﻿प्रेषित.
24.
आय्यीद नाळा बाद महायाजक हनन्या, काही आब्बागार इंगा तीर्तुल्ल फेरोन यादो तरी ओगा वकील इर किंदेक वचीर; इंगा वार सुभेदार मुंदार पौल विरुद्ध दोष आन्चीर. 
यपुड पौल शासकमुंदार नीला फड्या आप्पुड तीर्तुल्ल वान मिंदा दोष आंची आन्या, “फेलिक्स महाराज, मी इचांग माक संगेम शांती शिकीनाद इंगा मी दूरदृष्टी इचांग इ राष्ट्रला सुधारणा आतुनाद. 
दांचांग वारदी मिम पूर्ण कृत्यज्ञतागोन, आंता प्रकारता इंगा आन्नी तीकुड स्वागत शेस्ताम. 
तरी नीद जास्त टाईम तीस्कुणान्दे विनंती शेस्तान की, मेहरबानी शेशी माद रवासा इनाला. 
इ मणशी म्हणजे ओगाट पिडा उंडाद इल्ला माक आढळाशी वच्या इंगा जगलोन आंदार यहुदी मंदीला इड बंड लेपेतोड उंडी नासोरी पंथोड पुढारी उंडाड. 
इड परमेश्वरदी भवनपण अपवित्र शेशेद प्रयत्न शेश्या; वान मिम फटतीम; इंगा मा नियमशास्रलेका इनदी न्याय शेशेदेंक मिम सूदुम. 
पण लुसिया सरदार वची संगेम जबरदस्तीता इन मा शेतलोन्केल तिशी एका फोया. 
इंगा दिंदी चौकशी मीर शेश्यार तर या माटलाय दोषलु मिम वान मिंदा शेस्ताम आ आन्नी विषयला वान तीकेले मिक समजासी.” 
आप्पुड इ आन्नी माटलु इल्ले उंडाय, इल्ला आनिगास दुसरा यहुदील पण जोर इच्चीर. 
मग सुबेदार माटलार देंक खूनवाशीनेन्का पौल उत्तर इच्या, “नु संगेम वर्षकेल इ मंदी न्यायाधीश उंडाव इदी नाक यरका उंडाद, दांचांग नीन नि माटलाद संतोषता समर्थन शेस्तान. 
निक पुर्णपणे तेलची की, नाक यरुशलेम शहरला उपासना शेशेदेंक फोई इंगाना बारा पेक्षा जास्त दिवसलू कालेव. 
इंगा परमेश्वर भवनला, सभास्थान किंवा नगरला यवार संगा जगडाम शेस्तांना किंवा मंदीन भडका मतेतापुड नीन वारकी कम्पियाल्या. 
या माटलाद दोष वार ना मिंदा इपुड शेस्तुणार, आय माटलु वारकी नी मुंदार साबित शैया दाद. 
तरी नीन मी देगारा इंता कबूल शेस्तान की, या दावान वार पाखंड आंटार आ दावालेका येम-येम नियमशास्रलेका उंडाद इंगा या-या संदेष्ट्याल लेखला उंडाद आ आंदार मिंदा विश्वास फेटी नीन पुर्वजला द्यावारदी नीन सेवा शेस्तान. 
इंगा नीतीमानलाद अन अनीतिमानलाद पुनरुत्थान आयी, इल्ला याद आशा फेटतार आद्दे आशा नीन द्यावार तीकुड सुशी फेटतान. 
दिनकस्रोम द्यावार संबंधता इंगा मणशीसंबंधता नाद विवेकभाव नेहमी शुद्ध राखाशेद नीन प्रयत्न शेस्तान. 
नीन संगेम वर्षबाद मना मंदीक दानधर्म शेशेदेंक इंगा यज्ञार्पणे वहायदेंक वस्तीन. 
शुद्धीकरन विधीला नीन व्रतस्थ इल्ला परमेश्वर भवनला कम्पीस्तीन, ना संगा मंदिद घोळका लेकुंड्या किंवा दंगा का कुंड्या; पण इंदू आशिया प्रांतलोंटोर यंतातरी मंदी यहुदी उंडीर. 
वारदी ना उलटा येमी उंटे तर वार मना मुंदार वची ना मिंदा दोष आंचेद उंड्या. 
किंवा नीन न्यायसभा मुंदार नीला फडनेन्का नाद याद गुन्हा इरकी कमशा आदी इर तरी शपाला; 
इर नडमा नीला फडी, सचीनोर पुनरुत्थान विषयला नाद न्याय इबद मी मुंदार आतुनाद, इ शब्दल नीन बेग्गे आंटीन, इदी इंता फेद्दाद गुन्हा उंटे तर उंडी.” 
फेलीक्सकी आ दावाद संगेम माहिती लेकुंड्या दानीचांग वाड खटला तहकूब शेशी आन्या, “लुसियाटोड सरदार वची आप्पुड मी प्रकरणदी निकाल शेशी.” 
इंगा वाड शताधीपतीक हुकुम इच्या की, इन पहाराला फेटाला; तरी इनकी मोकळीकता उंडाला इंगा इन स्वकीयालकी इनदी सेवा शेशेदेंक मनाई लेवाराद. 
मग काही नाळ बाद फेलिक्स स्वता यहुदी वडती द्रुसिल्ला दिन संगा वच्या इंगा वाड पौलनि कुतेशी ख्रिस्त येशुन मिंदुड विश्वास विषयला वान देगाटेल ऐकाशी तीस्कोन्या. 
आप्पुड नितीमत्व, इंद्रियदमन इंगा मुंदार आय्येद न्याय इ विषयला वाड भाषण शेस्तापूड, फेलिक्स आद्री आन्या, “इपुड फो, संधी शिक्या आंटे नीनु कुतेश्यान.” 
इंगा नाक पौल तीकेल दुडलु शिकी इल्ला आशापण वांकी उंड्या, दांचांग वाड वान डबल-डबल कुतेशी तीस्कुनी वान संगा माटलाडदू. 
मुंदारकी रोंड वर्षला बाद फेलिक्स जागामिंदा पुर्क्य फेस्त इड वच्या; आप्पुड यहुदयाल्दी मर्जी संपादन शेशे इच्छाता फेलिक्स पौलनी कैदलाने फेट्टी फोया. 
