﻿ZABURU.
6.
To kapalana molaguna, tee kagasiana gambusu. Mboomo lagu: I walu anguna. Zaburuna Daud. 
E KAWASANA OPU, bholi uhukumuaku i nuncana amaramu, tee bholi uwanduaku i nuncana pamurumu. 
Maasiakaaku, e KAWASANA OPU, sababuna atopadhamo bukuku, pekatangkaaku roonamo bukuku arengku. 
Amapii incaku. Bholi upekangenge inda ulawaniaku, e KAWASANA OPU! 
E KAWASANA OPU, mbulimo, tee utulungiaku minaaka i mate! Pasalaamatiaku roonamo kaasimu molagina. 
Sababuna i alamuna mia mate Ingkoo indamo utoudhani, tee i nuncana koburu indamo dhaangia uka mosukuruna tee Ingkoo. 
Iaku kumangule roonamo kapeenciku, samalo-samalo loluku apotiburi abhaho kolemaku. 
Mataku amarea roonamo kaporona inca, tee amarawu roonamo bhari-bharia bhaliku. 
Dhencumo minaaka i karoku, e manga mia mopewauna kadhaki, roonamo KAWASANA OPU arangoa o tangiku. 
KAWASANA OPU arangomea iemaniku tee atarimamea o doʼaku. 
Bhari-bharia musuku bheanamisi kaea tee atokidha mpuu, manga incia asowo tee apokawaaka kaea sakijamata. 
