GEN 1:1 Aho mwaluko, Nguluwi nakalumba kilanga na isi.
GEN 1:2 Isi nayali kota kugunuche na nayalihela chinhu. Jiza nayali igubiche mazi menji, na Muhe wa Nguluwi nayali yekale yenele mchanya mwa mazi menji.
GEN 1:3 Na Nguluwi nakalonga, “Kuwe kubunguzuche,” baho kubunguzuka.
GEN 1:4 Nguluwi nakona kubunguzuka kunoga. Hamba Nguluwi kalekaniza kubunguzuka na jiza.
GEN 1:5 Nguluwi nakaluchema lumuli “Nemisi” na jiza nakaichema “Nechilo.” Iwa matinazo na iwa mitondo, zuwa lya mwaluko.
GEN 1:6 Nguluwi nakalonga, “Hawe honhu hagati ha mazi, ugawanuse mazi banzi mbili.”
GEN 1:7 Nguluwi nakadita honhu aho, kalekaniza mazi gawele kuchanya na mazi gawele hasi, iwa hihyo.
GEN 1:8 Nguluwi nakahachema “Ulanga.” Iwa matinazo na iwa mitondo, zuwa lya keli.
GEN 1:9 Nguluwi nakalonga, “Mazi gawele hasi ha ulanga, gawe honhu hamwe, isi ili kigongo ilawile.” Iwa hihyo.
GEN 1:10 Nguluwi nakahachema honhu aho kigongo “Isi” na nhing'hano ya mazi kahachema “Bahali”. Nakona kuta inoga.
GEN 1:11 Hamba Nguluwi nakalonga, “Isi nayote mizuchila, mizuchila jilingulela nyhule na migodi jilingulela mafuza gawele na nyhule, nyhule zilingulela mizuchila ja nhanzi yiyo.” Iwa hihyo.
GEN 1:12 Lelo isi yota mizuchila jilingulela nyhule za chila nhanzi na migodi jilingulela mafuza gawele na nyhule za chila nhanzi, Nguluwi nakona kota inoga.
GEN 1:13 Iwa matinazo, iwa mitondo, zuwa lya kadatu.
GEN 1:14 Nguluwi nakalonga, “Mimwemwesa jiwe kilanga, jilekanize nemisi na nechilo, jilajile mihela ja mnvina na zuwa na miyaka,
GEN 1:15 na lumwemwese kilanga na kuimwemwesela isi.” Iwa hihyo.
GEN 1:16 Lelo Nguluwi nakadita mimwemwesa mili mikulu, ula ukulu ulangaze nemisi, na ula udodo ulangaze nechilo, nakadita na nhondwe kahi.
GEN 1:17 Nguluwi nakawika mimwemwesa jiwele kilanga jimwemwesele isi,
GEN 1:18 iwe ilangaza nemisi na nechilo, na kulekaniza lumuli na jiza. Nguluwi nakona kota inoga.
GEN 1:19 Iwa matinazo, iwa mitondo, zuwa lya kane.
GEN 1:20 Nguluwi nakalonga, “Mazi nagalavye vilundo vya vilumbigwe viwele na ukomu, na kilanga kumemezwe videje vilinguguluka kuulanga.”
GEN 1:21 Lelo Nguluwi nakalumba migongolo ming'hangala ja bahali, chila chilumbigwe cha mli bahali na nhanzi zawo. Nakalumba chila videje na nhanzi zawo. Nguluwi nakona kota inoga.
GEN 1:22 Nguluwi nakavitambichiza, nakalonga, “Mlele miyonjeze, mmemeze mazi ga bahali, navyo videje vyonjezeche kuli isi.”
GEN 1:23 Iwa matinazo, iwa mitondo, zuwa lya kahano.
GEN 1:24 Kahi Nguluwi nakalonga, “Isi nailavye vilumbigwe vyeng'ha viwele vikomu, vyakudimigwa hakaye, vilingutambala, na vilingikala kisolo chila chilumbigwe kwa nhanzi zawo.” Iwa hihyo.
GEN 1:25 Lelo Nguluwi nakalumba nhanzi zeng'ha za migongolo ja kisolo na ja kufujigwa na vilingutambala. Nguluwi nakona kota inoga.
GEN 1:26 Hamba Nguluwi nakalonga, “Tumdite munhu kwa kiwhana na hetwe, yalongoze somba mli bahali na videje vya kilanga na migongolo ja kufujigwa hakaye hali isi yeng'ha na vilumbigwe vyeng'ha vilingutambala.”
GEN 1:27 Lelo Nguluwi nakalumba munhu kwa kiwhana na heye, ena, kwa kiwhana na heye Nguluwi nakamlumba. Nakawalumba mlume na mdala.
GEN 1:28 Nguluwi nakawatambichiza na kuwalonjela, “Muwe na wana mwonjezeche na mkaimemeze isi yeng'ha na kuilongoza, mlongoze somba ziwele mbahali na videje kuli ulanga na chila chilumbigwe chikomu chilingujenda muisi.”
GEN 1:29 Hamba Nguluwi nakalonga, “Mlole ndanguwapa chila izuchila muisi lilingulela nyhule, na chila igodi lilingulela mafuza gawele na nyhule, mafuza gake na nyhule zake zowa chilyo cha hemwe.
GEN 1:30 Na ajo migongolo jeng'ha na videje vyeng'ha viwele kuli ulanga na vilumbigwe vilingutambala, ena chila chilumbigwe chiwele na ukomu, chilyo chawo chowa mahamba geng'ha ga mizuchila.” Iwa hihyo.
GEN 1:31 Nguluwi nakona chila chinhu choyaditile kota ndo chinoga ng'hatu. Iwa matinazo, iwa mitondo, zuwa lya sita.
GEN 2:1 Ahyo ndo kilanga kweng'ha na isi lovigongomanyigwe hamwe na vinhu vyeng'ha viwele mgati.
GEN 2:2 Zuwa lya saba Nguluwi nakasinda mijito ja heye joyaditile, zuwa alyo lya saba Nguluwi nakesela kwa jila mijito jeng'ha joyakolile.
GEN 2:3 Nguluwi nakalitambichiza zuwa lya saba na kulidita liwe lyelile, kwa vila zuwa alyo Nguluwi nakesela kwa jila mijito ja heye jeng'ha ja kulumba.
GEN 2:4 Ahyo ndo vyoiwele kilanga na isi yeng'ha lovilumbigwe. Mhela wula Mkulu Nguluwi loyazilumbile isi na kilanga,
GEN 2:5 kwali kuduhu mizuchila kuli isi ne migodi hajizuchile kwa vila Mkulu Nguluwi nahaitowele nhonya isi, na hakuwele munhu wa kulima.
GEN 2:6 Na baho mazi nagalawa hasi gainweza isi yeng'ha.
GEN 2:7 Lelo Mkulu Nguluwi nakamlumba mlume kwa misanga, kamputila kumenyhelo lweselo lwa ukomu, na ayo mlume nakawa chilumbigwe chiwele na ukomu.
GEN 2:8 Hamba Mkulu Nguluwi nakalumba kamgunda ako Edeni, nzingo ya kolilawilaga isanya na mumo nakumuwika mlume yamlumbile.
GEN 2:9 Mkulu Nguluwi kazoteza kuli misanga chila nhanzi ya migodi jinojile jilingulela mafuza ganojile kwa chilyo. Hagati ha kamgunda nakanyala mgodi wa ukomu na mgodi wa uwanzi wa ganojile na gehile.
GEN 2:10 Kwali na lwanda ako Edeni luwele lubohoka mazi na kukanweza ako kamgunda, kulawila ako lwanda alo nalugawanuka kuwa nzanda zine.
GEN 2:11 Itagwa lya lwanda lwa mwaluko lyali Pishoni, alo lwanguzunguluta honhu heng'ha ha Havila kuwele na zahabu.
GEN 2:12 Zahabu ya honhu aho inoga ng'hatu. Ako kahi hana unhunyhililo ulinguchemigwa bedola na maganga ga sendi nyinji galingupulika galinguchemigwa shohamu.
GEN 2:13 Itagwa lya lwanda lwa keli ndo Gihoni, alo lwanguzunguluta honhu heng'ha ha Kushi.
GEN 2:14 Itagwa lya lwanda lwa kadatu ndo Tigili, nalo lwangubohochela nzingo ya kolilawilaga isanya honhu heng'ha ha Ashulu, na itagwa lya lwanda lwa kane ndo Eyufulate.
GEN 2:15 Lelo Mkulu Nguluwi nakamhola ayo mlume, kamuwika kuli kala kamgunda ka Edeni, yalime na kulolela.
GEN 2:16 Mkulu Nguluwi nakamlajiza ayo mlume, “Hegwe koweza kulya mafuza goneche kuli kamgunda,
GEN 2:17 ila mafuza ga mgodi wa uwanzi wa ganojile na gehile, uleche kulya. Mina loulya mafuza ga mgodi awo, ndangukomya, zuwa alyo hegwe kobagama.”
GEN 2:18 Hamba Mkulu Nguluwi nakalonga, “Hainojile ayu mlume yapone yaliyeka. Ndomditila mtanzi yatanganiche.”
GEN 2:19 Lelo kulawila kuli misanga, Mkulu Nguluwi nakalumba chila igongolo na videje vya kilanga, hamba kamigalila ayo mlume yalole kowachemela matagwa gachi na matagwa yawapele ndo gawa matagwa gawo.
GEN 2:20 Lelo ayo mlume nakajipa matagwa migongolo jeng'ha jila ja kufujigwa na ja kisolo na videje vya kilanga. Ila hakuwele na mtanzi yatanganiche kwa Adamu.
GEN 2:21 Lelo Mkulu Nguluwi nakamdita ayo mlume yebatigwe na usinjizi lukami. Loyawele muusinjizi nakahola lubavu lwake lumwe na kuhagubika honhu hala kwa iwunde.
GEN 2:22 Na alo lubavu Mkulu Nguluwi yaluholile kulawa kwa yula mlume, kaudita kuwa mdala, kamigala kwa ayo mlume.
GEN 2:23 Ndo hala yula mlume yalonjile, “Ena! Ayu ndo izeje kulawa mizeje jangu. Na iwunde kulawila miwunde ja heni. Ayu kochemigwa, ‘Mdala,’ kwa vila kalavigwa kuli mlume.”
GEN 2:24 Ndo mina mlume kangumlekaga mhaza na mayake, na kilumba hamwe na mdala wa heye, na hewo weli wowa lukuli lumwe.
GEN 2:25 Ayo mlume na mdala wa heye weng'ha wali mwazi, ila nahawawene soni.
GEN 3:1 Izoka lyali isugu kusinda migongolo jeng'ha ja kisolo jilumbigwe na Mkulu Nguluwi. Lelo izoka nalimlonjela ayo mdala, “Hambi Nguluwi nakalonga yokomya, mleche kulya mafuza ga mgodi woneche kuli kamgunda?”
GEN 3:2 Mdala nakalidichila alyo izoka, “Toweza kulya mafuza ga mgodi woneche kuli kamgunda,
GEN 3:3 ila Nguluwi nakalonga, ‘Mleche kulya mafuza ga mgodi uwele hagati ha kamgunda, kahi mleche kuudoliza, leka mleche kubagama.’ ”
GEN 3:4 Izoka nalimlonjela mdala, “Ndangukomya hambagama hebu.
GEN 3:5 Nguluwi nakalonga ahyo kwa vila nakavizela kota wone mulye mafuza ga mgodi awo mogubulilwa meho, na hemwe mowa kota Nguluwi, movizela ganojile na gehile.”
GEN 3:6 Lelo mdala loyawene kota mgodi awo unoga kwa chilyo, wangunojeza hameho, na kota unoga kwa kuwa na luhala, kabawa ifuza lya igodi, nakalya. Nakamha mlume wa heye na heye, kahi kalya.
GEN 3:7 Baho du meho gawo nagagubuligwa, wavizela kota wamwazi, ahyo nawehonela mahamba ga igodi lya ikuyu, weditila salule ya kuvala mchuno.
GEN 3:8 Matinazo, mhela wa kwesela mlubehelo, ayo mlume na mdala wa heye wahulika Mkulu Nguluwi yojenda mli kamgunda, na hewo wevisa hagati ha migodi jiwele mumo, leka Mkulu Nguluwi yaleche kuwona.
GEN 3:9 Ila Mkulu Nguluwi nakamchema ayo mlume, “Kwa kohi?”
GEN 3:10 Na heye nakamwidichila, “Nyhulika kujendajenda kwa hegwe kuli kamgunda, nandumba na kivisa kwa vila nandali mwazi.”
GEN 3:11 Mkulu Nguluwi nakamuuza, “Yali kohi yakulonjele kota kwa mwazi? Ndaze, kulya ifuza lya mgodi wondikulonjele uleche kulya?”
GEN 3:12 Ayo mlume nakamwidichila, “Mdala youmhele yekale hamwe na heni ndo yamhele ifuza lya mgodi awo, na heni ndiya.”
GEN 3:13 Aho Mkulu Nguluwi nakamuuza ayo mdala, “Kudita choni hegwe?” Mdala nakamwidichila, “Izoka nalimbada, na heni ndiya.”
GEN 3:14 Hamba Mkulu Nguluwi nakalilonjela izoka, “Kwa vila nakudita ahyo, nakupanjilwa kusinda migongolo jeng'ha ja kufujigwa, na migongolo jeng'ha ja kisolo. Kwa lida kotambala, na kulya nhimbwisi mazuwa gose ga ukomu wa hegwe.
GEN 3:15 Ndowika ung'honyo hagati ha hegwe na ayo mdala, hagati ha lulelo lwako na lulelo lwake, heye kochitowa chitwi cha hegwe, na hegwe kochitowa chisigino cha heye.”
GEN 3:16 Hamba nakamlonjela mdala, “Ndokonjezela usungu wa kuponda, kwa usungu koponda wana, kowa na maya na mlume wa hegwe, ila heye kowa na ludali lwa kukulongoza.”
GEN 3:17 Hamba nakamlonjela Adamu, “Kwa vila hegwe nakumhulichiza mdala wa hegwe, nakulya mafuza ga mgodi wondiwalajize mleche kulya, ahyo, kwa wihe wa hegwe isi ipanjilwa. Kwa kitunya kochipalila chilyo cha hegwe, mazuwa gose ga ukomu wa hegwe.
GEN 3:18 Isi yokulelela miwa na migugu, na hegwe yokugana kulya mizuchila.
GEN 3:19 Kwa chituguti kopala chilyo, mbaka louhiluka kuli misanga koulawile, mina hegwe kwa misanga, na kuli misanga kohiluka.”
GEN 3:20 Adamu nakamchemela mdala wa heye itagwa, “Hawa,” kwa vila nayali mamo wa wanhu weng'ha.
GEN 3:21 Mkulu Nguluwi nakawagongomanyila Adamu na mdala wa heye ivalo lya igozi, kawavaliza.
GEN 3:22 Hamba Mkulu Nguluwi nakalonga, “Sambi munhu kawa kota yumwe wa hetwe, kavizela ganojile na gehile. Igana kumlemeza kulya alila ifuza lya mgodi wa ukomu, kwa vila wone yalye, kochikala mazuwa gose.”
GEN 3:23 Lelo Mkulu Nguluwi nakamuwinga Adamu kunze mwa kamgunda ka Edeni, leka yakalime mmisanga moyalawile.
GEN 3:24 Nakamuwinga kunze, na kuwawika wamizi wahilisi nzingo kolilawilaga isanya kuli kamgunda ka Edeni na sengo ya chiluli ilinguhinduka ako na ako, nakwamila nzila ilingulutila kuli mgodi wa ukomu.
GEN 4:1 Adamu nakawasa na mdala wa heye, na heye nakawa na himila, nakamponda Kaini. Hawa nakalonga, “Ndimponda mwana msongolo kwa utanzi wa Mkulu Nguluwi.”
GEN 4:2 Hamba nakamponda mkulugwe Abeli nayawele mdima ming'holo na Kaini nayali mlimi.
GEN 4:3 Mhela udo hela, Kaini nakamlavila Mkulu Nguluwi nhambiko ya mbena ya kumgunda,
GEN 4:4 na heye Abeli nakamlavila Mkulu Nguluwi nhambiko ya lulelo lwa mwaluko lwa ming'holo na vihande vya mafuta. Mkulu Nguluwi nakanojezwa na Abeli na nhambiko ya heye,
GEN 4:5 ila nahanojezwe na Kaini na nhambiko ya heye. Lelo Kaini nakazudila ng'hatu na kumeho kwa heye nakwali kukwisimbale.
GEN 4:6 Mkulu Nguluwi nakamlonjela Kaini, “Lekachoni kwanguzudila, na lekachoni kumeho kwa hegwe kukwisimbala?
GEN 4:7 Ndaze, wone udite ganojile hukundigwa hebu? Na wone huditile ganojile, lelo gehile gangusunjilila hali lwizi, wangukugana kukulongoza, ila kwanguganigwa kuusumya.”
GEN 4:8 Hamba Kaini nakamlonjela Abeli mng'holoze, “Tuche honhu kutali na mgunda.” Lelo lowali kumgunda Kaini nakamvada Abeli mng'holoze na kumkopola.
GEN 4:9 Mkulu Nguluwi nakamuuza Kaini, “Mng'holozo Abeli kakohi?” Kaini nakamwidichila, “Heni sivizelele. Ndaze, heni nda mwamizi wa mng'holozangu?”
GEN 4:10 Mkulu Nguluwi nakalonga, “Nakudita choni? Danda ya mng'holozo ya kota luzi lulingundilila kulawa kuli misanga.
GEN 4:11 Lelo hegwe nakupanjilwa na kuwinjigwa mchanya mwa misanga jiwele ngubochela danda ya mng'holozo youmkopole.
GEN 4:12 Wone ulime misanga hajikugalila kahi mbena ng'oo. Kowa munhu wa kulubaluba, yalihela honhu hatanganiche ha kikala.”
GEN 4:13 Kaini nakamlonjela Mkulu Nguluwi, “Utaguso wa heni wowa ukulu ng'hatu, siweza kwimilila hebu.
GEN 4:14 Ulole, lehano kumbinga kuli misanga jiwele na mboto na kutali na meho ga hegwe. Lelo ndowa munhu wa kulubaluba, yalihela honhu hatanganiche ha kikala muisi, na yoneche yombona kong'hopola.”
GEN 4:15 Ila Mkulu Nguluwi nakamwidichila, “Hebu! Yokukopola hegwe Kaini, kohilulilwa mala saba.” Lelo Mkulu Nguluwi nakamuwika Kaini ulajilo wa kumdita munhu yoneche yomona yaleche kumkopola.
GEN 4:16 Hamba Kaini nakoka kumwando kwa Mkulu Nguluwi, kawa yochikala kuli isi ya Nodi nzingo ya kolilawilaga isanya mwa kamgunda ka Edeni.
GEN 4:17 Kaini nakawasa na mdala wa heye, na heye kawa na himila, nakamponda Enoki. Kaini nakazenga muji nakauchema Enoki itagwa lya mwana wa heye.
GEN 4:18 Enoki nakawa mhaza wa Iladi, na heye Iladi nakawa mhaza wa Mehuyaeli, na Mehuyaeli nakawa mhaza wa Mesushaeli, na heye Mesushaeli nakawa mhaza wa Lameki.
GEN 4:19 Lameki nakahola wadala weli, yumwenga nakachemigwa Ada, na yunji Sila.
GEN 4:20 Ada nakamponda Yabali yawele mhaza wa wadimi walingikala mli mihema.
GEN 4:21 Mng'holoze nayali Yubali, ayo nayali mhaza wa hewo wawele towa ching'weleng'wele na mluli.
GEN 4:22 Sila na heye nakamponda Tubali-kaini, yawele mponzi wa vinhu vyeng'ha vya shaba na chuma. Lumbulye Tubali-kaini nakachemigwa Naama.
GEN 4:23 Lameki nakawalonjela wadala wa heye, “Ada na Sila mhulichize lizi lya heni. Mhulichize gondilonga hemwe wadala wa Lameki. Heni nandimkopola munhu kwa chiwalo cha kung'wanyula, ena, nandimkopola msongolo kwa kundumiza.
GEN 4:24 Wone Kaini kohilusilwa mala saba, ndangukomya Lameki kohilusilwa mala makumi saba na saba.”
GEN 4:25 Adamu nakawasa kahi na Hawa mdala wa heye, na heye nakaponda mwana mlume, kamchema Seti. Yolonga, “Nguluwi kengalila mwana honhu ha Abeli yakopoligwe na Kaini.”
GEN 4:26 Seti na heye nakamponda mwana mlume, nakamchema Enoshi. Aho ndo wanhu waluche kumlanda Mkulu kwa itagwa lya Mkulu Nguluwi.
GEN 5:1 Ayi ndo mbuli ya lulelo lwa Adamu. Mhela Nguluwi loyamlumbile munhu, nakamlumba kwa kiwhana na heye.
GEN 5:2 Nakawalumba mlume na mdala, hamba nakawatambichiza na kuwapa itagwa “Munhu.”
GEN 5:3 Adamu loyali na miyaka miya imwe na makumi gadatu, nakawa na mwana msongolo yewhanile na heye, nakamchema Seti.
GEN 5:4 Kulawila aho, Adamu nakekala miyaka miya nane, na kuwa na wana wanji walume na wadala.
GEN 5:5 Adamu nakabagama loyawele na miyaka miya tisa na makumi gadatu.
GEN 5:6 Mhela Seti loyawele na miyaka miya imwe na jihano, nakawa mhaza wa Enoshi.
GEN 5:7 Loyampatile Enoshi, Seti nakekala miyaka miya nane na saba, na kuponda wana wanji walume na wadala.
GEN 5:8 Seti nakabagama loyawele na miyaka miya tisa na kumi na mili.
GEN 5:9 Mhela Enoshi loyali na miyaka makumi tisa, nakawa mhaza wa Kenani.
GEN 5:10 Loyampondile Kenani, Enoshi nakekala miyaka miya nane na kumi na jihano, na kuwa wana wanji walume na wadala.
GEN 5:11 Enoshi nakabagama loyali na miyaka miya tisa na jihano.
GEN 5:12 Mhela Kenani loyali na miyaka makumi saba, nakampata Mahalaleli.
GEN 5:13 Loyampondile Mahalaleli, Kenani nakekala miyaka miya nane na makumi gane, nakawa wana wanji walume na wadala.
GEN 5:14 Kenani nakabagama loyali na miyaka miya tisa na kumi.
GEN 5:15 Mhela Mahalaleli loyawele na miyaka makumi sita na jihano, nakawa mhaza wa Yaledi.
GEN 5:16 Loyampondile Yaledi, Mahalaleli nakekala miyaka miya nane na makumi gadatu, nakawa wana wanji walume na wadala.
GEN 5:17 Mahalaleli nakabagama loyawele na miyaka miya nane makumi tisa na jihano.
GEN 5:18 Mhela Yaledi loyawele na miyaka miya imwe na makumi sita na mili, nakawa mhaza wa Enoki.
GEN 5:19 Loyampondile Enoki, Yaledi nakekala miyaka miya nane, nakawa wana wanji walume na wadala.
GEN 5:20 Yaledi nakabagama loyawele na miyaka miya tisa na makumi sita na mili.
GEN 5:21 Mhela Enoki loyali na miyaka makumi sita na jihano, nakawa mhaza wa Metusela.
GEN 5:22 Enoki na Nguluwi wali weganile. Loyampondile Metusela, Enoki nakekala miyaka miya jidatu nakawa na wana walume na wadala.
GEN 5:23 Enoki nakekala miyaka jidatu na makumi sita na jihano.
GEN 5:24 Enoki nayali weganile na Nguluwi, nakaheluka hela, ndo mina Nguluwi nakamhola.
GEN 5:25 Mhela Metusela loyawele na miyaka miya imwe na makumi nane na saba, nakawa mhaza wa Lameki.
GEN 5:26 Loyampondile Lameki, Metusela nakekala miyaka miya saba na makumi nane na mili, nakawa na wana wanji walume na wadala.
GEN 5:27 Metusela nakabagama loyawele na miyaka miya tisa na makumi sita na tisa.
GEN 5:28 Mhela Lameki loyawele na miyaka miya imwe na makumi nane na mili, nakampata mwana msongolo.
GEN 5:29 Nakamchema mwana ayo Nuhu, yolonga, “Mwana ayu ndo yotuhembuliza kwa mijito jing'hang'hale yotulingukola kwa moko ga hetwe kuli isi yaipanjile Mkulu Nguluwi.”
GEN 5:30 Loyampatile Nuhu, Lameki nakekala miyaka miya jihano na makumi tisa na jihano, nakawa na wana wanji walume na wadala.
GEN 5:31 Lameki nakabagama loyawele na miyaka miya saba na makumi saba na saba.
GEN 5:32 Nuhu loyafichile miyaka miya jihano, nakawa mhaza wa Shemu na Hamu na Yafeti.
GEN 6:1 Wanhu lowaluche konjezeka muisi na kuponda wahinza,
GEN 6:2 wahilisi wa Nguluwi nawawona awo wahinza wa wanhu ndo wenolije ng'hatu, wawahola wala wawaganile na kuwa wadala wawo.
GEN 6:3 Aho Mkulu Nguluwi nakalonga, “Muhe wa heni hauchikala mgati mwa munhu mazuwa gose, mina heye ndo wa kubagama hela. Lelo hochikala lukami miyaka miya imwe na makumi meli.”
GEN 6:4 Mhela awo na kuli mazuwa ago nakwali na minhu muisi jiwele ndo lulelo lwa wahilisi wa Nguluwi na wahinza wa wanhu. Awo ndo wanhu wawele na mong'ho na lutogo aho katali, nawachemigwa Wanefili.
GEN 6:5 Mkulu Nguluwi loyawene winji wa wihe wa wanhu muisi, na kota chila choyochijesa mnhumbula mwa heye mhela weng'ha ndo wihe yeka mhela weng'ha,
GEN 6:6 Mkulu Nguluwi nakawa na masinzo ng'hatu kwa kumlumba munhu muisi. Mkulu Nguluwi nakejesa ng'hatu mnhumbula ya heye,
GEN 6:7 ahyo Mkulu Nguluwi nakalonga, “Ndomwajiliza munhu yondimlumbile muisi, ndokwajiliza migongolo na vilumbigwe vilingutambala na videje vya kilanga. Ndina masinzo ng'hatu kwa vila nandiwalumba muisi.”
GEN 6:8 Ila Nuhu nakaganigwa na Mkulu Nguluwi.
GEN 6:9 Ayi ndo mbuli ya Nuhu yawele yanojile yaliyeka na ndo yawele hela nongwa mhela wa heye. Nayali weganile na Nguluwi.
GEN 6:10 Nuhu nayali na wana wadatu wasongolo, Shemu na Hamu na Yafeti.
GEN 6:11 Nguluwi nakayona isi kota yiha ng'hatu na kumema wihe na kitowa.
GEN 6:12 Ena, Nguluwi nakayona isi yiha ng'hatu, kwa vila chila munhu nakawinza nzila ya heye yihile.
GEN 6:13 Nguluwi nakamlonjela Nuhu, “Nyamula kuwabagamiza wanhu weng'ha kwa vila waimemeza isi kitowa. Ena, ndowabagamiza ng'hatu hamwe na isi.
GEN 6:14 Lelo widitile safina kwa mbao zinojile za mgofu. Ugawanule vihengo mgati na ubakalize lusila kwa mgati na kunze.
GEN 6:15 Koidita iwe kota hino, utali wa mita miya imwe na makumi gadatu na zidatu na ugazi wa mita makumi meli na mbili na mita kumi na zidatu kuluta kuchanya.
GEN 6:16 Safina ayo iwe na vinduwiko vidatu. Hagati mwa safina ayo kuwe na chiswiswili cha fudi sentimita makumi gane na zine kwa nzingo za hafungo mwa chinduwiko acho na lwizi hafungo.
GEN 6:17 Ndochigala nhonya yobohoka na kubagamiza vinhu vyeng'ha viwele vikomu muisi. Chila chilumbigwe chiwele na muhe muisi chobagama.
GEN 6:18 Ila ndowika ilagano na hegwe. Kokwinjila mli safina, hegwe hamwe na mdala wa hegwe na wanago na wadala wawo.
GEN 6:19 Nagwe kokwinjiza mli safina chila chilumbigwe vili chilume na chidala, leka viwe vikomu hamwe na hegwe.
GEN 6:20 “Wokuya kwa hegwe chila nhanzi ya videje vya kilanga, chila igongolo na chila nhanzi ya chilumbigwe chilingutambala, vili vili, leka kuviwika viwe vikomu.
GEN 6:21 Kahi uhole vilyo vyeng'ha vilinguligwa, uwiche kwa mbuli ya chilyo cha hemwe na vilumbigwe avyo.”
GEN 6:22 Nuhu nakadita geng'ha kota Nguluwi vyoyalajize.
GEN 7:1 Mkulu Nguluwi nakamlonjela Nuhu, “Winjile mgati mwa safina hegwe hamwe na ivyazi lyako lyeng'ha, mina kwa wanhu weng'ha walingikala mhela awu wa hegwe, ndikona hegwe uliyeka utanganiche heni.
GEN 7:2 Uhole hamwe na hegwe migongolo jeng'ha johajikokomoche na jikokomoche, ilume na idala, saba saba, ila migongolo johambe jiliche, uhole mili ilume na idala.
GEN 7:3 Vivila uhole videje vya kilanga chilume na chidala, saba saba, leka kuzileka nhanzi zawo ziwe na ukomu muisi.
GEN 7:4 Logopuluta mazuwa saba, ndowatowela nhonya mazuwa makumi gane nemisi na nechilo, na chila chilumbigwe ndichilumbile muisi chobagama.”
GEN 7:5 Nuhu nakadita geng'ha kota Mkulu Nguluwi vyoyalajize.
GEN 7:6 Nuhu nayali na miyaka miya sita mhela nhonya loitowile na mazi kumema muisi.
GEN 7:7 Nuhu na mdala wa heye na wanage na wadala wawo nawenjila mgati mwa safina leka kuibilima nhonya imemeze mazi.
GEN 7:8 Migongolo jilingulika na migongolo hajilingulika na videje na vilumbigwe vyeng'ha vilingutambala,
GEN 7:9 vili vili, idala na ilume, navinjila mgati mwa safina hamwe na Nuhu kota Nguluwi vyoyalajize.
GEN 7:10 Logapulute mazuwa saba, mazi ga nhonya nagaluka kuigubika isi.
GEN 7:11 Nuhu loyawele na miyaka miya sita, logali mazuwa ga kumi na saba ga mwezi wa keli, zuwa alyo nzasa zeng'ha za mazi gawele nyang'ha za hasi nazilavya mazi, na mazi kulawa kilanga nagabohoka.
GEN 7:12 Nhonya naitowa hasi mazuwa makumi gane nemisi na nechilo.
GEN 7:13 Zuwa lilyo nhonya loyaluche kutowa, Nuhu na mdala wa heye na wanage, Shemu na Hamu na Yafeti, hamwe na wadala wawo, nawenjila mgati mwa safina.
GEN 7:14 Nawenjila hewo weng'ha hamwe na migongolo ja kisolo nhanzi zeng'ha na nhanzi zeng'ha za migongolo ja haluga na nhanzi zeng'ha za migongolo jilingutambala na videje chila nhanzi na nhanzi zeng'ha za vilumbigwe viwele na mabawa.
GEN 7:15 Vili vili vya chila nhanzi ya vilumbigwe vikomu navinjila mgati mwa safina hamwe na Nuhu.
GEN 7:16 Chila nhanzi nawenjila ilume na idala kota Nguluwi vyoyamlajize Nuhu. Hamba Mkulu Nguluwi nakahinda lwizi lwa safina kumbele kwa Nuhu.
GEN 7:17 Nhonya naitowa mazuwa makumi gane. Mazi nagonjezeka na kwinula safina, nayelela mchanya mwa isi.
GEN 7:18 Mazi nagalutilila konjezeka muisi na safina nayelela mchanya mwake.
GEN 7:19 Mazi ago gawa menji ng'hatu mchanya muisi, gavigubika vidunda vyeng'ha viling'wemang'wema muisi.
GEN 7:20 Nagamema mbaka kuvigubika vidunda chasi cha fudi kumi na zihano.
GEN 7:21 Vilumbigwe vyeng'ha navibagama, videje na migongolo ja kudimigwa na migongolo ja kisolo na vilumbigwe vyeng'ha muisi vilingujenda mchilundo na wanhu weng'ha,
GEN 7:22 ena, chila chilumbigwe chiwele na muhe muisi nachibagama.
GEN 7:23 Nguluwi nakachibagamiza chila chilumbigwe muisi, wanhu na migongolo na vilumbigwe vilingutambala na videje vya kilanga. Vyeng'ha navibagamizwa muisi. Nuhu yaliyeka ndo nayaponile hamwe na wala nawawele mgati mwa safina.
GEN 7:24 Mazi ago nagekala muisi kwa mazuwa miya imwe na makumi gahano.
GEN 8:1 Hamba Nguluwi nakamkumbuka Nuhu na migongolo jeng'ha ja kisolo na jifujigwe haluga jiwele hamwe na heye mgati mwa safina. Lelo Nguluwi nakegala mbeho mchanya mwa isi, mazi nagaluka kuswina.
GEN 8:2 Nzasa za mazi gawele nyang'ha na mazi kulawa kilanga nagadinyigwa. Nhonya naidinyigwa,
GEN 8:3 mazi nagalutilila kuswina mhole mhole muisi. Mazuwa miya na makumi gahano logakolile, mazi nagaswina lukami.
GEN 8:4 Zuwa lya kumi na saba, mwezi wa saba, safina naima mchanya mwa vidunda vya Alalati.
GEN 8:5 Mazi nagalutilila kuswina mhole mhole, na zuwa ya mwaluko ya mwezi wa kumi, vinhembenhembe vya vidunda navyaluka koneka.
GEN 8:6 Mazuwa makumi gane logakwete, Nuhu nakachumula itubuli lyoyawichile kuli yila safina,
GEN 8:7 nakalilavya ibondwa kunze, ila naliguluka aku na kula mbaka mazi logakalile muisi.
GEN 8:8 Hamba Nuhu nakailavya ng'hunda leka ilole kota mazi gaswina mchanya mwa isi.
GEN 8:9 Ila kwa vila mazi nagang'hali gagubiche isi yeng'ha, ayo ng'hunda haiwene honhu ha kudulika, naihiluka kwa Nuhu kuli safina. Nuhu nakagolola moko, kaibata na kuihilusa mgati mwa safina.
GEN 8:10 Nuhu nakabeteza mazuwa ganji saba, hamba nakailavya kahi ayo ng'hunda kunze mwa safina.
GEN 8:11 Ng'hunda ayo naimhiluchila Nuhu matinazo iwele na iputi lidodi lya mzeituni mumlomo mwake. Kwa chiwalo acho Nuhu nakavizela kota mazi gali gaswinile muisi.
GEN 8:12 Hamba nakabeteza mazuwa ganji saba, nakailavya kahi ayila ng'hunda zuwa ali, ng'hunda nahaihiluche ng'oo.
GEN 8:13 Nuhu loyawele na miyaka miya sita na umwe, zuwa lya mwaluko mwezi wa mwaluko, mazi nagakala muisi. Nuhu nakagubula chigubiko cha safina na loyalolile, nakona kota isi naikala.
GEN 8:14 Zuwa lya makumi meli na saba ga mwezi wa keli, isi naikala ng'hatu.
GEN 8:15 Aho Nguluwi nakamlonjela Nuhu,
GEN 8:16 “Ulawe kuli safina, hegwe hamwe na mdala wa hegwe na wanago na wadala wawo.
GEN 8:17 Ulavye kahi vilumbigwe vyeng'ha viwele na muhe vya chila nhanzi viwele hamwe na hegwe, videje na migongolo na chila chilumbigwe chilingutambala, vikalele kwa winji muisi, wonjezeche na kwenela honhu heng'ha muisi.”
GEN 8:18 Lelo Nuhu nakalawa kuli safina hamwe na wanage na mdala wa heye hamwe na wadala wa wanage.
GEN 8:19 Migongolo jeng'ha na vilumbigwe vyeng'ha vilingutambala na videje vyeng'ha, nawalawa kuli safina kwa nhanzi zawo.
GEN 8:20 Nuhu nakamzenjela Mkulu Nguluwi honhu ha kulavila nhambiko, nakahola yumwe kwa chila nhanzi ya migongolo johajikokomoche na chideje chohachikokomoche, nakumlavila Nguluwi nhambiko za kulakazwa hala.
GEN 8:21 Kunhunyhilila goya kwa nhambiko ayo na kumnojeza Mkulu Nguluwi, na heye nakalonga mnhumbula mwake, “Siwila kahi kuipanjila isi kwa mbuli ya wanhu, ndivizela kota majesa ga heye ndo wihe kulawila udodo. Na sivibagamiza kahi vilumbigwe vyeng'ha kota vyonditile.
GEN 8:22 “Kota vyoichikala isi, mihela ja kunyala na mbena, na ja mbeho na ivuche, na luhela na chipalangule, na nechilo na nemisi, hagomala.”
GEN 9:1 Nguluwi nakamtambichiza Nuhu na wanage, yowalonjela, “Mkalele, mwonjezeche, mkaimemeze isi yeng'ha.
GEN 9:2 Migongolo jeng'ha na videje vyeng'ha vya kilanga na vilumbigwe vyeng'ha vilingutambala muisi na somba zeng'ha za kuli bahali zowa na woga na zowadumba hemwe. Weng'ha wawichigwa hali ludali lwa hemwe.
GEN 9:3 Migongolo jeng'ha jiwele na muhe jowa ndiya ya hemwe, ndanguwapani kota vila londiwapele mizuchila jititime ja nyhule za ndiya ya hemwe.
GEN 9:4 Ila mleche kulya miwunde jiwele na danda, kwa vila ukomu wamumo mli danda.
GEN 9:5 Danda ya ukomu wa hemwe ndoitagusa, kwa chila igongolo na wanhu. Yomkopola miyage, ndoutagusa ukomu wa heye.
GEN 9:6 “Yalingubohola danda ya munhu, danda ya heye yoboholigwa na munhu, mina kwa kiwhana na Nguluwi, munhu nakalumbigwa.
GEN 9:7 Namwe mponde na mkonjezeche, mponde kwa winji, mkonjezeche muisi.”
GEN 9:8 Hamba Nguluwi nakamlonjela Nuhu na mwanage,
GEN 9:9 “Ndanguwika ilagano lyangu namwe na lulelo lwenu,
GEN 9:10 na vilumbigwe vyeng'ha viwele vikomu na videje na migongolo ja kudima haluga na ja kisolo, weng'ha walawile mli safina hamwe na hemwe.
GEN 9:11 Ndangwaluchiza ilagano lyangu na hemwe, kuta vilumbigwe vyeng'ha vikomu havibagamizwa ng'oo kwa nhonya, na hailawila kahi nhonya kota ila ya kuiwifya isi.”
GEN 9:12 Kahi Nguluwi nakalonga, “Achi ndo chilajilo cha ilagano londidita kwa heni na hemwe na chila chilumbigwe chikomu chiwele hamwe na hemwe kwa lulelo lweng'ha lulinguya,
GEN 9:13 ndanguwika upinde wa heni kuli ng'hungugu kilanga. Nawo wowa ulajilo wa ilagano lya heni na isi.
GEN 9:14 Hala hondiigubika isi kwa ng'hungugu, na awo upinde wa nhonya howokoneka kuli ng'hungugu,
GEN 9:15 ndokumbuchila ilagano lyangu na hemwe na vilumbigwe vyeng'ha viwele vikomu. Mazi hagomema ng'oo na kuvibagamiza vilumbigwe vyeng'ha viwele vikomu.
GEN 9:16 Awo upinde houlawila kung'ungugu, ndowona na kukumbuchila ilagano alyo lya mazuwa gose kwa heni na vilumbigwe vyeng'ha viwele vikomu muisi.”
GEN 9:17 Nguluwi nakamlonjela Nuhu, “Awu ulajilo wa ilagano lonyhaluchize na vilumbigwe vyeng'ha viwele vikomu muisi.”
GEN 9:18 Wana wa Nuhu walawile mli safina nawali Shemu na Hamu na Yafeti. Hamu nayali mhaza wa Kanaani.
GEN 9:19 Awo ndo wana wadatu wa Nuhu, na kulawa kwa hewo wanhu nawenela isi yeng'ha.
GEN 9:20 Nuhu yawele mlimi, nayali yaluche kuwa mlimi wa mgunda wa zabibu.
GEN 9:21 Nakanwa divai kulawa kuli zabibu zoyalimile, nakagala, hamba nakawasa mwazi mli chibumuli cha heye.
GEN 9:22 Hamu, mhaza wa Kanaani, nakawona umwazi wa mhaza wa heye, nakalawa kunze na kuwalonjela wang'holoze weli.
GEN 9:23 Ila Shemu na Yafeti nawahola nguwo, watandazula mmayega mwawo, nawaluta chimbelembele na kuugubika umwazi wa mhaza wa hewo. Nawalola kufungo, nahawauwene umwazi wa mhaza wa hewo.
GEN 9:24 Nuhu loyalilimche na kuvizela choyaditilwe na mwanage mdodo,
GEN 9:25 nakalonga, “Kanaani yapanjilwe! Kowa chitumagwa wa vitumagwa kwa wang'holoze.”
GEN 9:26 Kahi nakalonga, “Shemu nayatambichizwe na Mkulu Nguluwi, Nguluwi wa Shemu, Kanaani nayawe chitumagwa wa heye.
GEN 9:27 Nguluwi nayamtambichize Yafeti, yekale kuli chibumuli cha Shemu, Kanaani nayawe mpogozi wa heye.”
GEN 9:28 Loimalile nhonya ya mazi tendema, Nuhu nakekala miyaka miya zidatu na makumi gahano,
GEN 9:29 hamba Nuhu nakabagama loyawele na miyaka miya tisa na makumi gahano.
GEN 10:1 Ayi ndo mbuli ya lulelo lwa Nuhu, Shemu na Hamu na Yafeti. Awa wadatu nawali na wana loimalile nhonya ya mazi tendema.
GEN 10:2 Wana walume wa Yafeti nawali Gomeli na Magogu na Madai na Yavani na Tubali na Mesheki na Tilasi.
GEN 10:3 Wana wa Gomeli nawali Ashikenasi na Lifazi na Togoma.
GEN 10:4 Wana wa Yavani nawali Elisha na Talishishi na Kitimu na Dodanimu.
GEN 10:5 Awa ndo wanhu wa mwaluko ng'hatu wenele honhu ha mwhani, chila wanhu kwa isi za hewo na kwa ulonzi wawo na kwa lukolo lwawo na kwa nhanzi za hewo.
GEN 10:6 Wana wa Hamu nawali Kushi na Misili na Puti na Kanaani.
GEN 10:7 Wana walume wa Kushi nawali Seba na Havila na Sabuta na Lahama na Sabuteka. Wana walume wa Lahama nawali Sheba na Dedani.
GEN 10:8 Kushi nayali mhaza wa Nimulodi yawele na mong'ho wa mwaluko muisi yeng'ha.
GEN 10:9 Nayali mpelembi yawele na mong'ho hamwando ha Mkulu Nguluwi, ndo mina kwali na ulonzi ulingulonga, “Nayakudite uwe kota Nimulodi mpelembi yawele na mong'ho hamwando ha Mkulu Nguluwi.”
GEN 10:10 Miji ja mwaluko ja undewa wa heye, najali Babiloni na Eleki na Akadi na Kalinehi, kuli isi ya Shinali.
GEN 10:11 Kulawila ako, Nimulodi nakaluta Ashulu, nakazenga miji ja Ninawi na Lehoboti-ili na Kala na
GEN 10:12 Leseni uwele hagati ha Ninawi na muji ukulu wa Kala.
GEN 10:13 Misili nayali sekulu wa Waludi na Waanamu na Walehabi na Wanafutuhi
GEN 10:14 na Wapatilusi na Wakasiluhimu, wawele mwaluko wa Wafilisti na Wakafutoli.
GEN 10:15 Kanaani nayali sekulu wa Sidoni, mlelwa wa heye wa mwaluko, na Heti
GEN 10:16 na kahi sekulu wa hewo Wayebusi na Waamoli na Wagiligashi
GEN 10:17 na Wahivi na Waaliki na Waasini
GEN 10:18 na Waaluvadi na Wasemali na Wahamati. Hamba wanhu wa nhanzi zinjizinji za Kanaani nawasambaluka,
GEN 10:19 ahyo na honhu ha isi ya hewo nayali kulawila Sidoni kulutila kusini mbaka Gelali mbaka Gasa, na kulutila kolilawilaga isanya mbaka Sodoma na Gomola na Adima na Seboimu mbaka Lasha.
GEN 10:20 Awo ndo walelwa wa Hamu kota lukolo lwa hewo na ulonzi wa hewo na isi za hewo na wanhu wa isi za hewo.
GEN 10:21 Shemu, mkulugwe Yafeti, nayali mwana wa Ebeli.
GEN 10:22 Wana wa Shemu nawali Elamu na Ashulu na Alufakisadi na Ludi na Alamu.
GEN 10:23 Wana walume wa Alamu nawali Usi na Huli na Gaseli na Mashi.
GEN 10:24 Alufakisadi nakampata Shela, Shela nakampata Ebeli.
GEN 10:25 Ebeli nayali na wana weli, wa mwaluko nakamchema Pelegi kwa vila mhela awo wanhu wa isi nawasambaluka, na wa keli nakamchema Yokitani.
GEN 10:26 Yokitani nayali mhaza wa Alimodadi na Shelefu na Hasalimaweti na Yela
GEN 10:27 na Hadolamu na Usali na Dikila
GEN 10:28 na Obali na Abimaeli na Sheba
GEN 10:29 na Ofili na Havila na Yobabu. Awo weng'ha nawali wana wa Yokitani.
GEN 10:30 Isi nawekale nayenela kulawila Mesha kwa nzila ya Sefali kuli isi ya vidunda mwa kolilawilaga isanya.
GEN 10:31 Awo ndo walelwa wa Shemu na wanhu wa isi za hewo na ulonzi wa hewo na kuli isi za hewo na undewa wa hewo.
GEN 10:32 Ayi ndo mbuli ya lukolo lwa wana wa Nuhu, kwa ivyazi lya hewo na ulonzi wa hewo. Kulawa kwa wanhu awo nawenela kuli nhanzi zeng'ha loimalile nhonya ya mazi tendema.
GEN 11:1 Mwaluko wanhu weng'ha muisi nawali na ulonzi umwe, nawali wolonga luzi lulula.
GEN 11:2 Lelo naiwa wanhu lowenule majendo kulawila kolilawilaga isanya, nawafika kuli isi ya chiwala ako Shinali, nawekala.
GEN 11:3 Hamba nawelonjelela, “Lelo, natudite matufali, tugasome goya na chiluli.” Nawali na matufali honhu ha maganga na lami honhu ha ilongo.
GEN 11:4 Nawalonga, “Twizenjele muji na ilingo chinduwiko chake chofika mbaka kilanga leka tupegwe itagwa na kutogoligwa, tuleche kusambaluka isi yeng'ha.”
GEN 11:5 Ndo baho Mkulu Nguluwi nakedulika hasi kulola honhu hao na ilingo lowazenjile wanhu wa isi.
GEN 11:6 Mkulu Nguluwi nakalonga, “Mlole wanhu wano wa isi imwe na weng'ha wana ulonzi umwe, awu ndo mwaluko hela wa gala gowodita. Lyoneche lowogana kudita, woweza kudita.
GEN 11:7 Lelo natwiduliche hasi na kuubananga ulonzi wa hewo, leka walemwele kuvizela chowolonga hewo kwa hewo.”
GEN 11:8 Ahyo, Mkulu Nguluwi nakawasambalula honhu heng'ha muisi, na hewo nawaleka kuuzenga ula muji.
GEN 11:9 Muji awo nauchemigwa Babeli, kwa vila ako ndo Mkulu Nguluwi koyatigule ulonzi wa hewo wa isi yeng'ha na kulawa ako nakawasambalula wanhu chila honhu muisi.
GEN 11:10 Ayi ndo mbuli ya lulelo lwa Shemu. Miyaka mili kulawa ila nhonya ya mazi tendema, Shemu naloyali na miyaka miya imwe, nakamponda Alufakisadi.
GEN 11:11 Loyampondile Alufakisadi, Shemu nakekala miyaka miya jihano, na kuponda wana wanji walume na wadala.
GEN 11:12 Alufakisadi naloyawele na miyaka makumi gadatu na jihano, nakamponda Shela.
GEN 11:13 Loyampondile Shela, Alufakisadi nakekala miyaka miya zine na zidatu, na kuponda wana wanji walume na wadala.
GEN 11:14 Shela naloyawele na miyaka makumi gadatu, nakamponda Ebeli.
GEN 11:15 Loyampondile Ebeli, Shela nakekala miyaka miya zine na zidatu, na kuponda wana wanji walume na wadala.
GEN 11:16 Ebeli naloyawele na miyaka makumi gadatu na gane, nakamponda Pelegi.
GEN 11:17 Loyampondile Pelegi, Ebeli nakekala miyaka miya zine na makumi gadatu, na kuponda wana wanji walume na wadala.
GEN 11:18 Pelegi naloyawele na miyaka makumi gadatu, nakamponda Leu.
GEN 11:19 Naloyampondile Leu, Pelegi nakekala miyaka miya mbili na tisa, na kuponda wana wanji walume na wadala.
GEN 11:20 Leu naloyawele na miyaka makumi gadatu na meli, nakamponda Selugi.
GEN 11:21 Naloyampondile Selugi, Leu nakekala miyaka miya mbili na saba, na kuponda wana wanji walume na wadala.
GEN 11:22 Selugi naloyawele na miyaka makumi gadatu, nakamponda Naholi.
GEN 11:23 Naloyampondile Naholi, Selugi nakekala miyaka miya mbili na kuponda wana wanji walume na wadala.
GEN 11:24 Naholi naloyawele na miyaka makumi meli na tisa, nakamponda Tela.
GEN 11:25 Naloyampondile Tela, Naholi nakekala miyaka miya imwe na kumi na tisa, na kuponda wana wanji walume na wadala.
GEN 11:26 Tela naloyawele na miyaka makumi saba, nakamponda Abulamu na Naholi na Halani.
GEN 11:27 Ayi ndo mbuli ya lulelo lwa Tela, mhaza wa hewo Abulamu, Naholi na Halani. Halani nayali mhaza wa Loti.
GEN 11:28 Ayo Halani nakabagama hali mhaza wa heye Tela, loyali yochikala ako Chalideya nakoyapondigwe Uli.
GEN 11:29 Abulamu na Naholi nawahesa. Mdala wa Abulamu nakachemigwa Salai. Mdala wa Naholi nakachemigwa Milika, mhinza wa Halani nayawele kahi mhaza wa Isika.
GEN 11:30 Salai nahapondile mwana kwa vila nayali mhende.
GEN 11:31 Tela nakamhola Abulamu mwanage na Loti mzukulu wa heye, nayawele mwana wa Halani, na Salai mchewake Abulamu, nawoka weng'ha hamwe kulawa Uli, muji wa Wakalidayo, kuluta kuli isi ya Kanaani. Ila lowafichile Halani, nawekala.
GEN 11:32 Tela nakabagama ako Halani naloyawele na miyaka miya mbili na jihano.
GEN 12:1 Lelo Mkulu Nguluwi nakamlonjela Abulamu, “Uche kuli isi ya hegwe, uwaleche wang'holozo na ng'handa ya mhaza wa hegwe, ulute kuli isi yondikulajila.
GEN 12:2 “Ndokudita hegwe uwe nhanzi iwele na ukulu, ndokutambichiza na kulikwiniza itagwa lyako, leka nagwe uwe utambichizo kwa wanji.
GEN 12:3 Yokutambichiza, ndomtambichiza, yokupanjila, ndompanjila. Kwa kukolela hegwe, ndozitambichiza nhanzi za isi zeng'ha.”
GEN 12:4 Lelo Abulamu nakoka kota Mkulu Nguluwi vyonayamlajize, na Loti nakaluta hamwe na heye. Abulamu nayali na miyaka makumi saba na jihano loyalawile Halani.
GEN 12:5 Abulamu nakamhola mdala wa heye Salai, na Loti mwana wa mng'holoze, hamwe na lufufu lwao lweng'ha na wanhu weng'ha nawawaholile ako Halani, nawoka kuluta isi ya Kanaani. Nalowenjile isi ya Kanaani,
GEN 12:6 Abulamu nakakola hagati ha isi mbaka Shekemu, honhu Helile hawele na igodi likulu lya Mole. Mhela awo, Wakanaani nawali ndo wenyeng'haye wa isi ayo.
GEN 12:7 Ndo Mkulu Nguluwi nakamlawila Abulamu, nakamlonjela, “Lulelo lwako ndowapa isi ayi.” Lelo Abulamu nakazenga honhu ha kulavila nhambiko kwa mbuli ya Mkulu Nguluwi yamlawile.
GEN 12:8 Hamba Abulamu nakoka, nakalutila kuli isi ya vidunda kolilawilaga isanya mwa Beteli, nakazenga chibumuli hagati mwa muji wa Beteli nzingo ya kolizinjilaga isanya, na muji wa Ayi nzingo ya kolilawilaga isanya. Aho kahi nakamzenjela Mkulu Nguluwi honhu ha kulavila nhambiko na kumlanda kwa itagwa lyake.
GEN 12:9 Hamba Abulamu nakalutilila na majendo ubanzi wa Negebu.
GEN 12:10 Mhela awo, nzala nailawila muisi. Nayali nzala ya maduga, ahyo Abulamu naimgana kuluta Misili na kikala ako kwa mhela uchefu.
GEN 12:11 Loyawele behi na Misili, Abulamu nakamlonjela Salai mchewake, “Ndivizela kota hegwe kwa mdala ulinguwakwega wanhu kwa vila kunoga lukami.
GEN 12:12 Wamisili lowokona wolonga, ‘Ayu ndo mchewake,’ hamba wong'hopola ila hegwe wokuleka mkomu.
GEN 12:13 Lelo walonjele kota hegwe kwa lumbu wa heni leka mbuli zindutile goya, wandeche ndiwe mkomu kwa mbuli ya hegwe.”
GEN 12:14 Lelo Abulamu loyafichile muisi ya Misili, wenyeng'haye wa ako nawamona Salai kota ndo mdala yanojile lukami.
GEN 12:15 Wakulu wa chitala wa Falao lowamuwene Salai, nawamtogola kwa Falao. Lelo Salai nakahilikwa haluga ha Falao.
GEN 12:16 Lelo, kwa mbuli ya heye, Falao nakamuwika Abulamu, nakabochela ming'holo na misenga na idogowi ilume na vitumagwa walume na wadala na idogowi idala na ngamiya.
GEN 12:17 Ila Mkulu Nguluwi nakamgaza Falao na wanhu weng'ha wawele mng'handa ya heye kwa kuwadita wawe na matamwa makulu kwa mbuli ya Salai, mchewake Abulamu.
GEN 12:18 Falao nakamchema Abulamu, nakamuuza, “Ndo chinhu chachi achi chounditile? Lekachoni nahundonjele kota Salai ka mchewako?
GEN 12:19 Lekachoni nakulonga ka lumbu wa hegwe mbaka nandimhola yawe mchewangu? Lelo mchewako ndo ayo, umhole ulute.”
GEN 12:20 Hamba Falao nakawalajiza wanhu wa heye, na hewo wamleche Abulamu yalute mnzila yawele na mchewake na lufufu lwake lweng'ha.
GEN 13:1 Abulamu nakahiluka kulawila Misili, nakenjila nzingo ya Negebu nayali na mchewake na lufufu lwa heye lweng'ha hamwe na Loti.
GEN 13:2 Mhela awo, Abulamu nayali na lufufu ng'hatu. Nayali na migongolo minji na sendi na zahabu.
GEN 13:3 Nakalutilila na majendo kulawila honhu ha Negebu mbaka Beteli. Nakafika honhu naloyali yawichile kambi ya chibumuli aho mwaluko, hagati ha Beteli na Ayi,
GEN 13:4 na nayali yazenjile honhu ha kulavila nhambiko. Aho Abulamu nakamlanda Mkulu Nguluwi kwa itagwa lyake.
GEN 13:5 Kahi, Loti nayawele yelongoze na Abulamu, nayali na ming'holo na misenga na mihema.
GEN 13:6 Nawali na migongolo minji lukami, mbaka isi ila nailemwela kuwahega Abulamu na Loti kikala hamwe.
GEN 13:7 Lelo nakulawila kilewa kwa wadimi wa Abulamu na wadimi wa Loti. Mhela awo, Wakanaani na Wapelisi ndo nawali wochikala mli isi ayo.
GEN 13:8 Lelo Abulamu nakamlonjela Loti, “Kowa hela nongwa hali hetwe na kuleche kulawila kilewa kwa wadimi wa hegwe na wadimi wa heni, kwa vila hetwe twa ivyazi limwe.
GEN 13:9 Ulole isi ayi yeng'ha kumwando kwa hegwe. Na tibagule. Wone ulute kumoso, heni ndoluta kudilo, houluta kudilo, heni ndoluta kumoso.”
GEN 13:10 Loti nakenula meho ga heye, nakalyona ibindi lya lwanda lwa Yolodani, nakalyona kuta lina mazi ga kuhega chila honhu, kota kamgunda ka Mkulu Nguluwi na kota isi ya Misili nzingo ya Soali. Ayi nayali Mkulu Nguluwi naloyawele yang'hali kuibagamiza miji ja Sodoma na Gomola.
GEN 13:11 Lelo Loti nakehagulila ibindi lya lwanda lwa Yolodani, nakalutilila kolilawilaga isanya, na hino ndo nawebagule.
GEN 13:12 Abulamu nakapona muisi ya Kanaani na Loti nakekala hagati ha miji jiwele mibindi, nakaluta kikala behi na Sodoma.
GEN 13:13 Wanhu wa Sodoma nawali wehile na wadita gehile wakulu kwa Mkulu Nguluwi.
GEN 13:14 Loti loyebagule na Abulamu, Mkulu Nguluwi nakamlonjela Abulamu, “Winule meho ga hegwe kulawila aho houli ulole nzingo zeng'ha, kasikazini na kusini na kolilawilaga isanya na kolizinjilaga isanya.
GEN 13:15 Isi ayi yeng'ha youlinguyona ndokupa hegwe na walelwa wa hegwe iwe ya hemwe mazuwa gose.
GEN 13:16 Walelwa wa hegwe ndowadita wawe wenji kota vila sangalaza za isi hazilinguwazigwa na walelwa wa hegwe hawoweza kuwazigwa.
GEN 13:17 Lelo winuche uijendele isi ayi kwa ugazi na utali, kwa vila ndokupa hegwe.”
GEN 13:18 Baho, Abulamu nakang'umbula ihema, nakaluta kikala habehi na igodi likulu lya Mamle kula Hebuloni, ako nakamzenjela Mkulu Nguluwi honhu ha kulavila nhambiko.
GEN 14:1 Mhela awo, mndewa Amlafeli wa Shinali na mndewa Alioko wa Elasali na mndewa Kedolilaomeli wa Elamu na mndewa Tidali wa Goiimu,
GEN 14:2 nawetowa ngondo na Bela mndewa wa Sodoma na Bilisha mndewa wa Gomola na Shinabu mndewa wa Adima na Shemebeli mndewa wa Seboimu na mndewa wa Bela itagwa linji Soali.
GEN 14:3 Wandewa awo wahano nawawakungajiza hamwe wamizi wa hewo kuli ibindi lya Sidimu, liwele ndo Bahali ya Mwino.
GEN 14:4 Mhela wa miyaka kumi na mili nawali womhulichiza mndewa Kedolilaomeli, ila louwele mwaka wa kumi na midatu, nawamhinduka.
GEN 14:5 Loufichile mwaka wa kumi na jine, mndewa Kedolilaomeli na wala wandewa wayage nawoya kuwatowa wanhu wa Lefaimu ako Ashitaloti-kalinaimu na Wasusimu ako Hamu na Waemi ako Shawe-kiliataimu
GEN 14:6 na Waholi ako kuli isi ya vidunda vya Seili, nawawawinga mbaka Elipalani, mu mbaka mwa kuchiwala.
GEN 14:7 Hamba nawahiluka kumbele mbaka Enimishipati, ilinguchemigwa Kadeshi, na nawaitowa isi yeng'ha ya Waamaleki na kuwasumya Waamoli nawekale Hasasoni-tamali.
GEN 14:8 Ndo mndewa wa Sodoma na mndewa wa Gomola na mndewa wa Adima na mndewa wa Seboimu na mndewa wa Bela, itagwa linji Soali, nawenjila kuli ngondo kuli ibindi lya Sidimu kitowa
GEN 14:9 na Kedolilaomeli mndewa wa Elamu na Tidali mndewa wa Goiimu na Amlafeli mndewa wa Shinali na Alioko mndewa wa Elasali, wandewa wane wochitowa na wandewa wahano.
GEN 14:10 Ibindi lya Sidimu nalyali limemile minila ja lami, lelo wandewa wa Sodoma na Gomola nalowawele woibilima ngondo, nawatumbuchila mumo, ila wanji nawabilimila kuli isi ya vidunda.
GEN 14:11 Lelo wala wasumile, nawahola lufufu lweng'ha lwa Sodoma na Gomola na vilyo vyeng'ha na kuka.
GEN 14:12 Nawamibata Loti, mwana wa mng'holoze Abulamu nayawele yochikala Sodoma, hamwe na lufufu lwake, na kuka.
GEN 14:13 Munhu yumwe yesukule na kubilima, nakaluta kumlonjela yula Muebulaniya Abulamu nayawele yochikala behi na miyaloni ya Mwamoli Mamle. Mamle nayali mng'holoze Eshikoli na Aneli. Weng'ha nawali wawichile ilagano na Abulamu.
GEN 14:14 Abulamu loyahuliche kota mpwage kaholigwa kuli upogozi, nakawachema hamwe wamizi wa heye walanguswe kitowa ngondo na wazidahe miya zidatu na kumi na nane nawapondigwe mng'handa mwake, na kuwawinza wala wang'honyo mbaka Dani.
GEN 14:15 Ako nakawagawanula wamizi kuli vilundo. Nechilo nakawatowa wang'honyo wa heye, nakawasumya na kuwawinga mbaka Hoba, kasikazini mwa Damasiko.
GEN 14:16 Lelo Abulamu nakahiluka na lufufu lweng'ha naluholigwe na wang'honyo, na kumgombola Loti mpwage na lufufu lwake, hamwe na wadala na wanhu wanji waholigwe kuli upogozi.
GEN 14:17 Abulamu loyahiluche nayamtowile Kedolilaomeli na wayage, mndewa wa Sodoma nakalawa kuluta kumbochela kuli ibindi lya Shawe, naliwele nguchemigwa ibindi lya mndewa.
GEN 14:18 Na heye Melikisedeki, mndewa wa Salemu, nayawele mtambika wa Nguluwi yawele kuchanya, nakegala ibumunda na divai,
GEN 14:19 nakamtambichiza Abulamu yolonga, “Abulamu nayatambichizwe na Nguluwi Yawele kuchanya, yalumbile kilanga na isi.
GEN 14:20 Nayatogoligwe Nguluwi Yawele kuchanya, nayawawichile wang'honyo wa hegwe mmoko mwako.” Na heye Abulamu nakamha Melikisedeki ndolendole ya heye honhu hamwe ha kumi ha lufufu lwake naloyawele nalo.
GEN 14:21 Lelo mndewa wa Sodoma, nakamlonjela Abulamu, “Mumhe heni awo wanhu, ila wiholele lufufu lweng'ha gwegwe baho.”
GEN 14:22 Ila Abulamu nakamlonjela mndewa wa Sodoma, “Ndangilaha kwa Mkulu Nguluwi, Nguluwi Yawele kuchanya, yalumbile kilanga na isi,
GEN 14:23 kota sihola ne uzi ama ng'weso ya makwamba, na choneche cha hegwe, uleche kuya kidaya na kulonga kota ndimdita Abulamu yawe na lufufu.
GEN 14:24 Lelo sihola choneche leka vila vinhu wasongolo wa heni navyowadile na chasi cha wala nawawele hamwe na heni, Aneli na Eshikoli na Mamle nawawele waganigwe kupegwa.”
GEN 15:1 Lozipulute mbuli azo, ulonzi wa Mkulu Nguluwi naumuyila Abulamu aku yolota, “Abulamu, uleche kudumba. Heni nda ngwamo ya hegwe. Heni nda hamwe na hegwe na acho chinhu chikulu ng'hatu kwa hegwe!”
GEN 15:2 Ila Abulamu nakalonga, “Gwaa Mkulu Nguluwi, konipa choni hanga ndilutilila kikala ne mwana, na mhalizi wa heni ndo Elieseli wa Damasiko?”
GEN 15:3 Abulamu nakalonga, “Ulole, humhele mwana, chitumagwa yapondigwe mng'handa ya heni ndo kowa mhalizi wa heni.”
GEN 15:4 Ndo baho Mkulu Nguluwi nakamlonjela, “Ayu howa mhalizi wa hegwe. Mwanago wa kuponda gwegwe ndo kowa mhalizi wa hegwe.”
GEN 15:5 Aho Mkulu Nguluwi nakamigala Abulamu kunze na kumlonjela, “Ulole kilanga. Usiwaze nhondwe, wone koweza kuziwaza. Ahyo ndo vyoiwa lulelo lwa hegwe louwa lwinji.”
GEN 15:6 Abulamu nakamtogola Mkulu Nguluwi, na kwa chiwalo acho Mkulu Nguluwi nakamtawiza Abulamu kota katanganika.
GEN 15:7 Mkulu Nguluwi nakamlonjela Abulamu, “Heni ndo Mkulu Nguluwi ndikugale hegwe kulawila Uli, muji wa Wakalidayo, leka ndikupe isi ayi uihalile.”
GEN 15:8 Ila Abulamu nakamlonjela, “Gwaa Mkulu Nguluwi, ndovizela ndaze kota ndoihalila isi ayi?”
GEN 15:9 Mkulu Nguluwi nakamlonjela, “Ndigalile isenga ilogota idala liwele na miyaka jidatu, mhene ndala iwele na miyaka jidatu, ing'holo ilume liwele na miyaka jidatu, na ng'hunda na ibofu lya ng'hunda.”
GEN 15:10 Abulamu nakamigalila ajo jeng'ha, nakajidumula chila igongolo vihande vili, na kuviwika goya banzi mbili kudilo na kumoso, vichilola, ila videje nahavidumule vihande vili.
GEN 15:11 Na ndapo lowaiwinzile vihande vila Abulamu nakawa yowawinga.
GEN 15:12 Isanya loluwele luzibila, Abulamu nakebatika na usinjizi lukami, kudumba na jiza totolo navimgubika.
GEN 15:13 Aho Mkulu Nguluwi nakamlonjela Abulamu, “Uvizele ng'hatu kota walelwa wa hegwe wochikala kota wajenzi kuli isi yohaiwele ya hewo, wowa wapogozi na wogazigwa kwa mhela wa miyaka miya zine.
GEN 15:14 Lelo ndowatagusa wanhu wa nhanzi ya isi ilinguwadita wapogozi, na hamba wala wawele muupogozi wolawa wawele na lufufu lwinji.
GEN 15:15 Ila hegwe kobagama goya ng'hatu houchikala kwa mhela wa kuhega.
GEN 15:16 Walelwa wa hegwe wohiluka aha kuli lulelo lwa kane, kwa vila wihe wa Waamoli hauwele wa kuhega kutagusigwa.”
GEN 15:17 Loifichile matinazo kwali na jiza, Nguluwi nakalajiza chiya chilingufung'ha iyosi na chiluli chilingwaka navyoneka vikola hagati ha vila viwunde.
GEN 15:18 Mkulu Nguluwi kadita ilagano na Abulamu aku yolonga, “Walelwa wa hegwe ndanguwapa isi ayi, kulawila lwanda lwa Naili lwa Misili mbaka lula lwanda lukulu lwa Eyufulate,
GEN 15:19 ndo ila iwele isi ya Wakeni na Wakenisi na Wakadimoni
GEN 15:20 na Wahiti na Wapelisi na Walefayi
GEN 15:21 na Waamoli na Wakanaani na Wagiligashi na Wayebusi.”
GEN 16:1 Lelo Salai, mdala wa Abulamu, nayang'hali kumpondela mwana wa heye. Ila nayali na chitumagwa mdala nayali yochemigwa Hagali, kulawa Misili.
GEN 16:2 Lelo Salai nakamlonjela Abulamu, “Kuvizela kota Mkulu Nguluwi hamhele lulelo lwa kuponda wana. Umhole Hagali chitumagwa wa heni mdala, hanji ndopata wana kwa kukolela heye.” Abulamu nakakunda ulonzi wa Salai.
GEN 16:3 Hamba, Salai nakampa Abulamu Hagali, chitumagwa wa heye mdala yalawile Misili yawe mchewake. Aga nagalawila Abulamu nayekalile Kanaani kwa mhela wa miyaka kumi.
GEN 16:4 Abulamu nakamhola Hagali, na heye Hagali nakawa na himila. Ila baho du loyawene kahola himila, Hagali nakaluka kumbeza mkulu wake Salai.
GEN 16:5 Salai nakamlonjela Abulamu, “Hegwe yokuwala kwa wihe wondilinguditigwa! Heni nandikupa chitumagwa wa heni mdala, ila loyaholile himila du, heni ndiwa siwele munhu hameho hake. Mkulu Nguluwi nayataguse mbuli ya hegwe na heni!”
GEN 16:6 Ila Abulamu nakamlonjela Salai, “Chitumagwa wa hegwe mdala ka hasi ha ludali lwako, mditile kota louvigana.” Lelo Salai nakamgaza Hagali mbaka nakanyeleduka.
GEN 16:7 Mhilisi wa Mkulu Nguluwi nakamfika Hagali hawele na nzasa ya mazi kuchiwala, nzasa iwele mnzila kulutila Shuli.
GEN 16:8 Mhilisi nakamuuza, “Hagali, chitumagwa mdala wa Salai, kwangulawa kohi na kwanguza kohi?” Hagali nakamwidichila, “Ndangumbilima Salai mkulu wa heni.”
GEN 16:9 Yula mhilisi wa Mkulu Nguluwi nakamlonjela Hagali, “Hiluche kwa mkulu wa hegwe Salai na umhulichize heye.”
GEN 16:10 Kwa ago geng'ha, mhilisi wa Mkulu Nguluwi nakamlonjela Hagali, “Ndokonjezela lulelo lwako mbaka walemwele kuwazigwa kwa winji wa hewo.”
GEN 16:11 Hamba ayo mhilisi wa Mkulu Nguluwi nakamlonjela, “Hegwe kuna himila na koponda mwana mlume, komchema itagwa lyake Ishimaeli, mina Mkulu Nguluwi nakalola kugaya kwa hegwe.
GEN 16:12 Ishimaeli kochikala kota idogowi lya kisolo, kowa mng'honyo wa chila munhu, na chila munhu kowa yamwihilwe. Kochikala yawele mwihe wa ivyazi lyake.”
GEN 16:13 Lelo Hagali nakampa itagwa Mkulu Nguluwi loyasimile na heye ako, “Hegwe ndo Nguluwi yalingumbona heni” Kwa vila nakejesa, “Ndangukomya aha ndimona heye yalingumbona heni.”
GEN 16:14 Ndo mina lila izimbo lyanguchemigwa Beeli-lahai-loi. Izimbo ali lya hagati ha Kadeshi na Beledi.
GEN 16:15 Hagali nakampondela Abulamu mwana mlume. Abulamu nakamchema mwana ayo Ishimaeli.
GEN 16:16 Abulamu nayali na miyaka makumi nane na sita, mhela Hagali naloyampondile Ishimaeli.
GEN 17:1 Mhela Abulamu naloyawele na miyaka makumi tisa na tisa, Mkulu Nguluwi nakamlawila, na kumlonjela, “Heni nda Nguluwi yawele na mong'ho. Uwinze ulongozi wa heni na kikala goya ulihela nongwa.
GEN 17:2 Leka mbiche ilagano lya heni na hegwe na kukonjezela ng'hatu lulelo lwako.”
GEN 17:3 Aho Abulamu nakafugama. Na heye Nguluwi nakamlonjela,
GEN 17:4 “Ndanguwika ilagano ali na hegwe. Kowa mhaza wa nhanzi nyinji.
GEN 17:5 Kulawila sambi, huchemigwa kahi Abulamu, ila kochemigwa Abulahamu, mina ndikudita uwe mhaza wa nhanzi nyinji.
GEN 17:6 Ndokudita uwe na wana wenji ng'hatu, kwa hegwe ndolavya nhanzi nyinji na wandewa wolawa kwa heye.
GEN 17:7 Ndolibatilila ilagano lya heni na hegwe, lulelo lwa hegwe na lulelo lwawo lweng'ha mazuwa gose ne kuduma, kahi ndowa Nguluwi wa hegwe na Nguluwi wa lulelo lwako mazuwa gose.
GEN 17:8 Ndokupa hegwe na lulelo lwako isi ayi youlingikala kota mjenzi, mina isi yeng'ha ya Kanaani iwe ya hemwe mazuwa gose, na heni ndowa Nguluwi wa hewo.”
GEN 17:9 Hamba Nguluwi nakamlonjela Abulahamu, “Kwa banzi ya hegwe, hegwe kolibatilila ilagano lya heni, hegwe na lulelo lwako lweng'ha na lulelo lwao lweng'ha.
GEN 17:10 Ali ndo ilagano loulibatilila kuli heni na hegwe na lulelo lwako, chila mlume hali hemwe imgana yenjile ikumbi.
GEN 17:11 Mokwinjila ikumbi, na ayi ndo yowa ulajilo wa ilagano lya heni na hemwe.
GEN 17:12 Chila mwana mlume wa mazuwa nane hali hemwe imgana yenjile ikumbi. Chila mlume kuli lulelo lwenu, yawe munhu yapondigwe mng'handa mwenu ama yaguligwe kwa sendi za hemwe kulawa kwa mjenzi yohawele lulelo lwenu.
GEN 17:13 Ena, chila yumwe wa hewo yapondigwe kuli ng'handa ya hegwe na yaguligwe kwa sendi za hegwe ndangukomya, imgana yenjile ikumbi. Acho ndo chilajilo cha ilagano lyangu kuli ng'huli za hemwe, ilagano lya mazuwa gose ne kuduma.
GEN 17:14 Mlume yoneche yohenjile ikumbi kobaguligwa na wanhu wa heye, kwa vila nakabena ilagano lya heni.”
GEN 17:15 Hamba Nguluwi nakamlonjela Abulahamu, “Nakuwala mdala wa hegwe, humchema kahi itagwa lyake Salai, ila itagwa lyake lyowa Sala.
GEN 17:16 Ndomtambichiza, na heye kokupondela mwana mlume. Ena ndomtambichiza Sala, na heye kowa mamo wa nhanzi nyinji na wandewa wa isi wolawa kwa heye.”
GEN 17:17 Aho Abulahamu nakafugama, nakaseka mnhumbula mwa heye yochijesa, “Hambi, yokomya ng'hatu mwana kupondigwa na ng'hongoloka wa miyaka miya? Na ndaze, Sala yawele na miyaka makumi tisa, koweza kuponda mwana?”
GEN 17:18 Lelo Abulahamu nakamlonjela Nguluwi, “Na uwe ukundile ilagano alyo na uwe uliwichile kwa Ishimaeli.”
GEN 17:19 Nguluwi nakamwidichila, “Hebu, ila mdala wa hegwe Sala kokupondela mwana mlume, nagwe komchema Isaka. Ndoliwika goya ilagano lyangu kwa heye na walelwa wa heye, naliwe ilagano lya mazuwa gose.
GEN 17:20 “Na mbuli ya Ishimaeli, nyhulika kulanda kwa hegwe. Ndomtambichiza, na kowa na wana wenji na kumonjezela ng'hatu. Ishimaeli kowa mhaza wa wandewa kumi na weli, na heni ndomdita yawe mhaza wa nhanzi ng'hulu.
GEN 17:21 Ila ilagano lyangu lyotawizwa kwa Isaka yawele kokupondela Sala mwaka ukuya mhela kota awu.”
GEN 17:22 Lelo Nguluwi loyasindile kulonga, nakamleka Abulahamu, nakaheluka kilanga.
GEN 17:23 Aho, Abulahamu nakamwinjiza ikumbi mwanage Ishimaeli, na kuwenjiza ikumbi walume weng'ha nawapondigwe mng'handa mwake na waguligwe kwa sendi za heye, nakawenjiza ikumbi weng'ha zuwa lilila kota Nguluwi navyoyamlajize.
GEN 17:24 Abulahamu nayali na miyaka makumi tisa na tisa naloyenjizwe ikumbi.
GEN 17:25 Na Ishimaeli mwanage nayali na miyaka kumi na midatu naloyenjizwe ikumbi.
GEN 17:26 Abulahamu na mwanage Ishimaeli, hamwe na walume weng'ha wa ng'handa ya heye na wanhu weng'ha nawapondigwe mng'handa mwake na wala waguligwe kwa sendi za heye nawenjizwa ikumbi zuwa lilila.
GEN 18:1 Mkulu Nguluwi nakamlawila Abulahamu hali miyaloni ja Mamle. Abulahamu nayali yekale hali lwizi lwa chibumuli cha heye mhela wa ivuche lya nemisi,
GEN 18:2 na loyenule meho ga heye, nakawona wanhu wadatu wemile kutali hado na heye. Baho loyawawene, nakalawa yobilima kuluta kuwabochela. Loyafichile kenamiza mbaka hasi,
GEN 18:3 na kulonga, “Wakulu, wone mlingungana ndanguwalanda mleche kukola hondili chitumagwa wa hemwe.
GEN 18:4 Mochigalilwa mazi mado leka muhovuje magulu na kwesela hali migodi mlubehelo.
GEN 18:5 Mhela homukwesela, ndowa nditeleka ndiya, mulye, leka muwe na mong'ho wa kulutilila na majendo, mina muya kwa heni chitumagwa wa hemwe.” Na hewo nawalonga, “Goya, udite kota vyoulonjile.”
GEN 18:6 Abulahamu nakahiluka himahima kuli chibumuli nakamlonjela Sala, “Uwiche goya himahima vijemo vidatu vya utimbo unojile, utimbe, na usome mibumunda.”
GEN 18:7 Hamba Abulahamu nakalawa himahima nakuluta kuli misenga, nakahagula ilogota limwe linenehe goya, nakamha chitumagwa yumwe yeyohaje kulidumula na kuliteleka.
GEN 18:8 Kahi Abulahamu nakahola mtindi na matombo na ajila miwunde ja ibuguma jiwele jisomigwe goya, na kuwawichila wajenzi awo chilyo, na heye nakema behi na hewo kuwaditila nalowali wolya hasi ha igodi.
GEN 18:9 Awala wajenzi nawamuuza, “Mdala wa hegwe Sala kakohi?” Abulahamu nakawedichila, “Kamchibumuli.”
GEN 18:10 Yumwe wa hewo nakalonga, “Ndangukomya ndokuhiluchila mhela kota awu mwaka ukuya, na mdala wa hegwe Sala kowa na mwana mlume.” Sala nayali yohulichiza kuli lwizi lwa ihema naluwele kumbele kwa heye.
GEN 18:11 Abulahamu na Sala nawali walalile, na heye Sala mbuli zila za wadala nazali zidumile katali.
GEN 18:12 Lelo Sala nakaseka mgati mwa nhumbula yolonga, “Heni ndala, na mkulu wa heni Abulahamu hihyo. Ndaze, londiwa ndalile hino, ndoweza kusangalala na kuwa na wana?”
GEN 18:13 Aho Mkulu Nguluwi nakamuuza Abulahamu, “Lekachoni Sala nakaseka na kiwuza vyoiwa yawe na mwana vyoyawele yalalile?
GEN 18:14 Ndaze, hana mbuli yoneche haiditikwa kwa Mkulu Nguluwi? Ndokuhiluchila mhela uwichigwe, mhela kota awu mwaka ukuya, na Sala kowa na mwana mlume.”
GEN 18:15 Ila Sala, nayawele yodumba, nakabela yolonga, “Sisechile!” Mkulu Nguluwi nakamlonjela, “Hebu, kuseka nakuseka.”
GEN 18:16 Hamba wala wanhu nawoka, nawaulola muji wa Sodoma, na heye Abulahamu nakawasindichiza.
GEN 18:17 Lelo Mkulu Nguluwi nakejesa, “Ndaze, ndimvise Abulahamu mbuli ilibehi kuidita?
GEN 18:18 Heye Abulahamu kowa mhaza wa wanhu wa nhanzi ng'hulu na kwa heye nhanzi za isi zeng'ha zotambichizwa.
GEN 18:19 Ndimhagula heye leka yawalajize walelwa wa heye kibatilila nzila ya Mkulu Nguluwi, wawe watanganiche na kutagusa goya, ahyo Mkulu Nguluwi komigalila Abulahamu kota navyoyalagane.”
GEN 18:20 Lelo Mkulu Nguluwi nakalonga, “Hana kung'ung'utilwa lukami kwa muji wa Sodoma na Gomola na gehile ga hewo makulu ng'hatu.
GEN 18:21 Lelo ndodulika kuluta ako ndikelolele nene kota kukomya nawadita kota vila chililo vyochimbuyile. Ndangugana kuvizela.”
GEN 18:22 Kulawa baho, wala wanhu nawebatilila nzila ya kuluta Sodoma, ila Abulahamu nayang'hali yemile hali Mkulu Nguluwi.
GEN 18:23 Lelo Abulahamu nakamhejelela Mkulu Nguluwi, na kumuuza, “Ndaze, kwangukomya kowakopola wanhu wanojile hamwe na wehile?
GEN 18:24 Hanji wamumo wanhu wanojile makumi gahano amo mli muji. Ndaze, koubagamiza muji weng'ha huuleka hebu kwa wala makumi gahano wanojile wawele amo?
GEN 18:25 Ndangijesa kota hudita ahyo hebu. Kuwakopola wanhu wanojile hamwe na wehile, wanojile kuditilwa kota wehile. Hebu! Mtagusa wa isi yeng'ha holeka kutagusa gawele goya.”
GEN 18:26 Mkulu Nguluwi, nakamlonjela, “Hondiwafika wanhu wanojile makumi gahano kula Sodoma, ena ndouleka muji weng'ha uwe goya kwa mbuli ya hewo.”
GEN 18:27 Abulahamu nakalonga, “Njeza kowa na nhunmbula ikangele ya kulongasa na Mkulu, hanga heni siwele chinhu, nda kota misanga na mivu hela.
GEN 18:28 Hanji wabaho wanhu wanojile makumi gane na wahano kwa wala makumi gahano. Ndaze, koubagamiza muji weng'ha kwa vila wapuka wanhu wahano?” Mkulu Nguluwi nakamwidichila, “Siubagamiza muji wone kowa na wanhu wanojile makumi gane na wahano.”
GEN 18:29 Abulahamu nakonjezela kulonga, “Hanji wanhu makumi gane wawele amo.” Nguluwi nakamwidichila, “Kwa mbuli ya wanhu wanojile makumi gane, sidita ahyo.”
GEN 18:30 Abulahamu nakonjezela kulonga, “Mkulu, ndangulanda uleche kunzudila, na heni ndolonga kahi. Hanji wowabaho wanhu wanojile makumi gadatu.” Mkulu Nguluwi nakamwidichila, “Sidita ahyo hondiwafika awo wanhu makumi gadatu.”
GEN 18:31 Abulahamu nakalonga, “Nanjeza kulonga na Mkulu kwa nhumbula ikangale. Hanji wowa baho wanhu wanojile makumi meli.” Nguluwi nakamwidichila, “Kwa mbuli ya awo wanhu makumi meli wanojile, siubagamiza hebu.”
GEN 18:32 Hamba Abulahamu nakalonga, “Mkulu, ndangulanda uleche kunzudila, ila ndolonga kahi kamwe hela. Ndaze, wone wawe wanhu wanojile kumi, yowa ndaze?” Mkulu Nguluwi nakamwidichila, “Kwa mbuli ya awo wanojile kumi, siubagamiza muji awo.”
GEN 18:33 Mkulu Nguluwi loyasindile kulonga na Abulahamu, nakoka, na heye Abulahamu nakahiluka kaye.
GEN 19:1 Wala wahilisi weli nawafika muji wa Sodoma matinazo. Loti nayawele yekalise hali lwizi lwa muji wa Sodoma, loyawawene nakenuka kuwabochela, nakenamiza mbaka hasi
GEN 19:2 na kulonga, “Wakulu wa heni, muye hakaye hangu heni chitumagwa wa hemwe. Moweza kuhovuga magulu na kuwasa kwa heni nechilo ya lehano. Lufuku ng'hanu hananya moweza kulutilila na majendo ga hemwe.” Ila hewo nawalonga, “Hebu, hetwe towasa honhu hawele hagati ha muji.”
GEN 19:3 Loti nakawadedeza lukami, hamba nawamkundila, nawagaluka na kwinjila mng'handa mwake. Loti nakawawichila chilyo, nakapanila mibumunda johajiwichigwe usaso, nawalya.
GEN 19:4 Ila nalowang'hali kuwasa nechilo, walume weng'ha wa muji wa Sodoma na wasongolo na wasekulu, nawaizunguluta ng'handa ya Loti.
GEN 19:5 Nawamchema Loti na kumuuza, “Wakohi wala walume wezile kwa hegwe? Walavye kunze. Twangugana kuwasa nawo.”
GEN 19:6 Loti nakalawa kunze, nakapajila lwizi kumbele kwa heye,
GEN 19:7 nakawalonjela, “Wang'holozangu, ndanguwadedeza mleche kudita wihe awo.
GEN 19:8 Mlole, ndanawo wahinza weli wang'hali wasa na mlume. Mng'hundize ndiwape awo wahinza muwadite kota vyomgana. Ila mleche kuwaditila chinhu choneche chila walume awa kwa vila awa ndo wajenzi wawele hali wamizi wa heni.”
GEN 19:9 Ila hewo nawalonga, “Hejela! Hegwe nakuya hano kota mjenzi na sambi kwangidita mtagusa. Lelo tokudita vibi kusinda awo wajenzi wa hegwe.” Aho nawamkundujiza Loti kumbele behi na kuubegula lwizi lwa heye.
GEN 19:10 Ila wala wajenzi nawagolola moko gawo, nawamkwega Loti mng'handa na kupajila lwizi.
GEN 19:11 Hamba wawatowa kwa lumwemwesa lung'ang'ale kumeho na walemwela kulola walume weng'ha nawawele hali lwizi, wakulu kwa wadodo, mbaka nawapala kohi hawele na lwizi nahawauwene.
GEN 19:12 Wala wanhu weli nawamlonjela Loti, “Ndaze, kwanaye munhu yunji ahano, hanji wakasano ama wasongolo ama wahinza wa hegwe ama wanhu wanji wa ivyazi lyako walingikala hano, walavye honhu aha himahima,
GEN 19:13 kwa vila twahabehi kuubagamiza muji awu, mina chililo nachimfichile Mkulu Nguluwi kulawa kwa wanhu wa muji awu ndo kukulu ng'hatu, leka heye katulajiza tuye kuwabagamiza.”
GEN 19:14 Lelo Loti nakawalutila wakasano wa heye, nakawalonjela, “Himahima! Mlawe honhu aha, mina Mkulu Nguluwi koubagamiza muji awu.” Ila hewo nawamona kota munhu msechezi hela.
GEN 19:15 Lufuku, wahilisi nawamhimiliza Loti wolonga, “Ulilimche, muhole mdala wa hegwe na awa wahinza wa hegwe weli mleche kubagama mhela muji awo hougazigwa.”
GEN 19:16 Loti nakawa yogogoma. Ila kwa vila Mkulu Nguluwi vyoyamonele isungu Loti, wala wahilisi nawamibata heye na mdala wa heye na wahinza wa heye weli, na kumlavya kunze ha muji ula.
GEN 19:17 Nalowawalavile kunze ha muji, mhilisi yumwe nakawalonjela, “Mbilime kwa kuulohola ukomu wa hemwe. Mleche kulola kumbele ama kwima mibindi. Mbilimile kuchidunda, mleche kubagamizwa.”
GEN 19:18 Loti nakawalonjela, “Hebu, wakulu wa heni!
GEN 19:19 Ndangukomya kota heni chitumagwa wa hemwe ndina igano lya kwimilila hameho henu, na hemwe miwonela isungu ng'hatu kwa kuulohola ukomu wa heni, ila kuchidunda kwa kutali lukami. Ibagamizo ali lyofika nding'hali fika ako, nani ndobagama.
GEN 19:20 Mlole, kula kuna muji mdodo uwele behi ndoweza kubilimila ako. Lelo mng'hundize mbilimile ako. Ula ndo muji mdodo hela, na ako ndowa mkomu.”
GEN 19:21 Na heye nakamwidichila, “Goya, ndikukundiza kulanda kwa hegwe. Siubagamiza muji wouchemile.
GEN 19:22 Udite himahima. Ubilimile ako, na heni siweza kudita chinhu choneche mbaka houfika ako.” Lelo muji awo nauchemigwa Soali, ulinguzeleka kota udodo.
GEN 19:23 Isanya nalyali lilawile mhela Loti loyafichile hali muji wa Soali.
GEN 19:24 Ndo Mkulu Nguluwi nakalagaza hasi chiluli ching'ang'ale cha chikwatilo kulawa kilanga kwa muji wa Sodoma na Gomola,
GEN 19:25 nakajibagamiza miji ajo na ibindi lyeng'ha na wanhu weng'ha na mizuchila jeng'ha kuli misanga.
GEN 19:26 Ila mdala wa Loti nayawele kumbele kwa Loti, nakalola kumbele, nakagaluka ibiwi lya mwino.
GEN 19:27 Loiwele lufuku, Abulahamu nakaluta honhu hoyawele yemile kumwando kwa Mkulu Nguluwi.
GEN 19:28 Loyali aho, nakalola hasi nzingo za Sodoma na Gomola na honhu heng'ha ha ibindi, kwa kona iyosi likwina, iyosi kota itanuli ling'hangala.
GEN 19:29 Nguluwi loyajibagamize miji ja kibindi koyawele yochikala Loti, nakamkumbuka Abulahamu kwa kumlavya Loti kuli miji ajo, leka Loti yaleche kubagama hamwe na hewo.
GEN 19:30 Loti nakadumba kikala kuli muji wa Soali, lelo nakoka muji awo, heye hamwe na wahinza wa heye weli, nawaluta kikala mipalika kuchidunda.
GEN 19:31 Nalowawele ako, mhinza mkulu nakamlonjela lumbulye, “Mhaza wa hetwe nakalala, na kuduhu mlume muisi wa kuwasa na hetwe kota vyoilinguganigwa kuli chihendo.
GEN 19:32 Lelo tumgalize mhaza kwa divai, leka tuwase na heye na kukangaza lulelo kwa kuponda wana na heye.”
GEN 19:33 Nechilo ayo nawamgaliza mhaza wa hewo kwa divai, na yula mhinza mkulu nakaluta kuwasa na heye. Ila mhaza wa heye nahavizelele mhela mhinza wa heye loyawasile na heye na loyochile.
GEN 19:34 Mitondo, yula mhinza wa mwaluko nakamlonjela yula mdodo, “Haucha nechilo heni nambasa na mhaza, lehano kahi tumgalize na divai, hamba hegwe uwase na heye, leka hetwe twesa tukangaze lulelo kwa kuponda wana kwa mhaza wa hetwe.”
GEN 19:35 Lelo nechilo ayo kahi nawamgaliza mhaza wa hewo kwa divai, hamba yula mhinza nakaluta kuwasa naye. Ila mhaza wa heye nahavizelele mhela mhinza wa heye hoyawasile na heye, na loyochile.
GEN 19:36 Lelo wahinza weng'ha weli wa Loti nawawa na himila kwa kuwasa na mhaza wa hewo.
GEN 19:37 Yula mhinza wa mwaluko nakaponda mwana mlume, nakamchema Moabu. Ayo ndo mhaza wa Wamoabu mbaka lehano.
GEN 19:38 Yula mhinza mdodo kahi nakaponda mwana mlume, nakamchema Beni-ami. Ayo ndo mhaza wa Waamoni mbaka lehano.
GEN 20:1 Kulawila Mamle, Abulahamu nakenula majendo kulutila Negebu, nakadita luga lwake hagati ha Kadeshi na Shuli, hamba nakaluta kikala ako Gelali kwa mhela uchefu.
GEN 20:2 Loyawele ako, Abulahamu nakalonga kota mchewake Sala ka lumbulye. Lelo mndewa Abimeleki wa Gelali nakamhesa Sala.
GEN 20:3 Ila Nguluwi nakamuyila Abimeleki nechilo loyali yolota, nakamlonjela, “Hegwe kobagama kwa mbuli ya mdala youmholile, kwa vila kana mlume wake.”
GEN 20:4 Abimeleki nayang'hali wasa na Sala, nakedichila, “Mkulu, kowakopola wanhu wohawawele na nongwa?
GEN 20:5 Heye Abulahamu ndo yalonjile kota ayu mdala ka lumbulye. Kahi na heye Sala nakalonga kota Abulahamu kalumbu wa heye. Heni ndita vyonditile kwa nhumbula igoloche ndahela nongwa.”
GEN 20:6 Nguluwi nakamlonjela koyali yolota, “Goya. Ndivizela kota kudita ahyo kwa nhumbula igoloche, na heni ndo ndikulemeze kudita gehile ago, ndo mina sikukundiza umdolize ayo mdala.
GEN 20:7 Lelo umhiluse ayo mdala kwa mlume wa heye. Abulahamu ndo mloli wa heni, na heye kokulandila nagwe kowa mkomu. Ila wone humhiluse, uvizele ng'hatu kota hegwe kobagama hamwe na wanhu wa hegwe weng'ha.”
GEN 20:8 Abimeleki nakalilimka lufuku, nakawachema vitumagwa wa heye weng'ha na kuwalonjela mbuli nazoyaziwene koyali yolota, na hewo nawadumba ng'hatu.
GEN 20:9 Baho, Abimeleki nakamchema Abulahamu, na kumuuza, “Nakutuditila choni? Lekachoni nakunyambuza heni kudita gehile na sambi Nguluwi kangugana kungaza heni na undewa wa heni? Kunditila mbuli zohaziganigwa kuditigwa.”
GEN 20:10 Abimeleki nakalutilila kumuuza Abulahamu, “Chinhu chachi chikuditile kudita hino?”
GEN 20:11 Abulahamu nakamwidichila, “Nandita hino kwa vila nandijesa kota kuduhu munhu ne yumwe yalingumdumba Nguluwi honhu hano, na kota mwahang'hopole leka mumhole mchewangu.
GEN 20:12 Kuleka kwa ago, ndangukomya, heye ka lumbulyangu, mhaza wa heye na mhaza wa heni ndo yumwe, ila hatihanzile mamo, ndo mina kawa mchewangu.
GEN 20:13 Mhela Nguluwi loyanditile ndiileche ng'handa ya mhaza wa heni na kuluta kuujenzi, nandimlonjela mchewangu, ‘Honeche hotuluta, dedede ulajile igano kwa heni kwa kulonga kota heni nda lumbulyo.’ ”
GEN 20:14 Abimeleki nakamhilusila Abulahamu mchewake Sala, nakamha na ming'holo na misenga na vitumagwa walume na wadala.
GEN 20:15 Abimeleki nakamlonjela Abulahamu, “Ulole, isi ayi yeng'ha ya heni. Lelo uhagule heng'ha hala uhaganile, wikale.”
GEN 20:16 Hamba nakamlonjela Sala, “Ulole, heni ndimha mng'holozo migwala maelufu menji leka kuwalajila wawele hamwe na hegwe kota kwahela nongwa, nakutawizwa kota kwahela nongwa”
GEN 20:17 Hamba Abulahamu nakamlanda Nguluwi, na heye kamlohola Abimeleki na mchewake na vitumagwa wa heye mdala, mbaka nawaweza kuponda kahi wana.
GEN 20:18 Aho mwaluko Mkulu Nguluwi nayali yawalemeze wadala weng'ha wa ng'handa ya Abimeleki kuponda wana kwa mbuli ya Sala mchewake Abulahamu.
GEN 21:1 Mkulu Nguluwi nakamkumbuka Sala, nakamditila kota vyoyelahile.
GEN 21:2 Abulahamu naloyali yalalile, Sala nakahola himila, nakampondela mwana msongolo, mhela wuwula Nguluwi woyalonjile.
GEN 21:3 Abulahamu nakamchema ayo mwana yampondile Sala itagwa lyake, Isaka.
GEN 21:4 Isaka loyafichile mazuwa nane, Abulahamu nakamwinjiza ikumbi kota Nguluwi vyoyalajize.
GEN 21:5 Abulahamu nayali na miyaka miya imwe, mhela mwanage Isaka naloyapondigwe.
GEN 21:6 Na heye Sala nakalonga, “Nguluwi kangalila lusele, yoneche yohulika mbuli azi, koseka hamwe na heni.”
GEN 21:7 Hamba nakonjezela, “Yalikohi nayahamlonjele Abulahamu kota heni Sala ndokonyeza wana? Na ndimpondela mwana msongolo kuli ulalilo wa heye.”
GEN 21:8 Isaka nakalutilila kukula, na zuwa loyalechile kong'ha, Abulahamu nakadita mnvina ng'hulu.
GEN 21:9 Hamba Sala nakamona Ishimaeli, mwana wa Abulahamu yapondigwe na Hagali Mmisili, yoseka.
GEN 21:10 Sala nakamlonjela Abulahamu, “Umuwinje chitumagwa ayo mdala hamwe na mwanage. Kwa vila hohalila hamwe na mwana wa heni Isaka.”
GEN 21:11 Mbuli ayi naimigalila masinzo lukami Abulahamu kwa vila Ishimaeli na heye nayali mwanage.
GEN 21:12 Ila Nguluwi nakamlonjela Abulahamu, “Uleche kisinza kwa mbuli ya mwana ayu, na ayo chitumagwa wa hegwe mdala. Lyoneche loyokulonjela Sala, udite, ndangukomya walelwa wa hegwe wondikulahile wolawa kwa Isaka.
GEN 21:13 Na mbuli ya ayo mwana wa chitumagwa wa hegwe mdala ndomdita yawe mhaza wa nhanzi ng'hulu kwa vila heye naye ka mwana wa hegwe.”
GEN 21:14 Ahyo lufuku, Abulahamu nakahola chilyo na kajilo ka mazi, nakamha Hagali na kumdwika mmayega, na kumuwinga hamwe na mwanage. Hagali nakoka, kawa yojendajenda mchihulo Beeli-sheba.
GEN 21:15 Nayali mazi nalogamalile mli kala kajilo, Hagali nakamuwasiliza mwanage hasi migodi.
GEN 21:16 Heye nakaluta hafungo, kekala utali wa kota magulu miya imwe hino, yolonga mnhumbula mwa heye, “Inoga ndeche kumona mwanangu yobagama.” Naloyawele yekalise aho nakaluka kulila.
GEN 21:17 Nguluwi nakamhulika mwana ayo yolila, na mhilisi wa Nguluwi nakamchema Hagali kulawila kilanga, na kumlonjela, “Kuna nongwa yachi Hagali? Uleche kudumba, Nguluwi nakahulika lizi ya mwana ako kouwele.
GEN 21:18 Wime na umwinule mwana mibate goya mmoko mwa hegwe, mina ndomdita yawe mhaza wa nhanzi ng'hulu.”
GEN 21:19 Nguluwi nakamgubula Hagali meho, na heye nakalyona izimbo lya mazi. Nakaluta kamemeza mazi mkajilo, na kumnweza mwanage.
GEN 21:20 Nguluwi kawa hamwe na ayo mwana, na heye nakalutilila kukula. Nakekala kuchihulo nakawa mlasa msale.
GEN 21:21 Nayali yochikala kuli chihulo cha Palani, na mayake nakamhesela mdala kulawa isi ya Misili.
GEN 21:22 Mhela awo, Abimeleki hamwe na Fikoli, mkulu wa wamizi wa heye, nakamlutila Abulahamu na kumlonjela, “Nguluwi kahamwe na hegwe kwa chila chinhu choulingudita.
GEN 21:23 Lelo ndilahile kwa itagwa lya Nguluwi kota hunditila uhadi heni ama wana wa heni ama walelwa wa heni. Kota heni vyombele nojile kwa hegwe, hihyo nagwe uwe na igano lya kwimilila kwa heni na kwa isi ino youlingikala.”
GEN 21:24 Abulahamu nakalonga, “Ndangilaha.”
GEN 21:25 Mhela awo Abulahamu nayali yomng'ung'utila Abimeleki mbuli ya izimbo lya mazi vitumagwa wa Abimeleki lowali wambochile.
GEN 21:26 Abimeleki nakamlonjela, “Heni sivizelele yalikohi yaditile hino, mbaka lehano hegwe hundonjele, na heni nasinahulika mbuli azi mbaka lehano.”
GEN 21:27 Abulahamu nakahola ing'holo na isenga nakamha Abimeleki nawo weli nawadita ilagano hewo kwa hewo.
GEN 21:28 Abulahamu nakabagula ming'holo myana midala saba.
GEN 21:29 Abimeleki nakamuuza Abulahamu, “Lekachoni kwangubagula ajo ming'holo myana midala saba?”
GEN 21:30 Abulahamu nakamwidichila, “Aji ming'holo myana midala saba ndangukupa kwa moko wa heni baha kota ulolezi kota heni ndo mbawile izimbo alino.”
GEN 21:31 Lelo izimbo alyo nalichemigwa Beeli-sheba, mina weng'ha weli nawawika ilagano kwa kilaha honhu aho.
GEN 21:32 Ahyo nawadita ilagano ako Beeli-sheba. Abimeleki na Fikoli, mkulu wa wamizi wa heye, nakoka na kuhiluka kuli isi ya Wafilisti.
GEN 21:33 Abulahamu nakanyala igodi lilinguchemigwa tamalisiki ako Beeli-sheba, nakalanda kwa itagwa lya Mkulu Nguluwi wa mazuwa gose.
GEN 21:34 Abulahamu nakekala isi ya Wafilisti mihela minji.
GEN 22:1 Loupulute mhela udo hela, Nguluwi nakamjeza Abulahamu. Nguluwi nakamchema, “Abulahamu!” Na heye nakedichila, “Ena ndanguhulichiza.”
GEN 22:2 Nguluwi nakamlonjela, “Umuhole mwanago Isaka, mwanago wa udewele umganile, ulute mbaka isi ya Molia, ukamlavye nhambiko ya kulakazwa kuchanya mwa chidunda chimwenga chondikulajila.”
GEN 22:3 Hamitondo iyage, Abulahamu nakalilimka lufuku, kalilambalika goya idogowi lyake, nakawahola vitumagwa wa heye weli hamwe na Isaka mwanage. Nakatema ngodi kwa mbuli ya nhambiko ya kulakazwa, hamba nakaluka majendo kuluta honhu hoyalonjelwe na Nguluwi.
GEN 22:4 Zuwa lya kadatu, Abulahamu nakenula meho nakahona honhu aho kwa kutali.
GEN 22:5 Abulahamu nakawalonjela wala vitumagwa wa heye, “Betezeni bahano na ali idogowi. Heni na mwana wa heni toluta mbaka kula tukamfugamile Nguluwi, hamba towahiluchilani.”
GEN 22:6 Abulahamu nakamdwika zila ngodi mwanage Isaka, heye yuye nakahola chiluli na chimaje mmoko, na kuka hamwe.
GEN 22:7 Isaka nakamchema mhaza wa heye Abulahamu, “Mhaza!” Na heye nakedichila, “Ena, ndabahano mwanangu.” Isaka nakamuuza mhaza wa heye, “Chiluli na ngodi twanazo, ila ing'holo lya nhambiko ya kulakazwa lya kohi?”
GEN 22:8 Abulahamu nakamwidichila, “Mwana wa heni, Nguluwi heye kotigalila ing'holo lyana lya nhambiko ya kulakazwa.” Nawalutilila na majendo.
GEN 22:9 Nalowafichile honhu hala Nguluwi hoyamlajize, Abulahamu nakazenga honhu ha kulavila nhambiko na kuwika goya ngodi hachanya hake. Hamba nakamuwopa mwanage Isaka na kumuwasiliza mchanya hali ngodi kuli honhu ha kulavila nhambiko.
GEN 22:10 Abulahamu nakagolola moko, kahola chimaje yamdumule mwanage.
GEN 22:11 Ila mhilisi wa Mkulu Nguluwi nakamchema kulawa kilanga, “Abulahamu, Abulahamu!” Na heye nakedichila, “Ena, ndanguhulichiza.”
GEN 22:12 Mhilisi nakamlonjela, “Uleche kumlumiza mwana na uleche kumdita choneche. Sambi ndivizela kota kwangumdumba Nguluwi, kwa vila hundemeze mwanago wa udewele.”
GEN 22:13 Ndo baho Abulahamu nakenula meho, nakona ing'holo ilume, ligwilizwe mbalati kuli miwa hali chisosolo. Nakaluta, kalihola alila ing'holo, na kulilavya nhambiko ya kulakazwa honhu ha mwanage.
GEN 22:14 Lelo Abulahamu nakahachema honhu aho, “Mkulu Nguluwi kotigalila.” Kota vyoilingulonjigwa mazuwa aga, “Kuli chidunda cha Mkulu Nguluwi kotigalila.”
GEN 22:15 Mhilisi wa Mkulu Nguluwi nakamchema Abulahamu lwa keli kulawa kilanga,
GEN 22:16 na kumlonjela, “Mkulu Nguluwi kangulonga hino, ndilaha nene baha, kwa vila kudita hino, nahundemeze mwanago wa udewele,
GEN 22:17 ndangukomya ndokutambichiza, na walelwa wa hegwe ndowonjeza kota nhondwe za kilanga, na kota sangalaza mfungo mwa bahali. Walelwa wa hegwe woihalila miji ja wang'honyo wa hewo.
GEN 22:18 Kulawa kwa walelwa wa hegwe wanhu wa isi zeng'ha wotambichizwa kwa vila hegwe nakwidichila ilajizo lyangu.”
GEN 22:19 Abulahamu nakawahiluchila wala vitumagwa wa heye, nawo nawoka hamwe kuhiluka Beeli-sheba, Abulahamu nakekala ako.
GEN 22:20 Logalawile ago geng'ha Abulahamu nakahulika mbuli kota Milika kahi kampondela Naholi mng'holoze, wana walume.
GEN 22:21 Usi mlelwa wa mwaluko na Busi mng'holoze na Kemueli mhaza wa Alamu
GEN 22:22 na Kesedi na Haso na Pilidashi na Yidilafu na Betueli.
GEN 22:23 Betueli nakamponda Lebeka. Milika nakampondela Naholi, mng'holoze Abulahamu, wana awo nane.
GEN 22:24 Kulawila aho, Leuma mha wa Naholi nayawele kota mchewake, kahi nakampondela wana, Teba na Gahamu na Tahashi na Maaka.
GEN 23:1 Sala nakekala miyaka miya imwe na makumi meli na saba.
GEN 23:2 Nakabagama ako Kiliati-aliba, ako Hebuloni kuli isi ya Kanaani. Abulahamu nakalombocheza na kumditila matanga mchewake Sala.
GEN 23:3 Abulahamu nakauleka mtufi wa mchewake, nakalawa kuluta kulongasa na Wahiti, nakawalonjela,
GEN 23:4 “Heni ndangikala kota mjenzi hali hemwe. Mnguzile honhu ha kubawa chilaga leka nditile mtufi wa mchewangu na wanhu wa heni wabagame hamba.”
GEN 23:5 Wahiti nawamwidichila Abulahamu,
GEN 23:6 “Ena mkulu wa hetwe, tuhulichize, hegwe kwa chilongozi uhaguligwe na Nguluwi hali hetwe. Umtile mchewako kuli chilaga choneche wihagulile, kuduhu yoneche yokulemeza chilaga kwa hetwe, na kukulemeza kutila mtufi wa mchewako na wanhu wa hegwe wabagame.”
GEN 23:7 Aho Abulahamu nakema na kinamiza hamwando ha wanhu wa isi yila ya Wahiti,
GEN 23:8 na kuwalonjela, “Wone mlingung'hundiza ndiutile mtufi wa mchewangu na wanhu wa heni wabagame, dedede mlandeni Efuloni mwana Sohali, kwa mbuli ya heni,
GEN 23:9 yanguzile alila ipalika lyake lya Makipela liwele mmbaka mwa mgunda wa heye. Mumdedeze yanguzile ndilidite vilaga vya heni, yanguzile kwa sendi zakuhega namwe mlibaha.”
GEN 23:10 Efuloni heye nayali bahala howawele Wahiti awo nawawele wating'hane hali lwizi lwa muji. Efuloni Mhiti, nakamwidichila Abulahamu, kumwando kwa Wahiti weng'ha.
GEN 23:11 “Hebu mkulu, dedede unyhulichize. Ndangukupa mgunda weng'ha na ipalika liwele mumo, kahi ndangukupa hamwando ha Wahiti wayangu. Utile amo mtufi wa mchewako na wanhu wa hegwe wabagame.”
GEN 23:12 Abulahamu nakenamiza kahi hamwando ha wanhu wa isi yila ya Wahiti,
GEN 23:13 na kumlonjela Efuloni, leka wanhu weng'ha wahuliche, “Ndangukulanda, dedede unyhulichize. Ndolavya sendi za kuhega mgunda wa hegwe, na ndangukulanda ubochela sendi azo leka ndiutile amo mtufi wa mchewangu na wanhu wa hegwe wabagame.”
GEN 23:14 Efuloni nakamwidichila Abulahamu,
GEN 23:15 “Mkulu, unyhulichize, mgunda wanguguzigwa kwa migwala miya zine ndo chinhu chachi hali heni na hegwe? Utile mtufi wa mchewako na wanhu wa hegwe wabagame.”
GEN 23:16 Abulahamu nakekundiza na Efuloni, nakampimila chasi cha sendi zoyalonjile hawele na Wahiti weng'ha, migwala miya zine, kota naviwele vipimilo vya wawele nguguza vinhu mhela awo.
GEN 23:17 Lelo mgunda wa Efuloni nauwele ako Makipela, kolilawilaga isanya mwa Mamle, ipalika na migodi jeng'ha hamwe na honhu heng'ha, liwa lya heye,
GEN 23:18 Abulahamu hamwando ha Wahiti weng'ha naweting'hane mlwizi lwa muji.
GEN 23:19 Kulawila aho, Abulahamu nakamtila Sala mchewake kuli ipalika alyo naloliwele kuli mgunda wa Makipela, kolilawilaga isanya mwa Mamle, Hebuloni kuli isi ya Kanaani.
GEN 23:20 Mgunda na ipalika liwele amo nalitawizwa na Wahiti liwe lyake Abulahamu yawatile amo wanhu wa heye wabagame.
GEN 24:1 Abulahamu lelo nayali yalalile yawele na miyaka minji, na heye Mkulu Nguluwi nakamtambichiza kwa chila mbuli.
GEN 24:2 Zuwa limwe Abulahamu nakamlonjela chitumagwa wa heye yawele yalalile kusinda weng'ha na mwamizi wa lufufu lwake lweng'ha, “Dedede uwiche moko ga hegwe hasi ha mahaza ga heni, kulajila kota kwangilaha
GEN 24:3 nani ndokulahiza kwa Mkulu Nguluwi, Nguluwi wa kilanga na isi, kota hambe humgalile mwana wa heni mdala yoneche hali wadala wa Wakanaani wondilingikala nawo.
GEN 24:4 Ndilahile kota koluta mbaka kuli isi ya heni, kwa ivyazi lyangu, ukampalile mdala kwa mwana wa heni Isaka.”
GEN 24:5 Chitumagwa nakamlonjela, “Hanji mdala ayo kolema kilongoza na heni kuya akuno, wone iwe ahyo, ndaze, ingana ndimhiluse mwanago kuli isi koulawile?”
GEN 24:6 Abulahamu nakamlonjela, “Hebu! Wilolele ng'hatu uleche kumhilusa mwana wa heni ako.
GEN 24:7 Mkulu Nguluwi, Nguluwi wa kilanga, yandavile kaye kwa mhaza wa heni na kulawa kuli isi yomvumbuche, na yalingulonga na heni, nakandilahila kota kowapa walelwa wa heni isi ayi. Heye komlajiza mhilisi wa heye kumwando mwa hegwe leka umigalile mdala mwana wa heni kulawa ako.
GEN 24:8 Wone mdala ayo kolema kiwinza na hegwe mbaka kuno, lelo chilaho cha heni, hachikubata hebu, ila kwa vyeng'ha vila, uleche kumhilusa mwana wa heni ako”.
GEN 24:9 Lelo chitumagwa ayo nakawika moko wa heye hasi ha mahaza ga Abulahamu, mkulu wa heye, nakilaha kwa mbuli ayo.
GEN 24:10 Hamba, ayo chitumagwa nakahola ngamiya kumi wa mkulu wa heye na kuka yawele na ndolendole zinojile za vinjivinji. Kenula majendo kuluta kuli muji loyekale Naholi, kuli isi ya Mesopotamiya.
GEN 24:11 Loyafichile, nakawafugamiza ngamiya wa heye hafungo mwa izimbo liwele hafungo mwa muji. Nayali matinazo mhela uwele wadala nawalutaga kudeha mazi kuli izimbo.
GEN 24:12 Na heye nakalanda, “Hegwe Mkulu Nguluwi, Nguluwi wa mkulu wa heni Abulahamu, ndangukulanda sumye, na umditile igano lya kwimilila mkulu wa heni Abulahamu.
GEN 24:13 Nda ahano hafungo mwa nzasa hawele wahinza wa wenyeng'haye wa muji huyaga kudeha mazi.
GEN 24:14 Lelo mhinza yondimlonjela, yenenule chiya cha heye cha mazi yangalile mazi nyinwe, na heye nakangalila hamwe na kuwanweza ngamiya wa heni, na yawe ndo youmuhagulile chitumagwa wa hegwe Isaka. Mbuli ayo yondajila kota kumditila igano lya kwimilila mkulu wa heni.”
GEN 24:15 Naloyang'hali kusinda kulanda, baho du Lebeka, mhinza wa Betueli, mwanage Milika, mchewake Naholi, mng'holoze Abulahamu, nakafika yaholile chiya cha heye mmayega.
GEN 24:16 Mhinza ayo nakanoga lukami nayali na kumeho kunojile ng'hatu, na chigoli hanating'hana na mlume yoneche. Lelo nakedulisa minzasa, na kudeha mazi na chiya lochimemile, nakakwina na kuka.
GEN 24:17 Ndo yula chitumagwa nakaluta himahima kuza ting'hana na heye, na kumlonjela, “Dedede, ndangulanda mazi ga kunwa kulawa mchiya cha hegwe.”
GEN 24:18 Mhinza nakamwidichila, “Goya ung'we mkulu wa heni.” Na baho nakanenula chiya cha heye, na kibatilila leka yamnweze.
GEN 24:19 Loyampele mazi, nakamlonjela, “Ndowawichila mazi na ngamiya wa hegwe nawo, wanwe mbaka ng'halu imale.”
GEN 24:20 Lelo nakadita himahima, na kuwajidila ngamiya mazi ga chiya cha heye mibato, na kubilimila kuli izimbo kudeha mazi ganji na kuwanweza ngamiya wa heye weng'ha.
GEN 24:21 Yula chitumagwa nayali yomlola ne kulonga chinhu, yavizele kota Mkulu Nguluwi nakatambichiza majendo ga heye ama hebu.
GEN 24:22 Ngamiya lowanwele mazi, yula munhu nakamvaliza yula mhinza pete ndodo ya dhahabu ya kuvala mmenyhelo iwele na itunyo lya gilamu sita na banjili mbili za dhahabu ziwele na gilamu miya imwe na makumi meli chila imwe.
GEN 24:23 Nakamuuza, “Dedede undonjele, hegwe kwa mhinza wa whaani? Ndaze, hana honhu ha kuwasa hakaye ha mhaza wa hegwe?”
GEN 24:24 Lebeka nakedichila, “Heni nda mhinza wa Betueli, mwana Milika, mchewake Naholi.
GEN 24:25 Kwa hetwe kuna misolo na honhu ha kudimila hakulu na honhu ha kuhega kuwasa wajenzi.”
GEN 24:26 Ndo yula munhu nakenamiza mutwi wa heye, na kumfugamila Mkulu Nguluwi,
GEN 24:27 yolonga, “Yatogoligwe Mkulu Nguluwi, Nguluwi wa mkulu wa heni Abulahamu, yawele hambe yasemwe igano lya kwimilila na makundo ga heye kwa mkulu wa heni. Mkulu Nguluwi kandongoza heni ndute mbaka kwa ivyazi lya mkulu wa heni!”
GEN 24:28 Hamba yula mdala nakabilima kuza kuwalonjela mbuli yila ivyazi lya mayake.
GEN 24:29 Lebeka nayali na mkulugwe yalinguchemigwa Labani. Labani nakalawa yobilima kuza ting'hana na yula munhu kuli nzasa.
GEN 24:30 Labani nayali yaiwene ila pete na banjili mmoko mwa lumbulye na kuhulika mbuli Lebeka nazoyalonjelwe na ayo munhu. Labani nakamfika ayo munhu yemile behi na ngamiya wa heye hafungo mwa nzasa.
GEN 24:31 Labani nakamlonjela, “Uye haluga hetu hegwe utambichizwe na Mkulu Nguluwi. Ndaze kwangwima kunze? Heni mina mbika goya ng'handa na honhu kwa mbuli ya awa ngamiya wa hegwe.”
GEN 24:32 Lelo chitumagwa ayo wa Abulahamu nakenjila mng'handa. Labani nakawachumula ngamiya na kuwagalila misolo, nakamgalila heye na wanhu wa heye mazi ga kuhovujila magulu.
GEN 24:33 Ndiya loipile, yula munhu nakalonga, “Silya mbaka londilonga nachonganile kulonga.” Labani nakamlonjela, “Lelo utulonjele.”
GEN 24:34 Yula munhu nakalonga, “Heni nda chitumagwa wa Abulahamu.
GEN 24:35 Mkulu Nguluwi nakamtambichiza ng'hatu mkulu wa heni, na heye kawa munhu yawele na lufufu. Nakamgalila vilundo vya ming'holo na vilundo vya migongolo jinji jilingudimigwa minji na sendi na zahabu na vitumagwa wadala na walume na ngamiya na midogowi.
GEN 24:36 Sala, mchewake mkulu wa heni kuli ulalilo weng'ha ula, nakampondela mkulu wa heni mwana, na mkulu wa heni nakamha ayo mwana lufufu lwake lweng'ha.
GEN 24:37 Mkulu wa heni nakandita ndilahe yolonga, ‘Humholela mwana wa heni mhinza yoneche kuli wahinza wa Wakanaani ndilingikala kuli isi ya hewo.
GEN 24:38 Ila koluta kuli isi ya heni, kwa wang'holozangu, leka ukampalile mdala mwana wa heni Isaka.’
GEN 24:39 Na heni nandimlonjela mkulu wa heni, ‘Hanji mdala ayo kolema kilongoza na heni kuya kuno.’
GEN 24:40 Ila heye nakalonga, ‘Gwaa Mkulu Nguluwi yalingundongoza mli ukomu wa heni, komlajiza mhilisi wa heye yalute hamwe nagwe na kukudita usumye kuli majendo ga hegwe, nagwe kumholela mwana wa heni mdala kulawa kwa ivyazi lyangu na ng'handa ya mhaza wa heni.
GEN 24:41 Wone houfika kwa ivyazi lyangu na hawokupa ayo mhinza, lelo huchibatigwa hebu na kilaha kwa heni.’
GEN 24:42 “Lehano lofichile kuli nzasa, nandanda, ‘Gwaa Mkulu Nguluwi, Nguluwi wa mkulu wa heni Abulahamu, ndangulanda usumye goya lehano kuli majendo ga heni.
GEN 24:43 Nda ahano hafungo mwa nzasa. Mhinza yokuya kudeha mazi ndo yondimlanda yangalile mazi mado ga kunwa kulawa mchiya cha heye,
GEN 24:44 na heye nakanjidila na kuwadehela mazi ngamiya wa heni, lelo ayo na ndo yahaguligwe na Mkulu Nguluwi yawe mdala wa mwana wa mkulu wa heni.’
GEN 24:45 “Londing'hali sinda kulanda mnhumbula ya heni, baho du Lebeka nakafika na chiya cha heye cha mazi mmayega, nakidulisa kuli nzasa na kudeha mazi. Na heni nandimlonjela, ‘Dedede ndangulanda mazi ga kunwa.’
GEN 24:46 Na heye nakenenula chiya himahima kulawa mmayega mwa heye, na kulonga, ‘Lelo unwe mkulu wa heni. Nandowawichila mazi na ngamiya wa hegwe kahi.’ Lelo heni nyinwa na ngamiya wa heni nawo nakawapa mazi.
GEN 24:47 Ndo nambuza, ‘Ndaze, hegwe kwa mhinza wa whaani?’ Nakandonjela, ‘Heni nda mhinza wa Betueli, mwana Milika, mchewake Naholi.’ Aho ndo hondimpele pete ndodo ya kuwika mmenyhelo na kumvaliza banjili mmoko.
GEN 24:48 Hamba nandimfugamila na kumtogola Mkulu Nguluwi, Nguluwi wa mkulu wa heni Abulahamu, yawele yondongoza kwa nzila igoloche mbaka kwa mhinza wa lukolo lwa mkulu wa heni kwa mbuli ya mwanage.
GEN 24:49 Lelo mndonjele kota mkunda kumditila igano lya kwimilila na makundo kwa mkulu wa heni, wone hebu, lelo mlonje, nani ndovizela cha kudita.”
GEN 24:50 Loyahuliche ago, Labani na Betueli nawamwidichila, “Mbuli ayi nailawa kwa Mkulu Nguluwi, hetwe hatuweza kulonga choneche.
GEN 24:51 Lebeka ayu baha, umhole ulute. Na yawe mdala wa mwana wa mkulu wa hegwe kota Mkulu Nguluwi navyoyalonjile.”
GEN 24:52 Chitumagwa wa Abulahamu loyahuliche ulonzi awo, nakamwinamila Mkulu Nguluwi.
GEN 24:53 Hamba nakalavya vinhu vilingupulika na zahabu na nguwo, nakamha Lebeka. Kahi nakawapa wakulugwe na mayake Lebeka vinoliga vya sendi nyinji.
GEN 24:54 Chitumagwa wa Abulahamu na wanhu woyoyile nawo walya na kunwa na kuwasa kuko. Lowalilimche mitondo, chitumagwa yula nakalonga, “Ndangulanda kuhiluka kwa mkulu wa heni.”
GEN 24:55 Ila mkulugwe na mayake Lebeka nawalonga, “Umleche mhinza yekale na hetwe mhela udo hela, kota mazuwa kumi hino, hamba koluta.”
GEN 24:56 Ila heye nakalonga, “Dedede, mleche kung'hawiza, kwa vila Mkulu Nguluwi mina kagadita goya majendo ga heni, ndangulanda mng'hundize nyhiluche kwa mkulu wa heni.”
GEN 24:57 Na hewo wedichila, “Lelo tumcheme mhinza tumuuze.”
GEN 24:58 Nawamchema Lebeka na kumuuza, “Ndaze, koluta na munhu ayu?” Na heye nakedichila, “Ndoluta.”
GEN 24:59 Lelo nawamleka Lebeka yalute na chitumagwa wa Abulahamu na wanhu wa heye. Chitumagwa mdala yamhembulize lumbulye Lebeka kulawila yavumbuche naye nakalutasa na heye.
GEN 24:60 Lelo nawamtambichiza Lebeka wolonga, “Hegwe lumbuliyetu. Uwe mamo wa maelufu kwa maelufu, walelwa wa hegwe waihalile miji ja wang'honyo wa hewo.”
GEN 24:61 Hamba Lebeka na vitumagwa wadala wa heye nawakwina ngamiya na kumuwinza chitumagwa ayo wa Abulahamu, na hewo weng'ha woka.
GEN 24:62 Mhela awo, Isaka nayali yochile Beeli-lahai-loi, nakawa yochikala ako nzingo ya Negebu.
GEN 24:63 Zuwa limwe matinazo, Isaka nakaluta kumgunda kijesa. Lelo nakalola nakona ngamiya wanguya.
GEN 24:64 Na heye Lebeka loyalolile na kumona Isaka, nakedulika kulawa kuli ngamiya,
GEN 24:65 na kumuuza chitumagwa wa Abulahamu, “Ka whaani yula yalingujenda kula kumgunda, kanguya kutubochela?” Yula chitumagwa nakalonga, “Ka mkulu wa heni.” Lelo Lebeka nakahola igubiko lyake na kigubika kumeho.
GEN 24:66 Yula chitumagwa nakamsimila Isaka geng'ha goyagaditile.
GEN 24:67 Lelo Isaka nakamhola Lebeka mng'handa mwa chibumuli cha Sala mayake, kawa mchewake. Isaka nakamgana Lebeka kwa kumhembuliza loyabagame mayake.
GEN 25:1 Abulahamu namkahola mdala yunji, itagwa lyake lyali Ketula.
GEN 25:2 Ketula nakampondela Abulahamu wana awa, Simulani na Yokishani na Medani na Midiani na Ishibaki na Shua.
GEN 25:3 Yokishani nayali mhaza wa Sheba na Dedani, na walelwa wa Dedani wali Ashulu na Aletushi na Aleumi.
GEN 25:4 Wana wa Midiani wali Efa na Efeli na Enoki na Abida na Elidaa. Weng'ha awo wali walelwa wa Ketula.
GEN 25:5 Abulahamu nakamhaliza Isaka lufufu lwake lweng'ha.
GEN 25:6 Ila wana wa wahawake wanji wa Abulahamu nakawapa ndolendole, na mhela loyali yang'hali mkomu, nakawahilika kuli isi ya kolilawilaga isanya, kutali na mwanage Isaka.
GEN 25:7 Abulahamu nakekala miyaka miya imwe makumi saba na jihano.
GEN 25:8 Abulahamu nakabagama naloyekale kwa mihela minji lukami na ja kuhega, nakaza kilumba na wasekulu wa heye wamlongole.
GEN 25:9 Isaka na Ishimaeli, wanage Abulahamu, wamtila mhaza wa hewo kuli ipalika lya Makipela, behi na Mamle kuli mgunda nauwele wa Efuloni, mwana wa Sohali Mhiti.
GEN 25:10 Abulahamu nayali yagulile mgunda awo kwa Wahiti, kuko du ndo kowatiligwe Abulahamu na mdala wa heye Sala.
GEN 25:11 Loyabagame Abulahamu, Nguluwi nakamtambichiza Isaka mwanage. Na heye Isaka kawa yochikala behi na nzasa ya Beeli-lahai-loi.
GEN 25:12 Ayi ndo mbuli ya walelwa wa Ishimaeli mwanage Abulahamu yapondigwe na Hagali Mmisili nayawele chitumagwa mdala wa Sala.
GEN 25:13 Aga ndo matagwa gawo kota vyowapondigwe, Nebayoti mlelwa wa mwaluko, na wanji ndo Kedali na Adibeli na Mibisamu
GEN 25:14 na Mishima na Duma na Masa
GEN 25:15 na Hadadi na Tema na Yetuli na Nafishi na Kadema.
GEN 25:16 Awo ndo wana wa Ishimaeli, nawawele vilongozi wa nhanzi kumi na mbili, howali kikala na vijiji vya hewo navizeleka kwa matagwa gawo.
GEN 25:17 Ishimaeli nayali na miyaka miya imwe makumi gadatu na saba nakabagama, nakaza kilumba na wasekulu wa heye wamlongole.
GEN 25:18 Walelwa wa Ishimaeli nawekala kuli honhu hawele hagati ha Havila na Shuli, behi na Misili, kulutilila Ashulu. Nawekala wehilwe na ivyazi linji lya Abulahamu.
GEN 25:19 Ayi ndo mbuli ya walelwa wa Isaka mwana wa Abulahamu.
GEN 25:20 Isaka naloyawele na miyaka makumi gane, nakamhola Lebeka mhinza wa Betueli, Mwalamu wa Padani-alamu. Lebeka nayali lumbulye Labani.
GEN 25:21 Lebeka nayali mhende, lelo Isaka nakamlanda Mkulu Nguluwi. Na heye Mkulu Nguluwi nakakunda kulanda kwa heye, Lebeka nakawa na himila.
GEN 25:22 Himila ayo nayali ya wanyambili. Wana awo nawali wochilewa mmunda mwa Lebeka, na heye nakalonga, “Wone hino ndo vyozili mbuli azi, ya choni kuwa mkomu?” Lelo nakaluta kumuuza Mkulu Nguluwi.
GEN 25:23 Mkulu Nguluwi nakamlonjela, “Wanhu wa nhanzi mbili za mmunda mwa hegwe, nhanzi mbili zopondigwa na hegwe, zochibagula. Imwe yowa na ludali kusinda yinji, mkulugwe kowa chitumagwa wa mdodowe.”
GEN 25:24 Mazuwa ga kuponda logafichile, Lebeka nakaponda wanyambili.
GEN 25:25 Wa mwaluko nayali mdung'hu lukuli lweng'ha kota ikoti idung'hu ligongomanyigwe kwa milaika ja migongolo, ahyo nawamchema Esau.
GEN 25:26 Wa keli nakapondigwa yamibate Esau chisigino, ahyo nawamha itagwa lya Yakobo. Isaka nayali yawele na miyaka makumi sita mhela Esau na Yakobo lowapondigwe.
GEN 25:27 Wana awo nawakula, Esau kawa mpelembi ng'hatu, yaganile kikala kisolo, na Yakobo nakawa munhu yaholile na yawele ngugana kikala haluga.
GEN 25:28 Lelo Isaka nakamgana Esau kwa vila yaliyogana kulya upelembi wa heye woyali yochigala, ila Lebeka nakamgana Yakobo.
GEN 25:29 Zuwa limwe, Yakobo loyawele yoteleka chilyo, Esau nakahiluka haluga kulawa kuupelembi yawele na nzala lukami.
GEN 25:30 Ahyo Esau nakamlonjela Yakobo, “Ndangubagama na nzala, dedede, umhe muhuzi awo udung'hu nyinwe, mina nhoka.” Ahyo Esau nakachemigwa Edomu izeleche kota ndung'hu.
GEN 25:31 Yakobo nakedichila, “Tandi unguzile honhu ha uhalizi wa hegwe wa ulelwa wa hegwe wa mwaluko.”
GEN 25:32 Esau nakalonga, “Goya! Ndahabehi kubagama, hachi ya heni ya ulelwa wa mwaluko yonhanza choni?”
GEN 25:33 Yakobo nakamlonjela, “Wilahe tandi.” Aho Esau nakelaha na kumguzila Yakobo honhu ha uhalizi wa ulelwa wa mwaluko.
GEN 25:34 Ndo Yakobo nakamha Esau ibumunda na muhuzi wa mpanda. Esau nakalya na kanwa, hamba koka, kaluta nakoyalawile. Ahyo ndo Esau navyoyaibezile hachi ya heye ya ulelwa wa mwaluko.
GEN 26:1 Hamba nailawila nzala muisi yila, nzala ilivinji na aho katali mhela wa ukomu wa Abulahamu. Isaka nakaluta Gelali kwa Abimeleki mndewa wa Wafilisti.
GEN 26:2 Mkulu Nguluwi nakamlawila Isaka na kumlonjela, “Uleche kuluta Misili, ila wikale kuli isi yondikulonjela.
GEN 26:3 Wikale kuujenzi kuli isi ayo, na heni ndowa hamwe na hegwe na kukutambichiza. Ndokwimilila ilagano nalondimpele mhaza wa hegwe Abulahamu, ahyo ndokupa hegwe na lulelo lwako isi azi zeng'ha.
GEN 26:4 Ndokonjezela lulelo lwako luwe kota nhondwe za kilanga na kuwapa isi azi zeng'ha. Kwa kukolela lulelo lwako, wanhu wa isi zeng'ha muisi wotambichizwa.
GEN 26:5 Kwa vila Abulahamu nakanyhulichiza heni, nakakunda mizilo ja heni na malajizo ga heni na malanguso ga heni na utaguso wa heni.”
GEN 26:6 Lelo Isaka nakekala ako Gelali.
GEN 26:7 Wanhu wa ako nalowamuuzile mbuli za mchewake, heye nakedichila, “Ayu ka lumbulyangu.” Nakadumba kulonga kota kamchewake kwa kudumba kota wanhu wa isi yila wahamkopole kwa chiwalo cha Lebeka, mina Lebeka nakanoga lukami.
GEN 26:8 Naloyekale ako kwa miyaka minji, Abimeleki mndewa wa Wafilisti nakasunjilila mitubuli nakamona Isaka yomkumbatila mchewake Lebeka.
GEN 26:9 Abimeleki nakamchema Isaka na kumlonjela, “Hambi ayu kamchewako. Lekachoni nakulonga kalumbulyo?” Isaka nakedichila, “Kwa vila nandumba kota ndahakopoligwe kwa chiwalo cha heye.”
GEN 26:10 Abimeleki nakamuuza, “Ndo mbuli yachi youtuditile? Yumwe wa wanhu wa heni yahawasile na mchewako, ndangijesa nagwe wahatwambuze kudita gehile.”
GEN 26:11 Ndo baho Abimeleki nakawalonjela wanhu weng'ha yolonga, “Yoneche yomdoliza munhu ayu ama mchewake, ndangukomya kokopoligwa.”
GEN 26:12 Mhela awo Isaka nakanyala nyhadikwa kuli isi yila, nakabeta vya kuhega ng'hatu, mina Mkulu Nguluwi nakamtambichiza,
GEN 26:13 na heye nakawa munhu yawele na lufufu. Nakalutilila kuwa na lufufu mbaka kawa yawele na lufufu ng'hatu.
GEN 26:14 Kwa vila nayali yawele na chilundo cha ming'holo na misenga na vitumagwa wenji, Wafilisti nawamonela fihi.
GEN 26:15 Wafilisti wali watilile mizimbo jeng'ha ja mazi jila vitumagwa wa Abulahamu, mhaza wa heye, nawabawile mhela naloyang'hali mkomu.
GEN 26:16 Ndo baho Abimeleki nakamlonjela Isaka, “Uche hetu, kwa vila hegwe kuna ludali luhejile kusinda hetwe.”
GEN 26:17 Lelo Isaka nakoka ako, nakazenga kambi kuli ibindi lya Gelali, nakekala ako.
GEN 26:18 Isaka nakadikula jila mizimbo najibawigwe na mhaza wa heye Abulahamu naloyawele yang'hali mkomu, mizimbo jila Wafilisti nawatilile mhela Abulahamu naloyabagame. Nakajipa matagwa gagala nayajipele mhaza wa heye.
GEN 26:19 Ila vitumagwa wa Isaka nalowabawile kuli ibindi, nawaifika nzasa ilingulavya mazi,
GEN 26:20 wadimi wa aho Gelali nawelewa na wadimi wa Isaka wolonga, “Mazi aga ndo ga hetwe.” Ahyo Isaka nakalichema izimbo alyo Eseki. Izeleche kilewa.
GEN 26:21 Hamba nawabawa izimbo linji, nalyo kahi nawelewela, ahyo Isaka nakalichema izimbo alyo Sitina. Izeleche kota ung'honyo.
GEN 26:22 Hamba Isaka nakaluta honhu hanji na kubawa izimbo linji. Ila alyo nahawalewele, ahyo Isaka nakalichema Lehoboti yolonga, “Lelo Mkulu Nguluwi katulechela honhu, natwe tokonjezeka kuli isi ayi.”
GEN 26:23 Kulawa ako, Isaka nakaluta Beeli-sheba.
GEN 26:24 Nechilo yiyo Mkulu Nguluwi nakalawila na kumlonjela, “Heni nda Nguluwi wa mhaza wa hegwe Abulahamu. Uleche kudumba kwa vila nda hamwe na hegwe, ndokutambichiza na kukonjezela lulelo lwako kwa mbuli ya Abulahamu, chitumagwa wa heni.”
GEN 26:25 Ahyo Isaka nakazenga honhu ha kulavila nhambiko ako na nakamfugamila Mkulu Nguluwi nakachimika ihema na kwesela kwa mhela udo ako, na vitumagwa wa heye nawabawa izimbo.
GEN 26:26 Abimeleki nakalawa Gelali yawele hamwe na Ahusati munhu wa heye wa habehi ng'hatu, na Fikoli mkulu wa wamizi, nakamlutila Isaka.
GEN 26:27 Isaka nakawauza, “Lekachoni muya kwa heni, hanga mlingunzudila na mmbinga kwa hemwe?”
GEN 26:28 Hewo nawamwidichila, “Natona hazelu kota Mkulu Nguluwi kahamwe na hegwe. Ahyo natikundiza yangugana tuwiche chilaho hamwe na hegwe na kuwika ilagano,
GEN 26:29 kota hotudumya, hetwe hihyo hotukudumya. Natukuditila ganojile, natukuleka ulute goya, ne kukuditila chinhu choneche chihile. Na sambi hegwe kwa mtambichizwa wa Mkulu Nguluwi.”
GEN 26:30 Lelo Isaka nakawawichila chilyo cha mnvina, nawo walya na kunwa.
GEN 26:31 Mitondo, nawalilimka ng'hanu hananya na kilaha. Hamba Isaka nakawasindichiza na kilaga nawo goya.
GEN 26:32 Zuwa lilila vitumagwa wa Isaka nawamuyila na kumlonjela mbuli ya lila izimbo nalowali wabawile, wolonga, “Tugafika mazi.”
GEN 26:33 Lelo Isaka nakalichema izimbo ali Shiba, kwa vila itagwa lya muji awo ndo Beeli-sheba mbaka lehano.
GEN 26:34 Esau naloyali na miyaka makumi gane, nakahesa wadala weli Wahiti, Yuditi mhinza wa Beeli, na Basemati mhinza wa Eloni.
GEN 26:35 Wadala awo nawawadita Isaka na Lebeka wekale kwa usungu.
GEN 27:1 Isaka nakalala lukami na meho gali hambe galole. Lelo nakamchema Esau mwanage mkulu, nakamlonjela, “Mwana wa heni.” Na heye nakedichila, “Ena mhaza, ndanguhulichiza.”
GEN 27:2 Isaka nakalonga, “Ulole, heni ndala lukami, ne zuwa lya kubagama siizelele.
GEN 27:3 Lelo uhole misale na upinde wa hegwe, ulute kisolo kapelembe igongolo.
GEN 27:4 Hamba unditile ndiya inonile, undigalile ndiye, nene baha ndikutambichize nding'hali kubagama.”
GEN 27:5 Hambi, mhela awo Isaka naloyali yolongasa na mwanage Esau, Lebeka nayali yohulichiza. Ahyo, Esau naloyalutile kisolo kupelemba igongolo na kuligala,
GEN 27:6 Lebeka nakamlonjela mwanage Yakobo, “Nandimhulika mhaza wa hegwe yomlonjela mkulugo Esau,
GEN 27:7 yampelembile igongolo na yamditile chilyo chinonile ng'hatu, leka yalye, hamba yamtambichize hali Mkulu Nguluwi naloyang'hali kubagama.
GEN 27:8 Lelo mwana wa heni, uhulichize ulonzi wa heni na uwinze kota vyondilikulajiza.
GEN 27:9 Ulute hali chilundo cha mhene, ukengalile vinyehe vya mhene vili vinojile, ndimditile mhaza wa hegwe chilyo chinojile, chila choyogana.
GEN 27:10 Hamba komhilichila mhaza wa hegwe yalye, leka yakutambichize loyang'hali kubagama.”
GEN 27:11 Ila Yakobo nakamlonjela mayake Lebeka, “Ukumbuchile kota mkulu wangu Esau kamema milaika mlukuli, ila heni ndahela.
GEN 27:12 Hanji mhaza kogana kwabasa mlukuli lwangu, nani ndokoneka kota ndangumhada, ahyo ndochigalila kipanjila honhu ha utambichizo.”
GEN 27:13 Mayake nakamlonjela, “Kupanjilwa kwa hegwe na kuye kwa heni, mwana wa heni, hegwe udite vyondilikukulajiza. Ulute ukengalile avyo vinyehe.”
GEN 27:14 Lelo Yakobo nakaluta, nakahola vila vinyehe na kimigalila mayake, na heye nakadita chilyo chinonile ng'hatu, chila nachoyaganile mhaza wa heye Isaka.
GEN 27:15 Hamba Lebeka nakahola nguwo za Esau zinojile lukami, zoyawele nazo mwanage mkulu, nakumvaliza mwanage mdodo Yakobo.
GEN 27:16 Kahi nakamvaliza migozi ja vila vinyehe mmoko na honhu hadechedeche msingo ya heye.
GEN 27:17 Hamba Lebeka nakamha Yakobo chila chilyo chinonile na ibumunda nalyoyamditile.
GEN 27:18 Lelo Yakobo nakenjila mng'handa mwa mhaza wa heye, na kumchema, “Mhaza” Na heye nakedichila, “Ena. Kwa whaani hegwe mwana wa heni?”
GEN 27:19 Yakobo nakamwidichila mhaza wa heye, “Nda heni Esau, mlelwa wa hegwe wa mwaluko. Ndita kota vyoundajize. Dedede mhaza, wikale ulye upelembi wa heni leka unhambichize.”
GEN 27:20 Ila Isaka nakamuuza, “Iwa ndaze kupelemba himahima hino, mwana wa heni?” Yakobo nakamwidichila, “Mkulu Nguluwi, Nguluwi wa hegwe, nakandita sumye.”
GEN 27:21 Ndo baho Isaka nakamlonjela Yakobo, “Lelo mwana wa heni uhejele behi ndikwabase leka ng'hunde kota hegwe kwa heye mwana wa heni Esau ama hebu.”
GEN 27:22 Yakobo nakamhejelela mhaza wa heye Isaka, na heye nakamwabasa na kulonga, “Luzi ndo lwa Yakobo, ila moko ndo ga Esau.”
GEN 27:23 Nahamzelele kwa vila moko ga heye gali na milaika minji kota ja Esau mkulugwe, ahyo nakewika goya kumtambichiza.
GEN 27:24 Nakamuuza kahi, “Kwangukomya ng'hatu hegwe ndo kwa mwana wa heni Esau?” Na heye nakamwidichila, “Ena.”
GEN 27:25 Mhaza wa heye nakalonga, “Ndigalile alyo liwunde ndiye upelembi wa hegwe, mwana wa heni, ndikutambichize.” Aho Yakobo nakamhilichila ndiya, naye nakalya, nakamhilichila divai kahi, nakanwa.
GEN 27:26 Ndo mhaza wa heye Isaka, nakamlonjela, “Uhejele habehi mwana wa heni, unonele.”
GEN 27:27 Lelo Yakobo nakamhejelela mhaza wa heye na kumnonela, na mhaza wa heye loyahuliche kunhunyhilila kwa mivalo ja heye, nakamtambichiza yolonga, “Kunhunyhilila kwa mwana wa heni, ndo kota kunhunyhilila kwa mgunda woyautambichize Mkulu Nguluwi!
GEN 27:28 Nguluwi yakujidile nhungwi ya kilanga, yakupe misanga jiwele na mboto, nyhule na zabibu kwa winji.
GEN 27:29 Nhanzi za wanhu ziwe chitumagwa kwa hegwe, na wanhu wa isi wakinamizile. Uwe chilongozi wa wang'holozo, na lulelo lwa mayako lukinamizile. Chila yokupanjila, nayapanjilwe, chila yokutambichiza, yatambichizwe!”
GEN 27:30 Isaka loyasindile kumtambichiza Yakobo, na heye Yakobo loyali yokuka hela kumwando ha mhaza wa heye Isaka, Esau mkulugwe Yakobo, nakahiluka kulawa kuupelembi.
GEN 27:31 Esau kahi nakadita chilyo chinonile, na kumhilichila mhaza wa heye, na kumlonjela, “Ena mhaza, winuche ulye upelembi wa heni mwanago, leka unhambichize”
GEN 27:32 Isaka nakauza, “Hegwe kwa whaani?” Na heye nakamwidichila, “Nda heni mwanago Esau, mlelwa wa hegwe wa mwaluko.”
GEN 27:33 Aho Isaka nakakakama lukami, nakalonga, “Ka whaani lelo yula yapelembile na kingalila upelembi, nani mina ndiya, kahi mina ndimtambichiza hegwe hunoya? Ena na kotambichizwa.”
GEN 27:34 Esau loyahuliche ulonzi wa mhaza wa heye, nakaluka kulila kwa usungu. Hamba nakamlonjela mhaza wa heye, “Mhaza wa heni, dedede unhambichize na heni!”
GEN 27:35 Ila Isaka nakalonga, “Mng'holozo nakoya chiuhadi, naye kahola utambichizo wa hegwe.”
GEN 27:36 Esau nakalonga, “Ndo mina kanguchemigwa Yakobo. Kwa vila nakahola honhu hangu lwa keli. Mwaluko nakahola honhu hangu ha ulelwa wa mwaluko, na sambi kahola utambichizo wa heni.” Hamba nakamuuza mhaza wa heye, “Ndaze, hauponile utambichizo woneche ula?”
GEN 27:37 Isaka nakamwidichila, “Mina ndimdita Yakobo yawe chilongozi wa hegwe, na ndimpa wang'holozo weng'ha wawe vitumagwa wa heye. Ndimpa nyhule na divai. Ndikuditile choni lelo hegwe mwana wa heni?”
GEN 27:38 Esau nakamlonjela mhaza wa heye, “Mhaza, hambi kwanawo utambichizo umwe hela? Unhambichize na heni kahi, mhaza.” Aho Esau nakalila kwa lizi likulu.
GEN 27:39 Ndo Isaka mhaza wa heye, nakamlonjela, “Honhu hako ha kuchikala kowa kutali na ulongo uwele na mboto, na kutali na nhungwi ya kilanga.
GEN 27:40 Kochikala kwa kitowa ngondo kwa ipanga, na kowa chitumagwa wa mng'holozo, ila lougana kumhinduka, kowa kutali na ulongozi wa heye.”
GEN 27:41 Esau baho nakamzudila Yakobo kwa chiwalo cha utambichizo nayapegwe na mhaza wa heye. Esau nakejesa, “Mazuwa ga kuwasiliza chililo cha mhaza gahabehi, mbuli ayo hoimala, baho hondimkopola mdodowangu Yakobo.”
GEN 27:42 Ila Lebeka naloyavizelele nachoyogana kudita mwanage mkulu, nakamchema mwanage mdodo Yakobo, na kumlonjela, “Wilolele, mng'holozo Esau kangisangalaza kwa kiwika goya yogana yakukopole.
GEN 27:43 Lelo mwana wa heni uhulichize ulonzi wa heni. Uche ubilimile kwa kalumbu Labani akula Halani.
GEN 27:44 Wikale na heye kwa mhela udo, mbaka kuzudila kwa mng'holozo hokumala.
GEN 27:45 Kuzudila kwa heye hokuhola, na heye hoyowa yasemwile goumditile, ndomlajiza munhu yakuhiluse. Lekachoni filigwe na hemwe mweng'ha weli zuwa imwe?”
GEN 27:46 Lebeka nakamlonjela Isaka, “Heni nhoka kikala na awa wadala weli Wahiti wa Esau. Wone Yakobo yohesa yumwe wa wadala awa Wahiti, fola mbagame.”
GEN 28:1 Ahyo Isaka nakamchema Yakobo, nakamtambichiza na kumlajiza yolonga, “Uleche kuhesa mdala yoneche Mkanaani.
GEN 28:2 Ulute Padani-alamu, hakaye ha sekulu wa hegwe Betueli, kahole yumwe wa wala wahinza wa kolo wa hegwe Labani.
GEN 28:3 Nguluwi yawele na mong'ho yakutambichize uwe na walelwa wenji na konjezeka, leka uwe nhanzi ya wanhu wenji.
GEN 28:4 Leka yakutambichize hegwe hamwe na walelwa wa hegwe kota navyoyamtambichize Abulahamu, uihole isi youwelengikala kota mjenzi, isi yila Nguluwi yampele Abulahamu!”
GEN 28:5 Lelo Isaka nakamlajiza Yakobo, na heye nakaluta Padani-alamu kwa Labani, mwana wa Betueli, Mwalamu. Labani kalumbu wa Lebeka na Lebeka ndo nayawele mayawo Yakobo na Esau.
GEN 28:6 Esau nakavizela kota Isaka nakamtambichiza Yakobo na kumlajiza yalute yakahese ako Padani-alamu, na kota loyamtambichize, nakamlemeza yaleche kuhesa mdala Mkanaani.
GEN 28:7 Nakavizela kahi kota Yakobo nayali yowahulichiza mayake na mhaza wa heye, nakaluta Padani-alamu.
GEN 28:8 Lelo Esau nakavizela kota mhaza wa heye, hawaganile wadala wa Kanaani.
GEN 28:9 Ahyo, Esau nakaluta kwa Ishimaeli, mwana wa Abulahamu, nakaza konjeza mdala yunji kwa kumhesa Mahalati mhinza wa Ishimaeli, lumbulyake Nebayoti.
GEN 28:10 Yakobo nakoka Beeli-sheba, nakaluta Halani.
GEN 28:11 Loyafichile honhu hamwe, nakawasa baho kwa vila isanya nalyali lilutile. Nakahola iganga limwe lya honhu aho, nakawika hasi hali mutwi wa heye, nakawasa.
GEN 28:12 Nakalota, na kuli kulota ako, nakona chikwinilo chimizwe muisi na kuduma kwa chikwinilo ufika mbaka kilanga. Wahilisi wa Nguluwi nawali wokwina na kidulika kuli chikwinilo acho.
GEN 28:13 Mkulu Nguluwi nakema kuli chikwinilo acho, nakamlonjela, “Heni ndo Mkulu Nguluwi, Nguluwi wa Abulahamu mhaza wa hegwe na Nguluwi wa Isaka. Isi youlinguwasila ndokupa hegwe na lulelo lwako.
GEN 28:14 Lulelo lwako lowa lwinji kota sangalaza za muisi na wokwenela chila honhu, kolizibilaga isanya na kolilawilaga isanya na kasikazini na kusini. Kwa kukolela hegwe na lulelo lwako, lukolo lweng'ha muisi lotambichizwa.
GEN 28:15 Heni nda hamwe na hegwe, ndokwamila koneche kouluta na kukuhilusa kuli isi ayi. Sikuleka mbaka hondigongomanya ilagano lyondikupele.”
GEN 28:16 Ndo Yakobo nakalilimka muusinjizi nakalonga, “Ndangukomya Mkulu Nguluwi ka honhu aha, nani nasivizelele.”
GEN 28:17 Yakobo nakadumba nakalonga, “Honhu aha hangudumbiza kota choni. Ne majesa aha ndo ng'handa ya Nguluwi na lwizi lwa kilanga.”
GEN 28:18 Yakobo nakalilimka lufuku nakahola lila iganga nayaliwichile hasi ha mutwi, nakalimiza kota izengo na kulijidila mafuta.
GEN 28:19 Nakahachema honhu aho Beteli, ila itagwa lya katali lya muji awo nalyali Lusu
GEN 28:20 Hamba Yakobo nakelaha yolonga, “Wone hegwe Nguluwi kowa hamwe na heni, na kunyamila kuli majendo ga heni, umha chilyo na nguwo,
GEN 28:21 leka nyiluche kaye goya, lelo hegwe Mkulu Nguluwi kowa ndo Nguluwi wa heni.
GEN 28:22 Nalyo iganga ali lyonyimize aha kota izengo, lyowa ng'handa ya hegwe Nguluwi nani ndokupa honhu hamwe ha kumi ha vinhu vyeng'ha vyoumha.”
GEN 29:1 Yakobo nakalutilila na majendo ga heye, nakaluta kuli isi ya wanhu wa kolilingulawila isanya.
GEN 29:2 Hamba nakona izimbo kuli chiwala, na hafungo hali izimbo alyo kwali na vilundo vidatu vya ming'holo jilingwesela. Ming'holo najali jing'wezwa mazi ga izimbo alyo ligubichigwe na iganga ikulu.
GEN 29:3 Vilundo vyeng'ha hoviting'hana hala, wadimi nawoyaga na kulavya iganga alyo kwa kitanza leka wachumule izimbo alyo na kunweza mazi migongolo, hamba nawagubikaga kahi izimbo alyo kwa iganga lilyo.
GEN 29:4 Yakobo nakawauza wadimi, “Wang'holozangu, mwangulawila kohi?” Nawamwidichila, “Twangulawila Halani.”
GEN 29:5 Na heye nakawauza, “Ndaze, mumzela Labani mwana wa Naholi?” Nawamwidichila, “Twangumzela.”
GEN 29:6 Nakalutilila kuwauza, “Ndaze, kalamka?” Na hewo nawamwidichila, “Kalamka, na mhinza wa heye Laheli yula kula kanguya na ming'holo ja heye!”
GEN 29:7 Yakobo nakawalonjela, “Ndangona ing'hali nemisi, hauwa mhela wa kujikungajiza ming'holo hamwe. Lelo mjinweze mazi ming'holo, mlute mkajidime.”
GEN 29:8 Hewo nawamwidichila, “Hatulingudita ahyo mbaka vilundo vyeng'ha hoviting'hana hamwe na iganga lilavigwa kuli izimbo, aho ndo tojinweza mazi ming'holo.”
GEN 29:9 Yakobo loyawele yolonga na wala wadimi, Laheli nayawele mdimi nakafika na ming'holo ja mhaza wa heye.
GEN 29:10 Yakobo loyamuwene Laheli, mhinza wa Labani, kalumbu wa mamo wa heye, na loyajiwene ming'holo ja Labani, kolo wa heye, nakaluta kulihejeza lila iganga liwele hala kuli izimbo, nakachinweza mazi chilundo cha ming'holo ja kolo wa heye Labani.
GEN 29:11 Hamba Yakobo nakamnonela Laheli na kulila kwa kusangalala.
GEN 29:12 Hamba Yakobo nakamlonjela Laheli, kota heye ka yumwe wa lukolo lwa mhaza wa heye, mwana wa Lebeka. Laheli nakabilima hakaye kumlonjela mhaza wa heye.
GEN 29:13 Labani loyahuliche mbuli za Yakobo, mwana wa lumbulye, nakabilima kumbochela, na kamkumbatila nakamnonela na kumbochela hakaye ha heye. Yakobo nakamsimila Labani chila chinhu chilawile.
GEN 29:14 Labani nakalonga, “Ndikomya, hegwe wa lukolo lwangu, danda imwe na heni!” Yakobo nakekala na heye kwa mhela wa mwezi umwe.
GEN 29:15 Zuwa limwe Labani nakamlonjela Yakobo, “Hegwe wa lukolo lwangu, ila ayo yahela mana kota konditila mijito hihi hela. Ndonjele, kwangugana ndikulipe sendi zilinga?”
GEN 29:16 Lelo Labani nayali na wahinza weli, mkulu yachemigwe Lea na mdodo yachemigwe Laheli.
GEN 29:17 Lea nayali yanojile, ila Laheli nayali yanojile lukami.
GEN 29:18 Yakobo nayali yomgana Laheli, ahyo nakamlonjela Labani, “Ndokukolela mijito kwa mhela wa miyaka saba leka ungalile mhinza mdodo wa hegwe Laheli.”
GEN 29:19 Labani nakamlonjela, “Yowa goya kukugalila hegwe Laheli, kusinda kumgalila munhu yunji yoneche. Ulutilile kikala na heni.”
GEN 29:20 Lelo Yakobo nakamkolela mijito Labani kwa mhela wa miyaka saba kwa chiwalo cha Laheli, ila mhela ula kwa heye nawali kota mazuwa mado, kwa vila nayali yomgana Laheli.
GEN 29:21 Hamba Yakobo nakamlonjela Labani, “Mhela wa heni wenela, ahyo ngalile mchewangu.”
GEN 29:22 Lelo Labani nakawika goya mnvina na kuwalalika wanhu weng'ha wa ako.
GEN 29:23 Ila matinazo, Labani nakamhola Lea, mhinza mkulu wa heye, nakamhilika kwa Yakobo. Yakobo nakawasa na heye.
GEN 29:24 Ila Labani nakamlavya Silipa, mpogozi wa heye, yawe mpogozi wa Lea.
GEN 29:25 Lokubwemwenzuche, Yakobo nakavizela kota nayali Lea! Lelo nakamuuza Labani, “Nakunditila mbuli yachi? Ndaze, nasikukolile hegwe mijito kwa chiwalo cha Laheli? Lekachoni nakundeteleza?”
GEN 29:26 Labani nakedichila, “Hatuditaga ahyo kuli isi ya hetwe ayi, chihendo cha hetwe changulemeza kulongola kuhesigwa mhinza mdodo, aku mkulu yang'hali kuhesigwa.
GEN 29:27 Mgongomanyile mnvina Lea kwa mazuwa geng'ha saba, natwe tokugalila Laheli kwa kutukolela mijito mhela wa miyaka saba jinji.”
GEN 29:28 Yakobo nakakunda. Yakobo loyamgongomanyile Lea kwa mazuwa saba, Labani nakamgalila Laheli, mhinza wa heye mdodo yawe mchewake.
GEN 29:29 Labani nakamlavya Biliha mpogozi wa heye, yawe mpogozi wa Laheli.
GEN 29:30 Lelo Yakobo nakawasa na Laheli kahi. Ila Yakobo nakamgana ng'hatu Laheli kusinda Lea, nakamkolela mijito Labani kwa miyaka saba jinji.
GEN 29:31 Mkulu Nguluwi loyawene Lea kanguzudilwa, nakamdita yawe na mwana, ila Laheli nayali mhende.
GEN 29:32 Lea nakawa na himila, nakaponda mwana msongolo, nakamchema Lubeni, kwa vila nakalonga, “Mkulu Nguluwi nakona kugazika kwa heni, sambi mlume wa heni kongana.”
GEN 29:33 Lea nakawa na himila kahi, nakaponda mwana msongolo, nakamchema Simeoni, kwa vila nayali yolonga, “Mkulu Nguluwi nakangalila mwana yunji msongolo kwa vila nakahulika vyondilinguzudilwa.”
GEN 29:34 Nakawa na himila kahi, nakaponda mwana msongolo, nakamchema Lawi, kwa vila nayali yolonga, “Mhela uno mlume wa heni kochilumba hamwe na heni, kwa vila ndimpondela wana wasongolo wadatu.”
GEN 29:35 Lea nakawa na himila kahi, nakaponda mwana msongolo, nakamchema Yuda, kwa vila nayali yolonga, “Mhela uno ndomtogola Mkulu Nguluwi.” Hamba Lea nakaleka kuponda.
GEN 30:1 Laheli loyawene kota hambe yaponde mwana kwa Yakobo, nakamwonela fihi lumbulyake Lea, nakamlonjela Yakobo, “Ngalile wana, wone huditile ahyo, ndobagama.”
GEN 30:2 Yakobo nakazudizwa na Laheli na kumlonjela, “Ndaze, heni ndiwa honhu ha Nguluwi yakulemeze kuwa na wana?”
GEN 30:3 Laheli nakamwidichila, “Mpogozi wa heni Biliha kabaha. Uwase na heye leka yawe na wana honhu ha heni, nani kahi ndiwe na wana kwa kulawa kwa heye.”
GEN 30:4 Ahyo Laheli nakamgalila Yakobo mpogozi wa heye Biliha, yawe kota mchewake, na heye nakawasa na heye.
GEN 30:5 Biliha nakawa na himila nakampondela Yakobo mwana msongolo.
GEN 30:6 Laheli nakalonga, “Nguluwi nakanhagusa goya, nakahulika chililo cha heni na kungalila mwana msongolo.” Nakamchema mwana ayo Dani.
GEN 30:7 Biliha mpogozi wa Laheli, nakawa na himila kahi na nakampondela Yakobo mwana wa keli msongolo.
GEN 30:8 Aho Laheli nakalonga, “Natitowa lukami na lumbulyangu, nani sumya.” Ahyo nakamchema mwana ayo Nafutali.
GEN 30:9 Lea loyawene nakaleka kuponda, nakamhola mpogozi wa heye Silipa, nakamgalila Yakobo leka yawe kota mchewake.
GEN 30:10 Silipa nakampondela Yakobo mwana msongolo.
GEN 30:11 Lea nakalonga, “Mbuli zangundutila goya.” Ahyo nakamchema mwana ayo Gadi.
GEN 30:12 Silipa mpogozi wa Lea, nakampondela Yakobo mwana wa keli msongolo.
GEN 30:13 Lea nakalonga, “Ndangusangalala! Lelo wadala wonyhema heni kusangalala.” Ahyo, nakamchema mwana ayo Asheli.
GEN 30:14 Nawali mhela wa mbena ya ngano, Lubeni nakaluta kisolo na ako nakahola ifuza lilinguchemigwa mituletule, nakamgalila mayake, Lea. Laheli nakamlonjela Lea, “Dedede, ngalile jimwe ja ajo mituletule ja mwanago.”
GEN 30:15 Ila Lea nakalonga, “Ndaze, kwangujesa ndo mbuli ndodo kumhola mlume wa heni, na sambi kwangugana kuhola mituletule ja mwana wa heni?” Laheli nakamwidichila, “Loungalila mituletule ja mwanago, Yakobo kowasa kwa hegwe lehano.”
GEN 30:16 Lelo matinazo Yakobo loyawele yohiluka kulawa kumgunda, Lea nakalawa kumbochela, nakamlonjela, “Ndimha mituletule ja mwanangu, ahyo kwanguganigwa kuwasa na heni.” Ahyo Yakobo nakawasa kwa Lea nechilo ayo.
GEN 30:17 Nguluwi nakahulichiza kulanda kwa Lea, na heye nakawa na himila nakampondela Yakobo mwana wa kahano msongolo.
GEN 30:18 Lea nakalonga, “Nguluwi nakangalila chonolo cha heni kwa vila nandimpa mlume wa heni mpogozi wa heni.” Lelo nakamchema mwana ayo Isakali.
GEN 30:19 Lea nakawa na himila kahi nakampondela Yakobo mwana wa sita msongolo.
GEN 30:20 Lea nakalonga, “Nguluwi nakangalila ndolendole inojile. Lelo mlume wa heni konyhulichiza kwa vila nandimpondela mwana wa sita msongolo.” Ahyo nakamchema mwana ayo Sebuluni.
GEN 30:21 Hamba nakaponda mwana mhinza nakamchema Dina.
GEN 30:22 Hamba Nguluwi nakamkumbuchila Laheli, nakahulichiza kulanda kwa heye nakamdita yawe na wana.
GEN 30:23 Laheli nakawa na himila, nakaponda mwana msongolo, nakalonga, “Nguluwi nakambusila soni ya heni.”
GEN 30:24 Ahyo nakamchema mwana ayo Yusufu, yolonga, “Mkulu Nguluwi nayanyonjezele mwana yunji msongolo.”
GEN 30:25 Laheli loyampondile Yusufu, Yakobo nakamlonjela Labani, “Ng'hundize nyiluche hakaye hangu, hali isi ya heni.
GEN 30:26 Ngalile wadala wa heni na wana wa heni wapondigwe kwa kukukolela mijito hegwe, mbuche na hewo. Kwanguvizela kota nandikukolela mijito goya.”
GEN 30:27 Ila Labani nakamlonjela, “Ng'hundize kwa uganililo nani ndonje. Ndivizela kwa kulagula kota Mkulu Nguluwi nakamha utambichizo kwa chiwalo cha hegwe.
GEN 30:28 Ulonje sendi zilinga, nani ndokugalila.”
GEN 30:29 Yakobo nakamlonjela, “Hegwe kwanguvizela ndaze vyondikukolele mijito, na ndaze vyondijilolele migongolo ja hegwe.
GEN 30:30 Kwa vila londing'hali kuya kuno nawali na lufufu ludo hela ila kulawa lofichile, lufufu lwa hegwe lonjezeka ng'hatu, na Mkulu Nguluwi nakakutambichiza chila hondilinguluta. Ila sambi ndowalolela nili wang'holozangu?”
GEN 30:31 Labani nakamuuza, “Ndikugalile choni?” Yakobo nakamwidichila, “Humha chinhu choneche. Ndolutilila kujilolela migongolo ja hegwe wone konditila mbuli ayi.
GEN 30:32 Ng'hundize ng'hole hagati hali migongolo ja hegwe jeng'ha lehano, ndibagule hali ilundo chila ing'holo lyana liwele na usalagwe na utoletole na chila ing'holo lyana lititu na chila mhene iwele na usalagwe na utoletole. Azo ndo zowa sendi za heni.
GEN 30:33 Ahyo, mazuwa galinguya, kutanganika kwa heni kokoneka hazelu hala hondipegwa sendi za heni. Mhene yoneche yohaiwele na utoletole ama ing'holo lyana lyoneche lyohaliwele lititu likoneka hali ilundo lya heni, alyo lyowa lihizigwa.”
GEN 30:34 Labani nakalonga, “Goya! Na iwe kota vyoulonjile.”
GEN 30:35 Ila Labani zuwa lilyo nakaluta kujibagula mipongo jeng'ha jiwele usalagwe na utoletole na mhene zinji ndala ziwele na utoletole na usalagwe na uzelu na chila ing'holo lyana lititu na nakaziwika hali wamizi wa wanage leka jiwe ja Yakobo.
GEN 30:36 Migongolo ja Labani na migongolo ja Yakobo najibaguligwa kwa utali wa kujenda mazuwa gadatu. Yakobo nakapona bahala yodima migongolo ja Labani jiponile.
GEN 30:37 Lelo Yakobo nakahola fito za migodi jidatu jilivinji nakajibadula mibadu leka misitali mizelu joneche kuli fito azo.
GEN 30:38 Nakazimiza fito azo zoyazibadule hali migongolo hali mibuli ja kunwezela mazi, honhu hawele migongolo najuya kunwa mazi,
GEN 30:39 migongolo milume najikwina midala najiwa na nyinda hali fito azo, najilela migongolo jinji jiwele na usalagwe na utoletole.
GEN 30:40 Yakobo nakajibagula ajo ming'holo myana, hamba nakajilajila kuli migongolo jiwele na usalagwe na mititu kuli chilundo cha Labani. Kwa nzila ino, Yakobo nakawa na chilundo cha heye yuye, na hambe yahanzile na chilundo cha Labani.
GEN 30:41 Naiwa chila mhela wa migongolo jinenehe kuhola nyinda, Yakobo nakawikaga fito azo kumwando mwa ajo migongolo hali mibuli ja kunwezela mazi, leka wahole nyinda hali fito azo.
GEN 30:42 Ila nahawichile fito azo kumwando mwa migongolo jiwele ng'hochele lojali jihola nyinda. Baho du, migongolo jigandile najali ja Labani, na migongolo jinenehe najali ja Yakobo.
GEN 30:43 Lelo Yakobo nakawa na lufufu lukami, nakawa na vilundo vikulu vya migongolo na wakolamijito wa heye wadala na walume na ngamiya na midogowi.
GEN 31:1 Lelo Yakobo nakahulika kota wana wasongolo wa Labani nawali wolonga, “Yakobo nakahola chila chinhu cha mhaza wa hetwe, na ndo kawa na lufufu.”
GEN 31:2 Yakobo kahi nakavizela kota Labani sambi hamganile heye kota aho hamwande.
GEN 31:3 Hamba Mkulu Nguluwi nakamlonjela Yakobo, “Uhiluche kuli isi ya wasekulu wa hegwe na ivyazi lyako, nani ndowa hamwe na hegwe.”
GEN 31:4 Lelo Yakobo nakagana Laheli na Lea wachemigwe, na hewo nawaluta ako kuchiwala koyawele yodima ming'holo.
GEN 31:5 Yakobo nakawalonjela, “Ndangona kota mhaza wa hemwe hambe yangane heni kota aho hamwande. Ila Nguluwi wa mhaza wa heni kahamwe na heni.
GEN 31:6 Hemwe mvizela kota nandimkolela mijito mhaza wa hemwe kwa mong'ho wa heni weng'ha
GEN 31:7 Ila heye nakanyhada na kugalula sendi za heni mala kumi. Ila Nguluwi nahamkundize heye kundumiza heni.
GEN 31:8 Hala mhaza wa hemwe hoyali yolonga, ‘Migongolo jiwele na usalagwe ndo jowa sendi za hegwe,’ lelo chilundo cheng'ha nachilela migongolo jiwele na usalagwe. Na hala hoyali yolonga, ‘Migongolo jiwele na misitali ndo jowa sendi za hegwe,’ lelo chilundo cheng'ha nachilela migongolo jiwele na misitali.
GEN 31:9 Ahi ndo Nguluwi navyoyaholile migongolo ja mhaza wa hemwe, na kungalila heni.
GEN 31:10 “Mhela wa migongolo kuhola nyinda nandota ulotezi, na kuli ulotezi awo nandota mipongo jeng'ha najikwinha mhene ndala jiwele na usalagwe na utoletole.
GEN 31:11 Mhilisi wa Nguluwi nakalonga na heni kuli ulotezi awo, nakanyhema, ‘Yakobo,’ nani nyhidichila, ‘Ena.’
GEN 31:12 Na heye nakandonjela, ‘Ulole mipongo jeng'ha jangukwinha mhene ndala ziwele na misitali na ziwele na usalagwe na utoletole. Mbuli ayi naiwa kota ahi kwa vila nandola vyoyakuditile Labani.
GEN 31:13 Heni nda yula Nguluwi yakulawilile kula Beteli, honhu hala houliwichile lila izengo lyoulijidile mafuta na hala houwichile ilagano kwa kilaha. Lelo uche kuli isi ayi uhiluche kuli isi ya nhanzi ya hegwe.’ ”
GEN 31:14 Laheli na Lea nawamwidichila Yakobo, “Hetwe twahela honhu ha lufufu ama uhalizi woneche hali ng'handa ya mhaza wa hetwe.
GEN 31:15 Heye kangutona hetwe kota wajenzi, lelo ndo nakatuguza, nakatumiya lufufu lweng'ha loyapatile kwa kutuguza.
GEN 31:16 Lufufu lweng'ha luwele Nguluwi nakahola kulawa kwa mhaza wa hetwe ndo wa hetwe na wana wa hetwe. Ahyo, udite vila vyoulajizwe na Nguluwi.”
GEN 31:17 Lelo Yakobo nakenuka na kiwika goya kwa majendo kwa kuwakwiniza wana wa heye na wadala wa heye mchanya mwa ngamiya.
GEN 31:18 Nakajihola migongolo ja heye jeng'ha na lufufu lwa heye lweng'ha loyapatile ako Padani-alamu, nakaluka majendo ga kuhiluka kuli isi ya Kanaani kwa Isaka mhaza wa heye.
GEN 31:19 Mhela awo Labani nayali yalutile kujitema milaika ming'holo ja heye. Ahyo Laheli nakahiza jimalukolo ja milungu ja mhaza wa heye.
GEN 31:20 Yakobo nakadeta kwa Labani Mwalamu kwa kuka ne kumzelesa.
GEN 31:21 Lelo Yakobo nakahola lufufu lwa heye lweng'ha, na kuka. Loyalochile lwanda lwa Eyufulate, nakaluta Gileadi isi ya vidunda.
GEN 31:22 Logakolile mazuwa gadatu, Labani nakahulika kota Yakobo nakoka ne kumlonjela.
GEN 31:23 Lelo Labani nakawahola wang'holoze, nakamuwinza Yakobo kwa majendo ga mazuwa saba, nakamfika kuli isi ya vidunda vya Gileadi.
GEN 31:24 Ila nechilo, Nguluwi nakamlawila Labani Mwalamu kuli ulotezi, nakamlonjela, “Ulolele, uleche kumpanjila ne kumtambichiza Yakobo.”
GEN 31:25 Lelo Labani nakamfichila Yakobo. Mhela awo Yakobo nakesela kuli isi ya vidunda kwa mhela udo. Na heye Labani na wang'holoze nawesela hala kahi kuli vidunda vya Gileadi.
GEN 31:26 Ahyo, Labani nakamlonjela Yakobo, “Nakudita choni? Lekachoni nakunyhada, nakuwahola wahinza wa heni kota wapogozi wa kuli ngondo?
GEN 31:27 Lekachoni nakuka kwa uviso, nakunyhada nahundonjele hebu leka ndikulaje kwa kusangalala na nzimbo na ngoma na ving'hweleng'hwele?
GEN 31:28 Hambe hung'hundize heni kuwanonela wahinza wa heni na wazukulu wa heni? Ndikomya nakudita chinhu cha upoka.
GEN 31:29 Heni ndoweza kukuditila wihe, ila Nguluwi wa mhaza wa hegwe nakandawila nechilo ya kuya lehano, nakandonjela, ‘Ulolele, uleche kumlonjela Yakobo ulonzi woneche ula, linojile ama lihile.’
GEN 31:30 Ndivizela nakuka ne kulonga kwa vila nawali ugana ng'hatu kuhiluka kaye kwa mhaza wa hegwe, ila lekachoni nakuhiza jimalukolo ja milungu ja heni?”
GEN 31:31 Yakobo nakamwidichila Labani, “Nandumba kwa vila ndali ndijesa kota wahambochile wahinza wa hegwe.
GEN 31:32 Ila youmfika na jimalukolo ja milungu ja hegwe umkopole. Ulajile chinhu choneche chiwele cha hegwe hali wano wang'holozetu, uhole.” Yakobo nayali havizelele kota Laheli nayali yahizile jimalukolo ja milingu ja Labani.
GEN 31:33 Lelo Labani najikapala jimalukolo ja milungu jake kuli ihema lya Yakobo na lya Lea na lya wadala wa wapogozi weli, ila nahajiwene. Hamba nakalawa kuli ihema lya Lea na kwinjila kuli ihema lya Laheli.
GEN 31:34 Laheli nayali yaholile jimalukolo ajo, nakavisa hali chigoda cha kikalila mli ngamiya na kikala mchanya mwake. Labani nakapala mli ihema lyeng'ha, ila nahajiwene.
GEN 31:35 Aho, Laheli nakamlonjela mhaza wa heye, “Dedede mhaza wa heni, uleche kuzudila, heni siweza hebu kwima kumwando kwa hegwe kwa vila ndina mbuli za chidala.” Labani nakapala jimalukolo ja milungu ja heye nahajiwene.
GEN 31:36 Aho Yakobo nakazudila, naketwanza na Labani yolonga, “Lekachoni wali umbinga, ndita gehile gachi?
GEN 31:37 Ndaze, nakona choni lousakule mhomolo za heni zeng'ha? Chiwiche kumwando mwa wang'holozangu na wang'holozo, leka wataguse hali hetwe weli.
GEN 31:38 Nandikala na hegwe kwa mhela wa miyaka makumi meli, na mhela awo weng'ha ming'holo ja hegwe na mhene za hegwe zeng'ha haziwifile nyinda, nani sidile ing'holo ilume lya chilundo cha hegwe.
GEN 31:39 Heni sikugalile ne zuwa limwe igongolo lya hegwe likopoligwe na migongolo ja kisolo, ila nandihilusa nene baha. Hegwe nakungana ndikuhilusile ne kijesa kota nakahizigwa nemisi ama nechilo.
GEN 31:40 Ahyo nemisi ndikangaza isanya likali na nechilo mbeho naimhutila heni nasipatile kuwasa ne hado.
GEN 31:41 Kwa miyaka makumi meli aga geng'ha nandikala hakaye kwa hegwe. Nandikukolela mijito kwa mhela wa miyaka kumi na gane kwa chiwalo cha wahinza wa hegwe weli, na miyaka jinji sita nandima migongolo ja hegwe. Ila hegwe, nakugalula msahala wa heni mala kumi.
GEN 31:42 Kota Nguluwi wa mhaza wa heni Abulahamu, Nguluwi yamditile mhaza wa heni Isaka yakakame, wone nahawele ubanzi wa heni, ndikomya nakugana kundeka heni ndute ne chinhu. Ila Nguluwi nakona kugazika kwa heni na mijito yong'holile kwa moko ga heni, nakakung'hanuchila nechilo ya kuya lehano.”
GEN 31:43 Aho Labani nakamwidichila Yakobo, “Wahinza wano ndo wahinza wa heni, na wana wano ndo wana wa heni, migongolo jino ndo migongolo ja heni na vyeng'ha vyoulinguvyona hano ndo vya heni. Ila heni ndoweza kudita choni lehano kuwalapa wano wahinza wa heni na wana wa hewo wawapondile?
GEN 31:44 Lelo natudite ilagano heni na hegwe leka liwe ulolezi wa heni na hegwe.”
GEN 31:45 Lelo Yakobo nakahola iganga, nakalimiza kota izengo.
GEN 31:46 Kahi Yakobo nakawalonjela wang'holoze, “Mkungajize maganga.” Na hewo nawakungajiza na kudita chibugulu. Hamba nawalya chilyo behi na chibugulu acho cha maganga.
GEN 31:47 Labani nakachichema chibugulu acho cha maganga Yegali-sahaduta, ila Yakobo nakachichema Galeedi.
GEN 31:48 Labani nakalonga, “Chibugulu achi cha maganga ndo ulolezi wa heni na hegwe lehano.” Ahyo, ndo mina chibugulu acho nakachichema Galeedi,
GEN 31:49 na chibugulu chila kahi nachichemigwa Misipa aku yolonga, “Mkulu Nguluwi nayatwamile lotuwele kutali ne kiwona.
GEN 31:50 Wone uwagaze wahinza wa heni, ama louhesa wadala wanji kusinda wano, ne kuvizela munhu yunji, lelo uvizele kota kuduhu yawele mlolezi hali hetwe ila ndo Nguluwi yuye.”
GEN 31:51 Hamba Labani nakamlonjela Yakobo, “Ulole chibugulu achi cha maganga na izengo lyondilimize hali hegwe na heni.
GEN 31:52 Chibugulu chino ndo ulolezi na izengo ali ndo ulolezi kota heni hambe ndoche chibugulu chino kuya kwa hegwe kukuditila wihe, na huweza kuloka chibugulu chino kuya kwa heni kunditila wihe.
GEN 31:53 Nguluwi wa Abulahamu na Nguluwi wa Naholi, kotagusa hali hetwe.” Lelo Yakobo nakelaha kwa Nguluwi yamditile Isaka mhaza wa heye yakakame.
GEN 31:54 Hamba Yakobo nakalavya nhambiko ako kuli isi ya vidunda na kuwalalika wang'holoze walye chilyo. Lowasindile kulya nawapona kuko nechilo.
GEN 31:55 Lufuku Labani nakenuka, nakawanonela wazukulu wa heye na wahinza wa heye na nakawatambichiza. Hamba nakoka kuhiluka kaye.
GEN 32:1 Yakobo nakalutilila na majendo ga heye. Lelo wahilisi wa Nguluwi naweting'hana na heye.
GEN 32:2 Yakobo loyawawene, nakalonga, “Ayi ndo kambi ya Nguluwi!” Ahyo, nakahachema honhu aho Mahanaimu.
GEN 32:3 Yakobo nakawalajiza wahilisi wamlongole kwa mng'holoze Esau, ako Seili hali isi ya Edomu.
GEN 32:4 Nakawagalila malajizo gano, “Momulonjela hino mkulu wa heni Esau. Chitumagwa wa hegwe Yakobo kangulonga hino, ‘Nandikala kuli isi ya ujenzi kwa Labani mbaka sambi.
GEN 32:5 Ndina misenga na midogowi na milundo ja ming'holo na vitumagwa walume na wadala. Ndangukulajizila usenga awu, mkulu wa heni, leka ndiwe na uganililo hali hegwe.’ ”
GEN 32:6 Awo wahilisi nawaluta, hamba nawahiluka na kumlonjela Yakobo, “Natufika kwa mng'holozo Esau, na heye kamzila kuya kukubochela, yawele na walume miya zine.”
GEN 32:7 Lelo Yakobo nakadumba ng'hatu na nakawa na lunhwinhwi. Nakawabagula wanhu wowawele hamwe na heye kuli vilundo vili na ming'holo na migongolo jinji na ngamiya ako kuli kambi
GEN 32:8 yojesa, “Wone Esau kokuya na kubagamiza chilundo chimwe, chilundo chiyage chonyeleduka kuli kambi.”
GEN 32:9 Hamba Yakobo nakamlanda Nguluwi yolonga, “Hegwe Nguluwi wa mhaza wa heni Abulahamu na Nguluwi wa mhaza wa heni Isaka. Hegwe Mkulu Nguluwi youndonjele kota nyhiluche hali isi ya heni hawele na ivyazi lya heni, nakundonjela kunditila ganojile,
GEN 32:10 hambe nganigwe ne hado madito ga hegwe ga igano lya kwimilila na makundo goundajile heni chitumagwa wa hegwe. Londochile lwanda Yolodani, nandali hela chinhu ila ng'hweku hela, ila sambi ndanazo kambi mbili.
GEN 32:11 Ndangukulanda undohole sambi kulawa kwa mng'holozangu Esau, mina ndangudumba kota kotutowa na kutubagamiza hetwe tweng'ha, wadala hamwe na wana.
GEN 32:12 Hegwe nakundonjela ukomya konditila ganojile na kudita lulelo lwa heni luwe lwinji kota sangalaza ya mli bahali yohailinguwazika.”
GEN 32:13 Lelo Yakobo nakawasa baho nechilo ayo. Hamba nakabagula honhu ha lufufu lwa heye hawe ndolendole kwa mng'holoze Esau.
GEN 32:14 Mhene ndala miya mbili na mipongo makumi meli na ming'holo midala miya mbili na ming'holo milume makumi meli
GEN 32:15 na ngamiya makumi gadatu walingonyeza hamwe na wana na misenga makumi gane na mibuguma kumi hamwe na midogowi midala makumi meli na milume kumi.
GEN 32:16 Nakawagalila vitumagwa wa heye chila yumwe na ilundo lya heye, nakawalonjela, “Mlongole kuno mleka honhu hagati kulawa chilundo chimwe na chiyage kuli majendo ga hemwe.”
GEN 32:17 Nakamlajiza yula chitumagwa yalongole, “Louting'hana na mng'holozangu Esau, wone yakuuze, ‘Hegwe kwa chitumagwa wa whaani? Kwanguluta kohi? Na migongolo jino ja whaani?’
GEN 32:18 Nagwe komwidichila, ‘Alu ndo lufufu lwa chitumagwa wa hegwe Yakobo, na ndo ndolendole ya hegwe mkulu wa heni Esau. Kahi Yakobo yuye ka kumbele kanguya.’ ”
GEN 32:19 Nakalavya ilajizo lilyo kwa chilundo cha keli na cha kadatu na wanji weng'ha yolonga, “Momlonjela Esau ulonzi wuwo lomting'hana na heye.
GEN 32:20 Kupuluta kwa geng'ha, momlonjela, ‘Chitumagwa wa hegwe Yakobo ka kumbele, kanguya.’ ” Yakobo nakadita ahyo yojesa, “Hanji ndomdita yasindamale kwa ndolendole ino yoilongole, hamba ndoweza kiwona meho kwa meho, hanji kombochela heni.”
GEN 32:21 Lelo nakalongola ndolendole ya heye, ila heye nakawika kambi.
GEN 32:22 Nechilo yiyo Yakobo nakenuka, nakawahola wadala wa heye weli na wapogozi wa heye wadala weli na wana wa heye kumi na yumwe, nawakola chiloko cha Yaboki.
GEN 32:23 Loyawalajize kuloka lwanda alo wala wawele na heye na lufufu lwa heye lweng'ha,
GEN 32:24 Yakobo nakasigala yaliyeka. Munhu yumwe nakoya, nawetowa mbaka lufuku.
GEN 32:25 Munhu ayo loyawene kota howeza kumsumya Yakobo, nakamdoliza Yakobo kuli chuno, na heye nakatweguka loyawele yochitowa.
GEN 32:26 Hamba yula munhu nakamlonjela Yakobo, “Ndeche ndute, mina kubwemwenzuka sambi.” Ila Yakobo nakamlonjela, “Sikuleka ng'oo mbaka unhambichize!”
GEN 32:27 Na heye nakamuuza, “Itagwa lyako lyachi?” Heye nakamwidichila, “Yakobo.”
GEN 32:28 Yula munhu nakamlonjela, “Hochemigwa Yakobo kahi, ila Isilaeli, kwa vila nakwimilila kitowa na Nguluwi.”
GEN 32:29 Aho, Yakobo nakamlonjela, “Dedede, ndangukulanda undonjele itagwa lya hegwe.” Ila heye nakamlonjela, “Ya choni kumbuza itagwa lya heni?” Hamba nakamtambichiza Yakobo.
GEN 32:30 Yakobo nakahachema honhu aho Penieli, yolonga, “Nandimona Nguluwi meho kwa meho, na hambe mbagame.”
GEN 32:31 Isanya nalyali lyaluka kulawa mhela Yakobo loyochile Penueli, nayali yodudila kwa chiwalo cha chigudi cha heye.
GEN 32:32 Ndo mina mbaka lehano Waisilaeli hambe walye idanha lya honhu ha chigudi, mina yula munhu nakamdoliza Yakobo hali midanha ha chigudi cha heye.
GEN 33:1 Lelo Yakobo nakalola, nakamona Esau hamwe na walume miya zine. Aho, nakawabagula wana wa heye kwa Lea na Laheli na wala wapogozi wa heye wadala weli.
GEN 33:2 Nakawawika wapogozi wadala na wana wa hewo kumwando, hamba Lea na wana wa heye na kumbele ng'hatu nawali Laheli na mwana wa heye Yusufu.
GEN 33:3 Hamba heye nakalongoza, nakaluta kwa kufugama mala saba, mbaka loyafichile habehi na mng'holoze.
GEN 33:4 Lelo Esau nakaluta kwa kubilima kumbochela Yakobo, nakamkumbatila kuli singo na kumnonela, na weng'ha weli nawalila.
GEN 33:5 Esau loyalolile na kuwona wala wadala na wana, nakauza, “Awa wawele na hegwe ndo wanhu wachi?” Yakobo nakedichila, “Wano ndo wana wawele Nguluwi yangalile heni chitumagwa wa hegwe kwa kunoga kwa heye.”
GEN 33:6 Hamba wala wapogozi nawahejela hamwe na wana wa hewo, nawenamiza kwa kuhulichiza.
GEN 33:7 Na heye Lea kahi nakoya hamwe na wana wa heye, nakenamiza kwa kuhulichiza. Hamba, Laheli na Yusufu nawoya, nawenamiza kwa kuhulichiza.
GEN 33:8 Aho, Esau nakauza, “Kuting'hana heni na chilundo chino mnzila kuna mana yachi?” Yakobo nakamwidichila, “Ndali nditumbila kuwa na uganililo kulawa kwa hegwe mkulu wa heni.”
GEN 33:9 Ila Esau nakalonga, “Ndina lufufu lwa kuhega mng'holozangu. Lufufu lwa hegwe na lupone kwa hegwe.”
GEN 33:10 Yakobo nakamlonjela, “Hebu, kota kukomya, nakukunda kumbochela heni, lelo ndangukudedeza ubochele ndolendole ya heni. Ndikomya, sangalala kukona hegwe kota ndimona Nguluwi, kwa vila nakumbochela goya.
GEN 33:11 Lelo ndangukudedeza ubochele ndolendole kota utambichizo kulawa kwa heni yondikugalile, kwa vila nani kahi Nguluwi nakambonela isungu heni na kwa vila nandali na chinhu cha kuhega.” Ahi ndo Yakobo vyoyamdedeze ng'hatu Esau, na heye nakabochela ndolendole ya heye.
GEN 33:12 Esau nakalonga, “Natulutilile na majendo ga hetwe, heni ndokulongola.”
GEN 33:13 Ila Yakobo nakamlonjela, “Mkulu wa heni, hegwe kuvizela kota wana wano ndo vyali na kahi migongolo jino jangonyeza, na heni ndanguganigwa kujilolela, kota migongolo jino johilikwa kwa kubilima kwa zuwa limwe, jeng'ha jobagama.
GEN 33:14 Lelo mkulu wa heni ulongole, nani ndokuya mholemhole kota migongolo na wana vyowalingujenda mbaka londifika kwa mkulu wa heni ako Seili.”
GEN 33:15 Aho Esau nakalonga, “Inoga ndikulechele wanhu wamwe wa heni.” Ila Yakobo nakalonga, “Lekachoni kuganigwa kudita ahyo? Ihega kota heni mhegwa uganililo wa hegwe, mkulu wa heni.”
GEN 33:16 Lelo zuwa alyo Esau nakaluka majendo ga kuhiluka Seili.
GEN 33:17 Ila Yakobo nakaheluka nakafika Sukoti, na ako nakezenjela ng'handa na vibumuli kwa chiwalo cha migongolo ja heye. Kwa chiwalo acho, honhu aho nahachemigwa Sukoti.
GEN 33:18 Kulawila nzila ilingukolela Padani-alamu Yakobo nakafika goya kuli muji wa Shekemu, kuli isi ya Kanaani, nakawika kambi behi na muji awo.
GEN 33:19 Honhu aho ha misanga hawele yesele kwa mhela udo nakagula kulawa kwa lulelo lwa Hamoli, mhaza wa Shekemu kwa migwala miya imwe ja sendi.
GEN 33:20 Ako, nakazenga honhu ha kulavila nhambiko na kuhachema Nguluwi ndo Nguluwi wa Isilaeli.
GEN 34:1 Zuwa limwe Dina, mhinza wa Yakobo na Lea, nakoka kuwajendela wadala wa isi ayo.
GEN 34:2 Lelo Shekemu mwana wa Hamoli, Muhivi, nayawele mkulu wa isi ayo, loyamuwene Dina, nakambata na kuwasa na heye kwa lupichi na kumdita yone soni.
GEN 34:3 Ila Shekemu nakanojezwa ng'hatu na ayo mhinza, nakamgana na nakaluka kumdedeza.
GEN 34:4 Ahyo, Shekemu nakadogola na Hamoli mhaza wa heye, nakamlonjela, “Ndangulanda ndigalile ayo mhinza ndimhole yawe mchewangu.”
GEN 34:5 Yakobo nakahulika kota mhinza wa heye Dina, nakaditikwa yawe mwavu na Shekemu, ila kwa vila wana wa heye nawali wodima migongolo, nakanyamalila mbaka lowahiluche.
GEN 34:6 Hamoli mhaza wa Shekemu nakaluta kwa Yakobo leka yadogole na heye,
GEN 34:7 na mhela wuwo wana walume wa Yakobo nawali wohiluka kulawa kudima migongolo. Lowahuliche ago, wasongolo awo nawona usungu ng'hatu na kuzudila ng'hatu, kwa vila Shekemu nayali yawabasile soni wanhu wa Isilaeli kwa kuwasa na mhinza wa Yakobo, mina mbuli ayo nailemezigwa ng'hatu.
GEN 34:8 Ila Hamoli nakawalonjela, “Nhumbula ya mwana wa heni Shekemu nainojezwa ng'hatu na mhinza wa hemwe. Lelo dedede mumkundize yamhole.
GEN 34:9 Tihole. Hetwe towahola wahinza wa hemwe, namwe mowahola wahinza wa hetwe.
GEN 34:10 Ahyo mochikala hamwe na hetwe, mowa milejehe mli isi ayi. Mochikala amu, mgule na kuguza vinhu na muwe na honhu ha isi ayi.”
GEN 34:11 Na kahi, Shekemu nakawalonjela mhaza wa Dina na wang'holoze, “Dedede, ndangulanda uganililo hali hemwe, nani ndowagalila choneche chomlonga.
GEN 34:12 Mndonjele chasi choneche cha kulavya na ndolendole ya kuhesa, hanji na iwe ng'hulu ndaze, nani ndolavya, leka hela ndimhole mhinza ayu.”
GEN 34:13 Lelo wana walume wa Yakobo nawamwidichila kwa kumhada Shekemu na mhaza wa heye Hamoli, kwa vila Shekemu nakamdita lumbulyawo Dina yawe mwavu.
GEN 34:14 Nawawalonjela, “Hambe tumlavye lumbulyetu kwa munhu yohambe yenjile ikumbi. Kudita ahyo ndo kibasa soni kwa hetwe.
GEN 34:15 Tochikundiza na wone modita chinhu achi hela. Muwe kota hetwe kwa kumwinjiza ikumbi chila mlume hali hemwe.
GEN 34:16 Aho ndo towagalila wahinza wa hetwe na kuwahola wahinza wa hemwe, tochikala hamwe na hemwe na kuwa lukolo lumwe.
GEN 34:17 Ila wone hatikundize na hetwe na kwinjila ikumbi, hetwe tomhola mhinza wa hetwe na kuka na heye.”
GEN 34:18 Chowalonjile nachali chinoga kwa Hamoli na mwanage Shekemu.
GEN 34:19 Msongolo ayo nahalemile kudita ahyo, kwa vila navyoyanojezwe na mhinza wa Yakobo. Na kahi, Shekemu ndo nayali yotogoligwa ng'hatu kusinda weng'ha hakaye ha mhaza wa heye.
GEN 34:20 Lelo Hamoli na mwanage Shekemu nawaluta hali lwizi lwa muji, honhu ha nhing'hano, nawalonga na wanhu wa hewo, wolonga,
GEN 34:21 “Wanhu wano tigana na hetwe. Hamba tuwabochele na kikala hali isi ya hetwe na kuguza na kugula vinhu, kwa vila twanayo isi ihejile kikala hetwe na hewo, hamba towahola wahinza wa hewo na hewo wowahola wahinza wa hetwe.
GEN 34:22 Ila hewo wokunda kikala na hetwe na towa lukolo lumwe wone hetwe tokunda kudita ahi. Tomwinjiza ikumbi chila mlume hali hetwe kota hewo navyowenjile ikumbi.
GEN 34:23 Ndaze, hamlingona kota migongolo ja hewo na lufufu lwawo lweng'ha vyowa vya hetwe? Lelo tikundize na hewo leka wekale hamwe na hetwe.”
GEN 34:24 Walume weng'ha wowating'hane hala hali lwizi lwa muji awo, nawekundiza na Hamoli na mwanage Shekemu. Hamba walume weng'ha nawenjila ikumbi.
GEN 34:25 Mazuwa gadatu hamba, wala wenjile ikumbi wowawele wang'hali na usungu ng'hatu, wana weli wa Yakobo, Simeoni na Lawi kalumbu wa Dina, nawahola mipanga ja hewo wauvada muji, baho du na kuwakopola walume weng'ha.
GEN 34:26 Nawawakopola kwa mipanga Hamoli na mwanage Shekemu, nawamlavya Dina hali ng'handa ya Shekemu, nawoka.
GEN 34:27 Kukopola ako lokupulute, wasongolo wanji wa Yakobo nawenjila hali muji awo na kuhola chila chinhu, kwa vila lumbulyawo nayali yaditikwe yawe mwavu.
GEN 34:28 Nawahola ming'holo na mhene na misenga na midogowi na choneche chiwele kuli muji ama kumgunda.
GEN 34:29 Nawawebata wana na wadala weng'ha na kuhola lufufu lweng'ha na choneche chiwele mli ng'handa za hewo.
GEN 34:30 Hamba, Yakobo nakawalonjela Simeoni na Lawi, “Hemwe namungalila kugaya kwa kundita heni nzudilwe na wenyeng'haye wa isi ayi ya Wakanaani na Wapelisi. Heni ndahela wanhu wenji, wone wating'hane kuya kunhowa heni wong'hopola heni hamwe na wang'holozangu.”
GEN 34:31 Hewo nawedichila, “Hambi nakakundigwa kumditila lumbulyetu kota mng'hondwa?”
GEN 35:1 Zuwa limwe Nguluwi nakamlonjela Yakobo, “Waluche majendo, ulute kikala Beteli na kunzenjela honhu ha kulavila nhambiko heni Nguluwi yondikulawile mhela loumbilime mkulugo Esau.”
GEN 35:2 Lelo Yakobo nakawalonjela wang'holoze na wanhu weng'ha wowali na heye, “Mtajile kutali jimalukolo ja milungu cha chijenzi jomlinajo, mihovuje na kuvala nguwo zinji.
GEN 35:3 Hamba, toluta Beteli leka ndimzenjele honhu ha kulavila nhambiko Nguluwi yanhanzile zuwa lya kugaya, Nguluwi nayawele na heni heng'ha hondutile.”
GEN 35:4 Lelo nawamha Yakobo jimalukolo jeng'ha ja milungu mijenzi najowali najo hamwe na vipuli navyowavalile mmakutu, na heye nakavitila hasi ha mwaloni nauwele behi na Shekemu.
GEN 35:5 Yakobo na wanage nalowawele mlimajendo, Nguluwi nakawadumbiza ng'hatu wenyeng'haye wa miji jeng'ha ja habehi mbaka hawajezile kuwawinza.
GEN 35:6 Yakobo hamwe na wanhu weng'ha nawoyawele nawo nawafika Lusu ichemigwe kahi Beteli kuli isi ya Kanaani.
GEN 35:7 Nakazenga honhu ha kulavila nhambiko na kuhachema honhu aho Eli-beteli kwa vila aho ndo honhu Nguluwi nayelajile kwa heye mhela naloyali yombilima mkulugwe.
GEN 35:8 Debola chitumagwa wa Lebeka nakabagama, nakatiligwa hasi ha igodi lilinguchemigwa mwaloni nzingo ya kusini mwa Beteli. Lelo Yakobo nakahachema honhu aho Aloni-bakuti ilinguzeleka ibuyu lya kuzapila.
GEN 35:9 Yakobo naloyahiluche kulawa Padani-alamu, Nguluwi nakamlawila kahi na kumtambichiza.
GEN 35:10 Nguluwi nakamlonjela, “Itagwa lyako ndo Yakobo, ila huchemigwa ahyo kahi, sambi kochemigwa Isilaeli.” Lelo Yakobo nakachemigwa Isilaeli.
GEN 35:11 Kahi Nguluwi nakamlonjela, “Heni ndo Nguluwi yawele na mong'ho. Uwe na wana wenji na mwonjezeche, kwa hegwe wolawila wanhu wenji wa nhanzi na nhanzi nyinji na wandewa.
GEN 35:12 Isi yondiwapele Abulahamu na Isaka, ndokupa hegwe na wanago.”
GEN 35:13 Lelo loyasindile kulonga na Yakobo, Nguluwi nakamleka.
GEN 35:14 Yakobo nakemiza izengo honhu aho Nguluwi naloyalongase na heye, nakamjidila nhambiko ya chakunwa na mafuta.
GEN 35:15 Lelo Yakobo nakahachema honhu aho loyalongase na Nguluwi, Beteli.
GEN 35:16 Yakobo na ivyazi lya heye lyeng'ha nawalutilila na majendo ga hewo kulawila Beteli. Nalowali utali umwenga wang'hali kufika Efulata, Laheli nakebatikwa na usungu ung'hang'hale wa kuponda.
GEN 35:17 Naye loyawele mli usungu awo, mkunga nakamlonjela, “Uleche kugozola, kuponda mwana yunji mlume.”
GEN 35:18 Laheli aku yawele behi kubagama, nakamchema ayo mwana itagwa lya Beni-oni. Ila mhaza wa mwana nakamchema Benjamini.
GEN 35:19 Laheli nakabagama na kutiligwa hafungo mwa nzila ilinguluta Efulata. Ayo ndo Betelehemu.
GEN 35:20 Yakobo nakemiza izengo mchanya mwa chilaga cha Laheli liwele baho mbaka lehano.
GEN 35:21 Isilaeli nakalutilila na majendo na kwesela naloyapulute Migidoli-edeli izeleche kota ilingo lya Edeli.
GEN 35:22 Mhela Isilaeli naloyali yochikala muisi ayo, mwanage Lubeni, nakawasa na Biliha, mpogozi yawele kota mchewake mhaza wa heye, na heye Isilaeli nakahulika mbuli azo. Yakobo nayali na wana kumi na weli.
GEN 35:23 Wana wa Lea nawali Lubeni, mlelwa wa mwaluko wa Yakobo, na Simeoni na Lawi na Yuda na Isakali na Sebuluni.
GEN 35:24 Wana wa Laheli nawali Yusufu na Benjamini.
GEN 35:25 Wana wapondigwe na Biliha, chitumagwa mdala wa Laheli, nawali Dani na Nafutali.
GEN 35:26 Na wana wapondigwe na Silipa, chitumagwa mdala wa Lea, nawali Gadi na Asheli. Awo ndo wana wa Yakobo nayawapatile naloyawele kula Padani-alamu.
GEN 35:27 Yakobo nakoka nakuluta Mamle kwa mhaza wa heye Isaka, ako Kiliati-aliba, ako Hebuloni, honhu hawele Abulahamu na Isaka nawekale kota wajenzi.
GEN 35:28 Isaka nayali na miyaka miya imwe na makumi nane,
GEN 35:29 nakabagama yawele yalalile lukami na nakaza kilumba na wasekulu wa heye wamlongole. Wana wa heye Esau na Yakobo nawamtila.
GEN 36:1 Ayi ndo mbuli ya walelwa wa Esau, ahyo ndo Edomu.
GEN 36:2 Esau nakahesa wadala Wakanaani, Ada mhinza Eloni Mhiti na Oholibama mhinza wa Ana na kahi mzukulu wa Sibeoni Muhivi
GEN 36:3 na Basemati mhinza wa Ishimaeli, lumbulye Nebayoti.
GEN 36:4 Ada nakampondela Esau Elifasi, na heye Basemati nakampondela Leueli.
GEN 36:5 Oholibama nakampondela Yeushi na Yalamu na Kola. Awo ndo wana wa Esau woyawapatile naloyekale kuli isi ya Kanaani.
GEN 36:6 Hamba Esau nakawahola wachewake na wanage walume na wadala na wanhu weng'ha wa haluga hake, na misenga na migongolo ja heye jinji na vinhu vya heye vyeng'ha navyoyapalile kuli isi ya Kanaani, nakahamila honhu hanji, kutali na mng'holoze Yakobo.
GEN 36:7 Nakadita ahyo kwa vila vinhu vya hewo navyali vinji mbaka nawalemwela kikala hamwe. Isi nayowekale kota wajenzi nayali ndodo kwa winji wa vinhu navyowali navyo na misenga.
GEN 36:8 Ahyo, Esau nakaluta kikala kuli isi ya vidunda vya Seili. Itagwa linji lya Esau ndo Edomu.
GEN 36:9 Ayi ndo mbuli ya wana wa Esau, mhaza wa Edomu kuli vidunda vya Seili.
GEN 36:10 Wana wa Esau wali Elifasi yapondigwe na Ada mchewake, na Leueli yapondigwe na Basemati mchewake yunji.
GEN 36:11 Wana wa Elifasi wali Temani na Omali na Sefo na Gatamu na Kenasi.
GEN 36:12 Elifasi nayali na mhawake itagwa lyake Timuna. Ayu nakampondela mwana itagwa lyake Amaleki. Wano nawali wana wa mchewake Esau nayachemigwe Ada
GEN 36:13 Basemati mchewake Esau, nakamponda Leueli. Wana wa Leueli wali Nahati na Sela na Shama na Misa.
GEN 36:14 Oholibama mhinza wa Ana, mhinza wa Sibeoni, nakampondela Esau wana wadatu, Yeushi na Yalamu na Kola.
GEN 36:15 Awa ndo wakulu wa nhanzi ilawile kwa Esau. Elifasi, nayawele mlelwa wa mwaluko wa Esau nakawaponda Temani na Omali na Sefo na Kenasi
GEN 36:16 na Kola na Gatamu na Amaleki, chila yumwe wa hewo nayali mkulu wa nhanzi ya heye. Awo weng'ha ndo wana wa Elifasi kuli isi ya Edomu, nawalawile kwa Ada mchewake Esau.
GEN 36:17 Leueli, mwanage Esau, nakawaponda Nahati na Sela na Shama na Misa. Chila yumwe nayali mkulu wa nhanzi ya heye. Awo weng'ha ndo wana wa Leueli kuli isi ya Edomu nawalawile kwa Basemati mchewake Esau.
GEN 36:18 Wana wa Oholibama mchewake Esau nawali, Yeushi na Yalamu na Kola, chila yumwe nayali mkulu wa nhanzi ya heye. Awo weng'ha ndo wana wa Oholibama mhinza wa Ana, mchewake Esau.
GEN 36:19 Lelo awo ndo walelwa wa Esau mina ndo Edomu, chila yumwe nayawele mkulu wa nhanzi ya heye.
GEN 36:20 Awa ndo walelwa wa Seili Mholi, na ndo wenyeng'haye wa isi ayo, Lotani na Shobali na Sibeoni na Ana
GEN 36:21 na Dishoni na Eseli na Dishani, chila yumwe nayali mkulu wa nhanzi ya heye mli wala Waholi wa lulelo lwa Seili, kuli isi ya Edomu.
GEN 36:22 Wana wa Lotani nawali Holi na Hemani, na lumbulye Lotani nayachemigwe Timuna.
GEN 36:23 Wana wa Shobali nawali Alivani na Manahasi na Ebali na Shefo na Onamu.
GEN 36:24 Wana wa Sibeoni nawali Aya na Ana. Ana nandoyaziwene nzasa za mazi gapwituche kuchiwala, naloyali yodima midogowi ja mhaza wa heye Sibeoni.
GEN 36:25 Wana wa Ana nawali Dishoni na mhinza yumwe itagwa lyake Oholibama.
GEN 36:26 Wana walume wa Dishoni nawali Hemdani na Eshibani na Itilani na Kelani.
GEN 36:27 Wana walume wa Eseli nawali Bilihani na Saawani na Akani.
GEN 36:28 Wana walume wa Dishani nawali Usi na Alani.
GEN 36:29 Lelo awo ndo wakulu wa Waholi, Lotani na Shobali na Sibeoni na Ana
GEN 36:30 na Dishoni na Eseli na Dishani, chila yumwe wa hewo yawele mkulu wa nhanzi ya Waholi kuli isi ya Seili.
GEN 36:31 Awa ndo wandewa nawalongoze isi ya Edomu, lokung'hali kuduhu mndewa ne yumwe yalongoze Waisilaeli.
GEN 36:32 Bela, mwana Beoli, nakalongoza isi ya Edomu yawele na ng'handa ya undewa kuli muji wa Dinaba.
GEN 36:33 Bela loyabagame, Yobabu mwana wa Sela kulawa Bosila nakalongoza honhu hake.
GEN 36:34 Yobabu loyabagame, Hushamu wa isi ya Watemani, nakalongoza honhu hake.
GEN 36:35 Hushamu loyabagame, Hadadi mwana wa Bedadi nakalongoza honhu hake, ng'handa ya heye ya undewa nayali kuli muji wa Aviti. Ayu ndo nayawatowile na kuwasumya Wamidiani kuli isi ya Moabu.
GEN 36:36 Hadadi loyabagame, Samula kulawila Masileka, nakalongoza honhu hake.
GEN 36:37 Samula loyabagame, Shauli kulawila Lehoboti, muji uwele behi na lwanda lwa Eyufulate, nakalongoza honhu hake.
GEN 36:38 Shauli loyabagame, Baali-hanani, mwana wa Akiboli, nakalongoza honhu hake.
GEN 36:39 Baali-hanani loyabagame, Hadadi nakalongoza honhu hake, na itagwa lya muji wa heye liwa Pau. Mchewake Akiboli nayali Mehetabeli, mhinza wa Matiledi na mzukulu wa Mesahabu.
GEN 36:40 Wakulu wa nhanzi zilawile kwa Esau, kota nhanzi za hewo na honhu hao ha kikala, wali Timuna na Aluva na Yeteti
GEN 36:41 na Oholibama na Ela na Pinoni
GEN 36:42 na Kenasi na Temani na Mibisali
GEN 36:43 na Magidieli na Ilamu. Awo ndo wakulu wa Edomu, wachemigwa kulawa honhu hawo kuli honhu ha isi nazowekale. Esau nayali sekulu wa Waedomu.
GEN 37:1 Yakobo nakalutilila kikala kuli isi ya Kanaani, moyali ngikala mhaza wa heye kota mjenzi.
GEN 37:2 Ayi ndo mbuli ya lukolo lwa Yakobo, Yusufu naloyali msongolo wa miyaka kumi na saba, nayali yodima ming'holo na mhene hamwe na wang'holoze, wana wa Biliha na Silipa wadala wa mhaza wa heye. Yusufu nayali yomlonjela mhaza wa heye mbuli za wihe wa wang'holoze.
GEN 37:3 Isilaeli nakamgana lukami Yusufu kusinda wana weng'ha, kwa vila nakapondigwa mhela wa ulalilo wa heye na nakamhonela Yusufu ikanzu lya chiuyeng'ha linoligwe ng'hatu.
GEN 37:4 Ila wang'holoze vyowawene kota mhaza wa hewo nakamgana Yusufu kusinda hewo, nawamzudila ne kulonga na heye goya.
GEN 37:5 Nechilo imwe, Yusufu nakalota, ila loyawasimile wang'holoze, hewo nawamzudila ng'hatu.
GEN 37:6 Nakawalonjela, “Mhulichize vyondotile.
GEN 37:7 Nandota kota tweng'ha twali kumgunda tukoweleza nyhinza na baho du nyhinza ya heni nazima wima. Nyhinza za hemwe, nazikungajiza na kuzunguluta na kinamizila nyhinza ya heni.”
GEN 37:8 Wang'holoze nawamuuza, “Ndaze, kwangugana kutulonjela kota kotulongoza? Ama kowa na ludali kwa hetwe?” Lelo walutilila kumzudila ng'hatu kwa mbuli ya kulota na ulonzi wa heye.
GEN 37:9 Hamba Yusufu nakalota kahi, nakawasimila wang'holoze yolonga, “Mhulichize, ndota kahi, nambona nhondwe kumi na imwe na isanya na nyelezi, nazinamizila heni.”
GEN 37:10 Loyamsimile mhaza na wang'holoze kulota ako, mhaza wa heye nakamng'hanuchila yolonga, “Ndo kulota kwachi ako koulotile? Ndaze, yotulapa heni na mayako na wang'holozo kuya na kinamiza hasi hamwando ha hegwe kukutogola?”
GEN 37:11 Wang'holoze nawamonela fihi, ila mhaza wa heye nakalutilila kijesa mbuli ayo.
GEN 37:12 Zuwa limwe, wang'holoze Yusufu nawaluta kudima misenga ja mhaza wa heye behi na Shekemu.
GEN 37:13 Isilaeli nakamlonjela Yusufu, “Kuvizela kota wang'holozo wangudima migongolo kula Shekemu. Lelo ndangugana ndikulajize kwa hewo.” Yusufu nakedichila, “Heni nda goya.”
GEN 37:14 Mhaza wa heye nakamlonjela, “Ulute ukawalole wang'holozo na migongolo wone wawele wakomu hamba uye undonjele.” Yakobo nakamlajiza Yusufu kulawila ibindi lya Hebuloni. Yusufu naloyawele behi na Shekemu,
GEN 37:15 munhu yumwe nakamfika yolubaluba mchiwala, nakamuuza, “Kwangupala choni?”
GEN 37:16 Yusufu nakamwidichila, “Ndanguwapala wang'holozangu, dedede, undonjele honhu howali ngudima migongolo.”
GEN 37:17 Yula munhu nakamlonjela, “Ndangijesa kota mina woka, kwa vila nandiwahulika wolonga kota wanguluta Dotani.” Lelo Yusufu nakawawinza wang'holoze nakawafika ako Dotani.
GEN 37:18 Wang'holoze lowamuwene yang'hali kutali, hanoya behi, nawaheha wogana wamkopole.
GEN 37:19 Nawalongasa, “Mloleni! Yula yalingulota kanguya.
GEN 37:20 Natumkopole na kumtoza mli izimbo lilihela mazi, hamba tolonga kota nakadakuligwa na igongolo ling'hang'hale lya kisolo. Hamba tolola ako kulota kwa heye kowa ndaze.”
GEN 37:21 Ila Lubeni loyahuliche luzi alo, nakagana kumlohola mli moko gawo, nakawalonjela wang'holoze, “Dedede, tuleche kumkopola.
GEN 37:22 Mleche kubohola danda. Ila mumjele amu mli ideho hano mchiwala, ila mleche kumlumiza.” Nakalonga ahyo leka yamlohole mmoko mwa hewo, na hamba yamhiluse kwa mhaza wa heye.
GEN 37:23 Yusufu loyawafichile wang'holoze, nawamvula ikanzu lya chiuyeng'ha linoligwe.
GEN 37:24 Hamba wamibata na kumtoza kuli ideho, ila ideho lila nahaliwele na mazi.
GEN 37:25 Lowekalise kulya, nawona majendo ga Waishimaeli wojenda kulawila Gileadi kuza Misili. Ngamiya wa hewo nawapapa ubani na mafuta ga mono na manemane.
GEN 37:26 Aho Yuda nakawalonjela wang'holoze, “Topegwa choni wone tumkopole mng'holozetu, na kuvisa kukopola kwa heye?.
GEN 37:27 Inoga tumguze kwa awa Waishimaeli, ila tuleche kudita chinhu chiwala ukomu wa heye, kwa vila heye ka mng'holozetu na twaivyazi limwe.” Wang'holoze nawakunda ga heye.
GEN 37:28 Waguzaji na wagulaji Wamidiani lowafichile honhu hala, awo wang'holoze wamlavya Yusufu kuli ideho na wamguza kwa Waishimaeli kwa migwala makumi meli, nawo nawamhola Yusufu mbaka Misili.
GEN 37:29 Lubeni loyahiluche kuli lila ideho, nahamuwene Yusufu kahi, nakadega nguwo zoyavalile kwa masinzo.
GEN 37:30 Nakawalutila wang'holoze na kuwalonjela, “Msongolo ka haduhu, nani ndute kohi?”
GEN 37:31 Nawalidumula singo ipongo limwe, nawahola ikanzu lya Yusufu na kwinjiza mli danda ya ila mhene.
GEN 37:32 Hamba wamhilichila lila ikanzu mhaza wa hewo, na kumlonjela, “Natulokota ikanzu ali, lole tandi, liwhana kota lya mwanago ama hebu.”
GEN 37:33 Mhaza wa hewo nakalizela lila ikanzu, nakalonga, “Ena ng'hatu! Ndangijesa kota ne lunhwinhwi igongolo ling'hang'hale lya kisolo nalimdakula. Ndangukunda Yusufu kadumuligwa viwundewunde.”
GEN 37:34 Aho Yakobo nakadega nguwo zoyavalile kwa masinzo na kuvala igunila mchuno kwa kulajila masinzo. Nakamlilila mwanage kwa mhela wa mazuwa menji.
GEN 37:35 Wanage walume na wadala nawoya kumhembuliza, ila heye nakalema kuhembulizwa yolonga, “Mndeche ndolutilila kulombocheza kwa mbuli ya mwana wa heni, mbaka hondibagama na kuluta kuli isi ya wabagame koyawele mwana wa heni”. Yakobo nandovyoyamlilile mwanage.
GEN 37:36 Mhela awo kula Misili wala Wamidiani nawamguza Yusufu kwa munhu nayachemigwe Potifa, nayawele mng'hangala wa chimwe cha vilundo vya wamizi vya Falao.
GEN 38:1 Mhela awo Yuda nakebagula na wang'holoze, nakaluta kikala na munhu yumwe Mwadulami itagwa lyake Hila.
GEN 38:2 Loyali ako, Yuda nakamona mhinza wa Shua, Mkanaani, nakamhesa na kuwasa na heye.
GEN 38:3 Mhinza wa Shua nakebata himila, nakaponda mwana mlume, Yuda nakamchema Eli.
GEN 38:4 Nakahola himila inji, nakaponda mwana mlume, nakamchema Onani.
GEN 38:5 Hamba nakaponda mwana yunji mlume, nakamchema Shela. Mhela Shela loyapondigwe, Yuda nayali Kesibu.
GEN 38:6 Hamba Yuda nakamhesela mwanage wa mwaluko Eli, kwa mdala yachemigwe Tamali.
GEN 38:7 Ila Eli, mlelwa wa mwaluko wa Yuda, nayali na wihe hameho ha Mkulu Nguluwi, ahyo Mkulu Nguluwi nakamkopola.
GEN 38:8 Yuda nakamlonjela Onani, “Mhole mdala wa mng'holozo yabagame, ahyo kota vyoilinguganigwa kudita leka umpondele mng'holozo wana kulawa kwa mlamugo.”
GEN 38:9 Ila Onani nakavizela kota awo wana hawowa wa heye. Ahyo, loyawasile na mdala wa mng'holoze nakabohola hasi nyhadikwa za lulelo, yolema kumpondela mng'holoze wana.
GEN 38:10 Chinhu achi chihile ng'hatu hali meho ga Mkulu Nguluwi, nakamkopola Onani kahi.
GEN 38:11 Ndo Yuda nakamlonjela Tamali, mdala wa mwanage, “Uhiluche kaye kwa mhaza wa hegwe, upone kuko ne kuhesigwa mbaka mwana wa heni Shela hoyowa msongolo.” Yuda nakadumba Shela kota kobagama kota wang'holoze. Lelo Tamali nakahiluka kaye kwa mhaza wa heye.
GEN 38:12 Hamba mhinza wa Shua, mdala wa Yuda nakabagama. Yuda loyasindile kuwasiliza matanga, nakaluta na mganwa wa heye Hila, Mwadulami, nawaluta Timuna kwa wadumula milaika ja ming'holo ja heye.
GEN 38:13 Tamali loyahuliche kota mgosi wa heye nayali mnzila kuluta Timuna kudumula milaika ja ming'holo ja heye,
GEN 38:14 nakavula nguwo za mlekwa, na kigubika nguwo lukuli na kumeho, hamba kaza kikala honhu hawele na lwizi lwa Enaimu, chijiji nachiwele mnzila kuza Timuna. Nakadita ahyo, kwa vila nakona kota Shela nayali msongolo ila heye Tamali nahahesigwe yawe mdala wa heye.
GEN 38:15 Yuda nakamfika Tamali aho, nakejesa kota kamdala mng'hondwa, kwa vila nakegubika kumeho.
GEN 38:16 Aho ne kuvizela kota ayo nayali mdala wa mwanage, nakamlutila hala hafungo mwa nzila na kumlonjela, “Ndagugana kuwasa nagwe.” Tamali nakamuuza, “Komha choni hondikunda?”
GEN 38:17 Yuda nakamwidichila, “Ndokupa kanyehe ka mhene mli chilundo cha heni.” Tamali nakamlonjela, “Wilahe na undechele chinhu kota chilajilo cha kungalila ako kanyehe.”
GEN 38:18 Yuda nakamuuza, “Kwangugana ndikupe choni chiwe ulajilo?” Na heye nakamwidichila, “Umhe ayo pete iwele na ulajilo wa hegwe na ng'weso ya pete ayo na ayo ng'hweku ndivibate.” Yuda nakamha vinhu avyo vyeng'ha, nakawasa naye. Baho Tamali nakebata himila ya heye.
GEN 38:19 Tamali nakahiluka kaye, nakavula nguwo nazoyavalile nakuvala kahi nguwo za heye za ulekwa.
GEN 38:20 Mhela Yuda loyamlajize Mwadulami yamhilichile kala kanyehe yula mdala leka yahiluse vinhu vyoyampele kota ulajilo, Hila nahamfichile.
GEN 38:21 Hila nakawauza wenyeng'haye wa Enaimu, “Kakohi yula mdala mng'hondwa nayawele hafungo mwa nzila behi na hano?” Wamwidichila, “Enaimu hakuwele na mdala mng'hondwa.”
GEN 38:22 Ayo munhu nakahiluka kwa Yuda, nakamlonjela, “Simuwene. Kahi wenyeng'haye wa ako nawandonjela kota hakuwele na mdala mng'hondwa yoneche ako.” Wadala wanji nawali wodita ung'hondwa kota honhu ha kujifugamila jimalukolo jawo
GEN 38:23 Yuda nakalonga, “Leche yahole vinhu avyo, hanji kotudita tusechigwe. Hegwe baho kona kota nandimigalila kanyehe, ila humuwene.”
GEN 38:24 Lojikwete myezi jidatu, Yuda nakahulika kota, “Tamali mdala wa mwanage, kagaluka mng'hondwa, kahi kana himila kwa kudita ung'hondwa.” Yuda nakalajiza, “Mlavyeni kunze yasomigwe na chiluli.”
GEN 38:25 Lowali womlavya kunze, Tamali nakalajiza usenga kwa mgosi wa heye yolonga, “Yawele na vinhu avi ndo yamhele himila. Lelo ndangugana umzele munhu yawele na pete ayi na ng'weso na ng'hweku ayi.”
GEN 38:26 Yuda nakavizela vinhu avyo, nakalonga, “Tamali ndo yatanganiche kusinda heni, mina ndangukomya, simhesile heye kwa mwana wa heni Shela.” Kulawila zuwa alyo, Yuda hawasile kahi na Tamali.
GEN 38:27 Mhela wa kuponda Tamali loufichile, naizeleka kota kana wanyambili.
GEN 38:28 Usungu wa kuponda lowaluche, mwana yumwe nakalavya moko kunze, na heye mkunga kauwoha ng'weso ndung'hu, yolonga, “Ayu ndo yapondigwe mwaluko.”
GEN 38:29 Ila mwana ayo loyahiluse moko mgati, mng'holoze nakatoma kupondigwa. Mkunga nakalonga, “Ndaze hegwe kupondigwa kwa lupichi?” Ahyo, nakachemigwa Pelesi.
GEN 38:30 Hamba mng'holoze nakapondigwa yawele na ng'weso ndung'hu mmoko, na heye nakachemigwa Sela.
GEN 39:1 Yusufu loyaholigwe mbaka Misili, Mmisili yumwe nayachemigwe Potifa yawele chilongozi wa Falao na chilongozi wa chilundo cha heye cha wamizi, nakamgula kulawa kwa Waishimaeli wamigale Misili.
GEN 39:2 Mkulu Nguluwi, nayali hamwe na heye Yusufu, nakamdita yasumye ng'hatu. Yusufu nayali yochikala mli ng'handa ya mkulu wa heye Mmisili.
GEN 39:3 Ayu mkulu wa heye nakavizela kota Mkulu Nguluwi nayali hamwe na Yusufu na ndo heye yaditile yasumye geng'ha yalingudita Yusufu.
GEN 39:4 Yusufu nakaganika ng'hatu hali Potifa na ndo yawele chitumagwa wa heye nakadita yawe chilongozi wa ng'handa ya heye na lufufu lweng'ha.
GEN 39:5 Kulawila mhela Potifa loyamditile Yusufu yawe mwamizi wa ng'handa ya heye na mwamizi wa lufufu lwake, Mkulu Nguluwi nakaitambichiza ng'handa ya ayo Mmisili kwa mbuli ya Yusufu. Utambichizo wa Mkulu Nguluwi uwa kwa chila chinhu choyawele nacho haluga na kumgunda.
GEN 39:6 Kwa mbuli ayo, Potifa nakamha ludali lwa vinhu vya heye vyeng'ha, na heye Potifa, nakaleka kudita choneche chila ila kulya chilyo cha heye yeka. Yusufu nayali msongolo yanojile na wa kuganigwa.
GEN 39:7 Loukwete mhela udo hela, mdala wa Potifa nakanojezwa na heye Yusufu nakamlonjela, “Uwase na heni.”
GEN 39:8 Ila Yusufu nakalema na kumlojela ayo mdala wa Potifa, “Hebu! Mkulu wa heni kamha ludali lwa chila chinhu hano haluga, na kwa vila ndahano, kahela lunhwinhwi kuwala chinhu choneche.
GEN 39:9 Ahano haluga heye kahela ludali kusinda heni. Heye handemeze kibata choneche ila hegwe kwa vila kwa mchewake. Lelo yowa ndaze ndite wihe ukulu na gehile hali Nguluwi.”
GEN 39:10 Ayo mdala nakalutilila kumlanda Yusufu chila zuwa, ila Yusufu nahamhulichize na kukunda kikala behi na heye ama kuwasa na heye.
GEN 39:11 Zuwa limwe Yusufu nakenjila mng'handa kukola mijito kota vyoilinguganigwa, nayali yeka kwa vila walume wanji nawakolasa hamwe mijito nawali haduhu haluga.
GEN 39:12 Mdala wa Potifa nakamibata ikanzu lyake na kumlonjela, “Uwase na heni.” Ila Yusufu nakamlechela lila ikanzu mmoko mwa heye nakabilimila kunze.
GEN 39:13 Aho yula mdala loyawene Yusufu nakamlechela igolole mmoko mwa heye nakabilimila kunze,
GEN 39:14 nakawachema vitumagwa wa ng'handa ya heye na kuwalonjela, “Loleni! Ayu Muebulaniya yotugalilwe kangutubasa soni. Nakoya kwa heni yogana kimbata kwa lupichi, ila heni nanhowa iyowe.”
GEN 39:15 Loyahuliche nditowa iyowe, nakalileka igolole lyake, na kubilimila kunze.
GEN 39:16 Yula mdala nakaliwika behi na heye lila igolole mbaka mlume wa heye loyahiluche haluga.
GEN 39:17 Nakamsimila mbuli ila yolonga, “Ayu chitumagwa Muebulaniya umigale kwa hetwe, nakambuyila kumbasa soni.”
GEN 39:18 Ila baho du lonhowile iyowe, nakalileka igolole lyake na kubilimila kunze.
GEN 39:19 Mkulu wa Yusufu loyahuliche ulonzi wa mchewake, kota chitumagwa wa heye ndovyoyaditile, nakazudila lukami.
GEN 39:20 Nakamhola Yusufu na kumhindila mchinweng'ho, honhu nahowahindilwe wanhu wawele na nongwa kwa mndewa. Ahyo Yusufu nakapona hala mchinweng'ho.
GEN 39:21 Ila mbaka amo mchinweng'ho, Mkulu Nguluwi nayali hamwe na Yusufu, yomditila igano lya kwimilila mbaka kumdita yaganigwe hali mkulu wa chinweng'ho.
GEN 39:22 Ayo mkulu wa chinweng'ho nakamuwika Yusufu yawe chilongozi wa weng'ha wawele mchinweng'ho. Chila chinhu chiditikwe amo, nachiditikwa kwa ludali lwake.
GEN 39:23 Ayo mkulu wa chinweng'ho nahajesile chinhu choneche chila choyapegwe Yusufu, kwa vila Mkulu Nguluwi nayali hamwe na Yusufu na nakasumya chila chinhu choyaditile.
GEN 40:1 Mhela wunji lozikwete mbuli azo, vilongozi weli wa mndewa wa Misili nawamditila wihe mndewa. Vilongozi awo wali mlolela vyakunwa mkulu na mgongomanya mibumunda mkulu wa mndewa.
GEN 40:2 Falao nakazudizwa ng'hatu na awo vilongozi weli,
GEN 40:3 nakawahindila mgati mwa chinweng'ho cha mkulu wa chilundo cha wamizi honhu nahoyahindilwe Yusufu.
GEN 40:4 Mkulu wa chilundo cha wamizi nakamhagula Yusufu yawe chitumagwa wa hewo. Nawo nawekala mchinweng'ho mhela umwenga.
GEN 40:5 Nechilo imwe, yula mlolela vyakunwa mkulu, na yula mgongomanya mibumunda mkulu wa mndewa wa Misili, chila yumwe nakalota ilivinji na chila ulotezi nawali na utang'huzi ulivinji.
GEN 40:6 Yusufu loyalutile kwa hewo lufuku kuwalola, weng'ha weli wali na lunhwinhwi.
GEN 40:7 Yusufu nakawauza awo vilongozi wa Falao nawawele mchinweng'ho hamwe na heye, mng'handa mwa mkulu wa heye, “Ndaze, lehano mwangoneka mna masinzo?”
GEN 40:8 Nawamwidichila, “Tuna masinzo kwa vila kuduhu munhu ne yumwe yatutang'ulile vyotulotile.” Yusufu nakawalonjela, “Ndaze, kutang'hula kulota aku haiwa mijito ja Nguluwi? Lelo mndonjele kulota kwa hemwe.”
GEN 40:9 Mlolela vyakunwa mkulu wa mndewa nakamsimila Yusufu vyoyalotile yolonga, “Nandota hino, nambona mzabibu kumwando kwa heni,
GEN 40:10 nawo wali na nhagala zidatu. Baho du, lowaluche kutitima mahamba, uluwa ubahula, na ving'honyo vyake viwa zabibu zipile.
GEN 40:11 Mmoko mwangu ndali na chizombe cha Falao, ng'hama zabibu mli chizombe acho, na ndimha Falao.”
GEN 40:12 Yusufu nakamlonjela ayo chitumagwa, “Kutang'hula kwa vyoulotile ndo hino, zila nhagala zidatu ndo mazuwa gadatu.
GEN 40:13 Logopuluta mazuwa gadatu, Falao kokwinula nakolawa mchinweng'ho na kukuhilusa kahi mli ulongozi louwele nawo. Koweza kahi kumha Falao chizombe mmoko kota vyowali udita aho katali.
GEN 40:14 Ila dedede, uleche kusemwa ndiyago mhela mbuli hozikulutila goya, unhowanhile na kunyhema hali Falao nani ndawe amu mchinweng'ho.
GEN 40:15 Mina heni nyholigwa kuli isi ya Waebulaniya na hano Misili siditile choneche chindapa mbichigwe mchinweng'ho.”
GEN 40:16 Yula mgongomanya mibumunda mkulu, loyawene utang'huzi ula unoga, nakamlonjela Yusufu, “Na heni nandota, ndidwiche kumutwi nyhelo zidatu za mibumunda.
GEN 40:17 Kuli luhelo lwa kuchanya, mwali na vilyo vinji vitelechigwe kwa mbuli ya mnvina ya Falao. Ila videje vyali vidobola na kulya kuli luhelo alo naluwele kumutwi wa heni.”
GEN 40:18 Yusufu nakamlonjela, “Ulaguzi wa vyoulotile ndo awu, zila nyhelo zidatu ndo mazuwa gadatu.
GEN 40:19 Logopuluta mazuwa gadatu, Falao kokulavya mchinweng'ho, kowinula mutwi wa hegwe na kuniniza lukuli mchanya mli igodi, navyo videje vyolya lukuli lwako.”
GEN 40:20 Kuli zuwa lya kadatu, iwele ndo zuwa lya mnvina ya kukumbuchila kupondigwa kwa Falao nakawawichila chilyo wakulu wa heye weng'ha. Nakawalavya mchinweng'ho mlolela vyakunwa mkulu na mgongomanya mibumunda mkulu, nakawawika hali wakulu wanji wa heye.
GEN 40:21 Hamba nakamhilusila ukulu yula mlolela vyakunwa, leka yamigalile Falao chizombe.
GEN 40:22 Ila yula mgongomanya mibumunda nakamniniza kuli igodi, kota Yusufu navyoyatang'ule kulota kwa hewo.
GEN 40:23 Ahyo, yula mlolela vyakunwa nakamsemwa Yusufu, honhu ha kumkumbuka.
GEN 41:1 Lojikwete miyaka mili, Falao nakalota, nakewona yemile hafungo mwa lwanda lwa Naili,
GEN 41:2 nakona misenga saba jinenehe na kunojeza jilawa mlwanda lwa Naili na kuya kulya misolo.
GEN 41:3 Hamba misenga jinji saba jigandile na jihile ng'hatu najilawa mlwanda lwa Naili, juya na kwima behi na jila misenga jinenehe hafungo mwa lwanda.
GEN 41:4 Ajo misenga jigandile lukami najiwalya jila misenga jinenehe, aho Falao nakalilimka.
GEN 41:5 Loyawasile kahi, nakalota lwa keli, nakona miso mikulu saba ja uhemba na jititime jizuchile mli ibeleje limwe.
GEN 41:6 Hamba logakwete ago, miso jinji saba mizisili jikalile kwa ivuche lya mbeho kulawa kugunuche nalilawila.
GEN 41:7 Ajo miso saba, najimela jila miso saba jitiliwale jinenehe na jiwele na nyhule nyinji. Falao loyalilimche, nakavizela kota nayali yolota.
GEN 41:8 Lokubwemwenzuche, Falao yawele na lunhwinhwi lukami, nakawachema wahawi weng'ha wa Misili na wawele wasomile lukami na kuwalonjela navyoyalotile, ila kuduhu ne yumwe yadahile kutang'ula vyoyalotile.
GEN 41:9 Ndo yula mlolela vyakunwa mkulu nakamlonjela Falao kata, “Lehano ndangukumbuchila hala londitile gehile ga heni.
GEN 41:10 Mhela wula loutuzudile hetwe vitumagwa wa Falao, heni na mgongomanya mibumunda, nakutuhindila mng'handa mwa ngome ya mkulu wa chilundo cha wamizi.
GEN 41:11 Nechilo imwe natulota, chila yumwe nakalota ilivinji na chila ulotezi nawali na utang'huzi ulivinji.
GEN 41:12 Lelo msongolo yumwe Muebulaniya, chitumagwa wa mkulu wa wamizi, nayali hamwe na hetwe mchinweng'ho. Lotumsimile kulota kwa hetwe, na heye nakatutang'ulila chila yumwe wa hetwe choyalotile.
GEN 41:13 Na iwa kota vila vyoyatutang'ulile. Heni nanyiluswa kuli mijito ja heni na yula mgongomanya mibumunda nakaninizwa kuli igodi.”
GEN 41:14 Lelo Falao nakahilika wanhu, nakamchema Yusufu, nawamigala himahima kulawila kuchinweng'ho. Nakabeya mnvili na kuvala nguwo zinji na kwinjila kwa Falao.
GEN 41:15 Falao nakamlonjela Yusufu, “Ndota ila kuduhu munhu yadahile kutang'hula. Nanyhulika lutogo lwa hegwe kota wone munhu yakulonjele kulota kwa heye koweza kutang'hula.”
GEN 41:16 Yusufu nakamwidichila Falao, “Ndahela uwanzi awo, ila Nguluwi kokwidichila vitanganiche.”
GEN 41:17 Aho Falao nakamlonjela Yusufu, “Nandota kota nanyhima hafungo mwa lwanda lwa Naili,
GEN 41:18 nambona misenga saba jinojile na jinonile jilawa mlwanda lwa Naili na kulya misolo.
GEN 41:19 Awo nawawinzwa na misenga jinji saba jigandile lukami. Heni sinajona misenga jifandile kota ajo kuli isi ya Misili.
GEN 41:20 Lelo jila misenga jigandile lukami jiwadakula jila misenga saba jinenehe lukami.
GEN 41:21 Ila lojiwadakule jila misenga jinenehe, munhu yoneche howeza kuvizela kota najiwadakula jiyawo, kwa vila najali jigandile hihila kota mwaluko. Aho nandilimka kulawa kuli kuwasa.
GEN 41:22 Kahi nandota, mbona miso saba jimemile nyhule jitiliwale kuli ibeleje limwe.
GEN 41:23 Hamba najiwinzigwa na miso minji saba jilihela chinhu, jigandile na jikalile kwa ivuche lya mbeho ya kugunuche.
GEN 41:24 Jila mizuchila jigandile jimela jila mizuchila saba jitiliwale. Lelo heni nandiwalonjela wahawi kulota aku ila kuduhu munhu yadahile kundonjela goya.”
GEN 41:25 Aho Yusufu nakamlonjela Falao, “Kulota kwa hegwe kweng'ha kwangulajila mana imwe. Nguluwi nakakugubulila mbuli zoyalingugana kudita behi hihi.
GEN 41:26 Jila misenga saba jinonile, ndo miyaka saba, na jila mizuchila saba jinonile ndo miyaka saba kahi, kulota kwa hegwe kuna mana imwe.
GEN 41:27 Jila misenga jigandile lukami, jiwadakule jila misenga jinonile, na jila miso saba jilihela chinhu jikalizwe na ivuche lya mbeho kula kugunuche, izeleche kota ndo miyaka saba ja nzala.
GEN 41:28 Kota vyondikulonjele, hegwe Falao, Nguluwi nakakugubulila mbuli zoyalingugana kudita behi hihi.
GEN 41:29 Kowa na miyaka saba ja kiguta kuli isi yeng'ha ya Misili.
GEN 41:30 Ila hamba kowa na miyaka saba ja nzala, na kiguta kuleche kukumbuchilwa. Nzala ayo yoigaza isi ino.
GEN 41:31 Kiguta ako kuleche kukumbuchilwa ng'hatu kwa vila nzala yoikuya yowa ng'hulu lukami.
GEN 41:32 Kulota kwa hegwe nakuya mala mbili kwa nhelo mbili zilingiwhana kukulajila kota Nguluwi nakamula kwa kukomya kudita ahyo, na heye kodita mbuli ayo behi hihi.
GEN 41:33 “Lelo inoga sambi, hegwe Falao, umlajize munhu yawele na uwanzi na luhala, umhe mijito na ludali lwa kuilolela isi yeng'ha ya Misili.
GEN 41:34 Kahi, gwaa Falao, wahagule wamizi wanji hano muisi, uwalonjele wakungajize chinhu chimwe kuli chila vinhu vihano vya mbena yeng'ha ya Misili kuli mhela uno wa miyaka saba ya kiguta.
GEN 41:35 Uwalonjele awo wamizi wakungajize chilyo cheng'ha kuli miyaka saba ilinguya ya mbena kwa winji. Nyhule azo ziwichigwe hali ludali lwa wamizi wa hegwe, gwaa Falao, iwe ng'hano ya chilyo kwa miji jeng'ha, nawo wailolele nyhule ayo.
GEN 41:36 Chilyo acho chowa ng'hano ya hamba kwa isi ya Misili leka ileche kubagama kwa nzala ya miyaka saba ilinguya.”
GEN 41:37 Kwamula koyamule Yusufu nakoneka kunoga hali Falao na wakulu wa heye weng'ha.
GEN 41:38 Ahyo Falao nakawauza wakulu wa heye, “Munhu ayu kana muhe wa Nguluwi. Ndaze, towa na munhu yunji kahi kota ayu?”
GEN 41:39 Hamba Falao nakamlonjela Yusufu, “Kwa vila Nguluwi nakakugubulila aga geng'ha, kuduhu munhu yawele na luhala na nyhala kota hegwe.
GEN 41:40 Hegwe ndo munhu yoilongoza isi ya heni, na wanhu wa heni weng'ha wowa hali ulongozi wa hegwe. Heni hela ndo mkulu kuleka hegwe kwa vila ndangukalisa hali chigoda cha undewa.
GEN 41:41 Lelo Yusufu ndangukuwika sambi uwe mkulu wa isi yeng'ha ya Misili.”
GEN 41:42 Aho Falao nakailavya pete iwele ulajilo wa heye hali chidole cha heye na kumvika Yusufu, nakamvika na ivalo lya heye lya kitani inojile na ugasi wa dhahabu kuli singo ya heye.
GEN 41:43 Falao nakamkwinhiza kuli mutuka ya heye ya keli ya falasi na wamizi nawelongoza kumwando kwa Yusufu wotowa iyowe na kulonga, “Mumfugamile!” Ahi ndo Falao vyoyampele Yusufu ulongozi mkulu hali isi yeng'ha ya Misili.
GEN 41:44 Kupuluta kwa aga, Falao nakamlonjela Yusufu, “Heni ndo Falao. Ndangulonga, munhu yoneche hali isi yeng'ha ya Misili yaleche kudita chinhu choneche ne kukundizwa na hegwe.”
GEN 41:45 Falao nakamgalila Yusufu itagwa lya Chimisili, Safenati-paneya. Nakamhesela Asenati mhinza wa Potifela, mtambika wa muji wa Oni. Lelo Yusufu nakaluka kijendela isi yeng'ha ya Misili.
GEN 41:46 Yusufu nayali na miyaka makumi gadatu loyaluche kumkolela mijito Falao, mndewa wa Misili. Nakalawa kaye kwa Falao na kuijendela isi yeng'ha ya Misili.
GEN 41:47 Kuli miyaka ila saba ya kiguta, migunda ja Misili najilavya mbena nyinji lukami.
GEN 41:48 Yusufu nakakungajiza chilyo cheng'ha mhela ula wa miyaka saba ya kiguta na kuwika ng'hano kuli miji ja Misili. Kuli chila muji nakawika ng'hano kulawa kuli migunda ja behi na muji awo.
GEN 41:49 Yusufu nakawika nyhule mng'hano kwa winji ng'hatu naiwa nyinji kota sangalaza ya bahali, mbaka nailemwela kuwazika.
GEN 41:50 Kung'hali kwaluka miyaka ja nzala, Yusufu nayali na wana walume weli kwa mchewake Asenati, mhinza wa Potifela, mtambika wa muji wa Oni.
GEN 41:51 Yusufu nakamchema wana wa heye wa mwaluko Manase, yolonga, “Nguluwi nakandita ndisemwe kugaya kwa heni kweng'ha na wang'holoze mhaza wa heni.”
GEN 41:52 Mwana wa heye wa keli nakamchema Efulaimu, yolonga, “Nguluwi nakangalila mwana kuli isi ya kugaya kwa heni.”
GEN 41:53 Miyaka jila saba ja kiguta hala Misili najikola.
GEN 41:54 Najaluka miyaka saba ja nzala kota navyoyalonjile Yusufu hala hamwande. Isi zinji zeng'ha nazali na nzala, ila isi yeng'ha ya Misili nayali na chilyo.
GEN 41:55 Wanhu wa Misili lowaluche kona nzala, nawamlilila Falao yawagalile chilyo. Na heye Falao nakawalonjela Wamisili weng'ha, “Mlute kwa Yusufu, loyawalonjelani mkole mumhulichize.”
GEN 41:56 Nzala nailutilila kuwa ng'hulu na kwenela isi yeng'ha. Aho Yusufu nakachumula ng'hano zeng'ha, nakawaguzila Wamisili chilyo.
GEN 41:57 Wanhu kulawa chila honhu muisi nawoya Misili kwa Yusufu kugula chilyo, kwa vila nzala nayali ng'hulu kuli isi yeng'ha.
GEN 42:1 Yakobo naloyahuliche kota kwali na nyhule ako Misili, nakawalonjela wanage, “Lekachoni mwangikalisa mchilola hela?
GEN 42:2 Nanyhulika kota Misili kuna nyhule. Mlute ako mkagule nyhule tuleche kubagama kwa nzala.”
GEN 42:3 Ahyo, wang'holoze kumi wa Yusufu nawaluta Misili kugula nyhule.
GEN 42:4 Ila Yakobo nahamlechile Benjamini mng'holoze Yusufu yalute hamwe na hewo mina nakadumba kota koweza kugazigwa.
GEN 42:5 Lelo wana wa Isilaeli nawafika Misili wawele na wanhu wanji walutile kugula chilyo, mina kuli isi ya Kanaani nako kwali na nzala.
GEN 42:6 Mhela awo Yusufu nayali ndo chilongozi ako Misili. Heye ndo yawele na ludali lwa kuwaguzila wanhu chilyo. Wakulugwe nawoya kumwinamila mbaka hali magulu ga Yusufu kwa kufugama.
GEN 42:7 Yusufu loyawawene wakulugwe nakawazela, ila heye nakawadita kota wajenzi, nakalonga nawo aku yang'hang'hale. Nakawauza, “Mlawila kohi hemwe?” Nawamwidichila, “Tulawila isi ya Kanaani, tuya kugula chilyo.”
GEN 42:8 Hanga Yusufu nakawazela wakulugwe, hewo nahawamzelele.
GEN 42:9 Yusufu nakakumbuchila navyoyalotile katali kwa mbuli ya wakulugwe, nakawalonjela, “Hemwe muya kutupugajiza. Muya kulola isi ya hetwe vyoiwele na kubowala”
GEN 42:10 Hewo wamwidichila, “Hebu, mkulu wa hetwe. Hetwe vitumagwa wa hegwe tuya kugula chilyo.
GEN 42:11 Hetwe twa lukolo, wana wa mhaza yumwe. Hetwe twa vitumagwa wa hegwe na twa wanhu tutanganiche, na hatuwele wapugajizi hebu.”
GEN 42:12 Ila Yusufu nakalonga, “Hebu! Hemwe muya kulola kubowala kwa isi ya hetwe.”
GEN 42:13 Nawamlonjela, “Hetwe, vitumagwa wa hegwe, twa kumi na mbili, wana wa munhu yumwe, wenyeng'haye wa isi ya Kanaani. Mdodo wa hetwe nakapona na mhaza kaye, na mng'holozetu yunji kabagama.”
GEN 42:14 Ila Yusufu nakawalonjela, “Kota navyondonjile, hemwe mwa wapugajizi hela.
GEN 42:15 Ahi ndo vyomjezigwa, ndangilaha kwa itagwa lya Falao, kota hamlawa aha mbaka mdodo wa hemwe hoyokuya.
GEN 42:16 Mumlajize yumwe wa hemwe yakamigale ayo mng'holozenu mdodo, hanga wayenu wanji wombeteza mchinweng'ho. Aho ndo ulonzi wa hemwe wozeleka kukomya kokuli. Wone hebu, ndangilaha kwa itagwa lya Falao kota hemwe mwa wapugajizi.”
GEN 42:17 Hamba nakawawika weng'ha mchinweng'ho kwa mhela wa mazuwa gadatu.
GEN 42:18 Zuwa lya kadatu, Yusufu nakawalonjela, “Kwa vila heni ndangumdumba Nguluwi, mdite hino leka muwe wakomu.
GEN 42:19 Wone mkomya hemwe mtanganika, yumwe wa hemwe yapone mchinweng'ho na wanji wawegalile nyhule wang'holozenu wawele na nzala.
GEN 42:20 Hamba mmigale kwa heni mdodo wa hemwe. Ayi yotawiza kukomya kwa ulonzi wa hemwe, namwe hamkopoligwa.” Lelo nawakunda kudita ahyo.
GEN 42:21 Hamba walongasa hewo kwa hewo, “Twangukomya hetwe tumditila vibi mng'holozetu. Hanga natumona yawele na ching'oni mnhumbula, hetwe nahatumhulichize hala nahoyatulandile. Ndo mina kugaya aku kweng'ha kutuyila.”
GEN 42:22 Lubeni nakawalonjela, “Ndaze, hemwe nasiwalonjelani tuleche kumditila gehile mng'holozetu? Ila hemwe nahamnyhulichize. Lelo twangugazigwa kwa mbuli ya danda ya heye.”
GEN 42:23 Hewo nahawavizelele kota Yusufu nakavizela geng'ha ago gowalonjile, mina naloyalonjile na hewo nayali kwa nzila ya munhu yavizelele ulonzi ula.
GEN 42:24 Yusufu nakaluta hafungo, nakaluka kulila. Loyanyamalile, nakahiluka kulongasa na hewo. Hamba nakamibata Simeoni na kumuwopa pingu hali meho ga hewo.
GEN 42:25 Yusufu nakalajiza mihako jawo jiwichigwe nyhule, chila yumwe yahilusilwe migwala ja heye mli mhako wa heye na wapegwe ndiya ya mnzila. Nawaditilwa mbuli azo zeng'ha.
GEN 42:26 Wawadwika midogowi jawo mihako jawo ja nyhule na kuka.
GEN 42:27 Naiwa lowafichile honhu ha kuwasa wajenzi ako kunzila, yumwe wa hewo nakagubula igunila lyake leka yalipe chilyo idogowi lyake, nakabubuwala kona migwala hamlomo mwa igunila.
GEN 42:28 Nakawalonjela wang'holoze, “Migwala ja heni jeng'ha jihiluswa. Azino hano hamlomo mwa igunila lyangu!” Lowahuliche ago, nawagozola. Nawelola aku wokakama na kiwuza, “Ndo mbuli yachi ayi yatuditile Nguluwi?”
GEN 42:29 Lowafichile isi ya Kanaani kwa mhaza wa hewo Yakobo, nawamsimila geng'ha gayawafichile nawamlonjela,
GEN 42:30 “Mndewa wa isi ila nakalonga natwe kwa kung'hang'hala, na kijesa kota hetwe twangupugajiza gali mli isi ya heye.
GEN 42:31 Ila hetwe natumlonjela kota hetwe twa wanhu watanganiche na hatulingupugajiza isi ya wanhu.
GEN 42:32 Natumlonjela hetwe twa kumi na weli wa mhaza yumwe, na yumwe wa hetwe nakabagama na yula mdodo ka kaye kuli isi ya Kanaani hamwe na mhaza wa hetwe.
GEN 42:33 Ndo chilongozi wa isi ila nakatulonjela, ‘Ahi ndo vyondiwazela kota hemwe mwangukomya kota mwa wanhu wa kukomya, mlecheni kwa heni yumwe wa hemwe, namwe mponile muhiliche chilyo kaye kwa wanhu wa hemwe wawele na nzala.
GEN 42:34 Hamba mmigale kwa heni ayo mdodo wa hemwe na aho ndovizela kota hemwe hamuwele wasunjilila wa isi ya wanhu ila mwa wanhu mtanganiche. Homdita ahyo ndomlechela mng'holozenu, namwe mokundigwa muwe mguza na kugula vinhu kuli isi ayi.’ ”
GEN 42:35 Lowali wojida nyhule mli migunila jawo, nawabubuwala kona chila yumwe wa hewo kahilusilwa mhako wa sendi mgati mwa igunila lya heye. Lowawene ago, weng'ha hamwe na mhaza wa hewo nawamema majesa.
GEN 42:36 Mhaza wa hewo Yakobo, nakawalonjela, “Mwangumboka wana wa heni! Yusufu haduhu, Simeoni haduhu, sambi mwangugana kumhola Benjamini. Nongwa zeng'ha azo zifika heni!”
GEN 42:37 Aho Lubeni nakamlonjela mhaza wa heye, “Wone ndemwele kumhilusa Benjamini, wakopole wana wa heni weli. Mleche Benjamini mmoko mwa heni, nani ndomlolela na kumhilusa kwa hegwe.”
GEN 42:38 Ila mhaza wa heye nakamwidichila, “Mwana wa heni holuta na hemwe, mng'holoze mina nakabagama, na heye yeka ndo yaponile. Heni ndala ndina mbuliza hekwa, wone msongolo ayu yafichigwe na nongwa yoneche mlimajendo yomkwaluka, mweng'ha monyilika kuli isi ya wabagame mbele ng'hongoloka na mbuliza na memile masinzo.”
GEN 43:1 Hamba nzala nailutilila kung'hang'hala ng'hatu kuli isi ila ya Kanaani.
GEN 43:2 Chila chilyo nachowagulile kula Misili nalochimalile, Yakobo nakawalonjela wanage, “Mlute kahi Misili mkatugulile chilyo.”
GEN 43:3 Ila Yuda nakamlonjela mhaza wa heye, “Yula munhu nakatulonjela yang'ang'ale yolonga, ‘Siwabochela wone hamuyile na mng'holozo mdodo.’
GEN 43:4 Wone kokunda Benjamini tulutase, lelo toluta kukugulila chilyo.
GEN 43:5 Ila wone hulingukunda tulutase hamwe, hatuluta hebu ako, kwa vila yula munhu nakatulonjela hazelu, ‘Hammbona homkuya ne mdodowenu.’ ”
GEN 43:6 Isilaeli nakalonga, “Lekachoni mnyinjize kuli magazo kwa kumlonjela ayo munhu kota mwanaye mng'holozenu yunji?”
GEN 43:7 Nawamwidichila, “Yula munhu nakatuuza yakangaze ng'hatu kwa mbuli ya ivyazi lya hetwe yolonga, ‘Ndaze, mhaza wa hemwe yang'hali mkomu? Ndaze, mwanaye mng'holozenu yunji?’ Ahyo natumwidichila kota vyoyatuuzile. Hatulinguvizela kota kotulonjela, ‘Mmigale mng'holozenu.’ ”
GEN 43:8 Yuda nakamlonjela, Yakobo mhaza wa heye, “Ung'hundize heni ndute na heye leka tuche himahima, tuche tukakugulile chilyo, tuleche bagama na nzala hamwe na hegwe na wana wa hetwe.
GEN 43:9 Nene baha ndowa mwamizi wa heye. Hegwe kondanda heni. Wone simhiluse umone kwa meho gako, nongwa yeng'ha iwe kwa heni mazuwa gose.
GEN 43:10 Wone nahatukawile, natwali tulutile na kuhiluka lwa keli.”
GEN 43:11 Aho Yakobo mhaza wa hewo nakawalonjela, “Lelo, kwa yangulapigwa iwe ahyo, lelo mdite ahi, mhole gamwe ga chilyo cha isi ya hetwe mli mihako ja hemwe, mumhilichile ayo chilongozi ndolendole. Mumholele mafuta mado ga mkwaju na hanombwa nyindo na ifunyizi na manemane na kungu na ng'weme.
GEN 43:12 Mhole na migwala mala ya keli na zila zilingulapigwa, kwa vila mwanguganigwa kuhilusa migwala jila jiwichigwe mmigunila ja hemwe, hanji nazihiluswa ne kuvizela.
GEN 43:13 Mumhole na mng'holozenu mlutase kwa ayo munhu.
GEN 43:14 Mkulu Nguluwi Yawele na Mong'ho yawonele isungu hali munhu ayo yawalechele yula mng'holozenu yunji na Benjamini wahiluche hamwe na hemwe. Heni loindapa kifiligwa na wana wa heni ena.”
GEN 43:15 Aho nawahola zila ndolendole na migwala jonjezeche lwa keli, nawaluta Misili hamwe na mng'holozo Benjamini. Lowafichile nawaluta na kwima hali Yusufu.
GEN 43:16 Yusufu loyamuwene Benjamini hamwe na hewo, nakamlonjela chitumagwa wa ng'handa ya heye, “Wahiliche wanhu awa hakaye hangu, ukome igongolo limwe na kugongomanya goya, mina wanhu awa wolya chilyo cha nemisi hamwe na heni.”
GEN 43:17 Chitumagwa ayo nakadita kota navyoyalajizwe, nakawahilika wala wajenzi kaye kwa Yusufu.
GEN 43:18 Lowawene wahilikwe kuli ng'handa ya Yusufu nawamema majesa, nawalonga hewo kwa hewo, “Tigaligwa kuno kwa mbuli ya jila migwala jotuhilusilwe mli migunila ja hetwe nalotuyile hala ha mwaluko leka yawe na cha kusinjizila kututowa na kutusukula midogowi ja hetwe na kutudita wapogozi wa heye.”
GEN 43:19 Nawamhejelela yula mkola mijito wa kukundigwa wa ng'handa ya Yusufu, walongasa wawele mlwizi lwa ng'handa,
GEN 43:20 nawamlonjela, “Dedede, mkulu. Hetwe natuya hano hamwaluko kugula chilyo.
GEN 43:21 Lotufichile honhu ha kuwasa wajenzi ako kunzila, natudohola migunila jetu, natububuwala kufika migwala ja chila yumwe wa hetwe jali hamlomo mwa igunila lyake ne kudolizwa. Lelo tujihilusa migwala ajo.
GEN 43:22 Tigala na migwala jinji kugulila chilyo. Hatuvizelele yalikohi yawichile migwala ja hetwe mmigunila ja hetwe.”
GEN 43:23 Yula chitumagwa nakawedichila, “Mikale goya, na mleche kudumba. Nguluwi wa hemwe, Nguluwi wa mhaza wa hemwe, ndo yawahilusile migwala mli migunila ja hemwe. Heni nambochela migwala ja hemwe.” Hamba nakawegalila Simeoni mng'holozawo.
GEN 43:24 Ayo chitumagwa nakawabochela mng'handa ya Yusufu, nakamha mazi ga kuhovuga magulu gawo, na midogowi jawo jipegwa chilyo.
GEN 43:25 Nawo nawawika goya ndolendole za hewo za kumha Yusufu, kwa vila nawahulika kota wolya hamwe na heye nemisi yila.
GEN 43:26 Yusufu loyoyile kaye, nawamigalila zila ndolendole nazowawele nazo, nawamfugamila mbaka hanyi kumwando kwa heye.
GEN 43:27 Nakawauza mbuli za hewo, nakalonga, “Namsimila mbuli za mhaza wa hemwe. Ndaze, kalamka? Yang'hali mkomu?”
GEN 43:28 Nawamwidichila, “Chitumagwa wa hegwe, mhaza wa hetwe, kagoya yang'hali mkomu.” Nawenamiza na kumfugamila.
GEN 43:29 Yusufu naloyenule meho nakumona Benjamini, mng'holoze, mwana wa mayake, nakalonga, “Ayu ndo mng'holozenu mdodo namndonjele mbuli za heye? Nguluwi nayakuditile ganojile mwana wa heni!”
GEN 43:30 Baho du Yusufu nakoka honhu aho, kwa vila mihozi najigana kumlawa kwa isungu lya mng'holoze, nakenjila mng'handa na kulila.
GEN 43:31 Naloyehovuje kumeho, nakalawa aku yochikangaza, nakalajiza ndiya igaligwe.
GEN 43:32 Yusufu nakawichilwa ndiya ya uyeka, na wang'holoze wawichilwa ha uyeka, hihyo na Wamisili wadile hamwe na heye, nawawichilwa kwa uyeka, kwa vila izudizo kwa Wamisili kulya hamwe na Waebulaniya.
GEN 43:33 Wang'holoze Yusufu nawekala kumwando kwa heye kota vyoiwele ukulu wa chila yumwe, kwaluchila yapondigwe mwaluko, mbaka wa kuduma, wawa wochilola kwa kububuwala.
GEN 43:34 Ndiya nayali iholigwa kulawila mchisaga cha Yusufu na kuhilikwa kwa hewo, ila Benjamini nakapegwa kahano mzidi wa chila chowapegwe wang'holoze. Nawanwa na kusangalala hamwe na heye.
GEN 44:1 Hamba Yusufu nakamlajiza chitumagwa wa ng'handa ya heye yolonga, “Uwiche chilyo mli migunila ja wanhu awa kota vyowohega kupika. Hamba, uwiche migwala ja chila yumwe hamlomo mwa igunila lyake.
GEN 44:2 Mli igunila lya yula mdodo kusinda weng'ha, uwiche chila chizombe cha heni chauyeng'ha, hamwe na migwala ja heye.” Ayo chitumagwa nakadita kota navyoyalajizwe na Yusufu.
GEN 44:3 Lokuchele nawalonjelwa kwaluka majendo hamwe na midogowi jawo.
GEN 44:4 Lowalutile honhu hado kulawila kuli muji, Yusufu nakamlajiza chitumagwa wa ng'handa ya heye, “Himahima! Wawinze wala wanhu, na houwafika, uwauze, ‘Lekachoni mhilusa gehile kwa ganojile gomditilwe?
GEN 44:5 Lekachoni lomhizile chizombe cha mkulu wa heni, choyanwelaga na kulagulila? Mdita wihe ng'hatu kwa kudita ahyo.’ ”
GEN 44:6 Yula chitumagwa naloyawafichile nakawalonjela ulonzi awu.
GEN 44:7 Ila hewo nawamuuza, “Mkulu, iwa ndaze kutulonjela ulonzi kota awo? Hetwe vitumagwa wa hegwe, hatujeza kudita mbuli kota ayo!
GEN 44:8 Ukumbuchile mkulu, migwala natujifichile mmilomo mwa migunila ja hetwe natujihilusa kuli isi ya Kanaani. Yowa ndaze kahi tuhize sendi ama zahabu mli ng'handa ya mkulu wa hegwe?
GEN 44:9 Lelo wone yoneche yumwe wa hetwe kana chizombe acho yakopoligwe, na hetwe tweng'ha towa wapogozi wa hegwe.”
GEN 44:10 Ayo mkulu nakalonga, “Goya, iwe kota vyoulonjile. Yoneche yokoneka na chizombe acho, kowa mpogozi wa heni, ila wanji weng'ha hamuwa na nongwa.”
GEN 44:11 Chila yumwe nakawika hanyi igunila lyake na kulidohola himahima.
GEN 44:12 Yula chitumagwa nakapekulapekula migunila geng'ha yokwaluchila lya mkulu wawo na kumalila kwa mdodo ng'hatu. Chizombe nachoneka mli igunila lya Benjamini.
GEN 44:13 Aho nawadadula nguwo za hewo kwa masinzo. Chila munhu nakawika igunila lyake mli idogowi na kuhiluka mujini.
GEN 44:14 Yuda na wang'holoze nawafika kuli ng'handa ya Yusufu, nawamfika yang'hali baho haluga. Nawamfugamila chiundewa,
GEN 44:15 na heye Yusufu nakawauza, “Lekachoni namdita ahyo? Ndaze hamvizelele kota heni ndina ludali lwa kulagula?”
GEN 44:16 Yuda nakamwidichila, “Tukulonjele choni mkulu? Tulonje choni kulajila kota twahela wihe? Nguluwi nakawika hazelu wihe wa hetwe, hetwe wapogozi wa hegwe, hamwe na yula yoneche na chizombe cha hegwe.”
GEN 44:17 Ila Yusufu nakalonga, “Hebu! Heni siweza kudita ahyo! Yula yoneche na chizombe cha heni ndo kowa chitumagwa wa heni. Hemwe wanji mhiluche goya kwa mhaza wa hemwe.”
GEN 44:18 Ndo baho Yuda nakamhejelela Yusufu na kumlonjela, “Mkulu, ndangukulanda ung'hundize heni chitumagwa wa hegwe, ndigombele hali hegwe kwa ulonzi udo hela, dedede ndangukulanda uleche kuzudila, kwa vila hegwe ndo kota Falao yuye.
GEN 44:19 Mkulu, hegwe nakutuuza kota twanaye mhaza ama mng'holozetu,
GEN 44:20 natwe natukulonjela kota twanaye mhaza, naye kalala, na twanaye mng'holozetu yunji mdodo yapondigwe mhela wa ulalilo wa mhaza wa hetwe. Mkulugwe ayo msongolo mina kabagama, na ayo mwana mdodo ndo yaponile wa mayake na mhaza wa heye kangumgana lukami msongolo ayo.
GEN 44:21 Mkulu, nakutulajiza hetwe vitumagwa wa hegwe kumigala mdodo wa hetwe leka umone.
GEN 44:22 Natukulonjela kota ayo msongolo hochileka na mhaza wa heye, kwa vila hoyodita ahyo, mhaza wa heye kobagama.
GEN 44:23 Ila hegwe mkulu nakutulonjela wone hatuyile na mdodo wa hetwe hutubochela kahi.
GEN 44:24 “Nalotuhiluche kaye kwa chitumagwa wa hegwe, mhaza wa hetwe, natumlonjela vyoutulajize mkulu.
GEN 44:25 Na heye naloyatulonjele tuye kahi kuno kugula chilyo,
GEN 44:26 natumlonjela, ‘Hatuluta, hanji wone mdodo wa hetwe koluta hamwe na hetwe, wone holuta hamwe na hetwe hatubocheligwa hebu na yula munhu.’
GEN 44:27 Lelo mhaza wa hetwe chitumagwa wa hegwe, nakatulonjela, ‘Mvizela kota mchewangu Laheli nakamhondela wana weli.
GEN 44:28 Yumwe nakaga, nani nandonga, ndangona kota kebatigwa na kudumulangwa viundeunde na igongolo lya kisolo, mina sinamona mbaka sambi.
GEN 44:29 Lomumhola ayu kahi kulawa kwa heni, wone yafichigwe na nongwa, monyhilika kuli isi ya wanhu wabagame mbele ng'hongoloka na mbuliza na memile masinzo.’
GEN 44:30 Lelo mkulu, hondihiluka kwa mhaza wa heni chitumagwa wa hegwe ne msongolo ayu, hanga ukomu wa mhaza wangitumbila ukomu wa msongolo yuno,
GEN 44:31 wone hambe yamone msongolo ayu hamwe na hetwe, kobagama. Lelo hino, hetwe vitumagwa wa hegwe, tomhilika mhaza wa hetwe kuli isi ya wanhu wabagame yawele ng'hongoloka na mbuliza nayamemile masinzo.
GEN 44:32 Kwa ago geng'ha, heni baha nandilavya kuwa honhu ha msongolo ayu kwa mhaza wa heni, ndilonga, ‘Wone simhiluse Benjamini kwa hegwe, nongwa yeng'ha na iwe kwa heni mazuwa gose.’
GEN 44:33 Lelo gwaa mkulu, ndangukudedeza, heni chitumagwa wa hegwe ndiwe mkomu, ndiwe chitumagwa wa hegwe honhu ha msongolo ayu. Mlechele heye yahiluche kaye hamwe na wang'holoze.
GEN 44:34 Ndoweza ndaze kumhiluchila mhaza ne msongolo ayu? Sikwimilila kulola nongwa yoimfika mhaza wa heni.”
GEN 45:1 Aho Yusufu nakalemwela kilemeza hali wanhu weng'ha wowawele hamwe na heye, nakalila. Hamba nakawalonjela walawe kunze. Ahyo Yusufu nayali yaliyeka loyawelengizelesa hali wang'holozake.
GEN 45:2 Ila nakalila kwa lizi ng'hulu mbaka Wamisili nawamhulika, na wanhu wa kuli ng'handa ya Falao kahi nawamhulika.
GEN 45:3 Yusufu nakawalonjela wang'holozake, “Heni nda Yusufu. Ndaze, mhaza wa heni yang'hali mkomu?” Ila wang'holozake nawabubuwala hali heye, mbaka nawalemwela kumwidichila.
GEN 45:4 Yusufu nakawalonjela wang'holozake, “Dedede, mhejele habehi na heni.” Lowamhejelele, nakawalonjela, “Heni nda mng'holozenu Yusufu, mumguzile Misili.
GEN 45:5 Ila sambi mleche kona soni ne kilonjeleza kwa kunguza heni. Nguluwi ndo yengalile heni kuno ndiwalongole, leka ndiulohole ukomu wa wanhu.
GEN 45:6 Awu ndo mwaka wa keli hela wa nzala muisi, ing'hali miyaka jihano jiyage aho wanhu howeza kulima ne kubeta mbena.
GEN 45:7 Nguluwi nakangala kuno ndiwalongoze leka nyamile ukomu wa hemwe mpone muwele wakomu muisi na kuwalohola kwa ulohozi ukulu.
GEN 45:8 Ahyo, hemwe hamingale heni kuno, ila ndo Nguluwi. Ndo yanditile kota mhaza kwa Falao, yalingulolela ng'handa ya heye yeng'ha na chilongozi wa isi yeng'ha ya Misili.
GEN 45:9 Lelo mdite himahima, mlute kwa mhaza na kumlonjela, ‘Yusufu, mwana wa hegwe, kangulonga, Nguluwi nakandita ndiwe mkulu wa isi yeng'ha ya Misili. Lelo mleche kukawa kuya kwa heni.
GEN 45:10 Kochikala habehi na heni honhu ha Gosheni, hegwe na wanago na wazukulu wa hegwe na migongolo ja hegwe na lufufu lwa hegwe lweng'ha.
GEN 45:11 Louwa Gosheni, heni ndokulolela hegwe na wang'holozo hamwe na migongolo ja hegwe leka mleche kubagama kwa nzala, kwa vila jing'hali miyaka jihano jinji ja nzala.’ ”
GEN 45:12 Hamba Yusufu nakalonga, “Hemwe mwemwe namona kwa meho ga hemwe na mng'holozangu Benjamini kahi nakona kwa meho ga heye kota ndo heni Yusufu ndiwelengulongasa na hemwe.
GEN 45:13 Ingana ndimlonjele mhaza wa heni choni chondidayila kuno Misili na geng'ha gomgawene. Lelo mdite himahima mumgale mhaza wa heni kuno.”
GEN 45:14 Hamba Yusufu nakamnonela Benjamini mng'holoze, nakalila, na Benjamini na heye nakalila kuno wekumbatize.
GEN 45:15 Loyawele yang'hali yolila, Yusufu nakawakumbatiza wang'holozake na kuwanonela. Aho ndo wang'holozake waluka kudawala na heye.
GEN 45:16 Mbuli ila loifichile hali ng'handa ya Falao, kota wang'holoze Yusufu nawoya, Falao nakasangalala lukami na vitumagwa wa heye.
GEN 45:17 Ahyo, Falao nakamlonjela Yusufu, “Walonjele wang'holozo wajipiche mhomolo midogowi, wahiluche mli isi ya Kanaani,
GEN 45:18 wamgale hano mhaza wa hewo na wang'holozawo weng'ha. Heni ndowagalila honhu hanojile ng'hatu ha isi ya Misili, ako wosangalala kwa chila chinhu cha isi ino namwe molya vihande vya mafuta ga isi.
GEN 45:19 Walonjele kahi wahole kulawa hano mimutuka ja kukwejigwa ja kuvigala vyali vya hewo vyeng'ha na wadala wa hewo na wamgale mhazawo.
GEN 45:20 Walonjele waleche kujesa lufufu lwa hewo mina honhu hanojile kusinda kweng'ha hali isi ya Misili yowa ya hewo.”
GEN 45:21 Lelo wanhu wa Isilaeli nawadita kota vyowalajizwe. Yusufu nakawagalila mimutuka kota vyoyalajize Falao na chilyo cha mnzila.
GEN 45:22 Nakawagalila chila yumwe wa hewo nguwo za kugalula, ila nakamgalila Benjamini migwala miya zidatu na mivalo jihano ja kugalula.
GEN 45:23 Kahi nakamgalila mhaza wa heye ndolendole zino kwa chiwalo cha majendo ga heye, midogowi kumi jipichile vinhu vinojile, midogowi midala kumi mbena zinojile za Misili na mibumunda na vilyo vinji.
GEN 45:24 Lelo Yusufu nawelagana na wang'holoze. Lowawele wokuka, nakawakanya yolonga, “Mleche kitwanza mzila.”
GEN 45:25 Lelo nawalawa Misili na kuhiluka hakaye kwa mhaza wa hewo Yakobo, kuli isi ya Kanaani.
GEN 45:26 Nawamlonjela mhaza wa hewo, “Yusufu ka mkomu. Heye ndo chilongozi wa isi yeng'ha ya Misili.” Aho mhaza wa hewo nakabubuwala, nahakundile ulonzi wa hewo.
GEN 45:27 Ila, lowamsimile geng'ha gowalajizwe na Yusufu na loyajiwene mimutuka jila joyagalilwe na Yusufu leka jimhole, nhumbula ya heye naimema kusangalala lukami.
GEN 45:28 Isilaeli nakalonga, “Lelo nang'hunda, mwana wa heni Yusufu kamkomu. Ndoluta ndikamone londiwele nding'hali kubagama.”
GEN 46:1 Lelo Isilaeli nakaluka majendo ga heye hamwe na lufufu lwa heye lweng'ha. Loyafichile Beeli-sheba, nakamlavila nhambiko Nguluwi wa Isaka, mhaza wa heye.
GEN 46:2 Nguluwi nakalonga na Isilaeli kuli ulotezi nechilo, nakamchema, “Yakobo! Yakobo!” Yakobo nakedichila, “Ena ndanguhulichiza.”
GEN 46:3 Nguluwi nakamlonjela, “Heni ndo Nguluwi, Nguluwi wa mhaza wa hegwe. Uleche kudumba kuka Misili, louwa kuko, ndokudita uwe nhanzi ng'hulu.
GEN 46:4 Na heni ndokuka hamwe na hegwe kuko Misili na kukuhilula kuno. Loubagama, moko wa Yusufu ndo wokugosa.”
GEN 46:5 Lelo Yakobo nakoka Beeli-sheba. Wana wa heye nawamhola heye na vyali vya hewo hamwe na wadala wa hewo hali mimutuka jiwele Falao yajigale kumhola.
GEN 46:6 Nawahola kahi migongolo ja hewo na lufufu lwa hewo lweng'ha lowapatile kuli isi ya Kanaani, nawaluta Misili. Yakobo nakahola lukolo lwa heye lweng'ha.
GEN 46:7 Wana wa heye na wazukulu wa heye walume na wadala, weng'ha nakawagala Misili.
GEN 46:8 Walelwa wa Isilaeli nawalutile Misili hamwe na heye nawali Lubeni, mlelwa wa heye wa mwaluko
GEN 46:9 hamwe na wana wa Lubeni, Enoki na Palu na Hesiloni na Kalimi.
GEN 46:10 Simeoni na wanage, Yemueli na Yamini na Ohadi na Yakini na Sohali na Shauli nayapondigwe na mdala nayawele Mkanaani.
GEN 46:11 Lawi na wanage, Gelishoni na Kohati na Melali.
GEN 46:12 Yuda na wanage, Eli na Onani na Shela na Pelesi na Sela, ila Eli na Onani nawabagama kuli isi ya Kanaani. Wana wa Pelesi nawali Hesiloni na Hamuli.
GEN 46:13 Isakali na wanage, Tola na Puva na Yashubu na Shimuloni.
GEN 46:14 Sebuluni na wanage, Seledi na Eloni na Yaleeli.
GEN 46:15 Awo ndo wana Lea nayampondele Yakobo kula Padani-alamu, hamwe na Dina mhinza wa heye. Weng'ha wasongolo na wahinza wa heye nawali wanhu makumi gadatu na zidatu.
GEN 46:16 Gadi na wanage, Sifioni na Hagi na Shuni na Esiboni na Eli na Alodi na Aleli.
GEN 46:17 Asheli na wanage, Imuna na Ishiva na Ishivi na Belia na Sela na lumbuli yao. Belia na wanage, Hebeli na Malikieli.
GEN 46:18 Awa kumi na sita ndo wana wa Yakobo na Silipa, mpogozi yawele Labani nayampele Lea mhinza wa heye.
GEN 46:19 Laheli nakampondela Yakobo wana weli, Yusufu na Benjamini.
GEN 46:20 Ako Misili, Asenati mhinza wa Potifela, nayawele mtambika wa muji wa Oni, nakampondela Yusufu wana weli, Manase na Efulaimu.
GEN 46:21 Wana wa Benjamini nawali, Bela na Bekeli na Ashibeli na Gela na Naamani na Ehi na Loshi na Mupimu na Hupimu na Alidi.
GEN 46:22 Wanhu awo kumi na wane ndo wana na wazukulu wa Yakobo na Laheli mchewake.
GEN 46:23 Dani na Hushimu mwanage.
GEN 46:24 Nafutali na wanage, Yaseeli na Guni na Yeseli na Shilemu.
GEN 46:25 Awo saba ndo wana wa Yakobo na Biliha, mpogozi wa chidala yawele Labani nayampele mhinza wa heye Laheli.
GEN 46:26 Weng'ha walelwa wa Yakobo nayalutile nawo Misili, ne kuwaza wadala wa wana wa heye, nawali makumi sita na sita.
GEN 46:27 Ako kuli isi ya Misili Yusufu nayali yapatile wana weli. Ahyo, wanhu weng'ha wa lukolo lwa Yakobo nawali makumi saba.
GEN 46:28 Yakobo nakamlongola mwanage Yuda kwa Yusufu yomlanda wewone ako Gosheni, na hewo nawafika ako Gosheni.
GEN 46:29 Yusufu nakakwina mutuka wa heye wa falasi, nakaluta kumbochela Isilaeli, mhaza wa heye ako Gosheni. Loyamfichile mhaza wa heye, nakamkumbatila na kulila hado hela.
GEN 46:30 Isilaeli nakamlonjela Yusufu, “Wone mbagame sambi, haiwele chinhu, kwa vila ndikona na ndivizela kota kwa mkomu.”
GEN 46:31 Yusufu nakawalonjela wang'holoze na ivyazi lyeng'ha lya mhaza wa heye, “Ndanguluta kumlonjela Falao kota wang'holozangu na ivyazi lyeng'ha lya mhaza wa heni nawawele ako Kanaani, woya kwa heni.
GEN 46:32 Ndomlonjela kota hemwe mwa wadimi kwa vila namwali mdima migongolo, muya hamwe na mhene na ming'holo na misenga na lufufu lwenu lweng'ha.
GEN 46:33 Lelo wone Falao yowachema na kuwauza, ‘Mwangukola mijito yachi?’
GEN 46:34 Mlonje, ‘Mkulu, hetwe vitumagwa wa hegwe, hetwe twa wadimi kulawila lotuwele wana mbaka sambi, kwa vila ndo lowali wasekulu wa hetwe,’ mlonje ahyo leka mkundigwe kikala kuli honhu ha Gosheni, kwa vila kwa wanhu wa Misili, wadimi weng'ha wa ming'holo ndo izudizo.”
GEN 47:1 Lelo Yusufu nakaluta kwa Falao, nakamlonjela, “Mhaza wa heni na wang'holozangu hamwe na ming'holo na misenga na lufufu lwao lweng'ha woya kuli isi ya Kanaani. Lelo wafichila ako Gosheni.”
GEN 47:2 Yusufu nayali yawaholile wang'holoze wahano yakamlajile Falao.
GEN 47:3 Falao nakawauza, “Mwangukola choni?” Nawamwidichila, “Mkulu hetwe vitumagwa wa hegwe twa wadimi, kota navyowawele wasekulu wa hetwe.”
GEN 47:4 Hamba nawamlonjela Falao, “Hetwe vitumagwa wa hegwe tuya kikala kota wajenzi kuli isi ayi, kwa vila hana nzala lukami ako Kanaani na kuduhuli honhu ha kudimila migongolo. Ahyo mkulu, hetwe twangulanda utukundize kikala ako Gosheni.”
GEN 47:5 Falao nakamlonjela Yusufu, “Mhaza wa hegwe na wang'holozo wakuyila hegwe.
GEN 47:6 Isi yeng'ha ya Misili ya hali ulongozi wa hegwe, wamhe mhaza na wang'holozo honhu hanojile kuli isi ayi. Wekale ako Gosheni. Na wone wamumo wanhu wawanzi wahagule wawe wololela migongolo ja heni.”
GEN 47:7 Hamba Yusufu nakamigala mhaza wa heye Yakobo yamlamse Falao, na heye Yakobo nakamtambichiza Falao.
GEN 47:8 Falao nakamuuza Yakobo, “Kuna miyaka jilinga?”
GEN 47:9 Yakobo nakamwidichila Falao, “Miyaka joyamhele Nguluwi kota mwinula majendo ndo miyaka miya imwe na makumi gadatu. Miyaka ajo ndo mido na imemile magazo, kahi haifichile kota miyaka najowekale wasekulu wa hetwe kota wanhu wawele kwinula majendo.”
GEN 47:10 Hamba Yakobo nakamtambichiza Falao na kuka.
GEN 47:11 Lelo Yusufu nakawapa mhaza wa heye na wang'holoze honhu ha Lamesesi liwele na mboto ng'hatu kuli isi ya Misili hawe honhu ha kikala hewo, na hewo nawahalila kota vyoyalajize Falao.
GEN 47:12 Yusufu nayali yowapa chilyo mhaza wa heye na wang'holoze na ivyazi lyeng'ha lya mhaza wa heye kota winji wa hewo vyouwele.
GEN 47:13 Hamba chilyo nachajilila ng'hatu kuli isi yeng'ha. Nzala naing'ang'ala ng'hatu mbaka iwadita wanhu weng'ha kuli isi ya Misili na Kanaani kuganda.
GEN 47:14 Yusufu nakakungajiza migwala jeng'ha ja isi ya Misili na Kanaani kwa chilyo choyaguzile na kuhilika migwala ajo kwa mndewa Falao.
GEN 47:15 Wanhu weng'ha wa isi ya Misili na Kanaani lowesilwe migwala jeng'ha, Wamisili weng'ha nawamuyila Yusufu na kumlonjela, “Tugalile hetwe chilyo. Lekachoni tubagame aku ulola? Ulole migwala jeng'ha jimala.”
GEN 47:16 Yusufu nakamlonjela, “Wone migwala jeng'ha jimalile, lelo mungalile migongolo jenu nani ndowapa chilyo.”
GEN 47:17 Ndo baho wamigalila Yusufu migongolo jawo, falasi na misenga na ming'holo na mhene na midogowi kwa kugula chilyo. Mhela awo Yusufu nayali yowapa chilyo kwa kulavya migongolo.
GEN 47:18 Mhela uyage nawamuyila kahi na kumlonjela, “Mkulu, twangukomya kuta migwala ja hetwe jeng'ha jimala, na migongolo jeng'ha jiwa ja hegwe. Lelo mkulu, hetwe vitumagwa wa hegwe twahela chinhu chotuweza kukugalila, ila ng'huli za hetwe na migunda ja hetwe.
GEN 47:19 Ya choni hetwe kubagama aku hali hegwe na migunda ja hetwe jiwe vibi? Utugule hetwe hamwe na migunda ja hetwe tuwe wapogozi wa Falao, leka tulye chilyo. Tugalile chilyo tuleche kubagama, tugalile na nyhadikwa kwa chiwalo cha kunyala kuli migunda ja hetwe.”
GEN 47:20 Ahyo, Yusufu nakaigula isi yeng'ha ya Misili iwe ya Falao. Chila munhu yalingikala Misili, nakaganigwa kuguza mgunda wa heye kwa vila nzala navyoiwele ing'ang'ale. Ahyo, isi yeng'ha nayali ya Falao.
GEN 47:21 Yusufu nakawadita wanhu wawe wapogozi, kulawila nzingo imwe mbaka nzingo iyage ya isi ya Misili.
GEN 47:22 Migunda jiwele Yusufu hambe hagulile ndo jila najiwele ja watambika. Awo nawalajizwa waleche kuguza migunda jawo kwa vila hewo nawali wochikala kwa kupegwa chilyo na Falao.
GEN 47:23 Hamba Yusufu nakawalonjela wanhu, “Lole, mina ndiwagula hemwe mweng'ha na migunda ja hemwe kuwa lufufu lwa Falao. Mopegwa nyhadikwa namwe monyala kuli migunda ja hemwe.
GEN 47:24 Mhela wa mbena, imwe ya zihano za nyhadikwa momha Falao. Honhu hane hasigale, howa nyhadikwa na chilyo kwa ivyazi lya hemwe na wana wa hemwe.”
GEN 47:25 Nawamwidichila wata, “Mkulu, kulohola ukomu wa hetwe. Kwa vila kutulajila uganililo, hetwe towa wapogozi wa Falao.”
GEN 47:26 Ndo Yusufu nayawichile ilajizo limwe liwele lyabahala mbaka lehano kuli isi ya Misili kota chila munhu yalavye honhu hamwe ha kahano ya mbena ya heye kwa Falao. Migunda ja watambika jiliyeka ndo hajiguligwe na kuditikwa jiwe ja Falao.
GEN 47:27 Lelo wanhu wa Isilaeli nawekala ako Gosheni kuli isi ya Misili. Lowawele ako, nawawa na lufufu lwinji, kiponda na konjezeka lukami.
GEN 47:28 Yakobo nakekala kuli isi ya Misili kwa miyaka kumi na saba mbaka naloyawele na miyaka miya imwe na makumi gane na saba.
GEN 47:29 Mhela wa kubagama kwa heye louwele habehi, Yakobo nakamchema mwanage Yusufu nakamlonjela, “Lelo wone ukomya kuna igano lya kwimilila, uwiche moko wa hegwe mihaza jangu, na kilaha kota konditila goya na kondajila makundo, uleche kutila lukuli lwangu akuno Misili,
GEN 47:30 ila ukatile lukuli lwangu kota vyoiwele kwa wasekulu wa heni. Uhole lukuli lwangu kulawa Misili na kuza kutila kuli vilaga vya hewo.” Yusufu nakamwidichila, “Ndodita kota vyoulonjile.”
GEN 47:31 Yakobo nakamlonjela, “Wilahe.” Yusufu nakelaha. Hamba Isilaeli nakafugama banzi ya kumitwi mwa chinanda cha heye na kuta malumbo Nguluwi.
GEN 48:1 Logapulute ago, Yusufu nakalonjelwa kota mhaza wa heye kangutamika. Ahyo, nakawahola wanage weli, Manase na Efulaimu, nakaluta nawo kwa mhaza wa heye.
GEN 48:2 Yakobo vyoyalonjelwe kota mwanage Yusufu koya kumlola, naketatamula kwinuka na kikalisa mchinanda.
GEN 48:3 Yakobo nakamlonjela Yusufu, “Nguluwi yawele na mong'ho nakandawila nalondali kula Lusu kuli isi ya Kanaani, nakanhambichiza.
GEN 48:4 Nakandonjela, ‘Ulole, ndokudita hegwe uwe na lulelo na lonjezeche, ndokudita uwe sekulu wa nhanzi nyinji ng'hulu. Isi ayi ndowapa lulelo lwa Waisilaeli weng'ha, waihalile mazuwa gose.’ ”
GEN 48:5 Yakobo nakalutilila kulonga, “Wanago weli uwapondile aha Misili mhela londing'hali kuya, wowa wana wa heni. Manase na Efulaimu wowa wana wa heni kota vyowawele Lubeni na Simeoni.
GEN 48:6 Ila wana wouwaponda hamba wowa wa hegwe, kwa itagwa lya ivyazi lya hewo, wowa kuli uhalizi wa wang'holozawo.
GEN 48:7 Ndangwamula ahyo kwa chiwalo cha mayako, Laheli. Lombele ndihiluka, kulawila Padani heye nakabagama kuli isi ya Kanaani, lotuwele behi kufika Efulata, nakandechela masinzo. Lelo nandimtila baho du, hafungo mwa nzila ilinguluta Efulata, mina ndo Betelehemu.”
GEN 48:8 Isilaeli loyawawene wana wa Yusufu, nakawauza, “Awa wanhu wachi?”
GEN 48:9 Yusufu nakamwidichila mhaza wa heye, “Awa ndo wana wa heni woyamhele Nguluwi lombele aku.” Isilaeli nakalonga, “Dedede, uwegale behi ndiwatambichize.”
GEN 48:10 Meho ga Isilaeli nagali hambe galole goya kwa chiwalo cha ulalilo. Lelo Yusufu nakawahejeza wanage behi nayekale mhaza wa heye, na heye nakawanonela na kuwakumbatila.
GEN 48:11 Hamba Isilaeli nakamlonjela Yusufu, “Nasijesile kota ndokona kumeho kwa hegwe kahi, ila Nguluwi kamha utambichizo mbaka kuwona wana wa hegwe.”
GEN 48:12 Aho Yusufu nakawosa wanage kuli mafugamilo ga mhaza wa heye, hamba nakenamiza kwa kuhulichiza.
GEN 48:13 Yusufu nakawenula wanage weli, Efulaimu kuli moko wa heye wa kudilo yomhinduchiza kuli moko wa kumoso wa mhaza wa heye na Manase kuli moko wa heye wa kumoso yomhinduliza kuli moko wa kudilo kwa mhaza wa heye Isilaeli, nakawahejeza kwa mhaza wa heye.
GEN 48:14 Ila Isilaeli nakaipinjiza moko kwa kuwika wa kudilo kawika kuli mutwi wa Efulaimu hanga nayali mdodo na moko wa kumoso nakawika kuli mutwi wa Manase nayawele mlelwa wa mwaluko.
GEN 48:15 Hamba Isilaeli nakamtambichiza Yusufu yolonga, “Nguluwi yawele wasekulu wa heni, Abulahamu na Isaka nawali womhulichiza kuli ukomu wa hewo, Nguluwi ndo mdimi wa heni mbaka lehano,
GEN 48:16 na mhilisi nayawele yandohole kuli wihe weng'ha, na yawatambichize wasongolo awa! Wochemigwa wana wa heni kwa lulelo lwa wasekulu wa heni Abulahamu na Isaka, na hewo wonjezeche kwa winji muisi.”
GEN 48:17 Yusufu loyawene kota mhaza wa heye kawika moko wa heye wa kudilo kuli mutwi wa Efulaimu nahanojezwe hebu. Lelo nakebata moko wa mhaza wa heye yogana kusa kuli mutwi wa Efulaimu yauwiche kuli mutwi wa Manase.
GEN 48:18 Yusufu nakamlonjela mhaza wa heye, “Haiwele ahyo mhaza. Ayu ahano ndo mlelwa wa mwaluko. Dedede, uwiche moko wa hegwe wa kudilo kuli mutwi wa heye.”
GEN 48:19 Ila mhaza wa heye nakalema yolonga, “Ndivizela mwanangu, ndivizela. Wana wa Manase kahi wowa nhanzi ng'hulu. Ila mng'holoze mdodo kowa mkulu kusinda heye na walelwa wa heye wowa nhanzi nyinji.”
GEN 48:20 Lelo Isilaeli nakawatambichiza zuwa ahyo yolonga, “Waisilaeli wowa wotambichiza kwa matagwa ga hemwe, wolonga, ‘Nguluwi yakuditile ganojile kota Efulaimu na Manase.’ ” Ndo Isilaeli navyoyamuwichile Efulaimu kumwando kwa Manase.
GEN 48:21 Hamba Isilaeli nakamlonjela Yusufu, “Kota vyoulingumbona heni, ndahabehi kubagama. Ahyo, Nguluwi kowa hamwe na hemwe na kuwahiluseni kuli isi ya wasekulu wa hemwe.
GEN 48:22 Mzidi wa ago, ndikupa hegwe uwele mkulu kusinda wang'holozo, honhu hakulu hachemigwe Shekemu. Hondiwasukule Waamoli kwa ipanga na upinde wa heni wa msale.”
GEN 49:1 Yakobo nakawachema wanage, nakalonga, “Mikungajize hamwe ndiwalonjele mbuli ziwafika hamba.
GEN 49:2 “Mikungajize mhulichize hemwe wana wa Yakobo, mnyhulichize heni Isilaeli mhaza wa hemwe.
GEN 49:3 “Hegwe Lubeni ndo mlelwa wa heni wa mwaluko, ludali lwangu na ifuza lya usongolo wa heni. Hegwe kuna ukulu na mong'ho ng'hatu.
GEN 49:4 Hegwe kwanguwifya kota mazi gamemile tendema. Ila huwa wa mwaluko kahi, kwa vila nakukwina mchinhanda cha heni mhaza wa hegwe, hegwe nakuchidita chikokomoche kwa kuwasa na mchewangu, ena, hegwe nakuchikwina!
GEN 49:5 “Simeoni na Lawi mwa lukolo, wangukopola kwa migoha jawo,
GEN 49:6 ila heni sikunda kihanza na nongwa za hewo, hegwe nhumbula ya heni, uleche kihanza mli nhing'hano za hewo, mina mli kuzudila kwa hewo, nawawakopola wanhu, kwa ujuvi wa hewo nawakanha idanha lya isenga.
GEN 49:7 “Ndangupanjila kuzudila kwa Simeoni na Lawi, mina ndo kung'ang'ala lukami, na ng'alazi ya hewo yahela isungu. Ndowasambalula kuli isi ya Yakobo, ndoweneza kuli isi ya Isilaeli.
GEN 49:8 “Hegwe Yuda, wang'holozo wokutogola. Wang'honyo wa hegwe kowadinga singo, na wang'holozo wofugama kumwando kwa hegwe.
GEN 49:9 Hegwe Yuda mwanangu ndo kota isimba, yebatile igongolo na kukwina kuchanya. Kota vila isimba lilingigolola na kuwasa hasi, isimba liwele na mong'ho, yalikohi yojeza kulililimla?
GEN 49:10 Idela lya undewa halikuka kwa Yuda, ne ng'hweku ya ulongozi hali heye, mbaka hoyofika yula yawichilwe, yawele kohulichizwa na nhanzi zeng'ha.
GEN 49:11 Kowa na zabibu nyinji, kolikoweleza idogowi lya heye hali mzabibu, na idogowi lyana kuli mzabibu unojile, leka jilye. Kwa vila mzabibu naulela lukami, kohovuga nguwo za heye mli divai, na mivalo ja heye mli divai ndung'hu kota danda.
GEN 49:12 Meho ga heye nagoneka ganoga kota divai inojile, mizino ja heye mizelu kota itombo.
GEN 49:13 “Sebuluni kochikala honhu hawele mwhani, kumwhani kwa heye kowa honhu hakwimizila meli. Isi ya heye yobakana na Sidoni.
GEN 49:14 “Isakali ndo kota idogowi liwele na mong'ho, lilinguwasa hagati ha mitunyo ja heye.
GEN 49:15 “Nakona kota kambi inoga, na kota isi ndo yakunojeza, nakenamiza mhungo ya heye kupapa itunyo, nakawa mpogozi kukola mijito kwa lupichi.
GEN 49:16 “Dani kowa mhanyisi wa wanhu wa heye, kota yumwe wa lukolo lwa Isilaeli.
GEN 49:17 “Dani kowa kota izoka mnzila, izoka liwele na dunga hafungo mwa nzila, lilinguluma chisigino cha falasi, na heye yakwinile falasi kangugwa lung'ata.
GEN 49:18 Hegwe Mkulu Nguluwi, ndangukubeteza undohole.
GEN 49:19 “Gadi, kovadigwa na wabokaji, ila heye kowawinza kumbele na kuwadumya.
GEN 49:20 Isi ya Asheli yolavya mbena kwa winji, na heye kolavya chilyo chinonile kwa mndewa.
GEN 49:21 “Nafutali ndo kota ibala lilejehe, lilingulela wana wanojile.
GEN 49:22 “Yusufu ndo kota igodi lilingulela, igodi lilingulela hafungo mwa nzasa, nhagala za igodi zitanda mlukanzi.
GEN 49:23 Walasa misale nawamvada vibi ng'hatu, wamtozela msale wogana kumgaza lukami.
GEN 49:24 Ila upinde wa heye ung'hali ukakamale, na moko ga heye nagapegwa uwanzi, kwa ludali lwa Nayawele na Mong'ho wa Yakobo, kwa chiwalo cha Mdimi, Italawe lya Isilaeli,
GEN 49:25 kwa Nguluwi wa mhaza wa hegwe yokutanza, kwa Nguluwi yawele na mong'ho yokutambichiza, uwe na utambichizo wa nhonya kulawa kuchanya kilanga, utambichizo wa kuli mazi menji gawele hasi, utambichizo wa lulelo lwa wachimai na migongolo.
GEN 49:26 Utambichizo wa mhaza wa hegwe usumye utambichizo wa vidunda vya mazuwa gose, uwe unojile kusinda vidunda vya katali. Utambichizo awo uwe mchanya mwa mutwi wa Yusufu, mli chihanga cha heye nayabaguligwe kota chilongozi kwa wang'holoze.
GEN 49:27 “Benjamini ndo libwa lya kisolo ling'ang'ale, lufuku lyangulya lyolibate, na matinazo kangugawa upelembi.”
GEN 49:28 Azo ndo nhanzi kumi na mbili za Isilaeli na awo ndo ulonzi woyawalonjele mhaza wa hewo loyawatambichize, chila yumwe wa hewo kota vyoyaganigwe.
GEN 49:29 Hamba Isilaeli nakawalajiza wana wa heye ahi, “Heni ndahabehi kubagama na kilumba na wasekulu wa heni. Mkatile lukuli lwangu hamwe na wasekulu wa heni kuli chilaga chiwele kuli mgunda wa Efuloni Mhiti,
GEN 49:30 kula Makipela, kolilawilaga isanya kwa Mamle kuli isi ya Kanaani. Abulahamu nakagula ipalika na mgunda awo kwa Efuloni Mhiti liwe lya heye kutilila wanhu wabagame.
GEN 49:31 Ako ndo kowatiligwe Abulahamu na mchewake Sala, ako ndo kowatiligwe Isaka na mchewake Lebeka na ako ndo kondimtilile Lea.
GEN 49:32 Ipalika alyo na mgunda wake naliguligwa kwa Wahiti.”
GEN 49:33 Yakobo loyasindile kuwalajiza wanage, nakahilusa magulu ga heye mchinhanda, muhe nauleka lukuli nakelumba na wasekulu wa heye.
GEN 50:1 Aho Yusufu nakamkumbatila mhaza wa heye yolila na kumnonela.
GEN 50:2 Hamba Yusufu nakawalajiza wateleka mikwandi wambakalize Isilaeli, mhaza wa heye mikwandi leka yaleche kola, na hewo nawadita hihyo.
GEN 50:3 Kota navyoiwele, mazuwa makumi gane nagaganigwa kwa kubakaliza mikwandi. Na hewo Wamisili nawalombocheza kubagama kwa Yakobo kwa mazuwa makumi saba.
GEN 50:4 Kulombocheza lokumalile, Yusufu nakawalonjela wakulu wa ng'handa ya Falao, “Wone ndiwe ng'undigwe hali hemwe, dedede, mlonje na Falao kwa chiwalo cha igano lya heni,
GEN 50:5 kota mhaza wa heni navyoyanganile heni ndilahe, yolonga, ‘Heni ndahabehi kubagama. Yokugana kuza kutila lukuli lwa heni kuli chilaga nachonyongole kuli isi ya Kanaani.’ Lelo ndangumlanda yamhe mhumhu ndute ndikatile lukuli lwa mhaza wa heni, hamba ndohiluka.”
GEN 50:6 Falao nakedichila, “Ulute ukatile lukuli lwa mhaza wa hegwe kota navyoyakulahile.”
GEN 50:7 Lelo Yusufu nakoka kuza kumtila mhaza wa heye yelongoze na wakulu weng'ha wa Falao na wasekulu wa ng'handa ya Falao, hamwe na wasekulu wa isi yeng'ha ya Misili.
GEN 50:8 Hihyo du, Yusufu yelongoze na ivyazi lya heye lyeng'ha na wang'holoze na ivyazi lyeng'ha lya mhaza wa heye Yakobo. Kula Gosheni nawapona wana wa hewo yeng'ha hamwe na ming'holo na mhene na misenga ja hewo.
GEN 50:9 Kahi nawali hamwe na wakwina falasi na mutuka, nachali chilundo chikulu ng'hatu.
GEN 50:10 Lowafichile kuli luga lwa kupembulila nyhule lwa Atadi, kumwambu mwa lwanda lwa Yolodani, weng'ha nawalila kwa lizi na usungu ng'hatu. Yusufu nakamditila mhaza wa heye nhanga lukolo kwa mazuwa saba.
GEN 50:11 Wakanaani wenyeng'haye wa isi ayo, lowawene kulombocheza kuditilwe kuli luga lwa kupembulila nyhule lwa Atadi, nawalonga, “Kulombocheza aku ndo kwa Wamisili, kukulu ng'hatu.” Ahyo, honhu hala nahachemigwa Abeli-misili, naho ha hamwambu mwa lwanda lwa Yolodani.
GEN 50:12 Wana wa Yakobo nawamditila mhaza wa hewo kota navyoyawalajize.
GEN 50:13 Nawamhola mbaka isi ya Kanaani, nawamtila kuli ipalika naliwele kuli mgunda kula Makipela, nzingo ya kolilawilaga isanya ya Mamle. Ipalika hamwe na mgunda awo Abulahamu nayali yagulile kwa Efuloni Mhiti, leka hawe honhu ha kutilila wanhu wa ivyazi lya heye.
GEN 50:14 Loyasindile kumtila mhaza wa heye, Yusufu nakahiluka Misili hamwe na wang'holoze na wanhu weng'ha nawelongoze na heye kuza kumtila mhaza wa heye.
GEN 50:15 Loyabagame mhaza wa hewo, wang'holoze Yusufu nawadogola, “Hanji Yusufu kotuzudila na kilipizila gehile geng'ha gotumditile.”
GEN 50:16 Ahyo, nawamuhilichila Yusufu usenga, wolonga, “Mhaza wa hegwe naloyang'hali kubagama, nakalajiza ahi,
GEN 50:17 ‘Umlonjele Yusufu kwa chiwalo cha heni, dedede, uwalechele wang'holozo gala gehile geng'ha gowakuditile.’ Lelo dedede utulechele wihe wotukuditile hetwe vitumagwa wa Nguluwi wa mhaza wa hegwe.” Yusufu loyahuliche usenga awu, nakalila.
GEN 50:18 Hamba wang'holoze nawamuyila, wenamiza hasi hali heye, nawalonga, “Ulole, hetwe twa vitumagwa wa hegwe.”
GEN 50:19 Ila Yusufu nakawalonjela, “Mleche kudumba, ndaze, heni nda honhu ha Nguluwi?
GEN 50:20 Hemwe namgana kunditila vibi, ila Nguluwi nakagana ganojile, leka wanhu wenji wawe wakomu kota vyomlingona.
GEN 50:21 Lelo mleche kudumba. Heni ndowapani chilyo hamwe na wana wa hemwe.” Lelo nakawahembuliza na kulongasa na hewo goya.
GEN 50:22 Yusufu nakalutilila kikala kuli isi ya Misili hamwe na ivyazi lyeng'ha lya mhaza wa heye. Nakekala kwa miyaka miya imwe na kumi.
GEN 50:23 Yusufu nakawona wana na wazukulu wa mwanage Efulaimu na kahi nakawabochela kota wanage wana wa Makili mwana wa Manase.
GEN 50:24 Hamba Yusufu nakawalonjela wang'holoze, “Heni lelo ndahabehi kubagama. Ila Nguluwi kowajendela na kuwatanza. Kowalavya kuli isi ayi na kuwahilika kuli isi yawelahile Abulahamu na Isaka na Yakobo.”
GEN 50:25 Hamba Yusufu nakawalajiza wana wa Isilaeli yochilaha na kulonga, “Nguluwi hoyokuya kuwatanza, mhole na mizeje ja lukuli lwangu kulawila aku.”
GEN 50:26 Lelo Yusufu nakabagama kula Misili, yawele na miyaka miya imwe na kumi. Na hewo nawaubakaliza lukuli lwake mikwandi luleche kola, nawauwika mitusi kula Misili.
EXO 1:1 Ayi ndo mbuli ya matagwa ga wana wa Yakobo nayachemigwe Isilaeli nawalutile na heye, Misili chila yumwe na ivyazi lyake,
EXO 1:2 nawali Lubeni na Simeoni na Lawi na Yuda
EXO 1:3 na Isakali na Sebuluni na Benjamini
EXO 1:4 na Dani na Nafutali na Gadi na Asheli.
EXO 1:5 Lulelo lweng'ha lwa Yakobo lwali na wanhu makumi saba. Mhela awo Yusufu nayali mina yalongole kikala ako Misili.
EXO 1:6 Hamba Yusufu nakabagama, hihyo du na wang'holoze na lulelo lula lweng'ha.
EXO 1:7 Ila lulelo lwa Yakobo na lwonjezeka lukami, Waisilaeli nawawa wenji wawele na mong'ho heko, nawenela chila honhu muisi ya Misili.
EXO 1:8 Lelo nakalawila mndewa yunji ako Misili nahamzelele Yusufu.
EXO 1:9 Na heye nakawalonjela wanhu wa heye, “Mlole Waisilaeli vyowawele wenji na vyowawele na mong'ho kusinda hetwe.
EXO 1:10 Lelo twangulapigwa kupala nzila ya kuwadita waleche konjezeka, wone haiwele ahyo, wone ilawile ngondo wochilumba na wang'honyo wa hetwe na kuka muisi ino ne kuhiluka kahi.”
EXO 1:11 Wamisili nawawahagula walolezi wawemilile Waisilaeli na kuwadita vibi kwa kuwakoleza mijito kwa lupichi ne kwesela. Waisilaeli nawakola mijito ja kumzenjela Mndewa Falao miji ja kuwichila ng'hano, Pisomu na Lamesesi.
EXO 1:12 Ila navyowalutilile kuwatunya, ndo vyowalutilile konjezeka na kwenela muisi. Ahyo Wamisili nawawadumba ng'hatu wanhu wa Isilaeli.
EXO 1:13 Lelo Wamisili nawawatumajiza Waisilaeli kwa lupichi aku wang'ang'ale.
EXO 1:14 Wawadita wekale kwa kugaya na mijito jing'ang'ale kwa kugongomanya chokaa na mitufali, na mbuli zeng'ha za kumgunda. Mli mijito jeng'ha, Wamisili nawawatumajiza Waisilaeli kwa lupichi aku wang'ang'ale.
EXO 1:15 Hamba mndewa wa Misili nakawalonjela wahunga, Shifula na Pua, nawawele wowakolela mijito wadala Waebulaniya,
EXO 1:16 “Homuwakolela mijito wadala wa Chiebulaniya mhela wa kuponda, wone mwana hoyopondigwa yawe mlume, mumkopole. Ila wone yawe mdala, mlecheni yekale.”
EXO 1:17 Ila kwa vila wahunga awo nawali womdumba Nguluwi, hawaditile kota vyowalajizwe na mndewa wa Misili, ila hewo nawawaleka wana walume wa Waisilaeli wekale.
EXO 1:18 Mndewa wa Misili nakawachema wahunga awo, na kuwauza, “Lekachoni namdita ahyo? Lekachoni muwalechile wakomu wana walume?”
EXO 1:19 Hewo nawamwidichila Falao, “Wadala wa Chiebulaniya hawawele kota wadala wa Misili. Hewo ndo nawali na mong'ho, mhunga hanafika, hewo wawaga mina wapondile.”
EXO 1:20 Nguluwi nakawatambichiza wahunga awo, nawo Waisilaeli nawalutilila konjezeka na kuwa na mong'ho ng'hatu.
EXO 1:21 Kwa vila wahunga awo nawali womdumba Nguluwi, Nguluwi nakawatambichiza leka waponde wana wawo.
EXO 1:22 Hamba Falao nakawalajiza wanhu weng'ha wa heye, yolonga, “Chila mwana mlume yoleleka kwa Waebulaniya mumtaje mlwanda lwa Naili, ila chila mwana mdala mlecheni yawe mkomu.”
EXO 2:1 Kwali na munhu yumwe wa lukolo lwa Walawi nayahesile mdala yumwe na heye yawele wa lukolo wa Walawi.
EXO 2:2 Lelo mamo ayu nakapata himila, nakamponda mwana mlume. Loyawene kota mwana chali ayu nakanoga ng'hatu, nakamvisa kwa mhela wa myezi jidatu.
EXO 2:3 Ila kwa vila nakalemwela kumvisa kwa mhela uyage, nakadita chinhu kota chidoto cha minyi na kubakaliza chinhu kota lami, nakamuwika yula mwana mgati. Hamba nakachiwika chidoto hafungo mwa lwanda lwa Naili hali mikuluwili.
EXO 2:4 Lumbulye mwana ayo nakevisa behi na honhu aho leka yalole choni chimfika mng'holoze.
EXO 2:5 Lelo mhinza wa Falao nakedulika kulwanda yoje, na vitumagwa wa heye wadala wawa wojendajenda hafungo mwa lwanda lwa Naili. Mhinza wa Falao nakachona chila chidoto hali mikuluwili, nakamlajiza mpogozi wa heye yakachihole.
EXO 2:6 Loyachigubule nakamona yula mwana chali, yolila. Nakamonela isungu, nakalonga, “Ayu ndo yumwe wa wana wa Waebulaniya.”
EXO 2:7 Baho du lumbulye yula mwana nakalawila, nakamlonjela mhinza wa Falao, “Ndaze, ndute ndikamcheme munhu wa kumonyeza mwana ayu hali wadala wa Chiebulaniya?”
EXO 2:8 Mhinza wa Falao nakamlonjela, “Ena, luta.” Lelo ayo mhinza nakaluta, nakamchema mayake ayo mwana.
EXO 2:9 Mhinza wa Falao nakamlonjela yula mdala, “Umhole mwana ayu na kumonyeza honhu hangu, nani ndokupa sendi kwa mijito ajo.” Lelo ayo mdala nakamhola mwana ayo, nakamlela.
EXO 2:10 Mwana naloyawele yakulile, mayake nakamhilika kwa mhinza wa Falao, naye nakamhola na kumdita mwanage. Mhinza wa Falao nakalonga, “Ndimlavya mmazi,” ahyo, nakamha mwana ayo itagwa lya Musa. Itagwa lya Musa lyanguzeleka kota kulavya.
EXO 2:11 Zuwa limwe, Musa naloyawele msongolo, nakawalutila Waebulaniya wayage leka kulola vyowogaya. Lelo nakamona Mmisili yumwe yomtowa Muebulaniya yumwe wa nhanzi ya Musa.
EXO 2:12 Musa nakalola aku na kula, naloyawene kota kuduhu munhu habehi, nakamkopola yula Mmisili na kumvisa mmisanga.
EXO 2:13 Hamitondo, Musa nakalawa kahi, nakawona Waebulaniya weli wochitowa. Lelo nakamlonjela yula yawifile, “Lekachoni kwangumtowa muyago?”
EXO 2:14 Na heye nakamwidichila, “Yalihi yakuwichile hegwe kuwa chilongozi na mtagusa wa hetwe? Ndaze, kwangugana kung'hopola kota vyoumkopole yula Mmisili?” Ahyo, Musa nakadumba na kijesa, “Hanji mbuli ayi izeleka.”
EXO 2:15 Na heye Falao naloyahuliche mbuli ayo nakagana kumkopola Musa. Ila Musa nakambilima Falao, nakaluta kikala kuli isi ya Midiani. Zuwa imwe, Musa nayali yekale hafungo ha izimbo lya mazi.
EXO 2:16 Lelo wahinza saba wa mtambika wa ako Midiani nawoya kudeha mazi na kumemeza mibato kwa mbuli ya chilundo cha mhene na ming'holo ja mhaza wa hewo.
EXO 2:17 Wadimi wanji nawoya na kuwawinga awo wahinza. Ila Musa nakawatanza wahinza awo na kujinweza migongolo ja hewo.
EXO 2:18 Lowamhiluchile mhaza wa hewo Leueli, heye nakawauza, “Lekachoni lehano namhiluka himahima ahyo?”
EXO 2:19 Hewo nawamwidichila, “Mmisili yumwe nakatulohola mmoko mwa wala wadimi, na heye yuye nakadeha mazi nakujinweza migongolo ja hetwe.”
EXO 2:20 Mhaza wa hewo nakawauza wahinza wa heye, “Kakohi? Lekachoni mumleka ako? Mumcheme yoye yalye chilyo.”
EXO 2:21 Musa nakakunda kikala kwa ayo munhu. Lelo ayo munhu nakamha Musa mhinza wa heye nayachemigwe Sipola yawe mdala wa heye.
EXO 2:22 Sipola nakampondela Musa mwana mlume. Musa nakalonga, “Nang'hundizwa kikala kuli isi ayo ya chiunjenzi,” ahyo nakamchema ayo mwana Gelishomu.
EXO 2:23 Lojipulute miyaka jimwenga, mndewa wa Misili nakabagama. Waisilaeli nawang'ung'uta na kulila vyowawele kuli upogozi na kulila kwa hewo nakumlutila Nguluwi.
EXO 2:24 Nguluwi nakahulika chowali wong'ung'utila hewo, na heye nakakumbuchila ilagano lyoyaditile na Abulahamu na Isaka na Yakobo.
EXO 2:25 Nguluwi nakawalola Waisilaeli, na heye nakawona vyowali na kuvizela usungu wa hewo.
EXO 3:1 Zuwa limwe, Musa nayali yodima chilundo cha ming'holo ja mgosi wa heye, Yesilo, mtambika wa Midiani. Musa nakachihilika chila chilundo ubanzi wa kolizibilaga isanya mwa kuchiwala, nakachifichila chidunda cha Holebu, chidunda cha Nguluwi.
EXO 3:2 Lelo mhilisi wa Mkulu Nguluwi nakamlawila mlilapi lya chiluli hagati na chisosolo. Musa nakalola, nakabubuwala kona chisosolo chikwaka chiluli na hambe chilakale.
EXO 3:3 Lelo Musa nakelonjelela, “Achi ndo chinduzanduza. Chisosolo kwaka na hambe chilakale? Tandi ndute behi, ndole goya.”
EXO 3:4 Mkulu Nguluwi loyamuwene Musa yogalamka kuchilola chisosolo, nakamchema hala mchisosolo, “Musa! Musa!” Musa nakedichila, “Ena! Heni nda baha.”
EXO 3:5 Nguluwi nakamlonjela, “Uleche kuhejela habehi. Uvule makwamba gako kwa vila honhu aha howimile ndo helile.”
EXO 3:6 Hamba Nguluwi nakamlonjela, “Heni nda Nguluwi wa mhaza wa hegwe Abulahamu na Nguluwi wa Isaka na Nguluwi wa Yakobo.” Musa nakagubika meho gake kwa vila nakadumba kumlola Nguluwi.
EXO 3:7 Hamba Mkulu Nguluwi nakamlonjela, “Ndangukomya mbona ng'hatu kugaya kwa wanhu wa heni wawele Misili na nyhulika chililo cha hewo chambuzwe na walolezi wa Wamisili. Ndigazela magazo ga hewo,
EXO 3:8 ahyo mbuya leka ndiwagombole mmoko mwa Wamisili. Ndowalavya amo muisi na kuwahilika kuli isi inojile na ng'hulu, isi iwele na mboto, isi ya Wakanaani na Wahiti na Waamoli na Wapelisi na Wahivi na Wayebusi.
EXO 3:9 Ena, chililo cha Waisilaeli chimbuyila, mbona Wamisili vyowalinguwagaza.
EXO 3:10 Lelo ulute ndangukulajiza kwa Falao leka uwalavye wanhu wa heni, Waisilaeli muisi ya Misili.”
EXO 3:11 Ila Musa nakamlonjela Nguluwi, “Heni nda whaani mbaka ndimlutile Falao na kuwalavya Waisilaeli kuli isi ya Misili?”
EXO 3:12 Nguluwi nakamlonjela, “Heni ndowa hamwe na hegwe. Houwalavile wanhu wa Isilaeli kulawa Misili na kuya kufugamila heni mchidunda chichi. Awu wowa ndo ulajilo kota ndo heni Nguluwi ndikulajize hegwe.”
EXO 3:13 Aho, Musa nakamlonjela Nguluwi, “Lelo londiwalutila Waisilaeli na kuwalonjela, ‘Nguluwi wa wasekulu wa hemwe nakanhuma kwa hemwe,’ nawo howombuza, ‘Itagwa lyake lyani,’ ndowalonjela choni?”
EXO 3:14 Nguluwi nakamwidichila Musa, “HENI NDO NDIWELE.” Na kahi nakalonga, “Walonjele ahi wanhu wa Waisilaeli, ‘Yula yalinguchemigwa, HENI NDIWELE, kandajiza kwa hemwe.’ ”
EXO 3:15 Nguluwi nakamlonjela Musa, “Walonjele ahi Waisilaeli, ‘Mkulu Nguluwi, Nguluwi wa wasekulu wa hemwe na Nguluwi wa Abulahamu na Nguluwi wa Isaka na Nguluwi wa Yakobo, nakandajiza kwa hemwe. Ali ndo itagwa lyangu mazuwa gose, na ahyo ndo vyondiwa ndikumbuchilwa mli lulelo lweng'ha.’
EXO 3:16 Luta ukawakungajize wasekulu wa Isilaeli na kuwalonjela, ‘Mkulu Nguluwi, Nguluwi wa wasekulu wa hemwe, Nguluwi wa Abulahamu na Nguluwi wa Isaka na Nguluwi wa Yakobo, nakandawila na kulonga, “Ndiwalolani na kona isungu kwa kuzona mbuli zomlinguditilwa kuli isi ya Misili.
EXO 3:17 Ndangilaha kota ndowalavya mli kugaya kwa hemwe ako Misili na kuwahilika kuli isi ya Wakanaani na Wahiti na Waamoli na Wapelisi na Wahivi na Wayebusi, ndowahilika kuli isi iwele na mboto.” ’
EXO 3:18 “Hewo wokuhulichiza, nagwe hamwe na wasekulu wa Waisilaeli momlutila mndewa wa Misili na kumlonjela, ‘Mkulu Nguluwi, Nguluwi wa Waebulaniya, nakatulawila. Lelo utukundize twinule majendo ga mazuwa gadatu kuchiwala, tukamlavile nhambiko Mkulu Nguluwi, Nguluwi wa hetwe.’
EXO 3:19 Ndivizela kota mndewa wa Misili howakundiza muche mbaka yavizele kota heni ndina ludali ng'hatu kusinda heye.
EXO 3:20 Lelo ndowalajila ludali lwa heni kwa kuitowa isi ya Misili kwa vinduzanduza vyondiza dita ako. Hamba mndewa kowalechela muche.
EXO 3:21 Kahi ndogana mbone Wamisili wowakunda Waisilaeli, na homkuka Misili, hamkuka moko hela.
EXO 3:22 Chila mdala wa Chiebulaniya komlanda wekalase behi na heye Mmisili ama mjenzi yawele mng'handa ya heye, yamhe vinhu vilingupulika vya sendi na zahabu hamwe na nguwo. Ahyo mowavika wana wa hemwe wasongolo na wadala. Ahyo ndo Waisilaeli vyowaholile lufufu lwa Wamisili.”
EXO 4:1 Musa nakamlonjela Mkulu Nguluwi, “Ila Waisilaeli hawokunda ne kunyhulichiza, hanji wolonga kota hegwe Nguluwi hundawile hebu.”
EXO 4:2 Aho Mkulu Nguluwi nakamuuza Musa, “Kibata choni mmoko mwa hegwe?” Musa nakamwidichila, “Ng'weku.”
EXO 4:3 Mkulu Nguluwi nakamlonjela, “Ulagaze hanyi.” Musa nakalagaza ng'hweku hanyi, nayo naigaluka kuwa izoka. Musa nakaibilima.
EXO 4:4 Ila Mkulu Nguluwi nakamlonjela Musa, “Ugolole moko wa hegwe, ulibate mchila.” Musa nakagolola moko wa heye, nakalibata, izoka naligaluka kuwa ng'hweku kahi mmoko mwa heye.
EXO 4:5 Mkulu Nguluwi nakamlonjela, “Ahyo, kwa chinduzanduza achi, Waisilaeli woweza kukunda kota heni nda Mkulu Nguluwi, Nguluwi wa wasekulu wa hewo na Nguluwi wa Abulahamu na Nguluwi wa Isaka na Nguluwi wa Yakobo, ndikulawila.”
EXO 4:6 Kahi, Mkulu Nguluwi nakamlonjela, “Winjize moko wa hegwe mli ikanzu lya hegwe.” Musa nakadita hiho, ila loyalavile kunze, baho uwa na uswema.
EXO 4:7 Hamba Nguluwi nakamlonjela, “Winjize kahi moko wa hegwe mli ikanzu lya hegwe.” Musa nakenjiza moko wa heye mli ikanzu lya heye. Loyaulavile kunze, baho du uwa goya kota vyoluwele lukuli lwa heye aho hamwande.
EXO 4:8 Nguluwi nakamlonjela Musa, “Wone hawokwidichila ama kukunda ulajilo wa mwaluko, hanji wokunda ulajilo lwa keli.
EXO 4:9 Ila wone hawakundile ne ulajilo awu weng'ha wili, ama kukunda ulonzi wa hegwe, kogadeha mazi ga lwanda lwa Naili na kugabohola mchanya mwa isi ng'havu. Mazi ago gowa danda mchanya mwa isi ng'havu.”
EXO 4:10 Ila Musa nakamlonjela Mkulu Nguluwi, “Dedede Mkulu wa heni, heni sidahile kulonga goya kulawila hamwande, hanga na hala houlonjile na heni chitumagwa wa hegwe, heni sidahile kulonga goya ng'hatu.”
EXO 4:11 Aho Mkulu Nguluwi nakamuuza, “Whaani yalumbile umyango wa munhu? Whaani yomdita munhu yalemwele kulonga na kuhulika? Whaani yomdita munhu yalole ama yawe hambe yalole? Ndaze, hawele Mkulu Nguluwi?
EXO 4:12 Lelo ulute. Heni ndoulongoza umyango wa hegwe na kukulangusa cha kulonga.”
EXO 4:13 Ila Musa nakalonga, “Hegwe Mkulu wa heni, dedede ndangukulanda, umlajize munhu yunji.”
EXO 4:14 Ndo baho kuzudila kwa Mkulu Nguluwi lolwachile kwa Musa, nakamlonjela, “Ndaze, kuduhu mng'holozo Aluni yawele Mlawi? Ndivizela heye kaweza kulonga goya. Kahi kanguya kuting'hana na hegwe, baho du hoyokona kosangalala ng'hatu mnhumbula.
EXO 4:15 Hegwe kolonga na heye na kumlonjela geng'ha goyolonga. Heni ndowatanzani na kuwalangusa mbuli za kudita.
EXO 4:16 Aluni kodawala na Waisilaeli honhu hako. Heye kowa yolonga honhu ha hegwe, nagwe kowa kota Nguluwi kwa heye.
EXO 4:17 Kochibata mmoko mwako ng'hweku ayi ndo ikutanza kudita ula ulajilo.”
EXO 4:18 Musa nakahiluka kwa Yesilo, mgosi wa heye, nakamlonjela, “Dedede ung'hundize nyhiluche Misili kwa wang'holozangu, ndikalole wone wawele wakomu.” Yesilo nakamlonjela, “Lute goya.”
EXO 4:19 Musa loyali yang'hali muisi ya Midiani, Mkulu Nguluwi nakamlonjela, “Uhiluche Misili kwa vila wala weng'ha nawaganile kukukopola nawabagama.”
EXO 4:20 Lelo Musa nakamhola mchewake na wanage, nakawakwiniza midogowi, nakaluka majendo ga kuhiluka Misili. Mmoko mwa heye nakahola yila ng'hweku yalonjelwe na Nguluwi yaihole.
EXO 4:21 Mkulu Nguluwi nakamlonjela Musa, “Loufika Misili, uwe uvizelele kota kudita hali Falao vinduzanduza vyeng'ha vyondikupele ludali lwa kudita. Ila heni ndoidita nhumbula ya Falao iwe igagadale, na heye howalechela Waisilaeli woche.
EXO 4:22 Nagwe komlonjela Falao kota Mkulu Nguluwi kangulonga ahi, ‘Isi ya Isilaeli ndo mlelwa wa heni wa mwaluko mlume.
EXO 4:23 Nani ndangukulonjela, Mleche mwanangu yoche leka yakafugamile heni. Wone uleme kumlechela yoche, ulole ndomkopola mlelwa wa hegwe wa mwaluko mlume.’ ”
EXO 4:24 Loyali yang'hali mnzila kuhiluka Misili, Musa nayali honhu ha kuwasa wajenzi, Mkulu Nguluwi nakating'hana na heye nakajeza kumkopola.
EXO 4:25 Aho Sipola nakahola iganga linoleche, nakalidumula igovi lya mwanage na kumdoliza nalyo Musa mmagulu yolonga, “Hegwe ndo mkasano wa danda”.
EXO 4:26 Aho Mkulu Nguluwi nakamleka Musa yawele mkomu. Sipola nayali yalonjile, “Mkasano wa danda,” kwa mbuli ya kwinjiza ikumbi.
EXO 4:27 Mkulu Nguluwi nakamlonjela Aluni, “Ulute kuchiwala ukating'hane na Musa.” Aluni nakaluta nakating'hana na Musa kuli chidunda cha Nguluwi, nakamnonela.
EXO 4:28 Na heye Musa nakamlonjela Aluni ulonzi weng'ha woyalonjelwe na Mkulu Nguluwi yalonje, na ulajilo weng'ha woyalajizwe na Nguluwi yadite.
EXO 4:29 Hamba Musa na Aluni nawaluta ako Misili, wawakungajiza wasekulu weng'ha wa Waisilaeli.
EXO 4:30 Aluni nakawalonjela ulonzi weng'ha Mkulu Nguluwi woyamlonjele Musa na kudita ula ulajilo hali wanhu weng'ha.
EXO 4:31 Wanhu weng'ha nawakunda. Nalowahuliche kuta Mkulu Nguluwi koya kuwatanza Waisilaeli na kuta nakona isungu kwa kugaya kwa hewo, weng'ha nawamfugamila Nguluwi.
EXO 5:1 Hamba, Musa na Aluni nawamlutila Falao, nawamlonjela, “Mkulu Nguluwi, Nguluwi wa Isilaeli kangulonga hino, ‘Uwaleche wanhu wa heni woche, wakanditile mnvina kuchiwala.’ ”
EXO 5:2 Ila Falao nakawauza, “Ndo yalikohi ayo Mkulu Nguluwi, mbaka nani ndimhulichize na kuwaleka Waisilaeli woche? Heni simzelele ayo Mkulu Nguluwi, na siwalechela hebu Waisilaeli woche.”
EXO 5:3 Musa na Aluni nawamlonjela, “Nguluwi wa Waebulaniya nakating'hana na hetwe. Twangukudedeza utuleche tuche kuchiwala kwa majendo ga mazuwa gadatu tukamlavile nhambiko Mkulu Nguluwi, Nguluwi wa hetwe. Wone haiwa kota ahyo, kotukopola kwa matamwa gehile ama ngondo.”
EXO 5:4 Ila mndewa wa Misili nakawedichila, “Hemwe Musa na Aluni, lekachoni mwangujeza kuwalavya wanhu kuli mijito ja hewo? Hemwe wapogozi weng'ha mhiluche kuli mijito ja hemwe.”
EXO 5:5 Kahi Falao nakalonga, “Awa wanhu wa hemwe ndo wenji kusinda wenyeng'haye, mwangugana waleche kukola mijito!”
EXO 5:6 Zuwa lilyo Falao nakawalajiza walolezi wa wakolamijito hamwe na vilongozi wanji, nakalonga,
EXO 5:7 “Mleche kuwapa misolo ja kugongomanyila mitufali kota vyoiwele mazuwa gapulute. Hewo wawo woluta kikungajizila misolo wawo.
EXO 5:8 Ila hisabu ya mitufali galinguditikwa iwe yiyila, naileche kuwa nyindo, ne itufali limwe, kwa vila wanhu awa ndo wagata ndo mina wangutowa iyowe. ‘Utuleche tuche tukamlavile nhambiko Nguluwi wa hetwe.’
EXO 5:9 Muwonjezele wanhu awa mijito iwele itunyo leka walavye chituguti waleche kuhulichiza ulonzi wa udesi.”
EXO 5:10 Lelo vilongozi wa walolezi na walolezi wa Waisilaeli wayao nawalawa kunze na kuwalonjela wanhu, “Falao kangulonga ahi, ‘Siwagalilani misolo,
EXO 5:11 Mlute mwemwe baho mikekungajizile misolo honeche homuweza kujona, na mijito ya hemwe haipunguzigwa hebu.’ ”
EXO 5:12 Baho wanhu weng'ha nawasambaluka chila honhu muisi ya Misili wopala misolo jisigale ja kudidichila mitufali.
EXO 5:13 Na hewo walolezi nawalutilila kulonga, “Mgomanjize mijito ya chila zuwa kota vila katali nalomwali migalilwa misolo.”
EXO 5:14 Walolezi wa Falao nawawazapa walolezi wa Waisilaeli wayao wolonga, “Lekachoni hamligongomanya mijito iwazigwe na kweneza hisabu yiyila ya mitufali kota aho hamwande vyomlajizwe?”
EXO 5:15 Ahyo ndo walolezi wa wakolamijito wa Waisilaeli howalutile kwa Falao, wamlilila nakulonga, “Lekachoni kwangutuditila ahi hetwe vitumagwa wa hegwe?
EXO 5:16 Hatulingupegwa kahi misolo jeng'ha jila, na aku twangukolezwa lupichi kuditika mitufali. Kahi hetwe vitumagwa wa hegwe twangutowigwa, aku wawifile, ndo wanhu wa hegwe.”
EXO 5:17 Ila Falao nakalonga, “Wagata hemwe, hemwe mwa wagata, ndo mina mwangulonga, ‘Tuleche tuche tukamlavile nhambiko Mkulu Nguluwi.’
EXO 5:18 Mlute lelo mkakole mijito, mina hampegwa misolo joneche jila na mogongomanya hisabu yiyila ya mitufali.”
EXO 5:19 Lelo awo walolezi wa Waisilaeli sambi nawona kota wa mmagazo, kwa vila nawalonjelwa, “Hamkusilwa ne hado hisabu ya mitufali ya chila zuwa.”
EXO 5:20 Nalowochile kwa Falao, nawating'hana na Musa na Aluni, nawali wowabeteza.
EXO 5:21 Lelo nawawalonjela Musa na Aluni, “Mkulu Nguluwi nayayone mbuli ayi, na kuwatagusa hemwe kwa vila mtudita hetwe tuzudilwe na Falao na vitumigwa wa heye, hemwe muwapa chiwalo cha kutukopola.”
EXO 5:22 Hamba Musa nakamgalamchila kahi Mkulu Nguluwi, na kulonga, “Hegwe Mkulu Nguluwi, lekachoni ulinguwaditila wanhu awa wihe? Lekachoni nakunhuma heni hano?
EXO 5:23 Kulawila londali ndilonga na Falao kwa itagwa lya hegwe, heye nakawaditila wihe wanhu awa. Hegwe hunadita chinhu choneche cha kuwagombola wanhu wa hegwe.”
EXO 6:1 Ila Mkulu Nguluwi nakamlonjela Musa, “Lelo kolola vyondimditila Falao, mina kwa moko, kowakundiza walute na kwa moko kowawinga kulawa isi ya heye.”
EXO 6:2 Nguluwi nakamlonjela Musa, “Heni nda Mkulu Nguluwi.
EXO 6:3 Nandimlawila Abulahamu na Isaka na Yakobo lonzeleche kota Nguluwi yawele na mong'ho, ila itagwa lyangu Mkulu Nguluwi nahalizeleche kwa hewo.
EXO 6:4 Kahi nambika ilagano lya heni na hewo lya kuwapa isi ya Kanaani, isi yowekale kota wajenzi.
EXO 6:5 Lelo nanyhulika kung'ung'uta kwa Waisilaeli, nawawele wotunywa na Wamisili, nani ndilikumbuka ilagano lyangu.
EXO 6:6 Lelo walonjele Waisilaeli, ‘Heni nda Mkulu Nguluwi na ndowalavya hemwe kuli itunyo lya Wamisili, nani ndowalohola kuli upogozi wa hewo na kuwagombola kwa moko wa heni ugoloche na kuwagaza lukami Wamisili,
EXO 6:7 nani ndowaditani hemwe muwe wanhu wa heni, nani ndiwe Nguluwi wa hemwe, na movizela kota heni nda Mkulu Nguluwi, Nguluwi wa hemwe, ndiwele ndiwalohole kuli itunyo lya Wamisili.
EXO 6:8 Nani ndowegala mbaka kuli isi yila iwele nandilaha ndowapa Abulahamu na Isaka na Yakobo, ndowapa isi ayi iwe ya hemwe. Heni nda Mkulu Nguluwi.’ ”
EXO 6:9 Musa nakawalonjela Waisilaeli ulonzi awo, ila nahawamuhulichize kwa chiwalo cha usungu wa nhumbula na kwa chiwalo cha itunyo lya upogozi.
EXO 6:10 Hamba Mkulu Nguluwi nakamlonjela Musa,
EXO 6:11 “Ulute kwa Falao, mndewa wa Misili, umlonjele uwaleche Waisilaeli woche kuli isi ya heye.”
EXO 6:12 Ila Musa nakamwidichila Mkulu Nguluwi, “Ulole, Waisilaeli hawalingunyhulichiza heni. Lelo yowa ndaze ayo Falao yanyhulichize heni, ndilingulemwela kulonga goya?”
EXO 6:13 Ila Mkulu Nguluwi, nakalonga na Musa na Aluni, nakawalajiza walute kwa Falao, mndewa wa Misili na kuwalavya Waisilaeli kuli isi ya Misili.
EXO 6:14 Ayi ndo mbuli ya matagwa ga wakulu wa lukolo lwawo. Wana walume wa Lubeni, mlelwa wa mwaluko wa Isilaeli nawali, Enoki na Palu na Hesiloni na Kalimi. Alo nalwali lukolo lwa Lubeni.
EXO 6:15 Wana walume wa Simeoni nawali, Yemueli na Yamini na Ohadi na Yakini na Sohali na Shauli mwana wa mdala kulawa Kanaani, alo ndo lukolo lwa Simeoni.
EXO 6:16 Aga ndo matagwa ga wana walume wa Lawi, vivila na lukolo lwawo, Gelishoni na Kohati na Melali. Lawi nakekala kwa miyaka miya imwe na makumi gadatu na saba.
EXO 6:17 Wana walume wa Gelishoni nawali, Libuni na Shimei, vivila na lukolo lwawo.
EXO 6:18 Wana walume wa Kohati nawali, Amulamu na Ishali na Hebuloni na Usieli. Kohati nakekala kwa miyaka miya imwe na makumi gadatu na zidatu.
EXO 6:19 Wana walume wa Melali nawali Mahuli na Mushi. Awo ndo wasekulu wa lukolo lwa Walawi.
EXO 6:20 Amulamu nakamhesa Yokebedi, lumbu wa mhaza wa heye, na heye nakampondela Aluni na Musa. Amulamu nakekala miyaka miya imwe na makumi gadatu na saba.
EXO 6:21 Na wana walume wa Ishali nawali, Kola na Nefegi na Sikili.
EXO 6:22 Wana walume wa Usieli nawali, Mishaeli na Elisafani na Sitili.
EXO 6:23 Aluni nakamhesa Elisheba, mhinza wa Aminadabu, lumbulye Nashoni, na heye nakampondela wana walume, Nadabu na Abihu na Eleasali na Itamali.
EXO 6:24 Na hewo wana walume wa Kola nawali, Asili na Elikana na Abiasafu, nawawele wasekulu wa lukolo lwa Kola.
EXO 6:25 Eleasali mwana wa Aluni nakamhesa yumwe wa wahinza wa Putieli, na heye nakampondela Finehasi. Awa ndo nawali wakulu wa lukolo lwa Lawi.
EXO 6:26 Aluni na Musa ndo wawo nawalonjelwe na Mkulu Nguluwi, “Muwalavye wanhu wa Isilaeli kuli isi ya Misili, vilundo kwa vilundo.”
EXO 6:27 Ndo wawo Musa na Aluni nawadogole na Falao mndewa wa Misili, mbuli ya kuwalavya Waisilaeli kuli isi ya Misili.
EXO 6:28 Zuwa lila Mkulu Nguluwi naloyalonjile na Musa kuli isi ya Misili,
EXO 6:29 nakamlonjela Musa, “Heni ndo Mkulu Nguluwi. Mlonjele Falao, mndewa wa Misili, ulonzi weng'ha wondikulonjela.”
EXO 6:30 Ila Musa nakamlonjela Mkulu Nguluwi, “Kuvizela kota sidahile kulonga goya, lelo Falao konyhulichiza ndaze?”
EXO 7:1 Mkulu Nguluwi nakamlonjela Musa, “Ulole, heni ndikudita uwe kota Nguluwi kwa Falao, na heye mng'holozo Aluni kowa yolonga honhu ha hegwe.
EXO 7:2 Mlonjele mng'holozo Aluni mbuli yeng'ha yondikulajiza, na heye Aluni mng'holozo, komlonjela Falao yawaleche Waisilaeli walawe kuli isi ya heye.
EXO 7:3 Ila ndoidita nhumbula ya Falao iwe igagadale. Na nyonjeze vinduzanduza na kububuwaza kwa heni kuli isi ya Misili,
EXO 7:4 ila Falao hokuhulichiza, na aho ndougolola moko wa heni uwele na ludali na kuigaza ng'hatu isi ya Misili, na kuwalavya wanhu wa heni, nhanzi za Isilaeli kulawila Misili.
EXO 7:5 Mhela wondiugolola moko wa heni kwa isi ya Misili na kuwalavya Waisilaeli hali hewo. Aho ndo Wamisili wovizela kota heni nda Mkulu Nguluwi.”
EXO 7:6 Lelo Musa na Aluni nawadita ahyo, ena, nawadita kota Mkulu Nguluwi navyoyawalajize.
EXO 7:7 Musa nayali na miyaka makumi nane, na Aluni nayali na miyaka makumi nane na gadatu mhela awo nawalongase na Falao.
EXO 7:8 Mkulu Nguluwi nakawalonjela Musa na Aluni,
EXO 7:9 “Falao hoyowalonjela mtawize mbuli ayo kwa kudita vinduzanduza, hegwe komlonjela Aluni yaihole ng'hweku ya heye, na yaitoze hali Falao, nayo yogaluka izoka.”
EXO 7:10 Lelo Musa na Aluni nawamlutila Falao na kudita kota navyowalajizwe na Mkulu Nguluwi. Aluni nakatoza ng'hweku ya heye hali Falao na vitumigwa wa heye, nayo naigaluka izoka.
EXO 7:11 Ila Falao nakawachema wanhu wa heye wawele na nyhala na wahawi, awo wahawi wa Misili nawadita hihyo kwa uhawi wa hewo.
EXO 7:12 Chila yumwe nakatoza ng'hweku ya heye hasi naigaluka izoka. Ila ng'hweku ya Aluni naizimela ng'hweku za hewo.
EXO 7:13 Kwa ago geng'ha, nhumbula ya Falao naipona igagadale, nahawawahulichize, naiwa kota navyoyalonjile Mkulu Nguluwi.
EXO 7:14 Hamba Mkulu Nguluwi nakamlonjela Musa, “Nhumbula ya Falao igagadala. Kangulema ng'hatu kuwalechela Waisilaeli woche.
EXO 7:15 Lelo ulute ukating'hane na heye mitondo, mhela hoyoluta kuli lwanda lwa Naili. Umbeteze Falao hafungo mwa lwanda. Uhole mmoko mwa hegwe ayila ng'hweku naigaluche izoka.
EXO 7:16 Hamba mlonjele ahi, ‘Mkulu Nguluwi, Nguluwi wa Waebulaniya, kandajiza kwa hegwe, na heye kangulonga ahi, “Waleche wanhu wa heni walute leka wafugamile heni kuchiwala, ila mbaka sambi hegwe kwangulema kuhulichiza.”
EXO 7:17 Lelo Mkulu Nguluwi kangulonga kota sambi komzela heye ndo Mkulu Nguluwi. Ndogatowa mazi ga lwanda lwa Naili kwa ng'hweku ayi, na mazi gogaluka kuwa danda.
EXO 7:18 Somba ziwele mlwanda wa Naili zofa na lwanda lweng'ha lonhung'ha vibi na Wamisili wozudizwa na mazi gake.’ ”
EXO 7:19 Mkulu Nguluwi nakamlonjela Musa, “Umlonjele Aluni yahole ng'hweku ya heye na kuigolola mchanya mwa mazi ga Misili na mchanya mwa isi yeng'ha na mchanya mwa nzanda zeng'ha na nyhinda na mizimbo na milamba jawo jeng'ha, nago gowa danda. Kowa na danda isi yeng'ha na kuli vinhu vyeng'ha vya kuwichila mazi, vya mbao na vya maganga.”
EXO 7:20 Musa na Aluni nawadita kota Mkulu Nguluwi navyoyawalajize. Aluni nakenula ng'hweku ya heye kuchanya hali Falao na vitumigwa wa heye, nakagatowa mazi ga lwanda lwa Naili na mazi geng'ha nagagaluka kuwa danda.
EXO 7:21 Somba nazibagama, lwanda nalunhung'ha vibi ng'hatu mbaka Wamisili walemwela kunwa mazi ga lwanda Naili. Isi yeng'ha naimema danda.
EXO 7:22 Ila wahawi wa Misili kwa uhawi wawo nawadita hiho. Ahyo nhumbula ya Falao naipona igagadale na heye nahawahulichize Musa na Aluni, iwa kota Mkulu Nguluwi navyoyalonjile.
EXO 7:23 Lelo Falao, nakahiluka kaye na gala galawile nahagajesile.
EXO 7:24 Wamisili weng'ha nawabawabawa hafungo mwa lwanda lwa Naili leka wadehe mazi, kwa vila nawalemwela kunwa mazi ga lwanda alo.
EXO 7:25 Mazuwa saba nagapuluta kulawa Mkulu Nguluwi loyaugazile lwanda lwa Naili.
EXO 8:1 Hamba Mkulu Nguluwi nakamlonjela Musa, “Mlute kwa Falao mkamlonjele Mkulu Nguluwi kangulonga ahi, ‘Uwaleche Waisilaeli woche leka kuli isi ya Misili wakafugamile heni.
EXO 8:2 Ila wone uleme kuwaleka woche, lelo ndoitowa isi ya hegwe kwa kuwegalila mibula.
EXO 8:3 Lwanda lwa Naili lomema mibula najo jokwinjila mbaka mgati mwa ng'handa ya hegwe, chihengo cha hegwe cha kuwasa, mchinanda mwa hegwe na kuli ng'handa za vitumagwa na wanhu wa hegwe. Mibula ajo jokwinjila kuli chiko na visaye vya hemwe vya kutimbulila utimbo.
EXO 8:4 Mibula jokwina mchanya mwa lukuli lwa hegwe na mli ng'huli za wanhu wa hegwe na vitumagwa wa hemwe.’ ”
EXO 8:5 Mkulu Nguluwi nakamlonjela Musa, “Mlonjele Aluni yagolole moko wa heye na ng'hweku ya heye mchanya mwa nzanda na mchanya mwa nyinda na mizimbo, najo mibula jolawila na kwenela chila honhu mli isi ya Misili.”
EXO 8:6 Lelo Aluni nakagolola moko wa heye mchanya mwa mazi geng'ha ga Misili najo mibula najikwina mchanya na kuigubika isi yeng'ha ya Misili.
EXO 8:7 Ila nawo wahawi nawadita uhawi kota awo na kujigala mibula kuli isi ya Misili.
EXO 8:8 Hamba Falao nakawachema Musa na Aluni, nakawalonjela, “Mumdedeze Mkulu Nguluwi, leka yanyusile mibula aji, heni na wanhu wa heni, nani ndowaleka Waisilaeli walute na kumlavila nhambiko Mkulu Nguluwi.”
EXO 8:9 Musa nakamwidichila Falao, “Goya! Ndonjele du mhela ulingugana ndikulandile kwa Mkulu Nguluwi na ndikulandile vitumagwa wa hegwe na wanhu wa hegwe, ndomlanda yakopole mibula aji jiwele kuli ng'handa za hemwe, jopona hela kuli lwanda lwa Naili.”
EXO 8:10 Falao nakamlonjela, “Mitondo.” Musa nakalonga, “Ndodita kota vyoulonga, leka uvizele kota kuduhu yoneche yalingiwhana na Mkulu Nguluwi, Nguluwi wa hetwe.
EXO 8:11 Mibula jokuka kwa hegwe na kuli ng'handa za hegwe na kwa vitumagwa wa hegwe na kwa wanhu wa hegwe, jopona hela kuli lwanda lwa Naili.”
EXO 8:12 Lelo Musa na Aluni nawoka haluga ha Falao na Musa nakamlilila Mkulu Nguluwi yamusile Falao kumema kwa mibula ajo najoyamigalile.
EXO 8:13 Mkulu Nguluwi nakadita kota Musa navyoyamlandile, mibula najifa mng'handa na mluga na kuli vipepela vya ng'handa na kuli migunda.
EXO 8:14 Wanhu nawakungajiza mibula ajo chilundo kwa chilundo, isi yeng'ha nainung'ha nyee.
EXO 8:15 Ila Falao loyawene kota isi ihola, nakawa na nhumbula igagadale kahi, nahawahuliche ng'oo Musa na Aluni, kota Mkulu Nguluwi navyoyalonjile.
EXO 8:16 Hamba Mkulu Nguluwi nakamlonjela Musa, “Mlonjele Aluni yagolole ng'hweku ya heye na kutowa nhimbwisi nayo yogaluka kuwa sewe kweng'ha kuli isi ya Misili.”
EXO 8:17 Musa na Aluni nawadita ahyo. Aluni nakagolola ng'hweku ya heye na kuitowa nhimbwisi, nayo naigaluka kuwa sewe na kuwakwina wanhu na migongolo. Nhimbwisi yeng'ha mli isi ya Misili naigaluka sewe.
EXO 8:18 Wahawi wa Misili kwa uhawi wa hewo, nawajeza kuigalusa nhimbwisi iwe sewe, ila nawalemwela. Sewe azo nazenela kwa wanhu na migongolo.
EXO 8:19 Wahawi nawamlonjela Falao, “Aji mijito ja moko wa Nguluwi.” Ila nhumbula ya Falao nailutilila kugagadala na nakalema kuwahulichiza Musa na Aluni. Naiwa kota Mkulu Nguluwi navyoyalonjile.
EXO 8:20 Hamba Mkulu Nguluwi nakamlonjela Musa, “Mitondo ulilimche lufuku umlutile Falao mhela hoyoluta kulwanda umlonjele kota Mkulu Nguluwi kangulonga ahi, ‘Uwalechele wanhu wa heni woche leka wafugamile heni.
EXO 8:21 Wone kolema kuwalechela walute, lelo ndokugalila vilundo vya ng'honzi hegwe na vitumagwa wa hegwe weng'ha. Wokwinjila mli ng'handa za hemwe zeng'ha za Wamisili zomema vilundo vya ng'honzi, hihyo du, na isi yeng'ha wanhu howawele.
EXO 8:22 Ila zuwa alyo honhu ha Gosheni walingikala wanhu wa heni ndoyamila, amo ng'honzi azo haziwa mumo. Aho ndo houvizela kota heni Mkulu Nguluwi nda hali isi ayi.
EXO 8:23 Ndowaditila uganililo wanhu wa heni na ulajilo wowafika wanhu wa hegwe. Ulajilo awo woditikwa mitondo.’ ”
EXO 8:24 Mkulu Nguluwi nakadita kota navyoyalonjile. Vilundo vikulu vya ng'honzi navigwa mng'handa ya Falao na ng'handa za vitumagwa wa heye. Wanhu weng'ha wa isi ayo nawagazigwa ng'hatu na ng'honzi azo.
EXO 8:25 Ndo Falao nakawachema Musa na Aluni, nakalonga, “Moweza kuluta kumlavila nhambiko Nguluwi wa hemwe, ila mumu kuli isi ya Misili.”
EXO 8:26 Ila Musa nakamwidichila, “Hebu, hainojile kudita ahyo, mina nhambiko zotumlavila Mkulu Nguluwi, Nguluwi wa hetwe, zowazudiza Wamisili. Ndaze, Wamisili howotona tulavya nhambiko zoziwele izudizo kwa hewo, hawotutowa kwa maganga?
EXO 8:27 Yotulapa kwinula majendo kwa mazuwa gadatu kuza kuchiwala tukamlavile nhambiko Mkulu Nguluwi, Nguluwi wa hetwe, kota vyoyotulajiza.”
EXO 8:28 Lelo Falao nakalonga, “Ndowaleka mlute kumlavila nhambiko Mkulu Nguluwi, Nguluwi wa hemwe, kuchiwala. Ila mleche kuluta kutali ng'hatu. Mndandile na heni.”
EXO 8:29 Musa nakamwidichila Falao, “Baho du, hondikuleka, ndomlanda Mkulu Nguluwi yose vilundo avi vya ng'honzi mng'handa ya hegwe na vitumagwa wa hegwe na wanhu wa hegwe mitondo. Ila hegwe uleche kutubada kahi kuwalemeza wanhu kuluta kumlavila nhambiko Mkulu Nguluwi.”
EXO 8:30 Lelo Musa nakoka haluga ha Falao, nakamlanda Mkulu Nguluwi.
EXO 8:31 Mkulu Nguluwi nakadita kota Musa navyoyamlandile, zila ng'honzi nazuka kulawa kwa Falao na vitumagwa na wanhu wa heye, nahaiponile ne ng'honzi imwe.
EXO 8:32 Ila mhela awu kahi, Falao nayali na nhumbula igagadale, nahawakundize Waisilaeli kuka.
EXO 9:1 Hamba Mkulu Nguluwi nakamlonjela Musa, “Winjile hegwe kwa Falao umlonjele kota heni Mkulu Nguluwi, Nguluwi wa Waebulaniya ndangulonga, ‘Uwaleche wanhu wa heni woche leka wakafugamile heni.
EXO 9:2 Wone uleme kuwalechela woche na houlutilila kuwebatilila,
EXO 9:3 ndogolola moko wa heni na kuwegalila matamwa gehile ng'hatu kuli migongolo ja hemwe jeng'ha, misenga na falasi na midogowi na ngamiya na mhene na ming'holo.
EXO 9:4 Na ndojibagula migongolo ja Waisilaeli na migongolo ja Wamisili leka igongolo ne limwe lya Waisilaeli lileche kubagama.’ ”
EXO 9:5 Kahi Mkulu Nguluwi nakawika mhela yolonga, “Mitondo heni Mkulu Nguluwi ndodita mbuli ayo muisi ya Misili.”
EXO 9:6 Loifichile mitondo Mkulu Nguluwi nakadita choyalonjile. Migongolo jeng'ha ja Wamisili najibagama, ila kuduhuli igongolo ne limwe lya Waisilaeli libagame.
EXO 9:7 Falao nakauza mbuli ilingulapa migongolo ja Waisilaeli, nakalonjelwa kuduhuli igongolo lya hewo ne limwe libagame. Na ahyo, Falao nayali yang'hali na nhumbula igagadale, na hawakundize Waisilaeli woche.
EXO 9:8 Mkulu Nguluwi nakawalonjela Musa na Aluni, “Mhole miganza ja mivu ja itanulu, hamba Musa mhombe mchanya honhu hawele Falao yolola.
EXO 9:9 Mivu ajo jowa nhimbwisi nzisili ikwenela kuli isi yeng'ha ya Misili. Yokwambuza mipu jotumbuka na jowa vilonda kwa wanhu na migongolo chila honhu muisi ya Misili.”
EXO 9:10 Lelo nawahola mivu kulawa kuli itanulu, nawamlutila Falao, na heye Musa nakajihomba mchanya, na mipu najilawila kwa wanhu wa Misili na migongolo ja hewo.
EXO 9:11 Wahawi nawo nawali wokugula ajo mipu, ahyo nahawawezile kwima hali Musa, kwa vila Wamisili weng'ha nawali na mipu.
EXO 9:12 Ila Mkulu Nguluwi nakamdita Falao yawe na nhumbula igagadale, na heye hawahulichize kota hila Mkulu Nguluwi navyoyamlonjele Musa.
EXO 9:13 Baho du, Mkulu Nguluwi nakamlonjela Musa, “Mitondo winuche kung'hali lufuku mlutile Falao, umlonjele kota heni Mkulu Nguluwi, Nguluwi wa Waebulaniya, kangulonga ahi, ‘Waleche wanhu wa heni woche leka wakafugamile heni.
EXO 9:14 Lelo ndokigalila magazo ga heni geng'ha kwa hegwe na vitumagwa wa hegwe na chila munhu kuli isi ya hegwe. Hamba kovizela kota kuduhuli yoneche kuli isi yeng'ha yawele kota heni.
EXO 9:15 Wone nandiwegalile matamwa hegwe na wanhu wa hegwe, hemwe mwahawele mbagame katali.
EXO 9:16 Ila ndikuleka wikale leka ndiulajile ludali lwa heni. Kwa ahyo isi yeng'ha yovizela kota heni nda whaani.
EXO 9:17 Ila ung'hali kidaya hali wanhu wa heni, na hambe uwaleche woche.
EXO 9:18 Ahyo, mitondo mhela kota uno, ndochigala nhonya ng'hulu ng'hatu ya maganga ndo haina lawila muisi ya Misili, kwalawa mwaluko mbaka lehano.
EXO 9:19 Kwa ahyo ulajize migongolo ja hegwe na choneche chiwele ako kumgunda viwichigwe honhu hanojile, kwa vila nhonya ya maganga yomtowa chila munhu na igongolo liwele kumgunda na jing'hali hiluka haluga, jeng'ha jobagama.’ ”
EXO 9:20 Vitumigwa wanji wa Falao nawadumba choyalonjile Mkulu Nguluwi, ahyo nawawahilika wapogozi na migongolo ja hewo haluga honhu hanojile.
EXO 9:21 Ila wala wabezile ulonzi wa Mkulu Nguluwi nakawaleka wapogozi wa heye na migongolo ja heye kumgunda.
EXO 9:22 Hamba, Mkulu Nguluwi nakamlonjela Musa, “Ugolole moko wa hegwe kuchanya kilanga, leka nhonya ya maganga itowe chila honhu muisi ya Misili. Imtowe munhu na igongolo na chila chilyo kumgunda.”
EXO 9:23 Lelo Musa nakagolola ng'hweku ya heye kulola kilanga. Na heye Mkulu Nguluwi nekegala nhonya ya maganga na limlungu na chiluli na lumwemwesa isi. Mkulu Nguluwi nakegala nhonya ya maganga muisi ya Misili,
EXO 9:24 nhonya ng'hulu ya maganga itowile ng'hatu kweng'ha na chiluli chilutilile, iwele kuduhuli munhu yoneche wa isi ya Misili yayonile kulawila aho mwaluko.
EXO 9:25 Nhonya ayo ya maganga na ibenangabenanga chila chinhu kuli migunda na chila honhu muisi ya Misili, migongolo na wanhu. Nhonya ya maganga naibenangabenanga vilyo vyeng'ha na migodi kumgunda.
EXO 9:26 Mbuli ayo nayali ikoleche kweng'ha muisi ya Misili, ila honhu ha Gosheni mowekale Waisilaeli, amo mwali mduhuli nhonya ya maganga.
EXO 9:27 Lelo Falao nakawalajiza Musa na Aluni wachemigwe, nakawalonjela, “Mhela awu ndita gehile. Mkulu Nguluwi kana hachi, heni na wanhu wa heni tudita vibi.
EXO 9:28 Mumlande Mkulu Nguluwi kwa ahyo limlungu ali na nhonya ya maganga vyonjezeka lukami. Heni ndowalekani muche na wala homchikala kahi.”
EXO 9:29 Musa nakamlonjela, “Baho du vyondilawa kunze kwa muji ndokwinula moko na kumlanda Mkulu Nguluwi. Limlungu lyoleka na kowa kuduhuli nhonya ya maganga kahi leka uvizele kota isi ayi yeng'ha ndo ya heye Mkulu Nguluwi.
EXO 9:30 Ila ndivizela kota hegwe na vitumagwa wa hegwe mng'hali hambe mumdumbe Mkulu Nguluwi.”
EXO 9:31 (Katani na mizuchila ja uhemba jeng'ha najali jiwifigwe, kwa vila uhemba nawali na miso na katani nayali ilavile uluwa.
EXO 9:32 Ila uwele na ngano haviwifigwe hebu kwa vila avyo vyangudawila kukangala).
EXO 9:33 Lelo Musa nakoka haluga ha Falao, nakalawa kunze kwa muji. Hamba nakenula moko ga heye kumlanda Mkulu Nguluwi. Limlungu na nhonya ya maganga navileka, nhonya naileka kutowa muisi.
EXO 9:34 Ila Falao vyoyawene kota nhonya na nhonya ya maganga na limlungu vileka, nakawila kahi kudita gehile ga heye, nayali na nhumbula igagadale, heye hamwe na vitumagwa wa heye.
EXO 9:35 Lelo kota Mkulu Nguluwi vyoyalonjile kukolela Musa, Falao nayali na nhumbula igagadale nakalema kuwakundiza Waisilaeli woche.
EXO 10:1 Mkulu Nguluwi nakamlonjela Musa, “Ulute kwa Falao. Heni ndiwadita Falao na vitumagwa wa heye wawe na nhumbula zigagadale leka ndite ulajilo awu hali hewo,
EXO 10:2 leka hemwe muwasimile wana wa hemwe na wazukulu wa hemwe, vila vyondiwaditile Wamisili wawe wapoka kwa kudita ulajilo awo hali hewo. Ahyo movizela kota heni nda Mkulu Nguluwi.”
EXO 10:3 Lelo Musa na Aluni nawamlutila Falao na kumlonjela, “Mkulu Nguluwi, Nguluwi wa Waebulaniya, kangulonga ahi, ‘Mbaka hanili kolema kinamiza hali heni? Waleche wanhu wa heni woche leka wakafugamile heni.
EXO 10:4 Wone kolema kuwalechela wanhu wa heni woche, lelo mitondo ndochigala nzije kuli isi ya hegwe.
EXO 10:5 Isi yeng'ha ya Misili yowa jiza kwa vila nzije azo zogubika isi. Wolya chila chinhu chiponile mli yila nhonya ya maganga, kahi hawoleka choneche mchanya mwa migodi jilingota mmigunda.
EXO 10:6 Nzije azo zomema kuli ng'handa ya hegwe na ng'handa za vitumagwa hegwe na ng'handa za Wamisili weng'ha. Nzije zowa nyinji lukami mbaka wasekulu wa hemwe wobubuwala mina hawanazona nzije kota azo kulawila vyowavumbuche mbaka lehano.’ ” Lelo Musa nakalawa kwa Falao.
EXO 10:7 Vitumagwa wa Falao nawamuuza, “Ndaze, munhu ayu kotugaza mbaka hanili? Waleche wanhu awa walute wakamfugamile Mkulu Nguluwi, Nguluwi wa hewo. Ndaze, hulingona kota isi ya Misili yanguwifigwa?”
EXO 10:8 Aho, Musa na Aluni nawachemigwa wahiluche kwa Falao, na heye nakawalonjela, “Mlute mkamfugamile Mkulu Nguluwi, Nguluwi wa hemwe. Ila ndanguuza, walihi wolutasa hamwe na hemwe?”
EXO 10:9 Musa nakamwidichila, “Chila munhu, wasongolo na wasekulu, tokuka na wana wa hetwe walume na wadala, ming'holo na mhene na misenga, mina itulapa tumditile mnvina Mkulu Nguluwi.”
EXO 10:10 Kwa kuwabeza, Falao nakawalonjela, “Mkulu Nguluwi yawe hamwe na hemwe kota vyondiwakundiza mlute hamwe na wana wa hemwe. Yangoneka kota mwanacho chinhu chihile mnhumbula za hemwe.
EXO 10:11 Hebu! Walume yeka ndo woluta kumfugamila Mkulu Nguluwi, mina alyo ndomliganile.” Aho Musa na Aluni nawawinjigwa kwa Falao.
EXO 10:12 Mkulu Nguluwi nakamlonjela Musa, “Ugolole moko wa hegwe kuli isi ya Misili, nzije zilawile leka zinjile na kudakula mizuchila jeng'ha muisi na vyeng'ha viponile kuli yila nhonya ya maganga.”
EXO 10:13 Lelo Musa nakagolola ng'hweku ya heye mchanya mwa isi ya Misili. Mkulu Nguluwi nakegala mbeho kulawa kolilawilaga isanya, naiputa mli isi nemisi yeng'ha na nechilo. Lokubunguzuche, yila mbeho naigala nzije.
EXO 10:14 Azo nzije nazenela chila honhu kuli isi yeng'ha ya Misili. Nzije azo nazali chilundo chikulu lukami, chiwele hachinalawila na hachilawila kahi.
EXO 10:15 Nazigubika isi yeng'ha ya Misili, mbaka isi nayoneka kota iwa jiza. Nazilya mizuchila jeng'ha kuli misanga na mafuza geng'ha gaponile mhela wa yila nhonya ya maganga. Nakwali kuduhu ne ihamba limwe liponile mli migodi ne mizuchila honeche kuli isi yeng'ha ya Misili.
EXO 10:16 Aho Falao nakawachema Musa na Aluni himahima nakawalonjela, “Ndita gehile kwa Mkulu Nguluwi, Nguluwi wa hemwe na kwa hemwe.
EXO 10:17 Ahyo, sambi ndanguwadedeza mmbusile gehile ga heni, kamwe ayi hela, mkandandile kwa Mkulu Nguluwi, Nguluwi wa hemwe, yambusile igayo ali lihile.”
EXO 10:18 Lelo Musa nakoka kwa Falao, nakaluta kumlanda Mkulu Nguluwi.
EXO 10:19 Na heye Mkulu Nguluwi, nakegala mbeho ng'hulu iputa kulawila kolizibilaga isanya, naizinula nzije zila na kuzikundujizila kuli Bahali ya Shamu. Na kuduhu ne nzije imwe iponile kuli isi yeng'ha ya Misili.
EXO 10:20 Ila Mkulu Nguluwi, nakamdita Falao yawe na nhumbula igagadale, nahawalechele Waisilaeli woche.
EXO 10:21 Mkulu Nguluwi nakamlonjela Musa, “Ugolole moko wa hegwe kuchanya kilanga, leka jiza totolo ilawile mli isi ya Misili, jiza totolo iwele munhu yomlapa kwabasa.”
EXO 10:22 Lelo Musa nakagolola moko wa heye kuchanya kilanga, nakuwa jiza totolo kuli isi yeng'ha ya Misili kwa mhela wa mazuwa gadatu.
EXO 10:23 Wanhu wali hambe wewone ne kuka kuza honhu hanji, nawapona baho howawele kwa mhela wa mazuwa gadatu. Ila Waisilaeli weng'ha nawali na lumuli ako Gosheni nakowali wochikala.
EXO 10:24 Hamba Falao nakamchema Musa, nakamlonjela, “Mlute mkamfugamile Mkulu Nguluwi. Wana wa hemwe kahi woweza kuluta hamwe na hemwe. Ila ming'holo na mhene na misenga ja hemwe jipone baha.”
EXO 10:25 Ila Musa nakamlonjela, “Yokulapa utukundize kuhola migongolo ja nhambiko na nhambiko za kulakaza leka tukamlavile nhambiko Mkulu Nguluwi, Nguluwi wa hetwe.
EXO 10:26 Migongolo ja hetwe kahi yotulapa tujihole, kuduhu igongolo ne limwe lyopona kumbele, kwa vila mli migongolo ja hetwe, tomfugamila Mkulu Nguluwi, Nguluwi wa hetwe, na hatuvizelele ndo igongolo lyachi lyotumlavila Mkulu Nguluwi nhambiko mbaka hotufika ako.”
EXO 10:27 Ila Mkulu Nguluwi nakamdita Falao yawe na nhumbula igagadale, nakalema kuwalechela Waisilaeli woche.
EXO 10:28 Falao nakamlonjela Musa, “Uche kumeho kwa heni. Wilolele ng'hatu. Uleche kuya kumbona kahi, mina zuwa lyoukuya kahi kumeho kwa heni, kobagama.”
EXO 10:29 Musa na heye nakamlonjela, “Kota vyoulonjile sikuya kukona kahi.”
EXO 11:1 Mkulu Nguluwi nakamlonjela Musa, “Kung'hali igayo limwe lyondimgalila Falao na isi ya Misili. Hamba kuwalechelani muche hano. Kahi hoyowalechelani muche, yuye kowawinga muche ng'hatu hano.
EXO 11:2 Uwalonjele Waisilaeli sambi wahuliche kota chila yumwe wa hewo, mdala kwa mlume, kanguganigwa kumlanda miyage yowalingikalasa habehi, vinhu vya sendi na zahabu.”
EXO 11:3 Mkulu Nguluwi nakawadita Wamisili wanojezwe hali Waisilaeli. Kahi Musa yuye nakawa munhu mkulu ng'hatu kuli isi ya Misili na hali vitumagwa wa Falao.
EXO 11:4 Musa nakamlonjela Falao, “Mkulu Nguluwi kangulonga ahi, ‘Nechilo ng'hatu lehano, ndokolela hagati ha isi ya Misili.
EXO 11:5 Hondikola chila mlelwa mlume wa mwaluko muisi ya Misili kobagama, kwaluchila mlelwa wa mwaluko wa Falao, yawele ndo yalingikala kuli chigoda cha undewa mbaka mlelwa wa mwaluko wa mpogozi mdala wa hegwe yalingubalasa nyhule kwa iganga lya lwala. Na mbaka walelwa wa mwaluko wa migongolo jilingudimigwa najo jeng'ha jobagama.
EXO 11:6 Kowa na chililo chikulu kweng'ha muisi ya Misili, chililo chowa hachinalawila na hachilawila kahi.
EXO 11:7 Ila kowa goya na tulu ng'hatu kuli Waisilaeli na migongolo ja hewo, leka uvizele kota heni Mkulu Nguluwi ndivizela kubagula hali Waisilaeli na Wamisili.’ ”
EXO 11:8 Musa nakasinda kwa kumlonjela Falao, “Vitumagwa wa hegwe awano wombuyila na kinamizila heni, wolonga kota mbuche muisi ya Misili, heni hamwe na wanhu weng'ha walingumbinza. Logopuluta ago, ndokuka.” Hamba Musa aku yawele yazudile, nakoka kwa Falao.
EXO 11:9 Mkulu Nguluwi nakamlonjela Musa, “Falao hokuhulichiza, leka vinduzanduza vya heni vyonjezeche muisi ya Misili.”
EXO 11:10 Lelo Musa na Aluni nawadita vinduzanduza avyo vyeng'ha hali Falao. Ila Mkulu Nguluwi nakamdita Falao yawe na nhumbula igagadale, nakalema kuwakundiza Waisilaeli woche muisi ya heye.
EXO 12:1 Mkulu Nguluwi nakawalonjela Musa na Aluni, nalowali wang'hali muisi ya Misili,
EXO 12:2 “Mwezi awu wowa mwezi wa mwaluko wa mwaka kwa hemwe.
EXO 12:3 Mlonje na Waisilaeli weng'ha, mkawalonjele kota zuwa lya kumi lya mwezi awu chila munhu kohola ing'holo lyana limwe kwa chila ng'handa imwe.
EXO 12:4 Wone iwe wanhu wa ng'handa imwe wawe wachefu kwa ing'holo lyana, lelo wochitanza na walingikalasa habehi na ng'handa ya hewo, hamba wahole igongolo limwe lya kuhega kulya hewo weng'ha.
EXO 12:5 Ing'holo lyana alyo liwe lilihela nongwa, liwe ilume lya mwaka umwe. Lyoweza kuwa ing'holo lyana ama chinyehe chiwele na mwaka umwe.
EXO 12:6 Namwe moliwika igongolo alyo mbaka zuwa lya kumi na zine lya mwezi uno. Zuwa alyo Waisilaeli weng'ha wojidumula singo migongolo ajo mhela wa kuzinga kwa isanya.
EXO 12:7 Hamba wohola danda ya migongolo ajo na kuibakaliza kuli chibatilila lwizi na kuli mhajilo za kuchanya, kuli zila ng'handa zomudila migongolo ajo.
EXO 12:8 Wolya miwunde ajo nechilo yiyo loibanichigwe mchiluli, wolya hamwe na ibumunda lyohaliwichigwe usaso kahi hamwe na chiboga chiwele na usungu.
EXO 12:9 Mleche kulya ndodi ama ihemswe kwa mazi, ila isomigwe yeka mchiluli hamwe na mutwi na magulu na miwunde jake ja mgati.
EXO 12:10 Kahi mleche kuleka usanyango woneche mbaka mitondo, ila chila chisigale mbaka mitondo mochisoma kwa chiluli.
EXO 12:11 Na ahi ndo vyomuzangulya igongolo alyo. Mowa muwohigwe vyuno vya hemwe kwa misali na mvalile makwamba mmagulu na mibate ng'hweku za hemwe mmoko mwa hemwe, kiwika goya kwa kwinula majendo. Kahi molya kwa kukobanya. Na ayo ndo Pasaka ya Mkulu Nguluwi.
EXO 12:12 “Mina nechilo yiyo ndokola hagati ha isi ya Misili na kuwakopola walelwa wa mwaluko wa isi ya Misili na wanhu na migongolo. Ndojitagusa milungu jeng'ha ja Misili. Heni ndo Mkulu Nguluwi.
EXO 12:13 Na yila danda yowa ulajilo kwa hemwe kuli zila ng'handa zomuwa mgati. Nani hondikona yila danda, ndokola na igayo halifika hebu, hala hondiwa ndiitowa isi ya Misili.
EXO 12:14 Zuwa lino lyowa lya kukumbuchila kwa hemwe, moidita iwe mnvina kwa Mkulu Nguluwi kwa ivyazi lya hemwe lyeng'ha kota ilajizo lya mazuwa gose kwa hemwe.”
EXO 12:15 Mkulu Nguluwi nakalonga, “Molya mibumunda johajiwichigwe usaso kwa mhela wa mazuwa saba na zuwa lya mwaluko lya mazuwa ago saba, mokusa usaso kuli ng'handa za hemwe. Munhu yoneche yolya chinhu chiwichigwe usaso kuli mhela wa mazuwa saba, imgana kubaguligwa hali Waisilaeli.
EXO 12:16 Zuwa lya mwaluko na zuwa lya kuduma kuli mazuwa ago saba, mowa na nhing'hano yelile. Kuli mazuwa ago meli hamkundizwa kukola mijito yoneche ila ndo mijito ja kuwika goya chilyo.
EXO 12:17 Moidita mnvina ayo ya mibumunda johajiwichigwe usaso kota kukumbuchila kuli zuwa lila lyondiwalavile hemwe, vilundo vya Waisilaeli kulawa isi ya Misili. Mvina ayo yoditikwa zuwa lino na lulelo lwa hemwe lweng'ha lulinguya, kota ilajizo lya mazuwa gose.
EXO 12:18 Lelo molya mibumunda johajiwichigwe usaso kwaluchila matinazo ya zuwa lya kumi na zine lya mwezi wa mwaluko, mbaka mhela wa kuzinga kwa isanya wa zuwa lya makumi meli na imwe.
EXO 12:19 Mhela wa mazuwa saba kuleche koneka usaso mli ng'handa za hemwe. Munhu yoneche yula yawe mjenzi ama mwenyeng'haye wone yolya acho chiwichigwe usaso, munhu ayo kobaguligwa hali Waisilaeli weng'ha.
EXO 12:20 Mleche kulya chinhu choneche chiwichigwe usaso. Honeche hala homchikala, molya mibumunda johajiwichigwe usaso.”
EXO 12:21 Aho ndo Musa nakawachema wasekulu weng'ha wa Isilaeli na kuwalonjela, “Chila yumwe wa hemwe kwa winji wa ivyazi lyake, yahagule ing'holo lyana yalidumule singo kwa mbuli ya mnvina ya Pasaka.
EXO 12:22 Mohola nhagala za isopolo na kuwika mli danda mgati mwa chisaye na kubakaliza mli vibatilila lwizi za ng'handa za hemwe. Munhu yoneche yaleche kulawa kunze mwa ng'handa nechilo ayo ila mbaka mitondo.
EXO 12:23 Mina heye Mkulu Nguluwi kokola kuno yowakopola Wamisili. Ila hoyokona danda ibakalizwe mli vibatilila lwizi vya ng'handa za hemwe, kokola na homkundiza hebu yalingukopola yenjile kuli ng'handa za hemwe kuwakopola.
EXO 12:24 Namwe mowika mbuli ayi kuwa kota ilajizo kwa hemwe na kwa wana wa hemwe mazuwa gose.
EXO 12:25 Yowa ahyo homkwinjila isi ayo, Mkulu Nguluwi yowapani kota navyoyelahile, ndo modita mnvina ayi.
EXO 12:26 Hamba wana wa hemwe howowauza, ‘Mbuli ayi yangutulangusa choni?’
EXO 12:27 Hemwe mowedichila, ‘Ayi ndo nhambiko ya Pasaka kwa Mkulu Nguluwi, kwa vila nakazikola ng'handa za Waisilaeli naloyawagazile Wamisili, ila hetwe nahatugazile.’ ” Hamba, Waisilaeli nawenamiza vitwi na kumfugamila Mkulu Nguluwi.
EXO 12:28 Hamba, Waisilaeli nawaluta na kudita kota navyowalonjelwe na Musa na Aluni kwa kuwinza mzilo woyawapele Mkulu Nguluwi.
EXO 12:29 Nechilo ng'hatu, Mkulu Nguluwi nakawakopola walelwa wa mwaluko weng'ha wa Misili. Weng'ha nawabagama, kulawila mlelwa wa mwaluko wa Falao yawelengikala kuli chigoda cha undewa mbaka mlelwa wa mwaluko na wawele mchinweng'ho na walelwa wa mwaluko wa migongolo najibagama.
EXO 12:30 Lelo nechilo yila Falao na vitumagwa wa heye na wenyeng'haye wa heye nawenuka. Nakwali na chililo chikulu kweng'ha kuli isi ya Misili, mina nakwali kuduhu ng'handa ne imwe isowile munhu yabagame.
EXO 12:31 Aho Falao nakawachema Musa na Aluni nechilo yiyo, nakawalonjela, “Mwinuche! Muche hali wanhu wa heni. Mlute hemwe na awo Waisilaeli mkamfugamile Mkulu Nguluwi kota vyomlonjile.
EXO 12:32 Mhole vilundo vya ming'holo na mhene na migongolo, muche, mndandile na heni utambichizo.”
EXO 12:33 Wamisili nawawahimiliza Waisilaeli woche himahima, wolonga, “Ndakomya tobagama weng'ha!”
EXO 12:34 Wanhu nawahola utimbo wa hewo wa mibumunda jing'hali wichigwa usaso na visaye vya kufinanjila nawavijela mgati mwa nguwo za hewo na kupika mmayega.
EXO 12:35 Waisilaeli nawadita kota ula ulonzi wa Musa, nawawalanda Wamisili vinhu vya sendi na zahabu na nguwo.
EXO 12:36 Mkulu Nguluwi nakawadita Wamisili wakunde kuwapa Waisilaeli vinhu vyeng'ha navyowalandile. Ahyo ndo vyowaholile lufufu lwa Wamisili.
EXO 12:37 Waisilaeli nawoka kuli muji wa Lamesesi, nawenula majendo kwa magulu kuza Sukoti. Nawali walume wafichile lachi sita ne kuwaza wana na wadala.
EXO 12:38 Nakwali kahi na chilundo cha wanhu wanji nawehanza hamwe na kuza hamwe na ming'holo na misenga na mhene minji lukami.
EXO 12:39 Na hewo nawadita mibumunda johajiwichigwe usaso ja ula utimbo wauholile nalowalawile Misili, mina, nahauwichigwe usaso, kwa vila nawawinjigwa woche Misili, waleche kukawila, na hewo nawali wang'hali kiwichila goya chilyo cha mmajendo.
EXO 12:40 Waisilaeli nawali wekale Misili kwa miyaka miya zine na makumi gadatu.
EXO 12:41 Kuli zuwa lya kuduma lya miyaka miya zine na makumi gadatu, zuwa lilyo ndo vilundo vyeng'ha vya wanhu wa Mkulu Nguluwi navyuka muisi ya Misili.
EXO 12:42 Nechilo yiyo Mkulu Nguluwi nakawemilila leka yawose Waisilaeli muisi ya Misili. Ahyo, nechilo yila ya kuwemilila, yanguganigwa kukumbuchilwa na Waisilaeli weng'ha na lulelo lwao lweng'ha, kwa katogo ka Mkulu Nguluwi.
EXO 12:43 Mkulu Nguluwi nakawalonjela Musa na Aluni, “Aga ndo malajizo kwa mbuli ya mnvina ya Pasaka. Mjenzi yoneche yaleche kulya chilyo cha Pasaka.
EXO 12:44 Ila mpogozi yaguligwe kwa sendi, loyowa yenjile ikumbi, kokundizwa kulya.
EXO 12:45 Mjenzi yoneche yawele mmajendo ama yawelengukola mijito ya kupegwa sendi halingukundizwa kulya chilyo acho.
EXO 12:46 Ing'holo lyana lya Pasaka lyoligwa kuli ng'handa imwe. Hamlinguganigwa kulavya miwunde joneche kunze na ng'handa yoyadumuligwe singo ne kumbena chizeje cha ing'holo lyana lya Pasaka.
EXO 12:47 Waisilaeli weng'ha wadite mnvina ayo.
EXO 12:48 Mjenzi yoneche yalingikala hamwe na hemwe wone yogana kumditila Mkulu Nguluwi mnvina ya Pasaka, yomlapa tandi walume wa ng'handa ya heye wenjile ikumbi, aho kowazigwa kuwa kota mwenyeng'haye na kukundigwa kihanza. Mlume yoneche yohambe yenjile ikumbi, yaleche kulya chilyo cha mnvina ayo ya Pasaka.
EXO 12:49 Malajizo gagala gomkundiza mwenyeng'haye Muisilaeli na wajenzi walingikala hali hemwe”.
EXO 12:50 Waisilaeli weng'ha nawebatilila malajizo ago na kudita kota Mkulu Nguluwi navyoyawalajize Musa na Aluni.
EXO 12:51 Zuwa lilyo Mkulu Nguluwi nakawalavya Waisilaeli kuli isi ya Misili kwa vilundo.
EXO 13:1 Mkulu Nguluwi nakamlonjela Musa,
EXO 13:2 “Nyhagulile walelwa weng'ha wa mwaluko walume wa Waisilaeli wawe wa heni, na chila yaleleche mwaluko kwa migongolo ndo wa heni.”
