﻿ZABURU.
36.
To kapalana molaguna. Zaburuna Daud, o bhatuana KAWASANA OPU. 
Dosa apamembali mia madhaki arango pogau inda momalape i nuncana ngangarandana. Mia incia sumai apogau i nuncana ngangarandana, "Iaku inda kufaraluu kumaeka tee Aulataʼala." 
Roonamo incia awuju karona, tee afikiria ande o mia mosagaanana inda amataua o kasalahana, tee inda dhaangia mobancia. 
Pogau ibhoasakana satotuuna o kadhaki tee kagau-gau, incia inda aʼaarifu tee inda apewau kalape. 
Incia ahaejatiaka kadhaki i bhawona kolemana, sadiamo apewau inda momalapena, tee inda amendeu apewau kadhaki. 
E KAWASANA OPU, kaasimu molagina akawa i laiana, tee kaparacaeamu akawa i taʼina ngalu. 
Kabanaramu mboomo gunu momakaa, manga kambotumu mboomo andalaogena, E KAWASANA OPU, Ingkoomo modhambaakana maanusia tee binata. 
Tapanamo kalape o kaasimu molagina, e KAWASANA OPU! Bhari-bharia maanusia ujagania i nuncana peulusana panimu. 
Manga incia amambosu akande i Bhanuamu, tee atarima manga giu momalape mboomo o umala mosiwulu. 
Ingkoomo asalana dhadhina bhari-bharia mahaluku, tee kainawamu mosuluwina dhadhimami. 
Palausakea o kaasimu molagina i mia momatauko, tee kabanaramu i mia momakatena incana. 
Bholi utaroakaaku ahumbuniaku mia mosombo, atawa apadhencuaku mia madhaki. 
Kamatea, mia mopewauna kadhaki akotibumo, manga incia apolangkuri tee inda amembali abhangu pendua. 
