﻿ZABURU.
40.
To kapalana molaguna. Zaburuna Daud. 
Iaku kuantagi tee kuharapu mpuu katulungina KAWASANA OPU, kasiimpo Incia atilikiaku tee aperangoi goraku. 
Incia aangkaaku minaaka i bhalona karompa, minaaka i tomba momandala. Incia apaʼamaniaku i bhawona gunu bhatu tee apekatangka bhengkalaku. 
Incia aadhariakaaku lagu bhaau, lagu kapujia to Aulataʼalata. Abhari o mia bhemokamatea, kasiimpo amaeka tee aparacaea i KAWASANA OPU. 
Amasanaamo o mia moparacaeana i KAWASANA OPU, incia inda aose mia mosombo, atawa aose mia mosombana barahala. 
E KAWASANA OPU, e Aulataʼalaku, abhari o giu inda momentela mopadhana ipewaumu tee ihaejatiakamu to ingkami! Inda dhaangia momembalina mopodhimbana tee Ingkoo! Iaku bhekupetulatulaakea tee kubhoasakea, maka abhari laulauna to kugagaria. 
Ingkoo inda uemani mamudhaakana kudhawuakako kurubani itunu tee pasombaana giuna ikande, maka Ingkoo padhamo ubungkale talingaku. Kurubani itunu tee kurubani kahapusuana dosa inda utuntua. 
Kasiimpo kupogau, "Kamatea, iaku kuumba, i nuncana kalulungina kitabi mopadhana motoburi tee momembalina i karoku. 
Iaku gauku kupewau opea ipeelumu, e Aulataʼalaku, tee o hukumumu dhaangia i nuncana ngangarandaku." 
Iaku padhamo kupakoleleaka kabanara i tampana poromusakaana uumatimu mobharina sumai. Kamatea, iaku inda kutaangi bhiwiku, e KAWASANA OPU, Ingkoo uka umataua! 
Kabanaramu inda kubuniakea i nuncana ngangarandaku, iaku kupogauaka ande Ingkoo sadia ukeniaka pojanjiamu tee kupogauaka kasalaamati minaaka i Ingkoo. Kaasimu molagina tee kabanaramu inda kurahasiaakea i aroana poromusakaana uumatimu mobhari sumai. 
E KAWASANA OPU, bholi utaangi rahumatimu to iaku, taroakamo o kaasimu molagina tee kabanaramu sadia ajaganiaku. 
Roonamo abhari mpuu o balaa molibuaku. Iaku apajereaku manga dosaku tee inda kumembali kupokamata; kabharina alabhia o bulua i bhaaku, sabutuna amateakea akalaku. 
E KAWASANA OPU, madheimo upasalaamatiaku, e KAWASANA OPU, madheimo utulungiaku! 
Maasangia manga mia mohaejatina mopekamateaku amaea tee abingu. Maasangia manga mia mohaejatina to mopacilakaaku apalai tee apotibhaaka aebu. 
Maasangia manga mia moele-eleaku atokidha roonamo manga incia amaea. 
Taroakamo bhari-bharia mia mopeeloko amasanaa tee akaunde-unde, tee taroakamo bhari-bharia momaasiakana kasalaamati minaaka i Ingkoo sadia apogau, "Tapanamo kaogena o KAWASANA OPU!" 
Iaku sii kunarakaa tee kumisikini, maka o Aulataʼala afaduliakaaku. Ingkoomo motulungiaku tee mopasalaamatiaku, E Aulataʼalaku, bholi upekanoe-noe, pekadheimo utulungiaku. 
