﻿ZABURU.
60.
To kapalana molaguna. Aose lagu: Kamba Bakung Kasakusii. Zaburuna Daud, to atoadhariaka 
wakutuuna incia aewangi miana Aram-Naharaim tee miana Aram-Zoba, tee wakutuuna Yoab ambuli sapadhana apekamate 12.000 miana Edom i Mbolongana Asin. 
E Aulataʼala, Ingkoo padhamo manga mendeu, tee utaroaka manga musu akatuki katangkesimami. Ingkoo uʼamara tee ingkami, maka sii-sii upekalapea pendua kadhaangiamami minaaka i kanarakaa. 
Ingkoo padhamo ulendu alamu tee upaporuawetaia, tulungi upekalapea pendua manga ngkolelena, roonamo dunia sii atorende. 
Utaroakea uumatimu anamisi giu momatamo, upasumpu ingkami angguru sakawana tadida. 
Ingkoo padhamo upabhale tombi to manga mia momaekana tee Ingkoo mamudhaakana manga incia aporomusaka iwe sumai to apeulu minaaka i manga pande pana. Sela 
Manga pakana tee kuasamu tee uperangoimea o doʼamami, mamudhaakana manga mia imaasiakamu atopasalaamati. 
Aulataʼala padhamo afirimani i tampana momangkilo, "Iaku gauku kukaunde-unde, tee kupodhawu-dhawuaka Tana Sikhem, tee kuʼukuru Mbolongana Sukot. 
Gilead tee Manasye o pewauaku, Efraim mboomo helem minaaka i ase mojaganina bhaaku, tee Yuda katukona pamarintaku. 
Maka o Tana Moab amembali palangga tampana bhanuiana aeku, tee i bhawona Tana Edom kutudhaaka sandaliku. E Tana Filistin, Iaku kusambo-sambomo roonamo padhamo kutaloko!" 
Incema bhemobhawaaku i kota mokobentena makaa sumai? Incema momembalina moʼantaraaku sakawana i Edom? 
E Aulataʼala, buaka mencuana Ingkoo mangabhanakana? E Aulataʼala, Ingkoo inda umaju upobhawa tee tantaramami to taewangi musu. 
Manga tulungi minaaka i musu, roonamo o katulungina maanusia inda akoguna. 
Tapobhawa tee Aulataʼala ingkita tamembali tatalo musuta, sababuna Incia bhemopahancuruna musuta. 