EXO 13:3 Musa nakawalonjela wanhu, “Mkumbuche zuwa ali lyomlawile Misili nakomuwele wapogozi. Ali ndo zuwa Mkulu Nguluwi lyoyawalavile amo kwa moko wa heye uwele na mong'ho. Kuli zuwa ali, mleche kulya mibumunda jiwele na usaso ne hado.
EXO 13:4 Zuwa ali, mwezi wa mwaluko wa Abibu, molawa muisi ya Misili.
EXO 13:5 Na mhela Mkulu Nguluwi yowahilikani mbaka kuli isi ya Wakanaani na Wahiti na Waamoli na Wahivi na Wayebusi, isi yoyawelahile wasekulu wa hemwe kota kowapa hemwe, isi iwele na mboto, yowalapa mdite mnvina kuli zuwa ali chila mhela kuli mwezi wa mwaluko.
EXO 13:6 Kwa mhela wa mazuwa saba molya mibumunda johajiwichigwe usaso na kuli zuwa lya saba modita mnvina ya katogo kwa Mkulu Nguluwi.
EXO 13:7 Kwa mhela awo wa mazuwa saba, molya mibumunda johajiwichigwe usaso. Kuleche kuwa na mibumunda jiwichigwe usaso na usaso woneche ula hali hemwe na kuli isi ya hemwe yeng'ha.
EXO 13:8 Zuwa alyo mowalonjela wana wa hemwe kota mwangudita ahyo kwa chiwalo cha mbuli yawaditile Mkulu Nguluwi lomuchile muisi ya Misili.
EXO 13:9 Mnvina ayo yowa ya kukumbuchila kota ulajilo kuli moko ga hemwe ama kuli vihanga vya hemwe, leka iwakumbuse kulonga malajizo ga Mkulu Nguluwi. Mina, Mkulu Nguluwi kawalavya kuli isi ya Misili kwa moko uwele na mong'ho.
EXO 13:10 Ahyo mobatilila ilajizo ali kwa kudita mnvina ayi kwa mhela uwichigwe chila mhela.”
EXO 13:11 Musa nakalutilila kuwalonjela wanhu, “Yowa aho kahi hala Mkulu Nguluwi hoyowegala hemwe kuli isi ya Wakanaani, iwele kowapa kota navyoyawalahile hemwe na wasekulu wa hemwe,
EXO 13:12 ahyo komlavila Mkulu Nguluwi chila mlelwa wa mwaluko mlume. Na chila mlelwa wa mwaluko mlume wa igongolo, wowa ndo wa Mkulu Nguluwi.
EXO 13:13 Chila mlelwa wa mwaluko wa idogowi, komgombola kwa kulavya ing'holo lyana na wone ulema kumgombola komkopola kwa kumpobosola singo. Na chila mlelwa wa mwaluko wa munhu kuli wanago komgombola.
EXO 13:14 Wone hamba mwanago hoyokuuza chiwalo cha mbuli ayi, komlonjela, ‘Kwa mong'ho wa moko wa heye, Mkulu Nguluwi nakatulavya Misili, kotuwele wapogozi.
EXO 13:15 Lelo Falao navyoyawele na nhumbula igagadale nakalema kutulechela tuche, Mkulu Nguluwi nakawakopola walelwa weng'ha wa mwaluko nawawele Misili, yawele munhu ama igongolo. Kwa chiwalo acho, ndangumlavila Mkulu Nguluwi chila mlelwa wa mwaluko, wawe walume ila walelwa wa mwaluko weng'ha wawele wana wa heni, ndanguwagombola.’
EXO 13:16 Mbuli ayo yowa ndo ya kukumbuchila kota vila chinhu chiwopigwe mmoko mwako na mchihanga cha hegwe, kwa vila Mkulu Nguluwi nakatulavya Misili kwa moko wa heye uwele na mong'ho.”
EXO 13:17 Falao naloyawalechele wanhu awo walute, Nguluwi nahawalongoze kuli nzila ya isi ya Wafilisti, hanga nayali habehi. Mina Nguluwi nakalonga kota waleche kugozola aho wanhu awa lowoting'hana na ngondo na kuhiluka Misili.
EXO 13:18 Ila Nguluwi nakawazungulusa awo wanhu kwa nzila ya kuchiwala hafungofungo mwa Bahali ya Shamu. Waisilaeli nawakwina kulawila kuli isi ya Misili wawele goya kitowa ngondo.
EXO 13:19 Musa nakajihola jila mizeje ja Yusufu hamwe na heye, mina Yusufu nakawadita Waisilaeli welahe yolonga kota Nguluwi hoyokuya kuwatanza hemwe kuli isi ya Misili, namwe mohola mizeje ja heni kulawila hali hemwe.
EXO 13:20 Nawo nawenula majendo kulawila Sukoti nawawika kambi ako Etamu kuwele mbaka ya hala kuchiwala.
EXO 13:21 Mkulu Nguluwi na heye nakawalongola nemisi mgati mwa ng'hungugu iwhanile na izengo leka iwalongoze nzila, na nechilo mgati mwa chiluli chiwhanile na izengo, leka kuwalangazila, wawe wojenda nemisi na nechilo.
EXO 13:22 Lila izengo lya ng'hungugu nahalyuchile nemisi ne lila izengo lya chiluli nahalyuchile nechilo, kumwando kwa awo wanhu.
EXO 14:1 Mkulu Nguluwi nakalonga na Musa, nakamlonjela,
EXO 14:2 “Walonjela Waisilaeli, wahiluche na kuwika kambi ya hewo kumwando kwa Pi-hahiloti, hagati mwa muji wa Migidoli na bahali, mlola Baali-sefoni, mochiwika goya kumwando kwake behi na Bahali ya Shamu.
EXO 14:3 Na heye Falao kolonga mbuli ya Waisilaeli kota walemezwa kuli isi yila, na kula kuchiwala kuwalemeza waleche kulawa.
EXO 14:4 Nani ndoidita nhumbula ya Falao iwe igagadale, na heye kowawinza kumbele, nani ndobochela ukulu ng'hatu kwa kumbagamiza heye Falao na wamizi wa heye weng'ha na Wamisili wovizela kota heni ndo Mkulu Nguluwi.” Lelo nawadita ahyo.
EXO 14:5 Falao nakalonjelwa kota wala Waisilaeli mina wabilima, na nhumbula ya Falao na nhumbula za vitumagwa wa heye nazigaluswa, “Ndo choni chotuditile kwa kuwalechela wanhu awa walute na waleche kuwa wapogozi wa hetwe kahi?”
EXO 14:6 Nakawika goya mutuka ya heye ya kukwejigwa na falasi, na kawahola wanhu wa heye hamwe na heye,
EXO 14:7 kahi nakahola mituka ja heye jiwele goya miya sita na mituka jinji jeng'ha ja Wamisili na walolezi wakwine mchanya mwa mituka ajo zeng'ha.
EXO 14:8 Mkulu Nguluwi nakaidita nhumbula ya Falao iwe igagadale, na heye nakawawinza Waisilaeli, kwa vila Waisilaeli nawoka kwa nhumbula zikangale.
EXO 14:9 Wamisili nawawinza kumbele kwa hewo, falasi zeng'ha na mituka jeng'ha ja Falao na wamizi weng'ha wakwinile falasi na chilundo cha wamizi, nawo nawawafika Waisilaeli wawele wawichile kambi hala behi na bahali, behi na Pi-hahiloti, wochilola na Baali-sefoni.
EXO 14:10 Falao loyawele yowahejelela, Waisilaeli lowahinduche kumbele na kuwona Wamisili wokuya, nawadumba heko, Waisilaeli nawamlilila Mkulu Nguluwi.
EXO 14:11 Nawamlonjela Musa, “Ndaze, kwa vila nakwali kuduhu vilaga Misili ndo kutulavya ako leka tubagame aku kuchiwala? Lekachoni kutuditila aga, kwa kutulavya kuli isi ya Misili?
EXO 14:12 Ulonzi awu ndo hauwele ula wotukulonjele akula Misili, natulonga kota utuleche tuwe wapogozi wa Wamisili? Mina fola kuwa wapogozi kwa Wamisili kusinda kubagama aku kuchiwala.”
EXO 14:13 Musa nakawedichila, nakawalonjela, “Mleche kudumba! Mwime nzinzili mlole ulohozi wa Mkulu Nguluwi woyowaditila lehano, mina Wamisili awa mlinguwona lehano, hamuwona kahi mazuwa gose.
EXO 14:14 Mkulu Nguluwi kowa hamwe na hemwe na kowatowanila, hemwe mwanguganigwa kunyamalila tulu.”
EXO 14:15 Mkulu Nguluwi nakamlonjela Musa, “Lekachoni kwangundilila heni? Walonjele Waisilaeli walutilile kuza kumwando.
EXO 14:16 Nagwe winule ng'hweku ya hegwe na ugolole moko wa hegwe mchanya mwa bahali na kuigawanula, nawo Waisilaeli wokola hagati mwa bahali kuli isi isowile mazi.
EXO 14:17 Nani ulole, ndozidita nhumbula za Wamisili ziwe zigagadale, nawo wokwinjila na kuwawinza, nani ndobochela ukulu kwa kumbagamiza Falao na chilundo cheng'ha cha wamizi wa heye na wakwina falasi na wakwina mituka weng'ha.
EXO 14:18 Na wanhu wa isi ya Misili wonzela kota heni nda Mkulu Nguluwi, hondichiholela ukulu kwa Falao na mituka ja heye na wakwina falasi wa heye.”
EXO 14:19 Hamba mhilisi wa Nguluwi nayalongole kumwando kwa chilundo cha walolezi wa Isilaeli, nakoka nakaluta kumbele kwa hewo na lila izengo lya ng'hungugu nalyuka aho kumwando nalima kumbele kwa hewo,
EXO 14:20 nalima hagati mwa chilundo cha walolezi wa Misili na wamizi wa Isilaeli, na yila ng'hungugu nailavya jiza ubanzi umwe nalilavya lumuli ubanzi uyage mhela wa nechilo, Wamisili nahawahejelele ne hado nechilo yeng'ha.
EXO 14:21 Musa nakagolola moko wa heye mchanya mwa bahali, Mkulu Nguluwi nakaidita bahali ihiluche kumbele kwa mbeho ng'hulu ilingulawa kolilawilaga isanya nechilo yeng'ha, nakaidita bahali iwe isi isowile mazi, mazi nagagawanuka.
EXO 14:22 Waisilaeli nawakola hagati ha bahali hali isi isowile mazi, aku mazi gawele lukanzi kwa hewo ubanzi wa kumoso na kudilo.
EXO 14:23 Na wala Wamisili nawawawinza, nawenjila mgati kuli bahali, falasi zeng'ha za Falao na mituka ja heye na wakwina falasi wa heye.
EXO 14:24 Na vyoiwele lufuku, Mkulu Nguluwi nakawalola walolezi wa Misili kuli lila izengo lya chiluli na ya ng'hungugu na nakachidita chilundo cha walolezi wa Wamisili chiwe na lunhwinhwi lukami.
EXO 14:25 Nakagananahiza maguludumu ga mituka ja hewo mbaka jali jijenda mholemhole, Wamisili nawalonga, “Tuwabilime Waisilaeli, mina Mkulu Nguluwi kanguwatanza.”
EXO 14:26 Hamba Mkulu Nguluwi nakamlonjela Musa, “Ugolole moko wa hegwe mchanya mwa bahali, leka mazi gahiluche kahi gawagubiche Wamisili na mituka ja hewo na falasi wa hewo.”
EXO 14:27 Musa nakaugolola moko wa heye mchanya mwa bahali, nalokubwemwenzuche, bahali naihiluka kota vyoiwele hamwande, Wamisili nawajeza kugabilima mazi, ila Mkulu Nguluwi nakawadumya awo Wamisili mli bahali.
EXO 14:28 Gala mazi nagahiluka na kugubika mituka na wakwina falasi na chilundo cheng'ha cha wamizi cha Falao chinjile kuli bahali kumbele kwa hewo. Nahakuponile munhu ne yumwe.
EXO 14:29 Ila Waisilaeli nawaluta kuli isi isowile mazi hagati ha bahali na ago mazi nagali kota lukanzi ubanzi wa hewo wa kudilo na ubanzi wa kumoso.
EXO 14:30 Ndo Mkulu Nguluwi navyoyawalohole Waisilaeli zuwa lila mmoko mwa Wamisili. Waisilaeli nawawona Wamisili wabagame mfungo mwa bahali.
EXO 14:31 Waisilaeli nawalona lula ludali lukulu lwa Mkulu Nguluwi kwa Wamisili, ahyo awo wanhu nawamdumba na kumkunda Mkulu Nguluwi na Musa chitumagwa wa heye.
EXO 15:1 Hamba Musa na Waisilaeli nawamwimbila Mkulu Nguluwi lwimbo alu aku wolonga, “Ndomwimbila Mkulu Nguluwi, kwa vila nakenuligwa kwa katogo, falasi na wakwina falasi nakawatoza mbahali.
EXO 15:2 Mkulu Nguluwi ndo mong'ho na chiwalo cha lwimbo lwangu, heye ndo ulohozi wa heni. Heye ndo Nguluwi wa heni, nani ndomtogola. Ndo Nguluwi wa mhaza wa heni, nani ndomha ukulu.
EXO 15:3 Mkulu Nguluwi ka mtowa ngondo, Mkulu Nguluwi ndo itagwa lyake.
EXO 15:4 “Mituka ja Falao na wamizi wa heye nakawatoza mbahali, vilongozi wa heye wanojile kusinda weng'ha, nawazibila mli Bahali ya Shamu.
EXO 15:5 Bahali iwele na mazi nyang'ha iwagubichiza, nawazibila mbaka hasi mwa bahali kota maganga.
EXO 15:6 Mkulu Nguluwi, moko wa hegwe wa kudilo uwa na mong'ho, uwabenanga wang'honyo mvihande vidodo.
EXO 15:7 Kwa ukulu wa hegwe, kuwagwisa walingukulema, kuzudila kwa hegwe kwangupulika na kuwalakaza kota mibeleje jikalile.
EXO 15:8 Kwa muhe wa hegwe, mazi nagakwinizwa, nhigu nayima ngwalinga ifandile kota chidunda, Mazi nyang'ha nagebatana kota lukanzi hagati mwa bahali.
EXO 15:9 Mng'honyo nakalonga, ‘Ndowawinza na ndowapata, ndowagawila lufufu lwa hewo na kuhola geng'ha gondilingugana, ndohola ipanga lya heni na moko wa heni wowasumya.’
EXO 15:10 Nakuputa kwa mbeho ya hegwe, bahali naiwagubichiza. Nawazibila kota iganga mgati mwa mazi gawele na mleta.
EXO 15:11 “Gwaa Mkulu Nguluwi, yalikohi yawele kota hegwe kuli milungu? Yalikohi yawele kota hegwe yawele yelile mkulu, ulingudumbiza kwa madito makulu, ulingudita mbuli za kububuwaza?
EXO 15:12 Nakugolola moko wa hegwe wa kudilo uwele na mong'ho na isi naiwamela Wamisili weng'ha.
EXO 15:13 “Gwegwe kwa igano lya hegwe lya kwimilila, nakuwalongoza wanhu wouwagombole, kwa mong'ho wa hegwe nakuwalongoza mbaka koulingikala helile.
EXO 15:14 Wanhu wa isi zeng'ha wagahulika ago nawakakama, wenyeng'haye wa Ufilisti wenjililwa na chinhu cha kudumbiza chiwagalile usungu.
EXO 15:15 Vilongozi wa Edomu nawadumba ng'hatu, wanhu wa Moabu wangukakama, wanhu walingikala Kanaani, nawagozola.
EXO 15:16 Kudumba na kukakama kuwagwila, kwa chiwalo cha ukulu wa ludali lwako, hewo wanyamalila tulu kota iganga, mbaka howoloka wanhu wa hegwe Mkulu Nguluwi, ena, mbaka howoloka wanhu wa hegwe wouwagombole.
EXO 15:17 Nakuwegala na kuwemiza kuli chidunda cha hegwe, honhu hala nahouditile ha kikala gwegwe baho Mkulu Nguluwi, hala honhu helile uhawichile goya, Mkulu kwa moko ga hegwe.
EXO 15:18 Hegwe, gwa Mkulu Nguluwi, hegwe ndo mndewa mazuwa gose na mazuwa gose.”
EXO 15:19 Mina falasi wa Falao na mituka ja heye na wakwina falasi wa heye nawenjila mgati mwa bahali, Mkulu Nguluwi nakagahilusa mazi ga bahali gawagubiche, ila Waisilaeli nawakola kuli isi isowile mazi hagati mwa bahali.
EXO 15:20 Miliamu mdala mloli, nayawele lumbu wa Aluni nakahola kagoma kake mmoko, na wadala wanji weng'ha nawamuwinza wawele na vigoma vya hewo aku wovina.
EXO 15:21 Miliamu nakawalongoza kwa kwimba, “Mmwimbile Mkulu Nguluwi kwa vila kasumya kwa katogo, falasi na wakwina falasi kawatoza mbahali.”
EXO 15:22 Hamba, Musa nakawalongoza Waisilaeli kulawila kuli Bahali ya Shamu na kuza mbaka kuchiwala kwa Shuli. Nawenula majendo kwa mhela wa mazuwa gadatu kuchiwala ne kona mazi goneche.
EXO 15:23 Lowafichile honhu halinguchemigwa Mala, hawajezile kunwa mazi ga Mala kwa vila nagali na usungu. Kwa chiwalo acho, honhu aho nahachemigwa Mala.
EXO 15:24 Lelo wanhu weng'ha nawamng'ung'utila Musa wolonga, “Lelo tonwa choni?”
EXO 15:25 Aho Musa nakamlilila Mkulu Nguluwi, na heye nakamlajila nhagala ya igodi, na Musa nakazwika mli mazi ago na baho mazi ago nagawa ganojile. Ako Nguluwi nakawapa Waisilaeli ilajizo na mzilo, leka yawajeze hewo,
EXO 15:26 nakawalonjela, “Wone molihulichiza goya lizi lya heni Mkulu Nguluwi, Nguluwi wa hemwe, na kudita gawele goya kwa heni, na kibatilila mzilo na malajizo ga heni geng'ha, lelo heni siwagalila gala matamwa gondiwegalile Wamisili. Kwa vila, heni ndo Mkulu Nguluwi ndilinguwosela hemwe matamwa.”
EXO 15:27 Hamba Waisilaeli nawafika ako Elimu kuwele na nzasa kumi na mbili na mitende makumi saba. Nawawika kambi ako behi na mazi.
EXO 16:1 Waisilaeli weng'ha nawoka, nawafika kuchiwala nakuchemigwe Sini hagati mwa Elimu na Sinai. Ali nalyali zuwa lya kumi na kahano lya mwezi wa keli kulawila nalowochile muisi ya Misili.
EXO 16:2 Lelo Waisilaeli weng'ha nawawang'ung'utila Musa na Aluni ako kuchiwala,
EXO 16:3 Waisilaeli weng'ha nawalonga, “Fola Mkulu Nguluwi nahatukopole nalotuwele muisi ya Misili nakotikale, nakotudile miwunde na mibumunda mbaka natiguta. Ila hemwe mtugala aku kuchiwala kuikopola nhanzi ayi yeng'ha kwa nzala.”
EXO 16:4 Hamba Mkulu Nguluwi nakamlonjela Musa, “Heni ndowadulisila mibumunda kulawila kilanga. Chila zuwa wanhu wolawa na kukungajiza chilyo cha zuwa alyo hela. Kwa nzila ayi ndowajeza ndole kota wowinza malajizo ga heni ama hawowinza hebu.
EXO 16:5 Ila zuwa lya sita mhela howowika goya chilyo chowakungajize, chasi acho chowa mala keli ya chilyo cha chila zuwa.”
EXO 16:6 Lelo Musa na Aluni nawawalonjela wanhu weng'ha wa Isilaeli, “Mhela wa kuzinga kwa isanya, movizela kota Mkulu Nguluwi ndo yawalavile muisi ya Misili.
EXO 16:7 Kahi, mitondo lufuku, mowona ukulu wa Mkulu Nguluwi kwa vila kagahulika gomwali mng'ung'uta. Hetwe twa whaani mbaka mtung'ung'utile?”
EXO 16:8 Kahi Musa nakalonga, “Mhela wa kuzinga kwa isanya Mkulu Nguluwi kowegalila miwunde mulye na mitondo lufuku kowegalila mibumunda mulye migute, mina heye nakahulika vila navyomwali mumng'ung'utila. Hetwe twa whaani mbaka mtung'ung'utile? Hambe mtung'ung'utile hetwe, ila mwangumng'ung'utila Mkulu Nguluwi.”
EXO 16:9 Hamba Musa nakamlonjela Aluni, “Walonjele Waisilaeli weng'ha wekungajize hamwe kumwando kwa Mkulu Nguluwi, mina kagahulika gomwali mgang'ung'utila.”
EXO 16:10 Mhela Aluni loyali yolonga na Waisilaeli weng'ha, nawalola ako kuchiwala na baho ukulu wa Mkulu Nguluwi nawoneka kuli ng'hungugu.
EXO 16:11 Mkulu Nguluwi nakamlonjela Musa,
EXO 16:12 “Nyhulika kung'ung'uta kwa Waisilaeli. Lelo walonjela kota mhela wa kuzinga kwa isanya wolya miwunde, na mitondo wolya mibumunda. Aho ndo vyomvizela kota heni ndo Mkulu Nguluwi, Nguluwi wa hemwe.”
EXO 16:13 Lelo kuli mhela wa kuzinga kwa isanya nazuya ng'wale nyinji, nazigubika honhu howawichile kambi Waisilaeli. Mitondo lufuku nakulawila nhungwi naigubika kambi zeng'ha.
EXO 16:14 Nhungwi ayo loyuchile, vinhu vidodo vizisili navipona ako kuchiwala, vifandile kota ng'hunguyosi.
EXO 16:15 Waisilaeli lowawene chinhu acho naweuza, “Choni achi?” Nahawachizelele nachali chinhu chachi. Lelo Musa nakawalonjela, “Aji ndo mibumunda Mkulu Nguluwi yawapele mulye.
EXO 16:16 Mkulu Nguluwi nakalajiza mdite ahi, chila munhu nayakungajize chilyo cha kuhega kulya kuli ivyazi lya heye. Kolokota chasi cha lita mbili kwa chila munhu mihema lya heye.”
EXO 16:17 Lelo Waisilaeli nawadita ahyo na iwa kota wanji nawalokota kwa winji na wanji chido.
EXO 16:18 Ila weng'ha lowapimile chipimilo chowalokote kuli chijemo, nawafika kota yalokote chinji nahawele na nyonjeza na yalokote chido nahapunguchilwe. Chila yumwe nakalokota chasi choyoweza kulya.
EXO 16:19 Musa nakawalonjela wanhu, “Munhu yoneche yaleche kulya na kuwika chinji mbaka mitondo.”
EXO 16:20 Ila wanhu nahawamuhulichize Musa. Wamwe wa hewo nawasigaza chilyo mbaka mitondo. Ila mitondo chilyo acho nachiwa cholile na chilavya mhikomhiko na kunhung'ha. Musa nakazudizwa ng'hatu na wanhu.
EXO 16:21 Lelo chila mitondo nawakungajiza chila munhu cha kuhega kulya. Isanya vyoliwa ling'ang'ale, chila chilyo chinji chisigale hafungo mwa nzila nachisungulumka.
EXO 16:22 Kuli zuwa lya sita, hewo nawakungajiza chilyo acho keli, lita zine kwa chila munhu. Lelo wasekulu wa Waisilaeli weng'ha nawaluta kwa Musa, nawamlonjela mbuli azo.
EXO 16:23 Musa nakawalonjela, “Awu ndo mzilo wa Mkulu Nguluwi. Mitondo ndo zuwa lya kwesela, ndo zuwa lya kwesela lyelile lya Mkulu Nguluwi. Lelo mlute mkateleche ama kuhemsa chila chilyo chomlingugana lehano na chilyo chochisigala mchiwiche mbaka mitondo.”
EXO 16:24 Lelo nawadita ahyo na kuleka chilyo chiyage mbaka mitondo kota Musa vyoyalonjile. Mitondo nawachona kota hacholile ne kuwa na mhikomhiko na kunhung'ha.
EXO 16:25 Lelo Musa nakawalonjela, “Mulye chilyo acho chisigale kwa vila lehano ndo zuwa lya kwesela lya Mkulu Nguluwi. Lehano hamchifika chilyo ako kunze.
EXO 16:26 Kwa mazuwa sita mowa mkungajiza chilyo achi, ila zuwa lya saba liwele ndo Zuwa lya Kwesela chowa haduhu.”
EXO 16:27 Kuli zuwa lya saba wanhu wamwe nawalawa kuzapala chilyo, ila nahawachiwene.
EXO 16:28 Aho Mkulu Nguluwi nakamlonjela Musa, “Mbaka hanili mochikala ne kibatilila mzilo na malajizo ga heni?
EXO 16:29 Mvizele kota heni Mkulu Nguluwi ndiwapa Zuwa lya Kwesela, ndo mina nandiwapa chilyo cha mazuwa meli mli zuwa lya sita. Lelo mwesele chila munhu hakaye hake, munhu yoneche yaleche kulawa kuli zuwa lya saba.”
EXO 16:30 Ahyo, wanhu nawesela zuwa lya saba.
EXO 16:31 Waisilaeli nawachema chilyo acho “Mana.” Chilyo acho nachali kota nyhule za uhemba mzelu na ulyelyelye wake nawali kota ibumunda lizisili liwichigwe hanombwa.
EXO 16:32 Musa nakawalonjela, “Ali ndo ilajizo lya Mkulu Nguluwi. Mhole chasi cha lita mbili za mana na kuwika kwa chiwalo cha walelwa wa hemwe, leka wone chilyo chondiwapele kuchiwala mhela londiwalavile kuli isi ya Misili.”
EXO 16:33 Musa nakamlonjela Aluni, “Uhole chiya ujele mgati lita mbili za mana, ukawiche kumwando kwa Mkulu Nguluwi, iwe kwa chiwalo cha kukumbuchila kwa walelwa wa hemwe.”
EXO 16:34 Lelo Aluni nakawika mana kuli honhu ha kulavila nhambiko kumwando kwa vibao vya maganga ga ulolezi leka gawichigwe kota vila Mkulu Nguluwi navyoyamlajize Musa.
EXO 16:35 Waisilaeli nawalya mana kwa mhela wa miyaka makumi gane mbaka nalowafichile kuli isi iwele na wanhu, isi naiwele mli mbaka mwa Kanaani kowaditile honhu ha kikala hewo.
EXO 16:36 Chilyo cha mana chasi cha lita mbili nazali honhu ha kumi ha chipimilo cha mana nachichemigwe efa.
EXO 17:1 Kulawila kuchiwala kuwelenguchemigwa Sini, Waisilaeli weng'ha nawenula majendo kulawa honhu hamwe mbaka hayage kota navyoyalajize Mkulu Nguluwi, wanhu nawawika kambi ako Lefidimu. Ila ako nahakuwele na mazi ga kunwa.
EXO 17:2 Ahyo, wanhu nawamng'ung'utila Musa wolonga, “Utupe hetwe mazi ga kunwa.” Musa nakawauza, “Lekachoni mwangung'ung'utila heni? Lekachoni mwangumjeza Mkulu Nguluwi?”
EXO 17:3 Ila weng'ha nawali na ng'halu, nawamng'ung'utila Musa wolonga, “Lekachoni nakutulavya kula Misili utukopole kwa ng'halu hetwe weng'ha na wana wa hetwe na migongolo ja hetwe?”
EXO 17:4 Lelo Musa nakamlilila Mkulu Nguluwi yolonga, “Ndowaditila choni wanhu awa? Wahabehi kunhowa kwa maganga na kung'hopola!”
EXO 17:5 Mkulu Nguluwi nakamlonjela Musa, “Ukole kumwando kwa wanhu awa, uwahola wasekulu wa hewo wamwe, uhole kahi mmoko mwako yila ng'hweku youtowile lwanda lwa Naili, na ulute.
EXO 17:6 Ulole, heni ndokwima kumwando kwa hegwe mitalawe hala Holebu, nagwe kolitowa alyo italawe na mazi golawa leka wanhu weng'ha wanwe.” Lelo Musa nakadita ahyo hali wasekulu wa Waisilaeli.
EXO 17:7 Honhu aho Musa nakahachema Masa na Meliba kwa vila Waisilaeli nawamng'ung'utila na kumjeza Mkulu Nguluwi wolonga, “Ndaze, ndo kukomya Mkulu Nguluwi ka hali hetwe?”
EXO 17:8 Waamaleki nawoya na kitowa na Waisilaeli ako Lefidimu.
EXO 17:9 Musa nakamlonjela Yoshua, “Uhagule walume ulute kitowa na Waamaleki. Mitondo ndokwima mchanya mwa chidunda, ndichibata ng'hweku yila ya Nguluwi mmoko mwangu.”
EXO 17:10 Lelo Yoshua nakadita kota Musa navyoyamlonjele, nakaluta kitowa na Waamaleki. Musa na Aluni na Huli nawakwina kuchinhembenhembe mwa chidunda.
EXO 17:11 Naiwa mhela weng'ha Musa loyokwinula moko mchanya, Waisilaeli nawawasumya Waamaleki, naloyaduliche moko hasi, Waamaleki nawawasumya Waisilaeli.
EXO 17:12 Ila kwa mhela udo, moko ga Musa nagatoka ng'hatu. Ahyo, Aluni na Huli nawahola iganga nawaliwika behi na Musa na heye nakekalisa mchanya mwa iganga alyo. Hamba, nawajibata na kwinula moko gake, yumwe nakenula moko wa kudilo na yunji nakenula moko wa kumoso. Ahyo moko ga Musa nagapona gawele genuligwe kuchanya mbaka isanya loliswele.
EXO 17:13 Ahyo Yoshua nakawasumya Waamaleki kwa ipanga.
EXO 17:14 Hamba Mkulu Nguluwi nakamlonjela Musa, “Wandiche mbuli ayi kuli chitabu, iwe ya kukumbuchila na uhilulile kulonga mmakutu ga Yoshua kwa vila ndowosa ng'hatu Waamaleki muisi yeng'ha.”
EXO 17:15 Musa nakazenga honhu ha kulavila nhambiko na kuhachema honhu aho, “Mkulu Nguluwi kandita heni sumye,”
EXO 17:16 yolonga, “Namwinula moko kuchanya kuli chigoda cha undewa cha Mkulu Nguluwi. Kochitowa ngondo na Waamaleki mazuwa gose.”
EXO 18:1 Yesilo mtambika wa Midiani, mgosi wa Musa, nakahulika mbuli zeng'ha Mkulu Nguluwi zoyamditile Musa na Waisilaeli loyawalavile kuli isi ya Misili.
EXO 18:2 Ahyo, Yesilo nakoya kwa Musa yomigala Sipola mchewake Musa, yawele Musa nayamlechile kumbele kwa mhaza wa heye,
EXO 18:3 hamwe na wana weli walume wa Musa. Mwana wa mwaluko nakachemigwa Gelishomu. Musa nakamha itagwa ali kwa vila Musa nakalonga, “Nandali mjenzi kuli isi ya chijenzi.”
EXO 18:4 Mwana wa keli nakachemigwa Elieseli kwa vila Musa nakalonga, “Nguluwi wa mhaza wa heni ndo yanhanzile ndeche kukopoligwa na Falao.”
EXO 18:5 Yesilo mgosi wa Musa nakoya hamwe na mhinza wa heye, mina mchewake Musa hamwe na wanage, nakamfika Musa kuchiwala nakoyawichile kambi kuli chidunda cha Nguluwi.
EXO 18:6 Musa loyalonjelwe kota mgosi wa heye hamwe na mchewake na wanage weli wanguya,
EXO 18:7 lelo Musa nakalawa kuza kumbochela mgosi wa heye, nakamwinamila na kumnonela. Welamsa na kiwuza mbuli za chila yumwe, hamba nawenjila mli ihema lya Nguluwi.
EXO 18:8 Musa nakamlonjela mgosi wa heye mbuli zeng'ha Mkulu Nguluwi nazoyamditile Falao na Wamisili kwa chiwalo cha Waisilaeli. Nakamlonjela kahi mbuli za kugaya nakuwafichile mmajendo na vila Mkulu Nguluwi navyoyawalohole.
EXO 18:9 Yesilo nakasangalazwa na geng'ha goyaditile Mkulu Nguluwi kwa chiwalo cha Waisilaeli, kwa kuwalohola mmoko mwa Wamisili.
EXO 18:10 Yesilo nakalonga, “Nayatambichizwe Mkulu Nguluwi yawele yakulohole hegwe mmoko mwa Wamisili na kulawa kwa Falao, na yawalohole wanhu kulawa mmoko mwa Wamisili.
EXO 18:11 Lelo ndivizela kota Mkulu Nguluwi ndo mkulu kusinda milungu jeng'ha, kwa vila nakawalohola wanhu awa mmoko mwa Wamisili nawawele wochidaya.”
EXO 18:12 Aho Yesilo, mgosi wa Musa, nakamlavila Mkulu Nguluwi nhambiko ya kulakaza na nhambiko zinji. Na heye Aluni nakoya hamwe na wasekulu wa Isilaeli leka kulya chilyo hamwe na Yesilo, hali Nguluwi.
EXO 18:13 Hamitondo, Musa nakekala kuwatagusa Waisilaeli, nawo nawema wamzungulute, kulawila hamitondo mbaka mhela wa kuzinga kwa isanya.
EXO 18:14 Yesilo mgosi wa Musa, loyawene mbuli zeng'ha Musa nazoyawaditile Waisilaeli, nakamuuza, “Lekachoni kwanguwaditila wanhu mbuli azi? Lekachoni kwanguwa mtagusa uliyeka kuno wanhu wano wokuzunguluta kulawa mitondo mbaka mhela wa kuzinga kwa isanya?”
EXO 18:15 Musa nakamwidichila mgosi wa heye, “Kwa vila wanhu wanguya kwa heni kuuza choyogana Nguluwi.
EXO 18:16 Wone wawe na kilewa koneche kula, wanguya kwa heni, nani ndangutagusa hali hewo weli na kuwatang'ulila malajizo na mzilo wa Nguluwi.”
EXO 18:17 Lelo Yesilo nakamlonjela Musa, “Hainojile vyoulingudita.
EXO 18:18 Kochitunya gwegwe baho na awa wanhu, mina mbuli ayi inamana lukami. Huweza hebu kuidita uliyeka.
EXO 18:19 Uhulichize vyondilingukulonjela, ndangijesa ahi, na Nguluwi yawe hamwe na hegwe. Hegwe kolongasa na Nguluwi honhu ha wanhu na kochigala nongwa za hewo kwa Nguluwi.
EXO 18:20 Hihyo du, kowalangusa wanhu malajizo na mizilo ja Nguluwi, na uwalajile ndaze vyowalinguganigwa kikala na mijito yowalinguganigwa kudita.
EXO 18:21 Ila kwa chiwalo cha mbuli zinji, uhagule wanhu walume wadahile mumo mli wanhu weng'ha, wanhu walingumdumba Nguluwi na wanhu watanganiche na walinguzudila kupegwa chinhu choneche chila leka kubena malajizo. Uwape awo ulongozi, wawe wowemilila wanhu mli vilundo vya wanhu elufu imwe na vilundo vya wanhu miya imwe na vilundo vya makumi gahano na vilundo vya wanhu kumi.
EXO 18:22 Awo ndo wowa na nhing'hano chila zuwa kutagusa nongwa za wanhu. Nongwa ng'hulu wokigalila hegwe, ila zila ndodondodo wotagusa wawo. Kwa nzila ayi, koweza kuzona mbuli azi za ubewe kwa vila wochitanza na hegwe kuli mbuli azo.
EXO 18:23 Wone udite ahyo, na wone ndo vyoyalingugana Nguluwi, koweza kwimilila na wanhu awa weng'ha wohiluka kaye kwa hewo goya.”
EXO 18:24 Musa nakahulichiza ulonzi awo wa mgosi wa heye na kudita kota vyoyalonjile.
EXO 18:25 Lelo Musa nakawahagula wanhu wawele walume wawele na mong'ho hali Waisilaeli, nakawadita kuwa vilongozi wa vilundo vya wanhu elufu imwe na vilundo vya wanhu miya imwe na vilundo vya wanhu makumi gahano na vilundo vya wanhu kumi.
EXO 18:26 Na hewo wawa wowatagusa nongwa za hewo chila mhela. Nongwa ng'hulu nawamigalila Musa, ila zila ndodo nawetagusila wawo.
EXO 18:27 Loyasindile kudita ahyo, Musa na mgosi wa heye nawelaga. Heye Yesilo nakahiluka muisi ya heye.
EXO 19:1 Zuwa lya mwaluko lya mwezi wa kadatu kulawila lowalawile Misili, Waisilaeli nawafika kuchiwala ako Sinai.
EXO 19:2 Nalowochile Lefidimu na lowafichile kuchiwala ako Sinai, nawawika kambi kumwando mwa chidunda cha Sinai.
EXO 19:3 Lelo Musa nakakwina kuchanya kuchidunda kwa Nguluwi. Aho Mkulu Nguluwi nakamchema Musa kulawila ako kuchanya kuchidunda, nakamlonjela, “Ahi ndo vyouwalonjela walelwa wa Yakobo, awo Waisilaeli,
EXO 19:4 ‘Mwemwe baho mona vyondiwaditile Wamisili na vila vyondiwaholile hemwe kota ikungule lilinguhola wana wa heye kwa mbawa, ndiwegala hemwe kwa heni.
EXO 19:5 Lelo wone mhuliche lizi lyangu na kibata ilagano lya heni, mowa wanhu wa heni mhaguligwe hali isi zeng'ha, kwa vila isi zeng'ha ndo za heni.
EXO 19:6 Mowa undewa wa watambika na nhanzi yelile kwa heni.’ Awo ndo ulonzi womuwalonjela Waisilaeli.”
EXO 19:7 Lelo Musa nakahiluka, nakawakungajiza hamwe wasekulu wa Waisilaeli na kuwalonjela ulonzi awo nagowalajizwe na Mkulu Nguluwi.
EXO 19:8 Wanhu weng'ha nawedichila hamwe wolonga, “Mbuli zeng'ha nazoyalonjile Mkulu Nguluwi tozidita.” Musa nakamhilusila Mkulu Nguluwi kwidichila ako kwa wanhu.
EXO 19:9 Mkulu Nguluwi nakamlonjela Musa, “Heni ndokuyila kuli ng'hungugu itisile leka Waisilaeli wahuliche hondilonga na hegwe na wokukunda hegwe mazuwa gose.” Hamba Musa nakamlonjela Mkulu Nguluwi vila wanhu navyowalonjile.
EXO 19:10 Mkulu Nguluwi nakamlonjela Musa, “Ulute kwa wanhu ukawelize leka wawe welile lehano na mitondo. Uwalonjele wakanze nguwo za hewo.
EXO 19:11 Wekale goya kwa zuwa lya kadatu, mina zuwa alyo lya kadatu heni Mkulu Nguluwi ndodulika mchanya mwa chidunda cha Sinai hali wanhu weng'ha.
EXO 19:12 Kahi kowawichila wanhu mbaka kuzunguluta chidunda. Uwalonjele kota welolele ng'hatu waleche kukwina kuchanya mchidunda ne kuhejelela mbaka uwichigwe. Yoneche yohejelela na kudoliza chidunda kobagama.
EXO 19:13 Munhu yaleche kumdoliza munhu ayo yadolize chidunda, mina kobagama kwa kutowigwa na maganga ama msale, yawe munhu ama igongolo, hopona hebu. Mhela mhalamhanda hoipembigwa kwa kulutilila, wanhu weng'ha wokwina kuchidunda.”
EXO 19:14 Lelo Musa nakedulika mchidunda na kuwalutila wanhu, nakaweliza, na hewo nawakanza nguwo za hewo.
EXO 19:15 Hamba nakawalonjela wanhu, “Haucha muwe mwimile goya, na mlume yoneche yaleche kumhejelela mdala.”
EXO 19:16 Lelo zuwa lya kadatu mitondo, nakulawila kubuma na lumwemwesa na ng'hungugu itisile mchanya mwa chidunda. Naihulikwa lizi ng'hulu ng'hatu ya mhalamhanda naiwaditile wanhu weng'ha wakakame hala honhu nahowawichile kambi.
EXO 19:17 Hamba Musa nakawalongoza wanhu kulawa hala nahowawichila kambi, nawaluta kuting'hana na Nguluwi. Weng'ha nawaluta na kikala goya hanyiga ha chidunda.
EXO 19:18 Chidunda cha Sinai nachali chigubikwe kwa iyosi kwa vila Mkulu Nguluwi nakedulika mchanya mwake kuli chiluli. Iyosi alyo lya chiluli nalikwina kuchanya kota iyosi lya itanuli ikulu na chidunda cheng'ha chali chitigasika.
EXO 19:19 Lizi lya mhalamhanda nalilutilila konjezeka. Musa nakalonga na Nguluwi, na heye Nguluwi nakamwidichila kwa kubuma.
EXO 19:20 Mkulu Nguluwi nakedulika mchanya mwa chidunda cha Sinai, nakamchema Musa kulawila ako kuchanya, na heye Musa nakakwina kuchidunda.
EXO 19:21 Hamba Mkulu Nguluwi nakamlonjela Musa, “Widuliche hasi ukawakanye wanhu weng'ha waleche kuya kundola, mina wone wojeza kudita ahyo wenji wa hewo wobagama.
EXO 19:22 Na hewo watambika wawele wonyhejelela wanguganigwa wedite welile, wone haiwa ahyo, heni Mkulu Nguluwi ndowagaza.”
EXO 19:23 Musa nakamlonjela Mkulu Nguluwi, “Wanhu wano hawoweza kukwina kuchidunda cha Sinai kwa vila gwegwe baho nakutukanya tuwiche mbaka kuzunguluta chidunda na kuchidita chiwe chelile.”
EXO 19:24 Mkulu Nguluwi nakalonga, “Widuliche hasi hamba uhiluche na Aluni. Ila uleche kuwakundiza watambika na wanhu wanji waloche mbaka na kuya kwa heni, wone wodita ahyo ndowagaza.”
EXO 19:25 Lelo Musa nakedulika na kuwalonjela Waisilaeli mbuli zeng'ha nazoyalajizwe.
EXO 20:1 Nguluwi nakalonga ulonzi awu weng'ha, nakalonga,
EXO 20:2 “Heni ndo Mkulu Nguluwi, Nguluwi wa hegwe, ndikulavile kulawila Misili, nakouwele mpogozi.
EXO 20:3 “Uleche kuwa na milungu jiyage ila heni.
EXO 20:4 “Uleche kiditila jimalukolo ja milungu ja udesi, ama chihongoligwe chifandile na chiwele kilanga ama kuli isi ama mmazi hasi ha isi.
EXO 20:5 Uleche kujifugamila milungu ja udesi ne kujikolela mijito, kwa vila heni Mkulu Nguluwi, Nguluwi wa hegwe, nda Nguluwi yawele na fihi. Ndanguwagaza wana kwa wihe wa wahaza wa hewo, na lulelo lwa kadatu na lwa kane lwa awo walingunzudila.
EXO 20:6 Ila ndanguwalajila igano lya kwimilila maelufu ga wala wawele na igano kwa heni na kibata malajizo ga heni.
EXO 20:7 “Uleche kulichema hela itagwa lya heni Mkulu Nguluwi, Nguluwi wa hegwe. Mina heni Mkulu Nguluwi sileka kumgaza yalingulichema hela itagwa lya heni.
EXO 20:8 “Ukumbuchile Zuwa lya Kwesela na kulidita liwe lyelile, mina ndo lya chiuyeng'ha.
EXO 20:9 Mazuwa sita ukole mijito na udite mbuli za hegwe zeng'ha.
EXO 20:10 Ila zuwa lya saba ndo zuwa lya kwesela lya Mkulu Nguluwi, Nguluwi wa hegwe. Zuwa alyo uleche kukola mijito joneche, hegwe ne mwanago mlume ne mhinza wa hegwe ne wapogozi wa hegwe wadala ne chitumagwa wa hegwe mlume ne migongolo ja hegwe ja kudimigwa ne mjenzi yawele mng'handa mwa hegwe.
EXO 20:11 Mina kwa mazuwa sita heni Mkulu Nguluwi nandizilumba ulanga na isi, bahali na vyeng'ha vilimumo, hamba nanyhesela zuwa lya saba. Ahyo, heni Mkulu Nguluwi nandilitambichiza Zuwa lya Kwesela na ndilidita liwe yelile.
EXO 20:12 “Wahulichize mhaza na mayako leka wikale na ukomu wa kulutilila kuli isi yondilingukupa heni Mkulu Nguluwi na Nguluwi wa hegwe.
EXO 20:13 “Uleche kukopola.
EXO 20:14 “Uleche kuwasa na mdala ama mlume wa munhu yunji.
EXO 20:15 “Uleche kuhiza.
EXO 20:16 “Uleche kulavya ulolezi wa udesi kwa yawele habehi na hegwe.
EXO 20:17 “Uleche kuigana ng'hatu ng'handa ya muyago, ne mchewake ne mpogozi wa heye mlume ama mdala ne isenga lyake ne idogowi ne choneche chiwele cha muyago.”
EXO 20:18 Wanhu nalowahuliche kubuma kwa limlungu na kuhulika lizi ya mhalamanda na kuchanya mwa chidunda chiwele chifung'ha iyosi, weng'ha nawadumba na kukakama. Weng'ha nawema kutali,
EXO 20:19 nawamlonjela Musa, “Ulonje na hetwe gwegwe baho, natwe tokuhulichiza, ila Mkulu Nguluwi yaleche kulonga na hetwe, ama tobagama.”
EXO 20:20 Musa nakawalonjela, “Mleche kudumba, mina Nguluwi koya kuwajeza leka mumdumbe heye na mleche kudita gehile.”
EXO 20:21 Wanhu weng'ha nawema kutali mhela Musa nayahejelele ayila ng'hungugu itisile moyawele Nguluwi.
EXO 20:22 Mkulu Nguluwi nakamlonjela Musa, “Walonjele Waisilaeli, ‘Miwonela mwemwe baho kota heni nandonga na hemwe kulawila kilanga.
EXO 20:23 Mleche kiditila vinhu vya sendi viwhanile kota milungu viwe hamwe na heni na mleche kiditila mwemwe vinhu vya zahabu viwhanile kota milungu.
EXO 20:24 Hemwe monzenjela honhu ha kulavila nhambiko ha ilongo iwele mchanya mwake monhambichila migongolo ja hemwe kota nhambiko za kulakazwa na nhambiko ya kikala goya. Honhu honeche hondiwakumbusa wanhu itagwa lya heni, baho du heni baha ndokuyilani na kuwatambichiza.
EXO 20:25 Wone mwaluche kunzenjela honhu ha kulavila nhambiko ha maganga, mleche kuditila kwa maganga ga kuhongola, mina wone mditichile vinhu vya kuhongolela maganga mohadita hakokomoche.
EXO 20:26 Na mleche kudita honhu ha kulavila nhambiko hawele na honhu ha kukwinila, leka yaleche koneka umwazi wa heye yalingukwina mchanya mwake.’
EXO 21:1 “Aga ndo malajizo gouwapa Waisilaeli.
EXO 21:2 Hougula mpogozi Muebulaniya, kukukolela mijito kwa mihela sita, ila mhela wa saba kowa yelejehe na kuka, ne kulavya sendi.
EXO 21:3 Wone nakaguligwa hanahola mdala, kokuka yaliyeka. Ila wone nakoya na mchewake, kokuka na mchewake.
EXO 21:4 Wone mkulu wa heye nakamhesela mdala, nakampondela mwana mdala ama mlume, lelo ayo mdala na wanage wowa wanhu wa ayo mkulu wa heye na ayo mpogozi kokuka yaliyeka.
EXO 21:5 Ila wone mpogozi ayo wone yalonje kota kangumgana mkulu wa heye na mchewake na wana wa heye na halingugana kuka na kilejeha,
EXO 21:6 lelo, mkulu wa heye komigala hali Nguluwi. Hamba komhilika kuli lwizi ama mhajilo na kumtubula ikutu lyake kwa vibatililo. Hamba heye kowa mpogozi wa mkulu wa heye mazuwa gose.
EXO 21:7 “Munhu yomguza mhinza wa heye yawe mpogozi, ayo howa yelejehe kota wapogozi walume.
EXO 21:8 Wone mkulu wa heye nakamgula ayo mhinza yawe yumwe wa wadala wa heye, hamba wone nahanojezwe na heye na kumleka, mhaza wa heye koweza kumgombola ayo mpogozi. Ayo mkulu howeza kumguza kwa wanhu wa isi zinji, kwa vila nakabena ilagano na mdala yula.
EXO 21:9 Wone mwanage mlume yagane kumhesela ayo mpogozi, mkulu komditila mpogozi ayo kota mhinza wa heye.
EXO 21:10 Wone ayo mkulu yohesa mdala yunji, yomgana yalutilile kumwenezela mdala wa mwaluko kwa chilyo na nguwo na kuponda wana na heye.
EXO 21:11 Wone ayo mkulu kolemwela kumditila mbuli azo zidatu, lelo mdala kokuka na kowa yelejehe, ne kuganigwa kulavilwa chinhu choneche.
EXO 21:12 “Yomtowa munhu na kumkopola, imgana yakopoligwe.
EXO 21:13 Ila wone haganile kumkopola, wone Nguluwi nakakundiza mbuli ayi ilawile, lelo ayo yakopole koweza kubilimila honhu hondiwahagulilani.
EXO 21:14 Wone munhu nakagana kumkopola miyage kwa ujuvi, hanga na wone yabilimile kuli honhu ha kulavila nhambiko kwa kilohola, komlavya ako kuli honhu ha kulavila nhambiko ha heni na kumkopola.
EXO 21:15 “Yomtowa mhaza wa heye ama mayake imgana yakopoligwe.
EXO 21:16 “Yomibata munhu kwa lupichi leka yamguze ama kumdita mpogozi imgana yakopoligwe.
EXO 21:17 “Yompanjila mhaza wa heye ama mayake imgana yakopoligwe.
EXO 21:18 “Wanhu weli howochilewa, hamba yumwe yomtowa miyage iganga ama ngumi ne kumkopola, ila kamng'wanyula hela na kumdita yogule na kuwasa mchinanda,
EXO 21:19 wone ayo yatowigwe yowa goya na kujeza kujenda kwa ng'hweku, ayo yamng'wenyule kolechelwa. Ila, komha chasi kwa mhela woyajilize mchinanda na yamuguze mbaka yawe goya ng'hatu.
EXO 21:20 “Munhu yomtowa mpogozi wa heye mlume ama mdala kwa ng'obwa na kumkopola, imgana yagazigwe.
EXO 21:21 Ila mpogozi ayo wone yawe mkomu zuwa limwe ama mazuwa meli, mkulu wa heye hogazigwa hebu, kwa vila mpogozi ndo nayali wa heye.
EXO 21:22 “Walume wone wetowe na kumlumiza mdala yawele na himila, na himila ya heye haitenguche ne kulawila chinhu chinji ng'hatu, yula yamlumize koganigwa kumha chinhu choyogana mlume wa mdala ayo na kota watagusa vyowotagusa.
EXO 21:23 Ila wone kuwe na kuwifya kunji, lelo yamhilusile ukomu kwa ukomu
EXO 21:24 na iziho kwa iziho na izino kwa izino na moko kwa moko na mgulu kwa mgulu
EXO 21:25 na kusomigwa chiluli kwa kusomigwa chiluli na chilonda kwa chilonda na kutowa kwa kutowa.
EXO 21:26 “Munhu wone yamtowe mpogozi wa heye mlume ama mdala na kuwifya iziho lyake, yamlechele yalute yelejehe kwa chiwalo cha iziho lyake.
EXO 21:27 Hihyo du, wone yamtowe na kumbena izino mpogozi wa heye mlume ama mdala, yamlechele yawe yelejehe kwa chiwalo cha izino lyake.
EXO 21:28 “Wone isenga limtowe munhu kwa mbalati na kumkopola, munhu mlume ama mdala, isenga alyo lyokopoligwa kwa kutowigwa kwa maganga na miwunde jake hajiligwa hebu. Munhu nayawele na isenga alyo, howa na nongwa hebu.
EXO 21:29 Ila wone isenga alyo nalizowela kutowa wanhu kwa mbalati, na heye yawele na isenga alyo kalonjelwa na halikowele hebu, wone isenga alyo likopole munhu mlume ama mdala, litowigwe kwa maganga na heye munhu yakopoligwe.
EXO 21:30 Ila, munhu ayo wone yoganigwa kulavya chinhu kwa kilohola ukomu wa heye, yalavye chasi chichila choyolonjelwa kulavya.
EXO 21:31 Isenga wone limtowe mbalati mwana mlume ama mdala wa munhu yunji, nongwa ayi yotagusigwa kwa nzila yiyo.
EXO 21:32 Wone isenga alyo limtowe mbalati mpogozi mlume ama mdala, yawele na isenga alyo kumhilusila mkulu wa ayo mpogozi sendi zihejile kwa gilamu miya zidatu na makumi gahano ga sendi na alyo isenga likopoligwe kwa kutowigwa kwa maganga.
EXO 21:33 “Wone munhu yoleka ikulubila mwazi ama wone yobawa ikulubila hamba yaleche kuligubika, hamba isenga ama idogowi linjile amo,
EXO 21:34 ayo yawele na ikulubila alyo, yalavye sendi kwa yawele na isenga ibuguma na igongolo lifile lyowa lya heye.
EXO 21:35 “Isenga lya munhu wone lilumize isenga lya munhu yunji na kulikopola, lelo hewo woliguza alyo isenga liwele likomu na kigawila chochiguzigwa na vivila wochigawila lila isenga lifile.
EXO 21:36 Ila wone alyo isenga nalizowela kutowa wanji kwa mbalati na munhu yalifujile halikowele, yuye kohilusa isenga kwa isenga ibuguma na lila lifile lyowa lya heye.
EXO 22:1 “Wone munhu yohiza isenga ama ing'holo na kulidumula singo ama kuliguza, kolapigwa kulavya misenga jihano kwa chila isenga na ming'holo jine kwa chila ing'holo.
EXO 22:2 Wone mhizi yobatigwa yobena ng'handa mhela wa nechilo, na kutowigwa mbaka kubagama, yamkopole kowa hela nongwa ya kukopola.
EXO 22:3 Ila wone mhizi ayo yebatigwe nemisi na kukopoligwa, yamkopole kowa na nongwa. Ayo mhizi koganigwa kuhilusa chinhu. Wone yawe hela chinhu cha kulavya, lelo heye yuye koguzigwa leka kulipila uhizi wa heye.
EXO 22:4 Wone igongolo lihizigwe lyokoneka kwa yula yahizile liwele likomu, mhizi ayo kohilusa keli, liwe isenga ama idogowi ama ing'holo.
EXO 22:5 “Wone munhu yodimila migongolo ja heye kuli mgunda wa zabibu ama kulechela igongolo lyake kudima kuli mgunda wa munhu yunji, kohilusa kuwifya ako kwa chilyo chinojile cha mgunda wa heye yuye ama mgunda wa heye wa zabibu.
EXO 22:6 “Wone munhu yobwina chiluli na kusoma migodi ja miwa na kulutilila kulakaza migunila ja nyhule ama nyhule za munhu yunji zing'hali benigwa, ama mgunda weng'ha ulakale, yula yabwinile chiluli acho, yalavye chinhu kwa kuwifya ako kweng'ha.
EXO 22:7 “Wone munhu yomlechela miyage sendi ama lufufu lunji yamuwichile goya, hamba yahizilwe mng'handa mwake, mhizi yoneche wone yebatiche yahiluse keli.
EXO 22:8 Ila wone mhizi hambe yebatiche, yawele na ng'handa kohejelela hali Nguluwi leka yelahe kota haditile uhizi wa lufufu lwa miyage.
EXO 22:9 Wone howa na kitwanza kwa chiwalo cha isenga ama idogowi ama ing'holo ama cha kuvala ama chinhu choneche chajilile chiwele chila yumwe hali hewo weli yolonga cha heye, wala wanhu wogaligwa hali Nguluwi. Yula yawele Nguluwi yolonga kota kana nongwa, komhilusila miyage keli.
EXO 22:10 “Wone munhu yomlechela miyage idogowi ama isenga ama ing'holo ama igongolo linji lyoneche yamlolele goya na igongolo alyo libagame ama kulumila ama kuholigwa ne munhu yoneche kona,
EXO 22:11 chilaho hali Mkulu Nguluwi cholamula hali hewo kulajila kota ayo yalechelwe haditile uhizi wa lufufu lwa miyage. Yawele na igongolo alyo kokunda chilaho acho na ayo miyage holavya chinhu choneche chila.
EXO 22:12 Ila wone izeleche kota nalihizigwa kwa heye, yamhilusile miyage yawele na isenga ibuguma.
EXO 22:13 Wone alyo igongolo nalikopoligwa na migongolo ja kisolo, ayo munhu yawele yalechelwe yaligale igongolo alyo likopoligwe, kota ulolezi. Holavya chinhu choneche kwa chiwalo cha igongolo likopoligwe na migongolo ja kisolo.
EXO 22:14 “Wone munhu yaziche igongolo kwa miyage, hamba igongolo alyo lilumile ama kubagama, mhela yawele na igongolo nayali haduhu, yula yaziche yamhilusile miyage chenele.
EXO 22:15 Ila wone heye yawele na igongolo nayalibaho, lelo yula yaziche holavya chinhu choneche. Wone nalyali igongolo lyazichwe kwa sendi, sendi azo zohega kwa kwajilila kwa igongolo alyo.
EXO 22:16 “Wone munhu yomhada mhinza hanating'hana na mlume na hanabanichilwa na kuwasa na heye, yalavye sendi za kumhesa mhinza ayo yawe mchewake.
EXO 22:17 Mhaza wa ayo mhinza wone yolema ng'hatu mhinza wa heye kuholigwa, munhu ayo kolavya sendi zihejile kwa kumhola mhinza hanating'hana na mlume.
EXO 22:18 “Uleche kumleka mdala yawele mhawi yapone mkomu.
EXO 22:19 “Yalingudita ung'hondwa na migongolo kanguganigwa yakopoligwe.
EXO 22:20 “Yalingumlavila nhambiko mlungu yunji honhu ha Mkulu Nguluwi yaliyeka, imgana yabagamizwe ng'hatu.
EXO 22:21 “Mleche kumbada na kumgaza mjenzi, mina hemwe mwali wajenzi kuli isi ya Misili.
EXO 22:22 Mleche kumgaza mdala yafililwe na mlume wa heye ama mwana mchiwa.
EXO 22:23 Wone muwabunze awo na wone hewo wondilila, ndangukomya ndohulichiza chililo cha hewo,
EXO 22:24 na kuzudila kwa heni kokwaka. Nani ndowakopolani kwa ipanga, na wadala wa hemwe wowa walekwa na wana wa hemwe wowa wachiwa.
EXO 22:25 “Houmha sendi munhu yoneche hali wanhu wa heni wawele wazunwa, uleche kuwa kota yodayi na uleche kugana nyonjeza.
EXO 22:26 Wone kuhola igolole lya muyago na kuliwika poni, umhilusile isanya halinazinga,
EXO 22:27 kwa vila alyo ndo igolole lya heye liliyeka, ndo lyondichigubika na lilyo. Ama kwangijesa kowasila choni? Hoyondilila ndomhulichiza, mina heni ndo mbele na isungu.
EXO 22:28 “Uleche kumliga Nguluwi, ne kumpanjila mkulu wa wanhu wa hegwe.
EXO 22:29 “Uleche kukawila kundavila honhu hangu kuli winji wa chilyo cha hegwe na divai ya hegwe. Momha walelwa wa hemwe wa mwaluko walume.
EXO 22:30 Modita hihyo du kwa chiwalo cha walelwa wa mwaluko wa misenga na ming'holo ja hemwe. Momleka chila mlelwa wa mwaluko na mayake kwa mazuwa saba na zuwa lya nane mondavila.
EXO 22:31 “Hemwe mowa wanhu wa chiuyeng'ha kwa heni. Ahyo hamulya miwunde ja igongolo likopoligwe na igongolo lya kisolo. Miwunde ajo motozela mibwa.
EXO 23:1 “Uleche kulonga mbuli za udesi. Uleche kihanza na munhu yawele na wihe leka uwe mlolezi mwihe.
EXO 23:2 Uleche kuwinza chilundo cha wanhu kudita wihe, na uleche kihanza na chilundo cha wanhu kulavya ulolezi hali honhu ha kutagusila leka kuwajiliza wanhu.
EXO 23:3 Uleche kudita uganililo kuli utaguso wa wazunwa.
EXO 23:4 “Houlyona isenga ama idogowi lya mwihe wa hegwe lyajilile, komhilusila yuye.
EXO 23:5 Houlyona idogowi lya munhu yalingukuzudila ligwile na itunyo lyake, uleche kulileka na kuka, ila ulitanze kwinuka.
EXO 23:6 “Uleche kwajiliza hachi ilingumlapa mnzunwa kuli utaguso wa heye.
EXO 23:7 Wikale kutali na ulonjelezi wa udesi na uleche kuwakopola walihela nongwa na watanganiche, mina heni simlechela munhu mwihe.
EXO 23:8 Uleche kubochela chinhu chilingwambuza kubena malajizo, mina chinhu acho changuwajiliza wawele na nyhala na kwajiliza mbuli za wanhu wawele na hachi.
EXO 23:9 “Uleche kumbunza mjenzi, hemwe mvizela ndaze ujenzi vyouli, mina namwali wajenzi kuli isi ya Misili.
EXO 23:10 “Kwa mhela wa miyaka sita konyala nyhule kuli migunda ja hegwe na kubena chilyo cha heye.
EXO 23:11 Ila kuli mwaka wa saba, kojileka migunda ja hegwe ne kunyala nyhadikwa, leka wazunwa hali wanhu wa hegwe wapegwe chilyo chiponile amo na migongolo ja kisolo jilye. Kodita hihyo kuli migunda ja hegwe ja zabibu na mizeituni.
EXO 23:12 “Kwa mazuwa sita kokola mijito ja hegwe, ila zuwa lya saba kokwesela, leka ibuguma na idogowi jesele, na wana wa mpogozi wa hegwe mdala na wajenzi welejehe na kwesela.
EXO 23:13 “Wibate geng'ha gondonjile. Uleche kugachema ng'oo matagwa ga milungu jinji, ago galeche kuhulikwa kumlomo wa hegwe.
EXO 23:14 “Kadatu chila mwaka modita mnvina kwa ukulu wa heni.
EXO 23:15 Molutilila kuwa na mnvina ya mibumunda jiwele hela usaso, kota vyondiwalajize, molya mibumunda johajiwichigwe usaso kwa mazuwa saba mhela uwichigwe kuli mwezi wa Abibu, kwa vila kuli mwezi awo namlawa Misili. Munhu yoneche yaleche kuya behi na heni moko yeka.
EXO 23:16 Molutilila kuwa na mnvina ya mbena ya mwaluko ya mijito ya hemwe iwele mnyalile mli migunda ja hemwe. Molutilila kuwa na mnvina ya kukungajiza mbena kuduma kwa mhela homkungajiza chilyo cha mijito ya hemwe.
EXO 23:17 Kadatu kwa chila mhela, walume weng'ha wokuya kilajila hali Mkulu, Mkulu Nguluwi.
EXO 23:18 “Uleche kulavya danda ya nhambiko ya heni hamwe na mibumunda jiwichigwe usaso na uleche kugaleka mafuta ga igongolo lya mnvina ya heni gapone mbaka mitondo.
EXO 23:19 “Mbena ya mwaluko ya hegwe inojile kochigala kaye kwa heni Mkulu Nguluwi, Nguluwi wa hegwe. “Uleche kuhemsa mhene nyana kuli itombo lya mayake.
EXO 23:20 “Mlole, heni ndangumlajiza mhilisi yawalongole mmajendo leka yawamileni na kuwahilikani kuli isi yondiwawichileni.
EXO 23:21 Mumuhulichize na kibatilila choyolonga, na mleche kumhinduka, mina howosela gehile ga hemwe hebu kwa vila kana ludali lwa heni mgati mwake.
EXO 23:22 Ila wone momhulichiza goya na kudita geng'ha goyolonga, heni ndowa mwihe wa wehile wa hemwe na mtwanzi wa watwanzi wa hemwe.
EXO 23:23 “Mhilisi wa heni hoyowalongoza na kuwahilikani kuli isi ya Waamoli na Wahiti na Wapelisi na Wakanaani na Wahivi na Wayebusi, nani ndowabagamiza awo weng'ha,
EXO 23:24 mleche kufugamila hali milungu ja hewo na kujikolela mijito ne kujiditila chinhu ne kuwinza mbuli za hewo. Ila mowabagamiza ng'hatu na kubenanga mizengo ja milungu ja hewo.
EXO 23:25 Mofugamila heni Mkulu Nguluwi, Nguluwi wa hemwe, nani ndowatambichiza kwa chilyo na mazi na kusa matamwa hali hemwe.
EXO 23:26 Kuduhu mdala yoneche yowifya himila za hewo ne kuwa mhende kuli isi ya hemwe. Nani ndowegalila ukomu wa kulutilila.
EXO 23:27 Ndowegalila ukabuso wa heni kumwando kwa hemwe na kuwatigula wanhu weng'ha womting'hana nawo na wala wehile wa hemwe ndowadita wagaluche na kuwabilima.
EXO 23:28 Ndowegalila ukabuso wa heni kota midondola kumwando kwa hemwe jiwe jiwawinga Wahivi na Wakanaani na Wahiti.
EXO 23:29 Siwawinga wanhu kwa mhela umwe, isi ileche kupona ne chinhu na migongolo ja kisolo jonjezeche ng'hatu na kuwalumiza.
EXO 23:30 Ila ndowosa hadohado mbaka aho homkonjezeka na kuihalila isi ayo.
EXO 23:31 Mbaka ya isi ya hemwe yowa kulawila Bahali ya Shamu mbaka bahali ya Mediteleniyani na kulawila kuchiwala mbaka lwanda lwa Eyufulate, mina ndowawika wenyeng'haye wa isi ayo mmoko mwa hemwe, namwe mowawinga Wafilisti woche.
EXO 23:32 Mleche kudita ilagano lyoneche na hewo ne milungu ja hewo.
EXO 23:33 Mleche kuwakundiza wekale muisi ya hemwe, waleche kuwadita hemwe mnditile gehile, mina wone moiditila milungu ja hewo, ndangukomya ayo yowa chinhu cha kuwagwiliza.”
EXO 24:1 Mkulu Nguluwi nakamlonjela Musa, “Muye kwa heni, hegwe na Aluni na Nadabu na Abihu, hamwe na wasekulu makumi saba wa Isilaeli, mfugamile kwa kutali.
EXO 24:2 Hegwe Musa uliyeng'ha ndo kohejelela kwa heni, ila wanji waleche kuya behi na Mkulu Nguluwi, na wanhu waleche kukwina chidunda hamwe na hegwe.”
EXO 24:3 Lelo Musa nakaluta na kuwalonjela wanhu weng'ha ulonzi na malajizo geng'ha Mkulu Nguluwi goyamlonjele. Wanhu weng'ha nawedichila kwa lizi limwe, “Mbuli zeng'ha zoyalonjile Mkulu Nguluwi tozidita.”
EXO 24:4 Musa nakandika ulonzi weng'ha Mkulu Nguluwi nawoyamlonjele. Hamba nakalilimka mitondo ng'hatu, nakazenga honhu ha kulavila nhambiko hasi ha chidunda na kwimiza mizengo kumi na mili na kiwhana na nhanzi kumi na mbili za Isilaeli.
EXO 24:5 Hamba nakawalajiza wasongolo wa Waisilaeli wamlavile Mkulu Nguluwi nhambiko za kulakazwa na kumlavila nhambiko za kikala goya za milogota milume.
EXO 24:6 Musa nakadeha nusu ya danda ya migongolo ajo na kuwika kuli mikuwe, na nusu iyaje nakaboholela hala honhu ha kulavila nhambiko.
EXO 24:7 Hamba nakahola chitabu cha ilagano lya Mkulu Nguluwi, nakasoma ulonzi awo weng'ha hali wanhu, nawo nawalonga, “Ago geng'ha goyalonjile Mkulu Nguluwi togadita, natwe towa wanhu wa kuhulichiza.”
EXO 24:8 Musa nakahola ayila danda na kuwaboholela wanhu, yolonga, “Ayi ndo danda ya ilagano lya Mkulu Nguluwi yaliditile na hemwe kwa ulonzi awu weng'ha.”
EXO 24:9 Hamba, Musa na Aluni na Nadabu na Abihu na wasekulu makumi saba wa Isilaeli nawakwina kuchidunda,
EXO 24:10 nawamona Nguluwi wa Isilaeli. Hasi ha magulu ga heye kwali na honhu hasilibwe kota maganga ga yakuti ilingupulika, iwele buluu kota ulanga.
EXO 24:11 Na Nguluwi hawagazile awo vilongozi wa wanhu wa Isilaeli. Nawamona Nguluwi, walya na kunwa.
EXO 24:12 Mkulu Nguluwi nakamlonjela Musa, “Uye kwa heni kuchanya kuchidunda, umbeteze ako. Heni ndokupa vibao vya maganga viwele na malajizo na mizilo jonyandiche kwa chiwalo cha kuwalangusa Waisilaeli.”
EXO 24:13 Lelo Musa nawaluka hamwe na Yoshua chitumagwa wa heye, nakaluta kuli chidunda cha Nguluwi.
EXO 24:14 Musa nakawalonjela wala wasekulu, “Mtubeteze aha mbaka hotuwahiluchila. Aluni na Huli wa hamwe na hemwe, yoneche yawele na mbuli yawalutile awo.”
EXO 24:15 Lelo Musa nakaluta kuchidunda na ng'hungugu naigubika chidunda.
EXO 24:16 Ukulu wa Mkulu Nguluwi naudulika mchanya mchidunda cha Sinai na ng'hungugu naigubika chidunda kwa mhela wa mazuwa sita. Zuwa lya saba Nguluwi nakamchema Musa kulawila hagati ha yila ng'hungugu.
EXO 24:17 Ukulu wa Mkulu Nguluwi nawoneka hali meho ga wanhu wa Isilaeli kota chiluli chilingwaka mchanya mwa chidunda.
EXO 24:18 Musa nakenjila mgati mwa yila ng'hungugu, nakakwina kuchidunda. Nakekala ako kwa mhela wa mazuwa makumi gane, nemisi na nechilo.
EXO 25:1 Mkulu Nguluwi nakamlonjela Musa,
EXO 25:2 “Uwalonjele Waisilaeli walavye nhambiko. Kobochela kulawa kwa munhu yoneche yolavya kwa yoneche yalingugana kulavya.
EXO 25:3 Kobochela vinhu kota zahabu na sendi na shaba
EXO 25:4 na sufu ya buluu na ya zambalau na ndung'hu na kitani inojile itawigwe kwa milaika ja mhene
EXO 25:5 na migozi ja ing'holo ilume jiwichigwe lanji ndung'hu na migozi ja migongolo jinji jilingikala mbahali na mbao za msonobali
EXO 25:6 na mafuta kwa chiwalo cha chenje na ndugwa kwa chiwalo cha mafuta ga kubakala na kwa chiwalo cha ubani uwele na unhunyhililo unojile ng'hatu,
EXO 25:7 na maganga galingupulika ga salidoniki na maganga ganji galingupulika kwa chiwalo cha kunoliga, chizibao cha mmhambaga na chihako cha mmhambaga.
EXO 25:8 Wanhu wanzenjele ihema lya Nguluwi leka ndiwe ndichikala hamwe na hewo.
EXO 25:9 Mogomanjiza ihema alyo lya Nguluwi na vinhu vya mumo vyeng'ha kota vila ng'hatu vyondiwalajilani.
EXO 25:10 “Waisilaeli wagongomanjize isanduku lya mbao za msonobali na liwele na ulefu wa sentimita miya imwe na kumi na ugazi wa sentimita makumi sita na sita na fudi ya sentimita makumi sita na sita.
EXO 25:11 Kolibakaliza isanduku alyo zahabu inojile mgati na kunze na kuliditila mfungo mwake zahabu zingo zeng'ha.
EXO 25:12 Hamba koligongomanyila pete zine za zahabu na uwiche kuli chila mgulu. Hamba uwiche pete mbili kuli chila ubanzi.
EXO 25:13 Kogongomanjiza mipichilo kwa msonobali na kubakaliza zahabu.
EXO 25:14 Mipichilo ajo jokola kuli pete azo ziwele banzi mbili za alyo isanduku kwa chiwalo cha kulipika.
EXO 25:15 Mipichilo ajo ja isanduku jopona kuli pete, ileche kulavigwa mhela weng'ha ula.
EXO 25:16 Mgati mwa isanduku alyo kowika vibao vya maganga vya ulolezi.
EXO 25:17 “Hamba kogongomanya chigubiko cha uhanyisi cha zahabu inojile, ulefu yowa sentimita miya imwe na kumi na ugazi sentimita makumi sita na sita.
EXO 25:18 Kogongomanyizila kwa kuponda vilumbigwe vifandile kota wahilisi vili kwa zahabu, uviwiche mchanya, mwiso mwa nzingo mbili za acho chigubiko.
EXO 25:19 Chilumbigwe chifandile kota mhilisi chimwe chila mwiso wa chigubiko. Uviwiche vilumbigwe avyo kuli mwisho mwa chigubiko acho, ila viwe chinhu chimwe na acho chigubiko.
EXO 25:20 Chilumbigwe acho chifandile kota mhilisi chochilola chila chiyage na mbawa zawo zigoloche zigubiche chigubiko acho, kumeho kwa avyo vilumbigwe kowa kulola chigubiko acho.
EXO 25:21 Mgati mwa isanduku kowika vibao vili vya maganga na kuchiwika chigubiko acho mchanya mwake.
EXO 25:22 Ndoting'hana na hegwe ako, na kulawa mchanya mwa chigubiko acho, hagati ha vilumbigwe avyo vifandile kota wahilisi viwele mchanya mwa isanduku lya ilagano, ndolongasa na hegwe na kukugalila mizilo jeng'ha kwa chiwalo cha Waisilaeli.
EXO 25:23 “Kogongomanya chisaga cha mbao za msonobali uwele na ulefu wa sentimita makumi nane na nane, ugazi wa sentimita makumi gane na zine na fudi ya sentimita makumi sita na sita.
EXO 25:24 Chisaga acho kochibakaliza zahabu inojile na kuchizungulusila isali lya zahabu.
EXO 25:25 Hamba kochizungulusila chibao chiwele na ugazi wa sentimita nane na kuzungulusila isali lya zahabu.
EXO 25:26 Koigongomanyila pete zine za zahabu na kuziwika mli zingo za magulu gake.
EXO 25:27 Pete azo zowa behi na isali na zowa kwa chiwalo cha kubatilila mipichilo. Mipichilo ajo jowa kwa chiwalo cha kupichila acho chisaga.
EXO 25:28 Kogongomanyiza mipichilo ja msonobali na kuibakaliza zahabu, mipichilo jowa kwa chiwalo cha kupichila acho chisaga.
EXO 25:29 Kogongomanya nyhelo na vizombe vya kuwichila ubani mchisaga na kahi vibuyu na visaye vya kujidila nhambiko za kunwa. Uvidite vinhu avyo vyeng'ha kwa zahabu inojile.
EXO 25:30 Mazuwa gose kowika mibumunda jelile hali chisaga kumwando kwa heni chila mhela.
EXO 25:31 “Kogongomanya chinhu cha kuwichila chenje kwa zahabu inojile. Igongomanywe kwa kuponda, chikalilo chake na mitumba jake na vizombe vyake na uluwa wake vyowa chinhu chimwe.
EXO 25:32 Nhagala sita zolawilila kuli chinhu cha kuwichila chenje, nhagala zidatu ubanzi umwe na nhagala zidatu ubanzi uyage.
EXO 25:33 Kuli nhagala hana vizombe vidatu viwhanile na mitumba na uluwa ulinguchemigwa alimondi. Kuli nhagala ilinguya kahi hana vizombe vidatu viwhanile na mitumba na uluwa ulinguchemigwa alimondi. Nhagala zeng'ha sita ziwhana vivila kuli chinhu cha kuwichila chenje.
EXO 25:34 Na kuli ufito kowa na vizombe vine viwhanile na uluwa ulinguchemigwa alimondi hamwe na itumba lyake na uluwa wake.
EXO 25:35 Honhu halingulawilizila chila jozi ya nhagala zila sita, hasi hake kowa na itumba limwe limwe.
EXO 25:36 Mitumba ajo na nhagala zake jowa chinhu chimwe na chinhu acho cha kuwichila chenje acho, na cheng'ha chopondigwa kwa chihande chimwe cha zahabu inojile.
EXO 25:37 Kogongomanya kahi vyenje saba kwa chiwalo chinhu acho cha kuwichila chenje na kuchiwika mchanya mwake leka chiwe chimwemwesela kumwando.
EXO 25:38 Ugongomanye kahi vinhu vya kuzimila vyenje na nyhelo zake kwa zahabu inojile.
EXO 25:39 Kogongomanya chinhu acho cha kuwichila chenje na vinhu vinji viyage kwa kilogilamu makumi gadatu na zihano za zahabu inojile.
EXO 25:40 Ulole goya kota nakuvigongomanya kota vila navyoulajilwe kula kuchidunda.
EXO 26:1 “Kwa ago geng'ha, kogongomanya ihema lya Nguluwi kwa mipaziya kumi ja kitani itawigwe, na kwa sufu ya lanji ya buluu na zambalau na ndung'hu. Mipaziya ajo jeng'ha kovinoliga kwa vilumbigwe vifandile kota wahilisi, utawigwe goya.
EXO 26:2 Chila ipaziya lyowa na ulefu wa mita kumi na mbili na ugazi wa mita mbili. Mipaziya ajo jeng'ha jiwe chipimilo chimwe.
EXO 26:3 Kolumbiza mipaziya jihano liwe limwe na jihano jiyage kahi liwe ipaziya limwe.
EXO 26:4 Kohonela vibatililo vya buluu mlupembo mwa ipaziya lya mwiso lya chihande cha mwaluko, hihyo kohonela vibatililo mwiso mwa lupembo lwa kunze lya chihande chinji cha ipaziya.
EXO 26:5 Kowika vibatililo makumi gahano kuli ipaziya limwe na vibatililo vinji makumi gahano kuli ipaziya lya keli, vibatililo vyeng'ha viwe vichilola.
EXO 26:6 Hamba kogongomanya ngwamo makumi gahano za zahabu leka kulumbizila vila vihande vili vya mipaziya, ahyo ihema lya Nguluwi lyowa chinhu chimwe.
EXO 26:7 “Kahi kogongomanya chigubiko cha ihema lya Nguluwi kwa mipaziya kumi na limwe lya milaika ja mhene.
EXO 26:8 Chila ipaziya lyowa na ulefu wa mita kumi na zidatu, na ugazi wa mita mbili. Mipaziya jeng'ha ajo kumi na limwe jowa na chipimilo chichila.
EXO 26:9 Kolumbiza mipaziya jihano hamwe na mipaziya sita hamwe. Ipaziya lya sita kolibina hali ihema lya Nguluwi.
EXO 26:10 Hamba kodita vibatililo makumi gahano mlupembo lwa ipaziya lya mwiso kwa chihande cha mwaluko na vibatililo makumi gahano mlupembo lwa chihande cha keli.
EXO 26:11 Kodita ngwamo za shaba makumi gahano na kuzinjiza kuli zila ngwamo leka kulumbiza vila vihande vili vya mipaziya na ahyo kudita ipaziya limwe lya ihema.
EXO 26:12 Yila nusu ya ipaziya liponile kolibina lininile ubanzi weng'ha wa kumbele mwa ihema alyo.
EXO 26:13 Ulefu wa ipaziya iwele ya nyonjeza kolibina nusu mita kwa ubanzi umwe na nusu mita iyage ubanzi wunji, leka lininile banzi mbili za ihema kota chigubiko.
EXO 26:14 Kogongomanyiza kahi chigubiko cha ihema ligongomanyigwe kwa igozi lya ing'holo ilume liwichigwe lanji ndung'hu na chigubiko cha igozi lya igongolo linji lilingikala mbahali.
EXO 26:15 “Kogongomanya fulemu za msonobali kwa chiwalo cha kwimiza ihema lya Nguluwi.
EXO 26:16 Chila fulemu yowa na ulefu wa mita zine na ugazi wa sentimita makumi sita na sita.
EXO 26:17 Chila fulemu yowa ilumbizwe na ndimi mbili za kulumbizila. Kozidita fulemu zeng'ha ziwe zilumbigwe na ndimi mbili.
EXO 26:18 Lelo kogongomanya azo fulemu kota hino, fulemu makumi meli kwa chiwalo cha ubanzi wa kusini,
EXO 26:19 na vikalilo makumi gane ga sendi hasi mwa azo fulemu makumi meli, ndimi mbili hasi ha chila fulemu leka kibatilila zila ndimi mbili ziwe hasi ha fulemu yinji leka kibatilila vibatililo vyake vili.
EXO 26:20 Ubanzi wa kasikazini mwa ihema lya Nguluwi, kogongomanya fulemu makumi meli,
EXO 26:21 na vikalilo vyake makumi gane vya sendi, vikalilo vili hasi ya chila fulemu.
EXO 26:22 Kwa ubanzi wa kumbele, uwele kolizibilaga isanya, kogongomanya fulemu sita.
EXO 26:23 Kogongomanya kahi fulemu mbili kwa chiwalo cha nzingo za ihema ubanzi wa kumbele.
EXO 26:24 Fulemu azo za nzingo zilekane hasi ila zileche kibatanizwa kwa kuchanya hali pete ya mwaluko. Fulemu zeng'ha za nzingo ziditigwe hihyo leka zidite nzingo mbili.
EXO 26:25 Ahyo kowa na fulemu nane hamwe na vikalilo vyake kumi imwe na sita vya sendi, vikalilo vili hasi ha chila fulemu.
EXO 26:26 “Kogongomanya migamba ja msonobali, migamba jihano kwa chiwalo cha fulemu za ubanzi umwe wa ihema lya Nguluwi,
EXO 26:27 na migamba jihano kwa chiwalo cha fulemu ya ubanzi wa keli wa ihema na migamba jihano kwa chiwalo cha fulemu za ubanzi wa kumbele mwa ihema lya Nguluwi, uwele kolizinjila isanya.
EXO 26:28 Mgamba wa hagati ufichile nusu ya fulemu ya ihema wokola hagati kulawila mwiso awu mbaka mwiso uyage wa ihema.
EXO 26:29 Fulemu zeng'ha kozibakaliza zahabu na kuziditila pete za zahabu kwa kibatilila ajo migamba, nazo kahi kozibakaliza zahabu.
EXO 26:30 Ahyo kogongomanya ihema lya Nguluwi kwa kuwinza vyondikulajile kuchidunda.
EXO 26:31 “Kogongomanya ipaziya lya lanji ya buluu na zambalau na ndung'hu na kitani inojile itawigwe. Ipaziya alyo kolitawa kwa uwanzi kwa kuvinoliga kwa vilumbigwe vifandile kota wahilisi.
EXO 26:32 Kolinhinhiza ipaziya kuli mizengo jine ja msonobali zibakalizwe zahabu, ziwele ngwamo za zahabu na vikalilo vine vya sendi.
EXO 26:33 Kolinhinhiza ipaziya alyo kuli ngwamo, hamba uligale lila isanduku lya ilagano amo mgati, kumbele mwa ipaziya alyo. Ipaziya alyo lyogawaniza Honhu Helile na Honhu Helile Ng'hatu.
EXO 26:34 Mgati mwa Honhu Helile Ng'hatu kowika chigubiko cha uhanyisi mchanya mwa isanduku lya ilagano.
EXO 26:35 Achila chisaga kochiwika ubanzi wa kunze mwa ipaziya alyo, na chila chinhu cha kuwichila chenje kochiwika ubanzi wa kusini mwa ihema lya Nguluwi, lichilola na chisaga. Chisaga acho chowa ubanzi wa kasikazini.
EXO 26:36 “Kwa chiwalo cha lwizi lwa ihema kogongomanya ipaziya lya lanji ya buluu na zambalau na ndung'hu na kitani inojile itawigwe kwa uwanzi.
EXO 26:37 Kwa chiwalo cha ipaziya, kogongomanya mizengo jihano ja msonobali na kubakaliza zahabu. Mizengo ajo jowa na ngwamo za zahabu na chila limwe lyowa na chikalilo cha shaba.
EXO 27:1 “Kogongomanya honhu ha kulavila nhambiko kwa mbao za msonobali. Honhu ha kulavila nhambiko aho howa ha mlaba, ulefu mita mbili na lobo na ugazi mita mbili na lobo na fudi yowa mita imwe na lobo.
EXO 27:2 Nagwe udite mbalati imwe kuli chila nzingo, azo mbalati zowa chinhu chimwe na honhu ha kulavila nhambiko, nagwe kohagubika honhu heng'ha kwa shaba.
EXO 27:3 Kogongomanya visaye vyake vya kusila mivu na mihuka na visaye vyake na mibano jake na visaye vya kuholela makala, na vinhu vyeng'ha kovidita kwa shaba.
EXO 27:4 Hamba kogongomanya utandawala wa shaba uwele na pete zine za shaba kuli nzingo zake.
EXO 27:5 Utandawala awo kouwika hafungo halinguzunguluta honhu ha kulavila nhambiko ubanzi wa hasi leka awo utandawala ufiche hagati ha honhu ha kulavila nhambiko.
EXO 27:6 Nagwe udite mipichilo ja msonobali kwa chiwalo cha honhu ha kulavila nhambiko, najo kojibakaliza shaba.
EXO 27:7 Na mipichilo ajo jokwinjizwa mli pete chila nzingo ya honhu ha kulavila nhambiko mhela wa kupika.
EXO 27:8 Kogongomanya honhu ha kulavila nhambiko kwa mbao na hawe na lukweme mgati kota vila navyondikulajile kula kuchidunda.
EXO 27:9 “Kogongomanya lugagala lwa ihema lya Nguluwi. Kuli ubanzi wa kusini mwa lugagala kowa na ipaziya ligongomanyigwe kwa kitani inojile itawigwe uwele na ulefu wa mita makumi gane na zine kwa ubanzi umwe.
EXO 27:10 Ipaziya alyo lyobatililwa na mizengo makumi meli ga shaba jiwele na vikalilo vya shaba. Ila fito za mizengo ajo na vibatililo vyowa vya sendi.
EXO 27:11 Hihyo du ubanzi wa kasikazini, ulefu wa ipaziya wowa mita makumi gane na zine, na mizengo jake makumi meli ja shaba, ila fito za mizengo na vibatililo zake vyowa vya sendi.
EXO 27:12 Ubanzi wa kolizibilaga isanya wa lugagala kowa na ipaziya liwele na ulefu wa mita makumi meli na mbili, na mizengo jake kumi na vikalilo vyake kumi.
EXO 27:13 Ubanzi wa kolilawilaga isanya kuwele na lwizi, lugagala lowa na ugazi wa mita makumi meli na mbili.
EXO 27:14 Ipaziya lizidahe lya ubanzi umwe wa lwizi lyowa na ugazi wa mita sita na nusu, hamwe na mizengo jidatu na vikalilo vyake vidatu.
EXO 27:15 Vivila kuli ubanzi uyage wa lwizi ipaziya lyowa na mita sita na nusu, hamwe na mizengo jidatu na vikalilo vyake vidatu.
EXO 27:16 Lwizi alo lwa lugagala lowa na ipaziya liwele na ulefu wa mita tisa, ligongomanyigwe kwa sufu ya lanji ya buluu na zambalau na ndung'hu na kitani inojile itawigwe goya. Ipaziya alyo lyobatigwa na mizengo jine jiwele na vikalilo vine.
EXO 27:17 Mizengo jeng'ha kuzunguluta lugagala jolumbizwa kwa fito za sendi na ngwamo zake zowa za sendi na vikalilo vyake vyowa vya shaba.
EXO 27:18 Lugagala alo lowa na ulefu wa mita makumi gane na zine na ugazi wa mita makumi meli na mbili na fudi ya mita mbili na lobo. Ipaziya lyake lyowa lya kitani inojile na vikalilo vyake vya shaba.
EXO 27:19 Vinhu vyeng'ha vya ihema lya Nguluwi vya kuditila chila chinhu, hamwe na vigingi vyeng'ha na vila vya lugagala vyeng'ha vyowa vya shaba.
EXO 27:20 “Kowalonjela Waisilaeli wakugalile mafuta ganojile ga mzeituni gakamigwe, kwa chiwalo cha vyenje, leka kuwe na chenje chilingwaka chila mhela.
EXO 27:21 Ayo yowa mgati mwa ihema lya Nguluwi kunze mwa ipaziya alyo kumwando kwa isanduku lya ilagano, Aluni na wanage wochilolela hali heni kulawila mhela wa kuzinga kwa isanya mbaka mitondo hali Mkulu Nguluwi. Ilajizo alino lyanguganigwa liwinzwe mazuwa gose na Waisilaeli weng'ha, lulelo kwa lulelo.
EXO 28:1 “Nagwe Musa, umigale kwa heni mng'holozo Aluni, hamwe na wanage, Nadabu na Abihu na Eleasali na Itamali, kulawa kuli Waisilaeli, leka wang'holele mijito kota watambika.
EXO 28:2 Komhonela mng'holozo Aluni nguwo zelile leka yawe yokoneka yawele na ukulu na yanojile.
EXO 28:3 Walajize wawanzi weng'ha wala ndiwapele uwanzi wamhonele Aluni nguwo yelile leka yawichigwe yawe wa chiuyeng'ha kwa chiwalo cha mijito ja utambika wa heni.
EXO 28:4 Walonjele wamgongomanyile mivalo jelile ajino, chihako cha mmhambaga na chizibao na ijoho na ikanzu linoligwe na chipembelo na isali lya kuvala mchuno. Aluni mng'holozo na wanage wogavala leka wang'holele mijito kota watambika.
EXO 28:5 Awo wawanzi wobochela zahabu na nguwo ya lanji ya buluu na zambalau na ya lanji ndung'hu na nguwo ya kitani inojile.
EXO 28:6 “Wogongomanya chizibao kwa ng'weso za zahabu na sufu ya lanji ya buluu na zambalau na ndung'hu na kitani inojile, itawigwe na kunoligwa chiuwanzi.
EXO 28:7 Chowa na ng'weso mbili za kuwohela mmayega, zohonelwa hamwe mli lupembo lwake lwili.
EXO 28:8 Isali lya kibatilila loditikwa kwa vinhu vivyo, kwa ng'weso za zahabu na sufu ya buluu na zambalau na ndung'hu na kuwa chinhu chimwe na chizibao acho.
EXO 28:9 “Hamba kohola maganga galingupulika meli galinguchemigwa salidoniki goukwandichila mchanya mwake matagwa ga wana wa Isilaeli.
EXO 28:10 Matagwa sita kuli iganga limwe na matagwa gayage sita kuli iganga liyage, kwa kuwinza vyowapondigwe.
EXO 28:11 Kogandika gala matagwa ga nhanzi za Waisilaeli mchanya mwa gala maganga kota vila yalinguchola muhuli, hamba uganolige na ugenjize mli vibatililo vya zahabu.
EXO 28:12 Maganga ago meli gowichigwa mchanya mwa mayega kuli vihande vya chizibao kota vila ukumbuso wa nhanzi kumi na mbili za Isilaeli. Ahyo Aluni kovala matagwa ago mchanya mmayega ga heye hali heni Mkulu Nguluwi, gawe kota vila ukumbuso.
EXO 28:13 Kochigongomanyila vibatililo vili vya zahabu,
EXO 28:14 na mikufu mili ja zahabu inojile ya kutawigwa kota vila ng'weso. Nagwe kojilumbaniza mikufu ajo na vila vibatililo.
EXO 28:15 “Kogongomanya chihako cha mmhambaga cha utaguso, chiditikwe kwa uwanzi ng'hatu kiwhana kota vyochiditikwe chila chizibao, kwa zahabu na kwa sufu ya lanji ya buluu na ya zambalau na ndung'hu na kitani inojile itawigwe.
EXO 28:16 Chihako acho chiwele chibinigwe chowa mlaba, sentimita makumi meli na mbili.
EXO 28:17 Chonoligwa kwa misitali jine ja maganga ga sendi nyinji. Msitali wa mwaluko gowa maganga ga akiki na topazi na alimasi ndung'hu,
EXO 28:18 msitali wa keli gowa maganga ga zumalidi na yakuti ya samawati na alimasi,
EXO 28:19 msitali wa kadatu gowa maganga ga yasinto na agate na ametisto,
EXO 28:20 na msitali wa kane gowa maganga ga zabalajadi na shohamu na yasipi, geng'ha gowichigwa vibatililo vya zahabu.
EXO 28:21 Lelo kowa na maganga kumi na meli gacholigwe matagwa kumi na meli ga Waisilaeli. Chila limwe lyowa na itagwa limwe kota muhuli, kwa kulajila zila nhanzi kumi na mbili.
EXO 28:22 “Kwa chiwalo cha chila chihako cha mmhambaga, kogongomanya mikufu ja zahabu inojile itawigwe kota ng'weso.
EXO 28:23 Vivila kodita pete mbili za zahabu kwa chiwalo cha chihako cha mmhambaga na kuziwika mli nzingo mbili za chihako acho,
EXO 28:24 na mikufu mili ja zahabu ujiwohe mli pete azo za chihako acho cha mmhambaga.
EXO 28:25 Mwaluko na mwiso wa mikufu mili ja zahabu kozibatiza kuli vila vibatililo vili leka zichibate na chihande cha mmayega cha chihako ubanzi wa kumwando.
EXO 28:26 Kahi kogongomanya pete mbili za zahabu na kuziwika mli nzingo mbili za hanyi, banzi ya mgati mwa chihako cha mmhambaga behi na chizibao.
EXO 28:27 Hamba kogongomanya pete mbili zinji za zahabu na kuziwika kuli honhu heli ha hanyi, kumwando mwa vihande vya chizibao mmayega, honhu chihako cha mmhambaga hochilinguting'hana, mchanya mwa isali litawigwe kwa uwanzi ng'hatu.
EXO 28:28 Chihako cha mmhambaga chowohigwa kuli chizibao kwa kuting'haniza pete zake na chizibao kwa ng'weso ya lanji ya buluu, leka chihako acho cha mmhambaga chikale goya kuli lila isali litawigwe kwa uwanzi.
EXO 28:29 “Aluni hoyokwinjila kuli honhu helile, kovala chihako cha mmhambaga cha utaguso chicholigwe matagwa ga nhanzi za Waisilaeli, kwa mbuli ayo, heni Mkulu Nguluwi siwasemwa hewo ng'oo.
EXO 28:30 Mojela Ulimu na Sumimu kuli chila chihako cha mmhambaga cha lwamulilo, na azo zowa mchanya mwa nhumbula ya Aluni, aho hoyokwinjila mgati kumwando kwa Mkulu Nguluwi. Aluni kohola utaguso wa hewo wana wa Isilaeli mchanya mwa nhumbula ya heye, kumwando kwa Mkulu Nguluwi chila mhela.
EXO 28:31 “Kohona ijoho lya kuvalila chihako kwa sufu ya lanji ya buluu.
EXO 28:32 Lyowa na honhu ha kwinjizila mutwi hagati na honhu aho kozungulusilwa ng'weso itawigwe leka ileche kudejeka.
EXO 28:33 Kuli lupindo lwa kunyhiga kuzunguluta banzi zeng'ha, konoligwa kwa mafuza gachemigwe makomamanga ga lanji ya buluu na zambalau na ndung'hu, kowa kahi na nhogo za zahabu hagati mwa ago makomamanga,
EXO 28:34 komamanga na nhogo, komamanga na nhogo, kuzunguluta ijoho lyeng'ha.
EXO 28:35 Aluni kovala ijoho alyo kukola mijito ya heye ya utambika na lizi lya nhogo za heye lyohulikwa mhela hoyokwinjila kuli honhu helile kumwando kwa Mkulu Nguluwi na mhela hoyolawa, nhogo azo zohulikwa na heye hokopoligwa hebu.
EXO 28:36 “Hamba kodita chibati cha zahabu inojile na kwandika mchanya mwake kota munhu vyoyalingwandika muhuli, ‘Yelile kwa Mkulu Nguluwi.’
EXO 28:37 Chibati acho kochiwoha kumwando mwa chipembelo kwa ng'weso ya buluu.
EXO 28:38 Aluni kochivala chibati acho kuli chihanga cha heye, kwa acho chibati kohola nongwa ya wihe uwele hanji ukoligwe na Waisilaeli kuli kumlavila Mkulu Nguluwi nhambiko, nani ndozikunda nhambiko za hewo zelile. Kochivala acho chibati kwa chila mhela.
EXO 28:39 “Komgongomanyila Aluni ikanzu linoligwe kwa kitani inojile na kumtawila chipembelo cha kitani inojile na isali litawigwe goya.
EXO 28:40 “Kowagongomanyila wana wa Aluni mijoho na misali na kofia leka woneche wana ukulu na kunoga.
EXO 28:41 Komvaliza Aluni na wang'holoze mivalo ajo, hamba uwabakalize mafuta na kuwawika kuli mijito yelile na kuwadita wawe wa chiuyeng'ha leka wakole mijito kota watambika.
EXO 28:42 Vivila kowahonela lupati za kitani ziwagubika mchuno mbaka mmahaza, leka wagubiche umwazi wa hewo.
EXO 28:43 Aluni na wanage wovala lupati chila howokwinjila kuli ihema lya Nguluwi, ama howohejelela kuli honhu ha kulavila nhambiko, kuwatanza watambika kuli honhu ha kulavila nhambiko mgati mwa honhu helile. Kwa nzila ayo hawolajila umwazi wa hewo ne kuwa na nongwa na kukopoligwa. Alyo lyowa ilajizo lya mazuwa gose lya Aluni na walelwa wa heye.
EXO 29:1 “Azi ndo mbuli zouwaditila Aluni na wanage leka kuwawika wawe wa chiuyeng'ha wanditile kota watambika. Kohola ilogota ilume limwe na ming'holo milume mili jilihela nongwa yoneche yila,
EXO 29:2 mibumunda johajiwichigwe usaso, miandazi jilihela usaso jivujigwe kwa mafuta na mibumunda mizisili johajiwichigwe usaso, ila jibakalizigwe mafuta. Vyeng'ha avi viwe viditikwe kwa utimbo unojile wa ngano.
EXO 29:3 Hamba ujiwiche ajo mibumunda mgati mwa chidoto chimwe na kundavila mhela umwe na lila ilogota na jila ming'holo milume mili.
EXO 29:4 “Hamba uwahiliche Aluni na wanage hali lwizi lwa ihema lya Nguluwi na kuwahovuga kwa mazi.
EXO 29:5 Hamba kohola zila nguwo za chiutambika umvalize Aluni, ikanzu na ijoho na chizibao na chihako cha mmhambaga na kumuwoha lila isali litawigwe kwa uwanzi ng'hatu.
EXO 29:6 Kahi komvaliza chila chipembelo chelile kumutwi na kuwika mchanya mwa acho chipembelo chibati cha zahabu.
EXO 29:7 Lousinda kudita ago, kohola gala mafuta ga kubakala, umjidile Aluni kumutwi mwake.
EXO 29:8 “Hamba kowegala wana wa Aluni na kuwavaliza mikanzu.
EXO 29:9 Kowawoha misali mchuno mwao na kuwavaliza kofiya za hewo. Ahyo ndo vyouwadita Aluni na wanage wawe wakola mijito yelile. Awo wowa watambika mazuwa gose.
EXO 29:10 “Hamba koligala lila ilogota ilume kumwando kwa ihema lya Nguluwi. Aluni na wanage wowika moko ga hewo mchanya mwa mutwi wa alyo ilogota,
EXO 29:11 na kulidumula singo kumwando kwa Mkulu Nguluwi, hali lwizi lwa ihema lya Nguluwi.
EXO 29:12 Kohola chasi cha danda ya ilogota alyo na kubakaliza mli mbalati za honhu ha kulavila nhambiko kwa chidole cha hegwe na danda yeng'ha isigale koibohola hasi ha honhu ha kulavila nhambiko.
EXO 29:13 Hamba kohola mafuta geng'ha galingugubika mitumbu na honhu hanojile ng'hatu ha chini hamwe na figo mbili na mafuta gake, uvilakaze vyeng'ha mchanya mwa honhu ha kulavila nhambiko.
EXO 29:14 Ila miwunde ja ilogota alyo hamwe na migozi na midohe jake kovihola na kuvilakaza kwa chiluli kunze mwa kambi. Ayi yowa nhambiko ya kusa gehile.
EXO 29:15 “Hamba kolihola limwe lya jila ming'holo milume na kumlonjela Aluni na wanage wawiche moko gawo mchanya mwa mutwi wake.
EXO 29:16 Nagwe kolidumula singo na danda yake koboholela kuli honhu ha kulavila nhambiko kuli banzi zake zeng'ha.
EXO 29:17 Hamba kolidumula alyo ing'holo ilume kuli vihandevihande, kohovuga mitumbu jake na magulu gake ugawiche geng'ha hamwe na mutwi na vihande vinji.
EXO 29:18 Hamba kolilakaza ing'holo ilume lyeng'ha mchanya mwa honhu ha kulavila nhambiko, leka kundavila nhambiko ya kulakaza, kunhunyhilila kwa nhambiko yoilingulavigwa kwa chiluli yonojeza heni Mkulu Nguluwi.
EXO 29:19 “Kolihola lila ing'holo ilume linji, na heye Aluni na wanage wowika moko ga hewo mchanya mwa mutwi wake.
EXO 29:20 Nagwe kolidumula singo na kuhola chasi cha danda na kumbakaliza Aluni na wanage kuli makutu ga hewo ga kudilo na vidole vikuluwawo vya moko ga hewo ga kudilo na vidole vikuluwawo vya magulu ga hewo ga kudilo. Danda isigale koimizila kuli honhu ha kulavila nhambiko banzi zeng'ha.
EXO 29:21 Hamba kohola chasi cha danda iwele mchanya mwa honhu ha kulavila nhambiko hamwe na gala mafuta ga kubakala, ummizile Aluni na nguwo za heye, uwamizile kahi wanage na nguwo za hewo. Aluni na wanage wowa welile kwa heni hamwe na nguwo za hewo zeng'ha.
EXO 29:22 “Hamba kohola mafuta ago ga ing'holo ilume na mchila wake na mafuta galingugubika mitumbu na honhu hanojile ng'hatu ha chini na figo zake mbili na mafuta gake hamwe na chima cha kudilo. Ing'holo alyo ndo ing'holo lya kuwichigwa kwa mijito yelile.
EXO 29:23 Kulawila kuli chila chidoto cha mibumunda johajiwichigwe usaso jiwele kumwando kwa heni Mkulu Nguluwi, kohola ibumunda limwe na liandazi limwe liwichigwe mafuta na ibumunda lizisili limwe.
EXO 29:24 Vyeng'ha avi komigalila Aluni na wana wa heye kuli moko ga hewo na wovinula kuchanya kwa ulajilo wa kundavila nhambiko ya kwinula kuchanya heni Mkulu Nguluwi.
EXO 29:25 Hamba kovihola kahi kulawa mmoko mwawo na kuvilakaza mchanya mwa honhu ha kulavila nhambiko hamwe na ila nhambiko ya kulakazwa, viwe kunhunyhilila kunojile kuwele konojeza heni Mkulu Nguluwi. Ayo ndo nhambiko yoilingulavigwa kwa chiluli.
EXO 29:26 “Hamba kohola mhambaga ya alyo ing'holo lya kumuwika Aluni kuli mijito yelile, na kwinula kuchanya kwa ulajilo wa kundavila nhambiko ya kwinula kuchanya heni Mkulu Nguluwi. Ayo mhambaga yowa honhu ha hegwe.
EXO 29:27 Uwiche chiuyeng'ha vihande vya ing'holo ilume vilavigwe kwa mijito yelile ya utambika. Avi ndo mhambaga iwele ndo nhambiko ya kwinula kuchanya na chima chiwichigwe chiuyeng'ha. Mhambaga ndo kwa Aluni na chima ndo kwa wanage.
EXO 29:28 Ahyo Waisilaeli wohola vihande avyo mazuwa gose kulawa kuli nhambiko za hewo za kikala goya zowalingundavila heni Mkulu Nguluwi na kumgalila Aluni na wana wa heye. Ayo ndo nhambiko ya hewo kwa Mkulu Nguluwi.
EXO 29:29 “Aluni hoyobagama, mivalo ja heye jelile wopegwa lulelo lwa heye, na hewo wogavala zuwa lya hewo lya kubakalizwa mafuta na kuwawika kuli mijito yelile.
EXO 29:30 Mwana wa Aluni hoyowa mtambika honhu ha mhaza wa heye kojivala mivalo ajo mazuwa saba kuli ihema lya Nguluwi, leka kukolela mijito kuli honhu helile.
EXO 29:31 “Kohola iwunde lya alyo ing'holo ilume lya kuliwika kwa mijito yelile na kulihemsila kuli honhu hawichigwe chiuyeng'ha.
EXO 29:32 Hamba Aluni na wana wa heye, wolya iwunde alyo lya ing'holo ilume hali lwizi lwa ihema lya Nguluwi hamwe na jila mibumunda jisigale hamwande mli chidoto.
EXO 29:33 Wolya miwunde ajo jilavigwe kwa chiwalo cha uhanyisi na kuwawika kuli mijito yelile na kwa chiwalo cha kuwawika chiuyeng'ha, ila munhu yunji yaleche kukundigwa kulya miwunde ajo kwa vila ndo jelile.
EXO 29:34 Wone iwunde lyoneche ama mibumunda ajo vyosigala mbaka mitondo, lelo kojilakaza kwa chiluli, wanhu waleche kulya mina ndo chinhu chelile.
EXO 29:35 “Ahyo ndo vyouwaditila Aluni na wana wa heye kwa chiwalo cha vyeng'ha vila vyondikulonjele, kowawika kwa chiwalo cha mijito yelile kwa mazuwa saba,
EXO 29:36 na chila zuwa kolavya ibuguma liwe nhambiko ya gehile kwa chiwalo cha uhanyisi na kwa kudita ahyo kohadita honhu ha kulavila nhambiko hawe helile, hamba kohajidila mafuta leka kuhawika hawe honhu ha chiuyeng'ha.
EXO 29:37 Kwa mazuwa saba kohaditila uhanyisi honhu ha kulavila nhambiko na kuhawika hawe ha chiuyeng'ha. Hamba, honhu ha kulavila nhambiko howa helile ng'hatu na choneche chidoliza chowa chelile.
EXO 29:38 “Chila zuwa, mhela weng'ha woukuya, kolavila nhambiko ya ming'holo myana milume mili jiwele na mwaka umwe mchanya mwa honhu ha kulavila nhambiko.
EXO 29:39 Ing'holo lyana limwe kolilavya mitondo na liyage kolilavya mhela wa kuzinga kwa isanya.
EXO 29:40 Hamwe na ing'holo lyana lya mwaluko, kolavya utimbo unojile kilo imwe ihanzigwe na lita imwe ya mafuta ganojile na lita imwe ya divai kota nhambiko ya chakunwa.
EXO 29:41 Hihyo na lila ing'holo lyana liyage lya mhela wa kuzinga kwa isanya kolilavila nhambiko hamwe na nhambiko ya nyhule na chakunwa kota vyouditile mitondo, kunhunyhilila kwa ayo nhambiko yoilingulavigwa kwa chiluli yonojeza heni Mkulu Nguluwi.
EXO 29:42 Nhambiko ayi ya kulakazwa yolavigwa mazuwa gose, lulelo mbaka lulelo, kumwando kwa heni Mkulu Nguluwi, kumwando mwa ihema lya Nguluwi kuwele heni ndoting'hana na hemwe na kulongasa na hemwe.
EXO 29:43 Aho ndo honditing'hana na Waisilaeli na ukulu wa heni wohadita hawe helile.
EXO 29:44 Ihema lya Nguluwi na honhu ha kulavila nhambiko ndovidita viwe vya chiuyeng'ha, hihyo Aluni na wana wa heye ndowawika wawe wa chiuyeng'ha leka wang'holele mijito kota watambika.
EXO 29:45 Ndochikala hagati ha Waisilaeli, na heni ndowa Nguluwi wa hewo.
EXO 29:46 Aho ndo wovizela kota heni nda Mkulu Nguluwi, Nguluwi wa hewo, ndiwegale hewo kulawa isi ya Misili, leka ndikale hagati ha hewo. Heni ndo Mkulu Nguluwi, Nguluwi wa hewo.
EXO 30:1 “Kogongomanya honhu ha kulavila nhambiko kwa mbao za msonobali leka hawe honhu ha kufunyizila ubani.
EXO 30:2 Honhu ha kulavila nhambiko aho hawe ha mlaba, ulefu na ugazi viwe sentimita makumi gane na zihano na fudi yake iwe sentimita makumi tisa. Mbalati zake za kuchanya zolawilila zeng'ha ziwa chinhu chimwe na honhu ha kulavila nhambiko.
EXO 30:3 Heng'ha kohabakaliza zahabu inojile, ubanzi wa kuchanya na banzi zake zeng'ha za mlubavu na mbalati zake, kahi kohazungulusila msitali wa isali lya zahabu.
EXO 30:4 Kogongomanya pete mbili za zahabu na kuziwika hasi ha lusila lwake kuli banzi mbili zilingilola, azo pete zobatilila mipichilo mhela wa kupika.
EXO 30:5 Mipichilo ajo jiwe ja msonobali na jibakalizwe zahabu.
EXO 30:6 Aho honhu ha kulavila nhambiko hawichigwe kumwando mwa ipaziya lilingugubika isanduku lya ilagano, kumwando kwa chigubiko cha uhanyisi. Aho ndo honditing'hana na hegwe.
EXO 30:7 Chila zuwa Aluni hoyokwinjila kuwika goya vyenje viwele aho, kofunyiza ubani ulingunhunyhilila lukami hali honhu ha kulavila nhambiko.
EXO 30:8 Kahi kofunyiza ubani mhela wa kuzinga kwa isanya hoyobwina vyenje hali Mkulu Nguluwi. Nhambiko ayi ya ubani yolavigwa mazuwa gose ne kuleka kuli lulelo lwenu lweng'ha.
EXO 30:9 Kuli honhu aho ha kulavila nhambiko, mfunyize ubani ukundigwe hela na mleche kulavya nhambiko ya kulakazwa ne nhambiko ya nyhule ne kujida mchanya mwa honhu aho ha kulavila nhambiko ya chakunwa mchanya.
EXO 30:10 Aluni kanguganigwa kudita uhanyisi mchanya mwa mbalati za honhu ha kulavila nhambiko aho mala imwe kwa mwaka. Kokusa gehile kwa danda ya nhambiko mala imwe chila mwaka kuli lulelo lwa hemwe lweng'ha mina honhu ha kulavila nhambiko aho ndo helile ng'hatu kwa heni Mkulu Nguluwi.”
EXO 30:11 Mkulu Nguluwi nakamlonjela Musa,
EXO 30:12 “Chila houwawaza Waisilaeli, chila yumwe kolipa chasi cha sendi kwa chiwalo cha muhe wa heye hali Mkulu Nguluwi leka kuleche kuwa na matamwa gehile hali hewo mhela wa kuwazigwa.
EXO 30:13 Chila yumwe yowazigwa imgana kuhilula chasi cha sendi chilinguganigwa kwa chipimilo cha ihema lya Nguluwi. Ayi ndo nhambiko ya heye yondavila heni Mkulu Nguluwi.
EXO 30:14 Chila yumwe hoyowazigwa, kulawa miyaka makumi meli na kulutilila, kondavila nhambiko ayo ya Mkulu Nguluwi.
EXO 30:15 Yawele na lufufu yaleche kulavya ng'hatu ne mzunwa yaleche kulavya kupungula kwa nusu ya chasi chilinguganigwa, leka vyowolavya ayo nhambiko ya Mkulu Nguluwi, leka kudita uhanyisi kwa chiwalo cha ukomu wa hewo.
EXO 30:16 Hegwe kobochela sendi ayo ya kusa gehile kulawa kwa Waisilaeli, nagwe koiditila mijito ja ihema lya Nguluwi, leka iwe kukumbuchila kwa Waisilaeli hali Mkulu Nguluwi, kwa chiwalo cha kudita uhanyisi kwa ukomu wa hemwe.”
EXO 30:17 Mkulu Nguluwi nakamlonjela Musa,
EXO 30:18 “Kogongomanya likuwe lya shaba lya kuhovujila liwele na chikalilo cha shaba, uliwiche hagati mwa ihema lya Nguluwi na honhu ha kulavila nhambiko na kuwika mazi mgati mwake.
EXO 30:19 Aluni na wana wa heye wohovuga moko na magulu kwa mazi ago,
EXO 30:20 lowang'hali kwinjila mgati mwa ihema lya Nguluwi ama kuwa behi na honhu ha kulavila nhambiko leka kundavila nhambiko heni Mkulu Nguluwi, nhambiko zozilavigwa kwa chiluli. Wodita ahyo waleche kubagama.
EXO 30:21 Igana wahovuje moko na magulu ga hewo waleche kubagama. Ali lyowa ndo ilajizo kwa hewo mazuwa gose, kulawa Aluni na lulelo lwa heye na lulelo lweng'ha.”
EXO 30:22 Mkulu Nguluwi nakamlonjela Musa,
EXO 30:23 “Kohola ndugwa zinojile ng'hatu za kuhanzanya, manemane ya mazi kilo sita na mdalasini ulingunhunyhilila goya kilo zidatu na maguwa gawele na kunhunyhilila goya kilo zidatu
EXO 30:24 na mafuta ga mzeituni na mdalasini yinji kilo sita. Avyo vyeng'ha viwinze chipimilo cha ihema lya Nguluwi, uhole kahi lita zine za mafuta.
EXO 30:25 Kwa vinhu avyo, kogongomanya mafuta gelile na uhanzanye kota vyoyalingudita mgongomanyi wa mafuta galingunhunyhilila goya. Mafuta ago ga kubakala gowa gelile.
EXO 30:26 Hamba kojidila mafuta ago kuli ihema lya Nguluwi na isanduku lya ilagano
EXO 30:27 na chisaga na vinhu vyeng'ha na chinhu cha kuwichila chenje na vinhu vyeng'ha na honhu ha kulavila nhambiko ha kufunyizila ubani
EXO 30:28 na honhu ha kulavila nhambiko za kulakazwa na vinhu vyeng'ha na likuwe na chikalilo chake.
EXO 30:29 Koviwika viwe vya chiuyeng'ha leka viwe vyelile ng'hatu. Choneche chividoliza vinhu avyo, chowa chelile.
EXO 30:30 Hamba mbakalize mafuta Aluni na wana wa heye na kuwawika wawe wa chiuyeng'ha leka wang'holele mijito yelile kota watambika.
EXO 30:31 Walonjele Waisilaeli kota aga ndo gowa mafuta ga heni gelile ga kubakaliza kuli lulelo lwa hemwe lweng'ha.
EXO 30:32 Mafuta aga galeche kujidilwa munhu yoneche wa hihi hela na galeche kugongomanywa mafuta ganji kota aga, aga ndo mafuta gelile na igana mgalolele kota gelile kwa hemwe.
EXO 30:33 Yoneche yogongomanya mafuta kota aga, ama kumbakaliza munhu yohambe yaganigwe kubakalizwa mafuta aga, munhu ayo kobaguligwa kutali na wanhu wa heye.”
EXO 30:34 Mkulu Nguluwi nakamlonjela Musa, “Kohola vipimilo vyoviwhanile na ndugwa zilingunhunyhlila kota azi, unhomvu wa natafi na unhomvu wa shekeleti na unhomvu wa kelibena na ubani uli goya.
EXO 30:35 Kogongomanya ubani kwa vinhu avyo kota vyoulingugongomanyigwa na wagongomanyi wa unhunyhililo, uwichigwe mwino leka uwe unojile na welile.
EXO 30:36 Hamba koubalasa na kuwa utimbo, kouwika kumwando mwa isanduku lya ilagano mgati mwa ihema lya Nguluwi, honhu honditing'hana na hegwe. Awo wowa ubani welile ng'hatu kwa hemwe.
EXO 30:37 Mleche kudita ubani wa mhanzanyo awo kwa mijito ja hemwe kwa vila ubani awo wowa welile kwa hemwe hali heni Mkulu Nguluwi.
EXO 30:38 Yoneche yochigongomanyila ubani wa kota awo na kuudita kota unhunyhililo wa heye, kobaguligwa kutali na wanhu wa heye.”
EXO 31:1 Mkulu Nguluwi nakamlonjela Musa,
EXO 31:2 “Heni ndimhagula Besaleli, mwana wa Uli, mzukulu wa Huli, wa nhanzi ya Yuda,
EXO 31:3 na kummemeza Muhe wa heni. Ndimha udaho na kuzowela na nyhala na uwanzi na kugongomanya vinhu,
EXO 31:4 leka yavumbule mijito ja uwanzi na kukola mijito ja kuponda zahabu na sendi na shaba.
EXO 31:5 Ndimha uwanzi wa kuhongola maganga ga kunoliga na kuhongola mbao na uwanzi wa chila mbuli ya kugongomanya vinhu.
EXO 31:6 Vivila ndimhagula Oholiabu mwana wa Ahisamachi, wa nhanzi ya Dani, yakole mijito hamwe na heye. Hihyo du ndiwapa udaho ukulu wanhu wanji kwa chiwalo cha mijito jinjijinji, leka wagongomanye vinhu vyeng'ha vyondajize viditikwe.
EXO 31:7 Wagongomanye ihema lya Nguluwi na isanduku lya ilagano na chigubiko cha uhanyisi mchanya mwake, hamwe na vinhu vyake vyeng'ha,
EXO 31:8 chisaga na vinhu vyake na chinhu cha kuwichila chenje chinojile na vinhu vyake na honhu ha kulavila nhambiko ha kufunyizila ubani
EXO 31:9 na honhu ha kulavila nhambiko za kulakazwa na vinhu vyake vyeng'ha na likuwe lya mazi hamwe na chikalilo chake
EXO 31:10 na mivalo jitawigwe goya, jiwele ndo mivalo jelile ja mtambika Aluni na mivalo ja wanage wawele ndo wowa wokola mijito ja utambika,
EXO 31:11 mafuta ga kubakala na ubani uwele na unhunyhililo unojile kwa chiwalo cha honhu helile. Vinhu avyo vyeng'ha vyoditigwa kota vila vyondikulajize.”
EXO 31:12 Mkulu Nguluwi nakamlonjela Musa,
EXO 31:13 “Uwalonjele Waisilaeli ahi, ‘Ndangukomya hemwe molidita Zuwa lya Kwesela lya heni kwa vila awo ndo ulajilo hali heni na hemwe kwa lulelo lweng'ha kota heni, Mkulu Nguluwi, ndo ndilinguwadita hemwe muwe wa chiuyeng'ha na mwelile.
EXO 31:14 Molidita Zuwa lya Kwesela, nalyo lyowa lyelile kwa hemwe. Yoneche yoleka kuwinza ilajizo lya zuwa alyo, yomgana yakopoligwe. Na munhu yokola mijito yoneche zuwa alyo kowinjigwa kutali na wanhu wa heye.
EXO 31:15 Mokola mijito ja hemwe kwa mhela wa mazuwa sita, ila zuwa lya saba ndo zuwa lya kwesela ng'hatu, ndo zuwa lya chiuyeng'ha lya heni Mkulu Nguluwi. Munhu yoneche yokola mijito zuwa alyo imgana yabagame.
EXO 31:16 Ahyo Waisilaeli wolyamila Zuwa lya Kwesela na wolidita kuli lulelo lwao lweng'ha kota ilagano lya mazuwa gose.
EXO 31:17 Mbuli ayi yowa ulajilo wa kulutilila hali Waisilaeli na heni mazuwa gose, mina heni Mkulu Nguluwi nandita ulanga na isi kwa mhela wa mazuwa sita, ila zuwa lya saba nandeka kukola mijito, nanyhesela.’ ”
EXO 31:18 Mkulu Nguluwi loyasindile kulonga na Musa kuchidunda cha Sinai, nakamha Musa vila vibao vili vya maganga ga ulolezi, viwele heye Nguluwi nakavyandika jila mizilo kwa chidole cha heye yuye.
EXO 32:1 Wanhu lowawene Musa nakakawila kuhiluka kulawila kuchidunda, nawekungajiza hali Aluni na kumlonjela, “Lole, utugongomanyile jimalukolo ja milungu jojitulongoza. Mina hatuvizelele gamfichile ayo Musa yatulavile kuli isi ya Misili.”
EXO 32:2 Aluni nakawedichila, “Mhole vipuli vya zahabu mmakutu ga wadala wa hemwe na wana wa hemwe, mndigalile.”
EXO 32:3 Lelo wanhu weng'ha nawalavya vipuli vyeng'ha vya zahabu mmakutu mwa hewo, nawamigalila Aluni.
EXO 32:4 Na heye nakavihola kavihemsa mbaka visungumluka, nakadita limalukolo lya ilogota ilume lya kuponda. Wanhu nawalonga, “Gwaa Isilaeli, ayu ndo mlungu wa hetwe yatulavile kuli isi ya Misili.”
EXO 32:5 Aluni naloyawene ahyo, nakalizenjela limalukolo alyo ilogota ilume honhu ha kulavila nhambiko, kahi nakadamla, “Mitondo kowa na mnvina kwa chiwalo cha Mkulu Nguluwi.”
EXO 32:6 Mitondo wanhu nawalilimka lufuku nawalavya nhambiko za kulakazwa na nhambiko ya kikala goya. Wanhu nawekala hasi kulya na kunwa, hamba nawema na kuvina.
EXO 32:7 Mkulu Nguluwi nakamlonjela Musa, “Uduliche hanyi mina wanhu wa hegwe uwegalile kulawila isi ya Misili wekovulila wawo,
EXO 32:8 waileka yila nzila yondiwalajize, weditila ilogota ilume lya kuponda, na hewo walifugamila na kulilavila nhambiko wolonga, ‘Gwaa Isilaeli, ayu ndo mlungu wa hetwe yatulavile isi ya Misili!’ ”
EXO 32:9 Mkulu Nguluwi nakamlonjela Musa, “Ndiwazela wanhu awa, hewo wana nhumbula zigagadale.
EXO 32:10 Sambi, uleche kujeza kundemeza. Undeche ndiwadumye kwa kuzudila ng'hatu, leka kulawila kwa hegwe ndodita nhanzi ng'hulu.”
EXO 32:11 Ila Musa nakamdedeza Mkulu Nguluwi, Nguluwi wa heye, nakalonga, “Gwaa Mkulu Nguluwi, lekachoni kuzudila kwa hegwe kwangwaka lukami kwa wanhu wa hegwe, uwalavile kuli isi ya Misili kwa ludali lukulu na moko uwele na mong'ho?
EXO 32:12 Houdita ahyo, ndangukomya Wamisili wolonga, ‘Nakawalavya Misili kwa kugana kwihile leka yawakopolele kuchidunda na kuwabagamiza ng'hatu muisi.’ Gwaa Mkulu Nguluwi, usindamale na kuleka mbuli ayo yihile youlingugana kudita kwa wanhu wa hegwe.
EXO 32:13 Uwakumbuche vitumagwa wa hegwe, Abulahamu na Isaka na Isilaeli wawele uwalahile gwegwe baho, ulonga, ‘Ndowonjezela walelwa wa hemwe kota nhondwe za kilanga na isi ayi yondilagane na hewo kota ndowapa lulelo lwenu waihalile mazuwa gose.’ ”
EXO 32:14 Lelo Mkulu Nguluwi nakaleka kuwaditila wanhu wa heye mbuli yihile nayawele yalonjile.
EXO 32:15 Hamba Musa nakedulika kulawila kuchidunda yawele na vibao vili vya ulolezi mmoko mwa heye, vyandichigwe mizilo ja Nguluwi banzi zeng'ha.
EXO 32:16 Vibao avyo navyali mijito ya Nguluwi na gandichigwe ago nakandika Nguluwi yuye.
EXO 32:17 Yoshua loyahuliche iyowe lya wanhu, nakamlonjela Musa, “Kuna iyowe lya ngondo kuli kambi.”
EXO 32:18 Ila Musa nakamwidichila, “Haliwele iyowe lya kusumya ama kulemwela, ila iyowe lyoulinguhulika ndo iyowe lya wanhu walingwimba.”
EXO 32:19 Baho du loyahejelele kambi nalowaliwene lila ilogota ilume na wanhu wovina, baho du Musa nakazudila ng'hatu, nakavitaga hasi vila vibao vya ulolezi kulawila kuli moko ga heye na kuvibena hala hasi ha chidunda.
EXO 32:20 Lelo nakalihola lila ilogota ilume, nakalisoma kwa chiluli, nakalihondanga mbaka liwa mivu, nakatijiliza mivu jila kuli mazi na kuwakola lupichi Waisilaeli wanwe.
EXO 32:21 Musa nakamuuza Aluni, “Nawakudita choni wanhu awa mbaka uwalongoze kuli mbuli yihile ng'hulu kota ayo?”
EXO 32:22 Aluni nakamwidichila, “Ndangukulanda hegwe mkulu wa heni, uleche kuzudila. Kuwazela wanhu awa vyowemile goya kuli kudita wihe.
EXO 32:23 Nawoya nakundonjela, ‘Tuditile milungu jojitulongoza kwa vila hatuvizelele gamfichile ayo Musa yatulavile muisi ya Misili.’
EXO 32:24 Nani ndiwalonjela chila yumwe yawele na vipuli vya zahabu nayegale. Lelo wengalila, nani ndivisungulumla mchiluli na ali ilogota ilume nalilawila.”
EXO 32:25 Lelo Musa loyawene kota wanhu nawabelenhuka na kudita vyowaganile kwa vila Aluni nakawakundiza kudita vyowaganile na kigalila soni hali wang'honyo wa hewo.
EXO 32:26 Musa nakema hali lwizi lwa kambi na kuuza, “Yalihi yawele ubanzi wa Mkulu Nguluwi? Yeze kwa heni.” Wana weng'ha wa Lawi nawekungajiza hamwe hali heye.
EXO 32:27 Nakawalonjela, “Mkulu Nguluwi, Nguluwi wa Isilaeli, kangulonga ahi, ‘Chila munhu yekowele ipanga lya heye mchuno, yazungulute chila honhu hali kambi, kulawila lwizi lumwe kuza luyage hali kambi na chila yumwe yamkopole mng'holoze na yowalingigana na yowalingikalasa habehi.’ ”
EXO 32:28 Wana wa Lawi nawadita kota Musa navyoyawalajize. Zuwa alyo nawakopoligwa wanhu wafichile elufu zidatu.
EXO 32:29 Musa nakalonga, “Lehano, mwemwe baho miwika kwa mijito yelile kumkolela mijito Mkulu Nguluwi, kwa vila hamlechile kitwanza na wana wa hemwe ama wang'holozenu. Nguluwi kanguwatambichiza hemwe lehano.”
EXO 32:30 Mitondo iyaje Musa nakawalonjela wanhu, “Mdita gehile vikulu ng'hatu! Lelo ndomlutila Mkulu Nguluwi kuchanya kuchidunda, hanji ndoweza kuwaditila hemwe uhanyisi.”
EXO 32:31 Ahyo Musa nakahiluka kwa Mkulu Nguluwi, nakamlonjela, “Ndangisinza! Wanhu awa wadita gehile vikulu ng'hatu, weditila wawo mlungu wa zahabu.
EXO 32:32 Ila lelo, ndangukulanda uwosele gehile ga hewo. Wone huwosele, ndangukudedeza umbuse heni mli chitabu cha hegwe nachowandiche matagwa ga wanhu wa hegwe.”
EXO 32:33 Ila Mkulu Nguluwi nakamlonjela Musa, “Ndomusa mli chitabu cha heni munhu yoneche yaditile gehile.
EXO 32:34 Ila sambi ulute ukawalongoze wanhu mbaka honhu hondikulonjele. Ulole, mhilisi wa heni kokulongola. Ila, zuwa hondikuya kwa hewo, ndowagaza kwa chiwalo cha gehile ga hewo.”
EXO 32:35 Mkulu Nguluwi nakawahilichila wanhu utamwa wihile, kwa vila nawamlanda Aluni yawaditile lila ilogota ilume lya zahabu.
EXO 33:1 Mkulu Nguluwi nakamlonjela Musa, “Waluche majendo wuche aha, hegwe na wanhu awo uwalavile kuli isi ya Misili, mlute kuli isi yondimlahile Abulahamu na Isaka na Yakobo, ndilonga, ‘Ndowapa walelwa wa hemwe isi ayi.’
EXO 33:2 Ndomlajiza mhilisi yawalongoze, ndowawinga Wakanaani na Waamoli na Wahiti na Wapelisi na Wahivi na Wayebusi.
EXO 33:3 Mlute kuli ayo isi iwele na mboto. Ila kwa vila hemwe ndo muwele na nhumbula zigagadale, siluta hamwe na hemwe, leka ndeche kuwabagamiza mnzila.”
EXO 33:4 Wanhu nawalila lowahuliche mbuli ayo yihile, kuduhu ne yumwe yavalile vinoligo vya heye.
EXO 33:5 Nawadita ahyo kwa vila Mkulu Nguluwi nakamlonjela Musa, “Uwalonjele Waisilaeli, ‘Hemwe mwa wanhu wawele na nhumbula zigagadale, wone ndute hamwe na hemwe kwa mhela udo hela, ndowabagamiza. Ahyo, mvule vinoligo vya hemwe leka ndivizele mbuli ya kuwaditila.’ ”
EXO 33:6 Lelo Waisilaeli nawavula vinoligo vya hewo hala kuchidunda cha Holebu.
EXO 33:7 Musa nayali na chihendo cha kulihola ihema linji na kulimiza hanze, kutali chidodo na kambi. Ihema alyo nakalipa itagwa, ihema lya nhing'hano. Munhu yoneche yaganile kumlanda Mkulu Nguluwi, nakaluta hala kuli ihema alyo hanze ha kambi.
EXO 33:8 Chila mhela Musa loyalawile kuluta kuli ihema alyo, chila munhu nakema hali lwizi lwa ihema lya heye na kumlola Musa mbaka hoyokwinjila mgati mwa alyo ihema.
EXO 33:9 Mhela Musa loyenjile mgati mwa alyo ihema, izengo lya ng'hungugu naligwa kuli lwizi lwa ihema, na Mkulu Nguluwi nakalongasa na heye.
EXO 33:10 Wanhu weng'ha lowaliwene izengo lya ng'hungugu liwele hala, chila yumwe wa hewo nakafugama hali lwizi lwa ihema lya heye.
EXO 33:11 Ahyo ndo Mkulu Nguluwi navyoyali yolongasa na Musa hazelu, kota munhu yalingulonga na miyage yeganile na heye. Hamba Musa nakahiluka kahi kuli kambi. Na heye msongolo, Yoshua, na mwana wa Nuni, yawele chitumagwa wa heye nahochile hali ihema.
EXO 33:12 Musa nakamlonjela Mkulu Nguluwi, “Ulole, hegwe kwangundonjela, ‘Uwalongoze wanhu awa,’ ila hunanzelesa ndo yalihi youmlajiza yanhanze. Ila nakulonga kota kwangunzela kwa itagwa na kahi kota nojezwa na hegwe.
EXO 33:13 Lelo ndangukudedeza wone kunojezwa na heni, undajile lelo nzila za hegwe leka ndikuzele hegwe, leka kota kowa unojezwe na heni. Ndangulanda ukumbuche kahi kota nhanzi ayi ndo wanhu wa hegwe.”
EXO 33:14 Nguluwi nakalonga, “Heni baha ndoluta hamwe na hegwe na ndokudita usindamale.”
EXO 33:15 Musa nakalonga, “Wone gwegwe baho huluta hamwe na heni, lelo uleche kutusa honhu aha.
EXO 33:16 Mina ndovizela ndaze kota kunojezwa na heni, heni na wanhu wa hegwe, wone hulinguluta hamwe na hetwe? Houluta hamwe na hetwe yotudita tuwe wanhu wa chiuyeng'ha hali wanhu weng'ha wa isi.”
EXO 33:17 Mkulu Nguluwi nakamlonjela Musa, “Kwa vila heni nojezwa na hegwe, nani ndangukuzela kwa itagwa lyako, mbuli yiyino nayoulonjile ndoidita.”
EXO 33:18 Musa nakalonga, “Ndangukudedeza undajile ukulu wa hegwe.”
EXO 33:19 Mkulu Nguluwi nakamwidichila, “Ndokola hali hegwe na kukulajila kunoga kwa heni kweng'ha kuno ndiliwikula itagwa lyangu, ‘Mkulu Nguluwi.’ Ndomonela isungu munhu yula yondigana kumonela isungu, ndochisinza kwa munhu yula yondilingugana ndisinze.
EXO 33:20 Ila huweza kumbona kumeho mina kuduhu munhu yoneche yombona na kuwa mkomu.”
EXO 33:21 Hamba Mkulu Nguluwi nakamlonjela Musa, “Kuna honhu behi na heni hawele houkwima mchanya mwa italawe,
EXO 33:22 na ukulu wa heni houwa ukola, ndokuwika mli mhalika mitalawe na kukugubika kwa moko ga heni, mbaka hondiwa ng'holile.
EXO 33:23 Hamba ndokusa moko wa heni nagwe kochona chigosi cha heni, ila kumeho kwa heni hukona hebu.”
EXO 34:1 Mkulu Nguluwi nakamlonjela Musa, “Uhongole vibao vili vya maganga kota vila vya mwaluko, nani ndovyandika ulonzi ula louwele kuli vila vibao vya mwaluko vyouvibenile.
EXO 34:2 Uwe goya mitondo, uye kiting'hana na heni hala kuli kuchidunda cha Sinai.
EXO 34:3 Munhu yoneche yaleche kuya na hegwe, na yaleche koneka honeche mchidunda, ne ming'holo ama misenga jileche kudimigwa habehi.”
EXO 34:4 Lelo Musa nakahongola vibao vili vya maganga kota vila vya mwaluko. Nakoka mitondo lufuku, nakakwina mchidunda cha Sinai, kota Mkulu Nguluwi navyoyamlonjele. Nakahola vila vibao vili vya maganga mmoko mwake.
EXO 34:5 Mkulu Nguluwi nakadulika kuli ng'hungugu nakema hamwe na Musa, nakawikula itagwa lyake, “Mkulu Nguluwi.”
EXO 34:6 Hamba Mkulu Nguluwi nakakola hali Musa yowikula kahi, “Mkulu Nguluwi, heni Mkulu Nguluwi, ndo Nguluwi yawele na isungu na yalingutambichiza, halinguzudila himahima, kamema igano lya kwimilila na wa kitumbila.
EXO 34:7 Heni ndanguwaditila igano lya kwimilila maelufu ga lulelo lulinguya, ndiwosela wehile wihe na kubelenhuka na gehile, ila kwa vyoneche vila sileka kumgaza yawele na nongwa, ndanguwagaza wana na wazukulu wa wehile na lulelo lwa kadatu na lwa kane.”
EXO 34:8 Baho Musa nakenamiza hasi himahima, nakamfugamila Nguluwi.
EXO 34:9 Hamba nakalonga, “Gwaa Mkulu wa heni, wone ulingunojezwa na heni, ndangukulanda tulutase hamwe na hetwe. Wanhu awa ndo wawele na nhumbula zigagadale, ila utusile wihe wa hetwe na gehile ga hetwe, utubochele kota wanhu wa gwegwe baho.”
EXO 34:10 Mkulu Nguluwi nakamlonjela Musa, “Sambi ndangudita ilagano. Hali wanhu wa hegwe weng'ha ndodita vinduzanduza hali hewo viwele havinalawila kuli isi yeng'ha ne kuli nhanzi yoneche. Na wanhu weng'ha mlingikala hali hewo wogona madito ga heni makulu. Mina ndodita mbuli za vinduzanduza vya kudumbiza hamwe na hegwe.
EXO 34:11 “Wibatilile mizilo jondikupa lehano. Lole, ndowawinga hali hegwe Waamoli na Wakanaani na Wahiti na Wapelisi na Wahivi na Wayebusi.
EXO 34:12 Wilolele uleche kudita ilagano na walingikala isi youlinguluta, mina alyo lyowa idiwa hali hegwe.
EXO 34:13 Ila kozabomola honhu ha kulavila nhambiko ha hewo na kubena mizengo ja milungu ja hewo na mizengo jawo ja mlungu wa Ashela.
EXO 34:14 Mleche kumfugamila mlungu yunji, kwa vila heni Mkulu Nguluwi, ndanguzeleka kwa itagwa, ‘Yawele na Fihi,’ heni ndo Nguluwi yawele na fihi.
EXO 34:15 Mleche kiwichila malagano goneche na wanhu wa isi, kwa vila hala howofugamila jimalukolo kota wang'hondwa na kujilavila nhambiko, wokuchema hegwe kihanza na hewo na kokwejigwa kulya chowalingulavya kwa milungu ja hewo.
EXO 34:16 Wone wana wa hegwe wawahole wahinza wa wanhu awo, na awo wahinza wangufugamila milungu jawo kota wang'hondwa, wowabada wasongolo wa hegwe kuwinza milungu ja hewo.
EXO 34:17 “Uleche kiditila milungu ja chuma.
EXO 34:18 “Kodita mnvina ya mibumunda johajiwichigwe usaso. Kwa mhela wa mazuwa saba kolya mibumunda johajiwichigwe usaso mhela uwichigwe kuli mwezi wa Abibu, kota vyondikulajize, kwa vila kuli mwezi awo wa Abibu, nakulawa Misili.
EXO 34:19 Chila chochileleche mwaluko chilume ndo cha heni, hamwe na milume jeng'ha ja migongolo ja haluga na jileleche mwaluko ja misenga na ming'holo.
EXO 34:20 Ila idogowi lileleche mwaluko, koligombola kwa kundavila ing'holo. Wone huligombola, kolibena singo. Wana wa hegwe walume wapondigwe mwaluko, kowagombola. Munhu yoneche yaleche kuya hali heni ne chinhu.
EXO 34:21 “Mazuwa sita kokola mijito ja hegwe, ila zuwa lya saba, kokwesela, hanga uwe mhela wa lilima ama mbena.
EXO 34:22 Kodita mnvina ya mbena, kwaluka kwa mhela wa mbena ya ngano na kudita mnvina ya kukungajiza mbena kuduma kwa mhela.
EXO 34:23 Mala zidatu kwa mhela wanhu weng'ha walume wa hegwe wokuya kufugamila heni, Mkulu Nguluwi, Nguluwi wa Isilaeli.
EXO 34:24 Lelo ndowawinga wanhu wa isi zinji hali hegwe na konjeza isi ya hegwe, kuduhu ne yumwe yojeza kuhola isi ya hegwe hali heni Mkulu Nguluwi houluta mhela wa mnvina azo zidatu.
EXO 34:25 “Uleche kundavila danda ya nhambiko ya heni hamwe na usaso, na miwunde ja nhambiko ya mnvina ya Pasaka ileche kupona mbaka hamitondo.
EXO 34:26 “Mbena ya mwaluko ya hegwe inojile kochigala kaye kwa heni Mkulu Nguluwi, Nguluwi wa hegwe. “Uleche kuhemsa kanyehe kuli itombo lya mayake.”
EXO 34:27 Mkulu Nguluwi nakamlonjela Musa, “Wandiche ulonzi awu, mina kwa ulonzi awu, nandita ilagano na hegwe na wanhu wa Isilaeli.”
EXO 34:28 Musa nakekala ako kuchidunda hamwe na Mkulu Nguluwi kwa mazuwa makumi gane, nemisi na nechilo, hadile chilyo ne kunwa mazi. Nakandika malajizo geng'ha na jila mizilo kumi.
EXO 34:29 Musa loyali yodulika kuli chidunda cha Sinai yawele na vila vibao vili vya ulolezi mmoko mwake, nahavizelele kota kumeho kwa heye nakulangazuka kwa vila nayali yodawala na Mkulu Nguluwi.
EXO 34:30 Aluni na wanhu wa Isilaeli weng'ha nalowamuwene Musa, nawadumba kumhejelela, kwa vila kumeho kwa heye nakwali kupulika.
EXO 34:31 Ila Musa nakamchema Aluni na vilongozi wa Waisilaeli weng'ha nawalute behi na heye, hamba nakalongasa na hewo.
EXO 34:32 Hamba Waisilaeli weng'ha nawoya behi na heye, na heye nakawapa mizilo jeng'ha Mkulu Nguluwi najoyampele kula kuchidunda cha Sinai.
EXO 34:33 Musa loyasindile kulonga na wanhu, nakagubika kumeho kwa heye kwa chibende.
EXO 34:34 Ila naiwa kota chila mhela Musa hoyoluta kulonga na Mkulu Nguluwi, nayali yokusa chila chibende mbaka hoyolawa kunze. Na hoyolawa kunze nakawalonjela Waisilaeli mbuli yeng'ha yoyalajizwe,
EXO 34:35 na hewo Waisilaeli nawakona kumeho kwa heye vyokulangazuche. Ndo Musa loyagubiche kumeho kwa heye mbaka hoyoluta kulonga na Mkulu Nguluwi.
EXO 35:1 Musa nakawakungajiza Waisilaeli weng'ha, nakawalonjela, “Azi ndo mbuli ziwele Mkulu Nguluwi yawalajize mdite.
EXO 35:2 Kwa mazuwa sita mokola mijito ja hemwe, ila zuwa lya saba ndo zuwa lya kwesela ng'hatu liwichigwe lyelile kwa chiwalo cha Mkulu Nguluwi. Yoneche yokola mijito zuwa alyo imgana yakopoligwe.
EXO 35:3 Mleche kubwina chiluli kuli ng'handa za hemwe Zuwa lya Kwesela.”
EXO 35:4 Musa nakawalonjela Waisilaeli weng'ha, “Ayi ndo mbuli iwele Mkulu Nguluwi yawalajize mkole.
EXO 35:5 Molavya kuli lufufu lwa hemwe nhambiko ya kumha Mkulu Nguluwi. Chila munhu yawele na nhumbula inojile komigalila Mkulu Nguluwi nhambiko, zahabu na sendi na shaba
EXO 35:6 na sufu ya buluu na ya zambalau na ndung'hu na kitani inojile itawigwe na milaika ja mhene
EXO 35:7 na migozi ja ing'holo ilume liwichigwe lanji ndung'hu na migozi ja migongolo jinji jilingikala mbahali na mbao za msonobali
EXO 35:8 na mafuta kwa chiwalo cha chenje, ndugwa kwa chiwalo cha mafuta ga kubakala na kwa chiwalo cha ubani uwele na unhunyhililo unojile ng'hatu
EXO 35:9 na maganga galingupulika ga salidoniki na maganga ganji galingupulika kwa chiwalo cha kunoliga, chihako cha mmhambaga na chizibao cha mtambika.
EXO 35:10 “Chila munhu yawele na uwanzi hali hemwe kokuya kugongomanya vinhu vyeng'ha vyoyalajize Mkulu Nguluwi.
EXO 35:11 Kugongomanya ihema lya Nguluwi na chigubiko chake na ipaziya lyake na ngwamo zake na fulemu zake na vikalilo vyake
EXO 35:12 na isanduku lya ilagano hamwe na vipichilo vyake na chigubiko cha uhanyisi na ipaziya lya honhu helile ng'hatu
EXO 35:13 na chisaga na mipichilo jake hamwe na vinhu vyake vyeng'ha na mibumunda jelile jiwichigwe hali Mkulu Nguluwi
EXO 35:14 na vinhu vya kuwichila vyenje hamwe na vinhu vyake vyeng'ha na vyenje vyake na mafuta gake
EXO 35:15 na honhu ha kulavila nhambiko ha ubani hamwe na mipichilo jake na mafuta ga kubakala na ubani uwele na unhunyhililo unojile na ipaziya lya lwizi lwa ihema lya Nguluwi
EXO 35:16 na honhu ha kulavila nhambiko za kulakazwa hamwe na utandawala wa shaba na mipichilo jake hamwe na vinhu vyake vyeng'ha na likuwe na chikalilo chake
EXO 35:17 na utandawala wa lugagala na mizengo jake na vikalilo vyake na ipaziya lya lwizi lwa lugagala
EXO 35:18 na vigingi vya ihema lya Nguluwi na za lugagala hamwe na ng'weso zake
EXO 35:19 na mivalo jitawigwe goya ng'hatu kwa chiwalo cha mijito ja honhu helile, jiwele ndo mivalo jelile ja mtambika Aluni na ja wanage kwa chiwalo cha mijito ja hewo ja utambika.”
EXO 35:20 Lelo Waisilaeli weng'ha nawoka hali Musa.
EXO 35:21 Lelo chila munhu yawele na nhumbula inojile na kwinjilwa na isungu nakamlavila nhambiko Mkulu Nguluwi kwa chiwalo cha ihema lya Nguluwi na mijito ja ihema na mivalo ja watambika.
EXO 35:22 Ahyo weng'ha wawele na nhumbula zinojile, walume kwa wadala, nawegala vipuli vya mmenyhelo na vipuli vya mmakutu na pete za muhuli na banjili na chila chinhu cha zahabu, chila munhu nakamlavila Mkulu Nguluwi nhambiko ya kwinula kuchanya vinhu vya zahabu.
EXO 35:23 Chila munhu nakegala choneche nachoyawele nacho kota vila sufu ya lanji ya buluu na zambalau na ndung'hu ama kitani inojile ama milaika ja mhene ama igozi lya ing'holo ilume liwichigwe lanji ndung'hu ama migozi ja migongolo jinji jilingikala mbahali.
EXO 35:24 Chila munhu yawezile kulavya sendi ama shaba nakegala kwa Mkulu Nguluwi kota nhambiko ya heye. Kahi munhu yoneche yawele na mbao za msonobali kwa mijito yoneche, nakegala kahi.
EXO 35:25 Wadala weng'ha wawele na uwanzi wa kutawa nawegala vinhu vyowatawile kwa sufu ya lanji ya buluu na zambalau na ndung'hu na kitani inojile itawigwe.
EXO 35:26 Na wadala weng'ha nawenjilwe na isungu nawatawa milaika ja mhene.
EXO 35:27 Vilongozi nawegala vipuli vya lanji na maganga galinguchemigwa salidoniki na maganga kwa chiwalo cha chihako cha mmhambaga na chizibao.
EXO 35:28 Nawegala kahi ndugwa na mafuta kwa chiwalo cha vyenje na mafuta ga kubakala na ubani ulingununyhilila ng'hatu.
EXO 35:29 Waisilaeli weng'ha, walume kwa wadala wawele wakwejigwe mnhumbula ya hewo kigala choneche kwa chiwalo cha mijito ya Mkulu Nguluwi nayali yamlajize Musa ikoleche, nawegala vinhu avyo kota nhambiko ya kunuwila kwa wawo na kumha Mkulu Nguluwi.
EXO 35:30 Musa nakawalonjela Waisilaeli, “Mlole, Mkulu Nguluwi nakamhagula Besaleli mwanage Uli, mwanage Huli wa nhanzi ya Yuda.
EXO 35:31 Nakamemeza Muhe wa Nguluwi, kamha uwanzi na luhala na nyhala na uwanzi wa kugongomanya vinhu,
EXO 35:32 leka yavumbule mijito ja uwanzi na kukola mijito ja kuponda zahabu na sendi na shaba.
EXO 35:33 Ndimha uwanzi wa kuhongola maganga ga kunoliga na kuhongola mbao na uwanzi wa chila mbuli ya kugongomanya vinhu kwa uwanzi.
EXO 35:34 Kahi Mkulu Nguluwi nakamlongoza heye na Oholiabu mwanage Ahisamachi wa nhanzi ya Dani, waweze kuwalangusa wanji.
EXO 35:35 Nakawapa uwanzi wa kudita chila mijito ya uwanzi ama ilinguditigwa na wanhu walinguhongola ama walinguvumbula vinhu ama wawanzi wa kutawa kwa sufu ya lanji ya buluu na zambalau na ndung'hu na kitani inojile itawigwe kwa uwanzi woneche wa muwanzi.
EXO 36:1 “Besaleli na Oholiabu, hamwe na chila mlume yawele yapegwe uwanzi na luhala lwa kuvizela mbuli ya kukola mijito zeng'ha na Mkulu Nguluwi kuli kuzenga ihema lya Nguluwi, kokola mijito kwa geng'ha Mkulu Nguluwi nayamlajize.”
EXO 36:2 Musa nakawachema Besaleli na Oholiabu na chila mgongomanyi yawele yapegwe uwanzi na Mkulu Nguluwi na chila munhu yawele yatumigwe na nhumbula ya heye kukola mijito kwa kugana hela.
EXO 36:3 Awo nawabochela kulawila kwa Musa vinhu vyeng'ha navilavigwe na Waisilaeli kwa chiwalo cha mijito ya ihema lya Nguluwi. Wanhu nawalutilila kumigalila nhambiko za kunuwila kwa hewo chila mitondo.
EXO 36:4 Wanhu weng'ha wawele na uwanzi nawawele wokola mijito ga chila mbuli za kuzenga ihema lya Nguluwi nawaluta, chila yumwe kuli mijito ya heye, nawamlutila
EXO 36:5 Musa na kumlonjela, “Wanhu wegala vinhu vinji ng'hatu mzidi wa vila vilinguganigwa kwa mijito yoyatulajize Mkulu Nguluwi tuikole.”
EXO 36:6 Lelo Musa nakalajiza na mbuli ayo naiwikuligwa kuli kambi yeng'ha, “Munhu yoneche, yawe mlume ama mdala, yaleche kigala nhambiko yonzezeche kwa chiwalo cha ihema lya Nguluwi.” Wanhu nawalemezwa kigala vinhu,
EXO 36:7 mina vila navyowegale navihega kwa mijito ayo na kusigala.
EXO 36:8 Walume weng'ha wawele na uwanzi nawagongomanya ihema lya Nguluwi kwa mipaziya kumi ja kitani inojile itawigwe na kwa sufu ya lanji ya buluu na zambalau na ndung'hu na kunoliga kwa vilumbigwe vifandile kota wahilisi.
EXO 36:9 Ulefu wa chila ipaziya nawali mita kumi na mbili na ugazi mita mbili. Mipaziya jeng'ha jali na chipimilo chimwe.
EXO 36:10 Nakalumbaniza mipaziya jihano na kudita ipaziya limwe na kudita hihyo kwa jila jinji jihano.
EXO 36:11 Nakagongomanya vibatililo vya lanji ya buluu mlupembo lwa ipaziya lya mwiso kuli chihande cha mwaluko na vibatililo vinji kuli ipaziya lya mwiso hali chihande cha keli.
EXO 36:12 Nakajela vibatililo makumi gahano kuli ipaziya lya mwaluko na vibatililo makumi gahano kuli ipaziya lya keli. Vibatililo vyeng'ha navyali vichilola.
EXO 36:13 Hamba nakadita ngwamo za zahabu makumi gahano hamwe kuli kilumba na mipaziya mili kuli chihande chimwe.
EXO 36:14 Hamba nakadita kahi chigubiko cha ihema lya Nguluwi kwa mipaziya kumi na limwe lya milaika ja mhene.
EXO 36:15 Chila ipaziya lyali na ulefu wa mita kumi na zidatu na ugazi wa mita mbili. Mipaziya jeng'ha kumi na limwe najali na chipimilo chichila.
EXO 36:16 Lelo nakajilumbiza mipaziya jihano na mipaziya sita hamwe.
EXO 36:17 Hamba nakadita vibatililo makumi gahano mlupembo mwa ipaziya lya mwiso lya chihande cha mwaluko na vibatililo makumi gahano mlupembo mwa chihande cha keli.
EXO 36:18 Hamba nakadita ngwamo makumi gahano vya shaba leka kulumbizila vila vihande vili vya mipaziya na ahyo kudita ipaziya limwe lya ihema.
EXO 36:19 Hamba nakadita chigubiko cha igozi lya ing'holo ilume liwichigwe lanji ndung'hu na mchanya mwake chigubiko chinji cha igozi lya igongolo linji lilingikala mbahali.
EXO 36:20 Hamba nakaligongomanyila fulemu za msonobali kwa chiwalo cha kwimiza ihema lya Nguluwi.
EXO 36:21 Chila fulemu nayali na ulefu wa mita zine na ugazi wa sentimita makumi sita na sita.
EXO 36:22 Chila fulemu nayali na ndimi mbili za kulumbizila. Fulemu zeng'ha za ihema nakaziditila ndimi.
EXO 36:23 Fulemu azo za ihema naziditikwa hino, fulemu makumi meli, ubanzi wa kusini,
EXO 36:24 na vikalilo makumi gane vya sendi hasi ya azo fulemu makumi meli, vikalilo vili hasi ha chila fulemu leka kwimizila zila ndimi zake mbili.
EXO 36:25 Na ubanzi wa keli ula uwele kasikazini mwa ihema, nakaugongomanyila kahi fulemu makumi meli,
EXO 36:26 na vikalilo vyake makumi gane ga sendi na vikalilo vili hasi ha chila fulemu.
EXO 36:27 Ubanzi wa kumbele uwele kolizinjilaga isanya mwa ihema, nakaugongomanyila fulemu sita.
EXO 36:28 Nakagongomanya kahi fulemu mbili kwa chiwalo cha nzingo za ihema, ubanzi wake wa kumbele.
EXO 36:29 Fulemu azo mbili za kuli nzingo nazilekana hasi ila nazibatigwa kuchanya kuli pete ya mwaluko. Fulemu mbili kwa chiwalo cha azo nzingo mbili naziditikwa kota ahyo.
EXO 36:30 Ahyo nakwali na fulemu nane na vikalilo vyake vya sendi kumi na sita, vikalilo vili hasi ya chila fulemu.
EXO 36:31 Nakadita kahi migamba ja msonobali na migamba jihano kwa chiwalo cha fulemu ya banzi imwe ya ihema,
EXO 36:32 migamba jihano kwa chiwalo cha ubanzi wa keli wa ihema na migamba jihano kwa chiwalo cha fulemu za ubanzi wa kumbele mwa ihema, iwele kolizibilaga isanya.
EXO 36:33 Nakadita mgamba wa hagati ufichile nusu ya fulemu ya ihema uwele winjile hagati kulawila mwiso mbaka mwiso.
EXO 36:34 Fulemu zeng'ha nakazibakaliza zahabu, nakazidita na pete za zahabu za kibatilila mgamba ziwele kahi yazibakalize zahabu.
EXO 36:35 Nakagongomanya ipaziya lya lanji ya buluu na zambalau na ndung'hu na kitani inojile itawigwe. Ipaziya alyo nalitawigwa kwa kunoligwa kwa vilumbigwe vifandile kota wahilisi kwa uwanzi ng'hatu.
EXO 36:36 Nakagongomanya mizengo jine ajo ja msonobali, nakajibakaliza zahabu na kujiwichila ngwamo za zahabu. Vivila nakagongomanya vikalilo vine vya sendi.
EXO 36:37 Hihyo du, kwa chiwalo cha lwizi lwa ihema, nakagongomanya ipaziya lya lanji ya buluu na zambalau na ndung'hu na kitani inojile itawigwe, nalyo ipaziya nalitawigwa goya.
EXO 36:38 Nakagongomanya mizengo jake jihano jiwele na fito. Honhu ha kuchanya na vibatililo vyake nakavibakaliza zahabu, ila vikalilo vyake vihano navyali vya shaba.
EXO 37:1 Besaleli nakagongomanya isanduku lya ilagano kwa mbao za msonobali, ulefu wake nawali sentimita miya imwe na kumi, ugazi nawali sentimita makumi sita na sita, na wimo wake nawali sentimita makumi sita na sita.
EXO 37:2 Nakalibakaza zahabu inojile kunze na mgati na kudita mfungo mwake mweng'ha kuwe kwa zahabu.
EXO 37:3 Hamba nakagongomanya pete zine za zahabu, imwe kwa chila mgulu. Hamba nakawika pete imwe kuli chila ubanzi.
EXO 37:4 Nakagongomanya mipichilo ja msonobali na kubakaliza zahabu.
EXO 37:5 Mipichilo ajo nakajiwika mli zila pete ziwele kuli banzi mbili za isanduku, kwa chiwalo cha kupichila.
EXO 37:6 Nakagongomanya chigubiko cha uhanyisi cha zahabu inojile, ulefu wake nawali sentimita miya imwe na kumi na ugazi wake nawali sentimita makumi sita na sita.
EXO 37:7 Nakagongomanya kwa kuponda vilumbigwe vili vya zahabu vifandile kota wahilisi mwiso wa chigubiko acho,
EXO 37:8 chilumbigwe chifandile kota mhilisi, chimwe mwiso awu na chiyage mwiso uyage. Nakagongomanya vilumbigwe vifandile kota wahilisi kuli mwiso wa chigubiko acho, viwele chinhu chimwe na chigubiko.
EXO 37:9 Vilumbigwe avyo vifandile kota wahilisi navyali vichilola na mbawa zake hozigonzoligwa nazali zigubika chigubiko cha isanduku, meho gawo golola chigubiko cha isanduku.
EXO 37:10 Vivila nakagongomanya chisaga cha msonobali chiwele na ulefu wa sentimita makumi nane na nane na ugazi wa sentimita makumi gane na zine na wimo wake nawali sentimita makumi sita na sita.
EXO 37:11 Nakabakaliza zahabu inojile na kuchizungulusila isali lya zahabu.
EXO 37:12 Hamba nakachizungulusila chibao chiwele na ugazi wa sentimita nane na kuzungulusila isali lya zahabu.
EXO 37:13 Nakagongomanya pete zine za zahabu na kuzijela kuli nzingo zake zine honhu magulu hogalinguduma.
EXO 37:14 Pete azo nazali behi na isali na nazali kwa chiwalo cha kubatilila mipichilo. Mipichilo ajo najali kwa chiwalo cha kupichila acho chisaga.
EXO 37:15 Nakagongomanya mipichilo ja msonobali ja kupichila, nakaibakaliza zahabu.
EXO 37:16 Nakagongomanya vinhu vya zahabu inojile vya kuwichila mchanya mwa visaga, na nyhelo zake na vizombe vya kuwichila ubani na vibuyu na visaye kwa chiwalo cha kujidila nhambiko ya chakunwa.
EXO 37:17 Nakagongomanya chinhu cha kuwichila chenje kwa zahabu inojile. Chikalilo chake na mitumba jake na vizombe vyake na ufito wake na uluwa wake navyali chinhu chimwe.
EXO 37:18 Nhagala sita nazilawilila kuli chinhu cha kuwichila chenje, nhagala zidatu banzi imwe na nhagala zidatu banzi iyaje.
EXO 37:19 Kuli nhagala hana vizombe vidatu viwhanile na mitumba na uluwa ulinguchemigwa alimondi. Kuli nhagala ilinguya kahi hana vizombe vidatu viwhanile na mitumba na uluwa ulinguchemigwa alimondi. Nhagala zeng'ha sita naziwhana vivila kuli chinhu cha kuwichila chenje.
EXO 37:20 Na kuli ufito nakwali na vizombe vine viwhanile na uluwa ulinguchemigwa alimondi hamwe na itumba lyake na uluwa wake.
EXO 37:21 Honhu halingulawilizila chila jozi ya nhagala zila sita, hasi hake nakwali na itumba limwe limwe.
EXO 37:22 Mitumba ajo na nhagala zake nazali chinhu chimwe na chinhu acho cha kuwichila chenje acho, na cheng'ha nachipondigwa kwa zahabu inojile.
EXO 37:23 Nakagongomanya vyenje saba na vinhu vyake vya kuzimila vyenje na nyhelo zake kwa zahabu inojile.
EXO 37:24 Nakagongomanya chinhu acho cha kuwichila chenje na vinhu vyake kwa kilo makumi gadatu na zihano za zahabu inojile.
EXO 37:25 Nakagongomanya honhu ha kulavila nhambiko ha kufunyizila ubani kwa mbao za msonobali. Honhu ha kulavila nhambiko aho hali ha mlaba, sentimita makumi gane na gahano kwa sentimita makumi gane na gahano na fudi yake sentimita makumi tisa. Mbalati za honhu ha kulavila nhambiko zali chinhu chimwe na honhu ha kulavila nhambiko aho.
EXO 37:26 Heng'ha nakabakaliza zahabu inojile na nzingo yake ya kuchanya na banzi zake za mlubavu na mbalati zake kahi nakaziditila msitali wa zahabu.
EXO 37:27 Nakagongomanya pete mbili za zahabu hasi ha msitali kuli banzi mbili zilingilola. Pete azo nazali zibatilila mipichilo ja kupichila.
EXO 37:28 Nakagongomanya mipichilo mili ja msonobali na kuibakaliza zahabu.
EXO 37:29 Nakagongomanya mafuta gelile ga kubakala na ubani uwele na unhunyhililo unojile kota mgongomanyi wa unhunyhililo.
EXO 38:1 Nakagongomanya honhu ha kulavila nhambiko za kulakazwa kwa mbao za msonobali kwa chiwalo cha nhambiko ya kulakazwa. Honhu ha kulavila nhambiko nahali ha mlaba, mita mbili na lobo kwa mita mbili na lobo na fudi yake nawali mita imwe na lobo.
EXO 38:2 Kuli chila nzingo ya honhu ha kulavila nhambiko aho nakagongomanya mbalati imwe, azo mbalati nazali chinhu chimwe na honhu ha kulavila nhambiko, honhu heng'ha nakahabakaliza kwa shaba.
EXO 38:3 Nakagongomanya vinhu vyeng'ha vya honhu ha kulavila nhambiko, nakagongomanya visaye vyake vya kusila mivu na mihuka na visaye vyake na mibano jake na visaye vya kuholela makala, na vinhu vyeng'ha nakagongomanya kwa shaba.
EXO 38:4 Nakagongomanya utandawala wa shaba na kujela hasi mbaka hagati ha honhu ha kulavila nhambiko.
EXO 38:5 Kuli nzingo nakagongomanya pete zine za shaba za kuholela aho honhu ha kulavila nhambiko, pete imwe kuli chila nzingo.
EXO 38:6 Nakagongomanya mipichilo ja msonobali na kujibakaliza shaba.
EXO 38:7 Nakajijela jila mipichilo kuli pete naziwele hafungo mwa honhu ha kulavila nhambiko leka kupichila. Honhu ha kulavila nhambiko aho hagongomanyigwe kwa mbao hawele na lukweme mgati.
EXO 38:8 Hamba nakagongomanya likuwe lya shaba na chikalilo chake cha shaba, shaba ayo nailawila kuli vilolelo vya wadala wawele vitumagwa hali lwizi lwa ihema lya Nguluwi.
EXO 38:9 Hamba nakagongomanya lugagala. Mipaziya ja ubanzi wa kusini mwa lugagala najali ja kitani itawigwe viwele na utali wa mita makumi gane na zine,
EXO 38:10 navyo najibatigwa kwa mizengo makumi meli jiwele na vikalilo makumi meli ja shaba. Ila fito za mizengo ajo na vibatililo vyake navyali vya sendi.
EXO 38:11 Ubanzi wa kasikazini utali wa ipaziya nawali mita makumi gane na zine na mizengo jake makumi meli ja shaba, ila fito za mizengo ajo na vibatililo vyake navyali vya sendi.
EXO 38:12 Ubanzi wa kolizinjilaga isanya nawali na ipaziya liwele na utali wa mita makumi meli na mbili na mizengo jake kumi na vikalilo vyake kumi. Fito za mizengo ajo na vibatililo vyake navyali vya sendi.
EXO 38:13 Ubanzi wa kolilawilaga isanya, nakwali na lwizi, ubanzi awo nawali na ugazi wa mita makumi meli na mbili.
EXO 38:14 Ipaziya lya ubanzi umwe wa lwizi nawali na ugazi wa mita sita na nusu, hamwe na mizengo jidatu na vikalilo vyake vidatu.
EXO 38:15 Ubanzi wunji hihyo nawali na ipaziya liwele na ugazi wa mita sita na nusu hamwe na mizengo jidatu na vikalilo vyake vidatu.
EXO 38:16 Mipaziya jeng'ha kuzunguluta lugagala najali ja kitani inojile itawigwe.
EXO 38:17 Vikalilo vyeng'ha vya mizengo navyali vya shaba, ila ngwamo za mizengo ajo na vibatililo vyake navyali vya sendi. Honhu hake ha kuchanya nahali ha sendi kahi mizengo jeng'ha najibatililwa na fito za sendi.
EXO 38:18 Ipaziya lya lwizi lwa lugagala naligongomanyigwa kwa sufu ya lanji ya buluu na zambalau na ndung'hu na kitani inojile itawigwe kwa uwanzi, nalyo nalyali na utali wa mita tisa na wimo wa mita mbili, kota navyoliwele ipaziya lya lugagala.
EXO 38:19 Kahi mizengo jake najali jine na vikalilo vine vya shaba. Ngwamo zake nazali za sendi na honhu hake ha kuchanya na fito zake navyali vya sendi.
EXO 38:20 Vigingi vyeng'ha vya ihema na vya lugagala hafungo mwa ihema navyali vya shaba.
EXO 38:21 Avi ndo vinhu navizenjile ihema lya Nguluwi, mina ihema lya ulolezi. Vinhu avi naviwazigwa na Walawi kwa malajizo ga Musa, hali ulongozi wa Itamali mwana wa mtambika Aluni.
EXO 38:22 Besaleli mwana wa Uli, mwana wa Huli wa nhanzi ya Yuda, nakadita chila chinhu Mkulu Nguluwi nayamlajize Musa.
EXO 38:23 Nakatanzigwa na Oholiabu mwana wa Ahisamachi wa nhanzi ya Dani, muwanzi wa kunoliga, kuchola na kutawa uzi wa sufu wa lanji ya buluu na zambalau na ndung'hu na kitani inojile itawigwe.
EXO 38:24 Zahabu yeng'ha naiwele nhambiko ya kwinula kuchanya, nawamlavile Mkulu Nguluwi kwa chiwalo cha kuzenjela ihema lya Nguluwi nayali na itunyo lya kilo miya nane na makumi saba na saba na gilamu miya zidatu kulawila kuli chipimilo cha ihema lya Nguluwi.
EXO 38:25 Sendi kulawa kuli Waisilaeli weng'ha wawazigwe, nayali na itunyo lya kilo elufu zidatu na kumi na saba na gilamu miya saba na makumi gahano kulawila na vipimilo vya ihema lya Nguluwi.
EXO 38:26 Chila munhu nayawazigwe kulawila miyaka makumi meli na kulutilila nakaganigwa kulavya nhambiko ya sendi gilamu zihano na walume weng'ha nawawazigwe nawali miya sita elufu na elufu zidatu na miya zihano na makumi gahano.
EXO 38:27 Kilo elufu zidatu za sendi nazigongomanya vila vikalilo miya imwe vya ihema lya Nguluwi na lila ipaziya, mina kilo makumi gadatu kwa chila chikalilo.
EXO 38:28 Zila kilo kumi na saba na gilamu makumi saba na zihano zisigale, nazigongomanya ngwamo za mizengo na kubakaliza honhu ha kuchanya ha mizengo na kuditichila fito zake.
EXO 38:29 Nhambiko za kwinula kuchanya za shaba Waisilaeli nazowamlavile Mkulu Nguluwi nazali na itunyo lya kilo elufu mbili na miya zine na makumi meli na zihano.
EXO 38:30 Besaleli nakahola shaba ayo na kugongomanyila vikalilo vya lwizi lwa ihema lya Nguluwi na honhu ha kulavila nhambiko ha shaba hamwe na utandawala wake wa shaba na vinhu vyeng'ha vya honhu ha kulavila nhambiko,
EXO 38:31 vikalilo vya lugagala luzungulute ihema lya Nguluwi na vya lwizi lwa lugagala na vigingi vyeng'ha vya ihema lya Nguluwi na vya lugagala.
EXO 39:1 Kwa sufu ya lanji ya buluu na ya zambalau na ndung'hu, nawatawa mivalo ja kuvala mhela wa kudita mijito ja honhu helile. Nawamhonela Aluni mivalo jelile kota Mkulu Nguluwi navyoyamlajize Musa.
EXO 39:2 Nawagongomanya chizibao kwa ng'weso ya zahabu na kwa sufu ya lanji ya buluu na zambalau na ndung'hu na kwa kitani inojile itawigwe.
EXO 39:3 Nawaponda zahabu na kuidumula kuli ng'weso nzisili leka zitawigwe hamwe na sufu ya lanji ya buluu na ya zambalau na ndung'hu na kitani inojile zitawigwe kwa uwanzi.
EXO 39:4 Chizibao acho nachigongomanyigwa kwa ng'weso mbili za kuwohela mmayega zihonigwe hamwe.
EXO 39:5 Isali nalitawigwa kwa uwanzi mchanya mwake leka kuwohela uwe chinhu chimwe na chizibao acho na uditikwa kwa vinhu hihyo, ng'weso ya zahabu na sufu ya buluu na zambalau na ndung'hu na kitani inojile itawigwe kota Mkulu Nguluwi navyoyamalajize Musa.
EXO 39:6 Hamba nawawika maganga galingupulika galinguchemigwa salidoniki, nakaganoliga na kugenjiza mli vibatililo vya zahabu, navyo navicholigwa kota munhu yacholile muhuli na matagwa kumi na meli ga Waisilaeli.
EXO 39:7 Nawagawika maganga ago galingupulika mmayega mwa chila chizibao leka kulajila nhanzi kumi na mbili za Isilaeli kota Mkulu Nguluwi navyoyamlajize Musa.
EXO 39:8 Wawanzi nawagongomanya chihako cha mmhambaga kota vila navyowagongomanyile chila chizibao kwa ng'weso ya zahabu na sufu ya lanji ya buluu na zambalau na ndung'hu na kwa kitani inojile ibotigwe.
EXO 39:9 Chihako acho nachali cha mlaba, sentimita makumi meli na mbili kwa sentimita makumi meli na mbili, nacho nachibinigwa.
EXO 39:10 Chihako acho nachinoligwa kwa misitali jine ja maganga ga sendi nyinji. Msitali wa mwaluko gali maganga ga akiki na topazi na alimasi ndung'hu,
EXO 39:11 msitali wa keli gali maganga ga zumalidi na yakuti ya samawati na alimasi,
EXO 39:12 msitali wa kadatu gali maganga ga yasinto na agate na ametisto,
EXO 39:13 na msitali wa kane gali maganga ga zabalajadi na shohamu na yasipi, geng'ha nagawichigwa vibatililo vya zahabu.
EXO 39:14 Lelo nakwali na maganga kumi na meli gacholigwe matagwa kumi na meli ga Waisilaeli. Nagali gacholigwe kota vyowalinguchola muhuli, chila limwe nalicholigwa itagwa honhu ha nhanzi kumi na mbili za Isilaeli.
EXO 39:15 Nawachigongomanyila chila chihako cha mmhambaga mikufu ja zahabu inojile itawigwe kota ng'weso.
EXO 39:16 Vivila nawagongomanya vibatililo vili vya zahabu inojile na pete mbili za zahabu kwa chiwalo cha chihako cha mmhambaga na kuviwika mli nzingo mbili za chihako acho.
EXO 39:17 Mikufu ajo mili ja zahabu nawawoha kuli pete azo kuli nzingo za chihako cha mmhambaga.
EXO 39:18 Zila nzingo mbili za mikufu ya zahabu nawazijela mli vila vibatililo vili na kuvibatiliza na vila vili vya mmayega mwa chizibao banzi ya kumwando.
EXO 39:19 Nawagongomanya pete mbili za zahabu na kuziwika kuli nzingo mbili hasi banzi ya mgati mwa chihako acho cha mmhambaga behi na chizibao.
EXO 39:20 Nawagongomanya pete zinji mbili za zahabu na kuzijela kumwando kuli banzi ya hasi ya vihande vya chihako acho, honhu hovilinguting'hana na lila isali litawigwe kwa uwanzi ng'hatu.
EXO 39:21 Nawawoha chihako cha mmhambaga kuli chizibao kwa kuting'haniza pete zake na chizibao kwa ng'weso ya lanji ya buluu leka chihako acho chileche kuhejela ila chikalile lila isali litawigwe kwa uwanzi, kota Mkulu Nguluwi vyoyamlajize Musa.
EXO 39:22 Nakagongomanya ijoho lya kuvala mgati mwa chizibao cha sufu ya lanji ya buluu.
EXO 39:23 Ijoho alyo nalyali na honhu ha kwinjizila mutwi hagati, nalyo nalizungulisilwa isali litawigwe leka lileche kudejeka.
EXO 39:24 Kuli lupindo lwa hasi mwa ijoho nawatawa unoligo wa makomamanga ga sufu ya lanji ya buluu na zambalau na ndung'hu na kitani inojile ya kutawa.
EXO 39:25 Hamba nawagongomanya nhogo za zahabu inojile na chila komamanga nawawika nhogo kuli lupindo lwa ijoho.
EXO 39:26 Ahyo, nhogo na komamanga na nhogo na komamanga, navilongola kuzunguluta lupindo alo lwa ijoho alyo, kota Mkulu Nguluwi navyoyamlajize Musa.
EXO 39:27 Hamba nawawatawila Aluni na wanage ijoho lya kitani inojile,
EXO 39:28 chipembelo cha kitani inojile na kofia za kitani inojile na lupati lwa kitani inojile itawigwe,
EXO 39:29 na misali ja kitani inojile itawigwe kwa sufu ya lanji ya buluu na zambalau na ndung'hu na kutawigwa vinojile ng'hatu kota vila Mkulu Nguluwi navyoyamlajize Musa.
EXO 39:30 Hamba nawagongomanya chibati cha zahabu inojile kwa chiwalo cha chipembelo chelile na kuchola mchanya mwake kota navyowacholile muhuli, “Yelile kwa Mkulu Nguluwi.”
EXO 39:31 Hamba nawaliwoha kumwando kwa chila chipembelo kwa ng'weso ya lanji ya buluu, kota Mkulu Nguluwi navyoyamlajize Musa.
EXO 39:32 Lelo mijito jeng'ha ja ihema lya Nguluwi najimala. Waisilaeli nawadita geng'ha kota Mkulu Nguluwi navyoyamlajize Musa.
EXO 39:33 Nawamigalila Musa ihema lya Nguluwi hamwe na vinhu vyesa, ngwamo na fulemu zake na migamba jake na mizengo na vibatililo vyake
EXO 39:34 na chigubiko cha migozi ja ing'holo ilume liwichigwe lanji ndung'hu na igozi lya igongolo linji lilingikala mbahali na ipaziya lya honhu helile
EXO 39:35 na isanduku lya ilagano na mipichilo jake na chigubiko cha uhanyisi
EXO 39:36 na chisaga na vinhu vyake vyesa na mibumunda jelile
EXO 39:37 na chinhu cha kuwichila chenje cha zahabu inojile na vyenje vyake na vinhu vyake vyesa hamwe na mafuta kwa chiwalo cha vyenje avyo
EXO 39:38 na honhu ha kulavila nhambiko ha zahabu na mafuta ga kubakala na ubani uwele na unhunyhililo unojile na ipaziya lya lwizi lwa ihema
EXO 39:39 na honhu ha kulavila nhambiko ha shaba na utandawala wake wa shaba na mipichilo jake na vinhu vyake vyesa na likuwe na chikalilo chake
EXO 39:40 na mipaziya ja lugagala na mizengo jake na vikalilo vyake na ipaziya lya lwizi lwa lugagala na ng'weso zake na vigingi vyake na vinhu vyesa naviganigwe kuli mijito ja ihema lya Nguluwi, ndo mina kahi lyanguchemigwa ihema lya nhing'hano
EXO 39:41 na mivalo jeng'ha jitawigwe goya kwa chiwalo cha mijito ja honhu helile, mina ndo mivalo jelile ja mtambika Aluni na ga wanage kwa chiwalo cha mijito ja utambika.
EXO 39:42 Waisilaeli nawadita chila chinhu kota Mkulu Nguluwi navyoyamlajize Musa.
EXO 39:43 Musa nakalola chila chinhu, nakakunda kota nawadita chila chinhu kota Mkulu Nguluwi navyoyalajize. Ahyo, Musa nakawatambichiza.
EXO 40:1 Mkulu Nguluwi nakamlonjela Musa,
EXO 40:2 “Kuli zuwa lya mwaluko lya mwezi wa mwaluko, kokwimiza ihema lya Nguluwi.
EXO 40:3 Mgati mwa ihema alyo kowika lila isanduku lya ilagano, hamba uwiche ipaziya kumwando mwake.
EXO 40:4 Kokwinjiza chisaga na kuwika vinhu vyake mchanya. Kokwinjiza chila chinhu cha kuwichila chenje na kuwika chenje chake mchanya mwake.
EXO 40:5 Honhu ha kulavila nhambiko ha zahabu ha kufunyizila ubani kohawika kumwado kwa isanduku lya ilagano, hamba koniniza ipaziya kuli lwizi lwa ihema lya Nguluwi.
EXO 40:6 Hala honhu ha kulavila nhambiko za kulakazwa kohawika kumwado kwa lwizi lwa ihema lya Nguluwi.
EXO 40:7 Likuwe koliwika mlugagala, hagati ha ihema lya Nguluwi na honhu ha kulavila nhambiko na kulimemeza mazi.
EXO 40:8 Kokwimiza lugagala na kuniniza ipaziya kuli lwizi lwake.
EXO 40:9 “Hamba, kohola mafuta ga kubakaliza na kulibakaliza ihema lya Nguluwi hamwe na vinhu vyake vyeng'ha na kuliwika liwe lya chiuyeng'ha na vinhu vyake vyeng'ha, nalyo lyowa lyelile.
EXO 40:10 Hamba, kohawika hawe ha chiuyeng'ha honhu ha kulavila nhambiko za kulakazwa na vinhu vyake vyeng'ha kwa kuhabakaliza mafuta, naho howa helile ng'hatu.
EXO 40:11 Likuwe na chikalilo chake kahi koviwika viwe vya chiuyeng'ha na vyelile kwa kuvibakaliza mafuta kwa mijito yiyo du.
EXO 40:12 “Komchema Aluni na wanage woye hali lwizi lwa ihema lya Nguluwi, hamba uwahovuje.
EXO 40:13 Umvalize Aluni jila mivalo jelile, kombakaliza mafuta na kumdita yawe wa chiuyeng'ha, leka yaweze kukola mijito kota mtambika.
EXO 40:14 Uwacheme wanage na kuwavaliza jila mikanzu.
EXO 40:15 Hamba uwabakalize mafuta kota navyoumbakalize mhaza wa hewo, leka na hewo kahi wakole mijito kota watambika. Kubakalizwa mafuta aku kowenjiza kuli utambika wa mazuwa gose kuli lulelo lwao lweng'ha.”
EXO 40:16 Lelo Musa nakadita geng'ha kota navyoyalajizwe na Mkulu Nguluwi.
EXO 40:17 Mli zuwa lya mwaluko lya mwezi wa mwaluko mwaka wa keli nalowalawile Misili, ihema lya Nguluwi nalimizwa.
EXO 40:18 Musa nakawika vikalilo vyake, nakenula fulemu zake, nakebatiliza mipichilo jake na kwimiza mizengo jake.
EXO 40:19 Nakagonzola ipaziya mchanya mwa ihema na kuwika chigubiko cha ihema mchanya mwake kota Mkulu Nguluwi navyoyamlajize Musa.
EXO 40:20 Hamba nakahola vila vibao vili vya maganga na kuviwika kuli lila isanduku. Nakajikoleza jila mipichilo kuli pete za isanduku na kuchiwika chigubiko cha uhanyisi mchanya mwake.
EXO 40:21 Hamba nakaliwika lila isanduku lya ilagano mgati mwa ihema na kuniniza ipaziya kumwando kwa isanduku. Ipaziya nalivisa isanduku lya ilagano kota Musa vyoyalajizwe na Mkulu Nguluwi.
EXO 40:22 Nakawika chisaga mgati mwa ihema lya Nguluwi, ubanzi wa kasikazini, honhu ha kunze mwa ipaziya
EXO 40:23 na mchanya mwake nakawika goya mibumunda hali Mkulu Nguluwi, kota Musa vyoyalajizwe na Mkulu Nguluwi.
EXO 40:24 Nakachiwika chinhu cha kuwichila chenje mgati mwa ihema lya Nguluwi, ubanzi wa kusini, chichilola na chisaga.
EXO 40:25 Amo, hali Mkulu Nguluwi, nakemiza vyenje vyake, kota Musa navyoyalajizwe na Mkulu Nguluwi.
EXO 40:26 Nakahawika hala honhu ha kulavila nhambiko ha zahabu kuli ihema lya Nguluwi, kumwando mwa ipaziya
EXO 40:27 na kufunyiza ubani uwele kununyhilila goya mchanya mwake, kota Musa navyoyalajizwe na Mkulu Nguluwi.
EXO 40:28 Nakaniniza ipaziya hali lwizi lwa ihema lya Nguluwi,
EXO 40:29 nakawika honhu ha kulavila nhambiko za kulakazwa hali lwizi lwa ihema lya Nguluwi. Nakalavya mchanya mwake nhambiko ya kulakaza na nhambiko ya nyhule, kota Musa navyoyalajizwe na Mkulu Nguluwi.
EXO 40:30 Nakaliwika likuwe mlugagala, hagati ha ihema lya Nguluwi na honhu ha kulavila nhambiko na kujela mazi ga kihovujila.
EXO 40:31 Musa na Aluni na wana wa Aluni, weng'ha nawahovuga moko na magulu ga hewo amo.
EXO 40:32 Chila lowenjile mng'handa mwa ihema lya Nguluwi ama lowahejelele hala honhu ha kulavila nhambiko, nawahovuga moko na magulu ga hewo kota Musa navyoyalajizwe na Mkulu Nguluwi.
EXO 40:33 Mwiso Musa nakemiza lugagala kuzungulusila ihema lya Nguluwi na honhu ha kulavila nhambiko na kuwika ipaziya hali lwizi lwa lugagala. Ahyo, Musa nakasinda mijito yeng'ha.
EXO 40:34 Hamba, yila ng'hungugu naigubika lila ihema lya Nguluwi na ukulu wa Mkulu Nguluwi naulimemeza ihema.
EXO 40:35 Musa nakalemwela kwinjila mgati mwa ihema lya Nguluwi kwa vila yila ng'hungugu naikala mchanya mwake na ukulu wa Mkulu Nguluwi naumema amo.
EXO 40:36 Kuli majendo gawo geng'ha ga Waisilaeli, ng'hungugu yila loyinuligwe kulawila mchanya mwa ihema, nawenula majendo.
EXO 40:37 Wone ng'hungugu ayo hayinuligwe hewo nahawaluche majendo, nawabeteza mbaka mhela loyinuligwe.
EXO 40:38 Kuli majendo ga hewo geng'ha, Waisilaeli nawaweza kuyona yila ng'hungugu ya Mkulu Nguluwi mchanya mwa ihema mhela wa nemisi na chila chiluli chikwaka mgati mwake nechilo.
LEV 1:1 Mkulu Nguluwi nakamchema Musa kuli ihema lya heye na kudawala na heye, nakamlonjela,
LEV 1:2 “Walonjele Waisilaeli kota hana munhu kangugana kumlavila Mkulu Nguluwi nhambiko ya igongolo, kolihagula igongolo alyo kulawa kuli chilundo cha misenga ama ming'holo ama mhene.
LEV 1:3 “Wone munhu yalingulavya nhambiko ya kulakazwa, kolihagula isenga ibuguma lilihela nongwa kulawa kuli chilundo. Komlavila hali lwizi lwa ihema lya Nguluwi leka yakundigwe na Mkulu Nguluwi.
LEV 1:4 Kowika moko wa heye mchanya mwa mutwi wa isenga lya nhambiko ya kulakazwa, iwele yokundigwa kwa chiwalo cha kumditila uhanyisi.
LEV 1:5 Hamba, kolidumula singo alyo isenga hali Mkulu Nguluwi. Na hewo watambika wawele ndo walelwa wa Aluni, woihola danda na kuboholela banzi zeng'ha za honhu ha kulavila nhambiko hali lwizi lwa ihema lya Nguluwi.
LEV 1:6 Ayo munhu yegale isenga alyo kwa nhambiko ya kulakazwa, koliwambula na kudumula vipuli.
LEV 1:7 Awo watambika wawele ndo walelwa wa Aluni, wowika goya ngodi mchanya mwa honhu ha kulavila nhambiko na kubwina chiluli.
LEV 1:8 Hamba, walelwa wa Aluni wawele ndo watambika wohola vipuli vya iwunde na mutwi na mafuta na kuviwika mchanya mwa ngodi na mchanya mwa honhu ha kulavila nhambiko za kulakazwa kwa chiluli.
LEV 1:9 Ila mitumbu na magulu ga isenga alyo, munhu ayo kovihovuga kwa mazi. Mtambika koilakaza nhambiko ya kulakazwa hali honhu ha kulavila nhambiko kwa chiluli chiwele na unhunyhililo unojile wa kumnojeza Mkulu Nguluwi.
LEV 1:10 “Wone nhambiko ya heye ya kulakazwa koilavya kulawa kuli chilundo cha ming'holo ama mhene, ila kohagula ilume lilihela nongwa.
LEV 1:11 Kolidumulila singo kuli ubanzi wa kasikazini mwa honhu ha kulavila nhambiko hali Mkulu Nguluwi, awo watambika wawele ndo walelwa wa Aluni woboholela danda hali banzi zeng'ha za honhu ha kulavila nhambiko za kulakazwa.
LEV 1:12 Ila ayo munhu yegale igongolo alyo, kolidumula vipuli, kovilekaniza mutwi hamwe na mafuta ga ing'holo, na mtambika koviwika hali ngodi zilingwaka chiluli, hali honhu ha kulavila nhambiko.
LEV 1:13 Ila mitumbu na magulu ga ing'holo kogahovuga kwa mazi. Mtambika koilakaza yeng'ha hali honhu ha kulavila nhambiko. Ahyo ndo nhambiko ya kulakazwa kwa chiluli chiwele na unhunyhililo unojile na kumnojeza Mkulu Nguluwi.
LEV 1:14 “Wone komlavila Mkulu Nguluwi nhambiko ya kulakazwa ya videje, lelo kochigala nhambiko ya heye ya ng'hunda ya kisolo ama ng'hunda ya kufujigwa.
LEV 1:15 Mtambika kochigala chideje acho hali honhu ha kulavila nhambiko, kopobosola mutwi wa chideje na kuchilakaza hali honhu ha kulavila nhambiko. Danda ya chideje acho yokamigwa na kumizilwa hafungo ha honhu ha kulavila nhambiko.
LEV 1:16 Kolyusa lifu lyake hamwe na vinhu vya mgati mwa lifu na kuvitaga kuli ubanzi wa kolilawilaga isanya hali honhu ha kulavila nhambiko halinguwichigwa mivu.
LEV 1:17 Kochibata mabawa na kuchidadula, ila yaleche kuchidumula vipuli vili. Ila, mtambika kochilakaza hali honhu ha kulavila nhambiko, mchanya mwa ngodi. Ayo ndo nhambiko ya kulakazwa kwa chiluli chiwele na unhunyhililo unojile na kumnojeza Mkulu Nguluwi.”
LEV 2:1 “Munhu yoneche wone yochigala nhambiko ya nyhule kwa Mkulu Nguluwi, nhambiko ayo iwe ya utimbo unojile. Kojida mafuta na kuwika ubani mchanya mwa utimbo.
LEV 2:2 Hamba, kowegalila awo walelwa wa Aluni wawele ndo watambika. Kohola chiganza chimwe cha utimbo unojile hamwe na mafuta na ubani na koulakaza hali honhu ha kulavila nhambiko leka iwe nhambiko ya kukumbuchila kwa Mkulu Nguluwi. Ayo ndo nhambiko iwele na unhunyhililo unojile wa kumnojeza Mkulu Nguluwi kwa chiluli.
LEV 2:3 Honhu hasigale ha nhambiko ayo, ndo ya Aluni na walelwa wa heye. Aho ndo honhu helile ng'hatu ha nhambiko yalingulavilwa Mkulu Nguluwi kwa chiluli.
LEV 2:4 “Wone munhu yomlavila Nguluwi nhambiko ya nyhule ibanichigwe mchiko, ayo yowa ya mibumunda hajiwichigwe usaso wa utimbo unojile uhanzigwe na mafuta ga mzeituni, ama ga mibumunda mizisili johajiwichigwe usaso na jibakalizwe mafuta ga mzeituni.
LEV 2:5 Ila wone nhambiko youlingulavya ndo ibumunda litelechigwe migaye, ayo yowa ya utimbo unojile ulihela usaso uhanzigwe na mafuta ga mzeituni.
LEV 2:6 Mibumunda ajo jomogoligwa na kujidilwa mafuta, ayo ndo nhambiko ya nyhule.
LEV 2:7 Wone nhambiko youlingulavya ndo ya mibumunda jitelechigwe msufuliya, ayo yowa ya utimbo unojile na uwichigwa mafuta ga mzeituni.
LEV 2:8 Kochigala nhambiko ya nyhule igongomanyigwe na vinhu avi hali Mkulu Nguluwi, na kumha mtambika na heye kochigala hali honhu ha kulavila nhambiko.
LEV 2:9 Mtambika kohola honhu ha nhambiko ayo iwele ndo ya kukumbuchila na kuilakaza kwa chiluli mchanya mwa honhu ha kulavila nhambiko. Ayo ndo unhunyhililo unojile wa kumnojeza Mkulu Nguluwi.
LEV 2:10 Honhu hasigale ha nhambiko ya nyhule ndo ha Aluni na walelwa wa heye. Aho ndo honhu helile ng'hatu ha nhambiko ilingulavigwa kwa Mkulu Nguluwi kwa chiluli.
LEV 2:11 “Nhambiko yoneche ya nyhule youmgalila Mkulu Nguluwi yanguganigwa iwe igongomanyilwe ne usaso, ahyo hailingukundigwa kuwika usaso ne hanombwa kuli nhambiko zoyalingulavilwa Mkulu Nguluwi kwa chiluli.
LEV 2:12 Koweza kumgalila Mkulu Nguluwi mbena ya hegwe ya mwaluko kota nhambiko. Ila ago hogolavilwa hali honhu ha kulavila nhambiko kota unhunyhililo wa kumnojeza.
LEV 2:13 Kolakaza nhambiko za hegwe zeng'ha za nyhule na mwino. Ndangukomya uwiche mwino kuli nhambiko ya hegwe ya nyhule, ahyo mwino ndo ulajilo wa ilagano lyoyaditile Nguluwi hamwe na hemwe. Kowika mwino kuli nhambiko zeng'ha.
LEV 2:14 “Wone umlavila Mkulu Nguluwi nhambiko ya nyhule za mbena za hegwe za mwaluko, koilavya nyhule ayo inyale ibalasigwe na kutelechigwa kwa chiluli.
LEV 2:15 Kowika mafuta ga mzeituni na ubani, ayo ndo nhambiko ya nyhule.
LEV 2:16 Mtambika kolakaza honhu ha nhambiko ayo ya nyhule ibalaswe na mafuta hamwe na ubani wa heye weng'ha, ndo yowa nhambiko ya kukumbuchila, ayo ndo nhambiko yalingulavilwa Mkulu Nguluwi kwa chiluli.
LEV 3:1 “Wone munhu kangulavya nhambiko ya kikala goya hali Mkulu Nguluwi, nhambiko ya heye ndo isenga ibuguma ama idala kulawa kuli chilundo, lelo igongolo alyo lileche kuwa na nongwa.
LEV 3:2 Kowika moko wa heye mchanya mwa mutwi mwa igongolo alyo na kulidumula singo hali lwizi lwa ihema lya Nguluwi. Awo watambika wawele ndo walelwa wa Aluni, woboholela danda ayo honhu ha kulavila nhambiko banzi zeng'ha.
LEV 3:3 Mafuta geng'ha galingugubika mitumbu ja igongolo lya nhambiko ayo ya kikala goya kogalakaza kota nhambiko yalingulavilwa Mkulu Nguluwi kwa chiluli.
LEV 3:4 Kolavya kahi zila figo mbili na mafuta gake hamwe na hala honhu hanojile ng'hatu ha chini.
LEV 3:5 Walelwa wa Aluni woilakaza honhu ha kulavila nhambiko mchanya mwa nhambiko ya kulakazwa iwele mchanya mwa ngodi, ayo ndo nhambiko ilingulavigwa kwa chiluli iwele na unhunyhililo unojile ulingumnojeza Mkulu Nguluwi.
LEV 3:6 “Wone nhambiko ayo ya kikala goya youlingumlavila Mkulu Nguluwi ndo kulawa kuli chilundo cha ming'holo ama mhene, lelo lihaguligwe ilume ama idala lilihela nongwa.
LEV 3:7 Wone munhu yolavya ing'holo lyana liwe nhambiko ya heye, lelo kolilavila hali Mkulu Nguluwi.
LEV 3:8 Kowika moko wa heye mchanya mwa mutwi wa ing'holo alyo na kulidumula singo hali ihema lya Nguluwi. Watambika wawele ndo walelwa wa Aluni, woboholela danda ayo hali honhu ha kulavila nhambiko banzi zeng'ha.
LEV 3:9 Hamba, kulawa kuli nhambiko ya kikala goya yalingulavilwa Mkulu Nguluwi kwa chiluli, komlavila mafuta na mafuta ga mumchila uwele udumuligwe habehi ng'hatu na chigudi cha mgongosango na mafuta geng'ha galingugubika mitumbu,
LEV 3:10 na zila figo mbili na mafuta hamwe na honhu hanojile ng'hatu ha chini.
LEV 3:11 Mtambika kovilakaza avyo vyeng'ha mchanya mwa honhu ha kulavila nhambiko kota chilyo choyalingulavilwa Mkulu Nguluwi kwa chiluli.
LEV 3:12 “Wone nhambiko ya heye ndo mhene, lelo komlavila hali Mkulu Nguluwi.
LEV 3:13 Kowika moko wa heye mchanya mwa mutwi wa igongolo alyo na kulidumula singo hali ihema lya Nguluwi. Walelwa wa Aluni woboholela danda honhu ha kulavila nhambiko banzi zeng'ha.
LEV 3:14 Hamba kolavya kulawa kuli nhambiko ya kikala goya kwa Mkulu Nguluwi kwa chiluli, mafuta geng'ha galingugubika mitumbu,
LEV 3:15 na zila figo mbili na mafuta, hamwe na honhu hanojile ng'hatu ha chini.
LEV 3:16 Mtambika kovilakaza mchanya mwa honhu ha kulavila nhambiko kota chilyo chilingulavigwa kwa chiluli, kulavya unhunyhililo wa kumnojeza Mkulu Nguluwi. Mafuta geng'ha ndo ga Mkulu Nguluwi.
LEV 3:17 Ndo mina ilajizo lya mazuwa gose kwa lulelo lweng'ha na honhu honeche holulingukala. Mleche kulya mafuta ne danda.”
LEV 4:1 Mkulu Nguluwi nakamlonjela Musa,
LEV 4:2 “Walonjele wanhu wa Isilaeli kota wone munhu nakadita gehile ne kunuwila, na nakadita chinhu chilemezwe na mzilo wa Mkulu Nguluwi, kodita mbuli azi.
LEV 4:3 “Wone mtambika mkulu yawele yabakalizwe mafuta ndo yaditile gehile, ahyo nakawenjiza wanhu mli nongwa. Lelo ayo komlavila Mkulu Nguluwi ilogota ilume lilihela nongwa, liwe nhambiko ya gehile.
LEV 4:4 Koligala alyo ilogota hali lwizi lwa ihema lya Nguluwi, hali Mkulu Nguluwi, na heye kowika moko wa heye mchanya mwa mutwi wa alyo ilogota na kulidumula singo hali Mkulu Nguluwi.
LEV 4:5 Ayo mtambika mkulu yabakalizwe mafuta kohola chasi cha danda na kwinjila nayo mgati mwa ihema lya Nguluwi.
LEV 4:6 Kozabika chidole cha heye kuli danda ayo na kumizila mala saba hali Mkulu Nguluwi kumwando kwa ipaziya lya honhu helile.
LEV 4:7 Mtambika mkulu kohola honhu ha danda na kuzibakaliza mbalati za honhu ha kulavila nhambiko ha kufunyizila ubani wa unhunyhililo unojile hali Mkulu Nguluwi kuli ihema lya Nguluwi. Danda isigale kobohola hanyi hali chikalilo cha honhu ha kulavila nhambiko za kulakazwa hawele habehi na lwizi lwa ihema lya Nguluwi.
LEV 4:8 Hamba kokusa mafuta geng'ha ga alyo ilogota ilume, na mafuta geng'ha galingugubika mitumbu
LEV 4:9 na figo mbili na mafuta gawele mchanya na gala gawele mchuno na honhu hanojile ng'hatu ha chini,
LEV 4:10 kota vila mafuta galingusigwa kulawa kuli isenga lya nhambiko ya kikala goya. Hamba mtambika mkulu kohola na kulakaza hali honhu ha kulavila nhambiko za kulakazwa.
LEV 4:11 Ila igozi lya alyo ilogota ilume na miunde na mutwi na magulu na mitumbu na midohe,
LEV 4:12 liwele ndo ilogota ilume lyeng'ha lisigale lyoholigwa na kulilakaza kunze mwa kambi hali honhu habaguligwe hawele nguboholigwa mivu hali honhu hanojile. Lyolakazwa kwa chiluli mchanya mwa ngodi aho honhu ha kuboholela mivu.
LEV 4:13 “Wone Waisilaeli weng'ha nawadita gehile ne kunuwila, kwa kudita chinhu chilemezigwe na mzilo wa Mkulu Nguluwi, wana nongwa.
LEV 4:14 Hamba gehile ago hogozeleka, Waisilaeli weng'ha wolavya ilogota ilume liwe nhambiko ya gehile. Waisilaeli weng'ha woligala hali ihema lya Nguluwi.
LEV 4:15 Wasekulu wa Waisilaeli weng'ha wowika moko ga hewo hali mutwi wa alyo ilogota ilume, hamba lyodumuligwa singo hali Mkulu Nguluwi.
LEV 4:16 Yula mtambika mkulu yahaguligwe kwa kubakalizwa mafuta kochigala honhu ha danda ya alyo ilogota mgati mwa ihema lya Nguluwi.
LEV 4:17 Kozabika chidole cha heye kuli ayo danda na kuimizila hali ipaziya mala saba hali Mkulu Nguluwi.
LEV 4:18 Hamba, honhu ha danda kobakaliza mbalati kuli honhu ha kulavila nhambiko hawele kuli ihema lya Nguluwi hali Mkulu Nguluwi. Danda isigale kobohola hanyi hali chikalilo cha honhu ha kulavila nhambiko za kulakazwa habehi na lwizi lwa ihema lya Nguluwi.
LEV 4:19 Mafuta geng'ha ga ilogota alyo kohola na kugalakaza hali honhu ha kulavila nhambiko.
LEV 4:20 Lelo kolidita alyo ilogota ilume kota vyoyaliditile alila liyage lya nhambiko ya gehile. Lelo kwa nzila ayi, mtambika mkulu kanguwaditila wanhu uhanyisi, na hewo wolechelwa.
LEV 4:21 Hamba kolajiza ilogota alyo kugaligwa kunze mwa kambi na kulilakaza kwa chiluli kota vyoyaliditile alila liyage. Ayo ndo nhambiko ya gehile ga Waisilaeli weng'ha.
LEV 4:22 “Wone chilongozi nakadita gehile ne kunuwila vyoyodita chinhu chilemezwe na choyalonjile Mkulu Nguluwi, Nguluwi wa heye, ayo kana nongwa,
LEV 4:23 hoyovizela gehile goyaditile, kochigala nhambiko ya heye ya ipongo lilihela nongwa.
LEV 4:24 Kowika moko wa heye mchanya mwa mutwi wa ipongo na kulidumulila singo honhu ha kudumulila singo nhambiko za kulakazwa hali Mkulu Nguluwi, ayo ndo nhambiko ya gehile.
LEV 4:25 Mtambika mkulu kozabika chidole cha heye kuli danda ya nhambiko ya gehile na kubakaliza mbalati kuli honhu ha kulavila nhambiko za kulakazwa. Danda isigale koibohola hanyi hali chikalilo cha honhu aho ha kulavila nhambiko.
LEV 4:26 Mafuta geng'ha ga ipongo alyo kogalakaza hali honhu ha kulavila nhambiko kota vyoyaditile kuli mafuta ga isenga lya nhambiko ya kikala goya. Kwa nzila ayi, mtambika kangumditila uhanyisi chilongozi ayo, na kolechelwa gehile ga heye.
LEV 4:27 “Wone munhu wa hihi hela nakadita gehile ne kunuwila, kwa kudita chinhu chilemezigwe na mzilo wa Mkulu Nguluwi, ayo kana nongwa.
LEV 4:28 Hamba naloyalonjelwe kota nakadita gehile, kochigala nhambiko ya mhene ndala ilihela nongwa kwa chiwalo cha gehile goyaditile.
LEV 4:29 Kowika moko wa heye mchanya mwa mutwi wa mhene ayo ya nhambiko ya gehile, na kuidumula singo honhu ha nhambiko ya kulakazwa.
LEV 4:30 Mtambika kozabika chidole cha heye kuli danda na kubakaliza mbalati kuli honhu ha kulavila nhambiko za kulakazwa. Danda isigale koibohola hanyi hali chikalilo chake.
LEV 4:31 Mafuta geng'ha ga mhene ayo kogosa kota vyoyosile mafuta ga migongolo ja nhambiko ya kikala goya, na heye mtambika kogalakaza hali honhu ha kulavila nhambiko, na unhunyhililo unojile womnojeza Mkulu Nguluwi. Lelo kwa nzila ayi, mtambika komditila uhanyisi munhu ayo, na kolechelwa.
LEV 4:32 “Wone munhu ayo kochigala ing'holo lyana kwa chiwalo cha nhambiko ya gehile, lelo kochigala ing'holo lyana idala lilihela nongwa.
LEV 4:33 Kowika moko wa heye mchanya mwa mutwi wa ing'holo lyana alyo lya nhambiko ya gehile na kulidumula singo honhu ha nhambiko ya kulakazwa.
LEV 4:34 Hamba mtambika kozabika chidole cha heye kuli danda ya nhambiko ya gehile na kubakaliza mbalati honhu ha kulavila nhambiko za kulakazwa. Danda isigale koibohola hanyi hali chikalilo chake.
LEV 4:35 Hamba kokusa mafuta geng'ha kota vyoyosile mafuta ga ing'holo lyana lya nhambiko ya kikala goya na mtambika kogalakaza hali honhu ha kulavila nhambiko hamwe na nhambiko zilingulavigwa kwa Mkulu Nguluwi kwa chiluli. Kwa nzila ayi, mtambika komditila uhanyisi ayo munhu na heye kolechelwa gehile ga heye.”
LEV 5:1 “Wone munhu yoneche yoganigwa kulavya ulolezi kuli chitala kuwala mbuli yoyawene ama yoyahuliche na heye wone yaleme kulonga chinhu, lelo ago ndo gehile na koganigwa kugazigwa kwa chiwalo cha gehile ga heye.
LEV 5:2 Ama kota munhu yoneche hali hemwe nakawa yakokomoche ne kunuwila kwa kudoliza chinhu choneche chikokomoche, uwe mtufi wa igongolo lya kisolo ama lya kufujigwa ama vilumbigwe vilingutambala, kowa yakokomoche na kahi kowa na nongwa.
LEV 5:3 Ama munhu wone yadolize chinhu chikokomoche cha munhu ama chinhu choneche chilingumdita munhu yawe yakokomoche ne heye kuvizela, lelo loyovizela kowa na nongwa.
LEV 5:4 Ama wone munhu yelahe kudita choneche chila ne kijesa, chinojile ama chihile, kota yula halinguvizela, lelo loyovizela kowa na nongwa.
LEV 5:5 Lelo wone munhu yawe na nongwa kuwala mbuli zoneche zila, imgana yalonje kwa mlomo wa heye gehile ga heye goyaditile
LEV 5:6 na kumigalila Mkulu Nguluwi nhambiko kwa kilipiza kwa gehile ga heye goyaditile. Kochigala ing'holo idala ama mhene ndala yamlavye nhambiko ya gehile. Mtambika komditila uhanyisi kwa gehile ga heye.
LEV 5:7 “Ila wone yolemwela kulavya ing'holo lyana kwa kilipiza kwa chiwalo cha gehile ga heye goyaditile, lelo komigalila Mkulu Nguluwi ng'hunda mbili za kisolo ama ng'hunda mbili za kufujigwa, imwe kwa chiwalo cha nhambiko ya gehile, na iyage kwa chiwalo cha nhambiko ya kulakazwa.
LEV 5:8 Kozigala ng'hunda azo kwa mtambika, na heye mtambika koilavya imwe iwe nhambiko ya gehile kwa kuipobosola singo ne kusa mutwi.
LEV 5:9 Honhu ha danda ya nhambiko ya gehile, koimizila hafungo ha honhu ha kulavila nhambiko na ila iyage koikamila hanyi hali chikalilo cha honhu ha kulavila nhambiko. Ayo ndo nhambiko ya gehile.
LEV 5:10 Hamba koilavya ila ng'hunda ya keli iwe nhambiko ya kulakazwa kwa chiwalo cha utaguso. Mtambika komditila uhanyisi munhu ayo kwa chiwalo cha gehile goyaditile, na heye kolechelwa.
LEV 5:11 “Wone yolemwela kulavya ng'hunda mbili za kisolo ama za kufujigwa kota nhambiko ya heye ya gehile goyaditile, lelo kochigala utimbo unojile kilo imwe. Ila howika mafuta ne ubani kwa vila ndo nhambiko ya gehile.
LEV 5:12 Komigalila mtambika na mtambika kohola utimbo awo unojile chiganza chimwe na kulakaza mchanya ha honhu ha kulavila nhambiko kota honhu ha kukumbuchila, hamwe na nhambiko zoyalingulavilwa Mkulu Nguluwi kwa chiluli. Ayo ndo nhambiko ya gehile.
LEV 5:13 Lelo mtambika komditila uhanyisi ayo munhu kwa chiwalo cha gehile, na heye kolechelwa. Utimbo usigale wowa wa heye mtambika kota vyoilinguditigwa kuwala nhambiko ya nyhule.”
LEV 5:14 Mkulu Nguluwi nakamlonjela Musa,
LEV 5:15 “Wone munhu yoneche kangudita gehile ne kunuwila kuwala kuleka kulavya vinhu vyelile vyoyalingulavilwa Mkulu Nguluwi, komigalila ing'holo ilume lilihela nongwa kulawa kuli chilundo. Ing'holo ilume lyopimigwa kwa kuwinza chipimilo cha sendi za ihema lya Nguluwi. Ayo ndo nhambiko ya nongwa.
LEV 5:16 Ayo munhu kahi kolipizila vinhu vyoyalechile kulavya kuwala vinhu vyelile na konjezela honhu ha kahano ha vinhu vya heye na kumha mtambika. Lelo mtambika komditila uhanyisi kwa chiwalo cha gehile kwa alyo ing'holo ilume liwele nhambiko ya nongwa, na heye kolechelwa.
LEV 5:17 “Munhu yoneche wone yodita gehile ne kunuwila kwa kubena mzilo woneche wa Mkulu Nguluwi, heye kana nongwa na kogazigwa kwa chiwalo cha nongwa za heye.
LEV 5:18 Komigalila mtambika ing'holo ilume lilihela nongwa kuli chilundo ama kuguligwa kwa sendi zilingiwhana na lila ing'holo kwa nhambiko ya nongwa. Na mtambika komditila uhanyisi kwa nongwa yoyaditile ne kunuwila na heye kolechelwa.
LEV 5:19 Ayo ndo nhambiko ya nongwa, kukomya heye kana nongwa hali Mkulu Nguluwi.”
LEV 6:1 Mkulu Nguluwi nakamlonjela Musa,
LEV 6:2 “Wone munhu yoneche nakadita gehile na kumhinduka Mkulu Nguluwi kwa kumhada yalihabehi na heye kuwala ng'hano ama honhu ha yoyawichilwe, ama kumboka ama kumbunza miyage,
LEV 6:3 ama wone yalokote chinhu chajilile, nakalonga kota nahachiwene, ama nakelaha udesi kwa choneche chiwelenguwadita wanhu wawe na gehile,
LEV 6:4 munhu ayo loyowa yodita gehile na kuwa na nongwa, imgana yahilule choyahizile ama choyapatile kwa kubunza, ama ng'hano yoyapegwe, ama chinhu chajilile choyachiwene,
LEV 6:5 ama choneche choyelahile kwa udesi. Kohilusa chila chinhu chenele na konjeza honhu ha kahano kwa yula yoyabunzigwe zuwa lila du loyovizela nongwa ya heye.
LEV 6:6 Hamba komigalila mtambika ing'holo ilume ama ipongo lilihela nongwa yamlavile Mkulu Nguluwi nhambiko ya nongwa, ama kuguligwa kwa sendi zilingiwhana na lila ing'holo kwa nhambiko ya nongwa.
LEV 6:7 Mtambika komditila uhanyisi hali Mkulu Nguluwi, na heye kolechelwa gehile goyaditile.”
LEV 6:8 Mkulu Nguluwi nakamlonjela Musa,
LEV 6:9 “Walonjele Aluni na walelwa wa heye ulonzi awu, ‘Aga ndo malajizo galinguwala nhambiko ya kulakazwa. Nhambiko ya kulakazwa yowa mchiluli mchanya mwa honhu ha kulavila nhambiko nechilo yeng'ha mbaka mitondo na chiluli chikolezwe, chileche kuzima.
LEV 6:10 Hamba mtambika vyonayali yavalile ivalo lya heye lya kitani na lupati lwa heye lwa kitani kohola mivu ja yila nhambiko ya kulakazwa kwa chiluli kulawa hali honhu ha kulavila nhambiko na kujiwika hafungo ha honhu ha kulavila nhambiko.
LEV 6:11 Hamba kovala mivalo jinji ja heye na kojihilika ajila mivu honhu hawele habaguligwe kunze mwa kambi hali honhu hanojile.
LEV 6:12 Chiluli cha honhu ha kulavila nhambiko changuganigwa chilutilile kwaka, na hachiganigwe kuzimigwa. Chila zuwa mitondo mtambika kowika ngodi hali chiluli acho na mchanya mwake kowika nhambiko za kulakazwa, yang'hali lakaza mafuta ga igongolo lya nhambiko ya kikala goya.
LEV 6:13 Chiluli cholutilila kwaka mazuwa gose hali honhu ha kulavila nhambiko ne kuzimigwa.
LEV 6:14 “ ‘Aga ndo malajizo galinguwala nhambiko ya nyhule. Walelwa wa Aluni womlavila Mkulu Nguluwi nhambiko ayo kumwando kwa honhu ha kulavila nhambiko.
LEV 6:15 Yumwe wa watambika kohola chiganza chimwe cha utimbo unojile wa nhambiko ya nyhule hamwe na mafuta ga mzeituni na ubani weng'ha na kuvilakaza hali honhu ha kulavila nhambiko kota honhu ha kukumbuchila, leka kunhunyhilila kunojile kumnojeze Mkulu Nguluwi.
LEV 6:16 Utimbo unojile usigale wolya Aluni na walelwa wa heye watambika ne kuwichigwa usaso. Wolya hali honhu helile, hali lugagala lwa ihema lya Nguluwi.
LEV 6:17 Uleche kubanichigwa hamwe na usaso. Ndiwapa hewo honhu aho kulawa nhambiko ilavigwe kwa chiluli. Ayo ndo nhambiko yelile ng'hatu kota vyozili nhambiko za gehile na nhambiko za nongwa.
LEV 6:18 Walelwa walume wa Aluni ndo waliyeka wakundigwe kulya honhu aho kota vyoilajizwe mazuwa gose kulawa kuli nhambiko yalingulavilwa Mkulu Nguluwi kwa chiluli. Imgana munhu yawe yelile kuweza kudoliza vinhu avyo.’ ”
LEV 6:19 Mkulu Nguluwi nakamlonjela Musa,
LEV 6:20 “Zuwa lya kubakalizwa mafuta Aluni na walelwa wa heye wanguganigwa kumlavila Mkulu Nguluwi nhambiko ya nyhule ya kilo imwe ya utimbo unojile kota nhambiko ya chila zuwa, nusu imwe ya utimbo awo koilavya mitondo na nusu iyage matinazo.
LEV 6:21 Utimbo awo wohanzigwa na mafuta na kubanichigwa migaye, hamba kougala uwele mvipuli na kumlavila Mkulu Nguluwi kota nhambiko ya nyhule, na unhunyhililo wa nhambiko ayo womnojeza Mkulu Nguluwi.
LEV 6:22 Mtambika yawele mlelwa wa Aluni, yawele yabakalizwe mafuta kibata mijito ja heye komlavila Mkulu Nguluwi nhambiko ayo, alyo ndo ilajizo lya mazuwa gose. Nhambiko yeng'ha yolakazwa.
LEV 6:23 Nhambiko yoneche ya nyhule ilavigwe na mtambika yolakazwa yeng'ha, haiwa ya kulya hebu.”
LEV 6:24 Mkulu Nguluwi nakamlonjela Musa,
LEV 6:25 “Mlonjele Aluni na mwanage kota aga ndo malajizo ga nhambiko kuwala nhambiko ya gehile. Honhu hala hawele igongolo lya nhambiko ya kulakazwa hudumulilwa singo, ndo honhu holidumuligwa singo igongolo lya nhambiko ya gehile hali Mkulu Nguluwi. Ayo ndo nhambiko yelile ng'hatu.
LEV 6:26 Mtambika yawelengulavila nhambiko ayo ndo yolya. Yolika honhu helile, kuli lugagala lwa ihema lya Nguluwi.
LEV 6:27 Choneche chidoliza iwunde alyo chowa chelile, ivalo lyoneche wone limizilwe danda ya nhambiko ayo, lelo ivalo alyo lihovujigwe hali honhu helile.
LEV 6:28 Miwunde ja nhambiko ayo wone jitelechigwe mchiya, chiya acho chotuligwa. Ila wone chinhu acho ndo cha shaba, lelo chokwanguligwa na kuhovujigwa goya kwa mazi.
LEV 6:29 Walingukundigwa kulya ndo walume wa lukolo lwa watambika waliyeng'ha, ayo ndo nhambiko yelile ng'hatu.
LEV 6:30 Ila kota danda ya nhambiko yoneche ya gehile igaligwa mgati mwa ihema lya Nguluwi leka kudita uhanyisi hali honhu helile, nhambiko ayo hailinguganigwa kuligwa ila ilakazwe kwa chiluli.”
LEV 7:1 “Aga ndo malajizo galinguwala nhambiko ya nongwa. Nhambiko ayo ndo yelile ng'hatu.
LEV 7:2 Igongolo lya nhambiko ya nongwa lyodumuligwa singo honhu hojilingudumuligwa singo migongolo ja nhambiko ya kulakazwa, na danda yoboholigwa hali honhu ha kulavila nhambiko banzi zeng'ha.
LEV 7:3 Mafuta geng'ha na mafuta ga mchila na gala mafuta galingugubika mitumbu golavigwa,
LEV 7:4 na zila figo mbili hamwe na mafuta ga zila figo gawele mchuno na hala honhu hanojile ng'hatu ha chini.
LEV 7:5 Mtambika kovilakaza hali honhu ha kulavila nhambiko kota nhambiko yalingulavilwa Mkulu Nguluwi kwa chiluli. Ayo ndo nhambiko ya nongwa.
LEV 7:6 Walingukundigwa kulya nhambiko ayo ndo walume wa lukolo lwa watambika wali yeng'ha, ayo ndo nhambiko yelile ng'hatu. Yolika hali honhu helile.
LEV 7:7 Malajizo aga ndo gamwe kuwala nhambiko ya nongwa na nhambiko ya gehile. Mtambika yalingudita uhanyisi, ayo ndo kolihola iwunde lya nhambiko.
LEV 7:8 Mtambika yalingulavya nhambiko ya kulakazwa ya munhu yunji, kohola igozi lya igongolo lilavigwe.
LEV 7:9 Nhambiko yoneche ya nyhule ibanichigwe mchiko ama msufuliya ama migaye yowa ya mtambika yalinguilavya.
LEV 7:10 Chila nhambiko ya nyhule, iwe ihanzigwe na mafuta ama hebu, yowa ya walelwa wa Aluni na weng'ha wagawilwe kota winji wa hewo vyouwele.
LEV 7:11 “Aga ndo malajizo galinguwala nhambiko za kikala goya ziwele munhu koweza kumlavila Mkulu Nguluwi.
LEV 7:12 Wone munhu yolavya nhambiko yakuta malumbo Nguluwi, lelo koilavya hamwe na mibumunda johajiwichigwe usaso gahanzigwe na mafuta ga mzeituni, mibumunda mizisili jibachigwe mafuta ga mzeituni na mibumunda ja utimbo unojile uhanzigwe na mafuta ga mzeituni.
LEV 7:13 Hamwe na nhambiko ayo ya heye ya kikala goya yakuta malumbo Nguluwi, kochigala mibumunda jiwichigwe usaso.
LEV 7:14 Kwa chiwalo cha mibumunda ajo, komlavila Mkulu Nguluwi ibumunda limwe kulawa chila nhambiko, mibumunda ajo jowa ja heye mtambika yalingubohola danda ya nhambiko za kikala goya hali honhu ha kulavila nhambiko.
LEV 7:15 Iwunde lya nhambiko ayo ya kikala goya lyakuta malumbo Nguluwi, yolika zuwa lilila lilavigwe, holeka ne honhu mbaka mitondo.
LEV 7:16 Ila wone nhambiko ayo ya kikala goya ndo ya kutawiza kilaha ama ya kunuwila, yolika mazuwa gago vyoilavigwa na honhu hasigale hoganigwa kulika zuwa lya keli.
LEV 7:17 Ila miwunde joneche ja nhambiko ayo isigale mbaka zuwa lya kadatu jolakazwa kwa chiluli.
LEV 7:18 Wone iwunde lyoneche lya nhambiko ya kikala goya ilika zuwa lya kadatu, munhu yailavile hokundigwa, ne nhambiko haiwazigwa. Iwunde alyo ndo likokomoka na munhu yolya miwunde alyo, koganigwa kugazigwa.
LEV 7:19 Iwunde lyoneche lidoliza chinhu chikokomoche jileche kulika. Iwunde alyo lyolakazwa kwa chiluli. “Weng'ha welile woweza kulya iwunde
LEV 7:20 lilavigwe nhambiko ya kikala goya kwa Mkulu Nguluwi. Ila munhu yoneche yawele yakokomoche, wone yalye iwunde alyo, kobaguligwa na wanhu wa heye.
LEV 7:21 Munhu yoneche yodoliza chinhu choneche chikokomoche ama chinhu cha munhu chikokomoche ama igongolo likokomoche ama chilumbigwe choneche chikokomoche ndo chilinguzudiza, hamba wone yalye iwunde lya nhambiko ya kikala goya yalavigwe Mkulu Nguluwi, munhu ayo kobaguligwa na wanhu wa heye.”
LEV 7:22 Mkulu Nguluwi nakamlonjela Musa,
LEV 7:23 “Walonjele Waisilaeli ahi. Mleche kulya mafuta ga isenga ama ga ing'holo ama ga mhene.
LEV 7:24 Mafuta ga igongolo lyoneche libagame lilyo ama ga igongolo likopoligwe na igongolo lya kisolo woweza kuwichigwa kwa kugongomanyila mbuli zinji, mleche kulya.
LEV 7:25 Munhu yoneche wone yalye mafuta ga igongolo lilavigwe nhambiko kwa Mkulu Nguluwi kwa chiluli, kobaguligwa na wanhu wa heye.
LEV 7:26 Kahi, mleche kulya danda yoneche ila, iwe ya chideje ama ya igongolo honhu honeche homlingikala.
LEV 7:27 Munhu yoneche wone yalye danda yoneche, kobaguligwa na wanhu wa heye.”
LEV 7:28 Mkulu Nguluwi nakamlonjela Musa,
LEV 7:29 “Walonjele wanhu wa Isilaeli kota munhu yoneche wone yalavye nhambiko ya kikala goya, komha Mkulu Nguluwi honhu ha nhambiko ayo.
LEV 7:30 Komigalila kwa moko ga heye yuye kota nhambiko kwa chiluli. Kochigala mafuta hamwe na mhambaga iwele kokwinula kuchanya kwa ulajilo wa kumlavila nhambiko Mkulu Nguluwi.
LEV 7:31 Mtambika kolakaza mafuta geng'ha hali honhu ha kulavila nhambiko, ila iwunde lya mmhambaga lyowa lya Aluni na wanage watambika.
LEV 7:32 Chima cha kudilo cha igongolo lya nhambiko za hemwe za kikala goya momha mtambika.
LEV 7:33 Chima acho chowa ndo cha walelwa wa mtambika Aluni yalingulavya danda na mafuta ga nhambiko ya kikala goya.
LEV 7:34 Heni, Mkulu Nguluwi, ndiwalajiza wanhu wa Isilaeli wawiche goya iwunde alyo lya mmhambaga liwele ndo lya nhambiko ya kwinula kuchanya na chima acho cha igongolo lya nhambiko za hewo za kikala goya, yapegwe mtambika Aluni na wanage, mina honhu aho wawichilwa awo watambika mazuwa gose.
LEV 7:35 Aho ndo honhu habaguligwe kwa chiwalo cha Aluni na wanage kulawa kuli nhambiko yalingulavilwa Mkulu Nguluwi kwa chiluli, kwaluchila zuwa lowahaguligwe wawe watambika wa Mkulu Nguluwi.
LEV 7:36 Vyowahaguligwe kwa kubakalizwa mafuta, Mkulu Nguluwi nakawalajiza Waisilaeli wawape honhu aho ha nhambiko, ayo yowa ya hewo mazuwa gose.”
LEV 7:37 Lelo ago ndo malajizo galinguwala nhambiko ya kulakazwa na nhambiko ya nyhule na nhambiko ya gehile na nhambiko ya nongwa na nhambiko ya kuwichigwa kwa mijito yelile na nhambiko ya kikala goya.
LEV 7:38 Mkulu Nguluwi nakamha Musa malajizo ago mchidunda cha Sinai zuwa lila navyoyawalonjele Waisilaeli wamigalile nhambiko za hewo, kuchiwala ako Sinai.
LEV 8:1 Mkulu Nguluwi nakamlonjela Musa,
LEV 8:2 “Umcheme Aluni na wanage na uhole ivalo linojile na mafuta ga kubakala na ibuguma lya nhambiko ya gehile na ming'holo milume mili na chidoto cha mibumunda johajiwichigwe usaso.
LEV 8:3 Hamba uwakungajize Waisilaeli weng'ha hali lwizi lwa ihema lya Nguluwi.”
LEV 8:4 Musa nakadita kota vyoyalajizwe na Mkulu Nguluwi. Nakawakungajiza Waisilaeli weng'ha hali lwizi lwa ihema lya Nguluwi.
LEV 8:5 Musa nakawalonjela ahi Waisilaeli weng'ha, “Ayi ndo mbuli iwele Mkulu Nguluwi yoyalajize iditigwe.”
LEV 8:6 Aho Musa nakewegala Aluni na wanage na kuwahovuga kwa mazi.
LEV 8:7 Hamba nakamvaliza Aluni ikanzu na kuliwoha kwa isali, nakamvaliza ijoho, nakamvaliza chizibao na kuchiwoha mchuno mwa heye kwa isali litawigwe goya.
LEV 8:8 Hamba nakamuwika chila chihako cha mmhambaga na kujela azo Ulimu na Sumimu mgati mwa acho chihako cha mmhambaga.
LEV 8:9 Hamba nakamvaliza Aluni chipembelo kumutwi na mchanya mwa chipembelo acho mchihanga nakawika vinoligo vya zahabu, acho ndo chibati chelile, kota Mkulu Nguluwi vyoyamlajize Musa.
LEV 8:10 Hamba Musa nakahola mafuta ga kubakala, nakabakaliza hali ihema lya Nguluwi na vinhu vyeng'ha viwele mgati mwake leka kuvidita viwe vya chiuyeng'ha.
LEV 8:11 Nakamizila honhu ha mafuta aho hali honhu ha kulavila nhambiko mala saba, nakabakaliza mafuta honhu ha kulavila nhambiko na vinhu vyeng'ha na likuwe na chikalilo chake, na kuviwika viwe vya chiuyeng'ha.
LEV 8:12 Ahyo Musa nakamjidila Aluni mafuta kumutwi kwa kumdita yawe wa chiuyeng'ha.
LEV 8:13 Hamba Musa nakawegala wana wa Aluni na kuwavaliza mijoho na kuwawoha misali mchuno, na kuwavaliza kofia kota navyoyalajizwe na Mkulu Nguluwi.
LEV 8:14 Baho du Musa nakaligala ibuguma lya nhambiko ya gehile, na heye Aluni na wanage nawawika moko ga hewo mchanya mwa ibuguma alyo.
LEV 8:15 Musa nakalidumula singo alyo isenga ibuguma, nakahola danda na kubakaliza mbalati zeng'ha za honhu ha kulavila nhambiko kwa chidole cha heye leka kuhadita hawe helile. Hamba nakahola danda isigale kaijida hanyi hali chikalilo cha honhu ha kulavila nhambiko. Ahyo nakaviwika viwe vya chiuyeng'ha kwa kuhaditila uhanyisi.
LEV 8:16 Hamba, Musa nakahola mafuta geng'ha gawele mmitumbu na honhu hanojile ng'hatu ha chini hamwe na figo zeng'ha mbili na mafuta na kuvilakaza hali honhu ha kulavila nhambiko.
LEV 8:17 Ila iwunde lya ibuguma alyo na igozi na midohe jake, nakavilakaza kwa chiluli kunze mwa kambi kota Musa vyoyalajizwe na Mkulu Nguluwi.
LEV 8:18 Hamba Musa nakaligala ing'holo ilume lya nhambiko ya kulakazwa. Aluni na wanage nawawika moko ga hewo mchanya mmutwi mwa ing'holo alyo.
LEV 8:19 Musa kalidumula singo na danda ya ing'holo alyo nakabohola hali honhu ha kulavila nhambiko banzi zeng'ha.
LEV 8:20 Nakalidumula alyo ing'holo ilume kuli vipuli, Musa nakavilakaza hamwe na mutwi wa ing'holo na mafuta gake.
LEV 8:21 Vyonayahovuje mitumbu na magulu kwa mazi na kahi Musa nakalilakaza ing'holo ilume lyeng'ha hali honhu ha kulavila nhambiko kota nhambiko ya kulakazwa. Ayo ndo nhambiko ilingulavigwa kwa Mkulu Nguluwi kwa chiluli, iwele na unhunyhililo unojile wa kumnojeza Mkulu Nguluwi. Musa nakadita kota vyoyalajizwe na Mkulu Nguluwi.
LEV 8:22 Hamba nakaligala ing'holo ilume liyage, kwa chiwalo cha kuwawika kwa mijito yelile. Aluni na wanage nawawika moko ga hewo mchanya mwa mutwi wa ing'holo alyo.
LEV 8:23 Musa nakalidumula singo. Nakahola danda ya ing'holo alyo na kumbakaliza Aluni kuli ikutu lyake lya kudilo na chidole chikuluwawo moko wa kudilo na chidole chikuluwawo cha mgulu wa heye wa kudilo.
LEV 8:24 Wana wa Aluni nawo nawoya, Musa nakawabakaliza chasi cha danda kuli makutu ga hewo ga kudilo na kuli vidole vikuluwawo vya kuli moko ga hewo ga kudilo na kuli vidole vikuluwawo vya magulu ga hewo ga kudilo. Danda yinji nakaibohola hali honhu ha kulavila nhambiko banzi zeng'ha.
LEV 8:25 Hamba nakosa mafuta gake na mchila uwele na mafuta na mafuta geng'ha gawele kuli mitumbu na honhu hanojile ng'hatu ha chini na figo mbili na mafuta gake na chima cha kudilo cha ing'holo alyo ilume.
LEV 8:26 Hamba kuli lila likowe lya mibumunda liwichigwe hali Mkulu Nguluwi nakalavya ibumunda limwe lyohaliwichigwe usaso, ibumunda limwe liwele na mafuta na ibumunda limwe lizisili, vyeng'ha nakaviwika mchanya mwa vihande vya mafuta na chila chima cha kudilo.
LEV 8:27 Musa nakaviwika kuli moko ga Aluni na wana wa heye, na hewo nawenula kuchanya kwa ulajilo wa kumlavila nhambiko Mkulu Nguluwi.
LEV 8:28 Hamba Musa nakavihola vinhu avyo kulawa kuli moko ga hewo na kuvilakaza mchanya mwa honhu ha kulavila nhambiko hamwe na nhambiko ya kulakazwa. Ayi ndo nhambiko ya kuwichigwa kwa mijito yelile, iwele na unhunyhililo unojile ulingumnojeza Mkulu Nguluwi, ndo nhambiko ilingulavigwa kwa chiluli.
LEV 8:29 Hamba Musa nakahola ila mhambaga na kwinula kuchanya kwa ulajilo kwa kumlavila nhambiko Mkulu Nguluwi. Honhu aho ha lila ing'holo ilume lya kuwichigwa kwa mijito yelile ndo lya Musa, kota vyoyalajizwe na Mkulu Nguluwi.
LEV 8:30 Hamba Musa nakahola mafuta ga kubakaliza na danda kulawa kuli honhu ha kulavila nhambiko nakawamizila Aluni na wana wa heye na mivalo ja hewo kahi. Ahyo Musa nakamdita Aluni yawe wa chiuyeng'ha, heye hamwe na wanage kahi na mivalo ja hewo.
LEV 8:31 Musa nakawalonjela Aluni na wana wa heye, “Mtogose lila iwunde hali lwizi lwa ihema lya Nguluwi, mulye baho hamwe na ibumunda kulawa kuli likowe liwele na nhambiko ya kuwichigwa kwa mijito yelile. Mdite kota vyondajizwe na Mkulu Nguluwi, nakalonga, ‘Honhu aho holika na Aluni na wana wa heye.’
LEV 8:32 Iwunde lyoneche ama ibumunda lyoneche lisigale lyoganigwa kulakazwa kwa chiluli.
LEV 8:33 Hamlawa kunze mwa lwizi lwa ihema lya Nguluwi kwa mhela weng'ha wa mazuwa saba, mina mbaka mhela wa hemwe wa kuwichigwa kwa mijito yelile houmala, mhela wa kuwichigwa kuli mijito yelile wohola mazuwa saba.
LEV 8:34 Mkulu Nguluwi nakalajiza tudite kota navyotuditile lehano leka tuwaditile hemwe uhanyisi.
LEV 8:35 Mowa baho kuli lwizi lwa ihema lya Nguluwi nemisi na nechilo kwa mhela wa mazuwa saba, kuno mdita mbuli zoyalajize Mkulu Nguluwi. Lomdita vinji mobagama. Ahyo ndo vyondajizwe na Mkulu Nguluwi.”
LEV 8:36 Lelo Aluni na wana wa heye nawadita mbuli zeng'ha zoyalajize Mkulu Nguluwi kwa kukolela Musa.
LEV 9:1 Zuwa lya nane, Musa nakamchema Aluni na wanage hamwe na wasekulu wa Isilaeli.
LEV 9:2 Musa nakamlonjela Aluni, “Uhole isenga ibuguma kwa chiwalo cha nhambiko ya gehile na ing'holo ilume kwa chiwalo cha nhambiko ya kulakazwa, migongolo jeng'ha jiwe jilihela nongwa. Hamba walavye nhambiko hali Mkulu Nguluwi.
LEV 9:3 Walonjele Waisilaeli kota wahole ipongo limwe kwa chiwalo cha nhambiko ya gehile, na isenga ilogota limwe na ing'holo lyana limwe jeng'ha jiwe ja mwaka umwe na jilihela nongwa kwa chiwalo cha nhambiko ya kulakazwa,
LEV 9:4 isenga ibuguma limwe na ing'holo ilume limwe kwa chiwalo cha nhambiko ya kikala goya, womlavila Mkulu Nguluwi nhambiko ya nyhule ihanzigwe na mafuta, ndo mina lehano Mkulu Nguluwi kokulawilani.”
LEV 9:5 Waisilaeli nawegala vyeng'ha avyo hali ihema lya Nguluwi kota Musa vyoyawalonjele Waisilaeli weng'ha nawaluta kwima hali Mkulu Nguluwi.
LEV 9:6 Musa nakawalonjela, “Awo ndo ulonzi uwele Mkulu Nguluwi nakawalonjela waligongomanye leka ukulu wa heye woneche kwa hemwe.”
LEV 9:7 Aho Musa nakamlonjela Aluni, “Ulute hali honhu ha kulavila nhambiko, ulavile aho nhambiko ya gehile na nhambiko ya kulakazwa na kudita uhanyisi kwa chiwalo cha hegwe na kwa chiwalo cha wanhu. Ulavye nhambiko ya wanhu na kudita uhanyisi kwa chiwalo cha hewo kota Mkulu Nguluwi vyoyalajize.”
LEV 9:8 Lelo Aluni nakaluta habehi na honhu ha kulavila nhambiko, nakalidumula singo alila isenga ibuguma ilogota yalilavile liwe nhambiko ya gehile ga heye yuye.
LEV 9:9 Wana wa Aluni nawamigalila danda, na heye nakadoliza na chidole cha heye mli danda ayo na nakabakaliza mbalati za honhu ha kulavila nhambiko. Danda isigale nakajida hanyi hali chikalilo cha honhu ha kulavila nhambiko.
LEV 9:10 Ila mafuta na figo na honhu hanojile ng'hatu ha chini kulawa kuli nhambiko ya gehile, nakavilakaza vyeng'ha hali honhu ha kulavila nhambiko kota Mkulu Nguluwi vyoyamlajize Musa.
LEV 9:11 Ila lila iwunde na igozi nakalilakaza kwa chiluli kunze mwa kambi.
LEV 9:12 Hamba Aluni nakalidumula singo igongolo lya nhambiko ya kulakazwa. Wanage nawamgalila danda, na heye nakabohola hali honhu ha kulavila nhambiko banzi zeng'ha.
LEV 9:13 Hamba nawamigalila nhambiko ya kulakazwa, vipuli hamwe na mutwi, na heye nakavilakaza hali honhu ha kulavila nhambiko.
LEV 9:14 Nakahovuga mitumbu na magulu na kujilakaza hamwe na yila nhambiko ya kulakazwa hali honhu ha kulavila nhambiko.
LEV 9:15 Hamba Aluni nakaigala nhambiko kumwando kwa wanhu. Nakaihola mhene ya nhambiko ya gehile, nakaidumula singo na kulavya nhambiko ya gehile, kota vyoyaditile kwa lila igongolo lilongole.
LEV 9:16 Hamba nakaihejeza kumwando yila nhambiko ya kulakazwa nakalavya nhambiko ayo kota vyoitagusigwe.
LEV 9:17 Hamba nakaihejeza kumwando nhambiko ya nyhule na kujela chiganza chimwe na kulakaza hali honhu ha kulavila nhambiko hamwe na nhambiko ya kulakazwa kwa chila mitondo.
LEV 9:18 Hamba Aluni nakalidumula singo kahi isenga ibuguma na lila ing'holo ilume lya nhambiko ya kikala goya kwa chiwalo cha wanhu. Wanage nawamigalila danda na kubohola honhu ha kulavila nhambiko banzi zeng'ha.
LEV 9:19 Mafuta ga isenga ibuguma alyo na ing'holo ilume na mchila wa ing'holo na mafuta gagubiche mitumbu na figo na honhu hanojile ng'hatu ha chini,
LEV 9:20 ahyo nawawika avyo mchanya mwa mhambaga, na heye nakavilakaza hali honhu ha kulavila nhambiko.
LEV 9:21 Ila zila mbavu na chila chima cha kudilo, Aluni nakavinula mchanya navyo viwe ulajilo wa kumlavila Mkulu Nguluwi, kota Musa vyoyalajize.
LEV 9:22 Aluni vyoyasindile kulavya nhambiko zeng'ha, nhambiko ya gehile na nhambiko ya kulakazwa na nhambiko za kikala goya, nakawenulila wanhu moko na kawatambichiza, hamba nakedulika hanyi.
LEV 9:23 Hamba Musa na Aluni nawenjila mli ihema lya Nguluwi. Navyowalawile kunze, nawawatambichiza wanhu na ukulu kwa Mkulu Nguluwi nawoneka kwa wanhu weng'ha.
LEV 9:24 Mkulu Nguluwi nakadulisa chiluli, nachilakaza nimwa nhambiko ya kulakazwa na vihande vya mafuta gawele hali honhu ha kulavila nhambiko. Wanhu weng'ha vyowawene chila chiluli nawatowa iyowe na kufugama.
LEV 10:1 Nawo Nadabu na Abihu wawele ndo wana wa Aluni, nawahola chila yumwe chifunyizi, nawawika chiluli na ubani, nawamlavila Mkulu Nguluwi chiluli chiwele hachikundigwe na hambe yawalajize hewo.
LEV 10:2 Lelo chiluli chilawila hali Mkulu Nguluwi, nachiwalakaza awo wasongolo, na wabagama hali heye.
LEV 10:3 Aho, Musa nakamlonjela Aluni, “Kwa mbuli alyo Mkulu Nguluwi nakakulajila chilingulapa chila choyalonjile, ‘Ndochilajila kota nda yelile hali wala wawele habehi na heni, ndotogoligwa hali wanhu weng'ha!’ ” Aluni nakanyamalila tulu.
LEV 10:4 Lelo Musa nakawachema Mishaeli na Elisafani, wanage Usieli, mhaza mdodo wa Aluni, nakawalonjela woye kusa mitufi ja wang'holozawo kuli ihema lya Nguluwi na kujihilika kunze mwa kambi.
LEV 10:5 Nawahola mitufi ja wang'holozawo na kujihilika kunze mwa kambi kuno wawele wavalile mikanzu ja hewo, kota Musa vyoyawalonjele.
LEV 10:6 Hamba Musa nakamlonjela Aluni na wanage, Eleasali na Itamali, “Mleche kuleka mnvili za hemwe zizuzumuche na mleche kudega mivalo ja hemwe kwa kulombocheza, wone hamditile ahyo, mobagama na kuwagalila wanhu weng'ha kuzudila kwa Mkulu Nguluwi. Ila wang'holozenu wawele ndo Waisilaeli weng'ha, wanguweza kulombocheza kwa chiwalo cha chiluli acho choyegale Mkulu Nguluwi.
LEV 10:7 Mleche kulawa kunze kwa lwizi lwa ihema lya Nguluwi, wone mdite ahyo mobagama kwa vila mafuta ga kubakala ga Mkulu Nguluwi ga mchanya mwa hemwe.” Aluni na wanage nawadita kota Musa vyoyalonjile.
LEV 10:8 Mkulu Nguluwi nakalongasa na Aluni, nakamlonjela,
LEV 10:9 “Vyomkwinjila mgati mwa ihema lya Nguluwi, hegwe hamwe na wanago mleche kunwa divai ne ujimbi woneche. Wone munwe mobagama. Ilajizo ali lyowa lya mazuwa gose kuli lulelo lwa hemwe.
LEV 10:10 Hamba mwanguganigwa mbagule kuli mbuli za chiuyeng'ha na zila mbuli za hihi hela na kuli zila mbuli zikokomoche na zelile.
LEV 10:11 Hegwe kowalangusa Waisilaeli gala malajizo yalonjile Mkulu Nguluwi kwa kukolela Musa.”
LEV 10:12 Musa nakamlonjela Aluni na wanage waponile, Eleasali na Itamali, “Mhole hala honhu ha nhambiko ya nyhule hasigale kulawa kuli nhambiko yalingulavilwa Mkulu Nguluwi kwa chiluli, mgongomanye ibumunda lilihela usaso na mulye habehi na honhu ha kulavila nhambiko, kwa vila ndo helile ng'hatu.
LEV 10:13 Kolya hali honhu helile kwa vila ayo ndo hachi ya hegwe hamwe na wanago kulawa kuli nhambiko yalingulavilwa Mkulu Nguluwi kwa chiluli. Alyo ndo ilajizo.
LEV 10:14 Ila mhambaga yinuligwe kuchanya kota ulajilo wa kumlavila Mkulu Nguluwi na chima chilingulavigwa nhambiko, mwanguweza kulya honhu honeche helile. Kolya hegwe na wana wa hegwe walume na wadala. Vinhu avyo kupegwa kota hachi ya hegwe na wapondigwe na hegwe kulawa nhambiko ya kikala goya ya wanhu wa Isilaeli.
LEV 10:15 Chila chima chilavigwe na mhambaga ya nhambiko ya kwinula kuchanya, wovigala hamwe na vihande vya mafuta na nhambiko ilavigwe kwa Mkulu Nguluwi kwa chiluli. Ahyo vyowa vya hegwe hamwe na wanago, ndo hachi ya hemwe mazuwa gose kota Mkulu Nguluwi vyoyalajize.”
LEV 10:16 Lelo Musa nakauza chiwalo cha mhene ilavigwe nhambiko ya gehile, hamba nakavizela kota nailakazwa. Ahyo kawakalalila ng'hatu Eleasali na Itamali wawele ndo wana wa Aluni waponile, nakawauza,
LEV 10:17 “Lekachoni hamdile nhambiko ya gehile hali honhu helile? Kwa vila ayo ndo chinhu chelile, na mwali mpegwe ayo leka kusa nongwa ya Waisilaeli weng'ha na kuwaditila uhanyisi hali Mkulu Nguluwi.
LEV 10:18 Kahi, kwa vila danda ya nhambiko haigaligwe mgati mwa honhu helile, ndangukomya yangoneka namganigwa kulya mgati mwa honhu helile kota vyondajize.”
LEV 10:19 Aluni nakamlonjela Musa, “Ulole, lehano walavya nhambiko ya hewo ya gehile na nhambiko ya kulakazwa hali Mkulu Nguluwi, hamba ahyo mbuli ayi ifika heni! Ahyo nandiwe ndile yila nhambiko ya gehile aga lehano, ndaze, naikundigwe hali Mkulu Nguluwi?”
LEV 10:20 Musa vyoyahuliche ago, nakakunda.
LEV 11:1 Mkulu Nguluwi nakawalonjela Musa na Aluni,
LEV 11:2 “Muwalonjele Waisilaeli ahi,
LEV 11:3 ‘Hali migongolo jeng'ha hano muisi, mkundizwa kulya igongolo lyoneche liwele na kwato zigawanuche honhu heli na lilinguhelula.
LEV 11:4 Ila mleche kulya igongolo lyoneche liwelenguhelula ila kwato zake hazigawanuche honhu heli, ama liwele kwato zake zigawanuka ila hambe lihelule. Mleche kulya ngamiya, alyo lyanguhelula ila kwato zake hazigawanuche honhu heli. Kwa hemwe alyo ndo likokomoka.
LEV 11:5 Mleche kulya pelele, alyo lyanguhelula ila kwato za alyo hazigawanuche, kwa hemwe alyo ndo likokomoka.
LEV 11:6 Sungula mleche kulya, alyo lyanguhelula ila kwato za alyo hazigawanuche, kwa hemwe alyo ndo likokomoka.
LEV 11:7 Igubi mleche kulya, lina kwato zigawanuka ila hambe lihelule, kwa hemwe alyo ndo likokomoka.
LEV 11:8 Ila migongolo ajo ndo jikokomoka mleche kulya miwunde ja ajo migongolo na mleche kudoliza mitufi jawo.
LEV 11:9 “ ‘Somba yoneche ya mbahali ama kulwanda iwele na msepe na ukalagatu, mwanguweza kulya.
LEV 11:10 Ila choneche chilingikala mbahali ama kulwanda, chilihela msepe ne ukalagatu, ndo vilumbigwe vyeng'ha vilingutambala mmazi na vilumbigwe viyage vyeng'ha vilingikala mmazi ndo vizudizo kwa hemwe.
LEV 11:11 Vilumbigwe avyo vyowa vizudizo kwa hemwe. Mleche kulya migongolo ajo ne kudoliza mitufi jawo kwa vila ndo vizudizo.
LEV 11:12 Choneche chilingikala mmazi chilihela msepe ne ukalagatu ndo vizudizo kwa hemwe.
LEV 11:13 “ ‘Videje vyeng'ha ndo vizudizo kwa hemwe. Mleche kulya ikungule na ndapo na ng'hwazi
LEV 11:14 na chilutema na chila nhanzi ya kozi
LEV 11:15 na chila nhanzi ya ibondwa
LEV 11:16 na mbuni na chimtolo na idudumizi na chila nhanzi ya chilutema
LEV 11:17 na ituwe na mnandi na ituwe ikulu
LEV 11:18 na mumbi na chingowe na mdeli
LEV 11:19 na isakulang'hola na jila jeng'ha jiwhanile na ikoyogo na chigong'honda na ipalabutwa.
LEV 11:20 “ ‘Minhu jeng'ha jiwele na mabawa na jiwelengujenda kwa magulu gane, ajo ndo uzudizo kwa hemwe.
LEV 11:21 Ila jinji jiwele na mabawa na jangujenda kwa magulu gane ga kunyonzochela misanga moweza kulya.
LEV 11:22 Ajo ndo jila jiwhanile na nzije na jila jiwhanile na misenene na jila jiwhanile na ndede na jila jiwhanile na inwanwachi.
LEV 11:23 Ila minhu jiyage jeng'ha jiwele na mabawa na magulu gane ndo uzudizo kwa hemwe.
LEV 11:24 “ ‘Kudoliza migongolo jinji jangumdita munhu yawe yakokomoche, yoneche yodoliza mitufi jawo kowa yakokomoche mbaka matinazo.
LEV 11:25 Wone munhu yapiche honhu ha mitufi ja heye kowa yakokomoche mbaka matinazo, na mivalo ja heye yanguganigwa jihovujigwe.
LEV 11:26 Munhu yoneche yodoliza igongolo liwele na kwato zigawanuche ila hambe lihelule, munhu ayo kowa yakokomoche.
LEV 11:27 Migongolo jeng'ha jilingujenda kwa viganza vya hewo jiwele na magulu gane, ndo jikokomoka kwa hemwe, na yoneche yodoliza itufi lya igongolo kota alyo kowa yakokomoche mbaka matinazo.
LEV 11:28 Munhu yoneche yopika itufi, kowa yakokomoche mbaka matinazo, na heye kohovuga ivalo lya heye. Ajo ndo jikokomoka kwa hemwe.
LEV 11:29 “ ‘Vilumbigwe vilingutambala viyage ndo vikokomoka kwa hemwe, chilukwili na igule, jila jiwhanile na limdunhu,
LEV 11:30 igugulu lidodo na ichenje na jimdusu na igologonzi na liluwivu.
LEV 11:31 Ajo jeng'ha jilingutambala ndo jikokomoka kwa hemwe na yoneche yodoliza mitufi ajo, kowa yakokomoche mbaka matinazo.
LEV 11:32 Wone mitufi ja vilumbigwe avyo jogwila chinhu choneche, chiwe chinhu cha mbao ama ivalo ama igozi ama igunila ama chinhu chinji chilingutumika kwa choneche chila, chinhu acho chowa chikokomoche mbaka matinazo. Lelo kuchidita chiwe hachikokomoche, yanguganigwa kuchihovuga kwa mazi, hamba chowa chelile.
LEV 11:33 Wone itufi lya heye ligwile chinhu cha ilongo, lelo chinji chiwele mgati mwa chinhu acho ndo chikokomoka na changuganigwa chituligwe.
LEV 11:34 Chilyo ama chakunwa chinji chiwele mgati mwa chinhu acho chowa chikokomoka.
LEV 11:35 Chila chinhu chochigwililwa na chipuli choneche cha mitufi ajo chowa chikokomoka. Wone ndo itanuli ama chiko changuganigwa chibenigwe. Vyowa vikokomoka na vyolutilila kuwa vikokomoka kwa hemwe.
LEV 11:36 Ahyo, ideho ama nzasa ya mazi vyowa havikokomoche. Ila wone munhu yenjile na kudoliza itufi, kowa yakokomoche.
LEV 11:37 Na chipuli choneche cha itufi hochigwila nyhadikwa za kunyala, nyhadikwa azo zowa hazikokomoche.
LEV 11:38 Ila wone nyhadikwa azo naziwichigwa mli mazi na choneche cha mitufi kuzigwila, lelo nyhadikwa azo ndo zikokomoka kwa hemwe.
LEV 11:39 “ ‘Hanga igongolo lyoneche likundigwe kulya libagame lilyo, munhu yoneche yodoliza itufi alyo, kowa yakokomoche mbaka matinazo.
LEV 11:40 Munhu yoneche yolya vipuli vya itufi alyo kohovuga mivalo ja heye na kowa yakokomoche mbaka matinazo. Na yoneche yopika itufi alyo, kohovuga ivalo lya heye, na heye kowa yakokomoche mbaka matinazo.
LEV 11:41 “ ‘Chilumbigwe chinji chilingutambala muisi ndo uzudizo kwa hemwe, ndangukomya mleche kulya.
LEV 11:42 Chila chilingutambala kwa munda na chila chilingujenda kwa magulu gane ama chilingujenda kwa magulu menji, mina ndo vyeng'ha vilingutambala mmisanga, ndangukomya mleche kulya kwa mina ndo uzudizo kwa hemwe.
LEV 11:43 Ahyo mleche kiditila uzudizo kwa kulya vilumbigwe vilingutambala leka mleche kuwa mkokomoche kwa kukolela avyo.
LEV 11:44 Kwa vila heni Mkulu Nguluwi, mbele Nguluwi wa hemwe, miwiche chiuyeng'ha na muwe mwelile kwa vila heni nda yelile. Mleche kiwika muwe mkokomoche kwa chinhu choneche chilingitambala mchanya mwa isi.
LEV 11:45 Kwa vila heni nda Mkulu Nguluwi ndiwalavile kuli isi ya Misili leka ndiwe Nguluwi wa hemwe, ahyo muwe mwelile kwa vila heni nda yelile.
LEV 11:46 “ ‘Ahyo lelo, aga ndo malajizo galingulapa migongolo na videje na chila chilumbigwe chiwele mmazi na chila chilingutambala muisi,
LEV 11:47 leka kubagula chinhu chikokomoche na hachiwele chikokomoche, chilinguligwa na hambe chiligwe.’ ”
LEV 12:1 Mkulu Nguluwi nakamlonjela Musa,
LEV 12:2 “Walonjele wanhu wa Isilaeli ahi, ‘Mdala wone yawe na himila, na wone nakaponda mwana mlume, kowa yakokomoche kwa mhela wa mazuwa saba kota mazuwa ga heye galinguwala mbuli za chidala kota vyoziwele.
LEV 12:3 Mwana ayo kokwinjila ikumbi kuli zuwa lya heye lya nane.
LEV 12:4 Hamba mamo wa mwana ayo kolutilila kuwa yakokomoche kwa chiwalo cha mbuli za chidala kwa mhela wa mazuwa makumi gadatu na zidatu. Mhela awo yaleche kudoliza choneche chiwichigwe chelile ne kwinjila kuli ihema lya Nguluwi mbaka zuwa lya kwelizwa kwa heye vyoyikwenela.
LEV 12:5 Ila wone yaponde mwana mdala, lelo kowa yakokomoche kwa mhela wa juma mbili kota vyoili vyoyowa kuli zuwa za mbuli za chidala vyozili. Kolutilila kwelizwa kwa mhela wa mazuwa makumi sita na sita.
LEV 12:6 “ ‘Mazuwa ga kwelizwa kwa heye hogokwenela, yawe yapondile mwana mlume ama mdala, komigalila mtambika hali lwizi lwa ihema lya Nguluwi ing'holo lyana lya mwaka umwe kwa chiwalo cha nhambiko ya kulakazwa na ng'hunda ya kisolo ama ng'hunda ya kufujigwa, kwa chiwalo cha nhambiko ya gehile.
LEV 12:7 Mtambika komlavila Mkulu Nguluwi na kumditila uhanyisi. Hamba mdala ayo kowa yelizwe kuli mbuli za chidala. Ago ndo malajizo galingulapa mdala yunji yawele nguponda mwana mlume ama mdala.
LEV 12:8 “ ‘Wone hambe yaweze kulavya ing'holo lyana, lelo kochigala ng'hunda mbili za kufujigwa ama ng'hunda mbili za kisolo, kwa chiwalo cha nhambiko ya kulakazwa na iyage kwa chiwalo cha nhambiko ya gehile. Mtambika komditila mamo ayo uhanyisi, na heye kowa yelile.’ ”
LEV 13:1 Mkulu Nguluwi nakawalonjela Musa na Aluni,
LEV 13:2 “Wone munhu yoneche kowa na kutuna ama chilonda ama baka ama utamwa wa ngozi mlukuli lwa heye, nayoneka kota ndo utamwa wa ngozi ya lukuli, lelo ayo kogaligwa kwa mtambika Aluni ama yumwe wa walelwa wa Aluni, yawele mtambika.
LEV 13:3 Mtambika kohakagula honhu hawele na utamwa, na wone mnvili za honhu aho zigaluka ziwa nzelu, na wone utamwa awo woneche wa mgati mwa ngozi ya lukuli lwa heye, lelo awo ndo utamwa wa ngozi ya lukuli. Mtambika wone yasinde kumkagula, ahyo kolonga kota munhu ayo kakokomoka.
LEV 13:4 Wone liwe baka hela, hanga liwe lizelu halinjile ng'hatu mgati mwa ngozi na mnvili za honhu aho hazigaluche kuwa nzelu, lelo mtambika komhindila mchihengo munhu ayo kwa mhela wa mazuwa saba.
LEV 13:5 Zuwa lya saba, mtambika komkagula kahi munhu ayo vyonayali, kota mtambika vyoyamkagule na wone utamwa awo hawenele mli ngozi ya heye, lelo mtambika komhindila mchihengo munhu ayo kwa mazuwa gayage saba.
LEV 13:6 Mtambika komkagula kahi munhu ayu zuwa lya saba. Wone honhu ha utamwa habilabila na utamwa hawenele, lelo mtambika komlonjela munhu ayo kota ka yanojile na acho ndo chilonda hela. Munhu ayo kohovuga mivalo ja heye, na heye kowa yelizwe.
LEV 13:7 Ila wone chilonda acho chenele mli ngozi, ila munhu ayo yang'hali kilajila kwa mtambika kwa chiwalo cha kwelizwa kwa heye, lelo kokuya kahi kwa mtambika.
LEV 13:8 Mtambika komkagula kahi, na wone chilonda chila nachenela mli ngozi, lelo mtambika komlonjela munhu ayo ka yakokomoche, na awo ndo utamwa wa ngozi ya lukuli.
LEV 13:9 “Wone munhu yawe na utamwa wa ngozi ya lukuli, kohilikwa kwa mtambika.
LEV 13:10 Mtambika komkagula na wone kokona kutuna kuzelu kulinguzidita mnvili za heye ziwe nzelu na kutuna ako nakugaluka kuwa chilonda chidodi,
LEV 13:11 awo ndo utamwa wa ngozi ya lukuli wa mihela minji. Mtambika kodamla kota munhu ayo kakokomoka. Kuduhu chiwalo cha kumhindila mchihengo munhu kwa kumkagula. Heye ndo kakokomoka.
LEV 13:12 Wone utamwa wa ngozi ya lukuli umibate na kwenela lukuli lweng'ha, kulawa minhosi mbaka mizayo kota vyoyokona mtambika,
LEV 13:13 aho mtambika komkagula. Wone mtambika yone kota utamwa wa ngozi ya lukuli nawenela lukuli lweng'ha, lelo kodamla kota munhu ayo kela kwa vila lukuli lugaluka luwa luzelu. Ahyo munhu ayo kela.
LEV 13:14 Ila wone lukuli lwa munhu ayo naloneka luna chilonda chidodi, lelo munhu ayo kowa yakokomoche.
LEV 13:15 Mtambika kokagula acho chilonda chidodi na kudamla kota kakokomoka, kwa vila awo ndo utamwa wa ngozi ya lukuli.
LEV 13:16 Ila wone acho chilonda chipona na chigaluka kahi chiwa chizelu, munhu ayo kohiluka kwa mtambika.
LEV 13:17 Mtambika komkagula, na wone yone kota chigaluka chiwa chizelu, lelo kodamla kota munhu ayo kela. Ahyo kela.
LEV 13:18 “Wone munhu yawe na lipu, na alyo lipu lipona,
LEV 13:19 ila honhu hala honalyali lipu hagaluka hawa hatunile na hawa hazelu ama hadung'hu ila hazelu hado, yanguganigwa yalajilwe mtambika.
LEV 13:20 Mtambika komkagula ayo munhu. Wone mtambika yone hagaluka na hadidimila na mnvili za honhu aho zigaluka kuwa nzelu, lelo mtambika kodamla kota munhu ayo kakokomoka na awo ndo utamwa wa ngozi ya lukuli, ulawile kuli lipu.
LEV 13:21 Ila wone mtambika yamkagule ayo munhu na kona kota mnvili za honhu aho hawele hazelu na hadidimile hebu, ila habilabila, lelo komhindila mchihengo ayo munhu kwa mhela wa mazuwa saba.
LEV 13:22 Wone utamwa awo wokwenela mli ngozi, lelo mtambika kodamla kota munhu ayo kakokomoka na yula kana utamwa.
LEV 13:23 Ila wone habilebile ha bahala, na henele hebu, lelo ayo ndo ng'hovu ya lipu hela. Mtambika kodamla kota munhu ayo kela.
LEV 13:24 “Ama, kwa vila hana honhu halakale na chila chilonda chidodi chigaluka chiwa chidung'huwale hado ama chizelu,
LEV 13:25 mtambika komkagula. Wone yone kota mnvili zigaluka ziwa nzelu na hadidimila, lelo awo ndo utamwa wa ngozi ya lukuli. Utamwa awo wa ngozi ya lukuli ulawilila hala honhu halakale. Mtambika kodamla kota munhu ayo kakokomoka, kwa vila kanawo utamwa wa ngozi ya lukuli.
LEV 13:26 Ila wone mtambika yone mnvili za honhu aho haziwele nzelu na honhu aho hambe hadidimile ila habilabila, lelo mtambika komhindila mchihengo munhu ayo kwa mhela wa mazuwa saba.
LEV 13:27 Zuwa lya saba mtambika komlola. Wone wenele mli ngozi, lelo mtambika kodamla kota munhu ayo ka yakokomoche, kwa vila kanawo utamwa wa ngozi ya lukuli.
LEV 13:28 Ila wone hala honhu habilebile hapona hihila na henele hebu, ako ndo kutuna kulawile na kulakala. Lelo mtambika kodamla kota munhu ayo kela, kwa vila aho habilabila kwa kulakala.
LEV 13:29 “Wone munhu yoneche mlume ama mdala, kana utamwa wa ngozi kumutwi ama mchilevu,
LEV 13:30 mtambika koukagula utamwa awo. Wone mtambika yokona kota hadidimila na mnvili zina lanji ya manjano na nzisili, lelo kodamla kota munhu ayo ka yakokomoche, kwa vila awo ndo utamwa wa kizada wa ngozi ya lukuli wa mutwi ama wa mchilevu.
LEV 13:31 Wone mtambika yokagula wula utamwa wa kizada na yokona kota haduhu honhu hadidimile na mnvili haziwele nhitu, lelo mtambika komhindila mchihengo munhu ayo kwa mhela wa mazuwa saba.
LEV 13:32 Zuwa lya saba mtambika kokagula wula utamwa wa kizada. Wone utamwa awo wa kizada hawanele na haduhu mnvili ziwele na lanji ya njano ne kudidimila,
LEV 13:33 munhu ayo kobeya mnvili ama lulevu lwa heye. Ila honhu hala hawele na utamwa awo wa kizada hobeya hebu. Hamba mtambika komhindila mchihengo munhu ayo kwa mhela wa mazuwa saba gayage,
LEV 13:34 na kuli zuwa lya saba, mtambika kokagula wula utamwa wa kizada. Wone mtambika yokona utamwa awo hawenele kuli ngozi na hawinjile mgati mwa ngozi, lelo kodamla kota munhu ayo kela. Munhu ayo kohovuga ivalo lya heye, na heye kowa yelizwe.
LEV 13:35 Ila hala du vyonayelizwe, utamwa awo wa kizada nawonjezeka,
LEV 13:36 munhu ayo kokaguligwa na mtambika na vyonawonjezeche mli ngozi, mtambika hopala mnvili ziwele na lanji ya njano, munhu ayo kowa yakokomoche.
LEV 13:37 Ila wone mtambika yawone kota wula utamwa wa kizada na mnvili nhitu zota honhu aho, lelo utamwa awo wa kizada upona, lelo munhu ayo ndo kela. Mtambika kodamla kota munhu ayo kela.
LEV 13:38 “Wone munhu yoneche, yawe mlume ama mdala, kana mabaka mazelu mlukuli lwa heye,
LEV 13:39 mtambika komkagula munhu ayo. Ila wone mtambika yokona mabaka ago ndo mazelu hado hela, awo ndo utamwa wa kizada wa hihi hela, munhu ayo ndo kela.
LEV 13:40 “Wone mlume yawe na chibuje, heye kowa yanojile kwa vila kana chibuje hela.
LEV 13:41 Wone chibuje acho nachilawile kuli chihanga, munhu ayo kana chibuje hela ndo kela.
LEV 13:42 Ila wone kuli mutwi hali chibuje ama hali chihanga hali chibuje hana mabaka gadung'huwale na uzelu, awo ndo utamwa wa ngozi ya lukuli ulingulawila kuli chibuje cha heye kumutwi ama kuli chihanga cha heye.
LEV 13:43 Mtambika komkagula. Wone mtambika yokona kota ako kutuna ndo kudung'huwala na kuzelu kuli chibuje ama kuli chihanga cha heye, na kwangoneka kota utamwa wa ngozi ya lukuli,
LEV 13:44 lelo munhu ayo kana utamwa wa ngozi ya lukuli, heye kakokomoka. Mtambika kodamla kota munhu ayo kakokomoka kwa chiwalo cha utamwa wa heye wa kumutwi kwa heye.
LEV 13:45 “Yoneche yawele na utamwa wa ngozi ya lukuli, kovala mivalo jidejeche na mnvili za heye zowa zizuzumuche, na mlomo wa heye wa kuchanya kougubika na kokwiniza lizi yolonga, ‘Heni ng'hokomoka, heni ng'hokomoka.’
LEV 13:46 Kolutilila kuwa yakokomoche kwa mhela weng'ha yawele na utamwa awo. Heye kakokomoka na heye kochikala yaliyeng'ha kunze mwa kambi.
LEV 13:47 “Wone kuna mbuli ya lungwi kuli ivalo, liwe lya sufu ama kitani,
LEV 13:48 ivalo alyo liwe libotigwe ama litawigwe kwa kitani ama sufu ama ivalo lya igozi lyoneche lila,
LEV 13:49 ila lungwi alo luna lanji ya udedemu ama udung'huwale kuli ivalo alyo, lelo ivalo alyo lina lungwi. Ahyo yangumlapa kumlajila mtambika.
LEV 13:50 Mtambika kokagula lungwi alo na kuliwika ivalo alyo hafungo kwa mhela wa mazuwa saba.
LEV 13:51 Kuli zuwa lya saba, kokagula lungwi alo. Wone lungwi alo lwenela kuli mivalo ajo, liwe libotigwe ama litawigwe ama lya igozi ama lya igozi lyoneche lya vinji, alyo lina lungwi. Ahyo ivalo alyo ndo likokomoka.
LEV 13:52 Mtambika kolilakaza kwa chiluli ivalo alyo kwa vila lina lungwi.
LEV 13:53 “Wone mtambika yokona kota lungwi halwenele kuli ivalo,
LEV 13:54 lelo kolonga ivalo alyo lihovujigwe na kuwichigwa hafungo kwa mhela uyage wa mazuwa saba.
LEV 13:55 Hamba, mtambika kolikagula ivalo alyo holimalile kuhovujigwa. Wone lungwi alo halugaluche lanji na wone halwenele, lelo ivalo alyo ndo likokomoka. Kolilakaza kwa chiluli ivalo alyo, luwe lungwi lwa kumbele ama kumwando mwa ivalo alyo.
LEV 13:56 “Wone mtambika yokona kota lula lungwi lubilabila holimalile kuhovujigwa, lelo kokusa hala honhu hawele na lungwi.
LEV 13:57 Hamba wone lungwi lwoneche lwa hihila kahi kuli ivalo litawigwe ama libotigwe ama kuli chinhu choneche cha igozi, lelo lungwi lwenela. Ahyo ivalo alyo kolilakaza kwa chiluli.
LEV 13:58 Ila alyo ivalo liwele na lungwi kulawa holihovujigwe, yolapa kuhovujigwa mala ya keli, ahyo lyowa lyelizwe.”
LEV 13:59 Ago ndo malajizo kwa chiwalo cha lungwi lulingulawila kuli ivalo lya sufu ama kitani ama ivalo litawigwe ama libotigwe ama lya igozi linji. Kwa nzila ayo woweza kugawanula ivalo lyelizwe na lila ivalo likokomoche.
LEV 14:1 Mkulu Nguluwi nakamlonjela Musa,
LEV 14:2 “Aga ndo malajizo galingumlapa munhu yawele na utamwa wa ngozi ya lukuli kuli mazuwa ga kwelizwa kwa heye. Houkuka utamwa awo, kochigaligwa kwa mtambika.
LEV 14:3 Mtambika koluta kumkagula ayo munhu kunze mwa kambi. Wone utamwa awo wuka,
LEV 14:4 aho mtambika kolajiza kota wanhu wegale videje vili vikomu vikundigwe, chihande cha igodi lichemigwe mwelezi na sufu ya lanji ndung'hu na nhagala ya isopolo kwa chiwalo cha kwelizwa kwa munhu ayo.
LEV 14:5 Mtambika kolajiza chideje chimwe chipobosoligwe singo mchanya mwa chiya chiwele na mazi ganojile ga nzasa.
LEV 14:6 Mtambika kohola chila chideje chisigale chiwele chikomu na chihande chila cha igodi lya mwelezi na sufu ya lanji ndung'hu na yila nhagala ya isopolo na kuviwika vyeng'ha kuli danda ya chila chideje chipobosoligwe.
LEV 14:7 Hamba, kommizila mala saba yula yawele ngwelizwa utamwa wa ngozi, na heye kodamla kota yula munhu kela. Hamba kahi kochilechele chila chideje chiwele chikomu chiguluche kuza kuli migunda kunze kwa muji.
LEV 14:8 Munhu ayo kohovuga mivalo ja heye na kubeya mnvili za heye zeng'ha na koga na heye kowa kela. Hamba kohiluka kuli kambi, ila kochikala kunze kuli ihema lya heye kwa mhela wa mazuwa saba.
LEV 14:9 Zuwa lya saba kobeya mnvili za heye zeng'ha na lulevu na ngohe za meho ga heye na lukuli lweng'ha. Hamba kohovuga mivalo ja heye, kokoga kwa mazi na heye kowa kela.
LEV 14:10 “Zuwa lya nane kochigala ming'holo myana mili milume jilihela nongwa na ing'holo idala liwele na mwaka umwe lilihela nongwa na kilo zidatu za utimbo unojile uhanzigwe na mafuta ga mzeituni kwa chiwalo cha nhambiko ya nyhule hamwe na mafuta honhu hamwe ha kadatu ha lita.
LEV 14:11 Mtambika yalingumweliza munhu ayo, komwimiza munhu ayo hali Mkulu Nguluwi, habehi na lwizi lwa ihema lya Nguluwi hamwe na vinhu vyoyegale.
LEV 14:12 Mtambika kohola ing'holo lyana ilume limwe na kumlavila nhambiko ya nongwa hamwe na gala mafuta ga mzeituni. Hamba kovinula kuchanya kota ulajilo wa kumlavila nhambiko Mkulu Nguluwi.
LEV 14:13 Hamba kolidumula singo alyo ing'holo lyana hali honhu ha kulavila nhambiko, walingudumulila singo migongolo ja nhambiko ya gehile na nhambiko ya kulakazwa. Nhambiko ayi ya nongwa, kota vyoili nhambiko ya gehile, ndo yowa ya heye mtambika ndo nhambiko yelile ng'hatu.
LEV 14:14 Mtambika kohola danda nyindo ya nhambiko ya nongwa na kumbakaliza munhu yalinguganigwa kwelizwa kuli ikutu lya heye lya kudilo na chidole chikuluwawo cha moko wa heye wa kudilo na chidole chikuluwawo cha mgulu wa heye wa kudilo.
LEV 14:15 Hamba mtambika kohola honhu hado ha gala mafuta ga mzeituni na kugajida mli chiganza cha moko wa heye wa kumoso.
LEV 14:16 Kozabika chidole cha moko wa heye wa kudilo kuli mafuta ago na kumizila mala saba hali Mkulu Nguluwi.
LEV 14:17 Chasi cha mafuta gasigale kuli chiganza cha heye, kombakaliza munhu ayo yalingwelizwa, kuli ikutu lya heye lya kudilo na chidole chikuluwawo cha moko wa heye wa kudilo na chidole chikuluwawo cha mgulu wa heye wa kudilo na honhu hahala hoyambakalize danda ya nhambiko ya nongwa.
LEV 14:18 Gala mafuta gasigale kombakaliza kumutwi mwa munhu ayo yalinguganigwa kwelizwa. Ahyo mtambika komditila uhanyisi hali Mkulu Nguluwi.
LEV 14:19 Mtambika komlavila nhambiko ya gehile na kumditila uhanyisi munhu ayo yalingwelizwa, lelo kumusila kukokomoka kwa heye. Hamba, kolidumula singo ing'holo lyana lya nhambiko ya kulakazwa.
LEV 14:20 Mtambika komlavila ayo nhambiko ya kulakazwa na nhambiko ya nyhule hali honhu ha kulavila nhambiko. Ahyo mtambika komditila uhanyisi munhu ayo, na heye kowa kela.
LEV 14:21 “Ila wone iwe munhu ayo ka mzunwa, kolemwela kulavya vinhu avyo, lelo kochigala ing'holo ilume limwe liwe nhambiko ya nongwa, iwele yoditilwa ulajilo wa kulavya nhambiko ya kwinula kuchanya leka kumditila uhanyisi munhu ayo. Kochigala kilo imwe ya utimbo unojile uhanzanywe hamwe na mafuta ga mzeituni kwa chiwalo cha nhambiko ya nyhule hamwe na mafuta honhu ha kadatu ha lita.
LEV 14:22 Kochigala kahi ng'hunda mbili za kisolo ama ng'hunda mbili za kufujigwa vyoyoweza, imwe yowa kwa chiwalo cha nhambiko ya gehile na iyage kwa chiwalo cha nhambiko ya kulakazwa.
LEV 14:23 Zuwa lya nane komigalila mtambika vinhu avyo hali lwizi lwa ihema lya Nguluwi kwa chiwalo cha kwelizwa kwa heye hali Mkulu Nguluwi.
LEV 14:24 Mtambika kolihola alyo ing'holo lyana ilume lya nhambiko ya nongwa hamwe na gala mafuta ga mzeituni na kwinula kuchanya kota ulajilo wa kumlavila nhambiko Mkulu Nguluwi.
LEV 14:25 Kolidumula singo alyo ing'holo lyana ilume lya nhambiko ya nongwa. Mtambika kohola danda nyindo na kumbakaliza ayo munhu yalingwelizwa kuli ikutu lya heye lya kudilo na kuli chidole chikuluwawo cha moko wa heye wa kudilo na chidole chikuluwawo cha mgulu wa heye wa kudilo.
LEV 14:26 Mtambika kojida mafuta ago mado kuli chiganza cha moko wa heye wa kumoso.
LEV 14:27 Hamba komizila mafuta hali Mkulu Nguluwi kwa chidole cha heye cha kudilo mado gawele amo mli chiganza cha heye cha kumoso mala saba.
LEV 14:28 Mtambika kombakaliza mafuta munhu ayo yalingwelizwa kuli ikutu lya heye lya kudilo na kuli chidole chikuluwawo cha moko wa heye wa kudilo na chidole chikuluwawo cha mgulu wa heye wa kudilo. Kombakaliza honhu hahala honayambakalize yila danda ya nhambiko ya nongwa.
LEV 14:29 Mafuta gasigale mmoko mwa heye kombakaliza kumutwi munhu ayo yalingwelizwa, lelo komditila uhanyisi hali Mkulu Nguluwi.
LEV 14:30 Hamba, mtambika kolavya ng'hunda mbili za kisolo ama ng'hunda mbili za kufujigwa kota munhu ayo vyoyoweza kigala.
LEV 14:31 Ng'hunda zowa baho kwa chiwalo cha nhambiko ya gehile na iyage kwa chiwalo cha nhambiko ya kulakazwa. Hamwe na azo, kolavya nhambiko ya nyhule, na heye mtambika komditila uhanyisi munhu ayo yalingwelizwa, hali Mkulu Nguluwi.
LEV 14:32 Ago ndo malajizo galingumlapa munhu yawele na utamwa wa ngozi, yohambe yaweze kulavya nhambiko zila za kwelizwa.”
LEV 14:33 Mkulu Nguluwi nakawalonjela Musa na Aluni,
LEV 14:34 “Homkwinjila kuli isi ya Kanaani yondilinguwapani iwe ya hemwe, na hewo ndodita lungwi kuli lukanzi lwa ng'handa yoneche kuli isi yomchikala hemwe,
LEV 14:35 Lelo yawele na ng'handa ayo yangumlapa yamlonjele mtambika kota lungwi loneka kuli ng'handa ya heye.
LEV 14:36 Mtambika kolajiza vinhu vyeng'ha viwele mng'handa amo vilavigwe hanze yang'hali heye yuye kwaluka kukagula, leka vyeng'ha vileche kudamligwa kota vikokomoka. Hamba mtambika kokwinjila mgati mwa ng'handa ayo kukagula.
LEV 14:37 Kokagula lungwi alo, holukoneka mlukanzi na lwambuza mabaka ga lanji idedemuche ama ndung'hu na koneka kota lwinjila mbaka mgati mwa lukanzi,
LEV 14:38 lelo mtambika kolawa kunze na kuhinda ng'handa ayo kwa mhela wa mazuwa saba.
LEV 14:39 Zuwa lya saba mtambika kohiluka na kukagula kahi mgati mwa ng'handa ayo. Wone lungwi alo lwenela mlukanzi lwa ng'handa ayo,
LEV 14:40 mtambika kolajiza kota maganga gawele hali honhu hawele na lungwi gosigwe na kutajigwa honhu hakokomoche kunze kwa muji.
LEV 14:41 Lukanzi lweng'ha lwa mgati mwa ng'handa lusilibwe loganduligwa na ibiwi lyake lyotajigwa honhu hakokomoche kunze kwa muji.
LEV 14:42 Hamba wohola maganga manyale na kuzenga honhu howagandule na hewo woisiliba ng'handa ayo kahi.
LEV 14:43 “Wone lungwi alo lolawila kahi lokumalile kulavya maganga ago na kugandula hasilibwe na kusiliba kahi,
LEV 14:44 yangumlapa mtambika yoye kukagula goya. Wone lungwi lwenele kuli ng'handa ayo lelo alo ndo lungwi, ng'handa ayo ikokomoka.
LEV 14:45 Ng'handa ayo yangulapigwa ibomoligwe na maganga gake na migodi jake na kusilibwe kwake, vyohilichigwa honhu hakokomoche kunze kwa muji.
LEV 14:46 Kupuluta kwa ago, yoneche yokwinjila mgati mwa ng'handa ayo mhela vyoiwa ihindigwe, kowa yakokomoche mbaka matinazo.
LEV 14:47 Yoneche yowasa kuli ng'handa ayo ama kulya chilyo mgati mwa ng'handa ayo, yangumlapa yahovuje mivalo ja heye.
LEV 14:48 “Ila wone ufiche mhela wa kukagula ayo ng'handa, wone mtambika yokona kota lungwi halwenele mhela wa kusiliba, lelo mtambika kodamla kota ng'handa ayo ndo yela kwa vila lungwi lumala.
LEV 14:49 Leka kuyeliza ng'handa ayo, mtambika kohola videje vili hamwe na vihande vya igodi lichemigwe mwelezi na sufu ndung'hu na nhagala ya isopolo.
LEV 14:50 Kochipobosola chideje chimwe mchanya mwa chiya chiwele na mazi ganojile ga nzasa.
LEV 14:51 Kohola chihande cha igodi lichemigwe mwelezi na nhagala ya isopolo na sufu ndung'hu hamwe na chila chideje chiyage chiwele chikomu na kuvinjiza vyeng'ha kuli danda ya chila chideje chipobosoligwe singo na kuli mazi ganojile ga nzasa. Hamba komizila ng'handa ayo mala saba.
LEV 14:52 Ahyo ndo vyoyokweliza ng'handa ayo kwa danda ya chideje na mazi ganojile ga nzasa na chideje chikomu na chihande cha igodi lichemigwe mwelezi na nhagala ya isopolo na sufu ndung'hu.
LEV 14:53 Chila chideje chikomu kochilechela chiguluche kumgunda kunze kwa muji. Ahyo ndo vyoyoiditila uhanyisi ng'handa ayo, nayo ndo yowa yela.”
LEV 14:54 Aga ndo malajizo kuli mbuli ya utamwa wa ngozi, kwa utamwa wa ngozi wa kizada,
LEV 14:55 lungwi kuli ivalo ama mgati mwa ng'handa,
LEV 14:56 kutuna ama chilonda ama baka,
LEV 14:57 lelo kolajila ndo chinhu chachi chiwele chikokomoche na chelizwe. Ago ndo malajizo galinguwala mbuli ya utamwa wa ngozi ama lungwi.
LEV 15:1 Mkulu Nguluwi nakawalonjela Musa na Aluni,
LEV 15:2 “Walonjele Waisilaeli ahi, ‘Mlume yoneche jimlawa mifila, ajo jomdita yawe yakokomoche.
LEV 15:3 Aga ndo malajizo galinguwala kukokomoka ako, mhela weng'ha vyojimlawa mifila ama mifila vyojiwa jilemezigwa mgati mwa heye, munhu ayo kakokomoka.
LEV 15:4 Chinhanda choneche choyowasila ama choyokalisila, chowa chikokomoche.
LEV 15:5 Munhu yoneche yodoliza chinhanda cha munhu ayo yangumlapa yahovuje ivalo alyo na koga, na heye kowa yakokomoche mbaka matinazo.
LEV 15:6 Munhu yoneche yochikalisila chinhu choneche choyekalisile ayo munhu yalingulawa mifila, yangumlapa yahovuje ivalo na koga, na kowa yakokomoche mbaka matinazo.
LEV 15:7 Munhu yoneche yomdoliza munhu ayo yalingulawa mifila, yangumlapa yahovuje mivalo ajo na koga, na heye kowa yakokomoche mbaka matinazo.
LEV 15:8 Wone munhu yalingulawa mifila, yomtemela mite munhu, ayo munhu yatemelwe mite yomlapa yahovuje mivalo ja heye na koga, ila heye kowa yakokomoche mbaka matinazo.
LEV 15:9 Lutemvu loneche lwa kikalisila mchanya mwa igongolo, loyekalisile munhu yalingulawa mifila, lyowa likokomoche.
LEV 15:10 Munhu yoneche yodoliza chinhu choneche choyekalisile munhu ayo, kowa yakokomoche mbaka matinazo. Munhu yoneche yopika chinhu chila, yangumlapa yahovuje mivalo ja heye na koga na heye kowa yakokomoche mbaka matinazo.
LEV 15:11 Munhu yoneche yalingulawa mifila, wone yamdolize munhu ne kuhovuga moko wa heye tandi, munhu yadolizwe kohovuga ivalo na koga, na kowa yakokomoche mbaka matinazo.
LEV 15:12 Wone chinhu choneche chilumbigwe kwa ilongo chidolizwe na munhu yalingulawa mifila yanguganigwa chituligwe. Ila chinhu choneche cha mbao yangulapigwa kuhovujigwa kwa mazi.
LEV 15:13 “ ‘Mlume yoneche yalingulawa mifila, wone yawe mkomu kwa utamwa wa heye, yangumlapa ayo munhu yabeteze mazuwa saba kung'hali kusigwa ukokomoche wa heye. Kohovuga mivalo ja heye na koga kwa mazi ganojile ga nzasa, na heye kowa kela.
LEV 15:14 Zuwa lya nane, yangumlapa yegale ng'hunda mbili za kisolo ama ng'hunda za kufujigwa hali Mkulu Nguluwi hali lwizi lwa ihema lya Nguluwi na kumha mtambika.
LEV 15:15 Mtambika kozilavya ng'hunda azo. Imwe kwa chiwalo cha nhambiko ya gehile na iyage kwa chiwalo cha nhambiko ya kulakazwa na heye mtambika komditila uhanyisi munhu ayo hali Mkulu Nguluwi na kumusila ukokomoche wa heye wa kulawa mifila.
LEV 15:16 “ ‘Wone mlume yoneche yalingulawa migonye, yangumlapa yoje mazi lukuli lweng'ha, na heye kowa yakokomoche mbaka matinazo.
LEV 15:17 Ivalo lyoneche lilagalilwe na migonye ama igozi lyoneche idolizwe na migonye ajo, yangumlapa yaihovuje kwa mazi, na yowa yakokomoche mbaka matinazo.
LEV 15:18 Wone mlume yawase na mdala, migonye jilawa, lelo yanguwalapa weng'ha weli woje mazi, na hewo wowa wakokomoche mbaka matinazo.
LEV 15:19 “ ‘Mdala yoneche yawele kuli mbuli za chidala, kanguwa yakokomoche kwa mihela ja mazuwa saba. Munhu yoneche yomdoliza mdala ayo, kowa yakokomoche mbaka matinazo.
LEV 15:20 Chinhu choneche choyowasila ama kikalisila mhela nayali yakokomoche, chowa chikokomoche.
LEV 15:21 Munhu yoneche yodoliza chinhanda choyalinguwasila ayo mdala, yangumlapa yahovuje mivalo ja heye na koga mazi, na heye kowa yakokomoche mbaka matinazo.
LEV 15:22 Munhu yoneche yodoliza chinhu choneche choyalingikalisila mdala ayo, yangumlapa yahovuje mivalo ja heye na koga mazi, na heye kowa yakokomoche mbaka matinazo.
LEV 15:23 Mlume yoneche yodoliza chinhu choyowasila ama kikalisila ayo mdala, kowa yakokomoche mbaka matinazo.
LEV 15:24 Wone mlume yowasa na mdala ayo na wone danda ya mbuli ya chidala ya mdala ayo imlagalile mlume ayo, lelo mlume ayo kowa yakokomoche kwa mhela wa mazuwa saba. Chinhanda choneche choyowasila ayo mlume chowa chikokomoche.
LEV 15:25 “ ‘Wone mdala kowa na mbuli azo za chidala kwa mhela wa mazuwa menji kusinda vyonayali, ama mbuli azo zangumlawila mhela hauwele wa heye kulawilwa na mbuli azo, lelo kolutilila kuwa yakokomoche mhela weng'ha wa mbuli ayo.
LEV 15:26 Chinhanda choneche choyowasila mhela awo, ama chigoda choneche choyosikalisila, chowa chikokomoche kota vila mhela wa kukokomoka kwa heye kwa mbuli za chidala.
LEV 15:27 Munhu yoneche yodoliza vinhu avyo, kowa yakokomoche na yangumlapa yahovuje mivalo ja heye na koga, na heye kowa yakokomoche mbaka matinazo.
LEV 15:28 Wone mbuli azo zimale, mdala ayo kowa yang'hali yobeteza mazuwa saba leka yawe kela, na mhela awo kowa kela.
LEV 15:29 Zuwa lya nane kohola ng'hunda mbili za kisolo ama ng'hunda mbili za kufujigwa na kumgalila mtambika hali lwizi lya ihema lya Nguluwi.
LEV 15:30 Mtambika kolavya imwe kwa chiwalo cha nhambiko ya gehile na iyage kwa chiwalo cha nhambiko ya kulakazwa. Ahyo mtambika komditila uhanyisi mdala ayo hali Mkulu Nguluwi na kumusila kukokomoka kwa heye kwa mbuli za chidala.
LEV 15:31 “ ‘Ahi ndo vyomuwalonjela Waisilaeli webagule kulawa kuli kukokomoka kwa hewo, waleche kulidita liwe likokomoche ihema lya Nguluwi lya heni liwele hali hewo. Wone wadite hino wobagama.’ ”
LEV 15:32 Ago ndo malajizo galingumlapa mlume ayo yalingulawa mifila na migonye na kuwa yakokomoche.
LEV 15:33 Malanguso aga kahi ganguwala mdala yawele kuli mbuli za chidala na kuwa yakokomoche. Malanguso aga ganguwala mlume ayo ama mdala yoneche yalingulawa mifila, na kahi ganguwala mlume yalinguwasa na mdala yawele yakokomoche.
LEV 16:1 Mkulu Nguluwi nakalongasa na Musa, hala wana weli wa Aluni nalowabagame mhela ula nalowamhejelele Mkulu Nguluwi.
LEV 16:2 Mkulu Nguluwi nakamlonjela Musa, “Mlonjele mng'holozo Aluni yaleche kwinjila hali honhu helile ng'hatu, kumbele kwa ipaziya mhela wohaukundigwe. Yaleche kwinjila honhu aho kwa vila hondilawila hali ng'hungugu mchanya hali chigubiko cha uhanyisi, chiwele ndo isanduku. Wone hambe yahulichize, kobagama.
LEV 16:3 “Aluni kokwinjila honhu helile ng'hatu yawele na ilogota ilume kwa chiwalo cha nhambiko ya gehile na ing'holo ilume kwa chiwalo cha nhambiko ya kulakazwa.
LEV 16:4 Kokoga lukuli lweng'ha kuli mazi, hamba kovala mivalo jelile. Kovala ikanzu lya kitani, mchanya mwa ivalo lya mgati mwa lupati lwa kitani na kiwoha isali lya kitani na kovala chipembelo cha kitani.
LEV 16:5 Kohola mipongo mili kulawa kuli Waisilaeli weng'ha kwa chiwalo cha nhambiko ya gehile na ing'holo ilume limwe kwa chiwalo cha nhambiko ya kulakazwa.
LEV 16:6 “Aluni kolavya alyo ilogota kota nhambiko ya gehile kwa chiwalo cha heye yuye, na kudita uhanyisi kwa chiwalo cha heye yuye na ivyazi lyake.
LEV 16:7 Hamba, jila mipongo mili kojiwika hali Mkulu Nguluwi hali lwizi lwa ihema lya Nguluwi.
LEV 16:8 Aluni kojitowela simbi mipongo ajo kwa maganga meli, iganga limwe kwa chiwalo cha Mkulu Nguluwi na iganga lisigale ndo kwa chiwalo cha Azazeli.
LEV 16:9 Aluni koligala alyo ipongo liwele kwa simbi ya heye naliganigwa kwa chiwalo cha Mkulu Nguluwi na kumlavila nhambiko ya gehile.
LEV 16:10 Ila alyo ipongo lihaguligwe kwa simbi kwa chiwalo cha Azazeli, lyolavigwa liwele likomu hali Mkulu Nguluwi, leka kudita uhanyisi. Mtambika kolileka lilute kuchiwala kwa Azazeli.
LEV 16:11 “Aluni kolavya ilogota ilume kwa nhambiko ya gehile kwa chiwalo cha heye yuye, na kudita uhanyisi kwa chiwalo cha heye yuye na kwa chiwalo cha ivyazi lya heye, hamba kolidumula singo ilogota alyo kwa nhambiko ya gehile.
LEV 16:12 Hamba kohola chila chifunyizi chimemile makala ga chiluli kulawa kuli honhu ha kulavila nhambiko hali Mkulu Nguluwi na viganza vili vya ubani ubalaswe goya na kuvigala hali honhu helile ng'hatu.
LEV 16:13 Leka yaleche kubagama, kougala ubani awo hali Mkulu Nguluwi na kujela kuli chiluli leka iyosi lya ubani awo ugubiche chigubiko cha uhanyisi cha isanduku lya ilagano.
LEV 16:14 Kohola chasi cha danda ya lila ilogota ilume na kumizila kwa chidole cha heye kolilawilaga isanya mchanya mwa chigubiko cha uhanyisi, hamba komizila hali isanduku lya ilagano mala saba kwa chidole cha heye.
LEV 16:15 “Hamba kolidumula singo lila ipongo lya nhambiko ya gehile kwa chiwalo cha wanhu weng'ha. Danda ya mhene ayo koigala mgati mwa honhu helile ng'hatu na kudita kota vyoyaditile kwa danda ya lila ilogota ilume, komizila hawele na chigubiko cha uhanyisi na ubanzi wa kumwando.
LEV 16:16 Ahyo kodita uhanyisi kwa chiwalo cha honhu helile ng'hatu, kwa chiwalo cha mbuli zikokomoche zowaditile Waisilaeli na kwa chiwalo cha gehile ga hewo geng'ha. Ndo vyoyodita kahi kwa chiwalo cha ihema lya Nguluwi liwele hali wanhu awo wawele wakokomoche.
LEV 16:17 Mhela Aluni yodita uhanyisi kwa chiwalo cha heye yuye na kwa chiwalo cha ivyazi lya heye na wanhu weng'ha wa Isilaeli, munhu yunji yaleche kuwa mgati mwa ihema lya Nguluwi mbaka vyoyosinda mijito na kulawa mgati.
LEV 16:18 Hamba kolawa na kuza kuli honhu ha kulavila nhambiko hawele na Mkulu Nguluwi na kudita uhanyisi. Kohola chasi cha danda ya lila ilogota ilume na lila ipongo na kuzibakaliza mbalati za honhu ha kulavila nhambiko banzi zeng'ha.
LEV 16:19 Komizila danda ayo hali honhu ha kulavila nhambiko kwa chidole cha heye mala saba na ahyo koyeliza kulawa kukokomoka kwa wanhu wa Isilaeli na kuidita iwe yelile.
LEV 16:20 “Aluni vyonayasindile kuhaditila uhanyisi honhu helile ng'hatu na ihema lya Nguluwi na honhu ha kulavila nhambiko, aho ndo kolilavya lila ipongo liwele likomu kwa chiwalo cha Azazeli.
LEV 16:21 Aluni kowika moko ga heye mchanya mwa mutwi wa alyo ipongo likomu na kulonga kwa mlomo gehile geng'ha ga wanhu wa Isilaeli na kuhinduka kwa hewo kweng'ha na wihe wa hewo weng'ha, leka kugawika ago kuli ipongo. Hamba kolileka alyo ipongo leka lilute kuchiwala, lyohilichigwa ako na munhu yoneche yula yahaguligwe kudita ahyo.
LEV 16:22 Kolileka alyo ipongo lilute kuchiwala, liwele liholile wihe wa hewo weng'ha.
LEV 16:23 “Hamba Aluni kohiluka mgati mwa ihema lya Nguluwi, kovula jila mivalo ja kitani joyavalile vyoyenjile honhu helile ng'hatu na kuzileka mumo.
LEV 16:24 Kochihovuga mumo mgati kwa mazi hali honhu hanji helile na kuvala mivalo ja heye ja hihi hela. Kolawa na kilavila nhambiko ya heye ya kulakazwa, na nhambiko ya kulakazwa kwa wanhu wa Isilaeli, leka kudita uhanyisi kwa chiwalo cha heye yuye na kwa chiwalo cha wanhu weng'ha.
LEV 16:25 Mafuta ga nhambiko ya gehile kogalakaza mchanya mwa honhu ha kulavila nhambiko.
LEV 16:26 Yula munhu yalihiliche lila ipongo kwa Azazeli, kohovuga mivalo ja heye tandi na koga, aho ndo kokundigwa kwinjila kuli kambi ayo.
LEV 16:27 Lila ilogota ilume na mhene yajilavile nhambiko ya gehile iwele danda ya hewo naihilichigwa mgati mwa honhu helile ng'hatu kwa kudita uhanyisi, johilichigwa kunze mwa kambi na kulakazwa kwa chiluli. Migozi na miunde na midowe, vyeng'ha vyolakazwa.
LEV 16:28 Munhu ayo yojilakaza kohovuga mivalo jake na koga, ndo vyoyoweza kwinjila kuli kambi.
LEV 16:29 “Ali ndo ilajizo lilinguwalapa mliwinze mazuwa gose. Zuwa lya kumi lya mwezi wa saba, hemwe mwemwe na wajenzi walingikala na hemwe, yanguwalapani mwesele kulya zuwa alyo na kuleka kukola mijito.
LEV 16:30 Mina kwa zuwa alyo uhanyisi woditigwa kwa chiwalo cha hemwe leka kuweliza hemwe, namwe mokwelizwa kulawa kuli gehile ga hemwe geng'ha hali Mkulu Nguluwi.
LEV 16:31 Zuwa alyo ndo zuwa lya kwesela ng'hatu na hemwe mwesele kulya. Malajizo ago ndo ga mazuwa gose.
LEV 16:32 Mtambika Mkulu yabakalizwe mafuta na kuwichigwa kwa mijito ya chiuyeng'ha yawe honhu ha mhaza wa heye, ndo yodita uhanyisi yawele yavalile mivalo jelile ja kitani.
LEV 16:33 Kodita uhanyisi kwa chiwalo cha honhu helile ng'hatu na kwa chiwalo cha ihema lya Nguluwi na honhu ha kulavila nhambiko na watambika na kwa chiwalo cha wanhu weng'ha wa Isilaeli.
LEV 16:34 Ali, lelo ndo ilajizo lya mazuwa gose, na yanguganigwa mliwinze leka kudita uhanyisi kwa chiwalo cha wanhu wa Isilaeli kamwe kwa mwaka kwa chiwalo cha gehile ga hewo gowaditile.” Musa nakadita geng'ha kota vyoyalajizwe na Mkulu Nguluwi.
LEV 17:1 Mkulu Nguluwi nakamlonjela Musa,
LEV 17:2 “Mlonjele Aluni na wanage na wanhu weng'ha wa Isilaeli achi ndo chinhu choyalajize Mkulu Nguluwi.
LEV 17:3 Wone munhu yoneche hali Waisilaeli yodumula singo isenga ibuguma ama ing'holo lyana ama mhene, mgati ama kunze mwa kambi,
LEV 17:4 ne kuligala igongolo alyo kuli lwizi lwa ihema lya Nguluwi leka kumlavila Mkulu Nguluwi, munhu ayo kowa na nongwa ya kubohola danda, kabohola danda na kobaguligwa na wanhu wa heye.
LEV 17:5 Chiwalo cha malajizo aga ndo kota Waisilaeli wanguganigwa kigala migongolo jiwele ngudumuligwa singo kumgunda leka wejigale kwa Mkulu Nguluwi kwa mtambika kuli lwizi lwa ihema lya Nguluwi na kudumuligwa singo na kumlavila Mkulu Nguluwi nhambiko ya kikala goya.
LEV 17:6 Lelo mtambika kobohola danda hali honhu ha kulavila nhambiko ha Mkulu Nguluwi hawele hali lwizi lwa ihema lya Nguluwi na kugalakaza gala mafuta gawe gonhunyhilila goya kwa kumnojeza Mkulu Nguluwi.
LEV 17:7 Ahyo Waisilaeli woleka ng'hatu kujilavila nhambiko jimalukolo ja milungu ja udesi jiwhanile kota mhene, jowalingujifugamila kota wang'hondwa. Ilajizo ali ndo lya mazuwa gose kwa lulelo lweng'ha.
LEV 17:8 “Walonjele kota munhu yoneche hali Waisilaeli ama mjenzi yalingikala hali hewo, yalingulavya nhambiko ya kulakazwa ama nhambiko,
LEV 17:9 ila halingigala hali lwizi lwa ihema lya Nguluwi leka kumlavila Mkulu Nguluwi, munhu ayo kobaguligwa na wanhu wa heye.
LEV 17:10 “Wone munhu yoneche hali Waisilaeli ama mjenzi yalingikala hali hewo kangulya danda yoneche, heni ndomlema munhu ayo yadile danda na kumbagula kutali na wanhu wa heye.
LEV 17:11 Yowa ahyo kwa chiwalo cha ukomu wa chilumbigwe cha amo mli danda. Ndiwalajiza kuilavila danda hali honhu ha kulavila nhambiko leka kudita uhanyisi kwa chiwalo cha ukomu wa hemwe, kwa vila danda yangudita uhanyisi mina ukomu awo wa mli danda.
LEV 17:12 Ndo mina ndiwalonjela Waisilaeli ahi, ‘Munhu yoneche hali hemwe ama mjenzi yalingikala hali hemwe yanguganigwa yaleche kulya danda.’
LEV 17:13 “Munhu yoneche hali Waisilaeli ama mjenzi yalingikala hali hewo yoluta kupelemba migongolo ama videje vya uligo, yangumlapa yabohole danda hanyi na kuigubika kwa misanga.
LEV 17:14 Mina ukomu wa chila chilumbigwe wamumo mli danda. Ndo mina ndiwalonjela Waisilaeli kota waleche kulya danda ya chilumbigwe choneche kwa vila ukomu wa chilumbigwe choneche ndo danda. Yoneche yolya danda ayo kobaguligwa.
LEV 17:15 “Munhu yoneche yawele mwenyeng'haye ama mjenzi, yalingulya choneche chibagame chicho ama chikopoligwe na igongolo lya kisolo, yangumlapa yahovuje mivalo ja heye na koga, na heye kowa yakokomoche mbaka matinazo. Kulawila aho, kowa kela.
LEV 17:16 Ila wone hahovuje mivalo ja heye na koga, yomlapa munhu ayo kugazigwa kwa chiwalo cha wihe wa heye.”
LEV 18:1 Mkulu Nguluwi nakamlonjela Musa,
LEV 18:2 “Walonjele wanhu wa Isilaeli kota heni ndo Mkulu Nguluwi, Nguluwi wa hemwe.
LEV 18:3 Ndangukulonjelani mleche kudita kota vyowalingudita wanhu wa isi ya Misili konamwali mikale, na mleche kudita kota vyowalingudita wanhu wa isi ya Kanaani kondiwahiliche. Ndangukulonjelani mleche kuwinza vyowalingudita hewo.
LEV 18:4 Hemwe mowinza utaguso na kibatilila malajizo ga heni. Heni ndo Mkulu Nguluwi, Nguluwi wa hemwe.
LEV 18:5 Lelo leka munhu yalohole ukomu wa heye, mwangulapigwa kuwinza malajizo na utaguso wa heni. Heni ndo Mkulu Nguluwi.
LEV 18:6 “Munhu yoneche wa Isilaeli hambe yakundizwe kuwasa na mng'holoze wa habehi. Heni ndo Mkulu Nguluwi.
LEV 18:7 Ndangukulonjela uleche kumbasa soni mhaza wa hegwe kwa kuwasa na mayako yakupondile. Uleche kumbasa soni, heye ndo mayako.
LEV 18:8 Ndangukulonjela uleche kumbasa soni mhaza wa hegwe kwa kuwasa na yumwe wa wadala wa mhaza wa hegwe.
LEV 18:9 Ndangukulonjela uleche kuwasa na lumbu wa hegwe, yawe mhinza wa mayako ama mhinza wa mhaza wa hegwe ama kulawa ng'handa yinji mihanzile mhaza.
LEV 18:10 Ndangukulonjela uleche kuwasa na mzukulugo mdala, mwana wa mwanago mlume ama wa mhinza wa hegwe, mina kwangibasa soni gwegwe baho.
LEV 18:11 Ndangukulonjela uleche kuwasa na mhinza yavumbuche na mayako yunji yahesigwe na mhaza wa hegwe yagaligwe kulawa kuli ivyazi lya mhaza wa hegwe, kwa vila mhinza ayo ka lumbu wa hegwe.
LEV 18:12 Ndangukulonjela uleche kuwasa na lumbu wa mhaza wa hegwe, ayo ka mng'holoze mhaza wa hegwe.
LEV 18:13 Ndangukulonjela uleche kuwasa na lumbu wa mayako, kwa vila ayo ka mng'holoze mayako.
LEV 18:14 Ndangukulonjela uleche kumbasa soni mhaza mkulu wa hegwe kwa kuwasa na mdala wa heye, ayo ka mayako.
LEV 18:15 Ndangukulonjela uleche kuwasa na mche wa mwanago, ayo ndo mkweyo. Uleche kuwasa na heye.
LEV 18:16 Ndangukulonjela uleche kuwasa na mdala wa kalumbu wa hegwe mkulu ama mdodo, ahyo kombasa soni mng'holozo.
LEV 18:17 Wone kowasa na mdala, lelo ndangukulonjela uleche kuwasa na heye mhinza wa heye ne wazukulu wa heye. Awo ndo wang'holozo. Kuwahazanya ndo kudita gehile.
LEV 18:18 Ndangukulonjela uleche kumuhola lumbu wa mchewako mhela mchewako yang'hali mkomu, ayo yokwambuza kilewa.
LEV 18:19 “Ndangukulonjela uleche kuwasa na mdala yawele kuli mhela wa mbuli za chidala.
LEV 18:20 Ndangukulonjela uleche kuwasa na mdala wa nayali habehi na hegwe na ahyo kiwika gwegwe uwe ukokomoche.
LEV 18:21 “Ndangukulonjela uleche kumlavya mwanago yoneche yawe nhambiko kwa mlungu Moleki, mina kudita ahyo kwangubeza itagwa lya heni Nguluwi wa hegwe. Heni ndo Mkulu Nguluwi.
LEV 18:22 “Ndangukulonjela uleche kuwasa na mlume miyago kota mdala. Alyo ndo izudizo.
LEV 18:23 Ndangukulonjela uleche kuwasa na igongolo leka uleche kuwa ukokomoche, mlume ama mdala yoneche yaleche kudita ahyo, kudita ahyo ndo kwajilila.
LEV 18:24 “Uleche kiwika uwe ukokomoche kwa kudita mbuli ayo kwa vila kwa chiwalo cha mbuli ayo ndanguwawinga wanhu wawele habehi na hemwe kwa vila hewo wangudita ahyo na kiwika wakokomoche.
LEV 18:25 Isi ya hewo naiwa ikokomoche na heni nandiigaza, na isi naiwadeka wanhu wa hewo.
LEV 18:26 Ila hemwe na wajenzi walingikala na hemwe mwanguganigwa kibatilila gala malajizo na utaguso wondiwalonjele, mleche kudita mazudizo ago.
LEV 18:27 Mazudizo ago nawadita wanhu nawekale kuli isi ya Kanaani, hewo wawalongole hemwe, nawo nawaidita isi iwe ikokomoche.
LEV 18:28 Lelo hemwe mleche kudita mbuli ayo, ama isi ayo yowadeka kota isi vyoiwadechile wanhu wawalongole hemwe.
LEV 18:29 Wanhu weng'ha walingudita mazudizo ago yanguwalapa wabaguligwe na wanhu wa hewo.
LEV 18:30 Lelo mibatilile goya geng'ha gondiwalonjele, mleche kuwinza geng'ha gomgazowele ga kuzudiza gaditigwe na wala wawalongole kikala muisi. Mleche kuwa mkokomoche kwa ago. Heni ndo Mkulu Nguluwi, Nguluwi wa hemwe.”
LEV 19:1 Mkulu Nguluwi nakamlonjela Musa,
LEV 19:2 “Walonjele Waisilaeli weng'ha kota yanguwalapa wawe welile kwa vila heni ndo Mkulu Nguluwi, Nguluwi wa hemwe, nda yelile.
LEV 19:3 Chila yumwe wa hemwe yangumlapa yawahulichize mayake na mhaza wa heye na kibata Zuwa lya Kwesela lya heni. Heni ndo Mkulu Nguluwi, Nguluwi wa hemwe.
LEV 19:4 Mleche kujigalamchila jimalukolo ja milungu, na mleche kigongomanyila jimalukolo ja milungu ja kuponda. Heni ndo Mkulu Nguluwi, Nguluwi wa hemwe.
LEV 19:5 “Lomumlavila Mkulu Nguluwi nhambiko ya kikala goya, momlavila kota vyoilinguganigwa leka mkundigwe.
LEV 19:6 Nhambiko ayo yanguganigwa iliche zuwa lilyo ilavigwe ama zuwa lya keli. Choneche chisigale mbaka zuwa lya kadatu yanguganigwa chilakazwe kwa chiluli.
LEV 19:7 Wone honhu ha iwunde lyolika zuwa lya kadatu, mbuli ayo ndo ikokomoka na nhambiko ayo hoikundigwa hebu.
LEV 19:8 Yoneche yolya iwunde alyo kogazigwa kwa chiwalo cha nongwa ya heye, kwa vila nakachibeza chinhu chelile cha Mkulu Nguluwi. Munhu ayo kobaguligwa na wanhu wa heye.
LEV 19:9 “Vyoubeta mbena ya isi ya hemwe, mleche kubeta ng'hatu mbaka kuli mbaka mwa mgunda, na mleche kuhiluka kumbele kukungajiza visigale.
LEV 19:10 Mleche kuwila kukungajiza chila chinhu kuli mgunda wa zabibu na mleche kulokoteza zabibu zigwile hanyi, mowalechela wazunwa na wajenzi. Heni nda Mkulu Nguluwi, Nguluwi wa hemwe.
LEV 19:11 “Mleche kuhiza, mleche kudeta ne kilonjela udesi.
LEV 19:12 Mleche kilaha udesi kwa itagwa lya heni na kulibeza itagwa lya Nguluwi wa hemwe. Heni ndo Mkulu Nguluwi.
LEV 19:13 “Mleche kumbunza yalihabehi na hegwe ne kumuhizila. Msahala wa munhu yakukolele mijito uleche kikala kwa hegwe nechilo yeng'ha mbaka lufuku.
LEV 19:14 Mleche kumpanjila yohambe yahuliche ne kuwika iganga kumwando kwa yohambe yalole, ila mumdumbe Nguluwi wa hemwe. Heni ndo Mkulu Nguluwi.
LEV 19:15 “Vyomumtagusa munhu yoneche, mtaguse kwa hachi, mleche kumganilila mzunwa ne kumdumba yawele na lufufu. Ila yanguwalapa kumtagusa goya yalihabehi na hemwe.
LEV 19:16 Ndanguwalonjela mleche kukolakola kuno muwalonjeleza udesi wanhu wa hemwe. Mleche kwambuza ukomu wa yalihabehi na hemwe kwinjila kuli nongwa ya kubagama kwa ulonzi wa hemwe. Heni ndo Mkulu Nguluwi.
LEV 19:17 “Mleche kuwazudila wang'holozenu mnhumbula za hemwe, ila mikanye na walihabehi na hemwe leka mleche kudita gehile.
LEV 19:18 Mleche kulipizila ama kuwazudila walelwa wa wanhu wa hemwe ila muwagane walihabehi na hemwe kota vyomlingigana mwemwe baho. Heni ndo Mkulu Nguluwi.
LEV 19:19 “Yanguwalapa kibatilila malajizo ga heni. Mleche kuleka migongolo ja hemwe jikwinigwe na migongolo ja nhanzi iyage. Mleche kunyala nyhadikwa za nhanzi mbili kumigunda ja hemwe. Mleche kuvala ivalo litawigwe kwa nhanzi mbili za uzi.
LEV 19:20 “Wone mlume yawase na mdala mpogozi yabanichilwe na mlume yunji, ila yang'hali kugomboligwa ne kilejeha, ulolezi ukoleche. Ila waleche kukopoligwa kwa vila mdala ayo nayang'hali kilejeha.
LEV 19:21 Mlume ayo kochigala nhambiko ya nongwa ya heye ya ing'holo ilume hali lwizi lwa ihema lya Nguluwi na kumlavila Mkulu Nguluwi.
LEV 19:22 Mtambika komditila uhanyisi kwa ing'holo ilume alyo hali Mkulu Nguluwi kokusilwa gehile ago goyaditile.
LEV 19:23 “Vyomluta kuli isi ya Kanaani na kunyala nyhadikwa zeng'ha za migodi ja mafuza, mafuza ago hamulya hebu, hamkundizwa kulya kwa mhela wa miyaka jidatu.
LEV 19:24 Kuli mwaka wa kane, mafuza geng'ha gowa gelile, golavigwa kuwa nhambiko ya katogo kwa Mkulu Nguluwi.
LEV 19:25 Ila mafuza ga kwaluchila mwaka wa kahano ago moweza kulya, na mbena kwa hemwe yokonjezeka. Heni ndo Mkulu Nguluwi, Nguluwi wa hemwe.
LEV 19:26 “Mleche kulya iwunde lyoneche liwele na danda. Mleche kulagula ne kudita uhawi.
LEV 19:27 Mleche kubeya mnvili za hafungo mwa makutu ga hemwe ne lulevu lwa hemwe lwa hafungo.
LEV 19:28 Mleche kitemanga mlukuli lwa hemwe kwa chiwalo cha wabagame na kiwika ulajilo mlukuli. Heni ndo Mkulu Nguluwi.
LEV 19:29 “Mleche kumuwifya muhinza wa hegwe kwa kumdita yawe mng'hondwa, isi yeng'ha ileche kugwila kuli ung'hondwa na ahyo kumema wihe.
LEV 19:30 Mochibatilila Zuwa lya Kwesela na kuhadumba honhu ha heni helile. Heni ndo Mkulu Nguluwi.
LEV 19:31 “Mleche kuwalutila walaguzi wa midimu ne wahawi leka muwalande wawalagulile na ahyo mowa mkokomoche. Heni ndo Mkulu Nguluwi, Nguluwi wa hemwe.
LEV 19:32 “Homchikala kumwando kwa wasekulu, yanguwalapa mwime leka kuwahulichiza. Namwe mumdumbe Nguluwi wa hemwe. Heni ndo Mkulu Nguluwi.
LEV 19:33 “Wone kuwe na mjenzi kuli isi ya hemwe, mleche kumditila vibi.
LEV 19:34 Ayo mjenzi yalingikala na hemwe kowa kwa hemwe kota mwenyeng'haye, namwe momgana kota vyomlingigana mwemwe baho, kwa vila namwe mwali wajenzi kuli isi ya Misili. Heni ndo Mkulu Nguluwi, Nguluwi wa hemwe.
LEV 19:35 “Mleche kutagusa vibi kuli vipimilo vya utali ne itunyo ne kumema.
LEV 19:36 Yanguwalapa muwe na vipimilo vya hachi. Heni nda Mkulu Nguluwi, Nguluwi wa hemwe, ndiwalavile kuli isi ya Misili.
LEV 19:37 Yanguwalapa kibata na kudita malajizo na utaguso weng'ha wa heni. Heni ndo Mkulu Nguluwi.”
LEV 20:1 Mkulu Nguluwi nakamlonjela Musa,
LEV 20:2 “Walonjele Waisilaeli kota munhu yoneche hali Waisilaeli ama mjenzi yalingikala na hemwe, yomlavya mwana wa heye yoneche kwa mlungu Moleki kota nhambiko, yangumlapa munhu ayo yabagame. Wanhu wa aho womkopola kwa kumtowa kwa maganga.
LEV 20:3 Heni ndomlema munhu ayo na kumbagula na wanhu wa heye kwa vila nakamlavya yumwe wa wanage, yawe nhambiko kwa mlungu Moleki, ahyo nakuhadita hawe hakokomoche honhu hangu helile na kulibeza itagwa lya heni lyelile.
LEV 20:4 Wone wanhu wa honhu aho womdinyila meho na kuleka kumkopola munhu ayo,
LEV 20:5 heni ndomlema munhu ayo na lukolo lwa heye. Ndowabagula hewo kulawa kuli wanhu wa hewo, yuye hamwe na weng'ha walingumlutila mlungu Moleki kota wang'hondwa.
LEV 20:6 “Wone munhu yoneche yowalutila walaguzi wa midimu na wahawi kota wang'hondwa, ayo hokundigwa na heni, ndomlema munhu ayo na kumbagula na wanhu wa heye.
LEV 20:7 Ahyo midite mwemwe muwe chiuyeng'ha, kwa vila heni nda Mkulu Nguluwi, Nguluwi wa hemwe.
LEV 20:8 Mibatilile malajizo ga heni na kugakolela. Heni nda Mkulu Nguluwi ndilinguweliza.
LEV 20:9 Munhu yoneche yalingumpanjila mhaza wa heye ama mayake, kobagama. Kana nongwa ilingumuwala kubagama.
LEV 20:10 “Wone mlume yadite ung'hondwa na mdala wa yalibehi na heye, ndangukomya yanguwalapa weng'ha weli wabagame.
LEV 20:11 Wone mlume yawase na yumwe wa wadala wa mhaza wa heye, kangumbasa soni mhaza wa heye, weng'ha weli ndangukomya yanguwalapa wabagame. Mlume ayo na mdala ayo, hewo wana nongwa ilinguwalapa wabagame.
LEV 20:12 Wone mlume yoneche yowasa na mdala wa mwanage, weng'ha weli yowalapa wabagame. Wajilila kwa kudita ung'hondwa wihile, wana nongwa ilinguwalapa kubagama.
LEV 20:13 Wone mlume yoneche yowasa na mlume miyage kota mdala, lelo weng'ha weli nawadita izudizo na yowagana wabagame, ahyo wana nongwa ilinguwalapa wabagame.
LEV 20:14 Wone mlume yohesa mdala na kahi yomhesa mamo wa mdala ayo, awo ndo wihe, weng'ha wadatu yanguwalapa walakazwe kwa chiluli leka kudumya wihe hali hemwe.
LEV 20:15 Wone mlume yoneche yowasa na igongolo, ndangukomya yangumlapa yabagame, na igongolo alyo nalyo libagame.
LEV 20:16 Wone mdala yolihejelela igongolo na kuwasa nalyo yangumlapa mdala ayo yabagame na igongolo nalyo libagame. Ahyo, wana nongwa ilinguwalapa kubagama.
LEV 20:17 “Wone mlume yoneche yomhesa lumbulye yapondigwe na mhaza wa heye ama mayake, na mhinza ayo nakekundiza na ayo mlume ayo yawele kalumbu wa heye, na kuwasa na heye, awo ndo wihe. Yanguwagana wabaguligwe na wayao wewhanile miyaka kwa vila nawadita mbuli ya soni. Mlume ayo kogazigwa kwa chiwalo cha gehile ga heye.
LEV 20:18 Wone mlume yawase na mdala yawele kuli mhela wa mbuli za chidala, weng'ha weli yanguwagana wabaguligwe na wanhu wa hewo. Mlume ayo nakawasa na mdala yakokomoche kwa kuwa na danda, na ayo mdala nakawasa na mlume na kuno yolawa danda.
LEV 20:19 Uleche kuwasa na mayako mkulu ne lumbu wa mhaza wa hegwe, mina ako ndo kuwabasa soni wang'holozo wali habehi na hegwe. Weng'ha walingudita ago wangulapigwa wagazigwe kwa chiwalo cha wihe wa hewo.
LEV 20:20 Wone munhu yawase na mdala wa mhaza wa heye mkulu ama mdodo, kangumbasa soni mhaza wa heye mkulu ama mdodo, weng'ha weli wowa na gehile, weng'ha weli wobagama ne wana.
LEV 20:21 Wone mlume yamhole mdala wa mkulugwe ama mdodowe, kangumbasa soni mng'holoze, ako ndo kukokomoka, weng'ha weli wobagama ne wana.
LEV 20:22 “Hemwe mweng'ha mwanguganigwa kibata na kukolela mijito malajizo na utaguso wa heni weng'ha, ila wone haiwa ahyo, isi yila yondilinguwahilika yowalema.
LEV 20:23 Mleche kuwinza vihendo vya wanhu wa isi yondilinguwawinga hali hemwe, kwa vila nawadita ago geng'ha, nani nandiwazudila ng'hatu.
LEV 20:24 Ila, mina nandiwalonjela, ‘Moihalila isi ya hewo, nani ndanguwapa isi ayo iwe ya hemwe, isi iwele na mboto.’ Heni nda Mkulu Nguluwi, Nguluwi wa hemwe yawabagule na isi zinji.
LEV 20:25 Lelo yangumgana yabagule igongolo linojile na likokomoche na chideje chinojile na chiwele chikokomoche. Mleche kidita muwe mkokomoche kwa kudoliza igongolo ama chideje ama choneche chilingutambala muisi chiwele ndichibagule chiwe chikokomoche.
LEV 20:26 Muwe mwelile kwa vila heni Mkulu Nguluwi nda yelile, na heni ndo ndiwabagulani hemwe na isi zinji leka muwe wa heni.
LEV 20:27 “Mlume ama mdala yoneche wone yawe mlaguzi wa midimu ama mhawi, imgana yabagame kwa kumtowa kwa maganga. Weng'ha wana nongwa ilinguwalapa wabagame.”
LEV 21:1 Mkulu Nguluwi nakamlonjela Musa, “Walonjele watambika wawele ndo walelwa wa Aluni kota haleche kuwa na munhu yoneche hali hewo yochidita yakokomoche kwa kudoliza mitufi ja wanhu wa lukolo lwa heye,
LEV 21:2 ila mtufi wa mng'holoze wa habehi kota mayake ama mhaza wa heye ama mwana wa heye ama mhinza wa heye ama mkulugwe ama mdodowe
LEV 21:3 ama lumbu wa heye yawele wa ivyazi lya heye lya habehi na heye yang'hali kuhesigwa, koweza kidita yakokomoche kwa chiwalo cha lumbu wa heye.
LEV 21:4 Heye mtambika yaleche kidita yakokomoche kwa wang'holoze kukolela kuhesa. Kwa kudita ahi, kangibeza heye yuye.
LEV 21:5 Walelwa wa Aluni nawaleche kubeya mnvili za honeche kumutwi kwa hewo ne lulevu lwawo ne kutema sale kuli ng'huli za hewo.
LEV 21:6 Wowa welile hali Nguluwi wa hewo waleche kulibeza itagwa lya Nguluwi wa hewo. Mina hewo ndo walingulavya zila nhambiko zoyalingupegwa Mkulu Nguluwi kwa chiluli na nhambiko yalingupegwa Nguluwi wa hewo. Lelo iwagana wawe welile.
LEV 21:7 Kwa vila mtambika nakawichigwa chiuyeng'ha na Nguluwi wa heye, yaleche kuhesa mdala yawele mng'hondwa ne mdala yawifigwe ne kupegwa kalatasi ya luleko.
LEV 21:8 Komzela mtambika kota nakaditigwa yawe yelile, mina heye ndo yalingulavya nhambiko ya ibumunda lya Nguluwi wa hegwe. Komzela kota ka yelile, mina heni Mkulu Nguluwi ndikwelize hegwe, nda yelile.
LEV 21:9 Mhinza wa mtambika yoneche yochibeza heye yuye kwa kudita ung'hondwa, heye kangumuwifya mhaza wa heye, kolakazwa kwa chiluli.
LEV 21:10 “Mtambika mkulu yoneche hali wang'holoze, yawele nakajidilwa mafuta kumutwi kwa heye, na kuwichigwa chiuyeng'ha leka yavale mivalo jelile, yaleche mnvili za heye ziwe zizuzumuche na yaleche kudadula mivalo ja heye kwa kulombocheza.
LEV 21:11 Yaleche kuhejelela mtufi ne kidita yakokomoche kwa mtufi hanga ka mhaza wa heye ama mamo wa heye.
LEV 21:12 Kwa vila kwelizwa kwa kubakaliza mafuta ga Nguluwi kwa mchanya mwa heye, lelo nayaleche kuka honhu helile na kuhadita hawe hakokomoche. Heni nda Mkulu Nguluwi.
LEV 21:13 Mtambika mkulu komhesa mdala yohanating'hana na mlume.
LEV 21:14 Hambe yakundigwe kumhesa mdala yafililwe na mlume wa heye ne mdala yapegwe kalatasi ya luleko na mlume wa heye ne mdala yawifigwe ne mdala mng'hondwa. Imlapa yahese mdala yohanating'hana na mlume kulawa wanhu wa heye yuye,
LEV 21:15 lelo yaleche kuwadita wana wa heye yuye wawe wakokomoche. Heni nda Mkulu Nguluwi ndimditile yawe yelile.”
LEV 21:16 Mkulu Nguluwi nakamlonjela Musa,
LEV 21:17 “Mlonjele Aluni kota mlelwa wa hegwe yoneche kuli ivyazi lyeng'ha lilinguya yawele na nongwa mli lukuli lwa heye, hambe yakundigwe kuhejelela na kundavila nhambiko ya ibumunda heni Nguluwi wa heye.
LEV 21:18 Munhu yoneche yawele na nongwa yaleche kuhejela kundavila nhambiko. Yawe yohambe yalole ama yaziliche vitomo ama yawele vibi kumeho ama yawele na chitomo chitomoche lukami
LEV 21:19 ama yawele na moko ama mgulu ulumile,
LEV 21:20 yawele na chiduhi ama munhu yawele chifude ama yawele na njele ama yawele na utamwa wa kizada ama yawele na utamwa wa ngozi ama yalumile mhumbu.
LEV 21:21 Mlelwa yoneche wa mtambika Aluni yawele na nongwa mli lukuli lwa heye, yaleche kuhejela kumlavila nhambiko kwa chiluli Mkulu Nguluwi. Hambe yalavye nhambiko ya ibumunda kwa Nguluwi wa heye.
LEV 21:22 Munhu ayo koweza kulya ibumunda lya Nguluwi wa heye na vinhu vyelile na vinhu vyelile ng'hatu.
LEV 21:23 Ila yaleche kulihejelela lila ipaziya ne hala honhu ha kulavila nhambiko kwa vila kana nongwa, leka yaleche kuhadita honhu aho helile hawe hawifigwe, kwa vila heni Mkulu Nguluwi ndo ndilinguwadita wawe welile.”
LEV 21:24 Musa nakawalonjela Aluni na wana wa heye na Waisilaeli weng'ha mbuli zila zeng'ha.
LEV 22:1 Mkulu Nguluwi nakamlonjela Musa,
LEV 22:2 “Walonjele Aluni na wana wa heye watambika kota welolele vinhu vyelile viwele Waisilaeli nawaviwika viwe vya chiuyeng'ha, leka waleche kulibeza itagwa lya heni lyelile. Heni ndo Mkulu Nguluwi.
LEV 22:3 Walonjele kota yumwe wa wana wa hewo kuli lulelo lwa hewo lweng'ha yovihejelela vinhu vyelile viwele Waisilaeli nawaviwika viwe vya chiuyeng'ha kwa heni Mkulu Nguluwi, kuno yawele yakokomoche, munhu ayo kobaguligwa na heni. Heni ndo Mkulu Nguluwi.
LEV 22:4 Wone munhu yoneche wa ivyazi lya Aluni yowa na utamwa wa ngozi ama mifila jilingumlawa, yaleche kulya vinhu vyelile mbaka hoyowa yelile. Munhu yoneche wone yamdolize munhu yawele yakokomoche kwa kudoliza mtufi ama munhu yalingulawa migonye,
LEV 22:5 ama wone yadolize chilumbigwe choneche chilingutambala chilingumwambuza munhu yawe yakokomoche ama munhu yawele yoweza kumdita munhu yawe yakokomoche kwa vilivinji hela,
LEV 22:6 munhu ayo, kowa yakokomoche mbaka matinazo na hambe yakundigwe kulya vinhu vyelile mbaka aho hoyoluta koga.
LEV 22:7 Isanya holizinga aho ndo kowa kela. Hamba koweza kulya vinhu vyelile kwa vila acho ndo chilyo cha heye.
LEV 22:8 Mtambika yaleche kulya iwunde lyoneche lya igongolo libagame liliyeka ama kukopoligwa na igongolo lya kisolo, leka yaleche kidita yawe yakokomoche. Heni ndo Mkulu Nguluwi.
LEV 22:9 Ahyo iwagana watambika wahulichize ilajizo lya heni, leka waleche kudita gehile na kukopoligwa kwa kubeza ilajizo. Heni Mkulu Nguluwi ndo ndilinguwadita wawe welile.
LEV 22:10 “Munhu yohawele wa lukolo lwa watambika, hambe yakundigwe kulya chilyo chelile. Mjenzi wa mtambika ama mkola mijito wa heye hambe yakundigwe kulya kahi.
LEV 22:11 Ila wone mtambika yamgule mpogozi leka yawe wa heye, lelo ayo mpogozi kokundigwa kulya na kahi wala wapondigwe haluga hake.
LEV 22:12 Wone mhinza wa mtambika nakahesigwa na munhu yohawele mtambika, hambe yakundigwe kulya nhambiko ya vinhu vyelile.
LEV 22:13 Ila wone mhinza wa mtambika ka mlekwa ama nakapegwa kalatasi ya luleko na kahi kahela mwana, na heye nakahiluka haluga kwa mhaza wa heye, na kikala na heye kota vyoiwele hamwande, lelo koweza kulya chilyo cha mhaza wa heye. Ila ivyazi lya mtambika liliyeka ndo lyokundigwa kulya chilyo acho.
LEV 22:14 Wone munhu yunji yolya vilyo avyo vyelile ne kuvizela, lelo kokonjeza honhu hamwe ha kahano kuli vila vinhu vyoyadile na kumhilusila mtambika.
LEV 22:15 Mtambika yaleche kuvibeza vinhu vyelile viwele Waisilaeli nawamlavila Mkulu Nguluwi
LEV 22:16 na ahyo kwambuza wanhu wawe na nongwa na kugazigwa kwa chiwalo cha kulya vilyo avyo vyelile. Heni Mkulu Nguluwi ndo ndilinguvidita vinhu avyo viwe vyelile.”
LEV 22:17 Mkulu Nguluwi nakamlonjela Musa,
LEV 22:18 “Mlonjele Aluni na wana wa heye watambika na Waisilaeli weng'ha kota munhu yoneche hali hemwe ama mjenzi yoneche yalingikala hali isi ya Isilaeli, yolavya nhambiko ya heye ya kulakazwa, iwe ya kutawiza kilaha ama nhambiko ya kunuwila kwa heye kwa kumlavila Mkulu Nguluwi,
LEV 22:19 leka yakundigwe, kolavya ibuguma limwe ama ing'holo ilume ama ipongo limwe lilihela nongwa.
LEV 22:20 Ilemezigwa kulavya choneche chiwele na nongwa, hambe chikundigwe kwa hemwe.
LEV 22:21 Munhu yoneche hoyomlavila Mkulu Nguluwi nhambiko ya kikala goya leka yatawize kilaha ama nhambiko ya kunuwila kulawa kuli chilundo cha heye cha migongolo, leka yakundigwe, igana liwe igongolo linojile, igongolo alyo liwe lilihela nongwa yoneche.
LEV 22:22 Uleche kumlavila Mkulu Nguluwi igongolo lyoneche liwele hambe lilole na chete na libeneche honhu honeche na lilingulavya mifila na liwele na utamwa wa kizada ama chilonda, na uleche kujilavya jiwe nhambiko kwa Mkulu Nguluwi kwa chiluli mchanya mwa honhu ha kulavila nhambiko.
LEV 22:23 Ibuguma ama ing'holo lyana liwele na chitomo chimwe chisoloche ama chifupi kusinda vyoilinguganigwa yokulapa kumlavila nhambiko ya kunuwila ya kumlavila Mkulu Nguluwi, ila uleche kulilavya liwe nhambiko ya kutawiza kilaha.
LEV 22:24 Igongolo liwele lilumile mhumbu ama ihondigwe ama isaluligwe ama idumuligwe, mleche kumlavila Mkulu Nguluwi. Uleche kudita chinhu cha ahyo muisi ya hegwe.
LEV 22:25 Na uleche kubochela kulawa kwa wajenzi migongolo jiwele ahyo na kumlavila Nguluwi wa hegwe kota nhambiko. Migongolo ajo jina nongwa kwa vila jidumuligwa na hojikundigwa kwa kugana hemwe.”
LEV 22:26 Mkulu Nguluwi nakamlonjela Musa,
LEV 22:27 “Wone isenga ama ing'holo ama mhene ileleche, lyopona na mayake kwa mazuwa saba. Ila kwaluchila zuwa lya nane lyoweza kulavigwa kwa Mkulu Nguluwi kwa chiluli.
LEV 22:28 Ila uleche kulidumula singo ibuguma ama ing'holo zuwa limwe hamwe na lyana lyake.
LEV 22:29 Homumlavila Mkulu Nguluwi nhambiko ya kuta malumbo, koilavya leka ukundigwe.
LEV 22:30 Igongolo alyo lyanguganigwa liliche zuwa lilyo, mleche kusigaza mbaka zuwa lya keli. Heni ndo Mkulu Nguluwi.
LEV 22:31 “Ahyo mochibatilila malajizo na kudita vyondonjile heni. Heni ndo Mkulu Nguluwi.
LEV 22:32 Mleche kulibeza itagwa lya heni lyelile, kwa vila lyanguganigwa lizeleche kota lyelile hali wanhu wa Isilaeli. Heni Mkulu Nguluwi ndo ndilinguwadita hemwe muwe mwelile.
LEV 22:33 Heni ndo ndiwalavile kulawa kuli isi ya Misili leka ndiwe Nguluwi wa hemwe. Heni ndo Mkulu Nguluwi.”
LEV 23:1 Mkulu Nguluwi nakamlonjela Musa,
LEV 23:2 “Walonjele Waisilaeli kota kuli mnvina za Mkulu Nguluwi, ziwele mozidamla kota mowa na nhing'hano yelile, mnvina zonandonjile ndo azi.
LEV 23:3 Kowa na mazuwa sita ga kukola mijito. Ila zuwa lya saba ndo zuwa lya kwesela, hamkola mijito na mowa kuli nhing'hano yelile. Zuwa alyo lya saba hamkola mijito hebu, alyo ndo zuwa lya kwesela kwa Mkulu Nguluwi kuli honhu homlingikala hemwe mweng'ha.
LEV 23:4 “Mnvina ziyage za Mkulu Nguluwi ndo mowa na nhing'hano yelile mozidamla kuli mhela uyage uwichigwe.
LEV 23:5 “Mhela wa kuzinga kwa isanya, kuli zuwa lya kumi na gane lya mwezi wa mwaluko, mogongomanya mnvina ya Pasaka ya Mkulu Nguluwi.
LEV 23:6 Zuwa lya kumi na kahano lya mwezi uwo, ndo lya mnvina kwa Mkulu Nguluwi, mnvina ya mibumunda johajiwichigwe usaso. Kwa mhela wa mazuwa saba, molya mibumunda johajiwichigwe usaso.
LEV 23:7 Kuli zuwa lya mwaluko mowa na nhing'hano yelile. Zuwa alyo mleche kukola mijito ja chila zuwa.
LEV 23:8 Kwa mhela wa mazuwa saba momlavila Mkulu Nguluwi nhambiko kwa chiluli. Kuli zuwa lya saba modita nhing'hano yelile. Mleche kukola mijito ja chila zuwa.”
LEV 23:9 Mkulu Nguluwi nakamlonjela Musa,
LEV 23:10 “Walonjele Waisilaeli kota vyomkwinjila kuli isi yondiwapa na kubeta mbena, momigalila mtambika chizabala cha mbena ya mwaluko.
LEV 23:11 Mtambika kodita ulajilo wa kwinula kuchanya chizabala acho hali Mkulu Nguluwi leka ukundigwe, loimalile Zuwa lya Kwesela, mtambika kokwinula kuchanya.
LEV 23:12 Zuwa alyo vyomwinula kuchanya kwa ulajilo wa kulavya acho chizabala, momlavila Mkulu Nguluwi nhambiko ya kulakazwa ya ing'holo lyana ilume lya mwaka umwe lilihela nongwa.
LEV 23:13 Hamwe na nhambiko ayo, molavya nhambiko ya nyhule ya kilo mbili za utimbo unojile uhanzigwe na mafuta ga mzeituni, gawele ndo ga kumlavila Mkulu Nguluwi kwa chiluli na kunhunyhilila kwake kwangunojeza na nhambiko ya heye ya chakunwa ndo lita imwe ya divai.
LEV 23:14 Namwe mleche kulya mibumunda ne nyhule zikalanjigwe ne nyhule ndodi, mbaka zuwa lyomumlavila nhambiko Mkulu Nguluwi wa hemwe. Ali ndo ilajizo loyalajize liwinzigwe mazuwa gose kuli lulelo lwa hemwe honhu honeche homchikala.
LEV 23:15 “Mowaliza majuma saba genele kwaluchila zuwa lila loimalile Zuwa lya Kwesela, lomigale chizabala cha nhambiko ya kwinula kuchanya.
LEV 23:16 Loifichile zuwa lya makumi gahano, zuwa lya keli ya Zuwa lya Kwesela lya saba, momlavila Mkulu Nguluwi nhambiko iyage ya nyhule zinyale.
LEV 23:17 Chila ivyazi kulawa kuli ng'handa za hewo, lyochigala mibumunda mili ja nhambiko ya kwinula kuchanya kwa ulajilo hali Mkulu Nguluwi. Ibumunda lyanguganigwa liwe ligongomanyigwe kwa kilo mbili za utimbo unojile uwichigwe usaso, na awo momlavila Mkulu Nguluwi uwe nhambiko ya mbena ya mwaluko.
LEV 23:18 Hamwe na ago, molavya ming'holo myana saba ja mwaka umwe jilihela nongwa na ilogota ilume limwe na ming'holo milume mili. Migongolo ajo jowa nhambiko ya kulakazwa hamwe na nhambiko ya nyhule na nhambiko ya cha kunwa. Nhambiko azo zolavigwa kwa chiluli na unhunyhililo awo womnojeza Mkulu Nguluwi.
LEV 23:19 Molavya ipongo limwe lya nhambiko ya gehile na ming'holo myana milume mili ja mwaka umwe kwa chiwalo cha nhambiko ya kikala goya.
LEV 23:20 Mtambika kovinula kuchanya vinhu avyo kwa ulajilo hali Mkulu Nguluwi, hamwe na ibumunda lya mbena ya mwaluko na jila ming'holo myana mili. Vinhu avyo ndo vyelile kwa Mkulu Nguluwi na avyo vyowa vya mtambika.
LEV 23:21 Zuwa lilyo mowikula kota hana nhing'hano yelile. Mleche kukola mijito ja chila zuwa. Ali ndo ilajizo lya kuwinza mazuwa gose kuli lulelo lwa hemwe lweng'ha, kuli kikala kwa hemwe.
LEV 23:22 “Hombeta mbena za hemwe kumgunda, lelo mleche kubeta mbaka kuli mbaka ja migunda ja hemwe na mleche kuhiluka kumbele kukungajiza gasigale. Mowalechela wazunwa na wajenzi. Heni ndo Mkulu Nguluwi, Nguluwi wa hemwe.”
LEV 23:23 Mkulu Nguluwi nakamlonjela Musa,
LEV 23:24 “Walonjele wanhu wa Isilaeli kota zuwa lya mwaluko lya mwezi wa saba mokwesela, zuwa lya kukumbuchila vyoiwikuligwa lizi lya mhalamhanda na kudita nhing'hano yelile.
LEV 23:25 Mleche kukola mijito ya chila zuwa na yanguganigwa mumlavile nhambiko Mkulu Nguluwi kwa chiluli.”
LEV 23:26 Mkulu Nguluwi nakamlonjela Musa,
LEV 23:27 “Zuwa lya kumi mwezi awo wa saba ndo Zuwa lya Uhanyisi. Zuwa alyo ndo zuwa lya nhing'hano yelile. Mokwesela kulya na kumlavila nhambiko Mkulu Nguluwi kwa chiluli.
LEV 23:28 Mleche kukola mijito ja hemwe joneche zuwa alyo. Zuwa alyo ndo Zuwa lya Uhanyisi, ndo zuwa ya kusa gehile hali Mkulu Nguluwi, Nguluwi wa hemwe.
LEV 23:29 Munhu yoneche yula yohambe yesele kulya zuwa alyo yanguganigwa yabaguligwe kutali na wanhu wa heye.
LEV 23:30 Munhu yoneche yokola mijito joneche zuwa alyo, ndomkopola kulawila kwa wanhu wa heye.
LEV 23:31 Mleche kukola mijito, ali ndo ilajizo lya kuwinza mazuwa gose kuli lulelo lwa hemwe, na kuli luga lwa hemwe lweng'ha.
LEV 23:32 Mokwesela zuwa alyo, namwe mokwesela kulya. Zuwa lya kwesela ndo zuwa lya tisa lya mwezi awo kwaluchila matinazo mbaka matinazo zuwa lya kumi.”
LEV 23:33 Mkulu Nguluwi nakamlonjela Musa,
LEV 23:34 “Walonjele Waisilaeli kota kwaluchila zuwa lya kumi na zihano lya mwezi awo wa saba, momditila Mkulu Nguluwi mnvina ya vibumuli kwa mhela wa mazuwa saba. Ayo ndo mnvina ya Mkulu Nguluwi.
LEV 23:35 Zuwa lya mwaluko lya mazuwa ago saba, mowa na nhing'hano yelile na mleche kukola mijito ja chila zuwa.
LEV 23:36 Kwa mhela wa mazuwa saba molavya nhambiko kwa Mkulu Nguluwi kwa chiluli. Zuwa lya nane mowa na nhing'hano yelile na kumlavila nhambiko Mkulu Nguluwi kwa chiluli. Nhing'hano ayo ndo yelile. Zuwa alyo mleche kukola mijito ja chila zuwa.
LEV 23:37 “Azo ndo mnvina za Mkulu Nguluwi ziwichigwe, ziwele mowikula kuwe na nhing'hano yelile ya Mkulu Nguluwi, nhambiko zilingulavigwa kwa chiluli na nhambiko ya kulakazwa na nhambiko za nyhule na nhambiko na nhambiko za cha kunwa, chila imwe na zuwa yake iwichigwe.
LEV 23:38 Nhambiko azo ndo hamwe na zila zomuwele ngumlavila Mkulu Nguluwi Zuwa lya Kwesela hamwe na ndolendole ya hemwe na hamwe na nhambiko ya kutawiza kilaha kwa hemwe na hamwe na nhambiko za hemwe za kunuwila zomlingumlavila Mkulu Nguluwi.
LEV 23:39 “Aho hombeta migunda ja hemwe modita mnvina ya Mkulu Nguluwi kwa mhela wa mazuwa saba, kwaluchila zuwa lya kumi na zihano lya mwezi wa saba. Zuwa lya mwaluko lyowa Zuwa lya Kwesela na kahi zuwa lya nane.
LEV 23:40 Kuli zuwa lya mwaluko mohola mafuza ga igodi linojile na nhagala za mitende na nhagala ziwele na mahamba menji na nhagala za migodi jilingota hafungo ha lwanda, na hemwe modita mnvina hali Mkulu Nguluwi, Nguluwi wa hemwe kwa mazuwa saba.
LEV 23:41 Chila mwaka yangulapigwa kuwe na mnvina ayi kwa mhela wa mazuwa saba kwa Mkulu Nguluwi. Ali ndo ilajizo lya kuwinza mazuwa gose kuli lulelo lwa hemwe. Modita ahi kuli mwezi wa saba.
LEV 23:42 Kwa mhela wa mazuwa saba mochikala kuli vibumuli. Waisilaeli weng'ha wochikala kuli vibumuli mhela awo.
LEV 23:43 Mbuli ayo yoluzelesa lulelo lwenu kota vyondiwalavile wanhu wa Isilaeli kuli isi ya Misili, nandiwadita wekale kuli vibumuli. Heni ndo Mkulu Nguluwi, Nguluwi wa hemwe.”
LEV 23:44 Musa nakawalonjela Waisilaeli mnvina za Mkulu Nguluwi ziwichigwe.
LEV 24:1 Mkulu Nguluwi nakamlonjela Musa,
LEV 24:2 “Walajize wanhu wa Isilaeli wakigalile mafuta ganojile ga mzeituni kwa chiwalo cha chenje leka chenje acho chilutilile kwaka chila mhela.
LEV 24:3 Aluni kowika chenje acho mgati mwa alyo ihema lya Nguluwi, kunze kwa ipaziya lya isanduku lya ilagano leka chiwe chikwaka kwaluchila matinazo mbaka mitondo hali Mkulu Nguluwi chila mhela. Ali ndo ilajizo lya kuliwinza mazuwa gose kuli lulelo lwa hemwe.
LEV 24:4 Kowika avyo vyenje kuli chinhu cha kuwichila vyenje cha zahabu inojile, viwe vikwaka chila mhela hali Mkulu Nguluwi.
LEV 24:5 “Uhole utimbo unojile kilo makumi meli na gane na kuteleka mibumunda kumi na mili.
LEV 24:6 Mibumunda ajo jowichigwa hali msitali wa keli mchanya mwa chisaga cha zahabu inojile hali Mkulu Nguluwi, chila msitali mibumunda sita.
LEV 24:7 Chila msitali kowika ubani, leka kuwe kukumbuchila kwa mibumunda ajo, nhambiko ya kumlavila Mkulu Nguluwi kwa chiluli.
LEV 24:8 Chila Zuwa lya Kwesela Aluni koiwika goya kuli honhu hali Mkulu Nguluwi kwa chiwalo cha wanhu wa Isilaeli kota ilagano lya mazuwa gose.
LEV 24:9 Aluni na walelwa wa heye weng'ha waliyeng'ha ndo wangukundigwa kulya mibumunda ajo. Wolya kuli honhu hanji helile kwa vila ajo ndo jelile ng'hatu kuli nhambiko zilingulavigwa kwa Mkulu Nguluwi kwa chiluli. Ayi ndo hachi kwa hewo mazuwa gose.”
LEV 24:10 Zuwa limwe nakulawila kilewa ako kuli kambi hali Muisilaeli yumwe na msongolo yumwe wa mamo Muisilaeli yalinguchemigwa Shelemoti, ila mhaza nayali Mmisili.
LEV 24:11 Hamba yula msongolo Muisilaeli yawele mayake nakachemigwa Shelemoti, mhinza wa Dibuli wa nhanzi ya Dani, nakalibeza na kulipanjila itagwa lya Nguluwi. Lelo wanhu nawamhilika msongolo kwa Musa,
LEV 24:12 nawamibata mbaka aho hoyogubulilwa vyoyalingugana Mkulu Nguluwi.
LEV 24:13 Hamba, Mkulu Nguluwi nakamlonjela Musa,
LEV 24:14 “Mumlavye kunze mwa kambi ayo msongolo yapanjile, na wala weng'ha wamhuliche yopanjila wawiche moko ga hewo mchanya mwa mutwi wa heye, na Waisilaeli weng'ha wamkopole kwa kumtowa kwa maganga.
LEV 24:15 Nagwe uwalonjele Waisilaeli kota munhu yoneche yompanjila Nguluwi wa heye yanguganigwa yagazigwe kwa chiwalo cha gehile ga heye.
LEV 24:16 Munhu yoneche yawe mwenyeng'haye ama mjenzi yawele ngulibeza itagwa lya Mkulu Nguluwi, Waisilaeli weng'ha womkopola kwa kumtowa kwa maganga.
LEV 24:17 Munhu yoneche yalingumkopola munhu yunji, yangumlapa na heye yakopoligwe.
LEV 24:18 Munhu yoneche yalingulikopola igongolo yangumlapa yahilule chinhu kwa chiwalo cha kukopola ako, ukomu kwa ukomu.
LEV 24:19 Munhu yoneche yomlumiza munhu wa habehi na heye, yangumlapa na heye yalumizwe kota vyoyamlumize munhu wa habehi na heye,
LEV 24:20 wone nakambena izeje miyage, na heye kobenigwa izeje na iziho kwa iziho na izino kwa izino. Chila munhu yomlumiza miyage yangumlapa na heye yalumizwe kota vyoyaditile heye.
LEV 24:21 Yawele yolikopola igongolo yomlapa yahilule chinhu, ila munhu yoneche yomkopola miyage, yomlapa na heye yakopoligwe.
LEV 24:22 Utaguso awu weng'ha wanguganigwa kuwinzigwa na wanhu weng'ha, mjenzi ama mwenyeng'haye. Heni ndo Mkulu Nguluwi, Nguluwi wa hemwe.”
LEV 24:23 Lelo Musa nakawalonjela Waisilaeli ago geng'ha. Nawamuhilika yula munhu yampanjile Mkulu Nguluwi kunze mwa kambi, nawamkopola kwa kumtowa kwa maganga. Ahyo ndo Waisilaeli vyowaditile kota Mkulu Nguluwi vyoyamlajize Musa.
LEV 25:1 Mkulu Nguluwi nakamlonjela Musa ako kuli chidunda cha Sinai,
LEV 25:2 “Walonjele Waisilaeli kota homkwinjila kuli isi yondiwapele heni Mkulu Nguluwi, chila mwaka wa saba isi yokwesezwa ileche kulimigwa kwa chiwalo cha Mkulu Nguluwi.
LEV 25:3 Kwa mhela wa miyaka sita molima migunda na mohalila mizabibu ja hemwe na kubeta vilyo vya hemwe.
LEV 25:4 Ila mwaka wa saba wowa ndo mwaka wa kwesela kwa isi, ndo mwaka wa kwesela kwa Mkulu Nguluwi. Mleche kunyala choneche na kuhalila mizabibu ja hemwe.
LEV 25:5 Choneche chikota chiliyeka mleche kuchibeta ne kubawa zabibu kulawa kuli mizabibu johajidahulilwe. Awo wowa ndo mwaka wa kweseza migunda.
LEV 25:6 Ahyo mhela awo wa kwesela kwa isi wokupani chilyo hemwe na vitumagwa wa hemwe walume na wadala na wakolamijito na wajenzi walingikala hali hemwe.
LEV 25:7 Isi yojipa chilyo migongolo ja hemwe na migongolo ja kisolo jiwelengikala hali hemwe.
LEV 25:8 “Mowaliza miyaka saba mala saba na jeng'ha ndo miyaka makumi gane na tisa.
LEV 25:9 Hamba, kuli zuwa lya kumi lya mwezi wa saba, liwele ndo Zuwa lya Uhanyisi, momlajiza munhu kupemba mhalamhanda kuli isi yeng'ha.
LEV 25:10 Mwaka wa makumi gahano moudita uwe wa chiuyeng'ha kwa kuwikula kilejeha kwa wapogozi weng'ha muisi. Mwaka awo wowa wa kukumbuchila kwa miyaka makumi gahano. Chila yumwe wa hemwe kohiluka hali honhu ha heye ha isi na chila yumwe kohiluka kuli lukolo lwa heye.
LEV 25:11 Kwa vila mwaka awo ndo wa kukumbuchila kwa miyaka makumi gahano, mleche kunyala nyhadikwa ama kubeta choneche chilingota chiliyeka ne kubawa zabibu kulawa mizabibu johamdahulile.
LEV 25:12 Mwaka awo ndo wa mhela wa kukumbuchila miyaka makumi gahano kwa hemwe, wowa mwaka welile. Ahyo molya gala galingota galiyeka kumgunda.
LEV 25:13 “Kuli mwaka awo, chila munhu kohiluka kuli honhu ha heye ha isi.
LEV 25:14 Uleche kubunza hougula ama kuguza mgunda kwa munhu wa habehi.
LEV 25:15 Bei ya mgunda yolapa iwichigwe kwa kiwhana na miyaka jiwele isi ing'hali kulavya mbena, kung'hali fika kuli mhela wa kukumbuchila miyaka makumi gahano.
LEV 25:16 Wone miyaka jilingulapigwa ndo minji kokonjeza bei na wone miyaka ajo ndo mido kopungula bei, kwa vila bei ya heye yopimigwa kuli mbena zoyalingukuguzila.
LEV 25:17 Mleche kibunza mwemwe baho, ila mumdumbe Nguluwi wa hemwe. Heni ndo Mkulu Nguluwi, Nguluwi wa hemwe.
LEV 25:18 “Muwinze malajizo na utaguso wa heni, leka mlutilile kikala kwa kikala goya kuli isi.
LEV 25:19 Isi yolavya vilyo na hemwe molya na kiguta na kikala goya amo muisi.
LEV 25:20 Ila hanji mouza, ‘Tolya choni kuli mwaka wa saba, wone hambe tukundizwe kunyala ama kubeta vilyo vya hetwe?’
LEV 25:21 Heni ndoitambichiza isi kuli mwaka wa sita na ayo yowapani hemwe chilyo cha kuhega kwa miyaka jidatu.
LEV 25:22 Homnyala kuli mwaka wa nane, mowa mulya chilyo cha katali na molutilila kulya hela mbaka mwaka wa tisa homkwaluka kahi kubeta.
LEV 25:23 “Isi ileche kuguzigwa kwa mazuwa gose, kwa vila ayo ndo lufufu lwa Nguluwi, na hemwe ndo mwa wajenzi na mli mmajendo muisi ya heni.
LEV 25:24 Ndo mina mowa na mumhu ya kuigombola isi, kuli isi ya hemwe yeng'ha.
LEV 25:25 “Wone mng'holozo yawe mzunwa, nakaguza mgunda wa heye, lelo mng'holozo wa habehi yawele na mijito ja kuigombola, koigombola.
LEV 25:26 Wone munhu ayo kahela mng'holoze yawele na mijito ja kuigombola, ila hamba kawa na lufufu na kuwa na ludali lwa kuugombola mgunda wa heye,
LEV 25:27 lelo kowaliza miyaka jilinguganigwa kwaluchila hoyaguzile na kuhilusa sendi za heye, na yula munhu yaugulile mgunda awo ndo yangumlapa yamuhilusile.
LEV 25:28 Ila wone yawe hela lufufu lwa kuhega kuugombola, lelo wopona mmoko mwa yula yaugulile mbaka mwaka wa kukumbuchila kwa miyaka makumi gahano. Kuli mwaka awo, ndo yangulapigwa mgunda awo ulechigwe na kuhilusilwa yula munhu yauguzile.
LEV 25:29 “Ila wone munhu yaguze ng'handa ya heye ya kikala iwele mgati mwa muji uzenjigwe lukanzi, koweza kuigombola kwa mhela wa mwaka umwe kwaluchila hoyaiguzile. Kwa mwaka awo weng'ha kowa na hachi ya kuigombola.
LEV 25:30 Wone ng'handa iwele kuli muji uzenjigwe lukanzi haigomboligwe kwa mhela wa mwaka umwe, lelo yowa ya yula yagulile mazuwa gose kuli ivyazi lya hewo lyeng'ha, na hoihilula ng'oo kuli mwaka wa kukumbuchila miyaka makumi gahano.
LEV 25:31 Ila ng'handa za vijiji viwele havizungulusilwe lukanzi, zowalizwa hamwe na migunda ja isi, ng'handa azo zoweza kugomboligwa ila yanguganigwa zihiluswe kwa yuye kuli mwaka wa kukumbuchila miyaka makumi gahano.
LEV 25:32 Ahyo ng'handa ziwele kuli miji jowawelenajo Walawi, Walawi woweza kuzigombola mhela woneche.
LEV 25:33 Wone yumwe wa Walawi hambe yadite hachi ya heye ya kugombola, lelo ng'handa iguzigwe ndo yanguganigwa ihiluswe kwa yuye kuli mwaka wa kukumbuchila miyaka makumi gahano, kwa vila ng'handa ziwele kuli muji wawelengikala Walawi nawapegwa kota honhu hawo kulawila kwa wanhu wa Isilaeli.
LEV 25:34 Ila migunda ja miji jowawelenajo hewo Walawi kwa hamwe, jileche kuguzigwa, kwa vila ajo migunda ndo uhalizi wa hewo Walawi mazuwa gose.”
LEV 25:35 “Wone mng'holozo kawa mzunwa na hambe yaweze kilolela yuye yawele hamwe na hegwe, yanguganigwa umlolele na yalutilile kikala na hegwe, umditile kota mjenzi ama munhu yawele mmajendo yawele kwa hegwe.
LEV 25:36 Uleche kugana yakuhilusile nyonjeza. Ila umdumbe Nguluwi, leka heye mng'holozo yekale hamwe na hegwe.
LEV 25:37 Uleche kumwazika sendi leka yakuhilusile na nyonjeza ama kumha chilyo leka yakonjeze mzidi.
LEV 25:38 Heni ndo Mkulu Nguluwi, Nguluwi wa hegwe, ndikulavile kuli isi ya Misili, leka ndikupe isi ya Kanaani, leka ndiwe Nguluwi wa hegwe.
LEV 25:39 “Wone mng'holozo yalingikala habehi na hegwe nakawa mzunwa, wone yeguze kwa hegwe, uleche kumdita yakukolele mijito kota mpogozi.
LEV 25:40 Kochikala na hegwe kota chitumagwa yalingukola mijito ama kota mjenzi. Kokukolela mijito mbaka mwaka wa kukumbuchila miyaka makumi gahano.
LEV 25:41 Mwaka awo yanguganigwa yawe yelejehe yahiluche na wana wa heye na honhu ha uhalizi wa wasekulu wa heye.
LEV 25:42 Kwa vila Waisilaeli ndo vitumagwa wa heni nandiwalavile kuli isi ya Misili, lelo waleche kuguzigwa kota wapogozi.
LEV 25:43 Uleche kumlongoza mng'holozo kwa kung'ang'ala, leka umdumbe Nguluwi wa hegwe.
LEV 25:44 Ila kwa chiwalo cha wapogozi wadala na walume, moweza kuwagula kulawa kwa wanhu wa isi iyage ya habehi.
LEV 25:45 Moweza kahi kugula wapogozi kulawa kwa wajenzi walingikala hamwe na hemwe na wanhu wa hewo wapondigwe muisi ya hemwe, na hewo wowa wapogozi wa hemwe.
LEV 25:46 Awo wapogozi moweza kuwahilika kwa wana leka wawe uhalizi wa hewo na lufufu lwa hewo mazuwa gose. Awo moweza kuwadita wawe wapogozi wa hemwe, ila ayo mng'holozo Muisilaeli, mleche kumlongoza kwa kung'ang'ala.
LEV 25:47 “Wone mjenzi ama munhu yawele mmajendo yawelengikala hali hemwe nakawa na lufufu, na mng'holozo nakawa mzunwa na kiguza yuye kwa ayo mjenzi ama ayo munhu yawele mmajendo ama kwa yumwe wa wanhu wa hewo,
LEV 25:48 koweza kugomboligwa loyeguzile, munhu yumwe wa wang'holozo koweza kumgombola.
LEV 25:49 Kolo wa heye koweza kumgombola, ama mwanage kolo ama mng'holoze wa habehi kuli lukolo lwa heye, koweza kahi kigombola heye yuye wone yapate lufufu.
LEV 25:50 Wone heye yawe hamwe na yula yagulile, kowaliza jila miyaka hoyeguzile mbaka mwaka wa kukumbuchila miyaka makumi gahano. Bei ya kugomboligwa kwa heye leka yawe yelejehe, yochiwhana na bei ya mijito ja miyaka jisigale.
LEV 25:51 Wone hisabu ya miyaka mbaka mwaka wa kukumbuchila kwa miyaka makumi gahano ndo ng'hulu, lelo kohilula chasi cha bei yoyalipilwe.
LEV 25:52 Wone miyaka mido jipungula kung'halifika kukumbuchila kwa miyaka makumi gahano, kowaliza chasi cha bei isigale kuli miyaka ajo na kumha ayo chasi acho.
LEV 25:53 Mhela weng'ha loyawele kwa mkulu wa heye ndo yanguganigwa yaditilwe kota chitumagwa wa msahala chila mwaka. Hamkundigwa kumditila kwa kung'ang'ala.
LEV 25:54 Ila wone munhu ayo hagomboligwe kwa nzila azo, lelo yapegwe kilejeha kwa heye na wana wa heye kuli mwaka wa kukumbuchila kwa miyaka makumi gahano.
LEV 25:55 Kwa vila Waisilaeli ndo vitumagwa wa heni, nandiwalavile kuli isi ya Misili. Heni ndo Mkulu Nguluwi, Nguluwi wa hemwe.
LEV 26:1 “Mleche kigongomanyila jimalukolo ja milungu ja udesi, mleche kwimiza jimalukolo ja hewo ja kuhongola ne izengo ne jimalukolo ja maganga gahongoligwe muisi ya hemwe na kujifugamila. Heni ndo Mkulu Nguluwi, Nguluwi wa hemwe.
LEV 26:2 Mibatilile Zuwa lya Kwesela lya heni na kuhadumba honhu ha heni helile. Heni ndo Mkulu Nguluwi.
LEV 26:3 “Wone muwinze malajizo ga heni na kibatilila utaguso wa heni na kugadita,
LEV 26:4 ndowatowela nhonya mhela unojile, leka isi ilele vilyo vinji, na migodi ja kuli migunda jolela mafuza gake.
LEV 26:5 Kubena vilyo kolutilila mbaka mhela wa kubawa zabibu na kubawa zabibu mbaka mhela wa kunyala nyhadikwa. Mowa na vilyo vinji na kikala goya muisi ya hemwe.
LEV 26:6 “Ndowaditani mikale goya muisi na muwe muwasile goya leka mleche kudumba choneche. Ndojusa migongolo jing'ang'ale kuli isi na isi ya hemwe haiwa na ngondo.
LEV 26:7 Mowawinga wang'honyo wa hemwe na kuwakopola kwa ipanga.
LEV 26:8 Wanhu wahano wa hemwe wowawinga wang'honyo miya imwe na miya imwe wa hemwe wowawinga wang'honyo elufu kumi. Wang'honyo wa hemwe wobagama hali hemwe kwa ipanga.
LEV 26:9 Ndowatambichizani na kuwadita muwe na wana wenji na konjezeka, nani ndolitawiza ilagano lya heni na hemwe.
LEV 26:10 Mhela wa kubena mowa mng'hali mulya vilyo vya katali, kahi yowalapa kusa visigale leka muwe na honhu ha kuwika vilyo vinyale.
LEV 26:11 Ndowika honhu ha kikala ha heni hali hemwe, na siwabeza hebu.
LEV 26:12 Ndojenda hali hemwe na ndowa Nguluwi wa hemwe na hemwe mowa wanhu wa heni.
LEV 26:13 Heni ndo Mkulu Nguluwi, Nguluwi wa hemwe, nandiwalavile kuli isi ya Misili leka mleche kuwa wapogozi wa Wamisili. Heni nandiwalavya kuli upogozi kuli isi ya Misili na kuwadita muwe milejehe.
LEV 26:14 “Ila wone hamnyulichiza na kuwinza malajizo gondajize,
LEV 26:15 na wone mleme malajizo ga heni na kuzudila utaguso wa heni mnhumbula, moleka kuhulichiza malanguso ga heni geng'ha na kubena ilagano lya heni,
LEV 26:16 lelo heni ndowasubula kwa kuwagalila kudumba ng'hatu kwa kutinusa na lugandaganda na utamwa wouwatosolani meho na kuwadita muwe ng'hochele. Monyala nyhadikwa za hemwe ne kubena chinhu kwa vila wang'honyo wa hemwe ndo wolya.
LEV 26:17 Heni ndowalema, namwe motoweka na wang'honyo wa hemwe, molongozwa na wala walinguwazudilani. Mokabuswa na kubilima na hanji kowa haduhu munhu yoneche yalinguwabilimisa.
LEV 26:18 Na wone iwe mgaziche ahyo, mng'hali hamnyulichiza hebu, lelo ndowapa magazo mala saba kwa chiwalo cha gehile ga hemwe.
LEV 26:19 Kidaya kwa hemwe ndokubena ng'hatu kwa kudita isi iwehela nhonya na isi ya hemwe iwe igagadale kota shaba.
LEV 26:20 Molavya mong'ho hela mina migunda jenu hajilavya vilyo na isi ya hemwe hailela mafuza hebu.
LEV 26:21 “Wone mlutilile kulema kunyhulichiza chondilajiza, ndokonjezela kahi magazo ga hemwe mala saba vyoilinguganigwa na winji wa gehile ga hemwe.
LEV 26:22 Ndojigala migongolo jing'ang'ale hali hemwe na jowanyasulilani wana wa hemwe na kulya migongolo ja hemwe, na kudumya winji wa hemwe na kuli nzila za hemwe zowa na uchiwa.
LEV 26:23 “Wone iwe mng'hali mlema kungalamchila heni, lelo mwangonjeza kitowa na heni,
LEV 26:24 lelo, nani ndokonjeza kitowa na hemwe na kuwatowani mala saba ng'hatu kwa chiwalo cha gehile ga hemwe.
LEV 26:25 Ndokugalilani ipanga liwele lya kuhilusa chibida chilingulapa ilagano lyombenile. Wone hemwe mobilimila kuli muji wa hemwe, ndowahilichila matamwa gehile na kuwawika mmoko wa wang'honyo wa hemwe.
LEV 26:26 Chilyo cha hemwe ndochipunguza na wadala kumi woteleka chiko chimwe hela. Wowagawila kwa chipimilo. Na vyomulya mowa hamigute hebu.
LEV 26:27 “Na wone galawile ago geng'ha, kuno mng'hali mlema kunyhulichiza na mlutilila kitowa na heni,
LEV 26:28 lelo heni ndochitowa na hemwe kwa kuzudila ng'hatu, na kuwatowa nene baha mala saba kwa chiwalo cha gehile ga hemwe.
LEV 26:29 Mowa na nzala ng'hatu, ahyo molya miwunde ja wana wa hemwe walume na wadala.
LEV 26:30 Ndohawifya honhu ha hemwe ha kusalila ako kuchidunda na kuhabomola honhu ha kulavila nhambiko ha hemwe ha kufunyizila ubani na kutaga mitufi ja hemwe mchanya mwa jimalukolo ja milungu ja hemwe. Nhumbula ya heni yowazudilani ng'hatu.
LEV 26:31 Muji wa hemwe ndoubomola na honhu ha hemwe ha kufugamila jimalukolo, ndohadita hawe na uchiwa na kunhunyhilila kunojile kwa nhambiko za hemwe sikukunda hebu.
LEV 26:32 Ndoidita isi ya hemwe iwe iwifigwe ng'hatu, mbaka wang'honyo walinguhamila amo wobubuwala.
LEV 26:33 Ndowasambalulani hemwe hali wanhu wa isi zimwenga na kusomola ipanga hali hemwe. Isi ya hemwe yowa ya uchiwa na miji ja hemwe jowa jiwifigwe.
LEV 26:34 “Vyomuwa kuli isi ya wang'honyo wa hemwe, aho ndo isi vyoisechelela kwesela mhela vyouwa hali uchiwa. Isi yokwesela na kusechelela.
LEV 26:35 Isi vyoiwa hali uchiwa yokwesela, kwesela ako kuwele hakunalawila kuli mwaka wa saba vyonamwali mchikala hala kuli isi yila.
LEV 26:36 Kuli wamwe wa hemwe wopona wakomu, ndowegalila kudumba mnhumbula za hewo, kuli isi ayi wang'honyo wa hewo. Ihamba liwembeluswa lyowadita wabilime. Wobilima kota munhu yalingubilima ngondo. Wobilima na kugwa kuno haduhu munhu yalinguwabilimisa.
LEV 26:37 Wochigwila vibi kota munhu yalingubilima ngondo kuno haduhu yalinguwabilimisa. Mowahela mong'ho wa kitowa na wang'honyo wa hemwe.
LEV 26:38 Mobagama hali wanhu na isi za wang'honyo wa hemwe, zowamela.
LEV 26:39 Wone wayenu wamwe wasigale kuli isi za wang'honyo wa hemwe, wowa ng'hochele na kumala kwa chiwalo cha gehile ga hewo na kwa chiwalo cha gehile ga wasekulu wa hewo.
LEV 26:40 “Ila wone walonje kwa milomo ja hewo gehile na gehile ga wasekulu wa hewo hali gehile gowaditile kwa heni na kuli kitowa kwa hewo na heni,
LEV 26:41 ahyo nanditowile na hewo na kuwahilika kuli isi ya wang'honyo wa hewo, wone iwe kukomya, nhumbula za hewo zigagadala wone wadedeze na kukunda kugazigwa kwa chiwalo cha gehile ga hewo,
LEV 26:42 lelo aho nani ndolikumbuchila ilagano lya heni na Abulahamu na Isaka na Yakobo, na kuikumbuchila yila isi.
LEV 26:43 Mhela vyowowa kunze kwa isi ya hewo, isi ayo yosechelela kwesela kwa hewo vyokuwa kuli uchiwa. Mhela awo hewo wa kukunda kugazigwa kwa chiwalo cha gehile ga hewo kwa vila nawalema kuhulichiza utaguso wa heni na kubeza malajizo ga heni.
LEV 26:44 Ila, hamwe na ago geng'ha, lowowa kuli isi ya wang'honyo wa hewo, heni siwaleka hebu ne kuwazudila ne kuwakopola ng'hatu ne kuleka lila ilagano lya heni, Mkulu Nguluwi, Nguluwi wa hewo.
LEV 26:45 Ila kwa chiwalo cha hewo ndokumbuchila ilagano lyonditile na wasekulu wa hewo na londiwalavile kuli isi ya Misili, kuno isi zeng'ha zilolela, leka heni ndiwe Nguluwi wa hewo. Heni nda Mkulu Nguluwi.”
LEV 26:46 Aga ndo malajizo na mizilo na utaguso gawele Mkulu Nguluwi nakamha wanhu wa Isilaeli kula kuchidunda cha Sinai kwa kukolela Musa.
LEV 27:1 Mkulu Nguluwi nakamlonjela Musa,
LEV 27:2 “Walonjele Waisilaeli kota wone munhu yawiche chilaho cha kumlavila munhu Mkulu Nguluwi, munhu ayo koweza kusa chilaho cha heye kwa kulipiza chasi cha sendi zoziganigwe kota ahi.
LEV 27:3 Mlume yawele na miyaka makumi meli mbaka miyaka makumi sita kogomboligwa kwa sendi migwala makumi gahano kwa kuwinza chipimilo cha ihema lya Nguluwi.
LEV 27:4 Wone yawe mdala, kogomboligwa kwa sendi migwala makumi gadatu.
LEV 27:5 Wone munhu ayo yawe wa miyaka jihano mbaka miyaka makumi meli kogomboligwa kwa sendi migwala makumi meli wone yawe mlume na migwala kumi ja sendi wone yawe mdala.
LEV 27:6 Wone yawe mwana wa mwezi umwe mbaka miyaka jihano, kogomboligwa kwa sendi migwala jihano ja sendi wone yawe mlume na migwala jidatu ja sendi wone yawe mdala.
LEV 27:7 Wone munhu ayu kana miyaka makumi sita na mzidi, kogomboligwa kwa sendi migwala kumi na jihano ja sendi wone yawe mlume na migwala kumi ja sendi wone yawe mdala.
LEV 27:8 Ila wone iwe munhu ayo ndo mzunwa na hambe yaweze kuhilusa sendi za heye zoyawele ngudaigwa, lelo munhu ayo kohilikwa kwa mtambika. Mtambika komlola goya na kwamula chasi cha sendi choyalinguganigwa kulavya kuli ludali lwa heye lwa kilaha.
LEV 27:9 “Wone kilaha kwa heye kwangulapa igongolo liwele wanhu humlavila Mkulu Nguluwi nhambiko, lelo chila nhambiko kota igongolo alyo, yowa chinhu chelile.
LEV 27:10 Hambe ikundigwe kuligalula igongolo alyo kwa yunji yoneche yula, yanojile kwa yehile ama yehile kwa yanojile. Wone yagalule kwa igongolo liyage, jeng'ha mili jowa jelile.
LEV 27:11 “Wone choyelahile acho changulapa igongolo likokomoche, liwele hambe liwe lya kumlavila Mkulu Nguluwi, lelo munhu yalilavile, koligala kwa mtambika,
LEV 27:12 na heye mtambika kolonga chasi cha sendi ya heye kota vyoiwele kunoga ama kwiha kwa heye. Ndo vyoiwa yuye mtambika vyoyolonga.
LEV 27:13 Ila wone iwe yuye yogana kugombola, lelo kokonjeza chasi cha sendi honhu ha kahano ha bei ya igongolo alyo.
LEV 27:14 “Wone munhu yaiwiche ng'handa ya heye iwe ya chiuyeng'ha kwa Mkulu Nguluwi, mtambika kolonga bei ya heye kota vyoiwele kunoga ama kwiha kwa heye. Ndo vyoiwa yuye mtambika vyoyolonga.
LEV 27:15 Wone ayo munhu yaiwichile chiuyeng'ha, yagane kugombola ayo ng'handa, lelo kokonjeza honhu ha kahano ha chasi cha sendi za heye, na alo lowa lufufu lwa heye.
LEV 27:16 “Wone munhu yauwiche chiuyeng'ha mgunda wa heye kwa Mkulu Nguluwi, lelo sendi za heye zopimigwa kota nyhadikwa zila zinyaligwe kuli mgunda awo, kwa chila kilo makumi meli ga shayili, sendi ya ayo yowa migwala kumi.
LEV 27:17 Wone yaudite mgunda wa heye uwe wa chiuyeng'ha kuli mwaka wa mnvina ya kukumbuchila miyaka makumi gahano, bei yake yanguganigwa iwe iwhanile na chipimilo cha hemwe chenele.
LEV 27:18 Ila wone yauwiche uwe wa chiuyeng'ha, hamba houpuluta mwaka awo, lelo mtambika kolonga bei ya awo mgunda kota vyoiwele miyaka jisigale kufichila mwaka wa mnvina ya kukumbuchila kwa miyaka makumi gahano na bei ya heye ipunguzigwe.
LEV 27:19 Wone gwegwe ugana kugombola, lelo ndo yomlapa yonjezele chasi cha honhu ha kahano ha sendi ya awo mgunda, na hamba lowa lufufu lwa heye.
LEV 27:20 Ila wone yolema kugombola na kuguzigwa kwa munhu yunji, lelo mgunda awo uleche kugomboligwa kahi.
LEV 27:21 Kuli mwaka wa mnvina ya kukumbuchila kwa miyaka makumi gahano, mgunda awo wolechelwa leka uwe wa Mkulu Nguluwi mazuwa gose. Wowa wa watambika.
LEV 27:22 “Wone munhu nakaulavya kwa Mkulu Nguluwi mgunda woyagulile, mina hauwele wa heye kwa uhalizi,
LEV 27:23 mtambika kolonga bei ya mgunda awo kota vila vyoiwele miyaka jisigale kafichila mwaka wa mnvina ya kukumbuchila kwa miyaka makumi gahano na munhu ayo kolonjelwa yalavye chasi cha sendi kota ndo chinhu chelile kwa Mkulu Nguluwi.
LEV 27:24 Ila kuli mwaka wa mnvina ya kukumbuchila kwa miyaka makumi gahano, mgunda awo ndo yanguganigwa uhilulwe kwa yauguzile ama kwa walelwa wa hewo.
LEV 27:25 Chila chasi cha sendi chopimigwa kwa chipimilo cha ihema lya Nguluwi, chiwele ngugawigwa kuli vihande makumi meli.
LEV 27:26 “Lileleche mwaluko kwa migongolo, lyowa lya Mkulu Nguluwi, homuwika munhu yoneche yawe wa chiuyeng'ha, liwe isenga ama ing'holo, alyo ndo lya Mkulu Nguluwi.
LEV 27:27 Wone ndo igongolo likokomoche, lilyo koligula kwa kulawila kuli chipimilo na kokonjeza honhu ha kahano ha sendi za igongolo alyo. Wone haligomboligwe, lelo lyoguzigwa kuli chipimilo cha hemwe chenele.
LEV 27:28 “Ila chinhu choneche chiwichigwe chiwe cha chiuyeng'ha kwa Mkulu Nguluwi, chiwe ndo munhu ama igongolo ama chinhu choupegwe kwa kuhalila, hachiguzigwa ne kugomboligwa hebu. Choneche chiwichigwe chiwe chiuyeng'ha kwa Mkulu Nguluwi ndo chelile ng'hatu.
LEV 27:29 Munhu yoneche yawichigwe yawe wa chiuyeng'ha kwa kukopoligwa, yaleche kugomboligwa, yanguganigwa yabagame.
LEV 27:30 “Honhu ha kumi ha mbena hawe nyhule ama mafuza ga igodi, geng'ha ndo lufufu lwa Mkulu Nguluwi, ndo vyelile kwa Mkulu Nguluwi.
LEV 27:31 Wone munhu yogana kuhagombola honhu ha kumi ha heye, kolipa sendi ya heye na konjeza honhu ha kahano ha sendi.
LEV 27:32 Na ndolendole yoneche ya isenga ama ya ing'holo, chila lilingukola hasi ha ng'hweku, honhu ha kumi ndo helile kwa Mkulu Nguluwi.
LEV 27:33 Munhu yoneche yohambe yakundizwe kuuza kota igongolo alyo ndo linoga ama liha na igongolo alyo haligalamulwa hebu kwa linji. Wone ligalamulwe kwa linji, migongolo jeng'ha mili jowa jelile, hajigomboligwa.”
LEV 27:34 Ago ndo malajizo gawele Mkulu Nguluwi nayamlajize Musa yawalonjele Waisilaeli, kuchidunda cha Sinai.
NUM 1:1 Nalyali zuwa lya mwaluko lya mwezi wa keli, mwaka wa keli kuli wanhu wa Isilaeli kulawila Misili, Mkulu Nguluwi nakalonga na Musa mgati mwa ihema lya Nguluwi kuchiwala ako Sinai, nakamlonjela ahi,
NUM 1:2 “Hegwe na Aluni muwawaze Waisilaeli weng'ha, ivyazi limwe mbaka liyage kwa kuwinza lukolo lwa hewo kota vyogali matagwa gawo chila mlume yumwe mbaka yunji,
NUM 1:3 wala weng'ha kuli Isilaeli walinguweza kuluta kuza kitowa ngondo, wawele na miyaka kwaluchila makumi meli na mzidi, hegwe na Aluni mowawika kuli kuwazigwa kwa vilundo vilundo.
NUM 1:4 Kahi mlume yumwe wa chila nhanzi kowa hamwe na hemwe, chila yumwe yawele chilongozi wa ivyazi lya heye.
NUM 1:5 Ayi ndo mbuli ya matagwa ga walume walingukutanza, “kwa nhanzi ya Lubeni, Elisuli mwana wa Shedeuli,
NUM 1:6 kwa nhanzi ya Simeoni, Shelumieli mwana wa Suli-shadai,
NUM 1:7 kwa nhanzi ya Yuda, Nashoni mwana wa Aminadabu,
NUM 1:8 kwa nhanzi ya Isakali, Netaneli mwana wa Suali,
NUM 1:9 kwa nhanzi ya Sebuluni, Eliabu mwana wa Heloni,
NUM 1:10 kuli wana wa Yusufu, kwa nhanzi ya Efulaimu, Elishama mwana wa Amihudi, kwa nhanzi ya Manase, Gamalieli mwana wa Pedasuli,
NUM 1:11 kwa nhanzi ya Benjamini, Abidani mwana wa Gideoni,
NUM 1:12 kwa nhanzi ya Dani, Ahieseli mwana wa Amishadai,
NUM 1:13 kwa nhanzi ya Asheli, Pagieli mwana wa Okilani,
NUM 1:14 kwa nhanzi ya Gadi, Eliasafu mwana wa Deueli,
NUM 1:15 kwa nhanzi ya Nafutali, Ahila mwana wa Enani.”
NUM 1:16 Awa ndo vilongozi wahaguligwe kulawa kuli Waisilaeli weng'ha, kota vilongozi wakulu wa nhanzi ya hewo na vilongozi wa ng'holo za Isilaeli.
