﻿Tyípɩ́nɩ̀.
8.
Tɛ́ pǎh à ko mɔ sɛ̃́, képah nɔ Sole tyɩ́. Képah sɔkɔ, Yesu yõ sɛ̃́pú tĩ̀nkì kàhnfõhnɔ núkú tyah Yerusalɛmɩ sɔkɔ lésõlɛ. Kǎh pɩ sɛ̃́, à wil Yesu tɛ̃ntõ̀ névye tyɩ́ sɔkɔ, Yesu yõ sɛ̃́pú tɛ́lɔ́ pól to karkɩ de kwlo sɔkɔ, nónó-á mɛ Nsyude gbɛ̃̀nyah ànɛ̂ Samari gbɛ̃̀nyah sɔkɔ. 
Ǹtɛ névye nónó-á sõ̀ mɛ Liyel wɛ̃̀kɩ̀ tɛ̃́nɔ́ plɛ, pé yísyɔ́ mɛ Yetyɛ̃nɩ lékó tɔkɔ yɩ̃, tɛ́ ǹ kũ pɔ̀ kah gbo. 
Ǹtɛ Sole tɛ̃̀ wɔ sõ̀ mɛ n yah n kɔ̃ Yesu yõ sɛ̃́pú tĩ̀nkì duku tó-ńsahlɛ pnɛ́pnɛ́. À sõ̀ mɛ n de n kɔ̃ gbên sɔkɔ, à Yesu yõ sɛ̃́pú díbí ànɛ̂ syɔ́lɛ n tɛ̃ n yɔrɩ n wilki n dah n mɔ n pɔ wɔ̀kɔ̀npèkè sɔkɔ. 
Képah sɔkɔ, Yesu yõ sɛ̃́pú nónó-á sõ̀ karkɩ kɔ̃, pépi mó mɛ Nɩ̀vɩ̀nɩ̀ tirlɛ n yo n kɔ̃ tã̀ntã̀n pól sɔkɔ. 
Tɛ́ pé sɔkɔ nɛy nɛ̂-á pè n ye Filipilɛ, ǹmɔ mɛ kyɩ kwil yɔ́, Samari gbɛ̃̀nyah sɔkɔ, à kyɩ tyah Krista tyɩ́lɛ n yo nɛ́npɔ́. 
Képah tɛ̃̀nɛ, sétã̀n kwĩnki nónó-á sõ̀ mɛ déntɛ̃̀nɔ́lɛ névye sɔkɔ mɛ pélɛ n kwlɔ, sè sõ̀ mɛ n kah n de n syi, tɛ́ n wil pé sɔkɔ, tɛ́ wil kúnɔ́ névye ànɛ̂ gbáhkɩ̀ núkú névye náhnáh tɔ sõ̀ mɛ dɛ́nmɔnɔlɛ n wɛ. Képah sɔkɔ, tɔ́wû-á Filipi gbǐl pɩ́nɔ́ tyɩ́ yónɔ́ noh, tɛ́ kyɩ sè wɛ sɛ̃́, pé pól pé sõnɔ pɩ núkúlɛ, à ǹ wɛlɔlɛ n tɔ̃ n sah n nohnɩ. 
Kǎh pɩ sɛ̃́, nɩ̀vɩ̀nɩ̀ ǹgbɛ̃ wɛ kénɛ kwil. 
Tɛ́ légbĩ́nɛ, dĩ́ yɔ́ lésõ mɛ pè n ye Simolɛ. À sõ̀ mɛ tɛ̃̀nɔ́lɛ kénɛ kwil mɛ̀ ó sɔkɔ di mónɔ́lɛ. Ǹmɔ sõ̀ mɛ snɛ̀y tyilɛ n pɩ, nónó-á mɛ Samari gbɛ̃̀nyah tãn gbã̀n du kègbɩlɛ, tɛ́ mɛ ǹ gblɔ̌y pɩ nɛ́-ǹgbɛ̃nɛ. 
