﻿ZABURU.
76.
To kapalana molaguna. Tee atikiakea kecapi. Zaburuna Asaf to lagu. 
Manga miana Yuda amatau Aulataʼala, sarona amaoge i Israel. 
Bhanuana i Yerusalem, tee tampana mbooresana i Gunu Sion. 
Iwe sumakomo Incia akatuki bhari-bharia manga ewangana potimbeana musuna, bhari-bharia panana mokakila-kila, katangkesina, tee hancuna. Sela 
Ingkoo ukocahea mpuu! Alabhi umulia minaaka i manga gunu modhaangiana i zamani mangenge. 
Hasilina potimbea padhamo atorampasi minaaka i manga mia mobarani. Manga incia atokole saʼumurua; inda dhaangia minaaka i tantarana sumai momembalina moangkana limana uka. 
E Aulataʼala isombana Yakub, roonamo kagorampangimu, manga ajara tee mosawikia amalimpu. 
Atotuu-totuu Ingkoo utomaeka mpuu! Incema momembalina mopotaangina i aroamu wakutuuna upamuru? 
Minaaka i sorogaa uparangoakea o kambotuna kahukumumu, alamu uka amaeka tee inda tee uuʼuuna 
wakutuuna Aulataʼala abhangu to apaʼadili tee apasalaamati bhari-bharia mia motopisaki i alamu. Sela 
Satotuuna o pamurumu tee maanusia imembaliakamu utopuji, tee bhilaana pamurumu sumai upamembalia kabhokena tangamu. 
Pojanjimo tee upomeamea o tolauna onimu sumai i KAWASANA OPU, Aulataʼalamu! Taroakamo bhari-bharia modhaangiana i saripina abhawa pasombaana to Incia molaengana imaeka. 
Incia mopekamatena akalana manga mia mokokuasa, tee manga raja i dunia amaeka i aroana. 