NUM 1:17 Lelo Musa na Aluni nawawahola vilongozi awo wachemigwe matagwa ga hewo,
NUM 1:18 na kwaluchila zuwa lya mwaluko lya mwezi wa keli, nawawakungajiza Waisilaeli weng'ha walume wawele wawazigwe chila yumwe kulawa ivyazi lya heye na lukolo lwa heye. Kwa kuwinza matagwa ga walume wawele na miyaka makumi meli na mzidi wawazigwe yumwe yumwe,
NUM 1:19 kota Mkulu Nguluwi vyoyamlajize Musa. Musa kawawaliza walume awo kula kuchiwala ako Sinai.
NUM 1:20 Walume walawile kuli nhanzi ya Lubeni, yawele yavumbuche wa mwaluko kwa Isilaeli, kwa kuwinza vyowavumbuche hewo, kulawa ng'holo za hewo na kulawa ivyazi lya hewo, kwa kuwinza matagwa ga hewo yumwe yumwe, chila mlume yawele na miyaka makumi meli na mzidi, yoweza kwinjila kuli kitowa ngondo,
NUM 1:21 nawali walume makumi gane na sita elufu na miya zihano (46,500).
NUM 1:22 Kulawa nhanzi ya Simeoni kwa kuwinza vyowavumbuche hewo kuli ng'holo za hewo na kulawa kuli ivyazi lya hewo kuli winji wa matagwa gawo yumwe yumwe, chila mlume yawele na miyaka makumi meli na mzidi, yalinguweza kuza kitowa ngondo,
NUM 1:23 nawali walume makumi gahano na tisa elufu na miya zidatu (59,300).
NUM 1:24 Kulawila kuli nhanzi ya Gadi kwa kuwinza vyowavumbuche hewo kuli ng'holo za hewo na kuli ivyazi lya hewo na kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:25 nawali walume makumi gane na gahano elufu miya sita na makumi gahano (45,650).
NUM 1:26 Kulawila kuli nhanzi ya Yuda kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kwinjila kuli kitowa ngondo,
NUM 1:27 nawali wanhu makumi saba na gane elufu na miya sita (74,600).
NUM 1:28 Kulawila kuli nhanzi ya Isakali kwa kuwinza vyowavumbuche hewo kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:29 nawali wanhu makumi gahano na gane elufu na miya zine (54,400).
NUM 1:30 Kulawila nhanzi ya Sebuluni kwa kuwinza vyowavumbuche hewo kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:31 nawali wanhu makumi gahano na saba elufu na miya zine (57,400).
NUM 1:32 Kulawila nhanzi ya Efulaimu, mwanage Yusufu, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:33 nawali wanhu makumi gane elufu na miya zihano (40,500).
NUM 1:34 Kulawila kuli nhanzi ya Manase, mwanage Yusufu, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi walinguweza kuza kitowa ngondo,
NUM 1:35 nawali wanhu makumi gadatu na meli elufu na miya mbili (32,200).
NUM 1:36 Kulawila kuli nhanzi ya Benjamini, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:37 nawali walume elufu makumi gadatu na gahano na miya zine (35,400).
NUM 1:38 Kulawila nhanzi ya Dani kwa kuwinza kota vyowavumbuche kuli ng'holo za hewo na kuli ivyazi lya hewo kwa kuwinza winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:39 nawali walume elufu makumi sita na meli na miya saba (62,700).
NUM 1:40 Kulawa nhanzi ya Asheli, kwa kuwinza kota vyowavumbuche kuli ng'holo za hewo na kuli ivyazi lya hewo kwa winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:41 nawali walume elufu makumi gane na yumwe na miya zihano (41,500).
NUM 1:42 Kulawila nhanzi ya Nafutali, kwa kuwinza kota vyowavumbuche kuli ng'holo za hewo na kuli ivyazi lya hewo kwa winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,
NUM 1:43 nawali walume elufu makumi gahano na gadatu na miya zine (53,400).
NUM 1:44 Awa ndo walume wawele wawazigwe na Musa na Aluni hamwe na utanzi wa wala vilongozi kumi na weli wa Isilaeli, chila chilongozi yalawile honhu ha lukolo lwa heye.
NUM 1:45 Awo ndo walume weng'ha wa Isilaeli kuwinza ivyazi lya hewo wawele na miyaka makumi meli na mzidi, walinguweza kuza kitowa ngondo kuli isi ya Isilaeli,
NUM 1:46 nawali walume lachi sita na elufu zidatu na miya zihano na makumi gahano (603,550).
NUM 1:47 Ila Walawi hawawazigwe hamwe na zila nhanzi ziyage,
NUM 1:48 kwa vila Mkulu Nguluwi nakamlonjela Musa,
NUM 1:49 “Uleche nhanzi ya Walawi na uleche kuwawaza hali wanhu wa Isilaeli,
NUM 1:50 ila kowabagula wawe wololela ihema lya Nguluwi lya ulolezi, vinhu vyake vyeng'ha na chila chinhu chiwele amo mgati mwake. Wowa wolipika hamwe na vinhu vyake vyeng'ha. Wokola mijito mumo mgati na kuwika kambi kwa kuzunguluta.
NUM 1:51 Kahi mhela wa ihema kung'humbuligwa Walawi na ndo wong'humbula na mhela wa ihema kuwichigwa Walawi ndo wolimiza, na mjenzi yohejelela kokopoligwa.
NUM 1:52 Waisilaeli wanji weng'ha wowika kambi za hewo kwa vilundo vilundo, chila munhu hali chilundo cha heye na hasi ha bendela ya heye.
NUM 1:53 Ila Walawi wowika kambi kwa kuzunguluta ihema lya Nguluwi lya ulolezi kuno wololela leka munhu yoneche yaleche kuhejelela na kwambuza ng'halazi ya heni iwe kwa Waisilaeli weng'ha, lelo Walawi wowika goya ihema lya Nguluwi lya ulolezi.”
NUM 1:54 Ahyo Waisilaeli nawadita kota Mkulu Nguluwi vyoyamlajize Musa.
NUM 2:1 Mkulu Nguluwi nakawalonjela Musa na Aluni,
NUM 2:2 “Waisilaeli wowika kambi, chila munhu kochikala hali bendela ya heye, hali ulajilo wa ivyazi lya heye. Wowika kambi kuzunguluta ihema lya Nguluwi.
NUM 2:3 “Wala wawele wowika kambi nzingo ya kolilawila isanya, wowa chilundo cha wanhu wawele hasi ha bendela ya Yuda na chilongozi wa hewo kowa Nashoni mwana wa Aminadabu,
NUM 2:4 chilundo cha heye kwa kuwawaza ndo walume elufu makumi saba na gane na miya sita (74,600).
NUM 2:5 Wala wawele wowinza wanhu wa Yuda kuwika kambi, wowa nhanzi ya Isakali, chilongozi wa hewo nayawele Netaneli mwana wa Suali,
NUM 2:6 chilundo cha heye kwa kuwawaza ndo walume elufu makumi gahano na zine na miya zine (54,400).
NUM 2:7 Hamba nhanzi za Sebuluni, chilongozi wa hewo nayali Eliabu mwana wa Heloni,
NUM 2:8 chilundo cha heye kwa kuwaza ndo walume elufu makumi gahano na saba na miya zine (57,400).
NUM 2:9 Wanhu weng'ha wa wowa kuli kambi ya Yuda ndo kwa vilundo vya hewo ndo walume lachi imwe na elufu makumi nane na sita na miya zine (186,400). Awo ndo wolongola kwaluka majendo.
NUM 2:10 “Kwa ubanzi wa kusini, wala wawele hasi ha bendela ya chilundo cha Lubeni kwa vilundo vya hewo, chilongozi wa hewo yawele Elisuli mwana wa Shedeuli,
NUM 2:11 chilundo cha heye kwa kuwazigwa ndo walume elufu makumi gane na sita na miya zihano (46,500).
NUM 2:12 Baho du wala wowika kambi hafungo ha wanhu wa Lubeni ndo wanhu wa nhanzi ya Simeoni, chilongozi wa hewo kowa Shelumieli mwana wa Suli-shadai,
NUM 2:13 chilundo cha heye kwa kuwazigwa ndo walume elufu makumi gahano na tisa na miya zidatu (59,300).
NUM 2:14 Nhanzi ya Gadi, chilongozi wa hewo ndo Eliasafu mwana wa Leueli,
NUM 2:15 chilundo cha heye kwa kuwazigwa ndo walume elufu makumi gane na gahano na miya sita na makumi gahano (45,650),
NUM 2:16 walume vyowowa kuli kambi ya Lubeni kwa vilundo vya hewo ndo wanhu lachi imwe na elufu makumi gahano na imwe na miya zine na makumi gahano (151,450). Awa ndo wowa kuli chilundo cha keli kuli majendo.
NUM 2:17 “Hamba, nhanzi ya Walawi naiwa hagati ha nhanzi zinji kuno wohola alyo ihema lya Nguluwi wojenda. Chila nhanzi yojenda kwa kuwinza honhu hake kwa bendela.
NUM 2:18 “Kuli ubanzi wa kolilinguzinjila isanya, wala wawele hasi ha bendela ya chilundo cha Efulaimu wochikala mkambi kuli vilundo vya hewo, chilongozi wa hewo ndo Elishama mwana wa Amihudi,
NUM 2:19 chilundo cha heye kuli kuwaliza ndo walume elufu makumi gane na miya zihano (40,500).
NUM 2:20 Nhanzi ya Manase yowinza nhanzi ya Efulaimu. Chilongozi ndo Gamalieli, mwana wa Pedasuli,
NUM 2:21 chilundo cha heye kuli kuwaliza ndo walume elufu makumi gadatu na mbili na miya mbili (32,200).
NUM 2:22 Hamba nhanzi ya Benjamini, chilongozi ndo Abidani, mwana wa Gideoni,
NUM 2:23 chilundo cha heye kuli kuwaliza ndo walume elufu makumi gadatu na gahano na miya zine (35,400).
NUM 2:24 Wanhu nawawele kuli kambi ya Efulaimu kuli vilundo vya hewo ndo walume lachi imwe na elufu nane na miya imwe (108,100). Chilundo achi cha nhanzi ya Efulaimu chowa chilundo cha kadatu kuli majendo.
NUM 2:25 “Kuli ubanzi wa kasikazini, wowika kambi kuli vilundo lya hewo wala wawele hasi ha bendela ya Dani, chilongozi wa hewo ndo Ahieseli, mwana wa Amishadai,
NUM 2:26 chilundo cha heye kuli kuwaliza ndo walume elufu makumi sita na mbili na miya saba (62,700).
NUM 2:27 Baho du wowika kambi kulawila aho wowa wanhu wa nhanzi ya Asheli, chilongozi wa hewo ndo Pagieli mwana wa Okilani,
NUM 2:28 chilundo cha heye kuli kuwaliza ndo walume elufu makumi gane na imwe na miya zihano (41,500).
NUM 2:29 Baho du wanhu wa nhanzi ya Nafutali, chilongozi wa heye nayali Ahila mwana wa Enani,
NUM 2:30 chilundo cha heye kuli kuwaliza ndo walume elufu makumi gahano na gadatu na miya zine (53,400).
NUM 2:31 Weng'ha wowa kuli honhu howawichile kambi ya hewo walume lachi imwe na elufu makumi gahano na saba na miya sita (157,600). Chilundo achi cha Dani chowa chilundo cha mwiso kuli majendo, kulawa bendela imwe mbaka iyage.”
NUM 2:32 Awo ndo Waisilaeli wawalizwe kulawila kuli ivyazi lya hewo, kuli kambi ya chilundo cha hewo, weng'ha nawali lachi sita na elufu zidatu na miya zihano na makumi gahano (603,550).
NUM 2:33 Ila Walawi hawawazigwe hali wanhu wa Isilaeli kota Mkulu Nguluwi vyoyamlajize Musa.
NUM 2:34 Ahyo ndo Waisilaeli vyowaditile chila chinhu kota Mkulu Nguluwi vyoyamlajize Musa. Nawawika kambi kwa kuwinza bendela za hewo na walutilila na majendo chila yumwe na lukolo wa heye na ivyazi lya heye.
NUM 3:1 Awa ndo wana wa Aluni na Musa mhela Mkulu Nguluwi loyalonjile na Musa mchidunda cha Sinai.
NUM 3:2 Aga ndo matagwa ga wana wa Aluni. Nawali Nadabu, mlelwa wa heye wa mwaluko na Abihu na Eleasali na Itamali.
NUM 3:3 Aga ndo matagwa ga wana wa Aluni nawawichigwe kwa mijito yelile na kubakalizwa mafuta wawe watambika.
NUM 3:4 Ila Nadabu na Abihu nawabagama hali Mkulu Nguluwi, mhela lowamlavile Mkulu Nguluwi chiluli chohachikundigwe kuli chiwala cha Sinai. Hewo nawali hela wana, ahyo Eleasali na Itamali nawakola mijito kota watambika mhela wa ukomu wa Aluni Mhaza wa hewo.
NUM 3:5 Mkulu Nguluwi nakamlonjela Musa,
NUM 3:6 “Uwegale habehi wanhu wa nhanzi ya Lawi, uwawiche kumwando kwa mtambika Aluni waze kumkolela mijito.
NUM 3:7 Wowakolela mijito Aluni na Waisilaeli weng'ha hala kuli ihema lya Nguluwi howokola mijito ya ihema lya Nguluwi.
NUM 3:8 Wololela vinhu vyeng'ha vya ihema lya Nguluwi na kuwatanza Waisilaeli howokola mijito ja hewo kuli ihema lya Nguluwi.
NUM 3:9 Aluni na walelwa wa heye wopegwa Walawi, awo walavigwa hali Waisilaeli wawakolele mijito.”
NUM 3:10 Kowahagula Aluni na wana wa heye leka wazengukola mijito ja hewo ja utambika, ila wone munhu nyunji hoyojeza kukola mijito ja utambika, kokopoligwa.
NUM 3:11 Mkulu Nguluwi nakalutilila kumlonjela Musa,
NUM 3:12 “Ulole, ndiwahagula Walawi kuli wanhu wa Isilaeli weng'ha honhu hali chila mlelwa wa mwaluko mlume kuli chila ivyazi lya Isilaeli. Walawi ndo wa heni,
NUM 3:13 kwa vila chila mlelwa wa mwaluko wa Isilaeli ndo wa heni. Mhela londiwakopole walelwa wa mwaluko wa Misili nandimdita chila mlelwa wa mwaluko wa wanhu na wa migongolo yawe wa chiuyeng'ha, hewo wowa ndo wa heni. Heni ndo mbele Mkulu Nguluwi.”
NUM 3:14 Hamba Mkulu Nguluwi nakamlonjela Musa kuli chiwala cha Sinai,
NUM 3:15 “Wawaze wana wa Lawi weng'ha kwa kuwinza lukolo lwawo na ivyazi lya hewo, chila mlume yawele na mwezi umwe na mzidi.”
NUM 3:16 Lelo Musa nakawawaza kota vyoyalajizwe na lizi lya Mkulu Nguluwi.
NUM 3:17 Awa ndo wali wana wa Lawi, Gelishoni na Kohati na Melali.
NUM 3:18 Aga ndo matagwa ga wana walume wa Gelishoni kwa kuwinza ng'holo za hewo, Libuni na Shimei.
NUM 3:19 Wana walume wa Kohati kwa kuwinza ng'holo za hewo nawali, Amulamu na Ishali na Hebuloni na Usieli.
NUM 3:20 Wana walume wa Melali kwa kuwinza ng'holo za hewo, nawali Mahuli na Mushi. Ali nalyali ivyazi lya Walawi kulawa kuli ng'holo za hewo.
NUM 3:21 Ivyazi lya Walibuni na Washimei nalilawa kwa Gelishoni, azi ndo nazali ng'holo za Wagelishoni.
NUM 3:22 Hisabu ya hewo kwa kuwaza walume weng'ha kwaluchila nawawele na mwezi umwe na mzidi ndo elufu saba na miya zihano (7,500).
NUM 3:23 Ng'holo za Wagelishoni naiwalapa kuwika kambi kuli ubanzi wa kolizinjilaga isanya, kumbele kwa ihema lya Nguluwi,
NUM 3:24 na heye Eliasafu mwana wa Laeli yawele mkulu wa lukolo lwa Wagelishoni.
NUM 3:25 Mijito ja wana wa Gelishoni najali kulolela ihema lya Nguluwi hamwe na chigubiko cha ihema lya Nguluwi na ipaziya lya lwizi lwa ihema lya Nguluwi
NUM 3:26 na mipaziya ja lugagala naluwele lulinguzunguluta ihema lya Nguluwi na honhu ha kulavila nhambiko na ipaziya lya lwizi lwa lugagala na ng'weso zake. Mijito jeng'ha jilingulapa vinhu avi najali ja hewo.
NUM 3:27 Ng'holo za Waamulamu na Waishali na Wahebuloni na Wausieli nazilawa kwa Kohati, ali ndo nalyali ivyazi lya Wakohati.
NUM 3:28 Kota vyoliwazigwe kwa walume weng'ha kwaluchila na wawele na mwezi umwe na mzidi, nawali elufu nane na miya sita (8,600), nawali wololela honhu helile.
NUM 3:29 Ng'holo za wana wa Kohati nayali ilapigwa kuwika kambi ubanzi wa kusini mwa ihema lya Nguluwi,
NUM 3:30 na heye Elisafani mwana wa Usieli, yawele mkulu wa lukolo alo lwa ivyazi lya Wakohati.
NUM 3:31 Mijito ja hewo jali kulilolela isanduku lya ilagano na visaga na chinhu cha kuwichila chenje na honhu ha kulavila nhambiko na vinhu vyowalingukolela mijito honhu helile na ipaziya, mijito jeng'ha jilingulapa vinhu avi najali ja hewo.
NUM 3:32 Na heye Eleasali mwana wa mtambika Aluni nakawichigwa kuwa mng'hangala wa wakulu wa Walawi mlolezi wa wanhu weng'ha walingukola mijito honhu helile.
NUM 3:33 Ng'holo za Wamahili na Wamushi nazilawila kwa Melali.
NUM 3:34 Weng'ha kwa kuwazigwa kwa kwaluchila walume wawele na mwezi umwe na mzidi nawali wanhu elufu sita na miya mbili (6,200).
NUM 3:35 Mkulu wa lukolo lwa ivyazi lya Melali nayali Sulieli mwana wa Abihaili, awa nawaganigwa kuwika kambi ubanzi wa kasikazini mwa ihema lya Nguluwi.
NUM 3:36 Awo wana wa Melali nawapegwa mijito ja kulolela fulemu za ihema lya Nguluwi, mhajilo na mizengo na mambo na vinhu vyeng'ha vya kibatilila ihema, mijito jeng'ha jilinguwala vinhu avi, najali ja hewo.
NUM 3:37 Na kahi nawaganigwa kulolela mizengo ja lugagala luzungulute ihema lya Nguluwi na vigingi na ng'weso zake.
NUM 3:38 Musa na Aluni na wana wawo, nawaganigwa kuwika kambi hali ihema lya Nguluwi ubanzi wa kolilawilaga isanya. Nawaganigwa hewo kukola mijito ja utambika kuli ihema lya Nguluwi kwa chiwalo cha Waisilaeli. Munhu yunji yoneche yahejele habehi naiganigwa yakopoligwe.
NUM 3:39 Hisabu ya Walawi kwa kuwinza ivyazi lya hewo, walume weng'ha kwaluchila wana wawele na mwezi umwe na mzidi wawele Musa na Aluni nawawawazile kwa ilajizo lya Mkulu Nguluwi, nawali wanhu elufu makumi meli na mbili (22,000).
NUM 3:40 Mkulu Nguluwi nakamlonjela Musa, “Wawaze kwa matagwa walelwa wa mwaluko walume weng'ha wa Waisilaeli kwaluchila wawele na mwezi umwe na mzidi.
NUM 3:41 Nagwe kowabagula Walawi kwa chiwalo cha heni Mkulu Nguluwi wawe honhu ha walelwa wa mwaluko wa Waisilaeli, kahi kobagula kwa chiwalo cha heni migongolo jeng'ha ja Walawi jiwe honhu ha walelwa wa mwaluko wa migongolo ja wanhu wa Isilaeli.”
NUM 3:42 Lelo Musa nakawawaza walelwa wa mwaluko weng'ha wa wanhu wa Isilaeli kota Mkulu Nguluwi vyoyamlajize.
NUM 3:43 Walelwa weng'ha wa mwaluko walume kuli kuwazigwa kwa matagwa, wawele na mwezi umwe na mzidi, nawali elufu makumi meli na mbili na miya mbili na makumi saba na zidatu (22,273).
NUM 3:44 Mkulu Nguluwi nakamlonjela Musa,
NUM 3:45 “Lelo wabagule Walawi weng'ha wawe wa heni honhu ha walelwa wa mwaluko wa Waisilaeli. Kahi, ujibagule misenga ja Walawi weng'ha honhu ha walelwa wa mwaluko wa misenga ja Waisilaeli. Hewo Walawi ndo wa heni. Heni nda Mkulu Nguluwi.
NUM 3:46 Kwa chiwalo cha kuwagombola walelwa wa mwaluko walume wa wanhu wa Isilaeli miya mbili na makumi saba na wadatu (273), wawele mzidi wa walume Walawi,
NUM 3:47 kobochela kwa chila mlume sendi migwala jihano, kwa kuwinza chipimilo cha honhu helile,
NUM 3:48 na sendi azo kwa chiwalo cha kuwagombola awo wawele mzidi kwa Walawi komha Aluni na wanage.”
NUM 3:49 Musa nakahulichiza, nakahola sendi azo za kuwagombola awo wawele mzidi wa wagomboligwe na Walawi,
NUM 3:50 nakabochela kulawila walelwa wa mwaluko wa Isilaeli sendi chasi cha migwala elufu imwe na miya zidatu na makumi sita na gahano (1,365), kwa kuwinza chipimilo cha honhu helile,
NUM 3:51 Musa nakawapa Aluni na wanage sendi azo za kuwagombola kota Mkulu Nguluwi vyoyamlajize.
NUM 4:1 Mkulu Nguluwi nakawalonjela Musa na Aluni,
NUM 4:2 “Muwawaze walelwa wa Kohati, yumwe wa lukolo lwa Lawi kwa kuwinza wanhu wa hewo na ivyazi lya hewo,
NUM 4:3 kowawaza walume weng'ha wawele na miyaka makumi gadatu mbaka makumi gahano walinguganigwa kilumba na mijito ja ihema lya Nguluwi.
NUM 4:4 Ahyo ndo vyojiwa mijito ja wana wa Kohati kuli ihema lya Nguluwi, kuli vinhu vyelile ng'hatu.
NUM 4:5 “Mhela wa kubena kambi, watambika, Aluni na wanage, wokwinjila kuli ihema na kutelemla ipaziya liwele hali isanduku lya ilagano, hamba woligubika kwa ipaziya alyo.
NUM 4:6 Mchanya mwake wowika chigubiko cha migozi ja migongolo jilingikala mbahali, mchanya mwake migozi ajo kahi wowika chibende cha lanji ya buluu inojile. Hamba wokwinjiza mipichilo ja kuliholela isanduku alyo.
NUM 4:7 “Mchanya mwa chisaga cha kulavila mibumunda jelile, wowika chibende cha buluu chiwele mchanya mwa acho kowichigwa luhelo na visaye vya ubani na chizombe kwa chiwalo cha kulavila nhambiko za kunwa. Mazuwa gose kowa na ibumunda mchanya mwa chisaga.
NUM 4:8 Hamba, wogubika vinhu avyo vyeng'ha kwa chibende chidung'hu na mchanya mwake wowika chigubiko cha igozi lya igongolo lilingikala mbahali. Hamba wokwinjiza mipichilo jake ja kuliholela.
NUM 4:9 “Wohola chibende cha buluu chiwele ndo chowogubika chinhu cha kuwichila chenje na chenje chake na vinhu vya kibatila ikala na luhelo na vinhu vyeng'ha vilinguganigwa kuwichila mafuta.
NUM 4:10 Wochiwika hamwe na vinhu vyake vyeng'ha mgati mwa igozi lya igongolo lilingikala mbahali na kuchiwika mchanya mwa fulemu ya kupichila.
NUM 4:11 “Hamba wowika chibende cha buluu mchanya mwa honhu ha kulavila nhambiko ha zahabu na kuigubika kwa igozi lya igongolo lilingikala mbahali mchanya mwake. Hamba wokwinjiza mipichilo ja kupichila.
NUM 4:12 Wovihola vinhu vyeng'ha vilinguganigwa honhu helile, woviwopa kwa chibende cha buluu na kuvigubika kwa igozi lya igongolo lilingikala mbahali, hamba woviwika mchanya mwa fulemu ya kupichila.
NUM 4:13 Wokusa mivu hali honhu ha kulavila nhambiko ha shaba na mchanya mwake wowika chibende cha zambalau.
NUM 4:14 Mchanya mwake wowika vinhu vyeng'ha vilinguganigwa kuli mijito ja honhu ha kulavila nhambiko, makala na mibano na mihuka na visaye. Hamba, mchanya mwake wowika chigubiko cha igozi lya igongolo lilingikala mbahali na kwinjiza mipichilo jake ja kupichila.
NUM 4:15 Aluni na wanage lowagubiche honhu helile hamwe na vinhu vyake vyeng'ha, wawa wewichile goya kwa kwaluka majendo. Hamba wanhu wa nhanzi ya Kohati wokuya na kuvipika. Ila hewo, hambe wakundizwe ng'hatu kuvidoliza vinhu avyo vyelile, leka waleche kubagama. Ayo ndo mijito ja nhanzi ya Kohati chila mhela ihema lya Nguluwi holikusigwa na kuhilichigwa honhu hanji.
NUM 4:16 Eleasali, mwana wa mtambika Aluni, kanguganigwa kulolela mafuta ga chenje na ubani wa kununyhilila na nhambiko za nyhule ya chila zuwa na mafuta ga kubakaliza leka yalolele chila chinhu kuli ihema alyo na honhu helile na vinhu vyake.”
NUM 4:17 Hamba Mkulu Nguluwi nakawalonjela Musa na Aluni,
NUM 4:18 “Mleche kuleka nhanzi ya ng'holo za Kohati hali Walawi zidumigwe.
NUM 4:19 Lelo kwa kuwalemeza waleche kubagama kwa kuvihejelela vinhu avyo vyelile ng'hatu kodita ahi. Aluni na wanage wokwinjila na kumlonjela chila yumwe wa hewo vyoyalonjelwe kudita mijito ja heye.
NUM 4:20 Ila walelwa wa Kohati hawokwinjila ng'oo kuvilola vinhu vyelile ng'hatu, wone wadite ahyo, wobagama.”
NUM 4:21 Mkulu Nguluwi nakamlonjela Musa,
NUM 4:22 “Wawaze walelwa wa Gelishoni, kwa ivyazi na ng'holo za hewo,
NUM 4:23 kowawaza walume weng'ha wawele na miyaka makumi gadatu mbaka makumi gahano walinguganigwa kihanza kuli mijito ja ihema lya Nguluwi.
NUM 4:24 Awu ndo uchitumagwa wa ivyazi lya Wagelishoni kuli mijito na kupika mhomolo.
NUM 4:25 Hewo wopika mipaziya na ihema lya Nguluwi na chigubiko chake na chigubiko cha migozi ja migongolo jilingikala mbahali jiwele mchanya mwake na ipaziya lya lwizi lwa kwinjila kuli ihema lya Nguluwi,
NUM 4:26 na mipaziya ja lugagala na ipaziya lya kwinjila kuli lugagala lulinguzunguluta ihema lya Nguluwi na honhu ha kulavila nhambiko na ng'weso zake na vinhu vyeng'ha vya kukolela mijito. Wagelishoni wokola mijito na mbuli zeng'ha zilinguwala vinhu avi.
NUM 4:27 Aluni na wanage wowalajiza kukola mijito jeng'ha ja Wagelishoni kwa vinhu vyowopika na mijito jowodita. Kowawichila vinhu vyeng'ha vila viwele vyowalinguganigwa kupika.
NUM 4:28 Ajo ndo mijito ja walelwa wa Gelishoni kuli ihema lya Nguluwi, wokola mijito hali ulongozi wa Itamali mwana wa mtambika Aluni.
NUM 4:29 “Na kahi kowawaza walelwa wa Melali, kwa kuwinza ng'holo za hewo na ivyazi lya hewo.
NUM 4:30 Kowawaza walume weng'ha wawele na miyaka makumi gadatu mbaka makumi gahano, walinguganigwa kukola mijito kuli ihema lya Nguluwi.
NUM 4:31 Awo, ndo wowa na mijito ja kupika fulemu na mhajilo na mizengo na msisi wa ihema lya Nguluwi
NUM 4:32 na mizengo ja lugagala lwa kuzunguluta nzingo zeng'ha za ihema lya Nguluwi na vikalilo na vigingi na ng'weso hamwe na vinhu vyake vyeng'ha na vinhu viyage vyeng'ha. Nagwe kowawichila vinhu vyowalinguganigwa kupika kwa kuwinza matagwa ga hewo, chila munhu na mhomolo ya heye.
NUM 4:33 Ajo ndo jowa mijito ja walelwa wa Melali kuli kukola mijito ja hewo jeng'ha mgati mwa ihema lya Nguluwi, hali ulongozi wa Itamali mwana wa mtambika Aluni.”
NUM 4:34 Lelo Musa na Aluni na vilongozi wa Waisilaeli weng'ha wowawaza walelwa wa Kohati, kwa kuwinza ng'holo na ivyazi lya hewo.
NUM 4:35 Nawawandika wanhu weng'ha wawele na miyaka makumi gadatu mbaka makumi gahano, chila yoweza kwinjila kuli kukola mijito ja ihema lya Nguluwi.
NUM 4:36 Wanhu wa ivyazi lya hewo nawali elufu mbili na miya saba na makumi gahano (2,750).
NUM 4:37 Awa ndo wanhu wa ivyazi lya Kohati, wawele ngukola mijito kuli ihema lya Nguluwi, liwele Musa na Aluni nawawawaza kota Mkulu Nguluwi vyonayamlajize Musa.
NUM 4:38 Walelwa wa Gelishoni kwa kuwinza ng'holo za hewo,
NUM 4:39 wawele na miyaka makumi gadatu mbaka makumi gahano, wawele woweza kukola mijito kuli ihema lya Nguluwi,
NUM 4:40 nawali wanhu elufu mbili na miya sita na makumi gahano (2,650) kwa kuwinza ng'holo za hewo na ivyazi lya hewo.
NUM 4:41 Awa ndo nawawele walelwa wa Gelishoni weng'ha kwa kuwinza ng'holo za hewo na ivyazi lya hewo, wakolile mijito kuli ihema lya Nguluwi, wawele Musa na Aluni nawawawaza kota Mkulu Nguluwi vyoyawalajize.
NUM 4:42 Walelwa wa Melali kwa kuwinza ivyazi lya hewo,
NUM 4:43 wawele na miyaka makumi gadatu mbaka makumi gahano, wawele woweza kukola mijito kuli ihema lya Nguluwi,
NUM 4:44 nawali wanhu elufu zidatu na miya mbili (3,200).
NUM 4:45 Awa ndo walelwa wa Melali kwa kuwinza ng'holo za hewo wawele Musa na Aluni nawawawaza kota Mkulu Nguluwi vyoyamlajize Musa.
NUM 4:46 Ahyo, Walawi weng'ha wandichigwe na Musa na Aluni na vilongozi wa wanhu wa Isilaeli, kwa kuwinza ivyazi lyawo na ng'holo za hewo,
NUM 4:47 wawele na miyaka makumi gadatu mbaka makumi gahano, wawele woweza kukola mijito ja kulilolela na kulipika ihema lya Nguluwi,
NUM 4:48 nawali wanhu elufu nane na miya zihano na makumi nane (8,580).
NUM 4:49 Kwa mzilo wa Mkulu Nguluwi, nawawazigwa na Musa. Chila munhu nakapegwa mijito ja heye na itunyo lya heye, kota Mkulu Nguluwi navyoyamlajize Musa.
NUM 5:1 Mkulu Nguluwi nakamlonjela Musa,
NUM 5:2 “Walonjele Waisilaeli wamlavye kunze mwa kambi chila munhu yakokomoche na chila munhu yawele na utamwa wa ngozi na yalingulawa mifila na chila yawele yakokomoche kwa kudoliza mtufi.
NUM 5:3 Mowalavya kunze mwa kambi wanhu awo weng'ha, wawe walume ama wadala, leka waleche kuidita ikokomoche kambi ya heni yondilingikala hali hewo.”
NUM 5:4 Waisilaeli nawadita ahyo, nawawalavya kunze mwa kambi. Kota Mkulu Nguluwi vyoyamlajize Musa, ndo Waisilaeli vyowaditile.
NUM 5:5 Hamba Mkulu Nguluwi nakamlonjela Musa,
NUM 5:6 “Walonjele Waisilaeli kota munhu yoneche, mlume ama mdala, wone yomditila munhu gehile, kuno kahela makundo kwa Mkulu Nguluwi wa heye, munhu ayo kana nongwa,
NUM 5:7 yomlapa yalonje kwa mlomo wa heye gehile ga heye goyaditile. Na imgana kulavya chinhu chenele kwa gala goyaditile, yokonjeza honhu ha kahano ha chinhu acho, komha chinhu acho munhu yula yamditile gehile.
NUM 5:8 Ila wone munhu ayo yaditilwe gehile yabagame na kahela mng'holoze wa habehi wa kubochela chinhu acho, lelo chinhu acho kwa chiwalo cha nongwa ayo cholavigwa kwa Mkulu Nguluwi kwa chiwalo cha watambika. Kuhilusa kuno ndo hamwe na ing'holo ilume liwele lyolavigwa kwa chiwalo cha uhanyisi na kwa chiwalo cha gehile ga heye.
NUM 5:9 Chila ndolendole zelile za Waisilaeli za kumlavila mtambika, zowa za ayo mtambika.
NUM 5:10 Chila chinhu chelile cha kuhilikwa kwa mtambika chowa cha heye.”
NUM 5:11 Mkulu Nguluwi nakamlonjela Musa,
NUM 5:12 “Walonjele Waisilaeli ahi. Wone mdala wa munhu yoneche nakapaluka na kumdita yaleche kukundigwa kwa mlume wa heye,
NUM 5:13 nakawasa na munhu yunji ne mlume wa heye kuvizela, nakedita yakokomoche ila haduhu munhu yachiwene chinhu acho chikoleka kwa vila hebatigwe hebu.
NUM 5:14 Lelo wone mlume wa heye yenjilwe na majesa na kona fihi kwa mdala wa heye yeditile yakokomoche, ama wone nakawa na fihi kwa mdala wa heye hanga mdala wa heye naheditile yakokomoche,
NUM 5:15 lelo ayo mlume komigala ayo mdala kwa mtambika kigala nhambiko ilinguganigwa, iwele ndo kilo imwe ya utimbo wa shayili, ila ne kujida mafuta ama ubani, kwa vila ndo nhambiko ya fihi, nhambiko ilingulavigwa kulajila kota kana nongwa ama hebu.
NUM 5:16 “Mtambika komigala ayo mdala behi, na kumwimiza hali Mkulu Nguluwi.
NUM 5:17 Hamba mtambika kojida mazi gelile mli chisaye na kuhola nhimbwisi kulawa hasi mli ihema lya Nguluwi na kujela mli mazi ago.
NUM 5:18 Mtambika komuwika mdala ayo hali Mkulu Nguluwi na kumgubula mnvili na kumha nhambiko ayo ya nyhule ya kulajila nongwa, iwele ndo nhambiko ya fihi. Mtambika heye kochibatilila chila chisaye chiwele na mazi galingigala kupanjilwa.
NUM 5:19 Hamba mtambika komlonjela ayo mdala yelahe kwa kulonga, ‘Wone huwasile na mlume yunji kidita ukokomoche hali ludali lwa mlume wa hegwe, lelo hupanjilwa hebu na mazi gano.
NUM 5:20 Ila wone uhinduche uwele hali ludali lwa mlume wa hegwe, kiyambuza ukokomoche kwa kuwasa na mlume yunji uwele hali ludali lwa mlume wa hegwe,
NUM 5:21 Mkulu Nguluwi nayakugaze na kilaha kwa kukupanjila hali wanhu wa hegwe, uwe mhende na lida lya hegwe litutume.
NUM 5:22 Mazi aga galingigala kupanjilwa genjile mlida lya hegwe na kukudita uleche kuponda na lida lya hegwe litutume.’ Na heye mdala kokwidichila, ‘Ena, Ena.’
NUM 5:23 “Hamba mtambika kokwandika kupanjilwa aku kuli igozi na kuhovuga maandiko ago kuli mazi gausungu,
NUM 5:24 na heye komnweza mdala mazi ago galingigala kupanjilwa na kumigalila usungu lukami,
NUM 5:25 hamba mtambika kohola yila nhambiko ya nyhule ya fihi mmoko mwa mlume wa ayo mdala na kwinula kuchanya hali Mkulu Nguluwi na kuigala honhu ha kulavila nhambiko.
NUM 5:26 Hamba mtambika kohola honhu ha nhambiko ayo ya nyhule kwa kukumbuchila na kuilakaza hali honhu ha kulavila nhambiko. Hamba komnweza ayo mdala ago mazi gausungu.
NUM 5:27 Wone yanwe, wone yeditile yakokomoche, na kumdita yawe hambe yakundigwe kwa mlume wa heye, mazi ago galingigala kupanjilwa gomgalila usungu ung'hang'hale ng'hatu, lida lya heye lyotutuma na kowa mhende. Mdala ayo kowa yapanjilwe kuli wanhu wa heye.
NUM 5:28 Ila wone mdala ayo heditile yakokomoche na kela, lelo hokwabuka na koweza kuponda wana.
NUM 5:29 “Lelo aga ndo malajizo kuwala kutagusa fihi, wone mdala ka hali ludali lwa mlume wa heye, kopaluka na kidita yakokomoche,
NUM 5:30 ama mhela mlume hoyokona fihi, na kangijesa kota mchewake nakawasa na mlume yunji. Komwimiza mdala ayo hali Mkulu Nguluwi na mtambika kodita mbuli zeng'ha za malajizo aga.
NUM 5:31 Mlume wa heye kowa hela nongwa yoneche, ila mdala kogazigwa kwa nongwa ya heye.”
NUM 6:1 Mkulu Nguluwi nakamlonjela Musa,
NUM 6:2 “Uwape Waisilaeli malajizo gondonjile, wone mlume ama mdala kochilaha chilaho cha Mnazili kwa chiwalo cha kiwika chiuyeng'ha kwa Mkulu Nguluwi,
NUM 6:3 lelo, yaleche kunwa divai ama ujimbi ama chakunwa choneche cha zabibu ama kunwa mazi ga zabibu ne kulya zabibu zipile ama zikalile.
NUM 6:4 Mhela weng'ha hoyowa mchilaho, yaleche kulya chinhu choneche chilingulawa kuli zabibu, kulawila ipeche mbaka ibanzi.
NUM 6:5 “Zuwa lyeng'ha lya chilaho cha heye cha kibagula, hobeya hebu mnvili za heye mbaka mhela wa chilaho cha heye hali Mkulu Nguluwi hochimala. Kowa yelile na kozileka mnvili za heye zikule.
NUM 6:6 Zuwa lyeng'ha lyoyowa yebagule kwa Mkulu Nguluwi, munhu ayo yaleche kuwa habehi na mtufi,
NUM 6:7 hanga uwe wa mhaza ama wa mamo na lumbu ama kalumbu wa heye, hochidita yakokomoche kwa kibagula kwa Mkulu Nguluwi kwa kilaha.
NUM 6:8 Mhela weng'ha hoyowa Mnazili kowa yelile kwa Mkulu Nguluwi.
NUM 6:9 “Wone munhu wa habehi na Mnazili yabagame baho du na wone yamhejelele, Mnazili kowa yakokomoche. Zuwa lya saba hoyokwelizwa, kobeya mnvili za heye.
NUM 6:10 Kuli zuwa lya nane kohilika ng'hunda mbili za kufujigwa ama ng'hunda mbili za kisolo kwa mtambika hawele na lwizi lwa ihema lya Nguluwi.
NUM 6:11 Mtambika kolavya ng'hunda imwe iwe nhambiko ya gehile na ng'hunda iyage iwe kwa nhambiko ya kulakazwa, na heye komditila uhanyisi, kwa vila nakadita gehile kwa chiwalo cha kuhejelela mtufi. Zuwa lilyo du, koudita mutwi wa heye uwe welile
NUM 6:12 na kibagula kwa Mkulu Nguluwi na kwaluka chilaho kahi. Kolavya ing'holo ilume lya mwaka umwe liwe nhambiko ya nongwa. Mazuwa ago ga mwaluko hagowazigwa kwa vila nayali yakokomoche.
NUM 6:13 “Aga ndo malajizo ga Mnazili hoyosinda mhela wa heye wa kibagula. Kochigaligwa hali lwizi lwa ihema lya Nguluwi,
NUM 6:14 na kumlavila Mkulu Nguluwi nhambiko za heye, ing'holo ilume limwe lya mwaka umwe lilihela nongwa kwa chiwalo cha nhambiko ya kulakazwa, ing'holo idala limwe lya mwaka umwe lilihela nongwa kwa chiwalo cha nhambiko ya gehile, na ing'holo ilume limwe lilihela nongwa kwa chiwalo cha nhambiko ya kikala goya.
NUM 6:15 Kahi kolavya chidoto cha mibumunda jilihela usaso, kuwika goya kwa utimbo unojile na mafuta na mibumunda mizisili jibakalizwe mafuta hamwe na nhambiko za nyhule na za kunwa.
NUM 6:16 “Mtambika komlavila Mkulu Nguluwi vinhu vyeng'ha avi hamwe na nhambiko ya heye ya gehile na nhambiko ya heye ya kulakazwa.
NUM 6:17 Mtambika komlavila Mkulu Nguluwi alyo ing'holo ilume kota nhambiko ya kikala goya, komlavya hamwe na chidoto cha mibumunda jilihela usaso na nhambiko ya nyhule na nhambiko ya kunwa.
NUM 6:18 Aho hali lwizi lwa ihema lya Nguluwi Mnazili ayo kobeya mnvili za mutwi wa heye za kibagula na kuziwika kuli chiluli chiwele hasi ha nhambiko ya kikala goya.
NUM 6:19 “Baho du mtambika kohola iyega lya lila ing'holo ilume liwele lihemsigwe hamwe na ibumunda limwe lyohaliwichigwe usaso kulawa kuli chidoto na ibumunda limwe lizisili na kahi haliwichigwe usaso na kumha Mnazili mmoko naloyabeyile mnvili za heye.
NUM 6:20 Hamba mtambika kolavya vinhu avyo kota nhambiko ya kwinula kuchanya hali Mkulu Nguluwi, vyeng'ha avi ndo honhu helile ha mtambika, hamwe na mhambaga yinuligwe kuchanya na chima chilavigwe kota ndolendole. Hamba, Mnazili koweza kunwa divai.
NUM 6:21 “Alyo ndo ilajizo kuwala Mnazili. Ila wone nakelaha kulavya mzidi wa malajizo ga Mnazili, koganigwa kudita kota vyoyalagane.”
NUM 6:22 Mkulu Nguluwi nakamlonjela Musa,
NUM 6:23 “Mlonjele Aluni na wanage kota ahyo ndo vyomuwatambichiza Waisilaeli. Mowalonjela,
NUM 6:24 “ ‘Mkulu Nguluwi nayawatambichize na kuwamila,
NUM 6:25 Mkulu Nguluwi nayawalole kwa isungu na kwa uganililo,
NUM 6:26 Mkulu Nguluwi nayawalajile kunoga kwa heye na kuwapani kikala goya.’
NUM 6:27 “Ahyo ndo vyowolonga itagwa lya heni hali Waisilaeli, nani ndowatambichiza.”
NUM 7:1 Zuwa Musa loyasindile kwimiza ihema lya Nguluwi na kulibakaliza mafuta na kulidita liwe lyelile hamwe na vinhu vyake vyeng'ha na kubakaliza mafuta na kuhadita hawe helile honhu ha kulavila nhambiko na vinhu vyake vyeng'ha,
NUM 7:2 vilongozi wa Isilaeli na wakulu wa lukolo na vilongozi wa nhanzi iwele wawalolele na wanhu wala wawazigwe,
NUM 7:3 nawamigalila Mkulu Nguluwi nhambiko za hewo, mutuka imwe kwa chila vilongozi weli na isenga lilume kwa chila chilongozi. Nawavilavya vinhu avyo hali ihema lya Nguluwi,
NUM 7:4 Mkulu Nguluwi nakamlonjela Musa,
NUM 7:5 “Ubochele nhambiko azi leka zikole mijito kwa chiwalo cha ihema lya Nguluwi, uwape Walawi, chila yumwe kota mijito ja heye joyakolile.”
NUM 7:6 Lelo Musa nakahola mituka na misenga milume nakawapa Walawi.
NUM 7:7 Wagelishoni nawapegwa mituka mili na misenga milume jine, kwa mijito ja kupika vinhu vya ihema lya Nguluwi.
NUM 7:8 Wamelali nawapegwa mituka jine na misenga milume nane kwa mijito ja kupika vinhu vya ihema lya Nguluwi, hali ulongozi wa Itamali mwana wa mtambika Aluni.
NUM 7:9 Ila Musa hawapele choneche Wakohati kwa vila hewo nawali na mijito ja kulolela goya vinhu vyelile viwele naviganigwa kupichigwa mmayega.
NUM 7:10 Vilongozi awo wolavya nhambiko kwa chiwalo cha kuhawika honhu ha kulavila nhambiko kwa mijito yelile, zuwa lila navyohabakalizwe mafuta, nawalavya nhambiko za hewo hali honhu ha kulavila nhambiko.
NUM 7:11 Mkulu Nguluwi nakamlonjela Musa, “Chila zuwa chilongozi yumwe kolavya nhambiko ya heye kwa chiwalo cha kuhawika honhu ha kulavila nhambiko kwa mijito yelile.”
NUM 7:12 Lelo yula yalavile nhambiko zuwa lya mwaluko, nayali Nashoni mwana wa Aminadabu, wa nhanzi ya Yuda.
NUM 7:13 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:14 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:15 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:16 na ipongo limwe kwa chiwalo cha nhambiko ya gehile,
NUM 7:17 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo nayali nhambiko ya Nashoni, mwana wa Aminadabu.
NUM 7:18 Zuwa lya keli nayali Netaneli mwana wa Suali, chilongozi wa nhanzi ya Isakali.
NUM 7:19 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:20 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:21 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:22 na ipongo limwe kwa chiwalo cha nhambiko ya gehile,
NUM 7:23 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Netaneli, mwana wa Suali.
NUM 7:24 Zuwa lya kadatu nayali Eliabu mwana wa Heloni, chilongozi wa nhanzi ya Sebuluni.
NUM 7:25 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:26 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:27 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:28 na ipongo limwe kwa chiwalo cha nhambiko ya gehile,
NUM 7:29 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Eliabu, mwana wa Heloni.
NUM 7:30 Zuwa lya kane nayali Elisuli mwana wa Shedeuli, chilongozi wa nhanzi ya Lubeni.
NUM 7:31 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:32 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:33 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:34 na ipongo limwe kwa chiwalo cha nhambiko ya gehile,
NUM 7:35 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Elisuli, mwana wa Shedeuli.
NUM 7:36 Zuwa lya kahano nayali Shelumieli mwana wa Suli-shadai, chilongozi wa nhanzi ya Simeoni.
NUM 7:37 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:38 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:39 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:40 na ipongo limwe kwa chiwalo cha nhambiko ya gehile,
NUM 7:41 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Shelumieli, mwana wa Suli-shadai.
NUM 7:42 Zuwa lya sita nayali Eliasafu mwana wa Deueli, chilongozi wa nhanzi ya Gadi.
NUM 7:43 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:44 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:45 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:46 na ipongo limwe kwa chiwalo cha nhambiko ya gehile,
NUM 7:47 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Eliasafu, mwana wa Deueli.
NUM 7:48 Zuwa lya saba nayali Elishama mwana wa Amihudi, chilongozi wa nhanzi ya Efulaimu.
NUM 7:49 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:50 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:51 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:52 na ipongo limwe kwa chiwalo cha nhambiko ya gehile,
NUM 7:53 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Elishama, mwana wa Amihudi.
NUM 7:54 Zuwa lya nane nayali Gamalieli mwana wa Pedasuli, chilongozi wa nhanzi ya Manase.
NUM 7:55 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:56 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:57 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:58 na ipongo limwe kwa chiwalo cha nhambiko ya gehile,
NUM 7:59 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Gamalieli, mwana wa Pedasuli.
NUM 7:60 Zuwa lya tisa nayali Abidani mwana wa Gideoni, chilongozi wa nhanzi ya Benjamini.
NUM 7:61 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:62 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:63 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:64 na ipongo limwe kwa chiwalo cha nhambiko ya gehile,
NUM 7:65 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Abidani, mwana wa Gideoni.
NUM 7:66 Zuwa lya kumi nayali Ahieseli mwana wa Amishadai, chilongozi wa nhanzi ya Dani.
NUM 7:67 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:68 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:69 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:70 na ipongo limwe kwa chiwalo cha nhambiko ya gehile,
NUM 7:71 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Ahieseli, mwana wa Amishadai.
NUM 7:72 Zuwa lya kumi na imwe nayali Pagieli mwana wa Okilani, chilongozi wa nhanzi ya Asheli.
NUM 7:73 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:74 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:75 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:76 na ipongo limwe kwa chiwalo cha nhambiko ya gehile,
NUM 7:77 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Pagieli, mwana wa Okilani.
NUM 7:78 Zuwa lya kumi na mbili nayali Ahila mwana wa Enani, chilongozi wa nhanzi ya Nafutali.
NUM 7:79 Nhambiko ya heye nayali luhelo lumwe lugongomanyigwe kwa sendi na luwele na itunyo lya kilo imwe na nusu na chisaye chimwe chigongomanyigwe kwa sendi chiwele na itunyo lya gilamu miya nane kwa kuwinza chipimilo cha ihema lya Nguluwi. Luhelo na chisaye navyali vimemezwe utimbo unojile uhanzigwe na mafuta kwa chiwalo cha nhambiko ya nyhule.
NUM 7:80 Kahi nakegala chisaye chimwe cha zahabu chiwele na itunyo lya gilamu miya imwe na kumi chiwele chimemezwe ubani
NUM 7:81 na ilogota ilume limwe na ing'holo lilume limwe na ing'holo lyana lilume limwe lya mwaka umwe kwa chiwalo cha nhambiko ya kulakazwa,
NUM 7:82 na ipongo limwe kwa chiwalo cha nhambiko ya gehile,
NUM 7:83 na misenga milume mili na ming'holo milume jihano na mipongo jihano na ming'holo myana milume jihano ja mwaka umwe kwa chiwalo cha nhambiko ya kikala goya. Ayo ndo iwele nhambiko ya Ahila, mwana wa Enani.
NUM 7:84 Ndolendole zeng'ha za nhambiko za vilongozi wa Isilaeli kwa chiwalo cha honhu ha kulavila nhambiko kuli zuwa lya kubakalizwa mafuta, nyhelo kumi na mbili zigongomanyigwe kwa sendi nyinji na visaye kumi na vili vigongomanyigwe kwa sendi nyinji na visaye vya zahabu kumi na vili.
NUM 7:85 Chila chisaye chigongomanyigwe kwa sendi, nachali na itunyo lya kilo imwe na nusu na chila chisaye nachali na itunyo lya gilamu miya nane. Avyo vinhu vyeng'ha navyali na itunyo lya kilo makumi meli na saba na gilamu miya sita kwa kuwinza chipimilo cha ihema lya Nguluwi.
NUM 7:86 Zila nyhelo zigongomanyigwe kwa zahabu kumi na mbili ziwele zimemile ubani, chila imwe iwele na itunyo lya gilamu miya imwe na kumi kwa kuwinza chipimilo cha ihema lya Nguluwi, vyeng'ha navyali na itunyo lya kilo imwe na gilamu miya zidatu na makumi meli.
NUM 7:87 Migongolo jeng'ha ja nhambiko ya kulakazwa najali milogota milume kumi na mili na ming'holo milume kumi na mili hamwe na nhambiko ya nyhule na mipongo kumi na mili kwa chiwalo cha nhambiko ya gehile,
NUM 7:88 na kwa chiwalo cha nhambiko ya kikala goya. Migongolo jilavigwe najali mibuguma makumi meli na jine na ming'holo milume makumi sita na mibebelu makumi sita na ming'holo myana milume ja mwaka umwe, makumi sita. Ayo ndo nayali nhambiko ilavigwe kwa chiwalo cha honhu ha kulavila nhambiko nalohamalile kubakalizwa mafuta.
NUM 7:89 Mhela Musa vyoyenjile mgati mwa ihema lya Nguluwi leka yadawale na Mkulu Nguluwi, nakahulika lizi lilawila kuchanya kwa chigubiko cha uhanyisi, chiwele mchanya mwa isanduku lya ilagano, kulawila hagati mwa vila vilumbigwe vili vifandile kota wahilisi. Lelo, nakadawala na heye.
NUM 8:1 Mkulu Nguluwi nakamlonjela Musa,
NUM 8:2 “Mlonjele Aluni kota mhela hoyowika vila vyenje saba kuli chinhu cha kuwichila vyenje, yaviwiche goya leka vimwemwesele ubanzi wa kumwando.”
NUM 8:3 Aluni nakadita ago, nakaviwika vyenje avyo leka vimwemwesele ubanzi wa kumwando mwa chinhu cha kuwichila vyenje, kota Mkulu Nguluwi vyoyamlajize Musa.
NUM 8:4 Chinhu acho cha kuwichila vyenje nachali chigongomanyigwe kwa uwanzi ukulu kwa zahabu, ipondigwe kulawila kuli chikalilo mbaka kuli uluwa, kota Mkulu Nguluwi navyoyamlajize Musa.
NUM 8:5 Kahi Mkulu Nguluwi nakamlonjela Musa,
NUM 8:6 “Wabagule Walawi kulawila Waisilaeli, uwelize.
NUM 8:7 Ahi ndo vyouweliza, wamizile mazi ga kuwelizila na uwalonjele webeye mnvili lukuli lweng'ha na wahovuje mivalo ja hewo leka welizwe.
NUM 8:8 Hamba wolavya ilogota ilume limwe hamwe na nhambiko ya heye ya nyhule, iwele ndo utimbo unojile uhanzigwe na mafuta, nagwe kolavya ilogota ilume liyage kwa chiwalo cha nhambiko ya gehile.
NUM 8:9 Hamba kokungajiza Waisilaeli weng'ha na kuwegala Walawi hali ihema lya Nguluwi.
NUM 8:10 Houwegala Walawi hali heni Mkulu Nguluwi, Waisilaeli wowawichila moko Walawi,
NUM 8:11 hamba Aluni kowalavya awo Walawi hali heni Mkulu Nguluwi kota ndolendole ya chiuyeng'ha kulawila kwa Waisilaeli wang'holele mijito.
NUM 8:12 Hamba Walawi wowika moko ga hewo mchanya mwa mitwi ja mibuguma ajo, limwe kolilavya liwe nhambiko ya gehile na alyo liyage kolilavya liwe nhambiko ya kulakazwa ilavigwe kwa heni Mkulu Nguluwi, leka kuwaditila uhanyisi Walawi.
NUM 8:13 “Hamba, kowemiza Walawi hali Aluni na wanage na kuwalavya hali heni Mkulu Nguluwi kota ndolendole ya chiuyeng'ha.
NUM 8:14 Ahi ndo vyouwabagula Walawi hali Waisilaeli leka wawe wa heni.
NUM 8:15 Housinda kuweliza Walawi na kuwalavya kota ndolendole ya chiuyeng'ha, wokwinjila mli ihema lya Nguluwi.
NUM 8:16 Hewo wawichigwa wawe wa heni ng'hatu, ndiwahola hewo honhu ha walelwa wa mwaluko wa Isilaeli.
NUM 8:17 Mina walelwa weng'ha wa mwaluko kuli wanhu wa Isilaeli ndo wa heni, wanhu na migongolo, kwa vila kuli mazuwa ga mwaluko londiwakopole walelwa weng'ha wa mwaluko kuli isi ya Misili, nandiwawika chiuyeng'ha kwa chiwalo cha heni.
NUM 8:18 Sambi ndanguwahola Walawi honhu ha walelwa wa mwaluko wa Isilaeli,
NUM 8:19 na ndimha awo Walawi, Aluni na wanage kota ndolendole kulawila kwa Waisilaeli, leka wakole mijito kuli ihema lya Nguluwi kwa chiwalo cha Waisilaeli na kuwamila leka haleche kulawila igayo hali wanhu wa Isilaeli wone wohahejelela honhu helile.”
NUM 8:20 Ahyo, Musa na Aluni na Waisilaeli weng'ha, wowawika Walawi wawe wa chiuyeng'ha, kota Mkulu Nguluwi vyoyamlajize Musa.
NUM 8:21 Walawi naweweliza gehile ga hewo na kuhovuga nguwo za hewo, na heye Aluni nakawalavya kota ndolendole ya chiuyeng'ha hali Mkulu Nguluwi. Aluni kahi, nakadita uhanyisi kwa chiwalo cha kuweliza hewo.
NUM 8:22 Hamba Walawi nawenjila na kukola mijito ja hewo kuli ihema lya Nguluwi hali Aluni na wanage, kota Mkulu Nguluwi vyoyamlajize Musa kuwala awo Walawi, na ndo vyowawaditile.
NUM 8:23 Mkulu Nguluwi nakamlonjela Musa,
NUM 8:24 “Chila Mlawi yawele na miyaka makumi meli na gahano na mzidi, kokola mijito ja uchitumagwa kuli ihema lya Nguluwi
NUM 8:25 na koleka mijito ajo loyowa na miyaka makumi gahano.
NUM 8:26 Hamba kahi, koweza kuwatanza Walawi wayage kuli ihema lya Nguluwi kwa kulyamila, ila hambe yakundigwe kukola mijito yoneche. Ahyo ndo vyouwalajiza Walawi kukola mijito.”
NUM 9:1 Hamba, loufichile mwezi wa mwaluko wa mwaka wa keli hala Waisilaeli lowalawile Misili. Mkulu Nguluwi nakalongasa na Musa kuchiwala ako Sinai. Nakamlonjela,
NUM 9:2 “Waisilaeli wanguganigwa waidite mnvina ya Pasaka kuli mhela uwichigwe.
NUM 9:3 Ayi yowa zuwa lya kumi na kane lya mwezi awu, mhela wa kuzinga kwa isanya wodita ahyo kwa kuwinza mizilo na malajizo geng'ha.”
NUM 9:4 Ahyo, Musa nakawalonjela wanhu wa Isilaeli kota wangulapigwa kudita mnvina ya Pasaka.
NUM 9:5 Lelo nawaidita mnvina ya Pasaka mhela wa kuzinga kwa isanya, zuwa lya kumi na kane lya mwezi wa mwaluko kuchiwala ako Sinai. Waisilaeli nawadita geng'ha kota Mkulu Nguluwi vyoyamlajize Musa.
NUM 9:6 Ila wanhu wamwe nawawele hala nawalemwela kulya chilyo cha Pasaka ayo kwa vila nawali wadolize mtufi, nawawa wakokomoche. Awo nawawalutila Musa na Aluni,
NUM 9:7 Wawalonjela, “Hetwe twa wanhu wakokomoche kwa vila natudoliza mtufi, lelo lekachoni tulemezwe kumlavila Mkulu Nguluwi nhambiko za heye kwa mhela uwichigwe hamwe na Waisilaeli wanji?”
NUM 9:8 Musa nakawedichila, “Mbeteze mbaka hala hondipegwa malajizo ga kuwawala hemwe kulawila kwa Mkulu Nguluwi.”
NUM 9:9 Na heye Mkulu Nguluwi nakamlonjela Musa,
NUM 9:10 “Yumwe wa hemwe ama yumwe wa walelwa wa hemwe wone yawe yokokomoche kwa kudoliza mtufi ama yawe kutali mmajendo, ila yoweza kuidita mnvina ya Pasaka kwa Mkulu Nguluwi.
NUM 9:11 Munhu kota ayo kokundizwa kudita ahyo mwezi umwe hamba, mhela wa kuzinga kwa isanya kuli zuwa lya kumi na kane lya mwezi wa keli. Koidita kwa kulya mibumunda jilihela usaso na mboga ziwele usungu.
NUM 9:12 Waleche kusigaza chilyo choneche mbaka lufuku, kahi waleche kubena izeje ne limwe lya migongolo ja Pasaka. Woidita mnvina ayi ya pasaka kwa kuwinza malajizo galinguganigwa.
NUM 9:13 Ila yula munhu yoneche yelizwe ama hawele mmajendo, wone haiditile mnvina ya Pasaka, kobaguligwa na wanhu wa heye kwa vila handavile nhambiko Mkulu Nguluwi kwa mhela uganigwe. Koganigwa yagazigwe kwa chiwalo cha gehile ga heye.
NUM 9:14 “Wone hana mjenzi yalingikala behi na hemwe na kangugana kuidita mnvina ya Pasaka kwa Mkulu Nguluwi, munhu ayo koganigwa yadite ahyo kwa kuwinza malajizo geng'ha ga Pasaka. Chila munhu kowinza malajizo gagala galinguganigwa, yawe mjenzi ama mwenyeng'haye.”
NUM 9:15 Zuwa lila ihema lya Nguluwi loliwichigwe, ng'hungugu naidulika na kugubika ihema lya Nguluwi. Mhela wa kuzinga kwa isanya mbaka lufuku ng'hungugu ayo nayoneka kota chiluli.
NUM 9:16 Ahyo ndo vyonaiwele chila zuwa, ng'hungugu naigubika ihema nemisi, na nechilo nayoneka kota chiluli.
NUM 9:17 Chila mhela ng'hungugu yila chila loyinuligwe mchanya mwa ihema, Waisilaeli nawoka na kuza kuwika kambi honhu hanji yila ng'hungugu hoigwile.
NUM 9:18 Nawaheluka mmajendo kwa kulajizwa na Mkulu Nguluwi, wanhu wa Isilaeli nawawika kambi kahi kwa kulajizwa na Mkulu Nguluwi. Mhela weng'ha ng'hungugu ayo loyali mchanya mwa ihema, wanhu nawekala honhu aho.
NUM 9:19 Hanga yila ng'hungugu iwe yikale mchanya mwa ihema kwa mazuwa menji, Waisilaeli nawamhulichiza Mkulu Nguluwi, na hewo hawochile.
NUM 9:20 Mhela wunji ng'hungugu naikala mchanya mwa ihema lya Nguluwi kwa mhela wa mazuwa mado hela, ila chila mhela Waisilaeli nawapona bahala kuli kambi, nawoka hala Mkulu Nguluwi navyoyawalajize.
NUM 9:21 Mala yinji ng'hungugu naiwa mchanya mwa ihema lya Nguluwi kulawa matinazo mbaka mitondo. Ng'hungugu yila loyinuligwe nawenula majendo, hanga naiwele mchanya nemisi na nechilo, ng'hungugu loyinuligwe, nawenula majendo.
NUM 9:22 Wone iwe mazuwa meli ama mwezi ama mwaka ama mzidi, mhela weng'ha ng'hungugu loiwele mchanya mwa ihema lya Nguluwi, Waisilaeli hawochile, ila loyinuligwe na hewo nawoka.
NUM 9:23 Kwa kulajizwa na Mkulu Nguluwi nawawika kambi na kwa kulajizwa na Mkulu Nguluwi nawaheluka mmajendo. Nawebatilila ilajizo lya Mkulu Nguluwi kota navyoyalajize kwa kukolela Musa.
NUM 10:1 Mkulu Nguluwi nakamlonjela Musa,
NUM 10:2 “Ugongomanye mhalamhanda mbili kwa sendi, ziwele zipondigwe. Mhalamhanda azo mozikolela mijito ja kuwachema Waisilaeli weng'ha na kwa chiwalo cha kuka homuwichile kambi.
NUM 10:3 Mhalamhanda zeng'ha mbili wone zipembigwe hamwe, Waisilaeli weng'ha wochikungajiza hali hegwe hali lwizi lwa ihema lya Nguluwi.
NUM 10:4 Ila wone ipembigwe mhalamhanda imwe, aho vilongozi wa nhanzi ya Isilaeli yeka ndo wowa wolapigwa kikungajiza behi na hegwe.
NUM 10:5 Ulajilo awo wone ulavigwe kwa kupemba mhalamhanda hado hado kwa kulutilila, wenyeng'haye wa kambi za kolilawila isanya wokwaluka majendo.
NUM 10:6 Wone ulajilo awo utowigwe lwa keli, wala wawele kuli kambi za kusini wokwaluka kuka. Ulajilo awo wa mhalamhanda wotowigwa chila mhela wa kwaluka majendo.
NUM 10:7 Ila mhela wa kuwachema Waisilaeli weng'ha weting'hane hamwe, mhalamhanda zopembigwa kwa kulutilila lukami kota vyowazowele, ila zileche kupembigwa hado hado.
NUM 10:8 Walelwa walume wa Aluni, watambika, ndo wopemba mhalamhanda azo. Ilajizo ali moliwinza kuli lulelo wa hemwe weng'ha mazuwa gose.
NUM 10:9 “Mhela wa kitowa ngondo muisi ya hemwe na wang'honyo, molavya ulajilo kwa kupemba mhalamhanda azi hado hado leka Mkulu Nguluwi, Nguluwi wa hemwe yawakumbuche na kuwalohola na wala wang'honyo wa hemwe.
NUM 10:10 Hihila na mazuwa ga hemwe ga kusangalala, kota hila mnvina za kulawa kwa nyelezi na mnvina zinji, mopemba mhalamhanda azi mhela lomlavya nhambiko za hemwe za kulakaza na nhambiko za hemwe za kikala goya. Aho heni Mkulu Nguluwi wa hemwe ndowakumbukani. Heni nda Mkulu Nguluwi, Nguluwi wa hemwe.”
NUM 10:11 Loifichile zuwa lya makumi meli lya mwezi wa keli, mwaka wa keli kulawila Waisilaeli lowochile Misili, ng'hungugu iwele mchanya kuli ihema lya Nguluwi nayinuka,
NUM 10:12 na hewo Waisilaeli waluka majendo ga hewo kulawila kuli chiwala ako Sinai. Ng'hungugu ayo nayidulika kuli chiwala ako Palani.
NUM 10:13 Aho mwaluko Waisilaeli nawaluka majendo kota Mkulu Nguluwi vyoyamlajize Musa.
NUM 10:14 Wala wawele hali bendela ya chilundo cha nhanzi ya Yuda, nawalongola, chilundo chimwe hamba chiyage. Chilongozi wa hewo nayali Nashoni mwana wa Aminadabu.
NUM 10:15 Netaneli mwana wa Suali, nayali chilongozi wa chilundo cha nhanzi ya Isakali.
NUM 10:16 Na heye Eliabu mwana wa Heloni, nayali chilongozi wa chilundo cha nhanzi ya Sebuluni.
NUM 10:17 Hamba, ihema lya Nguluwi naliduliswa, na wanhu wa ng'holo za Gelishoni na za Melali ndo nawalipapile, nawaluka kuka.
NUM 10:18 Hamba, wanhu wonawali hali bendela ya chilundo chilongozwe na nhanzi ya Lubeni, nawawinza chilundo chimwe mbaka chiyage. Chilongozi wa hewo nayali Elisuli mwana wa Shedeuli.
NUM 10:19 Shelumieli mwana wa Suli-shadai, nakailongoza nhanzi ya Simeoni.
NUM 10:20 Eliasafu mwana wa Deueli, nakailongoza nhanzi ya Gadi.
NUM 10:21 Hamba nawawawinza wanhu wa lukolo lwa Kohati, nawali wapapile vinhu vyelile. Lowafichile, ihema lya Nguluwi nalyali liwichigwe goya.
NUM 10:22 Kumbele kwa hewo, nawawinza wanhu wawele hali bendela ya chilundo chilongozwe na nhanzi ya Efulaimu, chilundo chimwe kumbele kwa chiyage. Chilongozi wa hewo nayali Elishama, mwana wa Amihudi.
NUM 10:23 Gamalieli mwana wa Pedasuli nakailongoza nhanzi ya Manase,
NUM 10:24 na heye Abidani mwana wa Gideoni, nakailongoza nhanzi ya Benjamini.
NUM 10:25 Mwiso, wala wawele hali bendela ya chilundo chilongozwe na nhanzi ya Dani, wawele wokwamila kumbele mwa vilundo vyeng'ha, nawaluka majendo, chilundo chimwe kumbele kwa chiyage. Awa nawalongozwa na Ahieseli mwana wa Amishadai.
NUM 10:26 Pagieli, mwana wa Okilani, nakailongoza nhanzi ya Asheli.
NUM 10:27 Ahila mwana wa Enani, nakailongoza nhanzi ya Nafutali.
NUM 10:28 Ahi lelo, ndo Waisilaeli navyowawele mmajendo na ndo vyowewichile goya kuli vilundo vya hewo, chila mhela lowaluche majendo.
NUM 10:29 Musa nakamlonjela Hobabu mwana wa Leueli, mgosi wa heye Mmidiani, “Hetwe twangwaluka majendo kuluta honhu hawele Mkulu Nguluwi nakalonga, ‘Ndowapani hemwe honhu aho.’ Lelo tulute hamwe, natwe tokuditila ganojile, mina Mkulu Nguluwi nakalonga kotupa hetwe Waisilaeli utambichizo.”
NUM 10:30 Ila Hobabu nakalonga, “Heni hatuchiwinza na hemwe, ila ndohiluka kuli isi ya heni na kwa nhanzi ya heni.”
NUM 10:31 Musa nakamlonjela, “Ndangulanda uleche kutuleka, mina hegwe kuvizela honhu hotuweza kuwasa hagunuche, na koweza kutulongoza nzila.
NUM 10:32 Wone koluta hamwe na hetwe, choneche chinojile choyotuditila Mkulu Nguluwi, ndo chicho tokuditila na hegwe nagwe.”
NUM 10:33 Lelo wanhu nawaluka majendo kulawila Sinai, chidunda cha Mkulu Nguluwi, majendo ga mazuwa gadatu. Isanduku lya ilagano lya Mkulu Nguluwi naliwalongola leka kuwapalila honhu ha kuwasa.
NUM 10:34 Chila lowaluche majendo kulawa kowawichile kambi imwe mbaka iyage, ng'hungugu ya Mkulu Nguluwi nayali mchanya mwa hewo nemisi.
NUM 10:35 Chila mhela isanduku holyaluche majendo kuluta kumwando, Musa nakalonga, “Winuche, gwa Mkulu Nguluwi, wang'honyo wa hegwe wasambaluche, na awo walingukuzudila wakubilime kulawa hali hegwe.”
NUM 10:36 Chila mhela vyolimile, Musa nakalonga, “Uwahiluchile, gwa Mkulu Nguluwi, wano maelufu na maelufu ga Isilaeli.”
NUM 11:1 Wanhu nawaluka kumng'ung'utila Mkulu Nguluwi kwa gala magazo ga hewo. Mkulu Nguluwi navyoyahuliche, nayali yazudile, nakawahilichila chiluli. Chiluli acho nachali chikwaka hali hewo na kuwifya nzingo imwe ya yila kambi.
NUM 11:2 Wanhu nawamlilila Musa, na heye nakamlanda Mkulu Nguluwi na chiluli acho nachizima.
NUM 11:3 Lelo honhu aho hochemigwa Tabela, kwa vila acho chiluli cha Mkulu Nguluwi nachali chikwaka hali wanhu wamwe.
NUM 11:4 Hali Waisilaeli nakwali na chilundo chiyage chihanzile na hewo, nachali na maya lukami. Waisilaeli kwa mala iyage nawalila, wolonga. “Wone natwahawele na miwunde ja kulya!
NUM 11:5 Twangukumbuchila somba zotudile kula Misili ne kugula, matango na mitikiti na mboga na vitunguu na vitunguu saumu.
NUM 11:6 Ila sambi ludali lumala na kuduhu ndiya iyage ila ayi mana hela!”
NUM 11:7 Mana nayali kota nyhule za uhemba, lanji yake nayali nzelu hado.
NUM 11:8 Wanhu nawazunguluta zunguluta na kukungajiza, hamba nawazibalasa kwa maganga ga kubalasila ama kuzitwanga kwa ituli, hamba nawatogosa mchiya na kugongomanya mibumunda. Unojenoje wake nawali kota wa mibumunda jikalanjigwe kwa mafuta.
NUM 11:9 Nhungwi vyoyigwile kuli kambi mhela wa nechilo, mana kahi nayigwa hamwe na ayo nhungwi.
NUM 11:10 Musa nakahulika wanhu wolila kuli ng'holo zeng'ha, chila munhu hali lwizi lwa ihema lya heye. Lelo Mkulu Nguluwi nakazudila ng'hatu na heye Musa nakagaya mnhumbula ya heye.
NUM 11:11 Aho ndo Musa navyoyamlonjele Mkulu Nguluwi, “Lekachoni ulingunditila vibi heni chitumagwa wa hegwe? Lekachoni hambe umhe heni uganililo ila kumha heni itunyo lya kuwalolela wanhu weng'ha wano?
NUM 11:12 Ndaze, ndo heni ndiwapondile, na kundonjela ndiwapape mmhambaga ya heni kota mamo yalingupapa chali cha heye na kuwegala mbaka kuli isi youwalahile kuwapa wasekulu wa hewo?
NUM 11:13 Ndopata kohi miunde ja kuwalisa wanhu awa weng'ha? Mina wangulila hali heni wolonga, ‘Utugalile miwunde tulye!’
NUM 11:14 Siweza hebu kuwalolela wanhu awa weng'ha ndiliyeka, alyo ndo itunyo likulu ng'hatu kwa heni.
NUM 11:15 Wone iwe ahyo ndo vyoulingundita, fola ung'hopole hela. Wone mhegwe uganililo hali hegwe, lelo undavile magazo aga.”
NUM 11:16 Lelo Mkulu Nguluwi nakamlonjela Musa, “Muwakungajize wasekulu makumi saba wa Isilaeli, wawele hegwe kuwazela kota wangukundigwa na wanhu wawe vilongozi, uwegale kuli ihema lya Nguluwi, weme habehi na hegwe.
NUM 11:17 Ndodulika ako na kulongasa na hegwe, ndohola honhu ha muhe wondikupele, ndiwape wanhu awo. Na hewo wopapa itunyo lya kuwalolela wanhu awo hamwe na hegwe, leka uleche kupapa itunyo alyo uliyeka.
NUM 11:18 Lelo uwalonjele wanhu kota wewelize kwa vila hamitondo molya miwunde. Mkulu Nguluwi nakahulika mlila na kulonga kota haduhuli wa kuwapa miwunde, na kota hemwe namwali mulya vinojile ng'hatu lomwali Misili. Lelo Mkulu Nguluwi kowapani miwunde, na hemwe yanguwalapani mulye.
NUM 11:19 Molya miwunde haiwele kwa zuwa limwe hela ama mazuwa meli ama gahano ama kuli mazuwa makumi meli,
NUM 11:20 ila kwa mhela wa mwezi umwe. Molya mbaka jowalawila kumhenyhelo na kujizudila. Geng'ha ago ndo kwa vila mumlema Mkulu Nguluwi yawele bahano hali hemwe, na kulila hali heye mlonga, ‘Lekachoni natulawa Misili?’ ”
NUM 11:21 Ila Musa nakamlonjela Mkulu Nguluwi, “Winji wa wanhu ndilinguwalongoza hano ndo lachi sita walingujenda kwa magulu, na hegwe kwangulonga, ‘Ndowapani miwunde ja kuhega mwezi weng'ha!’
NUM 11:22 Ndaze, kudumuligwa singo ing'holo na isenga johega? Ndaze, somba zeng'ha mbahali zilowigwe kwa chiwalo cha hewo?”
NUM 11:23 Mkulu Nguluwi nakamwidichila Musa, “Ndaze, ludali lwa heni lupunguka? Kokona lelo ulonzi wa heni wowa wa kukomya kwa hegwe ama hebu.”
NUM 11:24 Lelo Musa nakaluta na kuwalonjela wanhu gala goyalonjile Mkulu Nguluwi. Hamba, nakawakungajiza wasekulu makumi saba kulawila kuli wala wasekulu vilongozi wa hewo, nakawawika hafungo kuzunguluta ihema.
NUM 11:25 Aho, Mkulu Nguluwi nakadulika kuli ng'hungugu na kulongasa na heye. Hamba nakalavya honhu ha muhe wonayampele Musa, nakamha chila yumwe wa wala wasekulu makumi saba. Lowenjilwe na muhe awo, wasekulu awo nawaluka kulonga kota waloli, ila hawahiluchile kudita ahyo.
NUM 11:26 Wasekulu weli hali wala makumi saba wahaguligwe, Elidadi na Medadi, nawali waponile kuli kambi, wayawo nalowalutile kuli ihema. Muhe nauwoyela mumo kuli ihema, nawaluka kulonga kota waloli honhu howawele.
NUM 11:27 Msongolo yumwe nakalawa yobilima na kumlonjela Musa, “Elidadi na Medadi wangulonga kota waloli kuli kambi.”
NUM 11:28 Aho, Yoshua, mwana wa Nuni, nayawele yomtanza Musa kulawila usongolo wa heye, nakamlonjela Musa, “Mkulu wa heni, walemeze.”
NUM 11:29 Ila Musa nakamlonjela, “Ndaze, kwangona fihi kwa chiwalo cha heni? Ila ndahaganile wone Mkulu Nguluwi nayawapele wanhu wa heye weng'ha muhe wa heye na hewo nawalonga kota waloli.”
NUM 11:30 Hamba Musa nakahiluka kuli kambi hamwe na wala wasekulu wa Isilaeli.
NUM 11:31 Hamba Mkulu Nguluwi nekegala mbeho baho du, naigala ng'wale kulawa mbahali na kuwadita wagwe hafungo ha yila kambi, majendo ga zuwa imwe ahi chila ubanzi kuzunguluta kambi, nawelunda hasi habehi mita imwe ahi kuluta kuchanya.
NUM 11:32 Lelo zuwa alyo lyeng'ha, na zuwa lilinguya wanhu nawakola mijito ja kukungajiza ng'wale, kuduhuli munhu yakungajize hasi ha kilo elufu imwe. Nawaziwika hali isanya chila honhu hafungo mwa kambi leka zikale.
NUM 11:33 Lokuwele kung'hali na miwunde kwa winji wanhu nawawele wang'hali kusinda kulya, Mkulu Nguluwi nakawazudila wanhu, nakawatowa kwa igayo ikulu ng'hatu.
NUM 11:34 Ahyo honhu aho nahapegwa itagwa Kibuloti-hataava, kwa vila ako ndo kowawatilile wanhu wawele na maya lukami.
NUM 11:35 Kulawila ako Kibuloti-hataava, wanhu nawaluka majendo mbaka Haseloti, nawawika kambi na kikala ako.
NUM 12:1 Hamba Miliamu na Aluni nawaluka kumlonga vibi Musa kwa chiwalo cha mdala Mkushi yonayali yamhesile.
NUM 12:2 Nawalonga, “Hambi Mkulu Nguluwi nakalonga kwa kukolela Musa yaliyeka? Ndaze, halonjile kwa kukolela hetwe tweng'ha?” Mkulu Nguluwi nakahulika ulonzi awo.
NUM 12:3 Musa nayali munhu yaholondale lukami kusinda wanhu wanji wawele muisi.
NUM 12:4 Baho du, Mkulu Nguluwi nakawalonjela Musa na Aluni na Miliamu, “Mlawe, muye hali ihema lya Nguluwi, hemwe wadatu.” Lelo weng'ha wadatu nawaluta kuli ihema lya Nguluwi.
NUM 12:5 Aho Mkulu Nguluwi nakadulika kuli izengo lya ng'hungugu, nakema hali lwizi lwa ihema, nakawachema Aluni na Miliamu. Weng'ha weli nawahejela kumwando.
NUM 12:6 Hamba Mkulu Nguluwi nakawalonjela, “Muhulichize ulonzi wa heni. Wone hana mloli hali hemwe, heni Mkulu Nguluwi ndizelesaga kwa heye kuli uloli na kulongasa na heye kuli kulota.
NUM 12:7 Ila kwa chitumagwa wa heni Musa, haiwa ahyo kwa vila heye ndo wa kukundigwa kuli ng'handa ya heni yeng'ha.
NUM 12:8 Heni ndangulonga na heye hazelu ne uviso. Heye kangumbona vyondili heni Mkulu Nguluwi. Lekachoni, lelo hamdumbile kumlonga vibi Musa, chitumagwa wa heni?”
NUM 12:9 Aho Mkulu Nguluwi nayali na ng'halazi kwa chiwalo cha hewo, nakoka.
NUM 12:10 Ng'hungugu vyoyuchile mchanya mwa ihema lya Nguluwi, Miliamu nakoneka kana utamwa wa ngozi wa lanji nzelu chwee. Aluni loyahinduche na kumlola Miliamu, nakabubuwala kona kota kana utamwa wa ngozi.
NUM 12:11 Aho Aluni nakamlonjela Musa, “Gwa mkulu wa heni, uleche kutugaza kwa vila natudita mbuli ya chipoka na kudita gehile.
NUM 12:12 Uleche kumdita Miliamu yawe kota mwana yapondigwe kuno yabagame, yawele nusu ya lukuli lwa heye lolile.”
NUM 12:13 Musa nakamlilila Mkulu Nguluwi yolonga, “Ndangukulonjela, gwa Nguluwi, umlohole!”
NUM 12:14 Ila Mkulu Nguluwi nakamlonjela Musa, “Hanji wone mhaza wa heye nayamtemele mite kumeho, ndaze, halingona soni kwa mazuwa saba? Lelo mlavye kunze mwa kambi yekale ako kwa mhela wa mazuwa saba, hamba komkundiza yahiluche kuli ihema.”
NUM 12:15 Ahyo, Miliamu nakawinjigwa kunze mwa kambi kwa mhela wa mazuwa saba. Wanhu hawaluche kahi majendo mbaka Miliamu hoyahilulwe kahi kuli kambi.
NUM 12:16 Hamba, wanhu nawaluka majendo kulawila Haseloti, nawawika kambi kuli chiwala ako Palani.
NUM 13:1 Mkulu Nguluwi nakamlonjela Musa,
NUM 13:2 “Uwalajize walume walute kuipugajiza isi ya Kanaani iwele yondiwapa wanhu wa Isilaeli. Komlajiza mlume yumwe kulawila chila nhanzi, yawele chilongozi kuli nhanzi ya heye.”
NUM 13:3 Lelo kwa chiwalo cha ilajizo lya Mkulu Nguluwi, Musa nakawatuma walume kulawila kuchiwala ako Palani. Walume weng'ha watumigwe nawali vilongozi wa nhanzi zilivinji za wanhu wa Isilaeli.
NUM 13:4 Aga ndo matagwa ga wanhu awo. Kulawa kuli nhanzi ya Lubeni, nayali Shamuwa mwana wa Sakuli.
NUM 13:5 Kulawa kuli nhanzi ya Simeoni, nayali Shafati mwana wa Holi.
NUM 13:6 Kulawa kuli nhanzi ya Yuda, nayali Kalebu, mwana wa Yefune.
NUM 13:7 Kulawa kuli nhanzi ya Isakali, nayali Igali mwana wa Yusufu.
NUM 13:8 Kulawa kuli nhanzi ya Efulaimu, nayali Hoshea mwana wa Nuni.
NUM 13:9 Kulawa kuli nhanzi ya Benjamini, nayali Paliti mwana wa Lafu.
NUM 13:10 Kulawa kuli nhanzi ya Sebuluni, nayali Gadieli mwana wa Sodi.
NUM 13:11 Kulawa kuli nhanzi ya Manase, iwele nailawile kuli nhanzi ya Yusufu, nayali Gadi mwana wa Susi.
NUM 13:12 Kulawa kuli nhanzi ya Dani, nayali Amieli mwana wa Gemali.
NUM 13:13 Kulawa kuli nhanzi ya Asheli, nayali Setuli mwana wa Mikaeli.
NUM 13:14 Kulawa kuli nhanzi ya Nafutali, nayali Nabi mwana wa Wofusi.
NUM 13:15 Kulawa kuli nhanzi ya Gadi, nayali Geueli mwana wa Maki.
NUM 13:16 Ago ndo matagwa ga wanhu wawele Musa nakawalajiza kuluta kuipugajiza isi ya Kanaani. Musa nakamha Hoshea mwana wa Nuni itagwa linyale, nakamchema Yoshua.
NUM 13:17 Vyoyawalajize kuza kuipugajiza isi ya Kanaani, Musa nakawalonjela, “Mlute kula kumwambu Negebu, mbaka kuli isi ya vidunda,
NUM 13:18 mkailole isi vyoili. Mlole kahi wone wanhu walingikala amo ndo wawele na mong'ho ama ng'hochele ama wenji ama wado.
NUM 13:19 Mpugajize kota isi ayo inoga ama yiha, miji jowalingikala ndo kambi ama ndo ng'handa zizungulutwe na lukanzi.
NUM 13:20 Mpugajize kahi isi ayo kota ina lufufu ama yahela lufufu, ina migodi ama yahela. Muwe msindamala na vyomuhiluka muhole mafuza gamwe ga isi ayo.” Awo nawali mhela wa kwaluka kupya kwa zabibu.
NUM 13:21 Lelo wanhu awo nawaluta na kuipugajiza isi kulawila kuli chiwala ako Sini mbaka Lehobu, habehi na nzila ya kwinjilila Hamati.
NUM 13:22 Nawaluta mbaka Negebu nawakola mbaka muji wa Hebuloni. Amo nawawafika Waahimani na Washeshai na Watalimai, walelwa wa Anaki. Muji wa Hebuloni nawali uzenjigwe miyaka saba loung'hali kuzenjigwa muji wa Soani uwele muisi ya Misili.
NUM 13:23 Lowafichile kuli ibindi lya Eshikoli, wanhu awo nawadumula chizabala cha zabibu chiwele na mafuza menji na acho nachiholigwa na wanhu weli mzegamzega. Nawahola kahi makomamanga ganji na tini.
NUM 13:24 Honhu aho nahachemigwa ibindi lya Eshikoli kwa chiwalo cha chizabala cha zabibu chiwele wanhu awa wa Isilaeli nawachihola kulawila honhu aho.
NUM 13:25 Lowasindile kuipugajiza isi kwa mhela wa mazuwa makumi gane, wanhu awo nawahiluka.
NUM 13:26 Nawawalutila Musa na Aluni na Waisilaeli weng'ha ako Kadeshi, kuli chiwala ako Palani, nawalonga mbuli zowaziwene na kuwalajila mafuza ga isi.
NUM 13:27 Nawamlonjela Musa, “Natufika isi youtulajize tuipugajize, ayo ndo isi iwele na mboto, na ali ndo ifuza lyake.
NUM 13:28 Ila wenyeng'haye wa isi ayo ndo wawele na mong'ho lukami, na miji ja hewo ndo mikulu ng'hatu na jina lukanzi lukulu. Natuwona kuko kahi walelwa wa Anaki, wawele ng'wemang'wema lukami.
NUM 13:29 Waamaleki wangikala kuli honhu ha Negebu, Wahiti na Wayebusi na Waamoli wangikala kuli honhu ha vidunda, na Wakanaani wangikala habehi na bahali ya Mediteleniyani na habehi na hafungo ha lwanda lwa Yolodani.”
NUM 13:30 Ila Kalebu nakawadita wanhu wenyamalile tulu hali Musa, nakalonga, “Tuche himahima tukaihole isi ayo. Kwa vila twanalo ludali lwa kuhega ng'hatu kwa kuwasumya.”
NUM 13:31 Ila wanhu wowawele welongoze na heye kuipugajiza isi nawalonga, “Hatuweza kitowa na wanhu awo, hewo wana mong'ho lukami kusinda hetwe.”
NUM 13:32 Ahyo naweneza mbuli zihile hali Waisilaeli kuwala isi yowaipugajize, wolonga, “Isi ayo yotuipugajize yanguwakopola wanhu wake. Kahi wanhu weng'ha wotuwawene ako ndo wang'wemang'wema ng'hatu.
NUM 13:33 Ako natuwona wanhu wawele ng'wemang'wema, walelwa wa Anaki. Hetwe natiwona kota ndede hali hewo, hanji hihyo du vyowatuwene hetwe.”
NUM 14:1 Waisilaeli weng'ha nawaluka kulila ng'hatu, wanhu nawalila nechilo yila.
NUM 14:2 Waisilaeli weng'ha nawawang'ung'utila Musa na Aluni kuno wolonga, “Fola natwahabagame Misili. Fola natwahabagame bahano kuchiwala.
NUM 14:3 Lekachoni Mkulu Nguluwi kangutuhilika kuli isi ayo? Tobagama kuli ngondo, na wadala wa hetwe na wana wa hetwe woholigwa na wang'honyo wa hetwe. Fola tuhiluche Misili!”
NUM 14:4 Lelo nawaluka kilonjela wawo, “Tuhagule chilongozi na tuhiluche ako Misili.”
NUM 14:5 Lelo Musa na Aluni nawagwa chifunama hali Waisilaeli weng'ha.
NUM 14:6 Yoshua mwana wa Nuni na Kalebu mwana wa Yefune, nawawele hali wala wanhu wowalutile kuipugajiza isi ayo, nawadega mivalo ja hewo kwa masinzo
NUM 14:7 na kuwalonjela Waisilaeli weng'ha, “Isi yotulutile kuipugajiza ndo inoga lukami.
NUM 14:8 Wone Mkulu Nguluwi nakanojezwa na hetwe, kotuhilika ako na kotukundiza kikala kuli isi iwele na mboto.
NUM 14:9 Ila mleche kumhinduka Mkulu Nguluwi ne kuwadumba wenyeng'haye wa isi ayo. Kwa vila hewo ndo chinhu chido hela kwa hetwe, hawokwamilwa hebu, na heye Mkulu Nguluwi ka hamwe na hetwe, mleche kuwadumba.”
NUM 14:10 Ila Waisilaeli weng'ha nawagana kujeza kuwatowa na maganga. Baho du, ukulu wa Mkulu Nguluwi naulawila mchanya mwa ihema lya Nguluwi, hali Waisilaeli weng'ha.
NUM 14:11 Hamba Mkulu Nguluwi nakamlonjela Musa, “Wanhu wano wombeza mbaka nili? Na woleka kung'hunda heni mbaka nili, hanga ndita vinduzanduza hali hewo?
NUM 14:12 Ndowagaza kwa matamwa gehile na hawowa wanhu wa heni, ila ndokudita uwe nhanzi yinji ng'hulu, iwele na mong'ho kusinda weng'ha.”
NUM 14:13 Ila Musa nakamlonjela Mkulu Nguluwi, “Aho ndo Wamisili wohulika mbuli ayo kota hegwe nakuwegala wanhu wa hegwe kwa ludali lwa hegwe hali hewo,
NUM 14:14 wowalonjela wanhu wa isi ayi. Mina wanhu wano nawahulika kota hegwe, gwa Mkulu Nguluwi, kwa hamwe na hetwe, mina hegwe, gwa Mkulu Nguluwi, kwangoneka hazelu hala ng'hungugu ya hegwe hoyikwima mchanya mwa hetwe, na kota hegwe kulongolaga nemisi kwa izengo lya ng'hungugu na nechilo kwa izengo lya chiluli.
NUM 14:15 Lelo wone uwakopole wanhu wa hegwe weng'ha kwa mhela umwe, isi ziwele nazihulika lutogo lwa hegwe zolonga,
NUM 14:16 ‘Mkulu Nguluwi nakawakopola wanhu wa heye kula kuchiwala kwa vila nakalemwela kuwahilika kuli isi yoyelahile kota kowapa.’
NUM 14:17 Lelo ndangukudedeza, Mkulu, utulajile ludali lwa hegwe kwa kudita kota navyoulagane na hetwe vila vyoulonjile,
NUM 14:18 ‘Heni Mkulu Nguluwi silinguzudila himahima, ndo yawele na igano lya kwimilila, na ndangulechela wihe na nongwa. Ila sileka hebu kuwagaza wawele na nongwa, wana na wazukulu wa wehile mbaka lulelo lwa kadatu na lwa kane kwa gehile ga wahaza wa hewo.’
NUM 14:19 Ndangukudedeza uwalechele gehile ga wanhu wano, kwa igano lya hegwe lya kwimilila kota navyouwalechele kulawa vyowalawile Misili mbaka sambi.”
NUM 14:20 Mkulu Nguluwi nakedichila, “Nandiwalechela kota vyoulandile.
NUM 14:21 Ila ndangukomya, kota vyombele mkomu na kota isi yeng'ha hoimema ukulu wa heni Mkulu Nguluwi,
NUM 14:22 haduhu ne yumwe wa hewo yawezile kuwona ukulu wa heni na vinduzanduza vya heni vyonditile Misili na kuchiwala hamba yolutilila kunjeza mala azi zeng'ha ne kuhulichiza lizi lya heni,
NUM 14:23 koyona isi yila yondiwalahile wasekulu wa hewo. Na kahi wala walingumbeza heni kahi hawoyona.
NUM 14:24 Ila kwa vila chitumagwa wa heni Kalebu ka vinji, na nakanyhulichiza vinojile, ndomfichiza kuli isi ayo na yenjile na walelwa wa heye woihalila isi ayo.
NUM 14:25 Kwa vila Waamaleki na Wakanaani wangikala kuli ibindi lya isi ayo, mitondo mgaluche kumbele mlute kuchiwala kukolela nzila ya hafungo mwa Bahali ya Shamu.”
NUM 14:26 Hamba Mkulu Nguluwi nakawauza Musa na Aluni,
NUM 14:27 “Waisilaeli weng'ha wehile wolutilila kung'ung'utila heni mbaka nili? Nhoka na kung'ung'utilwa na Waisilaeli.
NUM 14:28 Lelo wedichile ahi. Kota vyondili mkomu, ndangulonga heni Mkulu Nguluwi, ndowaditila gagala gondihuliche mlonga.
NUM 14:29 Mobagama na mitufi ja hemwe jotozigwa mumu kuchiwala. Kwa vila na mng'ung'utila heni, haduhu ne yumwe yawazigwe hali hemwe yawele na miyaka kwaluchila miyaka makumi meli na kulutilila,
NUM 14:30 yokwinjila kuli isi ayo yondilahile kota mochikala ako, ila Kalebu mwana wa Yefune na Yoshua mwana wa Nuni.
NUM 14:31 Hemwe namlonga kota wana wa hemwe woholigwa kuli upogozi, ila heni ndowahilika wana wa hemwe kuli isi yomuibezile, leka waizele na hawe haluga hawo.
NUM 14:32 Ila hemwe mobagama mumu kuchiwala.
NUM 14:33 Wana wa hemwe wowa wadimi na kugazika amu kuchiwala kwa mhela wa miyaka makumi gane kwa chiwalo cha hemwe kuleka kukunda mbaka munhu wa hemwe wa mwiso hoyobagama kuchiwala.
NUM 14:34 Kwa chiwalo cha nongwa za hemwe, mogazika kwa mhela wa miyaka makumi gane, kota gala mazuwa makumi gane gompugajize isi yila, mwaka umwe kwa chila zuwa limwe, movizela kota heni nzudila.
NUM 14:35 Heni Mkulu Nguluwi ndonga. Ndangukomya, ndowadita hihyo Waisilaeli weng'ha wating'hane hano kundeuza. Kuli chiwala achi, wobagama weng'ha.”
NUM 14:36 Wala wanhu wawele Musa yawalajize kuza kuipugajiza isi yila, wawele wahiluche na kwambuza Waisilaeli weng'ha wamng'ung'utile Mkulu Nguluwi kwa kigala mbuli yihile ilinguwala isi,
NUM 14:37 nawabagama kwa igayo hali Mkulu Nguluwi.
NUM 14:38 Ila Yoshua mwana wa Nuni na Kalebu mwana wa Yefune, nawapona wawele wakomu hali wala wanhu wowalutile kuipugajiza isi.
NUM 14:39 Na heye Musa nakawalonjela Waisilaeli weng'ha na hewo nawamlilila kwa usungu lukami.
NUM 14:40 Nawalilimka lufuku, nawaluta kuli chinhembenhembe cha isi ya vidunda, wolonga, “Tukomya kota natudita gehile. Lelo twa goya ng'hatu kuza honhu hawele Mkulu Nguluwi nayalagane na hetwe.”
NUM 14:41 Ila Musa nakalonga, “Lelo lekachoni mwangubena ilajizo lya Mkulu Nguluwi? Ahyo hamsinda hebu!
NUM 14:42 Mleche kuka ako kuchidunda leka mleche kutowigwa na wang'honyo wa hemwe, mina Mkulu Nguluwi kahaduhu hali hemwe.
NUM 14:43 Homchitowa na Waamaleki na Wakanaani, mobagama kuli ngondo, kwa vila namleka kumuwinza Mkulu Nguluwi, heye nahawele hamwe na hemwe.”
NUM 14:44 Lelo hewo nawaluta kuli isi ya vidunda, ila isanduku lya ilagano lya Mkulu Nguluwi na hambe lilawe kuli kambi, ne Musa nahochile kuli kambi.
NUM 14:45 Ahyo Waamaleki na Wakanaani, nawawele wochikala kuli isi ayo ya vidunda, nawadulika, nawawatowa na kuwasumya. Nawawawinga mbaka kuli muji wa Holima.
NUM 15:1 Mkulu Nguluwi nakamlonjela Musa,
NUM 15:2 “Walonjele Waisilaeli kota lomfika kuli isi yondilinguwapa iwele mochikala,
NUM 15:3 mondavila nhambiko heni Mkulu Nguluwi kwa chiluli kulawa kuli migongolo ja hemwe, nhambiko ya kulakazwa ama nhambiko yinji, leka munhu yetawize kilaha kwa heye nakoyalahile ama kulavya nhambiko ya kunuwila kwa heye ama nhambiko ya mnvina za hemwe kuli mhela uwichigwe, na kudita unhunyhililo unojile wa kunojeza heni Mkulu Nguluwi,
NUM 15:4 lelo, yula yalingulavya nhambiko ya heye, komigalila kahi Mkulu Nguluwi nhambiko ya nyhule ya kilo imwe ya utimbo unojile na uhanzigwe na lita imwe ya mafuta,
NUM 15:5 hamwe na divai ya nhambiko ya chakunwa, lita imwe na vinhu vyowa hamwe na chila ing'holo lyana lya nhambiko ya kulakazwa ama nhambiko yinji.
NUM 15:6 Mhela wa kulavya nhambiko ya ing'holo ilume, kilo mbili za utimbo unojile na lita imwe na nusu ya mafuta vyolavigwa kota nhambiko ya nyhule,
NUM 15:7 hamwe na nhambiko ya chakunwa lita imwe na nusu ya divai na kudita kunhunyhilila kunojile kwa nhambiko, kumnojeza Mkulu Nguluwi.
NUM 15:8 Mhela lomumlavila Mkulu Nguluwi ilogota ilume kwa chiwalo cha nhambiko ya kulakazwa ama nhambiko yinji leka kutawiza chilaho ama kwa chiwalo cha nhambiko za kikala goya,
NUM 15:9 hamwe na ibuguma, munhu ayo kolavya nhambiko ya nyhule ya utimbo unojile wa kilo zidatu na lita mbili za mafuta,
NUM 15:10 hamwe na nhambiko ya chakunwa lita mbili za divai na kudita kunhunyhilila kunojile kwa nhambiko yalingulavilwa Mkulu Nguluwi kwa chiluli.
NUM 15:11 “Kodita kota ahi kwa chila ibuguma ama ing'holo ilume na ing'holo lyana ilume ama chinyehe.
NUM 15:12 Udite hino kwa chila chimwe kota vyovilingulavigwa.
NUM 15:13 Chila munhu Muisilaeli kowinza malajizo ago mhela hoyolavya nhambiko yalingulavilwa Mkulu Nguluwi kwa chiluli, kunhunyhilila kulingumnojeza Mkulu Nguluwi.
NUM 15:14 Wone hana mjenzi yoneche yalingikala hamwe na hemwe kwa mhela ama kwa mazuwa gose, hoyogana kulavya nhambiko ya heye kwa chiluli, kunhunyhilila kumnojeze Mkulu Nguluwi, munhu ayo kodita kota vyomlingudita hemwe.
NUM 15:15 Kuli lulelo lweng'ha lulinguya, malajizo gagala gomlinguwinza, ndo gago goyalinguganigwa kuwinza mjenzi yoneche yalingikala na hemwe na Waisilaeli weng'ha mazuwa gose, hali Mkulu Nguluwi mowa chinhu chimwe,
NUM 15:16 hemwe na heye mowa hali malajizo gagala.”
NUM 15:17 Mkulu Nguluwi nakamlonjela Musa,
NUM 15:18 “Walonjele Waisilaeli kota homkwinjila kuli isi yondilinguwahilika,
NUM 15:19 chila homulya chilyo cha isi ayo, mobagula chasi chimwenga na kumha heni Mkulu Nguluwi.
NUM 15:20 Homteleka mibumunda ja utimbo wa mwaluko, jolavigwa kota ndolendole kulawa kuli honhu ha kuyugululila nyhule.
NUM 15:21 Mondavila heni Mkulu Nguluwi ndolendole ayi ya mibumunda ja nyhule za mwaluko kuli lulelo lwa hemwe lweng'ha lulinguya.
NUM 15:22 “Ila wone moleka kuwinza mizilo ajo jeng'ha ne kunuwila, jiwele heni Mkulu Nguluwi jondiwapele hemwe kwa kukolela Musa,
NUM 15:23 na wone kuli mazuwa galinguya walelwa wa hemwe woleka kuwinza geng'ha gawele heni Mkulu Nguluwi gondimlajize Musa,
NUM 15:24 lelo nongwa ayo yowa naiditigwa ne kunuwila na ne nhanzi ya wanhu kuvizela, Waisilaeli weng'ha wolavya ilogota ilume leka liwe nhambiko ya kulakazwa, kunhunyhilila kunojile kwa kumnojeza Mkulu Nguluwi, hamwe na nhambiko ya heye ya nyhule na ya chakunwa kota malajizo ga heye vyogalingulonga. Hihyo du wanhu wolavya ipongo limwe liwe nhambiko ya gehile.
NUM 15:25 Mtambika kodita uhanyisi kwa chiwalo cha Waisilaeli weng'ha, na hewo wolechelwa kwa vila haiwele nongwa iditigwe kwa kunuwila, na wegala nhambiko ya hewo, nhambiko yalingulavilwa Mkulu Nguluwi kwa chiluli, kota nhambiko na nhambiko ya gehile kwa chiwalo cha nongwa ya hewo.
NUM 15:26 Waisilaeli weng'ha hamwe na wajenzi wowalingikala na hewo, wolechelwa kwa vila weng'ha nawali kuli nongwa ayo.
NUM 15:27 “Wone munhu yumwe yodita gehile ne kunuwila, kolavya mhene ndala ya mwaka umwe leka iwe nhambiko ya gehile.
NUM 15:28 Mtambika kodita uhanyisi hali Mkulu Nguluwi, kwa chiwalo cha ayo munhu yaditile gehile ne kunuwila, na heye kulechelwa nongwa ya heye.
NUM 15:29 Mowinza ilajizo lilyo limwe kwa chila munhu wone yodita gehile ne kunuwila, yawe mwenyeng'haye Muisilaeli ama mjenzi yalingikala hamwe na hemwe.
NUM 15:30 “Ila munhu yoneche yodita gehile kwa kunuwila yuye, kangumbeza Mkulu Nguluwi, yawe mwenyeng'haye ama mjenzi, kanguganigwa yabaguligwe kutali na wanhu wa heye.
NUM 15:31 Mina nakalema gala goyalonjile Mkulu Nguluwi na kubena mizilo jake. Munhu ayo kobaguligwa kutali ng'hatu, na kogazigwa kwa chiwalo cha nongwa ya heye.”
NUM 15:32 Zuwa limwe Waisilaeli lowawele kuchiwala, nawamona munhu yumwe yolokota ngodi kuli Zuwa lya Kwesela.
NUM 15:33 Lelo munhu ayo nakegaligwa hali Musa na Aluni na Waisilaeli weng'ha.
NUM 15:34 Hewo nawamuwika hali wamizi kwa vila nahailonjigwe hazelu ndaze vyoyalinguganigwa kuditilwa munhu kota ayo.
NUM 15:35 Ahyo, Mkulu Nguluwi nakamlonjela Musa, “Munhu ayo imgana yabagame, Waisilaeli weng'ha womtowa kwa maganga hanze ha kambi.”
NUM 15:36 Lelo Waisilaeli weng'ha nawamlavya hanze ha kambi, nawamtowa kwa maganga mbaka nakabagama, kota Mkulu Nguluwi navyoyamlajize Musa.
NUM 15:37 Hamba Mkulu Nguluwi nakamlonjela Musa,
NUM 15:38 “Walonjele wanhu wa Isilaeli, uwalajize weditile usabuli kuli lupembo lwa nguwo za hewo, na kuwika ng'weso za buluu mchanya mwa chila usabuli. Walonjele wadite ahyo kuli chila lulelo lwawo lweng'ha.
NUM 15:39 Usabuli awo wowa chinhu cha kukumbuchila kwa hemwe. Chila homuwona, mokumbuchila mizilo jeng'ha ja heni Mkulu Nguluwi na kujiwinza leka mleche kuwinza maya ga meho na nhumbula za hemwe gomzowele kugadita, kota ung'hondwa.
NUM 15:40 Usabuli awo wowakumbusa mizilo ja heni jeng'ha na mojiwinza jeng'ha ne kuleka, namwe mowa welile kwa heni Nguluwi wa hemwe.
NUM 15:41 Heni ndo Mkulu Nguluwi, Nguluwi wa hemwe, ndiwalavile hemwe kulawa isi ya Misili ndiwe Nguluwi wa hemwe. Heni ndo Mkulu Nguluwi, Nguluwi wa hemwe.”
NUM 16:1 Hamba Kola mwana wa Ishali, mwana wa Kohati, mwana wa Lawi, nakawahola wanhu hamwe na wanhu wadatu wa lukolo lwa Lubeni, Datani na Abilamu, mwana wa Eliabu na Oni, mwana wa Peleti,
NUM 16:2 awo weng'ha nawelumbile na vilongozi wang'hangala miya mbili na makumi gahano wahaguligwe na Waisilaeli weng'ha, nawamlema Musa.
NUM 16:3 Nawekungajiza hali Musa na Aluni, wawalonjela, “Hemwe ihega! Wanhu weng'ha ndo welile na chila munhu kuli Waisilaeli weng'ha wano ndo welile, na Mkulu Nguluwi kahamwe na hetwe. Lelo lekachoni mwangidita mwa wang'hangala wa wanhu wa Mkulu Nguluwi?”
NUM 16:4 Musa loyahuliche ago, naketoza hanyi chifunama.
NUM 16:5 Hamba nakamlonjela Kola na wanhu weng'ha walingumuwinza heye, “Mitondo, Mkulu Nguluwi kolajila yalihi yawele wa heye na yalihi yawele yelile, na heye yomhagula. Munhu yohaguligwa kohejezwa habehi na Mkulu Nguluwi.
NUM 16:6 Lelo mdite ahi. Hegwe na wanhu weng'ha walingukuwinza hegwe, mohola vifunyizi,
NUM 16:7 muwiche chiluli na ubani mgati, hamba movihilika hali Mkulu Nguluwi. Hamba tokona yalihi yahaguligwe na Mkulu Nguluwi kowa yelile. Hemwe Walawi ihega!”
NUM 16:8 Musa nakalutilila kumlonjela Kola, “Mhulichize, hemwe Walawi.
NUM 16:9 Ndaze, mwangona ndo mbuli nyindo kwa hemwe kota Nguluwi wa Isilaeli nakawabagula hemwe hali Waisilaeli weng'ha, leka muwe habehi na heye, mkole mijito kuli ihema lya Mkulu Nguluwi na kukola mijito na kuwakolela mijito Waisilaeli weng'ha?
NUM 16:10 Nakawapa mijito ja chiuyeng'ha habehi na heye, hemwe hamwe na Walawi wang'holozenu weng'ha. Lelo mwangugana kuhola na utambika kahi?
NUM 16:11 Ahyo hegwe na wanhu weng'ha mwangumbelenhuka Mkulu Nguluwi. Hemwe mlingumng'ung'utila Aluni, ila ndangukomya kota mwangumng'ung'utila Nguluwi.”
NUM 16:12 Musa nakalajiza usenga kwa Datani na Abilamu wana wa Eliabu leka wachemigwe, ila hewo nawalonga, “Hatukuya hebu!
NUM 16:13 Ndaze, ndo mbuli nyindo kota kutulavya Misili, isi iwele na mboto, leka uye utukopole aku kuchiwala? Kahi, kwangidita kota kwa mng'hangala wa hetwe!
NUM 16:14 Mzidi wa ago, hambe utugale kuli isi iwele na mboto, na kahi hambe utugalile uhalizi wa migunda na migunda ja mizabibu. Vyoulingijesa koweza kutuhada? Hatukuya hebu!”
NUM 16:15 Musa nakazudila ng'hatu, nakamlonjela Mkulu Nguluwi “Uleche kukunda nhambiko za wanhu wano. Heni siholile idogowi lya munhu yoneche, ne kumlumiza munhu.”
NUM 16:16 Musa nakamlonjela Kola, “Mitondo uye na wanhu weng'ha walingukuwinza hegwe hali Mkulu Nguluwi. Aluni naye kowa baha.
NUM 16:17 Chila yumwe wa hemwe yahole chifunyizi cha heye, na kuwika ubani, hamba kochihilika hali Mkulu Nguluwi, vifunyizi avyo vyowa miya mbili na makumi gahano, hegwe nagwe na Aluni, chila yumwe kowa na chifunyizi cha heye.”
NUM 16:18 Lelo chila yumwe wa hewo nakahola chifunyizi cha heye, nakawika chiluli na ubani, hamba nawaluta kwima hali lwizi lwa ihema lya Nguluwi, hamwe na Musa na Aluni.
NUM 16:19 Na heye Kola nakawakungajiza wanhu weng'ha hamwe, nawawabelenhuka Musa na Aluni, nawema hali Musa na Aluni hali lwizi lwa ihema lya Nguluwi. Ndo ukulu wa Mkulu Nguluwi naulawila hali Waisilaeli weng'ha.
NUM 16:20 Aho Mkulu Nguluwi nakawalonjela Musa na Aluni,
NUM 16:21 “Mibagule na Waisilaeli weng'ha wano, leka ndiwadumye sambi baha.”
NUM 16:22 Ila Musa na Aluni nawetoza hanyi chifunama kuno wolonga, “Hegwe Nguluwi, Nguluwi uwapele ukomu wanhu weng'ha. Ndaze, wone munhu yumwe nakadita gehile, kowazudila Waisilaeli weng'ha?”
NUM 16:23 Mkulu Nguluwi nakamlonjela Musa,
NUM 16:24 “Walonjele Waisilaeli weng'ha woche habehi na mihema ja Kola na Datani na Abilamu.”
NUM 16:25 Lelo Musa nakaluta kwa Datani na Abilamu, yowinzigwa na wasekulu wa Isilaeli.
NUM 16:26 Loyafichile, nakawalonjela Waisilaeli weng'ha, “Dedede, muche hali ihema lya wanhu wawele na wihe na mleche kudoliza chinhu cha hewo choneche, wone muye modumigwa hamwe na hewo kwa chiwalo cha gehile ga hewo geng'ha.”
NUM 16:27 Wanhu nawoka kuli mihema ja Kola na Datani na Abilamu. Datani na Abilamu nawalawa kuli mihema ja hewo na kwima hali lwizi lwa mihema ja hewo wawele na wachewawo na wana wa hewo weng'ha mbaka wala walingong'a.
NUM 16:28 Aho Musa nakawalonjela wanhu, “Ahyo ndo vyomvizela kota Mkulu Nguluwi ndo yandajize kudita mbuli ayi yeng'ha, na haiwele kwa kunuwila kwa heni.
NUM 16:29 Wone wanhu wano wobagama kota wanhu wanji weng'ha, ne kugazigwa na Mkulu Nguluwi, lelo mvizele kota Mkulu Nguluwi handajize.
NUM 16:30 Ila wone Mkulu Nguluwi yadite mbuli iwele hainaditigwa, misanga jigubuche na kumela wanhu awa hamwe na chila chinhu cha hewo, walute kuli isi ya wabagame wawele wakomu, lelo movizela kota wanhu wano nawambeza Mkulu Nguluwi.”
NUM 16:31 Baho du vyoyasindile kulonga mbuli ayo yeng'ha, hasi howemile Datani na Abilamu nahagubuka
NUM 16:32 na kuwamela wanhu awo na wanhu wa ivyazi lya hewo, hamwe na wanhu weng'ha walinguwawinza Kola na lufufu lwa hewo lweng'ha.
NUM 16:33 Lelo hewo hamwe na vyeng'ha viwele vya hewo nawadulika kuli isi ya wabagame kuno wawele wang'hali wakomu. Misanga najiwagubika, wanhu weng'ha nawabagama.
NUM 16:34 Waisilaeli wawele habehi vyowahuliche wala walingudulika vyowotowa iyowe, nawadwina wolonga, “Tubilime, leka misanga jileche kutumela na hetwe natwe.”
NUM 16:35 Hamba Mkulu Nguluwi nakahilika chiluli nakawalakaza wala wanhu miya mbili na makumi gahano walutile kufunyiza ubani.
NUM 16:36 Vyogapulute ago, Mkulu Nguluwi nakamlonjela musa,
NUM 16:37 “Mlonjele Eleasali mwana wa mtambika Aluni yavilavye avyo vifunyizi hali chiluli, yakabohole kutali chiluli chiwele mgati, mina vifunyizi avyo ndo vyelile.
NUM 16:38 Naviwa vyelile kwa vila wanhu awa nawavigala hali honhu ha kulavila nhambiko ha Mkulu Nguluwi. Lelo vihole vifunyizi vya wanhu awo wabagame kwa chiwalo cha gehile ga hewo, vipondigwe na viwe vizisili leka viwe chigubiko cha honhu ha kulavila nhambiko. Ali ndo nalyali ikanyo kwa Waisilaeli weng'ha.”
NUM 16:39 Lelo mtambika Eleasali nakahola vifunyizi avyo vya shaba kulawa kwa wala wanhu walakazwe, nakaviponda na viwa chigubiko cha honhu ha kulavila nhambiko.
NUM 16:40 Ali nalyali ikanyo kwa Waisilaeli weng'ha kota munhu yoneche yohawele mtambika, mina hawele wa lukolo lwa Aluni, yaleche kuluta honhu ha kulavila nhambiko na kumfunyizila Mkulu Nguluwi ubani. Wone yoluta kobagama kota Kola na walingumuwinza heye. Aga geng'ha nagaditigwa kota Mkulu Nguluwi vyoyamlajize Eleasali kwa kukolela Musa.
NUM 16:41 Hamitondo, Waisilaeli weng'ha nawawang'ung'utila Musa na Aluni kuno wolonga, “Muwakopola wanhu wa Mkulu Nguluwi.”
NUM 16:42 Waisilaeli weng'ha vyowekungajize hali Musa na Aluni leka walavye kung'ung'uta kwa hewo, nawagaluchila ihema lya Nguluwi, nawona ng'hungugu igubiche ihema lya Nguluwi na ukulu wa Mkulu Nguluwi nawali ulawile aho.
NUM 16:43 Musa na Aluni nawaluta, nawema hali ihema lya Nguluwi,
NUM 16:44 na Mkulu Nguluwi nakamlonjela Musa,
NUM 16:45 “Wibagule na Waisilaeli weng'ha wano, leka ndiwakopole sambi baha.” Ila hewo nawetoza hanyi chifunama.
NUM 16:46 Musa nakamlonjela Aluni, “Uhole chifunyizi cha hegwe, uwiche chiluli kulawa kuli honhu ha kulavila nhambiko, hamba uwiche ubani na kahi ulute nacho himahima kuli Waisilaeli weng'ha kuwaditila uhanyisi. Kuzudila kwa Mkulu Nguluwi mina nakuwafichila na igayo nalyaluka kuwagaza.”
NUM 16:47 Lelo Aluni nakadita kota vyoyalajizwe na Musa. Nakahola chifunyizi cha heye na kubilima mbaka hagati ha wanhu wawele wekungajize hamwe. Vyoyawene kota igayo mina nalyaluka, nakawika ubani mli chifunyizi na kuwaditila uhanyisi wanhu weng'ha.
NUM 16:48 Navyoyaditile ahyo, igayo alyo nalileka, na heye nakasigala hagati kwa wala wabagame na wawele wakomu.
NUM 16:49 Wanhu wabagame kwa igayo alyo nawali elufu kumi na gane na miya saba (14,700), ne kuwawaza wala nawabagame kwa chiwalo cha kuhinduka kwa Kola.
NUM 16:50 Vyolimalile igayo alyo, Aluni nakahiluka kwa Musa hali lwizi lwa ihema lya Nguluwi.
NUM 17:1 Hamba Mkulu Nguluwi nakamlonjela Musa,
NUM 17:2 “Walonjele Waisilaeli wakigalile ng'hweku kumi na mbili, chilongozi yumwe wa chila nhanzi, ng'hweku imwe. Wandiche itagwa lya chila yumwe wa hewo kuli ng'hweku ya heye,
NUM 17:3 na itagwa lya Aluni wandiche mchanya mwa ng'hweku ya nhanzi ya Lawi. Howa na ng'hweku imwe kwa chila chilongozi wa nhanzi.
NUM 17:4 Zihiliche ng'hweku azo kuli ihema lya Nguluwi na kuziwika hali isanduku lya ilagano, honhu hawele heni nditing'hanaga na hegwe.
NUM 17:5 Ng'weku ya munhu yondimhagula yozuka. Kwa nzila ayi, kung'ung'uta kwa Waisilaeli kwa chiwalo cha hemwe, ndokudita kumale.”
NUM 17:6 Musa nakadawala na wanhu wa Isilaeli. Vilongozi wa hewo weng'ha nawamha chila yumwe ng'hweku ya heye kota vyoiwele nhanzi ya heye, ahyo nazali ng'hweku kumi na mbili, na ng'hweku ya Aluni nayali hali azo.
NUM 17:7 Musa nakaziwika ng'hweku azo hali Mkulu Nguluwi kuli ihema lya Nguluwi.
NUM 17:8 Hamitondo kung'hali lufuku, Musa nakaluta kuli ihema lya Nguluwi. Amo, nakaifika ng'hweku ya Aluni wa nhanzi ya Lawi, izuka na kulavya mitumba jibahule uluwa na kulela mafunza gapile ga igodi lilinguchemigwa mlozi.
NUM 17:9 Hamba Musa nakazilavya ng'hweku zeng'ha aho, kulawila hali Mkulu Nguluwi, nakawalajila Waisilaeli weng'ha, na chila chilongozi nakahola ng'hweku ya heye yuye.
NUM 17:10 Mkulu Nguluwi nakamlonjela Musa, “Ihilule ng'hweku ya Aluni hali isanduku lya ilagano. Ayo yowichigwa goya honhu aho, na ndo chinhu cha kukanya kwa wala wahinduche wone hawalechile kung'ung'uta, wobagama.”
NUM 17:11 Musa kadita kota vyoyalajizwe na Mkulu Nguluwi.
NUM 17:12 Waisilaeli nawamlonjela Musa, “Ulole lelo! Twangubagama! Tumala! Weng'ha tumala.
NUM 17:13 Chila munhu yolihejelela ihema lya Nguluwi, kobagama. Ndaze, tobagama tweng'ha?”
NUM 18:1 Lelo Mkulu Nguluwi nakamlonjela Aluni, “Nongwa zeng'ha zilinguwala mijito ja ihema lya Nguluwi, zowa za hegwe na wanago na lukolo lwa hegwe lwa Kohati, na nongwa zeng'ha zilinguwala utambika zowa za hegwe gwegwe na wanago.
NUM 18:2 Hegwe na wang'holozo, nhanzi ya Walawi, nhanzi ya mhaza wa hegwe, uwegale behi na hegwe leka welumbe na hegwe na kukola mijito kota watambika, ila hegwe na wanago mowa hali ihema lya Nguluwi lya ulolezi.
NUM 18:3 Awo wokola mijito jowopegwa kulawa kwa hegwe na kweneza gowalonjelwe hewo galingulapa ihema lya Nguluwi. Ila hambe wakundizwe kuvihejelela vinhu vya ihema lya Nguluwi na waleche kuhahejelela honhu ha kulavila nhambiko, leka waleche kubagama, na hegwe kahi kobagama.
NUM 18:4 Hewo wochilumba na hegwe na kweneza goya mijito ja hewo jowalinguganigwa ilinguwala mijito jeng'ha ja ihema lya Nguluwi, na haleche kuwa na munhu yunji yohejelela honhu aho.
NUM 18:5 Hemwe mokola mijito ja ihema lya Nguluwi na honhu ha kulavila nhambiko, leka ng'halazi ya heni ileche kuwalawila kahi Waisilaeli.
NUM 18:6 Heni ndiwahagule wang'holozenu Walawi hali Waisilaeli kota ndolendole kwa hemwe. Hewo nawabaguligwa kwa chiwalo cha heni Mkulu Nguluwi, leka wakole mijito ja ihema lya Nguluwi.
NUM 18:7 Ila hegwe uliyeka na wana wa hegwe mokola mijito jeng'ha ja utambika kwa chiwalo cha honhu ha kulavila nhambiko na vyeng'ha viwele kuli kumbele kwa ipaziya lya honhu helile. Ajo ndo mijito ja hemwe, kwa vila ndiwapa ndolendole ya utambika. Munhu yunji yoneche wone yovihejelela vinhu vya ihema lya Nguluwi, kobagama.”
NUM 18:8 Mkulu Nguluwi nakamlonjela Aluni, “Ndanguwika kwa hegwe ndolendole azi zowamhele Waisilaeli, vinhu vyeng'ha vyelile vyowamhele. Vinhu vyeng'ha viwichigwe chiuyeng'ha na Waisilaeli. Ndanguwika vinhu vyeng'ha kwa hegwe na walelwa wa hegwe kwa honhu ha hemwe, na ayo ndo hachi ya hemwe mazuwa gose.
NUM 18:9 Kuli vinhu vyelile ng'hatu vyohambe vilakazwe kwa chiluli, avi vyowa vya hemwe. Nhambiko za nyhule na nhambiko za gehile na nhambiko za nongwa, chila chinhu chowondavila wanhu kota nhambiko yelile chowa cha hegwe na wanago.
NUM 18:10 Molya vinhu avyo kota vinhu vyelile ng'hatu, na ndo walume hela ndo wolya, vinhu avyo ndo vyelile kwa hemwe.
NUM 18:11 “Kahi, vinhu viyage vyeng'ha vyowondavila Waisilaeli kota nhambiko za kwinula kuchanya, vyowa vya hegwe. Ndokupa hegwe na wanago na wahinza wa hegwe viwe vya hemwe mazuwa gose. Munhu yoneche yelizwe kuli nhanzi ya hegwe koweza kulya vinhu avyo.
NUM 18:12 “Ndangukupa vinhu vyeng'ha vinojile vilingulawila kuli mbena ya mwaluko iwele Waisilaeli hundavila heni Mkulu Nguluwi. Mafuta ganojile na divai na nyhule.
NUM 18:13 Mbena zeng'ha za mwaluko za mafuza gapile ga migunda ja hewo gawele wongalila heni Mkulu Nguluwi, gowa ga hegwe. Chila munhu yelizwe kuli ivyazi lya hegwe koweza kulya.
NUM 18:14 Chila chinhu chibaguligwe kwa chiwalo cha Nguluwi kuli isi ya Isilaeli chowa cha hemwe.
NUM 18:15 “Chila mlelwa wa mwaluko yawele Waisilaeli wondavila heni Mkulu Nguluwi, wone yowa mlelwa wa mwaluko wa munhu ama igongolo, yowa wa hegwe. Ila kwanguganigwa kuwagombola walelwa wa mwaluko weng'ha wa wanhu, na chila mlelwa wa mwaluko wa igongolo likokomoche yanguganigwa ligomboligwe.
NUM 18:16 Walelwa awo wa mwaluko wawele wa mwezi umwe kwa kulavigwa sendi vihande vihano, kwa kuwinza chipimilo cha ihema lya Nguluwi.
NUM 18:17 Ila walelwa wa mwaluko wa misenga ama ming'holo myana ama mhene, hewo huwagombola hebu kwa vila hewo ndo welile. Danda ya hewo koimizila kuli honhu ha kulavila nhambiko na mafuta gawo kogalakaza gawe nhambiko yalingulavilwa kwa chiluli gawele ndo kunhunyhilila kunojile kulingumnojeza Mkulu Nguluwi.
NUM 18:18 Miwunde ja hewo koweza kulya kota hila vyoudile mhambaga yinuligwe kuchanya na chima cha kudilo.
NUM 18:19 “Ndanguwika kwa hegwe Mkulu Nguluwi na wana wa hegwe na wahinza wa hegwe, vinhu vyeng'ha viwele wanhu wa Isilaeli nawandavilaga, avyo ndo vya hemwe mazuwa gose. Ali ndo ilagano lya mazuwa gose na halibenigwa hali heni, liwele ndo kwa chiwalo cha hegwe na walelwa wa hegwe.”
NUM 18:20 Mkulu Nguluwi nakamlonjela Aluni, “Hegwe hauwa na uhalizi woneche kuli isi ayo, ne kuwa na honhu ha hegwe hali hewo. Heni ndo honhu ha hegwe na uhalizi wa hegwe hali Waisilaeli.”
NUM 18:21 Mkulu Nguluwi nakalonga, “Kwa Walawi, hewo nandiwapa zaka zeng'ha ziwele Waisilaeli nawandavilaga ziwe uhalizi wa hewo. Aga ndo gowa kuhilusila kwa hewo kwa chiwalo cha mijito jowalingukola kwa kulilolela ihema lya Nguluwi.
NUM 18:22 Kulawila sambi, wanhu wanji wa Isilaeli waleche kuhejela habehi na ihema lya Nguluwi leka waleche kutagusigwa kwa gehile ga hewo na kigalila kubagama.
NUM 18:23 Ila Walawi waliyeka ndo wokola mijito kuli ihema lya Nguluwi na nongwa zeng'ha zilingulapa ihema lya Nguluwi, zowa za hewo. Alyo ndo ilajizo lya mhela weng'ha kuli lulelo lwa hemwe lweng'ha. Walawi hawowa na uhalizi kuli isi ya Isilaeli,
NUM 18:24 kwa vila zaka ziwele Waisilaeli zowalingundavila heni Mkulu Nguluwi ndiwapa hewo Walawi ziwe uhalizi wa hewo. Ndo mina ndilonga kota hewo hawowa na uhalizi hali Waisilaeli.”
NUM 18:25 Hamba, Mkulu Nguluwi nakamlonjela Musa,
NUM 18:26 “Kowalonjela Walawi malajizo aga. Hombochela zaka ziwele Mkulu Nguluwi nakawapa kulawa kwa Waisilaeli iwe ndo uhalizi wa hemwe, mondavila heni Mkulu Nguluwi honhu hamwe ha kumi ha zaka ayo.
NUM 18:27 Nhambiko ya hemwe yokundigwa iwe kota mbena ya mwaluko ama kota zabibu zoyalingundavila mlimi.
NUM 18:28 Lelo ahyo ndo vyomundavila heni Mkulu Nguluwi nhambiko za zaka zombochela kulawa kwa Waisilaeli. Zaka azo zomndavila heni Mkulu Nguluwi momha mtambika Aluni.
NUM 18:29 Nhambiko yila yomuilavile kwa Mkulu Nguluwi, iwe inojile kusinda zeng'ha kulawa kuli zaka zombochela.
NUM 18:30 Ahyo, kowalonjela kota, homsinda kundavila honhu hanojile kusinda heng'ha, honhu hohosigala howa ha hemwe Walawi, kota vyoiwele kwa mlimi yawele nakaholaga chisigale hoyasindile kulavya zaka za heye za nyhule na za zabibu.
NUM 18:31 Na hemwe moweza kulya chilavigwe honhu honeche hala hamwe na ivyazi lya hemwe mina ndo ndolendole za hemwe kwa chiwalo cha mijito ja hemwe ja ihema lya Nguluwi.
NUM 18:32 Mowahela nongwa yoneche wone mulye vinhu avyo, wone mumlavila Mkulu Nguluwi honhu hanojile kusinda heng'ha, namwe hamzibeza zaka zelile za Isilaeli ama mobagama.”
NUM 19:1 Mkulu Nguluwi nakawalonjela Musa na Aluni,
NUM 19:2 “Aji ndo mizilo ja malajizo gawele heni Mkulu Nguluwi ndangugalavya. Walonjele Waisilaeli wawegalile isenga idala idung'hu liwele hela nongwa, na hambe yakoweligwe ngwamo ne hado.
NUM 19:3 Hemwe momha mtambika Eleasali isenga alyo. Lyolavigwa hanze ha kambi na kudumuligwa singo hali mtambika ayo.
NUM 19:4 “Hamba mtambika Eleasali kohola chasi cha danda na kumiza kwa chidole mala saba, kuno yolola kuli ubanzi wa kumwando mwa ihema lya Nguluwi.
NUM 19:5 Isenga alyo lyeng'ha lyolakazwa hali mtambika. Chila chinhu cholakazwa, igozi na miwunde na danda na mitumbu.
NUM 19:6 Hamba mtambika kohola igodi lilinguchemigwa mwelezi na nhagala ya isopolo na sufu ndung'hu na kuviwika kuli chiluli acho.
NUM 19:7 Hamba kahi, mtambika kohovuga mivalo ja heye na koga, hamba koweza kwinjila kuli kambi, ila kowa yakokomoche mbaka matinazo.
NUM 19:8 Munhu yolilakaza isenga alyo kahi kohovuga mivalo ja heye na koga, ila na heye kahi kowa yakokomoche mbaka matinazo.
NUM 19:9 Munhu yawele yelizwe kohola mivu ja isenga alyo na kugahilika kuli honhu helizwe kunze mwa kambi. Gowichigwa goya kwa Waisilaeli weng'ha kugongomanya mazi ga kusa kukokomoka, leka kusa gehile.
NUM 19:10 Munhu yoyokusa mivu ja isenga alyo imgana yahovuje mivalo ja heye, ila kowa yakokomoche mbaka matinazo. Ilajizo ali ndo lya mazuwa gose na lyowawala Waisilaeli na wajenzi wowochikala hamwe na hewo.
NUM 19:11 “Wone munhu kodoliza itufi lya munhu yoneche, kowa yakokomoche kwa mazuwa saba.
NUM 19:12 Zuwa lya kadatu na lya saba munhu ayo kochiyeliza kwa gala mazi ga kweliza, na heye kokwelizwa. Ila wone yoleka kiyeliza kuli zuwa lya kadatu na lya saba, munhu ayo kopona yawele yakokomoche.
NUM 19:13 Yalingudoliza mtufi, wone yoleka kiyeliza, kolidita liwe likokomoche ihema lya Mkulu Nguluwi, na heye kobaguligwa na wanhu wa Isilaeli. Munhu ayo kopona yawele yakokomoche kwa vila hambe yamizilwe mazi ga kweliza.
NUM 19:14 “Na ali ndo ilajizo lya kuwinzigwa wone wanhu wobagama mgati mwa ihema. Chila munhu hoyokwinjila mgati mwa ihema alyo ama yawele mgati mwa ihema alyo, kowa yakokomoche kwa mazuwa saba.
NUM 19:15 Chila chisaye na chijilo chiwele mwanzi chilihela chigubiko mchanya mwake, chowa chikokomoche.
NUM 19:16 Munhu yoneche yodoliza lukuli lwa yakopoligwe ama yabagame hela hanze ha ng'handa, ama yodoliza izeje lya munhu ama chilaga, kowa yakokomoche kwa mazuwa saba.
NUM 19:17 “Kwa chiwalo cha wala weditile wakokomoche wohola mivu ja isenga idung'hu liwele ndo nhambiko ya kusa gehile ilakazwe, mivu ajo johanzanyigwa na mazi ga kulwanda kuli chiya.
NUM 19:18 Munhu yunji yohawele yakokomoche, kohola nhagala ya isopolo, hamba koiwika kuli mazi ago, hamba kahi kolimizila ihema na vinhu vyeng'ha viwele mgati mwa ihema na wanhu wawele mgati. Kommizila kahi munhu yoyadolize izeje lya munhu ama lukuli lwa munhu yakopoligwe ama yabagame hela ama yoyadolize chilaga.
NUM 19:19 Kuli zuwa lya kadatu na lya saba, munhu yula yohawele yakokomoche kommizila munhu yakokomoche mazi ago, ahyo kuli zuwa lya saba, komweliza munhu ayo yakokomoche. Yula yawele yakokomoche kohovuga mivalo ja heye na koga, na matinazo kowa yelizwe hali Nguluwi.
NUM 19:20 “Ila wone munhu yawe yakokomoche na hambe yelizwe, munhu ayo kobaguligwa kuli Waisilaeli weng'ha, kwa vila kangulidita ihema lya Mkulu Nguluwi liwe likokomoche. Kwa vila hambe yamizilwe mazi ga kweliza, ka yakokomoche.
NUM 19:21 Wanhu woliwinza ilajizo ali kulawila sambi na mhela weng'ha. Munhu yomizila mazi ga kweliza kohovuga mivalo ja heye, na heye yalingudoliza mazi ago kowa yakokomoche mbaka matinazo.
NUM 19:22 Choneche choyodoliza munhu yakokomoche chowa chikokomoche, na yoneche yalingudoliza chinhu acho kowa yakokomoche mbaka matinazo.”
NUM 20:1 Waisilaeli weng'ha nawafika kuchiwala ako Sini mwezi wa mwaluko, nawawika kambi ako Kadeshi. Lowawele ako Miliamu nakabagama, nakatiligwa.
NUM 20:2 Honhu aho nahali haduhu mazi. Ahyo, Waisilaeli weng'ha nawekungajiza kuwabelenhuka Musa na Aluni.
NUM 20:3 Nawetwanza weng'ha wolonga, “Fola twahabagame hamwe na wang'holozetu hali ihema lya Mkulu Nguluwi!
NUM 20:4 Lekachoni mtugala aku kuchiwala hetwe wanhu wa Mkulu Nguluwi? Ndaze, mtugala aku leka tubagame hetwe na migongolo ja hetwe?
NUM 20:5 Lekachoni kahi namtulavya kula Misili na kutugala hano honhu hehile hino? Hano hakuwele honhu ha nyhule ne tini ne zabibu ne makomamanga. Na mazi ga kunwa kahi haduhu!”
NUM 20:6 Aho, Musa na Aluni nawoka kuli nhing'hano ayo ya wanhu, nawaluta kwima kuli lwizi lwa ihema lya Nguluwi, nawagwa chifunama. Lelo ukulu wa Mkulu Nguluwi nauwalawila,
NUM 20:7 na heye Mkulu Nguluwi nakamlonjela Musa,
NUM 20:8 “Uhole yila ng'hweku ya hegwe, hamba hegwe na Aluni mng'holozo, muwakungajize Waisilaeli weng'ha. Hamba, ulilonjele italawe liwele kumwando kwa hewo lilavye mazi. Ena, kolidita italawe lilavye mazi, leka nhanzi yeng'ha ya wanhu na migongolo ja hewo jinwe mazi.”
NUM 20:9 Musa nakaihola yila ng'hweku hali Mkulu Nguluwi kota navyoyalajizwe.
NUM 20:10 Hamba Musa na Aluni nawaikungajiza nhanzi ya wanhu weng'ha hali italawe, Musa nakawalonjela, “Mhulichize ng'hatu hemwe mlingubelenhuka. Ndaze, tuwalavile mazi kulawa kuli italawe ali?”
NUM 20:11 Hamba Musa nakenula moko wa heye, nakalitowa lila italawe mala mbili kwa ng'hweku ya heye. Mazi nagalawa kwa winji, Waisilaeli weng'ha nawanwa hamwe na migongolo ja hewo.
NUM 20:12 Ila Mkulu Nguluwi nakawalonjela Musa na Aluni, “Kwa vila hemwe namwali hambe mng'hunde ne kumha ukulu hali meho ga Waisilaeli, kwa chiwalo acho hamuwenjiza wanhu weng'ha wano kuli isi yila yondiwapele.”
NUM 20:13 Ago ndo mazi ga Meliba, honhu hawele Waisilaeli nawawele womng'ung'utila Mkulu Nguluwi, na heye nakelajila kota ka yelile hali hewo.
NUM 20:14 Musa nakahilika wasenga kulawa Kadeshi kwa Mndewa wa Edomu, nakawalonjela, “Wang'holozo, Waisilaeli, wangulonga hino, ‘Hegwe kuvizela ndaze vyotugaziche.
NUM 20:15 Vila wasekulu wa hetwe navyowalutile Misili, kuwele natikala ako kwa mhela winji na vila Wamisili navyowawagazile wasekulu wa hetwe na vyowatugazile hetwe.
NUM 20:16 Natumlilila Mkulu Nguluwi, na heye nakahulika kulila kwa hetwe, nakatugalila mhilisi yatulavile Misili. Lelo twa hano Kadeshi, muji uwele behi ng'hatu na isi ya hegwe.
NUM 20:17 Dedede utukundize tukole kuli isi ya hegwe. Hatubiga hebu migunda ja hemwe ne jila ja mizabibu ne kunwa mazi ga mizimbo ja hemwe. Tokola kuli nzila ng'hulu ya mndewa na kuka ne kuhinduka kumoso ne kudilo, mbaka hotulawa kuli isi ya hegwe.’ ”
NUM 20:18 Ila mndewa wa Edomu nakawedichila, “Hebu! Hamkola hebu kuli isi ya heni, wone mkole tolawa na kuwatowa kwa ipanga.”
NUM 20:19 Waisilaeli nawamlonjela, “Hetwe towinza nzila ng'hulu, wone hetwe na migongolo ja hetwe tonwa mazi ga hemwe tohilula. Chotulingulanda dedede utukundize hela, tukole kwa magulu hambe tugane choneche chinji.”
NUM 20:20 Ila mndewa wa Edomu nakalema ng'hatu na kulonga kahi, “Hamkola hebu.” Hamba Waedomu wawele na mong'ho nawalawa kitowa na hewo.
NUM 20:21 Lelo mndewa wa Edomu nakalema kuwakundiza Waisilaeli kukola kuli mbaka ja heye. Waisilaeli nawagaluka na kukola nzila yinji.
NUM 20:22 Waisilaeli weng'ha nawali mmajendo kulawa Kadeshi, nawafika kuli chidunda cha Holi.
NUM 20:23 Lelo Mkulu Nguluwi nakawalonjela Musa na Aluni ako kuli chidunda cha Holi, kuli mbaka mwa isi ya Edomu,
NUM 20:24 “Aluni kobagama, hambe yenjile kuli isi yondiwapele wanhu wa Isilaeli, kwa vila hemwe weli namuubelenhuka mzilo wa heni kula Meliba.
NUM 20:25 Uwahole Aluni na mwanage Eleasali, uwegale kuchanya kuli chidunda cha Holi.
NUM 20:26 Hamba, umvule Aluni mivalo ja heye ja utambika, umvalize mwanage Eleasali. Aluni kobagama yawele ako kuli chidunda.”
NUM 20:27 Musa nakadita kota navyoyalajizwe na Mkulu Nguluwi. Weng'ha wadatu nawakwina kuli chidunda cha Holi hali Waisilaeli weng'ha.
NUM 20:28 Hamba Musa nakamvula Aluni mivalo ja heye ja utambika, nakamvaliza mwanage Eleasali. Na heye Aluni nakabagama bahala kuchidunda acho. Hamba Musa na Eleasali nawadulika kulawa kuchidunda acho.
NUM 20:29 Waisilaeli weng'ha vyowahuliche kota Aluni nakabagama, nawawasiliza matanga kwa mhela wa mazuwa makumi gadatu.
NUM 21:1 Mndewa yumwe Mkanaani wa Aladi nayawele yochikala ako Negebu, navyoyahuliche mbuli ayi kota Waisilaeli nawali wokuya kwa nzila ya Atalimu, nakaluta kuwatowa, nakawahola wamwe wa hewo.
NUM 21:2 Aho Waisilaeli nawamlahila Mkulu Nguluwi wolonga, “Wone kowawika wanhu wano kuli moko ga hetwe, lelo tojidumya ng'hatu miji ja hewo.”
NUM 21:3 Mkulu Nguluwi nakahulika kulanda kwa hewo, nakawadita wawasumye Wakanaani. Waisilaeli nawawadumya ng'hatu Wakanaani hamwe na miji ja hewo. Ahyo honhu aho nahachemigwa Holima.
NUM 21:4 Waisilaeli nawaluka majendo kulawa chidunda cha Holi, nawakola nzila ilingulutila Bahali ya Shamu leka waizungulute isi ya Edomu. Ila lowawele mnzila, wanhu nawagozola.
NUM 21:5 Lelo nawaluka kuwang'ung'utila Nguluwi na Musa, wolonga, “Lekachoni namtulavya kula Misili leka tubagame aku kuchiwala? Aku kwa haduhu mazi ne chilyo, natwe natutoka kwa mana ayi chakachaka.”
NUM 21:6 Aho Mkulu Nguluwi nakegala mizoka jiwele na dunga hali wanhu, najiwaluma wanhu wenji mbaka Waisilaeli wenji kahi nawabagama.
NUM 21:7 Lelo wanhu nawamlutila Musa, nawamlonjela, “Natudita gehile kwa kuwang'ung'utila hegwe na Mkulu Nguluwi. Mlande Mkulu Nguluwi yatusile mizoka aji.” Ahyo, Musa nakawalandila wanhu.
NUM 21:8 Ahyo, na heye Mkulu Nguluwi nakamlonjela Musa, “Gongomanya izoka lya shaba, lininize mchanya mwa igodi. Munhu yoneche yolumigwa na izoka, yolilola izoka alyo lya shaba, kowa mkomu.”
NUM 21:9 Lelo Musa nakagongomanya izoka lya shaba, nakalininiza kuli izengo. Chila munhu yoyalumigwe na izoka loyalilolile izoka alyo lya shaba, nakawa mkomu.
NUM 21:10 Waisilaeli nawalutilila na majendo ga hewo, nawawika kambi ako Oboti.
NUM 21:11 Kulawa ako Oboti, nawali mmajendo mbaka nawafika Iye-Abalimu, kuli kuchiwala ubanzi wa kolilawilaga isanya mwa Moabu.
NUM 21:12 Kulawa ako nawaluta na kuwika kambi ya hewo kuli ibindi lya Seledi.
NUM 21:13 Kulawa ako nawaluta mbaka kasikazini mwa lwanda lwa Alinoni, nawawika kambi ya hewo, kuwele mazi nagabubujikaga kulawa isi ya Waamoli na kukola kuli kuchiwala. Lwanda lwa Alinoni nalwali ndo mbaka hali Wamoabu na Waamoli.
NUM 21:14 Kwa chiwalo acho, nayandichigwa kuli chitabu cha ngondo ya Mkulu Nguluwi. “Muji wa Wahebu kuli isi ya Sufa, na mibindi ja Alinoni
NUM 21:15 na kuli viduliko vya mibindi ulingifika mbaka kuli muji wa Ali, na kulutila kuli mbaka mwa Moabu.”
NUM 21:16 Kulawa ako, Waisilaeli nawali mmajendo mbaka Beeli, mina ndo izimbo liwele Mkulu Nguluwi nakamlonjela Musa, “Wakungajize wanhu hamwe na heni ndowapa mazi.”
NUM 21:17 Aho Waisilaeli nawemba lwimbo alu. “Bogome mazi gwa izimbo! Muyimbile!
NUM 21:18 Izimbo lyolibawigwe na wakulu, libawigwe ng'hatu na vilongozi kwa ng'hweku za hewo na mikongojo.” Kulawa kuchiwala, nawali mmajendo mbaka ako Matana,
NUM 21:19 kulawa Matana nawaluta mbaka Nahalieli na kulawa Nahalieli nawaluta mbaka Bamoti,
NUM 21:20 na kulawa Bamoti nawaluta mbaka kuli ibindi lilingwinjila isi ya Moabu, kuli chinhembenhembe cha chidunda cha Pisiga, chilingulola kuli kuchiwala.
NUM 21:21 Waisilaeli nawamhilichila usenga mndewa wa Waamoli yalinguchemigwa Sihoni, usenga awu,
NUM 21:22 “Utukundize tukole kuli isi ya hegwe, hatuluta hebu kula kufungo na kwinjila kuli migunda ama kuli migunda ja mizabibu ne kunwa mazi ga mizimbo ja hemwe. Tokola kuli nzila ng'hulu hela ya mndewa mbaka hotuloka isi ya hegwe.”
NUM 21:23 Ila Sihoni hambe yawakundize wanhu wa Isilaeli wakole kuli isi ya heye. Nakawakungajiza wanhu wa heye, nakaluta Yahasi kuchiwala kuwatowa Waisilaeli.
NUM 21:24 Ila Waisilaeli nawamkopola, nawaihola isi ya heye kulawa lwanda lwa Alinoni mbaka Yaboki, mina mbaka wa isi ya Waamoni nawali ukwamililwa ng'hatu.
NUM 21:25 Waisilaeli nawajihola miji aji jeng'ha na hewo nawekala kuli miji ja Waamoli hamwe na muji wa Heshiboni na vijiji vyake vyeng'ha.
NUM 21:26 Heshiboni nawali muji wa Sihoni, yawele mndewa wa Waamoli, yetowile na mndewa wa Moabu iwele aho hamwande, Sihoni nakaihola isi ya heye yeng'ha mbaka kuli lwanda lwa Alinoni.
NUM 21:27 Ndo mina walingwimba wa hetwe wangwimba. “Muye Heshiboni na kuzenga. Muji wa Sihoni nauzenjigwe na kwimizwa nzinzili.
NUM 21:28 Mina chiluli nachilawa Heshiboni, milapi ja chiluli najilawa kuli muji wa Sihoni, nakuudumya muji wa Ali wa Moabu, na kuvidumya vidunda vya lwanda lwa Alinoni.
NUM 21:29 Mochona wanhu wa Moabu! Namdumigwa, hemwe wanhu wa mlungu Kemoshi! Nakuwadita wana wa hegwe walume wawe wajenzi, wahinza wa hegwe nakuwaleka waholigwe wapogozi wa ngondo kwa Sihoni, mndewa wa Amoli.
NUM 21:30 Ila lelo walelwa wa hewo nawadumigwa, kulawa Heshiboni mbaka Diboni, kulawa Nashimu mbaka Nofa, behi na Medeba.”
NUM 21:31 Lelo Waisilaeli nawekala kuli isi ya Waamoli.
NUM 21:32 Hamba Musa nakalajiza wanhu kuupugajiza muji wa Yaseli, nawauhola hamwe na vijiji vyake vyeng'ha, nawawawinga Waamoli nawawele wochikala amo.
NUM 21:33 Waisilaeli nawahinduka na kuluta kuli nzila ya kuluta Bashani. Mndewa Ogu wa Bashani nakalawa na wanhu wa heye kuwatowa ako Edileyi.
NUM 21:34 Ila Mkulu Nguluwi nakamlonjela Musa, “Uleche kumdumba mina ndimuwika mmoko mwako hamwe na wanhu wa heye weng'ha na isi ya heye yeng'ha. Komditila kota vyoumditile Sihoni, mndewa wa Waamoli, yawele yochikala ako Heshiboni.”
NUM 21:35 Lelo Waisilaeli nawamkopola Ogu na wana wa heye weng'ha na wanhu wa heye weng'ha na kuwadumya, haponile ne munhu yoneche. Hamba nawaihola isi ya heye.
NUM 22:1 Waisilaeli nawaluka majendo kahi, nawaluta kuwika kambi ya hewo kuli ibalalika lya Moabu, kolilawilaga isanya mwa lwanda lwa Yolodani, lichilola na muji wa Yeliko.
NUM 22:2 Mndewa Balaki mwana wa Sipoli, nakazona mbuli zeng'ha ziwele Waisilaeli zowawaditile Waamoli.
NUM 22:3 Heye hamwe na Wamoabu nawawadumba ng'hatu Waisilaeli. Nawawadumba kwa chiwalo cha winji wa hewo.
NUM 22:4 Lelo Wamoabu nawawalonjela vilongozi wa Midiani, “Lung'hongola alu lyowifya chila chinhu hafungo mwa hetwe kota ibuguma vyolilingulya misolo kumgunda.” Ahyo, Balaki mwana wa Sipoli, nayawele mndewa wa Moabu mhela awo,
NUM 22:5 nakahilika usenga kwa Balaamu mwana wa Beoli, ako Petoli kota kuwele hafungo mwa lwanda mbaka kuli isi ya wanhu wa heye, yolonga, “Hana wanhu walawile Misili, nawo nawenela chila honhu hano muisi, na kahi wangikala behi na heni.
NUM 22:6 Uye lelo uwapanjile wanhu wano kwa chiwalo cha heni, mina wana mong'ho kusinda heni. Wone uwapanjile, hanji ndoweza kuwasumya na kuwawinga waleche kwinjila kuli isi ya heni, kwa vila ndivizela wone hegwe umtambichize munhu nakatambichizagwa na wone umpanjile munhu nakapanjilagwa.”
NUM 22:7 Lelo wakulu wa Moabu na Midiani nawahola sendi na kumha mlaguzi, nawoka kuluta kwa Balaamu. Nalowafichile, nawamha Balaamu usenga wa Balaki.
NUM 22:8 Balaamu nakawalonjela, “Muwase kuno nechilo ayi, nani ndowalonjela choyondonjela Mkulu Nguluwi.” Lelo wala vilongozi wa Moabu nawawasa kwa Balaamu.
NUM 22:9 Hamba Nguluwi nakamuyila Balaamu, nakamuuza, “Wanhu wachi wano nawekale na hegwe?”
NUM 22:10 Balaamu nakamwidichila Nguluwi, “Balaki, mndewa wa ako Moabu, mwana wa Sipoli, nakangalila usenga kota
NUM 22:11 hana wanhu walingulawa Misili, nawenela chila honhu hano muisi. Nakandanda ndikawapanjile wala wanhu leka hanji koweza kitowa na hewo na kuwawinga.”
NUM 22:12 Nguluwi nakamlonjela Balaamu, “Uleche kuka hamwe na wanhu wano ne kuwapanjila, mina nawatambichizwa.”
NUM 22:13 Lelo hamitondo Balaamu nakenuka, nakawalonjela wakulu wa Balaki, “Mhiluche kuli isi ya hemwe, kwa vila Mkulu Nguluwi hambe yagane kung'hundiza kuka hamwe na hemwe.”
NUM 22:14 Lelo wakulu wa Moabu nawoka, nawahiluka kwa Balaki, nawamlonjela, “Balaamu nakalema kuya hamwe na hetwe.”
NUM 22:15 Hamba, Balaki nakalajiza wakulu wanji, wenji lukami na wakulu ng'hatu kusinda wala wa mwaluko.
NUM 22:16 Na hewo nawafika kwa Balaamu, nawamlonjela, “Balaki mwana wa Sipoli, nakalonga hino, ‘Uleche kukunda kulemezwa na chinhu choneche na kulema kuya kwa heni.
NUM 22:17 Ndokulipa vinojile ng'hatu na choneche choundanda ndokuditila goya. Uye uwapanjile wanhu wano.’ ”
NUM 22:18 Ila Balaamu nakawedichila, “Hanga Balaki komha heni ng'handa ya heye imemile sendi na zahabu, heni siweza kuleka kuhulichiza ilajizo lya Mkulu Nguluwi, Nguluwi wa heni, kwa mbuli yoneche, ndodo ama ng'hulu.
NUM 22:19 Ila dedede, muwase hano nechilo ayi kota wala wayenu, nani ndovizela kahi choyondonjela Mkulu Nguluwi.”
NUM 22:20 Lelo Nguluwi nakamuyila Balaamu nechilo ayo, nakamlonjela, “Wone wanhu wano nawoya kukuchema, uche hamwe na hewo, ila udite chila chondikulonjela hela.”
NUM 22:21 Balaamu nakalilimka mitondo, nakaliwika goya idogowi lya heye, nakoka hamwe na hewo wakulu wa Moabu.
NUM 22:22 Nguluwi nakazudila ng'hatu kwa vila Balaamu nayali yoluta, ahyo mhilisi wa Mkulu Nguluwi nayali yatatamale mnzila kumlemeza kukola. Mhela awo Balaamu nayali yakwinile idogowi lya heye yawele na vitumagwa wa heye weli.
NUM 22:23 Lelo idogowi nalimona mhilisi ayo wa Mkulu Nguluwi yemile mnzila, yebatile ipanga lisomoligwe kuli yala yake. Ahyo nalileka nzila, naliluta hafungo. Balaamu nakalitowa idogowi alyo na kumhilula mnzila.
NUM 22:24 Hamba mhilisi ayo wa Mkulu Nguluwi nakalongola kumwando, nakema honhu hawele na nzila nzisili, hagati mwa migunda ja zabibu na lukanzi banzi zeng'ha mbili.
NUM 22:25 Lila idogowi lolimuwene yula mhilisi wa Mkulu Nguluwi, nalikundujiza lilyo mlukanzi na kumlumiza mgulu wa Balaamu baho. Lelo Balaamu nakalitowa kahi alyo idogowi.
NUM 22:26 Hamba mhilisi wa Mkulu Nguluwi nakalongola kahi na kwima hali honhu hazisili halihela honhu ha kukola, ne kumoso ne kudilo.
NUM 22:27 Idogowi lila lolimuwene yula mhilisi wa Mkulu Nguluwi, naliwasa hanyi. Balaamu nakazudila ng'hatu, nakalitowa na ng'hweku ya heye.
NUM 22:28 Aho, Mkulu Nguluwi nakalidita lila idogowi lilonje, idogowi nalimlonjela Balaamu, “Nandikuditila choni mbaka kunhowa heni mala zidatu azi?”
NUM 22:29 Balaamu nakalilonjela lila idogowi, “Hegwe nakumbeza heni. Wone nandali ndibatile ipanga, ndahawele ndikukopole sambi baha.”
NUM 22:30 Idogowi lila nalimlonjela Balaamu, “Ndaze, heni ndahawele idogowi lya hegwe likupapile kuli mhela weng'ha wa kikala kwa hegwe mbaka zuwa lya lehano? Ndaze, nanjeza kukuditila kota ahi aho hamwande?” Balaamu nakalidichila, “Hebu.”
NUM 22:31 Aho, Mkulu Nguluwi nakamdita Balaamu yalole, na heye nakamona mhilisi wa Mkulu Nguluwi yemile mnzila, yebatile ipanga lisomoligwe kuli yala yake. Balaamu naketoza hanyi chifunama.
NUM 22:32 Mhilisi wa Mkulu Nguluwi nakamlonjela Balaamu, “Lekachoni nakulitowa idogowi lya hegwe mala zidatu azi? Mbuya kukulemeza, kwa vila kulutilila na majendo ndo kwajilila.
NUM 22:33 Idogowi lya hegwe limbona heni mala azi zidatu nalikola hafungo mwa heni. Wone nahalikolile kutali na heni, ndahawele ndikukopola hegwe na kulileka idogowi ali.”
NUM 22:34 Balaamu nakamlonjela mhilisi wa Mkulu Nguluwi, “Ndita gehile mina hambe ndivizele kota nakwima mnzila kundemeza heni. Lelo wone hauganile heni ndutilile na majendo ago, ndohiluka haluga.”
NUM 22:35 Ila mhilisi wa Mkulu Nguluwi nakamlonjela Balaamu, “Ulute na wanhu wano, ila kolonga chila chondikulonjela hela,” Lelo Balaamu nakalutilila na majendo hamwe na wala vilongozi wa Balaki.
NUM 22:36 Balaki naloyahuliche kota Balaamu kanguya, nakalawa kuka kumbochela kuli muji wa Ali, muji nalouwele hafungo mwa lwanda lwa Alinoni kuli mbaka wa Moabu.
NUM 22:37 Balaki nakamlonjela Balaamu, “Lekachoni nahuyile kwa heni mala imwe hala hondikuchemile? Ndaze, nakujesa kota siweza kukulipa vinojile?”
NUM 22:38 Balaamu nakamwidichila Balaki, “Lelo mbuya. Ila, ndaze, ndina ludali lwa kulonga choneche chila? Mbuli yondonjela Mkulu Nguluwi ndo yoganigwa kulonga.”
NUM 22:39 Lelo Balaamu nakaluta hamwe na Balaki, nawafika kuli muji wa Kiliati-husoti.
NUM 22:40 Balaki nakalavya nhambiko ya isenga na ing'holo ako, nakawapa miwunde ajo Balaamu hamwe na vilongozi wawele hamwe na heye.
NUM 22:41 Hamitondo hake, Balaki nakamhola Balaamu, nakoka na heye mbaka Bamoti-baali, nalowawele ako, Balaamu nakawona Waisilaeli wamwe.
NUM 23:1 Balaamu nakamlonjela Balaki, “Nzenjele honhu saba ha kulavila nhambiko hamba ungalile mibuguma saba na ming'holo milume saba.”
NUM 23:2 Balaki nakadita kota Balaamu navyoyalonjile. Lelo nawalavya mchanya mwa chila honhu ha kulavila nhambiko ibuguma limwe na ing'holo ilume limwe.
NUM 23:3 Hamba Balaamu nakamlonjela Balaki, “Upone hano behi na nhambiko ya hegwe ya kulakazwa, nani ndute. Hanji Mkulu Nguluwi koting'hana na heni. Choneche choyondajila ndokuya kukulonjela.” Lelo Balaamu nakaluta yaliyeka mchanya mwa chinhembenhembe cha chidunda.
NUM 23:4 Nguluwi nakating'hana na heye. Balaamu nakamlonjela, “Mbika goya honhu saba ha kulavila nhambiko na kulavya nhambiko ya ibuguma limwe na ing'holo ilume limwe mchanya mwa honhu ha kulavila nhambiko.”
NUM 23:5 Mkulu Nguluwi nakamha Balaamu ulonzi woyalinguganigwa kulonga na kumlonjela yahiluche kwa Balaki.
NUM 23:6 Balaamu nakahiluka na nakamfika yemile bahala habehi na nhambiko ya heye ya kulakazwa, hamwe na vilongozi weng'ha wa Moabu.
NUM 23:7 Balaamu nakamha Balaki ulonzi wa heye, nakalonga, “Balaki nakengala hano kulawa Alamu, ena, mndewa wa Moabu nakengala kulawa vidunda vya kolilawilaga isanya. ‘Uye uwapanjile wanhu wa Yakobo kwa chiwalo cha heni, ena, uye uwalonje vibi Waisilaeli!’
NUM 23:8 Ila ndompanjila ndaze munhu yawele Mkulu Nguluwi hambe yampanjile? Ndowalonga ndaze vibi wanhu wawele Mkulu Nguluwi hambe yawalonje vibi?
NUM 23:9 Kulawa kuli vinhembenhembe vya mitalawe nandiwona, kulawa mchanya mwa vidunda ndanguwasunjilila. Awo wanhu walingikala waliyeka, hawalingilola kota wanhu wa isi zinji.
NUM 23:10 Yalihi yoweza kuwawaza wanhu wa Yakobo kwa ndaze navyowawele wenji lukami, ama yoweza kuwaza honhu ha kane ha Waisilaeli? Hondibagama ndiwe kota munhu yatanganiche, kota Waisilaeli.”
NUM 23:11 Aho Balaki nakamlonjela Balaamu, “Nakunditila choni? Ndikugala hano leka uwapanjile wang'honyo wa heni, ila hegwe kwanguwatambichiza!”
NUM 23:12 Balaamu nakamlonjela Balaki, “Ndanguganigwa kulonga ulonzi wa Mkulu Nguluwi hela.”
NUM 23:13 Hamba Balaki nakamlonjela Balaamu, “Tulute honhu hanji hawele koweza kuwona, ila kowona wamwenga wa hewo hela, howeza kuwona weng'ha. Hamba, aho kowapanjila kwa chiwalo cha heni.”
NUM 23:14 Ahyo Balaki nakamhola Balaamu kuli mgunda wa Sofimu, mchanya mwa chinhembenhembe cha chidunda cha Pisiga. Aho nakazenga honhu saba ha kulavila nhambiko na kulavya nhambiko mchanya mwake, nhambiko ya ibuguma limwe na ing'holo ilume limwe.
NUM 23:15 Balaamu nakamlonjela Balaki, “Upone hano behi na nhambiko ya hegwe ya kulakazwa, nani ndute kula kumwambu kiting'hana na Mkulu Nguluwi.”
NUM 23:16 Mkulu Nguluwi nakating'hana na Balaamu, nakamha ulonzi woyolonga, na kumlonjela yahiluche kwa Balaki.
NUM 23:17 Lelo Balaamu nakahiluka, nakamfika Balaki yemile habehi na nhambiko ya heye ya kulakazwa hamwe na vilongozi weng'ha wa Moabu. Balaki nakamuuza, “Mkulu Nguluwi nakakulonjela choni?”
NUM 23:18 Aho, Balaamu nakamlavila Balaki ulonzi wa heye. “Wime Balaki, uhuliche, unyhulichize gwa mwana wa Sipoli.
NUM 23:19 Nguluwi hawele munhu, yalonje udesi, ne munhu yagaluse kijesa kwa heye! Ndaze, kolagana na wanhu chinhu na yaleche kudita, ama yalonje chinhu na yaleche kweneza?
NUM 23:20 Ulole, mhegwa mzilo wa kutambichiza, na heye nakatambichiza, heni siweza hebu kugalusa.
NUM 23:21 “Mkulu Nguluwi hawonile wihe wa wana wa Yakobo, ne kulema kwa hewo wana wa Isilaeli. Mkulu Nguluwi, Nguluwi wa hewo ka hamwe na hewo, heye nakabochelaga lutogo lwa wandewa.
NUM 23:22 Nguluwi nayawaholile kulawa Misili, naketwanza na wang'honyo wa hewo kota ibogo.
NUM 23:23 Ndangukomya, uhawi hauweza hebu kuwasumya wanhu wa Yakobo, ne upanjilo kwa wanhu wa Isilaeli. Lelo wanhu wolonga, kuwala Isilaeli, ‘Mlole vinduzanduza vyoyaditile Nguluwi!’
NUM 23:24 Ulole, kota isimba idala nawenuka, kota isimba ilume wangwima, Waisilaeli hawokwesela mbaka webate chila chowalinguwinga, na kunwa danda ya chila chowalinguwinga.”
NUM 23:25 Aho Balaki nakamlonjela Balaamu, “Lelo uleche kuwapanjila ne kuwatambichiza!”
NUM 23:26 Ila Balaamu nakamwidichila Balaki, “Ndaze, sikulonjele heni kota nachoyalonjile Mkulu Nguluwi ndo chondiganigwa kudita?”
NUM 23:27 Balaki nakamlonjela Balaamu, “Uye, ndokuhilika honhu hanji. Hanji Nguluwi konojezwa leka uwapanjile wanhu awo kulawa ako kwa chiwalo cha heni.”
NUM 23:28 Ahyo, Balaki nakamhola Balaamu mbaka kuli chinhembenhembe cha chidunda cha Peoli, hawele wone munhu yeme aho, koweza kuchona chiwala.
NUM 23:29 Balaamu nakamlonjela Balaki, “Nzenjele hano honhu saba ha kulavila nhambiko, umbichile goya mibuguma saba na ming'holo milume saba.”
NUM 23:30 Balaki nakadita kota navyoyalonjelwe na Balaamu, hamba nakalavya nhambiko ya ibuguma limwe na ing'holo ilume limwe mchanya mwa chila honhu ha kulavila nhambiko.
NUM 24:1 Lelo Balaamu nakavizela kota Mkulu Nguluwi nakagana kuwatambichiza Waisilaeli, ahyo nahalutile kulagula kahi, nayali yolola kuchiwala.
NUM 24:2 Balaamu nakalola, nakawona Waisilaeli wawichile kambi, chila nhanzi hali honhu hake. Hamba muhe wa Nguluwi naumuyila,
NUM 24:3 na heye nakadamla ulonzi awu wa chiuloli, “Ulonzi wa heni Balaamu mwana wa Peoli ulonzi wa munhu yagubuligwe meho,
NUM 24:4 ulonzi wa munhu yahuliche ulonzi wa Nguluwi, munhu yalolile ulaguzi wa Nguluwi yawele na mong'ho, munhu yalingufugama na kona hazelu.
NUM 24:5 “Mihema ja hegwe jinoga ndaze hemwe wanhu wa Yakobo, ena, kambi za hemwe zinoga ndaze hemwe wanhu wa Isilaeli!
NUM 24:6 “Avi ndo kota mibindi jilingubogoma mazi, kota kagunda hafungo mwa lwanda, kota mitembwe joyanyalile Mkulu Nguluwi, kota igodi lya mwelezi hafungo mwa mazi.
NUM 24:7 Viya vya hewo vyowa na mazi menji, nyhadikwa ya hewo yonyaligwa hali honhu hawele na mazi ga kuhega. Mndewa wa hewo kowa mkulu kusinda Agagi, na undewa wa heye wowa ukulu ng'hatu.
NUM 24:8 “Nguluwi nakawahola kulawa Misili, na heye naketwanza ng'hatu na wang'honyo wa hewo, kota ibogo. Kozidumya nhanzi zoziwele wang'honyo wa hewo, kobenanga mizeje ja hewo, kowahoma kwa misale ja heye.
NUM 24:9 Kowasa hasi kota isimba, yalihi yojeza kumlilimla? “Yoneche yokutambichiza, kotambichizwa, yoneche yokupanjila, kopanjilwa.”
NUM 24:10 Balaki nakazudila ng'hatu kwa chiwalo cha Balaamu, nakafumbata moko ga heye kwa kuzudila na kumlonjela, “Ndikuchema leka uwapanjile wang'honyo wa heni, ila mala zidatu zeng'ha azi kwanguwatambichiza!
NUM 24:11 Lelo lute hali honhu ha hegwe. Nangana ndikupe ndolendole nyinji, ila Mkulu Nguluwi nakakulemeza kubochela ndolendole azo.”
NUM 24:12 Balaamu nakamwidichila Balaki, “Ndaze, siwalonjela hebu wala wasenga wouwalajize kwa heni
NUM 24:13 kota hanga naumhe ng'handa ya hegwe imemile sendi na zahabu, heni siweza kubelenhuka ilajizo lya Mkulu Nguluwi, kwa kudita mbuli yoneche, ihile ama inojile kwa kunuwila nene baha. Nandonga kota choyolonga Mkulu Nguluwi ndo chondilonga heni.
NUM 24:14 “Lelo ndanguhiluka kwa wanhu wa heni, ila nding'hali kuka, leka ndikulonjele mbuli ziwele wanhu wano vyowowaditila wanhu wa hegwe mazuwa galinguya.”
NUM 24:15 Lelo Balaamu nakalonga ulonzi awu, “Ulonzi wa heni Balaamu mwana wa Beoli, ulonzi wa munhu yagubuligwe meho,
NUM 24:16 ulonzi wa munhu yoyahuliche ulonzi wa Nguluwi, na munhu yavizelele uwanzi wa Nguluwi yawele kuchanya, munhu yalingona ulaguzi wa Nguluwi yawele na Mong'ho, munhu yalingufugama na kona hazelu.
NUM 24:17 “Ndangumona, ila haiwele sambi, ndangumlola, ila ka kutali. Nhondwe yolawila kwa walelwa wa Yakobo, kolawila mndewa hali Waisilaeli. Kwa ng'hweku ya heye kowasubula vilongozi wa Wamoabu, kowadumya walelwa weng'ha wa Seti.
NUM 24:18 Edomu yowa ya heye, Seili yowa ya heye, Isilaeli yowa na kusumya kukulu.
NUM 24:19 Yumwe wa walelwa wa Yakobo kolongoza na heye kowadumya wawele wopona kuli muji.”
NUM 24:20 Hamba Balaamu nakawalola Waamaleki, nakalonga, “Waamaleki ndo wanhu wa isi ya mwaluko wawele na mong'ho kusinda weng'ha, ila mwiso wodumigwa ng'hatu.”
NUM 24:21 Hamba Balaamu nakawalola Wakeni, nakalavya ulonzi awu, “Ng'handa za hemwe za goya, hemwe Wakeni, kota chimvulila mchanya ng'hatu mwa italawe.
NUM 24:22 Ila modumigwa, hemwe Wakeni. Mbaka Ashulu hoyowahola hemwe kuwa wapogozi wa ngondo.”
NUM 24:23 Balaamu nakalavya ulonzi kahi, “Hambi! Yalihi yochikala, hala Mkulu Nguluwi hoyodita mbuli azo?
NUM 24:24 Meli zofika kulawa Kitimu, wozitowa Ashulu na Ebeli, na hewo kahi wodumigwa.”
NUM 24:25 Ahyo, Balaamu nakoka, nakahiluka haluga ha heye, Balaki kahi nakoka.
NUM 25:1 Waisilaeli nalowawele ako Shitimu, walume nawaluka kudita ung'hondwa na wadala wa Moabu.
NUM 25:2 Wadala awo nawawalalika Waisilaeli wehanze kuli nhambiko yowaiwichile kwa chiwalo cha milungu ja hewo, na hewo Waisilaeli nawalya na kujifugamila milungu ja hewo.
NUM 25:3 Ahyo ndo Waisilaeli navyowehanzile na mlungu Baali wa Peoli, na Mkulu Nguluwi nakawazudila ng'hatu.
NUM 25:4 Lelo Mkulu Nguluwi nakamlonjela Musa, “Wahole vilongozi weng'ha wa wanhu, uwakopole hali heni hali isanya, leka ng'halazi ya heni kwa hemwe ikole.”
NUM 25:5 Musa nakawalonjela walamuzi wa Isilaeli, “Chila yumwe wa hemwe yamkopole munhu yoneche hali hemwe yehanzile na mlungu Baali wa Peoli.”
NUM 25:6 Mhela wuwo munhu yumwe Muisilaeli nakamigala mdala yumwe Mmidiani haluga ha heye, hali Musa na Waisilaeli weng'ha, lowawele wolombocheza hali lwizi lwa ihema lya Nguluwi.
NUM 25:7 Lelo Finehasi mwana wa Eleasali, mwana wa mtambika Aluni, naloyawene mbuli ayo, nakenuka na kulawa kuli Waisilaeli weng'ha, nakahola umbaji
NUM 25:8 na kumuwinza yula Muisilaeli mbaka kuli ihema, nakawahoma umbaji weng'ha weli kuli munda. Utamwa wihile louwagazile nauwadumya Waisilaeli nausumigwa.
NUM 25:9 Wanhu wabagame kwa chiwalo cha utamwa ula nawali elufu makumi meli na gane (24,000).
NUM 25:10 Mkulu Nguluwi nakamlonjela Musa,
NUM 25:11 “Finehasi mwana wa Eleasali, mwana wa mtambika Aluni, nakalemeza ng'halazi ya heni kwa chiwalo cha Waisilaeli hali hemwe, ndo heye yawele na fihi kota yondiwelenayo heni. Ndo mina hambe ndiwadumye hebu Waisilaeli weng'ha kwa ng'halazi ya heni.
NUM 25:12 Lelo mlonjele kota ndangudita ilagano lya kikala goya na heye.
NUM 25:13 Ndangulagana na heye na walelwa wa heye wowa watambika mazuwa gose kwa vila nakona fihi kwa chiwalo cha heni, Nguluwi wa heye, nakawaditila uhanyisi Waisilaeli.”
NUM 25:14 Ayo Muisilaeli nayabagame hamwe na mdala Mmidiani nayali yochemigwa Simuli mwana wa Salu, chilongozi wa ivyazi limwenga kuli nhanzi ya Simeoni.
NUM 25:15 Na ayu mdala Mmidiani nayakopoligwe nayali yochemigwa Kosibi mhinza wa Suli, nayawele chilongozi wa nhanzi imwenga ako Midiani.
NUM 25:16 Mkulu Nguluwi nakamlonjela Musa,
NUM 25:17 “Waditile Wamidiani kota wang'honyo na kuwadumya,
NUM 25:18 kwa vila nawawaditila hemwe kota wang'honyo kwa uhadi wa hewo, nawawahada kuwala mbuli ya Peoli, na kwa chiwalo cha Kosibi, mhinza wa chilongozi wa Midiani, nayakopoligwe mhela wa utamwa wihile naloulawile ako Peoli.”
NUM 26:1 Navyoumalile awo utamwa, Mkulu Nguluwi nakawalonjela Musa na Eleasali mwana wa mtambika Aluni,
NUM 26:2 “Muwawaze wanhu weng'ha wa Waisilaeli weng'ha, chila munhu kota navyoiwele ivyazi lya heye. Muwawaze wanhu weng'ha wawele na miyaka makumi meli na mzidi wawele woweza kuza kitowa ngondo.”
NUM 26:3 Musa na mtambika Eleasali nawalongasa na wanhu kuli isi iwele na ibalalika lya Moabu, kumwambu mwa lwanda lwa Yolodani ilingilola na Yeliko, nawawalonjela,
NUM 26:4 “Muwawaze wanhu wawele na miyaka makumi meli na mzidi, kota Mkulu Nguluwi vyoyamlajize Musa.” Waisilaeli walawile Misili ndo awa.
NUM 26:5 Nhanzi ya Lubeni, mwana wa mwaluko kwa Yakobo, ng'holo za Hanoki na Palu
NUM 26:6 na Hesiloni na Kalimi.
NUM 26:7 Ng'holo za nhanzi ya Lubeni nawawazigwe, nawali walume elufu makumi gane na gadatu na miya saba na makumi gadatu (43,730).
NUM 26:8 Mlelwa wa Palu nayali Eliabu
NUM 26:9 na wana wa Eliabu, wawele ndo Nemueli na Datani na Abilamu. Awa weli, Datani na Abilamu ndo nawali wahaguligwe hali Waisilaeli weng'ha, ila nawawalema Musa na Aluni, na kihanza na wanhu walingumuwinza Kola mhela nalowambelenhuche Mkulu Nguluwi.
NUM 26:10 Mhela awo misanga najigubuka najiwamela, nawabagama hamwe na Kola na wala wanhu weng'ha walingumuwinza heye. Chiluli navyochiwalakaze wanhu miya mbili na makumi gahano, nawali ulanguso kwa wanhu.
NUM 26:11 Ila walelwa wa Kola nahawabagame.
NUM 26:12 Nhanzi ya Simeoni ndo ng'holo za Nemueli na Yamini na Yakini
NUM 26:13 na Sela na Shauli.
NUM 26:14 Azo ndo ng'holo za nhanzi ya Simeoni, walume weng'ha nawali elufu makumi meli na mbili na miya mbili (22,200).
NUM 26:15 Nhanzi ya Gadi ndo ng'holo za Sefoni na Hagi na Shuni
NUM 26:16 na Osini na Eli
NUM 26:17 na Alodi na Aleli.
NUM 26:18 Azo ndo ng'holo za nhanzi ya Gadi, nawali walume elufu makumi gane na miya zihano (40,500).
NUM 26:19 Na wana wa Yuda nawali Eli na Onani. Awa nawabagama kuli isi ya Kanaani.
NUM 26:20 Nhanzi ya Yuda ndo ng'holo za Shela na Pelesi na Sela.
NUM 26:21 Walelwa wa Pelesi ndo ng'holo za Hesiloni na Hamuli.
NUM 26:22 Azo ndo ng'holo za Yuda, nawali walume elufu makumi saba na sita na miya zihano (76,500).
NUM 26:23 Nhanzi ya Isakali ndo ng'holo za Tola na Puva
NUM 26:24 na Yashubu na Shimuloni.
NUM 26:25 Azo ndo ng'holo za Isakali, nawali walume elufu makumi sita na gane na miya zidatu (64,300).
NUM 26:26 Nhanzi ya Sebuluni ndo ng'holo za Seledi na Eloni na Yaleeli.
NUM 26:27 Azo ndo ng'holo za Sebuluni, nawali walume elufu makumi sita na miya zihano (60,500).
NUM 26:28 Nhanzi ya Yusufu mhaza wa hewo Manase na Efulaimu.
NUM 26:29 Nhanzi ya Manase ndo ng'holo za Makili na Gileadi. Gileadi nayali mwana wa Makili.
NUM 26:30 Walelwa wa Gileadi ndo ng'holo za Yeseli na Heleki
NUM 26:31 na Asilieli na Shekemu
NUM 26:32 na Shemida na Hefeli.
NUM 26:33 Selofehadi, mwana wa Hefeli hapatile wana walume ila wadala hela, na hewo ndo Mala na Noa na Hogula na Milika na Tilisa.
NUM 26:34 Azo ndo ng'holo za Manase, nawali walume elufu makumi gahano na mbili na miya saba (52,700).
NUM 26:35 Nhanzi ya Efulaimu ndo ng'holo za Shutihela na Bekeli na Tahani.
NUM 26:36 Lukolo lwa Elani nalulawa kwa Shutihela.
NUM 26:37 Azo ndo ng'holo za Efulaimu, nawali walume elufu makumi gadatu na mbili na miya zihano (32,500). Zeng'ha azo nazilawila kwa Yusufu.
NUM 26:38 Nhanzi ya Benjamini ndo ng'holo za Bela na Ashibeli na Ahilamu
NUM 26:39 na Shefufamu na Hufamu.
NUM 26:40 Ng'holo za Alidi na Naamani, nazilawila kwa Bela.
NUM 26:41 Azo ndo ng'holo za Benjamini, nawali walume elufu makumi gane na zihano na miya sita (45,600).
NUM 26:42 Nhanzi ya Dani nayali ya lukolo lwa Shuhamu.
NUM 26:43 Lukolo nalwali na walume elufu makumi sita na gane na miya zine (64,400).
NUM 26:44 Nhanzi ya Asheli ndo ng'holo za Imuna na Ishivi na Belia.
NUM 26:45 Ng'holo za Hebeli na Malikieli nazilawila kwa Belia.
NUM 26:46 Asheli nayali na mhinza yalinguchemigwa Sela.
NUM 26:47 Azo ndo ng'holo za nhanzi ya Asheli, nawali walume elufu makumi gahano na zidatu na miya zine (53,400).
NUM 26:48 Nhanzi ya Nafutali ndo ng'holo za Yaseeli na Guni
NUM 26:49 na Yeseli na Shilemu.
NUM 26:50 Azi ndo ng'holo za nhanzi ya Nafutali, walume nawali elufu makumi gane na zihano na miya zine (45,400).
NUM 26:51 Walume Waisilaeli wawazigwe nawali lachi sita na elufu imwe na miya saba na makumi gadatu (601,730).
NUM 26:52 Hamba Mkulu Nguluwi nakamlonjela Musa,
NUM 26:53 “Nhanzi azi zopegwa isi iwe uhalizi wa hewo wawo, kwa chiwalo cha winji wa matagwa ga hewo wawo.
NUM 26:54 Nhanzi ng'hulu yopegwa honhu hawo hakulu na nhanzi ndodo yopegwa honhu hawo hadodo. Chila nhanzi yopegwa honhu hake ha uhalizi kwa chiwalo cha winji wa wanhu vyowali.
NUM 26:55 Na ako kugawilwa kwa isi koditigwa kwa kutowa simbi. Chila nhanzi yohalila kwa chiwalo cha matagwa ga lukolo lwa hewo.
NUM 26:56 Uhalizi wa chila nhanzi woditigwa kwa kutowa simbi, chila nhanzi yopegwa kwa chiwalo cha ukulu ama udodo wake.”
NUM 26:57 Azi ndo ng'holo za Walawi ziwazigwe na walelwa wa hewo Gelishoni na Kohati na Melali.
NUM 26:58 Hamwe na ng'holo za Libuni na Hebuloni na Mahili na Mushi na Kola. Kohati nayali mhaza wa Amulamu.
NUM 26:59 Mchewake Amulamu nakachemigwa Yokebedi mwana wa heye Lawi, yavumbuche Misili. Ayu nakampondela Amulamu wana weli walume, Aluni na Musa, na mhinza yumwe, Miliamu.
NUM 26:60 Aluni nayali na wana walume wane, Nadabu na Abihu na Eleasali na Itamali.
NUM 26:61 Nadabu na Abihu nawabagama vyowamlavile Mkulu Nguluwi nhambiko ya chiluli, yohaikundigwe.
NUM 26:62 Walawi walume wawele na mwezi umwe na mzidi nawali elufu makumi meli na gadatu (23,000). Awa nahawawazigwe hamwe na Waisilaeli wanji kwa vila hewo nahawapeligwe isi kota uhalizi woneche hali hewo.
NUM 26:63 Awo ndo walume Waisilaeli wawazigwe na Musa na mtambika Eleasali kuli isi iwele na ibalalika lya Moabu, kumwambu mwa lwanda lwa Yolodani ilingilola na Yeliko.
NUM 26:64 Hali hewo hali haduhuli ne munhu yumwe hali wala wawazigwe na Musa na mtambika Aluni na ndo nawawazigwe aho mwaluko kuchiwala ako Sinai.
NUM 26:65 Mkulu Nguluwi nakalonga kota weng'ha wobagama wawele ako kuchiwala, na kukomya, haduhu ne yumwe wa hewo yasigale yawele mkomu, ila Kalebu mwana wa Yefune na Yoshua mwana wa Nuni.
NUM 27:1 Mhela awo, Mala na Noa na Hogula na Milika na Tilisa, wahinza wa Selofehadi, nawahejela. Na heye Selofehadi nayali mwana wa Hefeli, mwana wa Gileadi, mwana wa Makili, mwana wa Manase mwana wa Yusufu.
NUM 27:2 Lelo wahinza weng'ha awo wahano nawamlutila Musa, nawema hali heye na mtambika Eleasali na vilongozi weng'ha wa Waisilaeli weng'ha, hali lwizi lwa ihema lya Nguluwi, nawalonga,
NUM 27:3 “Mhaza wa hetwe nakabagama kuchiwala, nahawele kuli wala wanhu weng'ha welumbile kumditila vibi Mkulu Nguluwi, kuli chilundo cha Kola, ila nakabagama kwa gehile ga heye yuye. Nahawele na mwana yoneche mlume.
NUM 27:4 Lelo lekachoni itagwa lya mhaza wa hetwe lyusigwe kuli lukolo lwa heye kwa vila haduhu mwana mlume? Twangugana uhalizi hamwe na wang'holoze mhaza wa hetwe.”
NUM 27:5 Musa nakegala mbuli ya hewo hali Mkulu Nguluwi.
NUM 27:6 Mkulu Nguluwi nakamlonjela Musa,
NUM 27:7 “Chowalingulonga wahinza wa Selofehadi ndo cha kukomya, wagawile uhalizi hamwe na wang'holoze mhaza wa hewo, wahole uhalizi wa heye.
NUM 27:8 Hamba walonjele Waisilaeli kota munhu yoneche wone yabagame ne kuleka mwana mlume, uhalizi wa heye kopegwa mwana wa heye mdala.
NUM 27:9 Ila wone kahela mhinza, uhalizi wa hewo wopegwa wang'holoze walume.
NUM 27:10 Na wone kahela wang'holoze walume, uhalizi wa heye woluta kwa wang'holoze wa mhaza wa heye, mkulu ama mdodo.
NUM 27:11 Na wone mhaza wa heye kahela wang'holoze walume, lelo uhalizi wa heye wowa wa wanhu wa nhanzi ya heye ya habehi, na wowa wa heye. Ali ndo lyowa ilajizo na mzilo kwa Waisilaeli, kota vila heni Mkulu Nguluwi vyondikulajize, hegwe Musa.”
NUM 27:12 Mkulu Nguluwi nakamlonjela Musa, “Ukwine mchanya mwa chidunda achi cha vigongo vya Abalimu leka uilole isi yondiwapele Waisilaeli.
NUM 27:13 Louyona, nagwe kobagama kota vila mng'holozo Aluni navyoyabagame,
NUM 27:14 kwa vila hambe mhulichize mzilo wa heni kula kuchiwala Sini. Mhela Waisilaeli weng'ha lowamng'ung'utile kwa chiwalo cha heni kula Meliba, humhele ukulu hali hewo lowaganile wapegwe mazi.” Meliba ndo nzasa ya mazi ako Kadeshi kuli kuchiwala ako Sini.
NUM 27:15 Na heye Musa nakamlanda Mkulu Nguluwi yolonga,
NUM 27:16 “Gwa Mkulu Nguluwi, Nguluwi uwele mwaluko wa ukomu wa weng'ha, ndangukulanda umhagule munhu wa kuwalongoza Waisilaeli weng'ha,
NUM 27:17 yawele kowalongola kuwalongoza kuli mbuli za hewo zeng'ha, leka Waisilaeli weng'ha wa Mkulu Nguluwi waleche kuwa kota ming'holo jilihela mdimi.”
NUM 27:18 Mkulu Nguluwi nakamlonjela Musa, “Mhole Yoshua mwana wa Nuni, munhu yawele muhe wa Mkulu Nguluwi ka mgati mwa heye, hamba umuwichile moko,
NUM 27:19 na kumwimiza hali mtambika Eleasali na Waisilaeli weng'ha, umhe mijito ajo.
NUM 27:20 Umhe honhu ha ludali lwa hegwe leka Waisilaeli weng'ha wamhulichize.
NUM 27:21 Heye komtumbila mtambika Eleasali yawele komlonjela choni chondilingugana kwa Ulimu na Sumimu. Kwa nzila ayi, Eleasali kowalongoza Yoshua na Waisilaeli weng'ha kuli mbuli za hewo zeng'ha”
NUM 27:22 Musa nakadita kota navyoyalajizwe na Mkulu Nguluwi. Nakamhola Yoshua na kumwimiza hali mtambika Eleasali na Waisilaeli weng'ha.
NUM 27:23 Hamba nakamuwichila moko kwa kumdita yawe chilongozi kota Musa navyoyalajizwe na Mkulu Nguluwi.
NUM 28:1 Mkulu Nguluwi nakamlonjela Musa,
NUM 28:2 “Walonjele Waisilaeli kota hemwe mondavila kwa mhela wa nhambiko zilinguganigwa, vilyo vya kulakazwa kwa chiluli, viwele na unhunyhililo unojile wa kunojeza heni.
NUM 28:3 Walonjele kota nhambiko yowondavila heni Mkulu Nguluwi kwa chiluli, yowa ming'holo myana mili milume ja mwaka umwe jilihela nongwa yoneche, kwa chiwalo cha nhambiko ya kulakazwa ya chila zuwa.
NUM 28:4 Ing'holo lyana limwe lyolavigwa mitondo na lya keli lyolavigwa mhela wa kuzinga kwa isanya,
NUM 28:5 chila limwe lyolavigwa hamwe na nhambiko ya nyhule ya kilo imwe ya utimbo unojile uhanzigwe hamwe na lita imwe ya mafuta ganojile gahondigwe.
NUM 28:6 Ayi ndo nhambiko ya kulakazwa ilingulavigwa chila zuwa, iwele nailajizwe hala kuli chidunda cha Sinai kota unhunyhililo unojile, nhambiko yalingulavilwa Mkulu Nguluwi kwa chiluli.
NUM 28:7 Nhambiko ya chakunwa yoilingulavigwa na chila ing'holo lyana, ndo lita imwe ya divai. Koijida nhambiko ayi ya chakunwa hali honhu helile ha Mkulu Nguluwi.
NUM 28:8 Mhela wa kuzinga kwa isanya kolilavya lila ing'holo lyana liyage hamwe na nhambiko ya nyhule na ya chakunwa kota yoilavigwe mitondo, kolavya kota nhambiko yalingulavilwa Mkulu Nguluwi kwa chiluli, nhambiko iwele na unhunyhililo unojile wa kumnojeza Mkulu Nguluwi.
NUM 28:9 “Zuwa lya Kwesela, molavya nhambiko ya ming'holo myana mili milume ja mwaka umwe jilihela nongwa, nhambiko ya nyhule ya kilo mbili za utimbo unojile uhanzigwe na mafuta, na nhambiko yake ya chakunwa.
NUM 28:10 Nhambiko ayi ya kulakazwa yolavigwa chila Zuwa lya Kwesela ne kuwaza yila nhambiko ya chila zuwa hamwe na nhambiko yake ya chakunwa.
NUM 28:11 “Kuli mwaluko wa chila mwezi, momlavila Mkulu Nguluwi nhambiko ya kulakazwa. Milogota milume mili, ing'holo ilume limwe na ming'holo myana saba milume ja mwaka umwe, jeng'ha jiwe jilihela nongwa.
NUM 28:12 Molavya nhambiko ya nyhule ya utimbo unojile kilo zidatu, uhanzigwe na mafuta kwa chila ilogota ilume na molavya kahi kilo mbili za utimbo unojile uhanzigwe na mafuta kwa chila ing'holo ilume,
NUM 28:13 na kilo imwe ya utimbo unojile uhanzigwe na mafuta kwa chila ing'holo lyana. Nhambiko azi za kulakazwa ziwele na unhunyhililo wa kumnojeza Mkulu Nguluwi, ndo nhambiko zilingulavigwa Mkulu Nguluwi kwa chiluli.
NUM 28:14 Chipimilo cha nhambiko ya chakunwa chilinguganigwa ndo lita mbili za divai kwa chila ilogota ilume na lita imwe na nusu kwa chila ing'holo ilume na lita imwe kwa chila ing'holo lyana. Ayo ndo nhambiko ya kulakazwa ya chila mwezi kuli mwaka.
NUM 28:15 Kahi momlavila Mkulu Nguluwi nhambiko ya gehile, ipongo limwe, ne kuwaza yila nhambiko ya kulakazwa ya chila zuwa na nhambiko yake ya chakunwa.
NUM 28:16 “Zuwa lya kumi na kane lya mwezi wa mwaluko ndo mnvina ya Pasaka ya Mkulu Nguluwi.
NUM 28:17 Zuwa lya kumi na zihano lya mwezi wuwo ndo mnvina. Kwa mhela wa mazuwa saba, molya mibumunda jilihela usaso.
NUM 28:18 Kuli zuwa lya mwaluko kowa na nhing'hano yelile. Zuwa alyo hamkola mijito hebu.
NUM 28:19 Molavya nhambiko ya kulakazwa kwa Mkulu Nguluwi kwa chiluli, milogota milume mili na ing'holo ilume limwe na ming'holo myana saba milume ja mwaka umwe, jeng'ha jiwe jilihela nongwa.
NUM 28:20 Nhambiko ya nyhule yoiwa hamwe na ayo, yowa ya utimbo unojile uhanzigwe na mafuta, kilo zidatu kwa chila ilogota ilume na kilo mbili kwa chila ing'holo ilume,
NUM 28:21 na kilo imwe kwa chila limwe lya jila ming'holo myana saba.
NUM 28:22 Molavya kahi ipongo limwe liwe nhambiko ya gehile leka kuwaditila uhanyisi.
NUM 28:23 Molavya vinhu avi ne kuwaza yila nhambiko ya kulakazwa ilingulavigwa mitondo ya chila zuwa.
NUM 28:24 Hihyo du, kwa mhela wa mazuwa saba, molavya nhambiko ya chilyo yalingulavilwa Mkulu Nguluwi kwa chiluli, ndo iwele na unhunyhililo unojile wa kumnojeza Mkulu Nguluwi. Ayi moilavya ne kuwaza yila nhambiko ya kulakazwa ya chila zuwa na nhambiko yake ya chakunwa.
NUM 28:25 Kuli zuwa lya saba modita nhing'hano yelile na mleche kukola mijito.
NUM 28:26 “Kuli zuwa lya mwaluko lya mnvina ya mbena lomumlavila Mkulu Nguluwi mbena za mwaluko za nyhule za hemwe, modita nhing'hano yelile na mleche kukola mijito.
NUM 28:27 Molavya nhambiko ya kulakazwa, unhunyhililo unojile wa kumnojeza Mkulu Nguluwi, milogota milume mili na ing'holo ilume limwe na ming'holo myana milume saba ja mwaka umwe.
NUM 28:28 Nhambiko ya nyhule yoiwa hamwe na ayo yowa ya utimbo unojile uhanzigwe na mafuta, kilo zidatu kwa chila ilogota ilume na kilo mbili kwa chila ing'holo ilume
NUM 28:29 na kilo imwe kwa chila ing'holo lyana.
NUM 28:30 Molavya kahi ipongo limwe kuwaditila uhanyisi.
NUM 28:31 Molavya vinhu avi ne kuwaza yila nhambiko ya kulakazwa ya chila zuwa hamwe na nhambiko yake ya chakunwa. Jeng'ha jiwe jilihela nongwa.
NUM 29:1 “Zuwa lya mwaluko lya mwezi wa saba modita nhing'hano yelile na mleche kukola mijito. Alyo ndo zuwa lya kutowa mhalamanda.
NUM 29:2 Molavya nhambiko ya kulakaza, kunhunyhilila goya komnojeza Mkulu Nguluwi, ilogota ilume limwe na ing'holo ilume limwe na ming'holo myana milume saba ja mwaka umwe, jeng'ha jiwe jilihela nongwa yoneche.
NUM 29:3 Molavya kahi nhambiko ya heye ya utimbo unojile uhanzigwe na mafuta, kilo zidatu kwa ilogota ilume na kilo mbili kwa ing'holo ilume
NUM 29:4 na kilo imwe kwa chila ing'holo lyana.
NUM 29:5 Kahi molavya ipongo limwe liwe nhambiko ya gehile kwa kuwaditila uhanyisi.
NUM 29:6 Molavya vinhu avi ne kuwaza yila nhambiko ya kulakazwa ya mwezi unyale na nhambiko yake ya nyhule na nhambiko zake za chakunwa kota vyoilajizwe kuwa unhunyhililo unojile ulingunojeza, ndo nhambiko yalingulavilwa Mkulu Nguluwi kwa chiluli.
NUM 29:7 “Zuwa lya kumi lya mwezi wa saba, modita nhing'hano yelile. Zuwa alyo yowagana mwesele kulya ne kukola mijito joneche.
NUM 29:8 Momlavila Mkulu Nguluwi nhambiko ya kulakazwa na kunhunyhilila kwa kumnojeza Mkulu Nguluwi. Ilogota ilume limwe na ing'holo ilume limwe na ming'holo myana saba milume ja mwaka umwe, jeng'ha jiwe jilihela nongwa yoneche.
NUM 29:9 Kuleka vinhu avyo, molavya kahi nhambiko ya utimbo unojile uhanzanywe na mafuta kilo zidatu hamwe na alyo ilogota ilume na kilo mbili hamwe na lila ing'holo ilume
NUM 29:10 na kilo imwe kwa chila ing'holo lyana.
NUM 29:11 Molavya kahi ipongo limwe kwa nhambiko ya gehile ne kuwaza yila nhambiko ya uhanyisi hamwe na nhambiko ya kulakazwa ya chila zuwa na nhambiko yake ya nyhule na nhambiko zake za kunwa.
NUM 29:12 “Zuwa lya kumi na kahano lya mwezi wa saba, modita nhing'hano yelile. Hamkola mijito zuwa alyo. Modita mnvina kwa chiwalo cha Mkulu Nguluwi kwa mazuwa saba.
NUM 29:13 Molavya nhambiko ya kulakazwa, iwele ndo nhambiko yalingulavilwa Mkulu Nguluwi kwa chiluli, iwele na kunhunyhilila goya kulingumnojeza Mkulu Nguluwi na milogota milume kumi na jidatu na ming'holo milume mili na ming'holo myana ja mwaka umwe kumi na jine, jeng'ha jiwe jilihela nongwa yoneche.
NUM 29:14 Nhambiko yoiwa hamwe na ayo, yowa utimbo unojile uhanzigwe na mafuta, kilo zidatu kwa chila ilogota ilume na kilo mbili kwa chila ing'holo ilume
NUM 29:15 na kilo imwe kwa chila ing'holo lyana.
NUM 29:16 Molavya kahi ipongo limwe kwa nhambiko ya gehile, ne kuwaza yila nhambiko ya chila zuwa ya kulakazwa hamwe na nhambiko yake ya nyhule na nhambiko yake ya chakunwa.
NUM 29:17 “Zuwa lya keli, molavya milogota milume kumi na mili na ming'holo milume mili na ming'holo myana milume kumi na jine ja mwaka umwe jilihela nongwa yoneche.
NUM 29:18 Molavya kahi nhambiko ya nyhule na nhambiko ya chakunwa hamwe na jila milogota milume na ming'holo na ming'holo milume myana kwa winji wa hewo vyoilajizwe.
NUM 29:19 Molavya kahi ipongo limwe kwa nhambiko ya kulakazwa ya chila zuwa hamwe na nhambiko yake ya nyhule na nhambiko yake ya chakunwa.
NUM 29:20 “Zuwa lya kadatu, molavya mibuguma kumi na limwe na ming'holo milume mili na ming'holo myana kumi na jine ja mwaka umwe jilihela nongwa yoneche.
NUM 29:21 Molavya kahi nhambiko ya nyhule na nhambiko za chakunwa hamwe na ajo mibuguma na ming'holo milume na ming'holo myana kota vyoilajizwe.
NUM 29:22 Hihyo du, molavya ipongo limwe kwa nhambiko ya gehile ne kuwaza yila nhambiko ya kulakazwa hamwe na nhambiko yake ya nyhule na nhambiko yake ya chakunwa.
NUM 29:23 “Zuwa lya kane, molavya mibuguma kumi na ming'holo milume mili na ming'holo myana kumi na jine ja mwaka umwe jilihela nongwa yoneche.
NUM 29:24 Molavya kahi nhambiko ya nyhule na nhambiko za chakunwa hamwe na ajo mibuguma na ming'holo milume na ming'holo myana kwa winji wa hewo kota vyoilajizwe.
NUM 29:25 Molavya kahi ipongo limwe kwa nhambiko ya gehile ne kuwaza nhambiko ya chila zuwa ya kulakazwa hamwe na nhambiko yake ya nyhule na nhambiko yake ya chakunwa.
NUM 29:26 “Zuwa lya kahano, molavya mibuguma tisa na ming'holo milume mili na ming'holo myana milume kumi na jine ja mwaka umwe jilihela nongwa yoneche.
NUM 29:27 Molavya kahi nhambiko ya nyhule na nhambiko za chakunwa hamwe na mibuguma na ming'holo na ming'holo milume myana kota vyoilajizwe.
NUM 29:28 Molavya kahi ipongo limwe kwa nhambiko ya gehile ne kuwaza yila nhambiko ya chila zuwa ya kulakazwa hamwe na nhambiko yake ya nyhule na nhambiko yake ya chakunwa.
NUM 29:29 “Zuwa lya sita, molavya mibuguma nane na ming'holo milume mili na ming'holo myana milume kumi na jine ja mwaka umwe jiwele jilihela nongwa yoneche.
NUM 29:30 Molavya kahi nhambiko ya nyhule na nhambiko za chakunwa hamwe na ajo mibuguma na ming'holo milume na ming'holo myana kota vyoilajizwe.
NUM 29:31 Molavya kahi ipongo limwe lya nhambiko ya gehile hamwe na nhambiko ya kulakazwa na nhambiko yake ya nyhule na nhambiko zake za chakunwa.
NUM 29:32 “Zuwa lya saba, molavya mibuguma saba na ming'holo milume mili na ming'holo myana milume kumi na jine ja mwaka umwe, jilihela nongwa yoneche.
NUM 29:33 Molavya kahi nhambiko ya nyhule na nhambiko za chakunwa hamwe na ajo mibuguma na ming'holo milume na ming'holo myana kwa winji wa hewo kota vyoilajizwe.
NUM 29:34 Molavya kahi ipongo limwe kwa nhambiko ya gehile ne kuwaza yila nhambiko ya kulakazwa ya chila zuwa, hamwe na nhambiko yake ya nyhule na nhambiko yake ya chakunwa.
NUM 29:35 “Zuwa lya nane, mowa na nhing'hano ng'hulu. Mleche kukola mijito zuwa alyo.
NUM 29:36 Ila molavya nhambiko ya kulakazwa, nhambiko yalingulavilwa Mkulu Nguluwi kwa chiluli, na unhunyhililo unojile ulingumnojeza Mkulu Nguluwi, ibuguma limwe na ing'holo ilume limwe na ming'holo myana milume saba ja mwaka umwe jilihela nongwa yoneche.
NUM 29:37 Molavya kahi nhambiko ya nyhule na nhambiko za chakunwa hamwe na alyo ibuguma na ing'holo ilume na jila ming'holo myana kwa winji wa migongolo kota vyoilajizwe.
NUM 29:38 Hamba kahi molavya ipongo limwe kwa nhambiko ya gehile ne kuwaza yila nhambiko ya chila zuwa ya kulakazwa hamwe na nhambiko yake ya nyhule na nhambiko yake ya chakunwa.
NUM 29:39 “Aga ndo malajizo galinguwala nhambiko za kulakazwa na nhambiko za nyhule na nhambiko za chakunwa na nhambiko za kikala goya zomlingumlavila Mkulu Nguluwi mhela wa mnvina za hemwe zoziwichigwe. Ne kuwaza nhambiko azo ziwele momlavila Mkulu Nguluwi kweneza kilaha kwa hemwe na nhambiko za hemwe za kunuwila.”
NUM 29:40 Lelo Musa nakawalonjela Waisilaeli chila chinhu kota Mkulu Nguluwi navyoyamlajize.
NUM 30:1 Hamba, Musa nakalongasa na vilongozi wa nhanzi za Isilaeli, nakawalonjela, “Awu ndo ulonzi woyalonjile Mkulu Nguluwi.
NUM 30:2 “Wone munhu yochilaha kwa Mkulu Nguluwi ama kiwika milagano kwa chilaho, imgana yeneze kilagana kwa heye, na imgana kahi yagakolele mijito gala geng'ha goyalonjile heye.
NUM 30:3 “Mhinza yawele yang'hali mbaka sambi kangikala haluga ha mhaza wa heye, yochilaha kwa Mkulu Nguluwi ama kiwika milagano,
NUM 30:4 na wone mhaza wa heye nakahulika kiwika milagano, wone yoleka kumlemeza, lelo vilaho vya heye vyoyawichile vyopona bahala na kulagana kwa heye kahi kopona bahala.
NUM 30:5 Ila wone mhaza wa heye yohulika kilaha ako, na yomlemeza, lelo kilaha kwa heye na kulagana kwa heye hambe vipone bahala. Mkulu Nguluwi komlechela kwa vila mhaza wa heye nakalemeza mbuli ayo.
NUM 30:6 “Wone mhinza ayo kohesigwa hala du nahoyalahile na kulagana ne kijesa goya tandi na kiwika heye yuye milagano,
NUM 30:7 hamba mlume wa heye yahuliche chilaho acho na wone yaleche kumlemeza, lelo kilaha kwa heye kopona bahala na kulagana kwa heye kahi kopona bahala.
NUM 30:8 Ila wone mlume wa heye yahuliche chilaho acho na wone yamlemeze, lelo ayo mlume wa heye kokusa chilaho cha mchewake na ulonzi wa heye woyaulavile ne kujesa goya, na Mkulu Nguluwi komlechela.
NUM 30:9 “Ila kilaha ama kulagana koneche koyawichile mdala yafililwe na mlume wa heye ama mdala yapegwe luleko, ahyo chilaho ama kulagana kwa ayo mdala vyopona bahala.
NUM 30:10 “Wone mdala yahesigwe yochilaha ama kulagana kwa kilaha kuno yawele haluga ha mlume wa heye,
NUM 30:11 hamba wone mlume wa heye yahuliche mbuli ayo ila wone yaleche kumlemeza ne kumlonjela chinhu, lelo chilaho cha heye cheng'ha chopona bahala na kulagana kwa heye kweng'ha kahi kopona bahala.
NUM 30:12 Ila wone mlume yahuliche mbuli za heye, hamba yazileme, lelo hambe yaganigwe kugongomanyiza kilaha ama kulagana kwa heye, haimganile kweneza, mlume wa heye nakazilemeza na Mkulu Nguluwi komlechela mdala ayo.
NUM 30:13 Mlume wa heye koweza kutawiza ama kulemeza kilaha ama kulagana koneche kula.
NUM 30:14 Ila wone mlume wa heye hambe yalonje chinhu choneche chila kulawa zuwa lyoyohulika mbuli za kilaha ama kulagana kwa mdala wa heye, lelo mlume ayo kowa nakatawiza chilaho na kulagana ako.
NUM 30:15 Ila wone yolemeza mhela umwenga loyahuliche mbuli za heye, lelo heye mlume kowa na nongwa kwa chiwalo cha mchewake.”
NUM 30:16 Aga ndo malajizo gawele Mkulu Nguluwi nayamlajize Musa kwa chiwalo cha mdala na mlume wa heye na mhaza na mhinza wa heye, wone mhinza ayo yawe yang'hali kwalama na kangikala kwa mhaza wa heye.
NUM 31:1 Mkulu Nguluwi nakalongasa na Musa, nakamlonjela,
NUM 31:2 “Wahilulile chibida Wamidiani kwa mbuli zowawaditile Waisilaeli, hamba hegwe kobagama.”
NUM 31:3 Lelo Musa nakalongasa na wamizi, nakawalonjela, “Muwawiche goya wanhu walume walute kuza kitowa ngondo na Wamidiani kuwahilulila chibida kwa chiwalo cha Mkulu Nguluwi.
NUM 31:4 Kulawila chila nhanzi ya Isilaeli, mohilika wamizi elufu imwe kuli kitowa ngondo.”
NUM 31:5 Lelo wamizi elufu imwe nawalavigwa kulawila chila nhanzi hali wanhu wa maelufu ya Waisilaeli, walume wawichigwe goya kitowa ngondo nawali elufu kumi na mbili (12,000).
NUM 31:6 Musa nakawahilika kuli kitowa ngondo hali ulongozi wa Finehasi mwana wa mtambika Eleasali, yawele na vinhu vya honhu helile na mhalamhanda za kulajila ulajilo.
NUM 31:7 Nawaitowa isi ya Midiani, kota Mkulu Nguluwi vyoyamlajize Musa, nawawakopola walume weng'ha.
NUM 31:8 Hali wanhu awo wakopoligwe, nakwali na wandewa wahano wa Midiani, Evi na Lekemu na Suli na Huli na Leba. Vivila nawamkopola Balaamu mwana wa Beoli.
NUM 31:9 Waisilaeli nawawahola wadala wa Midiani na wana wa hewo na misenga na ming'holo na lufufu lwa hewo lweng'ha.
NUM 31:10 Miji ja hewo jeng'ha na howalingikala hewo heng'ha nawahalakaza heng'ha kwa chiluli.
NUM 31:11 Nawahola vinhu vyeng'ha hamwe na wanhu na migongolo,
NUM 31:12 hewo nawawegala wanhu na migongolo na vinhu vyeng'ha na kuviwika hali Musa na mtambika Eleasali na hali Waisilaeli weng'ha aho hawele na kambi kuli isi iwele na ibalalika lya Moabu, hawele habehi na lwanda lwa Yolodani ilingilola na Yeliko.
NUM 31:13 Musa na mtambika Eleasali na vilongozi weng'ha wa Waisilaeli weng'ha nawalawa kuli kambi, nawaluta kuwabochela wamizi.
NUM 31:14 Musa nakazudizwa na wakulu wa wamizi na wamizi wemilile vilundo vya wamizi maelufu menji na vilundo vya wamizi mamiya ga wowahiluche kulawa kitowa ngondo.
NUM 31:15 Musa nakawauza, “Lekachoni namuwaleka wadala awa weng'ha wawele wakomu?
NUM 31:16 Mkumbuchile kota wadala ndo wawinzile ulonzi wa Balaamu, nawawambuza Waisilaeli wamleme Mkulu Nguluwi kula Peoli mbaka matamwa gehile nagawoyela Waisilaeli weng'ha wa heye Mkulu Nguluwi.
NUM 31:17 Ahyo lelo, muwakopole wana weng'ha walume na chila mdala yawele nakawasa na mlume.
NUM 31:18 Ila mleche kuwakopola wahinza weng'ha wawele hawanawasa na mlume, muwaleche wawele wakomu kwa chiwalo cha hemwe mwemwe.
NUM 31:19 Wala weng'ha wawele hali hemwe wawele nawakopole munhu ama kudoliza mtufi yanguwalapa wekale kunze mwa kambi kwa mhela wa mazuwa saba, weyelize hamwe na Wamidiani wa hemwe kuli zuwa lya kadatu na zuwa lya saba.
NUM 31:20 Iwagana kahi welize chila ivalo na chila chinhu chigongomanyigwe kwa igozi na kwa milaika ja mhene ama kwa igodi.”
NUM 31:21 Mtambika Eleasali nakawalonjela walume wahiluche kulawila kuli kitowa ngondo, “Ali ndo ilajizo liwele Mkulu Nguluwi nalyoyampele Musa.
NUM 31:22 Zahabu na sendi na shaba na chuma na bati na madini galinguchemigwa lisasi,
NUM 31:23 ndo vinhu vyeng'ha viwele vilingwimilila chiluli, vyokwelizwa kwa kuvikoleza kuli chiluli. Ahyo, yanguganigwa kahi vyelizwe na mazi ga kweliza. Vinhu viyage vyeng'ha vila vyohambe vimilile chiluli vyokwelizwa kwa mazi ga kweliza.
NUM 31:24 Zuwa lya saba yangukulapa mhovuje mivalo ja hemwe, ndo vyomuwa mwelile na kukundigwa kwinjila kuli kambi.”
NUM 31:25 Mkulu Nguluwi nakalongasa na Musa, nakamlonjela,
NUM 31:26 “Hegwe na mtambika Eleasali, hamwe na vilongozi wa ng'holo za nhanzi ya Waisilaeli, muwaze vinhu navyomholile kuli ngondo na Waisilaeli weng'ha na migongolo.
NUM 31:27 Mgawe vinhu avyo kuli vilundo vili, chilundo cha mwaluko ndo cha wamizi walutile kuli kitowa ngondo na chilundo chiyage kwa chiwalo cha Waisilaeli weng'ha.
NUM 31:28 Ila kwa chila chilundo cha wamizi walutile kuli kitowa ngondo, ubagule ndolendole kwa chiwalo cha Mkulu Nguluwi. Chinhu chimwe kulawila kuli vinhu miya zihano, wawe wanhu ama isenga ama idogowi ama ing'holo ama mhene,
NUM 31:29 umhe mtambika Eleasali iwe ndolendole kwa Mkulu Nguluwi.
NUM 31:30 Kulawila kuli chilundo cha nhanzi yeng'ha ya wanhu wa Isilaeli, uhole honhu hamwe ha chila makumi gahano, wawe wanhu ama misenga ama midogowi ama ming'holo ama mhene. Ahyo mowapa Walawi wawele walinguganigwa kukola mijito kuli ihema lya Mkulu Nguluwi.”
NUM 31:31 Musa na mtambika Eleasali nawadita kota Mkulu Nguluwi vyoyamlajize Musa.
NUM 31:32 Vinhu navyowaholile kuli ngondo, navyali, ming'holo lachi sita na elufu makumi saba na zihano (675,000)
NUM 31:33 na misenga elufu makumi saba na mbili (72,000)
NUM 31:34 na midogowi elufu makumi sita na imwe (61,000)
NUM 31:35 na wadala wawele hawanating'hana na mlume elufu makumi gadatu na mbili (32,000).
NUM 31:36 Nusu yake, honhu hawele habaguligwe na wamizi walutile kuli ngondo, nayali ming'holo lachi zidatu na elufu makumi gadatu na saba na miya zihano (337,500),
NUM 31:37 kuli awo miya sita na makumi saba na wahano (675) walavigwe kwa Mkulu Nguluwi.
NUM 31:38 Misenga ja wamizi wa ngondo najali elufu makumi gadatu na sita (36,000), na kuli ajo makumi saba na mili (72) najilavigwa ndolendole kwa Mkulu Nguluwi.
NUM 31:39 Midogowi ajo najali elufu makumi gadatu na miya zihano (30,500) na kuli ajo makumi sita na imwe (61) najilavigwa ndolendole kwa Mkulu Nguluwi.
NUM 31:40 Wanhu nawali elufu kumi na sita (16,000), na hali awo honhu ha Mkulu Nguluwi nahali wanhu makumi gadatu na mbili (32).
NUM 31:41 Lelo Musa nakamha mtambika Eleasali ndolendole ayo ilavigwe kwa Mkulu Nguluwi, kota Mkulu Nguluwi vyoyamlajize Musa.
NUM 31:42 Nusu ya keli yowapegwe Waisilaeli, iwele Musa nayaibagule kulawa yila nusu yowapegwe wamizi walutile kuli kitowa ngondo,
NUM 31:43 najali ming'holo lachi zidatu na elufu makumi gadatu na saba na miya zihano (337,500)
NUM 31:44 na misenga elufu makumi gadatu na sita (36,000)
NUM 31:45 na midogowi elufu makumi gadatu na miya zihano (30,500)
NUM 31:46 na wanhu elufu kumi na sita (16,000).
NUM 31:47 Kulawa nusu ayi yowapegwe Waisilaeli, Musa nakamhola yumwe kuli chila Wamidiani makumi gahano na migongolo makumi gahano, kota vyoyalonjelwe na Mkulu Nguluwi, nakawapa Walawi wawele wokola mijito ja ihema lya Mkulu Nguluwi.
NUM 31:48 Hamba wakulu wawele hali vilundo vya awo wamizi na vilongozi wa maelufu ga awo wamizi na vilongozi wa mamiya ga awo wamizi, nawamlutila Musa,
NUM 31:49 nawamlonjela, “Vitumagwa wa hegwe natuwawaza wamizi weng'ha nawawele hali ulongozi wa hetwe natona kota kuduhu ne yumwe wa hewo yawele haduhuli.
NUM 31:50 Lelo natigala vinhu vya zahabu na banjili na banjili zilivinji na pete za muhuli na vipuli na ugasi viwele chila munhu nakafichigwa navyo. Natuvilavya leka hetwe tuditilwe uhanyisi wa ukomu wa hetwe, hali Mkulu Nguluwi.”
NUM 31:51 Musa na mtambika Eleasali nawabochela vinhu vyeng'ha vinoligwe kwa zahabu.
NUM 31:52 Zahabu yeng'ha yowamlavile Mkulu Nguluwi nayali kota kilo miya mbili.
NUM 31:53 Chila mwamizi yohawele chilongozi, nahalavile vinhu vya heye yuye kwa Mkulu Nguluwi.
NUM 31:54 Lelo Musa na mtambika Eleasali nawabochela zahabu ayo kulawa kwa vilongozi na kuihilika kuli ihema lya Nguluwi, leka Mkulu Nguluwi yawakumbuche Waisilaeli.
NUM 32:1 Nhanzi ya Lubeni na Gadi nayali na migongolo ja kufujigwa minji ng'hatu. Lelo vyowawene kota honhu ha Yaseli na Gileadi nahali hanojile kwa migongolo ja kufujigwa,
NUM 32:2 nawawalutila Musa na mtambika Eleasali na vilongozi wa Waisilaeli weng'ha, nawawalonjela,
NUM 32:3 “Miji ja Ataloti na Diboni na Yaseli na Nimula na Heshiboni na Eleale na Sebamu na Nebo na Beoni,
NUM 32:4 isi iwele Mkulu Nguluwi nayaisumile kwa chiwalo cha Waisilaeli weng'ha, ndo isi inojile kwa migongolo ja kufujigwa, natwe twanajo migongolo minji ng'hatu.
NUM 32:5 Lelo wone mtukunde twanguwalanda uganililo leka mtupe isi ayi iwe ya hetwe, mleche kutuhilika kumwambu mwa lwanda lwa Yolodani.”
NUM 32:6 Musa nakawalonjela wanhu wa nhanzi za Gadi na Lubeni, “Ndaze, mwangugana kusigala hano kuno wang'holozenu Waisilaeli wanguluta kuli ngondo?
NUM 32:7 Lekachoni mwanguwadita Waisilaeli wagozole na waleche kuka kuli isi iwele nawapegwe na Mkulu Nguluwi?
NUM 32:8 Ahyo ndo navyowaditile wasekulu wa hemwe londiwalajize kulawa Kadeshi-balineya kuipugajiza isi.
NUM 32:9 Hewo nawaluta mbaka hali ibindi lya Eshikoli, nawayona isi, ila nalowahiluche, nawawadita Waisilaeli wagozole leka waleche kwinjila kuli isi yowapegwe na Mkulu Nguluwi.
NUM 32:10 Mkulu Nguluwi nakazudila ng'hatu zuwa alyo, nakelaha yolonga,
NUM 32:11 ‘Ndangukomya, haduhu munhu yoneche hali wanhu walawile Misili yawele na miyaka makumi meli na mzidi yawele koyona isi yondilahile kota ndowapa Abulahamu na Isaka na Yakobo, kwa vila hambe wanyhulichize goya.
NUM 32:12 Weng'ha hawoyona ila Kalebu mwana wa Yefune, Mkenisi, na Yoshua mwana wa Nuni, mina hewo nawanyhulichiza goya heni Mkulu Nguluwi.’
NUM 32:13 Mkulu Nguluwi nakawazudila ng'hatu Waisilaeli, nakawadita wawe wolubaluba kuchiwala kwa mhela wa miyaka makumi gane, lulelo lweng'ha luditile wihe hali heye, nalubagama.
NUM 32:14 Lelo hemwe lulelo lwa wawele na gehile, namuya honhu ha wasekulu wa hemwe, konjeza ng'hatu kahi ng'halazi ya Mkulu Nguluwi kwa Waisilaeli.
NUM 32:15 Wone hemwe molema kumuwinza, heye kowaleka kahi kuchiwala na mokwambuza kubagama kwa wanhu wano weng'ha.”
NUM 32:16 Lelo nawamlutila Musa, nawamlonjela, “Utukundize tandi tujizenjele mibani ming'holo ja hetwe na miji kwa chiwalo cha wana wa hetwe.
NUM 32:17 Ila hetwe tochiwika goya kwa ngondo kuka na wang'holozetu Waisilaeli na towa msitali wa kumwando kuli kitowa ngondo mbaka tuwahiliche hala honhu howochikala. Mhela awo wana wa hetwe wochikala kuli muji uwele na ngome, leka weyamile na wenyeng'haye wa isi ayi.
NUM 32:18 Hambe tuhiluche haluga mbaka aho Waisilaeli wanji weng'ha howowa na honhu hawo howohalila.
NUM 32:19 Hatuwa na honhu choneche hali hewo kolizinjilaga isanya mwa lwanda lwa Yolodani, kwa vila hetwe natupegwa honhu hetu ubanzi awu, kolilawilaga isanya mwa Yolodani.”
NUM 32:20 Musa nakawalonjela, “Wone ndo mkomya modita kota navyomlonjile, lelo baha hali Mkulu Nguluwi, miwiche goya kuza kitowa ngondo.
NUM 32:21 Chila yumwe wa hemwe yawichigwe goya kitowa ngondo, koloka lwanda lwa Yolodani kuno yawele kuli ulongozi wa Mkulu Nguluwi, mowatowa wang'honyo wa hemwe mbaka Mkulu Nguluwi hoyowawinga wang'honyo wa heye hali heye
NUM 32:22 na kuihola isi. Lomdita ago, mohiluka, mina mowa mgongomanyiza chomlinguganigwa kudita kwa Mkulu Nguluwi na wang'holozenu Waisilaeli. Na isi ayi yowa ya hemwe hali Mkulu Nguluwi.
NUM 32:23 Ila ndanguwakanya kota wone hamgongomanyize kulagana kwa hemwe, mowa mumditila gehile Mkulu Nguluwi, na mvizele ng'hatu kota mogazigwa.
NUM 32:24 Mzenje miji kwa chiwalo cha wana wa hemwe na mibani kwa chiwalo cha ming'holo ja hemwe, ila mdite kota navyomlagane.”
NUM 32:25 Hamba, wanhu wa Gadi na wa Lubeni nawamlonjela Musa, “Mkulu, hetwe twa vitumagwa wa hegwe na todita kota vyoulonjile.
NUM 32:26 Wadala wa hetwe na wana wa hetwe na ming'holo ja hetwe na misenga ja hetwe, vyopona baha kuli miji ja Gileadi.
NUM 32:27 Ila hetwe vitumagwa wa hegwe tuwichigwa goya kitowa ngondo hali ulongozi wa Mkulu Nguluwi. Toloka lwanda lwa Yolodani kitowa, kota vyoulonjile.”
NUM 32:28 Lelo Musa nakalonga hino kwa mtambika Eleasali na kwa Yoshua mwana wa Nuni na kwa vilongozi wa nhanzi za Waisilaeli,
NUM 32:29 “Wone wanhu wa Gadi na wa Lubeni woloka lwanda lwa Yolodani hamwe na hemwe wawele wawichigwe goya kitowa ngondo hali ulongozi wa Mkulu Nguluwi, isi hoyosumya, mowapa isi ya Gileadi iwe ya hewo.
NUM 32:30 Ila wone hawoloka lwanda lwa Yolodani hamwe na hemwe wawichigwe goya kitowa ngondo, lelo honhu ha isi ya Kanaani yowa ya hewo na yowa ya hemwe kahi.”
NUM 32:31 Wanhu wa Gadi na Lubeni nawedichila, “Hetwe todita kota Mkulu Nguluwi navyoyatulonjele, hetwe vitumagwa wa hegwe.
NUM 32:32 Hali ulongozi wa Mkulu Nguluwi, toloka kuno tuwichigwe goya kitowa ngondo mbaka isi ya Kanaani, yila isi yotupegwe hano kolilawilaga isanya mwa Yolodani yowa ya hetwe.”
NUM 32:33 Lelo Musa nakawapa isi yeng'ha ya mndewa Sihoni wa Waamoli na isi ya mndewa Ogu wa Bashani hamwe na miji ja honhu hawele hafungo mwa miji ajo, wanhu wa nhanzi za Gadi na Lubeni na nusu ya nhanzi ya Manase mwana wa Yusufu.
NUM 32:34 Nhanzi ya Gadi naizenga miji ja Diboni na Ataloti na Aloeli
NUM 32:35 na Atiloti-shofani na Yaseli na Yogubeha
NUM 32:36 na Beti-nimula na Beti-halani, miji jiwele na ngome na mibani ja ming'holo.
NUM 32:37 Nhanzi ya Lubeni naizenga miji ja Heshiboni na Eleale na Kiliataimu
NUM 32:38 na Nebo na Baali-meoni na Sibuma. Hamba matagwa ga miji ajo nagagaluswa na kupegwa matagwa ganji kahi, matagwa ga wala wazenjile miji ajo.
NUM 32:39 Walelwa wa Makili mwana wa Manase, nawaitowa isi ya Gileadi, nawaihola na kuwawinga Waamoli wowawele wochikala amo.
NUM 32:40 Ahyo, Musa nakawapa isi ya Gileadi wanhu wa lukolo lwa Makili mwana wa Manase, na hewo nawekala amo.
NUM 32:41 Yaili wa nhanzi ya Manase, nakavitowa vijiji vya Gileadi na kuvihola, nakavichema itagwa lya Hawoti-yaili.
NUM 32:42 Na heye Noba nakaitowa na kuihola isi ya Kenati na vijiji vyake nakahachema Noba, itagwa lya heye yuye.
NUM 33:1 Azi ndo kambi zowafichile Waisilaeli, nawawika kambi walawile Misili kuno wawele kuli vilundo vya nhanzi za hewo, kuli ulongozi wa Musa na Aluni.
NUM 33:2 Musa nakandika itagwa lya chila honhu howawichile kambi, honhu hamwe mbaka honhu hanji, kwa ilajizo lya Mkulu Nguluwi.
NUM 33:3 Waisilaeli nawoka kuli muji uchemigwe Lamesesi kuli zuwa lya kumi na zihano lya mwezi wa mwaluko, zuwa limwe loimalile Pasaka ya mwaluko. Nawoka kwa nhumbula zikangale hali Wamisili weng'ha,
NUM 33:4 wawele wawatilile walelwa wa hewo wa mwaluko walume nawakopoligwe na Mkulu Nguluwi, Mkulu Nguluwi nayali yajigazile mbaka milungu ja hewo.
NUM 33:5 Lelo Waisilaeli nawoka Lamesesi, nawawika kambi ya hewo ako Sukoti.
NUM 33:6 Kulawila Sukoti, nawawika kambi ya hewo ako Etamu, hafungo ha chiwala.
NUM 33:7 Kulawila Etamu, nawahinduka na kuhiluka mbaka Pi-hahiloti, kolilawilaga isanya ya Baali-sefoni, nawawika kambi ya hewo habehi na Migidoli.
NUM 33:8 Nawoka Pi-hahiloti, nawakola Bahali ya Shamu mbaka kuchiwala ako Etamu, nawali mmajendo ako kuchiwala kwa utali wa kujenda mazuwa gadatu, nawawika kambi ya hewo ako Mala.
NUM 33:9 Kulawila Mala, nawaluka majendo mbaka Elimu, ako Elimu nakwali na nzasa kumi na mbili za mazi na mitende makumi saba, nawawika kambi ya hewo honhu aho.
NUM 33:10 Nawali mmajendo kulawila Elimu, nawawika kambi ya hewo habehi na Bahali ya Shamu.
NUM 33:11 Kulawila Bahali ya Shamu nawawika kambi ya hewo kuli chiwala ako Sini.
NUM 33:12 Kulawila kuli chiwala ako Sini, nawawika kambi ya hewo Dofuka.
NUM 33:13 Kulawila Dofuka nawawika kambi ya hewo ako Alushi.
NUM 33:14 Kulawila Alushi nawawika kambi ya hewo ako Lefidimu, hawele nakwali haduhu mazi ga kunwa.
NUM 33:15 Nawoka Lefidimu nawawika kambi ya hewo kuli chiwala ako Sinai.
NUM 33:16 Kulawila kuli chiwala ako Sinai nawawika kambi ya hewo ako Kibuloti-hataava.
NUM 33:17 Kulawila Kibuloti-hataava, nawawika kambi ya hewo Haseloti.
NUM 33:18 Kulawila Haseloti, nawawika kambi ya hewo ako Litima.
NUM 33:19 Kulawila Litima, nawawika kambi ya hewo ako Limoni-pelesi.
NUM 33:20 Kulawila Limoni-pelesi, nawawika kambi ya hewo ako Libuna.
NUM 33:21 Kulawila Libuna nawawika kambi ya hewo Lisa.
NUM 33:22 Nawoka Lisa, nawawika kambi ya hewo ako Kehelata.
NUM 33:23 Kulawila Kehelata, nawawika kambi ya hewo mchidunda cha Shefeli.
NUM 33:24 Kulawa mchidunda cha Shefeli nawawika kambi ya hewo ako Halada.
NUM 33:25 Kulawila Halada, nawawika kambi ya hewo ako Makeloti.
NUM 33:26 Kulawila Makeloti, nawawika kambi ya hewo ako Tahati.
NUM 33:27 Kulawila Tahati nawawika kambi ya hewo Tela.
NUM 33:28 Kulawila Tela nawawika kambi ya hewo Mitika.
NUM 33:29 Kulawila Mitika, nawawika kambi ya hewo Hashimona.
NUM 33:30 Kulawila Hashimona, nawawika kambi ya hewo Moseloti.
NUM 33:31 Kulawila Moseloti, nawawika kambi ya hewo Bene-yaakani.
NUM 33:32 Kulawila Bene-yaakani, nawawika kambi ya hewo Holi-hagidigadi.
NUM 33:33 Kulawila Holi-hagidigadi, nawawika kambi ya hewo Yotibata.
NUM 33:34 Kulawila Yotibata, nawawika kambi ya hewo Abulona.
NUM 33:35 Kulawila Abulona, nawawika kambi ya hewo Esioni-gebeli.
NUM 33:36 Nawoka Esioni-gebeli, nawaluka majendo na kuwika kambi ya hewo kuli chiwala ako Sini, kuwele ndo Kadeshi.
NUM 33:37 Kulawila Kadeshi, nawawika kambi ya hewo kuchidunda cha Holi, kuli mbaka wa isi ya Edomu.
NUM 33:38 Kwa ilajizo lya Mkulu Nguluwi mtambika Aluni nakakwina mchanya mwa chidunda cha Holi, na nakabagama zuwa lya mwaluko lya mwezi wa kahano, mwaka wa makumi gane kulawa Waisilaeli lowalawile kuli isi ya Misili.
NUM 33:39 Aluni nayali na miyaka miya imwe na makumi meli na gadatu (123) hoyabagame mchanya mwa chidunda cha Holi.
NUM 33:40 Mndewa wa Aladi, Mkanaani, nayawele yochikala Negebu kuli isi ya Kanaani nakahulika kota Waisilaeli nawali wokuya.
NUM 33:41 Kulawila kuchidunda cha Holi, Waisilaeli nawawika kambi ya hewo Salimona.
NUM 33:42 Kulawila Salimona, nawawika kambi ya hewo ako Punoni.
NUM 33:43 Kulawila Punoni, nawawika kambi ya hewo ako Oboti.
NUM 33:44 Kulawila Oboti, nawawika kambi ya hewo ako Iye-Abalimu, kuli honhu ha Moabu.
NUM 33:45 Kulawila Iye-Abalimu, nawawika kambi ya hewo ako Diboni-gadi.
NUM 33:46 Kulawila Diboni-gadi, nawaluka majendo na kuwika kambi ya hewo ako Alimoni-dibulataimu.
NUM 33:47 Kulawila Alimoni-dibulataimu, nawaluka majendo na kuza kuwika kambi ya hewo kuli vidunda vya Abalimu, habehi na chidunda cha Nebo.
NUM 33:48 Kulawa kuli vidunda vya Abalimu, nawaluka majendo na kuza kuwika kambi ya hewo kuli ibalalika lya Moabu kumwambu mwa lwanda lwa Yolodani ilingililola na Yeliko.
NUM 33:49 Nawawika kambi ayo habehi na lwanda lwa Yolodani hali Beti-yeshimoti na ibindi lya Abeli-shitimu kuwele na ibalalika lya Moabu.
NUM 33:50 Kuli ibalalika lya Moabu, kumwambu mwa lwanda lwa Yolodani ilingilola na Yeliko, Mkulu Nguluwi nakamlonjela Musa,
NUM 33:51 “Walonjele Waisilaeli kota homloka lwanda lwa Yolodani na kwinjila kuli isi ya Kanaani,
NUM 33:52 muwawinje wenyeng'haye weng'ha wa isi ayo hali hemwe. Mowifya jimalukolo ja hewo jeng'ha ja maganga na jimalukolo ja chuma na kubomola chila honhu hawo ha kulanda milungu.
NUM 33:53 Moihola isi ayo na kikala amo kwa vila ndiwapani iwe ya hemwe.
NUM 33:54 Moigawanula isi ayo kwa kutowa simbi kwa kuwinza winji wa ivyazi lya hemwe, honhu hakulu ndo ha nhanzi ng'hulu na honhu hadodo ndo kwa nhanzi ndodo.
NUM 33:55 Ila wone hamuwawinjile wenyeng'haye wa isi ayo tandi, lelo awo wawele mowaleka wowa kota vibanzi kumeho henu ama miwa chila ubanzi, na wowagazani.
NUM 33:56 Nani ndowaditani hemwe kota vyonjesile kuwadita hewo.”
NUM 34:1 Mkulu Nguluwi nakamlonjela Musa,
NUM 34:2 “Walonjele Waisilaeli ulonga kota homkwinjila Kanaani, isi iwele ndanguwapa iwe ya hemwe, mbaka ja honhu ha hemwe heng'ha jowa kota vyoili.
NUM 34:3 Ubanzi wa kusini mbaka wa hemwe wowa kulawila kuchiwala ako Sini kukolela ubanzi wa Edomu. Wokwaluchila kolizinjilaga isanya ubanzi wa kusini koidumile Bahali ya Mwino.
NUM 34:4 Hamba wokolela kusini kuluta kula Akilabimu na kukolela Sini mbaka Kadeshi-balineya, ubanzi wa kusini. Kulawila aho, mbaka wokola mbaka Hasali-adali na kuza mbaka Asimoni.
NUM 34:5 Kulawila Asimoni wokola kuza kuli kalwanda ka Misili kuwele na mbaka wa Misili na kumalila kuli bahali ya Mediteleniyani.
NUM 34:6 “Mbaka wa hemwe wa ubanzi wa kolizinjilaga isanya wowa bahali ya Mediteleniyani.
NUM 34:7 “Mbaka wa hemwe wa ubanzi wa kasikazini wowa kota ahi, kulawa bahali ya Mediteleniyani, wogoloka kulutilila mbaka kuli chidunda cha Holi.
NUM 34:8 Kulawila chidunda cha Holi, wogoloka kulutilila mbaka Hamati na kulutilila mbaka ako Sedadi
NUM 34:9 na kukola mbaka Sifuloni na kumalila Hasali-enani, awo ndo wowa mbaka wa hemwe, ubanzi wa kasikazini.
NUM 34:10 “Mbaka wa hemwe ubanzi wa kolilawilaga isanya mouwika kulawila Hasali-enani mbaka Shefamu.
NUM 34:11 Kulawila Shefamu wogoloka kulutilila kusini mbaka Libula, kolilawilaga isanya kwa Aini, hamba mbaka awo woluta hasi mbaka kidulika kwa kolilawilaga isanya kwa ilamba lya Galilaya,
NUM 34:12 hamba wowinza lwanda lwa Yolodani mbaka Bahali ya Mwino. Ayo ndo yowa isi ya hegwe kota mbaka vyouli.”
NUM 34:13 Lelo Musa nakawalajiza Waisilaeli, “Ayi ndo isi yomuihalila kwa kutowa simbi, isi iwele Mkulu Nguluwi nakalajiza zipegwe nhanzi tisa na nusu.
NUM 34:14 Nhanzi ya Lubeni na ya Gadi, na nusu ya nhanzi ya Manase zipegwa uhalizi wa hewo kwa kiwhana na winji wa ivyazi lya hewo.
NUM 34:15 Nhanzi azo mbili na nusu nazipegwa uhalizi wa hewo kumwambu mwa lwanda lwa Yolodani ubanzi ya kolilingulawila isanya, habehi na Yeliko.”
NUM 34:16 Mkulu Nguluwi nakamlonjela Musa,
NUM 34:17 “Mtambika Eleasali na Yoshua mwana wa Nuni ndo wowagawila wanhu isi, iwe ya hewo.
NUM 34:18 Kohola kahi chilongozi yumwe kulawila chila nhanzi kukutanza kuli kugawanula isi.
NUM 34:19 Aga ndo matagwa ga hewo. “Kulawila nhanzi ya Yuda, nayali Kalebu mwana wa Yefune.
NUM 34:20 Kulawila nhanzi ya Simeoni, nayali Shemueli mwana wa Amihudi.
NUM 34:21 Kulawila nhanzi ya Benjamini, nayali Elidadi mwana wa Kisiloni.
NUM 34:22 Kulawila nhanzi ya Dani, nayali Buki mwana wa Yoguli.
NUM 34:23 Kulawila nhanzi ya Manase mwanage Yusufu, nayali Hanieli mwana wa Efodi.
NUM 34:24 Kulawila nhanzi ya Efulaimu, mwanage Yusufu, nayali Kemueli mwana wa Shifutani.
NUM 34:25 Kulawila nhanzi ya Sebuluni, nayali Elisafani mwana wa Palinaki.
NUM 34:26 Kulawila nhanzi ya Isakali, nayali Palitieli mwana wa Asani.
NUM 34:27 Kulawila nhanzi ya Asheli, nayali Ahihudi mwana wa Shelomi.
NUM 34:28 Kulawila nhanzi ya Nafutali, nayali Pedaheli mwana wa Amihudi.”
NUM 34:29 Awa ndo wanhu wawele Mkulu Nguluwi nakawahagula wawagawile Waisilaeli isi ya Kanaani iwe ya hewo.
NUM 35:1 Mkulu Nguluwi nakalongasa na Musa kuli ibalalika lya Moabu, kumwambu mwa lwanda lwa Yolodani ilingilola na Yeliko, nakamlonjela,
NUM 35:2 “Walonjele Waisilaeli kota uhalizi wowawele nawo, wawagawile Walawi miji ja kikala na honhu ha kudimila migongolo hafungo ha miji ajo.
NUM 35:3 Miji ajo jowa ja hewo, na hewo wochikala amo na honhu ha kudimila migongolo howa ndo kwa chiwalo cha misenga hamwe na migongolo ja hewo jiyage.
NUM 35:4 Honhu ha kudimila homuwapa Walawi hafungo ha muji hokwenela chila ubanzi utali wa mita miya zine na makumi gahano kulawila kuli lukanzi lwa muji awo.
NUM 35:5 Ahyo, honhu aho ha kudimila migongolo howa ha mita miya tisa, na hokwenela chila ubanzi, muji awo wowa hagati. Honhu aho howa ha kudimila hewo hafungo ha miji ajo.
NUM 35:6 Mowagawila Walawi miji sita ja kubilimila, hawele wone munhu yamkopole miyage ne kunuwila, kokundizwa kubilimila ako. Hamwe na ago, mowapa kahi miji jiyage makumi gane na mbili.
NUM 35:7 Miji jomuwapa Walawi jowa makumi gane na nane hamwe na honhu hake ha kudimila.
NUM 35:8 Miji jomuwapa Walawi kuli uhalizi wa Waisilaeli jiwhane na ukulu wa nhanzi, nhanzi ng'hulu yolavya miji minji na nhanzi ndodo yolavya miji mido. Chila nhanzi yolavya miji jake kwa chiwalo cha Walawi kwa kiwhana na honhu hoichihalila.”
NUM 35:9 Mkulu Nguluwi nakalongasa na Musa, nakamlonjela,
NUM 35:10 Walonjele Waisilaeli kota mhela womloka lwanda lwa Yolodani na kwinjila isi ya Kanaani,
NUM 35:11 mohagula miji jiwele jowa miji ja kubilimila hawele kota munhu wone yamkopole miyage ne kunuwila koweza kubilimila.
NUM 35:12 Miji ajo jowa honhu ha kubilimila, leka yula yakopole yaleche kubagama na yula munhu yalinguhilula chibida, yang'hali kutagusigwa hali nhing'hano.
NUM 35:13 Mobagula miji sita kwa chiwalo cha kubilimila.
NUM 35:14 Hali miji ajo sita jombagula, jidatu jiwe kolilawilaga isanya mwa Yolodani, na jidatu jiyage jiwe kuli isi ya Kanaani.
NUM 35:15 Miji ajo jowa ja kubilimila kwa chiwalo cha Waisilaeli na wajenzi na wajenzi wowochikala hamwe na hewo mhela udo. Munhu yoneche yomkopola miyage ne kunuwila koweza kubilimila ako.
NUM 35:16 “Ila munhu wone yamtowe miyage na chinhu cha chuma, kabagama, munhu ayo ndo mkopolaji na yangumlapa yabagame.
NUM 35:17 Munhu yoneche yomtowa miyage na iganga, wone yabagame, munhu ayo ndo mkopolaji, yangumlapa na heye yabagame.
NUM 35:18 Wone yamtowe miyage na chilungu cha igodi chiwele chomwambuza kubagama, na wone yabagame, munhu ayo ndo mkopolaji, na yangumlapa yabagame.
NUM 35:19 Mng'holoze wa habehi wa munhu yawele nakabagama, kohilula chibida. Ahyo hoyoting'hana na ayo mkopolaji, na heye komkopola.
NUM 35:20 “Hihyo du, na wone munhu yomzudila miyage, hamba yomkundujiza ama kumtozela chinhu kwa chinyele,
NUM 35:21 ama kwa kumtowa ngumi na yabagame, lelo munhu ayo yamtowile miyage ndo mkopolaji na yangumlapa yabagame. Mng'holoze wa habehi wa munhu yawele nakabagama, kohilula chibida howoting'hana hamwe.
NUM 35:22 “Ila wone munhu yamkundujize miyage baho du, ne kuzudila ama kumtozela chinhu ne chinyele,
NUM 35:23 ama wone munhu yatoze iganga lilinguweza kwambuza munhu yabagame, na kumkopola munhu, hanga hawele mng'honyo wa heye na ayo yakopole nahaganile kukopola,
NUM 35:24 lelo, nhing'hano yokwamula hali munhu ayo mkopolaji na mng'holoze wa habehi wa munhu yawele nakabagama, kwa kuwinza utaguso awu.
NUM 35:25 Nhing'hano yomlohola munhu ayo yakopole, mmoko mwa mng'holoze wa habehi wa munhu yawele nakabagama na kumhilula kuli muji wa kubilimila monayali yabilimile. Kochikala ako mbaka kubagama kwa mtambika mkulu yabakalizwe mafuta gelile.
NUM 35:26 Ila wone ayo munhu yakopole yalawe kunze mwa muji woyabilimile mhela woneche ula,
NUM 35:27 hamba wone mng'holoze wa habehi wa munhu yawele nakabagama, yamfiche kunze mwa mbaka ja muji awo wa kubilimila na yamkopole, ayo kowa kahela nongwa ya kukopola.
NUM 35:28 Mina ayo yakopole imgana yekale mgati mwa awo muji wa kubilimila mbaka mtambika mkulu hoyobagama, ila hoyobagama mtambika mkulu koweza kuhiluka kaye.
NUM 35:29 “Malajizo aga na mizilo aji jowinzigwa kuli lulelo lwa hemwe lweng'ha, honhu honeche homchikala.
NUM 35:30 “Munhu yoneche yokopola munhu, kotagusigwa kubagama kwa walolezi weli ama mzidi, munhu yoneche howeza kutagusigwa kubagama kwa ulolezi wa munhu yumwe.
NUM 35:31 “Mleche kubochela sendi yoneche kulohola ukomu wa mkopolaji yawele na nongwa na yatagusigwe kubagama, munhu ayo yangumlapa yabagame.
NUM 35:32 Mleche kubochela sendi yoneche kulawila kwa munhu yabilimile muji wa kubilimila leka kumkundiza yahiluche kikala kaye kwa heye, kuno mtambika mkulu yang'hali kubagama.
NUM 35:33 Lomdita ahyo mowa muidita ikokomoche isi yomlingikala. Uboholaji wa danda woidita isi iwe ikokomoche, na kuduhuli uhanyisi kwa chiwalo cha kuyeliza isi iditilwe ukopolaji, ila kwa kumkopola ayo yakopole.
NUM 35:34 Mleche kuidita isi yomlingikala iwe ikokomoche, isi iwele heni yondilingikala, mina heni Mkulu Nguluwi ndangikala hali hemwe Waisilaeli.”
NUM 36:1 Vilongozi wa wanhu kuli lukolo lwa Gileadi, mwana wa Makili, mwana wa Manase, mwana wa Yusufu, nawaluta kulongasa na Musa na vilongozi wanji wa lukolo lwa Waisilaeli.
NUM 36:2 Nawalonga, “Mkulu Nguluwi nakakulonjela uwagawile wanhu wa Isilaeli isi kwa kutowa simbi, iwe uhalizi wa hewo, nakakulonjela kota uwape wahinza wa Selofehadi mng'holozetu uhalizi wa mhaza wa hewo.
NUM 36:3 Ila wone hewo wohesigwa na Waisilaeli wa nhanzi ziyage, uhalizi wa hewo wolawa kwa hetwe na kuwalutila wanhu wa nhanzi yowohesigwa, ahyo uhalizi wa hetwe wokuka kwa hetwe.
NUM 36:4 Kuli mnvina ya kukumbuchila ya miyaka makumi gahano, uhalizi wa isi ya hewo wokonjezeka kuli uhalizi wula wa nhanzi yowohesigwa, ahyo uhalizi wa hewo woholigwa kulawa kuli nhanzi za wahaza wa hetwe.”
NUM 36:5 Lelo Musa nakawapa Waisilaeli ilajizo alyo kulawila kwa Mkulu Nguluwi, nakawalonjela, “Wanhu wa lukolo lwa nhanzi ya Yusufu, nawalonga wokomya.
NUM 36:6 Ahi ndo vyoyalingulonga Mkulu Nguluwi kwa chiwalo cha wahinza wa Selofehadi, ‘Walecheligwa wahesigwe na munhu yoneche walingumgana, ila wahesigwe kuli nhanzi ya hewo,
NUM 36:7 leka uhalizi wa Waisilaeli uleche kuka kuli nhanzi imwe kuza kuli nhanzi iyage, chila Muisilaeli kochibatilila uhalizi wa nhanzi ya heye.
NUM 36:8 Mdala yoneche yawele na uhalizi kuli nhanzi imwenga ya Isilaeli yangumlapa yahesigwe na munhu wa nhanzi ya heye, leka chila Muisilaeli yahole uhalizi wa wasekulu wa heye.
NUM 36:9 Ahyo howa haduhu uhalizi woneche wokuka kulawila nhanzi imwe mbaka iyage. Chila nhanzi ya Waisilaeli yobatilila uhalizi wake wa isi.’ ”
NUM 36:10 Wahinza wa Selofehadi nawadita kota Mkulu Nguluwi vyoyamlajize Musa.
NUM 36:11 Weng'ha, Mala na Tilisa na Hogula na Milika na Noa, wahinza wa Selofehadi nawahesigwa na wana wa wang'holoze wa wahaza wa hewo.
NUM 36:12 Nawahesigwa kuli nhanzi za lukolo lwa Manase mwana wa Yusufu, na uhalizi wa hewo nausigala kuli nhanzi ya wahaza wa hewo.
NUM 36:13 Ajo ndo mizilo na malajizo gawele Mkulu Nguluwi nakawapa Waisilaeli kwa kukolela Musa kuli ibalalika lya Moabu, kumwambu kwa lwanda lwa Yolodani ilingilola na muji wa Yeliko.
DEU 1:1 Chitabu achi china ulonzi uwele Musa nakawalonjela wanhu weng'ha wa Isilaeli mhela lowawele mchiwala kolilawilaga isanya mwa lwanda lwa Yolodani. Nawali hali ibindi lya Yolodani behi na Sufu, hagati mwa muji wa Palani ubanzi umwe na muji wa Tofeli na Labani na Haseloti na Disahabu ubanzi wunji.
DEU 1:2 Ndo majendo ga mazuwa kumi na imwe kulawila kuchidunda cha Holebu mbaka Kadeshi-balineya kwa nzila ya chidunda cha Seili.
DEU 1:3 Zuwa lya mwaluko lya mwezi wa kumi na imwe, mwaka wa makumi gane, lowalawile Misili, Musa nakawalonjela wanhu wa Isilaeli chila chinhu Mkulu Nguluwi choyamlajize yawalonjele.
DEU 1:4 Nakadita ahyo hala du loimalile ngondo ya kuwasumya mndewa Sihoni wa Waamoli yawele yochikala kuli muji wa Heshiboni, na mndewa Ogu wa Bashani nayawele yochikala kuli miji ja Ashitaloti na Edileyi.
DEU 1:5 Musa nakawalonjela wanhu malajizo ga Nguluwi mhela lonawali kuli ubanzi wa keli wa lwanda lwa Yolodani kuli isi ya Moabu. Nakawalonjela ahi,
DEU 1:6 “Lotuwele kuli chidunda cha Holebu, Mkulu Nguluwi, Nguluwi wa hetwe nakatulonjela ahi, ‘Mikala kwa mhela wa kuhega kuli chidunda achi.
DEU 1:7 Lelo muche hano mlutilile na majendo. Mlute kuli isi ya vidunda vya Waamoli na honhu hawele habehi na ibindi lya Yolodani, kuli isi ya vidunda na kuli isi ya mibindi ako Negebu na honhu ha mhwani, ena, mlute mbaka kuli isi ya Kanaani na isi ya Lebanoni, mbaka kuli lula lwanda lukulu lwa Eyufulate.
DEU 1:8 Isi ayi yeng'ha ndiiwika hali hemwe. Lelo mlute mkaihole isi ayo iwele heni Mkulu Nguluwi nandilaha kuwapa wasekulu wa hemwe Abulahamu na Isaka na Yakobo na walelwa wa hewo.’ ”
DEU 1:9 Musa nakawalonjela wanhu, “Nalotuwele tung'hali kuchidunda cha Holebu, heni nandiwalonjela ahi, ‘Mbuli ya kuwalongoza hemwe ndo ng'hulu ng'hatu kusinda ludali lwa heni ndiliyeka.
DEU 1:10 Mkulu Nguluwi, Nguluwi wa hemwe, kawadita muwe wenji, lehano muwa wenji kota nhondwe za kilanga.
DEU 1:11 Mkulu Nguluwi, Nguluwi wa wasekulu wa hemwe, yawadite monjezeche mala elufu mzidi ya vila vyomuwele sambi na kuwatambichiza kota navyoyelahile!
DEU 1:12 Ila heni ndiliyeka ndoweza ndaze kuhola mbuli azo za itunyo lya hemwe na kilewa kwa hemwe?
DEU 1:13 Mhagule kulawa kuli chila nhanzi ya wanhu wawele na luhala na nyhala na uwanzi leka ndiwawiche wawe vilongozi wa hemwe.’
DEU 1:14 Hemwe namkunda na mnyidichila ahi, ‘Mbuli youlonjile ndo inoga.’
DEU 1:15 Ahyo nandiwahola wala vilongozi wa hemwe wawele na luhala na uwanzi wawele ndo muwahagule kulawila kuli nhanzi za hemwe, nandiwawika wanji wawe vilongozi wa hemwe kuli vilundo vya wanhu elufu imwe na vilundo vya wanhu miya imwe na vilundo vya wanhu makumi gahano na vilundo vya wanhu kumi. Nandiwahagula kahi vilongozi wang'hangala wanji kulawa chila nhanzi.
DEU 1:16 “Mhela wuwo nandiwapa vilongozi wa hemwe malajizo aga, ‘Mhulichize nongwa za wang'holozenu. Mtaguse kwa hachi hali nongwa za wang'holozenu, hihyo du na kilewa kwa wajenzi walingikala hamwe na hemwe.
DEU 1:17 Mleche kumganilila munhu yoneche kuli kulavya utaguso, mowahulichiza ne kubagula wawele na lufufu ne wazunwa. Mleche kumdumba munhu, mina hemwe moganigwa kutagusa honhu ha Nguluwi. Wone kuwe na nhaguso iwele ng'hulu kwa hemwe, moigala kwa heni, nani ndoihulichiza.’
DEU 1:18 Mhela wuwo nandiwalajiza mbuli zeng'ha nazomganigwe kudita.
DEU 1:19 “Lelo kota Mkulu Nguluwi, Nguluwi wa hetwe, navyoyatulonjele, natwaluka majendo kulawila kuli chidunda cha Holebu natukola kuli hala kuchiwala hagazi hakudumbiza, kota homuhawene kwa kuwinza nzila ilinguluta isi ya vidunda vya Waamoli. Natufika Kadeshi-balineya,
DEU 1:20 heni nandiwalonjela, ‘Lelo mfika kuli isi ya vidunda vya Waamoli iwele ndo Mkulu Nguluwi, Nguluwi wa hetwe, yalingutupa.
DEU 1:21 Mlole, Mkulu Nguluwi, Nguluwi wa hemwe, kaiwika isi ayi hali hemwe. Mwinjile mkaihole kota Mkulu Nguluwi, Nguluwi wa wasekulu wa hemwe navyoyawalonjele. Mleche kudumba na kisinza!’
DEU 1:22 “Hamba mweng'ha namuya behi na heni namndonjela, ‘Tuwalajize wanhu watulongole, wakailole isi, hamba wahiluche kutuzelesa nzila inojile ya kuwinza na miji jachi tojifika ako.’
DEU 1:23 Mbuli ayo nayoneka kota inoga kwa heni, nandiwahagula wanhu kumi na weli, munhu yumwe kulawila chila nhanzi.
DEU 1:24 Wanhu awo nawaluta kuli isi ya vidunda, nawafika kuli ibindi lya Eshikoli na kulilola chinyele.
DEU 1:25 Lowahiluche, nawatugalila mafuza gamwe ga isi ayo na watulonjela kota isi ayo yalingutupa Mkulu Nguluwi, Nguluwi wa hetwe, ndo inoga ng'hatu.
DEU 1:26 “Ila hemwe nahamuwinzile ilajizo lya Mkulu Nguluwi, Nguluwi wa hemwe, kwa kulema kuluta kuli isi ayo.
DEU 1:27 Namng'ung'uta mgati mwa mihema ja hemwe mlonga, ‘Mkulu Nguluwi kangutuzudila mina nakatulavya kuli isi ya Misili. Nakagana yatuwiche kuli moko ga Waamoli leka watudumye.
DEU 1:28 Lekachoni tulute ako? Tutweguche nhumbula kwa kudumba. Nawatulonjela kota wanhu wa ako ndo wazidahe na wawele ng'wemang'wema kusinda hetwe vyotuwele na kota miji ja hewo migazi na jizenjigwa lukanzi lufichile kilanga. Kahi walonga kota nawawona wala walelwa wa Anaki wawele ng'wemang'wema!’
DEU 1:29 “Ila heni nandiwalonjelani ahi, ‘Mleche kuwadumba wanhu awo.
DEU 1:30 Mkulu Nguluwi, Nguluwi wa hemwe, yawele yowalongola, heye yuye kochitowa kwa chiwalo cha hemwe kota navyoyaditile hali hemwe kula Misili,
DEU 1:31 na kula kuchiwala komuwene vila navyoyawapapile mmajendo gala geng'ha, kota vila mhaza vyoyalingumpapa mwanage, mbaka namfika aha.’
DEU 1:32 Ila hanga nandonga ago geng'ha, hemwe nahamumkundile Mkulu Nguluwi, Nguluwi wa hemwe,
DEU 1:33 ndo yawalongole mnzila na kuwapalila honhu ha kuwasa hemwe. Nechilo nakawalongolani kwa chiluli na nemisi kwa ng'hungugu, leka kuwalajila nzila.
DEU 1:34 “Mkulu Nguluwi nakahulika kung'ung'uta kwa hemwe, nakazudila, nakelaha yolonga,
DEU 1:35 ‘Kuduhu ne yumwe wa hemwe kuli lulelo alu lwihile yokwinjila kuli isi yila inojile yondilahile kuwapa wasekulu wa hemwe.
DEU 1:36 Kalebu mwana wa Yefune, ndo heye yaliyeka yoyona, nani ndomha isi ayo yoyaibijile iwe ya heye na lulelo lwake kwa vila nayali yombinza heni Mkulu Nguluwi kwa chila chinhu.’
DEU 1:37 Mkulu Nguluwi nakazudila ng'hatu kwa heni kahi kwa chiwalo cha hemwe nakalonga, ‘Na hegwe, Musa, hukwinjila ng'oo kuli isi ayo.
DEU 1:38 Ila Yoshua mwana wa Nuni, mtanzi wa hegwe, ndo yokwinjila amo. Lelo mkangaze nhumbula kwa vila heye kowalongoza wanhu wa Isilaeli leka wakaihole isi ayo.’
DEU 1:39 “Hamba Mkulu Nguluwi nakatulonjela hetwe tweng'ha, ‘Awo wana wa hemwe womlingudumba kota wowa wapogozi wa wang'honyo wa hemwe, ena, awo wawele wadodo wawele hawavizelele kulekaniza ganojile na gehile, awo ndo wokwinjila ako, nani ndowapa hewo isi ayo iwe ya hewo.
DEU 1:40 Ila hemwe, mgaluche na kuhiluka kuchiwala kulutila Bahali ya Shamu.’
DEU 1:41 “Hamba namunyidichila, ‘Hetwe tumditila gehile Mkulu Nguluwi, ila sambi toluta na kitowa kota Mkulu Nguluwi, Nguluwi wa hetwe vyoyatulajize.’ Ahyo, chila yumwe wa hemwe nakewika goya kuza kitowa ngondo, mina namijesa kota yahawele mbuli ndodo kuivaba isi ayo ya vidunda.
DEU 1:42 Na heye Mkulu Nguluwi nakandonjela, ‘Walonjele hewo kota waleche kuza kitowa kwa vila siwele hamwe na hewo, waleche kuluta, wozalemwela hela kwa wang'honyo wa hewo.’
DEU 1:43 Lelo heni nandiwalonjela ahyo, ila hemwe namlibelenhuka ilajizo lya Mkulu Nguluwi namwinjila kuli isi ayo kwa kudadambala.
DEU 1:44 Aho, Waamoli nawali wochikala kuli honhu aho ha isi ya vidunda nawadulika nawawawinga hemwe kota vila vyozilingudita nzuchi, ako nawawatowa kulawila Seili mbaka Holima.
DEU 1:45 Lomhiluche, nakumlilila Mkulu Nguluwi, ila Mkulu Nguluwi nahawahulichize.
DEU 1:46 “Lelo namikala ako Kadeshi kwa mhela uhejile.
DEU 2:1 “Hamba natuhinduka, natwinula majendo kuchiwala kwa kukolela nzila ya Bahali ya Shamu, kota Mkulu Nguluwi navyoyandonjele, natulubaluba behi na chidunda cha Seili kwa mhela uhejile.
DEU 2:2 Hamba Mkulu Nguluwi nakandonjela,
DEU 2:3 ‘Namlubaluba kwa mhela wa kuhega kuli isi ayi ya vidunda, lelo mgaluche kukolela kasikazini.
DEU 2:4 Walajize wanhu awa, “Mwahabehi kukola kuli isi ya vidunda vya Seili, isi ya wang'holozenu walelwa wa Esau. Awo wowadumbani, ila milolele,
DEU 2:5 mleche kitowa na hewo kwa vila siwapani honhu honeche ha isi ya hewo. Siwapani ne honhu hado ha kubiga. Isi ayo ya vidunda vya Seili ndiwapa walelwa wa Esau leka iwe ya hewo.
DEU 2:6 Homgana chilyo ama mazi kulawila kwa hewo, iwagana mgule.” ’
DEU 2:7 “Lelo kota Mkulu Nguluwi, Nguluwi wa hemwe navyoyawatambichize kuli chila mbuli zomditile. Nakawalolela nalomwali mlubaluba kula kuli chiwala chikulu. Nakawa hamwe na hemwe miyaka aji jeng'ha makumi gane na hamwisilwe ne chinhu choneche.
DEU 2:8 “Ahyo natulutilila na majendo ga hetwe, natuwakola wang'holozetu na walelwa wa Esau wawele wochikala Seili, natuheluka kahi na yila nzila ya kibindi na honhu ha miji ya Elasi na Esioni-gebeli. Hamba natuhinduka natuwinza nzila ya kukolela kuli chiwala cha Moabu.
DEU 2:9 Mkulu Nguluwi nakandonjela, ‘Uleche kuwagaza wanhu wa Moabu, na uleche kitowa na hewo mina siwapani honhu honeche ha isi ya hewo. Ila honhu aho ha Ali ndiwapa awo walelwa wa Loti hawe ha hewo.’ ”
DEU 2:10 Aho katali ayo isi ya Ali nayali ya Waemi, wawele na mong'ho na wawele ng'wemang'wema kota Waanaki.
DEU 2:11 Kota vila Waanaki, wanhu awa nawazeleka kahi kota Walefayi, ila Wamoabu nawawachema Waemi.
DEU 2:12 Waholi kahi nawekala ako Seili aho katali, ila walelwa wa Esau nawawawinga na kuwadumya, hamba wawo baho nawekala aho kuli honhu ha hewo. Waisilaeli nawadita kota ahyo kuli isi yila iwele Mkulu Nguluwi nayawapele iwe ya hewo.
DEU 2:13 Musa nakalutilila kulonga, “Mkulu Nguluwi nakatulonjela, ‘Muche lelo, mloche kalwanda ka Seledi.’ Lelo natuloka kalwanda ka Seledi.
DEU 2:14 Miyaka makumi gadatu na nane najipuluta kulawila kuka Kadeshi-balineya mbaka kuloka kalwanda ka Seledi. Mhela awo, wanhu wa chilundo chila wawele na miyaka ja kuhega kuza kuli kitowa ngondo nawabagama kuwinza vila Mkulu Nguluwi navyoyawalahile.
DEU 2:15 Mkulu Nguluwi yuye nakawagaluchila leka yawadumye ako kuli kambi, mbaka weng'ha wamale.
DEU 2:16 “Lelo wanhu awo weng'ha wawele na miyaka ja kuhega kuza kuli kitowa ngondo lowabagame,
DEU 2:17 Mkulu Nguluwi nakandonjela,
DEU 2:18 ‘Lehano moloka mbaka wa Moabu kwa kukolela isi ya Ali.
DEU 2:19 Homfika kuli isi ya Waamoni, mleche kuwatunya ne kitowa na hewo, kwa vila siwapani honhu honeche ha awo walelwa wa Amoni, iwe honhu ha hemwe. Hebu! Awo ndo lulelo lwa Loti, na ndiwapa ayo isi iwe ya hewo wawo.’ ”
DEU 2:20 Isi ayo yanguzeleka kahi kota isi ya Walefayi. Walefayi nawali wochikala ako aho katali, Waamoni nawawachema awo Wasamusumi.
DEU 2:21 Nawali wanhu wenji, wawele na mong'ho na wawele ng'wemang'wema kota Waanaki. Ila Mkulu Nguluwi nakawadumya lowafichile Waamoli nawawele waiholile isi na kikala amo honhu ha hewo.
DEU 2:22 Mkulu Nguluwi nakadita kota navyoyawaditile wana wa Esau, walinguchemigwa Waedomu, nawawele wochikala kuli isi ya Seili. Nakawadumya Waholi mhela Waedomu lowafichile ako, nawaihola isi ya hewo na kikala amo mbaka lehano.
DEU 2:23 Waavi nawali baho mwaluko wochikala kuli vijiji vya hafungo mwa Mediteleniyani kuza mbaka Gasa. Wakafutoli kulawila chihilwa cha Kilete nawawadumya, nawekala amo honhu ha hewo.
DEU 2:24 Musa nakalutilila kulonga, “Hamba Mkulu Nguluwi nakatulajiza, ‘Mwaluche majendo. Mloche ibindi lya Alinoni. Heni ndimuwika mmoko mwa hemwe Sihoni, mndewa wa Waamoli wa Heshiboni na isi ya heye. Mumtowe na kwaluka kuihola isi ya heye.
DEU 2:25 Lehano ndokwaluka kuwadita wanhu weng'ha muisi wawe wodumba na kuwa na lunhwinhwi kwa chiwalo cha hemwe, wohulika mbuli za hemwe na hewo wokakama na kudumba.
DEU 2:26 “Lelo nandiwalajiza wasenga kulawila kuchiwala Kedemoti walute kwa mndewa Sihoni wa Heshiboni na usenga awu ulinguya kwa kikala goya.
DEU 2:27 ‘Utukundize tukole kuli isi ya hegwe. Tokola mnzila na kulutilila ne kuhinduka kudilo ne kumoso.
DEU 2:28 Chilyo cha hetwe togula kwa hegwe na mazi ga kunwa kahi. Chotulanda du hetwe ndo kukundizwa kukola kwa magulu muisi ya hegwe,
DEU 2:29 tuloche lwanda lwa Yolodani na kwinjila kuli isi iwele Mkulu Nguluwi, Nguluwi wa hetwe yalingutupa. Walelwa wa Esau walingikala Seili na Wamoabu walingikala Ali nawatukundiza kahi kukolela kuli isi ya hewo.’
DEU 2:30 “Ila Sihoni, mndewa wa Heshiboni, nahatukundize tukole kuli isi ya heye. Mkulu Nguluwi, Nguluwi wa hemwe, nakamdita yawe na nhumbula igagadale ng'hatu, leka tumsumye na kuihola isi ya heye iwele tuikalila mbaka lehano.
DEU 2:31 “Hamba Mkulu Nguluwi nakandonjela, ‘Ulole, nyaluka kumuwika Sihoni na isi ya heye mmoko mwa hemwe, mwaluche kuihola isi ya heye.’
DEU 2:32 Hamba Sihoni na wanhu wa heye weng'ha nawoya kitowa na hetwe behi na mji wa Yahasi.
DEU 2:33 Na heye Mkulu Nguluwi, Nguluwi wa hetwe nakamlavya, natumsumya heye na wana wa heye na wanhu wa heye weng'ha.
DEU 2:34 Natuhola isi ya heye na kuwifyanga miji ja heye jeng'ha, natuwakopola walume na wadala na wana, nahatumlechile ne munhu yawele mkomu.
DEU 2:35 Natuhola migongolo na lufufu lunji lweng'ha natulufichile kuli miji.
DEU 2:36 Kwaluchila Aloeli, muji uwele mgati mwa ibindi lya Alinoni mbaka Gileadi, kuduhu muji woneche nawali wimile mbaka natulemwa kuuhola. Mkulu Nguluwi nakawika geng'ha mmoko mwa hetwe.
DEU 2:37 Ila nahatuihejelele isi ya Waamoni ama mfungo mwa lwanda lwa Yaboki ne kuli miji ja isi ya vidunda ne honhu honeche hala hawele Mkulu Nguluwi, Nguluwi wa hetwe, nayatulemeze.
DEU 3:1 “Hamba natuhinduka, natuluta kuli nzila ya kuluta Bashani. Mndewa Ogu nakalawa na wanhu wa heye weng'ha kitowa na hetwe habehi na muji wa Edileyi.
DEU 3:2 Ila Mkulu Nguluwi nakandonjela, ‘Uleche kumdumba, mina ndimuwika mmoko mwako hamwe na wanhu wa heye weng'ha na isi ya heye. Komditila kota navyoumditile Sihoni mndewa wa Waamoli nayekale kula Heshiboni.’
DEU 3:3 “Lelo Mkulu Nguluwi nakamuwika mmoko mwa hetwe Ogu mndewa wa Bashani na wanhu wa heye weng'ha, natuwadumya nahaponile ne munhu yoneche.
DEU 3:4 Natujihola miji jeng'ha ja heye, kuduhu muji ne umwe uwele nahatuuholile. Jeng'ha natujihola miji makumi sita, mina honhu heng'ha ha Aligobu nahawele holongozwa na Ogu mndewa wa Bashani.
DEU 3:5 Miji jeng'ha aji najali na lugagala luwele na lukanzi lulutile kuchanya, naluwele na lwizi lugazi na mhajilo. Nakwali kahi na vijiji vinji navyali hela lugagala luwele na lukanzi.
DEU 3:6 Natudumya chila chinhu ako, natuwifyanga chila muji na kukopola walume na wadala na wana kota navyotuditile kuli muji wa mndewa Sihoni wa Heshiboni.
DEU 3:7 Ila migongolo jeng'ha na lufufu natuhola hetwe.
DEU 3:8 “Mhela awo natuihola isi ayo ya wala wandewa weli wa Waamoli nawawele wochikala kolilawilaga isanya mwa lwanda lwa Yolodani, hagati ha lwanda lwa Alinoni na chidunda cha Helimoni.”
DEU 3:9 Wasidoni wanguchichema chidunda acho Silioni, nawo Waamoli wanguchichema Senili.
DEU 3:10 Musa nakalutilila kulonga, “Natujihola miji jeng'ha jiwele muwegawega mwa chidunda na kahi honhu heng'ha ha Gileadi na Bashani mbaka Saleka na Edileyi, miji ja mndewa Ogu ako Bashani.”
DEU 3:11 Mndewa Ogu yaliyeka ndo nayaponile hali Walefayi na ndo nayali mndewa wa Bashani. Chinhanda cha heye nachigongomanyigwa kwa chuma, nachali na utali wa mita zine na ugazi wa behi ya mita mbili, kota vipimilo navyoviwichigwe. Chinhanda acho ching'hali kuli muji wa Waamoni wa Laba.
DEU 3:12 Musa nakalutilila kulonga, “Navyotuiholile isi ayo, nandiwapa nhanzi za Lubeni na Gadi honhu haluchile kasikazini mwa Aloeli behi na Alinoni na nusu ya isi ya vidunda vya Gileadi hamwe na miji jake.
DEU 3:13 Hamba nandiipa nusu ya yila nhanzi ya Manase honhu haponile ha Gileadi hamwe na Bashani yeng'ha nailongozwe na Ogu, mina ndo honhu heng'ha ha Aligobu.” Isi yeng'ha ya Bashani yanguzeleka kota isi ya Walefayi.
DEU 3:14 Yaili munhu wa nhanzi ya Manase, nakahola honhu heng'ha ha isi ya Aligobu, mina ndo Bashani, kuza kuli mbaka wa Wageshuli na Wamaakati. Vijiji vyeng'ha nakavichema itagwa lyake, na mbaka lehano vyanguzeleka kota vijiji vya Hawoti-yaili.
DEU 3:15 Musa nakalutilila kulonga, “Wanhu wa lukolo lwa Makili wa nhanzi ya Manase nandiwapa Gileadi
DEU 3:16 na wanhu wa nhanzi ya Lubeni na Gadi nandiwapa isi yeng'ha kulawila Gileadi mbaka lwanda lwa Alinoni. Kusini nawabakana hagati ha lwanda na kasikazini nakwali na lwanda lwa Yaboki naluwele behi na isi ya Waamoni.
DEU 3:17 Ubanzi wa kolizinjilaga isanya isi ya hewo nayenela mbaka lwanda lwa Yolodani, kulawila ilamba lya Galilaya, ubanzi wa kasikazini kudulika kuza Bahali ya Mwino, mbaka kuli miduliko ja Pisiga ubanzi wa kolilawilaga isanya.
DEU 3:18 “Mhela wula nandiwapa walume wa nhanzi za Lubeni na Gadi na Manase ya kolilawilaga isanya, malajizo aga, ‘Mkulu Nguluwi, Nguluwi wa hemwe, nakawapani isi ayi muihole. Lelo hemwe muwele na mong'ho hali wang'holozenu, muwe muwichigwe goya kitowa ngondo, mloche lwanda lwa Yolodani muwele kumwando kwa wang'holozenu Waisilaeli.
DEU 3:19 Ila wadala wa hemwe na wana wa hemwe na migongolo minji ja hemwe, ahyo jopona kuli miji jondiwapele.
DEU 3:20 Muwatanze wang'holozenu Waisilaeli mbaka Mkulu Nguluwi hoyowadita wasindamale honhu hawo kota hemwe vyomsindamale, mina hewo nawo waihole isi iwele Mkulu Nguluwi, Nguluwi wa hemwe, kanguwapa kumwambu mwa lwanda lwa Yolodani. Homsinda ago moweza kuhiluka kuli isi ya hemwe, ayi muiholile ndiwapele.’
DEU 3:21 “Hamba nandimlajiza Yoshua, ‘Hegwe kona kwa meho gako mbuli zeng'ha ziwele Mkulu Nguluwi, Nguluwi wa hegwe, yawaditile wandewa awa weli, Sihoni na Ogu. Lelo heye kowaditila hihyo wandewa wa isi zeng'ha zoukola.
DEU 3:22 Mleche kuwadumba mina Mkulu Nguluwi, Nguluwi wa hemwe, ndo kochitowa kwa chiwalo cha hemwe.’
DEU 3:23 “Mhela awo nandimdedeza Mkulu Nguluwi ndilonga,
DEU 3:24 ‘Hegwe Mkulu, Mkulu Nguluwi ndivizela kundajila heni chitumagwa wa hegwe mwaluko hela wa ukulu wa hegwe na moko wa hegwe uwele na mong'ho. Mina kuna mlungu wachi ako kilanga ama kuli isi yoweza kudita mbuli ng'hulu na za kububuwaza kota zouditile hegwe?
DEU 3:25 Ndangukulanda ndoche lwanda lwa Yolodani, ndiyone isi inojile kolizinjilaga isanya mwa lwanda lwa Yolodani, ena, isi inojile ya kunojeza ya vidunda, hamwe na vidunda vya Lebanoni.’
DEU 3:26 “Ila Mkulu Nguluwi nakanzudila heni kwa chiwalo cha hemwe, nakalema kunyhulichiza. Hamba nakandonjela, ‘Ihega! Uleche kulonga kahi mbuli ayi.
DEU 3:27 Ukwine mbaka kuli chinhembenhembe cha chidunda cha Pisiga, ulole goya ubanzi wa kolizinjilaga isanya na kasikazini na kusini na kolilawilaga isanya na koyona isi ayo, ila hegwe huloka hebu alu lwanda lwa Yolodani.
DEU 3:28 Ila umhe Yoshua malajizo, umkangaze nhumbula na kumwimiza, mina heye ndo yowalongoza wanhu awa mbaka kumwambu, kuihola isi youyona.’
DEU 3:29 “Lelo natupona aha hawele na ibindi habehi na Beti-peoli.”
DEU 4:1 Musa nakalutilila kulonga, “Lelo hemwe Waisilaeli mibatilile na kuwinza malajizo na mizilo jondiwalanguse, leka mikale na kuihola isi yila Mkulu Nguluwi, Nguluwi wa wasekulu wa hemwe, yoyawapele.
DEU 4:2 Mleche konjeza choneche kuli ulonzi wondilinguwalajiza, na mleche kusa chinhu, mibatilile malajizo ga Mkulu Nguluwi, Nguluwi wa hemwe, gala goyawapele.
DEU 4:3 Hemwe namlola kwa meho genu mbuli zila Mkulu Nguluwi zoyaditile hala Baali-peoli. Mkulu Nguluwi, Nguluwi wa hemwe, nakamdumya chila yumwe wa hemwe nayamfugamile ayo mlungu wa Baali-peoli.
DEU 4:4 Ila hemwe womuwele mtanganiche kwa Mkulu Nguluwi, Nguluwi wa hemwe, mwa wakomu mbaka lehano.
DEU 4:5 “Mlole, ndiwalangusa malajizo na mizilo kota Mkulu Nguluwi, Nguluwi wa heni, vyoyandajize, leka mugawinze kuli isi yomluta kuihola.
DEU 4:6 Mibatilile na kugadita malajizo ago mina homdita ahyo wanhu wa isi zinji howovizela ago, wovizela kota hemwe ndo muwele na luhala na nyhala, wolonga, ‘Twangukomya wanhu wa isi ayi ng'hulu wana luhala na nyhala!’
DEU 4:7 “Kuduhu isi ng'hulu yoneche iwele mlungu wa hewo kahabehi na wanhu, kota Mkulu Nguluwi, Nguluwi wa hetwe, vyoyawele behi na hetwe, hotumlanda utanzi.
DEU 4:8 Na kuduhu isi yinji ng'hulu yoneche iwele na malajizo na mizilo jitanganiche, kota ajo jondiwalanguse hemwe wanhu zuwa ali lya lehano.
DEU 4:9 “Ila milolele na mleche kusemwa mbuli zila zomziwene kwa meho ga hemwe. Mbuli azo zileche kulawa mnhumbula za hemwe kuli mazuwa gose ga ukomu wa hemwe. Muwasimile wana wa hemwe na wazukulu wa hemwe,
DEU 4:10 kwa chiwalo cha zuwa lila nalomwimile hali Mkulu Nguluwi, Nguluwi wa hemwe, kula Holebu hoyandojele, ‘Muwakungajize awo wanhu hali heni, ndiwalonjele ulonzi wa heni leka welanguse kundumba heni mazuwa gose ga ukomu wa hewo na kuwalangusa wana wa hewo kudita ahyo.’
DEU 4:11 “Lelo namhejela na kwima hasi ha chila chidunda chiwele mhela awo nachali chikwaka chiluli nachifichile mbaka kilanga chigubiche jiza na ng'hungugu ng'hulu.
DEU 4:12 Hamba Mkulu Nguluwi nakalonga na hemwe hagati ha chiluli acho, namuuhulika ulonzi woyalonjile ila nahamumuwene, namhulika hela lizi lyake.
DEU 4:13 Na heye nakawadamlila ilagano lya heye nakawalajiza mbatilile na kuwinza jila mizilo kumi najoyandiche mli vibao vili vya maganga.
DEU 4:14 Mhela awo yula Mkulu Nguluwi nakandajiza ndiwalanguse malajizo na mizilo jomlinguganigwa kudita kuli isi yomlinguluta kuihola.
DEU 4:15 “Nahamumuwene kwa meho Mkulu Nguluwi hoyalonjile namwe kula kuchidunda cha Holebu hagati ha chiluli, kwa chiwalo acho milolele ng'hatu,
DEU 4:16 mleche kwajilila kwa kugongomanya jimalukolo joneche ja kuhongola kwa kiwhaniza kota mlume ama mdala
DEU 4:17 ama igongolo lyoneche lila muisi ama chideje
DEU 4:18 ama kwa kiwhana na igongolo lilingutambala hanyi ama somba mmazi.
DEU 4:19 Milolele, leka mhela homlola kilanga, isanya na nyelezi na nhondwe, mleche kukwejigwa kuvifugamila ne kuviditila chinhu choneche. Vinhu avyo Mkulu Nguluwi nakavileka kwa wanhu weng'ha hasi ha kilanga.
DEU 4:20 Ila hemwe ndo wanhu yoyawagombole Mkulu Nguluwi kulawila Misili kuli itanuli lya chuma. Nakawalavya ako leka muwe wanhu wa heye kota vila vyomli lehano.
DEU 4:21 Kwa chiwalo cha hemwe Mkulu Nguluwi, Nguluwi wa hemwe, nakanzudila heni, nakelaha kota heni siloka lwanda lwa Yolodani kwinjila kuli isi yila inojile yoyalinguwapa iwe uhalizi wa hemwe.
DEU 4:22 Heni ndobagama kuli isi ayi na siloka lwanda lwa Yolodani, ila hemwe mwa habehi kuluta kuihola isi yila inojile.
DEU 4:23 Milolele ng'hatu mleche kusemwa ilagano lila Mkulu Nguluwi, Nguluwi wa hemwe, loyaditile na hemwe na kiditila jimalukolo ja kuhongola kwa kiwhaniza na chinhu choneche chiwele Mkulu Nguluwi, Nguluwi wa hemwe, nakawalemeza kuwhaniza,
DEU 4:24 mina Mkulu Nguluwi, Nguluwi wa hemwe, ndo chiluli chilingulakaza, heye ndo Nguluwi yawele na fihi.
DEU 4:25 “Homuwa mikale kuli isi ayo, homponda wana na wazukulu muwe mlalile, wone mwaluche kwajilila na kiditila jimalukolo ja kuhongola kwa kiwhaniza na chinhu choneche, namdite wihe hali Mkulu Nguluwi, Nguluwi wa hemwe na kumzudiza,
DEU 4:26 lelo, heni lehano ndanguvichema ulanga na isi vilole hali hemwe, ndanguwalonjelani kota baho du modumigwa ng'hatu kuli isi yomlinguluta kuihola ako kumwambu mwa lwanda lwa Yolodani. Hamchikala ako mhela uhejile, ila modumigwa ng'hatu.
DEU 4:27 Mkulu Nguluwi kowasambalula hali isi zinji na wanhu wachefu hela wa hemwe wopona ako Mkulu Nguluwi koyowawinjila.
DEU 4:28 Ako mojifugamila milungu ja migodi na maganga jiwele jiditikwe kwa moko ga wanhu na johajiwa jilola na hajilinguhulika na hambe jilye ne kunusa.
DEU 4:29 Hamba kulawila mumo mu isi mompala Mkulu Nguluwi, Nguluwi wa hemwe, namwe momona wone mumpale kwa nhumbula yeng'ha na muhe weng'ha.
DEU 4:30 Mbuli azi zeng'ha hoziwafika aho hamwande, homgaya momuhiluchila Mkulu Nguluwi, Nguluwi wa hemwe, na kumhulichiza.
DEU 4:31 Mkulu Nguluwi, Nguluwi wa hemwe, ndo Nguluwi yawele na isungu, howaleka ne kuwadumya ne kusemwa ilagano lila lyoyaliditile na wasekulu wa hemwe kwa chilaho.
DEU 4:32 “Mijese ng'hatu kwa chiwalo cha gala galawile katali, mbuli nazilawile hala hemwe hamnapondigwa, kulawila zuwa lila Nguluwi hoyamlumbile munhu muisi. Muuze kuli isi yeng'ha, kulawila ubanzi umwe mbaka wunji, wone mbuli ya kububuwaza kota ayo mina ilawila ama kuhulikwa.
DEU 4:33 Ndaze, wanhu wa isi mina wahulika lizi lya Nguluwi lulonga kulawila hagati ha chiluli, kota hemwe navyomhuliche, nakupona wakomu?
DEU 4:34 Ndaze, kabaho Nguluwi yoneche yunji yajezile kuza kuhola wanhu kulawila isi yinji, kota vila Mkulu Nguluwi, Nguluwi wa hemwe? Nakadita hino kwa kujezigwa na kwa kudita ulajilo na kwa vinduzanduza na kwa ngondo na kwa moko wa hegwe uwele na mong'ho na kwa ludali lwake lukulu, nakambuza mbuli za kudumbiza ziwele hemwe namzona kwa meho genu kula Misili.
DEU 4:35 Hemwe namlajilwa mbuli azo, leka mvizele kota Mkulu Nguluwi ndo yaliyeka Nguluwi na haduhu yunji.
DEU 4:36 Nakawadita mhuliche lizi lya heye kulawila kilanga leka yaweze kuwalangusa kuhulichiza. Aha muisi nakawadita mlole chiluli cha heye chikulu na kuhulika ulonzi wa heye kulawila hagati ha chiluli acho.
DEU 4:37 Kwa vila nakawagana wasekulu wa hemwe, heye nakawahagula hemwe walelwa wa hewo, nakawalavya yuye kuli isi ya Misili kwa ludali lwake lukulu.
DEU 4:38 Nakawawinga hali hemwe wanhu wa nhanzi ng'hulu na wawele na ludali kusinda hemwe, leka yawegale na kuwapani isi ya hewo kwa uhalizi, kota vyoiwele lehano.
DEU 4:39 Lelo mkumbuche lehano na kuwika mnhumbula za hemwe kota Mkulu Nguluwi ndo Nguluwi kuchanya kilanga na hasi muisi, kuduhu yunji.
DEU 4:40 Ahyo, mibatilile malajizo na mizilo ja heye jondilinguwapa lehano leka mbuli ziditigwe kwa hemwe goya, hamwe na walelwa wa hemwe na kikala mazuwa menji kuli isi yila Mkulu Nguluwi, Nguluwi wa hemwe kanguwapani iwe ya hemwe mazuwa gose.”
DEU 4:41 Aho ndo Musa nakabagula miji jidatu kolilawilaga isanya kwa lwanda lwa Yolodani,
DEU 4:42 kuwele munhu koweza kubilimila na kivisa wone yamkopole munhu ne kunuwila nahawele yamwihilwe. Munhu kota ayo koweza kubilimila kuli muji umwe na kulohola ukomu wa heye.
DEU 4:43 Nakabagula muji wa Beseli muwegawega mwa chiwala kwa chiwalo cha nhanzi ya Lubeni na muji wa Lamoti kuli isi ya Gileadi kwa chiwalo cha nhanzi ya Gadi na muji wa Golani kuli isi ya Bashani kwa chiwalo cha nhanzi ya Manase.
DEU 4:44 Aga ndo malajizo Musa nayawapele Waisilaeli.
DEU 4:45 Aga ndo malajizo na mizilo na utaguso Musa nayawalonjele Waisilaeli nalowalawile Misili,
DEU 4:46 nalowali kumwambu mwa lwanda lwa Yolodani, kuli ibindi lya kumwando mwa Beti-peoli, kuli isi naiwele ya mndewa Sihoni wa Waamoli, nayalongoze muji wa Heshiboni, yula Musa na Waisilaeli navyowamsumile nalowalawile Misili.
DEU 4:47 Nawaihola isi ya heye na ya mndewa Ogu wa Bashani. Wandewa awo weli wa Waamoli nawalongoza ako kolilawilaga isanya mwa lwanda lwa Yolodani.
DEU 4:48 Isi ayo nayenela kulawila Aloeli hafungo mwa lwanda lwa Alinoni mbaka chidunda cha Helimoni.
DEU 4:49 Hamwe na honhu heng'ha ha ubanzi wa kolilawilaga isanya mwa lwanda lwa Yolodani mbaka Bahali ya Mwino, mbaka kuli miduliko ja chidunda cha Pisiga.
DEU 5:1 Musa nakawachema Waisilaeli weng'ha, nakawalonjela, “Mhulichize hemwe Waisilaeli, malajizo na mizilo jondilingulonga na hemwe lehano. Milanguse ago na kugawinza goya.
DEU 5:2 Mkulu Nguluwi, Nguluwi wa hetwe, nakadita ilagano na hetwe kuchidunda cha Holebu.
DEU 5:3 Mkulu Nguluwi nahaditile ilagano alyo na wasekulu wa hetwe, ila nakadita na hetwe tweng'ha tuwele wakomu sambi baha.
DEU 5:4 Mkulu Nguluwi nakalonga na hemwe mchilola ako kuchidunda hagati ha chiluli.
DEU 5:5 Mhela awo heni nanyima hagati ha hemwe na Mkulu Nguluwi, nandiwalonjelani gala nagoyalonjile, kwa vila hemwe namdumba chila chiluli na hamkwinile kuchidunda. “Mkulu Nguluwi nakalonga ahi
DEU 5:6 ‘Heni, ndo Mkulu Nguluwi, Nguluwi wa hegwe, ndikulavile kulawila Misili, nakouwele mpogozi.
DEU 5:7 “ ‘Uleche kuwa na milungu jiyage ila heni.
DEU 5:8 “ ‘Uleche kiditila jimalukolo ja milungu ja udesi, ama chihongoligwe chifandile na chiwele kilanga ama kuli isi ama mmazi hasi ha isi.
DEU 5:9 Uleche kujifugamila milungu ja udesi ne kujikolela mijito, kwa vila heni Mkulu Nguluwi, Nguluwi wa hegwe, nda Nguluwi yawele na fihi. Ndanguwagaza wana kwa wihe wa wahaza wa hewo, na lulelo lwa kadatu na lwa kane lwa awo walingunzudila.
DEU 5:10 Ila ndanguwalajila igano lya kwimilila maelufu ga wala wawele na igano kwa heni na kibata malajizo ga heni.
DEU 5:11 “ ‘Uleche kulichema hela itagwa lya Mkulu Nguluwi, Nguluwi wa hegwe, mina heni ndo Mkulu Nguluwi sileka kumgaza yoneche yalingulichema hela itagwa lya heni.
DEU 5:12 “ ‘Udite Zuwa lya Kwesela na kuliwika liwe lyelile, kota heni Mkulu Nguluwi, Nguluwi wa hegwe, vyondikulajize.
DEU 5:13 Mazuwa sita ukole mijito na udite mbuli za hegwe zeng'ha,
DEU 5:14 ila zuwa lya saba ndo zuwa lya kwesela kwa chiwalo cha heni Mkulu Nguluwi. Zuwa alyo hegwe uleche kukola mijito joneche, ne mwanago ne mhinza wa hegwe ne mpogozi wa hegwe mlume ama mdala ne isenga lyako ne idogowi lyako ne igongolo lya hegwe lyoneche ne mjenzi yawele mgati mwa lugagala lwako, leka mpogozi wa hegwe mlume na mdala wesele kota hegwe vivila.
DEU 5:15 Uleche kusemwa kota hegwe nawali mpogozi kuli isi ya Misili, nani Mkulu Nguluwi, Nguluwi wa hegwe, nandikulavya ako kwa moko uwele na ludali na mong'ho, ndo mina heni Mkulu Nguluwi, Nguluwi wa hegwe ndikulajiza kulidita liwe Zuwa lya Kwesela.
DEU 5:16 “ ‘Wahulichize mhaza na mayako, kota vila heni Mkulu Nguluwi, Nguluwi wa hegwe vyondikulajize, udite ahyo leka wikale miyaka minji na mbuli za hegwe ziditigwe goya kuli isi yondilingukupa.
DEU 5:17 “ ‘Uleche kukopola.
DEU 5:18 “ ‘Uleche kuwasa na mdala ama mlume wa munhu yunji.
DEU 5:19 “ ‘Uleche kuhiza.
DEU 5:20 “ ‘Uleche kulavya ulolezi wa udesi kwa yawele habehi na hegwe.
DEU 5:21 “ ‘Uleche kumgana mdala wa munhu yawele habehi na hegwe ne kuigana ng'handa ya heye ne mgunda wa heye ne mpogozi wa heye mlume ama mdala ne isenga lya heye ne idogowi lya heye ne chinhu choneche choyawele nacho.’
DEU 5:22 “Awo ndo ulonzi uwele Mkulu Nguluwi nawoyawalonjele wanhu weng'ha kwa lizi ng'hulu kulawila kuli chiluli na yila ng'hungugu idinyile jiza totolo. Nakawalonjela lonamwali mikungajize kula kuchidunda na honjeze aho mzilo wunji. Hamba nakandika mchanya mwa vibao vili vya maganga, nakamha.
DEU 5:23 “Mhela nalomhuliche ayo lizi kulawa hagati ha lila jiza, kuchanya kwa chila chidunda nachali chikwaka chiluli, vilongozi weng'ha wa nhanzi za hemwe na wasekulu nawambuyila.
DEU 5:24 Hemwe namlonga, ‘Mhulichize! Mkulu Nguluwi, Nguluwi wa hetwe, nakatugubulila ukulu wa heye, tuhulika lizi lya heye kulawila hagati ha chila chiluli. Lehano natumona Nguluwi yolonga na wanhu, na heye munhu nahabagame ila nakalutilila kikala!
DEU 5:25 Ila ya choni kiwika hali nongwa ya kubagama kwa kulakazwa na chila chiluli chikulu? Hotuhulika kahi lizi lya Mkulu Nguluwi, Nguluwi wa hetwe, tobagama!
DEU 5:26 Ndaze, ndo munhu wachi nayahuliche lizi lya Nguluwi yawele mkomu kulawa hagati ha chiluli kota vyotumhuliche hetwe hamba nakapona mkomu?
DEU 5:27 Musa, ulute habehi kuhulichiza geng'ha goyolonga Mkulu Nguluwi, Nguluwi wa hetwe, hamba uye kutulonjela mbuli azo zeng'ha zoyokulonjela. Hetwe togahulichiza na kugadita.’
DEU 5:28 “Mkulu Nguluwi nakahulika ulonzi awo weng'ha, nakandonjela, ‘Nyhulika ulonzi vyowokulonjela wanhu awa, geng'ha gowalonjile ga goya.
DEU 5:29 Wone wawe na majesa kota aga mazuwa geng'ha, nawawe wondumba na kibata mizilo ja heni! Mbuli zeng'ha zahawele goya kwa hewo wawo na walelwa wa hewo mazuwa gose.
DEU 5:30 Ulute ukawalonjele wahiluche kuli mihema ja hewo.
DEU 5:31 Ila hegwe Musa wime aha habehi na heni, ndokulonjela malajizo geng'ha na mizilo na utaguso wouwalangusa, leka wadite ahyo kuli isi iwele ndowapa iwe ya hewo.’
DEU 5:32 “Hemwe milolele mkadite kota Mkulu Nguluwi, Nguluwi wa hemwe navyoyawalajize, uleche kuleka kudita chila chinhu chilinguganigwa.
DEU 5:33 Mowinza nzila zeng'ha Mkulu Nguluwi, Nguluwi wa hemwe, vyoyawalajize kuwinza leka mbuli za hemwe ziditigwe goya na mikale miyaka minji kuli isi yomuihola.
DEU 6:1 “Aga ndo malajizo na mizilo na utaguso uwele Mkulu Nguluwi, Nguluwi wa hemwe, nakandajiza ndiwalanguse, leka mdite kuli isi yomlinguluta kuihola.
DEU 6:2 Mhela weng'ha womuwa wakomu, mwanguganigwa kumdumba Mkulu Nguluwi, Nguluwi wa hemwe na kibatilila malajizo geng'ha na mizilo jondilinguwapani hemwe na walelwa wa hemwe leka mikale kwa miyaka minji.
DEU 6:3 Ahyo, mhulichize hemwe Waisilaeli, milolele na kibatilila leka mbuli za hemwe ziditigwe goya na konjezeka ng'hatu kuli isi ayo iwele na mboto kota navyoyelahile Mkulu Nguluwi, Nguluwi wa wasekulu wa hemwe.
DEU 6:4 “Lelo mhulichize hemwe Waisilaeli. Mkulu Nguluwi, Nguluwi wa hetwe, ndo Mkulu Nguluwi yumwe hela.
DEU 6:5 Namwe mumgane Mkulu Nguluwi wa hemwe, kwa nhumbula za hemwe zeng'ha na kwa muhe wa hemwe weng'ha na kwa mong'ho wa hemwe weng'ha.
DEU 6:6 Na ulonzi awu wondilinguwalonjela lehano, muuwiche mnhumbula za hemwe,
DEU 6:7 namwe muwalanguse wana wa hemwe goya na kugalonga homchikalisa kuli ng'handa za hemwe na homjenda mnzila na homuwasa na homlilimka.
DEU 6:8 Mgakoweleze gawe ulajilo mchanya mwa moko ga hemwe na kuwoha mvihanga vya hemwe.
DEU 6:9 Kahi mgandiche mchanya mwa vibatilila lwizi lwa ng'handa za hemwe na mchanya mwa lwizi lwa lugagala lwa ng'handa za hemwe.
DEU 6:10 “Kota vila Mkulu Nguluwi, Nguluwi wa hemwe, navyoyawalahile wasekulu wa hemwe, Abulahamu na Isaka na Yakobo, heye kowapani isi iwele na miji migazi na jidedemche jiwele hemwe hamzenjile.
DEU 6:11 Ng'handa zowa zimemile vinhu vinojile viwele hemwe hamviwichile, kowa na mizimbo jiwele hajibawigwe na hemwe na migunda ja zabibu na mizeituni jiwele hemwe hamnyalile. Homuwa na chilyo choneche chomlingugana,
DEU 6:12 milolele mleche kumsemwa Mkulu Nguluwi yawalavile Misili nakomuwele wapogozi.
DEU 6:13 Momdumba Mkulu Nguluwi, Nguluwi wa hemwe, mowa vitumagwa wa heye na kilaha kwa itagwa lya heye.
DEU 6:14 Mleche kujiwinza milungu jinji na milungu ja wanhu wawele habehi na hemwe,
DEU 6:15 ng'halazi ya Mkulu Nguluwi ileche kuya kwa hemwe na kuwadumya ng'hatu kulawa kuli isi, mina Mkulu Nguluwi, Nguluwi wa hemwe yawele hagati ha hemwe, ndo Nguluwi yawele na fihi.
DEU 6:16 “Mleche kumjeza Mkulu Nguluwi, Nguluwi wa hemwe kota navyomumjezile ako Masa.
DEU 6:17 Mibatilile ng'hatu malajizo na utaguso na mizilo ja Mkulu Nguluwi, Nguluwi wa hemwe jiwele heye joyalajize.
DEU 6:18 Mdite gawele na hachi na ganojile hali Mkulu Nguluwi, leka mbuli za hemwe ziditigwe goya. Moweza kuhola isi yila inojile iwele Mkulu Nguluwi nakelaha kuwapa wasekulu wa hemwe,
DEU 6:19 na mowawinga wang'honyo wa hemwe kota Mkulu Nguluwi navyoyawalahile.
DEU 6:20 “Mazuwa galinguya, wana wa hemwe howowauza, ‘Malajizo na mizilo na utaguso uwele Mkulu Nguluwi, Nguluwi wa hetwe, na kuwalonjela mdite, gana mana yachi?’
DEU 6:21 Hemwe mowedichila ahi, ‘Hetwe natwali wapogozi wa Falao, mndewa wa Misili na Mkulu Nguluwi nakatugombola kwa moko wa heye uwele na mong'ho.
DEU 6:22 Kwa meho ga hetwe twetwe, natumona Mkulu Nguluwi yodita ulajilo na vinduzanduza vikulu vya kudumbiza kwa kuwagaza Wamisili na mndewa wa hewo Falao na wakulu wa heye.
DEU 6:23 Nakatulavya Misili, nakatugala aha na kutupa isi ayi kota navyoyelahile kota kowapa wasekulu wa hetwe.
DEU 6:24 Lelo Mkulu Nguluwi nakatulajiza kibatilila malajizo aga na kumdumba kwa chiwalo cha kutwamila hetwe leka tikale kota vyotulingikala lehano.
DEU 6:25 Kahi towa tutanganiche wone tibatilile malajizo hali Mkulu Nguluwi, Nguluwi wa hetwe, kota navyoyatulajize.’
DEU 7:1 “Mkulu Nguluwi, Nguluwi wa hemwe, kowafichiza kuli isi yomluta kuzakikala na kowawinga wanhu wenji kulawa kuli isi ayo. Homkwinjila, kowawinga hali hemwe wanhu wa isi saba ng'hulu na ziwele na mong'ho kusinda hemwe, Wahiti na Wagiligashi na Waamoli na Wakanaani na Wapelisi na Wahivi na Wayebusi.
DEU 7:2 Kahi, Mkulu Nguluwi, Nguluwi wa hemwe hoyowawika mmoko mwenu, muwasumye wanhu awo na kuwadumya ng'hatu, mleche kuwika ilagano lyoneche na hewo na mleche kuwonela isungu.
DEU 7:3 Mleche kihola na hewo, na mleche kuwakundiza wana wa hemwe kihola na hewo.
DEU 7:4 Homdita ahyo hewo wowajiliza wana wa hemwe waleche kumfugamila Mkulu Nguluwi na kuwadita wajifugamile milungu jinji, na ng'halazi ya Mkulu Nguluwi yowagwila hemwe hamba kowadumya kamwe.
DEU 7:5 Ila muwaditile ahi, mobomola honhu ha kulavila nhambiko na kugwisa mizengo ja maganga ga kufugamila milungu ja hewo. Mizengo ja migodi ja Ashela mojitema na kujisoma kwa chiluli jimalukolo ja hewo ja kuhongola.
DEU 7:6 Mdite ahyo, leka muwe wa chiuyeng'ha kwa Mkulu Nguluwi, Nguluwi wa hemwe. Kuli wanhu weng'ha kuli isi yeng'ha, Nguluwi nakawahagula hemwe leka muwe nhanzi ya heye yuye.
DEU 7:7 “Mkulu Nguluwi nahawaganile hemwe na kuwahagula kwa vila hemwe mwa wenji heko kusinda wanhu wanji, hemwe namwali wachefu kusinda nhanzi zinji kuli isi yeng'ha.
DEU 7:8 Ila kwa vila Mkulu Nguluwi kanguwagana hemwe na kangibata chilaho nachoyawalahile wasekulu wa hemwe, ndo mina nakawagombola kwa moko uwele na mong'ho na kuwalohola kulawa kuli upogozi, kuli moko ga Falao mndewa wa Misili.
DEU 7:9 Lelo mvizele kota Mkulu Nguluwi, Nguluwi wa hemwe, ndo Nguluwi wa kitumbila. Kochibata ilagano lya heye na kuwalajila igano lya kwimilila kwa lulelo elufu lwa wala walingumgana na kuwinza malajizo ga heye.
DEU 7:10 Ila holemwela kuwagaza himahima wala walingumzudila.
DEU 7:11 Ahyo, muwe mchilolela na kibatilila malajizo na mizilo na utaguso wondilinguwalajiza lehano.
DEU 7:12 “Homuwinza malajizo aga na kugabatilila na kugadita, Mkulu Nguluwi, Nguluwi wa hemwe, kochibata ilagano lya heye na hemwe, na kowalajila igano lya kwimilila kota navyoyawelahile wasekulu wa hemwe.
DEU 7:13 Kowagana na kuwatambichiza, namwe mokonjezeka na mowa na lulelo lwinji. Kojitambichiza migunda ja hemwe leka muwe na mbena ya kuhega na divai na mafuta ga mzeituni, kowatambichiza kwa kuwapani misenga na ming'holo minji kuli isi yawelahile wasekulu wa hemwe kowapani hemwe.
DEU 7:14 Motambichizwa kusinda wanhu weng'ha muisi. Kowa kuduhu mlume ama mdala ama igongolo lya hemwe kowa mhende hali hemwe.
DEU 7:15 Mkulu Nguluwi kowosela hemwe matamwa geng'ha na hamtamika matamwa goneche ga kudumbiza kota nagomugule ako Misili, ila matamwa ago kowapa wang'honyo wa hemwe.
DEU 7:16 Muidumye nhanzi yoneche Mkulu Nguluwi, Nguluwi wa hemwe, koiwika mmoko ga hemwe na mleche kuyonela isungu. Mleche kufugamila milungu ja hewo, kwa vila mbuli ayi yowa ya kuwagwiliza hemwe.
DEU 7:17 “Mleche kilonjelela mnhumbula za hemwe, ‘Wanhu awa ndo wenji kusinda hetwe, toweza kuwawinga muisi?’
DEU 7:18 Mleche kuwadumba, mkumbuchile kota vila Mkulu Nguluwi, Nguluwi wa hemwe, navyoyamditile Falao na isi yeng'ha ya Misili.
DEU 7:19 Mkumbuchile matamwa gehile mgawene kwa meho genu mwemwe na ulajilo na kububuwaza na moko uwele na mong'ho na ludali lukulu, uwele Mkulu Nguluwi, Nguluwi wa hemwe, nayawalohole hemwe. Ahyo ndo vyoyowadumya wanhu mlinguwadumba.
DEU 7:20 Mzidi wa ago, Mkulu Nguluwi, Nguluwi wa hemwe, kohilika nzuchi hali hewo na wala weng'ha wevisile leka wadumigwe.
DEU 7:21 Lelo mleche kuwadumba, kwa vila Mkulu Nguluwi, Nguluwi wa hemwe, ka hamwe na hemwe. Heye ndo Nguluwi mkulu na wa kudumbiza.
DEU 7:22 Mkulu Nguluwi, Nguluwi wa hemwe, kowawinga wanhu wa isi azi zilingulutilila kumwando hadohado. Hamuweza kugadumya geng'ha kamwe, kwa vila homdita ahyo, migongolo ja kisolo jokonjezeka na jowa ja kudumbiza kwa hemwe.
DEU 7:23 Mkulu Nguluwi, Nguluwi wa hemwe, kowawika wang'honyo wa hemwe mmoko mwenu na kowadita wadumbe ng'hatu mbaka wabagame.
DEU 7:24 Kowawika wandewa wa hewo mmoko mwenu. Mowakopola nawo wosemigwa. Kuduhu munhu yoneche yoweza kuwalemeza mbaka homuwadumya.
DEU 7:25 Mjilakaze kwa chiluli jimalukolo jawo ja kuhongola ja milungu jawo. Mleche kugana sendi ne zahabu za hewo zigubiche jimalukolo jawo na mleche kuhola na kuzidita ziwe za hemwe. Kudita ahyo ndo kuwagwiliza na ndo izudizo kwa Mkulu Nguluwi, Nguluwi wa hemwe.
DEU 7:26 Mleche kuhilika izudizo kota jimalukolo kuli ng'handa za hemwe, wone mdite ahyo, modumigwa kota jimalukolo ajo. Iwagana mjizudile na kujibeza kwa vila ndo vinhu vidumigwe.
DEU 8:1 “Mkumbuchile kugadita malajizo geng'ha gondilinguwapani lehano, leka mikale na konjezeka na mwinjile na kuihola isi yila iwele Mkulu Nguluwi nakelaha kuwapa wasekulu wa hemwe.
DEU 8:2 Mkumbuchile vila Mkulu Nguluwi, Nguluwi wa hemwe, navyoyawalongoze kuli majendo kukolela kuchiwala kwa mhela wa miyaka ajo makumi gane leka yawosele ukulu wa hemwe na kuwajeza leka yavizele gomwalingijesa mnhumbula za hemwe na wone mochibatilila malajizo ga heye ama hebu.
DEU 8:3 Nakawosela ukulu wa hemwe na nakawaleka mone nzala na hamba nakawapani mana mulye, chilyo chohamchizelele na wasekulu wa hemwe nahawachizelele. Nakadita ahyo leka yawalanguse kota munhu howa mkomu kwa ibumunda hela, ila kwa chila ulonzi woyolonga Mkulu Nguluwi.
DEU 8:4 Mhela awo wa miyaka makumi gane, nguwo za hemwe nahazilalile ne magulu ga hemwe hagatung'hune.
DEU 8:5 Mvizele kota Mkulu Nguluwi, Nguluwi wa hemwe, kanguwazapa kota vila mhaza yalingumzapa mwanage.
DEU 8:6 Ahyo, mibatilile malajizo ga Mkulu Nguluwi, Nguluwi wa hemwe, kwa kuwinza nzila ya heye na kumdumba.
DEU 8:7 Mkulu Nguluwi, Nguluwi wa hemwe, kanguwegala kuli isi inojile, isi iwele na nzanda na nzasa na mazi galingulawa kuli mibindi na kuli vidunda,
DEU 8:8 isi iwele na ngano na shayili na zabibu na mikuyu na mikomamanga na mizeituni na hanombwa.
DEU 8:9 Ako mowa na chilyo cha kuhega ne kwisilwa chinhu. Mitalawe jake jina chuma na kuli vidunda moweza kubawa shaba.
DEU 8:10 Molya na kiguta, momtogola Mkulu Nguluwi, Nguluwi wa hemwe, kwa isi inojile yoyawapele.
DEU 8:11 “Milolele mleche kumsemwa Mkulu Nguluwi, Nguluwi wa hemwe, kwa kuleka kibata malajizo na mizilo na utaguso woyawalajize lehano.
DEU 8:12 Homulya na kiguta na kizenjela ng'handa zinojile na kikala amo
DEU 8:13 na mhela ula misenga na ming'holo ja hemwe na zahabu na sendi za hemwe na chila chinhu chomuwele nacho chowa chonjezeche,
DEU 8:14 mleche kidaya na kumsemwa Mkulu Nguluwi, Nguluwi wa hemwe, yawalavile kuli isi ya Misili, honhu nahomuwele wapogozi.
DEU 8:15 Ndo heye yawalongoze kuli chiwala chikulu na cha kudumbiza na kuwele na mizoka jiwele na dunga na nyinje, kuli isi yila ikalile ilihela mazi, ila heye nakawegalila mazi kulawa kuli italawe likavu.
DEU 8:16 Kahi ndo yawaditile mulye mana kula kuchiwala, chilyo chiwele wasekulu wa hemwe nahawachizelele. Nakadita ago geng'ha leka kuwosela ukulu na kuwajeza leka yawape utambichizo kumwiso.
DEU 8:17 Ahyo milolele mleche kilonjelela mnhumbula za hemwe, ‘Tuwa na lufufu kwa mong'ho na ludali lwetu baha.’
DEU 8:18 Mkumbuchile kota Mkulu Nguluwi, Nguluwi wa hemwe, ndo yalinguwapani ludali lwa kuwa na lufufu. Kangudita ahyo leka kuliwika goya ilagano lyoyelahile na wasekulu wa hemwe mbaka lehano.
DEU 8:19 Ila mleche kumsemwa Mkulu Nguluwi, Nguluwi wa hemwe, na kujiwinza milungu jinji leka wone mojikolela mijito na kujifugamila, ndanguwakanya lehano kota mobagama.
DEU 8:20 Wone mlema kumhulichiza Mkulu Nguluwi, mobagama kota wanhu wa isi zeng'ha vyowadumigwe hali hemwe.
DEU 9:1 “Mhulichize hemwe Waisilaeli! Hambi lehano mwa habehi kuloka lwanda lwa Yolodani kuza kuihola isi ya wanhu wenji na wawele na mong'ho kusinda hemwe. Miji ja hewo ndo mikulu lukami na jina lugagala lwa lukanzi lulingufika kilanga.
DEU 9:2 Wanhu wawo ndo wang'wemang'wema na wawele na mong'ho, ndo Waanaki wawele kota mvizelele na kota vyomuhuliche wanhu wangulonga mbuli ya hewo, ‘Kakohi yoweza kuwahejelela wana wa Anaki?’
DEU 9:3 Mvizele lehano baha, kota yalinguwalongola kota chiluli chilingulakaza ndo Mkulu Nguluwi, Nguluwi wa hemwe. Kowadumya na kuwawika hasi hali hemwe, ahyo mowawinga na kuwadumya kamwe hela, kota navyoyawelahile Mkulu Nguluwi.
DEU 9:4 “Hala du Mkulu Nguluwi, Nguluwi wa hemwe, hoyowawinga wanhu awo hali hemwe, mleche kulonga mnhumbula za hemwe kota, ‘Ndo kwa chiwalo cha kutanganika kwa hetwe Mkulu Nguluwi katigala tuihole isi ayi.’ Hebu, Mkulu Nguluwi nakawawinga wanhu awa hali hemwe kwa chiwalo cha wihe wa hewo.
DEU 9:5 Moweza kuihola isi ya hewo haiwele kwa vila hemwe ndo wanhu mtanganiche ama muwele na nhumbula zinojile, ila Mkulu Nguluwi, Nguluwi wa hemwe, kanguwawinga wanhu awo hali hemwe kwa vila weha na kangugana kuwika goya ula ulonzi yawelahile wasekulu wa hemwe, Abulahamu na Isaka na Yakobo.
DEU 9:6 Lelo mvizele kota Mkulu Nguluwi, Nguluwi wa hemwe, kanguwapani isi ayi inojile muihole haiwele kwa vila hemwe ndo wanhu mtanganiche, ila hemwe ndo wanhu muwele na nhumbula igagadale.
DEU 9:7 “Mkumbuche na mleche kusemwa vila navyomumzudize Mkulu Nguluwi, Nguluwi wa hemwe, akula kuchiwala. Kulawila zuwa lila lomlawile isi ya Misili mbaka zuwa lomfichile honhu aha, hemwe muwa mumbelenhuka Mkulu Nguluwi.
DEU 9:8 Na ako kuchidunda Holebu, namumzudiza Mkulu Nguluwi, na heye nakazudila ng'hatu, chasi cha kugana kuwadumya hemwe.
DEU 9:9 Long'hwinile kuchidunda kubochela vibao vya maganga viwele navyandichigwe ilagano liwele Mkulu Nguluwi nakadita na hemwe, nandikala ako mazuwa makumi gane, nechilo na nemisi, sidile ne kunwa choneche.
DEU 9:10 Hamba Mkulu Nguluwi nakamha heni vibao vili vya maganga vyandichigwe kwa chidole cha heye Nguluwi, navyali vyandichigwe ulonzi weng'ha uwele Mkulu Nguluwi nakawalonjelani kuchidunda kulawa kuli chiluli zuwa lya nhing'hano.
DEU 9:11 Ena, loifichile zuwa alyo lya makumi gane, nechilo na nemisi, Mkulu Nguluwi nakamha heni vibao avyo vili vya maganga viwele vyandichigwe ilagano.
DEU 9:12 “Lelo Mkulu Nguluwi nakandonjela ‘Uche, widuliche hasi ha chidunda himahima, kwa vila wanhu wa hegwe uwalavile Misili wajilila. Waileka himahima nzila yondiwalonjele waiwinze na weditila jimalukolo ja kupondigwa.’
DEU 9:13 “Na kahi Mkulu Nguluwi nakandonjela ‘Ndiwona wanhu awa, ndo wanhu wawele na nhumbula zigagadale ng'hatu,
DEU 9:14 undeche ndiwadumye wanhu awa, ndilyuse ng'hatu itagwa lya hewo muisi, na heni ndokudita hegwe uwe isi iwele na mong'ho na wanhu wenji kusinda hewo.’
DEU 9:15 “Nacho chiluli nachali chikwaka kuchidunda. Nanyhinduka na kudulika kulawila kuchidunda, mbele mhapile vila vibao vili vya ilagano vya maganga.
DEU 9:16 Nandola, nambona mina mdita gehile ng'hatu kwa Mkulu Nguluwi, Nguluwi wa hemwe namihongolela limalukolo lya ilogota lya kuponda, ne kukawila namleka nzila ya Mkulu Nguluwi iwele nayawalonjele.
DEU 9:17 Ahyo, nandivibata vila vibao vili vya maganga nandivitaga hanyi, nandivibena hali hemwe.
DEU 9:18 Hamba nambasa hasi chifunama hali Mkulu Nguluwi, kota aho mwaluko, kwa mhela wa mazuwa makumi gane nechilo na nemisi, sidile chilyo ne kunwa mazi, kwa chiwalo cha gehile gomuwele mditile kwa kudita wihe hali Mkulu Nguluwi na kumzudiza.
DEU 9:19 Nandumba kuzudila na kukalala kwa Mkulu Nguluwi hali hemwe, naiwadumya, ila Mkulu Nguluwi nakanyhulichiza kahi mhela awo.
DEU 9:20 Kahi, Mkulu Nguluwi nayali yomkalalila ng'hatu Aluni, chasi cha kumdumya, ahyo nandimlandila Aluni mhela wuwo.
DEU 9:21 Hamba gala gehile, mina lila ilogota lyomigongomanyile, nandilihola na kulilakaza kuchiluli na ndilifinafina na kulibalasabalasa, liwa nhimbwisi iwele nimwanimwa, hamba nandiitaga ayo nhimbwisi kuli lwanda lulinguchililika hali chidunda chila.
DEU 9:22 “Kahi namumzudiza Mkulu Nguluwi, Nguluwi wa hemwe, ako Tabela na Masa na Kibuloti-hataava.
DEU 9:23 Na Mkulu Nguluwi vyoyawalajize hemwe kulawila Kadeshi-balineya yolonga, ‘Mlute mkaihole isi iwele ndiwapele,’ hamkundile ne kuhulichiza gala goyawalonjele.
DEU 9:24 Hemwe muwa wanhu wambelenhuche Mkulu Nguluwi kwaluchila zuwa lila lyondiwazelele.
DEU 9:25 “Ahyo nambasa chifunama hali Mkulu Nguluwi zuwa alyo makumi gane, nechilo na nemisi, kwa vila Mkulu Nguluwi nayali yalonjile kowadumya.
DEU 9:26 Nandimlanda Mkulu Nguluwi ndilonga, ‘Hegwe Mkulu Nguluwi, uleche kuwadumya wanhu wa hegwe na uhalizi wa hegwe, wanhu wouwagombole na kuwalavya kuli isi ya Misili kwa moko uwele na mong'ho.
DEU 9:27 Uwakumbuche vitumagwa wa hegwe, Abulahamu na Isaka na Yakobo, na uleche kijesa kugagadala kwa nhumbula za hewo ama wihe ama gehile ga wanhu awa.
DEU 9:28 Wanhu wa kula koutulavile waleche kuya kulonga kota Mkulu Nguluwi nakawalavya leka yawakopole kuchiwala kwa vila hawezile kuwenjiza kuli isi yoyawalonjele na kwa vila nakawazudila.
DEU 9:29 Mina, awa ndo wanhu wa hegwe na uhalizi wa hegwe, wanhu nauwalavile kulawila Misili kwa mong'ho na ludali lwa hegwe lukulu.’
DEU 10:1 “Hamba Mkulu Nguluwi nakandonjela, ‘Uhongole vibao vili vya maganga kota vila vya mwaluko, na ugongomanye isanduku lya mbao lya kuwichila. Uye kwa heni aku kuchidunda,
DEU 10:2 nani ndokwandika ulonzi uwele wandichigwe kuli vibao vila vyoubenile, hamba uviwiche vibao avyo kuli isanduku.’
DEU 10:3 “Lelo nangongomanya isanduku kwa igodi lya msonobali na kuhongola vibao vili vya maganga kota vila vya mwaluko, nandivihola mmoko, na kukwina navyo kuchidunda.
DEU 10:4 Mkulu Nguluwi nakandika kuli vibao avyo ulonzi wuwula kota aho mwaluko, mizilo kumi jila najoyawapele naloyalonjile kulawila kuli chiluli zuwa lya nhing'hano. Hamba Mkulu Nguluwi nakamha vibao avyo.
DEU 10:5 Lelo nanyhinduka nakudulika kulawila kuchidunda, nandiviwika vibao avyo mgati mwa isanduku lyonandali ndiligongomanyile, na vya mgati mwa isanduku alyo, kota Mkulu Nguluwi navyoyandajize.”
DEU 10:6 Wanhu wa Isilaeli nawenula majendo kulawila kuli mizimbo ja Wajaakani mbaka Mosela. Aho, Aluni nakabagama, nakatiligwa. Eleasali mwanage, nakahola honhu hake kota mtambika.
DEU 10:7 Kulawila aho, nawenula majendo mbaka Gudigoda, na kulawila Gudigoda mbaka Yotibata, honhu hawele na nzanda nyinji za mazi.
DEU 10:8 Mhela awo, Mkulu Nguluwi nakawahagula wanhu wa nhanzi ya Lawi wawe wolipika isanduku lya ilagano lya Mkulu Nguluwi, wamkolele mijito kota watambika na kuwatambichiza wanhu kwa itagwa lya heye mbaka sambi baha.
DEU 10:9 Ndo mina nhanzi ya wanhu wa Lawi yahela honhu ha isi ya uhalizi hamwe na wang'holozawo, Mkulu Nguluwi ndo uhalizi wa heye, kota Mkulu Nguluwi, Nguluwi wa hemwe navyoyalonjile.
DEU 10:10 Musa nakalutilila kulonga, “Nandikala kuchindunda kwa mhela wa mazuwa makumi gane, nechilo na nemisi, kota aho mwaluko. Mkulu Nguluwi nakanyhulichiza lwa keli kahi nakukunda koleka kuwadumya hemwe.
DEU 10:11 Hamba Mkulu Nguluwi nakandonjela, ‘Uche ulutilile na majendo ga hegwe uwalongoze wanhu leka wenjile na kuihola isi yondiwelahile wasekulu wa hewo kota ndowapa.’
DEU 10:12 “Lelo hemwe Waisilaeli, Mkulu Nguluwi, Nguluwi wa hemwe, kangugana choni kwa hemwe, ila ndo kumdumba Mkulu Nguluwi, Nguluwi wa hemwe na kuziwinza nzila za heye zeng'ha na kumgana na kumkolela mijito Mkulu Nguluwi, Nguluwi wa hemwe, kwa nhumbula yeng'ha na kwa muhe wa hemwe weng'ha
DEU 10:13 na kibatilila mizilo na malajizo ga Mkulu Nguluwi gondilinguwawichila lehano, kwa mbuli za mwemwe baho?
DEU 10:14 Ulole, kilanga na kilanga ng'hatu, vyeng'ha vya heye Mkulu Nguluwi, Nguluwi wa hemwe na isi na vyeng'ha vilimumo.
DEU 10:15 Kahi Mkulu Nguluwi nakawagana wasekulu wa hemwe ng'hatu nakawahagula hemwe walelwa wa hewo honhu ha wanhu wanji, kota lehano baha.
DEU 10:16 Ahyo, mibatilile ilagano lya Mkulu Nguluwi na mleche kuwa na nhumbula zigagadale.
DEU 10:17 Mina Mkulu Nguluwi, Nguluwi wa hemwe, ndo Nguluwi wa milungu na Mkulu wa wakulu. Heye ndo Nguluwi mkulu na yawele na ludali na wa kudumbigwa, halinguganilila na hambe yabochele chinhu kwa chiwalo cha kumganilila munhu.
DEU 10:18 Kangumditila hachi mwana mchiwa na mdala yafililwe na mlume, kahi kangumgana mjenzi na kumha chilyo na nguwo.
DEU 10:19 Lelo muwagane wajenzi kwa vila namwe kahi namwali wajenzi kuli isi ya Misili.
DEU 10:20 Mumdumbe Mkulu Nguluwi, Nguluwi wa hemwe na mumkolele mijito, muwe hamwe na heye na kilaha kwa itagwa lya heye.
DEU 10:21 Heye ndo lutogo lwa hemwe, ndo Nguluwi wa hemwe yawele yawaditile azi mbuli ng'hulu na za kukabusa zomziwene kwa meho ga mwemwe baho.
DEU 10:22 Wasekulu wa hemwe nalowalutile Misili, nawali wanhu makumi saba hela, ila sambi Mkulu Nguluwi, Nguluwi wa hemwe, kawadita wawe wenji kota nhondwe za kilanga.
DEU 11:1 “Kwa chiwalo acho, mumgane Mkulu Nguluwi, Nguluwi wa hemwe na kibata utaguso na malajizo na mizilo ja heye mazuwa gose.
DEU 11:2 Mijese goya ng'hatu, nakawazapa hemwe, hawawele wana wa hemwe. Hemwe ndo Mkulu Nguluwi na ukulu wa heye na moko wa heye uwele na mong'ho na ludali lukulu lwa heye
DEU 11:3 na ulajilo wa heye na kububuwaza kwa heye koyaditile kula Misili kwa Falao, mndewa wa Misili, na isi ya heye yeng'ha,
DEU 11:4 na yawaditile wamizi wa Misili na falasi na mituka ja hewo ja kitowela ngondo, vila vyoyachizibize kuli Bahali ya Shamu, navyowawawinzile hemwe. Ahyo ndo Mkulu Nguluwi vyoyawasumile mbaka lehano.
DEU 11:5 Kahi mkumbuche navyoyawaditile Mkulu Nguluwi kuchiwala nalomuwele mng'hali fika aha,
DEU 11:6 na mbuli yoyawaditile Datani na Abilamu, wana wa Eliabu, mwana wa Lubeni, vila hali wanhu weng'ha wa Isilaeli, isi navyoigubuche na kuwamela hamwe na ivyazi lya hewo na mihema ja hewo na vitumagwa wa hewo weng'ha.
DEU 11:7 Mina meho ga hemwe nagona madito makulu geng'ha aga gawele gaditikwe na Mkulu Nguluwi.
DEU 11:8 “Mibatilile malajizo geng'ha ga heye gondilinguwapa zuwa ali lya lehano, leka muwe na mong'ho na mwinjile na kuihola isi yomlinguluta
DEU 11:9 na mikale kwa mhela uhejile kuli isi iwele na mboto, isi iwele Mkulu Nguluwi nakelaha kota kowapa wasekulu wa hemwe na walelwa wa hewo.
DEU 11:10 Kwa vila isi yomlinguluta kuihola haiwele kota isi ya Misili komlawile, komunyalile nyhule na kuboholela mazi kwa kitunya kota migunda ja mboga,
DEU 11:11 ila isi yomlinguluta kuihola, ndo isi ya vidunda na mibindi, isi iwele yowa na mazi kulawila kilanga,
DEU 11:12 isi iwele Mkulu Nguluwi, Nguluwi wa hemwe, kanguilolela mazuwa gose kanguilolela kulawila mwaluko wa mwaka mbaka kuduma kwa mwaka.
DEU 11:13 “Lelo wone mochibatilila malajizo ga heni gondilinguwapa lehano, momgana Mkulu Nguluwi, Nguluwi wa hemwe na momkolela mijito kwa nhumbula za hemwe zeng'ha na kwa muhe wa hemwe weng'ha,
DEU 11:14 heye koigalila nhonya isi ya hemwe mhela woufika na nhonya za luhela na nhonya za ng'humbusa walimi, namwe mobena nyhule za hemwe na divai ya hemwe na mafuta ga mzeituni.
DEU 11:15 Kojoteza misolo kumigunda kwa chiwalo cha misenga ja hemwe, namwe molya na kiguta.
DEU 11:16 Milolele, nhumbula za hemwe zileche kuhadigwa na kugaluka na kujikolela mijito milungu jinji na kujifugamila,
DEU 11:17 nayo ng'halazi ya Mkulu Nguluwi yowafika hemwe na kudinya kilanga mbaka hawe haduhu nhonya na isi ileche kulavya chilyo. Hamba modumigwa himahima kulawila kuli isi inojile iwele Mkulu Nguluwi yawapele.
DEU 11:18 “Muuwiche ulonzi wa heni mnhumbula za hemwe na kuli muhe wa hemwe. Mgawohe mmoko mwenu kota ulajilo na kugavala kuli vihanga.
DEU 11:19 Muwalanguse wana wa hemwe ulonzi awu, muwasimile homuwa mchikala kuli ng'handa za hemwe na homuwa mjenda na homuwasa na homlilimka.
DEU 11:20 Mzandiche kuli vibatilila lwizi na kuli lwizi lwa lugagala lwa hemwe,
DEU 11:21 leka hemwe na wana wa hemwe mikale kwa miyaka minji kuli isi iwele Mkulu Nguluwi, Nguluwi wa hemwe, nakelaha kuwapa wasekulu wa hemwe. Mikale hala mazuwa gose ulanga houlutilila kikala mchanya mwa isi.
DEU 11:22 “Wone mochilolela kudita malajizo geng'ha gawele ndiwapele, kumgana Mkulu Nguluwi, Nguluwi wa hemwe na kuwinza nzila za heye na kilumba na heye,
DEU 11:23 lelo, Mkulu Nguluwi kowawinga wanhu wa isi azo zeng'ha hali hemwe, namwe moihola isi ya wanhu wenji na wawele na mong'ho kusinda hemwe.
DEU 11:24 Chila honhu hombiga howa henu. Isi ya hemwe yokwenela kulawila kuchiwala ubanzi wa kusini mbaka vidunda vya Lebanoni ubanzi wa kasikazini na kulawila lwanda lwa Eyufulate ubanzi wa kolilawilaga isanya mbaka bahali ya Mediteleniyani ubanzi wa kolilinguzibila isanya.
DEU 11:25 Kuduhu munhu yoneche yoweza kitwanza na hemwe. Honeche homluta kuli isi ayo, Mkulu Nguluwi, Nguluwi wa hemwe, kowapa wanhu lunhwinhwi wawadumbe hemwe, kota navyoyelahile.
DEU 11:26 “Milolele, lehano ndanguwika utambichizo na upanjilo hali hemwe,
DEU 11:27 utambichizo wone mochibatilila malajizo ga Mkulu Nguluwi, Nguluwi wa hemwe, gala gondilinguwapani lehano
DEU 11:28 na upanjilo wone hamlingibatilila malajizo ga Mkulu Nguluwi, Nguluwi wa hemwe, na kuleka nzila yondiwalajize na wone mojifugamila milungu jinji johamjizelele.
DEU 11:29 Mkulu Nguluwi hoyowadita mfiche kuli isi yomlinguluta kuihola, modamla utambichizo kulawa kuchidunda cha Gelisimu na upanjilo kulawa kuli chidunda cha Ebali.
DEU 11:30 Vidunda avi vya kumwambu mwa lwanda lwa Yolodani ubanzi wa kolizibilaga isanya, kuli isi ya Wakanaani walingikala kuli ibindi lya Yolodani lichilola na Giligali hafungo ha mwaloni wa Mole.
DEU 11:31 Yowagana kuloka lwanda lwa Yolodani leka mwinjile kuihola isi iwele Mkulu Nguluwi, Nguluwi wa hemwe, yalinguwapani. Lelo homuihola na kikala amo,
DEU 11:32 namwe milolele, mgadite malajizo na mizilo jeng'ha ndilinguwapani lehano.
DEU 12:1 “Aga ndo malajizo na mizilo jomlinguganigwa kuwinza kuli isi iwele ndo Mkulu Nguluwi, Nguluwi wa hemwe, yoyawapele muihole, mazuwa gose ga kikala kwa hemwe hali isi.
DEU 12:2 Muwifye ng'hatu honhu hawo heng'ha ha kulavila nhambiko ha milungu, kuli isi zomlinguluta kuzihola kuli chinhembenhembe cha chidunda na kuchidunda na kuli lubehelo lwa migodi mikulu.
DEU 12:3 Mbomole honhu ha kulavila nhambiko na kugwisa mizengo ja maganga ga hewo. Mjilakaze kwa chiluli mizengo ja migodi ja Ashela na kubenanga jimalukolo jawo ja kuhongola na kusila kutali itagwa lyawo na honhu aho.
DEU 12:4 “Na mleche kumfugamila Mkulu Nguluwi, Nguluwi wa hemwe kota ahyo.
DEU 12:5 Ila moluta honhu hala Mkulu Nguluwi, Nguluwi wa hemwe, koyakuhagule kuli nhanzi zeng'ha leka kuwika itagwa lyake aho. Ako ndo komluta,
DEU 12:6 kahi ako mohilika nhambiko za hemwe za kulakazwa na nhambiko za hemwe na zaka na ndolendole zomlinguhilika na nhambiko za hemwe za kilaha na nhambiko za hemwe za kunuwila na nhambiko za walelwa wa mwaluko wa isenga na ming'holo ja hemwe.
DEU 12:7 Ako molya hali Mkulu Nguluwi, Nguluwi wa hemwe na mosangalala hemwe hamwe na wanhu wa haluga henu kwa chiwalo cha mijito jomjikolile na kwa chiwalo cha gala gomtambichizwe na Mkulu Nguluwi, Nguluwi wa hemwe.
DEU 12:8 “Mleche kudita kota vyotulingudita sambi, iwele chila munhu kota vyoyalingugana yuye,
DEU 12:9 kwa vila mng'hali kwinjila kuli honhu ha kwesela na kuli uhalizi yalinguwapa Mkulu Nguluwi, Nguluwi wa hemwe.
DEU 12:10 Ila homloka lwanda lwa Yolodani na kikala kuli isi iwele Mkulu Nguluwi, Nguluwi wa hemwe, kowapa muihole na hoyowapa lweselo leka mleche kugazigwa na wang'honyo wa hemwe weng'ha wawele wowazunguluta leka mikale goya.
DEU 12:11 Lelo aho honhu hawele Mkulu Nguluwi, Nguluwi wa hemwe, hoyohagula leka itagwa lya heye likale, mohilika chila chinhu chilinguwalapa hemwe viwele ndo nhambiko za hemwe za kulakazwa na zaka za hemwe na ndolendole zomlinguhilika na nhambiko za hemwe za kilaha zomlingulonga momlavila Mkulu Nguluwi.
DEU 12:12 Ako mosangalala hali Mkulu Nguluwi, Nguluwi wa hemwe, hemwe hamwe na wana wa hemwe na vitumagwa wa hemwe na Walawi walingikala kuli miji ja hemwe kwa vila wahela honhu ne uhalizi hali hemwe.
DEU 12:13 Milolele mleche kulavya nhambiko za hemwe za kulakazwa honhu honeche homkona,
DEU 12:14 ila honhu hala Mkulu Nguluwi hoyohagula kuli nhanzi imwe ya nhanzi za hemwe, aho ndo honhu homlavila nhambiko za hemwe za kulakazwa na ndo aho homditila mbuli zinji zeng'ha zondiwalonjele mdite.
DEU 12:15 “Ila milejeha kuli kudumula singo na kulya migongolo honeche kuli honhu homlingikala homganile kota utambichizo wa Mkulu Nguluwi, Nguluwi wa hemwe. Wanhu weng'ha, wawele wakokomoche ama wohambe wakokomoche woweza kulya kota vila vyomlingulya miwunde ja chifuno ama ibala.
DEU 12:16 Ila mleche kulya danda ya migongolo ajo, muibohole danda ayo hasi kota mazi.
DEU 12:17 Mleche kulya vinhu vino honhu homlingikala, nhambiko za nyhule za hemwe na divai za hemwe ama mafuta ga mzeituni na walelwa wa mwaluko wa misenga ja hemwe ama ming'holo ja hemwe ama nhambiko za hemwe za kilaha ama nhambiko za hemwe za kunuwila ama ndolendole zinji za hemwe zomlinguhilika.
DEU 12:18 Ila molya hali Mkulu Nguluwi, Nguluwi wa hemwe honhu hoyohagula. Molya hemwe hamwe na wana wa hemwe na vitumagwa wa hemwe na Walawi walingikala kuli miji ja hemwe. Mosangalala hali Mkulu Nguluwi, Nguluwi wa hemwe, kuli mijito jeng'ha jomkolile.
DEU 12:19 Milolele kahi kota hamuwasemwa Walawi mhela weng'ha homchikala kuli isi ya hemwe.
DEU 12:20 “Mkulu Nguluwi, Nguluwi wa hemwe, hoyokonjeza mbaka ja isi ya hemwe, kota vyoyelahile, namwe molonga, ‘Tolya miwunde,’ kwa vila mwangugana miwunde, moweza kulya miwunde chasi chomgana.
DEU 12:21 Lelo honhu hoyohagula Mkulu Nguluwi, Nguluwi wa hemwe, hahawiche itagwa lya heye, wone hawe kutali ng'hatu, moweza kulidumula singo isenga ama ing'holo lyoneche lila Mkulu Nguluwi yawapele, kota vyondiwalonjele na moweza kulya chasi choneche cha miwunde ajo, kota mwa hali miji ja hemwe.
DEU 12:22 Molya miwunde ajo kota vyochilingulika chifuno ama ibala. Munhu yoneche koweza kulya, yawele yakokomoche ama yohambe yakokomoche.
DEU 12:23 Ila mvizele kota hamlingulya danda, mina danda ndo ukomu, ahyo lelo, mleche kulya ukomu hamwe na miwunde.
DEU 12:24 Mleche kulya danda ayo, ila muibohole hasi kota mazi.
DEU 12:25 Mleche kulya danda leka mbuli za hemwe ziditigwe goya hamwe na walelwa wa hemwe, mina mowa mdita ganojile hali Mkulu Nguluwi.
DEU 12:26 “Vinhu vyelile vyomlavya na nhambiko za kilaha, movihola na kuvihilika honhu hawele Mkulu Nguluwi hoyohagula.
DEU 12:27 Aho, molavya nhambiko za kulakazwa na miwunde na danda kuli honhu ha kulavila nhambiko ha Mkulu Nguluwi, Nguluwi wa hemwe, danda ya igongolo moiboholela hali honhu ha kulavila nhambiko ha heye Mkulu Nguluwi, Nguluwi wa hemwe, ila mwangukundigwa kulya miwunde.
DEU 12:28 Milolele kuhulichiza aga gondiwalajizeni, leka mbuli ziditigwe goya kwa hemwe hamwe na walelwa wa hemwe mazuwa gose, mina mowa mdita gawele ganojile na ga hachi hali Mkulu Nguluwi, Nguluwi wa hemwe.
DEU 12:29 “Mkulu Nguluwi, Nguluwi wa hemwe, hoyowadumya wanhu wa isi zeng'ha hali hemwe, awo womlinguluta kuwawinga na kuwalavya na kikala kuli isi ya hewo,
DEU 12:30 milolele mleche kigwiliza kwa kuwawinza wala wanhu wa isi zisumigwe hali hemwe. Mleche kuuza kwa chiwalo cha kuvizela milungu ja hewo, mlonga, ‘Wanhu awa nawafugamila ndaze milungu ja hewo? Leka natwe tufugamile hihyo.’
DEU 12:31 Mleche kumfugamila Mkulu Nguluwi, Nguluwi wa hemwe, kota ahyo kwa vila chila chizudizo chiwele Mkulu Nguluwi, nayachizudile, wajiditila milungu ja hewo, mbaka wawasoma mchiluli wana wa hewo, kota nhambiko kwa milungu ja hewo.
DEU 12:32 “Chila chinhu ndiwalajiza milolele kuchidita, mleche konjeza ne kusa chinhu.
DEU 13:1 “Hoyolawila mloli ama mlaguzi wa kulota hali hemwe na kuwapa ulajilo ama ububuwalo woneche ula,
DEU 13:2 hamba ulajilo ama ububuwalo yawalonjele naulawila na hoyolonga, ‘Tuwinze milungu jinji,’ mina milungu johamjizelele na kujifugamila,
DEU 13:3 mleche kuhulichiza ulonzi wa heye mloli ayo ama mlaguzi wa kulota. Mina Mkulu Nguluwi, Nguluwi wa hemwe, kanguwajeza leka yavizele kota mwangumgana heye Mkulu Nguluwi, Nguluwi wa hemwe, kwa nhumbula za hemwe zeng'ha na muhe wa hemwe weng'ha.
DEU 13:4 Mumuwinze na kumdumba Mkulu Nguluwi, Nguluwi wa hemwe na kibata malajizo ga heye na kumhulichiza, mumkolele mijito na kilumba na heye.
DEU 13:5 Ila mloli ayo ama mlaguzi wa kulota koganigwa kukopoligwa kwa vila kowa yawalanguse kumbelenhuka Mkulu Nguluwi, Nguluwi wa heye, yawalavile kuli isi ya Misili na kuwagombola kuli upogozi. Heye kanguwadita muileche nzila ya Mkulu Nguluwi, Nguluwi wa hemwe nayawalajize kuiwinza. Ahyo ndo vyomdumya wihe hali hemwe.
DEU 13:6 “Wone mng'holozo yomvumbuche hamwe ama mwanago msongolo ama mhinza wa hegwe ama mchewako ulingumgana ng'hatu ama goloko wa hegwe wa mgati ng'hatu, kokudedeza kwa uviso yolonga, ‘Tuche tukajifugamile milungu jinji,’ jiwele hegwe na wasekulu wa hegwe hawajizelele,
DEU 13:7 milungu ja wanhu walingikala habehi na hemwe ama walingikala kutali na hemwe, kulawila ubanzi umwe wa isi mbaka ubanzi wunji wa isi,
DEU 13:8 uleche kukunda kudedezwa ama kumhulichiza ama kumonela isungu ama kumlechela ama kumvisa.
DEU 13:9 Ndangukomya komkopola. Igana hegwe uwe wa mwaluko mhela wa kumkopola hamba wanji weng'ha wowinza.
DEU 13:10 Umtowe kwa maganga mbaka yabagame. Kwa vila nakajeza kukukwega kutali na Mkulu Nguluwi, Nguluwi wa hegwe, yawele yakulavile kuli upogozi kuli isi ya Misili.
DEU 13:11 Ahyo, Waisilaeli weng'ha wohulika na kudumba na hawodita wihe kota awo ne hado.
DEU 13:12 “Houchikala kuli muji uwele Mkulu Nguluwi, Nguluwi wa hegwe, kangukupa, hanji kohulika,
DEU 13:13 kota wanhu wamwe wapoka hali hegwe, wodedeza wanhu wa muji wolonga, ‘Tucheni tukajifugamile milungu jinji,’ johajizeleche kwa hegwe,
DEU 13:14 lelo, kolola na kupala na kuuza goya na kota kukomya hana mbuli ya kuzudiza naikoleka hali hegwe,
DEU 13:15 yangukulapa kuwakopola kwa ipanga wanhu wa muji awo, koudumya ng'hatu muji awo na kujikopola misenga jeng'ha kwa ipanga.
DEU 13:16 Kokungajiza vinhu vyeng'ha kuli luga lwa hazelu lwa muji na kusoma kwa chiluli vinhu vyeng'ha kota nhambiko ya kulakazwa kwa Mkulu Nguluwi wa hegwe, muji awo wowa chilundo cha mahame mazuwa gose nawo hauzenjigwa kahi.
DEU 13:17 Chinhu chilavigwe chilakazwe uleche kuhola, leka Mkulu Nguluwi yaleche ng'halazi ya heye, yakulajile utambichizo na isungu na kukudita hegwe uwe lulelo lwinji kota navyoyawelahile wasekulu wa hegwe,
DEU 13:18 wone kohulichiza lizi lya Mkulu Nguluwi, Nguluwi wa hegwe, kochibata malajizo ga heye geng'ha gala gondilingupa aha lehano na kudita chila chiwele cha hachi hali Mkulu Nguluwi, Nguluwi wa hegwe.
DEU 14:1 “Hemwe ndo wana wa Mkulu Nguluwi, Nguluwi wa hemwe, mleche kitema sale na mleche kubeya mnvili ziwele mchihanga kwa chiwalo cha munhu yabagame.
DEU 14:2 Kwa vila hemwe ndo wa chiuyeng'ha kwa Mkulu Nguluwi, Nguluwi wa hemwe, Mkulu Nguluwi nakawahagula hemwe muwe wanhu wa heye hali wanhu weng'ha kuli isi yeng'ha.
DEU 14:3 “Mleche kulya chinhu cha kuzudiza kwa Nguluwi.
DEU 14:4 Moweza kulya migongolo aji, misenga na ming'holo na mhene
DEU 14:5 na ibala na chifuno na kongoni na mhene ya kisolo na pofu na paa na ing'holo lya kuchidunda
DEU 14:6 na chila igongolo liwele na uzayo ugawanuche honhu heli na lilinguhelula, alyo moweza kulya.
DEU 14:7 Ila mleche kulya igongolo lyoneche lila liwele na uzayo haugawanuche honhu heli na hambe lihelule, mleche kulya ngamiya na chisungula na pelele. Wanguhelula ila uzayo wa ajo migongolo hambe jigawanuche honhu heli, ajo ndo jikokomoche kwa hemwe.
DEU 14:8 Ila mleche kulya migubi, mina uzayo wawo najigawanuka honhu heli, hambe jihelule, ajo ndo jikokomoka kwa hemwe, mleche kulya miunde jawo na mleche kudoliza mitufi jawo.
DEU 14:9 “Moweza kulya chila somba ziwele na msepe na ukalagatu.
DEU 14:10 Ila chilumbigwe choneche chilingikala mmazi chiwele hela msepe na ukalagatu mleche kulya, avyo ndo vikokomoka kwa hemwe.
DEU 14:11 “Moweza kulya videje vyeng'ha viwele vyohavikokomoche.
DEU 14:12 Ila mleche kulya videje avi, ikungule na ndapo na ng'hwazi
DEU 14:13 na chilutema na kozi kwa nhanzi zake,
DEU 14:14 ibondwa kwa nhanzi zake
DEU 14:15 na mbuni na chimtolo na idudumizi na chilutema kwa nhanzi zake
DEU 14:16 na ituwe na mumbi na ituwe ikulu
DEU 14:17 na chingowe na mdeli na mnandi
DEU 14:18 na isakulang'hola na ikoyogo kwa nhanzi zake na chigong'honda na ipalabutwa.
DEU 14:19 Na minhu jeng'ha jiwele na mabawa ndo jikokomoka kwa hemwe, mleche kulya.
DEU 14:20 Moweza kulya vilumbigwe vyeng'ha viwele na mabawa viwele havikokomoche.
DEU 14:21 “Mleche kulya igongolo lyoneche lifile, moweza kumha mjenzi yalingikala kuli muji wa hemwe yalye, ama moweza kumguzila munhu wa isi inji, kwa vila hemwe ndo mwelile na Mkulu Nguluwi ndo Nguluwi wa hemwe. “Mleche kuhemsa chinyehe kuli itombo lya mayake.
DEU 14:22 “Mlavye zaka, iwele ndo honhu hamwe ha kumi, ya vilyo vya hemwe vyeng'ha vya kumgunda chila mwaka.
DEU 14:23 Ila kahi mlute honhu hawele Mkulu Nguluwi, Nguluwi wa hemwe nakahahagula honhu ha kumfugamila heye, na mowa hali heye na molya zaka ya vilyo vya hemwe na ya divai ya hemwe na ya mafuta ga mzeituni na ya walelwa wa mwaluko wa isenga na ing'holo lya hemwe. Mdite ahyo leka milanguse kumdumba Mkulu Nguluwi, Nguluwi wa hemwe, mazuwa gose.
DEU 14:24 Wone gawe majendo gahejile kwa vila Mkulu Nguluwi, Nguluwi wa hemwe, nakahagula honhu ha kumfugamila heye hawele kutali ng'hatu na haluga, na hemwe hamuweza hebu kuhola zaka za vilyo vya hemwe kwa vila Mkulu Nguluwi nakawatambichiza,
DEU 14:25 lelo, mguze vilyo vya hemwe na kuhola sendi mbaka honhu Mkulu Nguluwi, Nguluwi wa hemwe, hoyahahagule.
DEU 14:26 Mtumiye azo sendi kwa choneche chila chomgana, miwunde ja misenga na miwunde ja ming'holo na divai ama chakunwa chilingwambuza kugala, molya na kusangalala aho hali Mkulu Nguluwi, Nguluwi wa hemwe, hamwe na wanhu wa ivyazi lya hemwe.
DEU 14:27 “Mleche kuwasemwa Walawi walingikala hali hemwe, awo wahela honhu ne uhalizi wa hewo hali hemwe.
DEU 14:28 Na chila houmala mwaka wa kadatu, mlavye zaka ya vilyo vya hemwe vyeng'ha na kuwika ng'hano kuli miji ja hemwe.
DEU 14:29 Ayo yowa kwa chiwalo cha Walawi, kwa vila wahela honhu ne uhalizi woneche wa hewo hali hemwe, na hewo wajenzi na walekwa na wadala wafililwe na walume wawo, hewo wekale kuli miji ja hemwe, wokuya kulya na kiguta. Mdite ahyo na heye Mkulu Nguluwi, Nguluwi wa hemwe, kowatambichiza kuli mijito ja hemwe jeng'ha jomlingugongomanya kwa moko ga hemwe.
DEU 15:1 “Chila houmala mwaka wa saba mowalechela wala weng'ha walingudaigwa.
DEU 15:2 Ahi ndo vyomumditila chila yumwe yomuwaziche mng'holozo Muisilaeli, muse alyo ideni na mleche kujeza kumswaswanika yahiluse, kwa vila Mkulu Nguluwi yuye kona inoga wone ideni alyo lyusigwe.
DEU 15:3 Moweza kubochela ideni kulawa kwa wajenzi, ila wang'holozo Waisilaeli mwemwe baho mowosela.
DEU 15:4 “Mkulu Nguluwi, Nguluwi wa hemwe kowatambichiza kuli isi yalinguwapa muihalile. Kuduhu ne yumwe yowa mzunwa hali hemwe,
DEU 15:5 ila yowalapa mumhulichize Mkulu Nguluwi, Nguluwi wa hemwe, kwa kuwinza goya malajizo gondilinguwapani lehano.
DEU 15:6 Mkulu Nguluwi, Nguluwi wa hemwe, kowatambichiza kota vila vyoyawalahile. Namwe mozazika isi zinji nyinji, ila namwe homkwazika. Hihyo molongoza isi nyinji, ila wanhu awo howowalongoza hemwe.
DEU 15:7 “Hokuwa na mzunwa, mng'holozo Muisilaeli, kuli miji ja isi iwele Mkulu Nguluwi kowapa, mleche kuwa wabuhu na mgagadale kwa heye.
DEU 15:8 Ila mgonzole moko ga hemwe aku mkundile kuwazika chasi cha kuhega kwa chila choyogana.
DEU 15:9 Milolele majesa gehile galeche kuwenjila mnhumbula za hemwe, muye mlonje, ‘Mwaka wa saba wa habehi, ndo mwaka wa kuwalechela walingudaigwa,’ mumjesa mng'holozenu mzunwa kwa kung'ang'ala na kulema kulavya na kumha choneche, heye koweza kumlilila Mkulu Nguluwi kwa chiwalo cha hemwe na ayo yowa gehile kwa hemwe.
DEU 15:10 Mumhe mng'holozo mzunwa kwa igano ne kung'ung'uta, mina kwa chiwalo cha ago, Mkulu Nguluwi, Nguluwi wa hemwe, kowatambichiza kuli mijito jeng'ha ja hemwe na kuli chila chinhu chomkola.
DEU 15:11 Mina isi yowa na wazunwa mazuwa gose, ahyo ndanguwalajiza, muwe muwele na isungu kwa wang'holozo Waisilaeli walingulanda na wazunwa kuli isi ya hemwe.
DEU 15:12 “Wone mng'holozo Muisilaeli, mlume ama mdala, hoyoguzigwa kwa hegwe, kokukolela mijito kwa miyaka sita, ila kuli mwaka wa saba, komleka yawe yelejehe.
DEU 15:13 Nagwe houmleka yelejehe, uleche kumleka yalute moko hela.
DEU 15:14 Umhe kwa isungu chila chiwele Mkulu Nguluwi, Nguluwi wa hegwe choyakutambichize, ming'holo na chilyo na divai.
DEU 15:15 Ukumbuche kota hegwe nawali mpogozi ako Misili na Mkulu Nguluwi, Nguluwi wa hegwe, nakakugombola, ndo mina lehano ndangukulajiza ahyo.
DEU 15:16 Ila wone hoyokulonjela, ‘Sikuka kwa hegwe,’ kwa vila kangukugana hegwe na ivyazi lyako na kunojezwa kikala na hegwe,
DEU 15:17 lelo, kohola sanzia na kutubula ikutu lya heye mbaka sanzia ayo yinjile mbaka hali lwizi na heye kowa mpogozi wa hegwe mazuwa gose. Umditile hihyo mpogozi wa hegwe mdala.
DEU 15:18 Na uleche kuwa na ching'honi houmleka mpogozi wa hegwe, mina nakakukolela mijito kwa mhela wa miyaka sita kwa kupegwa nusu ya sendi za chitumagwa. Udite ahyo na heye Mkulu Nguluwi, Nguluwi wa hegwe kokutambichiza kwa chila choudita.
DEU 15:19 “Umbagulile Mkulu Nguluwi, Nguluwi wa hegwe, lulelo lweng'ha lwa mwaluko lwa chilume lwa chilundo cha misenga na ming'holo. Uleche kuswajiza kuzakola mijito kumgunda misenga ajo ama kujikanha milaika ja ming'holo ajo.
DEU 15:20 Chila mwaka, hegwe na ivyazi lyako molya migongolo ajo hali Mkulu Nguluwi, Nguluwi wa hegwe, honhu hoyohagula kumfugamila heye.
DEU 15:21 Ila wone igongolo alyo liwe na nongwa yoneche, kota lili chete ama hambe lilole ama lina nongwa yoneche ng'hulu, uleche kulilavya nhambiko kwa Mkulu Nguluwi, Nguluwi wa hegwe.
DEU 15:22 Kolya igongolo lya nhanzi ayo uwele kuli muji wa hegwe, kahi weng'ha wawele wohambe wakokomoche na wakokomoche woweza kulya kota vyoulingulya ibala ama chifuno.
DEU 15:23 Ila uleche kulya danda, koibohola hasi kota mazi.
DEU 16:1 “Mdite mnvina mwezi wa Abibu na kudita Pasaka kwa lutogo lwa Mkulu Nguluwi, Nguluwi wa hemwe. Mina kuli mwezi awo wa Abibu, Mkulu Nguluwi, Nguluwi wa hemwe, nakawalavya Misili mhela wa nechilo.
DEU 16:2 Molavya nhambiko ya Pasaka kwa kulavya migongolo ja hemwe, ming'holo ama misenga kwa Mkulu Nguluwi honhu hoyohagula kumfugamila.
DEU 16:3 Mleche kulya nhambiko ya mibumunda jiwichigwe usaso. Kwa mhela wa mazuwa saba molya mibumunda johajiwichigwe usaso, najo ndo mibumunda ja magazo kwa vila namlawa Misili himahima. Ahyo, mhela weng'ha homchikala mokumbuchila lila zuwa namlawile Misili.
DEU 16:4 Kwa mhela wa mazuwa saba, munhu yoneche kuli isi ya hemwe, yaleche kuwika usaso mng'handa ya heye na iwunde lya lila igongolo lidumuligwe singo nemisi ya zuwa lya mwaluko ileche kusigala mbaka hamitondo.
DEU 16:5 Mleche kulavila nhambiko ya Pasaka kuli muji woneche uwele Mkulu Nguluwi, Nguluwi wa hemwe, yalinguwapa,
DEU 16:6 ila moilavila hala honhu Mkulu Nguluwi, Nguluwi wa hemwe, hoyohagula kumfugamila, aho ndo homlavila nhambiko ya Pasaka matinazo isanya holizinga, mhela wuwula homlawile Misili.
DEU 16:7 Alyo iwunde moteleka na kulya honhu hala Mkulu Nguluwi, Nguluwi wa hemwe hoyohagula, mitondo yake mohinduka na kuhiluka kuli mihema ja hemwe.
DEU 16:8 Kuli zuwa lya sita molya mibumunda johajiwichigwe usaso na kuli zuwa lya saba kowa na nhing'hano ng'hulu ya kumfugamila Mkulu Nguluwi na mleche kukola mijito joneche jila kuli zuwa alyo.
DEU 16:9 “Mowaza majuma saba. Mokwaluka kugawaza homkwaluka kubena nyhule.
DEU 16:10 Hamba modita mnvina ya mbena kwa lutogo lwa Mkulu Nguluwi, Nguluwi wa hemwe, kwa kulavya nhambiko ya kunuwila. Molavya kota vyomtambichizwe na Mkulu Nguluwi, Nguluwi wa hemwe.
DEU 16:11 Mosangalala hali Mkulu Nguluwi, Nguluwi wa hemwe, namwe hamwe na wasongolo wa hemwe na wahinza wa hemwe na vitumagwa wa hemwe, Walawi na wajenzi na walekwa na wadala wafililwe na walume wawo wala walingikala hamwe na hemwe. Mdite aga kuli honhu hala Mkulu Nguluwi, Nguluwi wa hemwe, hoyohahagula kumfugamila.
DEU 16:12 Mkumbuche kota namwali wapogozi kula Misili, lelo milolele kuwinza malajizo aga.
DEU 16:13 “Homsinda kupulula nyhule za hemwe zeng'ha, na kukama zabibu za hemwe, mdite mnvina ya vibumuli kwa mhela wa mazuwa saba.
DEU 16:14 Modita mnvina ayo, msangalale hemwe na wasongolo wa hemwe na wahinza wa hemwe na vitumagwa wa hemwe na Walawi na wajenzi na walekwa na wadala wafililwe na walume wawo wawelengikala kuli miji ja hemwe.
DEU 16:15 Kwa mazuwa saba momditila mnvina Mkulu Nguluwi, Nguluwi wa hemwe, honhu hawele Mkulu Nguluwi kohahagula, kwa vila Mkulu Nguluwi, Nguluwi wa hemwe kowatambichiza kwa chilyo cha hemwe cheng'ha na kuli mbuli za hemwe zeng'ha, namwe mosangalala ng'hatu.
DEU 16:16 “Walume weng'ha wa isi ya hemwe wokuya hali Mkulu Nguluwi, Nguluwi wa hemwe, kadatu chila mwaka, honhu hawele Mkulu Nguluwi, Nguluwi wa hemwe, kohahagula mhela wa mnvina ya Pasaka na mnvina ya mbena na mnvina ya vibumuli. Waleche kuza hali Mkulu Nguluwi moko hela.
DEU 16:17 Weng'ha wolavya vyowoweza kota Mkulu Nguluwi, Nguluwi wa hemwe vyoyawatambichize.
DEU 16:18 “Mowahagula watagusa na vilongozi kulawila kuli nhanzi za hemwe kuli miji ja hemwe jiwele Mkulu Nguluwi, Nguluwi wa hemwe, kowadita wawe wotagusa hachi kwa wanhu.
DEU 16:19 Mleche kwajiliza hachi, mleche kumganilila munhu yumwe, na mleche kubochela chinhu kwa chiwalo cha kumganilila munhu, kwa vila kudita ahyo nakudinyaga meho ga wanhu wawele na luhala na kugalula ulonzi wa munhu yatanganiche.
DEU 16:20 Mochibatilila hachi hela leka mikale na kuhalila isi yomlingupegwa na Mkulu Nguluwi, Nguluwi wa hemwe.
DEU 16:21 “Mleche kuwika izengo lya Ashela habehi na honhu ha kulavila nhambiko homumzenjela Mkulu Nguluwi, Nguluwi wa hemwe.
DEU 16:22 Na mleche kwimiza izengo liwele Mkulu Nguluwi, Nguluwi wa hegwe, kangulizudila.
DEU 17:1 “Mleche kulavya nhambiko kwa Mkulu Nguluwi, Nguluwi wa hemwe, isenga ama ing'holo lilivinji liwele na nongwa yoneche, kwa vila alyo ndo izudizo kwa Mkulu Nguluwi, Nguluwi wa hemwe.
DEU 17:2 “Wone mhuliche kuli umwe wa muji hana mlume ama mdala yalingudita wihe hali Mkulu Nguluwi, Nguluwi wa hemwe, na kubena ilagano lya heye,
DEU 17:3 na heye kaza kujikolela mijito na kujifugamila milungu jinji ama nakafugamila mbaka isanya na nyelezi ama vinhu vinji vya kilanga vyondivilemeze,
DEU 17:4 namwe namlonjelwa ago na mhulika usenga awo, molola goya na wone kuwe kukomya na kota chinhu achi cha kuzudiza nachiditigwa kuli Isilaeli,
DEU 17:5 lelo, mumlavye munhu ayo kunze kwa muji na kumtowa kwa maganga mbaka yabagame.
DEU 17:6 Ayo, kokopoligwa wone kuwele na ulolezi wa wanhu weli ama wadatu. Yaleche kukopoligwa wone kuwele na ulolezi wa munhu yumwe.
DEU 17:7 Wala walolezi ndo wokwaluka tandi kumtowa kwa maganga, hamba wanji wamtowe kwa maganga. Ahyo ndo vyomkusa wihe hali hemwe.
DEU 17:8 “Wone watagusa wangulemwela kutagusa mbuli ng'hulu hali muji wa hemwe, kota vila mbuli ilinguwala kukopola ne kunuwila ama mbuli ya kitwanza ama mbuli ya kumlumiza yunji, lelo mokuka na kuza honhu hala Mkulu Nguluwi, Nguluwi wa hemwe, hoyahahagule.
DEU 17:9 Ako mowalutila watambika Walawi na mtagusa nayawele kuli mijito kwa mhela awo, namwe molavya mbuli ya hemwe, nawo wowalonjela chowataguse.
DEU 17:10 Hamba modita kota vyowowalonjela hala honhu Mkulu Nguluwi hoyohahagula, mowa mchilolela kudita geng'ha kota vyoyowalajiza.
DEU 17:11 Yowalapa kudita kota malajizo gompegwe vyowataguse kwa hemwe. Mgomanjize ng'hatu utaguso woulavigwa kwa hemwe.
DEU 17:12 Na heye munhu yohambe yakunde na kumhulichiza mtambika yawichigwe kumkolela mijito Mkulu Nguluwi, Nguluwi wa hemwe ama mtagusa, munhu ayo kokopoligwa. Ahyo ndo vyomkusa wihe hali hemwe Waisilaeli.
DEU 17:13 Wanhu weng'ha wohulika na kudumba woleka kudita mbuli ayo kahi.
DEU 17:14 “Homkwinjila kuli isi iwele Mkulu Nguluwi, Nguluwi wa hemwe, yalinguwapani, mkaihalile na kikala amo, namwe mlonje, ‘Towika mndewa hali hetwe kota isi zeng'ha zozilingutuzunguluta,’
DEU 17:15 moweza kumuwika mndewa hali hemwe munhu yawele Mkulu Nguluwi, Nguluwi wa hemwe, komhagula. Momuwika yumwe wa wang'holozenu yawe mndewa hali hemwe. Mleche kumdita mjenzi yohawele mng'holozenu yawe mndewa wa hemwe.
DEU 17:16 Na heye, yawe yalihela falasi wenji kwa chiwalo cha heye na yaleche kuwahilusa wanhu Misili leka kikungajizila falasi wenji ng'hatu, kwa vila Mkulu Nguluwi nakawalonjela, ‘Mleche kuhiluka ako kahi.’
DEU 17:17 Na yaleche kuwa na wadala wenji, hanji nhumbula ya heye yombelenhuka Mkulu Nguluwi, na yaleche kuwa na sendi nyinji na zahabu nyinji ng'hatu.
DEU 17:18 Hoyowa yekalile chigoda cha undewa, mndewa yomlapa yandiche chitabu achi cha malajizo, chitawizwe na chitabu cha watambika Walawi.
DEU 17:19 Chitabu acho kowa nacho heye mazuwa gose na kuchisoma kuli ukomu wa heye weng'ha, leka yelanguse kumdumba Mkulu Nguluwi, Nguluwi wa heye. Kochibatilila na kudita ulonzi wa malajizo geng'ha na geng'ha galinguganigwa,
DEU 17:20 leka yaleche kudadambala yuye hali wang'holoze na kuwika hafungo mizilo aji kwa mbuli yoneche yila, leka yekale kuli ulongozi kwa miyaka minji, heye na walelwa wa heye kuli Isilaeli.
DEU 18:1 “Watambika Walawi, wawele ndo nhanzi yeng'ha ya Lawi, waleche kuwa na honhu ha uhalizi kuli Isilaeli. Hewo wolya honhu ha nhambiko ha Mkulu Nguluwi ilingulavigwa kwa chiluli.
DEU 18:2 Waleche kuwa na uhalizi hali wang'holozawo wawo, Mkulu Nguluwi ndo uhalizi wa hewo kota navyoyawelahile.
DEU 18:3 “Aha howa honhu ha nhambiko kwa hewo watambika kulawila kwa wanhu walingulavya nhambiko iwele ndo misenga ama ming'holo. Womha mtambika mgulu wa kumwando na mizeze na mitumbu.
DEU 18:4 Mowapa honhu ha mwaluko ha mbena ya hemwe ya nyhule na divai na mafuta ga mzeituni na milaika ja mwaluko ja ming'holo ja hemwe.
DEU 18:5 Mkulu Nguluwi, Nguluwi wa hemwe nakahagula nhanzi ya Walawi kuli nhanzi za hemwe zeng'ha leka imkolele mijito kota watambika mazuwa gose.
DEU 18:6 “Wone Mlawi yoneche kogana yuye, koweza kuka muji woneche ula wa Isilaeli na kuluta hala honhu Mkulu Nguluwi hoyahahagule,
DEU 18:7 na aho koweza kumkolela mijito kwa itagwa lya Mkulu Nguluwi, Nguluwi wa heye, kota wala Walawi wanji walingukola mijito hali Mkulu Nguluwi.
DEU 18:8 Kopegwa honhu hawo ha kulya halingiwhana na hanji, hanga mbuli za heye nazimlutila goya kulawila kuli vinhu vilinguguzigwa na wanhu wa ivyazi lyawo.
DEU 18:9 “Homfika kuli yila isi yalinguwapa Mkulu Nguluwi, Nguluwi wa hemwe, mleche kuwinza vila vihendo vijenzi vya kuzudiza vya wanhu wa isi ayo.
DEU 18:10 Haleche koneka munhu yoneche hali hemwe yalingumsoma kwa chiluli mwanage mlume ama mdala yawe nhambiko ne munhu yalingulagula ne yalingusoma ulajilo ne mtowa ibao,
DEU 18:11 ne mhawi ne yalinguhawila na yalinguwala luzi kwa wawasile katali na jimazoga kulawila kwa wabagame.
DEU 18:12 Mina yoneche yalingudita mbuli azi ndo izudizo kwa Mkulu Nguluwi na kwa chiwalo cha mbuli azi za kuzudiza, Mkulu Nguluwi, Nguluwi wa hemwe, kanguwawinga wanhu wafandile kota awo hali hemwe.
DEU 18:13 Muwe mli hela nongwa hali Mkulu Nguluwi, Nguluwi wa hemwe.
DEU 18:14 “Wanhu wa isi awa weng'ha womza kuwawinga kuli isi ya hewo wanguwinza ulongozi wa walaguzi na walingutowa ibao, ila Mkulu Nguluwi, Nguluwi wa hemwe, howakundiza hemwe kudita ahyo.
DEU 18:15 “Mkulu Nguluwi, Nguluwi wa hemwe, kowahagulilani mloli yawele kota heni kulawila hali wang'holozenu baho, namwe momuhulichiza ayo.
DEU 18:16 “Achi ndo chomumlandile Mkulu Nguluwi, Nguluwi wa hemwe, kula Holebu, zuwa lila nahomikungajize na kulonga, ‘Tuleche kuhulichiza kahi lizi lya Mkulu Nguluwi, Nguluwi wa hetwe, na tuleche kuchona kahi chiluli achi chikulu, leka tuleche kubagama.’
DEU 18:17 Na heye Mkulu Nguluwi nakandonjela, ‘Walonga wakomya.
DEU 18:18 Ndowahagulilani hali wang'holozawo mloli kota hegwe, ndomjela ulonzi wa heni kumlomo kwa heye, na heye kowalonjela geng'ha gondiwalajiza.
DEU 18:19 Yoneche yohambe yahulichize ulonzi woyolonga mloli ayo kwa itagwa lya heni, nene baha ndomgaza.
DEU 18:20 Ila mloli yoneche yolonga kwa itagwa lya milungu jinji ama yojeza kulonga ulonzi kwa itagwa lya heni hala heni nasimlonjele yalonje, mloli ayo kobagama.’
DEU 18:21 “Ila hemwe moweza kulonga, ‘Toweza ndaze kuuzela ulonzi wa mloli uwele haulawile kwa Mkulu Nguluwi?’
DEU 18:22 Wone mloli yalonje chinhu kwa itagwa lya Mkulu Nguluwi, na chinhu acho hachinguditigwa ama hachiwa cha kukomya, mbuli ayo hailonjigwe na Mkulu Nguluwi, mloli nakalonga kwa kidaya, namwe mleche kumdumba heye.
DEU 19:1 “Hala Mkulu Nguluwi, Nguluwi wa hemwe hoyowadumya wanhu wala wawele isi ya hewo kanguwapa hemwe na hala homuwawinga na kikala kuli ng'handa za hewo na miji ja hewo,
DEU 19:2 mowika hafungo miji jidatu kuli isi yompegwa na Mkulu Nguluwi, Nguluwi wa hemwe muihalile.
DEU 19:3 Mogongomanya nzila kuli miji ajo na kubagula honhu hadatu, isi naiwele Mkulu Nguluwi, Nguluwi wa hemwe, kowapa muihalile, leka chila yalingumkopola miyage ne kunuwila, yabilimile ako.
DEU 19:4 “Wone munhu yamkopole miyage ne kunuwila, yawele aho hamwande nahawele yamzudile, koweza kubilimila kuli muji umwe kuli miji ajo leka yalohole ukomu wa heye.
DEU 19:5 Wone munhu yalingulutasa na miyage kisolo kugoda ngodi hamwe na heye, mhela hoyokana igodi, iwago likomoche kulawa kuli chaka na kumtowa na kumkopola, munhu ayo koweza kubilimila kuli muji uyage, kwa kulohola ukomu wa heye.
DEU 19:6 Wone nakwali na muji umwe hela, utali wa muji awo uwe ukulu ng'hatu, ayo yalinguhilula chibida, kwa kuzudila ng'hatu koweza kumuwinza na kumibata na kumkopola ayo yambuze kubagama, hanga nahatagusigwe kubagama na wanhu awo nahawawele wang'honyo aho hamwande.
DEU 19:7 Kwa chiwalo acho, ndanguwalajiza muwiche hafungo miji jidatu.
DEU 19:8 “Wone kahi Mkulu Nguluwi, Nguluwi wa hemwe, kokonjeza mbaka ja isi ya hemwe kota navyoyawalahile wasekulu wa hemwe, na heye kowapa isi yeng'ha naiwele yawelahile kuwapa awo wasekulu wa hemwe,
DEU 19:9 wone muwe mikangaze kibatilila malajizo aga geng'ha gondilinguwalajiza lehano kwa kumgana Mkulu Nguluwi, Nguluwi wa hemwe na kuwinza nzila za heye mazuwa gose, lelo mokonjeza miji jinji jidatu mzidi wa miji aji jidatu.
DEU 19:10 Mdite ahyo leka munhu yalihela nongwa yaleche kukopoligwa kuli isi ya hemwe iwele Mkulu Nguluwi, Nguluwi wa hemwe, kowapa muihalile, leka mleche kuwa na nongwa ya kukopola.
DEU 19:11 “Ila wone munhu hoyowa mng'honyo wa miyage, komvaba na kumsubula na kumkopola, hamba yobilimila kuli muji umwe hali miji ajo,
DEU 19:12 aho wasekulu wa muji wowalajiza wanhu wamlavye ako na kumuhilika kwa yalingugana kuhilusa chibida kwa kubohola danda leka yakopoligwe.
DEU 19:13 Mleche kumonela isungu, ila mokusa wihe wa kukopola munhu yalihela nongwa kuli Isilaeli, leka muwe mchikala goya.
DEU 19:14 “Mleche kusa ulajilo wa mbaka ja mlingikalasa habehi, najiwichigwe aho katali kuli isi iwele Mkulu Nguluwi wa hemwe, yawapele muihalile.
DEU 19:15 “Ulolezi wa munhu yumwe hauweza hebu kumtagusa munhu kwa chiwalo cha nongwa yoneche yila. Ulolezi wa wanhu weli ama wadatu hela ndo wokundigwa kumtagusa munhu.
DEU 19:16 Wone mlolezi yehile kolawila kumlonjeleza munhu kwa chiwalo cha nongwa yoneche,
DEU 19:17 lelo heye na yula yalonjelezwe kwa chiwalo cha kilewa ako, woluta hali Mkulu Nguluwi na hali watambika na watagusa wawele bahala kwa mhela awo.
DEU 19:18 Watagusa wolola goya nongwa ayo na wone mlolezi nakadeta kwa kumlonjeleza miyage kwa udesi,
DEU 19:19 lelo, momditila kota navyoyaganile kumditila yula yalonjelezwe. Ahyo ndo vyomkusa wihe hali hemwe.
DEU 19:20 Na hewo wanhu wanji wohulika na kudumba na wihe kota awo haukoleka kahi hali hemwe.
DEU 19:21 Mleche kuwonela isungu wanhu kota awo. Ukomu wolipigwa kwa ukomu na iziho kwa iziho na izino kwa izino na moko kwa moko na mgulu kwa mgulu.
DEU 20:1 “Homluta kitowa ngondo na wang'honyo wa hemwe na kona falasi na mituka na chilundo chikulu cha wamizi kusinda hemwe, mleche kudumba. Mina Mkulu Nguluwi, Nguluwi wa hemwe yawalavile Misili, kowa hamwe na hemwe.
DEU 20:2 Lomuwa mng'hali kwaluka kitowa, mtambika kolawila kumwando na kowalonjela wanhu,
DEU 20:3 ‘Mhulichize hemwe Waisilaeli, lehano mwahabehi kitowa na wang'honyo wa hemwe. Mleche kugozola ama kudumba ama kukakama kwa chiwalo cha wang'honyo wa hemwe,
DEU 20:4 mina Mkulu Nguluwi, Nguluwi wa hemwe, ndo yoluta hamwe na hemwe kitowa na wang'honyo wa hemwe honhu henu, leka kuwasumya.’
DEU 20:5 “Hamba vilongozi wowalonjela wanhu, ‘Hana munhu yoneche aha yazenjile ng'handa inyale ila halimbule? Yahiluche kaye leka yaleche kubagama kuli ngondo na munhu yunji yalimbule.
DEU 20:6 Hana munhu yoneche aha yanyalile zabibu na kubena mafuza ga mwaluko? Yahiluche kaye yaleche kubagama kuli ngondo na munhu yunji yasangalale kwa chiwalo cha mafuza ga heye.
DEU 20:7 Hana mlume yoneche yahesile na kahabehi kuhola? Yahiluche kaye, yaleche kubagama kungondo na mlume yunji yakamhole mdala wa heye.’
DEU 20:8 Vilongozi kahi wolutilila kuwalonjela wanhu, ‘Ndaze, kabaha munhu yalingukakama nayawele na lunhwinhwi? Yahiluche kaye yaleche kuwambuza wayage kuwa na lunhwinhwi kota heye.’
DEU 20:9 Vilongozi lowosinda kulongasa na wanhu, lelo wowahagula vilongozi wa wamizi wowalongoza wanhu.
DEU 20:10 “Lomuwa habehi na muji wa kitowela ngondo, muwape mumhu ya kikala goya.
DEU 20:11 Wanhu walingikala kuli muji awo wone wagane kikala goya na kiwika hali magulu ga hemwe, lelo wanhu weng'ha wawele amo wowa vitumagwa na wowakolela mijito kwa lupichi.
DEU 20:12 Ila wone walingikala kuli muji awo hawakundile mbuli ya kikala goya na hemwe, ila wochitowa ngondo na hemwe, lelo mouzunguluta muji wa hewo
DEU 20:13 na heye Mkulu Nguluwi, Nguluwi wa hemwe kowawika mmoko mwa hemwe, mowakopola kwa ipanga walume weng'ha,
DEU 20:14 ila wadala na wana na misenga na vyeng'ha viwele kuli muji moweza kuvihola kwa chiwalo cha mwemwe baho, moweza kusangalala kwa vinhu vya wang'honyo wa hemwe viwele Mkulu Nguluwi, Nguluwi wa hemwe, yawapele.
DEU 20:15 Ahyo ndo vyomujiditila miji jeng'ha jiwele kutali na hajiwele miji ja isi ayi.
DEU 20:16 Ila kuli miji ja isi iwele Mkulu Nguluwi, Nguluwi wa hemwe kanguwapani muihalile, mleche kuleka choneche chiwele chikomu.
DEU 20:17 Mowadumya wanhu weng'ha, Wahiti na Waamoli na Wakanaani na Wapelisi na Wahivi na Wayebusi kota Mkulu Nguluwi, Nguluwi wa hemwe, navyoyalajize,
DEU 20:18 leka waleche kuwalangusa mbuli zowalingudita hewo, mbuli zilinguzudiza ziwele wangujiditila milungu ja hewo, leka namwe mdite gehile hali Mkulu Nguluwi, Nguluwi wa hemwe.
DEU 20:19 “Homuuzunguluta muji kwa mhela wa kuhega, mchitowa kuuhola, mleche kuwifya migodi ja mafuza kwa iwago. Ndaze, migodi ndo wanhu mbaka jiwifigwe namwe? Moweza kulya mafuza ga migodi ajo, ila mleche kutemanga.
DEU 20:20 Moweza kutema migodi jinji hela kwa kuzungulutila muji mbaka homuuhola.
DEU 21:1 “Wone munhu yokoneka kuchiwala, yakopoligwe, kuli isi iwele Mkulu Nguluwi, Nguluwi wa hemwe, yawapele muihalile, namwe hamumzelele kota yalikohi yamkopole,
DEU 21:2 wasekulu na watagusa, wolawila na wolola utali wa kulawila honhu honayali munhu ayo mbaka miji jiwele habehi.
DEU 21:3 Hamba, wasekulu wa muji ula behi ng'hatu na ula mtufi wohola isenga ilogota ling'hali kwaluka kukola mijito joneche jila ne kuwichigwa ngwamo.
DEU 21:4 Nawo wodulisa isenga ilogota kuli ibindi behi na kalwanda kohambe kakale na alyo ibindi hambe lilimigwe ne kunyaligwa, ako wolibena singo lila isenga ilogota.
DEU 21:5 Na hewo watambika wa lukolo lwa Lawi iwagana wawe baho. Mkulu Nguluwi, Nguluwi wa hemwe, nakawahagula wawe vitumagwa na kutambichiza kwa itagwa lya heye. Nawo kahi ndo wawele na ludali lwa kwamula chila mbuli.
DEU 21:6 Lila isenga ilogota holibenigwa singo, wasekulu weng'ha wa muji awo uwele behi na munhu ayo yakopoligwe, wohovuga moko ga hewo kwa mazi mchanya mwa isenga ilogota,
DEU 21:7 na kulonga, ‘Twahela nongwa kwa chiwalo cha munhu ayu yakopoligwe na hatumzelele munhu yamkopole.
DEU 21:8 Hegwe, Mkulu Nguluwi, uwalechele wanhu wa hegwe wa Isilaeli wala uwagombole, uleche kuwawichila wanhu wa hegwe Isilaeli nongwa ya kumkopola munhu yalihela nongwa ila uwalechele na uwaditile uhanyisi.’
DEU 21:9 Ahyo danda ayo iboholigwe haiwa kahi chiwalo cha nongwa kwa hemwe, mina mdita gala Mkulu Nguluwi nayaganile mdite.
DEU 21:10 “Homluta kitowa ngondo na wang'honyo, heye Mkulu Nguluwi, Nguluwi wa hemwe kowadita muwatowe na kuwahola wapogozi wa ngondo,
DEU 21:11 wone yumwe wa hemwe yone mdala yanojile hali wapogozi na kugana yamhole,
DEU 21:12 lelo, hegwe komhilika kaye, umbeye mnvili za heye na kudumula ndole za heye,
DEU 21:13 na kumvaliza nguwo zinji. Kochikala kwa mhela wa mwezi umwe wa kulombocheza kwa chiwalo cha mayake na mhaza wa heye. Hamba koweza kumhesa, yawe mchewako nagwe uwe mlume wa heye.
DEU 21:14 Wone hamba hulingumgana, komleka yalute koyogana, humguza hebu leka uhole sendi ne kumditila kota mpogozi kwa vila nakumditila vibi.