No pól sõ̀ mɛ mɔ ǹnɛ, à tɔkɔ wɛ̃́npì tyɩ́, à kyɩ sah yèwàhnɩ̀ tyɩ́. Tɛ́ mɛ yo tũ nɛ ńkɛ̃́, Liyel tɛ̃́nwɛnɔ nɛ̂-á pè n ye Ǹgbɛ̃nɛ, képah-á dĩ́ mɛ̀nɛ. 
Tɛ́ dĩ́ mɛ̀ sõ̀ mɛ gbɛ̃̀ndùnìnɛ n pɩ pé tyɩ́ ǹ snɛ̀y sɔkɔ di mónɔ́lɛ, képah ye pè kɔ̃ pè mɔ ǹnɛ. 
Ǹtɛ Filipi-á pɔ Liyel tɔ̃́rɩ́ Nɩ̀vɩ̀nɩ̀ tir ànɛ̂ Yesu Krista tyɩ́ yo pé tyɩ́ sɛ̃́, pè sɛ̃ ké yõ. Tɛ́ díbí ànɛ̂ syɔ́ mɛ à kɔ̃ à pè wel wilki ni sɔkɔ. 
Képah sɔkɔ, Simo ńtɛ̃ tɔ sɛ̃ Yesu yõ, tɛ́ Filipi kɔ̃ à à wel wilki ni sɔkɔ. À náh tɔ̃ sõ̀ mɛ ké tyɩ́ nɛ pé yal Filipi tnɔ̂. Tɛ́ gbǐl tyi ǹgbnɔ nónó-á sõ̀ mɛ n pɩ à n yah, sè sõ̀ mɛ pɩ gbɛ̃̀ndùnìnɛ ǹ tyɩ́. 
Képah tɛ̃̀nɛ, Yesu tɛ̃ntõ̀ névye-á tɛ̃ Yerusalɛmɩ kwil, tɛ́ noh nɛ Samari gbɛ̃̀nyah tãn-á Liyel wɛy fɛ̃ syi sɛ̃́, pè Pyɛrɩ ànɛ̂ Nsyɔ̃ tɛkɩ mɔ pè kɔ̃. 
Pǎh kyɩ de Samari sɔkɔ, tɛ́ Yesu yõ sɛ̃́pú nónó wɛ nɛ́npɔ́, Liyel Mirki náh tɔ̃̌nɩ̀ sõ̀ mɛ tiki pé sɔkɔ yɔ́ ńtɛ̃ yõ. Pè sõ̀ mɛ wèlnwìlkìnɔ́ wɛ ni sɔkɔ Tɛ̃̀ ǹgbɛ̃ Yesu wɔ yĩn yõ. Kǎh pɩ sɛ̃́, Pyɛrɩ ànɛ̂ Nsyɔ̃ mɛ tyah nírílɛ n pɩ pé tyɩ́, nɛ pè Liyel Mirki wɛ. 
Pè sõ̀ mɛ pé gbã̀n sah no nɔ́pi yõ à nírílɛ n pɩ pé tyɩ́. Képah sɔkɔ, pè mɛ Liyel Mirki wɛ. 
Képah tɛ̃̀nɛ, Simo-á kè wɛ Yesu tɛ̃ntõ̀ névye pé gbã̀nnɛ n sah pé yõ, pè kɔ̃ pè Liyel Mirkilɛ n wɛ sɛ̃́, à pɔ pɔ́lɛ Pyɛrɩpi tyɩ́, 
tɛ́ nɛ, pè péwɔ tɔ kɔ̃ kénɛ tǎhkɩ̀lɛ. Képah sɔkɔ, pâh fyɔ̀ pé gbã̀n sah nɛ̂ yõ, tɛ̃̀ Liyel Mirki wɛ. 
Wǎh yo sɛ̃́, Pyɛrɩ mɛ à syah nɛ, ǹ tyɩ́ yɩkɩ n to ànɛ̂ ǹ pɔ́ tɔlɛ, wǎh sɔ̃́npɩ́lɛ n sõ nɛ, páh kɩ fɛ̃ Liyel yɩ̃́nkɔ̃nɔ kwâh dwe pɔ́lɛ. 
Ǹ nɩ-á mɛ kétúkùyɔ̂ Liyel yah. Képah-á, wɛ wɛ tɛ̃̀ náh mɛ ǹ tyɩ́ yĩ mɛ̀ sɔkɔ. À náh yɩ̃nɛ kélɛ póllɛ. 
