﻿गलती.
3.
अरे बुद्धी लेनेर गलती ओर, क्रूस मिन्दा खिळासणेल येशु ख्रिस्त यवार कनला मुंदार वर्णन शेशी फेटीन्या, आय्यी मिमलान यवार भुला मत्तीर? 
नाक नि देगार नुस इंताने समजाशी तीस्कुनेद उंडाद की, मिक जो पवित्र आत्मा शिक्या आदी नियमशास्त्रलोन्केल फनिलता शिक्या की, सुवार्ता ऐकाशी विश्वास फेटीनाम आंका शिक्या? 
मीर इंताने कमी बुद्धी टोर उंडार येम? मीर द्यावार आत्माता चालू शेशी नेन्का इप्पूळ शरीरस्वभावता पूर्ण येस्केन देंग सुस्तुणार येम? 
मीर इंता दुख सहन शेस्तीर इदी व्यर्थ येम? दिन व्यर्थ आंदाम येम! 
दानचांग यवार मिक द्यावार आत्मा पुरामत्तुत्ताळ इंगा मी मधातला चमत्कार शेस्ताल वाळ जो इ आंता शेस्ताळ आय्यी नियमशास्त्रली फनिकेल शेस्तार की, सुवार्ता एकाशी विश्वास फेटतींम आंका आदी वाळ शेस्ताळ? 
येल्ला अब्राहम द्यावार मिंदा विश्वास फेटीनाळ इंगा आदी नितीमत्व इल्ला मोजास्कामला वच्या. आला इदी आय्या. 
दिन मिन्दुकेल मीर समजास्कोंडा की, यवार विश्वास फेटतार वारे अब्राहम गंगोदटोर का. 
इंगा द्यावार इंगोगो राष्ट्रटोरनी विश्वास्ता नीतिमान ठेहेरामतुताल इ पहिला ज्ञानकोळोन्ग शास्त्रलेखकोळ, अब्राहम की पहिलाने मंचीबातमी शेप्या की, 'नितीकेल आन्नी राष्ट्रल की आशीर्वाद शिक्की.' 
तर नंतर यवार विश्वास फेटतार वारकी विश्वासु अब्राहम संगा आशीर्वाद इच्चीनाड. 
येनटीक की नियमशास्त्रलोनि फनील मिंदा येण्ता जन अवलंबून उन्डार आंता जन शापला उंडार येनटीक की पवित्र शास्र्ला इल्ला लीवाशी उंडाद की, 'नियमशास्रद पुस्तक ला जो लीवाशी उंडाद आय्यी आन्नी पाळादेंग जो टीकाशी उंडार वाळ शापित उंडाळ.' 
नियमशास्त्राटोर यवार पण द्यावार मुंदरा नीतिमान ठेहेरार, इदी उघडासी उंडाद; येनटीक की 'नीतिमान विश्वास ता जगास्ताळ.' 
इंगा नियमशास्त्रा तर विश्वासदी लेद पण 'यवार दान फनील लेका शेस्तार वाळ वार लेका जगश्यार.' 
मना बद्दल ख्रिस्त शाप आय्या इंगा वाळ मनालनी नियमशास्त्र शापकेल कोंकोनी तीस्कोन्या; इल्ला शास्त्रलेख आटाद 'यवार पण शेटूमिंदा टानगाशिणार वाळ शापित उंडाळ', इल्ला शास्रलेख उंडाद. 
दिं-दि उद्देश इल्ला की, अब्राहम कि इचीनेद आशीर्वाद ख्रिस्त येशुन द्वारा इंगोगो राष्ट्रक शिक्काला, म्हणजे मना विश्वास लेका आत्माविषयाला अभिवचन शिक्काला. 
ताम्मुल इंगा शेल्यालु, नीन इदी व्यवहारीत नजरता माटलाळतान. ओकाटआळदम मनशीद करार सुद्धा वाळ स्थापित शेशी नेका यवार मिटा मत्तार किंवा दान्तल्या भारी निम्पार. 
इप्पूळ, यादि वचनलु अब्राहाम इंगा वान बीळलाक इच्चीन्या. वाळ 'बीळलाक' इल्ला जास्त जन बद्दल आनाळ, पण 'नि बीळलाक' इल्ला ओकोन विषयला आंटाळ इंगा वाळ ओकोळे ख्रिस्त उंडाळ. 
इंगा, नीन इदी आणटान की, द्यावार आदी करार पहिलाने स्थापासनेका चारशेतीस वर्ष नंतर आईने नियमशास्त्र कोळोन्ग संपुष्टाला वची दानकोळोन्ग अभिवचन रद्द काद. 
येनटीक की वतन जर नियमशास्त्रता शिकतात, तर आदी दिन मुन्दार अभिवचन ता काक फोई; पण अब्राहमकी द्यावार आदी कृपाता अभिवचन द्वारा इच्या. 
मग इदी नियम शास्त्र येनटीक? येनटीक की, या वंश क वचन इच्चीन्या वानदी वचकाम आय्यी पर्यंत आय्यी मोळाशेळ कोळोन्ग नियमशास्त्र इच्चीनार; वार मधातलोनटोर शेतला द्यावार दुतलातीकेल नेमाशी वच्या. 
मधातलोनटोळ इळ ओगारकना जास्त जन कोळोन्ग उंटाळ; तरीपण द्यावार ओकोळे उंदाड. 
'तर येम नियमशास्त्र इदी द्यावार वचनाविरुद्ध उंडाद? येपुळूच लेद येनटीक की जेम इद्देंग समर्थ उंडीनेद नियमशास्त्र इदेंग ओचका उंटोन्या तर, नितीमत्व खरेमे नियमशास्त्रता शिकतुन्या. 
तरी दान कना, नियमशास्त्रता आंदार पापला कोंडाशी फेट्या, इ उद्देशचंग की, विश्वास फेटेतोरकी येशु ख्रिस्त तोंन विश्वासता याद अभिवचन उंडाद आदी इयाला. 
पण ख्रीस्तला विश्वास वच्या दान पहिला, इदी जो विश्वास प्रकट आयेळदी उंड्या, वाड वचेकना पहिला मनाम कब्जाला उंनिमटीम मनालनी नियमशास्त्र किंदा इल्ला रखवालीला फेटीनीर. 
दिन मिंदीकेल मनाम विश्वास ता नीतिमान ठहराला दानचांग नियमशास्त्र मनालनी ख्रिस्त तीकुळ पोहोचा मत्तेळदी बीळा रक्षक उंड्या. 
गान इपूळ, विश्वासता वचकाम आयनाद उंडाद दानचांग मनाम दिन मुंदार बीळारक्षक भरोसाला नीला लेम. 
पण मीर आंदार ख्रिस्त येशुन मिंदा विश्वासद्वारा द्यावार कोडकु उंडार. 
येनटिक्की ख्रीस्तला मीदीनटल्या येंतामंदीद बाप्तीस्मा आयनाद आंता जन ख्रीस्तन परिधान शेस्तीनार. 
येहुदील किंवा ग्रीक, दास किंवा मोकळा लेद, मनशी किंवा आंडी इदी भेदे लेद येनटीक की ख्रिस्त येशुला मीर आंदार ओकोरे उंडार. 
इंगा मीर जर ख्रिस्ताटोर उंडार; तर अब्राहाम बीळा इंगा अभिवचन लेका वारीस उंडार. 