DEU 21:15 “Wone mlume yunji kana wadala weli naye kangumgana yumwe kusinda yunji. Nawo wadala awo wampondela wana wasongolo, na mwana wa mwaluko kupondigwa ndo wa yula mdala halingumgana,
DEU 21:16 loifika zuwa lya kuwagawila awo wana uhalizi, ayo mhaza halinguganigwa ng'oo kumditila mwana wa yula mdala yalingumgana kota mwana wa mwaluko kupondigwa, honhu ha yula mamo halinguganigwa yawele ndo mlelwa wa mwaluko.
DEU 21:17 Imgana yamkunde yula mwana yapondigwe mwaluko, mwana wa yula mdala yohambe yaganigwe na kumha uhalizi wa heye, honhu ha lufufu lwake lwa keli.
DEU 21:18 “Wone munhu kana mwana yawele mjuvi na yalingubelenhuka, hambe yamhulichize mhaza wa heye ama mayake hanga nawamgaza,
DEU 21:19 lelo, mamo na mhaza wa ayo mwana womibata na kumhilika kwa wasekulu kuli lwizi lwa muji.
DEU 21:20 Wahaza awo wowalonjela wasekulu wa muji, ‘Mwana wa hetwe ka mjuvi na yalingubelenhuka na halingugana kutuhulichiza, kadongoka na kangugala.’
DEU 21:21 Aho walume wa muji awo womtowa kwa maganga mwana ayo mbaka yabagame. Ndo vyomkusa wihe awo hali hemwe. Chila munhu kuli Isilaeli kohulika mbuli ayo na kudumba.
DEU 21:22 “Wone munhu nakadita mbuli yihile ilingumgana yakopoligwe na wone yokopoligwa kwa kuninizwa kuli igodi,
DEU 21:23 mtufi wa heye uleche kulechigwa kuli igodi nechilo yeng'ha, ila moutila zuwa lilyo. Mina munhu yapobosoligwe singo nakapanjilwa na Nguluwi, namwe hamuidita isi ya hemwe iwe ikokomoche, isi yompegwe na Mkulu Nguluwi, Nguluwi wa hemwe muihalile.
DEU 22:1 “Houlyona isenga ama ing'holo lya mng'holozo Muisilaeli lyajilile, uleche kulileka, ila ulihiluse kwa mng'holozo.
DEU 22:2 Ila wone hakaye ha mng'holozo Muisilaeli ha kutali ama wone humzelele, lelo kolihola igongolo alyo kuza kaye kwa hegwe, likale kwa hegwe mbaka yawele na igongolo alyo hoyokuya, nagwe komhilusila.
DEU 22:3 Kodita ahyo kwa chiwalo cha idogowi ama ivalo ama choneche chiwele mng'holozo Muisilaeli nakachajiliza. Uleche kulema kumtanza.
DEU 22:4 “Houlyona idogowi ama isenga lya mng'holozo Muisilaeli ligwile mnzila, uleche kulema kulitanza, kolitanza kulinula.
DEU 22:5 “Wadala waleche kuvala nguwo za walume na walume waleche kuvala nguwo za wadala. Yalingudita ahyo ndo izudizo kwa Mkulu Nguluwi, Nguluwi wa hemwe.
DEU 22:6 “Houchona chimvulila cha chideje kuli igodi ama mnzila, chiwele na vibofu ama mafinga na chideje chimaimunhu chigubiche ago mafinga ama ajo vibofu, uleche kuchihola chideje acho na mibofu jake.
DEU 22:7 Kochileka chideje chimaimunhu chilute, ila koweza kuhola mibofu. Houdita ahyo mbuli za hegwe zokulutila goya na kochikala mhela uhejile.
DEU 22:8 “Houzenga ng'handa, uzenje lukanzi hafungo mwa chinduwiko, uleche kuhola nongwa ya kukopola munhu ayo hoyogwa kulawila ako na kubagama.
DEU 22:9 “Uleche kunyala hamwe mizabibu ja hegwe na mizuchila jinji, jeng'ha jowa jikokomoche, haiwele jila unyalile hela, ila na mafuza ga mizabibu kahi.
DEU 22:10 “Uleche kubugula mgunda kwa isenga na idogowi hamwe.
DEU 22:11 “Uleche kuvala ivalo litawigwe kwa sufu na kitani.
DEU 22:12 “Ukowele usabuli kuli lupembo lwa nguwo ya hegwe.
DEU 22:13 “Wone mlume yamhole mdala na kuwasa na heye, hamba yojesa kota kangugana kumleka,
DEU 22:14 na kulonga kota nakadita mbuli za kubasa soni na kumuwifila lutogo lwake kwa kulonga kota nakamfika mina nakadita ung'hondwa na mlume mhela loyamholile.
DEU 22:15 Lelo wone ilawile ahyo, mhaza na mayake mhinza ayo, wohola ulolezi wa kota mhinza wa hewo nahanating'hana na mlume na kuhilika kwa wasekulu kuli lwizi lwa muji na kuwalonjela,
DEU 22:16 ‘Mhinza wa hetwe nakaholigwa na munhu ayu, ila sambi halingumgana kahi,
DEU 22:17 na chilingububuwaza ndo kota nakamvilizila mbuli za kumbasa soni kwa kulonga kota nahamfichile yawele hanating'hana na mlume kwa kulavya ulolezi. Lelo ulolezi wa kuta mhinza wa hetwe nayali hanating'hana na mlume mhela loyamholile ndo awu.’ Hamba kogonzola chibende chiwele na ulolezi wa danda hali wasekulu wa muji.
DEU 22:18 Aho wasekulu wa muji womhola yula mlume na kumsubula ng'hobwa.
DEU 22:19 Kahi womtagusa yula munhu yalavye migwala miya imwe ga sendi na kupegwa mhaza wa ayo mhinza kwa vila mlume ayo nakamuwifila lutogo mhinza wa Isilaeli. Na ayo mdala kolutilila kuwa mchewake na howeza kumha kalatasi ya luleko kuli ukomu wa heye mazuwa gose.
DEU 22:20 Ila wone utaguso awo uwe wa kukomya, na kuduhu ulolezi wa kuta hanating'hana na mlume,
DEU 22:21 womuhilika hali lwizi lwa ng'handa ya mhaza wa heye na walume wa muji awo womtowa yula mdala kwa maganga mbaka yabagame, kwa vila nakaibasa soni isi ya Isilaeli kwa kudita ung'hondwa yawele haluga ha mhaza wa heye. Ahyo ndo vyomkusa wihe hali hemwe.
DEU 22:22 “Munhu hoyochibatigwa na mdala wa munhu yunji, weng'ha weli, mlume na mdala wanguganigwa wakopoligwe. Ahyo ndo vyomkusa wihe awo hali hemwe Waisilaeli.
DEU 22:23 “Wone mlume yamfiche mdala yabanichilwe, na yawase na heye,
DEU 22:24 mowalavya weng'ha weli kunze mwa muji na kuwatowa kwa maganga mbaka wabagame. Mhinza ayo imgana yabagame kwa vila hatowile iyowe yatanzigwe hanga nayali kuli muji, na heye mlume imgana yabagame kwa vila nakambasa soni mkasano wa miyage. Ahyo ndo vyomkusa wihe awo hali hemwe.
DEU 22:25 “Ila wone mlume nakating'hana na mhinza yabanichilwe na kumibata kwa lupichi ako kuchiwala, lelo ayo mlume yaliyeka ndo yokopoligwa.
DEU 22:26 Mleche kumditila chinhu choneche ayo mhinza, heye kahela nongwa ilingumlapa yakopoligwe. Chinhu achi changiwhana na munhu yamvabile munhu yunji na kumkopola,
DEU 22:27 kwa vila mlume ayo nakamibata kwa lupichi mhinza ayo ako kuchiwala hanga nakatowa iyowe lya kulanda kutanzigwa, hakuwele na munhu wa kumtanza.
DEU 22:28 “Mlume hoyoting'hana na mhinza yawele hanabanichilwa, wone yamibate kwa lupichi na kufichigwa,
DEU 22:29 mlume ayo komha mhaza wa mhinza ayo migwala makumi gahano ga sendi kwa vila nakambasa soni mhinza ayo. Mhinza ayo kowa mchewake na homleka mazuwa geng'ha ga ukomu wa heye.
DEU 22:30 “Mlume yoneche yula yaleche kuwasa na mdala wa mhaza wa heye, leka yaleche kumbasa soni mhaza wa heye.
DEU 23:1 “Mlume yoneche yalumile mhumbu ama yakanhigwe mhunde ya heye, halinguganigwa kihanza na nhing'hano ya wanhu wa Mkulu Nguluwi.
DEU 23:2 “Mwana yapondigwe kunze na mlelwa wa heye mbaka lulelo lwa kumi, halinguganigwa kwinjila kuli nhing'hano ya wanhu wa Mkulu Nguluwi.
DEU 23:3 “Mwamoni ama Mmoabu yoneche na walelwa wa heye weng'ha mbaka lulelo lwa kumi, hawalinguganigwa kwinjila kuli nhing'hano ya wanhu wa Mkulu Nguluwi mazuwa gose.
DEU 23:4 Kwa vila nawalema kuwapa chilyo na mazi lomuwele mnzila kulawila Misili, na kwa vila nawamha sendi Balaamu, mwana wa Beoli kulawila Petoli kula Mesopotamiya, leka yawapanjile.
DEU 23:5 Ila Mkulu Nguluwi, Nguluwi wa hemwe, nahamhulichize Balaamu, ila upanjilo awo naugaluka kuwa utambichizo kwa vila Mkulu Nguluwi, Nguluwi wa hemwe, nakawagana.
DEU 23:6 Ahyo mleche kupala kikala goya na kuwatanza mazuwa ga hewo gose, mazuwa gose.
DEU 23:7 “Mleche kuwabeza Waedomu, awo ndo wang'holozenu. Hihyo du, mleche kuwabeza Wamisili, kwa vila namikala kuli isi ya hewo kota wajenzi.
DEU 23:8 Walelwa wa hewo, kwaluchila lulelo lwa kadatu, wokundizwa kwinjila kuli nhing'hano ya wanhu wa Mkulu Nguluwi.
DEU 23:9 “Homluta kitowa ngondo na homuwika kambi, chila yumwe yekale kutali na chinhu choneche chihile.
DEU 23:10 Wone hali hemwe hana munhu yoneche yakokomoche kwa vila kangulavya migonye nechilo, ayo kolawa kunze mwa kambi, kochikala aho.
DEU 23:11 Ila hoifika matinazo kokoga na isanya holizinga koweza kuhiluka kuli kambi.
DEU 23:12 “Iwagana muwe na honhu hanze kuli kambi homuweza kuza jela midohe ja hemwe.
DEU 23:13 Hali vinhu vya hemwe mowa na ihuka, homluta hala mowa mbawila cholo na kutila midohe ja hemwe.
DEU 23:14 Homuwika kambi iwagana hawe helile kwa vila Mkulu Nguluwi, Nguluwi wa hemwe, kangujenda kuli kambi ya hemwe leka yawalohole na kuwawika wang'honyo wa hemwe mmoko mwenu. Ahyo, leka yaleche kona chinhu choneche chikokomoche hali hemwe, hanji kowaleka.
DEU 23:15 “Mpogozi hoyobilimila kwa hemwe, mleche kumhilusa kwa mkulu wa heye.
DEU 23:16 Kochikala hamwe na hemwe honhu hoyahagule kuli honhu hamwe ha miji ja hemwe, honhu halingumnojeza. Mleche kumbunza.
DEU 23:17 “Muisilaeli yoneche, mlume ama mdala, halinguganigwa ng'oo yawe mng'hondwa wa ng'handa ya milungu jinji.
DEU 23:18 Sendi yoneche igaligwe kwa ung'hondwa awo, mleche kuhilika kuli ng'handa ya Mkulu Nguluwi, Nguluwi wa hemwe, kuza lipila kilaha, mina mlume ama mdala yawele mng'hondwa wa ng'handa ya milungu jinji ndo izudizo kwa Mkulu Nguluwi.
DEU 23:19 “Uleche kumwazika mng'holozo Muisilaeli chinhu kwa kumgana yahiluse na nyonjeza, uleche kulapa nyonjeza kuli sendi na chilyo ama choneche wanhu walinguhilusa kwa nyonjeza.
DEU 23:20 Koweza kulapa nyonjeza kwa kumwazika mjenzi, ila mng'holozo Muisilaeli uleche kumlapa nyonjeza, na heye Mkulu Nguluwi, Nguluwi wa hegwe, kokutambichiza kuli mijito ja hegwe joukola kuli isi youwele nguluta kuihalila.
DEU 23:21 “Houchilaha kwa Mkulu Nguluwi, Nguluwi wa hegwe, uleche kukawila kweneza, mina Mkulu Nguluwi, Nguluwi wa hegwe koilapa kwa hegwe, nagwe kowa na gehile.
DEU 23:22 Ila wone uleche kilaha kowa hela gehile.
DEU 23:23 Wilolele kudita kota vyowilahile kwa mlomo wa hegwe, mina nakumilahila Mkulu Nguluwi, Nguluwi wa hegwe, ne kukolwa lupichi.
DEU 23:24 “Houkola kuli mgunda wa zabibu wa yomlingikalasa habehi, koweza kulya zabibu kota vyougana, ila uleche kubawa zabibu zeng'ha na kujela mchidoto cha hegwe.
DEU 23:25 Houkola kuli mgunda wa mizuchila jilingulavya nyhule wa yomlingikalasa habehi uwele na miso koweza kukwanyula miso kwa moko na kulya, ila uleche kuhola sengo na kupuga miso ja heye.
DEU 24:1 “Wone mlume kahola mdala na hamba kawa haviganile na heye kwa vila nakona chinhu chilingumbasa soni kwa heye, lelo ayo mlume nakamwandichila kalatasi ya luleko nakumha na kumuwinga haluga hake, hamba ayo mdala nakoka,
DEU 24:2 na kuholeka na mlume yunji,
DEU 24:3 wone ayo mlume wa keli hamganile na kumwandichila kalatasi ya luleko na kumha na kumuwinga haluga hake ama wone ayo mlume yabagame,
DEU 24:4 lelo yula mlume wa mwaluko halinguganigwa kahi kumhola mdala ayo yawe mchewake kwa vila nakawa yakokomoche. Kudita ahyo ndo izudizo kwa Mkulu Nguluwi. Lelo uleche kuyinjiza kuli gehile isi iwele Mkulu Nguluwi, Nguluwi wa hegwe yalingupa iwe uhalizi wa hegwe.
DEU 24:5 “Mlume yaholile behi baha yaleche kuluta kuli ngondo na yaleche kupegwa mijito joneche jinji, yalechigwe yawe yelejehe kwa mwaka umwe, leka yekale haluga na kusangalala na mchewake.
DEU 24:6 “Munhu yoneche yaleche kuhola iganga lya hasi ama lya mchanya lya lwala liwe ugombozi, kudita ahyo ndo kota kusa ludali lwa kubalasa utimbo kwa chiwalo cha kulutilila kikala.
DEU 24:7 “Munhu yoneche yomhiza Muisilaeli miyage na kumdita yawe mpogozi wa heye ama kumguza kuli upogozi, munhu ayo imgana yakopoligwe. Ahyo ndo vyomkusa wihe hali hemwe.
DEU 24:8 “Wone munhu yawe na utamwa wa ngozi, mwanguganigwa kuwa milolele kuwinza malajizo ga watambika Walawi. Kota vyondiwalajize Walawi ndo vyomuwinza kwa kilolela.
DEU 24:9 Mkumbuchile Mkulu Nguluwi, Nguluwi wa hemwe, navyoyamditile Miliamu navyoyawele kuli majendo kulawila Misili.
DEU 24:10 “Houmwazika yomlingikalasa habehi chinhu choneche, uleche kwinjila kwa heye kuhola igwanda kwa ugombozi.
DEU 24:11 Umbeteze kunze na umleche yuye yakigalile.
DEU 24:12 Wone heye yawe mzunwa, uleche kikala na alyo igwanda lya ugombozi nechilo yeng'ha.
DEU 24:13 Ikugana umuhilusile alyo igwanda lya ugombozi matinazo yila, leka yavale na kuwasa. Lelo kokulandila utambichizo. Kudita ahyo ndo mbuli itanganiche hali Mkulu Nguluwi, Nguluwi wa hemwe.
DEU 24:14 “Mleche kumgaza chitumagwa wa hemwe yalingupegwa sendi yawele mzunwa na yalingugana, wone yawe mng'holozo Muisilaeli ama kota ndo mjenzi wa hemwe yumwenga yawele hali miji ja hemwe.
DEU 24:15 Chila zuwa, isanya ling'hali kuzinga, muwape chasi cha sendi zowalinguganigwa kupegwa, kwa vila ka mzunwa, ndiya ya heye yangitumbila sendi zizo, yaleche kumng'ung'utila Mkulu Nguluwi, namwe muwe na nongwa ya gehile.
DEU 24:16 “Wahaza waleche kukopoligwa kwa chiwalo cha gehile ga wana wa hewo na wana waleche kukopoligwa kwa chiwalo cha gehile ga wahaza wa hewo, chila munhu yakopoligwe kwa chiwalo cha gehile ga heye yuye.
DEU 24:17 “Mleche kwajiliza hachi za wajenzi na walekwa. Na mleche kahi kuhola ivalo lya mdala yafililwe na mlume wa heye liwe ugombozi.
DEU 24:18 Mkumbuchile kota hemwe namwali wapogozi kuli isi ya Misili na Mkulu Nguluwi, Nguluwi wa hemwe, nakawagombola kulawila ako. Ahyo, ndanguwalajiza mdite ahyo.
DEU 24:19 “Hombeta chilyo cha hemwe kuli migunda ja hemwe na kusemwa miso jinji mumo, mleche kuhiluka kujihola, ila muwalechele wajenzi na walekwa na wadala wafililwe na walume wawo leka Mkulu Nguluwi, Nguluwi wa hemwe yawatambichize kuli mijito ja hemwe jeng'ha.
DEU 24:20 Homkwangula mizeituni ja hemwe, mleche kuhiluka kwangula kahi, ila muwalechele wajenzi na walekwa na wadala wafililwe na walume wawo.
DEU 24:21 Hombawa zabibu, mleche kuhiluka kulokota zabibu zisigale, ila muwalechele wajenzi na walekwa na wadala wafililwe na walume wawo.
DEU 24:22 Mkumbuchile kota hemwe namwali wapogozi kuli isi ya Misili, ahyo ndanguwalajiza mdite ahyo.
DEU 25:1 “Wone kuwe na kilewa hali wanhu weli nakuluta kuli chitala, yumwe nakoneka kota kahela nongwa, na yunji yawele na nongwa yatagusigwe,
DEU 25:2 wone yula yatagusigwe koganigwa kuzapigwa ng'hobwa, mtagusa komlonjela munhu yula yawase hasi na yazapigwe ng'hobwa kwa nongwa yoyawele nayo.
DEU 25:3 Yawele na nongwa koweza kuzapigwa ng'hobwa makumi gane ila zileche konjezeka. Homkonjeza chasi acho, mowa mumbasile soni mng'holozenu.
DEU 25:4 “Uleche kulidinya mlomo isenga holipulula nyhule.
DEU 25:5 “Wone wenyelukolo weli walume wangikala honhu hamwe na yumwe wa hewo nakabagama ne kuleka mwana mlume, mdala wa mlume yabagame, yaleche kuholeka na munhu yunji wa kunze na lukolo lwao. Imgana mng'holoze wa mlume yabagame yamhalile mdala ayo.
DEU 25:6 Mwana msongolo wa mwaluko yopondigwa na hewo kowazigwa ndo wa yula mlume yabagame, leka itagwa lyake lileche kwaga kuli isi ya Isilaeli.
DEU 25:7 Ila wone ayo mng'holoze munhu yula yabagame halingumgana ayo mdala yafililwe na mlume wa heye, lelo mdala ayo koluta hali wasekulu wa muji na kulonga, ‘Mkulugwe mlume wa heni yabagame kangulema kulutiliza itagwa lya mkulugwe yabagame kuli isi ya Isilaeli, halingugana kunditila nachoyali yodita mkulugwe mlume wa heni.’
DEU 25:8 Hamba wasekulu wa muji womchema ayo mlume na kudawala na heye. Wone yawe yang'hali yolonga kangulema kumhola,
DEU 25:9 ayo mdala yafililwe na mlume wa heye komlutila hali wasekulu awo wa muji, komvula makwamba ga heye mgulu umwe na kummizila lite kumeho na kumlonjela, ‘Ahi ndo vyoilinguganigwa yaditilwe munhu yalingulema kwinula ng'handa ya mkulugwe.’
DEU 25:10 Na itagwa lya ng'handa ya heye kuli Isilaeli lyowa, ‘Ng'handa ya munhu yavuligwe makwamba ga heye mgulu umwe.’
DEU 25:11 “Walume weli howochitowa na mdala wa yumwe wa hewo yakamtanze mlume wa heye kwa kumibata mhumbu yula yalingitowa na mlume wa heye,
DEU 25:12 moudumula moko wa heye, mleche kumonela isungu.
DEU 25:13 “Mleche kuwa na vipimilo vili, chimwe cha kitunya na chimwe cha ubewe. Mleche kuwa na chipimilo cha udesi.
DEU 25:14 Na mleche kuwa na vipimilo vya nhanzi mbili, chikulu na chidodo.
DEU 25:15 Muwe na chipimilo cha hachi leka muwe mikale kwa miyaka minji kuli isi yalinguwapani Mkulu Nguluwi, Nguluwi wa hemwe.
DEU 25:16 Weng'ha walingudita mbuli azo na walingudita kwa uhadi ndo izudizo kwa Mkulu Nguluwi, Nguluwi wa hemwe.
DEU 25:17 “Mkumbuchile madito ga Waamaleki navyomuwele kuli majendo kulawila Misili.
DEU 25:18 Mkumbuchile navyowawavabile ako kunzila homuwele ng'hochele na kutoka na kuwatowa wala weng'ha wezile kumbele kwa hemwe. Waamaleki nahawamdumbile Nguluwi.
DEU 25:19 Ahyo, mhela Mkulu Nguluwi, Nguluwi wa hemwe, hoyoweseza kuli wang'honyo wa hemwe, weng'ha walinguwazunguluta kuli isi iwele mpeligwe muihalile na kikala amo, mleche kusemwa yowagana muwadumye Waamaleki weng'ha.
DEU 26:1 “Hala homfika na kuihalila isi yila Mkulu Nguluwi, Nguluwi wa hemwe yalinguwapa iwe ya hemwe na kikala ako,
DEU 26:2 uhole mbena ya mwaluko yombeta kuli isi yalingukupa Mkulu Nguluwi, Nguluwi wa hegwe na kuwika kuli chidoto mbaka hala honhu hawele heye Mkulu Nguluwi, Nguluwi wa hegwe, hoyohahagula kumfugamila.
DEU 26:3 Komlutila mtambika yalingukola mijito mhela awo, na kumlonjela, ‘Lehano ndangukunda hali Mkulu Nguluwi, Nguluwi wa heni, kota nyinjila kuli isi yawelahile wasekulu wa hetwe kota kotupa.’
DEU 26:4 “Na heye mtambika hoyohola acho chidoto mmoko mwako na kuchiwika hali honhu ha kulavila nhambiko ha Mkulu Nguluwi, Nguluwi wa hegwe.
DEU 26:5 Hegwe kolonga ulonzi awu hali Mkulu Nguluwi, Nguluwi wa hegwe, ‘Mhaza wa heni nayali Mwalamu nayawele yolubaluba aku na ako, hamba nakadulika kuza Misili nakekala ako kota mjenzi. Heye na ivyazi lyake nawali wanhu wachefu hela nalowali ako, ila hamba nawali wonjezeche na kuwa isi ng'hulu iwele na ludali na wanhu wenji.
DEU 26:6 Wamisili nawatuditila mbuli zihile nawatugaza na kutukola lupichi kudita mijito ja kitunya.
DEU 26:7 Hamba natumlilila Mkulu Nguluwi, Nguluwi wa wasekulu wa hetwe, nakahulika chililo cha hetwe na kugona magazo ga hetwe na kitunya na kubunzwa.
DEU 26:8 Lelo Mkulu Nguluwi nakatulavya ako Misili kwa moko uwele na mong'ho na ludali lukulu na kwa mbuli za kukabusa na kwa ulajilo na vinduzanduza.
DEU 26:9 Nakatugala aha na kutupa isi ayi inojile na iwele na mboto.
DEU 26:10 Na sambi ndangumigalila Mkulu Nguluwi mbena za mwaluko za isi yoyamhele.’ Hamba hegwe kowika chidoto hasi hali Mkulu Nguluwi, Nguluwi wa hegwe, na kufugamila hali heye.
DEU 26:11 Nagwe kosangalalila ganojile geng'ha gawele Mkulu Nguluwi, Nguluwi wa hegwe, kakupa hegwe na ivyazi lyako. Na hewo wajenzi na Walawi wosangalala hamwe na hemwe.
DEU 26:12 “Chila mwaka kolavya honhu hamwe ha kumi ha mbena za hegwe kwa Mkulu Nguluwi. Ila chila mwaka wa kadatu honhu hamwe ha kumi ha mbena yila, kolavya kwa kuwapa Walawi na wajenzi na walekwa na wadala wafililwe na walume wawo, leka wawe na chilyo cheng'ha chowalingugana howowa kuli miji ja hemwe.
DEU 26:13 Hamba kolonga ahi hali Mkulu Nguluwi, Nguluwi wa hegwe, ‘Ndililavya hakaye hangu ilundo lyelile, ndiwapa Walawi na wajenzi na walekwa na wadala wafililwe na walume wawo kota navyoundajize ndite. Sibenile mzilo wa hegwe ne kusemwa.
DEU 26:14 Sidile nhambiko yoneche nalondali ndilombocheza na nasiilavile hanze ha ng'handa ya heni londali ng'hokomoche na silavile nhambiko ayo kwa wabagame. Ndikuhulichiza hegwe Mkulu Nguluwi, Nguluwi wa heni, ndita chila chinhu choundajize kwa chiwalo cha nhambiko.
DEU 26:15 Ulole hasi kulawila honhu houchikala hegwe helile kilanga, uwatambichize wanhu wa hegwe wa Isilaeli na isi youtupele kota navyouwelahile wasekulu wa hetwe, isi iwele na mboto.’
DEU 26:16 “Lehano baha, Mkulu Nguluwi, Nguluwi wa hemwe kanguwalajiza kuwinza malajizo aga na mizilo aji. Milolele kugadita kwa nhumbula yeng'ha na muhe weng'ha.
DEU 26:17 Lehano baha namkunda Mkulu Nguluwi, yawe Nguluwi wa hemwe na kota mowinza nzila ya heye na kibata malajizo na mizilo na utaguso wa heye na kuwinza lizi lyake.
DEU 26:18 Na heye Mkulu Nguluwi nakakunda ng'hatu lehano baha kota hemwe ndo wanhu wa heye yuye kota navyoyawelahile na kota mwanguganigwa kibatilila malajizo ga heye geng'ha.
DEU 26:19 Nakakunda kota kowadita hemwe muwe isi ng'hulu na ya lutogo na kuhulichizwa kusinda isi zeng'ha nayoyalumbile. Namwe mowa wanhu wa chiuyeng'ha kwa heye Mkulu Nguluwi, Nguluwi wa hemwe kota vila navyoyelahile.”
DEU 27:1 Lelo Musa yawele hamwe na wasekulu wa Isilaeli nakawalonjela wanhu ahi, “Mibatilile malajizo geng'ha gondilinguwapa lehano.
DEU 27:2 Zuwa lila homloka lwanda lwa Yolodani na kwinjila kuli isi iwele Mkulu Nguluwi, Nguluwi wa hemwe, yawapele, mochimika maganga mang'hangala na kugasiliba.
DEU 27:3 Mchanya mwake mokwandika ulonzi weng'ha wa malajizo aga, homkwinjila kuli isi yila iwele na lufufu na iwele na mboto ndo iwele Mkulu Nguluwi, Nguluwi wa wasekulu wa hemwe, nayewelahile.
DEU 27:4 Homuwa kumwambu mwa lwanda lwa Yolodani, mochimika maganga mbaka kuchanya mwa chidunda cha Ebali, kota vyondilinguwalajiza lehano na kugasiliba.
DEU 27:5 Momzenjela Mkulu Nguluwi, Nguluwi wa hemwe, honhu ha kulavila nhambiko aho hawele na maganga hagahongoligwe.
DEU 27:6 Ena, honhu ha kulavila nhambiko honeche homumzenjela Mkulu Nguluwi, Nguluwi wa hemwe, hoganigwa hazenjigwe kwa maganga hagahongoligwe. Mchanya mwa honhu ha kulavila nhambiko momlavila Mkulu Nguluwi, Nguluwi wa hemwe nhambiko za kulakazwa.
DEU 27:7 Momlavila nhambiko za kikala goya na kulya baho na kusangalala hali Mkulu Nguluwi, Nguluwi wa hemwe.
DEU 27:8 Mokwandika kwa koneka mchanya mwa maganga ago ulonzi weng'ha wa malajizo aga.”
DEU 27:9 Lelo Musa hamwe na watambika Walawi nawawalonjela wanhu weng'ha wa Isilaeli, “Mnyamalile mhulichize hemwe Waisilaeli. Lehano baha hemwe muwa wanhu wa Mkulu Nguluwi, Nguluwi wa hemwe.
DEU 27:10 Ahyo, momhulichiza Mkulu Nguluwi, Nguluwi wa hemwe kuno muwinza malajizo na mizilo ja heye jondilinguwalonjela lehano.”
DEU 27:11 Zuwa alyo Musa nakawalajiza wanhu na kulonga,
DEU 27:12 “Homuwa mlochile lwanda lwa Yolodani, nhanzi azi zokwima mchanya mwa chidunda cha Gelisimu kuwatambichiza wanhu, Simeoni na Lawi na Yuda na Isakali na Yusufu na Benjamini.
DEU 27:13 Na nhanzi azi zokwima mchanya mwa chidunda cha Ebali mhela upanjilo houlavigwa, Lubeni na Gadi na Asheli na Sebuluni na Dani na Nafutali.
DEU 27:14 Na hewo Walawi wowalonjela wanhu weng'ha wa Isilaeli kwa lizi ng'hulu.
DEU 27:15 “ ‘Yapanjilwe munhu yoneche yalingugongomanya jimalukolo ja kuhongola ama ja kuponda na kujimiza kwa uviso, chinhu chiwele chilumbigwe kwa moko ga uwanzi. Achi ndo izudizo kwa Mkulu Nguluwi, Nguluwi wa hemwe.’ Na wanhu weng'ha wokwidichila, ‘Ena!’
DEU 27:16 “ ‘Yapanjilwe munhu yoneche yalingumbeza mhaza wa heye ama mayake.’ Na wanhu weng'ha wokwidichila, ‘Ena!’
DEU 27:17 “ ‘Yapanjilwe munhu yoneche yalingusa ulajilo wa mbaka ja yowalingikalasa habehi.’ Na wanhu weng'ha wokwidichila, ‘Ena!’
DEU 27:18 “ ‘Yapanjilwe munhu yoneche yalingumwajiliza yohambe yalole mnzila.’ Na wanhu weng'ha wokwidichila, ‘Ena!’
DEU 27:19 “ ‘Yapanjilwe munhu yoneche yalingwajiliza hachi ya mjenzi ama mlekwa ama mdala yafililwe na mlume wa heye.’ Na wanhu weng'ha wokwidichila, ‘Ena!’
DEU 27:20 “ ‘Yapanjilwe mlume yalinguwasa na mdala wa mhaza wa heye, mina nakambasa soni mhaza wa heye.’ Na wanhu weng'ha wokwidichila, ‘Ena!’
DEU 27:21 “ ‘Yapanjilwe munhu yoneche yalinguwasa na igongolo lyoneche.’ Na wanhu weng'ha wokwidichila, ‘Ena!’
DEU 27:22 “ ‘Yapanjilwe munhu yoneche yalinguwasa na lumbulye, hanji yawe mhinza wa mhaza wa heye ama mhinza wa mayake.’ Na wanhu weng'ha wokwidichila, ‘Ena!’
DEU 27:23 “ ‘Yapanjilwe munhu yoneche yalinguwasa na mkweye.’ Na wanhu weng'ha wokwidichila, ‘Ena!’
DEU 27:24 “ ‘Yapanjilwe munhu yoneche yalingukopola munhu kwa uviso.’ Na wanhu weng'ha wokwidichila, ‘Ena!’
DEU 27:25 “ ‘Yapanjilwe munhu yoneche yalingubochela chinhu leka yamkopole munhu yalihela nongwa.’ Na wanhu weng'ha wokwidichila, ‘Ena!’
DEU 27:26 “ ‘Yapanjilwe munhu yoneche yohambe yauhulichize ulonzi awu wa malajizo na kibatilila.’ Na wanhu weng'ha wokwidichila, ‘Ena!’
DEU 28:1 “Wone mhulichize lizi lya Mkulu Nguluwi, Nguluwi wa hemwe, na kibatilila goya malajizo gondinguwalonjela lehano, heye kowadita hemwe muwe na ludali kusinda wanhu wa isi zeng'ha.
DEU 28:2 Wone muhulichize lyzi lya Mkulu Nguluwi, Nguluwi wa hemwe, mopegwa utambichizo awu weng'ha ulinguya.
DEU 28:3 “Motambichizwa kuli miji na migunda.
DEU 28:4 “Motambichizwa mponde wana wenji na mbena nyinji na misenga minji na ming'holo minji.
DEU 28:5 “Motambichizwa hemwe na vidoto vya hemwe vya nyhule na vinhu vya hemwe vya kutimbulila.
DEU 28:6 “Motambichizwa homhiluka haluga na homulawa kunze.
DEU 28:7 “Wang'honyo howogana kitowa ngondo na hemwe, Mkulu Nguluwi kowapani ludali lwa kuwasumya. Howokuya kuwatowa kwa nzila imwe, wowabilimani kwa nzila saba.
DEU 28:8 “Utambichizo wa Mkulu Nguluwi, Nguluwi wa hemwe, wowa kuli ng'hano za hemwe za nyhule na kuli mijito ja hemwe jeng'ha. Kowatambichiza kuli isi yoyalinguwapani.
DEU 28:9 “Mkulu Nguluwi kowadita muwe wanhu wa chiuyeng'ha kwa heye kota navyoyawelahile, wone mibatilile malajizo ga heye na kuwinza nzila za heye Mkulu Nguluwi, Nguluwi wa hemwe.
DEU 28:10 Isi zeng'ha hozikona kota hemwe mwanguchemigwa kwa itagwa lya Mkulu Nguluwi, zowadumbani.
DEU 28:11 Mkulu Nguluwi kowaditila mbuli za hemwe zilutilile goya kwa kuwa na wana wenji na migongolo minji na mbena nyinji kumgunda kuli isi yawalahile wasekulu wa hemwe kota kowapani.
DEU 28:12 Mkulu Nguluwi kowachumulila ng'hano ya heye inojile kulawila kilanga na kuwegalila nhonya kuli isi kwa mhela wa heye na kutambichiza mijito ja hemwe. Mowazika wanhu wenji ila hemwe hamkwazikwa hebu.
DEU 28:13 Mkulu Nguluwi, Nguluwi wa hemwe, kowadita muwe wa mwaluko kwa ludali na haiwele wa kuduma. Molutilila kumwando na haiwele kuhiluka kumbele wone mibatilile malajizo ga heye gondilinguwapani lehano na muwe mchilolela kugadita,
DEU 28:14 ne kuhinduka kudilo ama kumoso kuwinza milungu jinji na kujikolela mijito.
DEU 28:15 “Ila wone hamhulichize lizi lya Mkulu Nguluwi, Nguluwi wa hemwe, ama wone hamilolele kudita malajizo na mizilo ja heye na kuwinza vyondilinguwalajiza lehano, lelo mofikwa na upanjilo awu weng'ha ulinguya.
DEU 28:16 “Mopanjilwa kuli miji na migunda ja hemwe.
DEU 28:17 “Mopanjilwa hemwe na vidoto vya hemwe vya nyhule na vinhu vya hemwe vya kutimbulila mibumunda.
DEU 28:18 “Mopanjilwa hemwe na wana wa hemwe na mizuchila ja hemwe ja isi na migongolo ja kudimigwa ja hemwe jileche konjezeka.
DEU 28:19 “Mopanjilwa homukwinjila na homulawa.
DEU 28:20 “Mkulu Nguluwi kowapanjila na kuwegalila ivuche na kugozola kuli mbuli za hemwe zeng'ha mbaka mbagame himahima kwa chiwalo cha wihe wa hemwe na kwa madito ga hemwe na kwa chiwalo cha kumleka Mkulu Nguluwi.
DEU 28:21 Mkulu Nguluwi kowegalila matamwa gehile mbaka mweng'ha mbagame ng'hatu kuli isi yomlinguluta kuihalila.
DEU 28:22 Mkulu Nguluwi kowagaza kwa ng'ololo na kuzumbuka na mipu na kupwituka lukami na chipalangule na nhigu na lungwi, mbuli azo zowawinza mbaka mbagame.
DEU 28:23 Ulanga wokala kota shaba na kowa hela nhonya na isi yowa kota chuma.
DEU 28:24 Mkulu Nguluwi kodita nimbwisi na misanga kuwa nhonya ya hemwe, nimbwisi yowatimulila mbaka muwe mdumigwe ng'hatu.
DEU 28:25 “Mkulu Nguluwi kowaditani mlemwele kitowa na wang'honyo wa hemwe. Hemwe moluta kuwafikaniza kwa nzila imwe, ila mowabilima kwa nzila saba. Namwe mowa chizudizo kwa wanhu weng'ha muisi.
DEU 28:26 Mitufi ja hemwe jowa chilyo cha videje na migongolo ja kisolo na kuduhu munhu yojiwinga.
DEU 28:27 Mkulu Nguluwi kowatowa kwa mipu najiwafichile Wamisili, kowapani vilonda na utamwa wa kizada na chipata cholemwela kuloholigwa.
DEU 28:28 Mkulu Nguluwi kowatowa kwa kuwadita muwe na lukwale na mowa hambe mlole na kufanda kota mna kububuwala.
DEU 28:29 Moluta kwa kukwabasakwabasa nemisi kota wohambe walole na hamuwa na chinhu cha kuhega kuli mbuli za hemwe za chila zuwa. Mowa mbunzigwa na kuhizilwa chila mhela na hakuwa na munhu wa kuwatanza.
DEU 28:30 “Mowabanichila wadala ila wanhu wanji wowasa nawo kwa lupichi. Mozenga ng'handa za hemwe, ila hamchikala mgati mwake. Monyala zabibu, ila hambena hebu mafuza gake.
DEU 28:31 Misenga ja hemwe jodumuligwa singo hali meho ga hemwe, ila hamjeza ne chiwunde cha isenga alyo. Midogowi ja hemwe joholigwa kwa lupichi hali meho ga hemwe, na hajihiluswa ng'oo. Ming'holo ja hemwe wopegwa wang'honyo wa hemwe na kuduhu munhu yoweza kuwatanza.
DEU 28:32 Wana wa hemwe walume na wadala wolavigwa kwa wanhu wanji aku mlola nemisi yeng'ha mchijesa kota wohiluka, ila hamuwa na ludali lwa kukola choneche chila.
DEU 28:33 Isi yohamuizelele yohola mbena yeng'ha ya isi ya hemwe na cheng'ha chomkolile kwa chituguti cha hemwe, namwe mobunzwa na kugazigwa mazuwa gose,
DEU 28:34 mbaka mowa na lukwale kwa mbuli yomyona kwa meho ga mwemwe baho.
DEU 28:35 Mkulu Nguluwi kogatowa mafugamilo ga hemwe na magulu ga hemwe kwa mipu jihile jilihela ulohozi, jokwenela kulawa mizayo mbaka minosi.
DEU 28:36 “Mkulu Nguluwi kowahilika hemwe na mndewa wa hemwe yomihagulile mbaka kuli isi yohamuizelele hemwe na wasekulu wa hemwe. Na ako mojifugamila milungu jinji ja migodi na maganga.
DEU 28:37 Namwe mowa chizudizo na kubeza na kububuwala hali wanhu weng'ha wa isi iwele Mkulu Nguluwi yowahilika.
DEU 28:38 Monyala nyhadikwa nyinji ila mobena chido hela kwa vila nzije zolya mizuchila jeng'ha ja hemwe.
DEU 28:39 Monyala mizabibu na kuihalila ila hambawa zabibu ne kunwa divai, mina minhu jolya.
DEU 28:40 Mowa na mizeituni honhu heng'ha hali isi ya hemwe, ila hamuwa na mafuta ga kubakala kwa vila mizeituni ajo jopululuka.
DEU 28:41 Moponda wana walume na wadala, ila hawowa wa hemwe, woholigwa kuli upogozi.
DEU 28:42 Mafuza ga hemwe geng'ha na chilyo cha hemwe kumgunda, vyofichigwa na nzije.
DEU 28:43 “Wajenzi walingikala kuli isi ya hemwe wokonjezelwa ludali, ila hemwe molutilila kuwa ng'hochele.
DEU 28:44 Hewo wokwazika hemwe, ila hemwe hamuwa na ludali lwa kuwazika hewo. Hewo wowa wa mwaluko kwa ludali namwe mowa wa kuduma.
DEU 28:45 “Upanjilo weng'ha wowafika hemwe na kupona kwa hemwe mbaka mdumigwe kwa vila nahamhulichize lizi lya Mkulu Nguluwi, Nguluwi wa hemwe kwa chiwalo cha kibatilila mizilo na malajizo goyawapele.
DEU 28:46 Ila awo wowa ulajilo wa utaguso wa Mkulu Nguluwi kwa hemwe na walelwa wa hemwe mazuwa gose.
DEU 28:47 Mkulu Nguluwi, Nguluwi wa hemwe, nakawatambichiza kwa chila chinhu, ila hemwe nahamumditile kwa nhumbula isangalale na kugoloka.
DEU 28:48 Ahyo, mowakolela mijito wang'honyo wa hemwe nawawele Mkulu Nguluwi kowalajiza kwa hemwe kwa nzala na ng'halu na kusauka nguwo na kwisilwa chila chinhu. Kowawohela ngwamo ya chuma mbaka yawadumye.
DEU 28:49 “Mkulu Nguluwi kochigala isi imwe kulawila kutali iwavabe kota ikungule, wanhu hamlinguvizela chowolonga.
DEU 28:50 Isi ayo iwele na wanhu wawele hawowahulichiza wasekulu ne kuwonela isungu wasongolo,
DEU 28:51 wolya misenga ja hemwe na mbena za hemwe mbaka mdumigwe. Hawowalechela nyhule ne divai ne mafuta ne misenga ne ming'holo mbaka wawadumye.
DEU 28:52 Wanhu awo wowazunguluta kuli miji ja hemwe jeng'ha, mbaka lukanzi lwa lugagala lomijesile mowa mikale goya, wogwisa hasi chila honhu kuli isi ya hemwe nayompegwe na Mkulu Nguluwi.
DEU 28:53 Mhela wa kuzungulutwa na kugazigwa na wang'honyo wa hemwe, mowa na nzala ng'hatu mbaka molya wana wa hemwe Mkulu Nguluwi nayawapele.
DEU 28:54 Mbaka munhu liholile ng'hatu na yaleligwe goya komwima chilyo mng'holoze na mchewake yalingumgana na mwana wa heye yaponile,
DEU 28:55 na homgawila ne yumwe wa hewo miwunde ja wana wa heye joyolya. Hopona na choneche mhela awo wa kuzungulutwa na kugazigwa na wang'honyo wa hemwe kuli miji ja hemwe jeng'ha.
DEU 28:56 Na yula mdala yawele liholile ng'hatu na yaleleche goya na yadedemche na hanabiga misanga kwa uzayo wa heye howeza kudita vinji. Mhela awo wa kuzungulutwa kowa na nzala ng'hatu
DEU 28:57 mbaka, kwa uviso, kolya chali cha heye chipondigwe baho du na lila lilingulawa kumbele. Hochihanza na mlume wa heye yamganile ne wana woneche wa heye.
DEU 28:58 “Wone hamuwele milolela goya kudita ulonzi weng'ha wa malajizo aga gandichigwe mchitabu achi na wone hamlingulihulichiza itagwa lyelile lya kudumbiza lya Mkulu Nguluwi, Nguluwi wa hemwe,
DEU 28:59 lelo, Mkulu Nguluwi kowegalila hemwe na walelwa wa hemwe magazo gang'ang'ale na magazo hogowa na lubehelo na ga kulutilila na matamwa makulu ga kulutilila.
DEU 28:60 Kowegalilani kahi gala matamwa namgadumbile kuli isi ya Misili, nago gowawinza mazuwa gose.
DEU 28:61 Mkulu Nguluwi kowegalila matamwa ga chila nhanzi na magazo ganji gohagalajilwe kuli chitabu achi cha malajizo mbaka gawadumye.
DEU 28:62 Hanga hemwe mwa wenji kota nhondwe za kilanga, ila mowa wachefu hela kwa vila hamhulichize lizi ya Mkulu Nguluwi, Nguluwi wa hemwe.
DEU 28:63 Kota vila Mkulu Nguluwi navyoyanojezwe na kuwaditila mbuli za hemwe ziwe goya na kuwadita muwe wenji, hihyo du Mkulu Nguluwi konojezwa kuwegalila kubagama na kuwadumya. Namwe molavigwa kuli isi ayo yomuwele nguluta kuihalila.
DEU 28:64 “Mkulu Nguluwi kowasambalula hali nhanzi zeng'ha za isi, kulawila ubanzi umwe wa isi mbaka ubanzi wunji na ako mofugamila milungu jinji ja migodi na maganga, milungu jiwele hemwe ne wasekulu wa hemwe nahamjizelele.
DEU 28:65 Hamchikala goya ne honhu ha kwesela hali wamwe wa wanhu awo. Ila Mkulu Nguluwi kowapani ako lunhwinhwi lwa nhumbula, kubilabila kwa meho na kugaya kwa muhe.
DEU 28:66 Ukomu wa hemwe wowa na lunhwinhwi, nemisi na nechilo mowa mdumba na hamuwa na cha kitumbila kuli ukomu wa hemwe.
DEU 28:67 Nhumbula za hemwe zodumba chila mbuli yomyona. Hamitondo molonga, ‘Wone na kuwe nemisi,’ nemisi loifika molonga, ‘Wone na kuwe hamitondo.’
DEU 28:68 Mkulu Nguluwi kowahilusani Misili kwa meli, majendo nayelahile kota hamgadita kahi. Ako mojeza kiguza kwa wang'honyo wa hemwe leka muwe wapogozi, ila kuduhu munhu yowagula.”
DEU 29:1 Awu ndo ulonzi wa ilagano liwele Mkulu Nguluwi nayawalajize Musa kudita na Waisilaeli kuli isi ya Moabu, konjezela kwa lila ilagano Mkulu Nguluwi naloyaditile na hewo kuchidunda cha Holebu.
DEU 29:2 Musa nakawachema hamwe Waisilaeli weng'ha na kuwalonjela, “Namona mwemwe baho vila Mkulu Nguluwi navyoyaditile kuli isi ya Misili kwa Falao na vitumagwa wa heye na isi ya heye yeng'ha.
DEU 29:3 Namona magayo makulu na ulajilo na vinduzanduza navyoyaditile.
DEU 29:4 Ila mbaka lehano Mkulu Nguluwi hawapele luhala lwa kuvizela ne meho ga kulola ne makutu ga kuhulika.
DEU 29:5 Kwa mhela wa miyaka makumi gane, heni nandiwalongoza kuchiwala, nguwo nazomvalile nahazilalile ne makwamba ga hemwe nagomvalile mmagulu genu hagalalile.
DEU 29:6 Hamdile ibumunda ne kunwa divai ama chilingugaliza choneche chila leka mvizele kota Mkulu Nguluwi ndo Nguluwi wa hemwe.
DEU 29:7 “Nalomfichile honhu aha, mndewa Sihoni wa Heshiboni na mndewa Ogu wa Bashani nawoya kitowa na hetwe, ila natuwasumya
DEU 29:8 na kuihola isi ya hewo, natuwapa nhanzi za Lubeni na Gadi na nusu ya nhanzi ya Manase iwe ya hewo ng'hatu.
DEU 29:9 Ahyo, milolele kibatilila ulonzi weng'ha na kudita ilagano lino leka mbuli za hemwe ziwalutile goya.
DEU 29:10 “Lehano, mwima hali Mkulu Nguluwi, Nguluwi wa hemwe, hemwe mweng'ha mwa vilongozi wa nhanzi na wasekulu wa hemwe na wang'hangala wa hemwe na walume weng'ha wa Waisilaeli,
DEU 29:11 na wana wa hemwe na wadala wa hemwe na wajenzi walingikala hali hemwe kuli kambi, wawele nguwagodela ngodi na kuwadehela mazi.
DEU 29:12 Mwa aha lehano leka mdite ilagano alino liwele Mkulu Nguluwi, Nguluwi wa hemwe kangilaha lehano,
DEU 29:13 kota kowakundiza lehano muwe wanhu wa heye na heye kowa Nguluwi wa hemwe, kota navyoyawelahile hemwe na wasekulu wa hemwe, Abulahamu na Isaka na Yakobo.
DEU 29:14 Silingilaha ilagano alino lehano kwa chiwalo cha hemwe hela,
DEU 29:15 ila kahi kwa chiwalo cha hemwe muwele hamwe na hetwe lehano hali Mkulu Nguluwi, Nguluwi wa hetwe na lulelo lwa hetwe lulinguya.
DEU 29:16 “Mvizela vila navyomikale kuli isi ya Misili na vila navyomwinule majendo kuza kuli isi za wanhu wanji.
DEU 29:17 Namona jimalukolo ja hewo ja kuzudiza na milungu ja migodi na maganga na sendi na zahabu.
DEU 29:18 Milolele, haleche kuwa na mlume ama mdala ama ivyazi ama nhanzi yoneche ilingwima aha lehano imleka Mkulu Nguluwi, Nguluwi wa hemwe, kuza kujifugamila milungu ja isi zinji. Mbuli ayi yowa kota izabi lisile na kulela mafuza galiusungu gawele na dunga.
DEU 29:19 Munhu kota ayo hoyohulika ulonzi wa ilagano alino liwele milahile, hamba munhu yejese na kilonjela yuye mnhumbula mwake, ‘Ndochikala goya hanga ndangugaya mnhumbula na kuwinza nzila ya heni.’ Ayo yowadumya weng'ha, wehile na wanojile.
DEU 29:20 Mkulu Nguluwi homlechela munhu ayo, na ng'halazi ya Mkulu Nguluwi na fihi ya heye yomgwila munhu ayo, upanjilo weng'ha wandichigwe mchitabu achi womfika heye na Mkulu Nguluwi kolyusa ng'hatu itagwa lya munhu ayo kulawila kuli isi.
DEU 29:21 Mkulu Nguluwi komwengula kulawila hali nhanzi yeng'ha ya Isilaeli yafichigwe na nongwa kwa upanjilo weng'ha wa ilagano lyandichigwe kuli chitabu achi.
DEU 29:22 Kuli lulelo lulinguya, walelwa wa hemwe na wajenzi kulawila isi ya kutali wokona vila Mkulu Nguluwi navyoyaigalile isi ayi magazo na matamwa,
DEU 29:23 imema chikwatilo na mwino, ilakazwa na kuwa hela chinhu, hainyaligwe nyhadikwa na hailingota choneche chila. Ndo kota navyoiwele mhela Mkulu Nguluwi, navyoyazidumile ng'hatu Sodoma na Gomola na Adima na Seboimu.
DEU 29:24 Ena, wanhu wa isi zeng'ha wolonga, ‘Lekachoni Mkulu Nguluwi kaiditila ahyo isi ayi? Lekachoni nayali na ng'halazi ng'hulu kota ayi?’
DEU 29:25 Na chidichilo cholavigwa, ‘Ndo kwa vila nawabena ilagano lya Mkulu Nguluwi, Nguluwi wa wasekulu wa hewo naliwele yaditile na hewo navyoyawalavile kuli isi ya Misili,
DEU 29:26 nawaluta kujikolela mijito na kujifugamila milungu jinji nahawajizelele aho katali, na Mkulu Nguluwi nahawapele.
DEU 29:27 Ahyo, ng'halazi ya Mkulu Nguluwi naiwafika kwa chiwalo cha isi ayi na kuwegalila upanjilo weng'ha wandichigwe kuli chitabu achi.
DEU 29:28 Na heye Mkulu Nguluwi, nakawosa kulawila kuli isi ya hewo kwa kuzudila na ng'halazi ng'hulu, nakawahilika kuli isi yinji kota vyoili lehano.’
DEU 29:29 “Mbuli za uviso ndo za Mkulu Nguluwi, Nguluwi wa hetwe, ila gala gawele goyagubule ndo ga hetwe na walelwa wa hetwe mazuwa gose, leka tuwinze goya ulonzi weng'ha wa malajizo aga.”
DEU 30:1 Musa nakalutilila kulonga, “Ndiwapani mhagule kuli utambichizo na upanjilo. Mbuli azo hoziwafika namwe mochijesa honeche homuwa msambalulwe hali wanhu weng'ha na Mkulu Nguluwi, Nguluwi wa hemwe.
DEU 30:2 Wone mumhiluchile Mkulu Nguluwi, Nguluwi wa hemwe, hemwe na wana wa hemwe na mibatilile kwa nhumbula yeng'ha na muhe weng'ha ulonzi wa heye wondilinguwalajiza lehano,
DEU 30:3 Mkulu Nguluwi, Nguluwi wa hemwe, kowahilusilani ukomu wa hemwe unojile na kuwonela isungu na kuwakungajiza kahi kulawila kuli isi nazoyawele yawasambalule.
DEU 30:4 Na wone yawasambalule hemwe koneche kula kuli isi yeng'ha, Mkulu Nguluwi, Nguluwi wa hemwe, kowakungajiza na kuwahilusani hemwe,
DEU 30:5 leka muihole kahi isi nawekale wasekulu wa hemwe. Na heye Mkulu Nguluwi kowatambichiza ng'hatu na kuwa wenji kusinda wasekulu wa hemwe.
DEU 30:6 Mkulu Nguluwi, Nguluwi wa hemwe, kowadita hemwe na walelwa wa hemwe mibatilile ilagano lya Mkulu Nguluwi leka mumgane heye kwa nhumbula ya hemwe yeng'ha na muhe wa hemwe weng'ha, leka mikale.
DEU 30:7 Mkulu Nguluwi, Nguluwi wa hemwe, koudita ula upanjilo uwagwile wang'honyo wa hemwe nawawagazile hemwe.
DEU 30:8 Namwe mohulichiza lizi lya Mkulu Nguluwi na kibatilila malajizo ga heye geng'ha gondilinguwapa lehano.
DEU 30:9 Mkulu Nguluwi, Nguluwi wa hemwe kowaditila mbuli za hemwe zilutilile goya kwa chila chinhu chomdita, na mowa na wana wenji na misenga minji na migunda ja hemwe jolavya chilyo cha kuhega. Mina konojezwa kahi kuwaditila goya kota vila navyoyanojezwe na wasekulu wa hemwe,
DEU 30:10 wone mohulichiza lizi lya heye na kibatilila malajizo na mizilo ja heye jandichigwe kuli chitabu achi cha malajizo na kumhiluchila Mkulu Nguluwi, Nguluwi wa hemwe, kwa nhumbula yeng'ha na muhe weng'ha.
DEU 30:11 “Mzilo jondilinguwapa lehano hajiwele ja kulemwa kuwinzwa na hemwe na hajiwele kutali na hemwe.
DEU 30:12 Hajiwele kilanga mbaka mlonje, ‘Yalihi yokwina kilanga kutigalila leka tuweze kujihulika na kibatilila?’
DEU 30:13 Najo hajiwele kumwambu kwa bahali, mbaka mlonje, ‘Yalikohi yoloka bahali yatigalile leka tujihuliche na kibatilila.’
DEU 30:14 Haiwele ahyo, ila usenga wahabehi na hemwe, kumlomo kwa hemwe na mnhumbula mwa hemwe, ahyo muubatilile.
DEU 30:15 “Lehano baha ndanguwapani uhaguzi hali ganojile na gehile na hali ukomu na kubagama.
DEU 30:16 Wone mibatilile malajizo ga Mkulu Nguluwi, Nguluwi wa hemwe, jila jondilinguwapani lehano, momgana Mkulu Nguluwi, Nguluwi wa hemwe na kuwinza nzila za heye, na kibatilila malajizo na mizilo ja heye, lelo mochikala na konjezeka, na heye Mkulu Nguluwi, Nguluwi wa hemwe, kowatambichiza kuli isi yomlinguluta kuihola.
DEU 30:17 Ila wone mwajilile na kulema kuhulichiza na kukwejigwa kuza kujifugamila milungu jinji na kujikolela mijito,
DEU 30:18 heni ndanguwadamlila lehano baha kota mobagama. Hamchikala kwa miyaka minji kuli isi yomlinguluta kuihola, kumwambu mwa lwanda lwa Yolodani.
DEU 30:19 Ndanguchema kilanga na isi lehano kota walolezi. Kota nandiwapa uhaguzi hali ukomu na kubagama na hali utambichizo na upanjilo. Lelo mhagule ukomu hemwe na walelwa wa hemwe leka mikale.
DEU 30:20 Mumgane Mkulu Nguluwi wa hemwe, mumhulichize heye na kumibatilila heye, hamba hemwe na walelwa wa hemwe mochikala kwa miyaka minji kuli isi yila nayawalahile kowapa wasekulu wa hemwe, Abulahamu na Isaka na Yakobo.”
DEU 31:1 Musa nakalutilila kulonga na Waisilaeli weng'ha,
DEU 31:2 nakawalonjela, “Heni sambi ndina miyaka miya imwe na makumi meli, na siweza kukola mijito ja kuhega. Kahi Mkulu Nguluwi, nakandonjela kota siloka lwanda lwa Yolodani.
DEU 31:3 Mkulu Nguluwi, Nguluwi wa hemwe, kowalongola kuwadumya wanhu wa isi zeng'ha zilingikala ako, leka muihole isi ya hewo. Yoshua kowa chilongozi wa hemwe kota vyoyalonjile Mkulu Nguluwi.
DEU 31:4 Mkulu Nguluwi kowadumya wanhu wa isi azo kota vila navyoyawadumile Sihoni na Ogu, wandewa wa Waamoli na isi ya hewo.
DEU 31:5 Mkulu Nguluwi kowapani ludali lwa kuwadumya, namwe mowaditila hewo malajizo geng'ha kota vyondiwalajize.
DEU 31:6 Muwe mwimile nzinzili na msindamale, mleche kudumba ama kudumbizwa na hewo, mina Mkulu Nguluwi, Nguluwi wa hemwe ndo yalinguluta hamwe na hemwe. Heye kowa hamwe na hegwe na hokuleka ng'oo.”
DEU 31:7 Hamba Musa nakamchema Yoshua, nakamlonjela hali wanhu weng'ha wa Isilaeli, “Uwe wimile nzinzili na usindamale, mina hegwe kowalongoza wanhu awa kuza kuihalila isi iwele Mkulu Nguluwi yawelahile wasekulu wa hewo, nagwe kuwapa waihalile.
DEU 31:8 Mkulu Nguluwi ndo yalingukulongoza, heye kowa hamwe na hegwe, heye hokuleka ng'oo. Ahyo, uleche kudumba ne kisinza.”
DEU 31:9 Lelo Musa nakandika malajizo, nakawapa watambika wa lukolo lwa Lawi nawawele na ludali lwa kulipika isanduku lya ilagano lya Mkulu Nguluwi, na wasekulu weng'ha wa Isilaeli.
DEU 31:10 Hamba Musa nakawalajiza, nakalonga, “Chila mwaka wa saba wowa mhela wa kuwalechela walingudaiwa, mhela wa mnvina ya vibumuli, mwaka awo,
DEU 31:11 mhela wanhu wa Isilaeli howokuya hali Mkulu Nguluwi honhu hala hoyohagula, mowasomela wanhu weng'ha wa Isilaeli malajizo aga.
DEU 31:12 Wakungajize wanhu, walume na wadala na wana na wajenzi walingikala kuli miji ja hemwe, leka chila yumwe yahuliche ulonzi awu wa kilangusa kumdumba Mkulu Nguluwi, Nguluwi wa hemwe, na wawe welolela na kuwinza ulonzi wa malajizo aga.
DEU 31:13 Nawo walelwa wawele hawanahulika malajizo ga Mkulu Nguluwi, Nguluwi wa hemwe, wagahuliche na kilangusa kumdumba Mkulu Nguluwi, Nguluwi wa hemwe, mhela weng'ha homuchikala kuli isi muwele nguluta kuihalila kumwambu mwa lwanda lwa Yolodani.”
DEU 31:14 Lelo Mkulu Nguluwi nakamlonjela Musa, “Zuwa lya hegwe lya kubagama lya habehi. Umcheme Yoshua, muye hamwe kuli ihema lya Nguluwi leka ndimhe malajizo.” Lelo Musa na Yoshua nawaluta kuli ihema lya Nguluwi,
DEU 31:15 na heye Mkulu Nguluwi nakawalawila amo kuli izengo lya ng'hungugu ndo liwele nalimile kuli lwizi lwa ihema.
DEU 31:16 Mkulu Nguluwi nakamlonjela Musa, “Hegwe kwa habehi kilumba na wasekulu wa hegwe. Hamba louwa ubagame, wanhu wokwaluka kundeka na kujilutila jimalukolo jinji kota wang'hondwa ndo kowoluta kuza kikala. Wondeka na kubena ilagano lyonditile na hewo.
DEU 31:17 Ahyo ndo vyondiwazudila ng'hatu zuwa alyo, nani ndowaleka na ndodinya meho ga heni nawo wodumigwa. Wihe winji na magazo gowa ga hewo mbaka wavizele kuwa wihe awo uwafika kwa vila heni, Nguluwi wa hewo, siwele hamwe na hewo.
DEU 31:18 Ndangukomya ndodinya meho ga heni kwa vila nawadita wihe na kujihinduchila milungu jinji.
DEU 31:19 “Sambi, wandiche lwimbo alu, uwalanguse wanhu wa Isilaeli leka uwe ulolezi wa heni hali hewo.
DEU 31:20 Vyondiwahilika kuli isi iwele na mboto, kota vyondiwelahile wasekulu wa hewo, na hewo howolya na kiguta na kuneneha, wojihinduchila milungu jinji na kujikolela mijito, wombeza na kubena ilagano lya heni.
DEU 31:21 Vyowofichigwa na wihe na magazo, lwimbo alu lowa kota ulolezi kwa vila halusemwigwa na walelwa wa hewo. Na mbaka sambi, nding'hali kuwahilika kuli isi yondilahile ndowapa, ndivizela geng'ha gowalingijesa.”
DEU 31:22 Lelo Musa nakandika lwimbo alo zuwa lilyo, nakawalangusa Waisilaeli.
DEU 31:23 Hamba Mkulu Nguluwi nakamlajiza Yoshua, mwana wa Nuni, nakamlonjela, “Mwime nzinzili na kusindamala, mina kowalongoza Waisilaeli kuli isi ndiwelahile ndowapa, nani ndowa hamwe na hegwe.”
DEU 31:24 Musa vyoyasindile kwandika ulonzi wa malajizo ago kwaluchila mwaluko mbaka kuduma,
DEU 31:25 nakawalonjela Walawi, wawele nguganigwa kulipika alyo isanduku lya ilagano lya Mkulu Nguluwi,
DEU 31:26 “Muhole chitabu achi cha malajizo, mchiwiche habehi na isanduku lya ilagano lya Mkulu Nguluwi, Nguluwi wa hemwe, leka chiwe cha ulolezi hali hemwe.
DEU 31:27 Mina ndivizela vyomli ngubelenhuka na ujuvi wa hemwe. Navyomumbelenhuche Mkulu Nguluwi mhela vyonandali mkomu hamwe na hemwe, ndaze haiwa mzidi hondibagama heni?
DEU 31:28 Wakungajize hali heni wasekulu weng'ha wa nhanzi ya hemwe na vilongozi wa hemwe, leka ndonje ulonzi awu na wauhuliche, na awo ulanga na isi viwe ulolezi hali hewo.
DEU 31:29 Mina ndivizela vyoiwa kubagama kwa heni, ndangukomya mowa mwajilile na kuileka yila nzila yondiwalonjele muiwinze. Na kuli zuwa liyage mofichigwa na magazo kwa vila namdita wihe hali Mkulu Nguluwi na kumdita yazudile kwa madito ga hemwe.”
DEU 31:30 Hamba Musa nakalonga ulonzi wa lwimbo lweng'ha alo hali nhing'hano ya Waisilaeli weng'ha.
DEU 32:1 “Uwiche goya makutu, gwa ulanga, nani ndolonga, hegwe isi uhulichize ulonzi wondilingulonga.
DEU 32:2 Malanguso ga heni nagalagale kota nhonya, ulonzi wa heni ulagale kota nhungwi, na kota upesi wa nhonya kuli mizuchila mido, kota upesi wa nhonya kuli misolo midodi.
DEU 32:3 Mina ndolidamla itagwa lya Mkulu Nguluwi, namwe mlonje, ‘Nguluwi wa hetwe ka Mkulu!’
DEU 32:4 “Mkulu Nguluwi ndo Italawe lya kwamila, mijito ja heye jenela, nzila za heye zeng'ha ndo za hachi. Heye ndo Nguluwi wa kitumbila yalihela nongwa, heye kangudita mbuli za kukomya na za hachi.
DEU 32:5 Ila hemwe mwahela utumbilo kwa heye, hemwe hamuwele wana wa heye kahi kwa chiwalo cha soni, hemwe ndo lulelo lwihile na lwajilile.
DEU 32:6 Mwangujeza ndaze kumditila ahyo Mkulu Nguluwi, hemwe wanhu wapoka na msowile nyhala? Ndaze, heye hawele mhaza wa hemwe yawalumbile, yawaditile na kuwakangaza?
DEU 32:7 Mkumbuchile mazuwa gapulute, mijese miyaka ja katali, muwauze wahaza wa hemwe na hewo wowazelesa, muwauze wakulu wa hemwe na hewo wowalonjelani.
DEU 32:8 Nguluwi yawele kuchanya hoyazipele isi zeng'ha lufufu lwao, naloyawagawile wanhu weng'ha, chila isi nakaibasila mbaka, kwa kuwinza winji wa wana wa Isilaeli,
DEU 32:9 ila nakewichila wana wa Yakobo wawe wa heye, Mkulu Nguluwi, awo nakehagulila wawe wa heye.
DEU 32:10 “Nakawafika kuli isi igunuche, chiwala cheng'ha chiwele na mbeho. Nakawamila na kuwalolela, nakawadita kota iziho lya heye.
DEU 32:11 Kota ikungule vyolilingulolela chimvulila chake, na kugulukaguluka mchanya mwa mibofu jake, yogolosa mbawa zake leka kuwebatilila, na kuwapapa mchanya mwa mbawa zake.
DEU 32:12 Heye yuye Mkulu Nguluwi nakawalongoza na hakuwele na mlungu yunji wa kumtanza.
DEU 32:13 Nakamkwiniza hali honhu ha isi henuche, na heye nakalya mbena ya mgunda. Nakawapa hanombwa nailawile kuli italawe na mafuta galawile kuli italawe ikavu.
DEU 32:14 Nakawapa mtindi na matombo ga migongolo na mafuta ga ming'holo myana, na ming'holo milume ja Bashani na mhene. Nakawapa ngano inojile ng'hatu na divai inyale nawanwa.
DEU 32:15 “Lelo Waisilaeli nawaneneha na kutowa teche, nawaneneha na wawa na mida kusu na kudedemka, hamba nawamleka Nguluwi yawalumbile, nawabeza Italawe lya kwamila naliwele ndo ulohozi wa hewo.
DEU 32:16 Nawamdita yone fihi kwa milungu jawo, nawamdita yazudile kwa madito ga hewo ga kuzudiza.
DEU 32:17 Nawavilavila nhambiko vijeni, vyohaviwele Nguluwi, nawajilutila milungu johawajizelele ng'oo, milungu minyale jilawile mazuwa ga sambi baha, jiwele wasekulu wa hewo hawajikundile hebu.
DEU 32:18 Hawakumbuchile Italawe lya kwamila liwapele ukomu, namumsemwa Nguluwi yawapondile hemwe.
DEU 32:19 “Mkulu Nguluwi nakayona mbuli ayo nakawaleka, nakawalema wana wa heye, walume na wadala.
DEU 32:20 Nakalonga, ‘Ndovisa kumeho kwa heni, ndole kuduma kwa hewo wowa ndaze. Mina hewo ndo lulelo lwajilile, wana wohawawele wakitumbila ng'hatu.
DEU 32:21 Nawandita mbone fihi kwa chinhu chohachiwele nguluwi, wanzudiza kwa jimalukolo ja hewo. Ahyo ndowadita wone maya kwa chohachiwele wanhu, ndowazudiza kwa yila nhanzi ya wapoka.
DEU 32:22 Ng'halazi ya heni yokwaka kota chiluli, chowasoma mbaka isi ya wabagame, cholakaza isi na mbena, chosoma misisi ja vidunda.
DEU 32:23 “ ‘Ndowika magazo menji ng'hatu kwa chiwalo cha hewo, ndowakongozela misale ja heni.
DEU 32:24 Woganda kwa nzala, wodumigwa kwa kugula lukami kwa matamwa. Ndohilika migongolo jiwele na mizino jihongoche kuwaluma, na mizoka jiwele na dunga jilingutambala kuli nhimbwisi.
DEU 32:25 Ngondo yokwambuza kubagama kwinji kunze na haluga lunhwinhwi lolongoza, wasongolo na wahinza wokopoligwa na wala walingong'a na wasekulu wawele na mbuliza hawopona hebu.
DEU 32:26 Nandonga, “Nandawadumile ng'hatu na kuwadita mleche kukumbuchilwa kahi na munhu yoneche,”
DEU 32:27 ila kwa chiwalo cha kidaya kwa wang'honyo wa hewo, leka wang'honyo waleche kulonga, “Hetwe natuwasumya, na Mkulu Nguluwi nahaditile mbuli azi.” ’
DEU 32:28 “Isilaeli ndo isi isowile nyhala, wanhu wake wahela luhala mgati mwake.
DEU 32:29 Wone wahawele na luhala nawahavizelele lekachoni nawalemwela, nawahajezile kuvizela kuduma kwa hewo kowa ndaze.
DEU 32:30 Munhu yumwe koweza ndaze kuwadumya wanhu elufu imwe, ama wanhu weli woweza ndaze kuwadumya wanhu elufu kumi, ila wone Italawe lya kwamila hewo naliwataga, Mkulu Nguluwi wa hewo nakawaleka?
DEU 32:31 Na wang'honyo wa hetwe nawakunda hazelu, kota hewo wahela ludali kota Italawe lya hetwe lya kwamila.
DEU 32:32 Mina mizabibu ja hewo ndo mizuchila ja Sodoma jilawile kuli ibindi lya Gomola, zabibu zake ndo ziwele na dunga, zabibu zake zausungu.
DEU 32:33 Divai ya hewo ndo kota dunga ya mizoka, ina dunga yihile ya ngole.
DEU 32:34 “Ndaze ndahela nzila ya kuwagaza? Ndangubeteza mhela unojile wa kuwagaza hewo.
DEU 32:35 Kuhilula chibida ndo kwa chiwalo cha heni, heni ndolipiza, mhela magulu ga hewo hogotelela, mina zuwa lya hewo lya kubagama lyuya, kuduma kwa hewo kwa habehi ng'hatu.
DEU 32:36 Mkulu Nguluwi kowalewela wanhu wa heye na kuwonela isungu vitumagwa wa heye, mhela hoyokona ludali lwawo luduma na haduhu yaponile, yawele mchinweng'ho ama munhu yelejehe.
DEU 32:37 Aho ndo Mkulu Nguluwi hoyowauza wanhu wa heye, ‘Ja kohi jila milungu ja hemwe, Italawe lyomlibilimile kwa kwamilwa?’
DEU 32:38 Ja kohi ajo milungu ja hemwe jidile mafuta ga nhambiko, na kunwa divai na nhambiko za hemwe za chakunwa? Lelo najime, jiwatanzeni, jiwamile hemwe.
DEU 32:39 “ ‘Mlole kota heni nda Nguluwi na kuduhu yunji ila heni. Heni ndangukopola na kuwika ukomu, ndangulumiza na kuwika goya, na kuduhu yoweza kumlohola yoneche kuli moko ga heni.
DEU 32:40 Ndangugolola moko ga heni kilanga, na kilaha kwa ukomu wa heni wa mazuwa gose,
DEU 32:41 wone nole ipanga lyangu lilingupulika, na kugolola moko kulavya utaguso, ndowahilusila chibida wang'honyo wa heni, ndowagaza wala walingunzudila heni.
DEU 32:42 Misale ja heni ndojigaliza kwa danda, ipanga lyangu lyochiguta miwunde, lyododa danda ya walumizwe na wapogozi na wang'honyo wawele na mnvili zisoloche.’
DEU 32:43 “Hemwe isi msangalale na wanhu wa hemwe, mina heye nakahilulaga chibida kwa danda ya vitumagwa wa heye, kanguwaditila uhanyisi walingitwanza na heye na kuyeliza isi ya wanhu wa heye.”
DEU 32:44 Musa nakoya hamwe na Yoshua, mwana wa Nuni, nawadekuliza ulonzi wa lwimbo alu, leka Waisilaeli weng'ha wauhuliche.
DEU 32:45 Musa loyasindile kuwalonjela wanhu wa Isilaeli ulonzi awu weng'ha,
DEU 32:46 nakawalonjela, “Muuwiche mnhumbula za hemwe ulonzi weng'ha wondilinguwapani lehano, leka muwalajize wana wa hemwe wawinze goya ulonzi weng'ha wa malajizo aga.
DEU 32:47 Mina malajizo aga hagawele ulonzi hela, ila ndo ukomu wa hemwe, kwa malajizo aga, mochikala kwa miyaka minji kuli isi yomlinguluta kuihola, kumwambu mwa lwanda lwa Yolodani.”
DEU 32:48 Zuwa lilyo, Mkulu Nguluwi nakamlonjela Musa,
DEU 32:49 “Ukwine chidunda achi cha Abalimu, chidunda cha Nebo kuli isi ya Moabu, chilingilola na muji wa Yeliko, ukailole isi ya Kanaani yondilinguwapa Waisilaeli waihole.
DEU 32:50 Hamba kobagama kuko kuchidunda kota mkulugo Aluni navyoyabagame kuli chidunda cha Holi,
DEU 32:51 kwa vila weng'ha weli nambena kitumbila kwa hemwe kwa heni hali Waisilaeli nalomuwele kuli mazi ga Meliba, habehi na muji wa Kadeshi, kuli kuchiwala cha Sini, na mlemwela kunditila heni kota nda yelile hali Waisilaeli.
DEU 32:52 Koyona isi iwele kumwando kwa hegwe, ila haukwinjila kuli isi ayo yondilinguwapa Waisilaeli.”
DEU 33:1 Awu ndo utambichizo uwele Musa, munhu wa Nguluwi, nakawatambichiza Waisilaeli naloyang'hali kubagama.
DEU 33:2 Nakalonga, “Mkulu Nguluwi nakoya kulawila kuchidunda cha Sinai, nakatulawila kulawila kuli chidunda cha Seili, nakamwemwesa kulawila chidunda cha Palani. Nakalawila hali wahilisi elufu kumi na chiluli chilingwaka kuli moko wa heye wa kudilo.
DEU 33:3 Mkulu Nguluwi nakawagana wanhu wa heye, kanguwalolela welile wa heye weng'ha. Ahyo, wanhu wa heye nawafugama hali magulu ga heye na kupegwa malajizo kulawila kwa heye.
DEU 33:4 Musa nakatulajiza kibatilila malajizo, chinhu chitanganiche cha nhing'hano ya Yakobo.
DEU 33:5 Mkulu Nguluwi nakawa mndewa wa Isilaeli, mhela vilongozi navyoweting'hane na nhanzi zeng'ha za Isilaeli hozikungajize.”
DEU 33:6 Musa nakalonga kwa chiwalo cha nhanzi ya Lubeni, “Wanhu wa Lubeni wekale waleche kubagama, ila wanhu wa heye wawe wado.”
DEU 33:7 Kwa chiwalo cha nhanzi ya Yuda nakalonga, “Gwa Mkulu Nguluwi uhulichize chililo cha nhanzi ya Yuda, umuhiluse kahi kwa wanhu wa heye. Utowanile kwa moko gako kwa chiwalo cha heye, uitanze nhanzi ya Yuda kwa wang'honyo.”
DEU 33:8 Kwa chiwalo cha nhanzi ya Lawi, nakalonga, “Gwa Mkulu Nguluwi uipe nhanzi ya Lawi ulonzi wa hegwe wa Ulimu, ulonzi wa hegwe wa Sumimu kwa awo wouwaganilile, nawouwajezile ako Masa, na kitwanza na hewo kuli mazi ga Meliba.
DEU 33:9 Walawi nawawalechile wahaza wa hewo, na kusemwa ivyazi lya hewo, waleche kuwazela mbaka na wana wa hewo mina nawebatilila malajizo ga hegwe na kibatilila ilagano lya hegwe.
DEU 33:10 Nawawalanguse walelwa wa Yakobo mizilo ja hegwe, wawalanguse wanhu wa Isilaeli malajizo ga hegwe. Walawi na wafunyize ubani hali hegwe, nhambiko yeng'ha ya kulakazwa hali honhu ha kulavila nhambiko ha hegwe.
DEU 33:11 Hegwe Mkulu Nguluwi, utambichize ludali lwa hewo, kukunda mijito ja moko ga hewo, ubenele kutali ludali lwa wang'honyo wa hewo, ludali lwa walinguwazudila mbaka walemwele kwinuka kahi.”
DEU 33:12 Kwa chiwalo cha nhanzi ya Benjamini nakalonga, “Ayi ndo nhanzi yaiganile Mkulu Nguluwi, nayo yangikala habehi na heye. Heye kanguilolela nemisi yeng'ha na kikala hamwe na ayo nhanzi.”
DEU 33:13 Kwa chiwalo cha nhanzi ya Yusufu nakalonga, “Mkulu Nguluwi yaitambichize isi ya heye kwa nhungwi, na kwa mazi ga nzasa,
DEU 33:14 itambichizigwe kwa mafuza ganojile gapile kwa isanya, kwa mafuza ga chila mhela,
DEU 33:15 kwa mbena inojile ya vidunda vya katali na mbena imemile ya vidunda vya mazuwa gose.
DEU 33:16 Isi ya heye imeme geng'ha ganojile, itambichizwe kwa isungu lya Mkulu Nguluwi, yawele yolawila kuchisosolo chilingwaka. Utambichizo awu uwadulichile wanhu wa nhanzi ya Yusufu, nayawele mkulu hali wang'holoze.
DEU 33:17 Mong'ho wa heye ndo kota wa ibuguma lya mwaluko, mbalati zake ndo za ibogo ilume. Na mbalati azo zowanuga wanhu wa isi, zowanuga wanhu mbaka kuduma kwa isi. Mbalati azo ndo Efulaimu, kowa na wamizi awo maelufu kumi, na Manase, kwa maelufu.”
DEU 33:18 Kwa chiwalo cha nhanzi ya Sebuluni na nhanzi ya Isakali, nakalonga, “Wanhu wa Sebuluni, msangalale kuli majendo ga hemwe, na wanhu wa Isakali, msangalale kuli mihema ja hemwe.
DEU 33:19 Wowachema wajenzi kuli vidunda vyao na ako wanhu wolavila nhambiko itanganiche. Mina hewo wopegwa lufufu lwa hewo kulawila kuli bahali na ng'hano za hewo kuli misanga ja kumwani.”
DEU 33:20 Kwa chiwalo cha nhanzi ya Gadi, nakalonga, “Yatogoligwe Nguluwi yalinguwapa wanhu wa Gadi honhu hakulu, wanhu wa Gadi wangibandabanda kota isimba likwanyule moko na unhosi wa mutwi.
DEU 33:21 Nawehagulila honhu ha mwaluko, kwa vila ako ndo kuwichigwe honhu ha chilongozi, nakoya hamwe na wakulu wa wanhu, nakaidita hachi ya Mkulu Nguluwi, na kutagusa kwa heye kwa Waisilaeli.”
DEU 33:22 Kwa chiwalo cha nhanzi ya Dani nakalonga ahi, “Wanhu wa Dani ndo kota mwana wa isimba, yalingudwaluka kulawila Bashani.”
DEU 33:23 Kwa chiwalo cha nhanzi ya Nafutali nakalonga, “Hemwe wanhu wa Nafutali womganililwe, mmemile utambichizo wa Mkulu Nguluwi, isi ya hemwe ndo kusini kuwele na ilamba.”
DEU 33:24 Kwa chiwalo cha nhanzi ya Asheli nakalonga, “Wanhu wa Asheli watambichizwe kusinda nhanzi zeng'ha za Isilaeli na waganililwe na wang'holoze weng'ha na wajele magulu ga hewo kuli mafuta ga mzeituni.
DEU 33:25 Miji ja hewo ndo lwizi lwa chuma na shaba. Kikala goya kwa hewo kochikala kwa ukomu wa hewo weng'ha.”
DEU 33:26 Musa nakagwisa chilasi kwa kulonga, “Gwa Isilaeli, kuduhu yawele kota Nguluwi wa hegwe, heye kangukola kilanga kuya kukutanza, kangukola kuchanya kilanga kuli ukulu wa heye.
DEU 33:27 Nguluwi wa mazuwa gose ndo hakubilimila kwa hegwe, kangukupapa kuli moko ga heye. Nakawawinga wang'honyo wa hegwe, nakakulajiza, ‘Uwadumye.’
DEU 33:28 Ahyo, wanhu wa Isilaeli nawekala goya, walelwa wa Yakobo waliyeka, kuli isi imemile nyhule na divai, isi iwele na ulanga ulingulagaza nhungwi.
DEU 33:29 Mbweda hemwe Waisilaeli. Yalikohi yawele kota hemwe, wanhu mloholigwe na Mkulu Nguluwi, yawele ndo ngwamo ya utanzi wa hemwe na ipanga lilinguwegalila kusumya! Wang'honyo wa hemwe wokuya wowadedeza hemwe, namwe mowabiga hanyi.”
DEU 34:1 Lelo Musa nakoka kuli ibindi lya Moabu, nakaluta kuchidunda cha Nebo, nakakwina kuli chinhembenhembe cha Pisiga chiwele chichilola na Yeliko. Aho, Mkulu Nguluwi, nakamlajila isi yeng'ha kulawila Gileadi mbaka Dani
DEU 34:2 na honhu heng'ha ha Nafutali na honhu ha Efulaimu na Manase na honhu heng'ha ha Yuda mbaka Bahali ya Mediteleniyani
DEU 34:3 na chiwala cha Negebu na honhu ha chiwala cha ibindi lya Yeliko, muji wa michikichi mbaka Soali.
DEU 34:4 Hamba Mkulu Nguluwi nakamlonjela Musa, “Ayi ndo isi yila yondimlahile Abulahamu na Isaka na Yakobo kota ndowapa walelwa wa hewo. Ndikulajila uyone kwa meho ga hegwe baho, ila hufika ako hebu.”
DEU 34:5 Lelo Musa chitumagwa wa Mkulu Nguluwi nakabagama ako kuli isi ya Moabu kota ulonzi wa Mkulu Nguluwi navyoulonjile.
DEU 34:6 Mkulu Nguluwi nakamtila kuli ibindi lya Moabu, halingilola na muji wa Beti-peoli ila mbaka lehano kuduhu munhu yavizelele nakoyatiligwe.
DEU 34:7 Musa nayali na miyaka miya imwe na makumi meli naloyabagame, meho nagali makomu na lukuli lwake nalwali na mong'ho.
DEU 34:8 Wana wa Isilaeli nawalombocheza kubagama kwa Musa kwa mazuwa makumi gadatu kuli ibindi lya Moabu. Kulawa aho zuwa lya kikala aho hali matanga na kulombocheza nakumala.
DEU 34:9 Yoshua mwana wa Nuni nakamema muhe wa luhala, kwa vila Musa nayali yamuwichile moko ga heye. Ahyo Waisilaeli nawamhulichiza Yoshua na kuwinza malajizo gawele Mkulu Nguluwi nagoyampele Musa.
DEU 34:10 Hanalawila kahi mloli kuli Isilaeli kota Musa nayawele Mkulu Nguluwi nayalongase hazelu.
DEU 34:11 Kuduhu mloli yunji nayawele yaditile ulajilo na vinduzanduza kota vila Mkulu Nguluwi navyoyamlajize Musa yadite hali Falao na wakulu wa heye na isi ya heye yeng'ha.
DEU 34:12 Kuduhu mloli yunji nayawele yaditile mbuli ng'hulu na za kudumbiza kota nazoyaditile Musa hali Waisilaeli weng'ha.
JOS 1:1 Loyabagame Musa, chitumagwa wa Mkulu Nguluwi, Mkulu Nguluwi nakamlonjela Yoshua, mwana wa Nuni, mtanzi wa Musa,
JOS 1:2 “Chitumagwa wa heni Musa nakabagama, lelo wiwiche goya na uloche lwanda lwa Yolodani, hegwe hamwe na Waisilaeli weng'ha mbaka kuwele na isi yila yondiwapa hemwe.
JOS 1:3 Chila honhu hombiga ndiwapa hemwe kota vyondimlahile Musa.
JOS 1:4 Mbaka ja isi ya hemwe jowa hino, kusini ndo chiwala, kasikazini ndo vidunda vya Lebanoni, kolilawilaga isanya ndo lwanda lula lukulu lwa Eyufulate, kukolela isi yeng'ha ya Wahiti mbaka bahali ya Mediteleniyani ubanzi wa kolizinjilaga isanya.
JOS 1:5 Yoshua, kuduhuli munhu yokusumya mazuwa geng'ha ga kikala kwa hegwe. Ndowa hamwe na hegwe kota vyombele hamwe na Musa. Ndowa hamwe na hegwe na sikuleka hebu.
JOS 1:6 Uwe wimile nzinzili na usindamale kwa vila hegwe kowalongoza wanhu awa kuihalila isi iwele nandiwalahile wasekulu wa hewo kota ndowapa.
JOS 1:7 Ila wilolele, uwe wimile nzinzili na usindamale na uwe ulolela na kibatilila malajizo geng'ha goyakulonjele chitumagwa wa heni Musa. Uleche kuhinduka kumoso ne kudilo, leka mbuli za hegwe ziditigwe goya honeche houluta.
JOS 1:8 Uleche kusemwa kulonga ulonzi wa chitabu achi cha malajizo, ila chila zuwa wilanguse mbuli za chitabu achi, nemisi na nechilo, leka ulolele kuli kudita geng'ha gandichigwe amu. Hamba mbuli za hegwe zeng'ha zoditigwa goya ng'hatu.
JOS 1:9 Ukumbuchile kota heni ndikulajiza uwe wimile nzinzili na usindamale. Uleche kudumba ne kuwa na masinzo kwa vila heni Mkulu Nguluwi, Nguluwi wa hegwe, nda hamwe na hegwe honeche houluta.”
JOS 1:10 Hamba Yoshua nakawalajiza vilongozi wa wanhu,
JOS 1:11 “Mkole kuli kambi na kuwalonjela wanhu ‘Mgongomanye chilyo, kwa vila holifika zuwa lya kadatu moloka lwanda lwa Yolodani, kuluta kuihola isi iwele Mkulu Nguluwi, Nguluwi wa hemwe kangukupani iwe ya hemwe.’ ”
JOS 1:12 Yoshua nakawalonjela wanhu wa nhanzi za Lubeni na Gadi na nusu ya nhanzi ya Manase,
JOS 1:13 “Mkumbuchile yila mbuli iwele Musa, chitumagwa wa Mkulu Nguluwi, nakawalajiza yolonga, ‘Mkulu Nguluwi, Nguluwi wa hemwe, kowapani honhu ha kwesela na kowapani isi ayi.’
JOS 1:14 Wache wa hemwe na wana wa hemwe na migongolo ja hemwe ja kudimigwa josigala kuli isi ayo iwele Musa nakawapani, kolilawilaga isanya mwa lwanda lwa Yolodani. Ila walume weng'ha wazidahe wawichigwe goya kitowa ngondo, woloka lwanda na kuwalongola wang'holozenu, wawele ndo nhanzi zinji za Isilaeli.
JOS 1:15 Mowatanza mbaka Mkulu Nguluwi hoyowapa wang'holozenu kahi honhu ha kwesela, kota vyoyawapele hemwe, nawo waihole isi iwele yowalingupegwa na Mkulu Nguluwi, Nguluwi wa hemwe. Hamba mohiluka kuli isi iwele ya hemwe na kikala, isi iwele nampeligwe na Musa, chitumagwa wa Mkulu Nguluwi, kolilawilaga isanya mwa lwanda lwa Yolodani.”
JOS 1:16 Nawamlonjela Yoshua, “Mbuli zeng'ha zoutulonjele tozikola na honeche houtulonjela tulute, toluta.
JOS 1:17 Kota vila vyotumhulichize Musa kuli mbuli zeng'ha, ndo vyotukuhulichiza hegwe. Ila Mkulu Nguluwi, Nguluwi wa hegwe yawe hamwe na hegwe kota vyoyawele hamwe na Musa.
JOS 1:18 Munhu yoneche yolibelenhuka ilajizo lya hegwe ama yolema kuhulichiza ulonzi wa hegwe ama mbuli yoneche youlingumlonjela, yakopoligwe. Ila hegwe, uwe wimile nzinzili na usindamale.”
JOS 2:1 Lelo Yoshua mwana wa Nuni, nakawalajiza wanhu weli kwa uviso kulawila Shitimu walute kupugajiza kuli isi ayo na kuli muji wa Yeliko. Nawaluta, nawafika kuli ng'handa ya mng'hondwa yumwe nayachemigwe Lahabu, nawekala amo.
JOS 2:2 Mndewa wa muji wa Yeliko nakalonjelwa, “Ulole, walume wa Waisilaeli nawenjila kuli muji lehano nechilo leka waipugajize isi.”
JOS 2:3 Mndewa wa Yeliko nakawalajiza wasenga kwa Lahabu, yolonga, “Walavye walume woyile kaye kwa hegwe kwa vila nawoya kuipugajiza isi yeng'ha.”
JOS 2:4 Ila, yula mdala nayali mina yawavisile wala walume. Lelo nakawalonjela wasenga awo, “Ndangukomya kota awo walume nawoya kwa heni, ila heni sivizelele kota nawalawila kohi.
JOS 2:5 Mhela wa kuhinda lwizi lwa muji louwele habehi kufika, jiza vyoyinjile, awo walume nawoka. Kula kowalutile heni sivizelele, muwawinze himahima hanji hemwe mowona.”
JOS 2:6 Ila Lahabu nayali yawakwinize kuchinduwiko awo wapugajizi na kuwavisa kwa mibeleje ja kitani yajiwichile ako kuchinduwiko leka yajikaze.
JOS 2:7 Lelo wala wanhu wowalajizwe na mndewa nawawapala mbaka kuli honhu ha kulochela kuli lwanda lwa Yolodani. Vyowochile kuli muji, lwizi lwa muji naluhindigwa.
JOS 2:8 Lahabu nakawalutila awo wapugajizi kuchanya kuchinduwiko wang'hali kuwasa,
JOS 2:9 nakawalonjela, “Heni ndivizela kota Mkulu Nguluwi kakupani isi ayi. Twangudumba kwa chiwalo cha hemwe na wanhu weng'ha wa isi ayi nawatweguka ng'hatu kwa chiwalo cha hemwe.
JOS 2:10 Mina natuhulika hila Mkulu Nguluwi vyoyakazile mazi ga Bahali ya Shamu hali hemwe vyomlawile isi ya Misili na hila vyomuwaditile wandewa weli wa Waamoli, wawele ndo Sihoni na Ogu na wanhu wa hewo weng'ha wawele kumwambu mwa lwanda lwa Yolodani, wawele namuwadumya ng'hatu.
JOS 2:11 Vyotuhuliche mbuli ayo, natutweguka ng'hatu kwa chiwalo cha hemwe, natwali hela mong'ho ne hado. Mkulu Nguluwi, Nguluwi wa hemwe, ndo Nguluwi kuchanya kilanga na muisi.
JOS 2:12 Ahyo lelo, ndangulanda milahe kwa itagwa lya Mkulu Nguluwi kota vyondiwaditile ganojile hemwe, namwe monditila ganojile heni na ivyazi lya heni. Mumhe heni ulajilo wa kukundigwa
JOS 2:13 kota moleka kuwakopola mhaza wa heni na maiwangu na wakalumbu wa heni na walumbu zangu na ivyazi lya hewo lyeng'ha na kutulohola kuli kubagama.”
JOS 2:14 Wala wapugajizi nawamlonjela, “Ukomu wa hemwe ndo ukomu wa hetwe! Wone haulonga uviso wa hetwe, Mkulu Nguluwi hoyotupa isi ayi, tokuditila ganojile na kukundigwa.”
JOS 2:15 Lelo Lahabu nakawadulisa awo wapugajizi kwa ng'weso kukolela mitubuli, kwa vila ng'handa ya heye nayali izenjigwe hagati ha ng'hanzi za muji wa Yeliko.
JOS 2:16 Nakawalonjela, “Mlute kuli isi ya vidunda leka walinguwawinza waleche kuwafikani. Mikale ako kwa mhela wa mazuwa gadatu, mbaka walinguwawinza wahiluche kuli muji, hamba muche, mlute.”
JOS 2:17 Awo wanhu nawamlonjela, “Hetwe todita chilaho cha hegwe choutulandile hetwe kilaha
JOS 2:18 wone vyotukuya kuli isi ayi, kowoha ng'weso ayi ndung'hu kuli itubuli lyoutudulisile. Uwakungajize hano ha hegwe mhaza wa hegwe na maiwako na kalumbu wa hegwe na ivyazi lyeng'ha lya mhaza wa hegwe.
JOS 2:19 Ila munhu yoneche wone yawe kunze mwa ng'handa ya hegwe, towa tulihela nongwa ya kubagama kwa heye. Ila wone munhu yoneche yowa mgati mwa ng'handa ya hegwe, wone yadolizwe hela, lelo nongwa ya kubagama kwa heye yowa ya hetwe.
JOS 2:20 Ila wone umlonjele munhu yoneche kuwala mbuli ayi ya hetwe, lelo hetwe hatuchibatigwa hebu na chilaho chotukulahile.”
JOS 2:21 Naye nakawalonjela “Iwe kota vyomlonjile.” Hamba nakawakundiza walute, nawo nawaluta. Naye nakawoha yila ng'weso ndung'hu mitubuli.
JOS 2:22 Wapugajizi awo nawoka nawaluta kuchidunda. Nawekala ako kwa mhela wa mazuwa gadatu mbaka wala walinguwawinza vyowahiluche kuli mji wa Yeliko. Vyowawele wowapala nahawawawene hebu.
JOS 2:23 Lelo awo wapugajizi weli nawedulika kulawa kuli isi ya vidunda, nawaloka lwanda na kumlutila Yoshua mwana wa Nuni, nawamlonjela geng'ha gawafichile.
JOS 2:24 Nawamlonjela Yoshua, “Mkulu Nguluwi kaiwika isi yeng'ha mmoko mwa hetwe. Kahi wenyeng'haye wa isi ayo nawatweguka kwa chiwalo cha hetwe.”
JOS 3:1 Kung'hali lufuku Yoshua hamwe na wanhu weng'ha wa Isilaeli nawaluka majendo kulawa Shitimu. Lowalufichile lwanda lwa Yolodani, nawawika kambi aho lowawele wang'hali kuloka.
JOS 3:2 Lolifichile zuwa lya kadatu, vilongozi nawakola hagati ha kambi ayo,
JOS 3:3 nawawalajiza wanhu, “Homlyona isanduku lya ilagano lya Mkulu Nguluwi, Nguluwi wa hemwe, lipapigwa na watambika Walawi, mokuka honhu ha hemwe na kuliwinza,
JOS 3:4 leka mvizele nzila ya kukola kwa vila hamkolile aku aho hamwande. Ila mleche kuwa habehi na isanduku lya ilagano, muwe utali wa kota kilomita imwe hino.”
JOS 3:5 Yoshua nakawalonjela wanhu, “Miyelize kwa vila mitondo Mkulu Nguluwi kodita vinduzanduza hali hemwe.”
JOS 3:6 Hamba Yoshua nakawalonjela watambika, “Mhole isanduku lya ilagano, mlongole nalyo hali wanhu.” Nawo nawalihola na kulongola hali wanhu.
JOS 3:7 Mkulu Nguluwi nakamlonjela Yoshua, “Lehano ndokwaluka kukwinula uwe chilongozi hali wanhu weng'ha wa Isilaeli leka wavizele kota vila vyondiwele hamwe na Musa, ndo vyondiwa hamwe na hegwe.
JOS 3:8 Walajize awo watambika walingulipika isanduku lya ilagano kota howofika habehi na hafungo mwa lwanda lwa Yolodani, wenjile mlwanda na weme hali mazi.”
JOS 3:9 Hamba Yoshua nakawalonjela Waisilaeli, “Muye habehi leka mhuliche ulonzi woyalonjile Mkulu Nguluwi, Nguluwi wa hemwe.”
JOS 3:10 Yoshua nakalutilila kulonga, “Lelo kwa mbuli ayi movizela kota Nguluwi yawele mkomu ka hali hemwe na kowawinga hali hemwe wanhu walingikala ubanzi uyage wa lwanda lwa Yolodani, wawele ndo Wakanaani na Wahiti na Wahivi na Wapelisi na Wagiligashi na Waamoli na Wayebusi.
JOS 3:11 Mlole isanduku lya ilagano lya Mkulu wa isi yeng'ha, lya habehi kukola hali hemwe kuluta kuli lwanda lwa Yolodani.
JOS 3:12 Lelo mhagule walume kumi na weli kulawa kuli nhanzi za Isilaeli, chila nhanzi munhu yumwe.
JOS 3:13 Mhela wa magulu ga watambika walingulipika isanduku lya ilagano lya Mkulu Nguluwi, Mkulu wa isi yeng'ha, logokwinjila mli mazi ga lwanda lwa Yolodani, mazi ga lwanda alo goleka kuchililika. Gala gawele gowa gochililika kulawila ubanzi wa kuchanya gochikungajiza hamwe.”
JOS 3:14 Lelo wanhu nawoka howekale na kuluta kuloka lwanda lwa Yolodani, watambika nawali wapichile isanduku lya ilagano wowalongola wanhu.
JOS 3:15 Lwanda lwa Yolodani lwangumema mhela wa mbena. Baho du wala wapichile isanduku lya ilagano lowafichile Yolodani na magulu ga hewo vyogabijile mazi hafungo ha lwanda alo,
JOS 3:16 mazi gawele gochililika kulawila ubanzi wa kuchanya nagema na kilunda mbaka ako Adamu, chijiji chiwele habehi na muji wa Saletani. Ahyo mazi ago nagali gochidulika kuluta bahali ya Alaba, izeleche kota Bahali ya Mwino, nagema ng'hatu. Wanhu nawaloka kumwando kwa Yeliko.
JOS 3:17 Mhela Waisilaeli vyowawele woloka honhu hawele mazi nagakola, watambika wapichile isanduku lya ilagano lya Mkulu Nguluwi, nawema hagati ha lwanda Yolodani mbaka wanhu weng'ha nawaloka.
JOS 4:1 Wanhu weng'ha vyowalochile lwanda lwa Yolodani, Mkulu Nguluwi nakamlonjela Yoshua,
JOS 4:2 “Mhagule walume kumi na weli hali awo Waisilaeli, munhu yumwe kulawa chila nhanzi.
JOS 4:3 Muwalajize hino, ‘Mhole maganga kumi na meli kulawa aho hagati ha lwanda lwa Yolodani, hogali magulu ga watambika, hamba mpiche maganga ago, mkagawiche honhu hala homuwasa lehano.’ ”
JOS 4:4 Yoshua nakawachema awo walume kumi na weli hali Waisilaeli yawawichile kuli mijito, chila nhanzi munhu yumwe.
JOS 4:5 Yoshua nakawalonjela, “Mlilongole isanduku lya ilagano lya Mkulu Nguluwi, Nguluwi wa hemwe, mbaka kuli lwanda lwa Yolodani. Chila yumwe wa hemwe yahole iganga miyega mwa heye, iganga limwe kwa chiwalo cha chila nhanzi ya Isilaeli.
JOS 4:6 Mbuli ayo yowa ulajilo hali hemwe. Wana wa hemwe howowauzani zuwa lilinguya, ‘Ndaze maganga ago gana mana yachi kwa hemwe?’
JOS 4:7 Hemwe mowalonjela kota isanduku lya ilagano lya Mkulu Nguluwi vyolikolezwe kuli lwanda lwa Yolodani, mazi ga lwanda alo nagalemezwa galeche kuchililika! Ahyo, maganga ago gowa chikumbuchilo kwa Waisilaeli mazuwa gose.”
JOS 4:8 Wala walume nawadita kota vyowalajizwe na Yoshua, nawahola maganga kumi na meli kulawa hagati ha lwanda lwa Yolodani, iganga limwe kwa chiwalo cha chila nhanzi ya Isilaeli, kota Mkulu Nguluwi vyoyamlajize Yoshua, nawaluta nago mbaka honhu hala howawasile, wagawika aho.
JOS 4:9 Yoshua nakemiza kahi maganga kumi na meli hagati ha lwanda lwa Yolodani, honhu hala hawele magulu ga watambika wala wapichile lila isanduku lya ilagano hogemile. Maganga ago ga kuko mbaka lehano.
JOS 4:10 Wala watambika wapichile isanduku lya ilagano, nawema hagati ha lwanda lwa Yolodani mbaka wanhu vyowagomanjize kudita chila chinhu chiwele Mkulu Nguluwi choyamlajize Yoshua yawalonjele wanhu. Yoshua nakadita geng'ha gawele Musa nayali yamlajize. Wanhu nawadita himahima kuloka.
JOS 4:11 Wanhu weng'ha vyowalochile, wala watambika nawakola hali wanhu na lila isanduku lya ilagano lya Mkulu Nguluwi.
JOS 4:12 Walume wa nhanzi ya Lubeni na ya Gadi na nusu ya nhanzi ya Manase wawele wawichigwe goya kitowa ngondo, nawali wa mwaluko kuloka lwanda hali Waisilaeli, kota vila vyowalajizwe na Musa.
JOS 4:13 Walume awo kota elufu makumi gane, wawele wewichile goya kitowa ngondo, nawakola hali Mkulu Nguluwi woluta kuli ibalalika lya muji wa Yeliko.
JOS 4:14 Kuli zuwa alyo Mkulu Nguluwi nakamlajila Yoshua kota ndo chilongozi hali Waisilaeli weng'ha, nawo nawamhulichiza Yoshua kuli kikala kwa heye kweng'ha kota vyowamhulichize Musa kuli ukomu wa heye weng'ha.
JOS 4:15 Hamba Mkulu Nguluwi nakamlonjela Yoshua,
JOS 4:16 “Walajize watambika walingulipika isanduku lya ilagano, walawe kuli lwanda lwa Yolodani.”
JOS 4:17 Lelo Yoshua nakawalonjela wala watambika, “Mlawe kuli lwanda lwa Yolodani.”
JOS 4:18 Awo watambika nawali wapichile lila isanduku lya ilagano lya Mkulu Nguluwi vyowalawile hagati ha lwanda lwa Yolodani na kubiga hafungo mwa lwanda, mazi ga lwanda lwa Yolodani nagaluka kuchililika kahi na kumema kota hamwande.
JOS 4:19 Waisilaeli nawaloka lwanda lwa Yolodani kuli zuwa lya kumi lya mwezi wa mwaluko, nawawika kambi ako Giligali, kolilawilaga isanya mwa Yeliko.
JOS 4:20 Yoshua nakagemiza gala maganga kumi na meli gowaholile kulawa kuli lwanda lwa Yolodani, ako Giligali.
JOS 4:21 Hamba Yoshua nakawalonjela Waisilaeli, “Wana wa hemwe howowauzani zuwa lilinguya, ‘Ndaze, maganga aga gana mana yachi?’
JOS 4:22 Mowalonjela hino, ‘Waisilaeli nawaloka lwanda alu lwa Yolodani honhu hakalile.’
JOS 4:23 Kwa vila Mkulu Nguluwi, Nguluwi wa hetwe, nakagakaza mazi ga lwanda lwa Yolodani kwa chiwalo cha hetwe mbaka tuloka, kota vyoyawaditile wanhu wa hetwe kuli Bahali ya Shamu,
JOS 4:24 lelo wanhu weng'ha wa isi zeng'ha wavizele kota moko wa Mkulu Nguluwi una mong'ho, namwe mumdumbe Mkulu Nguluwi, Nguluwi wa hemwe, mazuwa gose.”
JOS 5:1 Wandewa weng'ha wa Amoli wawele wochikala hafungo mwa kolizinjilaga isanya mwa Yolodani na wandewa weng'ha wa Wakanaani wawele habehi na bahali ya Mediteleniyani, lowahuliche kota Mkulu Nguluwi nakakaza mazi ga lwanda lwa Yolodani kwa chiwalo cha Waisilaeli mbaka howalochile, nawatweguka, nawali walihela nhumbula zikangale ne hado kwa kitowa na Waisilaeli.
JOS 5:2 Mhela awo, Mkulu Nguluwi nakamlonjela Yoshua, “Ugongomanye vilimbo vya maganga leka waluche kahi chihendo cha kuwenjiza ikumbi Waisilaeli.”
JOS 5:3 Lelo Yoshua nakagongomanya vilimbo avyo vya maganga na kuwenjiza ikumbi Waisilaeli ako Gibeati-haalaloti.
JOS 5:4 Chiwalo cha Yoshua kuwenjiza ikumbi Waisilaeli ndo achi, Waisilaeli weng'ha walume walawile Misili wawele wawezile kuluta kuli kitowa ngondo, weng'ha nawabagama kuli majendo kuchiwala lowalawile Misili.
JOS 5:5 Awo weng'ha walawile Misili nawali wenjile ikumbi, ila wala weng'ha wapondigwe mmajendo ako kuchiwala woyile kulawa Misili, nawali wang'hali kwinjila ikumbi.
JOS 5:6 Waisilaeli nawaluka majendo kwa mhela wa miyaka makumi gane kuchiwala na walume weng'ha wawele wawezile kuluta kuli kitowa ngondo, nawabagama kwa vila hawachihulichize choyalonjile Mkulu Nguluwi. Mkulu Nguluwi nayali yawalahile wanhu awo kota hawoyona isi ayo iwele na mboto nakawalahila wasekulu wa hewo kota kowapa lulelo lwa hewo.
JOS 5:7 Ahyo, nawali wana wa wanhu awo wawele Mkulu Nguluwi nayali yowalolela wakule honhu ha hewo, awo ndo Yoshua yawenjize ikumbi, kwa vila nawali hawenjile ikumbi mhela wula wonawali mmajendo kuchiwala.
JOS 5:8 Walume wa nhanzi zeng'ha lowenjile ikumbi, wanhu weng'ha nawekala hali honhu ha hewo ako kuli kambi mbaka vyowaponile.
JOS 5:9 Hamba Mkulu Nguluwi nakamlonjela Yoshua, “Lehano ndiwoselani yila soni ya Misili.” Ahyo honhu aho hanguchemigwa Giligali mbaka lehano.
JOS 5:10 Waisilaeli vyowawele wawichile kambi ako Giligali, nawadita mnvina ya Pasaka matinazo kuli zuwa lya kumi na zine lya mwezi kuli ibalalika lya Yeliko.
JOS 5:11 Zuwa lila loimalile mnvina ya Pasaka, nawalya mibumunda johajiwichigwe usaso na nyhule zikalanjigwe kulawa kuli mbena za isi ayo.
JOS 5:12 Lelo kulawila zuwa alyo Waisilaeli hawadile mana kahi. Kwaluchila mhela awo Waisilaeli nawalya mbena za isi ya Kanaani.
JOS 5:13 Zuwa limwe Yoshua vyoyawele habehi na muji wa Yeliko, baho du nakamona munhu yumwe yemile kumwando kwa heye yawele na ipanga mmoko mwa heye. Yoshua nakamlutila, nakamuuza, “Ndaze, hegwe kwa myetu ama kwa mng'honyo wa hetwe?”
JOS 5:14 Heye nakamlonjela, “Hebu, heni nda chilongozi wa wamizi wa Mkulu Nguluwi, sambi mbuya.” Yoshua nakenamiza hasi na kumfugamila, hamba nakamuuza, “Mkulu wa heni, kwangugana heni chitumagwa wa hegwe ndite choni?”
JOS 5:15 Ayo chilongozi wa wamizi wa Mkulu Nguluwi nakamlonjela, “Uvule makwamba ga hegwe, mina honhu howimile ndo helile.” Yoshua nakadita ahyo.
JOS 6:1 Lwizi lwa kwinjilila kuli muji wa Yeliko nalwali luhindigwe nzinzili kuwalemeza Waisilaeli waleche kwinjila. Kuduhuli munhu yoweza kwinjila ne kulawa kuli muji awo.
JOS 6:2 Mkulu Nguluwi nakamlonjela Yoshua, “Ulole! Heni ndouwika mmoko wa hegwe muji wa Yeliko hamwe na mndewa wa heye na wamizi wake wawele na mong'ho.
JOS 6:3 Hegwe na wala wamizi weng'ha mouzunguluta awo muji mala imwe chila zuwa kwa mazuwa sita.
JOS 6:4 Watambika saba, chila yumwe yawele yaholile mhalamhanda ya heye ya mbalati ya ing'holo ilume, wolongola kumwando kwa isanduku lya ilagano. Kuli zuwa lya saba mouzunguluta muji awo mala saba, aku watambika wopemba mhalamhanda.
JOS 6:5 Vyowopemba mhalamhanda azo kwa kulandula lizi kwa kulutilila na baho du vyomhulika alyo lizi, wanhu weng'ha wotowa iyowe, alo lukanzi lwa muji logwa. Aho ndo wanhu wouvaba muji chila yumwe kulawa honhu hoyemile.”
JOS 6:6 Lelo Yoshua, mwana wa Nuni, nakawachema watambika, nakawalonjela, “Mlipiche isanduku lya ilagano lya Mkulu Nguluwi na watambika saba wahole mbalati saba za ming'holo milume, walongole kumwando kwa isanduku alyo.”
JOS 6:7 Yoshua nakawalonjela wanhu, “Mlute kumwando, muuzungulute muji na awo wanhu wawichigwe goya kitowa ngondo walute kumwando kwa isanduku lya ilagano lya Mkulu Nguluwi.”
JOS 6:8 Kwa ilajizo lya Yoshua, wala watambika saba wawele na mbalati saba za ming'holo milume hali Mkulu Nguluwi, nawaluta kumwando kuno wopemba mhalamhanda wowinzwa na lila isanduku lya ilagano lya Mkulu Nguluwi.
JOS 6:9 Wala wanhu wawichigwe goya kitowa ngondo nawawalongola wala watambika aku wopemba mhalamhanda, wamizi wanji wowinza kumbele kwa isanduku lya ilagano aku mhalamhanda zipembigwa kwa kulutilila.
JOS 6:10 Ila Yoshua nakawalonjela wanhu, “Mleche kutowa iyowe ama kulavya lizi ne ulonzi woneche uleche kulawila kuli mlomo wa hemwe, mbaka zuwa alyo hondiwalonjelani mtowe iyowe, mhela awo ndo vyomtowa iyowe.”
JOS 6:11 Lelo Yoshua nakawadita awo wanhu wauzungulute wula muji mala imwe wawele wapichile isanduku lya ilagano lya Mkulu Nguluwi na kuhiluka kuli kambi kuwasa nechilo.
JOS 6:12 Lufuku Yoshua nakalilimka, watambika nawalipika lila isanduku lya ilagano lya Mkulu Nguluwi.
JOS 6:13 Wala watambika saba wawele na mbalati saba za ming'holo milume nawajenda kumwando kwa isanduku lya ilagano aku wopemba mhalamhanda kwa kulutilila. Wanhu wawichigwe goya kitowa ngondo nawalilongola isanduku lya Mkulu Nguluwi na wamizi wanji kumbele kwa heye. Mhalamhanda nazilutilila kupembigwa.
JOS 6:14 Zuwa lya keli nawauzunguluta awo muji mala imwe na kuhiluka kahi kuli kambi ya hewo. Nawadita ahyo kwa mhela wa mazuwa sita.
JOS 6:15 Zuwa lya saba nawenuka kung'hali lufuku, nawauzunguluta muji awo mala saba kota hihila mwaluko. Nalyali zuwa lilyo hela ndo nawauzunguluta muji awo mala saba.
JOS 6:16 Loifichile mala ya saba, mhela watambika lowapembile mhalamhanda, Yoshua nakawalonjela wanhu, “Mtowe iyowe, kwa vila Mkulu Nguluwi mina nakawapa awo muji!
JOS 6:17 Muji awo wodumigwa ng'hatu na chila chinhu chiwele amo kwa vila uwichigwa chiuyeng'ha kwa Mkulu Nguluwi, ila Lahabu, yula mng'hondwa, ndo yopona hamwe na wala wawele mumo mgati mwa ng'handa ya heye kwa vila nakawavisa wapugajizi wa hetwe.
JOS 6:18 Ila mleche kuhola choneche chiwichigwe chiuyeng'ha leka chidumigwe. Wone mhole chinhu choneche chiwichigwe chiuyeng'ha mochigala nongwa na kudumigwa kwa kambi ya Waisilaeli.
JOS 6:19 Ila sendi zeng'ha na zahabu na visaye vya shaba na chuma ndo vyelile kwa Mkulu Nguluwi, ahyo vyowichigwa kuli ng'hano ya Mkulu Nguluwi.”
JOS 6:20 Lelo wanhu nawatowa iyowe aku mhalamhanda zipembigwa. Wanhu vyowahuliche lizi lya mhalamhanda nawatowa iyowe kwa kulandula lizi, na lukanzi lwa muji nalugwa, luu. Chila yumwe kulawila honhu hoyemile, nawauvaba baho du na kuuhola muji ula.
JOS 6:21 Hamba nawadumya chila chinhu kuli awo muji na kuwakopola kwa ipanga, walume na wadala na wana na wasekulu na misenga na ming'holo na midogowi.
JOS 6:22 Yoshua nakawalonjela awo wapugajizi weli waipugajize isi ayo, “Mlute kuli ng'handa ya ayo mng'hondwa, mkawegale yula mdala na wala weng'ha wawele wang'holoze kota vyomilahile.”
JOS 6:23 Lelo wala walume wapugajizi nawaluta, nawawegala Lahabu na mhaza wa heye na maiwake na wakalumbu wa heye na wanhu weng'ha wa ivyazi lya heye, nawawawika kunze kuli kambi ya Isilaeli.
JOS 6:24 Kulawila aho, nawaulakaza kwa chiluli muji wa Yeliko na chila chinhu chiwele amo, ila nawaleka sendi na zahabu na vinhu vya shaba na vya chuma, avyo naviwichigwa kwa chiwalo cha ng'hano ya ng'handa ya Mkulu Nguluwi.
JOS 6:25 Ila Lahabu hamwe na wanhu weng'ha wa ng'handa ya mhaza wa heye na weng'ha wawele wochikala na heye, nawaloholigwa na Yoshua. Lahabu kangulutilila kikala hali Waisilaeli mbaka lehano, kwa vila nakawavisa wapugajizi walajizwe na Yoshua kuluta kuupugajiza muji wa Yeliko.
JOS 6:26 Mhela awo Yoshua nakalonga chilaho achi hali wanhu yolonga, “Yoneche youzenga kahi muji wa Yeliko, yapanjilwe na Mkulu Nguluwi. Yoneche yokoneka yowika msisi wa muji awo, mlelwa wa heye wa mwaluko yabagame. Yoneche yozenga lwizi lwa muji awo, mwanage mzuwanda yabagame.”
JOS 6:27 Lelo Mkulu Nguluwi nayali hamwe na Yoshua na lutogo lwa heye nalwenela kuli isi yeng'ha.
JOS 7:1 Ila Waisilaeli hawawele na makundo kuli vila vinhu viwichigwe chiuyeng'ha kwa vila Akani nakahola vinhu vimwe viganigwe kudumigwa. Akani nayali mwana wa Kalimi, mwana wa Sabidi, mwana wa Sela, wa nhanzi ya Yuda. Ahyo, ng'halazi ya Mkulu Nguluwi naiwafika Waisilaeli.
JOS 7:2 Yoshua nakawalajiza wanhu kulawa Yeliko kuluta muji wa Ayi, uwele habehi na Beti-aveni, kolilawilaga isanya mwa Beteli na nakawalonjela, “Mlute mkaipugajize isi.” Nawo nawaluta na kuupugajiza muji wa Ayi.
JOS 7:3 Vyowahiluche, nawamlonjela Yoshua, “Kuduhuli chiwalo cha kuhilika wanhu weng'ha na kuwatunya kwa kuutowa muji wa Ayi, mina wanhu wake ndo wado hela. Wanhu elufu mbili ama elufu zidatu wohega.”
JOS 7:4 Lelo wanhu kota elufu zidatu hino nawaluta kuutowa muji wa Ayi, ila nawabilimiswa na wanhu wa muji awo.
JOS 7:5 Wanhu wa Ayi nawawakopola Waisilaeli makumi gadatu na sita na kuwawinga wayage kulawa kuli lwizi lwa muji mbaka kuli viduliko vya Shebalimu na kuwatowa hala lowaduliche. Waisilaeli nawatweguka ng'hatu.
JOS 7:6 Yoshua nakadega mivalo ja heye kwa chiwalo cha kulombocheza, heye hamwe na wasekulu wa Isilaeli. Nawetoza hanyi ha isanduku lya ilagano lya Mkulu Nguluwi mbaka matinazo na nawewika nhimbwisi kumutwi kwa hewo.
JOS 7:7 Yoshua nakalonga, “Tochona hetwe, gwa Mkulu Nguluwi! Lekachoni nautulosile lwanda lwa Yolodani leka utuwiche mmoko mwa Waamoli watudumye? Natwahakundile kupona kumwambu mwa lwanda lwa Yolodani!
JOS 7:8 Gwa Mkulu, ndonje choni kuno Waisilaeli nawawabilima wang'honyo wa hewo?
JOS 7:9 Lelo Wakanaani hamwe na wanhu wa hewo weng'ha wa isi ayi vyowohulika mbuli ayo, wotuzunguluta na kutudumya ng'hatu. Lelo kodita choni kwa chiwalo cha ung'hangala wa itagwa lya hegwe?”
JOS 7:10 Mkulu Nguluwi nakamlonjela Yoshua, “Wime! Lekachoni kwangitoza hanyi ahyo?
JOS 7:11 Waisilaeli nawadita gehile, mina waleka ilagano lya heni lyondiwalajize webatilile, nawahola vinhu vimwe viwichigwe chiuyeng'ha, wahiza na kuhada. Nawaviwika hamwe na vinhu vya hewo.
JOS 7:12 Ahyo, Waisilaeli hawoweza kuwatowa wang'honyo wa hewo, wanguwabilima wang'honyo wa hewo kwa vila nawedita wawo wawe chinhu cha chiuyeng'ha cha kudumizwa! Siwa hamwe na hewo kahi wone hamdumize vinhu viwele amo hali hemwe viwichigwe chiuyeng'ha.
JOS 7:13 Lelo winuche uwelize wanhu, walonjele kota weyelize kwa kiwika goya kwa zuwa lya mitondo. Mina heni Mkulu Nguluwi, Nguluwi wa Isilaeli, ndangulonga hino, ‘Hali hemwe hana vinhu vilavigwe vidumigwe. Hamuweza kuwasumya wang'honyo wa hemwe mbaka vinhu avyo vyusigwe hali hemwe.
JOS 7:14 Ahyo, mitondo kung'hali lufuku weng'ha mokuya kwa heni Mkulu Nguluwi, nhanzi kwa nhanzi. Nhanzi yondiihagula yoluta kumwando kwa lukolo mbaka lukolo. Lukolo lyondilihagula lyoluta kumwando ivyazi mbaka ivyazi. Na ivyazi lyondilihagula lyoluta kumwando kwa munhu yumwe yumwe.
JOS 7:15 Munhu yoneche yokoneka yawele na vinhu viwichigwe chiuyeng'ha, ayo munhu kolakazwa kwa chiluli, heye hamwe na vinhu vya heye, mina nakabena ilagano lya heni Mkulu Nguluwi, nakadita mbuli ya kubasa soni kuli Isilaeli.’ ”
JOS 7:16 Lelo Yoshua nakenuka kung'hali lufuku, nakawegala Waisilaeli weng'ha habehi, nhanzi kwa nhanzi, nhanzi ya Yuda naihaguligwa.
JOS 7:17 Nakazigala habehi ng'holo za Yuda, lukolo kwa lukolo, na lukolo lwa Sela naluhaguligwa. Nakegala habehi ivyazi lya Sela, ivyazi mbaka ivyazi, na ivyazi lya Sabidi naluhaguligwa.
JOS 7:18 Yoshua nakegala ivyazi lya Sabidi habehi, munhu kwa munhu. Akani mwana wa Kalimi, mwana wa Sabidi, mwana wa Sela wa nhanzi ya Yuda, nakahaguligwa.
JOS 7:19 Yoshua nakamlonjela Akani, “Mwana wa heni, umhe ukulu Mkulu Nguluwi, Nguluwi wa Isilaeli, umtogole. Undonjele gala gouditile, na uleche kuvisa.”
JOS 7:20 Akani nakamlonjela Yoshua, “Ndikomya ndita gehile hali Mkulu Nguluwi, Nguluwi wa Isilaeli, na hino ndo vyonditile.
JOS 7:21 Vyondiliwene ivalo limwe linojile kulawa Shinali hali vinhu viholigwe kuli ngondo na migwala miya mbili ja sendi na chihande cha zahabu chiwele na itunyo lya nusu kilo, nambona maya na kuvihola. Ndizitila hanyi mgati mwa ihema lya heni, sendi kahi za hanyi ha vinhu avyo.”
JOS 7:22 Lelo, Yoshua nakawalajiza wasenga, nawo nawabilima mbaka kuli ihema lya Akani. Vila vinhu navyali vivisigwe kuli ihema na sendi iwele hanyi hake.
JOS 7:23 Nawavihola kuli ihema na kuvihilika kwa Yoshua na wanhu weng'ha wa Isilaeli, nawo nawaviwika hasi hali Mkulu Nguluwi.
JOS 7:24 Yoshua hamwe na Waisilaeli weng'ha, nawamhola Akani, mwana wa Sela, hamwe na sendi na ivalo na zahabu na wanage weng'ha walume na wahinza wa heye na misenga ja heye na midogowi na ming'holo ja heye na ihema lya heye na chila chinhu choyawele nacho na kuwahilika kuli ibindi lya Akoli.
JOS 7:25 Yoshua nakamuuza Akani, “Lekachoni nakutugalila magazo? Mkulu Nguluwi kokugalila magazo gwegwe baho lehano.” Waisilaeli weng'ha nawamtowa Akani kwa maganga mbaka nakabagama. Hamba nawawatowa wanhu wa heye weng'ha kwa maganga mbaka nawabagama, nawawalakaza weng'ha kwa chiluli.
JOS 7:26 Hamba nawakungajiza maganga menji mchanya mwake, gabaho mbaka lehano. Aho ng'halazi ya Mkulu Nguluwi naihola. Honhu aho hanguchemigwa Ibindi lya Akoli mbaka lehano.
JOS 8:1 Mkulu Nguluwi nakamlonjela Yoshua, “Uleche kudumba na uleche kuwa na lunhwinhwi lwoneche, wahole wamizi wa hegwe weng'ha ulute kuli muji wa Ayi, kwa vila mndewa wa Ayi ndimuwika mmoko wa hegwe, hamwe na wanhu wa heye na muji wa heye na isi ya heye.
JOS 8:2 Mouditila muji wa Ayi hamwe na mndewa wa heye kota vila vyomuuditile muji wa Yeliko hamwe na mndewa wake, ila lufufu lwa hewo hamwe na migongolo ja hewo hela jomboka, vyowa ndo lufufu lwa hemwe. Mlute mkauvabe muji kulawa ubanzi wa kumbele.”
JOS 8:3 Lelo Yoshua nakoka, hamwe na wamizi weng'ha wa heye nawaluta Ayi. Nakawahagula wanhu wawele na mong'ho elufu makumi gadatu na kuwalajiza walongole mhela wa nechilo.
JOS 8:4 Nakawalonjela hino, “Hemwe mobeteza na kivisa kuli ubanzi wa kumbele wa muji. Mleche kuluta kutali na muji, ila muwe miwichile goya mhela weng'ha.
JOS 8:5 Heni hamwe na wanhu weng'ha wawele hamwe na heni, touhejelela muji. Vyowolawa kuya habehi na hetwe kota aho mwaluko, hetwe towabilima.
JOS 8:6 Na hewo wokuya kutuwinza mbaka wawe kutali na muji wa hewo, mina wovizela kota nawatuwinga kota vila vyowaditile aho mwaluko. Hetwe towaleka watuwinje.
JOS 8:7 Lelo hemwe molawila ako komlingivisa na kuuboka muji, mina Mkulu Nguluwi, Nguluwi wa hemwe, kouwika muji awo mmoko wa hemwe muuhole.
JOS 8:8 Homuuboka awo muji moulakaza kwa chiluli, kota vila Mkulu Nguluwi vyoyalajize. Ago ndo malajizo ga heni gomuwinza.”
JOS 8:9 Lelo Yoshua nakawalonjela wala wanhu elufu makumi gadatu walute honhu ha hewo ha kubeteza, nawo nawekala kolizinjilaga isanya mwa muji wa Ayi, hagati ha Ayi na Beteli. Ila Yoshua nakawasa nechilo ayo kuli kambi ya Waisilaeli.
JOS 8:10 Yoshua nakalilimka kung'hali lufuku, nakawakungajiza wanhu, hamba nakawalongoza kuluta kuli muji wa Ayi kumwando kwa wanhu awo yawele hamwe na wasekulu wa Isilaeli.
JOS 8:11 Wamizi weng'ha woyile na heye nawali habehi na muji na kuwika kambi kasikazini, kumwambu mwa ibindi lichilola na muji wa Ayi.
JOS 8:12 Aho nakawahola wanhu elufu zihano na kuwawika wabeteze na kivisa hagati ha muji wa Beteli na Ayi, kolizinjilaga isanya mwa muji wa Ayi.
JOS 8:13 Chilundo chikulu nachiwichigwa kasikazini mwa muji na wala wasigale nawawichigwa kolizinjilaga isanya mwa muji. Ila nechilo ayo, Yoshua nakawasa kuli ibindi.
JOS 8:14 Mndewa wa muji wa Ayi vyoyawene ahyo, nakadita himahima na kuluta na wanhu wa heye weng'ha walume kuli ibindi lilingulutila Alaba leka yawating'hanize Waisilaeli kuli ngondo. Ila nayali havizelele kota muji wa heye nawali na wanhu wowawele woubeteza ubanzi wa kumbele.
JOS 8:15 Hamba Yoshua hamwe na wanhu wa heye nawedita kota wangulemwela, nawaluka kubilima kuluta kuchiwala.
JOS 8:16 Wanhu weng'ha wowawele kuli muji wa Ayi, nawachemigwa wawawinze Waisilaeli, navyowawele womuwinza Yoshua nawoka na kuluta kutali na muji wa hewo.
JOS 8:17 Kuduhuli mlume yoneche yasigale kuli muji wa Beteli ama Ayi, nawaleka lwizi lwa muji mwanzi, weng'ha nawaluta kuwawinza Waisilaeli.
JOS 8:18 Hamba Mkulu Nguluwi nakamlonjela Yoshua, “Uhinduchize chimaje cha hegwe chikulu ako kuli muji wa Ayi mina ndouwika muji awo mmoko mwa hegwe.” Yoshua nakahinduchiza chimaje cha heye chikulu kuli muji wa Ayi.
JOS 8:19 Baho du Yoshua vyoyahinduchize igoha lya heye kula Ayi, chilundo chiwele chibeteza ubanzi uyage nachilawa himahima na kwinjila kuli muji na kuuhola muji. Nawaulakaza himahima kwa chiluli.
JOS 8:20 Wanhu wa Ayi vyowalolile kumbele, nawona iyosi lilawila kuli muji likwina mbaka kilanga. Hewo nawalihela ludali lwa kubilima ubanzi woneche, mina Waisilaeli nawawahinduchila awo, nawali wowawinza.
JOS 8:21 Yoshua na Waisilaeli weng'ha vyowawene lelo chilundo chochiwele chibeteza chihola muji wa Ayi na kota iyosi nalyali likwina kuchanya, nawawahinduchila na kwaluka kuwakopola wanhu wa Ayi.
JOS 8:22 Waisilaeli wasigale kuli muji nawalawa na wanhu wa Ayi nawali hagati ha Waisilaeli, nawo nawakopoligwa, haponile ne munhu yumwe.
JOS 8:23 Ila mndewa wa muji wa Ayi nakebatigwa yang'hali mkomu na kumigala kwa Yoshua.
JOS 8:24 Waisilaeli vyowasindile ng'hatu kuwakopola walume wa muji wa Ayi ako kuchiwala kowawele wowawinza, nawahiluka kuli muji wa Ayi na kuwakopola weng'ha wasigale amo.
JOS 8:25 Wanhu weng'ha wa Ayi, walume na wadala nawabagama zuwa alyo, nawali elufu kumi na mbili.
JOS 8:26 Yoshua haduliche moko wa heye wouwele ubatilile chimaje cha heye chikulu kuhinduchila muji wa Ayi mbaka vyowawakopole wanhu weng'ha wa muji awo.
JOS 8:27 Waisilaeli nawahola hela kuli muji migongolo na lufufu kota Mkulu Nguluwi navyoyamlajize Yoshua.
JOS 8:28 Lelo Yoshua nakaulakaza muji wa Ayi kwa chiluli na kuudita uwe chihame, muji awo upona kuli uchiwa mbaka lehano.
JOS 8:29 Hamba nakamniniza mndewa yumwe wa muji wa Ayi kuli igodi mbaka matinazo. Ila isanya vyolyaluche kuzinga, Yoshua nakawalonjela wose itufi alyo migodi na walitaje kuli lwizi lwa muji. Hamba nawalunda ilundo likulu lya maganga mchanya mwa itufi alyo, ilundo alyo lyakuko mbaka lehano.
JOS 8:30 Aho ndo Yoshua nakamzenjela Mkulu Nguluwi, Nguluwi wa Isilaeli, honhu ha kulavila nhambiko, kuli chidunda cha Ebali.
JOS 8:31 Kota Musa, chitumagwa wa Mkulu Nguluwi vyoyawalajize Waisilaeli, kota vyoyandichigwe kuli chitabu cha malajizo ga Musa, honhu ha kulavila nhambiko hazenjigwe kwa maganga gawele hagahongoligwe ne kudolizwa na chinhu choneche cha chuma. Mchanya mwa honhu ha kulavila nhambiko ayo nawamlavila Mkulu Nguluwi nhambiko za kulakazwa na nhambiko ya kikala goya.
JOS 8:32 Ako, hali wanhu weng'ha wa Isilaeli, Yoshua nakandika lyandiko lya malajizo ga Musa mchanya mwa maganga.
JOS 8:33 Waisilaeli weng'ha hamwe na vilongozi wa hewo na wasekulu na walingwamula na wajenzi weng'ha wawele hali hewo, nawema chila ubanzi wochilola na isanduku lya ilagano hali watambika Walawi wawele walipichile isanduku lya ilagano lya Mkulu Nguluwi. Nusu ya hewo nawema kumwando mwa chidunda cha Gelisimu na nusu iyage nawema kumwando mwa chidunda cha Ebali, kota vila Musa, chitumagwa wa Mkulu Nguluwi, vyoyalajize aho mwaluko kuwala kuwatambichiza Waisilaeli.
JOS 8:34 Hamba, Yoshua nakasoma kwa lizi malajizo hamwe na utambichizo na upanjilo kota vyoyandichigwe kuli chitabu cha malajizo.
JOS 8:35 Kuduhuli ulonzi ulajizwe na Musa, uwele Yoshua hausomile hali Waisilaeli weng'ha, wawele mumo wadala na wana na wajenzi wowekale na hewo.
JOS 9:1 Wandewa weng'ha nawali kolizinjilaga isanya mwa lwanda lwa Yolodani vyowahuliche mbuli za Waisilaeli, wala wandewa wawele kuli isi ya vidunda na kuli ibalalika na honhu heng'ha ha mhwani ha bahali ya Mediteleniyani kulutila Lebanoni, wandewa wa Wahiti na wa Waamoli na wa Wakanaani na wa Wapelisi na wa Wahivi na wa Wayebusi,
JOS 9:2 nawekungajiza hamwe kwa chiwalo cha mbuli imwe ya kitowa ngondo na Yoshua na Waisilaeli.
JOS 9:3 Ila wenyeng'haye wa Gibeoni vyowahuliche mbuli kuwala kwa Yoshua vyoyajiditile miji ja Yeliko na Ayi,
JOS 9:4 nawamula kudita usugu. Nawawika goya vilyo, nawakwiniza migunila jilalile mchanya mwa idogowi lya hewo, chihako cha igozi cha kuwichila divai chilalile na kuhonigwa,
JOS 9:5 nawavala makwamba na nguwo zilalile na vilyo vya hewo vyeng'ha navyali vikalile viwele na lungwi.
JOS 9:6 Lelo nawamlutila Yoshua kuli kambi ako Giligali, nawamlonjela heye na Waisilaeli, “Hetwe natulawa isi ya kutali, twangulanda mdite ilagano na hetwe.”
JOS 9:7 Ila Waisilaeli nawawalonjela awo Wahivi, “Toweza ndaze kudita ilagano na hemwe? Hanji hemwe mwangikala kuli muji uwele habehi na hetwe.”
JOS 9:8 Nawo nawamlonjela Yoshua, “Hetwe twa vitumagwa wa hegwe.” Naye Yoshua nakawauza, “Hemwe mwa whaani na mwangulawila kohi?”
JOS 9:9 Nawamlonjela, “Hetwe twa vitumagwa wa hegwe, kulawa isi ya kutali. Tuya kwa hegwe mina natuhulika lutogo lwa itagwa lya Mkulu Nguluwi, Nguluwi wa hemwe. Natuhulika mbuli ya lutogo lwa heye na geng'ha goyaditile kula kuli isi ya Misili.
JOS 9:10 Natuhulika geng'ha goyawaditile wandewa weli wa Waamoli na wanhu wa hewo, wawele ubanzi wa kolilawilaga isanya mwa lwanda lwa Yolodani, mndewa Sihoni wa Heshiboni na mndewa Ogu wa Bashani nayawele yochikala ako Ashitaloti.
JOS 9:11 Aho ndo wasekulu wa hetwe na wanhu weng'ha wa isi ya hetwe, nawatulonjela tuhole chilyo cha majendo, tuye tuting'hane na hemwe na kuwalonjela hemwe kota hetwe twa vitumagwa wa hemwe, twanguwalanda mdite ilagano na hetwe.
JOS 9:12 Ulole mibumunda ja hetwe najali jipwituche kulawa vyotuholile mhela wotuchile kulawa kwa hetwe, ila lelo jikala na kota lungwi.
JOS 9:13 Vihako avi vya kuwichila divai navyali vinyale hotwaluche majendo, ila lelo vitulika vibi. Mbaka nguwo na makwamba ga hetwe galala kwa vila twaluka majendo kulawa kutali ng'hatu.”
JOS 9:14 Ahyo, Waisilaeli nawahola vilyo vya hewo ne kumuuza Mkulu Nguluwi mbuli ayo.
JOS 9:15 Yoshua nakelaha na hewo kwa kikala goya, nakadita ilagano kota kowakundiza kikala. Vilongozi wa Waisilaeli weng'ha nawelaha kudita gowalonjile kuli ilagano.
JOS 9:16 Zuwa lya kadatu kulawa vyoyawichile ilagano kwa wanhu awo, Waisilaeli nawahulika kota wanhu awa nawali wochikala habehi na hewo.
JOS 9:17 Lelo Waisilaeli nawaluka majendo. Lolifichile zuwa lya kadatu nawafika kuli miji ja Wagibeoni. Miji ajo najali Gibeoni na Kefila na Beeloti na Kiliati-yealimu.
JOS 9:18 Ila Waisilaeli nahawawakopole, mina vilongozi wa wanhu wa Isilaeli nawali wawalahile kwa itagwa lya Mkulu Nguluwi, Nguluwi wa Isilaeli. Ahyo lelo, wanhu weng'ha nawawang'ung'utila vilongozi awo.
JOS 9:19 Ila vilongozi wa Isilaeli nawawalonjela, “Kwa vila natilaha kwa itagwa lya Mkulu Nguluwi, Nguluwi wa Isilaeli, lelo hatuweza kuwadoliza hewo.
JOS 9:20 Towaleka wekale leka tulemeze kugazika kwa chiwalo cha kilaha kotilahile.
JOS 9:21 Muwaleche wekale.” Lelo nawawatemela ngodi na kuwadehela mazi Waisilaeli. Hino ndo kota vilongozi wa Waisilaeli weng'ha vyowalajize.
JOS 9:22 Yoshua nakawachema Wagibeoni na kuwauza, “Lekachoni namtuhada kota namlawa kuli isi ya kutali kuno hemwe mwangikala hali hetwe?
JOS 9:23 Lelo hemwe nampanjilwa na wayenu wamwe, weng'ha mowa wapogozi wa kutema ngodi na kudeha mazi mazuwa gose kwa chiwalo cha ng'handa ya Nguluwi wa heni.”
JOS 9:24 Nawamwidichila Yoshua, “Natuhulika kota kwa kukomya Mkulu Nguluwi, Nguluwi wa hemwe, nakamlonjela chitumagwa wa heye Musa yawakopole wanhu weng'ha wa isi ayo na kuwapa hemwe isi ayo iwe ya hemwe. Ahyo natudumba kwa chiwalo cha kikala kwa hetwe na ndo mina natudita mbuli ayi.
JOS 9:25 Lelo hetwe twa mmoko wa hegwe, utuditile kota vyoulingona ya goya.”
JOS 9:26 Lelo choyawaditile ndo kuwalohola hewo kulawa mmoko mwa Waisilaeli leka waleche kudumigwa, ahyo hawawakopole.
JOS 9:27 Ila kulawa zuwa alyo, Yoshua nakawadita awo wawe watema ngodi na wadeha mazi mbaka lehano kwa chiwalo cha wanhu weng'ha wa Isilaeli na kwa chiwalo cha honhu ha kulavila nhambiko ha Mkulu Nguluwi, honeche hala Mkulu Nguluwi hoyahagule.
JOS 10:1 Mndewa Adoni-sedeki wa Yelusalemu nakahulika mbuli ilinguwala vila Yoshua vyoyaubochile muji wa Ayi na kuudumya muji awo na mndewa wake kota vyoyauditile muji wa Yeliko na mndewa wake. Kahi nakahulika kota wanhu wa Gibeoni nawali waditile ilagano lya kikala goya na Waisilaeli na kota sambi wangikala hali hewo.
JOS 10:2 Mbuli azo nazambuza kudumba kukulu ako Yelusalemu kwa vila muji wa Gibeoni nawali utogoligwe hali miji ja mndewa. Kahi muji awo nawali uzeleche kusinda Ayi, walume weng'ha nawali wamizi.
JOS 10:3 Lelo mndewa Adoni-sedeki wa Yelusalemu, nakahilika usenga kwa mndewa Hohamu wa Hebuloni na mndewa Pilamu wa Yalimuti na mndewa Yafiya wa Lakishi na mndewa Debili wa Eguloni, nakawalonjela,
JOS 10:4 “Muye mnhanze tuwadumye Wagibeoni, mina nawadita ilagano lya kikala goya na Yoshua hamwe na Waisilaeli.”
JOS 10:5 Hamba wandewa awo wahano wa Waamoli, mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni, nawakungajiza wamizi wa hewo, nawaluta nawo mbaka Gibeoni, nawawika kambi kuuzunguluta muji awo, nawautowa.
JOS 10:6 Wagibeoni nawahilika usenga kwa Yoshua ako kuli kambi ya Giligali, nawamlonjela, “Dedede, uleche kututaga hetwe vitumagwa wa hegwe, uye himahima ututanze na kutulohola kwa vila wandewa weng'ha wa Waamoli kulawa kuli isi ya vidunda nawoya kututowa.”
JOS 10:7 Lelo Yoshua hamwe na wamizi wa heye weng'ha na wazidahe ng'hatu nawoka Giligali.
JOS 10:8 Mkulu Nguluwi nakamlonjela Yoshua, “Uleche kuwadumba ne hado mina nandiwawika mmoko mwa hegwe, kuduhuli ne yumwe yoweza kwima hali hegwe.”
JOS 10:9 Vyowajendile kulawa Giligali nechilo yeng'ha, Yoshua nakawalawila baho du.
JOS 10:10 Mkulu Nguluwi nakawadita Waamoli weng'ha wawe wodumba ng'hatu hali Waisilaeli wawele nawawatowa ako Gibeoni. Nawawabilimisa kuli nzila ya ibindi lya Beti-holoni na kuwakopola mnzila mbaka Aseka na Makeda.
JOS 10:11 Navyonawali wowabilima Waisilaeli kuli ibindi lya Beti-holoni, Mkulu Nguluwi nakawatowela nhonya ya maganga makulu wawele mnzila mbaka Aseka na wala wabagame kwa maganga ago nawali wenji kusinda wabagame kwa mipanga ja Waisilaeli.
JOS 10:12 Mhela Mkulu Nguluwi vyoyawawichile Waamoli mmoko mwa Waisilaeli, Yoshua nakamlanda Mkulu Nguluwi hali Waisilaeli weng'ha, nakalonga, “Gwa isanya, wime tulu mchanya mwa Gibeoni, gwa nyelezi, kuli ibindi lya Aiyaloni.”
JOS 10:13 Isanya nalima tulu na nyelezi nayima mbaka isi ya Isilaeli vyoiwahilusile chibida wang'honyo wake. Kota vyoyandiche kuli chitabu cha Yashali, isanya nalima tulu kilanga, nalimiza majendo gake ne kuzibila kota zuwa limwe.
JOS 10:14 Zuwa kota alyo halinalawila hebu na halikoneka kahi, zuwa alyo Mkulu Nguluwi yamwidichile munhu kwa mbuli ayo, mina Mkulu Nguluwi yuye naketowa kwa chiwalo cha Waisilaeli.
JOS 10:15 Hamba Yoshua nakahiluka kuli kambi ako Giligali hamwe na Waisilaeli weng'ha.
JOS 10:16 Wala wandewa wahano nawabilima na kuza kivisa kuli mhalika ya Makeda.
JOS 10:17 Yoshua nakahulika kota wandewa awo nawazeleka kowevisile kuli mhalika ya Makeda.
JOS 10:18 Yoshua nakalonga, “Muwiche maganga makulu hali lwizi lwa mhalika na kuwika wamizi aho,
JOS 10:19 ila hemwe mleche kikala ako. Muwawinze wang'honyo wa hemwe na muwatowe kulawa ubanzi wa kumbele na mleche kuwaleka wenjile kuli muji wa hewo, mina Mkulu Nguluwi, Nguluwi wa hemwe, nakawawika mmoko wa hemwe.”
JOS 10:20 Yoshua hamwe na Waisilaeli nawawatowa na kuwakopola wenji, wamwe wa hewo waponile nawabilimila kuli miji ja hewo jiwele na ngome.
JOS 10:21 Vyogalawile ago Waisilaeli weng'ha nawahiluka kwa kikala goya kwa Yoshua ako kuli kambi ya Makeda, kuduhuli kahi munhu yajezile kulonga choneche chihile kwa Waisilaeli.
JOS 10:22 Hamba Yoshua nakalonga, “Mchumule lwizi lwa mhalika mingalile wala wandewa wahano kulawa amo.”
JOS 10:23 Nawadita ahyo, nawamigalila Yoshua wala wandewa wahano kulawa kuli mhalika, wawele ndo mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni.
JOS 10:24 Wandewa awo vyowegaligwe, Yoshua nakawachema Waisilaeli weng'ha na wakulu wa wamizi walutile na heye kuli ngondo, nakawalonjela, “Muye habehi muwabije wandewa awa kuli singo za hewo.” Nawo nawahejela na kuwabiga kuli singo za hewo.
JOS 10:25 Yoshua nakawalonjela “Mleche kudumba ne kuwa na lunhwinhwi, mwime nzinzili na msindamale, mina ahyo ndo Mkulu Nguluwi vyoyowaditila wang'honyo wa hemwe wawele mochitowa na hewo.”
JOS 10:26 Hamba Yoshua nakawakopola na kuwaniniza kuli migodi jihano na kujileka mitufi ajo mbaka matinazo.
JOS 10:27 Mhela wa kuzibila kwa isanya, Yoshua nakawalonjela wose mitufi ajo kuli migodi kojiwele jininizwe na kujitaga kuli mhalika konawali wevisile. Hamba nawawika maganga makulu kuli lwizi lwa mhalika. Maganga ago ga kuko mbaka lehano.
JOS 10:28 Zuwa alyo Yoshua vyoyauholile muji wa Makeda, nakamkopola mndewa wake na wanhu wa heye weng'ha ne kumleka munhu wa heye ne yumwe. Nakamditila mndewa wa Makeda kota vila vyoyamditile mndewa wa Yeliko.
JOS 10:29 Kulawa Makeda, Yoshua hamwe na Waisilaeli weng'ha nawaluta kuli muji wa Libuna kuutowa.
JOS 10:30 Mkulu Nguluwi nakauwika muji awo hamwe na mndewa wake mmoko mwa Waisilaeli, nawawakopola wanhu wake ne kumleka ne yumwe. Nawamditila mndewa wa Libuna kota vyowamditile mndewa wa Yeliko.
JOS 10:31 Hamba Yoshua na Waisilaeli weng'ha nawalawa Libuna nawaluta Lakishi, nawauzunguluta muji awo na kuutowa.
JOS 10:32 Naye Mkulu Nguluwi nakauwika muji awo mmoko mwa Waisilaeli, nawauhola lolifichile zuwa lya keli. Nawawakopola wanhu weng'ha wa muji awo wa Lakishi kota vyowaditile kula Libuna.
JOS 10:33 Aho, mndewa Holamu wa Geseli nakoya kuwatanza wanhu wa Lakishi. Ila Yoshua nakamkopola hamwe na wanhu wa heye weng'ha, nahamlechile ne munhu yumwe.
JOS 10:34 Hamba kulawa Lakishi, Yoshua na Waisilaeli weng'ha nawaluta mbaka muji wa Eguloni, nawauzunguluta na kuutowa.
JOS 10:35 Nawauhola zuwa lilyo na nakuwakopola wanhu wake weng'ha kota vyoyaditile kula Lakishi.
JOS 10:36 Hamba kulawa Eguloni, Yoshua na Waisilaeli weng'ha nawaluta mbaka muji wa Hebuloni na kuutowa muji awo na kuuhola.
JOS 10:37 Nawawakopola wanhu wake weng'ha hamwe na mndewa wa hewo, nawajiwifya ng'hatu miji jiyage jizungulute, nawawakopola wanhu wake weng'ha ne kumleka munhu ne yumwe kota vyowaditile kula Eguloni.
JOS 10:38 Hamba Yoshua na Waisilaeli weng'ha nawahinduka kuza kuli muji wa Debili na kuutowa.
JOS 10:39 Nawauhola muji awo na mndewa wake hamwe na miji jiyage jeng'ha jizungulute na kuwakopola weng'ha wawele ako Debili ne kumleka munhu ne yumwe. Nawauditila muji awo kota vyowauditile muji wa Hebuloni na muji wa Libuna na wandewa wake.
JOS 10:40 Lelo Yoshua nakaihola isi yeng'ha, nakaitowa isi ya vidunda na honhu ha Negebu na honhu ha isi iwele kuli mibindi na mibalalika na wandewa wake weng'ha. Hamlechile munhu ne yumwe ila nakakopola chila munhu kota Mkulu Nguluwi, Nguluwi wa Isilaeli, vyoyawalajize.
JOS 10:41 Yoshua nakawasumya wanhu weng'ha kulawa Kadeshi-balineya mbaka Gasa na kulawa isi ya Gosheni mbaka Gibeoni.
JOS 10:42 Yoshua nakaweza kuihola isi ayi yeng'ha na wandewa wake kwa mhela umwe kwa vila Mkulu Nguluwi, Nguluwi wa Isilaeli, naketowa kwa chiwalo cha Waisilaeli.
JOS 10:43 Lelo Yoshua nakahiluka mbaka kuli kambi ako Giligali hamwe na Waisilaeli weng'ha.
JOS 11:1 Mndewa Yabini wa muji wa Hasoli loyahuliche mbuli azo, nakahilika usenga kwa mndewa Yobabu wa Madoni na mndewa wa Shimuloni na mndewa wa Akishafi
JOS 11:2 na kwa wandewa wawele kuli vidunda vya kasikazini na Alaba nayali kusini mwa Kineleti na kuli ibalalika na Nafoti-doli kuli ubanzi wa kolizinjilaga isanya.
JOS 11:3 Nawahilika usenga kahi kwa Wakanaani wa ubanzi wa kolilawilaga isanya na kolizinjilaga isanya, wawele ndo Waamoli na Wahiti na Wapelisi na Wayebusi wawele wochikala kuli isi ya vidunda na kwa Wahivi hasi ha chidunda cha Helimoni kuli isi ya Misipa.
JOS 11:4 Lelo walawa weng'ha na wamizi wa hewo. Nawo nawali wenji kota sangalaza za kugunuche hamwe na mituka minji ja falasi na falasi wenji ng'hatu.
JOS 11:5 Wandewa awa weng'ha nawelumba na kuwika kambi ya hewo kuli Mazi ga Melomu leka wetowe na Waisilaeli.
JOS 11:6 Mkulu Nguluwi nakamlonjela Yoshua, “Uleche kuwadumba awo, mina mitondo mhela kota awu, ndowakopola weng'ha kwa kuwawika mmoko wa Waisilaeli. Hemwe modumula midanha ja falasi awo na kulakaza mituka ja hewo kwa chiluli.”
JOS 11:7 Lelo baho du Yoshua hamwe na wamizi wa heye weng'ha nawalawila kuli nzasa ya Melomu na kuwatowa.
JOS 11:8 Mkulu Nguluwi nakawawika mmoko mwa Waisilaeli, na hewo nawawatowa na kuwawinga mbaka Sidoni Ng'hulu na Misilefoti-maimu, mbaka ubanzi wa kolilawilaga isanya kuli ibindi lya Misipa. Waisilaeli nawawatowa na kuwakopola weng'ha.
JOS 11:9 Yoshua nakadumula midanha jeng'ha ja falasi wa hewo na kulakaza mituka ja hewo kwa chiluli, kota Mkulu Nguluwi vyoyamlajize.
JOS 11:10 Yoshua loyawele yohiluka, nakauhola muji wa Hasoli. Nakamkopola mndewa wake. Hasoli nawali muji ukulu wa undewa wa isi azo zeng'ha.
JOS 11:11 Hamba nakaulakaza muji wa Hasoli kwa chiluli na kuwakopola kwa ipanga wanhu wake weng'ha, hamlechile ne munhu yumwe.
JOS 11:12 Miji jeng'ha ja wandewa wa hewo na wandewa wake weng'ha, Yoshua nakawahola na kuwatowa kwa ipanga na kuwadumya ng'hatu, kota vyoyalajizwe na Musa, chitumagwa wa Mkulu Nguluwi.
JOS 11:13 Ila Waisilaeli hawajilakaze miji jiwele jizenjigwe kuli mahame, ila wula muji wa Hasoli uwele Yoshua nakaulakaza.
JOS 11:14 Waisilaeli nawahola vinhu vyeng'ha vyowabochile na migongolo ja muji awo, ila nawawakopola wanhu wake weng'ha na hawamlechile ne munhu yumwe.
JOS 11:15 Mzilo awu nakapegwa Musa, chitumagwa wa Mkulu Nguluwi. Musa nakamlajiza Yoshua yawele nakaukolela mijito. Yoshua nakeneza chila mbuli iwele Mkulu Nguluwi yoyamlajize Musa.
JOS 11:16 Yoshua na wamizi wa heye nawaiboka isi yeng'ha kulawa kasikazini mbaka kusini. Nawaboka honhu ha vidunda na honhu heng'ha ha Negebu na honhu heng'ha ha Gosheni na isi ya ibindi na isi ya Alaba na kuli vidunda vya Isilaeli na honhu hake hawele na ibalalika,
JOS 11:17 nakawahola na kuwakopola wandewa weng'ha wa isi ayo kwaluchila chidunda cha Halaki habehi na Seili mbaka Baali-gadi kuli ibindi lya Lebanoni, kusini mwa chidunda cha Helimoni.
JOS 11:18 Yoshua naketowa ngondo na wandewa awo weng'ha kwa mhela winji.
JOS 11:19 Kuduhuli muji nauditile uhanyisi wa kikala goya na Waisilaeli, ila Gibeoni hela, kuwele nawekale Wahivi. Waisilaeli nawajiboka miji jiyage jeng'ha kwa kitowa ngondo.
JOS 11:20 Nayali kota vyoyaganile Mkulu Nguluwi yuye kuzidita nhumbula za wanhu wa isi azo ziwe zigagadale leka wetowe. Nakagana waleche konelwa isungu ila wadumigwe. Ndo Mkulu Nguluwi vyoyamlajize Musa.
JOS 11:21 Mhela awo, Yoshua nakaluta na kuwakopola Waanaki wawele wochikala kuli isi ya vidunda ako Hebuloni na Debili na Anabu, isi yeng'ha ya vidunda vya Yuda na Isilaeli. Yoshua nakawakopola wanhu awo hamwe na kujiwifya miji ja hewo.
JOS 11:22 Haduhuli munhu wa nhanzi ya Anaki nayaponile kuli isi ya Isilaeli, wanji nawapona kuli miji ja Gasa na Gati na Ashidodi.
JOS 11:23 Lelo Yoshua nakawapa isi yeng'ha iwe ya hewo kwa chiwalo cha gala geng'ha Mkulu Nguluwi vyoyamlajize Musa. Yoshua nakawapa Waisilaeli iwe uhalizi wa hewo, wegawile kuli nhanzi ya hewo. Hamba isi yeng'ha nayali na kikala goya ne ngondo.
JOS 12:1 Awa ndo wandewa wasumigwe na Waisilaeli nakuhola isi ya hewo yeng'ha iwele kolilawilaga isanya kuli lwanda lwa Yolodani kulawila kuli ibindi lya lwanda lwa Alinoni mbaka kuli chidunda cha Helimoni na isi yeng'ha ya Alaba ubanzi wa kolilawilaga isanya.
JOS 12:2 Mndewa Sihoni wa Waamoli yawele yochikala ako Heshiboni na kulongoza kulawa ako Aloeli, muji uwele hafungo ha ibindi lya Alinoni, kahi nayali mndewa kuli honhu halingwaluchila hagati ha ibindi mbaka lwanda lwa Yaboki ndo nakwali mbaka wa isi ya Waamoni, nusu ya isi ya Gileadi.
JOS 12:3 Hihyo du, nakalongoza isi yeng'ha ya Alaba ya kolilawilaga isanya kwaluchila bahali ya Kineleti mbaka Bahali ya Mwino na kulutilila kusini mbaka hasi ha viduliko vya Pisiga.
JOS 12:4 Myage ndo mndewa Ogu, yumwe wa Walefayi waponile, nayalongoze Bashani na yawele yochikala Ashitaloti na Edileyi.
JOS 12:5 Ulongozi wa heye nawenela mbaka ako kuli chidunda cha Helimoni na ako Saleka na Bashani yeng'ha kulutila kuli mbaka ja Wageshuli na Wamaakati na nusu ya Gileadi mbaka kuli mbaka wa isi ya mndewa Sihoni wa Heshiboni.
JOS 12:6 Musa, chitumagwa wa Mkulu Nguluwi, hamwe na Waisilaeli nawawasumya wandewa awo, nakazipa isi azo nhanzi ya Lubeni na Gadi na nusu ya nhanzi ya Manase ziwe za hewo.
JOS 12:7 Hamba Yoshua hamwe na Waisilaeli nawawatowa wandewa weng'ha wa honhu heng'ha hawele kolizinjilaga isanya mwa lwanda lwa Yolodani, kwaluchila Baali-gadi kuli ibindi lya Lebanoni mbaka kuli chidunda cha Halaki kusini habehi na Seili. Yoshua nakazigawila nhanzi za Isilaeli isi azo ziwe za hewo.
JOS 12:8 Isi azo nazali hamwe na honhu ha vidunda na isi iwele na isi ya ibindi na honhu ha Alaba na kuli viduliko vya vidunda na honhu ha chiwala na honhu ha Negebu, isi zoziwele za Wahiti na Waamoli na Wakanaani na Wapelisi na Wahivi na Wayebusi.
JOS 12:9 Wandewa wowawasumile nawali mndewa wa Yeliko na mndewa wa Ayi, muji uwele habehi na Beteli
JOS 12:10 na mndewa wa Yelusalemu na mndewa wa Hebuloni
JOS 12:11 na mndewa wa Yalimuti na mndewa wa Lakishi
JOS 12:12 na mndewa wa Eguloni na mndewa wa Geseli
JOS 12:13 na mndewa wa Debili na mndewa wa Gedeli
JOS 12:14 na mndewa wa Holima na mndewa wa Aladi
JOS 12:15 na mndewa wa Libuna na mndewa wa Adulamu
JOS 12:16 na mndewa wa Makeda na mndewa wa Beteli
JOS 12:17 na mndewa wa Tapua na mndewa wa Hefeli
JOS 12:18 na mndewa wa Afeki na mndewa wa Shaloni
JOS 12:19 na mndewa wa Madoni na mndewa wa Hasoli
JOS 12:20 na mndewa wa Shimuloni-meloni na mndewa wa Akishafi
JOS 12:21 na mndewa wa Taanaki na mndewa wa Megido
JOS 12:22 na mndewa wa Kedeshi na mndewa wa Yokineamu, muji uwele kuli chidunda cha Kalimeli
JOS 12:23 na mndewa wa Doli kuli mkowa wa Nafoti-doli, mndewa wa Goiimu ako Giligali
JOS 12:24 na mndewa wa Tilisa. Wandewa awo weng'ha nawali makumi gadatu na yumwe.
JOS 13:1 Mhela awu Yoshua nayali yalalile ng'hatu, Mkulu Nguluwi nakamlonjela, “Hegwe lelo kulala na kwa sekulu wa miyaka minji, hang'hali honhu ha isi nyinji haholigwe.
JOS 13:2 Honhu aho ndo isi yeng'ha iponile kubochigwa, isi yeng'ha ya Wafilisti na isi yeng'ha ya Wageshuli,
JOS 13:3 kulawa lwanda lwa Shiholi luwele ako kolilawilaga isanya mwa Misili mbaka kuli mbaka wa Ekiloni ubanzi wa kasikazini, isi ilingulonjigwa kota ndo ya Wakanaani. Kahi hambochile isi ya wandewa wahano wa Wafilisti wawele wolongoza Gasa na Ashidodi na Ashikeloti na Gati na Ekiloni na kahi hambochile isi ya Waavi.
JOS 13:4 Kahi ndo ubanzi wa kusini kuwele na isi yeng'ha ya Wakanaani na Meala iwele ya Wasidoni mbaka Afeki kuli mbaka wa Waamoli
JOS 13:5 na honhu ha Wagebali na honhu heng'ha ha Lebanoni ako kolilawilaga isanya, kulawa Baali-gadi hasi ha chidunda cha Helimoni mbaka Lebo-hamati
JOS 13:6 na wanhu weng'ha walingikala honhu ha vidunda viwele kwaluchila Lebanoni mbaka Misilefoti-maimu iwele wanhu wa ako ndo Wasidoni. Heni Nguluwi, ndowawinga wanhu wa isi azo hali Waisilaeli. Nagwe kowagawila hela honhu ha isi azo kota vyondikulajize.
JOS 13:7 Kozigawa isi azo kwa uhalizi kwa nhanzi tisa na nusu ya nhanzi ya Manase.”
JOS 13:8 Nhanzi ya Lubeni na Gadi na nusu iyage ya nhanzi ya Manase nazali zigawilwe isi iwe ya hewo iwele kolilawilaga isanya mwa lwanda lwa Yolodani, kota Mkulu Nguluwi vyoyamlajize Musa, chitumagwa wa heye.
JOS 13:9 Honhu ha hewo nahali kwaluchila Aloeli hafungo ha ibindi lya Alinoni na muji wula uwele hagati ha ibindi na isi yila yeng'ha ya ibalalika lya Medeba mbaka Diboni,
JOS 13:10 hamwe na miji ja mndewa Sihoni wa Waamoli, yalongoze ako Heshiboni kuli mbaka wa Waamoni,
JOS 13:11 hamwe na isi ya Gileadi na honhu ha Wageshuli na Wamaakati na chidunda cheng'ha cha Helimoni na isi yeng'ha ya Bashani mbaka Saleka
JOS 13:12 na undewa weng'ha wa Ogu kuli Bashani, yumwe wa Walefayi wasigale, nayalongoze ako Ashitaloti na Edileyi. Musa nayali yawasumile awo weng'ha na kuwawinga.
JOS 13:13 Ila Waisilaeli nawalemwela kuwawinga Wageshuli na Wamaakati, ahyo wangikala hali Waisilaeli mbaka lehano.
JOS 13:14 Musa hawagawile wanhu wa nhanzi ya Walawi isi yoneche iwe ya hewo. Ila nhambiko zowamlavile Mkulu Nguluwi, Nguluwi wa Isilaeli kwa chiluli, azo ndo nazali uhalizi wa hewo, kota Mkulu Nguluwi navyoyamlajize Musa.
JOS 13:15 Musa nakawapa uhalizi wa isi wanhu wa nhanzi ya Lubeni kota vyoziwele ng'holo za hewo.
JOS 13:16 Nayali kwaluchila Aloeli hafungo ha ibindi lya Alinoni na muji uwele kuli hagati ha ibindi alyo hamwe na isi yeng'ha ya ibalalika lya Medeba.
JOS 13:17 Nayali kahi hamwe na Heshiboni na muji wake weng'ha uwele hali honhu hawele na ibalalika, hawele ndo Diboni na Bamoti-baali na Beti-baali-meoni
JOS 13:18 na Yahasa na Kedemoti na Mefaati
JOS 13:19 na Kiliataimu na Sibuma na Seleti-shahali, ako kuchidunda chido chiwele kuli ibindi
JOS 13:20 na Beti-peoli na kuli viduliko vya vidunda vya Pisiga na Beti-yeshimoti,
JOS 13:21 mina ndo miji jeng'ha ja kuli ibalalika na isi yeng'ha ya mndewa Sihoni wa Waamoli, yawele yalongoze ako Heshiboni. Musa nayali yamsumile ayo Sihoni hamwe na vilongozi wanji wawele hali ulongozi wa heye, vilongozi wa Midiani nawali Evi na Lekemu na Suli na Huli na Leba, ndo nawalongoze isi yila.
JOS 13:22 Waisilaeli kahi nawamkopola Balaamu, mwana wa Beoli, nayawele mlaguzi.
JOS 13:23 Kuli mbaka wa isi ya nhanzi ya Lubeni ubanzi wa kolizinjilaga isanya, nakwali lwanda lwa Yolodani. Miji na vijiji avyo ndo uhalizi wowagawilwe wanhu wa nhanzi ya Lubeni, kota vyoziwele ng'holo za hewo.
JOS 13:24 Musa nakawapa uhalizi wa isi wanhu wa nhanzi ya Gadi kota vyoziwele ng'holo za hewo.
JOS 13:25 Honhu aho nahali Yaseli na miji jeng'ha ja Gileadi na nusu ya isi ya Waamoni mbaka Aloeli iwele kolilawilaga isanya mwa Laba,
JOS 13:26 na kwaluchila Heshiboni mbaka Lamati-misipa na Betonimu na kulawa Mahanaimu kuli mbaka wa Debili,
JOS 13:27 na miji jiwele kuli ibindi lya Beti-halamu na Beti-nimula na Sukoti na Safoni na isi yeng'ha iponile ya mndewa Sihoni wa Heshiboni. Honhu aho nahali ubanzi wa kolilawilaga isanya mwa lwanda lwa Yolodani hawele habakane na ubanzi wa kusini mwa bahali ya Kineleti.
JOS 13:28 Miji na vijiji avyo ndo navyowapegwe wanhu wa nhanzi ya Gadi viwe vya hewo kota vyoziwele ng'holo za hewo.
JOS 13:29 Kahi Musa nakawapa uhalizi wa isi nusu ya nhanzi ya Manase kota vyoziwele ng'holo za hewo.
JOS 13:30 Honhu aho nahali kwaluchila Mahanaimu na isi yeng'ha iwele ya mndewa Ogu ako Bashani, hamwe na miji makumi sita ja Yaili
JOS 13:31 na nusu ya Gileadi na Ashitaloti na Edileyi, najali miji jiwele hasi ha chilongozi yumwe wa mndewa Ogu wa Bashani. Honhu aho nawapegwa nusu ya walelwa wa Makili mwana wa Manase, kota vyoziwele ng'holo za hewo.
JOS 13:32 Awu ndo uhalizi uwele Musa nayaugawile kuli isi za mibalalika ja Moabu, kumwambu mwa lwanda lwa Yolodani na Yeliko kuli ubanzi wa kolilawilaga isanya.
JOS 13:33 Ila Musa haipele nhanzi ya Lawi honhu ha isi hawe ha hewo, mina nakawalonjela kota uhalizi wa hewo ndo Mkulu Nguluwi, Nguluwi wa Isilaeli.
JOS 14:1 Awu ndo uhalizi wa isi iwele wapegwe Waisilaeli kuli isi ya Kanaani. Mtambika Eleasali na Yoshua, mwana wa Nuni, hamwe na wakulu wa lukolo lwa nhanzi ya Waisilaeli nawawagawila Waisilaeli.
JOS 14:2 Uhalizi wa hewo nawapegwa kwa kutowa simbi kota vila Mkulu Nguluwi vyoyamlajize Musa kota zipegwe zila nhanzi tisa na nusu uwe wa hewo.
JOS 14:3 Musa nayali yazipele nhanzi mbili na nusu uhalizi wa hewo, kolilawilaga isanya mwa lwanda lwa Yolodani, ila Walawi hawawele wapegwe honhu ha hewo hamwe na hewo.
JOS 14:4 Walelwa wa Yusufu nawali nhanzi mbili, Manase na Efulaimu. Nhanzi ya Lawi haipegwe honhu honeche ha isi, ila miji ja kikala hela na honhu ha kudimila kwa chiwalo cha misenga na ming'holo ja hewo.
JOS 14:5 Lelo Waisilaeli nawaigawa isi kota vila Mkulu Nguluwi vyoyamlajize Musa.
JOS 14:6 Zuwa limwe wanhu wa nhanzi ya Yuda nawamlutila Yoshua ako Giligali. Kalebu mwana wa Yefune, nayawele Mkenisi, nakamlonjela Yoshua, “Kwangukumbuchila vila Mkulu Nguluwi vyoyamlajize Musa, munhu wa Nguluwi, kuwala heni na hegwe vyonatwali Kadeshi-balineya.
JOS 14:7 Vyonandali na miyaka makumi gane, Musa chitumagwa wa Mkulu Nguluwi, nakandajiza kulawa Kadeshi-balineya kuza kupugajiza isi. Vyonyhiluche nandimgalila mbuli kota vyoiwele mnhumbula ya heni,
JOS 14:8 ila wala wayangu walutile hamwe na heni nawawadita wanhu wagozole, ila heni nandimuwinza ng'hatu Mkulu Nguluwi, Nguluwi wa heni.
JOS 14:9 Zuwa alyo Musa nakelaha, ‘Ndangukomya honhu ha isi yila youkolile iwe ya hegwe na walelwa wa hegwe mazuwa gose, kwa vila nakumuwinza ng'hatu Mkulu Nguluwi, Nguluwi wa hegwe.’
JOS 14:10 Ila lelo ulole! Ndo miyaka makumi gane na jihano kulawila Mkulu Nguluwi vyoyalongase na Musa, mhela Waisilaeli vyonawali wokola kuchiwala. Kulawa mhela awo Mkulu Nguluwi, kota vyoyalonjile, nakandita ndiwe mkomu mbaka lehano na sambi ndina miyaka makumi nane na jihano.
JOS 14:11 Ila nding'hali ndina mong'ho kota vyondiwele mhela wula Musa vyoyandajize. Ndina mong'ho wa kuweza kitowa ngondo ama kukola mijito jiyage joneche.
JOS 14:12 Lelo ndangulanda umhe isi ayi ya chidunda chiwele Mkulu Nguluwi nakalonga zuwa alyo. Hegwe nakuhulika zuwa lila kota Waanaki nawekala amo kuli miji jiwele na lugagala. Hanji Mkulu Nguluwi kowa hamwe na heni, nani ndowawinga kota Mkulu Nguluwi vyoyalonjile.”
JOS 14:13 Yoshua nakamtambichiza Kalebu mwana wa Yefune na kumha muji wa Hebuloni uwe uhalizi wa heye.
JOS 14:14 Ahyo, muji wa Hebuloni ndo uhalizi wa walelwa wa Kalebu, mwana wa Yefune, mbaka lehano. Kalebu ndo Mkenisi. Nakapegwa muji wula kwa vila nayali yomuwinza ng'hatu Mkulu Nguluwi, Nguluwi wa Isilaeli.
JOS 14:15 Muji wa Hebuloni aho hamwande nawali uchemigwa Kiliati-aliba. Aliba nayali munhu yazeleche kusinda weng'ha hali Waanaki. Isi yeng'ha nayali tulu ilihela ngondo.
JOS 15:1 Wanhu wa nhanzi ya Yuda nawapegwa honhu ha isi kota vyoziwele ng'holo za hewo, nahenela kulawa ubanzi wa kusini wobakana na Edomu. Honhu ha kusini ng'hatu nakwali kuchiwala kuchemigwa Sini.
JOS 15:2 Mbaka wa hewo ubanzi wa kusini nawaluchila ubanzi wa kusini mwa Bahali ya Mwino,
JOS 15:3 naulutilila kusini mbaka kuli chidunda cha Akilabimu, naukolela hafungo ha Sini na kusini ya Kadeshi-balineya, ukolela Hesiloni mbaka Adali na kulawila aho nauhinduka kuluta Kalika.
JOS 15:4 Kulawa aho naukolela habehi na Asimoni na kuwinza chikolola kuli mbaka wa Misili, kuza kuli bahali ya Mediteleniyani. Aho ndo houkolile mbaka wa kusini.
JOS 15:5 Mbaka wa hewo wa ubanzi wa kolilawilaga isanya ndo Bahali ya Mwino kuza hala hali lwanda lwa Yolodani lulingwinjilila kuli bahali. Mbaka wa hewo ubanzi wa kasikazini naukola kulawa ubanzi wa Bahali ya Mwino honhu hawele lwanda lwa Yolodani lulingwinjilila mbahali.
JOS 15:6 Mbaka awo naukola Beti-hogila na kasikazini mwa Beti-alaba mbaka kuwele na iganga lya Bohani mwana wa Lubeni.
JOS 15:7 Hamba naulutilila mbaka Debili kulawa ibindi lya Akoli nauhinduka kasikazini kuza Giligali, uwele habehi na chidunda cha Adumimu, uwele kusini mwa chikolola. Aho nauluta kuli nzasa ya Eni-shemeshi na kumalila Eni-logeli.
JOS 15:8 Kulawila aho, mbaka awo naukolela kuli ibindi lya Hinomu, ubanzi wa kusini mwa chidunda cha Wayebusi, iwele ndo Yelusalemu, kuluta kuli chinhembenhembe mwa chidunda chiwele kolizinjilaga isanya mwa ibindi lya Hinomu na kumalila ubanzi wa kasikazini kuli ibindi lya Lefaimu.
JOS 15:9 Kulawila aho, nauluta kuli chidunda mbaka kuli nzasa za Nefitoa, mbaka kuli miji ja chidunda cha Efuloni. Hamba nauhinduka na kuluta Baala, iwele ndo Kiliati-yealimu.
JOS 15:10 Hamba mbaka nauzunguluta kulawa Baala kulutila ubanzi wa kolizinjilaga isanya mbaka kuli chidunda cha Seili, naulutilila mbaka kuli ubanzi wa chidunda cha Yealimu ubanzi wa kasikazini, awo ndo Kesaloni, hamba naudulichila kuli Beti-shemeshi na kulutila habehi na Timuna.
JOS 15:11 Kulawila aho naulutilila ubanzi wa kasikazini mwa Ekiloni, na kuzunguluta kuluta Shikeloni kuwele naukola habehi na chidunda cha Baala mbaka Yabineeli na kudumila kuli bahali ya Mediteleniyani.
JOS 15:12 Mbaka wa kolizinjilaga isanya nawali bahali ya Mediteleniyani. Hino ndo vyouwele mbaka wa honhu howapegwe wanhu wa nhanzi ya Yuda kota vyoziwele ng'holo za hewo.
JOS 15:13 Kalebu mwana wa Yefune, nakapegwa honhu ha isi ya Yuda kota Mkulu Nguluwi vyoyamlajize Yoshua. Nakapegwa Kiliati-aliba iwele ndo Hebuloni. Aliba nayali mhaza wa Anaki.
JOS 15:14 Kalebu nakaziwinga ng'holo zidatu za Anaki kulawa muji awo, ziwele ndo ng'holo za Sheshayi na Ahimani na Talimayi.
JOS 15:15 Kulawa Hebuloni nakaluta kuwatowa wanhu wa Debili na muji uwele aho hamwande nawali uchemigwa Kiliati-sefeli.
JOS 15:16 Kalebu nakalonga kota komuheseza mwanage Akisa kwa mlume yoneche youboka muji wa Kiliati-sefeli.
JOS 15:17 Lelo Otinieli, mwana wa Kenasi, mng'holoze Kalebu, nakauboka muji awo. Kalebu nakamuheseza mwanage Akisa.
JOS 15:18 Zuwa limwe Akisa nakamlonjela Otinieli yamlande Kalebu mgunda. Akisa nayali yakwinile idogowi, navyoyawele yodulika kuli idogowi lya heye, Kalebu nakamuuza, “Kwangugana ndikupe choni?”
JOS 15:19 Akisa nakamlonjela, “Umhe utambichizo wa honhu hawele na nzasa kwa vila ako Negebu koumhele kukala.” Lelo Kalebu nakamha nzasa za mazi ziwele kuli isi za kuchanya na za hasi.
JOS 15:20 Awu ndo uhalizi wa isi wowapegwe wanhu wa nhanzi ya Yuda, kota vyoziwele ng'holo za hewo.
JOS 15:21 Miji jiwele ubanzi wa kusini ng'hatu mwa isi ya Yuda kuluta kuli mbaka wa Edomu, nayali Kabiseeli na Edeli na Yaguli
JOS 15:22 na Kina na Dimona na Adada
JOS 15:23 na Kedeshi na Hasoli na Itinani
JOS 15:24 na Sifu na Telemu na Bealoti
JOS 15:25 na Hasoli-hadata na Kelioti-hesiloni, mina Hasoli
JOS 15:26 na Amamu na Shema na Molada
JOS 15:27 na Hasali-gada na Heshimoni na Beti-peleti
JOS 15:28 na Hasali-shuali na Beeli-sheba na Bisiotiya
JOS 15:29 na Baala na Iyimu na Esemu
JOS 15:30 na Elitoladi na Kesili na Holima
JOS 15:31 na Sikilagi na Madimana na Sanisana
JOS 15:32 na Lebaoti na Shilihimu na Aini na Limoni. Miji jeng'ha jowapegwe najali makumi meli na tisa hamwe na vijiji vyake.
JOS 15:33 Miji jiwele hali ibalalika, najali Eshitaoli na Sola na Ashina
JOS 15:34 na Sanowa na Eni-ganimu na Tapua na Enamu
JOS 15:35 na Yalimuti na Adulamu na Soko na Aseka
JOS 15:36 na Shaalaimu na Aditaimu na Gedela na Gedelotaimu. Miji jeng'ha jowapegwe najali kumi na jine hamwe na vijiji vyake.
JOS 15:37 Nawapegwa kahi na muji wa Senani na Hadasha na Migidali-gadi
JOS 15:38 na Dileani na Misipa na Yokiteeli
JOS 15:39 na Lakishi na Bosikati na Eguloni
JOS 15:40 na Kaboni na Lahamasi na Kitilishi
JOS 15:41 na Gedeloti na Beti-dagoni na Naama na Makeda. Miji jeng'ha jowapegwe, najali kumi na sita hamwe na vijiji vyake.
JOS 15:42 Kahi nawapegwa miji ja Libuna na Eteli na Ashani
JOS 15:43 na Yifita na Ashina na Nesibu
JOS 15:44 na Keila na Akisibu na Malesha. Miji jeng'ha jowapegwe, najali tisa hamwe na vijiji vyake.
JOS 15:45 Vivila nawapegwa Ekiloni hamwe na miji jake midodo na vijiji,
JOS 15:46 miji jeng'ha na vijiji viwele habehi na Ashidodi kulawa Ekiloni mbaka bahali ya Mediteleniyani.
JOS 15:47 Kahi hana Ashidodi na Gasa hamwe na miji na vijiji vyake, mbaka kuli chikolola cha Misili mbaka hafungo ha bahali ya Mediteleniyani.
JOS 15:48 Miji jiwele kuli isi ya vidunda ndo Shamili na Yatili na Soko
JOS 15:49 na Dana na Kiliati-sana, mina Debili,
JOS 15:50 na Anabu na Eshitemoa na Animu
JOS 15:51 na Gosheni na Holoni na Gilo. Miji jeng'ha jowapegwe, najali kumi na imwe na vijiji vyake.
JOS 15:52 Nawapegwa kahi miji ja Alabu na Duma na Eshani
JOS 15:53 na Yanumi na Beti-tapua na Afeka
JOS 15:54 na Humuta na Kiliati-aliba, mina Hebuloni na Sioli. Miji jeng'ha jowapegwe, najali tisa hamwe na vijiji vyake.
JOS 15:55 Kahi nawapegwa miji ja Maoni na Kalimeli na Sifu na Yuta
JOS 15:56 na Yesileeli na Yokideamu na Sanowa
JOS 15:57 na Kaini na Gibeya na Timuna. Miji jeng'ha jowapegwe, najali kumi hamwe na vijiji vyake.
JOS 15:58 Vivila nawapegwa miji ja Halihuli na Beti-suli na Gedoli
JOS 15:59 na Maalati na Beti-anoti na Elitekoni. Miji jeng'ha jowapegwe, najali sita hamwe na vijiji vyake.
JOS 15:60 Kahi nawapegwa Kiliati-baali, muji ulinguchemigwa kahi Kiliati-yealimu, na Laba. Miji jeng'ha jowapegwe, najali mili hamwe na vijiji vyake.
JOS 15:61 Miji ja kuchiwala najali Beti-alaba na Midini na Sekaka
JOS 15:62 na Nibishali na Muji wa Mwino na En-gedi. Miji jeng'ha jowapegwe najali sita hamwe na vijiji vyake.
JOS 15:63 Ila wanhu wa Yuda hawawezile kuwawinga Wayebusi, wawele ndo wenyeng'haye wa Yelusalemu. Ila mbaka lehano Wayebusi wang'hali wochikala hali muji awo hamwe na wanhu wa Yuda.
JOS 16:1 Honhu howapegwe walelwa wa Yusufu kwa kubakana, nahaluchila kuli lwanda lwa Yolodani, kolilawilaga isanya kuli nzasa ya Yeliko, kukolela kuchiwala mbaka kuli isi ya vidunda kulutila Beteli.
JOS 16:2 Kulawila Beteli mbaka nauluta Lusu, hamba naukola Ataloti kuwele wekale Waaliki.
JOS 16:3 Hamba naudulichila kolizinjilaga isanya kuli isi ya Wayafiteti mbaka Beti-holoni ya Hasi na Geseli na kumalila kuli bahali ya Mediteleniyani.
JOS 16:4 Walelwa wa Yusufu, mina ndo nhanzi ya Manase na nhanzi ya Efulaimu, nawapegwa uhalizi wa isi ayo.
JOS 16:5 Wanhu wa nhanzi ya Efulaimu kota vyoziwele ng'holo za hewo, mbaka wa isi ya hewo nawali ubanzi wa kolilawilaga isanya, naukola Ataloti-adali kuza Beti-holoni ya Kuchanya,
JOS 16:6 hamba kumalila kuli bahali ya Mediteleniyani. Kwa ubanzi wa kasikazini mbaka naukolela Mikimetati. Kolilawilaga isanya nauhinduka na kuluta Taanati-shilo kuwele naukolile ubanzi kolilawilaga isanya mbaka Yanoa.
JOS 16:7 Kulawa Yanoa nauluta mbaka Ataloti na Naala na kufichila Yeliko na naudumila kuli lwanda lwa Yolodani.
JOS 16:8 Kulawa Tapua, mbaka nauluta kolizinjilaga isanya kuza kuli chikolola cha Kana na kumalila kuli bahali ya Mediteleniyani. Ayi ndo isi yowapegwe wanhu wa nhanzi ya Efulaimu kota vyoziwele ng'holo za hewo,
JOS 16:9 hamwe na muji na vijiji ndo nawonjezelwe kulawila kuli isi ya nhanzi ya Manase.
JOS 16:10 Waefulaimu nahawawawinjile Wakanaani wowawele wekale Geseli. Wakanaani awo nawalutilila kikala hali wanhu wa Efulaimu mbaka lehano, ila wawele wapogozi wa kuwakolela mijito.
JOS 17:1 Wanhu wa nhanzi ya Manase, Manase yawele ndo mlelwa wa mwaluko kwa Yusufu, nawo nawapegwa honhu ha hewo. Makili mlelwa wa mwaluko wa Manase na nayali mhaza wa Gileadi. Makili nakapegwa miji ja Gileadi na Bashani, mina nayali muwanzi wa kitowa ngondo.
JOS 17:2 Wanji wasigale wa nhanzi ya Manase nawapegwa honhu ha hewo kota vyoziwele ng'holo za hewo. Ng'holo azo nazali zila za Abieseli na Heleki na Asilieli na Shekemu na Hefeli na Shemida, awo weng'ha nawali walelwa walume wa Manase mwana wa Yusufu.
JOS 17:3 Ila Selofehadi mwana wa Hefeli, mwana wa Gileadi, mwana wa Makili, mwana wa Manase, hawele na wana walume, ila nayali na wahinza yeka, nawo nawali Mahila na Noa na Hogula na Milika na Tilisa.
JOS 17:4 Wahinza awo nawamuyila mtambika Eleasali na Yoshua mwana wa Nuni na vilongozi wayage, nawawalonjela, “Mkulu Nguluwi nakamlonjela Musa yatugawile kwa hetwe isi iwe ya hetwe kota vyowalinguwagawila walume wa nhanzi ya hetwe.” Lelo kwa malajizo ga Mkulu Nguluwi, Yoshua nakawapa honhu ha hewo kota vyoyawapele walume wa nhanzi ya hewo.
JOS 17:5 Ahyo, nhanzi ya Manase nawapegwa honhu kumi, hamwe na isi ya Gileadi na Bashani iwele ubanzi uyage wa lwanda lwa Yolodani,
JOS 17:6 kwa vila wahinza wa Manase nawagawilwa honhu ha hewo kota vyowagawilwe walume wa nhanzi ya hewo. Isi ya Gileadi nawapegwa walelwa wanji wa Manase.
JOS 17:7 Mbaka wa nhanzi ya Manase nawaluchila Asheli na kuluta mbaka Mikimetati kolilawilaga isanya mwa Shekemu, hamba mbaka awo naulutilila kusini kuza kuli isi ya wanhu wa Eni-tapua.
JOS 17:8 Isi ya Tapua nayali ya Manase, ila muji wa Tapua uwele kuli mbaka wa Manase, nawali wa walelwa wa Efulaimu.
JOS 17:9 Mbaka awo naulutilila kuli chikolola cha Kana. Miji jiwele kusini mwa Kana, najali ja Waefulaimu hanga ja kuko kuli miji ja Manase. Kahi mbaka naukola kasikazini mwa chikolola na kumalila kuli bahali ya Mediteleniyani.
JOS 17:10 Nhanzi ya Efulaimu nayali ubanzi wa kusini na Manase nayali ubanzi wa kasikazini, mbaka wa hewo nawali bahali ya Mediteleniyani. Isi ya hewo naifika mbaka Asheli ubanzi wa kasikazini na kwenela mbaka Isakali ubanzi wa kolilawilaga isanya.
JOS 17:11 Vivila kuli isi ya nhanzi ya Isakali na nhanzi ya Asheli, nhanzi ya Manase naipegwa miji ja Beti-sheani na Ibuleamu hamwe na vijiji vyake na wanhu wa miji ja Doli na Eni-doli na Taanaki na Megido hamwe na vijiji vyake na kahi imwe ya kadatu ya Nafati.
JOS 17:12 Ila walelwa wa Manase hawawezile kuwawinga wanhu wa miji ajo, lelo Wakanaani nawalutilila kikala amo.
JOS 17:13 Hamba Waisilaeli vyowawele na mong'ho ng'hatu, hawawezile kuwawinga ila nawawadita wawe wakola mijito.
JOS 17:14 Wanhu wa nhanzi ya Yusufu nawamlutila Yoshua, nawamlonjela, “Lekachoni nakutugawila honhu hamwe hela ha isi iwe ya hetwe, hanga Mkulu Nguluwi nakatutambichiza na kutudita tuwe wenji ng'hatu?”
JOS 17:15 Yoshua nakawalonjela, “Wone mwa wenji ahyo na isi ya vidunda vya Efulaimu haihega kwa hemwe kikala aho kahi, lelo mlute kuchihulo kuli isi ya Wapelisi na ya Walefayi, mkateme migodi kwa chiwalo cha kuwika goya honhu ha kikala hemwe.”
JOS 17:16 Nawo nawamlonjela, “Kukomya, isi ayi ya vidunda haihega kwa hetwe, kwa vila Wakanaani weng'ha walingikala kuli ibindi na wala weng'ha walingikala Beti-sheani hamwe na vijiji vyake na wala walingikala kuli ibindi lya Yesileeli, wawele na mituka ja chuma.”
JOS 17:17 Lelo Yoshua nakawalonjela walelwa wa Yusufu, iwele ndo nhanzi ya Efulaimu na Manase, “Kukomya, hemwe muwa wenji na muwele na ludali lukulu. Hainoga mpegwe honhu hamwe hela,
JOS 17:18 ila kahi isi ya vidunda yowa ya hemwe. Hanga sambi ndo chihulo, motema migodi na kuidita iwe ya hemwe, isi yeng'ha kulawila ubanzi awu mbaka uyage. Mowawinga Wakanaani, hanga wana mituka ja chuma na wana ludali.”
JOS 18:1 Vyowaisumile yila isi, wanhu weng'ha wa Isilaeli nawekungajiza ako Shilo na kulimiza ihema lya Nguluwi.
JOS 18:2 Nazali zisigale hali hewo nhanzi saba ziwele hazigawilwe honhu ha hewo ha isi.
JOS 18:3 Ahyo, Yoshua nakawalonjela Waisilaeli, “Ndaze, mokawila mbaka hanili kuza kuihola isi yila iwele Mkulu Nguluwi, Nguluwi wa wasekulu wa hemwe, yawapele?
JOS 18:4 Mhagule wanhu wadatu kulawa chila nhanzi ndiwalajize kuli isi yeng'ha wakalole na kwandika kota vyowalingugana kwa uhalizi wa hewo, hamba woye wandonjele.
JOS 18:5 Nawo nawaigawa isi ayo kuli honhu saba. Nhanzi ya Yuda naipona na honhu hake ha kusini na nhanzi ya Yusufu ako kasikazini.
JOS 18:6 Mwandiche goya kuwala honhu heng'ha saba na kingalila. Hamba ndotowa simbi hano hali Mkulu Nguluwi, Nguluwi wa hetwe, ilinguwala honhu ha chila nhanzi ya hemwe.
JOS 18:7 Ila Walawi hawopegwa honhu honeche hali hemwe, mina honhu hawo howa ndo watambika wa kumkolela mijito Mkulu Nguluwi. Gadi na Lubeni na nusu ya nhanzi ya Manase, mina nawapegwa honhu ha ubanzi wa kolilawilaga isanya kuli lwanda lwa Yolodani. Nawapegwa honhu aho na Musa, chitumagwa wa Mkulu Nguluwi.”
JOS 18:8 Lelo wanhu awo nawaluka majendo ga kuluta kuilola isi. Lowawele wang'hali kuka, Yoshua nakawalonjela, “Mlute kuli isi zeng'ha mkandiche mbuli ilinguwala ayo isi, hamba mhiluche kundonjela, nani ndotowa simbi hali Mkulu Nguluwi, hano Shilo.”
JOS 18:9 Walume awo nawazunguluta kuli isi yeng'ha, nawandika mbuli ilinguwala honhu aho hamwe na miji jawo kuli vihande saba, hamba nawahiluka kwa Yoshua kula kuli kambi ya Shilo.
JOS 18:10 Ako Shilo, Yoshua nakatowa simbi kwa chiwalo cha honhu aho hali Mkulu Nguluwi, nakawagawila Waisilaeli, chila nhanzi na honhu hake.
JOS 18:11 Simbi ya mwaluko naigwila kwa wanhu wa nhanzi ya Benjamini, kota vyoziwele ng'holo za hewo. Honhu howapegwe wanhu awo nahali hagati ha yila nhanzi ya Yuda na yila nhanzi ya Yusufu.
JOS 18:12 Mbaka wa kasikazini nawaluchila kuli lwanda lwa Yolodani na kukolela kasikazini mwa Yeliko na isi ya vidunda, nauluta kolizinjilaga isanya mbaka kuli chiwala cha Beti-aveni.
JOS 18:13 Kulawa ako, mbaka naulutilila kusini kuza Lusu kukolela ubanzi wa kusini mwa Lusu, mina ndo Beteli, mbaka Ataloti-adali kuli chidunda chiwele kusini mwa Beti-holoni ya Hasi.
JOS 18:14 Ubanzi wa kolizinjilaga isanya mwa chidunda acho chiwele kusini mwa Beti-holoni, mbaka nauhinduka kuluta kusini na Kiliati-baali, ulinguchemigwa kahi Kiliati-yealimu, muji uwele wa nhanzi ya Yuda. Awo ndo nawali mbaka wake ubanzi wa kolizinjilaga isanya.
JOS 18:15 Ubanzi wa kusini, mbaka wake nawaluchila hali ubanzi wa Kiliati-yealimu, naufika Efuloni na kuluta mbaka kuli nzasa ya mazi ga Nefitoa.
JOS 18:16 Hamba naudulika mbaka kuduma kwa chidunda chiwele habehi na ibindi lya mwana wa Hinomu, hali honhu ha kasikazini mwa ibindi lya Walefayi. Kahi mbaka naulutilila kuza kusini, kuli ibindi lya Hinomu, kusini mwa chidunda cha Wayebusi, naulutilila mbaka Eni-logeli.
JOS 18:17 Ako, mbaka nauhinduka kuluta kasikazini kulutila Eni-shemeshi, naukolela Geliloti ulingilola na chiduliko cha Adumimu na kidulika mbaka kuwele na iganga lya Bohani mwana wa Lubeni.
JOS 18:18 Kulawa aho, mbaka nauzunguluta kuza kasikazini hafungo ha Alaba, nawo naudulichila ako Alaba.
JOS 18:19 Kahi, naulutilila kuli ubanzi wa kasikazini kuli chidunda cha Beti-hogila na kumalila kasikazini mwa Bahali ya Mwino, honhu halingwinjilila lwanda lwa Yolodani. Awu ndo nawali mbaka wake kuli ubanzi wa kusini.
JOS 18:20 Lwanda lwa Yolodani ndo nalwali mbaka wake ubanzi wa kolilawilaga isanya. Awu ndo uhalizi wa wanhu wa nhanzi ya Benjamini kota vyoziwele ng'holo za hewo.
JOS 18:21 Miji ja ng'holo za nhanzi ya Benjamini ndo Yeliko na Beti-hogila na Emeki-kesisi
JOS 18:22 na Beti-alaba na Semalaimu na Beteli
JOS 18:23 na Avimu na Pala na Ofila
JOS 18:24 na Kefali-amoni na Ofini na Geba. Miji jeng'ha jowapegwe najali kumi na mili hamwe na vijiji vyake.
JOS 18:25 Miji jiyage najali Gibeoni na Lama na Beeloti
JOS 18:26 na Misipa na Kefila na Mosa
JOS 18:27 na Lekemu na Ilipeeli na Talala
JOS 18:28 na Sela na Haelefu na Yebusi, mina ndo Yelusalemu na Gibeya na Kiliati-yealimu. Miji jeng'ha jowapegwe najali kumi na jine hamwe na vijiji vyake. Aho heng'ha ndo honhu howapegwe wanhu wa nhanzi ya Benjamini, hawe uhalizi wa hewo, kota vyoziwele ng'holo za hewo.
JOS 19:1 Simbi ya keli naigwila kuli nhanzi ya Simeoni kota vyoziwele ng'holo za hewo. Isi yowapegwe nayali izungulutwe na yila nhanzi ya Yuda.
JOS 19:2 Nhanzi ya Simeoni naipegwa miji ja Beeli-sheba na Sheba na Molada
JOS 19:3 na Hasali-shuali na Bala na Esemu
JOS 19:4 na Elitoladi na Betuli na Holima
JOS 19:5 na Sikilagi na Beti-makilaboti na Hasali-susa
JOS 19:6 na Beti-lebaoti na Shaluheni. Miji jowapegwe najali kumi na jidatu hamwe na vijiji vyake.
JOS 19:7 Kahi nakwali na muji wa Aini na Limoni na Eteli na Ashani. Miji jowapegwe najali jine hamwe na vijiji vyake,
JOS 19:8 hamwe na vijiji vyeng'ha vizungulute miji ajo mbaka Baalati-beeli na Lama ya Negebu. Awo ndo uhalizi wa wanhu wa nhanzi ya Simeoni, kota vyoziwele ng'holo za hewo.
JOS 19:9 Kwa vila honhu hoipegwe nhanzi ya Yuda nahali hakulu ng'hatu kusinda nhanzi ayo vyoiganile, ahyo honhu hamwe ha hewo naipegwa nhanzi ya Simeoni.
JOS 19:10 Simbi ya kadatu naigwila kwa wanhu wa nhanzi ya Sebuluni, kota vyoziwele ng'holo za hewo. Honhu ha hewo nahenela mbaka Salidi.
JOS 19:11 Kulawa ako, mbaka wa hewo nauluta kolizinjilaga isanya mbaka Maleali, naukolela hafungo ha Dabesheti na kuluta kuli chikolola chiwele kolilawilaga isanya ako Yokineamu.
JOS 19:12 Kulawa Salidi, mbaka naulutilila kuza kolilawilaga isanya kuza kuli mbaka wa Kisiloti-taboli. Kulawa ako naukola Dabelati mbaka Yafiya.
JOS 19:13 Kulawa Yafiya naulutilila kuza kolilawilaga isanya mbaka Gati-hefeli na Eti-kasini na kulutilila mbaka Limoni uhinduka kuluta Nea.
JOS 19:14 Ubanzi wa kasikazini mbaka nauhinduka kuza Hanatoni na kumalila kuli ibindi lya Yifitaheli.
JOS 19:15 Nawapegwa kahi miji ja Katati na Nahalali na Shimuloni na Yidala na Betelehemu, miji jeng'ha jowapegwe najali kumi na mili hamwe na vijiji vyake.
JOS 19:16 Awo ndo uhalizi wozipegwe kwa wanhu wa nhanzi ya Sebuluni kota vyoziwele ng'holo za hewo, miji ajo hamwe na vijiji vyake.
JOS 19:17 Simbi ya kane naigwila wanhu wa nhanzi ya Isakali, kota vyoziwele ng'holo za hewo.
JOS 19:18 Honhu aho nahali na miji ja Yesileeli na Kesuloti na Shunemu
JOS 19:19 na Hafalaimu na Shioni na Anahalati
JOS 19:20 na Labiti na Kishioni na Ebesi
JOS 19:21 na Lemeti na Eni-ganimu na Eni-hada na Beti-pasesi.
JOS 19:22 Kahi mbaka wawo naufika Taboli na Shahasuma na Beti-shemeshi na kumalila kuli lwanda lwa Yolodani. Miji jowapegwe najali kumi na sita hamwe na vijiji vyake.
JOS 19:23 Awo ndo uhalizi wowapegwe wanhu wa nhanzi ya Isakali kota vyoziwele ng'holo za hewo, miji ajo hamwe na vijiji vyake.
JOS 19:24 Simbi ya kahano naigwila kwa wanhu wa nhanzi ya Asheli, kota vyoziwele ng'holo za hewo.
JOS 19:25 Honhu ha isi ya hewo nahali na miji ja Helikati na Hali na Beteni na Akishafi
JOS 19:26 na Alameleki na Amadi na Mishali. Kwa ubanzi wa kolizinjilaga isanya, mbaka nauting'hana na Kalimeli na Shiholi-libinati.
JOS 19:27 Hamba nauhinduka kuluta kolilawilaga isanya kuluta Beti-dagoni kouting'hane na Sebuluni na ibindi lya Yifitaheli. Kulawa aho naulutilila kasikazini mbaka Beti-emeki na Neieli na kulutilila kuza kasikazini mbaka Kabuli
JOS 19:28 na Abidoni na Lehobu na Hamoni na Kana mbaka Sidoni Ng'hulu.
JOS 19:29 Aho, mbaka nauhinduka kuluta Lama na kufichila kuli muji wa Tilo uwele na lugagala. Hamba nauhinduka kuluta Hosa na kumalila kuli bahali ya Mediteleniyani. Miji jiyage ndo Mahalabu na Akisibu
JOS 19:30 na Uma na Afeki na Lehobu. Miji jeng'ha jowapegwe najali makumi meli na meli hamwe na vijiji vyake.
JOS 19:31 Awo ndo uhalizi wowapegwe wanhu wa nhanzi ya Asheli kota vyoziwele ng'holo za hewo, miji ajo hamwe na vijiji vyake.
JOS 19:32 Simbi ya sita naigwila wanhu wa nhanzi ya Nafutali, kota vyoziwele ng'holo za hewo.
JOS 19:33 Mbaka wawo nawaluchila Helefu kuli mwaloni wa Saananimu, naukolela Adami-nekebu na Yabineeli mbaka Lakumu na kumalila kuli lwanda lwa Yolodani.
JOS 19:34 Kulawa aho mbaka nauluta kolizinjilaga isanya kuluta Asinoti-taboli, kulawila ako nauluta Hukoki na kiting'hana na ubanzi wa kusini wa honhu ha nhanzi ya Sebuluni, kulawa aho uting'hana na nhanzi ya Asheli ubanzi wa kolizinjilaga isanya. Kwa ubanzi wa kolilawilaga isanya mbaka wokwinjilila hali lwanda lwa Yolodani.
JOS 19:35 Miji ja hewo jiwele na lugagala ndo Sidimu na Seli na Hamati na Lakati na Kineleti
JOS 19:36 na Adama na Lama na Hasoli
JOS 19:37 na Kedeshi na Edileyi na Eni-hasoli
JOS 19:38 na Yiloni na Migidali-eli na Holemu na Beti-anati na Beti-shemeshi. Miji jeng'ha jowapegwe najali kumi na tisa hamwe na vijiji vyake.
JOS 19:39 Awo ndo uhalizi wowapegwe wanhu wa nhanzi ya Nafutali kota vyoziwele ng'holo za hewo, miji ajo hamwe na vijiji vyake.
JOS 19:40 Simbi ya saba naigwila kwa wanhu wa nhanzi ya Dani, kota vyoziwele ng'holo za hewo.
JOS 19:41 Honhu ha isi ya hewo nahali na miji ja Sola na Eshitaoli na Ili-shemeshi
JOS 19:42 na Shaalabini na Aiyaloni na Yitila
JOS 19:43 na Eloni na Timuna na Ekiloni
JOS 19:44 na Eliteke na Gibetoni na Baalati
JOS 19:45 na Yehudi na Bene-belaki na Gati-limoni
JOS 19:46 na Me-yalikoni na Lakoni na isi iwele habehi na Yopa.
JOS 19:47 Wanhu wa nhanzi ya Dani vyowajilize isi ya hewo, nawaluta kuihola isi ya Leshemu. Nawawasumya na kuiboka vyowawakopole wanhu wa aho weng'ha. Vyowaubochile nawagalusa itagwa lya muji awo, uwa Dani, itagwa lyoliwele lya sekulu wa hewo Dani.
JOS 19:48 Awo ndo uhalizi wowapegwe wanhu wa nhanzi ya Dani kota vyoziwele ng'holo za hewo, muji awo hamwe na vijiji vyake.
JOS 19:49 Vyowamalile kigawila honhu heng'ha ha isi kota uhalizi, Waisilaeli nawamha Yoshua, mwana wa Nuni, honhu ha heye hagati ha hewo.
JOS 19:50 Kota vyoyalajize Mkulu Nguluwi, nawamha muji uwele nakauhagula heye yuye, mina Timunati-sela, uwele nawali kuli isi ya vidunda vya Efulaimu. Na heye Yoshua nakauzenga kahi muji awo na kikala amo.
JOS 19:51 Lelo mtambika Eleasali na Yoshua, mwana wa Nuni, hamwe na vilongozi wa ivyazi lya nhanzi za Waisilaeli, nawagawa honhu aho kwa kutowa simbi hali Mkulu Nguluwi hali lwizi lwa ihema lya Nguluwi ako Shilo. Lelo naweneza kigawila isi.
JOS 20:1 Hamba Mkulu Nguluwi, nakamlajiza Yoshua
JOS 20:2 yawalonjele Waisilaeli hino, “Mihagulile miji jiwele munhu yoweza kubilimila, miji jiwele nandimlonjela Musa yakulonjele.
JOS 20:3 Munhu yoneche wone yamkopole munhu ne kunuwila koweza kubilimila kuli muji woneche, ahyo koluta ako kwa chiwalo cha kumbilima yula munhu yalingugana kuhilula chibida.
JOS 20:4 Yakopole kobilimila kuli muji woneche na kwima hali lwizi lwa muji na kuwalonjela wasekulu wa muji awo nongwa ya heye. Wasekulu wombochela na kumha honhu ha kikala hamwe na hewo.
JOS 20:5 Wone yula munhu yalingugana kuhilula chibida komuwinza mbaka kuli muji awo, wasekulu wa muji awo hawomlavya munhu ayo yakopole kwa yula yalingugana kuhilula chibida kwa vila hamkopole myage kwa kunuwila kwa vila nayali hamzudile heye aho hamwande.
JOS 20:6 Mkopolaji kolutilila kikala amo mbaka aho hoyotagusigwa hali wanhu na kahi mbaka aho yula mkulu wa mtambika yawele yolongoza mhela awo hoyobagama. Kulawa aho munhu ayo koweza kuhiluka kaye kwa heye kuli muji wula woyalawile.”
JOS 20:7 Lelo kwa chiwalo acho, nawajibagula miji ja Kedeshi ako Galilaya kuluta kuli vidunda vya Nafutali na Shekemu kuli vidunda vya Efulaimu na Kiliati-aliba, mina ndo Hebuloni kuli isi ya vidunda vya Yuda.
JOS 20:8 Kumwambu mwa lwanda lwa Yolodani, kolilawilaga isanya mwa muji wa Yeliko nawauhagula muji wa Beseli uwele kuli chiwala kuli ibalalika, muji awo nawali ndo honhu ha nhanzi ya Lubeni. Kahi nawahagula Lamoti ako Gileadi kuwele na muji wa nhanzi ya Gadi na Golani ako Bashani kuli honhu ha nhanzi ya Manase.
JOS 20:9 Aji ndo miji jibaguligwe kwa chiwalo cha wanhu weng'ha wa Isilaeli na wajenzi wowawele wochikala hali hewo, leka wone munhu yoneche yomkopola myage ne kunuwila, wone yabilimile ako yaleche kukopoligwa na yalinguhilula chibida, mbaka aho hoyotagusigwa hali chilundo cha wanhu muji awo.
JOS 21:1 Vyowawele ako Shilo kuli isi ya Kanaani, vilongozi wa ng'holo za Walawi nawawalutila mtambika Eleasali na Yoshua mwana wa Nuni na vilongozi wa wanhu wa nhanzi zeng'ha za Waisilaeli,
JOS 21:2 nawawalonjela, “Mkulu Nguluwi nakamlonjela Musa kota hetwe tupegwe miji ja kikala na honhu ha kudimila ming'holo na misenga ja hetwe.”
JOS 21:3 Lelo kwa malajizo ga Mkulu Nguluwi, Waisilaeli nawahagula kulawa kuli honhu ha isi, miji na honhu ha kudimila ming'holo na misenga ja hewo, nawawapa Walawi hawe uhalizi wa hewo.
JOS 21:4 Simbi ya mwaluko naiwagwila wanhu wa ng'holo za Kohati. Hali hewo, walelwa wa mtambika Aluni nawapegwa kwa kutowa simbi, miji jiwele hali honhu ha nhanzi ya Yuda na Simeoni na Benjamini. Miji jeng'ha jowapegwe najali kumi na jidatu.
JOS 21:5 Wanhu wa ng'holo za Kohati wowasigale nawapegwa kwa kutowa simbi miji kumi jiwele hali honhu ha nhanzi ya Efulaimu na Dani na kuli nusu ya honhu ha nhanzi ya Manase.
JOS 21:6 Wanhu wa ng'holo za Gelishoni nawapegwa kwa kutowa simbi miji kumi na jidatu kuli honhu ha nhanzi ya Isakali na Asheli na Nafutali na kuli nusu ya honhu ha nhanzi ya Manase ako Bashani.
JOS 21:7 Wanhu wa ng'holo za Melali nawapegwa miji kumi na mili kuli honhu ha nhanzi ya Lubeni na Gadi na Sebuluni.
JOS 21:8 Waisilaeli nawawapa Walawi miji ajo hamwe na honhu ha kudimila ming'holo na misenga ja hewo kwa kutowa simbi, kota Mkulu Nguluwi vyoyamlajize Musa.
JOS 21:9 Aga ndo matagwa ga miji kulawila kuli honhu ha nhanzi ya Yuda na Simeoni ndo nailavigwe
JOS 21:10 kwa walelwa wa mtambika Aluni, wawele wanhu wa ng'holo za Kohati, yawele nayali wa nhanzi ya Lawi. Honhu ha hewo nawapegwa aho mwaluko kwa vila simbi ya hewo naiwagwila aho mwaluko.
JOS 21:11 Nawapegwa Kiliati-aliba, mina ndo Hebuloni. Aliba nayali mhaza wa Anaki kuli isi ya vidunda vya Yuda, hamwe na honhu ha kudimila.
JOS 21:12 Ila migunda ja muji awo hamwe na vijiji vizungulute, nayali yapegwe Kalebu mwana wa Yefune viwe vya heye.
JOS 21:13 Hamba nakawapa walelwa wa mtambika Aluni muji wa Hebuloni na honhu hake ha kudimila, muji awo nawali kahi ubaguligwe kuwa muji wa kubilimila, nawawapa kahi mji wa Libuna hamwe na honhu hake ha kudimila
JOS 21:14 na Yatili hamwe na honhu hake ha kudimila na Eshitemoa hamwe na honhu hake ha kudimila
JOS 21:15 na Holoni hamwe na honhu hake ha kudimila na Debili hamwe na honhu hake ha kudimila
JOS 21:16 na Aini hamwe na honhu hake ha kudimila na Yuta hamwe na honhu hake ha kudimila na Beti-shemeshi hamwe na honhu hake ha kudimila. Miji jeng'ha ndo tisa, jiwele kuli nhanzi azo mbili.
JOS 21:17 Kuli honhu ha nhanzi ya Benjamini nawapegwa miji jiyage, jiwele ndo Gibeoni na honhu ha kudimila na Geba hamwe na honhu ha kudimila
JOS 21:18 na Anatoti hamwe na honhu ha kudimila na Alimoni hamwe na honhu ha kudimila. Miji jeng'ha jowapegwe, najali jine.
JOS 21:19 Miji jeng'ha ja walelwa wa Aluni wowawele watambika, najali kumi na jidatu hamwe na honhu ha kudimila.
JOS 21:20 Wanhu wa ng'holo za Kohati wasigale, wawele kahi wanhu wa nhanzi ya Lawi, nawapegwa miji kuli honhu ha nhanzi ya Efulaimu.
JOS 21:21 Nawapegwa Shekemu, muji wa kubilimila hamwe na honhu hake ha kudimila kuli isi ya vidunda vya Efulaimu na Geseli hamwe na honhu hake ha kudimila
JOS 21:22 na Kibisaimu hamwe na honhu hake ha kudimila na Beti-holoni hamwe na honhu hake ha kudimila. Miji jeng'ha jowapegwe, najali jine.
JOS 21:23 Kuli honhu ha nhanzi ya Dani, nawapegwa Eliteke hamwe na honhu hake ha kudimila na Gibetoni hamwe na honhu hake ha kudimila
JOS 21:24 na Aiyaloni hamwe na honhu hake ha kudimila na Gati-limoni hamwe na honhu hake ha kudimila. Miji jeng'ha jowapegwe, najali jine.
JOS 21:25 Kuli nusu ha honhu ha nhanzi ya Manase, nawapegwa Taanaki hamwe na honhu hake ha kudimila na Gati-limoni hamwe na honhu hake ha kudimila. Miji jeng'ha jowapegwe, najali mili.
JOS 21:26 Lelo miji jowapegwe wanhu wa Kohati wasigale najali kumi hamwe na honhu ha kudimila.
JOS 21:27 Kwa Wagelishoni kahi, lukolo lumwe lwa Walawi, nalupegwa miji mili kuli honhu ha nusu ya nhanzi ya Manase, muji wa Golani, ako Bashani, muji wa kubilimila hamwe na honhu hake ha kudimila na Beeshitela hamwe na honhu hake ha kudimila.
JOS 21:28 Kuli honhu ha nhanzi ya Isakali, nawapegwa Kishioni hamwe na honhu hake ha kudimila na Dabelati hamwe na honhu hake ha kudimila
JOS 21:29 na Yalimuti hamwe na honhu hake ha kudimila na Eni-ganimu hamwe na honhu hake ha kudimila. Miji jeng'ha jowapegwe, najali jine.
JOS 21:30 Kuli honhu ha nhanzi ya Asheli, nawapegwa Mishali hamwe na honhu hake ha kudimila na Abidoni hamwe na honhu hake ha kudimila
JOS 21:31 na Helikati hamwe na honhu hake ha kudimila na Lehobu hamwe na honhu hake ha kudimila. Miji jeng'ha jowapegwe, najali jine.
JOS 21:32 Kuli honhu ha nhanzi ya Nafutali nawapegwa Kedeshi, muji wa kubilimila ako Galilaya, hamwe na honhu hake ha kudimila na Hamoti-doli hamwe na honhu hake ha kudimila na Kalitani hamwe na honhu hake ha kudimila. Miji jeng'ha, najali jidatu.
JOS 21:33 Miji jeng'ha ja ng'holo za Gelishoni, najali kumi na jidatu hamwe na honhu ha kudimila.
JOS 21:34 Walawi wayage wasigale, wawele ndo walelwa wa Melali, nawapegwa miji kuli honhu ha nhanzi ya Sebuluni. Najo ndo Yokineamu hamwe na honhu hake ha kudimila na Kalita hamwe na honhu hake ha kudimila
JOS 21:35 na Dimina hamwe na honhu hake ha kudimila na Nahalali hamwe na honhu hake ha kudimila. Miji jeng'ha najali jine.
JOS 21:36 Kuli honhu ha nhanzi ya Lubeni, nawapegwa Beseli hamwe na honhu hake ha kudimila na Yahasa hamwe na honhu hake ha kudimila
JOS 21:37 na Kedemoti hamwe na honhu hake ha kudimila na Mefaati hamwe na honhu hake ha kudimila. Miji jeng'ha najali jine.
JOS 21:38 Kuli honhu ha nhanzi ya Gadi nawapegwa, Lamoti kuli Gileadi, awo ndo muji wa kubilimila, hamwe na honhu hake ha kudimila na Mahanaimu hamwe na honhu hake ha kudimila
JOS 21:39 na Heshiboni hamwe na honhu hake ha kudimila na Yaseli hamwe na honhu hake ha kudimila. Miji jeng'ha najali jine.
JOS 21:40 Miji jeng'ha jowapegwe walelwa wa Melali, wawele ndo ivyazi lya Walawi lisigale, najali kumi na mbili.
JOS 21:41 Miji jeng'ha jiwele Walawi nawapegwa kuli honhu ha Waisilaeli, najali makumi gane na nane hamwe na honhu ha kudimila.
JOS 21:42 Chila muji umwe hali miji aji, nauzungulutwa na honhu hake ha kudimila.
JOS 21:43 Lelo Mkulu Nguluwi, nakawapa Waisilaeli isi yeng'ha iwele yelahile na wasekulu wa hewo. Nawaihola na kikala amo.
JOS 21:44 Mkulu Nguluwi nakawadita wekale goya chila honhu muisi, kota vyoyawalahile wasekulu wa hewo. Haduhu mng'honyo yoneche yawezile kuwahejelela kwa vila Mkulu Nguluwi nayali yawawichile wang'honyo awo mmoko mwa hewo.
JOS 21:45 Haduhu ne ilagano lyoneche linojile liwele Mkulu Nguluwi nakawalonjela Waisilaeli, hamba haliditigwe. Goyalonjile geng'ha nagenela.
JOS 22:1 Lelo Yoshua nakawachema wanhu wa nhanzi ya Lubeni na nhanzi ya Gadi na nusu ya wanhu wa nhanzi ya Manase,
JOS 22:2 nakawalonjela, “Hemwe namuwinza gala geng'ha gawele Musa, chitumagwa wa Mkulu Nguluwi, vyoyawalonjeleni na namhulichiza malajizo gondiwalonjeleni.
JOS 22:3 Hamuwalechile wang'holozenu mhela awo weng'ha winji mbaka lehano, ila namuwinza goya ilajizo lya Mkulu Nguluwi, Nguluwi wa hemwe.
JOS 22:4 Lelo Mkulu Nguluwi, Nguluwi wa hemwe nakawadita wang'holozenu wekale goya, kota vila vyoyalonjile, lelo mhiluche kwa hemwe kuli isi iwele nampegwa na Musa, chitumagwa wa Mkulu Nguluwi, iwe ya hemwe, kumwambu kwa lwanda lwa Yolodani.
JOS 22:5 Muwe milolela kuli mizilo na malajizo gawele Musa, chitumagwa wa Mkulu Nguluwi, nakawalajiza kumgana Mkulu Nguluwi, Nguluwi wa hemwe, muwinze choyogana na kibata choyalajize heye na mikale hamwe na heye na kumkolela mijito kwa nhumbula yeng'ha na muhe weng'ha.”
JOS 22:6 Aho ndo Yoshua nakawatambichiza na kuwalaga leka walute kaye kwa hewo.
JOS 22:7 Kwa nusu ya nhanzi ya Manase Musa nayali yawapele honhu kuli Bashani na yila nusu iyage ya nhanzi ayo, Yoshua nakawapa honhu ubanzi wa kolizinjilaga isanya mwa Yolodani, hamwe na wang'holozawo. Yoshua nakawalaga leka walute kaye, hamba nakawatambichiza,
JOS 22:8 yolonga, “Mhiluche haluga ha hemwe na lufufu lwa hemwe lwinji, mina ndo vilundo vikulu vya migongolo, kuno muwele na sendi na zahabu na shaba na chuma na kahi winji wa nguwo, namwe mkegawile na wang'holozenu avyo vinhu viholigwe kulawa kwa wang'honyo wa hemwe.”
JOS 22:9 Lelo wanhu wa Lubeni na Gadi na nusu ya nhanzi ya Manase naweleka na wanhu wa nhanzi ziyage za Isilaeli ako Shilo, kuli isi ya Kanaani, nawahiluka kwa hewo kuli isi ya Gileadi, isi ya hewo waiholile kwa kulajizwa na Mkulu Nguluwi kota vyoyamlonjele Musa.
JOS 22:10 Lowafichile kuli lwanda lwa Yolodani wawele wang'hali kuli isi ya Kanaani, nhanzi ya Gadi na nhanzi ya Lubeni na nusu ya nhanzi ya Manase nazizenga chinhu kota honhu ha kulavila nhambiko hakulu ng'hatu habehi na lwanda alo.
JOS 22:11 Lelo mbuli naiwafichila wanhu wa nhanzi ziyage za Isilaeli kota nhanzi ya Lubeni na nhanzi ya Gadi na nusu ya nhanzi ya Manase nazali zizenjile honhu ha kulavila nhambiko habehi na lwanda lwa Yolodani kuli isi ya Kanaani.
JOS 22:12 Lowahuliche ahyo, Waisilaeli weng'ha nawekungajiza ako Shilo kuza kitowa ngondo na hewo.
JOS 22:13 Lelo wanhu wa Isilaeli nawamlajiza Finehasi, mwana wa mtambika Eleasali, ako Gileadi kwa nhanzi ya Lubeni na nhanzi ya Gadi na nusu ya nhanzi ya Manase.
JOS 22:14 Finehasi nakoka hamwe na wang'hangala kumi Waisilaeli, chila yumwe yawele mng'hangala wa ivyazi kuli nhanzi ya heye.
JOS 22:15 Nawo nawawalutila wanhu wa nhanzi ya Lubeni na nhanzi ya Gadi na nusu ya nhanzi ya Manase ako Gileadi, nawawalonjela,
JOS 22:16 “Wanhu weng'ha wa Mkulu Nguluwi wanguuza hino, ‘Ndo udesi wachi awo womlingumditila Nguluwi wa Isilaeli? Lekachoni mumbelenhuka Mkulu Nguluwi kwa kuzenga honhu ha kulavila nhambiko? Namleka kumuwinza!
JOS 22:17 Ndaze, gehile gotuditile Waisilaeli weng'ha ako Peoli hagatosile? Mbaka lehano tung'hali kiyeliza kwa chiwalo cha gehile ago. Kwa gehile ago, magazo nagoya hali wanhu wa Mkulu Nguluwi.
JOS 22:18 Lekachoni lelo namleka kumuwinza Mkulu Nguluwi? Wone mumleme Mkulu Nguluwi lehano, mitondo kowakalalila ng'hatu wanhu weng'ha wa Isilaeli.
JOS 22:19 Lelo wone isi ya hemwe ndo ikokomoche, muye kuli isi ya Mkulu Nguluwi kuwele ihema lya heye lya kuko na kiholela honhu ako hamwe na hetwe, ila mleche kumbelenhuka Mkulu Nguluwi na kutudita hetwe tweng'ha tumbelenhuche kwa kizenjela honhu ha kulavila nhambiko hali vinji na hala honhu ha kulavila nhambiko ha Mkulu Nguluwi, Nguluwi wa hetwe.
JOS 22:20 Ndaze, Akani, mwana wa Sela vyoyawifile kuli vinhu vilavigwe leka vidumigwe, ng'halazi ya Mkulu Nguluwi haiwafichile wanhu weng'ha wa Isilaeli? Akani kahi habagame hela yuye yaliyeka kwa chiwalo cha wihe wa heye.’ ”
JOS 22:21 Aho wanhu wa nhanzi ya Lubeni na nhanzi ya Gadi na nusu ya nhanzi ya Manase nawawedichila vilongozi wa ivyazi lya Isilaeli,
JOS 22:22 “Nguluwi wa milungu ndo Mkulu Nguluwi! Nguluwi wa milungu ndo Mkulu Nguluwi! Heye kanguvizela lekachoni tuditile ahyo. Waisilaeli weng'ha wovizela kahi! Wone natumbelenhuka ama kuleka kumhulichiza Mkulu Nguluwi, hemwe mleche kutulohola lehano.
JOS 22:23 Wone tumbelenhuche Mkulu Nguluwi kwa kuzenga honhu ha hetwe ha kulavila nhambiko baha, leka tulavye nhambiko za kulakaza ama nhambiko za nyhule ama nhambiko za kikala goya, lelo Mkulu Nguluwi yahiluse chibida.
JOS 22:24 Ila wone haiwele ahyo. Natuzenga kwa kudumba kota hanji mazuwa galinguya wana wa hemwe wowalonjela wana wa hetwe, ‘Hemwe mwandaze na Mkulu Nguluwi, Nguluwi wa Isilaeli?
JOS 22:25 Hambe mone kota Mkulu Nguluwi nakawika lwanda lwa Yolodani kota mbaka hagati ha hemwe na hetwe? Hemwe nhanzi ya Lubeni na nhanzi ya Gadi mwahela chinhu choneche kwa Mkulu Nguluwi.’ Ahyo hamba wana wa hemwe wahawezile kwambuza wana wa hetwe waleche kumfugamila Mkulu Nguluwi.
JOS 22:26 Ndo mina natwamula kuzenga honhu kota honhu ha kulavila nhambiko, ila haiwele kwa chiwalo cha kulavila nhambiko ya kulakaza ama nhambiko ziyage mchanya mwake,
JOS 22:27 ila natugana honhu aha hawe ndo ulolezi hali hetwe na hemwe na walelwa wa hetwe walinguya kota hetwe twanayo hachi ya kumfugamila Mkulu Nguluwi kwa nhambiko za kulakaza na ndolendole za hetwe na nhambiko za kikala goya, leka wana wa hemwe waleche kuwalonjela wana wa hetwe kota wahela chinhu choneche kwa Mkulu Nguluwi.
JOS 22:28 Kahi natijesa kota wone kuwe na mbuli kota ayo yolonjigwa hali hetwe ama ilinguwalapa awa walelwa na hetwe kuli mazuwa galinguya, tolonga, ‘Mlole honhu ha kulavila nhambiko hawele wasekulu wa hetwe nawahazenga, halingiwhana na honhu ha kulavila nhambiko ha Mkulu Nguluwi. Aho hakuwele kwa chiwalo cha kulavila nhambiko ya kulakazwa ama nhambiko ziyage mchanya mwake, ila ndo kota ulolezi hali hetwe na hemwe.’
JOS 22:29 Hetwe natwali tulihela majesa ga kumbelenhuka Mkulu Nguluwi ne hado na kumleka kwa kuzenga honhu ha kulavila nhambiko kwa nhambiko za kulakazwa ama nhambiko za nyhule ama nhambiko ziyage. Hambe tugane kulavila nhambiko honhu hayage ila mchanya mwa honhu ha kulavila nhambiko ha Mkulu Nguluwi, Nguluwi wa hetwe hawele kumwando mwa ihema lya heye.”
JOS 22:30 Mtambika Finehasi na vilongozi wa Waisilaeli weng'ha wawele hamwe na heye, vyowahuliche ulonzi awo wa wanhu wa nhanzi ya Lubeni na nhanzi ya Gadi na nusu ya nhanzi ya Manase, nawakunda.
JOS 22:31 Finehasi mwana wa mtambika Eleasali, nakawalonjela, “Lehano tuvizela kota Mkulu Nguluwi ka hamwe na hetwe mina hamumbelenhuche Nguluwi. Lelo namuwalohola Waisilaeli waleche kugazigwa na Mkulu Nguluwi.”
JOS 22:32 Lelo Finehasi, mwana wa mtambika Eleasali hamwe na vilongozi wayage nawawalaga wanhu wa nhanzi ya Lubeni na nhanzi ya Gadi, nawoka muisi ya Gileadi. Nawahiluka Kanaani kwa Waisilaeli na kuwalonjela mbuli azo.
JOS 22:33 Ulonzi awo nauwasangalaza Waisilaeli, nawamtogola Mkulu Nguluwi na kuleka mbuli ya hewo ya kitowa ngondo kwa kuiwifya ng'hatu isi iwele ya nhanzi ya Lubeni na nhanzi ya Gadi.
JOS 22:34 Wanhu wa nhanzi ya Lubeni na nhanzi ya Gadi nawahachema hala honhu ha kulavila nhambiko ndo “Ulolezi.” Ahyo nawalonga, “Honhu aha ha kulavila nhambiko ndo ulolezi wa hetwe kota Mkulu Nguluwi ndo Nguluwi.”
JOS 23:1 Vyojipulute mihela minji, Mkulu Nguluwi nakawapa Waisilaeli kikala goya kulawa kwa wang'honyo wa hewo nzingo zeng'ha. Mhela awo Yoshua nayali sekulu wa miyaka minji.
JOS 23:2 Yoshua nakawachema Waisilaeli weng'ha hamwe na wasekulu na vilongozi na walamuzi na wang'hangala wa hewo, nakawalonjela, “Sambi heni ndiwa sekulu wa miyaka minji.
JOS 23:3 Hemwe mona mbuli zeng'ha ziwele Mkulu Nguluwi, Nguluwi wa hemwe, zoyawaditile wanhu wa isi azi zeng'ha kwa chiwalo cha hemwe. Mkulu Nguluwi, Nguluwi wa hemwe ndo yawatowanile.
JOS 23:4 Isi zeng'ha ziponile kuzisumya na zila ndizisumile ndiwapani ziwe uhalizi wa nhanzi za hemwe, kulawa Yolodani mbaka kuli bahali ya Mediteleniyani, ubanzi wa kolizinjilaga isanya.
JOS 23:5 Mkulu Nguluwi, Nguluwi wa hemwe, kowosa hali hemwe na kuwawinga ng'hatu, namwe moihola isi ya hewo kota vila Mkulu Nguluwi, Nguluwi wa hemwe, vyoyawelahile.
JOS 23:6 Ahyo, muwe mwimile nzinzili ng'hatu kuli kibatilila geng'ha gandichigwe kuli chitabu cha malajizo ga Musa, mleche kugaleka ne hado.
JOS 23:7 Mleche kihanza na wanhu wa isi azo wasigale hali hemwe. Mleche kujichema milungu ja hewo na mleche kilaha kwa matagwa ga milungu ja hewo na mleche kujikolela mijito na kujifugamila.
JOS 23:8 Ila mumibate Mkulu Nguluwi, Nguluwi wa hemwe kota vyomditile mbaka lehano.
JOS 23:9 Mina Mkulu Nguluwi nakaziwinga hali hemwe isi ng'hulu ziwele na mong'ho, kuduhuli munhu yoneche yoweza kuwalemeza hemwe mbaka lehano.
JOS 23:10 Munhu wa hemwe yumwe hela koweza kuwabilimisa wang'honyo elufu, kwa vila Mkulu Nguluwi, Nguluwi wa hemwe kanguwatowanila hemwe kota vyoyelahile.
JOS 23:11 Lelo muwe milolela ng'hatu kuli kumgana Mkulu Nguluwi, Nguluwi wa hemwe.
JOS 23:12 Mina, wone mumleche Nguluwi na kihanza na wanhu wa isi azo wasigale hali hemwe, wone mohesa kwa hewo na hewo wohesa kwa hemwe,
JOS 23:13 mvizele kota Mkulu Nguluwi, Nguluwi wa hemwe, holutilila hebu kuwawinga wanhu wa isi azo hali hemwe, ila gowa ngwamo na idiwa kwa hemwe. Wowa kwa hemwe kota ng'weso ya kuwazapilani na miwa ja kuwahoma mmeho mbaka aho homuwifigwa kulawa kuli isi ayi inojile iwele Mkulu Nguluwi, Nguluwi wa hemwe, kawapani.
JOS 23:14 “Sambi, mhela wa heni wa kubagama kota vyoiwele kwa wanhu wa isi yeng'ha, wa habehi. Ila hemwe mweng'ha mvizela ng'hatu mnhumbula za hemwe na kuli muhe wa hemwe kota kuli kulagana kweng'ha kunojile kuwele Mkulu Nguluwi, Nguluwi wa hemwe nakawalahila, kuduhuli ne limwe liwele halyenele. Geng'ha genela kota vila vyoyelahile.
JOS 23:15 Ila wone kota vila Mkulu Nguluwi, Nguluwi wa hemwe, vyoyeneze kulagana kweng'ha kunojile koyawalonjele, baho du koweza kuwegalilani gehile geng'ha mbaka yawadumye weng'ha kulawa kuli isi ayi inojile yawapele.
JOS 23:16 Wone mobena ilagano lya Mkulu Nguluwi, Nguluwi wa hemwe, lyoyawalajize mlibate, wone moluta kujikolela mijito milungu jinji na kujifugamila, lelo ng'halazi ya Mkulu Nguluwi yokwaka hali hemwe, namwe modumigwa himahima kulawa kuli isi ayi inojile yawapele.”
JOS 24:1 Hamba Yoshua nakakungajiza nhanzi zeng'ha za Isilaeli ako Shekemu. Nakawachema wasekulu na vilongozi na walamuzi na wang'hangala wa Isilaeli, nawo nawoya hali Nguluwi.
JOS 24:2 Yoshua nakawalonjela wanhu weng'ha, “Mkulu Nguluwi, Nguluwi wa Isilaeli, nakalonga hino, ‘Aho katali, wasekulu wa hemwe nawekala kumwambu mwa lwanda lwa Eyufulate, nawajifugamila milungu jiyage. Sekulu yumwe nayali Tela, mhaza wa Abulahamu na Naholi.
JOS 24:3 Heni Nguluwi ndimusa sekulu wa hemwe Abulahamu kulawa ako kumwambu mwa lwanda lwa Eyufulate na kumigala hano kuli Kanaani yeng'ha na ndimha walelwa wenji. Ndimha Isaka,
JOS 24:4 naye Isaka ndimha Yakobo na Esau. Ndimha Esau isi ya vidunda vya Seili iwe ya heye, ila Yakobo na wanage nawaluta Misili.
JOS 24:5 Hamba nandiwalajiza Musa na Aluni, nandiigalila magazo isi ya Misili, hamba ndiwalavyani hemwe kuli isi ayo.
JOS 24:6 Nandiwalavya wasekulu wa hemwe kulawa Misili na kuwegala mbaka kuli Bahali ya Shamu. Wamisili nawawawinza wawele na mituka na wamizi wawele wakwinile falasi.
JOS 24:7 Hemwe Waisilaeli vyomndilile heni Mkulu Nguluwi, nandiwegalila jiza hagati ha hemwe na Wamisili na kuidita bahali iwagubiche Wamisili. Hemwe mwemwe namiyonela gala gondiwaditile Wamisili. Namikala kugunuche kwa mhela winji.
JOS 24:8 Hamba nandiwalongoza mbaka kuli isi ya Waamoli wawele wekale ubanzi wa kolilawilaga isanya mwa lwanda lwa Yolodani. Nawetowa na hemwe, ila heni nandiwapani ludali lwa kuwasumya hewo, namuwadumya na kuihola isi ya hewo.
JOS 24:9 Naye Balaki mwana wa Sipoli, mndewa wa Moabu, nakoya na kuwatowa Waisilaeli. Nakamlalika Balaamu mwana wa Beoli yoye kuwapanjilani hemwe,
JOS 24:10 ila heni simhuluchize Balaamu, naimgana heye yawatambichize hemwe, nani ndiwalohola hemwe mmoko mwa Balaki.
JOS 24:11 Hamba namloka lwanda lwa Yolodani, namfika Yeliko. Wenyeng'haye wa Yeliko nawetowa na hemwe, hihyo du na Waamoli na Wapelisi na Wakanaani na Wahiti na Wagiligashi na Wahivi na Wayebusi. Heni ndiwawika awo mmoko mwa hemwe.
JOS 24:12 Hamba nandiwadita wandewa weli wa Waamoli wadumbe leka wawinjigwe hali hemwe. Hamditile ahyo kwa kugana mipanga ne misale ja hemwe.
JOS 24:13 Nandiwapani migunda jiwele hamlimile na miji johamzenjile jiwele sambi mwangikala na kulya mafuza ga mzabibu na mizeituni johamnyalile.’
JOS 24:14 “Lelo mumdumbe na kumkolela mijito Mkulu Nguluwi kwa nhumbula igoloche na kwa kukundigwa. Mjileche ng'hatu milungu jila jiwele wasekulu wa hemwe nawajifugamila kumwambu mwa lwanda lwa Eyufulate na kuli isi ya Misili. Mumkolele mijito Mkulu Nguluwi.
JOS 24:15 Wone hamganile kumkolela mijito Mkulu Nguluwi, lelo mhagule lehano baha ndo whaani yomumkolela mijito, kota ndo milungu jila jiwele wasekulu wa hemwe nawajikolela mijito kumwambu mwa lwanda lwa Eyufulate ama milungu ja Waamoli jiwele sambi mwangikala kuli isi ya hewo. Ila heni na ng'handa ya heni, tomkolela mijito Mkulu Nguluwi.”
JOS 24:16 Aho ndo wanhu nawamwidichila, “Hotuweza ng'oo kumleka Mkulu Nguluwi na kujifugamila milungu jiyage.
JOS 24:17 Mina, Mkulu Nguluwi, Nguluwi wa hetwe, ndo yatulavile hetwe hamwe na wasekulu wa hetwe kuli isi ya Misili kotuwele wapogozi, natugona kwa meho ga hetwe madito ga kububuwaza goyaditile. Nakatwamila kuli majendo ga hetwe geng'ha na hali wanhu weng'ha wawele natukola hali hewo.
JOS 24:18 Mkulu Nguluwi nakatusila wanhu weng'ha, wawele ndo Waamoli weng'ha wekale muisi. Ahyo, natwe tomkolela mijito Mkulu Nguluwi, mina ndo Nguluwi wa hetwe.”
JOS 24:19 Ila Yoshua nakawalonjela, “Hemwe hamuweza kumkolela mijito Mkulu Nguluwi, mina heye ndo Nguluwi yelile. Heye ndo Nguluwi yawele na fihi na howalechela nongwa na gehile ga hemwe.
JOS 24:20 Wone mumleche Mkulu Nguluwi na kujikolela mijito milungu ja chijenzi, kowagaza hemwe na kuwadumya ng'hatu hanga nakawaditila ganojile aga geng'ha.”
JOS 24:21 Wanhu nawamlonjela Yoshua, “Hebu! Hetwe tomkolela mijito Mkulu Nguluwi.”
JOS 24:22 Aho Yoshua nakawalonjela, “Hemwe ndo walolezi wa vinhu viwele mnhumbula za hemwe kota mhagula kumkolela mijito Mkulu Nguluwi.” Nawo nawamlonjela, “Hetwe twa walolezi.”
JOS 24:23 Yoshua nakawalonjela, “Lelo muse milungu ja chijenzi jomuwele najo, mumuwinze Mkulu Nguluwi, Nguluwi wa Isilaeli, kwa nhumbula za hemwe zeng'ha.”
JOS 24:24 Nawo nawamlonjela Yoshua, “Tomkolela mijito na kumhulichiza Mkulu Nguluwi, Nguluwi wa hetwe.”
JOS 24:25 Ahyo, Yoshua nakadita ilagano kwa chiwalo cha Waisilaeli ako Shekemu, nakawapa mizilo na malajizo ga kuwinza.
JOS 24:26 Yoshua nakagandika aga geng'ha kuli chitabu cha malajizo ga Nguluwi. Hamba nakahola iganga ikulu na kulimiza hasi ha igodi lya mwaloni habehi na honhu helile ha Mkulu Nguluwi.
JOS 24:27 Yoshua kahi nakawalonjela wanhu weng'ha, “Iganga alyo lyowa ulolezi wa hetwe, mina nalihulika ulonzi weng'ha uwele Mkulu Nguluwi nakatulonjela. Ahyo, lyowa ulolezi hali hemwe leka mleche kumlema Nguluwi wa hemwe.”
JOS 24:28 Hamba Yoshua nakawakundiza wanhu woche, na hewo nawoka chila yumwe kuli honhu ha heye ha uhalizi.
JOS 24:29 Vyozimalile mbuli azo, Yoshua, mwana wa Nuni, chitumagwa wa Mkulu Nguluwi, nakabagama yawele na miyaka miya imwe na kumi.
JOS 24:30 Na hewo nawamtila kuli chilaga kuli honhu hawele nayali yagawilwe hawe uhalizi wa heye, ako Timunati-sela, kuli chidunda cha Efulaimu, kasikazini mwa chidunda cha Gaashi.
JOS 24:31 Waisilaeli nawamkolela mijito Mkulu Nguluwi mhela weng'ha wa ukomu wa Yoshua na wasekulu wawele nawalongoza na heye nawalutilila kikala loyabagame Yoshua, wasekulu wawele waziwene kwa meho ga hewo mbuli zila Mkulu Nguluwi zoyawaditile Waisilaeli.
JOS 24:32 Mizeje ja Yusufu jiwele Waisilaeli nawali wajigale kulawa Misili, nawajitila ako Shekemu kuli honhu hawele Yakobo nayali yahagulile kulawa kwa wana wa Hamoli, mhaza wa heye Shekemu, kwa migwala miya imwe ja sendi. Honhu aho hawa uhalizi wa walelwa wa Yusufu.
JOS 24:33 Naye Eleasali, mwana wa Aluni, nakabagama na kutiligwa ako Gibeya, muji wonayali yapegwe mwanage Finehasi, kuli isi ya vidunda vya Efulaimu.
JDG 1:1 Hala loyabagame Yoshua, Waisilaeli nawamuuza Mkulu Nguluwi wolonga, “Nhanzi yachi yotoma kuluta kitowa na Wakanaani?”
JDG 1:2 Mkulu Nguluwi nakedichila, “Nhanzi ya Yuda yotoma kuluta. Lole, nandiiwika isi ayo kuli moko ga hewo.”
JDG 1:3 Aho, wanhu wa nhanzi ya Yuda nawawalonjela wang'holozawo wa nhanzi ya Simeoni, “Muche hamwe na hetwe kuli honhu hawichigwe kwa chiwalo cha hetwe, leka titowe na Wakanaani. Hamba natwe toluta hamwe na hemwe kuli honhu ha hemwe.” Lelo nhanzi ya Simeoni nailuta hamwe na hewo.
JDG 1:4 Nhanzi ya Yuda vyoilutile, Mkulu Nguluwi nakawawika Wakanaani na Wapelisi mmoko mwa hewo, nawo nawawasumya wanhu elufu kumi ako Beseki.
JDG 1:5 Nawamfika ayo mndewa Adoni-beseki ako Beseki, nawetowa na heye na kuwasumya Wakanaani na Wapelisi.
JDG 1:6 Ila mndewa Adoni-beseki nakabilima, nawo nawamuwinga na kumibata, hamba nawamdumula vidole vikuluwawo vya kuli magulu na kuli moko ga heye.
JDG 1:7 Mndewa Adoni-beseki nakalonga, “Wandewa makumi saba wowadumuligwe vidole vikuluwawo vya kuli moko na magulu ga hewo, nawalokota chilyo chisigale hasi ha chisaga cha heni. Kota vyonditile heni, Nguluwi nakanyhilulila hihyo.” Nawamhilika Yelusalemu na nakabagama kuko.
JDG 1:8 Hamba, wanhu wa nhanzi ya Yuda nawetowa na wanhu wa Yelusalemu na nawauhola muji awo. Nawawakopola wanhu wa muji awo kwa ipanga na kuulakaza muji awo kwa chiluli.
JDG 1:9 Hamba wanhu wa nhanzi ya Yuda nawedulika leka wetowe na Wakanaani wawele wochikala kuli isi iwele na vidunda na isi ya Negebu na isi ya vidunda vidodo vya kolizinjilaga isanya.
JDG 1:10 Hamba nhanzi ya Yuda naiwawinza Wakanaani wawele wochikala ako Hebuloni. Hebuloni ndo muji uwele aho hamwande nawali uchemigwa Kiliati-aliba. Nawo nawawasumya wanhu wa ng'holo za Sheshayi na Ahimani na Talimayi.
JDG 1:11 Hamba nawawatowa wala walingikala ako Debili, muji uwele hamwande nawali uchemigwa Kiliati-sefeli.
JDG 1:12 Kalebu nakalonga, “Heye yowatowa wanhu wa muji wa Kiliati-sefeli na kuuhola muji awo, ndomha mhinza wa heni Akisa, yawe mchewake.”
JDG 1:13 Naye Otinieli, mwana wa Kenasi, mdodowe Kalebu, nakautowa na kuuhola muji awo. Lelo Kalebu nakamha mhinza wa heye yachemigwe Akisa.
JDG 1:14 Akisa loyalutile kwa Otinieli nakamdedeza Otinieli yamlande mgunda mhaza wa heye, Kalebu. Yula mdala nakadulika kulawa kuli idogowi lya heye, Kalebu nakamuuza yula mdala, “Kwangugana choni?”
JDG 1:15 Yula mdala nakedichila, “Umhe heni utambichizo, kwa vila hegwe nakumbika heni kuli isi ya Negebu ilihela mazi, lelo ndangulanda umhe na nzasa za mazi kahi.” Lelo Kalebu nakamha zila nzasa za mazi za kuchanya na za hasi.
JDG 1:16 Walelwa wa yula Mkeni, mkweye Musa, nawaluta kuchanya kuli Yeliko, muji wa michikichi, hamwe na wanhu wa nhanzi ya Yuda na kwinjila kuli chiwala cha Yuda, chiwele ako kusini mwa Aladi. Nawo nawaluta kikala hamwe na wanhu awo.
JDG 1:17 Lelo wanhu wa nhanzi ya Yuda nawaluta hamwe na wang'holozawo, wanhu wa nhanzi ya Simeoni, nawawatowa Wakanaani wawele wochikala ako Sefati na kuuwifya ng'hatu muji awo. Muji awo sambi wanguchemigwa Holima.
JDG 1:18 Wanhu wa nhanzi ya Yuda kahi nawajihola miji ja Gasa na honhu hake na Ashikeloni na honhu hake na Ekiloni na honhu hake.
JDG 1:19 Mkulu Nguluwi nayali hamwe na wanhu wa nhanzi ya Yuda, nawo nawaihola isi ya vidunda, ila nawalemwela kuwawinga wala wowawele wochikala kuli ibalalika, kwa vila hewo nawali na mituka ja chuma.
JDG 1:20 Hamba, kota vyoyalajize Musa, Kalebu nakapegwa muji wa Hebuloni, naye nakaziwinga ng'holo zidatu za Anaki.
JDG 1:21 Ila wanhu wa nhanzi ya Benjamini hawawawinjile Wayebusi wowawele wochikala kuli muji wa Yelusalemu. Ahyo Wayebusi nawekala hamwe na wanhu wa Benjamini mgati mwa Yelusalemu mbaka lehano.
JDG 1:22 Lelo ng'handa ya Yusufu, iwele ndo nhanzi za Manase na Efulaimu, nailuta kuutowa muji wa Beteli, Mkulu Nguluwi nayali hamwe na hewo.
JDG 1:23 Nawawalajiza wanhu walute kuupugajiza muji wa Beteli, muji uwele hamwande nawali uchemigwa Lusu.
JDG 1:24 Wapugajizi awo nawamona munhu yolawa kuli muji awo wa Beteli, nawamlonjela, “Dedede, utulajile nzila ya kwinjila muji awu, natwe tokuditila ganojile.”
JDG 1:25 Lelo yula munhu nakawalajila nzila ya kwinjila kuli muji awo, nawo nawawakopola wanhu wa muji awo kwa ipanga, ila nawamleka yula munhu na wanhu wa ivyazi lya heye.
JDG 1:26 Munhu ayo nakaluta kuli isi ya Wahiti, nakazenga muji na nakauchema muji awo itagwa lilila la Lusu, itagwa lilinguchemigwa mbaka lehano.
JDG 1:27 Wanhu wa nhanzi ya Manase kahi hawawawinjile wenyeng'haye wa Beti-sheani na vijiji vyake ne wala wawele wochikala Taanaki na vijiji vyake ne wala wawele wochikala Doli na vijiji vyake ne wala wawele wochikala Ibuleamu na vijiji vyake ne wala wawele wochikala Megido na vijiji vyake, ila wala Wakanaani nawang'ang'anila kikala kuli miji ajo.
JDG 1:28 Waisilaeli lowawele na mong'ho, hawawawinjile hebu Wakanaani, ila nawawatumajiza kwa lupichi.
JDG 1:29 Wanhu wa nhanzi ya Efulaimu kahi hawawawinjile Wakanaani wowawele wochikala ako Geseli, ila Wakanaani nawalutilila kikala hali hewo.
JDG 1:30 Wanhu wa nhanzi ya Sebuluni nawo hawawawinjile wenyeng'haye wa Kitiloni ne wala wawele wochikala ako Nahalali, ila Wakanaani nawekala hali hewo nawatumajizwa kwa lupichi.
JDG 1:31 Wanhu wa nhanzi ya Asheli hawawawinjile wanhu wa miji ja Aka ne Sidoni ne Ahilabu ne Akisibu ne Heliba ne Afeka ne Lehobu,
JDG 1:32 ila Waasheli nawekala hali Wakanaani, wawele ndo wenyeng'haye wa isi, kwa vila hawawawinjile.
JDG 1:33 Wanhu wa nhanzi ya Nafutali hawawawinjile wanhu wa miji ja Beti-shemeshi ne Beti-anati, ila nawekala hali Wakanaani, wawele ndo wenyeng'haye wa isi. Ahyo wenyeng'haye wa Beti-shemeshi na Beti-anati nawawadita wakole mijito kwa lupichi.
JDG 1:34 Hamba, Waamoli nawawawinga wanhu wa nhanzi ya Dani walute kuli isi ya vidunda, kwa vila hawawalechile kuza kikala kuli ibalalika.
JDG 1:35 Waamoli nawalutilila kikala kuli chidunda cha Helesi na kuli Aiyaloni na kuli Shaalibimu, ila wanhu wa nhanzi za Efulaimu na Manase nawawalongoza na kuwadita wakole mijito kwa lupichi.
JDG 1:36 Mbaka wa Waamoli nawali kwaluchila kuli chiduliko cha Akilabimu kulutila Sela na mchanya mwake.
JDG 2:1 Hamba mhilisi wa Mkulu Nguluwi nakalawa Giligali na kuluta Bokimu, nakalonga, “Heni ndiwegala hemwe kulawa Misili na kuwenjiza mbaka kuli isi yondiwalahile wasekulu wa hemwe. Nandonga, ‘Mazuwa gose hambe ndilibene alyo ilagano lyondilagane na hemwe,
JDG 2:2 namwe mleche kudita ilagano lyoneche na wano wenyeng'haye wa isi ayi. Mbomole honhu ha hewo ha kulavila nhambiko.’ Ila hambe mnyhulichize heni. Lekachoni namdita aga?
JDG 2:3 Lelo kwa chiwalo acho, nani ndangulonga kota hambe ndiwawinje wenyeng'haye wa isi kulawa kwa hemwe, ila wowagaza hemwe na milungu ja hewo jowa midiwa kwa hemwe.”
JDG 2:4 Lelo ayo mhilisi wa Mkulu Nguluwi loyasindile kuwalonjela ago Waisilaeli weng'ha, wanhu nawaluka kulila kwa usungu.
JDG 2:5 Nawo nawahachema honhu hala Bokimu na kumlavila nhambiko Mkulu Nguluwi.
JDG 2:6 Lelo Yoshua loyawakundize wanhu walute, Waisilaeli nawaluta chila munhu kuli uhalizi wa heye, leka kuihola isi ayo.
JDG 2:7 Wanhu awo nawamkolela mijito Mkulu Nguluwi kuli mazuwa geng'ha ga Yoshua na mazuwa geng'ha gawele wasekulu nawalutilila kikala, loyabagame Yoshua, wawele nawona mijito ja Mkulu Nguluwi, joyaditile kwa chiwalo cha Waisilaeli.
JDG 2:8 Hamba Yoshua, mwana wa Nuni, yoyawele chitumagwa wa Mkulu Nguluwi, nakabagama kuno yawele na miyaka miya imwe na kumi.
JDG 2:9 Nawo nawamtila kuli mbaka wa honhu ha uhalizi wa heye ako Timunati-helesi, kuli isi ya vidunda vya Efulaimu, ubanzi wa kasikazini mwa chidunda cha Gaashi.
JDG 2:10 Ahyo, wanhu weng'ha wa lulelo alo nalubagama. Lulelo loluwinzile kumwando kwa hewo nalwali halumzelele Mkulu Nguluwi ne mijito joyajikolile kwa chiwalo cha Waisilaeli.
JDG 2:11 Waisilaeli nawadita mbuli zihile hali Mkulu Nguluwi na kujifugamila Mibaali.
JDG 2:12 Nawamleka Mkulu Nguluwi, Nguluwi wa wasekulu wa hewo, nayawegale aho kulawa kuli isi ya Misili. Nawajiwinza milungu jinji, milungu jimwenga ja wanhu wala wawele wochikala habehi, nawenamiza hali ajo na kumzudiza Mkulu Nguluwi.
JDG 2:13 Nawamleka Mkulu Nguluwi na kujifugamila jimalukolo ja Baali na Ashela.
JDG 2:14 Mkulu Nguluwi nakawazudila ng'hatu Waisilaeli, naye nakawaleka wabokaji wahole lufufu lwa hewo, nakawawika kuli moko ga wang'honyo wa hewo banzi zeng'ha na kulemwela kuwatowa wang'honyo wa hewo.
JDG 2:15 Chila kowalutile kitowa ngondo, moko wa Mkulu Nguluwi nawali mchanya mwa hewo kuwasumya, kota Mkulu Nguluwi navyoyalonjile na kuwelahila. Hewo nawawa na masinzo ng'hatu.
JDG 2:16 Aho ndo Mkulu Nguluwi nakawegala watagusa wawalohole kulawa kuli moko ga wanhu waholile lufufu lwa hewo.
JDG 2:17 Ila hambe wawahulichize wala watagusa wa hewo, mina nawajiwinza milungu jinji kota wang'hondwa na kujifugamila. Nawaleka kuwinza vila vyowaditile wasekulu wa hewo wawele wahulichize malajizo ga Mkulu Nguluwi, ila hewo hawaditile ahyo.
JDG 2:18 Chila Mkulu Nguluwi loyawenulile watagusa kulawa kwa hewo, Mkulu Nguluwi nayali hamwe na mtagusa na nakawalohola kulawa kuli moko ga wang'honyo wa hewo mazuwa gose ga mtagusa ayo, kwa vila Mkulu Nguluwi nayali na masinzo kwa kulila kwa hewo, kwa vila nawagazigwa na kutunyigwa kwa chiwalo cha wanji.
JDG 2:19 Ila hala du naloyabagame yula mtagusa, nawaluka kahi kudita wihe kusinda wasekulu wa hewo, kwa kujiwinza milungu jinji na kujikolela mijito na kujifugamila. Hawalechile madito ga hewo ne nzila za hewo zigagadale.
JDG 2:20 Lelo Mkulu Nguluwi nakawazudila ng'hatu Waisilaeli na kulonga, “Kwa vila wanhu wano nawabena ilagano lya heni londiwalajize wasekulu wa hewo na hawahulichize lizi lya heni,
JDG 2:21 lelo kulawa sambi hambe ndiwawinje wanhu wa isi yoneche yila yailechile Yoshua loyabagame.
JDG 2:22 Leka ndiwajeze Waisilaeli, kota woiwinza nzila ya heni Mkulu Nguluwi, kota wasekulu wa hewo ama hebu.”
JDG 2:23 Lelo Mkulu Nguluwi nakawaleka wanhu awo wasigale muisi, hawawinjile himahima ne kuwawika kuli moko ga Yoshua.
JDG 3:1 Mkulu Nguluwi nakawaleka wanhu wa isi azo zipone leka kuwajeza Waisilaeli wawele hawetowile ngondo kuli isi ya Kanaani.
JDG 3:2 Nakadita ahyo leka kululangusa lulelo lweng'ha lwa Waisilaeli kitowa ngondo, wala hambe waizele ngondo ung'hali mhela wula.
JDG 3:3 Nakawaleka wakulu wahano wa Wafilisti na Wakanaani weng'ha na Wasidoni na Wahivi wowawele wochikala kuli vidunda vya Lebanoni, kulawa kuli chidunda cha Baali-helimoni mbaka kwinjila Hamati.
JDG 3:4 Heye nakawaleka leka yawajeze Waisilaeli, leka yavizele kota wohulichiza malajizo ga Mkulu Nguluwi, goyawalajize wasekulu wa hewo, kwa kukolela Musa.
JDG 3:5 Lelo Waisilaeli nawekala hali Wakanaani na Wahiti na Waamoli na Wapelisi na Wahivi na Wayebusi.
JDG 3:6 Wasongolo wa Waisilaeli nawawahesa wahinza wa isi zinji na wahinza wa Waisilaeli nawawaleka wahesigwe na wasongolo wa isi zinji. Kwa chiwalo acho, Waisilaeli nawaluka kujifugamila milungu ja chiujenzi.
JDG 3:7 Waisilaeli nawadita wihe hali Mkulu Nguluwi na kumsemwa Mkulu Nguluwi, Nguluwi wa hewo na kujifugamila Mibaali na Maashela.
JDG 3:8 Ahyo Mkulu Nguluwi nakawazudila ng'hatu Waisilaeli na kuwawika mmoko mwa Kushani-lishataimu, mndewa wa Alamu-nahalaimu, nawo Waisilaeli nawamkolela mijito ayo Kushani-lishataimu kwa mhela wa miyaka nane.
JDG 3:9 Hamba Waisilaeli nalowamlilile Mkulu Nguluwi, Mkulu Nguluwi nakawegalila Waisilaeli mlohozi, yawele ndo Otinieli, mwana mlume wa Kenasi, mdodowe Kalebu.
JDG 3:10 Muhe wa Mkulu Nguluwi naumuyila mchanya mwa heye, naye nakawa mtagusa kwa Waisilaeli. Otinieli nakaluta kuli ngondo, Mkulu Nguluwi nakamuwika ayo mndewa wa Mesopotamiya mmoko mwa heye na nakamsumya.
JDG 3:11 Isi naiwa na kikala goya kwa mhela wa miyaka makumi gane. Hamba Otinieli nakabagama.
JDG 3:12 Lelo Waisilaeli nawadita wihe kahi hali Mkulu Nguluwi, naye Mkulu Nguluwi nakamha mong'ho Eguloni, mndewa wa Moabu mchanya mwa Waisilaeli, kwa vila nawadita wihe hali Mkulu Nguluwi.
JDG 3:13 Ayo Eguloni nakawating'haniza Waamoni na Waamaleki, nakaluta kuwatowa Waisilaeli na kuuhola muji wula wa michikichi, mina ndo Yeliko.
JDG 3:14 Waisilaeli nawamkolela mijito Eguloni, mndewa wa Moabu kwa mhela wa miyaka kumi na nane.
JDG 3:15 Ila Waisilaeli lowamlilile Mkulu Nguluwi, nakawegalila mlohozi yawele ndo Ehudi, mwana mlume wa Gela wa nhanzi ya Benjamini, munhu yalingukola mijito kwa moko wa kumoso. Waisilaeli nawamlajiza Ehudi yahiliche ndolendole kwa Eguloni, mndewa wa Moabu.
JDG 3:16 Ehudi nakegongomanyila ipanga lya heye liwele na kunoleche kuno na kuno, ulefu wa ipanga alyo nawali kota sentimita makumi gahano. Nakaliwopa alyo ipanga mgati mwa nguwo ya heye na hagati ha ihaza lya heye lya kudilo.
JDG 3:17 Hamba Ehudi nakamhilichila ndolendole ayo Eguloni, mndewa wa Moabu. Eguloni nayali munhu yanenehe lukami.
JDG 3:18 Loyasindile kulavya ndolendole, nakawakundiza wala wanhu wapapile ndolendole azo woche.
JDG 3:19 Ila heye yuye nakahinduka kulawa kula kuli jimalukolo jiwele habehi na Giligali, nakamhiluchila Eguloni, nakalonga, “Heni ndina usenga wa chinyele kwa hegwe, gwa mndewa.” Eguloni nakalonga, “Mtuleche.” Weng'ha wawele wemile habehi na heye nawawaleka.
JDG 3:20 Lelo Ehudi nakamlutila mndewa, naye mndewa nayali yekalise yaliyeka kuli chihengo cha heye cha kuchanya chiwele na chipute. Ehudi nakalonga, “Ndina usenga wa hegwe kulawa kwa Nguluwi.” Lelo mndewa nakema kulawa kuli chila chigoda cha heye.
JDG 3:21 Ehudi nakagolola moko wa heye wa kumoso, nakebata alyo ipanga leka yalavye kulawa hala kuli ihaza lya heye lya kudilo, nakamhoma mndewa kuli lida lya heye.
JDG 3:22 Alyo ipanga nalinjila mgati hamwe na chaka chake. Mafuta nagagubika mchanya mwa alyo ipanga, kwa vila halilavile alyo ipanga kuli lida. Alyo ipanga nalilawila kwa kumbele.
JDG 3:23 Aho Ehudi nakalawa kuli chihengo cha kuchanya, nakamhindila lwizi lwa chihengo kwa kufuli.
JDG 3:24 Lelo loyawele kunze, vitumagwa wa heye nawahiluka. Nalowawene kota lwizi lwa chihengo najali jihindigwe kwa kufuli, nawo nawali wochilonjela, “Ne majesa nakaluta kucholo kuli chihengo cha heye cha kuchanya.”
JDG 3:25 Nawabeteza mbaka nawaluka kuwa na lunhwinhwi. Lelo vyowawene hambe yachumule, nawahola funguo na kuchumula lwizi. Nawamona mndewa wa hewo nayali yagwile hanyi, nakabagama.
JDG 3:26 Nalowawele wobeteza, Ehudi nakoka ne kibatigwa nakakolela kuli jimalukolo ja maganga, nakaluta Seila.
JDG 3:27 Naloyafichile kuli isi ya vidunda vya Efulaimu, nakapemba mhalamhanda, Waisilaeli nawedulika hamwe na heye kulawa ako kuli vidunda, naye nakawalongoza.
JDG 3:28 Nakawalonjela, “Mmbinze, kwa vila Mkulu Nguluwi nakawawika wang'honyo wa hemwe Wamoabu mmoko mwa hemwe.” Lelo nawedulika na kumuwinza, nawebata honhu heng'ha ha kuloka lwanda lwa Yolodani, hawele Wamoabu nawalokaga, nawalemeza munhu yoneche kuloka.
JDG 3:29 Mhela awo nawawakopola Wamoabu walume elufu kumi (10,000), wawele weng'ha nawali na mong'ho na wazidahe, haponile munhu ne yumwe.
JDG 3:30 Lelo Wamoabu zuwa alyo nawalemwela kwa Waisilaeli. Isi nayali na kikala goya kwa mhela wa miyaka makumi nane.
JDG 3:31 Mtagusa yawinzile hamba nayali Shamugali, mwana mlume wa Anati, yawele nakawakopola Wafilisti miya sita kwa ng'hweku ya kudimila misenga na kuwalohola Waisilaeli.
JDG 4:1 Hala du loyabagame Ehudi, Waisilaeli nawadita kahi mbuli ziwele Mkulu Nguluwi kanguzona kota ndo wihe.
JDG 4:2 Mkulu Nguluwi nakawawika kuli moko wa Yabini, mndewa wa Kanaani, nayalongoze ako Hasoli. Chilongozi wa wamizi wa heye nayali Sisela, mwenyeng'haye wa Halosheti-hagojimu.
JDG 4:3 Waisilaeli nawamlilila Mkulu Nguluwi, kwa vila Yabini nayali na mituka ja chuma ja kitowa ngondo, miya tisa, naye nakawagaza kwa mhela wa miyaka makumi meli.
JDG 4:4 Lelo Debola, mloli mdala, mchewake Lapidoti, nayawele yowatagusa Waisilaeli kwa mhela wula.
JDG 4:5 Naye nayali yochikalisa hasi ha mtende wa Debola, hagati ha Lama na Beteli, kuli isi ya vidunda vya Efulaimu, Waisilaeli nawakwina kwa heye leka yawatagusile.
JDG 4:6 Zuwa limwe Debola nakalajiza munhu yumwe yamcheme Balaka, mwana mlume wa Abinoamu kulawa Kedeshi-Nafutali, nakamlonjela, “Mkulu Nguluwi, Nguluwi wa Isilaeli kangukulajiza udite hino, ‘Ulute, ukawahole wanhu elufu kumi (10,000) wa nhanzi ya Nafutali na wa nhanzi ya Sebuluni leka uwalongoze kuluta kuli chidunda cha Taboli.
JDG 4:7 Nani ndomlongoza Sisela, mkulu wa wamizi wa Yabini, mbaka kuli lwanda lwa Kishoni, hamwe na mituka ja heye na wanhu wa heye kota vyowali, ndomuwika mmoko mwa hegwe.’ ”
JDG 4:8 Balaka nakamlonjela Debola, “Wone koluta hamwe na heni, nani ndoluta, ila wone hambe ulute, nani siluta hebu.”
JDG 4:9 Lelo Debola nakalonga, “Ndikomya ndoluta hamwe na hegwe, ila hambe utogoligwe hebu kwa kusumya ngondo, kwa vila Mkulu Nguluwi komuwika Sisela kuli moko wa mdala.” Debola nakenuka, nakaluta hamwe na Balaka mbaka Kedeshi.
JDG 4:10 Balaka nakazichema nhanzi za Nafutali na Sebuluni leka walute Kedeshi, wanhu elufu kumi (10,000) nawamuwinza. Debola nakaluta hamwe na heye.
JDG 4:11 Lelo Hebeli, Mkeni, nayali yebagule na Wakeni, wawele ndo walelwa wa Hobabu, mkweye Musa, nakawika ihema lya heye hali mwaloni uwele Saananimu, habehi na Kedeshi.
JDG 4:12 Wanhu nawamlonjela Sisela kota Balaka, mwana wa Abinoamu, nakaluta kuli chidunda cha Taboli.
JDG 4:13 Sisela nakajikungajiza mituka ja heye jeng'ha ja chuma miya tisa na wanhu weng'ha wowawele hamwe na heye, kulawa Halosheti-hagojimu mbaka lwanda lwa Kishoni.
JDG 4:14 Debola nakamlonjela Balaka, “Winuche, zuwa lino ndo zuwa liwele Mkulu Nguluwi nakamuwika Sisela mmoko mwa hegwe. Ndaze, Mkulu Nguluwi nahakulongole?” Lelo Balaka nakadulika kulawa kuli chidunda cha Taboli na wanhu elufu kumi (10,000).
JDG 4:15 Mkulu Nguluwi nakamdita Sisela yalemwele yawele na mituka ja heye na wamizi wa heye weng'ha hali Balaka, kwa ipanga. Lelo Sisela nakadulika kulawa kuli mutuka wa heye, nakabilima kwa magulu.
JDG 4:16 Ila Balaka nakajiwinza mituka na wamizi mbaka Halosheti-hagojimu, wala wamizi weng'ha wa Sisela nawakopoligwa kwa ipanga. Haponile munhu ne yumwe.
JDG 4:17 Ila Sisela nakabilima kwa magulu, nakalifika ihema lya Yaeli, mchewake Hebeli, Mkeni. Nakadita ahyo kwa vila nakwali na kikala goya hali Yabini, yawele mndewa wa Hasoli na kwa lukolo lwa Hebeli, Mkeni.
JDG 4:18 Yaeli nakalawa kuza kumbochela Sisela, nakamlonjela, “Uye mkulu wa heni, uye kwa heni, uleche kudumba.” Nakenjila kuli ihema lya heye, naye nakamgubika na kumvisa kwa igolole.
JDG 4:19 Sisela nakamlonjela, “Dedede umhe mazi nyinwe, mina ndina ng'halu.” Nakagubula chihako cha igozi cha itombo, nakamha yanwe, hamba nakamgubika kahi.
JDG 4:20 Naye Sisela nakamlonjela, “Wime hali lwizi lwa ihema, leka munhu yoneche yokuya na kukuuza, ‘Hana munhu hano,’ Mwidichile, ‘Hebu, haduhu.’ ”
JDG 4:21 Sisela nayali yebatigwe ng'hatu na usinjizi, nakawasa. Lelo Yaeli, mchewake Hebeli, nakahola chigingi cha ihema, nakahola kahi nyundo, nakamlutila mholemhole, nakamtowa na kumtowelela chila chigingi kumutwi kwa heye, chigingi acho nachinjila mbaka mgati mwa sangalaza, lelo nakabagama bahala.
JDG 4:22 Hamba, Balaka loyawele yomuwinza Sisela, Yaeli nakalawa leka yambochele, nakamlonjela, “Uye, nani ndokulajila yula munhu youlingumpala.” Lelo nakaluta, Sisela nayali yawasile amo, yabagame, chigingi acho nachali kuli mutwi wa heye.
JDG 4:23 Lelo ahyo ndo Nguluwi vyoyamsumile Yabini, mndewa wa Kanaani hali Waisilaeli zuwa alyo.
JDG 4:24 Moko wa Waisilaeli naulutilila kuwa na mong'ho kwa Yabini, mndewa wa Kanaani, mbaka lowamdumile.
JDG 5:1 Zuwa alyo Debola na Balaka, mwana mlume wa Abinoamu, nawemba lwimbo alu.
JDG 5:2 “Kwa vila vilongozi nawalawa ne lunhwinhwi kulongoza Isilaeli, kwa vila wanhu nawelavya kwa kunuwila, Mkulu Nguluwi yatogoligwe.
JDG 5:3 Mhulichize, hemwe wandewa! Muwiche goya makutu, hemwe wakulu! Ndomwimbila Mkulu Nguluwi, ndokwimba, kwa lwimbo ndomtogola Mkulu Nguluwi, Nguluwi wa Isilaeli.
JDG 5:4 Mkulu Nguluwi, loulawile kuli vidunda vya Seili, lowuchile kulawa isi ya Edomu kuluta kitowa ngondo, isi naikakama, ulanga naulagaza mazi, ena, ng'hungugu nailagaza nhonya.
JDG 5:5 Vidunda navitigasika hali Mkulu Nguluwi, Nguluwi wa Sinai, navitigasika hali Mkulu Nguluwi, Nguluwi wa Isilaeli.
JDG 5:6 “Kuli mazuwa ga Shamugali, mwana mlume wa Anati, mazuwa ga Yaeli, nzila ng'hulu nazali zihile, na majendo ga wanhu nagali kuli nzila za hafungo.
JDG 5:7 Walimi nawaleka kukola mijito, nawaleka kukola mijito kuli Isilaeli, mbaka londawile heni Debola, heni mbele kota mamo kuli Isilaeli.
JDG 5:8 Waisilaeli lowehagule milungu jinji, ngondo nailawila kuli isi, ila nakwali haduhu ngawo ama igoha hali wanhu elufu makumi gane (40,000) wa Isilaeli.
JDG 5:9 Heni ndanguwahulichiza vilongozi wa Isilaeli, hamwe na wawele welavile kwa kunuwila, kwa hewo wawo hali wanhu. Mkulu Nguluwi yatogoligwe.
JDG 5:10 “Muwikule mbuli, hemwe mlingukwina midogowi mizelu, mlingikalisa kuli nhemvu za sendi nyinji, namwe mlingukola nzila kwa magulu.
JDG 5:11 Mhulichize! Wanhu wawele kuli ideho lya mazi, aho wowikula madito ga hachi ga Mkulu Nguluwi, ena, madito ga hachi ga wanhu wa heye kuli Isilaeli. Aho ndo wanhu wa Mkulu Nguluwi lowaduliche hali lwizi lukulu lwa muji.
JDG 5:12 ‘Ulilimche, ulilimche, Debola! Ulilimche, ulilimche, wimbe lwimbo! Winuche, Balaka, hegwe mwana mlume wa Abinoamu, uwahole wapogozi wa hegwe wa ngondo.’
JDG 5:13 “Vilongozi waponile nawadulika, wanhu wa Mkulu Nguluwi nawaluta leka wetowe na wawele na mong'ho.
JDG 5:14 Kulawa Efulaimu nawadulika hewo wawele nawalawila Amaleki, kumbele kwa hegwe Benjamini na hagati ya wanhu wa hegwe. Kulawa Makili, nawadulika wakulu, na kulawa Sebuluni hewo walingibata idela.
JDG 5:15 Wakulu wa Isakali nawali hamwe na Debola, ena, wanhu wa Isakali nawali na Balaka. Nawamuwinza kuno wobilima mbaka kuli ibindi. Ila ng'holo za Lubeni, nazali na lunhwinhwi mnhumbula.
JDG 5:16 Wanhu wa Lubeni, lekachoni hemwe namikalisa kuli mibani ja ming'holo, kuhulichiza mluli ulingupembigwa leka kuvichema vilundo? Kuli ng'holo za Lubeni, nakwali na lunhwinhwi mnhumbula.
JDG 5:17 Nhanzi ya Gadi nayali kumwambu mwa lwanda lwa Yolodani, nhanzi ya Dani, lekachoni nawali waponile kuli itumbwi? Nhanzi ya Asheli nawali wochikala tulu hali hafungo mwa bahali, nawali wekale hali hafungo mwa bandali ya hewo.
JDG 5:18 Ila wanhu wa Sebuluni na Nafutali hawadumbile kubagama, kuli honhu ha kitowa ngondo.
JDG 5:19 “Wandewa nawoya na kitowa ngondo, aho ndo wandewa wa Kanaani nawetowa ngondo, kuli Taanaki, habehi na mazi ga Megido, ila hawapatile chinhu choneche cha sendi.
JDG 5:20 Nhondwe kulawa kilanga nazihanza kuli ngondo, kulawa honhu zawo, nazitowa na Sisela.
JDG 5:21 Kumema kwa mazi ga lwanda lwa Kishoni nakuwahilika kutali, lula lwanda lwa katali, lwanda lwa Kishoni. Gwa muhe wa heni, ulutilile kumwando kwa nhumbula ikangale.
JDG 5:22 Hamba kwato za falasi nazitowa ng'hatu hasi, nazitowa himahima, kwato za falasi wawele na mong'ho.
JDG 5:23 Mhilisi wa Mkulu Nguluwi nakalonga, ‘Muupanjile muji wa Melosi, muwapanjile kwa usungu wa wenyeng'haye wake, kwa vila hawoyile kumtanza Mkulu Nguluwi, kumtanza Mkulu Nguluwi kwa kitowa na wala wawele na mong'ho.’
JDG 5:24 “Kotambichizwa Yaeli kusinda wadala weng'ha, mchewake Hebeli, Mkeni, kotambichizwa ng'hatu kuli wadala weng'ha walingikala kuli ihema.
JDG 5:25 Nakalanda mazi hela, ila nakamha matombo. Nakamgalila mtindi kuli chisaye chinojile.
JDG 5:26 Nakagolola moko wa heye wa kumoso nakebata chigingi, moko wa heye wa kudilo naubata yila nyundo, nakamtowa Sisela, nakatubula mutwi wa heye. Ena, nakamtowa na kutubula mutwi wa heye kwa chigingi.
JDG 5:27 Sisela nakenamiza hali magulu ga heye, nakagwa na kuwasa tulu. Hali magulu ga heye nakenamiza, nakagwa hala. Hala hoyagwile nakabagama.
JDG 5:28 “Mayake Sisela nakasunjilila hali itubuli, kulawa kumbele mwa ipaziya nakalila, ‘Lekachoni mutuka wa heye wangukawila? Lekachoni lizi lwya mutuka haluhulikwe?’
JDG 5:29 Wadala wa heye wawele na nyhala nawamwidichila. Ena, mayake Sisela nayali yochijesa,
JDG 5:30 ‘Ndaze, hawawele na vinhu kulawa kuli ngondo na kigawila, mpogozi mdala yumwe ama weli kwa chila mlume? Kwa Sisela nguwo zeng'ha zowapatile kuli ngondo, nguwo za lanji za vilivinji, nguwo za kunoliga, kahi nguwo za lanji zilivinji za kunoliga banzi zeng'ha mbili, kuli singo ya heni.’
JDG 5:31 “Wabagame wang'honyo wa hegwe weng'ha, gwa Mkulu Nguluwi. Ila wala walingukugana wawe kota isanya hala holilawa kwa mong'ho wake.” Isi nayali na kikala goya kwa miyaka makumi gane.
JDG 6:1 Hamba Waisilaeli nawadita kahi mbuli ziwele Mkulu Nguluwi kanguzona kota ndo wihe, naye Mkulu Nguluwi nakawawika mmoko mwa Wamidiani kwa mhela wa miyaka saba.
JDG 6:2 Wamidiani nawali na mong'ho lukami kusinda Waisilaeli, lelo Waisilaeli nawegongomanyila honhu ha kivisa kuli vidunda na mhalika na ngome.
JDG 6:3 Lelo hala Waisilaeli lowanyalile nyhadikwa kuli migunda, Wamidiani na Waamaleki na wala wanhu wa kolilawilaga isanya, nawoya kuwatowa.
JDG 6:4 Wanhu awo nawawika kambi ya hewo kuli isi na kuwifya mbena mbaka Gasa. Hawalechile chinhu choneche kuli isi ya Isilaeli, ne ming'holo ne misenga ne midogowi.
JDG 6:5 Kwa vila nawoya na misenga ja hewo na mihema ja hewo, nawoya wenji ng'hatu kota nzije na ngamiya wa hewo wawele wenji lukami. Nawenjila kuli isi ayo leka wawifye chila chinhu.
JDG 6:6 Waisilaeli nawaditigwa wawe ng'hochele lukami kwa chiwalo cha Wamidiani, nawo Waisilaeli nawamlilila Mkulu Nguluwi.
JDG 6:7 Waisilaeli lowamlilile Mkulu Nguluwi kwa chiwalo cha Wamidiani,
JDG 6:8 Mkulu Nguluwi nakamlajiza mloli yalute kwa Waisilaeli, mloli ayo nakawalonjela, “Mkulu Nguluwi, Nguluwi wa Waisilaeli nakalonga hino, ‘Heni ndiwegala hemwe kulawa Misili, komuwele wapogozi.
JDG 6:9 Nandiwalohola kulawa kuli moko ga Wamisili na moko ga weng'ha wowawele wowagaza hemwe, nani ndiwawinga woche kwa hemwe na kuwapa hemwe isi ya hewo.
JDG 6:10 Hamba nandiwalonjela hemwe kota heni ndo Mkulu Nguluwi, Nguluwi wa hemwe, mleche kujifugamila milungu ja Waamoli, jiwele kuli isi yomlingikala hemwe sambi. Ila hambe mhulichize lizi lya heni.’ ”
JDG 6:11 Mhilisi wa Mkulu Nguluwi nakaluta na kikalisa hasi hali mwaloni uwele ako Ofula, mwaloni wa Yoashi, Mwabieseli. Gideoni mwana wa Yoashi, nayali yopulula ngano mgati mwa honhu ha kukamila zabibu, leka Wamidiani waleche kumona.
JDG 6:12 Mhilisi wa Mkulu Nguluwi nakamlawila na kumlonjela, “Mkulu Nguluwi ka hamwe na hegwe, gwa uwele na mong'ho ng'hatu.”
JDG 6:13 Gideoni nakamlonjela, “Gwa Mkulu wa heni, wone Mkulu Nguluwi ka hamwe na hetwe, lekachoni mbuli azi zeng'ha zitufika hetwe? Gakohi madito ga heye ga kububuwaza gowatulonjele wasekulu wa hetwe kuno wolonga, ‘Ndaze, hawele Mkulu Nguluwi, yatugale kuno kulawa Misili?’ Ila sambi nakatuleka, naye nakatuwika kuli moko ga Wamidiani.”
JDG 6:14 Mkulu Nguluwi nakamlola, nakalonga, “Ulute kwa ludali lwako alo, ukawalohole Waisilaeli kuli moko ga Wamidiani. Ndaze, siwele heni ndikulajize?”
JDG 6:15 Nakamlonjela, “Gwa Mkulu Nguluwi, ndowalohola ndaze Waisilaeli? Lole, lukolo lwa heni ndo ng'hochele lukami kuli nhanzi ya Manase na heni ndo mdodo kuli ivyazi lya heni.”
JDG 6:16 Mkulu Nguluwi nakamlonjela, “Ndikomya, ndowa hamwe na hegwe, nagwe kowatowa Wamidiani kota munhu yumwe.”
JDG 6:17 Gideoni nakamlonjela, “Kota hegwe nakunojezwa na heni, lelo ndajile ulajilo kota hegwe, Mkulu Nguluwi ndo ulingulonga na heni.
JDG 6:18 Dedede, uleche kuka hano mbaka ndikalavye nhambiko ya heni na kuiwika hali hegwe.” Nakalonga, “Ndobeteza mbaka louhiluka.”
JDG 6:19 Lelo Gideoni nakenjila mgati, nakachiwika goya chinyehe na kugongomanya mibumunda johajiwichigwe usaso kwa kilo kumi za utimbo. Nakawika jila miwunde kuli chidoto, nakawika mhuzi kuli chiya, nakamgalila hala kunze hali mwaloni, nakamha.
JDG 6:20 Naye mhilisi wa Nguluwi nakamlonjela, “Uhole jila miwunde na mibumunda johajiwichigwe usaso, ujiwiche mchanya mwa italawe ali, ulute ukaubohole mhuzi awu mchanya mwa avyo vinhu.” Nakadita ahyo.
JDG 6:21 Hamba mhilisi wa Mkulu Nguluwi nakagolola yila ng'hweku yoyawelenayo mmoko mwa heye, nakajidoliza jila miwunde na jila mibumunda. Chiluli nachilawila kuli alyo italawe na kulakaza miwunde na jila mibumunda johajiwichigwe usaso. Mhilisi wa Mkulu Nguluwi nakoka hali heye.
JDG 6:22 Gideoni loyavizele kota nakamona mhilisi wa Mkulu Nguluwi, nakalonga, “Ndochona, gwa Mkulu Nguluwi Yawele na Ludali. Ndimona mhilisi wa hegwe kwa meho ga heni.”
JDG 6:23 Ila Mkulu Nguluwi nakamlonjela, “Kikala goya kuwe kwa hegwe. Uleche kudumba, hubagama.”
JDG 6:24 Gideoni nakamzenjela Mkulu Nguluwi honhu ha kulavila nhambiko, nakahachema honhu aho “Mkulu Nguluwi ndo Kikala Goya.” Honhu aho ha Ofula, muji wa lukolo lwa Waabieseli, muji uwele aho mbaka lehano.
JDG 6:25 Nechilo ayo, Mkulu Nguluwi nakamlonjela Gideoni, “Ulihole isenga ilume lya keli lya mhaza wa hegwe liwele na miyaka saba, ulute ukabomole honhu ha kulavila nhambiko ha Baali, hawele mhaza wa hegwe kanguhafugamila na ukabene izengo lya limalukolo lya Ashela liwele habehi na honhu ha kulavila nhambiko,
JDG 6:26 hamba ukamzenjele goya Mkulu Nguluwi wa hegwe honhu ha kulavila nhambiko mchanya mwa chidunda achi chido, kota vyoilinguganigwa. Ukalihole lila ibuguma na kulilavya nhambiko ya kulakazwa, kwa ngodi za izengo lya limalukolo lya Ashela lyoulibomole.”
JDG 6:27 Gideoni nakahola wanhu kumi hali vitumagwa wa heye, nakadita kota vyoyalajizwe na Mkulu Nguluwi, ila kwa vila nakalidumba ivyazi lya heye na wanhu wa muji, haditile mbuli azo nemisi, ila nakadita nechilo.
JDG 6:28 Wenyeng'haye wa muji lowalilimche lufuku, nawona honhu ha kulavila nhambiko ha Baali habomoligwa na lila izengo lya Ashela liwele habehi nalibenigwa na lila ibuguma lya keli nalilavigwa nhambiko mchanya mwa honhu ha kulavila nhambiko hazenjigwe.
JDG 6:29 Nawali wochilonjela hewo kwa hewo, “Whaani yaditile mbuli ayi?” Nalowapalile mbuli ayi na kuuza, nawalonga, “Gideoni mwana wa Yoashi ndo yaditile mbuli ayi.”
JDG 6:30 Wenyeng'haye wa muji awo nawamlonjela Yoashi, “Umigale mwanago yabagame kwa chiwalo cha kubomola honhu ha kulavila nhambiko ha Baali na kulibena lila izengo lya Ashela liwele habehi na honhu ha kulavila nhambiko.”
JDG 6:31 Yoashi nakawalonjela wanhu weng'ha wowawele wochitwanza na heye, “Ndaze, momlewela Baali? Ama momlohola hemwe? Heye yomlewela kobagama lokung'hali kubwemwenzuka. Wone Baali ndo Nguluwi, yelewele heye yuye kwa vila munhu yumwe nakabomola honhu ha heye ha kulavila nhambiko.”
JDG 6:32 Kulawa zuwa lila nawamchema Gideoni, Yelubaali, nakalonga, “Baali yelewele na Gideoni kwa vila nakabomola honhu ha heye ha kulavila nhambiko.”
JDG 6:33 Mhela awo Wamidiani na Waamaleki na wanhu wa kolilawilaga isanya, naweting'hana hamwe, nawaloka lwanda lwa Yolodani na kuwika kambi za hewo kuli ibindi lya Yesileeli.
JDG 6:34 Ila muhe wa Mkulu Nguluwi naumuyila Gideoni mchanya mwa heye, naye nakapemba mhalamhanda kuwachema Waabieseli leka wamuwinze.
JDG 6:35 Hamba nakawalajiza wasenga walute hali nhanzi yeng'ha ya Manase, nawo kahi nawachemigwa leka wamuwinze. Nakalajiza kahi wasenga walute kwa nhanzi za Asheli na Sebuluni na Nafutali, nawo nawaluta kuwating'haniza.
JDG 6:36 Gideoni nakamlonjela Nguluwi, “Wone hegwe kowalohola Waisilaeli kwa moko wa heni, kota vyoulonjile,
JDG 6:37 lole, ndowika igozi lya ing'holo kuli honhu ha kupululila nyhule. Wone kuwe na nungwi hela mchanya mwa igozi na misanga jeng'ha jowa jikalile, lelo aho ndovizela kota kowalohola Waisilaeli kwa moko wa heni, kota vyoulonjile.”
JDG 6:38 Ahyo, mitondo nakoka lufuku lukami, nakalikama lila igozi, nakailavya yila nhungwi kuli lila igozi, yila nungwi nayali imemile chisaye chimwe.
JDG 6:39 Hamba Gideoni nakamlonjela Nguluwi, “Dedede, uleche kuzudila. Ndangukulanda ndonje mala imwe kahi, ung'hundize mbiche igozi lino kujeza kahi. Ndangukulanda mchanya mwa igozi kuwe kukalile, ila kuli misanga jeng'ha kuwe na nungwi.”
JDG 6:40 Nguluwi nakadita ahyo nechilo ayo. Lila igozi naliwa likalile, ila mchanya mwa misanga jeng'ha nakwali na nungwi.
JDG 7:1 Hamba, Yelubaali, yawele ndo Gideoni na wanhu weng'ha wawele hamwe na heye, nawoka lufuku ng'hatu, nawawika kambi ya hewo habehi na nzasa ya Halodi. Kambi ya Wamidiani nayali ubanzi wa kasikazini, kuli ibindi, habehi na chidunda cha Mole.
JDG 7:2 Mkulu Nguluwi nakamlonjela Gideoni, “Wanhu wano wowawele hamwe na hegwe ndo wenji ng'hatu kwa heni kuwawika Wamidiani kuli moko mwa hewo, leka Waisilaeli waleche kidaya na kulonga kota moko ga hewo wawo ndo gawalohole.
JDG 7:3 Lelo ulute, ukawikule mbuli ayi kuli makutu ga wanhu wano na kulonga kota munhu yoneche yalingudumba na kukakama, yahiluche kaye natwe tochikala hano kuli chidunda chino cha Gileadi. Aho ndo wanhu elufu makumi meli na mbili (22,000) nawahiluka, nawapona wanhu elufu kumi (10,000).”
JDG 7:4 Mkulu Nguluwi nakamlonjela Gideoni, “Wanhu wano wang'hali wenji lukami. Wahiliche kuli lwanda nani ndowajeza ako kwa chiwalo cha hegwe. Hamba yula yondikulonjela hegwe, ‘Ayu koluta hamwe na hegwe,’ ayo koluta hamwe na hegwe. Yula munhu yondikulonjela, ‘Ayu hambe yalute hamwe na hegwe,’ ayo holuta hamwe na hegwe.”
JDG 7:5 Lelo nakawahilika wanhu kuli lwanda. Mkulu Nguluwi nakamlonjela Gideoni, “Chila munhu yojeza mazi kwa umiyango wa heye kota vyoliditaga libwa, munhu ayo komuwika hafungo, chila munhu yofugama kunwa mazi, naye komditila hihyo.”
JDG 7:6 Wanhu wanwele mazi kwa kuhilika moko ga hewo kuli milomo ja hewo na kumyanga kota libwa, nawali wanhu miya zidatu, ila wanhu wanji weng'ha nawanwa mazi kwa kufugama.
JDG 7:7 Mkulu Nguluwi nakamlonjela Gideoni, “Ndowalohola hemwe mweng'ha kukolela wanhu wano miya zidatu wanwele mazi kota mibwa na ndowawika Wamidiani kuli moko ga hegwe, ila wanhu wanji weng'ha waleche woche chila munhu yalute haluga hake.”
JDG 7:8 Lelo Gideoni nakahola chilyo cha hewo na mhalamhanda za hewo, hamba nakawalaga wanhu weng'ha wa Isilaeli, chila munhu kuli ihema lya heye, ila nakapona na wanhu miya zidatu. Kambi ya Wamidiani nayali ubanzi wa hasi, kuli ibindi.
JDG 7:9 Nechilo, Mkulu Nguluwi nakamlonjela Gideoni, “Uche, uduliche na ulute kuli kambi ya hewo na kuwatowa, mina ndiwawika kuli moko ga hegwe.
JDG 7:10 Ila wone kodumba, uduliche na Pula chitumagwa wa hegwe.
JDG 7:11 Nagwe kohulika vyowolonga, hamba moko ga hegwe gowichigwa goya kitowa ngondo.” Aho ndo Gideoni nakadulika hamwe na chitumagwa wa heye Pula mbaka kowawele wamizi wa kambi ya Wamidiani.
JDG 7:12 Wamidiani na Waamaleki na wanhu wa kolilawilaga isanya, nawali kuli ibindi, nawali wenji kota nzije na ngamiya wa hewo nawali wenji lukami kota sangalaza za mhwani.
JDG 7:13 Gideoni loyafichile, nakwali na munhu yumwe nayawele yomsimila myage kulota kwa heye, yolonga, “Lole, ndota hino, ibumunda lya shayili naligwa kuli kambi ya Wamidiani, nalifika kuli ihema limwe, nalitowa lukami ihema mbaka ihema naligwa, luu.”
JDG 7:14 Myage nakamwidichila yolonga, “Mbuli ayi yowa ipanga lya Gideoni, mwana mlume wa Yoashi, munhu wa Isilaeli. Nguluwi nakawawika mmoko mwa Gideoni, Wamidiani na wamizi weng'ha wawele kuli kambi.”
JDG 7:15 Lelo Gideoni naloyahuliche kulota ako na kutang'hula kwake, nakamfugamila Nguluwi. Nakahiluka kuli kambi ya Waisilaeli na kulonga, “Mwinuche, kwa vila Mkulu Nguluwi nakawawika wamizi wa Wamidiani kuli moko ga hemwe.”
JDG 7:16 Hamba nakawawika wala wanhu miya zidatu kuli vilundo vidatu, nakawapa mhalamhanda na mibuli jilihela mazi na vyenje mgati mwa mibuli ajo.
JDG 7:17 Nakawalonjela, “Mlole, mkadite kota heni vyondilingudita londifika kuli mwiso wa kambi.
JDG 7:18 Londipemba mhalamhanda, heni na weng'ha wawele hamwe na heni, namwe mpembe mhalamhanda za hemwe banzi zeng'ha za kambi, kuno mtowa iyowe, ‘Ayi ndo kwa chiwalo cha Mkulu Nguluwi na Gideoni.’ ”
JDG 7:19 Lelo Gideoni na wala wanhu miya imwe wowawele hamwe na heye, nawafika mwiso wa kambi, mwaluko mwa mhela wa hagati ha nechilo, mhela lowawele wagaluse wamizi wa hewo kuli kambi, nawapemba mhalamhanda za hewo, nawabena vihandevihande jila mibuli jiwele mmoko mwa hewo.
JDG 7:20 Hamba vila vilundo vidatu navipemba mhalamhanda na kubena mibuli. Nawebata vyenje vya hewo kuli moko ga hewo ga kumoso na zila mhalamhanda za hewo kuli moko ga hewo ga kudilo leka wapembe. Nawatowa iyowe, “Ipanga ndo lya Mkulu Nguluwi na Gideoni.”
JDG 7:21 Nawema chila yumwe honhu ha heye kuzunguluta kambi banzi zeng'ha, wamizi weng'ha kuli kambi nawabilima na kutowa iyowe.
JDG 7:22 Wanhu wa Gideoni nawapemba mhalamhanda za hewo, naye Mkulu Nguluwi nakawadita Wamidiani wekopole hewo kwa hewo kuli kambi. Waponile nawabilima mbaka Beti-shita kulutila Selela, mbaka kuli mbaka wa Abeli-Mehola, habehi na Tabati.
JDG 7:23 Walume wa Isilaeli nawali weting'hane kulawa nhanzi za Nafutali na Asheli na Manase, nawawawinga Wamidiani.
JDG 7:24 Hamba Gideoni nakalajiza wasenga kuli isi yeng'ha ya vidunda vya Efulaimu, yolonga, “Lelo mduliche kwa Wamidiani, mkawalemeze Wamidiani waleche kufika kuli mazi ga lwanda lwa Yolodani mbaka Beti-bala.” Lelo walume weng'ha wa Isilaeli nawaluta kwamila mazi ako Beti-bala na lwanda lwa Yolodani na kuwalemeza waleche kuloka.
JDG 7:25 Nawawebata wala wakulu weli wa Wamidiani, Olebu na Seebu. Nawamkopola ayo Olebu bahala kuli italawe lya Olebu. Ayo Seebu nawamkopola hala hawele na honhu ha Seebu ha kukamila divai, hamba nawawawinga Wamidiani. Vitwi vya Olebu na Seebu nawavigala kwa Gideoni kumwambu mwa lwanda lwa Yolodani.
JDG 8:1 Lelo wanhu wa nhanzi ya Efulaimu nawamlonjela Gideoni, “Lekachoni nakutuditila hino? Lekachoni hambe hutulonjele hala loulutile kitowa na Wamidiani?” Nawamng'ung'utila lukami.
JDG 8:2 Ila Gideoni nakawedichila, “Ndaze, mbuli zonditile heni zinojile ng'hatu kwa kiwhaniza na zila za hemwe? Zabibu za wanhu wa Efulaimu zisigale haziwa zinojile kusinda mbena za Abieseli?
JDG 8:3 Nguluwi nakawawika mmoko mwa hemwe wala wakulu wa Wamidiani, Olebu na Seebu. Heni ndita choni chiwhanile na vyomditile hemwe?” Aho ndo ng'halazi ya hewo vyoisindamale, hala loyalonjile ago.
JDG 8:4 Gideoni na wayage miya zidatu wowawele hamwe na heye nawafika Yolodani. Nawaloka lwanda kuno wawele watochile lukami, ila nawalutilila kuwawinga wang'honyo wa hewo.
JDG 8:5 Naye nakawalonjela wanhu wa Sukoti, “Dedede muwape mibumunda wanhu wano walingumbinza, kwa vila wahela mong'ho, nani nda mmajendo kuwawinza Seba na Salimuna, wandewa wa Midiani.”
JDG 8:6 Wala wakulu wa Sukoti nawalonga, “Lekachoni hetwe tuwape mibumunda wamizi wa hegwe? Mng'hali kuwasumya Seba na Salimuna”
JDG 8:7 Aho ndo Gideoni nakawedichila, “Kwa chiwalo achi, Mkulu Nguluwi hoyowa yawawichile Seba na Salimuna mmoko mwa heni, ndowawambula hemwe kwa miwa ja kuchiwala na mikwangwasale.”
JDG 8:8 Hamba Gideoni nakaluta ako Penieli, nakalonga na wanhu wa honhu aho ulonzi kota awo. Wanhu wa Penieli nawamwidichila kota wanhu wa Sukoti navyowamwidichile.
JDG 8:9 Naye Gideoni nakawalonjela wala wanhu wa Penieli, yolonga, “Londikuya kahi hala hondisumya, ndolibomola ilingo ali.”
JDG 8:10 Lelo Seba na Salimuna nawali Kalikoli, wamizi wa hewo nawali hamwe na hewo. Nawali wanhu kota elufu kumi na zihano (15,000), ndo wamizi wa kulilawilaga isanya waponile, kwa vila wamizi wayawo wabagame, nawali lachi imwe na elufu makumi meli (120,000).
JDG 8:11 Lelo Gideoni nakoka kwa kukolela nzila yowakolile wanhu walingikala kuli mihema nalowawele ubanzi wa kolilawilaga isanya mwa Noba na Yogubeha, nakawatowa wamizi kwa kuwatinhusa.
JDG 8:12 Wandewa weli wa Midiani, Seba na Salimuna nawabilima. Ila heye nakawawinga mbaka nakawebata, nakawatowa wamizi weng'ha wa wandewa awo na kuwasambalula.
JDG 8:13 Hamba, ayo Gideoni, mwana mlume wa Yoashi, nakahiluka kulawa kitowa ngondo kwa kukolela nzila ya chidunda cha Helesi.
JDG 8:14 Aho ndo nakamibata msongolo yumwe kuli wanhu wa Sukoti, nakamuuza. Yula msongolo nakamwandichila matagwa ga wakulu weng'ha wa Sukoti na wasekulu wa muji. Weng'ha nawali wanhu makumi saba na saba.
JDG 8:15 Hamba nakaluta kwa wala wanhu wa Sukoti, nakawalonjela, “Lole, Seba na Salimuna, wawele hemwe namwali mndonga lukami kwa chiwalo cha hewo hala lomlonjile, ‘Ndaze, Seba na Salimuna wa mmoko mwa hegwe mbaka hetwe tuwape mibumunda wamizi wa hegwe?’ ”
JDG 8:16 Lelo Gideoni nakawahola wala wasekulu wa muji na kuwalangusa wanhu wa Sukoti kwa kuwagaza kwa miwa ja kuchiwala na mikwangwasale.
JDG 8:17 Hamba nakalibomola ilingo lya muji wa Penieli na kuwakopola walume wa muji awo.
JDG 8:18 Gideoni nakawauza Seba na Salimuna, “Wala wanhu womuwakopole kula Taboli, nawali wanhu wa ndaze?” Hewo, nawamwidichila, “Nawali kota vyouwele hegwe, chila yumwe nayali yochiwhana na wana wa mndewa.”
JDG 8:19 Gideoni nakalonga, “Wala wanhu nawali wang'holozangu, wana wa mayangu. Kota heye Mkulu Nguluwi vyoyawele mkomu, wone namleche kuwakopola wanhu wala, heni hanasali kuwakopola.”
JDG 8:20 Hamba Gideoni nakamlonjela Yeteli mwanage wa mwaluko, “Lelo wime, uwakopole wano.” Ila yula msongolo halavile ipanga lya heye, mina nakadumba kwa vila nayali yang'hali msongolo hela.
JDG 8:21 Aho ndo Seba na Salimuna vyowalonjile, “Lelo utukopole gwegwe, mina aji ndo mijito ja munhu yakangale.” Lelo Gideoni nakawakopola wala Seba na Salimuna na kuhola vinoligo viwele msingo mwa ngamiya wa hewo.
JDG 8:22 Aho ndo wanhu wa Isilaeli nawamlonjela Gideoni, “Utulongoze hetwe, utulongoze hegwe na lulelo lwa hegwe, kwa vila hegwe nakutulohola kulawa kuli moko ga Wamidiani.”
JDG 8:23 Gideoni nakawalonjela, “Heni hambe ndiwalongoze hemwe ne mwana wa heni hambe yawalongoze, ila heye Mkulu Nguluwi ndo yowalongoza hemwe.”
JDG 8:24 Hamba, Gideoni nakawalonjela, “Heni ndina chinhu chondilingugana kwa hemwe, ndo chila munhu yamhe heni vipuli vyoyaholile kulawa kwa wang'honyo wa heye.” Wang'honyo nawali na vipuli vya zahabu vya kuli makutu, kwa vila nawali Waishimaeli.
JDG 8:25 Wala wanhu nawedichila, “Tokupa kwa kusangalala.” Lelo nawawika nguwo hasi, chila munhu nakawika amo vipuli vya wapogozi wa heye wa ngondo.
JDG 8:26 Zahabu azo nazali na itunyo lya kilo makumi meli, kuleka vila vinoligo na vinhu vya kuvala kuli singo na mivalo ja lanji ya zambalau jowavalile wala wandewa wa Midiani, kahi kuleka vinhu vinji vya kuvala kuli singo viwele kuli singo za ngamiya wa hewo.
JDG 8:27 Lelo Gideoni nakagongomanya limalukolo kota chizibao kwa vila vinhu vyoyaholile kwa wala wanhu, nakaliwika limalukolo alyo kuli muji wa heye uchemigwe Ofula. Waisilaeli weng'ha nawaluta ako kulifugamila kota wang'hondwa. Limalukolo alyo nalyali idiwa kwa heye Gideoni na ivyazi lya heye.
JDG 8:28 Aho ndo Wamidiani nawalemwela hali Waisilaeli na hawenule vitwi vya hewo kahi. Isi ayo nayali na kikala goya kwa mhela wa miyaka makumi gane kuli kikala kwa Gideoni.
JDG 8:29 Hamba, Yelubaali, yawele ndo yuye ayo Gideoni, mwana mlume wa Yoashi, nakahiluka haluga ha heye na kikala aho.
JDG 8:30 Gideoni nayali na wana makumi saba kulawa kwa heye yuye, kwa vila nayali yahesile wache wenji.
JDG 8:31 Mhawake nayawele ako Shekemu, naye nakampondela mwana na nakamchema itagwa lyake Abimeleki.
JDG 8:32 Lelo Gideoni, mwana mlume wa Yoashi nakabagama kuno yawele miyaka minji, nakatiligwa habehi na kuli chilaga cha mhaza wa heye Yoashi, ako Ofula ya Waabieseli.
JDG 8:33 Loyabagame Gideoni, Waisilaeli nawabelenhuka kahi, nawajiwinza Mibaali kota wang'hondwa. Nawamkolela mijito Baali-beliti kota ndo mlungu wa hewo.
JDG 8:34 Waisilaeli hawamkumbuchile Mkulu Nguluwi, Nguluwi wa hewo, yawele ndo yawalohole kulawa kuli moko ga wang'honyo wa hewo wa banzi zeng'ha
JDG 8:35 ne kuiditila igano lya kwimilila ng'handa ya Yelubaali yawele ndo yuye Gideoni, kuleka gala geng'ha ganojile gawele Gideoni goyawaditile hewo Waisilaeli.
JDG 9:1 Abimeleki mwana mlume wa Yelubaali, nakaluta Shekemu kwa wang'holoze mayake, nakalongasa na hewo na lukolo lwa mayake, yowalonjela,
JDG 9:2 “Mlonje na wakulu wa Shekemu na muwauze, ‘Ndaze, lyakohi linojile kwa hemwe, wana wa Yelubaali weng'ha, wawele ndo wanhu makumi saba, kuwalongoza hemwe ama kulongozwa na munhu yumwe? Mkumbuchile kota heni Abimeleki, nda mng'holozenu.’ ”
JDG 9:3 Nawo wang'holoze mayake nawalongasa na wala wakulu wa Shekemu na nhumbula za hewo nazaluka kumuwinza Abimeleki, kwa vila nawalonga, “Ayu ka mng'holozetu.”
JDG 9:4 Nawamha Abimeleki migwala makumi saba jilawile kuli ng'handa ya Baali-beliti, naye Abimeleki nakawapa wajuvi, leka wamuwinze.
JDG 9:5 Hamba nakaluta kuli ng'handa ya mhaza wa heye ako Ofula, nakawakopola wang'holoze, wana walume wa Yelubaali, wanhu makumi saba. Nakawakopola mchanya mwa iganga limwe, ila Yotamu, mwana mlume mdodo wa Yelubaali, nakapona kwa vila nayali yevisile.
JDG 9:6 Hamba, wala wakulu wa Shekemu naweting'hana hamwe na wanhu weng'ha wa Beti-milo, nawaluta kumuwika Abimeleki yawe mndewa, habehi na igodi lya mwaloni uwele habehi na izengo liwele ako Shekemu.
JDG 9:7 Hamba hala lowamlonjele Yotamu na heye nakaluta na kwima mchanya mwa chila chinhembenhembe cha chidunda cha Gelisimu. Nakatowa iyowe yochemeleza, “Mnyhulichize hemwe wakulu wa Shekemu leka na heye Nguluwi yawahulichize hemwe.
JDG 9:8 Zuwa limwe migodi najilawa leka kuliwika igodi linji liwe mndewa hali hewo. Migodi ajo najililonjela igodi lya mzeituni, ‘Uwe chilongozi hali hetwe.’
JDG 9:9 Ila lila igodi lya mzeituni nalijilonjela jila migodi, ‘Ndigaleche mafuta ga heni ganojile galingukundigwa kukolela mijito ja kujihulichiza milungu na wanhu, leka ndute ndikasanzalime mchanya mwa migodi?’
JDG 9:10 Hamba, migodi najililonjela igodi lya mtini, ‘Uwe chilongozi hali hetwe.’
JDG 9:11 Ila awo mtini naujilonjela migodi ajo, ‘Ndaze, ndiuleche unojenoje wa heni na mafuza ga heni ganojile, ndute ndikasanzalime mchanya mwa migodi?’
JDG 9:12 Hamba, migodi ajo najililonjela igodi lya mzabibu, ‘Uwe chilongozi hali hetwe.’
JDG 9:13 Awo mzabibu nawo naujilonjela migodi ajo, ‘Ndaze, ndeche divai ya heni, iwele ilingujisangalaza milungu na wanhu, ndute ndikasanzalime mchanya mwa migodi?’
JDG 9:14 Aho ndo ajo migodi najililonjela igodi lya miwa, ‘Uwe chilongozi hali hetwe.’
JDG 9:15 Ila igodi alyo lya miwa nalijilonjela migodi ajo, ‘Wone mwangumbika heni ndiwe mndewa hali hemwe, lelo muye mkalise hali lubehelo lwa heni. Wone haiwa ahyo, chiluli chilawe kuli igodi lya miwa na kujilakaza migodi ja mielezi ja Lebanoni.’ ”
JDG 9:16 Yotamu nakalutilila kulonga, “Wone namumditila kwa kunuwila kunojile na kwa kulolela goya kuli kumuwika Abimeleki leka yawe mndewa na wone namumditila ganojile Yelubaali na walelwa wa heye na kumditila kota vyoilinguganigwa,
JDG 9:17 kwa vila mhaza wa heni nakawatowanila hemwe na kugana kwajiliza ukomu wa heye kwa kuwalohola kulawa kuli moko ga Wamidiani,
JDG 9:18 hemwe namuibelenhuka ng'handa ya mhaza wa heni na kuwakopola wanage, wanhu makumi saba mchanya mwa iganga limwe. Namumuwika Abimeleki, yawele mwana wa mpogozi mdala wa heye, yawe chilongozi wa wakulu wa Shekemu kwa vila heye ka mng'holozenu.
JDG 9:19 Lelo wone namumditila Yelubaali na walelwa wa heye kwa kunuwila kunojile na kwa kulolela goya, lelo msangalale kwa chiwalo cha heye yuye Abimeleki, naye yasangalale kwa chiwalo cha hemwe.
JDG 9:20 Ila wone haiwele ahyo, chiluli chilawe kwa Abimeleki na kuwalakaza wakulu wa Shekemu na wa Beti-milo na kahi chilawe kwa wakulu wa Shekemu na Beti-milo na kumlakaza Abimeleki.”
JDG 9:21 Hamba Yotamu nakoka kwa kubilima, nakaluta Beeli na kikala ako kwa chiwalo cha kumdumba mng'holoze Abimeleki.
JDG 9:22 Lelo Abimeleki nakailongoza isi ya Isilaeli kwa mhela wa miyaka jidatu.
JDG 9:23 Hamba Nguluwi nakamlajiza muhe mwihe hali Abimeleki na wakulu wa Shekemu. Wakulu wa Shekemu nawambelenhuka Abimeleki
JDG 9:24 leka wula wihe wowaditilwe wala wana makumi saba wa Yelubaali uhiluswe kwa Abimeleki yagazigwe hamwe na wakulu wa Shekemu kwa chiwalo cha kumtanza kuwakopola wala wang'holoze.
JDG 9:25 Lelo wakulu wa Shekemu nawawawika wanhu leka wawabeteze mchanya mwa vila vinhembenhembe vya vidunda, wanhu wawele nawahola vinhu vya wanhu weng'ha wowakolile nzila yila, na heye Abimeleki nakapegwa mbuli ayo.
JDG 9:26 Hamba Gaali, mwana mlume wa Ebedi, nakaluta hamwe na wang'holoze. Nawaluta mbaka Shekemu, wakulu wa Shekemu nawamkunda heye Gaali.
JDG 9:27 Wakulu wa Shekemu nawaluta kuli migunda ja hewo ja mizabibu, nawabena zabibu na kuzikama zabibu azo na kudita mnvina. Hamba nawenjila kuli ng'handa ya mlungu wa hewo nawalya na kunwa leka kumbeza ayo Abimeleki.
JDG 9:28 Gaali mwana mlume wa Ebedi nakalonga, “Abimeleki ndo whaani na hetwe wakulu wa Shekemu ndo wanhu wachi mbaka tumkolele mijito heye? Abimeleki ndo mwana wa Yelubaali na mkolamijito wa heye mng'hangala ndo Sebuli. Muwakolele mijito wana wa Hamoli yawele mhaza wa Shekemu. Ila lekachoni tumkolele mijito Abimeleki?
JDG 9:29 Wone wanhu wano wa hali ulongozi wa heni, lelo heni ndahamusile ayo Abimeleki. Hamba ndahamlonjele Abimeleki, ‘Lelo wonjeze wamizi wa hegwe, uye titowe.’ ”
JDG 9:30 Aho lelo, Sebuli nayawele mkulu wa muji, loyahuliche ulonzi kulawa kwa Gaali, mwana mlume wa Ebedi, nakazudila lukami.
JDG 9:31 Naye nakalajiza wasenga kwa chinyele walute kwa Abimeleki, nakalonga, “Lole, Gaali, mwana mlume wa Ebedi na wang'holoze nawoya Shekemu kwambuza wanhu wa muji awu kukubelenhuka hegwe.
JDG 9:32 Lelo winuche nechilo, hegwe na wanhu wawele hamwe na hegwe, mumbeteze hali migunda kumvaba.
JDG 9:33 Hamba, hala du isanya holilawa, wime na kuutowa muji awo. Gaali na wanhu wa heye lowolawa kitowa na hegwe, aho ndo houwaditila kota vyouweza hegwe.”
JDG 9:34 Lelo Abimeleki na wanhu weng'ha wawele hamwe na heye nawalawa nechilo kuluta kubeteza kuutowa muji wa Shekemu kwa vilundo vine.
JDG 9:35 Ayo Gaali, mwana mlume wa Ebedi nakalawa, nakema kunze hali lwizi lwa muji. Abimeleki na wanhu wa heye wawele hamwe na heye nawema kuli hala honhu howawele wobeteza.
JDG 9:36 Lelo Gaali loyawawene wala wanhu, nakamlonjela Sebuli, “Lole, wanhu wangudulika kulawa kuli vinhembenhembe vya vidunda.” Sebuli nakamlonjela, “Alyo ndo isisila lya vidunda ndo wangona kota wanhu.”
JDG 9:37 Hamba Gaali nakalonga lwa keli, “Lole, wanhu wangudulika kuli isi na chilundo chimwe changuya kwa kukolela nzila ya Mwaloni wa Walaguzi.”
JDG 9:38 Aho ndo Sebuli nakamlonjela, “Ndaze, mlomo wa hegwe sambi wakohi mbaka nakulonga, ‘Ayo Abimeleki ka whaani mbaka kumkolela mijito heye? Ndaze, wano hawawele wamizi wouwabezile hegwe? Ulawe lelo na witowe na hewo.’ ”
JDG 9:39 Lelo Gaali nakalawa kitowa na wakulu wa Shekemu na Abimeleki.
JDG 9:40 Gaali nakalemwela na kubilima hali Abimeleki. Wanhu wenji nawalumila na kugwa mbaka habehi na lwizi lwa muji.
JDG 9:41 Lelo Abimeleki nakekala Aluma, ila heye Sebuli nakamuwinga Gaali na wang'holoze leka waleche kikala ako Shekemu.
JDG 9:42 Zuwa lya keli, wanhu nawalawa leka walute kuli migunda ja hewo, Abimeleki nakahulika mbuli ayo.
JDG 9:43 Abimeleki nakawahola wanhu wa heye na kuwagawa kuli vilundo vidatu, leka walute kubeteza kuli migunda. Loyawawene wanhu wangulawa kuli muji, nakawatowa na kuwakopola.
JDG 9:44 Lelo Abimeleki na chila chilundo chiwele hamwe na heye, nawaluta kwima hali lwizi lwa muji, vila vilundo vili naviwatowa wala wanhu wawele kuli migunda na kuwakopola weng'ha.
JDG 9:45 Abimeleki naketowa na wanhu wa muji awo nemisi yeng'ha. Nakawakopola wanhu wawele wochikala amo na kuuhola muji awo na kuubomola na kuuwika mwino.
JDG 9:46 Hamba wakulu weng'ha wawele wochikala kuli lila ilingo lya Shekemu, lowahuliche mbuli yila, nawenjila mgati mwa ngome ya ng'handa ya Eli-beliti.
JDG 9:47 Abimeleki nakahulika kota wakulu weng'ha wa lila ilingo lya Shekemu naweting'hana hamwe.
JDG 9:48 Lelo Abimeleki na wanhu weng'ha wawele hamwe na heye, nawakwina kuluta kuli chidunda cha Salimoni. Abimeleki nakebata iwago mmoko mwa heye na kudumula nhagala imwe kuli igodi, nakebata na kulipika hali mayega ga heye na kuwalonjela wala wanhu wawele hamwe na heye, “Lelo chila chomlinguchona heni ndita, namwe mdite hihyo himahima.”
JDG 9:49 Lelo chila munhu nakatema nhagala ya heye, nawamuwinza Abimeleki na nhagala azo nawaziwika hala hali ngome na kuilakaza ngome ayo kwa chiluli. Hino ndo wanhu weng'ha wa ilingo lya Shekemu vyowabagame, wanhu elufu imwe, walume na wadala.
JDG 9:50 Ahyo Abimeleki nakaluta muji wa Tebesi, nakauzunguluta na kuuhola muji awo.
JDG 9:51 Ila mgati mwa muji awo nakwali na ilingo liwele na mong'ho. Wanhu weng'ha, wakulu na walume na wadala nawabilimila ako, wanhu weng'ha wa muji awo nawehindila mgati na kukwina kuli chinduwiko cha ilingo.
JDG 9:52 Abimeleki nakaluta mbaka hala hawele na ilingo alyo na kitowa na wala wanhu, nakahejela mbaka hali lwizi lwa ilingo alyo leka yalilakaze kwa chiluli.
JDG 9:53 Mdala yumwe nakatoza iganga lya lwala lya kuchanya, iganga alyo nalimtowa Abimeleki kumutwi.
JDG 9:54 Abimeleki nakamchema himahima msongolo yawele yopapa vinhu vya heye vya kitowa ngondo na kumlonjela, “Ubaguse ipanga lya hegwe ung'hopole heni, leka wanhu waleche kulonga kota ng'hopoligwa na mdala.” Yula msongolo nakahola ipanga lya heye na kumhoma, naye Abimeleki nakabagama.
JDG 9:55 Wanhu wa Isilaeli lowawene kota Abimeleki nakabagama, nawaluta chila munhu hali haluga hake.
JDG 9:56 Lelo Nguluwi nakahilusa chibida kwa kumdita Abimeleki yakopoligwe na wang'holoze, wanhu makumi saba.
JDG 9:57 Hihyo du Nguluwi nakawadita wanhu wa Shekemu wagazigwe kwa chiwalo cha wihe wa hewo wowauditile. Ahyo kupanjilwa kwa Yotamu, mwana mlume wa Yelubaali nakuwafika hewo.
JDG 10:1 Loyabagame Abimeleki, nakalawila Tola mwana wa Pua, mwana wa Dodo, wa nhanzi ya Isakali kuwalohola wanhu wa Isilaeli. Tola nayali yochikala ako Shamili kuli isi ya vidunda vya Efulaimu.
JDG 10:2 Ayo nayali yokola mijito ja utagusa kuli isi ya Isilaeli kwa miyaka makumi meli na gadatu. Hamba nakabagama na kutiligwa ako Shamili.
JDG 10:3 Loyabagame Tola, nakalawila Yaili, Mgileadi na ayu kahi nayali yokola mijito ja utagusa kuli isi ya Isilaeli kwa mhela wa miyaka makumi meli na mbili.
JDG 10:4 Ayo Yaili nayali na wana walume makumi gadatu, wawele wokwina midogowi makumi gadatu. Hewo nawali na miji makumi gadatu, jilinguchemigwa Hawoti-yaili mbaka lehano. Miji ajo ja kuli isi ya Gileadi.
JDG 10:5 Yaili nakabagama na kutiligwa ako Kamoni.
JDG 10:6 Hamba Waisilaeli nawadita wihe kahi hali Mkulu Nguluwi kwa kujifugamila Mibaali na Maashitaloti na milungu ja Shamu na milungu ja Sidoni na milungu ja Moabu na milungu ja Amoni na milungu ja Wafilisti. Nawamleka Mkulu Nguluwi ne kumfugamila heye.
JDG 10:7 Ahyo, Mkulu Nguluwi nakawazudila ng'hatu Waisilaeli, nakawawika mmoko mwa Wafilisti na mmoko mwa Waamoni.
JDG 10:8 Nawo nawawakoda ng'hatu na kuwaditila wihe Waisilaeli kuli mwaka awo. Nawawaditila wihe Waisilaeli weng'ha wawele wochikala kumwambu mwa lwanda lwa Yolodani kuli isi ya Waamoli, iwele ako Gileadi, kwa mhela wa miyaka kumi na nane.
JDG 10:9 Nawo Waamoni nawaloka lwanda lwa Yolodani leka kitowa na wanhu wa nhanzi za Yuda na Benjamini na Efulaimu. Lelo Waisilaeli nawali kuli kugazika lukami.
JDG 10:10 Lelo Waisilaeli nawamlilila Mkulu Nguluwi na kulonga, “Hetwe natukuditila gehile kwa vila tukuleka hegwe, Nguluwi wa hetwe na kujifugamila Mibaali.”
JDG 10:11 Mkulu Nguluwi nakedichila kwa kuwalonjela Waisilaeli, “Ndaze, hemwe hamloholigwe na heni kulawa kuli moko ga Wamisili na Waamoli na Waamoni na Wafilisti?
JDG 10:12 Kahi Wasidoni na Waamaleki na Wamaoni wawagazile hemwe, namwe namndilila, nani ndiwalohola kulawa kuli moko ga hewo.
JDG 10:13 Ila hemwe mndeka na kujifugamila milungu jinji. Lelo kwa chiwalo acho, heni hambe ndiwalohole kahi.
JDG 10:14 Lelo mlute mkajililile ajo milungu ja hemwe jomjihagule, jiwalohole hala lomuwa hali kugazika.”
JDG 10:15 Waisilaeli nawamlonjela Mkulu Nguluwi, “Natudita gehile, lelo utuditile goneche gougona ndo ganoga kwa hetwe, ila twangukudedeza utulohole zuwa lino lya lehano.”
JDG 10:16 Lelo Waisilaeli nawosa milungu ja hewo ja chijenzi jiwele hali hewo na kumfugamila Mkulu Nguluwi. Mkulu Nguluwi hawezile kulutilila kugona magazo ga Waisilaeli.
JDG 10:17 Mhela awo, Waamoni nawali weting'hane hamwe kwa ngondo, nawawika kambi ya hewo ako Gileadi. Nawo Waisilaeli naweting'hana na kuwika kambi ya hewo ako Misipa.
JDG 10:18 Wakulu wa Gileadi nawali wochiuza hewo kwa hewo, “Ndaze, munhu wachi yokwaluka kitowa na Waamoni? Heye kowa chilongozi wa walingikala Gileadi.”
JDG 11:1 Ako Gileadi nakwali na munhu yumwe yezidahe ng'hatu kitowa ngondo yachemigwe Yefuta, mwana wa mdala yumwe mng'hondwa, mhaza wa heye nayali yochemigwa Gileadi.
JDG 11:2 Heye Gileadi nayali na mchewake yawele yochikala na heye. Lelo wana wa ayo mchewake lowawele wakulu, nawamuwinga Yefuta kuno womlonjela, “Hegwe huweza hebu kuhalila uhalizi wa mhaza wa hetwe, kwa vila hegwe kwa mwana wa mdala yunji.”
JDG 11:3 Aho ndo Yefuta nakawabilima wang'holoze na kuluta kikala kuli isi ya Tobu. Lelo wanhu wajuvi nawamuwinza Yefuta na kilumba na heye.
JDG 11:4 Loukolile mhela umwenga, wana wa Amoni nawawatowa Waisilaeli.
JDG 11:5 Waamoni lowawele wochitowa na Waisilaeli, wasekulu wa Gileadi nawaluta kumhola Yefuta ako Tobu.
JDG 11:6 Nawamlonjela Yefuta, “Uye uwe chilingozi wa hetwe, leka titowe ngondo na Waamoni.”
JDG 11:7 Ila Yefuta nakawalonjela wasekulu wa Gileadi, “Hemwe hamnganile heni na kumbinga heni kuli ng'handa ya mhaza wa heni, lelo lekachoni mwanguya mhela awu wa kugaya kwa hemwe?”
JDG 11:8 Wasekulu wa Gileadi nawamlonjela Yefuta, “Ndo mina hetwe tuya kwa hegwe leka uche hamwe na hetwe kitowa na Waamoni, kowa mng'hangala wa hetwe na wenyeng'haye weng'ha wa Gileadi.”
JDG 11:9 Yefuta nakawalonjela wasekulu wa Gileadi, “Wone mondihilusa heni kwa hemwe kahi leka titowe na Waamoni na wone heye Mkulu Nguluwi yawalavye hali heni, lelo ndowa chilongozi wa hemwe?”
JDG 11:10 Wasekulu wa Gileadi nawamlonjela Yefuta, “Heye Mkulu Nguluwi kowa mlolezi hali hetwe. Tukomya, todita kota vyoulingugana hegwe.”
JDG 11:11 Aho ndo Yefuta nakaluta hamwe na wasekulu wa Gileadi na wamdita yawe chilongozi na mng'hangala wa hewo. Naye Yefuta nakalonga ulonzi wa heye weng'ha hali Mkulu Nguluwi ako Misipa.
JDG 11:12 Lelo Yefuta nakalajiza wasenga walute kwa mndewa wa Waamoni yolonga, “Ndaze! Hegwe kuna choni na hetwe, mbaka kuya kwa hetwe na kitowa hali isi ya hetwe?”
JDG 11:13 Mndewa wa isi ya Waamoni nakawedichila wala wasenga wa Yefuta, “Kwa vila Waisilaeli nawali waiholile isi ya hetwe, hala lowalawile kuli isi ya Misili, kulawa Alinoni mbaka Yaboki mbaka Yolodani, lelo mhiluse azo isi kahi kwa kikala goya.”
JDG 11:14 Lelo Yefuta nakalajiza wasenga lwakeli watule kwa ayo mndewa wa Waamoni,
JDG 11:15 nakamlonjela, “Yefuta kangukulonjela kota Isilaeli haiholile isi ya Moabu ne isi ya wanhu wa Amoni.
JDG 11:16 Ila Waisilaeli lowalawile Misili nawajenda kuchiwala mbaka kuli Bahali ya Shamu na mbaka Kadeshi.
JDG 11:17 Aho ndo Waisilaeli nawalajiza wasenga walute kwa mndewa wa Edomu, wolonga, ‘Dedede, ndangukulanda ung'hundize kukola kuli isi ya hegwe.’ Ila mndewa wa Edomu hakundile hebu. Nawalajiza kahi wasenga kwa mndewa wa Moabu, ila mndewa ayu kahi nahawakundize kukola kuli isi ya heye. Lelo Waisilaeli nawapona kuli isi ya Kadeshi.
JDG 11:18 Hamba nawaluka majendo mbaka kuchiwala na kuzizunguluta azo isi za Edomu na Moabu, nawo nawakola kuli ubanzi wa kolilawilaga isanya mwa isi ya Moabu, nawawika kambi ya hewo kumwambu mwa lwanda lwa Alinoni. Ila hambe wenjile kuli honhu ha Moabu. Lwanda lwa Alinoni nalwali ndo mbaka wa Moabu.
JDG 11:19 Hamba Waisilaeli nawalajiza wasenga walute kwa Sihoni mndewa wa Waamoli ako Heshiboni, kumlanda yawakundize kukola kuli isi ya heye leka walute kuli isi ya hewo.
JDG 11:20 Ila ayo Sihoni nahawakundile Waisilaeli wakole kuli mbaka ja isi ya heye. Sihoni nakawakungajiza wanhu wa heye weng'ha, nawo nawawika kambi ako Yahasa, kitowa na Waisilaeli.
JDG 11:21 Ila Mkulu Nguluwi, Nguluwi wa Isilaeli, nakawadita wanhu wa heye wawasumye wanhu wa mndewa Sihoni. Lelo Waisilaeli nawaihola isi yeng'ha ya Waamoli wawele wochikala kuli isi ayo.
JDG 11:22 Nawahola honhu heng'ha ha Waamoli kulawa kuli lwanda lwa Alinoni mbaka kuli lwanda lwa Yaboki na kulawa kuchiwala ubanzi wa kolilawilaga isanya mbaka kolizinjilaga isanya.
JDG 11:23 Lelo Mkulu Nguluwi, Nguluwi wa Isilaeli nakawasukula isi ya Waamoli na kuwapa Waisilaeli. Nagwe kwangugana kuhola honhu ha hewo?
JDG 11:24 Wigute na chila choupegwe na mlungu wa hegwe Kemoshi. Ila isi yoneche iwele Mkulu Nguluwi, Nguluwi wa hetwe nakawawinga wenyeng'haye wake na kutupa hetwe, ayo ndo ya hetwe.
JDG 11:25 Nagwe kunoga ng'hatu kusinda Balaki mwana wa Sipoli, mndewa wa Moabu? Heye naketwanza na Waisilaeli ama kitowa na hewo?
JDG 11:26 Lekachoni hambe muigombole mhela wula, miyaka miya zidatu, mhela Waisilaeli lowawele wochikala ako Heshiboni na miji jake na Aloeli na miji jake na kuli miji jiwele hafungo mwa Alinoni?
JDG 11:27 Lelo heni, sikuditile gehile, ila hegwe nakunditila wihe heni kwa kitowa na heni, heye Mkulu Nguluwi, heye yalingutagusa, yataguse lehano hali Waisilaeli na Waamoni.”
JDG 11:28 Ila mndewa wa Waamoni nakaubeza usenga woyapegwe kulawa kwa Yefuta.
JDG 11:29 Aho ndo Muhe wa Mkulu Nguluwi naumuyila Yefuta, naye nakakola kuli Gileadi na Manase, kulawa aho Misipa ya Gileadi, nakakola kuwalutila wanhu wa Amoni.
JDG 11:30 Naye Yefuta nakelaha kwa chiwalo cha Mkulu Nguluwi yolonga kota wone kwangukomya, kowawika Waamoni mmoko mwa heni,
JDG 11:31 aho ndo yowa, chila chochilawa kuli lwizi lwa ng'handa ya heni kumbochela, hondihiluka na kusumya kulawa kwa hewo Waamoni, chinhu acho chowa ndo cha Mkulu Nguluwi, nani ndochigala chiwe nhambiko ya kulakazwa.
JDG 11:32 Lelo Yefuta nakaloka kuwalutila Waamoni leka yetowe na hewo, naye Mkulu Nguluwi nakamha Yefuta kusumya, nakawakopola Waamoni weng'ha.
JDG 11:33 Nakawatowa na kuwawinga kulawa Aloeli mbaka Miniti, miji makumi meli na mbaka Abeli-kelamimu, nakawatowa ng'hatu. Ahyo, Waamoni nawalemwela hali Waisilaeli.
JDG 11:34 Yefuta loyawele yohiluka haluga ha heye Misipa, mhinza wa heye nakoya kumbochela na matali kuno yovina, ayo mhinza nayali mwana wa heye wa udewele. Yefuta hawele na mwana yunji mlume ne mdala.
JDG 11:35 Hala loyamuwene mhinza yula, Yefuta nakadadula igwanda lya heye na kulonga, “Gwa, mhinza wa heni, nakundita heni ngozole, kwa vila nakungalila magazo makulu. Nani ndilaha kwa Mkulu Nguluwi, hambe mbene chilaho cha heni.”
JDG 11:36 Mhinza wa heye nakamlonjela, “Mhaza wa heni, hegwe nakulaha kwa Mkulu Nguluwi, lelo nditile kota vyoulahile, kwa vila heye Mkulu Nguluwi nakakuhilusila chibida kwa hewo wang'honyo wa hegwe Waamoni.”
JDG 11:37 Hamba, nakamlonjela mhaza wa heye, “Lelo ndangukulanda unditile chinhu chimwe, undeche ndiliyeka kwa mhela wa myezi mili, leka ndute kuli vidunda na wayangu, tolila hamwe kwa vila siweza kuholeka ne kuponda mwana.”
JDG 11:38 Mhaza wa heye nakamkundiza kwa kumlonjela, “Goya, lute.” Hamba nakamhilika kutali kwa mhela wa myezi mili, naye nakaluta na wayage, nakalombocheza kubagama kwa heye ne kuholeka ne kuponda mwana.
JDG 11:39 Lelo lojimalile jila myezi mili, nakahiluka kwa mhaza wa heye. Mhaza wa heye nakadita kota vyoyelahile, ayo mhinza nakabagama ne kumzela mlume. Mbuli ayo naiwa chihendo kuli isi ya Isilaeli,
JDG 11:40 kota wahinza wa Isilaeli walute chila mwaka kumkumbuchila mhinza wa Yefuta, Mgileadi, mazuwa gane kuli chila mwaka.
JDG 12:1 Hamba wanhu wa Efulaimu naweting'hana na kuloka lwanda lwa Yolodani na kufika mbaka Safoni, nawamlonjela Yefuta, “Lekachoni namloka na kuka kitowa na Waamoni na hambe utucheme hetwe kuka hamwe na Waamoni? Toilakaza ng'handa ya hegwe kwa chiluli.”
JDG 12:2 Yefuta nakawalonjela, “Heni na wanhu wa heni natwali na kilewa kukulu na Waamoni, londiwachemile hemwe hamndohole hebu kuli moko ga hewo.
JDG 12:3 Londiwene kota hambe mndohole, nangana kwajiliza ukomu wa heni kwa kuloka leka nditowe na Waamoni, Mkulu Nguluwi nakawawika mmoko mwa heni. Lelo lekachoni mwanguya kwa heni lehano na kugana kitowa na heni?”
JDG 12:4 Aho ndo Yefuta nakawating'haniza wakulu wa Gileadi na kitowa na wanhu wa Efulaimu, nawo wanhu wa Gileadi nawawatowa wanhu wa Efulaimu kwa vila nawalonga, “Hemwe Wagileadi mwa wanhu wabilimile hela, mwangikala hagati ha Efulaimu na Manase.”
JDG 12:5 Nawo Wagileadi nawahola honhu heng'ha ha kuloka ha Yolodani leka kuwalemeza Waefulaimu. Hamba nayali chila yumwe yasulupuche hali Efulaimu loyalonjile, “Ndeche ndoche,” wala wanhu wa Gileadi nawamuuza, “Ndaze, hegwe kwa Muefulaimu?” Wone nakedichila, “Hebu,”
JDG 12:6 aho ndo nawamlonjela, “Goya, lelo ulonje ulonzi awu, Shiboleti,” naye nakalonga, “Siboleti.” Hawezile kudita mlomo wa heye kulonga goya ulonzi, aho ndo nawamibata na kumkopola hala hali honhu ha kuloka ha Yolodani. Lelo nawagwa wanhu wa Efulaimu elufu makumi gane na weli (42,000) mhela awo.
JDG 12:7 Yefuta nayali yokola mijito ja utagusa hali wanhu wa Isilaeli kwa mhela wa miyaka sita. Aho ndo Yefuta Mgileadi loyabagame na kutiligwa kuli muji wa heye ako Gileadi.
JDG 12:8 Loyabagame Yefuta, Ibusani wa Betelehemu nayali yotagusa hali wanhu wa Isilaeli.
JDG 12:9 Heye nayali na wana walume makumi gadatu na wahinza makumi gadatu. Nakawalavya wala wahinza wa heye leka wahesigwe na wanhu wa lukolo lunji, hamba nakegala wadala makumi gadatu kulawa lukolo lunji kwa chiwalo cha wanage walume. Nayali yokola mijito ja utagusa hali Isilaeli kwa mhela wa miyaka saba.
JDG 12:10 Ayo Ibusani nakabagama na kutiligwa ako Betelehemu.
JDG 12:11 Loyabagame Ibusani, Eloni, Msebuluni nayali yotagusa hali Isilaeli. Nakakola mijito ja utagusa kwa mhela wa miyaka kumi.
JDG 12:12 Ayo Eloni, Msebuluni, nakabagama na kutiligwa kuli muji wa Aiyaloni kuli isi ya Sebuluni.
JDG 12:13 Loyabagame Eloni, Abudoni, mwana wa Hileli, Mpilatoni nayali yotagusa hali Isilaeli.
JDG 12:14 Naye nayali na wana walume makumi gane na wazukulu walume makumi gadatu wawele wokwina midogowi makumi saba, nayali yokola mijito ja utagusa kuli isi ya Isilaeli kwa miyaka nane.
JDG 12:15 Ayo Abudoni mwana wa Hileli, Mpilatoni nakabagama na kutiligwa ako Pilatoni kuli isi ya Efulaimu hali vidunda vya Waamaleki.
JDG 13:1 Waisilaeli nawadita wihe kahi hali Mkulu Nguluwi, Mkulu Nguluwi nakawawika kuli moko ga Wafilisti kwa mhela wa miyaka makumi gane.
JDG 13:2 Nakwali na munhu yumwe wa ako Sola, wa nhanzi ya Dani, nayali yochemigwa itagwa lyake Manoa, mchewake nayali mhende nahawele na wana.
JDG 13:3 Mhilisi wa Mkulu Nguluwi nakamlawila yula mdala, nakamlonjela, “Lole, hegwe sambi kwa mhende, hambe uponde, ila kowa na himila na koponda mwana mlume.
JDG 13:4 Lelo ulolele, uleche kunwa divai ne chinhu choneche cha kukwambuza hegwe kugala na uleche kulya chinhu choneche chikokomoche,
JDG 13:5 kwa vila kowa na himila nagwe kuponda mwana mlume ne nzembe kukola kuli mutwi wa heye, kwa vila mwana ayo kowa Mnazili kwa Mkulu Nguluwi naye kokwaluka kuwalohola Waisilaeli kuli moko ga Wafilisti.”
JDG 13:6 Yula mdala nakaluta kumlonjela mlume wa heye, yolonga, “Munhu wa Nguluwi nakambuyila, kumeho kwa heye nakwali kota kumeho kwa mhilisi wa Nguluwi, wa kudumbiza ng'hatu. Nani simuuzile, ‘Nakulawa kohi?’ Naye handonjele itagwa lya heye,
JDG 13:7 ila nakandonjela, ‘Lole, kowa na himila na koponda mwana mlume, ila uleche kunwa divai ne chinhu cha kukwambuza kugala na uleche kulya chinhu chikokomoche. Mina ayo mwana wa hegwe kowa Mnazili kwa Nguluwi kulawa mmunda mwa hegwe mbaka zuwa lya kubagama kwa heye.’ ”
JDG 13:8 Manoa loyaluche kumlanda Mkulu Nguluwi, nakalonga, “Gwa Mkulu Nguluwi ndangukulanda, yula munhu yomlajize, yoye kwa hetwe lwa keli leka yatulanguse gala gotulapigwe kumditila ayo mwana yotumponda hamba.”
JDG 13:9 Nguluwi nakahulika lizi lya Manoa, mhilisi wa Nguluwi nakamlutila yula mdala kahi loyawele yochikalisa kumgunda, ila mlume wa heye nahawele hamwe na heye.
JDG 13:10 Lelo ayo mdala nakaluta himahima kwa kubilima na kumlonjela mlume wa heye yolonga, “Lole, ayo munhu nakandawila, ayo yambuyile zuwa lila.”
JDG 13:11 Lelo Manoa nakenuka na kumuwinza mchewake, nakamfika munhu ayo na kumuuza, “Ndaze, hegwe kwa yula munhu youmlonjele ayu mdala?” Yula munhu nakedichila, “Ena, ndo heni.”
JDG 13:12 Manoa nakalonga, “Lelo ulonzi wa hegwe houkwenela, ndaze mwana ayo koganigwa kuwinza malajizo gachi na kowa na mijito jachi?”
JDG 13:13 Mhilisi wa Mkulu Nguluwi nakamlonjela Manoa, “Lelo ayo mdala yelolele na vinhu vyeng'ha vyondimlonjele.
JDG 13:14 Yaleche kulya chinhu choneche chilingulawa kuli zabibu ne kunwa divai ne kulya chinhu chikokomoche. Aga geng'ha gondimlonjele yebatilile goya.”
JDG 13:15 Hamba Manoa nakamlonjela ayo mhilisi wa Mkulu Nguluwi, “Ndangukulanda uleche kuka leka tuwiche goya chinyehe kwa chiwalo cha hegwe.”
JDG 13:16 Ila mhilisi wa Mkulu Nguluwi nakamlonjela Manoa, “Hanga mondemeza kuka, hambe ndiye chilyo cha hegwe, ila wone kwangugana kuwika goya nhambiko ya kulakazwa, mlavile Mkulu Nguluwi.” Manoa nahavizelele kota ayo nayali mhilisi wa Mkulu Nguluwi.
JDG 13:17 Manoa nakamuuza ayo mhilisi wa Mkulu Nguluwi, “Itagwa lyako lyachi, leka aho ulonzi wa hegwe houkwenela tukutogole?”
JDG 13:18 Ayo mhilisi wa Mkulu Nguluwi nakamwidichila Manoa, “Lekachoni kwangumbuza itagwa lya heni, itagwa lya heni lya kububuwaza ng'hatu?”
JDG 13:19 Lelo Manoa nakachihola chila chinyehe hamwe na nhambiko ya utimbo, nakamlavila Mkulu Nguluwi hala mchanya mwa italawe. Mhilisi nakadita vinduzanduza, Manoa na mchewake nawalola.
JDG 13:20 Lelo ajo milapi ja chiluli lojimemile kuchanya kilanga kulawa hala honhu ha kulavila nhambiko, ayo mhilisi wa Mkulu Nguluwi nakaguluka kuli milapi ajo ja chiluli cha honhu ha kulavila nhambiko, nawo Manoa na mchewake nawagwa chifunama.
JDG 13:21 Manoa nakavizela kota ayo nayali mhilisi wa Mkulu Nguluwi. Mhilisi hawalawile kahi Manoa na mchewake.
JDG 13:22 Manoa nakamlonjela mchewake, “Ndikomya hetwe tobagama, kwa vila natumona Nguluwi.”
JDG 13:23 Ila mchewake Manoa nakamlonjela mlume wa heye, “Wone Mkulu Nguluwi nayaganile kutukopola, hanayalikunda nhambiko ya kulakazwa ne nhambiko ya utimbo kulawa mmoko mwa hetwe ne kutulajila mbuli zeng'ha azi ne kutulonjela mbuli kota azi mhela awu.”
JDG 13:24 Lelo yula mdala nakamponda mwana mlume, nakamchema Samsoni. Mwana ayu nakakula na Mkulu Nguluwi nakamtambichiza.
JDG 13:25 Muhe wa Mkulu Nguluwi nawaluka kukola mijito mgati mwa heye ako Mahane-dani, hagati ha Sola na Eshitaoli.
JDG 14:1 Samsoni nakaluta mbaka Timuna, nakamona mdala ako Timuna yawele ndo yumwe wa wahinza wa Wafilisti.
JDG 14:2 Hamba, nakahiluka na kuwalonjela mhaza na mayake, yolonga, “Ndimona mdala ako Timuna, yumwe wa wahinza wa Wafilisti, lelo mng'hundize ndimhole.”
JDG 14:3 Mayake na mhaza wa heye nawamlonjela Samsoni, “Ndaze, haduhu mdala ne yumwe hali wang'holozo ama kuli nhanzi ya heni yeng'ha, mbaka kwamula kuluta kuhola kwa Wafilisti wano wohambe wenjile ikumbi?” Samsoni nakamlonjela mhaza wa heye, “Mng'hundize heni ndimhese ayo kwa vila nojezwa na heye.”
JDG 14:4 Ila mhaza wa heye na mayake hawavizelele kota mbuli ayi nayali ya Mkulu Nguluwi, kwa vila nayali yogana chiwalo kulawa kwa Wafilisti. Lelo mhela wula Wafilisti nawali wowalongoza Waisilaeli.
JDG 14:5 Samsoni na mhaza wa heye na mayake nawadulika mbaka Timuna. Nalowafichile kuli migunda ja zabibu ako Timuna, baho du isimba nalimuwinza kuno limng'hanuchila.
JDG 14:6 Muhe wa Mkulu Nguluwi naumuyila kwa mong'ho ng'hatu, naye Samsoni nakalidadula alyo isimba kota kanguchidadula chinyehe. Hawele na chinhu choneche mmoko mwa heye. Hawalonjele mhaza na mayake choyaditile.
JDG 14:7 Hamba Samsoni nakadulika na kulonga na ayo mdala na nakanojezwa na heye.
JDG 14:8 Hamba, nakahiluka leka yamhole ayo mhinza. Lole, nzuchi nyinji nazali mgati mwa itufi lya alyo isimba na hanombwa.
JDG 14:9 Nakahola yila hanombwa kwa moko ga heye na kulutilila na majendo kuno yolya ayo hanombwa mnzila, nakawafika mhaza na mayake na nakawapa yila hanombwa nawo nawalya, ila hambe yawalonjele kota hanombwa ayo nakailavya kulawa kuli itufi lya isimba.
JDG 14:10 Lelo mhaza wa heye nakaluta kwa ayo mdala, naye Samsoni nakadita mnvina ako kwa vila ndo chihendo kwa wasongolo kudita ahyo.
JDG 14:11 Lelo Wafilisti vyowamuwene Samsoni, nawawegala wasongolo makumi gadatu wawe hamwe na heye kuli mnvina.
JDG 14:12 Samsoni nakawalonjela, “Heni ndowagwilliza hemwe kwa chitendawili, wone moweza kutang'hula chitendawili acho kuli mazuwa aga saba ga mnvina na kuvizela, aho ndo ndowapa mivalo makumi gadatu ga kitani na mivalo jinji makumi gadatu.
JDG 14:13 Ila wone molemwela kutang'hula, aho ndo hemwe momha heni mivalo ajo makumi gadatu ga kitani na mivalo jinji makumi gadatu.” Lelo hewo nawamlonjela, “Goya, longa leka hetwe tukuhulichize.”
JDG 14:14 Heye nakawalonjela, “Kulawa kwa yalingulya, nachilawa chilyo, kulawa kwa ayo yawele na mong'ho nachilawa chinonile.” Nawo nahawawezile kutang'hula chitendawili acho kwa mazuwa gadatu.
JDG 14:15 Kuli zuwa lya kane, nawamlonjela mchewake Samsoni, “Mhembulize mlume wa hegwe leka yatutang'hulile acho chitendawili, leka tuleche kukulakaza kwa chiluli hegwe na ivyazi lya mhaza wa hegwe. Ndaze, namtuchema leka mhole lufufu lwa hetwe ama hebu?”
JDG 14:16 Lelo mchewake Samsoni nakalila hali heye, nakalonga, “Hegwe kwangunzudila hambe ungane. Hegwe nakuwawichila chitendawili wano wanhu wa heni na hundonjele.” Samsoni nakamlonjela ayo mdala, “Lole, siwalonjele mhaza na mayangu, lekachoni ndikulonjele hegwe?”
JDG 14:17 Naye nakamlilila mbaka mnvina hoiwele habehi kumala. Lelo kuli zuwa lya saba, Samsoni nakamlonjela ayo mdala kwa vila nayali yomhimiliza ng'hatu yamlonjele. Mdala ayo nakawalonjela wala wanhu wa heye kutang'hula kwa chitendawili acho.
JDG 14:18 Nawo wanhu wa muji awo nawamlonjela Samsoni zuwa lya saba kung'hali kufika kuzinga kwa isanya, “Ndo chinhu chachi chinonile kusinda hanombwa? Ndo chinhu chachi chiwele na mong'ho kusinda isimba?” Naye nakawalonjela, “Wone mwahalimile na isenga lya heni, mwahatang'hule chitendawili cha heni.”
JDG 14:19 Muhe wa Mkulu Nguluwi naumuyila Samsoni kwa mong'ho, naye nakadulika mbaka Ashikeloni, nakawakopola walume makumi gadatu na kuhola mivalo ja hewo na kuwapa wala watang'hule chitendawili cha heye. Kuno yawele na ng'halazi nakakwina kuhiluka haluga ha mhaza wa heye.
JDG 14:20 Ila ayo mchewake Samsoni nakahesigwa na mlume yunji yawele mtanzi wa Samsoni zuwa lya kuhesa.
JDG 15:1 Hamba mhela wa mbena ya ngano, Samsoni nakaluta kumlola mchewake, nakamholela chinyehe, nakamlonjela mhaza wa heye, “Ndokwinjila mchihengo cha mchewangu.” Ila mhaza wa mdala ayo nahamlechile Samsoni yenjile mgati.
JDG 15:2 Mhaza wa ayo mdala nakamlonjela Samsoni, “Ndikomya, heni ndivizela kota hegwe nakumzudila ng'hatu, lelo ndimha mtanzi wa hegwe wa kuli zuwa lya kuhesa. Ndaze, hambe wijese kota mdodowe ndo yanojile kusinda yula mkulugwe? Dedede, mhole ayu honhu ha heye.”
JDG 15:3 Samsoni nakalonga, “Sambi ndowa ndilihela nongwa kwa Wafilisti wano hala hondiwaditila vibi.”
JDG 15:4 Samsoni nakaluta kibata mikanhu miya jidatu na kuhola vyenje. Nakawopa michila ja chila mikanhu mili na chenje.
JDG 15:5 Loyavibwinile vila vyenje, nakajilechela jila mikanhu mgati mwa migunda ja nyhule ja Wafilisti. Nakajilakaza kwa chiluli nganda za nyhule na nyhule hazibetigwe na migunda ja mizabibu na migunda ja mizeituni.
JDG 15:6 Aho ndo Wafilisti nawaluka kulonga, “Munhu wachi yaditile hino?” Nawalonjelwa, “Ndo ayu Samsoni mgosi wa ayu Mtimuna, kwa vila nakamhola mche wa Samsoni na kumha myage.” Lelo Wafilisti nawaluta kuwalakaza kwa chiluli yula mdala na mhaza wa heye.
JDG 15:7 Samsoni nakawalonjela, “Wone hemwe mwangudita mbuli kota azo, ndikomya sileka kuwaditila vibi mbaka hala hondihilusa chibida kwa hemwe.”
JDG 15:8 Aho ndo Samsoni nakawatowa ng'hatu na kuwakopola wenji wa hewo. Hamba nakadulika na kikala kuli mhalika ya italawe lya Etamu.
JDG 15:9 Lelo Wafilisti nawakwina na kuwika kambi ya hewo ako Yuda na kiwika goya kwa ngondo habehi na muji wa Lehi.
JDG 15:10 Wanhu wa muji wa Yuda nawalonga, “Lekachoni muya kitowa na hetwe?” Nawo nawedichila, “Natukwina leka kumibata na kumhola Samsoni na kumdita heye kota vyoyatuditile hetwe.”
JDG 15:11 Aho ndo wanhu wa Yuda elufu zidatu nandowaduliche kuka mbaka kula kuli mhalika ya italawe lya Etamu na kumlonjela Samsoni, “Ndaze, huvizelele kota Wafilisti wangutulongoza? Ndo choni achi lelo choutuditile hetwe?” Heye nakawedichila, “Nandiwaditila kota hewo vyowanditile heni.”
JDG 15:12 Nawo nawamlonjela, “Natudulika leka tukuwope na kukuwika kuli moko ga Wafilisti.” Samsoni nakawalonjela, “Milahe kwa heni hano kota hemwe hamng'hopola.”
JDG 15:13 Nawamlonjela wolonga, “Goya, tokuwopa hela na kukuwika kuli moko ga hewo. Tukomya hatukukopola hebu.” Lelo nawamuwopa kwa ng'weso mbili zinyale nawamhola kulawa ako kuli italawe na kumhilika kwa Wafilisti.
JDG 15:14 Loyafichile Lehi, Wafilisti nawamlutila kuno wotowa iyowe. Muhe wa Mkulu Nguluwi naumuyila kwa mong'ho, na zila ng'weso ziwele kuli moko ga heye naziwa kota kitani ilakazigwe kwa chiluli na kudumuka ziliyeka.
JDG 15:15 Naye nakalyona izeje idodi lya mlomo wa idogowi, nakahola na kuwatowela wala walume elufu imwe na kuwakopola kwa izeje alyo.
JDG 15:16 Ahyo, Samsoni nakalonga, “Kwa izeje lya mlomo wa idogowi, ndizilunda ng'huli za hewo. Kwa izeje lya mlomo wa idogowi, ndiwakopola walume elufu imwe.”
JDG 15:17 Hala du loyalonjile, nakatoza lila izeje lya mlomo wa idogowi kulawa mmoko mwa heye. Honhu hala nahachemigwa Lamati-lehi.
JDG 15:18 Hamba Samsoni nakawa na ng'halu ng'hatu, nakamchema Mkulu Nguluwi na kulonga, “Nakumha ulohozi awu kwa moko wa chitumagwa wa hegwe. Sambi ndobagama kwa ng'halu na kugwa kuli moko ga wanhu wohambe wenjile ikumbi.”
JDG 15:19 Ila Nguluwi nakagubula honhu hawele na isimo hawele ako Lehi, honhu aho nahalawa mazi naye nakanwa na muhe wa heye naumuyila kahi. Lelo itagwa lya honhu hala nalyali Eni-hakole, hawele ako mbaka lehano.
JDG 15:20 Naye Samsoni nayali yokola mijito ja utagusa ako Isilaeli kuli mazuwa ga Wafilisti kwa mhela wa miyaka makumi meli.
JDG 16:1 Samsoni nakaluta Gasa, ako nakamona mdala mng'hondwa, Samsoni nakawasa naye.
JDG 16:2 Wanhu wa Gasa nalowavizelele kota Samsoni ka kula, nawazunguluta honhu heng'ha kuno wombeteza heye nechilo yeng'ha kuli lwizi lwa muji. Nawanyamalila tulu nechilo yeng'ha kuno wochijesa na kilonjela hewo kwa hewo, “Tubeteze mbaka kubwemwenzuche, ndo tomkopola.”
JDG 16:3 Lelo Samsoni nakawasa mbaka hagati ha nechilo, hamba nakalilimka, nakebata lwizi lwa muji na mizengo mili ja lwizi, nakang'humbula lwizi hamwe na mhajilo zake na kuvipika. Nakavihilika mbaka kuli chinhembenhembe cha chila chidunda chilingilola na Hebuloni.
JDG 16:4 Hamba, logakwete ago, Samsoni nakamgana mdala yumwe kuli ibindi lya Soleki, itagwa lyake lyali Delila.
JDG 16:5 Nawo wakulu wa Wafilisti nawamlutila na kumlonjela, “Mhembulize leka uvizele mwaluko wa mong'ho wa heye na ndaze vyotuweza kumsumya, leka tumuwope na kumgaza. Natwe tokupa chila munhu sendi elufu imwe na miya imwe.”
JDG 16:6 Delila nakamlonjela Samsoni, “Dedede, ndonjele mwaluko wa mong'ho wa hegwe na ndaze wanhu vyowoweza kukuwopa na kukugaza.”
JDG 16:7 Samsoni nakamlonjela, “Wone wanhu wondiwopa kwa ng'weso saba ndodi za upinde, aho ndo hondiwa ng'hochele na ndowa kota wanhu wayangu wanji.”
JDG 16:8 Aho ndo wakulu wa Wafilisti nawamigalila Delila ng'weso saba ndodi. Delila nakamuwopa Samsoni.
JDG 16:9 Ayo mdala nayali na walume kuli chihengo cha heye cha mgati, wombeteza Samsoni. Lelo yula mdala nakamlonjela Samsoni, “Wafilisti wanguya.” Samsoni nakazidumula zila ng'weso kota vyoulingudumuligwa uzi wa mhamba hala houdoliza chiluli. Lelo mwaluko wa mong'ho wa heye hauzeleche hebu kwa mhela wula.
JDG 16:10 Delila nakamlonjela Samsoni, “Nakumbeza na kulonga udesi kwa heni. Lelo ndonjele, koweza kuwopigwa kwa chinhu chachi?”
JDG 16:11 Samsoni nakamlonjela, “Wone wondiwopa kwa ng'weso zinyale na hambe zikole mijito ne zuwa limwe, aho ndo hondiwa ng'hochele na ndowa kota wanhu wayangu wanji.”
JDG 16:12 Lelo Delila nakegala ng'weso zinyale na kumuwopa nazo, nakamlonjela, “Wafilisti wanguya, Samsoni.” Na wala wawele wombeteza Samsoni nawali kuli chihengo cha mgati. Naye Samsoni nakazidumula zila ng'weso, nakazitoza kulawa kuli moko ga heye kota uzi.
JDG 16:13 Delila nakamlonjela Samsoni, “Sambi kahi nakumbeza, nakulonga udesi kwa heni. Ndonjele, kowopigwa kwa chinhu chachi kahi lelo?” Samsoni nakamlonjela, “Wone wotawa vifundo saba vya mnvili za mutwi wa heni na kuziwopa ng'hatu kuli mtande wa kutawila nguwo, nani ndowa kota wanhu wayangu wanji.”
JDG 16:14 Lelo Delila nakaziwopa azo mnvili kuli mtande wa kutawila nguwo, nakamlonjela Samsoni, “Wafilisti wanguya.” Naye Samsoni nakalilimka kulawa kuli usinjizi, nakang'humbula wula mtande.
JDG 16:15 Delila nakamlonjela Samsoni, “Koweza ndaze kulonga ‘Ndangukugana’ kuno nhumbula ya hegwe hambe ingane? Nakumbeza lwa kadatu, hambe hundonjele mwaluko wa mong'ho ukulu wa hegwe.”
JDG 16:16 Delila nayali yomtunya Samsoni chila zuwa kwa kumuuza kuwala mbuli yila, muhe wa heye naugazika habehi kubagama.
JDG 16:17 Aho ndo Samsoni nakamlonjela geng'ha gawele mnhumbula ya heye, nakamlonjela, “Nzembe haikolile hebu kumutwi kwa heni kwa vila heni nda Mnazili wa Mkulu Nguluwi kulawa mmunda mwa mayangu. Wone mbeye mnvili za heni, aho ndo mong'ho wa heni wokuka, nani ndowa ng'hochele na kuwa kota wanhu wayangu.”
JDG 16:18 Lelo Delila loyawene kota Samsoni nakamlonjela geng'ha gawele mnhumbula ya heye, nakamlajiza munhu kuwachema wakulu wa Wafilisti, yolonga, “Muye kuno sambi baha, mina nakandonjela uviso wa heye weng'ha.” Aho ndo wakulu wa Wafilisti nawaluta kuno waholile sendi mmoko mwa hewo.
JDG 16:19 Naye Delila nakamdita Samsoni yawe na usinjizi na yawase kuli mafugamilo ga heye. Hamba Delila nakamchema munhu na kubeya vila vifundo saba vya mnvili za kumutwi mwa heye, nakaluka kumgaza na mong'ho wa heye naumlawa.
JDG 16:20 Hamba Delila nakalonga, “Wafilisti wanguya.” Samsoni nakalilimka kulawa kuli usinjizi, nakalonga, “Ndoluta kunze kota zuwa linji na kilohola.” Ila havizelele kota Mkulu Nguluwi nakamleka.
JDG 16:21 Wafilisti nawamibata na kumlavya meho ga heye, nawadulika na heye mbaka Gasa. Nawamuwopa kwa ng'weso za shaba na kumha mijito ja kubalasa nyhule mchinweng'ho.
JDG 16:22 Ila zila mnvili za mutwi wa heye nazaluka kukula hala du lozibeyigwe.
JDG 16:23 Hamba wakulu wa Wafilisti naweting'hana hamwe leka kumlavila nhambiko mlungu wa hewo Dagoni kuno wosangalala, mina nawalonga, “Mlungu wa hetwe nakamuwika Samsoni, mng'honyo wa hetwe kuli moko ga hetwe.”
JDG 16:24 Wala wanhu lowamuwene, nawamfugamila mlungu wa hewo, mina nawalonga, “Mlungu wa hetwe nakamuwika mmoko mwa hetwe ayu mng'honyo wa hetwe. Nakaiwifya isi ya hetwe na kuwakopola wanhu wenji hali hetwe.”
JDG 16:25 Nhumbula za hewo nazisangalala, nawalonga, “Mumigale Samsoni leka yatuditile chinhu cha kutudita hetwe tuseche.” Lelo nawamigala Samsoni kulawa mchinweng'ho leka yawadite waseche, nawamuwika hagati ha mizengo mili.
JDG 16:26 Samsoni nakamlonjela yula msongolo yembatile moko, “Ndeche ndikwabase mizengo jiwele jimize ng'handa ino, leka nyhegamile.”
JDG 16:27 Lelo ng'handa yila nayali imemile walume na wadala na wakulu weng'ha wa Wafilisti nawali mumo. Kuchinduwiko nakwali na wanhu elufu zidatu walume na wadala, wawele womlola Samsoni vyoyawele yowasecheza.
JDG 16:28 Samsoni nakamchema Mkulu Nguluwi, yolonga, “Gwa Mkulu Nguluwi, ndangukulanda ung'humbuche, ndangukulanda umhe mong'ho sambi hela, gwa Mkulu Nguluwi, leka ndihiluse chibida kwa Wafilisti kwa chiwalo cha meho ga heni meli.”
JDG 16:29 Hamba Samsoni nakajibata jila mizengo mili jiwele yila ng'handa naijikalisila mchanya mwake na nakajegamila, imwe kwa moko wa heye wa kudilo na iyage kwa moko wa heye wa kumoso.
JDG 16:30 Samsoni nakalonga, “Leka heni mbagame na Wafilisti wano.” Nakajikundujiza mizengo kwa mong'ho wa heye weng'ha, yila ng'handa naiwagwila wala wakulu na wanhu weng'ha wawele mgati mwake. Wanhu wabagame mhela wa kubagama kwa Samsoni, nawali wenji kusinda wala yawakopole mhela Samsoni woyawele mkomu.
JDG 16:31 Aho ndo wang'holoze Samsoni na wanhu weng'ha wa ivyazi lya mhaza wa heye nawadulika, nawamhola na kuza kumtila hagati ha Sola na Eshitaoli, mchilaga cha kutilila cha Manoa, mhaza wa heye. Samsoni nayali yokola mijito ja utagusa kuli isi ya Isilaeli kwa mhela wa miyaka makumi meli.
JDG 17:1 Mhela awo nakwali na munhu yumwe wa isi ya vidunda vya Efulaimu, nayali yochemigwa Mika.
JDG 17:2 Zuwa limwe nakamlonjela mayake, “Vila vihande elufu imwe na miya imwe vya sendi vyouhizilwe, nanyhulika kota nakumpanjila yakuhizile, heni ndanavyo. Heni ndo ndiviholile.” Mayake nakalonga, “Mwana wa heni utambichizwe na Mkulu Nguluwi.”
JDG 17:3 Lelo nakamhilusila sendi azo migwala elufu imwe na miya imwe. Mayake nakalonga, “Heni ndanguwika sendi azi ziwe kwa mijito jelile kwa Mkulu Nguluwi, zilawe mmoko mwa heni kwa chiwalo cha mwana wa heni, leka kugongomanya limalukolo lya kuhongola na limalukolo lya kuponda. Lelo ndangukuhilusila hegwe.”
JDG 17:4 Lelo loyamhilusile mayake sendi azo, mayake nakahola sendi migwala miya mbili, nakamha munhu yalinguponda sendi, naye nakadita limalukolo lya kuhongola na limalukolo lya kuponda. Jimalukolo ajo najiwichigwa mgati mwa ng'handa ya Mika.
JDG 17:5 Lelo Mika nayali na ng'handa ya milungu, naye nakagongomanya chizibao na jimalukolo jinji na kumhagula yumwe wa wanage yawe mtambika wa heye.
JDG 17:6 Mazuwa ago nakwali haduhu mndewa ako Isilaeli, chila munhu nayali yodita chinhu choneche choyalinguchona kota ndo chinoga kwa heye yuye.
JDG 17:7 Nakwali na msongolo yumwe Mlawi yalawile Betelehemu kuli isi ya Yuda, naye nakekala ako kuli nhanzi ya Yuda kota mjenzi.
JDG 17:8 Munhu ayo nakalawa Betelehemu kuli isi ya Yuda leka yalute kupala honhu ha kikala. Kuli majendo ga heye nakafichila kuli isi ya vidunda vya Efulaimu, mbaka kuli ng'handa ya ayo Mika.
JDG 17:9 Mika nakamuuza, “Nakulawa kohi?” Yula munhu nakamwidichila, “Heni nda Mlawi wa Betelehemu kuli isi ya Yuda, nani ndoluta kikala honhu honeche hala hondikona hanojile.”
JDG 17:10 Mika nakamlonjela, “Wikale hamwe na heni, uwe undonjela choni Nguluwi choyogana ndite na kahi uwe mtambika wa heni, nani ndokupa sendi migwala kumi chila mwaka na nguwo za kuvala na chilyo.” Yula munhu Mlawi nakenjila mgati.
JDG 17:11 Mlawi ayo nakakunda kikala na munhu ayo, nayali kota yumwe wa wana wa Mika.
JDG 17:12 Lelo Mika nakamhagula ayo Mlawi yawe yokola mijito jelile leka yawe mtambika wa heye. Nakekala haluga ha Mika.
JDG 17:13 Aho ndo Mika nakalonga, “Sambi ndivizela kota Mkulu Nguluwi konditila ganojile kwa vila ndina Mlawi kota mtambika wa heni.”
JDG 18:1 Mazuwa ago nakwali haduhu mndewa kuli isi ya Isilaeli na kahi nhanzi ya Dani nawepalila uhalizi leka wawe na honhu ha kikala, mina nawali wang'hali kubochela uhalizi wa hewo hali nhanzi ya Waisilaeli.
JDG 18:2 Lelo wanhu wa Dani nawalajiza wanhu wahano kulawa wanhu weng'ha wa nhanzi ya hewo, wanhu wezidahe kulawa Sola na Eshitaoli, leka kuipugajiza isi ayo na kuikagula. Nawawalonjela, “Lelo muche mkaikagule isi ayo.” Lelo nawafika isi ya vidunda vya Efulaimu mbaka ng'handa ya ayo Mika, nawawasa ako.
JDG 18:3 Lowawele habehi na ng'handa ya Mika, nawatang'hula kulonga kwa ayo msongolo Mlawi kota ka mjenzi, aho ndo nawagaluka na kumuuza, “Ndaze, munhu whaani yakugale hegwe kuno? Kwangudita choni hano?”
JDG 18:4 Naye nakawalonjela, “Hino ndo vyoyalingunditila Mika, ndangumkolela mijito, nani ndiwa mtambika wa heye.”
JDG 18:5 Nawo nawamlonjela, “Dedede, umlande Nguluwi wone kotutambichiza tovizela kota nzila yotulinguluta yowa goya.”
JDG 18:6 Mtambika nakawalonjela, “Goya, muche kwa kikala goya, mina nzila yomlinguluta nayo ya hali Mkulu Nguluwi.”
JDG 18:7 Aho ndo wala wanhu wahano nawoka, nawafika Laisha, nawawona wala wanhu wowawele mgati mwake, ndaze vyowali wekale kwa kikala goya kota vyochiwele chihendo cha Wasidoni. Nawali wesindamale na walihela lunhwinhwi na hambe wapunguchilwe na choneche hali isi. Nawo nawali kutali na Wasidoni, nawali hela ilagano lyoneche na wanhu wanji.
JDG 18:8 Hamba nawawawinza wang'holozawo ako Sola na Eshitaoli. Wang'holozawo nawawauza, “Lelo mna mbuli yachi?”
JDG 18:9 Hewo nawalonga, “Mwinuche lelo, tuche kitowa na hewo mina tuyona ayo isi inoga ng'hatu. Ndaze, hemwe hambe mdite chinhu choneche? Mleche kuwa wagata kuluta na kwinjila leka muihole ayo isi.
JDG 18:10 Homluta ako mowafika wanhu walingikala kwa kikala goya. Isi ndo ng'hulu na Nguluwi nakaiwika kuli moko ga hemwe, ndo honhu hawele hambe hesilwe chinhu choneche.”
JDG 18:11 Lelo nawalawa wanhu wa nhanzi ya Dani miya sita wawichigwe goya kitowa ngondo, kulawa Sola na Eshitaoli.
JDG 18:12 Nawaluta kuwika kambi ya hewo ako kolizinjilaga isanya mwa Kiliati-yealimu kuli Yuda. Kwa chiwalo acho nawahachema honhu aho Mahane-dani mbaka lehano.
JDG 18:13 Nawo nawakola ako mbaka kuli isi ya vidunda vya Efulaimu, nawafichila kuli ng'handa ya ayo Mika.
JDG 18:14 Aho ndo wala wanhu wahano walutile kuipugajiza isi ya Laisha nawawalonjela wang'holozawo, “Ndaze, hemwe mvizela kota mgati mwa ng'handa ayi mna chizibao na limalukolo lya kuhongola na limalukolo lya kuponda na jimalukolo jinji? Lelo mijese choni chomlinguganigwa kudita.”
JDG 18:15 Lelo nawagaluka na kuluta ako, nawafika hali ng'handa ya ayo msongolo Mlawi, haluga ha Mika na kumlamsa.
JDG 18:16 Wala walume miya sita wawichigwe goya kitowa ngondo, wawele ndo wanhu wa nhanzi ya Dani, nawema kuli honhu ha kwinjilila, hali lwizi lwa lugagala.
JDG 18:17 Wala wanhu wahano walutile kuipugajiza yila isi, nawakwina kuchanya, nawenjila mgati na kulihola lila limalukolo lya kuhongola na chila chizibao na lila limalukolo lya kuponda na jimalukolo jinji. Ayo mtambika nakema hali honhu ha kwinjilila, hali lwizi lwa lugagala hamwe na wala wamizi miya sita.
JDG 18:18 Hala lowenjile mgati mwa ng'handa ya Mika na kulihola lila limalukolo lya kuhongola na chila chizibao na limalukolo lya kuponda na jimalukolo jinji, ayo mtambika nakawauza, “Mwangudita choni hemwe?”
JDG 18:19 Nawo nawamlonjela, “Winyamalile hegwe. Wiche moko ga hegwe kumlomo kwa hegwe na uche hamwe na hetwe leka uwe kwa hetwe mhaza na mtambika kahi. Ndaze, iwa goya kwa hegwe kuwa mtambika kwa munhu yumwe ama kuwa mtambika kwa chiwalo cha wanhu wa nhanzi imwe ya Isilaeli?”
JDG 18:20 Nhumbula ya mtambika ayu naisangalala, naye nakachihola acho chizibao na jila jimalukolo na lila limalukolo lya kuhongola, nakaluta hagati ha wala wanhu.
JDG 18:21 Lelo nawagaluka na kuluta. Ila wana wa hewo wadodo na migongolo ja hewo ja kufujigwa na vinhu vya hewo nawavilongola kumwando kwa hewo.
JDG 18:22 Nalowalutile kutali na ng'handa ya Mika, wala wanhu wawele kuli ng'handa ziwele habehi na yila ng'handa ya Mika, naweting'hana na kuwawinza wanhu wa nhanzi ya Dani, nawawafika.
JDG 18:23 Nawawatowela iyowe wanhu wa Dani. Wanhu wa Dani nawagalusa kumeho kwa hewo na kumlonjela Mika, “Kuna choni hegwe mbaka nakuya na nhing'hano kota ayi?”
JDG 18:24 Mika nakawalonjela, “Hemwe namjihola milungu ndijigongomanye na mumhola kahi ayo mtambika na kuluta, nani ndina choni kahi? Lelo iwa ndaze hemwe kumbuza heni, ‘Kuna choni hegwe?’ ”
JDG 18:25 Wala wanhu wa nhanzi ya Dani nawamlonjela, “Hatulingugana kahi kuhulika lizi lya hegwe, leka wanhu wawele wazudile ng'hatu waleche kukutowa na hegwe kubagama hamwe na wanhu wa haluga hako.”
JDG 18:26 Lelo wanhu wa nhanzi ya Dani nawaluta. Mika navyoyawene kota wala wana mong'ho lukami, nakagaluka na kuhiluka haluga ha heye.
JDG 18:27 Wala wanhu wa nhanzi ya Dani nawahola chila chinhu choyagongomanye Mika na kumhola mtambika wa heye kahi. Nawafika Laisha kwa wanhu wowawele wochikala kwa kikala goya na walihela lunhwinhwi, nawawatowa wala wanhu kwa ipanga na kuulakaza kwa chiluli muji awo.
JDG 18:28 Nakwali haduhu munhu wa kuwalohola kwa vila muji awo nawali kutali ng'hatu na Sidoni, nawo nawali hela ilagano lyoneche na wanhu wanji. Muji awo nawali kuli ibindi alyo liwele habehi na Beti-lehobu. Nawo nawauzenga muji awo na kikala amo.
JDG 18:29 Nawauchema muji awo Dani, kwa kuliwinza itagwa lya mhaza wa hewo Dani, yawele mwana wa Isilaeli. Ila itagwa lya muji awo aho hamwande, nalyali Laisha.
JDG 18:30 Hamba, wanhu wa nhanzi ya Dani nawemizila alyo limalukolo lya kuhongola, naye Yonatani, mwana wa Gelishomu, mwana wa Musa, heye na wanage nawali watambika kwa nhanzi ya Dani mbaka kuli zuwa alyo nhanzi ayo vyoiholigwe kuli upogozi wa ngondo.
JDG 18:31 Lelo nawalimiza alyo limalukolo lya kuhongola ligongomanyigwe na Mika na kulifugamila, mhela weng'ha yila ng'handa ya Nguluwi loiwele ako Shilo.
JDG 19:1 Mhela awo lokuwele haduhu mndewa hali isi ya Isilaeli, nakwali na Mlawi yumwe yawele yochikala kota mjenzi kumwando mwa isi ya vidunda vya Efulaimu, yaholile mhawake ako Betelehemu kuli Yuda.
JDG 19:2 Hamba, ayo mhawake nakamzudila ayo Mlawi, nakamleka na kuhiluka kwa mhaza wa heye ako Betelehemu kuli Yuda, nakekala ako kwa mhela wa myezi jine.
JDG 19:3 Hamba, mlume wa heye nakamuwinza leka yadawale na heye kwa igano na kumhilula kahi. Ayo Mlawi nayali na chitumagwa na midogowi mili. Lelo ayo mdala nakambochela ayo Mlawi na kumhilika kuli ng'handa ya mhaza wa heye. Mhaza wa ayo mdala loyamuwene Mlawi, nakasangalala kumona.
JDG 19:4 Hamba mkweye, mhaza wa ayo mdala, nakambochela goya. Nawo nawalya na kunwa ako kwa mhela wa mazuwa gadatu.
JDG 19:5 Hamba kuli zuwa lya kane, nawalilimka lufuku, nawewika goya leka woche, ila mhaza wa ayo mdala nakamlonjela yula Mlawi, “Ulye chinhu hado, hamba mokuka.”
JDG 19:6 Lelo nawakalisa, nawalya na kunwa hamwe weng'ha weli. Hamba, mhaza wa yula mdala nakamlonjela yula Mlawi, “Dedede, uwase hano nechilo ayi na kusangalala.”
JDG 19:7 Yula munhu nakaluka kuka, mkweye nakamdedeza ng'hatu, naye nakawasa kahi bahala.
JDG 19:8 Lelo kuli zuwa lya kahano, nakenuka kahi lufuku leka yoche, yula mhaza wa mdala nakamlonjela. “Dedede, mulye nakikala hano mbaka nemisi.” Nawo nawalya hamwe weng'ha weli.
JDG 19:9 Hamba, yula munhu nakenuka leka yoche heye na ayo mhawake na chitumagwa wa heye, yula mkweye, mhaza wa yula mdala, nakamlonjela, “Lole, matinazo ya habehi, uwase hano na kusangalala, mitondo kolilimka lufuku na kwaluka majendo kuhiluka haluga.”
JDG 19:10 Ila yula munhu nahakundile kuwasa hala kahi, nakenuka na kuka. Nakafika mbaka behi na muji wa Yebusi, uwele ndo muji wa Yelusalemu. Heye nayali na jila midogowi mili jiwichigwe goya na ayo mhawake.
JDG 19:11 Lelo lowafichile behi na Yebusi, nayali matinazo. Yula chitumagwa nakamlonjela yula mkulu wa heye, “Lelo inoga kwinjila kuli muji awu wa Wayebusi na kuwasa amo nechilo ayi.”
JDG 19:12 Mkulu wa heye nakamlonjela, “Hambe tuhinduche na kwinjila kuli muji wa wajenzi wohawawele Waisilaeli. Tolutilila na majendo mbaka Gibeya.”
JDG 19:13 Hamba nakamlonjela chitumagwa wa heye, “Lelo tuche na kujihejelela miji ajo na kuwasa kuli muji wa Gibeya ama Lama.”
JDG 19:14 Nawalutilila na majendo ga hewo mbaka mhela wa kuzinga kwa isanya, nawali habehi na muji wa Gibeya uwele ndo muji wa Benjamini.
JDG 19:15 Nawenjila kuli muji wa Gibeya na kikalisa kuli honhu hagati ha muji, ila nakwali haduhu munhu yawabochele haluga hake kuwasa.
JDG 19:16 Lole lowawele ako, matinazo nakalawila mlume yumwe yalalile kulawa kumgunda kwa heye. Munhu ayo nayali mwenyeng'haye wa isi ya vidunda vya Efulaimu, nayali yochikala ako Gibeya kota mjenzi, ila wenyeng'haye wa muji awo nawali nhanzi ya Benjamini.
JDG 19:17 Munhu ayo loyalolile, nakamona Mlawi yawele mmajendo, yawele kuli honhu ha hagati ha muji, nakamuuza, “Kwangulawa kohi na kwanguluta kohi?”
JDG 19:18 Naye nakamwidichila, “Twangukola hano kulawa Betelehemu kuli Yuda, twanguluta ako nzingo ya kutali ya isi ya vidunda vya Efulaimu, ako ndo kondilingikala. Ndanguhiluka kuli ng'handa ya Mkulu Nguluwi, ila haduhu munhu yambochele haluga ha heye.
JDG 19:19 Ila twanazo ng'hocha kwa chiwalo cha migongolo ja hetwe na mibumunda na divai kwa heni na ayu mpogozi mdala na kwa ayu msongolo yawele hamwe na hetwe. Haduhu ne chinhu choneche chipunguche.”
JDG 19:20 Hamba, yula munhu yalalile nakalonga, “Kikala goya kuwe kwa hegwe. Ndowapani chila chinhu chomgana, ila mleche kuwasa hano hagati ha muji.”
JDG 19:21 Ahyo, nakawabochela na kuluta nawo mbaka haluga ha heye, nakajipa midogowi chilyo, nawo nawahovuga magulu ga hewo, nawalya na kunwa.
JDG 19:22 Nalowawele wosangalala mnhumbula, wanhu wehile wa muji awo nawaizunguluta ng'handa yeng'ha kuli banzi zeng'ha. Nawatowa lwizi kuno wolonga na ayo yawele na ng'handa na kumlonjela, “Mgale kunze yula munhu yafichile haluga ha hegwe leka tuwase na heye.”
JDG 19:23 Ayo yawele na ng'handa nakalawa na kuwalonjela, “Wang'holozangu ndanguwadedeza, mleche kudita wihe wa kota hino kwa vila munhu ayu nakenjila kuli ng'handa ya heni. Mleche kudita mbuli ya kubasa soni.
JDG 19:24 Lole, mhinza wa heni ayu aha, yang'hali ting'hana na mlume na mhawake munhu ayu ndowegala hano kunze na hemwe mowaditila kota vyomlingugana. Ila mleche kumditila munhu ayu mbuli ya kubasa soni kota hino.”
JDG 19:25 Ila wala wanhu hambe wamhulichize. Lelo yula Mlawi nakamlavya yula mhawake na kuwegalila wala wanhu. Hewo nawamhola na kumditila vibi nechilo yeng'ha mbaka habehi na kubwemwenzuka, nawamleka yalute.
JDG 19:26 Aho ndo yula mdala nakahiluka lufuku, nakagwa hali lwizi lwa ng'handa iwele mkulu wa heye nayali yochikala. Nayali baho mbaka lokubwemwenzuche.
JDG 19:27 Yula mkulu nakalilimka na kuchumula lwizi leka yoche, nakalawa. Ayo mhawake nayali yagwile kuli lwizi lwa ng'handa na moko ga heye nagali hali chizingiti.
JDG 19:28 Nakamlonjela, “Winuche lelo tuche.” Ila heye hedichile chinhu. Nakamwinula na kumuwika mchanya mwa idogowi na kuluta haluga ha heye.
JDG 19:29 Loyafichile haluga ha heye, nakahola chimaje na kumibata yula mhawake, nakamdumula chitomo chimwe mbaka chiyage, vitomo kumi na vili nakavihilika kuli mbaka jeng'ha ja isi ya Isilaeli.
JDG 19:30 Lelo weng'ha lowaiwene mbuli yila, nawalonga, “Mbuli kota ino hainakoleka ne koneka kulawa zuwa lila Waisilaeli lowakwinile kulawa kuli isi ya Misili mbaka lehano. Mijese na kulongasa na kwamula.”
JDG 20:1 Wanhu weng'ha wa Isilaeli kulawa Dani mbaka Beeli-sheba, hamwe na wanhu wa isi ya Gileadi na nhanzi yeng'ha naiting'hana hali Mkulu Nguluwi ako Misipa.
JDG 20:2 Wakulu weng'ha wa nhanzi zeng'ha za Isilaeli, nawafika hali nhing'hano ayo ya wanhu wa Nguluwi, walume lachi zine (400,000) walingujenda kwa magulu, wawele wawichigwe goya kwa ngondo.
JDG 20:3 Lelo wanhu wa Benjamini nawahulika kota wanhu wa Isilaeli nawakwina kuluta Misipa. Wanhu wa Isilaeli nawalonga, “Mtulonjele, wihe awo nauditika ndaze?”
JDG 20:4 Ayo Mlawi, mlume wa mdala yakopoligwe nakedichila na nakalonga, “Heni nafika Gibeya, muji wa nhanzi ya Benjamini, mbele na mhawangu leka tuwase.