Páh kè wɛ nɛ, dyɔ́yɔ́kɩ̀ képékè-á yuku sah ǹ nɩlɛ, ànɛ̂ wǎh mɛ tyípékè yɔ̃rɩ sɔkɔ. Képah-á, à ǹ nɩ vi mɔ, à mó Tɛ̃̀ ǹgbɛ̃ Liyel ni à kɔ̃ à ǹ fɔ́kɔ́sõnɔ pèkè mɛ̀ yɔ̃ mɔ à kɔ̃, kàh kɩ fɛ̃ n pɩ n pi. 
Képah sɔkɔ, Simo mɛ yo Pyɛrɩ ànɛ̂ Nsyɔ̃ tyɩ́ nɛ, pépi Tɛ̃̀ ǹgbɛ̃ Liyel ni pé tyɩ́ pé gblɔ̌y. Kàh kɩ pɩ sɛ̃́, tyi nónó-á pè yo pé tyɩ́, sé sɔkɔ yɔ́ ńtɛ̃ náh pé nɔ n pi. 
Képah náh, Pyɛrɩ ànɛ̂ Nsyɔ̃-á tyi nónó pɩ̃ Yesu tyɩ́ sɔkɔ, pǎh sè yãh tɛ névye tyɩ́, tɛ́ Tɛ̃̀ ǹgbɛ̃ wɛy yo tɛ pé tyɩ́ gbĩ́ nɛ̂nɛ, pè pé syɩ n yuku Yerusalɛmɩ kwil, tɛ́ mɛ Nɩ̀vɩ̀nɩ̀ tirlɛ n yo n yuku kwílpî náhnáh sɔkɔ wɛ̃̀kɩ̀ yah, nónó-á mɛ Samari gbɛ̃̀nyah. 
Sõ yɔ́lɛ, Tɛ̃̀ ǹgbɛ̃ yĩ̂nyõ tõ̀npɩ yɔ́ pɔ yo Filipi tyɩ́ nɛ ńkɛ̃́, à ǹ gblɔ̌y vi, à mó ǹ yah mɔ gbĩ̀ngboke gbõ̀yõ̀ sõ̀lɛ, à wɛ̃̀kɩ̀ tɛ̃, nɛ̂-á wil Yerusalɛmɩ, à n tiki n yuku Kasa kwil. Kénɛ wɛ̃̀kɩ̀ mɛ̀ yõ kɔ́pú náh mɛ fwɔ́ɔ. 
Képah sɔkɔ, Filipi núkú yuku kénɛ wɛ̃̀kɩ̀ tɛ̃. Wǎh n yuku, dǒ, à Yetyopi gbɛ̃̀nyah nɛ́-ǹgbɛ̃ yɔ́ wɛ. Ǹmɔ ye sõ̀ Yetyopi yõ̀tɛ̃̀ pi Kãndasɩ tɔkɔ sah ǹ tahrɩ yõ̀tɛ̃̀nɛ. À sõ̀ kyɩ Liyel ni Yerusalɛmɩ sɔkɔ. 
Tɛ́ wǎh ǹ syɩ n yuku ǹ tĩ̀nnɛ, à sõ̀ mɛ kɔ̃́ntɛ̃̀nɔ́lɛ ǹ wòtoro sɔkɔ, mɛ Liyel tɛ̃ntõ̀ syínyo-ò Yesayi sɛ́bɛ́ynɛ n kar. 
Képah sɔkɔ, Liyel Mirki mɛ yo Filipi tyɩ́ nɛ, à kɔ n tel wòtoro mɛ̀ tyɩ́. 
Filipi mɛ to tel ké tyɩ́, tɛ́ dĩ́ kàrnɔ́ noh. À sõ̀ mɛ fɩ̃́ yɔ́lɛ n kar Liyel tɛ̃ntõ̀ syínyo-ò Yesayi sɛ́bɛ́y sɔkɔ. Filipi mɛ à piki yah nɛ, fɩ̃́ nɛ̂-á à n kar yɔ̀, à se mɛ ké kɔ́rlɛ n pnɛ nɩ? 
