﻿ZABURU.
90.
Doʼana Musa, bhatuana Aulataʼala. E Kawasana Opu, Ingkoomo tampamami tapeulu to saʼumurua. 
Indapo manga gunu atopadhaangia, indapo alamu tee dunia sii upamembalia, Ingkoomo Aulataʼala mobakaa, inda tee auwalina inda tee aahirina. 
Ingkoo ubhalii maanusia amembali ngawuna tana, firimanimu, "Mbulimo i asalamu e anana maanusia." 
I nuncana pokamatamu sarewu tao apokana mboomo eo iawi siimpo molapana, atawa mboomo sapalika jagaana malo. 
Ingkoo upepadhai dhadhimami mboomo tapongipi, mboomo rumpu motuna saeona; 
wakutuuna saeona o rumpu atuwu tee atuna, maka wakutuuna konowia amalau tee amatuu. 
Sababuna ingkami tamofu roonamo amaramu, tee ingkami tatokidha roonamo pamurumu. 
Manga kasalahamami udhikaia i aroamu tee o dosamami motobuniaka atokamata i nuncana caheana roumu. 
Sababuna bhari-bharia eomami tanamisi pamurumu mokarore-rore, tee talaloi tao-taomami mboomo kadheina tapoinunca. 
Kangengena dhadhimami tangkanamo pitu pulu tao, atawa ande amakaa o bukumami koroo akawa walu pulu tao, maka manga eo momalape mpuu ipotibhaakamami tangkanamo kasukara tee kanarakaa; dhadhimami amampodho tee amasimba, sapadhana sumai tamofumo. 
Incema buaka momatauna kaogena amaramu? Pamurumu amaoge mpuu apokana mboomo mia amaekako. 
Manga adharimo to tagagari eo-eomami momampodhona sii mamudhaakana ingkami tapotibhaaka o ngangaranda moʼaarifu. 
E KAWASANA OPU, mbulimo. Sakawana naepia Ingkoo uʼamara? Maasiakapea manga bhatuamu. 
Patumpua o incamami i wakutuuna saeona tee kaasimu molagina mamudhaakana ingkami tasambo-sambo tee takaunde-unde saʼumurua dhadhimami. 
Pasanaaia o incamami, apokana mboomo upewau eo-eomami i piamo itu asukara, tee apokana tee tao-tao itanggomami wakutuuna tanamisi kanarakaa. 
Taroakamo opea ipewaumu akamatea manga bhatuamu, tee o kuasamu momulia sumai akamatea anaanamami. 
Taroakamo kabarakatina Kawasana Opu, Aulataʼalamami, dhaangia to ingkami. Pekatangkea o angkana limamami, mamudhaakana usahamami akohasili! 