JDG 20:5 Wala walume wa Gibeya nawoya na kuizunguluta ayo ng'handa banzi zeng'ha mhela wa nechilo, wogana kung'hopola. Mhawangu nawamditila vibi mbaka nakabagama.
JDG 20:6 Lelo ndimhola yula mhawangu na kumdumula vihande na kuvihilika kuli isi yeng'ha ya uhalizi wa Isilaeli, kwa vila nawadita izudizo na upoka kuli isi ya Isilaeli.
JDG 20:7 Mlolele hemwe wanhu weng'ha wa Isilaeli, lelo mlongase na mwamule mwemwe baho.”
JDG 20:8 Lelo wanhu weng'ha nawenuka na kulonga kwa kikundiza, “Hambe tulute ne yumwe kuli ihema lya heye ne yumwe kuluta haluga ha heye.
JDG 20:9 Hino ndo vyotudita kwa wanhu wa Gibeya, toluta kuwatowa kwa kutowa simbi.
JDG 20:10 Towahagula wanhu kumi hali miya imwe kulawa nhanzi zeng'ha za Isilaeli na wanhu miya imwe kuli wanhu elufu imwe na wanhu elufu imwe kuli wanhu elufu kumi, leka walute kuwaholela wanhu vilyo, leka hala howofika Gibeya ya Benjamini, wahiluse chibida kwa chila chinhu cha kuwabasa soni chowaditile kuli isi ya Isilaeli.”
JDG 20:11 Lelo walume weng'ha wa Isilaeli naweting'hana hamwe hali muji awo wa Gibeya.
JDG 20:12 Hamba nhanzi za Isilaeli nazilajiza wanhu walute kuli nhanzi yeng'ha ya Benjamini, nawalonga, “Ndaze, ndo wihe wachi awu uwele hali hemwe?
JDG 20:13 Lelo muwalavye awo wanhu, awo wanhu wehile walingikala Gibeya, leka tuwakopole na kusa wihe hali Isilaeli.” Ila wanhu wa Benjamini hawakundile kuwahulichiza wang'holozawo wa Isilaeli.
JDG 20:14 Lelo wanhu wa Benjamini naweting'hana ako Gibeya, kulawa kuli miji ja hewo leka kitowa na wanhu wa Isilaeli.
JDG 20:15 Wanhu wa Benjamini nawawakungajiza wanhu zuwa lila kulawa kuli miji ja hewo, wanhu wazidahe kitowa ngondo nawali elufu makumi meli na sita (26,000) wawele wawichigwe goya kitowa ngondo na wenyeng'haye wa muji wa Gibeya nawekungajiza wanhu miya saba wahaguligwe.
JDG 20:16 Kuli wanhu wala weng'ha, nawali walume miya saba wahaguligwe na wawezile kutumiya moko wa kumoso na kutoza iganga kwa mhembeyo kuweza kutowa chinhu chido ng'hatu.
JDG 20:17 Nawo wanhu wa Isilaeli, kuleka wala wa wanhu wa Benjamini, nawawazigwa. Nawali walume lachi zine (400,000), wawele ndo wamizi wawichigwe goya kwa kitowa ngondo.
JDG 20:18 Lelo wanhu wa Isilaeli nawenuka na kuluta ako Beteli, nawamuuza Nguluwi, wolonga, “Nhanzi yachi yokwaluka kuwatowa wanhu wa Benjamini?” Mkulu Nguluwi nakawalonjela, “Nhanzi ya Yuda yokwaluka.”
JDG 20:19 Lelo wanhu wa Isilaeli nawaluta mitondo na kuwika mihema ja hewo leka kuuvaba muji wa Gibeya.
JDG 20:20 Wanhu wa Isilaeli nawewika goya ako Gibeya na kuluta kitowa na wanhu wa Benjamini.
JDG 20:21 Wanhu wa Benjamini nawalawa ako Gibeya, kuwatowa na kuwakopola wanhu wa Isilaeli. Nawawakopola wanhu elufu makumi meli na mbili (22,000) zuwa alyo ako Isilaeli.
JDG 20:22 Ila wanhu wa Isilaeli nawekangaza na kiwika goya kwa kitowa ngondo lwa keli kahi, honhu hahala wewichile goya hala hamwande.
JDG 20:23 Wanhu wa Isilaeli nawaluta na kumlilila Mkulu Nguluwi mbaka matinazo, womuuza Mkulu Nguluwi wolonga, “Ndaze, tulute kahi kitowa na wang'holozetu wanhu wa Benjamini?” Mkulu Nguluwi nakawalonjela, “Ena, mlute.”
JDG 20:24 Lelo wanhu wa Isilaeli nawaluta kitowa na wanhu wa Benjamini kuli zuwa lya keli.
JDG 20:25 Wanhu wa Benjamini nawalawa ako Gibeya zuwa lya keli kitowa na wanhu wa Isilaeli. Nawawakopola wanhu elufu kumi na nane (18,000) kulawa kuli wamizi wa Isilaeli.
JDG 20:26 Wanhu wa Isilaeli weng'ha nawakwina na kuluta Beteli na kulila. Nawekala aho hali Mkulu Nguluwi, nawaleka kulya zuwa alyo mbaka matinazo. Nawalavya nhambiko za kulakazwa za kikala goya hali Mkulu Nguluwi.
JDG 20:27 Hamba wanhu wa Isilaeli nawamlanda Mkulu Nguluwi, kwa vila isanduku lya Ilagano lya Mkulu Nguluwi nalyali ako mazuwa ago.
JDG 20:28 Finehasi, mwana mlume wa Eleasali, mwana wa Aluni, nayali yokwima hali isanduku alyo mazuwa ago, Waisilaeli nawalonga, “Ndaze, tulawe kahi kitowa na wang'holozetu wa Benjamini, ama tuleche?” Mkulu Nguluwi nakawalonjela, “Ena, mkwine kwa vila hamitondo ndowalavya na kuwawika mmoko mwa hemwe.”
JDG 20:29 Lelo Wanhu wa Isilaeli nawawawika wanhu kwa uviso kuzunguluta muji wa Gibeya banzi zeng'ha.
JDG 20:30 Wanhu wa Isilaeli nawaluta kitowa na wanhu wa Benjamini kuli zuwa lya kadatu. Nawewika goya kwa kitowa na wanhu wa Gibeya kota navyowaditile aho hamwande.
JDG 20:31 Wanhu wa Benjamini lowalawile kuluta kitowa, nawawawinza Waisilaeli mbaka nawafika kutali na muji. Hamba nawaluka kuwatowa na kuwakopola Waisilaeli kota makumi gadatu hino, kota navyowaditile aho hamwande kwa kuwakopola kuli azo nzila ng'hulu zilinguluta Beteli na Gibeya na kuli isi za ibalalika.
JDG 20:32 Wanhu wa Benjamini nawalonga, “Natuwasumya kota aho hamwande.” Ila wanhu wa Isilaeli nawalonga, “Lelo tubilime leka watuwinze na kuuleka muji awu na kuluta kuli nzila ng'hulu.”
JDG 20:33 Lelo wala wanhu weng'ha wa Isilaeli nawoka hali honhu aho na kiwika goya kwa ngondo ako Baali-tamali. Wanhu wa Isilaeli wevisile, nawalawa honhu aho howawele, kolizinjilaga isanya mwa muji wa Gibeya.
JDG 20:34 Hamba wanhu elufu kumi (10,000) wahaguligwe ako Isilaeli, weng'ha nawoya kuuvaba muji wa Gibeya na yila ngondo nayali ng'hulu lukami. Ila wanhu wa Benjamini hawavizelele kota kubagama kwa hewo kwa habehi kuwafichila.
JDG 20:35 Mkulu Nguluwi nakawadita Waisilaeli wawasumye wanhu wa Benjamini. Waisilaeli zuwa alyo nawawakopola walume elufu makumi meli na gahano na miya imwe (25,100), wawichigwe goya kwa kitowa ngondo.
JDG 20:36 Ahyo wanhu wa nhanzi ya Benjamini nawona kota wasumigwa. Waisilaeli nawahiluka kumbele kwa vila nawavizela kota wayawo wa kuko wevisile na kubeteza leka kuuvaba muji wa Gibeya.
JDG 20:37 Wala wapugajizi nawadita himahima na kwinjila kuli muji wa Gibeya na kuwatowa kwa ipanga wanhu weng'ha wa muji wula.
JDG 20:38 Lelo nawelagana ulajilo hali hewo Waisilaeli na wala wapugajizi, kota lowolyona iyosi kuchanya kulawa kuli muji,
JDG 20:39 Waisilaeli waluche kuhinduka na kuwatowa. Mhela awo nhanzi ya Benjamini nayali iwakopole Waisilaeli kota makumi gadatu hino, kwa vila nawalonga, “Natuwatowa kota aho hamwande.”
JDG 20:40 Ila hala du lila iyosi vyolyaluche kukwina kulawa kuli muji wula kota izengo lya ng'hungugu, aho ndo wanhu wa Benjamini nawalola kumbele, iyosi nalyali lyenele chila honhu kuli muji awo kulutila kilanga.
JDG 20:41 Wanhu wa Isilaeli nawahinduka na wanhu wa nhanzi ya Benjamini nawatinuswa kwa vila nawona kubagama kwa hewo nakwali habehi.
JDG 20:42 Ahyo nawahinduka hali Waisilaeli na kuluta kuchiwala, ila yila ngondo naiwawinza lukami na wala wanhu walawile kuli muji wula nawawakopola.
JDG 20:43 Nawawazunguluta Wabenjamini kuli banzi zeng'ha na kuwawinga kulawa Noha mbaka kolilawilaga isanya mwa muji wa Gibeya, kuno nawawakopola wenji wa hewo.
JDG 20:44 Nawawakopola Wabenjamini elufu kumi na nane (18,000) wawele wezidahe kitowa ngondo.
JDG 20:45 Hamba wanhu wanji wa nhanzi ya Benjamini nawahinduka na kubilimila kuchiwala kuli italawe lya Limoni. Wanhu wanji elufu zihano nawabagama kuli nzila ng'hulu lowawele wobilima. Waisilaeli nawalutilila kuwawinza lukami wanhu wa nhanzi ya Benjamini mbaka kuli muji wa Gidomu na kuwakopola kahi wanhu elufu mbili.
JDG 20:46 Lelo wanhu wa nhanzi ya Benjamini wabagame zuwa lila nawali wanhu elufu makumi meli na wahano (25,000) wazidahe kitowa ngondo.
JDG 20:47 Ila walume miya sita wa nhanzi ya Benjamini nawabilima mbaka kuchiwala kuli italawe lya Limoni, nawekala ako kwa mhela wa myezi jine.
JDG 20:48 Waisilaeli nawahinduka na kuwalutila wanhu wa nhanzi ya Benjamini. Nawawatowa kwa ipanga wanhu weng'ha wa miji jila na migongolo jawo na chila chinhu chowachiwene. Miji jeng'ha jowajiwene, nawajilakaza kwa chiluli.
JDG 21:1 Lelo wanhu wa Isilaeli nawelaha ako Misipa kuno wolonga, “Haduhu yumwe hali hetwe yokunda mhinza wa heye yaholeche na munhu wa nhanzi ya Benjamini.”
JDG 21:2 Hamba wala wanhu nawafika Beteli, nawekala ako hali Mkulu Nguluwi mbaka matinazo, nawalila kwa kutowa iyowe.
JDG 21:3 Nawalonga, “Gwa Mkulu Nguluwi, Nguluwi wa Isilaeli, lekachoni mbuli ayi ya kuli Isilaeli, kota lehano nhanzi imwe ya haduhu kuli Isilaeli?”
JDG 21:4 Mitondo wala wanhu nawalilimka lufuku, nawazenga honhu ha kulavila nhambiko ako. Nawegala nhambiko za kulakazwa na nhambiko za kikala goya.
JDG 21:5 Waisilaeli nawalonga, “Kuli nhanzi azi zeng'ha za Isilaeli, nhanzi yachi haifichile kuli nhing'hano ya kumhejelela Mkulu Nguluwi? Mina nawawika chilaho chikulu kuwala ayo yohambe yamhejelele Mkulu Nguluwi ako Misipa kuno wolonga, ‘Kukomya, ayo kokopoligwa.’ ”
JDG 21:6 Waisilaeli nawesinza kwa chiwalo cha wang'holozawo Wabenjamini, nawalonga, “Nhanzi imwe hali Isilaeli nayajilila lehano.
JDG 21:7 Tudite ndaze kwa Wabenjamini walume waponile? Kwa vila natilaha kwa Mkulu Nguluwi kota hatuwapa wahinza wa hetwe leka wawahole.”
JDG 21:8 Lelo nawalonga, “Nhanzi yachi ya Isilaeli iwele haifichile hali Mkulu Nguluwi ako Misipa?” Hamba nawavizela kota haduhu ne yumwe yoyile kuli kambi kulawa Yabeshi-gileadi kuli nhing'hano ayo.
JDG 21:9 Mina hala wanhu lowawazigwe, hakuwele na munhu ne yumwe hali wenyeng'haye wa Yabeshi-gileadi.
JDG 21:10 Lelo nhing'hano nailajiza wanhu elufu kumi na mbili (12,000) wazidahe kitowa ngondo, nawawalonjela, “Muche mkawatowe wenyeng'haye wa Yabeshi-gileadi kwa ipanga, wadala na wana wadodo.
JDG 21:11 Mbuli yomdita ndo ayi, momkopola chila mlume na mdala yawasile na mlume.”
JDG 21:12 Nawo nawawafika wahinza miya zine ako Yabeshi-gileadi, wawele hawanating'hana na walume, nawawegala kuli kambi ya ako Shilo kuli isi ya Kanaani.
JDG 21:13 Lelo Waisilaeli weng'ha nawawalajiza wanhu kuluta kulonga na wanhu wa Benjamini wowawele kuli italawe lya Limoni, kuwawikulila kikala goya.
JDG 21:14 Wabenjamini nawahiluka mhela wuwo, hamba nawawapa wala wadala waponile kuli wala wadala wa Yabeshi-gileadi, ila wadala awo hawenele hebu.
JDG 21:15 Nawo wanhu nawawonela isungu Wabenjamini, kwa vila Mkulu Nguluwi nakambuza kwajilila kwa nhanzi imwe ya isi ya Isilaeli.
JDG 21:16 Hamba wasekulu wa nhing'hano yeng'ha nawalonga, “Ndaze, tudite ndaze leka tuwape wadala wala waponile kwa vila wadala wa nhanzi ya Benjamini nawabagamizwa?”
JDG 21:17 Nawalonga, “Igana kuwa na uhalizi kwa wala wanhu wa nhanzi ya Benjamini waponile, leka nhanzi ya Isilaeli ileche kwajilila.
JDG 21:18 Ila hetwe hatuweza hebu kuwaleka wahinza wa hetwe wawe wadala wa hewo kwa vila hetwe Waisilaeli natilaha kwa kulonga, ‘Yapanjilwe ayo yomgalila mdala munhu wa nhanzi ya Benjamini.’ ”
JDG 21:19 Hamba nawalonga, “Mlolele, hana mnvina ya Mkulu Nguluwi chila mwaka ako Shilo, muji uwele ubanzi wa kasikazini mwa Beteli, ubanzi wa kolilawilaga isanya mwa nzila ng'hulu ilingulawa Beteli kuza Shekemu, awo ndo ubanzi wa kusini mwa Lebona.”
JDG 21:20 Lelo nawawalajiza wanhu wa nhanzi ya Benjamini wolonga, “Lelo mlute chinyele kuli migunda ja mizabibu,
JDG 21:21 mbeteze leka wadala wa Shilo lowolawa mgati kuza kunze kuvina mhela wa mnvina, hamba mlawe kuli mizabibu na chila munhu yeholile mdala yumwe leka yawe mchewake na mhiluche kuli isi ya Benjamini.
JDG 21:22 Wahaza wa hewo ama wang'holozawo lowokuya kulonjeleza, natwe towalonjela, ‘Dedede, muwape uganililo kwa chiwalo cha hetwe, kwa vila hatuwaholile hewo kuwa wadala wa hewo kulawa kuli ngondo, kwa vila hamuwapele hewo na hamuwa na nongwa kuli chilaho cha hemwe.’ ”
JDG 21:23 Wala wanhu wa Benjamini nawadita ahyo, naweholela wadala kwa kiwhana na winji wa hewo kulawa kuli wala wawele wovina na kuhiluka kuli uhalizi wa hewo na kuzenga miji na kikala amo.
JDG 21:24 Wanhu wa Isilaeli nawaluta, chila munhu nakaluta kuli nhanzi ya heye na wanhu wa heye. Nawalawa ako na chila munhu nakaluta kuli uhalizi wa heye.
JDG 21:25 Mazuwa ago nakwali haduhu mndewa hali isi ya Isilaeli, chila munhu nakadita choyalinguchona kota ndo chinoga kwa heye yuye.
RUT 1:1 Aho katali walamuzi vyonawali wolongoza Isilaeli, nakwali na lufemba kuli isi. Munhu yumwe wa Betelehemu ya Yuda nakaluta kikala kuli isi ya Moabu kota mjenzi, heye na mchewake na wanage weli walume.
RUT 1:2 Munhu ayo nayali yochemigwa Elimeleki na itagwa lya mchewake ndo Naomi na matagwa ga wanage weli walume ndo Maloni na Kilioni. Hewo nawali Waefulata kulawa Betelehemu kuli Yuda. Nawaluta isi ya Moabu, nawekala ako.
RUT 1:3 Hamba Elimeleki mlume wa Naomi nakabagama, Naomi nakapona na wanage weli walume.
RUT 1:4 Nawo nawahola wadala Wamoabu, itagwa lya yumwe nalyali Olipa na itagwa lya wa keli nalyali Luti. Lowekale ako kwa miyaka kota kumi hino,
RUT 1:5 weng'ha weli, Maloni na Kilioni nawabagama, lelo Naomi nayali yafililwe na wanage weli na mlume wa heye.
RUT 1:6 Hamba Naomi nakahulika kota Mkulu Nguluwi nayali yawatambichize wanhu wa heye kwa kuwapa chilyo. Lelo, nakamula kuhiluka kaye kwa hewo kulawa Moabu, hamwe na wakweye.
RUT 1:7 Lelo nawaluka kulawa hala hoyawele yochikala na wakweye weli, nawakola nzila imwe leka wahiluche mbaka isi ya Yuda.
RUT 1:8 Hamba Naomi nakawalonjela wakweye weli, “Mlute lelo chila yumwe kaye kwa maiwake, Mkulu Nguluwi yawaditile ganojile hemwe, kota hemwe vyomtuditile ganojile heni hamwe na awo wabagame.
RUT 1:9 Mkulu Nguluwi yawape kwesela, chila yumwe wa hemwe yekale goya kwa mlume yunji.” Hamba Naomi nakawalaga kwa kuwanonela. Ila hewo nawaluka kulila kwa lizi,
RUT 1:10 nawamlonjela, “Hebu! Toluta hamwe na hegwe kwa wanhu wa hegwe.”
RUT 1:11 Naomi nakawalonjela, “Mhiluche wahinza wa heni. Lekachoni mwangumbinza? Mwangijesa kota ndoweza kuponda wana kahi wawele wowa walume wa hemwe?
RUT 1:12 Mhiluche wahinza wa heni, mlute kaye kwa vila heni nda sekulu, siwa na mlume kahi. Wone nandonje ndangitumbila ndowa na mlume nechilo ayi na kulela wana walume,
RUT 1:13 ndaze, mwahawabeteze mbaka wakule? Ndaze, namilemeze mleche kuholeka na walume wanji? Hebu wahinza wa heni, ndina usungu lukami kusinda hemwe, kwa vila Mkulu Nguluwi nakangaza.”
RUT 1:14 Nawo nawalila kahi kwa lizi. Aho ndo Olipa nakamnonela mkweye kwa kumlaga, ila Luti nakamibata.
RUT 1:15 Naomi nakamlonjela, “Ulole, mlamugo nakahiluka kwa wanhu wa heye na kwa milungu ja heye, lelo nagwe uhiluche umuwinze heye.”
RUT 1:16 Naye Luti nakalonga, “Uleche kundedeza ndikuleche hegwe, na uleche kundemeza kiwinza hamwe na hegwe. Koneche kouluta nani ndoluta kuko, na kouchikala nani ndochikala, wanhu wa hegwe wowa wanhu wa heni, na Nguluwi wa hegwe kowa Nguluwi wa heni.
RUT 1:17 Honhu houbagama hegwe ndo hondibagama heni, na hala ndotiligwa, Mkulu Nguluwi yangaze heni wone ndibagule na hegwe ila kwa kubagama hela.”
RUT 1:18 Naomi vyoyawene kota Luti nakamula ng'hatu kuluta hamwe na heye, nakaleka kumdedeza kahi.
RUT 1:19 Aho ndo weng'ha weli nawalutilila na majendo mbaka lowafichile Betelehemu. Lowafichile ako wanhu weng'ha nawabubuwala, wadala naweuza, “Ndaze, ayu ndo Naomi?”
RUT 1:20 Naomi nakalonga, “Mleche kunyhema kahi Naomi mnyheme Mala, kwa vila Nguluwi Yawele na Ludali, nakadita kikala kwa heni kuwe kwa usungu ng'hatu.
RUT 1:21 Vyombuchile hano, nandali na vinhu vinji, ila Mkulu Nguluwi kanyhilula moko yeka. Lekachoni mwangunyhema Naomi kuno Mkulu Nguluwi nakandeka, heye Nguluwi Yawele na Ludali nakangaza.”
RUT 1:22 Ahyo ndo Naomi hamwe na Luti mkweye vyowahiluche. Lowahiluche kulawa Moabu na kuya Betelehemu, mhela wa mbena ya shayili vyonawali ukwaluka.
RUT 2:1 Nakwali na munhu yumwe kulawa lukolo lula koyalawile Elimeleki, mlume wa Naomi, yawele yochemigwa Boasi. Ayo nayali yazeleche ng'hatu na yawele na lufufu.
RUT 2:2 Luti, Mmoabu, nakamlonjela Naomi, “Ng'hundize ndute kumgunda kulokota visigale kuli mbena za munhu yawele kondajila isungu.” Naomi nakamlonjela, “Goya, ulute mhinza wa heni.”
RUT 2:3 Lelo Luti nakaluta kumgunda, nakawawinza wala walingubeta kuno yolokota miso jowalechile. Nakafika kuli mgunda wa Boasi ne kunuwila, yula wa kulawa kuli lukolo lula koyalawile Elimeleki, nayawele mlume wa Naomi.
RUT 2:4 Hamba, Boasi nakoya kulawila Betelehemu nakawalamsa walingubeta, nakalonga, “Mkulu Nguluwi yawe na hemwe.” Nawo nawamwidichila, “Mkulu Nguluwi nayakutambichize.”
RUT 2:5 Lelo, Boasi nakamuuza chilongozi wa wala walingubeta, “Ndaze, yula mhinza ka whaani?”
RUT 2:6 Aho ndo chilongozi wa wala walingubeta nakedichila, “Ndo mhinza Mmoabu, yoyile hamwe na Naomi kulawila kuli isi ya Moabu.
RUT 2:7 Nakandanda ndimkundize yawawize kumbele walingubeta kuno yolokota visigale hagati ha mibanzi. Lelo nakoya, nakakola mijito kwaluchila hamitondo mbaka sambi, ila nakesela kwa mhela udo hela mchibumuli.”
RUT 2:8 Aho ndo Boasi nakamlonjela Luti, “Mhinza wa heni uhulichize. Uleche kuluta kulokota miso honhu hanji ila kuli mgunda uno hela. Miwinze na wadala awa walingukola mijito kwa heni,
RUT 2:9 ulole honhu howalingubeta, wawinze hewo. Ndiwakanya walume awa waleche kukutunya. Wone uwe na ng'halu, ulute kuli mibiga na unwe mazi gowadehile wala walume.”
RUT 2:10 Luti nakenamiza kwa Boasi mbaka hanyi kwa kuhulichiza, nakamlonjela, “Mhegwa ndaze uganililo na hegwe? Lekachoni kwangumbonela isungu na heni nda mjenzi hela?”
RUT 2:11 Ila Boasi nakamlonjela, “Ndigahulika geng'ha goumditile mkweyo kulawa mlume wa hegwe loyabagame. Ndivizela ndaze vyouwalechile mhaza wa hegwe na mayako, nakuileka isi ya hegwe na ndaze vyowuyile kikala hali wanhu wawele hambe uwazelele kulawa aho hamwande.
RUT 2:12 Mkulu Nguluwi yakuhilusile kwa geng'ha gouditile. Mkulu Nguluwi wa Isilaeli youmbilimile yakwamile hanyi ha mabawa ga heye, yakupe utambichizo wa kuhega.”
RUT 2:13 Luti nakalonga, “Mkulu, hegwe nakundajila isungu ng'hatu. Hanga heni siwele kota yumwe wa vitumagwa wa hegwe, nakundita sangalale ng'hatu na kulonga na heni kwa uliholile.”
RUT 2:14 Mhela wa chilyo, Boasi nakamlonjela Luti, “Uye hano, uye ulye ibumunda na udilize mli mhuzi.” Ahyo Luti nakekalisa hamwe na wala wakola mijito, Boasi nakamha nyhule ikalanjigwe, nakalya na kiguta na kusigaza.
RUT 2:15 Luti vyoyalutilile kulokoteza mbena, Boasi nakawalonjela wakolamijito wa heye, “Mumleche yalokoteze mbaka honhu hawele na nganda ne kumng'hanuchila.
RUT 2:16 Ila lelo, mkweje miso kulawa kuli nganda na mumleche yalokote ne kumng'hanuchila.”
RUT 2:17 Lelo Luti nakalutilila kulokota miso mbaka matinazo. Navyoyapulule ayo shayili nakapata kota kilo kumi.
RUT 2:18 Hamba nakahola mbena ayo na kuluta nayo mbaka kuli mji na kumlajila mkweye chasi choyalokote. Nakalavya kahi chila chilyo choyasigaze hoyegute, hala loyawele yolya na wakola mijito wa Boasi, nakamha.
RUT 2:19 Lelo mkweye nakamuuza, “Nakulokota kohi aga geng'ha? Nawali kuli mgunda wa whaani? Nguluwi yamtambichize ayo yakupele.” Hamba Luti nakamlonjela Naomi kota nakakola mijito kuli mgunda wa munhu yalinguchemigwa Boasi.
RUT 2:20 Lelo, Naomi nakamlonjela Luti, “Mkulu Nguluwi yamtambichize Boasi! Mkulu Nguluwi kenezaga kulagana kwa heye kwa wawele wakomu na wabagame.” Hamba nakalutilila kulonga, “Ayo munhu ka mng'holozetu wa habehi na ndo yumwe wa wala walinguganigwa kutulolela.”
RUT 2:21 Hamba Luti nakalonga, “Nakandonjela kahi ndokoteze hamwe na wakola mijito wa heye mbaka wasinde ng'hatu kubeta.”
RUT 2:22 Lelo, Naomi nakamlonjela Luti, “Ena mhinza wa heni. Ndo inoga kukola mijito hamwe na wadala wanji kuli mgunda wa Boasi, leka uleche kugazigwa kuli mgunda wa munhu yunji.”
RUT 2:23 Ahyo, Luti nakakola mijito na hewo, nakalokota miso mbaka mhela wa kubeta ngano na shayili vyokumalile. Mhela awo weng'ha, nayali yochikala na mkweye.
RUT 3:1 Hamba Naomi nakamlonjela Luti, “Heni ndanguganigwa ndikupalile mlume leka wikale goya.
RUT 3:2 Lelo ayu Boasi, yawele naukolile mijito hamwe na wakola mijito wa heye wadala, ayu ndo mng'holozetu. Lelo uhulichize, matinazo kowa yopulula shayili.
RUT 3:3 Ahyo, wihovuje na wibakalize unhunyhililo na kuvala goya, hamba ulute honhu hoyalingupululila, ila ulolele uleche kuzeleka kwa heye mbaka hoyosinda kulya na kunwa.
RUT 3:4 Kahi, uvizele honhu hoyowasa na vyoyowa yosinzila, umlutile na kugubula igolole kuli magulu ga heye uwase baho habehi na magulu ga heye. Heye kokulonjela cha kudita.”
RUT 3:5 Luti nakedichila, “Ndodita geng'ha goundonjele.”
RUT 3:6 Ahyo, Luti nakaluta honhu ha kupululila na nakadita kota vyoyalonjelwe na mkweye.
RUT 3:7 Boasi vyoyasindile kulya na kunwa, nakasangalala mnhumbula. Lelo nakaluta habehi na ilundo lya shayili, nakawasa. Luti nakaluta na kugubula igolole kuli magulu ga heye Boasi na kuwasa aho.
RUT 3:8 Nechilo ng'hatu, baho du, Boasi nakalilimka, nakahinduka, nakabubuwala kumona mdala yawasile kuli magulu ga heye.
RUT 3:9 Nakauza, “Hegwe kwa whaani?” Luti nakedichila, “Heni nda Luti, chitumagwa wa hegwe. Ugubiche lupembo lwa igolole lya hegwe mchanya mwa chitumagwa wa hegwe, kwa vila hegwe kwa mng'holozangu ulinguganigwa kundolela.”
RUT 3:10 Boasi nakalonga, “Mkulu Nguluwi yakutambichize hegwe mhinza wa heni, mina kwa geng'ha goulingudita kwangulajila isungu ng'hatu kupuluta gougaditile aho mwaluko, kwa vila huwapalile wasongolo wazunwa ama wawele na lufufu wakuhole.
RUT 3:11 Lelo mhinza wa heni uleche kudumba, ndokuditila geng'ha goulingulanda kwa vila chila munhu mujini kanguvizela kota hegwe kwa mdala yanojile.
RUT 3:12 Ndo kukomya kota yanguganigwa heni kukulolela, ila hana mng'holozo wa habehi kusinda heni yalinguganigwa kukulolela.
RUT 3:13 Ahyo, wikale hano nechilo ayi. Mitondo tolola wone heye kokunda kukulolela ama hebu. Wone yakulolele ndo goya. Wone yaleme, kwa itagwa lya Mkulu Nguluwi yawele mkomu, heni ndokulolela. Uwase hano mbaka mitondo.”
RUT 3:14 Lelo Luti nakawasa aho mmagulu ga heye mbaka mitondo, ila nakenuka kung'hali lufuku leka yaleche koneka, kwa vila Boasi nahaganile munhu yavizele kota mdala nayali honhu ha kupululila.
RUT 3:15 Boasi nakamlonjela, “Utandiche nguwo ya hegwe hanyi.” Luti nakadita ahyo. Boasi nakabohola shayili kilo makumi meli, nakamdwika Luti, hamba nakahiluka mujini.
RUT 3:16 Luti vyoyafichile mujini, mkweye nakamuuza, “Nayali ndaze mhinza wa heni?” Luti nakamlonjela geng'ha goyamditile Boasi.
RUT 3:17 Kahi nakalutilila kulonga, “Nakandonjela ndeche kuhiluka kaye kwa mkweyangu ne chinhu, ahyo nakamha shayili kilo makumi meli.”
RUT 3:18 Naye Naomi nakalonga, “Lelo unyamalile mhinza wa heni, mbaka tulolele chochilawila. Boasi hosindamala lehano mbaka yeneze mbuli ayi.”
RUT 4:1 Lelo, Boasi nakaluta honhu ha nhing'hano, ako kuli lwizi lwa muji nakekalisa hanyi. Hamba yula mng'holoze wa habehi ng'hatu wa Elimeleki, yawele Boasi yamtajile, nakakola habehi na aho. Boasi nakamchema, nakalonga, “Uye, wikalise hano mng'holozangu.” Lelo ayo munhu nakoya na kikalisa aho.
RUT 4:2 Boasi nakawachema wasekulu kumi wa muji, nakawalanda wekalise aho. Nawekalisa.
RUT 4:3 Boasi nakamlonjela yula mng'holoze, “Lelo Naomi, yahiluche kulawa Moabu, kangugana kuguza honhu hawele nahali ha mng'holozetu Elimeleki.
RUT 4:4 Lelo heni mbona fola ndikulonjele mbuli ayi. Lelo wone kwangugana honhu aho, ulavye sendi kwa kuhagombola hali wasekulu wa wanhu wa heni. Wone kwangugana ama hambe ugane ulonje, kwa vila mumhu wa kuhagombola ndo wa hegwe, heni nda wa keli.” Yula mng'holoze nakedichila, “Heni ndohagombola.”
RUT 4:5 Boasi nakalonga, “Inoga, wone uhagombole honhu aho kulawa kwa Naomi, lelo umhole kahi Luti Mmoabu, yafililwe na mlume wa heye, leka itagwa lya yabagame na uhalizi wa heye vipone kuli ivyazi lya heye.”
RUT 4:6 Lelo yula nakedichila, “Wone iwe ahyo, siweza kuhagombola honhu aho, kwa vila wana wa heni hawohalila. Fola hachi ya heni ya kuhagombola ndikupe hegwe, mina heni siweza kuhagombola.”
RUT 4:7 Mazuwa gala, kuli Isilaeli, wone wanhu nawali wogana kugombola ama kiholela vinhu, nachali chihendo kwa wanhu kulajila ulajilo kwa kuvula ikwamba lya heye na kumha yunji. Kwa ulajilo awo Waisilaeli nawalajila kota mbuli nazitawizwa.
RUT 4:8 Lelo, munhu ayo navyoyamlonjele Boasi, “Uhagombole hegwe honhu aho,” hamba nakavula ikwamba lya heye kwa chiwalo cha kumha.
RUT 4:9 Naye Boasi nakawalonjela wala wasekulu na wanhu weng'ha, “Lehano hemwe ndo mwa walolezi wa heni. Mona kota ngombola kulawila kwa Naomi, vyeng'ha viwele vya Elimeleki na vya Kilioni na vya Maloni.
RUT 4:10 Mzidi wa ago, ndimgombola Luti Mmoabu yafililwe na Maloni, leka yawe mchewangu. Kikundiza aku kodita uhalizi wa ayo yabagame upone kuli ivyazi lya heye na itagwa lya heye lilutilile kuli lukolo lwa heye na muji wa heye. Hemwe mwa walolezi.”
RUT 4:11 Lelo wasekulu wawele hali lwizi na wanhu weng'ha wawele aho nawedichila, “Ena, hetwe twa walolezi. Mkulu Nguluwi yamdite mchewako yawe kota Laheli na Lea, wawele weng'ha weli nawampondela wana wenji Yakobo. Nagwe uwe na lufufu kuli wanhu wa Efulata, uwe uzeleche kuli Betelehemu.
RUT 4:12 Kwa kukolela wana wawele Mkulu Nguluwi kokupa, kulawa kwa mdala ayu, ivyazi lya hegwe liwhane na ivyazi lya Pelesi, liwele Tamali nakampondela Yuda.”
RUT 4:13 Ahyo, Boasi nakamhola Luti, nakawa mchewake na kawasa na heye. Mkulu Nguluwi nakamtambichiza Luti nakawa na himila, nakaponda mwana mlume.
RUT 4:14 Wadala wa muji awo nawamlonjela Naomi, “Yatogoligwe Mkulu Nguluwi yawele hakulechile lehano ne kuwa na mzukulu wa kukulolela hegwe, naye yawe yazeleche ng'hatu kuli Isilaeli.
RUT 4:15 Heye kokuhilusila ukomu wa hegwe na kukulolela mbaka kuli kulala kwa hegwe. Mina mkweyo yalingukugana na yawele mtanzi wa hegwe ng'hatu kusinda wana walume saba, ndo yampondile.”
RUT 4:16 Lelo Naomi nakamhola ayo mwana nakamuwika mmahaza ga heye na kumlolela.
RUT 4:17 Wadala wawele habehi nawamchema mwana ayo Obedi wolonga, “Mwana nakapondigwa kwa chiwalo cha Naomi.” Aho ndo Obedi nakawa mhaza wa Yese, yawele mhaza wa Daudi.
RUT 4:18 Hino ndo vyoluwele lulelo lwa Pelesi. Pelesi nakamponda Hesiloni.
RUT 4:19 Hesiloni nakawa mhaza wa Lami, Lami nakawa mhaza wa Aminadabu,
RUT 4:20 Aminadabu nakawa mhaza wa Nahishoni, Nashoni nakawa mhaza wa Salimoni,
RUT 4:21 Salimoni nakawa mhaza wa Boasi, Boasi nakawa mhaza wa Obedi,
RUT 4:22 Obedi nakawa mhaza wa Yese, Yese nakawa mhaza wa Daudi.
1SA 1:1 Kwali na munhu yumwe kuli muji wa Lama kuli isi ya vidunda vya Efulaimu yalinguchemigwa Elikana wa nhanzi ya Efulaimu wa lukolo lwa Sufu. Heye nayali mwana wa Yelohamu, mwana wa Elihu, mwana wa Tohu, mwana wa Sufu.
1SA 1:2 Elikana nayali na wache weli, yumwe nakachemigwa Hana na wa keli nakachemigwa Penina. Penina nayali na wana ila Hana nayali hela wana.
1SA 1:3 Chila mwaka Elikana nayali yolawa Lama na kuluta Shilo kumfugamila na kulavya nhambiko kwa Mkulu Nguluwi Yawele na Mong'ho. Ako wana weli walume wa Eli, wawele ndo Hofini na Finehasi nawali watambika wa Mkulu Nguluwi.
1SA 1:4 Chila mhela Elikana loyalavile nhambiko, nakawapa honhu ha miwunde kwa mdala wa heye Penina na kwa wana wa heye, walume na wadala, chila yumwe na honhu hake.
1SA 1:5 Ila Elikana nakamha Hana honhu heli ha miwunde kwa vila nayali yomgana lukami, hanga Mkulu Nguluwi nayali hampele wana.
1SA 1:6 Ila Penina nayali yomzudiza ng'hatu Hana chila mhela kwa kumgaza, kwa vila Mkulu Nguluwi hampele wana.
1SA 1:7 Mbuli ayi nailutilila kuli chila mwaka. Chila mhela Hana loyawele yoluta kuli ng'handa ya Mkulu Nguluwi, Penina nakamzudiza Hana mbaka Hana nakaluka kulila na kulema kulya choneche.
1SA 1:8 Chila mhela Elikana, mlume wa heye Hana nayali yomuuza, “Lekachoni kwangulila Hana? Lekachoni kwangulema kulya? Lekachoni kuna masinzo mnhumbula ya hegwe? Ndaze, hambe ndikulolele lukami kusinda wana walume kumi?”
1SA 1:9 Zuwa limwe lowasindile kulya na kunwa ako Shilo, Hana nakaluta kulanda. Mhela awo mtambika Eli nayali yekalise kuli chigoda habehi na honhu ha kwinjila kuli ihema lya kumfugamila Mkulu Nguluwi.
1SA 1:10 Hana nayali na masinzo ng'hatu. Loyawele yomlanda Mkulu Nguluwi nayali yolila kwa usungu.
1SA 1:11 Nakelaha yolonga, “Gwa Mkulu Nguluwi Uwele na Mong'ho, ugalole magazo ga heni, chitumagwa wa hegwe na kung'humbuka ne kusemwa heni. Wone konhambichiza heni ndiwe na mwana mlume, ndokupa hegwe Mkulu Nguluwi mwana ayo mlume yawe wa hegwe kwa mhela weng'ha wa ukomu wa heye na mnvili za kumutwi kwa heye ama lulevu lwa heye havibeyigwa hebu.”
1SA 1:12 Hana nakalutilila kumlanda Mkulu Nguluwi, Eli nayali yolola mlomo wa heye.
1SA 1:13 Hana nayali yolanda mnhumbula na mlomo wa heye nawali utigasika, ila lizi lya heye haluhulikwe. Ahyo Eli nakejesa kota Hana kagala.
1SA 1:14 Ahyo Eli nakamlonjela, “Kolutilila kugala mbaka nili? Uleche kunwa divai!”
1SA 1:15 Ila Hana nakamwidichila, “Hebu mkulu wa heni, heni nda mdala mbele na magazo makulu. Heni sinwele divai ne chakunwa ching'ang'ale, ila nandali ndimlavila Mkulu Nguluwi gawele mnhumbula ya heni.
1SA 1:16 Kwa mhela weng'ha ndali ndilanda kwa chiwalo cha kugaya ng'hatu kwa heni na masinzo ga heni. Ahyo uleche kijesa kota heni nda mdala yohambe nhanze chinhu.”
1SA 1:17 Hamba Eli nakamlonjela, “Ulute kwa kikala goya, Nguluwi wa Isilaeli yakupe chila choumlandile.”
1SA 1:18 Hana nakalonga, “Nani chitumagwa wa hegwe ndangulanda ndiwe na uganililo hali hegwe.” Hamba Hana nakoka, nakalya chilyo nakawa nayali hela masinzo kahi.
1SA 1:19 Mitondo Elikana na ivyazi lya heye nawenuka lufuku, lowasindile kumfugamila Mkulu Nguluwi nawahiluka haluga Lama. Elikana nakawasa na mdala wa heye Hana na Mkulu Nguluwi nakedichila kulanda kwa heye.
1SA 1:20 Ahyo Hana nakawa na himila. Mhela wa kuponda loufichile, nakaponda mwana mlume. Hana kamchema ayo mwana Samweli kwa vila nakalonga, “Ndimlanda Mkulu Nguluwi.”
1SA 1:21 Elikana na ivyazi lya heye nawaluta kahi Shilo kumlavila Mkulu Nguluwi nhambiko ya chila mwaka na kweneza kilaha kwa heye.
1SA 1:22 Hana nahalutile, ila nakamlonjela hino mlume wa heye, “Hala mwana hoyolechezwa kong'ha, ndomhilika yakawichigwe hali Mkulu Nguluwi, yapone ako mazuwa gose.”
1SA 1:23 Elikana nakamlonjela Hana hino, “Udite chila chouchona chinoga. Ubeteze mbaka houmlecheza mwana kong'ha. Mkulu Nguluwi yeneze kulagana kwa heye kuwe kwa kukomya.” Lelo Hana nakapona haluga, nakalutilila kumlolela mwanage mbaka loyamlecheze kong'ha.
1SA 1:24 Loyamlecheze kong'ha nakamhilika hamwe na isenga ibuguma lya miyaka jidatu na kilo kumi za utimbo na chihako cha igozi cha divai. Hana nakamwinjiza hali ihema lya Mkulu Nguluwi ako Shilo, mwana nayali mdodo hela.
1SA 1:25 Lowasindile kulidumula singo lila isenga ibuguma, nawamhilika mwana kwa mtambika Eli.
1SA 1:26 Hana nakamlonjela Eli, “Kukomya, gwa mkulu wa heni, ukumbuchile heni ndo yula mdala ndiwele nyimile hali hegwe ndimlanda Mkulu Nguluwi.
1SA 1:27 Nandimlanda Mkulu Nguluwi yamhe mwana ayu naye nakamha heni chila chondandile.
1SA 1:28 Kwa chiwalo acho, heni ndimha ayo mwana Mkulu Nguluwi, mhela weng'ha hoyowa mkomu, nakalavigwa kwa Mkulu Nguluwi.” Hamba nakamfugamila Mkulu Nguluwi ako.
1SA 2:1 Hamba Hana nakalanda na kulonga. “Ndangusangalala mnhumbula ya heni kwa chiwalo cha Mkulu Nguluwi. Ndangusumya kwa utanzi wa Mkulu Nguluwi. Ndanguwaseka wang'honyo wa heni, mina ndangusangalalila ulohozi wa hegwe.
1SA 2:2 “Haduhu munhu yawele yelile kota Mkulu Nguluwi, haduhu munhu yawele kota heye, haduhu yawele italawe kota Nguluwi wa hetwe.
1SA 2:3 Mleche kitogola, mleche kulonga kwa kidaya. Mina yavizelele ndo Mkulu Nguluwi. Heye kangutagusa madito geng'ha.
1SA 2:4 Mipinde ja wanhu wawele na mong'ho najibeneka. Ila wanhu ng'hochele nawapegwa mong'ho.
1SA 2:5 Wala wawele nawali na chilyo chinji, sambi wangupegwa mijito leka wawe na chilyo. Ila wawele na nzala, sambi wahela nzala kahi. Mdala yawele mhende nakaponda wana saba. Ila mdala yawele na wana wenji, sambi nakalechigwa ne wana.
1SA 2:6 Mkulu Nguluwi kangukopolaga na kanguzilipulaga, heye kanguwadulisaga kuli isi ya wabagame, na kanguwahilusaga kahi.
1SA 2:7 Mkulu Nguluwi kanguwaditaga wamwe wawe wazunwa, na wamwe wawe na lufufu. Wanji kanguwadulisaga, na wanji kanguwakwinizaga.
1SA 2:8 Kanguwenulaga wazunwa kulawa kuli nhimbwisi, kanguwenulaga walingugana kulawa kuli vilundo vya mivu, nakawawika hamwe na wakulu, na kuwahaliza vigoda vya ukulu. Mina, misisi ja isi ndo ja Mkulu Nguluwi, heye nakaiwika isi ayi mchanya mwa misisi jake.
1SA 2:9 Kikala kwa welile wa heye kangwamilaga, ila kikala kwa wanhu wehile kangukutozelaga kutali kuli jiza. Mina munhu hambe yasumye kwa mong'ho wa heye.
1SA 2:10 Wang'honyo wa Mkulu Nguluwi wobenigwa vihandevihande, kowabumila hewo kota limlungu kilanga. Mkulu Nguluwi koitagusa isi yeng'ha, komha mong'ho mndewa wa heye na kolwinula ludali lwa yabakalizwe mafuta wa heye.”
1SA 2:11 Hamba Elikana nakahiluka kaye Lama, ila mwana wa heye Samweli nakapona Shilo kumkolela mijito Mkulu Nguluwi hali ulongozi wa mtambika Eli.
1SA 2:12 Wana wa walume wa Eli nawali wanhu wohambe watanze chinhu. Hawamhulichize Mkulu Nguluwi.
1SA 2:13 Nachali chihendo cha watambika hamwe na wanhu kota chila mhela yoneche hoyolavya nhambiko kuno iwunde liwe lihemswa, chitumagwa wa mtambika nailapigwa yoye na uma uwele na mizino jidatu mmoko mwake.
1SA 2:14 Kangwinjiza uma awo mchiya na iwunde lyoneche lyolilawa liwaga lya mtambika. Wanhu weng'ha wa Isilaeli walutile kulavya nhambiko ako Shilo, nawaditilwa hihyo.
1SA 2:15 Ila kung'hali mafuta gang'hali kusomigwa, chitumagwa wa mtambika koyaga na kumlonjela yula munhu yalingulavya nhambiko, “Mlavile mtambika miwunde midodi mina heye hobochela miwunde ja hegwe jihemsigwe, ila ja kusoma.”
1SA 2:16 Wone munhu ayo yamwidichile, “Tandi gasomigwe mafuta nagwe kohola miwunde joulingugana,” ayo chitumagwa wa mtambika kangumlonjela, “Hebu! Umhe sambi, ama ndohola kwa lupichi.”
1SA 2:17 Ago gehile ga awo wasongolo wa Eli nagali makulu ng'hatu hali Mkulu Nguluwi. Mina, wasongolo awo nawabeza nhambiko za Mkulu Nguluwi.
1SA 2:18 Mhela awo, msongolo Samweli nakalutilila kumkolela mijito Mkulu Nguluwi, yawele yavalile chizibao cha kitani.
1SA 2:19 Chila mwaka mayake kangumhonelaga ikanzu lido na kumgalila loyowa yoluta hamwe na mlume wa heye kulavya nhambiko ya mwaka.
1SA 2:20 Eli nakawatambichiza Elikana na mchewake, yolonga, “Mkulu Nguluwi yakupe wana wanji kwa mdala ayu wahalile honhu ha yula umpele Nguluwi.” Hamba nawahiluka kaye.
1SA 2:21 Mkulu Nguluwi nakamtambichiza Hana naye nakaponda wana walume wadatu na wahinza weli. Msongolo Samweli kalutilila kukula hali Mkulu Nguluwi.
1SA 2:22 Mhela awo Eli nayali sekulu ng'hatu, loyahuliche geng'ha wana wa heye walume gowawaditile Waisilaeli, vyowawele wowasa na wadala wawele wakola mijito hali lwizi lwa ihema lya Nguluwi,
1SA 2:23 nakawauza, “Lekachoni mwangudita mbuli azi? Ndanguhulika kulawa kwa wanhu weng'ha kuwala wihe womlingudita.
1SA 2:24 Haiwele ahyo wana wa heni! Ayi mbuli yondilinguhulika yokwenela hali wanhu wa Mkulu Nguluwi, hainojile.
1SA 2:25 Wone munhu yamditile gehile myage, Nguluwi koweza kumlechela. Ila wone munhu yamditile gehile Mkulu Nguluwi, whaani yowahanyisa?” Ila wanage hawahulichize makanyo ga mhaza wa hewo, kwa vila Mkulu Nguluwi nakagana kuwakopola.
1SA 2:26 Msongolo Samweli kalutilila kukula, yomnojeza Mkulu Nguluwi na wanhu.
1SA 2:27 Zuwa limwe munhu wa Nguluwi nakamlutila Eli, nakamlonjela, “Mkulu Nguluwi kangulonga hino, ‘Nandilajila hazelu kwa ivyazi lya mhaza wa hegwe mhela lowawele ako Misili hali ulongozi wa Falao.
1SA 2:28 Kuli nhanzi zeng'ha za Isilaeli nandimhagula Aluni na walelwa wa heye wawe watambika wa heni wakole mijito kuli honhu ha kulavila nhambiko, wafunyize ubani na kuvala chizibao hali heni. Kahi ndiwapa hachi ya kuhola honhu ha miwunde ja nhambiko zeng'ha zilavigwe kwa chiluli na Waisilaeli.
1SA 2:29 Lekachoni kwangubeza nhambiko za heni na ndolendole zila zilajizwe kwa chiwalo cha wanhu wa heni? Lekachoni kwanguwahulichiza wanago kusinda heni kwa kineneheza mwemwe kwa kulya hala honhu hanojile ha chila nhambiko zilavigwe na wanhu wa Isilaeli?
1SA 2:30 Ahyo, heni Mkulu Nguluwi, Nguluwi wa Isilaeli nandilaha kota ivyazi lya hegwe na lya wasekulu wa hegwe mokuya kumwando kwa heni mazuwa geng'ha. Ila lelo silingugana mbuli ayi ilutilile kwa heni! Wala walingunyhulichiza ndowahulichiza na walingumbeza nani ndolema kuwahulichiza.
1SA 2:31 Mhela wanguya hondipungula mong'ho wa hemwe na wa ivyazi lya wasekulu wa hemwe, leka hawe haduhu munhu wa hemwe yawele yochikala mbaka kuwa sekulu.
1SA 2:32 Namwe mowa na masinzo hali haluga ha heni. Hanga Isilaeli woditilwa kunoga, hakuwa na munhu kuli ivyazi lya hegwe yawele yochikala mbaka kuwa sekulu.
1SA 2:33 Munhu yumwe hela wa hegwe yawele yohambe ndimuse kulawa kuli honhu ha heni ha kulavila nhambiko, ayo kopona yolila na kulombocheza kwa chiwalo cha walelwa wa hegwe weng'ha vyowokopoligwa kwa ipanga.
1SA 2:34 “ ‘Chila chochilawila kwa wanago weli, Hofini na Finehasi, chowa ulajilo kwa hegwe. Weng'ha weli wobagama kuli zuwa limwe.
1SA 2:35 Nani ndoyinulila mtambika yunji yalingukundigwa, yawele kodita kota chila chiwele mnhumbula ya heni na kuli nyhala za heni. Ndolidita ivyazi lya heye liwe nzinzili, nawo wokola mijito hali yabakalizwe mafuta wa heni mazuwa geng'ha.
1SA 2:36 Hamba chila yumwe yalechigwe kwa hemwe kokuya na kufugamila hali heye kwa chiwalo cha sendi na ibumunda yolonga, “Unyhagule kuli honhu hanji ha kukolela mijito ha utambika leka ndiwe na chilyo.” ’ ”
1SA 3:1 Mhela awo msongolo Samweli nayali yomkolela mijito Mkulu Nguluwi hali Eli. Lizi kulawa kwa Mkulu Nguluwi nalwali ludo na uloli kwa heye nawali udo.
1SA 3:2 Zuwa limwe nechilo, Eli yawele meho ga heye nagali gabililebilile ng'hatu mbaka nayali yokona hado hela, nayali yawasile honhu ha heye ha chila mhela.
1SA 3:3 Myage Samweli nayali yawasile mgati mwa ihema lya Mkulu Nguluwi holiwele isanduku lya ilagano lya Nguluwi. Chenje cha Nguluwi nachali ching'hali chikwaka.
1SA 3:4 Hamba Mkulu Nguluwi nakamchema Samweli. Naye Samweli nakedichila, “Heni baha.”
1SA 3:5 Samweli nakabilima kwa Eli himahima na kumlonjela, “Heni baha, kwa vila kunyhema.” Ila Eli nakalonga, “Sikuchemile, uhiluche ukawase.” Ahyo nakaluta kuwasa.
1SA 3:6 Hamba Mkulu Nguluwi kamchema kahi, “Samweli.” Samweli nakalilimka, nakaluta kwa Eli na kulonga, “Heni baha, kwa vila kunyhema.” Ila Eli nakalonga, “Mwana wa heni, sikuchemile, uhiluche ukawase kahi.”
1SA 3:7 Mhela awu Samweli nayali hamzelele Mkulu Nguluwi. Ulonzi wa Mkulu Nguluwi nawali ung'hali kugubuligwa kwa heye.
1SA 3:8 Mkulu Nguluwi nakamchema Samweli lwa kadatu. Samweli nakalilimka kaluta kwa Eli na kulonga, “Heni baha, kwa vila kunyhema.” Aho ndo Eli nakavizela kota Mkulu Nguluwi ndo nayali yomchema msongolo Samweli.
1SA 3:9 Ahyo Eli nakamlonjela Samweli, “Ulute ukawase na hoyokuchema mlonjele hino, ‘Ulonje, gwa Mkulu Nguluwi, kwa vila chitumagwa wa hegwe kanguhulichiza.’ ” Ahyo Samweli nakaluta kuwasa honhu hake.
1SA 3:10 Mkulu Nguluwi nakoya kwima hala kuno yochema kota hamwande, “Samweli, Samweli.” Samweli nakalonga, “Ulonje, kwa vila chitumagwa wa hegwe kanguhulichiza.”
1SA 3:11 Mkulu Nguluwi nakamlonjela Samweli, “Nda habehi kudita chinhu kuli isi ya Isilaeli chiwele chila yumwe yawele yohulika kotinhuka.
1SA 3:12 Mhela awo ndokweneza geng'ha gondonjile kwa Eli na ivyazi lya heye.
1SA 3:13 Mina nandimlonjela kota ndolitagusa ivyazi lya heye mazuwa geng'ha, kwa gehile goyawele yagazelele kwa vila wanage walume nawang'hovula heni naye hawalemeze.
1SA 3:14 Ahyo ndangilaha kwa ivyazi lya Eli kota gehile gowaditile hagokusigwa kwa nhambiko ama ndolendole mazuwa gose.”
1SA 3:15 Samweli nakawasa hala mbaka mitondo, hamba nakachumula lwizi lwa ihema lya Mkulu Nguluwi. Samweli nakadumba na kumlonjela Eli uloli awo,
1SA 3:16 ila Eli nakamchema Samweli na kumlonjela, “Samweli mwanangu.” Samweli nakedichila, “Heni baha.”
1SA 3:17 Eli nakamuuza, “Mkulu Nguluwi nakakulonjela choni? Uleche kuvisa choyakulonjele. Wone umvise choyakulonjele, Nguluwi yakuditile vibi na mzidi.”
1SA 3:18 Ahyo Samweli nakamlonjela Eli geng'ha Mkulu Nguluwi goyamlonjele ne kumvisa chinhu. Eli nakalonga, “Heye ndo Mkulu Nguluwi, yadite lila liwele linojile hali meho ga heye.”
1SA 3:19 Samweli nayali hamwe na Mkulu Nguluwi loyawele yokula, halechile ne ulonzi wa heye uleche kwenela.
1SA 3:20 Wanhu weng'ha wa isi ya Isilaeli kulawa Dani kuli ubanzi wa kasikazini mbaka Beeli-sheba kuli ubanzi wa kusini, nawavizela kota Samweli nayali yatawizwe yawe mloli wa Mkulu Nguluwi.
1SA 3:21 Mkulu Nguluwi nakalutilila kilajila hazelu ako Shilo na kulongasa na Samweli.
1SA 4:1 Samweli nakaugubula ulonzi wa Mkulu Nguluwi kuli Isilaeli yeng'ha. Lelo Waisilaeli nawaluta kitowa ngondo na Wafilisti. Waisilaeli nawawika kambi ya hewo ako Ebeneseli na Wafilisti nawawika kambi ya hewo ako Afeki.
1SA 4:2 Wafilisti nawekungajiza kuwatowa Waisilaeli, lowawele wochitowa, Waisilaeli nawasumigwa. Waisilaeli elufu zine nawakopoligwa kuli ngondo.
1SA 4:3 Wamizi wa ngondo lowahiluche kuli kambi, wasekulu wa Isilaeli nawalonga, “Lekachoni Mkulu Nguluwi nakawakundiza Wafilisti watusumye lehano? Tuche tukaligale isanduku lya ilagano lya Mkulu Nguluwi kulawa Shilo, leka lilute hamwe na hetwe na kutulohola kulawa mmoko mwa wang'honyo wa hetwe.”
1SA 4:4 Ahyo nawawalajiza vitumagwa ako Shilo, nawo nawaligala isanduku lya ilagano lya Mkulu Nguluwi Yawele na Mong'ho, yekale hagati ha vilumbigwe vili vifandile kota wahilisi, vigongomanyigwe na kuwichigwa mchanya mwa isanduku. Wala wana weli walume wa Eli, Hofini na Finehasi nawoya hamwe na lila isanduku lya ilagano lya Mkulu Nguluwi.
1SA 4:5 Isanduku lya ilagano lya Mkulu Nguluwi lolifichile kuli kambi Waisilaeli weng'ha nawatowa luchenze kwa lizi ng'hulu mbaka isi yeng'ha naitigasika.
1SA 4:6 Wafilisti lowahuliche luchenze alo, nawauza, “Luchenze lweng'ha alo kuli kambi ya Waebulaniya luna mana yachi?” Lowavizelele kota isanduku lya ilagano lya Mkulu Nguluwi nalyali lifichile kuli kambi ya Waisilaeli,
1SA 4:7 Wafilisti nawadumba nawalonga, “Mlungu nakenjila kuli kambi. Tochona hetwe! Mbuli kota ayi hainalawila mbaka sambi.
1SA 4:8 Tochona hetwe! Yalikohi yotulohola kulawa mmoko mwa milungu jiwele na ludali? Ajo ndo milungu jiwatowile Wamisili kwa magazo geng'ha ako kuchiwala.
1SA 4:9 Lelo hemwe Wafilisti tikangaze. Mitowe kota walume, ama hebu mowa wapogozi wa Waebulaniya, kota hewo vyowawele wapogozi wa hetwe. Mitowe kota walume.”
1SA 4:10 Wafilisti nawetowa ngondo, Waisilaeli nawalemwela na kudwina chila munhu haluga ha heye. Zuwa alyo nakwali kukopola kukulu ng'hatu, Waisilaeli nawajiliza wamizi elufu makumi gadatu (30,000) walingujenda kwa magulu.
1SA 4:11 Isanduku lya ilagano lya Nguluwi naliholigwa, nawo wana weli walume wa Eli, Hofini na Finehasi, nawakopoligwa.
1SA 4:12 Lelo zuwa lilila munhu yumwe wa nhanzi ya Benjamini nakabilima kulawa kuli kitowa ngondo na kuluta Shilo, mivalo ja heye jiwele jidejeche na yawele na nhimbwisi kumutwi kwa heye kulajila masinzo ga heye.
1SA 4:13 Loyafichile, Eli yawele na lunhwinhwi mnhumbula ya heye kwa chiwalo cha isanduku lya ilagano lya Nguluwi, nayali yekalise kuli chigoda cha heye hafungo ha nzila yolola. Yula munhu loyafichile kuli muji na kulonga mbuli azo, wanhu weng'ha wa muji nawalila.
1SA 4:14 Eli loyahuliche lizi lya chililo, nakauza, “Iyowe alyo lya choni?” Yula munhu nakaluta himahima kwa Eli na kumlonjela mbuli azo.
1SA 4:15 Mhela awo Eli nayali na miyaka makumi tisa na nane na meho ga heye nagali gadozoche.
1SA 4:16 Yula munhu nakamlonjela Eli, “Heni ndawa kuli ngondo sambi baha, mbilima kulawa kuli ngondo lehano.” Eli nakamuuza, “Mwanangu, mbuli za ndaze ako?”
1SA 4:17 Ayo yegale mbuli nakalonga, “Waisilaeli nawawabilima Wafilisti. Wanhu wenji nawabagama na wana wa hegwe weli, Hofini na Finehasi, nawabagama na isanduku lya ilagano lya Nguluwi naliholigwa.”
1SA 4:18 Hala loyalonjile isanduku lya ilagano lya Nguluwi, Eli nakagwa kwa kumbele kulawa kuli chigoda cha heye hafungo ha lwizi lwa muji. Eli loyagwile ahyo, singo ya heye naibeneka kwa vila nayali munhu yanenehe na sekulu, naye nakabagama. Eli nakawalongoza Waisilaeli kwa miyaka makumi gane.
1SA 4:19 Mdala wa Finehasi, mhela awo nayali na himila, mhela wa heye wa kuponda nawali ufichile. Loyahuliche isanduku lya ilagano lya Nguluwi nalyali liholigwe na kahi mlume wa heye na mhaza wa mlume wa heye nawabagama, bahala nakasunzumala na kuponda. Ila nayali na usungu ng'hatu.
1SA 4:20 Loyawele yobagama, wadala wawele womtanza nawamlonjela, “Uleche kugozola, nakuponda mwana mlume.” Ila hedichile ne kuhulichiza.
1SA 4:21 Nakamchema mwana wa heye Ikabodi, yolonga, “Ukulu nawuka kuli Isilaeli,” kwa vila isanduku lya ilagano nalyali liholigwe na kwa chiwalo cha kubagama kwa mlume wa heye na mhaza wa mlume wa heye.
1SA 4:22 Nakalonga, “Ukulu nawuka kuli Isilaeli kwa vila isanduku lya ilagano lya Nguluwi naliholigwa.”
1SA 5:1 Wafilisti nawalihola isanduku lya ilagano lya Nguluwi, nawalipika kulawa Ebeneseli mbaka kuli muji wa Ashidodi.
1SA 5:2 Hamba, nawaligala isanduku lya ilagano lya Nguluwi kuli ng'handa ya mlungu wa hewo Dagoni na kuliwika habehi na heye Dagoni.
1SA 5:3 Mitondo yake lufuku, wanhu wa muji wa Ashidodi lowalilimche nawona limalukolo lya Dagoni ligwile chifunama hali isanduku lya ilagano lya Mkulu Nguluwi. Nawalinula kahi limalukolo alyo na kulihilula honhu hake.
1SA 5:4 Ila mitondo iyage lowalilimche, nawona limalukolo lya Dagoni naligwa kahi chifunama hali isanduku lya ilagano lya Mkulu Nguluwi. Mutwi na moko ga limalukolo alyo, vyeng'ha navyali vibeneche na navyali viwasile hasi hali fulemu ya lwizi. Lukuli lwa limalukolo lya Dagoni ndo nalwali luponile.
1SA 5:5 Ndo mina kulawa mhela wula watambika wa Dagoni na weng'ha walingumfugamila mlungu Dagoni ako Ashidodi, lowokwinjila kuli ng'handa ya Dagoni hambe wabije fulemu ya lwizi lwa ng'handa ya Dagoni.
1SA 5:6 Mkulu Nguluwi nakawatowa vibi na kuwakabusa wanhu wa Ashidodi. Nakawatowa na wanhu wa habehi na heye kwa kuwagalila mipu.
1SA 5:7 Wanhu wa Ashidodi lowagawene ago gawafika, nawalonga, “Nguluwi wa Isilaeli kangututowa vibi hetwe hamwe na mlungu wa hetwe Dagoni. Isanduku lya ilagano lya Nguluwi halichikala kwa hetwe.”
1SA 5:8 Lelo nawawachema vilongozi weng'ha wa Wafilisti na kuwauza, “Ndaze, todita choni na ali isanduku lya ilagano lya Nguluwi wa Isilaeli?” Nawedichila, “Isanduku lya Nguluwi wa Isilaeli lilute Gati.” Lelo nawalilavya aho isanduku lya Nguluwi wa Isilaeli.
1SA 5:9 Ila lowalihiliche Gati, Mkulu Nguluwi, nakautowa muji awo wa Gati na kuwadumbiza. Nguluwi nakawagaza wanhu wa muji awo wasongolo na wasekulu, kwa kuwagalila mipu.
1SA 5:10 Ahyo nawalihilika alyo isanduku lya ilagano lya Nguluwi kuli muji wa Ekiloni. Ila mhela isanduku alyo lya Nguluwi vyoliwele likwinjila Ekiloni, wanhu wa muji awo nawalila wolonga, “Nawaligala isanduku lya Nguluwi wa Isilaeli kwa hetwe leka kutukopola hetwe na wanhu wa hetwe.”
1SA 5:11 Lelo nawawachema hamwe vilongozi weng'ha wa Wafilisti na kulonga, “Mlyuse isanduku lya ilagano lya Nguluwi wa Isilaeli na lihiluswe honhu hake, wone haiwa ahyo lyotukopola hetwe na wanhu wa hetwe.” Muji nawali umemile lunhwinhwi kwa vila Nguluwi nayali yowagaza lukami.
1SA 5:12 Wala wowawele wang'hali kubagama nawafichigwa na mipu na chililo cha muji nachifika mbaka kilanga.
1SA 6:1 Alyo isanduku lya ilagano lya Mkulu Nguluwi nalyali kuli isi ya Wafilisti myezi saba.
1SA 6:2 Nawo Wafilisti nawawachema watambika wa Dagoni na walaguzi na kuwalonjela, “Tulidite ndaze ali isanduku lya ilagano lya Mkulu Nguluwi? Mtulonjele hotulihilula ali isanduku kuli honhu hake, tulajize na chinhu chachi kahi?”
1SA 6:3 Nawedichila, “Wone molihilula alyo isanduku lya ilagano lya Nguluwi wa Isilaeli, mleche kuhilula lilihela chinhu ila mumhilichile nhambiko ya nongwa. Hamba mowa wakomu na mogubulilwa lekachoni kangulutilila kuwagaza hemwe.”
1SA 6:4 Wafilisti nawawauza, “Nhambiko yachi ya nongwa yotumhilichila Mkulu Nguluwi?” Nawedichila, “Mipu jihano ja zahabu na migule jihano ja zahabu, kwa kiwhana na winji wa vilongozi wahano wa Wafilisti, kwa vila utamwa wuwo wa tauni uwele mgati mwa hemwe weng'ha ndo wuwo uwele mgati mwa wakulu wa hemwe.
1SA 6:5 Ahyo mgongomanye vinhu viwele kota mipu ja hemwe na vinhu kota migule ja hemwe jiiditile vibi isi ya hemwe, moutogola ukulu wa Nguluwi wa Isilaeli. Hanji kopunguza magazo ga hemwe na milungu ja hemwe na isi ya hemwe.
1SA 6:6 Mleche kuzidita nhumbula za hemwe ziwe zigagadale kota vila wala Wamisili na yula Falao. Nguluwi vyoyawaditile Wamisili kwa kung'hang'hala nawawaleka Waisilaeli woche Misili.
1SA 6:7 Lelo muwiche goya mutuka wa kukwejigwa hamwe na misenga mili jilingonyeza ila jiwele hajiwopigwe ngwamo. Mjiwohe misenga ajo kuli mutuka awo, ila mjileche milogota ajo na mjiwiche kuli ibani.
1SA 6:8 Mhole alyo isanduku lya ilagano lya Mkulu Nguluwi na mliwiche mchanya mwa awo mutuka wa kukwejigwa, mgati mwa mhako hafungo hake muwiche avyo vinhu vya zahabu vyomlingumhilichila Mkulu Nguluwi kota nhambiko ya nongwa. Hamba muihiliche,
1SA 6:9 ila mlilolele ng'hatu. Wone lyoluta kuli isi yake, mina kuluta Beti-shemeshi ako Isilaeli, lelo tovizela kota Mkulu Nguluwi ndo yatugalile hetwe matamwa ago makulu. Ila wone haliluta, lelo tovizela kota hauwele moko wa heye ututowile na kota chochilawile kwa hetwe nachilawila hela.”
1SA 6:10 Lelo nawadita ahyo. Nawahola misenga mili kota vyowalajizwe, nawajiwoha kuli mutuka awo wa kukwejigwa, milogota jawo najiwichigwa kuli ibani.
1SA 6:11 Nawaliwika isanduku lya ilagano lya Mkulu Nguluwi mchanya mwa mutuka awo wa kukwejigwa hamwe na wula mhako uwele na vinhu vya zahabu vilingiwhana na migule na mipu.
1SA 6:12 Hamba ajo misenga najiluta mbaka Beti-shemeshi, wojenda ne kuhinduka ubanzi woneche kuno jilila nzila yeng'ha. Vilongozi wa Wafilisti nawajiwinza misenga ajo mbaka kuli mbaka wa Beti-shemeshi.
1SA 6:13 Mhela awo wanhu wa Beti-shemeshi nawali wobeta ngano ya hewo ako kibindi, lowenule meho ga hewo na kulyona lila isanduku lya ilagano, nawasangalala ng'hatu kulyona.
1SA 6:14 Wula mutuka nawuya mbaka kuli mgunda wa Yoshua wa Beti-shemeshi na kwima hafungo ha italawe likulu. Wanhu nawatula mbawo za wula mutuka wa kukwejigwa na kujilavya nhambiko jila misenga, jiwa nhambiko ya kulakazwa kwa Mkulu Nguluwi.
1SA 6:15 Nawo Walawi nawalidulisa isanduku lya ilagano lya Mkulu Nguluwi hamwe na wula mhako uwele na vinhu vya zahabu na kuwika mchanya mwa lila italawe likulu. Zuwa lila wanhu wa Beti-shemeshi nawalavya nhambiko ya kulakazwa na nhambiko iyage kwa Mkulu Nguluwi.
1SA 6:16 Wala vilongozi wahano wa Wafilisti lowawene geng'ha, nawahiluka zuwa lilila mbaka Ekiloni.
1SA 6:17 Aji ndo jila mipu ja zahabu jiwele Wafilisti nawajihilika kota nhambiko ya nongwa kwa Mkulu Nguluwi, imwe kwa chiwalo cha chila muji, jiwele ndo Ashidodi na Gasa na Ashikeloni na Gati na Ekiloni.
1SA 6:18 Hisabu ya migule ja zahabu nayali kota miji ja Wafilisti jilongozwe na wandewa wahano. Miji jiwele na ng'hanzi na vijiji vilihela ng'hanzi. Kulawa mhela wula lila italawe likulu, liwichigwe isanduku lya ilagano lya Mkulu Nguluwi mchanya mwake, nalyali bahala kuli mgunda wa Yoshua wa Beti-shemeshi, kota ulolezi wa chinhu chiditigwe.
1SA 6:19 Ila Mkulu Nguluwi nakawatowa wanhu wamwe wa Beti-shemeshi, yowakopola wanhu makumi saba hali hewo kwa vila nawasunjilila mgati mwa isanduku lya ilagano lya Mkulu Nguluwi. Wanhu nawalombocheza kwa chiwalo cha magazo makulu kulawa kwa Mkulu Nguluwi.
1SA 6:20 Wanhu wa Beti-shemeshi nawalonga, “Whaani yoweza kwima hali Mkulu Nguluwi, ayu Nguluwi yelile? Isanduku lyoluta kwa whaani kulawa hano?”
1SA 6:21 Hamba nawalajiza wasenga kwa wanhu wa Kiliati-yealimu, wolonga, “Wafilisti nawahilula isanduku lya ilagano lya Mkulu Nguluwi. Muye mlihole.”
1SA 7:1 Nawo wanhu wa Kiliati-yealimu nawoya, nawahola isanduku lya Mkulu Nguluwi. Nawaligala kuli ng'handa ya Abinadabu mchanya kuli chidunda na kumuwika Eleasali, mwanage, kuli mijito ja chiuyeng'ha yalilolele isanduku lya ilagano lya Mkulu Nguluwi.
1SA 7:2 Alyo isanduku lya ilagano lya Mkulu Nguluwi nalipona ako Kiliati-yealimu kwa miyaka makumi meli. Wanhu weng'ha wa Isilaeli nawamlilila Mkulu Nguluwi leka yawatanze.
1SA 7:3 Samweli nakawalonjela wanhu weng'ha wa Isilaeli, yolonga, “Wone momgaluchila Mkulu Nguluwi kwa nhumbula za hemwe zeng'ha, lelo mjileche milungu mijenzi na Maashitaloti na kilavya mwemwe baho kwa Mkulu Nguluwi na kumkolela mijito heye yaliyeka, heye kowalohola hemwe kulawa kuli moko ga Wafilisti.”
1SA 7:4 Ahyo wanhu wa Isilaeli nawawika kutali Mibaali na Maashitaloti ja hewo na kumkolela mijito Mkulu Nguluwi yaliyeka.
1SA 7:5 Samweli nakalonga, “Muwakungajize Waisilaeli weng'ha ako Misipa, nani ndowalandilani hemwe kwa Mkulu Nguluwi.”
1SA 7:6 Loweting'hane ako Misipa, nawadeha mazi na kubohola hasi kota nhambiko kwa Mkulu Nguluwi. Zuwa alyo nawesela kulya, wolonga, “Natudita gehile hali Mkulu Nguluwi.” Samweli nayali mtagusa kwa Waisilaeli ako Misipa.
1SA 7:7 Wafilisti lowahuliche kota wanhu wa Isilaeli naweting'hana ako Misipa, vilongozi wa Wafilisti nawaluta kuwatowa. Waisilaeli lowahuliche mbuli ayo, nawadumba kwa chiwalo cha Wafilisti.
1SA 7:8 Wanhu wa Isilaeli nawamlonjela Samweli, “Uleche kuleka kumlilila Mkulu Nguluwi, Nguluwi wa hetwe kwa chiwalo cha hetwe, leka yatulohole kulawa kuli moko ga Wafilisti.”
1SA 7:9 Hamba Samweli nakalihola ing'holo lyana lilingong'ha, nakalilavya lyeng'ha nhambiko ya kulakazwa kwa Mkulu Nguluwi. Samweli nakamlilila Mkulu Nguluwi kwa chiwalo cha wanhu wa Isilaeli, Mkulu Nguluwi nakamwidichila.
1SA 7:10 Samweli loyawele yolavya nhambiko ya kulakazwa, Wafilisti nawahejela habehi kitowa na wanhu wa Isilaeli, ila Mkulu Nguluwi nakabuma ng'hatu kwa Wafilisti. Zuwa lila nawali wokakama kwa lunhwinhwi na kubilimiswa hali Waisilaeli.
1SA 7:11 Wanhu wa Isilaeli nawalawa ako Misipa kwa kubilima na kuwawinza Wafilisti, nawawatowa mnzila mbaka hali honhu hawele habehi na Beti-kali.
1SA 7:12 Hamba Samweli nakahola iganga na kulimiza hagati ha Misipa na Sheni. Nakalichema Ebeneseli, yolonga, “Mbaka sambi Mkulu Nguluwi nakatutanza.”
1SA 7:13 Lelo Wafilisti nawalemwela na hawenjile kahi kuli isi ya Isilaeli. Kuli ukomu wa Samweli, Mkulu Nguluwi nayali yowagaza Wafilisti.
1SA 7:14 Miji kwaluchila Ekiloni mbaka Gati, jila jiwele Wafilisti nawali wajiholile kulawa Isilaeli najali jihilusigwe kwa Isilaeli, isi ya Isilaeli naigomboligwa kulawa mmoko mwa Wafilisti. Nakwali na kikala goya hali Isilaeli na Waamoli.
1SA 7:15 Samweli nayali yolutilila kutagusa hali Waisilaeli, mazuwa geng'ha ga ukomu wa heye.
1SA 7:16 Chila mwaka nakalutilila kuzunguluta kulawa Beteli na Giligali na Misipa, yotagusa hali Waisilaeli chila honhu.
1SA 7:17 Hamba nakahiluka haluga ha heye ako Lama. Ako kahi nayali yotagusa hali Waisilaeli na nakamzenjela Mkulu Nguluwi honhu ha kulavila nhambiko.
1SA 8:1 Samweli loyawele sekulu, nakawawika wanage wawe watagusa hali Isilaeli.
1SA 8:2 Mlelwa wa mwaluko nakachemigwa Yoeli na itagwa lya yula wa keli nalyali Abiya, nawo nawali watagusa ako Beeli-sheba.
1SA 8:3 Ila wanage nahawawinzile nzila za heye. Nawabelenhuka na kuwinza lufufu lwa uhadi, nawabochela chinhu kwa uviso na kwajiliza hachi.
1SA 8:4 Lelo wasekulu weng'ha wa Isilaeli nawating'hana hamwe kuluta kwa Samweli ako Lama.
1SA 8:5 Nawamlonjela, “Ulole, hegwe nakuwa sekulu, wanago hambe wawinze nzila za hegwe, lelo tuwichile mndewa wa kutulongoza kota wanhu wa isi zinji zeng'ha.”
1SA 8:6 Ila hewo lowalonjile, “Utupe mndewa wa kutulongoza,” ali nalimzudiza Samweli, ahyo nakamlanda Mkulu Nguluwi.
1SA 8:7 Mkulu Nguluwi nakamlonjela Samweli, “Uhulichize gala geng'ha gawele wanhu awa gowalingukulonjela, kwa vila nahawakulemile hegwe, ila nawandema heni kuwa mndewa wa hewo.
1SA 8:8 Kota vila vyowaditile kulawa zuwa lila londiwalavile kulawa Misili mbaka zuwa ali lya lehano, kwa kundeka heni na kujikolela mijito milungu jinji, ndo vyowalingukuditila hegwe.
1SA 8:9 Lelo uwahulichize goya na uwazelese gala gowoditilwa na mndewa yalinguya kuwalongoza.”
1SA 8:10 Samweli nakawalonjela wala wanhu wawele wolanda wapegwe mndewa ulonzi weng'ha wa Mkulu Nguluwi.
1SA 8:11 Nakalonga, “Hino ndo vyoyowaditila mndewa yawele yowalongoza. Kowahola wana wa hemwe walume na kuwadita wakole mijito kuli mituka ja heye ja kitowa ngondo na falasi wa heye, nawo wolongola kumwando mwa mituka ja heye kujamila.
1SA 8:12 Naye kowawika kwa heye na wowa wakulu kwa wamizi maelufu na wakulu kwa wamizi makumi gahano. Wanji kowawika wawe wokatula kuli mgunda wa heye na kubeta mbena za heye na kugongomanya vinhu vya kitowa ngondo na vinhu vya mutuka wa heye.
1SA 8:13 Wahinza wa hemwe kowahola na wowa wogongomanya unhunyhililo na wateleka na walingubanika mibumunda.
1SA 8:14 Kohola migunda ja hemwe jinojile na migunda ja hemwe ja mizabibu na migunda ja mizeituni na kuwapa wakola mijito wa heye.
1SA 8:15 Kohola honhu hamwe ha kumi ha nyhule za hemwe na ha zabibu za hemwe na kuwapa vilongozi wa heye na wakola mijito wa heye.
1SA 8:16 Kowahola wakola mijito wa hemwe walume na wadala na wasongolo wa hemwe wanojile na midogowi ja hemwe kwa chiwalo cha heye yuye.
1SA 8:17 Kohola honhu hamwe ha kumi ha vilundo vya hemwe vya ming'holo na mhene na mwemwe baho mowa wapogozi wa heye.
1SA 8:18 Zuwa alyo holifika, molila kwa kugana utanzi kwa chiwalo cha mndewa mumhagule, ila Mkulu Nguluwi howedichila.”
1SA 8:19 Ila wanhu nawalema kumhulichiza Samweli, nawalonga, “Hebu! Twangugana mndewa wa kutulongoza.
1SA 8:20 Hamba towa kota wanhu wa isi zinji zeng'ha, tuwele na mndewa wa kutulongoza na kuluta kumwando kwa hetwe kwa kitowa ngondo kwa chiwalo cha hetwe.”
1SA 8:21 Samweli loyahuliche gala geng'ha gowalonjile wanhu, nakahiluchila kulonga hali Mkulu Nguluwi.
1SA 8:22 Mkulu Nguluwi nakamwidichila Samweli, “Wahulichize na uwape mndewa.” Hamba Samweli nakawalonjela wanhu wa Isilaeli, “Chila yumwe yalute mujini kwa heye.”
1SA 9:1 Nakwali na munhu yumwe Mbenjamini yawele na lufufu. Itagwa lyake nalyali Kishi, mwana wa Abieli, mwana wa Seloli, mwana wa Bekolati, mwana wa Afiya.
1SA 9:2 Nayali na mwana yachemigwe Sauli, msongolo yanojile ng'hatu, nakwali haduhu yewhanile na heye hali Waisilaeli, nayali ng'wemang'wema kusinda wanhu wanji.
1SA 9:3 Lelo midogowi ja Kishi, mhaza wa Sauli, najajilila. Kishi nakamlonjela mwanage Sauli, “Mhole yumwe wa vitumagwa wa hegwe, ulute ukapale midogowi.”
1SA 9:4 Ahyo nakajipala kuli isi ya vidunda vya Efulaimu na kuli honhu ha Shalisha, ila hawajipatile. Nawalutilila kuli honhu hanji ha Shaalimu, ila midogowi hajiwele ako. Hamba nawakola kuli isi ya Benjamini, ila hawajipatile.
1SA 9:5 Lowafichile kuli isi ya Sufu, Sauli nakamlonjela yula chitumagwa yawele hamwe na heye, “Uye, hetwe tuhiluche mina mhaza wa heni koleka kijesa kwa chiwalo cha midogowi na kwaluka kuwa na lunhwinhwi kwa chiwalo cha hetwe.”
1SA 9:6 Yula chitumagwa nakamlonjela Sauli, “Ubeteze tandi, kuli muji awu hana munhu wa Nguluwi yalingukundigwa lukami, chila choyalingulonga nachiwaga cha kukomya. Lelo tumlutile ako, hanji koweza kutulonjela mbuli za majendo ga hetwe vyogowa.”
1SA 9:7 Sauli nakamuuza, “Ila wone tumlutile, tomha choni? Lole, mibumunda kuli mihako ja hetwe najimala na twahela choneche cha kumha munhu wa Nguluwi. Tuna choni?”
1SA 9:8 Yula chitumagwa nakamlonjela Sauli, nakalonga, “Lole heni ndina igwala lido lya sendi. Ndomha ayo munhu wa Nguluwi igwala alyo leka yatulonjele kuwala majendo ga hetwe.”
1SA 9:9 Aho katali kuli Isilaeli, wone munhu yogana kumlanda chinhu Nguluwi, nakalongaga hino, “Goya, muye, tulute kwa mlaguzi.” Kwa munhu yawele mloli, mazuwa ago nayali yochemigwa mlaguzi.
1SA 9:10 Sauli nakamwidichila, “Ayo ndo mbuli inojile, tulute.” Nawaluta mbaka kuli muji uwele nayali yochikala yula munhu wa Nguluwi.
1SA 9:11 Lowawele wokwina chidunda kulutila mujini, naweting'hana na wahinza wolawa kudeha mazi, nawawauza, “Mlaguzi kabaho?”
1SA 9:12 Hewo nawalonga, “Ena, kabaho, lole ka kula kumwando kwa hemwe, mlute himahima ng'hatu, kwa vila lehano nakoya kuno kuli muji, kwa vila wanhu wana nhambiko ako kuli honhu ha kufugamila.
1SA 9:13 Homkwinjila kuli muji, momfika yang'hali kuluta kuchanya kuli honhu ha kufugamila. Mina wanhu hawolya mbaka yatambichize nhambiko, hamba wala walalikwe wolya. Ahyo mlute himahima, moting'hana naye.”
1SA 9:14 Ahyo Sauli na chitumagwa wa heye nawaluta mujini. Lowawele wokwinjila kuli muji, nawamona Samweli yolawa mujini yoluta honhu ha kufugamila.
1SA 9:15 Lelo zuwa limwe Sauli loyawele yang'hali kufika hala mujini, Mkulu Nguluwi nayali yamlonjele Samweli,
1SA 9:16 “Hamitondo, mhela kota awu, ndokugalila munhu kulawa isi ya Benjamini, nagwe kombakaliza mafuta yawe chilongozi hali wanhu wa heni Isilaeli. Heye kowalohola wanhu wa heni kuli moko ga Wafilisti, kwa vila ndigona magazo ga wanhu wa heni na chililo cha hewo nachifika kwa heni.”
1SA 9:17 Samweli loyamuwene Sauli, Mkulu Nguluwi nakamlonjela, “Ayu ndo yula munhu ndikulonjele. Heye ndo kowalongoza wanhu wa heni.”
1SA 9:18 Lelo Sauli nakamlutila Samweli loyawele kuli lwizi lwa muji, nakalonga, “Dedede, ndonjele ng'handa ya mlaguzi yakohi?”
1SA 9:19 Samweli nakamwidichila Sauli, “Heni ndo mlaguzi. Mndongole kuluta kuli honhu ha kufugamila, kwa vila molya hamwe na heni. Hamitondo lufuku, kuuza kweng'ha komuwele nako, ndowedichila.
1SA 9:20 Kuwala jila midogowi jajilile mazuwa gadatu gakolile, mleche kuwa na lunhwinhwi kwa chiwalo cha ajo kwa vila joneka. Ila ndo whaani ayo yawele Waisilaeli wangumgana ng'hatu? Hauwele hegwe na ivyazi lya mhaza wa hegwe lyeng'ha?”
1SA 9:21 Sauli nakedichila, “Heni nda Mbenjamini, nhanzi ndodo kusinda zeng'ha za Isilaeli. Na kuli nhanzi yeng'ha ya Benjamini, lukolo lwangu ndo ludo ng'hatu. Lelo lekachoni kwangulonga ahyo kwa chiwalo cha heni?”
1SA 9:22 Samweli nakamhilika Sauli na chitumagwa wa Sauli mchituka, honhu ha ukulu. Nakwali na wanhu walalikwe makumi gadatu.
1SA 9:23 Samweli nakamlonjela munhu yalinguteleka, “Wigale hala honhu ha iwunde hondikupele, ndikulonjele uhawiche hafungo.”
1SA 9:24 Yula munhu yalinguteleka nakahola chima na honhu ha iwunde liwele kuchanya na kuviwika hali Sauli. Aho ndo Samweli nakalonga, “Lole chila chouwichile, lelo nachiwichigwa hali hegwe. Lelo ulye kwa vila nachiwichigwa kwa chiwalo cha hegwe leka ulye hamwe na walalikwe.” Ahyo Sauli nakalya hamwe na Samweli zuwa alyo.
1SA 9:25 Lowahiluche mujini kulawa honhu ha kufugamila, Samweli nakalongasa na Sauli kuli chinduwiko cha ng'handa.
1SA 9:26 Lufuku, kung'hali kubwemwenzuka, Samweli nakamchema Sauli kuchinduwiko, nakalonga, “Winuche, ndikuhiluse haluga ha hegwe.” Sauli nakenuka, heye na Samweli nawaluta kuli nzila.
1SA 9:27 Lowawele wodulika kuluta kuduma kwa muji, Samweli nakamlonjela Sauli, “Mlonjele chitumagwa wa hegwe yalongole kumwando kwa hetwe, ila ubeteze hano hado, leka ndikupe usenga kulawa kwa Nguluwi.” Ayo chitumagwa nakadita ahyo.
1SA 10:1 Samweli nakahola ibuli lido lya mafuta, nakajida kumutwi kwa Sauli, nakamnonela na kulonga, “Mkulu Nguluwi kakubakaliza mafuta uwe chilongozi wa wanhu wa heye Isilaeli.
1SA 10:2 Loukuka kwa heni lehano, koting'hana na wanhu weli habehi na chilaga cha Laheli ako Selisa kuli mbaka wa Benjamini. Wokulonjela, ‘Jila midogowi jouwele ulingujipala, joneka. Lelo mhaza wa hegwe nakaleka kijesa kuwala midogowi na sambi kana lunhwinhwi kukuwala hegwe. Kanguuza, “Ndodita ndaze kuwala mwana wa heni?” ’
1SA 10:3 Hamba koluta kumwando kulawa hano mbaka ufiche kuli igodi ikulu lya mwaloni ako Taboli. Wanhu wadatu walinguluta kwa Nguluwi ako Beteli woting'hana na hegwe aho. Yumwe kowa yaholile vinyehe vidatu na yunji mibumunda jidatu na yunji kahi kowa yaholile chihako cha igozi cha kuwichila divai.
1SA 10:4 Wokulamsa na wokupa mibumunda mili, nagwe kobochela kulawa kwa hewo.
1SA 10:5 Hamba koluta Gibeya ya Nguluwi, hawele aho kuwele hana kambi ya Wafilisti. Louwa habehi ha muji, koting'hana na chilundo cha waloli wodulika kulawa honhu ha kufugamila wawele na igombogombo na ngoma ndodo na mluli na ching'hweleng'hwele vyowa vitowigwa na kupembigwa kumwando kwa hewo, nawo wowa wolavya uloli.
1SA 10:6 Muhe wa Mkulu Nguluwi wokuya mchanya mwa hegwe kwa mong'ho, nagwe kolavya uloli hamwe na hewo na kogaluswa kowa munhu yunji.
1SA 10:7 Ulajilo awu houkwenela, udite choneche kota vyoulingulongozwa na Nguluwi, kwa vila Nguluwi ka hamwe na hegwe.
1SA 10:8 Hamba ulongole kudulika kumwando kwa heni mbaka Giligali. Nani ndodulika kuko leka kulavya nhambiko za kulakazwa na nhambiko za kikala goya, ila kobeteza mazuwa saba mbaka hondikuya kukulonjela chinhu cha kudita.”
1SA 10:9 Sauli loyagaluche na kumleka Samweli, Nguluwi nakaigalusa nhumbula ya Sauli kuwa inojile kusinda hamwande, ulajilo awu weng'ha nawenela zuwa lila.
1SA 10:10 Lowafichile Gibeya, nakating'hana na chilundo cha waloli. Muhe wa Nguluwi naumuyila kwa mong'ho, naye nakelumba hali hewo na kulavya uloli.
1SA 10:11 Wala wanhu weng'ha wamzelele hamwande lowamuwene yolavya uloli hamwe na waloli, naweuza, “Choni achi chimlawile mwana wa Kishi? Ndaze, Sauli naye kamumo hali waloli?”
1SA 10:12 Munhu yumwe yawele yochikala ako nakedichila, “Ndaze, mhaza wa hewo ndo whaani?” Lelo nayali nhelo, kulonga, “Ndaze, Sauli naye kamumo hali waloli?”
1SA 10:13 Sauli loyasindile kulavya uloli, nakaluta honhu ha kufugamila.
1SA 10:14 Lelo mhaza mdodo wa Sauli, nakamuuza Sauli na chitumagwa wa heye, “Ndaze, namwali kohi?” Naye nakedichila, “Natwali tujipala ajo midogowi. Ila vyotuwene hajoneche, natuluta kwa Samweli.”
1SA 10:15 Mhaza mdodo wa Sauli nakalonga, “Ndonjele Samweli nakakulonjela choni?”
1SA 10:16 Sauli nakedichila, “Nakatulonjela hazelu kota ajo midogowi najoneka.” Ila nahamlonjele mhaza wa heye mdodo chila chinhu chiwele Samweli choyamlonje kuwala undewa.
1SA 10:17 Samweli nakawachema wanhu wa Isilaeli leka walute hali Mkulu Nguluwi ako Misipa,
1SA 10:18 nakawalonjela. “Mkulu Nguluwi wa Isilaeli kangulonga hino, ‘Nandiwalavya Isilaeli kulawa Misili, nani nandiwalohola kulawa kuli mong'ho wa Misili na isi zeng'ha zila ziwagazile.’
1SA 10:19 Ila lelo namumlema Nguluwi wa hemwe, yawele kanguwalohola kulawa kuli kubagama kwa hemwe kweng'ha na magazo ga hemwe geng'ha. Namlonga, ‘Tuwichile mndewa hali hetwe.’ Lelo miwiche mwemwe baho hali Mkulu Nguluwi kwa nhanzi zeng'ha na ng'holo za hemwe leka yahagule mndewa hali hemwe.”
1SA 10:20 Samweli nakawalonjela Waisilaeli wekungajize kwa kiwhana na nhanzi na ng'holo za hewo. Hamba nhanzi ya Benjamini naihaguligwa kwa kutowa simbi.
1SA 10:21 Hamba nakaiwika habehi nhanzi ya Benjamini, lukolo kwa lukolo, lukolo lwa Matili naluhaguligwa kwa kutowa simbi. Kuli kuduma Sauli, mwana wa Kishi, nakahaguligwa kwa kutowa simbi. Ila vyowampalile nayali hambe yoneche.
1SA 10:22 Nawalutilila kumuuza Mkulu Nguluwi, “Ndaze, hana munhu yunji kahi yalinguya?” Mkulu Nguluwi nakalonga, “Lole, nakevisa hagati ha mhomolo.”
1SA 10:23 Nawabilima kumhola Sauli na kumhilika kwa wanhu, loyemile hagati ha wanhu, nayali ng'wemang'wema hali wanhu weng'ha.
1SA 10:24 Samweli nakawalonjela wanhu weng'ha, “Ndaze, mwangumona munhu yawele Mkulu Nguluwi nakamhagula? Ka haduhuli munhu kota ayu hali wanhu weng'ha.” Aho ndo wanhu weng'ha nawatowa iyowe, nawalonga, “Mndewa yawe na kikala kwinji.”
1SA 10:25 Samweli nakawalonjela wala wanhu hachi na mijito ja mndewa. Nakagandika mli chitabu na kachiwika hali Mkulu Nguluwi. Hamba Samweli nakawakundiza wanhu, chila munhu yalute kaye kwa heye.
1SA 10:26 Sauli kahi nakaluta kaye kwa heye ako Gibeya, nayali hamwe na wanhu wazidahe wawele Nguluwi nakazikangaza nhumbula za hewo kuluta na heye.
1SA 10:27 Ila wanhu wanji wajuvi nawalonga, “Munhu ayo koweza kutulohola?” Nawambeza, hambe wamigalile ndolendole. Ila Sauli nayali na kikala goya.
1SA 11:1 Mndewa Nahashi, Mwamoni, nakakwina na wamizi kuuzunguluta muji wa Yabeshi-gileadi. Wanhu weng'ha wa muji awo nawamlonjela Nahashi, “Udite ilagano na hetwe, towa hali ulongozi wa hegwe.”
1SA 11:2 Ila Nahashi Mwamoni, nakedichila, “Ndodita ilagano na hemwe wone mokunda heni kulavya iziho lya kudilo lya chila yumwe wa hemwe, leka ndiwabase soni wanhu weng'ha wa Isilaeli.”
1SA 11:3 Vilongozi wa muji awo nawalonga, “Tuleche kwa mazuwa saba leka tuwalajize wasenga walute kuli isi yeng'ha ya Isilaeli, wone kuwe kuduhu munhu ne yumwe yalinguya kutulohola, tochiwika hali moko ga hegwe.”
1SA 11:4 Wasenga lowafichile Gibeya ya Sauli na kulonga kuwala mbuli azi kwa wanhu, wanhu weng'ha nawalila kwa lizi ng'hulu.
1SA 11:5 Mhela wuwo Sauli nayali yohiluka kulawa kumgunda, yawele kumbele kwa isenga ibuguma lya heye, Sauli nakauza, “Wanhu wana choni? Lekachoni wangulila?” Aho ndo nawamlonjela ndaze wanhu wa Yabeshi vyowalonjile.
1SA 11:6 Sauli loyahuliche ulonzi awo, Muhe wa Nguluwi naumuyila mchanya mwake kwa mong'ho, nakazudila ng'hatu.
1SA 11:7 Nakajihola misenga mili mibuguma na kujidumula vihande vihande, hamba nakavilajiza vihande avyo kukolela wasenga kuli Isilaeli yeng'ha, wowikula, “Munhu yoneche yohambe yawawinze kumbele kwa Sauli na Samweli, misenga ja heye joditigwa hihi!” Kwa kukolela mbuli ayi, Mkulu Nguluwi nakawadita wanhu wa Isilaeli wadumbe, ahyo weng'ha nawalawa hamwe.
1SA 11:8 Sauli loyawakungajize ako Beseki, wanhu wa Isilaeli nawali lachi zidatu (300,000) na wanhu wa Yuda nawali elufu makumi gadatu (30,000).
1SA 11:9 Nawawalonjela wala wasenga woyile kulawa Yabeshi, “Muwalonjele wanhu wa Yabeshi-gileadi, ‘Mitondo mhela wa isanya liwele ling'hali kuwa ling'ang'ale, mowa mloholigwe.’ ” Wanhu wa Yabeshi lowahuliche mbuli ayo, nawasangalala lukami.
1SA 11:10 Wanhu wa Yabeshi nawawalonjela Waamoni, “Mitondo tochiwika mmoko mwa hemwe, namwe motuditila choneche chomkona chinoga.”
1SA 11:11 Mitondo, Sauli nakawawika wanhu wa heye kuli vilundo vidatu, nawenjila lufuku kuli kambi ya wang'honyo, nawawatowa Waamoni. Loifichile nemisi, wang'honyo wenji nawali wakopoligwe. Wala waponile nawabilima, haduhu ne wanhu weli walechigwe hamwe.
1SA 11:12 Hamba wanhu nawamlonjela Samweli, “Wakohi wanhu weuzile, ‘Ndaze, Sauli kowa chilongozi wa hetwe?’ Uwegale hano wanhu awo, tuwakopole.”
1SA 11:13 Ila Sauli nakawalonjela, “Kuduhu munhu ne yumwe yokopoligwa lehano, kwa vila kuli zuwa ali Mkulu Nguluwi nakailohola Isilaeli.”
1SA 11:14 Aho ndo Samweli nakawalonjela wanhu, “Muye, tulute Giligali, ako toutawiza undewa wa heye.”
1SA 11:15 Ahyo wanhu weng'ha nawaluta Giligali na kumtawiza Sauli kota ndo mndewa hali Mkulu Nguluwi. Ako nawalavya nhambiko ya kikala goya hali Mkulu Nguluwi. Sauli hamwe na Waisilaeli weng'ha nawasangalala ng'hatu.
1SA 12:1 Samweli nakawalonjela wanhu weng'ha wa Isilaeli, “Nyhulika chila chinhu chomndonjele, nani ndiwawichila mndewa hali hemwe.
1SA 12:2 Lelo muna mndewa kota chilongozi wa hemwe. Ila heni nda sekulu na ndina mbuliza. Wana wa heni wa aha hamwe na hemwe. Nandali chilongozi wa hemwe kulawa uwana wa heni mbaka zuwa lya lehano.
1SA 12:3 Heni ndangwima hano. Hana munhu yoneche koweza kundonjeleza hali Mkulu Nguluwi na yabakalizwe mafuta wa heye? Ndihola isenga lya munhu ama idogowi lya munhu? Nandonga udesi kwa munhu? Whaani ndimditile vibi? Ndibochela chinhu kwa uviso kwa whaani leka kwajiliza hachi? Kota nandita chinhu chimwe kuli vinhu avi, ndohilusa vinhu vyonyholile.”
1SA 12:4 Hewo nawalonga, “Hebu, hambe ulonje udesi ne kumditila vibi munhu yoneche ne kubochela chinhu kwa uviso kwa munhu yoneche yula.”
1SA 12:5 Samweli nakawalonjela, “Mkulu Nguluwi na mndewa yabakalizwe mafuta ndo walolezi lehano, hambe mone ne chinhu kuli moko ga heni.” Hewo nawalonga, “Mkulu Nguluwi ndo mlolezi.”
1SA 12:6 Hamba Samweli nakawalonjela wanhu, “Mkulu Nguluwi ndo yawahagule Musa na Aluni, yuye ndo yawalohole wasekulu wa hemwe kulawa isi ya Misili.
1SA 12:7 Lelo mwime baho homuwele, ndiwalonjele hali Mkulu Nguluwi, kwa kulonga madito geng'ha gatanganiche ga Mkulu Nguluwi, yawaditile hemwe na wasekulu wa hemwe.
1SA 12:8 Yakobo loyenjile Misili na wasekulu wa hemwe lowalandile kutanzigwa na Mkulu Nguluwi, Nguluwi nakawegala Musa na Aluni, nawo nawawalohola wasekulu wa hemwe kulawa Misili, nawawawika honhu aha.
1SA 12:9 Ila nawamsemwa Mkulu Nguluwi, Nguluwi wa hewo, lelo nakawawika kuli moko ga Sisela, yawele ndo chilongozi wa chilundo cha wamizi cha Hasoli na kuli moko ga Wafilisti na kuli moko ga mndewa wa Moabu, nawetowa na hewo.
1SA 12:10 Nawalanda utanzi kwa Mkulu Nguluwi nawalonga, ‘Natudita gehile kwa vila natumleka Mkulu Nguluwi, natuwa vitumagwa wa Mabaali na Maashitaloti, lelo tulohole kuli moko ga wang'honyo wa hetwe, natwe towa vitumagwa wa hegwe.’
1SA 12:11 Lelo Mkulu Nguluwi nakawalajiza Yelubaali na Balaka na Yefuta na Samweli, nakawalohola hemwe kuli moko ga wang'honyo wa hemwe honhu heng'ha, leka hemwe muwe hali kikala goya.
1SA 12:12 “Lomumuwene Nahashi, mndewa wa Waamoni nakoya kitowa na hemwe, namndonjela heni, ‘Hebu, twangugana mndewa yatulongoze,’ hanga Mkulu Nguluwi, Nguluwi wa hemwe, nayali mndewa wa hemwe.
1SA 12:13 Lelo ayu ndo mndewa yomumlandile na kumhagula. Mkulu Nguluwi nakamuwika mndewa hali hemwe.
1SA 12:14 Lomumdumba Mkulu Nguluwi na kumkolela mijito na kumhulichiza heye na kuleka kubelenhuka mizilo ja heye, wone hemwe hamwe na mndewa yalinguwalongoza hemwe, momuwinza Mkulu Nguluwi, Nguluwi wa hemwe, mbuli zowa goya kwa hemwe.
1SA 12:15 Wone hamlingumhulichiza Mkulu Nguluwi na lombelenhuka mizilo ja heye, Mkulu Nguluwi kowagaza hemwe, kota vyoyawagazile wasekulu wa hemwe.
1SA 12:16 Lelo mwime na mone mbuli ayi ng'hulu iwele Mkulu Nguluwi koidita hali hemwe.
1SA 12:17 Ndaze, sambi hauwele mhela wa kubeta ngano, mhela ulihela nhonya? Ndomlanda Mkulu Nguluwi leka yegale limlungu na nhonya. Namwe movizela ndaze wihe awu womuuditile hali Mkulu Nguluwi lomuwele mlanda kuwa na mndewa.”
1SA 12:18 Hamba Samweli nakamlanda Mkulu Nguluwi, Mkulu Nguluwi nakalajiza limlungu na nhonya zuwa lilila. Ahyo wanhu weng'ha nawawadumba ng'hatu Mkulu Nguluwi na Samweli.
1SA 12:19 Wanhu weng'ha nawamlonjela Samweli, “Utulandile kwa Mkulu Nguluwi, Nguluwi wa hegwe, leka vitumagwa wa hegwe tuleche kubagama, kwa vila natonjeza wihe hali gehile ga hetwe ganji kwa kulanda mndewa.”
1SA 12:20 Samweli nakawalonjela, “Mleche kudumba hanga namdita wihe awu weng'ha, mleche kumleka Mkulu Nguluwi, ila mumkolele mijito Mkulu Nguluwi kwa nhumbula za hemwe zeng'ha.
1SA 12:21 Mleche kujifugamila jimalukolo johambe jitanze chinhu. Hajiweza kuwaditila linojile ne kuwalohola kwa vila jahela utanzi.
1SA 12:22 Kwa chiwalo cha kuleka kubasigwa soni itagwa lya heye, Mkulu Nguluwi howalema wanhu wa heye, kwa vila naimnojeza kuwadita kuwa wa heye yuye.
1SA 12:23 Wone ndeche kuwalandila, ndowa nditile gehile hali Mkulu Nguluwi. Ndowalangusa nzila iwele inojile na igoloche.
1SA 12:24 Ila mumdumbe Mkulu Nguluwi na kumkolela mijito kwa kukundigwa na kwa nhumbula yeng'ha. Mijese mbuli ng'hulu zomditile kwa chiwalo cha hemwe.
1SA 12:25 Ila lomlutilila kudita wihe, hemwe na mndewa wa hemwe mowinjigwa.”
1SA 13:1 Sauli nakekala kwa mwaka umwe hamba nakawa mndewa. Loyalongoze isi ya Isilaeli kwa miyaka mili,
1SA 13:2 Sauli nakahagula wanhu walume elufu zidatu kulawa Isilaeli. Wanhu elufu mbili nawali hamwe na heye ako Mikimashi na kuli isi ya vidunda vya Beteli na wanhu elufu imwe nawali hamwe na Yonatani ako Gibeya ya isi ya nhanzi ya Benjamini. Wanhu wanji waponile, nakawalajiza wahiluche chila munhu haluga hake.
1SA 13:3 Yonatani nakaitowa ngome ya Wafilisti wa ako Geba na Wafilisti nawahulika mbuli ayo. Hamba Sauli nakalajiza mhalamhanda ipembigwe kuli isi yeng'ha na kulonga, “Waisilaeli wahuliche!”
1SA 13:4 Ahyo Waisilaeli weng'ha nawahulika kota Sauli nakaitowa kambi ya Wafilisti na kahi Waisilaeli nawawa chinhu cha kuzudiza kwa Wafilisti. Lelo wanhu nawachemigwa kilumba na Sauli ako Giligali.
1SA 13:5 Wafilisti naweting'hana kwa chiwalo cha kitowa na Waisilaeli, wawele na mituka ja ngondo elufu makumi gadatu na wakwina falasi elufu sita na wamizi wa kujenda kwa magulu wenji kota sangalaza za mhwani. Nawakwina kuchanya na kuwika kambi ako Mikimashi, ubanzi wa kolilawilaga isanya mwa Beti-aveni.
1SA 13:6 Waisilaeli lowawene kota wa kuli magazo ng'hatu, nawevisa kuli mhalika na kuli misimo na kuli mitalawe na kuli visosolo na kuli mideho.
1SA 13:7 Waisilaeli nawaloka lwanda lwa Yolodani mbaka kuli isi za Gadi na Gileadi. Sauli nayali ako Giligali, vilundo vyeng'ha vya wanhu viwele hamwe na heye navyali vikakama kwa lunhwinhwi.
1SA 13:8 Sauli nakabeteza kwa mazuwa saba, mhela uwichigwe na Samweli, ila Samweli halutile Giligali na awo wanhu nawaluka kusambaluka.
1SA 13:9 Sauli nakalonga, “Mngalile hano nhambiko ya kulakazwa na nhambiko za kikala goya.” Sauli nakalavya nhambiko ya kulakazwa.
1SA 13:10 Loyasindile kulavya ayo nhambiko, Samweli nakalawila na Sauli nakaluta kumlamsa.
1SA 13:11 Samweli nakauza, “Nakudita choni?” Sauli nakedichila, “Lombonile kota wanhu wangusambaluka nagwe huyile kwa mhela uwichigwe, kahi kota Wafilisti nawating'hana hamwe ako Mikimashi,
1SA 13:12 nandijesa kota Wafilisti wodulika kunhowa ako Giligali. Nani simlandile Mkulu Nguluwi yang'hundize. Ahyo naindapa kulavya nhambiko ya kulakazwa.”
1SA 13:13 Samweli nakamlonjela Sauli, “Nakudita upoka. Nakulema kuwinza malajizo goyakupele Mkulu Nguluwi, Nguluwi wa hemwe. Wone wahawinzile, Nguluwi yahauwichile undewa wa hegwe kwa Waisilaeli kwa mhela weng'ha.
1SA 13:14 Ila undewa wa hegwe hauchikala mhela winji, Mkulu Nguluwi nakapala munhu yawele na nhumbula ya kumuwinza heye, nakamhagula yawe chilongozi wa wanhu wa heye, kwa vila hegwe nakulema kuwinza malajizo ga Mkulu Nguluwi.”
1SA 13:15 Hamba Samweli nakaluta Giligali, nakaluta mbaka Gibeya ya isi ya nhanzi ya Benjamini. Sauli nakawawaza wanhu wawele hamwe na heye, nawali miya sita.
1SA 13:16 Sauli na mwanage Yonatani na wanhu wawele hamwe na hewo nawali wochikala ako Geba ya isi ya nhanzi ya Benjamini, mhela Wafilisti vyowawele wawichile kambi ako Mikimashi.
1SA 13:17 Vilundo vya wanhu walinguvaba navyuya kulawa kuli kambi ya Wafilisti, kuli vilundo vidatu. Chilundo chimwe nachikola nzila ilinguluta Ofila habehi na Shuali
1SA 13:18 na chilundo cha keli nachiluta nzila ya Beti-holoni na chilundo cha kuduma nachikola nzila ya kuli isi ya mbaka jilinguluta kuli ibindi lya Seboimu lilingilola na kuchiwala.
1SA 13:19 Nahakuwele na muwanzi wa kugongomanya vinhu vya chuma, yawele yoweza koneka kuli isi yeng'ha ya Isilaeli, kwa vila Wafilisti nawalonga, “Waisilaeli waleche kugongomanya mipanga ama migoha.”
1SA 13:20 Ahyo Waisilaeli weng'ha nawalutaga kwa Wafilisti leka kunola mihuka ja kulimila na misenga na mihuka ja kulimila kwa moko na miwago ja hewo na sengo za hewo.
1SA 13:21 Bei nayali ng'hulu kwa kunolela mihuka ja kulimila na misenga na mihuka ja kulimila kwa moko na sengo na uma na miwago.
1SA 13:22 Ahyo zuwa lya ngondo, haduhu mwamizi yoneche yawele kuli kambi na Sauli na Yonatani, yawele nayali na ipanga ne igoha mmoko mwa heye, ila Sauli na mwanage Yonatani hela ndo nawali navyo.
1SA 13:23 Lelo chilundo chimwe cha Wafilisti nachali chilawile kuli nzila ilingukola kuli vidunda kuluta Mikimashi.
1SA 14:1 Zuwa limwe, Yonatani, mwana wa Sauli, nakamlonjela yula msongolo yapapile vinhu vya heye vya kitowa ngondo, “Tuloche tulute kumwambu kuli chilundo cha wamizi wa Wafilisti.” Ila nahamlonjele mhaza wa heye.
1SA 14:2 Sauli nayali yochikala Gibeya hasi ha igodi limwe lichemigwe likomamanga liwele ako Migiloni. Nayali hamwe na wanhu miya sita,
1SA 14:3 hali hewo nayali baho Ahiya, yawele nayali yavalile chizibao. Ahiya nayali mwana wa Ahitubu, mng'holoze Ikabodi. Ahitubu nayali mwana wa Finehasi, mwana wa Eli, mtambika wa Mkulu Nguluwi ako Shilo. Haduhu yoneche yawele nakavizela kota Yonatani nakoka.
1SA 14:4 Chila ubanzi wa nzila iwele Yonatani nayali yaganile kuloka leka yafiche kwa Wafilisti ako Mikimashi, nakwali na nyenje ng'hulu. Nyenje imwe nayali ichemigwa Bosesi na nyenje iyage nayali ichemigwa Sene.
1SA 14:5 Nyenje imwe nayali ubanzi wa kasikazini kulutila Mikimashi na ayo ya keli nayali kusini kulutila Geba.
1SA 14:6 Yonatani nakamlonjela yula msongolo yapapile vinhu vya heye, “Uye, tuloche honhu ha wala Wafilisti wohambe wenjile ikumbi. Hanji Mkulu Nguluwi kodita chinhu kwa chiwalo cha hetwe. Haduhu ne chinhu chomlemeza Mkulu Nguluwi yaleche kulohola, kota kwa wanhu wenji ama wado hela.”
1SA 14:7 Yula msongolo nakalonga, “Udite geng'ha gawele mnhumbula ya hegwe. Ulute kumwando, choneche chochilawila, nda hamwe na hegwe.”
1SA 14:8 Yonatani nakalonga, “Lelo uye, toloka kuwalutila wanhu awo leka toneche.
1SA 14:9 Wone wotulonjela, ‘Mbeteze aho mbaka tuye kwa hemwe,’ tochikala aho hotuwele hatuluta kwa hewo.
1SA 14:10 Ila wone wolonga, ‘Muye kwa hetwe,’ toluta, kwa chiwalo acho yowa ulajilo kwa hetwe kota Mkulu Nguluwi nakawawika mmoko mwa hetwe.”
1SA 14:11 Lelo weng'ha weli nawelajila hali Wafilisti. Wafilisti nawalonga, “Lole. Waisilaeli wangulawa kuli misimo kowevisile.”
1SA 14:12 Nawamlonjela Yonatani na yula yapapile vinhu vya heye, “Goya, hemwe muye aku kuchanya kotuwele, natwe towalangusa ndaze vyoilinguganigwa kitowa.” Lelo Yonatani nakamlonjela yula mpapa vinhu vya heye, “Uye kumbele kwa heni, kwa vila Mkulu Nguluwi nakawawika mmoko mwa Waisilaeli.”
1SA 14:13 Yonatani nakakwina kwa magulu na moko ga heye, mpapa vinhu vya heye yawele kumbele kwa heye. Yonatani nakawatowa Wafilisti na kuwagwisa, yula mpapa vinhu vya kitowa ngondo nakamuwinza kumbele yowakopola wanhu.
1SA 14:14 Kuli kitowa ako kwa mwaluko, Yonatani na yula mpapa vinhu nawawakopola wanhu kota makumi meli hali honhu kota nusu eka hino.
1SA 14:15 Hamba wamizi weng'ha nawadeula, wala wawele kuli kambi na kuli migunda na wala wawele kuli vilundo vya walingwamila na walingitowa nawakakama, mbaka isi yeng'ha kahi naikakama. Nayali lunhwinhwi lwa kuya baho du lugaligwe na Nguluwi.
1SA 14:16 Wapugajizi wa Sauli ako Gibeya ya isi ya nhanzi ya Benjamini nawawona wamizi wosambaluka banzi zeng'ha.
1SA 14:17 Aho ndo Sauli nakawalonjela wanhu wawele hamwe na heye, “Muwakagule wamizi leka mone whaani yochile hali hetwe.” Vyowakagule, nawona kota Yonatani na mpapa vinhu ndo wawele haduhu.
1SA 14:18 Sauli nakamlonjela Ahiya, “Ligale hano isanduku lya ilagano lya Nguluwi.” Mhela awo isanduku alyo nalyali kwa Waisilaeli.
1SA 14:19 Sauli loyawele yolonga na mtambika, iyowe kuli kambi za Wafilisti nalyonjezeka ng'hatu. Ahyo Sauli nakamlonjela mtambika, “Uleche kuligala alyo isanduku, tulutilile na majendo.”
1SA 14:20 Hamba Sauli na wanhu wa heye weng'ha nawating'hana kuluta kuli ngondo. Nawawafika Wafilisti wawele wafichigwe na lukwale, wochitowa na mipanga chila yumwe na myage.
1SA 14:21 Wala Waisilaeli wawele na Wafilisti na wawele nawali walutile hamwe na hewo mbaka kuli kambi za hewo, nawaluta na kilumba na Waisilaeli wawele hamwe na Sauli na Yonatani.
1SA 14:22 Waisilaeli weng'ha wawele wevisile kuli isi ya vidunda vya Efulaimu lowahuliche kota Wafilisti nawabilima, nawelumba kuli ngondo na kuwawinza ng'hatu.
1SA 14:23 Lelo Mkulu Nguluwi nakawalohola wanhu wa Isilaeli zuwa lila na yila ngondo nayenela Beti-aveni na kulutilila.
1SA 14:24 Wanhu wa Isilaeli nawagaya lukami mhela wula, kwa vila Sauli nakawadita wanhu welahe, nakalonga, “Mkulu Nguluwi yampanjile munhu yalingulya chilyo kung'hali kufika matinazo, londiwele nding'hali kuhilusa chibida kwa wang'honyo wa heni.” Lelo haduhu ne munhu hali hewo yajezile chilyo.
1SA 14:25 Wamizi weng'ha nawenjila kisolo, ako nakwali na hanombwa hanyi.
1SA 14:26 Lowenjile kisolo, nawona hanombwa nayali ilagala ila kuduhu ne munhu yawichile moko wa heye kumlomo, kwa vila wanhu awo nawali wodumba chilaho.
1SA 14:27 Ila Yonatani nayali hahuliche mhaza wa heye loyawalajize wanhu kwa kilaha. Nakenula ng'hweku iwele mmoko mwa heye, nakaiwika kuli ilala lya hanombwa, hamba nakawika moko wa heye kumlomo, lelo nakaluka kuwa na mong'ho.
1SA 14:28 Hamba yumwe wa wamizi wa heye, nakalonga, “Mhaza wa hegwe nakawadita wamizi welahe kwa chilaho ching'ang'ale, nakalonga, ‘Yapanjilwe munhu yoneche yalingulya chilyo lehano.’ Ndo mina wanhu wangutweguka.”
1SA 14:29 Yonatani nakalonga, “Mhaza wa heni nakawagaza wanhu wa hetwe. Lole heni vyombele na mong'ho unyale vyonjezile hanombwa yino nyindo.
1SA 14:30 Ndaze, nahaiwele goya ng'hatu wone wanhu wolya na kiguta lehano kuli vinhu avi vyowapatile kuli ngondo vyowaholile wang'honyo wa hewo? Ndaze kukopola kwa Wafilisti kwahawele kukulu ng'hatu?”
1SA 14:31 Zuwa lila Waisilaeli nawawakopola Wafilisti kulawa Mikimashi mbaka Aiyaloni, nawali watochile lukami.
1SA 14:32 Wanhu nawahiza himahima vila vinhu, wohola ming'holo na misenga na milogota na kujidumula singo baho na kulya hamwe na danda.
1SA 14:33 Hamba munhu yumwe nakamlonjela Sauli, “Ulole, wanhu wangudita gehile hali Mkulu Nguluwi kwa kulya miwunde hamwe na danda.” Sauli nakalonga, “Hemwe nambena ilagano, mfidusile hano iganga likulu.”
1SA 14:34 Sauli nakalonga, “Mlute hali wanhu mkawalonjele, ‘Chila yumwe wa hemwe yegale isenga lya heye na ing'holo lya heye, mjidumule singo hano na kulya, mleche kudita gehile kwa Mkulu Nguluwi kwa kulya hamwe na danda.’ ” Wanhu awo nawegala migongolo ja hewo na kujidumula singo nechilo ayo.
1SA 14:35 Aho ndo Sauli nakamzenjela Mkulu Nguluwi honhu ha kulavila nhambiko, ndo nawali mwaluko wa heye kuzenga honhu ha kulavila nhambiko.
1SA 14:36 Sauli nakalonga, “Tulute kuwawinza Wafilisti nechilo na kuhola vinhu vya hewo mbaka kumwebwenzuka, ne kumleka ne yumwe wa hewo yawele mkomu.” Nawedichila, “Udite choneche chila choulingona kota chinoga ng'hatu kwa hegwe.” Ila mtambika nakalonga, “Tumlonjele Nguluwi.”
1SA 14:37 Sauli nakamuuza Nguluwi, nakalonga, “Ndaze, ndute kuwawinza Wafilisti? Ndaze, kowawika mmoko mwa Waisilaeli?” Ila Nguluwi hamwidichile chinhu zuwa lila.
1SA 14:38 Sauli nakalonga, “Muye hano, hemwe mweng'ha muwele vilongozi wa wamizi, tupale gehile gachi gaditigwe lehano.
1SA 14:39 Kwa kukomya kota Mkulu Nguluwi yalinguilohola Isilaeli vyoyalingikala, wone iwe kwa mwana wa heni Yonatani, yolapigwa yabagame.” Ila haduhu ne munhu yoneche yalonjile chinhu.
1SA 14:40 Hamba Sauli nakawalonjela Waisilaeli weng'ha, “Hemwe mwime ako, heni na mwana wa heni Yonatani towa twimile hano.” Wanhu nawedichila, “Udite choulingona chinoga ng'hatu kwa hegwe.”
1SA 14:41 Hamba Sauli nakamlanda Mkulu Nguluwi, Nguluwi wa Isilaeli, yolonga, “Lekachoni hambe hunyhidichile chitumagwa wa hegwe lehano? Wone nongwa iwe ya heni ama ya mwana wa heni Yonatani, hegwe Mkulu Nguluwi, Nguluwi wa Isilaeli mlongoze mtambika yatoze Ulimu, ila wone nongwa iwe ya Isilaeli, mtambika yatoze Sumimu.” Yonatani na Sauli nawafichigwa na nongwa, ila wanhu nawafichigwa walihela nongwa.
1SA 14:42 Sauli nakalonga, “Utoze Ulimu na Sumimu kwa chiwalo cha heni na mwana wa heni Yonatani.” Mtambika nakadita ahyo na nongwa naimfika Yonatani.
1SA 14:43 Lelo Sauli nakamlonjela Yonatani, “Ndonjele choni chouditile.” Yonatani nakamlonjela, “Heni njeza hanombwa nyindo hela kwa ng'hweku ya heni, kwa chiwalo acho, ndanguganigwa kubagama.”
1SA 14:44 Sauli nakalonga, “Nguluwi yangaze ng'hatu wone hegwe Yonatani hubagama.”
1SA 14:45 Ila wanhu nawamlonjela Sauli, “Ndaze, Yonatani kobagama, yula yawele nakegala kusumya kukulu ako Isilaeli? Hebu, kota Mkulu Nguluwi vyoyalingikala, haduhu mnvili ne imwe ya mutwi wa heye iwele yolagala, kwa vila nakadita mbuli ayi lehano kwa kutanzigwa na Nguluwi.” Lelo wanhu nawamgombola Yonatani yaleche kukopoligwa.
1SA 14:46 Hamba Sauli nakaleka kuwawinga Wafilisti, nawo Wafilisti nawebagula na kuhiluka kuli isi ya hewo.
1SA 14:47 Sauli loyawele mndewa wa Waisilaeli, naketowa na wang'honyo wa hewo weng'ha chila honhu. Naketowa na Wamoabu na Waamoni na Waedomu na wandewa wa Soba na Wafilisti. Chila honhu nakawasumya.
1SA 14:48 Naketowa kwa kikangaza mbaka nakawasumya Waamaleki, yoilohola Isilaeli kulawa kuli moko ga wala wawele waholile vinhu vya hewo.
1SA 14:49 Wana walume wa Sauli nawali Yonatani na Ishivi na Malikishuwa. Matagwa ga wahinza wa heye nagali, wa mwaluko nayali yochemigwa Melabu na mdodowe nayali yochemigwa Mikali.
1SA 14:50 Mchewake Sauli, nayali yochemigwa Ahinoamu, mwana wa Ahimaasi. Itagwa lya mkulu wa vilundo vya wamizi nalyali Abuneli, mwana wa Neli, yawele ndo mhaza mdodo wa Sauli.
1SA 14:51 Mhaza wa Sauli, yawele ndo Kishi na Neli mhaza wa Abuneli, nawali wana wa Abieli.
1SA 14:52 Mazuwa geng'ha ga ulongozi wa Sauli nagali ga ngondo ng'hulu ng'hatu kwa Wafilisti, mhela woneche Sauli loyamuwene munhu yawele na mong'ho na yazidahe, nakamhola leka yawe hamwe na wamizi wa heye.
1SA 15:1 Samweli nakamlonjela Sauli, “Mkulu Nguluwi nakandajiza ndikubakalize mafuta uwe mndewa wa wanhu wa heye ako Isilaeli, lelo uhulichize usenga wa Mkulu Nguluwi.
1SA 15:2 Mkulu Nguluwi Yawele na Mong'ho kangulonga hino, ‘Ndowagaza Waamaleki kwa chila chowawaditile Waisilaeli, vyowalawile Misili.
1SA 15:3 Lelo ulute kuwatowa Waamaleki na kuwadumya ng'hatu hamwe na chila chinhu chiwele cha hewo. Uleche kuwonela isungu, uwakopole walume na wadala na wana na wana walingong'ha na misenga na ming'holo na ngamiya na midogowi.’ ”
1SA 15:4 Aho ndo Sauli nakawachema wanhu, nakawawaza ako Telemu, wamizi wa kujenda kwa magulu lachi mbili (200,000) hamwe na wanhu elufu kumi kulawa Yuda.
1SA 15:5 Sauli nakaluta kuli muji wa Amaleki na kuwabeteza kuli ibindi.
1SA 15:6 Hamba Sauli nakawalonjela Wakeni, “Muche, muwaleche Waamaleki leka ndeche kuwadumya hamwe na hewo, kwa vila wasekulu wa hemwe nawawaditila igano lya kwimilila wasekulu wa hetwe Waisilaeli mhela lowawele wolawa Misili.” Lelo Wakeni nawoka, nawawaleka Waamaleki.
1SA 15:7 Aho Sauli nakawatowa Waamaleki kulawa Havila mbaka Shuli, kolilawilaga isanya mwa isi ya Misili.
1SA 15:8 Nakamhola Agagi, mndewa wa Waamaleki yawele yang'hali mkomu, wanhu wa heye weng'ha nakawakopola kwa ipanga.
1SA 15:9 Ila Sauli na wamizi wa heye nawaleka kumkopola Agagi na ming'holo jinojile na misenga na milogota jinenehe na ming'holo myana na chila chinhu chinojile. Vinhu avi hawakundile hebu kuvisumya, ila chila chinhu chibezigwe na chiwele ng'hochele nawachidumya ng'hatu.
1SA 15:10 Hamba ulonzi wa Mkulu Nguluwi naumuyila Samweli, ulonga,
1SA 15:11 “Ndina masinzo kwa vila ndimdita Sauli yawe mndewa, nakaleka kumbinza na kweneza malajizo ga heni.” Samweli nakadeula na kumlilila Mkulu Nguluwi nechilo yila yeng'ha.
1SA 15:12 Samweli nakenuka lufuku yakating'hane na Sauli, ila nakalonjelwa, “Sauli nakaluta kuli muji wa Kalimeli. Ako nakazenga chinhu chilingiwhana na ilingo lido kwa lutogo lwa heye yuye, hamba nakaluta Giligali.”
1SA 15:13 Samweli loyamfichile Sauli, Sauli nakamlonjela, “Mkulu Nguluwi yakutambichize. Nyeneza gala goyandajize Mkulu Nguluwi.”
1SA 15:14 Ila Samweli nakalonga, “Aku kulila kwa ing'holo kuna mana yachi? Aku kulila kwa isenga ndo choni?”
1SA 15:15 Sauli nakedichila, “Wamizi nawajigala kulawa kwa Waamaleki, nawajileka jila ming'holo na misenga jinojile leka wajilavye nhambiko kwa Mkulu Nguluwi, Nguluwi wa hegwe, ila jinji jeng'ha natujikopola.”
1SA 15:16 Samweli nakamlonjela Sauli, “Leka! Ndokulonjela ulonzi woyandonjele Mkulu Nguluwi lehano nechilo ayi.” Sauli nakedichila, “Ndonjele.”
1SA 15:17 Samweli nakalonga, “Hanga katali nawali wochijesa kota ung'hali mdodo, ndaze hauwele chilongozi wa nhanzi kumi na mbili za Isilaeli? Mkulu Nguluwi nakakubakaliza mafuta leka uwe mndewa wa Isilaeli.
1SA 15:18 Mkulu Nguluwi loyakulajize nakakulonjela, ‘Ulute kuwadumya wala wanhu wa Amaleki, wehile, witowe na hewo mbaka houwadumya weng'ha.’
1SA 15:19 Lekachoni humhulichize Mkulu Nguluwi? Lekachoni nakuhola vinhu na kudita wihe hali Mkulu Nguluwi?”
1SA 15:20 Sauli nakalonga, “Ndangukomya heni nanyhulichiza lizi lya Mkulu Nguluwi, nani ndimgala Agagi, mndewa wa Waamaleki, kahi ndiwakopola Waamaleki wanji weng'ha.
1SA 15:21 Wamizi hawajidumule singo ming'holo na misenga, mina ndo vinhu vyeng'ha vinojile ng'hatu, viwele hali viwichigwe chiuyeng'ha kudumigwa kwa Nguluwi. Ila nawajigala hano leka jilavigwe nhambiko kwa Mkulu Nguluwi, Nguluwi wa hegwe aha Giligali.”
1SA 15:22 Ila Samweli nakedichila. “Ndaze, Mkulu Nguluwi kangugana lukami nhambiko za kulakazwa na nhambiko kota vila kuhulichiza lizi lya Mkulu Nguluwi? Kuhulichiza ndo kunojile ng'hatu kusinda nhambiko, kukunda ndo kunoga kusinda mafuta ga ing'holo ilume.
1SA 15:23 Kwa vila kubelenhuka ndo kota gehile ga ulaguzi, na ujuvi ndo kota wihe wa kujifugamila jimalukolo. Kwa vila nakuulema ulonzi wa Mkulu Nguluwi, naye nakakulema hegwe kulutilila kuwa mndewa.”
1SA 15:24 Aho ndo Sauli nakamlonjela Samweli, “Nandita gehile. Mina mbena mzilo wa Mkulu Nguluwi na malajizo ga hegwe. Nandiwadumba wamizi, ahyo nandita kota vyowaganile hewo.
1SA 15:25 Lelo ndangukudedeza, ulechele gehile ga heni. Uhiluche hamwe na heni leka ndimfugamile Mkulu Nguluwi.”
1SA 15:26 Ila Samweli nakamwidichila, “Hambe nyhiluche hamwe na hegwe. Nakuulema ulonzi wa Mkulu Nguluwi, nagwe Mkulu Nguluwi nakakulema hegwe kuwa mndewa wa wanhu wa Isilaeli.”
1SA 15:27 Samweli loyahinduche leka yoche, Sauli nakebata lupembo lwa ivalo lya heye, alyo ivalo nalidejeka.
1SA 15:28 Samweli nakamlonjela Sauli, “Lehano Mkulu Nguluwi nakaudega undewa wa Isilaeli kulawa kwa hegwe, naye nakauwika kwa Muisilaeli myago yawele yanojile kusinda hegwe.
1SA 15:29 Heye yawele Nguluwi wa Isilaeli wa mazuwa gose, hambe yalonje udesi ne kugalula kunuwila kwa heye, kwa vila heye hawele munhu, mbaka yagalule kunuwila kwa heye.”
1SA 15:30 Sauli nakedichila, “Nandita gehile. Ila dedede umhe heni lutogo hali wasekulu wa wanhu wa heni na hali Waisilaeli. Tuhiluche hamwe leka ndikamfugamile Mkulu Nguluwi, Nguluwi wa hegwe.”
1SA 15:31 Ahyo Samweli nakahiluka hamwe na Sauli, naye Sauli nakamfugamila Mkulu Nguluwi.
1SA 15:32 Aho ndo Samweli nakalonga, “Ngalile Agagi mndewa wa Waamaleki.” Agagi nakaluta kwa Samweli kuno yawele na nhumbula ikangale, kwa vila nakejesa, “Ndikomya usungu wa kubagama naukola.”
1SA 15:33 Ila Samweli nakamwidichila. “Kota ipanga lya hegwe vyoliwaditile wadala wafililwe na wana wa hewo, ndo mayako hoyowa kahela mwana hali wadala.” Samweli nakamkopola Agagi hali Mkulu Nguluwi ako Giligali.
1SA 15:34 Hamba Samweli nakaluta kuli muji wa Lama, ila mndewa Sauli nakahiluka haluga ha heye ako Gibeya.
1SA 15:35 Samweli halutile kumona Sauli kahi, mbaka heye loyabagame hanga Samweli nayali na masinzo kwa chiwalo cha Sauli. Mkulu Nguluwi nayali na masinzo kwa kumdita Sauli kuwa mndewa wa Isilaeli.
1SA 16:1 Mkulu Nguluwi nakamlonjela Samweli, “Komlilila Sauli mbaka nili, kwa vila nandimlemeza kuwa mndewa wa Isilaeli? Uhole mafuta ulute kwa Yese ako kuli muji wa Betelehemu. Nandimhagula yumwe wa wanage yawe mndewa.”
1SA 16:2 Ila Samweli nakalonga, “Ndoluta ndaze ako? Sauli kohulika kuwala heni, kong'hopola.” Mkulu Nguluwi nakalonga, “Uhole ilogota idala na ulonje hino, ‘Nambuya kumlavila Mkulu Nguluwi nhambiko.’
1SA 16:3 Mcheme Yese yoye kuli nhambiko, nani ndokulonjela chinhu cha kudita. Kombakaliza mafuta kwa chiwalo cha heni, yula yondikulajila.”
1SA 16:4 Samweli nakadita kota vyoyalonjile Mkulu Nguluwi, nakaluta Betelehemu. Wasekulu wa muji nawoya kumbochela, nawali wokakama lowambochele. Nawamuuza, “Ndaze, nakuya kwa kikala goya?”
1SA 16:5 Samweli nakedichila, “Ena, kwa kikala goya, nambuya kumlavila Mkulu Nguluwi nhambiko. Miyelize mwemwe na muye hali nhambiko hamwe na heni.” Aho ndo Samweli nakamweliza Yese hamwe na wana wa heye na kawachema kuli nhambiko.
1SA 16:6 Lowafichile, Samweli nakamona Eliyabu, mwana mkulu wa Yese, Samweli nakelonjela, “Kukomya, munhu ayu ndo yahaguligwe na Mkulu Nguluwi.”
1SA 16:7 Ila Mkulu Nguluwi nakamlonjela Samweli, “Uleche kulola kumeho kwa heye na vyoyawele ng'wemang'wema, kwa vila heni nandimlema. Heni, Mkulu Nguluwi, hambe ndole vila vinhu vyoyalingulola munhu. Munhu kangulolaga kwa kunze, ila heni Mkulu Nguluwi ndangulolaga mnhumbula.”
1SA 16:8 Hamba Yese nakamchema Abinadabu, nakamkoleza kumwando kwa Samweli. Ila Samweli nakalonga, “Ayu hambe yahaguligwe na Mkulu Nguluwi.”
1SA 16:9 Yese nakamkoleza kahi Shama, Samweli nakalonga kahi, “Ayu kahi hambe yahaguligwe na Mkulu Nguluwi.”
1SA 16:10 Aho ndo Yese nakawakoleza wana wa heye saba kumwando kwa Samweli, ila Samweli nakamlonjela Yese, “Mkulu Nguluwi hambe yamhagule yoneche hali hewo.”
1SA 16:11 Ahyo nakamuuza, “Ndaze, wano ndo wana walume wa hegwe weng'ha?” Yese nakalonga, “Yang'hali yumwe mdodo hali weng'ha, ila kangudima ming'holo.” Samweli nakamlonjela Yese, “Mlonjele yoye hano, hetwe hatuchikalisa hebu mbaka hoyofika.”
1SA 16:12 Lelo nakalajiza munhu yamigale, naye nakoya. Nayali na mong'ho, yawele na kumeho kunojile na lukuli lunojile. Mkulu Nguluwi nakalonga, “Winuche na kumbakaliza mafuta, ayu ndo yuye.”
1SA 16:13 Samweli nakahola ibuli lya mafuta na kumbakaliza hali wakulugwe, kwaluchila zuwa lila na kulutilila Muhe wa Mkulu Nguluwi nawuya kwa Daudi kwa mong'ho. Hamba Samweli nakaluta Lama.
1SA 16:14 Muhe wa Mkulu Nguluwi nawali wuchile kwa Sauli na muhe yehile naulajizwa na Mkulu Nguluwi leka imtunye.
1SA 16:15 Wakola mijito wa Sauli nawamlonjela, “Lole, muhe yehile naulajizwa na Mkulu Nguluwi leka ukutunye.
1SA 16:16 Lelo mkulu wa hetwe tulajize kumpala munhu yadahile kutowa ching'hweleng'hwele, muhe yehile ulajizwe na Nguluwi houkuya kwa hegwe, munhu ayo kotowa ching'hweleng'hwele, nagwe kosindamala.”
1SA 16:17 Sauli nakawalonjela wakola mijito wa heye, “Goya, mumpale munhu ayo yalingutowa goya ching'hweleng'hwele mumgale kwa heni.”
1SA 16:18 Yumwe mwa wakola mijito wa heye nakalonga, “Ndimona mwana yumwe wa Yese, wa muji wa Betelehemu yadahile kutowa ching'hweleng'hwele. Kana mong'ho na kana ludali lwa kitowa ngondo na kangulonga goya. Mkulu Nguluwi ka hamwe na heye.”
1SA 16:19 Aho ndo Sauli nakawalajiza wasenga kwa Yese, nakalonga, “Mlajize mwana wa hegwe Daudi, yalingudima ming'holo.”
1SA 16:20 Aho Yese nakalihola idogowi lipapile mibumunda na chihako cha kuwichila divai na chinyehe, nakavihilika vinhu avyo kwa Sauli hamwe na Daudi mwanage.
1SA 16:21 Daudi nakafika kwa Sauli na kwaluka kumkolela mijito Sauli. Sauli nakamgana lukami, Daudi nakawa munhu yalingupapa vinhu vya heye vya kitowa ngondo.
1SA 16:22 Lelo Sauli nakalajiza wasenga kwa Yese, nakalonga, “Mleche Daudi yawe hamwe na heni, yakole mijito ja heni kwa vila nojezwa na heye lukami.”
1SA 16:23 Chila mhela muhe yehile ulajizwe na Nguluwi vyoukuya kwa Sauli, Daudi nayali yohola ching'hweleng'hwele na kwaluka kutowa. Aho muhe yehile naumlechela Sauli, naye Sauli nakahembulizwa na kuwa goya.
1SA 17:1 Mhela awo Wafilisti naweting'hana na wamizi wa hewo ako Soko kuli Yuda. Nawawika kambi ako Efesi-damimu, hagati ha Soko na Aseka.
1SA 17:2 Sauli na Waisilaeli naweting'hana na kuwika kambi kuli ibindi lya Ela na kuwawika goya wamizi leka kitowa ngondo na Wafilisti.
1SA 17:3 Wafilisti nawali kuli chidunda chimwe na Waisilaeli nawali kuli chidunda chiyage na ibindi nalyali hagati ha hewo.
1SA 17:4 Munhu yawezile kitowa ngondo lukami yachemigwe Goliati yalawile Gati nakelajila kulawa kuli kambi ya Wafilisti. Nayali ng'wemang'wema lukami kwa mita zidatu.
1SA 17:5 Nayali na kofia ya shaba kumutwi kwa heye na chizibao cha shaba mmhambaga, iwele na itunyo lya kilo makumi gahano na saba.
1SA 17:6 Mmagulu mwa heye nakwali na mibadu ja shaba, nayali na chimaje chikulu cha shaba kumgongo kwa heye.
1SA 17:7 Chaka cha igoha lya heye nachali chikulu na chitwi chake nachigongomanyigwa kwa chuma. Chuma acho nachali na itunyo lya kota kilo saba. Mpapa ngawo ya heye nayali yalongole kumwando kwa heye.
1SA 17:8 Goliati nakema na kuwatowela iyowe wamizi wa Isilaeli, nakawalonjela, “Lekachoni mwangugana kitowa ngondo? Heni nda Mfilisti namwe mwa vitumagwa wa Sauli. Mumhagule munhu yumwe wa kitowa na heni.
1SA 17:9 Wone yoweza kunhowa heni na kung'hopola, hetwe towa wapogozi wa hemwe, ila wone ndimtowe na kumkopola heye, hemwe mowa wapogozi wa hetwe na kukola mijito ja hetwe.”
1SA 17:10 Hamba, yula Mfilisti nakalonga, “Zuwa ali lya lehano ndanguviliga vilundo vya wamizi wa Isilaeli. Ngalileni munhu wa kitowa na heni.”
1SA 17:11 Sauli na Waisilaeli weng'ha lowahuliche ulonzi awo wa Mfilisti, nawadeula na kudumba ng'hatu.
1SA 17:12 Lelo Daudi nayali mwana wa Yese, Muefulata, kulawa Betelehemu ako Yuda. Yese nayali na wana walume nane, naye nayali sekulu wa miyaka minji mhela Sauli loyawele mndewa.
1SA 17:13 Wana wakulu wadatu wa Yese nawali walutile hamwe na Sauli kuli ngondo. Mlelwa wa mwaluko nayali Eliyabu na wa keli nayali Abinadabu na wa kadatu nayali Shama.
1SA 17:14 Daudi ndo nayali mdodo hali wana weng'ha nane. Wala wana wakulu wadatu nawamuwinza Sauli,
1SA 17:15 ila Daudi nayali yoluta kwa Sauli na kuhiluka leka yadime ming'holo ja mhaza wa heye ako Betelehemu.
1SA 17:16 Yula Mfilisti nayali yokoneka mitondo na matinazo kwa mhela wa mazuwa makumi gane, yokwima na kona wone hana yumwe hali Waisilaeli yawele yoweza kitowa na heye.
1SA 17:17 Yese nakamlonjela Daudi, mwana wa heye, “Wahilichile wakulugo walume nyhule zino zikalanjigwe kilo kumi na mibumunda jino kumi ako kuli kambi.
1SA 17:18 Mhilichile yula mkulu wa vilundo vya wamizi zino jibini kumi. Kawalole wakulugo kota wangulutilila goya na uye ungalile ulajilo wa kutawiza ago.
1SA 17:19 Hewo wa hamwe na Sauli na wanhu weng'ha wa Isilaeli kuli ibindi lya Ela, wochitowa na Wafilisti.”
1SA 17:20 Lufuku Daudi nakalilimka, nakajileka ming'holo kwa mdimi. Nakahola vila vinhu na kuluta kota vyoyalonjelwe na mhaza wa heye Yese. Loyafichile kuli kambi ya Waisilaeli, nakawafika nawali wolawa kuli kambi za hewo na kuluta kitowa ngondo na wangutowa iyowe lya ngondo.
1SA 17:21 Waisilaeli na Wafilisti nawali wowika goya misitali ja wamizi wochilola.
1SA 17:22 Daudi nakavileka vila vinhu vya heye kwa munhu yalingulolela mhomolo, nakabilimila kuli misitali ja wamizi kuwalamsa wakulugwe.
1SA 17:23 Loyawele yolonga na hewo, yula Mfilisti Goliati wa Gati yadahile kitowa nakalawila hali vilundo vya wamizi wa Isilaeli na kulonga ulonzi wuwula. Naye Daudi nakahulika ulonzi wula.
1SA 17:24 Waisilaeli lowamuwene yula Goliati, weng'ha nawabilima kwa kudumba lukami.
1SA 17:25 Waisilaeli nawauza, “Ndaze, mwangumona yula munhu vyoyalingulutilila kilajila? Kwa kukomya, nakoya kuwaliga wanhu wa Isilaeli. Munhu yoneche yoweza kumkopola munhu ayo, mndewa Sauli komha lufufu na kahi kopegwa mhinza wa mndewa Sauli. Kahi wanhu wa lukolo lwa mhaza wa heye wolechigwa hawolavya kodi.”
1SA 17:26 Daudi nakalonga na wanhu wemile kumwando na heye, “Ndaze, koditilwa choni munhu yawele yomkopola ayu Mfilisti na kusa soni ayi ilawe kuli Isilaeli? Ndo whaani ayu Mfilisti yohambe yenjile ikumbi mbaka yavilije vilundo vya wamizi wa Nguluwi yawele mkomu?”
1SA 17:27 Wala wanhu nawamlonjela kota vyowalonjile hamwande kuwala munhu yawele yomkopola Goliati.
1SA 17:28 Eliyabu mng'holoze Daudi, loyahuliche Daudi vyoyawele yolonga na wanhu, nakazudila, nakauza, “Lekachoni nakuya hano? Jila ming'holo michefu ja kula kisolo nakumlechela munhu wachi? Ndivizela ndaze vyouwele mjuvi ulingidaya. Nakuya hano kulola ngondo hela.”
1SA 17:29 Daudi nakedichila, “Lelo nandita choni? Ndaze, heni siweza ne kuuza?”
1SA 17:30 Daudi nakamgaluchila munhu yunji na kumuuza mbuli yiyila, wanhu nawamwidichila hihila kota hamwande.
1SA 17:31 Lila loyalonjile Daudi, nalihulikwa na kulonjelwa Sauli. Sauli nakalajiza Daudi yachemigwe.
1SA 17:32 Daudi nakamlonjela Sauli, “Munhu yoneche yaleche kudumba mnhumbula ya heye kwa chiwalo cha ayu Mfilisti. Heni chitumagwa wa hegwe ndoluta kitowa na heye.”
1SA 17:33 Sauli nakamlonjela Daudi, “Hegwe huweza hebu kitowa na yula Mfilisti kwa vila hegwe kwa msongolo hela. Ila yula munhu naketowa kulawa kuli usongolo wa heye.”
1SA 17:34 Daudi nakamlonjela Sauli, “Heni chitumagwa wa hegwe nzowela kudima ming'holo ja mhaza wa heni. Lolikuya isimba na dubu kibata ing'holo lyana kuli chilundo,
1SA 17:35 heni ndangulutaga kulitowa na kulilohola ing'holo kulawa kuli mlomo wa isimba. Wone isimba ama idubu lyuye kitowa na heni ndangulutaga na kibata milaika ja kuli singo na kulitowa na kulikopola.
1SA 17:36 Heni chitumagwa wa hegwe ng'hopola misimba na midubu minji. Lelo ayo Mfilisti yohambe yenjile ikumbi, kowa kota limwe lya ajo kwa chiwalo cha kuviliga vilundo vya wamizi wa Nguluwi yawele mkomu.
1SA 17:37 Daudi nakalonga, Mkulu Nguluwi yawele yandohole heni kuli ndole za isimba na dubu, kondohola kuli moko ga ayu Mfilisti.” Sauli nakamlonjela Daudi, “Ulute, Mkulu Nguluwi kowa hamwe na hegwe.”
1SA 17:38 Sauli nakamvaliza Daudi mivalo ja heye ja kitowa ngondo jiwele ndo kofia ya shaba kumutwi kwa heye na ikoti lya kwamila mhambaga kulumila.
1SA 17:39 Daudi nakawoha ipanga kuli mivalo ja heye, nakajeza kujenda, ila nakalemwela kwa vila hazowele kujenda najo. Daudi nakamlonjela Sauli, “Siweza hebu kuluta na vinhu avi kwa vila sivizowele.” Daudi nakavula vila vinhu.
1SA 17:40 Daudi nakahola ng'hweku ya heye, nakehagulila maganga ganojile gahano kulawa kulwanda, nakawika kuli chihako cha heye cha kudimila. Mhembeyo ya heye nayali goya mmoko mwa heye, nakamhejelela yula Mfilisti.
1SA 17:41 Mfilisti nakaluka kumhejelela Daudi na yula munhu yebatile ngawo ya heye nayali kumwando kwa heye.
1SA 17:42 Yula Mfilisti loyalolile na kumona Daudi, nakambeza kwa vila Daudi nayali msongolo hela na kahi nayali na kumeho kunojile.
1SA 17:43 Goliati nakamuuza Daudi, “Hegwe nakuya kwa heni na ng'hweku kota heni nda libwa?” Yula Mfilisti nakampanjila Daudi kwa milungu ja heye.
1SA 17:44 Mfilisti nakamlonjela Daudi, “Uye kwa heni. Lukuli lwa hegwe ndotajila videje na migongolo ja kisolo!”
1SA 17:45 Ila Daudi nakamlonjela Goliati, “Hegwe kwanguya kwa heni na ipanga na igoha na chimaje chikulu, ila heni ndanguya kwa hegwe kwa itagwa lya Mkulu Nguluwi Yawele na Mong'ho, Nguluwi wa wamizi wa Isilaeli yawele nakumliga.
1SA 17:46 Zuwa lya lehano Mkulu Nguluwi kokuwika kuli moko ga heni, nani ndokutowa na kulavya mutwi wa hegwe na mitufi ja vilundo vya wamizi wa Wafilisti ndotozela videje na migongolo ja kisolo. Aho ndo isi yeng'ha yovizela kota Nguluwi ka kuli isi ya Isilaeli.
1SA 17:47 Weng'ha weting'hane hano wavizele kota Mkulu Nguluwi hambe yalohole kwa ipanga ne igoha. Ngondo ino ndo ya Mkulu Nguluwi naye kowawika hemwe kuli moko ga hetwe.”
1SA 17:48 Goliati loyahejele habehi leka yamtowe Daudi, Daudi nakabilimila kuli misitali ja wamizi leka yating'hane na heye.
1SA 17:49 Daudi nakenjiza moko wa heye kuli chihako na kuhola iganga limwe na kutoza lila iganga kwa yila mhembeyo, nakamtowa yula Mfilisti kuli chihanga cha heye. Lila iganga nalinjila mchihanga mwa yula Mfilisti, nakagwa chifunama.
1SA 17:50 Ahyo ndo Daudi vyoyamkopole Goliati kwa yila mhembeyo ya heye na iganga ne kuwa na ipanga kuli moko ga heye.
1SA 17:51 Daudi nakabilima na kwima mchanya mwa yula Mfilisti, nakahola ipanga lya Goliati kuli yala na kudumula mutwi wa yula Goliati kwa lila ipanga. Wafilisti lowamuwene Goliati nakakopoligwa, nawabilima.
1SA 17:52 Wanhu wa Isilaeli na wa Yuda nawaluka kutowa iyowe lya kusumya. Nawawawinza Wafilisti kumbele mbaka kuli nzila ilingulutila Shaalaimu kuluta honhu halinguchemigwa Gati, kuli lwizi lukulu lwa Ekiloni. Mitufi ja hewo najisambaluka hafungo ha nzila ya Shaalaimu na Gati na Ekiloni.
1SA 17:53 Waisilaeli nawahiluka kulawa kuwabilimisa Wafilisti na kuhola vinhu vya kuli kambi za hewo.
1SA 17:54 Daudi nakahola mutwi wa yula Mfilisti Goliati nakauhilika Yelusalemu. Ila vinhu vya Goliati vya kitowa ngondo nakavileka kuli ihema lya heye.
1SA 17:55 Sauli loyamuwene Daudi kanguluta kitowa na yula Mfilisti Goliati, nakamuuza Abuneli chilongozi wa wamizi, “Msongolo ayu ndo mwana wa whaani?” Abuneli nakamwidichila, “Gwa mndewa, ndikomya heni sivizelele.”
1SA 17:56 Mndewa nakamlonjela Abuneli, “Lelo muuze, heye ka mwana wa whaani.”
1SA 17:57 Daudi loyahiluche kulawa kumkopola yula Mfilisti Goliati, Abuneli nakamhola na kumhilika kwa Sauli kuno yawele na mutwi wa yula Mfilisti Goliati kuli moko ga heye.
1SA 17:58 Sauli nakamuuza Daudi, “Gwa msongolo, hegwe kwa mwana wa whaani?” Daudi nakamwidichila, “Heni nda mwana wa chitumagwa wa hegwe Yese, kulawa Betelehemu.”
1SA 18:1 Sauli loyasindile kulongasa na Daudi, Yonatani nakelumba na Daudi, Yonatani nakamgana Daudi kota vyoyalingigana heye yuye.
1SA 18:2 Kulawa zuwa lila, Sauli nakamhola Daudi, hamlechile yahiluche kahi kwa mhaza wa heye.
1SA 18:3 Yonatani nakadita ilagano na Daudi kwa vila nakamgana kota vyoyalingigana heye yuye.
1SA 18:4 Yonatani nakavula ikoti lyoyavalile nakamha Daudi hamwe na vinhu vya kitowa ngondo na ipanga na upinde na isali lya heye lya mchuno.
1SA 18:5 Daudi nakasumya chila koyalajizwe na Sauli. Sauli nakamdita Daudi kuwa chilongozi wa vilundo vya wamizi weng'ha wa Sauli. Mbuli ayo naiwa goya kwa wanhu weng'ha na kwa wakola mijito wa Sauli.
1SA 18:6 Lowawele wohiluka haluga hamwe na Daudi kulawa kumkopola yula Mfilisti Goliati, wadala nawalawa kulawa miji jeng'ha ja Isilaeli kumbochela mndewa Sauli. Wadala nawali wokwimba na kuvina kwa kusangalala na kwa kutowa ngoma ndodo na igombogombo.
1SA 18:7 Wadala nawemba hino kuno wovina. “Sauli nakawakopola elufu, ila Daudi nakawakopola makumi elufu.”
1SA 18:8 Sauli nakazudila lukami kwa ulonzi wula na kwimba kwa hewo. Nakalonga, “Nawamha Daudi makumi elufu, heni elufu hela. Mbuli iponile hano ndo kumha Daudi undewa!”
1SA 18:9 Sauli nakamonela fihi Daudi kulawa zuwa lila.
1SA 18:10 Zuwa lya keli baho du muhe yehile kulawa kwa Nguluwi nakoya kwa Sauli, naye nayali yolongalonga hela haluga ha heye kota yawele na lukwale. Daudi nayali yotowa ching'hweleng'hwele kwa moko ga heye kota vyoyalingudita chila zuwa. Naye Sauli nayali na igoha kuli moko wa heye.
1SA 18:11 Sauli nakatoza igoha lila, nakelonjela, “Ndomhoma Daudi kwa igoha na yapone aho kuli lukanzi.” Ila Daudi nakakwepa, naiwa ahyo mala mbili.
1SA 18:12 Sauli nakamdumba Daudi kwa vila Mkulu Nguluwi nayali hamwe na heye, ila Mkulu Nguluwi nakamleka Sauli.
1SA 18:13 Kwa chiwalo acho, Sauli nakamlavya Daudi kwa heye na kumdita yawe chilongozi wa wamizi elufu imwe. Naye Daudi nakawalongoza hewo.
1SA 18:14 Daudi nakadita goya kwa chila chinhu yaditile kwa vila Mkulu Nguluwi nayali hamwe na heye.
1SA 18:15 Sauli loyamuwene Daudi nakadita goya, nakamdumba.
1SA 18:16 Ila wanhu weng'ha wa Isilaeli na Yuda nawamgana Daudi kwa vila nakawalongoza goya kuli kitowa ngondo.
1SA 18:17 Hamba Sauli nakamlonjela Daudi, “Lole, ayu ndo Melabu, mhinza mkulu wa heni, ndokupa hegwe leka umhese, ila ndangukugana hegwe wikangaze na witowe ngondo ya Mkulu Nguluwi.” Sauli nayali yojesa mnhumbula ya heye kota kwa kudita vila, Wafilisti womkopola Daudi, leka yaleche koneka kota nakamkopola kwa moko ga heye yuye.
1SA 18:18 Daudi nakamlonjela Sauli, “Heni nda munhu whaani leka mndewa yawe mgosi wa heni? Lukolo lwa heni na wasongolo wa mhaza wa heni hawazeleche hebu kuli isi ya Isilaeli.”
1SA 18:19 Ila mhela wula Daudi loyaganigwe kupegwa Melabu mhinza wa Sauli, nayali yahesigwe na Adilieli kulawa muji wa Mehola.
1SA 18:20 Lelo Mikali mhinza wa Sauli nakamgana Daudi. Sauli vyoyalonjelwe nakasangalala lukami.
1SA 18:21 Sauli nayali yolonga mnhumbula ya heye, “Ndomha ayu leka iwe idiwa kwa heye na Wafilisti womkopola.” Ahyo Sauli nakamlonjela Daudi lwa keli, “Lelo kowa mgosi wa heni.”
1SA 18:22 Sauli nakawalonjela vitumagwa wa heye, “Mlongase na Daudi kwa uviso, mlonje hino, ‘Mndewa kangukugana ng'hatu hegwe na vitumagwa wa heye weng'ha wangukugana. Lelo uwe mgosi wa mndewa.’ ”
1SA 18:23 Vitumagwa wa Sauli nawalonga ulonzi wula kwa Daudi, Daudi nakalonga, “Ndaze, hemwe mwangona ndo mbuli ndodo hela heni ndiwe mgosi wa mndewa, nani nda mzunwa hela hambe nzeleche lukami?”
1SA 18:24 Wala vitumagwa wa Sauli nawamlonjela Sauli kota vyoyalonjile Daudi.
1SA 18:25 Naye Sauli nakalonga, “Mumlonjele hino Daudi, ‘Mndewa halingugana chinhu choneche, ila kangugana kuwakopola Wafilisti miya imwe na kuhola migovi ja hewo leka yahilule chibida kwa wang'honyo wa heye.’ ” Majesa ga Sauli nagali Daudi yakopoligwe na Wafilisti.
1SA 18:26 Vitumagwa wa heye lowamlonjele Daudi ulonzi wula, Daudi nakanojezwa kuwa mgosi wa mndewa. Mazuwa nagali gang'hali kumala,
1SA 18:27 Daudi na wanhu wa heye, nawaluta na kuwakopola Wafilisti miya mbili na kujihola migovi ja hewo. Nawamhiluchila mndewa na kumuwazila ajo leka yawe mgosi wa mndewa. Hamba Sauli nakamha Daudi mhinza wa heye Mikali.
1SA 18:28 Sauli vyoyawene na kuvizela kota Mkulu Nguluwi ka hamwe na Daudi na kahi Mikali nakamgana lukami Daudi,
1SA 18:29 nakalutilila kumdumba Daudi. Sauli nakawa mng'honyo wa Daudi mazuwa geng'ha.
1SA 18:30 Mhela awo wakulu wa Wafilisti nawaluta kitowa na Waisilaeli, ila lowawele wochitowa ngondo, Daudi nakasumya kusinda vitumagwa wanji wa Sauli na itagwa lya heye naliwa na lutogo lukulu.
1SA 19:1 Hamba Sauli nakalonga na mwana wa heye Yonatani na vitumagwa wa heye weng'ha mbuli ya kumkopola Daudi. Ila Yonatani, mwana wa Sauli, nakamgana lukami Daudi.
1SA 19:2 Kwa chiwalo acho, Yonatani nakamlonjela Daudi, “Mhaza wa heni kangugana kukukopola, lelo wiyamile goya, zuwa liyage lufuku wivise honhu ha uviso.
1SA 19:3 Nani ndolawa na kwima kumwando kwa mhaza wa heni ako kumgunda kouwele hegwe. Ndolongasa na mhaza mbuli za hegwe, wone ndiizele mbuli ya hegwe yoneche kulawa kwa heye, ndokulonjela.”
1SA 19:4 Yonatani nakalonga ganojile kuwala Daudi hali Sauli mhaza wa heye, nakamlonjela, “Uleche kudita wihe kwa chitumagwa wa hegwe Daudi, kwa vila heye hakuditile wihe hegwe na madito ga heye geng'ha kwa hegwe nagali ga kukutanza hegwe.
1SA 19:5 Kwa vila nakawika ukomu wa heye kuli moko ga heye kwa kumkopola yula Goliati, Mkulu Nguluwi nakawaditila Waisilaeli weng'ha ulohozi ukulu. Gwegwe baho nakona mbuli ayo nakusangalala. Lekachoni kwangugana kubohola danda haiwele na nongwa kwa kumkopola Daudi ne chiwalo?”
1SA 19:6 Sauli nakamhulichiza Yonatani, naye Sauli kahi nakelaha, “Kota vyoyalingikala Mkulu Nguluwi, simkopola Daudi hebu.”
1SA 19:7 Yonatani nakamchema Daudi na kumlonjela mbuli azo zeng'ha. Hamba Yonatani nakamhilika Daudi koyawele Sauli, Daudi nakakola mijito kota aho mwaluko.
1SA 19:8 Hamba nakwali na ngondo kahi ya Wafilisti na Waisilaeli, Daudi nakalawa kitowa na Wafilisti. Nakawatowa kwa mong'ho ng'hatu mbaka nawabilima.
1SA 19:9 Muhe yehile kulawa kwa Mkulu Nguluwi nawuya kahi kwa Sauli mhela Sauli loyawele haluga ha heye na igoha kuli moko wa heye, Daudi nayali yotowa ching'hweleng'hwele.
1SA 19:10 Sauli nakajeza kumtowa Daudi kuli lukanzi kwa lila igoha lya heye, ila Daudi nakakwepa lila igoha, igoha nalitowa lukanzi. Daudi nakabilima nechilo yiyila.
1SA 19:11 Sauli nakalajiza kahi walume haluga ha Daudi, leka wapale mhumu ya kumkopola lufuku yila. Ila Mikali mche wa Daudi nakamlonjela Daudi, “Wone nakulemwela kusulupuka nechilo ayi, mitondo kokopoligwa.”
1SA 19:12 Mikali nakamdulisa Daudi kwa kukolela kuli itubuli lya ng'handa ya hewo, Daudi nakalawa na kubilima.
1SA 19:13 Mikali nakahola limalukolo, nakaliwika mchinhanda na kumutwi kwake nakawika chinhu cha milaika ja mhene cha kuwichila mutwi na kuchigubika na ivalo.
1SA 19:14 Sauli vyoyawalajize walume wamibate Daudi, Mikali nakawalonjela wala wanhu kota Daudi kangutamika.
1SA 19:15 Sauli nakawalajiza walume leka wamlole Daudi, nakalonga, “Mmigale hano kwa heni mli chinhanda cha heye leka ndimkopole.”
1SA 19:16 Lowenjile kuli ng'handa ya Daudi, wala walume walajizwe na Sauli, nawalifika limalukolo mchinhanda na chinhu cha milaika ja mhene cha kuwichila mutwi kumutwi kwa alyo limalukolo.
1SA 19:17 Sauli nakamlonjela Mikali, “Lekachoni kwangumbada? Nakumleka mng'honyo wa heni yalute?” Mikali nakamwidichila, “Heye nakandonjela, ‘Undechele ndute leka ndeche kukukopola.’ ”
1SA 19:18 Daudi loyabilime, nakaluta kwa Samweli ako Lama. Nakamlonjela mbuli zeng'ha zoyamditile Sauli. Hamba Daudi na Samweli nawaluta kikala ako Nayoti.
1SA 19:19 Sauli nakapegwa mbuli kota Daudi ka kula Nayoti ako Lama.
1SA 19:20 Sauli nakalajiza walume leka wamibate Daudi. Nawo lowawachifichile chilundo cha waloli wangulavya uloli na Samweli kangulongoza chilundo acho, muhe wa Nguluwi nawuya kwa wala walume wa Sauli, nawo nawaluka kulavya uloli.
1SA 19:21 Sauli loyahuliche mbuli azo, nakalajiza walume wanji kahi, nawo nawaluka kulavya uloli. Sauli nakalajiza walume wanji lwa kadatu, nawo nawalavya uloli kahi.
1SA 19:22 Sauli nakaluta Lama. Loyafichile kuli ideho ikulu ako Seku, nakamfika munhu yumwe, nakamuuza, “Wakohi Samweli na Daudi?” Yula munhu nakamwidichila, “Samweli na Daudi wa ako Nayoti, Lama.”
1SA 19:23 Sauli nakaluta kuko Nayoti ako Lama. Muhe wa Nguluwi nawuya kwa heye, nakaluka kulavya uloli kulawa mnzila mbaka loyafichile Nayoti.
1SA 19:24 Kota wamlongole, nakalavya mikanzu ja heye yolavya uloli hali Samweli. Nayali hihyo ne nguwo kwa zuwa limwe nemisi na nechilo. Wanhu nawaluka kiuza hewo kwa hewo, “Ndaze, Sauli kahi ka yumwe wa waloli?”
1SA 20:1 Daudi nakabilima kulawa Nayoti ako Lama, nakaluta mbaka kwa Yonatani, nakamlonjela, “Ndita choni heni? Ndina nongwa yachi? Ndita gehile gachi kwa mhaza wa hegwe mbaka yagane kulavya ukomu wa heni?”
1SA 20:2 Yonatani nakamwidichila, “Hebu, hegwe haubagama hebu. Lole, mhaza wa heni hodita mbuli yoneche ng'hulu ama ndodo ne kundonjela heni. Mhaza wa heni kana chiwalo chachi mbaka yaleche kungubulila heni mbuli ayi? Acho choulonga hulingulonga kukomya hebu.”
1SA 20:3 Daudi nakelaha yolonga, “Mhaza wa hegwe kanguvizela goya kota hegwe Yonatani kwangungana heni, kangijesa kukuvisa hegwe mbuli ayi leka uleche kisinza. Ila kota Mkulu Nguluwi yawele mkomu na kota vyoulingikala, ndangilaha kubagama kwa habehi kufika heni.”
1SA 20:4 Yonatani nakamlonjela Daudi, “Heni ndodita mbuli yoneche youlingugana.”
1SA 20:5 Daudi nakamlonjela Yonatani, “Mitondo kowa na mnvina ya kulawa kwa nyelezi, nani ndowa kuko kwa chilyo cha hamwe na mndewa. Ila ndeche ndute kivisa kumgunda mbaka zuwa lya kadatu matinazo.
1SA 20:6 Wone mhaza wa hegwe yafiche ako na kona heni nda haduhu, lelo mlonjele, ‘Daudi nakalanda kuluta Betelehemu kuli muji wa heye, ako hana nhambiko ya chila mwaka ya lukolo lwa heye.’
1SA 20:7 Wone yalonje, ‘Goya ng'hatu,’ lelo heni chitumagwa wa hegwe ndochikala goya. Ila wone yazudile, uvizele kota nakagana kunditila heni mbuli yihile.
1SA 20:8 Lelo ulajile igano lya kwimilila kwa vila nakumbika heni kuli ilagano lya Mkulu Nguluwi hamwe na hegwe, ila wone ndina nongwa, ung'hopole gwegwe baho. Lekachoni undigale heni kwa mhaza wa hegwe yang'hopole?”
1SA 20:9 Yonatani nakamwidichila, “Uleche kulonga ahyo. Wone nandivizele mhaza wa heni kangugana kudita mbuli yihile kota ayo, nasalikukuvisa hebu.”
1SA 20:10 Daudi nakamuuza Yonatani, “Munhu whachi kondonjela wone mhaza wa hegwe nakakwidichila kwa kung'hang'hala?”
1SA 20:11 Yonatani nakamwidichila Daudi, “Uye tuche hamwe kumgunda.” Nawaluta weng'ha weli.
1SA 20:12 Yonatani nakamlonjela Daudi, “Mkulu Nguluwi, Nguluwi wa Isilaeli, yawe mlolezi wa hetwe. Londigazela majesa ga mhaza wa heni mhela kota uno hamitondo ama zuwa lya kadatu, wone hana ulonzi unojile kwa hegwe ndokulonjela.
1SA 20:13 Mkulu Nguluwi yang'hopole heni Yonatani wone Sauli kangugana kukuditila gehile, nani ndeche kukulonjela aga leka ulute goya honhu ha kutali. Mkulu Nguluwi yawe hamwe na hegwe kota vyoyawele hamwe na mhaza wa heni.
1SA 20:14 Wone ndolutilila kuwa mkomu hegwe kondajila igano lya kwimilila lya Mkulu Nguluwi. Ila wone ndangubagama,
1SA 20:15 uleche kuleka kulilajila igano lya kwimilila kwa ivyazi lya heni mazuwa geng'ha, mhela wula Mkulu Nguluwi hoyowakopola wang'honyo wa hegwe weng'ha.”
1SA 20:16 Yonatani kahi nakadita ilagano na ivyazi lya Daudi lyeng'ha, “Mkulu Nguluwi yawadumye wang'honyo wa Daudi.”
1SA 20:17 Yonatani nakamlonjela Daudi yelahe kahi kwa chiwalo cha igano liwele kwa heye Daudi na Yonatani, kwa vila nakamgana Daudi kota vyoyalingigana heye yuye.
1SA 20:18 Hamba Yonatani nakamlonjela Daudi, “Mitondo ndo mnvina ya kulawa kwa nyelezi. Yozeleka kota kwa haduhu kwa vila chigoda cha hegwe chowa chilihela munhu.
1SA 20:19 Zuwa lya kadatu, matinazo ulute kevise kukula kowivisile hamwande, wikale kula habehi na iganga lya Eseli.
1SA 20:20 Nani ndotoza misale jidatu hafungo ha lila iganga, kota ndangiwika goya kwa shabaha.
1SA 20:21 Hamba ndomlajiza msongolo na kumlonjela, ‘Ulute ukajipale misale.’ Wone ndimlonjele, ‘Ulole, misale ja kuli ubanzi awu wa hegwe. Ujigale hano,’ lelo uye, kota Mkulu Nguluwi yalingikala, ndangilaha hegwe kuna kikala goya, haduhu chinhu chihile chokulawila hegwe.
1SA 20:22 Ila hondimlonjela yula chitumagwa, ‘Ulutilile, misale ja kumwando kwa hegwe,’ lelo yokulapa uche, kwa vila Mkulu Nguluwi kowa kangugana ulute.
1SA 20:23 Kuwala mbuli yila yotulongase, Mkulu Nguluwi kowa mlolezi wa hetwe mazuwa geng'ha.”
1SA 20:24 Lelo Daudi nakevisa kumgunda. Loifichile mnvina ya kulawa kwa nyelezi, mndewa nakekalisa kwa chilyo.
1SA 20:25 Mndewa nakekalisa mchigoda cha heye chiwele habehi na lukanzi kota vyoyalingudita mazuwa geng'ha. Yonatani nayali kumwando kwa heye na Abuneli nayali habehi na mndewa Sauli. Ila chigoda cha Daudi nachali chilihela munhu.
1SA 20:26 Zuwa lila Sauli halonjile chinhu choneche, nakejesa kota Daudi kana mbuli ilingumlemeza kuluta kuli yila mnvina na ka yakokomoche.
1SA 20:27 Ila zuwa lya keli lya mnvina ya kulawa kwa nyelezi, chigoda cha Daudi nachali chilihela munhu. Lelo Sauli nakamuuza Yonatani, “Lekachoni Daudi mwana wa Yese hambe yoye kulya chilyo zuwa likolile na lehano?”
1SA 20:28 Yonatani nakamwidichila, “Daudi nakagana ng'hatu ndimkundize yalute Betelehemu.
1SA 20:29 Nakandonjela, ‘Dedede, ng'hundize ndute kwa vila ivyazi lya hetwe lina nhambiko ako kuli muji wa hetwe na wang'holozangu wangungana ndute. Lelo wone yowa goya kwa hegwe ung'hundize ndute kwa wang'holozangu kuwalola.’ Acho ndo chiwalo cha Daudi kuwa haduhu kuli chilyo cha hamwe na mndewa.”
1SA 20:30 Sauli loyahuliche mbuli ayo nakamzudila lukami Yonatani, nakamlonjela, “Hegwe kwa mwana wa mdala yajilile na yalingubelenhuka! Heni ndivizela kota hegwe nakihagulila kumhulichiza Daudi, mwana wa Yese kwa soni ya gwegwe baho na kumbasa soni mayako yakupondile.
1SA 20:31 Ndaze, huvizelele kota Daudi, mwana wa Yese yang'hali mkomu hegwe hauweza kukundizwa kuwa mndewa isi ayi? Lelo ulute ukamhole na uye na heye hano, kwa vila nakaganigwa yabagame.”
1SA 20:32 Yonatani nakamwidichila Sauli, “Lekachoni yakopoligwe? Nakadita choni?”
1SA 20:33 Sauli nakamtozela Yonatani igoha leka yamkopole. Aho ndo Yonatani nakavizela kota Mhaza wa heye Sauli nayali yogana kumkopola Daudi.
1SA 20:34 Yonatani nakalawa hala mchisaga kuno yazudile lukami. Nakalema kulya chilyo choneche zuwa lya keli lya mnvina. Yonatani nayali na masinzo kwa vila mhaza wa heye kangugana kumditila vibi Daudi na kwa vila nakambasa soni.
1SA 20:35 Zuwa liyage lufuku, Yonatani nakaluta kiting'hana na Daudi kumgunda kota vyowelagane. Msongolo mdodo nayali hamwe na Yonatani.
1SA 20:36 Yonatani nakamlonjela yula msongolo, “Ubilime ukajipale misale jondijitoza.” Yula msongolo loyawele yobilima, Yonatani nakatoza msale umwe naukola kuchanya mwa heye.
1SA 20:37 Yula msongolo loyafichile hala hawele na msale, Yonatani nakamtowela iyowe yula msongolo, “Ulutilile msale wa kumwando kwa hegwe.”
1SA 20:38 Yonatani nakamtowela iyowe, “Udite himahima uleche kwima aho.” Lelo yula msongolo nakahola jila misale na kuluta kwa mkulu wa heye.
1SA 20:39 Yula msongolo nayali havizelele choneche. Yonatani na Daudi hela ndo nawaizela mbuli yila.
1SA 20:40 Yonatani nakamgalila yula msongolo vinhu vya heye vya kitowa ngondo na kumlonjela, “Ulute uvihilule mujini.”
1SA 20:41 Yula msongolo vyoyochile, Daudi nakalawa honhu hala habehi na iganga, nakenamiza kwa Yonatani mala zidatu. Hamba chila yumwe nakamnonela myage, nawalila hamwe. Ila Daudi nakalila lukami kusinda myage.
1SA 20:42 Yonatani nakamlonjela Daudi, “Ulute kwa kikala goya kwa vila hetwe weli weng'ha natilaha kwa itagwa lya Mkulu Nguluwi, ahyo Mkulu Nguluwi kowa hagati mwa hetwe na hali lulelo lwa hetwe mazuwa gose.” Daudi nakenuka na kuluta, Yonatani nakahiluka mujini.
1SA 21:1 Daudi nakaluta kwa mtambika Ahimeleki ako Nobu. Ahimeleki nayali yokakama loyeting'hane na Daudi, nakamuuza, “Lekachoni nakuya hano uliyeka, kuduhu ne munhu hamwe na hegwe?”
1SA 21:2 Daudi nakamwidichila mtambika Ahimeleki, “Heni nda hano kwa chiwalo cha ilajizo lya mndewa. Ndeche kumlonjela munhu yoneche mnzila mbuli ayi yandajize. Ndiwalajiza walume walute na tuting'hane honhu hanji.
1SA 21:3 Lelo kuna chinhu choneche? Umhe heni mibumunda jihano ama chinhu choneche chouweza kumha heni.”
1SA 21:4 Ila mtambika Ahimeleki nakamlonjela Daudi, “Ndahela ibumunda lyoneche lya hihi hela hano. Ila ja hano mibumunda jelile, wone wanhu wa hegwe nawewika kutali na wadala.”
1SA 21:5 Daudi nakamwidichila yula mtambika, “Kwa kukomya, natibagula na wadala mazuwa mado aga kota vyonditaga hondilawa ndiluta kuli majendo. Ng'huli za walume zanguwaga zelile mbaka kuli majendo ga hihi hela. Lelo ndaze, ng'huli za hewo haziwa zelile lukami lehano?”
1SA 21:6 Lelo yula mtambika Ahimeleki nakamha jila mibumunda jelile, kwa vila nakwali haduhu mibumunda ja hihi hela ila jila jelile, najo najusigwa kumwando kwa Mkulu Nguluwi leka jiwichigwe mibumunda jilingulawa mchiko zuwa lila lojusigwe.
1SA 21:7 Zuwa lila nakwali na yumwe wa vitumagwa wa Sauli yaganigwe kuwa hali Mkulu Nguluwi. Chitumagwa ayo nayali yochemigwa Doegi, Mwedomu, mkulu wa wadimi wa Sauli.
1SA 21:8 Daudi nakamlonjela Ahimeleki, “Ndaze, kuna ipanga ama igoha? Heni hambe mbuye na ipanga ne vinhu vya heni vya kitowa ngondo, kwa vila mndewa nakagana ndawe himahima.”
1SA 21:9 Yula mtambika nakalonga, “Ndanalyo lila ipanga lya yula Mfilisti Goliati umkopole kula kuli ibindi lya Ela, liwohigwa na nguwo kumbele kwa chizibao. Lougana kuhola alyo ipanga, uhole kwa vila haduhu ipanga linji.” Daudi nakalonga, “Haduhu ipanga linji kota alyo, ndangukulanda umhe heni.”
1SA 21:10 Lelo Daudi nakabilima, nakalawa kwa Sauli zuwa lila nakaluta kwa mndewa Akishi wa Gati.
1SA 21:11 Wala vitumagwa wa Akishi nawamlonjela Akishi, “Ndaze, ayu hawele ndo yula Daudi, mndewa wa isi ya Isilaeli? Yula yawele wanhu wangwimba mbuli za heye, wolonga, ‘Sauli nakawakopola elufu, ila Daudi nakawakopola makumi elufu?’ ”
1SA 21:12 Daudi nakauwika ulonzi wula mnhumbula ya heye, nakaluka kumdumba Akishi mndewa wa Gati.
1SA 21:13 Lelo nakedita kota kana lukwale hali hewo, nayali yozadazada kuli lwizi lwa muji, nakalileka lite lya heye lilingulagala kuli lulevu lwa heye.
1SA 21:14 Lelo Akishi nakawalonjela wala vitumagwa wa heye, “Hemwe mvizela kota munhu ayu kahela chinhu kumutwi, lekachoni mwangumigala kwa heni?
1SA 21:15 Ndaze, heni ndanguwagana wanhu wawele na lukwale mbaka mmigale ayo hali heni? Ndaze, naiganigwa munhu ayu yoye haluga ha heni?”
1SA 22:1 Daudi nakoka Gati nakabilimila kuli mhalika ya kuli muji wa Adulamu. Wang'holoze lowahuliche mbuli ayo nawaluta kwa heye.
1SA 22:2 Chila munhu yawele kuli magazo na munhu yoneche yalingudaigwa na wanhu weng'ha wawele na usungu kuli nhumbula za hewo na weting'hana kwa Daudi. Daudi nayali chilongozi wa hewo, nawo weng'ha nawali kota wanhu miya zine.
1SA 22:3 Kulawa kula Daudi nakaluta mbaka Misipa ako Moabu na kumlonjela mndewa wa Moabu, “Ndangulanda uwakundize mhaza na mayangu wekale na hegwe mbaka heni ndivizele Nguluwi konditila choni.”
1SA 22:4 Lelo nakawaleka mhaza wa heye na mayake wekale kwa mndewa wa Moabu, hewo nawekala hamwe na hewo mhela weng'ha Daudi loyawele kuli ngome.
1SA 22:5 Mloli Gadi nakamlonjela Daudi, “Uleche kikala hano kuli ngome. Ulute kuli isi ya Yuda.” Daudi nakoka kuli chihulo cha ako Heleti.
1SA 22:6 Sauli nakahulika kota Daudi na wanhu wawele hamwe na heye nawoneka. Sauli yawele na igoha lya heye mmoko, nayali yekalise hasi ha igodi lya ukwaju kuli chidunda ako Gibeya, yawele na vilongozi wa heye weng'ha wawele wemile kumzunguluta.
1SA 22:7 Sauli nakawalonjela vilongozi wa heye, “Hemwe wanhu wa nhanzi ya isi ya Benjamini mhulichize. Ndaze, ayu Daudi mwana wa Yese kowapa hemwe chila yumwe migunda na migunda ja mizabibu? Ndaze, kowadita hemwe kuwa wakulu wa wamizi mamiya na wakulu wa wamizi maelufu?
1SA 22:8 Lekachoni hemwe namkunda kunditila vibi heni? Haduhu ne munhu yandonjele mbuli ayi hanili mwana wa heni nakalagana na mwana wa Yese. Haduhu munhu ne yumwe wa hemwe yalingumbonela isungu ama kundonjela kota mwana wa heni nakamlavya chitumagwa wa heni Daudi kwa kubeteza chinyele leka yanhowe, kota vyoyalingudita lehano?”
1SA 22:9 Ila Doegi munhu wa Edomu, yawele yemile habehi na vitumagwa wa Sauli, nakalonga, “Heni ndimona mwana wa Yese yoluta ako Nobu kwa Ahimeleki mwana wa Ahitubu.
1SA 22:10 Ahimeleki nakamlandila Daudi kwa Mkulu Nguluwi, Ahimeleki nakamha Daudi chilyo na lila ipanga lya yula Mfilisti Goliati.”
1SA 22:11 Hamba Sauli nakalajiza wanhu walute kumchema mtambika Ahimeleki mwana wa Ahitubu na ivyazi lyeng'ha lya mhaza wa heye, liwele nalyali watambika ako Nobu, weng'ha nawaluta kwa mndewa Sauli.
1SA 22:12 Sauli nakalonga, “Lelo uhulichize hegwe mwana wa Ahitubu.” Ahimeleki nakamwidichila, “Ena, mkulu wa heni.”
1SA 22:13 Sauli nakamuuza Ahimeleki, “Lekachoni hegwe na Daudi mwana wa Yese namkunda kunditila heni wihe, nakumha mibumunda na ipanga na kumlandila kwa Nguluwi kwa chiwalo cha heye? Kwa chiwalo acho nakambelenhuka na kumbeteza heni chinyele leka yanhowe kota vyoyalingudita lehano.”
1SA 22:14 Ahimeleki nakamwidichila mndewa, “Kuli vitumagwa wa hegwe weng'ha, whaani yawele wa kukundigwa kota Daudi, mgosi wa hegwe mndewa na chilongozi wa chilundo cha wamizi wa hegwe yalingutogoligwa na weng'ha haluga ha hegwe?
1SA 22:15 Ndaze, zuwa alyo nalyali lya mwaluko kumlanda Nguluwi kwa chiwalo cha heye? Hebu. Mndewa uleche kuwa na majesa gehile kwa heni ne yoneche wa ivyazi lya mhaza wa heni, kwa vila heni sivizelele choneche kuwala mbuli ayi yeng'ha.”
1SA 22:16 Ila mndewa Sauli nakamlonjela, “Kobagama hegwe Ahimeleki na ivyazi lyeng'ha lya mhaza wa hegwe.”
1SA 22:17 Hamba Sauli nakawalonjela wamizi wemile habehi na heye, “Muwakopole wala watambika wa Mkulu Nguluwi, kwa vila weng'ha wa hamwe na Daudi. Nawavizela kota nakabilima ila hawandonjele.” Ila wala wamizi hawakundile kwinula moko ga hewo kuwakopola watambika wa Mkulu Nguluwi.
1SA 22:18 Mndewa nakamlonjela Doegi, “Ulute hegwe ukawakopole wala watambika.” Ahyo Doegi, Mwedomu, nakawakopola weng'ha. Zuwa lila nakawakopola watambika makumi nane na wahano wavalile vizibao vya kitani.
1SA 22:19 Nakawakopola wanhu weng'ha wa muji wa Nobu kwa ipanga, muji wa watambika, walume na wadala na wana na wana walingong'ha na misenga na midogowi na ming'holo.
1SA 22:20 Ila Abiatali, mwana mlume wa Ahimeleki, mwana wa Ahitubu nakabilimila kwa Daudi.
1SA 22:21 Abiatali nakamlonjela Daudi kota Sauli nakawakopola watambika wa Mkulu Nguluwi.
1SA 22:22 Daudi nakamlonjela Abiatali, “Zuwa lila, mhela Doegi, Mwedomu loyawele hala, nandivizela kota komlonjela Sauli. Lelo heni ndo chiwalo cha kubagama kwa ivyazi lya mhaza wa hegwe.
1SA 22:23 Hegwe wikale na heni, uleche kudumba. Mina yawele youpala ukomu wa hegwe kanguupala ukomu wa heni kahi. Louwa hamwe na heni kochikala goya hela.”
1SA 23:1 Daudi loyalonjelwe, “Ulole, Wafilisti wanguutowa muji wa Keila na wanguhola mbena kuli honhu ha kuyugululila nyhule,”
1SA 23:2 Daudi nakamuuza Mkulu Nguluwi, “Ndaze, ndute kuwatowa wala Wafilisti?” Mkulu Nguluwi nakamwidichila, “Ena, ulute ukawakopole wala Wafilisti na kuulohola muji wa Keila.”
1SA 23:3 Ila wanhu walume wa Daudi nawamlonjela, “Ulole, hetwe twangudumba kikala hano Yuda, lelo hayowa vibi ng'hatu wone tulute kitowa na vilundo vya wamizi wa Wafilisti ako Keila?”
1SA 23:4 Daudi nakamlanda Mkulu Nguluwi lwa keli, Mkulu Nguluwi nakamwidichila, “Ulute Keila, kwa vila heni ndowawika Wafilisti mmoko mwa hegwe.”
1SA 23:5 Daudi na wanhu wa heye nawaluta Keila, nawawatowa ng'hatu wala Wafilisti na kuhiluka na misenga ja hewo minji. Ahyo Daudi nakawakopola Wafilisti wenji na kuwalohola wanhu wa Keila.
1SA 23:6 Lelo Abiatali, mwana wa Ahimeleki, loyabilimile kwa Daudi ako Keila, nakahola na chizibao cha mtambika.
1SA 23:7 Sauli kahi nakahulika kota Daudi ka Keila, nakalonga, “Nguluwi nakamuwika Daudi kuli mmoko mwa heni mina nakewoha yuye kwa kwinjila kuli muji uwele na lwizi na mhajilo.”
1SA 23:8 Lelo Sauli nakawalonjela wanhu wa heye weng'ha walute Keila na kitowa ngondo leka wamzungulute Daudi na wanhu wa heye.
1SA 23:9 Daudi loyavizele kota Sauli kangugana kumditila heye wihe, nakamlonjela mtambika Abiatali, “Wigale hano acho chizibao.”
1SA 23:10 Hamba Daudi nakalanda, “Gwa Mkulu Nguluwi, Nguluwi wa Isilaeli, heni chitumagwa wa hegwe nyhulika kota Sauli kangugana kuya kuno Keila kuudumya muji weng'ha kwa chiwalo cha heni.
1SA 23:11 Ndaze, wanhu wa Keila wombika mmoko mwa Sauli? Ndaze, Sauli kokuya kota chitumagwa wa hegwe vyonyhuliche? Gwa Mkulu Nguluwi, Nguluwi wa Isilaeli ndangukulanda unyhidichile chitumagwa wa hegwe.” Mkulu Nguluwi nakamwidichila Daudi, “Ena, Sauli kokuya.”
1SA 23:12 Daudi nakamuuza Nguluwi, “Ndaze, wanhu wa Keila wombika heni na wanhu wa heni mmoko mwa Sauli?” Mkulu Nguluwi nakamwidichila, “Ena, wokuwika mmoko mwa heye.”
1SA 23:13 Hamba, Daudi na wanhu wa heye wawele kota miya sita, nawalawa Keila nawaluta honhu hamwe mbaka hanji. Sauli loyahuliche kota Daudi nakabilima kulawa Keila, Sauli halutile ako.
1SA 23:14 Lelo Daudi nayali yochikala kuli ngome za kuchiwala na kuli isi ya vidunda vya chiwala cha Sifu. Sauli nayali yompala chila zuwa, ila Nguluwi hamuwichile Daudi mmoko mwa Sauli.
1SA 23:15 Daudi loyawele ako Holeshi kuli chiwala cha Sifu, nakavizela kota Sauli nakoya leka yamkopole.
1SA 23:16 Lelo Yonatani mwana wa Sauli nakaluta kwa Daudi ako Holeshi kumkangaza nhumbula kota Nguluwi kowa na heye.
1SA 23:17 Yonatani nakamlonjela, “Uleche kudumba, mina Sauli mhaza wa heni hokufika hebu. Hegwe kowa mndewa wa Isilaeli na heni ndowa wa keli kwa hegwe. Sauli mhaza wa heni, kanguizela mbuli ayi.”
1SA 23:18 Weng'ha weli nawadita ilagano hali Mkulu Nguluwi. Hamba Yonatani nakahiluka haluga, ila Daudi nakapona Holeshi.
1SA 23:19 Lelo wala Wasifu nawaluta ako Gibeya kwa Sauli na kumlonjela, “Daudi kangivisa hali hetwe kuli ngome ako Holeshi, kuli chidunda cha Hakila, chiwele kuli ubanzi wa kusini mwa Yeshimoni.
1SA 23:20 Lelo gwa mndewa, uye mhela woneche woukona wa goya kudita ahyo, hetwe tokutanza kumuwika Daudi mmoko mwa hegwe.”
1SA 23:21 Sauli nakawedichila, “Mtambichizwe na Mkulu Nguluwi, kwa vila mwangijesa kwa chiwalo cha heni.
1SA 23:22 Mlute mkewiche goya ng'hatu. Mvizele honhu hoyalingulutaga Daudi chila mhela na whaani yamuwene ako. Ndonjelwa kota heye ka msugu ng'hatu.
1SA 23:23 Mvizele chila honhu hoyalingivisa, hamba mhiluche kundonjela mbuli zeng'ha. Hamba tolutasa na hemwe, wone kowa kuli honhu aho, ndompala hali ng'holo zeng'ha za Yuda.”
1SA 23:24 Lelo nawoka na kuluta mbaka Sifu womlongola Sauli. Daudi na wanhu wa heye nawali kuli kuchiwala cha Maoni, kuli ibindi lya Alaba ubanzi wa kusini mwa Yeshimoni.
1SA 23:25 Sauli na wanhu wa heye nawaluka kumpala Daudi. Wanhu nawamlonjela Daudi mbuli ayi, Daudi nakaluta mbaka kuli italawe na kikala kuli chiwala cha Maoni. Sauli loyahuliche mbuli azo, nakaluta kuli chiwala cha Maoni yomuwinza Daudi.
1SA 23:26 Sauli na wanhu wa heye nawaluta ubanzi awu wa chidunda na Daudi na wanhu wa heye nawaluta ubanzi uyage wa chidunda. Daudi nakabilima himahima kwa kumdumba Sauli, kwa vila Sauli nayali habehi kumibata Daudi.
1SA 23:27 Hamba nakoya munhu yumwe kwa Sauli na kumlojela, “Uye himahima, Wafilisti wanguitowa isi.”
1SA 23:28 Aho ndo Sauli nakahiluka na kuleka kumuwinza Daudi, nakaluta kitowa na Wafilisti. Ndo mina honhu aho hanguchemigwa Sela-hamahilekoti.
1SA 23:29 Hamba Daudi nakalawa honhu aho, nakaluta kikala kuli honhu ha kivisa ako Eni-gedi.
1SA 24:1 Sauli loyahiluche kulawa kitowa na Wafilisti, wanhu nawamlonjela kota Daudi ka kuli chiwala cha Eni-gedi.
1SA 24:2 Lelo Sauli nakahola wanhu elufu zidatu wazidahe kitowa ngondo kulawa Isilaeli yeng'ha, nakaluta nawo kumpala Daudi habehi na Mitalawe ja Mhene za Kisolo.
1SA 24:3 Nakafika honhu hawele na mibani ja ming'holo hafungo ha nzila, aho nakwali na mhalika, Sauli nakenjila amo nakaluta kitanza. Daudi na wanhu wa heye nawali mumo mgati lukami mwa ayo mhalika.
1SA 24:4 Wanhu wa Daudi nawalonga, “Ulole, lehano ndo lila zuwa lyoyakulonjele Mkulu Nguluwi kota kumuwika mng'honyo wa hegwe mmoko mwa hegwe nagwe komditila heye chinhu choneche choulinguchona chinoga.” Lelo Daudi nakajenda chinyele na kudumula lupembo lwa ivalo lya Sauli.
1SA 24:5 Daudi vyoyaditile ahyo, nakaluka kitagusa mnhumbula mwa heye kwa vila nakadumula lupembo wa ivalo lya Sauli,
1SA 24:6 ahyo Daudi nakawalonjela wanhu wa heye, “Mkulu Nguluwi yandemeze kudita chinhu kota achi kwa mkulu wa heni, yabakalizwe mafuta na Mkulu Nguluwi. Ndeche kumlumiza munhu yawele Mkulu Nguluwi nakambakaliza mafuta.”
1SA 24:7 Kwa ulonzi awo, Daudi nakawalemeza wanhu wa heye waleche kumtowa Sauli. Hamba Sauli nakenuka, nakalawa kuli mhalika nakalutilila na majendo ga heye.
1SA 24:8 Aho ndo Daudi nakalawa kuli mhalika na kumchema Sauli, yolonga, “Mndewa, mkulu wa heni.” Mndewa Sauli loyalolile kumbele, Daudi nakenamiza kumeho kwa heye kwa kumfugamila Sauli.
1SA 24:9 Daudi nakamuuza Sauli, “Lekachoni kwanguhulichiza ulonzi walingulonga wanhu, howokulonjela, ‘Daudi kangugana kukuditila wihe?’
1SA 24:10 Lelo ulole, lehano meho ga hegwe nagona Mkulu Nguluwi vyoyakuwichile kuli moko ga heni. Wanhu wanji nawandonjela ndikukopole, ila ndikuleka kwa kukonela isungu. Nandiwalonjela kota ndemwela kumlumiza mkulu wa heni kwa vila heye ka mbakalizwa mafuta wa Mkulu Nguluwi.
1SA 24:11 Ulole, mhaza wa heni, dedede ulole lupembo alu lwa ivalo lya hegwe mmoko mwa heni. Ndumula lupembo lwa ivalo lya hegwe ne kukukopola, lelo koweza kuvizela kota heni ndahela nongwa ya kudita wihe ama kukubelenhuka. Siditile wihe kwa hegwe, ila hegwe kwangumhala leka ung'hopole.
1SA 24:12 Mkulu Nguluwi yatutaguse hetwe na yakuhilusile chibida kwa wihe wounditile, ila heni sikulumiza hegwe.
1SA 24:13 Kota ulonzi wa katali vyoulingulonga, ‘Wihe wangulawaga kwa wanhu wehile,’ ila heni hambe ndikulumize hegwe.
1SA 24:14 Ndaze, mndewa wa Isilaeli nakalawa leka yamuwinze munhu whachi? Ndaze, kupelemba libwa lifile ama sewe imwe?
1SA 24:15 Mkulu Nguluwi yawe mtagusa wa hetwe na yataguse hali hetwe. Heye yalole mbuli ayi, yanhowanile na kundohola kulawa kuli moko ga hegwe.”
1SA 24:16 Daudi loyalonjile hila, Sauli nakalonga, “Ndaze, alyo ndo lizi lya hegwe mwana wa heni Daudi?” Sauli nakalila kwa usungu.
1SA 24:17 Hamba Sauli nakamlonjela Daudi, “Hegwe ndo kutanganika kusinda heni, mina hegwe nakunditila ganojile, ila heni ndikuditila gehile.
1SA 24:18 Lehano nakundajila vyoulingunditila ganojile. Mkulu Nguluwi nakambika mmoko mwa hegwe, ila hegwe hung'hopole.
1SA 24:19 Ndaze, munhu wone yamibate mng'honyo wa heye komleka yalute ne kumditila chinhu choneche chihile? Lelo Mkulu Nguluwi yakuhilusile ganojile kota vyounditile lehano.
1SA 24:20 Kukomya, ndivizela kota kowa mndewa wa Isilaeli na undewa wa Isilaeli wowa nzinzili kuli ulongozi wa hegwe.
1SA 24:21 Lelo wilahe kwa Mkulu Nguluwi kota huweza kuwakopola wang'holozangu ne ivyazi lya heni leka itagwa lya ivyazi lya heni lilutilile.”
1SA 24:22 Daudi nakelaha. Hamba Sauli nakahiluka kaye kwa heye, ila Daudi na wanhu wa heye nawahiluka kuli ngome ya hewo.
1SA 25:1 Lelo Samweli nakabagama, wanhu wa isi ya Isilaeli weng'ha naweting'hana kwa chiwalo cha kulombocheza. Nawamtila habehi na haluga ha heye ako Lama. Hamba Daudi nakaluta kuli chiwala cha Palani.
1SA 25:2 Ako Maoni nakwali na munhu yumwe yawele na mijito kuli muji wa Kalimeli. Munhu ayo nayali na lufufu lwinji lwa ming'holo elufu zidatu na mhene elufu imwe. Nayali yojidumula milaika ja migongolo jake ako Kalimeli.
1SA 25:3 Munhu ayo nayali yochemigwa Nabali na mchewake nayali yochemigwa Abigaili. Abigaili nayali na luhala na yanojile kumeho kwa heye, ila Nabali yula mlume wa heye wa lukolo lwa Kalebu, nayali yawele na ng'halazi na madito gehile kuli mijito ja heye.
1SA 25:4 Lelo Daudi loyawele ako kuchiwala, nakahulika kota Nabali nayali kuko kangudumula milaika ja ming'holo ja heye.
1SA 25:5 Daudi nakawalajiza wasongolo kumi, nakawalonjela, “Mlute ako Kalimeli kwa Nabali, mkamlonjele ndangumlamsa.
1SA 25:6 Momlonjela hino, ‘Kikala goya kuwe na hegwe na wang'holozo na choneche chiwele na hegwe!
1SA 25:7 Heni nanyhulika kota hegwe kuna wanhu wangudumula milaika ja ming'holo ja hegwe, ndangugana uvizele kota wadimi wa hegwe nawali hamwe na hetwe, natwe hatuwadiltile wihe hewo. Mhela weng'ha lowawele ako Kalimeli haduhu chinhu cha hewo choneche chajilile.
1SA 25:8 Wauze wakola mijito wa hegwe, wokulonjela. Lelo uwaditile ganojile wasongolo wa heni, mina hetwe natuya mhela wa kusangalala. Dedede uwape vitumagwa wa hegwe na mwanago Daudi choneche chouwele nacho.’ ”
1SA 25:9 Lelo wanhu wa Daudi lowafichile, nawamlonjela Nabali kota vyoyawalonjele Daudi. Hamba nawabeteza.
1SA 25:10 Nabali nakawedichila wala vitumagwa wa Daudi, “Ayu Daudi ndo whaani? Mwana wa Yese ndo whaani? Mazuwa gano vitumagwa wenji wanguwabilima wakulu wa hewo.
1SA 25:11 Lekachoni nyhole ibumunda lya heni na mazi ga heni na miwunde jombichile kwa chiwalo cha wanhu wa heni walingudumula milaika ja ming'holo na kuwapa wanhu wawele hawalinguzeleka wangulawila kohi?”
1SA 25:12 Wasongolo wa Daudi nawahiluka na kumlonjela Daudi kota vyowalonjelwe na Nabali.
1SA 25:13 Daudi nakawalonjela wanhu wa heye, “Chila munhu yahole ipanga lya heye!” Nawadita ahyo na Daudi nakahola kahi ipanga lya heye. Wanhu wawele kota miya zine hino nawamuwinza Daudi na wanhu kota miya mbili nawapona bahala kulolela vinhu vya hewo.
1SA 25:14 Chitumagwa yumwe wa Nabali nakamlonjela Abigaili, mchewake Nabali, nakalonga, “Ndaze, nakuhulika? Daudi nakawalajiza wanhu kulawa kuli chiwala kumlamsa mkulu wa hetwe, ila heye nakawaliga wanhu awo.
1SA 25:15 Ila wanhu wano nawali wanojile ng'hatu kwa hetwe. Hawatuditile gehile mhela weng'ha hetwe lotuwele ako kuli migunda habehi na hewo, hatwajilize chinhu choneche.
1SA 25:16 Wanhu awo nawali kota lukanzi kwa kutwamila nemisi na nechilo mhela weng'ha lotuwelengudima ming'holo ja hetwe habehi na hewo.
1SA 25:17 Lelo wijese na kuchizela chinhu choulingugana kudita. Mina wihe wanguya kwa mkulu wa hetwe na wanhu wa heye weng'ha. Heye ka mjuvi na kuduhu ne munhu wa kulongasa na heye.”
1SA 25:18 Abigaili nakadita himahima, nakahola mibumunda miya mbili na vihako vya ngozi vya kuwichila divai vili na ming'holo jihano jiwichigwe goya kwa kulya na kilo kumi na saba za nyhule zikalanjigwe na vilundo miya imwe vya zabibu zikalile na vilundo miya mbili vya tini zikalile. Vinhu avi vyeng'ha naviwichigwa mchanya mwa midogowi.
1SA 25:19 Nakawalonjela wala vitumagwa wa heye, “Mlongole kumwando kwa heni. Heni ndowawinza.” Ila hamlonjele choneche mlume wa heye, Nabali.
1SA 25:20 Loyakwinile idogowi lya heye kuli ibindi lya chidunda, Daudi na wanhu wa heye nawali wodulika kuluta kwa heye, naweting'hana.
1SA 25:21 Daudi nakejesa, “Nandali mwamizi wa vinhu vya Nabali mhela weng'ha kula kuli chiwala haduhu ne chinhu choneche chajilile, hanga sipeligwe choneche. Heye nakanditila wihe hanga heni ndimditila ganojile.
1SA 25:22 Nguluwi yanditile hihi ng'hatu, wone ndimleche mkomu mlume yumwe hali hewo wanhu wa Nabali loifika lufuku!”
1SA 25:23 Baho du Abigaili vyoyamuwene Daudi, nakadulika himahima kulawa mchanya mwa idogowi lya heye, nakafunama ng'hatu kumwando kwa Daudi.
1SA 25:24 Naketoza mmagulu ga Daudi na kulonga, “Mkulu wa heni, nongwa yeng'ha iwe kwa heni. Ndangukulanda uhulichize ulonzi wa heni, chitumagwa wa hegwe.
1SA 25:25 Ndangukudedeza, mkulu wa heni, uleche kumjesa munhu ayu, Nabali, ka mjuvi. Heye kangiwhana na itagwa lya heye na itagwa lya heye lina mana ya upoka, nawo upoka wanguluta hamwe na heye. Ila heni chitumagwa wa hegwe siwawene wala wasongolo wa hegwe mkulu wa heni wouwalajize.
1SA 25:26 Lelo Mkulu Nguluwi nakakulemeza hegwe mkulu wa heni, kukopola na kuhilusa chibida kwa moko ga hegwe. Kota Mkulu Nguluwi vyoyalingikala na hegwe vyoulingikala, wang'honyo wa hegwe na weng'ha walingunuwila kukuditila wihe hegwe, mkulu wa heni, weng'ha wagazigwe kota Nabali vyoyogazigwa.
1SA 25:27 Lelo ubochele ndolendole ayi yondikugalile, wapegwe wasongolo weng'ha walingumuwinza mkulu wa heni.
1SA 25:28 Ndangukulanda ugalechele gehile ga heni chitumagwa wa hegwe. Kukomya Mkulu Nguluwi kowimiza nzinzili ulongozi wa hegwe na ulongozi wa walelwa wa hegwe, kwa vila hegwe mkulu wa heni kwangitowa ngondo kwa chiwalo cha Mkulu Nguluwi. Wihe haukoneka kuli mazuwa geng'ha ga ukomu wa hegwe.
1SA 25:29 Lowokoneka wanhu wangukuwinza na kugana kuudumya ukomu wa hegwe, Mkulu Nguluwi kowamila ukomu wa hegwe kota mwamizi vyoyalingwamila ng'hano, ila ukomu wa wang'honyo wa hegwe, Mkulu Nguluwi koutoza kota iganga kulawa kuli mhembeyo.
1SA 25:30 Mkulu Nguluwi hoyowa yakuditile hegwe mkulu wa heni chila chinhu chinojile choyalagane kuwala hegwe na kukuhagula uwe chilongozi wa Isilaeli,
1SA 25:31 ahyo hegwe hauwa na nongwa ne chinhu cha kuzudiza mnhumbula mwa hegwe kwa kubohola danda kwa chiwalo cha kuhilusa chibida. Mkulu Nguluwi hoyowa yakuditile ganojile ago, ndangukulanda ung'humbuche heni chitumagwa wa hegwe.”
1SA 25:32 Daudi nakamlonjela Abigaili, “Yatogoligwe Mkulu Nguluwi, Nguluwi wa Isilaeli yakulajize lehano uye kiting'hana na heni.
1SA 25:33 Lutambichizwe luhala lwa hegwe na gwegwe baho kwa kundemeza lehano ndeche kubohola danda na kihilusila chibida nene baha.
1SA 25:34 Kukomya, Mkulu Nguluwi, Nguluwi wa Isilaeli, yandemeze heni ndeche kukuditila wihe hegwe. Wone hanawalikuya himahima kiting'hana na heni, kukomya, lufuku haduhu mlume ne yumwe hali Nabali yahalechigwe yawele mkomu.”
1SA 25:35 Hamba Daudi nakabochela vinhu vyeng'ha vyoyapegwe na Abigaili, nakamlonjela Abigaili, “Uhiluche haluga ha hegwe kwa kikala goya. Ulole, ndiuhulika ulonzi wa hegwe, nang'hunda kulanda kwa hegwe.”
1SA 25:36 Hamba Abigaili nakahiluka kwa Nabali, nakamfika Nabali kana mnvina ng'hulu kota ya chiundewa haluga ha heye. Nhumbula ya ayo Nabali naisangalala ng'hatu na nayali yagalile. Kwa chiwalo acho hambe yamlonjele chinhu choneche mbaka lufuku.
1SA 25:37 Lufuku, divai loilawile kumutwi kwa Nabali, mchewake nakamlonjela mbuli azo zeng'ha, baho Nabali nakazilika, nayali kota iganga.
1SA 25:38 Mazuwa kumi hamba, Mkulu Nguluwi nakamtowa Nabali, Nabali nakabagama.
1SA 25:39 Daudi loyahuliche kota Nabali nakabagama, nakalonga, “Yatogoligwe Mkulu Nguluwi yawele yamhilusile chibida Nabali kwa kundiga na kundemeza heni chitumagwa wa heye ndeche kudita wihe. Mkulu Nguluwi nakamhilusila Nabali kwa gehile ga heye.” Hamba Daudi nakalajiza wanhu wamuuze Abigaili leka yamhese yawe mchewake.
1SA 25:40 Vitumagwa wa Daudi lowafichile kwa ayo Abigaili ako Kalimeli, nawamlonjela, “Daudi nakatulonjela hetwe tukuhole hegwe leka uwe mchewake.”
1SA 25:41 Abigaili nakafugama hali hewo, nakalonga, “Ndowa chitumagwa wa Daudi na kuwahovuga magulu vitumagwa wa heye.”
1SA 25:42 Abigaili nakadita himahima, nakenuka na kukwina idogowi lya heye, nayali hamwe na vitumagwa wa heye wadala wahano, nakawawinza hewo vitumagwa wa Daudi naye nakawa mche wa Daudi.
1SA 25:43 Daudi nakamhola Ahinoamu kulawa Yesileeli. Lelo hewo weli nawali wache wa heye.
1SA 25:44 Mhela awo, Sauli nakamha Paliti mwana wa Laishi munhu wa kulawa Galimu, mhinza wa heye Mikali yawele mche wa Daudi.
1SA 26:1 Lelo hewo Wasifu nawaluta ako Gibeya kwa Sauli nawamlonjela kota Daudi kevisa mlichidunda cha Hakila, nzingo ya kolilawilaga isanya ako Yeshimoni.
1SA 26:2 Sauli nakaluta hamwe na wamizi elufu zidatu wazidahe wa Isilaeli kuli chiwala cha Sifu kumpala Daudi.
1SA 26:3 Naye Sauli nakawika kambi ya heye mchanya mwa chidunda cha Hakila, behi na nzila, kolilawilaga isanya ako Yeshimoni, ila Daudi nayali yochikala kuli chiwala. Daudi loyavizelele kota Sauli nakamuwinza kukula kumpala heye,
1SA 26:4 nakalajiza wanhu wa kupugajiza, nakapegwa mbuli za kukomya kota Sauli ka kuko.
1SA 26:5 Daudi nakaluta honhu hoyawele Sauli. Daudi nakahona honhu yawasile Sauli na Abuneli. Abuneli nayali mwana wa Neli, mkulu wa wamizi wa heye. Sauli nakawasa mli kambi nawo wamizi nawali mli mihema ja hewo womzunguluta heye.
1SA 26:6 Daudi nakamlonjela Ahimeleki yawele Muhiti na Abishayi, mng'holoze Yoabu, mamo wa hewo nayali yochemigwa Seluiya, “Whaani koluta hamwe na heni kuli kambi ya Sauli?” Abishayi nakamlonjela, “Heni ndoluta hamwe na hegwe.”
1SA 26:7 Lelo Daudi na Abishayi nawaluta nechilo kuli kambi za Sauli, ulole, Sauli nayali yawasile mgati mwa kambi na igoha lya heye nalihoma na kwima kuli misanga behi na mutwi wa heye. Abuneli na wamizi wa heye nawali wawasile kumzunguluta Sauli.
1SA 26:8 Abishayi nakamlonjela Daudi, “Nguluwi lehano nakamuwika mng'honyo wa hegwe mmoko mwa hegwe. Lelo ng'hundize ndimhome na alyo igoha mbaka kuli misanga kamwe hela, simhoma kahi lwa keli.”
1SA 26:9 Ila Daudi nakamlonjela Abishayi, “Uleche kumtowa, mina ndo whaani yoweza kugolola moko wa heye na kumtowa munhu yabakalizwe mafuta na Mkulu Nguluwi naye yawe yalihela nongwa?
1SA 26:10 Kota Mkulu Nguluwi vyoyawele mkomu, heye Mkulu Nguluwi ndo komtowa ama zuwa lya heye lya kubagama lyomfika ama koluta kuwele na ngondo naye kobagama kuko.
1SA 26:11 Hebu, ndeche kugolola moko wa heni kwa kumtowa munhu yabakalizwe mafuta na Mkulu Nguluwi. Ila uhole igoha lya heye liwele behi na mutwi wa heye na alyo ibuli lya heye lya mazi, tulute.”
1SA 26:12 Lelo Daudi nakahola lila igoha na lila ibuli liwele habehi na mutwi wa Sauli nawaluta. Ila haduhu ne munhu yonile na kuizela mbuli ayo ne kwinuka, mina weng'ha nawali webatigwe na usinjizi lukami kwa vila Mkulu Nguluwi nakawegalila usinjizi.
1SA 26:13 Hamba Daudi nakaluta kumwambu, nakema mchanya mwa chidunda kutali na ikugusi lya Sauli.
1SA 26:14 Naye Daudi nakawachemeleza wanhu wa Sauli na Abuneli mwana wa Neli. Daudi nakalonga, “Abuneli, kwangunyhulika heni?” Abuneli nakauza, “Hegwe kwa whaani kwangumchema mndewa?”
1SA 26:15 Daudi nakamwidichila, “Abuneli, hegwe huwele mlume udahile kitowa ngondo? Kahi ndo whaani yawele kota hegwe Isilaeli yeng'ha? Lelo lekachoni humwamile mkulu wa hegwe mndewa? Lole, munhu yumwe nakoya kumkopola mkulu wa hegwe mndewa.
1SA 26:16 Mbuli ayi youditile hainojile hebu. Kota Mkulu Nguluwi vyoyawele mkomu, ndangilaha hegwe na wanhu wa hegwe, mwanguganigwa kubagama, kwa vila hammwamile mkulu wa hemwe, yabakalizwe mafuta na Mkulu Nguluwi. Lelo mlole lyakohi igoha lya mndewa na lila ibuli lya mazi viwele kumutwi kwa heye.”
1SA 26:17 Naye Sauli nakalizela lizi lya Daudi, nakamuuza, “Ali ndo lizi lya hegwe Daudi mwana wa heni?” Daudi nakedichila, “Ena mkulu, ndo lizi lya heni.”
1SA 26:18 Hamba nakalutilila kulonga, “Lekachoni hegwe mkulu wa heni kwangumhelemba heni chitumagwa wa hegwe? Ndita choni heni? Ndita wihe wachi kwa hegwe?
1SA 26:19 Lelo ndangukudedeza hegwe, mndewa wa heni, uhuliche ulonzi wa chitumagwa wa hegwe. Wone Mkulu Nguluwi ndo yakulonjele hegwe uye kungaza, yaikunde ayi nhambiko ya heni na kugalula majesa ga heye. Ila wone ndo wanhu, lelo awo wanhu wopanjilwa na Mkulu Nguluwi, kwa vila nawambinga kulawa isi iwele Mkulu Nguluwi nakaipa nhanzi ya heni, walonga, ‘Ulute ukafugamile milungu jinji.’
1SA 26:20 Hegwe, mndewa wa Isilaeli nakuya kuno kupala sewe imwe. Nakuya kumhala kota munhu yalingupala chideje kuli chidunda. Lelo uleche kuleka danda ya heni ibohoche kuli isi ya wanhu wanji kutali na Mkulu Nguluwi.”
1SA 26:21 Sauli nakedichila, “Heni ndita gehile, uhiluche Daudi mwana wa heni. Hambe ndikuditile wihe kahi kwa vila ukomu wa heni nawali mmoko mwa hegwe lehano. Ulole ndita upoka na ndita gehile ng'hatu.”
1SA 26:22 Daudi kedichila, “Gwa mndewa, ulole igoha lya hegwe lino, mlonjele msongolo yumwe yoye yahole.
1SA 26:23 Mkulu Nguluwi komha chonolo chila munhu yalingudita gatanganiche na yalingumuwinza heye ne kuleka. Mkulu Nguluwi nakakuwika mmoko mwa heni, ila heni ndema kugolola moko wa heni kwa kukuditila wihe kwa vila hegwe nakubakalizwa mafuta na Mkulu Nguluwi.
1SA 26:24 Kota vyondikulechile ne kukukopola lehano, Mkulu Nguluwi yadite hihyo kwa heni na kundohola kulawa kuli magazo geng'ha.”
1SA 26:25 Sauli nakamlonjela Daudi, “Nguluwi nayakutambichize mwana wa heni Daudi. Kodita mbuli ng'hulu, kahi kosumya.” Daudi nakaluta naye Sauli nakahiluka kaye kwa heye.
1SA 27:1 Daudi nakalonga mnhumbula ya heye, “Zuwa limwe Sauli kong'hopola kwa moko wa heye yuye. Haduhu mbuli inojile kwa heni kusinda kubilimila isi ya Wafilisti. Naye Sauli kogozola kumhala kuli mbaka jeng'ha ja isi ya Isilaeli, nani ndochilohola kulawa kuli moko ga heye.”
1SA 27:2 Daudi na wanhu wa heye miya sita nawaluta kwa Akishi, mwana wa Maoki, mndewa wa Gati.
1SA 27:3 Daudi na wanhu wa heye na wang'holozawo nawekala na Akishi ako Gati. Daudi nayali na wache weli, Ahinoamu kulawa Yesileeli na Abigaili yawele aho hamwande nayali mche wa Nabali kulawa Kalimeli.
1SA 27:4 Sauli loyahuliche kota Daudi nakabilimila Gati, hampalile kahi.
1SA 27:5 Zuwa limwe Daudi nakamlonjela Akishi, “Wone nandikunojeza, umhe heni honhu ha muji kuli isi, leka ndikale ako. Haduhu chinhu cha kundita ndikale na hegwe hano kuli muji wa chiundewa.”
1SA 27:6 Zuwa lila Akishi nakamha Daudi muji wa Sikilagi. Kwa chiwalo acho, kulawa mhela wula, muji awo wa Sikilagi ndo wa mndewa wa Yuda.
1SA 27:7 Daudi nakekala ako kuli isi ya Wafilisti kwa mwaka umwe na myezi jine.
1SA 27:8 Kwa mhela awo Daudi na wanhu wa heye nawaluta kuwatowa Wageshuli na Wagilisi na Waamaleki walingikala kuli isi ayo kulawa katali. Naketowa mbaka Shuli habehi na Misili.
1SA 27:9 Daudi nakaitowa isi ayo ne kumleka munhu yoneche yawele mkomu, hawele mlume ne mdala. Nakahola ming'holo na misenga na midogowi na ngamiya na mivalo, hamba nakahiluka kwa Akishi.
1SA 27:10 Akishi nakamuuza Daudi, “Ndaze, lehano nakitowa mbaka kohi?” Daudi nakamwidichila kwa udesi kota ubanzi wa Negebu ya Yuda ama ubanzi wa Negebu ya Wayelameeli ama ubanzi wa Negebu ya Wakeni.
1SA 27:11 Daudi hamlechile munhu yoneche yawele mkomu ne mlume ne mdala leka yegaligwe Gati. Nakejesa mnhumbula ya heye, “Waleche kutulonjeleza na kulonga, ‘Daudi ndo yaditile ahyo.’ ” Nayali yodita hihyo mhela loyawele yochikala kuli isi ya Wafilisti.
1SA 27:12 Lelo Akishi nakakunda kota Daudi nakawatowa Waisilaeli, nakalonga, “Nakazudilwa ng'hatu na wang'holoze Waisilaeli. Lelo kowa chitumagwa wa heni mazuwa geng'ha.”
1SA 28:1 Mazuwa gala Wafilisti nawakungajiza vilundo vya wamizi wa hewo nawaluta kitowa na wanhu wa Isilaeli. Akishi nakamlonjela Daudi, “Uvizele kota hegwe na wanhu wa hegwe molawa kuli kambi hamwe na heni kitowa ngondo.”
1SA 28:2 Daudi nakamwidichila Akishi, “Goya. Kovizela choyalingugana kudita chitumagwa wa hegwe.” Akishi nakamlonjela Daudi, “Heni ndokudita hegwe unyamile mazuwa geng'ha.”
1SA 28:3 Mhela loyabagame Samweli, Waisilaeli weng'ha nawalombocheza kwa kubagama kwa Samweli, nawamtila ako Lama kouwele muji wa heye yuye. Sauli nakawabilimisa walaguzi na wahawi kuli isi ya heye.
1SA 28:4 Wafilisti naweting'hana na kuwika kambi ako Shunemu. Sauli nakawakungajiza Waisilaeli weng'ha na kuwika kambi za hewo ako kuli chidunda cha Gilibowa.
1SA 28:5 Sauli loyawawene wamizi wa Wafilisti nakaluka kudumba na nhumbula ya heye nayali na lunhwinhwi lukami.
1SA 28:6 Ila Sauli loyalandile kutanzigwa na Mkulu Nguluwi, Mkulu Nguluwi nahamwidichile kwa kulota ne kulonga kwa Ulimu ne kwa nzila ya waloli.
1SA 28:7 Sauli nakawalonjela vitumagwa wa heye, “Mmhalile mdala mlaguzi wa kunhanza.” Vitumagwa wa heye nawamwidichila, “Ulole, hana mdala yumwe mlaguzi ako Eni-doli.”
1SA 28:8 Lelo Sauli nakegalusa kwa kuvala mivalo jinji, heye na wanhu weli wa heye nawaluta hamwe na heye ako kwa ayo mdala nechilo na kumlonjela, “Dedede ndolele, ngalile hano ihoka lya yoneche yondikulonjela.”
1SA 28:9 Yula mdala nakamlonjela, “Ulole, hegwe nakuvizela vyoyaditile Sauli, vyoyawabilimise kuli isi ya Isilaeli, walaguzi na wahawi. Lekachoni kwangumbichila idiwa leka mbagame?”
1SA 28:10 Sauli nakelaha na kulonga, “Kota Mkulu Nguluwi vyoyawele mkomu ndangilaha, hugazigwa hebu kwa chiwalo cha mbuli ayi.”
1SA 28:11 Yula mdala nakamuuza, “Ndaze, ndimigale whaani?” Sauli nakamwidichila, “Ngalile ihoka lya Samweli.”
1SA 28:12 Yula mdala loyaliwene ihoka lya Samweli nakatowa iyowe kwa kulonga, “Lekachoni nakudeta? Hegwe ndo Sauli.”
1SA 28:13 Mndewa nakamlonjela, “Uleche kudumba! Kwangona choni?” Yula mdala nakamwidichila Sauli, “Ndangulyona ihoka lyangulawa kuli misanga.”
1SA 28:14 Sauli nakamuuza yula mdala, “Wa kota ulajilo wa choni?” Yula mdala nakedichila, “Wa kota sekulu kangukwina kuchanya, nakegubika ikanzu.” Aho Sauli nakavizela kota ayo ka heye yuye Samweli. Sauli nakenamiza na kufugama.
1SA 28:15 Lelo Samweli nakamlonjela Sauli, “Lekachoni kwangunhunya na kundigala kuchanya?” Sauli nakedichila, “Heni ngazika lukami kwa vila Wafilisti wangitowa ngondo na heni na Nguluwi nakandeka, hanyhidichile kahi kwa nzila ya waloli ne kwa kulota. Lelo nandikuchema undonjele chinhu cha kudita.”
1SA 28:16 Samweli nakalonga, “Lekachoni kwangumbuza? Ama kwa vila Mkulu Nguluwi nakakuleka, nakawa mng'honyo wa hegwe?
1SA 28:17 Mkulu Nguluwi nakakuditila kota vyoyalonjile kwa nzila ya mlomo wa heni. Mkulu Nguluwi nakaudadula undewa kulawa mmoko mwa hegwe, nakamha Daudi yawele Muisilaeli myago.
1SA 28:18 Kwa vila hegwe hauhulichize lizi lya Mkulu Nguluwi na hambe ulajile ng'halazi ya heye kwa Waamaleki. Kwa chiwalo acho ndo mina Mkulu Nguluwi kangukuditila mbuli ayi lehano.
1SA 28:19 Mzidi wa ago, Mkulu Nguluwi kowawika mmoko mwa Wafilisti, mitondo hegwe na wanago walume mowa hamwe na heni. Mkulu Nguluwi kowawika wamizi wa Isilaeli mmoko mwa Wafilisti.”
1SA 28:20 Baho du Sauli nakagwa na kigolola yawele yamemile lunhwinhwi kwa chiwalo cha ulonzi wa Samweli. Mong'ho wa heye naupungula kwa vila hadile chinhu choneche kwa mhela wa zuwa limwe.
1SA 28:21 Yula mdala nakaluta kwa Sauli, nakamona Sauli nayali yodumba lukami, nakamlonjela, “Lole, heni chitumagwa wa hegwe, nyhulika lizi lya hegwe nangana kwajiliza ukomu wa heni kwa kudita choundonjele.
1SA 28:22 Lelo dedede uhulichize lizi lya chitumagwa wa hegwe, ndokuwichila mibumunda michefu ulye uwe na mong'ho leka ulutilile na majendo ga hegwe.”
1SA 28:23 Ila Sauli nakalema na kulonga, “Ndema kulya.” Wala vitumagwa wa heye na yula mdala nawamdedeza yalye, hamba nakakunda. Lelo nakenuka kulawa hasi na kikalisa mchinhanda.
1SA 28:24 Yula mdala nayali na ilogota linojile haluga ha heye, nakadita himahima kulidumula singo lila ilogota, nakahola utimbo na kugongomanya ibumunda lilihela usaso.
1SA 28:25 Mdala nakawika chilyo chila hali Sauli hamwe na vitumagwa wa heye, nawalya. Hamba nechilo hihila nawenuka, nawoka.
1SA 29:1 Lelo Wafilisti nawakungajiza vilundo vyeng'ha vya wamizi wa hewo ako Afeki, Waisilaeli nawawika kambi behi na nzasa iwele ako Yesileeli.
1SA 29:2 Wakulu wa Wafilisti lowawele wokola hamwe na vilundo vya hewo vya mamiya na vya maelufu, Daudi na wanhu wa heye nawali wojenda hamwe na Akishi ako kumbele.
1SA 29:3 Wakulu wa Wafilisti nawauza, “Wang'honyo wa hetwe wano Waisilaeli wangukola choni hano?” Akishi nakawalonjela wala wakulu wa Wafilisti, “Ayu ndo Daudi, chitumagwa wa Sauli, mndewa wa Waisilaeli, ka hamwe na heni kwa mhela winji. Kulawa loyalawile Isilaeli kuwa hamwe na heni, hambe mbone wihe woneche kwa heye.”
1SA 29:4 Ila wakulu wa Wafilisti nawali na ng'halazi kwa Akishi, nawamlonjela, “Mhiluse ayu kuli muji woumpele. Hambe yalute hamwe na hetwe kitowa ngondo, mhela wa kitowa kobelenhuka, kowa mng'honyo wa hetwe. Hambe wone kota munhu ayu kowa na nzila ya kihanyisa na mkulu wa heye hamba kowa mng'honyo wa hetwe na kutukopola?
1SA 29:5 Ndaze, ayu hawele ndo yuyula Daudi, yawele wadala nawali wokwimba mbuli za heye kuli mnvina, wolonga. “ ‘Sauli nakakopola elufu, ila Daudi nakakopola makumi elufu?’ ”
1SA 29:6 Akishi nakamchema Daudi na kumlonjela, “Kota Mkulu Nguluwi vyoyawele mkomu, hegwe nakuwa munhu wa kukomya kwa heni. Yowa mbuli inojile kwa heni wone toluta hamwe kitowa ngondo, mina heni siuwene wihe woneche kwa hegwe kulawa mhela wula wowuyile hegwe. Ila wakulu wanji hawakukundile hegwe.
1SA 29:7 Lelo uhiluche kwa kikala goya kaye kwa hegwe, uleche kudita wihe hali wakulu wa Wafilisti.”
1SA 29:8 Daudi nakamlonjela Akishi, “Ila nandita choni? Hegwe nakona choni kwa heni chitumagwa wa hegwe, kulawa mhela wula weng'ha hondikale hano hamwe na hegwe, lekachoni hambe ng'hundigwe kuluta kitowa na wang'honyo wa hegwe mndewa wa heni?”
1SA 29:9 Akishi nakamwidichila Daudi, “Heni ndivizela kota hegwe kunoga hali heni kota mhilisi wa Nguluwi. Ila wala wakulu wa Wafilisti nawalonga, ‘Ayu holuta hamwe na hetwe kitowa ngondo.’
1SA 29:10 Lelo mitondo winuche lufuku hegwe na wanhu wa hegwe, hala du lokubwemwenzuka, mlute.”
1SA 29:11 Ahyo Daudi nakenuka lufuku heye na wanhu wa heye, nawaluta kuli isi ya Wafilisti. Wafilisti nawaluta Yesileeli.
1SA 30:1 Hamba zuwa lya kadatu, Daudi na wanhu wa heye nawafika Sikilagi. Waamaleki nawali woivaba isi ya Negebu na kuutowa muji wa Sikilagi na kuulakaza kwa chiluli.
1SA 30:2 Nawawahola wadala na wana. Nawawahola weng'ha wawele wakomu hawamkopole munhu yoneche.
1SA 30:3 Daudi na wanhu wa heye lowafichile mujini, nawaufika muji weng'ha ulakazwe na wache wa hewo na wana wa hewo wasongolo na wahinza nawaholigwa.
1SA 30:4 Daudi na wamizi wa heye nawaluka kulila, nawalila mbaka nawesilwa mong'ho wa kulutilila kahi.
1SA 30:5 Wache weli wa Daudi, Ahinoamu kulawa Yesileeli na Abigaili wa Kalimeli yafiligwe na mlume wa heye Nabali, hewo kahi nawaholigwa.
1SA 30:6 Lelo Daudi nayali kuli magazo makulu kwa vila wamizi wa heye nawali na usungu mnhumbula za hewo kwa kwajiliza wana wa hewo. Lelo nawagana kumtowa Daudi kwa maganga, ila Daudi nakekangaza kwa kumtumbila Mkulu Nguluwi, Nguluwi wa heye.
1SA 30:7 Daudi nakamlonjela mtambika Abiatali, mwana wa Ahimeleki, “Wingalile chizibao cha mtambika.” Abiatali nakamigalila.
1SA 30:8 Daudi nakamuuza Mkulu Nguluwi, “Ndaze, ndiwawinze wamizi wano? Ndaze, ndowafika?” Mkulu Nguluwi nakamwidichila, “Wawinze kwa vila kowebata na kowalohola wala waholigwe kulawa kwa hemwe.”
1SA 30:9 Lelo Daudi nakaluta hamwe na wala wamizi miya sita wawele na heye. Lowafichile kuli ibindi lya Besoli, nawawafika wanhu wamwe nawalechigwa aho.
1SA 30:10 Ila Daudi nakalutilila kuwawinza wala wamizi aku yawele na wanhu miya zine. Wanhu miya mbili nawapona bahala kwa vila nawali watoka lukami, nawalemwela kuloka lwanda alo.
1SA 30:11 Wala wanhu wawele na Daudi nawamfika munhu yumwe Mmisili kuli chiwala, nawamhilika kwa Daudi. Nawamha munhu ayo ibumunda na mazi.
1SA 30:12 Nawamha kahi chilundo cha tini zikalile na vilundo vili vya zabibu zikalile. Loyasindile kulya, nakawa na mong'ho kwa vila aho hamwande nayali hadile ne kunwa mazi kwa mhela wa mazuwa gadatu.
1SA 30:13 Daudi nakamuuza, “Mkulu wa hegwe ndo whaani na kwangulawila kohi?” Heye nakamwidichila, “Heni nda Mmisili, chitumagwa wa Mwamaleki. Mkulu wa heni nakandeka kumbele kwa mazuwa gadatu kwa vila nandali nditamika.
1SA 30:14 Hetwe natuivaba isi ya Negebu ya Wakeleti na honhu ha Yuda na Negebu ya Kalebu. Muji wa Sikilagi natuulakaza.”
1SA 30:15 Daudi nakamuuza, “Ndaze, kondongoza mbaka kwa wala Waamaleki?” Yula msongolo nakamwidichila, “Wilahe kwa Nguluwi kota hung'hopola ne kumbika mmoko mwa mkulu wa heni, nani ndokuhilika mbaka kowawele.”
1SA 30:16 Ahyo nakamlongoza Daudi mbaka kowawele Waamaleki. Lowafichile hala nawawafika wanhu waholigwe na wala wamizi nawali wasambaluche chila honhu, kwa vila nawali wolya na kunwa na kudita mnvina kwa chiwalo cha vila vinhu vinji vyowaholile kulawa isi ya Wafilisti na isi ya Yuda.
1SA 30:17 Daudi nakawatowa kulawa kubwemwenzuka mbaka mhela wa kuzinga kwa isanya. Haduhu mlume ne yumwe yasulupuche, ila wasongolo miya zine nawakwina ngamiya na kubilima.
1SA 30:18 Daudi nakalohola chila chinhu chowaholile Waamaleki na wache wa heye weli kahi nakawalohola.
1SA 30:19 Haduhu choneche chajilile, msongolo ama sekulu ama mwana mlume ama mhinza ama chinhu choneche chowaholile. Daudi nakahilusa chila chinhu.
1SA 30:20 Daudi nakahola vilundo vyeng'ha vya ming'holo na misenga, wanhu wa heye nawajilongoza migongolo jila kumwando kwa migongolo minji ja kufujigwa, wolonga, “Migongolo aji ndo chonolo cha Daudi kulawa kuli ngondo.”
1SA 30:21 Hamba Daudi nakawafika wala wanhu miya mbili walechigwe hala kuli ibindi lya Besoli, kwa vila nawali watochile na kulemwela kuluta na Daudi. Wanhu awo nawaluta kumbochela Daudi na wala wanhu wawele hamwe na Daudi. Daudi loyafichile habehi na wala wanhu, nakawalamsa.
1SA 30:22 Ila wala wanhu wehile na wala wajuvi hali wala walingumuwinza Daudi, nawalonga, “Kwa vila wanhu wano hawalutile hamwe na hetwe hambe tuwagawile chinhu choneche kuli vinhu vyotuholile. Ila chila munhu kopegwa mchewake na mwanage, yalute.”
1SA 30:23 Daudi nakalonga, “Hebu wang'holozangu! Mleche kudita ahyo kwa chila chotupegwe na Mkulu Nguluwi. Nakatwamila goya na kuwawika mmoko mwa hetwe wala wamizi watuvabile.
1SA 30:24 Haduhu ne munhu yokunda majesa ga hemwe. Yula yalutile kuli ngondo na yula yaponile na vinhu vya hetwe, chila munhu kopegwa kota myage.”
1SA 30:25 Kulawa mhela wula, Daudi nakaidita mbuli ayo iwe mzilo na ilajizo kuli isi ya Isilaeli.
1SA 30:26 Daudi loyafichile Sikilagi, nakawalajiza wanhu wawahilichile wasekulu wa Yuda honhu ha vinhu viholigwe na usenga awu, “Mlole, utambichizo wa hemwe kuli vinhu viholigwe na wang'honyo wa Mkulu Nguluwi.”
1SA 30:27 Nakalajiza kwa wala wasekulu wa Beteli na wa Lamoti kuli Negebu na wa Yatili
1SA 30:28 na wa Aloeli na wa Simufoti na wa Eshitemoa
1SA 30:29 na wasekulu wa Lakali na wa miji ja Wayelameeli na wa miji ja Wakeni
1SA 30:30 na wasekulu wa Holima na wa Boli-ashani na wa Ataki
1SA 30:31 na wasekulu wa Hebuloni. Nakalajiza vinhu avyo kwa wasekulu wa chila honhu howazowele kujendela Daudi na wanhu wa heye.
1SA 31:1 Wafilisti nawetowa ngondo na Waisilaeli, wanhu wa Isilaeli nawabilima, wenji nawabagama kuli chidunda cha Gilibowa.
1SA 31:2 Wafilisti nawawawinza lukami Sauli na wanage walume, hamba Wafilisti nawawakopola wana walume wa Sauli, Yonatani na Abinadabu na Malikishua.
1SA 31:3 Ngondo nayali ng'hulu ng'hatu kumzunguluta Sauli. Watowa misale nawamfika Sauli na kumhoma ng'hatu kwa misale.
1SA 31:4 Sauli nakamlonjela yula mpapa vinhu vya heye vya ngondo, “Uhole ipanga lya hegwe, ung'hopole leka wala wanhu wawele hambe wenjile ikumbi waleche kumbeza na kunyhoma.” Ila yula mpapa vinhu vya heye vya ngondo nakalema kwa vila nakadumba lukami. Lelo Sauli nakahola ipanga lya heye yuye, nakagwila mli lila ipanga lya heye.
1SA 31:5 Hamba yula mpapa vinhu vya Sauli loyamuwene Sauli nakabagama, heye kahi nakabagama kwa kugwila mli lila ipanga lya heye, hamwe na Sauli.
1SA 31:6 Ahi ndo Sauli na wanage wadatu na mpapa vinhu vya heye hamwe na wamizi wa heye weng'ha vyowabagame zuwa lilyo limwe.
1SA 31:7 Hamba wanhu wa Isilaeli wawele ubanzi wa kumwambu mwa ibindi lila na kumwambu mwa lwanda lwa Yolodani, lowawene kota wanhu wa Isilaeli nawabilima na Sauli na wanage kahi nawabagama, nawajileka miji ja hewo nawabilima. Wafilisti nawaluta na kikala kuli miji ajo.
1SA 31:8 Zuwa lya keli wala Wafilisti lowalutile kuvihola vinhu vya wanhu wabagame, nawajifika mitufi ja Sauli na wanage wadatu mchanya mwa chidunda cha Gilibowa.
1SA 31:9 Nawadumula mutwi wa heye na kuhola vinhu vya heye vya ngondo, hamba nawawahilika wasenga wa hewo kuli isi ya Wafilisti banzi zeng'ha kuwikula mbuli kuli ng'handa ya jimalukolo ja hewo na hali wanhu wa hewo.
1SA 31:10 Vinhu vya heye vya ngondo nawaviwika kuli ng'handa ya milungu ja Maashitaloti, hamba nawaluniniza lukuli lwa heye kuli lukanzi lwa muji wa Beti-shani.
1SA 31:11 Wanhu wa muji wa Yabeshi-gileadi lowahuliche Wafilisti vyowamditile Sauli,
1SA 31:12 wanhu wazidahe kitowa ngondo nawoka, nawajenda nechilo yeng'ha, nawajihola jila mitufi ja Sauli na wanage kulawa kuli lukanzi lwa muji wa Beti-shani. Nawaluta najo mbaka Yabeshi na kujilakaza kuko.
1SA 31:13 Hamba nawahola mizeje ja hewo na kujitila hasi ha igodi lya ikwaju ako Yabeshi, hamba nawesela kulya kwa mazuwa saba.
2SA 1:1 Loyabagame Sauli, Daudi loyahiluche kulawa kuwasumya Waamaleki naye nakekala Sikilagi kwa mazuwa meli.
2SA 1:2 Zuwa lya kadatu nakoya munhu yumwe kulawa kuli kambi ya Sauli, mivalo ja heye najidejeka na nayali yawele na nhimbwisi kumutwi kwa heye kulajila masinzo. Loyamfichile Daudi, naketoza kumwando kwa Daudi nakamfugamila.
2SA 1:3 Daudi nakamlonjela, “Kwangulawa kohi?” Heye nakamwidichila, “Nambilima kulawa kuli kambi ya Waisilaeli.”
2SA 1:4 Daudi nakamlonjela, “Nachilawila choni ako?” Yula munhu nakamwidichila, “Wamizi wa Isilaeli nawabilima kulawa kuli ngondo na wanhu wa hetwe wenji nawabagama. Sauli na mwanage Yonatani kahi nawabagama.”
2SA 1:5 Daudi nakamuuza yula munhu yampele mbuli zila, “Nakuvizela ndaze kota Sauli na mwanage Yonatani nawabagama?”
2SA 1:6 Yula msongolo nakedichila, “Bahala londiwele kuli chidunda cha Gilibowa, ndimona Sauli nakegamila igoha lya heye na Wafilisti wawele na mituka ja falasi ja ngondo na walingwendesa falasi nawali womlutila.
2SA 1:7 Sauli loyalolile kumbele, nakambona na kunyhema, nani nandimwidichila, ‘Ena, nda hano.’
2SA 1:8 Nakambuza heni, ‘Hegwe kwa whaani? Nani nandimwidichila kota heni nda Mwamaleki.’
2SA 1:9 Nakandonjela, ‘Dedede, wime habehi na heni ung'hopole mina nhowigwa vibi, ila nding'hali mkomu.’
2SA 1:10 Lelo nanduta habehi na heye na kumkopola, kwa vila nandivizela howeza kulutilila kuwa mkomu. Ila nanyhola chila kofia ya mndewa iwele kumutwi kwa heye na ipogo lya mndewa liwele mmoko mwa heye. Vyeng'ha nandikugalila hegwe mkulu wa heni.”
2SA 1:11 Aho ndo Daudi nakadadula ivalo lya heye kulajila masinzo. Wanhu weng'ha wawele hamwe na Daudi nawadita hihila.
2SA 1:12 Nawalombocheza kuno wolila na kwesela kulya mbaka matinazo, kwa chiwalo cha Sauli na Yonatani mwanage na wamizi wa Mkulu Nguluwi na Waisilaeli weng'ha. Nawadita ahyo kwa vila wenji wa hewo nawabagama kuli ngondo.
2SA 1:13 Daudi nakamuuza yula msongolo yamlonjele mbuli zila, “Kwangulawila kohi?” Heye nakamwidichila, “Heni nda Mwamaleki, ila ndangikala kuli isi ya hegwe kota mjenzi.”
2SA 1:14 Daudi nakamuuza, “Iwa ndaze hambe udumbe kugolola moko wa hegwe na kumkopola munhu yabakalizwe mafuta na Mkulu Nguluwi?”
2SA 1:15 Hamba Daudi nakamchema yumwe wa wasongolo wa heye nakamlonjela, “Mkopole munhu ayu!” Yula msongolo nakamtowa yula Mwamaleki na kumkopola.
2SA 1:16 Loyawele habehi kubagama, Daudi nakalonga, “Nongwa ayi iwe kwa gwegwe baho, mina nakulonga kwa mlomo wa gwegwe baho, ‘Nandimkopola munhu yabakalizwe mafuta na Mkulu Nguluwi.’ ”
2SA 1:17 Daudi nayali yokwimba na kulombocheza kwa chiwalo cha Sauli na Yonatani.
2SA 1:18 Daudi nakalonga kota wanhu wa Yuda walanguswe lwimbo lulinguchemigwa Lwimbo lwa Upinde, nalo nalwandichigwa mli chitabu cha Yashali. Daudi nakaluka kwimba,
2SA 1:19 “Wawele ndo ukulu wa hegwe, gwa Isilaeli, nawabagama hali honhu ha hegwe henuche. Ulole wawele na mong'ho vyowagwile!
2SA 1:20 Mleche kuwalonjela Wafilisti wa Gati mbuli ayi mleche kuwikula ayi kuli nzila za Ashikeloni, leka wahinza wa Wafilisti waleche kusangalala, na wahinza wa wohambe wenjile ikumbi waleche kutowa luchenze.
2SA 1:21 “Hemwe wanhu wa vidunda vya Gilibowa, mleche kuwa na nungwi ne nhonya ne migunda ja hemwe jilingulela ndolendole ya nyhule. Mina ako ndo ngawo za wawele na mong'ho nazitozigwa, ngawo ya Sauli haibakalizwa mafuta kahi.
2SA 1:22 “Wula upinde wa Yonatani hauhinduche kumbele, ipanga lya Sauli halihiluche hihi hela, mazuwa gose navikopola wenji, ena, navikopola wawele na mong'ho.
2SA 1:23 “Sauli na Yonatani, nawaganigwa na nawanojeza, kuli ukomu na kuli kubagama hawebagule. Nawali wabewe kusinda ikungule, ena, nawali na mong'ho kusinda isimba.
2SA 1:24 “Wadala wa isi ya Isilaeli, mumlilile Sauli, ayo Sauli nayawavalize mivalo midung'hu na jinojile, yawele nakazinoliga nguwo za hemwe kwa zahabu.
2SA 1:25 “Ulole wawele na mong'ho vyowagwile, nawabagama wawele kuli kitowa. Yonatani nakakopoligwa hali honhu henuche.
2SA 1:26 “Ndangung'ung'uta kwa chiwalo cha hegwe, mng'holozangu Yonatani, kwa heni nawali wa kunojeza ng'hatu. Igano lya hegwe kwa heni nalyali lya kububuwaza, nalyali kusinda igano lya wadala.
2SA 1:27 “Ulole wawele na mong'ho vyowagwile, na vinhu vya hewo vya ngondo navidumigwa!”
2SA 2:1 Mbuli zila vyozikolile, Daudi nakamlanda Mkulu Nguluwi, yolonga, “Ndaze, ndute kuli muji umwe wa Yuda?” Mkulu Nguluwi nakamwidichila, “Ulute!” Daudi nakamuuza kahi Mkulu Nguluwi, “Ndute kuli muji wachi?” Mkulu Nguluwi nakamwidichila, “Ulute kuli muji wa Hebuloni.”
2SA 2:2 Daudi nakaluta ako Hebuloni hamwe na wache wa heye weng'ha weli, Ahinoamu wa Yesileeli na Abigaili yafililwe na mlume wa heye Nabali, kulawa muji wa Kalimeli.
2SA 2:3 Daudi nakoka na wanhu wa heye wenji, chila munhu na wang'holoze, nawekala kuli vijiji vilinguuzunguluta muji wa Hebuloni.
2SA 2:4 Wanhu wa Yuda nawaluta ako kwa Daudi na kumbakaliza mafuta yawe mndewa wa hewo. Daudi loyahuliche kota wanhu wa Yabeshi-gileadi nawamtila Sauli
2SA 2:5 nakalajiza wasenga kwa wanhu wa Yabeshi-gileadi kuwalonjela usenga uno, “Mtambichizwe na Mkulu Nguluwi mina hemwe namumditila igano lya kwimilila mkulu wa hemwe Sauli kwa vila namumtila.
2SA 2:6 Lelo Mkulu Nguluwi nakawaditila hemwe igano lya kwimilila na kukundigwa, nani ndowalajila kunoga kukula kwa vila namdita mbuli ayi.
2SA 2:7 Lelo mikangaze na muwe wanhu mzidahe kwa vila mkulu wa hemwe Sauli nakabagama, wanhu wa Yuda nawambakaliza mafuta ndiwe mndewa wa hewo.”
2SA 2:8 Ahyo Abuneli mwana wa Neli, mkulu wa chilundo cha wamizi wa Sauli, nakamhola Ishi-bosheti mwana wa Sauli na kumhilika ako Mahanaimu.
2SA 2:9 Abuneli nakamdita Ishi-bosheti yawe mndewa wa isi ya Gileadi na Ashulu na Yesileeli na Efulaimu na Benjamini na Isilaeli yeng'ha.
2SA 2:10 Ishi-bosheti nakaluka kulongoza isi ya Isilaeli yawele na miyaka makumi gane, nakalongoza kwa miyaka mili. Ila nhanzi ya Yuda naimuwinza Daudi.
2SA 2:11 Daudi nayali mndewa wa nhanzi ya Yuda ako Hebuloni kwa miyaka saba na myezi sita.
2SA 2:12 Abuneli mwana wa Neli na vitumagwa wa Ishi-bosheti mwana wa Sauli, nawalawa kuli muji wa Mahanaimu nawaluta muji wa Gibeoni.
2SA 2:13 Yoabu mwana wa Seluiya na vitumagwa wanji wa Daudi, nawalawa na kiting'hana na Abuneli na wanhu wawele na heye kuli izimbo liwele kuli muji wa Gibeoni. Chilundo chimwe nachali ubanzi umwe wa izimbo na chilundo chiyage ubanzi wa keli.
2SA 2:14 Abuneli nakamlonjela Yoabu, “Tuwawiche wasongolo wanji kulawa chila ubanzi wetowe hali hetwe!” Yoabu nakedichila, “Goya, wadite ahyo.”
2SA 2:15 Ahyo wasongolo nawema na kuwazigwa, wanhu wa Ishi-bosheti, wawele ndo nhanzi ya Benjamini nawali kumi na mbili na ubanzi wa Daudi nawali kumi na mbili.
2SA 2:16 Hamba chila yumwe nakamibata kumutwi mng'honyo wa heye na kumhoma kwa ipanga kuli lubavu, weng'ha makumi meli na gane nawagwa hasi hamwe. Lelo honhu aho ha Gibeoni nahachemigwa Helikati-hasulimu.
2SA 2:17 Ngondo ya zuwa alyo nayali ng'hulu. Abuneli na wanhu wa isi ya Isilaeli nawasumigwa hali wanhu wa Daudi.
2SA 2:18 Wana wadatu wa Seluiya, Yoabu na Abishayi na Asaheli nawali baho. Asaheli nayali yoweza kubilima kota ibala.
2SA 2:19 Asaheli nakambilimisa Abuneli ne kuhinduka kudilo ne kumoso.
2SA 2:20 Abuneli loyalolile kumbele na kumona Asaheli, nakamuuza, “Ndaze, ndo hegwe Asaheli?” Heye nakamwidichila, “Ena, ndo heni.”
2SA 2:21 Abuneli nakamlonjela, “Uhinduche kudilo ama kumoso, umbilimise msongolo yunji na kuhola vinhu vya heye.” Ila Asaheli halechile kumbilimisa.
2SA 2:22 Abuneli nakamlonjela Asaheli lwa keli, “Uleche kumbilimisa. Lekachoni ndikukopole? Ndoweza ndaze kumlola kumeho mkulugo Yoabu?”
2SA 2:23 Ila Asaheli nakalema. Lelo Abuneli nakamhoma na chaka cha igoha mmunda mwa heye na chaka acho nachilawila kuli mhungo wa Asaheli. Asaheli nakagwa na kubagama bahala. Wanhu weng'ha wafichile honhu hoyabagame Asaheli, nawema.
2SA 2:24 Ila Yoabu na Abishayi nawamuwinza Abuneli. Isanya vyoliwele lizinga, nawafika kuli chidunda cha Ama, chiwele ubanzi wa kolilawilaga isanya mwa Giya, kuli nzila ilinguluta kuli chiwala cha muji wa Gibeoni.
2SA 2:25 Wanhu wa nhanzi ya Benjamini naweting'hana kahi kumbele kwa Abuneli, nawadita chilundo cha hewo, nawema kuli chinhembenhembe cha chidunda.
2SA 2:26 Hamba Abuneli nakamuuza Yoabu, “Ndaze, tochitowa mazuwa geng'ha? Ndaze, hambe wone kota mbuli ayi yomala kwa usungu? Ndaze kolutilila kwa mhela wachi ne kuwalonjela wanhu wa hegwe kuleka kuwawinza wang'holozawo?”
2SA 2:27 Yoabu nakamlonjela, “Kota Nguluwi vyoyawele mkomu, wone haulonjile mbuli ayo, wanhu wa heni wahalutilile kuwawinza wang'holozawo mbaka hamitondo.”
2SA 2:28 Lelo Yoabu nakapemba mhalamhanda na wanhu wa heye nawaleka kuwawinza wanhu wa Isilaeli ne kitowa kahi.
2SA 2:29 Abuneli na wanhu wa heye nawakola kuli ibindi lya Alaba nechilo yeng'ha. Nawaloka lwanda lwa Yolodani, nawalutilila kujenda mitondo yeng'ha mbaka nawafika Mahanaimu.
2SA 2:30 Yoabu loyahiluche kulawa kumbilimisa Abuneli, nakating'hana na wanhu wa heye weng'ha. Hamwe na Asaheli, wanhu kumi na tisa wa Daudi nawali wajilile.
2SA 2:31 Ila wamizi wa Daudi nawawakopola wanhu miya zidatu na makumi sita kulawa kuli nhanzi ya Benjamini, wawele hamwe na wanhu wa Abuneli.
2SA 2:32 Yoabu na wanhu wa heye nawahola mtufi wa Asaheli, nawautila kuli mhalika iwele mhaza wa heye kahi nayali yatiligwe, iwele ako kuli muji wa Betelehemu. Yoabu na wanhu wa heye nawajenda nechilo yeng'ha, loifichile lufuku nawafika kuli muji wa Hebuloni.
2SA 3:1 Nakwali na ngondo ya mhela winji hali wamizi wawele hamwe na ivyazi lya Sauli na wala wamizi wawele hamwe na Daudi. Ubanzi wa Daudi naulutilila kuwa na mong'ho ila ubanzi wa Sauli naulutilila kuwa ng'hochele.
2SA 3:2 Wana walume wa Daudi wapondigwe na wache wa Daudi ako Hebuloni nawali wano. Wa mwaluko nayali Amunoni, mayake nayali Ahinoamu kulawa Yesileeli
2SA 3:3 na wa keli nayali Kileabu, mayake nayali Abigaili yafililwe na mlume wa heye Nabali kulawa Kalimeli na wa kadatu nayali Abusalomu, mayake nayali Maaka mhinza wa Talimayi, mndewa wa Geshuli
2SA 3:4 na wa kane nayali Adoniya, mayake nayali Hagiti na wa kahano nayali Shefatiya, mayake nayali Abitali
2SA 3:5 na wa sita nayali Itileamu, mayake nayali Egila, mche yunji wa Daudi. Wana weng'ha wano nawapondigwa mhela lowawele ako Hebuloni.
2SA 3:6 Ngondo vyoiwele ilutilila hali wanhu wa Daudi na wanhu wa Sauli, Abuneli nayali chilongozi yawele yolutilila kuwa na mong'ho na ludali hali wanhu wa Sauli.
2SA 3:7 Sauli loyawele yang'hali mkomu, nayali na mhawake yumwe itagwa lyake nayali Lisipa, mhinza wa Aya. Lelo zuwa limwe Ishi-bosheti nakamuuza Abuneli, “Lekachoni nakuwasa na mha wa mhaza wa heni?”
2SA 3:8 Abuneli nakazudila lukami kwa chiwalo cha ulonzi wa Ishi-bosheti, nakamuuza, “Ndaze, kwangijesa heni ndomhinduka Sauli? Ndaze, kwangijesa heni ndanguwakolela mijito wanhu wa isi ya Yuda? Ulole, heni ndanguwaditila igano lya kwimilila wanhu wa mhaza wa hegwe Sauli na wang'holoze, siwawichile mmoko mwa Daudi kulawa mhela wula. Lelo lehano kwangumbona ndina nongwa kwa chiwalo cha mdala.
2SA 3:9 Nguluwi yangaze na mzidi, wone ndoleka kumditila Daudi kota vila Mkulu Nguluwi vyoyamlahile.
2SA 3:10 Mkulu Nguluwi nakamlonjela Daudi kota kowusa undewa kulawa kwa wanhu wa Sauli na kumha heye. Heye kolongoza isi ya Isilaeli na Yuda kulawa Dani mbaka Beeli-sheba.”
2SA 3:11 Ishi-bosheti halonjile chinhu kwa Abuneli, kwa vila nakamdumba.
2SA 3:12 Lelo Abuneli nakalajiza wasenga kwa Daudi na kumlonjela, “Ndaze, isi yino ndo ya whaani? Udite ilagano na heni, ndokutanza kuidita Isilaeli yeng'ha iwe isi ya hegwe.”
2SA 3:13 Daudi nakedichila, “Goya, ndodita ilagano na hegwe. Ila ndangukugana udite mbuli imwe uwele ung'hali kumbona, kwanguganigwa ungalile Mikali mhinza wa Sauli. Aho kombona.”
2SA 3:14 Daudi kahi nakalajiza wasenga kwa Ishi-bosheti mwana wa Sauli, nakalonga, “Nyhilulile mchewangu Mikali ndimhesile kwa kulavya migovi miya imwe ja Wafilisti.”
2SA 3:15 Ishi-bosheti nakalajiza wanhu kumhola Mikali kulawa kwa mlume wa heye Palitieli, mwana wa Laishi.
2SA 3:16 Ila Palitieli nakaluta hamwe na mchewake yolila nzila yeng'ha mbaka kuko Bahulimu. Abuneli nakamlonjela Palitieli, “Uhiluche kaye.” Ahyo nakahiluka.
2SA 3:17 Abuneli nakalonga ulonzi unojile na wasekulu wa Isilaeli, nakawalonjela, “Kwa mhela winji namumgana Daudi yawe mndewa wa hemwe.
2SA 3:18 Lelo mumdite yawe mndewa, kwa vila Mkulu Nguluwi nakamlonjela Daudi yolonga, ‘Kwa moko wa hegwe Daudi, chitumagwa wa heni, ndowalohola wanhu wa heni wa Isilaeli kulawa kwa Wafilisti na kulawa kwa wang'honyo wa hewo weng'ha.’ ”
2SA 3:19 Abuneli kahi nakalonga na Wabenjamini, hamba nakaluta mbaka Hebuloni kumlonjela Daudi chila chinhu kuwala wanhu weng'ha wa Isilaeli mbaka nhanzi yeng'ha ya Benjamini chowaganile kudita.
2SA 3:20 Abuneli loyawele kwa Daudi ako Hebuloni, nayali na wanhu makumi meli, Daudi nakawaditila mnvina.
2SA 3:21 Abuneli nakamlonjela Daudi, “Lelo heni ndoluta kukugalila wanhu weng'ha wa Isilaeli, hegwe mndewa wa heni. Wokuya kudita ilagano na hegwe, leka uwe mndewa wa hewo, nagwe kuwalongoza weng'ha vyougana.” Daudi nakalagana na Abuneli nakaluta, naye nakaluta kwa kikala goya.
2SA 3:22 Hamba Yoabu na wanhu wanji wa Daudi nawahiluka kulawa kitowa, nawahola vinhu vinji kulawa kuli ngondo. Ila Abuneli hawele hamwe na Daudi ako Hebuloni kwa vila Daudi nayali yamkundize yalute, ahyo Abuneli nakaluta kwa kikala goya.
2SA 3:23 Yoabu loyagomole na ikugusi lya wamizi wa heye loyawele nalyo, nakapegwa mbuli ya kota Abuneli mwana wa Neli, nakoya kumona mndewa Daudi, nakalanda yalute, nakoka kwa kikala goya.
2SA 3:24 Yoabu nakaluta kwa mndewa na kumlonjela, “Lelo nakudita ndaze? Lole, Abuneli nakoya kwa hegwe, lekachoni nakumleka yalute? Lelo nakaluta!
2SA 3:25 Ndaze, nakuvizela kota Abuneli mwana wa Neli, nakoya kudeta kwa hegwe? Nakoya kuvizela mbuli za hegwe na choni choulingudita.”
2SA 3:26 Yoabu loyalawile kulonga na Daudi, nakalajiza wasenga wamigale Abuneli, nawo nawamfika kuli ideho lya Sila na kumhilula, ila Daudi nayali hambe yaizele mbuli ayo.
2SA 3:27 Abuneli loyahiluche Hebuloni, Yoabu nakamhola Abuneli hafungo ha lwizi lwa lukanzi lwa muji kota kangugana kulongasa na heye kwa uviso. Yoabu nakamhoma Abuneli mmunda mwa heye kwa vila Abuneli nayali yamkopole Asaheli, mdodowe Yoabu, Abuneli nakabagama.
2SA 3:28 Hamba Daudi loyahuliche mbuli ayo nakalonga, “Heni na undewa wa heni twahela nongwa mazuwa gose hali Mkulu Nguluwi kwa chiwalo cha danda ya Abuneli, mwana wa Neli.
2SA 3:29 Nongwa ya chiwalo cha kukopola ako iwe kwa Yoabu na wang'holoze mhaza wa heye. Yumwe wa wang'holoze Yoabu mazuwa geng'ha yawe na utamwa wa kutunda ufila ama utamwa wa ngozi ama yawe yalingujenda kwa ng'hweku ama kubagama kwa ipanga ama yawe yalihela chilyo.”
2SA 3:30 Yoabu na mng'holoze Abishayi nawamkopola Abuneli kwa vila nakamkopola mng'holozawo Asaheli mhela wa ngondo ako Gibeoni.
2SA 3:31 Hamba nakamlonjela Yoabu na wala weng'ha wawele hamwe na heye kota wadadule mivalo ja hewo na wavale mivalo ja igunila na kuchilongola chinhanda chiwele na mtufi wa Abuneli na kulombocheza. Mhela wa kutila ako, mndewa Daudi nakajenda kumbele kwa chinhanda acho cha kuwichila mtufi.
2SA 3:32 Nakatiligwa ako Hebuloni na mndewa nakalombocheza kwa lizi loyawele hafungo ha chilaga, wanhu wanji weng'ha nawadita hihila kahi.
2SA 3:33 Mndewa nakamlombochezela Abuneli, nakemba, “Ndaze, lekachoni Abuneli nakabagama kota munhu yaditile nongwa?
2SA 3:34 Moko ga heye hagawopigwe na magulu ga heye hagawichigwe pingu kota mwihe. Nakabagama kota munhu yakopoligwe na wehile!” Wanhu weng'ha nawalila kahi kwa chiwalo cha heye.
2SA 3:35 Hamba wanhu weng'ha nawaluta kumlonjela Daudi yalye ibumunda lokuwele kung'hali nemisi. Ila Daudi nakelaha yowalonjela, “Nguluwi yang'hopole wone ndojeza ibumunda ama chinhu choneche mbaka isanya holizibila.”
2SA 3:36 Wanhu weng'ha nawona mbuli azo, nawanojezwa kota vila vyowanojezwe na chila chinhu choyaditile mndewa.
2SA 3:37 Lelo zuwa lila Waisilaeli weng'ha nawavizela kota mndewa Daudi hehanzile kuli kumkopola Abuneli, mwana wa Neli.
2SA 3:38 Mndewa Daudi nakawalonjela vitumagwa wa heye, “Ndaze, hamvizelele kota lehano munhu yawele chilongozi na yanojile nakabagama Isilaeli?
2SA 3:39 Hanga nambakalizwa mafuta ndiwe mndewa, ila heni lehano nda ng'hochele. Wano wana wa Seluiya ndo wang'ang'ale lukami kusinda heni. Mkulu Nguluwi yawagaze wano kwa kiwhana na wihe wa hewo!”
2SA 4:1 Ishi-bosheti mwana wa Sauli, loyahuliche kota Abuneli nakakopoligwa ako Hebuloni, nayali yalihela nhumbula ikangale na wanhu weng'ha wa Isilaeli nawakabuswa.
2SA 4:2 Ishi-bosheti mwana wa Sauli nayali na wanhu weli wawele vilongozi wa ikugusi lya kuvaba, yumwe nayali yochemigwa Baana na yunji nayali yochemigwa Lekabu. Hewo nawali wana wa Limoni, munhu wa nhanzi ya Benjamini kulawa muji wa Beeloti, mina Beeloti nawali muji wa nhanzi ya Benjamini.
2SA 4:3 Kulawa mhela wula, wanhu wa Beeloti nawabilimila Gitaimu, nawekala kuko kota wajenzi.
2SA 4:4 Yonatani mwana wa Sauli, nayali na mwana yaziliche magulu geng'ha meli. Mwana ayo nayali yochemigwa Mefibosheti. Ayo Mefibosheti loyawele na miyaka jihano nakahulika mbuli za kubagama kwa Sauli na Yonatani kulawa Yesileeli. Munhu yalingumlolela heye loyahuliche kota Sauli na Yonatani nawakopoligwa ako Yesileeli, nakamhola Mefibosheti nakabilima na heye. Ila loyawele yobilima himahima, mwana ayo nakagwa, naye nakazilika.
2SA 4:5 Lekabu na Baana, wana wa Limoni, Mbeeloti, nawaluka majendo kuluta kaye kwa Ishi-bosheti. Nawafika ako nemisi, Ishi-bosheti loyawele yokwesela kaye kwa heye.
2SA 4:6 Nawenjila mng'handa na kidita kota wangugana kuhola ngano, nawamfika Ishi-bosheti yawasile mchinhanda cha heye kuli chihengo cha heye cha kuwasa. Nawamhoma mmunda mwa heye. Lowamkopole, nawamdumula mutwi nawoka nawo. Nawakolela nzila ya Alaba, nawajenda nechilo yeng'ha.
2SA 4:8 Nawahola mutwi wa Ishi-bosheti na kumhilichila Daudi ako Hebuloni. Nawamlonjela mndewa Daudi, “Awu ndo mutwi wa Ishi-bosheti mwana wa Sauli. Sauli nayali mng'honyo wa hegwe yaganile kukukopola. Mkulu Nguluwi lehano nakahilusila chibida kwa Sauli na walelwa wa heye.”
2SA 4:9 Ila Daudi nakawedichila Lekabu na Baana, wana wa Limoni, Mbeeloti. “Kota Mkulu Nguluwi vyoyalingikala, heye nakaulohola ukomu wa heni kuli magazo geng'ha.
2SA 4:10 Yula munhu yoyile kundonjela kota Sauli nakabagama, nakejesa kota nakandonjela mbuli inojile, ila nandiwalajiza wanhu kumibata na kumkopola ako Sikilagi. Acho ndo chonolo chondimpele kuwala mbuli ayo.
2SA 4:11 Hemwe namdita vibi ng'hatu kusinda yula. Lelo, kwa vila hemwe wehile namumkopola munhu yatanganiche yawasile mchinhanda cha heye, kaye kwa heye, yowa goya kwa heni kuhilula chibida kwa kuwosa hemwe muisi.”
2SA 4:12 Daudi nakawalajiza wasongolo wa heye wawakopole Lekabu na Baala, wala wasongolo nawawakopola. Nawawadumula moko na magulu ga hewo. Hamba nawajininiza mitufi ja hewo kuli igodi hafungo ha izimbo ako Hebuloni. Ila nawahola mutwi wa Ishi-bosheti na kuutila kuli mhalika koyatiligwe Abuneli ako Hebuloni.
2SA 5:1 Hamba nhanzi zeng'ha za Isilaeli naziluta kwa Daudi ako Hebuloni na kumlonjela, “Lole, hetwe twa danda ya lukuli lwa hegwe.
2SA 5:2 Aho mwaluko, Sauli loyawele mndewa wa hetwe hegwe ndo nawali uwalongoza Waisilaeli kuli ngondo, Mkulu Nguluwi nakakulonjela, ‘Kowa mdimi wa wanhu wa heni ako Isilaeli na kowa kahi mkulu wa Isilaeli.’ ”
2SA 5:3 Lelo wasekulu weng'ha wa Isilaeli nawaluta kwa mndewa Daudi ako Hebuloni, Daudi nakadita ilagano na hewo hali Mkulu Nguluwi. Hamba nawambakaliza mafuta Daudi yawe mndewa wa Isilaeli.
2SA 5:4 Daudi nakaluka kulongoza loyawele na miyaka makumi gadatu, nakalongoza kwa mhela wa miyaka makumi gane.
2SA 5:5 Ako Hebuloni nakawalongoza wanhu wa Yuda kwa mhela wa miyaka saba na myezi sita. Ako Yelusalemu nakawalongoza wanhu weng'ha wa Isilaeli hamwe na wanhu wa Yuda kwa mhela wa miyaka makumi gadatu na jidatu.
2SA 5:6 Hamba mndewa na wanhu wa heye nawaluta Yelusalemu kuwatowa Wayebusi wawele wochikala amo. Wayebusi nawamlonjela, “Hambe winjile amo kuli muji, mina mbaka wohambe walole na walichete woweza kukuwinga.” Nawamlonjela ahyo mina nawejesa kota Daudi howeza kwinjila amo kuli muji.
2SA 5:7 Ahyo mndewa Daudi nakahola muji wula, mina ndo ngome ya Siyoni. Hamba nauchemigwa muji wa Daudi.
2SA 5:8 Zuwa alyo Daudi nakalonga, “Munhu yoneche wone yawatowe Wayebusi, yakole mli vikolola vya mazi leka kuwatowa awo wapoka walingiwhana na walichete na wohambe walole, wawele ndo wang'honyo wa Daudi.” Ndo mina wanhu wangulongaga, “Wohambe walole na walichete hambe wenjile kuli ng'handa ya mndewa.”
2SA 5:9 Daudi nakekala kuli ngome ayo na kuichema, “Muji wa Daudi.” Daudi nakauzenga muji kuuzunguluta, kwaluchila Milo kulutila mgati.
2SA 5:10 Daudi nakalutilila kuwa na mong'ho ng'hatu kwa vila Mkulu Nguluwi, Nguluwi Yawele na Mong'ho, nayali hamwe na heye.
2SA 5:11 Hamba mndewa Hilamu wa Tilo nakalajiza wasenga kwa Daudi, nakamhilichila kahi migodi ja mbawo jichemigwe mielezi na wawanzi wa kugongomanya vinhu vya mbawo na wawanzi wa kuzenga ng'handa kwa maganga, nawamzenjela Daudi ng'handa ya mndewa.
2SA 5:12 Lelo Daudi nakavizela kota Mkulu Nguluwi nakamuwika nzinzili yawe mndewa wa Isilaeli, kahi nakaudita undewa wa heye ulutilile goya kwa chiwalo cha wanhu wa heye wa Isilaeli.
2SA 5:13 Mhela Daudi loyochile Hebuloni, nakeholela waha na wache mzidi wa ako mujini Yelusalemu. Wache awo nawampondela wana wenji walume na wadala.
2SA 5:14 Wano ndo wana wa heye walume wapondigwe na wachewake ako Yelusalemu, Shamuwa na Shobabu na Natani na Solomoni
2SA 5:15 na Ibali na Elishua na Nefegi na Yafiya
2SA 5:16 na Elishama na Eliyada na Elifeleti.
2SA 5:17 Wafilisti lowahuliche kota Daudi nakabakalizwa mafuta leka yawe mndewa wa Isilaeli, weng'ha nawalawa kuluta kumpala, ila heye nakavizela, nakenjila mgati mwa ngome.
2SA 5:18 Wafilisti nawafika na kusambaluka hali ibindi lya Lefaimu.
2SA 5:19 Daudi nakamuuza Mkulu Nguluwi, “Ndaze, ndute kuwatowa Wafilisti? Ndaze, kowawika mmoko mwa heni?” Mkulu Nguluwi nakamwidichila Daudi, “Ulute, mina kwa kukomya ndowawika Wafilisti mmoko mwa hegwe.”
2SA 5:20 Lelo Daudi nakafika Baali-pelasimu na kuwasumya Wafilisti, hamba nakalonga, “Kota mazi tendema vyogalinguwifya, Mkulu Nguluwi nakawaditila hihyo wang'honyo wa heni hali heni.” Ahyo honhu aho nahachemigwa Baali-pelasimu.
2SA 5:21 Wafilisti nawajileka jimalukolo ja milungu ja hewo, Daudi na wanhu wa heye nawajihola.
2SA 5:22 Wafilisti nawafika kahi na kwenela kuli ibindi lya Lefaimu.
2SA 5:23 Daudi naloyamlandile Mkulu Nguluwi, Mkulu Nguluwi nakamlonjela, “Uleche kuwatowa kulawa aho houli, ila uzungulute na kuwatowa kulawa behi na migodi ja mifolosadi.
2SA 5:24 Hamba, louhulika lizi kuli vinhembenhembe vya mifolosadi, lizi lya wamizi walingujenda kwa magulu, aho ulute himahima kuwatowa, kwa vila Mkulu Nguluwi nakalongola kumwando kwa hegwe leka yawatowe wamizi wa Wafilisti.”
2SA 5:25 Daudi nakadita kota vyoyalonjelwe na Mkulu Nguluwi, ahyo nakawatowa Wafilisti kulawa Geba mbaka Geseli.
2SA 6:1 Daudi nakawakungajiza kahi wanhu walume elufu makumi gadatu wa Isilaeli wahaguligwe.
2SA 6:2 Daudi nakoka na wanhu wa heye weng'ha wawele na heye kulawa Baala ako Yuda, kuza hola isanduku lya ilagano lilinguchemigwa kwa itagwa lya Mkulu Nguluwi Yawele na Mong'ho, yalingikala kuli chigoda cha undewa hagati ha vilumbigwe vifandile kota wahilisi.
2SA 6:3 Nawalihola isanduku lya ilagano lya Mkulu Nguluwi kulawa kuli ng'handa ya Abinadabu iwele kuli chidunda, nawalikwiniza kuli mutuka unyale. Usa na Ahio, wana wa Abinadabu, nawali wolongoza mibuguma jilingukwega mutuka awo,
2SA 6:4 uwele na isanduku lya ilagano lya Mkulu Nguluwi. Ahio nayali yojenda yawele kumwando mwa isanduku alyo.
2SA 6:5 Daudi na wanhu wa heye weng'ha wa Isilaeli, nawali wokwimba nzimbo na kuvina kwa mong'ho wa hewo weng'ha hali Mkulu Nguluwi. Nawatowa vinhu vya muziki vigongomanyigwe kwa igodi lya mvinje, kota ving'hweleng'hwele na igombogombo na ngoma ndodo na kayamba na matoazi.
2SA 6:6 Lowafichile kuli honhu ha kupulila nyhule ako Nakoni, Usa nakagolola moko wa heye na kibata isanduku lya ilagano lya Mkulu Nguluwi kwa vila jila mibuguma najikwang'hwala.
2SA 6:7 Baho Mkulu Nguluwi nakamzudila Usa kwa chiwalo cha nongwa ya heye. Nguluwi nakamkopola bahala. Ahyo Usa nakabagama bahala hafungo ha isanduku lya ilagano.
2SA 6:8 Daudi nakazudila kwa vila Mkulu Nguluwi nakamkopola Usa kwa kuzudila ng'hatu. Lelo kulawa mhela wula honhu aho nahachemigwa Pelesi-usa.
2SA 6:9 Zuwa alyo Daudi nakamdumba Mkulu Nguluwi nakalonga, “Lelo isanduku lya ilagano lyokuya ndaze kwa heni?”
2SA 6:10 Lelo Daudi hawele goya kuhilika isanduku lya ilagano lya Mkulu Nguluwi, mgati mwa muji wa Daudi. Ila Daudi nakalihilika kaye kwa Obedi-edomu, Mgiti.
2SA 6:11 Alyo isanduku lya ilagano nalikala kaye kwa Obedi-edomu, Mgiti kwa mhela wa myezi jidatu, Mkulu Nguluwi nakamtambichiza Obedi-edomu hamwe na wang'holoze.
2SA 6:12 Mndewa Daudi loyahuliche kota Mkulu Nguluwi nakalitambichiza ivyazi lya Obedi-edomu na vinhu vyeng'ha vyoyawele navyo kwa chiwalo cha isanduku lya Nguluwi, nakaluta kulihola isanduku lya ilagano kwa Obedi-edomu na kulihilika kuli muji wa Daudi kwa kusangalala.
2SA 6:13 Wala wanhu wapichile lila isanduku lya ilagano lya Mkulu Nguluwi lowalutile magulu sita, Daudi nakalavya nhambiko, ibuguma limwe na ilogota limwe linenehe.
2SA 6:14 Daudi vyoyawopile goya chizibao cha kitani mchuno cha heye, nakavina kwa mong'ho wa heye weng'ha hali Mkulu Nguluwi.
2SA 6:15 Lelo heye na wanhu weng'ha wa Isilaeli nawalihilika isanduku lya ilagano lya Mkulu Nguluwi mbaka kuli muji wa Daudi kwa lizi lya kusangalala na mhalamhanda.
2SA 6:16 Isanduku lya ilagano vyoliwele likwinjila kuli muji wa Daudi, Mikali mhinza wa Sauli nakasunjilila kuli itubuli nakamona mndewa Daudi nayali yonyozoka na kuvina hali Mkulu Nguluwi, nakambeza mnhumbula ya heye.
2SA 6:17 Hamba, nawalinjiza isanduku lya ilagano kuli ihema ligongomanyigwe na Daudi na kuliwika honhu hake. Daudi nakalavya nhambiko ya kulakazwa na nhambiko za kikala goya hali Mkulu Nguluwi.
2SA 6:18 Daudi loyalavile nhambiko za kulakazwa na za kikala goya, nakawatambichiza wanhu kwa itagwa lya Mkulu Nguluwi Yawele na Mong'ho
2SA 6:19 na kuwagawila ibumunda na iwunde na vizabala vya zabibu zikalile wanhu weng'ha na ikugusi lyeng'ha lya Waisilaeli, walume na wadala. Hamba chila munhu nakaluta haluga hake.
2SA 6:20 Daudi loyahiluche haluga hake leka yawatambichize wang'holoze, Mikali, mhinza wa Sauli, nakaluta kumbochela, nakalonga, “Kububuwaza kwa mndewa wa Isilaeli kitogola kota ahi lehano, kwa kiwika mwanzi hali wapogozi wadala wa vitumagwa wa heye kota mpoka yalingusa mivalo ja heye hali wanhu ne kona soni!”
2SA 6:21 Daudi nakamlonjela Mikali, “Nandali hali Mkulu Nguluwi yanyhagule heni na kumleka mhaza wa hegwe na wang'holoze, leka ndiwe mkulu wa wanhu wa Isilaeli wawele ndo wanhu wa Mkulu Nguluwi, lelo heni ndovina hali Mkulu Nguluwi.
2SA 6:22 Ndochidita munhu mdodo kusinda weng'ha sambi. Hegwe kombona heni siwele chinhu, ila hewo vitumagwa wadala wouwalonjele wonyhulichiza.”
2SA 6:23 Lelo Mikali, mhinza wa Sauli nayali hela mwana mbaka kubagama kwa heye.
2SA 7:1 Mhela mndewa Daudi loyawele yochikala kuli ng'handa ya mndewa, Mkulu Nguluwi nakamdita yawe na kikala goya na wang'honyo wa heye chila ubanzi,
2SA 7:2 mndewa Daudi nakamlonjela mloli Natani, “Lole, heni ndangikala kuli ng'handa izenjigwe na migodi ja mielezi, ila isanduku lya ilagano lya Nguluwi lyangikala kuli ihema.”
2SA 7:3 Natani nakamlonjela mndewa, “Ulute ukadite choneche choulingijesa mnhumbula mwa hegwe, kwa vila Mkulu Nguluwi ka hamwe na hegwe.”
2SA 7:4 Ila nechilo yiyila ulonzi wa Mkulu Nguluwi nawuya kwa Natani,
2SA 7:5 “Ulute ukamlonjele chitumagwa wa heni Daudi, ‘Mkulu Nguluwi kangulonga hino, ndaze, hegwe konzenjela ng'handa ya kikala heni?
2SA 7:6 Kulawa mhela wula ndiwalavye Waisilaeli kulawa Misili mbaka lehano sikale kuli ng'handa hebu. Nandali mmajendo chila honhu ndichikala kuli ihema.
2SA 7:7 Ndaze, chila honhu hondiluta na Waisilaeli weng'ha ndimuuza munhu yoneche wa Isilaeli yondimlonjele yawadime wanhu wa Isilaeli, “Lekachoni hambe unzenjele ng'handa ya migodi ja mielezi?” ’
2SA 7:8 “Lelo mlonjele chitumagwa wa heni Daudi. Mkulu Nguluwi Yawele na Mong'ho kangulonga hino, ‘Ndikulavya ako kouwele udima ming'holo, leka uwe mkulu wa wanhu wa heni Isilaeli.
2SA 7:9 Kulawa mhela awo nandali hamwe na hegwe honhu honeche houlutile, nandiwakopola wang'honyo wa hegwe weng'ha. Ndokudita uwe munhu yalinguzeleka kota wanhu wanji wakulu muisi.
2SA 7:10 Nani ndowahagulila wanhu wa heni wa Isilaeli honhu ha kikala, ndiwawiche leka wekale goya hali honhu ha hewo wawo, wesele. Wanhu wehile wawele na mong'ho wa kuwagaza hewo, hawowila kuwagaza kota aho mwaluko,
2SA 7:11 kulawa mhela londiwahagule watagusa kwa chiwalo cha wanhu wa heni wa Isilaeli na ndowadita mwesele hali wang'honyo wa hemwe weng'ha. Mzidi wa ago, heni Mkulu Nguluwi ndangukuwikulila kota ndoutawiza undewa kuli ivyazi lya hegwe.
2SA 7:12 Mazuwa ga hegwe hogokwenela na kilumba na wasekulu wa hegwe, yumwe wa wana wa hegwe ndomdita yawe mndewa, nani ndowimiza nzinzili undewa wa heye.
2SA 7:13 Mazuwa ga hegwe hogokwenela na kilumba na wasekulu wa hegwe, yumwe wa wana wa hegwe ndomdita yawe mndewa, nani ndowimiza nzinzili undewa wa heye.
2SA 7:14 Heni ndowa mhaza wa heye na heye kowa mwana wa heni. Wone yadite gehile, ndomgaza kota wanhu vyowalinguwagaza wana wa hewo kwa ng'hobwa.
2SA 7:15 Ila silyusa igano lya heni lya kwimilila kwa heye kota vyonditile kwa Sauli, yondimusile kumwando kwa hegwe.
2SA 7:16 Lukolo lwa hegwe na undewa wa hegwe vyokwima nzinzili mazuwa gose. Chigoda cha undewa cha hegwe chokwima nzinzili mazuwa gose.’ ”
2SA 7:17 Natani nakamlonjela Daudi chila ulonzi woyaubochele kulawa kwa Nguluwi kuli uloli awo.
2SA 7:18 Hamba mndewa Daudi nakenjila mgati mwa ihema lya Nguluwi na kikala hali Mkulu Nguluwi, nakaluka kulanda, “Gwa Mkulu Nguluwi, heni na wang'holozangu twa whaani mbaka nakutuditila mbuli azi zinojile?
2SA 7:19 Mbuli ayi kahi nayali ndodo kumeho kwa hegwe Mkulu Nguluwi, mzidi wa ago na kulagana na wang'holozangu mbuli ng'hulu miyaka minji jilinguya. Ndaze, ayi ndo nzila ya hegwe iwele ulinguwaditilaga wanhu, gwa Mkulu Nguluwi?
2SA 7:20 Ndikulonjele choni kahi mzidi wa ago, heni Daudi? Kwa vila hegwe kwangunzela heni chitumagwa wa hegwe, gwa Mkulu Nguluwi.
2SA 7:21 Kwa chiwalo cha kulagana na kunuwila kwa hegwe, nakudita mbuli ng'hulu zeng'ha azo leka heni chitumagwa wa hegwe ndivizele.
2SA 7:22 “Kwa chiwalo cha gala gotugahuliche, gwa Mkulu Nguluwi ndo Mkulu, haduhu yawele kota hegwe na haduhu kahi Nguluwi yunji ila hegwe.
2SA 7:23 Ndo wanhu wachi muisi wawele woweza kuwhanizwa na wanhu wa hegwe wa Isilaeli? Hegwe Nguluwi nakuluta kuwagombola leka wawe wanhu wa hegwe. Nakuliditila itagwa lya hegwe liwe likulu, nakudita kahi mbuli za kububuwaza na vinduzanduza kwa kuwawinga wanhu wa isi zinji na milungu ja hewo hali wanhu wa hegwe, wawele nakuwegala kulawa Misili leka wawe wa hegwe.
2SA 7:24 Nakuwahagula Waisilaeli wawe wanhu wa hegwe mazuwa gose, gwa Mkulu Nguluwi nakuwa Nguluwi wa hewo.
2SA 7:25 “Lelo gwa Mkulu Nguluwi weneze mazuwa gose lila ilagano lya hegwe kuwala heni, chitumagwa wa hegwe na kuwala wang'holozangu kota vyoulagane.
2SA 7:26 Itagwa lya hegwe lyotogoligwa mazuwa gose na wanhu wolonga, ‘Mkulu Nguluwi Yawele na Mong'ho ndo Nguluwi wa Waisilaeli.’ Lulelo lwa heni Daudi, chitumagwa wa hegwe, lokwima nzinzili hali hegwe.
2SA 7:27 Mina hegwe, Mkulu Nguluwi Yawele na Mong'ho, Nguluwi wa Isilaeli, nakungubulila heni chitumagwa wa hegwe kota koludita lulelo lwa heni lulongoze. Ena, kwa vila ndina nhumbula ikangale kulanda hali hegwe.
2SA 7:28 Gwa Mkulu Nguluwi Yawele na Ludali, hegwe ndo Nguluwi. Ulonzi wa hegwe ndo wa kukomya na nakulagana na heni chitumagwa wa hegwe mbuli ayi inojile.
2SA 7:29 Lelo heni ndangukulanda utambichize lulelo lwa chitumagwa wa hegwe lulutilile mazuwa gose hali hegwe. Gwa Mkulu Nguluwi Yawele na Ludali nakulonga ahyo, kwa utambichizo wa hegwe kahi, lulelo lwa heni lotambichizwa mazuwa gose.”
2SA 8:1 Daudi nakawatowa na kuwasumya Wafilisti. Nakauhola muji wa Metegi-ama kulawa kuli mmoko mwa Wafilisti.
2SA 8:2 Nakawasumya kahi Wamoabu. Nakawawika kuli misitali jidatu wanhu awo na kuwawasiliza hasi. Nakalonga wala wawele kuli misitali mili wakopoligwe na wala wa msitali wa kadatu walechigwe wakomu. Ahyo Wamoabu nawali vitumagwa wa heye na nawali womigalila kodi.
2SA 8:3 Daudi kahi nakamsumya Hadadeseli mwana wa Lehobu, mndewa wa Soba. Daudi nakaluta kuhilula kahi ulongozi wa heye kuli honhu ha lwanda lwa Eyufulate.
2SA 8:4 Daudi nakawahola kulawa kwa Hadadeseli, wakwina falasi elufu imwe na miya saba na wamizi wa kujenda kwa magulu elufu makumi meli. Hamba Daudi nakadumula midanha ja magulu ga kumbele ja falasi weng'ha wa mituka, ila nakawaleka falasi wa mituka miya imwe.
2SA 8:5 Washami wa muji wa Damasiko lowoyile kumtanza Hadadeseli, mndewa wa Soba, Daudi nakawakopola wanhu elufu makumi meli na mbili.
2SA 8:6 Hamba Daudi nakawika kambi za wamizi kuli isi ya Washami ako Damasiko. Lelo Washami nawali wakola mijito wa heye, nawali wolavya kodi. Mkulu Nguluwi nakamha Daudi kusumya honhu honeche hoyalutile.
2SA 8:7 Daudi nakahola ngawo za zahabu zowaholile kulawa vilongozi wa Hadadeseli na kuhilika Yelusalemu.
2SA 8:8 Nakahola kahi shaba nyinji lukami kulawa miji ja Beta na Belotayi, ziwele kuli miji ja Hadadeseli.
2SA 8:9 Towu, mndewa wa Hamati, loyahuliche kota Daudi nakalisumya ikugusi lyeng'ha lya wamizi wa Hadadeseli,
2SA 8:10 nakamlajiza mwanage Yolamu kwa mndewa Daudi kumhilichila ulamso na kumtogola kwa chiwalo cha kumsumya Hadadeseli, kwa vila Hadadeseli nayali yetowile ngondo na Towu mala nyinji. Yolamu nakamhilichila Daudi vinhu vya sendi na zahabu na shaba.
2SA 8:11 Daudi nakaviwika vinhu avyo viwe vya chiuyeng'ha kwa chiwalo cha kumfugamila Mkulu Nguluwi, ndolendole azo ndo hamwe na sendi na zahabu zoyaholile kulawa kuli isi zeng'ha yazisumile,
2SA 8:12 mina Edomu na Moabu na Amoni na Filistiya na Amaleki, hamwe na vinhu vyeng'ha vyoyaholile kulawa kwa mndewa Hadadeseli, mwana wa Lehobu, mndewa wa Soba.
2SA 8:13 Lelo Daudi nakonjeza kuzeleka kwa heye loyawele yohiluka kuwakopola Waedomu elufu kumi na nane kuli Ibindi lya Mwino.
2SA 8:14 Nakawika kambi za wamizi kuli Edomu yeng'ha. Waedomu weng'ha wa ako nawali wakola mijito wa heye. Mkulu Nguluwi nakamha Daudi kusumya koneche koyalutile.
2SA 8:15 Ahyo Daudi nakalongoza Isilaeli yeng'ha, yowaditila wanhu weng'ha wa heye kwa hachi ne uganililo.
2SA 8:16 Yoabu, mwana wa mdala yalinguchemigwa Seluiya, nayali mkulu wa wamizi. Yehoshafati mwana wa Ahiludi, nayali yalingwandika kukumbuchila.
2SA 8:17 Sadoki, mwana wa Ahitubu na Ahimeleki, mwana wa Abiatali nawali watambika na Selaya nayali yalingwandika.
2SA 8:18 Benaya, mwana wa Yehoyada nayali chilongozi wa Wakeleti na Wapeleti wawele nawali womwamila Daudi. Wana wa Daudi nawali watambika.
2SA 9:1 Zuwa limwe Daudi nakauza, “Ndaze, hana munhu yoneche yaponile hali ivyazi lya Sauli? Wone kabaho, ndangugana kumditila igano lya kwimilila kwa chiwalo cha Yonatani.”
2SA 9:2 Nakwali na chitumagwa wa ivyazi lya Sauli yachemigwe Siba. Siba nakachemigwa yalute kwa Daudi. Mndewa Daudi nakamuuza, “Ndaze, hegwe ndo Siba?” Naye nakamwidichila, “Nda baha chitumagwa wa hegwe.”
2SA 9:3 Mndewa nakamuuza, “Ndaze, haduhu munhu yoneche yaponile hali ivyazi lya Sauli? Wone kabaho, ndangugana kumditila igano lya kwimilila lyondilagane hali Nguluwi kota ndolidita.” Siba nakamwidichila, “Kabaha mwana wa Yonatani, ila nakazilika magulu.”
2SA 9:4 Mndewa nakamuuza, “Kakohi?” Siba nakamwidichila, “Ka haluga ha Makili, mwana wa Amieli ako Lo-debali.”
2SA 9:5 Lelo mndewa Daudi nakalajiza wanhu kumigala, nawo nawamigala kulawa haluga ha Makili, mwana wa Amieli ako Lo-debali.
2SA 9:6 Lelo Mefibosheti, mwana wa Yonatani na mzukulu wa Sauli nakaluta kwa mndewa Daudi, naketoza chifunama kumwando kwa mndewa Daudi, nakamfugamila. Daudi nakamchema, “Mefibosheti.” Naye nakedichila, “Ulole, nda baha chitumagwa wa hegwe.”
2SA 9:7 Daudi nakamlonjela, “Uleche kudumba. Heni ndokuditila igano lya kwimilila kwa chiwalo cha mhaza wa hegwe Yonatani. Isi yeng'ha ya sekulu wa hegwe Sauli, ndokuhilusila. Nagwe kolya kuli chisaga cha heni mazuwa geng'ha.”
2SA 9:8 Mefibosheti nakafugama na kulonga, “Heni nda kota libwa lifile, lekachoni unditile ahyo?”
2SA 9:9 Hamba, mndewa Daudi nakamchema Siba, chitumagwa wa Sauli, nakamlonjela, “Lula lufufu lweng'ha loluwele lwa Sauli na ivyazi lya heye ndimha Mefibosheti, mzukulu wa mkulu wa hegwe.
2SA 9:10 Hegwe na wanago na vitumagwa wa hegwe mowa mumlimila Mefibosheti na momhilichila mbena leka mzukulu wa mkulu wa hegwe yawe na chilyo mhela weng'ha. Ila heye kolya kuli chisaga cha heni.” Mhela awo, Siba nayali na wana walume kumi na wahano na vitumagwa makumi meli.
2SA 9:11 Aho ndo Siba nakamlonjela mndewa, “Heni chitumagwa wa hegwe ndodita geng'ha kota vyoundonjele.” Lelo Mefibosheti nayali yolya chilyo kuli chisaga cha Daudi, kota yumwe wa wana wa mndewa.
2SA 9:12 Mefibosheti nayali na mwana mlume mdodo yumwe yachemigwe Mika. Wanhu weng'ha wa Siba nawali vitumagwa wa Mefibosheti.
2SA 9:13 Lelo Mefibosheti nayali yochikala mujini Yelusalemu. Nayali yolya kuli chisaga cha mndewa Daudi mazuwa gose. Nayali yaziliche magulu ga heye geng'ha.
2SA 10:1 Logapulute ago, mndewa Nahashi wa Waamoni nakabagama. Mwanage, yachemigwe Hanuni nayali mndewa kota mhaza wa heye.
2SA 10:2 Mndewa Daudi nakalonga, “Ndomditila Hanuni igano lya kwimilila, mwana wa Nahashi kota mhaza wa heye vyoyanditile.” Lelo Daudi nakalajiza wasenga kumhilichila ulamso wa kumhembuliza munhu yafililwe. Wasenga wa Daudi lowafichile isi ya Waamoni,
2SA 10:3 wakulu wa Waamoni nawamuuza mkulu wa hewo Hanuni, “Ndaze, kwangijesa kota Daudi kuwalajiza wanhu wa kukuhembuliza kangumtogola mhaza wa hegwe? Ndaze, Daudi hawalajize wanhu wano kwa hegwe leka yaupugajize muji uno leka hamba yauhole?”
2SA 10:4 Lelo Hanuni nakawahola wasenga wala wa Daudi na kuwatema lulevu chila yumwe nusu ya lulevu lwa heye, nakajidumula mivalo ja hewo hagati ha madako, hamba nakawaleka walute.
2SA 10:5 Wasenga awo nawona soni lukami kuhiluka kaye. Mndewa Daudi loyalonjelwe mbuli azo nakalajiza wanhu kiting'hana nawo. Mndewa nakawalonjela, “Mikale kuli muji wa Yeliko mbaka lulevu lwa hemwe lwote, hamba mohiluka kaye.”
2SA 10:6 Waamoni lowawene kota nawamzudiza Daudi, nawalanda wamizi Washami elufu makumi meli walingujenda kwa magulu kulawa Beti-lehobu na Soba na wamizi elufu kumi na mbili kulawa Tobu na mndewa Maaka yawele na wamizi elufu imwe.
2SA 10:7 Daudi loyahuliche mbuli azo, nakamlajiza Yoabu yalute na wamizi weng'ha wa kitowa ngondo.
2SA 10:8 Waamoni nawalawa wemile goya kitowa ngondo kuli lwizi lwa muji wa Laba, muji ukulu wa hewo. Washami kulawa Soba na Lehobu na wanhu kulawa Tobu na Maaka nawali waliyeka hali honhu hazelu.
2SA 10:9 Yoabu loyawene kota wang'honyo wa heye wangugana kitowa na heye kumwando na kumbele, nakawahagula wamizi wa Waisilaeli wazidahe ng'hatu kitowa ngondo nakawawika wetowe na Washami.
2SA 10:10 Wala wamizi wanji waponile nakawawika kuli ulongozi wa mng'holoze Abishayi, naye Abishayi nakawawika wala wamizi wetowe na Waamoni.
2SA 10:11 Yoabu nakamlonjela Abishayi, “Wone Washami wowa na mong'ho lukami konhanza, ila wone Waamoni wawe na mong'ho lukami nani ndokuya kukutanza.
2SA 10:12 Ila wikangaze nhumbula gwegwe baho. Titowe kwa nhumbula ikangale kwa chiwalo cha wanhu wa hetwe na kwa chiwalo cha miji ja Nguluwi wa hetwe. Mkulu Nguluwi wa hetwe kotuditila lila linojile kwa heye.”
2SA 10:13 Lelo Yoabu na wanhu wa heye nawaluta habehi kitowa na Washami mbaka Washami nawabilima.
2SA 10:14 Waamoni lowawene kota Washami nawabilima, nawo kahi nawambilima Abishayi na kwinjila kuli muji. Yoabu nakaleka kitowa na Waamoni, nakahiluka Yelusalemu.
2SA 10:15 Hamba Washami lowawene kota nawasumigwa na Waisilaeli, nawekungajiza hamwe.
2SA 10:16 Hadadeseli nakalajiza Washami wawele kumwambu mwa lwanda lwa Eyufulate wegaligwe, wahilikwe ako Helamu leka walongozwe na Shobaki, mkulu wa wamizi wa Hadadeseli.
2SA 10:17 Daudi loyapegwe mbuli ayo, nakawakungajiza hamwe Waisilaeli weng'ha, nakaloka lwanda lwa Yolodani na kuluta mbaka Helamu. Nawo Washami nawewika goya kitowa na Daudi. Nawaluka kitowa na heye,
2SA 10:18 ila Washami nawawabilima Waisilaeli. Daudi nakawakopola Washami miya saba walingwendesa mituka ja ngondo na wakwina falasi elufu makumi gane. Shobaki, mkulu wa chilundo cha wamizi cha hewo, nakalumizwa na kubagama bahala.
2SA 10:19 Hamba wandewa weng'ha wawele womkolela mijito Hadadeseli lowawene kota nawasumigwa na Waisilaeli, nawadita ilagano lya kikala goya na Waisilaeli, nawo nawawa vitumagwa wa isi ya Isilaeli. Lelo Washami nawadumba kuwatanza kahi Waamoni.
2SA 11:1 Mwaluko wa mwaka unyale, mhela uwele wandewa nawalutaga kuli ngondo, Daudi nakamlajiza Yoabu na vilongozi wa heye hamwe na wamizi weng'ha wa Isilaeli kitowa. Nawawasumya Waamoni na kuuzunguluta muji wa Laba. Ila Daudi nakapona Yelusalemu.
2SA 11:2 Zuwa limwe mhela wa kuzinga kwa isanya Daudi nakenuka mchinhanda, nakaluta kuli chinduwiko cha ng'handa ya mndewa. Loyawele yojendajenda ako kuchanya, nakamona mdala yumwe yalingoga, mdala ayo nayali yanojile lukami.
2SA 11:3 Daudi nakalajiza munhu kumuuza mdala ayo ndo whaani. Munhu ayo nakamlonjela Daudi “Mdala ayo ndo Batisheba, mhinza wa Eliabu na ndo mche wa Uliya Mhiti.”
2SA 11:4 Lelo Daudi nakalajiza wasenga wamigale. Batisheba nakoya kwa Daudi, naye Daudi nakawasa na heye, mina mdala ayo nayali yelizwe kulawa kuli kukokomoka kwa heye kwa chila mwezi. Hamba nakahiluka haluga hake.
2SA 11:5 Mdala ayo nakawa na himila na nakalajiza usenga kwa Daudi kota kana himila ya heye.
2SA 11:6 Aho ndo Daudi nakalajiza usenga kwa Yoabu, “Mlajize Uliya, Mhiti, yoye kwa heni.” Naye Yoabu nakamlajiza kwa Daudi.
2SA 11:7 Loyafichile kwa heye, Daudi nakamuuza mbuli za Yoabu na wanhu weng'ha na ngondo vyoiwele ako.
2SA 11:8 Hamba Daudi nakamlonjela Uliya, “Uhiluche haluga kahovuje magulu ga hegwe.” Uliya nakalawa haluga kwa mndewa na mndewa nakamhilichila ndolendole.
2SA 11:9 Ila Uliya hahiluche haluga hake, nakawasa kuli lwizi lwa ng'handa ya mndewa hamwe na vitumagwa weng'ha wa mndewa.
2SA 11:10 Daudi loyalonjelwe kota Uliya halutile haluga hake, nakamuuza Uliya, “Hegwe nakulawa kuli majendo, lekachoni haulutile haluga ha hegwe?”
2SA 11:11 Uliya nakamwidichila Daudi, “Isanduku lya ilagano hamwe na vilundo vya wamizi wa Isilaeli na Yuda vyangikala kuli mihema. Mkulu wa heni Yoabu na vitumagwa weng'ha nawawika kambi kuli chiwala. Ndaze iwa goya heni ndute kulya na kunwa na kuwasa na mche wangu haluga? Kota vyoulingikala, ndangilaha hambe ndite chinhu kota acho.”
2SA 11:12 Hamba, Daudi nakamlonjela Uliya, “Lelo wikale hano kahi na lehano, mitondo ndokuleka uhiluche.” Ahyo, Uliya nayali bahala mujini Yelusalemu zuwa lila. Zuwa lya keli,
2SA 11:13 Daudi nakamchema Uliya yoye kulya na kunwa, Daudi nakamdita Uliya yanwe na yagale. Ila matinazo Uliya halutile haluga hake, nakawasa kuli lutemvu lwa heye hamwe na vitumagwa wa mndewa.
2SA 11:14 Loifichile mitondo, Daudi nakamwandichila Yoabu baluwa na kumlajiza Uliya yaihiliche kwa Yoabu.
2SA 11:15 Kuli baluwa ayo Daudi nakandika hino, “Muwiche Uliya kuli msitali wa kumwando, honhu hawele na kitowa kukulu, hamba mleche kuko nagwe uhiluche kumbele leka wamtowe, yabagame.”
2SA 11:16 Lelo Yoabu loyawele yozunguluta muji wula nakamuwika Uliya honhu hali kitowa kung'hang'hale.
2SA 11:17 Wenyeng'haye wa muji awo nawalawa kitowa na Yoabu. Vitumagwa wanji wa Daudi nawakopoligwa. Uliya Mhiti naye nakakopoligwa.
2SA 11:18 Hamba Yoabu nakahilika mbuli zeng'ha kwa Daudi, ndaze ngondo vyoiwele.
2SA 11:19 Yoabu nakamlonjela hino yula msenga yoyamlajize, “Loumlonjela mndewa mbuli zeng'ha za kuwala ngondo,
2SA 11:20 wone kozudila na kukuuza, ‘Lekachoni namluta habehi na muji lomuwele ngitowa? Hamvizelele kota wowatowa hemwe kwa misale kulawa kuli lukanzi lwa muji wa hewo?
2SA 11:21 Whaani nakamkopola Abimeleki, mwana wa Yelubesheti? Hawele mdala yumwe wa muji wa Tebesi yawele nakatoza iganga kulawa kuli lukanzi, nalyo nalimkopola Abimeleki? Lekachoni lelo namluta habehi na lukanzi?’ Lelo hegwe komlonjela hino, ‘Chitumagwa wa hegwe Uliya Mhiti, naye nakabagama.’ ”
2SA 11:22 Yula msenga nakaluta kwa Daudi na kumlonjela geng'ha goyalajizwe na Yoabu.
2SA 11:23 Yula msenga nakamlonjela Daudi, “Wang'honyo wa hetwe nawali na mong'ho kusinda hetwe, nawalawa kumwando mwa muji na kututowa hetwe kuli chiwala. Ila hetwe natuwahilusa mbaka kuli lwizi lwa muji.
2SA 11:24 Hamba nawatutowa kwa misale hetwe vitumagwa wa hegwe kulawa kuli lukanzi. Vitumagwa wa hegwe wanji nawabagama. Chitumagwa wa hegwe Uliya, Mhiti, naye nakabagama.”
2SA 11:25 Daudi nakamlonjela yula msenga, “Komlonjela hino Yoabu, ‘Mbuli ileche kukutunya kwa vila ipanga lyahela meho, ngondo yangukopolaga yoneche yula. Muutowe kahi kwa mong'ho ng'hatu muji awo na kuudumya.’ Mlonjele ahyo leka kumkangaza nhumbula Yoabu.”
2SA 11:26 Batisheba mche wa Uliya loyahuliche kota mlume wa heye nakabagama, nakamlombochezela mlume wa heye.
2SA 11:27 Mhela wa kuwasiliza matanga loumalile, Daudi nakalajiza Batisheba yaholigwe na kuhilikwa haluga hake Daudi. Batisheba nakawa mche wa Daudi, naye nakampondela Daudi mwana msongolo. Ila chila choyaditile Daudi nachali wihe hali meho ga Mkulu Nguluwi.
2SA 12:1 Lelo Mkulu Nguluwi nakamlajiza mloli Natani kwa Daudi. Natani nakaluta kwa Daudi, nakamlonjela, “Nakwali na walume weli kuli muji umwe, yumwe nayali na lufufu lwinji na yunji nayali mzunwa.
2SA 12:2 Yula yawele na lufufu nayali na ming'holo minji na misenga minji.
2SA 12:3 Ila yula mzunwa nayali na ing'holo lyana limwe idala, liwele yaligulile. Nakalilolela goya nalyo nalikula haluga ha heye hamwe na wana wa heye. Nakalipa chilyo lila ing'holo lyana, chilyo chichila kota cha heye na kunwa mazi kwa chizombe cha heye, naye kahi nayali yolibatilila mmhambaga. Lila ing'holo lyana nalyali kota mhinza kwa yula mzunwa.
2SA 12:4 Zuwa limwe yula yawele na lufufu nayali na mjenzi. Yula yawele na lufufu haganile kuhola limwe lya ing'holo lya heye yuye ama isenga lya heye, yalidumule singo kwa chiwalo cha mjenzi wa heye, ila nakaluta kulihola ing'holo lyana lya yula mzunwa. Nakalidumula singo na kuliteleka kwa chiwalo cha mjenzi wa heye.”
2SA 12:5 Daudi loyahuliche ago, nakamzudila lukami yula yawele na lufufu. Nakamlonjela mloli Natani, “Ndangilaha kwa Mkulu Nguluwi yawele mkomu kota munhu yaditile mbuli ayo kanguganigwa kubagama!
2SA 12:6 Kahi kanguganigwa kumhilusila yula mzunwa ming'holo myana jine kwa chiwalo cha lila ing'holo lyana limwe yaliholile, kwa vila nakadita mbuli yihile na nayali hela isungu.”
2SA 12:7 Natani nakamlonjela Daudi, “Hegwe ndo yula munhu! Lelo Mkulu Nguluwi, Nguluwi wa Isilaeli, kangulonga hino, ‘Heni nandikubakaliza mafuta leka uwe mndewa kwa wanhu wa Isilaeli na kukulohola kuli moko ga Sauli.
2SA 12:8 Ndikupa ng'handa ya mkulu wa hegwe na wache wa heye wawe wa hegwe. Ndikupa kahi wanhu wa Isilaeli na wa Yuda uwalongoze. Kota nagali mado hela kwa hegwe ndigana ndikupe mala keli kusinda ago.
2SA 12:9 Lekachoni lelo nakulemwela kuhulichiza ulonzi wa heni Mkulu Nguluwi, nakudita wihe awu hali heni? Nakulajiza Uliya Mhiti, yakopoligwe kwa ipanga na kumhola mche wake kuwa mche wako. Nakwambuza Waamoni wamkopole Uliya kuli ngondo.
2SA 12:10 Lelo kwa vila nakumbeza na kumhola mche wa Uliya, Mhiti na kuwa mchewako, kubagama kwa ipanga kwa wang'holozo kolutilila mazuwa gose.’
2SA 12:11 Uhulichize, Mkulu Nguluwi kangulonga, ‘Lole, ndochigala wihe kwa hegwe kulawa kuli ivyazi lya hegwe. Ndowahola wache wa hegwe hali meho ga hegwe na kumha munhu wa behi na hegwe, naye kowasa na hewo honhu hazelu.
2SA 12:12 Hegwe nakudita mbuli ayi kwa uviso, ila heni ndogadita aga hali Waisilaeli weng'ha hazelu.’ ”
2SA 12:13 Lelo Daudi nakamlonjela Natani, “Nandimditila gehile Mkulu Nguluwi.” Natani nakamlonjela, “Mkulu Nguluwi nakosa gehile ga hegwe, nagwe haubagama hebu.
2SA 12:14 Ila kwa vila nakumbeza ng'hatu Mkulu Nguluwi, mwana hoyopondigwa sambi, kobagama.”
2SA 12:15 Hamba Natani nakahiluka haluga hake. Mkulu Nguluwi nakamtowa mwana wa Batisheba yawele nayali mche wa Uliya, yampondele Daudi, naye nakawa mtamwa.
2SA 12:16 Daudi nakamlanda Nguluwi kwa chiwalo cha mwana wa heye. Nakesela kulya na nakawa yowasa hasi nechilo yeng'ha.
2SA 12:17 Vilongozi wa heye nawema hafungo ha heye na kujeza kumwinula, ila henuche ne kulya.
2SA 12:18 Kuli zuwa lya saba, mwana ayo nakabagama, ila vitumagwa wa Daudi nawadumba kumlonjela. Nawelonjela hewo kwa hewo, nawalonga, “Mwana loyawele yang'hali mkomu, Daudi hatuhuliche hetwe. Ndaze, tomlonjela heye kota mwanage kabagama? Hanji kochilumiza!”
2SA 12:19 Daudi nakawona vitumagwa wa heye wopwepwa, nakavizela kota mwanage nakabagama. Ahyo nakawauza, “Ndaze, mwana nakabagama?” Nawo wamwidichila, “Ena, nakabagama.”
2SA 12:20 Daudi nakenuka na kuluta koga na kuwika goya mnvili na kuvala. Nakaluta kuli ihema lya Mkulu Nguluwi na kumfugamila. Loyahiluche haluga hake, nakalanda chinhu cha kulya. Vitumagwa lowamigalile chilyo, nakalya.
2SA 12:21 Vitumagwa wa heye nawalonga, “Kwangukola choni? Nakuluta ne kulya na kumlilila mwanago vyoyawele mkomu! Ila sambi nakabagama, nakwinuka na kulya.”
2SA 12:22 Daudi nakedichila, “Loyawele yang'hali mkomu nyesela kulya na kulila kwa vila nandijesa, hanji Mkulu Nguluwi kowa na isungu na heni na kumleka mwana wa heni yawe mkomu.”
2SA 12:23 Ila sambi nakabagama lekachoni nyesele kulya? Siweza kumhilusa kahi! Zuwa linji ndochilumba naye kuli wabagame, ila hohiluka kwa heni kahi!
2SA 12:24 Daudi nakamhembuliza mchewake Batisheba na kuwasa naye. Hamba nakaponda mwana yunji msongolo, nakamchema Solomoni. Mkulu Nguluwi nakamgana Solomoni,
2SA 12:25 nakamlajiza mloli Natani kumlonjela Daudi yamcheme mwana ayo Yedidiya kwa vila Mkulu Nguluwi nakamgana.
2SA 12:26 Mhela Yoabu loyawele kuli isi ya Waamoni, nakauvaba muji wa Laba na kuihola ngome ya undewa.
2SA 12:27 Nakalajiza usenga kumlonjela Daudi, “Nandiuvaba muji na kuihola ngome ilingwamila honhu halingulavya mazi.
2SA 12:28 Uwakungajize wamizi hamwe hamba uzungulute muji na kuuhola. Wone haiwele ahyo, londiuhola ndotogolwa kwa kuuhola muji awo.”
2SA 12:29 Daudi nakakungajiza wamizi hamwe na kuuvaba muji wa Laba na kuuhola
2SA 12:30 na kuhola kofia ya mndewa kulawa kuli limalukolo lya mlungu wa hewo Milikomu. Kofia ayo naigongomanyigwa kwa kilo makumi gadatu na zine za zahabu, nakwali na libwe lya sendi nyinji kwa chiwalo cha kunoliga, kuchanya mwa kofia ayo. Daudi nakawika libwe alyo lya sendi nyinji kuli kofia ya heye. Hamba wamizi wa Daudi nawahola vinhu viyage vya sendi nyinji.
2SA 12:31 Daudi nakawalavya wanhu wawele amo, nakawawika wakole mijito kwa misumeno na sululu za chuma na miwago, hamba nakawawika hewo wakole mijito ja kugongomanya mitufali. Nakadita hihyo kwa miji jeng'ha ja Waamoni. Hamba Daudi na wanhu wa heye weng'ha, nawahiluka Yelusalemu.
2SA 13:1 Logakolile ago, Amunoni mwana wa Daudi nakamgana Tamali, kwa vila nayali yanojile lukami. Tamali nayali lumbulye Abusalomu, mwana wa Daudi.
2SA 13:2 Ila Tamali nayali mhinza yohanating'hana na mlume, lelo Amunoni nayali yochijesa kota howeza hebu kuwasa na Tamali, yawele ndo mng'holoze. Nayali yochijesa lukami kwa mbuli ayo mbaka nakaluka kutamika.
2SA 13:3 Amunoni nayali na goloko yachemigwe Yonadabu yawele ndo mwana wa mkulugwe Daudi, nayachemigwe Shama. Yonadabu nayali msugu lukami,
2SA 13:4 nakamlonjela Amunoni, “Hegwe kwa mwana wa mndewa lekachoni kwanguganda chila zuwa? Lekachoni hulingundonjela?” Amunoni nakamlonjela, “Ndangumgana Tamali, lumbulye mng'holozangu Abusalomu.”
2SA 13:5 Yonadabu nakamlonjela, “Hegwe uwase mchinhanda uchidita kwa mtamwa. Mhaza wa hegwe hoyokuya kukulola, mlande aku ulonga, ‘Umlajize Tamali yateleche chilyo hali heni aku ndimlola hamba yandise.’ ”
2SA 13:6 Ahyo Amunoni nakaluta kuwasa na kidita kota ka mtamwa. Mndewa loyoyile kumlola, Amunoni nakalonga, “Dedede ndangulanda umlonjele Tamali yoye yangongomanyile mibumunda michefu aku ndimlola hamba heye yuye yandise.”
2SA 13:7 Ahyo, Daudi nakalajiza usenga kwa Tamali yawele nayali kuli ng'handa ya mndewa, yolonga, “Ulute kuli ng'handa ya Amunoni ukamgongomanyile chilyo.”
2SA 13:8 Tamali loyafichile hala, Amunoni nayali yawasile mchinhanda. Lelo nakahola utimbo na kuutimba. Hamba nakagongomanya mibumunda na kujibanika aku Amunoni yololela.
2SA 13:9 Hamba Tamali nakahola mibumunda kulawa mchiya na kuwika hali heye, ila Amunoni nakalema kulya. Amunoni nakalonga, “Uwalonjele vitumagwa walawe mng'handa,” lowalawile,
2SA 13:10 Amunoni nakamlonjela Tamali, “Ungalile chilyo kuli chihengo cha heni leka undise.” Tamali nakahola mibumunda joyabaniche na kujihilika kuli chihengo cha heye.
2SA 13:11 Ila loyawele yomhilichila mibumunda, Amunoni nakamibata na kumlonjela, “Uye uwase na heni, lumbu wa heni.”
2SA 13:12 Tamali nakedichila, “Hebu, kalumbu wa heni! Dedede uleche kung'hola lupichi. Mbuli ayi hailinguganigwa ikoleche kuli isi ya Isilaeli. Mbuli ayi yiha!
2SA 13:13 Yowa ndaze kwa heni? Ndobezigwa mazuwa gose! Wijese gwegwe. Chila munhu aha Isilaeli kolonga kota huwele chinhu ila usanyangwa. Muuze mndewa na kokundiza unyhese.”
2SA 13:14 Ila Amunoni hahulichize choyalonjile Tamali. Nayali na mong'ho kusinda Tamali, ahyo nakamsumya na kuwasa naye kwa lupichi.
2SA 13:15 Hamba Amunoni nakamzudila ng'hatu Tamali kusinda hala hamwande loyamganile. Ahyo, nakamlonjela, “Winuche na ulute kaye!”
2SA 13:16 Tamali nakamlonjela Amunoni, “Uleche kumbinga! Yowa vibi ng'hatu kusinda chinhu chino chouditile.” Ila Amunoni hamhulichize hebu.
2SA 13:17 Nakamchema chitumagwa wa heye na kumlonjela, “Umlavye mdala ayu na uhinde lwizi kwa mhajilo.”
2SA 13:18 Chitumagwa nakamlavya ayo mdala na kuhinda lwizi kwa mhajilo. Nayali yavalile ikanzu lya undewa liwele wahinza wa mndewa hawanaholeka nawavalaga.
2SA 13:19 Tamali nakadega ikanzu nalyoyavalile na kubakala mivu kumutwi. Hamba nakawika moko ga heye kumutwi na kulila kwa lizi likulu loyawele yokuka.
2SA 13:20 Abusalomu nakamlonjela Tamali, “Ndaze, Amunoni kalumbu wa hegwe nakawasa na hegwe? Usindamale lumbulyangu. Heye ka kalumbu wa hegwe. Uleche kuwika mbuli ayi mnhumbula ya hegwe.” Tamali nakekala aho kuli ng'handa ya Abusalomu, ila nayali na masinzo na kikala yaliyeka.
2SA 13:21 Daudi loyahuliche chinhu chilawile kwa Tamali, nakazudila ng'hatu.
2SA 13:22 Abusalomu nakalema kulongasa kahi na Amunoni, kwa vila nakamzudila Amunoni kwa chinhu choyamditile Tamali, lumbulye.
2SA 13:23 Miyaka mili hamba, vitumagwa wa Abusalomu nawali wotema milaika ja ming'holo ja heye ako Baali-hasoli, habehi na muji wa Efulaimu. Abusalomu nakawalalika wana walume weng'ha wa wandewa wawe bahala.
2SA 13:24 Hamba nakaluta kwa Daudi na kumlonjela, “Vitumagwa wa heni wangutema milaika ja ming'holo ja heni, dedede uye na kihanza na hetwe kuli mnvina!”
2SA 13:25 Daudi nakedichila, “Hebu mwana wa heni, hatuluta. Towa itunyo kwa hegwe.” Abusalomu naketunya kumdita yagaluse majesa ga heye, ila Daudi nakalema kuluta, ila nakamtambichiza.
2SA 13:26 Abusalomu nakalonga, “Wone houkuya, lelo mlonjele Amunoni mng'holozangu tuche hamwe.” Daudi nakauza, “Lekachoni kwangugana mlutase?”
2SA 13:27 Ila Abusalomu nakalutilila kitunya kulanda walutase, hamba Daudi nakamkundiza Amunoni walutase na wana wanji wa mndewa. Abusalomu nakawika goya mnvina ya chiundewa,
2SA 13:28 ila nakawalonjela vitumagwa, “Iziho lya hemwe liwe kwa Amunoni. Wone yanwe na yaluche kugala na kusangalala, ndowalonjela, ‘Mumtowe Amunoni,’ hamba mumkopole. Ndiwalajiza hemwe kudita ahi, ahyo mleche kudumba. Mwime nzinzili na muwele na mong'ho.”
2SA 13:29 Vitumagwa wa Abusalomu nawamkopola Amunoni kota vyoyalonjile Abusalomu. Wana walume wanji wa mndewa Daudi nawakwina migongolo kota midogowi mikulu himahima na kumbilima Abusalomu.
2SA 13:30 Lowawele mnzila kuluta Yelusalemu, munhu yumwe nakamlonjela mndewa Daudi, “Abusalomu nakawakopola wana walume wa hegwe weng'ha, kuduhu ne yumwe yaponile.”
2SA 13:31 Mndewa Daudi nakenuka na kudega nguwo za heye kwa masinzo na kuwasa hanyi mmisanga. Vitumagwa wa heye nawapona wemile, ila nawadega nguwo za hewo kahi.
2SA 13:32 Hamba Yonadabu, mwana wa mkulugwe Daudi, nakalonga, “Mndewa, haiwele wana wa hegwe weng'ha wakopoligwe, ila Amunoni yaliyeka ndo yakopoligwe. Zuwa lila Amunoni loyamibate Tamali na kuwasa naye kwa lupichi, Abusalomu nakejesa ng'hatu kumkopola Amunoni.
2SA 13:33 Uleche kijesa kota wana wa hegwe weng'ha nawabagama, mndewa wa heni, hebu ila Amunoni yaliyeka ndo yabagame.”
2SA 13:34 Abusalomu nakabilima. Mwamizi yumwe nakawona wanhu wenji wokola nzila ya kuchidunda kulawa Holonaimu. Nakaluta nakumlonjela mndewa, “Ndiwona wanhu wenji wokola kuli nzila ya kulawa Holonaimu.”
2SA 13:35 Yonadabu nakalonga, “Mndewa, ulole! Wana wa hegwe wanguya, kota vila vyondikulonjele.”
2SA 13:36 Loyawele yolonga, baho du wana wa Daudi nawenjila. Nawali wolila kwa lizi likulu, Daudi na vitumagwa wa heye wanji nawalila lukami kwa usungu.
2SA 13:37 Daudi nayali na masinzo ng'hatu kwa vila Amunoni nakabagama. Abusalomu nakabilimila ako Geshuli, koyekale kwa miyaka jidatu na mndewa Talimayi, mwana wa Amihudi.
2SA 13:39 Muhe wa Daudi naugana kuluta kumona Abusalomu, kwa vila Daudi nayali yasindile kulombocheza kwa chiwalo cha kubagama kwa Amunoni.
2SA 14:1 Yoabu, mwana wa Seluiya nakavizela kota nhumbula ya Daudi naigana kumona mwanage Abusalomu,
2SA 14:2 lelo nakamchema munhu yumwe yakamigale mdala yawele na nyhala na yawele yochikala ako Tekoa. Yoabu nakamlonjela mdala, “Uvale nguwo za kulombocheza na uleche kinoliga kwa mafuta. Widite kota mdala yawele nayali na masinzo kwa mazuwa menji kwa chiwalo cha kufililwa.
2SA 14:3 Hamba ulute kwa mndewa na ulonje ulonzi awu.” Yoabu nakamlonjela yula mdala ulonzi wa kumlonjela mndewa.
2SA 14:4 Mdala ayo kulawa Tekoa nakaluta kwa Daudi. Naketoza chifunama hali Daudi na kumfugamila na kulonga, “Mndewa, dedede ndangulanda unhanze!”
2SA 14:5 Daudi nakauza, “Kuna mbuli yachi?” Mdala nakedichila, “Mlume wa heni nakabagama, sambi nda mdala fililwe.
2SA 14:6 Nandali na wana walume weli. Nawetowa hewo kwa hewo ako kumgunda, hakuwele na munhu wa kuwalewela, ahyo yumwe nakamtowa na kumkopola myage.
2SA 14:7 Lelo wang'holozangu weng'ha nawoya kwa heni na kulonga, ‘Umlavye mwanago! Twanguluta kumkopola heye kota vyoyamkopole mng'holoze.’ Ila chowalingugana ndo kumusa heye leka wahole isi ya hetwe. Dedede uleche kuwadita wose kitumbila kwa heni. Kowa kulihela munhu yopona hano muisi yohola itagwa lya mlume wa heni.”
2SA 14:8 Daudi nakamlonjela yula mdala, “Uhiluche kaye. Ndoidita mbuli ayi kwa chiwalo cha hegwe.”
2SA 14:9 Mdala yula nakalonga, “Mndewa wa heni, nongwa yeng'ha iwe kwa heni na kwa ivyazi lya mhaza wa heni. Ahyo, hali hegwe na chigoda cha undewa wa hegwe haleche kuwa na nongwa.”
2SA 14:10 Daudi nakalonga, “Wone munhu yoneche yokutunya kahi, umigale ayo kwa heni na hokudoliza kahi!”
2SA 14:11 Ayo mdala nakalonga, “Lelo, hegwe mndewa umlande Mkulu Nguluwi, Nguluwi wa hegwe leka kulemeza kuhilula chibida, leka mwana wa heni yaleche kukopoligwa.” Mndewa nakalonga, “Kukomya, kota Mkulu Nguluwi vyoyalingikala, ndangilaha kota mwanago holumizwa ne hado.”
2SA 14:12 Hamba nakamuuza, “Mndewa, ndoweza kulonga chinhu chimwe kahi?” Mndewa nakamwidichila, “Ena.”
2SA 14:13 Mdala nakalonga, “Huwalumize hebu wanhu wa Nguluwi? Mwana wa hegwe nakoka kuli isi ayi. Wone ulingutagusa mbuli ya heni kota ahi, fola umkundize mwana wa hegwe yahiluche kuli isi ya heye.
2SA 14:14 Hetwe tweng'ha tobagama na kwajilila kota mazi gabohoche mmisanga. Ila Nguluwi hokusa ukomu, kangupala nzila ya kumhilusa heye yabilime.
2SA 14:15 Mndewa, mbuya hano leka ndikulonjele mbuli yombele nayo, kwa vila nandali ndidumba munhu yoneche koweza kunditila chinhu chihile. Nyamula kuya kwa hegwe kwa vila nandali ndijesa hanji konhanza.
2SA 14:16 Mina nandivizela mndewa konyhulichiza na kundohola heni na mwana wa heni kulawa kwa wala wanhu walingugana kuiboka isi yatupele Nguluwi.
2SA 14:17 Lelo nandijesa, ‘Ulonzi wa mndewa wa heni umhe heni kwesela,’ kwa vila mndewa wa heni ndo kota mhilisi wa Nguluwi kuli kuvizela linojile na lihile. Mkulu Nguluwi, Nguluwi wa hegwe yawe hamwe na hegwe.”
2SA 14:18 Hamba Daudi nakamlonjela yula mdala, “Lelo ndokuuza chinhu na uleche kuvisa choneche!” Yula mdala nakedichila, “Dedede, umbuze mndewa.”
2SA 14:19 Daudi nakamuuza, “Yoabu kakuwika hegwe kuli mbuli ayi?” Mdala nakedichila nakalonga, “Mndewa, ndangilaha kwa ukomu wa hegwe kota kuduhu ne yumwe yovisa chinhu kwa hegwe. Ena, Yoabu nakandangusa cha kulonga,
2SA 14:20 ila Yoabu nakadita ahyo leka kugalula mbuli ya ilingumuwala Abusalomu. Hegwe, mkulu wa heni kuna luhala kota mhilisi wa Nguluwi mbaka kwanguvizela mbuli zeng'ha ziwele muisi.”
2SA 14:21 Daudi nakamgalamchila Yoabu na kulonga, “Goya, ndoidita mbuli ayi. Umhiluse haluga yula msongolo Abusalomu.”
2SA 14:22 Yoabu nakagwa chifunama, nakafugama na kumtambichiza mndewa na kulonga, “Lehano, heni chitumagwa wa hegwe, mndewa wa heni, ndivizela kota nakunojezwa na heni, kwa kukunda kulanda kwa heni.”
2SA 14:23 Yoabu nakaluta Geshuli kumhola Abusalomu, ila lowahiluche Yelusalemu,
2SA 14:24 Daudi nakamlonjela Yoabu, “Silingugana kumona mwanangu Abusalomu. Umlonjele yekale kutali na heni.” Ahyo, Abusalomu nakaluta kikala kuli ng'handa ya heye ne kumona mhaza wa heye.
2SA 14:25 Kuduhu msongolo ne yumwe hali Isilaeli yawele yanojile kota Abusalomu. Kulawa kumeho kwa heye mbaka kuli uzayo wa heye, Abusalomu hawele na nongwa yoneche.
2SA 14:26 Chila kuli kuduma kwa mwaka nayali yobeya mnvili za heye. Loyabeyile mnvili azo, nazali na itunyo lya kilo mbili kwa vipimilo vya undewa.
2SA 14:27 Abusalomu nayali na wana walume wadatu. Nayali kahi na mhinza nayachemigwe Tamali, yawele yanojile lukami.
2SA 14:28 Abusalomu nakekala Yelusalemu kwa mhela wa miyaka mili ne kiwona na mhaza wa heye, Daudi.
2SA 14:29 Nakagana Yoabu yalonje na Daudi honhu ha heye. Ahyo, zuwa limwe nakamlajiza msenga kumlajiza Yoabu yoye kwa heye, ila Yoabu nakalema. Abusalomu nakamlajiza msenga yunji, ila Yoabu nakalema kahi.
2SA 14:30 Hamba Abusalomu nakawalonjela vitumagwa wa heye, “Mgunda wa shayili wa Yoabu wangilola na wa heni. Mlute mkausome!” Hewo nawadita kota vyowalonjelwe.
2SA 14:31 Yoabu nakaluta mbaka kuli ng'handa ya Abusalomu na kumlonjela, “Lekachoni vitumagwa wa hegwe nawasoma mgunda wa heni?”
2SA 14:32 Abusalomu nakedichila, “Hung'hundile hondikulajize. Ndangugana ulute ukamuuze mhaza wa heni, lekachoni yandonjele nyhiluche kulawa Geshuli? Nandali ndikale goya kula. Ndangugana ndimone mhaza. Wone ndina nongwa, lelo yang'hopole.”
2SA 14:33 Yoabu nakaluta kwa Daudi na kumlonjela geng'ha goyalonjile Abusalomu. Daudi nakamchema Abusalomu, naye nakoya na kitoza chifunama, Daudi nakamnonela Abusalomu.
2SA 15:1 Mhela udo hamba, Abusalomu nayali na mutuka wa kukwejigwa na falasi na nayali na wanhu makumi gahano wamlongole kumwando.
2SA 15:2 Kanguwaga yokwinuka ng'hanu hananya na kikala hafungo mwa nzila ilinguluta kuli lwizi lwa muji. Yoneche yawele na nongwa ya kuhilika kwa mndewa Daudi leka yatagusigwe, yomlapa kukola nzila yila. Abusalomu kanguwaga yowauza chila yumwe wa hewo na kulonga, “Kwangulawila kohi?” Lowalonjile kota wangulawa kuli nhanzi imwenga ya Isilaeli,
2SA 15:3 Abusalomu nakalongaga, “Kwanguganigwa usumye nongwa ya hegwe, ila mndewa kahela munhu wa kuhulichiza nongwa ya hegwe.”
2SA 15:4 Hamba Abusalomu kangumlonjelaga, “Wone nandahawele mtagusa wa Isilaeli! Chila munhu yalingigala kwa heni mbuli ya heye ilingumtunya, nani ndahampele hachi.”
2SA 15:5 Mhela woneche wone munhu yoye kwa Abusalomu na kwaluka kumfugamila, heye kangumwinulaga na kumkumbatila na kumnonela.
2SA 15:6 Ahyo ndo navyoyawele yowaditila kwa chila munhu yalawile Isilaeli yegale nongwa ya heye kwa mndewa leka yatagusigwe. Hamba wanhu nawamgana ng'hatu Abusalomu kusinda vyowamganile mndewa Daudi.
2SA 15:7 Miyaka jine hamba, Abusalomu nakamlonjela Daudi, “Dedede, leka ndute Hebuloni, ndikeneze ilagano lyondilahile kwa Mkulu Nguluwi,
2SA 15:8 londali ndichikala na Washami ako Geshuli. Nandilaha kota, ‘Wone mkulu yanyhiluse heni kikala kahi Yelusalemu, ndomfugamila Mkulu Nguluwi ako Hebuloni.’ ”
2SA 15:9 Daudi nakamkundiza Abusalomu yoche kwa kikala goya, naye nakaluta ako Hebuloni.
2SA 15:10 Ila Abusalomu nakawalajiza wapugajizi kuli nhanzi zeng'ha za isi ya Isilaeli kulonga, “Hala du lomhulika lizi lya mhalamhanda, aho ndo homlonga, ‘Abusalomu ka mndewa hala Hebuloni.’ ”
2SA 15:11 Wanhu miya mbili kulawa Yelusalemu nawaluta na Abusalomu. Nawali walalikwe kota wajenzi, nawo nawaluta kwa kikala goya ne kuvizela choneche.
2SA 15:12 Abusalomu loyawele yolavya nhambiko, nakamlajiza Ahitofeli, Mgiloni, munhu yalingumlonjela Daudi mbuli zilivinji. Ahitofeli yachemigwe kulawa kuli muji wa heye, uwele ndo Gilo. Kubelenhuka kwa hewo nakwali na mong'ho na konjezeka lukami.
2SA 15:13 Msenga nakoya na kumlonjela Daudi, “Walume wa Isilaeli wangumuwinza Abusalomu!”
2SA 15:14 Lelo Daudi nakawalonjela vilongozi wa heye wawele Yelusalemu hamwe na heye, “Tuche hano! Twanguganigwa kulawa himahima sambi baha ama kuduhu ne yumwe yosulupuka kulawa kwa Abusalomu. Wone hatulawa himahima, kotibata hetwe tung'hali baha. Hamba kotukopola tweng'ha na chila yumwe aha kuli muji.”
2SA 15:15 Vilongozi wa Daudi nawalonga, “Mndewa, hetwe vitumagwa wa hegwe, todita choneche choulonga.”
2SA 15:16 Daudi nakawaleka kumbele waha wake kumi kulolela ng'handa ya mndewa, ila wamwe wa ivyazi lya heye na vilongozi nawalutasa hamwe na heye. Nawema kuli ng'handa ya kuduma kuli lukanzi lwa muji.
2SA 15:18 Wanhu wa heye weng'ha nawamkola na kumlongola heye wawele wolutasa na Wakeleti na Wapeleti weng'ha. Ikugusi lya mwiso nalyali na wamizi miya sita wamuwinzile kulawa Gati.
2SA 15:19 Hamba, mndewa Daudi loyamuwene Itayi, Mgiti, nakamlonjela, “Lekachoni mbaka nagwe nakuka hamwe na hetwe? Uhiluche kikala na ayo mndewa msongolo. Mina hegwe ndo mjenzi kuno, kahi ndo munhu yabilime kulawa haluga hake.
2SA 15:20 Hegwe kwa hano na heni kwa mhela uchefu hela, lelo lekachoni umbinze kuno sivizelele kohi kondilinguluta? Uwahole wamizi wa hegwe na uhiluche kumbele. Ndangulanda kota Mkulu Nguluwi kowa na igano lya kwimilila na wa kukundigwa kwa hegwe.”
2SA 15:21 Ila Itayi nakamwidichila mndewa, “Kota Mkulu Nguluwi vyoyalingikala na hegwe mkulu wa heni vyoulingikala, honeche houwa, wone iwe kwa kubagama ama kwa kikala, nani chitumagwa wa hegwe ndowa aho.”
2SA 15:22 Lelo Daudi nakalonga, “Ena uye lelo!” Ahyo Itayi Mgiti na wanhu wa heye weng'ha na ivyazi lyawo nawaluka majendo hamwe na Daudi.
2SA 15:23 Wanhu wa Isilaeli nawali wolila na kulombocheza hala Daudi loyawele yokuka hamwe na wanhu wa heye. Nakawalongoza kukolela ibindi lya Kidiloni kulutila kuchiwala.
2SA 15:24 Sadoki na Abiatali, mtambika nawali hala na wanhu wanji wenji kulawa kuli nhanzi ya Lawi wawele wapichile isanduku lya ilagano lya Nguluwi. Nawawika isanduku hasi na kulileka bahala mbaka Daudi na wanhu wa heye lowochile kuluta kunze kwa muji.
2SA 15:25 Hamba Daudi nakalonga, “Sadoki, uhole isanduku lya ilagano lya Nguluwi, lihiliche kumbele Yelusalemu. Wone Mkulu Nguluwi kanojezwa na heni, konyhilusila na kung'hundiza ndilyone isanduku na ihema lya heye kahi.
2SA 15:26 Ila wone yolonga halingunojezwa na heni, lelo mleche yadite choyokona chinoga.”
2SA 15:27 Ndaze, kwanguvizela? Uhiluche kuli muji kwa kikala goya hamwe na mwanago Ahimaasi na Yonatani, mwana wa Abiatali.
2SA 15:28 Ndokubeteza kuli lwanda lulinguloka chiwala mbaka hondihulika mbuli ya hegwe.
2SA 15:29 Sadoki na Abiatali nawahiluka Yelusalemu na isanduku lya ilagano na kikala kuko.
2SA 15:30 Daudi nakaluta kuli chiduliko cha chidunda cha mzeituni. Havalile makwamba kuli magulu na kulila aku yegubiche kumutwi kulajila masinzo goyawele nago. Chila yumwe yawele hamwe na heye nayali yolila na kigubika kumutwi kahi.
2SA 15:31 Munhu yumwe nakamlonjela Daudi, “Ahitofeli kangumtanza Abusalomu kukubelenhuka!” Daudi nakalonga, “Dedede, Mkulu Nguluwi udite ulonzi wa Ahitofeli uwe wa chipoka!”
2SA 15:32 Daudi loyafichile kuli chinhembenhembe kuli Chidunda cha mzeituni honhu ha kumfugamila Nguluwi, naketing'hana na Hushayi, Mualiki. Ikanzu lya Hushayi nalidejeka na nhimbwisi nayali kumutwi kwa heye kulajila masinzo.
2SA 15:33 Daudi nakamlonjela, “Wone koluta hamwe na heni, kowa itunyo kwa heni.
2SA 15:34 Uhiluche kuli muji, ukamlonjele Abusalomu, ‘Mndewa, heni nda chitumagwa wa hegwe. Ndowa chitumagwa wa hegwe sambi kota vyondiwele chitumagwa wa mhaza wa hegwe aho hamwande.’ Hushayi, wone udite ahyo, konhanza heni sumye kuwifya ulonzi wa Ahitofeli.
2SA 15:35 Watambika, Sadoki na Abiatali, wowa hamwe na hegwe ako na kuwalonjela choneche chouhulika kuli ng'handa ya mndewa.
2SA 15:36 Hamba wowalajiza wana wa hewo, Ahimaasi na Yonatani kundonjela choni chouhuliche.”
2SA 15:37 Hushayi, goloko wa Daudi, nakahiluka kumbele kuluta Yelusalemu, mhela wuwula Abusalomu loyawele yohiluka na kwinjila kuli muji.
2SA 16:1 Daudi nakaluka kudulika kuchidunda ubanzi wa keli wa chidunda cha mzeituni, loyating'hane na Siba, chitumagwa wa Mefibosheti. Siba yawele na midogowi mili jipapile mibumunda miya mbili na vilundo miya imwe vya zabibu zikalile na mafuza miya imwe ga tini na chihako cha igozi cha kuwichila divai.
2SA 16:2 Daudi nakamuuza Siba, “Vya choni vinhu avi vyeng'ha?” Siba nakamlonjela, “Idogowi ndiwagalila ivyazi lya hegwe kukwina. Mibumunda na mafuza ndiwagalila wanhu kulya na divai ndo ya kunwa lowowa kuchiwala hala howochiwona watoka.”
2SA 16:3 Daudi nakamuuza “Kakohi Mefibosheti?” Siba nakedichila, “Kangikala Yelusalemu, kwa vila nakejesa kota wanhu wa Isilaeli wangugana heye yalongoze undewa wa sekulu wa heye, Sauli.”
2SA 16:4 Hamba Daudi nakamlonjela, “Chila chinhu nachiwele cha Mefibosheti sambi ndo cha hegwe.” Siba nakalonga, “Mndewa, heni nda chitumagwa wa hegwe hela, ndangitumbila konojezwa na heni.”
2SA 16:5 Daudi nayali habehi na muji wa Bahulimu hala munhu loyalawile na kwaluka kumpanjila. Munhu ayo nayali Shimeyi, mwana wa Gela na nayali yumwe wa wang'holoze Sauli wa kutali.
2SA 16:6 Nakamtozela maganga Daudi na vitumagwa wa heye na kwa chila munhu yawele hamwe na heye, hanga wamizi nawali womwamila mndewa Daudi ubanzi wa kumoso na kudilo.
2SA 16:7 Shimeyi nayali yompanjila Daudi, “Uche hano, hegwe mkopolaji. Kwa mwihe hegwe!
2SA 16:8 Mkulu Nguluwi kangukuhilusila chibida kwa kuwakopola wanhu wenji kuli ivyazi lya Sauli. Nakuhiza undewa wa heye ila sambi Mkulu Nguluwi nakamha Abusalomu. Kuna magazo kwa vila hegwe kwa mkopolaji.”
2SA 16:9 Hamba Abishayi, mwana wa Seluiya nakamlonjela mndewa, “Lekachoni ali libwa lifile lyangumpanjila mndewa wa heni? Ng'hundize ndute kudumula mutwi wa heye.”
2SA 16:10 Daudi nakedichila, “Mbuli ayi hailinguwawala hemwe. Wone Shimeyi kangumhanjila heni kwa vila Mkulu Nguluwi nakamlonjela heye, lelo hemwe mwa whaani mumlonjele yaleche?”
2SA 16:11 Hamba Daudi nakamlonjela Abishayi na wamizi wa heye, “Mwana wa nene baha kangugana kung'hopola! Ayu Mbenjamini kahi kogana heni mbagame. Mumleche yamhanjile. Hanji Mkulu Nguluwi nakamlonjela yamhanjile.
2SA 16:12 Ila wone Mkulu Nguluwi yahuliche kupanjila aku na kulola nongwa yombele nayo, hanji kowa na isungu kwa heni.”
2SA 16:13 Daudi na wanhu wa heye nawalutilila na majendo mnzila, ila Shimeyi nayali yojenda hafungo mwa chidunda hamwe na Daudi, kuno yompanjila na kuwatozela maganga na nhimbwisi.
2SA 16:14 Hala Daudi na weng'ha wawele hamwe na heye lowafichile kuli lwanda lwa Yolodani, nawatoka lukami. Ila lowesele, nawawa na mong'ho kahi.
2SA 16:15 Mhela awo Abusalomu na wanhu weng'ha wa Isilaeli nawafika Yelusalemu, naye Ahitofeli nayali hamwe na heye.
2SA 16:16 Aho ndo Hushayi, Mualiki, goloko wa Daudi, nakoya kwa Abusalomu na kulonga, “Wikale mndewa! Wikale mndewa!”
2SA 16:17 Ila Abusalomu nakamuuza Hushayi, “Ahi ndo vyoulingulajila igano lya kwimilila kwa goloko wa hegwe Daudi? Lekachoni hulutile hamwe na heye?”
2SA 16:18 Hushayi nakedichila, “Mkulu Nguluwi na wanhu weng'ha wa Isilaeli nawakuhagula hegwe uwe mndewa. Sikuka hebu. Ndopona baha na kuwa chitumagwa wa yula wamhagule.
2SA 16:19 Mzidi wa ago, ndomkolela mijito whaani? Ndaze, hawele mwana wa goloko wa heni? Lelo, kota vyondimkolele mijito mhaza wa hegwe, ahyo ndo vyondikukolela mijito hegwe.”
2SA 16:20 Abusalomu nakahinduka kwa Ahitofeli na kulonga, “Utulonjele, tudite choni?”
2SA 16:21 Ahitofeli nakedichila, “Wamwe wa waha wa mhaza wa hegwe nawapona aha kulolela ng'handa ya mndewa. Uwase na hewo. Hamba chila yumwe kuli isi ya Isilaeli kovizela kota hegwe kwa izudizo kwa mhaza wa hegwe. Ayi yowadita wanhu walingukuwinza wawe wekangaze, kwa vila wokona hegwe hulingudumba chinhu choneche.”
2SA 16:22 Ahyo, wanhu nawamwichila ihema Abusalomu kuchinduwiko cha ng'handa ya mndewa, Waisilaeli weng'ha nawali wolola yokwinjila na waha wa mhaza wa heye kwa chiwalo cha kuwasa nawo.
2SA 16:23 Mazuwa ago, ulonzi woneche woyalavile Ahitofeli nawali kota naulawa kwa Nguluwi, ahyo nawali uhulichizwa na Daudi na Abusalomu.
2SA 17:1 Ahitofeli nakamlonjela Abusalomu, “Undeche ndiwahagule walume elufu kumi na mbili na kuza kumvaba Daudi lehano nechilo.
2SA 17:2 Hala hoyowa yatochile na kutweguka, kowa na lunhwinhwi na chila yumwe hali heye kobilima. Simkopola ne yumwe ila Daudi
2SA 17:3 na kuwahilula wanhu weng'ha kwa hegwe. Kubagama kwa munhu yula ulingumpala cholajila kuhiluka kwa weng'ha, haduhuli ne yumwe yawele yolumizwa.”
2SA 17:4 Abusalomu na vilongozi weng'ha wa nhanzi ya Isilaeli nawakunda kota Ahitofeli kana majesa ganojile.
2SA 17:5 Hamba Abusalomu nakalonga, “Mumcheme Hushayi Mualiki. Tuhuliche choyolonga.”
2SA 17:6 Hushayi loyafichile kwa Abusalomu, Abusalomu nakalonga, “Ahi ndo vyoyalonjile Ahitofeli. Toweza kudita choyalonjile? Wone hatuditile, kowa na nzila yinji inojile ya kudita?”
2SA 17:7 Hushayi nakalonga, “Mhela awu majesa ga Ahitofeli hagawele ganojile.
2SA 17:8 Nakuvizela kota mhaza wa hegwe na wanhu wa heye ndo wamizi wazidahe. Wang'hang'hala kota idubu limaimunhu liwele wanage wakopoligwe. Mzidi wa ago, mhaza wa hegwe kadaha kitowa ngondo kwa nhumbula ikangale na howasa nechilo hamwe na wamizi wa heye.
2SA 17:9 Hanji sambi nakevisa kuli mhalika ama honhu hayage. Wone yokwaluka kuwatowa, yoneche hoyohulika kota wamwe wa wamizi wa hegwe nawakopoligwa, kochijesa wamizi wa hegwe weng'ha nawadumigwa.
2SA 17:10 Hamba wala wawele na mong'ho kota isimba wotweguka kwa vila Waisilaeli weng'ha wovizela vila mhaza wa hegwe vyoyawele mwamizi mkulu na vyoyawele na wamizi wazidahe.
2SA 17:11 “Ahyo uwakungajize wamizi weng'ha wa Isilaeli kulawa kuli muji wa Dani kasikazini kulutila kuli muji wa Beeli-sheba ubanzi wa kusini. Kowa na wamizi wenji kota sangalaza ya mhwani. Gwegwe Abusalomu kowalongoza
2SA 17:12 na weng'ha toluta kitowa na Daudi koneche koyali. Tomvaba kota nungwi yoilingugwa na kugubika isi. Heye na wamizi wa heye wobagama.
2SA 17:13 Wone walute kuli muji uwele na lukanzi, Waisilaeli weng'ha wochigala ng'weso na kukwega maganga ga lukanzi lwa muji awo mbaka kuli ibindi, haduhu choneche chosigala mbaka iganga lido lya muji awo.”
2SA 17:14 Abusalomu na Waisilaeli weng'ha nawaukunda ulonzi wa Hushayi kusinda wula wa Ahitofeli. Nayali ahi kwa vila Mkulu Nguluwi nakagana kuusumya ulonzi wa Ahitofeli na kwambuza kudumigwa kwa Abusalomu.
2SA 17:15 Hamba Hushayi nakawalonjela watambika Sadoki na Abiatali ndaze Ahitofeli na heye yuye vyowawalonjele Abusalomu na wasekulu wa Isilaeli.
2SA 17:16 Nakalonga, “Wiyohaje! Umlajize munhu yumwe yakamlonjele Daudi yaleche kuwasa ubanzi wuno kuli lwanda lwa Yolodani. Kanguganigwa yaloche lwanda leka heye na wayage waleche kudumigwa.”
2SA 17:17 Yonatani na Ahimaasi nawali wobeteza kuli nzasa ya Eni-logeli kwa vila nahawaganile woneche ako Yelusalemu. Mdala chitumagwa wa watambika nakaluta kuli nzasa kuwapa usenga woyapegwe na wala watambika leka wahiliche kwa Daudi.
2SA 17:18 Ila msongolo yumwe nakawona na kuluta kumlonjela Abusalomu. Ahyo Yonatani na Ahimaasi nawaluta himahima kuli ng'handa ya munhu yumwe ako Bahulimu. Hamba nawenjila kuli ideho liwele mluga.
2SA 17:19 Mche wa munhu yawele na ng'handa nakawika chigubiko na kubohola nyhule mchanya mwake, ahyo ideho nahalyoneche.
2SA 17:20 Wamizi wa Abusalomu nawoya kwa yula mdala na kulonga, “Wakohi Ahimaasi na Yonatani?” Mdala nakawedichila, “Nawaluta ako kuli nzanda.” Wamizi nawaluta kuwapala wala wanhu weli, ila hawawawene wala wanhu. Ahyo nawahiluka Yelusalemu.
2SA 17:21 Wala wamizi lowochile, Yonatani na Ahimaasi nawalawa kuli ideho. Nawaluta kwa Daudi na kumlonjela, “Wiyohaje! Wiwiche goya kuloka lwanda, kwa vila Ahitofeli nakamlonjela Abusalomu mbuli za wihe zilingukuwala hegwe.”
2SA 17:22 Daudi na wayage nawewika goya na kwaluka kuloka lwanda lwa Yolodani. Lokubwemwenzuche, weng'ha nawali kumwambu.
2SA 17:23 Ahitofeli loyawene kota Abusalomu na vilongozi wa Isilaeli nawalema kuwinza ulonzi wa heye, nakaliwika goya idogowi kwa chiwalo cha kukwina na kuhiluka kaye ako Gilo. Nakawalonjela wana wa heye na vitumagwa choni cha kudita. Hamba nakekopola na nawamtila kuli mhalika iwele mhaza wa heye nayali yatiligwe amo.
2SA 17:24 Daudi nakaluta kuli muji wa Mahanaimu na Abusalomu nakaloka lwanda lwa Yolodani na wamizi wa Isilaeli.
2SA 17:25 Abusalomu nakamuwika Amasa honhu ha Yoabu kota mkulu wa wamizi. Amasa nayali mwana wa Yitila, Mwishimaeli. Mayake nayali yochemigwa Abigaili mhinza wa Nahashi, nayawele lumbulye Seluiya, mayake Yoabu.
2SA 17:26 Abusalomu hamwe na wanhu wa Waisilaeli nawawika kambi kuli isi ya Gileadi.
2SA 17:27 Daudi loyafichile kuli muji wa Mahanaimu, Shobi mwana wa Nahashi, nakoya kulawa Laba kuli isi ya Amoni na Makili, mwana wa Amieli, nakoya kulawa kuli muji wa Lo-debali na Balisilayi, Mgileadi, nakoya kulawa Logelimu.
2SA 17:28 Avi ndo vinhu vyowamigalile, nhemvu za kuwasila na visaye na mibiga ja ilongo. Nawegala kahi ngano na shayili na utimbo na nyhule zikalanjigwe na mpanda na nhandala na
2SA 17:29 hanombwa na mtindi na ming'holo na jibini. Nawamigalila chilyo Daudi na wanji leka walye, kwa vila nawavizela kota chila yumwe kowa na nzala na utofu na ng'halu kwa vila nawajenda kuchiwala.
2SA 18:1 Daudi nakawawika wamizi wa heye kuli vilundo vya wamizi miya imwe na vilundo vya wamizi elufu imwe. Hamba nakawahagula vilongozi wawele wolongoza wamizi wa chila chilundo.
2SA 18:2 Nakawalajiza wamizi honhu hamwe ha kadatu ha wamizi weng'ha hali ulongozi wa Yoabu na honhu hamwe ha kadatu ha wamizi weng'ha hali ulongozi wa Abishayi. Awa Yoabu na Abishayi ndo wana wa Seluiya. Honhu hamwe ha kadatu hali ulongozi wa Itayi, Mgiti. Nakawalonjela wamizi, “Ndanguluta kuli ngondo hamwe na hemwe.”
2SA 18:3 Ila wamizi nawamlonjela, “Hebu, uleche kuluta kuli ngondo hamwe na hetwe. Mina, wone tobilima, hawowa na majesa kwa hetwe na wone nusu ya hetwe tobagama, hawochijesa kwa chiwalo cha hetwe. Ila hegwe kwa mzidi wa wanhu elufu kumi hali hetwe. Ahyo yowa goya wone upone wikale kuli muji na kutigalila utanzi hala hotulanda.”
2SA 18:4 Mndewa Daudi nakalonga, “Lyoneche lyomlyona lya goya, ndolidita.” Ahyo mndewa nakema hafungo ha lwizi lwa muji, kuno wamizi wa heye wokola, mamiya na maelufu.
2SA 18:5 Mndewa nakawalajiza Yoabu na Abishayi na Itayi, “Kwa chiwalo cha heni, mumditile yula msongolo Abusalomu kwa uliholile.” Wanhu weng'ha nawamhulika mndewa loyawalajize vilongozi wa heye kuwala Abusalomu.
2SA 18:6 Ahyo, wamizi wa Daudi nawaluta kuchiwala kitowa na wanhu wa Isilaeli. Kitowa ako nakwali kuli chihulo cha Efulaimu.
2SA 18:7 Wanhu wa Daudi nawawasumya ng'hatu wanhu wa Isilaeli. Kukopola kwa zuwa alyo nakwali kukulu kwa vila wanhu elufu makumi meli (20,000) nawakopoligwa.
2SA 18:8 Kitowa ako nakwenela kuli isi yeng'ha na wanhu wenji nawabagama kuli chihulo kusinda wala wowakopoligwe kwa ipanga.
2SA 18:9 Hamba Abusalomu yawele yakwinile igongolo lya heye kota idogowi likulu, naketing'hana na vitumagwa wa Daudi. Igongolo alyo vyoliwele likola hasi ha nhagala ng'hulu ya mwaloni, mnvili za Abusalomu nazinanahila kuli mwaloni. Abusalomu nakalechigwa yoninila mchanya. Igongolo alyo lya heye nalilutilila kumwando.
2SA 18:10 Yumwe wa hewo nakaluta na kumlonjela Yoabu, “Ndimona Abusalomu yoninila kuli igodi!”
2SA 18:11 Yoabu nakalonga, “Nakumona Abusalomu?” Lekachoni humkopole? Ndahakupele vihande kumi vya sendi na isali.
2SA 18:12 Yula munhu nakedichila, “Hanga naumhele vihande elufu imwe vya sendi, siweza kumdoliza mwana wa mndewa. Weng'ha natuhulika mndewa Daudi yowalonjela hegwe na Abishayi na Itayi kota mleche kumlumiza Abusalomu.
2SA 18:13 Nani wone ndahawele ndimditile vibi, haduhu lyoneche lilinguvisigwa kwa mndewa, gwegwe baho nawibagule na heni.”
2SA 18:14 Yoabu nakalonga, “Sikubeteza hegwe kudita ahyo!” Abusalomu yawele yang'hali mkomu, ahyo Yoabu nakahola migoha jidatu na kumhoma Abusalomu mmhambaga.
2SA 18:15 Wamizi kumi wa kumwamila Yoabu nawoya kumzunguluta Abusalomu, nawamtowa na kumkopola.
2SA 18:16 Hamba Yoabu nakapemba mhalamhanda kota ulajilo wa wamizi wa heye waleche kuwawinga wamizi wa Isilaeli.
2SA 18:17 Nawatoza lukuli lwa Abusalomu mli ikulubila ako kuchiwala na kudinya kwa maganga menji. Baho wanhu weng'ha wa Isilaeli nawabilima wohiluka kaye kwa hewo.
2SA 18:18 Abusalomu vyoyawele yang'hali kuwa na wana, nakazenga chinhu chilingiwhana na ilingo lido chiwele kuli ibindi lya Wandewa. Nakejesa, “Ndahela mwana wa kuhalila itagwa lyangu.” Kulawa mhela wula honhu aho nakahachema chikumbuchilo cha Abusalomu.
2SA 18:19 Ahimaasi, mwana wa Sadoki nakalonga, “Yoabu undeche heni ndute kumlonjela mndewa kota Mkulu Nguluwi nakamlohola kulawa kwa wang'honyo.”
2SA 18:20 Yoabu nakedichila, “Hegwe huwele yumwe wa kumlonjela mndewa kota mwanage nakabagama. Komhilichila usenga mhela wunji, ila haiwele lehano, kwa vila mwana wa mndewa nakabagama.”
2SA 18:21 Munhu yumwe, Mkushi nayali hala na Yoabu nakamlonjela, “Ulute na kumlonjela mndewa choni chouwene.” Yula munhu nakenamiza kumwando kwa Yoabu hamba nakenuka na kwaluka kubilima.
2SA 18:22 Hamba Ahimaasi, mwana wa Sadoki nakamlonjela Yoabu kahi, “Dedede ng'hundize nani ndimbilimile yula Mkushi.” Yoabu nakamlonjela, “Lekachoni kwangugana kubilima? Hegwe hupegwa choneche kwa mbuli azi.”
2SA 18:23 Ahimaasi nakalonga, “Wone yowa mbuli inojile ama yihile kwa heni, ndobilima.” Aho ndo Yoabu nakalonga, “Goya, ubilime.” Aho ndo Ahimaasi nakaluka kubilima kukolela nzila ya kuchiwala na nakawahika kufika kusinda yula Mkushi.
2SA 18:24 Mhela Daudi naloyekale hagati ha lwizi lwa kunze na lwa mgati lwa muji, yumwe wa mwamizi wa heye nayali yolola kulawa kuli chinduwiko cha lwizi, nakamona munhu yobilima yaliyeka,
2SA 18:25 nakamlonjela Daudi. Daudi nakedichila, nakalonga, “Wone kayeka, kowa na mbuli.” Yula munhu nayali yohejela habehi,
2SA 18:26 hala mwamizi loyamuwene munhu yunji yobilima. Nakachema hala hanyi hali lwizi, “Ulole hana yunji yalingubilima!” Daudi nakalonga, “Kowa na mbuli kahi.”
2SA 18:27 Mwamizi wa kuchinduwiko nakalonga, “Ndangona kota yula yalingubilima lukami ndo Ahimaasi, mwana wa Sadoki.” Mhela awu Daudi nakalonga, “Ayo ka munhu yanojile, kowa na mbuli zinojile.”
2SA 18:28 Ahimaasi nakalonga kwa lizi ikulu, “Tusumya! Tusumya!” Hamba nakamwinamila Daudi na kulonga, “Mndewa, yatogolwe Mkulu Nguluwi, Nguluwi wa hegwe. Nakakudita uwasumye wang'honyo wa hegwe.”
2SA 18:29 Daudi nakauza, “Mwana wa heni Abusalomu ka mkomu?” Ahimaasi nakalonga, “Yoabu loyandajize heni chitumagwa wa hegwe, nambona chilundo cha wanhu hawele na iyowe, ila sivizelele nakwali na choni.”
2SA 18:30 Daudi nakamlonjela, “Wime hala na ubeteze.” Ahimaasi nakahejela hafungo na kwima.
2SA 18:31 Yula Mkushi nakoya na kulonga, “Mndewa, lehano ndina mbuli inojile! Mkulu Nguluwi nakakulohola kulawa kwa wang'honyo wa hegwe.”
2SA 18:32 Daudi nakauza, “Mwanangu Abusalomu ka mkomu?” Mkushi nakedichila, “Ndangulonga kota wang'honyo wa hegwe weng'ha na chila yumwe nayajezile kukulumiza hegwe yawe kota heye!”
2SA 18:33 Daudi nakatweguka nhumbula ng'hatu. Nakaluta kuchihengo chiwele mchanya mwa lwizi lwa muji kulila. Loyawele yoluta, nayali yolonga, “Mwanangu Abusalomu! Fola ndahabagame honhu ha hegwe! Abusalomu mwanangu! Mwanangu!”
2SA 19:1 Munhu yumwe nakamlonjela Yoabu, “Mndewa kangulila kwa vila Abusalomu nakabagama.”
2SA 19:2 Wamizi nawavizela kota mndewa Daudi kangulila kwa vila mwanage nakabagama, ahyo zuwa lya kusumya ngondo naligaluka liwa zuwa lya masinzo.
2SA 19:3 Wamizi nawali wokwinjila kuli muji wa Mahanaimu kuno wenyamalile, kota nawabilima kuli ngondo na kubasigwa soni.
2SA 19:4 Daudi nakagubika kumeho kwa moko ga heye na kulutilila kulila kwa lizi likulu yolonga, “Mwanangu Abusalomu! Abusalomu mwanangu! Mwanangu!”
2SA 19:5 Yoabu nakaluta kuli ng'handa yalingikala Daudi na kumlonjela, “Nakuwadita wamizi wa hegwe wabasigwe soni, wawele hawalohole ukomu wa hegwe yeka ila nawawalohola wana walume wa hegwe na wahinza wa hegwe na wache wa hegwe na waha wa hegwe kahi.
2SA 19:6 Kwanguwagana lukami wang'honyo kusinda walingukugana hegwe. Nakutulajila hazelu kota vilongozi wa hegwe na wanhu wa hewo wahela utanzi kwa hegwe. Ndangona kota wahasangalale wone Abusalomu yahawele mkomu lehano natwe tweng'ha twahawele tubagame.
2SA 19:7 Lelo winuche ulute kula kunze na uwakangaze wanhu wa hegwe. Ndangilaha kwa Mkulu Nguluwi kota wone hulawa, kowa haduhu ne munhu yopona hamwe na hegwe hoifika matinazo ya lehano. Chinhu achi chowa chihile ng'hatu kwa hegwe kusinda choneche chikulawile kulawa kuli usongolo wa hegwe mbaka sambi.”
2SA 19:8 Lelo Daudi nakenuka na kuluta kikalisa kuli chigoda cha heye hali lwizi lwa muji. Wanhu lowalonjelwe kota mndewa ka hali lwizi, wanhu weng'ha nawamlutila. Waisilaeli weng'ha nawali wabilime chila yumwe haluga hake.
2SA 19:9 Wanhu weng'ha nawali wochitwanza hewo kwa hewo kuli nhanzi zeng'ha za Isilaeli, wolonga, “Mndewa Daudi nakatulohola kulawa mmoko mwa wang'honyo wa hetwe, nakatulohola kahi kulawa mmoko mwa Wafilisti. Ila lelo nakalawa kuli isi, yombilima Abusalomu.
2SA 19:10 Abusalomu yotumbakalize mafuta yawe mndewa wa hetwe, nakabagama kuli ngondo. Lelo, lekachoni hatulingulonga kuwala mbuli ya kumhilusa mndewa Daudi?”
2SA 19:11 Mndewa Daudi nakalajiza usenga kwa watambika, Sadoki na Abiatali, “Muwalonjele wasekulu wa Yuda, ‘Lekachoni hemwe muwe wa kuduma kunyhilula heni mndewa haluga hangu? Usenga wa Waisilaeli weng'ha naufika kwa heni.
2SA 19:12 Hemwe mwa wang'holozangu na ivyazi lya heni, lekachoni muwe wa kuduma kunyhilula heni haluga?’
2SA 19:13 Mumuuze kahi Amasa, ‘Ndaze, hegwe hauwele ivyazi lya heni? Nguluwi yang'hopole wone sikuditile hegwe kuwa chilongozi wa wamizi wa heni kulawa lehano honhu ha Yoabu.’ ”
2SA 19:14 Ahyo Daudi nakawadita wanhu weng'ha wa Yuda wamkunde heye. Lelo nawamigalila usenga ulingulonga, “Uhiluche haluga hegwe na vitumagwa wa hegwe weng'ha.”
2SA 19:15 Aho ndo mndewa Daudi nakahiluka, nakaluta mbaka kuli lwanda lwa Yolodani. Lelo wanhu wa Yuda nawaluta mbaka ako Giligali leka kumbochela mndewa na kumtanza yaloche lwanda lwa Yolodani.
2SA 19:16 Shimeyi mwana wa Gela, Mbenjamini, kulawa Bahulimu, nakadita himahima kuluta na wanhu wa Yuda leka kumbochela mndewa Daudi.
2SA 19:17 Shimeyi nakaluta hamwe na Wabenjamini elufu imwe. Siba chitumagwa wa ivyazi lya Sauli hamwe na wana wa heye kumi na tano na vitumagwa makumi meli, nawaluta himahima kuli lwanda lwa Yolodani kumlongola Daudi.
2SA 19:18 Lelo, nawaloka kuli honhu ha kulochela leka kulihilika ivyazi lya mndewa na kumditila geng'ha goyaganile. Shimeyi mwana wa Gela nakoya, naketoza na kufugama hali mndewa, mhela mndewa loyawele habehi kuloka lwanda lwa Yolodani.
2SA 19:19 Shimeyi nakamlonjela mndewa, “Ndangukulanda, mndewa wa heni, uleche kumbona ndina nongwa ne kukumbuchila nongwa yonditile zuwa lila lyouwele ukuka mujini Yelusalemu. Ndangukulanda uleche kugawika mnhumbula mwa hegwe.
2SA 19:20 Mina ndivizela kota heni, chitumagwa wa hegwe nandita gehile. Ndo mina nambuya lehano, ndiwele wa mwaluko kuli nhanzi ya Yusufu, kukubochela hegwe mndewa wa heni.”
2SA 19:21 Abishayi, mwana wa Seluiya, nakalonga, “Ndaze, Shimeyi halinguganigwa kukopoligwa kwa chiwalo cha mbuli ayi? Nakampanjila mbakalizwa mafuta wa Mkulu Nguluwi.”
2SA 19:22 Daudi nakedichila, “Mbuli ayi hailinguwawala hemwe, wana wa Seluiya. Lehano namuwa kota wang'honyo wa heni! Ndaze, hana yoneche yokopoligwa lehano hali Isilaeli? Ndaze, sivizelele kota lehano heni nda mndewa hali Isilaeli yeng'ha?”
2SA 19:23 Hamba, mndewa Daudi nakamlonjela Shimeyi, “Hegwe hukopoligwa.” Mndewa nakalagana na Shimeyi kwa chilaho.
2SA 19:24 Mefibosheti mzukulu wa Sauli, nakaluta kahi kumbochela mndewa Daudi. Kulawa zuwa lila mndewa vyoyochile Yelusalemu mbaka loyawele yohiluka kwa kikala goya, Mefibosheti nayali hahovuje magulu ga heye ne kubeya lulevu lwa heye ne kuhovuga nguwo za heye.
2SA 19:25 Lelo, Mefibosheti loyafichile kulawa Yelusalemu kumbochela mndewa, mndewa nakamuuza Mefibosheti, “Lekachoni hulutile hamwe na heni?”
2SA 19:26 Mefibosheti nakedichila, “Mndewa wa heni, kwa vila heni chitumagwa wa hegwe nda chete, nandimlonjela Siba, ‘Umbichile goya idogowi lya heni ndilikwine leka ndute hamwe na mndewa.’ Ila Siba nakandeteleza.
2SA 19:27 Naye nakalonga mbuli zihile kwa hegwe mndewa, kuwala heni. Ila mndewa wa heni ndo kota mhilisi wa Nguluwi, lelo udite choneche chilingukunojeza.
2SA 19:28 Walelwa weng'ha wa mhaza wa heni hambe waganigwe kupegwa chinhu choneche, ila kukopoligwa na mndewa wa heni. Ila nakumha heni, chitumagwa wa hegwe honhu hali wala wadile hali chisaga cha hegwe. Ndaze, ndina hachi yachi ya kumlanda mndewa mzidi wa ago?”
2SA 19:29 Mndewa Daudi nakamlonjela, “Uleche kundonjela mzidi wa mbuli za gwegwe baho. Heni nyamula kota hegwe na Siba mochigawila isi ya Sauli.”
2SA 19:30 Mefibosheti nakamlonjela mndewa, “Mleche Siba yahole isi yeng'ha yaliyeka. Heni sangalala kwa vila hegwe mkulu wa heni kwanguhiluka haluga kwa kikala goya.”
2SA 19:31 Balisilayi, Mgileadi, nayali yafichile kulawa Logelimu na kuluta hamwe na mndewa Daudi kuli lwanda lwa Yolodani leka walutase mbaka kumwambu mwa lwanda.
2SA 19:32 Balisilayi nayali sekulu ng'hatu, yawele na miyaka makumi nane. Nayali yomlolela mndewa Daudi loyawele yochikala ako Mahanaimu, kwa vila nayali na lufufu ng'hatu.
2SA 19:33 Lelo mndewa Daudi nakamlonjela Balisilayi, “Tulute hamwe ako Yelusalemu nani ndokulolela.”
2SA 19:34 Ila Balisilayi nakamwidichila mndewa, “Ndaze, ndina miyaka minji ja kulutilila kikala mbaka ndute hamwe na hegwe mndewa ako Yelusalemu?
2SA 19:35 Heni ndina miyaka makumi nane. Ndaze, ndoweza kugazela ganojile ama hebu? Ndaze, heni chitumagwa wa hegwe, ndoweza kuvizela kota chilyo chombelengulya ama kunwa, chinona ama chiha? Ndaze, ndoweza kuvizela kunoga kwa lizi lya walingwimba walume ama wadala? Lekachoni heni, chitumagwa wa hegwe ndiwe itunyo kwa hegwe, mndewa wa heni?
2SA 19:36 Lekachoni mndewa yamhe heni ndolendole ng'hulu ahyo? Heni chitumagwa wa hegwe ndoluta na hegwe kwa majendo mado kumwambu mwa lwanda lwa Yolodani.
2SA 19:37 Ndangukulanda, ung'hundize heni chitumagwa wa hegwe, nyhiluche na mbagame kuli muji wa heni, habehi na chilaga cha mhaza wa heni na maiwangu. Ila ayu chitumagwa wa hegwe Chimuhamu, mkundize yalute hamwe na hegwe, mndewa wa heni na umditile heye lyoneche lyoukona linoga.”
2SA 19:38 Mndewa Daudi nakamlonjela Balisilayi, “Chimuhamu koluta na heni na ndomditila lyoneche liwele linojile kwa hegwe. Lyoneche lyougana ndikuditile, ndokuditila.”
2SA 19:39 Wanhu weng'ha nawaloka lwanda lwa Yolodani na mndewa naye nakaloka. Mndewa nakamnonela na kumtambichiza Balisilayi, naye Balisilayi nakahiluka haluga hake.
2SA 19:40 Mndewa nakalutilila mbaka Giligali, Chimuhamu nayali hamwe na heye. Wanhu weng'ha wa Yuda na nusu ya wanhu wa Isilaeli nawali womhilika mndewa.
2SA 19:41 Hamba, wanhu weng'ha wa Isilaeli nawoya kwa mndewa na kumlonjela, “Lekachoni wang'holozetu wanhu wa Yuda nawahola hachi ya hetwe ya kukubochela, nawakulosa kuli lwanda lwa Yolodani, hegwe na ivyazi lya hegwe, hamwe na wanhu wa hegwe ne kutulonjela?”
2SA 19:42 Wanhu weng'ha wa Yuda nawawedichila wanhu wa Waisilaeli, “Natudita ahi kwa vila mndewa ka mng'holozetu wa habehi. Lekachoni mwanguzudila kwa chiwalo cha mbuli ayi? Ndaze, natulya chinhu choneche cha mndewa? Ndaze, natiholela chinhu choneche kwa chiwalo cha hetwe?”
2SA 19:43 Aho ndo wanhu wa Isilaeli nawawedichila wanhu wa Yuda, “Twanayo hachi mala kumi kumuwala mndewa Daudi kusinda hemwe. Lekachoni lelo mwangutubeza? Ndaze, hatuwele wa mwaluko kulonga mbuli ya kuwala kumhilula mndewa haluga?” Ila wanhu wa Yuda nawedichila kwa kung'hang'hala ng'hatu kusinda wanhu wa Isilaeli.
2SA 20:1 Lelo, nakwali na munhu mjuvi yachemigwe Sheba, mwana wa Bikili, Mbenjamini. Nakapemba mhalamhanda na kulandula lizi, “Twahela honhu honeche kwa Daudi, twahela uhalizi kwa mwana wa Yese! Chila munhu yalute haluga ha heye, hemwe wanhu wa Isilaeli!”
2SA 20:2 Ahyo, wanhu weng'ha wa Isilaeli nawamleka Daudi, nawamuwinza Sheba, mwana wa Bikili. Ila wanhu wa Yuda nawamuwinza Daudi kwa kukundigwa kulawa lwanda lwa Yolodani mbaka mujini Yelusalemu.
2SA 20:3 Hamba, mndewa Daudi nakafika haluga hake Yelusalemu, nakawahola waha wa heye kumi wawele nakawaleka leka walolele ng'handa ya heye. Nakawawika kuli ng'handa imwe hali wamizi, nakawalolela goya, ila hawasile na hewo. Ahyo, waha awo nawali wawichigwe mgati mbaka kubagama kwa hewo. Nawekala kota nawali wafililwe na walume wa hewo.
2SA 20:4 Mndewa Daudi nakamlonjela Amasa, “Ng'hungajizile wanhu weng'ha wa Yuda kuli mazuwa gadatu, nagwe uwe baho kahi.”
2SA 20:5 Lelo, Amasa nakaluta kuwachema wanhu wa Yuda. Ila nakakawila kuhiluka kuli mhela wula uwichigwe na mndewa.
2SA 20:6 Ahyo, Daudi nakamlonjela Abishayi, “Lelo, Sheba mwana wa Bikili, kotigalila nongwa kusinda Abusalomu. Uwahole vitumagwa wa heni na umuwinze Sheba yaleche kwinjila kuli muji uwele na ngome na kusulupuka.”
2SA 20:7 Ahyo wanhu wa Yoabu na Wakeleti na Wapeleti, hamwe na wazidahe kitowa ngondo weng'ha nawoka hali ulongozi wa Abishayi. Weng'ha awo nawoka Yelusalemu kuluta kumuwinza Sheba, mwana wa Bikili.
2SA 20:8 Lowafichile kuli iganga likulu liwele ako Gibeoni, Amasa nakaluta kuwating'haniza. Yoabu nayali yavalile ivalo lya chiwamizi na mchanya mwa ivalo alyo nakwali na isali, libatilile ipanga mchuno mwa heye, liwele kuli yala yake. Yoabu loyahejele habehi, nakalidita ipanga lya heye ligwe kulawa kuli yala yake.
2SA 20:9 Yoabu nakamlonjela Amasa, “Kulamka mng'holozangu?” Hamba Yoabu nakebata lulevu lwa Amasa kwa moko wa heye wa kudilo leka yamnonele.
2SA 20:10 Ila Amasa haliwene ipanga liyage liwele kuli moko wa kumoso wa Yoabu. Lelo, Yoabu nakamhoma Amasa kwa ipanga kuli lida lya heye na mitumbu ja heye najilawa. Nakabagama ne Yoabu kumhoma lwakeli. Hamba, Yoabu na mng'holoze Abishayi, nawalutilila kumuwinza Sheba, mwana wa Bikili.
2SA 20:11 Munhu yumwe wa Yoabu, nakoya na kwima habehi na Amasa, nakalonga, “Yoneche yalingumgana Yoabu na yoneche yalingumgana Daudi, yamuwinze Yoabu!”
2SA 20:12 Lukuli lwa Amasa nalwali hala hasi hali danda hagati mwa nzila ng'hulu. Ahyo, chila munhu yakolile aho loyamuwene, nakema. Ila yula munhu wa Yoabu loyawene kota wanhu weng'ha nawoya na kwima aho, nakosa lukuli lwa Amasa mnzila, nakaluhilika kumgunda na kugubika kwa nguwo.
2SA 20:13 Lukuli lwa Amasa lolulavigwe mnzila, wanhu weng'ha nawaluta hamwe na Yoabu kumuwinza Sheba mwana wa Bikili.
2SA 20:14 Sheba nakakolela kuli nhanzi zeng'ha za Isilaeli mbaka muji wa Abeli-beti-maaka. Wanhu weng'ha wa lukolo lwa Bikili naweting'hana na kumuwinza.
2SA 20:15 Vilundo vyeng'ha vya Yoabu navyuya na kumzunguluta Sheba mwana wa Bikili, yawele kuli muji wa Abeli-beti-maaka. Nawagongomanya nzila kwa maganga leka kufika kuli lukanzi lwa ngome, hamba nawaluka kubomola lukanzi leka waugwise.
2SA 20:16 Hamba mdala yumwe yawele na luhala nakatowa iyowe kuli muji yolonga, “Mhulichize! Mhulichize! Mumlonjele Yoabu yoye ndonje na heye.”
2SA 20:17 Yoabu nakaluta habehi na yula mdala, ayo mdala nakamlonjela, “Ndaze, hegwe kwa Yoabu?” Yoabu nakalonga, “Ena! Ndo heni.” Yula mdala nakamlonjela, “Unyhulichize heni chitumagwa wa hegwe.” Yoabu nakalonga, “Ndanguhulichiza.”
2SA 20:18 Ayo mdala nakamlonjela, “Aho katali wanhu nawali wolonga, ‘Muwaleche wagane ulonzi uwele na luhala kulawa muji wa Abeli.’ Ahyo ndo wanhu vyowawezile kuduma mbuli za hewo.
2SA 20:19 Hetwe ndo wala walingugana kikala goya na kukundigwa kuli Isilaeli. Lelo, hegwe kwangugana kuuwifya muji ukulu kuli Isilaeli. Lekachoni lelo kwangugana kuudumya muji uwele ndo wa Mkulu Nguluwi?”
2SA 20:20 Yoabu nakedichila, “Hebu, kuli ukomu wa heni, silingugana kudumya ne kuwifya.
2SA 20:21 Vyoulonjile haiwele kukomya! Ila munhu yumwe kulawa kuli isi ya vidunda vya Efulaimu yalinguchemigwa Sheba mwana wa Bikili, nakambelenhuka mndewa Daudi. Mumhe heni munhu ayo nani ndokuka kuli muji wa hemwe.” Yula mdala nakamlonjela Yoabu, “Mutwi wa heye kotozelwa kukolela kuli lukanzi.”
2SA 20:22 Hamba ayo mdala nakaluta kwa wanhu weng'ha mujini kwa luhala lwa heye. Nawamdumula mutwi Sheba mwana wa Bikili, nawautoza mutwi awo kunze kwa Yoabu. Ahyo, Yoabu nakapemba mhalamhanda na wanhu wa heye nawasambaluka, chila yumwe yohiluka haluga hake. Hamba Yoabu nakahiluka kwa mndewa Daudi, mujini Yelusalemu.
2SA 20:23 Yoabu nayali chilongozi wa chilundo cheng'ha cha wamizi wa Isilaeli. Benaya, mwana wa Yehoyada, nayali chilongozi wa Wakeleti na Wapeleti.
2SA 20:24 Adolamu nayali chilongozi wa mijito ja kukolwa lupichi. Yehoshafati, mwana wa Ahiludi nayali yalingwandika kukumbuchila.
2SA 20:25 Sheva nayali yalingwandika. Sadoki na Abiatali nawali watambika.
2SA 20:26 Myaili yalinguchemigwa Ila, nayali yumwe hali watambika wa mndewa Daudi.
2SA 21:1 Mhela wa ulongozi wa Daudi nakwali na lufemba kwa miyaka jidatu, ahyo Daudi nakamlanda Mkulu Nguluwi. Mkulu Nguluwi nakalonga, “Sauli na ivyazi lyake wana nongwa ya kubohola danda, kwa vila nakawakopola Wagibeoni.”
2SA 21:2 Ahyo mndewa Daudi nakawachema Wagibeoni. Wagibeoni hawawele Waisilaeli, ila nawali Waamoli wasigale. Hanga wanhu wa Isilaeli nawali welahile kuwaleka Wagibeoni wawele wakomu, ila Sauli nakajeza kuwakopola weng'ha, kwa vila nayali yowaganilila wanhu wa Isilaeli na Yuda.
2SA 21:3 Daudi nakawauza Wagibeoni, “Ndiwaditile choni? Tochihanyisa ndaze kwa wihe womditilwe leka muitambichize isi ayi na wanhu wa Mkulu Nguluwi?”
2SA 21:4 Wagibeoni nawamwidichila, “Hatulingugana sendi ne zahabu kulawa kwa Sauli ama ivyazi lya heye ne twahela hachi ya kumkopola munhu yoneche kuli Isilaeli.” Daudi nakawauza, “Mwangugana ndiwaditile choni?”
2SA 21:5 Hewo nawamlonjela mndewa, “Sauli nakanuwila kutukopola na kutudumya ne kuleka munhu wa hetwe yoneche kuli honhu heng'ha ha Isilaeli.