Dĩ́ mɛ yo ǹ tyɩ́ nɛ, sɔ̃́ se pé kɩ pɩ̃ ké kɔ́rlɛ, nɛ́ nɛy náh ké yah yo pé syah nɩ? Tɛ́ mɛ kè yah kɔ̃ Filipi tyɩ́ nɛ, à pɔ n dɔkɔ n kɔ̃ n tɛ̃ pé tnɔ̂ wòtoro sɔkɔ. 
Tɛ́ fɩ̃́ nɛ̂-á sõ̀ dĩ́ mɛ n kar, kè mɛ yónɔ́lɛ nɛ́npɔ́ sɔkɔ nɛ ńkɛ̃́: «À sõ̀ pɩ képɔ́ sɔ̃́, nɛ̂-á pè tɛ̃ n yuku kò-ǹsah; képah náh pɩ, nɛ̂ yɛ̀-á pè n kõ, tɛ́ à náh ǹ vyãh fyɔ. 
Pè à yilɔ, tɛ́ lékàhlɛ à kɔ̃, tɛ́ à ko mɔ, ǹ duku to kèkõyṍ. Nɛ̂ kɩ tɔ̃ n yãh ǹ no tyɩ́lɛ?» 
Dĩ́-á kar tɛ, à mɛ yo Filipi tyɩ́ nɛ, à kékwɛ, à yo pé syah, nɛ̂ tyɩ́ se Liyel tɛ̃ntõ̀ syínyo-ò Yesayi n yo sɛ̃́ yɔ̀ nɩ? Ǹ gblɔ̌y tyɩ́ se à n yo, tĩ̂ ǹnɩ̂ tyɩ́ se à n yo? 
Képah sɔkɔ, Filipi syɔ̃ kénɛ Liyel wɛy mɛ̀ tyɩ́, à Nɩ̀vɩ̀nɩ̀ tir yo à syah Yesu tyɩ́ sɔkɔ. 
Pǎh mɛ wɛ̃̀kɩ̀ yõ, pè kyɩ syɩ yɔ yɔ́ tyɩ́. Dĩ́ mɛ yo Filipi tyɩ́ nɛ ńkɛ̃́, yɔ-á yɔ̀, tir yɔ́ tɛ̃̀-à kɩ mɛ́-ńkɛ̃̂nɛ, páh mɛ ké tyɩ́ nɛ, à pé wel wilki ni sɔkɔ.  
À mɛ yo ǹ tyɩ́ nɛ, wàh kɩ mɛ sɛ̃ Yesu yõ ǹ nɩ póllɛ, páh kɩ fɛ̃ à wel wilki ni sɔkɔ. Dĩ́ mɛ yo ǹ tyɩ́ nɛ, páh sɛ̃ ké yõ nɛ, Liyel Pídĩ́-á Yesu Kristalɛ. 
Tɛ́ mɛ nɛ, pè wòtoro yĩn mɔ. Kǎh yĩn, à tiki ànɛ̂ Filipilɛ à kyɩ de yɔ, tɛ́ Filipi mɛ à wel wilki ni sɔkɔ. 
Pǎh fyɔ̀ wil yɔ sɔkɔ, Tɛ̃̀ ǹgbɛ̃ Liyel Mirki núkú Filipi tɔkɔ sɔkɔ. Yetyopi gbɛ̃̀nyah nɛ́-ǹgbɛ̃ mɛ̀ náh tɔ̃ à wɛ. Ǹtɛ à yɔ̃ sɔkɔ ǹ kɔ́lɔ́lɛ nɩ̀vɩ̀nɩ̀ sɔkɔ. 
Tɛ́ Filipi tɛ̃̀ wɔ mó kyɩ ǹ gblɔ̌y wɛ Asɔtɩ kwil. À mɛ yɔ̃ sɔkɔ, à Nɩ̀vɩ̀nɩ̀ tirlɛ n yo n yuku kwlo kwlo pól sɔkɔ, wǎh n kah nónó sɔkɔ, pópó à kyɩ de Sesarɩ kwil. 