2SA 21:6 Utupe walelwa wa heye saba walume, tuwakopole hazelu hali Mkulu Nguluwi ako kuli chidunda cha Gibeya ya Sauli, yawele yahaguligwe na Mkulu Nguluwi.” Mndewa nakalonga, “Ndowegala kwa hemwe.”
2SA 21:7 Ila mndewa nakaleka kumkopola Mefibosheti, mwana wa Yonatani, mwana wa Sauli, kwa chiwalo cha chilaho chowelahile Daudi na Yonatani hali Mkulu Nguluwi.
2SA 21:8 Ila mndewa nakawahola Alimoni na Mefibosheti yunji, wana weli wa Lisipa, yawele nakampondela Sauli. Lisipa nayali mhinza wa Aya. Nakawahola kahi wana wahano wa Melabu, mhinza wa Sauli, yawele nakampondela Adilieli, mwana wa Balisilayi, Mmeholati.
2SA 21:9 Walelwa awo saba walume, Daudi nakawahilika kwa Wagibeoni. Nawo Wagibeoni nawawakopola hazelu kuli chidunda hali Mkulu Nguluwi, weng'ha saba nawabagama hamwe. Walelwa awo nawakopoligwa kuli mwaluko wa mhela wa kubena shayili.
2SA 21:10 Hamba Lisipa, mhinza wa Aya, nakahola nguwo ya igunila, naketandichila hali italawe. Nakekala aho kulawa mwaluko wa mbena mbaka mhela wa nhonya loufichile na kujitowela mitufi. Mhela awo weng'ha, nakaviwinga videje mhela wa nemisi na migongolo ja kisolo mhela wa nechilo, leka mitufi ajo jileche kufichilwa na kuwifigwa.
2SA 21:11 Daudi loyahuliche gala goyaditile Lisipa, mhinza wa Aya, mha wa Sauli,
2SA 21:12 Daudi nakaluta kujihola mizeje ja Sauli na mwanage Yonatani kulawa kwa wenyeng'haye wa Yabeshi-gileadi, wawele nawali wajihizile kulawa luga lwa wanhu weng'ha ako mujini Beti-shani, kuwele Wafilisti nawali wawaninize Sauli na Yonatani zuwa lila Wafilisti lowamkopole Sauli kuli chidunda cha Gilibowa.
2SA 21:13 Lelo Daudi nakajihilula mizeje ja Sauli na Yonatani mwanage kulawa ako, hamba nawakungajiza mizeje ja mitufi ja wasongolo saba walechigwe hazelu.
2SA 21:14 Lelo, wanhu wa Daudi nawajitila mizeje ja Sauli na Yonatani mwanage, kuli isi ya Benjamini ako Sela, kuli mhalika iwele Kishi, mhaza wa Sauli, nayali yatiligwe. Nawadita chila chinhu chiwele mndewa nakalajiza. Hamba, Nguluwi nakahulichiza kulanda kuwala isi ya hewo.
2SA 21:15 Hamba Wafilisti nawadita ngondo kahi na Waisilaeli. Daudi na wanhu wa heye nawaluta kitowa na Wafilisti. Daudi nayali yatochile lukami zuwa alyo.
2SA 21:16 Ishibi-benobu, yumwe wa walelwa wa Walefayi, yawele igoha lya heye nalyali na itunyo lya kota kilo zidatu na nusu na yawele yewopile ipanga linyale, nakewika goya kumkopola Daudi.
2SA 21:17 Ila Abishayi, mwana wa Seluiya, nakaluta kumtanza Daudi. Abishayi nakamtowa yula Mfilisti na kumkopola. Ahyo, wanhu nawamlahila Daudi, “Huweza kuluta kahi na hetwe kuli ngondo, wone haiwa ahyo, kochizima chenje cha undewa hali Isilaeli.”
2SA 21:18 Hamba nakulawila kahi kitowa na Wafilisti ako Gobu. Sibekayi, Mhushati, nakamkopola Safu, yawele yumwe wa walelwa wa Walefayi.
2SA 21:19 Nakulawila kitowa kahi na Wafilisti ako Gobu. Elihanani, mwana wa Yaaleo-legimu, Mbetelehemu, nakamkopola Goliati, Mgiti, yawele chaka cha igoha lya heye nachali kota igodi likulu lya kutawila nguwo.
2SA 21:20 Hamba nakulawila ngondo kahi ako Gati kuwele nakwali na munhu yumwe, yawele nayali ng'wemang'wema lukami na yawele na vidole sita kuli chila moko na vidole sita kuli chila mgulu, vyeng'ha navyali makumi meli na gane. Heye kahi nayali mlelwa wa Walefayi.
2SA 21:21 Munhu ayo loyawalijile Waisilaeli, Yonatani, mwana wa Shimeyi, mng'holoze Daudi, nakamkopola.
2SA 21:22 Awa wane nawali walelwa wa Walefayi ako Gati, nawo nawakopoligwa na Daudi na wanhu wa heye.
2SA 22:1 Daudi nakamwimbila Mkulu Nguluwi ulonzi wa lwimbo, zuwa lila Mkulu Nguluwi loyamlohole mmoko mwa wang'honyo wa heye na mmoko mwa Sauli.
2SA 22:2 Nakalonga, “Mkulu Nguluwi ndo italawe lya heni na ngome ya heni na mlohozi wa heni.
2SA 22:3 Nguluwi wa heni ndo italawe lya heni, yawele yondilingumbilimila kikala goya, ngawo ya heni, mong'ho wa ulohozi wa heni. Heye ndo ngome ya heni, kubilimila kwa heni na mlohozi wa heni, kangundoholaga kulawa kwa wanhu walingugana kunhowa.
2SA 22:4 Nandimchema Mkulu Nguluwi, yalinguganigwa kutogoligwa yanhanze, nani nandoholigwa kulawa kwa wang'honyo wa heni.
2SA 22:5 “Mina nhigu za kubagama nazinzunguluta, mazi tendema ga kudumya nagavaba.
2SA 22:6 Ng'weso za kuli isi ya wabagame nazimbata, midiwa ja kubagama najifika.
2SA 22:7 Kuli magazo ga heni, nandimchema Mkulu Nguluwi, ena, nandimchema Nguluwi wa heni. Kulawa kuli ng'handa ya heye nakahulika lizi lya heni, kulila kwa heni nakufika kuli makutu ga heye.
2SA 22:8 “Isi naikakama na kutigasika, misisi ja ulanga najitigasika, navitigasika kwa vila Nguluwi nayali yazudile.
2SA 22:9 Iyosi nalifung'ha kulawa kuli mhenyelo ya heye, chiluli chilingulakaza nachilawa kuli mlomo wa heye, makala ga chiluli nagaka kulawa kwa heye.
2SA 22:10 Nakagubula ulanga nakadulika, ng'hungugu nhitu hasi ha magulu ga heye.
2SA 22:11 Nakakwina chilumbigwe chiwele na mabawa na kuguluka, nakoneka mchanya mwa mabawa ga mbeho.
2SA 22:12 Nakezungulusila jiza banzi zeng'ha, ihema lya heye nalyali nhing'hano ya mazi, na ng'hungugu ng'hulu ya kilanga.
2SA 22:13 Lumwemwesa nalumwemwesa hali heye, nagaka makala ga chiluli.
2SA 22:14 Mkulu Nguluwi nakabuma kulawa kilanga, Nguluwi Yawele Kuchanya nakalavya lizi lya heye.
2SA 22:15 Nakawatozela misale wang'honyo na kuwasambalula, kwa lumwemwesa lwa limlungu nakawawinga.
2SA 22:16 Kwa kung'hanuchila kwa heye Mkulu Nguluwi, kwa lweselo lwa mhenyelo ya heye, nzila za bahali nazigubuligwa, misisi ja isi najoneka hazelu.
2SA 22:17 “Nguluwi nakagolola moko wa heye kulawa kuchanya na kundavya, kulawa hasi ha mazi menji nakanyasula.
2SA 22:18 Nakandohola kulawa kwa mng'honyo wa heni yawele na mong'ho, kulawa kwa hewo wanzudile kwa vila nawali na mong'ho lukami kusinda heni.
2SA 22:19 Nawavaba vyombele kuli magazo, ila Mkulu Nguluwi nayali kitumbila kwa heni.
2SA 22:20 Nakandavya na kunyhilika kuli kilejeha, nakandohola kwa vila nakanojezwa na heni.
2SA 22:21 “Mkulu Nguluwi nakamha heni chonolo kwa kiwhana na kutanganika kwa heni, kiwhana na welile wa moko ga heni.
2SA 22:22 Kwa vila nandizibatilila nzila za Mkulu Nguluwi, na simbelenhuche Nguluwi wa heni.
2SA 22:23 Kwa vila nhaguso za heye zeng'ha nazali hali heni, sigawichile hafungo malajizo ga heye.
2SA 22:24 Hali heye siwele na nongwa, nandiwika kutali na gehile.
2SA 22:25 Ahyo Mkulu Nguluwi nakamha heni chonolo kwa kiwhana na kutanganika kwa heni, kwa kiwhana na welile wa heni kwa heye.
2SA 22:26 “Mkulu Nguluwi, hegwe kowa wa kukundigwa kwa wawele wa kukundigwa, kwa walihela nongwa, kwangilajila kwahela nongwa.
2SA 22:27 Kwa heye yalingiyeliza kwangilajila kota ndo yelile, ila kwa wajilile kwanguwaditila kota vyowalinguganigwa.
2SA 22:28 Kwanguwalohola walingunyenyetela, ila meho ga hegwe ga kwa walingidaya, kwanguwadulisa.
2SA 22:29 Kwa vila hegwe kwa chenje cha heni, gwa Mkulu Nguluwi, Nguluwi wa heni, kwanguwinga jiza lya heni.
2SA 22:30 Kwa utanzi wa hegwe ndanguwasumya wamizi, londiwa hamwe na Nguluwi wa heni ndoweza kuzuma lukanzi.
2SA 22:31 “Choyalingudita Nguluwi chahela nongwa! Kulagana kwa Mkulu Nguluwi ndo kwa kukundigwa, heye ndo ngawo kwa weng'ha walingumbilimila.
2SA 22:32 Whaani yawele Nguluwi, mzidi wa Mkulu Nguluwi? Whaani yawele italawe lya kutwamila, kota Nguluwi wa hetwe?
2SA 22:33 Nguluwi ndo honhu ha kubilimila kwa heni kwimile nzinzili, nakaidita nzila ya heni iwe inojile.
2SA 22:34 Nakadita magulu ga heni gawe nzinzili kota ga ibala, na kumbika honhu hanojile mchanya mwa vinhembenhembe.
2SA 22:35 Kangundangusa kitowa ngondo, leka moko ga heni gawe na mong'ho wa kukwega upinde uwele nzinzili.
2SA 22:36 Nakumha heni ngawo ya hegwe ya ulohozi, kunyenyetela kwa hegwe nakundita ndiwe mkulu.
2SA 22:37 Nakundita njende kwa kilejeha, leka magulu ga heni galeche kutelela.
2SA 22:38 “Nandiwawinza wang'honyo wa heni na kuwadumya, na sihiluche kumbele mbaka lowadumigwe.
2SA 22:39 Nandiwadumya na kuwatowanga leka walemwele kwinuka, ena, nawagwa hali magulu ga heni.
2SA 22:40 Hegwe nakundita ndiwe na mong'ho wa kitowa ngondo, nakuwadulisa wang'honyo hali heni.
2SA 22:41 Nakuwadita wang'honyo wa heni wabilime, wala wanzudile nandiwadumya.
2SA 22:42 Nawapala utanzi, ila hakuwele na wa kuwalohola nawamlilila Mkulu Nguluwi, ila hawedichile.
2SA 22:43 Nandiwatowa, nawali kota nhimbwisi hali mbeho, nandiwabalasa na kuwabiga kota nhope mnzila.
2SA 22:44 Hegwe nakundohola kulawa kuli kutowigwa na wanhu wa heni, nakumbika ndiwe chilongozi wa wanhu wa isi. Wanhu wohambe ndiwazele nawang'holela mijito.
2SA 22:45 Wajenzi nawoya na kufugama kwa heni, lowahuliche malajizo ga heni, nawanyhulichiza.
2SA 22:46 Wajenzi watweguche nhumbula, nawoya kulawa kuli ngome za hewo wokakama.
2SA 22:47 “Mkulu Nguluwi ka mkomu! Yatambichizwe italawe lya heni! Yatogoligwe Nguluwi wa heni, italawe lya ulohozi wa heni.
2SA 22:48 Heye nakandita nyhilule chibida, na kuwawika wanhu hali ludali lwa heni.
2SA 22:49 Nakundavya kulawa kwa wang'honyo wa heni. Kwangunyhinula leka ndiwe mchanya ng'hatu mwa wang'honyo wa heni, na kundohola kulawa kwa wehile.
2SA 22:50 “Ahyo, ndokutogola, gwa Mkulu Nguluwi, hali isi zeng'ha, ndolitogola itagwa lya hegwe.
2SA 22:51 Nguluwi kangumtambichizaga mndewa wa heye kusumya kukulu, kangulajilaga igano lya kwimilila kwa yabakalizwe mafuta wa heye, ena, kangumditilaga ahi Daudi na walelwa wa heye mazuwa gose.”
2SA 23:1 Uwu ndo ulonzi wa kuduma wa Daudi, mwana wa Yese. Usenga wa munhu yawele Nguluwi nakamdita yawe mkulu. Nguluwi wa Yakobo nakambakaliza mafuta Daudi yawe mndewa na ulonzi wa heye Waisilaeli nawasangalala kwimba.
2SA 23:2 “Muhe wa Mkulu Nguluwi naulonga kwa kukolela heni, nakawika ulonzi wa heye kuli mlomo wa heni.
2SA 23:3 Nguluwi wa Isilaeli nakalonga, Italawe lya Isilaeli nakandonjela, ‘Munhu hoyowalongoza wanhu kwa hachi, yalingulongoza kwa kumdumba Nguluwi,
2SA 23:4 heye ndo kota lumuli lwa mitondo, isanya holilawa mitondo kulihela ng'hungugu, ena, kota nhonya ilingwambuza mizuchila kota kuli misanga.’
2SA 23:5 “Ahyo ndo Nguluwi vyoyalutambichize lukolo lwa heni, mina nakadita ilagano lya mazuwa gose na heni, ilagano lyenele na limile nzinzili. Naye kozidita mbuli za heni zeng'ha zilutilile goya na kumha heni geng'ha gondilingugana.
2SA 23:6 Ila wehile, weng'ha ndo kota miwa jilingutagwa hela, mina hajiweza kuholigwa kwa moko,
2SA 23:7 ila igana kutumiya chuma ama chaka cha igoha kujusa. Ajo jangudumigwa ng'hatu kwa chiluli.”
2SA 23:8 Aga ndo matagwa ga wazidahe wowawele na Daudi. Yoshebu-bashebeti, Mtakimoni, nayali chilongozi wa chilundo chilinguchemigwa Wadatu. Heye naketowa kwa igoha lya heye na kuwakopola wanhu miya nane kuli ngondo imwe.
2SA 23:9 Yawinzile hali wala wazidahe Wadatu, nayali Eleasali, mwana wa Dodo, wa lukolo lwa Mwahohi. Zuwa limwe, Eleasali nayali hamwe na Daudi lowawalijile Wafilisti wowawele wekungajize kitowa ngondo. Waisilaeli nawawabilima Wafilisti,
2SA 23:10 ila Eleasali nakema nzinzili na kitowa na Wafilisti mbaka moko wa heye loutochile, naupona uwele ubatilile ipanga lya heye. Zuwa alyo, Mkulu Nguluwi nakambuza kusumya kukulu. Hamba Waisilaeli nawahiluka honhu hoyawele Eleasali na kiholela vinhu vya hihi hela kulawa kwa Wafilisti wakopoligwe.
2SA 23:11 Wa kadatu nayali Shama, mwana wa Agee, Mhalali. Wafilisti nawekungajiza ako Lehi, honhu houwele mgunda wa mpanda winji, nawo Waisilaeli nawawabilima Wafilisti,
2SA 23:12 ila Shama nakema nzinzili hagati ha mgunda awo leka kuulewela na kuwakopola Wafilisti. Mkulu Nguluwi nakambuza kusumya kukulu.
2SA 23:13 Hamba, mhela wa mbena wazidahe wadatu hali wakulu makumi gadatu nawaluta kwa Daudi na kumfika kuli mhalika ya Adulamu. Mhela awo wamizi wa Wafilisti nawali wawichile kambi kuli ibindi lya Lefaimu.
2SA 23:14 Mhela awo Daudi nayali kuli ngome, wamizi wa Wafilisti nawali mujini Betelehemu.
2SA 23:15 Daudi nakalonga kwa maya lukami, “Wone munhu yahawezile kumha mazi ga kunwa kulawa kuli ideho lya Betelehemu, liwele habehi na lwizi lwa muji, ndahasangalale!”
2SA 23:16 Wala wazidahe wa heye wadatu nawalawa na kukola hagati ha wamizi wa Wafilisti. Nawaluta kudeha mazi kuli ideho lya Betelehemu liwele habehi na lwizi lwa muji, nawamigalila Daudi. Ila Daudi nakalema kunwa, nakagabohola hanyi kota nhambiko kwa Mkulu Nguluwi,
2SA 23:17 nakalonga, “Gwa Mkulu Nguluwi, ndahela hachi ya kunwa mazi aga. Ndaze, aga hagawele kota danda ya wala welavile ukomu wa hewo kigala mazi aga?” Ahyo, Daudi hanwele mazi gala. Azo ndo mbuli zowaditile wala wazidahe Wadatu.
2SA 23:18 Abishayi, mdodowe Yoabu, mwana wa Seluiya, nayali chilongozi wa wazidahe makumi gadatu. Heye naketowa na wanhu miya zidatu kwa igoha lya heye. Nakawakopola na kiholela itagwa kota wala wazidahe Wadatu.
2SA 23:19 Nayali yazeleche ng'hatu hali wazidahe makumi gadatu, ahyo nakawa chilongozi wa hewo. Ila hawele yumwe wa wala wazidahe wadatu.
2SA 23:20 Benaya, mwana wa Yehoyada, kulawa Kabiseeli, nayali mwamizi yunji yazidahe yawele nakadita mbuli nyinji kwa nhumbula ikangale. Nakawakopola wazidahe weli kulawa Moabu. Zuwa limwe kahi mhela wa seluji, nakadulika kuli ikulubila na kukopola isimba.
2SA 23:21 Nakamkopola kahi Mmisili yawele ng'wemang'wema na mkulu ng'hatu. Mmisili ayo nayali na igoha ila Benaya nakamlutila yawele na nyimbati, nakamsukula igoha alyo na kumkopola Mmisili ayo kwa igoha lya heye yuye.
2SA 23:22 Benaya nakadita mbuli azi, nakeholela itagwa kota wala wazidahe Wadatu.
2SA 23:23 Lelo, nayali yazeleche hali wala wazidahe makumi gadatu, hanga hawele kota wala wazidahe Wadatu. Daudi nakamdita yawe chilongozi wa wamizi wa kumwamila heye.
2SA 23:24 Asaheli mdodowe Yoabu, nayali yumwe wa wazidahe makumi gadatu. Wazidahe wanji wa Daudi nawali Elihanani, mwana wa Dodo wa Betelehemu
2SA 23:25 na Shama, Mhalodi na Elika, Mhalodi
2SA 23:26 na Helesi, Mpaliti na Yila, mwana wa Ikeshi, Mtekoa
2SA 23:27 na Abieseli, Mwanatoti na Mebunayi, Mhushati
2SA 23:28 na Salimoni, Mwahohi na Mahalayi, Mnetofahi
2SA 23:29 na Helebu, mwana wa Baana, Mnetofahi na Itayi, mwana wa Libayi kulawa Gibeya ya Benjamini.
2SA 23:30 Nakwali kahi na Benaya, Mpilatoni na Hidayi wa nzanda za Gaashi
2SA 23:31 na Abi-aliboni, Mwalibati na Asimaweti, Mbahulimu
2SA 23:32 na Eliaba, Mshaaliboni na wana wa Yasheni na Yonatani
2SA 23:33 mwana wa Shama, Mhalali na Ahiamu, mwana wa Shalali, Mhalali
2SA 23:34 na Elifeleti, mwana wa Ahasibayi, Mmaakati na Eliamu, mwana wa Ahitofeli, Mgiloni
2SA 23:35 na Hesilo, Mkalimeli na Paalayi, Mwalibi
2SA 23:36 na Igali, mwana wa Natani, Msoba na Bani, Mgadi
2SA 23:37 na Seleki, Mwamoni na Nahalayi, Mbeeloti nayawele yopika vinhu vya kitowa ngondo vya Yoabu, mwana wa Seluiya
2SA 23:38 na Yila, Mwaitili na Galebu, Mwaitili
2SA 23:39 na Uliya, Mhiti. Weng'ha hamwe, nawali wazidahe makumi gadatu na saba.
2SA 24:1 Kwa mala iyage, Mkulu Nguluwi nakawazudila Waisilaeli, nakamwambuza Daudi yawatunye Waisilaeli. Mkulu Nguluwi nakamlonjela, “Wawaze wanhu wa Isilaeli na wanhu wa Yuda.”
2SA 24:2 Ahyo, mndewa Daudi nakamlonjela Yoabu na vilongozi wa wamizi wawele hamwe na heye, “Mlute kuli nhanzi zeng'ha za isi ya Isilaeli, kulawa kuli muji wa Dani mbaka Beeli-sheba, mkawawaze wanhu leka ndivizele hisabu ya hewo.”
2SA 24:3 Ila Yoabu nakamlonjela mndewa, “Mkulu Nguluwi, Nguluwi wa hegwe, yawonjeze Waisilaeli mala miya kusinda vyowawele sambi, leka nagwe, mndewa wa heni wone konjezeka ako kwa meho ga hegwe baho. Ila, lekachoni hegwe mndewa wa heni nakunojezwa na mbuli ayi?”
2SA 24:4 Ila ulonzi wa mndewa Daudi nauwasumya Yoabu na vilongozi wa wamizi. Lelo, Yoabu na vilongozi wa wamizi nawoka hali mndewa, nawaluta kuwawaza Waisilaeli.
2SA 24:5 Nawaloka lwanda lwa Yolodani na kuwika kambi ya hewo kusini mwa muji wa Aloeli, muji uwele hagati ha ibindi, ako Gadi. Kulawa ako nawaluta mbaka Yaseli.
2SA 24:6 Hamba, nawaluta Kadeshi iwele ako Gileadi kuli isi ya Wahiti. Hamba nawafika Dani na kulawa ako nawaluta Sidoni
2SA 24:7 na kufika kuli ngome ya muji wa Tilo, nawenjila kuli miji jeng'ha ja Wahivi na Wakanaani. Hamba, nawalawa na kuluta ubanzi wa kusini kuli Yuda ako Beeli-sheba.
2SA 24:8 Lowajendile isi yeng'ha, nawahiluka Yelusalemu lojikolile myezi tisa na mazuwa makumi meli.
2SA 24:9 Hamba Yoabu nakamhilichila mndewa hisabu ya wanhu. Kuli isi ya Isilaeli nakwali na walume wazidahe lachi nane (800,000) wawezile kutumiya vinhu vya kitowa ngondo na kuli isi ya Yuda, nakwali na walume lachi tano (500,000).
2SA 24:10 Ila Daudi nakaluka kitagusa mnhumbula kulawa vyoyawawalize wanhu. Ahyo, Daudi nakamlonjela Mkulu Nguluwi, “Ndita gehile ng'hatu kwa mbuli yondiitile. Ila sambi, gwa Mkulu Nguluwi, ndangukudedeza undechele heni chitumagwa wa hegwe, kwa vila ndita mbuli ya chipoka ng'hatu.”
2SA 24:11 Daudi vyoyenuche mitondo, mhela awo Mkulu Nguluwi nakamha usenga Gadi, mloli wa mndewa Daudi, yolonga,
2SA 24:12 “Ulute ukamlonjele Daudi hino, ‘Mkulu Nguluwi kangulonga ahi. Ndina mbuli zidatu kwa chiwalo cha hegwe, lelo wihagulile mbuli imwe, nani ndokuditila.’ ”
2SA 24:13 Lelo Gadi nakaluta kwa Daudi na kumlonjela, “Ndaze, lulawile lufemba lwa miyaka saba kuli isi ya hegwe ama myezi jidatu ja kuwabilima wang'honyo wa hegwe howokuwinza ama mazuwa gadatu ga utamwa wa tauni kuli isi ya hegwe? Lelo wijese kwa chiwalo cha mbuli ayo na wamule ndaze vyondimwidichila ayo yanhumile.”
2SA 24:14 Daudi nakamwidichila Gadi, “Ndina lunhwinhwi ndogazika ng'hatu. Ila fola Mkulu Nguluwi yangaze, mina heye kana isungu lukami, kusinda kuwichigwa mmoko mwa wang'honyo.”
2SA 24:15 Lelo, Mkulu Nguluwi nakawegalila Waisilaeli utamwa wa tauni kulawa mitondo mbaka mhela woyamule Nguluwi. Wanhu elufu makumi saba (70,000) nawabagama kuli isi yeng'ha, kulawa Dani mbaka Beeli-sheba.
2SA 24:16 Ila yula mhilisi loyagolole moko wa heye kulutila muji wa Yelusalemu leka kuudumya, Mkulu Nguluwi nakagalula kunuwila kwa heye. Mkulu Nguluwi nakamlonjela yula mhilisi yawele yowadumya wanhu, “Ihega! Uhiluse moko wa hegwe.” Mhilisi wa Mkulu Nguluwi nayali yemile habehi na honhu ha kupululila nyhule ha Alauna, Myebusi.
2SA 24:17 Daudi loyamuwene ayo mhilisi yoyawele yowakopola wanhu, nakamlonjela Mkulu Nguluwi, “Lole, heni ndo mbele na nongwa! Nene baha ndo nditile gehile! Wanhu awa ndo waliholile, hawaditile wihe. Ndangukudedeza ng'hatu ungaze heni na ivyazi lya heni.”
2SA 24:18 Zuwa lilyo Gadi nakamlutila Daudi na kumlonjela, “Ulute ukamzenjele Mkulu Nguluwi honhu ha kulavila nhambiko, kuli honhu ha kupululila nyhule ha Alauna, Myebusi.”
2SA 24:19 Ahyo Daudi nakaluta kota Mkulu Nguluwi vyoyalajize kwa kukolela Gadi.
2SA 24:20 Alauna nakalola na kumona Daudi na vitumagwa wa heye womhejelela, naye nakaluta na kitoza hanyi hali mndewa na kumfugamila.
2SA 24:21 Hamba Alauna nakamuuza mndewa, “Lekachoni mndewa wa heni nakoya kwa chitumagwa wa heye?” Daudi nakedichila, “Mbuya kugula honhu ha hegwe ha kupululila nyhule leka ndimzenjele Mkulu Nguluwi honhu ha kulavila nhambiko, leka utamwa wa tauni uwele hali wanhu wusigwe.”
2SA 24:22 Alauna nakamlonjela Daudi, “Mndewa wa heni, uhole choneche choulinguchona chinoga na ulavye nhambiko. Heni ndangujilavya mibuguma aji kwa chiwalo cha nhambiko ya kulakazwa na vinhu avi vya kupululila nyhule na ngwamo za misenga ziwe ngodi.
2SA 24:23 Gwa mndewa, ndangukupa vinhu avi vyeng'ha. Ndangitumbila Mkulu Nguluwi, Nguluwi wa hegwe, konojezwa na nhambiko ya hegwe.”
2SA 24:24 Ila mndewa Daudi nakamwidichila Alauna, “Hebu! Hegwe huweza kumha heni choneche hihi hela. Heni ndovigula kwa hegwe. Simlavila Mkulu Nguluwi, Nguluwi wa heni, nhambiko za kulakazwa ziwele heni silavile ne chinhu.” Ahyo, Daudi nakagula hala honhu ha kupululila nyhule na mibuguma kwa migwala makumi gahano ga sendi.
2SA 24:25 Hamba Daudi nakamzenjela Mkulu Nguluwi honhu ha kulavila nhambiko na kumlavila nhambiko za kulakazwa na za kikala goya. Lelo, Mkulu Nguluwi nakakunda kulanda kwa chiwalo cha isi. Utamwa wa tauni nawuka kuli isi ya Isilaeli.
1KI 1:1 Mhela mndewa loyawele sekulu ng'hatu, vitumagwa wa heye nawamgubika kwa migolole, ila hawezile kupata ivuche.
1KI 1:2 Ahyo nawamlonjela, “Mkulu wa hetwe mndewa, fola tukupalile mhinza yakukolele mijito na kukulolela na kuwasa hamwe na hegwe leka yakupe ivuche.”
1KI 1:3 Hamba nawapala mhinza yalingoneka yanojile kuli isi yeng'ha ya Isilaeli, nawampata mdala yumwe yanojile yalinguchemigwa Abishagi, Mshunami, nawamigala kwa mndewa.
1KI 1:4 Mdala ayo nayali yokoneka yanojile lukami. Lelo nakaluka kumkolela mijito na kumlolela mndewa. Mndewa nakawasa na yula mhinza, ila kwa chiwalo cha ivuche hela.
1KI 1:5 Mhela awo, Adoniya, yawele mayake ndo Hagiti, nakaluka kidaya na kulonga, “Ndowa mndewa.” Lelo nakalajiza yawichilwe goya mituka ja kubulunwa na falasi na wakwina falasi na wamizi makumi gahano walingulongola kuno wobilima.
1KI 1:6 Ila kulawa Adoniya loyapondigwe, mhaza wa heye Daudi, hamng'hanuchile mwanage ne zuwa limwe ne kumuuza, “Lekachoni kwangudita ahyo?” Adoniya nayali yokoneka yanojile ng'hatu, nakapondigwa Abusalomu, hamba nakapondigwa heye.
1KI 1:7 Adoniya nakalongasa na Yoabu, mwana wa Seluiya na mtambika Abiatali, nawo nawakunda kumuwinza na kumtanza heye.
1KI 1:8 Ila mtambika Sadoki na Benaya, mwana wa Yehoyada na mloli Natani na Shimeyi na Leyi, hamwe na wamizi wa chiuyeng'ha wa Daudi, hawakundile kumuwinza Adoniya.
1KI 1:9 Zuwa limwe, Adoniya nakalavya nhambiko ya ing'holo na isenga na milogota jinonile kuli honhu halinguchemigwa Iganga lya Izoka, habehi na nzasa ilinguchemigwa Eni-logeli. Nakawalalika wakalumbu wa heye kuli mnvina ya nhambiko ayo wawele ndo wana wanji wa mndewa na vilongozi weng'ha wa nhanzi ya Yuda,
1KI 1:10 ila hawalaliche mloli Natani na Benaya na wamizi wa chiuyeng'ha wa mndewa Daudi na Solomoni mng'holoze.
1KI 1:11 Aho ndo Natani nakaluta kwa Batisheba, mayake Solomoni, nakamuuza, “Ndaze, hauhuliche kota Adoniya, mwana wa Hagiti nakeholela ludali lwa mndewa na mkulu wa hetwe Daudi ne heye kuvizela?
1KI 1:12 Lelo, ubeteze ndikulonjele ndaze vyouweza kuulohola ukomu wa hegwe na wa mwanago Solomoni.
1KI 1:13 Ulute kwa mndewa Daudi na umuuze, ‘Mkulu wa heni mndewa, ndaze hundahile heni chitumagwa wa hegwe ulonga, “Ndikomya, mwanago Solomoni kolongoza honhu ha heni na kochikalisa kuli chigoda cha heni cha undewa?” Naiwa ndaze lelo Adoniya nakawa mndewa?’
1KI 1:14 Louwa ulutilila kulongasa na mndewa, heni ndokwinjila na kutawiza ulonzi wa hegwe.”
1KI 1:15 Lelo, Batisheba nakaluta kumlola mndewa kuli chihengo cha heye, honhu hawele Abishagi, Mshunami nayali yomkolela mijito. Mhela awo mndewa nayali sekulu lukami.
1KI 1:16 Batisheba nakamfugamila mndewa kwa kumhulichiza, mndewa nakamuuza, “Kwangugana choni?”
1KI 1:17 Batisheba nakedichila, “Mkulu wa heni, nawilaha hali heni, chitumagwa wa hegwe na hali Mkulu Nguluwi, Nguluwi wa hegwe, ulonga, ‘Mwanago Solomoni kolongoza honhu ha heni na kochikalisa kuli chigoda cha hegwe cha undewa.’
1KI 1:18 Ila lehano, Adoniya nakawa mndewa, nagwe huvizelele.
1KI 1:19 Nakalavya nhambiko ya misenga na milogota jinonile na ming'holo na kuwachema wana weng'ha wa mndewa na mtambika Abiatali na Yoabu, chilongozi wa wamizi, ila chitumagwa wa hegwe Solomoni hamchemile.
1KI 1:20 Lelo, mkulu wa heni mndewa, Waisilaeli weng'ha wangukubeteza leka uwalonjele munhu yawele kochikalisa kuli chigoda cha hegwe cha undewa, honhu ha hegwe.
1KI 1:21 Wone haiwa ahyo, mhela hegwe mndewa wa heni houbagama, heni hamwe na mwana wa heni Solomoni toditilwa vibi kota wabelenhuche.”
1KI 1:22 Mhela Batisheba loyawele yolutilila kulongasa na mndewa, mloli Natani nakenjila kuli ng'handa ya mndewa.
1KI 1:23 Wanhu nawamlonjela mndewa, “Mloli Natani ka hano.” Naye loyamfichile mndewa nakamfugamila mndewa mbaka kumeho kwa heye nakudoliza hasi.
1KI 1:24 Aho ndo Natani nakalonga, “Mkulu wa heni, ndaze, nakulonga, ‘Adoniya kolongoza honhu ha heni na kochikalisa kuli chigoda cha heni cha undewa?’
1KI 1:25 Kwa vila lehano nakaluta kulavya nhambiko ya misenga na milogota jinonile na ming'holo na kuwalalika wana wa mndewa na Yoabu, mkulu wa wamizi na mtambika Abiatali. Ulole, wangulya na kunwa hali heye na kulonga, ‘Wikale mhela winji mndewa Adoniya.’
1KI 1:26 Ila hanyhemile heni, chitumagwa wa hegwe ne mtambika Sadoki ne Benaya, mwana wa Yehoyada ne chitumagwa wa hegwe Solomoni.
1KI 1:27 Ndaze, aga geng'ha nakugakola gwegwe mndewa wa heni ne kutulonjela vitumagwa wa hegwe, munhu yawele kochikalisa kuli chigoda cha hegwe cha undewa honhu ha hegwe?”
1KI 1:28 Mndewa Daudi nakamlonjela “Nyhemele Batisheba.” Batisheba nakaluta kwa mndewa na kwima hali heye.
1KI 1:29 Hamba mndewa nakelaha, yolonga, “Kota Mkulu Nguluwi vyoyalingikala, yawele nakangombola kulawa kuli magazo menji,
1KI 1:30 kota vyondikulahile hali Mkulu Nguluwi, Nguluwi wa Isilaeli, kuno ndilonga, ‘Mwanago Solomoni kolongoza honhu ha heni na kochikalisa kuli chigoda cha heni cha undewa honhu ha heni,’ ndo vyondidita lehano.”
1KI 1:31 Batisheba nakamfugamila mndewa kwa kumhulichiza na kulonga, “Mkulu wa heni, mndewa Daudi, wikale mhela winji!”
1KI 1:32 Hamba mndewa Daudi nakalonga, “Nyhemele mtambika Sadoki na mloli Natani na Benaya, mwana wa Yehoyada.” Nawo nawaluta kwa mndewa.
1KI 1:33 Mndewa nakawalonjela, “Mlute na vitumagwa wa heni, mumuwiche mwana wa heni Solomoni mchanya mwa igongolo lya heni, mumhiliche Gihoni.
1KI 1:34 Lomuwa ako, mtambika Sadoki na mloli Natani wambakalize mafuta leka yawe mndewa wa Isilaeli, hamba mpembe mhalamhanda na kulonga, ‘Mndewa Solomoni yekale mhela winji!’
1KI 1:35 Namwe moluta hamwe na heye, naye kochikalisa kuli chigoda cha heni cha undewa honhu ha heni. Nandimuwika yawe chilongozi kuli Isilaeli na kuli Yuda.”
1KI 1:36 Aho ndo Benaya, mwana wa Yehoyada nakamwidichila mndewa, “Ena! Mkulu Nguluwi, Nguluwi wa mndewa wa heni, yalonje hihyo du.
1KI 1:37 Kota vila vyoyawele Mkulu Nguluwi na mndewa wa heni, Solomoni kahi yawe hihyo. Mkulu Nguluwi yachidite chigoda cha heye cha undewa chiwe chikulu kusinda chila cha mndewa wa heni Daudi.”
1KI 1:38 Ahyo, mtambika Sadoki na mloli Natani na Benaya, mwana wa Yehoyada na Wakeleti na Wapeleti, nawamkwiniza Solomoni kuli igongolo lya mndewa Daudi, liwele kota idogowi likulu, nawamhilika mbaka Gihoni.
1KI 1:39 Hamba mtambika Sadoki nakahola mbalati ziwele na mafuta kulawa kuli honhu ha kulavila nhambiko na kumbakaliza Solomoni leka yawe mndewa. Hamba nawapemba mhalamhanda na wanhu weng'ha nawalonga, “Mndewa Solomoni yekale mhela winji!”
1KI 1:40 Hamba wanhu weng'ha nawamuwinza wopemba mhalamhanda, nawasangalala kwa mnvina ng'hulu na isi naitigasika kwa chiwalo cha lizi lya hewo.
1KI 1:41 Lelo, Adoniya hamwe na weng'ha wawele hamwe na heye nawahulika lizi alyo lowawele wosinda mnvina ya hewo. Lowahuliche lizi lya mhalamhanda, Yoabu nakauza, “Iyowe alyo ako mujini ndo lya choni?”
1KI 1:42 Loyawele yolonga, Yonatani mwana wa mtambika Abiatali nakenjila, hamba Adoniya nakalonga, “Winjile, kwa vila hegwe ndo munhu yanojile, kwangigala mbuli inojile.”
1KI 1:43 Yonatani nakamwidichila Adoniya, “Hebu! Mndewa Daudi nakamdita Solomoni yawe mndewa.
1KI 1:44 Mndewa nakamlajiza mtambika Sadoki na mloli Natani na Benaya, mwana wa Yehoyada na Wakeleti na Wapeleti, nawo nawamkwiniza mchanya mwa igongolo lya mndewa,
1KI 1:45 hamba mtambika Sadoki na mloli Natani nawambakaliza mafuta leka yawe mndewa kula Gihoni. Kwaluchila aho nawalutilila kusangalala na lizi nalyenela kuli muji weng'ha. Alyo ndo lizi lyoulingulihulika.
1KI 1:46 Sambi Solomoni nakekalisa kuli chigoda cha heye cha undewa.
1KI 1:47 Mzidi ya ago, vitumagwa wa mndewa nawoya kumtogola mkulu wa hetwe, mndewa Daudi kuno wolonga, ‘Nguluwi wa hegwe yalidite itagwa lya Solomoni lizeleche kusinda lya hegwe na chigoda cha heye cha undewa chiwe chikulu kusinda cha hegwe.’ Hamba mndewa nakafugama mchinhanda mwa heye,
1KI 1:48 nakalanda yolonga, ‘Yatogoligwe Mkulu Nguluwi, Nguluwi wa Isilaeli, yawele nakakunda meho ga heni kumona yalinguhalila chigoda cha heni cha undewa lehano.’ ”
1KI 1:49 Lelo, wanhu weng'ha wawele hamwe na Adoniya nawadumba ng'hatu na kusambaluka.
1KI 1:50 Kwa vila Adoniya nakamdumba Solomoni, nakaluta kibata mbalati za kuli honhu ha kulavila nhambiko leka yelohole.
1KI 1:51 Hamba mndewa Solomoni nakahulika kota Adoniya nayali yabilimile kuli ihema na kibata mbalati za kuli honhu ha kulavila nhambiko yolonga, “Sikuka hano mbaka mndewa Solomoni yandonjele kota sikopoligwa.”
1KI 1:52 Mndewa Solomoni nakalonga, “Wone kochilajila kota ka yalingukundigwa, hoditigwa chinhu choneche. Ila wone ndimone kota ndo mwihe, yomlapa yabagame.”
1KI 1:53 Lelo mndewa Solomoni nakawalajiza wanhu wamigale Adoniya kulawa kuli honhu ha kulavila nhambiko. Adoniya nakoya na kinamiza hali mndewa Solomoni. Mndewa nakamlonjela, “Ulute haluga ha hegwe.”
1KI 2:1 Daudi loyawele habehi kubagama, nakamchema Solomoni mwanage na kumlonjela,
1KI 2:2 “Mwanangu, kota vyoilinguzeleka, vilumbigwe vyeng'ha vyobagama, mazuwa ga heni nagamala. Wime nzinzili na uwe uzidahe.
1KI 2:3 Weneze malajizo ga Mkulu Nguluwi, Nguluwi wa hegwe, uwinze nzila za heye na kibatilila mizilo ja heye na malajizo ga heye na nhaguso za heye na ulolezi wa heye, kota vyoyandichigwe kuli malajizo ga Musa, leka mbuli za hegwe zilutilile goya koneche kouluta,
1KI 2:4 leka Mkulu Nguluwi yeneze kulagana kwa heye, loyandonjele, ‘Wone walelwa wa hegwe wobatilila mizilo ja heni na kung'holela mijito kwa kukundigwa na kwa nhumbula yeng'ha, kowa na munhu hali hemwe yawele kochikalisa kuli chigoda cha undewa cha Isilaeli.’
1KI 2:5 “Mzidi wa ago, kwangugazela gala goyanditile Yoabu, mwana wa Seluiya, vila vyoyawaditile wakulu wa wamizi weli wa Isilaeli, wawele ndo Abuneli, mwana wa Neli na Amasa, mwana wa Yeteli. Nakawakopola, nakabohola danda ya hewo mhela wa kikala goya kota vila kuli ngondo, kahi nayali na nongwa kwa vila nakaibakaliza danda yila kuli isali liwele kuli chuno cha heye na makwamba gawele goyavalile.
1KI 2:6 Umditile vyoulinguweza kwa luhala lwa hegwe, ila uleche kumleka yabagame kwa kikala goya.
1KI 2:7 “Ila uwalajile igano lya kwimilila wana wa Balisilayi, Mgileadi na uwakundize wawe hali wala walingulya kuli chisaga cha hegwe, kwa vila nawanditila igano lya kwimilila mhela lombele ndibilima kwa chiwalo cha mng'holozo Abusalomu.
1KI 2:8 Kabaho kahi Shimeyi, mwana wa Gela, Mbenjamini wa Bahulimu, yawele nakamhanjila lukami londutile Mahanaimu. Vyoyoyile kunhing'haniza kuli lwanda lwa Yolodani nandimlahila kwa itagwa lya Mkulu Nguluwi ndimlonjela, ‘Sikukopola kwa ipanga.’
1KI 2:9 Ila lelo, uleche kijesa kota kahela nongwa. Hegwe kuna luhala kovizela choumditila, uleche kumleka yabagame kwa kikala goya.”
1KI 2:10 Hamba Daudi nakabagama, nakatiligwa Yelusalemu, kuli muji wa heye.
1KI 2:11 Mhela Daudi woyalongoze Isilaeli nawali miyaka makumi gane. Ako Hebuloni nakalongoza kwa miyaka saba na Yelusalemu nakalongoza kwa miyaka makumi gadatu na jidatu.
1KI 2:12 Lelo Solomoni nakekalisa kuli chigoda cha undewa honhu ha Daudi, mhaza wa heye na undewa wa heye nawima nzinzili.
1KI 2:13 Hamba Adoniya, mwana wa Hagiti, nakaluta kwa Batisheba, mayake Solomoni. Batisheba nakamuuza, “Ndaze, kwanguya kwa kikala goya?” Adoniya nakamwidichila, “Ena, ndanguya kwa kikala goya.”
1KI 2:14 Hamba nakalonga, “Ndina mbuli imwe hela ya kukulonjela.” Batisheba nakamlonjela, “Ulonje.”
1KI 2:15 Adoniya nakamlonjela, “Kota vyoulinguvizela, undewa nawali wa heni. Waisilaeli weng'ha nawali wondola kota ndo mndewa wa hewo. Ila mbuli nazigaluka, undewa nauluta kwa mng'holozangu, Mkulu Nguluwi nakagana mbuli ayi iwe kota vyoilawile.
1KI 2:16 Lelo ndangukulanda chinhu chimwe, ndangukudedeza uleche kundemela.” Batisheba nakamlonjela, “Longa.”
1KI 2:17 Nakalonga, “Dedede ndangukulanda umlande mndewa Solomoni, yamhe heni Abishagi, Mshunami, yawe mche wangu, howeza kulema.”
1KI 2:18 Batisheba nakamlonjela, “Goya, ndolongasa na mndewa honhu ha hegwe.”
1KI 2:19 Lelo Batisheba nakaluta kulongasa na mndewa Solomoni kwa chiwalo cha Adoniya. Mndewa nakenuka nakaluta kumbochela mayake, nakafugama, hamba nakekalisa kuli chigoda cha heye cha undewa. Nakalajiza chigoda cha undewa chigaligwe kwa heye kwa chiwalo cha mayake, naye mayake nakekalisa kuli moko wa kudilo wa mndewa.
1KI 2:20 Batisheba nakamlonjela mndewa, “Ndina mbuli nyindo ndangukulanda, dedede uleche kundemela.” Mndewa nakamlonjela, “Longa mayangu, sikulemela.”
1KI 2:21 Mayake nakalonga, “Mkundize mng'holozo Adoniya yamhole Abishagi, Mshunami leka yawe mche wake.”
1KI 2:22 Mndewa Solomoni nakamuuza mayake, “Lekachoni kwangumlanda Abishagi, Mshunami, kwa chiwalo cha Adoniya? Mbuli ayi naiwhana ng'hatu na kumganila undewa wa heni, kwa vila heye ndo mkulu kwa heni na kwa vila Yoabu, mwana wa Seluiya na mtambika Abiatali wa hamwe na heye.”
1KI 2:23 Aho mndewa Solomoni nakelaha kwa itagwa lya Mkulu Nguluwi yolonga, “Nguluwi yang'hopole ne kumbonela isungu, wone Adoniya hobagama kwa chiwalo cha kulanda aku!
1KI 2:24 Lelo, ndangilaha kwa itagwa lya Mkulu Nguluwi yawele mkomu, yawele nakambika na kunyimiza nzinzili kuli undewa wa mhaza wa heni Daudi na yawele nakeneza kulagana kwa heye kwa kumha undewa heni na lulelo lwa heni, ndikomya, Adoniya kobagama!”
1KI 2:25 Aho ndo mndewa Solomoni nakamlajiza Benaya, mwana wa Yehoyada, naye Benaya nakaluta kwa Adoniya na kumkopola.
1KI 2:26 Mndewa Solomoni nakamlonjela mtambika Abiatali, “Ulute ako Anatoti kuli migunda ja hegwe. Kwangulapigwa kubagama, ila sikukopola sambi kwa vila nakulihola isanduku lya ilagano lya Mkulu Nguluwi hali mhaza wa heni Daudi na kugazigwa hamwe na heye.”
1KI 2:27 Ahyo mndewa Solomoni nakamuwinga Abiatali kuli utambika wa Mkulu Nguluwi, yokweneza ulonzi wa Mkulu Nguluwi woyalonjile ako Shilo, galingumuwala Eli na lukolo lwa heye.
1KI 2:28 Yoabu loyahuliche mbuli azo, nakabilimila kuli ihema lya Mkulu Nguluwi na kibatilila mbalati za honhu ha kulavila nhambiko, kwa chiwalo cha kikala goya. Nakadita ahyo kwa vila nayali yelumbile na Adoniya, ila hawele na Abusalomu.
1KI 2:29 Mndewa Solomoni loyahuliche kota Yoabu ka kuli ihema lya Mkulu Nguluwi na nayali yemile habehi na honhu ha kulavila nhambiko, nakamlajiza Benaya, mwana wa Yehoyada, yolonga, “Ulute ukamtowe.”
1KI 2:30 Benaya nakaluta kuli ihema lya Mkulu Nguluwi, nakamlonjela Yoabu, “Mndewa kangukulonjela, ‘Ulawe amo.’ ” Yoabu nakedichila, “Hebu, ndobagama bahano.” Benaya nakahiluka kwa mndewa na kumlonjela vyoyalonjile Yoabu.
1KI 2:31 Mndewa Solomoni nakamlonjela Benaya, “Udite kota vyoyalonjile. Umtowe na kumtila, leka kusa gehile kulawa kwa heni na ivyazi lya mhaza wa heni, gehile ga danda ilihela nongwa iwele naiboholigwa na Yoabu.
1KI 2:32 Mkulu Nguluwi komgaza Yoabu kwa kukopola ako koyaditile ne mhaza wa heni Daudi kuvizela. Nakawakopola kwa ipanga wanhu weli wawele watanganiche kusinda heye na nawali wanojile kusinda heye. Nakawakopola Abuneli, mwana wa Neli, mkulu wa wamizi wa Isilaeli na Amasa, mwana wa Yeteli, yawele nayali mkulu wa wamizi wa Yuda.
1KI 2:33 Nongwa ya kubohola danda iwe kwa Yoabu na walelwa wa heye mazuwa gose. Ila kwa Daudi na walelwa wa heye na ivyazi lya heye na chigoda cha heye cha undewa, wawe na kikala goya kwa Mkulu Nguluwi mazuwa gose.”
1KI 2:34 Lelo Benaya, mwana wa Yehoyada, nakaluta kuli ihema nakamtowa Yoabu na kumkopola, nakatiligwa kuli mgunda wa heye kuchiwala.
1KI 2:35 Mndewa nakamuwika Benaya, mwana wa Yehoyada, yawe mkulu wa wamizi honhu ha Yoabu na Sadoki yawe mtambika honhu ha Abiatali.
1KI 2:36 Hamba mndewa nakalajiza usenga kwa Shimeyi na kumlonjela, “Wizenjele ng'handa amu Yelusalemu, wikale aha ila uleche kuluta honhu hanji.
1KI 2:37 Zuwa loukuka na kuloka ibindi lya Kidiloni, ndangukulonjela ndikomya kota kobagama kwa kiyambuza gwegwe baho.”
1KI 2:38 Shimeyi nakamwidichila mndewa, “Goya mndewa. Ndodita kota mkulu wa heni, mndewa vyoulonjile.” Lelo nakekala Yelusalemu kwa mhela winji.
1KI 2:39 Ila kuli kuduma kwa mwaka wa kadatu, wapogozi weli wa Shimeyi nawasulupuka na kuluta kwa Akishi, mwana wa Maaka, mndewa wa Gati. Shimeyi loyahuliche kota wapogozi wa ako Gati,
1KI 2:40 nakakwina idogowi lya heye nakaluta kuwapala ako Gati kwa mndewa Akishi. Lelo, nakawafika ako na nakawahilula kaye.
1KI 2:41 Mndewa Solomoni loyahuliche kota Shimeyi nayali yochile Yelusalemu, nakaluta Gati na kuhiluka,
1KI 2:42 mndewa nakamchema Shimeyi na kumuuza, “Ndaze, hundahile kwa itagwa lya Mkulu Nguluwi kota hulawa Yelusalemu, nani sikukanyile kota kobagama wone kojeza kuluta kunze? Nagwe nakukunda na kundonjela, ‘Goya, ndohulichiza.’
1KI 2:43 Lekachoni lelo nakubena chilaho chowilahile kwa Mkulu Nguluwi na kubena mzilo wondikupele?”
1KI 2:44 Mndewa nakalutilila kumlonjela Shimeyi, “Kwangugazela gehile goumditile mhaza wa heni Daudi, lelo kwa chiwalo cha ago, Mkulu Nguluwi kokugaza.
1KI 2:45 Ila heni Solomoni ndotambichizwa na chigoda cha undewa cha Daudi chokwimizwa nzinzili hali Mkulu Nguluwi mazuwa gose.”
1KI 2:46 Hamba, mndewa nakamlajiza Benaya, mwana wa Yehoyada, naye nakalawa na kumtowa Shimeyi na kumkopola. Lelo, undewa wa Solomoni nawali wimile nzinzili.
1KI 3:1 Solomoni nakelumba na Falao, mndewa wa Misili na kumhesa mhinza wa heye. Nakamhilika mhinza wa Falao na kumuwika kuli Yelusalemu, muji wa Daudi, mbaka loyasindile kuzenga ng'handa ya heye ya chiundewa na ng'handa ya Mkulu Nguluwi, hamwe na lukanzi lulinguzunguluta muji wa Yelusalemu.
1KI 3:2 Wanhu nawali wolutilila kulavya nhambiko kuli honhu halivinji ha kufugamila, kwa vila ng'handa ya Mkulu Nguluwi nayali ing'hali kuzenjigwa.
1KI 3:3 Solomoni nakamgana Mkulu Nguluwi, nayali yowinza mizilo ja Daudi, mhaza wa heye, ila heye nakalavya nhambiko na kufunyiza ubani ako hali honhu ha kufugamila.
1KI 3:4 Mhela umwenga, mndewa Solomoni nakaluta kulavya nhambiko ako Gibeoni, honhu aho nahali honhu ha kufugamila halinguzeleka lukami, naye Solomoni nakalavya nhambiko za kulakazwa elufu imwe mchanya mwa honhu aho ha kulavila nhambiko.
1KI 3:5 Mkulu Nguluwi nakamlawila Solomoni ako Gibeoni, kuli kulota mhela wa nechilo, Nguluwi nakamlonjela, “Undande choneche nani ndokupa.”
1KI 3:6 Solomoni nakalonga, “Nakumlajila igano lya kwimilila chitumagwa wa hegwe Daudi, mhaza wa heni, kwa vila nakakukolela mijito kwa kukundigwa na kwa hachi na kwa nhumbula igoloche. Nakulutilila kumlajila igano lya kwimilila kwa kumha mwana wa kikalisa kuli chigoda cha heye cha undewa.
1KI 3:7 Lelo, gwa Mkulu Nguluwi, Nguluwi wa heni, nakumbika heni chitumagwa wa hegwe ndiwe mndewa honhu ha mhaza wa heni Daudi. Ila nding'hali mwana mdodo sivizelele ndaze vyondilinguganigwa kulongoza.
1KI 3:8 Nakumbika aha hali wanhu wa hegwe wawele nakuwahagula, wanhu wenji wohambe wawazigwe ne kuizela hisabu ya hewo.
1KI 3:9 Ahyo, ndangukulanda umhe heni chitumagwa wa hegwe uwanzi leka ndiwalongoze wanhu wa hegwe na kuvizela ganojile na gehile. Whaani yoweza kuwalongoza awa wanhu wa hegwe wawele wenji ahi?”
1KI 3:10 Kulanda aku kwa Solomoni nakumnojeza Mkulu Nguluwi.
1KI 3:11 Nguluwi nakamlonjela, “Kwa vila nakulanda mbuli ayi, hulandile kwa chiwalo cha kikala mazuwa menji ama lufufu ne kulanda kwa chiwalo cha kubagama kwa wang'honyo wa hegwe, ila nakulanda kuvizela kwa chiwalo cha hegwe kutagusa kwa hachi,
1KI 3:12 lelo ndodita kota vyoulandile. Ndokupa uwanzi na luhala, chasi chiwele hanalawila munhu yunji kota hegwe na howeza kulawila hamba.
1KI 3:13 Mzidi wa ago, ndokupa gala gawele hundandile, gawele ndo lufufu na lutogo, leka kuli kikala kwa hegwe kweng'ha hakuweza kulawila munhu kota hegwe hali wandewa.
1KI 3:14 Wone kowinza nzila za heni na kibatilila mizilo ja heni kota vyoyaditile mhaza wa hegwe Daudi, ndokutambichiza leka wikale mazuwa menji.”
1KI 3:15 Solomoni loyenuche nakavizela kota nayali yolota. Nakahiluka Yelusalemu, nakema kumwando mwa isanduku lya ilagano lya Mkulu Nguluwi na kulavya nhambiko za kulakazwa na za kikala goya. Hamba nakawaditila mnvina vitumagwa wa heye weng'ha.
1KI 3:16 Zuwa limwe wadala weli wang'hondwa nawaluta kwa mndewa Solomoni na kwima hali heye.
1KI 3:17 Yumwe wa hewo nakalonga, “Gwa mkulu wa heni, heni na ayu myangu twangikala ng'handa imwe. Heni namhonda mwana, mhela ayu loyawele hamwe na heni.
1KI 3:18 Mazuwa meli hamba kulawa loyapondigwe ayu mwana wa heni, ayu naye nakaponda mwana. Natwali twetwe yeka, hakuwele na yoneche kuli ng'handa ayo, ila hetwe weli hela.
1KI 3:19 Zuwa limwe nechilo mwanage nakabagama, kwa vila nayali yamuwasile.
1KI 3:20 Loyenuche nechilo ayo, nakamhola mwana wa heni mhela heni lombasile. Nakamuwasiliza hali mhambaga ya heye na kumuwika mwanage yabagame kuli mhambaga ya heni.
1KI 3:21 Lonyinuche hamitondo kumonyeza mwana wa heni, nandimona yawele yabagame. Ila londolile ng'hatu nandivizela kota hawele yula mwana wa heni yondimpondile.”
1KI 3:22 Ila yula mdala yunji nakalonga, “Hebu. Mwana yawele mkomu ndo wa heni na yabagame ndo wa hegwe.” Naye mdala wa mwaluko nakalonga, “Hebu. Mwana yawele mkomu ndo wa heni na yabagame ndo wa hegwe.” Ahi ndo vyowawele wochitwanza hali mndewa.
1KI 3:23 Mndewa Solomoni nakalonga, “Chila yumwe wa hemwe kangulonga kota mwanage ndo yawele mkomu, yabagame hawele wa heye.”
1KI 3:24 Lelo mndewa nakalajiza, “Mngalile ipanga.” Nawamigalila mndewa ipanga.
1KI 3:25 Mndewa nakalonga, “Mdumule ayo mwana yawele mkomu kuli vihande vili, umhe mdala ayu nusu na mdala yunji kahi nusu iyage.”
1KI 3:26 Yula mdala yawele mwanage ndo yawele mkomu, nayali yamemile isungu kwa chiwalo cha mwanage na kumlonjela mndewa, “Dedede mkulu wa heni, uleche kumkopola mwana. Umhe heye mwana ayu yawele mkomu.” Ila yula mdala yunji nakalonga, “Yadumuligwe kuli vihande vili, leka yaleche kuwa wa heni ne wa hegwe!”
1KI 3:27 Hamba, mndewa Solomoni nakalonga, “Mumhe mdala wa mwaluko mwana yawele mkomu. Mleche kumkopola, ayo ndo mayake.”
1KI 3:28 Wanhu weng'ha wa Isilaeli lowahuliche utaguso woyaulavile mndewa, nawamdumba mndewa, kwa vila nawona kota nayali na luhala kulawa kwa Nguluwi kwa kulavya hachi.
1KI 4:1 Solomoni nayali mndewa wa isi yeng'ha ya Isilaeli.
1KI 4:2 Wano nawali wamwe wa vilongozi wa heye wakulu. Asaliya, mwana wa Sadoki, nayali mtambika.
1KI 4:3 Eliholefu na Ahiya wana wa Shausha, nawali walingwandika. Yehoshafati, mwana wa Ahiludi, nayali yalingwandika kukumbuchila.
1KI 4:4 Benaya, mwana wa Yehoyada, nayali chilongozi wa wamizi na Sadoki na Abiatali, nawali watambika.
1KI 4:5 Asaliya, mwana wa Natani, nayali chilongozi wa wakulu wa mikowa na mtambika Sabudi, mwana wa Natani, nayali goloko wa mndewa.
1KI 4:6 Ahishali, nayali mkulu wa ng'handa ya mndewa na Adonilamu, mwana wa Abuda, nayali yalingulolela mijito ja kukola lupichi.
1KI 4:7 Solomoni nayali kahi na vilongozi kumi na weli kuli isi yeng'ha ya Isilaeli. Awo nawapegwa mijito ja kuwinza chilyo kwa chiwalo cha mndewa na kwa chiwalo cha wanhu wa ng'handa ya heye mndewa. Chila yumwe wa hewo nakegala chilyo kwa mwezi umwe kuli chila mwaka.
1KI 4:8 Aga ndo matagwa ga vilongozi, Beni-huli, nakalongoza isi ya vidunda vya Efulaimu
1KI 4:9 na Beni-dekeli, nakalongoza miji ja Makasi na Shaalibimu na Beti-shemeshi na Eloni-beti-hanani.
1KI 4:10 Beni-hesedi nayali chilongozi wa muji wa Aluboti na Soko na isi yeng'ha ya Hefeli.
1KI 4:11 Beni-abinadabu, mlume wa Tafati, mhinza wa Solomoni, nakalongoza isi yeng'ha ya Nafoti-doli.
1KI 4:12 Baana, mwana wa Ahiludi, nakalongoza miji ja Taanaki na Megido na honhu heng'ha ha Beti-sheani iwele habehi na muji wa Saletani, kusini mwa muji wa Yesileeli na kulawa Beti-sheani mbaka muji wa Abeli-mehola mbaka kupuluta muji wa Yokimeamu.
1KI 4:13 Beni-gebeli nakalongoza muji wa Lamoti-gileadi hamwe na vijiji vya Gileadi viwele kuli isi ya Yaili, mlelwa wa Manase. Nakalongoza kahi mkowa wa Aligobu, uwele Bashani, najali miji mikulu makumi sita jizungulusilwe lukanzi na kuwichilwa fito za shaba kuli lwizi.
1KI 4:14 Ahinadabu, mwana wa Ido, nakalongoza muji wa Mahanaimu.
1KI 4:15 Ahimaasi, mlume wa Basemati, mhinza wa Solomoni, nakalongoza isi ya Nafutali.
1KI 4:16 Baana, mwana wa Hushayi, nakalongoza isi ya Asheli na Bealoti.
1KI 4:17 Yehoshafati, mwana wa Palua, nakalongoza isi ya Isakali.
1KI 4:18 Shimeyi, mwana wa Ela, nakalongoza isi ya Benjamini.
1KI 4:19 Gebeli, mwana wa Uli, nakalongoza isi ya Gileadi, ndo yila iwele naiholigwa na Sihoni, mndewa wa Waamoli na Ogu mndewa wa Bashani. Mzidi wa awa kumi na weli, nakwali na mkulu yumwe yawele nayali yolongoza isi yeng'ha.
1KI 4:20 Wanhu wa Yuda na wa Isilaeli nawali wenji kota sangalaza za mhwani, nawalya na kunwa na kusangalala.
1KI 4:21 Solomoni nakalongoza undewa weng'ha wa kwaluchila lwanda lwa Eyufulate mbaka kuli isi ya Wafilisti na kuli mbaka wa Misili. Wanhu wa isi zeng'ha nawamkolela mijito na kulavya kodi kwa heye kuli mhela weng'ha wa kikala kwa heye.
1KI 4:22 Chilyo choyatumiye Solomoni kuli zuwa limwe nachali utimbo unojile lita elufu sita na miya sita na utimbo wunji wa hihi hela lita elufu kumi na zidatu na miya mbili
1KI 4:23 na misenga jinyatile kumi na misenga jilingulya kisolo makumi meli na ming'holo miya imwe, hamwe na ibala na chifuno na kulungu na ng'huku zinojile lukami.
1KI 4:24 Kwa vila Solomoni nakalongoza undewa weng'ha wa kolizinjilaga isanya mwa lwanda lwa Eyufulate, kwaluchila Tifusa mbaka Gasa, ahyo nayali na kikala goya kuli banzi zeng'ha.
1KI 4:25 Mazuwa geng'ha ga ulongozi wa heye Solomoni kwa wanhu wa Yuda na wa Isilaeli, kulawa Dani mbaka Beeli-sheba, nawekala kwa kikala goya chila munhu hali migodi ja heye ja mizabibu na mitini.
1KI 4:26 Solomoni nayali na vibumuli elufu makumi gane (40,000) kwa chiwalo cha falasi na mituka ja heye ja kubulunwa na wamizi wakwina falasi elufu kumi na weli (12,000).
1KI 4:27 Wala vilongozi kumi na weli, chila yumwe kuli mwezi woyalonjelwe, nawegala chilyo cha kuhega kwa chiwalo cha mndewa Solomoni na wanhu weng'ha walingulya hali chisaga cha mndewa. Nawali wokweneza chila chinhu chilinguganigwa.
1KI 4:28 Nawali wochigala kahi honhu ha vinhu vilinguganigwa vya shayili na misolo kwa chiwalo cha falasi na kwa falasi wanji walingubilima lukami.
1KI 4:29 Nguluwi nakamha Solomoni luhala na nyhala ng'hatu na kuvizela lukami kuwele hakulinguweza kupimigwa kota sangalaza za mhwani.
1KI 4:30 Luhala lwa Solomoni nalwali lukulu kusinda luhala lwa wanhu weng'ha wa kolilawila isanya na kusinda luhala lwa wanhu wa Misili.
1KI 4:31 Nayali na luhala kusinda Etani, Mwesila na kusinda Hemani na Kalikoli na Dalida, wana wa Maholi. Lutogo lwa heye nalwenela kwa wanhu wa isi zeng'ha za habehi.
1KI 4:32 Nakandika nhelo elufu zidatu (3,000) na nzimbo elufu imwe na zihano (1,005).
1KI 4:33 Nakalonga mbuli zilinguwala migodi, kwaluchila mwelezi uwele Lebanoni na isopolo, mizuchila jilingota kuli lukanzi. Nakalonga kahi kuwala migongolo na videje na vilumbigwe vilingutambala viwele na danda izizime jilingulagaza mafinga, kota somba.
1KI 4:34 Wanhu wa isi zeng'ha nawoya kuhulichiza luhala lwa Solomoni, wawele nawalajizwa na wandewa weng'ha wa kuli isi zeng'ha wawele nawahulika kuwala luhala lwa mndewa Solomoni.
1KI 5:1 Mndewa Hilamu wa Tilo, loyahuliche kota Solomoni nakabakalizwa mafuta leka yawe mndewa honhu ha mhaza wa heye Daudi, nakalajiza wasenga kwa Solomoni, kwa vila heye Hilamu nayali goloko wa Daudi.
1KI 5:2 Solomoni nakahilika usenga kwa Hilamu yolonga,
1KI 5:3 “Kwanguvizela kota mhaza wa heni Daudi nakalemwela kuzenga ng'handa ya kumfugamila Mkulu Nguluwi, Nguluwi wa heye, kwa chiwalo cha kitowa ngondo na wang'honyo wa isi za habehi mbaka hala Mkulu Nguluwi loyampele kusumya.
1KI 5:4 Ila lelo, Mkulu Nguluwi, Nguluwi wa heni, nakamha heni kikala goya kuli banzi zeng'ha. Haduhu mng'honyo ne magazo.
1KI 5:5 Lelo, nanhuwila kuzenga ng'handa kwa chiwalo cha Mkulu Nguluwi, Nguluwi wa heni, kota Mkulu Nguluwi vyoyamlonjele mhaza wa heni Daudi, yolonga, ‘Mwanago yondimuwika kuli chigoda cha undewa honhu ha hegwe, ayo ndo kozenga ng'handa kwa chiwalo cha itagwa lya heni.’
1KI 5:6 Lelo, uwalajize wanhu wa hegwe wateme mielezi ja Lebanoni kwa chiwalo cha heni. Wanhu wa heni wokola mijito hamwe na wanhu wa hegwe, nani ndowalipa vitumagwa wa hegwe kota vyoulonga. Kwanguvizela kota haduhu wanhu walingudaha kutema migodi kota Wasidoni.”
1KI 5:7 Hilamu loyahuliche usenga awo kulawa kwa Solomoni, nakasangalala lukami na kulonga, “Mkulu Nguluwi yatogoligwe lehano, kwa vila nakamha Daudi mwana yawele na luhala yawalongoze wanhu wa isi ayi ng'hulu.”
1KI 5:8 Hamba, Hilamu nakalajiza usenga kwa Solomoni, yolonga, “Nambochela usenga wa hegwe wouulajize kwa heni, ndodita geng'ha goulingugana leka ndikupe mizinga ja migodi ja mielezi na mibeloshi.
1KI 5:9 Wanhu wa heni wojilavya mizinga ajo kulawa Lebanoni mbaka mbahali, nani ndojiwoha kuli vilundo mbaka honhu houlajila jilute. Ako ndojidohola, nagwe kojibochela. Kokweneza kugana kwa heni kwa kumha heni chilyo kwa chiwalo cha wanhu wa kaye kwa heni.”
1KI 5:10 Kwa nzila ayi, Hilamu nakamha Solomoni migodi jeng'ha ja mielezi na mibeloshi kota vyoyaganile,
1KI 5:11 naye Solomoni nakamha Hilamu lita lachi zine na elufu makumi gahano na zine (454,000) za ngano na lita lachi zine na elufu makumi gahano na zine (454,000) za mafuta ganojile ga mzeituni, kwa chiwalo cha wanhu wa kaye kwa heye. Solomoni nakalutilila kumditila ayi Hilamu chila mwaka.
1KI 5:12 Mkulu Nguluwi nakamha Solomoni luhala kota vyoyamlahile. Nakwali na kikala goya hali Solomoni na Hilamu, weng'ha weli nawadita ilagano hali hewo.
1KI 5:13 Mndewa Solomoni nakawakungajiza wanhu elufu makumi gadatu (30,000) kulawa chila honhu kuli isi yeng'ha ya Isilaeli, leka wakole mijito ja kukola lupichi.
1KI 5:14 Nakawahilika wanhu Lebanoni kwa kuwabagula kuli vilundo, wanhu elufu kumi kuli chila mwezi, ahyo nawekala Lebanoni kwa mwezi umwe na myezi mili nawekala kaye. Adonilamu ndo nayali chilongozi wa wanhu walingukola mijito kwa lupichi.
1KI 5:15 Solomoni nayali na vitumagwa wa kupika mhomolo elufu makumi saba (70,000) na wahongola maganga kuli vidunda elufu makumi nane (80,000),
1KI 5:16 hamwe na vilongozi elufu zidatu na miya zidatu wawele nawalongoza mijito ajo na kuwalolela wakola mijito weng'ha.
1KI 5:17 Kwa mzilo wa mndewa, nawabawa maganga makulu ga sendi nyinji, leka gahongoligwe na kuzenjela msisi wa ng'handa ya Nguluwi.
1KI 5:18 Ahyo ndo walinguzenga wa Solomoni na wa Hilamu na wanhu wa muji wa Gebali vyowahongole maganga na kuwika goya mbawo kwa chiwalo cha kuzenjela ng'handa ya Nguluwi.
1KI 6:1 Kuli mwaka wa miya zine na makumi nane kulawa Waisilaeli lowalawile kuli isi ya Misili, kuli mwaka wa kane wa ulongozi wa mndewa Solomoni kuli Isilaeli, kuli mwezi wa Sifu, uwele ndo mwezi wa keli, Solomoni nakaluka kuzenga ng'handa ya Mkulu Nguluwi.
1KI 6:2 Ng'handa ayo iwele mndewa Solomoni nakazenga kwa chiwalo cha Mkulu Nguluwi, nayali na ulefu wa mita makumi meli na saba na ugazi wa mita tisa na wimo wa mita kumi na zidatu na nusu kuluta kuchanya.
1KI 6:3 Chituka cha kumwando nachali na ulefu wa mita tisa, kwa kiwhana na ugazi wa ng'handa ya Nguluwi na honhu halawilile kumwando kwa ng'handa ayo nahali na ulefu wa mita zine na nusu.
1KI 6:4 Nakaiwichila mitubuli migazi kwa mgati na mizisili kwa kunze.
1KI 6:5 Nakagongomanya vihengo vya hafungo kuizunguluta ng'handa ya Nguluwi yeng'ha kwa wimo wa milingo jidatu kuluta kuchanya, vihengo avyo navibatililwa na ng'hanzi za ng'handa na za honhu helile.
1KI 6:6 Ilingo lya hasi nalyali na ugazi wa mita mbili na lobo na ilingo liyage nalyali na ugazi wa mita mbili na lobo zidatu na ilingo lya mchanya ng'hatu nalyali na ugazi wa mita zidatu. Milingo ajo najali jilivinji kwa ugazi, kwa vila Solomoni nayali yapunguze lukanzi lwa kunze kuzunguluta ng'handa, leka boliti za kwegamila ng'handa vibatane na lukanzi.
1KI 6:7 Mhela wa kuzenga ng'handa ya Nguluwi, maganga gahongoligwe hela ndo nagakola mijito ajo, hakuwele na nyundo ne liwago ama chinhu choneche cha chuma chiwele nachihulikwa kuli honhu aho ha kuzenga ng'handa ya Nguluwi.
1KI 6:8 Lwizi lwa kwinjilila kuli ilingo lya hasi nalwali ubanzi wa kusini mwa ng'handa ya Nguluwi, chikwinilo nachiluta kuli ilingo lya hagati na kulawa aho nachiluta mbaka kuli ilingo lya kadatu.
1KI 6:9 Ahyo, Solomoni nakazenga ng'handa, naimala. Chinduwiko cha ng'handa nachali chigongomanyigwe kwa boliti na mbawo za mielezi.
1KI 6:10 Mndewa Solomoni nakazenga vihengo kuizunguluta ng'handa ya Nguluwi yeng'ha. Wimo wa chila chihengo nawali mita mbili na lobo na navyali vilumbile na ng'handa kwa boliti za mielezi.
1KI 6:11 Mhela awo, ulonzi wa Mkulu Nguluwi naumuyila Solomoni,
1KI 6:12 “Kuwala ng'handa ayi youlinguzenga, wone kowinza mzilo wa heni na kibatilila malajizo ga heni na malanguso ga heni, kwa kukolela hegwe ndokweneza kulagana kwa heni kondilagane na mhaza wa hegwe, Daudi.
1KI 6:13 Ndochikala hali Isilaeli na siwaleka wanhu wa heni, Isilaeli.”
1KI 6:14 Ahyo, Solomoni nakazenga ng'handa ya Nguluwi na kusinda.
1KI 6:15 Nakazigubika ng'hanzi zake za mgati kwa mbawo za mielezi, nakaziwika kuli ng'hanzi kulawa hasi ha ng'handa mbaka kuli chinduwiko na kuhagubika hasi ha ng'handa ya Nguluwi kwa mbawo za mibeloshi.
1KI 6:16 Chihengo cha mgati chilinguchemigwa honhu helile, nachizenjigwa kuli honhu ha kumbele ha ng'handa. Nachali chizenjigwe kwa mbawo za mielezi kulawa hasi mbaka kuli chinduwiko na ulefu wake nawali mita tisa.
1KI 6:17 Chihengo chikulu chiwele kumwando kwa honhu helile, nachali na ulefu wa mita kumi na nane.
1KI 6:18 Ng'handa ya Nguluwi kwa mgati nayali inoligwe kwa kiwhana na mayungu na uluwa ubawule. Chila chinhu nachali cha mielezi, hakuwele na iganga liwele nalyoneka.
1KI 6:19 Mgati mwa ng'handa ya Nguluwi nakagongomanya honhu helile ha mgati, kwa chiwalo cha kuliwika isanduku lya Ilagano lya Mkulu Nguluwi.
1KI 6:20 Honhu helile ha mgati nahali na ugazi wa mita tisa na ulefu wa mita tisa na wimo wa mita tisa. Honhu aho nahali hagubikwe kwa zahabu inojile na nakagongomanya honhu ha kulavila nhambiko kwa mbawo za migodi ja mielezi na kuhagubika kahi kwa zahabu inojile.
1KI 6:21 Solomoni nakahagubika honhu ha mgati ha ng'handa ya Nguluwi kwa zahabu inojile na nakawika migasi ja zahabu kulawa ubanzi umwe mbaka uyage uwele kumwando mwa honhu helile, hawele nahagubikwa kwa zahabu.
1KI 6:22 Ng'handa yeng'ha nakaigubika kwa zahabu inojile na honhu ha kulavila nhambiko kuli honhu helile kahi nakahagubika kwa zahabu inojile.
1KI 6:23 Hali honhu helile nakavigongomanya vilumbigwe vili viwele na mabawa kwa mbawo za mizeituni, chila chilumbigwe nachali na wimo wa mita zine na nusu.
1KI 6:24 Kuli chila ibawa lya chilumbigwe chiwele na mabawa, nalyali na ulefu wa mita mbili na lobo, lelo ulefu kulawa kuli kuduma kwa ibawa limwe mbaka kuduma kwa ibawa liyage nawali mita zine na nusu.
1KI 6:25 Chilumbigwe chiyage chiwele na mabawa nachali na ulefu wa mita zine na nusu, vilumbigwe vyeng'ha vili navyali na vipimilo vivila na ukulu wuwula.
1KI 6:26 Wimo wa chila chilumbigwe chiwele na mabawa nawali mita zine na nusu.
1KI 6:27 Nakaviwika vilumbigwe avyo viwele na mabawa mgati mwa honhu helile ha ng'handa ya Nguluwi, mabawa ga vilumbigwe avyo nagali gagonzoligwe. Ibawa lya chilumbigwe chimwe nalyali lidoliza lukanzi lumwe, kuno ibawa lya chilumbigwe chiyage nalidoliza lukanzi luyage na mabawa ganji ga vilumbigwe avyo nagating'hana na kidoliza hagati ha chihengo.
1KI 6:28 Nakavigubika kwa zahabu vila vilumbigwe viwele na mabawa.
1KI 6:29 Mchanya mwa chila lukanzi lwa ng'handa ya Nguluwi nakunoligwa kwa kuhongoligwa vilumbigwe viwele na mabawa na migodi ja michikichi na uluwa ulingubawula.
1KI 6:30 Hanyi ha vihengo vyeng'ha vya mgati na vya kunze mwa ng'handa ya Nguluwi, nakahagubika kwa zahabu.
1KI 6:31 Hali honhu ha kwinjilila kuli chihengo cha mgati ng'hatu, nakagongomanya lwizi mili ja mbawo za mizeituni jiwele na wimo na fulemu zilingoneka ziwele na nzingo zihano.
1KI 6:32 Kuli lwizi ja mbawo za mizeituni nakanoliga kwa kuhongola vilumbigwe viwele na mabawa na migodi ja michikichi na uluwa ulingubawula, hamba nakagubika vinoligo avyo kwa zahabu.
1KI 6:33 Nakagongomanya kahi fulemu ziwele na nzingo zine kwa migodi ja mizeituni, kwa chiwalo cha lwizi mili ja chihengo chikulu.
1KI 6:34 Nakwali na lwizi jilinguweza kigonzola jigongomanyigwe kwa mbawo za mibeloshi na chila lwizi nalwali na bawaba zilinguweza kibina kuli chila ubanzi mchanya mwa lwizi luyage.
1KI 6:35 Kuli lwizi ajo, nakahongola vilumbigwe viwele na mabawa na migodi ja michikichi na uluwa ubawule, nakajinoliga goya kwa zahabu.
1KI 6:36 Nakazenga lugagala lwa mgati, luwele ng'hanzi zake nazali za misitali jidatu ja maganga gahongoligwe na msitali umwe wa boliti za mielezi.
1KI 6:37 Msisi wa ng'handa ya Mkulu Nguluwi nawali uzenjigwe kuli mwaka wa kane na mwezi wa Sifu.
1KI 6:38 Kuli mwaka wa kumi na umwe, mwezi wa Buli, uwele ndo mwezi wa nane, ng'handa ya Nguluwi nayali isindile kuzenjigwa. Nakaizenga ng'handa ayo kwa miyaka saba.
1KI 7:1 Solomoni nakazenga ng'handa ya heye ya chiundewa kwa mhela wa miyaka kumi na jidatu.
1KI 7:2 Hamba, nakazenga chihengo mgati mwa ng'handa ya mndewa, chilinguchemigwa Chihulo cha Lebanoni. Nachali na ulefu wa mita makumi gane na zine na nusu na ugazi wake mita makumi meli na mbili na lobo na wimo wake nawali mita kumi na zidatu na nusu. Chihengo acho nachali chizenjigwe mchanya mwa misitali jine ja mizengo ja mielezi, mizengo jiwele najali jibatilile boliti za mielezi kwa ubanzi wa kuchanya.
1KI 7:3 Chila msitali nawali na mizengo kumi na jihano, ahyo jeng'ha hamwe najali mizengo makumi gane na jihano. Vihengo vizenjigwe mchanya mwa mizengo ajo, nakaviwichila vinduwiko vya mbawo za mielezi.
1KI 7:4 Nakwali na misitali jidatu ja mitubuli jilingilola.
1KI 7:5 Lwizi jeng'ha najali ja nzingo zine, najali ubanzi wa kumwando kuli misitali jidatu, jichilola.
1KI 7:6 Nakazenga lugagala lwa mizengo, ulefu wake nawali mita makumi meli na lobo na ugazi wake nawali mita kumi na zidatu na nusu. Hali honhu ha kumwando ha lugagala alo nakwali na chituka na kumwando mwa chituka acho nakwali na mizengo na chinduwiko chidodo.
1KI 7:7 Solomoni nakazenga chitala cha chigoda cha undewa, hawele amo nayali yotagusa wanhu. Chitala acho nachichemigwa Chitala cha Utaguso. Nachali chinoligwe kwa mbawo za mielezi kulawa hanyi mbaka kuli chinduwiko.
1KI 7:8 Ng'handa ya kikala heye, iwele nayali kumbele kwa Chitala cha Utaguso nayali izenjigwe kota ziyage. Solomoni kahi nakazenga ng'handa kota ayo kwa chiwalo cha mhinza wa Falao, yawele nayali yamhesile.
1KI 7:9 Ng'handa azo zeng'ha nazizenjigwa kwa maganga ga sendi nyinji kulawa kuli msisi mbaka kuchanya, maganga gahongoligwe kwa vipimilo vyowaganile na kudumuligwa kwa msumeno banzi zeng'ha.
1KI 7:10 Msisi nawali wa maganga ga sendi nyinji na makulu gawele na ulefu wa mita zidatu na nusu na ugazi mita zine na nusu.
1KI 7:11 Honhu ha kuchanya nahazenjigwa kwa maganga ganji gahongoligwe kwa vipimilo vivila vyowaganile na kwa mbawo za mielezi.
1KI 7:12 Lugagala lwa ng'handa ya mndewa nalwali na lukanzi luwele na msitali umwe wa mbawo za mielezi jipanjigwe mchanya mwa misitali jidatu ja maganga ga kuhongola, kota vyoluwele lugagala lwa mgati mwa ng'handa ya Mkulu Nguluwi na chituka chake.
1KI 7:13 Mndewa Solomoni nakawalajiza wanhu kumigala Hilamu kulawa Tilo.
1KI 7:14 Hilamu, nayali mwana wa mdala yafililwe na mlume wa heye, kulawa nhanzi ya Nafutali na mhaza wa heye nayali mwenyeng'haye wa Tilo, mponda shaba. Hilamu nayali na kuvizela na muwanzi ng'hatu wa mijito joneche ja shaba, lelo nakaluta kwa mndewa Solomoni, nakamkolela mijito ja heye jeng'ha.
1KI 7:15 Hilamu nakagongomanya mizengo mili ja shaba, chila limwe nalyali na ulefu wa mita nane na mzunguluto wake mita zihano na nusu.
1KI 7:16 Nakagongomanya mitaji mili ja shaba, chila limwe nalyali na ulefu wa mita mbili na nusu kuluta kuchanya, nakajiwika mchanya mwa mizengo ajo.
1KI 7:17 Hamba, nakagongomanya migasi jibotigwe kuli jila mitaji mchanya mwa jila mizengo. Nakwali na migasi saba kuli chila itaji.
1KI 7:18 Nakagongomanya mafuza ga makomamanga, nakagawika kuli misitali mili kujizunguluta jila mitaji mchanya mwa chila izengo.
1KI 7:19 Mitaji jiwele mchanya mwa mizengo ja chituka, najali jikoneka kota uluwa wa yunjiyunji na wimo wake nawali mita imwe na lobo zidatu.
1KI 7:20 Mitaji ajo najali mchanya mwa ajo mizengo mili na najali kahi mchanya mwa honhu halingiwhana na chisaye. Habehi na wula utandawala nakwali na gala makomamanga miya mbili kuli misitali kuzunguluta chila itaji.
1KI 7:21 Hilamu nakajiwika mizengo ajo kuli chituka cha ng'handa ya Nguluwi, izengo lyoyalimize ubanzi wa kusini nalichemigwa Yakini na lila lyoyalimize ubanzi wa kasikazini nalichemigwa Boasi.
1KI 7:22 Mitaji jiwele kuchanya najali jikoneka kota uluwa wa yunjiyunji. Ahyo mijito ja mizengo ajo najali jisindile.
1KI 7:23 Hamba Hilamu nakagongomanya ibiga lya shaba lilinguchemigwa Bahali. Nalyali lya uvilingo liwele na ugazi wa mita zine na nusu kulawa nzingo imwe mbaka nzingo iyage na wimo wa mita mbili na lobo na mzunguluto wa mita kumi na zidatu na nusu.
1KI 7:24 Hasi ha nzingo yake nakuzungulutwa na misitali mili ja mayungu, mayungu kumi kuli chila sentimita makumi gane na zihano. Mayungu ago nagagongomanyigwa mhela wuwula wa kuligongomanya ibiga.
1KI 7:25 Ibiga alyo nalyali liwichigwe mchanya mwa jimalukolo ja mibuguma kumi na mili, jidatu najilola kasikazini na jidatu jinji najilola kolizinjilaga isanya na jidatu kahi najilola kusini na jidatu jiyage najilola kolilawilaga isanya. Ibiga alyo naliwichigwa mchanya mwa mibuguma ajo honhu hawo ha kumbele.
1KI 7:26 Nzingo zake nazali na ugazi wa sentimita saba na nusu na nazali ziwhana na nzingo za chizombe na kota wula uluwa wa yunjiyunji. Ibiga alyo nalyali liweza kuwichigwa mazi lita elufu makumi gane (40,000).
1KI 7:27 Hilamu kahi nakagongomanya mituka kumi ja shaba, chila mutuka nawali na ulefu wa mita imwe na lobo zidatu na ugazi wa mita imwe na lobo zidatu na wimo wa mita imwe na lobo.
1KI 7:28 Mituka ajo najigongomanyigwa hino. Nakwali na mabamba ga hafungo gawele nagali gabatililwe na fulemu.
1KI 7:29 Mchanya mwa mabamba na hagati ha azo fulemu, nakwali na jimalukolo ja misimba na mibuguma na vilumbigwe viwele na mabawa. Mchanya na hasi ha misimba na mibuguma nakwali kuwichigwe vinoligo vya kupondigwa.
1KI 7:30 Chila mutuka nawali na maguludumu gane ga shaba na vinhu vya hagati vya kugazungulusila maguludumu ago navyali vya shaba. Kuli nzingo zine za mutuka nakwali na vibatililo vya shaba kwa chiwalo cha ibiga. Habehi na chila chibatililo nakwali na vinoligo vya kupondigwa.
1KI 7:31 Honhu ha kuchanya ha mutuka nahali mwanzi na ha mvilingo, nahaluta kuchanya kwa nusu mita na sentimita kumi na nane mgati mwake. Kwa kunze, honhu hala nahanoligwa, mabamba gake nagali ga mlaba hagawele ga mvilingo.
1KI 7:32 Maguludumu ago gane nagali hasi ha mabamba na vinhu vya hagati vya kuzungulusila maguludumu, navyali vilumbile na fulemu na wimo wa maguludumu ago nawali sentimita makumi sita na sita.
1KI 7:33 Maguludumu ago nagagongomanyigwa kota maguludumu ga mituka ja ngondo ja kukwejigwa, mvilingo wake na chila chinhu cha maguludumu ago nachali cha kupondigwa.
1KI 7:34 Chila fulemu nayali na moko gane. Moko umwe kuli chila nzingo.
1KI 7:35 Mchanya mwa chila mutuka nakwali na fito ilingudita uvilingo wa wimo wa sentimita makumi meli na mbili. Vibatililo vyake na mabamba gake gawele ubanzi wa kuchanya, navilumba na mutuka.
1KI 7:36 Moko na mabamba navinoligwa kwa jimalukolo ja vilumbigwe viwele na mabawa na misimba na migodi ja michikichi mchanya mwa fito, hamwe na mitaji jibotigwe kuzunguluta honhu heng'ha.
1KI 7:37 Ahi ndo Hilamu vyoyagongomanye jila mituka kumi. Jeng'ha najali ja kugongomanyigwa kwa kupondigwa, jiwele na vipimilo na ukulu vilingiwhana.
1KI 7:38 Hamba nakagongomanya mibiga jinji kumi ja shaba, ibiga limwe kuli chila mutuka. Chila ibiga nalyali na ugazi wa mita imwe na lobo zidatu na naliweza kuwika mazi lita miya nane.
1KI 7:39 Nakawika mituka jihano kuli ubanzi wa kusini wa ng'handa na mituka jihano kuli ubanzi wa kasikazini na lila ibiga likulu nakaliwika kuli ubanzi wa kusini kolilawilaga isanya mwa yila ng'handa.
1KI 7:40 Hilamu nakagongomanya kahi mibiga na makoleo na visaye vya kumizila. Lelo, Hilamu nakasinda mijito jeng'ha joyawele yomkolela mndewa Solomoni kuli ng'handa ya Mkulu Nguluwi,
1KI 7:41 mizengo mili na mitaji mili jilingiwhana na visaye navyali mchanya mwa mizengo na utandawala wili kwa chiwalo cha kunoliga ajo mitaji mili jilingiwhana na visaye, jiwele mchanya mwa mizengo
1KI 7:42 na makomamanga miya zine kwa chiwalo cha utandawala awo wili na misitali mili ja makomamanga kwa chila utandawala leka kunoliga jila mitaji mili jilingiwhana na visaye, jiwele mchanya mwa mizengo.
1KI 7:43 Nakagongomanya kahi vikalilo kumi hamwe na nyhelo kumi kuli mituka ajo
1KI 7:44 na lila ibiga likulu na jila mibuguma kumi na mili hasi ha ibiga
1KI 7:45 na mibiga na makoleo na visaye vya kumizila. Vinhu avi vyeng'ha viwele Hilamu nakamgongomanyila mndewa Solomoni kwa chiwalo cha ng'handa ya Mkulu Nguluwi, navyali vya shaba ilingupulika.
1KI 7:46 Vinhu avyo vyeng'ha mndewa nakavigongomanya kuli ibindi lya Yolodani, honhu hawele na misanga ja ilongo lya kulumbila vinhu, hawele hagati ha Sukoti na Saletani.
1KI 7:47 Solomoni nakavileka vinhu avyo ne kuvipima kwa vila navyali vinji lukami, itunyo lya shaba haliwezile kuzeleka.
1KI 7:48 Solomoni nakagongomanya kahi vinhu vyeng'ha viwele kuli ng'handa ya Mkulu Nguluwi, viwele ndo honhu ha kulavila nhambiko ha zahabu na chisaga cha zahabu kwa chiwalo cha mibumunda ja kuwika hali Nguluwi
1KI 7:49 na vinhu vya kuwichila chenje vya zahabu inojile viwichigwe kumwando ha honhu helile ng'hatu, vihano kuli ubanzi wa kusini na vihano kuli ubanzi wa kasikazini, kumwando ha honhu helile ng'hatu. Nakagongomanya kahi uluwa na vyenje na makoleo
1KI 7:50 na vizombe na mikasi ja kudumulila tambi za mishumaa na visaye vya kumizila na vifunyizi vya ubani na bawaba kwa chiwalo cha lwizi lwa honhu helile ng'hatu na kwa chiwalo cha lwizi lwa chituka chikulu cha ng'handa ya Nguluwi.
1KI 7:51 Lelo mndewa Solomoni loyasindile mijito jeng'ha kuli ng'handa ya Mkulu Nguluwi, nakaviwika mng'handa vila vinhu viwele Daudi, mhaza wa heye nayali yaviditile viwe vya chiuyeng'ha, viwele ndo sendi na zahabu na vinhu viyage, hamba nakaviwika vinhu avyo kuli ng'hano za ng'handa ya Mkulu Nguluwi.
1KI 8:1 Lelo, mndewa Solomoni, nakawachema wasekulu na vilongozi weng'ha wa nhanzi na wa ivyazi lya Isilaeli ako Yelusalemu, leka waligale isanduku lya ilagano lya Mkulu Nguluwi kulawa honhu hamwenga ha muji wa Daudi, hawele ndo chidunda cha Siyoni mbaka kuli ng'handa ya Nguluwi.
1KI 8:2 Walume weng'ha wa Isilaeli nawekungajiza kwa mndewa Solomoni mhela wa mnvina ya vibumuli, kuli mwezi wa Etanimu, uwele ndo mwezi wa saba.
1KI 8:3 Wasekulu weng'ha wa Isilaeli lowafichile, watambika nawalipika isanduku lya ilagano lya Mkulu Nguluwi.
1KI 8:4 Walawi na watambika nawalihola isanduku lya ilagano lya Mkulu Nguluwi na ihema lya Nguluwi na vinhu vyelile vyeng'ha viwele amo mihema, watambika na Walawi nawavipika.
1KI 8:5 Mndewa Solomoni na nhing'hano yeng'ha ya Waisilaeli wawele nawekungajiza hali heye, wawele nawali hali alyo isanduku lya ilagano, nawalavya nhambiko nyinji za ming'holo na misenga jiwele hisabu yake hailinguweza kwandichigwa ne kuwazigwa.
1KI 8:6 Hamba watambika nawalihilika isanduku lya ilagano lya Mkulu Nguluwi mbaka hali honhu hake, mgati mwa honhu helile ha ng'handa ya Nguluwi, hawele ndo honhu helile ng'hatu, nawaliwika hasi ha mabawa ga vilumbigwe viwele na mabawa.
1KI 8:7 Avyo vilumbigwe viwele na mabawa navigonzola mabawa gawo mchanya mwa honhu hawichigwe isanduku lya ilagano, ahyo isanduku alyo na mipichilo jake navyali hasi ha mabawa.
1KI 8:8 Mipichilo jake najali ng'wemang'wema lukami mbaka najoneka kulawa honhu helile hali honhu helile ng'hatu, ila hajilingoneka hanze ha honhu helile. Mipichilo ajo jing'hali kuko.
1KI 8:9 Mgati mwa isanduku lya ilagano nakwali na vibawo vili hela vya maganga, viwele Musa nayali yaviwichile mgati mwake ako Holebu, honhu hawele Mkulu Nguluwi nakadita ilagano na Waisilaeli lowalawile Misili.
1KI 8:10 Watambika lowalawile hali honhu helile, ng'hungugu naimemeza ng'handa ya Mkulu Nguluwi.
1KI 8:11 Ahyo watambika nawalemwela kukola mijito kwa chiwalo cha ng'hungugu ayo, kwa vila ukulu wa Mkulu Nguluwi nauimemeza ng'handa ya Mkulu Nguluwi.
1KI 8:12 Hamba Solomoni nakalanda yolonga, “Mkulu Nguluwi nakulonga kota hegwe kochikala kuli jiza totolo,
1KI 8:13 ena, ndikomya nandikuzenjela ng'handa inojile ng'hatu, honhu ha hegwe ha kikala mazuwa gose.”
1KI 8:14 Hamba mndewa Solomoni nakaligaluchila na kulitambichiza ikugusi lya wanhu wa Isilaeli wawele wemile hala,
1KI 8:15 nakalonga, “Yatogoligwe Mkulu Nguluwi, Nguluwi wa Isilaeli, yawele kwa moko wa heye nakeneza lila lyoyalagane na mhaza wa heni Daudi, yolonga,
1KI 8:16 ‘Kulawa zuwa lila londiwalavile wanhu wa heni Isilaeli kulawa Misili, sihagule muji kuli nhanzi yoneche ya Isilaeli leka ng'handa ya heni izenjigwe amo na itagwa lya heni liwe amo, ila nandimhagula Daudi kuwalongoza wanhu wa heni Isilaeli.’
1KI 8:17 “Ahyo, mhaza wa heni Daudi, nakanuwila kuzenga ng'handa kwa chiwalo cha Mkulu Nguluwi, Nguluwi wa Isilaeli.
1KI 8:18 Ila Mkulu Nguluwi nakamlonjela mhaza wa heni Daudi, ‘Nakudita goya kuwa na majesa ga kuzenga ng'handa ya heni kwa chiwalo cha itagwa lya heni.
1KI 8:19 Ila, haiwele hegwe uwele konzenjela ng'handa, ila mwanago ndo konzenjela ayo ng'handa, kwa chiwalo cha itagwa lya heni.’
1KI 8:20 “Lelo, Mkulu Nguluwi nakeneza kulagana kwa heye koyalagane, kwa vila nandiwa mndewa honhu ha mhaza wa heni Daudi na sambi ndangikalisa kuli chigoda cha undewa cha Isilaeli, kota vila Mkulu Nguluwi vyoyalagane, nani nanzenga ng'handa ya Nguluwi kwa chiwalo cha itagwa lya Mkulu Nguluwi, Nguluwi wa Isilaeli.
1KI 8:21 Mzidi wa ago, nambika honhu ha kuwika isanduku lya ilagano, liwele mgati mwa alyo mna lila ilagano lya Mkulu Nguluwi lyoyaliditile na wasekulu wa hetwe, mhela loyawalavile kuli isi ya Misili.”
1KI 8:22 Hamba Solomoni nakema hali honhu ha kulavila nhambiko ha Mkulu Nguluwi na hali nhing'hano yeng'ha ya Isilaeli, nakenula moko ga heye kulutila kilanga,
1KI 8:23 nakalonga, “Gwa Mkulu Nguluwi, Nguluwi wa Isilaeli, haduhu Nguluwi yunji kota hegwe, kuchanya kilanga ne hasi muisi! Hegwe ndo wa kukundigwa, ulingubatilila ilagano na kulajila igano lya kwimilila kwa vitumagwa wa hegwe walinguwinza nzila za hegwe kwa nhumbula za hewo zeng'ha.
1KI 8:24 Nakweneza kulagana kwa hegwe kwa chitumagwa wa hegwe Daudi, mhaza wa heni, kwa mlomo wa hegwe nakulagana na kwa moko wa hegwe nakweneza, kota vyoiwele lehano.
1KI 8:25 Ahyo, gwa Mkulu Nguluwi, Nguluwi wa Isilaeli, ndangukulanda kahi mwenezele chitumagwa wa hegwe Daudi, mhaza wa heni, kulagana kwa hegwe koulagane loulonjile, ‘Mazuwa geng'ha kowa na mlelwa wa kikalisa kuli chigoda cha undewa cha Isilaeli, wone walelwa wa hegwe wochilolela goya hali heni kota hegwe vyouditile hali heni.’
1KI 8:26 Lelo, gwa Nguluwi wa Isilaeli, weneze ulonzi wa hegwe woulagane na chitumagwa wa hegwe Daudi, mhaza wa heni.
1KI 8:27 “Ila, gwa Nguluwi, kwangukomya kochikala muisi? Ulole, ukulu uwele kilanga hauweza kuhega kwa hegwe. Yowa ndaze kuli ng'handa ayi izenjigwe?
1KI 8:28 Ila, gwa Mkulu Nguluwi, Nguluwi wa heni, heni chitumagwa wa hegwe ndangukulanda uhulichize kulanda kwa heni lehano.
1KI 8:29 Uyamile ng'handa ayi nechilo na nemisi, honhu hawele nakulonga, ‘Itagwa lya heni lyowa aha,’ leka unyhulichize, heni chitumagwa wa hegwe hondikuya honhu aha kulanda.
1KI 8:30 Uhulichize kulanda kwa heni chitumagwa wa hegwe na kwa wanhu wa hegwe Isilaeli howolanda kuno wahinduchile honhu aha. Kulawa ako kilanga, uhulichize kulanda na louhulika, utulechele.
1KI 8:31 “Wone munhu yalonjelezwe na myage kota nakamditila gehile na koganigwa kilaha na koluta hali honhu ha kulavila nhambiko ha hegwe mgati mwa ng'handa ya hegwe kwa chiwalo cha kilaha,
1KI 8:32 lelo, dedede, uhulichize kulawa kilanga na uwaditile vitumagwa wa hegwe kota vyoulingona inoga. Utaguse hali vitumagwa wa hegwe, kuno umtagusa yula yawele na nongwa na kigala gala goyaditile mchanya mwake. Umuwikulile yula yawele na hachi kota kahela nongwa na utawize kota kana hachi.
1KI 8:33 “Mhela wanhu wa hegwe Isilaeli howolemwela hali wang'honyo wa hewo kwa chiwalo cha gehile gowaditile hali hegwe na wone wokugaluchila na kulikunda itagwa lya hegwe na kukudedeza kuli ng'handa ayi,
1KI 8:34 lelo, uhulichize ako kilanga na ugalechele gehile ga wanhu wa hegwe Isilaeli na kuwahilusa kuli isi youwapele wasekulu wa hewo.
1KI 8:35 “Mhela ulanga houleka kulagaza nhonya kwa vila wanhu wa hegwe nawadita gehile hali hegwe na wone wolanda kulutila honhu aho kulikunda itagwa lya hegwe na kugaleka gehile ga hewo kwa vila nakuwagaza,
1KI 8:36 dedede, uhulichize kulawa ako kilanga na ugalechele gehile ga wanhu wa hegwe Isilaeli. Uwalanguse nzila inojile ya kikala na uwatowele nhonya mchanya mwa isi youwapele, wanhu wa hegwe, leka iwe uhalizi wa hewo.
1KI 8:37 “Wone kuwe na lufemba muisi ama utamwa ulinguchemigwa tauni ama chipalangule ama lungwi ama nzije ama lung'hwawa ama wone wang'honyo wowazunguluta kuli muji wa hewo woneche wula ama utamwa woneche uwele woweza kuwafika,
1KI 8:38 dedede, uhulichize kulanda koneche kwa munhu yoneche ama wanhu wa hegwe Isilaeli, wone chila munhu kogazela magazo ga mnhumbula mwa heye na kokulanda na kugolola moko ga heye kulutila kuli ng'handa ayi,
1KI 8:39 lelo, uhulichize kulawa ako kilanga, haluga ha hegwe. Uwalechele na udite chila choulinguchona chinoga na umhe chila munhu kwa kiwhana na madito ga heye, kwa vila kwanguizela nhumbula ya heye na kwa vila ndo hegwe uliyeka ulinguzizela nhumbula za wanhu weng'ha,
1KI 8:40 leka wakudumbe mhela weng'ha howowa wochikala kuli isi youwapele wasekulu wa hetwe.
1KI 8:41 “Hihyo du, kwa mbuli ya mjenzi yawele hawele yumwe wa wanhu wa hegwe Isilaeli, ila nakoya kulawa isi ya kutali kwa chiwalo cha itagwa lya hegwe,
1KI 8:42 kwa vila wanhu wa isi zinji wohulika kuwala itagwa lya hegwe likulu na moko wa hegwe uwele na mong'ho, hoyokuya kulanda kulutila kuli ng'handa ayi,
1KI 8:43 lelo, uhulichize kulawa kilanga, haluga ha hegwe na udite kota vyoulingona inoga na udite lyoneche liwele mjenzi ayo kangukulanda, leka wanhu wa isi zeng'ha walizele itagwa lya hegwe na wakudumbe kota vyowalingudita wanhu wa hegwe Isilaeli leka nawo wavizele kota ng'handa ayi yondiizenjile naichemigwa kwa itagwa lya hegwe.
1KI 8:44 “Mhela wanhu wa hegwe howoluta kitowa ngondo na mng'honyo wa hewo koneche kula kouwahilika na mhela howolanda kwa Mkulu Nguluwi kulutila kuli muji uwele nauhaguligwa na kuli ng'handa iwele nandiizenga kwa chiwalo cha itagwa lya hegwe,
1KI 8:45 lelo, uhulichize kulanda kwa hewo kulawa ako kilanga, uwadite hewo wawasumye wang'honyo wa hewo.
1KI 8:46 “Wone wanhu wa hegwe wodita gehile hali hegwe, kwa vila haduhu munhu yoneche yawele halingudita gehile na hegwe kozudizwa na hewo na kuwawika kwa wang'honyo wa hewo wawele wowahilika kuli isi ya wang'honyo, kutali ama habehi
1KI 8:47 na wone mhela lowowa ako kuli isi ya chijenzi wogalula nhumbula za hewo na kulonga gehile ga hewo na kukulilila kuli isi ya wala wawele nawawasumya na kulonga, ‘Natudita gehile na kwajilila na natudita wihe,’
1KI 8:48 na wone wokugaluchila kwa nhumbula za hewo zeng'ha kuli isi ya wang'honyo wa hewo wawele nawawahola na wone wokulanda kulutila kuli isi youwapele wasekulu wa hewo na kulutila kuli muji wouuhagule na ng'handa yondiizenjile kwa chiwalo cha itagwa lya hegwe,
1KI 8:49 lelo, kulawa ako kilanga, haluga ha hegwe, uhulichize kulanda kwa hewo na kung'ung'uta kwa hewo na kuilewela hachi ya hewo.
1KI 8:50 Uwalechele wanhu wa hegwe waditile gehile hali hegwe, uwalechele nongwa za hewo zeng'ha waziditile hali hegwe na uwadite wawasumile wawonele isungu,
1KI 8:51 kwa vila ndo wanhu wa hegwe na uhalizi wa hegwe uwalavile Misili kuli lila itanulu lya kusungulumulila chuma.
1KI 8:52 “Ukulole kulanda kwa chitumagwa wa hegwe na kulanda kwa wanhu wa hegwe Isilaeli. Uwahulichize mhela woneche howokulanda,
1KI 8:53 kwa vila gwa Mkulu Nguluwi, nakuwahagula hewo kulawa kuli wanhu wa isi zeng'ha leka wawe uhalizi wa hegwe, kota vyouwikule kukolela chitumagwa wa hegwe Musa, mhela louwalavile wasekulu wa hetwe kulawa Misili.”
1KI 8:54 Solomoni loyasindile kumlanda Mkulu Nguluwi, nakenuka kulawa kuli hala honhu ha kulavila nhambiko ha Mkulu Nguluwi, honhu hoyawele yafugame, kuno yawele yagonzole moko ga heye kulutila kilanga.
1KI 8:55 Nakema na kuwatambichiza Waisilaeli weng'ha wawele wekungajize aho, yolonga kwa lizi likulu,
1KI 8:56 “Yatogoligwe Mkulu Nguluwi, yawapele kwesela wanhu wa heye Isilaeli, kota vila vyoyalagane. Haduhu ulonzi woneche upungule kuli kulagana kwa heye kweng'ha kunojile koyalagane na chitumagwa wa heye Musa.
1KI 8:57 Mkulu Nguluwi, Nguluwi wa hetwe, yawe hamwe na hetwe kota vyoyawele na wasekulu wa hetwe, yaleche kutuleka ne kutulema.
1KI 8:58 Yazidite nhumbula za hetwe zilute kwa heye, leka tujende kuli nzila za heye na kibatilila malajizo na mizilo joyawapele wasekulu wa hetwe.
1KI 8:59 Lelo, awu ulonzi wa heni uwele ndo kulanda kwa heni hali Mkulu Nguluwi, uwe habehi na Mkulu Nguluwi, Nguluwi wa hetwe, nemisi na nechilo, leka yamtambichize chitumagwa wa heye na wanhu wa heye Isilaeli, leka mbuli za hewo zilutilile goya chila zuwa,
1KI 8:60 leka wanhu wa isi zeng'ha wavizele kota Mkulu Nguluwi ndo Nguluwi na haduhu yunji.
1KI 8:61 Ila mwanguganigwa muwe wa kukundigwa hali Mkulu Nguluwi, Nguluwi wa hetwe, kwa kikala kwa kuwinza malajizo na kibatilila mizilo jake kota vyomlingudita mhela awu.”
1KI 8:62 Hamba mndewa Solomoni na Waisilaeli weng'ha wawele hamwe na heye, nawamlavila nhambiko Mkulu Nguluwi.
1KI 8:63 Naye mndewa Solomoni nakalavya nhambiko za kikala goya kwa Mkulu Nguluwi, misenga elufu makumi meli na mbili (22,000) na ming'holo na mhene lachi imwe na elufu makumi meli (120,000). Ahyo ndo mndewa Solomoni na wanhu weng'ha wa Isilaeli vyowaiwichile chiuyeng'ha ng'handa ya Mkulu Nguluwi.
1KI 8:64 Zuwa lilyo, mndewa Solomoni nakahaheliza honhu ha hagati ha lugagala luwele kumwando mwa ng'handa ya Mkulu Nguluwi na kulavya nhambiko za kulakazwa na nhambiko za nyhule na vihande vya mafuta ga nhambiko ya kikala goya, kwa vila hala honhu ha kulavila nhambiko ha shaba hawele hali Mkulu Nguluwi nahali hado lukami kuweza kuwika nhambiko azo zeng'ha.
1KI 8:65 Ahyo mndewa Solomoni nakadita mnvina mhela wula na Waisilaeli weng'ha wawele hamwe na heye. Nayali nhing'hano ng'hulu lukami, wanhu kulawa Lebo-hamati mbaka kuli kazanda ka Misili. Nawadita mnvina ayo hali Mkulu Nguluwi, Nguluwi wa hetwe kwa mazuwa saba na mazuwa saba ganji, gawele ndo mazuwa kumi na gane.
1KI 8:66 Zuwa liwinzile, Solomoni nakawalaga wanhu na kuwakundiza woche. Nawamtambichiza mndewa, hamba nawaluta chila munhu kaye kwake kuno wosangalala mnhumbula mwa hewo kwa chiwalo cha mbuli zeng'ha ziwele Mkulu Nguluwi nakadita kwa chiwalo cha chitumagwa wa heye Daudi na kwa chiwalo cha wanhu wa heye Isilaeli.
1KI 9:1 Mndewa Solomoni loyasindile kuzenga ng'handa ya Mkulu Nguluwi na ng'handa ya chiundewa na ng'handa zinji zoyaganile kuzenga,
1KI 9:2 Mkulu Nguluwi nakamlawila kahi Solomoni kota vyoyamlawile kula Gibeoni.
1KI 9:3 Mkulu Nguluwi nakamlonjela, “Nanyhulika kulanda kwa hegwe hali heni, ahyo nandiiwika iwe chiuyeng'ha ng'handa ayi youizenjile kwa kuliwika itagwa lya heni amo mazuwa gose. Meho ga heni na nhumbula ya heni vyowa amo mazuwa gose.
1KI 9:4 Wone nagwe ufugamile heni kwa nhumbula igoloche na kukundigwa kota mhaza wa hegwe Daudi vyoyaditile na kudita geng'ha gondikulajize kwa kibatilila mizilo ja heni na malajizo,
1KI 9:5 ndochidita chigoda cha hegwe cha undewa chiwe nzinzili mchanya mwa Isilaeli mazuwa gose, kota vyondimlonjele Daudi, mhaza wa hegwe, ndilonga, ‘Huweza kuwa ulihela munhu wa kikalisa kuli chigoda cha hegwe cha undewa cha Isilaeli.’
1KI 9:6 Ila houbelenhuka ama wanago howobelenhuka na kuleka kumbinza na kuleka kibatilila mizilo ja heni na malajizo ga heni na wone moluta kujikolela mijito na kujifugamila milungu,
1KI 9:7 lelo, ndowalavya wanhu wa Isilaeli, kulawa kuli isi ayi yondiwapele na ndodita hihyo du kuli ng'handa ayi yondiiwichile chiuyeng'ha kwa chiwalo cha itagwa lya heni. Isilaeli yowa chinhu cha kubezigwa hali wanhu wa isi zeng'ha.
1KI 9:8 Ng'handa ayi yobomoka na kuwa mahame. Chila yalingukola habehi kotinuka na kutigasa mutwi na wouza, ‘Lekachoni Mkulu Nguluwi nakadita ahi kuli isi ayi na kuli ng'handa ayi?’
1KI 9:9 Wanhu wokwidichila, ‘Kwa vila nawamleka Mkulu Nguluwi, Nguluwi wa hewo, yawalavile wasekulu wa hewo kulawa kuli isi ya Misili, lelo nawawa hamwe na milungu kwa kujikolela mijito na kujifugamila. Ahyo Mkulu Nguluwi nakawegalila kubagama aku hali hewo.’ ”
1KI 9:10 Kuli kuduma kwa miyaka makumi meli, miyaka jiwele Solomoni nakazenga zila ng'handa mbili, ziwele ndo ng'handa ya Mkulu Nguluwi na ng'handa ya chiundewa,
1KI 9:11 mndewa Solomoni nakamha Hilamu, mndewa wa Tilo, miji makumi meli kuli mkowa wa Galilaya, kwa vila ayo Hilamu nayali yampele Solomoni mbawo za migodi ja mielezi na mibeloshi na zahabu kota vyoyaganile.
1KI 9:12 Ila Hilamu vyoyalawile Tilo na kuluta kujona miji ajo joyapegwe na Solomoni, Hilamu nayali hajiganile miji ajo.
1KI 9:13 Lelo, Hilamu nakamuuza Solomoni, “Mng'holozangu, ndo miji jachi aji joumhele?” Acho ndo chiwalo cha kujichema miji ajo Kabuli, itagwa lilinguchemigwa kulawa mhela awo.
1KI 9:14 Hilamu nayali yamgalile mndewa Solomoni zahabu kilo elufu zine na miya imwe.
1KI 9:15 Ahi ndo mndewa Solomoni vyoyawaditile wanhu wakole mijito kwa lupichi kwa chiwalo cha kuzenga ng'handa ya Mkulu Nguluwi na ng'handa ya chiundewa na Milo na lukanzi lwa Yelusalemu na Hasoli na Megido na Geseli.
1KI 9:16 Geseli ndo muji uwele Falao, mndewa wa Misili, nayali yaubochile na kuulakaza kwa chiluli na kuwakopola Wakanaani, wenyeng'haye wake. Hamba mhinza wa Falao loyaholeche na Solomoni, mndewa wa Misili nakamha mhinza wa heye muji awo wa Geseli leka uwe ndolendole ya kuholeka kwa heye.
1KI 9:17 Lelo, Solomoni nakauzenga kahi muji wa Geseli na Beti-holoni ya hasi
1KI 9:18 na muji wa Baalati na Tamali, muji uwele kuli chiwala kuli isi ya Yuda
1KI 9:19 na miji jake jeng'ha ja ng'hano na miji kwa chiwalo cha mituka ja heye na kwa chiwalo cha falasi wa heye na choneche choyaganile kuzenga kuli Yelusalemu na Lebanoni na kuli honhu heng'ha hoyalingulongozwa na mndewa Solomoni.
1KI 9:20 Wanhu weng'ha wasigale hali Waamoli na Wahiti na Wapelisi na Wahivi na Wayebusi, wano weng'ha hawawele Waisilaeli,
1KI 9:21 wawele ndo walelwa wa hewo waponile kuli isi, wawele Waisilaeli nawalemwela kuwakopola weng'ha, Solomoni nakawadita wawe wapogozi, kota vyoiwele kuli mhela wula.
1KI 9:22 Ila hali Waisilaeli, Solomoni hamditile munhu ne yumwe yawe mpogozi. Nawali wamizi na vilongozi wa heye na wakulu wa wamizi wa heye na wakulu wa mituka ja heye ja kubulunwa na wakwina falasi wa heye.
1KI 9:23 Nakwali kahi na wang'hangala walingulolela mijito ja mndewa Solomoni. Wang'hangala miya zihano na makumi gahano nawali wowalolela wanhu walingukola mijito.
1KI 9:24 Ila mhinza wa Falao nakaluta kuli muji wa Daudi na kwinjila kuli ng'handa ya chiundewa, iwele Solomoni nayali yamzenjele. Hamba Solomoni nakazenga Milo.
1KI 9:25 Solomoni nakalavya nhambiko za kulakazwa na nhambiko za kikala goya mala zidatu kwa mwaka, mchanya mwa honhu ha kulavila nhambiko hoyahazenjile kwa chiwalo cha Mkulu Nguluwi, yofunyiza ubani hali Mkulu Nguluwi hamwe na nhambiko azo, ahyo nakasinda kuzenga ng'handa ya Mkulu Nguluwi.
1KI 9:26 Mndewa Solomoni nakagongomanya meli nyinji ako Esioni-gebeli, habehi na Eloti iwele hafungo ha Bahali ya Shamu, kuli isi ya Edomu.
1KI 9:27 Mndewa Hilamu nakawalajiza vitumagwa wa heye, walingwendesa meli wa heye kukola mijito kuli meli azo hamwe na vitumagwa wa mndewa Solomoni.
1KI 9:28 Nawenula majendo mbahali kuluta isi ya Ofili na kigala zahabu kilo elufu kumi na zine kulawa ako, ziwele nawamha mndewa Solomoni.
1KI 10:1 Mndewa wa chidala wa ako Sheba loyahuliche lutogo lwa Solomoni, kuwala itagwa lya Mkulu Nguluwi, ayo mndewa wa chidala nakaluta kwa Solomoni leka yamjeze kwa kumuuza mbuli zing'ang'ale.
1KI 10:2 Nakafika Yelusalemu yawele na wanhu wenji lukami, hamwe na ngamiya wapichile vinhu vilingunhunyhilila na zahabu nyinji na maganga ga sendi nyinji. Nakaluta kwa Solomoni, nakamlonjela kuwala mbuli zeng'ha ziwele mnhumbula mwa heye.
1KI 10:3 Solomoni nakamlonjela mbuli zeng'ha, hakuwele na mbuli yoneche iwele mndewa nakalemwela kumlonjela.
1KI 10:4 Mndewa wa chidala wa Sheba loyavizele ndaze luhala lweng'ha lwa mndewa Solomoni vyoluwele na kuyona ng'handa ya chiundewa yaizenjile
1KI 10:5 na chilyo chiwele kuli chisaga cha heye na ng'handa za wang'hangala wa heye na wakola mijito wa heye na mikanzu jawo na walingigala vyakunwa na nhambiko za heye za kulakazwa zoyazilavile kuli ng'handa ya Mkulu Nguluwi, nakabubuwala lukami.
1KI 10:6 Lelo, nakamlonjela mndewa, “Mbuli zeng'ha zonyhuliche kuli isi ya heni kuwala mbuli za hegwe zilingulutilila goya na kuwala luhala lwa hegwe ndo za kukomya.
1KI 10:7 Ila sikundile kuwala mbuli azo mbaka lombuyile na kulola. Ena, silonjelwe ne nusu yake, kuli luhala na lufufu nakupuluta yila mbuli yonyhuliche.
1KI 10:8 Nawatambichizwa wanhu wa hegwe! Nawatambichizwa vitumagwa wa hegwe walingwima hali hegwe mazuwa gose na kuhulichiza luhala lwa hegwe!
1KI 10:9 Yatogoligwe Mkulu Nguluwi, Nguluwi wa hegwe, yula yanojezwe lukami na hegwe na kukuwika kuli chigoda cha undewa cha Isilaeli. Kwa vila Mkulu Nguluwi nakawagana Waisilaeli mazuwa gose, nakakudita uwe mndewa leka udite hachi na kutanganika.”
1KI 10:10 Hamba mndewa wa chidala nakamha mndewa Solomoni zahabu kilo elufu zine na miya imwe na maganga ga sendi nyinji na chasi chikulu ng'hatu cha vinhu vilingunhunyhilila. Hailawile ne hado kuhilikwa vinhu vinji kota vila, viwele mndewa wa chidala wa Sheba vyoyahiliche kwa mndewa Solomoni.
1KI 10:11 Hihyo du kwa meli za Hilamu, nazihilika zahabu nyinji lukami na mizinga ja migodi minji lukami ja msandali na maganga ga sendi nyinji kulawa Ofili.
1KI 10:12 Mndewa Solomoni nakajiwika mizinga ja migodi ja msandali leka jiwe mizengo ja ng'handa ya Mkulu Nguluwi na kwa ng'handa ya chiundewa na kwa kugongomanyila ving'weleng'wele na migombogombo kwa chiwalo cha walingwimba. Chasi acho chinji cha mizinga ja msandali hainalawila kuhilikwa ama kwinjizwa amo kulawa zuwa lila.
1KI 10:13 Naye mndewa Solomoni nakamha mndewa wa chidala wa Sheba chila chinhu choyaganile na kulanda, hamwe na vila vinhu vyoyapegwe na mndewa Solomoni kwa kunoga kwa heye kota mndewa. Hamba, mndewa ayo wa chidala nakahiluka kuli isi ya heye yawele na vitumagwa wa heye.
1KI 10:14 Chila mwaka Solomoni nayali yobochela zahabu kilo elufu makumi meli na zidatu (23,000),
1KI 10:15 hamwe na vinhu vyoyalingubochela kulawa kwa walingugula na kuguza vinhu na wawele na lufufu na kulawa kwa wandewa weng'ha wa kolizinjilaga isanya na kulawa kwa vilongozi wa isi.
1KI 10:16 Mndewa Solomoni nakagongomanya ngawo ng'hulu miya mbili kwa zahabu ipondigwe, chila ngawo nayali na itunyo lya kilo saba.
1KI 10:17 Nakagongomanya ngawo ndodo za zahabu ipondigwe miya zidatu, chila ngawo nayali na itunyo lya kilo imwe na nusu. Hamba mndewa nakaziwika kuli ng'handa ya chiundewa ya Chihulo cha Lebanoni.
1KI 10:18 Hamba mndewa nakagongomanya chigoda chikulu cha undewa kwa mizino ja nhembo na kuchigubika kwa zahabu inojile ng'hatu.
1KI 10:19 Chigoda acho cha undewa nachali na ngazi ya magulu sita na honhu ha kumbele nahali ha mvilingo kuli honhu ha kuchanya. Kuli banzi zeng'ha za chigoda nakwali na honhu ha kuwichila moko na misimba mili jimile hafungo ha moko ago.
1KI 10:20 Nakwali kahi na jimalukolo kumi na mili ja misimba jimile, limwe kuli chila kuduma kwa chila ngazi. Nakwali haduhu chinhu kota acho chiwele nachigongomanyigwa kuli undewa woneche.
1KI 10:21 Vizombe vyeng'ha vya kunwela mndewa Solomoni, navyali vya zahabu na vinhu vyeng'ha vya kuli ng'handa ya chiundewa ya Chihulo cha Lebanoni navyali vya zahabu inojile. Hakuwele na chinhu choneche chiwele nachigongomanyigwa kwa sendi, kwa vila sendi nayali yokoneka kota yahela lutogo ng'hatu kuli mhela wa ulongozi wa Solomoni.
1KI 10:22 Mndewa Solomoni nayali na meli nyinji za kugula na kuguza kuli bahali ziwele nazali ziluta hamwe na meli za Hilamu. Mala imwe kuli chila miyaka jidatu meli azo za Talishishi nazali zihiluka kuno ziwele na zahabu na sendi na mizino ja nhembo na minyabu mikulu na midodo.
1KI 10:23 Ahyo, mndewa Solomoni nayali mkulu lukami kwa lufufu na luhala kusinda wandewa weng'ha wa isi.
1KI 10:24 Wanhu wa isi zeng'ha nawali wopala kiting'hana na mndewa Solomoni leka kuhulichiza luhala luwele Nguluwi nayali yaluwichile kumutwi mwa heye.
1KI 10:25 Chila mwaka, chila munhu yawele nayali yoluta, nayali yomhilichila ndolendole. Ndolendole azo ndo vinhu vya sendi na zahabu na mikanzu na vinhu vya kitowa ngondo na vinhu vilingunhunyhilila na falasi na migongolo kota midogowi mikulu.
1KI 10:26 Mndewa Solomoni nakakungajiza mituka ja kitowa ngondo na falasi. Nayali na mituka elufu imwe na miya zine na falasi elufu kumi na mbili, wawele nakawawika kuli muji wa mituka ja falasi na mituka jinji nayali najo ako Yelusalemu.
1KI 10:27 Mndewa Solomoni nakagadita maganga ga sendi kuli Yelusalemu gawe chinhu cha hihi hela kota maganga na mbawo, mielezi nakajidita jiwe minji kota mikuyu ja Shefela.
1KI 10:28 Falasi wa mndewa Solomoni nawegaligwa kulawa Misili na kulawa Kue. Walingugula na kuguza vinhu wa mndewa nawawagula kulawa Kue.
1KI 10:29 Mituka najiguligwa kulawa Misili kwa beyi ya sendi migwala miya sita na falasi yumwe kwa sendi migwala miya imwe na makumi gahano. Walinguguza vinhu na walingugula vinhu wa mndewa nawaguza kunze kwa wandewa weng'ha wa Wahiti na wa Waalamu.
1KI 11:1 Mndewa Solomoni nakawagana lukami wadala wa chijenzi. Mhinza wa Falao na wadala wa Wamoabu na Waamoni na Waedomu na Wasidoni na Wahiti.
1KI 11:2 Wadala awa nawalawa kuli wanhu wa isi iwele Mkulu Nguluwi nayali yawalonjele Waisilaeli, “Mleche kuhola wadala kulawa kwa hewo nawo waleche kuhola kwa hemwe, kwa vila wadala awo wogalula nhumbula za hemwe kwa milungu ja hewo.” Ila Solomoni nakalutilila kuwagana.
1KI 11:3 Mndewa Solomoni nayali na wache miya saba, weng'ha nawali wahinza wa wandewa na waha miya zidatu. Wadala awo nawamwajiliza.
1KI 11:4 Mndewa Solomoni vyoyawele yolutilila kuwa sekulu, wache wa heye nawagalula nhumbula ya heye na kulutila kuli milungu, hawele wa kukundigwa kwa Mkulu Nguluwi, Nguluwi wa heye kota vyoiwele nhumbula ya Daudi, mhaza wa heye.
1KI 11:5 Solomoni nakamfugamila Ashitaloti, mlungu wa chidala wa Wasidoni na Milikomu, yawele nayali izudizo lya Waamoni.
1KI 11:6 Ahyo, Solomoni nakadita wihe hali Mkulu Nguluwi, hamuwinzile goya Mkulu Nguluwi kota vyoyaditile Daudi, mhaza wa heye.
1KI 11:7 Mchanya mwa chidunda chiwele kolilawilaga isanya mwa Yelusalemu, Solomoni nakazenga honhu ha kufugamila kwa chiwalo cha Kemoshi, izudizo lya Wamoabu na kwa mlungu Moleki, izudizo lya Waamoni.
1KI 11:8 Nakadita hihyo kwa wache wa heye wa chijenzi weng'ha, wawele nawafunyiza ubani na kulavya nhambiko kwa milungu ja hewo.
1KI 11:9 Lelo, Mkulu Nguluwi, Nguluwi wa Isilaeli, nakamzudila Solomoni, kwa vila nayali yamlechile Mkulu Nguluwi, Nguluwi wa Isilaeli, hanga nayali yamlawile mala mbili.
1KI 11:10 Hanga nayali yamlemeze Solomoni yaleche kujiwinza milungu, ila Solomoni hauhulichize mzilo wa Mkulu Nguluwi.
1KI 11:11 Ahyo Mkulu Nguluwi nakamlonjela Solomoni, “Kwa vila ahi ndo vyouwele na nakulema kibatilila ilagano lya heni na malajizo ga heni, ndikomya ndokusukula awo undewa wa hegwe na kumha yumwe wa wawele hali ulongozi wa hegwe.
1KI 11:12 Ila, kwa chiwalo cha Daudi, mhaza wa hegwe, sidita mbuli ayi mhela wa ukomu wa hegwe, ila ndowusa undewa awo kulawa kwa mwanago.
1KI 11:13 Ila siuhola undewa weng'ha kulawa kwa heye, ila ndomha mwanago nhanzi imwe kwa chiwalo cha Daudi, chitumagwa wa heni na kwa chiwalo cha Yelusalemu, muji uwele nandiuhagula.”
1KI 11:14 Hamba Mkulu Nguluwi nakamdita Hadadi wa lukolo lwa mndewa wa Edomu, yawe mng'honyo wa Solomoni.
1KI 11:15 Aho hamwande, mhela Daudi loyawele yochitowa na Waedomu, Yoabu mkulu wa wamizi wa Daudi, nayali yalutile kuwatila Waisilaeli wakopoligwe, loyawele ako nakawakopola walume weng'ha wawele nawali ako Edomu.
1KI 11:16 Yoabu na Waisilaeli weng'ha nawekala ako kwa myezi sita mbaka lowasindile kuwadumya walume weng'ha wa ako Edomu.
1KI 11:17 Ila Hadadi, yawele nayali msongolo lukami, nakabilimila Misili na wamwe wa Waedomu wawele nawali vitumagwa wa mhaza wa heye.
1KI 11:18 Hadadi na wayage nawaluka majendo kulawa Midiani nawaluta Palani. Nawawahola walume wamwe kulawa Palani, nawaluta nawo mbaka Misili, kwa Falao mndewa wa Misili, yawele nayali yampele Hadadi ng'handa na isi na chilyo.
1KI 11:19 Falao nakanojezwa ng'hatu na Hadadi mbaka nakamha mlamugwe, yawele ndo mdodo wa mche wake, leka yaholeche na Hadadi. Mche wa Falao nayali yochemigwa Tapenesi.
1KI 11:20 Mdodo wa Tapenesi nakampondela Hadadi mwana yachemigwe Genubati. Genubati nakalolelwa na Tapenesi kuli ng'handa ya chiundewa ya Falao. Nakekala ako hamwe na wana wa Falao.
1KI 11:21 Ila Hadadi loyawele Misili na loyahuliche kota Daudi na Yoabu nawali wabagame, nakamlonjela Falao, “Ung'hundize ndute kuli isi ya heni.”
1KI 11:22 Falao nakamuuza, “Kwahela choni aha mbaka kwangugana kuhiluka kuli isi ya hegwe?” Hadadi nakamwidichila, “Haduhu, ila ung'hundize ndute.”
1KI 11:23 Nguluwi nakamwinula mng'honyo yunji wa Solomoni, Lesoni mwana wa Eliyada, yawele nayali yambilime mkulu wa heye, mndewa Hadadeseli wa Soba.
1KI 11:24 Daudi loyasindile kukopola ako Soba, Lesoni nakakungajiza na kwaluchiza chilundo cha walinguboka, heye Lesoni nakawa chilongozi wa hewo. Lelo, nawaluta Damasiko na kikala ako na kumdita Lesoni yawe mndewa wa Damasiko.
1KI 11:25 Lesoni nayali mng'honyo wa Isilaeli kuli mhela weng'ha wa ulongozi wa Solomoni, nakamtunya ng'hatu Solomoni kota Hadadi vyoyamtunyile. Lelo, Lesoni nakailongoza Alamu na nayali mng'honyo wa Isilaeli.
1KI 11:26 Yeloboamu mwana wa Nebati, Mwefulaimu wa Seleda, chitumagwa wa Solomoni, yawele mayake yafililwe na mlume wa heye, nayali yochemigwa Seluwa, nakambelenhuka mndewa.
1KI 11:27 Achi ndo chiwalo cha kubelenhuka ako. Mndewa Solomoni nayali yazenjile Milo na nayali yadinyile honhu hawele mwanzi kuli lukanzi lwa muji wa Daudi, mhaza wa heye.
1KI 11:28 Lelo, Yeloboamu nayali yazidahe ng'hatu. Solomoni vyoyamonile msongolo ayo vyoyalingukola mijito ja heye, nakamhagula yawe chilongozi wa mijito ja heye ja kukola lupichi kuli ng'handa ya Yusufu.
1KI 11:29 Zuwa limwe, Yeloboamu loyawele kuli majendo kulawa Yelusalemu, mloli Ahiya wa Shilo naketing'hana na heye mnzila, kuno Ahiya yavalile ikanzu linyale. Weng'ha awa weli nawali waliyeka kuli migunda,
1KI 11:30 baho du, Ahiya nakalivula ivalo lya heye linyale, nakalidega kuli vihande kumi na vili.
1KI 11:31 Hamba nakamlonjela Yeloboamu, “Uhole vihande kumi kwa chiwalo cha hegwe, kwa vila Mkulu Nguluwi, Nguluwi wa Isilaeli kangulonga hino, ‘Ulole, ndahabehi kuudega undewa na kuwusa mmoko mwa Solomoni na kukupa hegwe nhanzi kumi.’
1KI 11:32 Ila kwa chiwalo cha chitumagwa wa heni Daudi na muji wa Yelusalemu, muji uwele nandiuhagula hali nhanzi zeng'ha za Isilaeli, kowa na nhanzi imwe.
1KI 11:33 Ndodita ahyo kwa vila Solomoni nakandeka, nakajifugamila milungu ja chijenzi. Ashitaloti mlungu wa chidala wa Wasidoni na Kemoshi, mlungu wa Wamoabu na Milikomu, mlungu wa Waamoni. Halutile kuli nzila za heni leka kudita gagoloche hali heni ne kibatilila mizilo na malajizo ga heni kota Daudi, mhaza wa heye, vyoyaditile.
1KI 11:34 Ila siwusa undewa weng'ha kulawa mmoko mwa Solomoni, nandimdita yawe chilongozi mazuwa geng'ha ga kikala kwa heye kwa chiwalo cha Daudi, chitumagwa wa heni, yondimhagule na yawele nakabatilila malajizo na mizilo ja heni.
1KI 11:35 Ndowusa undewa kulawa mmoko mwa mwanage na kukupa hegwe nhanzi kumi.
1KI 11:36 Ndomha mwanage nhanzi imwe leka Daudi, chitumagwa wa heni yawe na lulelo lulingulongoza mazuwa gose kuli Yelusalemu, muji uwele nandiuhagula leka kuliwika itagwa lya heni.
1KI 11:37 Ila, kuwala hegwe Yeloboamu, ndokudita uwe mndewa wa Isilaeli na kolongoza kota vyoulingugana.
1KI 11:38 Wone kodita chila chinhu chondikulajiza na kuluta kuli nzila za heni na kudita gawele ga hachi hali heni kwa kibatilila mizilo ja heni na malajizo ga heni kota vyoyaditile Daudi, chitumagwa wa heni, ndowa hamwe na hegwe. Ndoudita undewa wa hegwe wime nzinzili kota vyondiuditile undewa wa Daudi na ndokupa isi ya Isilaeli.
1KI 11:39 Ndowagaza walelwa wa Daudi kwa chiwalo cha gehile ga Solomoni, ila haiwele mazuwa gose.”
1KI 11:40 Kwa chiwalo acho, Solomoni nakajeza kumkopola Yeloboamu, ila Yeloboamu nakabilimila Misili kwa Shishaki, mndewa wa Misili, nakekala ako mbaka Solomoni loyabagame.
1KI 11:41 Mbuli zinji za Solomoni na geng'ha goyaditile na luhala lwa heye, nagandichigwa kuli chitabu cha madito ga Solomoni.
1KI 11:42 Solomoni nakailongoza isi yeng'ha ya Isilaeli kwa mhela wa miyaka makumi gane, yawele Yelusalemu.
1KI 11:43 Hamba Solomoni nakabagama, nakatiligwa Yelusalemu, muji wa Daudi, mhaza wa heye. Lehoboamu, mwana wa Solomoni, nakalongoza honhu ha heye.
1KI 12:1 Lehoboamu nakaluta Shekemu kwa vila Waisilaeli weng'ha nawali walutile ako leka kumdita heye yawe mndewa.
1KI 12:2 Yeloboamu, mwana wa Nebati loyahuliche mbuli ayo, nakahiluka kulawa Misili. Yeloboamu nayali Misili kuwele nakabilimila ako leka yawe kutali na mndewa Solomoni.
1KI 12:3 Ahyo Waisilaeli nawawalajiza wanhu kumchema Yeloboamu, hamba Yeloboamu hamwe na nhing'hano yeng'ha ya Waisilaeli nawaluta kwa Lehoboamu, nawamlonjela,
1KI 12:4 “Mhaza wa hegwe nakatudwika ngwamo ng'hulu, lelo utupunguzile itunyo ali natwe tokukolela mijito.”
1KI 12:5 Lehoboamu nakawedichila, “Mlute, mhiluche kahi kwa heni mazuwa gadatu hamba.” Lelo, wanhu awo nawaluta.
1KI 12:6 Hamba mndewa Lehoboamu nakagana utanzi kwa wasekulu wawele nawali womkolela mijito Solomoni, mhaza wa heye loyawele yang'hali mkomu. Nakawauza, “Ndaze, ndiwedichile ndaze wanhu awa?”
1KI 12:7 Wasekulu awo nawamwidichila, “Wone lehano kowa chitumagwa wa wanhu wano na kuwakolela mijito na kuwedichila goya, wowa vitumagwa wa hegwe mazuwa gose.”
1KI 12:8 Ila Lehoboamu nakagaleka majesa goyapegwe na wasekulu, nakaluta kuwauza wasongolo walingiwhana na heye wawele nawali womkolela mijito.
1KI 12:9 Nakawauza, “Mwangijesa ndaze? Tuwedichile ndaze wanhu wano walingundonjela, ‘Utupunguzile itunyo ali natwe tokukolela mijito.’ ”
1KI 12:10 Wasongolo awo nawamwidichila, “Walonjele ahi wanhu wano wawele nawakulonjela, ‘Mhaza wa hegwe nakatudwika ngwamo ng'hulu, lelo utupunguzile itunyo ali,’ kota, ‘Chidole cha heni chidodo chineneha kusinda chuno cha mhaza wa heni.
1KI 12:11 Mhaza wa heni nakawadwika hemwe ngwamo ng'hulu, ila heni ndowadwika ng'hulu lukami. Mhaza wa heni nakawazapa hemwe kwa ng'weso za ngozi, ila heni ndowazapa kwa nyinje.’ ”
1KI 12:12 Ahyo, zuwa lya kadatu Yeloboamu hamwe na wanhu weng'ha nawahiluka kwa Lehoboamu kota mndewa vyoyawalonjele.
1KI 12:13 Mndewa nakawedichila wanhu awo kwa lizi lya kung'ang'ala, nakagalema majesa goyapegwe na wasekulu,
1KI 12:14 nakawinza majesa ga wasongolo walingiwhana na heye na kulonga, “Mhaza wa heni nakawadwika hemwe ngwamo ng'hulu, ila heni ndowadwika ng'hulu lukami. Mhaza wa heni nakawazapa hemwe kwa ng'weso za ngozi, ila heni ndowazapa kwa nyinje.”
1KI 12:15 Ahyo, mndewa hawahulichize wala wanhu, kwa vila mbuli ayi nayambuzwa na Mkulu Nguluwi, leka kweneza uloli uwele Mkulu Nguluwi nayali yamlonjele Yeloboamu, mwana wa Nebati, kukolela kwa Ahiya, Mshiloni.
1KI 12:16 Ila wanhu weng'ha wa nhanzi za kasikazini mwa Isilaeli vyowawene kota mndewa nakalema kuwahulichiza, nawamwidichila, “Daudi hawele myetu. Twahela uhalizi kwa mwana wa Yese. Kuli mihema ja hegwe, gwa Isilaeli! Mhiluche kaye, hemwe wanhu wa Isilaeli. Uyamile ng'handa ya hegwe, gwa Daudi!” Ahyo, wala wanhu nawahiluka kuli mihema ja hewo.
1KI 12:17 Ila Lehoboamu nakalutilila kuwalongoza wanhu wa Isilaeli wawele nawali wochikala kuli miji ja Yuda.
1KI 12:18 Mndewa Lehoboamu nakamlajiza Adolamu leka yawadite wanhu wakole mijito kwa lupichi, ila Waisilaeli weng'ha nawamtowa kwa maganga mbaka nakabagama. Ila mndewa Lehoboamu nakakwina mutuka wa heye himahima na kubilimila Yelusalemu.
1KI 12:19 Ahyo wanhu weng'ha wa nhanzi za kasikazini mwa Isilaeli nawalibelenhuka ivyazi lya Daudi kulawa mhela wula.
1KI 12:20 Waisilaeli weng'ha vyowahuliche kota Yeloboamu nayali yahiluche kulawila Misili, nawawalajiza wanhu kumchema Yeloboamu kuli nhing'hano na kumdita yawe mndewa wa Isilaeli yeng'ha. Nhanzi ya Yuda iliyeka ndo iponile na kulihulichiza ivyazi lya Daudi.
1KI 12:21 Lehoboamu loyafichile Yelusalemu, nakawakungajiza wamizi wawele na mong'ho lachi imwe na elufu makumi nane (180,000) wa nhanzi ya Yuda na nhanzi ya Benjamini, leka wetowe ngondo na mndewa wa Isilaeli na kuuhilula undewa wa heye yuye Lehoboamu, mwana wa Solomoni.
1KI 12:22 Ila ulonzi wa Nguluwi naumuyila mloli Shemaya.
1KI 12:23 “Mlonjele Lehoboamu mwana wa Solomoni, mndewa wa Yuda na wanhu weng'ha wa nhanzi ya Yuda na Benjamini na wanhu wanji weng'ha,
1KI 12:24 kota heni Mkulu Nguluwi ndangulonga hino, ‘Mleche kuluta kitowa na wang'holozenu, wanhu wa Isilaeli. Mhiluche chila munhu na kaye kwa heye, kwa vila ago galawile ndo vyonganile heni.’ ” Lelo, nawawinza ulonzi wa Mkulu Nguluwi, nawahiluka kaye kota Mkulu Nguluwi vyoyalajize.
1KI 12:25 Hamba mndewa Yeloboamu nakauzenjela ngome muji wa Shekemu kuli chidunda cha Efulaimu, nakekala ako. Hamba nakaluta kuuzenga muji wa Penueli.
1KI 12:26 Yeloboamu nakaluka kijesa mnhumbula mwa heye, “Lelo undewa woweza kuhiluka kuli ivyazi lya mndewa Daudi.
1KI 12:27 Wone wanhu wano woluta kulavya nhambiko kuli ng'handa ya Mkulu Nguluwi ako Yelusalemu, nhumbula za hewo zomhiluchila mkulu wa hewo Lehoboamu, mndewa wa Yuda, hamba wong'hopola.”
1KI 12:28 Loyapatile utanzi wa majesa kulawa kwa wanji, mndewa nakagongomanya milogota mili ja zahabu na kuwalonjela wanhu, “Hemwe wanhu wa Isilaeli, aji ndo milungu ja hemwe jiwalavile kulawa kuli isi ya Misili. Haduhu chinhu chilinguwambuza hemwe kuluta Yelusalemu kutambika.”
1KI 12:29 Nakawika limalukolo limwe lya ilogota lya zahabu kuli muji wa Beteli na lya keli kuli muji wa Dani.
1KI 12:30 Mbuli ayo nayali gehile, kwa vila wanhu nawali woluta mbaka Beteli na Dani kujifugamila ajo jimalukolo jiwichigwe ako.
1KI 12:31 Yeloboamu nakazenga honhu ha kufugamila na kuwahagula watambika kulawa kwa wanhu wa nhanzi zeng'ha, ila hawawele kulawa kwa Walawi.
1KI 12:32 Naye Yeloboamu nakadita mnvina kuli zuwa lya kumi na zihano lya mwezi wa nane, mnvina ilingiwhana na mnvina ilinguditigwa ako Yuda, nakalavya nhambiko kuli honhu ha kulavila nhambiko. Nakadita ahyo ako Beteli yolavya nhambiko kuli limalukolo lya ilogota lyoyaligongomanyile. Nakawawika watambika ako Beteli na kuli honhu ha kufugamila hoyagongomanye.
1KI 12:33 Kuli zuwa lya kumi na zihano lya mwezi wa nane, mwezi uwele nakauhagula yuye, nakalavya nhambiko mchanya mwa honhu hawele hagongomanyigwe na heye yuye ako Beteli. Ahyo, nakadita mnvina kwa chiwalo cha Waisilaeli na kuluta mchanya mwa honhu ha kulavila nhambiko leka kulavya nhambiko.
1KI 13:1 Kwa ulonzi wa Mkulu Nguluwi, mloli nakafika Beteli kulawa Yuda, mhela Yeloboamu loyawele yemile hafungo ha honhu ha kulavila nhambiko leka yalavye nhambiko.
1KI 13:2 Munhu ayo nakahapanjila kwa lizi likulu hala honhu ha kulavila nhambiko yolonga, “Gwa honhu ha kulavila nhambiko, honhu ha kulavila nhambiko! Ulonzi wa Mkulu Nguluwi wangulonga hino, ‘Mwana yalinguchemigwa Yosiya kopondigwa kuli ng'handa ya Daudi. Mchanya mwa hegwe kowalavya watambika wa honhu ha kufugamila, wala wawele wangulavya nhambiko sambi na mizeje ja wanhu jolakazwa mchanya mwako.’ ”
1KI 13:3 Zuwa lilyo, mloli nakalavya ulajilo yolonga, “Awu ndo ulajilo woyalonjile Mkulu Nguluwi, ‘Honhu aha ha kulavila nhambiko hobomoka na mivu jiwele mchanya mwake jobohoka.’ ”
1KI 13:4 Mndewa Yeloboamu loyahuliche ulonzi awo wa mloli kuwala honhu ha kulavila nhambiko ako Beteli, nakagolola moko mchanya mwa honhu ha kulavila nhambiko na kulonga, “Mmibate ayo.” Ila moko woyaugolole kumlutila yula munhu nauswina na kupona bahala, hawezile kuubina.
1KI 13:5 Honhu ha kulavila nhambiko nahabomoka na mivu najibohoka kota wula ulajilo yaulavile ayo mloli kwa ulonzi wa Mkulu Nguluwi.
1KI 13:6 Hamba mndewa Yeloboamu nakamlonjela mloli, “Dedede, mdedeze Mkulu Nguluwi, Nguluwi wa hegwe, leka moko wa heni upone.” Lelo mloli nakalanda kwa Mkulu Nguluwi kwa chiwalo cha mndewa na moko wa heye naupona na nawali kota vyouwele hamwande.
1KI 13:7 Mndewa nakamlonjela yula mloli, “Uye kaye kwa heni ulye chilyo, nani ndokupa ndolendole.”
1KI 13:8 Ila yula mloli nakamwidichila, “Hebu, siweza kuluta hamwe na hegwe ne kulya ibumunda ama kunwa mazi, hanga komha heni nusu ya lufufu lwa hegwe,
1KI 13:9 kwa vila nandajizwa kwa ulonzi wa Mkulu Nguluwi, ‘Uleche kulya ibumunda ne kunwa mazi ne kuhiluka kwa nzila yowuyile.’ ”
1KI 13:10 Lelo, yula munhu nakaluta, hahiluchile kukola nzila yila yoyuyile Beteli.
1KI 13:11 Mhela awo, nakwali na mloli yumwenga sekulu, yawele nayali yochikala ako Beteli, yawele wanage nawaluta kwa heye na kumlonjela mbuli zeng'ha zoyaditile yula mloli wa mwaluko zuwa lila ako Beteli na nawamlonjela wula ulonzi woyamlonjele mndewa Yeloboamu.
1KI 13:12 Mhaza wa hewo nakawauza, “Nakalutila nzila yachi?” Nawo nawamlajila nzila yoyalutile ayo mloli kulawa Yuda.
1KI 13:13 Naye nakawalonjela wanage, “Mmbichile goya alyo idogowi.” Wanage nawamuwichila goya idogowi na sekulu nakakwina mchanya mwa alyo idogowi
1KI 13:14 na kumuwinza yula mloli. Nakamfika yekalise hasi ha mwaloni, nakamuuza, “Ndaze, hegwe ndo mloli kulawa Yuda?” Naye nakamwidichila “Ena, ndo heni.”
1KI 13:15 Ayo sekulu nakamlonjela, “Tulute kaye kwa heni, ukalye chilyo.”
1KI 13:16 Ila yula mloli kulawa Yuda nakamlonjela, “Siweza kuhiluka na kuluta na hegwe ne kulya ibumunda ne kunwa mazi hamwe na hegwe honhu aha,
1KI 13:17 kwa vila ulonzi wa Mkulu Nguluwi naundonjela, ‘Uleche kulya ibumunda ne kunwa mazi ako ne kuhiluka kwa nzila yiyo yowuyile.’ ”
1KI 13:18 Ayo mloli sekulu wa Beteli nakamlonjela, “Nani kahi nda mloli kota hegwe. Mhilisi nakalongasa na heni kwa ulonzi wa Mkulu Nguluwi, yolonga, ‘Mhiluse yalute kaye kwa hegwe, leka yalye chilyo na kunwa mazi.’ ” Ila ayo mloli sekulu nayali yomhada.
1KI 13:19 Ahyo, mloli kulawa Yuda nakahiluka hamwe na heye, nakalya chilyo na kunwa mazi kwa ayo mloli sekulu.
1KI 13:20 Lowawele mchisaga, ulonzi wa Mkulu Nguluwi naumuyila ayo mloli sekulu yawele nakamhilusa yula mloli kulawa Yuda,
1KI 13:21 nakamlonjela kwa lizi likulu yula mloli kulawa Yuda, “Mkulu Nguluwi kangulonga hino, ‘Nakuubelenhuka ulonzi wa Mkulu Nguluwi na huwinzile mzilo woyakupele Mkulu Nguluwi, Nguluwi wa hegwe,
1KI 13:22 ila nakuhiluka hano, nakulya chilyo na kunwa mazi honhu hano hawele nakulonjelwa uleche kulya ne kunwa. Ahyo, mtufi wa hegwe hautiligwa kuli vilaga vya wasekulu wa hegwe.’ ”
1KI 13:23 Mhela mloli kulawa Yuda loyasindile kulya na kunwa, yula mloli kulawa Beteli yawele nakamhilula, nakamuwichila goya idogowi lya heye.
1KI 13:24 Loyawele yoluta naketing'hana na isimba mnzila. Alyo isimba nalimkopola na mtufi wa heye nawali utozigwe mnzila, kuno idogowi lya heye na alyo isimba najali jimile habehi na mtufi wa heye.
1KI 13:25 Wanhu wamwenga vyowawele wokola mnzila nawawona mtufi aho mnzila kuno isimba liwele limile hafungo ha mtufi awo, nawaluta kuwalonjela wanhu kuli muji uwele yula mloli sekulu nayali yochikala.
1KI 13:26 Yula mloli kulawa Beteli yawele nakambochela haluga ha heye, loyahuliche mbuli ayi nakalonga, “Ayo ndo yula mloli kulawa Yuda, yawele nakaubelenhuka ulonzi wa Mkulu Nguluwi. Mkulu Nguluwi nakamlavya kwa isimba, liwele nalimdadula na kumkopola kota ulonzi wa Mkulu Nguluwi vyoumlonjele.”
1KI 13:27 Yula mloli nakawalonjela wanage, “Mmbichile goya idogowi.” Nawo nawadita ahyo.
1KI 13:28 Hamba, ayo mloli sekulu nakaluta na kuufika mtufi wa mloli kulawa Yuda uwele mnzila, kuno idogowi na isimba jimile hafungo ha mtufi wa heye. Alyo isimba halidile mtufi wa yula munhu ne kulidadula lila idogowi.
1KI 13:29 Lelo, ayo mloli sekulu nakauhola wula mtufi wa mloli kulawa Yuda, nakauwika mchanya mwa idogowi lya heye na kuuhilusa kuli muji wa Beteli, leka yaulombochezele na kuutila.
1KI 13:30 Hamba nakauwika wula mtufi kuli chilaga cha heye, ayo mloli sekulu. Heye hamwe na wanage nawalombocheza kwa kubagama kwa heye kwa kulonga, “Gwa! Mng'holozangu.”
1KI 13:31 Lowasindile kumtila, mloli ayo nakawalonjela wanage, “Hondibagama, mnhile mumu kuli chilaga choyatiligwe ayu mloli kulawa Yuda, mjiwiche mizeje ja heni hafungo ha mizeje ja heye.
1KI 13:32 Kwa vila mbuli zoyalajizwe kuzidamla kwa ulonzi wa Mkulu Nguluwi kuwala honhu ha kulavila nhambiko ako Beteli na kuwala honhu ha kulavila nhambiko heng'ha kuli honhu ha kufugamila kuli miji ja Samaliya, ndikomya zolawila.”
1KI 13:33 Hanga mbuli azi nazilawila, ila Yeloboamu hagalule nzila za heye zihile. Nakawawika kahi watambika kwa chiwalo cha honhu ha kufugamila, kulawa wanhu wa chila nhanzi. Yoneche yaganile kuwa mtambika, nayali yomuwika yawe mtambika wa honhu ha kufugamila.
1KI 13:34 Mbuli ayi nayali gehile ga ivyazi lya Yeloboamu, gawele nagawambuzila kudumigwa kwa heye mbaka kwajilila muisi.
1KI 14:1 Mhela awo, Abiya mwana wa mndewa Yeloboamu, nayali mtamwa.
1KI 14:2 Yeloboamu nakamlonjela mche wake, “Ulute kidita ndo munhu yunji leka wanhu waleche kuvizela kota hegwe kwa mche wa Yeloboamu. Hamba ulute kula Shilo koyalingikala mloli Ahiya, yawele nakandonjela kota ndowa mndewa wa Isilaeli.
1KI 14:3 Mhilichile mibumunda kumi na maandazi mado na hanombwa ibuli limwe. Kokulonjela gawele golawila kwa mwana wa hetwe.”
1KI 14:4 Lelo mche wa Yeloboamu nakadita kota vyoyalonjile mlume wa heye, nakaluta kuli ng'handa ya Ahiya ako Shilo. Mhela awo Ahiya nakalemwela kona goya kwa chiwalo cha usekulu wa heye.
1KI 14:5 Mkulu Nguluwi nayali yamlonjele Ahiya, “Mche wa Yeloboamu kanguya kukuuza kuwala mwanage, kwa vila ndo mtamwa, nani ndokulajila ndaze vyoulinguganigwa kumwidichila.” Mche wa Yeloboamu vyoyafichile, nakedita heye ka munhu yunji.
1KI 14:6 Lelo Ahiya loyahuliche munhu yokwinjila kuli lwizi, nakalonga, “Winjile mng'handa mche wa Yeloboamu. Lekachoni kwangidita kota ndo munhu yunji? Nandajizwa kukupa mbuli yihile.
1KI 14:7 Ulute ukamlonjele Yeloboamu kota Mkulu Nguluwi, Nguluwi wa Isilaeli, kangulonga hino, ‘Nandikuhagula hali wanhu na kukudita uwe chilongozi wa wanhu wa heni, Isilaeli.
1KI 14:8 Nandiwusa undewa kulawa kuli ivyazi lya Daudi na kukupa hegwe, ila hauwele kota chitumagwa wa heni Daudi, yawele nakebatilila malajizo ga heni na kumbinza kwa nhumbula ya heye yeng'ha, yodita gagoloche hali heni.
1KI 14:9 Nakudita wihe ng'hatu kusinda wala wakulongole. Nakigongomanyila milungu jinji na jimalukolo ja kuponda, hamba nakundeka.
1KI 14:10 Kwa chiwalo acho, ndoligalila magazo makulu ivyazi lya Yeloboamu. Ndowakopola walume weng'ha wa ivyazi lya heye kuli Isilaeli, wone kowa mpogozi ama munhu yelejehe. Ndoilakaza ng'handa ya Yeloboamu mbaka ilakale ng'hatu na hawe haduhu chinhu chisigale.
1KI 14:11 Mibwa jowalya wala wawele wa ng'handa ya Yeloboamu wawele wobagama mgati mwa muji na wala wawele wobagama kuli migunda, videje vyowalya. Heni Mkulu Nguluwi nandonga.’ ”
1KI 14:12 Ahiya nakamlonjela mche wa Yeloboamu, “Lelo winuche, ulute kaye. Houfika kuli muji wa hegwe, mwanago kobagama.
1KI 14:13 Wanhu weng'ha wa Isilaeli wowasilila matanga na kumtila. Ila ndo heye yaliyeka wa ivyazi lya Yeloboamu yawele kotiligwa, kwa vila ndo heye yaliyeka wa ivyazi lya Yeloboamu, yawele Mkulu Nguluwi, Nguluwi wa Isilaeli nakona chinhu chinojile kwa heye.
1KI 14:14 Mkulu Nguluwi lehano komuwika mndewa yunji kuli Isilaeli, yawele kolidumya ivyazi lya Yeloboamu.
1KI 14:15 Ena, Mkulu Nguluwi kowatowa wanhu wa Isilaeli nawo wotigasika kota midete vyojilingutigasika kuli mazi. Kowosa Waisilaeli kulawa kuli isi ayi inojile yawapele wasekulu wa hewo na kuwasambalula kumwambu mwa lwanda lwa Eyufulate, kwa vila nawamzudiza Mkulu Nguluwi kwa kigongomanyila jimalukolo ja Ashela, mlungu wa chidala.
1KI 14:16 Mkulu Nguluwi kowaleka Waisilaeli kwa chiwalo cha gehile goyaditile Yeloboamu na kuwambuza wanhu wa Isilaeli wadite gehile.”
1KI 14:17 Hamba mche wa Yeloboamu nakoka, nakaluta Tilisa. Loyafichile hali lwizi, mwana nakabagama.
1KI 14:18 Wanhu weng'ha wa Isilaeli nawamtila na kuwasiliza matanga kota ulonzi wa Mkulu Nguluwi vyoulonjile kwa kukolela mloli Ahiya, chitumagwa wa heye.
1KI 14:19 Madito ganji ga mndewa Yeloboamu, gawele ndo ngondo za heye na ndaze vyoyalongoze, navyandichigwa kuli chitabu cha kukumbuchila kwa wandewa wa Isilaeli.
1KI 14:20 Yeloboamu nakalongoza kwa mhela wa miyaka makumi meli na mili, hamba nakabagama. Nadabu, mwanage, nakalongoza honhu hake.
1KI 14:21 Lehoboamu, mwana wa Solomoni, nayali mndewa wa Yuda. Nakaluka kulongoza loyawele na miyaka makumi gane na umwe, naye nakalongoza kwa miyaka kumi na saba ako Yelusalemu, muji uwele Mkulu Nguluwi nayali yauhagule kulawa nhanzi zeng'ha za Isilaeli leka yaliwiche itagwa lya heye amo. Mayake nayali yochemigwa Naama, yawele nayali Mwamoni.
1KI 14:22 Wanhu wa Yuda kahi nawadita wihe hali Mkulu Nguluwi. Kwa gehile gowaditile nawambuza ng'halazi iwele na fihi ng'hatu kusinda vyowaditile wasekulu wa hewo.
1KI 14:23 Nawezenjela honhu ha kufugamila na milingo ja kufugamila na mizengo ja Ashela mchanya mwa chila chidunda na kuli chila igodi liwele na mahamba madodi.
1KI 14:24 Kahi nawali baho walume wang'hondwa wa honhu ha kujifugamila jimalukolo kuli isi, wanhu wa Yuda nawenjila kuli kudita mbuli za kuzudiza za wanhu wa isi wawele Mkulu Nguluwi nayali yawawinjile hali Waisilaeli.
1KI 14:25 Kuli mwaka wa kahano wa ulongozi wa mndewa Lehoboamu, Shishaki mndewa wa Misili, nakautowa muji wa Yelusalemu
1KI 14:26 na kuhola ng'hano zeng'ha za ng'handa ya Mkulu Nguluwi na ng'hano za ng'handa ya chiundewa. Nakahola chila chinhu, hamwe na zila ngawo zeng'ha za zahabu ziwele mndewa Solomoni nayali yazigongomanye.
1KI 14:27 Mndewa Lehoboamu nakagongomanya ngawo za shaba honhu ha zila za zahabu na kuwapa wakulu wa wamizi walingwamila kuli lwizi lwa ng'handa ya chiundewa.
1KI 14:28 Chila mhela mndewa loyawele yoluta kuli ng'handa ya Mkulu Nguluwi, wamizi nawali wohola ngawo azo, hamba nawali wozihilula kuli chihengo cha kwamilila.
1KI 14:29 Madito ganji ga mndewa Lehoboamu na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
1KI 14:30 Nakwali na ngondo ilingulutilila hali Lehoboamu na Yeloboamu.
1KI 14:31 Hamba Lehoboamu nakabagama na kutiligwa kuli vilaga vya wasekulu wa heye, kuli muji wa Daudi. Mayake nayali yochemigwa Naama, Mwamoni. Abiyamu, mwanage Lehoboamu, nakalongoza honhu ha heye.
1KI 15:1 Abiyamu nakaluka kulongoza ako Yuda kuli mwaka wa kumi na nane wa ulongozi wa mndewa Yeloboamu wa Isilaeli, mwana wa Nebati.
1KI 15:2 Naye nakalongoza ako Yelusalemu kwa miyaka jidatu. Mayake nayali yochemigwa Maaka, mhinza wa Abishalomu.
1KI 15:3 Abiyamu nakadita gehile kota gagala goyaditile mhaza wa heye. Hawele kota Daudi, yawele nayali na nhumbula ya kukundigwa hali Mkulu Nguluwi, Nguluwi wa heye.
1KI 15:4 Ila, kwa chiwalo cha Daudi, Mkulu Nguluwi, Nguluwi wa heye, nakamha Abiyamu mwana msongolo wa kulongoza kuli Yelusalemu, kwa kuidita Yelusalemu iwe nzinzili.
1KI 15:5 Kwa vila Daudi nakadita ganojile hali Mkulu Nguluwi na halemwele kibatilila malajizo geng'ha ga Mkulu Nguluwi mazuwa geng'ha ga ukomu wa heye, ila kwa mbuli ya Uliya, Mhiti hela.
1KI 15:6 Nakwali na ngondo hali Lehoboamu na Yeloboamu kuli mhela weng'ha wa ukomu wa Abiyamu.
1KI 15:7 Madito ganji ga Abiyamu na geng'ha goyaditile, nagandichigwa kuli chitabu cha kukumbuchila cha wandewa wa Yuda. Nakwali na ngondo hali Abiyamu na Yeloboamu.
1KI 15:8 Hamba Abiyamu nakabagama na kutiligwa kuli muji wa Daudi. Asa mwanage, nakalongoza honhu ha heye.
1KI 15:9 Kuli mwaka wa makumi meli wa ulongozi Yeloboamu, mndewa wa Isilaeli, Asa nakawa mndewa wa Yuda.
1KI 15:10 Nakalongoza kuli Yelusalemu kwa mhela wa miyaka makumi gane na umwe. Mayake nayali Maaka, mhinza wa Abishalomu.
1KI 15:11 Mndewa Asa nakadita ganojile hali Mkulu Nguluwi kota vyoyaditile Daudi, sekulu wa heye.
1KI 15:12 Nakawawinga kuli isi wala walume wang'hondwa wawele hala hali honhu ha kufugamila, nakosa jimalukolo jeng'ha jowajigongomanye wasekulu wa heye.
1KI 15:13 Nakamusa Maaka, mayake, kuli ulongozi wa heye kota mamo mndewa mdala, kwa vila nakagongomanya limalukolo lya kuzudiza kwa Ashela, mlungu wa chidala. Asa nakajibenanga na kujilakaza ajo jimalukolo kuli ibindi lya Kidiloni.
1KI 15:14 Hanga nayali hahosile honhu ha kufugamila, nhumbula ya Asa nayali yiwichile ng'hatu kwa Mkulu Nguluwi kuli kikala kwa heye kweng'ha.
1KI 15:15 Nakahilusa mgati mwa ng'handa ya Mkulu Nguluwi sendi na zahabu na vila vinhu viwele heye na mhaza wa heye nawali waviwichile chiuyeng'ha.
1KI 15:16 Nakwali na ngondo hali Asa na Baasha, mndewa wa Isilaeli, kuli mazuwa geng'ha ga ulongozi wa hewo.
1KI 15:17 Baasha, mndewa wa Isilaeli, nakaitowa isi ya Yuda na kwaluka kuzenga ngome kuli muji wa Lama, leka yamlemeze munhu yoneche yaleche kulawa ne kwinjila kuli isi ya Asa, mndewa wa Yuda.
1KI 15:18 Hamba, mndewa Asa nakahola sendi na zahabu yeng'ha isigale kuli ng'hano za ng'handa ya Mkulu Nguluwi na kuli ng'hano za ng'handa ya mndewa, nakawapa vitumagwa wa heye na kuwalajiza walute kwa Beni-hadadi, mwana wa Tabulimoni, mzukulu wa Hesioni, mndewa wa Alamu, yawele nayali yochikala ako Damasiko, nakalonga,
1KI 15:19 “Tuwiche ilagano hali heni na hegwe, kota vyowaditile mhaza wa heni na mhaza wa hegwe. Ulole, nandikugalila ndolendole ya sendi na zahabu, lelo ulute ukabene ilagano lya hegwe na Baasha, mndewa wa Isilaeli, leka yaleche kitowa na heni.”
1KI 15:20 Mndewa Beni-hadadi nakakunda kuwinza ulonzi wa mndewa Asa, nakalajiza wakulu wa wamizi wa heye na wamizi wa heye kuluta kujitowa miji ja Isilaeli. Nawo nawajihola miji ja Iyoni na Dani na Abeli-beti-maaka na Kineleti yeng'ha, hamwe na isi yeng'ha ya Nafutali.
1KI 15:21 Mndewa Baasha loyahuliche mbuli ayo, nakaleka kuuzenga muji wa Lama na kuluta kikala Tilisa.
1KI 15:22 Hamba mndewa Asa nakalajiza kwa Wayuda weng'ha ne kumbagula ne yumwe, wahole maganga na mbawo kulawa Lama, vinhu viwele Baasha nayali yotumiya ako kwa kuzenjela. Mndewa Asa nakatumiya mbawo azo kuzenjela Misipa na Geba iwele ako Benjamini.
1KI 15:23 Madito ganji geng'ha ga mndewa Asa na ludali lwa heye lweng'ha na geng'ha goyaditile na miji jeng'ha joyajizenjile, nagandichigwa kuli chitabu cha kukumbuchila kwa wandewa wa Yuda. Ila nakafichigwa na utamwa kuli magulu ga heye kuli mhela wa usekulu wa heye.
1KI 15:24 Hamba Asa nakabagama, nakatiligwa kuli vilaga vya chiundewa, kuli muji wa Daudi, sekulu wa heye. Yehoshafati mwanage, nakalongoza honhu ha heye.
1KI 15:25 Nadabu, mwana wa Yeloboamu, nakawa mndewa wa Isilaeli kuli mwaka wa keli wa ulongozi wa Asa, mndewa wa Yuda. Naye nakalongoza Isilaeli kwa miyaka mili.
1KI 15:26 Kuli ulongozi wa heye, nakadita gehile hali Mkulu Nguluwi, yowinza nzila za mhaza wa heye, yawele nakawambuza wanhu wa Isilaeli kudita gehile.
1KI 15:27 Baasha, mwana wa Ahiya, kulawa kuli ivyazi lya Isakali, nayali na majesa ga kumditila vibi Nadabu. Mhela uwele Nadabu na Waisilaeli weng'ha lowawele wauzungulute muji wa Gibetoni wa Wafilisti, Baasha nakamvaba Nadabu na kumkopola.
1KI 15:28 Baasha nakamkopola Nadabu kuli mwaka wa kadatu wa ulongozi wa Asa, mndewa wa Yuda. Hamba heye Baasha nakawa mndewa honhu ha heye.
1KI 15:29 Baasha loyaluche kulongoza, nakawakopola wanhu weng'ha wa ivyazi lya Yeloboamu, hamlechile munhu ne yumwe wa lukolo lwa Yeloboamu yawele mkomu. Ahyo nakawadumya weng'ha kwa kiwhana na ulonzi wa Mkulu Nguluwi wougaligwe kukolela chitumagwa wa heye Ahiya, Mshiloni,
1KI 15:30 kwa chiwalo cha gehile goyaditile Yeloboamu na kuwambuza Waisilaeli kudita gehile na kwa vila nakamzudiza Mkulu Nguluwi, Nguluwi wa Isilaeli.
1KI 15:31 Madito ganji ga Nadabu, nagandichigwa kuli chitabu cha kukumbuchila kwa wandewa wa Isilaeli.
1KI 15:32 Nakwali na ngondo hali Asa na Baasha, mndewa wa Isilaeli, kuli mazuwa geng'ha ga ulongozi wa hewo.
1KI 15:33 Kuli mwaka wa kadatu wa ulongozi wa Asa, mndewa wa Yuda, Baasha mwana wa Ahiya, nakawa mndewa wa Isilaeli yeng'ha ako Tilisa. Naye nakalongoza kwa mhela wa miyaka makumi meli na jine.
1KI 15:34 Baasha nakadita gehile hali Mkulu Nguluwi, yowinza nzila za Yeloboamu na gehile ga heye, yawele nakawambuza Waisilaeli kudita gehile ago.
1KI 16:1 Aho ndo ulonzi wa Mkulu Nguluwi naumuyila Yehu, mwana wa Hanani, kumuwala Baasha.
1KI 16:2 “Nandikwinula hegwe Baasha kulawa kuli nhimbwisi na kukudita uwe chilongozi wa wanhu wa heni Isilaeli, ila nakuwinza nzila za Yeloboamu na kuwambuza wanhu wa heni Isilaeli kudita gehile na kunzudiza kwa gehile ga hewo.
1KI 16:3 Lelo, ndokudumya hegwe Baasha hamwe na ivyazi lya hegwe na ndoliditila ivyazi lya hegwe kota vyondiliditile ivyazi lya Yeloboamu na Nebati, mwanage.
1KI 16:4 Mibwa jowalya wanhu wa hegwe wawele wobagama kuli muji na videje vyowa na chilyo kulawa kwa wala wawele wobagama kuli migunda.”
1KI 16:5 Madito ganji ga Baasha na ludali lwa heye, nagandichigwa kuli chitabu cha kukumbuchila kwa wandewa wa Isilaeli.
1KI 16:6 Hamba Baasha nakabagama, nakatiligwa ako Tilisa. Ela, mwanage nakalongoza honhu hake.
1KI 16:7 Mzidi wa ago, ulonzi wa Mkulu Nguluwi nawuya kukolela mloli Yehu, kwa Baasha hamwe na ivyazi lya heye, kwa chiwalo cha wihe weng'ha woyauditile hali Mkulu Nguluwi. Baasha nakamzudiza Mkulu Nguluwi kwa kudita kota Yeloboamu na kahi kwa kulidumya ivyazi lya Yeloboamu.
1KI 16:8 Kuli mwaka wa makumi meli na sita wa ulongozi wa Asa mndewa wa Yuda, Ela mwana wa Baasha, nakawa mndewa wa Isilaeli. Naye nakalongoza ako Tilisa kwa miyaka mili.
1KI 16:9 Simuli, yumwe wa vitumagwa wa heye, yawele nayali chilongozi wa nusu ya mituka ja heye ja ngondo, nayali yochijesa kumditila vibi Ela. Mhela awo Ela nayali Tilisa yogala kuli ng'handa ya Alisa, munhu yawele nayali mkulu wa ng'handa ya chiundewa ako Tilisa,
1KI 16:10 lelo Simuli nakenjila mgati, nakamtowa na kumkopola. Hamba nakalongoza honhu ha heye. Nawali mwaka wa makumi meli na saba wa ulongozi wa Asa, mndewa wa Yuda.
1KI 16:11 Simuli loyaluche kulongoza, nakawakopola wanhu weng'ha wa ivyazi lya Baasha, hamlechile mlume ne yumwe wa ivyazi lya heye ne yula wa goloko wa heye.
1KI 16:12 Ahyo Simuli nakalidumya ivyazi lyeng'ha lya Baasha kwa kiwhana na ulonzi wa Mkulu Nguluwi ulonjigwe kukolela mloli Yehu.
1KI 16:13 Mbuli azi nazikoleka kwa chiwalo cha gehile goyaditile Baasha na Ela, mwanage. Nawamzudiza Mkulu Nguluwi, Nguluwi wa Isilaeli, kwa kudita gehile na kuwambuza wanhu wa Isilaeli wadite gehile kwa jimalukolo ja milungu ja hewo.
1KI 16:14 Madito ganji ga Ela, nagandichigwa kuli chitabu cha kukumbuchila kwa wandewa wa Isilaeli.
1KI 16:15 Kuli mwaka wa makumi meli na saba wa ulongozi wa Asa, mndewa wa Yuda, Simuli nakalongoza ako Tilisa kwa mhela wa mazuwa saba. Wamizi nawali wawichile kambi ya hewo habehi na Gibetoni, muji wa Wafilisti.
1KI 16:16 Lowahuliche kota Simuli nayali yamditile mndewa mbuli yihile na kumkopola, zuwa lilyo kuno wawele kuko kuli kambi, nawamuwika Omuli, mkulu wa wamizi leka yawe mndewa wa Isilaeli.
1KI 16:17 Aho ndo Omuli na Waisilaeli weng'ha wawele hamwe na heye nawoka Gibetoni na kuuzunguluta muji wa Tilisa.
1KI 16:18 Simuli loyonile kota muji nauzungulutwa, nakenjila kuli ngome ya ng'handa ya chiundewa na nakailakaza kwa chiluli na kidumya yuye mumo mgati.
1KI 16:19 Mbuli ayi naikoleka kwa chiwalo cha gehile goyaditile hali Mkulu Nguluwi, nakadita kota vyoyaditile Yeloboamu na kuwambuza wanhu wa Isilaeli wadite gehile.
1KI 16:20 Madito ganji ga Simuli na kubelenhuka koyakuditile, nagandichigwa kuli chitabu cha kukumbuchila kwa wandewa wa Isilaeli.
1KI 16:21 Lelo, wanhu wa Isilaeli nawebagula vilundo vili. Chilundo chimwe nachilumba na Tibuni, mwana wa Ginati, leka yawe mndewa na chilundo cha keli nachilumba na Omuli.
1KI 16:22 Hamba wanhu wa chilundo chilumbile na Omuli nachali na mong'ho kusinda chila chilumbile na Tibuni, mwana wa Ginati. Ahyo Tibuni nakabagama, Omuli nakawa mndewa.
1KI 16:23 Kuli mwaka wa makumi gadatu na umwe wa ulongozi wa Asa, mndewa wa Yuda, Omuli nakawa mndewa wa Isilaeli, naye nakalongoza kwa mhela wa miyaka kumi na mili, miyaka sita ja mwaluko kuli ajo kumi na mili, nakalongoza Tilisa.
1KI 16:24 Nakagula chidunda cha Samaliya kwa kilo makumi saba za sendi kulawa kwa munhu yumwe yalinguchemigwa Shemeli. Nakazenga muji mchanya mwa chidunda acho. Muji awo nakauchema Samaliya kwa kiwhana na Shemeli, itagwa lya munhu wa mwaluko yawele na chidunda acho.
1KI 16:25 Omuli nakadita gehile hali Mkulu Nguluwi, nakadita gehile ng'hatu kupuluta wala wamlongole.
1KI 16:26 Nakawinza nzila zeng'ha za Yeloboamu, mwana wa Nebati na kuli gehile ga heye, gawele nakawambuza Waisilaeli wadite. Ahyo, nawamzudiza Mkulu Nguluwi, Nguluwi wa Isilaeli kwa kujifugamila jimalukolo ja milungu.
1KI 16:27 Madito ganji ga Omuli na ludali lwa heye, nagandichigwa kuli chitabu cha kukumbuchila kwa wandewa wa Isilaeli.
1KI 16:28 Hamba Omuli nakabagama na kutiligwa ako Samaliya. Ahabu, mwanage nakalongoza honhu ha heye.
1KI 16:29 Kuli mwaka wa makumi gadatu na nane wa ulongozi wa Asa, mndewa wa Yuda, Ahabu mwana wa Omuli nakawa mndewa wa Isilaeli. Naye nakalongoza ako Isilaeli kuno yawele Samaliya kwa mhela wa miyaka makumi meli na mili.
1KI 16:30 Ahabu nakadita gehile hali Mkulu Nguluwi kusinda wandewa weng'ha wamlongole.
1KI 16:31 Hanga nayali yawinzile nzila za Yeloboamu, mwana wa Nebati, Ahabu nakadita wihe ng'hatu kwa kumhesa Yesebeli, mhinza wa Etibaali, mndewa wa Wasidoni. Naye nakaluka kumkolela mijito na kumfugamila Baali.
1KI 16:32 Nakazenga honhu ha kulavila nhambiko na ng'handa kwa chiwalo cha Baali, yila yaizenjile ako Samaliya.
1KI 16:33 Ahabu kahi nakazenga izengo lya Ashela na kudita mbuli nyinji za kumzudiza Mkulu Nguluwi, Nguluwi wa Isilaeli, kusinda vyowaditile wandewa weng'ha wawele nawamlongola.
1KI 16:34 Kuli mhela wa ulongozi wa Ahabu, Hieli Mbeteli, nakaizenga kahi Yeliko. Kota ulonzi wa Mkulu Nguluwi vyoulonjile kwa kukolela Yoshua, mwana wa Nuni, Abilamu mwana wa mwaluko wa Hieli, nakabagama mhela wa kwaluchiza misisi ja muji wa Yeliko. Hamba Segubu, mwana mdodo wa Hieli, nakabagama kahi mhela wa kuwika lwizi lwa muji awo.
1KI 17:1 Lelo, Eliya yawele nakalawa Tishibe ako Gileadi, nakamlonjela mndewa Ahabu, “Kota Mkulu Nguluwi, Nguluwi wa Isilaeli yawele mkomu, yondilingumkolela mijito, ndangilaha kota kowa kulihela nungwi ne nhonya kuli miyaka jino mbaka hondilajiza.”
1KI 17:2 Hamba ulonzi wa Mkulu Nguluwi naumuyila Eliya na kumlonjela,
1KI 17:3 “Wuche hano, ulutile kuli ubanzi wa kolilawilaga isanya, ukevise kuli kazanda ka Keliti, ako kolilawilaga isanya mwa lwanda lwa Yolodani.
1KI 17:4 Konwa mazi kulawa kuli kazanda ako na nandijilajiza mibondwa jikugalile chilyo.”
1KI 17:5 Lelo, Eliya nakadita kota ulonzi wa Mkulu Nguluwi vyoumlajize. Nakaluta kuli kazanda ka Keliti, kawele kolilawilaga isanya mwa lwanda lwa Yolodani na kikala ako.
1KI 17:6 Mibondwa najali jimhilichila mibumunda na miwunde kuli chila hamitondo na matinazo na nayali yonwa mazi ga kazanda ako.
1KI 17:7 Lelo loukolile mhela umwenga, mazi nagakala kwa vila nhonya haitowile kuli isi yila.
1KI 17:8 Hamba ulonzi wa Mkulu Nguluwi naumuyila Eliya na kulonga,
1KI 17:9 “Ulute kuli muji wa Salefati habehi na Sidoni na wikale ako. Nandimlajiza mdala yafililwe na mlume yakugalile chilyo.”
1KI 17:10 Lelo Eliya nakaluta Salefati. Loyafichile hali lwizi lwa muji, nakamfika mdala yumwe yafililwe na mlume yolokota ngodi. Eliya nakamchema ayo mdala na kumlonjela, “Ngalile mazi machefu leka nyinwe.”
1KI 17:11 Yula mdala loyawele yoluta kumholela mazi, Eliya nakamchema kahi na kumlonjela, “Dedede, ngalile kahi na chihande cha ibumunda.”
1KI 17:12 Yula mdala nakamlonjela, “Ndikomya, ndangilaha kwa itagwa lya Mkulu Nguluwi, Nguluwi wa hegwe yawele mkomu, ndahela ibumunda ne hado, ila ndanawo utimbo ulinguweza kumema kuli chiganza uwele kuli chijilo na mafuta machefu kuli ibuli. Ndangulokoteza ngodi nyindo leka nyhiliche haluga na kuteleka chilyo kwa chiwalo cha heni na mwanangu, hamba tubagame.”
1KI 17:13 Eliya nakamlonjela “Uleche kudumba. Ulute haluga na udite kota vyoulonjile, ila ungongomanyile tandi ibumunda lido kulawa kuli vila vinhu vyouwele navyo na ungalile, hamba ugongomanye choneche kwa chiwalo cha hegwe na mwanago.
1KI 17:14 Kwa vila Mkulu Nguluwi, Nguluwi wa Isilaeli, kangulonga hino, ‘Utimbo uwele kuli chijilo cha hegwe haupunguwa hebu na mafuta gawele kuli ibuli hagomala mbaka aho heni Mkulu Nguluwi hondichigala nhonya kuli isi.’ ”
1KI 17:15 Lelo, ayo mdala yafililwe na mlume nakaluta na kudita kota vyoyalonjelwe na Eliya. Ahyo nakwali na chilyo kuli chila zuwa kwa chiwalo cha Eliya na yula mdala na ivyazi lya heye.
1KI 17:16 Utimbo haumalile kuli chijilo na mafuta ga kuli ibuli hagamalile, nayali hihila kota ulonzi wa Mkulu Nguluwi woyamlonjele Eliya.
1KI 17:17 Vyoupulute mhela umwenga, mwana wa yula mdala mwenyeng'haye nayali yotamika. Nakatamika ng'hatu mbaka nakabagama.
1KI 17:18 Ayo mdala nakamlonjela Eliya, “Kuna nongwa yachi kuwala heni, hegwe mloli? Nakuya kwa heni leka uwiche hazelu gehile ga heni na kwambuza kubagama kwa mwanangu?”
1KI 17:19 Eliya nakamwidichila, “Umhe heni ayo mwanago.” Eliya nakamhola mwana kulawa kuli mhambaga ya heye, nakampapa na kuluta naye mbaka kuli chihengo cha kuchanya koyawele yochikala, nakamuwasiliza mchinhanda cha heye.
1KI 17:20 Hamba nakamlanda Mkulu Nguluwi yolonga, “Gwa Mkulu Nguluwi, Nguluwi wa heni, ndaze, nakigala kubagama kwa mdala ayu yafililwe na mlume, yondilingikalasa na heye, kwa kwambuza kubagama kwa mwanage?”
1KI 17:21 Hamba Eliya nakegolola mchanya mwa ayo mwana mala zidatu na kumlanda Mkulu Nguluwi, yolonga, “Gwa Mkulu Nguluwi, Nguluwi wa heni, ndangukulanda umhilusile mwana muhe wa heye.”
1KI 17:22 Mkulu Nguluwi nakahulika kulanda kwa Eliya, muhe wa yula mwana naumhiluchila na nakazilipuka.
1KI 17:23 Eliya nakamhola yula mwana na kumpapa kulawa kuli chihengo cha heye, nakamdulisa kuli ng'handa, hamba nakamha mayake na kumlonjela, “Ulole, mwanago ka mkomu.”
1KI 17:24 Aho ndo yula mdala yafililwe na mlume nakamlonjela Eliya, “Lelo ndanguvizela kota hegwe kwa mloli na ulonzi wa Mkulu Nguluwi kulawa kuli mlomo wa hegwe ndo wa kukomya.”
1KI 18:1 Logapulute mazuwa menji, kuli mwaka wa kadatu wa lufemba, ulonzi wa Mkulu Nguluwi naumuyila Eliya na kumlonjela, “Ulute ukelajile kwa mndewa Ahabu, hamba nhonya yotowa kuli isi.”
1KI 18:2 Lelo Eliya nakaluta kilajila kwa Ahabu. Mhela awo nakwali na lufemba ako Samaliya.
1KI 18:3 Lelo Ahabu nakamchema Obadiya mkulu wa ng'handa ya chiundewa. Obadiya nayali munhu yalingumdumba ng'hatu Mkulu Nguluwi.
1KI 18:4 Mhela uwele Yesebeli loyawele yowakopola waloli wa Mkulu Nguluwi, Obadiya nayali yawaholile waloli miya imwe na kuwahilika kuli mhalika mbili, waloli makumi gahano kuli chila mhalika na nayali yowahilichila chilyo na mazi.
1KI 18:5 Hamba Ahabu nakamlonjela Obadiya, “Ulute kuli isi yeng'ha kuli nzanda zeng'ha na mibindi jeng'ha, hanji topata misolo kwa chiwalo cha falasi na migongolo ja hetwe jinji leka migongolo ja hetwe jileche kubagama.”
1KI 18:6 Ahyo nawebagula leka chila munhu yalute ubanzi umwe wa isi kupala misolo. Ahabu nakaluta ubanzi umwenga na Obadiya nakaluta ubanzi uyage.
1KI 18:7 Mhela Obadiya loyawele yojenda mzila, naketing'hana na Eliya. Obadiya nakamzela Eliya, ahyo nakafugama mbaka hasi na kumlonjela, “Ndaze, hegwe ndo mkulu wa heni Eliya?”
1KI 18:8 Eliya nakamwidichila, “Ena, ndo nene. Ulute ukamlonjele mkulu wa hegwe Ahabu, ‘Eliya ka hano.’ ”
1KI 18:9 Obadiya nakamuuza, “Nandita gehile gachi mbaka nakumbika mmoko mwa mndewa Ahabu leka ng'hopoligwe?
1KI 18:10 Ndangilaha kwa itagwa lya Mkulu Nguluwi, Nguluwi wa hegwe yawele mkomu, haduhu isi ama undewa uwele mkulu wa heni hamlajize munhu kukupala. Chila mhela wala wanhu walutile kukupala wone walonje hegwe kwa haduhu ako, mkulu wa heni nayali yowagana welahe kota wangulonga kukomya, kwa haduhu.
1KI 18:11 Ila kwangundonjela ndute kwa mkulu wa heni na kulonga, ‘Eliya ka hano.’
1KI 18:12 Sivizelele kohi kuwele muhe wa Mkulu Nguluwi wokuhilika mhela hondikuleka na kuka. Wone ndute kumlonjela Ahabu kota kwa hano, hamba yakupale na kulemwela kukona, kong'hopola, hanga heni, chitumagwa wa hegwe nandali ndimdumba Mkulu Nguluwi kulawa kuli usongolo wa heni.
1KI 18:13 Ndaze, huvizelele kota Yesebeli loyawele yowakopola waloli wa Mkulu Nguluwi, nandiwahola waloli miya imwe na kuwavisa makumi gahano kuli chila mhalika na nandali ndiwahilichila chilyo na mazi?
1KI 18:14 Lelo, kwangundonjela ndute kwa mkulu wa heni na kumlonjela, ‘Eliya ka hano.’ Heye kong'hopola.”
1KI 18:15 Eliya nakamlonjela, “Ndangilaha kwa itagwa lya Mkulu Nguluwi yawele na mong'ho kota vyoyalingikala na yula ndilingumkolela mijito, ndikomya ndochilajila kwa Ahabu lehano.”
1KI 18:16 Lelo Obadiya nakaluta kwa mndewa Ahabu na kumlonjela mbuli azo. Naye Ahabu nakaluta kiting'hana na Eliya.
1KI 18:17 Ahabu loyamuwene Eliya, nakamuuza, “Hegwe ndo ulinguitunya Isilaeli?”
1KI 18:18 Eliya nakamwidichila, “Siitunyile Isilaeli, ila hegwe na ivyazi lya mhaza wa hegwe ndo mlinguitunya Isilaeli. Namjileka mizilo ja Mkulu Nguluwi, namjiwinza Mabaali.
1KI 18:19 Lelo wacheme wanhu kulawa Isilaeli yeng'ha leka tuting'hane kuli chidunda cha Kalimeli, nagwe uwegale awo waloli wa Baali miya zine na makumi gahano na waloli miya zine wa Ashela walingulya chilyo kuli chisaga cha Yesebeli.”
1KI 18:20 Ahabu nakalajiza usenga kuli Isilaeli yeng'ha na kuwakungajiza waloli awo kuli chidunda cha Kalimeli.
1KI 18:21 Hamba Eliya nakema hali wanhu na kulonga, “Mochiziganila kuli majesa meli mbaka nili? Wone Mkulu Nguluwi ndo Nguluwi, mumuwinze heye, ila wone Baali ndo Nguluwi, lelo mumuwinze heye.” Ila wanhu hawalonjile chinhu.
1KI 18:22 Hamba Eliya nakawalonjela wanhu, “Heni ndiliyeka ndo mloli wa Mkulu Nguluwi sigale, ila Baali kana waloli miya zine na makumi gahano.
1KI 18:23 Lelo migale hano mibuguma mili, waloli wa Baali wehagulile limwe, walidumule kuli vihande na kuviwika mchanya mwa ngodi ila waleche kubwina chiluli. Nani ndolihola alyo limwe lisigale, ndoliwika goya na kuliwika mchanya mwa ngodi ila sibwina chiluli.
1KI 18:24 Hamba mlicheme itagwa lya mlungu wa hemwe nani ndolichema itagwa lya Mkulu Nguluwi. Nguluwi ama mlungu yawele kokwidichila kwa chiluli, ayo ndo wa kukomya.” Hamba, wanhu weng'ha nawalonga, “Ena, nakulonga goya.”
1KI 18:25 Eliya nakawalonjela waloli wa Baali, “Mhagule ibuguma limwe hali aji na muwe wa mwaluko kuliwika goya, kwa vila hemwe mwa wenji lukami. Mlicheme itagwa lya mlungu wa hemwe, ila mleche kubwina chiluli.”
1KI 18:26 Ahyo waloli wa Baali nawalihola ibuguma lya hewo lyowapegwe na kwaluka kuliwika goya. Hamba nawalichema itagwa lya Baali kulawa hamitondo mbaka nemisi, nawalonga, “Gwa Baali utwidichile.” Ila nakwali haduhu wa kuwedichila. Nawavina kwa kuzebeduka kuno wohazunguluta honhu ha kulavila nhambiko howahazenjile.
1KI 18:27 Mhela wa nemisi, Eliya nakaluka kuwaseka kwa kulonga, “Mtowe iyowe ng'hatu! Ndikomya heye ndo mlungu! Hanji ka kuli majesa ng'hatu ama kana mijito minji ama ka kuli majendo. Hanji ka kuli usinjizi unonile, yanguganigwa kumwinula.”
1KI 18:28 Ahyo waloli awo nawayoweleza na kitemanga kota vyowazowele. Nawetemanga na vimaje na nzembe mbaka danda naziwalawa.
1KI 18:29 Nemisi naikola, nawo nawalutilila kulonga kota wapoka mbaka mhela wa nhambiko ya matinazo, ila hakuwele na wa kuwedichila.
1KI 18:30 Hamba, Eliya nakawalonjela wanhu weng'ha, “Mhejele habehi na heni.” Wanhu weng'ha nawamhejelela, naye Eliya nakazenga kahi honhu ha kulavila nhambiko ha Mkulu Nguluwi hawele nahali habomoligwe.
1KI 18:31 Eliya nakahola maganga kumi na meli, limwe kwa chiwalo cha chila nhanzi ya wana wa Yakobo, yawele ulonzi wa Mkulu Nguluwi naumuyila na kulonga, “Itagwa lya hegwe lyowa Isilaeli.”
1KI 18:32 Kwa maganga ago, Eliya nakamzenjela Mkulu Nguluwi honhu ha kulavila nhambiko, hamba nakabawa msisi kuhazunguluta aho honhu ha kulavila nhambiko, msisi ulinguweza kuhola lita makumi gadatu ga nyhule.
1KI 18:33 Nakawika ngodi na kulidumula lila ibuguma kuli vihande na kuviwika mchanya mwa ngodi. Hamba nakawalonjela, “Mmemeze mazi kuli vijilo vine na kugabohola mchanya mwa nhambiko ya kulakazwa na mchanya mwa ngodi.” Nawadita ahyo.
1KI 18:34 Hamba nakawalonjela, “Mdite ahyo kahi.” Nawo nawadita ahyo kahi. Nakalajiza, “Mdite ahyo lwa kadatu.” Nawo nawadita ahyo lwa kadatu.
1KI 18:35 Mazi nagachililika hasi ha honhu ha kulavila nhambiko na mbaka kuhamemeza honhu howabawile wula msisi.
1KI 18:36 Mhela wa kulavya nhambiko ya matinazo, mloli Eliya nakahejela kumwando na kulanda yolonga, “Gwa Mkulu Nguluwi, Nguluwi wa Abulahamu na Isaka na Yakobo, izeleche lehano kota hegwe ndo Nguluwi kuli Isilaeli na kota heni ndo chitumagwa wa hegwe na nandita mbuli azi zeng'ha kota vyoundajize.
1KI 18:37 Unyhidichile, gwa Mkulu Nguluwi, unyhidichile leka wanhu awa wavizele kota hegwe, gwa Mkulu Nguluwi, ndo Nguluwi na kota nakuzigalamula nhumbula za hewo zikuhiluchile kahi.”
1KI 18:38 Baho du Mkulu Nguluwi nakadulisa chiluli na kuidumya yila nhambiko ya kulakazwa na zila ngodi na gala maganga na jila misanga na kugakaza gala mazi gawele kuli msisi.
1KI 18:39 Wanhu lowaiwene mbuli ayo, nawagwa chifunama na kulonga, “Mkulu Nguluwi, ndo Nguluwi, Mkulu Nguluwi, ndo Nguluwi!”
1KI 18:40 Hamba Eliya nakawalonjela, “Muwebate awo waloli weng'ha wa Baali. Mleche kumleka ne yumwe yasulupuche.” Lelo wanhu nawawebata weng'ha, naye Eliya nakawahilika mbaka kuli ibindi lya Kishoni na kuwadumula singo.
1KI 18:41 Eliya nakamlonjela mndewa Ahabu, “Ulute ukalye na kunwa kwa vila hana lizi lya nhonya ng'hulu.”
1KI 18:42 Ahyo Ahabu nakaluta kulya na kunwa, ila Eliya nakakwina kuli chinhembenhembe cha chidunda cha Kalimeli, nakafugama na kuwika mutwi wa heye hagati ha mafugamilo ga heye.
1KI 18:43 Hamba Eliya nakamlonjela chitumagwa wa heye, “Ulute ukalole kuli ubanzi wa bahali.” Chitumagwa nakaluta na kudita vyoyalonjelwe, hamba nakahiluka na kulonga, “Haduhu chinhu choneche ako.” Eliya nakamlonjela hihyo mala sita mzidi yula chitumagwa, “Ulute kahi.”
1KI 18:44 Mala ya saba, chitumagwa ayo nakahiluka na kulonga, “Ndangona ng'hungugu ndodo kota moko wa munhu yangulawa kuli bahali.” Eliya nakamlonjela, “Ulute ukamlonjele mndewa Ahabu, ‘Uwiche goya mutuka wa hegwe na uhiluche haluga mhela nhonya ing'hali kukulemeza.’ ”
1KI 18:45 Mhela wuwula ulanga nauwa utitu kwa chiwalo cha ng'hungugu, mbeho nayaluka kuputa na nhonya ng'hulu naitowa, naye Ahabu nakaluta Yesileeli.
1KI 18:46 Mong'ho wa Mkulu Nguluwi naumuyila Eliya, nakawoha goya ikanzu lya heye na kubilima, nakamlongola Ahabu kwinjila kuli muji wa Yesileeli.
1KI 19:1 Mndewa Ahabu nakamsimila Yesebeli, mche wake, mbuli zeng'ha zoyaditile Eliya na vyoyawakopole waloli weng'ha wa Baali kwa ipanga.
1KI 19:2 Yesebeli nakalajiza usenga kwa Eliya yolonga, “Milungu ajo jinditile ahyo na mzidi, wone ifiche mitondo mhela kota awu ndowa siuditile ukomu wa hegwe kota yumwe wa awo waloli.”
1KI 19:3 Eliya nakadumba, ahyo nakabilimila kuli muji wa Beeli-sheba ako Yuda kwa chiwalo cha kilohola, kuno yawele na chitumagwa wa heye. Hamba nakamleka ako chitumagwa ayo
1KI 19:4 na kujenda kwa zuwa limwe kuchiwala. Nakafika kuli igodi lya mletemu, nakekalisa hasi ha igodi alyo na kulanda leka yabagame. Nakalonga, “Ihega lelo, Mkulu Nguluwi, wuse ukomu wa heni, kwa vila siwele nojile kusinda wasekulu wa heni.”
1KI 19:5 Hamba nakegolola na kuwasa. Baho du mhilisi nakamdoliza na kumlonjela, “Winuche leka ulye.”
1KI 19:6 Eliya nakalola banzi zeng'ha, habehi na mutwi wa heye nakwali na ibumunda libanichigwe kuli makala ga chiluli na ibuli lya mazi. Nakalya na kunwa, hamba nakawasa kahi.
1KI 19:7 Yula mhilisi wa Mkulu Nguluwi nakamuyila kahi lwa keli, nakamdoliza na kumlonjela, “Winuche ulye kahi, leka uwe na mong'ho wa kulutilila na majendo.”
1KI 19:8 Eliya nakenuka, nakalya na kunwa. Loyawele na mong'ho kwa vila nakalya chila chilyo, nakajenda kwa mhela wa mazuwa makumi gane, nemisi na nechilo mbaka nakafika Holebu, chidunda cha Nguluwi.
1KI 19:9 Ako nakenjila kuli mhalika, nakawasa amo nechilo yila. Hamba, ulonzi wa Mkulu Nguluwi naumuyila Eliya na kumlonjela, “Kwangudita choni hano?”
1KI 19:10 Eliya nakedichila, “Mhela weng'ha nandikukolela mijito hegwe uliyeka, Mkulu Nguluwi Uwele na Mong'ho, ila Waisilaeli nawabena ilagano lya hegwe, nawabomola honhu ha hegwe ha kulavila nhambiko na kuwakopola waloli wa hegwe kwa ipanga. Ndo heni, heni ndiliyeka ndo sigale na wangumhala leka wandumye.”
1KI 19:11 Mkulu Nguluwi nakamlonjela, “Ulute kunze na kwima mchanya mwa chidunda hali heni Mkulu Nguluwi, kwa vila nda habehi kukola aho.” Hamba mbeho ng'hulu iwele na mong'ho naividita vila vidunda vikakame na kutula mitalawe, ila lizi lya Mkulu Nguluwi haliwele kuli yila mbeho. Vyoikolile mbeho nakwali na limachinyhina, ila lizi lya Mkulu Nguluwi haliwele kuli alyo limachinyhina.
1KI 19:12 Vyolikolile limachinyhina nakwali na chiluli, ila lizi lya Mkulu Nguluwi haliwele kuli chiluli acho. Vyochipulute chiluli, nalihulikwa lizi lisindamale na lya kupwepwa.
1KI 19:13 Eliya loyahuliche lizi alyo, nakegubika kumeho na ikanzu lya heye, nakalawa mgati na kwima hali mlomo wa mhalika. Lila lizi nalimlonjela, “Eliya, kwangudita choni aha?”
1KI 19:14 Eliya nakedichila, “Mhela weng'ha nandikukolela mijito hegwe uliyeka, Mkulu Nguluwi Uwele na Mong'ho, ila Waisilaeli nawabena ilagano lya hegwe, nawabomola honhu ha hegwe ha kulavila nhambiko na kuwakopola waloli wa hegwe kwa ipanga. Ndo heni, heni ndiliyeka ndo sigale na wangumhala leka wandumye.”
1KI 19:15 Mkulu Nguluwi nakamlonjela, “Uhiluche kwa kukolela kuchiwala mbaka Damasiko. Loufika, mbakalize mafuta Hasaeli yawe mndewa wa Alamu.
1KI 19:16 Naye Yehu, mwana wa Nimushi, umbakalize mafuta leka yawe mndewa wa Isilaeli. Kahi mbakalize mafuta Elisha, mwana wa Shafati wa Abeli-mehola, leka yawe mloli honhu ha hegwe.
1KI 19:17 Lelo yoneche yawele yosulupuka kuli ipanga lya Hasaeli, Yehu komkopola na yoneche yosulupuka kuli ipanga lya Yehu, Elisha komkopola.
1KI 19:18 Ila ndowaleka wakomu wanhu elufu saba kuli isi ya Isilaeli, wala wawele hawamfugamile Baali ne kujinonela jimalukolo ja heye.”
1KI 19:19 Ahyo Eliya nakoka kulawa ako nakamfika Elisha, mwana wa Shafati. Nayali yolima kwa misenga makumi meli na jine ja kulimila, kuno heye yuye yojilongoza misenga ja kumbele. Eliya nakakola habehi na heye na loyamfichile nakamvaliza ikanzu lya heye.
1KI 19:20 Aho, Elisha nakajileka misenga ja heye, nakamuwinza Eliya yobilima na kumlonjela, “Ng'hundize tandi ndute ndikawalaje mamo na mhaza wa heni kwa kuwanonela, hamba ndikuwinze,” Eliya nakedichila, “Ulute, nandikuditila choni?”
1KI 19:21 Lelo Elisha nakamleka Eliya, nakahiluchila chilundo cha misenga, nakajidumula singo misenga ajo na kuteleka kwa migodi ja ngwamo kota ngodi, nakawapa wanhu nawalya. Hamba nakoka na kumuwinza Eliya na nakawa chitumagwa wa heye.
1KI 20:1 Beni-hadadi, mndewa wa Alamu, nakakungajiza wamizi wa heye weng'ha, kuno yawele hamwe na wandewa wanji makumi gadatu na weli hamwe na falasi na mituka jawo ja kubulunwa. Nakaluta kuli wula muji wa Samaliya nakauzunguluta na kuutowa.
1KI 20:2 Hamba nakalajiza wasenga wa heye kuli muji kwa Ahabu, mndewa wa Isilaeli, nawamlonjela, “Mndewa Beni-hadadi kangulonga hino,
1KI 20:3 ‘Sendi na zahabu za hegwe, vyeng'ha ndo vya heni na wadala wa hegwe wanojile na wanago wanojile nawo ndo wa heni.’ ”
1KI 20:4 Mndewa wa Isilaeli nakedichila, “Mkulu wa heni mndewa, ilawile kota vyoulonjile. Heni na vyeng'ha vyombele navyo ndo vya hegwe.”
1KI 20:5 Wala wasenga wa hewo nawamhiluchila kahi Ahabu, nawamlonjela, “Mndewa Beni-hadadi kangulonga ahi, ‘Nandajiza usenga kwa hegwe umhe heni zahabu na sendi na wache wa hegwe na wanago.
1KI 20:6 Ila mitondo mhela kota awu, ndowalajiza vilongozi wa heni kukagula ng'handa ya hegwe ya chiundewa na ng'handa za vilongozi wa hegwe. Wohola chinhu chowalinguchigana lukami.’ ”
1KI 20:7 Aho ndo Ahabu, mndewa wa Isilaeli, nakawachema wasekulu weng'ha wa Isilaeli na nakawalonjela, “Ulole munhu ayo vyoyalingunyokoza. Mhela loyalajize yahilichilwe wache wa heni na wana wa heni na sendi za heni na zahabu za heni, nasimlemele.”
1KI 20:8 Wasekulu na wanhu weng'ha nawamwidichila, “Uleche kumhulichiza ne kukunda vyoyalingugana.”
1KI 20:9 Lelo Ahabu nakawalonjela wasenga wa Beni-hadadi, “Mumlonjele hino mkulu wa heni mndewa, ‘Chitumagwa wa hegwe kodita geng'ha goulonjile hamwande, ila howeza kudita choneche kuwala mbuli ayi ya sambi.’ ” Awo wasenga nawaluta na kumlonjela kahi mndewa Beni-hadadi.
1KI 20:10 Hamba Beni-hadadi nakalajiza usenga wunji kwa Ahabu, “Milungu jingalile kubagama kukulu, wone nhimbwisi ya Samaliya yohega igawo limwe lya chila munhu lya wala walingulongozwa na heni.”
1KI 20:11 Mndewa Ahabu wa Isilaeli nakedichila, “Mumlonjele mndewa Beni-hadadi kota yalinguvala mivalo ja ngondo kangitogolaga hoyolawa kitowa ngondo, haiwele yang'hali kitowa.”
1KI 20:12 Beni-hadadi nakabochela usenga awu wa Ahabu mhela heye na wandewa wanji nawali wogala kuli mihema ja hewo, ahyo nakawalajiza wanhu wa heye, “Miwiche goya kuutowa muji.” Nawo nawewika goya kuutowa muji.
1KI 20:13 Mhela wuwo mloli yumwe nakaluta kwa Ahabu, mndewa wa Isilaeli, nakamlonjela, “Mkulu Nguluwi kangulonga hino, ‘Kwangona winji wa wamizi awa? Lelo hano ndowegala mmoko mwa hegwe na hegwe kovizela kota heni ndo Mkulu Nguluwi.’ ”
1KI 20:14 Ahabu nakauza, “Kwa utanzi wa whaani?” Mloli nakalonga, Mkulu Nguluwi kangulonga hino, “Kwa utanzi wa wasongolo walinguwakolela mijito wamizi wakulu wa wilaya.” Naye mndewa nakauza, “Whaani yokwaluka kitowa?” Mloli nakedichila, “Hegwe.”
1KI 20:15 Lelo mndewa Ahabu nakawachema wasongolo walinguwakolela mijito wamizi wakulu wa wilaya, wanhu weng'ha nawali miya mbili na makumi gadatu na weli. Hamba nakawachema wamizi wa Isilaeli, nawali elufu saba.
1KI 20:16 Loifichile nemisi, mhela Beni-hadadi na wala wandewa wayage makumi gadatu na weli welumbile hamwe lowawele kuli ihema lya hewo wonwa na kugala, kitowa nakwaluka.
1KI 20:17 Wala wasongolo walinguwakolela mijito wamizi wakulu wa wilaya, nawalongola. Mhela awo, Beni-hadadi nayali yawalajize wamizi wa kupugajiza, nawo nawamha mbuli kota nakwali na chilundo cha walume woyile kulawa Samaliya.
1KI 20:18 Beni-hadadi nakamlonjela, “Muwebate wawele wang'hali wakomu, leka tuvizele kota nawoya kitowa ngondo ama kwa kikala goya.”
1KI 20:19 Lelo wala wasongolo walinguwakolela mijito wamizi wakulu wa wilaya nawalongola kuno wowinzigwa na wamizi wa Isilaeli kumbele kwa hewo.
1KI 20:20 Chila munhu nakamkopola mng'honyo yumwe. Wanhu wa Alamu nawadwina na wamizi wa Isilaeli nawawawinza, ila Beni-hadadi, mndewa wa Alamu, yawele yakwinile falasi, nakasulupuka na wamizi wamwe wakwina falasi.
1KI 20:21 Lelo mndewa wa Isilaeli nakasumya ngondo, nakahola falasi na mituka ja kubulunwa minji na kuwakopola wanhu wa Alamu wenji.
1KI 20:22 Hamba yula mloli nakaluta kwa mndewa wa Isilaeli, nakamlonjela, “Wiwiche goya na wijese kahi lya kudita. Mwaka ulinguya mndewa wa Alamu kokuya kitowa na hegwe kahi.”
1KI 20:23 Mhela wuwo vitumagwa wa Beni-hadadi nawamlonjela hino mndewa Beni-hadadi, “Milungu ja Waisilaeli ndo milungu ja kuli vidunda, ahyo natulemwela, ila towasumya wone tochitowa na hewo honhu hali ibalalika.
1KI 20:24 Sambi udite hino, wose wala wandewa makumi gadatu na weli na uwawiche wakulu wa wamizi honhu ha hewo.
1KI 20:25 Uwakungajize wamizi wanji kota wawala wouwalajize na falasi na mituka ja kubulunwa. Hamba, tochitowa na hewo honhu hawele na ibalalika na towa na mong'ho.” Mndewa Beni-hadadi nakahulika gowalonjile, nakadita hihyo.
1KI 20:26 Mwaka awo loukolile, mndewa Beni-hadadi nakawakungajiza wanhu wa heye, nakaluta kuli muji wa Afeka kitowa na wanhu wa Isilaeli.
1KI 20:27 Nawo wanhu wa Isilaeli nawakungajizwa na kupegwa migoha, nawaluta kitowa na Waalamu. Wanhu Waisilaeli nawawika kambi wochilola na Waalamu, nawoneka kota vilundo vili vidodo vya mhene, ila Waalamu nawenela kuli isi yeng'ha.
1KI 20:28 Hamba munhu yumwe wa Nguluwi nakamhejelela mndewa wa Isilaeli, nakamlonjela, “Mkulu Nguluwi kangulonga hino, ‘Kwa vila Waalamu wangijesa heni Mkulu Nguluwi nda Nguluwi wa kuli vidunda na siwele Nguluwi wa kuli ibalalika, ndokudita usumye hali chilundo achi chikulu cha wamizi, nagwe kovizela kota heni ndo Mkulu Nguluwi.’ ”
1KI 20:29 Wanhu wa Isilaeli na Waalamu nawawika kambi kwa mhela wa mazuwa saba, nawali habehi. Zuwa lya saba nawaluka kitowa. Zuwa lilyo wanhu wa Isilaeli nawawakopola wamizi wa kujenda kwa magulu lachi imwe (100,000).
1KI 20:30 Waponile nawabilimila kuli muji wa Afeka. Ako, ng'hanzi za muji naziwagwila na kuwakopola wanhu elufu makumi meli na saba (27,000) waponile. Beni-hadadi kahi nakabilima na kuluta kivisa kuli chihengo chimwe cha mgati mwa muji.
1KI 20:31 Vitumagwa wa heye nawaluta na kumlonjela, “Natuhulika kota wanhu wa Isilaeli ndo wanhu wawele na isungu. Lelo utukundize tiwohe migunila mchuno na ng'weso msingo kwa chiwalo cha kinyenyeteza, tulute kwa mndewa wa Isilaeli, hanji kouleka ukomu wa hegwe.”
1KI 20:32 Lelo nawewoha migunila mchuno na ng'weso msingo, nawaluta kwa mndewa wa Isilaeli, nawamlonjela, “Chitumagwa wa hegwe Beni-hadadi kangukudedeza yolonga ‘Dedede undechele leka ndikale.’ ” Ahabu nakalonga, “Yang'hali mkomu? Heye ndo kota mng'holozangu.”
1KI 20:33 Vitumagwa wa Beni-hadadi nawali wobeteza ulajilo woneche wula wa mbuli inojile. Lelo Ahabu loyalonjile ahyo, hewo nawedichila wolonga, “Ena, Beni-hadadi ndo kota mng'holoze.” Ahabu nakawalonjela, “Mlute mkamhole mmigale kwa heni.” Lelo Beni-hadadi loyamuyile, Ahabu nakagana yekalise na heye kuli mutuka wa heye wa kubulunwa.
1KI 20:34 Hamba Beni-hadadi nakamlonjela, “Muji weng'ha uwele mhaza wa heni nakamsukula mhaza wa hegwe, ndokuhilusila. Koweza kwaluchiza masoko ako Damasiko kota vyoyaditile mhaza wa heni ako Samaliya.” Ahabu nakedichila, “Ndokulechela kwa chiwalo acho.” Ahyo, nakadita ilagano na heye na kumleka yelejehe.
1KI 20:35 Kwa ulonzi wa Mkulu Nguluwi, yumwe wa waloli nakamlonjela myage, “Dedede unhowe.” Ila myage nakalema kumtowa.
1KI 20:36 Heye nakamlonjela, “Kwa vila nakulema kuhulichiza ulonzi wa Mkulu Nguluwi, lelo houlekana na heni isimba lyokukopola.” Baho du vyowalekane na heye, nakating'hana na isimba, nalimkopola.
1KI 20:37 Hamba mloli ayo nakamfika munhu yunji, nakamlonjela, “Dedede unhowe.” Munhu ayo nakamtowa na kumlumiza.
1KI 20:38 Lelo mloli nakoka nakaluta kikalisa hafungo ha nzila kumbeteza mndewa wa Isilaeli kuno yewohile chibende kumeho leka yaleche kuzeleka.
1KI 20:39 Mndewa loyawele yokola, mloli nakamlilila yolonga, “Mkulu, heni chitumagwa wa hegwe nandali kuli kitowa ngondo, nakoya mwamizi yumwe nakengalila munhu yumwe yebatigwe na kundonjela, ‘Mlolele munhu ayu, wone yasulupuche yokulapa hegwe kulipa kikala kwa hegwe ama kwa vihande elufu zidatu vya sendi.’
1KI 20:40 Ila lombele ndikola mijito, munhu ayo nakasulupuka.” Mndewa wa Isilaeli nakamlonjela, “Ndo vyouwa utaguso wa hegwe, nakitagusa gwegwe.”
1KI 20:41 Ahyo mloli nakosa himahima chibende kumeho kwa heye na mndewa nakavizela kota nayali yumwe wa waloli.
1KI 20:42 Lelo mloli nakamlonjela mndewa, “Mkulu Nguluwi kangulonga ahi, ‘Nakumleka munhu yondonjile yakopoligwe. Ahyo, ukomu wa heye koulipa kwa ukomu wa hegwe na wanhu wa heye kwa wanhu wa hegwe.’ ”
1KI 20:43 Lelo mndewa wa Isilaeli nakaluta haluga ha heye Samaliya kuno yawele na usungu na ng'halazi.
1KI 21:1 Naboti, mwenyeng'haye wa Yesileeli, nayali na mgunda wa mizabibu ako Yesileeli habehi na ng'handa ya chiundewa ya Ahabu, mndewa wa Samaliya.
1KI 21:2 Zuwa limwe Ahabu nakamlonjela Naboti, “Umhe heni mgunda wa hegwe umwe ndiudite uwe mgunda wa mboga, kwa vila wa habehi na ng'handa ya heni. Ndokupa mgunda wunji unojile kusinda awo, ama wone ugane, ndougula kwa sendi nyinji.”
1KI 21:3 Naboti nakamwidichila Ahabu, “Mkulu Nguluwi yaiwiche kutali mbuli ayi ya kukupa uhalizi wa wasekulu wa heni.”
1KI 21:4 Ahyo Ahabu nakaluta haluga yawele na usungu na ng'halazi, kwa vila Naboti, mwenyeng'haye wa Yesileeli, nakamlonjela kota homha chila choyahalile kulawa kwa wasekulu wa heye. Lelo nakawasa mchinhanda nakavisa kumeho kwa heye na kuviluka chilyo.
1KI 21:5 Yesebeli, mche wake nakenjila na kumuuza, “Lekachoni kuna masinzo mnhumbula na hambe ulye?”
1KI 21:6 Naye nakamwidichila, “Kwa vila nandimlonjela Naboti, mwenyeng'haye wa Yesileeli, ‘Nguzile mgunda wa hegwe wa mizabibu ama wone kogana ndokupa mgunda wunji wa mizabibu honhu ha awo,’ ila nakandonjela, ‘Hambe ndikupe mgunda wa heni wa mizabibu.’ ”
1KI 21:7 Aho ndo Yesebeli, mche wake nakamlonjela, “Ahi ndo vyoulingudita hegwe mndewa wa Isilaeli yeng'ha? Winuche ulye na usangalale. Ndokupa mgunda wa mizabibu wa Naboti, Myesileeli.”
1KI 21:8 Ahyo Yesebeli nakandika baluwa kwa itagwa lya Ahabu na kuwika mhuli wa mndewa kuli baluwa azo. Nakahilika baluwa azo kwa wasekulu na kwa wanhu wawele kuli ulongozi walingikala kuli muji hamwe na Naboti.
1KI 21:9 Baluwa azo nazandichigwa hino, “Muwikule zuwa lya wanhu kulanda na kuleka kulya, mlute kumuwika Naboti honhu ha lutogo hali wanhu.
1KI 21:10 Hamba mpale wanhu weli wehile habehi na heye leka walavye ulolezi hali wanhu kota heye nakampanjila Nguluwi na mndewa. Hamba mumlavye mgati na kumtowa kwa maganga mbaka yabagame.”
1KI 21:11 Ahyo wasekulu na wanhu wawele kuli ulongozi walingikala kuli muji wa Naboti, nawadita kota Yesebeli vyoyawalonjele kuli baluwa yoyawandichile.
1KI 21:12 Nawawikula kuwala wanhu kuleka kulya na kumuwika Naboti hali honhu ha lutogo hali wanhu.
1KI 21:13 Hamba wala wanhu wehile nawoya na kikalisa habehi na heye na kumlonjeleza Naboti hali wanhu, wolonga, “Naboti nakampanjila Nguluwi na mndewa.” Lelo nawamlavya Naboti mgati mwa muji, nawamtowa kwa maganga mbaka nakabagama.
1KI 21:14 Hamba nawalajiza usenga kwa Yesebeli kwa kulonga, “Naboti nakatowigwa kwa maganga mbaka nakabagama.”
1KI 21:15 Baho du Yesebeli loyahuliche kota Naboti nakabagama kwa kutowigwa kwa maganga, nakamlonjela Ahabu, “Winuche, ulute ukaudite wula mgunda wa mizabibu wa Naboti uwe wa hegwe uwele nakalema kukuguzila. Naboti hawele mkomu, nakabagama.”
1KI 21:16 Ahabu loyahuliche kota Naboti nakabagama, nakaluta kuudita mgunda wa mizabibu wa Naboti uwe wa heye.
1KI 21:17 Hamba ulonzi wa Mkulu Nguluwi naumuyila mloli Eliya wa Tishibe,
1KI 21:18 “Winuche, ulute kiting'hana na Ahabu, mndewa wa Isilaeli, yula yalongoze ako Samaliya. Komfika kuli mgunda wa mizabibu wa Naboti, uwele heye nakaudita uwe wa heye.
1KI 21:19 Mlonjele Mkulu Nguluwi kangulonga hino, ‘Ndaze, humkopole munhu na kuhola isi ya heye?’ Hamba mlonjele Mkulu Nguluwi kangulonga hino, ‘Honhu hawele mibwa najimyanga danda ya Naboti, mibwa jomyanga danda ya hegwe, ena, danda ya hegwe.’ ”
1KI 21:20 Ahabu loyamuwene Eliya, nakalonga, “Lelo nakumhata, hegwe mng'honyo wa heni?” Eliya nakedichila, “Ena, nandikupata, kwa vila nakunuwila ng'hatu kudita gehile hali Mkulu Nguluwi.
1KI 21:21 Mkulu Nguluwi kangulonga hino, ‘Ndokugalila kubagama. Ndolidumya ivyazi lya hegwe Ahabu na kumkopola chila mlelwa mlume kulawa lulelo lwa hegwe kuli Isilaeli, yawe mpogozi ama yelejehe.
1KI 21:22 Ndolidita ivyazi lya hegwe liwe kota lya Yeloboamu, mwana wa Nebati na kota ivyazi lya Baasha, mwana wa Ahiya, kwa vila nakunzudiza kwa kuwambuza wanhu wa Isilaeli wadite gehile.’
1KI 21:23 “Mkulu Nguluwi kahi kangulonga ahi kuwala Yesebeli, ‘Mibwa jolya lukuli lwa Yesebeli habehi na lukanzi lwa muji wa Yesileeli.
1KI 21:24 Mibwa jowalya wala wa ivyazi lya Ahabu wawele wobagama kuli muji na wala wawele wobagama kuli migunda, videje vyowalya.’ ”
1KI 21:25 Haduhu munhu yaganile kudita gehile hali Mkulu Nguluwi kota Ahabu, yawele nakeguza yuye kudita wihe hali Mkulu Nguluwi kwa kwambuzwa na Yesebeli, mche wake.
1KI 21:26 Nakadita izudizo kwa kufugamila jimalukolo ja milungu kota vyowaditile Waamoli, wawele aho hamwande Mkulu Nguluwi nakawawinga hali wanhu wa Isilaeli.
1KI 21:27 Ila Ahabu loyahuliche mbuli ayo kulawa kwa Eliya nakadadula mivalo ja heye, nakavala ivalo lya igunila na kuleka kulya. Nayali yowasa na kigubika mivalo ja igunila na kujenda kwa kunyenyetela.
1KI 21:28 Aho ndo ulonzi wa Mkulu Nguluwi naumuyila Eliya wa Tishibe na kulonga,
1KI 21:29 “Nakumona Ahabu vyoyenyenyeteze hali heni? Kwa vila nakedulisa heye yuye, sikugala kudumya kuno yawele yang'hali mkomu, ila ndoligalila kubagama ivyazi lya heye kuli mazuwa ga ukomu wa mwanage.”
1KI 22:1 Nakwali na kikala goya hali Isilaeli na Alamu kwa mhela wa miyaka jidatu.
1KI 22:2 Kuli mwaka awo wa kadatu, Yehoshafati, mndewa wa Yuda nakaluta kumjendela Ahabu, mndewa wa Isilaeli.
1KI 22:3 Ahabu nakawalonjela vilongozi wa heye, “Ndaze, hamvizelele kota Lamoti-gileadi ndo wa hetwe? Lekachoni lelo twangulemwela kuuhola kulawa kwa mndewa wa Alamu?”
1KI 22:4 Lelo, nakamuuza Yehoshafati, “Ndaze, koluta hamwe na heni kitowa ako Lamoti-gileadi?” Naye Yehoshafati nakamwidichila mndewa wa Isilaeli, “Ena, heni na hegwe ndo chinhu chimwe na wanhu wa heni ndo kota wanhu wa hegwe na falasi wa heni ndo kota falasi wa hegwe.”
1KI 22:5 Yehoshafati nakalutilila kumlonjela mndewa wa Isilaeli, “Waluche kumuuza Mkulu Nguluwi tandi.”
1KI 22:6 Ahyo, Ahabu, mndewa wa Isilaeli, nakawegala waloli kota miya zine, nakawauza, “Ndaze, ndute kuutowa muji wa Lamoti-gileadi ama ndeche kuluta?” Nawo nawamwidichila, “Ulute, kwa vila Mkulu Nguluwi kouwika muji wa Lamoti-gileadi mmoko mwa mndewa.”
1KI 22:7 Ila Yehoshafati nakauza, “Ndaze, haduhu mloli yunji wa Mkulu Nguluwi hano yawele toweza kumuuza?”
1KI 22:8 Mndewa wa Isilaeli nakamwidichila Yehoshafati, “Kabaha, nakapona munhu yumwe yawele kwa kukolela heye toweza kumuuza Mkulu Nguluwi, ila ndangumzudila kwa vila halingulavya uloli unojile kuwala heni, ila kangulavyaga uloli wihile hela. Mloli ayo ndo Mikaya, mwana wa Imula.” Yehoshafati nakedichila, “Mndewa halinguganigwa kulonga ahyo.”
1KI 22:9 Lelo Ahabu, mndewa wa Isilaeli, nakamchema chitumagwa yumwe na kumlonjela, “Migale himahima Mikaya, mwana wa Imula.”
1KI 22:10 Lowawele wavalile mikanzu ja hewo ja chiundewa, mndewa wa Isilaeli na Yehoshafati, mndewa wa Yuda, nawali kuli vigoda vya hewo vya chiundewa kuli honhu ha kupululila nyhule, hali lwizi lwa kwinjilila Samaliya, hamwe na waloli weng'ha wawele wolavya uloli hali hewo.
1KI 22:11 Mhela awu Sedekiya, mwana wa Kenaana, nayali yagongomanye mbalati za chuma, nakawikula yolonga hino, “Mkulu Nguluwi kangulonga hino, ‘Kwa mbalati azi kowatowa na kuwahilula kumbele Waalamu mbaka howodumigwa.’ ”
1KI 22:12 Waloli weng'ha nawali wolavya uloli wuwula wolonga, “Utowe muji wa Lamoti-gileadi leka usumye, kwa vila Mkulu Nguluwi kouwika mmoko mwa hegwe.”
1KI 22:13 Mhela awo, yula chitumagwa yalajizwe kumchema Mikaya, nakamlonjela, “Ulole, waloli weng'ha ndo kota munhu yumwe, wangulavya uloli kuwala kusumya kwa mndewa. Fola nagwe uwe kota hewo, ulavye uloli ulinguwala ganojile kuwala mndewa.”
1KI 22:14 Ila Mikaya nakalonga, “Ndangilaha kwa Mkulu Nguluwi yawele mkomu, ndolonga gala goyondonjela Mkulu Nguluwi.”
1KI 22:15 Lelo Mikaya loyafichile hali mndewa, mndewa nakamuuza, “Ndaze Mikaya, tulute kitowa ngondo ako Lamoti-gileadi ama tuleche kuluta?” Mikaya nakamwidichila, “Ulute na usumye, kwa vila Mkulu Nguluwi kouwika mmoko mwa hegwe.”
1KI 22:16 Ila mndewa nakamlonjela, “Ndokudita wilahe mala zilinga leka uleche kundonjela chinhu choneche ila kukomya hela kwa itagwa lya Mkulu Nguluwi?”
1KI 22:17 Ahyo Mikaya nakedichila, “Nambona wanhu weng'ha wa Isilaeli nawasambaluka kuli vidunda kota ming'holo jilihela mdimi, naye Mkulu Nguluwi nakalonga, ‘Wanhu wano wahela chilongozi. Waleche leka chila munhu yalute haluga ha heye kwa kikala goya.’ ”
1KI 22:18 Mndewa wa Isilaeli nakamlonjela Yehoshafati, “Sikulonjele kota kangulavyaga uloli kuwala mbuli zihile hela na haziwele zinojile?”
1KI 22:19 Mikaya nakalutilila kulonga, “Lelo uhuliche ulonzi wa Mkulu Nguluwi. Nandimona Mkulu Nguluwi yekalise kuli chigoda cha heye cha undewa na wahilisi weng'ha wawele wemile hafungo ha heye, kuli ubanzi wa heye wa kumoso na wa kudilo.
1KI 22:20 Mkulu Nguluwi nakauza, ‘Whaani yomhada Ahabu leka yalute kuutowa muji wa Lamoti-gileadi, leka yalute kuli kubagama ako?’ Chila munhu nakedichila kota vyoyejesile.
1KI 22:21 Hamba muhe nawuya na kwima hali Mkulu Nguluwi na kulonga, ‘Ndomhada.’
1KI 22:22 Mkulu Nguluwi nakauuza, ‘Kwa nzila yachi?’ Nawo nawidichila, ‘Ndoluta na kuwadita waloli wa heye weng'ha walonje udesi.’ Mkulu Nguluwi nakaulonjela, ‘Koweza kumhada. Lelo ulute ukadite ahyo.’
1KI 22:23 Ahyo Mkulu Nguluwi nakawadita awa waloli wa hegwe weng'ha walonje udesi. Mkulu Nguluwi nakalajiza kubagama kukuyile.”
1KI 22:24 Hamba Sedekiya, mwana wa Kenaana, nakamhejelela Mikaya na kumzabula mizeze na kumuuza, “Kulawa nili awo Muhe wa Mkulu Nguluwi naundeka na kuya kulongasa na hegwe?”
1KI 22:25 Mikaya nakedichila, “Kovizela zuwa alyo louluta na kivisa kuli chihengo cha mgati.”
1KI 22:26 Hamba mndewa wa Isilaeli nakalajiza, “Mumhole Mikaya na mumhiluse kwa Amoni, mkulu wa muji na kwa Yoashi, mwana wa mndewa.
1KI 22:27 Mkalonje kota mndewa kangulonga hino, ‘Mumuwiche mchinweng'ho munhu ayo na mleche kumha chinhu choneche, ila ibumunda na mazi mbaka hondikuya kwa kikala goya.’ ”
1KI 22:28 Mikaya nakalonga, “Wone kohiluka kwa kikala goya, Mkulu Nguluwi kowa halongase na heni.” Hamba nakalutilila kulonga, “Mhulichize ulonzi wa heni hemwe wanhu weng'ha!”
1KI 22:29 Lelo mndewa wa Isilaeli na Yehoshafati, mndewa wa Yuda, nawaluta Lamoti-gileadi.
1KI 22:30 Mndewa wa Isilaeli nakamlonjela Yehoshafati, “Ndokwinjila kuli kitowa ngondo kuno mbele vilivinji kwa kuvala mivalo johajiwele ja chiundewa, ila hegwe uvale ikanzu lya hegwe lya chiundewa.” Ahyo mndewa wa Isilaeli nakaluta kitowa ngondo ne kuvala mivalo ja chiundewa.
1KI 22:31 Mhela awo mndewa wa Alamu nayali yawalajize wakulu wa wamizi wa heye makumi gadatu na weli wa mituka ja kitowa ngondo, yolonga, “Mleche kitowa na munhu yoneche yula, yawe mkulu ama mdodo, ila mitowe na mndewa wa Isilaeli hela.”
1KI 22:32 Mhela wala wakulu wa wamizi wa ngondo lowamonile Yehoshafati, nawejesa, “Ena, ayu ndo mndewa wa Isilaeli.” Ahyo nawaluta kwa heye leka wamtowe, ila Yehoshafati nakatowa iyowe.
1KI 22:33 Ahyo, wala wakulu wa wamizi lowawene kota hawele mndewa wa Isilaeli, nawaleka kumuwinza.
1KI 22:34 Ila munhu yumwenga nakakwega upinde wa heye ne kunuwila na kumhoma mndewa wa Isilaeli hagati ha honhu halinguting'hana mivalo ja heye ja chuma. Mndewa nakamlonjela yalingwendesa mutuka wa heye, “Galamula mutuka na umbuse kuli kitowa, nandumizwa.”
1KI 22:35 Ngondo nailutilila nemisi yeng'ha kuno mndewa nakegamizwa mgati mwa mutuka yochilola na Waalamu. Danda kulawa kuli chilonda cha heye nayali ichililika mgati mwa mutuka na loifichile matinazo, nakabagama.
1KI 22:36 Isanya vyoliwele lizinga, ilajizo nalilavigwa, “Chila munhu yahiluche kuli muji wa heye na chila munhu kuli isi ya heye!”
1KI 22:37 Lelo mndewa Ahabu nakabagama, mtufi wa heye nauhilikwa Samaliya na kutiligwa ako.
1KI 22:38 Mutuka wa heye wa kubulunwa nauhovujigwa kuli ilamba lidodo lya Samaliya, honhu hawele wang'hondwa nawoga aho na mibwa najimyanga danda ya heye kwa kiwhana na ulonzi wa Mkulu Nguluwi vyoulonjile.
1KI 22:39 Madito ganji ga ulongozi wa mndewa Ahabu, hamwe na geng'ha goyaditile na ng'handa ya chiundewa yaizenjile na kuinoliga kwa mbalati za nhembo na miji jeng'ha yajizenjile, nagandichigwa kuli chitabu cha kukumbuchila kwa wandewa wa Isilaeli.
1KI 22:40 Ahabu loyabagame, Ahasiya mwanage, nakawa mndewa honhu ha heye.
1KI 22:41 Yehoshafati, mwana wa Asa, nakawa mndewa wa isi ya Yuda kuli mwaka wa kane wa ulongozi wa Ahabu, mndewa wa Isilaeli.
1KI 22:42 Yehoshafati nayali na miyaka makumi gadatu na jihano loyaluche kulongoza. Nakalongoza ako Yelusalemu kwa miyaka makumi meli na jihano. Mayake nayali yochemigwa Asuba, mhinza wa Shilihi.
1KI 22:43 Nakadita mbuli zinojile hali Mkulu Nguluwi kota vyoyaditile Asa, mhaza wa heye, ila hala honhu ha kufugamila milungu hahosigwe. Wanhu nawalutilila kulavya nhambiko na kufunyiza ubani ako.
1KI 22:44 Yehoshafati nayali na kikala goya na mndewa wa Isilaeli.
1KI 22:45 Mbuli zinji za ulongozi wa Yehoshafati na mbuli za heye zilingulutilila goya na kidaha kwa heye kuli kitowa ngondo, nagandichigwa kuli chitabu cha kukumbuchila kwa wandewa wa Yuda.
1KI 22:46 Walume wang'hondwa wa kuli honhu ha kufugamila wawele nawapona ako kulawa loukolile ulongozi wa Asa, mhaza wa heye, nakawosa.
1KI 22:47 Kulawa aho Edomu nayali ilihela mndewa. Isi ayo nailongozwa na mtanzi wa mndewa.
1KI 22:48 Mhela awo Yehoshafati nakagongomanya meli nyinji za Talishishi, kwa chiwalo cha kugula na kuguza vinhu leka kuluta Ofili kuhola zahabu, ila haziwezile kujenda ako, kwa vila nazibeneka ako Esioni-gebeli.
1KI 22:49 Lelo Ahasiya, mwana wa Ahabu, nakamlonjela Yehoshafati, “Waleche vitumagwa wa heni wajende hamwe na vitumagwa wa hegwe,” ila Yehoshafati nakalema.
1KI 22:50 Hamba Yehoshafati nakabagama na kutiligwa hamwe na wasekulu wa heye, kuli vilaga vya chiundewa kuli muji wa Daudi, sekulu wa heye. Yeholamu, mwanage nakawa mndewa honhu ha heye.
1KI 22:51 Ahasiya, mwana wa Ahabu, nakawa mndewa wa Isilaeli ako Samaliya kuli mwaka wa kumi na saba wa ulongozi wa Yehoshafati, mndewa wa Yuda. Naye nakalongoza kuli Isilaeli kwa miyaka mili.
1KI 22:52 Ahasiya nakadita gehile hali Mkulu Nguluwi, nakawinza nzila za mhaza wa heye na za mayake na za Yeloboamu, mwana wa Nebati, yawele nakawambuza Waisilaeli kudita gehile.
1KI 22:53 Nakamkolela mijito na kumfugamila Baali, nakamzudiza Mkulu Nguluwi, Nguluwi wa Isilaeli, kota vyoyaditile mhaza wa heye.
2KI 1:1 Kulawa loyabagame mndewa Ahabu, wanhu wa isi ya Moabu nawabelenhuka leka waleche kulongozwa na Isilaeli.
2KI 1:2 Lelo mndewa Ahasiya nakagwa ako Samaliya kulawa hali honhu habotigwe kuli chihengo cha heye cha kuchanya, nakalumila. Ahyo nakalajiza wasenga yowalonjela, “Mlute kwa Baali-sebubu, mlungu wa muji wa Ekiloni, mkamuuze kota ndopona utamwa awu.”
2KI 1:3 Ila mhilisi wa Mkulu Nguluwi nakamlonjela mloli Eliya, Mtishibe, “Ulute uketing'hane na wasenga wa mndewa wa Samaliya, uwauze, ‘Lekachoni mwanguluta kwa Baali-sebubu, mlungu wa Ekiloni? Ndaze, Isilaeli haduhu Nguluwi?’
2KI 1:4 Mlonjele mndewa kota Mkulu Nguluwi kangulonga hino, ‘Huweza kudulika kuli chinhanda choulinguwasila. Ndangukomya kobagama.’ ” Lelo Eliya nakaluta.
2KI 1:5 Wala wasenga lowahiluche kwa mndewa, mndewa nakawauza, “Lekachoni namhiluka?”
2KI 1:6 Nawamwidichila, “Munhu yumwenga nakoya kiting'hana na hetwe, nakatulonjela kota tuhiluche kwa hegwe na kukulonjela kota Mkulu Nguluwi kangulonga hino, ‘Lekachoni mwanguluta kwa Baali-sebubu, mlungu wa Ekiloni? Ndaze, Isilaeli haduhu Nguluwi? Huweza kudulika kuli chinhanda choulinguwasila. Ndangukomya kobagama.’ ”
2KI 1:7 Mndewa nakawauza, “Munhu wachi ayo yomting'hane naye yawele nakawalonjela mbuli ayi?”
2KI 1:8 Nawo nawamwidichila, “Nayali yavalile ivalo lya milaika na isali lya ngozi mchuno.” Mndewa nakalonga, “Ayo kowa Eliya, Mtishibe.”
2KI 1:9 Aho ndo mndewa nakamlajiza chilongozi yumwe na wamizi wa heye makumi gahano, yamigale Eliya kwa heye. Yula chilongozi wa chilundo nakaluta kwa Eliya, yawele nayali yekalise mchanya mwa chidunda, nakamlonjela, “Hegwe munhu wa Nguluwi, mndewa kangukulojela uduliche.”
2KI 1:10 Eliya nakamwidichila yula chilongozi wa chilundo, “Wone heni nda munhu wa Nguluwi, chiluli chiduliche na kukudumya hegwe na awo wanhu wa hegwe makumi gahano.” Aho ndo chiluli nachidulika kulawa kilanga na kumdumya yula chilongozi wa chilundo, hamwe na wanhu wa heye.
2KI 1:11 Mndewa loyahuliche mbuli ayo, nakamlajiza chilongozi yunji na wamizi wa heye makumi gahano, yamigale Eliya kwa heye. Yula chilongozi wa chilundo nakamlonjela Eliya, “Hegwe munhu wa Nguluwi, mndewa kangukulonjela uduliche sambi.”
2KI 1:12 Eliya nakedichila, “Wone heni nda munhu wa Nguluwi, chiluli chiduliche na kukudumya hegwe na awo wanhu wa hegwe makumi gahano.” Aho ndo chiluli nachidulika kulawa kilanga na kumdumya yula chilongozi wa chilundo, hamwe na wanhu wa heye.
2KI 1:13 Ahyo mndewa nakamlajiza chilongozi yunji na chilundo cha wamizi wa heye makumi gahano. Ayo chilongozi wa kadatu nakakwina mchidunda na kufugama hali Eliya, yolanda, “Hegwe munhu wa Nguluwi, dedede undechele ukomu wa heni na wa awa wanhu wano makumi gahano, vitumagwa wa hegwe!
2KI 1:14 Ulole, chiluli nachidulika kulawa kilanga na kuwadumya wala vilongozi wa vilundo vili vya mwaluko hamwe na wanhu wa hewo. Ila lelo, undechele ukomu wa heni!”
2KI 1:15 Aho ndo mhilisi wa Mkulu Nguluwi nakamlonjela Eliya, “Uduliche hamwe na heye, uleche kumdumba.” Ahyo Eliya nakenuka na kudulika hamwe na heye mbaka kwa mndewa,
2KI 1:16 nakamlonjela mndewa, “Mkulu Nguluwi kangulonga hino, ‘Ndaze, kwa vila haduhu Nguluwi kuli Isilaeli wa kumuuza mbuli, ndo mina nakulajiza wasenga kumuuza Baali-sebubu, mlungu wa Ekiloni? Kwa vila nakudita mbuli ayi, huweza kulawa kuli chinhanda choulinguwasila. Ndikomya kobagama.’ ”
2KI 1:17 Hamba Ahasiya nakabagama kwa kiwhana na ulonzi wa Mkulu Nguluwi, uwele Eliya nayali yaulonjile. Kwa vila Ahasiya nayali yalihela mwana, Yolamu nayali mndewa honhu ha heye kuli mwaka wa keli wa ulongozi wa Yeholamu, mwana wa Yehoshafati, mndewa wa Yuda.
2KI 1:18 Mbuli zinji zoyakolile mndewa Ahasiya, zeng'ha nazandichigwa kuli chitabu cha kukumbuchila kwa wandewa wa Isilaeli.
2KI 2:1 Mkulu Nguluwi loyawele habehi kumhola Eliya na kumhilika kilanga kwa chivuluvumbi, Eliya na Elisha nawali mnzila wolawa Giligali.
2KI 2:2 Eliya nakamlonjela Elisha, “Wikalise hano, Mkulu Nguluwi nakandajiza ndute Beteli.” Ila Elisha nakalonga, “Ndikomya, kota Mkulu Nguluwi vyoyalingikala na kota hegwe vyoulingikala, ndangilaha sikuleka.” Lelo, nawaluta hamwe mbaka Beteli.
2KI 2:3 Chilundo cha waloli wawele ako Beteli, nachiluta kwa Elisha na kumuuza, “Ndaze, kwanguvizela kota Mkulu Nguluwi komhola mkulu wa hegwe lehano?” Elisha nakawedichila, “Ena, ndanguvizela, ila mleche kulonga kuwala mbuli ayo.”
2KI 2:4 Hamba Eliya nakamlonjela Elisha, “Wikale hano, Mkulu Nguluwi nakandajiza ndute Yeliko.” Elisha nakedichila, “Ndangilaha kota Mkulu Nguluwi vyoyalingikala na kota hegwe vyoulingikala, sikuleka.” Ahyo nawaluta hamwe mbaka Yeliko.
2KI 2:5 Chilundo cha waloli chiwele ako Yeliko, nachiluta kwa Elisha na kumuuza, “Ndaze, kwanguvizela kota Mkulu Nguluwi komhola mkulu wa hegwe lehano?” Elisha nakawedichila, “Ena, ndanguvizela, ila mleche kulonga kuwala mbuli ayo.”
2KI 2:6 Hamba Eliya nakamlonjela Elisha, “Wikale hano, Mkulu Nguluwi nakandajiza ndute kuli lwanda lwa Yolodani.” Elisha nakedichila, “Ndangilaha kota Mkulu Nguluwi vyoyalingikala na kota hegwe vyoulingikala, sikuleka.” Ahyo nawaluta hamwe.
2KI 2:7 Waloli makumi gahano wawawinzile Eliya na Elisha kulawa Yeliko, nawema kutali na kuwalola Eliya na Elisha vyowawele woluta kuli lwanda lwa Yolodani.
2KI 2:8 Eliya nakavula ivalo lya heye, nakalibota na kugatowa mazi. Mazi nagebagula kuli honhu heli, kumoso na kudilo, Eliya na Elisha nawaloka kuli honhu hakalile.
2KI 2:9 Lowafichile kumwambu, Eliya nakamuuza Elisha, “Ndonjele, ndikuditile choni nding'hali kusigwa kulawa kwa hegwe?” Elisha nakamwidichila, “Ndangulanda kuhalila muhe kota woupegwe.”
2KI 2:10 Eliya nakedichila, “Nakulanda mbuli ing'ang'ale. Ila wone kombona mhela londiwa ndikusigwa kulawa kwa hegwe, kopegwa. Wone haiwa ahyo, huweza kupegwa.”
2KI 2:11 Lowawele wojenda hamwe na kulongasa, baho du naulawila mutuka wa chiluli na falasi wa chiluli, navilawila na kuwabagula, Eliya nakakwina na kuluta kilanga kuli chivuluvumbi.
2KI 2:12 Elisha nakayona mbuli ayo, nakatowa iyowe, “Mhaza wa heni! Mhaza wa heni! Mituka ja Isilaeli na wakwina falasi wa heye.” Lelo, Elisha hamuwene kahi Eliya. Hamba kwa masinzo Elisha nakebata mivalo ja heye nakajidadula kuli vihande vili.
2KI 2:13 Hamba nakalokota ikoti lya Eliya ligwile, nakahiluka na kwima hafungo ha lwanda lwa Yolodani.
2KI 2:14 Nakagatowa mazi kwa lila ikoti lya Eliya youza, “Kakohi lelo Mkulu Nguluwi, Nguluwi wa Eliya?” Elisha loyagatowile mazi, gala mazi nagebagula kumoso na kudilo, naye nakaloka.
2KI 2:15 Wala waloli makumi gahano kulawa Yeliko lowamuwene, nawalonga, “Muhe wa Eliya wa kwa Elisha.” Lelo nawaluta kumbochela, nawafugama na kinamiza mbaka hanyi hali heye.
2KI 2:16 Nawamlonjela, “Hetwe vitumagwa wa hegwe twanawo wanhu makumi gahano wawele na mong'ho. Wakundize walute kumpala mkulu wa hegwe. Hanji muhe wa Mkulu Nguluwi naumhola na kumuwika kuli chidunda chimwenga ama kuli ibindi limwenga.” Elisha nakedichila, “Hebu, mleche kuwalajiza.”
2KI 2:17 Ila nawalutilila kumlonjela mbaka nakona soni kuwalemela. Ahyo nakawalonjela, “Muwalajize.” Ahyo nawawalajiza wanhu makumi gahano, nawampala chila honhu kwa mazuwa gadatu, ila hawampatile.
2KI 2:18 Lowahiluche kwa Elisha, yawele nayali yochikala ako Yeliko, Elisha nakawauza, “Ndaze, siwalonjele mleche kuluta?”
2KI 2:19 Hamba wanhu wa muji wa Yeliko nawaluta kwa Elisha na kumlonjela, “Ulole mkulu wa hetwe, honhu hawele muji awu nauzenjigwa ndo hanojile kota vyoulingona, ila mazi gake ndo geha na isi yahela mboto.”
2KI 2:20 Elisha nakawalonjela, “Mngalile chisaye chinyale na muwiche mwino mgati mwake.” Ahyo nawamhilichila.
2KI 2:21 Hamba Elisha nakaluta kuli nzasa ya mazi na kuutoza awo mwino mgati mwake na kulonga, “Mkulu Nguluwi kangulonga hino, ‘Nandigadita mazi aga gawe ganojile. Hagoweza kuwambuza wanhu kubagama ne isi kuleka kuwa na mboto.’ ”
2KI 2:22 Mazi ago nagawa ganojile kulawa mhela wula, kwa kiwhana na ulonzi wa Elisha.
2KI 2:23 Kulawa ako Yeliko, Elisha nakaluta Beteli. Loyawele mnzila, wasongolo wamwenga nawalawa mujini nawaluka kumzomela wolonga, “Wuche hegwe uwele na chibuje! Wuche hegwe uwele na chibuje!”
2KI 2:24 Elisha nakagalamka, nakawalola na kuwapanjila kwa itagwa lya Mkulu Nguluwi. Hamba midubu mili midala najilawa kisolo na kuwadadula wasongolo makumi gane na weli hali hewo.
2KI 2:25 Elisha nakalutilila na majendo ga heye mbaka kuli chidunda cha Kalimeli na kulawa ako nakahiluka Samaliya.
2KI 3:1 Yeholamu, mwana wa Ahabu, nakawa mndewa wa Isilaeli kuli Samaliya, kuli mwaka wa kumi na nane wa ulongozi wa Yehoshafati, mndewa wa Yuda. Nakalongoza kwa miyaka kumi na mili.
2KI 3:2 Yeholamu nakadita gehile hali Mkulu Nguluwi, ila haiwele kota mhaza wa heye na mayake vyowaditile. Nakosa izengo lya Baali liwele nalizenjigwa na mhaza wa heye.
2KI 3:3 Ila halechile gehile kota mndewa Yeloboamu, mwana wa Nebati, yawele nakawambuza Waisilaeli kudita gehile.
2KI 3:4 Lelo Mesha, mndewa wa Moabu, nayali yodima ming'holo milume. Chila mwaka nayali yolavya kodi kwa mndewa wa Isilaeli ming'holo myana lachi imwe na sufu ya ming'holo milume lachi imwe.
2KI 3:5 Ila Ahabu loyabagame ako Isilaeli, mndewa wa Moabu nakambelenhuka mndewa wa Isilaeli.
2KI 3:6 Ahyo mhela awo mndewa Yeholamu nakoka kulawa Samaliya na kukungajiza wamizi weng'ha wa Isilaeli, yawele goya kuluta kitowa ngondo.
2KI 3:7 Nakahilika kahi usenga awu kwa Yehoshafati, mndewa wa Yuda, “Mndewa wa Moabu nakambelenhuka heni. Ndaze, koluta hamwe na heni kitowa na Wamoabu?” Mndewa Yehoshafati nakedichila, “Ndoluta hamwe na hegwe. Heni ndo kota hegwe na wanhu wa heni ndo kota wanhu wa hegwe na falasi wa heni ndo kota falasi wa hegwe.”
2KI 3:8 Yehoshafati nakauza, “Ndaze, towatowa kwa kukolela nzila yachi?” Yeholamu nakedichila, “Kwa kukolela kuli chiwala cha Edomu.”
2KI 3:9 Ahyo Yeholamu, mndewa wa Isilaeli nakoka hamwe na mndewa wa Yuda na mndewa wa Edomu. Lowawele kuli majendo kwa mhela wa mazuwa saba, wamizi nawesilwa mazi kwa chiwalo cha hewo na migongolo ja hewo.
2KI 3:10 Aho mndewa wa Isilaeli nakauza, “Ndaze, Mkulu Nguluwi nakatukungajiza tweng'ha wandewa wadatu leka yatuwiche mmoko mwa mndewa wa Moabu?”
2KI 3:11 Mndewa Yehoshafati nakauza, “Ndaze, haduhu mloli yoneche wa Mkulu Nguluwi hano, leka tumuuze Mkulu Nguluwi kwa kukolela heye?” Chilongozi yumwe wa Yeholamu, mndewa wa Isilaeli, nakedichila, “Elisha, mwana wa Shafati, ka hano. Nayali chitumagwa wa Eliya.”
2KI 3:12 Yehoshafati nakalonga, “Ayo ndo mloli wa kukomya.” Hamba wandewa awo wadatu, wawele ndo mndewa wa Isilaeli na Yehoshafati na mndewa wa Edomu, nawaluta kwa Elisha ako Isilaeli.
2KI 3:13 Elisha nakamuuza mndewa wa Isilaeli, “Ndina choni na hegwe? Ulute kwa waloli wa mhaza wa hegwe na wa mayako.” Mndewa wa Isilaeli nakedichila, “Hebu, kwa vila Mkulu Nguluwi ndo yatuchemile hamwe hetwe wandewa wadatu leka yatuwiche mmoko mwa Wamoabu.”
2KI 3:14 Elisha nakalonga, “Ndangukomya, kota Mkulu Nguluwi Yawele na Mong'ho vyoyalingikala na yondilingumkolela mijito, wone haiwele kwa lutogo lombele nalo kwa goloko wa hegwe Yehoshafati, mndewa wa Yuda, hanji ndahalechile kijesa kuwala hegwe.
2KI 3:15 Ila lelo ngalile yalingutowa ching'weleng'wele.” Nawamigalila yalingutowa ching'weleng'wele. Yula munhu vyoyawele yotowa ching'weleng'wele, mong'ho wa Mkulu Nguluwi naumuyila Elisha,
2KI 3:16 nakalonga, “Mkulu Nguluwi kangulonga hino, ‘Mbawe misimo chila honhu hali ibindi,
2KI 3:17 kwa vila Mkulu Nguluwi kangulonga kota hamuweza kuyona mbeho ne nhonya, ila ibindi ali lyomema mazi, namwe monwa hamwe na misenga ja hemwe na migongolo ja hemwe jinji.’
2KI 3:18 Ila kwa Mkulu Nguluwi mbuli ayi ndo ndodo hela na kowapa ludali lwa kuwasumya wanhu wa Moabu.
2KI 3:19 Mousumya chila muji uwele na ngome na chila muji ukulu. Molitema chila igodi lilingulela mafuza na kudinya nzasa zeng'ha za mazi na kuwifya chila mgunda unojile kwa kuumemeza maganga.”
2KI 3:20 Mitondo lufuku, habehi na mhela wa kulavya nhambiko, mazi nagachililika kulawa ubanzi wa Edomu na kumema hali isi yeng'ha.
2KI 3:21 Wamoabu lowahuliche kota wala wandewa wadatu nawoya kitowa na hewo, wanhu weng'ha wasongolo na wasekulu, wawele na mong'ho wa kuhola vinhu vya kitowela ngondo, nawachemigwa na kuwichigwa goya kuli mbaka kwa chiwalo cha kitowa ngondo.
2KI 3:22 Lowenuche lufuku, isanya nalyali lipulika mchanya mwa ago mazi. Wamoabu wawele kuli ubanzi wa keli nawagona mazi madung'hu kota danda.
2KI 3:23 Wamoabu nawalonga, “Yila ndo danda. Wala wandewa wowa nawetowa na kidumula singo hewo kwa hewo. Lelo tuche kuhola vinhu vya hewo.”
2KI 3:24 Ila Wamoabu lowafichile kuli kambi ya Isilaeli, wanhu wa Isilaeli nawawatowa Wamoabu mbaka nawabilima. Waisilaeli nawaivaba isi na kuwadumula singo Wamoabu.
2KI 3:25 Nawajiwifya miji na chila munhu nakatoza iganga kuli chila mgunda unojile mbaka migunda najigubikwa kwa maganga. Nawazidinya nzasa zeng'ha na kulitema chila igodi lilingulela mafuza. Kili-haleseti ndo muji uliyeka uponile na lukanzi lwake. Ila wanhu wawele na mhembeyo nawauzunguluta na kuutowa kota vyowajiditile miji jiyage.
2KI 3:26 Mndewa wa Moabu loyonile kota ngondo nayali ing'ang'ale, nakawahola wanhu miya saba wawele na mipanga leka wafyele hali wamizi na kumfichila mndewa wa Edomu, ila nawalemwela.
2KI 3:27 Ahyo nakamhola mwanage, mlelwa wa heye wa mwaluko, yawele yahawele mndewa honhu ha heye, nakamlavya leka yawe nhambiko ya kulakazwa mchanya mwa lukanzi lwa muji. Nakwali na ng'halazi ng'hulu kuwala Isilaeli. Ahyo Waisilaeli nawauleka muji awo na kuhiluka kuli isi ya hewo.
2KI 4:1 Zuwa limwe, mdala wa yumwe wa waloli wa Mkulu Nguluwi nakamlonjela Elisha, “Chitumagwa wa hegwe, mlume wa heni nakabagama. Nagwe kwanguvizela kota nayali yomdumba Mkulu Nguluwi, ila yula yalingumdai kanguya kuwahola wanangu weli leka wawe wapogozi wa heye.”
2KI 4:2 Elisha nakamuuza “Lelo ndikutanze choni? Ndonjele, kuna choni hegwe mgati mwa ng'handa ya hegwe?” Mdala ayo nakedichila, “Heni chitumagwa wa hegwe, ndahela chinhu choneche ila mafuta kuli ibuli lido.”
2KI 4:3 Elisha nakamlonjela, “Ulute kwa wayago womlingikalasa habehi ukalande mibuli jilihela chinhu mgati. Ulande mibuli minji.
2KI 4:4 Hamba winjile mgati na kihindila lwizi hegwe na wanago na waluche kujela mafuta kuli chila ibuli. Chila ibuli holimema, uliwiche hafungo.”
2KI 4:5 Yula mdala yafililwe na mlume nakaluta na kihindila mgati, hamwe na wanage. Wana nawamigalila mayawo mibuli ja kuwichila mafuta, naye nakalutilila kujela mafuta.
2KI 4:6 Mibuli jeng'ha lojimemile mafuta, nakamlonjela mwanage, “Ngalile ibuli liyage.” Mwanage nakedichila, “Haduhu ibuli linji lisigale.” Aho ndo mafuta nagaleka kuchililika.
2KI 4:7 Yula mdala nakaluta kumlonjela yula munhu wa Nguluwi, Elisha, naye Elisha nakamlonjela, “Ulute ukaguze ago mafuta na kumhilusila sendi yula yalingukudai. Hegwe na wanago moweza kikala kwa acho chasi chisigale.”
2KI 4:8 Zuwa limwe Elisha nakaluta Shunemu. Ako nakwali na mdala yumwe yawele na lufufu. Mdala ayo nakamdedeza ng'hatu Elisha yalute kulya chilyo. Ahyo, chila Elisha loyakolile hala, nayali yokwinjila amo leka yalye.
2KI 4:9 Mdala ayo nakamlonjela mlume wa heye, “Ndanguvizela kota ayu munhu yalinguya kwa hetwe chila mhela ndo yelile wa Nguluwi.
2KI 4:10 Ugongomanye chihengo chidodo mchanya mwa chinduwiko leka tuwiche chinhanda na chisaga na chigoda na chenje mgati mwa chihengo acho, kwa chiwalo cha munhu ayo. Hamba heye koweza kikala amo chila mhela hoyokuya kwa hetwe.”
2KI 4:11 Zuwa limwe Elisha loyafichile, nakakwina kuli chihengo cha heye na kuwasa amo.
2KI 4:12 Nakamlonjela chitumagwa wa heye, Gehasi, “Mcheme ayo mdala, Mshunami.” Ayo chitumagwa nakamchema yula mdala, naye mdala nakaluta na kwima hali heye.
2KI 4:13 Elisha nakamlonjela Gehasi, “Mlonjele ayu mdala, ‘Nakugazika ng'hatu kwa chiwalo cha hetwe. Lelo kwangugana tukuditile choni? Ndaze, twanguweza kulongasa na mndewa ama chilongozi wa wamizi honhu ha hegwe?’ ” Mdala nakedichila, “Ndangikala kwa heni hali wanhu wa heni.”
2KI 4:14 Hamba, Elisha nakamlonjela chitumagwa wa heye, “Tumditile choni lelo?” Gehasi nakedichila “Ndangukomya, kahela mwana na mlume wa heye nakalala.”
2KI 4:15 Elisha nakamlonjela, “Mcheme ayo mdala.” Ahyo nakamchema, naye nakaluta na kwima hali lwizi.
2KI 4:16 Elisha nakamlonjela yula mdala, “Mwaka ulinguya mhela kota awu, kowa na mwana mmoko mwa hegwe.” Yula mdala nakalonga, “Hebu, mkulu wa heni. Uleche kumhada chitumagwa wa hegwe, gwa munhu wa Nguluwi!”
2KI 4:17 Ila yula mdala nakawa na himila na kuponda mwana kuli mwaka uwinzile na mhela wuwula kota vyoyamlonjele Elisha.
2KI 4:18 Mwana ayo nakakula. Zuwa limwe mwana ayo nakaluta kwa mhaza wa heye, yawele nayali hamwe na wanhu walingubeta,
2KI 4:19 nakamlonjela mhaza wa heye, “Mutwi wa heni, mutwi wa heni wangunhama.” Mhaza wa heye nakamlonjela yumwe wa vitumagwa, “Mpape na umhiliche kwa mayake.”
2KI 4:20 Yula chitumagwa nakamhilika yula mwana kwa mayake, mwana ayo nakekalisa kuli mahaza ga mayake mbaka nemisi, hamba nakabagama.
2KI 4:21 Mayake nakamkwiniza na kumuwasiliza mchanya mwa chinhanda cha yula munhu wa Nguluwi, hamba nakahinda lwizi, nakalawa mgati.
2KI 4:22 Nakamchema mlume wa heye na kumlonjela, “Dedede mlajize yumwe wa vitumagwa hamwe na idogowi leka ndute himahima kwa munhu wa Nguluwi na kuhiluka.”
2KI 4:23 Mlume wa heye nakamuuza “Lekachoni ulute lehano? Lehano haliwele zuwa lya mnvina ya kulawa kwa nyelezi ne zuwa lya kwesela.” Mdala nakedichila, “Uleche kuwa na lunhwinhwi.”
2KI 4:24 Yula mdala nakaliwika goya idogowi kwa chiwalo cha majendo na kumlonjela chitumagwa wa heye, “Lilongoze alyo idogowi. Uleche kujenda mholemhole mbaka ndikulonjele.”
2KI 4:25 Ahyo nakaluta na kumfika munhu wa Nguluwi ako kuli chidunda cha Kalimeli. Loyamonile kwa kutali, ayo munhu wa Nguluwi nakamlonjela Gehasi, chitumagwa wa heye, “Ulole, ndangumona Mshunami kanguya!
2KI 4:26 Ubilime himahima na kumbochela na umuuze, ‘Kulamka? Mlume wa hegwe kalamka? Mwanago ka mkomu?’ ” Naye Mshunami nakamwidichila “Chila chinhu cha goya.”
2KI 4:27 Loyamfichile munhu wa Nguluwi ako kuchidunda, ayo mdala nakebata magulu ga munhu wa Nguluwi. Gehasi nakaluta leka yamuse, ila munhu wa Nguluwi nakamlonjela, “Mleche. Kana usungu ng'hatu na Mkulu Nguluwi handonjele kuwala mbuli ayi.”
2KI 4:28 Ahyo ayo mdala nakalonga, “Mkulu wa heni, nandikulanda mwana? Ndaze, sikulonjele kota uleche kumha heni kitumbila?”
2KI 4:29 Elisha nakamlonjela Gehasi, “Uhole ng'hweku ya heni wuche. Uleche kwima mnzila kumlamsa munhu yoneche, wone munhu yoneche yakulamse mnzila, uleche kumwidichila. Ulute himahima mbaka mng'handa na kuwika ng'hweku ya heni mchanya mwa mwana.”
2KI 4:30 Ila yula mdala nakamlonjela Elisha, “Ndikomya, kota Mkulu Nguluwi vyoyalingikala na kota hegwe vyoulingikala, sikuleka.” Ahyo Elisha nakenuka na kuluta hamwe na heye.
2KI 4:31 Gehasi nakalongola na loyafichile nakawika ng'hweku mchanya mwa kumeho kwa mwana, ila hakuwele na lizi ne kwidichila koneche. Ahyo Gehasi nakahiluka kiting'hana na Elisha na kumlonjela, “Mwana henuche.”
2KI 4:32 Elisha loyafichile kuli yila ng'handa, mwana nayali yawasile kuli chinhanda cha heye yawele yabagame.
2KI 4:33 Nakenjila kuli chihengo cha heye na kihindila hamwe na yula mwana na kumlanda Mkulu Nguluwi.
2KI 4:34 Hamba nakakwina kuli chila chinhanda na kuwasa mchanya mwa yula mwana. Mlomo wa heye mchanya mwa mlomo wa mwana na meho ga heye mchanya mwa meho ga mwana na moko gake mchanya mwa moko ga mwana. Loyegolole mchanya mwake, lukuli lwa mwana naluwa na ivuche.
2KI 4:35 Elisha nakenuka na kwaluka kujendajenda kuli chihengo acho, hamba nakahiluka kahi na kigolola kahi mchanya mwa lukulu lwa yula mwana. Mwana nakasamula mala saba na kugubula meho.
2KI 4:36 Elisha nakamchema Gehasi na kumlonjela, “Mcheme ayo Mshunami.” Naye chitumagwa nakadita ahyo. Yula Mshunami loyafichile, Elisha nakamlonjela, “Mhole mwanago.”
2KI 4:37 Yula mdala Mshunami nakenjila kuli chila chihengo, naketoza hali magulu ga Elisha na kufugama mbaka hanyi. Hamba yula mdala nakamhola mwanage na kulawa mgati.
2KI 4:38 Elisha nakahiluka Giligali, mhela awo nakwali na lufemba kuli isi ayo. Zuwa limwe, chilundo cha waloli vyochiwele hali heye, nakamlonjela chitumagwa wa heye, “Uwiche chiya chikulu mchiluli, uwatelechele waloli.”
2KI 4:39 Yumwe wa hewo nakaluta kumgunda kubawa mboga, nakapata vinhu kota mayungu. Nakabawa vinhu avyo na kumemeza nguwo ya heye yaibinile. Loyahiluche, nakavitemanga vila vinhu na kuviwika mchiya hanga haduhu munhu yavizele vinhu avyo.
2KI 4:40 Chilyo nachigaligwa kwa wanhu, ila lowaluche kulya, nawalila wolonga, “Gwa Elisha, chilyo achi chotukopola.” Hawawezile kulya.
2KI 4:41 Elisha nakalonga, “Mngalile utimbo.” Nakauwika mchiya na kulonga, “Wagawile wanhu leka walye.” Wanhu nawalya na hakuwele na chinhu choneche chihile mchiya.
2KI 4:42 Mhela wunji nakoya munhu yumwe kulawa Baali-shalisha, yomigalila mibumunda makumi meli ja shayili ya nyhule ya mwaluko, hamwe na nganda za ngano inyale. Elisha nakalonga, “Wape wanhu leka walye.”
2KI 4:43 Chitumagwa wa heye nakalonga, “Hambe ndiwape kwa vila hachiweza kuhega kwa wanhu miya imwe.” Elisha nakedichila, “Uwape wanhu leka walye. Mkulu Nguluwi kangulonga hino, ‘Wolya na kiguta mbaka wolechelela.’ ”
2KI 4:44 Chitumagwa nakawawichila goya chilyo, wanhu nawalya na mibumunda jiyage nawajileka, kwa kiwhana na ulonzi wa Mkulu Nguluwi.
2KI 5:1 Naamani nayali chilongozi wa wamizi wa isi ya Alamu. Nayali munhu yalingutogoligwa na kuhulichizwa ng'hatu hali mkulu wa heye, yawele ndo mndewa wa Alamu. Kwa kukolela heye, Mkulu Nguluwi nakaidita isi ya Alamu isumye. Nayali mwamizi yazidahe, ila nayali na utamwa wa ngozi.
2KI 5:2 Kuli kitowa ngondo na Isilaeli, Waalamu nawali wamholile mhinza yumwe kulawa Isilaeli, naye nayali yomkolela mijito mche wa Naamani.
2KI 5:3 Zuwa limwe yula mhinza nakamlonjela mche wa Naamani, “Wone mkulu wa heni yahamonile yula mloli yawele Samaliya! Yahamusile utamwa wa heye.”
2KI 5:4 Naamani loyahuliche mbuli ayo, nakaluta kumlonjela mkulu wa heye choyalonjile yula mhinza kulawa Isilaeli.
2KI 5:5 Mndewa wa Alamu nakamwidichila, “Ndikomya, ulute. Ndolajiza baluwa kwa mndewa wa Isilaeli.” Aho Naamani nakoka kuno yawele yaholile vihande elufu makumi gadatu (30,000) vya sendi na vihande elufu sita vya zahabu na mivalo kumi ja mnvina.
2KI 5:6 Baluwa iwele nakahilichilwa mndewa wa Isilaeli nayandichigwa hino, “Hamwe na baluwa ayi ndangumlajiza kwa hegwe Naamani, chitumagwa wa heni, leka umusile utamwa wa heye.”
2KI 5:7 Mndewa wa Isilaeli loyasindile kusoma baluwa ayo, nakadadula mivalo ja heye na kulonga, “Lekachoni mndewa wa Alamu kangugana ndimusile utamwa ayu munhu? Kangijesa heni nda Nguluwi mbele na ludali lwa kukopola ama kuzilipula? Munhu ayo kangugana kwaluchiza ivuche hali heni na heye.”
2KI 5:8 Elisha, munhu wa Nguluwi, loyahuliche kota mndewa wa Isilaeli nakadadula mivalo ja heye, nakalajiza usenga awu kwa mndewa, “Lekachoni nakudadula mivalo ja hegwe? Mlonjele ayo munhu yoye kwa heni, heye kovizela kota kabaho mloli kuli Isilaeli.”
2KI 5:9 Ahyo Naamani nakaluta kuno yawele na falasi wa heye na mituka ja heye na kwima hali lwizi lwa ng'handa ya Elisha.
2KI 5:10 Elisha nakamlonjela chitumagwa wa heye yamlonjele, “Ulute ukoje mala saba kuli lwanda lwa Yolodani, nagwe kopona ng'hatu.”
2KI 5:11 Naamani nakalawa hala yawele yazudile, nakalonga, “Ndikomya, nandali ndijesa kota heye kolawa mgati na kwima hanze na kulichema itagwa lya Mkulu Nguluwi, Nguluwi wa heye na kuwika moko mchanya mwa honhu halingutamika leka yambusile utamwa.
2KI 5:12 Ndaze, nzanda za Abana na Falipali za ako Damasiko, haziwele zinojile kusinda nzanda zeng'ha za Isilaeli?” Lelo nakagalamka na kuka kuno yawele yazudile lukami.
2KI 5:13 Vitumagwa wa Naamani nawamlonjela, “Mkulu wa hetwe, wone mloli yahakulonjele udite mbuli ng'hulu wahalechile kudita? Lelo nakakulonjela, ‘Woje leka welizwe.’ ”
2KI 5:14 Ahyo Naamani nakadulika kuli lwanda lwa Yolodani na kuzibila mala saba, kota vyoyalonjelwe na Elisha, munhu wa Nguluwi. Ngozi ya lukuli lwa heye nayelizwa. Nayali nzinzili na iwele na mong'ho kota ya msongolo.
2KI 5:15 Hamba Naamani na vitumagwa wa heye weng'ha nawahiluka kwa yula munhu wa Nguluwi. Nakema hali heye na kulonga, “Lelo ndanguvizela kota haduhu Nguluwi kuli isi yeng'ha, ila kuli Isilaeli. Lelo dedede ubochele ndolendole kulawa kwa chitumagwa wa hegwe.”
2KI 5:16 Elisha nakedichila, “Ndangilaha kwa Mkulu Nguluwi yawele mkomu na yondilingumkolela mijito, sibochela ne chinhu choneche.” Naamani nakamdedeza lukami, ila Elisha nakalema.
2KI 5:17 Naamani nakalonga, “Wone hubochela ndolendole za heni, lelo dedede umhe heni, chitumagwa wa hegwe, misanga jiwele joweza kupapigwa na migongolo mili, kwa vila silavya kahi nhambiko za kulakazwa ne nhambiko kwa milungu jinji, ila kwa Mkulu Nguluwi.
2KI 5:18 Naye Mkulu Nguluwi yandechele heni chitumagwa wa heye londichilongoza na mndewa wa heni kuluta kufugamila kuli ng'handa ya Limoni, mlungu wa Alamu. Ndangulanda Mkulu Nguluwi yambusile gehile.”
2KI 5:19 Elisha nakamlonjela, “Ulute kwa kikala goya.” Loyajendile na kuluta kutali hado,
2KI 5:20 Gehasi, chitumagwa wa Elisha, munhu wa Nguluwi, nakelonjela yuye, “Ulole, mkulu wa heni nakamlechela Naamani, Mwalamu, yalute ne kubochela choneche choyamgalile. Ndikomya, kota Mkulu Nguluwi vyoyalingikala, ndomuwinza leka yamhe heni chinhu kulawa kwa heye.”
2KI 5:21 Ahyo Gehasi nakadita himahima kumuwinza Naamani. Naamani loyamonile Gehasi yobilima kuluta koyawele heye, nakadulika kulawa kuli mutuka wa heye na kuluta kumbochela. Lelo, nakamuuza, “Ndaze, mbuli zeng'ha za goya?”
2KI 5:22 Gehasi nakedichila, “Mbuli zeng'ha za goya. Mkulu wa heni nakandajiza ndikulonjele, ‘Wasongolo weli wa chilundo cha waloli nawoya kwa heni sambi kulawa kuli vidunda vya Efulaimu. Dedede, uwape vihande elufu zidatu vya sendi na mivalo mili.’ ”
2KI 5:23 Naamani nakalonga, “Ndikomya, uhole vihande elufu sita vya sendi.” Nakamdedeza Gehasi yabochele, hamba nakakoweleza mhomholo mbili za sendi, hamwe na mivalo mili. Nakawapa vitumagwa wa heye weli azo mhomholo, nakawalajiza wamuwinze Gehasi.
2KI 5:24 Gehasi loyafichile kuli chidunda chiwele Elisha nayali yochikala, nakavihola vila vinhu na kuvivisa kuli ng'handa, hamba wala vitumagwa nawahiluka kowalawile.
2KI 5:25 Hamba Gehasi nakaluta mgati na kwima hali Elisha, mkulu wa heye. Elisha nakamuuza, “Nawali kohi Gehasi?” Gehasi nakedichila, “Silutile honhu honeche.”
2KI 5:26 Ila Elisha nakamlonjela, “Ndaze, muhe wa heni hauwele hamwe na hegwe mhela yula munhu loyaduliche kulawa kuli mutuka wa heye leka yakubochele? Ndaze, awu ndo mhela wa kubochela sendi ama mivalo ama migunda ja mizeituni ama ja mizabibu ama ming'holo ama misenga ama vitumagwa walume ama wadala?
2KI 5:27 Ahyo utamwa wa ngozi wa Naamani wowa kwa hegwe na walelwa wa hegwe mazuwa gose.” Hamba Gehasi nakoka hali Elisha kuno yawele na utamwa wa ngozi na ngozi ya heye nayali nzelu kota sufi.
2KI 6:1 Zuwa limwe chilundo cha waloli nachimlonjela Elisha, “Honhu hano hotulingikala na hegwe ndo hadodo ng'hatu.
2KI 6:2 Tulute Yolodani, honhu hawele chila yumwe wa hetwe koweza kutema migodi na kuzenga honhu ha kikala.” Elisha nakawedichila, “Mlute.”
2KI 6:3 Hamba yumwe wa hewo nakamuuza Elisha, “Ndaze, huweza kulutasa na hetwe vitumagwa wa hegwe?” Elisha nakedichila “Ndoluta hamwe na hemwe.”
2KI 6:4 Ahyo nakaluta hamwe na hewo. Lowafichile kuli lwanda lwa Yolodani, nawaluka kutema migodi.
2KI 6:5 Yumwe wa hewo loyawele yotema igodi, iwago nalisomoka na kwinjila mmazi. Nakalila yolonga, “Gwa mkulu wa heni, iwago ali natwali twazichigwe!”
2KI 6:6 Elisha nakamuuza, “Naligwila kohi?” Munhu ayo loyamlajile hala honhu, Elisha nakatema ngoda nakaitoza hali hala honhu na lila iwago nalyelela.
2KI 6:7 Elisha nakamlonjela, “Lihole.” Yula munhu nakagolola moko wa heye nakalihola lila iwago.
2KI 6:8 Mhela awo mndewa wa Waalamu nayali yochitowa na Isilaeli. Mndewa wa Alamu nakalongasa na wang'hangala wa heye na kuhagula honhu ha kuwika kambi ya heye.
2KI 6:9 Ila Elisha, munhu wa Nguluwi nakalajiza usenga kwa mndewa wa Isilaeli, “Wilolele leka uleche kukola honhu hala, kwa vila Waalamu wanguluta ako.”
2KI 6:10 Ahyo mndewa wa Isilaeli nakalajiza usenga wa kilolela honhu hala hoyalonjelwe na munhu wa Nguluwi. Elisha nakamkanya mndewa mala nyinji kota wanhu welolele hali honhu kota aho.
2KI 6:11 Mbuli ayo naimdeuza ng'hatu mndewa wa Alamu. Nakawachema wang'hangala wa heye, nakawauza, “Whaani hali hemwe yawele ubanzi wa mndewa wa Isilaeli?”
2KI 6:12 Yumwe wa wang'hangala wa heye nakalonga, “Mndewa, mkulu wa heni, haduhu yoneche hali hetwe yalingukubelenhuka. Ila Elisha, yula mloli yawele Isilaeli, kangumlonjelaga mndewa wa Isilaeli mbaka wula ulonzi ulingulonga kuli chihengo cha hegwe cha kuwasa.”
2KI 6:13 Mndewa nakalajiza yolonga, “Mlute mkapugajize leka mvizele honhu hoyawele, leka ndajize wanhu kumibata.” Lelo, nawadita ahyo na kumlonjela mndewa kota Elisha nayali Dotani.
2KI 6:14 Ahyo mndewa nakahilika ako chilundo chikulu cha wamizi hamwe na falasi na mituka ja ngondo. Chilundo acho cha wamizi nachifika ako mhela wa nechilo na kuuzunguluta muji.
2KI 6:15 Hamitondo lufuku, chitumagwa wa munhu wa Nguluwi loyenuche na kulawa mgati mwa ng'handa, wamizi hamwe na falasi na mituka ja ngondo, nawali wauzungulute muji. Chitumagwa wa munhu wa Nguluwi nakalonga, “Tochona, mkulu wa heni. Todita choni?”
2KI 6:16 Elisha nakedichila, “Uleche kudumba, kwa vila wamizi wawele hamwe na hetwe ndo wenji kusinda wamizi wawele hamwe na hewo.”
2KI 6:17 Hamba Elisha nakalanda, “Gwa Mkulu Nguluwi, ugubule meho ga chitumagwa ayo leka yalole.” Mkulu Nguluwi nakagubula meho ga yula chitumagwa, nakona vidunda navimema falasi na mituka ja chiluli, vyeng'ha avyo navimzunguluta Elisha.
2KI 6:18 Mhela Waalamu lowaduliche kuluta kwa heye, Elisha nakamlanda Mkulu Nguluwi yolonga, “Uwadite wanhu awa wawe hambe walole.” Lelo Nguluwi nakawadita wawe hambe walole kota Elisha vyoyalandile.
2KI 6:19 Elisha nakawalonjela, “Ayi haiwele nzila yomlinguigana na awu hauwele awo muji. Mmbinze, nani ndowahilika kwa ayo munhu yomlingumpala.” Naye nakawahilika Samaliya.
2KI 6:20 Lowenjile kuli muji, Elisha nakalanda yolonga, “Gwa Mkulu Nguluwi, ugubule meho ga wanhu awa leka walole.” Mkulu Nguluwi nakagubula meho ga hewo. Nawefika wawele hagati ha muji wa Samaliya.
2KI 6:21 Mndewa wa Isilaeli loyawawene Waalamu, nakamuuza Elisha, “Mkulu wa heni, ndaze ndiwakopole?”
2KI 6:22 Elisha nakedichila, “Hebu, uleche kuwakopola. Wanhu wano nakuwahola kwa ipanga lya hegwe na upinde wa hegwe. Wape chilyo na mazi leka walye na kunwa leka wahiluche kwa mkulu wa hewo.”
2KI 6:23 Lelo mndewa wa Isilaeli nakawaditila mnvina ng'hulu. Lowasindile kulya na kunwa nakawalaga, nawo nawahiluka kwa mkulu wa hewo. Ahyo wamizi kulawa Alamu nawaleka kuivaba isi ya Isilaeli.
2KI 6:24 Hamba Beni-hadadi, mndewa wa Alamu, nakawawika goya wamizi wa heye weng'ha na kuluta kuuzunguluta muji wa Samaliya.
2KI 6:25 Muji wa Samaliya nauzungulutwa kwa mhela winji, ahyo nakwali na lufemba kuli muji awo mbaka mutwi wa idogowi nawali uguzigwa kwa migwala makumi gadatu ga sendi na chijemo cha midohe ja ng'hunda najiguzigwa kwa migwala jihano ja sendi.
2KI 6:26 Zuwa limwe mndewa wa Isilaeli loyawele yojenda mchanya mwa lukanzi lwa muji, nakamhulika mdala yumwe yomlilila, “Mkulu wa heni mndewa, unhanze.”
2KI 6:27 Mndewa nakamwidichila, “Wone Mkulu Nguluwi hambe yakutanze, ndokupa utanzi kulawa kohi? Honhu ha kupululila nyhule na honhu ha kukamila divai hahela chinhu.”
2KI 6:28 Hamba nakamuuza, “Hana choni?” Yula mdala nakamlonjela, “Ayu mdala nakandonjela, ‘Mlavye mwana wa hegwe leka tumulye lehano na mitondo tomulya wa heni.’
2KI 6:29 Natumteleka mwana wa heni natumulya. Zuwa liwinzile nandimlonjela, ‘Mlavye mwanago leka tumulye.’ Ila nayali yamvisile.”
2KI 6:30 Mndewa loyahuliche ulonzi wa yula mdala, nakadadula mivalo ja heye. Mndewa loyawele yolutilila kujenda mchanya mwa lukanzi wanhu wawele habehi na lukanzi nawamona mndewa, mgati nayali yavalile mivalo ja igunila kwa masinzo.
2KI 6:31 Mndewa nakalonga, “Nguluwi yanditile kwa kung'hang'hala na mzidi, wone mutwi wa Elisha, mwana wa Shafati wosigala mchanya mwa mayega ga heye lehano!”
2KI 6:32 Ahyo nakalajiza msenga kuluta kumigala Elisha. Mhela awo Elisha nayali yekalise mgati mwa ng'handa ya heye, yawele hamwe na wasekulu. Yula msenga yalajizwe na mndewa loyawele yang'hali kufika, Elisha nakawalonjela wala wasekulu, “Yula yalingukopola nakalajiza munhu yoye yandumule mutwi. Hoyofika hano, mhinde lwizi, mleche kukunda yenjile. Mkulu wa heye kahi kangumuwinza kumbele.”
2KI 6:33 Elisha loyawele yang'hali yolutilila kuwalonjela wala wasekulu, yula msenga nakafika kwa Elisha na kulonga, “Mndewa nakalonga kota kubagama aku kwangulawa kwa Mkulu Nguluwi. Lekachoni ndutilile kuubeteza utanzi wa heye?”
2KI 7:1 Elisha nakamwidichila, “Uhulichize ulonzi wa Mkulu Nguluwi. Mkulu Nguluwi kangulonga hino, ‘Mitondo mhela kota awu, kilo zidatu za utimbo unojile ama kilo sita za shayili vyoguzigwa kwa igwala limwe lya sendi kuli lwizi lwa Samaliya.’ ”
2KI 7:2 Mng'hangala yumwe wa mndewa nakamlonjela Elisha, “Ulole, hanga Mkulu Nguluwi yuye kogubula mitubuli ja kilanga, ndaze, mbuli ayi yoditigwa?” Elisha nakamwidichila, “Kolola kwa meho gako, ila hegwe hulya.”
2KI 7:3 Nakwali na wanhu wane wawele na utamwa wa ngozi kuli lwizi lwa muji wa Samaliya. Wanhu awo nawelonjela, “Lekachoni tikale hano mbaka tubagame?
2KI 7:4 Wone twinjile kuli muji tobagama kwa lufemba. Ahyo tulute kuli kambi ya Waalamu, hanji wotuleka ama wotukopola.”
2KI 7:5 Ahyo mhela wa matinazo jiza vyolyaluche, nawaluta kuli kambi ya Waalamu. Lowafichile kuli mwaluko wa kambi, nakwali haduhu munhu,
2KI 7:6 kwa vila Mkulu Nguluwi nakachidita chilundo cha wamizi wa Waalamu chihuliche lizi kota lya mituka ja ngondo na falasi na chilundo cha wamizi wenji, mbaka nawelonjela, “Ulole, mndewa wa Isilaeli nakawapa sendi mndewa wa Wahiti na mndewa wa Wamisili leka wawe hamwe na heye kuli kututowa.”
2KI 7:7 Ahyo nawoka kwa kubilima mhela wa jiza lya matinazo na kuleka mihema ja hewo na falasi wa hewo na midogowi ja hewo. Nawabilima leka kulohola ukomu wa hewo na kuleka chila chinhu mgati mwa kambi.
2KI 7:8 Wala wanhu wawele na utamwa wa ngozi lowafichile kuli mwaluko wa kambi, nawenjila kuli ihema limwe hali jila mihema. Nawalya na kunwa na kuhola sendi na zahabu na nguwo, nawaluta kuvivisa. Nawahiluka na kwinjila kuli ihema linji na kuhola vinhu vimwenga kuli ihema alyo na kuvivisa kahi.
2KI 7:9 Hamba nawelonjela, “Mbuli ayi yotulingudita haiwele inojile. Ali ndo zuwa lya mbuli inojile, natwe twangunyamalila. Wone tobeteza mbaka hokubwemwenzuka, tozapigwa. Tuche kuli ng'handa ya mndewa leka tuhiliche usenga awu.”
2KI 7:10 Ahyo, nawaluta mujini na kuwachema wamizi wa lwizi, nawawalonjela, “Natuluta kuli kambi ya Waalamu, ila hakuwele na munhu ako ne lizi lya munhu yoneche ila falasi na midogowi jiwele najikowelezwa kuli mihema jilechigwe kota vyojiwele.”
2KI 7:11 Wamizi wa lwizi lwa muji nawawikula kuwala mbuli yila na usenga nauhilikwa mgati mwa ng'handa ya chiundewa.
2KI 7:12 Mndewa nakenuka nechilo yila na kuwalonjela wang'hangala wa heye, “Ndangugazela majesa ga Waalamu. Hewo wanguvizela hetwe tuna lufemba hano mujini, lelo nawaileka kambi ya hewo na kuluta kivisa leka hotuluta kupala chilyo, watibate tweng'ha kuno tuwele wakomu na kuuhola muji.”
2KI 7:13 Yumwe wa wang'hangala wa heye nakalonga, “Walajize wanhu wachefu wakawahole falasi wahano hali wala falasi wasigale kuli muji, kwa vila kuduma kwa hewo kowa kota kwa Waisilaeli weng'ha wawele hano. Wowa kota Waisilaeli wano walingubeteza kubagama. Ahyo walajize leka wavizele nakulawila choni.”
2KI 7:14 Lelo nawahagula mituka mili ja ngondo hamwe na falasi wake, mndewa nakawalajiza wawawinze wamizi wa Waalamu. Nakawalajiza walingwendesa falasi yolonga, “Mlute leka mkalole nachilawila choni.”
2KI 7:15 Nawawawinza mbaka kuli lwanda lwa Yolodani, nawafika nzila yeng'ha nayenela nguwo na vinhu vya Waalamu viwele nawali wavitozile lowawele wobilima. Wala wasenga nawahiluka na kumha usenga mndewa.
2KI 7:16 Hamba wanhu nawalawa na kuluta kuihola kambi ya Waalamu. Ahyo kilo zidatu za utimbo unojile wa ngano ama kilo sita za shayili naviguzigwa kwa igwala limwe lya sendi, kota ulonzi wa Mkulu Nguluwi vyoulonjile.
2KI 7:17 Lelo mndewa nakamuwika yula yumwe wa wang'hangala wa heye yawe mwamizi wa lwizi. Wanhu lowawele wokwinjila kuli muji, nawambiga yula mng'hangala mbaka nakabagama, kota Elisha, munhu wa Nguluwi, vyoyalonjile mhela mndewa loyafichile haluga ha heye.
2KI 7:18 Nailawila kota Elisha, munhu wa Nguluwi, vyoyamlonjele mndewa, “Mitondo mhela kota awu, kilo zidatu za utimbo unojile ama kilo sita za shayili vyoguzigwa kwa igwala limwe lya sendi kuli lwizi lwa Samaliya.”
2KI 7:19 Kwa vila yula mng'hangala nayali yamlonjele Elisha, munhu wa Nguluwi, “Ulole, hanga Mkulu Nguluwi yuye kogubula mitubuli ja kilanga, ndaze, mbuli ayi yoditigwa?” Elisha nakamwidichila, “Kolola kwa meho gako, ila hegwe hulya.”
2KI 7:20 Ahi ndo vyoiwele kwa heye, kwa vila wanhu nawambiga kuli lwizi, naye nakabagama.
2KI 8:1 Elisha nayali yamlonjele yula mdala yawele mwanage nayali yazilipuligwe, “Wuche hegwe na ivyazi lyako leka ulute kikala honhu honeche houweza kikala kwa mhela umwenga, kwa vila Mkulu Nguluwi nakalajiza lufemba luye kuli isi ayi na lowa kwa mhela wa miyaka saba.”
2KI 8:2 Yula mdala nakadita kota munhu wa Nguluwi vyoyalonjile. Heye hamwe na ivyazi lya heye nawaluta kikala kuli isi ya Wafilisti kwa miyaka saba.
2KI 8:3 Miyaka saba vyojimalile, yula mdala nakahiluka kulawa isi ya Wafilisti, nakaluta kwa mndewa wa Isilaeli na kulanda yahilusilwe ng'handa ya heye na mgunda wa heye.
2KI 8:4 Loyafichile, nakamfika mndewa yolongasa na Gehasi, chitumagwa wa munhu wa Nguluwi. Mndewa nayali yalonjile, “Ndonjele kuwala mbuli ng'hulu zeng'ha ziditigwe na Elisha.”
2KI 8:5 Gehasi loyawele yomlonjela mndewa vila Elisha vyoyamzilipule munhu, yula mdala nakoya leka yamlande mndewa ng'handa ya heye na mgunda wa heye. Gehasi nakalonga, “Gwa mndewa, ayu ndo yula mdala yawele mwanage nakazilipuligwa na Elisha na ayu ndo mwanage yazilipuligwe.”
2KI 8:6 Mndewa nakamuuza yula mdala kuwala mbuli zila, yula mdala nakamlonjela. Mndewa nakamlajiza yumwe wa wang'hangala wa heye yaikolele mijito mbuli ya yula mdala na kumlonjela, “Mhilusile mdala ayu chila chinhu cha heye hamwe na vyeng'ha viwele navilawa kuli migunda ja heye kulawa zuwa lila loyochile kuli isi ayi mbaka sambi.”
2KI 8:7 Hamba Elisha nakaluta Damasiko. Mhela awo Beni-hadadi, mndewa wa Alamu, nayali mtamwa. Mndewa vyoyalonjelwe, “Elisha, munhu wa Nguluwi nakalawa kutali, nakoya mbaka hano,”
2KI 8:8 mndewa nakamlonjela Hasaeli, “Uhole ndolendole na ulute kumbochela ayo munhu wa Nguluwi na umuuze Mkulu Nguluwi kukolela heye kota ndopona utamwa awu ama hebu.”
2KI 8:9 Hasaeli nakaluta kumbochela Elisha kuno yawele na ndolendole za chila chinhu chinojile chiwele nachilawila Damasiko. Ndolendole azo nazali mhomolo za kupapa kwa ngamiya makumi gane. Loyafichile kwa Elisha, nakamlonjela, “Chitumagwa wa hegwe Beni-hadadi, mndewa wa Alamu, nakandajiza ndikuuze, ‘Ndaze, ndopona utamwa awu?’ ”
2KI 8:10 Elisha nakamwidichila, “Ulute ukamlonjele, ‘Ndikomya heye kopona,’ ila Mkulu Nguluwi nakangubulila kota kobagama.”
2KI 8:11 Elisha nakamnogolela meho Hasaeli mbaka nakona soni. Hamba munhu wa Nguluwi nakaluka kulila.
2KI 8:12 Hasaeli nakamuuza, “Mkulu wa heni, lekachoni kwangulila?” Elisha nakamwidichila, “Kwa vila ndangugazela gehile gouwaditila wanhu wa Isilaeli. Hegwe kozilakaza ngome za hewo na kuwakopola wasongolo wa hewo kwa ipanga na kuvihondanga vyali vya hewo na kuwatubula wadala wawele na himila.”
2KI 8:13 Hasaeli nakauza, “Ila heni, chitumagwa wa hegwe siwele chinhu, nda libwa hela. Ndoweza ndaze kudita mbuli ayo ng'hulu?” Elisha nakedichila, “Mkulu Nguluwi nakandajila kota hegwe kowa mndewa wa Alamu.”
2KI 8:14 Hamba Hasaeli nakamleka Elisha na kuhiluka kwa mkulu wa heye. Mndewa Beni-hadadi nakamuuza, “Elisha nakakulonjela choni?” Hasaeli nakedichila, “Nakandonjela kota kopona.”
2KI 8:15 Ila mitondo Hasaeli nakahola igolole nakalidodeza kwa mazi na kumgubika mndewa kumeho mbaka nakabagama. Hasaeli nakawa mndewa wa Alamu honhu ha heye.
2KI 8:16 Kuli mwaka wa kahano wa ulongozi wa Yolamu, mwana wa Ahabu, mndewa wa Isilaeli, mhela awo Yehoshafati yawele ndo mndewa wa Yuda, Yeholamu, mwana wa Yehoshafati, nakaluka kulongoza kota mndewa wa Yuda.
2KI 8:17 Nakaluka kulongoza loyawele na miyaka makumi gadatu na mili. Nakalongoza ako Yelusalemu kwa miyaka nane.
2KI 8:18 Nakawinza nzila zihile za wandewa wa Isilaeli, kota ivyazi lya Ahabu vyoliditile, kwa vila nakamhesa mhinza wa Ahabu. Nakadita gehile hali Mkulu Nguluwi,
2KI 8:19 ila Mkulu Nguluwi haganile kuidumya Yuda, kwa chiwalo cha Daudi, chitumagwa wa heye, kwa vila nakalagana kota lulelo lwa heye lolutilila kulongoza mazuwa gose.
2KI 8:20 Mhela wa ulongozi wa Yeholamu, wanhu wa Edomu nawaubelenhuka ulongozi wa Yuda na kiwichila mndewa wa hewo wawo.
2KI 8:21 Ahyo Yeholamu nakaluta Saili na mituka ja heye ja ngondo jeng'ha. Waedomu nawamzunguluta heye na wamizi wa heye na wakulu wa wamizi wa heye wa mituka ja heye ja ngondo, mhela wa nechilo nakaweza kukola hagati ha Waedomu na wamizi wa heye nawabilimila haluga ha hewo.
2KI 8:22 Ahyo wanhu wa Edomu nawaubelenhuka ulongozi wa Yuda kulawa mhela wula. Mhela wuwo, wanhu wa Libuna nawo nawabelenhuka.
2KI 8:23 Madito ganji geng'ha ga mndewa Yeholamu, nagandichigwa kuli chitabu cha kukumbuchila kwa wandewa wa Yuda.
2KI 8:24 Yeholamu nakabagama na kutiligwa kuli vilaga vya chiundewa kuli muji wa Daudi. Ahasiya, mwana wa Yeholamu, nakalongoza honhu ha heye.
2KI 8:25 Kuli mwaka wa kumi na mili wa ulongozi wa Yolamu, mwana wa Ahabu, mndewa wa Isilaeli, Ahasiya, mwana wa Yeholamu, mndewa wa Yuda, nakaluka kulongoza.
2KI 8:26 Ahasiya nakaluka kulongoza yawele na miyaka makumi meli na mili. Nakalongoza kuli Yelusalemu kwa mhela wa mwaka umwe. Mayake nayali yochemigwa Ataliya, mzukulu wa Omuli, mndewa wa Isilaeli.
2KI 8:27 Nakawinza nzila ya ivyazi lya Ahabu, nakadita gehile hali Mkulu Nguluwi kota ivyazi lya Ahabu vyoliditile, kwa vila nayali yahesile kulawa kuli ivyazi lya Ahabu.
2KI 8:28 Mndewa Ahasiya nakaluta hamwe na Yolamu, mwana wa Ahabu, kitowa ngondo na Hasaeli, mndewa wa Gileadi, ako Lamoti-gileadi. Waalamu nawamlumiza Yolamu.
2KI 8:29 Mndewa Yolamu nakahiluka kuli muji wa Yesileeli leka kuvilolela vilonda vyoyalumizwe ako Lama loyawele yochitowa na Hasaeli, mndewa wa Alamu. Naye Ahasiya, mwana wa Yeholamu, mndewa wa Yuda, nakaluta kumjendela Yolamu, mwana wa Ahabu, ako Yesileeli, kwa vila nayali mtamwa.
2KI 9:1 Mhela awo mloli Elisha nakamchema yumwe wa waloli na kumlonjela, “Wiwiche goya, uhole ibuli ali lya mafuta na ulute Lamoti-gileadi.
2KI 9:2 Loufika ako, mpale Yehu, mwana wa Yehoshafati, mzukulu wa Nimushi. Ulute kwa heye na umbagule na wayage na umhiliche kuli chihengo cha mgati.
2KI 9:3 Hamba uhole ibuli ali lya mafuta na umjidile kumutwi na uwikule, Mkulu Nguluwi kangulonga hino, ‘Ndangukubakaliza mafuta leka uwe mndewa wa Isilaeli.’ Hamba uchumule lwizi na ubilime, uleche kukawila.”
2KI 9:4 Lelo, yula mloli msongolo nakaluta Lamoti-gileadi.
2KI 9:5 Loyafichile nakawafika wakulu wa wamizi nawekalisa hamwe, nakalonga, “Ndina usenga wa hegwe, gwa mkulu wa wamizi.” Yehu nakamuuza, “Whaani hali hetwe youlingumlonjela?” Yula msongolo nakedichila, “Gwegwe mkulu wa wamizi.”
2KI 9:6 Yehu nakenuka na kwinjila mng'handa. Yula mloli nakambakaliza mafuta kumutwi na kuwikula, “Mkulu Nguluwi, Nguluwi wa Isilaeli kangulonga, ‘Ndangukubakaliza mafuta leka uwe mndewa wa Isilaeli.
2KI 9:7 Kwanguganigwa kuitowa ng'handa ya mkulu wa hegwe Ahabu, nani ndohilula chibida cha danda ya waloli wa heni na vitumagwa weng'ha wa Mkulu Nguluwi yoiboholigwe na Yesebeli.
2KI 9:8 Ivyazi lyeng'ha lya Ahabu lyodumigwa. Ndomkopola chila mlelwa mlume wa Ahabu kuli Isilaeli, wone yawe mpogozi ama yelejehe.
2KI 9:9 Ndolidita ivyazi lya Ahabu liwe kota ivyazi lya Yeloboamu, mwana wa Nebati na kota lila ivyazi lya Baasha, mwana wa Ahiya.
2KI 9:10 Kuwala Yesebeli, mibwa jomulya kuli chalanza ako Yesileeli, hakuweza kuwa na munhu wa kumtila.’ ” Hamba nakachumula lwizi na kubilima.
2KI 9:11 Yehu loyahiluche kwa wayage, yumwe wa hewo nakamuuza, “Hana mbuli yoneche yihile? Lekachoni yawele na lukwale nakoya kwa hegwe?” Yehu nakedichila, “Kwangumzela munhu ayo na mbuli zoyalingulongaga.”
2KI 9:12 Nawo nawamlonjela, “Haiwele kukomya! Utulonjele choyalonjile.” Yehu nakalonga, “Nakandonjela ahi, ‘Mkulu Nguluwi kangulonga kota ndangukubakaliza mafuta leka uwe mndewa wa Isilaeli.’ ”
2KI 9:13 Baho du vilongozi wayage nawavula mikoti ja hewo, nawajiwika hali magulu ga heye leka yeme mchanya. Hamba nawapemba mhalamhanda na kuwikula, “Yehu ndo mndewa!”
2KI 9:14 Yehu, mwana wa Yehoshafati, mwana wa Nimushi, nakewika goya kumditila vibi Yolamu. Mhela awo Yolamu na wanhu weng'ha wa Isilaeli nawali woyamila Lamoti-gileadi leka ileche kutowigwa na Hasaeli, mndewa wa Alamu.
2KI 9:15 Ila mndewa Yolamu nayali yahiluche Yesileeli kwa chiwalo cha vilonda vyoyapatile mhela wa kitowa ngondo na mndewa Hasaeli wa Alamu. Yehu nakawalonjela vilongozi wayage, “Wone aku ndo kunuwila kwa hemwe heni ndiwe mndewa, lelo mleche kumkundiza munhu ne yumwe kulawa Lamoti na kuluta Yesileeli kuhilika mbuli azi.”
2KI 9:16 Yehu nakenjila kuli mutuka wa heye wa ngondo na kuluta Yesileeli, kwa vila Yolamu nayali yang'hali yesele ako. Ahasiya, mndewa wa Yuda, nayali yalutile kumlola.
2KI 9:17 Mwamizi yawele nayali yemile kuli ilingo lya Yesileeli loyawawene wamizi wa Yehu wokuya, nakalonga, “Ndanguwona wamizi wanguya.” Yolamu nakalajiza, “Umlajize mkwina falasi yeting'hane nawo leka yawauze, ‘Ndaze, namuya kwa kikala goya?’ ”
2KI 9:18 Mkwina falasi nakaluta kiting'hana na Yehu na kulonga, “Mndewa kanguuza, ‘Ndaze, namuya kwa kikala goya?’ ” Yehu nakedichila, “Lekachoni kwanguuza kuwala kikala goya? Umbinze.” Mwamizi yawele mchanya mwa ilingo nakalonga, “Msenga nakawafichila ila hohiluka.”
2KI 9:19 Yula mwamizi nakamlajiza mkwina falasi wa keli. Loyawafichile nakalonga, “Mndewa kangulonga hino, ‘Ndaze, namuya kwa kikala goya?’ ” Yehu nakedichila kahi, “Lekachoni kwanguuza kuwala kikala goya? Umbinze.”
2KI 9:20 Yula mwamizi nakalonga, “Msenga nakawafichila ila heye kahi hohiluka.” Nakonjezela, “Kwendesa kula kwa mutuka ndo kota kwa Yehu, mwana wa Nimushi, kwa vila heye kangwendesa kwa kubilima lukami.”
2KI 9:21 Yolamu nakalajiza yolonga, “Uwiche goya mutuka wa heni wa ngondo.” Mutuka wa heye vyouwichigwe goya, Yolamu, mndewa wa Isilaeli na Ahasiya, mndewa wa Yuda, nawoka chila munhu kuli mutuka wa heye, nawaluta kiting'hana na Yehu. Naweting'hana kuli mgunda uwele nawali wa Naboti, Myesileeli.
2KI 9:22 Yolamu loyamuwene Yehu, nakamuuza, “Ndaze Yehu, nakuya kwa kikala goya?” Yehu nakamwidichila, “Kikala goya kwachi kuno kung'hali hana kufugamila jimalukolo na uhawi wa Yesebeli, mayako, ving'hali baha?”
2KI 9:23 Yolamu nakagalamula mutuka wa heye na kubilima kuno yomlonjela Ahasiya, “Aku ndo kubelenhuka, Ahasiya!”
2KI 9:24 Hamba Yehu nakahola upinde wa heye na msale wa heye na kumhoma Yolamu hagati ha mayega. Msale naukola mbaka naufika kuli nhumbula ya heye, naye baho du nakagwa mgati mwa mutuka wa heye.
2KI 9:25 Yehu nakamlonjela Bidikali, yalingwendesa mutuka wa heye, “Umwinule na umtoze kuli mgunda uwele nawali wa Naboti, Myesileeli. Ukumbuchile heni na hegwe vyotuwele tukwendesa hamwe mituka ja hetwe kumbele kwa Ahabu, mhaza wa heye, mhela Mkulu Nguluwi loyalavile uloli awu kumuwala heye,
2KI 9:26 ‘Zuwa likolile nandiyona danda ya Naboti na wanage, nani ndikomya ndokutowa kuli mgunda wuwu.’ Lelo, uhole lukuli lwa Yolamu na kulutoza kuli mgunda wa Naboti kota vyoyalonjile Mkulu Nguluwi.”
2KI 9:27 Ahasiya, mndewa wa Yuda, loyagawene galawile, nakajeza kusulupuka kwa kukolela nzila ya Beti-hagani. Yehu nakamuwinza kuno yotowa iyowe na kulonga, “Mumkopole naye kahi!” Nawo nawamhoma na msale kuno yawele kuli mutuka kuli nzila ya kulutila Guli habehi na muji wa Ibuleamu. Hamba nakabilimila Megido na kubagama yawele ako.
2KI 9:28 Vitumagwa wa heye nawaupapa mtufi wa heye kuli mutuka wa heye na kuuhilika Yelusalemu, nawautila kuli vilaga vya chiundewa kuli muji wa Daudi.
2KI 9:29 Ahasiya nayali yaluche kulongoza kuli Yuda kuli mwaka wa kumi na umwe wa ulongozi wa Yolamu, mwana wa Ahabu.
2KI 9:30 Hamba Yehu nakaluta Yesileeli. Yesebeli loyahuliche mbuli ayi, nakenoliga kumeho kwa heye na kuziwika goya mnvili za heye na kulola kunze kwa kukolela kuli itubuli.
2KI 9:31 Yehu loyawele yokwinjila hali lwizi lwa muji, Yesebeli nakalonga, “Ndaze, kwanguya kwa kikala goya hegwe uwele kota Simuli, ulinguwakopola wakulu wa hegwe?”
2KI 9:32 Yehu nakalola kuchanya kuli itubuli na kulonga, “Whaani yawele ubanzi wa heni?” Vitumagwa weli ama wadatu nawamlola.
2KI 9:33 Yehu nakalonga, “Mumtoze hasi ayo mdala.” Ahyo nawamtoza hasi na danda ya heye nayenela kuli lukanzi na Yehu nakendesa mutuka wa heye wa ngondo mchanya mwa lukuli lwa mdala ayo.
2KI 9:34 Yehu nakenjila mgati mwa ng'handa ya chiundewa na kalya na kunwa. Hamba nakalonga, “Mumtile ayo mdala yapanjilwe, kwa vila nayali mhinza wa mndewa.”
2KI 9:35 Ila lowalawile leka walute kumtila, hawalufichile lukuli lweng'ha ila izeje lya mutwi na magulu na moko hela.
2KI 9:36 Nawahiluka na kumlonjela Yehu mbuli ayi, naye nakalonga ahi, “Awu ndo ulonzi wa Mkulu Nguluwi woyaulonjile kwa kukolela chitumagwa wa heye Eliya, Mtishibe, yolonga, ‘Mibwa jolya lukuli lwa Yesebeli kuli isi ya Yesileeli.
2KI 9:37 Mtufi wa Yesebeli wowa kota midohe kumgunda kuli isi ya Yesileeli, kota haduhu munhu yawele koweza kumzela.’ ”
2KI 10:1 Kuli muji wa Samaliya nakwali na wana makumi saba wa Ahabu. Ahyo Yehu nakandika baluwa na kulajiza baluwa ayo ihilikwe Samaliya kwa wakulu wa muji na kwa vilongozi na kwa walolezi wa wana wa Ahabu. Nakalonga,
2KI 10:2 “Hala du baluwa ayi hoifika kwa hegwe, mhagule munhu yawele na ludali ng'hatu hali wana wa mkulu wa hegwe na umuwiche kuli chigoda cha undewa cha mhaza wa heye, kwa vila hemwe mwanajo mituka ja ngondo na falasi na muji uwele na ngome na vinhu vya kitowela ngondo. Hamba ulute kitowa kwa chiwalo cha ivyazi lya mkulu wa hegwe.”
2KI 10:4 Ila wakulu wa Samaliya nawadumba ng'hatu na kulonga, “Wone wandewa weli nawalemwela kitowa na Yehu, hetwe toweza ndaze?”
2KI 10:5 Lelo mlolezi wa ng'handa ya chiundewa na chilongozi wa muji na wasekulu na walingulolela wana nawalajiza usenga awu kwa Yehu, “Hetwe twa vitumagwa wa hegwe na todita choneche choulonga. Ila hatumhagula munhu yoneche leka yawe mndewa. Udite lyoulyona linoga.”
2KI 10:6 Hamba Yehu nakawandichila baluwa ya keli, yolonga, “Wone hemwe mwa ubanzi wa heni na mwangunyhulichiza, mhole vitwi vya wana wa mkulu wa hemwe na muye kwa heni aku Yesileeli mitondo mhela kota awu.” Mhela awo wala wana makumi saba wa mndewa nawali wochikala hamwe na vilongozi wa muji wa Samaliya, wawele nawali wowalolela.
2KI 10:7 Baluwa ayo loiwafichile, wanhu wala nawawahola wala makumi saba wa mndewa na kuwadumula singo weng'ha. Nawawika vitwi vya hewo mgati mwa vidoto na kumhilichila Yehu ako Yesileeli.
2KI 10:8 Msenga loyafichile nakamlonjela Yehu, “Nawegala vitwi vya wana wa mndewa.” Aho ndo Yehu nakalonga, “Mviwiche kuli vilundo vili hali lwizi lwa muji, mvileche vikale kuko mbaka hamitondo.”
2KI 10:9 Hamitondo Yehu nakalawa mgati na kwima hali wanhu weng'ha na kulonga, “Mwahela nongwa. Heni ndo ndavile majesa gehile kumuwala mkulu wa heni na kumkopola, ila ndo whaani yawakopole awa weng'ha?
2KI 10:10 Mvizele kota haduhu ulonzi uwele Mkulu Nguluwi nakalonga kuwala ivyazi lya Ahabu na hawenele. Mkulu Nguluwi nakadita mbuli yila yoyalagane kwa kukolela chitumagwa wa heye Eliya.”
2KI 10:11 Ahyo Yehu nakamkopola chila yumwe wa ivyazi lya Ahabu ako Yesileeli yawele nakasigala, hamwe na wakulu wa heye na goloko wa heye wa habehi na watambika wa heye. Hamlechile yoneche yawele mkomu.
2KI 10:12 Hamba Yehu nakoka Yesileeli na kuluta Samaliya. Loyawele mnzila habehi na ng'handa ya kutemela milaika ja ming'holo, iwele ndo Beti-ekedi ya wadima ming'holo,
2KI 10:13 Yehu naketing'hana na wanhu wa ivyazi lya Ahasiya, mndewa wa Yuda, nakauza, “Hemwe mwa whaani?” Nawamwidichila, “Hetwe twa ivyazi lya Ahasiya. Natuya kulilamsa ivyazi lya mndewa na lya mamo wa mndewa.”
2KI 10:14 Hamba Yehu nakalajiza, “Muwebate kuno wawele wakomu.” Ahyo nawawahola wanhu makumi gane na weli na kuwadumula singo hafungo ha ideho lya Beti-ekedi. Hamlechile yoneche yawele mkomu.
2KI 10:15 Yehu nakalawa hala na loyafichile mnzila naketing'hana na Yehonadabu, mwana wa Lekabu, yawele nayali yoluta kumbochela. Yehu nakamlamsa na kulonga, “Ndaze, nhumbula ya hegwe naigoloka kwa heni kota nhumbula ya heni vyoigoloche kwa hegwe?” Yehonadabu nakedichila, “Ena.” Yehu nakalonga, “Wone ndo ahyo, umhe heni moko wa hegwe.” Nakamha moko na Yehu nakamkwiniza kuli mutuka wa heye wa ngondo.
2KI 10:16 Yehu nakalonga, “Tulutase leka ukalole maya ga heni kwa Mkulu Nguluwi.” Ahyo nawaluta hamwe kwa mutuka wa heye.
2KI 10:17 Lowafichile Samaliya, Yehu nakalikopola ivyazi lyeng'ha lya Ahabu liwele nalisigala, nakawadumya kwa kiwhana na ulonzi wa Mkulu Nguluwi woyaulonjile kukolela Eliya.
2KI 10:18 Hamba Yehu nakawakungajiza wanhu weng'ha wa Samaliya na kuwalonjela, “Ahabu nakamkolela mijito Baali hado. Ila Yehu komkolela mijito mzidi.
2KI 10:19 Lelo muwacheme waloli weng'ha wa Baali na vitumagwa wa heye weng'ha na watambika wa heye weng'ha. Mlolele leka chila munhu yawe aho, kwa vila ndangugana kumlavila Baali nhambiko ng'hulu lukami. Yoneche yawele kolemwela kuya, holutilila kikala.” Ila Yehu nakadita ahyo kwa chiwalo cha majesa ga usugu leka yawadumye vitumagwa weng'ha wa Baali.
2KI 10:20 Yehu nakalonga, “Muwiche nhing'hano ng'hulu kwa lutogo lwa Baali.”
2KI 10:21 Hamba Yehu nakegala usenga kuli isi yeng'ha ya Isilaeli na vitumagwa weng'ha wa Baali nawoya, haduhu ne yumwe yawele hafichile. Nawamema mgati mwa ng'handa ya Baali kulawa hali lwizi mbaka kuli kuduma kwa ng'handa.
2KI 10:22 Yehu nakamlonjela yula yawele nayali yololela chihengo cha nguwo, “Wigale mikanzu kwa chiwalo cha vitumagwa weng'ha wa Baali.” Yula munhu nakegala mikanzu.
2KI 10:23 Hamba Yehu na Yehonadabu, mwana wa Lekabu, nawenjila mgati mwa ng'handa ya Baali. Yehu nakawalonjela vitumagwa wa Baali, “Mlole chila honhu leka haleche kuwa na chitumagwa wa Mkulu Nguluwi hamwe na hemwe, ila ndo vitumagwa wa Baali hela.”
2KI 10:24 Ahyo nawenjila mgati leka kulavya nhambiko ya kulakazwa. Mhela awu, Yehu nayali yawegale hanze wanhu wa heye makumi nane kuno yawakanyile kwa kulonga, “Wone yumwe wa hemwe komleka yasulupuche munhu yoneche yondilingumuwika mmoko mwa heye, kolipa kwa ukomu wa heye.”
2KI 10:25 Yehu loyasindile kulavya nhambiko ya kulakazwa, nakawalajiza wamizi na vilongozi, “Mwinjile leka muwakopole weng'ha. Yaleche kusulupuka ne yumwe.” Lelo nawawakopola kwa ipanga. Wamizi na vilongozi nawazitoza kunze zila ng'huli, hamba nawenjila hali honhu ha izengo lya kufugamilwa lya Baali.
2KI 10:26 Nawalihilika kunze mwa yila ng'handa ya Baali lila izengo na kulilakaza kwa chiluli.
2KI 10:27 Nawalibomola lila izengo lya kufugamilwa lya Baali hamwe na ng'handa ya Baali, wanhu nawaidita ng'handa ayo kuwa cholo kulawa mhela wula.
2KI 10:28 Ahyo Yehu nakadumya kufugamilwa kwa Baali kuli isi ya Isilaeli.
2KI 10:29 Ila nakawinza gehile ga Yeloboamu, mwana wa Nebati, yawele nakawambuza Waisilaeli kudita gehile, gawele ndo kujifugamila jimalukolo ja milogota ja zahabu ako Beteli na Dani.
2KI 10:30 Mkulu Nguluwi nakamlonjela Yehu, “Kwa vila nakweneza gagoloche hali heni na nakuliditila ivyazi lya Ahabu gala geng'ha gonganile kudita, walelwa wa hegwe wochikalisa kuli chigoda cha undewa cha Isilaeli mbaka lulelo lwa kane.”
2KI 10:31 Ila Yehu habatilile malajizo ga Mkulu Nguluwi, Nguluwi wa Isilaeli, kwa nhumbula ya heye yeng'ha. Halechile kudita gehile goyaditile Yeloboamu, yawele nakawambuza Waisilaeli kudita gehile.
2KI 10:32 Mhela awo Mkulu Nguluwi nakaluka kupunguza honhu ha isi ya Isilaeli. Hasaeli, mndewa wa Alamu, nakawasumya Waisilaeli hali honhu heng'ha ha isi ya hewo
2KI 10:33 kulawila ubanzi wa kolilawilaga isanya mwa lwanda lwa Yolodani, kuli isi yeng'ha ya Gileadi, hawele ndo honhu ha Gadi na Lubeni na Manase na kulawila Aloeli habehi na ibindi lya Alinoni kukolela Gileadi mbaka Bashani.
2KI 10:34 Madito ganji geng'ha ga ulongozi wa Yehu na geng'ha goyaditile na mbuli za heye za kusumya, nazandichigwa kuli chitabu cha kukumbuchila kwa wandewa wa Isilaeli.
2KI 10:35 Yehu nakabagama na kutiligwa ako Samaliya. Yehoahasi mwanage, nakalongoza honhu ha heye.
2KI 10:36 Yehu nakalongoza Isilaeli yawele Samaliya kwa miyaka makumi meli na nane.
2KI 11:1 Mhela Ataliya, mayake mndewa Ahasiya, loyawene kota mwanage nakabagama, nayali yonuwila kulidumya lulelo lweng'ha lwa chiundewa.
2KI 11:2 Ila Yehosheba, mhinza wa mndewa Yeholamu, lumbulye Ahasiya, nakamhola kwa uviso Yoashi, mwana wa Ahasiya, kulawa hali wana wa mndewa wawele habehi kukopoligwa. Nakamuwika Yoashi hamwe na munhu wa kumhembuliza mwana wa heye mgati mwa chihengo cha kuwasa na kumvisa amo leka Ataliya yaleche kumona, ahyo hamkopole.
2KI 11:3 Yoashi nakasigala naye kwa mhela wa miyaka sita yawele yavisigwe mgati mwa ng'handa ya Mkulu Nguluwi, mhela Ataliya loyawele yoilongoza isi.
2KI 11:4 Kuli mwaka wa saba, mtambika Yehoyada nakahilika wakulu wa vilundo vya mamiya na wamizi walingumwamila mndewa, nakalajiza wahilikwe kwa heye kuli ng'handa ya Mkulu Nguluwi. Nakadita ilagano na hewo na kuwadita welahe kuli ng'handa ya Mkulu Nguluwi. Ahyo nakawalajila mwana wa mndewa.
2KI 11:5 Nakawalajiza yolonga, “Ahi ndo vyomlinguganigwa kudita. Hemwe muwele kuli vilundo vidatu mlingwinjila kuli zamu kuli zuwa lya Kwesela, honhu hamwe ha kadatu ha hemwe wokwamila ng'handa ya chiundewa
2KI 11:6 na honhu hamwe ha kadatu hanji wokwamila kuli lwizi lwa Suli na honhu hamwe ha kadatu hasigale, kuli lwizi luwele kumbele kwa wamizi. Ahi ndo vyomkwamila ng'handa ya mndewa.
2KI 11:7 Namwe muwele kuli vilundo vili vinji, muwele mwangwesela kuli zuwa lya Kwesela, mweng'ha moyamila ng'handa ya Mkulu Nguluwi honhu ha mndewa.
2KI 11:8 Mumzungulute mndewa kuno chila yumwe yawele na vinhu vya heye vya kitowa ngondo. Yoneche yawele kohejelela kuli misitali ja hemwe kanguganigwa kukopoligwa. Muwe hamwe na mndewa honeche hoyoluta.”
2KI 11:9 Wakulu wa vilundo vya mamiya nawadita kota vyowalajizwe na mtambika Yehoyada. Chila yumwe nakawahola wanhu wa heye, wala wawele nawali wokwinjila kuli zamu kuli zuwa lya Kwesela na wala wawele nawali woluta kwesela, nawo nawaluta kwa mtambika Yehoyada.
2KI 11:10 Mtambika nakawapa wala wakulu wa vilundo migoha na ngawo, viwele navyali vya mndewa Daudi, viwele navyali mgati mwa ng'handa ya Mkulu Nguluwi.
2KI 11:11 Wala wamizi, wawele chila yumwe yawele na vinhu vya heye vya kitowela ngondo mmoko mwake, nawema kumzunguluta mndewa, habehi na honhu ha kulavila nhambiko na ng'handa ya Mkulu Nguluwi, kwaluchila ubanzi wa kusini mbaka ubanzi wa kasikazini mwa ng'handa ya Mkulu Nguluwi.
2KI 11:12 Hamba Yehoyada nakamlavya mgati Yoashi, mwana wa mndewa na kumvaliza kofia ya chiundewa na kumha kalatasi ya ilagano na kumuwikula kota heye ndo mndewa. Nawambakaliza mafuta na wanhu nawatowa vimbamba na kutowa iyowe wolonga, “Mndewa yekale kwa mhela winji.”
2KI 11:13 Ataliya loyahuliche iyowe lya wamizi na wanhu wanji, nakaluta kwa wala wanhu hala kuli ng'handa ya Mkulu Nguluwi.
2KI 11:14 Nakalola na kumona mndewa yemile habehi na izengo liwele habehi na lwizi lwa ng'handa ya Nguluwi kota vyoyazowele. Vilongozi na wapemba mhalamhanda nawali hafungo ha mndewa na wanhu weng'ha wotowa lucheze na kupemba mhalamhanda. Ahyo Ataliya nakadadula mivalo ja heye na kulila, “Kubelenhuka! Kubelenhuka!”
2KI 11:15 Hamba mtambika Yehoyada nakawalajiza wakulu wa vilundo vya wamizi, “Mumhiliche Ataliya kunze hagati ha wamizi na mumkopole kwa ipanga munhu yoneche yalingumuwinza.” Kwa vila mtambika nayali yalonjile, “Hokopoligwa mgati mwa ng'handa ya Mkulu Nguluwi.”
2KI 11:16 Ahyo nawamibata Ataliya na lowafichile hali honhu hawele falasi wangwinjililaga kuli ng'handa ya mndewa, nawamkopola.
2KI 11:17 Hamba Yehoyada nakadita ilagano hali Mkulu Nguluwi na mndewa na wanhu, kota wowa wanhu wa Mkulu Nguluwi. Nakadita ilagano kahi hali mndewa na wanhu.
2KI 11:18 Hamba wanhu weng'ha wa isi nawaluta kuli ng'handa ya Baali na kuibomola. Nawahabomola honhu ha kulavila nhambiko na jimalukolo na kumkopola Matani, mtambika wa Baali hali aho honhu ha kulavila nhambiko. Hamba mtambika Yehoyada nakawawika wamizi wa kwamila ng'handa ya Mkulu Nguluwi.
2KI 11:19 Nakawahola wakulu wa wamizi wa mamiya na Wakali na wanhu weng'ha wa isi, nawamhilika mndewa kulawa kuli ng'handa ya Mkulu Nguluwi na kuluta kuli ng'handa ya mndewa, kuno wokolela nzila ya lwizi lwa wamizi. Ahyo mndewa nakekalisa kuli chigoda cha heye cha undewa,
2KI 11:20 ahyo wanhu weng'ha wa isi nawasangalala. Muji nausindamala kwa vila Ataliya nayali yakopoligwe kwa ipanga haluga ha mndewa.
2KI 11:21 Yoashi nakaluka kulongoza Yuda loyawele na miyaka saba.
2KI 12:1 Kuli mwaka wa saba wa ulongozi wa Yehu, mndewa wa Isilaeli, Yoashi nakaluka kulongoza Yuda ako Yelusalemu. Nakalongoza kwa miyaka makumi gane ako Yelusalemu. Mayake nayali yochemigwa Sibiya, kulawa Beeli-sheba.
2KI 12:2 Yoashi nakadita ganojile hali Mkulu Nguluwi kwa miyaka jeng'ha, kwa vila mtambika Yehoyada nayali yomlangusa.
2KI 12:3 Hala honhu ha kufugamila milungu hahosigwe. Wanhu nawali wolutilila kulavya nhambiko na kufunyiza ubani ako.
2KI 12:4 Yoashi nakawalonjela watambika, “Mkungajize sendi zeng'ha ziwele zogaligwa kota nhambiko zelile hali ng'handa ya Mkulu Nguluwi, ziwele ndo sendi zikungajizwe kota kodi na sendi zibochelwe kulawa kwa wanhu walavile kwa vilaho vya wanhu na sendi zigaligwe kwa kunuwila kuli ng'handa ya Nguluwi.
2KI 12:5 Chila mtambika yabochele sendi kulawa kwa yumwe wa walolela ng'hano leka kuzenga honhu honeche hawifigwe kuli ng'handa ya Nguluwi.”
2KI 12:6 Ila mbaka loufichile mwaka wa makumi meli na jidatu wa ulongozi wa mndewa Yoashi, watambika nawali wang'hali kuzenga kahi ng'handa ya Nguluwi.
2KI 12:7 Ahyo mndewa Yoashi nakamchema mtambika Yehoyada na watambika wanji, nakawauza, “Lekachoni hamlinguzenga kahi ng'handa ya Nguluwi hala habomoche? Mleche kuhola sendi mzidi kulawa kwa walolela ng'hano wa hemwe kwa chiwalo cha hemwe. Kwaluchila sambi sendi zeng'ha ziwe kwa chiwalo cha ng'handa ya Nguluwi.”
2KI 12:8 Watambika nawakunda kota hawohola kahi sendi kulawa kwa wanhu na hawozenga kahi ng'handa ya Mkulu Nguluwi.
2KI 12:9 Mtambika Yehoyada nakahola isanduku na kulitubula kuli chigubiko. Nakaliwika hafungo ha honhu ha kulavila nhambiko kuli ubanzi wa kudilo houkwinjila kuli ng'handa ya Mkulu Nguluwi. Watambika wawele nawali wokwamila lwizi nawawika mgati mwa isanduku sendi zeng'ha ziwele nazigaligwa kuli ng'handa ya Nguluwi.
2KI 12:10 Chila lowawene hana sendi nyinji kuli isanduku alyo, yalingwandika wa mndewa na mtambika mkulu nawoya na kuziwaza sendi azo zigaligwe kuli ng'handa ya Mkulu Nguluwi na kuziwika kuli vihako.
2KI 12:11 Lowasindile kuziwaza nawawapa wanhu wawele nawahaguligwa kulolela mijito ja ng'handa ya Mkulu Nguluwi. Kwa sendi azo nawawalipa wala wanhu wakolile mijito kuli ng'handa ya Nguluwi, wawele ndo walinguhongola na walinguzenga
2KI 12:12 na watema maganga. Nawagula mbawo na maganga ga kuhongoligwa kwa chiwalo cha kuzenjela kahi ng'handa ya Mkulu Nguluwi na kwa chiwalo cha mijito jinji jeng'ha ja kuzenga.
2KI 12:13 Ila sendi zozigaligwe kuli ng'handa ya Nguluwi hazitumiche kugongomanyila nyhelo za sendi ne mikasi ja kudumulila goya tambi ne visaye vya kumizila ne mhalamhanda ne vinhu viyage vyoneche vya zahabu ama sendi kwa chiwalo cha ng'handa ya Mkulu Nguluwi.
2KI 12:14 Sendi zeng'ha nazihilikwa kwa wakola mijito wawele nawapegwa sendi azo kwa chiwalo cha kuzenga kahi ng'handa ya Mkulu Nguluwi.
2KI 12:15 Wakola mijito wawele nawali wololela mijito aji nawali wa kukundigwa ng'hatu, ahyo hawaganigwe kulajila ndaze vyowatumiye sendi azo.
2KI 12:16 Sendi zilawile kuli nhambiko ya nongwa na nhambiko za gehile, hazigaligwe kuli ng'handa ya Mkulu Nguluwi, sendi azo nazali za mtambika.
2KI 12:17 Mhela awo Hasaeli, mndewa wa Alamu, nakaluta kuutowa muji wa Gati na kuuhola. Hamba nakagaluka leka yaitowe Yelusalemu.
2KI 12:18 Ila Yoashi, mndewa wa Yuda, nakavihola vinhu vyeng'ha vyelile vya wasekulu wa heye, viwele viwichigwe chiuyeng'ha na Yehoshafati na Yeholamu na Ahasiya, wawele ndo wandewa wa Yuda. Kahi nakahola ndolendole ziwele heye yuye nayali yaziwichile chiuyeng'ha hamwe na zahabu yeng'ha ifichigwe kuli ng'hano za ng'handa ya Mkulu Nguluwi na kuli ng'handa ya chiundewa, nakazihilika kwa Hasaeli, mndewa wa Alamu. Hamba heye Hasaeli nakoka Yelusalemu.
2KI 12:19 Mbuli zinji za ulongozi wa Yoashi na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
2KI 12:20 Vilongozi wa heye nawali wochijesa kumditila vibi, ahyo nawamkopola Yoashi ako Milo kuli nzila ilingulutila Sila.
2KI 12:21 Vilongozi wawele nawamkopola, nawali Yosabadi, mwana wa Shimeati na Yehosabadi, mwana wa Shomeli. Hamba nawamtila kuli vilaga vya chiundewa kuli muji wa Daudi. Amasiya mwanage, nakawa mndewa honhu ha heye.
2KI 13:1 Kuli mwaka wa makumi meli na gadatu ga ulongozi wa Yoashi, mwana wa Ahasiya, mndewa wa Yuda, Yehoahasi, mwana wa Yehu, nakaluka kulongoza Isilaeli yawele ako Samaliya. Nakalongoza kwa miyaka kumi na saba.
2KI 13:2 Nakadita gehile hali Mkulu Nguluwi kwa kudita kota vyoyaditile Yeloboamu, mwana wa Nebati, yawele nakawambuza wanhu wa Isilaeli kudita gehile. Yehoahasi hagalechile gehile ga heye.
2KI 13:3 Ahyo ng'halazi ya Mkulu Nguluwi naiwafika wanhu wa Isilaeli na kwa mhela winji Nguluwi nakawadita wanhu wa Isilaeli wasumigwe na Hasaeli, mndewa wa Alamu na Beni-hadadi, mwanage.
2KI 13:4 Yehoahasi nakamlanda Mkulu Nguluwi, naye Mkulu Nguluwi nakamhulichiza kwa vila nakona ndaze mndewa wa Alamu vyoyawele yowagaza ng'hatu wanhu wa Isilaeli.
2KI 13:5 Mkulu Nguluwi nakahilika mlohozi kwa chiwalo cha Isilaeli, nawo nawaloholigwa kulawa kuli ludali lwa Alamu. Ahyo Waisilaeli nawekala kuli ng'handa za hewo kwa kikala goya kota vyoiwele aho hamwande.
2KI 13:6 Ila hawagalechile gehile gawele Yeloboamu nakawambuza Waisilaeli kudita. Izengo lya mlungu Ashela nalilutilila kwimizwa ako Samaliya.
2KI 13:7 Hakuwele na chinhu chikulu chisigale kuli wamizi wa Yehoahasi, ila wakwina falasi makumi gahano na mituka ja ngondo kumi na wamizi wa kujenda kwa magulu elufu kumi, kwa vila mndewa wa Alamu nayali yawadumile wala wanji na kuwadita kota nhimbwisi mhela wa kupulula nyhule.
2KI 13:8 Madito ganji ga ulongozi wa Yehoahasi na mbuli za heye zeng'ha, navyandichigwa kuli chitabu cha kukumbuchila kwa wandewa wa Isilaeli.
2KI 13:9 Yehoahasi nakabagama na kutiligwa ako Samaliya. Yehoashi, mwanage, nakawa mndewa honhu ha heye.
2KI 13:10 Kuli mwaka wa makumi gadatu na saba ga ulongozi wa Yoashi, mndewa wa Yuda, Yehoashi mwana wa Yehoahasi, nakaluka kulongoza Isilaeli ako Samaliya. Nakalongoza kwa miyaka kumi na sita.
2KI 13:11 Yehoashi nakadita gehile hali Mkulu Nguluwi, halechile gehile goneche hali gala ga Yeloboamu, mwana wa Nebati, gawele nagawambuza Waisilaeli kudita gehile, ila nakalutilila nago.
2KI 13:12 Madito ganji ga ulongozi wa Yehoashi na geng'ha goyaditile na ngondo ya heye yetowile kwa mong'ho na mng'honyo wa heye Amasiya, mndewa wa Yuda, navyandichigwa kuli chitabu cha kukumbuchila kwa wandewa wa Isilaeli.
2KI 13:13 Yehoashi nakabagama na kutiligwa kuli vilaga vya chiundewa ako Samaliya, hamwe na wandewa wa Isilaeli. Yeloboamu mwanage, nakawa mndewa honhu ha heye.
2KI 13:14 Mloli Elisha nakatamika ng'hatu. Loyawele habehi kubagama Yehoashi, mndewa wa Isilaeli, nakaluta kumona. Loyafichile kwa Elisha, nakalila yolonga, “Mhaza wa heni! Mhaza wa heni! Mituka ja ngondo ja Isilaeli na wakwina falasi wa heye.”
2KI 13:15 Elisha nakamlonjela, “Wigale upinde na misale jimwenga.” Yehoashi nakavigala vinhu avyo.
2KI 13:16 Elisha nakamlonjela Yehoashi, mndewa wa Isilaeli, “Uhole upinde.” Loyaviholile vinhu avyo, Elisha nakawika moko ga heye mchanya mwa moko ga mndewa.
2KI 13:17 Elisha nakalonga, “Uchumule itubuli lya ubanzi wa kolilawilaga isanya,” naye nakachumula. Mloli Elisha nakalonga, “Utoze msale.” Naye nakatoza msale. Elisha nakalonga, “Msale wa kusumya kwa Mkulu Nguluwi, msale wa kuisumya Alamu. Kowasumya ng'hatu Waalamu ako Afeki.”
2KI 13:18 Hamba Elisha nakalonga, “Uhole misale,” naye mndewa wa Isilaeli nakajihola. Elisha nakamlonjela, “Jitowe misanga kwa ajo misale.” Nakajitowa misanga mala zidatu, hamba nakaleka.
2KI 13:19 Elisha, munhu wa Nguluwi nakazudila, nakalonga, “Lekachoni hutowile mala zihano ama mala sita? Wahaditile ahyo wahawadumile ng'hatu Waalamu. Lelo kowatowa mala zidatu hela.”
2KI 13:20 Elisha nakabagama, nakatiligwa. Lelo, kuli chila mwaka vilundo vya wamizi wa Wamoabu navyali viwatowa wanhu wa Isilaeli.
2KI 13:21 Mhela umwenga, Waisilaeli lowawele womtila munhu, baho du nawachona chilundo cha wala wamizi wa Wamoabu chiluta kwa hewo, ahyo nawautoza wula mtufi mgati mwa chilaga cha Elisha, yula munhu nakazilipuka na kwima.
2KI 13:22 Lelo Hasaeli, mndewa wa Alamu, nakawagaza ng'hatu wanhu wa Isilaeli mhela weng'ha wa ulongozi wa Yehoahasi.
2KI 13:23 Ila Mkulu Nguluwi nakawonela isungu na kuwalajila uganililo. Nakawagalamchila kwa chiwalo cha ilagano lya heye kwa Abulahamu na Isaka na Yakobo. Kulawa mhela wula, nakaleka kuwadumya ne kuwawinga hali heye.
2KI 13:24 Loyabagame Hasaeli, Beni-hadadi mwanage, nakalongoza honhu ha heye.
2KI 13:25 Hamba Yehoashi, mwana wa Yehoahasi, nakamsumya Beni-hadadi mala zidatu na kujilohola miji jeng'ha ja Isilaeli jiwele najiholigwa mhela wa ulongozi wa Yehoahasi, mhaza wa heye.
2KI 14:1 Kuli mwaka wa keli wa ulongozi wa Yehoashi, mwana wa Yehoahasi, mndewa wa Isilaeli, Amasiya, mwana wa Yoashi, mndewa wa Yuda, nakaluka kulongoza.
2KI 14:2 Nayali na miyaka makumi meli na jihano loyaluche kulongoza. Nakalongoza ako Yelusalemu kwa mhela wa miyaka makumi meli na tisa. Mayake nayali yochemigwa Yehoadani, kulawa Yelusalemu.
2KI 14:3 Nakadita ganojile hali Mkulu Nguluwi, ila haiwele kota sekulu wa heye Daudi. Nakawinza nzila za mhaza wa heye, yawele ndo Yoashi.
2KI 14:4 Ila hala honhu ha kufugamila milungu hahawifigwe, wanhu nawalutilila kulavya nhambiko na kufunyiza ubani hali honhu aho.
2KI 14:5 Undewa wa heye lowimile nzinzili kuli isi ya heye, nakawakopola wala wang'hangala wawele nawamkopola mndewa, mhaza wa heye.
2KI 14:6 Ila hawawakopole wana wa walingukopola, kota vyoyandichigwe kuli chitabu cha Malajizo ga Musa, Mkulu Nguluwi vyoyalajize, “Wahaza waleche kukopoligwa kwa chiwalo cha gehile ga wana wa hewo na wana waleche kukopoligwa kwa chiwalo cha gehile ga wahaza wa hewo, chila munhu yakopoligwe kwa chiwalo cha gehile ga heye yuye.”
2KI 14:7 Amasiya ndo yawakopole Waedomu elufu kumi kuli Ibindi lya Mwino na kuuhola muji wa Sela na kuuchema Yokiteeli, itagwa liwele lyanguchemigwa kulawa mhela wula.
2KI 14:8 Hamba Amasiya nakawalajiza wasenga kwa Yehoashi, mwana wa Yehoahasi, mwana wa Yehu, mndewa wa Isilaeli, yolonga, “Uye titowe.”
2KI 14:9 Ila Yehoashi, mndewa wa Isilaeli, nakamwidichila Amasiya, mndewa wa Yuda, yolonga, “Zuwa limwe izuchila lya mbigili lya Lebanoni nalilajiza usenga kwa igodi lya mwelezi liwele ako Lebanoni, ‘Mlavye mhinza wa hegwe yaholeche na msongolo wa heni.’ Hamba igongolo lya kisolo lya Lebanoni nalyuya na kulibiga lila izuchila lya mbigili.
2KI 14:10 Ndikomya nakuwasumya Waedomu, nagwe kwangidaya. Witogole kwa kusumya kwa hegwe, ila wikale haluga ha hegwe. Lekachoni kwangugana kigalila magazo gawele gokudumya gwegwe na wanhu wa Yuda?”
2KI 14:11 Ila Amasiya hahulichize. Ahyo Yehoashi, mndewa wa Isilaeli, nakaluta kitowa na Amasiya, mndewa wa Yuda ako Beti-shemeshi kuli isi ya Yuda.
2KI 14:12 Wanhu wa Yuda nawalemwela hali wanhu wa Isilaeli na chila munhu nakabilimila kaye kwa heye.
2KI 14:13 Yehoashi, mndewa wa Isilaeli, nakamibata Amasiya, mndewa wa Yuda, mwana wa Yoashi, mwana wa Ahasiya, ako Beti-shemeshi. Hamba Yehoashi nakaluta Yelusalemu na kubomola lukanzi lwa muji wa Yelusalemu kwaluchila kuli Lwizi lwa Efulaimu mbaka kuli Lwizi lwa Hafungo, utali wa mita miya mbili.
2KI 14:14 Nakahola zahabu zeng'ha na sendi na vinhu vyeng'ha viwele mgati mwa ng'handa ya Mkulu Nguluwi na kuli ng'hano za ng'handa ya chiundewa. Nakawahola kahi wapogozi wa ngondo na kuhiluka Samaliya.
2KI 14:15 Madito ganji geng'ha ga ulongozi wa Yehoashi na geng'ha goyaditile, hamwe na kitowa kwa mong'ho na mng'honyo wa heye Amasiya, mndewa wa Yuda, navyandichigwa kuli chitabu cha kukumbuchila kwa wandewa wa Isilaeli.
2KI 14:16 Yehoashi nakabagama na kutiligwa ako Samaliya hamwe na wandewa wa Isilaeli, kuli vilaga vya chiundewa. Yeloboamu mwanage, nakawa mndewa honhu ha heye.
2KI 14:17 Amasiya mwana wa Yoashi, mndewa wa Yuda, nakekala kwa miyaka kumi na jihano kulawa loyabagame Yehoashi, mwana wa Yehoahasi, mndewa wa Isilaeli.
2KI 14:18 Madito ganji ga ulongozi wa Amasiya, nagandichigwa kuli chitabu cha kukumbuchila kwa wandewa wa Yuda.
2KI 14:19 Nawali wochijesa kumditila mbuli yihile Amasiya ako Yelusalemu, naye Amasiya nakabilimila Lakishi. Nawawalajiza wanhu wamuwinze ako Lakishi na kumkopola kuko.
2KI 14:20 Mtufi wa heye naugaligwa mchanya mwa falasi na kutiligwa ako Yelusalemu kuli vilaga vya chiundewa kuli muji wa Daudi.
2KI 14:21 Hamba wanhu weng'ha wa Yuda nawamhola Usiya yawele na miyaka kumi na sita na kumdita yawe mndewa honhu ha Amasiya, mhaza wa heye.
2KI 14:22 Amasiya loyabagame, mndewa Usiya ndo yauzenjile kahi muji wa Elasi na kuuhilusa kwa Yuda.
2KI 14:23 Kuli mwaka wa kumi na jihano wa ulongozi wa Amasiya, mwana wa Yoashi, mndewa wa Yuda, Yeloboamu, mwana wa Yehoashi, mndewa wa Isilaeli, nakaluka kulongoza ako Samaliya. Nakalongoza kwa mhela wa miyaka makumi gane na umwe.
2KI 14:24 Nakadita wihe hali Mkulu Nguluwi na halechile gehile ne gamwe ga Yeloboamu, mwana wa Nebati, yawele nakawambuza Waisilaeli kudita gehile.
2KI 14:25 Ndo yuye yajihilule mbaka ja Isilaeli kwaluchila Lebo-hamati mbaka kuli bahali ya Alaba, kwa kiwhana na ulonzi wa Mkulu Nguluwi, Nguluwi wa Isilaeli, ulonjigwe kwa kukolela chitumagwa wa heye Yona, mwana wa Amitayi, mloli kulawa Gati-hefeli.
2KI 14:26 Mkulu Nguluwi nakagona magazo makulu gowapatile Waisilaeli, kwa vila hakuwele na munhu yoneche wa kuwatanza.
2KI 14:27 Kwa vila Mkulu Nguluwi halonjile kota koidumya ng'hatu Isilaeli muisi, nakawalohola kwa moko wa Yeloboamu, mwana wa Yehoashi.
2KI 14:28 Madito ganji ga ulongozi wa Yeloboamu na geng'ha goyaditile na mbuli zeng'ha, hamwe na ndaze vyoyaihiluse Damasiko na Hamati kwa Isilaeli, jiwele najali ja Yuda, navyandichigwa kuli chitabu cha kukumbuchilwa kwa wandewa wa Isilaeli.
2KI 14:29 Yeloboamu nakabagama ako Isilaeli na kutiligwa kuli vilaga vya chiundewa. Sekaliya mwanage, nakawa mndewa honhu ha heye.
2KI 15:1 Kuli mwaka wa makumi meli na saba wa ulongozi wa Yeloboamu, mndewa wa Isilaeli, Usiya mwana wa Amasiya, mndewa wa Yuda, nakaluka kulongoza.
2KI 15:2 Nakaluka kulongoza loyawele na miyaka kumi na sita. Nakalongoza ako Yelusalemu kwa miyaka makumi gahano na mili. Mayake nayali yochemigwa Yekoliya, kulawa Yelusalemu.
2KI 15:3 Usiya nakadita ganojile hali Mkulu Nguluwi, kota vyoyaditile Amasiya, mhaza wa heye.
2KI 15:4 Ila hala honhu ha kufugamila milungu hahawifigwe. Wanhu nawalutilila kulavya nhambiko na kufunyiza ubani hali honhu aho.
2KI 15:5 Mkulu Nguluwi nakamtowa mndewa kwa utamwa wa ngozi mbaka loyabagame. Nayali yochikala kuli ng'handa ibaguligwe. Yotamu, mwana wa mndewa, nayali yoilolela ng'handa ya mndewa na kuwalongoza wanhu wa isi ayo.
2KI 15:6 Madito ganji ga ulongozi wa Usiya na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
2KI 15:7 Usiya nakabagama na kutiligwa kuli muji wa Daudi. Yotamu mwanage, nakalongoza honhu ha heye.
2KI 15:8 Kuli mwaka wa makumi gadatu na nane ja ulongozi wa Asaliya, mndewa wa Yuda, Sekaliya, mwana wa Yeloboamu, nakaluka kulongoza Isilaeli, nayali mndewa wa Isilaeli kuli Samaliya. Nakalongoza kwa mhela wa myezi sita.
2KI 15:9 Sekaliya nakadita gehile hali Mkulu Nguluwi, kota mhaza wa heye vyoyaditile. Hagalechile gehile ga Yeloboamu, mwana wa Nebati, yawele nakawambuza Waisilaeli kudita gehile.
2KI 15:10 Shalumu, mwana wa Yabeshi, nayali na majesa ga kumditila vibi Sekaliya. Ahyo nakamtowa hali wanhu mbaka nakamkopola, hamba nakalongoza honhu ha heye.
2KI 15:11 Madito ganji ga ulongozi wa Sekaliya, nagandichigwa kuli chitabu cha kukumbuchila kwa wandewa wa Isilaeli.
2KI 15:12 Lelo ulonzi wa Mkulu Nguluwi ulonjigwe kwa mndewa Yehu, kwa kulonga, “Walelwa wa hegwe wochikalisa kuli chigoda cha undewa cha Isilaeli mbaka lulelo lwa kane.” Nayali ahyo.
2KI 15:13 Shalumu, mwana wa Yabeshi nakawa mndewa kuli mwaka wa makumi gadatu na tisa ga ulongozi wa Usiya, mndewa wa Yuda. Nakalongoza ako Samaliya kwa mwezi umwe.
2KI 15:14 Hamba Menahemu, mwana wa Gadi, nakalawa Tilisa na kuluta Samaliya. Nakamtowa na kumkopola Shalumu, mwana wa Yabeshi, hamba nakawa mndewa honhu ha heye.
2KI 15:15 Madito ganji geng'ha ga ulongozi wa Shalumu na kukopola koyaditile, navyandichigwa kuli chitabu cha kukumbuchila kwa wandewa wa Isilaeli.
2KI 15:16 Mhela wula Menahemu loyawele mnzila kulawa Tilisa, nakautowa muji wa Tifusa na kuwadumya wanhu wawele mgati mwake na wala wawele honhu ha habehi, kwa vila nawalema kumchumulila lwizi lwa hewo. Nakaidumya Tifusa yeng'ha na kuwatumbula mida wadala weng'ha wawele na himila.
2KI 15:17 Kuli mwaka wa makumi gadatu na tisa wa ulongozi wa Usiya, mndewa wa Yuda, Menahemu mwana wa Gadi, nakawa mndewa wa Isilaeli. Nakalongoza ako Samaliya kwa mhela wa miyaka kumi.
2KI 15:18 Nakadita gehile hali Mkulu Nguluwi. Kuli mhela wa ulongozi wa heye weng'ha, halechile gehile ga Yeloboamu, mwana wa Nebati, yawele nakawambuza Waisilaeli kudita gehile.
2KI 15:19 Hamba, Tigilati-pileseli mndewa wa Ashulu, nakaitowa Isilaeli. Menahemu, mndewa wa Isilaeli, nakamha kilo elufu makumi gadatu na zine (34,000) za sendi leka yamtanze kwimiza nzinzili ulongozi wa heye kuli isi ya Isilaeli.
2KI 15:20 Menahemu nakapata sendi azo kwa lupichi kulawa Isilaeli. Chila yawele na lufufu nayali yoganigwa kulavya migwala makumi gahano ja sendi jiwele nakapegwa mndewa wa Ashulu. Ahyo mndewa wa Ashulu nakelavya na halutilile kikala Isilaeli.
2KI 15:21 Madito ganji geng'ha ga ulongozi wa Menahemu na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
2KI 15:22 Menahemu nakabagama. Pekahiya mwanage, nakawa mndewa honhu ha heye.
2KI 15:23 Kuli mwaka wa makumi gahano wa ulongozi wa Usiya, mndewa wa Yuda, Pekahiya, mwana wa Menahemu, nakawa mndewa wa Isilaeli ako Samaliya. Nakalongoza kwa mhela wa miyaka mili.
2KI 15:24 Pekahiya nakadita gehile hali Mkulu Nguluwi. Hagalechile gehile ga Yeloboamu, mwana wa Nebati, yawele nakawambuza Waisilaeli kudita gehile.
2KI 15:25 Peka, mwana wa Lemaliya, yawele ndo yumwe wa vilongozi wa wamizi wa Pekahiya, nayali yochijesa kumditila vibi Pekahiya. Nakawahola wanhu makumi gahano wa Gileadi na kumkopola Pekahiya, hamwe na Aligobu na Aliya, kuli ngome ya ng'handa ya chiundewa ako Samaliya. Ahyo, Peka nakamkopola Pekahiya, hamba nakawa mndewa honhu ha heye.
2KI 15:26 Madito ganji ga ulongozi wa Pekahiya na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
2KI 15:27 Kuli mwaka wa makumi gahano na mili wa ulongozi wa Usiya mndewa wa Yuda, Peka mwana wa Lemaliya, nakawa mndewa wa Isilaeli ako Samaliya. Nakalongoza kwa mhela wa miyaka makumi meli.
2KI 15:28 Nakadita gehile hali Mkulu Nguluwi, hagalechile gehile ga Yeloboamu, mwana wa Nebati, yawele nakawambuza wanhu wa Isilaeli kudita gehile.
2KI 15:29 Mhela wa ulongozi wa Peka, mndewa wa Isilaeli, Tigilati-pileseli, mndewa wa Ashulu, nakoya na kuuboka muji wa Iyoni na muji wa Abeli-beti-maaka na muji wa Yanoa na muji wa Kedeshi na muji wa Hasoli na mkowa wa Gileadi na mkowa wa Galilaya, hamwe na mkowa weng'ha wa Nafutali, nakawosa wanhu na kuwegala Ashulu.
2KI 15:30 Hamba Hosheya, mwana wa Ela, nayali yochijesa kumditila gehile Peka, mwana wa Lemaliya. Nakamtowa na kumkopola Lemaliya, hamba nakawa mndewa honhu ha heye, kuli mwaka wa makumi meli wa ulongozi wa Yotamu, mwana wa Usiya.
2KI 15:31 Madito ganji ga ulongozi wa Peka na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
2KI 15:32 Kuli mwaka wa keli wa ulongozi wa Peka, mwana wa Lemaliya, mndewa wa Isilaeli, Yotamu, mwana wa Usiya, mndewa wa Yuda, nakaluka kulongoza ako Yuda.
2KI 15:33 Nayali na miyaka makumi meli na jihano loyaluche kulongoza. Naye nakalongoza ako Yelusalemu kwa mhela wa miyaka kumi na sita. Mayake nayali yochemigwa Yelusha, mhinza wa Sadoki.
2KI 15:34 Nakadita ganojile hali Mkulu Nguluwi, kota vila Usiya, mhaza wa heye, vyoyaditile.
2KI 15:35 Ila honhu ha kufugamila milungu hahosigwe. Wanhu nawalutilila kulavya nhambiko na kufunyiza ubani ako. Yotamu nakazenga kahi lwizi lwa kuchanya lwa ng'handa ya Mkulu Nguluwi.
2KI 15:36 Madito ganji ga ulongozi wa Yotamu na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
2KI 15:37 Mhela wa ulongozi wa Yotamu, Mkulu Nguluwi nakaluka kuwalajiza Lesini, mndewa wa Alamu na Peka, mwana wa Lemaliya, mndewa wa Isilaeli, leka waitowe Yuda.
2KI 15:38 Yotamu nakabagama na kutiligwa kuli vilaga vya chiundewa kuli muji wa Daudi. Ahasi, mwanage nakalongoza honhu ha heye.
2KI 16:1 Kuli mwaka wa kumi na saba wa ulongozi wa Peka, mwana wa Lemaliya, mndewa wa Isilaeli, Ahasi mwana wa Yotamu, mndewa wa Yuda, nakaluka kulongoza.
2KI 16:2 Ahasi nayali na miyaka makumi meli loyaluche kulongoza. Nakalongoza ako Yelusalemu kwa mhela wa miyaka kumi na sita. Nakadita vilivinji na sekulu wa heye Daudi, heye haditile ganojile hali Mkulu Nguluwi, Nguluwi wa heye.
2KI 16:3 Nakawinza nzila ya wandewa wa Isilaeli na kumlavya mwanage leka yawe nhambiko kuli chiluli, yowinza vihendo vya kuzudiza vya wanhu wa isi wawele Mkulu Nguluwi nayali yawawinjile hali wanhu wa Isilaeli.
2KI 16:4 Ahasi nakalavya nhambiko na kufunyiza ubani honhu ha kufugamila milungu na mchanya mwa vidunda na hasi ha chila igodi liwele na mahamba madodi.
2KI 16:5 Hamba Lesini, mndewa wa Alamu na Peka, mwana wa Lemaliya, mndewa wa Isilaeli, nawaluta kitowa ngondo na wanhu wa Yelusalemu na kumzunguluta Ahasi kwa wamizi, ila nawalemwela kumsumya.
2KI 16:6 Mhela awo Lesini, mndewa wa Alamu nakauhilula muji wa Elasi kwa Waalamu kwa kuwawinga wanhu wa Yuda. Hamba Waedomu nawaluta kikala Elasi, nawo wangikala ako kulawa mhela awo.
2KI 16:7 Ahasi nakawalajiza wasenga kwa Tigilati-pileseli, mndewa wa Ashulu, yolonga, “Heni nda chitumagwa wa hegwe wakitumbila. Uye undohole kulawa kwa wandewa wa Ashulu na wa Isilaeli, walingunhowa.”
2KI 16:8 Ahasi kahi nakahola sendi na zahabu kuli ng'handa ya Mkulu Nguluwi na kuli ng'hano ya ng'handa ya mndewa na kuzilajiza kwa Tigilati-pileseli, mndewa wa Ashulu kota ndolendole.
2KI 16:9 Mndewa wa Ashulu nakamwidichila Ahasi kwa kuutowa muji wa Damasiko na kuuhola. Nakawalavya wenyeng'haye wa Damasiko mbaka Kili na kumkopola Lesini.
2KI 16:10 Hamba mndewa Ahasi nakaluta Damasiko kiting'hana na Tigilati-pileseli, mndewa wa Ashulu. Loyawele ako nakona honhu ha kulavila nhambiko, ahyo nakalajiza kwa mtambika Uliya kalatasi icholigwe honhu ha kulavila nhambiko, hamwe na malajizo ga ndaze vyowozenga.
2KI 16:11 Mtambika Uliya nakazenga honhu ha kulavila nhambiko kwa kiwhana na mndewa Ahasi vyoyalajize kulawa Damasiko. Nakasinda kuzenga mndewa Ahasi yang'hali kuhiluka.
2KI 16:12 Mndewa Ahasi loyahiluche kulawa Damasiko, nakahona aho honhu ha kulavila nhambiko, nakahahejelela na kulavya nhambiko mchanya mwake.
2KI 16:13 Nakalavya nhambiko ya kulakazwa na ya nyhule na ya kunwa na kumizila danda ya nhambiko za heye za kikala goya mchanya mwa aho honhu ha kulavila nhambiko.
2KI 16:14 Mndewa Ahasi nakahosa hala honhu ha kulavila nhambiko ha katali ha shaba hawele hali ng'handa ya Mkulu Nguluwi na kuhawika ubanzi wa kasikazini mwa honhu ha kulavila nhambiko hanyale hawele hagati ha lwizi lwa ng'handa ya Mkulu Nguluwi.
2KI 16:15 Hamba mndewa Ahasi nakalajiza hino kwa mtambika Uliya, “Kuwala aho honhu ha kulavila nhambiko hakulu hanyale, ulavye nhambiko ya hamitondo ya kulakazwa na ya matinazo ya nyhule na nhambiko ya mndewa ya kulakazwa na ya nyhule, hamwe na nhambiko ya kulakazwa ya wanhu weng'ha wa isi na nhambiko ya hewo ya nyhule na ya chakunwa. Umizile danda yeng'ha ya nhambiko za kulakazwa na nhambiko zinji mchanya mwa honhu ha kulavila nhambiko hanyale. Ila heni ndotumiya hala honhu ha kulavila nhambiko ha katali kwa kuuza ulonzi wa Nguluwi.”
2KI 16:16 Mtambika Uliya nakadita kota vyoyalajizwe na mndewa Ahasi.
2KI 16:17 Mndewa Ahasi nakosa mabamba ga hafungo gawele nagali gabatililwe na fulemu na kusa visaye kulawa kuli zila fulemu. Nakosa lila ibiga likulu kuli jila mibuguma ja shaba jilingubatilila na kuliwika kuli chikalilo cha iganga.
2KI 16:18 Kwa lutogo lwa mndewa wa Ashulu, kahi nakosa lila ihema liwele nalyali lyangutumiwa kuli zuwa lya kwesela na kusa kahi yila nzila ya chiundewa ya kwinjilila kuli ng'handa ya Mkulu Nguluwi.
2KI 16:19 Lelo Madito ganji ga ulongozi wa mndewa Ahasi, nagandichigwa kuli chitabu cha kukumbuchila kwa wandewa wa Yuda.
2KI 16:20 Ahasi nakabagama na kutiligwa kuli muji wa Daudi. Hesekiya, mwanage nakalongoza honhu ha heye.
2KI 17:1 Kuli mwaka wa kumi na mbili wa ulongozi wa Ahasi, mndewa wa Yuda, Hosheya, mwana wa Ela, nakawa mndewa wa Isilaeli ako Samaliya. Nakalongoza ako kwa miyaka tisa.
2KI 17:2 Nakadita gehile hali Mkulu Nguluwi, ila haiwele kota wandewa wanji wa Isilaeli, wamlongole.
2KI 17:3 Shalimanesa, mndewa wa Ashulu nakamtowa mndewa Hosheya. Hamba Hosheya nakawa chitumagwa wa Shalimanesa na kumlavila kodi.
2KI 17:4 Ila mndewa wa Ashulu nakavizela kota Hosheya nakabelenhuka, kwa vila nayali yawalajize wasenga kwa So, mndewa wa Misili na halutilile kulipa kodi kota vyoyawele yodita kuli chila mwaka. Ahyo, Shalimanesa nakamibata na kumuwika mchinweng'ho.
2KI 17:5 Hamba mndewa wa Ashulu nakaitowa isi yeng'ha, naketowa na wamizi wa muji wa Samaliya na kuuzunguluta kwa wamizi wa mhela wa miyaka jidatu.
2KI 17:6 Kuli mwaka wa tisa wa ulongozi wa Hosheya, mndewa wa Ashulu nakauhola muji wa Samaliya na kuwahola wanhu wa Isilaeli na kuwahilika Ashulu. Nakawawika ako kuli muji wa Hala na wamwenga nakawawika habehi na lwanda lwa Haboli kuli mkowa wa Gosani na kuli miji ja Wamedi.
2KI 17:7 Aga geng'ha nagalawila kwa vila Waisilaeli nawadita gehile hali Mkulu Nguluwi, Nguluwi wa hewo, yawele nakawalavya kulawa Misili hali ulongozi wa ludali lwa Falao, mndewa wa Misili, ila nawajifugamila milungu
2KI 17:8 na kuwinza vihendo vya wanhu wa isi zinji wawele Mkulu Nguluwi nayali yawawinjile hali hewo, hamwe na vihendo viwele wandewa wa Isilaeli nawali wavigalile.
2KI 17:9 Wanhu wa Isilaeli nawajeza kudita mbuli kwa uviso leka kumvisa Mkulu Nguluwi, Nguluwi wa hewo, mbuli ziwele haziwele goya. Nawezenjela honhu ha kufugamila milungu kuli vijiji vya hewo mbaka kuli miji jiwele na ngome.
2KI 17:10 Nawawika maganga ga kufugamilwa na mizengo ja Ashela mchanya mwa chila chidunda chiwele ng'wemang'wema na hasi ha chila igodi liwele na mahamba madodi.
2KI 17:11 Nawafunyiza ubani kuli chila honhu ha kulavila nhambiko, kota vyowaditile wala wanhu wa isi zinji wawele Mkulu Nguluwi nayali yawawinjile hali hewo. Nawadita mbuli zihile ziwele nazimzudiza Mkulu Nguluwi.
2KI 17:12 Nawajifugamila jimalukolo, hanga Mkulu Nguluwi nayali yalonjile, “Mleche kudita mbuli azo.”
2KI 17:13 Mkulu Nguluwi nakawalajiza waloli na walingulola wa heye weng'ha leka waikanye Isilaeli na Yuda, yolonga, “Mzileche nzila za hemwe zihile, mibatilile mizilo ja heni na malajizo ga heni na kuwinza malajizo gondiwapele wasekulu wa hemwe kwa kukolela vitumagwa wa heni waloli.”
2KI 17:14 Ila hawahulichize, nawali na nhumbula zigagadale kota wasekulu wa hewo, wawele hawamkundile Mkulu Nguluwi, Nguluwi wa hewo.
2KI 17:15 Nawajilema mizilo ja heye na ilagano yaliditile na wasekulu wa hewo na makanyo goyawapele. Nawajifugamila jimalukolo jilihela utanzi mbaka nawo nawali walihela utanzi kahi. Nawawinza vihendo vya wanhu wa isi wawele habehi na hewo, hanga Mkulu Nguluwi nayali yawakanyile kwa kuwalonjela, “Mleche kudita kota vyowalingudita.”
2KI 17:16 Nawagaleka malajizo geng'ha ga Mkulu Nguluwi, Nguluwi wa hewo na kigongomanyila jimalukolo mili kwa kiwhana na ilogota na izengo lya Ashela. Nawavifugamila vinhu vyeng'ha vya kuli ulanga na kumkolela mijito Baali.
2KI 17:17 Nawawalavya wana wa hewo walume na wadala kota nhambiko kuli chiluli. Nawalagula na kuhawila na kiguza hewo wawo kuli kudita wihe hali Mkulu Nguluwi na kumzudiza.
2KI 17:18 Lelo Mkulu Nguluwi nakawa na ng'halazi ng'hatu na wanhu wa Isilaeli na kuwawinga hali heye. Nhanzi ya Yuda iliyeka ndo iponile.
2KI 17:19 Ila wanhu wa Yuda nawo hawajiwinzile mizilo ja Mkulu Nguluwi, Nguluwi wa hewo. Nawawinza vihendo vigaligwe na Waisilaeli.
2KI 17:20 Ahyo Mkulu Nguluwi nakawalema Waisilaeli weng'ha, nakawagaza na kuwaleka mmoko mwa wang'honyo wang'ang'ale, hamba nakawawinga hali heye.
2KI 17:21 Hamwande Mkulu Nguluwi loyawabagule wanhu wa Isilaeli kulawa kuli ivyazi lya Daudi, nawamdita Yeloboamu, mwana wa Nebati, yawe mndewa wa hewo. Yeloboamu nakawadita wanhu wa Isilaeli wamleche Mkulu Nguluwi na kudita gehile ng'hatu.
2KI 17:22 Waisilaeli nawadita gehile kota goyaditile Yeloboamu, mwana wa Nebati, hawagalechile,
2KI 17:23 mbaka Mkulu Nguluwi nakawawinga hali heye, kota vila vyoyawakanyile kwa kukolela vitumagwa wa heye weng'ha, wawele ndo waloli. Ahyo wanhu wa Isilaeli nawaholigwa kulawa kuli isi ya hewo wawo na kuhilikwa kuli isi ya Ashulu, kuwele wangikala ako kulawa mhela awo.
2KI 17:24 Hamba mndewa wa Ashulu nakawegala wanhu kulawa Babuloni na Kuta na Ava na Hamati na Sefalivaimu na kuwawika kuli miji ja Samaliya honhu ha wanhu wa Isilaeli. Nawaihola Samaliya na kikala kuli miji jake.
2KI 17:25 Mhela lowaluche kikala amo, hawamdumbile Mkulu Nguluwi, ahyo Mkulu Nguluwi nakalajiza misimba hali hewo, misimba ajo najiwakopola wamwe wa hewo.
2KI 17:26 Hamba wanhu nawamlonjela mndewa wa Ashulu, “Wanhu wawele nakuwahola kula na kuwawika kuli miji ja Samaliya, hawavizelele choyalinguchigana mlungu wa isi ayo. Ahyo mlungu yula nakalajiza misimba hali hewo, misimba ajo najiwakopola.”
2KI 17:27 Mndewa wa Ashulu nakalajiza, “Mumhole mtambika yumwe hali wala tuwaholile kulawa Samaliya, mumhiluse leka yekale ako na kuwalangusa wanhu malajizo ga mlungu wa isi ayo.”
2KI 17:28 Ahyo yumwe wa wala watambika waholigwe kulawa Samaliya nakaluta kikala Beteli na kuwalangusa wanhu vyoilinguganigwa kumdumba Mkulu Nguluwi.
2KI 17:29 Ila wanhu wa isi zinji wegaligwe Samaliya, nawegongomanyila milungu ja hewo kuli miji jimwenga hali honhu howalingikala na kujiwika kuli honhu ha kufugamila milungu jiwele wanhu wa Samaliya nawali wajigongomanye.
2KI 17:30 Wanhu wa Babuloni nawagongomanya limalukolo lya Sukoti-benoti leka liwe ndo mlungu wa hewo. Wanhu kulawa Kuti nawagongomanya limalukolo lya Neligali na wanhu kulawa Hamati nawagongomanya limalukolo lya Ashima
2KI 17:31 na Waavi nawagongomanya jimalukolo ja Nibuhasi na Talitaki. Wasefalivaimu nawawalavya wana wa hewo walume na wadala leka wawe nhambiko za kulakazwa na chiluli kwa Adilameleki na Anameleki, milungu ja Sefalivaimu.
2KI 17:32 Wanhu wano kahi nawamfugamila Mkulu Nguluwi, ila nawawahagula wanhu wa hewo leka wawe watambika hali honhu ha kufugamila milungu ja hewo.
2KI 17:33 Ahyo nawamfugamila Mkulu Nguluwi, ila kahi nawajikolela mijito milungu ja hewo kwa kiwhana na vihendo vya wanhu wa isi yowalawile.
2KI 17:34 Wang'hali wanguwinza vihendo vya hewo vya katali kulawa mhela wula. Hawalingumfugamila Mkulu Nguluwi ne kibatilila nhaguso ne malajizo ga heye ne malajizo ganji ne mizilo jiwele Mkulu Nguluwi nayali yawapele wanhu wa lulelo lwa Yakobo, yawele nakamchema Isilaeli.
2KI 17:35 Mhela Mkulu Nguluwi loyaditile ilagano na Waisilaeli, nakawalajiza yolonga, “Mleche kujifugamila milungu ne kujikolela mijito ne kujilavila nhambiko.
2KI 17:36 Ila mofugamila heni Mkulu Nguluwi, ndiwalavile kulawa Misili kwa ludali na mong'ho ng'hatu. Mofugamila heni na kundavila nhambiko.
2KI 17:37 Mhela weng'ha moganigwa kilolela leka mibatilile malajizo na mizilo ja heni viwele nanyandika kwa chiwalo cha hemwe. Mleche kujifugamila milungu.
2KI 17:38 Mleche kusemwa ilagano lyondiliditile na hemwe, mleche kujifugamila milungu.
2KI 17:39 Ila mofugamila heni Mkulu Nguluwi, Nguluwi wa hemwe, mbele ndowalohola kulawa mmoko mwa wang'honyo wa hemwe weng'ha.”
2KI 17:40 Ila wanhu awo hawahulichize, nawalutilila kudita kota vyowaditile aho hamwande.
2KI 17:41 Kulawa mhela wula, wanhu kulawa zila isi zinji nawalutilila kujifugamila jimalukolo ja hewo, hanga nawali womfugamila Mkulu Nguluwi. Wana na wazukulu wa hewo wangulutilila kudita kota wasekulu wa hewo vyowaditile.
2KI 18:1 Kuli mwaka wa kadatu wa ulongozi wa Hosheya, mwana wa Ela, mndewa wa Isilaeli, Hesekiya, mwana wa Ahasi, mndewa wa Yuda, nakaluka kulongoza.
2KI 18:2 Nayali na miyaka makumi meli na jihano loyaluche kulongoza. Nakalongoza ako Yelusalemu kwa miyaka makumi meli na tisa. Mayake nayali yochemigwa Abiya, mhinza wa Sekaliya.
2KI 18:3 Nakadita ganojile hali Mkulu Nguluwi, kota vyoyaditile Daudi, sekulu wa heye.
2KI 18:4 Nakahawifya honhu ha kufugamila milungu na kubenanga jimalukolo na kutemanga mizengo ja Ashela. Nakatulanga lila limalukolo lya izoka lya shaba ligongomanyigwe na Musa, liwele nalyali lichemigwa Nahushitani, kwa vila mbaka mhela awo wanhu wa Isilaeli nawali wolifunyizila ubani.
2KI 18:5 Hesekiya nayali yochitumbila kwa Mkulu Nguluwi, Nguluwi wa Isilaeli. Nakwali haduhu mndewa yunji wa kiwhana na heye hali wandewa wa Yuda, wamlongole ama woyile hamba.
2KI 18:6 Nakelumba na Mkulu Nguluwi, halechile kumuwinza ne kubatilila mizilo ja Mkulu Nguluwi joyampele Musa.
2KI 18:7 Mkulu Nguluwi nayali hamwe na Hesekiya na chila mbuli yaiditile nailutilila goya. Nakambelenhuka mndewa wa Ashulu, hamkolele mijito.
2KI 18:8 Nakawatowa Wafilisti mbaka kufika kuli muji wa Gasa na honhu hake heng'ha. Nakavitowa vijiji mbaka kuli miji jiwele na ngome.
2KI 18:9 Kuli mwaka wa kane wa ulongozi wa mndewa Hesekiya, uwele nawali mwaka wa saba wa Hosheya, mwana wa Ela, mndewa wa Isilaeli, Shalimanesa, mndewa wa Ashulu, nakaluta kuutowa muji wa Samaliya na kuuzunguluta kwa wamizi.
2KI 18:10 Kuli kuduma kwa mwaka wa kadatu, Waashulu nawauhola muji wa Samaliya. Ahyo muji wa Samaliya nauholigwa kuli mwaka wa sita wa ulongozi wa mndewa Hesekiya, uwele nawali ndo mwaka wa tisa wa ulongozi wa Hosheya, mndewa wa Isilaeli.
2KI 18:11 Mndewa wa Ashulu nakawahola wanhu wa Isilaeli kulawa Ashulu na kuwawika Hala habehi na lwanda lwa Haboli kuli mkowa wa Gosani na kuli miji ja Wamedi.
2KI 18:12 Mbuli ayi nailawila kwa vila hawamhulichize Mkulu Nguluwi, Nguluwi wa hewo, ila nawali wabenile ilagano lya heye, gala geng'ha gawele Musa, chitumagwa wa Mkulu Nguluwi nayali yawalajize. Hawagahulichize ne kugebatilila.
2KI 18:13 Kuli mwaka wa kumi na jine wa ulongozi wa mndewa Hesekiya, Senakelibu, mndewa wa Ashulu, nakajitowa na kujihola miji jeng'ha ja Yuda jiwele na ngome.
2KI 18:14 Lelo Hesekiya, mndewa wa Yuda, nakalajiza usenga kwa Senakelibu, mndewa wa Ashulu, ako Lakishi, yolonga, “Nandita wihe. Wuche kuli isi ya heni, nani ndokulipa choneche choulingugana kwa heni.” Mndewa wa Ashulu nakamlonjela Hesekiya, mndewa wa Yuda yalavye kilo elufu tisa (9,000) za sendi na kilo miya tisa (900) za zahabu.
2KI 18:15 Lelo Hesekiya nakamha sendi zeng'ha ziwele kuli ng'handa ya Mkulu Nguluwi na kuli ng'hano ya ng'handa ya mndewa.
2KI 18:16 Mhela awo Hesekiya, mndewa wa Yuda, nakabadula zahabu yeng'ha iwele naigubika lwizi na fulemu za ng'handa ya Mkulu Nguluwi, nakamha mndewa wa Ashulu.
2KI 18:17 Hamba mndewa wa Ashulu nakawalajiza wakulu wadatu hamwe na wamizi wenji kulawa Lakishi na kuluta kwa mndewa Hesekiya ako Yelusalemu. Nawaluta Yelusalemu na kwima habehi na chikolola cha ilamba lya Kuchanya, liwele nalizenjigwa kuli nzila ng'hulu ilinguluta kuli chalanza cha dobi.
2KI 18:18 Nawalajiza mndewa yachemigwe. Eliyakimu, mwana wa Hilikiya, yawele nayali yoilolela ng'handa ya mndewa na Shebuna, yawele nayali yalingwandika na Yowa, mwana wa Asafu, yalingwandika kukumbuchila, nawaluta kumbochela.
2KI 18:19 Yula chilongozi mkulu wa wamizi nakawalonjela, “Mumlonjele Hesekiya, ahi ndo vyoyalingulonga mndewa mkulu, mndewa wa Ashulu, ‘Kwangitumbila choni?
2KI 18:20 Kwangulonga kuna majesa na mong'ho wa wamizi, ila kwangulonga hela. Kwangitumbila kwa whaani mbaka nakumbelenhuka?
2KI 18:21 Ulole lelo, kwangitumbila ako Misili, ng'weku yila ya idenje lituliche, liwele lyanguuhomaga na kuulumiza moko wa munhu wone kolyegamila. Ahyo ndo vyoyawele Falao, mndewa wa Misili, kwa weng'ha walingitumbila kwa heye.’
2KI 18:22 “Ila wone mndonjele, ‘Twangitumbila kwa Mkulu Nguluwi, Nguluwi wa hetwe.’ Mvizele kota ndo yuyo Nguluwi yawele Hesekiya nakahawifya honhu hake ha kufugamila milungu na honhu hake ha kufunyizila ubani na kuwalonjela wanhu wa Yuda na wanhu wa Yelusalemu wafugame hali honhu ha kulavila nhambiko hawele ako Yelusalemu.
2KI 18:23 Lelo, muye mikundize na mkulu wa heni, mndewa wa Ashulu, nani ndowapa hemwe falasi elufu mbili, ila ndanguvizela kota mwahela wakwina falasi wa kuhega.
2KI 18:24 Moweza ndaze kumsumya chilongozi ne yumwe yawele mdodo hali vilongozi wa mkulu wa heni, kuno mwangitumbila kuli isi ya Misili kwa mituka ja ngondo na wakwina falasi?
2KI 18:25 Mzidi wa ago, ndaze, mwangijesa kota nambuya kuitowa na kuhadumya honhu hano ne kulajizwa na Mkulu Nguluwi? Mkulu Nguluwi yuye ndo yandajize kuitowa na kuidumya isi ayi.”
2KI 18:26 Hamba Eliyakimu, mwana wa Hilikiya na Shebuna na Yowa, nawamlonjela ayo chilongozi wa wamizi, “Dedede, ulongase na hetwe vitumagwa wa hegwe kwa ndonga ya Chialamu, kwa vila twanguizela. Uleche kulongasa na hetwe kwa Chiebulaniya, kwa vila wanhu wawele kuli lukanzi wanguhulichiza.”
2KI 18:27 Ila yula chilongozi wa wamizi nakawalonjela, “Ndaze, mkulu wa heni nakandajiza kulavya usenga awu kwa mkulu wa hemwe na kwa hemwe hela? Nakandajiza kahi kwa wanhu walingikalisa kuli lukanzi, wawele woganigwa kulya midohe ja hewo wawo na kunwa mitunzi ja hewo wawo.”
2KI 18:28 Hamba ayo chilongozi wa wamizi nakema na kulonga kwa Chiebulaniya, “Mhulichize ulonzi wa mndewa mkulu, mndewa wa Ashulu!
2KI 18:29 Kangulonga kota mleche kukunda Hesekiya yawahade hemwe, kwa vila howeza kuwalohola kulawa mmoko mwa heye.
2KI 18:30 Mleche kukunda Hesekiya yawahade hemwe leka mitumbile kwa Mkulu Nguluwi kwa kuwalonjela, ‘Mkulu Nguluwi kotulohola na muji awu hauwichigwa mmoko mwa mndewa wa Ashulu.’
2KI 18:31 Mleche kumhulichiza Hesekiya, kwa vila mndewa wa Ashulu kangulonga kota mihanyise na heye na miwiche hali ulongozi wa heye. Hamba chila yumwe kolya kulawa kuli mzabibu wa heye na mtini wa heye yuye na kunwa mazi kulawa kuli ideho lya heye yuye,
2KI 18:32 mbaka aho hamba hoyokuya kuwahilika kutali kuli isi kota ayi ya hemwe, isi iwele na nyhule na divai na mibumunda na migunda ja zabibu na mizeituni na hanombwa, leka mikale mleche kubagama. Mleche kumhulichiza Hesekiya hoyowahada hoyolonga kota Mkulu Nguluwi kowalohola hemwe.
2KI 18:33 Ndaze, kabaho mlungu wa wanhu wa isi yoneche yawele nakawalohola kulawa mmoko mwa mndewa wa Ashulu?
2KI 18:34 Jakohi milungu ja Hamati na Alipadi? Jakohi milungu ja Sefalivaimu na Hena na Iva? Ndaze, najiulohola muji wa Samaliya kulawa mmoko mwa heye?
2KI 18:35 Mlungu wachi hali milungu jeng'ha ja isi azi yawele nakailohola isi ya heye mmoko mwa mndewa wa Ashulu? Ahyo Mkulu Nguluwi howeza kuulohola muji wa Yelusalemu kulawa mmoko mwa heni.”
2KI 18:36 Ila wala wanhu nawenyamalila, hawedichile chinhu choneche, kwa vila mndewa Hesekiya nayali yawalajize, “Mleche kumwidichila.”
2KI 18:37 Hamba Eliyakimu, mwana wa Hilikiya, yawele nayali yoilolela ng'handa na Shebuna yalingwandika kukumbuchila na Yowa, mwana wa Asafu, yalingwandika, nawaluta kwa Hesekiya kuno mivalo ja hewo jidaduligwe kwa masinzo na kumlonjela ulonzi uwele chilongozi mkulu wa wamizi woyaulonjile.
2KI 19:1 Mndewa Hesekiya loyahuliche mbuli azo, nakadadula mivalo ja heye na kuvala mivalo ja igunila kwa masinzo, nakenjila kuli ng'handa ya Mkulu Nguluwi.
2KI 19:2 Nakawalajiza Eliyakimu, yawele nayali yoilolela ng'handa ya mndewa na Shebuna, yalingwandika na vilongozi wa watambika, weng'ha wawele wavalile mivalo ja migunila, walute kwa mloli Isaya, mwana wa Amosi.
2KI 19:3 Nawamlonjela, “Awu ndo usenga kulawa kwa Hesekiya, ‘Lehano ndo zuwa lya magazo na lya kung'hanuchilwa na lya soni, kota vila mhela wana vyowowa habehi kupondigwa na haduhu mong'ho wa kuwaponda.
2KI 19:4 Hanji Mkulu Nguluwi, Nguluwi wa hegwe nakauhulika ulonzi wa chilongozi wa wamizi, yawele mkulu wa heye, mndewa wa Ashulu, nakamlajiza kumbeza Nguluwi yawele mkomu. Mkulu Nguluwi, Nguluwi wa hegwe, komng'hanuchila. Ahyo ulande kwa chiwalo cha wanhu wasigale.’ ”
2KI 19:5 Lelo vitumagwa wa mndewa Hesekiya lowafichile kwa Isaya,
2KI 19:6 Isaya nakawalonjela, “Mkulu Nguluwi kangulonga, ‘Uleche kudumba kwa ulonzi wouuhuliche, wula ulonzi uwele vitumagwa wa mndewa wa Ashulu waulonjile kundiga heni.
2KI 19:7 Ulole! Ndomuwichila mndewa muhe umwenga mgati mwake leka hoyohulika usenga umwenga, kohiluka kuli isi ya heye yuye, nani ndomdita yakopoligwe hala kwa ipanga.’ ”
2KI 19:8 Chilongozi wa wamizi loyahuliche kota mndewa wa Ashulu nakoka Lakishi, nakahiluka na kumfika mndewa youtowa muji wa Libuna.
2KI 19:9 Lelo mndewa Senakelibu nakahulika kota Tilihaka, Mkushi, mndewa wa Misili nayali yoluta kitowa na heye. Ahyo nakawalajiza kahi wasenga kwa Hesekiya yolonga,
2KI 19:10 “Mumlonjele Hesekiya, mndewa wa Yuda, ‘Uleche kitumbila kwa Nguluwi wa hegwe hoyolonga kota Yelusalemu haiwichigwa mmoko mwa mndewa wa Ashulu.
2KI 19:11 Ndikomya hegwe nakuhulika zila mbuli zowaziditile wandewa wa Ashulu kuli isi zeng'ha, wowadumya ng'hatu. Ndaze, hegwe koloholigwa?
2KI 19:12 Ndaze, ajo milungu ja wanhu wa isi wawele nawadumigwa na wasekulu wa heni, milungu ja Gosani na Halani na Lesefu na ja wanhu wa Edeni wawele nawali wochikala ako Telasali, najiweza kuwalohola?
2KI 19:13 Wakohi wandewa wa miji ja Hamati na Alipadi na Sefalivaimu na Hena na wa Iva?’ ”
2KI 19:14 Mndewa Hesekiya nakabochela baluwa kulawa kwa wasenga na kuisoma. Hamba nakaluta na kwinjila kuli ng'handa ya Mkulu Nguluwi, naye nakaiwika hali Mkulu Nguluwi.
2KI 19:15 Hamba Hesekiya nakalanda hali Mkulu Nguluwi na kulonga, “Gwa Mkulu Nguluwi, Nguluwi wa Isilaeli, ulingikalisa kuli chigoda cha undewa hagati ha vilumbigwe viwele na mabawa, hegwe uliyeka ndo Nguluwi mchanya mwa undewa weng'ha wa kuli isi. Hegwe nakulumba isi na ulanga.
2KI 19:16 Gwa Mkulu Nguluwi, uwiche goya ikutu lya hegwe leka uhulichize, ugubule meho ga hegwe, gwa Mkulu Nguluwi leka wone, uhulichize ulonzi uwele Senakelibu nakalajiza kukuliga hegwe Nguluwi uwele mkomu.
2KI 19:17 Gwa Mkulu Nguluwi, ndikomya kota wandewa wa Ashulu nawawadumya wanhu wa isi azi na isi za hewo.
2KI 19:18 Nawajitoza milungu ja hewo kuli chiluli na kujidumya, kwa vila hajiwele milungu hebu, ila najali jimalukolo ja migodi na maganga jihongoligwe na moko ga wanhu.
2KI 19:19 Lelo, gwa Mkulu Nguluwi, Nguluwi wa hetwe, dedede utulohole, kulawa mmoko mwa Senakelibu, leka undewa weng'ha wa kuli isi uvizele kota hegwe uliyeka, gwa Mkulu Nguluwi, ndo Nguluwi.”
2KI 19:20 Hamba Isaya, mwana wa Amosi, nakahilika usenga kwa Hesekiya, yolonga, “Mkulu Nguluwi, Nguluwi wa Isilaeli, kangulonga hino, ‘Nanyhulika kulanda kwa hegwe kuwala Senakelibu, mndewa wa Ashulu.
2KI 19:21 Awu ndo ulonzi wa Mkulu Nguluwi woyalonjile kuwala Senakelibu, “ ‘Mhinza Yelusalemu, kangukuseka na kukubeza. Mhinza Siyoni kangutigasa mutwi wa heye houbilima.
2KI 19:22 Whaani umbezile na kumliga? Whaani youmng'hanuchile, na kumnogolela meho kwa kidaya? Ndo yula yawele Yelile wa Isilaeli!
2KI 19:23 Kwa kukolela wasenga wa hegwe, nakumliga ng'hatu Mkulu. Nagwe nakulonga, “Kwa mituka ja heni minji ja kitowa ngondo, nang'wina kuli vinhembenhembe vya vidunda, mbaka kuli vinhembenhembe vya kuchanya ng'hatu vya Lebanoni. Nandijigwisa mielezi jake jiwele ng'wemang'wema, na mibeloshi jake jinojile ng'hatu. Nafika hali honhu ha heye hawele kutali ng'hatu, vihulo vya heye vinojile ng'hatu.
2KI 19:24 Nambawa mideho kuli isi za chijenzi, na kunwa mazi ga chijenzi. Nang'haza nzanda zeng'ha za Misili kwa nzayo za magulu ga heni.”
2KI 19:25 “ ‘Ndaze, huhuliche? Nanyamula kuwala mbuli ayi kulawa katali. Mazuwa ga katali nandiiwika goya mbuli ayi, lelo nandiidita ilawile kwa kukupa mong'ho, wa kugalula miji jiwele na ngome kuwa mahame.
2KI 19:26 Wanhu wa miji ajo nawesilwa mong'ho, nawatweguka nhumbula na kubasigwa soni. Hewo nawali kota mizuchila kuli mgunda, kota misolo jilihela mong'ho, jilinguzuka mchanya mwa chinduwiko, na kukala jing'hali kukula.
2KI 19:27 “ ‘Ila ndanguvizela vyoulingikalisa, vyoulingulawa na vyoulingwinjila, na kuzudila kwa hegwe kuwala heni.
2KI 19:28 Kwa chiwalo cha kuzudila kwa hegwe kuwala heni na kidaya kwa hegwe nakufika kuli makutu ga heni, ndowika ndowano ya heni kuli menyhelo ya hegwe leka kukulongoza, na lijamu lya heni kuli mlomo wa hegwe. Ndokuhilusa kwa nzila yiyila yowuyile nayo.’ ”
2KI 19:29 Isaya nakalutilila kumlonjela mndewa Hesekiya, “Awu wowa ndo ulajilo kwa hegwe, gwa Hesekiya. Mwaka awu na mwaka awo ulinguya kolya chinhu chotile chiliyeka. Ila kuli mwaka wa kadatu monyala na kubeta mbena, monyala mizabibu na kulya mafuza gake.
2KI 19:30 Wala wasigale kuli lukolo lwa Yuda wokonjezeka na kuwa wenji kota vila igodi vyolilinguwika mizabi jake kuli misanga na kulela mafuza mchanya.
2KI 19:31 Kwa vila kulawa Yelusalemu wokuya wasigale, ena ako kuli chidunda cha Siyoni kowa wanhu wachefu wasigale. Fihi ya Mkulu Nguluwi Yawele na Mong'ho ndo yokweneza mbuli ayi.
2KI 19:32 “Ahyo, Mkulu Nguluwi kangulonga hino kuwala mndewa wa Ashulu, ‘Hokwinjila kuli muji awu ne kuutowa msale ne kuwuyila kwa ngawo ne kuuzunguluta.
2KI 19:33 Kohiluka kwa nzila yiyila yoyuyile na hokwinjila kuli muji awu.
2KI 19:34 Ndowamila muji awu na kuulohola, kwa chiwalo cha nene baha na kwa chiwalo cha Daudi, chitumagwa wa heni.’ ”
2KI 19:35 Lelo, nechilo yiyila mhilisi wa Mkulu Nguluwi nakaluta kuli kambi ya Ashulu na kuwakopola wanhu lachi imwe na elufu makumi nane na wahano (185,000). Wayawo lowenuche hamitondo, nawajifika mitufi chila honhu.
2KI 19:36 Lelo Senakelibu, mndewa wa Ashulu, nakabena kambi na kuka. Nakaluta Ninawi na kikala ako.
2KI 19:37 Zuwa limwe Senakelibu loyawele yomfugamila mlungu wa heye Nisiloki, wana wa heye wawele ndo Adilameleki na Shaleseli, nawamkopola kwa ipanga na kubilimila kuli isi ya Alalati. Naye Esalihadoni, mwanage, nakawa mndewa honhu ha heye.
2KI 20:1 Kuli mazuwa ago, Hesekiya nakatamika ng'hatu habehi kubagama. Mloli Isaya, mwana wa Amosi, nakaluta kwa heye na kumlonjela, “Ahi ndo vyoyalingulonga Mkulu Nguluwi, ‘Uwiche goya mbuli za hegwe kuli ng'handa ya hegwe, kwa vila kobagama.’ ”
2KI 20:2 Hesekiya nakagalamchila ubanzi wa kuli lukanzi, nakamlanda Mkulu Nguluwi, yolonga,
2KI 20:3 “Lelo, gwa Mkulu Nguluwi, dedede ukumbuchile vyondikukolele mijito kwa kukundigwa na kwa nhumbula ya heni yeng'ha na kudita ganojile hali hegwe.” Hesekiya nakalila kwa usungu ng'hatu.
2KI 20:4 Isaya loyawele yang'hali bahala kuli lugagala lwa hagati, ulonzi wa Mkulu Nguluwi naumuyila na kumlonjela,
2KI 20:5 “Uhiluche ukamlonjele Hesekiya, chilongozi wa wanhu wa heni, ‘Heni Mkulu Nguluwi, Nguluwi wa sekulu wa hegwe Daudi, nanyhulika kulanda kwa hegwe na kugona mahozi ga hegwe. Ndowusa utamwa. Zuwa lya kadatu kwaluchila lehano koluta kuli ng'handa ya Mkulu Nguluwi.
2KI 20:6 Lelo Ndokonjezela miyaka kumi na jihano kuli kikala kwa hegwe. Ndokulohola hegwe hamwe na muji awu kulawa mmoko mwa mndewa wa Ashulu na kuwamila muji awu kwa chiwalo cha heni na kwa chiwalo cha Daudi, chitumagwa wa heni.’ ”
2KI 20:7 Lelo Isaya nakalonga, “Mgongomanye mikwandi ja tini.” Nawo nawadita ahyo na kujiwika kuli lipu, naye nakapona.
2KI 20:8 Hesekiya nayali nakamuuza Isaya, “Kowa na ulajilo wachi kota Mkulu Nguluwi kombusila utamwa na kota ndoluta kuli ng'handa ya Mkulu Nguluwi kuli zuwa lya kadatu kwaluchila lehano?”
2KI 20:9 Isaya nakamwidichila, “Uwu wowa ndo ulajilo wa Mkulu Nguluwi kwa hegwe, kota Mkulu Nguluwi kodita kota vyoyalagane. Ndaze, isisila lilute kumwando magulu kumi ama kumbele magulu kumi?”
2KI 20:10 Hesekiya nakamwidichila, “Ndo mbuli ya ubewe ng'hatu kwa isisila kuluta kumwando magulu kumi, kusinda kulidita lilute kumbele magulu kumi.”
2KI 20:11 Mloli Isaya nakamlanda Mkulu Nguluwi, naye Mkulu Nguluwi nakalidita isisila lilute kumbele magulu kumi hali chikwinilo chizenjigwe na Ahasi.
2KI 20:12 Mhela awo Melodaki-baladani, mwana wa Baladani, mndewa wa Babuloni, nakalajiza baluwa na ndolendole vihilikwe kwa Hesekiya, kwa vila nakahulika kota Hesekiya nayali yotamika.
2KI 20:13 Lelo Hesekiya nakawabochela wala wasenga na kuwalajila vinhu vyeng'ha viwele kuli ng'hano za heye, viwele ndo sendi na zahabu na vifunyhizi na mafuta ganojile na ng'hano ya vinhu vya kitowa ngondo na vyeng'ha viwele kuli ng'hano za heye. Hakuwele na chinhu choneche chiwele kuli ng'handa yake ya chiundewa ama kuli undewa wake weng'ha chiwele Hesekiya nayali hawalajile.
2KI 20:14 Hamba mloli Isaya nakaluta kwa mndewa Hesekiya na kumuuza, “Wanhu awa nawalonga choni na wangulawa kohi?” Naye Hesekiya nakamwidichila, “Nawoya kulawa isi ya kutali. Nawalawa Babuloni.”
2KI 20:15 Mloli nakauza, “Nawona choni kuli ng'handa ya hegwe?” Naye Hesekiya nakedichila, “Nawona chila chinhu kuli ng'handa ya heni. Haduhu ne chinhu chiwele kuli ng'hano za heni, chiwele siwalajile.”
2KI 20:16 Isaya nakamlonjela Hesekiya, “Uhulichize ulonzi wa Mkulu Nguluwi.
2KI 20:17 Ulole, mazuwa ganguya, vinhu vyeng'ha viwele kuli ng'handa ya hegwe ya chiundewa na vinhu vyeng'ha viwele wasekulu wa hegwe nawaviwika mbaka mhela awu, vyohilikwa Babuloni. Haduhu ne chinhu chosigala. Mkulu Nguluwi kangulonga.
2KI 20:18 Wamwe wa walelwa wa hegwe, kulawa kuli lukuli lwa hegwe, wawele wopondigwa hamba, wohilikwa kutali na kubasigwa soni kwa kuwa vitumagwa kuli ng'handa ya mndewa wa Babuloni.”
2KI 20:19 Hesekiya nakamwidichila Isaya, “Ulonzi wa Mkulu Nguluwi woulonjile unoga.” Nakelonjela nhumbula kwa vila nayali yochijesa, “Lekachoni ileche kuwa na kikala goya na kwamilwa kuli mazuwa geng'ha ga kikala kwa heni?”
2KI 20:20 Mbuli zinji za ulongozi wa Hesekiya na mbuli za heye zeng'ha zilinguluta goya na ndaze vyoyagongomanye ilamba na chikolola chiwele nachigala mazi kuli muji, nagandichigwa kuli chitabu cha kukumbuchila kwa wandewa wa Yuda.
2KI 20:21 Hesekiya nakabagama, Manase, mwana wa heye, nakalongoza honhu ha heye.
2KI 21:1 Manase nayali na miyaka kumi na mili loyaluche kulongoza. Nakalongoza ako Yelusalemu kwa miyaka makumi gahano na jihano. Mayake nayali yochemigwa Hefusiba.
2KI 21:2 Nakadita gehile hali Mkulu Nguluwi kwa kuwinza vihendo vihile vya wanhu wa isi wawele Mkulu Nguluwi nayali yawawinjile hali Waisilaeli.
2KI 21:3 Kwa vila nakahagongomanya kahi honhu ha kufugamila milungu hawele Hesekiya, mhaza wa heye nayali yahabomole. Nakahagongomanya kahi honhu ha kulavila nhambiko ha Baali na mizengo ja Ashela, kota Ahabu, mndewa wa Isilaeli vyoyaditile. Nakavifugamila vinhu vyeng'ha vya kuli ulanga.
2KI 21:4 Nakazenga honhu ha kulavila nhambiko kuli ng'handa ya Mkulu Nguluwi, honhu hawele Mkulu Nguluwi nayali yalonjile, “Hali Yelusalemu ndoliwika Itagwa lya heni.”
2KI 21:5 Kuli lugagala lweng'ha lwa ng'handa ya Mkulu Nguluwi, nakazenga honhu ha kulavila nhambiko kwa chiwalo cha vinhu vyeng'ha vya kuli ulanga.
2KI 21:6 Nakamlavya mwanage kota nhambiko ya kulakazwa kuli chiluli. Nakadita uhawi na kulagula na kuluta kulanda utanzi kwa walaguzi na kulonga na wanhu walingulongasa na mihoka. Nakadita gehile ng'hatu hali Mkulu Nguluwi, nakamzudiza.
2KI 21:7 Nakalihola limalukolo lya Ashela lyoyalihongole na kuliwika kuli ng'handa, iwele Mkulu Nguluwi nayali yawalonjele Daudi na Solomoni, mwanage, “Kuli ng'handa ayi na kuli Yelusalemu yondiihagule kulawa kuli nhanzi zeng'ha za Isilaeli, ndoliwika Itagwa lya heni mazuwa gose.
2KI 21:8 Sigadita kahi magulu ga Waisilaeli galubelube kulawa kuli isi yondiwapele wasekulu wa hewo, wone wowa wololela kuli kudita chila chinhu chondiwalajize na kikala kuli malajizo geng'ha gowapegwe na Musa, chitumagwa wa heni.”
2KI 21:9 Ila wanhu awa hawahulichize. Manase nakawajiliza, ahyo nawadita gehile ng'hatu kusinda gowaditile wanhu wa isi wawele Mkulu Nguluwi nayali yawadumye hali Waisilaeli.
2KI 21:10 Hamba Mkulu Nguluwi nakalonga kukolela vitumagwa wa heye waloli,
2KI 21:11 “Mndewa Manase nakadita mbuli azi za kuzudiza, mbuli zihile ng'hatu kusinda zila zowaditile Waamoli walongole na nakailongoza Yuda kuli gehile kwa jimalukolo ja heye.
2KI 21:12 Lelo, heni Mkulu Nguluwi, Nguluwi wa Isilaeli, ndokugala kudumya kukulu mchanya mwa Yelusalemu na Yuda mbaka makutu ga chila yumwe wone gohulika kuwala mbuli ayo gokwawa.
2KI 21:13 Ndoudumya muji wa Yelusalemu kota vila vyonditile kuli Samaliya na kwa mndewa Ahabu na walelwa wa heye. Ndoyusa Yelusalemu kota munhu vyoyalinguhovuga chisaye na kuchigubika.
2KI 21:14 Ndowaleka awo wanhu wa uhalizi wa heni wasigale na kuwawika mmoko mwa wang'honyo wa hewo. Wosukulwa lufufu lwa hewo na kuholigwa na wang'honyo wa hewo weng'ha kota wapogozi.
2KI 21:15 Ndowaditila ago geng'ha kwa vila nawadita gehile hali heni na kunzudiza kwaluchila hala wasekulu wa hewo lowalawile Misili mbaka mhela awu.”
2KI 21:16 Mzidi wa ago, Manase kahi nakabohola danda nyinji ilihela nongwa, ahyo nakaimemeza danda Yelusalemu yeng'ha. Kahi nakawambuza wanhu wa Yuda kudita gehile hali Mkulu Nguluwi.
2KI 21:17 Madito ganji ga ulongozi wa Manase na geng'ha goyaditile na gehile ga heye geng'ha, navyandichigwa kuli chitabu cha kukumbuchila kwa wandewa wa Yuda.
2KI 21:18 Manase nakabagama na kutiligwa kuli kagunda ka ng'handa ya chiundewa ya heye yuye, kuli kagunda ka Usa. Amoni, mwanage nakawa mndewa honhu ha heye.
2KI 21:19 Amoni nayali na miyaka makumi meli na meli loyaluche kulongoza. Nakalongoza kwa miyaka mili ako Yelusalemu. Mayake nayali yochemigwa Meshulemeti, mhinza wa Halusi, kulawa Yotiba.
2KI 21:20 Nakadita wihe hali Mkulu Nguluwi, kota vila Manase, mhaza wa heye vyoyaditile.
2KI 21:21 Nakawinza nzila ya mhaza wa heye na kujikolela mijito jimalukolo jiwele mhaza wa heye nakajikolela mijito na kujifugamila.
2KI 21:22 Nakamleka Mkulu Nguluwi, Nguluwi wa wasekulu wa heye, hawinzile nzila za Mkulu Nguluwi.
2KI 21:23 Hamba vitumagwa wa Amoni nawewika goya kumditila vibi Amoni, nawamkopola kuli ng'handa ya heye.
2KI 21:24 Hamba wanhu wa isi ya Yuda nawawakopola weng'ha wawele nawamkopola mndewa Amoni. Nawamdita Yosiya mwanage, yawe mndewa honhu ha heye.
2KI 21:25 Madito ganji ga ulongozi wa Amoni na gala goyaditile, nagandichigwa kuli chitabu cha kukumbuchila kwa wandewa wa Yuda.
2KI 21:26 Amoni nakatiligwa kuli kagunda ka Usa. Yosiya mwanage, nakawa mndewa honhu ha heye.
2KI 22:1 Yosiya nayali na miyaka nane loyaluche kulongoza. Nakalongoza ako Yelusalemu kwa miyaka makumi gadatu na umwe. Mayake nayali yochemigwa Yedida, mhinza wa Adaya, mwenyeng'haye wa muji wa Bosikati.
2KI 22:2 Yosiya nakadita mbuli zigoloche hali Mkulu Nguluwi na kuwinza nzila zeng'ha za mndewa Daudi, sekulu wa heye. Hagaluchile kuli kumoso ne kudilo.
2KI 22:3 Kuli mwaka wa kumi na nane wa ulongozi wa heye mndewa Yosiya, nakamlajiza yalingwandika Shafani, mwana wa Asaliya, mwana wa Meshulamu, kuluta kuli ng'handa ya Mkulu Nguluwi. Nakalonga,
2KI 22:4 “Ulute kwa mtambika mkulu Hilikiya na umlonjele yawaze zila sendi zigaligwe kuli ng'handa ya Mkulu Nguluwi, ziwele wamizi wa kuli lwizi nawakongoza kulawa kwa wanhu.
2KI 22:5 Walonjele wawape wanhu wahaguligwe kujilolela mijito ja ng'handa ya Nguluwi. Walonjele wanhu wano wawalipe wakola mijito walinguzenga kahi ng'handa ya Mkulu Nguluwi,
2KI 22:6 wawele ndo walinguhongola vinhu vya mbawo na walinguzenga ng'handa na walinguhongola maganga. Walonjele kahi wagule mbawo na maganga gahongoligwe kwa chiwalo cha kuzenga kahi ng'handa ya Mkulu Nguluwi.
2KI 22:7 Wanhu walingulolela mijito ja kuzenga, waleche kulavya hisabu ya sendi zowapegwe kwa vila wangukola mijito kwa kukundigwa.”
2KI 22:8 Hamba Hilikiya, mtambika mkulu, nakamlonjela Shafani yalingwandika, “Nandichona chitabu cha malajizo kuli ng'handa ya Mkulu Nguluwi.” Hilikiya nakamha Shafani chitabu chila, naye Shafani nakasoma malajizo gawele amo.
2KI 22:9 Hamba Shafani, yalingwandika, nakaluta kwa mndewa na kumha mbuli ayo, yolonga, “Vitumagwa wa hegwe nawalavya zila sendi ziwele nazali mgati mwa ng'handa ya Mkulu Nguluwi na kuwapa wanhu walingulolela mijito ja ng'handa ya Mkulu Nguluwi.”
2KI 22:10 Shafani nakamlonjela mndewa, “Mtambika Hilikiya nakamha chitabu achi.” Naye Shafani nakasoma malajizo gawele amo hali mndewa.
2KI 22:11 Mndewa loyahuliche ulonzi wa chila chitabu cha malajizo, nakadadula mivalo ja heye kwa masinzo.
2KI 22:12 Mndewa nakawalajiza mtambika Hilikiya na Ahikamu, mwana wa Shafani na Akiboli, mwana wa Mikaya na Shafani yalingwandika na Asaya, chitumagwa wa mndewa, yolonga,
2KI 22:13 “Mlute mkamuuze Mkulu Nguluwi kwa chiwalo cha heni na kwa chiwalo cha wanhu wanji na kwa wanhu wa Yuda weng'ha, kuwala ulonzi wandichigwe kuli chitabu achi chiwele nachoneka. Ng'halazi ya Mkulu Nguluwi naing'hang'hala kwa chiwalo cha hetwe, kwa vila wasekulu wa hetwe hawauhulichize ulonzi wa chitabu achi. Hawaditile kwa kiwhana na gala geng'ha gandichigwe amu kuwala hetwe.”
2KI 22:14 Ahyo mtambika Hilikiya na Ahikamu na Akiboli na Shafani na Asaya, nawaluta kulongasa na mloli mdala, yalinguchemigwa Huluda, yawele nayali mche wa Shalumu, mwana wa Tikwa, mwana wa Halihasi, yalingulolela chihengo cha mivalo. Huluda nayali yochikala Yelusalemu kuli chijiji cha keli.
2KI 22:15 Lelo yula mloli mdala nakawalonjela kota Mkulu Nguluwi, Nguluwi wa Isilaeli kangulonga hino, “Mumlonjele ayo munhu yawele nakawalajiza hemwe kwa heni kota
2KI 22:16 ndokugala kudumya hali honhu hano na kwa wanhu wake, kwa kiwhana na chila chinhu chandichigwe kuli chitabu acho, chisomigwe na mndewa wa Yuda.
2KI 22:17 Kwa vila nawandeka na kujifunyhizila ubani milungu na kunzudiza kwa jimalukolo jeng'ha jigongomanyigwe kwa mijito ja moko ga hewo, ng'halazi ya heni yokwaka mchanya mwa honhu aha, haiweza kuditigwa isindamale.
2KI 22:18 Ila mumlonjele mndewa wa Yuda kota
2KI 22:19 kwa vila nhumbula ya hegwe nayali ya kuhulichiza na kunyenyetela hali heni Mkulu Nguluwi, louhuliche londonjile kuwala honhu aha na kuwala wanhu wake, kota wanguganigwa kulechigwa wachiwa na kupanjilwa na kwa vila nakudadula mivalo ja hegwe na kulila hali heni Mkulu Nguluwi, nandikuhulika.
2KI 22:20 Lelo ndokukungajiza hamwe na wasekulu wa hegwe, nagwe kotiligwa kwa kikala goya. Meho ga hegwe hagokona kudumya kweng'ha kuwele ndokugala hali honhu aha.” Ahyo nawahilika mbuli ayo kwa mndewa Yosiya.
2KI 23:1 Hamba mndewa Yosiya nakawachema na kuwakungajiza hali heye wasekulu weng'ha wa Yuda na wa Yelusalemu.
2KI 23:2 Naye mndewa nakaluta kuli ng'handa ya Mkulu Nguluwi hamwe na wanhu weng'ha wa Yuda na wa Yelusalemu na watambika na waloli na wanhu weng'ha wakulu na wadodo. Nakasoma ulonzi weng'ha wa chila chitabu cha ilagano chiwele nachoneka kuli ng'handa ya Mkulu Nguluwi, kuno wanhu weng'ha wanguhulika.
2KI 23:3 Hamba mndewa nakema habehi na izengo na kudita kahi ilagano hali Mkulu Nguluwi, liwele ndo kumuwinza Mkulu Nguluwi na kibatilila mizilo ja heye na malajizo na kwamula kwa heye kwa nhumbula ya heye yeng'ha na muhe wa heye weng'ha, ahyo ndo kutawiza ulonzi wa ilagano ali wandichigwe kuli chitabu acho. Hamba wanhu weng'ha nawelumba kuli kudita ilagano alyo.
2KI 23:4 Hamba mndewa Yosiya nakamlajiza Hilikiya, mtambika mkulu na watambika watanzi wa heye na wamizi wa kuli lwizi, kulavya vinhu vyeng'ha kuli ng'handa ya Mkulu Nguluwi, viwele navigongomanyigwa kwa chiwalo cha Baali na Ashela na kwa chiwalo cha vinhu vyeng'ha vya kuli ulanga. Nakavilakaza hanze ha Yelusalemu kuli migunda ja ibindi lya Kidiloni na kuhola mivu na kujihilika Beteli.
2KI 23:5 Hamba nakawawinga watambika weng'ha wahaguligwe na wandewa wa Yuda leka kufunyiza ubani kuli honhu ha kufugamila milungu kuli miji ja Yuda na jila jilinguzunguluta Yelusalemu, wawele ndo wala wafunyizile ubani kwa Baali na kwa isanya na kwa nyelezi na kwa vilundo vya nhondwe na vinhu vyeng'ha vya kuli ulanga.
2KI 23:6 Nakosa izengo lya Ashela kulawa kuli ng'handa ya Mkulu Nguluwi na kulihilika kuli ibindi lya Kidiloni hanze ha Yelusalemu, nakalilakaza ako. Nakalibalasa mbaka mivu jake najiwa kota utimbo na nhimbwisi, hamba nakajisambalula mchanya mwa vilaga vya wanhu wa hihi hela.
2KI 23:7 Nakabomola honhu ha kujifugamila milungu ha wang'hondwa walume wa kuli ng'handa ya Mkulu Nguluwi na honhu hawele wadala nawali wobota mipaziya kwa chiwalo cha Ashela.
2KI 23:8 Yosiya nakawegala watambika kulawa kuli miji jeng'ha ja Yuda na kuhadita honhu ha kufugamila milungu hawe hakokomoche, kwaluchila Geba mbaka Beeli-sheba, honhu heng'ha hawele watambika wa milungu nawafunyiza ubani. Nakahabomola honhu ha kufugamila milungu hawele hali lwizi lwa Yoshua, chilongozi wa muji, luwele ubanzi wa kumoso mwa lwizi lwa muji.
2KI 23:9 Hanga watambika wa honhu ha kufugamila milungu hawakolile mijito hali honhu ha kulavila nhambiko ha Mkulu Nguluwi kuli Yelusalemu, ila nawalya mibumunda jilihela usaso jowapegwe na wang'holozawo wawele nawo kahi ndo watambika.
2KI 23:10 Hamba mndewa Yosiya nakahadita hawe hakokomoche honhu ha kufugamila milungu halinguchemigwa Tofeti kuli ibindi lya Hinomu, leka munhu yoneche yaleche kumlakaza kwa chiluli mwanage msongolo ama mhinza kota nhambiko ya mlungu Moleki.
2KI 23:11 Kahi nakawosa kulawa kuli lwizi lwa ng'handa ya Mkulu Nguluwi wala falasi wawele mndewa wa Yuda nayali yawawichile chiuyeng'ha kwa chiwalo cha isanya. Nawali kuli lugagala habehi na chihengo cha mng'hangala yawele nayali yochemigwa Natani-meleki. Lelo Yosiya nakajilakaza jila mituka jiwele najali jiwichigwe chiuyeng'ha kwa isanya.
2KI 23:12 Nakahabomola kahi honhu ha kulavila nhambiko hawele wandewa wa Yuda nawali wahazenjile mchanya mwa chihengo cha kuchanya cha Ahasi na honhu ha kulavila nhambiko hawele nahazenjigwa na Manase kuli lugagala lwili lwa ng'handa ya Mkulu Nguluwi. Nakahondanga na kuchusa chila chilundo cha misanga na kuluta kuchitoza kuli ibindi lya Kidiloni.
2KI 23:13 Mndewa kahi nakahadita hawe hakokomoche honhu ha kufugamila milungu hawele ubanzi wa kolilawilaga isanya mwa Yelusalemu na ubanzi wa kusini mwa chidunda cha Kuwifya, hala honhu hawele Solomoni, mndewa wa Isilaeli, nayali yahazenjile kwa chiwalo cha Ashitaloti, mlungu izudizo lya Wasidoni na kwa chiwalo cha Kemoshi, mlungu izudizo lya Moabu na kwa chiwalo cha Milikomu, mlungu izudizo lya Waamoni.
2KI 23:14 Yosiya nakabena gala maganga ga kufugamilwa na kubenanga mizengo ja Ashela. Hamba nakahagubika honhu aho kwa mizeje ja wanhu.
2KI 23:15 Nakahabomola kahi honhu ha kulavila nhambiko hawele ako Beteli na honhu ha kufugamila milungu hawele nahazenjigwa na Yeloboamu, mwana wa Nebati, yawele nakawambuza Waisilaeli kudita gehile. Nakahalakaza kwa chiluli honhu aho ha kufugamila milungu na kuhabalasa mbaka nahawa nhimbwisi na kulilakaza izengo lya Ashela.
2KI 23:16 Hamba Yosiya nakalola aku na kula, loyavyonile vilaga viwele ako kuli chidunda, nakalajiza mizeje jilavigwe amo na kujilakaza mchanya mwa honhu ha kulavila nhambiko ha ako Beteli leka kuhadita honhu aho hawe hakokomoche. Mbuli ayi nailawila kwa kiwhana na ulonzi wa Mkulu Nguluwi ulonjigwe na munhu wa Nguluwi yawele nakalongola kulonga mbuli azi.
2KI 23:17 Hamba mndewa nakauza, “Chila chilaga chiwele na ilingo lya kukumbuchila chondilinguchona, ndo kwa chiwalo cha whaani?” Wanhu wa muji nawalonga, “Awu ndo ulajilo wa chilaga cha munhu wa Nguluwi yawele nakoya kulawa Yuda, yawele nakalonga kuwala honhu ha kulavila nhambiko ha ako Beteli, mbuli zizila zouziditile lehano.”
2KI 23:18 Naye nakalajiza, “Mchileche, mleche kuchidoliza. Mleche kumkundiza munhu yoneche kusa mizeje jake.” Lelo nawajileka mizeje jake hamwe na jila mizeje ja mloli yawele nakoya kulawa Samaliya.
2KI 23:19 Kota vyoyaditile ako Beteli, Yosiya nakahabomola na kuhadita hawe hakokomoche honhu ha kufugamila milungu, honhu hawele wandewa wa Isilaeli nawali wahazenjile mgati mwa miji ja Samaliya, hawele nahamzudiza Mkulu Nguluwi.
2KI 23:20 Yosiya nakawadumula singo watambika wa honhu ha kufugamila milungu hali honhu ha hewo wawo ha kulavila nhambiko na kujilakaza mizeje ja wanhu mchanya mwake. Hamba nakahiluka Yelusalemu.
2KI 23:21 Hamba mndewa nakawalajiza wanhu weng'ha yolonga, “Mdite mnvina ya Pasaka kwa chiwalo cha Mkulu Nguluwi, Nguluwi wa hemwe, kota vyoyandichigwe kuli chitabu achi cha ilagano.”
2KI 23:22 Mnvina ya Pasaka naiditigwa goya kota vyoiditigwe na watagusa wawele nawailongoza Isilaeli kusinda kuli mhela weng'ha wa wandewa wa Isilaeli na wa Yuda.
2KI 23:23 Ila kuli mwaka wa kumi na nane wa ulongozi wa mndewa Yosiya, mnvina ya Pasaka naiditigwa kwa chiwalo cha Mkulu Nguluwi, ako Yelusalemu.
2KI 23:24 Mzidi wa ago, mndewa Yosiya nakawosa walaguzi wa midimu na wahawi na jimalukolo ja kulagulila na vinhu vyeng'ha viwele ndo izudizo, viwele navyoneka ako Yelusalemu na Yuda. Nakadita ahyo leka kweneza malajizo gandichigwe kuli chila chitabu chiwele mtambika Hilikiya, nakachona na kuchihola kulawa kuli ng'handa ya Mkulu Nguluwi.
2KI 23:25 Haduhu mndewa yunji yawele nakamgana Mkulu Nguluwi kwa nhumbula ya heye yeng'ha na kwa muhe wa heye weng'ha na kwa mong'ho wa heye weng'ha kwa kiwhana na malajizo geng'ha ga Musa, kota mndewa Yosiya.
2KI 23:26 Ila Mkulu Nguluwi hakulechile kuzudila kwa heye kwa wanhu wa Yuda, kwa chiwalo cha gala geng'ha gawele Manase nakagadita na kumzudiza.
2KI 23:27 Ahyo Mkulu Nguluwi nakalonga, “Ndowawinga wanhu wa Yuda hali heni kota vila vyonditile kwa wanhu wa Isilaeli. Ndoulema wula muji wa Yelusalemu, muji wondiuhagule na ng'handa ayi ya heni yomlinguichema ng'handa ya Nguluwi, londonjile, ‘Itagwa lya heni lyochikala amo.’ ”
2KI 23:28 Madito ganji ga Yosiya na gala geng'ha goyaditile, nagandichigwa kuli chitabu cha kukumbuchila kwa wandewa wa Yuda.
2KI 23:29 Yosiya loyawele mndewa, Falao Neko, mndewa wa Misili, nakaluta mbaka kuli lwanda lwa Eyufulate leka kumtanza mndewa wa Ashulu. Mndewa Yosiya nakaluta kitowa naye, ila Neko nakamtowa na kumkopola ako Megido.
2KI 23:30 Vitumagwa wa heye nawaugala mtufi wake kuli mutuka wa ngondo kulawa Megido mbaka Yelusalemu, nawautila kuli chilaga cha heye yuye. Hamba wanhu wa isi nawamhola Yehoahasi, mwana wa Yosiya, nawambakaliza mafuta na kumuwika yawe mndewa honhu ha mhaza wa heye.
2KI 23:31 Yehoahasi nayali na miyaka makumi meli na gadatu loyaluche kulongoza. Nakalongoza ako Yelusalemu kwa myezi jidatu. Mayake nayali yochemigwa Hamutali, mhinza wa Yelemiya, kulawa Libuna.
2KI 23:32 Yehoahasi nakadita wihe hali Mkulu Nguluwi, kota wasekulu wa heye vyowaditile.
2KI 23:33 Falao Neko nakamuwoha kwa minyololo ako Libula kuli isi ya Hamati, leka yaleche kulutilila kulongoza ako Yelusalemu. Nakailajiza isi ya Yuda ilavye kodi, kilo elufu zidatu na miya zine za sendi na kilo makumi gadatu na zine za zahabu.
2KI 23:34 Falao Neko nakamdita Eliyakimu, mwana wa mndewa Yosiya, yawe mndewa honhu ha mhaza wa heye. Nakaligalula itagwa lya heye, kulawa Eliyakimu na kuwa Yehoyakimu. Ila nakamhola Yehoahasi na kumhilika Misili, naye nakabagama yawele kuko.
2KI 23:35 Mndewa Yehoyakimu nakamha Falao Neko sendi na zahabu, ila nakaiwichila isi kodi leka yeneze goyalingugana Falao. Leka kudita ahyo, Yehoyakimu nakawalajiza wanhu wa isi ayo walavye kodi, iwele ndo sendi na zahabu, kwa kiwhana na vila vyowalingupata.
2KI 23:36 Yehoyakimu nayali na miyaka makumi meli na jihano loyaluche kulongoza. Nakalongoza ako Yelusalemu kwa mhela wa miyaka kumi na umwe. Mayake nalyali yochemigwa Sebida, mhinza wa Pedaya, kulawa Luma.
2KI 23:37 Yehoyakimu nakadita wihe hali Mkulu Nguluwi, kota wasekulu wa heye vyowaditile.
2KI 24:1 Mhela wa ulongozi wa Yehoyakimu, Nebukadinesa, mndewa wa Babuloni nakaitowa isi. Yehoyakimu nakawa mpogozi wa heye kwa miyaka jidatu. Ila hamba nakagalula majesa ga heye na kumbelenhuka Nebukadinesa.
2KI 24:2 Mkulu Nguluwi nakahilika vilundo vya Wababuloni na Waalamu na Wamoabu na Waamoni leka waitowe isi ya Yuda na kuiwifya, kota ulonzi wa Mkulu Nguluwi woyaulonjile kwa kukolela vitumagwa wa heye waloli.
2KI 24:3 Ena, mbuli azi nazilawila ako Yuda kwa kiwhana na mzilo wa Mkulu Nguluwi, leka kuwosa hali heye kwa chiwalo cha gehile ga Manase goyaditile
2KI 24:4 na kwa chiwalo cha kubohola danda ilihela nongwa yoyaibohole. Mkulu Nguluwi hamlechele gehile goyaditile, kwa vila nakaimemeza Yelusalemu kwa danda ilihela nongwa.
2KI 24:5 Mbuli zinji za ulongozi wa Yehoyakimu na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
2KI 24:6 Yehoyakimu nakabagama. Yehoyakini, mwanage, nakalongoza honhu ha heye.
2KI 24:7 Mndewa wa Misili halawile kahi kuli isi ya heye, kwa vila mndewa wa Babuloni nakaihola isi ya heye yeng'ha, kwaluchila kuli kazanda ka Misili mbaka kuli lwanda lwa Eyufulate.
2KI 24:8 Yehoyakini nayali na miyaka kumi na nane loyaluche kulongoza. Nakalongoza ako Yelusalemu kwa mhela wa myezi jidatu. Mayake nayali yochemigwa Nehushata, mhinza wa Elinatani, kulawa Yelusalemu.
2KI 24:9 Nakadita wihe hali Mkulu Nguluwi kota vyoyaditile mhaza wa heye.
2KI 24:10 Mhela awo vilongozi wa Nebukadinesa, mndewa wa Babuloni, nawautowa muji wa Yelusalemu na kuuzunguluta.
2KI 24:11 Mhela vilongozi lowawele nawauzunguluta muji, Nebukadinesa, mndewa wa Babuloni nakaluta Yelusalemu.
2KI 24:12 Yehoyakini, mndewa wa Yuda na mayake na vitumagwa wa heye weng'ha, nawewika hali ulongozi wa Nebukadinesa. Kuli mwaka wa nane wa ulongozi wa mndewa wa Babuloni, nakamhola leka yawe mnweng'wa.
2KI 24:13 Kota Mkulu Nguluwi vyoyalonjile, Nebukadinesa nakosa lufufu lweng'ha luwele kuli ng'handa ya Mkulu Nguluwi na kuli ng'handa ya chiundewa. Nakavihola vinhu vyeng'ha vya zahabu viwele Solomoni, mndewa wa Isilaeli, nayali yavigongomanye kwa chiwalo cha ng'handa ya Mkulu Nguluwi.
2KI 24:14 Nakawahola wanhu weng'ha wa Yelusalemu na kuwahilika kuli isi ya chijenzi, wawele ndo vilongozi weng'ha na wanhu weng'ha wazidahe kitowa ngondo na wanhu wawele na uwanzi. Weng'ha nawali elufu kumi. Wanhu wawele wazunwa lukami ndo waliyeka wasigale kuli isi.
2KI 24:15 Nebukadinesa nakamhilika Yehoyakini mbaka Babuloni. Nakawahola kahi mayake mndewa na wache wa mndewa na vilongozi wa heye na wakulu wa isi. Awo weng'ha nakawalavya Yelusalemu na kuwahilika Babuloni.
2KI 24:16 Mndewa Nebukadinesa kahi nakawahola wanhu wazidahe kitowa ngondo wa Yuda elufu saba, hamwe na wawanzi na walingugongomanya vinhu vya chuma elufu imwe, awo weng'ha nawali na mong'ho wa kitowa ngondo.
2KI 24:17 Nebukadinesa nakamuwika Mataniya, mng'holoze mhaza wa Yehoyakini, leka yawe mndewa honhu ha Yehoyakini na kumchema itagwa linji, Sedekiya.
2KI 24:18 Sedekiya nayali na miyaka makumi meli na umwe loyaluche kulongoza. Nakalongoza ako Yelusalemu kwa miyaka kumi na umwe. Mayake nayali yochemigwa Hamutali, mhinza wa Yelemiya, kulawa Libuna.
2KI 24:19 Nakadita wihe hali Mkulu Nguluwi kota vila vyoyaditile mndewa Yehoyakimu.
2KI 24:20 Mkulu Nguluwi nakawazudila ng'hatu wanhu wa Yelusalemu na Yuda, mbaka nakawawinga leka wawe kutali na heye. Sedekiya nakambelenhuka mndewa wa Babuloni.
2KI 25:1 Kuli mwaka wa tisa wa ulongozi wa Sedekiya, kuli zuwa lya kumi lya mwezi wa kumi, Nebukadinesa, mndewa wa Babuloni, yawele na wamizi wa heye weng'ha, nakautowa muji wa Yelusalemu. Nakawika kambi ya heye hanze ha muji na kuuzunguluta muji na kuzenga vinhu vya kukwinila kuli lukanzi banzi zeng'ha, leka yenjile kuli muji.
2KI 25:2 Muji nauzungulutwa na wamizi mbaka mwaka wa kumi na umwe wa ulongozi wa mndewa Sedekiya.
2KI 25:3 Kuli zuwa lya tisa lya mwezi wa kane, lufemba nalung'ang'ala lukami kuli muji mbaka nakwali haduhu chilyo kwa chiwalo cha wanhu wake.
2KI 25:4 Hamba lukanzi lwa muji nalubomoligwa na wamizi weng'ha nawabilima. Nawoka na kulawa kuli muji nechilo, kwa kukolela kuli lwizi luwele hagati ha ng'hanzi mbili habehi na kagunda ka mndewa, hanga Wababuloni nawali wauzungulute muji. Nawabilima kulutila Alaba.
2KI 25:5 Ila wamizi wa Wakalidayo nawamuwinza mndewa na kumibata kuli ibalalika lya Yeliko, wamizi wa heye weng'ha nawasambaluka na kumleka.
2KI 25:6 Wakalidayo nawamhola mndewa na kumhilika kwa mndewa wa Babuloni ako Libula, kuli isi ya Hamati, naye nakamtagusa.
2KI 25:7 Nawawakopola wana wa Sedekiya hali heye. Hamba nakosa meho ga Sedekiya na kumuwoha kwa pingu za shaba na kumhilika Babuloni.
2KI 25:8 Kuli zuwa lya saba lya mwezi wa kahano wa mwaka wa kumi na tisa wa ulongozi wa Nebukadinesa, mndewa wa Babuloni, Nebusaladani, mng'hangala wa wamizi wa Babuloni, yawele nayali yumwe wa vilongozi hali mndewa wa Babuloni, nakafika Yelusalemu.
2KI 25:9 Nakailakaza ng'handa ya Mkulu Nguluwi na ng'handa ya mndewa na ng'handa zeng'ha za Yelusalemu. Chila ng'handa ng'hulu nailakazwa.
2KI 25:10 Wamizi weng'ha wa Wakalidayo wawele hamwe na chilongozi wa wamizi wa mndewa, nawazibomola ng'hanzi ziwele naziuzunguluta muji wa Yelusalemu.
2KI 25:11 Nebusaladani nakawahilika kuli isi ya chijenzi wanhu wasigale kuli muji, hamwe na wanhu wa hihi hela na wanhu wewichile hali ulongozi wa mndewa wa Babuloni.
2KI 25:12 Ila yula chilongozi wa wamizi nakawaleka wamwe wa wala wanhu wa isi wawele ndo wazunwa ng'hatu leka wajilolele migunda ja mizabibu na migunda jinji.
2KI 25:13 Wababuloni nawajibena jila mizengo ja shaba na jila mituka ja shaba na lila ibiga likulu lya shaba, viwele vyeng'ha navyali kuli ng'handa ya Mkulu Nguluwi. Ahyo nawaihola ayo shaba na kuihilika Babuloni.
2KI 25:14 Nawahola kahi viya na makoleo na mikasi ja kudumulila tambi na visaye na vinhu vyeng'ha vya shaba vilingukola mijito kuli ng'handa ya Nguluwi.
2KI 25:15 Chilongozi wa wamizi walingumwamila mndewa, nakavihola kahi vila vifunyizi na vila visaye vya kumizila na vinhu vyeng'ha viwele navyali vigongomanyigwe kwa zahabu inojile ama sendi.
2KI 25:16 Shaba iwele nailawa kuli jila mizengo mili na yila ya ibiga na vila vibatililo vyusigwe, viwele Solomoni nayali yavigongomanye kwa chiwalo cha ng'handa ya Mkulu Nguluwi, nayali na itunyo liwele haliweza kupimigwa.
2KI 25:17 Chila izengo nalyali na ulefu wa mita nane. Honhu ha shaba mchanya mwa izengo limwe hawele ndo itaji lyake, nahali na ulefu wa mita imwe na nusu na nahali hanoligwe kwa utandawala na makomamanga ga shaba kuzunguluta kweng'ha. Lila izengo linji hamwe na utandawala wake naliwhana na lila lya mwaluko.
2KI 25:18 Hamba Nebusaladani, chilongozi wa wamizi wa mndewa, nakawadita Selaya, mtambika mkulu na Sefaniya, mtambika wa keli hamwe na wamizi wadatu wa kuli lwizi, wawe wapogozi wa ngondo.
2KI 25:19 Hali wala wanhu wawele nawasigala kuli muji, nakamhola chilongozi wa walingitowa ngondo, hamwe na wanhu wahano walingumlonjela mndewa mbuli zilivinji. Nakamhola kahi yalingwandika yawele nayali yololela mijito ja kwandika wanhu wa isi walinguweza kitowa ngondo hamwe na wanhu wa heye makumi sita wawele nawalawa mgati mwa muji.
2KI 25:20 Nebusaladani, chilongozi wa wamizi wa mndewa, nakawahola wanhu awo weng'ha na kuwahilika kwa mndewa wa Babuloni ako Libula.
2KI 25:21 Mndewa wa Babuloni nakawatowa na kuwakopola ako Libula, kuli isi ya Hamati. Ahyo wanhu wa Yuda nawaholigwa na kuhilikwa kuli isi ya chijenzi.
2KI 25:22 Nebukadinesa, mndewa wa Babuloni, nakamhagula Gedaliya, mwana wa Ahikamu, mzukulu wa Shafani, yawe chilongozi wa wanhu weng'ha wa Yuda wawele nawasigala hala.
2KI 25:23 Hamba vilongozi weng'ha wa wamizi, hamwe na wanhu wa hewo, lowahuliche kota mndewa wa Babuloni nakamhagula Gedaliya yawe chilongozi, nawaluta kwa Gedaliya ako Misipa. Wanhu awo nawali Ishimaeli, mwana wa Netaniya na Yohanani, mwana wa Kaleya na Selaya, mwana wa Tanumeti, Mnetofahi na Yesaniya, mwana wa Mmaaka, hamwe na wanhu wa hewo.
2KI 25:24 Gedaliya nakelaha leka yawakangaze nhumbula hewo na wanhu wa hewo. Nakalonga, “Mleche kuwadumba wang'hangala wa Wakalidayo. Mikale kuli isi na kumkolela mijito mndewa wa Babuloni, yowa goya kwa hemwe.”
2KI 25:25 Ila kuli mwezi wa saba, Ishimaeli, mwana wa Netaniya, mzukulu wa Elishama, yawele nayali wa lulelo wa chiundewa, nakaluta kwa Gedaliya hamwe na wanhu kumi, nakamtowa na kumkopola Gedaliya na wanhu wa Yuda, hamwe na Wakalidayo wawele hamwe na heye ako Misipa.
2KI 25:26 Logakolile ago, wanhu weng'ha kwaluchila mdodo lukami mbaka yawele mkulu lukami, hamwe na wakulu wa wamizi, nawabilimila Misili kwa kuwadumba Wababuloni.
2KI 25:27 Kuli mwaka wa makumi gadatu na saba kulawa Yehoyakini, mndewa wa Yuda, loyahilikwe kuli isi ya chijenzi, kuli zuwa lya makumi meli na saba lya mwezi wa kumi na mbili, Evili-melodaki, mndewa wa Babuloni, loyaluche kulongoza, nakamlechela yelejehe Yehoyakini, mndewa wa Yuda kulawa mchinweng'ho.
2KI 25:28 Nakalongasa naye kwa uliholile na kumha chigoda cha lutogo kusinda wandewa wanji wawele nawali hamwe na heye ako Babuloni.
2KI 25:29 Ahyo, Yehoyakini nakavula mivalo ja heye ja mchinweng'ho. Kuli mazuwa ga heye geng'ha ga kikala kwa heye, nakalya kuli chisaga cha mndewa.
2KI 25:30 Yehoyakini nakapegwa na mndewa vinhu vyoyalinguganigwa kupegwa chila zuwa kuli ukomu wa heye weng'ha.
PSA 1:1 Nakatambichizwa yula munhu, yohambe yalute kuli chitala cha wehile, halinguwinza nzila za wawele na gehile, ne kikalisa hamwe na walinguliga.
PSA 1:2 Ila kangunojezwa na ilajizo lya Mkulu Nguluwi, kangijesaga ilajizo lya heye nemisi na nechilo.
PSA 1:3 Naye kanguwa kota igodi litopekwe hafungo ha nzanda za mazi, lilingulela mafuza gake kwa mihela jake ne ihamba lyake halilinguswinha. Chila choyalingudita changulutilila goya.
PSA 1:4 Haiwele kota vyowawele wehile, hewo ndo kota mhumba ilinguwembeluka kwa mbeho.
PSA 1:5 Lelo wehile hambe weme nzinzili kuli utaguso, ne wawele na gehile hali nhing'hano ya watanganiche.
PSA 1:6 Kwa vila Mkulu Nguluwi kanguizela nzila ya watanganiche, ila nzila ya wehile yokwajilila.
PSA 2:1 Lekachoni wanhu wa isi wangubelenhuka? Lekachoni wanhu wangiwika goya kwa uviso kwa mbuli za hihi hela?
PSA 2:2 Wandewa wa isi wangiwika goya, na wakulu wangikungajiza hamwe kwa chiwalo cha kihanza majesa ga kumlema Mkulu Nguluwi na yabakalizwe mafuta wa heye.
PSA 2:3 Wandewa awo wangulonga, “Tiwuse kuli ulongozi wa hewo, tutoze kutali minyololo ja hewo.”
PSA 2:4 Yula yalingulongoza kilanga kanguwaseka, Nguluwi kanguwabeza.
PSA 2:5 Hamba kanguwang'hanuchila kwa ng'halazi ya heye, na kuwadumbiza kwa kuzudila kwa heye, yolonga,
PSA 2:6 “Nani nandimuwika mndewa wa heni, mchanya mwa Siyoni, chidunda cha heni chelile.”
PSA 2:7 Ndowikula mzilo wa Mkulu Nguluwi, “Hegwe ndo mwanangu, heni lehano nandiwa mhaza wa hegwe.
PSA 2:8 Undande, nani ndokupa wanhu wa isi wawe uhalizi wa hegwe, na mbaka ja isi jowa ja hegwe.
PSA 2:9 Kowatowa kwa ng'hweku ya chuma, na kuwabena kota chijilo.”
PSA 2:10 Lelo hemwe wandewa, muwe na luhala, hemwe wakulu wa isi, mwangukanyigwa.
PSA 2:11 Mumkolele mijito Mkulu Nguluwi kwa kudumba na kusangalala.
PSA 2:12 Mumfugamile na kukakama, leka yaleche kuzudila na kuwadumya baho du, kwa vila heye kanguzudilaga himahima. Wangutambichizwa weng'ha walingubilimila kikala goya kwa heye.
PSA 3:1 (Zabuli ya Daudi loyambilime Abusalomu, mwanage.) Mkulu Nguluwi, wang'honyo wa heni nawonjezeka! Walingunhowa ndo wenji.
PSA 3:2 Ndo wenji walingulonga, “Nguluwi homlohola.”
PSA 3:3 Ila hegwe Mkulu Nguluwi, kwa ngawo ya heni banzi zeng'ha, kwa hegwe ndanguwa na lutogo na kusumya.
PSA 3:4 Kwa lizi lya heni ndangumchema Mkulu Nguluwi naye kangwidichila kulawa kuli chidunda cha heye chelile.
PSA 3:5 Ndanguwasa na kuwa na usinjizi, ndangwinuka kahi kwa vila hegwe, gwa Mkulu Nguluwi kwangunyimiza.
PSA 3:6 Hambe ndumbe wanhu elufu na maelufu, hanga wangunhowa banzi zeng'ha.
PSA 3:7 Mkulu Nguluwi winuche! Nguluwi wa heni undohole! Uwatowe wang'honyo wa heni weng'ha kwa mizeje ja milomo ja hewo, ubene mizino ja wehile.
PSA 3:8 Kwa vila ulohozi ndo wa Mkulu Nguluwi. Utambichizo wa hegwe uwe mchanya mwa wanhu wa hegwe.
PSA 4:1 (Kwa yula yalingwaluchiza kwimba na vinhu vya ng'weso za muziki. Zabuli ya Daudi.) Gwa Nguluwi wa heni ulingundewela, ndangulanda unyidichile hondilanda. Lombele kuli kugaya, hegwe nakunhanza, umbonele isungu na kuhulichiza kulanda kwa heni.
PSA 4:2 Mwela yoo, mowifya ukulu wa heni kwa soni mbaka nili? Ndaze, mogana upoka na uhadi mbaka nili?
PSA 4:3 Ila mvizele kota Mkulu Nguluwi nakehagulila munhu wa heye yalingumhulichiza mazuwa gose. Mkulu Nguluwi kanguhulichizaga hondimchema.
PSA 4:4 Mdumbe na mleche kudita gehile, mijese ng'hatu kuli vinhanda vya hemwe na minyamalile.
PSA 4:5 Mlavye nhambiko za hachi, na kitumbila kwa Mkulu Nguluwi.
PSA 4:6 Wanhu wenji wangulongaga, “Whaani yalinguweza kutulajila ganojile?” Gwa Mkulu Nguluwi, utulole kwa isungu.
PSA 4:7 Ila nakumha heni kusangalala kukulu mnhumbula, kusinda hewo wawele na divai na nyhule kwa winji.
PSA 4:8 Ndanguwasaga na kuwa na usinjizi kwa kikala goya, kwa vila gwa Mkulu Nguluwi, hegwe uliyeka kwangumbika honhu hanojile.
PSA 5:1 (Kwa yula yalingwaluchiza kwimba na kwa mluli. Zabuli ya Daudi.) Gwa Mkulu Nguluwi, uhulichize ulonzi wa heni, ulole kung'ung'uta kwa heni.
PSA 5:2 Uhulichize kulila kwa heni leka unhanze, gwa Mndewa wa heni na Nguluwi wa heni, kwa vila hegwe ndo ndilingukulanda.
PSA 5:3 Gwa Mkulu Nguluwi, hamitondo kwanguhulika lizi lya heni, hamitondo ndangukuwichila goya kulanda kwa heni, hamba ndangubeteza unyidichile.
PSA 5:4 Kwa vila hegwe hauwele Nguluwi ulingunojezwa na wihe, wihe hauweza kikala na hegwe.
PSA 5:5 Walingidaya hambe weme hali hegwe, hegwe kwanguwazudila weng'ha walingudita wihe.
PSA 5:6 Hegwe kwanguwadumya weng'ha walingulonga udesi, gwa Mkulu Nguluwi, kwanguwazudila walingukopola na wahadi.
PSA 5:7 Ila, kwa winji wa igano lya kwimilila lya hegwe, ndokwinjila mng'handa mwa hegwe. Ndofugama kwa kuhulichiza kuli ng'handa ya hegwe yelile.
PSA 5:8 Gwa Mkulu Nguluwi, undongoze kuli kutanganika kwa hegwe, kwa chiwalo cha wang'honyo wa heni, ugolose nzila ya hegwe hali heni.
PSA 5:9 Kwa vila kuli milomo ja hewo kwahela kukundigwa, mnhumbula za hewo nakumema kudumya, milomo ja hewo ndo kota chilaga chiwele mwanzi, myango za hewo nazimema wihe.
PSA 5:10 Gwa Nguluwi, uwagaze kwa wihe wa hewo, wagwe kwa mbuli zihile za hewo wawo. Uwawinje kwa chiwalo cha winji wa gehile ga hewo, kwa vila nawakubelenhuka hegwe,
PSA 5:11 ila weng'ha walingubilimila kikala goya kwa hegwe wasangalale, wembe kwa kusangalala mazuwa gose. Uwemile walinguligana itagwa lya hegwe, leka wasangalale kwa chiwalo cha hegwe.
PSA 5:12 Kwa vila hegwe Mkulu Nguluwi kwanguwatambichiza wala watanganiche, kwanguwamila kwa kunoga kwa hegwe kota ngawo.
PSA 6:1 (Kwa yula yalingwaluchiza kwimba na vinhu vya ng'weso za muziki. Kwimba kwa Sheminiti. Zabuli ya Daudi.) Gwa Mkulu Nguluwi, uleche kung'hanuchila kwa ng'halazi ya hegwe, uleche kungaza kwa kuzudila kwa hegwe.
PSA 6:2 Umbonele isungu, gwa Mkulu Nguluwi, ndahela mong'ho. Gwa Mkulu Nguluwi, umhe heni mong'ho, ndangutoka mbaka kuli mizeje ja heni.
PSA 6:3 Muhe wa heni wangugazika ng'hatu. Gwa Mkulu Nguluwi, kobeteza mbaka nili?
PSA 6:4 Gwa Mkulu Nguluwi, unyhinduchile na kundohola, undohole kwa chiwalo cha igano lya hegwe lya kwimilila.
PSA 6:5 Kwa vila haduhu yalingukukumbuchila kula kowawele wabagame whaani yoweza kukutogola ako kuli isi ya wabagame?
PSA 6:6 Nhoka kwa chililo cha usungu, chila nechilo ndanguchidoza chinhanda cha heni kwa mahozi, kwa mahozi ndangudoza chegamo cha heni.
PSA 6:7 Meho ga heni nagatoka kwa masinzo, nagabilabila kwa chiwalo cha kugazigwa na mng'honyo.
PSA 6:8 Muche kwa heni hemwe mweng'ha mlingudita wihe, kwa vila Mkulu Nguluwi nakahulika lizi lya chililo cha heni.
PSA 6:9 Mkulu Nguluwi nakahulika chililo cha heni, Mkulu Nguluwi nakakunda kulanda kwa heni.
PSA 6:10 Wang'honyo wa heni weng'ha wobasigwa soni na kudumbizwa ng'hatu, baho du, wohiluka kumbele na wobasigwa soni.
PSA 7:1 (Lwimbo lwa Daudi kwa Mkulu Nguluwi kuwala Kushi, Mbenjamini.) Gwa Mkulu Nguluwi, Nguluwi wa heni, ndangubilimila kikala goya kwa hegwe, undohole kulawa kwa weng'ha walingumbilimisa.
PSA 7:2 Wone uleche, wokuya kundadula heni kota isimba, wombulunha heni mbaka kutali, kowa kuduhu wa kundohola.
PSA 7:3 Gwa Mkulu Nguluwi, Nguluwi wa heni, wone nandita mbuli imwe hali azi, wone ndina nongwa kuli madito ga heni,
PSA 7:4 wone nandimhilusila goloko wa heni wihe honhu ha ganojile, ama nandimsukula mng'honyo wa heni ne chiwalo,
PSA 7:5 lelo, mng'honyo yambinze na kimbata heni, yabije ukomu wa heni, na kuuwika ukulu wa heni kuli nhimbwisi.
PSA 7:6 Winuche gwa Mkulu Nguluwi, kwa ng'halazi ya hegwe, ukulemeze kuzudila kwa wang'honyo wa heni. Winuche, gwa Nguluwi wa heni, hegwe nakulajiza hachi iditigwe.
PSA 7:7 Uwakungajize wanhu wa isi hafungo ha hegwe, nagwe uwalongoze kulawa kuchanya.
PSA 7:8 Hegwe, gwa Mkulu Nguluwi, kwanguwatagusa wanhu wa isi. Umhe heni hachi kwa kiwhana na kutanganika kwa heni, kwa kiwhana na kugoloka kwa nhumbula ya heni.
PSA 7:9 Uudumye wihe wa wanhu wehile, uwemize nzinzili wanhu watanganiche, gwa Nguluwi uwele na hachi, ulinguuzela uviso wa nhumbula na majesa ga wanhu.
PSA 7:10 Nguluwi ndo ngawo ya heni, heye kanguwalohola wawele wagoloche nhumbula.
PSA 7:11 Nguluwi ndo mtagusa wa hachi, yalinguugaza wihe chila zuwa.
PSA 7:12 Wanhu wohambe wamgaluchile Nguluwi, Nguluwi konola ipanga lya heye, kowika goya upinde wa heye na kuugololela honhu.
PSA 7:13 Kowika goya vinhu vya heye vya kitowa ngondo, kowika misale ja heye kuli chiluli.
PSA 7:14 Ulole, mwihe kangijesaga wihe, kangiwikaga goya kuwifya, na kangwambuzaga uhadi.
PSA 7:15 Kangubawaga isimo, hamba kangugwilaga amo.
PSA 7:16 Kuwifya kwa heye komhiluchila, kuwifya komgwila heye yuye.
PSA 7:17 Ndolonga malumbo kwa Mkulu Nguluwi kwa chiwalo cha hachi ya heye, ndokwimba lutogo lwa itagwa lya Mkulu Nguluwi, Nguluwi yawele kuchanya.
PSA 8:1 (Kwa yalingwaluchiza kwimba. Kwa kiwhana na Gititi. Zabuli ya Daudi.) Gwa Mkulu Nguluwi, Mkulu wa hetwe, ndikomya itagwa lyako lyangutogoligwa kuli isi yeng'ha. Nakuuwika ukulu wa hegwe ako mchanya mwa ulanga.
PSA 8:2 Kwa kutogoligwa na wana wadodo na walingong'a, nakiwichila ngome ya kiyamila kwa chiwalo cha wang'honyo wa hegwe, uwadumye walingukubelenhuka na yalinguhilusa chibida.
PSA 8:3 Hondilola ulanga, mijito ja vidole vya hegwe, nyelezi na nhondwe, vyouviwichile ako,
PSA 8:4 munhu ka whaani, mbaka umjese, munhu ndo choni mbaka umlolele?
PSA 8:5 Nakumdita yawe mdodo kusinda Nguluwi, nakumha itaji lya ukulu na kuhulichizwa.
PSA 8:6 Nakumdita heye yawe chilongozi kuli mijito ja hegwe jeng'ha, nakuviwika vilumbigwe vyeng'ha hali ludali lwa heye.
PSA 8:7 Ming'holo na misenga na migongolo ja kisolo,
PSA 8:8 videje na somba, ena chila chilingojelela kuli nzila za bahali, vyeng'ha nakuviwika kuli ludali lwa heye.
PSA 8:9 Gwa Mkulu Nguluwi, Mkulu wa hetwe, ndikomya itagwa lya hegwe lyangutogoligwa kuli isi yeng'ha.
PSA 9:1 (Kwa yalingwaluchiza kwimba. Kwa kiwhana na Muti-labeni. Zabuli ya Daudi.) Ndolonga malumbo kwa Mkulu Nguluwi kwa nhumbula ya heni yeng'ha, ndogasimila madito ga hegwe ga kububuwaza.
PSA 9:2 Ndosangalala na kutowa luchenze kwa chiwalo cha hegwe, ndolimbila lutogo itagwa lya hegwe, gwa Nguluwi Uwele Kuchanya.
PSA 9:3 Mhela naloulawile, wang'honyo wa heni nawahiluka kumbele, nawekwang'wala na kudumigwa.
PSA 9:4 Nakuilewela hachi ya heni, kulawa kuli chigoda cha hegwe cha undewa nakulavya utaguso uwele wa hachi.
PSA 9:5 Nakuwang'hanuchila wanhu wa isi, nakuwadumya wehile, matagwa ga hewo nakugosa mazuwa gose.
PSA 9:6 Wang'honyo nawadumigwa mazuwa gose, nakuwifya miji ja hewo, mbaka kukumbuchilwa kwa hewo nakwajilila.
PSA 9:7 Ila Mkulu Nguluwi kangulongoza mazuwa gose, nakawika chigoda cha heye cha undewa leka yataguse.
PSA 9:8 Kanguitagusa isi kwa hachi, kangwamula kwa kutanganika hali wanhu wa isi.
PSA 9:9 Mkulu Nguluwi ndo ngome kwa walingubunzwa, heye ndo honhu ha kikala goya mihela ja magazo.
PSA 9:10 Walingukuzela, gwa Nguluwi wangitumbila kwa hegwe, kwa vila hegwe Mkulu Nguluwi huwalechile walingukupala.
PSA 9:11 Mumwimbile Mkulu Nguluwi yalingulongoza ako Siyoni. Mugawikule kwa wanhu madito goyaditile.
PSA 9:12 Nguluwi kanguhilulaga chibida kwa kuboholigwa kwa danda, halingusemwa hebu chililo cha walingubunzwa.
PSA 9:13 Uwe na isungu kwa heni, gwa Mkulu Nguluwi. Ulole magazo gawele nagafika kwa heni, kulawa kwa walingunzudila, hegwe nakunyasula lombele habehi kubagama,
PSA 9:14 leka sime lutogo lwa hegwe hali wanhu wa Siyoni, leka sangalale kwa vila nakundohola.
PSA 9:15 Wanhu wa isi nawenjila kuli ikulubila lyowabawile wawo, nawagwilizwa magulu kuli utandawala wowauvisile.
PSA 9:16 Mkulu Nguluwi nakelajila vyoyawele kwa kukolela utaguso wa heye wa hachi. Wanhu wehile nawagwilizwa kwa madito ga hewo wawo.
PSA 9:17 Wehile wohiluka kuli isi ya wabagame, ena, wanhu wa isi zeng'ha walingumsemwa Nguluwi.
PSA 9:18 Ila wazunwa hawosemwigwa mazuwa gose, kitumbila kwa walihela chinhu hakukwajilila mazuwa gose.
PSA 9:19 Winuche, gwa Mkulu Nguluwi. Uleche kumleka yehile yasumye. Uwakungajize wanhu wa isi zeng'ha hali hegwe, uwataguse.
PSA 9:20 Uwakabuse, gwa Mkulu Nguluwi, leka wanhu wa isi zeng'ha wavizele kota hewo ndo wanhu hela!
PSA 10:1 Gwa Mkulu Nguluwi, lekachoni kwangwima kutali? Lekachoni kwangivisa mhela wa magazo?
PSA 10:2 Kwa kidaya wehile wanguwagaza wazunwa, wazunwa walingugwilizwa na hewo.
PSA 10:3 Mwihe kangitogolaga kwa maya ga nhumbula ya heye, kangumtambichizaga yawele na maya na kumliga Mkulu Nguluwi.
PSA 10:4 Kuli kidaya kwa heye halingumpala Nguluwi. Kijesa kwa heye kweng'ha ndo, “Haduhu Nguluwi.”
PSA 10:5 Nzila za mwihe zangusumya, kwa heye nhaguso za hegwe za kutali na majesa ga heye, kanguwabezaga wang'honyo wa heye weng'ha.
PSA 10:6 Kangijesaga mnhumbula, “Siwa na lunhwinhwi, sifichigwa na magazo kuli ukomu wa heni.”
PSA 10:7 Kumlomo kwa heye nakumema upanjilo na uhadi na kubunza, kangulongaga ulonzi wa kuzudiza na wihe.
PSA 10:8 Kangivisaga kuli vijiji yobeteza, yamkopole munhu yalihela nongwa. Ka meho kumpugajiza ng'hochele,
PSA 10:9 kangubetezaga hali honhu ha kivisa kota isimba. Kangupugajizaga leka yawebate wazunwa, kanguwagwilizaga kuli idiwa lya heye na kuwahola.
PSA 10:10 Ng'hochele kanguhondigwa na kutozigwa hasi, kangutozigwa kwa nhumbula yihile ya yula mwihe.
PSA 10:11 Mwihe kangijesaga mnhumbula ya heye, “Nguluwi nakasemwa, nakadinya kumeho kwa heye halingona chinhu.”
PSA 10:12 Winuche, gwa Mkulu Nguluwi, uwagaze, uleche kuwasemwa awo walingubunzwa.
PSA 10:13 Gwa Nguluwi, lekachoni mwihe kangukubeza, na kulonga kota humgaza?
PSA 10:14 Ila hegwe kwanguwonaga wawele kuli kutunywa na magazo, nakukunda kuwabochela mmoko mwa hegwe. Ng'hochele kangitumbila kwa hegwe, gwa Nguluwi, hegwe kwanguwaga utanzi wa walekwa.
PSA 10:15 Ubene mong'ho wa munhu mwihe, udumye wihe wa heye weng'ha, uleche koneka kahi.
PSA 10:16 Mkulu Nguluwi ndo mndewa mazuwa gose. Wanhu wa isi zeng'ha wohawamzelele wokwajilila kuli isi ya heye.
PSA 10:17 Gwa Mkulu Nguluwi, kwangubochela kulanda kwa ng'hochele, kwangumkangaza na kumhulichiza.
PSA 10:18 Kowaditila hachi walekwa na walingubunzwa, leka munhu yawele ndo misanga yalemwele kigala lunhwinhwi kahi.
PSA 11:1 (Kwa yalingwaluchiza kwimba. Zabuli ya Daudi.) Kwa heye Mkulu Nguluwi ndangubilimila kikala goya. Mwanguweza ndaze lelo kundonjela, “Uguluche kota chideje mbaka kuli vidunda,
PSA 11:2 kwa vila wehile wangujiwika goya mipinde ja hewo, nawawika goya misale kuli jiza, leka wawatowe wanhu wanojile.
PSA 11:3 Wone misisi ja ulongozi jowifigwa, munhu yatanganiche kodita ndaze?”
PSA 11:4 Mkulu Nguluwi ka mgati mwa Ng'handa ya heye yelile, chigoda cha undewa cha Mkulu Nguluwi cha ako kilanga. Kwa meho ga heye kanguwalolaga wanhu, na kuvizela chila chowalingudita.
PSA 11:5 Mkulu Nguluwi kanguwapimaga watanganiche, ila kanguwazudilaga ng'hatu wehile walingugana kubunza.
PSA 11:6 Kowadulisila wehile makala ga chiluli na maganga ga chiluli, mbeho ng'hulu yowa ndo magazo ga hewo.
PSA 11:7 Mkulu Nguluwi ndo yatanganiche na kangugana kutanganika. Wanhu wagoloche nhumbula wochikala hamwe na heye.
PSA 12:1 (Kwa yalingwaluchiza kwimba. Kwimba kwa Sheminiti. Zabuli ya Daudi.) Ututanze, gwa Mkulu Nguluwi. Wanhu wanojile nawamala, wakukundigwa nawajilila hali wanhu.
PSA 12:2 Chila yumwe kangumdetelezaga myage, wangulongaga kwa kudeta na kwa nhumbula ya udesi.
PSA 12:3 Gwa Mkulu Nguluwi, uzidumule azo myango za uhadi, na ajo milomo jilingidaya lukami.
PSA 12:4 Hewo wangulongaga, “Kwa myango za hetwe tosumya, milomo ja hetwe jina ludali, mkulu wa hetwe ndo whaani?”
PSA 12:5 Ila Mkulu Nguluwi kangulonga, “Kwa vila wazunwa wangubunzwa, walingugana wangulila kwa usungu, lelo ndanguya, nani ndowegalila kikala goya konakwali wokubeteza.”
PSA 12:6 Ulonzi wa Mkulu Nguluwi ndo kukomya, ndo welile kota zahabu yelizwe kuli itanulu, ena, kota zahabu yelizwe mala saba.
PSA 12:7 Kotwamila, gwa Mkulu Nguluwi, kotuwika kutali mazuwa gose na lulelo alu lwihile.
PSA 12:8 Wehile wanguzunguluta chila honhu, kwajilila kwangutogoligwa hali wanhu.
PSA 13:1 (Kwa yalingwaluchiza kwimba. Zabuli ya Daudi.) Gwa Mkulu Nguluwi, kosemwa heni mbaka hanili? Ndaze, kosemwa heni mbaka mazuwa gose? Mbaka hanili kokuvisa kumeho kwa hegwe?
PSA 13:2 Ndowa na lunhwinhwi na majesa mbaka hanili, masinzo mnhumbula chila zuwa? Mbaka hanili wang'honyo wa heni wosumya heni?
PSA 13:3 Undole na kunyhidichila, gwa Mkulu Nguluwi, Nguluwi wa heni. Umhe heni mong'ho kahi, leka ndeche kufichigwa na usinjizi wa kubagama.
PSA 13:4 Uleche kuwadita wang'honyo wa heni walonje, “Natumsumya ayu.” Walingungaza waleche kusangalalila kugwa kwa heni.
PSA 13:5 Ila heni ndangitumbila igano lya hegwe lya kwimilila, nhumbula ya heni yangusangalala kwa chiwalo cha ulohozi wa hegwe.
PSA 13:6 Ndokwimbila hegwe, gwa Mkulu Nguluwi, kwa igano lya kwimilila lya hegwe lyoulilajile kwa heni.
PSA 14:1 (Kwa yalingwaluchiza kwimba. Zabuli ya Daudi.) Wapoka wangilonjelaga mnhumbula, “Haduhuli Nguluwi.” Weng'ha nawajilila lukami, nawadita mbuli za kuzudiza, haduhuli ne yumwe yalingudita linojile.
PSA 14:2 Mkulu Nguluwi kanguwalola wanhu kulawa kilanga, yalole kota hana yoneche yawele na luhala, kota hana yoneche yalingumuwinza Nguluwi.
PSA 14:3 Ila weng'ha nawali hafungo, nawajilila hamwe, haduhu ne yumwe wa hewo yaditile ganojile, haduhuli ne yumwe.
PSA 14:4 Ndaze, hewo weng'ha walingudita wihe wahela nyhala? Wanguwabunza wanhu chila zuwa, hambe wandande heni Mkulu Nguluwi.
PSA 14:5 Wobatigwa na kukabusa kukulu, kwa vila Nguluwi ka hamwe na watanganiche.
PSA 14:6 Hemwe mlingudita gehile, mwangulemeza majesa ga mzunwa, ila Mkulu Nguluwi ndo honhu ha heye ha kubilimila.
PSA 14:7 Ndangugana ng'hatu ulohozi wa Isilaeli wahafichile kulawa Siyoni. Mkulu Nguluwi hoyowahilula goya wanhu wa heye, walelwa wa Yakobo wotowa luchenze, Waisilaeli wosangalala.
PSA 15:1 (Zabuli ya Daudi.) Gwa Mkulu Nguluwi, whaani yoweza kikala kuli ihema lya hegwe? Whaani yoweza kikala mchanya mwa chidunda cha hegwe chelile?
PSA 15:2 Ndo munhu yalingikala ne nongwa, mhela weng'ha kangudita gatanganiche, yalingulonga ga kukomya kulawa mnhumbula,
PSA 15:3 ndo munhu yohambe yahehe wanhu, yohambe yamditile gehile myage, ne kumvilizila munhu yowalingikalasa habehi,
PSA 15:4 ndo munhu yalinguwabeza walinguwabunza wayao, ila kanguwahulichiza wala walingumdumba Mkulu Nguluwi, ndo munhu yohambe yagalamule chilaho cha heye hanga hamba chowifya mbuli za heye,
PSA 15:5 yohambe yaziche sendi ya heye kwa kugana mzidi ng'hatu, ne kubochela chinhu kwa chiwalo cha kumbunza yalihela nongwa. Munhu yalingudita ago, hotigasika.
PSA 16:1 (Zabuli ya Daudi.) Unyamile gwa Nguluwi, kwa vila kwa hegwe ndangubilimila kikala goya.
PSA 16:2 Ndangumlonjela Mkulu Nguluwi, “Hegwe ndo Mkulu wa heni, ndahela linojile lyoneche ila hegwe.”
PSA 16:3 Kwa mbuli za welile wawele muisi, kikala na hewo ndo kusangalala kwa heni.
PSA 16:4 Ila walingujifugamila milungu jinji, wowa na magazo menji. Nhambiko ya danda sijilavila na matagwa ga milungu ajo sigalonga hebu.
PSA 16:5 Gwa Mkulu Nguluwi kwanguhega kwa heni, nakuzidita mbuli za heni zeng'ha ziwe goya.
PSA 16:6 Nakumha heni ndolendole zinojile ng'hatu, ena, uhalizi wa heni unoga.
PSA 16:7 Ndangumtogola Mkulu Nguluwi kwa kundongoza, mbaka mhela wa nechilo nhumbula ya heni yangundagusaga.
PSA 16:8 Ndangumuwika Mkulu Nguluwi kumwando kwa heni mazuwa gose, ka hamwe na heni, sitigasika.
PSA 16:9 Lelo nhumbula ya heni yeng'ha yangusangalala na kutowa luchenze, lukuli lwa heni lokwesela kwa kikala goya ng'hatu.
PSA 16:10 Ena hegwe huuleka muhe wa heni kuli isi ya wabagame, hambe undeche, Yelile wa hegwe, nyole mchilaga.
PSA 16:11 Kwangundajila nzila ya ukomu, kuwa hamwe na hegwe kwangumemeza heni usangalalo wenele, kuli moko wa hegwe uwele na mong'ho hana usangalalo mazuwa gose.
PSA 17:1 (Kulanda kwa Daudi.) Gwa Mkulu Nguluwi uhulichize chiwalo cha heni cha hachi, uhulichize chililo cha heni, uhulichize kulanda kwa heni kulihela uhadi.
PSA 17:2 Utaguso wa heni uye kulawa kwa hegwe, kwa vila hegwe kuizela mbuli iwele ya hachi.
PSA 17:3 Hegwe kwanguizela ng'hatu nhumbula ya heni, nakumbuyila nechilo kumhugajiza, nakumbika kuli kujezigwa. Huweza kuwona wihe mgati mwa heni, nanyamula silonga chinhu chihile.
PSA 17:4 Kuwala madito gowalingudita wanhu, heni nyhulichiza malajizo ga hegwe, nandiwika kutali na nzila za wanhu wehile.
PSA 17:5 Mbinza ng'hatu nzila ya hegwe, ne hado silechile hebu.
PSA 17:6 Ndangukuchema, hegwe Nguluwi, kwa vila hegwe kwangunyidichila, unyhulichize goya, uhuliche ulonzi wa heni.
PSA 17:7 Ulajile kunoga kwa igano lya hegwe lya kwimilila, uwalohole kulawa kwa wang'honyo wa hewo, wala walingubilimila kikala goya kwa hegwe.
PSA 17:8 Unyamile kota vyoulingulyamila iziho lya hegwe, uvise heni kuli lubehelo lwa mabawa ga hegwe,
PSA 17:9 kutali na kudumigwa na wehile, kutali na wang'honyo wa heni walinguzunguluta.
PSA 17:10 Awo wahela isungu lyoneche mnhumbula, wamema ulonzi wa kidadambala.
PSA 17:11 Wangumbinza na kunzunguluta, wangumbeteza heni leka wangwise.
PSA 17:12 Wangugana kundadula kota isimba. Kota isimba lilingupelemba.
PSA 17:13 Winuche, gwa Mkulu Nguluwi, witowe na hewo na kuwagwisa. Kwa ipanga undohole kulawa kwa wang'honyo.
PSA 17:14 Kwa moko wa hegwe, gwa Mkulu Nguluwi, undohole kulawa mmoko mwa wanhu awo, wanhu wawele ng'hano ya hewo ndo kuli isi ayi hela. Uwamemeze magazo gouwawichile, leka wawenago ga kuhega na wana wa hewo, wawalechele mbaka wazukulu wa hewo.
PSA 17:15 Nani kuli kutanganika ndokona kumeho kwa hegwe, hondililimka ndomema kusangalala kwa kukona.
PSA 18:1 (Kwa yalingwaluchiza kwimba. Lwimbo lwa Daudi, chitumagwa wa Nguluwi, lwoyamwimbile Mkulu Nguluwi zuwa lila loyamlohole mmoko mwa wang'honyo wa heye na mmoko mwa Sauli.) Ndangukugana, gwa Mkulu Nguluwi, mong'ho wa heni.
PSA 18:2 Mkulu Nguluwi ndo italawe lya heni, ngome ya heni na mlohozi wa heni, Nguluwi wa heni, italawe lya heni yondilingumbilimila kikala goya, ngawo ya heni na mong'ho wa ulohozi wa heni na ngome ya heni.
PSA 18:3 Nandimchema Mkulu Nguluwi, yalinguganigwa kutogoligwa yanhanze, nani nandoholigwa kulawa kwa wang'honyo wa heni.
PSA 18:4 Kwa vila ng'weso za kubagama nazinzunguluta, mazi tendema ga kudumya nagavaba heni,
PSA 18:5 ng'weso za kuli isi ya wabagame nazimbata, midiwa ja kubagama najifika.
PSA 18:6 Kuli magazo ga heni nandimchema Mkulu Nguluwi, nandimlilila Nguluwi wa heni yanhanze. Kulawa kuli ng'handa ya heye, nakahulika lizi lya heni, kulila kwa heni nakufika kuli makutu ga heye.
PSA 18:7 Aho isi naikakama na kutigasika, na misisi ja vidunda najitigasika, navitigasika kwa vila Nguluwi nayali yazudile.
PSA 18:8 Iyosi nalifung'ha kulawa kuli mhenyelo ya heye, chiluli chilingulakaza nachilawa kuli mlomo wa heye, makala ga chiluli nagaka kulawa kwa heye.
PSA 18:9 Nakagubula ulanga nakadulika, ng'hungugu nhitu hasi ha magulu ga heye.
PSA 18:10 Nakakwina chilumbigwe chiwele na mabawa na kuguluka, nakaguluka himahima mchanya mwa mbeho.
PSA 18:11 Nakegubika jiza banzi zeng'ha, chigubiko cha heye nachali jiza, nachali ng'hungugu ng'hulu ya kilanga.
PSA 18:12 Lumwemwesa nalumwemwesa hali heye, kulawa kuli ng'hungugu nakulawila nhonya ya maganga na makala ga chiluli.
PSA 18:13 Mkulu Nguluwi nakabuma kulawa kilanga, Nguluwi Yawele Kuchanya nakalavya lizi lya heye, nhonya ya maganga na makala ga chiluli navilawila.
PSA 18:14 Nakawatozela wang'honyo misale ja heye na kuwasambalula, nakatoza lumwemwesa, nakawawinga.
PSA 18:15 Kwa kung'hanuchila kwa hegwe, gwa Mkulu Nguluwi, kwa lweselo lwa mhenyelo ya hegwe, hasi ha bahali nakugubuligwa, misisi ja isi najoneka hazelu.
PSA 18:16 Nguluwi nakagolola moko wa heye kulawa kuchanya na kundavya, kulawa hasi ha mazi menji nakanyasula.
PSA 18:17 Nakandohola kulawa kwa mng'honyo wa heni yawele na mong'ho, na kulawa kwa hewo wanzudile kwa vila nawali na mong'ho lukami kusinda heni.
PSA 18:18 Nawavaba vyombele kuli magazo, ila Mkulu Nguluwi nayali kitumbila kwa heni.
PSA 18:19 Nakandavya na kunyhilika kuli kilejeha, nakandohola kwa vila nakanojezwa na heni.
PSA 18:20 Mkulu Nguluwi nakamha heni chonolo kwa kiwhana na kutanganika kwa heni, kiwhana na welile wa moko ga heni.
PSA 18:21 Kwa vila nandizibatilila nzila za Mkulu Nguluwi, na simbelenhuche Nguluwi wa heni.
PSA 18:22 Kwa vila nhaguso za heye zeng'ha nazali hali heni, silechile kuwinza malajizo ga heye.
PSA 18:23 Hali heye siwele na nongwa, nandiwika kutali na gehile ga heni.
PSA 18:24 Lelo Mkulu Nguluwi nakamha heni chonolo kwa kiwhana na kutanganika kwa heni, kwa kiwhana na welile wa moko ga heni hali heye.
PSA 18:25 Mkulu Nguluwi, hegwe kowa wa kukundigwa kwa wawele wa kukundigwa, kwa walihela nongwa, kwangilajila kwahela nongwa.
PSA 18:26 Kwa heye yalingiyeliza kwangilajila kota ndo yelile, ila kwa wajilile kwanguwaditila kota vyowalinguganigwa.
PSA 18:27 Kwa vila kwanguwalohola walingunyenyetela, ila kwanguwadulisa walingidaya.
PSA 18:28 Kwa vila hegwe ndo ulingubwina chenje cha heni, Mkulu Nguluwi, Nguluwi wa heni, kwanguwinga jiza lya heni.
PSA 18:29 Kwa utanzi wa hegwe ndanguwasumya wamizi, londiwa hamwe na Nguluwi wa heni ndoweza kuzuma lukanzi.
PSA 18:30 Choyalingudita Nguluwi chahela nongwa! Kulagana kwa Mkulu Nguluwi ndo kwa kukundigwa, heye ndo ngawo kwa weng'ha walingumbilimila.
PSA 18:31 Whaani yawele Nguluwi, mzidi wa Mkulu Nguluwi? Whaani yawele italawe lya kutwamila, kota Nguluwi wa hetwe?
PSA 18:32 Nguluwi ndo yalinguwopa heni isali liwele na mong'ho, nakaidita nzila ya heni iwe inojile.
PSA 18:33 Nakadita magulu ga heni gawe nzinzili kota ga ibala, na kumbika honhu hanojile mchanya mwa vinhembenhembe.
PSA 18:34 Kangundangusa kitowa ngondo, leka moko ga heni gawe na mong'ho wa kukwega upinde uwele nzinzili.
PSA 18:35 Nakumha heni ngawo ya hegwe ya ulohozi, moko wa hegwe wa kudilo naunhanza, kunyenyetela kwa hegwe nakundita ndiwe mkulu.
PSA 18:36 Nakundita njende kwa kilejeha, leka magulu ga heni galeche kutelela.
PSA 18:37 Nandiwawinza wang'honyo wa heni na kuwafichila, sihiluche kumbele mbaka lowadumigwe.
PSA 18:38 Ndowatowanga leka walemwele kwinuka kahi, wogwa hali magulu ga heni.
PSA 18:39 Hegwe nakundita ndiwe na mong'ho wa kitowa ngondo, nakuwadulisa wang'honyo hali heni.
PSA 18:40 Nakuwadita wang'honyo wa heni wabilime, wala wanzudile nandiwadumya.
PSA 18:41 Nawatowa iyowe lya kulanda utanzi, ila hakuwele na wa kuwalohola, nawamlilila Mkulu Nguluwi ila hawedichile.
PSA 18:42 Nandiwatowa, nawali kota nhimbwisi hali mbeho, nandiwatoza hanze kota nhope mnzila.
PSA 18:43 Hegwe nakundohola kulawa kuli kutowigwa na wanhu, nakundita ndiwe chilongozi wa wanhu wa isi. Wanhu wohambe ndiwazele nawang'holela mijito.
PSA 18:44 Wajenzi nawoya na kufugama kwa heni, lowahuliche malajizo ga heni, nawanyhulichiza.
PSA 18:45 Wajenzi watweguche nhumbula, nawoya kulawa kuli ngome za hewo wokakama.
PSA 18:46 Mkulu Nguluwi ka mkomu! Yatambichizwe italawe lya heni! Yatogoligwe Nguluwi wa ulohozi wa heni.
PSA 18:47 Heye nakandita nyhilule chibida, na kuwadita wanhu walemwele hali ludali lwa heni.
PSA 18:48 Nakundohola kulawa kwa wang'honyo wa heni. Ena, kwangunyhinula leka ndiwe mchanya ng'hatu mwa wang'honyo wa heni, na kundohola kulawa kwa wehile.
PSA 18:49 Ahyo, ndokutogola, gwa Mkulu Nguluwi, hali isi zeng'ha, ndolimbila lutogo itagwa lya hegwe.
PSA 18:50 Nguluwi kangumtambichizaga mndewa wa heye kusumya kukulu, kangulajilaga igano lya kwimilila kwa yabakalizwe mafuta wa heye, ena, kangumditilaga ahi Daudi na walelwa wa heye mazuwa gose.
PSA 19:1 (Kwa yalingwaluchiza kwimba. Zabuli ya Daudi.) Kilanga kwangiwikula ukulu wa Nguluwi, ulanga wangutawiza mijito ja moko ga heye.
PSA 19:2 Chila zuwa lyanguulonga, chila nechilo yanguzelesa.
PSA 19:3 Kuduhu nhelo ama ulonzi ulingulonjigwa, ne lizi lulinguhulikwa,
PSA 19:4 ila lizi lya hewo lyangulutaga kuli isi yeng'ha, na ulonzi wa hewo kuli kuduma kwa isi yeng'ha. Nguluwi nakaliwichila isanya honhu hake kuli ulanga,
PSA 19:5 nalyo lyangulawa kota mkasano yalingulawa kuli chihengo cha heye, lyangusangalala kota munhu yawele na mong'ho yalingubilima kuli nzila ya heye.
PSA 19:6 Lyangulawaga ubanzi umwe, na kuzunguluta mbaka ubanzi uyage, haduhu choweza kibagula na ivuche lyake.
PSA 19:7 Ilajizo lya Mkulu Nguluwi ndo lyenela, kangumpaga munhu ukomu unyale. Ulolezi wa Mkulu Nguluwi nawima nzinzili, kanguwapaga luhala walihela uwanzi.
PSA 19:8 Malajizo ga Mkulu Nguluwi ndo ga hachi, kangusangalazaga nhumbula. Mizilo ja Mkulu Nguluwi jahela nongwa, jangigala lumuli kuli meho.
PSA 19:9 Kumdumba Mkulu Nguluwi ndo welile, na wa kikala mazuwa gose. Nhaguso za Mkulu Nguluwi ugoloka, zeng'ha utanganika.
PSA 19:10 Zangunojeza kusinda zahabu, kusinda zahabu inojile ng'hatu, zinona kusinda hanombwa, kusinda hanombwa ilawile kuli ilala.
PSA 19:11 Kwa malanguso ga hegwe, ndangukanyigwa, kwa kugawinza ndangupegwa chonolo chikulu.
PSA 19:12 Ila whaani yalingona nongwa za heye yuye? Gwa Nguluwi, mbiche kutali na nongwa zohambe ndizizele.
PSA 19:13 Undemeze heni chitumagwa wa hegwe ndeche kudita gehile ga kunuwila, uleche kukunda ago gandongoze. Aho ndowa ndilihela nongwa, siwa na gehile ng'hatu.
PSA 19:14 Ulonzi wa mlomo wa heni na majesa ga nhumbula ya heni, gakundigwe hali hegwe, gwa Mkulu Nguluwi, italawe lya heni na mgombozi wa heni.
PSA 20:1 (Kwa yalingwaluchiza kwimba. Zabuli ya Daudi.) Mkulu Nguluwi yakwidichile houwa kuli magazo, itagwa lya Nguluwi wa Yakobo likwamile.
PSA 20:2 Yakuhilichile utanzi kulawila mng'handa mwa heye, yakutanze kulawa chidunda cha Siyoni.
PSA 20:3 Yazikumbuchile ndolendole za hegwe zeng'ha, yazikunde nhambiko za hegwe za kulakazwa.
PSA 20:4 Yakupe goulingugana mnhumbula ya hegwe, yazidite mbuli za hegwe zeng'ha zikulutile goya.
PSA 20:5 Totowa luchenze kwa chiwalo cha kusumya kwa hegwe, tokwinula bendela kulipa ukulu itagwa lya Nguluwi wa hetwe. Mkulu Nguluwi yakwenezele kulanda kwa hegwe kweng'ha.
PSA 20:6 Ndanguvizela kota Mkulu Nguluwi komtanza mndewa yambakalize mafuta, komwidichila kulawa mng'handa mwa heye kilanga, kwa moko wa heye wa kudilo komdita yasumye ng'hatu.
PSA 20:7 Wanji wangitumbila mituka ja hewo ja kitowela ngondo, wanji wangitumbila falasi wa hewo. Ila hetwe twangitumbila Mkulu Nguluwi, Nguluwi wa hetwe.
PSA 20:8 Hewo wochikwang'wala na kugwa, ila hetwe tokwima nzinzili.
PSA 20:9 Umdite mndewa yasumye, gwa Mkulu Nguluwi! Utwidichile hotukulanda!
PSA 21:1 (Kwa yalingwaluchiza kwimba. Zabuli ya Daudi.) Gwa Mkulu Nguluwi, mndewa kangutowa luchenze kwa mong'ho wa hegwe, kangusangalala ng'hatu kwa kusumya koumpele.
PSA 21:2 Nakumha kugana kwa nhumbula ya heye, haulemile kulanda kwa heye.
PSA 21:3 Nakumuyila, nakumha utambichizo winji, nakumvaliza kofia ya undewa ya zahabu inojile kumutwi kwa heye.
PSA 21:4 Nakakulanda ukomu nagwe nakumha, nakumha ukomu wa kikala mazuwa gose.
PSA 21:5 Kwa kusumya kwa hegwe, mndewa kana ukulu ng'hatu, hegwe nakumha ukulu na kuhulichizwa.
PSA 21:6 Nakumdita heye yawe yatambichizwe mazuwa gose, nakumsangalaza heye, kwa kukuhejelela hegwe.
PSA 21:7 Mndewa kangitumbila kwa Mkulu Nguluwi, kwa igano lya kwimilila lya Nguluwi Yawele Kuchanya, hotigaswa.
PSA 21:8 Gwa mndewa, moko wa hegwe wowebata wang'honyo wa hegwe weng'ha, moko wa hegwe wa kudilo wowebata walingukuzudila.
PSA 21:9 Houlawila kowadumya kota itanuli lya chiluli. Mkulu Nguluwi kowadumya kwa ng'halazi ya heye, chiluli chowalakaza ng'hatu.
PSA 21:10 Gwa mndewa, kowadumya walelwa wa hewo muisi, wana wa hewo hawopona hali wanhu.
PSA 21:11 Hanga howochijesa kukuditila gehile, wone wowika goya mbuli za wihe, hawoweza kusumya hebu.
PSA 21:12 Kwa vila hegwe kowadita wabilime, louwagololela kumeho misale ja hegwe.
PSA 21:13 Utogoligwe gwa Mkulu Nguluwi, kwa chiwalo cha mong'ho wa hegwe. Tokwimba na kutogola ludali lwa hegwe.
PSA 22:1 (Kwa yalingwaluchiza kwimba. Kwimba kwa lwimbo lwa chifuno chidala cha lufuku. Zabuli ya Daudi.) Nguluwi wa heni, Nguluwi wa heni, lekachoni nakundeka? Lekachoni kwa kutali ng'hatu kundohola, kutali na chililo cha heni cha magazo?
PSA 22:2 Gwa Nguluwi wa heni, ndangulila nemisi ila hambe widichile, ndangutowa iyowe nechilo, ila siweza kwesela.
PSA 22:3 Ila, hegwe kwa yelile, hegwe kwangulongoza kulawa kuli chigoda cha hegwe cha undewa na kutogoligwa na Waisilaeli.
PSA 22:4 Wasekulu wa hetwe nawetumbila kwa hegwe, nawetumbila kwa hegwe, nagwe nakuwalohola.
PSA 22:5 Nawakulilila hegwe, nawaloholigwa, nawakutumbila nawo hawabasigwe soni.
PSA 22:6 Ila heni nda linhu hela, siwele munhu, ndemigwa na kubezigwa na wanhu weng'ha.
PSA 22:7 Weng'ha walingumbona wangumbeza, wangufyonya na kutigasa vitwi vya hewo.
PSA 22:8 Wangulongaga, “Nakamtumbila Mkulu Nguluwi, lelo, Nguluwi yamgombole. Wone Nguluwi kangunojezwa na heye, lelo, yamlohole.”
PSA 22:9 Ila hegwe ndo undavile mmunda mwa mayangu, nakumbika hanojile kuli mhambaga ya mayangu.
PSA 22:10 Nandikutumbila kulawa kupondigwa kwa heni. Kulawa lomhondigwe, hegwe nawali Nguluwi wa heni.
PSA 22:11 Uleche kuwa kutali na heni, kwa vila magazo ga habehi, haduhu wa kunhanza.
PSA 22:12 Wang'honyo wenji nawanzunguluta kota mibuguma, wamema chila ubanzi wa heni kota mibuguma jing'hang'hale ja Bashani.
PSA 22:13 Wangugabula milomo ja hewo kota isimba, liwele goya kuvaba heni na kundadula.
PSA 22:14 Namala kota mazi gabohoche, mizeje ja heni najiseleuka, nhumbula ya heni ndo kota ihota, yangusungulumuka mgati mwa heni.
PSA 22:15 Ikolomelo lya heni nalikala ng'hatu, umyango wa heni wangunanahila kumlomo kwa heni. Nakundeka kuli nimbwisi ya kubagama.
PSA 22:16 Chilundo cha wehile nachinzunguluta, nawanzunguluta kota chilundo cha mibwa, kota isimba, nawandadula kuli moko na magulu ga heni.
PSA 22:17 Mhona mizeje hela, wang'honyo wa heni wangundola na kundonga vibi.
PSA 22:18 Wangigawila nguwo za heni, wangulitowela simbi ivalo lya heni.
PSA 22:19 Ila hegwe gwa Mkulu Nguluwi, uleche kuwa kutali na heni. Hegwe mong'ho wa heni, uye himahima kunhanza.
PSA 22:20 Undohole kulawa kuli ipanga, ulohole ukomu wa heni mli ndole za mibwa ajo.
PSA 22:21 Undohole kumlomo mwa isimba, undohole kulawa kuli mbalati za mibogo ajo.
PSA 22:22 Ndowasimila wang'holozangu itagwa lya hegwe, ndokutogola hali nhing'hano ya hewo.
PSA 22:23 “Hemwe mlingumdumba Mkulu Nguluwi, mumtogole. Mumhulichize hemwe walelwa weng'ha wa Yakobo. Mumfugamile Nguluwi hemwe walelwa weng'ha wa Isilaeli.
PSA 22:24 Kwa vila heye halingubeza ne kuzudila ung'hochele wa ng'hochele, ne kivisa kutali na heye, ila kangumhulika hoyomlanda utanzi.”
PSA 22:25 Kwa chiwalo cha hegwe ndokutogola, hali nhing'hano ng'hulu ya wanhu, ndokweneza chilaho cha heni hali hewo walingukudumba.
PSA 22:26 Wazunwa wolya na kiguta, walingumpala Mkulu Nguluwi womtogola. Nguluwi yawatambichize kikala mazuwa gose.
PSA 22:27 Isi zeng'ha zokumbuchila na kumhiluchila Mkulu Nguluwi, wanhu wa isi zeng'ha womfugamila,
PSA 22:28 kwa vila Mkulu Nguluwi ndo mndewa, heye kanguwalongoza wanhu wa isi zeng'ha.
PSA 22:29 Wawele na lufufu weng'ha muisi, wofugama hali heye, weng'ha wawele wobagama wofugama hali heye, weng'ha wohambe waweze kulutiliza ukomu wa hewo.
PSA 22:30 Lulelo lulinguya lwomkolela mijito, wanhu wolusimila mbuli za Nguluwi,
PSA 22:31 wowikula madito ga heye ga hachi. Wanhu wowawele wang'hali kupondigwa wolonjelwa, “Mkulu Nguluwi nakadita kwa hachi.”
PSA 23:1 (Zabuli ya Daudi.) Mkulu Nguluwi ndo mdimi wa heni, sipunguchilwa na chinhu.
PSA 23:2 Hali honhu ha misolo midodi kangumbasilizaga, hafungo ha mazi gasindamale kangundongozaga.
PSA 23:3 Kanguuhilusilaga muhe wa heni mong'ho unyale. Kuli nzila ya hachi kangundongozaga, kwa chiwalo cha kuzeleka kwa heye.
PSA 23:4 Hanga hondikola hali ibindi lya jiza likulu lya kubagama, sidumba wihe woneche, kwa vila hegwe, gwa Mkulu Nguluwi kwa hamwe na heni, nyimbati na ng'hweku ya hegwe vyangunyamila.
PSA 23:5 Nakumbichila goya mnvina hali wang'honyo wa heni, nakumbakaliza heni mafuta kumutwi, chizombe cha heni chimema lukami.
PSA 23:6 Kwa kukomya, kunoga kwa hegwe na igano lya kwimilila lya hegwe vyowa hamwe na heni, kuli mazuwa geng'ha ga ukomu wa heni, nani ndochikala kuli ng'handa ya Mkulu Nguluwi mazuwa gose.
PSA 24:1 (Zabuli ya Daudi.) Isi na vyeng'ha viwele mgati mwake ndo vya heye Mkulu Nguluwi, isi na weng'ha walingikala mgati mwake ndo vya heye.
PSA 24:2 Kwa vila heye nakawika misisi ja isi mchanya mwa bahali, nakajiwika nzinzili mchanya mwa nzanda za mazi.
PSA 24:3 Whaani yokwina kuli chidunda cha Mkulu Nguluwi? Whaani yochikala kuli ng'handa ya heye yelile?
PSA 24:4 Munhu yawele na madito ganojile na nhumbula nzelu, yohambe yauwiche muhe wa heye kuli kudeta, ne kilaha kwa udesi.
PSA 24:5 Munhu ayo kobochela utambichizo kulawa kwa Mkulu Nguluwi na hachi ya heye kulawa kwa Nguluwi wa ulohozi wa heye.
PSA 24:6 Ndo vyoluwele lulelo lwa walingumpala heye, ena, wanhu walingumpala Nguluwi wa Yakobo.
PSA 24:7 Mchumuche hemwe lwizi, mchumuche, hemwe lwizi lwa katali, mndewa mkulu yaweze kwinjila.
PSA 24:8 Whaani ayo Mndewa mkulu? Ndo Mkulu Nguluwi Yawele na Mong'ho na ludali, Mkulu Nguluwi Yawele na Ludali kuli ngondo.
PSA 24:9 Mchumuche hemwe lwizi mchumuche, hemwe lwizi lwa katali, mndewa mkulu yaweze kwinjila.
PSA 24:10 Whaani ayo Mndewa mkulu? Ndo Mkulu Nguluwi Yawele na Mong'ho, heye ndo Mndewa wa ukulu.
PSA 25:1 (Zabuli ya Daudi.) Gwa Mkulu Nguluwi, kwa hegwe ndangigala nhumbula ya heni.
PSA 25:2 Ndangitumbila kwa hegwe, gwa Nguluwi wa heni, uleche kundeka mbasigwe soni, wang'honyo wa heni waleche kusangalala kwa kulemwela kwa heni.
PSA 25:3 Haduhu ne yumwe hali walingitumbila kwa hegwe, yawele yobasigwa soni, ila weng'ha walingukubelenhuka wabasigwe soni.
PSA 25:4 Gwa Mkulu Nguluwi, unzelese nzila za hegwe, undanguse kugawinza goulingugana.
PSA 25:5 Undongoze kuli kukomya kwa hegwe na kundangusa, kwa vila hegwe ndo Nguluwi mlohozi wa heni, ndangitumbila kwa hegwe chila zuwa.
PSA 25:6 Gwa Mkulu Nguluwi, ukumbuchile isungu na igano lya kwimilila lya hegwe, viwele navyali kulawa katali.
PSA 25:7 Uleche kukumbuchila gehile ga usongolo wa heni, ung'humbuche kwa kiwhana na igano lya kwimilila lya hegwe, gwa Mkulu Nguluwi, kwa chiwalo cha kunoga kwa hegwe.
PSA 25:8 Mkulu Nguluwi ka yanojile na yagoloche, ahyo kanguwalangusaga nzila wawele na gehile.
PSA 25:9 Kanguwalongozaga walingunyenyetela kuli hachi, ena, kanguwalangusaga nzila ya heye.
PSA 25:10 Mkulu Nguluwi kanguditaga kwa igano lya kwimilila na kukundigwa, kwa wala walingibatilila malajizo ga ilagano lya heye.
PSA 25:11 Gwa Mkulu Nguluwi, kwa chiwalo cha itagwa lya hegwe, undechele nongwa ya heni hanga ndo ng'hulu.
PSA 25:12 Chila munhu yalingumdumba Mkulu Nguluwi, Mkulu Nguluwi komlangusa nzila ya kuwinza.
PSA 25:13 Mbuli za munhu ayo zomlutila goya mazuwa gose, walelwa wa heye woihalila isi.
PSA 25:14 Mkulu Nguluwi ka goloko wa hewo walingumdumba, heye kanguwazelesaga ilagano lya heye.
PSA 25:15 Meho ga heni gangumlola Mkulu Nguluwi mazuwa gose, naye kogalavya magulu ga heni kuli idiwa.
PSA 25:16 Gwa Nguluwi, uye kwa heni na kumbonela isungu, kwa vila ndayeka na ndangugazika.
PSA 25:17 Umbusile kusanzalima kwa nhumbula ya heni, na umbuse kuli lunhwinhwi.
PSA 25:18 Ulole magazo na kusanzalima kwa heni, undechele gehile ga heni geng'ha.
PSA 25:19 Lole ndaze vyowawele wenji wang'honyo wa heni, lole ndaze vyowalingunzudila ng'hatu na kugana kundumiza.
PSA 25:20 Uwamile ukomu wa heni, undohole, uleche kukunda mbasigwe soni, ndangubilimila kikala goya kwa hegwe.
PSA 25:21 Kugoloka na kutanganika vinyamile, kwa vila ndangukutumbila hegwe.
PSA 25:22 Gwa Mkulu Nguluwi, uwagombole wanhu wa hegwe, Isilaeli, kuli magazo ga hewo geng'ha.
PSA 26:1 (Zabuli ya Daudi.) Gwa Mkulu Nguluwi, umhe heni hachi, kwa vila nandikala kwa kugoloka, nanditumbila kwa hegwe ne kukuleka.
PSA 26:2 Gwa Mkulu Nguluwi, umhugajize na kunjeza, uitaguse nhumbula ya heni na nyhala za heni.
PSA 26:3 Mazuwa gose silisemwa igano lya kwimilila lya hegwe, ndangikala kwa chiwalo cha kukundigwa kwa hegwe.
PSA 26:4 Hambe ndilumbe hamwe na wanhu wadesi, hambe ndihanze na wanhu wahadi.
PSA 26:5 Ndanguzizudila nhing'hano za wajilile, na kilumba hamwe na wehile.
PSA 26:6 Ndanguhovuga moko ga heni kulajila ndahela nongwa, na kuhahejelela honhu ha hegwe ha kulavila nhambiko, Gwa Mkulu Nguluwi,
PSA 26:7 kuno ndikwimba lwimbo lwa kuta malumbo, na kusimila madito ga hegwe geng'ha ga kububuwaza.
PSA 26:8 Mkulu Nguluwi, nojezwa na ng'handa ya hegwe, honhu houlingikala, honhu houlingikala ukulu wa hegwe.
PSA 26:9 Uleche kundumya hamwe na wawele na gehile, ne kunhoza hamwe na walingukopola,
PSA 26:10 wanhu wawele madito ga hewo ndo ga wihe mazuwa gose, wanhu wawele wamema kugana kubochela chinhu leka kwajiliza hachi.
PSA 26:11 Ila heni ndangikala kwa kugoloka, ungombole na kumbonela isungu.
PSA 26:12 Ndangwima hali honhu hawele na kikala goya, ndomtogola Mkulu Nguluwi, kuli nhing'hano ng'hulu.
PSA 27:1 (Zabuli ya Daudi.) Mkulu Nguluwi ndo lumuli lwa heni na ulohozi wa heni, ndimdumbe whaani? Mkulu Nguluwi ndo ngome ya ukomu wa heni, ndimdumbe whaani?
PSA 27:2 Wehile howonhowa, na kugana kundumya, wang'honyo na walingitwanza na heni wochikwang'wala na kugwa.
PSA 27:3 Hanga wamizi howonzunguluta, nhumbula ya heni haidumba chinhu, hanga ngondo hoilawila kwa heni, ndowa nding'hali na kitumbila.
PSA 27:4 Mbuli imwe nandimlanda Mkulu Nguluwi, ayo ndo ndilinguipala, ndikale mng'handa mwa Mkulu Nguluwi mazuwa geng'ha ga ukomu wa heni, ndijese ng'hatu kunoga kwa Mkulu Nguluwi, na kupala ulongozi wa heye kuli ng'handa ya heye.
PSA 27:5 Kukomya, zuwa lya magazo konyamila kuli chibumuli cha heye, kovisa heni kuli ihema lya heye, na kumbika kwa kikala goya mchanya mwa italawe.
PSA 27:6 Kwa kusumya nani ndolola mchanya mwa wang'honyo wa heni walingunzunguluta. Ndomlavila nhambiko kwa kutowa luchenze mgati mwa ng'handa ya heye, ndokwimba na kumtowela luchenze Mkulu Nguluwi.
PSA 27:7 Gwa Mkulu Nguluwi, unyhulichize hondikulilila, umbonele isungu na kunyhidichila.
PSA 27:8 Nhumbula ya heni yangundonjela, “Uye umpale Nguluwi.” Lelo, ndanguya kwa hegwe, gwa Mkulu Nguluwi.
PSA 27:9 Uleche kuleka kundola, uleche kundema kwa ng'halazi heni chitumagwa wa hegwe. Hegwe nawali utanzi wa heni. Uleche kunhoza ne kundeka, gwa Nguluwi Mlohozi wa heni.
PSA 27:10 Hanga mhaza na mayangu howondeka, Mkulu Nguluwi kombochela.
PSA 27:11 Gwa Mkulu Nguluwi, undanguse nzila ya hegwe, undongoze kuli nzila igoloche, kwa chiwalo cha wang'honyo wa heni.
PSA 27:12 Uleche kundeka leka wang'honyo wa heni wanditile vyowogana, kwa vila walolezi wa udesi nawambuyila, hewo walingulavya ulonjelezi wihile.
PSA 27:13 Ndangukunda kota ndolyona isungu lya Mkulu Nguluwi, kuli isi ya wawele wakomu.
PSA 27:14 Witumbile kwa Mkulu Nguluwi. Wime nzinzili, uleche kugozola. Ena, witumbile kwa Mkulu Nguluwi.
PSA 28:1 (Zabuli ya Daudi.) Ndangukulilila, gwa Mkulu Nguluwi, gwa italawe lya heni, uleche kunditila kota yohambe yahuliche. Wone hunyhulichize, ndowa kota wala walingudulika kuli ikulubila lya wabagame.
PSA 28:2 Uhulichize lizi lya kulanda kwa heni kwa isungu, hondikulilila unhanze, hondikwinula moko ga heni kuli ng'handa ya hegwe yelile.
PSA 28:3 Uleche kumbulunha heni hamwe na wanhu wehile, hamwe na wanhu walingudita wihe. Wala walingulonga na wayao ulonzi wa kikala goya, ila nawamema wihe mnhumbula za hewo.
PSA 28:4 Uwagaze kwa kiwhana na madito ga hewo, kwa kiwhana na wihe wowauditile. Uwagaze kwa kiwhana na gowalingudita kwa moko ga hewo, uwaditile vila vyowalinguganigwa kuditilwa.
PSA 28:5 Kwa vila hambe wajese kwa chiwalo cha madito ga Mkulu Nguluwi, hawazizelele mbuli zoyaditile, kwa chiwalo acho kowabomola, howazenga kahi unyale.
PSA 28:6 Yatogoligwe Mkulu Nguluwi, kwa vila nakahulika kulanda kwa heni kwa isungu.
PSA 28:7 Mkulu Nguluwi ndo mong'ho wa heni na ngawo ya heni, nhumbula ya heni yangitumbila kwa heye. Nakanhanza nani nditowa luchenze kwa nhumbula, kwa lwimbo lwa heni ndangulonga malumbo kwa chiwalo cha heye.
PSA 28:8 Mkulu Nguluwi ndo mong'ho wa wanhu wa heye, heye ndo honhu ha kubilimila kwa mndewa wa heye yambakalize mafuta.
PSA 28:9 Gwa Nguluwi, uwalohole wanhu wa hegwe, uwatambichize wanhu wa hegwe. Uwe mdimi wa hewo na kuwatanza mazuwa gose.
PSA 29:1 (Zabuli ya Daudi.) Mumtogole Mkulu Nguluwi, hemwe vilumbigwe vya kilanga, mlonje Mkulu Nguluwi kana ukulu na mong'ho.
PSA 29:2 Muwikule ukulu wa itagwa lya Mkulu Nguluwi. Mumfugamile Mkulu Nguluwi kuli welile ng'hatu wa heye.
PSA 29:3 Lizi lya Mkulu Nguluwi lwanguhulikwa mchanya mwa bahali, Nguluwi yawele na ukulu kangulibumiza limlungu, lizi lya Mkulu Nguluwi lyanguhulikwa mchanya mwa bahali.
PSA 29:4 Lizi lya Mkulu Nguluwi lina mong'ho, lizi lya Mkulu Nguluwi limema ukulu.
PSA 29:5 Lizi lya Mkulu Nguluwi lyangubena migodi mikulu, Mkulu Nguluwi kangubenanga migodi mikulu ja Lebanoni.
PSA 29:6 Kangwambuzaga limachinyhina kuli vidunda vya Lebanoni, chidunda cha Helimoni chitigasiche.
PSA 29:7 Lizi lya Mkulu Nguluwi lyangulavyaga lumwemwesa.
PSA 29:8 Lizi lya Mkulu Nguluwi lyangukudita kugunuche kukakame, Mkulu Nguluwi nakakudita kugunuche ako Kadeshi kukakame.
PSA 29:9 Lizi lya Mkulu Nguluwi lyangutigasa migodi ja kumhulo, lyangulagaza mahamba ga migodi kuli kisolo, na mgati mwa ng'handa ya heye kweng'ha wangulonga, “Ukulu kwa Nguluwi.”
PSA 29:10 Mkulu Nguluwi ndo yalingulongoza mchanya mwa mazi tendema, Mkulu Nguluwi ndo mndewa yalingulongoza mazuwa gose.
PSA 29:11 Mkulu Nguluwi yawape mong'ho wanhu wa heye. Mkulu Nguluwi yawatambichize wanhu wa heye kwa kikala goya.
PSA 30:1 (Zabuli ya Daudi. Lwimbo lwa kuiwika chiuyeng'ha ng'handa ya Nguluwi.) Gwa Mkulu Nguluwi, ndangukutogola kwa vila nakunyinula kulawa kuli ikulubila, huwalechile wang'honyo wa heni wasangalale kwa kusumya heni.
PSA 30:2 Gwa Mkulu Nguluwi, Nguluwi wa heni, nandikulilila unhanze, nagwe nakumhonya.
PSA 30:3 Gwa Mkulu Nguluwi, nakundohola kulawa kuli isi ya wabagame, nakumha kahi heni ukomu, nakundavya hali walinguluta kuli vilaga.
PSA 30:4 Mumwimbile Mkulu Nguluwi lutogo, hemwe wa kukundigwa wa heye, mkumbuchile welile wa heye na kumlonjela malumbo.
PSA 30:5 Ng'halazi ya heye yangikala kwa mhela udo, kukundigwa kwa heye kwangikala mazuwa gose. Chililo choweza kuwa baho mbaka nechilo, ila mitondo usangalalo wanguya.
PSA 30:6 Mbuli za heni hoziwele zilutilila goya, nandonga, “Silemwela hebu.”
PSA 30:7 Kwa kunoga kwa hegwe, gwa Mkulu Nguluwi, nakunyimiza nzinzili kota chidunda chikulu. Ila louwele wivisile kutali na heni, nandumba ng'hatu.
PSA 30:8 Gwa Nguluwi, nandikulilila hegwe, ena nandikudedeza, gwa Mkulu Nguluwi, kwa isungu.
PSA 30:9 “Ndaze, kopegwa choni hondibagama, na kudulika mbaka kuli wabagame? Ndaze, nhimbwisi ya wabagame yoweza kukutogola? Ndaze, yoweza kusimila kukundigwa kwa hegwe?
PSA 30:10 Unyhulichize, gwa Mkulu Nguluwi na kumbonela isungu, gwa Mkulu Nguluwi, unhanze.”
PSA 30:11 Hegwe nakugalula kulombocheza kwa heni kuwa ngoma ya kusangalala, nakumbusila masinzo ga heni, nakunzungulusila usangalalo.
PSA 30:12 Ndokutogola hambe nyamalile. Gwa Mkulu Nguluwi, Nguluwi wa heni ndokulonjela malumbo mazuwa gose.
PSA 31:1 (Kwa yalingwaluchiza kwimba. Zabuli ya Daudi.) Gwa Mkulu Nguluwi, kwa hegwe ndangubilimila kikala goya, uleche kundeka ne hado mbasigwe soni, kwa kutanganika kwa hegwe undohole himahima.
PSA 31:2 Umbichile goya ikutu lyako, undohole. Uwe kwa heni italawe lya kikala goya, ngome iwele nzinzili kundohola.
PSA 31:3 Ena, hegwe ndo italawe na ngome ya heni, kwa chiwalo cha itagwa lya hegwe undongoze na kundajila.
PSA 31:4 Undavye kuli idiwa lyowambichile chinyele, kwa vila hegwe ndo honhu ha heni ha kubilimila.
PSA 31:5 Mmoko mwa hegwe ndanguwika muhe wa heni, nakungombola, gwa Mkulu Nguluwi, Nguluwi wa kitumbila.
PSA 31:6 Ndanguwazudila walingufugamila milungu ja udesi, ila heni ndangitumbila kwa hegwe, gwa Mkulu Nguluwi.
PSA 31:7 Ndotowa luchenze na kusangalala kwa igano lya kwimilila lya hegwe, kwa vila hegwe nakukona kugaya kwa heni, nakukuzela kusanzalima kwa nhumbula ya heni.
PSA 31:8 Hegwe hundechile mbichigwe kuli moko ga wang'honyo wa heni, nakunyimiza honhu hawele na kilejeha.
PSA 31:9 Gwa Mkulu Nguluwi, umbonele isungu, nda kuli magazo, meho ga heni nagatoka kwa masinzo, ndahela mong'ho kuli lukuli na kuli nhumbula.
PSA 31:10 Ukomu wa heni naumala kwa masinzo, ena, miyaka jangu kwa kung'ung'uta. Mong'ho wa heni naumala kwa kugazika, mbaka mizeje ja heni jahela mong'ho.
PSA 31:11 Nandiwa wa kubezigwa kwa wang'honyo wa heni weng'ha, kwa wawele habehi na heni nambezigwa ng'hatu. Goloko wa heni wangumbona heni nda chinhu cha kukabusa, howombona mnzila wangumbilima heni.
PSA 31:12 Semwigwa kota munhu yabagame, ndiwa kota chiya chibeneche.
PSA 31:13 Ndanguhulika wanhu woheha, “Kukabusa chila ubanzi!” Wangijesa mbuli zihile kwa heni, wangiwika goya kung'hopola.
PSA 31:14 Ila heni ndangitumbila kwa hegwe, gwa Mkulu Nguluwi. Ndangulonga, “Hegwe ndo Nguluwi wa heni.”
PSA 31:15 Mazuwa ga ukomu wa heni ga mmoko mwa hegwe, undohole kulawa kwa wang'honyo wa heni, undohole kulawa kwa hewo walingumbinga.
PSA 31:16 Undole kwa kunoga heni chitumagwa wa hegwe, undohole kwa igano lya kwimilila lya hegwe.
PSA 31:17 Gwa Mkulu Nguluwi, uleche kundeka mbasigwe soni kwa vila heni ndangukulanda, ila waleche wehile wabasigwe soni, waleche wajilile kwa kububuwala ako kuli isi ya wabagame.
PSA 31:18 Ujidinye milomo ja wanhu wadesi, wanhu wawele na kidaya na izudizo kwa wanji, wawele wanguwabezaga wanhu watanganiche.
PSA 31:19 Ndaze vyokuwele kwinji kunoga kwa hegwe, kouwawichile wala walingukudumba! Walingubilimila kikala goya kwa hegwe kwanguwapa ganojile kuno wanhu weng'ha wolola.
PSA 31:20 Kwanguwavisa hali honhu hawele na kikala goya aho houwele, kutali na majesa gehile ga wanhu. Kwanguwawika kuli kikala goya hali ng'handa ya hegwe, kutali na maligo ga wang'honyo wa hewo.
PSA 31:21 Yatogoligwe Mkulu Nguluwi, kwa vila nakandajila igano lya kwimilila lya heye lya kububuwaza, lonzungulutwe kota muji ulingutowigwa.
PSA 31:22 Nandumba lukami na kijesa kota nawali undechile, hambi, nakuhulika chililo cha heni londikuchemile unhanze.
PSA 31:23 Mumgane Mkulu Nguluwi, hemwe welile wa heye weng'ha. Mkulu Nguluwi kanguwamilaga wanhu wa kukundigwa, ila kanguwagazaga walingidaya kota vyowalinguganigwa.
PSA 31:24 Muwe mzidahe na mikangaze nhumbula, hemwe mweng'ha mlingitumbila kwa Mkulu Nguluwi.
PSA 32:1 (Ilanguso lya Daudi.) Nakatambichizwa munhu yalechelwe nongwa ya heye, munhu yawele gehile ga heye nagosigwa ng'hatu.
PSA 32:2 Nakatambichizwa munhu yawele Mkulu Nguluwi hambe yamuwazile nongwa, munhu yawele muhe wa heye wahela uhadi.
PSA 32:3 Mhela lombele ndilutilila kuleka kulonga gehile ga heni, nandali ng'hochele kwa kulila nemisi yeng'ha.
PSA 32:4 Nemisi na nechilo moko wa hegwe naunhunya, mong'ho wa heni nawali wusigwe, kota mazi mhela wa chipalangule.
PSA 32:5 Hamba nandonga gehile ga heni kwa hegwe, siuvisile wihe wa heni. Nandonga, “Ndangulonga wihe wa heni gwa Mkulu Nguluwi.” Aho ndo nagwe loumbusile gehile ga heni.
PSA 32:6 Ahyo, chila yalingukundigwa yakulande, mhela houwa baho, kukomya mazi makulu hogomema, hagomfichila heye.
PSA 32:7 Hegwe ndo honhu ha heni ha kivisa, kombika kutali na magazo, na kunzunguluta kwa nzimbo za ulohozi.
PSA 32:8 Nguluwi kangulonga, “Ndokulangusa na kukulajila nzila youlinguganigwa kuwinza. Ndokulonjela mbuli na kukulola ng'hatu.
PSA 32:9 Uleche kuwa mpoka kota falasi ama falasi-idogowi, jiwele janguganigwa jikowelwe lijamu na hatamu, ama hebu hawokuhejelela.”
PSA 32:10 Wanhu wehile wofichigwa na magazo menji, ila walingumtumbila Mkulu Nguluwi wanguzungulutwa na igano lya heye lya kwimilila.
PSA 32:11 Mtowe luchenze na kusangalala kwa chiwalo cha Mkulu Nguluwi hemwe watanganiche, mtowe luchenze lwa kusangalala hemwe mgoloche nhumbula!
PSA 33:1 Mtowe luchenze kwa chiwalo cha Mkulu Nguluwi hemwe watanganiche. Kumtogola Nguluwi kwanguwawala wanhu wawele na nhumbula zigoloche.
PSA 33:2 Mumtogole Mkulu Nguluwi kwa igombogombo, mumtogole kwa ching'weleng'wele cha ng'weso kumi.
PSA 33:3 Mmwimbile lwimbo lunyale, mtowe goya ching'weleng'wele na luchenze,
PSA 33:4 kwa vila ulonzi wa Mkulu Nguluwi ugoloka, na madito ga heye ndo ga kukundigwa.
PSA 33:5 Mkulu Nguluwi kangugana kutanganika na hachi, isi naimema igano lya kwimilila lya heye.
PSA 33:6 Kwa ulonzi wa Mkulu Nguluwi ulanga naulumbigwa, na vyeng'ha viwele mumo kwa lweselo lwa mlomo wa heye.
PSA 33:7 Nakakungajiza mazi ga bahali kota kuli ibuli, mazi menji nakagahindila kung'hano.
PSA 33:8 Isi yeng'ha imdumbe Mkulu Nguluwi. Wenyeng'haye weng'ha muisi, wamhulichize.
PSA 33:9 Kwa vila nakalonga na isi naiwa, nakalajiza nayo nayima nzinzili.
PSA 33:10 Mkulu Nguluwi kangutengulaga kunuwila kwa wanhu wa isi, kangutengulaga majesa ga hewo.
PSA 33:11 Choyogana kudita Mkulu Nguluwi changikala mazuwa gose, kunuwila kwa heye kwangikala kuli lulelo lweng'ha.
PSA 33:12 Nawatambichizwa wanhu wa isi wawele Nguluwi wa hewo ndo Mkulu Nguluwi, nawatambichizwa wanhu woyawahagule wawe wa heye yuye.
PSA 33:13 Mkulu Nguluwi kangulolaga hasi kulawa kilanga, na kuwona wanhu weng'ha.
PSA 33:14 Kulawa kuli chigoda cha heye cha undewa, kangulolaga weng'ha walingikala muisi.
PSA 33:15 Heye kangulumbaga nhumbula za wanhu weng'ha, heye kanguvizela chila chinhu chowalingudita.
PSA 33:16 Mndewa halinguloholigwa kwa chilundo chikulu cha wamizi, ne mwamizi muwanzi hawaga na kusumya kwa mong'ho wa heye ukulu.
PSA 33:17 Falasi wa ngondo hawele chinhu kwa kusumya, mong'ho wa heye winji hauweza hebu kumlohola munhu.
PSA 33:18 Mkulu Nguluwi kanguwalola wala walingumdumba, wanhu wawele wangitumbila igano lya heye lya kwimilila.
PSA 33:19 Heye kanguwaloholaga kulawa kuli kubagama, kanguwaditaga wawe wakomu mhela wa lufemba.
PSA 33:20 Nhumbula za hetwe zangitumbila kwa Mkulu Nguluwi. Heye ndo utanzi wa hetwe na ngawo ya hetwe.
PSA 33:21 Ena twangusangalala kwa chiwalo cha heye, twangitumbila kuli itagwa lya heye lyelile.
PSA 33:22 Igano lya hegwe lya kwimilila likale na hetwe, gwa Mkulu Nguluwi, kwa vila hetwe natukuwichila kitumbila kwa hetwe.
PSA 34:1 (Zabuli ya Daudi loyeditile kota kana lukwale hali Abimeleki, yawele nakamuwinga, naye nakoka.) Ndomtogola Mkulu Nguluwi mihela jeng'ha, sileka hebu kulonga lutogo lwa heye.
PSA 34:2 Heni ndowa na lutogo hali Mkulu Nguluwi, ng'hochele wahuliche na kusangalala.
PSA 34:3 Mumtogole Mkulu Nguluwi hamwe na heni, tweng'ha hamwe tulitogole itagwa lya heye.
PSA 34:4 Nandimlanda Mkulu Nguluwi naye nakanyidichila, nakambusa kulawa kuli kudumba kwa heni kweng'ha.
PSA 34:5 Wala walingumlola, wowichigwa lumuli, kumeho kwa hewo hakuwa na soni hebu.
PSA 34:6 Yalingubunzwa nakamlilila Mkulu Nguluwi, naye nakamhulika, na kumlohola kuli magazo ga heye geng'ha.
PSA 34:7 Mhilisi wa Mkulu Nguluwi kanguwamilaga banzi zeng'ha na kuwalohola, weng'ha walingumdumba.
PSA 34:8 Mjeze mone Mkulu Nguluwi vyoyawele yanojile. Nakatambichizwa munhu yalingubilimila kikala goya kwa heye.
PSA 34:9 Mumdumbe Mkulu Nguluwi hemwe welile wa heye, kwa vila walingumdumba hawokwisilwa chinhu.
PSA 34:10 Mbaka misimba jangwisilwa na kona nzala, ila walingumpala Mkulu Nguluwi, hawalingupunguchilwa na chinhu choneche chinojile.
PSA 34:11 Muye hemwe wasongolo mnyhulichize, nani ndowalangusa kumdumba Mkulu Nguluwi.
PSA 34:12 Whaani yalingunojezwa na ukomu, yalingugana mazuwa menji leka yagone ganojile?
PSA 34:13 Lelo, uleche kulonga gehile, na kiwika kutali na kulonga udesi.
PSA 34:14 Wiwiche kutali na wihe, udite ganojile, upale kikala goya na kibatilila.
PSA 34:15 Meho ga Mkulu Nguluwi ganguwalolaga watanganiche, na kuhulichiza kung'ung'uta kwa hewo,
PSA 34:16 ila Mkulu Nguluwi kanguwaga yochitwanza na walingudita wihe, leka yose kukumbuchila kwa hewo muisi.
PSA 34:17 Watanganiche howomlilila Mkulu Nguluwi, heye kanguwahulika, na kuwalohola kulawa kuli magazo ga hewo geng'ha.
PSA 34:18 Mkulu Nguluwi ka habehi na hewo watweguche nhumbula, kanguwalohola weng'ha wagozole ng'hatu.
PSA 34:19 Magazo ga yatanganiche ndo menji, ila Mkulu Nguluwi kangumlohola kulawa geng'ha.
PSA 34:20 Kangujamila mizeje ja heye jeng'ha, haduhu ne limwe lyobeneka.
PSA 34:21 Wihe wanguwegalilaga wehile kubagama, walinguwazudila watanganiche wotagusigwa kwa wihe.
PSA 34:22 Mkulu Nguluwi kanguloholaga ukomu wa vitumagwa wa heye, weng'ha walingumbilimila hawotagusigwa kwa wihe.
PSA 35:1 (Zabuli ya Daudi.) Gwa Mkulu Nguluwi, witwanze na walingitwanza na heni, uwatowe hewo walingunhowa.
PSA 35:2 Uhole ngawo ya hegwe, winuche uye unhanze.
PSA 35:3 Uwiche goya igoha na ipanga lya hegwe kwa chiwalo cha walingumbilimisa. Undonjele kota kondohola.
PSA 35:4 Wabasigwe soni na kudeula, hewo walingugana kung'hopola. Wahiluse kumbele kwa soni, hewo walingijesa kundumya.
PSA 35:5 Wawe kota mhumba hali mbeho, lowobilimiswa na mhilisi wa Mkulu Nguluwi.
PSA 35:6 Nzila ya hewo iwe ya jiza na kutelela, lowowinjigwa na mhilisi wa Mkulu Nguluwi.
PSA 35:7 Kwa vila ne chiwalo choneche nawambichila midiwa, wambawila ikulubila ne nongwa yoneche.
PSA 35:8 Kudumigwa kuwafiche hewo himahima, wagwilizwe kuli idiwa hewo wawo, wagwe mgati na kudumigwa.
PSA 35:9 Aho ndosangalala kwa chiwalo cha Mkulu Nguluwi, ndotowa luchenze kwa vila heye nakandohola.
PSA 35:10 Ndomlonjela Mkulu Nguluwi kwa nhumbula ya heni yeng'ha, “Gwa Mkulu Nguluwi, haduhu yawele kota hegwe. Hegwe kwanguwalohola ng'hochele kuli ndole za wawele na mong'ho, wazunwa na walihela chinhu mmoko mwa wabokaji.”
PSA 35:11 Walolezi wajuvi wangilajila, wangumbuza mbuli zohambe ndizizele.
PSA 35:12 Wangunyhilusila gehile honhu ha ganojile, mbaka heni ndanguwa kuli uchiwa.
PSA 35:13 Ila hewo nalowawele watamwa, heni navala migunila kulajila masinzo, nandingaza kwa kuleka kulya. Ndilanda kwa kinamiza mutwi,
PSA 35:14 kota ndangumlilila goloko wa heni ama mng'holozangu. Nanduta nandinamiza mutwi kwa masinzo, kota munhu yalingulombocheza kubagama kwa mayake.
PSA 35:15 Ila vyondikwang'hwale nawekungajiza na kusangalala. Nawekungajiza hamwe kwa chiwalo cha heni. Wanhu wohambe ndiwazele nawanhowa ne kuleka.
PSA 35:16 Wanhu wawele wanguwabezaga mbaka vyete, nawang'hanuchila kwa kuzudila.
PSA 35:17 Gwa Mkulu Nguluwi, kolola hela mbaka hanili? Undohole kulawa kuli kudumigwa na hewo, ulohole ukomu wa heni kulawa kuli misimba ajo.
PSA 35:18 Ndolonga malumbo hali nhing'hano ng'hulu ya wanhu, ndokutogola hali wanhu wenji.
PSA 35:19 Uleche kuwaleka wang'honyo awo wandonje vibi, hewo walingunzudila hela wasangalale kwa chiwalo cha magazo ga heni.
PSA 35:20 Hambe walonje kwa kikala goya, ila wangulonga ulonjelezi wa udesi, kwa kitwanza na wenyeng'haye wasindamale.
PSA 35:21 Wangundonjeleza kwa lizi, “Goya! Goya! Natona gouditile.”
PSA 35:22 Ila, gwa Mkulu Nguluwi, kwanguyona mbuli ayo, gwa Mkulu Nguluwi, uleche kunyamalila, uleche kuwa kutali na heni.
PSA 35:23 Winuche, gwa Mkulu Nguluwi unhowanile, unyamile gwa Nguluwi na Mkulu wa heni.
PSA 35:24 Gwa Mkulu Nguluwi, Nguluwi wa heni, unhowanile, udite kwa kiwhana na kutanganika kwa hegwe, uleche kuwaleka wang'honyo wa heni wandonje vibi.
PSA 35:25 Uleche kuwaleka wejese, “Mbuli za hetwe nazitulutila goya kota vyotuganile.” Ama walonje, “Natumdumya ayu.”
PSA 35:26 Waleche hewo walingusangalalila kudumigwa kwa heni, walemwele weng'ha na kudeula. Hewo weng'ha walingiwona wanojile kusinda heni, wadeule na kona soni.
PSA 35:27 Ila walingugana kona kota heni nda yatanganiche, wakwinize lizi kwa kusangalala walonje mazuwa gose, “Mkulu Nguluwi ndo mkulu ng'hatu. Kangunojezwa na kunoga kwa chitumagwa wa heye.”
PSA 35:28 Aho nani ndowikula kutanganika kwa hegwe, ndolonga lutogo lwa hegwe nemisi yeng'ha.
PSA 36:1 (Kwa yalingwaluchiza kwimba. Zabuli ya Daudi, chitumagwa wa Mkulu Nguluwi.) Gehile gangulongaga na munhu mwihe, mgati ng'hatu mwa nhumbula ya heye, mbuli ya kumdumba Nguluwi ya haduhu ng'hatu kwa heye.
PSA 36:2 Mwihe kangiganililaga yuye, mbaka kangulemwela kuvizela na kugazudila gehile ga heye.
PSA 36:3 Chila choyalingulonga ndo wihe na udesi, nakaleka kuwa na luhala na kudita ganojile.
PSA 36:4 Hoyowasa kangijesaga kudita wihe, kangiwikaga kuli nzila yohaiwele inojile, halingileka na wihe hebu.
PSA 36:5 Igano lya hegwe lya kwimilila, gwa Mkulu Nguluwi lyangwenela mbaka kilanga, kukundigwa kwa hegwe kwangufika mbaka kuli ng'hungugu.
PSA 36:6 Kutanganika kwa hegwe ndo kota vidunda vikulu, utaguso wa hegwe ndo kota mgati ng'hatu mwa bahali. Gwa Mkulu Nguluwi, kwanguwamila wanhu na migongolo.
PSA 36:7 Gwa Nguluwi, ndaze vyoliwele linojile igano lya hegwe lya kwimilila? Wanhu wangubilimilaga kuli lubehelo lwa mbawa za hegwe.
PSA 36:8 Kwanguwagutiza kwa lufufu lwa ng'handa ya hegwe, kwanguwanweza kulawa kuli lwanda lwa kunoga kwa hegwe.
PSA 36:9 Hegwe ndo mwaluko wa ukomu, kwa lumuli lwa hegwe, twangona lumuli.
PSA 36:10 Ulutilile kuwa na igano lya kwimilila kwa walingukuzela, ulutilile kuwa wa hachi kwa wagoloche nhumbula.
PSA 36:11 Uleche kukunda walingidaya wavabe heni, ne wanhu wehile wambilimise heni.
PSA 36:12 Hambi walingudita wihe nawagwa, nawagwiswa hasi hawoweza kwinuka.
PSA 37:1 (Zabuli ya Daudi.) Uleche kitunya kwa chiwalo cha wehile, uleche kuwonela fihi walingudita gehile.
PSA 37:2 Kwa vila hewo wokwajilila himahima kota misolo, woswinha kota mizuchila.
PSA 37:3 Witumbile kwa Mkulu Nguluwi na kudita ganojile, wikale kuli isi iwele na kikala goya.
PSA 37:4 Upale usangalalo wa hegwe kwa Mkulu Nguluwi, naye kokuditila kota vyoilingugana nhumbula ya hegwe.
PSA 37:5 Umhe Mkulu Nguluwi ukomu wa hegwe, witumbile kwa heye,
PSA 37:6 naye kokudita kunoga kwa hegwe kupuliche kota lumuli, na hachi ya hegwe yuye kota isanya lya nemisi.
PSA 37:7 Usindamale hali Mkulu Nguluwi, umbeteze kwa kwimilila, uleche kitunya kwa chiwalo cha wala wawele mbuli za hewo zanguwalutila goya, wala walingudita goya kuli mbuli za hewo za wihe.
PSA 37:8 Wiyuse na ng'halazi na uleche kuzudila, uleche kusanzalima kwa vila ako ndo kulutiliza wihe.
PSA 37:9 Wanhu walingudita wihe wodumigwa, ila walingitumbila kwa Mkulu Nguluwi woihalila isi iwele heye nakalagana kuwapa.
PSA 37:10 Ung'hali mhela uchefu, wehile wokwajilila, kowapala hala howawele, howona hebu.
PSA 37:11 Ila wawele liholile woihalila isi, wosangalalila winji wa kikala goya na ganojile.
PSA 37:12 Wehile wangiwikaga goya kudita gehile kwa yatanganiche, na kumjejedela mizino kwa kuzudila.
PSA 37:13 Ila Mkulu Nguluwi kanguwasekaga wehile, kwa vila kanguvizela kota kuduma kwa hewo kwa habehi.
PSA 37:14 Wehile wangusomolaga mipanga ja hewo na kukwega mipinde jawo, leka wawakopole wazunwa na walihela chinhu, wawadumule singo wanhu walingikala kwa kugoloka.
PSA 37:15 Ila mipanga jawo jokwinjila kwa hewo wawo, na mipinde jawo jobeneka.
PSA 37:16 Fola lufufu ludo lwa munhu yatanganiche, kusinda lufufu lwinji lwa wehile wenji.
PSA 37:17 Kwa vila mong'ho wa wehile wobenangwa, ila Mkulu Nguluwi kanguwatanza watanganiche.
PSA 37:18 Mkulu Nguluwi kangulolelaga ukomu wa wanhu walihela nongwa, na uhalizi wa hewo wochikala mazuwa gose.
PSA 37:19 Hawobasigwa soni hojifika mihela jihile, mazuwa ga lufemba wowa na chilyo chekwa.
PSA 37:20 Ila wehile wodumigwa, wang'honyo wa Mkulu Nguluwi woswinha kota uluwa wa kuchiwala, ena, wokwajilila kota iyosi.
PSA 37:21 Wehile wangwazika ne kuhilusa, ila yatanganiche kangulavyaga kwa isungu.
PSA 37:22 Walingutambichizwa na Mkulu Nguluwi woihalila isi, ila walingupanjilwa naye wodumigwa.
PSA 37:23 Mkulu Nguluwi kangulongozaga magulu ga munhu, kangumwamilaga yula yamganile heye.
PSA 37:24 Hoyochikwang'wala, hogwa na kupona hasi, kwa vila Mkulu Nguluwi komibata moko.
PSA 37:25 Nandali msongolo na sambi nda sekulu, ila nasimuwene yatanganiche nakalechigwa, ama wana wa heye wodedeza chilyo.
PSA 37:26 Mazuwa gose kanguwapaga wanji kwa kusangalala na kuwazika, na wana wa heye ndo utambichizo.
PSA 37:27 Wiyuse kuli wihe, udite ganojile, nagwe kochikala muisi mazuwa gose.
PSA 37:28 Kwa vila Mkulu Nguluwi kanguwagana wawele na hachi, hambe yawaleche wanhu wa heye wa kukundigwa. Kanguwamilaga mazuwa gose, ila walelwa wa wehile wodumigwa.
PSA 37:29 Watanganiche woihalila isi, wochikala amo mazuwa gose.
PSA 37:30 Munhu yatanganiche kangulongaga ulonzi wa luhala, kwa umyango wa heye kangulongaga gawele na hachi.
PSA 37:31 Kangibatililaga malajizo ga Nguluwi wa heye mnhumbula mwa heye, naye hambe yajilile kuli kudita mbuli za heye.
PSA 37:32 Wehile wangumpugajizaga munhu yanojile na kujeza kumkopola,
PSA 37:33 ila Mkulu Nguluwi homuwika hebu munhu yanojile kuli ndole za wehile, homleka yafichigwe na nongwa hoyotagusigwa.
PSA 37:34 Witumbile kwa Mkulu Nguluwi na kibata nzila za heye, naye kokwinula leka uihalile isi, na kuwona wehile wodumigwa.
PSA 37:35 Ndiwona wehile wang'ang'ale, wewichile mchanya mwa weng'ha kota mielezi ja Lebanoni.
PSA 37:36 Hamba nang'hola aho, nawo hawawele hala kahi, nandiwapala ila hawoneche kahi.
PSA 37:37 Umjese munhu yalihela nongwa, munhu yatanganiche, munhu yalingugana kikala goya kotambichizwa walelwa.
PSA 37:38 Wawele na nongwa weng'ha wodumigwa, na walelwa wa hewo wokwajilizwa.
PSA 37:39 Mkulu Nguluwi kanguwaloholaga watanganiche, na kuwamila mhela wa magazo.
PSA 37:40 Mkulu Nguluwi kanguwatanza na kuwalohola, kanguwaloholaga kulawa kwa wehile na kuwawika hali kikala goya, kwa vila wangubilimila kikala goya kwa heye.
PSA 38:1 (Zabuli ya Daudi. Kwa kukumbuchila.) Gwa Mkulu Nguluwi, uleche kung'hanuchila heni kwa ng'halazi ya hegwe, uleche kungaza kwa kuzudila kwa hegwe.
PSA 38:2 Misale ja hegwe najihoma lukuli lwa heni, moko wa hegwe naung'hundujiza hasi.
PSA 38:3 Kuduhuli honhu hawele hanojile mlukuli lwangu, kwa vila nakuzudila kwa chiwalo cha heni, haduhuli hawele na mong'ho mbaka kuli mizeje ja heni, kwa chiwalo cha gehile ga heni.
PSA 38:4 Nangubikwa ng'hatu na gehile ga heni, gangunhunya kota mhomholo ng'hulu.
PSA 38:5 Vilonda vya heni vyola na kunhung'ha, kwa chiwalo cha upoka wa heni.
PSA 38:6 Ndibina mbaka hasi na kuhondigwa, nemisi yeng'ha ndanguzunguluta ndilombocheza.
PSA 38:7 Lukuli lwa heni nalumema utamwa, mlukuli mwa heni mwa haduhu honhu hawele goya ne hado.
PSA 38:8 Nganda na kupondigwa pondigwa, ndangulila kwa kugazigwa mnhumbula.
PSA 38:9 Gwa Mkulu, hegwe kuvizela maya ga heni geng'ha, kwa hegwe hachivisile hebu chililo cha heni.
PSA 38:10 Nhumbula yangutama, mong'ho umalila heni, mbaka meho ga heni kahi hambe galole goya.
PSA 38:11 Goloko na wayangu wangiwika kutali na heni kona magazo ga heni, nhanzi ya heni yanguwa kutali na heni kahi.
PSA 38:12 Walingugana kung'hopola wanguwika goya midiwa ja hewo, walingugana ndumile, wanguwika goya udesi kundumya. Nemisi yeng'ha wangiwika goya kwa chiwalo cha heni.
PSA 38:13 Ila heni ndiwa kota yohambe yahuliche, hambe nyhuliche, ndiwa kota yohambe yalonje, hawezile kulonga chinhu.
PSA 38:14 Ena, ndiwa kota munhu yohambe yahuliche, kota munhu yohawele na choneche cha kilewela.
PSA 38:15 Ila ndangukubeteza, gwa Mkulu Nguluwi, hegwe konyhidichila, gwa Mkulu Nguluwi, Nguluwi wa heni.
PSA 38:16 Ndangukulanda hela wang'honyo waleche kundonga vibi, waleche kitogola kwa kugwa kwa heni.
PSA 38:17 Habehi ng'hatu ndogwa, ndina usungu wa mazuwa gose.
PSA 38:18 Ndangulonga kwa mlomo wa heni wihe wa heni, gehile ga heni gangungalila masinzo.
PSA 38:19 Wang'honyo wa heni wa goya, wenji lukami walingunzudila ne chiwalo.
PSA 38:20 Walinguhilusa wihe kwa ganojile ga heni, wangundonjeleza kwa vila ndangudita ganojile.
PSA 38:21 Uleche kunhoza, gwa Mkulu Nguluwi, uleche kuwa kutali na heni, Nguluwi wa heni.
PSA 38:22 Uye himahima kunhanza, gwa Mkulu Nguluwi, uwele ndo ulohozi wa heni.
PSA 39:1 (Kwa yalingwaluchiza kwimba. Kwimba kwa Yedutuni. Zabuli ya Daudi.) Nandonga, “Ndozilolela nzila za heni, ndeche kudita gehile kwa ulonzi wa heni. Ndodinya mlomo wa heni, wehile howowa habehi na heni.”
PSA 39:2 Nandali kota yohambe yalonje, ne kulonga chinhu, nandali ndinyamalile, ila siwele goya hebu. Magazo ga heni nagalutilila kuwa gang'ang'ale,
PSA 39:3 kugaya kwa heni nakundumiza mnhumbula. Vyombele ndijesa, ndo vyondutilile kugaya kwa chiluli, hamba ulonzi awu naulawa kwa heni,
PSA 39:4 “Gwa Mkulu Nguluwi, unzelese kuduma kwa heni, mazuwa ga heni ga kikala gapona galinga, ndivizele vyoulingukola himahima ukomu wa heni.
PSA 39:5 “Hambi kumbichila ukomu udo ng'hatu. Ukomu wa heni hauwele chinhu hali hegwe. Kukomya, chila munhu ndo kota lweselo hela.
PSA 39:6 Ndangukomya, chila munhu kangukola kota isisila, mijito ja heye jeng'ha ja hihi hela, kangukungajiza lufufu ne kuvizela whaani yohola.
PSA 39:7 “Ila, gwa Mkulu, ndangubeteza choni? Kitumbila kwa heni ndo kwa hegwe.
PSA 39:8 Undohole kulawa kuli nongwa za heni zeng'ha, uleche kukunda wapoka waseche heni.
PSA 39:9 Nda kota yohambe yalonje, hambe ndonje chinhu, kwa vila hegwe ndo unditile ahi.
PSA 39:10 Uleche kunzapa kahi, ndangumala kwa magazo ga hegwe.
PSA 39:11 Houmgaza munhu gehile ga heye kwa kumng'hanuchila, kwanguwifya ng'hano ya hewo kota lung'hwawa vyowalingulya mahamba. Kukomya, chila munhu ndo kota lweselo hela.
PSA 39:12 “Gwa Mkulu Nguluwi, uhulichize kulanda kwa heni, uhulichize chililo cha heni, uleche kuwa tulu hondilila. Kwa vila heni nda mjenzi hela yalingukola, nda mmajendo kota wasekulu wa heni weng'ha.
PSA 39:13 Uleche kundola leka sangalale hado, londing'hali bagama na kwajilila.”
PSA 40:1 (Kwa yalingwaluchiza kwimba. Zabuli ya Daudi.) Nandimbeteza Mkulu Nguluwi kwa kwimilila, nakanyuyila na kuhulika chililo cha heni.
PSA 40:2 Nakambusa kulawa kuli ikulubila likulu, nakandavya kuli ndidi za ilamba, nakemiza goya magulu ga heni mchanya mwa italawe, nakagapa mong'ho magulu ga heni.
PSA 40:3 Nakandangusa lwimbo lunyale, lwimbo lwa lutogo kwa Nguluwi wa hetwe. Wenji womlola na kumdumba Mkulu Nguluwi, na kitumbila kwa heye.
PSA 40:4 Nakatambichizwa munhu yalingitumbila kwa Mkulu Nguluwi, munhu yohambe yelumbe na wanhu walingidaya, wala walingujifugamila milungu ja udesi.
PSA 40:5 Gwa Mkulu Nguluwi, Nguluwi wa heni, nakutuditila kwa winji, vinduzanduza na majesa ga hegwe kwa hetwe. Haduhu yoweza kuwhanizwa na hegwe. Wone ndahaganile kugawikula na kugadamla, ndo menji lukami kugawaza.
PSA 40:6 Hegwe hulingunojezwa na nhambiko ne nhambiko za kulakazwa, ila nakumha heni makutu ndikuhuliche. Nhambiko za kulakazwa na nhambiko za kusa gehile hulinguzigana.
PSA 40:7 Aho nandonga, “Ulole nambuya, kuli chitabu nagandichigwa kuwala heni,
PSA 40:8 kota ndangusangalala kweneza goulingugana, gwa Nguluwi wa heni, ilajizo lya hegwe ndangulibatilila kwa nhumbula ya heni.”
PSA 40:9 Nasimila mbuli inojile ya kutanganika, hali nhing'hano ng'hulu ya wanhu. Kota vyouvizelele, gwa Mkulu Nguluwi, heni hambe ndilemeze kuiwikula.
PSA 40:10 Sivisile mnhumbula mwa heni kutanganika kwa hegwe, nandiwikula kota hegwe kwa mlohozi wa kukundigwa. Siivisile nhing'hano ng'hulu ya wanhu, igano lya hegwe lya kwimilila na kukundigwa kwa hegwe.
PSA 40:11 Gwa Mkulu Nguluwi, uleche kuleka kumha heni isungu lya hegwe. Igano lya hegwe lya kwimilila na kukundigwa kwa hegwe vinyamile mazuwa gose.
PSA 40:12 Kudumya kohambe kuwazigwe, kwangunzunguluta heni, gehile ga heni gangundinya mbaka ndangulemwela kona, ga menji kusinda mnvili kumutwi kwa heni, nani ngozola.
PSA 40:13 Gwa Mkulu Nguluwi, ugane kundohola, gwa Mkulu Nguluwi, uye himahima kunhanza.
PSA 40:14 Walingugana kundumya, wabasigwe soni na kudeula. Hewo walingugana ndumile, wahiluche kumbele na kubezigwa.
PSA 40:15 Hewo walinguseka heni, wabubuwale kwa kulemwela kwa hewo.
PSA 40:16 Ila wala weng'ha walingukupala hegwe, wasangalale na kutowa luchenze kwa chiwalo cha hegwe. Walinguugana ulohozi wa hegwe, walonje mazuwa gose, “Mkulu Nguluwi ndo Mkulu!”
PSA 40:17 Nani nda mzunwa na ndilihela chinhu, ila gwa Mkulu, hegwe kwangung'humbuka heni. Hegwe ndo mtanzi wa heni na mlohozi wa heni, gwa Mkulu Nguluwi, uye uleche kukawila.
PSA 41:1 (Kwa yalingwaluchiza kwimba. Zabuli ya Daudi.) Katambichizwa yalingijesa kwa chiwalo cha mzunwa, Mkulu Nguluwi komlohola zuwa lya magazo.
PSA 41:2 Mkulu Nguluwi komwamila na kumuwika yawe mkomu, mbuli za heye zolutilila goya kuli isi, Nguluwi homleka kuli ndole za wang'honyo wa heye.
PSA 41:3 Mkulu Nguluwi komtanza hoyowa mtamwa, komusila matamwa ga heye geng'ha.
PSA 41:4 Nani nandonga, “Gwa Mkulu Nguluwi, umbonele isungu, umhonye kwa vila nandikuditila gehile.”
PSA 41:5 Wang'honyo wa heni wangulongaga vibi kwa heni, “Kobagama hanili na itagwa lya heye lyajilile?”
PSA 41:6 Lowonjendela wangulongaga ulonzi wa hihi hela, wangukungajizaga gehile kwa chiwalo cha heni, lowofika kunze wanguwikulaga kwa wanji.
PSA 41:7 Weng'ha walingunzudila, hewo wangupwepwaga kwa chiwalo cha heni, wangunjesela mbuli zihile za kunditila wihe.
PSA 41:8 Wangulongaga, “Matamwa ago gomkopola, holawa kahi mchinhanda cha heye.”
PSA 41:9 Mbaka goloko wa heni ndimkundile, goloko yawele yehanzile na heni ibumunda, nakambelenhuka.
PSA 41:10 Gwa Mkulu Nguluwi, umbonele isungu, unyhinule kahi, nani ndowahilusila chibida.
PSA 41:11 Ahyo ndovizela kota kwangunojezwa na heni, kwa vila wang'honyo wa heni hawoweza kusumya heni.
PSA 41:12 Hegwe nakunyimiza kwa vila ndahela nongwa, kwangumbika kumwando kwa hegwe mazuwa gose.
PSA 41:13 Yatogoligwe Mkulu Nguluwi, Nguluwi wa Isilaeli, kulawa mazuwa gose, mbaka mazuwa gose. Ena! Ena!
PSA 42:1 (Kwa yalingwaluchiza kwimba. Ilanguso lya Wakola.) Kota ibala vyolilingugana mazi ga kazanda, ndo vyondilingukugana, gwa Nguluwi.
PSA 42:2 Ndina ng'halu ya Nguluwi, ng'halu ya Nguluwi yawele mkomu. Ndofika hanili kwa heye na kukona kumeho kwa heye?
PSA 42:3 Mahozi nagawa chilyo cha heni nemisi na nechilo, lowandonjele chila zuwa, “Kakohi Nguluwi wa hegwe?”
PSA 42:4 Ndangukumbuka kahi mbuli azi kwa masinzo mnhumbula ya heni, ndaze vyondutile na chilundo cha wanhu, nandiwalongoza kuluta haluga ha Nguluwi, wotowa luchenze lwa lutogo, hali chilundo cha wanhu wodita mnvina.
PSA 42:5 Lekachoni ndangutweguka nhumbula? Lekachoni ndangusumajila ahyo mgati mwa heni? Ndochitumbila kwa Nguluwi, kwa vila ndomtogola kahi heye yawele ulohozi wa heni na Nguluwi wa heni.
PSA 42:6 Nanzungulutwa na masinzo mnhumbula mwa heni, lelo ndangukukumbuchila hegwe, gwa Nguluwi, kulawa kuli honhu ha Yolodani, kulawa chidunda cha Helimoni na Misali.
PSA 42:7 Nafikwa na mazi tendema, mazi tendema ga hegwe ganguchema kubuguma, nhigu na magazo ga hegwe, vya mchanya mwa heni.
PSA 42:8 Mkulu Nguluwi kongana heni kwa igano lya heye lya kwimilila nemisi, nakamha heni lwimbo lwa lutogo nechilo, lwimbo lwa kumlanda Nguluwi wa ukomu wa heni.
PSA 42:9 Ndangumlonjela Nguluwi, italawe lya heni, “Lekachoni nakusemwa heni? Lekachoni ndute aku na ako ndilombocheza, kwa kubunzwa na wang'honyo wa heni?”
PSA 42:10 Mhondigwa kwa maligo ga hewo, vyowombuza chila zuwa, “Kakohi Nguluwi wa hegwe?”
PSA 42:11 Lekachoni ndangutweguka nhumbula? Lekachoni ndangusumajila ahyo mgati mwa heni? Ndochitumbila kwa Nguluwi, kwa vila ndomtogola kahi heye yawele ulohozi wa heni na Nguluwi wa heni.
PSA 43:1 (Lwimbo lwa 42 lwangulutilila.) Gwa Nguluwi, ulajile kota ndahela nongwa, uilewele mbuli ya heni kwa wanhu wa isi yihile, undohole kulawa kwa wanhu wadesi na wehile.
PSA 43:2 Ndangubilimila kikala goya kwa hegwe, gwa Nguluwi. Lekachoni kunhoza kutali? Lekachoni ndute aku na ako ndilombocheza, kwa kubunzwa na wang'honyo wa heni?
PSA 43:3 Uhiliche lumuli na kukomya kwa hegwe vindongoze, vifichize heni kuli chidunda cha hegwe chelile, haluga ha hegwe.
PSA 43:4 Hamba, Nguluwi wa heni, ndoluta hali honhu ha hegwe ha kulavila nhambiko, ndokuya kwa hegwe, gwa Nguluwi, usangalalo wa heni ukulu. Ndokutogola kwa igombogombo, gwa Nguluwi, Nguluwi wa heni.
PSA 43:5 Lekachoni ndangutweguka nhumbula? Lekachoni ndangusumajila ahyo mgati mwa heni? Ndochitumbila kwa Nguluwi, kwa vila ndomtogola kahi heye yawele ulohozi wa heni na Nguluwi wa heni.
PSA 44:1 (Kwa yalingwaluchiza kwimba. Ilanguso lya Wakola.) Gwa Nguluwi, hetwe natuhulika kwa makutu ga hetwe, wasekulu wa hetwe nawatusimila mbuli zouditile mihela ja hewo, ena, mbuli zouditile aho katali.
PSA 44:2 Kwa moko wa gwegwe baho nakuwawinga wanhu wa isi zinji, honhu ha hewo nakuwawika wasekulu wa hetwe, nakuwagaza wanhu wa isi zinji, nakuzidita mbuli za wasekulu wa hetwe zilutilile goya.
PSA 44:3 Wasekulu wa hetwe hawaiholile isi kwa mipanga ja hewo, ne kusumya kwa mong'ho wa hewo, ila nakuwadita wasumye kwa moko wa hegwe, kwa kuwalangazila kumeho kwa hegwe, kwa vila nakuwagana hewo.
PSA 44:4 Hegwe ndo mndewa wa heni na Nguluwi wa heni. Wamule walelwa wa Yakobo wasumye.
PSA 44:5 Kwa mong'ho wa hegwe twanguwasumya wang'honyo wa hetwe, kwa ludali lwa hegwe, twanguwabiga walingututowa.
PSA 44:6 Heni hambe nditumbile ipinde lya heni, ne ipanga lya heni haliweza kundohola.
PSA 44:7 Hegwe ndo uwele utulohole kwa wang'honyo wa hetwe, nakuwadita walingutuzudila wabasigwe soni.
PSA 44:8 Mazuwa gose tochidayila hegwe, gwa Nguluwi, tolitogola itagwa lya hegwe mazuwa gose.
PSA 44:9 Ila nakutuleka na kutubasa soni, hambe ulutase kahi na chilundo cha wamizi wa hetwe.
PSA 44:10 Nakutudita tuwabilime wang'honyo wa hetwe, nawo nawahola lufufu lwa hetwe.
PSA 44:11 Nakutudita kota ming'holo jilinguhilikwa kudumuligwa singo, nakutusambalula kuli isi zinji.
PSA 44:12 Nakuwaguza wanhu wa hegwe kwa sendi nyindo, ne kuwa na chinhu choneche cha mzidi kulawa kuli kuwaguza hewo.
PSA 44:13 Nakutudita tulonjelezwe na wotulingikalasa habehi, nawo wangutubeza na kutuseka.
PSA 44:14 Nakutudita tubezigwe na wanhu wa isi zinji, wangutigasa vitwi vya hewo kwa kutubeza.
PSA 44:15 Nemisi yeng'ha soni naingubika, kumeho kwa heni kumema soni,
PSA 44:16 kwa ulonzi na kubeza kwa walingundiga, kwa chiwalo cha wang'honyo wa heni na wahilula chibida.
PSA 44:17 Aga geng'ha nagatufika hetwe, hanga hatukusemwile, ne hatubenile ilagano lya hegwe.
PSA 44:18 Hatukubelenhuche, ne kuzileka nzila za hegwe.
PSA 44:19 Ila nakutuleka tuwele tutochile ng'hatu hali honhu ha mibwa ja kisolo jing'hang'hale, nakutuleka kuli jiza ng'hulu.
PSA 44:20 Wone twahakusemwile hegwe Nguluwi wa hetwe, na kumbilimila mlungu wa udesi,
PSA 44:21 gwa Nguluwi, wahavizelele mbuli ayo, kwa vila hegwe nakuuzela uviso wa mnhumbula.
PSA 44:22 Ila kwa chiwalo cha hegwe, twangukopoligwa chila zuwa, twanguditilwa kota ming'holo jilinguhilikwa kudumuligwa singo.
PSA 44:23 Gwa Mkulu, ulilimche. Lekachoni nakuwasa? Winuche. Dedede uleche kututoza mazuwa gose.
PSA 44:24 Lekachoni kwangivisa kutali na hetwe, na kusemwa magazo na kubunzwa kwa hetwe?
PSA 44:25 Natuduliswa mbaka kuli nhimbwisi, natunanahila kuli misanga.
PSA 44:26 Winuche, uye kututanza. Utugombole kwa chiwalo cha igano lya hegwe lya kwimilila.
PSA 45:1 (Kwa yalingwaluchiza kwimba. Kwimba kwa Yunjiyunji. Ilanguso lya Wakola. Lwimbo lwa mnvina ya kuhesa.) Nhumbula ya heni imema majesa ganojile. Ndangumlonjela mndewa misitali ja lwimbo lwangu, umyango wa heni ndo kota kalamu ya yalinguweza kwandika goya.
PSA 45:2 Kumeho kwa hegwe ndo kunoga kusinda wanhu weng'ha, ulonzi wa hegwe ndo isungu hela. Ahyo Nguluwi nakakutambichiza mazuwa gose.
PSA 45:3 Uwohe ipanga lya hegwe, hegwe ulingitowa ngondo uzidahe. Hegwe kuna ukulu na lutogo.
PSA 45:4 Kuli ukulu wa hegwe, ulutilile kumwando kwa kusumya, ukulewele kukomya na kunyenyetela na kwamila hachi. Moko wa hegwe wa kudilo udite mbuli ng'hulu.
PSA 45:5 Misale ja hegwe jihongoka lukami, jangukola kuli nhumbula za wang'honyo wa mndewa, wanhu wa isi wangugwa hasi ha hegwe.
PSA 45:6 Gwa Nguluwi, chigoda cha hegwe cha undewa ndo cha mazuwa gose. Kwangulongoza wanhu wa hegwe kwa hachi.
PSA 45:7 Nakugana gatanganiche na kuzudila wihe, kwa chiwalo acho, Nguluwi, Nguluwi wa hegwe, nakakuhagula kwa kukubakaliza mafuta ga usangalalo, kusinda wayago.
PSA 45:8 Mivalo ja hegwe jangunhunyhilila manemane na udi na mdalasini, lizi lya vinhu vya muziki vya ng'weso lyangukusangalaza, kuli ng'handa ng'hulu zinoligwe kwa mizino mikulu ja itembo,
PSA 45:9 Wahinza wa wandewa wa hali wadala wa hegwe walingutogoligwa, naye mche wa mndewa kema kudilo kwa hegwe, yavalile vinoligo vya zahabu inojile ya Ofili.
PSA 45:10 Uhulichize mhinza, wijese. Uwiche goya ikutu lya hegwe. Uleche kukumbuchila wanhu wa hegwe na ivyazi lya hegwe.
PSA 45:11 Kumeho kwa hegwe ndo kunoga, heye ka mkulu wa hegwe igana umhulichize.
PSA 45:12 Wanhu wa Tilo wokugalila ndolendole, wawele na lufufu wogana uganililo wa hegwe.
PSA 45:13 Ukulu weng'ha ndo kwa mhinza wa mndewa kuli chihengo cha heye. Ivalo lyake nalitawigwa kwa ng'weso za zahabu.
PSA 45:14 Yawele yavalile ivalo lya lanji nyinji, kangulongozwa kwa mndewa, wayage mhinza wangumuwinza, nawo wangugaligwa kwa hegwe.
PSA 45:15 Kwa usangalalo na luchenze wangufika ako, na kwinjila kuli ng'handa ng'hulu ya mndewa.
PSA 45:16 Gwa mndewa, kowa na wana wenji wawele wolongoza honhu ha wasekulu wa hegwe, kowadita walongoze kuli isi yeng'ha.
PSA 45:17 Ndolidita itagwa lyako likumbuchilwe kuli lulelo lweng'ha, isi zeng'ha zokutogola mazuwa gose.
PSA 46:1 (Kwa yalingwaluchiza kwimba. Lwimbo lwa Wakola. Kwa kiwhana na Alamoti.) Nguluwi ndo honhu ha hetwe ha kubilimila na mong'ho wa hetwe, heye ndo utanzi wa hetwe mazuwa gose mhela wa magazo.
PSA 46:2 Ahyo hatudumba choneche, hanga limachinyhina holilawila na vidunda kugwa mbahali,
PSA 46:3 hanga bahali yobuguma na kukabusa na vidunda hovikakama kwa kukabusa kwake.
PSA 46:4 Hana lwanda luwele mazi gake ganguusangalaza muji wa Nguluwi, honhu helile ha kikala Nguluwi Yawele Kuchanya.
PSA 46:5 Nguluwi ka kuli muji awo, nawo hauweza kutigaswa, Nguluwi koutanza lufuku.
PSA 46:6 Wanhu wa isi zeng'ha wangulila kwa kukabuswa, na ulongozi wangukakama, Nguluwi kangubuma na isi yangusungulumuka.
PSA 46:7 Mkulu Nguluwi Yawele na Mong'ho ka hamwe na hetwe, Nguluwi wa Yakobo ndo ngome ya hetwe.
PSA 46:8 Muye mlole madito ga Mkulu Nguluwi, mlole vinduzanduza vya kudumbiza vyoyaditile muisi.
PSA 46:9 Kangudumya ngondo muisi yeng'ha, kangubenanga mipinde na migoha, ngawo kanguzilakaza kwa chiluli.
PSA 46:10 Kangulonga, “Mnyamalile na kuvizela kota heni nda Nguluwi. Ndina ukulu kuli wanhu wa isi zeng'ha, ndikomya, ndina ukulu muisi.”
PSA 46:11 Mkulu Nguluwi Yawele na Mong'ho ka hamwe na hetwe, Nguluwi wa Yakobo ndo ngome ya hetwe.
PSA 47:1 (Kwa yalingwaluchiza kwimba. Zabuli ya Wakola.) Hemwe wanhu weng'ha mtowe vimbamba. Mumtogole Nguluwi kwa lizi lya kusangalala.
PSA 47:2 Kwa vila Mkulu Nguluwi, Nguluwi Yawele Kuchanya, kangukabusa. Heye ndo Mndewa mkulu kuli isi zeng'ha.
PSA 47:3 Nakatudita tuwasumye wanhu wa isi, nakawawika wanhu wa isi hanyi, hali magulu ga hetwe.
PSA 47:4 Nakatuhagulila isi ayi iwe uhalizi wa hetwe, iwele ndo lutogo lwa walelwa wa Yakobo yalingumgana.
PSA 47:5 Nguluwi nakenuka kuchanya hali walingutowa luchenze, Mkulu Nguluwi hali walingutowa mhalamanda.
PSA 47:6 Mumwimbile Nguluwi lutogo, mumwimbile. Mumwimbile lutogo mndewa wa hetwe, mumwimbile.
PSA 47:7 Mumwimbile Nguluwi lwimbo lwa lutogo, kwa vila heye ndo mndewa wa isi zeng'ha.
PSA 47:8 Nguluwi yalinguwalongoza wanhu wa isi zeng'ha, nakekala kuli chigoda cha heye cha undewa chelile.
PSA 47:9 Vilongozi wa wanhu wa isi wangikungajiza, wangilumba na wanhu wa Nguluwi wa Abulahamu, kwa vila ludali lweng'ha lwa muisi ndo lwa Nguluwi, heye kana ukulu ng'hatu.
PSA 48:1 (Kwa yalingwaluchiza kwimba. Lwimbo. Zabuli ya Wakola.) Mkulu Nguluwi, ndo mkulu, kanguganigwa yatogoligwe ng'hatu kuli muji wa heye, chiwele ndo chidunda cha heye chelile.
PSA 48:2 Chidunda cha Siyoni ako kasikazini ndo kota chidunda cha Safoni, changunojeza kwa ung'wemang'wema, muji wa Mndewa mkulu, ndo kusangalala kwa isi zeng'ha.
PSA 48:3 Nguluwi kangwamila ngome za muji awo, ena, heye ndo ngome.
PSA 48:4 Ulole, wandewa nawekungajiza, nawaluta hamwe kuutowa,
PSA 48:5 ila lowauwene muji wa Siyoni, nawabubuwala, nawebatigwa na lunhwinhwi, nawabilima.
PSA 48:6 Kudumba kukulu nakuwebata, nawali na usungu kota wa mdala yalinguponda.
PSA 48:7 Nakuwadumya kwa chivuluvumbi cha kolilawilaga isanya, nachiwabenanga kota meli za Talishishi.
PSA 48:8 Geng'ha gotuhuliche natugona twetwe baha, kuli muji wa Mkulu Nguluwi Yawele na Mong'ho, ena, kuli muji wa Nguluwi wa hetwe, Nguluwi kowimiza nzinzili mazuwa gose.
PSA 48:9 Gwa Nguluwi, twangijesa igano lya hegwe lya kwimilila, tuwele kuli ng'handa ya hegwe.
PSA 48:10 Itagwa lya hegwe, gwa Nguluwi lyangutogoligwa chila honhu, lutogo lwa hegwe lwangwenela honeche muisi. Kwa moko wa hegwe wa kudilo nakudita kwa hachi,
PSA 48:11 leka wanhu wa Siyoni wasangalale. Wanhu wa Yuda watowe luchenze, kwa chiwalo cha utaguso wa hegwe.
PSA 48:12 Mjende ako Siyoni muuzungulute muji weng'ha, kuno muwaza milingo jake.
PSA 48:13 Mlole ng'hanzi zake na kupugajiza ngome za hewo, leka msimile kuli lulelo lulinguya kota,
PSA 48:14 “Ayu Nguluwi ndo Nguluwi wa hetwe mazuwa gose. Kowa chilongozi wa hetwe mazuwa gose.”
PSA 49:1 (Kwa yalingwaluchiza kwimba. Zabuli ya Wakola.) Mhulichize mbuli ayi hemwe wanhu wa isi zeng'ha, muwiche goya makutu hemwe wenyeng'haye mweng'ha wa isi,
PSA 49:2 mhulichize mweng'ha wakulu na wadodo, wawele na lufufu na wazunwa hamwe.
PSA 49:3 Majesa ga heni gowa ga kitunya, ndolonga ulonzi uwele na luhala.
PSA 49:4 Ndowika goya ikutu lyangu leka nyhulichize nhelo, ndotang'hula nhelo kwa muziki wa igombogombo.
PSA 49:5 Lekachoni ndumbe zuwa lihile, hondizungulutwa na wihe wa mng'honyo?
PSA 49:6 Wanhu wehile wangitumbila lufufu lwao, wangitogola kwa winji wa lufufu lwao.
PSA 49:7 Ila munhu howeza kumgombola yunji, hambe yaweze kumhilusila Nguluwi chasi cha ukomu wa heye,
PSA 49:8 kwa vila chasi cha ukomu ndo chikulu ng'hatu. Howeza kulavya chinhu choneche chiwele chohega,
PSA 49:9 chiwele chomdita yekale mazuwa gose, yaleche kwinjila kuli chilaga.
PSA 49:10 Weng'ha wanguvizela kota mbaka wawele na luhala wangubagama, wasowile nyhala mbaka wapoka kahi wangubagama. Weng'ha awo wanguwalechelaga wanji lufufu lwao.
PSA 49:11 Vilaga vyopona kuwa haluga ha hewo mazuwa gose, ndo ng'handa ya lulelo mbaka lulelo, hanga nawali na migunda jiwele nawajichema kwa matagwa ga hewo.
PSA 49:12 Munhu halingikala ng'hatu kuli lufufu lwa heye, kobagama hela kota igongolo.
PSA 49:13 Ago ndo gowapata hewo wapoka, kahi walinguwawinza hewo wawele nawakunda ulonzi wa hewo.
PSA 49:14 Wolongozwa kota ming'holo mbaka kuli isi ya wabagame, kubagama kowa mdimi wa hewo. Watanganiche wowasumya hamitondo, ng'huli za hewo zokola kuli chilaga, kutali na ng'handa ng'hulu za hewo zinojile ng'hatu.
PSA 49:15 Ila Nguluwi kongombola na ako kuli isi ya wabagame. Kombika habehi na heye.
PSA 49:16 Uleche kusumajila houmona munhu yowa na lufufu, ne lutogo lwa ng'handa ya heye holukonjezeka ng'hatu.
PSA 49:17 Kwa vila hoyobagama hohola choneche, lufufu lwa heye haludulika ako hasi hamwe na heye.
PSA 49:18 Hoyochidita ndo mkulu kuli ukomu awu na kutogoligwa kwa chiwalo cha mbuli za heye kumlutila goya,
PSA 49:19 kochilumba na wasekulu wowamlongole kubagama, wawele hawoweza kona kahi lumuli.
PSA 49:20 Munhu yawele na lufufu ne luhala, ndo kota migongolo jilingubagama.
PSA 50:1 (Zabuli ya Asafu.) Nguluwi wa mong'ho, Mkulu Nguluwi, nakalonga na kuwachema walingikala muisi, kulawa kwa isanya mbaka kuzibila kwake.
PSA 50:2 Kulawa Siyoni, muji unojile lukami, Nguluwi nakelajila, yolangaza.
PSA 50:3 Nguluwi wa hetwe kanguya, haiwele tulu, chiluli chilingulakaza nhimwa changumlongola, chivuluvumbi chikulu changumzunguluta.
PSA 50:4 Kulawa kuchanya kanguvichema kilanga na isi, vilole vyoyalinguwatagusa wanhu wa heye.
PSA 50:5 Mng'hungajizile wanhu wa heni wa kukundigwa, wawele nawadita ilagano na heni kwa nhambiko.
PSA 50:6 Ulanga wanguwikula kutanganika kwa Nguluwi, kota Nguluwi yuye ndo mtagusa.
PSA 50:7 “Mhulichize wanhu wa heni, chondilingulonga. Isilaeli, ndangukulonjeleza. Heni nda Nguluwi. Heni nda Nguluwi wa hegwe.
PSA 50:8 Hambe ndikung'hanuchile kwa chiwalo cha nhambiko za hegwe, hulechile kundavila nhambiko za kulakazwa.
PSA 50:9 Kwa kukomya hambe ndiligane ibuguma lya ibani lya hegwe, ne ipongo kuli ibani lya hegwe,
PSA 50:10 kwa vila migongolo jeng'ha ja kisolo ndo ja heni, maelufu ga migongolo kuli vidunda ndo ja heni.
PSA 50:11 Ndanguchizela chila chideje cha kuli vidunda, vilumbigwe vyeng'ha vya kuli chiwala ndo vya heni.
PSA 50:12 “Wone ndahawele na nzala hanasali kukulonjela hebu, kwa vila isi zeng'ha na vyeng'ha viwele mgati ndo vya heni.
PSA 50:13 Ndaze, wangijesa ndangulya iwunde lya ibuguma, ama kunwa danda ya mhene?
PSA 50:14 Kulonga malumbo kuwe ndo nhambiko ya hegwe kwa Nguluwi, mwenezele Nguluwi Yawele Kuchanya chilaho cha hegwe.
PSA 50:15 Unyheme mhela wa magazo, nani ndokulohola, nagwe konyhulichiza.”
PSA 50:16 Ila Nguluwi kangumlonjela munhu mwihe, “Kuna choni kugalongalonga hela mizilo ja heni? Lekachoni kwangulongalonga kwa chiwalo cha ilagano lya heni?
PSA 50:17 Hegwe kwanguzudila makanyo ga heni, ulonzi wa heni hulingugana kuuwinza.
PSA 50:18 Loumona mhizi kwanguwa hamwe na heye, wang'hondwa kwangihanza nawo.
PSA 50:19 Kwa goya mazuwa gose kulonga gehile, mijito ja umyango wa hegwe ndo kulonga udesi.
PSA 50:20 Kwangikalisa na kumheha myago, ena kumlonjeleza mng'holozo.
PSA 50:21 Nakudita aga geng'ha nani nanyamalila. Ndaze, wangijesa kukomya heni nda kota hegwe? Ila sambi ndangukung'hanuchila, ndangulonga nongwa za hegwe hazelu.
PSA 50:22 “Mijese goya mbuli ayi, hemwe mlingumsemwa Nguluwi, ama ndowadumya hemwe, ne hakuwa na wa kuwalohola.
PSA 50:23 Yalingumha heni malumbo kota ndo nhambiko ya heye, ayo ndo yalingunyhulichiza, yoneche yalingibatilila nzila ya heni Nguluwi, ayo ndo yondimlohola.”
PSA 51:1 (Kwa yalingwaluchiza kwimba. Zabuli ya Daudi loyang'hanuchilwe na mloli Natani kwa nongwa ya heye kuwala Batisheba.) Gwa Nguluwi, mbonele isungu, kwa winji wa igano lya hegwe lya kwimilila. Kwa winji wa isungu lya hegwe, wuse gehile ga heni.
PSA 51:2 Uhovuje ng'hatu nongwa ya heni, welize gehile ga heni.
PSA 51:3 Kwa vila ndanguzizela nongwa za heni, na ndangugona hazelu gehile ga heni.
PSA 51:4 Nandikuditila gehile gwegwe uliyeka, nandita nongwa hali hegwe. Lelo, uzeleche kota kuna hachi houlonga, na haulingung'ung'utilwa kuli nhaguso za hegwe.
PSA 51:5 Ulole, ndina nongwa kulawa lomhondigwe, mbele na gehile kulawa mmunda wa mayangu.
PSA 51:6 Hegwe kwangugana kugoloka kwa mgati, ahyo undanguse luhala mnhumbula.
PSA 51:7 Welize gehile kwa heni kwa izuchila lya isopolo nani ndiwe yelile, undite ndiwe mzelu kusinda seluji.
PSA 51:8 Memeze kusangalala na luchenze, hanga nakumhonda, undite sangalale kahi.
PSA 51:9 Uhinduche, uleche kugalola gehile ga heni, wuse nongwa za heni zeng'ha.
PSA 51:10 Gwa Nguluwi, umhe heni nhumbula yelile, uwiche mgati mwa heni muhe unyale na uwele nzinzili.
PSA 51:11 Uleche kumbika kutali na hegwe, uleche kumbusila Muhe Welile wa hegwe.
PSA 51:12 Nyhilulile kahi kusangalala kwa kundohola, uwiche mgati mwa heni nhumbula ya kuhulichiza leka iwe lwega lwa heni.
PSA 51:13 Hamba ndowalangusa wehile nzila za hegwe, na wawele na gehile wohiluka kwa hegwe.
PSA 51:14 Gwa Nguluwi, Nguluwi ulingundohola, undohole kulawa kuli nongwa ya kukopola, nani ndokwimba kwa lizi kutanganika kwa hegwe.
PSA 51:15 Undite ndonje, gwa Mkulu, mlomo wa heni uwikule lutogo lwa hegwe.
PSA 51:16 Kwa vila hulingunojezwa na nhambiko, wone wahaganile, heni ndahakulavile. Hegwe hulingusangalazwa na nhambiko za kulakazwa.
PSA 51:17 Nhambiko ya heni kwa hegwe, gwa Nguluwi, ndo nhumbula ilingunyenyetela, hegwe, gwa Nguluwi, hambe uileme nhumbula ilingunyenyetela na ilinguhulichiza.
PSA 51:18 Gwa Nguluwi, ugane kuuditila ganojile muji wa Siyoni, uzenje kahi ng'hanzi za muji wa Yelusalemu.
PSA 51:19 Aho ndo konojezwa na nhambiko za kukomya, ndolendole za kulakazwa na za kulakazwa ne kugawilwa. Mibuguma jolavigwa nhambiko hali honhu ha hegwe ha kulavila nhambiko.
PSA 52:1 (Kwa yalingwaluchiza kwimba. Ilanguso lya Daudi mhela Doegi, Mwedomu loyamlutile Sauli na kumlonjela, “Daudi nakaluta kaye kwa Ahimeleki.”) Lekachoni kwangivuna kwa wihe wa hegwe, gwa mkulu? Igano lya kwimilila lya Nguluwi lyangikala mazuwa gose.
PSA 52:2 Gwa mhadi, chila mhela kwanguwika goya kudumya, umyango wa hegwe ndo kota nzembe.
PSA 52:3 Hegwe kwangugana wihe kusinda kunoga, kwangugana udesi kusinda kulonga kukomya.
PSA 52:4 Gwa mhadi mkulu, kwangugana mbuli za kuwadumya wanji.
PSA 52:5 Ahyo Nguluwi kokudumya mazuwa gose, kokunyasula na kukusa kaye kwa hegwe, kokung'umbula kuli isi ya wawele wakomu.
PSA 52:6 Watanganiche wogona ago na kudumba, hamba wokuseka na kulonga,
PSA 52:7 “Mlole gamfichile munhu ayu. Heye nahaganile Nguluwi yawe honhu ha heye ha kubilimila, ila nayali yochitumbila winji wa lufufu lwa heye, yochitumbila vinhu vyoyaholile kulawa kwa wanji.”
PSA 52:8 Ila heni ndo kota igodi idodi lya mzeituni, lilingudedemka kuli ng'handa ya Nguluwi. Ndangitumbila igano lya heye lya kwimilila mazuwa gose.
PSA 52:9 Gwa Nguluwi ndokulonjela malumbo mazuwa gose, kwa chiwalo cha mbuli zouditile. Ndowikula kota hegwe ndo unojile, hali wanhu wa kukundigwa.
PSA 53:1 (Kwa yalingwaluchiza kwimba. Kwa kiwhana na Mahalati. Ilanguso lya Daudi.) Wapoka wangilonjelaga mnhumbula, “Haduhuli Nguluwi.” Weng'ha nawajilila lukami, nawadita gehile ga kuzudiza, haduhuli ne yumwe yalingudita linojile.
PSA 53:2 Nguluwi kanguwalola wanhu kulawa kilanga, yalole kota hana yoneche yawele na luhala, kota hana yoneche yalingumuwinza Nguluwi.
PSA 53:3 Ila weng'ha nawabelenhuka, weng'ha nawajilila hamwe, haduhuli yaditile ganojile, haduhuli ne yumwe.
PSA 53:4 Ndaze, hewo walingudita wihe wahela nyhala? Wanguwadakula wanhu wa heni kota mhau, hambe wamlande Nguluwi.
PSA 53:5 Aho wowa na kukabusa kukulu, kukabusa kuwele hawanakona hamwande, kwa vila Nguluwi kojisambalula mizeje ja wang'honyo, hewo wobasigwa soni kwa vila Nguluwi nakawalema.
PSA 53:6 Twangugana ulohozi wa Isilaeli ufiche kulawa Siyoni. Nguluwi hoyowahilula goya wanhu wa heye, walelwa wa Yakobo wotowa luchenze, Waisilaeli wosangalala.
PSA 54:1 (Kwa yalingwaluchiza kwimba. Na vinhu vya ng'weso vya muziki. Ilanguso lya Daudi mhela munhu yumwe kulawa Sifu loyamlutile Sauli na kumzelesa kota Daudi nakevisa kwa hewo.) Undohole, gwa Nguluwi kwa itagwa lya hegwe, kwa mong'ho wa hegwe, ulajile kota ndahela nongwa.
PSA 54:2 Gwa Nguluwi, uhulichize kulanda kwa heni, uhulichize ulonzi wa mlomo wa heni.
PSA 54:3 Wajenzi wangunhowa, wanhu wawele na nhumbula zigagadale wanguuwinga ukomu wa heni, wanhu wohambe wamdumbe Nguluwi.
PSA 54:4 Ndivizela Nguluwi ndo utanzi wa heni, Mkulu ndo yalingunyimiza nzinzili.
PSA 54:5 Heye kowagaza wang'honyo wa heni kwa wihe wa hewo wawo, kwa kukundigwa kwa hegwe, gwa Nguluwi, uwadumye.
PSA 54:6 Ndokulavila nhambiko ya kunuwila, gwa Mkulu Nguluwi, ndolitogola itagwa lya hegwe kwa vila ndo linoga.
PSA 54:7 Kwa vila nakundohola kuli magazo ga heni geng'ha, nani ndiwona wang'honyo wa heni nawalemwela.
PSA 55:1 (Kwa yalingwaluchiza kwimba. Na vinhu vya ng'weso vya muziki. Ilanguso lya Daudi.) Gwa Nguluwi, uwiche goya ikutu lya hegwe uhulichize kulanda kwa heni, uleche kulola hafungo hondikulanda.
PSA 55:2 Uhulichize na kunyhidichila, majesa ga heni gangunhunya na ngozola,
PSA 55:3 kwa lizi lya wang'honyo wa heni, kwa kubunzwa na wehile, kwa vila wangingalila magazo, na kundiga kwa ng'halazi za hewo.
PSA 55:4 Nhumbula ya heni imema lunhwinhwi, kukabusa kwa kubagama nakunzunguluta.
PSA 55:5 Ndangukakama kwa lunhwinhwi lukulu, kukabusa kukulu nakwinjila kwa heni.
PSA 55:6 Wone ndahawele na mabawa kota ng'hunda, ndahaguluche kutali na kwesela,
PSA 55:7 ena, ndahajendile kutali ng'hatu, ndahawele na haluga kuchiwala.
PSA 55:8 Ndahabilimile kutali hawele na kikala goya, kutali na mbeho ng'hulu na chivuluvumbi.
PSA 55:9 Gwa Mkulu, udumye majesa ga wehile na kuwifya ndonga ya hewo, leka walemwele kulongosa, kwa vila ndangona nhumbula zihile na kilewa kuli muji.
PSA 55:10 Nemisi na nechilo wanguzunguluta kuli ng'hanzi zake, na kuumemeza magazo na wihe.
PSA 55:11 Kuwifya kwangwenela kweng'ha kuli muji, ung'honyo na udesi chila honhu.
PSA 55:12 Wone mng'honyo wa heni yahawele nakandiga, ndahawezile kwimilila ago, wone yalingitwanza na heni yahawele yambezile, ndahawezile kivisa kutali na heye.
PSA 55:13 Ila hambi ndo hegwe myangu, ndo hegwe goloko wa heni na ulinguzizela mbuli za heni zeng'ha!
PSA 55:14 Hetwe natuzowela kulongasa kwa kikala goya, natujenda hamwe kuli ng'handa ya Nguluwi, hali walingufugamila wanji.
PSA 55:15 Leka kubagama kuwafiche wang'honyo wa heni, waduliche kuli isi ya wabagame wawele wang'hali wakomu, kwa vila wihe naumema mnhumbula za hewo.
PSA 55:16 Ila heni ndangumlilila Nguluwi, naye Mkulu Nguluwi kondohola.
PSA 55:17 Mitondo na nemisi na matinazo, ndangung'ung'uta na kulila, naye kohulika lizi lya heni.
PSA 55:18 Kongombola kulawa kuli ngondo yombele nayo, hanga wang'honyo wa heni ndo wenji.
PSA 55:19 Nguluwi yalingulongoza kulawa mazuwa gose, konyhulika na kuwabasa soni wang'honyo wa heni, kwa vila hawalingugana kidita wawe wanojile, ne kumdumba Nguluwi.
PSA 55:20 Myangu nakawatowa goloko wa heye, nakabena kulagana kwa heye.
PSA 55:21 Ulonzi wa heye ndo udeche kusinda siagi, ila majesa ga heye ndo kudita ngondo. Ulonzi wa heye ndo udeche kota mafuta, ila wangutema kota ipanga likali.
PSA 55:22 Mlechele Mkulu Nguluwi itunyo lya hegwe, naye kokutanza, homleka hebu yatanganiche yalemwele.
PSA 55:23 Gwa Nguluwi, kowadulisa kuli ikulubila hasi ng'hatu, wanhu awo ndo walingukopola na wahadi, hewo hawofika hebu ne nusu ya ukomu wa hewo. Ila heni ndochitumbila kwa hegwe gwa Nguluwi.
PSA 56:1 (Kwa yalingwaluchiza kwimba. Kwa kiwhana na “Ng'hunda ya Kutali Isindamale.” Zabuli ya Daudi mhela loyebatigwe na Wafilisti kula Gati.) Gwa Nguluwi, mbonele isungu, kwa vila wanhu wangunhowa. Nemisi yeng'ha wanhu wangumbunza heni.
PSA 56:2 Nemisi yeng'ha wanhu wangitwanza na heni, wenji walingidaya wangunhowa.
PSA 56:3 Gwa Nguluwi, lunhwinhwi holukuya, ndochitumbila kwa hegwe.
PSA 56:4 Ndanguutogola ulonzi wa Nguluwi, ndangitumbila kwa Nguluwi hambe ndumbe. Wanhu wohambe wekale mazuwa gose kota Nguluwi, wondita choni?
PSA 56:5 Nemisi yeng'ha wangulonga udesi kwa heni, majesa ga hewo geng'ha ndo kumbunza heni.
PSA 56:6 Wangiting'hana kiwika goya na kumbinza chinyele, wangupugajiza geng'ha gondilingudita, wangugana kung'hopola.
PSA 56:7 Gwa Nguluwi, uwahilusile kwa winji wa wihe wa hewo, uwagwise wanhu wa isi azo kwa ng'halazi ya hegwe.
PSA 56:8 Hegwe kugazela magazo ga heni, kwanguwika kukumbuchila kwa mahozi ga heni geng'ha. Ndaze, geng'ha hagawele kuli chitabu cha hegwe?
PSA 56:9 Chila hondilanda utanzi kwa hegwe, wang'honyo wa heni wanguhiluswa kumbele. Ndanguvizela ndikomya Nguluwi ka ubanzi wa heni.
PSA 56:10 Ndangitumbila kwa Nguluwi na kuutogola ulonzi wa heye. Ndangitumbila kwa Mkulu Nguluwi na kuutogola ulonzi wa heye.
PSA 56:11 Ndangitumbila kwa Nguluwi hambe ndumbe. Munhu kondita choni?
PSA 56:12 Gwa Nguluwi, ndokweneza chilaho cha heni, ndokulavila nhambiko za kulonga malumbo.
PSA 56:13 Kwa vila nakundohola kulawa kuli kubagama, ena, nakunyamila leka ndeche kugwa, leka njende hali hegwe, gwa Nguluwi, kuli lumuli lwa ukomu.
PSA 57:1 (Kwa yalingwaluchiza kwimba. Kwa kiwhana na “Uleche kuwifya.” Zabuli ya Daudi loyasulupuche kwa Sauli na kivisa hali mhalika.) Umbonele isungu, gwa Nguluwi umbonele isungu, kwa vila kwa hegwe ndangubilimila kikala goya. Kuli lubehelo lwa mabawa ga hegwe ndobilimila kikala goya, mbaka aho chivuluvumbi cha kudumya hochikola.
PSA 57:2 Ndangumlilila Nguluwi Yawele Kuchanya, Nguluwi yalingweneza kunuwila kwa heye, kwa heni.
PSA 57:3 Kongalila utanzi kulawa kilanga na kundohola, kowabasa soni hewo walingunhowa. Nguluwi kondajila igano lya heye lya kwimilila na kukundigwa kwa heye.
PSA 57:4 Nanzungulutwa na wang'honyo, mbasa hali walingugana danda kota isimba, mizino ja hewo ndo kota migoha na misale, umyango wa hewo ndo kota ipanga likali.
PSA 57:5 Utogoligwe, gwa Nguluwi, kuchanya kilanga. Ukulu wa hegwe wenele muisi yeng'ha.
PSA 57:6 Wang'honyo nawambichila utandawala leka wangwilize, nani nang'ung'uta kwa masinzo. Nawabawa isimo kuli nzila ya heni, ila hewo wawo ndo nawagwa amo.
PSA 57:7 Nda nzinzili mnhumbula, gwa Nguluwi, nda nzinzili mnhumbula. Ndokwimba na kukutowela luchenze.
PSA 57:8 Ulilimche, gwa nhumbula ya heni. Vililimche avyo ching'weleng'wele na igombogombo. Ndolililimla isanya kuwe mitondo.
PSA 57:9 Gwa Mkulu, ndolonga malumbo kwa hegwe hali wanhu wa isi, ndokwimbila lutogo hali wanhu wa isi zeng'ha.
PSA 57:10 Igano lya hegwe lya kwimilila ndo likulu kilanga, kukundigwa kwa hegwe kwangwenela mbaka kuli ng'hungugu.
PSA 57:11 Utogoligwe, gwa Nguluwi, kuchanya kilanga. Ukulu wa hegwe wenele muisi yeng'ha.
PSA 58:1 (Kwa yalingwaluchiza kwimba. Kwa kiwhana na “Uleche kuwifya.” Zabuli ya Daudi.) Hemwe vilongozi, ndaze, hambi ndo kukomya mwangutagusa kwa hachi? Ndaze, mwanguwatagusa wanhu kwa kutanganika?
PSA 58:2 Hebu! Hemwe mwangijesa hela kudita wihe, hemwe mwemwe mwangweneza kubunza kuli isi.
PSA 58:3 Wehile nawajilila kulawa kupondigwa kwa hewo, wehile awo, nawadita wihe kulawa mmunda mwa wamai wa hewo, wangulonga udesi.
PSA 58:4 Wana dunga kota dunga ya izoka, wa wohambe wahuliche kota izoka lilingudinya makutu,
PSA 58:5 lyohambe lihuliche ne lizi lya wateleka mikwandi, ama lwimbo lwa mteleka mikwandi yazidahe ng'hatu kwa uhawi.
PSA 58:6 Gwa Nguluwi, ubene mizino ja hewo, ung'humbule, gwa Mkulu Nguluwi, mizino ja misimba ajo.
PSA 58:7 Wajilile kota mazi galigwajilila kuli sangalaza, howokwega mipinde ja hewo, misale ja hewo jigwe habehi.
PSA 58:8 Wajilile kota ikola vyolilingubagama kuli isanya, kota himila iwifigwe ne kona isanya.
PSA 58:9 Wang'hali hawavizelele, wang'humbuligwe himahima, kota miwa ama mikwangwasale ama misolo. Kwa ng'halazi ya Nguluwi, kwa mbeho wosigwe kutali, wawele wang'hali wakomu.
PSA 58:10 Watanganiche wosangalala howowona wehile wangugazigwa, wojenda kuli danda ya wanhu wehile.
PSA 58:11 Wanhu weng'ha wolonga, “Ena, watanganiche wopegwa chonolo. Kwa kukomya ka baho Nguluwi yalinguwatagusa wanhu wa isi.”
PSA 59:1 (Kwa yalingwaluchiza kwimba. Kwa kiwhana na “Uleche kuwifya.” Lwimbo lwa Daudi, mhela Sauli loyalajize wapugajizi haluga ha Daudi leka wamkopole.) Gwa Nguluwi wa heni, undohole na wang'honyo wa heni, unyamile na hewo walingunhowa.
PSA 59:2 Undohole na hewo walingudita wihe, umbiche kutali na hewo walingukopola.
PSA 59:3 Lole Mkulu Nguluwi, wangumhugajiza leka wang'hopole, wanhu wawele na nhumbula zigagadale wangwambuza magazo kwa heni, hanga sibelenhuche ne kudita gehile.
PSA 59:4 Siditile nongwa, ila nawewika goya kunhowa. Winuche, gwa Mkulu Nguluwi, uye unhanze.
PSA 59:5 Winuche, gwa Mkulu Nguluwi, Nguluwi yawele na Mong'ho, Nguluwi wa Isilaeli. Ulilimche, uwagaze hewo wanhu wa isi zeng'ha, uleche kuwonela isungu wala wabelenhuche.
PSA 59:6 Chila matinazo wang'honyo wanguhilukaga, wobwaka kota libwa, na kulubaluba kuli muji.
PSA 59:7 Lole, ndo maligo yeka galingulawa kuli milomo ja hewo, ulonzi wa hewo wangudumula kota ipanga likali, wangijesa haduhu yalinguwahulika.
PSA 59:8 Ila, gwa Mkulu Nguluwi kwanguwaseka, kwanguwabeza wanhu wa isi azo zeng'ha.
PSA 59:9 Ndokubeteza, hegwe uwele mong'ho wa heni, kwa vila hegwe, gwa Nguluwi, ndo ngome ya heni.
PSA 59:10 Nguluwi wa heni kokuya kwa heni na igano lya heye lya kwimilila, kondita ndiwone wang'honyo wa heni nawalemwela.
PSA 59:11 Uleche kuwakopola kamwe hela, leka wanhu wa heni waleche kukusemwa, ila uwasambalule kwa ludali lwa hegwe, uwadulise. Gwa Mkulu, hegwe ndo ngawo ya hetwe.
PSA 59:12 Hewo wanguditaga gehile kwa geng'ha gowalingulonga, ahyo wagwilizwe kuli kidaya kwa hewo. Kwa chiwalo cha kupanjilwa na udesi wa hewo,
PSA 59:13 uwalakaze kwa ng'halazi ya hegwe, uwalakaze leka waleche koneka kahi, leka wanhu weng'ha wavizele kota hegwe Nguluwi, kwangulongoza walelwa wa Yakobo, mbaka kuli kuduma kwa isi.
PSA 59:14 Chila matinazo wang'honyo wanguhilukaga wobwaka kota libwa, na kulubaluba kuli muji.
PSA 59:15 Wangukolaga kuno na kula wopala chilyo, na howowa hawegute wangubumaga.
PSA 59:16 Ila heni ndokwimba lutogo lwa mong'ho wa hegwe, ndotowa luchenze mitondo kwa chiwalo cha igano lya hegwe lya kwimilila, kwa vila hegwe nakuwa ngome ya heni, honhu ha heni ha kubilimila mhela wa magazo.
PSA 59:17 Hegwe uwele mong'ho wa heni, ndokwimbila lutogo, gwa Nguluwi, hegwe ndo ngome ya heni, Nguluwi ulingumha heni igano lya kwimilila.
PSA 60:1 (Kwa yalingwaluchiza kwimba. Kwa kiwhana na Shushani Eduti. Lwimbo lwa Daudi lwa kulangusa, mhela loyetowile na Waalamu kulawa Nahalaimu na Soba, hala Yoabu naloyahiluche kumbele na kuwakopola Waedomu elufu kumi na mbili kuli Ibindi lya Mwino.) Gwa Nguluwi, nakututoza na kutuhonda, nakuwika ng'halazi, dedede utuhilusile mong'ho.
PSA 60:2 Nakuidita isi ikakame na kuitula, uhadinye hala honhu hatuliche kwa vila nahawifigwa.
PSA 60:3 Nakuwadwika wanhu wa hegwe magazo, nakutunweza divai ilingutudita tuzebeduche.
PSA 60:4 Uwalajile ulajilo wala walingukudumba, waweze kuhepa msale.
PSA 60:5 Leka woulingugana waloholigwe, ulohole kwa moko wa hegwe wa kudilo, utwidichile.
PSA 60:6 Nguluwi nakalonga kulawa helile ha heye, “Lelo, hondisumya ndoigawanula Shekemu, ibindi lya Sukoti ndolipima chila honhu.
PSA 60:7 Gileadi ndo ya heni na Manase ndo ya heni, Efulaimu ndo kofia ya heni ya chuma, na Yuda ndo ng'hweku ya heni ya undewa.
PSA 60:8 Moabu ndo kota chisaye cha heni cha kihovujila, makwamba ga heni ndogatozela Edomu. Ndotowa iyowe lya kusumya kwa chiwalo cha Filistiya.”
PSA 60:9 Whaani yonyhilika kuli muji wa ngome? Whaani yondongoza mbaka Edomu?
PSA 60:10 Ndaze, nakutuleka ng'hatu gwa Nguluwi, nakuwaleka wamizi wa hetwe?
PSA 60:11 Utugalile utanzi kwa chiwalo cha walingutugaza, kwa vila ulohozi wa munhu hauwele chinhu.
PSA 60:12 Kwa utanzi wa Nguluwi tosumya, heye kowabiga walingutugaza.
PSA 61:1 (Kwa yalingwaluchiza kwimba. Na vinhu vya ng'weso vya muziki. Lwimbo lwa Daudi.) Gwa Nguluwi, uhuliche kulila kwa heni, uhulichize kulanda kwa heni.
PSA 61:2 Kulawa kuli kuduma kwa isi ndangukulilila, mbele nweguche nhumbula. Undongoze mbaka kuchanya kuwele na italawe ikulu, hali honhu ha kubilimila kikala goya,
PSA 61:3 kwa vila hegwe ndo honhu ha heni ha kubilimila, ngome ya heni iwele nzinzili, wang'honyo hawoweza kufika heni.
PSA 61:4 Ndangulanda ndikale kuli ihema lya hegwe mazuwa gose, leka ndiwe hali kikala goya hanyi ha mabawa ga hegwe.
PSA 61:5 Gwa Nguluwi, nakuhulika chilaho cha heni, nakumha heni uhalizi wa wala walingukudumba.
PSA 61:6 Wonjeze ukomu wa mndewa uwe wa mazuwa menji, miyaka ja heye jiwe ja lulelo lwinji.
PSA 61:7 Yalongoze mazuwa gose hali hegwe, gwa Nguluwi, igano lya kwimilila na kukundigwa kwa hegwe vimwamile.
PSA 61:8 Ahyo ndokwimbila nzimbo za kulitogola itagwa lya hegwe, ndikweneza chilaho cha heni chila zuwa.
PSA 62:1 (Kwa yalingwaluchiza kwimba. Kwa kiwhana na Yedutuni. Zabuli ya Daudi.) Ndangumbeteza Nguluwi yaliyeka kwa kusindamala, kwa heye wangulawa ulohozi wa heni.
PSA 62:2 Heye yaliyeka ndo italawe na ulohozi wa heni, heye ndo ngome ya heni, sitigasika ng'o.
PSA 62:3 Mbaka hanili monhowa? Mbaka hanili hemwe mweng'ha momhonda heni, heni mbele kota lukanzi lwiname, kota lugagala lulingwaluka kugwa?
PSA 62:4 Mwangugana kungwisa kulawa honhu hangu ha lutogo, usangalalo wa hemwe ndo kulonga udesi. Kwa ulonzi, mwangutambichiza, ila mnhumbula mwangupanjila.
PSA 62:5 Gwa nhumbula ya heni, usindamale kwa Nguluwi yaliyeka, kitumbila kwa heni kwangulawa kwa heye.
PSA 62:6 Heye yaliyeka ndo italawe na ulohozi wa heni, heye ndo ngome ya heni, sitigasika.
PSA 62:7 Ulohozi na ukulu wa heni vyangulawa kwa Nguluwi, italawe lya heni ikulu na honhu ha heni ha kubilimila ndo Nguluwi.
PSA 62:8 Hemwe wanhu, mitumbile kwa Nguluwi mazuwa gose, mumchumulile Mkulu gawele mnhumbula za hemwe. Nguluwi ndo honhu ha hetwe ha kubilimila.
PSA 62:9 Wanhu weng'ha ndo kota lweselo hela, weng'ha, wakulu na wadodo, hawawele chinhu. Kahi houwapima itunyo hambe wafiche kilo, weng'ha hamwe ndo wabewe kusinda lweselo.
PSA 62:10 Mleche kipalila sendi kwa kubunza, mleche kitogola kwa lufufu lwa uhizi, wone lufufu lokonjezeka, mleche kitumbila kuli lufufu alo.
PSA 62:11 Mbuli imwe Nguluwi nakalonga, mbuli mbili nandizihulika, kota mong'ho ndo wa Nguluwi,
PSA 62:12 ena, igano lya kwimilila ndo lya hegwe Mkulu. Kwangumpaga chila munhu kwa kiwhana na madito ga heye.
PSA 63:1 (Zabuli ya Daudi mhela loyawele kuli chiwala cha Yuda.) Gwa Nguluwi, hegwe ndo Nguluwi wa heni, nani ndangukupala kwa nhumbula, muhe wa heni wangukugana kota munhu yawele na ng'halu, ndina ng'halu kota isi ikalile, ilihela mazi.
PSA 63:2 Nandikona hegwe kuli honhu ha hegwe, ndiwone mong'ho wa hegwe na ukulu wa hegwe.
PSA 63:3 Igano lya hegwe lya kwimilila linoga kusinda ukomu, nani ndokutogola kwa mlomo wa heni.
PSA 63:4 Ndolonga malumbo kuli kikala kwa heni kweng'ha, ndokwinula moko ga heni na kukutogola.
PSA 63:5 Nhumbula ya heni yangugutizwa kota mnvina na vinonile, kwa mlomo wa heni ndokwimba lutogo lwa hegwe.
PSA 63:6 Londiwa mchinhanda ndokukumbuchila, nechilo yeng'ha ndochijesa kwa chiwalo cha hegwe,
PSA 63:7 kwa vila hegwe nakunhanza. Kuli lubehelo lwa mabawa ga hegwe, ndotowa luchenze.
PSA 63:8 Nda hamwe na hegwe, moko wa hegwe wa kudilo wangunhanza.
PSA 63:9 Wala walinguupala ukomu wa heni, wowifigwa, wokwinjila hanyi kuwele walingikala wabagame.
PSA 63:10 Wokopoligwa kwa ipanga, wowa chilyo cha mikanhu.
PSA 63:11 Ila mndewa kosangalala kwa chiwalo cha Nguluwi, walingilaha kwa itagwa lya Nguluwi wotowa iyowe lya kusumya, ila milomo ja wadesi jodinyigwa.
PSA 64:1 (Kwa yalingwaluchiza kwimba. Zabuli ya Daudi.) Gwa Nguluwi, uhuliche kung'ung'uta kwa heni, wamile ukomu wa heni na kukabusa kwa wang'honyo.
PSA 64:2 Unyamile na majesa gehile ga wehile, na ivuche lya wanhu wehile.
PSA 64:3 Wangunola umyango wa hewo kota ipanga, wangulavya ulonzi wihile kota misale.
PSA 64:4 Kulawa kuli kivisa wangumtowa munhu yagoloche, baho du wangumtowa ne kudumba.
PSA 64:5 Wangilumba kuli kunuwila kwa hewo kwihile, wangikundiza honhu ha kuvisa midiwa ja hewo, wangulonga, “Kuduhu yoweza kujona.”
PSA 64:6 Wangijesaga kunuwila kwa hewo kwihile na kulonga, “Sambi natweneza gotuganile kudita ne kulemwela.” Kunuwila kwihile kwa uviso nakuvisigwa mnhumbula mwa munhu.
PSA 64:7 Ila Nguluwi kowatowa kwa misale, na kuwalumiza baho du.
PSA 64:8 Wodumigwa kwa chiwalo cha ulonzi wa hewo wawo, chila hoyowona kotigasa mutwi kwa kubeza.
PSA 64:9 Aho wanhu weng'ha wodumba, wowikula goyaditile Nguluwi, na kijesa kwa chiwalo cha madito ga heye.
PSA 64:10 Watanganiche wosangalala kwa chiwalo cha Mkulu Nguluwi, na kubilimila kikala goya kwa heye, wanhu weng'ha wagoloche womtogola.
PSA 65:1 (Kwa yalingwaluchiza kwimba. Zabuli ya Daudi.) Kwanguganigwa kutogoligwa, gwa Nguluwi, ako Siyoni, wanhu wokwenezela hegwe kulagana kwa hewo,
PSA 65:2 kwa vila hegwe kwanguhulika kulanda kwa hetwe. Wanhu weng'ha wokuyila.
PSA 65:3 Vyotuwele tugubikwe ng'hatu na gehile, gwegwe baho nakugubika nongwa za hetwe.
PSA 65:4 Wotambichizwa wala ulinguwahagula na kigaligwa habehi, wekale haluga ha hegwe. Tugutizwe ganojile ga ng'handa ya hegwe, ganojile ga ng'handa ya hegwe yelile.
PSA 65:5 Kwangutwidichila kwa hachi na kudita madito makulu, gwa Nguluwi wa ulohozi wa hetwe, hegwe ndo kitumbila kwa wanhu weng'ha, muisi yeng'ha na kutali mbahali.
PSA 65:6 Kwa mong'ho wa hegwe nakuvimiza vidunda honhu hake. Hegwe kuna mong'ho lukami,
PSA 65:7 ulinguvidita bahali na nhigu visindamale, kahi ivuche lya wanhu lisindamale.
PSA 65:8 Weng'ha walingikala kutali wangububuwazwa kwa madito ga hegwe. Kwangwambuza usangalalo chila honhu, kulawa kolilawilaga isanya mbaka kolizinjilaga isanya.
PSA 65:9 Hegwe kwanguilolela isi kwa kuitowela nhonya, kwanguitambichiza mboto na kujidita mizuchila jidedemche. Lwanda lwa hegwe Nguluwi nalumema mazi heko, kwanguidita isi iwe na vilyo vinji. Ahi ndo vyoulinguigongomanya isi.
PSA 65:10 Migunda kwangujitowela nhonya nyinji, na kujidodeza kwa mazi, isi kwanguidita idode kwa upesi, na kujitambichiza mizuchila jizuche.
PSA 65:11 Kwanguutambichiza mwaka weng'ha kwa ganojile ga hegwe, chila houkolile nahamema ganojile.
PSA 65:12 Kisolo nakumema migongolo, vidunda navyo navigubikwa usangalalo.
PSA 65:13 Honhu ha kudimila migongolo nakugubikwa ming'holo, mibindi najigubikwa na ngano. Chila chinhu changutowa luchenze na kwimba.
PSA 66:1 (Kwa yalingwaluchiza kwimba. Lwimbo. Zabuli.) Hemwe wanhu weng'ha muisi mumtowele luchenze Nguluwi!
PSA 66:2 Mwimbe kwa chiwalo cha lutogo lwa itagwa lya heye, mumlavile lutogo lukulu.
PSA 66:3 Mumlonjele Nguluwi, “Madito ga hegwe ndo ga kububuwaza lukami. Ludali lwa hegwe ndo lukulu ng'hatu mbaka wang'honyo wa hegwe wangisuwata kwa kudumba.
PSA 66:4 Isi yeng'ha yangukufugamila, wanhu weng'ha wangukwimbila lutogo, wangulimbila lutogo itagwa lya hegwe.”
PSA 66:5 Muye, mlole mbuli zoyaditile Nguluwi, nakadita mbuli za kudumbiza hali wanhu.
PSA 66:6 Nakaidita bahali naiwa isi ikalile, wanhu nawakola amo kwa magulu. Muye, natwe totowa luchenze kwa chiwalo cha heye.
PSA 66:7 Kangulongoza mazuwa gose kwa mong'ho wa heye, meho ga heye ganguwalola wanhu wa isi zeng'ha, leka yoneche yalingumbelenhuka yaleche kujeza kiyinula hali heye.
PSA 66:8 Mumtogole Nguluwi wa hetwe, hemwe wanhu wa isi zeng'ha, muwikule lutogo lwa heye leka luhulikwe.
PSA 66:9 Heye nakalutiliza ukomu wa hetwe, hatulechile tugwe.
PSA 66:10 Nakutupima, gwa Nguluwi, nakutweliza kota sendi vyoilingwelizwa mchiluli.
PSA 66:11 Nakutuleka tugwilizwe muutandawala, kutupapiza magazo ga kutunya.
PSA 66:12 Nakuwaleka wanhu watubije, natukolela mchiluli na mmazi. Ila sambi nakutigala kuli honhu ha kwesela.
PSA 66:13 Ndokuya kuli ng'handa ya hegwe na nhambiko za kulakazwa, ndokweneza chilaho cha heni,
PSA 66:14 chondonjile na kulagana vyombele kuli magazo.
PSA 66:15 Ndokulavila nhambiko za kulakazwa zinonile, hamwe na iyosi lya nhambiko za ming'holo milume, ndolavya nhambiko za ibuguma na mhene.
PSA 66:16 Hemwe mlingumdumba Nguluwi, muye mweng'ha mhulichize, nani ndowasimila goyanditile.
PSA 66:17 Nandimlilila kwa mlomo wa heni, lutogo lwa heye nalwali kuli umyango wa heni.
PSA 66:18 Wone ndahalolile gehile mnhumbula, Nguluwi yahawezile kunyhulichiza,
PSA 66:19 ila ndangukomya Nguluwi nakanyhulichiza, ena, nakahulichiza kulanda kwa heni.
PSA 66:20 Yatogoligwe Nguluwi, kwa vila halemile kulanda kwa heni, ne kusa igano lya heye lya kwimilila kwa heni.
PSA 67:1 (Kwa yalingwaluchiza kwimba. Kwa vinhu vya ng'weso vya muziki. Zabuli. Lwimbo.) Utonele isungu, gwa Nguluwi, ututambichize, utulajile kumeho kwa hegwe kwa kunoga,
PSA 67:2 leka isi yeng'ha ivizele nzila ya hegwe, wanhu wa isi zeng'ha wavizele ludali lwa hegwe lwa kulohola.
PSA 67:3 Wanhu weng'ha wakupe ukulu, gwa Nguluwi, wanhu weng'ha wakutogole.
PSA 67:4 Wanhu wa isi zeng'ha wasangalale na kwimba kwa usangalalo, kwa vila kwanguwatagusa wanhu kwa hachi, na kuwalongoza wanhu wa isi zeng'ha muisi.
PSA 67:5 Wanhu weng'ha wakupe ukulu, gwa Nguluwi, wanhu weng'ha wakutogole.
PSA 67:6 Isi nailavya mbena zake, Nguluwi, Nguluwi wa hetwe, nakatutambichiza.
PSA 67:7 Nguluwi yalutilile kututambichiza. Wanhu weng'ha muisi wamdumbe.
PSA 68:1 (Kwa yalingwaluchiza kwimba. Zabuli ya Daudi. Lwimbo.) Nguluwi kangwinuka na wang'honyo wa heye wangusambaluka, walingumzudila wangubilima kutali na heye.
PSA 68:2 Kota iyosi vyolilinguwembeluswa na mbeho, ndo vyoyalinguwawembelusa, kota ihota vyolilingusungulumuka vyoliwa habehi na chiluli, ndo wehile vyowalinguduma hali Nguluwi.
PSA 68:3 Ila watanganiche wangusangalala hali Nguluwi, wanguvinanga na kwimba kwa usangalalo.
PSA 68:4 Mumwimbile Nguluwi, mlitogole itagwa lya heye, mumgongomanyile nzila ya heye yalingwendesa ng'hungugu. Itagwa lya heye ndo Mkulu Nguluwi, msangalale hali heye.
PSA 68:5 Nguluwi yalingikala honhu ha heye helile, ndo mhaza wa walekwa na mwamizi wa wafililwe na walume wa hewo.
PSA 68:6 Nguluwi kanguwahilula waliyeka leka wawe na ivyazi lya hewo, kanguwadoholela wanweng'hwa na kuwaleka welejehe, ila walingubelenhuka kanguwahilika kuli kugunuche.
PSA 68:7 Gwa Nguluwi, louwalongole wanhu wa hegwe, vyouwele kuli majendo kula kuchiwala,
PSA 68:8 isi naikakama, ulanga naulagaza nhonya ng'hulu, kwa hegwe kuwa baho, Nguluwi wa Sinai, ena, kwa hegwe kuwa baho, Nguluwi wa Isilaeli.
PSA 68:9 Gwa Nguluwi, nakuitowela isi nhonya nyinji, nakuisangalaza isi ya hegwe iwele itochile.
PSA 68:10 Wanhu wa hegwe nawapata amo honhu ha kikala, gwa Nguluwi, nakuwapa chilyo wazunwa kwa kunoga kwa hegwe.
PSA 68:11 Mkulu nakalavya mzilo, wadala wenji nawawikula mbuli.
PSA 68:12 “Wandewa na wamizi wa hewo wangudwina vibi.” Wadala weng'ha wa haluga nawegawila vinhu vilawile kuli ngondo,
PSA 68:13 hanga hewo nawapona kuli kambi, nawabochela jimalukolo ja ng'hunda za sendi, na mabawa gawo gangupulika kwa zahabu.
PSA 68:14 Nguluwi Yawele na Ludali vyoyawasambalule wandewa ako, kota seluji ilingugwa mchanya mwa chidunda cha Salimoni.
PSA 68:15 Chidunda cha Bashani ndo chidunda cha chikulu, chidunda cha Bashani china vinhembenhembe vihongoche,
PSA 68:16 lekachoni kwanguchonela fihi, chidunda choyachihagule Nguluwi yekalise mchanya mwake? Mkulu Nguluwi kochikala ako mazuwa gose.
PSA 68:17 Mituka ja Nguluwi ndo makumi elufu, na maelufu ga maelufu, Mkulu nakoya honhu ha heye helile kulawa Sinai.
PSA 68:18 Nakukwina kuchanya, nakuhola wapogozi wa ngondo, nakubochela ndolendole kulawa kwa wanhu, mbaka kulawa kwa wanhu wabelenhuche, Mkulu Nguluwi leka yekale ako.
PSA 68:19 Mkulu Nguluwi yatogoligwe mazuwa gose. Hegwe kangutupapilaga mhomolo za hetwe, heye ndo Nguluwi wa ulohozi wa hetwe.
PSA 68:20 Nguluwi wa hetwe ndo Nguluwi yawele kangutuloholaga, Mkulu Nguluwi yaliyeka ndo yalingulohola kulawa kuli kubagama.
PSA 68:21 Nguluwi kovihondanga vitwi vya wang'honyo wa heye, ena, vitwi vya wala walingibatilila nzila ihile.
PSA 68:22 Mkulu nakalonga, “Ndowahilula wang'honyo kulawa Bashani, ndowahilula kulawa mgati mwa bahali,
PSA 68:23 ubije kuli danda ya wang'honyo wa hewo, najo mibwa ja hegwe jimyanje danda za hewo.”
PSA 68:24 Gwa Nguluwi, majendo ga hegwe ga kusumya goneche, majendo ga Nguluwi wa heni na mndewa, mbaka honhu ha heye helile.
PSA 68:25 Kumwando walingwimba, kumbele walingutowa vinhu vya muziki, hagati wahinza walingutowa ngoma ndodo.
PSA 68:26 Mumtogole Nguluwi kuli vilundo vikulu vya wanhu. “Mumtogole Mkulu Nguluwi, hemwe walelwa wa Waisilaeli.”
PSA 68:27 Mwaluko ndo Benjamini, mdodo wa weng'ha, hamba vilongozi wa Yuda na chilundo cha hewo, hamba wakulu wa Sebuluni na Nafutali.
PSA 68:28 Gwa Nguluwi, ulajile ludali lwa hegwe, undewa wa hegwe wouutumiye kwa chiwalo cha hetwe,
PSA 68:29 kulawa kuli ng'handa ya hegwe, Yelusalemu, kuwele wandewa wokuyila na ndolendole za hewo.
PSA 68:30 Uling'hanuchile lila igongolo lilingikala milamba, Misili, chilundo cha mibuguma na myana jawo, mbaka wanhu wa isi azo wakupe lutogo na kodi. Uwasambalule awo wanhu walingugana ngondo.
PSA 68:31 Vinhu vya shaba vyokuya kulawa Misili, Wakushi wokugalila Nguluwi lufufu lwa hewo.
PSA 68:32 Hemwe wandewa wa isi, mumwimbile Nguluwi, mumwimbile Mkulu nzimbo za lutogo,
PSA 68:33 mumwimbile heye yalingwendesa kuli ulanga, ulanga wa katali uwele kuchanya, mumhulichize yobuma kota limlungu.
PSA 68:34 Muwikule kuwala ludali lukulu lwa Nguluwi, heye kangulongoza mchanya mwa Isilaeli, ludali lwa heye lwangoneka kuli ulanga.
PSA 68:35 Gwa Nguluwi, hegwe ndo wa kukabusa kuli honhu ha hegwe helile. Ena, heye ndo Nguluwi wa Isilaeli. Kanguwapaga wanhu wa heye ludali na mong'ho. Yatogoligwe Nguluwi.
PSA 69:1 (Kwa yalingwaluchiza kwimba. Kwimba kwa Yunjiyunji. Lwimbo lwa Daudi.) Gwa Nguluwi, undohole, mazi gafika msingo.
PSA 69:2 Ndanguzulubila mgati mwa ndidimila, haduhu ne honhu ha kuwika magulu. Nyinjila mgati ng'hatu mwa mazi, ndanguholigwa na nhigu.
PSA 69:3 Nhoka kutowa iyowe, na ikolomelo lya heni likala. Meho ga heni gabilabila, kuno ndikubeteza hegwe Nguluwi wa heni.
PSA 69:4 Wanhu wenji kusinda mnvili za heni ndo walingunzudila hela. Wang'honyo walingugana kung'hopola ndo wenji, awo walingunhowa kwa mbuli za udesi. Ndaze, nyhilule chinhu chosihizile?
PSA 69:5 Gwa Nguluwi, kwanguuzela upoka wa heni, nongwa za heni hambe zivisigwe kwa hegwe.
PSA 69:6 Walingitumbila kwa hegwe waleche kubasigwa soni kwa chiwalo cha heni, gwa Mkulu Nguluwi Yawele na Mong'ho, walingukupala waleche kudeula kwa chiwalo cha heni, gwa Nguluwi wa Isilaeli.
PSA 69:7 Kwa chiwalo cha hegwe mbasigwa soni lukami, soni igubika kumeho kwa heni.
PSA 69:8 Ndiwa mjenzi hali wang'holozangu, kalumbu na lumbu zangu hambe wanzele.
PSA 69:9 Maya ga ng'handa ya hegwe gamema kwa heni, mbuli zeng'ha zihile zowalingukuditila hegwe zangufika heni.
PSA 69:10 Vyombele ndinyenyetela kwa kwesela kulya, wanhu nawang'ung'utila heni.
PSA 69:11 Vyovalile ivalo lya igunila kulombocheza, hewo nawambeza.
PSA 69:12 Wanhu wanguheha heni mnzila, wagalile ujimbi wangijesa nzimbo za kumbeza heni.
PSA 69:13 Ila heni ndangukulanda hegwe, gwa Mkulu Nguluwi, ung'hundile chondilanda mhela wougana. Gwa Nguluwi, kwa winji wa igano lya hegwe lya kwimilila unyidichile, unyidichile kwa ulohozi wa kukundigwa.
PSA 69:14 Undohole kulawa kuli ndidimila, uleche kundeka nzibile, undohole na awo walingunzudila, umbiche kutali kulawa mgati ng'hatu mwa mazi.
PSA 69:15 Uleche kundeka fichigwe na mazi tendema, ama nzibile mgati ng'hatu mwa mazi, ama fichigwe na chilaga.
PSA 69:16 Gwa Mkulu Nguluwi, unyidichile, kwa kunoga kwa igano lya hegwe lya kwimilila, umbuyile kwa winji wa isungu lya hegwe.
PSA 69:17 Uleche kumvisa heni, chitumagwa wa hegwe, unyidichile himahima, kwa vila ndangutunyigwa.
PSA 69:18 Umbuyile habehi na kungombola, undohole na wang'honyo wa heni wenji.
PSA 69:19 Hegwe kwanguvizela vyondilingulijigwa, kwanguvizela soni na kubezigwa vyovilingufika heni, kwa vila wang'honyo wa heni weng'ha hegwe kwanguwazela.
PSA 69:20 Kubezigwa nakutwegula nhumbula ya heni, nani ngozola ng'hatu. Nandimpala munhu wa kundajila isungu, ila nakwali haduhu, nandimpala wa kunyhembuliza heni, ila simpatile.
PSA 69:21 Nawamha heni dunga iwe chilyo, londiwele na ng'halu nawamha heni sichi.
PSA 69:22 Visaga vya hewo wawo hali hewo, viwagwilize, viwe vinhu vya kuwagwiliza.
PSA 69:23 Meho ga hewo gawichigwe jiza leka walemwele kulola, chila mhela uvidite vyuno vya hewo vibiniche.
PSA 69:24 Uwaboholele ng'halazi ya hegwe, kuzudila kwa hegwe kuwafiche.
PSA 69:25 Kambi za hewo zilechigwe mahame, yaleche kikala yoneche kuli mihema ja hewo.
PSA 69:26 Kwa vila hewo wanguwagaza wala uwazapile, wangulonga kwa chiwalo cha magazo ga wala uwalumize.
PSA 69:27 Ukumbuchile nongwa kwa chila wihe wa hewo, uwalemele ng'hatu kulechela kwa hegwe.
PSA 69:28 Uwose kuli chitabu cha wawele wakomu, waleche kuwa amo mli matagwa ga watanganiche.
PSA 69:29 Ila heni ngazika na nda mtamwa, unyinule, gwa Nguluwi, undohole.
PSA 69:30 Kwa lwimbo ndolitogola itagwa lya Nguluwi, ndomha ukulu kwa kulonga malumbo.
PSA 69:31 Mbuli ayi yomnojeza ng'hatu Mkulu Nguluwi, kusinda kumlavila nhambiko ya isenga, kusinda kumlavila ibuguma lyeng'ha likomu.
PSA 69:32 Wazunwa wogona ago na kusangalala, walingumpala Nguluwi wokangazwa nhumbula.
PSA 69:33 Mkulu Nguluwi kanguwahulichizaga walihela chinhu, howasemwa ng'o wanhu wa heye wanweng'hwa.
PSA 69:34 Ulanga na isi vimtogole Nguluwi, bahali na vyeng'ha viwele amo, vimtogole.
PSA 69:35 Kwa vila Nguluwi koulohola muji wa Siyoni, na kujizenga kahi miji ja Yuda. Wanhu wochikala amo na kuihola,
PSA 69:36 walelwa wa vitumagwa wa heye woihalila, wala walingugana itagwa lya heye wochikala amo.
PSA 70:1 (Kwa yalingwaluchiza kwimba. Lwimbo lwa Daudi lwa kukumbuchila.) Gwa Nguluwi, undohole. Gwa Mkulu Nguluwi, uye himahima kunhanza.
PSA 70:2 Walingugana kundumya, wone soni na kudeula. Awo walingugana ndumile, walingugana ndumile, wahiluche kumbele na kubezigwa.
PSA 70:3 Awo walinguseka heni, wahiluche kumbele kwa kulemwela kwa hewo.
PSA 70:4 Wala weng'ha walingukupala, wasangalale na kutowa luchenze kwa chiwalo cha hegwe. Walinguugana ulohozi wa hegwe, chila yumwe yalonje mazuwa gose, “Nguluwi ndo Mkulu!”
PSA 70:5 Ila heni mbele mzunwa na ndilihela chinhu, gwa Nguluwi, umbuyile himahima. Hegwe ndo mtanzi wa heni na mlohozi wa heni, gwa Mkulu Nguluwi, uleche kukawila.
PSA 71:1 Gwa Mkulu Nguluwi, kwa hegwe ndangubilimila kikala goya, uleche kundeka ne hado mbasigwe soni.
PSA 71:2 Kwa kutanganika kwa hegwe undohole, uwiche goya ikutu lya hegwe na kundohola.
PSA 71:3 Uwe kwa heni italawe lya kikala goya, honhu hondibilimila chila mhela, kwa vila hegwe ndo italawe na ngome ya heni.
PSA 71:4 Gwa Nguluwi wa heni, undohole kulawa mmoko mwa wehile, kulawa kuli ndole za walinguleka hachi na wang'hang'hale.
PSA 71:5 Kwa vila hegwe Mkulu ndo kitumbila kwa heni, kitumbila kwa heni gwa Mkulu Nguluwi, kulawa kuli usongolo wa heni,
PSA 71:6 nandikutumbila hegwe kulawila lomhondigwe, ndo hegwe undavile mmunda mwa mayangu. Ndokutogola mazuwa gose.
PSA 71:7 Nandiwa munhu wa kububuwaza kwa wenji, ila hegwe ndo honhu ha heni ha kubilimila hemile nzinzili.
PSA 71:8 Mlomo wa heni umema lutogo lwa hegwe, na ukulu wa hegwe nemisi yeng'ha.
PSA 71:9 Mhela wa kulala uleche kunhoza, uleche kundeka mong'ho wa heni houmala,
PSA 71:10 kwa vila wang'honyo wa heni wangulonga vibi kwa heni, nawo walingugana kung'hopola wangiwika goya,
PSA 71:11 wolonga, “Nguluwi nakamleka, mumuwinze na kumibata, kwa vila haduhu wa kumlohola.”
PSA 71:12 Gwa Nguluwi, uleche kuwa kutali na heni, gwa Nguluwi wa heni, uye himahima kunhanza.
PSA 71:13 Weng'ha walingundonjeleza wabasigwe soni na kudumigwa, walingugana kundumiza wabasigwe soni na kudeula.
PSA 71:14 Ila heni ndowa na kitumbila mazuwa gose, ndokutogola lukami.
PSA 71:15 Mlomo wa heni wolonga madito ga hegwe ga hachi, ndowikula nemisi yeng'ha madito ga hegwe ga ulohozi, hanga ago ndo mzidi wa nyhala za heni.
PSA 71:16 Ndolonga madito ga hegwe makulu, gwa Mkulu Nguluwi, ndowakumbusa kota hegwe uliyeka ndo utanganiche.
PSA 71:17 Gwa Nguluwi, hegwe nakundangusa kulawa usongolo wa heni, ndangulutilila kuwikula madito ga hegwe ga vinduzanduza.
PSA 71:18 Gwa Nguluwi, uleche kundeka hondiwa ndalile ndiwele na mbuliza, mbaka ndiluwikulile lulelo lulinguya mong'ho wa hegwe, mong'ho wa hegwe kwa weng'ha walinguya.
PSA 71:19 Gwa Nguluwi, hachi ya hegwe naifika mbaka kuchanya mwa ulanga, hegwe uwele nakudita mbuli ng'hulu ng'hatu. Gwa Nguluwi, whaani yawele kota hegwe?
PSA 71:20 Nakundita mbone magazo menji ng'hatu, ila konyhilusila kahi ukomu, hegwe konyhilula kahi kulawa ako hasi.
PSA 71:21 Konyonjezela kuhulichizwa kwa heni, na kunyhembuliza kahi.
PSA 71:22 Ndokutogola kahi kwa ching'weleng'wele, kwa chiwalo cha kukundigwa kwa hegwe, gwa Nguluwi wa heni. Ndokwimbila lutogo kwa igombogombo, hegwe Welile wa Isilaeli.
PSA 71:23 Ndotowa iyowe kwa kusangalala, hondikwimbila lutogo lwa hegwe na nhumbula ya heni yokutogola kwa vila nakungombola.
PSA 71:24 Ndolonga kutanganika kwa hegwe nemisi yeng'ha, kwa vila wowaganile kundumiza nawabasigwa soni na kudeuzwa.
PSA 72:1 (Lwimbo lwa Solomoni.) Gwa Nguluwi, umtambichize mndewa yamule kwa hachi, umhe mwana wa mndewa kutanganika kwa hegwe,
PSA 72:2 yalongoze wanhu wa isi ya hegwe kwa kutanganika, na walingugazigwa kwa hachi.
PSA 72:3 Vidunda viwegalile kikala goya wanhu wa hegwe, vidunda viwegalile kutanganika.
PSA 72:4 Mndewa yawalewele wazunwa, yawatanze wana wa walihela chinhu, na kuwahonda walingubunza.
PSA 72:5 Mndewa yekale mihela minji kota isanya, na kota nyelezi kukolela lulelo lweng'ha.
PSA 72:6 Yawe kota upesi ulingunojeza migunda, kota nhonya ilingutowa kuli misanga.
PSA 72:7 Watanganiche wakule goya kuli ukomu wa hewo weng'ha, na kikala goya kwa winji mbaka nyelezi hoiduma.
PSA 72:8 Yalongoze kulawa bahali mbaka bahali, kulawa lwanda lwa Eyufulate mbaka kuli kuduma kwa isi.
PSA 72:9 Wang'honyo wa heye walingikala kuli chiwala wanyenyetele hali heye, walingitwanza na heye wafugame mbaka wamyanje nhimbwisi.
PSA 72:10 Wandewa wa Talishishi na vihilwa wamhe kodi, wandewa wa Sheba na Seba wamigalile ndolendole.
PSA 72:11 Wandewa weng'ha wa isi wamfugamile, wanhu wa isi zeng'ha wamkolele mijito.
PSA 72:12 Kangumlohola munhu yalihela chinhu yalingumlanda, na yalingugazigwa yawele kahela wa kumtanza.
PSA 72:13 Kanguwonela isungu ng'hochele na walihela chinhu, kangulohola ukomu wa walihela chinhu.
PSA 72:14 Kanguwagombola kuwele na kubunza na kitowa, kwa vila danda ya hewo ndo chinhu chikulu ng'hatu kwa heye.
PSA 72:15 Mndewa yekale kwa mihela minji, yabochele ndolendole ya zahabu kulawa Sheba, wanhu wamlandile kwa Nguluwi mazuwa gose, na kumganila utambichizo nemisi yeng'ha.
PSA 72:16 Isi ilele nyhule kwa winji, mbaka kuli vinhembenhembe vya vidunda. Vidunda vimeme mbena kota ya Lebanoni, wanhu wa kuli miji wakule goya kota misolo.
PSA 72:17 Itagwa lya mndewa likale mazuwa gose, lizeleche kwa mihela minji isanya holikwaka. Kukolela heye wanhu wa isi zeng'ha watambichizwe, wanhu weng'ha wamcheme yawele yatambichizwe.
PSA 72:18 Yatogoligwe Mkulu Nguluwi, Nguluwi wa Isilaeli, yawele heye yaliyeka kanguditaga vinduzanduza.
PSA 72:19 Itagwa lya heye lyelile litogoligwe mazuwa gose, ukulu wa heye umeme kuli isi zeng'ha. Ena! Ena!
PSA 72:20 Kuduma kwa kulanda kwa Daudi, mwana wa Yese.
PSA 73:1 (Zabuli ya Asafu.) Ndangukomya, Nguluwi ndo yanojile kwa wanhu wa Isilaeli, ndo yanojile kwa wanhu welile mnhumbula.
PSA 73:2 Behi ng'hatu ndahakwang'wale, hado hela ndahatelele,
PSA 73:3 kwa vila nandiwonela fihi walingidaya, londiwene mbuli za wehile zangulutilila goya.
PSA 73:4 Kwa vila hewo hambe wafichigwe na magazo, ng'huli za hewo za goya na nazineneha.
PSA 73:5 Magazo ga wanhu hagawafichile hewo, hawasumbuligwe kota wanhu wanji.
PSA 73:6 Kidaya kuwa ugasi wa hewo misingo, kitowa ndo kota nguwo za hewo.
PSA 73:7 Meho ga hewo gangumemaga wihe, nhumbula za hewo zangulavya majesa gehile.
PSA 73:8 Wanguwalonjeleza wanji na kulonga gehile, wangidaya na kiwika goya kubunza.
PSA 73:9 Kwa milomo ja hewo wangulonga kota wangulongoza kilanga, na kwa umyango wa hewo kota wangulongoza isi.
PSA 73:10 Mbaka wanhu wa heye wanguwawinza, hambe wone choneche chihile kwa hewo na kukunda chila chowalingulonga.
PSA 73:11 Wangulonga, “Nguluwi howeza kuvizela? Ndaze, Nguluwi Yawele Kuchanya howeza kuvizela choneche?”
PSA 73:12 Ulole, wanhu wehile vyowawele! Wana chila chinhu na wangupata lufufu mzidi.
PSA 73:13 Ndaze, ndilolela hihi hela welile mnhumbula, na kiyamila ndeche kudita gehile?
PSA 73:14 Nemisi yeng'ha nhowigwa, chila mitondo nafichigwa na magazo.
PSA 73:15 Wone ndahalonjile ago hazelu kota hewo, ndahawele mwihe hali walelwa wa hegwe.
PSA 73:16 Lelo, nanjeza kijesa kwa chiwalo cha mbuli ayi, ila nayali mbuli inamane kwa heni kutang'hula,
PSA 73:17 mbaka lonyinjile honhu ha hegwe helile, aho ndo ndivizela chowowafika wehile.
PSA 73:18 Ndangukomya hegwe kwanguwawika honhu kuli halingutelela, kwanguwadita wagwe na kudumigwa.
PSA 73:19 Wangudumigwa baho du, na kusigwa kwa kukabusa.
PSA 73:20 Gwa Mkulu, houkwinuka, hewo wangwajilila baho du, kota kulota mhela wa munhu kulilimka mitondo.
PSA 73:21 Lombone usungu mnhumbula, na kuhomwa kuli muhe,
PSA 73:22 nandali yasowile nyhala na mpoka, nandali kota igongolo hali hegwe.
PSA 73:23 Ila, gwa Nguluwi, nda hamwe na hegwe mazuwa gose, kwangimbata moko na kunyimiza.
PSA 73:24 Hegwe kwangundongoza kwa ulanguso wa hegwe, hamba kombochela kuli ukulu.
PSA 73:25 Whaani yoweza kunhanza kilanga, wone hauwele hegwe? Na muisi haduhuli chondilingugana ila hegwe.
PSA 73:26 Hanga ndiwe ndilihela mong'ho kuli lukuli na kuli muhe, gwa Nguluwi, hegwe ndo italawe lya heni, hegwe ndo honhu ha heni mazuwa gose.
PSA 73:27 Ulole! Yalingibagula na hegwe, ndangukomya kodumigwa, yalingukulema kota mng'hondwa, komdumya.
PSA 73:28 Ila kwa heni, chondilingugana ndo kuwa habehi na Nguluwi hela. Mkulu Nguluwi, hegwe ndo honhu ha heni ha kubilimila. Ndowikula madito geng'ha gouditile.
PSA 74:1 (Ilanguso lya Asafu.) Gwa Nguluwi, lekachoni nakututoza ng'hatu? Lekachoni ng'halazi ya hegwe yangulutilila kuli ming'holo ja hegwe?
PSA 74:2 Uwakumbuchile wanhu wa hegwe uwagulile kulawa katali, nhanzi youigombole iwe ya hegwe, uhalizi wa hegwe, uchikumbuchile chidunda cha Siyoni, honhu hawele nawali wikala.
PSA 74:3 Ukole na kulola mchanya mwa mahame aga ga mazuwa gose. Wang'honyo nawawifya chila chinhu kuli ng'handa ya hegwe.
PSA 74:4 Wang'honyo wa hegwe nawabuma kusumya kuli ng'handa ya hegwe. Nawawika amo bendela za hewo za kusumya.
PSA 74:5 Wangiwhana na walingugoda ngodi, walingutema ngodi kwa miwago ja hewo.
PSA 74:6 Nawabenanga vinoligo vya mbawo vya ng'handa ya Nguluwi, kwa miwago na nyundo za hewo.
PSA 74:7 Nawahasoma honhu helile ha hegwe kwa chiluli, nawahaliga ng'hatu hala honhu houlingufugamilwa.
PSA 74:8 Nawalonga mnhumbula za hewo, “Towahonda ng'hatu!” Nawahoma chila honhu, hawele Nguluwi nayali yofugamilwa kuli isi.
PSA 74:9 Hatulingona kahi ulajilo wa Nguluwi, twahela kahi mloli yoneche. Hatulinguvizela kota yowa ahi mbaka hanili.
PSA 74:10 Gwa Nguluwi, mbaka hanili mng'honyo kokuseka? Ndaze, woliliga itagwa lya hegwe mazuwa gose?
PSA 74:11 Lekachoni nakuuvisa moko wa hegwe wa kudilo? Lekachoni hambe ugolole moko wa hegwe kuwadumya?
PSA 74:12 Ila hegwe Nguluwi ndo mndewa wa hetwe kulawa katali, nakuwalohola wanhu kuli isi yeng'ha.
PSA 74:13 Kwa mong'ho wa hegwe nakuigawanula bahali, nakuvihonda vitwi vya mizoka ja bahali.
PSA 74:14 Hegwe nakuhondanga vitwi vya linhu Lewiyatani, nakujipa migongolo ja kuchiwala itufi lyake.
PSA 74:15 Hegwe nakudita nzasa na vikolola, nakuzidita nzanda ng'hulu zikale.
PSA 74:16 Nemisi ndo ya hegwe na nechilo ndo ya hegwe, nakuwika nyelezi na isanya honhu hawo.
PSA 74:17 Hegwe nakuwika mbaka jeng'ha ja isi, nakuwika mhela wa chipalangule na chipute.
PSA 74:18 Gwa Mkulu Nguluwi, ukumbuchile wang'honyo wa hegwe vyowakusechile, wapoka wanguliliga itagwa lyako.
PSA 74:19 Hetwe ndo ng'hochele kota ng'hunda, ahyo, uleche kujitozela migongolo jing'ang'ale, uleche kuusemwa ukomu wa walingugazigwa.
PSA 74:20 Ulikumbuchile ilagano lyouliditile na hetwe, kwa vila isi naimema kitowa chila honhu hawele na jiza.
PSA 74:21 Uleche kuwaleka walingutunywa wabasigwe soni, uwatambichize wazunwa na walihela chinhu walitogole itagwa lyako.
PSA 74:22 Gwa Nguluwi, wime wilewele, ukumbuchile wala vyowalingukubeza chila zuwa.
PSA 74:23 Uleche kusemwa iyowe lya wang'honyo wa hegwe, na ivuche lilingulutilila mazuwa gose lya walingitwanza na hegwe.
PSA 75:1 (Kwa yalingwaluchiza kwimba. Kwa kiwhana na “Uleche kuwifya.” Zabuli ya Asafu. Lwimbo.) Twangulonga malumbo, gwa Nguluwi, twangulonga malumbo. Twanguwikula ukulu wa itagwa lya hegwe na kusimila mbuli za madito ga hegwe makulu.
PSA 75:2 Nguluwi kangulonga, “Nambika mihela jondijihagule, kuli mihela ajo ndotagusa kwa hachi chila mhela.
PSA 75:3 Isi hoikakama na vyeng'ha viwele amo, heni ndo ndilingwimiza misisi jake.
PSA 75:4 Ndanguwalonjela wawele walingidaya, ‘Mleche kidaya,’ na wehile, ‘Mleche kwinula mbalati kota namsumya.
PSA 75:5 Mleche kiwona kota mwa wanhu mtanganiche ng'hatu, ne kulonga ulonzi wa kidaya.’ ”
PSA 75:6 Kusumya hakulingulawa kolilawilaga isanya ne kolizinjilaga isanya, ne kuchiwala ne kuli chidunda.
PSA 75:7 Nguluwi yuye ndo mtagusa, kangumdulisaga yumwe na kumkwiniza yunji.
PSA 75:8 Mkulu Nguluwi kangibata chizombe mmoko, chimemile divai ing'ang'ale ya ng'halazi ya heye, kanguijida. Kukomya wehile weng'ha wanguinwa, ena, wanguinwa mbaka kuduma.
PSA 75:9 Ila heni ndowikula mazuwa gose, ndomwimbila lutogo Nguluwi wa Yakobo.
PSA 75:10 Kowifya ludali lweng'ha lwa wanhu wehile, ila mong'ho wa watanganiche kowimiza nzinzili.
PSA 76:1 (Kwa yalingwaluchiza kwimba. Kwa vinhu vya ng'weso za muziki. Zabuli ya Asafu. Lwimbo.) Nguluwi kanguzeleka ako Yuda itagwa lyake ndo likulu kuli Isilaeli.
PSA 76:2 Haluga ha heye ndo ako Salemu, honhu ha heye ha kikala ako Siyoni.
PSA 76:3 Ako nakabena misale ja wang'honyo, nakabena ngawo na ipanga na vinhu vya kitowela ngondo.
PSA 76:4 Gwa Nguluwi, kuna lutogo ng'hatu, louhiluche kulawa kuli vidunda, louwasumile wang'honyo wa hegwe.
PSA 76:5 Wawele na mong'ho nawasukulwa vinhu vya hewo navyowaholile kuli ngondo, lelo nawawasa usinjizi wa kubagama, wazidahe kitowa ngondo hawawezile kitowa ne hado.
PSA 76:6 Gwa Nguluwi wa Yakobo, louwang'hanuchile, falasi na wakwina falasi nawawasa usinjizi wa kubagama.
PSA 76:7 Gwa Nguluwi, hegwe uliyeka ndo wa kukabusa ng'hatu. Whaani yoweza kwima hali hegwe houzudila?
PSA 76:8 Nakuuwikula utaguso wa hegwe kulawa kilanga, isi naidumba na kunyamalila,
PSA 76:9 hegwe Nguluwi, mhela lowinuche kudita utaguso, kuwalohola weng'ha walingubunzwa muisi.
PSA 76:10 Kuzudila kwa wanhu kwangwambuza hela lutogo kwa hegwe, houwika goya ng'halazi ya hegwe isigale.
PSA 76:11 Mumwenezele Mkulu Nguluwi, Nguluwi wa hemwe kulagana kwa hemwe, hemwe muwele habehi mumhe ndolendole Nguluwi wa kukabusa.
PSA 76:12 Heye kangubenaga muhe wa wakulu, kanguwakabusaga wandewa wa isi.
PSA 77:1 (Kwa yalingwaluchiza kwimba. Kwa kiwhana na Yedutuni. Zabuli ya Asafu.) Ndangumlilila Nguluwi leka yanhanze, ndangumlilila Nguluwi leka yanyhuliche.
PSA 77:2 Mhela wa magazo ndangumlanda Mkulu, ndangumgololela moko ga heni nechilo ne kutoka, hambe mhegwe usangalalo woneche kwa munhu.
PSA 77:3 Vyondimkumbuchile Nguluwi na kung'ung'uta, vyonjesile nanweguka nhumbula.
PSA 77:4 Wangundemeza mbaka kuwa na usinjizi ne hado, ndangusanzalima mbaka ndangulemwela kulonga.
PSA 77:5 Nandijesa mazuwa ga katali, ndangujikumbuchila miyaka ja aho katali.
PSA 77:6 Nechilo ndangukumbuchila na kupala mnhumbula, ndangijesa na kiwuza kuli muhe.
PSA 77:7 “Ndaze, Mkulu nakatulema ng'hatu? Ndaze, hotonela isungu kahi?
PSA 77:8 Ndaze, igano lya heye lya kwimilila naliduma ng'hatu? Ndaze, hokweneza kahi malagano ga heye?
PSA 77:9 Ndaze, Nguluwi nakasemwa kuwa na isungu? Ndaze, ng'halazi ya heye nayusa uliholile wa heye?”
PSA 77:10 Hamba nandonga, “Chilingundumiza ng'hatu ndo kota, Nguluwi Yawele Kuchanya halingudita kahi chinhu kwa chiwalo cha hetwe.”
PSA 77:11 Ndogakumbuchila madito ga hegwe, gwa Mkulu Nguluwi, ena, ndovikumbuchila vinduzanduza vya hegwe vya aho katali.
PSA 77:12 Ndochijesa kwa chiwalo cha mijito ja hegwe, na kijesa kwa chiwalo cha madito ga hegwe makulu.
PSA 77:13 Chila choulingudita gwa Nguluwi, ndo chelile. Ndo mlungu wachi yawele mkulu kota Nguluwi wa hetwe?
PSA 77:14 Hegwe ndo Nguluwi ulingudita vinduzanduza, hegwe nakuwalajila wanhu wa isi mong'ho wa hegwe.
PSA 77:15 Kwa moko wa hegwe uwele na mong'ho nakuwagombola wanhu wa hegwe, nakuwagombola walelwa wa Yakobo na Yusufu.
PSA 77:16 Mazi vyogakuwene, gwa Nguluwi, mazi vyogakuwene, nagadumba lukami, ena, bahali naikakama mbaka hasi ng'hatu.
PSA 77:17 Ng'hungugu nailavya mazi, kubuma nakwaluka kuli ulanga, milapi ja chiluli najimwemwesa chila ubanzi.
PSA 77:18 Lizi lya kubuma kwa hegwe nalulawila kuli chivuluvumbi, lumwemwesa lwa hegwe nalulangazila isi zeng'ha, isi naikakama na kutigasika.
PSA 77:19 Hegwe nakuwika nzila ya hegwe mchanya mwa bahali, nakujenda kukolela mazi menji, ila nzayo za hegwe hazoneche hebu.
PSA 77:20 Nakuwalongoza wanhu wa hegwe kota ming'holo, kuli ulongozi wa Musa na Aluni.
PSA 78:1 (Ilanguso lwa Asafu.) 10 Mhulichize malanguso ga heni, hemwe wanhu wa heni, muwiche goya makutu kwa chiwalo cha ulonzi wa mlomo wa heni.
PSA 78:2 Ndogabula mlomo wa heni kwa nhelo, ndouwika hazelu ulonzi uvisigwe kulawa katali,
PSA 78:3 mbuli zotuzihuliche na kuzizela, mbuli ziwele wasekulu wa hetwe nawatusimila.
PSA 78:4 Hatuwavisa wana wa hetwe, ila tolusimila lulelo lulinguya madito makulu ga Mkulu Nguluwi na ludali lwa heye towalonjela vinduzanduza vya heye vyoyaditile.
PSA 78:5 Nakawapa walelwa wa Yakobo malajizo, nakawika mizilo kuli Isilaeli, jiwele nakawalajiza wasekulu wa hetwe wawalanguse wana wa hewo,
PSA 78:6 leka wanhu wa lulelo lulinguya, wana wawele wopondigwa hamba wagazele, nawo kahi wawazelese wana wa hewo.
PSA 78:7 Wamuwichile Nguluwi kitumbila kwa hewo, waleche kusemwa madito ga Nguluwi, ila webate malajizo ga heye.
PSA 78:8 Waleche kuwa kota wasekulu wa hewo, wanhu wawele na nhumbula zigagadale na walingubelenhuka, lulelo luwele haluwele na majesa gemile nzinzili, luwele haluwele lwa kukundigwa kwa Nguluwi.
PSA 78:9 Wanhu wa Efulaimu, mipinde na misale mmoko, nawahiluka kumbele, nawabilima zuwa lila lya ngondo.
PSA 78:10 Hawalibatilile ilagano lya Nguluwi, nawalema kuwinza malajizo ga heye.
PSA 78:11 Nawasemwa mbuli zoyawele yaziditile, vinduzanduza vyoyawele yawalajile.
PSA 78:12 Nakadita vinduzanduza hali wasekulu wa hewo, kuli ibalalika lya Soani, kuli isi ya Misili.
PSA 78:13 Nakaigawanula bahali na kuwadita waloche amo, nakagadita mazi geme kota lukanzi.
PSA 78:14 Nemisi nakawalongoza kwa ng'hungugu, nechilo yeng'ha kwa lumwemwesa lwa chiluli.
PSA 78:15 Nakatula mitalawe ako kugunuche, nakawanweza mazi kulawa kuli mazi menji kota bahali.
PSA 78:16 Nakadita vikolola vilavye mazi kulawa kuli italawe, na kugadita mazi gachililiche kota lwanda.
PSA 78:17 Ila nawalutilila kumditila gehile Nguluwi, nawambelenhuka Nguluwi Yawele Kuchanya kula kugunuche.
PSA 78:18 Nawamjeza Nguluwi kwa kunuwila, wolanda kupegwa chilyo chowaganile.
PSA 78:19 Nawamkovula Nguluwi wolonga, “Ndaze, Nguluwi koweza kutigalila chilyo kuchiwala?
PSA 78:20 Kwa kukomya, nakatowa italawe, mazi nagachililika kota lwanda, ila ndaze, kanguweza kutigalila mibumunda, na kuwegalila wanhu wa heye miwunde?”
PSA 78:21 Mkulu Nguluwi naloyahuliche ago, nayali yamemile kuzudila, chiluli nachaka kwa walelwa wa Yakobo, ng'halazi ya heye naiwavaba wanhu wa Isilaeli,
PSA 78:22 kwa vila hawamkundile Nguluwi, ne kuukunda mong'ho wa heye wa kulohola.
PSA 78:23 Ila nakalajiza ng'hungugu ya kuchanya, nakachumula lwizi lwa kilanga,
PSA 78:24 nakawadulisila mana leka walye, nakawapa nyhule kulawa kilanga.
PSA 78:25 Wanhu nawalya chilyo cha wahilisi, naye nakawegalila chilyo cha kuhega.
PSA 78:26 Nakegala mbeho ya kolilawilaga isanya kulawa kilanga, kwa ludali lwa heye nakambuza mbeho ya kusini ipute,
PSA 78:27 nakawagalila wanhu wa heye miwunde kota nhimbwisi, videje vinji kota sangalaza ya mhwani.
PSA 78:28 Videje avyo navigwa hali kambi ya hewo, chila honhu kuzunguluta haluga ha hewo.
PSA 78:29 Wanhu nawalya na kiguta ng'hatu, Nguluwi nakawapa chowaganile.
PSA 78:30 Ila lowawele wang'hali kigutiza maya ga hewo, chilyo lochiwele ching'hali kuli milomo ja hewo,
PSA 78:31 ng'halazi ya Nguluwi naiwafika hewo, nakawakopola wawele na mong'ho hali hewo, na kuwagwisa wasongolo wa Isilaeli.
PSA 78:32 Ila nawalutilila kudita gehile hali Nguluwi, hanga nakadita vinduzanduza, ila hawakundile.
PSA 78:33 Lelo, nakaduma mazuwa ga hewo kota lweselo, miyaka ja hewo kwa kubagama baho du.
PSA 78:34 Chila loyawakopole, wala waponile nawampala, na kumhinduchila Nguluwi kwa nhumbula.
PSA 78:35 Nawakumbuchila kota Nguluwi nayali italawe lya hewo, Nguluwi Yawele Kuchanya nayali mgombozi wa hewo.
PSA 78:36 Ila nawamhada kwa ulonzi wa hewo, chila chowamlonjele nachali udesi.
PSA 78:37 Hawambatilile heye kwa nhumbula, nahawawele wakukundigwa kuli ilagano lya heye.
PSA 78:38 Ila Nguluwi yawele na isungu nakaugubika wihe wa hewo, hawadumye hebu. Mihela minji nayali yoilemeza ng'halazi ya heye, nahakulechile kuzudila kwa heye kweng'ha kuwafiche.
PSA 78:39 Nakakumbuchila kota hewo ndo wanhu hela, ndo kota mbeho ilingukola na kwajilila.
PSA 78:40 Mala zilinga nawambelenhuka kuchiwala, na kumzudiza ako kugunuche?
PSA 78:41 Nawamjeza Nguluwi chila mhela, nawamzudiza ayo Yelile wa Isilaeli.
PSA 78:42 Hawalukumbuchile ludali lwa heye, zuwa lila loyawagombole kwa wang'honyo wa hewo,
PSA 78:43 naloyaditile mbuli za kububuwaza kuli isi ya Misili, na vinduzanduza kuli ibalalika lya Soani.
PSA 78:44 Nakagalusa zila nzanda ziwa danda, Wamisili waleche kuwa na mazi ga kunwa.
PSA 78:45 Nakawahilichila vilundo vya ng'onzi ziwele naziwatunya, na mibula jiwifile chila chinhu.
PSA 78:46 Nakalajiza nzije, nazilya mbena za hewo, na kuwifya migunda ja hewo.
PSA 78:47 Nakajiwifya mizabibu ja hewo kwa nhonya ya maganga, na mitini ja hewo kwa chipute ching'ang'ale.
PSA 78:48 Misenga ja hewo najikopoligwa kwa nhonya ya maganga, na ming'holo ja hewo kwa lumwemwesa.
PSA 78:49 Nakaleka ng'halazi ya heye iwafiche, kuzudila na nhumbula yihile na kugaya na chilundo cha wahilisi wa kudumya.
PSA 78:50 Nakalechelela ng'halazi ya heye ilutilile, ne kuwawika kutali na kubagama, ila nakawadumya kwa utamwa.
PSA 78:51 Nakawakopola walelwa wa mwaluko weng'ha wa Misili, ena, wa mwaluko kuli kambi ya Hamu.
PSA 78:52 Hamba nakawahilika wanhu wa heye kota ming'holo, nakawalongoza kuchiwala kota chilundo cha migongolo ja kufujigwa.
PSA 78:53 Nakawalongoza goya, nawo hawadumbile, ila bahali naiwagubika wang'honyo wa hewo.
PSA 78:54 Nakawegala kuli isi ya heye yelile, kuli chidunda choyachiholile kwa moko wa heye wa kudilo.
PSA 78:55 Nakawawinga wanhu wa isi hali hewo, nakazilavya isi za hewo ziwe za Isilaeli, nakaziwika nhanzi za Isilaeli hali honhu ha hewo.
PSA 78:56 Ila nawamjeza na kumbelenhuka Nguluwi Yawele Kuchanya, ne kibatilila malajizo ga heye.
PSA 78:57 Ila nawahinduka na kudita gehile kota wasekulu wa hewo, nawali wohambe wetumbilwe kota upinde wohauwele nzinzili.
PSA 78:58 Nawamzudiza kwa honhu hawo ha kulavila nhambiko ha milungu, nawamdita yawe na fihi kwa jimalukolo jawo.
PSA 78:59 Nguluwi loyagawene ago, nakazudila, nakailema ng'hatu Isilaeli.
PSA 78:60 Nakalileka ihema lyelile lya heye ako Shilo, haluga hawele nayali yekale hagati ha wanhu.
PSA 78:61 Nakalileka isanduku, ulajilo wa mong'ho wa heye, liholigwe kuli isi ya chijenzi, ukulu wa heye uwichigwe mmoko mwa wang'honyo.
PSA 78:62 Nakawazudila wanhu wa heye yuye, nakawalavya wadumigwe kwa ipanga.
PSA 78:63 Chiluli nachiwalakaza wasongolo wa hewo, wahinza wa hewo nawali walihela wanhu wa kuwahesa.
PSA 78:64 Watambika wa hewo nawabagama kwa ipanga, wadala wa hewo wafililwe na walume wawo hawawezile kulombocheza.
PSA 78:65 Hamba Mkulu nakalilimka kota munhu yolawa kuli usinjizi, kota munhu yazidahe kitowa ngondo yanwele divai,
PSA 78:66 Nakawawinga wang'honyo wa heye, nakawabasa soni ya mazuwa gose.
PSA 78:67 Nakailema nhanzi ya Yusufu, haihagule nhanzi ya Efulaimu,
PSA 78:68 ila nakaihagula nhanzi ya Yuda, na chidunda cha Siyoni choyachiganile.
PSA 78:69 Nakazenga aho ng'handa ya heye ng'hulu kota ulanga, kota isi yoyaiwichile nzinzili mazuwa gose.
PSA 78:70 Nakamhagula Daudi, chitumagwa wa heye, nakamusa kuli mijito ja kudima ming'holo.
PSA 78:71 Nakamlavya kuli mijito ja kudima ming'holo, yawe na mijito ja kudima wanhu wa Yakobo, wanhu wa heye, yadime Isilaeli, wanhu wa Nguluwi yuye.
PSA 78:72 Daudi nakawadima kwa nhumbula ya heye yeng'ha, nakawalongoza kwa luhala lwa moko ga heye.
PSA 79:1 (Zabuli ya Asafu.) Gwa Nguluwi, wajenzi nawaivaba isi ya hegwe, nawaidita iwe ikokomoche ng'handa ya hegwe yelile, na kuudita muji wa Yelusalemu uwe mahame.
PSA 79:2 Nawajileka mitufi ja vitumagwa wa hegwe jiwe chilyo cha videje, ng'huli za wanhu wa hegwe ziwe chilyo cha migongolo ja kisolo.
PSA 79:3 Nawabohola danda kota mazi hali honhu ha muji wa Yelusalemu, nawawichigwa amo na haduhuli wa kuwatila.
PSA 79:4 Natubaswa soni kwa wanhu wa isi za habehi, walingikalasa habehi na hetwe wangutuseka na kutubeza.
PSA 79:5 Gwa Mkulu Nguluwi, ndaze, kozudila mbaka mazuwa gose? Ng'halazi ya hegwe ya fihi yokwaka kota chiluli mbaka hanili?
PSA 79:6 Uwaboholele wajenzi ng'halazi ya hegwe, ena, isi zeng'ha zohambe zilicheme itagwa lya hegwe.
PSA 79:7 Kwa vila nawammela Yakobo, nhanzi ya hegwe, nawahalakaza ng'hatu haluga ha heye.
PSA 79:8 Uleche kutugaza kwa chiwalo cha nongwa za wasekulu wa hetwe. Isungu lya hegwe lituyile himahima, kwa vila twangugazigwa ng'hatu.
PSA 79:9 Ututanze, gwa Nguluwi, mlohozi wa hetwe, kwa lutogo lwa itagwa lyako utulohole na kugagubika gehile ga hetwe, kwa chiwalo cha itagwa lya hegwe.
PSA 79:10 Lekachoni isi zitulonjele, “Kakohi Nguluwi wa hemwe?” Ututambichize tulole vyoulinguwahilulila chibida wanhu wa isi, kwa kukopoligwa kwa vitumagwa wa hegwe.
PSA 79:11 Chililo cha hewo wanweng'hwa chikufichile, kwa ludali lwa hegwe lukulu uwalohole wowatagusigwe kubagama.
PSA 79:12 Wanhu awo wa isi wawele habehi, gwa Mkulu, wahilusilwe kubezigwa mala saba.
PSA 79:13 Natwe wanhu wa hegwe, tuwele ming'holo ja chilundo cha hegwe, tolonga malumbo mazuwa gose, kulawa lulelo mbaka lulelo tokutogola.
PSA 80:1 (Kwa yalingwaluchiza kwimba. Kwa kiwhana na yunjiyunji. Zabuli ya Asafu.) Uhulichize, gwa Mdimi wa Isilaeli, ulinguwalongoza walelwa wa Yusufu kota ming'holo. Hegwe ulingulongoza hali vilumbigwe viwele na mabawa, ulangaze
PSA 80:2 hali Efulaimu na Benjamini na Manase. Ulajile ludali lwa hegwe, uye kutulohola.
PSA 80:3 Gwa Nguluwi utuhiluse, utulole kwa kunoga, natwe toloholigwa.
PSA 80:4 Gwa Mkulu Nguluwi, Nguluwi uwele na mong'ho, mbaka hanili kokuzudila kulanda kwa wanhu wa hegwe?
PSA 80:5 Nakudita masinzo gawe chilyo cha hetwe, nakutunweza mahozi kwa winji.
PSA 80:6 Nakutudita tubezigwe na wotulingikalasa habehi, wang'honyo wa hetwe wangutuseka.
PSA 80:7 Gwa Mkulu Nguluwi uwele na Mong'ho, utuhiluse, utulole kwa kunoga, natwe toloholigwa.
PSA 80:8 Hegwe nakigala mzabibu kulawa Misili, nakuwawinga wanhu wa isi zinji, na kuunyala kuli isi ya hewo.
PSA 80:9 Nakuulolela goya leka ukule, najo mizabi najiluta hanyi ng'hatu na kwenela kweng'ha muisi.
PSA 80:10 Nakuvigubika vidunda kwa isisila lyake, nhagala zake nazigubika mielezi mikulu.
PSA 80:11 Nhagala zake nazenela mbaka kuli bahali, mizuchila jake mbaka hafungo mwa lwanda lwa Eyufulate.
PSA 80:12 Lekachoni nakubomola lukanzi lulinguzunguluta, lelo chila yalingukola mnzila kangukwanyula zabibu zake?
PSA 80:13 Migubi ja kisolo janguuwifya, na migongolo ja kisolo janguudakula.
PSA 80:14 Utuhinduchile kahi, gwa Mkulu Nguluwi uwele na Mong'ho. Ulole kulawa kilanga, wone, ukaulolele mzabibu awo.
PSA 80:15 Ulyamile izuchila lyoulinyalile kwa moko wa hegwe wa kudilo, alyo izuchila lyoulimize nzinzili gwegwe.
PSA 80:16 Mzabibu wa hegwe naudumuligwa na kulakazwa kwa chiluli, vyouwang'hanuchila, wanhu wa hegwe wangudumigwa.
PSA 80:17 Moko wa hegwe wa kudilo umwamile ayo youmganile, ayo youmhagule kwa chiwalo cha hegwe.
PSA 80:18 Hamba hatukuleka na kukubelenhuka kahi, ututambichize ukomu, natwe tolichema itagwa lya hegwe.
PSA 80:19 Gwa Mkulu Nguluwi uwele na Mong'ho, utuhiluse, utulole kwa kunoga, natwe toloholigwa.
PSA 81:1 (Kwa yalingwaluchiza kwimba. Kwa kiwhana na Gititi. Lwimbo lwa Asafu.) Mumwimbile kwa usangalalo Nguluwi, mong'ho wa hetwe, mumtowele iyowe lya kusangalala Nguluwi wa Yakobo.
PSA 81:2 Mtowe iyowe lya kwimba lwimbo lwa kusangalala, mtowe ngoma, mvine igombogombo na ching'weleng'wele cha lizi linojile.
PSA 81:3 Mpembe mhalamhanda kuwikula kulawila kwa nyelezi, na kahi nyelezi ikangale, mhela wa mnvina ya hetwe.
PSA 81:4 Awo ndo mzilo kuli Isilaeli, alyo ndo ilajizo lya Nguluwi wa Yakobo.
PSA 81:5 Nakawika liwe kota ilajizo kwa Yusufu, hoyaitowile isi ya Misili, ako natuhulika ndonga yohatuizelele.
PSA 81:6 Nakalonga, “Heni ndizilavya mhomolo za hegwe mmayega, nandikusila mitufali jouholile mmoko.
PSA 81:7 Louwele kuli magazo nakunyhema, nani nandikulohola. Nandikwidichila londiwele kuli kivisa kuli kubuma. Nandikujeza kuli mazi ga Meliba.
PSA 81:8 Hemwe wanhu wa heni, mhulichize ikanyo lya heni. Wone wahanyhulichize, gwa Isilaeli!
PSA 81:9 Yaleche kuwa kwa hegwe mlungu wa chijenzi, uleche kumfugamila mlungu yunji.
PSA 81:10 Heni ndo Mkulu Nguluwi, Nguluwi wa hegwe, ndikulavile kulawa kuli isi ya Misili. Ugabule mlomo wa hegwe, nani ndokupa chilyo.
PSA 81:11 “Ila wanhu wa heni hawanyhulichize, Isilaeli halingunyhulichiza.
PSA 81:12 Ahyo nandiwaleka wapone na nhumbula za hewo zigagadale, wawinze majesa ga hewo wawo.
PSA 81:13 Wone wanhu wa heni wahanyhulichize. Wone Isilaeli yahawinzile nzila ya heni.
PSA 81:14 Ndahawasumile wang'honyo wa hewo himahima, ndahagolole moko wa heni kwa chiwalo cha wang'honyo wa hewo.
PSA 81:15 Wala walingumzudila Mkulu Nguluwi wahawele wakukabuswa hali heye, na magazo ga hewo gahawele ga mazuwa gose.
PSA 81:16 Ila hegwe ndahakupele chilyo kwa ngano inojile, ndahakugutize kwa hanombwa inonile.”
PSA 82:1 (Zabuli ya Asafu.) Nguluwi kangwimilila chitala chikulu, kangulavya utaguso kuli nhing'hano ya milungu,
PSA 82:2 “Mbaka hanili molutilila kutagusa ne hachi na kuwaganilila wanhu wehile?
PSA 82:3 Muwape ng'hochele na walekwa hachi za hewo, mwamile hachi za walingubunzwa na wazunwa.
PSA 82:4 Muwalohole ng'hochele na wazunwa, muwalohole kulawa kuli ndole za wehile.
PSA 82:5 “Ila milungu ndo mipoka na hajivizelele. Hewo wangujenda kuli jiza lya kwajilila, misisi jeng'ha ja hachi kuli isi najitigaswa.
PSA 82:6 Heni nandonga, ‘Hemwe mwa milungu, mweng'ha mwa wana wa Nguluwi Yawele Kuchanya.
PSA 82:7 Ila mobagama kota wanhu wanji, mogwa kota mkulu yoneche.’ ”
PSA 82:8 Gwa Nguluwi winuche, uzitaguse isi zeng'ha, kwa vila wanhu wa isi zeng'ha ndo wa hegwe.
PSA 83:1 (Lwimbo. Zabuli ya Asafu.) Gwa Nguluwi, uleche kuwa tulu, uleche kunyamalila gwa Nguluwi, ne kusindamala.
PSA 83:2 Lole wang'honyo wa hegwe wangudita ivuche, walingukuzudila wangwinula vitwi ne kudumba.
PSA 83:3 Wangiwika goya kwa wihe kuwaditila vibi wanhu wa hegwe, wangilongasa kwa chiwalo cha hewo ulinguwamila.
PSA 83:4 Wangulonga, “Muye tuwadumye wanhu wa isi, itagwa lya Isilaeli lileche kukumbuchilwa kahi.”
PSA 83:5 Ena, wangikundiza kwa nhumbula imwe, wangilaha kilumba hamwe leka kukulema.
PSA 83:6 Wanhu wa Edomu na Waishimaeli, Wamoabu na wanhu wa Hagali,
PSA 83:7 wanhu wa Gebali na Amoni na Amaleki, wanhu wa Filistiya na wenyeng'haye wa Tilo wangilumba,
PSA 83:8 mbaka Ashulu nailumba na hewo, nawekundiza kuwatanza walelwa wa Loti.
PSA 83:9 Uwadite kota vyouwaditile wanhu wa Midiani, vyouwaditile Sisela na Yabini kuli lwanda lwa Kishoni.
PSA 83:10 Wanhu wouwadumile kula Eni-doli, nawali midohe mchanya mwa isi.
PSA 83:11 Uwadite wakulu wa hewo kota Olebu na Seebu, vilongozi wa hewo weng'ha kota Seba na Salimuna,
PSA 83:12 wawele nawalonga, “Tochiholela honhu ha Nguluwi ha kudimila.”
PSA 83:13 Gwa Nguluwi wa heni, uwadite kota nhimbwisi, kota mhumba zikalile zilinguholigwa na mbeho.
PSA 83:14 Kota vila chiluli chilingulakaza chihulo, na milapi ja chiluli vyojilingulakaza vidunda,
PSA 83:15 uwabilimise hewo kwa chivuluvumbi cha hegwe, na kuwakabusa kwa mbeho ya hegwe ng'hulu.
PSA 83:16 Uwadite wawe na soni, leka wakupale, gwa Mkulu Nguluwi.
PSA 83:17 Wabasigwe soni na kusanzalima mazuwa gose, wadumigwe kwa soni ng'hatu.
PSA 83:18 Wavizele kota hegwe, uwele itagwa lya hegwe ndo Mkulu Nguluwi, hegwe uliyeka ndo Nguluwi Yawele Kuchanya yalingulongoza isi yeng'ha.
PSA 84:1 (Kwa yalingwaluchiza kwimba. Kwa kiwhana na Gititi. Zabuli ya Wakola.) Kaye kwa hegwe ndo kunoga ng'hatu, gwa Mkulu Nguluwi Yawele na Mong'ho.
PSA 84:2 Muhe wa heni wangugana ng'hatu mbaka ndangwisilwa mong'ho kwa chiwalo cha haluga ha Mkulu Nguluwi. Nhumbula na lukuli lwa heni lweng'ha, vyeng'ha vyangusangalala kwa chiwalo cha Nguluwi yawele mkomu.
PSA 84:3 Mbaka videje viwa na kaye kwa hewo, videje navigongomanya vimvulila vyawo, amo naviwika mibofu jawo, habehi na honhu ha hegwe ha kulavila nhambiko, gwa Mkulu Nguluwi Yawele na Mong'ho, mndewa wa heni na Nguluwi wa heni.
PSA 84:4 Nawatambichizwa wala walingikala kaye kwa hegwe, wokwimba mazuwa gose lutogo lwa hegwe.
PSA 84:5 Nawatambichizwa wala walinguwa na mong'ho kulawa kwa hegwe, walingugana kuluta kujendela mchidunda cha hegwe.
PSA 84:6 Howokola kuli ibindi lya Baka, kwanguliditaga liwe honhu ha nzasa, na nhonya za luhela zangumemezaga milamba.
PSA 84:7 Wangulutilila kuwa na mong'ho ng'hatu, womona Nguluwi ako Siyoni.
PSA 84:8 Uhulichize kulanda kwa heni, gwa Mkulu Nguluwi Yawele na Mong'ho, umbichile goya ikutu lya hegwe, gwa Nguluwi wa Yakobo.
PSA 84:9 Gwa Nguluwi, umlole kwa kunoga ngawo ya hetwe, mndewa, umlole kwa uganililo youmbakalize mafuta.
PSA 84:10 Zuwa limwe hela haluga ha hegwe, fola kusinda mazuwa elufu honhu hanji, fola kwima hali lwizi lwa ng'handa ya hegwe Nguluwi wa heni, kusinda kikala kuli mihema ja wanhu wehile.
PSA 84:11 Mkulu Nguluwi ndo isanya lya hetwe na ngawo ya hetwe, heye kangutuditaga tuwe na kunoga na ukulu. Hambe yawalemeze kuwa na choneche chiwele chinojile, wala walingikala ne nongwa.
PSA 84:12 Gwa Mkulu Nguluwi Yawele na Mong'ho, katambichizwa yula munhu yalingitumbila kwa hegwe.
PSA 85:1 (Kwa yalingwaluchiza kwimba. Zabuli ya Wakola.) Gwa Mkulu Nguluwi, nakuipa kunoga kwa hegwe isi ya hegwe, nakumhilulila kahi Yakobo utambichizo wa heye.
PSA 85:2 Nakuigubika nongwa ya wanhu wa hegwe, nakusa gehile ga hewo geng'ha.
PSA 85:3 Nakulemeza kuzudila kwa hegwe kweng'ha, nakuileka ng'halazi ya hegwe ing'ang'ale.
PSA 85:4 Utuhiluse kahi, gwa Nguluwi mlohozi wa hetwe, wuse kuzudila kouwelenako kwa hetwe.
PSA 85:5 Ndaze, kotuzudila hetwe mbaka mazuwa gose? Ndaze, kolutiliza ng'halazi ya hegwe kwa lulelo lweng'ha?
PSA 85:6 Ndaze, hambe utuhilusile kahi ukomu unyale, leka wanhu wa hegwe wasangalale kwa chiwalo cha hegwe?
PSA 85:7 Utulajile igano lya hegwe lya kwimilila, gwa Mkulu Nguluwi, utupe ulohozi wa hegwe.
PSA 85:8 Ndohulichiza choyalingulonga Mkulu Nguluwi, kwa vila kangulagana kuwapa wanhu wa heye kikala goya, vitumagwa wa heye yuye wone woleka kuwila kahi upoka.
PSA 85:9 Kukomya kowalohola walingumdumba leka ukulu wa heye ulutilile kikala kuli isi ya hetwe.
PSA 85:10 Igano lya kwimilila na kukundigwa vyoting'hana, kutanganika na kikala goya vyochilamsa.
PSA 85:11 Kukundigwa kozuchila kuli isi, kutanganika kolola hasi kulawa kilanga.
PSA 85:12 Mkulu Nguluwi kolavya chiwele chinojile, isi ya hetwe yolavya mbena nyinji.
PSA 85:13 Kutanganika komlongola Nguluwi na kumuwichila goya nzila ya heye.
PSA 86:1 (Kulanda kwa Daudi.) Gwa Mkulu Nguluwi, mbichile goya ikutu lya hegwe, unyidichile, kwa vila heni ndo mzunwa na ndilihela chinhu.
PSA 86:2 Uwamile ukomu wa heni kwa vila ndangukukunda hegwe Nguluwi, undohole heni chitumagwa wa hegwe ndilingukutumbila.
PSA 86:3 Hegwe ndo Nguluwi wa heni, lelo, umbonele isungu, kwa vila ndangukuchema nemisi yeng'ha.
PSA 86:4 Usangalaze heni mbele chitumagwa wa hegwe, kwa vila kulanda kwa heni ndangigala kwa hegwe Mkulu.
PSA 86:5 Gwa Mkulu, hegwe ndo unojile na kwanguwalechela wanhu, kuna winji wa igano lya kwimilila kwa weng'ha walingukuchema.
PSA 86:6 Gwa Mkulu Nguluwi, ukuwichile goya ikutu lya hegwe kulanda kwa heni, ukuhuliche kulila kwa isungu.
PSA 86:7 Mazuwa ga kugazika ndangukuchema, kwa vila hegwe kwangunyidichila.
PSA 86:8 Gwa Mkulu, haduhu Nguluwi yawele kota hegwe, haduhu yalinguweza kudita goulingudita hegwe.
PSA 86:9 Wanhu wa isi zeng'ha uwalumbile, wokuya kukufugamila, gwa Mkulu, wowikula ukulu wa itagwa lya hegwe.
PSA 86:10 Hegwe ndo mkulu, kwangudita vinduzanduza, hegwe uliyeka ndo Nguluwi.
PSA 86:11 Gwa Mkulu Nguluwi, undanguse nzila ya hegwe, leka ndiwe wa kukundigwa kwa hegwe, umhe nhumbula ya kukuwinza hegwe uliyeka, leka ndikudumbe.
PSA 86:12 Gwa Mkulu, Nguluwi wa heni, ndokutogola kwa nhumbula yeng'ha, ndowikula ukulu wa itagwa lya hegwe mazuwa gose.
PSA 86:13 Igano lya hegwe lya kwimilila kwa heni ndo linji. Nakundohola kulawa hasi kuli isi ya wabagame.
PSA 86:14 Gwa Nguluwi, wanhu walingidaya wangunhowa, chilundo cha wanhu wang'ang'ale wangugana kung'hopola, hambe wakudumbe hegwe ne hado.
PSA 86:15 Ila hegwe Mkulu, ndo Nguluwi wa kunoga na isungu, hulinguzudila himahima, kuna winji wa igano lya kwimilila na kukundigwa.
PSA 86:16 Unyhinduchile, umbonele isungu, umhe heni mong'ho wa hegwe, heni chitumagwa wa hegwe, undohole mbele mwana wa mpogozi wa hegwe.
PSA 86:17 Gwa Mkulu Nguluwi, undajile ulajilo wa kunoga kwa hegwe, leka wala walingunzudila walole na kubasigwa soni, kwa vila nakunhanza na kunyhembuliza.
PSA 87:1 (Zabuli ya Wakola. Lwimbo.) Nguluwi nakazenga muji wa heye mchanya mwa chidunda cha heye chelile.
PSA 87:2 Mkulu Nguluwi kanguugana muji wa Siyoni, kusinda kaye kuyage kwa Yakobo.
PSA 87:3 Mbuli ng'hulu zangulonjigwa kwa chiwalo cha hegwe, gwa muji wa Nguluwi.
PSA 87:4 “Hali wala walingunzela, wa baho wanhu wa Misili na Babuloni, hihyo du wanhu wa Filistiya na Tilo na Kushi, weng'ha wolonga, ‘Ayu nakapondigwa ako Siyoni.’ ”
PSA 87:5 Kuwala Siyoni yolonjigwa ahi, “Siyoni ndo mamo wa wala weng'ha, Nguluwi Yawele Kuchanya koutawiza.”
PSA 87:6 Mkulu Nguluwi kokwandika kuli chitabu, hoyowika kukumbuchila kwa wanhu. “Ayu nakapondigwa ako Siyoni.”
PSA 87:7 Weng'ha wanguvina ngoma na kwimba, “Nzasa za heni zeng'ha za kwa hegwe.”
PSA 88:1 (Zabuli ya Wakola. Kwa yalingwaluchiza kwimba. Kwa kiwhana na Mahalati Nealoti. Ilanguso lya Hemani Mwesila.) Gwa Mkulu Nguluwi, mlohozi wa heni, ndangulila nemisi yeng'ha, na nechilo ndangukulanda.
PSA 88:2 Kulanda kwa heni kukufichile, uhulichize chililo cha heni.
PSA 88:3 Kugazika kwinji nakufika heni, nani nda habehi kuli isi ya wabagame.
PSA 88:4 Ndangoneka kota munhu yalingudulika kuli ikulubila likulu, mong'ho wa heni weng'ha naumalila.
PSA 88:5 Nandechigwa hali wabagame, kota wakopoligwe wawele kuli chilaga, kota wala wawele hegwe hambe uwakumbuchile kahi, wawele nawabaguligwa na kwamilwa kwa hegwe.
PSA 88:6 Nakunhoza kuli ikulubila likulu lilutile hanyi ng'hatu, hali honhu ha mgati ng'hatu hawele na jiza.
PSA 88:7 Ng'halazi ya hegwe naiwa itunyo ikulu kwa heni, nakungubika kwa nhigu za hegwe zeng'ha.
PSA 88:8 Nakuwadita goloko wa heni webagule na heni, nakundita ndiwe izudizo kwa hewo. Ndiwopigwa mgati, siweza hebu kusulupuka,
PSA 88:9 meho ga heni ndo ng'hochele kwa masinzo. Chila zuwa ndangukulilila, gwa Mkulu Nguluwi, ndangukugololela moko ga heni.
PSA 88:10 Ndaze, hegwe kwanguwaditilaga wabagame kububuwaza kwa hegwe? Ndaze, muhe wa wabagame wangwinukaga na kukutogola?
PSA 88:11 Ndaze, igano lya kwimilila lya hegwe lyangudamligwa kuli chilaga, ama kukundigwa kwa hegwe kuli haluga ha kudumya?
PSA 88:12 Ndaze, kububuwaza kwa hegwe kwanguzeleka amo kuli jiza, ama kutanganika kwa hegwe kuli isi ya wasemwigwe?
PSA 88:13 Ila heni ndangukulilila, gwa Mkulu Nguluwi, chila mitondo ndangukugalila kulanda kwa heni.
PSA 88:14 Lekachoni, gwa Mkulu Nguluwi, kwangundema? Hambi lekachoni kwanguvisa heni kumeho kwa hegwe?
PSA 88:15 Nangazika na kuhejelela kubagama kulawa kuli usongolo wa heni, nangazika kwa ukabuso wa hegwe, nhoka lukami.
PSA 88:16 Kuzudila kwa hegwe kufichila heni, kutowa kwa hegwe kwa kukabusa kwangundumya.
PSA 88:17 Kwangunzunguluta kota mazi tendema nemisi yeng'ha, gangunzunguluta chila ubanzi.
PSA 88:18 Nakuwadita goloko na wayangu weng'ha wambagule, jiza ndo liwa miyangu hela.
PSA 89:1 (Ilanguso lya Etani Mwesila.) Gwa Mkulu Nguluwi, ndokwimba igano lya kwimilila lya hegwe mazuwa gose, Ndowikula kuli lulelo lweng'ha kukundigwa kwa hegwe.
PSA 89:2 Ndangulonga kota igano lya kwimilila lya hegwe lyangikala mazuwa gose, kukundigwa kwa hegwe kolutilila mazuwa gose kota ulanga.
PSA 89:3 Nakulonga, “Nandita ilagano na yahaguligwe wa heni, nandimlahila chitumagwa wa heni Daudi,
PSA 89:4 ‘Mazuwa gose ndomuwika mlelwa wa hegwe yawe mndewa, kahi ndoulolela undewa wa hegwe mazuwa gose.’ ”
PSA 89:5 Ulanga uvitogole vinduzanduza vya hegwe, gwa Mkulu Nguluwi, kukundigwa kwa hegwe kutogoligwe hali nhing'hano ya welile.
PSA 89:6 Whaani ako kilanga yoweza kiwhanizwa na hegwe, gwa Mkulu Nguluwi? Whaani yawele kota hegwe hali vilumbigwe vya kilanga?
PSA 89:7 Hegwe Nguluwi kwangudumbigwa kuli chitala cha welile, weng'ha walingukuzunguluta wangububuwazwa.
PSA 89:8 Gwa Mkulu Nguluwi, Nguluwi Yawele na Mong'ho, whaani yawele na mong'ho kota hegwe, gwa Mkulu Nguluwi? Kukundigwa kwa hegwe nakukuzunguluta banzi zeng'ha.
PSA 89:9 Hegwe kwangulongoza kutiguka kwa bahali, nhigu yake hoikwinuka, kwanguidita isindamale.
PSA 89:10 Nakulihonda izoka Lahabu na kulikopola, nakuwasambalula wang'honyo wa hegwe kwa mong'ho wa hegwe.
PSA 89:11 Ulanga ndo wa hegwe na isi ndo ya hegwe kahi, isi zeng'ha na vinhu vyeng'ha vilimumo hegwe nakuvilumba.
PSA 89:12 Hegwe nakulumba kasikazini na kusini, vidunda vya Taboli na Helimoni vyangukutogola kwa kusangalala.
PSA 89:13 Moko wa hegwe una mong'ho, moko wa hegwe una mong'ho na nausumya.
PSA 89:14 Kutanganika na hachi ndo msisi wa chigoda cha hegwe cha undewa, igano lya kwimilila na kukundigwa vyangukulongola.
PSA 89:15 Nawatambichizwa wanhu walinguweza kukutowela luchenze, walingikala kuli lumuli lwa kumeho kwa hegwe, gwa Mkulu Nguluwi.
PSA 89:16 Wangusangalala nemisi yeng'ha kwa chiwalo cha hegwe, na kukutogola kwa chiwalo cha kutanganika kwa hegwe.
PSA 89:17 Hegwe ndo ukulu na mong'ho wa hewo, kwa uganililo wa hegwe twanguwa na kusumya.
PSA 89:18 Gwa Mkulu Nguluwi, hegwe ndo mwamizi wa hetwe, mndewa wa hetwe nakalawa kwa hegwe, gwa Welile wa Isilaeli.
PSA 89:19 Katali nakulonga kuli kulota, nakuwalonjela vitumagwa wa hegwe wa kukundigwa, “Ndimha mong'ho yalingitowa, ndimha ukulu ayo yondimhagule hali wanhu.
PSA 89:20 Nandimpata Daudi chitumagwa wa heni, nandimbakaliza mafuta ga heni gelile.
PSA 89:21 Moko wa heni wa mong'ho wowa na heye mazuwa gose, moko wa heni nene baha womwimiza nzinzili.
PSA 89:22 Wang'honyo hawoweza kumsumya, ne wehile hawomditila vibi.
PSA 89:23 Ndowahonda walingitwanza na heye, ndowadumya weng'ha walingumzudila.
PSA 89:24 Ndowa wa kukundigwa na yawele na igano lya kwimilila kwa heye, kwa itagwa lya heni kowa na kusumya kukulu.
PSA 89:25 Ndowimiza nzinzili undewa wa heye, kulawa kuli bahali mbaka kuli lwanda.
PSA 89:26 Heye konyhema, ‘Hegwe ndo mhaza wa heni, Nguluwi wa heni, italawe na ulohozi wa heni.’
PSA 89:27 Nani ndomdita yawe mlelwa wa heni wa mwaluko, mkulu kusinda wandewa weng'ha muisi.
PSA 89:28 Igano lya kwimilila lya heni ndomuwichila mazuwa gose, na ilagano lya heni na heye lyochikala mazuwa gose.
PSA 89:29 Ndodita lukolo lwa heye lwa chiundewa lwikale mazuwa gose, na chigoda cha heye cha undewa kota ulanga.
PSA 89:30 “Wone walelwa wa heye wogaleka malanguso ga heni, howochikala kwa kuleka utaguso wa heni,
PSA 89:31 wone wobena mizilo ja heni, na kuleka kuhulichiza malajizo ga heni,
PSA 89:32 aho ndowagaza kwa nongwa za hewo, ndowatowanga kwa chiwalo cha gehile ga hewo.
PSA 89:33 Ila sikusa igano lya kwimilila lya heni kwa Daudi, ne kuleka kukundigwa kwa heni.
PSA 89:34 Sibena ilagano lya heni na heye, ne kugalula ulonzi wondonjile kwa mlomo wa heni.
PSA 89:35 “Nandilaha kamwe hela kwa welile wa heni, nani hambe ndimlonjele Daudi udesi.
PSA 89:36 Ivyazi lya heye lyolongoza mazuwa gose, na undewa wa heye kota isanya.
PSA 89:37 Lochikala mazuwa gose kota nyelezi vyoilingulawa kuli ulanga.”
PSA 89:38 Ila sambi Gwa Nguluwi, nakumuwika kutali na hegwe na kumlema, nakumema ng'halazi kwa ayo youmbakalize mafuta.
PSA 89:39 Nakusa ilagano lyouliwichile na ayo chitumagwa wa hegwe, nakutoza kofia ya undewa wa heye kuli nhimbwisi.
PSA 89:40 Lukanzi lweng'ha lwa muji wa heye nakubomola, ngome za heye nakuwifyanga.
PSA 89:41 Weng'ha walingukola wanguhola lufufu lwa heye, nakawa wa kubezigwa kwa walingikala habehi na heye.
PSA 89:42 Wang'honyo wa heye nakuwapa kusumya, nakuwasangalaza.
PSA 89:43 Vinhu vya heye vya kitowa ngondo nakuviwifya, nakumleka yalemwele kuli ngondo.
PSA 89:44 Nakusa ukulu wa heye wa chiundewa nakuchigwisa chigoda cha heye cha undewa.
PSA 89:45 Nakumpunguzila mazuwa ga usongolo wa heye, nakumgubika kwa igolole lya soni.
PSA 89:46 Mbaka hanili? Gwa Mkulu Nguluwi, kochivisa mbaka mazuwa gose? Mbaka hanili ng'halazi ya hegwe yokwaka kota chiluli?
PSA 89:47 Ukumbuchile ukomu wa heni vyouwele udo, kota munhu youmlumbile kangikala kwa mhela uchefu.
PSA 89:48 Whaani yalingikala ne kubagama? Whaani yoweza kusulupuka kuli isi ya wabagame?
PSA 89:49 Gwa Mkulu, lya kohi lelo igano lya kwimilila lya hegwe, lyoumlahile Daudi kwa kukundigwa kwa hegwe?
PSA 89:50 Gwa Mkulu, ukumbuchile vyowalingumliga chitumagwa wa hegwe, ndaze vyondilingwimilila maligo ga wanhu wa isi zeng'ha.
PSA 89:51 Lole vyowalingumseka, gwa Mkulu Nguluwi, ndaze vyowalingumbeza yabakalizwe mafuta wa hegwe chila hoyoluta.
PSA 89:52 Yatogoligwe Mkulu Nguluwi mazuwa gose. Ena! Ena!
PSA 90:1 (Kulanda kwa Musa, munhu wa Nguluwi.) Gwa Mkulu, kulawa lulelo lweng'ha, hegwe nakuwa kikala goya kwa hetwe.
PSA 90:2 Loving'hali kuwa vidunda, louwele ung'hali kulumba isi yeng'ha, hegwe ndo Nguluwi, kulawa mazuwa gose mbaka mazuwa gose.
PSA 90:3 Kwangumlonjela munhu, “Uhiluche kuli nhimbwisi.” Naye munhu kanguhilukaga kuli nhimbwisi nakoyalawile.
PSA 90:4 Kwa hegwe miyaka elufu ndo kota zuwa limwe hela, ndo kota zuwa likolile hela, kwa hegwe ndo kota mhela uchefu wa nechilo.
PSA 90:5 Kwanguwajiliza wanhu kota kulota. Munhu ndo kota misolo jilinguzuchila mitondo.
PSA 90:6 Mitondo janguzuchilaga na kubahula, ila matinazo janguswinhaga na kukala.
PSA 90:7 Ng'halazi ya hegwe yangutudumya, twangukabuswa na kuzudila kwa hegwe.
PSA 90:8 Nongwa za hetwe nakuziwika kumwando kwa hegwe, gehile ga hetwe ga chinyele ga hazelu hali hegwe.
PSA 90:9 Kwa ng'halazi ya hegwe, ukomu wa hetwe wangwajilila, wangumala kota lweselo.
PSA 90:10 Miyaka ja kikala ndo makumi saba, ama wone tuwe na mong'ho, makumi nane, ila geng'ha ndo magazo na kisinza. Mazuwa gangupuluta himahima, natwe twangubilabila himahima.
PSA 90:11 Whaani yalinguvizela itunyo lya ng'halazi ya hegwe? Kwa vila kuzudila kwa hegwe ndo kukulu, kota kudumba kotulinguganigwa kuwa nako kwa hegwe.
PSA 90:12 Utulanguse kuvizela kota ukomu wa hetwe ndo uchefu, leka tuwe na luhala.
PSA 90:13 Gwa Mkulu Nguluwi, uwe na isungu. Kozudila mbaka hanili? Utonele isungu hetwe vitumagwa wa hegwe.
PSA 90:14 Utugutize igano lya kwimilila lya hegwe mitondo, tutowe luchenze na kusangalala kuli ukomu wa hetwe weng'ha.
PSA 90:15 Ututambichize lelo miyaka minji ja kusangalala, kota vyoutupele miyaka minji ja magazo na kisinza.
PSA 90:16 Utulajile madito ga hegwe hetwe vitumagwa wa hegwe, uwalajile walelwa wa hetwe ludali lwa hegwe lwa ukulu.
PSA 90:17 Uganililo wa hegwe, gwa Mkulu, Nguluwi wa hetwe, chotulingudita uchiwiche chiwe goya, ena, uchiwiche goya chila chotulingudita.
PSA 91:1 Heye yalingikala hali honhu ha kikala goya ha Nguluwi Yawele Kuchanya, kokwesela kuli lubehelo lwa Nguluwi Yawele na Ludali.
PSA 91:2 Ndolonga kwa Mkulu Nguluwi, “Hegwe ndo honhu ha heni ha kubilimila na ngome ya heni, Nguluwi wa heni yondilingitumbila.”
PSA 91:3 Ena, Nguluwi kokulohola kuli idiwa lya mpelembi, kokwamila kuli matamwa galingukopola.
PSA 91:4 Kokugubika kwa mabawa ga heye, kowa na kikala goya hala, kukundigwa kwa heye kokwamila kota ngawo.
PSA 91:5 Hulinguganigwa kudumba kukabusa kwa nechilo ne kutowigwa na misale baho du nemisi,
PSA 91:6 ne utamwa ulinguya nechilo, ne kubagama kulingulawila nemisi.
PSA 91:7 Hanga wanhu elufu wogwa habehi na hegwe, ena, elufu kumi kwa moko wa hegwe wa kudilo, ila hegwe kubagama hambe kukuhejelele.
PSA 91:8 Kwa meho ga gwegwe baho, kolola ndaze wanhu wehile vyowalingugazigwa.
PSA 91:9 Kwa vila nakumdita Mkulu Nguluwi ndo honhu ha hegwe ha kubilimila, ena, Nguluwi Yawele Kuchanya yawele ndo kaye kwa hegwe,
PSA 91:10 ahyo, hufichigwa na wihe woneche, ihema lya hegwe halifichigwa na utamwa woneche.
PSA 91:11 Kwa vila Nguluwi kowalajiza wahilisi wa heye, kwa chiwalo cha hegwe, leka wakwamile koneche kouluta.
PSA 91:12 Wokuwika mmoko mwawo, leka magulu ga hegwe galeche kikwang'hwala kuli iganga.
PSA 91:13 Kojisumya misimba na mizoka, kojihonda misimba na mingole.
PSA 91:14 Nguluwi kangulonga, “Ndomlohola yula yalingungana, ndomwamila yula yalingunzela.
PSA 91:15 Hoyonyhema nani ndomwidichila, hoyowa kuli magazo ndowa hamwe na heye, ndomlohola na kumhulichiza.
PSA 91:16 Ndomdita yasangalale kwa ukomu wa mihela minji, ndomlajila ulohozi wa heni.”
PSA 92:1 (Zabuli. Lwimbo lwa Zuwa lya Kwesela.) Inoga kukulonjela, gwa Mkulu Nguluwi malumbo, kulimbila lutogo itagwa lya hegwe, gwa Nguluwi Yawele Kuchanya.
PSA 92:2 Inoga kuwikula igano lya kwimilila lya hegwe mitondo, na kukundigwa kwa hegwe mhela wa nechilo,
PSA 92:3 kwa muziki wa igombogombo lya ng'weso kumi na ching'weleng'wele, na kwa lizi linojile lya igombogombo.
PSA 92:4 Gwa Mkulu Nguluwi, madito ga hegwe gangusangalaza heni, ndokutowela luchenze kwa chiwalo cha mbuli za hegwe zeng'ha zouditile.
PSA 92:5 Gwa Mkulu Nguluwi, madito ga hegwe ndo makulu ng'hatu. Majesa ga hegwe ndo itunyo ng'hatu.
PSA 92:6 Mpoka howeza kuvizela, ne yasowile nyhala haizelele mbuli ayi,
PSA 92:7 hanga wehile woweza kudedemka kota misolo, na walingudita wihe weng'ha mbuli za hewo zowalutila goya, kuduma kwa hewo ndo kudumigwa mazuwa gose,
PSA 92:8 ila, gwa Mkulu Nguluwi, hegwe kwa kuchanya mazuwa gose.
PSA 92:9 Wang'honyo wa hegwe, gwa Mkulu Nguluwi, ulole, hewo wang'honyo wa hegwe, ndikomya wodumigwa, weng'ha walingudita wihe wosambaluka.
PSA 92:10 Hegwe nakumha heni mong'ho kota ibogo, nakumbakaliza heni mafuta ganojile.
PSA 92:11 Kwa meho nambona wang'honyo wa heni nawalemwela, kwa makutu nanyhulika chililo cha walingunditila wihe.
PSA 92:12 Watanganiche wangudedemkaga kota mitende, wangukulaga kota mielezi ja Lebanoni.
PSA 92:13 Awo ndo kota migodi jinyaligwe haluga ha Mkulu Nguluwi, jangudedemkaga kota migodi mgati mwa lugagala lwa Nguluwi wa hetwe,
PSA 92:14 wangulutililaga kulela mafuza kuli mhela wa kulala, mazuwa gose wangumemaga unhomvu na wanguwaga wadodi,
PSA 92:15 Wowikula, “Mkulu Nguluwi ndo yatanganiche, heye ndo italawe lya heni, mgati mwa heye haduhu ne wihe.”
PSA 93:1 Mkulu Nguluwi kangulongoza, nakevika ukulu ng'hatu. Mkulu Nguluwi nakavala ukulu na mong'ho. Nakayimiza nzinzili isi yeng'ha, nayo haitigasika hebu.
PSA 93:2 Chigoda cha hegwe cha undewa cha nzinzili kulawa katali, hegwe nawali baho mihela jeng'ha lojing'hali kuwa.
PSA 93:3 Mazi menji nagalavya lizi, gwa Mkulu Nguluwi, ena, nagakwiniza lizi lyake, mazi menji gangukwiniza kahi kubuma kwake.
PSA 93:4 Heye ndo mkulu kusinda kubogoma kwa mazi makulu, ndo mkulu kusinda nhigu za bahali, Mkulu Nguluwi yalingikala kuchanya kana mong'ho.
PSA 93:5 Gwa Mkulu Nguluwi, malajizo ga hegwe gema nzinzili, welile wa ng'handa ya hegwe wangunojeza mazuwa gose.
PSA 94:1 Gwa Mkulu Nguluwi, Nguluwi yalinguhilula chibida, hegwe Nguluwi mhilula chibida, wilajile.
PSA 94:2 Wime, gwa mtagusa wa isi yeng'ha, uwagaze walingidaya vyoilinguganigwa.
PSA 94:3 Mbaka hanili, gwa Mkulu Nguluwi, wehile wotowa luchenze?
PSA 94:4 Wangulonga ulonzi wa ujuvi, wadita wihe weng'ha nawamema kidaya.
PSA 94:5 Gwa Mkulu Nguluwi, wanguwadumya wanhu wa hegwe, wanguwagaza hewo uwahagule.
PSA 94:6 Wanguwakopola wadala wafililwe na walume wawo na wajenzi, wanguwakopola walekwa.
PSA 94:7 Wangulonga, “Mkulu Nguluwi halingona hebu, Nguluwi wa Yakobo havizelele.”
PSA 94:8 Hemwe wapoka wa kuduma, mijese hado. Hemwe msowile nyhala hanili mowa na luhala?
PSA 94:9 Yaliditile ikutu, ndaze, howeza kuhulika? Yalumbile iziho, ndaze, howeza kona?
PSA 94:10 Ndaze, yalinguwazapa wanhu wa isi howeza kugaza? Yalinguwalangusa wanhu uwanzi.
PSA 94:11 Mkulu Nguluwi kangugazela majesa ga wanhu, kanguvizela kota hagotanza chinhu.
PSA 94:12 Gwa Mkulu Nguluwi, nakatambichizwa munhu ulingumzapa, munhu ulingumlangusa malajizo ga hegwe,
PSA 94:13 leka zuwa lya magazo yesele, mbaka wehile wabawilwe chilaga.
PSA 94:14 Mkulu Nguluwi howaleka wanhu wa heye, howatoza wahaguligwe na heye.
PSA 94:15 Kwa vila nhaguso zolavigwa kwa hachi, weng'ha wagoloche nhumbula wozibatilila.
PSA 94:16 Whaani yawele yanhanzile kitwanza na munhu mwihe? Whaani nayawele ubanzi umwe na heni kwa chiwalo cha wehile?
PSA 94:17 Wone Mkulu Nguluwi yahalechile kunhanza, ndahawele habehi kuluta kuli isi ya wabagame.
PSA 94:18 Londijesile kota ndangutelela, gwa Mkulu Nguluwi, igano lya kwimilila lya hegwe nalinyimiza nzinzili.
PSA 94:19 Kusanzalima kwa nhumbula ya heni hokuwa kwinji lukami, hegwe kwangunyhembuliza na kusangalaza heni.
PSA 94:20 Hegwe huweza kihanza na watagusa wehile, walinguwika mizilo ja kuwagaza wanhu.
PSA 94:21 Wangikungajiza kuwaditila wihe watanganiche, na kuwatagusa kubagama, wanhu walihela nongwa.
PSA 94:22 Ila Mkulu Nguluwi ndo ngome ya heni, Nguluwi wa heni ndo italawe lya kunyamila.
PSA 94:23 Wihe wa hewo, heye kowahilusila hewo wawo, kowadumya kwa chiwalo cha wihe wa hewo. Mkulu Nguluwi, Nguluwi wa hetwe, kowadumya.
PSA 95:1 Muye tumwimbile Mkulu Nguluwi, tumtowele luchenze italawe lya ulohozi wa hetwe.
PSA 95:2 Tulute hali heye na kulonga malumbo, tumtowele luchenze na nzimbo za lutogo.
PSA 95:3 Kwa vila Mkulu Nguluwi, ndo Nguluwi mkulu, heye ndo Mndewa mkulu hali milungu jeng'ha.
PSA 95:4 Mgati ng'hatu mwa isi kwa mmoko mwa heye, mbaka kuli vinhembenhembe vya vidunda ndo vya heye.
PSA 95:5 Bahali ndo ya heye, ndo yaiditile, kwa moko ga heye nakalumba isi ng'havu.
PSA 95:6 Muye tinamize na kumfugamila, tufugame hali Mkulu Nguluwi, yatulumbile hetwe.
PSA 95:7 Kwa vila heye ndo Nguluwi wa hetwe, natwe twa wanhu wa heye, ndo ming'holo ja heye yalingujidima. Wone lehano mohulika lizi lya heye,
PSA 95:8 “Mleche kuzidita nhumbula za hemwe ziwe zigagadale kota kula Meliba, kota vyowawele kula kuchiwala Masa.
PSA 95:9 Wasekulu wa hemwe lowanjezile na kupima majesa ga heni, hanga nawajona mijito ja heni.
PSA 95:10 Kwa miyaka makumi gane nanzudizwa ng'hatu na hewo, nandonga, ‘Ndikomya, wanhu wano nawajilila mnhumbula za hewo. Nawo hawazizelele nzila za heni.’
PSA 95:11 Lelo nanzudila ng'hatu, nandilaha, ‘Hawokwinjila hali honhu hangu ha kwesela.’ ”
PSA 96:1 Mumwimbile Mkulu Nguluwi lwimbo lunyale. Mumwimbile Mkulu Nguluwi, isi yeng'ha.
PSA 96:2 Mumwimbile Mkulu Nguluwi na kulitogola itagwa lya heye. Mdamle chila zuwa madito ga heye ga ulohozi.
PSA 96:3 Muuwikule ukulu wa heye hali wanhu wa isi zeng'ha, muwalonjele wanhu weng'ha madito ga heye ga vinduzanduza.
PSA 96:4 Kwa vila Mkulu Nguluwi ndo mkulu, kangutogoligwa ng'hatu, kanguganigwa kudumbigwa kusinda milungu jeng'ha.
PSA 96:5 Kwa vila milungu jeng'ha ja wanhu ndo jimalukolo hela, ila Mkulu Nguluwi nakalumba ulanga.
PSA 96:6 Ukulu na lutogo vya hali heye, mong'ho na kunoga vyangumemeza ng'handa ya heye.
PSA 96:7 Mumhe Mkulu Nguluwi lutogo, hemwe ivyazi za isi yeng'ha, ena, mumtogole kwa ukulu na mong'ho wa heye.
PSA 96:8 Mumfugamile Mkulu Nguluwi kwa ukulu wa itagwa lya heye, migale nhambiko na muye hali lugagala lwa heye.
PSA 96:9 Mumfugamile Mkulu Nguluwi kuli welile ng'hatu wa heye, Ukakame hali heye, hegwe isi yeng'ha.
PSA 96:10 Muwalonjele wanhu wa isi zeng'ha, “Mkulu Nguluwi kangulongoza! Ena, isi yeng'ha nayima nzinzili, haitigasika hebu. Kowatagusa wanhu kwa hachi.”
PSA 96:11 Usangalale hegwe ulanga, utowe luchenze hegwe isi, bahali ibogome na vyeng'ha viwele mumo.
PSA 96:12 Msangalale hemwe migunda na vyeng'ha viwele mumo. Hamba migodi jeng'ha ja kisolo, jokwimba kwa usangalalo,
PSA 96:13 hali Mkulu Nguluwi, kwa vila kanguya, ena, kanguya kuitagusa isi yeng'ha. Koitagusa isi kwa hachi, na wanhu wa isi kwa kukundigwa kwa heye.
PSA 97:1 Mkulu Nguluwi kangulongoza. Usangalale hegwe isi. Msangalale hemwe vihilwa vinji.
PSA 97:2 Ng'hungugu na jiza totolo vyangumzunguluta, kutanganika na hachi ndo msisi wa chigoda cha heye cha undewa.
PSA 97:3 Chiluli changulongola kumwando kwa heye, kuwalakaza wang'honyo wa heye banzi zeng'ha.
PSA 97:4 Lumwemwesa lwa heye lwangulangazila isi yeng'ha, isi yanguwona na kukakama.
PSA 97:5 Vidunda vyangusungulumuka kota ihota hali Mkulu Nguluwi, ena, hali Mkulu wa isi yeng'ha.
PSA 97:6 Ulanga wanguwikula kutanganika kwa heye, wanhu wa isi yeng'ha wanguwona ukulu wa heye.
PSA 97:7 Weng'ha walingujikolela mijito jimalukolo, ena, weng'ha walingujitogola milungu, jiwele hajilingutanza chinhu, wangubasigwa soni. Milungu jeng'ha jangufugama hali Mkulu Nguluwi.
PSA 97:8 Wanhu wa Siyoni wangusangalala, wanhu wa Yuda wangutowa luchenze, kwa chiwalo cha nhaguso za hegwe, gwa Mkulu Nguluwi.
PSA 97:9 Hegwe Mkulu Nguluwi ndo Nguluwi Yawele Kuchanya, mchanya mwa isi yeng'ha, hegwe kuna ukulu ng'hatu mchanya mwa milungu jeng'ha.
PSA 97:10 Wala walingumgana Mkulu Nguluwi, wauzudile wihe, kwa vila kangwamilaga ukomu wa walingukundigwa wa heye, kanguwaloholaga kuli ndole za wang'honyo.
PSA 97:11 Lumuli lwanguwamwemweselaga watanganiche, usangalalo kwa wanhu wawele na nhumbula zigoloche.
PSA 97:12 Msangalale kwa chiwalo cha Mkulu Nguluwi hemwe watanganiche, mlonje malumbo kwa chiwalo cha itagwa lya heye lyelile.
PSA 98:1 Mumwimbile Mkulu Nguluwi lwimbo lunyale, kwa vila nakadita mbuli za vinduzanduza. Moko wa heye wa kudilo uzidahe, moko wa heye welile naumha heye kusumya.
PSA 98:2 Mkulu Nguluwi nakalajila ulohozi wa heye, nakawalajila wanhu wa isi zeng'ha kutanganika kwa heye.
PSA 98:3 Nakalikumbuchila igano lya kwimilila na kukundigwa kwa heye kwa Waisilaeli. Banzi zeng'ha za isi nazona ulohozi wa Nguluwi wa hetwe.
PSA 98:4 Isi yeng'ha itowe luchenze kwa chiwalo cha Mkulu Nguluwi, imtogole kwa nzimbo za usangalalo.
PSA 98:5 Mumtogole Mkulu Nguluwi kwa kutowa luchenze, mumtogole kwa lizi linojile lya igombogombo.
PSA 98:6 Mumtowele luchenze Mkulu Nguluwi mndewa wa hetwe, msangalale kwa mhalamhanda na mbalati.
PSA 98:7 Bahali ibogome na vyeng'ha viwele mumo, isi zeng'ha na weng'ha walingikala mgati mwake.
PSA 98:8 Hemwe nzanda mtowe vimbamba, hemwe vidunda mwimbe hamwe kwa kusangalala.
PSA 98:9 Visangalale hali Mkulu Nguluwi, kwa vila kanguya kuitagusa isi yeng'ha. Kozitagusa isi zeng'ha kwa hachi, kowatagusa wanhu kwa kutanganika.
PSA 99:1 Mkulu Nguluwi kangulongoza, wanhu wa isi zeng'ha wangukakama. Nakekalisa hagati ha vilumbigwe viwele na mabawa, isi yangutigasika.
PSA 99:2 Mkulu Nguluwi ndo mkulu ako Siyoni, kangwinuligwa hali wanhu wa isi zeng'ha.
PSA 99:3 Weng'ha walitogole itagwa lya heye likulu lya kukabusa. Yelile ndo heye.
PSA 99:4 Gwa mndewa uwele na mong'ho, ulingugana kutanganika. Nakutawiza hachi kuli Isilaeli, nawigala kutanganika na hachi.
PSA 99:5 Mumtogole Mkulu Nguluwi, Nguluwi wa hetwe, mugwe chifunama hali heye. Yelile ndo heye.
PSA 99:6 Musa na Aluni nawali watambika wa heye, Samweli nayali hali wala walichemile itagwa lya heye. Nawamlilila Mkulu Nguluwi naye nakawedichila.
PSA 99:7 Nakalonga nawo kulawa kuli izengo lya ng'hungugu, nawebatilila nhaguso za heye na mizilo joyawapele.
PSA 99:8 Gwa Mkulu Nguluwi, Nguluwi wa hetwe, hegwe nakuwedichila, kwa hewo nawali Nguluwi uwele ulinguwalechela wanhu, hanga nakuwagaza kwa nongwa za hewo.
PSA 99:9 Mumtogole Mkulu Nguluwi, Nguluwi wa hetwe, mfugamile kuli chidunda cha heye chelile. Mkulu Nguluwi, Nguluwi wa hetwe, ndo yelile.
PSA 100:1 (Zabuli ya kulonga malumbo.) Mumtowele luchenze Mkulu Nguluwi, hemwe isi zeng'ha.
PSA 100:2 Mumfugamile Mkulu Nguluwi kwa kusangalala, mlute kwa heye kuno mkwimba kwa kusangalala.
PSA 100:3 Mvizele kota Mkulu Nguluwi ndo Nguluwi. Heye ndo yatulumbile, natwe twa wa heye, hetwe ndo wanhu wa heye, ndo ming'holo hali honhu ha heye ha kudimila.
PSA 100:4 Mkole hali lwizi lwa ng'handa ya heye kwa kulonga malumbo, mwinjile kuli lugagala lwake kwa lutogo, mlonje malumbo Nguluwi na kulitogola itagwa lyake.
PSA 100:5 Kwa vila Mkulu Nguluwi nakanoga, igano lya kwimilila lya heye lyangikala mazuwa gose, kukundigwa kwa heye kwangulutilila hali lulelo lweng'ha.
PSA 101:1 (Zabuli ya Daudi.) Ndokwimba kuwala igano lya kwimilila lya hegwe na hachi ya hegwe, gwa Mkulu Nguluwi, kwa hegwe ndokwimba lutogo.
PSA 101:2 Ndobatilila nzila iwele inojile. Ndaze, kokuya nili kwa heni? Ndochikala kwa kugoloka haluga ha heni,
PSA 101:3 sikwimilila hebu upoka. Ndangugazudila madito ga wanhu wajilile, mbuli za hewo haziwa hamwe na heni.
PSA 101:4 Kwajilila koneche kula kuwe kutali na heni, heni ndowa haduhu ng'hatu hali wihe.
PSA 101:5 Yalingumlonga vibi kwa uviso yawele habehi na heye, ndomdumya, siweza kumwimilila munhu yalingidaya.
PSA 101:6 Meho ga heni gowa mchanya mwa wanhu wawele wa kukundigwa kuli isi, leka wekale hamwe na heni. Wanhu wagoloche ndo wong'holela mijito.
PSA 101:7 Mhadi yoneche hochikala haluga ha heni ha undewa, haduhu yalingulonga udesi yochikala kwa heni.
PSA 101:8 Zuwa mbaka zuwa ndowasumya wehile weng'ha kuli isi, ndowawinga wehile weng'ha kuli muji wa Mkulu Nguluwi.
PSA 102:1 (Kulanda kwa munhu yawele kuli magazo na yawele kangumhilichila Mkulu Nguluwi kung'ung'uta kwa heye.) Gwa Mkulu Nguluwi, uhulichize kulanda kwa heni, na chililo cha heni chikufichile.
PSA 102:2 Uleche kivisa kutali na heni mhela wa magazo. Umbichile goya ikutu lya hegwe, unyidichile himahima mhela hondikulanda.
PSA 102:3 Mazuwa ga heni gangukola kota iyosi, mizeje ja heni jangulakala kota kuli itanulu.
PSA 102:4 Namhondigwa mnhumbula kota misolo na kuswinha, hambe ngane ne chilyo.
PSA 102:5 Kwa chiwalo cha magazo ga heni, namhona mizeje na ngozi.
PSA 102:6 Ndayeka kota chideje cha kuchiwala, kota ituwe kuli chihame.
PSA 102:7 Ndanguwasa meho mwanzi, kota chideje chichiwa mchanya mwa chinduwiko cha ng'handa.
PSA 102:8 Nemisi yeng'ha wang'honyo wa heni wangundonga vibi, Walingumbeza heni wanguwapanjila wanhu wanji kwa itagwa lya heni.
PSA 102:9 Kwa vila ndangulombocheza, mivu janguwa chilyo cha heni, mahozi ndangugahanza na chakunwa cha heni,
PSA 102:10 kwa chiwalo cha kuzudila na ng'halazi ya hegwe, kwa vila nakundokota na kunhozela kutali.
PSA 102:11 Ukomu wa heni ndo kota isisila lya matinazo, ndanguswinha kota misolo.
PSA 102:12 Ila gwa Mkulu Nguluwi, hegwe, kwangulongoza mazuwa gose, itagwa lya hegwe lyangukumbuchilwa lulelo lweng'ha.
PSA 102:13 Hegwe kokwinuka na kuwonela isungu muji wa Siyoni, kwa vila mhela naufika wa kuuditila ganojile, mhela wake uwichigwe naufika.
PSA 102:14 Kwa vila vitumagwa wa hegwe wanguuhulichiza lukami, hanga naulala lukami, wanguwonela isungu, hanga nauwifigwa ng'hatu.
PSA 102:15 Wanhu wa isi zeng'ha wolihulichiza itagwa lya Mkulu Nguluwi, wandewa weng'ha muisi wodumba ukulu wa heye.
PSA 102:16 Kwa vila Mkulu Nguluwi kouzenga kahi muji wa Siyoni, na koneka vyoyawele mkulu.
PSA 102:17 Kokukunda kulanda kwa yalihela chinhu, hambe yakuleme kulanda kwa hewo.
PSA 102:18 Wandiche mbuli ayi kwa chiwalo cha lulelo lulinguya, leka howopondigwa hamba wamtogole Mkulu Nguluwi.
PSA 102:19 “Nakalola hasi kulawa honhu helile ha heye hawele kuchanya, Mkulu Nguluwi nakailola isi kulawa kilanga.
PSA 102:20 Nakahulika kulila kwa wanweng'hwa, nakawalechela welejehe wowatagusigwe kukopoligwa.”
PSA 102:21 Ahyo wanhu woliwikula itagwa lya Mkulu Nguluwi ako Siyoni, lutogo lwa heye lyowikuligwa ako Yelusalemu,
PSA 102:22 mhela wanhu wa isi zeng'ha howoting'hana hamwe, na wandewa howoting'hana kumfugamila Mkulu Nguluwi.
PSA 102:23 Nguluwi nakamhunguzila mong'ho londiwele nding'hali msongolo, nakambuza ukomu wa heni uwe udo.
PSA 102:24 Ahyo nandonga, “Gwa Nguluwi wa heni, uleche kukunda mbagame, mhela londing'hali msongolo. Gwa Mkulu Nguluwi, hegwe kwangikala mazuwa gose.
PSA 102:25 Hegwe nakuwika msisi wa isi katali ng'hatu, ulanga ndo mijito ja moko ga hegwe.
PSA 102:26 Isi na ulanga vyokwaga, ila hegwe kopona, vyolala kota ivalo, na kota nguwo kovigalula, navyo vyokwajililila,
PSA 102:27 ila hegwe ndo yuyula, ukomu wa hegwe wahela kuduma.
PSA 102:28 Wana wa vitumagwa wa hegwe wochikala kwa kwamilwa, walelwa wa hewo woditigwa wawe nzinzili hali hegwe.”
PSA 103:1 (Lwimbo lwa Daudi.) Gwa nhumbula ya heni, umtogole Mkulu Nguluwi, vyeng'ha viwele mgati mwa heni vilitogole itagwa lyake lyelile.
PSA 103:2 Gwa nhumbula ya heni, umtogole Mkulu Nguluwi. Uleche kusemwa ng'o kunoga kwa heye kweng'ha.
PSA 103:3 Ndo yalingukulechela wihe wa hegwe weng'ha, na kukudita uwe mkomu kulawa kuli matamwa geng'ha.
PSA 103:4 Ndo yalingukugombola kulawa kuli kubagama na kukuvaliza isungu lya heye na igano lya kwimilila lya heye.
PSA 103:5 Ndo yalinguumemeza ukomu wa hegwe weng'ha kwa ganojile, leka upone msongolo uwele na mong'ho kota ikungule.
PSA 103:6 Mkulu Nguluwi kangutagusaga kwa hachi, kanguwapaga walingubunzwa hachi za hewo.
PSA 103:7 Nakamzelesa Musa nzila za heye, nakawalajila wanhu wa Isilaeli madito ga heye.
PSA 103:8 Mkulu Nguluwi kana isungu na uliholile, halinguzudilaga himahima nakamema igano lya kwimilila.
PSA 103:9 Hambe yatung'hanuchile chila mhela, ne ng'halazi ya heye hambe ikale mazuwa gose.
PSA 103:10 Heye halingutugaza kwa kiwhana na gehile ga hetwe, hambe yahiluse chibida kwa winji wa wihe wa hetwe.
PSA 103:11 Kota vila ulanga vyouwele kuchanya kutali na isi, ndo vyoliwele linji igano lya kwimilila lya heye kwa wanhu walingumdumba.
PSA 103:12 Kota kolilawilaga isanya vyokuwele kutali na kolizinjilaga isanya, ndo vyoyalingubagula gehile ga hetwe kutali na hetwe.
PSA 103:13 Kota vila mhaza vyoyalingumonela isungu mwanage, ndo Mkulu Nguluwi vyoyalinguwonela isungu wanhu walingumdumba.
PSA 103:14 Nguluwi kanguvizela ndaze vyotulumbigwe, kanguvizela kota hetwe twa nhimbwisi.
PSA 103:15 Ila munhu, ukomu wa heye ndo kota misolo hela, na wangubawulaga kota uluwa kuchiwala.
PSA 103:16 Mbeho yanguputaga mchanya mwake nawo wangwajililaga, na honhu holiwele halingoneka kahi.
PSA 103:17 Ila igano lya kwimilila lya Mkulu Nguluwi lyangikala mazuwa gose, kwa wala walingumdumba na kutanganika kwa heye kwangikala lulelo lweng'ha,
PSA 103:18 kwa weng'ha walingibatilila ilagano lya heye, walingukumbuchila kuhulichiza malajizo ga heye.
PSA 103:19 Mkulu Nguluwi nakawika chigoda cha heye cha undewa kilanga, heye kangulongoza mchanya mwa vinhu vyeng'ha.
PSA 103:20 Hemwe wahilisi muwele na mong'ho, mumtogole Mkulu Nguluwi, mlingweneza malajizo ga heye na kuuhulichiza ulonzi wa heye.
PSA 103:21 Hemwe wamizi weng'ha wa kilanga, mumtogole Mkulu Nguluwi, hemwe vitumagwa wa heye mlingudita goyalingugana heye.
PSA 103:22 Mumtogole Mkulu Nguluwi hemwe vilumbigwe vya heye vyeng'ha, mumtogole honeche homuwele kuli honhu heng'ha hoyalingulongoza. Gwa nhumbula ya heni, umtogole Mkulu Nguluwi.
PSA 104:1 Umtogole Mkulu Nguluwi, gwa nhumbula ya heni. Gwa Mkulu Nguluwi, Nguluwi wa heni, hegwe kwa mkulu ng'hatu. Hegwe nakivaliza ukulu na kuhulichiza.
PSA 104:2 Nawizungulusila lumuli kota ivalo, nakutandazula ulanga kota ihema.
PSA 104:3 Kwanguzenga honhu ha hegwe ha kikala mchanya mwa mazi gawele kuchanya mwa ulanga. Kwanguidita ng'hungugu iwa mutuka wa hegwe, kwanguguluka mchanya mwa mbeho.
PSA 104:4 Kwanguidita mbeho iwe msenga wa hegwe, milapi ja chiluli jiwe vitumagwa wa hegwe.
PSA 104:5 Isi nakuiwika nzinzili mchanya mwa misisi jake, leka ileche kutigasika mazuwa gose.
PSA 104:6 Nakuigubika isi kwa bahali kota ivalo, mbaka mazi nagema mchanya mwa vidunda.
PSA 104:7 Lougang'hanuchile, mazi nagoka, logahuliche kubuma kwa hegwe, nagabilima.
PSA 104:8 Nagabubujika kulawa kuli chidunda mbaka kuli ibindi, mbaka hala honhu hougagongomanyile.
PSA 104:9 Nakugawichila ago mazi mbaka, galeche kuigubika isi kahi.
PSA 104:10 Kwanguziditaga nzasa kuli mibindi, nzila zake zangukolaga hagati ha vidunda.
PSA 104:11 Azo zangujigalilaga mazi migongolo jeng'ha kisolo. Amo midogowi ja kisolo jangusindaga ng'halu zawo.
PSA 104:12 Videje vyanguzengaga vimvulila vyawo kuli migodi jiwele habehi na mazi, vyangudulikaga kuli nhagala zake na kwimba.
PSA 104:13 Kulawa kuchanya kilanga kwanguvidulisila vidunda nhonya na isi kwanguigutiza kwa utambichizo wa hegwe.
PSA 104:14 Kwangoteza misolo kwa chiwalo cha migongolo na mizuchila kwa chiwalo cha munhu, leka naye yalime chilyo kuli misanga,
PSA 104:15 divai ya kumsangalaza, mafuta ga mzeituni kubakala kumeho leka yadedemche na ibumunda lya kumha mong'ho.
PSA 104:16 Migodi mikulu ja Mkulu Nguluwi janguwa na mazi ga kuhega, ena, mielezi ja Lebanoni joyajinyalile.
PSA 104:17 Amo videje vyanguzengaga vimvulila vyawo, misakulang'hola jina haluga kuli misonobali.
PSA 104:18 Vidunda viwele ng'wemang'wema ndo honhu ha kikala mhene za kisolo, mhimbi zangivisaga mitalawe.
PSA 104:19 Nakulumba nyelezi ipime mhela, isanya nalyo lyanguuzela mhela wa kuzinga.
PSA 104:20 Kwangigala jiza, nechilo yangwinjila, najo migongolo jeng'ha ja kisolo jangulawa.
PSA 104:21 Misimba jangubumaga leka jiwe na upelembi, jangubetezaga Nguluwi yajipe chilyo chawo.
PSA 104:22 Isanya holilawa janguhilukaga kwa hewo na kwesela hali mhalika za hewo.
PSA 104:23 Aho, naye munhu kangulutaga kuli mijito ja heye na kukola mijito ajo mbaka matinazo.
PSA 104:24 Gwa Mkulu Nguluwi nakudita mbuli nyinji lukami. Geng'ha nakudita kwa luhala. Isi naimema vilumbigwe vya hegwe.
PSA 104:25 Hala hana bahali ng'hulu na iwele ngazi, kuwele nakumema vilumbigwe vyohambe viwaziche, vilumbigwe vilingikala, vikulu na vidodo.
PSA 104:26 Ndo zilingujenda meli na lila linhu likulu Lewiyatani lyoulilumbile livine amo.
PSA 104:27 Vilumbigwe vyeng'ha vyangukubeteza, uvipe chilyo kwa mhela uwichigwe.
PSA 104:28 Vyangulokota choneche chila choulinguwapa, hougubula moko wa hegwe vyangiguta vinonile.
PSA 104:29 Louwapa chigosi, vyangudumba, loukusa lweselo lwa hewo, vyangubagama na kuhiluka kuli nhimbwisi kowalawile.
PSA 104:30 Louwaputila lweselo lwa hegwe, vyangulumbigwa, hegwe kwanguigalila isi kumeho kunyale.
PSA 104:31 Ukulu wa Mkulu Nguluwi ulutilile kikala mazuwa gose, Mkulu Nguluwi yanojezwe na madito ga heye yuye,
PSA 104:32 heye yalinguilola isi nayo yangukakama, yalinguvidoliza vidunda navyo vyangulavya iyosi.
PSA 104:33 Ndomwimbila Mkulu Nguluwi kuli ukomu wa heni weng'ha, ndomtogola Nguluwi wa heni mhela weng'ha hondichikala.
PSA 104:34 Gwa Mkulu Nguluwi, unojezwe na aga majesa ga heni, kwa vila kusangalala kwa heni kwangulawa kwa hegwe.
PSA 104:35 Wawele na gehile wosigwe muisi, hawe haduhu wehile woneche. Umtogole Mkulu Nguluwi, gwa nhumbula ya heni. Mumtogole Mkulu Nguluwi.
PSA 105:1 Mlonje malumbo kwa Mkulu Nguluwi, mliwikule itagwa lya heye, muwazelese wanhu weng'ha madito ga heye.
PSA 105:2 Mumwimbile heye, mumwimbile heye lutogo, msimile madito ga heye ga kububuwaza.
PSA 105:3 Lutogo kwa itagwa lya heye lyelile, nhumbula za walingumpala Mkulu Nguluwi zisangalale.
PSA 105:4 Mpale Mkulu Nguluwi na mong'ho wa heye, Mumhejelele Mkulu Nguluwi mazuwa gose.
PSA 105:5 Hemwe walelwa wa Abulahamu chitumagwa wa heye, hemwe wana wa Yakobo, yahaguligwe wa heye, mkumbuchile madito ga heye ga kububuwaza goyaditile, vinduzanduza vya heye na nhaguso zoyazilavile.
PSA 105:7 Heye ndo Mkulu Nguluwi, Nguluwi wa hetwe, nhaguso za heye za muisi yeng'ha.
PSA 105:8 Heye kangulikumbuchilaga ilagano lya heye mazuwa gose, kangwenezaga kulagana kwa heye kwa lulelo elufu.
PSA 105:9 Kangubatililaga ilagano lyoyaliditile na Abulahamu na ilagano lyoyamlahile Isaka.
PSA 105:10 Nakamtawizila Yakobo kulagana kwa heye kota ndo ilajizo, na Isilaeli kota ndo ilagano alyo lya mazuwa gose.
PSA 105:11 Nakalonga, “Ndowapani isi ya Kanaani, nayo yowa uhalizi wa hemwe.”
PSA 105:12 Lowawele wachefu na walinguwazika, na wajenzi kuli isi ya Kanaani,
PSA 105:13 nawalubaluba kulawa honhu hamwe mbaka hayage, isi imwe mbaka yinji.
PSA 105:14 Ila Nguluwi hakundile ne munhu yawabunze, kwa chiwalo cha hewo nakawang'hanuchila wandewa,
PSA 105:15 “Mleche kuwadoliza wabakalizwe mafuta wa heni, mleche kuwalumiza waloli wa heni.”
PSA 105:16 Nguluwi nakambuza lufemba kuli isi ya hewo, nakawifya chilyo cha hewo cheng'ha.
PSA 105:17 Ila nakawalongolezela munhu yumwe, Yusufu yawele yaguzigwe kuli upogozi.
PSA 105:18 Nawamuwopa magulu kwa minyololo na ngwamo ya chuma kuli singo,
PSA 105:19 mbaka choyalonjile Yusufu vyochenele, ulonzi wa Mkulu Nguluwi naulajila kota Yusufu nakakomya.
PSA 105:20 Mndewa wa Misili nakalajiza yadoholigwe, chilongozi wa wanhu wa isi nakamlechela yelejehe.
PSA 105:21 Nakamuwika yalongoze undewa wa heye na mkulu wa lufufu lwa heye lweng'ha,
PSA 105:22 yawalongoze vilongozi wa heye vyoyalingugana, na kuwalangusa wasekulu wa heye luhala.
PSA 105:23 Aho ndo Isilaeli nakenjila Misili, kwa vila Yakobo nayali mjenzi kuli isi ya Hamu.
PSA 105:24 Mkulu Nguluwi nakawadita wanhu wa heye waponde lukami, nakawapa mong'ho kusinda wang'honyo wa hewo.
PSA 105:25 Nakawadita Wamisili wawazudile wanhu wa heye, nawawaditila vibi vitumagwa wa heye.
PSA 105:26 Hamba nakamlajiza Musa chitumagwa wa heye, nakamlajiza na Aluni yahaguligwe wa heye.
PSA 105:27 Nawadita ulajilo wa Nguluwi hali Wamisili, vinduzanduza kuli isi ya Hamu.
PSA 105:28 Nguluwi nakegala jiza mchanya mwa isi, Wamisili nawalema kuuhulichiza ulonzi wa heye.
PSA 105:29 Nakagalula mazi ga nzanda za hewo nagawa danda, nakazikopola somba za hewo zeng'ha.
PSA 105:30 Mibula najiivaba isi ya hewo, mbaka ng'handa ya mndewa naimema jijo.
PSA 105:31 Nguluwi nakalonga, navyuya vilundo vya ng'honzi na sewe kuli isi ya hewo yeng'ha.
PSA 105:32 Nakagalula nhonya ya hewo iwe nhonya ya maganga iwele na lumwemwesa kuli isi ya hewo yeng'ha,
PSA 105:33 nakajiwifya mizabibu na mitini ja hewo, nakabena migodi ja isi ya hewo.
PSA 105:34 Nguluwi nakalonga na nzije nazilawila, ndede maelufu zohambe ziwaziche,
PSA 105:35 nazijigubika mizuchila jeng'ha kuli isi, najilya mbena za hewo zeng'ha.
PSA 105:36 Nakawakopola walelwa wa mwaluko kuli isi ya hewo, walelwa wa mwaluko wa Wamisili.
PSA 105:37 Hamba nakawalavya wanhu wa Isilaeli kuli isi, nawoka na sendi na zahabu za Wamisili, haduhu ne munhu yumwe wa hewo yekwang'wale.
PSA 105:38 Wamisili nawasangalala kuka kwa hewo, kwa vila nawali wakabuswe kwa chiwalo cha hewo.
PSA 105:39 Nguluwi nakawika ng'hungugu kota chigubiko mchanya wa wanhu wa heye na chiluli leka yawalangazile nechilo.
PSA 105:40 Nawalanda naye nakawegalila ng'hwale, nakawagutiza ibumunda kulawa kilanga.
PSA 105:41 Loyatulile italawe mazi nagalawa, kota lwanda nagakola kuli chiwala.
PSA 105:42 Nakakumbuchila kulagana kwa heye kwelile, koyampele Abulahamu chitumagwa wa heye.
PSA 105:43 Lelo nakawalavya wanhu wa heye kuli isi kwa kusangalala, wahaguligwe wa heye nawatowa luchenze lowalawile.
PSA 105:44 Nakawapa isi za wanhu wanji, na migunda ja wenyeng'haye,
PSA 105:45 leka wanhu wa heye wahulichize mizilo ja heye, na kuwinza malajizo ga heye. Yatogoligwe Mkulu Nguluwi.
PSA 106:1 Yatogoligwe Mkulu Nguluwi. Mlonje malumbo kwa Mkulu Nguluwi kwa vila ka yanojile, kwa vila igano lya kwimilila lya heye lyangikala mazuwa gose.
PSA 106:2 Whaani yoweza kulonga madito ga Mkulu Nguluwi? Whaani yoweza kumtogola kota vyoyalinguganigwa?
PSA 106:3 Nawatambichizwa wala walingudita hachi, walingudita mazuwa gose mbuli zitanganiche.
PSA 106:4 Ung'humbuche gwa Mkulu Nguluwi mhela houlajila vyoulingunojezwa na wanhu wa hegwe, unhanze mhela houwalohola,
PSA 106:5 leka nhambichizwe hamwe na wahaguligwe wa hegwe, sangalale hamwe na wanhu wa isi ya hegwe na kivuna hamwe na wahalizi wa hegwe.
PSA 106:6 Natudita gehile, hetwe na wasekulu wa hetwe, natudita wihe, natudita mbuli zihile.
PSA 106:7 Wasekulu wa hetwe lowawele Misili, hawajesile madito ga heye ga kububuwaza, hawakumbuchile winji wa igano lya kwimilila lya heye, nawambelenhuka hafungo ha bahali ya Shamu.
PSA 106:8 Ila Nguluwi nakawalohola kwa lutogo lwa itagwa lya heye, leka yalajile mong'ho wa heye ukulu.
PSA 106:9 Nakaing'hanuchila bahali ya Shamu, naikala, nakawakoleza amo kota kuli isi ng'havu.
PSA 106:10 Nakawalohola kuli moko ga wawazudile, nakawagombola kulawa kuli moko ga wang'honyo wa hewo.
PSA 106:11 Mazi ga bahali nagawagubika wang'honyo wa hewo, haponile ne yumwe wa hewo.
PSA 106:12 Hamba wanhu wa heye nawaukunda ulonzi wa heye, nawamwimbila nzimbo za lutogo lwa heye.
PSA 106:13 Ila mhela uchefu hela nawasemwa madito ga Nguluwi, nawaleka kitumbila kuli ulonzi wa heye.
PSA 106:14 Nawali wamemile maya ng'hatu ya iwunde kula kuchiwala, nawamjeza Nguluwi kula kugunuche.
PSA 106:15 Naye Nguluwi nakawapa chila chowaganile, ila nakegala utamwa ulingwambuza kuganda hali hewo.
PSA 106:16 Kuli kambi walume nawamonela fihi Musa kahi nawamonela fihi Aluni, chitumagwa yelile wa Mkulu Nguluwi.
PSA 106:17 Aho ndo misanga najigubuka na kummela Datani, Abilamu na chilundo cha heye cheng'ha nawatiligwa,
PSA 106:18 chiluli nachiwalawila walinguwawinza hewo, nachiwalakaza wanhu wehile.
PSA 106:19 Nawagongomanya ilogota kula Holebu, nawalifugamila limalukolo alyo lya zahabu ya kulubuswa,
PSA 106:20 nawauleka ukulu wa Nguluwi, kwa chiwalo cha limalukolo lya igongolo liwele lyangulyaga misolo.
PSA 106:21 Nawamsemwa Nguluwi yawalohole, yaditile mbuli ng'hulu kuli isi ya Misili,
PSA 106:22 vinduzanduza kuli isi ayo ya Hamu, na mbuli za mong'ho kuli bahali ya Shamu.
PSA 106:23 Nguluwi nakalonga kowadumya wanhu wa heye, ila Musa hela yahaguligwe wa heye nakema hagati, nakalemeza ng'halazi ya heye ileche kuwadumya.
PSA 106:24 Hamba nawaibeza yila isi ya kunojeza, kwa vila hawawele na makundo na kulagana kwa Nguluwi.
PSA 106:25 Nawang'ung'uta kuli mihema ja hewo, hawamhulichize Mkulu Nguluwi.
PSA 106:26 Ahyo Nguluwi nakenula moko, nakelaha, “Ndowadumya kuchiwala,
PSA 106:27 ndowasambalula walelwa wa hemwe hali wanhu wanji, na ndowasambalula kuli isi yeng'ha.”
PSA 106:28 Hamba nawelumba kumfugamila Baali wa kula Peoli, Nawalya nhambiko zilavigwe kwa chiwalo cha milungu jilihela ukomu.
PSA 106:29 Nawamdita Nguluwi yazudile kwa madito ga hewo, utamwa nawuya hali hewo.
PSA 106:30 Ila Finehasi nakema hagati kuwatanza, na wula utamwa naulemezwa.
PSA 106:31 Mbuli ayo yangukumbuchilwa kwa kutanganika kwa heye, kwa lulelo lulinguya lulihela kuduma.
PSA 106:32 Nawamzudiza Nguluwi kuli mazi ga Meliba, Musa nakagazigwa kwa chiwalo cha hewo.
PSA 106:33 Kwa vila nawambelenhuka muhe wa Nguluwi, mbaka nakalonga ulonzi ne kijesa.
PSA 106:34 Hawawakopole wanhu wa isi zinji, kota Mkulu Nguluwi vyoyawalajize,
PSA 106:35 ila nawehanza na wanhu wanji, nawelangusa kudita mbuli za hewo.
PSA 106:36 Nawajifugamila jimalukolo ja milungu ja hewo, najo najiwa idiwa lya kuwadumya.
PSA 106:37 Nawawakopola wana wa hewo walume na wadala, nawawalavya nhambiko kwa vijeni.
PSA 106:38 Nawabohola danda ya walihela nongwa, danda ya wana wa hewo walume na wadala, wawele nawawalavya nhambiko kwa jimalukolo ja Kanaani, isi naiwa ikokomoche kwa danda ya hewo.
PSA 106:39 Ahyo nawaditigwa wakokomoche kwa madito ga hewo, nawali walihela kukundigwa kwa Nguluwi kota wang'hondwa.
PSA 106:40 Lelo ng'halazi ya Mkulu Nguluwi naiwafika wanhu wa heye, nakazudizwa ng'hatu na wahalizi wa heye.
PSA 106:41 Nakawawika kuli ndole za wanhu wa isi zinji, walinguwazudila nawawalongoza.
PSA 106:42 Wang'honyo wa hewo nawawabunza, na kuwawika hali ludali lwa hewo.
PSA 106:43 Mala nyinji Nguluwi nakawalohola wanhu wa heye, ila hewo nawahagula kumbelenhuka, nawalutilila kudita wihe.
PSA 106:44 Ila Nguluwi nakahulichiza magazo ga hewo, mhela loyahuliche chililo cha hewo.
PSA 106:45 Kwa chiwalo cha hewo nakalikumbuchila ilagano lya heye, nakawonela isungu kwa winji wa igano lya kwimilila lya heye.
PSA 106:46 Nakawadita wonelwe isungu, na weng'ha wawaholile.
PSA 106:47 Gwa Mkulu Nguluwi, Nguluwi wa hetwe, utulohole, utukungajize hamwe kulawa hali wanhu wa isi, leka tulonje malumbo kwa itagwa lya hegwe lyelile, na kivuna kwa chiwalo cha lutogo lwa hegwe.
PSA 106:48 Yatogoligwe Mkulu Nguluwi, Nguluwi wa Isilaeli, kulawa mazuwa gose mbaka mazuwa gose. Wanhu weng'ha walonje, “Ena.” Yatogoligwe Mkulu Nguluwi.
PSA 107:1 “Mlonje malumbo kwa Mkulu Nguluwi kwa vila heye ka yanojile, kwa vila igano lya kwimilila lya heye lyangikala mazuwa gose.”
PSA 107:2 Mlonje ahyo hemwe womgomboligwe na Mkulu Nguluwi, wanhu wawele nakawalohola kulawa kwa wang'honyo.
PSA 107:3 Nakawakungajizani kulawa isi za chijenzi, kulawa kolilawilaga isanya na kolizinjilaga isanya, kulawa kasikazini na kusini.
PSA 107:4 Wamwenga nawalubaluba hela kuli chiwala, kuno wolemwela kuufichila muji wa kikala.
PSA 107:5 Nawona nzala na ng'halu, nawagozola ng'hatu.
PSA 107:6 Kuli kugaya kwa hewo nawamlilila Mkulu Nguluwi, naye nakawalohola kuli magazo ga hewo.
PSA 107:7 Nakawalongoza kuli nzila igoloche, mbaka nawaufichila muji wa kikala.
PSA 107:8 Mlonje malumbo kwa Mkulu Nguluwi kwa igano lya kwimilila lya heye, kwa chiwalo cha vinduzanduza navyoyawaditile wanhu.
PSA 107:9 Kanguwanwezaga wawele na ng'halu, na wawele na nzala kanguwagutizaga ganojile.
PSA 107:10 Wamwe nawekala kuli jiza na uchiwa, wanweng'hwa kuli magazo na minyololo,
PSA 107:11 kwa vila nawabelenhuka malajizo ga Nguluwi, na kuubeza ulonzi wa Nguluwi Yawele Kuchanya.
PSA 107:12 Nawali watochile lukami kwa mijito jing'ang'ale, nawagwa, hakuwele na wa kuwatanza.
PSA 107:13 Kuli kugaya kwa hewo nawamlilila Mkulu Nguluwi, naye nakawalohola kuli magazo ga hewo.
PSA 107:14 Nakawalavya kuli jiza na uchiwa, minyololo ja hewo nakajibenanga.
PSA 107:15 Mlonje malumbo kwa Mkulu Nguluwi kwa igano lya kwimilila lya heye, kwa chiwalo cha vinduzanduza navyoyawaditile wanhu.
PSA 107:16 Heye kangubenaga na kuchumula lwizi lwa shaba, na kutemanga fito za chuma.
PSA 107:17 Kwa upoka, wamwe nawadita gehile, nawagazika kwa chiwalo cha wihe wa hewo,
PSA 107:18 nawachizudila chilyo cheng'ha, nawali habehi kubagama.
PSA 107:19 Kuli kugaya kwa hewo nawamlilila Mkulu Nguluwi, naye nakawalohola kuli magazo ga hewo.
PSA 107:20 Kwa ulonzi wa heye nakawalohola, nakawalohola leka waleche kudumigwa.
PSA 107:21 Mlonje malumbo kwa Mkulu Nguluwi kwa igano lya kwimilila lya heye, kwa chiwalo cha vinduzanduza navyoyawaditile wanhu.
PSA 107:22 Wamlavile nhambiko za kulonga malumbo, wasimile madito ga heye kwa nzimbo za kusangalala.
PSA 107:23 Wamwenga nawali mmajendo kuli bahali kwa meli, na kukola mijito ja hewo mumo kuli bahali.
PSA 107:24 Nawagona madito ga Mkulu Nguluwi, mbuli za kububuwaza zoyaditile ako.
PSA 107:25 Nakalajiza, nakambuza chivuluvumbi chikulu, nachitoza kuchanya nhigu ya bahali.
PSA 107:26 Nawatozigwa kuchanya kuli ulanga, hamba hasi kuli mazi menji, uzidahe wa hewo naumalila kuli mbuli ayo.
PSA 107:27 Nawatigasika na kuzebeduka kota wagalile, uwanzi wa hewo weng'ha wa kuli mazi nauwamalila baho.
PSA 107:28 Kuli kugaya kwa hewo nawamlilila Mkulu Nguluwi, naye nakawalohola kuli magazo ga hewo.
PSA 107:29 Nakachidita chila chivuluvumbi chikulu chisindamale, nayo nhigu naileka.
PSA 107:30 Aho nawasangalala kwa kuwa na kusindamala, nakawafichiza kuli bandali iwele nawali woluta.
PSA 107:31 Mlonje malumbo kwa Mkulu Nguluwi kwa igano lya kwimilila lya heye, kwa chiwalo cha vinduzanduza navyoyawaditile wanhu.
PSA 107:32 Mumtogole kuli nhing'hano ya wanhu, na kuli chitala cha wasekulu.
PSA 107:33 Nguluwi nakagalula nzanda ziwa kugunuche, nzasa nakazidita zikale ng'hatu.
PSA 107:34 Misanga jiwele na mboto nakajidita jiwe misanga jiwele na mwino, kwa chiwalo cha wihe wa wenyeng'haye wake.
PSA 107:35 Nakagalula kugunuche nakuwa mizimbo ja mazi, na isi ng'havu naziwa nzasa za mazi.
PSA 107:36 Nakawahilika ako wawele na nzala, nawo nawazenga muji na kikala ako.
PSA 107:37 Nawalima migunda na kunyala mizabibu, nawabeta mbena kwa winji.
PSA 107:38 Nakawatambichiza wanhu wa heye nawonjezeka, na winji wa migongolo ja hewo nawonjezeka.
PSA 107:39 Hamba lowapunguche na lowawele ng'hochele, kwa kuditilwa vibi na kugazigwa na masinzo,
PSA 107:40 nakawabeza wakulu wowawagazile, nakawazungulusa kuchiwala kokuwele haduhuli nzila.
PSA 107:41 Ila nakawalohola walingugana utanzi kuli magazo ga hewo, nakonjeza nhanzi za hewo kota vilundo vya ming'holo.
PSA 107:42 Watanganiche howoyona mbuli ayo wosangalala, ila wehile weng'ha woditigwa wanyamalile.
PSA 107:43 Wawele na luhala wejese kwa chiwalo cha mbuli azi, wejese kwa chiwalo cha igano lya kwimilila lya Mkulu Nguluwi.
PSA 108:1 (Lwimbo. Zabuli ya Daudi.) Gwa Nguluwi, nda nzinzili mnhumbula, ndokwimba na kukutowela luchenze kwa nhumbula ya heni yeng'ha.
PSA 108:2 Ndokwaluka kutowa ching'weleng'wele na igombogombo. Ndolililimla isanya kuwe mitondo.
PSA 108:3 Gwa Mkulu Nguluwi, ndolonga malumbo kwa hegwe hali wanhu wa isi, ndokwimbila lutogo hali wanhu wa isi zeng'ha.
PSA 108:4 Igano lya kwimilila lya hegwe ndo likulu mbaka kilanga, kukundigwa kwa hegwe kwangwenela mbaka kuli ng'hungugu.
PSA 108:5 Utogoligwe, gwa Nguluwi, kuchanya kilanga, ukulu wa hegwe wenele muisi yeng'ha.
PSA 108:6 Leka woulingugana waloholigwe, ulohole kwa moko wa hegwe wa kudilo, unhyidichile.
PSA 108:7 Nguluwi nakelaha kulawa helile ha heye, “Lelo, hondisumya ndoigawanula Shekemu, ibindi lya Sukoti ndolipima chila honhu.
PSA 108:8 Gileadi ndo ya heni na Manase ndo ya heni, Efulaimu ndo kofia ya heni ya chuma, na Yuda ndo ng'hweku ya heni ya undewa.
PSA 108:9 Moabu ndo kota chisaye cha heni cha kihovujila, makwamba ga heni ndogatozela Edomu. Ndotowa iyowe lya kusumya kwa chiwalo cha Filistiya.”
PSA 108:10 Whaani yonyhilika kuli muji wa ngome? Whaani yondongoza mbaka Edomu?
PSA 108:11 Nakutuleka ng'hatu, gwa Nguluwi. Lekachoni hambe ulute kahi na wamizi wa hetwe?
PSA 108:12 Utugalile utanzi kwa chiwalo cha walingutugaza, kwa vila ulohozi wa munhu hauwele chinhu.
PSA 108:13 Kwa utanzi wa Nguluwi tosumya, heye kowabiga walingutugaza.
PSA 109:1 (Kwa yalingwaluchiza kwimba. Zabuli ya Daudi.) Uleche kunyamalila, gwa Nguluwi ndilingukutogola.
PSA 109:2 Wanhu wehile na wahadi wangunhowa, wangulonga udesi kwa heni.
PSA 109:3 Wangulonga wihe kwa heni, na kunhowa ne nongwa.
PSA 109:4 Hanga nandiwagana, nawandonjeleza, ila nandiwalandila.
PSA 109:5 Wanguhilula wihe honhu ha kunoga kwa heni, na kuzudila kwa igano lya heni.
PSA 109:6 Umuwiche mtagusa mwihe kwa mng'honyo wa heni, na yalingumlonjeleza heye yamhiliche kuli chitala.
PSA 109:7 Hoyotagusigwa yafichigwe na nongwa, kulanda kwa heye kuwazigwe kota nongwa yinji.
PSA 109:8 Mazuwa ga ukomu wa heye gawe machefu, munhu yunji yahole mijito ja heye ja kulongoza.
PSA 109:9 Wana wa heye wawe walekwa, na mamo wa wana awo yawe yafililwe na mlume.
PSA 109:10 Wana wa heye wawe wolubaluba na kulandalanda, wawinjigwe kuli mahame ga ng'handa za hewo.
PSA 109:11 Yalingumdai chinhu yasukule lufufu lwa heye lweng'ha, na wajenzi wahole vinhu vyoyapatile kwa chituguti cha heye.
PSA 109:12 Hawe haduhu munhu wa kumonela isungu, ama kuwalolela wana wa heye walekwa.
PSA 109:13 Walelwa wa heye weng'ha wabagame, itagwa lya heye lisemwigwe kuli lulelo lulinguya.
PSA 109:14 Mkulu Nguluwi yaukumbuchile wihe wa wasekulu wa heye, gehile ga mayake galeche kusigwa hebu.
PSA 109:15 Mkulu Nguluwi yakumbuchile gehile ga hewo mazuwa gose, ila hewo wawo wasemwigwe muisi.
PSA 109:16 Mwihe ayo hajesile ng'hatu kuwa na isungu, ila nakawabunza wazunwa na walihela chinhu na ng'hochele mbaka kubagama.
PSA 109:17 Heye kanguganaga kuwapanjila wanhu, kupanjila kumfiche heye yuye. Hambe yawaganile wanji utambichizo, lelo, yaleche kuwa na utambichizo.
PSA 109:18 Kwa heye kupanjila ndo kota kuvala nguwo, lelo, kupanjila ako kumdodeze kota mazi, kwinjile kuli mizeje ja heye kota mafuta.
PSA 109:19 Kupanjila kumgubiche kota nguwo, kumzungulute mazuwa gose kota isali.
PSA 109:20 Mkulu Nguluwi yawahilusile kota ahyo wanhu walingundonjeleza, ena, hewo walingulonga gehile kwa heni.
PSA 109:21 Gwa Mkulu Nguluwi, Mkulu wa heni, unhanze kwa lutogo lwa itagwa lya hegwe, undohole kwa winji wa igano lya kwimilila lya hegwe.
PSA 109:22 Heni mzunwa na ndilihela chinhu, nandilumizwa mbaka mnhumbula mwa heni.
PSA 109:23 Ndangwajilila kota isisila lya matinazo, nanyhusigwa kota ndede mlukuli.
PSA 109:24 Mafugamilo ga heni ndo ng'hochele kwa chiwalo cha kwesela kulya, ndipona na mizeje na ngozi.
PSA 109:25 Ndiwa munhu wa kubezigwa hela na wanhu, howombona wangutigasaga vitwi vya hewo kwa kubeza.
PSA 109:26 Unhanze, gwa Mkulu Nguluwi, Nguluwi wa heni, undohole kwa winji wa igano lya kwimilila lya hegwe.
PSA 109:27 Uwalajile wanhu kota ago ndo madito ga hegwe, hegwe, gwa Mkulu Nguluwi, nakudita ahyo.
PSA 109:28 Wanguweza kumhanjila, ila hegwe konhambichiza, walingunhowa wabasigwe soni, nani chitumagwa wa hegwe ndosangalala.
PSA 109:29 Walingundonjeleza wavalizwe soni, wegubiche soni ya hewo kota igolole.
PSA 109:30 Ndolonga malumbo ng'hatu kwa Mkulu Nguluwi kwa lizi, ndomtogola hali chilundo cha wanhu,
PSA 109:31 kwa vila heye kangumlewelaga mzunwa, kangumloholaga mhela hoyotagusigwa.
PSA 110:1 (Zabuli ya Daudi.) Mkulu Nguluwi kangumlonjela Mkulu wa heni, “Wikalise ubanzi wa kudilo kwa heni, mbaka ndiwawiche wang'honyo wa hegwe hasi ha magulu ga hegwe.”
PSA 110:2 Mkulu Nguluwi koweneza undewa wa hegwe kulawa Siyoni, hegwe kolongoza mchanya mwa wang'honyo wa hegwe weng'ha.
PSA 110:3 Wanhu wa hegwe wokuyila kwa kunuwila, zuwa lyouluta kuwatowa wang'honyo. Mchanya mwa vidunda vyelile wokuyila wasongolo wa hegwe, kota nungwi ilingulawa lufuku ng'hatu.
PSA 110:4 Mkulu Nguluwi nakelaha, hogalula kunuwila kwa heye, “Hegwe ndo mtambika mazuwa gose kwa kuwinza utambika wa Melekisedeki.”
PSA 110:5 Mkulu ka ubanzi wa hegwe wa kudilo, kowahonda wandewa hoyozudila.
PSA 110:6 Kowatagusa na kuwakopola wanhu wenji wa isi zinji, kowahonda vilongozi chila honhu muisi.
PSA 110:7 Mndewa konwa mazi ga mnzila, naye kokwinula mutwi kuchanya kwa kusumya.
PSA 111:1 Mumtogole Mkulu Nguluwi. Ndolonga malumbo Mkulu Nguluwi kwa nhumbula ya heni yeng'ha, hamwe na ikugusi lya wanhu watanganiche.
PSA 111:2 Madito ga Mkulu Nguluwi ndo makulu ng'hatu. Weng'ha walingusangalalila wanguwaga wogajesa.
PSA 111:3 Chila choyalingudita chimema ukulu na lutogo, kutanganika kwa heye kwangikala mazuwa gose.
PSA 111:4 Nakambuza madito ga heye ga kububuwaza gakumbuchilwe. Mkulu Nguluwi ka yanojile na yawele na isungu.
PSA 111:5 Kanguwapaga chilyo walingumdumba, mazuwa gose kangulikumbuchilaga ilagano lya heye.
PSA 111:6 Nakawalajila wanhu wa heye mong'ho lwa madito ga heye, nakawapa isi za wanhu wa isi zinji ziwe uhalizi wa hewo.
PSA 111:7 Madito ga heye ndo ga hachi na ga kukundigwa, malajizo ga heye geng'ha ndo ga kukundigwa,
PSA 111:8 gangikala mazuwa gose, nagalavigwa kwa hachi na kutanganika.
PSA 111:9 Nakawagombola wanhu wa heye na kudita na hewo ilagano lya mazuwa gose. Heye ka yelile na wa kukabusa ng'hatu.
PSA 111:10 Kumdumba Mkulu Nguluwi ndo msisi wa luhala, weng'ha walingibatilila malajizo ga heye wangutambichizwa luhala. Lutogo lwa heye lwangikala mazuwa gose.
PSA 112:1 Mumtogole Mkulu Nguluwi. Katambichizwa munhu yalingumdumba Mkulu Nguluwi, yalingusangalala ng'hatu kibatilila malajizo ga heye.
PSA 112:2 Walelwa wa heye wowa wawele na mong'ho kuli isi, wana wa wagoloche nhumbula wotambichizwa.
PSA 112:3 Kuli ng'handa ya heye kowa na lufufu lwinji, kutanganika kwa heye kwangikala mazuwa gose.
PSA 112:4 Munhu yanojile kangulangaziwaga lumuli kuli jiza, munhu yawele na isungu na yaliholile na yatanganiche.
PSA 112:5 Ganojile gomuyila munhu yula yawele na isungu na yalingwazika ne kugana mzidi, yalingudita mbuli za heye kwa hachi.
PSA 112:6 Yatanganiche hotigasika hebu, kokumbuchilwa mazuwa gose.
PSA 112:7 Halingudumba hoyofichigwa na mbuli yihile, kana nhumbula iwele nzinzili na kangitumbila kwa Mkulu Nguluwi.
PSA 112:8 Ka nzinzili mnhumbula, hodumba hebu, naye kowona wang'honyo wa heye wosumigwa.
PSA 112:9 Kangulavyaga kwa isungu na kuwapa wazunwa, kutanganika kwa heye kwangikala mazuwa gose. Ludali lwa heye lwangutogoligwa kwa kuhulichizwa.
PSA 112:10 Wanhu wehile wangugona ago na kuzudila, wangujejedaga mizino kwa kuzudila na kubilabila ng'hatu, kitumbila kwa munhu yehile kwangwajilila hela.
PSA 113:1 Mumtogole Mkulu Nguluwi. Hemwe vitumagwa wa Mkulu Nguluwi, mlitogole itagwa lya Mkulu Nguluwi.
PSA 113:2 Itagwa lya Mkulu Nguluwi litogoligwe, lehano mbaka mazuwa gose.
PSA 113:3 Kulawa kolilawilaga isanya mbaka kolizinjilaga isanya, litogoligwe itagwa lya Mkulu Nguluwi.
PSA 113:4 Mkulu Nguluwi ka mchanya mwa wanhu wa isi zeng'ha, ukulu wa heye wangufika mchanya mwa ulanga.
PSA 113:5 Whaani yawele kota Mkulu Nguluwi, Nguluwi wa hetwe? Heye nakekalisa mchanya kuli chigoda cha undewa,
PSA 113:6 ila kangulola hasi, yalole ulanga na isi.
PSA 113:7 Kangumwinulaga yalihela chinhu kulawa kuli nhimbwisi, na kumkwiniza mzunwa kulawa kuli soni ya heye,
PSA 113:8 na kumuwika hamwe na wakulu, wakulu wa wanhu wa heye.
PSA 113:9 Kangumtambichizaga mdala yawele mhende kusangalala kuli ng'handa ya heye, kangumsangalazaga kwa kumtambichiza wana. Mumtogole Mkulu Nguluwi.
PSA 114:1 Wanhu wa Isilaeli lowalawile Misili, walelwa wa Yakobo lowalawile kuli isi ya ulonzi wa chijenzi,
PSA 114:2 Yuda nayali haluga ha Nguluwi, Isilaeli nayali undewa wa heye.
PSA 114:3 Bahali ya Shamu naimona Nguluwi, naibilima, lwanda lwa Yolodani naluleka kuchililika.
PSA 114:4 Vidunda navizumazuma kota ing'holo ilume, vidunda vidodo navizuma kota ming'holo myana.
PSA 114:5 Gwa bahali, lekachoni nakubilima? Nagwe Yolodani, lekachoni nakuleka kuchililika?
PSA 114:6 Hemwe vidunda, lekachoni namzumazuma kota ing'holo ilume? Hemwe vidunda, lekachoni namzuma kota ming'holo myana?
PSA 114:7 Gwa isi, ukakame hali Nguluwi, ukakame hali Nguluwi wa Yakobo,
PSA 114:8 yalingudoliza italawe kuwa ilamba lya mazi, nago maganga nagali nzasa za mazi.
PSA 115:1 Hatuwele hetwe, gwa Mkulu Nguluwi, hatuwele hetwe, ila hegwe uliyeka utogoligwe, kwa chiwalo cha igano lya kwimilila lya hegwe na kukundigwa kwa hegwe.
PSA 115:2 Lekachoni wanhu wa isi walonje, “Kakohi Nguluwi wa hemwe?”
PSA 115:3 Nguluwi wa hetwe ka kilanga, heye kanguditaga geng'ha yalingugana.
PSA 115:4 Jimalukolo ja hewo ndo sendi na zahabu, najigongomanyigwa kwa moko ga wanhu.
PSA 115:5 Jina milomo, ila hajilingulonga, jina meho, ila hajilingona.
PSA 115:6 Jina makutu, ila hajilinguhulika, jina mhenyelo ila, hajilingunusa.
PSA 115:7 Jina moko, ila hajilingwabasa. Jina magulu, ila hajilingujenda. Hajiweza hebu kulavya lizi.
PSA 115:8 Weng'ha walingujigongomanya wochiwhana najo, hihyo du na weng'ha walingujitumbila.
PSA 115:9 Hemwe Waisilaeli mchitumbile kwa Mkulu Nguluwi, heye ndo utanzi na ngawo ya hemwe.
PSA 115:10 Hemwe walelwa wa Aluni, watambika, mchitumbile kwa Mkulu Nguluwi, heye ndo utanzi wa hemwe na ngawo ya hemwe.
PSA 115:11 Hemwe mlingumdumba Mkulu Nguluwi, mchitumbile kwa heye, heye ndo utanzi wa hemwe na ngawo ya hemwe.
PSA 115:12 Mkulu Nguluwi kangutukumbuchila na kotutambichiza, kowatambichiza wanhu wa Isilaeli, kowatambichiza walelwa wa Aluni.
PSA 115:13 Kowatambichiza weng'ha walingumdumba Mkulu Nguluwi, kowatambichiza wakulu na wadodo.
PSA 115:14 Mkulu Nguluwi yawatambichize leka monjezeche, yawatambichize monjezeche hemwe na walelwa wa hemwe.
PSA 115:15 Mtambichizwe na Mkulu Nguluwi, yavilumbile ulanga na isi.
PSA 115:16 Ulanga uwele kuchanya ng'hatu ndo wa heye Mkulu Nguluwi, ila isi nakawapa wanhu.
PSA 115:17 Wabagame hambe wamtogole Mkulu Nguluwi, ne wala walingudulika kuli isi iwele tulu.
PSA 115:18 Ila hetwe tuwele wakomu twangumtogola Mkulu Nguluwi, tomtogola sambi mbaka mazuwa gose. Mumtogole Mkulu Nguluwi.
PSA 116:1 Ndangumgana Mkulu Nguluwi, kwa vila nakanyhulika, kwa vila nakahulika chililo cha kulanda kwa heni kwa isungu.
PSA 116:2 Nakambichila goya ikutu, ahyo ndomlanda mhela weng'ha hondichikala.
PSA 116:3 Vihindo vya kubagama navinzunguluta, kukabusa kwa isi ya wabagame nakuvaba heni, nandali memile kusanzalima na masinzo.
PSA 116:4 Hamba nandimlilila Mkulu Nguluwi, “Gwa Mkulu Nguluwi, undohole.”
PSA 116:5 Mkulu Nguluwi nakamema isungu na kutanganika, Nguluwi wa hetwe ndo yawele na uliholile.
PSA 116:6 Mkulu Nguluwi kanguwamilaga walingunyenyetela, londiwele kuli magazo nakandohola.
PSA 116:7 Usindamale, gwa nhumbula ya heni, kwa vila Mkulu Nguluwi nakanditila ganojile.
PSA 116:8 Nakandohola kulawa kuli kubagama na kusa mahozi ga heni, nakanyamila leka ndeche kugwa.
PSA 116:9 Ndojenda hali heye Mkulu Nguluwi, kuli isi ya wanhu wawele wakomu.
PSA 116:10 Nandali na makundo hala hondonjile, “Nangazika lukami.”
PSA 116:11 Mbaka nandonga kwa lunhwinhwi lwa heni, “Wanhu weng'ha wangulonga udesi.”
PSA 116:12 Ndimhilusile choni Mkulu Nguluwi, kwa isungu lya heye lyeng'ha lyoyanditile?
PSA 116:13 Ndomlavila nhambiko ya divai kwa kundohola, ndolanda kwa itagwa lya heye Mkulu Nguluwi.
PSA 116:14 Ndomwenezela Mkulu Nguluwi chilaho cha heni, hali wanhu wa heye weng'ha.
PSA 116:15 Kubagama kwa wanhu wa kukundigwa wa Mkulu Nguluwi haiwele mbuli ndodo hali heye.
PSA 116:16 Gwa Mkulu Nguluwi, heni nda chitumagwa wa hegwe, nda chitumagwa wa hegwe, mwana wa mpogozi wa hegwe, nakuvichumula vihindo vya heni vya kubagama.
PSA 116:17 Ndokulavila nhambiko za kulonga malumbo na kulanda kwa itagwa lya hegwe, Mkulu Nguluwi.
PSA 116:18 Ndomwenezela Mkulu Nguluwi chilaho cha heni, hali wanhu wa heye weng'ha,
PSA 116:19 wowekungajize hali ng'handa ya heye, hagati ha Yelusalemu. Mumtogole Mkulu Nguluwi.
PSA 117:1 Hemwe wanhu wa isi zeng'ha za chijenzi, mumtogole Mkulu Nguluwi. Hemwe wanhu weng'ha mumtogole.
PSA 117:2 Kwa vila igano lya kwimilila lya heye kwa hetwe ndo likulu, na kukundigwa kwa heye Mkulu Nguluwi kwangikala mazuwa gose. Mumtogole Mkulu Nguluwi.
PSA 118:1 Mlonje malumbo kwa Mkulu Nguluwi, kwa vila ka yanojile, igano lya kwimilila lya heye lyangikala mazuwa gose.
PSA 118:2 Wanhu wa Isilaeli walonje, “Igano lya kwimilila lya heye lyangikala mazuwa gose.”
PSA 118:3 Walelwa wa Aluni, watambika, walonje, “Igano lya kwimilila lya heye lyangikala mazuwa gose.”
PSA 118:4 Weng'ha walingumdumba Mkulu Nguluwi walonje, “Igano lya kwimilila lya heye lyangikala mazuwa gose.”
PSA 118:5 Kuli magazo ga heni nandimlanda Mkulu Nguluwi, naye nakanyhulika na kumbika ndilejehe.
PSA 118:6 Mkulu Nguluwi ka hamwe na heni, silingudumba chinhu, munhu kondita choni?
PSA 118:7 Mkulu Nguluwi ka hamwe na heni, kunhanza, nani ndowona wang'honyo walingunzudila nawalemwela.
PSA 118:8 Fola kubilimila kikala goya kwa Mkulu Nguluwi, kusinda kuchitumbila kwa munhu.
PSA 118:9 Fola kubilimila kikala goya kwa Mkulu Nguluwi, kusinda kuchitumbila kuli vilongozi wa isi.
PSA 118:10 Wanhu wa isi zeng'ha nawanzunguluta, ila kwa itagwa lya Mkulu Nguluwi nandiwadumya.
PSA 118:11 Nawanzunguluta chila ubanzi, ila kwa itagwa lya Mkulu Nguluwi, nandiwadumya.
PSA 118:12 Nawanzunguluta, wenji kota nzuchi, ila nawalakazwa himahima kota chisosolo kuli chiluli, kwa itagwa lya Mkulu Nguluwi nandiwadumya.
PSA 118:13 Nang'hundujizwa kumbele habehi kugwa, ila Mkulu Nguluwi nakanhanza.
PSA 118:14 Mkulu Nguluwi ka mong'ho wa heni ukulu, heye ndo ulohozi wa heni.
PSA 118:15 Lizi lya usangalalo wa kusumya lyanguhulikwa kuli ihema lya hewo watanganiche, “Moko wa kudilo wa Mkulu Nguluwi naudita mbuli ng'hulu.
PSA 118:16 Moko wa kudilo wa Mkulu Nguluwi nawinuligwa kuli kusumya. Moko wa kudilo wa Mkulu Nguluwi naudita mbuli ng'hulu.”
PSA 118:17 Sibagama hebu, ila ndochikala, na kusimila madito ga Mkulu Nguluwi.
PSA 118:18 Mkulu Nguluwi nakanzapa ng'hatu, ila handechile mbagame.
PSA 118:19 Nyhumulile lwizi lwa hachi, nyinjile na kumlonjela Mkulu Nguluwi malumbo.
PSA 118:20 Alu ndo lwizi lwa Mkulu Nguluwi, wanhu wawele watanganiche wokwinjila amo.
PSA 118:21 Ndolonga malumbo, gwa Mkulu Nguluwi kwa kunyhidichila, kwa vila hegwe ndo ulohozi wa heni.
PSA 118:22 Iganga lyowalilemile walinguzenga, naliwa iganga likulu lya msisi,
PSA 118:23 ajo ndo mijito ja Mkulu Nguluwi najo ndo ja kububuwaza ng'hatu kwa hetwe.
PSA 118:24 Ali ndo zuwa lyoyaliditile Mkulu Nguluwi, ahyo tusangalale na kutowa luchenze.
PSA 118:25 Gwa Mkulu Nguluwi, dedede utulohole. Dedede uzidite mbuli za hetwe zilutilile goya, gwa Mkulu Nguluwi.
PSA 118:26 Yatambichizwe ayo yalinguya kwa itagwa lya Mkulu Nguluwi. Twanguwatambichiza kulawa haluga ha Mkulu Nguluwi.
PSA 118:27 Mkulu Nguluwi ndo Nguluwi, naye ndo yatupele lumuli lwa heye. Mibate nhagala mmoko kwa chiwalo cha mnvina, kuno mjenda hamwe mbaka honhu ha kulavila nhambiko.
PSA 118:28 Hegwe ndo Nguluwi wa heni, nani ndangulonga malumbo, ndangukutogola, gwa Mkulu Nguluwi, Nguluwi wa heni.
PSA 118:29 Mlonje malumbo kwa Mkulu Nguluwi kwa vila ka yanojile, igano lya kwimilila lya heye lyangikala mazuwa gose.
PSA 119:1 Nawatambichizwa walingikala ne nongwa, walingibatilila ilajizo lya Mkulu Nguluwi.
PSA 119:2 Nawatambichizwa walinguhulichiza kwamula kwa heye, walingumpala kwa nhumbula yeng'ha.
PSA 119:3 Wanhu wohawaditile wihe, mazuwa gose wanguwinzaga nzila za heye.
PSA 119:4 Gwa Nguluwi, nakutupa malajizo ga hegwe, leka tugebatilile kwa kukundigwa.
PSA 119:5 Ndahaganile ng'hatu kwima nzinzili, kwa kuwinza mizilo ja hegwe.
PSA 119:6 Ahyo nasalikona soni, kwa kijesa kuwala mizilo ja hegwe jeng'ha.
PSA 119:7 Ndokutogola kwa nhumbula igoloche, kuno ndichilangusa malajizo ga hegwe gatanganiche.
PSA 119:8 Ndojiwinza mizilo ja hegwe, uleche kundeka ne hado.
PSA 119:9 Msongolo koulolela ndaze ukomu wa heye leka uwe welile? Kwa kuwinza ulonzi wa hegwe.
PSA 119:10 Ndangikangaza kukuhulichiza kwa nhumbula ya heni yeng'ha, uleche kundeka ndijibelenhuche mizilo ja hegwe.
PSA 119:11 Ndibatilila ulonzi wa hegwe mnhumbula ya heni, leka ndeche kukuditila gehile.
PSA 119:12 Gwa Mkulu Nguluwi, utogoligwe. Undanguse malajizo ga hegwe.
PSA 119:13 Ndogahiluchila kwa lizi malajizo ga hegwe geng'ha gougalavile.
PSA 119:14 Ndangusangalala kuwinza kwamula kwa hegwe, kusinda kuwa na lufufu lwinji.
PSA 119:15 Ndangijesa malajizo ga hegwe, na kijesa ng'hatu kuwala nzila za hegwe.
PSA 119:16 Ndangusangalala kwa chiwalo cha mizilo ja hegwe, siweza kusemwa hebu ulonzi wa hegwe.
PSA 119:17 Unditile igano heni chitumagwa wa hegwe, leka ndikale na kibata ulonzi wa hegwe.
PSA 119:18 Ugagubule meho ga heni, ndigone malanguso ga kububuwaza kuli malajizo ga hegwe.
PSA 119:19 Heni nda mjenzi hela hano muisi, uleche kuvisa heni mizilo ja hegwe.
PSA 119:20 Nhumbula ya heni yangugazika kwa maya, ga kugana kuzizela ng'hatu nhaguso za hegwe mhela weng'ha.
PSA 119:21 Hegwe kwanguwang'hanuchila walingidaya na wawele wapanjilwe, walingujibelenhuka mizilo ja hegwe.
PSA 119:22 Umbiche kutali na maligo na kubeza kwa hewo, kwa vila ndibatilila kwamula kwa hegwe.
PSA 119:23 Wakulu wanguting'hana na kugana kunditila vibi, heni chitumagwa wa hegwe ndochijesa kwa chiwalo cha mizilo ja hegwe.
PSA 119:24 Kwamula kwa hegwe ndo usangalalo wa heni, azo ndo zilingundongoza kota goloko yanojile.
PSA 119:25 Ndangugalawata hanyi mnhimbwisi, umhe heni kahi ukomu kota vyoulagane.
PSA 119:26 Nandonga kwa mlomo wa heni gala gonditile, nagwe nakunyidichila. Undanguse malajizo ga hegwe.
PSA 119:27 Undanguse vyoilinguganigwa kibatilila malajizo ga hegwe, nani ndogajesa madito ga hegwe ga kububuwaza.
PSA 119:28 Nhoka kwa masinzo, unyhilulile mong'ho kota vyoulagane.
PSA 119:29 Umbiche kutali na nzila za uhadi, undanguse kwa isungu malajizo ga hegwe.
PSA 119:30 Nanyhagula nzila ya kukundigwa, ndibatilila nhaguso za hegwe.
PSA 119:31 Ndangibatilila kwamula kwa hegwe, gwa Mkulu Nguluwi, uleche kukunda mbasigwe soni.
PSA 119:32 Ndikomya, ndojiwinza mizilo ja hegwe, kwa vila kwangumha heni uwanzi wa kugazela ng'hatu.
PSA 119:33 Gwa Mkulu Nguluwi, undanguse kibatilila mizilo ja hegwe, nani ndojibatilila mbaka kuduma.
PSA 119:34 Unzelese leka ndibatilile malajizo ga hegwe, ndigawinze kwa nhumbula ya heni yeng'ha.
PSA 119:35 Undongoze kuli nzila ya mizilo ja hegwe, kwa vila amo ndanguwa na usangalalo.
PSA 119:36 Umhe heni maya ga kibatilila kwamula kwa hegwe, haiwele kuli lufufu.
PSA 119:37 Umbiche kutali, ndeche kuwinza mbuli zohambe zitanze chinhu, undajile nzila ya hegwe, umhe heni ukomu.
PSA 119:38 Unyenezele kulagana kwa hegwe, heni chitumagwa wa hegwe, kulagana koulinguwapa wala walingukuhulichiza.
PSA 119:39 Undavile soni yondilinguidumba, kwa vila nhaguso za hegwe ndo zinoga.
PSA 119:40 Ndangona maya ng'hatu kibatilila malajizo ga hegwe, umhe heni ukomu, ndikomya hegwe kwa utanganiche.
PSA 119:41 Igano lya kwimilila lya hegwe lyuye kwa heni, gwa Mkulu Nguluwi, undohole kota vyoulagane.
PSA 119:42 Aho ndoweza kuwedichila awo walingundiga, kwa vila ndina makundo ng'hatu na ulonzi wa hegwe.
PSA 119:43 Uleche kusa hebu ulonzi wa kukomya kuli mlomo wa heni, kwa vila kitumbila kwa heni kwa kuli nhaguso za hegwe.
PSA 119:44 Ndogabatilila malajizo ga hegwe mazuwa gose, ena, mazuwa gose na mazuwa gose.
PSA 119:45 Ndochikala kuli kilejeha kuwele kwenele, kwa vila ndangibatilila malajizo ga hegwe.
PSA 119:46 Ndowalonjela wandewa kwamula kwa hegwe, ne kona soni.
PSA 119:47 Maya ga heni ndo kibatilila mizilo ja hegwe, jondilingujigana.
PSA 119:48 Ndangugahulichiza na kugagana malajizo ga hegwe, mizilo ja hegwe ndojijesa.
PSA 119:49 Ukumbuchile kota vyoulagane na heni, chitumagwa wa hegwe, kulagana kuwele nakumha heni kitumbila.
PSA 119:50 Mbaka hondiwa mmagazo ndanguwa sindamale, kwa vila kulagana kwa hegwe kwangumha heni ukomu.
PSA 119:51 Walingidaya wangundanila mazuwa gose, ila hambe mbelenhuche malajizo ga hegwe.
PSA 119:52 Gwa Mkulu Nguluwi, ndanguzikumbuchila nhaguso za hegwe za katali, nazo zangunyhembuliza.
PSA 119:53 Ndanguwa na ng'halazi ing'ang'ale, hondiwona wehile wangubena malajizo ga hegwe.
PSA 119:54 Mizilo ja hegwe najiwa lwimbo lwa heni, londilingikala kwa mhela uchefu.
PSA 119:55 Nechilo ndangukukumbuchila, gwa Mkulu Nguluwi, na kibatilila malajizo ga hegwe.
PSA 119:56 Awu ndo utambichizo ukulu kwa heni, kwa vila ndangibatilila malajizo ga hegwe.
PSA 119:57 Gwa Mkulu Nguluwi, hegwe uliyeka ndo ndilingukugana, ndangilagana kibatilila ulonzi wa hegwe.
PSA 119:58 Ndangulanda kwa nhumbula ya heni yeng'ha, umbonele isungu kota vyoulagane.
PSA 119:59 Nandigajesa madito ga heni, nanyhiluka leka mbinze kwamula kwa hegwe.
PSA 119:60 Ne kukawila ndangudita himahima, kujibatilila mizilo ja hegwe.
PSA 119:61 Wehile nawawika midiwa leka wangwilize, ila heni sisemwa malajizo ga hegwe.
PSA 119:62 Nechilo ng'hatu ndangulilimka kukutogola, kwa chiwalo cha nhaguso za hegwe zitanganiche.
PSA 119:63 Heni nda goloko wa weng'ha walingukudumba, goloko wa hewo walingibatilila malajizo ga hegwe.
PSA 119:64 Isi naimema igano lya kwimilila lya hegwe, gwa Mkulu Nguluwi, undanguse mizilo ja hegwe.
PSA 119:65 Nakunditila goya heni chitumagwa wa hegwe, kota vyoulagane, gwa Mkulu Nguluwi.
PSA 119:66 Undanguse kuvizela goya na kuwa na luhala, kwa vila ndina makundo ng'hatu na mizilo ja hegwe.
PSA 119:67 Louwele ung'hali kunzapa nanyajilila nzila, ila lelo ndangibatilila ulonzi wa hegwe.
PSA 119:68 Hegwe ndo unojile na kwangudita ganojile, undanguse mizilo ja hegwe.
PSA 119:69 Walingidaya wangulonga udesi kuwala heni, ila heni ndangibatilila malajizo ga hegwe kwa nhumbula ya heni yeng'ha.
PSA 119:70 Nhumbula za hewo nazigagadala, ila ndangusangalala kwa chiwalo cha malajizo ga hegwe.
PSA 119:71 Nayali goya kwa heni kugazigwa, kwa vila nakundita ndilanguse malajizo ga hegwe.
PSA 119:72 Malajizo gougawichile ndo ganoga kwa heni, kusinda lufufu lweng'ha lwa muisi.
PSA 119:73 Moko ga hegwe nagandita na kunyimiza nzinzili, umhe heni uwanzi wa kuvizela leka ndilanguse mizilo ja hegwe.
PSA 119:74 Walingukudumba wombona na kusangalala, kwa vila kitumbila kwa heni kwa kuli ulonzi wa hegwe.
PSA 119:75 Gwa Mkulu Nguluwi, ndivizela nhaguso za hegwe ndo za kutanganika, na kota nakunzapa kwa vila hegwe kwa wa kukundigwa.
PSA 119:76 Igano lya kwimilila lya hegwe linyhembulize, kota vyoulagane kwa heni, chitumagwa wa hegwe.
PSA 119:77 Umbonele isungu leka ndikale, kwa vila malajizo ga hegwe ndo usangalalo wa heni.
PSA 119:78 Walingidaya wabasigwe soni kwa vila nawalonga udesi kuwala heni, ila ndochijesa kuwala malajizo ga hegwe.
PSA 119:79 Weng'ha walingukudumba woye kwa heni, leka wakuzele kwamula kwa hegwe.
PSA 119:80 Nhumbula ya heni yeng'ha ibatilile mizilo ja hegwe, leka ndeche kubasigwa soni.
PSA 119:81 Nhoka kwa chiwalo cha kubeteza ulohozi wa heni, ndanguwika kitumbila kwa heni kuli ulonzi wa hegwe.
PSA 119:82 Meho ga heni gangubilabila kwa kubeteza choulagane. Ndanguuza, “Kokuya nili kunyhembuliza?”
PSA 119:83 Hanga silingutanza chinhu kota chihako cha igozi chiwifigwe na iyosi, sisemwile malajizo ga hegwe.
PSA 119:84 Heni chitumagwa wa hegwe ndobeteza mbaka nili? Kowatagusa nili wala walingumbunza?
PSA 119:85 Walingidaya wambawila misimo, wanhu wawele hambe wawinze malajizo ga hegwe.
PSA 119:86 Mizilo ja hegwe jeng'ha ndo ja kukundigwa, wanhu wangungaza ne hachi, unhanze.
PSA 119:87 Wahabehi kundumya, ila sibenile malajizo ga hegwe.
PSA 119:88 Uwamile ukomu wa heni kwa kiwhana na igano lya kwimilila lya hegwe, leka ndibatilile kwamula koulonjile.
PSA 119:89 Gwa Mkulu Nguluwi, ulonzi wa hegwe wangikala mazuwa gose, nautawizwa kuchanya kilanga.
PSA 119:90 Kukundigwa kwa hegwe kwangikala kuli lulelo lweng'ha, nakuiwika isi honhu hake na yangikala mazuwa gose.
PSA 119:91 Vinhu vyeng'ha vyangikala kwa nhaguso za hegwe, kwa vila vyangukukolela mijito.
PSA 119:92 Wone malajizo ga hegwe hagawele usangalalo wa heni, ndahawele ndumigwe kwa magazo ga heni.
PSA 119:93 Siweza kusemwa malajizo ga hegwe, kwa vila kwa ago nakumha heni ukomu.
PSA 119:94 Heni nda wa hegwe, undohole, kwa vila nandikangaza kibatilila malajizo ga hegwe.
PSA 119:95 Wehile wangumbeteza leka wang'hopole, ila ndangijesa kwamula kwa hegwe.
PSA 119:96 Ndivizela chila chinhu changuwa na kuduma, ila mizilo ja hegwe jahela kuduma.
PSA 119:97 Ndangugagana ng'hatu malajizo ga hegwe. Ndangugajesa nemisi yeng'ha.
PSA 119:98 Mizilo ja hegwe ja hamwe na heni mazuwa gose, jangumha heni luhala kusinda wang'honyo wa heni.
PSA 119:99 Ndivizela kusinda walangusa wa heni weng'ha, kwa vila ndangijesa kwamula kwa hegwe.
PSA 119:100 Ndanguvizela kusinda wasekulu wa heni, kwa vila ndangibatilila malajizo ga hegwe.
PSA 119:101 Ndangilemeza kuwinza nzila yihile, leka ndibatilile ulonzi wa hegwe.
PSA 119:102 Sibelenhuche nhaguso za hegwe, kwa vila hegwe nakundangusa.
PSA 119:103 Ulonzi wa hegwe ndo unona ng'hatu kwa heni, ena, ndo unona ng'hatu kusinda hanombwa.
PSA 119:104 Kwa malajizo ga hegwe ndanguwa na luhala, ahyo ndanguzudila chila chilingulutilila vibi.
PSA 119:105 Ulonzi wa hegwe ndo chenje cha kundongoza, na lumuli kuli nzila ya heni.
PSA 119:106 Nandilaha na kutawiza chilaho cha heni, kota ndobatilila nhaguso za hegwe za kukomya.
PSA 119:107 Gwa Mkulu Nguluwi, ndangugazika ng'hatu, uwamile ukomu wa heni kota vyoulagane.
PSA 119:108 Gwa Mkulu Nguluwi, ubochele lutogo lwa heni lwa kunuwila, na kundangusa nhaguso za hegwe.
PSA 119:109 Mazuwa gose kikala kwa heni kwa habehi kwajilila, ila hambe ndigasemwe malajizo ga hegwe.
PSA 119:110 Wehile nawambichila midiwa, ila hambe mbelenhuche malajizo ga hegwe.
PSA 119:111 Kwamula kwa hegwe ndo uhalizi wa heni mazuwa gose, ako ndo usangalalo wa nhumbula ya heni.
PSA 119:112 Nangana kwa nhumbula ya heni yeng'ha, kuwinza malajizo ga hegwe mazuwa gose.
PSA 119:113 Ndanguwazudila wanhu wadesi, ila ndangugagana malajizo ga hegwe.
PSA 119:114 Hegwe ndo honhu ha heni ha kikala goya na ngawo ya heni, ndanguwika kitumbila kwa heni kuli ulonzi wa hegwe.
PSA 119:115 Muche kwa heni, hemwe mwihile, leka ndijibatilile mizilo ja Nguluwi wa heni.
PSA 119:116 Undite ndiwe nzinzili kota vyoulagane, nani ndochikala, uleche kukunda mbasigwe soni kuli kitumbila kwa heni.
PSA 119:117 Unyimize nzinzili nani ndoloholigwa, mazuwa gose ndiwe ndilinguhulichiza mizilo ja hegwe.
PSA 119:118 Kwanguwalema weng'ha walingubelenhuka malajizo ga hegwe, kwa vila majesa ga hewo ga uhadi hagalingutanza chinhu.
PSA 119:119 Wehile weng'ha kwanguwosa kota wavu, ahyo heni ndangugana kwamula kwa hegwe.
PSA 119:120 Ndangukakama kwa kukudumba, ndangudumba kwa chiwalo cha nhaguso za hegwe.
PSA 119:121 Nandita mbuli zinojile na za hachi, uleche kundeka kuli ndole za walingumbunza.
PSA 119:122 Ulagane kota konhanza, heni chitumagwa wa hegwe, uleche kukunda walingidaya wambunze.
PSA 119:123 Meho ga heni gangubilabila ndibeteza undohole, ndibeteza weneze vyoulagane ilagano lya kutanganika.
PSA 119:124 Unditile, heni chitumagwa wa hegwe kwa igano lya kwimilila lya hegwe, undanguse mizilo ja hegwe.
PSA 119:125 Heni ndo chitumagwa wa hegwe, umhe heni uwanzi wa kuvizela, leka ndikuzele kwamula kwa hegwe.
PSA 119:126 Sambi ndo mhela wa Mkulu Nguluwi kudita chinhu, kwa vila wanhu wangubena malajizo ga hegwe.
PSA 119:127 Ndangujigana mizilo ja hegwe, kusinda zahabu inojile ng'hatu.
PSA 119:128 Ahyo, ndangugawinza malajizo ga hegwe geng'ha, chila nzila yihile ndanguizudila.
PSA 119:129 Kwamula kwa hegwe ndo kwa kububuwaza, ahyo ndangukubatilila kwa nhumbula ya heni yeng'ha.
PSA 119:130 Ulonzi wa malanguso ga hegwe gangigalaga lumuli, ganguwapaga luhala wanhu wohawavizelele chinhu.
PSA 119:131 Nhumbula ya heni ina maya ng'hatu, kwa vila ndangujigana ng'hatu mizilo ja hegwe.
PSA 119:132 Ungalamchile na kumbonela isungu, kota vyoulinguwaditila walingukugana.
PSA 119:133 Umbiche ndiwe nzinzili hondijenda kota vyoulagane, uleche kukunda ndongozwe na wihe.
PSA 119:134 Ungombole kulawa kwa walingumbunza, leka ndibatilile malajizo ga hegwe.
PSA 119:135 Unhambichize, heni chitumagwa wa hegwe, undanguse mizilo ja hegwe.
PSA 119:136 Meho ga heni gangulavya mahozi kota lwanda, kwa vila wanhu hawalingubatilila malajizo ga hegwe.
PSA 119:137 Gwa Mkulu Nguluwi, hegwe kwa utanganiche, na nhaguso za hegwe ndo za hachi.
PSA 119:138 Nakulavya kwamula kwa hegwe, kwa kukundigwa na kutanganika.
PSA 119:139 Igano lya heni kwa hegwe lyangundita nzudile ng'hatu, kwa vila wang'honyo wa heni nawausemwa ulonzi wa hegwe.
PSA 119:140 Kulagana kwa hegwe ndo kwa kukomya ng'hatu, nani chitumagwa wa hegwe ndangukugana kulagana ako.
PSA 119:141 Heni nda mdodo na ndangubezigwa, ila sisemwa malajizo ga hegwe.
PSA 119:142 Kutanganika kwa hegwe kwangikala mazuwa gose, malajizo ga hegwe ndo ga kukomya.
PSA 119:143 Magazo na masinzo navifika heni, ila mizilo ja hegwe ndo usangalalo wa heni.
PSA 119:144 Kwamula kwa hegwe ndo kwa hachi mazuwa gose, umhe heni uwanzi wa kuvizela leka ndikale.
PSA 119:145 Ndangukulilila kwa nhumbula ya heni yeng'ha, gwa Mkulu Nguluwi, unyhidichile leka mbinze mizilo ja hegwe.
PSA 119:146 Ndangukulilila undohole, leka ndibatilile kwamula kwa hegwe.
PSA 119:147 Ndangulilimka kung'hali kubwemwenzuka na kukulanda utanzi, ndanguwika kitumbila kwa heni kuli ulonzi wa hegwe.
PSA 119:148 Siwasile nechilo yeng'ha, kwa chiwalo cha kijesa ulonzi wa hegwe.
PSA 119:149 Gwa Mkulu Nguluwi, kwa igano lya kwimilila lya hegwe, unyhuliche, uwamile ukomu wa heni kwa hachi ya hegwe.
PSA 119:150 Wanhu wang'ang'ale walingumbunza wangunyejelela, awo wa kutali ng'hatu na malajizo ga hegwe,
PSA 119:151 ila, gwa Mkulu Nguluwi, hegwe kwa habehi na heni, na mizilo ja hegwe jeng'ha ndo ja kukundigwa.
PSA 119:152 Kulawa katali nandilangusa kwamula kwa hegwe, kuwele ukuwichile kukale mazuwa gose.
PSA 119:153 Ulole magazo ga heni, undohole, kwa vila sigasemwile malajizo ga hegwe.
PSA 119:154 Undewele heni na kungombola, uwamile ukomu wa heni kota vyoulagane.
PSA 119:155 Wehile hawoloholigwa, kwa vila hambe wajiwinze mizilo ja hegwe.
PSA 119:156 Gwa Mkulu Nguluwi, isungu lya hegwe ndo likulu, uwamile ukomu wa heni kwa kiwhana na nhaguso za hegwe.
PSA 119:157 Wang'honyo na walingumbunza ndo wenji, ila sikuleka kwamula kwa hegwe.
PSA 119:158 Hondiwona walingudita wihe, ndanguzudizwa ng'hatu, kwa vila hambe webatilile ulonzi wa hegwe.
PSA 119:159 Gwa Mkulu Nguluwi, ulole vyondilingugagana malajizo ga hegwe. Uwamile ukomu wa heni kwa kiwhana na igano lya kwimilila lya hegwe.
PSA 119:160 Ulonzi wa hegwe weng'ha ndo wa kukomya, nhaguso za hegwe zeng'ha ndo za kutanganika, zangikala mazuwa gose.
PSA 119:161 Wang'hangala wangumbunza ne chiwalo, ila nhumbula ya heni yangukakama kwa chiwalo cha ulonzi wa hegwe.
PSA 119:162 Ndangusangalala kwa chiwalo cha ulonzi wa hegwe, kota munhu yalufichile lufufu lwinji ng'hatu.
PSA 119:163 Ndanguuzudila ng'hatu udesi, ila ndangugagana malajizo ga hegwe.
PSA 119:164 Ndangukutogola mala saba chila zuwa, kwa chiwalo cha nhaguso za hegwe zitanganiche.
PSA 119:165 Walingugagana malajizo ga hegwe wana kikala goya kukulu, haduhu choweza kuwagwisa.
PSA 119:166 Gwa Mkulu Nguluwi, ndangukubeteza undohole, ndangweneza mizilo ja hegwe.
PSA 119:167 Ndangibatilila kwamula kwa hegwe, ndangukugana ng'hatu kwamula ako.
PSA 119:168 Ndangibatilila malajizo na kwamula kwa hegwe, kwa vila kwangugona madito ga heni.
PSA 119:169 Gwa Mkulu Nguluwi, chililo cha heni chikufichile. Umhe heni uwanzi wa kuvizela kota vyoulagane.
PSA 119:170 Kulanda kwa heni kukufichile, undohole kota vyoulagane.
PSA 119:171 Ndolutilila kulonga lutogo lwa hegwe, kwa vila kwangundangusa mizilo ja hegwe.
PSA 119:172 Ndokwimba kwa chiwalo cha ulonzi wa hegwe, kwa vila mizilo ja hegwe jeng'ha ndo ja hachi.
PSA 119:173 Unhanze kwa mong'ho wa hegwe, kwa vila nanyamula kuwinza malajizo ga hegwe.
PSA 119:174 Gwa Mkulu Nguluwi, ndangubeteza lukami undohole, malajizo ga hegwe ndo kusangalala kwa heni.
PSA 119:175 Unhambichize kikala leka ndikutogole, na malajizo ga hegwe ganhanze.
PSA 119:176 Ndangulubaluba kota ing'holo lyajilile, uye umhale heni chitumagwa wa hegwe, kwa vila sisemwile mizilo ja hegwe.
PSA 120:1 (Lwimbo lwa kuluta kuchanya.) Kuli magazo ga heni nandimchema Mkulu Nguluwi, naye nakanyhidichila.
PSA 120:2 Gwa Mkulu Nguluwi, undohole kulawa kwa wanhu wadesi na wahadi.
PSA 120:3 Hemwe wanhu wahadi, mopegwa choni? Mozapigwa ndaze?
PSA 120:4 Kowagaza kwa misale jing'ang'ale ja mwamizi, na kwa makala ga chiluli ching'ang'ale.
PSA 120:5 Ndochona kwa vila ndangikala kota mjenzi aku Mesheki, ama kuli mihema ja Kedali.
PSA 120:6 Nandikala kwa mihela minji ng'hatu hali wanhu walinguzudila kikala goya.
PSA 120:7 Heni nda munhu wa kikala goya, ila hondilonga ahyo, hewo wangugana ngondo.
PSA 121:1 (Lwimbo lwa kuluta kuchanya.) Ndangulola kuchanya kuli vidunda, utanzi wa heni wolawa kohi?
PSA 121:2 Utanzi wa heni wangulawa kwa Mkulu Nguluwi, yalumbile ulanga na isi.
PSA 121:3 Hokuleka ugwe, mwamizi wa hegwe hambe yasinzile.
PSA 121:4 Ena, mwamizi wa Isilaeli, hambe yasinzile ne kuwasa.
PSA 121:5 Mkulu Nguluwi ndo mwamizi wa hegwe, ka ubanzi wa hegwe wa kudilo kota lubehelo kukwamila.
PSA 121:6 Nemisi isanya haliweza kukulumiza, ne nyelezi mhela wa nechilo.
PSA 121:7 Mkulu Nguluwi kokwamila na lihile lyoneche, kowamila goya ukomu wa hegwe.
PSA 121:8 Mkulu Nguluwi kokwamila kuli mbuli za hegwe za chila zuwa, kulawa sambi mbaka mazuwa gose.
PSA 122:1 (Lwimbo lwa kuluta kuchanya. Lwimbo lwa Daudi.) Nasangalala vyowandonjele, “Tulute kaye kwa Mkulu Nguluwi.”
PSA 122:2 Lelo twa hano natwima, mgati mwa lwizi lwa hegwe, gwa Yelusalemu.
PSA 122:3 Yelusalemu, muji uzenjigwe, leka wanhu weting'hane amo.
PSA 122:4 Amo ndo nhanzi zilinguluta, ena, nhanzi za Mkulu Nguluwi, kulonga malumbo kwa Mkulu Nguluwi kota vyoyalajize.
PSA 122:5 Amo namuwichigwa chitala cha utaguso wa hachi, chitala cha lukolo lwa chiundewa lwa Daudi.
PSA 122:6 Muulandile kikala goya muji wa Yelusalemu. “Weng'ha walinguugana, mbuli za hewo zilutilile goya.
PSA 122:7 Mgati mwa ng'hanzi za hegwe kuwe na kikala goya, na ngome ya hegwe iwe goya.”
PSA 122:8 Kwa chiwalo cha wanhu wa heni na wang'holozangu, ndangulonga, “Gwa Yelusalemu, ndangukuganila kikala goya.
PSA 122:9 Kwa chiwalo cha ng'handa ya Mkulu Nguluwi, Nguluwi wa hetwe, ndangukulandila ganojile.”
PSA 123:1 (Lwimbo lwa kuluta kuchanya.) Ndangwinula meho ga heni kwa hegwe, ndangukulola hegwe ulingulongoza ako kuchanya kilanga.
PSA 123:2 Kota vitumagwa vyowalingumlola mkulu wa hewo, kota mpogozi vyoyalingitumbila kwa mkulu wa heye, ndo natwe vyotulingitumbila kwa hegwe, gwa Mkulu Nguluwi, Nguluwi wa hetwe, mbaka aho houtonela isungu.
PSA 123:3 Utonele isungu, gwa Mkulu Nguluwi, utonele isungu, kwa vila natubezigwa lukami.
PSA 123:4 Natiguta kwa mhela winji kubezigwa kwa wawele na lufufu, walingidaya wangutona kota natubezigwa.
PSA 124:1 (Lwimbo lwa kuluta kuchanya. Lwimbo lwa Daudi.) “Wone Mkulu Nguluwi yahawele haduhu ubanzi wa hetwe.” Mlonje mweng'ha muwele kuli Isilaeli.
PSA 124:2 “Wone Mkulu Nguluwi yahawele haduhu ubanzi wa hetwe, mhela wula lotutowigwe na wang'honyo,
PSA 124:3 ndangukomya twahawele tumeligwe tung'hali wakomu, mhela ng'halazi ya hewo loitufichile.
PSA 124:4 Twahaholigwe na mazi tendema, twahatowigwe kota mazi ga lwanda,
PSA 124:5 mazi galinguluta himahima gahatuholile.”
PSA 124:6 Yatogoligwe Mkulu Nguluwi, yawele hatulechile kuli ndole za hewo.
PSA 124:7 Natusulupuka kota chideje kuli idiwa, idiwa nalibenigwa, natwe natuloholigwa.
PSA 124:8 Utanzi wa hetwe wangulawa kwa Mkulu Nguluwi, yalumbile ulanga na isi.
PSA 125:1 (Lwimbo lwa kuluta kuchanya.) Walingitumbila kwa Mkulu Nguluwi, wa kota chidunda cha Siyoni, chiwele hambe chitigasiche ila changupona chiwele nzinzili mazuwa gose.
PSA 125:2 Kota Yelusalemu vyoilinguzungulutwa na vidunda, ndo Mkulu Nguluwi vyoyalinguwazunguluta wanhu wa heye, kulawa sambi na mazuwa gose.
PSA 125:3 Wehile hawolutilila kuilongoza isi ya watanganiche, leka watanganiche waleche kudita gehile kota wala.
PSA 125:4 Gwa Mkulu Nguluwi, uwe unojile kwa wanhu wanojile, kwa wala wagoloche nhumbula.
PSA 125:5 Ila walingugalamka na kuwinza nzila za hewo zihile, Mkulu Nguluwi uwose hamwe na walingudita gehile. Kikala goya kuwe na Isilaeli.
PSA 126:1 (Lwimbo lwa kuluta kuchanya.) Mkulu Nguluwi loyatuwichile goya na kutuhilula Siyoni, natwali kota wanhu walingulota.
PSA 126:2 Ahyo natwaluka kuseka, natutowa luchenze kwa usangalalo. Wanhu wa isi zinji nawalonga, “Mkulu Nguluwi nakawaditila mbuli ng'hulu.”
PSA 126:3 Ena, Mkulu Nguluwi nakatuditila mbuli ng'hulu, natusangalala lukami.
PSA 126:4 Gwa Mkulu Nguluwi, utuwiche goya kahi, kota nhonya vyoilingigala mazi kugunuche.
PSA 126:5 Walingunyala kwa mahozi, wobeta kwa usangalalo.
PSA 126:6 Walinguluta kunyala nyhadikwa kuno wolila, wohiluka kwa usangalalo wawele na mbena.
PSA 127:1 (Lwimbo lwa kuluta kuchanya. Lwimbo lwa Solomoni.) Mkulu Nguluwi wone hazenjile ng'handa, walinguzenga wangitunya hela. Wone Mkulu Nguluwi howamila muji, walingwamila wanguwa meho kwa kitunya hela.
PSA 127:2 Mwangitunya hela kulilimka lufuku ng'hatu, na kukawila kuluta kwesela matinazo, mipalile chilyo kwa chituguti cha hemwe. Nguluwi kanguwapaga chilyo wala yalinguwagana, hanga howowasa.
PSA 127:3 Wana ndo utambichizo kulawa kwa Mkulu Nguluwi, wana ndo ndolendole kulawa kwa heye.
PSA 127:4 Wana wapondigwe kuno wahaza wa hewo wang'hali wawele na mong'ho, woweza kuwatanza wahaza wa hewo howowa walalile.
PSA 127:5 Ahyo, nakatambichizwa munhu yawele na wana wenji. Holemwela hoyowa habehi na mng'honyo hali chitala.
PSA 128:1 (Lwimbo lwa kuluta kuchanya.) Nawatambichizwa weng'ha walingumdumba Mkulu Nguluwi, walingikala kwa kuwinza nzila za heye.
PSA 128:2 Kowa na mafuza ga chituguti cha hegwe, kosangalala na mbuli za hegwe zolutilila goya.
PSA 128:3 Mchewako kowa kota mzabibu wa mafuza menji kaye kwa hegwe, wana wa hegwe kota mizuchila ja mizeituni kuzunguluta chisaga cha hegwe.
PSA 128:4 Ena, ndo vyoyotambichizwa, munhu yalingumdumba Mkulu Nguluwi.
PSA 128:5 Mkulu Nguluwi yakutambichize kulawa Siyoni. Uzone mbuli za Yelusalemu zilutilila goya mazuwa gose ga ukomu wa hegwe.
PSA 128:6 Wikale mbaka uwone wazukulu wa hegwe. Kikala goya kuwe na Isilaeli.
PSA 129:1 (Lwimbo lwa kuluta kuchanya.) “Nawangaza ng'hatu kulawa kuli usongolo wa heni.” Chila munhu kuli Isilaeli yalonje,
PSA 129:2 “Nawangaza ng'hatu kulawa kuli usongolo wa heni, ila hawawezile kusumya heni.
PSA 129:3 Nawanhowa ng'hatu kumgongo kwa heni, kumgongo kwangu nakuwa kota misitali ja kumgunda.
PSA 129:4 Ila Mkulu Nguluwi ndo katanganika, nakandohola kulawa kuli ng'weso za wanhu wehile.”
PSA 129:5 Wabasigwe soni na kuhiluswa kumbele, wala weng'ha walinguuzudila muji wa Siyoni.
PSA 129:6 Wawe kota misolo jilihela mizabi milefu, jiwele janguswinhaga lojiwa jing'hali kukula,
PSA 129:7 kuduhu munhu yalingukola mijito ja kujikungajiza, ne kuhola kota nyinza.
PSA 129:8 Haduhuli yalingukola habehi hoyolonga, “Mkulu Nguluwi yawatambichize. Twanguwatambichiza kwa itagwa lya Mkulu Nguluwi.”
PSA 130:1 (Lwimbo lwa kuluta kuchanya.) Kulawa kuli magazo ga heni, ndangukulilila, gwa Mkulu Nguluwi.
PSA 130:2 Gwa Mkulu, uhuliche lizi lya heni, uwiche goya ikutu lya hegwe uhulichize kulanda kwa heni kwa isungu.
PSA 130:3 Gwa Mkulu Nguluwi, wone wahakumbuchile wihe wa hetwe gwa Mkulu, whaani yahawezile kusulupuka kulawa kuli kugazigwa?
PSA 130:4 Ila kwa hegwe twanguwa na kulechelwa, leka hetwe tukudumbe.
PSA 130:5 Ndangitumbila kwa Mkulu Nguluwi kwa nhumbula ya heni yeng'ha, ndina makundo ng'hatu na ulonzi wa heye.
PSA 130:6 Ndangitumbila kwa Mkulu, kusinda wamizi walingubeteza kubwemwenzuka, kusinda wamizi walingubeteza mitondo.
PSA 130:7 Gwa Isilaeli, witumbile kwa Mkulu Nguluwi, kwa vila kwa heye Mkulu Nguluwi kuna igano lya kwimilila, kwa heye kuna mong'ho ng'hatu wa kutugombola.
PSA 130:8 Heye kowagombola wanhu wa Isilaeli, kulawa kuli gehile ga hewo geng'ha.
PSA 131:1 (Lwimbo lwa kuluta kuchanya. Lwimbo lwa Daudi.) Gwa Mkulu Nguluwi, ndahela nhumbula ya kidaya, siwele munhu wa kidaya. Hambe ndite mbuli ng'hulu, ama gawele ga vinduzanduza ng'hatu kwa heni.
PSA 131:2 Ila nhumbula ya heni naisindamala na kuwa na kikala goya, kota chali vyochisindamale na mayake, ndo nhumbula ya heni vyoisindamale.
PSA 131:3 Gwa Isilaeli, witumbile kwa Mkulu Nguluwi, kulawa sambi mbaka mazuwa gose.
PSA 132:1 (Lwimbo lwa kuluta kuchanya.) Gwa Mkulu Nguluwi, mkumbuchile Daudi, ukumbuchile magazo geng'ha goyapatile.
PSA 132:2 Gwa Mkulu Nguluwi, ukumbuchile kulagana koyakupele, chilaho choyakulahile, gwa Nguluwi wa Yakobo, Nguluwi Yawele na Mong'ho,
PSA 132:3 “Sikwinjila mgati mwa ng'handa ya heni, ne kuwasa kuli chinhanda cha heni,
PSA 132:4 sikunda kuwasa, ne kusinzila,
PSA 132:5 mbaka ndikupe hegwe Mkulu Nguluwi honhu ha kikala, haluga ha hegwe, gwa Nguluwi wa Yakobo, Nguluwi Yawele na Mong'ho.”
PSA 132:6 Ako Efulata natuhulika mbuli za isanduku lya ilagano, natulifika kuli migunda ja Yealimu.
PSA 132:7 “Goya. Tuche kaye kwa Nguluwi, tufugame kumwando mwa chigoda cha heye cha undewa.”
PSA 132:8 Ndangukulanda winuche, gwa Mkulu Nguluwi, ulute hali honhu ha hegwe ha kwesela, hegwe, hamwe na isanduku lya ilagano lya mong'ho wa hegwe.
PSA 132:9 Watambika wa hegwe wagubikwe na kutanganika, na welile wa hegwe watowe iyowe lya usangalalo.
PSA 132:10 Kwa chiwalo cha Daudi, chitumagwa wa hegwe, uleche kumlema yabakalizwe mafuta wa hegwe.
PSA 132:11 Mkulu Nguluwi nakamlahila Daudi chilaho cha kukomya, chilaho chiwele hambe yachigalule. “Ndomuwika yumwe wa walelwa wa hegwe, yakalise kuli chigoda cha hegwe cha undewa.
PSA 132:12 Wone wana wa hegwe webatilile ilagano lya heni, na kibatilila malanguso gondiwapa, wana wa hewo kahi wowa wandewa kota hegwe mazuwa gose.”
PSA 132:13 Kukomya, Mkulu Nguluwi nakauhagula muji wa Siyoni, nakagana hawe haluga ha heye.
PSA 132:14 “Aha ndo hondichikala mazuwa gose, ndo haluga ha heni kwa vila nandihagana.
PSA 132:15 Ndoutambichiza ng'hatu muji wa Siyoni kwa vinhu vyake, ndowagutiza chilyo wazunwa wake.
PSA 132:16 Ndowavaliza ulohozi watambika wake, na walingukundigwa wake wotowa luchenze lwa usangalalo.
PSA 132:17 Kulawa aha, hemwe mowa na mndewa yazidahe wa lukolo lwa Daudi. Kota chenje chilingwimilila ndomwimiza mndewa yondimbakalize mafuta.
PSA 132:18 Wang'honyo wake ndowavaliza soni, ila heye ndomvaliza kofia ya chiundewa.”
PSA 133:1 (Lwimbo lwa kuluta kuchanya. Lwimbo lwa Daudi.) Ndo mbuli inojile na ya kunojeza ng'hatu, wenyelukolo kikala hamwe kwa uhamwe.
PSA 133:2 Ndo kota mafuta ganojile kumutwi, mbaka kuli lulevu lwa heye Aluni, mbaka mlupembo lwa ivalo lya heye msingo, kota ulajilo kota Nguluwi nakamhagula leka yawe mtambika.
PSA 133:3 Kota nungwi vyoilingulawila kuli chidunda cha Helimoni, utambichizo wa Nguluwi wokuya mchanya mwa chidunda cha Siyoni. Ako Mkulu Nguluwi nakalonga nakalagana kuwatambichiza wanhu wa heye, kuwegalila ukomu ulihela kuduma.
PSA 134:1 (Lwimbo lwa kuluta kuchanya.) Muye mumtogole Mkulu Nguluwi hemwe vitumagwa wa heye weng'ha, hemwe mweng'ha mlingukola mijito nechilo haluga hake.
PSA 134:2 Mwinule moko kulutila honhu helile, na kumtogola Mkulu Nguluwi.
PSA 134:3 Mkulu Nguluwi yawatambichize kulawa Siyoni, heye yalumbile ulanga na isi.
PSA 135:1 Mumtogole Mkulu Nguluwi. Mlitogole itagwa lya Mkulu Nguluwi, mumtogole hemwe vitumagwa wa heye.
PSA 135:2 Mumtogole hemwe mlingikala kuli ng'handa ya Mkulu Nguluwi, kuli lugagala lwa ng'handa ya Nguluwi wa hetwe.
PSA 135:3 Mumtogole Mkulu Nguluwi kwa vila ka yanojile, mlitogole kwa nzimbo itagwa lya heye, kwa vila alyo lyangunojeza.
PSA 135:4 Mkulu Nguluwi nakamhagula Yakobo yawe wa heye, hemwe wanhu wa Isilaeli muwe wa heye.
PSA 135:5 Ndikomya, ndivizela kota Mkulu Nguluwi ndo mkulu, Mkulu wa hetwe ndo mkulu mchanya mwa milungu jeng'ha.
PSA 135:6 Mkulu Nguluwi kanguditaga choneche choyalingugana, kuli kilanga na muisi na mbahali na mgati ng'hatu mwa mazi.
PSA 135:7 Ndo yalingigala ng'hungugu kulawa kuli mbaka ja isi, yalingudita mazi tendema kwa lumwemwesa, na kuputa mbeho ng'hulu kulawa kuli ng'hano za heye.
PSA 135:8 Ndo yawakopole walelwa wa mwaluko ako Misili, walelwa wa wanhu na migongolo kahi.
PSA 135:9 Ndo yaditile ulajilo na kububuwaza kwa hegwe, gwa Misili, kwa kuwagaza Falao na vitumagwa wa heye weng'ha.
PSA 135:10 Ndo yawadumye wanhu wa isi nyinji, nakawakopola wandewa wawele na mong'ho,
PSA 135:11 wawele ndo Sihoni mndewa wa Waamoli, Ogu mndewa wa Bashani, na wandewa weng'ha wa Kanaani.
PSA 135:12 Nakahola isi za hewo na kuwapa wanhu wa heye, ena, leka ziwe uhalizi kwa wanhu wa heye Isilaeli.
PSA 135:13 Itagwa lya hegwe, gwa Mkulu Nguluwi, lyangikala mazuwa gose, lyokumbuchilwa kuli lulelo lweng'ha.
PSA 135:14 Mkulu Nguluwi kowalewela wanhu wa heye, na kuwonela isungu vitumagwa wa heye.
PSA 135:15 Jimalukolo ja wanhu wa isi ndo sendi na zahabu, najigongomanyigwa kwa moko ga wanhu.
PSA 135:16 Jina milomo, ila hajilingulonga, jina meho, ila hajilingona.
PSA 135:17 Jina makutu, ila hajilinguhulika, na jahela ukomu.
PSA 135:18 Weng'ha walingujigongomanya wochiwhana najo, hihyo du na weng'ha walingujitumbila.
PSA 135:19 Hemwe wanhu wa Isilaeli, mumtogole Mkulu Nguluwi. Hemwe watambika wa ivyazi lya Aluni, mumtogole Mkulu Nguluwi.
PSA 135:20 Hemwe Walawi, mumtogole Mkulu Nguluwi. Hemwe mlingumdumba Mkulu Nguluwi, mumtogole.
PSA 135:21 Yatogoligwe Mkulu Nguluwi kuli Siyoni, yatogoligwe yalingikala Yelusalemu. Mumtogole Mkulu Nguluwi.
PSA 136:1 Mlonje malumbo kwa Mkulu Nguluwi kwa vila ka yanojile, kwa vila igano lya heye lya kwimilila lyangikala mazuwa gose.
PSA 136:2 Mlonje malumbo kwa Nguluwi wa milungu, kwa vila igano lya heye lya kwimilila lyangikala mazuwa gose.
PSA 136:3 Mlonje malumbo kwa Mkulu wa wakulu, kwa vila igano lya heye lya kwimilila lyangikala mazuwa gose.
PSA 136:4 Ndo yaliyeka yalingudita makulu ga kububuwaza, kwa vila igano lya heye lya kwimilila lyangikala mazuwa gose.
PSA 136:5 Ndo yaulumbile ulanga kwa luhala, kwa vila igano lya heye lya kwimilila lyangikala mazuwa gose.
PSA 136:6 Ndo yaigongomanyile isi mchanya mwa mazi menji, kwa vila igano lya heye lya kwimilila lyangikala mazuwa gose.
PSA 136:7 Ndo yalumbile isanya na nyelezi na nhondwe, kwa vila igano lya heye lya kwimilila lyangikala mazuwa gose.
PSA 136:8 Isanya lilongoze nemisi, kwa vila igano lya heye lya kwimilila lyangikala mazuwa gose.
PSA 136:9 Nyelezi na nhondwe vilongoze nechilo, kwa vila igano lya heye lya kwimilila lyangikala mazuwa gose.
PSA 136:10 Ndo yawakopole walelwa wa mwaluko wa Misili, kwa vila igano lya heye lya kwimilila lyangikala mazuwa gose.
PSA 136:11 Nakawosa wanhu wa Isilaeli kulawa ako, kwa vila igano lya heye lya kwimilila lyangikala mazuwa gose.
PSA 136:12 Kwa moko wa heye uwele na mong'ho na ludali, kwa vila igano lya heye lya kwimilila lyangikala mazuwa gose.
PSA 136:13 Ndo yaigawanule Bahali ya Shamu honhu heli, kwa vila igano lya heye lya kwimilila lyangikala mazuwa gose,
PSA 136:14 nakawadita wanhu wa Isilaeli wakole amo, kwa vila igano lya heye lya kwimilila lyangikala mazuwa gose.
PSA 136:15 Ila nakawazibiza Falao na chilundo cha heye cha wamizi kuli Bahali ya Shamu, kwa vila igano lya heye lya kwimilila lyangikala mazuwa gose.
PSA 136:16 Ndo yawalongoze wanhu wa heye kuchiwala, kwa vila igano lya heye lya kwimilila lyangikala mazuwa gose.
PSA 136:17 Ndo yawatowile wandewa wakulu, kwa vila igano lya heye lya kwimilila lyangikala mazuwa gose.
PSA 136:18 Nakawakopola wandewa wawele na mong'ho, kwa vila igano lya heye lya kwimilila lyangikala mazuwa gose.
PSA 136:19 Nakamkopola Sihoni, mndewa wa Waamoli, kwa vila igano lya heye lya kwimilila lyangikala mazuwa gose,
PSA 136:20 na Ogu, mndewa wa Bashani, kwa vila igano lya heye lya kwimilila lyangikala mazuwa gose.
PSA 136:21 Nakazihola isi za hewo, nakawapa wanhu wa heye, kwa vila igano lya heye lya kwimilila lyangikala mazuwa gose,
PSA 136:22 leka ziwe uhalizi kwa Isilaeli, chitumagwa wa heye, kwa vila igano lya heye lya kwimilila lyangikala mazuwa gose.
PSA 136:23 Ndo yatukumbuchile mhela wa ung'hochele wa hetwe, kwa vila igano lya heye lya kwimilila lyangikala mazuwa gose,
PSA 136:24 nakatulohola kulawa kwa wang'honyo wa hetwe, kwa vila igano lya heye lya kwimilila lyangikala mazuwa gose.
PSA 136:25 Ndo yalingigala chilyo kwa chila chilumbigwe chiwele na ukomu, kwa vila igano lya heye lya kwimilila lyangikala mazuwa gose.
PSA 136:26 Mlonje malumbo kwa Nguluwi wa kilanga, kwa vila igano lya heye lya kwimilila lyangikala mazuwa gose.
PSA 137:1 Hafungo ha nzanda za Babuloni, natikalisa natwali tulila vyotukumbuchile Siyoni.
PSA 137:2 Kuli migodi ja isi yila, natupatika migombogombo ja hetwe.
PSA 137:3 Watuholile tuwe wapogozi wa ngondo nawagana tuwembile, walingutugaza nawatugana tuwasangalaze, “Mtwimbile lwimbo lumwe hali nzimbo za Siyoni.”
PSA 137:4 Toweza ndaze kwimba lwimbo lwa Mkulu Nguluwi, kuli isi ya chijenzi?
PSA 137:5 Gwa Yelusalemu, wone ndikusemwe, moko wa heni wa kudilo usemwe uwanzi wa kutowa igombogombo.
PSA 137:6 Umyango wa heni unanahile na kulemwela kwimba, wone sikukumbuchile hegwe, gwa Yelusalemu, ena, wone ndogana choneche kusinda kusangalala kwa Yelusalemu.
PSA 137:7 Gwa Mkulu Nguluwi, uleche kusemwa gowaditile Waedomu, zuwa lila Yelusalemu vyoiholigwe kuli upogozi, ukumbuchile gowalonjile, “Mbomole muji wa Yelusalemu. Mng'humbule misisi jake.”
PSA 137:8 Gwa Babuloni, kodumigwa. Kotambichizwa yula yawele yokuhilusila chibida kwa gehile goutuditile,
PSA 137:9 yula yowahola wana wa hegwe, na kuwahondanga kuli mitalawe.
PSA 138:1 (Lwimbo lwa Daudi.) Ndangulonga malumbo, gwa Mkulu Nguluwi, kwa nhumbula ya heni yeng'ha, ndangwimba lutogo lwa hegwe hali milungu.
PSA 138:2 Ndanginamiza kulola kuli ng'handa ya hegwe yelile, ndangulitogola itagwa lya hegwe, kwa chiwalo cha igano lya kwimilila lya hegwe na kukundigwa kwa hegwe, kwa vila nakuwika itagwa lya hegwe na ulonzi wa hegwe mchanya mwa chila chinhu.
PSA 138:3 Londikulilile, hegwe nakunyidichila, nakunyonjezela mong'ho wa nhumbula.
PSA 138:4 Gwa Mkulu Nguluwi, wandewa weng'ha muisi wokutogola, kwa vila nawahulika ulonzi wa hegwe.
PSA 138:5 Wokwimba lutogo lwa ndaze vyoulingudita, gwa Mkulu Nguluwi, kwa vila hegwe ndo mkulu ng'hatu.
PSA 138:6 Hanga hegwe, gwa Mkulu Nguluwi kwa mchanya mwa weng'ha, kwanguwalola kwa kunoga wawele ng'hochele, ila walingidaya kwanguwonaga kulawa kutali.
PSA 138:7 Hala hondifichigwa na magazo, hegwe kwangunyamila, kwangugolola moko wa hegwe kwa chiwalo cha ng'halazi ya wang'honyo wa heni, kwa mong'ho wa hegwe ukulu, kwangundohola.
PSA 138:8 Gwa Mkulu Nguluwi, kokweneza geng'ha goulagane na heni. Igano lya kwimilila lya hegwe, gwa Mkulu Nguluwi, lyangikala mazuwa gose. Uleche kujileka kutali mijito ja moko wa hegwe.
PSA 139:1 (Kwa yalingwaluchiza kwimba. Zabuli ya Daudi.) Gwa Mkulu Nguluwi, hegwe nakumhugajiza, hegwe kwangunzela heni mbaka mgati.
PSA 139:2 Kwanguvizela kikalisa na kwima kwa heni, kwanguvizela chila chinhu chondilingijesa kulawa kutali.
PSA 139:3 Kwanguvizela hondijenda ama hondikwesela, kwanguhazela chila honhu hondilinguluta.
PSA 139:4 Nding'hali kulonga ulonzi woneche, gwa Mkulu Nguluwi, nakuuzela ng'hatu.
PSA 139:5 Kwa baho kuli chila ubanzi wa heni, kumwando na kumbele, kwangumbichila moko wa hegwe kunyamila.
PSA 139:6 Uwanzi wa hegwe ndo mzidi wa nyhala za heni, ndo ukulu ng'hatu, siweza kuuzela.
PSA 139:7 Mbilimile kohi kuwele muhe wa hegwe wa haduhu? Ndute kohi kuwele hegwe kwa haduhu?
PSA 139:8 Wone ng'hwine kilanga, hegwe kwa baho, wone mbase hanyi kuli isi ya wabagame, hegwe kwa baho.
PSA 139:9 Wone nguluche mbaka kolilawilaga isanya, ama mbaka kuli kolizinjilaga isanya,
PSA 139:10 mbaka ako kahi kwa kuko kundongoza, moko wa hegwe wa kudilo wondibata.
PSA 139:11 Wone ndahalandile jiza lingumbiche, jiza linzungulute honhu ha lumuli,
PSA 139:12 kwa hegwe, jiza haliwele jiza ne hado, na nechilo kwangupulika kota nemisi, kwa hegwe jiza na lumuli ndo chinhu chimwe.
PSA 139:13 Hegwe nakundita heni, nhumbula na muhe, nakungongomanya mmunda mwa mayangu.
PSA 139:14 Ndangukutogola kwa vila nditigwa kwa kububuwaza na vinduzanduza, madito ga hegwe ndo ga kububuwaza, nhumbula ya heni yangugazela ng'hatu.
PSA 139:15 Lukuli lwa heni haluvisigwe kwa hegwe, vyounditile kwa uviso, honhu hawele munhu hawezile kumbona.
PSA 139:16 Hegwe nakumbona lombele nding'hali kupondigwa, nakwandika chila chinhu mchitabu cha hegwe, mazuwa ga heni geng'ha nakugawika goya, mbaka kung'hali kuwa baho zuwa lila lya mwaluko.
PSA 139:17 Gwa Nguluwi, majesa ga hegwe ndo makulu ng'hatu, hambe gaweze kuwalizwa ng'hatu.
PSA 139:18 Wone ndahagawazile gahawele menji kupuluta sangalaza. Hondililimka, nding'hali nda hamwe na hegwe.
PSA 139:19 Gwa Nguluwi, uwakopole wanhu wehile. Walingukopola woche kwa heni.
PSA 139:20 Wangulonga vibi kwa chiwalo cha hegwe, wangulonga gehile kwa hegwe galinguwala itagwa lya hegwe.
PSA 139:21 Gwa Mkulu Nguluwi, ndanguwazudila walingukuzudila, ndanguwabeza ng'hatu wala walingukubelenhuka.
PSA 139:22 Wang'honyo wa hegwe ndo wang'honyo wa heni, ndanguwazudila ng'hatu.
PSA 139:23 Umhugajize, gwa Nguluwi, uizele nhumbula ya heni, unjeze, uluzele lunhwinhwi lwa heni.
PSA 139:24 Ugalole, wone gala gondilingudita ndo geha, undongoze kuli nzila ya mazuwa gose.
PSA 140:1 (Kwa yalingwaluchiza kwimba. Zabuli ya Daudi.) Gwa Mkulu Nguluwi, undohole kulawa kwa wanhu wehile, unyamile na wanhu walingugana kundumiza.
PSA 140:2 Wanhu awo wangiwika goya mnhumbula za hewo kudita gehile, wangwambuza kilewa chila mhela.
PSA 140:3 Myango zawo ziha kota za izoka, kuli milomo jawo muna ulonzi uwele na dunga kota ya izoka.
PSA 140:4 Gwa Mkulu Nguluwi, unyamile na ndole za wehile, unyamile na wanhu walingugana kundumiza, wawele wewichile goya kungwisa.
PSA 140:5 Walingidaya nawambichila midiwa, nawalambalika ng'weso kota utandawala, nawavisa midiwa mnzila leka wandibate.
PSA 140:6 Ndangumlonjela Mkulu Nguluwi, “Hegwe ndo Nguluwi wa heni.” Gwa Mkulu Nguluwi, uhulichize lizi lya kulanda kwa heni kwa isungu.
PSA 140:7 Gwa Mkulu Nguluwi, Mkulu wa heni, mlohozi wa heni yawele na mong'ho, nakunyamila goya mhela wa ngondo.
PSA 140:8 Gwa Mkulu Nguluwi, uleche kuwapa wehile gowalingugana, na kiwika goya kwa hewo kwihile kuleche kulutilila goya, ama wokwinula vitwi vya hewo.
PSA 140:9 Wihe wa ulonzi wa hewo uwafiche hewo wawo.
PSA 140:10 Makala ga chiluli gawagwile, watozwe kuli chiluli, wenjizwe kuli ikulubila, waleche kwinuka kahi.
PSA 140:11 Mbuli za walinguwaheha wanji zileche kulutilila goya kuli isi, wihe uwawinge na kuwadumya wala walingugana kundumiza.
PSA 140:12 Ndivizela Mkulu Nguluwi kangulewelaga mbuli za wanhu walingubunzwa, na kuwapa hachi wazunwa.
PSA 140:13 Ndikomya, watanganiche wolitogola itagwa lya hegwe, wagoloche nhumbula wochikala hali hegwe.
PSA 141:1 (Zabuli ya Daudi.) Ndangukuchema, gwa Mkulu Nguluwi, uye himahima kunhanza. Uhulichize lizi lya heni mhela hondikuchema.
PSA 141:2 Kulanda kwa heni ukubochele kota ubani, hondikwinula moko ga heni kwa hegwe ung'hunde kota nhambiko ya matinazo.
PSA 141:3 Gwa Mkulu Nguluwi, uwamile mlomo wa heni, uwiche wamizi kuli lwizi lwa mlomo wa heni.
PSA 141:4 Undemeze ndeche kuluta kudita gehile, ndeche kihanza na madito gehile, ndeche kilumba na wanhu walingudita gehile, ne kuwa hamwe kuli mnvina za hewo.
PSA 141:5 Munhu yawele na hachi yanhowe, ndo mbuli ya isungu, na yang'hanuchile, ndo mafuta kumutwi kwa heni. Mutwi wa heni hauweza kuilema mbuli ayo. Ila kulanda kwa heni mazuwa gose, ndo kwa chiwalo cha hewo kuleka wihe.
PSA 141:6 Wakulu wa hewo howohondigwa kuli mitalawe, ndo wovizela kota ulonzi wa heni nawali goya.
PSA 141:7 Mizeje jawo josambalulwa kuli mlomo wa chilaga kota munhu vyoyalingulima na kukatula misanga.
PSA 141:8 Ila heni ndangitumbila kwa hegwe, gwa Mkulu Nguluwi, Mkulu wa heni, ndangubilimila kwa hegwe leka unyamile, uleche kundeka kwihile.
PSA 141:9 Unyamile na midiwa jowambichile, kugwilizwa na wanhu wehile.
PSA 141:10 Wehile wagwilizwe kuli midiwa jawo, mhela hondikola kwa kikala goya.
PSA 142:1 (Ilanguso lya Daudi loyawele kuli mhalika. Kulanda.) Ndangumlilila Mkulu Nguluwi kwa lizi, ndangumdedeza Mkulu Nguluwi kwa lizi, leka yambonele isungu.
PSA 142:2 Ndangumuwichila kung'ung'uta kwa heni, ndangumlonjela magazo ga heni.
PSA 142:3 Hondiwa habehi kugozola, hegwe kwa baho, kwangunzela vyombele. Wang'honyo wa heni nawambichila midiwa kuli nzila ya heni.
PSA 142:4 Hondilola ubanzi wa kudilo na kubeteza, ndangona haduhu munhu wa kunhanza, ndahela kahi honhu ha kubilimila, haduhu munhu yalingijesa kwa chiwalo cha heni.
PSA 142:5 Gwa Mkulu Nguluwi, ndangukulilila. Hegwe ndo honhu ha heni ha kubilimila, hegwe ndo chila chinhu kwa heni kuli isi ya wawele wakomu.
PSA 142:6 Uhulichize chililo cha heni, kwa vila nhoka lukami. Undohole kulawa kwa walingungaza, kwa vila wana mong'ho kusinda heni.
PSA 142:7 Undavye amu mchinweng'ho leka ndonje malumbo kwa hegwe. Wanhu watanganiche wochilumba na heni kwa vila nakunditila ganojile menji.
PSA 143:1 (Zabuli ya Daudi.) Uhulichize kulanda kwa heni, gwa Mkulu Nguluwi. Uwiche goya ikutu lya hegwe kwa chiwalo cha kulanda kwa heni kwa isungu. Kwa chiwalo cha kukundigwa na kutanganika kwa hegwe, unyidichile.
PSA 143:2 Uleche kunhagusa kwa kung'ang'ala, heni chitumagwa wa hegwe, kwa vila haduhu yoneche yawele mkomu, yawele yatanganiche hali hegwe.
PSA 143:3 Wang'honyo wa heni nawambinza, nawangwisa ng'hatu, nawambika kuli jiza kota munhu yabagame katali.
PSA 143:4 Ngozola ng'hatu, nhumbula ya heni naizilika kwa chiwalo cha kudumba.
PSA 143:5 Ndangugakumbuchila mazuwa ga katali, ndangijesa kwa chiwalo cha mijito ja hegwe jeng'ha, ndangulola mijito jikoligwe kwa moko ga hegwe.
PSA 143:6 Ndangugolola moko ga heni kulanda, nhumbula ya heni ina ng'halu na hegwe kota isi ng'havu.
PSA 143:7 Gwa Mkulu Nguluwi, unyidichile himahima, kwa vila nangozola ng'hatu. Uleche kivisa kutali na heni, leka ndeche kuwa kota wala walingudulika kuli isi ya wabagame.
PSA 143:8 Mitondo undajile igano lya kwimilila lya hegwe, kwa vila nandikuwichila kitumbila kwa heni. Undanguse vyoilinguganigwa kudita, kwa vila ndangukugalila nhumbula ya heni.
PSA 143:9 Gwa Mkulu Nguluwi, undohole kulawa kwa wang'honyo wa heni, kwa vila kwa hegwe ndangubilimila kikala goya.
PSA 143:10 Undanguse kweneza vyoulingugana, kwa vila hegwe ndo Nguluwi wa heni. Muhe wa hegwe unojile undongoze kuli nzila inojile.
PSA 143:11 Kwa chiwalo cha itagwa lya hegwe, Mkulu Nguluwi, uwamile ukomu wa heni, umbuse kuli magazo kwa chiwalo cha kutanganika kwa hegwe.
PSA 143:12 Kwa chiwalo cha igano lya kwimilila lya hegwe, uwakopole wang'honyo wa heni, uwadumye weng'ha walingumbunza, kwa vila heni nda chitumagwa wa hegwe.
PSA 144:1 (Lwimbo lwa Daudi.) Yatogoligwe Mkulu Nguluwi, italawe lya heni, yalingugadita moko ga heni gazowele kitowa ngondo, na kuvilangusa vidole vya heni kitowa.
PSA 144:2 Heye ndo igano lya kwimilila lya heni na ngome ya heni yalingunyamila na mlohozi wa heni, heye ndo ngawo ya heni na honhu ha heni ha kubilimila, kanguwasumyaga wanhu wa isi zinji na kuwawika hasi ha heni.
PSA 144:3 Gwa Mkulu Nguluwi, munhu ndo choni mbaka umlolele? Munhu ndo choni mbaka umjese?
PSA 144:4 Munhu ndo kota lweselo hela, mazuwa ga heye ndo kota isisila lilingukola.
PSA 144:5 Uchumule ulanga wa hegwe, gwa Mkulu Nguluwi, uduliche. Uvidolize vidunda navyo vilavye iyosi.
PSA 144:6 Wambuze lumwemwesa, luwasambalule wang'honyo, utowe misale ja hegwe, leka wabilime.
PSA 144:7 Ugolole moko wa hegwe kulawa kuchanya, undohole na kumbusa kuli mazi aga menji, umbuse kuli moko ga wajenzi,
PSA 144:8 wawele wangulongaga ulonzi wa udesi, wangugololaga moko kwa ulolezi wa udesi.
PSA 144:9 Gwa Nguluwi, ndokwimbila lwimbo lunyale, ndokutowela ching'weleng'wele cha ng'weso kumi,
PSA 144:10 hegwe ulinguwapa wandewa kusumya, ulingumlohola Daudi chitumagwa wa hegwe.
PSA 144:11 Undohole na ipanga lya mng'honyo yamemile wihe, umbuse kuli moko ga wajenzi, wawele wangulongaga ulonzi wa udesi, wangugololaga moko kwa ulolezi wa udesi.
PSA 144:12 Wasongolo wa hetwe wakule goya kota mizuchila kuli kagunda, wahinza wa hetwe wawe kota mizengo jihongoligwe kwa kuinoliga ng'handa ya mndewa.
PSA 144:13 Ng'hano za hetwe zimeme mbena. Ming'holo ja hetwe kuli migunda jilele maelufu kwa maelufu.
PSA 144:14 Migongolo ja hetwe jiwe jinenehe na mong'ho, jileche kwajiliza nyinda ne kulela mhela haunafika, ne chililo cha magazo kuli vijiji vya hetwe.
PSA 144:15 Kukomya, nawatambichizwa wanhu wa isi wawele watambichizwe mbuli azo. Nawatambichizwa wanhu wa isi wawele Nguluwi wa hewo ndo Mkulu Nguluwi.
PSA 145:1 (Lwimbo lwa lutogo lwa Daudi.) Ndokutogola, gwa Nguluwi wa heni na mndewa wa heni, ndolipa ukulu itagwa lya hegwe mazuwa gose na mazuwa gose.
PSA 145:2 Ndokutogola chila zuwa, ndolitogola itagwa lya hegwe mazuwa gose na mazuwa gose.
PSA 145:3 Mkulu Nguluwi ndo mkulu, kanguganigwa kupegwa lutogo lwinji, ukulu wa heye hauweza kupugajizika.
PSA 145:4 Lulelo mbaka lulelo, lutogo lwa madito ga hegwe lwosimilwa, awo wowikula madito ga hegwe makulu.
PSA 145:5 Wolonga ukulu wa ludali lwa hegwe. Ndogajesa madito ga hegwe ga kububuwaza.
PSA 145:6 Wowikula ukulu wa mong'ho wa madito ga hegwe ga kububuwaza, nani ndowikula ukulu wa hegwe.
PSA 145:7 Wowikula lutogo lwa kunoga kwa hegwe kwinji, na kwimba kwa chiwalo cha kutanganika kwa hegwe.
PSA 145:8 Mkulu Nguluwi kana isungu na uliholile, halinguzudilaga himahima, nakamema igano lya kwimilila.
PSA 145:9 Mkulu Nguluwi ka yanojile kwa weng'ha, ndo yawele na isungu kwa vilumbigwe vya heye vyeng'ha.
PSA 145:10 Vilumbigwe vya hegwe vyeng'ha vyolonga malumbo kwa hegwe, gwa Mkulu Nguluwi, nawo wa kukundigwa wa hegwe wokutogola.
PSA 145:11 Wolonga ukulu wa undewa wa hegwe, na kuwikula mong'ho wa hegwe ukulu,
PSA 145:12 leka chila munhu yagazele madito ga hegwe makulu, na ukulu wa undewa wa hegwe.
PSA 145:13 Undewa wa hegwe ndo undewa wa mazuwa gose, ludali lwa hegwe lukale lulelo lweng'ha. Mkulu Nguluwi ka wa kukundigwa kuli kulagana kwa heye kweng'ha, ka yanojile kuli madito ga heye geng'ha.
PSA 145:14 Mkulu Nguluwi kanguwatanzaga weng'ha walingugwa, kanguwenulaga weng'ha walingugazika.
PSA 145:15 Vilumbigwe vyeng'ha vyangukulola kwa kitumbila ng'hatu, nagwe kwanguvipa chilyo kwa mhela uwichigwe.
PSA 145:16 Kwangugubula moko wa hegwe kwa isungu, kwanguvyenezela chila chovilingugana chila chilumbigwe chiwele na ukomu.
PSA 145:17 Mkulu Nguluwi ndo yatanganiche kuli nzila za heye zeng'ha, ndo yanojile kuli madito ga heye geng'ha.
PSA 145:18 Mkulu Nguluwi ka habehi na weng'ha walingumlanda, weng'ha walingumlanda kwa nhumbula igoloche.
PSA 145:19 Kanguwagalilaga chowalingugana weng'ha walingumdumba, kanguhulichizaga chililo cha hewo na kuwalohola.
PSA 145:20 Mkulu Nguluwi kanguwamilaga weng'ha walingumgana, ila kowadumya wehile weng'ha.
PSA 145:21 Ndowikula lutogo lwa Mkulu Nguluwi, vilumbigwe vyeng'ha vilitogole itagwa lya heye lyelile, mazuwa gose na mazuwa gose.
PSA 146:1 Mumtogole Mkulu Nguluwi. Umtogole Mkulu Nguluwi, gwa nhumbula ya heni.
PSA 146:2 Ndomtogola Mkulu Nguluwi kuli ukomu wa heni weng'ha, ndomwimbila Nguluwi wa heni mhela weng'ha hondichikala.
PSA 146:3 Mleche kitumbila kuli wakulu wa isi, hewo ndo wanhu hela, hawoweza kulohola.
PSA 146:4 Munhu hoyolavya lweselo lwa heye lwa kuduma, kanguhiluka kuli nhimbwisi nakoyalawile, na aho mijito ja heye jeng'ha joyajiwichile goya jangwajililaga.
PSA 146:5 Nakatambichizwa munhu yalingutanzigwa na Nguluwi wa Yakobo, munhu yawichile kitumbila kwa heye kwa Mkulu Nguluwi, Nguluwi wa heye,
PSA 146:6 yavilumbile ulanga na isi, bahali na vyeng'ha viwele mumo. Heye kangibatililaga kulagana kwa heye mazuwa gose.
PSA 146:7 Heye kanguwapaga walingubunzwa hachi zawo, Mkulu Nguluwi kanguwapaga chilyo wawele na nzala. Mkulu Nguluwi kanguwapaga wanweng'hwa kilejeha.
PSA 146:8 Mkulu Nguluwi kanguwagubulaga meho wohambe walole. Mkulu Nguluwi kanguwenulaga walinguduliswa. Mkulu Nguluwi kanguwaganaga wanhu watanganiche.
PSA 146:9 Mkulu Nguluwi kanguwamilaga wajenzi, kanguwatanzaga wadala wafililwe na walume wawo na walekwa, ila kangwajilizaga nzila ya wehile.
PSA 146:10 Mkulu Nguluwi kangulongoza mazuwa gose, Nguluwi wa hegwe, gwa Siyoni, ka mndewa wa lulelo lweng'ha. Mumtogole Mkulu Nguluwi.
PSA 147:1 Mumtogole Mkulu Nguluwi. Ndaze vyoiwele goya kumwimbila lutogo Nguluwi wa hetwe. Heye ka yanojile na kanguganigwa kwimbilwa lutogo.
PSA 147:2 Mkulu Nguluwi kanguuzenga kahi muji wa Yelusalemu, kanguwahilula Waisilaeli wawele kuli ujenzi.
PSA 147:3 Kanguwatanza watweguche nhumbula, na kuwopa vilonda vya hewo.
PSA 147:4 Kangwamula hisabu ya nhondwe, na kuzigalila zeng'ha matagwa gake.
PSA 147:5 Mkulu wa hetwe ka mkulu, kana mong'ho ng'hatu, luhala lwa heye lwahela chipimilo.
PSA 147:6 Mkulu Nguluwi kanguwakwinizaga wala walingunyenyetela, ila kanguwatozaga wehile, wagwe kuli nhimbwisi.
PSA 147:7 Mumwimbile Mkulu Nguluwi nzimbo za kulonga malumbo, mumtowele ching'weleng'wele Nguluwi wa hetwe.
PSA 147:8 Kangugubikaga ulanga kwa ng'hungugu, kanguigalilaga isi nhonya, na koteza misolo kuli vidunda.
PSA 147:9 Kangujigalilaga migongolo chilyo chawo na mibofu ja mibondwa hojilila.
PSA 147:10 Hambe yagane mong'ho wa falasi na hambe yanojezwe na uzidahe wa wamizi,
PSA 147:11 ila Mkulu Nguluwi kangunojezwaga na walingumdumba, wanhu walingitumbila igano lya kwimilila lya heye.
PSA 147:12 Umtogole Mkulu Nguluwi, gwa Yelusalemu. Umtogole Nguluwi wa hegwe, gwa Siyoni.
PSA 147:13 Kwa vila kanguwikaga nzinzili lwizi lwa hegwe, kanguwatambichizaga wanhu wawele mgati mwa hegwe.
PSA 147:14 Kangwamilaga mbaka ja hegwe, kangukugutizaga kwa mhau inojile.
PSA 147:15 Kanguhilikaga mzilo wa heye muisi, na ulonzi wa heye wangwenezwaga himahima.
PSA 147:16 Kangwanzanza seluji kota igolole lya sufu, kangusambalulaga nungwi kota mivu.
PSA 147:17 Kangigalaga nhonya ya maganga kota maganga madodo. Whaani yoweza kwimilila kung'ang'ala kwa chipute cha heye?
PSA 147:18 Hamba kangulavyaga ulonzi, leka seluji ayo isungulumuche, kangigalaga mbeho ya heye, nayo yanguchililikaga.
PSA 147:19 Kanguwikulaga usenga wa heye kwa walelwa wa Yakobo, mizilo ja heye na nhaguso zake kwa Isilaeli.
PSA 147:20 Ila haditile ahyo kwa wanhu wa isi zinji, wanhu wanji hawagazelele malajizo ga heye. Mumtogole Mkulu Nguluwi.
PSA 148:1 Mumtogole Mkulu Nguluwi. Mumtogole Mkulu Nguluwi kulawa kilanga, mumtogole kulawa ako kuchanya ng'hatu.
PSA 148:2 Mumtogole, hemwe wahilisi wa heye weng'ha, mumtogole, hemwe wamizi wa heye weng'ha wa kilanga.
PSA 148:3 Mumtogole hemwe isanya na nyelezi, mumtogole hemwe nhondwe zeng'ha zilingupulika.
PSA 148:4 Mumtogole hemwe ulanga wa kuchanya, na mazi gawele kuchanya mwa ulanga.
PSA 148:5 Vyeng'ha vilitogole itagwa lya Mkulu Nguluwi, kwa vila heye nakalajiza na vyeng'ha navilumbigwa.
PSA 148:6 Nakaviwika honhu hawo mazuwa gose, kwa mzilo uwele hauweza kugaluswa.
PSA 148:7 Mumtogole Mkulu Nguluwi kulawa muisi, hemwe mizoka ja mbahali na mgati ng'hatu mwa bahali, mumtogole.
PSA 148:8 Mumtogole hemwe lumwemwesa na nhonya ya maganga na seluji na ng'hungugu, mbeho ya nhigu ilingweneza mzilo wa heye.
PSA 148:9 Mumtogole hemwe vidunda vikulu na vidunda vidodo, migodi ja mafuza na vihulo.
PSA 148:10 Mumtogole hemwe migongolo ja kisolo na ja kufujigwa, vilumbigwe vyeng'ha vilingutambala na videje vyeng'ha.
PSA 148:11 Mumtogole hemwe wandewa na wanhu wa isi zeng'ha, wang'hangala na vilongozi weng'ha muisi.
PSA 148:12 Mumtogole hemwe wasongolo na wahinza, wasekulu weng'ha na wana kahi.
PSA 148:13 Mweng'ha mlitogole itagwa lya Mkulu Nguluwi, kwa vila itagwa lya heye yaliyeka lyangwinuligwa, ukulu wa heye wa kuchanya ng'hatu mwa isi na ulanga.
PSA 148:14 Nakawagalila mong'ho wanhu wa heye, kuhulichizwa kwa wanhu weng'ha walingukundigwa, wanhu wa Isilaeli yawaganile. Mumtogole Mkulu Nguluwi.
PSA 149:1 Mumtogole Mkulu Nguluwi. Mumwimbile Mkulu Nguluwi lwimbo lunyale, mumtogole kuli nhing'hano ya walingukundigwa.
PSA 149:2 Usangalale, gwa Isilaeli, kwa chiwalo cha yakulumbile hegwe, wenyeng'haye wa Siyoni, mtowe luchenze kwa chiwalo cha mndewa wa hemwe.
PSA 149:3 Mlitogole itagwa lya heye kwa ngoma, mmwimbile na kutowa ngoma na igombogombo.
PSA 149:4 Kwa vila Mkulu Nguluwi kangunojezwaga na wanhu wa heye, nakawanoliga ulohozi walingunyenyetela.
PSA 149:5 Wanhu walingukundigwa wangusangalala kwa kusumya, wasangalale mbaka howalinguwasa.
PSA 149:6 Wawe na lutogo lukulu lwa Nguluwi, na mipanga jiwele na kunoleche kwili mmoko mwa hewo,
PSA 149:7 wawahilulile chibida wanhu wa isi zinji, wawagaze wanhu wa isi zinji,
PSA 149:8 wawawohe wandewa wa hewo kwa minyololo, na vilongozi wa hewo kwa pingu za chuma,
PSA 149:9 leka weneze magazo gogalajizwe na Nguluwi. Alo ndo lutogo lwa walingukundigwa wa Nguluwi. Mumtogole Mkulu Nguluwi.
PSA 150:1 Mumtogole Mkulu Nguluwi. Mumtogole Nguluwi kuli ng'handa ya heye, muutogole mong'ho wa heye kuli ulanga.
PSA 150:2 Mumtogole kwa chiwalo cha madito ga heye makulu, mumtogole kwa chiwalo cha winji wa ukulu wa heye.
PSA 150:3 Mumtogole kwa lizi lya mhalamhanda, mumtogole kwa igombogombo na ching'weleng'wele.
PSA 150:4 Mumtogole kwa kutowa ngoma na kuvina, mumtogole kwa mluli na ching'weleng'wele.
PSA 150:5 Mumtogole kwa kutowa matoazi. Mumtogole kwa matoazi ga lizi likulu.
PSA 150:6 Chila chilumbigwe chiwele chikomu chimtogole Mkulu Nguluwi. Mumtogole Mkulu Nguluwi.
PRO 1:1 Azi ndo nhelo za Solomoni, mndewa wa Isilaeli, mwana wa Daudi.
PRO 1:2 Nhelo azi zanguwapa wanhu luhala na kuhulichiza na kuwadita waweze kutang'hula ulonzi uwele na mana ivisigwe.
PRO 1:3 Zanguwalangusa ndaze vyowalinguganigwa kikala kwa luhala na ndaze vyowalinguganigwa kudita mbuli kwa kutanganika na kwa hachi ne kuwa na uganililo.
PRO 1:4 Zanguwapaga wapoka kuvizela na wasongolo uwanzi wa kuhagula goya.
PRO 1:5 Yawele na nyhala yazihuliche na konjeza luhala lwa heye na yawe na ulonzi ulingumlongoza.
PRO 1:6 Munhu yauzele goya ulonzi na nhelo na ulonzi wa wala wawele na nyhala na vitendawili vya hewo.
PRO 1:7 Kumdumba Mkulu Nguluwi ndo msisi wa luhala, ila wapoka wangubeza luhala na malanguso.
PRO 1:8 Mwana wa heni, uhulichize malajizo kulawa kwa mhaza wa hegwe, uleche kugabeza malanguso ga mayako,
PRO 1:9 ago gowa chipembelo kumutwi kwa hegwe, na ugasi kuli singo ya hegwe.
PRO 1:10 Mwana wa heni, wawele na gehile howokuhada, uleche kukunda.
PRO 1:11 Wone wolonga, “Tuche tukamibate munhu na kumkopola, kwa usangalalo wa hetwe, uye leka tuwatowe walihela nongwa,
PRO 1:12 kota kuli isi ya wabagame, tuwambuze wameligwe kuno wawele wakomu, wowa kota wala walingudulika kuli isimo.
PRO 1:13 Tohola vinhu vyeng'ha vya sendi nyinji, ng'handa za hetwe zeng'ha tozimemeza vinhu vyotuholile.
PRO 1:14 Uye tihanze, vyeng'ha vyotupata tochigawila.”
PRO 1:15 Mwana wa heni uleche kihanza nawo, ulemeze mgulu wa hegwe uleche kulutasa nawo,
PRO 1:16 kwa vila magulu ga hewo gangubilimilaga kudita wihe, kudita himahima kwa hewo kweng'ha ndo kubohola danda.
PRO 1:17 Idiwa liwichigwe kuno chideje chilola, lyanguwichigwa hihi hela,
PRO 1:18 ila wangupelembaga na kikopola hewo wawo, wanguwikaga idiwa lya kigwiliza hewo wawo.
PRO 1:19 Ndo vyoziwele nzila za wala walingikala kwa maya ga lufufu, nhumbula za hewo zangudumyaga ukomu wa hewo wawo.
PRO 1:20 Luhala lwanguchemaga kwa lizi mnzila, lwangulonga kwa lizi lyake kuli honhu ha kuguzila vinhu,
PRO 1:21 hawele na iyowe likulu lwangulandulaga lizi, kuli lwizi lwa muji lwangulongaga,
PRO 1:22 “Hemwe wapoka! Mogana kuwa wapoka mbaka nili? Mbaka hanili walingubeza wosangalala kwa chiwalo cha kubeza kwa hewo, na wasowile nyhala kuuzudila uwanzi?
PRO 1:23 Mhulichize makanyo ga heni, ndowajidila majesa ga heni, ndowazelesa ulonzi wa heni.
PRO 1:24 Kwa vila nandiwachema, ila namlema kuhulichiza, nandiwalajila moko kwa kuwalalika leka muye, namlema,
PRO 1:25 kwa vila kahi namgabeza majesa ga heni geng'ha, hamgakundile makanyo ga heni,
PRO 1:26 nani ndosechelela magazo ga hemwe. Ndowabeza kwa ulonzi ung'hang'hale vyomuwa kuli kukabuswa,
PRO 1:27 na lunhwinhwi holuwafika kota nhigu, ndowabeza kahi kubagama kwa hemwe vyokuwavaba kota chivuluvumbi, mhela wa kugaya na usungu houwafika.
PRO 1:28 Ahyo homnyhema ila sikwidika, momhala kwa kikangaza ila hamuweza kumbona.
PRO 1:29 Kwa vila namuuzudila uwanzi, hamhagule kumdumba Mkulu Nguluwi,
PRO 1:30 hamkundile kulongozwa na heni, nambeza makanyo ga heni geng'ha,
PRO 1:31 lelo, molya mafuza ga madito ga hemwe, mogutizwa mbuli zihile za mwemwe baho.
PRO 1:32 Kwa vila wapoka wangikopola kwa kubelenhuka kwa hewo, wasowile nyhala wangikopolaga kwa ugata wa hewo,
PRO 1:33 ila chila yalingunyhulichiza kochikala kwa kikala goya, kosindamala ne kudumba magazo.”
PRO 2:1 Mwana wa heni, ukunde ulonzi wa heni, na kukumbuchila malajizo ga heni.
PRO 2:2 Uliwiche goya ikutu lya hegwe kuhulichiza luhala, na kuidita nhumbula ya hegwe iwe na kuvizela.
PRO 2:3 Ena, kolanda upegwe luhala, kodedeza upegwe kuvizela.
PRO 2:4 Kopala luhala kota sendi, ama kota ng'hano ivisigwe.
PRO 2:5 Kwa kudita ahyo, kovizela kumdumba Mkulu Nguluwi ndo choni, na kopata mana ya kumzela Nguluwi.
PRO 2:6 Kwa vila Mkulu Nguluwi kanguwapaga wanhu luhala, kumlomo kwa heye kwangulawaga uwanzi na kuvizela.
PRO 2:7 Kanguwawichilaga walingumhulichiza ng'hano ya luhala, heye ndo ngawo kwa wanhu walingikala kwa kugoloka.
PRO 2:8 Kangwamilaga madito ga wanhu walingudita hachi, na kuzilolela goya nzila za walingukundigwa wa heye.
PRO 2:9 Aho ndo kolizela lyakohi litanganiche na lya hachi, kovizela ndaze vyouweza kuleka uganililo na kuwinza chila nzila inojile.
PRO 2:10 Kwa vila luhala lwokwinjila mgati mwa hegwe, na uwanzi woinojeza nhumbula ya hegwe.
PRO 2:11 Nhaguso zinojile zokwamila, kuvizela kokulolela goya,
PRO 2:12 vyokulohola kulawa kuli nzila yihile, na wanhu wawele na ulonzi wihile,
PRO 2:13 walinguleka nzila zigoloche, leka kuziwinza nzila za jiza.
PRO 2:14 Wala walingusangalala kudita gehile, na kunojezwa kwa kwajilila,
PRO 2:15 wawele madito ga hewo nagajilila, na azo nzila za hewo zilinguhada.
PRO 2:16 Luhala lokudita uwe kutali na mdala mng'hondwa, kulawa kwa mdala mng'hondwa na ulonzi wa heye wa uhadi,
PRO 2:17 mdala yalingumleka mlume wa heye wa kuli usongolo, na kulisemwa ilagano lya Nguluwi wa heye.
PRO 2:18 Ng'handa ya heye yanguluta kuli isi ya wabagame, na nzila za heye kuli kubagama.
PRO 2:19 Yoneche yalingumlutila, ndikomya halinguhiluka hebu, ne kuhiluchila kahi kuli nzila ya ukomu.
PRO 2:20 Ahyo, hegwe kowinza kiwhana kwa wanhu wanojile, na kibatilila nzila za watanganiche.
PRO 2:21 Kwa vila wagoloche nhumbula wochikala kuli isi, na walihela nongwa wosigala mgati mwake.
PRO 2:22 Ila wehile wokusigwa kuli isi, na wawele na nhumbula zihile wolavigwa amo.
PRO 3:1 Mwana wa heni, uleche kusemwa malanguso ga heni, kwa nhumbula ya hegwe wibatilile mizilo ja heni.
PRO 3:2 Kwa vila vyokupa winji wa mazuwa, na kikala lukami na mbuli za hegwe zolutilila goya.
PRO 3:3 Igano lya kwimilila na kukundigwa vileche kuwa kutali na hegwe. Uvibate mmoko ga hegwe, na uvyandiche mnhumbula ya hegwe.
PRO 3:4 Ahyo kowa na uganililo na kutogoligwa, hali Nguluwi na hali wanhu.
PRO 3:5 Witumbile kwa Mkulu Nguluwi kwa nhumbula ya hegwe yeng'ha, uleche kitumbila nyhala za gwegwe baho.
PRO 3:6 Umkumbuchile Nguluwi kuli chila choulingudita, heye kozigolola nzila za hegwe.
PRO 3:7 Uleche kiwona gwegwe baho kota kuna luhala, umdumbe Mkulu Nguluwi na kiwika kutali na wihe.
PRO 3:8 Avyo vyowa mikwandi mlukuli lwa hegwe, na chihewezo mli mizeje ja hegwe.
PRO 3:9 Umhulichize Mkulu Nguluwi kwa lufufu lwa hegwe, na kwa kufunya kwa chilyo cha hegwe cheng'ha cha mwaluko.
PRO 3:10 Ahyo ng'hano za hegwe zomema nyhule, na mibiga ja hegwe jomema divai inyale.
PRO 3:11 Mwana wa heni, uleche kubeza kuzapigwa na Mkulu Nguluwi, na uleche kuzudila kwa makanyo ga heye,
PRO 3:12 kwa vila Mkulu Nguluwi kangumkanyaga yula yalingumgana, kota mhaza vyoyalingumkanya mwanage yalingumgana.
PRO 3:13 Nakatambichizwa munhu yula yalingulufichila luhala, yalingupata kuvizela.
PRO 3:14 Luhala ndo chinhu chinojile kusinda sendi, chinoga ng'hatu kusinda zahabu.
PRO 3:15 Luhala ndo lunoga ng'hatu kusinda johali, kuduhu choulingugana choweza kiwhana nayo.
PRO 3:16 Kwa moko wa heye wa kudilo luhala lolavya kikala lukami, kwa moko wa heye wa kumoso lolavya lufufu na lutogo.
PRO 3:17 Nzila za luhala ndo za kunojeza, zeng'ha zanguluta kuli kikala goya.
PRO 3:18 Luhala ndo igodi lya ukomu kwa weng'ha walingulipata, wangutambichizwa weng'ha walingikala habehi na alyo.
PRO 3:19 Kwa luhala Mkulu Nguluwi nakawika msisi wa isi, kwa nyhala nakawimiza nzinzili ulanga.
PRO 3:20 Kwa uwanzi wa heye nakambuza nzanda kuchililika, na ng'hungugu nazilagaza nungwi.
PRO 3:21 Mwana wa heni, wibatilile luhala na kwamula goya, uleche kuvileka vyuche kumeho kwa hegwe,
PRO 3:22 vyowa ukomu kwa hegwe, na inoligo linojile msingo ya hegwe.
PRO 3:23 Aho, koweza kuluta kwa kikala goya, mgulu wa hegwe hauchikwang'hwala.
PRO 3:24 Wone uwase haudumba, houwasa kowa na usinjizi unonile.
PRO 3:25 Uleche kudumba kwa chiwalo cha kukabuswa kwa kutinhusa, ne kutowigwa hamwe na wehile,
PRO 3:26 kwa vila Mkulu Nguluwi ndo yowika utumbilo kwa hegwe, kokwamila leka mgulu wa hegwe uleche kugwilizwa.
PRO 3:27 Louwa na ludali, uleche kulema kumha yalingugana utanzi.
PRO 3:28 Uleche kumlonjela munhu yomlingikalasa habehi, “Uye hamba, ndokupa mitondo,” kuno hegwe kuna ludali lwa kumha choyalingugana, lehano.
PRO 3:29 Uleche kijesa kudita gehile kwa munhu yomlingikalasa habehi, yalingikala na hegwe ne lunhwinhwi.
PRO 3:30 Uleche kilewa na munhu ne chiwalo, wone hakuditile chinhu choneche chila chihile.
PRO 3:31 Uleche kumonela fihi munhu yawele na nhumbula yihile, ne kwiga madito ga heye,
PRO 3:32 kwa vila wajilile ndo izudizo kwa Mkulu Nguluwi, ila heye kanguwaditaga goloko wa heye, wala wawele wagoloche nhumbula.
PRO 3:33 Mkulu Nguluwi kanguzipanjilaga ng'handa za wanhu wehile, ila kanguhatambichizaga haluga ha watanganiche.
PRO 3:34 Heye kanguwabezaga walingubeza, ila kanguwapaga uganililo walingunyenyetela.
PRO 3:35 Wawele na luhala wobeta lutogo, ila wasowile nyhala wopegwa soni.
PRO 4:1 Wana wa heni, mhulichize malanguso ga mhaza wa hemwe, mhulichize goya leka muwe na nyhala.
PRO 4:2 Ndanguwapa malajizo ganojile, ahyo mleche kulema malanguso ga heni.
PRO 4:3 Heni kahi nandali mwana yawele na mhaza, nandali chali na mwana wa udewele wa mayangu.
PRO 4:4 Mhaza wa heni nakandangusa chinhu achi, “Wibatilile kwa nhumbula yeng'ha ulonzi wa heni, na mizilo ja heni, nagwe kochikala.
PRO 4:5 Wiholele luhala, wiholele kuvizela, uleche kuusemwa ne kuugaluka ulonzi wa heni.
PRO 4:6 Uleche kumleka luhala, naye kokulolela, umgane, naye kokwamila.
PRO 4:7 Luhala ndo lunoga kusinda vinhu vyeng'ha, lelo, wiholele luhala, ulavye vyeng'ha vyouwelenavyo, wiholele nyhala.
PRO 4:8 Umone luhala kota ka chinhu chitanganiche ng'hatu, naye kokulolela, wone umbatilile kokupa lutogo.
PRO 4:9 Kokuvaliza chipembelo chinojile kumutwi kwa hegwe, kokupa itaji linojile.”
PRO 4:10 Mwana wa heni, uhuliche na kuubochela ulonzi wa heni, leka uwe na miyaka minji ja kikala.
PRO 4:11 Ndangukulangusaga nzila ya luhala, ndangukulongozaga kuli nzila igoloche.
PRO 4:12 Houjenda magulu ga hegwe hagolemezwa, houbilima hauchikwang'hwala.
PRO 4:13 Wibatilile malanguso ga luhala na uleche kumleka yasulupuche, umbatilile goya kwa vila heye ndo ukomu wa hegwe.
PRO 4:14 Uleche kiyinjiza kuli nzila ya wehile, uleche kuwinza madito ga hewo.
PRO 4:15 Wiwiche kutali na nzila ayo ne kuihejelela, wiyuse na ayo, wuche.
PRO 4:16 Wehile hambe wawase wone hawaditile wihe, hawawaga na usinjizi ne kumditila vibi munhu,
PRO 4:17 kwa vila wihe ndo chilyo cha hewo, nhumbula zihile ndo divai ya hewo.
PRO 4:18 Nzila ya wanhu watanganiche ndo kota lumuli lwa lufuku, lulingupulika lukami mbaka nemisi,
PRO 4:19 ila nzila ya wehile ndo kota jiza totolo, hawavizelele chilinguwadita wekwang'wale.
PRO 4:20 Mwana wa heni, uhulichize goya ulonzi wa heni, uwiche goya ikutu kuli nhelo za heni.
PRO 4:21 Uleche kuvileka vyajilile hali meho ga hegwe, uviwiche goya mgati mwa nhumbula ya hegwe,
PRO 4:22 kwa vila avyo ndo ukomu kwa munhu yalinguvipata, ndo mikwandi kwa lukuli lwa heye lweng'ha.
PRO 4:23 Mzidi wa ago geng'ha, wamile goya nhumbula ya hegwe, kwa vila ayo ndo mwaluko wa ukomu.
PRO 4:24 Wiwiche kutali na ulonzi wa udesi, na mlomo wa hegwe uleche kulonga mbuli za uhadi.
PRO 4:25 Meho ga hegwe galole kulutila kumwando, uwe ulola kumwando yeka.
PRO 4:26 Wijese nzila youihola, goulingudita geng'ha gowa genele.
PRO 4:27 Uleche kuhinduka kudilo ne kumoso, uwiche mgulu wa hegwe kutali na wihe.
PRO 5:1 Msongolo wa heni, uhuliche luhala lwa heni, uwiche goya ikutu uhulichize malanguso ga heni,
PRO 5:2 leka wamule goya, na mlomo wa hegwe ubatilile uwanzi.
PRO 5:3 Mlomo wa mdala mng'hondwa ndo unona kota hanombwa, ulonzi wa heye ndo ulobwanika kusinda mafuta,
PRO 5:4 ila kuli kuduma ndo wa usungu kota nhungwi, wangutema kota ipanga linoleche banzi zeng'ha.
PRO 5:5 Nzayo za heye zangulutila hanyi kuli kubagama, kangujenda kuli nzila ya kuluta kuli isi ya wabagame.
PRO 5:6 Halingijesa kuwala nzila ya ukomu, nzila za heye ndo za kulubaluba, havizelele.
PRO 5:7 Lelo hemwe wasongolo wa heni, mnyhulichize, mleche kusemwa ulonzi wa mlomo wa heni.
PRO 5:8 Mziwiche nzila za hemwe kutali na mdala kota ayo, mleche kuhejelela kuli lwizi lwa ng'handa ya heye.
PRO 5:9 Mleche kujeza kuwapa wanji lutogo lwa hemwe, na miyaka ja hemwe kwa yawele na nhumbula yihile,
PRO 5:10 wajenzi waleche kigutiza kwa lufufu lwa hemwe, leka vinhu vyeng'ha vyompatile kwa kukola mijito, vileche kuluta kwa wajenzi.
PRO 5:11 Kuduma kwa ukomu wa hemwe molombocheza, mhela ng'huli za hemwe hozidumigwa.
PRO 5:12 Aho molonga, “Ndaze vyondikuzudile kuzapigwa, na kubeza makanyo mnhumbula mwa heni.
PRO 5:13 Sihulichize lizi lya walangusa wa heni, ne kuwawichila goya ikutu wandanguse.
PRO 5:14 Lelo nda habehi kudumigwa ng'hatu, hali wanhu wa Nguluwi.”
PRO 5:15 Mchewako ndo kota izimbo lya mazi ganojile. Unwe mazi ga izimbo lya gwegwe baho.
PRO 5:16 Lekachoni nzasa za hegwe ziwichigwe kutali, na nzanda za mazi mnzila?
PRO 5:17 Azo ndo za gwegwe baho, uleche kuwahanza wanhu wanji.
PRO 5:18 Nzasa ya hegwe itambichizwe, usangalale kwa chiwalo cha mchewako youmuholile louwele msongolo.
PRO 5:19 Ndo kanoga kota ibala, kangujenda goya kota chifuno. Mhambaga ya heye ikugalile kusangalala chila mhela, ugale mazuwa gose na matombo ga heye.
PRO 5:20 Msongolo wa heni, lekachoni nakubatigwa ng'hatu na mdala mng'hondwa? Lekachoni nakumkumbatila mmhambaga mdala wa mlume yunji?
PRO 5:21 Ukumbuchile nzila za munhu za hazelu hali Mkulu Nguluwi, heye kangona chila chinhu choyalingudita munhu.
PRO 5:22 Mwihe kangugwilizwaga kwa wihe wa heye yuye, kangubatigwa kwa ng'weso za gehile ga heye yuye.
PRO 5:23 Kangubagama kwa kuleka kuhulichiza, kangudumigwa kwa chiwalo cha upoka wa heye.
PRO 6:1 Msongolo wa heni, wone nakulagana kota koweza kiwika lehani kwa chiwalo cha youlingikalasa habehi, wone nakulagana kwa chiwalo cha yunji,
PRO 6:2 wone nakidinya kwa ulonzi wa gwegwe baho, nakigwiliza kwa kulagana kwa hegwe,
PRO 6:3 uvizele kota hegwe, kwa kuli ludali lwa munhu yula. Ila msongolo wa heni, wone kwangugana kilohola, lelo udite ahi, umlutile munhu ayo mala imwe, umdedeze yakupe kilejeha kwa hegwe.
PRO 6:4 Wikangaze uleche kuleka meho ga hegwe gawe na usinjizi, uleche kukunda gasinzile.
PRO 6:5 Wilohole kwa kilavya kuli idiwa alyo, kota chifuno ama chideje chilingisukula kwa yalingupelemba.
PRO 6:6 Hegwe mgata! Ulute ukalilole isisina, wijese vyolilinguganigwa kikala leka uwe na luhala.
PRO 6:7 Isisina lyahela chilongozi ne mkulu ne yalingulongoza,
PRO 6:8 ila lyangiwichila chilyo mhela wa chipalangule, lyangukungajizaga na kuwika kuli ng'hano, mhela wa kubeta.
PRO 6:9 Hegwe mgata, kowasa aho mbaka nili? Kolilimka nili kuli usinjizi wa hegwe?
PRO 6:10 Kwangilonjela, “Uwase hado hela, usinzile hado. Uswinize moko ga hegwe wesele hado.”
PRO 6:11 Mhela awo uzunwa wokuvaba kota yalinguboka, kupunguchilwa kokuwinza kota muhizi.
PRO 6:12 Mwihe ama mjuvi, kangulubaluba yolonga ulonzi wihile,
PRO 6:13 kuno yokonyeza kuwajiliza wanji, kangupananga kwa uzayo, na kuwalajila wanhu kwa vidole.
PRO 6:14 Yawele yamemile uhadi mnhumbula kangulonga wihe, kangwambuzaga kilewa chila honhu.
PRO 6:15 Kwa chiwalo acho kubagama komfika himahima, baho du kogazika vibi ne kuwa na kitumbila.
PRO 6:16 Hana vinhu sita, viwele Mkulu Nguluwi kanguvizudila, ena, vinhu saba viwele ndo izudizo kwa heye.
PRO 6:17 Meho ga ujuvi, umyango wa uhadi, moko galingukopola walihela nongwa,
PRO 6:18 nhumbula ilingijesa mbuli zihile, magulu galingubilimila kudita wihe,
PRO 6:19 mlolezi yalingulavya udesi, na munhu yalingwambuza wihe hali wenyelukolo.
PRO 6:20 Msongolo wa heni, wibatilile malajizo ga mhaza wa hegwe, uleche kusemwa malanguso ga mayako.
PRO 6:21 Ugawiche mnhumbula mwa hegwe mhela weng'ha, ugabatilile mmoko mwa hegwe.
PRO 6:22 Gokulongoza kuli nzila ya hegwe, gokwamila mhela houwasa, gokulangusa ganojile mhela wa nemisi.
PRO 6:23 Kwa vila mzilo awo ndo chenje, na ilajizo alyo ndo lumuli. Makanyo ago na kuhulichiza gokuwika kuli nzila ya ukomu.
PRO 6:24 Gokwamila leka uwe kutali na mdala yehile, gokuwika kutali na ulonzi wa uhadi wa mdala mng'hondwa.
PRO 6:25 Uleche kumgana mdala ayo kwa kunoga kwa heye, uleche kukunda kugwilizwa na meho ga heye.
PRO 6:26 Kuwasa na mdala mng'hondwa komdita mlume yawe mzunwa, ila kuwasa na mche wa munhu yunji kowajiliza ukomu weng'ha.
PRO 6:27 Ndaze, koweza kuwika chiluli mmhambaga na nguwo za hegwe zileche kulakala?
PRO 6:28 Ndaze, koweza kubiga makala ga chiluli, na uzayo wa hegwe uleche kulakala?
PRO 6:29 Ndo vyoyawele mlume yalinguwasa na mche wa myage, yoneche yalingumdoliza mdala ayo holeka kugazigwa.
PRO 6:30 Wanhu hawalingumbeza ng'hatu munhu, wone yohiza kwa chiwalo cha nzala,
PRO 6:31 ila wone yebatigwe yomlapa yalipe mala saba, kolavya kahi lufufu lweng'ha lwoyawele nalo.
PRO 6:32 Mlume yalinguwasa na mche wa munhu yunji kahela nyhala ng'hatu, ayo kangidumya heye yuye.
PRO 6:33 Kopata vilonda na kubezigwa, soni hoyopata haikuka kwa heye.
PRO 6:34 Kwa vila fihi ya mlume yomdita yawe yang'hang'hale ng'hatu, mhela hoyohilula chibida kahela cha kuchonela isungu.
PRO 6:35 Hokunda kupegwa sendi, ne kuhembulizwa na ndolendole nyinji.
PRO 7:1 Msongolo wa heni, wibatilile ulonzi wa heni, ujiwiche mizilo ja heni mgati mwako kota lufufu.
PRO 7:2 Ujiwinze mizilo ja heni nagwe kochikala, ugamile malanguso ga heni kota iziho lya hegwe.
PRO 7:3 Ugawohe kuli vidole vya hegwe, ugandiche mnhumbula mwa hegwe.
PRO 7:4 Ululonjele luhala, “Hegwe ndo lumbu wa heni, hegwe ndo goloko wa heni.”
PRO 7:5 Lwokwamila na mdala yehile, lwokuwika kutali na ulonzi unonile wa mdala mng'hondwa.
PRO 7:6 Zuwa limwe kuli itubuli lya ng'handa ya heni, nasunjilila kwa kukolela itubuli,
PRO 7:7 nandiwona wasongolo wenji wapoka, na yumwe yawele yasowile nyhala.
PRO 7:8 Ayo nayali yojenda kuli nzila yila, habehi na nzingo koyekale mdala yumwenga. Lelo nakawinza nzila ilinguluta haluga ha mdala yula.
PRO 7:9 Nawali mhela wa matinazo, jiza na nechilo navyali vyaluche kwinjila.
PRO 7:10 Lelo, msongolo nakating'hana na mdala ayo, yavalile kota mng'hondwa, yawele kuli usugu wa heye.
PRO 7:11 Nayali mdala yalingulonga ne kupwepwa na mjuvi, magulu ga heye hambe gasindamale haluga,
PRO 7:12 mhela umwenga ganguwa mnzila, mhela wunji kuli soko, kuli chila nzingo ya nzila kanguwa baho yopelemba.
PRO 7:13 Nakamkumbatila msongolo ayo na kumnonela, ne soni, nakamlonjela,
PRO 7:14 “Ndanajo miwunde ja nhambiko kaye kwa heni, lehano nanyeneza chilaho cha heni.
PRO 7:15 Ndo mina nandawa leka ndikubochele, nandikupala ng'hatu, lelo nandikupata.
PRO 7:16 Nambika goya chinhanda cha heni, kwa igolole lya lanji za kitani kulawa Misili.
PRO 7:17 Nambika unhunyhililo wa manemane na udi na mdalasini.
PRO 7:18 Uye tuwase hamwe mbaka mitondo, uye tikofye kwa kigana.
PRO 7:19 Mlume wa heni ka haduhuli kaye, nakaluta kuli majendo ga kutali.
PRO 7:20 Nakahola sendi nyinji, hohiluka kaye himahima.”
PRO 7:21 Nakamhada kwa ulonzi wa kuhembuliza, msongolo nakakunda kwa ulonzi wa heye unonile.
PRO 7:22 Baho du, msongolo nakamuwinza mdala ayo, kota isenga lilinguluta kuli honhu ha kudumulila singo, kota chifuno chilingunomochela midiwa.
PRO 7:23 Nayali havizelele kota kowajiliza ukomu wa heye, mbaka hoyonile nakawa kota nakahomigwa msale mnhumbula, nakawa kota chideje chigwilile kuli utandawala.
PRO 7:24 Lelo wasongolo wa heni, mnyhulichize, muuwichile goya makutu ulonzi wa heni.
PRO 7:25 Mleche kukunda kulongozwa na mdala kota ayo, ne kukola kuli nzila za heye.
PRO 7:26 Kwa vila nakawagwisa walume wenji, ndo wenji lukami awo yawadumule singo.
PRO 7:27 Ng'handa ya heye ndo nzila ya kuluta kuli isi ya wabagame, ndo honhu ha kudulichila kuli kubagama.
PRO 8:1 Mhulichize! Luhala kanguchema. Luhala kangukwiniza lizi lya heye.
PRO 8:2 Mchanya henuche habehi na nzila, kuli nzila mhanda ndo hoyewichile.
PRO 8:3 Habehi na lwizi lwa kwinjilila mujini, honhu howalingwinjila wanhu, kanguchema kwa lizi,
PRO 8:4 “Hemwe wanhu weng'ha, ndanguwachema. Nyhemo ya heni ndo kwa chiwalo cha wanhu.
PRO 8:5 Hemwe wapoka, milanguse kuwa na nyhala, mhulichize goya hemwe msowile nyhala.
PRO 8:6 Mhulichize kwa vila chondilonga ndo mbuli zitanganiche, kuli mlomo wa heni zangulawa mbuli za hachi.
PRO 8:7 Mlomo wa heni wolonga kukomya yeka, wihe ndo izudizo kumlomo kwa heni.
PRO 8:8 Mlomo wa heni wolonga ulonzi wa kutanganika, haduhu ne limwe liwele nalyajilila ama lya ujuvi.
PRO 8:9 Kwa munhu yalinguweza kutang'hula, ulonzi awu wa hazelu, kwa yawele na uwanzi, ulonzi awu ndo wa kutanganika.
PRO 8:10 Uhagule malanguso ga heni honhu ha sendi, na uwanzi honhu ha zahabu inojile.
PRO 8:11 Heni luhala, noga lukami kusinda johali, choneche choulinguchonela maya hachiweza kiwhana na heni.
PRO 8:12 “Heni luhala ndangikala na uwanzi, ndanawo uwanzi na nyhala.
PRO 8:13 Kumdumba Mkulu Nguluwi ndo kuzudila wihe. Ndanguuzudila ujuvi na kidaya na kikala kwihile, ndanguzizudila ndonga zihile.
PRO 8:14 Ndina ludali lwa kulonga ganojile na ndina luhala. Ndanawo uwanzi na ndina mong'ho.
PRO 8:15 Kwa utanzi wa heni, wandewa wangulongozaga, vilongozi wangwamulaga gawele ga hachi.
PRO 8:16 Kwa utanzi wa heni, vilongozi wangulongozaga, wakulu na walingulongoza kwa hachi.
PRO 8:17 Ndanguwagana wala walingungana, walingumhala ng'hatu wangumbona.
PRO 8:18 Lufufu na lutogo vya kwa heni, vinhu vya sendi nyinji vya kikala mazuwa gose na kutanganika.
PRO 8:19 Mafuza ga heni ndo ganoga kusinda zahabu inojile, mbena za heni za mzidi ndo kusinda sendi inojile.
PRO 8:20 Ndangujenda kuli nzila ya kutanganika, ndanguwinza nzila za hachi.
PRO 8:21 Ndanguwapaga lufufu walingungana, ndanguzimemezaga ng'hatu ng'hano zawo.”
PRO 8:22 Luhala nalulutilila kulonga, “Mkulu Nguluwi nakandita kuli mwaluko wa mijito ja heye, mhela wa katali kung'hali kuwa na chinhu choneche.
PRO 8:23 Nanditigwa mwaluko wa mihela, nandali kuko lokung'hali kwaluka isi.
PRO 8:24 Namhondigwa kung'hali kuwa na bahali, kung'hali kuwa na nzasa zilingulavya mazi.
PRO 8:25 Namhondigwa kung'hali vidunda, na vigongo kwimizwa honhu hake,
PRO 8:26 kung'hali Nguluwi hanailumba isi na migunda jake, ne vihande vya mwaluko vya nhimbwisi ya isi.
PRO 8:27 Nandali aho mhela hoyauwichile ulanga, mhela woyacholile msitali wa kiting'hana kwa bahali na ulanga,
PRO 8:28 mhela woyaziwichile nzinzili ng'hungugu kilanga, vyoyaziditile nzasa za bahali ziwe nzinzili,
PRO 8:29 mhela woyaiwichile bahali mbaka wake, mazi gake galeche kuya kubena mizilo ja heye, mhela hoyajiwichile misisi ja isi.
PRO 8:30 Nandali hamwe na heye kota muwanzi ng'hatu, nandali usangalalo kwa heye chila zuwa, nasangalala hali heye mazuwa gose,
PRO 8:31 nandiisangalalila isi na wenyeng'haye wake, na kunojezwa kuwa hamwe na wanhu.
PRO 8:32 “Lelo wasongolo wa heni, mhulichize. Fola wala walinguwinza nzila za heni.
PRO 8:33 Mhulichize malanguso leka muwe na luhala, na mleche kugalema.
PRO 8:34 Kotambichizwa munhu yalingunyhulichiza, yalingikalisa chila zuwa hali lwizi lwa heni, yalinguwa meho habehi na lwizi lwa heni.
PRO 8:35 Yalingumhata heni kanguwa na ukomu, kana uganililo kwa Mkulu Nguluwi.
PRO 8:36 Yalingulemwela kumhata heni kangilumizaga yuye, weng'ha walingunzudila wangugana kubagama.”
PRO 9:1 Luhala ndo kota mdala yazenjile ng'handa yake, ng'handa iwele na mizengo saba.
PRO 9:2 Nakajidumula singo migongolo ja mnvina, divai yake nakaiwika goya, nakachiwika goya chisaga chake.
PRO 9:3 Nakawalajiza vitumagwa wa heye wadala mujini, wawacheme wanhu kulawa kuli vinhembenhembe vya vigongo,
PRO 9:4 “Yoneche yawele mpoka yoye hano.” Na yoneche yasowile nyhala kangumlonjelaga,
PRO 9:5 “Uye ulye chilyo, na unwe divai yongongomanye.
PRO 9:6 Wileche na upoka leka wikale, uwinze nzila ya nyhala.”
PRO 9:7 Yalingumlonga yalingubeza kangupataga maligo, yalingumng'hanuchila mwihe kangudumilaga kwa kulumizwa.
PRO 9:8 Uleche kumkanya yalingubeza kwa vila kokuzudila, umkanye yawele na luhala naye kokugana.
PRO 9:9 Umlanguse yawele na luhala, ayo kolutilila kuwa na luhala, mlanguse yatanganiche, naye kolutilila kuwa na kuvizela.
PRO 9:10 Kumdumba Mkulu Nguluwi ndo msisi wa luhala, na kumzela yula Yelile ndo kuwa na nyhala.
PRO 9:11 Kwa utanzi wa heni luhala, mazuwa ga hegwe gokonjezwa, kokonjezelwa miyaka minji kuli ukomu wa hegwe.
PRO 9:12 Wone kuna luhala, lwokupa chonolo, wone ulubeze, kogazika ng'hatu.
PRO 9:13 Upoka ndo kota mdala yalingulonga kwa lizi likulu, ndo kahela nyhala na havizelele chinhu.
PRO 9:14 Kangikalisaga hali lwizi lwa ng'handa ya heye, kanguwikaga chigoda cha heye honhu ha kuchanya mujini,
PRO 9:15 na kuwachema wanhu walingukola mnzila, wanhu walinguluta kuli mijito ja hewo,
PRO 9:16 “Yoneche yawele mpoka yoye hano.” Yoneche yasowile nyhala kangumlonjelaga,
PRO 9:17 “Mazi ga uhizi ndo ganona ng'hatu, ibumunda lilinguligwa kwa uviso ndo linona lukami.”
PRO 9:18 Ila mpoka havizelele kota amo hana wabagame, wajenzi wa mdala ayo wa hasi kuli isi ya wabagame.
PRO 10:1 Azi ndo nhelo za Solomoni. Msongolo yawele na luhala ndo usangalalo kwa mhaza wa heye, ila msongolo yasowile luhala ndo masinzo kwa mayake.
PRO 10:2 Ng'hano ilingulawa kuli nzila zihile haiwele inojile, ila kutanganika kwangumloholaga munhu kulawa kuli kubagama.
PRO 10:3 Mkulu Nguluwi halinguwalekaga watanganiche wawe na nzala, ila kangulemaga maya ga wehile.
PRO 10:4 Ugata wangwambuza uzunwa, ila moko ga munhu ga kikangaza gangigalaga lufufu.
PRO 10:5 Yawele na luhala kangukungajizaga mhela wa mbena, kuwasa mhela wa kubeta ndo soni.
PRO 10:6 Yatanganiche kangigalilaga utambichizo heye yuye, ila mlomo wa mwihe wanguvisaga wihe.
PRO 10:7 Watanganiche wokumbuchilwa kwa utambichizo, ila wehile wosemwigwa ng'hatu.
PRO 10:8 Yawele na luhala mnhumbula kanguhulichizaga mizilo, ila yula mpoka yalingulosoka kodumigwa.
PRO 10:9 Yalingikala kwa kugoloka kangikalaga goya, yalingwajiliza kikala kwa heye kozeleka.
PRO 10:10 Yalingukonyeza kwa kunuwila kwihile kangwambuzaga magazo, ila mpoka yalingulosoka kodumigwa.
PRO 10:11 Mlomo wa yatanganiche ndo nzasa ya ukomu, ila mlomo wa mwihe wanguvisa kilewa.
PRO 10:12 Kuzudila kwangwambuzaga kilewa, ila igano lyangugubikaga gehile geng'ha.
PRO 10:13 Kumlomo kwa munhu yawele na kuvizela kuna luhala, ila wapoka wozapigwa ng'hobwa kumgongo.
PRO 10:14 Wawele na luhala wanguulolelaga uwanzi, ila kulosoka kwa mpoka kwangigalaga kudumigwa himahima.
PRO 10:15 Lufufu lwa yawele na lufufu ndo ngome ya heye, uzunwa wa mzunwa wangumgalilaga kudumigwa.
PRO 10:16 Chonolo cha munhu yanojile ndo ukomu, ila mwihe kangudumaga kuli gehile.
PRO 10:17 Yalingukunda kukanyigwa kangulutila kuli ukomu, ila yalingulema, kangwajilila.
PRO 10:18 Yalingumzudila yunji kwa uviso ndo mdesi, yalingumvilizila munhu ka mpoka.
PRO 10:19 Kodita gehile wone kolonga lukami, ila yawele na luhala kunguulemeza mlomo wa heye.
PRO 10:20 Ulonzi wa munhu yatanganiche ndo kota sendi inojile, majesa ga munhu mwihe hagalingutanza choneche.
PRO 10:21 Ulonzi wa munhu yatanganiche wanguwatanza wanhu wenji, ila wapoka wangubagama kwa vila wahela nyhala.
PRO 10:22 Utambichizo wa Mkulu Nguluwi ndo ulingigala lufufu, kikangaza kwa munhu hambe konjeze choneche.
PRO 10:23 Kwa wapoka, kudita wihe ndo kota mdawalo, ila wawele na nyhala wangusangalalaga kwa chiwalo cha luhala.
PRO 10:24 Choyalingudumba mwihe ndo chompata, ila choyalingugana yatanganiche ndo choyopegwa.
PRO 10:25 Chivuluvumbi changukolaga na mwihe kangwajililaga, ila yatanganiche kanguwichigwa nzinzili mazuwa gose.
PRO 10:26 Kota vyoiwele sichi kuli mizino ama iyosi kuli meho, ndo vyoyawele mgata kwa mkulu wa heye.
PRO 10:27 Kumdumba Mkulu Nguluwi kwangonjezaga ukomu, ila miyaka ja wehile jowa michefu.
PRO 10:28 Kitumbila kwa yatanganiche kwangumalilaga kuli usangalalo, ila kubeteza kwa mwihe kwangudumilaga hihi hela.
PRO 10:29 Mkulu Nguluwi ndo ngome ya wagoloche nhumbula, ila walingudita gehile wodumigwa.
PRO 10:30 Watanganiche hawokusigwa hebu muisi, ila wehile hawochikala kuli isi.
PRO 10:31 Mlomo wa yatanganiche wangulavya mbuli za luhala, ila umyango wajilile wodumuligwa ng'hatu.
PRO 10:32 Milomo ja watanganiche janguvizela galingukundigwa, ila ja wehile jangulongaga wihe hela.
PRO 11:1 Mizani ja uhadi ndo izudizo kwa Mkulu Nguluwi, ila chipimilo cha hachi ndo usangalalo kwa heye.
PRO 11:2 Walingidaya wanguwa hamwe na kudeula, ila kwa wanhu walingunyenyetela wana luhala.
PRO 11:3 Kugoloka kwa wanhu wanojile kwanguwalongozaga, kwajilila kwa wawele na nhumbula zihile kwanguwadumyaga.
PRO 11:4 Kuwa na lufufu hambe kutanze chinhu kuli zuwa lya kuzudila kwa Nguluwi, ila kutanganika kwanguloholaga kulawa kuli kubagama.
PRO 11:5 Kutanganika kwa walihela nongwa kwangugololaga nzila ya hewo, ila wehile wangugwa kwa gehile ga hewo wawo.
PRO 11:6 Kutanganika kwa wanhu wagoloche nhumbula kwanguwaloholaga, ila wawele na nhumbula zihile wangugwilizwaga kwa maya ga hewo wawo.
PRO 11:7 Wone mwihe yabagame na kitumbila kwa heye nako kwangwajililaga, geng'ha goyajesile kupata kwa mong'ho wa heye ganguwaga hihi hela.
PRO 11:8 Yatanganiche kanguloholigwaga kuli magazo, na mwihe kangwinjila amo honhu ha heye.
PRO 11:9 Yohambe yamdumbe Nguluwi kanguwadumyaga wanji kwa mlomo wa heye, ila yatanganiche kanguloholigwa kwa uwanzi wa heye.
PRO 11:10 Wone watanganiche wopegwa utambichizo, muji wotowa luchenze, na wone wehile wodumigwa, wanhu wosangalala.
PRO 11:11 Muji wanguwaga unojile kwa utambichizo wa watanganiche, ila wangudumigwa kwa milomo ja wehile.
PRO 11:12 Yalingumbeza munhu yalingikalasa habehi na heye kahela nyhala, munhu yawele na luhala kanginyamalilaga.
PRO 11:13 Yalingukolakola yoheha kangulavyaga uviso, ila yalingukundigwa kuli muhe kanguwikaga uviso.
PRO 11:14 Hali hela ulongozi isi yangugwa, hawele na wanhu wenji wa kulonga ganojile hanguwa na kikala goya.
PRO 11:15 Yalingiwika lehani kwa chiwalo cha mjenzi, kokuya kung'ung'uta, ila yalinguzudila kudita mbuli azo ka honhu ha kikala goya.
PRO 11:16 Mdala yawele na nhumbula ya isungu kangutogoligwa, mlume yalingugana kilewa kanguwa na lufufu hela.
PRO 11:17 Munhu yawele na nhumbula inojile kanguwaga na vinhu vinojile, ila mjuvi kangilumizaga yuye.
PRO 11:18 Chinhu cha mzidi choyalingupata mwihe ndo cha udesi, ila yalingunyala kutanganika kopata chonolo cha kukomya.
PRO 11:19 Munhu yalingulutilila kuli kutanganika kochikala, ila yalinguhagula kudita gehile kobagama.
PRO 11:20 Wawele na nhumbula zajilile ndo izudizo kwa Mkulu Nguluwi, ila walihela nongwa ndo usangalalo wa heye.
PRO 11:21 Ndangukomya, mwihe hosulupuka kuli magazo kwa madito ga heye, ila watanganiche woloholigwa.
PRO 11:22 Mdala yanojile yalihela luhala, ndo kota pete ya zahabu mmhenyhelo mwa igubi.
PRO 11:23 Kitumbila kwa watanganiche kwangigalaga ganojile, maya ga wehile gangumalilaga kuli kuzudila kwa Nguluwi.
PRO 11:24 Yalingulavya sendi kwa isungu kangonjezelwaga lufufu, ila yohaganile kulavya kangubatigwa kuli uzunwa.
PRO 11:25 Munhu yawele na nhumbula ya kulavya utanzi, mbuli za heye zolutilila goya, yalingumnweza myage mazi naye konwezwa.
PRO 11:26 Wanhu wangumpanjilaga yalinguvisa nyhule, ila wangumganilaga utambichizo yalinguguza.
PRO 11:27 Yalingupala kudita ganojile kangupegwa kunoga, ila yalingupala kudita wihe kofichigwa na wihe.
PRO 11:28 Yalingitumbila lufufu lwa heye kogwa, ila yatanganiche kodedemka kota ihamba idodi.
PRO 11:29 Yalinguibena ng'handa ya heye kopata mbeho, mpoka kowa mpogozi wa wawele na luhala.
PRO 11:30 Madito ga yatanganiche gangigalaga ukomu, naye yawele na luhala kangukwegaga nhumbula za wanhu.
PRO 11:31 Wone yatanganiche kangupegwa chonolo aha muisi, ndangukomya, mwihe ama yawele na gehile kopegwa chihile ng'hatu.
PRO 12:1 Yalingugana kuhulichiza kanguganaga uwanzi, ila yohambe yagane kukanyigwa ndo yalihela nyhala.
PRO 12:2 Mkulu Nguluwi kangunojezwa na munhu yanojile, ila yawele na kunuwila kwihile kangupanjilwa na Nguluwi.
PRO 12:3 Munhu howeza kuwa nzinzili kwa kudita wihe, ila haduhu chilinguweza kumusa yatanganiche.
PRO 12:4 Mdala yawele na nhumbula inojile ndo lutogo kwa mlume wa heye, ila yalingumbasa soni mlume wa heye ndo kota chilonda mmizeje ja heye.
PRO 12:5 Majesa ga yatanganiche ndo ga hachi, ila ulonzi wa mwihe ndo wa uhadi.
PRO 12:6 Ulonzi wa wanhu wehile wangugana kukopola, ila ulonzi wa watanganiche wanguwaloholaga.
PRO 12:7 Wehile wangudumigwa na kwajilila ng'hatu, ila ivyazi lya wawele na hachi lyangwimaga nzinzili.
PRO 12:8 Munhu kangutogoligwa kwa kiwhana na luhala lwa heye, ila wanhu wawele na majesa gajilile wangubezigwa.
PRO 12:9 Fola munhu wa hihi hela yalingulya kwa mijito ja heye, kusinda kidita kuna lufufu, kuno kwahela chilyo.
PRO 12:10 Munhu yatanganiche kanguwaga na isungu kwa migongolo ja heye, ila mbaka madito ga mwihe ga isungu, ganguwa nhumbula yihile.
PRO 12:11 Yalingulima mgunda wa heye kowa na chilyo chinji, ila yalinguwinza mbuli za kulota kahela kuvizela.
PRO 12:12 Wehile wanguganaga kuwa na vinhu vya wehile wanji, ila watanganiche wangwimaga nzinzili.
PRO 12:13 Mwihe kangugwilizwaga kwa ulonzi wa heye yuye, ila yatanganiche kangiwikaga kutali na magazo.
PRO 12:14 Mbuli za munhu zangulutililaga goya kwa kiwhana na ulonzi wa heye, kota vyoyalingupata chila chilinguya, kulawa kuli mijito ja moko ga heye.
PRO 12:15 Mpoka kanguyonaga nzila ya heye kota ya goya, ila yawele na luhala kanguhulichizaga ulonzi unojile.
PRO 12:16 Ugata wa mpoka wanguzelekaga himahima, ila yawele na luhala kangubezaga maligo.
PRO 12:17 Yalingulonga mbuli ya kukomya kangulavyaga ulolezi wa kukomya, ila mlolezi wa udesi kangulongaga uhadi.
PRO 12:18 Ulonzi wihile wangulumizaga kota ipanga, ila goyalingulonga yawele na luhala ganguchidita chilonda chipone.
PRO 12:19 Mlomo ulingulonga kukomya, wangikala mazuwa gose, ila umyango wa udesi ndo wa mhela uchefu hela.
PRO 12:20 Walingiwika goya kudita gehile nawamema uhadi mnhumbula, ila walingikangaza kuwala kikala goya wanguwa na usangalalo.
PRO 12:21 Watanganiche hawalingufichigwa na mbuli yoneche yihile, ila wehile nawamema magazo menji.
PRO 12:22 Milomo jilingulonga udesi ndo izudizo kwa Mkulu Nguluwi, ila wanhu walingukundigwa ndo usangalalo wa heye.
PRO 12:23 Munhu yawele na luhala kanguvisaga uwanzi wa heye, ila wapoka wanguwikulaga upoka wa hewo.
PRO 12:24 Kikangaza kwangumhaga munhu ludali, ila ugata womdita yawe mpogozi.
PRO 12:25 Lunhwinhwi mnhumbula ndo itunyo ikulu kwa munhu, ila ulonzi unojile wangumsangalaza.
PRO 12:26 Munhu yawele na hachi kangilolela kuli ugoloko, ila nzila ya wehile yanguwajilizaga hewo wawo.
PRO 12:27 Mpelembi mgata hopata choyalingupelemba, ila yalingikangaza, mbuli za heye zolutilila goya.
PRO 12:28 Kutanganika ndo nzila ya ukomu, kuli nzila yake haduhu kubagama.
PRO 13:1 Mwana yawele na luhala kanguhulichizaga malajizo ga mhaza wa heye, ila yalingubeza hambe yahulichize makanyo.
PRO 13:2 Munhu yawele na nhumbula inojile kangupataga ganojile kulawa kuli ulonzi wa heye, ila wahadi wanguganaga kilewa.
PRO 13:3 Yalinguudima mlomo wa heye kangwamilaga kikala kwa heye, yalinguhabuka kangiyambuzila yuye kudumigwa.
PRO 13:4 Mgata kanguwaga na maya ila hambe yapate choneche, walingikangaza wangutambichizwaga chilyo kwa winji.
PRO 13:5 Yatanganiche kanguuzudilaga udesi, ila mwihe kangigalaga soni na kudeula.
PRO 13:6 Kutanganika kwanguwamilaga wagoloche nhumbula, ila gehile ganguwagwisaga wehile.
PRO 13:7 Wamwenga wangiditaga kota wana lufufu kuno wahela chinhu, wanji wangiwonaga kota wazunwa kuno wana lufufu lwinji.
PRO 13:8 Lufufu lwa munhu lwoweza kumgombola, kulawa kwa wanhu walingugana kumhola kwa chiwalo cha kugana lufufu lwa heye, ila mzunwa halingudumba kuholigwa.
PRO 13:9 Watanganiche wangupulikaga kota chenje chilingwaka goya, ila wehile ndo kota chenje chilinguzima.
PRO 13:10 Kidaya kwangwambuzaga kilewa hela, ila walingukunda ulonzi unojile wana luhala.
PRO 13:11 Lufufu lwa himahima lwangwajililaga, ila yalingukungajiza hadohado kolwonjeza.
PRO 13:12 Kitumbila kwa kubeteza ng'hatu kwangulumiza nhumbula, ila kitumbila kwenele kwangigalaga kusangalala.
PRO 13:13 Yalingubeza ulonzi unojile kangigalila kudumigwa, ila yalinguhulichiza mizilo kopegwa chonolo.
PRO 13:14 Malanguso ga wawele na luhala ndo nzasa ya ukomu, gangumtanza munhu kiwika kutali na midiwa ja kubagama.
PRO 13:15 Yawele na kuvizela kangigalaga uganililo, ila nzila ya wehile ndo ya magazo.
PRO 13:16 Yawele na luhala kanguditaga chila chinhu kwa nyhala, ila mpoka kanguwikaga hazelu upoka wa heye.
PRO 13:17 Msenga yehile kanguwenjizaga wanhu kuli magazo, ila msenga yalingukundigwa kangigalaga kikala goya.
PRO 13:18 Uzunwa na kudeula vyangumpataga yalingugabeza malanguso, ila yalinguhulika makanyo kanguhulichizwaga.
PRO 13:19 Kwangusangalala hala houpata chila choulingugana. Wapoka wanguzudilaga kiwika kutali na wihe.
PRO 13:20 Yalinguwa hamwe na wawele na luhala kangupataga luhala, ila yalingilumba na wapoka kolumila.
PRO 13:21 Walingudita gehile wanguwaga na magazo ng'hatu, ila watanganiche wopegwa ganojile.
PRO 13:22 Munhu yanojile kanguwalechelaga uhalizi walelwa wa heye, ila lufufu lwa yawele na gehile nawawichilwa watanganiche.
PRO 13:23 Mgunda wa mzunwa wangulavyaga mbena nyinji, ila ne hachi wanguholigwa.
PRO 13:24 Yohambe yamzape mwanage kwa makanyo hambe yamgane, ila yalingumgana mwanage kangumkanyaga kung'hali.
PRO 13:25 Yatanganiche kanacho chilyo cha kuhega, ila lida lya mwihe lyangugazika kwa nzala.
PRO 14:1 Mdala yawele na luhala kanguzengaga ng'handa ya heye, ila mdala mpoka kangubomolaga kwa moko ga heye yuye.
PRO 14:2 Yalingudita mbuli zigoloche kangumdumbaga Mkulu Nguluwi, ila yajilile kangumbezaga Nguluwi.
PRO 14:3 Mpoka kangigazaga yuye kwa kulonga kwa kidaya, ila yawele na luhala kangwamilwaga kwa ulonzi wa heye.
PRO 14:4 Honhu halihela misenga ja kulimila, ng'hano za munhu zahela chinhu, mbena nyinji zangulawa kwa chiwalo cha mong'ho wa misenga ja kulimila.
PRO 14:5 Mlolezi yalingukundigwa hambe yalonje udesi, ila yohambe yakundigwe kangulongaga udesi.
PRO 14:6 Yalingubeza kangupalaga luhala na hambe yapate, ila yawele na luhala kangupataga uwanzi kwa ubewe.
PRO 14:7 Wiwiche kutali na mpoka, kwa vila aho hoyawele haduhu ulonzi wa luhala.
PRO 14:8 Luhala lwa yula yawele na nyhala lwangumlajila nzila ya heye, ila upoka wa mpoka, wangumhada heye yuye.
PRO 14:9 Wapoka wangusechelelaga gehile ga hewo, ila wagoloche nhumbula wangupataga kunoga kulawa kwa Nguluwi.
PRO 14:10 Chila nhumbula yanguuzela usungu wake, haduhu yawele yoweza kihanza kuli kusangalala kwake.
PRO 14:11 Ng'handa ya mwihe yobomoligwa, ila ihema lya yagoloche nhumbula lyoditigwa liwe nzinzili.
PRO 14:12 Hana nzila youlingijesa kota ya goya, ila kuli kuduma yoweza kukulongoza kuli kubagama.
PRO 14:13 Masinzo goweza kivisa kuli kuseka, usangalalo woweza kumalila kuli masinzo.
PRO 14:14 Munhu yajilile kobeta mafuza ga gala goyalingudita, naye yanojile kopata chonolo cha madito ga heye.
PRO 14:15 Mpoka kangukundaga chila chinhu choyalingulonjelwa, ila yawele na luhala kanguwaga na kilolela kuli nzila za heye.
PRO 14:16 Yawele na luhala ndo yalingilolela na kangiwikaga kutali na wihe, ila mpoka hambe yelemeze ne kilolela.
PRO 14:17 Yalinguzudila himahima kanguditaga upoka, naye yawele na nhumbula yihile kanguzudilwa.
PRO 14:18 Wasowile nyhala wanguhalilaga upoka, ila wawele na luhala wangupegwa itaji lya uwanzi.
PRO 14:19 Walingudita gehile wofugama hali wanhu wanojile, wehile hali lwizi lwa watanganiche.
PRO 14:20 Mzunwa kanguzudilwa mbaka na yowalingikalasa habehi, ila yawele na lufufu kana goloko wenji.
PRO 14:21 Yalingumbeza yowalingikalasa habehi ndo yawele na gehile, ila nakatambichizwa yawele na isungu kwa wazunwa.
PRO 14:22 Yalingiwika goya kudita gehile, ndangukomya kanguwifya. Yalingiwika goya kudita ganojile, kangupegwa igano lya kwimilila na kukundigwa.
PRO 14:23 Kikangaza kuli chila mijito kwangigalaga chinhu cha mzidi, ila ulonzi hela wangigalaga uzunwa.
PRO 14:24 Lufufu ndo chonolo kwa yula yawele na luhala, ila upoka wa mpoka wangulelaga upoka.
PRO 14:25 Mlolezi wa kukomya kanguuloholaga ukomu, ila yalingulonga udesi ka yalinguhada.
PRO 14:26 Yalingumdumba Mkulu Nguluwi kana kitumbila kwimile nzinzili, na wana wa heye wopata honhu ha kubilimila hawele na kikala goya.
PRO 14:27 Kumdumba Mkulu Nguluwi ndo nzasa ya ukomu, kwangumtanza munhu kiwika kutali na midiwa ja kubagama.
PRO 14:28 Lufufu lwa mndewa ndo winji wa wanhu wa heye, ila ne wanhu chilongozi kangudumigwa.
PRO 14:29 Munhu yohawele wa kuzudila himahima kana luhala ng'hatu, ila yalinguzudila himahima kangulajilaga upoka.
PRO 14:30 Kikala goya mnhumbula kwangumha munhu mong'ho, ila maya gangujidita mizeje jole.
PRO 14:31 Yalingumbunza mzunwa kangumliga Yamlumbile heye, ila yalingumonela isungu mzunwa, kangumtogola Nguluwi.
PRO 14:32 Mwihe kangudumigwa kwa madito ga heye ga wihe, ila yatanganiche kangwamilwa na kugoloka kwa heye.
PRO 14:33 Luhala lwa kwa munhu yawele na nyhala, ila hailinguzeleka hali wapoka.
PRO 14:34 Kutanganika kwanguwadita wanhu wa isi watogoligwe, ila gehile ndo mbuli yihile kwa isi yoneche.
PRO 14:35 Mndewa kanguwaga yomha kunoga chitumagwa yalingudita kwa luhala, ila ng'halazi ya heye yangumpataga yula yalingudita vibi.
PRO 15:1 Kwidichila kwa uliholile kwangulemeza ng'halazi, ila ulonzi ung'hang'hale wangonjeza ng'halazi.
PRO 15:2 Umyango wa yawele na luhala wanguutogolaga uwanzi, ila mlomo wa mpoka wangulavyaga upoka.
PRO 15:3 Meho ga Mkulu Nguluwi gangonaga chila chinhu, ganguwapugajizaga yanojile na yehile.
PRO 15:4 Umyango uwele liholile ndo mwaluko wa ukomu, ila mlomo wajilile wangutwegulaga nhumbula.
PRO 15:5 Mpoka kangubezaga malanguso ga mhaza wa heye, ila yalingukunda makanyo ndo msugu.
PRO 15:6 Kaye kwa yatanganiche hana lufufu lwinji, ila choyalingupata mwihe changumigalila magazo.
PRO 15:7 Mlomo wa yawele na luhala wangweneza uwanzi, ila haiwele ahyo kuli nhumbula ya mpoka.
PRO 15:8 Nhambiko ya wehile ndo izudizo kwa Mkulu Nguluwi, ila kulanda kwa wagoloche nhumbula kwangumsangalaza Nguluwi.
PRO 15:9 Madito ga wehile ndo izudizo kwa Mkulu Nguluwi, ila Nguluwi kanguwaganaga walinguwinza mbuli za kutanganika.
PRO 15:10 Magazo gang'hang'hale ndo kwa chiwalo cha yalinguleka madito ganojile, yoneche yalinguzudila kukanyigwa kobagama.
PRO 15:11 Wone Mkulu Nguluwi kangugazela ga kuli Kubagama na ga kuli Kudumya, ndaze, majesa ga wanhu goweza kivisa hali heye?
PRO 15:12 Yalingubeza hambe yagane kukanyigwa, hambe yapale utanzi kwa yawele na luhala.
PRO 15:13 Nhumbula iwele na kusangalala yangukudita kumeho kupuliche, ila usungu wangutwegula nhumbula.
PRO 15:14 Yawele na luhala kangupalaga uwanzi, ila mpoka kangulyaga upoka.
PRO 15:15 Kwa yalingubunzwa chila zuwa ndo liha, ila kwa yawele na nhumbula ilingusangalala ndo mnvina yohambe imale.
PRO 15:16 Fola kuwa na chido na kumdumba Mkulu Nguluwi, kusinda kuwa na ng'hano nyinji hamwe na magazo.
PRO 15:17 Fola chilyo cha ibwasi na kuwa na igano, kusinda mnvina ya iwunde linyatile na kuwa na kuzudila.
PRO 15:18 Munhu wa ng'halazi kangwambuzaga kilewa, ila yula yawele halinguzudila himahima, kangukudita kilewa kusindamale.
PRO 15:19 Nzila ya mgata naimema miwa, ila ya yula yagoloche nhumbula ya hazelu kota nzila ng'hulu.
PRO 15:20 Mwana yawele na luhala kangumditaga mhaza wa heye yasangalale, ila mpoka kangumbezaga mayake.
PRO 15:21 Upoka ndo usangalalo kwa mpoka, ila yalinguvizela goya kanguhagulaga nzila iwele goya.
PRO 15:22 Majesa ga kudita chinhu ganguwifigwa wone hawe haduhu utanzi kulawa kwa wanji, ila wone hawe na wanhu wenji wa kutanza, majesa ago gosumya.
PRO 15:23 Munhu kanguwaga na usangalalo wone yedichile goya, ulonzi unojile kwa mhela wake ndo unoga lukami.
PRO 15:24 Nzila ya yawele na luhala yanguluta kuchanya kuli ukomu, leka yewiche kutali na kwinjila hasi kuli isi ya wabagame.
PRO 15:25 Mkulu Nguluwi kangubomolaga ng'handa za wala walingidaya, ila kangwamilaga mbaka ja haluga ha wadala wafililwe na walume wawo.
PRO 15:26 Majesa ga mwihe ndo izudizo kwa Mkulu Nguluwi, ila ulonzi wa isungu ndo welile.
PRO 15:27 Munhu yawele na maya ga sendi, kanguligalilaga magazo ivyazi lyake, ila yalinguzudila kupegwa chinhu choneche kwa uviso, kochikala.
PRO 15:28 Nhumbula ya yatanganiche yangijesa kung'hali kwidichila, ila mlomo wa mwihe wangulongaga wihe.
PRO 15:29 Mkulu Nguluwi ka kutali na wehile, ila kanguhulichiza kulanda kwa watanganiche.
PRO 15:30 Meho ga isungu gangusangalaza nhumbula, mbuli inojile yangusangalaza lukuli.
PRO 15:31 Munhu yalinguhulichiza makanyo ganojile, kana honhu hake hali wawele na luhala.
PRO 15:32 Yalingulema kulanguswa kangibeza yuye, ila yalingukunda makanyo kowa na luhala.
PRO 15:33 Kumdumba Mkulu Nguluwi ndo malanguso ga luhala, kung'hali kutogoligwa yanguganigwa kuwa ulingunyenyetela.
PRO 16:1 Munhu kangijesaga kudita mbuli zoyogana heye, ila ulonzi wa kuduma ndo wa heye Mkulu Nguluwi.
PRO 16:2 Madito ga munhu gangonekaga kwa heye kota ga goya, ila Mkulu Nguluwi kangujezaga kunuwila kwa munhu.
PRO 16:3 Umhe Mkulu Nguluwi choneche choulingudita, na mbuli za hegwe zokulutila goya.
PRO 16:4 Mkulu Nguluwi nakalumba chila chinhu kwa kunuwila kwa heye, mbaka wehile kwa chiwalo cha zuwa lya kudumya.
PRO 16:5 Chila yalingidaya ndo izudizo kwa Mkulu Nguluwi, ndangukomya, munhu kota ayo kogazigwa.
PRO 16:6 Kwa igano lya kwimilila na kukundigwa, munhu kanguditilwaga uhanyisi, kwa kumdumba Mkulu Nguluwi, kangiwikaga kutali na wihe.
PRO 16:7 Wone Mkulu Nguluwi yanojezwe na madito ga munhu, kanguwagalamulaga mbaka wang'honyo wa heye wanguwa goloko.
PRO 16:8 Fola lufufu ludo kuli kutanganika, kusinda kuwa na vinji kuli wihe.
PRO 16:9 Munhu koweza kudita goyalingijesa kudita, ila Mkulu Nguluwi kangulongozaga chila choyalingudita.
PRO 16:10 Mndewa kangwamulaga kwa kulongozwa na Nguluwi, hoyolavya utaguso hambe yawifye.
PRO 16:11 Mkulu Nguluwi kanguganaga vipimilo na mizani ja hachi, vipimilo vyeng'ha vya mizani kuli chihako cha kupimila, ndo mijito ja heye.
PRO 16:12 Ndo izudizo wandewa kudita wihe, kwa vila misisi ja ludali lwa hewo ndo hachi.
PRO 16:13 Mndewa kanguganaga munhu yalingulonga kwa kutanganika, kangumganaga munhu yalingulonga kwa hachi.
PRO 16:14 Ng'halazi ya mndewa ndo kota msenga wa kubagama, munhu yawele na luhala koidita isindamale.
PRO 16:15 Wone kumeho kwa mndewa kupuliche, hana ukomu, kunoga kwa heye ndo kota ng'hungugu ya luhela.
PRO 16:16 Kuwa na luhala ndo kunoga kusinda zahabu, kupata nyhala ndo kuhagula kunojile kusinda sendi.
PRO 16:17 Nzila ya wagoloche nhumbula yangiwikaga kutali na wihe, yalingwamila nzila ya heye, kangwamilaga kikala kwa heye.
PRO 16:18 Kidaya kwangulongolaga kudumya, nhumbula ya kidaya yangulongolaga kugwa.
PRO 16:19 Fola kuwa ulingunyenyetela na mzunwa, kusinda kihanza vinhu vya kuboka na walingidaya.
PRO 16:20 Yalingibatilila malanguso, mbuli za heye zomlutila goya, kotambichizwa munhu yalingitumbila kwa Mkulu Nguluwi.
PRO 16:21 Yawele na luhala mnhumbula kanguchemigwa yawele na nyhala, ulonzi wa kunojeza wanguwakwega wanhu.
PRO 16:22 Luhala ndo nzasa ya ukomu kwa yawele nalo, ila upoka ndo kuzapigwa kwa wapoka.
PRO 16:23 Nhumbula ya yawele na luhala yangumditaga yalonje kwa kilolela, yanguuditaga ulonzi wa heye uwe wa kukwega wanhu.
PRO 16:24 Ulonzi wa isungu ndo kota hanombwa, ndo unona kuli nhumbula na una mong'ho kuli lukuli.
PRO 16:25 Hana nzila youlingijesa kota ya goya, ila kuli kuduma yoweza kukulongoza kuli kubagama.
PRO 16:26 Kugana chilyo kwangumdita mkola mijito yekangaze, kwa vila nzala yangumdita yalutilile.
PRO 16:27 Mjuvi kangijesaga kudita wihe, ulonzi wa heye ndo kota chiluli ching'hang'hale.
PRO 16:28 Munhu yajilile kangwenezaga kilewa, yalinguheha kanguwaditaga wanhu webagule na goloko.
PRO 16:29 Munhu yawele na nhumbula yihile, kangumhada munhu yowalingikalasa habehi, kangumlongozaga kuli nzila yihile.
PRO 16:30 Yalingukonyeza kwa wihe kangijesa kudita gehile, na yohambe yagane kulonga, kangunuwila kudita gehile.
PRO 16:31 Kuwa na mbuliza za usekulu ndo itaji lya ukulu, lyangulawa kuli kikala kwa kutanganika.
PRO 16:32 Yohawele mbewe wa kuzudila ndo kanoga kusinda yawele na mong'ho, yalinguilongoza nhumbula ya heye yuye ndo kanoga kusinda yula yalinguuhola muji kwa lupichi.
PRO 16:33 Simbi yangutowigwa leka kuvizela goyolawila, ila Mkulu Nguluwi ndo yalingwamula chila chinhu.
PRO 17:1 Fola ibumunda likalile kuli kikala goya, kusinda mnvina kuli ng'handa ya kilewa.
PRO 17:2 Chitumagwa yawele na luhala, kohola honhu ha mwana mpoka, leka yawe na honhu ha kuhalila ha ivyazi alyo.
PRO 17:3 Zahabu ama sendi zangwelizwa kwa chiluli kuli itanulu, ila Mkulu Nguluwi ndo yalingweliza nhumbula za wanhu.
PRO 17:4 Yalingudita wihe kanguhulichizaga ulonzi wihile, mdesi kanguhulichizaga umyango wa uhadi.
PRO 17:5 Yalingumbeza mzunwa kangumliga Yamlumbile heye, yalingusangalalila kutunya kogazigwa.
PRO 17:6 Wazukulu ndo itaji lya wasekulu wa hewo, wana ndo lutogo lwa mhaza na mamo wa hewo.
PRO 17:7 Ulonzi unojile hauwele hihi hela hali mlomo wa mjuvi, ila ndo vibi ng'hatu kwa chilongozi kulonga ulonzi wa udesi!
PRO 17:8 Kwa yalingulavya vinhu kwa uviso, kudita ahyo ndo kota subala, kangijesa kota mbuli za heye zolutilila goya.
PRO 17:9 Yalingulechela gehile kangulutiliza igano, ila yalingukumbusila nongwa kangubagulaga goloko.
PRO 17:10 Makanyo kwa wawele na luhala gana mana, kusinda mitowa miya imwe kwa wapoka.
PRO 17:11 Choyalingudita munhu yehile ndo kubelenhuka hela, msenga yang'hang'hale kolajizwa kwa heye.
PRO 17:12 Fola kiting'hana na isimba idala ling'hang'hale lisukuligwe wanage, kusinda kiting'hana na mpoka kuli upoka wa heye.
PRO 17:13 Yalinguhilula gehile kwa ganojile, gehile hagokuka mng'handa ya heye.
PRO 17:14 Kwaluchiza kilewa ndo kota kutula izimbo lya mazi, lelo, uleche kudita ahyo, kung'hali kitwanza hakunakwaluka.
PRO 17:15 Kumlechela yawele na nongwa na kumgaza yalihela nongwa, geng'ha meli ndo izudizo kwa Mkulu Nguluwi.
PRO 17:16 Lekachoni mpoka yawe na sendi mmoko ga kugulila luhala, kuno heye yuye kahela nyhala?
PRO 17:17 Goloko kanguganaga mazuwa geng'ha, mwenyelukolo kangupondigwa kwa chiwalo cha utanzi mhela wa magazo.
PRO 17:18 Haiwele mbuli ya nyhala kuwika lehani, na kiwika lehani honhu ha munhu yunji.
PRO 17:19 Yalingugana kilewa kangugana gehile, yalingidaya kangipalila kudumigwa.
PRO 17:20 Yawele na nhumbula yajilile, mbuli za heye haziwa goya, na yalingulonga udesi, kangufikwaga na magazo.
PRO 17:21 Mwana mpoka ndo masinzo kwa mhaza wa heye, na usangalalo wa haduhu kwa mhaza wa mpoka.
PRO 17:22 Nhumbula ilingusangalala ndo mikwandi, ila nhumbula iwele na masinzo yangwambuza lukuli luwe ng'hochele.
PRO 17:23 Yehile kangubochelaga vinhu kwa uviso, leka yajilize hachi.
PRO 17:24 Choyalingugana yawele na luhala, ndo nyhala, ila mpoka kangugana chila chinhu muisi.
PRO 17:25 Mwana mpoka ndo masinzo kwa mhaza wa heye, na usungu kwa mayake yampondile.
PRO 17:26 Haiwele goya kumdita munhu yalihela nongwa yalipe faini, ama kuwatowa wang'hangala kwa chiwalo cha kugoloka kwa hewo.
PRO 17:27 Yalingijesa yang'hali kulonga, kana luhala, munhu yawele liholile ndo yawele na nyhala.
PRO 17:28 Wone mpoka yanyamalile, kangonekaga kota kana luhala, wone yadinye mlomo wa heye, kangonekaga kota yawele na nyhala.
PRO 18:1 Yalingupala ga heye hela kangibagulaga na wayage, kanguzudilaga wone yalonjelwe choneche chiwele na luhala.
PRO 18:2 Mpoka hambe yanojezwe na luhala, kwa heye kulonga choyalingijesa ndo chinojile.
PRO 18:3 Vyoukuya wihe, kwanguyaga na kubeza kahi, hamwe na soni, kwanguyaga na kudeula.
PRO 18:4 Ulonzi wa munhu ndo mazi menji, ila nzasa ya luhala ndo kazanda kalinguchililika.
PRO 18:5 Haiwele goya kumganilila mwihe, na kumbunza hachi yatanganiche.
PRO 18:6 Ulonzi wa mpoka wangigalaga kilewa, chila choyalingulonga changwambuzaga mitowa.
PRO 18:7 Mlomo wa mpoka wangumdumyaga heye yuye, mlomo wa heye ndo idiwa lya kikala kwa heye.
PRO 18:8 Ulonzi wa munhu yalinguheha ndo kota chilyo chinojile, chiwele changudulikaga du mbaka mmunda.
PRO 18:9 Munhu mgata kuli mijito ja heye, mng'holoze ndo yalinguwifya.
PRO 18:10 Mkulu Nguluwi ndo ngome iwele nzinzili, yatanganiche kangulibilimilaga na kanguwaga hali kikala goya.
PRO 18:11 Lufufu lwa yawele na lufufu ndo ngome ya heye, kangijesa kota ndo lukanzi luwele ng'wemang'wema lulingumwamila.
PRO 18:12 Kidaya kwa mnhumbula kwangigalaga kudumigwa, ila kunyenyetela kwangigalaga lutogo.
PRO 18:13 Yalingwidichila kuno yang'hali kuhulichiza, ndo upoka na mbuli ya soni kwa heye.
PRO 18:14 Nhumbula ya munhu yanguwezaga kwimilila utamwa, ila wone itweguche, yokwimilila ndaze?
PRO 18:15 Munhu yawele na nyhala kangulutililaga kilangusa kuwala uwanzi, ikutu lya yawele na luhala lyangupalaga uwanzi.
PRO 18:16 Ndolendole yangumchumulilaga nzila yalingulavya, yangumigalaga hali wakulu.
PRO 18:17 Yalingilewela tandi kangonekaga yalingulonga kwa kukomya, mbaka aho yowalingitwanza na heye hoyokwaluka kumuuza.
PRO 18:18 Kutowa simbi ndo kwanguduma kitwanza, kwangwamula hali wakulu walingitwanza.
PRO 18:19 Mwenyelukolo yaditilwe gehile, kana nhumbula igagadale kusinda lukanzi lwa muji, nako kitwanza ndo kota lwizi lwa ngome luwele na mhajilo.
PRO 18:20 Ulonzi wa munhu wanguweza kumgutiza, kangigutiza mafuza kulawa kuli ulonzi wa heye.
PRO 18:21 Umyango una mong'ho wa kigala ukomu ama kukopola, walingugana kuukolela mijito wolya mafuza gake.
PRO 18:22 Yalingumpata mche nakapata chinhu chinojile, ako ndo kunoga kulawa kwa Mkulu Nguluwi.
PRO 18:23 Wazunwa wangulandaga kwa kunyenyetela, ila yawele na lufufu kangwidichilaga kwa kung'hang'hala.
PRO 18:24 Goloko wenji wanguweza kumgwisa munhu, ila kabaho goloko yalingukundigwa kusinda mwenyelukolo.
PRO 19:1 Fola mzunwa yalingikala kwa kugoloka, kusinda yajilile kwa ulonzi na mpoka.
PRO 19:2 Hainojile munhu kuwa na maya ne kuwa na uwanzi, ne kudita himahima kwa vila koileka nzila.
PRO 19:3 Wone munhu yedumye kwa upoka wa heye, kangumzudilaga Mkulu Nguluwi.
PRO 19:4 Lufufu lwangigalaga wagoloko, ila mzunwa kangulechigwa ne goloko.
PRO 19:5 Mlolezi mdesi holeka kugazigwa, yalingulonga udesi howeza kiwika kutali na magazo.
PRO 19:6 Wanhu wenji wanguganaga kuwa habehi na wang'hangala, chila munhu kanguganaga yawe goloko wa munhu yalingulavya ndolendole.
PRO 19:7 Mzunwa kanguzudilwa na wang'holoze, goloko wa heye ndo mzidi, wangumbilimaga. Hanga kanguwawinzaga kwa kuwadedeza, ila hawalingoneka honeche.
PRO 19:8 Yalingupata luhala kangigana yuye, yalingibatilila kuvizela kwa heye, kowa goya.
PRO 19:9 Mlolezi mdesi holeka kugazigwa, yalingulonga udesi kodumigwa.
PRO 19:10 Haiwa goya kwa mpoka kuwa na lufufu, ndo vibi ng'hatu kwa mpogozi kuwalongoza wakulu.
PRO 19:11 Yawele na luhala halinguzudila himahima, kulechela nongwa ndo lutogo kwa heye.
PRO 19:12 Kuzudila kwa mndewa ndo kota kubuma kwa isimba, ila kunoga kwa heye ndo kota nungwi kuli misolo.
PRO 19:13 Mwana mpoka ndo kubagama kwa mhaza wa heye, na kilewa kwa mche ndo kota midovu ja nhonya johambe jimale.
PRO 19:14 Ng'handa na lufufu ndo uhalizi woyalingupata munhu kulawa kwa wasekulu wa heye, ila mche yawele na luhala kangulawaga kwa Mkulu Nguluwi.
PRO 19:15 Ugata ndo kota usinjizi unonile, munhu mgata kogazika kwa nzala.
PRO 19:16 Yalingibatilila mizilo kangukuwika kikala kwa heye kuwe kwa kikala goya, yalingubeza ilajizo kobagama.
PRO 19:17 Yalingumtanza mzunwa kangumwazichila Mkulu Nguluwi, Mkulu Nguluwi komlipa kwa madito ga heye ganojile.
PRO 19:18 Mkanye mwanago mhela kitumbila kung'hali baho, ila wone uleche kudita ahyo ndo kota kumdumya.
PRO 19:19 Munhu yalinguzudila ng'hatu yangumlapa yapegwe magazo, wone umlohole kamwe, yokulapa umlohole kahi.
PRO 19:20 Uhulichize ulonzi unojile na kubochela malanguso, leka uwe na luhala lwa kukutanza mazuwa galinguya.
PRO 19:21 Kuli mutwi wa munhu hana majesa menji ga kudita chinhu, ila choyalingunuwila Mkulu Nguluwi ndo choditigwa.
PRO 19:22 Chilinguganigwa kwa munhu ndo igano lya kwimilila, fola mzunwa kusinda mdesi.
PRO 19:23 Kumdumba Mkulu Nguluwi kwangigalaga ukomu, yalingumdumba kangutambichizwaga kwesela ng'hatu, hofichigwa na chihile choneche.
PRO 19:24 Mgata kanguwikaga moko wa heye kuli luhelo lwa chilyo, ila ndo mgata lukami mbaka kangulemwela kwinula moko wa heye kuhilika kumlomo.
PRO 19:25 Mgaze yalingubeza, naye yalihela nyhala kochilangusa kuwa na luhala, mkanye yawele na luhala, naye kowa na uwanzi.
PRO 19:26 Yalingumtowa mhaza wa heye na kumuwinga mayake, ndo mwana yalingigala soni na kudeula.
PRO 19:27 Mwana wa heni, wone uleche kuhulichiza malanguso, kowa kutali na ulonzi wa luhala.
PRO 19:28 Mlolezi yohambe yatanze chinhu kangubezaga hachi, na umyango wa mwihe wanguugana unojenoje wa wihe.
PRO 19:29 Magazo nagawichigwa goya kwa walingubeza, ng'hobwa za ngozi naziwichigwa goya kwa kuwatowa wapoka kuli migongo.
PRO 20:1 Divai yangigalaga kubeza na ujimbi wangigalaga kilewa, yoneche yalingugala kahela luhala.
PRO 20:2 Kuzudila ng'hatu kwa mndewa ndo kota isimba lilingubuma, yalingumzudiza kangukuwika kikala kwa heye hali honhu hehile.
PRO 20:3 Ndo mbuli inojile kiwika kutali na kilewa, wapoka ndo walingilewa.
PRO 20:4 Mgata hambe yalime mhela wa kulima, mhela wa mbena kopala, ila hopata choneche.
PRO 20:5 Majesa ga munhu nagavisigwa kota mgati ng'hatu mwa mazi menji, ila munhu yawele na luhala kogadeha kulawa amo.
PRO 20:6 Wanhu wenji wangidayilaga kuwa wawele na igano lya kwimilila, ila yalingukundigwa wa kukomya kakohi?
PRO 20:7 Wone yatanganiche yekale kwa kugoloka, wanage wotambichizwa.
PRO 20:8 Mndewa yanojile hoyokalisa kulavya utaguso, kanguyugululaga gehile geng'ha kwa meho ga heye.
PRO 20:9 Whaani yojeza kulonga, “Ndiiyeliza nhumbula ya heni, ndahela gehile?”
PRO 20:10 Mizani ja uhadi na vipimilo vya uhadi, vyeng'ha ndo izudizo kwa Mkulu Nguluwi.
PRO 20:11 Mwana kanguzelekaga kwa kiwhana na vyoyawele, wone madito ga heye ndo ganoga na nagagoloka.
PRO 20:12 Ikutu lilinguhulika na iziho lilingulola, vyeng'ha vili nakavidita Mkulu Nguluwi.
PRO 20:13 Uleche kugana kuwasa hela leka uleche kuwa mzunwa, uwe meho nagwe kowa na chilyo chinji.
PRO 20:14 “Hainojile, hainojile,” yalingugula kangung'ung'utaga, ila wone yoche kangitogolaga nakapunguzilwa beyi.
PRO 20:15 Hana zahabu na winji wa maganga ga sendi nyinji, ila cha kutanza ng'hatu ndo ulonzi wa luhala.
PRO 20:16 Wone munhu yelahe hali hegwe kota komuwichila lehani mjenzi, uhole ivalo lya heye, leka yalipe sendi kwa vila nakamuwichila lehani ayo mjenzi.
PRO 20:17 Chilyo chilinguya kwa uhadi ndo chinona, ila hamba changuwaga kota sangalaza kumlomo.
PRO 20:18 Kuwika goya mbuli, kwangukolekaga kwa kulongasa hamwe, wone kwangugana kwaluka kitowa ngondo, yangulapigwa kubochela majesa kulawa kwa wanji.
PRO 20:19 Yalinguheha hambe yavise chinhu, ahyo wiwiche kutali na munhu yalinguhabuka.
PRO 20:20 Yalingumpanjila mhaza wa heye ama mayake, lumuli lwa ukomu wa heye lozimigwa kota chenje kuli jiza totolo.
PRO 20:21 Uhalizi wuyile himahima mwaluko, wahela utambichizo kuli kuduma.
PRO 20:22 Uleche kulonga, “Ndohilusa wihe wonditilwe.” Witumbile kwa Mkulu Nguluwi naye kokulohola.
PRO 20:23 Mizani ya uhadi ndo izudizo kwa Mkulu Nguluwi, na vipimilo vyohavikundigwe havilingumnojeza.
PRO 20:24 Majendo ga munhu gangulongozwaga na Mkulu Nguluwi, munhu koweza ndaze kuizela nzila ya kuluta?
PRO 20:25 Ndo idiwa kwa munhu kuchiwika chinhu chiuyeng'ha himahima, hamba kijesa kahi kuwala chilaho cha heye.
PRO 20:26 Mndewa yawele na luhala kanguwayugululaga wehile, kanguwagazaga ne isungu.
PRO 20:27 Muhe wa munhu ndo chenje cha Mkulu Nguluwi, kangupugajizaga nhumbula ya munhu mbaka mgati ng'hatu.
PRO 20:28 Igano lya kwimilila na kukundigwa vyangumwamilaga mndewa, ulongozi wa heye wangukangazwa kwa igano lya kwimilila.
PRO 20:29 Lutogo lwa wasongolo ndo mong'ho wa hewo, kunoga kwa wasekulu ndo mbuliza.
PRO 20:30 Mitowa jilingulumiza ndo mikwandi ja kusa wihe, ng'hobwa zangwelizaga nhumbula mbaka mgati ng'hatu.
PRO 21:1 Nhumbula ya mndewa ndo kota mazi galinguchililika, Mkulu Nguluwi, kanguilongozaga honeche hoyogana.
PRO 21:2 Madito geng'ha ga munhu gangoneka ga goya kwa heye, ila Mkulu Nguluwi kanguipimaga nhumbula.
PRO 21:3 Kudita mbuli zitanganiche na za hachi, kwangumnojeza Mkulu Nguluwi kusinda nhambiko.
PRO 21:4 Meho ga ujuvi na nhumbula ya kidaya, vyangulajila hazelu gehile ga wehile.
PRO 21:5 Gala goyodita munhu kwa kwimilila gangigala lufufu kwa winji, ila galinguditigwa himahima ganguwa hihi hela.
PRO 21:6 Ng'hano ilinguya kwa uhadi, ndo ivuche lilingukola na idiwa lya kubagama.
PRO 21:7 Kilewa kwa wehile kokusigwa, kwa vila wangulema kudita mbuli za hachi.
PRO 21:8 Nzila ya munhu yawele na nongwa ndo ya kwajilila, ila madito ga yanojile nagagoloka.
PRO 21:9 Fola kikala hafungo mchanya mwa chinduwiko, kusinda kikala kaye hamwe na mche yalingugana kilewa.
PRO 21:10 Choyalingugana kudita mwihe ndo wihe, kahela isungu mbaka kwa munhu yowalingikalasa habehi.
PRO 21:11 Wone umgaze yalingubeza, mpoka kanguwaga na kuvizela, wone umlanguse yawele na luhala, kwangumha uwanzi.
PRO 21:12 Nguluwi kangugazela galingukoleka kuli ng'handa za wehile, naye kowadumya walingudita gehile.
PRO 21:13 Yalingulema kuhulichiza chililo cha wazunwa, naye kahi hohulichizwa hoyolanda utanzi.
PRO 21:14 Ng'halazi yanguditigwa isindamale kwa ndolendole ya uviso, chinhu choyalingupegwa munhu kuno chivisigwa changulemeza kuzudila.
PRO 21:15 Wone hachi iditigwe, wanhu watanganiche wosangalala, ila wanhu wehile wokabuswa.
PRO 21:16 Munhu yalingulubaluba kutali na nzila ya luhala, kowasa kuli chilundo cha wabagame.
PRO 21:17 Yalinguwinza maya ga heye kowa mzunwa, yalingugana divai na mafuta ga mzeituni howa na lufufu.
PRO 21:18 Mwihe kanguwika goya mbuli zihile kwa yatanganiche, ila kangiyambuzila magazo honhu ha yagoloche.
PRO 21:19 Fola kikala kugunuche, kusinda kikala na mche yalingugana kilewa na yalingutunya.
PRO 21:20 Kaye kwa yawele na luhala hana ng'hano ya sendi nyinji na mafuta, ila lufufu lwa mpoka lwangumala himahima.
PRO 21:21 Yalingupala kutanganika na isungu, kochikala ng'hatu na mbuli za heye zolutilila goya na kutogoligwa.
PRO 21:22 Yawele na luhala koweza kuboka muji wa yawele na mong'ho, na kubomola ngome yowalingitumbila.
PRO 21:23 Yalingwamila mlomo na umyango wa heye, kangiwikaga kutali na magazo.
PRO 21:24 Yalingidaya na mjuvi, itagwa lya heye ndo “Kubeza,” madito ga heye nagamema kidaya kwa ujuvi wa heye.
PRO 21:25 Mgata kangubagama kwa kulemwela kweneza maya ga heye, kwa vila moko ga heye gangulema kukola mijito.
PRO 21:26 Nemisi yeng'ha kanguganaga kuwa na chinhu, ila yatanganiche kangulavyaga kwa isungu.
PRO 21:27 Nhambiko ya mwihe ndo izudizo, yanguzudiza ng'hatu wone yalavye kwa kunuwila kwihile.
PRO 21:28 Mlolezi mdesi kodumigwa, ila yalingulonga ulonzi wa kukomya howeza kulonjelwa yanyamalile.
PRO 21:29 Mwihe kangulajilaga kota ka yazidahe, ila yagoloche kangutawizaga kota nakadita goya.
PRO 21:30 Haduhu luhala na uwanzi ne ulonzi unojile wa munhu, uwele woweza kumsumya Mkulu Nguluwi.
PRO 21:31 Falasi kanguwichigwa goya kwa kitowa ngondo, ila kusumya kwangitumbila kwa Mkulu Nguluwi.
PRO 22:1 Fola kuzeleka goya kusinda lufufu lwinji, fola kuganililwa kusinda sendi ama zahabu.
PRO 22:2 Wawele na lufufu na wazunwa wangiwhana hela. Mkulu Nguluwi ndo yawalumbile hewo weng'ha.
PRO 22:3 Yawele na luhala kanguzonaga mbuli zihile na kivisa, ila mpoka kangiwikaga kumwando na kulumizwa.
PRO 22:4 Kunyenyetela na kumdumba Mkulu Nguluwi, kwangigalaga lufufu na lutogo na ukomu.
PRO 22:5 Nzila ya mwihe naimema miwa na midiwa, yalingugana kuwamila ukomu wa heye kochiwika kutali na nzila ayo.
PRO 22:6 Umlanguse mwana ndaze vyoilinguganigwa kikala goya, naye hosemwa mbaka kuli usekulu.
PRO 22:7 Yawele na lufufu kangumlongozaga mzunwa, yalingulanda ndo mpogozi wa yalingulavya.
PRO 22:8 Yalingunyala kubunza kobeta lihile, ludali lwa ng'halazi ya heye lobenigwa.
PRO 22:9 Yawele na isungu kotambichizwa, kwa vila chilyo cha heye kangumgawilaga mzunwa.
PRO 22:10 Muwinje yalingubeza, ivuche lyokwajilila, kilewa na maligo vyomala.
PRO 22:11 Yalingugana nhumbula inojile na yalingugana ulonzi wa isungu, kowa goloko wa mndewa.
PRO 22:12 Mkulu Nguluwi kangwamilaga malanguso ga kukomya, ila kanguuwifyaga ulonzi wa yalingubelenhuka.
PRO 22:13 Mgata kangulongaga, “Siweza kuluta kunze, kuna isimba ako, lyong'hopola kuli nzila ng'hulu.”
PRO 22:14 Mlomo wa mng'hondwa ndo ikulubila liwele ng'wemang'wema, yalinguzudilwa na Mkulu Nguluwi kogwila amo.
PRO 22:15 Mwana kanguganaga mbuli za chipoka mnhumbula, ila ng'hobwa ya magazo yangumusilaga ago.
PRO 22:16 Yalingumbunza mzunwa leka kiyonjezela lufufu, na yalingumha ndolendole yawele na lufufu, weng'ha wowa wazunwa.
PRO 22:17 Uwiche goya ikutu leka uhulichize ulonzi wa wawele na luhala, wijese ng'hatu kuwala uwanzi wa heni.
PRO 22:18 Hegwe kosangalala wone kogawika mnhumbula, na kugakumbuchila chila mhela.
PRO 22:19 Ila kitumbila kwa hegwe kuwe kwa Mkulu Nguluwi, ndangukulangusa lehano.
PRO 22:20 Nandikwandichila nhelo makumi gadatu, nhelo za makanyo na uwanzi,
PRO 22:21 leka kukulangusa gawele ga hachi na ga kukomya, na wone munhu yakuuze, umwidichile goya.
PRO 22:22 Uleche kumbunza mzunwa kwa vila ka mzunwa, umhe hachi ya heye kuli chitala,
PRO 22:23 kwa vila Mkulu Nguluwi komlewela, kowasukula ukomu wa hewo walinguwabunza wayawo.
PRO 22:24 Uleche kuwa habehi na yalinguzudila himahima, ne kuwa hamwe na yawele na ng'halazi ya himahima,
PRO 22:25 leka uleche kilangusa madito ga heye, na kigwiliza ng'hatu kuli idiwa.
PRO 22:26 Uleche kuwa yumwe wa wala walinguwika kulagana kumlipila yunji, wanhu wawele wangiwikaga lehani kwa chiwalo cha kudaigwa kwa wanhu wanji.
PRO 22:27 Wone uwe ulihela chinhu cha kulipa, chinhanda choulinguwasila choholigwa.
PRO 22:28 Uleche kusa ulajilo wa mbaka ja katali, jiwele najiwichigwa na wasekulu wa hegwe.
PRO 22:29 Ndaze, hana munhu yawele na uwanzi kuli mijito ja heye? Ayo kowakolela mijito wandewa, howakolela mijito wanhu wa hihi hela.
PRO 23:1 Wone wikalise na kulya hamwe na chilongozi, uleche kusemwa ne hado kota chilyo chiwele hali hegwe ndo cha chilongozi.
PRO 23:2 Ulemeze ng'hatu maya ga hegwe, wone kwangugana kulya ng'hatu.
PRO 23:3 Uleche konela maya vilyo vya heye vinojile, kwa vila vyoweza kukuhada.
PRO 23:4 Wone kuna luhala lwa kuhega, uleche kitunya ng'hatu kupala lufufu lwinji.
PRO 23:5 Lufufu lwangwajililaga baho du, lwanguwaga kota lupatile mabawa baho du, luguluche na kuluta kuli ulanga kota ikungule.
PRO 23:6 Uleche kulya chilyo cha mbuhu, ne konela maya vilyo vya heye vinojile,
PRO 23:7 kwa vila mnhumbula mwa heye kanguwaza chila choulingulya. Kokulonjela, “Ulye, unwe.” Ila mnhumbula mwa heye hawele hamwe na hegwe.
PRO 23:8 Hegwe kodeka vihande vyoudile, malumbo ga hegwe geng'ha gowa ga hihi hela.
PRO 23:9 Uleche kulonga mbuli za hegwe hali makutu ga mpoka, kwa vila kobeza luhala lwa ulonzi wa hegwe.
PRO 23:10 Uleche kusa ulajilo wa mbaka ja katali, ne kuhola migunda ja walekwa,
PRO 23:11 kwa vila Nguluwi, Mgombozi, ndo yawele na mong'ho, naye koilewela hachi ya hewo kwa hegwe.
PRO 23:12 Kwa nhumbula ya hegwe, uwinze malanguso, na kwa makutu uhulichize uwanzi.
PRO 23:13 Umkanye mwana, wone umzape ng'hobwa, hobagama.
PRO 23:14 Houmzapa, kokulohola kikala kwa heye, kulawa kuli isi ya wabagame.
PRO 23:15 Mwana wa heni, wone nhumbula ya hegwe iwe na luhala, nhumbula ya heni yosangalala.
PRO 23:16 Nhumbula ya heni yotowa luchenze, mlomo wa hegwe houlonga ulonzi wa hachi.
PRO 23:17 Nhumbula ya hegwe ileche kuwonela maya wawele na gehile, ila ilutilile kumdumba Mkulu Nguluwi mazuwa gose.
PRO 23:18 Ndangukomya, hana kitumbila kunojile kwa chiwalo cha hegwe kuli mazuwa galinguya, na kitumbila ako hakukusigwa.
PRO 23:19 Uhulichize mwana wa heni, uwe na luhala, wijese ng'hatu ndaze vyoulingikala.
PRO 23:20 Uleche kuwa yumwe wa walingugala divai, ne walingulya lukami walingugana miwunde,
PRO 23:21 kwa vila walingugala na walingulya lukami kuli kuduma wowa wazunwa, yalingutumiya zuwa lya heye kusinzila kovala vibende.
PRO 23:22 Umhulichize mhaza wa hegwe, uleche kumbeza mayako wone yalale.
PRO 23:23 Ugule kukomya, uleche kukuguza, uwe na luhala na malanguso na kuhulichiza.
PRO 23:24 Mhaza wa mwana yatanganiche komema usangalalo, yalingumponda mwana yawele na luhala, kosangalala kwa chiwalo cha heye.
PRO 23:25 Uwadite mhaza na mayako wasangalale, mamo yakupondile yasangalale.
PRO 23:26 Mwana wa heni, unyhulichize goya, wibatilile madito ga kikala kwa heni.
PRO 23:27 Mdala mng'hondwa ndo ikulubila liwele ng'wemang'wema lya kugwiliza wanhu, mdala ayo ndo idiwa.
PRO 23:28 Heye kangivisa na kubeteza kota yalinguboka, kangwambuzaga walume wenji wawe wohambe wakundigwe hali wanhu.
PRO 23:29 Ndo wanhu wachi walingutowa iyowe? Ndo wanhu wachi wawele na masinzo? Ndo wanhu wachi wawele na kilewa? Ndo wanhu wachi walingung'ung'uta? Ndo wanhu wachi wawele na vilonda ne chiwalo? Ndo wanhu wachi wawele na meho madung'hu?
PRO 23:30 Ndo wala wawele hambe woche hali divai, wala walingikalisa hafungo kujeza divai ihazanywe na ndugwa.
PRO 23:31 Uleche kuyonela maya divai kwa udung'hu wake, hanga yowa yopulika kuli chizombe, na kidulika mholemhole hounwa.
PRO 23:32 Kuli kuduma yangulumaga kota izoka, yangulumiza kota izoka liwele na dunga.
PRO 23:33 Meho ga hegwe govyona vinduzanduza, nhumbula ya hegwe yokuhada.
PRO 23:34 Kowa kota munhu yalingujeza kuwasa kuli meli mhela wa nhigu.
PRO 23:35 Kolonga, “Nawanhowa, ila silumile, nawanhowa, ila nasivizelele. Ndokwinuka nili? Ubeteze tandi mhale chakunwa chinji.”
PRO 24:1 Uleche kuwonela fihi wehile, na kugana kuwa hamwe na hewo,
PRO 24:2 kwa vila majesa ga hewo geng'ha ndo kuwala kilewa, haduhu linojile lyoneche lilingulawa kuli milomo ja hewo.
PRO 24:3 Ng'handa yanguzenjigwa kwa luhala, na kwimizwa nzinzili kwa kuvizela.
PRO 24:4 Kwa uwanzi vihengo vyake vyangumemezwa, vinhu vya sendi nyinji na vya kunojeza.
PRO 24:5 Munhu yawele na luhala kana ludali ng'hatu, naye yawele na uwanzi kangonjeza mong'ho.
PRO 24:6 Kwa ulongozi unojile koweza kitowa ngondo, na kusumya kwa winji wa wanhu walingukulonjela ganojile.
PRO 24:7 Luhala lwa kuchanya ng'hatu kwa mpoka, kuli nhing'hano kahela cha kulonga.
PRO 24:8 Yalingijesa kudita wihe, kochemigwa mjuvi.
PRO 24:9 Kiwika goya kudita chinhu kwa mpoka ndo gehile, yalingubeza ndo izudizo kwa chila munhu.
PRO 24:10 Wone uwe ng'hochele mhela wa magazo, lelo hegwe ndo kwahela mong'ho lukami.
PRO 24:11 Mlohole munhu yalinguholigwa kuluta kubagama hihi hela, uleche kulemwela kumlohola yalingukopoligwa ne nongwa.
PRO 24:12 Hamba uleche kulonga, “Hatuvizelele.” Kwa vila Nguluwi yalingupima nhumbula za wanhu kangulola, heye yalinguwamila ukomu wa hemwe kanguvizela, komha chila munhu kwa kiwhana na madito ga heye.
PRO 24:13 Mwana wa heni, ulye hanombwa kwa vila ndo inoga, ilala lya hanombwa ndo linona kumlomo.
PRO 24:14 Ndo vyoluwele luhala kuli nhumbula ya hegwe, wone ulupate mbuli za hegwe zolutilila goya, na kitumbila kwa hegwe hakukusigwa hihi hela.
PRO 24:15 Uleche kubeteza kwa uviso kota mwihe kuhatowa haluga ha munhu yatanganiche, uleche kujeza kuwifya ng'handa ya heye,
PRO 24:16 kwa vila munhu yatanganiche kangugwa mala nyinji na kwinuka, ila mwihe hoyochikwang'hwala howeza kwinuka.
PRO 24:17 Uleche kutowa luchenze kwa chiwalo cha kugwa kwa mng'honyo wa hegwe, ne kusangalala mnhumbula mwa hegwe kwa kikwang'hwala kwa heye,
PRO 24:18 kwa vila Mkulu Nguluwi yalingugona ago honojezwa, hanji koleka kumgaza.
PRO 24:19 Uleche kuzudila kwa chiwalo cha wehile, ne kuwonela maya,
PRO 24:20 kwa vila mwihe howa na ganojile hamba, chenje cha ukomu wa heye chozimigwa.
PRO 24:21 Mwana wa heni, umdumbe Mkulu Nguluwi na kumhulichiza mndewa, uleche kilumba na walingubelenhuka,
PRO 24:22 kwa vila kudumigwa kwa hewo kwanguwafikaga baho du. Haduhu yalinguvizela kutunya kowokwambuza.
PRO 24:23 Azo kahi ndo nhelo za wanhu wawele na luhala. Kuganilila wanhu kuli utaguso hakuwele kunojile.
PRO 24:24 Yoneche yalingumlonjela yawele na nongwa, “Kwahela nongwa,” kangupanjilwaga na wanhu na kuzudilwa na wanhu wa isi zinji.
PRO 24:25 Ila walinguwagaza wehile wowa na usangalalo, na utambichizo wokuya kwa hewo.
PRO 24:26 Kwidichila kwa hachi, ndo kota kumkumbatila goloko.
PRO 24:27 Ukole mijito ja hegwe kunze tandi, uwiche goya chila chinhu kumgunda, hamba uzenje ng'handa ya hegwe.
PRO 24:28 Uleche kulavya ulolezi kwa munhu youlingikalasa habehi ne chiwalo, ne kulonga udesi kwa heye.
PRO 24:29 Uleche kulonga, “Ndomdita kota vyoyanditile. Yangundapa nyhilule chibida.”
PRO 24:30 Nang'hola habehi ha mgunda wa mgata, mgunda wa mizabibu wa mpoka.
PRO 24:31 Ulole, miwa najali jotile kuli chila honhu, misolo najigubika honhu hake heng'ha, na lukanzi lwake lwa maganga lubomoka.
PRO 24:32 Nandola na kijesa, hamba nandilangusa.
PRO 24:33 Uwase hado hela, usinzile hado. Uswinize moko ga hegwe wesele hado.
PRO 24:34 Mhela awo uzunwa wokuvaba kota yalinguboka, kupunguchilwa kokuwinza kota muhizi.
PRO 25:1 Azi nazo ndo nhelo zinji za mndewa Solomoni, zandichigwe na wanhu wa Hesekiya, mndewa wa Yuda.
PRO 25:2 Nguluwi kangutogoligwa kwa kuvisa mbuli, ila mndewa kangutogoligwa kwa kupugajiza mbuli.
PRO 25:3 Kota ulanga vyouwele kuchanya na misanga vyojiwele hasi, ndo vyoziwele nhumbula za wandewa, hazilingupugajizika.
PRO 25:4 Wuse wavu kuli sendi, na mponzi kokugongomanyila chinhu chinojile.
PRO 25:5 Uwose wehile hali mndewa, na undewa wa heye wowa nzinzili hali hachi.
PRO 25:6 Uleche kiwika habehi na mndewa, uleche kidita kota kwa mkulu,
PRO 25:7 kwa vila fola kulonjelwa, “Uye kuno kumwando,” kusinda kuduliswa hali mkulu. Mbuli zouziwene kwa meho ga hegwe,
PRO 25:8 uleche kudita himahima kuzigala kuli chitala, kwa vila kodita choni aho hamba, wone mlolezi yunji kogalema ago goulingulonga?
PRO 25:9 Ulewele kilewa na myago yaliyeka, na chila yumwe wa hemwe yaleche kulavya uviso wa myage,
PRO 25:10 leka wanhu waleche kuvizela kota hana uviso, na kuliwifya itagwa lya hegwe mazuwa gose.
PRO 25:11 Ulonzi ulingulonjigwa mhela unojile, ndo kota chinoligo cha zahabu chilingubatililwa na sendi.
PRO 25:12 Makanyo ga yawele na luhala kwa munhu yalinguhulichiza, ndo ganoga kusinda pete ya zahabu ama vinoligo vya zahabu inojile.
PRO 25:13 Msenga yalingukundigwa kangumsangalaza mkulu wa heye, kota mazi gazizime mhela wa ivuche.
PRO 25:14 Kota vila ng'hungugu na mbeho ne nhonya, ndo vyoyawele munhu yalingitutumula kulavya ndolendole, kuno yolemwela.
PRO 25:15 Kwa kwimilila mndewa koweza kugalula majesa ga heye, umyango udeche wangubenaga mizeje.
PRO 25:16 Houpata hanombwa ulye chasi cha kuhega, ileche kukwambuza kudeka.
PRO 25:17 Uleche kumjendela chila mhela munhu youlingikalasa habehi, uleche kumtunya mbaka yakuzudile.
PRO 25:18 Munhu yalingulavya ulolezi wa udesi kumuwala myage, ndo keha kota nyimbati na ipanga ama msale unoleche lukami.
PRO 25:19 Kitumbila kuli munhu yohambe yakundigwe mhela wa magazo, ndo kota izino lihile ama mgulu uvyuduche.
PRO 25:20 Kumwimbila munhu yawele na masinzo, ndo kota kuvula nguwo mhela wa chipute, ama kujela mwino kuli chilonda.
PRO 25:21 Wone mng'honyo wa hegwe kana nzala, umhe chilyo, wone yawe na ng'halu, umhe mazi yanwe.
PRO 25:22 Kwa vila kwa kudita ahyo komdita yone usungu mnhumbula kota makala ga chiluli mchanya muli mutwi wa heye, naye Mkulu Nguluwi kokupa chonolo.
PRO 25:23 Mbeho ya kasikazini yangigalaga nhonya, na kuhehigwa kwangigalaga kuzudila.
PRO 25:24 Fola kikala hafungo mchanya mwa chinduwiko, kusinda kikala kaye hamwe na mche yalingugana kilewa.
PRO 25:25 Kota vila mazi gazizime kwa yawele na ng'halu, ndo vyoziwele mbuli zinojile kulawa isi ya kutali.
PRO 25:26 Yatanganiche yalingukunda kuwinza mbuli za mwihe, ndo nzasa iwifigwe ama ideho litiguligwe.
PRO 25:27 Hainojile kulya hanombwa nyinji ng'hatu, na kahi hailingutogoligwa kiwikawika kumwando lukami.
PRO 25:28 Munhu yawele hambe yaweze kuilemeza ng'halazi ya heye, ndo kota muji ulihela wamizi houtowigwa.
PRO 26:1 Hailingukundigwa kumtogola mpoka, kudita ahyo ndo kota seluji kuli mhela wa chipalangule, ama nhonya kuli mhela wa mbena.
PRO 26:2 Kota chideje chimwenga ama mbayuwayu wohambe waduliche, na kahi upanjilo ulihela chiwalo, haumfika.
PRO 26:3 Ng'hobwa za ngozi kwa falasi na chihande cha chuma kwa kulilongoza idogowi, na ng'hobwa kwa mgongo wa mpoka.
PRO 26:4 Uleche kumwidichila mpoka kwa upoka, leka uleche kiwhana na heye.
PRO 26:5 Umwidichile mpoka kota vyoulinguganigwa upoka wa heye, yaleche kiwona kota ka yawele na luhala lukami.
PRO 26:6 Kumlajiza mpoka kuhilika usenga, ndo kota kitema na kusa magulu ama kipalila magazo.
PRO 26:7 Nhelo kumlomo mwa mpoka, ndo kota magulu ga chete galinguninila.
PRO 26:8 Kumha lutogo mpoka, ndo kota kuwoha iganga kuli mhembeyo.
PRO 26:9 Mpoka yalingujeza kutumiya nhelo, ndo kota yagalile yalingujeza kusa liwa mmoko.
PRO 26:10 Munhu yalingumhola mpoka ama yoneche yalingukola leka yamkolele mijito, ndo kota yalingutowa msale yalingumlumiza chila munhu.
PRO 26:11 Mpoka yalinguuhiluchila upoka wa heye chila mhela, ndo kota libwa lilingulya cholidechile.
PRO 26:12 Kwangumona munhu yalingidaya kota kana luhala? Ndangukulonjela, fola mpoka kusinda ayo.
PRO 26:13 Mgata kangulongaga, “Hana isimba mnzila! Hana isimba kuli nzila ng'hulu!”
PRO 26:14 Kota vila lwizi lulinguzunguluta kuli vibatililo vyake, ndo hihyo kwa mgata mchanya mwa chinhanda cha heye.
PRO 26:15 Mgata kanguwikaga moko wa heye kuli luhelo lwa chilyo, ila kangutokaga lukami mbaka kangulemwela kwinula moko wa heye kuhilika kumlomo.
PRO 26:16 Mgata kangiwonaga kota kana nyhala, kusinda wanhu saba walinguweza kwidichila kwa luhala.
PRO 26:17 Yalingiyinjiza kuli kilewa hakuwele kwa heye, ndo kota munhu yalingugabata makutu ga libwa lilingukola.
PRO 26:18 Kota yawele na luweje yalingudawalila vyenje, ama misale ja kubagama,
PRO 26:19 ndo hihyo vyoyawele munhu yalingumhada yowalingikalasa habehi, hamba yalonje, “Nandali ndilonga hela.”
PRO 26:20 Ne ngodi, chiluli changuzimaga, ne yalinguheha, kilewa kwangumalaga.
PRO 26:21 Kota vila makala ama ngodi vyanguchidita chiluli kwaka, ndo yalingugana kilewa vyoyalingonjezaga kilewa.
PRO 26:22 Ulonzi wa munhu yalinguheha ndo kota chilyo chinojile, chiwele changudulikaga du mbaka mmunda.
PRO 26:23 Kota lanji ilingupulika iwele naibakalizwa kuli chisaye, ndo vyouwele ulonzi unojile uwele na kunuwila kwihile.
PRO 26:24 Yalinguwazudila wanji kangivisaga kwa ulonzi wa mlomo wa heye, ila mnhumbula mwa heye kanguwaga na uhadi.
PRO 26:25 Hanga ulonzi wa heye wowa unojile, uleche kumkunda, kwa vila mnhumbula mwa heye nakumema izudizo.
PRO 26:26 Hanji kouvisa wihe wa heye, ila kunuwila kwa heye kwihile kozeleka kwa wanhu weng'ha.
PRO 26:27 Yalingumbawila myage ikulubila, kangwinjilaga yuye, yalingulikundujiza iganga kwa myage, lyomhiluchila yuye.
PRO 26:28 Yalingulonga udesi kanguwazudilaga awo walingulumizwa na heye, naye yalingutogola kwa udesi kangigalaga kuwifya.
PRO 27:1 Uleche kitogola kwa chiwalo cha mitondo, kwa vila huvizelele choni cholawila kuli zuwa limwe.
PRO 27:2 Uleche wanhu wanji wakutogole, haiwele kwa mlomo wa hegwe, munhu yunji yadite ahyo, haiwele gwegwe.
PRO 27:3 Iganga na sangalaza ndo itunyo, ila kutunyigwa na mpoka ndo itunyo ng'hatu.
PRO 27:4 Ng'halazi ndo kuwa na nhumbula yihile na kuzudila kung'hang'hale ndo kudumya, ila whaani yoweza kitwanza na fihi?
PRO 27:5 Fola munhu yalingukukanya hazelu, kusinda yula yalinguvisa igano.
PRO 27:6 Kung'hanuchila kwa goloko wa hegwe wa habehi kwangulajila kukundigwa, ila kulamswa na mng'honyo ndo uhadi.
PRO 27:7 Yegute mbaka hanombwa kanguilema, ila kwa yawele na nzala chila chiwele cha usungu ndo chinona.
PRO 27:8 Munhu yajilile ndo kota chideje, chajilile kutali na chimvulila chake.
PRO 27:9 Mafuta na unhunyhililo kwa chiwalo cha lukuli vyanguisangalaza nhumbula, na kunoga kwa goloko, kwangulawa kuli ulonzi wa utanzi wa heye wa kukundigwa.
PRO 27:10 Uleche kumsemwa goloko wa hegwe ne wa mhaza wa hegwe. Wone uwe na magazo uleche kubilimila kwa mng'holozo, fola munhu youlingikalasa habehi kusinda mwenyelukolo yawele kutali.
PRO 27:11 Mwana wa heni, uwe na luhala leka uisangalaze nhumbula ya heni, nani ndowa na lya kumwidichila yoneche yalingulonga vibi kuwala heni.
PRO 27:12 Yawele na luhala kanguzonaga mbuli zihile na kivisa, ila mpoka kangiwikaga kumwando na kulumizwa.
PRO 27:13 Wone munhu yelahe hali hegwe kota komuwichila lehani mjenzi, uhole ivalo lya heye, leka yalipe sendi kwa vila nakamuwichila lehani ayo mjenzi.
PRO 27:14 Yoneche yalingumtambichiza munhu yowalingikalasa habehi kwa iyowe lufuku, yozeleka kota kangumganila upanjilo.
PRO 27:15 Mdala yalingugana kilewa, ndo kota midovu ja mazi zuwa lya nhonya johambe jimale,
PRO 27:16 kumlemeza ndo kota kulemeza mbeho, ama kibata mafuta ga mzeituni kwa moko.
PRO 27:17 Kota vila chuma vyochilingunola chuma, ndo hihyo du munhu vyoyalingulanguswa na myage.
PRO 27:18 Yalinguulolela mtini kangulyaga tini, yalingumlolela mkulu wa heye kohulichizwa.
PRO 27:19 Kota kumeho vyokulingiwona kuli mazi, ndo munhu vyoyalingizela yuye mnhumbula.
PRO 27:20 Kuli Kubagama na kuli Kuwifya, hambe vigute, na meho ga wanhu hambe gegute.
PRO 27:21 Zahabu ama sendi zangwelizwa kwa chiluli kuli itanulu, na munhu kangupimigwa kwa lutogo lwa heye.
PRO 27:22 Umtwanje mpoka kuli ituli hamwe na ngano, ila huweza kumbagula na upoka wa heye.
PRO 27:23 Ujilolele goya ming'holo ja hegwe vyojiwele, ujilolele goya misenga ja hegwe,
PRO 27:24 kwa vila lufufu haluweza kikala mazuwa gose, ne itaji hambe likale lulelo lweng'ha.
PRO 27:25 Mhela misolo jikalile najusigwa, na misolo minyale najizuka, najo misolo kulawa kuli chidunda najikungajizwa,
PRO 27:26 ming'holo jokupa sufu kwa chiwalo cha mivalo, mhene nazo koziguza na kugula migunda,
PRO 27:27 jokupa matombo ga kuhega hegwe na ivyazi lyako, na kwa chiwalo cha vitumagwa wa hegwe wadala.
PRO 28:1 Wehile wangubilimaga hanga hambe wawinjigwe na munhu, ila watanganiche wangiwhana na isimba, kwa vila hambe wadumbe.
PRO 28:2 Mhela isi hoiwa kuli kubelenhuka, yanguwa na vilongozi wenji, ila yawele na kuvizela na uwanzi, kangibatililaga kikala goya kuli isi.
PRO 28:3 Mzunwa yalinguwabunza wazunwa ng'hatu, kangiwhana na nhonya ng'hulu ilinguwifya mizuchila.
PRO 28:4 Wanhu walingubena malajizo wanguwatogolaga wehile, ila walingibatilila malajizo wangitwanza na hewo.
PRO 28:5 Wehile hawavizelele mana ya hachi, ila walingumdumba Mkulu Nguluwi wanguizela ng'hatu.
PRO 28:6 Fola mzunwa yalingikala kwa kugoloka, kusinda yawele na lufufu yalingikala kwa kwajilila.
PRO 28:7 Mwana yalingibatilila malajizo ndo yawele na luhala, ila goloko wa wabuhu kangumbasaga soni mhaza wa heye.
PRO 28:8 Yalingonjeza lufufu lwa heye kwa kugana liba ng'hulu, hoyobagama loluta kwa yunji yalinguwonela isungu wazunwa.
PRO 28:9 Yalingulema kugahulichiza malajizo, mbaka kulanda kwa heye ndo izudizo kwa Nguluwi.
PRO 28:10 Yalingumhada munhu yanojile kudita gehile, kogwa kuli idiwa lya heye yuye, ila walihela nongwa wohalila ganojile.
PRO 28:11 Yawele na lufufu kangiwonaga kota ka yawele na luhala, ila mzunwa yawele na luhala, kangukuzela kukomya kuwala ayo.
PRO 28:12 Wone wanhu wanojile wapate ulongozi, wanhu wangusangalala, ila wone wehile walongoze, wanhu wangivisaga.
PRO 28:13 Yalinguvisa nongwa za heye, mbuli za heye haziweza kuluta goya, ila yalingulonga gehile ga heye na kugaleka, kolechelwa.
PRO 28:14 Kotambichizwa munhu yalingumdumba Mkulu Nguluwi mazuwa gose, ila yawele na nhumbula igagadale, kogwila kuli magazo.
PRO 28:15 Chilongozi mwihe yalinguwalongoza wazunwa, ndo kota isimba lilingubuma ama idubu lilinguvaba.
PRO 28:16 Chilongozi yalihela nyhala ndo yehile na kahela isungu, ila yalinguzudila lufufu lwa uhadi kolongoza mhela winji.
PRO 28:17 Munhu yalingutunyigwa na nongwa ya kukopola munhu, kowa munhu wa kubilima mbaka kuli chilaga, munhu yoneche yaleche kumtanza.
PRO 28:18 Yalingikala kwa kutanganika koloholigwa na mbuli zihile, ila yajilile kogwa baho du.
PRO 28:19 Yalingulima mgunda wa heye kowa na chilyo chinji, ila yalinguwinza mbuli za kulota kowa mzunwa ng'hatu.
PRO 28:20 Munhu yalingukundigwa kowa na utambichizo winji, ila yalingudita himahima kuwa na lufufu howeza kiwika kutali na magazo.
PRO 28:21 Hainojile kulajila uganililo, wanhu wanguditaga gehile mbaka kwa chihande cha ibumunda.
PRO 28:22 Mbuhu kangubilimilaga lufufu, ne kuvizela kota uzunwa womuyila.
PRO 28:23 Yalingumkanya myage hamba kanguwaga na ganojile ng'hatu, kusinda yula yalingumhembuliza kwa ulonzi unonile.
PRO 28:24 Yalinguhiza lufufu lwa mhaza wa heye ama mayake, yolonga kota haiwele nongwa, ayo nakewhana hela na wahizi wanji.
PRO 28:25 Mbuhu kangwambuzaga kilewa, ila yalingitumbila kwa Mkulu Nguluwi, mbuli za heye zolutilila goya.
PRO 28:26 Yalingitumbila nyhala za heye yuye ka mpoka, ila yalingikala kwa luhala, kowa na kikala goya.
PRO 28:27 Yawele na isungu kwa wazunwa, hopunguchilwa chinhu choneche, ila yalingulema kuwalolela, kopanjilwa ng'hatu.
PRO 28:28 Wone wehile walongoze, wanhu wangivisaga, ila wone wadumigwe, watanganiche wangonjezekaga.
PRO 29:1 Wone yalingukanyigwa chila mhela, ila kangulutilila kuwa na nhumbula igagadale, kodumigwa baho du, howeza kupona.
PRO 29:2 Wone watanganiche walongoze, wanhu wangusangalalaga, ila wone wehile walongoze, wanhu wangung'ung'utaga.
PRO 29:3 Yalingugana luhala kangumdita mhaza wa heye yasangalale, ila yalinguwa hamwe na mng'hondwa kanguwifyaga lufufu lwa heye.
PRO 29:4 Wone mndewa yatumiye hachi, kanguipaga isi kwima nzinzili, ila wone yagane kubochela chinhu kwa uviso, isi yangudumigwa.
PRO 29:5 Yalingumhembuliza munhu yowalingikalasa habehi kwa udesi, kanguwika idiwa lya kigwiliza yuye.
PRO 29:6 Mwihe kangugwilizwaga kwa gehile ga heye, ila yatanganiche kangwimbaga na kusangalala.
PRO 29:7 Yatanganiche kanguzizela hachi za mzunwa, ila mwihe hazizelele mbuli azo.
PRO 29:8 Yalingubeza kangwambuzaga kilewa kuli muji weng'ha, ila yawele na luhala kangukuditaga kilewa kusindamale.
PRO 29:9 Wone yawele na luhala yetwanze na mpoka, mpoka kanguwaga na ng'halazi ng'hatu na kuseka ne kinyamalila.
PRO 29:10 Walingugana kubohola danda, wangumzudilaga yalihela nongwa, mbaka wanhu wanojile wanguzudilaga kikala kwa heye.
PRO 29:11 Mpoka kangulajilaga ng'halazi ya heye ne uviso, ila yawele na luhala kangilemezaga na kuidita isindamale.
PRO 29:12 Wone mndewa yahulichize mbuli za udesi, wang'hangala wa heye weng'ha wowa na wihe.
PRO 29:13 Mzunwa na yalingubunza wangiwhana kwa chinhu chimwe, weng'ha weli nawapegwa meho na Mkulu Nguluwi.
PRO 29:14 Mndewa yalinguwamulila wazunwa kwa hachi, kowona ulongozi wa heye wangwima nzinzili mazuwa gose.
PRO 29:15 Kuzapigwa na kukanyigwa, vyangigalaga luhala, ila wone mwana kolechigwa yadite vyoyogana, kombasa soni mayake.
PRO 29:16 Wone wehile walongoze, gehile gangonjezekaga, ila watanganiche wolola kugwa kwa hewo.
PRO 29:17 Umkanye mwanago, naye hokudita uwe na lunhwinhwi, koisangalaza nhumbula ya hegwe.
PRO 29:18 Wone hawe haduhu ulotezi wa chiuloli, wanhu wanguwaga walihela kuhulichiza, ila nakatambichizwa munhu yula yalingubatilila malajizo.
PRO 29:19 Mpogozi hambe yakanyigwe kwa ulonzi hela, kwa vila ulonzi kanguuzela heye, hogana kuuhulichiza.
PRO 29:20 Kwangumona munhu yalingulonga ne kijesa? Fola mpoka kusinda heye.
PRO 29:21 Yalingumhembuliza ng'hatu mpogozi wa heye kulawa uwana, hamba mpogozi ayo komtunya kuli kuduma.
PRO 29:22 Yazudile kangwambuzaga kilewa, yalinguzudila himahima kangwambuzaga gehile menji.
PRO 29:23 Kidaya kwa munhu kwangumdulisaga yuye, ila yalingunyenyetela kopegwa lutogo.
PRO 29:24 Yalinguwa hamwe na mhizi kangiwifya yuye, kanguuhulikaga uhadi wa yula mhizi, ne kulonga chinhu.
PRO 29:25 Kuwadumba wanhu ndo kiwichila idiwa gwegwe, ila yalingitumbila kwa Mkulu Nguluwi ka hali kikala goya.
PRO 29:26 Wenji wanguganaga kiwika habehi na mndewa, ila munhu kangupegwa hachi ya heye kulawa kwa Mkulu Nguluwi.
PRO 29:27 Yalihela hachi ndo izudizo kwa yagoloche, naye yagoloche ndo izudizo kwa mwihe.
PRO 30:1 Ulonzi wa Aguli, mwana wa Yake, ulonzi uwele munhu ayu nakamlonjela Itieli, ena, Itieli na Ukali.
PRO 30:2 Heni nda mpoka lukami kusinda wanhu weng'ha, ndahela nyhala ya chiwunhu.
PRO 30:3 Hambe ndilanguse luhala, sivizelele chinhu choneche chilingumuwala Nguluwi Yelile.
PRO 30:4 Whaani yakwinile kuchanya kilanga hamba nakadulika? Whaani yebatile mbeho mmoko? Whaani yawohile mazi kuli chibende? Whaani yajiwichile mbaka jeng'ha ja isi? Kanguchemigwa whaani? Ndo lyachi itagwa lya mwanage? Ndonjele wone kwanguvizela.
PRO 30:5 Ulonzi weng'ha wa Nguluwi ndo wenela, heye ndo ngawo ya hewo weng'ha walingumbilimila.
PRO 30:6 Uleche konjeza ulonzi kuli ulonzi wa heye, leka yaleche kukung'hanuchila, nagwe kokoneka kwa mdesi.
PRO 30:7 Gwa Nguluwi, ndangukulanda mbuli azi mbili, uleche kundemela nding'hali bagama.
PRO 30:8 Umbusile udesi na uhadi, uleche kumha heni uzunwa ne lufufu, umhe heni chilyo cha chila zuwa,
PRO 30:9 wone ndahagutile, ndahakubelile na kulonga, “Mkulu Nguluwi ndo whaani?” Ama ndahawele mzunwa, hamba ndahahizile, na kukubeza, gwa Nguluwi wa heni.
PRO 30:10 Uleche kumlonjeleza mpogozi kwa mkulu wa heye, leka yaleche kukupanjila, woneche kuna nongwa.
PRO 30:11 Hana wanhu wawele wanguwapanjilaga wahaza wa hewo, na kuleka kuwatambichiza wamamo wa hewo.
PRO 30:12 Hana wanhu wawele wangiwonaga kota wanoga, kuno wang'hali kwelizwa wavu wa hewo.
PRO 30:13 Wabaho wanji walingidaya ng'hatu, wangubezaga chila chinhu chowalinguchona.
PRO 30:14 Hana wanhu wawele ulonzi wa hewo ndo kota ipanga, na mizino ja hewo ndo kota vimaje. Nawewika goya kuwadakula wazunwa wa isi, na walihela chinhu wawele hali wanhu.
PRO 30:15 Iluba lina wahinza weli walingulonga, “Umhe heni, umhe heni.” Hana vinhu vidatu viwele hambe vigute, ena, chinhu cha kane chohambe chilonje, “Ihega.”
PRO 30:16 Kuli isi ya wabagame, munda wa mdala wohambe uponde, misanga johambe jigute mazi, na chiluli chohambe chilonje, “Ihega.”
PRO 30:17 Wone munhu yambeze mhaza wa heye, na kubeza kuhulichiza kwa mayake, mibondwa ja kibindi jodobola meho ga mtufi wa heye, na kuligwa na ikungule.
PRO 30:18 Hana mbuli zidatu za kububuwaza kwa heni, ena, mbuli ya kane yohambe ndiizelele.
PRO 30:19 Nzila ya ikungule kuli ulanga, nzila ya izoka kuli italawe, nzila ya meli kuli bahali, na chilingumkwega mlume kwa mdala.
PRO 30:20 Madito ga mdala mng'hondwa ndo aga. Kangulyaga na kibagusa mlomo, na kulonga, “Siditile nongwa yoneche.”
PRO 30:21 Hana mbuli zidatu ziwele zilinguidita isi ikakame, ena, mbuli ya kane iwele isi haiweza kwimilila.
PRO 30:22 Mpogozi yalinguwa mndewa, mpoka yalingiguta chilyo,
PRO 30:23 mdala yohambe yaganigwe, hoyohesigwa, na mpogozi mdala yalinguhola honhu ha mdala wa mkulu wa heye.
PRO 30:24 Hana vilumbigwe vine vidodo ng'hatu muisi, ila vina nyhala ng'hatu.
PRO 30:25 Misisina ndo minhu jilihela mong'ho, ila jangiwichila chilyo mhela wa chipalangule,
PRO 30:26 mhimbi, migongolo jilihela ludali, ila jangigongomanyila honhu ha kikala hali mitalawe,
PRO 30:27 nzije zahela mndewa, ila zeng'ha zangulutaga hamwe kwa vilundo,
PRO 30:28 limdusu, koweza kulibata mmoko, ila lyangwinjilaga kuli ng'handa ya mndewa.
PRO 30:29 Hana vilumbigwe vidatu vilingujenda kwa kunojeza, ena, cha kane chilingujenda kwa kunojeza.
PRO 30:30 Isimba ndo igongolo liwele na mong'ho kusinda jeng'ha, halilingudumba igongolo lyoneche,
PRO 30:31 izogolo lilinguluta kwa kidaya, na kahi ipongo, na mndewa yalihela wang'honyo.
PRO 30:32 Wone nakudita upoka na kitogola gwegwe, ama wone nawali uchijesa kudita gehile, wamile mlomo wa hegwe.
PRO 30:33 Kwa vila wone utijetije matombo, kopata siagi, wone umtowe munhu kuli mhenyelo, kolawa danda, na kahi konjeza ng'halazi, kwangigalaga kilewa.
PRO 31:1 Ulonzi wa mndewa Lemweli. Ulonzi woyalangusigwe na mayake.
PRO 31:2 Ndikulonjele choni mwana wa heni? Ndikulonjele choni mwana wa heni hegwe yondikupondile? Ndikulonjele choni hegwe yondikulandile kwa Nguluwi?
PRO 31:3 Uleche kitunya kwa chiwalo cha wadala, uleche kuwapa lufufu lwa hegwe awo walinguwadumya wandewa.
PRO 31:4 Hailingutanza chinhu, gwa Lemweli, haiwele goya wandewa kunwa divai, ne wakulu konela maya ujimbi.
PRO 31:5 Wone wanwe wosemwa malajizo, na kwajiliza hachi za wazunwa.
PRO 31:6 Umhe ujimbi munhu yawele habehi kubagama, uwape divai wala wawele na masinzo ng'hatu,
PRO 31:7 wanwe na kusemwa uzunwa wa hewo, leka waleche kukumbuchila kahi magazo ga hewo.
PRO 31:8 Ila hegwe, yangukulapa ulonje, kwa chiwalo cha weng'ha wohambe waweze kulonga, na kulewela hachi za weng'ha walihela ludali.
PRO 31:9 Ulonje kwa chiwalo cha hewo na kwamula kwa hachi, wamile hachi za wazunwa na walihela chinhu.
PRO 31:10 Mdala yawele na nhumbula inojile kangoneka kohi? Ayo ndo yanojile ng'hatu kusinda johali.
PRO 31:11 Mlume wa heye kangumkundaga ng'hatu, kwa heye kopata chinhu cha mzidi ng'hatu.
PRO 31:12 Halingumditila mbuli zihile mlume wa heye, ila kangumditilaga ganojile kuli kikala kwa heye kweng'ha.
PRO 31:13 Kangupalaga sufu na kitani, na kukola mijito kwa moko gake kwa kikangaza.
PRO 31:14 Heye ndo kota meli za kugula na kuguza, kangigalaga chilyo cha heye kulawa kutali.
PRO 31:15 Kangwinukaga lufuku, kanguliwichilaga goya ivyazi lya heye chilyo, na kuwagawila mijito vitumagwa wa heye wadala.
PRO 31:16 Kangijesaga kugula mgunda, hamba kanguugulaga, kwa kiwhana na choyalingupata kangunyalaga mizabibu kuli mgunda awo.
PRO 31:17 Kanguwaga goya kukola mijito kwa mong'ho, na moko ga heye gana mong'ho kuli mijito ja heye.
PRO 31:18 Kanguvizela kota mijito ja heye jina chinhu cha mzidi, kangukolaga mijito mbaka nechilo kwa lumuli lwa chenje cha heye.
PRO 31:19 Kangubotaga uzi kwa moko ga heye yuye, kwa vidole vya heye kangutawaga nguwo za heye.
PRO 31:20 Kangugololaga moko wa heye kuwapa wazunwa, na kuwatanza walihela chinhu.
PRO 31:21 Kahela lunhwinhwi kuwala wanhu wa heye hokuwa na chipute, kwa vila chila yumwe kanazo nguwo za kuhega.
PRO 31:22 Kangigongomanyilaga micheka, mivalo ja heye ndo ja kitani inojile ja lanji ya zambalau.
PRO 31:23 Mlume wa heye ka munhu yalingutogoligwa kuli lwizi lwa muji, hoyochikalisa hali wasekulu wa isi.
PRO 31:24 Mdala ayo kanguwaga yogongomanya nguwo na kuguza, kanguwaguzilaga misali walingugula na kuguza.
PRO 31:25 Mong'ho na kuhulichiza ndo lutogo lwa heye, kangusekaga hoyochijesa kuwala mhela ulinguya.
PRO 31:26 Kangulongaga kwa luhala, na malanguso ga igano lya kwimilila kwa umyango wa heye.
PRO 31:27 Kangupugajizaga geng'ha galingukoleka kaye kwa heye, halingikalisa hihi hela ne hado.
PRO 31:28 Wana wa heye wangulilimkaga na kulonga malumbo kwa heye, mlume wa heye kangwimbaga lutogo lwa heye.
PRO 31:29 Kangulongaga, “Wadala wenji nawadita mbuli zinojile, ila hegwe nakuwasumya weng'ha.”
PRO 31:30 Ulonzi ulingunojeza wangudetaga na kunoga kwa kumeho kwangukolaga himahima, ila mdala yalingumdumba Mkulu Nguluwi kotogoligwa.
PRO 31:31 Chituguti cha heye changuganigwa kulipigwa, mijito ja heye janguganigwa kutogoligwa honeche.
HOS 1:1 Ulonzi wa Mkulu Nguluwi woumuyile Hoseya mwana wa Beeli, mihela ja ulongozi wa Usiya na Yotamu na Ahasi na Hesekiya wawele ndo wandewa wa Yuda na mhela wa ulongozi wa Yeloboamu mwana wa Yoashi, mndewa wa Isilaeli.
HOS 1:2 Mkulu Nguluwi loyaluche kulongasa na Waisilaeli kwa kukolela Hoseya, nakamlonjela hino, “Ulute ukamhese mdala mng'hondwa leka uponde naye wana wa ung'hondwa, kwa vila wanhu wa isi yino wangudita ung'hondwa winji kwa kundeka heni.”
HOS 1:3 Hoseya nakaluta, nakamhesa Gomeli, mhinza wa Dibulaimu. Gomeli nakawa na himila, nakampondela Hoseya mwana msongolo.
HOS 1:4 Mkulu Nguluwi nakamlonjela Hoseya, “Mwana ayo mcheme ‘Yesileeli,’ kwa vila naupona mhela uchefu hela, ndoligaza ivyazi lya Yehu kwa chiwalo cha kukopola koyaditile ako Yesileeli. Nani ndowusa undewa wa Isilaeli.
HOS 1:5 Zuwa alyo ndopungula mong'ho wa Isilaeli ako kuli ibindi lya Yesileeli.”
HOS 1:6 Gomeli nakawa na himila kahi, nakaponda mwana mhinza. Mkulu Nguluwi nakamlonjela Hoseya, “Mwana ayo mcheme ‘Lo-luhama,’ kwa vila silajila kahi igano kuli ng'handa ya Isilaeli leka ndeche kuwalechela.
HOS 1:7 Ila ndolajila igano kuli ng'handa ya Yuda, nani ndowalohola ne upinde ne ipanga ama ngondo ne kwa falasi ne kwa wakwina falasi, ila heni, Mkulu Nguluwi, Nguluwi wa hewo ndowalohola.”
HOS 1:8 Gomeli loyamlecheze kong'ha Lo-luhama, nakawa na himila na kumpondela Hoseya mwana yunji msongolo.
HOS 1:9 Mkulu Nguluwi nakamlonjela Hoseya, “Mwana ayo mcheme ‘Lo-ami,’ kwa vila hemwe hamuwele wanhu wa heni ne nani siwa Nguluwi wa hemwe.”
HOS 1:10 Ila Waisilaeli wowa wenji kota sangalaza hafungo ha bahali, ziwele haziweza kupimigwa ne kuwazigwa. Hanga Nguluwi nakawalonjela, “Hemwe hamuwele wanhu wa heni,” lelo kowalonjela, “Hemwe ndo wana wa Nguluwi yawele mkomu.”
HOS 1:11 Wanhu wa Yuda na wanhu wa Isilaeli wochilumba hamwe kahi na kumhagula chilongozi wa hewo yumwe, mbuli za hewo zolutilila goya kuli isi ya hewo. Zuwa alyo lya Yesileeli lyowa likulu ng'hatu.
HOS 2:1 Muwacheme wakalumbu wa hemwe, “Wanhu wa heni,” kahi muwacheme lumbu wa hemwe, “Waganwa wa heni.”
HOS 2:2 Mumdedeze mamo wa hemwe, mumdedeze, kwa vila heye hawele mche wa heni, nani siwele mlume wa heye. Yalavye isisila lya ung'hondwa kumeho kwa heye na yaleche ng'hatu ung'hondwa.
HOS 2:3 Wone haiwele ayo ndomvula nguwo yawe mwanzi na kumleka ne nguwo kota zuwa lila loyapondigwe. Ndomdita kota chiwala, ndomgalamula yawe isi ya ng'halu nani ndomkopola kwa ng'halu.
HOS 2:4 Silajila igano lya heni kwa wana wa heye, kwa vila ndo wana wa ung'hondwa.
HOS 2:5 Mayawo nakadita ung'hondwa, yoyaholile himila nakadita mbuli za kubasa soni. Gomeli nakalonga, “Ndowalutila wala ndiwaganile heni, wawele wangumhaga heni chilyo cha heni na mazi ga heni, sufu ya heni na kitani ya heni, mafuta ga heni na chakunwa cha heni.”
HOS 2:6 Lelo, ndoidinya nzila ya heye kwa miwa, ndomzenjela lukanzi leka yaleche kuwa na nzila.
HOS 2:7 Gomeli kowawinza wala yawaganile, ila howafika, ena, kowapala, ila howona. Hamba kolonga, “Ndohiluka kwa mlume wa heni wa mwaluko, kwa vila aho mwaluko nandali goya ng'hatu kusinda sambi.”
HOS 2:8 Isilaeli nayali havizelele kota heni ndo ndimpele nyhule na divai na mafuta, ndimpele sendi na zahabu kwa winji, ziwele nakamgalila mlungu Baali.
HOS 2:9 Lelo, mhela wa mbeta ndozihola nyhule za heni, ndoilavya divai ya heni inyale. Ndomsukula nguwo za heni za sufu na kitani, ziwele nazali kwa chiwalo cha kugubika umwanzi wa heye.
HOS 2:10 Lelo ndomvula yawe mwanzi hali wala yawaganile, haduhu munhu yoneche yoweza kumlohola kulawa mmoko mwa heni.
HOS 2:11 Ndokudumya kusangalala na kuseka kwa heye kweng'ha, viwele ndo mnvina za heye za mwaka, na mnvina za kulawa kwa nyelezi, na mazuwa ga heye ga zuwa lya Kwesela, na mnvina za heye zeng'ha ziwichigwe.
HOS 2:12 Ndojiwifya mizabibu ja heye na mitini ja heye, jiwele nakalonga nakapegwa heye kulawa kwa yawaganile, ndojidita jiwe chisosolo, migongolo ja kisolo jojidita jiwe chilyo.
HOS 2:13 Ndomgaza kwa chiwalo cha mazuwa goyawafunyizile ubani Mabaali, loyajinolije kwa pete na kwa maganga ga sendi nyinji na kuwalutila yawaganile heye, ila heni nakasemwa, heni Mkulu Nguluwi ndangulonga.
HOS 2:14 Lelo, ndomdita yanyhulichize ndomlongoza mbaka kuchiwala na kulongasa naye kwa uliholile.
HOS 2:15 Ako ndomhilulila migunda ja heye ja mizabibu, ibindi lya Akoli ndolidita liwe lwizi lwa kitumbila. Kombinza kwa kugana heye kota vyoyawele mhinza, kota mhela vyoyalawile kuli isi ya Misili.
HOS 2:16 Heni Mkulu Nguluwi ndangulonga hino, “Zuwa alyo, hegwe konyhema ‘Mlume wa heni,’ hunyhema kahi ‘Mkulu wa heni.’ ”
HOS 2:17 Kwa vila ndokusa matagwa ga Baali kuli mlomo wa heye, holanda kahi kwa matagwa ga milungu ajo.
HOS 2:18 Ndodita ilagano kwa chiwalo cha hewo, na migongolo ja kisolo na videje na vilumbigwe vilingutambala kuli misanga, vileche kukulumiza. Ndodumya upinde na ipanga na vinhu vya kitowela ngondo hali isi, leka wikale kwa kikala goya.
HOS 2:19 Ndokudita uwe mche wa heni mazuwa gose, ndokuhesa kwa kutanganika na hachi, kwa igano lya kwimilila na isungu.
HOS 2:20 Ena ndokuhesa kwa kukundigwa, nagwe konzela heni Mkulu Nguluwi.
HOS 2:21 “Kuli zuwa alyo, heni Mkulu Nguluwi ndangulonga, ndogakunda maya ga ulanga ga kutowa kwa nhonya, ulanga nawo wokunda maya ga misanga.
HOS 2:22 Misanga najo jokunda maya ga nyhule na divai na mafuta, navyo vyokweneza kugana kwa Yesileeli.
HOS 2:23 Ndomnyala Yesileeli kuli isi kwa chiwalo cha nene baha, nani ndolajila igano lya heni kwa heye, yula yawele nandimchema, ‘Hauwele mganwa wa heni.’ Yula ndimchemile, ‘Hegwe hauwele munhu wa heni,’ ndomlonjela, ‘Hegwe ndo munhu wa heni,’ naye kolonga, ‘Hegwe ndo Nguluwi wa heni.’ ”
HOS 3:1 Mkulu Nguluwi nakandonjela, “Ulute ukalajile igano lya hegwe kwa mche wako kahi, hanga nakaganigwa kwa ung'hondwa na mlume yunji. Umgane kota Mkulu Nguluwi vyoyalinguwagana Waisilaeli, hanga hewo wangujigalamchila milungu na kugana kulavya vilundo vya zabibu zikalile kwa milungu ajo.”
HOS 3:2 Lelo, nandimgula ayo mdala kwa sendi gilamu miya imwe na makumi saba na kilo miya imwe na makumi gahano ga shayili.
HOS 3:3 Hamba nandimlonjela, “Kochikala na heni kwa mazuwa menji, hulinguganigwa kuwa mng'hondwa ama kuwa mche wa mlume yunji, nani kahi ndowa wakukundigwa.”
HOS 3:4 Ahyo ndo Waisilaeli vyowowa. Wochikala kwa mhela winji ne mndewa ama mkulu ne nhambiko ne ilingo lya maganga ne mtambika mkulu ne limalukolo.
HOS 3:5 Hamba, Waisilaeli wohiluka na kumpala Mkulu Nguluwi, Nguluwi wa hewo na mlelwa wa Daudi, mndewa wa hewo. Ahyo wokwaluka kumdumba Mkulu Nguluwi na kubeteza kunoga kwa heye kuli mazuwa ga kuduma.
HOS 4:1 Mhulichize ulonzi wa Mkulu Nguluwi, hemwe Waisilaeli, kwa vila Mkulu Nguluwi kanguwang'ung'utila wanhu walingikala kuli isi ayi. “Haduhu kahi kukundigwa ne igano lya kwimilila kuli isi, haduhu yalingumzela Nguluwi kuli isi ayi.
HOS 4:2 Hana kupanjila na uhadi na kukopola yeka, uhizi na ung'hondwa, ne kuwa na kuduma, na kubohola danda kwa kulutilila.
HOS 4:3 Ahyo isi yeng'ha naikala, weng'ha walingikala amo wanguwa ng'hochele hamwe na migongolo ja kisolo na videje, mbaka somba za mbahali zangudumigwa.
HOS 4:4 “Ila wanhu waleche kulonjelezwa ne kumlonjeleza yunji, kwa vila heni ndangukulonjeleza hegwe mtambika.
HOS 4:5 Hegwe kwangikwang'hwalaga nemisi, naye mloli wa udesi kangikwang'hwalaga hamwe na hegwe nechilo. Ahyo, ndomdumya mayako, yawele ndo Isilaeli.
HOS 4:6 Wanhu wa heni wangudumigwa kwa vila wahela uwanzi. “Kwa vila hegwe nakuulema uwanzi, nani nandikulema kuwa mtambika wa heni, kwa vila nakugasemwa malajizo ga Nguluwi wa hegwe, nani kahi ndowasemwa wana wa hegwe.
HOS 4:7 Vila watambika vyowonjezeche, ndo weng'ha vyowalutilile kudita gehile hali heni. Lelo, ndoludita lutogo lwa hewo luwe chinhu cha soni.
HOS 4:8 Wangigutiza kwa ndolendole za wanhu wa heni wawele na gehile, wana maya ng'hatu ga kuwona nawadita gehile.
HOS 4:9 Magazo gawele gowafika wanhu, ndo gowafika watambika kahi. Ndowatowa kwa chiwalo cha gowalingudita, ndowahilulila kwa madito ga hewo wawo.
HOS 4:10 Wolya, ila hawochiguta, wodita ung'hondwa, ila hawoponda wana, kwa vila nawandeka heni Mkulu Nguluwi, na kujiwinza milungu kota wang'hondwa.
HOS 4:11 “Divai inyale na ya katali, vyangusa uwanzi.
HOS 4:12 Wanhu wa heni wanguganaga utanzi kulawa kuli jimalukolo, ngoda ya hewo ya ulaguzi ndo yanguwapaga ulonzi. Muhe wa ung'hondwa nauwadita hewo wajilile, nawadita ung'hondwa kwa kujifugamila milungu jinji, nawandeka heni Nguluwi wa hewo.
HOS 4:13 Wangulavya nhambiko kuli vinhembenhembe vya vidunda, ena, wangulavya nhambiko kuli vidunda, hasi ha migodi ja miyaloni na migodi ja migude na migodi ja ukwaju, kwa vila lubehelo lwa migodi ajo ndo lunoga. Ahyo wahinza wa hemwe wanguditaga ung'hondwa, na wache wa wana wa hemwe wanguditaga ung'hondwa.
HOS 4:14 “Ila siwatowa wahinza wa hemwe howowa wodita ung'hondwa, ne wache wa wana wa hemwe howodita ung'hondwa, kwa vila walume hewo wawo ndo walingulutasa na wang'hondwa, na kulavya nhambiko hamwe na hewo hali milungu kota wang'hondwa. Wanhu awa walihela kuvizela, ndikomya wodumigwa!
HOS 4:15 “Ndikomya, hemwe Waisilaeli mwa wang'hondwa, ila, mleche kuwadita wanhu wa Yuda wawe na nongwa! Mleche kuluta honhu helile ako Giligali, ne kuluta kula Beti-aveni, ne kilaha, ‘Kota Mkulu Nguluwi vyoyalingikala!’
HOS 4:16 Waisilaeli wana nhumbula zigagadale, kota libwa liwele na chijeni. Ndaze lelo Mkulu Nguluwi yawadime, kota ming'holo kuli honhu hagazi ha kudila migongolo?
HOS 4:17 Wanhu wa Isilaeli nawelumba na jimalukolo. Waleche walutilile!
HOS 4:18 Kota vila chilundo cha wagalile, wangulutilila na ung'hondwa wa hewo, vilongozi wa hewo wanguganaga ng'hatu soni.
HOS 4:19 Lelo, chivuluvumbi chowawembelusa, wozonela soni nhambiko za hewo kwa milungu ja udesi.
HOS 5:1 “Mhulichize hemwe watambika, muwiche goya makutu, hemwe Waisilaeli! Mhulichize, hemwe ivyazi lya mndewa, namuwa idiwa kwa wanhu wa Misipa, namuwa utandawala wa kuwagwiliza wanhu wa Taboli, ahyo, motagusigwa kwa kuwalongoza wanhu leka wawe kutali na Nguluwi.
HOS 5:2 Walingubelenhuka nawonjeza lukami kukopola. Nani ndowagaza weng'ha.
HOS 5:3 Ndangugazela geng'ha kuwala wanhu wa Isilaeli, hawevisile hali heni. Hemwe wanhu wa Isilaeli namdita ung'hondwa, hemwe mweng'ha namkokomoka.
HOS 5:4 “Madito ga hewo ganguwalemeza kumhiluchila Nguluwi wa hewo. Mnhumbula za hewo nammema ung'hondwa, hawalingumhulichiza Mkulu Nguluwi.
HOS 5:5 Kidaya kwa Isilaeli kwangoneka hazelu, wanhu wa Isilaeli wochikwang'hwala hali nongwa ya hewo, wanhu wa Yuda nawo wochikwang'hwala hamwe na hewo.
HOS 5:6 Mhela howoluta na vilundo vya hewo vya ming'holo na misenga, kumpala Mkulu Nguluwi, hawoweza kumona, kwa vila nakebagula na hewo.
HOS 5:7 Hawawele wa kukundigwa hali Mkulu Nguluwi, nawali na wana kulawa kwa wadala wanji. Lelo, mnvina za hewo za kulawa kwa nyelezi zowadumya, hamwe na migunda ja hewo.
HOS 5:8 “Mpembe mhalamhanda ya ngondo ako Gibeya, mpembe talumbeta ako Lama. Mlandule lizi lya nyhemo ako Beti-aveni. Hemwe wanhu wa Benjamini, mng'honyo wa hemwe ka kumbele.
HOS 5:9 Zuwa lya magazo, Isilaeli yowa kota kugunuche! Chondiwikula hamba hali nhanzi za Isilaeli, ndikomya, ndo mbuli ilinguya kulawila.
HOS 5:10 Vilongozi wa Yuda nawali kota walinguhejeza maganga ga mbaka. Ndobohola ng'halazi ya heni mchanya mwa hewo, kota mazi tendema.
HOS 5:11 Wanhu wa Isilaeli nawagazigwa, utaguso nauwakolela, kwa vila nawanuwila kuwinza upoka wa kufugamila jimalukolo.
HOS 5:12 Ahyo, heni Nguluwi nda kota fukuzi kwa wanhu wa Isilaeli, kota chilonda chihile kwa wanhu wa Yuda.
HOS 5:13 Wanhu wa Isilaeli lowauzelele utamwa wa hewo, ena, wanhu wa Yuda lowachizelele chilonda cha hewo, wanhu wa Isilaeli nawaluta Ashulu, kulanda utanzi kwa mndewa mkulu, ila heye hawezile kusa utamwa wa hewo, hawezile kuchidita chilonda cha hewo chipone.
HOS 5:14 Kwa vila ndowa kota isimba kwa wanhu wa Isilaeli, kota isimba hali wanhu wa Yuda. Ndowadadula vihande vihande na kuka, ndowahola na haduhu yawele yowalohola.
HOS 5:15 Ndohiluka hali honhu ha heni na kibagula na hewo mbaka howoikunda nongwa ya hewo na kupala kumeho kwa heni. Magazo ga hewo gowatagusa leka wamhale kwa kikangaza.”
HOS 6:1 Wanhu wangulonga, “Muye, tumgalamchile Mkulu Nguluwi! Heye yuye nakatudadula, ila heye yuye kotudita tupone, nakatulumiza, ila heye yuye kovidita vilonda vya hetwe vipone.
HOS 6:2 Hogokola mazuwa meli, kotudita tuwe wakomu kahi, ena, kuli zuwa lya kadatu kotuzilipula leka tikale hamwe na heye.
HOS 6:3 Lelo tumkunde, tikangaze kumzela Mkulu Nguluwi. Ndikomya, kuya kwa heye ndo kota lufuku, heye kotuyila kota nhonya za ng'humbusa walimi, kota nhonya za luhela zilingutowela isi.”
HOS 6:4 Ila Mkulu Nguluwi kangulonga hino, “Ndiwaditile choni, hemwe wanhu wa Isilaeli? Ndite choni kwa hemwe wanhu wa Yuda? Igano lya kwimilila lya hemwe kwa heni ndo kota ng'hungugu ya mitondo, kota nungwi ilingwajilila himahima.
HOS 6:5 Ahyo nandiwavaba hemwe kwa nzila ya ulonzi wa waloli, nandiwadumya kwa ulonzi wa heni, utaguso wa heni wangulawa kota lumuli lwa kubwemwenzuka.
HOS 6:6 Kwa vila chondilingugana kwa hemwe ndo igano lya kwimilila, haiwele nhambiko, kumhulichiza Nguluwi, kusinda kulavya nhambiko za kulakazwa.
HOS 6:7 Ila hewo nawalibena ilagano lya heni kota vyoyaditile Adamu, ako hawawele wa kukundigwa kwa heni.
HOS 6:8 Gileadi ndo muji wa wehile, nawenela danda.
HOS 6:9 Kota walinguvaba vyowalingumbeteza munhu mnzila, ndo hihyo watambika vyowalingudita, wanguwakopola wanhu kuli nzila ilinguluta Shekemu, ena, wangudita wihe ukulu.
HOS 6:10 Nandiyona mbuli ya kuzudiza ng'hatu hali Waisilaeli. Wanhu wa Isilaeli wangujibilimila milungu jinji kota wang'hondwa, ena, Waisilaeli nawedita wawe wakokomoche.
HOS 6:11 Namwe wanhu wa Yuda hihila. “Nandiwawichila hemwe mhela uwele mohiluka kulawa kuli isi ya chijenzi,
HOS 7:1 “chila mhela longanile kuwalohola Waisilaeli, wihe wa wanhu wa Isilaeli nawali ugubuligwa, madito gehile ga Samaliya nagali golawila. Wangudita uhadi, wahizi wangubena ng'handa, wabokaji wanguvaba mnzila.
HOS 7:2 Hawalingijesa ne hado kota heni, ndangukumbuchila gehile ga hewo geng'ha. Lelo madito ga hewo gehile nagawazunguluta banzi zeng'ha, geng'ha gowaditile ga kumwando kwa heni.
HOS 7:3 “Wangumdita mndewa yasangalale kwa wihe wa hewo, wanguwadita vilongozi wasangalale kwa udesi wa hewo.
HOS 7:4 Weng'ha ndo wang'hondwa, hewo wana maya kota itanulu liwichigwe chiluli chiwele yalingubanika mibumunda halinguganigwa kuchibwina, kulawa hala hoyatijile utimbo mbaka hala ibumunda holiwa goya kwa kubanichigwa.
HOS 7:5 Kuli mnvina ya mndewa, nawawadita vilongozi wa hewo wagale ng'hatu mbaka wadeche, naye mndewa nakehanza hamwe na walingudita idaba.
HOS 7:6 Kota itanulu vyolilingwaka, nhumbula za hewo zangwaka kwa maya, nechilo yeng'ha ng'halazi yangulavya iyosi, hoifika mitondo, yangwaka kota milapi ja chiluli.
HOS 7:7 Weng'ha wana ng'halazi kota itanulu lilingwaka wanguwadumya vilongozi wa hewo. Wandewa wa hewo weng'ha nawagwa, haduhu ne yumwe hali hewo yalingundanda utanzi.”
HOS 7:8 Nguluwi kangulutilila kulonga, “Wanhu wa Isilaeli wangihanza na wanhu wa isi zinji, wangoneka kota ibumunda liwele halipile.
HOS 7:9 Wajenzi wanguhola mong'ho wa hewo, ila hewo hawavizelele, mbuliza nazenela kumutwi kwa hewo, ila hewo wahela mbuli yoneche.
HOS 7:10 Kidaya kwa wanhu wa Isilaeli kwangilajila hali hewo, hanga aga geng'ha gangulawila, ila hawangalamchile heni Mkulu Nguluwi, Nguluwi wa hewo, ne kumhala.
HOS 7:11 Wanhu wa Isilaeli ndo kota ng'hunda, wanguhadigwa chiubewe na wahela nyhala, mhela umwenga wanguchema Misili, mhela wunji wangugaluchila Ashulu.
HOS 7:12 Mhela howoluta, ndotoza utandawala wa heni mchanya mwa hewo, ndowakwega leka wagwe kota videje. Hondihulika mbuli kota naweting'hana, ndowagwiliza.
HOS 7:13 Wochona, kwa vila nawajilila. Kudumigwa kuwafiche, kwa vila nawambelenhuka heni. Nangana kuwagombola, ila wangulonga udesi kwa heni.
HOS 7:14 Hawandilile kulawa mnhumbula za hewo, ila wangulombocheza kuli vinhanda vya hewo. Wangidumulaga kwa chiwalo cha kumfugamila Baali, leka wapate nyhule na divai inyale, ila wanguhinduchila kutali na heni.
HOS 7:15 Hanga nandiwalangusa na kuwapa mong'ho, ila wangunuwila kudita gehile hali heni.
HOS 7:16 Hawalingungalamchila Heni Mbele Kuchanya Ng'hatu, wa kota upinde ulihela mong'ho. Vilongozi wa hewo wobagama kwa ipanga, kwa chiwalo cha ulonzi wa hewo wa ng'halazi. Ahyo, wobezigwa kuli isi ya Misili.
HOS 8:1 “Mpembe mhalamhanda! Mng'honyo kanguya kota ikungule, kuivaba ng'handa ya Mkulu Nguluwi, kwa vila nawalibena ilagano lya heni na kulibelenhuka ilajizo lya heni.
HOS 8:2 Waisilaeli wangundilila wolonga, ‘Gwa Nguluwi wa hetwe, twangukuzela.’
HOS 8:3 Ila wanhu wa Isilaeli nawazibeza mbuli zinojile, ahyo, wang'honyo wowawinza.
HOS 8:4 “Nawewichila wandewa ne kukundigwa na heni, nawehagulila vilongozi ne heni kuwalonjela. Kwa sendi za hewo na zahabu za hewo, nawegongomanyila limalukolo mbuli iwele yowadumya hewo wawo.
HOS 8:5 Hemwe wanhu wa Samaliya, mtoze kutali limalukolo lya hemwe lya ilogota. Ng'halazi ya heni yangwaka kwa hemwe. Nili mowa mlihela nongwa?
HOS 8:6 Namwe Waisilaeli hihyo du! Alyo limalukolo lya hemwe naligongomanyigwa na munhu hela, haliwele Nguluwi. Ena! Limalukolo lya ilogota lya Samaliya lyobenangwa!
HOS 8:7 “Walingunyala mbeho, wobeta chivuluvumbi! Mizuchila ja hewo ja nyhule jiwele kuli migunda hajiweza kulela nyhule yoneche. Wone jolela, mbeta azo wolya wajenzi.
HOS 8:8 Waisilaeli nawamelwa, lelo wa hali wanhu wa isi zinji, kota chinhu chisowile utanzi,
HOS 8:9 kwa vila nawaluta Ashulu kulanda utanzi, kota idogowi lya kisolo lilingulubaluba liliyeka. Wanhu wa Isilaeli nawalipa sendi kwa wamizi wa Ashulu, leka kuwamila hewo.
HOS 8:10 Hanga nawagula utanzi kwa wanhu wa isi zinji, ila ndowakungajiza. Wowa ng'hochele kwa kutunyigwa na mndewa yawele na mong'ho.
HOS 8:11 “Hanga wanhu wa Isilaeli nawezenjela honhu ha kulavila nhambiko kwa winji, kwa chiwalo cha nhambiko za gehile, honhu aho ha kulavila nhambiko, nahawa honhu ha kuditila gehile.
HOS 8:12 Nanyandika mbuli nyinji kwa chiwalo cha hewo, kuwala malajizo ga heni, ila nawazona kota chinhu chijenzi.
HOS 8:13 Wangulavya nhambiko, na kulya miwunde jake, ila heni Mkulu Nguluwi hambe nojezwe nawo. Ndangukumbuchila gehile ga hewo, ndowagaza kwa gehile ga hewo, ndowahilusa kuli upogozi kula Misili.
HOS 8:14 Waisilaeli nawamsemwa Yawalumbile, nawezenjela ng'handa za sendi nyinji ng'hatu, wanhu wa Yuda nawajizenjela ngome miji minji, ila ndohilika chiluli kuli miji ajo, na kuzilakaza ngome za hewo.”
HOS 9:1 Mleche kusangalala hemwe Waisilaeli! Mleche kudita mnvina kota wanhu wa isi zinji, kwa vila namuwa wang'hondwa kwa kumleka Nguluwi wa hemwe. Namgana kupegwa sendi kwa chiwalo cha ung'hondwa, chila honhu ha kupululila nyhule.
HOS 9:2 Honhu ha kupululila nyhule na honhu ha kukamila divai haviweza kuwadita wanhu wegute, hampata divai inyale.
HOS 9:3 Hawochikala kuli isi ya Mkulu Nguluwi, ena, wanhu wa Isilaeli wohiluka kuli upogozi ako Misili, wolya chilyo chikokomoche ako Ashulu.
HOS 9:4 Hawomlavila Mkulu Nguluwi nhambiko ya divai, ne nhambiko za hewo haziweza kumnojeza. Chilyo cha hewo chowa kota chilyo cha matanga, weng'ha wawele wolya chilyo acho, wowa wakokomoche. Chowa chilyo cha kuwadita wegute hela, hachiwa chinhu cha kuchigala kuli Ng'handa ya Mkulu Nguluwi.
HOS 9:5 Modita choni kuli zila mnvina ziwichigwe, kuli mnvina za Mkulu Nguluwi? Hamuweza.
HOS 9:6 Hombilima kudumigwa kwa isi ya hemwe, Misili yowabochela, ila vilaga vya hemwe vyanguwabeteza ako Memfisi. Misolo johola honhu ha ng'hano za sendi, miwa jomema kuli mihema ja hemwe.
HOS 9:7 Mazuwa ga magazo nagoya, ena, mazuwa ga kuhilula chibida nagafika, Waisilaeli wanguganigwa wauzele mhela awo! Hemwe mwangulonga, “Mloli ka mpoka, yalingulongozwa na muhe kana lukwale.” Mwangulonga ahyo kwa chiwalo cha winji wa gehile ga hemwe, kwa vila namumzudila heye.
HOS 9:8 Mloli ka mwamizi wa wanhu wa Isilaeli honhu ha Nguluwi, ila honeche hoyalinguluta kanguwichilwa idiwa kota chideje na yalingupelemba. Mbaka kuli ng'handa ya Nguluwi wa heye kanguzudilwa.
HOS 9:9 Hemwe namwinjila kuli wihe, kota vyoiwele kula Gibeya. Nguluwi kozikumbuchila nongwa za hemwe, na kuwagaza kwa chiwalo cha gehile ga hemwe.
HOS 9:10 “Hondiwapatile Waisilaeli, nawali kota kupata zabibu kuchiwala. Londiwawene wasekulu wa hemwe, nayali goya kota mafuza ga mwaluko kuli igodi lya mtini. Ila hala howafichile ako Baali-peoli, nawalifugamila lila limalukolo lya Baali, nawawa izudizo kota acho chowachiganile.
HOS 9:11 Ukulu wa Isilaeli woguluka kota chideje, wana hawopondigwa kahi, ne kuwa na himila.
HOS 9:12 Hanga wowalolela wana, ndomkopola chila yumwe wa hewo. Wochona hewo hondiwaleka waliyeka!
HOS 9:13 Kota vyombonile aho mwaluko, Isilaeli nayali kota igodi lideche lya Tilo kuli ibindi linojile, ila lelo Isilaeli yomlapa kuwahilika wana wa hewo wakopoligwe.”
HOS 9:14 Uwagaze wanhu awa gwa Mkulu Nguluwi! Ila kowagaza ndaze? Uwadite wache wawo wawe mhende, uwadite wawe walihela matombo ga konyeza wana wa hewo.
HOS 9:15 Mkulu Nguluwi kangulonga hino, “Wihe wa hewo weng'ha nawaluchila Giligali, ako ndo nyaluche kuwazudila. Kwa chiwalo cha wihe wa madito ga hewo, ndowawinga haluga hangu. Siwagana kahi. Vilongozi wa hewo weng'ha ndo walingubelenhuka.
HOS 9:16 Wanhu wa Isilaeli nawatowigwa, nawali kota igodi liwele na mizabi jikalile, hawoponda wana. Wone woponda, ndowakopola wana wa hewo wawaganile.”
HOS 9:17 Nguluwi nakawalema, kwa vila hawamhulichize, wowa wanhu wa kulubaluba, hali wanhu wa isi zinji.
HOS 10:1 Waisilaeli nawali kota mzabibu unojile lukami, ulingulavya mafuza gake. Mafuza gake vyogalutilile konjezeka, ndo vyowalutilile kizenjela honhu ha kulavila nhambiko kwa chiwalo cha milungu. Isi vyoilutilile kudedemka, ndo vyowalutilile kunoliga mizengo jawo ja kufugamila.
HOS 10:2 Mnhumbula za hewo nammema uhadi, lelo wangulapigwa wahole nongwa ya hewo. Mkulu Nguluwi kobomola honhu ha kulavila nhambiko ha hewo na kujiwifya mizengo ja hewo ja kufugamila.
HOS 10:3 Hamba wolonga, “Twahela kahi mndewa, kwa vila hatumdumbile Mkulu Nguluwi. Ila hanga twahawele na mndewa yahatuditile choni?”
HOS 10:4 Chowalingulonga ndo ulonzi hela, wangilaha na kikundiza kwa udesi, hachi haiwele hachi kahi, yanguzuka kota misolo ja dunga kuli mgunda.
HOS 10:5 Wenyeng'haye wa Samaliya wokakama kwa chiwalo cha limalukolo lya ilogota lya ako Beti-aveni. Wanhu wake wolilombochezela alyo limalukolo lya ilogota, mbaka watambika walingulifugamila wolila kwa chiwalo cha limalukolo alyo, kwa vila lutogo lwa ilogota alyo nalulavigwa.
HOS 10:6 Limalukolo alyo lyohilikwa Ashulu, kota kodi kwa mndewa mkulu. Wanhu wa Isilaeli wobasigwa soni, Waisilaeli wolyonela soni limalukolo lya hewo.
HOS 10:7 Mndewa wa Samaliya koholigwa kota chihande cha nhagala ndodo ya igodi kuli lwanda.
HOS 10:8 Honhu ha kufugamila kuli Aveni, howifigwa kwa vila ndo gehile ga Isilaeli. Miwa na misolo vyokula na kugubika honhu ha kulavila nhambiko ha hewo. Nawo wovilonjela vidunda, “Mtugubiche” na vidunda vidodo, “Mtugwile.”
HOS 10:9 Hemwe Waisilaeli, namdita gehile kulawa kula Gibeya, mng'hali mlutilila kahi. Ndikomya, ngondo yowadumya wehile kuko Gibeya.
HOS 10:10 Mhela wondiuganile ndowagaza, wanhu wa isi zinji wochikungajiza kwa chiwalo cha hemwe, leka wawawiche mchinweng'ho, kwa chiwalo cha gehile ga hemwe menji.
HOS 10:11 Isilaeli ndo ilogota idala, lilangusigwe goya, liwele lyanguganaga kupulula nyhule, lelo ndoliwoha ngwamo kuli singo yake inojile. Ndomwendesa Isilaeli, Yuda yangumlapa yalime, kwa ihuka heye yuye, ena, Yakobo kolima kwa ihuka.
HOS 10:12 Mnyale kutanganika kwa chiwalo cha hemwe, namwe mobeta igano lya kwimilila, mlime migunda ja hemwe, kwa vila mhela wa kumhala heni Mkulu Nguluwi naufika, nani ndowegalila hemwe kutanganika.
HOS 10:13 Ila hemwe namlima na kunyala wihe, nambeta kubunza, namulya mafuza ga uhadi wa hemwe. Hegwe Isilaeli nakitumbila mong'ho wa gwegwe baho na winji wa wamizi wa hegwe.
HOS 10:14 Ahi ndo ngondo vyoikwinuka hali wanhu wa hegwe, ngome za hegwe zeng'ha zowifigwa, kota Shalimani vyoyaiwifile Beti-alibeli kuli zuwa lila lya ngondo. Mhela wadala wamwenga na wana wa hewo vyowatozigwe kwa mong'ho kuli misanga.
HOS 10:15 Ahyo ndo vyoiwa kwa hemwe wanhu wa Beteli, kwa chiwalo cha ukulu wa wihe wa hemwe. Zuwa alyo holifika, mndewa wa Isilaeli kodumigwa ng'hatu.
HOS 11:1 “Waisilaeli vyowawele wana, nandiwagana, kulawa Misili nandiwachema wana wa heni.
HOS 11:2 Ila vyondutilile kuwachema Waisilaeli, ndo vyowalutilile kuluta kutali na heni. Nawalavya nhambiko kwa Mabaali na kujifunyizila ubani jimalukolo ja milungu.
HOS 11:3 Heni ndo ndiwalanguse wanhu wa Isilaeli kujenda, nene baha nandiwabata moko, ila hawavizelele, kota heni ndo ndiwosele utamwa.
HOS 11:4 Nandiwalongoza kwa ng'weso za isungu ena, kwa ng'weso za igano, nambusa ngwamo msingo mwa hewo, heni nandinamiza na kuwalisa.
HOS 11:5 “Lelo, wohiluka kuli isi ya Misili, wolongozwa na mndewa wa Ashulu, kwa vila nawalema kunyhiluchila.
HOS 11:6 Ipanga lyowa kuli miji ja hewo, lyowifya mhajilo za lwizi lwa hewo na kulemeza kiwika goya kwa hewo.
HOS 11:7 Wanhu wa heni nawamula kundeka, hanga wochemigwa na Nguluwi Yawele Kuchanya, haduhu ne yumwe yoweza kuwenula.
HOS 11:8 Gwa Isilaeli, ndoweza ndaze kukuleka? Ndoweza ndaze kukutoza, gwa Isilaeli? Ndoweza ndaze kukuditila kota muji wa Adima? Ndoweza ndaze kukudita kota muji wa Seboimu? Nhumbula ya heni naigaluka, isungu lya heni nalilutilila kuzuka.
HOS 11:9 Ndoilemeza ng'halazi ya heni ing'ang'ale, siwadumya kahi wanhu wa Isilaeli, kwa vila heni ndo Nguluwi, siwele munhu. Heni ndo yelile hali hemwe, nani sikuya na ng'halazi.
HOS 11:10 Womhala heni Mkulu Nguluwi ndilingubuma kota isimba, hondibuma wokuya kwa heni kulawa kolizinjilaga isanya kuno wokakama.
HOS 11:11 Heni Mkulu Nguluwi ndangulonga kota, wokuya kulawa Misili wokakama kota videje, woguluka kulawa Ashulu kota ng'hunda, nani ndowahilula kuli ng'handa za hewo.”
HOS 11:12 Wanhu wa Isilaeli wangunzunguluta kwa ulonzi wa hewo wa udesi na uhadi. Wanhu wa Yuda wang'hali wojendajenda na Nguluwi, wang'hali wa kukundigwa kwa Yawele Yelile.
HOS 12:1 Wanhu wa Isilaeli wangudita upoka kwa kuibilimisa mbeho ya kolilawilaga isanya nemisi yeng'ha, na kuwa na udesi na kilewa ng'hatu. Wangudita ilagano na wanhu wa Ashulu, na kulajiza mafuta ga mzeituni kulawa Misili.
HOS 12:2 Mkulu Nguluwi kangung'ung'uta kuwala Yuda, komgaza Yakobo kwa kiwhana na nzila za heye na kumhilusila kwa kiwhana na madito ga heye.
HOS 12:3 Yakobo vyoyawele mmunda nakebata chisigino cha mkulugwe, kota munhu, naketwanza na Nguluwi.
HOS 12:4 Naketwanza na mhilisi na kumsumya, nakalila na kudedeza kupegwa uganililo wa heye. Nakamfika ako Beteli na kulongasa naye.
HOS 12:5 Mkulu Nguluwi Yawele na Mong'ho, Mkulu Nguluwi ndo itagwa lya heye!
HOS 12:6 Ila yangukugana uhiluche kwa Nguluwi wa hegwe, wibatilile igano lya kwimilila na hachi na umbeteze Nguluwi wa hegwe mazuwa gose.
HOS 12:7 Yalinguguza vinhu kangutumiyaga vipimilo vya uhadi, kanguganaga kuwabunza wanhu.
HOS 12:8 Wanhu wa Isilaeli wangitogolaga wolonga, “Hetwe tuna lufufu ng'hatu, natidita tuwe na lufufu. Hamwe na lufufu lwa hetwe lweng'ha, hawofika mgati mwa hetwe nongwa yoneche ama gehile.”
HOS 12:9 Mkulu Nguluwi kangulonga, “Heni ndo Mkulu Nguluwi, Nguluwi wa hemwe, heni ndo ndiwalavile kuli isi ya Misili! Heni ndowadita mikale kahi kuli mihema, kota vila kuli mazuwa ga mnvina za hemwe ziwichigwe.
HOS 12:10 Nandonga na waloli, nandiwapa uloli winji na kulonga kwa nhelo kukolela hewo.”
HOS 12:11 Ndaze, Gileadi hawele mwihe? Wanhu wa heye hambe watanze chinhu! Ndaze, hawalingulavya nhambiko za mibuguma ako Giligali? Honhu ha kulavila nhambiko za hewo, howa kota vilundo vya maganga kuli mgunda ulimigwe.
HOS 12:12 Yakobo nakabilimila kuli isi ya Alamu, nakakola mijito leka yapegwe mche, nakadima ming'holo kwa chiwalo cha kupegwa mche.
HOS 12:13 Mkulu Nguluwi nakamlajiza mloli kumlavya Isilaeli kulawa Misili, kwa nzila ya mloli nakamlolela.
HOS 12:14 Wanhu wa Isilaeli nawamzudiza ng'hatu Mkulu Nguluwi, ila Mkulu Nguluwi kowahilulila chibida, kwa nongwa ya hewo ya kubohola danda, kowagaza kwa mbuli zihile zowaditile.
HOS 13:1 Mhela nhanzi ya Efulaimu vyoilonjile, wanhu nawakakama, nayali itogoligwe kuli Isilaeli, ila nayali na nongwa ya kumfugamila Baali, naye nakabagama.
HOS 13:2 Lelo nawalutilila kudita gehile, nawegongomanyila jimalukolo kwa sendi za hewo, jimalukolo jigongomanyigwe goya ng'hatu, jeng'ha ndo mijito ja walingugongomanya goya. Yangulonjigwa kuwala awa wanhu, “Walingulavya nhambiko kwa jimalukolo ja milogota, wa kota wanhu walingujinonela jimalukolo ja milogota!”
HOS 13:3 Lelo, wokwajilila kota ng'hungugu ya mitondo, kota nungwi ilinguka himahima, kota mhumba ilinguwembeluswa honhu ha kupululila, kota iyosi lilingubilabila kuli itubuli liwele mwanzi.
HOS 13:4 “Ila heni ndo Mkulu Nguluwi, Nguluwi wa hemwe, ndiwalavile hemwe kulawa isi ya Misili, mwahela Nguluwi yunji ila heni, haduhu yalinguweza kuwalohola.
HOS 13:5 Heni ndo ndiwalolele hemwe vyomuwele kuchiwala, kuli isi iwele na ivuche lilingulakaza.
HOS 13:6 Londiwapele hemwe chilyo, namwali migute lomigute, namwaluka kidaya, hamba namsemwa heni.
HOS 13:7 Lelo, ndowa kota isimba kwa hemwe, ndowabeteza mnzila kota izongoduma.
HOS 13:8 Kota idubu lisukuligwe mwanage, Ndowatowa na kuzidadula mhambaga za hemwe. Kota isimba ndowalya, igongolo lya kisolo lyowadadula.
HOS 13:9 “Ndowadumya hemwe Waisilaeli. Whaani yoweza kuwatanza?
HOS 13:10 Kakohi lelo mndewa wa hemwe yawalohole kulawa kuli miji ja hemwe jeng'ha? Wa kohi wala vilongozi wa hemwe wawamile? Hemwe ndo mlandile, ‘Utupe mndewa na vilongozi watulongoze.’
HOS 13:11 Kwa kuzudila kwa heni nandikupa mndewa, hamba nandimusa kwa ng'halazi ya heni.
HOS 13:12 Wihe wa Isilaeli nauwichigwa ako, magazo ga heye nagawichigwa kung'hano kwa chiwalo cha hamba.
HOS 13:13 Usungu kota wa mdala yalinguponda womfika, ila heye ndo mwana mpoka, mhela wa kupondigwa houfika, kangulemaga kulawa mmunda mwa mayake.
HOS 13:14 “Ndowagombola hemwe kulawa kuli isi ya wabagame, ndowalohola kulawa kuli kubagama. Gwa kubagama, kwa kohi kudumya kwa hegwe? Gwa isi ya wabagame, kwa kohi kuwifya kwa hegwe? “Heni siwonela isungu,
HOS 13:15 hanga Isilaeli kolutilila goya hali wang'holoze. Mbeho ya ivuche ya kolilawilaga isanya kulawa kwa Mkulu Nguluwi yokuya, iputa kulawa kuchiwala, nzasa yake hailavya mazi na ideho lyake lyokala. Ng'hano za heye zeng'ha za vinhu vya sendi nyinji zoholigwa.
HOS 13:16 Wanhu wa Samaliya wotowigwa kwa nongwa ya hewo, kwa vila nawambelenhuka Nguluwi wa hewo. Wokopoligwa kwa ipanga, wana wa hewo wohondangwa, wache wa hewo wawele na himila wotumbuligwa.”
HOS 14:1 Hemwe Waisilaeli, mhiluche kwa Mkulu Nguluwi, Nguluwi wa hemwe, namikwang'hwala kwa chiwalo cha gehile ga hemwe.
HOS 14:2 Mumhiluchile Mkulu Nguluwi na kumlonjela, “Utulechele gehile geng'ha, ubochele ndolendole za hetwe za lutogo, kota ndolendole za milogota milume.
HOS 14:3 Ashulu howeza kutulohola, hatuweza kitumbila kahi kuli falasi wa ngondo. Hambe tujicheme kahi, ‘Milungu ja hetwe,’ ajo ndo jimalukolo jotuhongole twetwe. Kwa hegwe walekwa wangupataga isungu.”
HOS 14:4 Mkulu Nguluwi kangulonga, “Ndowalohola kulawa kuli wihe wa hemwe, siwaleka, ila ndowagana kahi kwa kunuwila kwa heni, kwa vila ng'halazi ya heni ya haduhu kwa hemwe.
HOS 14:5 Ndowa kota nungwi kwa Isilaeli, kobahula kota uluwa wa yunjiyunji, kota mielezi ja Lebanoni, kodulisa mizabi jake hasi.
HOS 14:6 Nhagala zake zokwenela chila honhu, kunoga kwake kowa kota migodi ja mzeituni, kunhunyhilila kwake kunojile ndo kota mielezi ja Lebanoni.
HOS 14:7 Wanhu wochikala kahi kuli lubehelo lwake, yodedemka kota nyhule inojile, yobahula kota mizabibu, kuzeleka kwake kowa kota divai ya Lebanoni.
HOS 14:8 Gwa Isilaeli, ndina choni kahi na jimalukolo? Ndowedichila hemwe na kuwalolela, Heni ndo kota msonobali uwele na mahamba madodi kulela mafuza kwa hemwe kwangulawa kwa heni.”
HOS 14:9 Whaani yawele na luhala? Kozizela mbuli azi. Whaani yalinguvizela? Ayu kozizela. Nzila za Mkulu Nguluwi ndo zigoloka, watanganiche ndo wangujendaga kuli nzila azo, ila walingubelenhuka wochikwang'hwala amo.
JOE 1:1 Ulonzi wa Mkulu Nguluwi naumuyila Yoeli, mwana wa Petueli.
JOE 1:2 Mhulichize chinhu achi hemwe wasekulu, muwiche goya ikutu weng'ha mlingikala Yuda. Ndaze, mbuli kota ayi naiwahika kulawila kuli kikala kwa hemwe kweng'ha, ama mhela wa wasekulu wa hemwe?
JOE 1:3 Muwasimile wana wa hemwe mbuli ayi, nawo wawasimile wana wa hewo, na wana wa hewo walusimile lulelo lulinguya.
JOE 1:4 Nzije zilingutemanga nazijivaba mizuchila, chilechigwe na nzije zilingutemanga nachilika na nzije vilundo kwa vilundo, chilechigwe na nzije vilundo kwa vilundo, nachilika na nzije zilingunomoka, chilechigwe na nzije zilingunomoka, nachilika na nzije zilinguwifya.
JOE 1:5 Hemwe mlingugala, mgale na kulila, mtowe iyowe, hemwe mlingugala divai, zabibu zeng'ha za kugongomanya divai inyale naziwifigwa.
JOE 1:6 Nzije nyinji naziivaba isi ya hetwe, zina mong'ho na nyinji lukami, mizino jawo ndo kota ja isimba, na mizeje ja milomo jawo ndo kota ja isimba idala.
JOE 1:7 Naziwifya mizabibu ja hetwe, na kudakula mitini ja hetwe. Nazidadula mibadu ja migodi na kujitoza hanyi, na nhagala zake nazilechigwa ne chinhu.
JOE 1:8 Mlile kota mhinza yavalile ivalo lya igunila yolombocheza kwa chiwalo cha kubagama kwa mlume yawele nakambanichila.
JOE 1:9 Nhambiko za nyhule na za kunwa za haduhu kuli ng'handa ya Mkulu Nguluwi. Watambika, vitumagwa wa Mkulu Nguluwi, wangulombocheza.
JOE 1:10 Migunda jahela chinhu, isi yangulombocheza, kwa vila nyhule naziwifigwa, divai inyale ya haduhu, mizeituni najikala.
JOE 1:11 Mlombocheze hemwe mlingulima, mtowe iyowe hemwe mlingulolela mizabibu. Ngano na shayili naziwifigwa, mbeta zeng'ha kuli migunda nazidumigwa.
JOE 1:12 Mizabibu najikala, mitini najiwa ng'hochele, mikomamanga na mitende na mitofaa najikala, ena migodi jeng'ha kuli migunda najikala. Kusangalala kwa haduhu hali wanhu.
JOE 1:13 Hemwe watambika, mvale migunila mlombocheze, mlile hemwe vitumagwa wa honhu ha kulavila nhambiko. Mwinjile kuli ng'handa ya Mkulu Nguluwi mlombocheze nechilo yeng'ha. Nhambiko za nyhule na za kunwa za haduhu kuli ng'handa ya Nguluwi.
JOE 1:14 Mlavye mzilo leka wanhu wesele kulya, mcheme nhing'hano yelile. Muwakungajize wasekulu na weng'ha walingikala kuli isi, wenjile kuli ng'handa ya Mkulu Nguluwi, Nguluwi wa hemwe, na amo mumlilile Mkulu Nguluwi.
JOE 1:15 Tochona kwa chiwalo cha lila zuwa lya Mkulu Nguluwi, zuwa alyo lya Mkulu Nguluwi lya habehi, lyanguya hamwe na kudumya, kulawa kwa Nguluwi Yawele na Ludali.
JOE 1:16 Ndaze, vilyo vya hetwe naviwifigwa kuno tulola. Kusangalala na kuseka vya haduhu kuli ng'handa ya Nguluwi wa hetwe.
JOE 1:17 Nyhadikwa zangola hali misanga, ng'hano za nyhule zahela chinhu, ng'hano nazibomoligwa, kwa vila kuduhu nyhule za kuwika.
JOE 1:18 Lole migongolo vyojilingulila kwa masinzo. Vilundo vya misenga vyangusanzalima, kwa vila vyahela honhu ha kulya, na vilundo vya ming'holo vyangugazika.
JOE 1:19 Ndangukulilila hegwe, gwa Mkulu Nguluwi, chiluli nachilakaza misolo kuli chiwala, milapi ja chiluli najilakaza migodi kuli migunda.
JOE 1:20 Migongolo ja kisolo jangukulilila, kwa vila nzanda za mazi nazikala, chiluli nachilakaza misolo kuli chiwala.
JOE 2:1 Mpembe mhalamhanda ako Siyoni, mpembe mhalamhanda mchanya mwa chidunda chelile. Mkakame hemwe mlingikala Yuda, kwa vila zuwa lya Mkulu Nguluwi lyanguya, ena, zuwa alyo lya habehi!
JOE 2:2 Alyo ndo zuwa lya jiza, zuwa lya ng'hungugu na jiza totolo. Chilundo chikulu cha nzije cha habehi kota jiza igubiche kuli chidunda, mbuli kota ayo hainawahika kulawila mazuwa gose ne haikoneka kahi kuli lulelo lweng'ha lulinguya.
JOE 2:3 Kota vila chiluli chilingulakaza chilundo acho changuwifyaga chila chinhu na kuleka chila chinhu kumbele chidumigwe, isi yanguwa kota kamgunda ka Edeni, ila wone chikole, yanguwa chiwala. Haduhu chilinguweza kiwika kutali.
JOE 2:4 Changoneka kota falasi, changudumya kota falasi wa ngondo,
JOE 2:5 Changulavya lizi kota mituka ja ngondo, hochinomoka kuli vinhembenhembe vya vidunda, kota milapi ja chiluli chilingulakaza mibeleje, kota chilundo chikulu cha wamizi chiwichile goya kwa ngondo.
JOE 2:6 Hochikoneka, wanhu wa isi wangudumba, kumeho kwa hewo kwangulajila lunhwinhwi lwa hewo.
JOE 2:7 Changubilima kota wamizi walingujenda kuli ngondo, changukwinha kuli lukanzi kota wamizi. Nzije zeng'ha zangujenda kuli misitali, hambe zileche kukola kuli misitali jawo.
JOE 2:8 Haduhu ilingumkundujiza myage, chila imwe yanguluta kumwando. Zangukola kuli lwizi lwa honhu halingwamilwa, ne kuwifya misitali jawo.
JOE 2:9 Zanguluta himahima kwinjila kuli muji, zangubilimila kuli lukanzi, zangwinjila mgati mwa ng'handa, kwa kukolela kuli mitubuli kota wahizi.
JOE 2:10 Hali hewo isi yangutigasika, ulanga wangukakama, isanya na nyelezi vyanguwichigwa jiza, nhondwe zanguleka kulavya lumuli.
JOE 2:11 Mkulu Nguluwi kangulavya lizi lya kubuma, wamizi wa heye ndo wenji ng'hatu, wala walinguhulichiza malajizo ga heye. Zuwa lya Mkulu Nguluwi ndo likulu na lya kukabusa. Whaani yoweza kwimilila?
JOE 2:12 Mkulu Nguluwi kangulonga, “Mbaka sambi, Mnyhiluchile kwa nhumbula za hemwe zeng'ha, kwa kwesela kulya na kulila na kulombocheza.”
JOE 2:13 Mleche kudadula mivalo ja hemwe kulajila masinzo ila mumhiluchile kwa nhumbula ya kulonga gehile. Mumhiluchile Mkulu Nguluwi, Nguluwi wa hemwe, kwa vila heye ndo yalingulechela na yamemile isungu, halinguzudila himahima na yamemile igano lya kwimilila, kangonaga isungu na kuleka kugala magazo.
JOE 2:14 Hanji Mkulu Nguluwi, Nguluwi wa hemwe, kogalula kunuwila kwa heye na kuwapa hemwe utambichizo wa mbena, hamba moweza kumlavila nhambiko za nyhule na za kunwa.
JOE 2:15 Mpembe mhalamhanda ako Siyoni. Mlavye mzilo leka wanhu wesele kulya, mcheme nhing'hano yelile.
JOE 2:16 Muwakungajize wanhu weng'ha, muwelize. Muwegale wasekulu, muwakungajize wana, mbaka wana walingong'ha. Mkasano na mdala yahesigwe walawe kuli vihengo vya hewo.
JOE 2:17 Hagati ha honhu ha kulavila nhambiko na lwizi lwa ng'handa ya Nguluwi, watambika, vitumagwa wa Mkulu Nguluwi, walile na kulanda wolonga, “Gwa Mkulu Nguluwi, wonele isungu wanhu wa hegwe. Uleche kuwaleka wanhu wa isi zinji, watubeze na kulonga, ‘Ka kohi lelo Nguluwi wa hewo?’ ”
JOE 2:18 Hamba Mkulu Nguluwi nayali na fihi ng'hatu kwa chiwalo cha isi ya heye nakawonela isungu wanhu wa heye.
JOE 2:19 Nakawahulichiza na kuwedichila kulanda kwa hewo, nakalonga, “Lelo ndowapa hemwe kahi nyhule, divai inyale na mafuta, vya kuhega ng'hatu kwa chiwalo cha hemwe, siwadita mbezigwe kahi na wanhu wa isi zinji.
JOE 2:20 Ndowosa awo wang'honyo walingulawa kasikazini, ndowawinga mbaka kuli chiwala, wamizi wa kumwando ndowatoza kuli Bahali ya Mwino na wala wa kumbele kuli Bahali ya Mediteleniyani. Wonung'ha ng'hatu, awo wawele waditile wihe ukulu.
JOE 2:21 Uleche kudumba, gwa isi, ila usangalale na kusechelela, kwa vila Mkulu Nguluwi nakadita makulu.
JOE 2:22 Mleche kudumba, hemwe migongolo ja kisolo, kwa vila misolo kuli chiwala najiwa goya, migodi jangulela mafuza gake, mizabibu na mitini jangulela kwa winji.
JOE 2:23 Msangalale, hemwe wanhu wa Siyoni, msechelele kwa chiwalo cha Mkulu Nguluwi, Nguluwi wa hemwe, kwa vila nakawapa hemwe nhonya ya kunyalila, nakawapa hemwe nhonya ya kuhega. Nhonya ya kunyalila na nhonya za ng'humbusa walimi kota aho hamwande.
JOE 2:24 Honhu ha kupululila homema nyhule, mibiga jomema divai na mafuta.
JOE 2:25 Ndowahilusila hemwe miyaka jila jiwele chila chinhu nachiwifigwa na nzije vilundo kwa vilundo, chila chinhu chilichile na nzije zilingunomoka na nzije zilinguwifya na nzije zilingutemanga, acho chilundo chikulu cha wamizi chondiwagalile.
JOE 2:26 Mopata chilyo chinji cha kuhega, molitogola itagwa lya Mkulu Nguluwi, Nguluwi wa hemwe, yaditile mbuli za kububuwaza kwa hemwe. Wanhu wa heni, mazuwa gose hawobezigwa kahi.
JOE 2:27 Ahyo movizela kota heni nda hamwe na hemwe, hemwe Waisilaeli, kota heni Mkulu Nguluwi, ndo Nguluwi wa hemwe, haduhu yunji. Wanhu wa heni, mazuwa gose hawobezigwa kahi.
JOE 2:28 “Hamba ndowapa muhe wa heni wanhu weng'ha. Wana wa hemwe wadala na walume wolavya uloli, wasekulu wa hemwe wolota kahi, na wasongolo wa hemwe wowona ulotezi.
JOE 2:29 Mbaka vitumagwa walume na wadala, ndowapa muhe wa heni mhela awo.
JOE 2:30 Ndolavya ulajilo kilanga na kuli isi, kowa na danda na chiluli na milingo ja iyosi.
JOE 2:31 Isanya lyowichigwa jiza, na nyelezi yowa ndung'hu kota danda, Kung'hali kuya kwa zuwa lya Mkulu Nguluwi, zuwa liwele ndo likulu na lya kukabusa.
JOE 2:32 Ahyo wanhu weng'ha howolanda kwa itagwa lya Mkulu Nguluwi woloholigwa. Kwa vila kuli chidunda cha Siyoni na Yelusalemu, kowa na wanhu wasigale wakomu, wala wawele nandiwachema heni Mkulu Nguluwi.
JOE 3:1 “Mhela awo na mazuwa ago hondihilusa lutogo lwa Yuda na Yelusalemu,
JOE 3:2 ndowakungajiza wanhu wa isi zeng'ha, ndiwegale kuli ibindi lichemigwe, ‘Mkulu Nguluwi yataguse.’ Ako ndowatagusa wanhu wa isi azo, kwa mbuli zowawaditile wanhu wa heni Isilaeli, wawele ndo uhalizi wa heni. Kwa vila wanhu wa isi azo nawawasambalula kuli isi, na kuigawanula isi ya heni
JOE 3:3 na kigawila wanhu wa heni kwa simbi. Nawawaguza wasongolo leka wawagule wang'hondwa na wahinza leka wagule divai.”
JOE 3:4 Mkulu Nguluwi kangulonga na isi zinji, “Mwangugana kundita choni hemwe Tilo na Sidoni na honhu heng'ha ha Filistiya? Ndaze, mwanacho chibida kwa heni chomlingugana kunyhilulila? Wone mwanguhilusa chibida, nani ndowahilulila baho du!
JOE 3:5 Namhola sendi na zahabu ya heni na kupika vinhu vya heni vya sendi nyinji mbaka kuli ng'handa za milungu ja hemwe.
JOE 3:6 Namuwahilika wanhu wa Yuda na Yelusalemu kutali na isi ya hewo, namuwaguza kwa Wagilichi.
JOE 3:7 Lelo ndowahilusa wanhu wa heni kulawa ako komuwaguzile. Ndohilula chibida kwa hemwe kwa geng'ha gomuwaditile.
JOE 3:8 Wana wa hemwe walume na wadala ndowadita waguzigwe kwa wanhu wa Yuda, nawo wowaguzila Washeba, wanhu wa isi ya kutali ng'hatu. Heni Mkulu Nguluwi nandonga.”
JOE 3:9 Muwawikulile wanhu wa isi azo mbuli ayi, “Miwiche goya kwa ngondo, muwacheme wadahile kitowa ngondo wa hemwe, wamizi weng'ha wekungajize, walute kumwando.
JOE 3:10 Mihuka ja hemwe mjidite jiwe mipanga, sengo za hemwe ziwe migoha. Yawele ng'hochele yalonje, ‘Heni kahi ndina mong'ho wa kitowa.’
JOE 3:11 Muye himahima, hemwe wanhu wa isi za habehi, mikungajize ako kuli ibindi.” Gwa Mkulu Nguluwi, Wamizi wa hegwe waduliche hali hewo.
JOE 3:12 Lelo wanhu wa isi zeng'ha wewiche goya, woye kuli ibindi lichemigwe, “Mkulu Nguluwi yataguse.” Ako, heni Mkulu Nguluwi, ndochikalisa kuwatagusa wanhu wa isi zeng'ha za habehi.
JOE 3:13 Lelo, mhole sengo kwa chiwalo cha kubeta, kwa vila awu ndo mhela wa kubeta. Mwinjile! Muwaponde kota zabibu, ziwele zimemile hali honhu ha kugongomanyila divai. Wihe wa hewo ndo winji lukami kota mibiga jimemile lukami.
JOE 3:14 Wangufika vilundo kwa vilundo kuli ibindi lya kutagusa, kwa vila zuwa lya Mkulu Nguluwi lya habehi.
JOE 3:15 Isanya na nyelezi vyanguwichigwa jiza, nhondwe nazileka kulavya lumuli.
JOE 3:16 Mkulu Nguluwi kangubuma ako Siyoni, lizi lya heye lyanguhulikwa kulawa Yelusalemu, ulanga na isi vyangukakama. Ila Mkulu Nguluwi ndo honhu ha kubilimila kwa wanhu wa heye, ndo ngome ya kulohola ukomu kwa wanhu wa Isilaeli.
JOE 3:17 “Gwa Isilaeli, kovizela kota heni Mkulu Nguluwi, Nguluwi wa hegwe, ndangikala Siyoni, chidunda cha heni chelile, Yelusalemu wowa muji welile, wamizi wajenzi hawokola kahi amo.
JOE 3:18 Mhela awo vidunda vyolavya divai inyale, vigongo vyolavya itombo. Nzanda zeng'ha za Yuda zomema mazi, nzasa yolawila kuli ng'handa ya Mkulu Nguluwi, na kulimizila ibindi lya Shitimu.
JOE 3:19 Misili yowa chihame, Edomu yowa kugunuche, kwa vila nawawatowa wanhu wa Yuda nawawakopola wanhu walihela nongwa.
JOE 3:20 Ila wanhu wochikala kwa kikala goya ako Yuda mazuwa gose, na Yelusalemu lulelo lweng'ha.
JOE 3:21 Ndowatowa wala wawele nawabohola danda ya wanhu wa Yuda siwaleka wawele na nongwa. Heni Mkulu Nguluwi ndilingikala Siyoni.”
AMO 1:1 Ulonzi wa Amosi, yumwe wa wadimi wa kuli muji wa Tekowa. Nguluwi nakamgubulila Amosi uloli weng'ha kuwala Isilaeli, miyaka mili kung'hali kulawila limachinyina, mhela Usiya vyoyawele mndewa wa Yuda na Yeloboamu, mwana wa Yoashi, vyoyawele mndewa wa Isilaeli.
AMO 1:2 Amosi nakalonga hino, “Mkulu Nguluwi kangubuma kulawa kuli chidunda cha Siyoni, kangulandula lizi kulawa Yelusalemu, mbaka honhu ha kudimila migongolo hangukala, misolo ja kuli chidunda cha Kalimeli janguswinha.”
AMO 1:3 Mkulu Nguluwi kangulonga hino, “Wanhu wa Damasiko nawalutilila kudita gehile, ahyo, sileka kuwagaza, nawawadumya ng'hatu wanhu wa Gileadi.
AMO 1:4 Lelo, ndodulisa chiluli kuli ng'handa ya mndewa Hasaeli, nacho chozilakaza ng'hatu ngome za mndewa Beni-hadadi.
AMO 1:5 Ndobenanga lwizi lweng'ha lwa muji wa Damasiko, na kuwosa walingikala kuli ibindi lya Aweni, hamwe na chilongozi wa Beti-edeni. Wanhu wa Alamu wohilikwa kuli isi yinji ya Kili. Heni Mkulu Nguluwi nandonga.”
AMO 1:6 Mkulu Nguluwi kangulonga hino, “Wanhu wa Gasa nawalutilila kudita gehile, ahyo sileka kuwagaza. Nawawahilika wanhu wa miji jeng'ha, nawawaguza leka wawe wapogozi ako Edomu.
AMO 1:7 Lelo, ndodulisa chiluli kuli ng'hanzi za muji wa Gasa, nacho chozilakaza ng'hatu ngome za muji awo.
AMO 1:8 Ndowosa walingikala kuli muji wa Ashidodi, hamwe na chilongozi wa Ashikeloni. Ndogolola moko kuli Ekiloni, Wafilisti weng'ha wasigale wobagama. Heni Mkulu Nguluwi Mbele na Ludali nandonga.”
AMO 1:9 Mkulu Nguluwi kangulonga hino, “Wanhu wa Tilo nawalutilila kudita gehile, lelo sileka kuwagaza. Nawawahilika wanhu wa miji jeng'ha mbaka Edomu, leka wawe wapogozi, nawalibelenhuka ilagano lya goloko lyowaliditile.
AMO 1:10 Lelo, ndodulisa chiluli kuli ng'hanzi za muji wa Tilo, na kuzilakaza ng'hatu ngome za muji awo.”
AMO 1:11 Mkulu Nguluwi kangulonga hino, “Wanhu wa Edomu nawalutilila kudita gehile, ahyo sileka kuwagaza. Nawaluta kwa wang'holozawo Waisilaeli kwa mipanga, nawosa ng'hatu isungu lya hewo lyeng'ha lya chilukolo. Ng'halazi ya hewo haiwele ya kuduma, nawaileka ikwaka mazuwa gose.
AMO 1:12 Lelo, ndodulisa chiluli kuli ng'hanzi za muji wa Temani, na kuzilakaza ng'hatu ngome za Bosila.”
AMO 1:13 Mkulu Nguluwi kangulonga hino, “Wanhu wa Amoni nawalutilila kudita gehile, ahyo sileka kuwagaza. Kuli ngondo ya hewo ya kuihola isi, nawawatubula wadala wawele na himila kuli isi ya Gileadi.
AMO 1:14 Lelo, ndodulisa chiluli kuli ng'hanzi za muji wa Laba, na kuzilakaza ng'hatu ngome zake. Zuwa alyo lya ngondo kowa na iyowe likulu, na kitowa kowa kukulu kota chivuluvumbi.
AMO 1:15 Mndewa wa hewo na vilongozi wa heye, weng'ha wohilikwa kuli isi yinji. Heni Mkulu Nguluwi nandonga.”
AMO 2:1 Mkulu Nguluwi kangulonga hino, “Wanhu wa Moabu nawalutilila kudita gehile, ahyo sileka kuwagaza. Hawamditile goya mndewa wa Edomu yabagame nawajilakaza ng'hatu kwa chiluli mizeje ja heye mbaka najiwa kota chokaa.
AMO 2:2 Lelo, ndodulisa chiluli kuli isi ya Moabu, na kuzilakaza ng'hatu ngome za muji wa Kelioti. Wamizi vyowolandula lizi lya hewo na kupemba mhalamhanda, wanhu wa Moabu wobagama kuli iyowe alyo lya ngondo.
AMO 2:3 Kahi, ndomkopola chilongozi wa Moabu, hamwe na vilongozi weng'ha wa isi ayo. Heni Mkulu Nguluwi nandonga.”
AMO 2:4 Mkulu Nguluwi kangulonga hino, “Wanhu wa Yuda nawalutilila kudita gehile, ahyo sileka kuwagaza. Hawagakundile malajizo ga heni Mkulu Nguluwi, ne kuwinza mizilo ja heni. Nawajilizwa na milungu jijila jowajikundile wasekulu wa hewo.
AMO 2:5 Lelo, ndodulisa chiluli kuli isi ya Yuda, na kuzilakaza ng'hatu ngome za Yelusalemu.”
AMO 2:6 Mkulu Nguluwi kangulonga hino, Waisilaeli nawalutilila kudita gehile, ahyo sileka kuwagaza. Nawawaguza wanhu watanganiche kwa vila hawawezile kuhilusa vinhu vyowalingudaigwa, na kuwaguza wazunwa wawele nawalemwela kuhilusa sendi zowalingudaigwa kwa chiwalo cha makwamba.
AMO 2:7 Wanguwatunyaga na kuwabunza ng'hochele, na kuwabagula wazunwa, leka walemwele kupata hachi za hewo. Mhaza na msongolo wa heye wanguwasa na chitumagwa mdala yumwe, ahyo wangulidita itagwa lya heni lyelile liwe likokomoche.
AMO 2:8 Honeche hawele na honhu ha kulavila nhambiko, wanhu wanguwasilaga nguwo zowaholile kulawa kwa wazunwa kota lehani zowalingudaigwa, na kuli ng'handa ya Nguluwi wa hewo wangunwa divai yowaiholile kwa walinguwadai.
AMO 2:9 Ahyo, hemwe wanhu wa heni, kwa chiwalo cha hemwe, nandiwadumya ng'hatu Waamoli wawele nawali ng'wemang'wema kota mielezi, wawele na mong'ho kota migodi ja mialoni. Ena, nandiwadumya, nhagala na mizabi.
AMO 2:10 Nandiwalavya hemwe kulawa kuli isi ya Misili, nandiwalongoza hemwe kwa kukolela kuli chiwala kwa miyaka makumi gane, mbaka namuihola isi ya Waamoli naiwa ya hemwe.
AMO 2:11 Nandiwahagula wamwe wa wana wa hemwe wawe waloli, na wamwe wa wasongolo wa hemwe wawe Wanazili. Ndaze, hemwe Waisilaeli, aga gondilingulonga hagawele ga kukomya? Heni Mkulu Nguluwi nandonga.
AMO 2:12 Ila hemwe namuwadita Wanazili wanwe divai, na kuwalajiza waloli waleche kulavya uloli.
AMO 2:13 “Lelo, ndowadwika mhomholo ng'hulu ng'hatu, kota mutuka umemile nyhule.
AMO 2:14 Walingubilima goya hawoweza kusulupuka, wawele na mong'ho hawowa na mong'ho kahi, na wamizi wolemwela kulohola ukomu wa hewo.
AMO 2:15 Walingutoza upinde kuli ngondo wobilima, wawele goya kubilima hawoweza kiyamila, wakwina falasi wolemwela kulohola ukomu wa hewo.
AMO 2:16 Mbaka wamizi wazidahe ng'hatu, zuwa alyo wobilima wawele mwanzi. Heni Mkulu Nguluwi nandonga.”
AMO 3:1 Hemwe Waisilaeli, muuhulichize ulonzi uwele Mkulu Nguluwi woyalonjile kwa chiwalo cha hemwe, hemwe wanhu weng'ha wa isi yawalavile kuli isi ya Misili.
AMO 3:2 Nakalonga ahi, “Hali wanhu wa isi zeng'ha, hemwe ndo ndiwahagule. Ahyo ndowagaza hemwe, kwa chiwalo cha gehile ga hemwe geng'ha.”
AMO 3:3 Ndaze, wanhu weli wokwaluka majendo hamwe, ne kikundiza tandi?
AMO 3:4 Ndaze, isimba lyangubumaga kisolo kuno lyahela chilyo? Ndaze, isimba lyoweza kubuma kuli mhalika ya heye kuno halibatile chinhu?
AMO 3:5 Ndaze, idiwa ne nyhule lyogwiliza chideje? Ndaze, idiwa lyangugwilizaga ne kudolizwa na chinhu?
AMO 3:6 Ndaze, mhalamhanda ya ngondo hoipembigwa kuli muji, wanhu hambe wadumbe? Ndaze, muji wangufichigwa na kubagama kohakugaligwe na Mkulu Nguluwi?
AMO 3:7 Ndikomya, Mkulu Nguluwi hambe yadite chinhu ne kuwagubulila vitumagwa wa heye waloli kunuwila kwa heye.
AMO 3:8 Wone isimba libume, whaani halingudumba? Wone Mkulu Nguluwi yalonje, whaani yoleka kulavya uloli?
AMO 3:9 Muwikule kuli ng'handa za mndewa wa Ashidodi, na kuli ng'handa za mndewa za isi ya Misili. “Mikungajize kuli vidunda vilinguizunguluta isi ya Samaliya, mkalole lunhwinhwi lukulu na kubunza kulingukoleka amo.”
AMO 3:10 Mkulu Nguluwi kangulonga hino, “Wanhu wano nawazimemeza ng'handa za hewo vinhu vya kuhiza na kuboka. Hawavizelele ng'hatu kudita ganojile!
AMO 3:11 Ahyo, mng'honyo koizunguluta isi ya hewo, kobomola honhu hawo ha kiyamila, na kuzihola ngome za hewo.
AMO 3:12 Kota mdimi vyoyalingulisukula isimba kuli mlomo magulu meli hela ama chihande cha ikutu lya ing'holo, ahyo ndo vyowosulupuka wanhu wachefu hela wa Isilaeli walingikala Samaliya. Wosigala na itendego lya chinhanda na honhu hado ha chigoda.”
AMO 3:13 Mkulu Nguluwi Yawele na Mong'ho kangulonga hino, “Mhulichize, mkawakanye walelwa wa Yakobo.
AMO 3:14 Zuwa londiwadumya Waisilaeli kwa chiwalo cha gehile ga hewo, ndowifya chila honhu ha kulavila nhambiko kuli muji wa Beteli. Ndobena mbalati za chila honhu ha kulavila nhambiko na kuzigwisa.
AMO 3:15 Ndoziwifya ng'handa zeng'ha za kuli muji na vijiji, ndozibomola ng'handa zinolijigwe kwa mbalati, ng'handa ng'hulu haisigala ne imwe. Heni Mkulu Nguluwi nandonga.”
AMO 4:1 Mhulichize ulonzi awu, hemwe wadala muwele namneneha kota misenga ja Bashani muwele ako kuli chidunda cha Samaliya, hemwe mlinguwagaza ng'hochele, mlinguwabunza wazunwa, na kuwalonjela walume wa hemwe, “Mtigalile divai tunwe!”
AMO 4:2 Heni Mkulu Nguluwi mbele yelile nandilaha, “Lole, mhela wanguya, uwele moholigwa na ndoano, chila yumwe wa hemwe kota somba kuli ndoano.
AMO 4:3 Mobulunwa mbaka kuli lukanzi lubomoligwe, motozigwa kunze kulutila Halimoni. Heni Mkulu Nguluwi ndangulonga.
AMO 4:4 “Hemwe Waisilaeli, mlute ako Beteli mkabelenhuche, mlute Giligali leka mlutilile kudita gehile. Mlavye nhambiko za hemwe chila mitondo, na zaka za hemwe chila zuwa lya kadatu.
AMO 4:5 Mlavye mibumunda jiwichigwe usaso kota nhambiko ya kulonga malumbo, mitogole kuwala nhambiko za hemwe za kunuwila, mdite ahyo kwa chiwalo cha nhambiko azo, hemwe Waisilaeli, kwa vila acho ndo chomlingugana kudita. Heni Mkulu Nguluwi nandonga.
AMO 4:6 “Siwapele chilyo, nanyambuza lufemba kuli chila muji, ila mng'hali mwangulema kunyhiluchila.
AMO 4:7 Kahi nandiilemeza nhonya myezi jidatu kung'hali mhela wa mbena. Nandiidita nhonya itowe kuli muji umwe, ila nandiilemeza kutowa kuli miji jiyage. Mgunda umwe naupata nhonya, wunji haupatile, nawo naukala.
AMO 4:8 Wanhu nawalubaluba kulawa muji umwe mbaka uyage kupala mazi, ila hawapatile ga kuhega kunwa, ila mng'hali mwangulema kunyhiluchila. Heni Mkulu Nguluwi nandonga.
AMO 4:9 “Nandiwagaza kwa kuvitowa vigunda vya hemwe na migunda ja hemwe ja mizabibu kwa lungwi, nzije nazilya mitini na mizeituni ja hemwe, ila mng'hali mwangulema kunyhiluchila.
AMO 4:10 Nandiwagalila hemwe magazo kota gala gondigahiliche kula Misili. Nandiwakopola wasongolo wa hemwe kuli ngondo, nandiwahola falasi wa hemwe wa ngondo. Mitufi najimema kuli kambi za hemwe, na kunhung'ha kwa ajo nakwali hali mhenyelo za hemwe. Ila mng'hali mwangulema kunyhiluchila.
AMO 4:11 Nandiwagwisa wamwe wa hemwe kwa kuwadumya kota vyondizidumile Sodoma na Gomola. Wala wasulupuche hali hemwe, nawali kota ngoda iloholigwe kuli chiluli. Ila mng'hali mwangulema kunyhiluchila.
AMO 4:12 Lelo, ago ndo gondiwaditila Waisilaeli. Kwa vila ndodita mbuli ayo, ahyo miwiche goya kubochela utaguso wa Nguluwi wa hemwe!”
AMO 4:13 Nguluwi ndo yaviditile vidunda, na kulumba mbeho, ndo yamzelese munhu majesa ga heye, ndo yalingugalusa nemisi kuwa nechilo, na kubiga vinhembenhembe vya isi. Mkulu Nguluwi Yawele na Mong'ho ndo itagwa lya heye!
AMO 5:1 Mhulichize kulombocheza kwa heni hali hemwe, hemwe Waisilaeli.
AMO 5:2 Nakugwa na haukwinuka kahi hegwe mhinza Isilaeli! Nakulechigwa uliyeka kuli isi ya hegwe, haduhu wa kukwinula.
AMO 5:3 Kwa vila Mkulu Nguluwi kangulonga hino, “Wanhu elufu imwe wolawa mujini kuluta kitowa kwa chiwalo cha Isilaeli, ila wohiluka miya imwe hela, wokuka wanhu miya imwe wa chijiji chimwe, ila wosulupuka wanhu kumi hela.”
AMO 5:4 Mkulu Nguluwi kanguwalonjela hino Waisilaeli, “Mumhale, namwe mochikala!
AMO 5:5 Ila mleche kumhala ako Beteli ne kuluta Giligali ne kuloka kuluta Beeli-sheba. Kwa vila walingikala Giligali, ndikomya, wohilikwa kuli isi ya chijenzi, na Wabeteli wodumigwa!”
AMO 5:6 Mumpale Mkulu Nguluwi namwe mochikala! Wone haiwa ahyo, heye kowalakaza walelwa wa Yusufu, chiluli chowalakaza walingikala Beteli haduhu yoweza kuchizima.
AMO 5:7 Hemwe mlingugalusa hachi kuwa usungu na kuigwisa hachi.
AMO 5:8 Heye yaviditile vilundo vya nhondwe vya Kilimiya na Olioni, yalingugalula jiza ng'hulu kuwa kubwemwenzuka, na nemisi kuwa nechilo, yalingugachema hamwe mazi ga bahali na kugabohola mchanya mwa isi. Mkulu Nguluwi ndo itagwa lya heye.
AMO 5:9 Heye ndo yalinguwadumya wawele na mong'ho baho du, na kuziwifya ngome za hewo.
AMO 5:10 Mwangumzudila yula yalinguilewela hachi, na kumbeza yula yalingulonga kukomya.
AMO 5:11 Mwanguwabunza wazunwa na kuwadita wawape hemwe nyhule kwa lupichi. Ahyo, hanga namzenga ng'handa za maganga ga sendi nyinji, hamchikala mgati mwake, hanga namnyala nyhadikwa kuli migunda jinojile ja mizabibu, ila hamuweza kunwa divai yake.
AMO 5:12 Kwa vila ndanguizela hisabu ya nongwa za hemwe, na ukulu wa gehile ga hemwe. Namuwabunza watanganiche na kubochela chinhu kwa uviso leka kwajiliza hachi, na kulemeza hachi ya mzunwa kuli chitala,
AMO 5:13 lelo, munhu yawele na luhala kanguwaga yonyamalila kuli mhela kota awo, kwa vila mhela awo ndo wihile.
AMO 5:14 Mpale kudita ganojile ne kudita gehile, leka mikale. Hamba, Mkulu Nguluwi Yawele na Mong'ho, yawe hamwe na hemwe kota vyomlingulonga.
AMO 5:15 Mzudile wihe, mgane kunoga, na kulutilila kudita hachi kuli chitala. Mkulu Nguluwi Yawele na Mong'ho kowalajila isungu lya heye wanhu wa Yusufu wasigale.
AMO 5:16 Lelo, Mkulu Nguluwi Yawele na Mong'ho, ena, Mkulu Nguluwi kangulonga, “Kowa na chililo chila honhu kuli muji, wanhu wolombocheza, ‘Tochona! Tochona!’ Walimi wochemigwa woye kulombocheza, na walingupegwa sendi kwa chiwalo cha kulombocheza, woye kulombocheza.
AMO 5:17 Kowa na chililo kuli migunda jeng'ha ja mizabibu, kwa vila ndokola hali hemwe kuwagaza. Heni Mkulu Nguluwi ndangulonga.”
AMO 5:18 Mochona hemwe mlingulibeteza kwa maya zuwa lya Mkulu Nguluwi! Lekachoni mwanguligana ng'hatu zuwa alyo? Zuwa alyo, lyowa zuwa lya jiza na haliwa na lumuli!
AMO 5:19 Lyowa kota vila munhu yalingulibilima isimba, hamba kangiting'hana na idubu! Ama kota munhu yalinguhiluka kaye kwa heye, na kuwika moko kuli lukanzi na kulumigwa na izoka.
AMO 5:20 Zuwa lya Mkulu Nguluwi lyowa na jiza na haliwa na lumuli, lyowa lya masinzo ne lumuli loneche.
AMO 5:21 Mkulu Nguluwi kangulonga hino, “Ndanguzizudila na kuzibeza mnvina za hemwe, hambe sangalale na nhing'hano za hemwe.
AMO 5:22 Homndavila nhambiko za hemwe za kulakazwa na nhambiko za nyhule, sikunda kuzibochela, na nhambiko za hemwe za kikala goya za milogota jinonile sizilola ne hado.
AMO 5:23 Muse iyowe lya lwimbo lwa hemwe hali heni! Silingugana kuhulichiza muzichi wa ving'weleng'wele vya hemwe!
AMO 5:24 Ila mleche hachi ichililiche kota mazi, kutanganika kuwe kota lwanda luwele hambe lukale.
AMO 5:25 “Hemwe Waisilaeli, mhela wula womuwele kula kuli chiwala kwa miyaka makumi gane, ndaze, namingalila nhambiko na ndolendole ne kamwe?
AMO 5:26 Mhela awo nampika jimalukolo ja Sakuti, mndewa wa hemwe na jimalukolo ja Kaiwani, mlungu wa hemwe wa nhondwe, vinhu viwele namigongomanyila mwemwe leka mvifugamile.
AMO 5:27 Ahyo ndowahilika hemwe kuli isi ya chijenzi, kutali kusinda Damasiko!” Mkulu Nguluwi, yawele itagwa lya heye ndo Mkulu Nguluwi Yawele na Mong'ho, nakalonga.
AMO 6:1 Mochona hemwe mlingwesela ako Siyoni, namwe mlingiwona kota mwa kuli kikala goya kuli chidunda cha Samaliya! Mwangijesa kota ndo vilongozi wa wanhu wa isi ilinguzeleka, wawele Waisilaeli weng'ha wangitumbila kwa hemwe.
AMO 6:2 Ena! Mlute Kaline mkalole chila honhu, mlawe ako mlute mbaka muji wula ukulu wa Hamati, hamba mduliche mbaka Gati kwa Wafilisti. Ndaze, ulongozi wa hewo hauwele unojile kusinda wa hemwe na honhu ha hewo hakuwele kunojile kusinda ha hemwe?
AMO 6:3 Mwangujeza kuliwinga zuwa lihile, ila madito ga hemwe ganguligala habehi.
AMO 6:4 Mochona hemwe mlinguwasa hali vinhanda vya mbalati za itembo na kigolola hali vigoda vinojile, kuno mulya miwunde ja ming'holo myana na ilogota!
AMO 6:5 Mwangugana kwimba kwa lizi lya ving'weleng'wele na kijesa kugongomanya vinhu vinyale vya muzichi na kudita kota Daudi.
AMO 6:6 Mwangunwa divai kwa visaye, na kibakaliza mafuta ganojile ng'hatu. Ila hamlingijesa ne hado kuwala kudumigwa kwa walelwa wa Yusufu, wawele ndo Waisilaeli.
AMO 6:7 Ahyo mowa wa mwaluko kuhilikwa kuli isi ya chijenzi, na mnvina za wagata zowa haduhu.
AMO 6:8 Mkulu Nguluwi nakelaha kwa nhumbula ya heye, Mkulu Nguluwi Yawele na Mong'ho kangulonga, “Ndanguzudizwa ng'hatu na kidaya kwa walelwa wa Yakobo, kahi ndanguzizudila ngome za hewo zinojile. Muji wa hewo na vyeng'ha viwele amo ndowapa wang'honyo wa hewo.”
AMO 6:9 Wone wosigala wanhu kumi kuli ng'handa imwe kwa kikala goya, wobagama.
AMO 6:10 Hoyokuya mng'holoze yula yabagame leka yalavye itufi leka yalilakaze, yomuuza yoneche yawele mng'handa, hafungo mwa ng'handa, “Ndaze, hana munhu yoneche amu?” Naye komwidichila, “Hebu! Kuduhu!” Naye komwidichila, “Unyamalile! Tuleche kulonga ne itagwa lya Mkulu Nguluwi.”
AMO 6:11 Lole! Mkulu Nguluwi kangulavya mzilo, ng'handa ng'hulu yogwa na kubeneka vihande vihande na ng'handa ndodo yobalaswa.
AMO 6:12 Ndaze, falasi woweza kubilima kuli mhalika ndodo? Ndaze, wanhu wangulima kuli bahali kwa mibuguma? Ila, hemwe namuigalula hachi kuwa dunga, na kutanganika kuwa usungu.
AMO 6:13 Hemwe mlingusangalala kwa kulemwela kwa Lo-debali, na kulonga namuuhola muji wa Kalinaimu kwa mong'ho wa hemwe,
AMO 6:14 Mkulu Nguluwi Yawele na Mong'ho kangulonga hino, “Hemwe Waisilaeli, ndikomya, ndowegala wanhu wa isi imwe woye kuwatowa hemwe, nawo wowagaza hemwe kulawa Lebo-hamati kasikazini, mbaka kuli chikolola cha Alaba, ubanzi wa kusini.”
AMO 7:1 Zuwa limwe Mkulu Nguluwi nakandajila kulota. Nandimona Nguluwi yolumba chilundo cha nzije, hala wanhu vyowasindile kutema misolo ja migongolo ja mndewa. Mhela awo, misolo najali jikwaluka kuzuka kahi.
AMO 7:2 Nandizona nzije azo ziwele zidile chila izuchila kuli isi. Ahyo nandonga, “Gwa Mkulu Nguluwi, ndangukulanda utulechele! Walelwa wa Yakobo woweza ndaze kikala? Hewo ndo wadodo lukami!”
AMO 7:3 Lelo, Mkulu Nguluwi nakagalula kunuwila kwa heye, nakalonga, “Haiwa ahyo!”
AMO 7:4 Mkulu Nguluwi nakandajila kahi kulota. Nandimona Mkulu Nguluwi yochichema chiluli cha utaguso. Chiluli acho nachilakaza mgati ng'hatu mwa mazi ga bahali, hamba nachaluka kulakaza isi ng'havu.
AMO 7:5 Ahyo nandonga, “Gwa Mkulu Nguluwi, ndangukulanda uleche kugaza! Walelwa wa Yakobo woweza ndaze kikala? Hewo ndo wadodo lukami!”
AMO 7:6 Lelo Mkulu Nguluwi nakagalula kunuwila kwa heye, yolonga, “Ali kahi halilawila.”
AMO 7:7 Mkulu Nguluwi nakandajila kahi kulota kunji. Nandimona Mkulu Nguluwi yemile habehi na lukanzi, mmoko mwa heye yebate uzi wa kupimila lukanzi.
AMO 7:8 Naye nakambuza, “Amosi, kwangona choni?” Nandimwidichila, “Ndanguwona uzi wa kupimila.” Hamba Mkulu Nguluwi nakalonga, “Lole! Ndanguuwika uzi wa kupimila hali wanhu wa heni Waisilaeli. Sikwimilila kahi wihe wa hewo.
AMO 7:9 Ako hali honhu ha kufugamila milungu hawele walelwa wa Isaka wangulavyaga nhambiko howifigwa na honhu helile ha Waisilaeli howa mahame. Ndolutowa kwa ngondo lukolo lwa mndewa Yeloboamu.”
AMO 7:10 Lelo, Amasiya mtambika wa muji wa Beteli, nakamhilichila Yeloboamu, mndewa wa Isilaeli mbuli azi, “Amosi kangulonga vibi kuwala hegwe kuli undewa wa Isilaeli. Wanhu wa isi ayi wokabuswa kwa ulonzi wa heye.
AMO 7:11 Choyalingulonga Amosi ndo achi, ‘Yeloboamu kobagama kwa ipanga nawo Waisilaeli wohilikwa kuli isi ya chijenzi, kutali ng'hatu na isi ya hewo.’ ”
AMO 7:12 Hamba Amasiya nakamlonjela Amosi, “Lelo natukutoka, gwa mloli! Wuche! Uhiluche kuli isi ya Yuda, ulavye uloli ako na upegwe sendi kuko.
AMO 7:13 Uleche kulavya uloli kahi hano Beteli, kwa vila hano ndo honhu ha kufugamila mndewa, ndo ng'handa ya undewa kuli ulongozi awu.”
AMO 7:14 Amosi nakamwidichila Amasiya, “Heni siwele mloli wa kupegwa sendi na siwele yumwe wa chilundo cha waloli, ila nda mdimi na yalingulolela mikuyu.
AMO 7:15 Mkulu Nguluwi nakandavya kulawa kuli mijito ja heni ja udimi, nakandonjela mbuye kuwalonjela uloli wanhu wa heye wa Isilaeli.
AMO 7:16 Lelo hegwe Amasiya, uhulichize ulonzi wa Mkulu Nguluwi. Kwangundonjela ndeche kulavya uloli kuwala Isilaeli, ne kudamla hali walelwa wa Isaka.
AMO 7:17 “Ahyo, Mkulu Nguluwi kangulonga hino, ‘Mchewako kowa mng'hondwa kuli muji, na wana wa hegwe walume na wadala wobagama kuli ngondo. Isi ya hegwe yogawilwa kwa wanji, nagwe kobagama kuli isi ya chijenzi, nawo Waisilaeli, ndikomya wohilikwa kuli isi ya chijenzi, kutali ng'hatu na isi ya hewo.’ ”
AMO 8:1 Mkulu Nguluwi nakandajila kahi kulota. Nambona chikowe chimemile mafuza ga chipalangule.
AMO 8:2 Naye Mkulu Nguluwi nakambuza, “Amosi, kwangona choni?” Heni nandimwidichila, “Ndanguchona chikowe cha mafuza ga chipalangule.” Hamba Mkulu Nguluwi nakandonjela, “Kuduma nakuwafichila wanhu wa heni wa Isilaeli. Sikwimilila kahi wihe wa hewo.”
AMO 8:3 Mkulu Nguluwi kangulonga, “Kuli zuwa alyo, nzimbo za ng'handa ya Nguluwi zowa ndo kulombocheza. Kowa na mitufi minji, najo jotozigwa kunze. Kowa tulu ng'hatu.”
AMO 8:4 Mhulichize hemwe mlinguwabunza ng'hochele na kuwegalila kubagama wazunwa wa isi.
AMO 8:5 Mwangilonjela mnhumbula za hemwe, “Mnvina ya kulawa kwa nyelezi yomala nili leka twaluche kahi kuguza nyhule za hetwe? Zuwa lya Kwesela lyomala nili leka tuguze ngano ya hetwe? Topungula vipimilo na konjeza bei, ahyo towahada wanhu kwa vipimilo vyohaviwele goya,
AMO 8:6 na kuguza miwewezi jiwele hamwe na ngano. Toweza kuwagula wazunwa kwa sendi, na wawele na magazo kwa makwamba.”
AMO 8:7 Mkulu Nguluwi, Nguluwi wa Isilaeli, nakelaha, “Ndikomya, sigasemwa madito ga hemwe gehile.
AMO 8:8 Ahyo, isi yokakama na chila munhu kuli isi kolombocheza. Isi yeng'ha yotigasika, yokwina na kudulika, kota vyogalingumema na kuka mazi ga lwanda lwa Naili!”
AMO 8:9 Mkulu Nguluwi kangulonga, “Zuwa alyo ndolidita isanya lizinje nemisi, na kuidita nemisi iwe na jiza.
AMO 8:10 Mnvina za hemwe ndozidita kuwa chililo, na lwimbo lwa hemwe lwa kusangalala kuwa kulombocheza. Ndowadita weng'ha mvale migunila kwa masinzo na kubeya mnvili za kumutwi kwa hemwe, kota ndo kulombocheza kwa kubagama kwa mwana wa udewele, na zuwa lya kuduma lyowa lya usungu ukulu.
AMO 8:11 Mhela wanguya uwele ndoigala nzala kuli isi. Ila haiwele nzala na ng'halu ya chilyo na mazi, yowa nzala ya kuhulika ulonzi wa Mkulu Nguluwi.
AMO 8:12 Wanhu wolubaluba kulawa bahali mbaka bahali, kulawa ubanzi wa kasikazini mbaka kolilawilaga isanya. Wobilima aku na ako wopala ulonzi wa Mkulu Nguluwi, ila hawowona.
AMO 8:13 Zuwa alyo, mbaka wasongolo na wahinza wawele na mong'ho, wowa habehi kubagama kwa ng'halu.
AMO 8:14 Wala walingilaha kwa mlungu wa Samaliya, na kulonga, ‘Kwa muhe wa mlungu wa hegwe, gwa Dani, na kwa muhe wa mlungu wa Beeli-sheba,’ weng'ha wogwa na hawokwima kahi mazuwa gose.”
AMO 9:1 Nandimona Mkulu Nguluwi yemile hafungo ha honhu ha kulavila nhambiko, naye nakalonga, “Jitowe ajo mizengo ja ng'handa ya Nguluwi, mbaka misisi jake jitigasiche. Jibene ajo mizengo jiwagwile wanhu kumutwi. Wala wawele wosigala, ndowakopola kwa ipanga, haduhu ne yumwe wa hewo yosulupuka, ena, haduhu yosigala.
AMO 9:2 Howobawa nzila ya kuluta kuli isi ya wabagame, kulawa ako ndowahola kwa moko wa heni. Howokwina kuluta kilanga, ndowadulisa.
AMO 9:3 Howochivisa mchanya mwa chidunda cha Kalimeli, ndowapelemba na kuwebata. Howochivisa kutali na heni, mgati ng'hatu mwa bahali, ndolilonjela izoka lya mbahali liwalume.
AMO 9:4 Howohilikwa kuli isi ya chijenzi na wang'honyo wa hewo, ndolajiza wakopoligwe kwa ipanga. Ndowalola kwa kilolela ng'hatu, leka ndiwagaze, waleche kulutilila goya.”
AMO 9:5 Mkulu Nguluwi Yawele na Mong'ho kalinguidoliza isi nayo yangusungulumuka, na weng'ha walingikala mgati mwake wangulombocheza. Isi yeng'ha yangukwina na kudulika kota kumema na kuka kwa mazi ga lwanda Naili lwa Misili.
AMO 9:6 Mkulu Nguluwi nakazenga haluga ha heye kilanga, isi nakaigubika kwa ulanga. Kangugachemaga mazi ga bahali, na kugabohola mchanya mwa isi ng'havu. Mkulu Nguluwi ndo itagwa lya heye!
AMO 9:7 Mkulu Nguluwi kangulonga hino, “Kwa heni, hemwe Waisilaeli, mwa kota wanhu wa Kushi! Nandiwalavya Wafilisti kulawa Kilete, na Waalamu kulawa Kili, kota vyondiwalavile hemwe kuli isi ya Misili.
AMO 9:8 Heni Mkulu Nguluwi, ndanguulola undewa uwele na gehile, ndoudumya ng'hatu leka ulawe kuli isi. Ila siwadumya walelwa weng'ha wa Yakobo.
AMO 9:9 Kwa vila ndolavya ilajizo, na kuwayugulula Waisilaeli hali wanhu wa isi, kota munhu vyoyalingupembula nyhule, haduhu ne nyhule imwe iwele yolagala.
AMO 9:10 Wawele na gehile weng'ha hali wanhu wa heni, wobagama kwa ipanga kuli ngondo, hanga wangulonga, ‘Kubagama hakuweza kutufika ne kuya kwa hetwe.’
AMO 9:11 “Zuwa lyanguya, hondiyimiza ng'handa ya Daudi igwile. Ndozigongomanya kahi ng'hanzi zake, na kuzenga kahi mahame gake. Ndoizenga kahi kota vyoiwele aho hamwande.
AMO 9:12 Nawo Waisilaeli wowahola Waedomu wasigale na wanhu wa isi zeng'ha wawele wa heni. Heni Mkulu Nguluwi nandonga, ndodita ahyo.”
AMO 9:13 Mkulu Nguluwi kangulonga hino, “Mazuwa ganguya, hala du mhela wa kulima houkola, mbeta nyinji zowa goya kubetigwa. Housinda kunyala mizabibu wokuya mhela wa kubeta zabibu. Divai inyale yochililika kulawa kuli vidunda vikulu, na kuli vidunda vidodo vyeng'ha.
AMO 9:14 Ndowahilula wanhu wa heni Waisilaeli wawele nawahilikwa kuli isi ya chijenzi, wojizenga kahi miji jilechigwe mahame, nawo wochikala mgati mwake. Wonyala mizabibu na kunwa divai yake, wolima migunda na kulya mbena zake.
AMO 9:15 Ndowemiza nzinzili Waisilaeli kuli isi ya hewo wawo, hawokusigwa kahi kulawa kuli isi yondiwapele. Heni Mkulu Nguluwi nandonga.”
OBA 1:1 Kulola kwa Obadiya. Mbuli yoyalonjile, Mkulu Nguluwi Yawele na Ludali kuwala isi ya Edomu. Naitufika mbuli kulawa kwa Mkulu Nguluwi, msenga nakalajizwa kwa wanhu wa isi nyinji, yolonga, “Mwinuche! Tulute tuketowe ngondo na Edomu!”
OBA 1:2 Mkulu Nguluwi nakawalonjela wanhu wa isi ya Edomu, “Mlole! Ndowadita hemwe muwe wadodo hali wanhu wa isi nyinji, mobezigwa ng'hatu na weng'ha,
OBA 1:3 kidaya kwa hemwe nakuwahada, kwa vila muji wa hemwe ukulu ndo ngome ya mitalawe nzinzili na honhu ha hemwe ha mchanya mwa vidunda, ahyo mwangilonjela, ‘Whaani yoweza kutudulisa?’
OBA 1:4 Hanga namguluka kota ikungule, na kikala kuchanya ng'hatu, nani ndowadulisa. Heni Mkulu Nguluwi ndangulonga.
OBA 1:5 Wone wahizi ama walinguboka, nawoyile kwa hemwe nechilo, ndaze, hanawalihola chasi cha kuhega? Wone walingubawa zabibu nawoyile kwa hemwe, ndaze, hanawali kuwalechela chasi chido? Ila, wang'honyo wa hemwe wowadumya ng'hatu.
OBA 1:6 Hemwe walelwa wa Esau, lufufu lwenu nalubochigwa, ng'hano za hemwe zeng'ha naziholigwa.
OBA 1:7 Walingulonga kota wowatanza hemwe, wowahada, wowawinga kuli isi ya hemwe, goloko wa hemwe wowasumya kuli ngondo, womlingikalasa habehi womlingitumbila, wowenjiza hemwe kuli idiwa, hemwe hamvizelele galinguditigwa.
OBA 1:8 Heni Mkulu Nguluwi ndanguwauza hino, Ndaze, zuwa alyo siwadumya wawele na luhala kulawa Edomu, na wawele na kuvizela kulawa kuli chidunda cha Esau?
OBA 1:9 Hemwe wanhu wa Temani, wazidahe kitowa ngondo wa hemwe wodumba, na chila munhu kokopoligwa kuli chidunda cha Esau.
OBA 1:10 “Kwa chiwalo cha madito gehile gomuwaditile wang'holozenu, walelwa wa Yakobo, mobasigwa soni na kudumigwa mazuwa gose.
OBA 1:11 Zuwa lila namwima hafungo kuno mlola hela, mhela wajenzi lowabochile lufufu lwa hewo, ena, wajenzi vyowenjile kuli lwizi lwa hewo, na kigawila lufufu lwa Yelusalemu kwa simbi. Ahyo hemwe namdita kota wala wajenzi.
OBA 1:12 Hanamwali kusechelela zuwa alyo wang'holozenu vyowafichigwe na nongwa, hanamwali sangalala mhela Wayuda vyowadumigwe, hanamwali kidaya mhela wayenu lowawele wogazika.
OBA 1:13 Hanamwali kwinjila kuli muji wa wanhu wa heni, zuwa vyowafichigwe na kubagama kwa hewo ne kusechelela kuli kubagama kwa hewo, ne kuboka lufufu lwa hewo, kuli zuwa lya kubagama kwa hewo.
OBA 1:14 Hanamwali kwima kuli nzila mhanda na kuwebata walingubilima, ne hanamwali kuwapa wang'honyo wa hewo, wala wasigale wakomu.
OBA 1:15 “Zuwa lya habehi, hala heni Mkulu Nguluwi ndozitagusa isi zeng'ha. Kota vyomuwaditile wanji, ndo vyomditilwa, mopegwa kwa kiwhana na madito ga hemwe.
OBA 1:16 Kwa vila kota vyomnwele chizombe cha magazo kuli chidunda cha heni chelile, ndo vyoiwa na isi ziwele habehi vyozinwa, wozebeduka na kugwa, wodumigwa kota vila hawawahiche kuwa kuli isi.
OBA 1:17 “Ila kuli chidunda cha Siyoni wowabaho wala waloholigwe, nacho chowa chidunda chelile. Walelwa wa Yakobo woihola kahi isi iwele ndo ya hewo.
OBA 1:18 Walelwa wa Yakobo wowa kota chiluli na walelwa wa Yusufu kota lumuli lwa chiluli. Wowasumya walelwa wa Esau kota vila chiluli vyochilingulakaza mibeleje jikalile, yaleche kupona ne yumwe. Heni Mkulu Nguluwi nandonga.”
OBA 1:19 Wala walingikala Negebu wochihola chidunda cha Esau, wala walingikala Shefela woihola isi ya Wafilisti. Waisilaeli wozihola isi za Efulaimu na Samaliya na wanhu wa Benjamini woihola isi ya Gileadi.
OBA 1:20 Waisilaeli wawele nawahilikwa kuli isi za Wakanaani, wohiluka na kuhola Foinike mbaka Salefati. Wanhu wa Yelusalemu wawele nawahilikwa Sefaladi, wojihola miji ja Negebu.
OBA 1:21 Walingulohola wokwina mchanya mwa chidunda cha Siyoni, leka kuchihola chidunda cha Esau, naye Mkulu Nguluwi kowa ndo mndewa.
JON 1:1 Zuwa limwe, ulonzi wa Mkulu Nguluwi naumuyila Yona, mwana wa Amitayi, naumlonjela,
JON 1:2 “Wuche ulute Ninawi muji wula ukulu, uudamlile kwa vila nandiwona wihe wa hewo ndo winji lukami.”
JON 1:3 Ila Yona nakaluka majendo, nakakola nzila ya Talishishi leka yewiche kutali na Mkulu Nguluwi. Nakadulika kuli muji wa Yopa, ako nakaifika meli yangugana kuluta Talishishi. Nakalavya sendi za majendo, nakakwina kuli meli na kwaluka majendo na walingwendesa meli, leka yewiche kutali na Mkulu Nguluwi.
JON 1:4 Mkulu Nguluwi nakaidita mbeho ipute ng'hatu mbahali, nachilawila chivuluvumbi chikulu mbaka meli nayali habehi kubeneka.
JON 1:5 Walingwendesa meli weng'ha nawadumba na chila yumwe nakaluka kumlilila mlungu wa heye. Nawatoza mhomolo za hewo mbahali leka kudita itunyo liwe lido. Mhela awo Yona nayali yaduliche mgati mwa chihengo cha meli, nayali yawasile kwa vila nayali na usinjizi ng'hatu.
JON 1:6 Chilongozi wa meli nakamlutila Yona na kumuuza, “Lekachoni kwanguwasa? Ulilimche umlande mlungu wa hegwe hanji kotonela isungu yaleche kutudumya.”
JON 1:7 Walingwendesa meli nawalongasa, “Tutowe simbi leka tuvizele kota mbuli ayi naitufika kwa chiwalo cha whaani.” Lelo nawatowa simbi na kumgwila Yona.
JON 1:8 Ahyo nawaluka kumuuza, “Lekachoni mbuli ayi naitufika? Kwangukola mijito jachi? Nakulawa kohi? Nakulawa kuli isi yachi? Kuli nhanzi yachi?”
JON 1:9 Yona nakawedichila, “Heni nda Muebulaniya, ndangumfugamila Mkulu Nguluwi, Nguluwi wa kilanga, yula yalumbile bahali na isi.”
JON 1:10 Mbuli ayi naiwadita wadumbe, nawo nawamuuza, “Nakudita choni?” Nawauza ahyo kwa vila nawavizela kota kangumbilima Mkulu Nguluwi, kwa vila nayali yawalonjele ahyo.
JON 1:11 Mhela weng'ha awo bahali nayali yonjezeche kutiguka. Lelo nawamuuza Yona, “Tukuditile choni leka bahali isindamale?”
JON 1:12 Yona nakawalonjela, “Mnhoze mbahali, aho ndo bahali yosindamala, kwa vila ndangona chivuluvumbi achi nachiwafika hemwe kwa chiwalo cha heni.”
JON 1:13 Walingwendesa meli nawajeza kahi kwendesa meli leka waifichize mhwani, ila hawawezile kwa vila bahali nayonjezeka kutiguka.
JON 1:14 Nawamlilila Mkulu Nguluwi, wolonga, “Gwa Mkulu Nguluwi twangukulanda uleche kutudumya kwa kuulavya ukomu wa munhu ayu ne kutugaza kwa kubohola danda ya munhu yalihela nongwa, kwa vila hegwe Mkulu Nguluwi nakudita kota vyouganile.”
JON 1:15 Hamba nawamhola Yona na kumtoza mbahali, baho du bahali naisindamala.
JON 1:16 Walingwendesa meli nawamdumba ng'hatu Mkulu Nguluwi, nawelaha na kumlavila nhambiko.
JON 1:17 Hamba Mkulu Nguluwi nakailajiza somba ng'hulu immele Yona. Yona nayali mgati mwa lida lya somba ayo kwa mhela wa mazuwa gadatu.
JON 2:1 Lelo Yona loyawele mgati mwa lida lya somba ayo, nayali yomlanda Mkulu Nguluwi, Nguluwi wa heye,
JON 2:2 yolonga, “Kuli magazo ga heni nandimchema Mkulu Nguluwi, nagwe nakanyhulichiza, kulawa mgati mwa chilaga nandanda utanzi, nagwe nakuhulika kulila kwa heni.
JON 2:3 Kwa vila nakunhoza mgati ng'hatu mwa bahali, hagati ha bahali, mazi naganzunguluta chila ubanzi, nhigu nazikola mchanya mwa heni.
JON 2:4 Nandali ndijesa kota nambikwa kutali na meho ga hegwe, ila ndolola kahi kulutila kuli ng'handa ya hegwe yelile.
JON 2:5 Mazi naganzunguluta, mgati ng'hatu mwa bahali nakunzunguluta chila ubanzi. Mahamba ga mbahali nagangubika kumutwi.
JON 2:6 Nandulika kuli misisi ja vidunda, kuli isi iwele lwizi jake najihindigwa mazuwa gose. Ila hegwe, gwa Mkulu Nguluwi, Nguluwi wa heni, nakunyhilusila ukomu kulawa ako kuli ikulubila.
JON 2:7 Muhe wa heni lowaluche kundeka, nandikulanda, gwa Mkulu Nguluwi, kulanda kwa heni nakukufichila, kuli ng'handa ya hegwe yelile.
JON 2:8 Wanhu walingujifugamila milungu, wangulitoza kutali igano lya kwimilila lya hegwe kwa hewo.
JON 2:9 Ila heni kwa lwimbo lwa kulonga malumbo, ndokulavila nhambiko, na kweneza chilaho cha heni. Ulohozi wangulawa kwa Mkulu Nguluwi.”
JON 2:10 Lelo Mkulu Nguluwi nakailajiza yila somba imdeche Yona, somba naimdeka Yona kuli isi ng'havu.
JON 3:1 Ulonzi wa Mkulu Nguluwi naumuyila Yona lwa keli, naulonga,
JON 3:2 “Ulute Ninawi muji wula ukulu leka uwadamlile wanhu usenga wondikupa.”
JON 3:3 Lelo Yona nakamhulichiza Mkulu Nguluwi, nakaluta Ninawi kota Mkulu Nguluwi vyoyamlajize. Muji wa Ninawi nawali ukulu. Yona nayali kuli muji awo wa Ninawi kwa mazuwa gadatu.
JON 3:4 Yona loyafichile Ninawi, nakajenda kwa zuwa limwe, hamba nakaluka kudamla, “Nagapona mazuwa makumi gane hela, muji wa Ninawi wodumigwa!”
JON 3:5 Lelo wanhu wa Ninawi nawaukunda usenga wa Nguluwi, nawawikula kwesela kulya, wanhu weng'ha kwaluchila mkulu ng'hatu mbaka mdodo lukami. Nawavala mivalo ja migunila kota ulajilo wa kulombocheza kuleka gehile ga hewo.
JON 3:6 Mbuli azi nazimfichila mndewa wa Ninawi, naye nakoka kuli chigoda cha heye, nakavula ivalo lya heye na kuvala ivalo lya igunila na kikalisa kuli mivu.
JON 3:7 Hamba mndewa nakawawikulila wenyeng'haye wa Ninawi yolonga, “Heni mndewa hamwe na wakulu wa heni, ndangulavya mzilo awu, mleche kukunda munhu yoneche ne isenga ne igongolo lyoneche lya kufujigwa, yajeze kulya chinhu choneche. Mlongo kwa munhu yoneche ama igongolo kulya ne kunwa.
JON 3:8 Wanhu weng'ha na migongolo wavale mivalo ja migunila, chila munhu yamlande Nguluwi na kumdedeza kwa nhumbula. Chila munhu yaleche gehile ga heye na wihe wa heye.
JON 3:9 Hanji Nguluwi kogalula kunuwila kwa heye, koleka kutuzudila leka tuleche kudumigwa.”
JON 3:10 Nguluwi vyoyawene ndaze vyowaditile wanhu na kuleka wihe wa hewo, nakagalula kunuwila kwa heye, nakaleka kuwadumya.
JON 4:1 Mbuli ayo haiwele goya kwa Yona ne hado, nakazudila ng'hatu.
JON 4:2 Ahyo nakalanda yolonga, “Mkulu Nguluwi, ndaze, azi haziwele mbuli zizila zombele ndijesa londiwele kaye, kota kozidita? Ndo mina nandita himahima kubilimila Talishishi. Nandivizela kota hegwe ndo Nguluwi wa igano lya kwimilila ng'hatu na isungu na hulinguzudila himahima. Mazuwa gose kwa unojile na kwa goya kugalula kunuwila kwa hegwe mhela woneche leka uleche kugaza.
JON 4:3 Lelo Mkulu Nguluwi ndangukudedeza wuse ukomu wa heni, kwa vila kwa heni fola kubagama kusinda kikala.”
JON 4:4 Mkulu Nguluwi nakamlonjela Yona, “Kwangijesa kwangudita goya kuzudila?”
JON 4:5 Ahyo Yona nakalawa mgati mwa muji na kikalisa ubanzi wa kolilawilaga isanya mwa muji. Nakazenga chibumuli na kikalisa kuli lubehelo lwa chibumuli acho kuno yobeteza chochilawila kuli muji wa Ninawi.
JON 4:6 Nguluwi, Mkulu Nguluwi nakalajiza izuchila lizuche na kukula. Nakamha Yona lubehelo lwa kugubika mutwi wa heye leka kumusila magazo goyawele nago. Yona nakasangalala lukami kwa chiwalo cha lubehelo lwa izuchila alyo.
JON 4:7 Lelo zuwa lya keli lokubwemwenzuche, Nguluwi nakalajiza lung'hwawa iwifye izuchila alyo, hamba izuchila alyo naliswina.
JON 4:8 Isanya vyolilawile, Nguluwi nakegala mbeho ya ivuche kulawa kolilawilaga isanya, isanya nalimlakaza lukami Yona kumutwi, habehi kubagama. Yona nakalonga, “Fola kubagama kusinda kikala.”
JON 4:9 Lelo Nguluwi nakamlonjela Yona, “Ndaze, kwangona kwangudita goya kulizudila izuchila alyo?” Yona nakedichila, “Ena, ndangudita goya kuzudila, kuzudila mbaka kubagama.”
JON 4:10 Mkulu Nguluwi nakamlonjela Yona, “Izuchila ali nalizuka na kukula kwa nechilo imwe, nechilo iyage naliswina. Hegwe hauliditile chinhu choneche ne kulidita izuchila lizuche, lekachoni kwangulyonela isungu?
JON 4:11 Ndaze, haiwele goya heni kuwonela isungu muji wa Ninawi, wula muji ukulu uwele na wanhu lachi imwe na elufu makumi meli (120,000), wawele hawawezile kutang'hula linojile ne lihile, hamwe na migongolo minji?”
MIC 1:1 Ulonzi wa Mkulu Nguluwi naumuyila Mika, mwenyeng'haye wa Molesheti, mihela ja Yotamu na Ahasi na Hesekiya vyowawele wandewa wa Yuda. Mika nakayona mbuli ilinguwala Samaliya na Yelusalemu.
MIC 1:2 Mhulichize hemwe wanhu weng'ha, mhulichize hemwe wanhu wa isi yeng'ha. Mkulu Nguluwi kanguya kuwahilika kuli chitala, Mkulu kanguwang'ung'utila hemwe kulawa kuli ng'handa ya heye yelile.
MIC 1:3 Ena! Mkulu Nguluwi kanguya kulawa haluga ha heye, kodulika na kujenda mchanya mwa vinhembenhembe vya isi.
MIC 1:4 Vidunda vyosungulumuka hanyi ha uzayo wa heye, kota ihota habehi na chiluli na mibalalika jotulika, kota mazi galingubogoma kuli chiduliko.
MIC 1:5 Aga geng'ha golawila, kwa chiwalo cha gehile ga walelwa wa Yakobo, kwa chiwalo cha gehile ga walelwa wa Isilaeli. Ndaze, wihe wa Yakobo wangoneka kohi? Kuli muji wa heye ukulu, Samaliya! Ndaze, honhu ha kujifugamila jimalukolo ha Yuda hangoneka kohi? Kuli Yelusalemu!
MIC 1:6 Ahyo, Mkulu Nguluwi kangulonga hino, “Muji wa Samaliya ndoudita uwe mahame kuchiwala, mgunda uwele wanhu wonyala mizabibu. Maganga ga lukanzi lwake ndogatoza kuli ibindi na kujileka mwanzi misisi jake.
MIC 1:7 Jimalukolo jake jeng'ha jobenangwa, ndolendole zake zeng'ha za kuli honhu ha kufugamila zolakazwa kwa chiluli. Ndojiwifya jimalukolo jake jeng'ha. Kwa vila wanhu wa Samaliya nawakungajiza ndolendole kota wang'hondwa, nazo zokolelwa mijito ja kuwalipa wang'hondwa.”
MIC 1:8 Kwa chiwalo acho, ndolila na kulombocheza, ndojenda mwanzi na ne makwamba. Ndobwaka kota ikanhu, na kulombocheza kota ituwe.
MIC 1:9 Vilonda vya Samaliya havipona, nayo Yuda naipata vilonda avyo, navifichila kuli lwizi lwa Yelusalemu, honhu howalingikala wanhu wa heni.
MIC 1:10 Mleche kulonga mbuli ayi ako Gati, na mleche kulila! Ako Beti-leafa mgalawate kuli nhimbwisi kwa masinzo.
MIC 1:11 Mlute hemwe wenyeng'haye wa Shafili, muwele mwanzi na mlingudeula. Wenyeng'haye wa Saanani mleche kulawa mgati mwa muji wa hemwe. Wanhu wa Beti-eseli wangulila, utanzi wa hewo kwa hemwe nawusigwa.
MIC 1:12 Wenyeng'haye wa Maloti wanguubeteza utanzi kwa maya ng'hatu, ila kudumya kwanguya kulawa kwa Mkulu Nguluwi, habehi ng'hatu na lwizi lwa Yelusalemu.
MIC 1:13 Hemwe wenyeng'haye wa Lakishi, muwohe falasi yalingubilima lukami kuli mituka ja ngondo. Namwali mwaluko wa gehile kwa mhinza Siyoni, kwa vila namdita gehile kota wanhu wa Isilaeli.
MIC 1:14 Ahyo, mwanguganigwa kilaga na kuwaleka wenyeng'haye wa Molasheti-gati. Nawo muji wa Akisibu hauwatanza wandewa wa Isilaeli.
MIC 1:15 Hemwe wenyeng'haye wa Malesha, Nguluwi kowegalila hemwe mng'honyo yawele kowasumya hemwe. Mndewa yawele ndo ukulu wa Isilaeli, koganigwa kivisa Adulamu.
MIC 1:16 Hemwe wanhu wa Yuda, mbeye mnvili za hemwe, leka kulombocheza kwa chiwalo cha wana wa hemwe muwaganile, muse mnvili za hemwe kota ikungule, kwa vila wana wa hemwe wowaleka hemwe na kuluta kuli isi zinji.
MIC 2:1 Wochona hewo walingugana kudita wihe, walinguwasa nechilo kuno wonuwila kudita wihe! Hokubwemwenzuka, wangudita kwa vila wana ludali.
MIC 2:2 Wangugana migunda na kujihola, kahi ng'handa na kuzihola. Wangumhada mlume na kuhola ng'handa ya heye, wanguwasukula uhalizi wa hewo, uwele ndo isi.
MIC 2:3 Ahyo, Mkulu Nguluwi kangulonga ahi, “Ndangugana kuwegalila hemwe kudumya, kuwele hamuweza kiwika kutali nako. Wowa mhela wihile kwa nhanzi ya hemwe, hamuweza kujenda kwa kidaya.
MIC 2:4 Zuwa alyo wanhu wowalonga hemwe kwa nzimbo, wolila na kulombocheza kwa usungu na kulonga, ‘Natudumigwa ng'hatu, Mkulu Nguluwi nakahola isi ya hetwe, ena, nakayusa mmoko mwa hetwe. Migunda ja hetwe nakawapa wala wawele nawatusumya.’ ”
MIC 2:5 Ahyo hampegwa honhu honeche ha mgunda kwa simbi, hali wanhu wa heye Mkulu Nguluwi.
MIC 2:6 Wanhu wa hewo wangulongaga, “Uleche kulavya uloli, uleche kulavya uloli kuwala hetwe. Mbuli kota azo haziweza kutufika. Hatufichigwa na soni.”
MIC 2:7 Ndaze, hemwe walelwa wa Yakobo, yanguwa goya kulonga, “Mkulu Nguluwi nakaleka kwimilila kwa heye? Ndaze, heye kangudita mbuli kota azi?” Ulonzi wa heni wowa unojile kwa wala walingudita hachi.
MIC 2:8 Ila Mkulu Nguluwi kanguwalonjela hino, “Hemwe, wanhu wa heni mwangwinuka kota wang'honyo. Mwanguboka mivalo ja wanhu wasindamale na walingikala goya, wanhu walingukola nzila ne lunhwinhwi na walihela majesa goneche ga kitowa ngondo.
MIC 2:9 Mwanguwawinga wadala wafililwe na walume wa hewo wa wanhu wa heni kulawa kuli ng'handa za hewo zinojile, wana wa hewo namuwosela uhalizi wa heni mazuwa gose.
MIC 2:10 Mwinuche mlute! Hano haduhu kahi honhu ha kwesela! Kwa chiwalo cha wavu wa hemwe, modumigwa, ena, kudumya kukulu ng'hatu!
MIC 2:11 Wone munhu yalonje, ‘Ndangulavya uloli kwa hemwe kota mowa na divai na ujimbi kwa winji,’ munhu ayo kowa mloli yalingukundigwa na wanhu awo!
MIC 2:12 Ila ndangukomya ndowakungajiza weng'ha hemwe wanhu wa Yakobo, ena, ndowakungajiza hemwe Waisilaeli msigale, ndiwegale hamwe kota ming'holo, kota chilundo chikulu cha ming'holo kuli ibani, kota chilundo hali honhu ha kudimila, namwe mowa chilundo cha wanhu wenji.
MIC 2:13 Yula yawele kochumula nzila kowalongola, nawo wobena lwizi lwa muji na kulawa mgati mwa muji. Mndewa wa hewo kowalongola, Mkulu Nguluwi yuye kowalongola.”
MIC 3:1 Lelo mhulichize hemwe wakulu wa walelwa wa Yakobo, mhulichize, hemwe vilongozi wa walelwa wa Isilaeli! Hemwe ndo mlinguganigwa kuvizela kuwala mbuli ya utaguso.
MIC 3:2 Ila mwanguzudila ganojile na kugana wihe. Mwanguwawambula ngozi wanhu wa heni, na kusa miwunde kuli mizeje ja hewo.
MIC 3:3 Mwangulya miwunde ja wanhu wa heni, mwanguwawambula ngozi zawo, mwangubenanga mizeje jawo na kuwadumulanga kota miwunde ja kuteleka, kota miwunde ja kuwika mgati mchiya.
MIC 3:4 Mhela wanguya uwele momlilila Mkulu Nguluwi, ila heye howedichila. Kogubika kumeho kwa heye mhela awo, kwa vila namdita mbuli zihile.
MIC 3:5 Mkulu Nguluwi kangulonga hino, “Kuwala waloli walinguwajiliza wanhu wa heni, waloli walingulavya uloli kuwala kikala goya wone wapegwe chinhu, ila wanguwakabusa wanhu kwa uloli wa ngondo wone waleche kupegwa chinhu.
MIC 3:6 Kwa hemwe waloli kowa nechilo ne kulagula, kowa jiza kwa hemwe ne ugubulo. Kwa hemwe waloli kowa matinazo, nemisi kowa jiza kwa hemwe.
MIC 3:7 Walingulota wokona soni, nawo walaguzi wodeula. Weng'ha wogubika kumeho kwa hewo, kwa vila haduhu ulonzi woneche kulawa kwa Nguluwi.”
MIC 3:8 Ila kuwala heni, namemezwa ludali lwa muhe wa Mkulu Nguluwi, hachi na mong'ho, kuwalonjela wanhu wa Yakobo nongwa za hewo, nandiwalonjela Waisilaeli gehile ga hewo.
MIC 3:9 Mhuliche mbuli ayi hemwe vilongozi wa walelwa wa Yakobo, mhulichize, hemwe vilongozi wa Waisilaeli. Mwanguizudila hachi na kwajiliza mbuli zinojile.
MIC 3:10 Mwanguzenga muji wa Siyoni kwa kubohola danda, ena, wula muji wa Yelusalemu kwa gehile.
MIC 3:11 Vilongozi wa heye wangutagusa kwa kupegwa chinhu kwa uviso, watambika wa heye wangulangusa kwa kupegwa chinhu, waloli wa heye wangulagula kwa sendi. Ila wangidaya kwa kitumbila kwa Mkulu Nguluwi, wolonga, “Mkulu Nguluwi ka hamwe na hetwe! Hatufichigwa na mbuli yoneche yihile!”
MIC 3:12 Kwa chiwalo cha hemwe, Siyoni yolimigwa kota mgunda, Yelusalemu yowa mahame, na chidunda cha ng'handa ya Nguluwi chowa chihulo.
MIC 4:1 Mhela wokuya uwele, chidunda cha ng'handa ya Mkulu Nguluwi, chowa chikulu kusinda vidunda vyeng'ha. Ena, chokwinizwa mchanya mwa vidunda vyeng'ha. Wanhu wenji woluta ako.
MIC 4:2 Wanhu wa isi nyinji wokuya na kulonga, “Tuche, tulute kuchanya kuli chidunda cha Mkulu Nguluwi, kuli ng'handa ya Nguluwi wa Yakobo, leka yatulanguse nzila za heye, natwe tuwinze vyoyodita heye. Kwa vila malajizo golawa ako Siyoni, ulonzi wa Mkulu Nguluwi ako Yelusalemu.”
MIC 4:3 Kowadita wanhu wa isi nyinji wehanyise, na kwamula kitwanza kwa wanhu wa isi zinji, ziwele na mong'ho na ziwele kutali. Wogongomanya mipanga ja hewo jiwe mihuka na migoha ja hewo jiwe sengo za kutemela nhagala. Wanhu wa isi imwe hawochitowa na wanhu wa isi iyage, ne kilangusa ngondo kahi.
MIC 4:4 Chila munhu kochikala kwa kikala goya, hanyi ha mtini na mizabibu ja heye, haduhu munhu yowadita wadumbe, kwa vila Mkulu Nguluwi Yawele na Mong'ho nakalonga ahyo.
MIC 4:5 Wanhu wa isi zinji wanguwinza nzila za hewo, kwa kitumbila milungu ja hewo, ila hetwe twangumuwinza Mkulu Nguluwi, Nguluwi wa hetwe, mazuwa gose.
MIC 4:6 Mkulu Nguluwi nakalonga, “Zuwa alyo ndowakungajiza wanhu wa heni, ena, ndowakungajiza vyete wa wala wawele nawahilikwa kuli isi zinji, wanhu wala wawele nandiwagaza.
MIC 4:7 Awo vyete na wala wasigale wakomu, wawele nawahilikwa kuli isi ya chijenzi, ndowadita hewo wawe wanhu wa isi inyale iwele na mong'ho. Nani Mkulu Nguluwi ndowalongoza kuli chidunda cha Siyoni, kwaluchila mhela awo mbaka mazuwa gose.”
MIC 4:8 Nagwe Yelusalemu, hegwe ngome ya Siyoni, mong'ho wa mwaluko wohiluswa kwa hegwe, undewa wokuya kwa hegwe Yelusalemu.
MIC 4:9 Lelo, lekachoni mwangulila kwa lizi? Ndaze, mwahela mndewa kahi? Yalingukulonjela mbuli zinojile nakabagama? Mwangulila kwa lizi kwa chiwalo cha usungu, kota mamo yalinguponda!
MIC 4:10 Hemwe wanhu wa Siyoni, mlile kota mamo yalinguponda! Kwa vila lelo mokuka kuli muji awu, mlute kikala kugunuche, moluta mbaka Babuloni. Ila ako moloholigwa. Ako Mkulu Nguluwi kowagombola hemwe, kulawa kuli ndole za wang'honyo wa hemwe.
MIC 4:11 Wanhu wa isi nyinji nawekungajiza kuwatowa hemwe. Wangidaya wolonga, “Muji wa Yelusalemu uwe ukokomoche, natwe tugone mahame ga Siyoni!”
MIC 4:12 Ila hewo hawachizelele choyachiwichile goya Mkulu Nguluwi, ne kugazela majesa ga heye. Kwa vila nakawakungajiza hamwe, kota nyhule hali honhu ha kupululila.
MIC 4:13 Mkulu Nguluwi nakalonga, “Hemwe wanhu wa Siyoni, mwinuche leka muwatowe wang'honyo wa hemwe! Ndowapa hemwe mong'ho kota ibuguma, liwele na mbalati za chuma na nzayo za shaba. Mowabalasa wanhu wa isi nyinji, gowopata mombichila chiuyeng'ha, lufufu lwa hewo mondavila heni Mkulu wa isi yeng'ha.”
MIC 5:1 Mikungajizile wamizi, hemwe wanhu wa Yelusalemu, kwa vila natuzungulutwa na kutunyigwa, naye chilongozi wa Isilaeli wangumtowa mizeze na ng'hweku.
MIC 5:2 Mkulu Nguluwi kangulonga, “Ila gwa Betelehemu kuli Efulata, hanga hegwe kwa mdodo hela hali lukolo lwa Yuda, ila kwa hegwe kolawa chilongozi, yawele kolongoza kuli Isilaeli. Lulelo lwake ndo lwa katali ng'hatu.”
MIC 5:3 Ahyo Nguluwi kowaleka wanhu wa heye kwa wang'honyo, mbaka yula mamo yawele na himila hoyoponda. Hamba wang'holoze wasigale hanze ha Isilaeli, wohiluka na kihanza na Waisilaeli wayawo.
MIC 5:4 Ayo chilongozi kowadima wanhu wa heye kwa mong'ho wa Mkulu Nguluwi, kwa ukulu wa itagwa lya heye Mkulu Nguluwi, Nguluwi wa heye. Wanhu wa heye wochikala kwa kikala goya, kwa vila kowa mkulu mbaka kuli isi zeng'ha.
MIC 5:5 Heye kowa ndo kikala goya kwa hewo. Waashulu howoivaba isi ya hetwe, na kukola kuli ngome za hetwe, towahilika wamizi kitowa na hewo, ena, towahilika vilongozi wa hetwe kwa winji.
MIC 5:6 Kwa vinhu vya hewo vya kitowela ngondo woilongoza isi ya Ashulu na kuihola isi ya Nimulodi leka iwe ya hewo. Mndewa wa hetwe kotulohola kulawa kuli moko ga Waashulu, howofika kuli mbaka ja isi ya hetwe na kwaluka kuivaba isi ya hetwe.
MIC 5:7 Walelwa wa Yakobo wosigala wakomu, kwa vila nawenela hali wanhu wa isi nyinji, wowa kota nungwi ya Mkulu Nguluwi ilinguheweza, kota upesi ulingulagala kuli misolo, uwele haulingwambuzwa na munhu, ne kitumbila kuli ludali lwa munhu.
MIC 5:8 Walelwa wa Yakobo wosigala wakomu, wawele nawenela hali wanhu wa isi nyinji, wowa na mong'ho ng'hatu, kota isimba hali migongolo ja kisolo, kota isimba lyana hali vilundo vya ming'holo, liwele chila honhu holikola, lyangunyozochelaga upelembi wake na kuudadula, haduhu munhu yoneche wa kulohola.
MIC 5:9 Waisilaeli wowasumya wang'honyo wa hewo, na kuwadumya ng'hatu.
MIC 5:10 Mkulu Nguluwi nakalonga, “Mhela awo ndowosa falasi wa hemwe na kujiwifya mituka ja hemwe ja ngondo.
MIC 5:11 Ndojiwifya miji ja isi ya hemwe, na kuzibomola ngome za hemwe zeng'ha.
MIC 5:12 Ndoudumya uhawi wa hemwe, namwe hamuweza kahi kuwa na walingulagula.
MIC 5:13 Ndojiwifya jimalukolo ja hemwe na mizengo ja hemwe ja kufugamila, namwe moleka kuvifugamila vinhu vyomvigongomanye mwemwe.
MIC 5:14 Ndong'humbula jimalukolo ja Ashela hali hemwe na kujidumya miji ja hemwe.
MIC 5:15 Kwa ng'halazi na kuzudila kwa heni, ndohilula chibida kwa wanhu wa isi zeng'ha wohambe wanyhulichize.”
MIC 6:1 Mhulichize choyalingulonga Mkulu Nguluwi, kanguving'ung'utila vidunda, navyo vidunda vidodo vihuliche lizi lya heye.
MIC 6:2 Mhulichize kung'ung'uta kwa Mkulu Nguluwi hemwe vidunda, mhulichize hemwe misisi ja isi ja mazuwa gose! Mkulu Nguluwi kanguwang'ung'utila wanhu wa heye. Kowang'ung'utila wanhu wa heye Waisilaeli.
MIC 6:3 Mkulu Nguluwi kangulonga hino, “Hemwe wanhu wa heni, nandita choni kwa hemwe? Nandiwatunya kwa chinhu chachi? Mnyhidichile!
MIC 6:4 Nandiwalavya hemwe kulawa kuli isi ya Misili na kuwagombola kulawa kuli isi ya upogozi. Nandiwalajiza Musa na Aluni na Miliamu wawalongoze hemwe.
MIC 6:5 Hemwe wanhu wa heni, muukumbuchile wihe wa Balaki, mndewa wa Moabu, na ndaze Balaamu, mwana wa Beoli vyoyamwidichile. Mgakumbuchile majendo ga hemwe ga kulawa Shitimu mbaka Giligali, leka mgazele madito ga hachi ga Mkulu Nguluwi.”
MIC 6:6 Ndute kwa Mkulu Nguluwi na chinhu chachi, leka ndimfugamile Nguluwi yawele kuchanya? Ndaze, ndute na nhambiko za kulakazwa ama ndimlavile milogota milume ja mwaka umwe?
MIC 6:7 Ndaze, Mkulu Nguluwi konojezwa, wone ndimlavile maelufu ga ming'holo milume, ama nzanda maelufu menji za mafuta? Ndaze, ndimlavile mlelwa wa heni wa mwaluko, kwa chiwalo cha nongwa ya heni, kwa chiwalo cha gehile ga heni?
MIC 6:8 Nguluwi nakakulajila gawele ganojile, gwa munhu. Choyalingugana Mkulu Nguluwi kwa hegwe ndo achi, kudita mbuli za hachi, kuwa na igano lya kwimilila na kikala kwa kunyenyetela na Nguluwi wa hegwe.
MIC 6:9 Mkulu Nguluwi kanguwachema wenyeng'haye wa muji, na ndo mbuli ya luhala ng'hatu kumdumba heye, “Uhulichize gwa nhanzi, na hemwe muwele namikungajiza mujini.
MIC 6:10 Ndaze, ndokwimilila wihe, uwichigwe kuli chilundo mng'handa mwa hemwe? Ndaze, ndokwimilila lufufu lompatile kwa uhadi, na mizani ja uhadi, mbuli iwele ndo izudizo?
MIC 6:11 Ndaze, ndoweza kuwalechela, wanhu walingutumiya mizani ja uhadi na maganga ga kupimila gawele hagalingukundigwa?
MIC 6:12 Hemwe muwele na lufufu kuli muji nammema kubunza, mwangulongaga udesi, chila chomlingulonga ndo uhadi.
MIC 6:13 Ahyo, nani nanyaluka kuwagwisa hemwe na kuwadumya kwa chiwalo cha gehile ga hemwe.
MIC 6:14 Molya ila hamchiguta, mng'handa mwa hemwe nzala yokonjezeka. Mowika vinhu kuli ng'hano, ila hamuweza kulohola choneche, kwa vila ndoviwifya kwa ngondo.
MIC 6:15 Monyala ila hambeta, Mokama zeituni, ila hamuweza kutumiya mafuta gake. Mokama zabibu, ila hamnwa ayo divai.
MIC 6:16 Namgabata malajizo ga Omuli, na madito geng'ha ga ivyazi lya Ahabu namuwinza kahi vihendo vya hewo. Ahyo, ndowegalila hemwe kudumya, na chila munhu kowabeza hemwe. Wanhu wowazomela hemwe chila honhu.”
MIC 7:1 Magazo gachi aga gombele nago! Nandiwhana na yula yalingukungajiza mafuza ga chipalangule, yalingulokoteza gasigale mhela wa mbena loukolile kuli mgunda wa mizabibu. Haduhu chizabala chiwele na mafuza ga kulya, haduhu ne tini ya mwaluko ndilinguyonela maya.
MIC 7:2 Haduhu yalingumdumba Nguluwi yasigale kuli isi, haduhu munhu yoneche yagoloche yawele nakasigala. Chila yumwe kangugana kubohola danda, chila yumwe kangumpelemba myage leka yamgwilize.
MIC 7:3 Weng'ha nawazowela kudita wihe, chilongozi kangugana ndolendole, mtagusa kangubochela chinhu kwa uviso kwa chiwalo cha kwajiliza hachi. Wawele na mong'ho wangudita chowogana, weng'ha wangikundiza hamwe kudita mbuli zihile.
MIC 7:4 Yanojile kusinda weng'ha hali hewo ndo kota mikwangwasale, yalingoneka yagoloche ng'hatu hali hewo ndo keha kusinda lugagala lwa miwa. Zuwa lya utaguso wa hewo liwele nalyali libetezwa nalifika, lelo ivuche naliwafika.
MIC 7:5 Uleche kitumbila kwa yalingikalasa habehi na hegwe ne kwa goloko wa hegwe. Wilolele kuli ulonzi wa hegwe, mbaka mchewako yaleche kuvizela choneche.
MIC 7:6 Kwa vila mwana mlume kangumbezaga mhaza wa heye, mhinza kangitwanzaga na mayake, mche kangitowaga na mamo wa mlume wa heye. Wang'honyo wa munhu ndo wanhu wa mng'handa mwa heye.
MIC 7:7 Ila heni ndangitumbila kwa Mkulu Nguluwi, ndangumbeteza Nguluwi yawele ndo mlohozi wa heni, Nguluwi wa heni konyhulichiza.
MIC 7:8 Mleche kuseka heni, hemwe wang'honyo wa heni! Wone nyigwe, ndokwinuka kahi, wone ndiwe kuli jiza, Mkulu Nguluwi ndo lumuli lwa heni.
MIC 7:9 Kwa vila nandimditila gehile Mkulu Nguluwi, ndokwimilila kuzudila kwa heye, mbaka hoyondewela na kutawiza hachi kwa chiwalo cha heni. Konyhilika kunze kuwele na lumuli, nani ndoyona hachi ya heye.
MIC 7:10 Hamba wang'honyo wa heni wogona ago nawo womema soni, kwa vila nawandonjela, “Ka kohi lelo Mkulu Nguluwi, Nguluwi wa hegwe?” Nani ndowona wang'honyo vyowogwa, wobigangwa hanyi kota nhope mnzila.
MIC 7:11 Zuwa lyanguya liwele ng'hanzi za muji wa hemwe zozenjigwa kahi. Zuwa alyo mbaka ja isi ya hemwe jokonjezwa.
MIC 7:12 Zuwa alyo wang'holozenu wowahiluchila, kulawa Ashulu na vijiji vya Misili, kulawa kuli isi ya Misili na honhu ha Eyufulate, kulawa mhwani na honhu ha vidunda.
MIC 7:13 Ila isi yowa chiwala, kwa chiwalo cha wihe wa wenyeng'haye wake.
MIC 7:14 Gwa Nguluwi, uwadime wanhu wa hegwe kwa ng'hweku ya hegwe, awo wawele ndo chilundo cha uhalizi wa hegwe, wawele wangikala waliyeka kuli chihulo, kuli isi ya honhu ha kudimila. Uwaleche wadimile kuli Bashani na Gileadi, kota vyoiwele kuli mazuwa ga katali.
MIC 7:15 Kota mhela woutulavile kuli isi ya Misili, utulajile kahi vinduzanduza vya hegwe.
MIC 7:16 Wanhu wa isi howogona ago, wodeula na kumema soni hanga wana mong'ho. Wobubuwala na kuwa hela cha kulonga na kuwa kota wohambe wahuliche.
MIC 7:17 Wotambala mnhimbwisi kota izoka, ena, kota vilumbigwe vilingutambala. Wolawa kuli ngome za hewo, kuno wokakama na kuwa na lunhwinhwi. Wokuhinduchila hegwe Mkulu Nguluwi, Nguluwi wa hetwe kwa kudumba, wodumba kwa chiwalo cha hegwe.
MIC 7:18 Gwa, Nguluwi, whaani yawele kota hegwe? Hegwe kwangugalechela gehile ga wanhu wa hegwe wasigale, ne kulola nongwa za hewo. Ng'halazi ya hegwe hailingikala mazuwa gose, ila kwangusangalala ng'hatu kutulajila igano lya kwimilila lya hegwe.
MIC 7:19 Kotonela isungu kahi, gwa Mkulu Nguluwi, kokusa gehile ga hetwe, kogataga geng'ha mgati ng'hatu mwa mazi ga bahali.
MIC 7:20 Kolajila kukundigwa kwa hegwe na igano lya kwimilila lya hegwe kwa walelwa wa Abulahamu na wa Yakobo, kota vyoulagane na wasekulu wa hetwe kulawa katali.
NAH 1:1 Ulonzi wa Nguluwi kuwala muji wa Ninawi kuli isi ya Ashulu. Chitabu cha kulola kwa Nahumu wa Elikoshi.
NAH 1:2 Mkulu Nguluwi ndo Nguluwi yawele na fihi, yalinguhilula chibida, Mkulu Nguluwi kanguhilula chibida na kana ng'halazi, Mkulu Nguluwi kanguhilula chibida kwa wang'honyo wa heye, kangulutilila kuwazudila wang'honyo wa heye.
NAH 1:3 Mkulu Nguluwi hambe yazudile hima, ila nakamema mong'ho, Mkulu Nguluwi mazuwa gose hambe yaleche kuwagaza wawele na nongwa. Nzila yalingukola Mkulu Nguluwi, changulawilaga chivuluvumbi chikulu, ng'hungugu ndo chivuluvumbi chilingwenezwa na nzayo za heye.
NAH 1:4 Kanguing'hanuchilaga bahali na kuikaza, heye kangwambuza nzanda zeng'ha zikale. Viwala viwele Bashani na chidunda cha Kalimeli vyanguswina, uluwa wa Lebanoni wanguswina.
NAH 1:5 Vidunda vyangukakama hali heye, navyo vidunda vyangusungulumuka, isi na vyeng'ha viwele amo vyangukakama hali heye.
NAH 1:6 Whaani yalinguweza kuwa habehi na kuzudila kwa Mkulu Nguluwi? Whaani yalinguweza kwimilila kung'hang'hala kwa ng'halazi ya heye? Heye kangubohola ng'halazi ya heye ilingwaka kota chiluli, na mitalawe jangutulika vihandevihande hoyojihejelela.
NAH 1:7 Mkulu Nguluwi kagoya, heye ka ngome ya kikala goya mhela wa magazo. Heye kanguwamilaga weng'ha walingubilimila kikala goya kwa heye.
NAH 1:8 Ila kwa mazi menji ng'hatu koidumya Ninawi, kanguwosaga na kuwawinga mbaka kuli jiza.
NAH 1:9 Lekachoni mwangijesa kudita chinhu chihile hali Mkulu Nguluwi? Heye kogadumya, na yalingitwanza na heye howeza kwima kahi.
NAH 1:10 Wodumigwa kota chisosolo cha miwa, na kugala kwa ujimbi wa hewo wawo, wolakazwa kota vila mibeleje jikalile.
NAH 1:11 Kulawa hegwe Ninawi, nakalawa munhu yalingugana kudita wihe hali Mkulu Nguluwi, yalingunuwila kudita vinhu vya udesi.
NAH 1:12 Mkulu Nguluwi nakawalonjela hino wanhu wa heye, “Hanga wanhu wa Ninawi ndo wenji na wawele na mong'ho, woduliswa na kudumigwa. Hanga nandiwagaza hemwe wanhu wa heni, siwagaza kahi.
NAH 1:13 Lelo ndoibena ngwamo ya Ashulu kuli singo za hemwe, na minyololo jowowahindile ndojidumulanga”
NAH 1:14 Mkulu Nguluwi nakalonga hino kuwala Ninawi, “Huweza kuwa na walelwa. Jimalukolo ja hegwe ja kuhongola na ja kuponda, ndojibena kuli haluga ha milungu ja hegwe. Ndokubawila chilaga cha hegwe, kwa vila hegwe haulingukundigwa.”
NAH 1:15 Hemwe wanhu wa Yuda mlole, kanguya kulawa kuli chidunda, munhu yalingigala mbuli zinojile, msenga yalinguwikula kikala goya. Mdite mvina za hemwe, hemwe wanhu wa Yuda, mweneze kilaha kwa hemwe, kwa vila wehile hawowavaba kahi, kwa vila wodumigwa ng'hatu.
NAH 2:1 Wamizi wa Ninawi wangulila, “Yalingudumya kanguya kututowa. Twamile ngome za hetwe! Tuwiche wamizi mbalabala! Tiwiche goya! Tukungajize mong'ho wa hetwe weng'ha.”
NAH 2:2 Mkulu Nguluwi komhilusila Yakobo ludali lwake, ena, kowapa kahi Waisilaeli ludali lwa hewo, hanga walinguvaba hawawalechele chinhu, mbaka nhagala za hewo za mizabibu nawazitema.
NAH 2:3 Ngawo za wamizi wa heye ndo ndung'hu, wazidahe kitowa ngondo wa heye nawavala mivalo midung'hu. Mituka ja hewo ja falasi jangupulika kota lumuli lwa chiluli, kuli zuwa lyoyajiwichile goya, migoha ja mibeloshi ja hewo jangupulika.
NAH 2:4 Mituka ja falasi jangubilima kuli nzila, jangubilima aku na kula hagati ha muji. Jangoneka kota milapi ja chiluli. Jangubilima kota lumwemwesa.
NAH 2:5 Lelo mkulu kanguwachema vilongozi wa heye, nawo wangikwang'wala vyowalinguluta kwa heye, wangubilimila kuli lukanzi lwa miji, leka kuwika goya ngawo ya hewo.
NAH 2:6 Lwizi ja lwanda najidoholigwa, ng'handa ya mndewa naigwa.
NAH 2:7 Muji wa mwanzi lukami, wanhu wanguholigwa na kuhilikwa kuli isi ya chijenzi. Wapogozi wake wadala wangulombocheza kota ng'hunda, na kitowa kuli mhambaga za hewo kwa masinzo.
NAH 2:8 Ninawi ndo kota ilamba libomoche, wanhu wake wanguubilima. Lizi lyanguchemeleza, “Mwime! Mwime!” Ila haduhu yalingulola kumbele.
NAH 2:9 Walinguivaba Ninawi wangulonga, “Mhole vinhu vya sendi, mhole vinhu vya zahabu. Ng'hano yake yahela kuduma. Hana winji wa chila chinhu cha sendi nyinji.”
NAH 2:10 Muji wa Ninawi nauholigwa na kuwifigwa na kulechigwa uchiwa! Wanhu wake nawatweguka nhumbula, mafugamilo gawo gangukakama, mong'ho wa hewo naumala, kumeho kwa hewo nakugaluka kwa chiwalo cha lunhwinhwi.
NAH 2:11 Wa kohi muji wula uwele kota mhalika ya misimba, hawele ndo honhu hawo ha kivisa? Ha ndaze aho honhu ha misimba, hawele haduhu yawezile kujitinhusa?
NAH 2:12 Isimba ilume nalidadula miwunde ja kuhega kwa chiwalo cha myana jake, naliwabatila misimba midala upelembi wawo, mhalika yake naimema upelembi, haluga hake hana vihande vinji vya miwunde.
NAH 2:13 Mkulu Nguluwi Yawele na Mong'ho kanguwikula, “Lelo ndangitwanza na hemwe. Mituka ja hemwe ja ngondo ndojidumya kwa chiluli na kujikopola kwa ipanga myana isimba ja hemwe. Siwalechela upelembi kuli isi. Lizi lya wasenga wa hegwe haluhulikwa kahi.”
NAH 3:1 Kochona gwa Ninawi, muji ulingukopola! Nakumema uhadi hela na vinhu vinji viholigwe kuli ngondo, hulinguleka kuhola vinhu kulawa kuli ngondo.
NAH 3:2 Uhulichize! Lizi lya ng'hobwa ya ngozi, lizi lya kujenda kwa maguludumu, lizi lya kujenda kwa falasi na kubuma kwa mituka ja ngondo.
NAH 3:3 Walingukwina falasi wangubilimisa falasi baho du, wakopoligwe ndo wenji lukami, mitufi minji ng'hatu, mbaka wanhu wangikwang'hala mchanya mwa mitufi.
NAH 3:4 “Ninawi! Hegwe ndo kota mng'hondwa. Nakuwakwega wanhu kwa kinoliga, gwa mhinza wa uhawi, nakuwadita wanhu wa isi zinji wawe wapogozi kwa ung'hondwa wa hegwe na kwa uhawi wa hegwe.
NAH 3:5 Lelo heni Mkulu Nguluwi Mbele na Mong'ho, ndangitwanza na hegwe, ndolikwiniza ivalo lya hegwe mbaka kumutwi, ndowadita wanhu wa isi wawone umwanzi wa hegwe, chila undewa uyone soni ya hegwe.
NAH 3:6 Ndokutozela wavu na kukuditila kwa kubeza, na kuwadita wanhu wakuseche.
NAH 3:7 Hamba weng'ha howokona wokubilima na kulonga, ‘Ninawi nakudumigwa, whaani yolombocheza kwa chiwalo cha hegwe? Whaani yokuhembuliza?’ ”
NAH 3:8 Ndaze, hegwe Ninawi ndo kunoga kusinda Tebesi, muji uzenjigwe hafungo ha lwanda Naili? Tebesi nauzungulutwa na mazi, lwanda nalwali ngawo yake, mazi nagali lukanzi lwake.
NAH 3:9 Kushi na Misili nazali mong'ho wa heye ulihela mbaka, Puti na Libiya nawali hali wala welumbile na heye.
NAH 3:10 Ila nakaholigwa kota mpogozi, wanhu wa heye nawahilikwa kuli isi zinji. Mbaka wana wa heye nawabenangwa kuli chila nzila, wakulu wake nawaguzigwa wang'hangala wake weng'ha nawawohigwa kwa minyololo.
NAH 3:11 Ninawi, nagwe kahi kogala, kombilima mng'honyo na kujeza kivisa.
NAH 3:12 Ngome za hegwe zeng'ha ndo kota migodi ja tini, jiwele mafuza gake ga mwaluko nagapya, mhela hojitigaswa tini zangugwilaga kuli mlomo wa yalingulya.
NAH 3:13 Lole wamizi wa hegwe, walingudumba kota wadala. Lwizi ja isi ya hegwe ja mwanzi hali wang'honyo wa hegwe, chiluli nachilakaza ng'hatu lwizi jake.
NAH 3:14 Mdehe mazi leka miwiche goya kwa chiwalo cha kuzungulutwa kwa hemwe, mziwiche nzinzili ngome za hemwe. Mbiganje ilongo kwa chiwalo cha kulikolela mijito, mliwiche goya itanuli lya kusomela matufali.
NAH 3:15 Ila ako kahi chiluli chowalakaza hemwe, ipanga lyowakopola hemwe, wowadumya kota nzije vyozilingulya. Monjezeche kota nzije, ena, monjezeche kota ndede.
NAH 3:16 Walinguguza vinhu wa hegwe nawonjezeka kusinda nhondwe, ila wanguka kota ndede vyozilinguguluka na kuileka isi ne chinhu.
NAH 3:17 Wakulu wa hegwe ndo kota ndede, vilongozi wa hegwe ndo kota chilundo cha nzije, mhela wa chipute zangikala kuli lukanzi, ila isanya holilawa, zanguguluka, haduhu yalinguvizela hozilutile.
NAH 3:18 Hegwe mndewa wa Ashulu, wadimi wa hegwe nawawasa, vilongozi wa hegwe nawasinzila. Wanhu wa hegwe nawasambaluka kuli vidunda, haduhu yoneche wa kuwakungajiza.
NAH 3:19 Haduhu wa kuhoza kulumila kwa hegwe, vilonda vya hegwe vya kubagama. Weng'ha walinguhulika mbuli za hegwe wangutowa luchenze. Kwa vila haduhu yawezile kiwika kutali na nhumbula ya hegwe yihile ilihela kuduma.
HAB 1:1 Ulonzi wa Nguluwi woyaubochele mloli Habakuki.
HAB 1:2 “Gwa, Mkulu Nguluwi, mbaka hanili ndokulanda utanzi, lekachoni hulingunyhulichiza? Lekachoni ndangulila, ‘Kilewa,’ ila hulingulohola?
HAB 1:3 Lekachoni kwangundita ndigone gehile na kubunza? Kuwifya na kilewa vyangunzunguluta, kitwanza na magazo vyangulutilila.
HAB 1:4 Ahyo malajizo gahela mong'ho, na hachi hambe ikoleche. Wehile wanguwazunguluta watanganiche, ahyo utaguso wangulavigwa kwa kwajilizwa.”
HAB 1:5 Nguluwi nakalonga, “Uwalole wanhu wa isi zinji! Kobubuwala na kona vinduzanduza. Kwa vila ndodita chinhu louwa ung'hali mkomu, hanga wahalonjelwe, hawalikunda.
HAB 1:6 Kwa vila ndanguwapa mong'ho Wababuloni, wanhu wa isi wawele na nhumbula zihile na walingudita chinhu himahima. Walingukola kuli isi yeng'ha, leka kuhola haluga ha wanhu wanji.
HAB 1:7 Ndo wanhu walingudumbigwa na walingukabusa, kwa kidaya kwawo, utaguso wa hewo wangulawa mnhumbula za hewo wawo.
HAB 1:8 Falasi wa hewo ndo wabewe kusinda iduma, wang'hang'hala kusinda mibwa ja kisolo jiwele na nzala. Falasi wa hewo wangubilima ng'hatu kulawa kutali, wangunyonzoka himahima kota ikungule lilinguhola upelembi.
HAB 1:9 “Weng'ha wangugana kilewa, vilundo vya hewo vya wamizi vyangulutilila kumwando, kota mbeho ya kolilawilaga isanya, kuno wangukungajiza wapogozi wa ngondo kota sangalaza.
HAB 1:10 Wanguwabeza wandewa, wanguwaseka vilongozi. Chila ngome ndo idaba kwa hewo, nawazenga chinhu cha misanga cha kukwinila kuli lukanzi na kuuhola muji.
HAB 1:11 Hamba wangukola himahima kota mbeho na kuluta kumwando, ndo wanhu wawele na gehile, kwa vila mong'ho wa hewo ndo mlungu wa hewo.”
HAB 1:12 Gwa Mkulu Nguluwi, ndaze, hegwe hauwele wa kulawa katali? Hegwe ndo Nguluwi wa heni, Yelile wa heni, yohambe ubagame. Gwa Mkulu Nguluwi, nakuwahagula Wababuloni watutaguse, hegwe italawe, nakuwakangaza leka watugaze.
HAB 1:13 Hegwe kwa yelile ng'hatu, haulinguukunda wihe, mazuwa gose haulingwimilila kulola gehile. Lekachoni lelo kwanguwona walingudita gehile na kunyamalila? Lekachoni kwangunyamalila wehile howowadumya wala wanhu watanganiche kusinda hewo?
HAB 1:14 Nakuwadita wanhu wawe kota somba mbahali, kota vilumbigwe vilingutambala vilihela chilongozi.
HAB 1:15 Wababuloni wanguwalowa wanhu kwa ndowano, wanguwakwega kwa utandawala wa hewo, wanguwakungajiza weng'ha kuli utandawala wa hewo, hamba wangusangalala na kutowa luchenze.
HAB 1:16 Lelo wangulavya nhambiko kwa chiwalo cha utandawala wa hewo, na kufunyizila ubani, kwa vila kwa awo wanguweza kulya chilyo cha kuhega, na kuwa na chilyo chinji lukami.
HAB 1:17 Ndaze, mazuwa gose hawoleka kukwega utandawala wa hewo? Ndaze, wolutilila kuwagwiliza wanhu na kuwadumya wanhu wa isi ne kuwonela isungu?
HAB 2:1 Ndokwima mchanya mwa ilingo, siwasa leka nyhuliche choni choyondonjela Mkulu Nguluwi na konyhidichila ndaze kuwala kung'ung'uta aku.
HAB 2:2 Hamba, Mkulu Nguluwi nakedichila, “Wandiche uloli awu, wandiche hazelu mchanya mwa vibawo, leka yalingukola aho yasome.
HAB 2:3 Uloli wuno wangubeteza mhela uwichigwe, ndo uloli wa kukomya kuwala kuduma. Wone wangoneka wangukawila, ubeteze, ndangukomya wofika, haukawila.
HAB 2:4 “Uwalole walingidaya, wodumigwa, ila watanganiche wochikala kwa makundo ga hewo.
HAB 2:5 Mzidi wa ago divai yangwajiliza, yalingidaya hokwesela. Maya ga heye ndo kota isi ya wabagame, kota vila kubagama, halingiguta. Kangikungajizila wanhu wa isi zeng'ha, na wanhu wanji weng'ha.
HAB 2:6 Munhu kota ayo kobezigwa na chila munhu na kumlonga kwa nhelo za idaba, ‘Kochona hegwe ulingukungajiza vinhu vyohaviwele vya hegwe na kuhola lehani ya vinhu vya wanhu ila hulingulipa! Kolutilila kudita ahyo mbaka nili?’
HAB 2:7 Zuwa limwe walingukudayi wokwinuka baho du na kukudita ukakame. Nagwe kowa mpogozi wa hewo.
HAB 2:8 Nakuvihola vinhu vya wanhu wa isi nyinji, ila weng'ha wawele wosulupuka, wovihola vinhu vya hegwe. Mbuli ayo yokufika kwa vila nakukopola na kubunza kuli isi, ena, nakudita ahyo kuli miji na kwa wenyeng'haye wake weng'ha.
HAB 2:9 “Kochona hegwe ulingupata lufufu kwa kubunza, ulinguzenga ng'handa ya hegwe mchanya kuli chidunda, ulingijesa kota kwangiwika kutali na kuwifya.
HAB 2:10 Ila kwa kiwika goya kwa hegwe nakuwabasa soni wanhu wa nhanzi ya hegwe. Kwa kuwadumya wanhu wa isi nyinji, nakuudumya ukomu wa hegwe.
HAB 2:11 Maganga ga kuli lukanzi gotowa iyowe na boliti za ng'handa zokwidichila kwa iyowe kahi.
HAB 2:12 “Kochona hegwe ulinguzenga muji kwa kukopola, ulinguudita muji uwe nzinzili kwa wihe.
HAB 2:13 Mkulu Nguluwi Yawele na Mong'ho, kangwambuzaga kikangaza kwa wanhu kwajilile kuli chiluli, na wanhu wa isi zinji wetunye hihi hela.
HAB 2:14 Kwa vila isi yomemezwa na uwanzi wa ukulu wa Mkulu Nguluwi, kota vila mazi vyogalingwenela mbahali.
HAB 2:15 “Kochona hegwe ulinguwadita womlingikalasa habehi wagale, kwa kuwapa divai nyinji, leka uwone umwanzi wa hewo.
HAB 2:16 Komema soni honhu ha lutogo. Konwa gwegwe baho na kuulajila umwanzi wa hegwe! Mkulu Nguluwi yuye kokudita ugale na soni yogubika lutogo lwa hegwe.
HAB 2:17 Wihe wouuditile Lebanoni wokuvaba, nakujikopola migongolo, migongolo najo jokutinhusa. Ago geng'ha gokufika, kwa vila nakukopola na kubunza kuli isi, ena, nakudita ahyo kuli miji na kwa wenyeng'haye wake weng'ha.
HAB 2:18 “Limalukolo ligongomanyigwe na munhu lyotanza choni? Limalukolo ndo chuma cha sendi nyinji chilingusungulumulwa, ndo chinhu chilingweneza uhadi. Yalingugongomanya limalukolo kangitumbila choyachigongomanye yuye, limalukolo liwele halilingulonga.
HAB 2:19 Kochona munhu yalingulilonjela izinga, ‘Ulilimche!’ Ama iganga lyohambe lilonje, ‘Winuche!’ Ndaze, limalukolo lyoweza kumlangusa munhu? Ulole, nalibakalizwa zahabu na sendi, na lyahela ukomu.
HAB 2:20 Ila Mkulu Nguluwi ka kuli ng'handa ya heye yelile, isi yeng'ha inyamalile hali heye.”
HAB 3:1 (Kwa yalingwaluchiza kwimba. Kwa vinhu vya muzichi vya ng'weso.) Kulanda kwa mloli Habakuki.
HAB 3:2 Gwa Mkulu Nguluwi, nanyhulika mbuli zilinguwala lutogo lwa hegwe, nani ndangudumba kwa madito ga hegwe. Uzidite kahi mbuli azo kuli mhela wa hetwe, zizeleche kuli awu mhela wa hetwe. Houzudila, dedede ukumbuchile kutulajila isungu lya hegwe.
HAB 3:3 Nguluwi nakoya kulawa Temani, heye yawele yelile kulawa kuli chidunda cha Palani. Ukulu wa heye nauugubika ulanga weng'ha, isi nayo naimema lutogo lwa heye.
HAB 3:4 Kupulika kwa heye ndo kota isanya lilingulawa, milapi najilawa mmoko mwa heye, kuwele mong'ho wa heye nauvisigwa.
HAB 3:5 Matamwa gangulongola kumwando kwa heye, kumbele kwa heye kubagama kwanguwinza.
HAB 3:6 Loyemile, isi naitigasika, loyawalolile wanhu wa isi, nawakakama. Vidunda vya katali navibenigwa, vigongo navigulumuka, amo namwali na nzila za heye za mazuwa gose.
HAB 3:7 Nandijona mihema ja wanhu wa Kushani vyojilingugazika, na mipaziya ja wanhu wa Midiani vyojilingukakama.
HAB 3:8 Gwa Mkulu Nguluwi, ndaze, nakuzizudila nzanda? Ndaze, nakugazudila mazi ga bahali, mbaka nakwendesa falasi wa hegwe na mituka ja ngondo ja kusumya?
HAB 3:9 Nakuuwika goya upinde wa hegwe, nakuwika misale ja hegwe kuli ng'weso. Lumwemwesa lwa hegwe lwangumwemwesa na nzanda zangulawila.
HAB 3:10 Vidunda navikona, navikakama. Mazi tendema nagakola amo. Mgati ng'hatu mwa bahali nakubuma, na kwinula nhigu zake.
HAB 3:11 Isanya na nyelezi navileka kujenda hali haluga hawo, vyoijiwene misale ja hegwe vyojilinguluta himahima, ena, vyoviliwene igoha lya hegwe vyolilingupulika.
HAB 3:12 Kwa ng'halazi nakukola mchanya mwa isi, nakuwabiga wanhu wa isi kwa ng'halazi ya hegwe.
HAB 3:13 Nakuluta kuwalohola wanhu wa hegwe, kumlohola yula umhagule kwa kumbakaliza mafuta. Nakumtowa chilongozi wa wehile, na kusa ludali lwa undewa wa heye.
HAB 3:14 Chilongozi wa wamizi nakumhoma kwa misale, wamizi vyowoyile kota chivuluvumbi kutusambalula, kuno wosangalala kwa kuwadumya wazunwa wevisile hali honhu hawo.
HAB 3:15 Kwa falasi wa hegwe nakujenda mchanya mwa bahali, bahali ilingutunyigwa na nhigu.
HAB 3:16 Nanyhulika nani nandumba, mlomo wa heni naukakama kwa lunhwinhwi, mizeje ja heni najizilika, magulu ga heni nagakakama. Ila ndangulibeteza kwa kusindamala zuwa lila lya kubagama, liwele lyanguya kwa wala walingututowa.
HAB 3:17 Hanga mitini joleka kulavya uluwa, na mizabibu kuleka kulela, na mizeituni kuleka kulavya zeituni, na migunda kuleka kulavya mbena, na wone ming'holo jokuka kuli ibani, na migongolo ja kufujigwa jiwe haduhu kuli mibani,
HAB 3:18 ndolutilila kusangalala kwa chiwalo cha Mkulu Nguluwi, kwa vila Mkulu Nguluwi ndo mlohozi wa heni.
HAB 3:19 Mkulu Nguluwi Yawele na Ludali ndo mong'ho wa heni, kangugakangaza magulu ga heni gawe kota ga ibala, kangunditaga ng'hole mchanya mwa chidunda.
ZEP 1:1 Ulonzi wa Mkulu Nguluwi naumuyila Sefaniya, mwana wa Kushi, mwana wa Gedaliya, mwana wa Amaliya, mwana wa Hesekiya, mhela wa ulongozi wa Yosiya, mwana wa Amoni, mndewa wa Yuda.
ZEP 1:2 Mkulu Nguluwi kangulonga, “Ndovidumya vilumbigwe vyeng'ha viwele kuli isi.
ZEP 1:3 Wanhu na migongolo na videje vya kilanga na somba za mbahali, na chinhu choneche chilinguwambuza wanhu kudita wihe, vyeng'ha ndovidumya ng'hatu, haduhu munhu yoneche yawele kosigala muisi. Heni Mkulu Nguluwi nandonga.”
ZEP 1:4 “Ndoigaza isi ya Yuda na weng'ha walingikala kuli muji wa Yelusalemu. Ndovidumya vinhu vyeng'ha vya Baali viwele navisigala kuli isi ayi, na watambika walingujikolela mijito jimalukolo wosemwigwa.
ZEP 1:5 Ndowadumya weng'ha walingufugama mchanya mwa vinduwiko, kuvifugamila vinhu vya ulanga, wala walingufugama na kilaha kwa itagwa lya heni Mkulu Nguluwi, kahi wangilaha kwa mlungu Milikomu.
ZEP 1:6 Ndowadumya kahi weng'ha walinguleka kumbinza heni Mkulu Nguluwi, ne kumbuza na kundanda utanzi.”
ZEP 1:7 Mnyamalile hali Mkulu Nguluwi Yawele na Ludali, kwa vila zuwa lya utaguso wa Mkulu Nguluwi lya habehi. Mkulu Nguluwi nakaiwika goya nhambiko ya wanhu wa heye, nakaweliza wala wawele nakawalalika.
ZEP 1:8 Mkulu Nguluwi kangulonga hino, “Kuli zuwa lya nhambiko ya heni, ndowagaza vilongozi wa wanhu, na wana wa mndewa hamwe na weng'ha walinguwinza vihendo vya chijenzi.
ZEP 1:9 Kuli zuwa alyo ndowagaza weng'ha, walingujifugamila milungu, walinguimemeza ng'handa ya milungu ja hewo kwa vinhu vya uhadi na vya kubunza.”
ZEP 1:10 Mkulu Nguluwi kangulonga, “Kuli zuwa alyo chohulikwa chililo kulawa kuli lwizi lwa somba kuli Yelusalemu, kulombocheza kulawa kuli honhu hanyale ha muji, na kubuma kukulu kulawa kuli chidunda.
ZEP 1:11 Mlombocheze hemwe mlingikala kuli honhu ha kuguzila na kugula vinhu! Walinguguza na kugula vinhu wa hemwe weng'ha nawadumigwa, weng'ha walingupima sendi nawadumigwa.
ZEP 1:12 Mhela awo ndoupugajiza muji wa Yelusalemu kwa chenje, na kuwagaza wala wawele wangikala kuli gehile ne kudumba ama kona soni, kuno wolonga mnhumbula za hewo, ‘Mkulu Nguluwi hodita chinhu choneche, chiwe chinojile ama chihile.’
ZEP 1:13 Lufufu lwa hewo loholigwa na ng'handa za hewo zobomoligwa. Wozenga ng'handa, ila hawochikala mgati mwake, wonyala mizabibu, ila hawonwa divai.”
ZEP 1:14 Lila zuwa likulu lya utaguso wa Mkulu Nguluwi lya habehi, lya habehi na lyanguya himahima. Lizi lya zuwa lya Mkulu Nguluwi ndo usungu, mbaka yazidahe kotowa iyowe.
ZEP 1:15 Zuwa alyo lyowa zuwa lya kuzudila, ndo zuwa lya magazo na kugazika, zuwa lya kubomoligwa na uchiwa, zuwa lya jiza na masinzo, zuwa lya ng'hungugu na jiza totolo.
ZEP 1:16 Zuwa alyo ndo lya lizi lya mhalamhanda ya ngondo, hali miji jiwele na ngome na ng'hanzi ziwele ng'wemang'wema.
ZEP 1:17 Kwa vila wanhu nawadita gehile hali Mkulu Nguluwi, heye kowegalila magazo makulu, ahyo wojenda kota wohambe walole. Danda ya hewo yohumizwa kota mitunzi, na ng'huli za hewo zokwenela kuli isi kota midohe.
ZEP 1:18 Sendi ya hewo na zahabu ya hewo haviweza kuwalohola kuli zuwa alyo lya kuzudila kwa Mkulu Nguluwi. Kwa chiluli cha fihi ya heye isi yeng'ha yolakazwa, ena, baho du kochigala kuduma, kwa weng'ha walingikala kuli isi.
ZEP 2:1 Mikungajize, mikungajize hamwe, hemwe wanhu wa isi mlihela soni,
ZEP 2:2 kung'hali mhela uwichigwe haunafika, zuwa lila lilinguwembelusa kota mhumba, kung'hali ng'halazi ing'hang'hale ya Mkulu Nguluwi hainawafichila, kung'hali zuwa lya kuzudila kwa Mkulu Nguluwi halinafika kwa hemwe.
ZEP 2:3 Mumpale Mkulu Nguluwi hemwe mweng'ha mlingunyenyetela wa isi, hemwe muwele mwanguditaga lila yalilajize. Mpale hachi, mpale kunyenyetela, hanji mowichigwa kutali na zuwa lya ng'halazi ya Mkulu Nguluwi.
ZEP 2:4 Muji wa Gasa wolechigwa uchiwa, Ashikeloni wowa mahame. Mhela wa nemisi wanhu wa Ashidodi wowinjigwa na wang'honyo, na wanhu wa Ekiloni wokusigwa.
ZEP 2:5 Mochona hemwe mlingikala hafungo ha bahali, hemwe Wakeleti, Mkulu Nguluwi nakalonga kuwala hemwe, Kanaani, isi ya Wafilisti, “Ndowadumya, haduhu yoneche yawele kowa mkomu.”
ZEP 2:6 Isi za hafungo ha bahali, zoditigwa kuwa honhu ha kudimila, howa honhu ha wadimi, na mibani ja ming'holo.
ZEP 2:7 Yowa ya wanhu wa lukolo lwa Yuda wasigale, wowa na honhu ha kudimila migongolo. Mhela wa matinazo wowasa hanyi, kuli ng'handa za Ashikeloni. Kwa vila Mkulu Nguluwi, Nguluwi wa hewo, kowalolela na kuwahilulila ng'hano ya hewo.
ZEP 2:8 Mkulu Nguluwi kangulonga, “Nandigahulika maligo ga Moabu na kubeza kwa Waamoni, wawele nawawaliga wanhu wa heni, na kuikabusa isi ya wanhu wa heni.
ZEP 2:9 Ndikomya, kota vyondilingikala, heni Mkulu Nguluwi Mbele na Mong'ho, Nguluwi wa Isilaeli, Moabu yowa kota Sodoma na Waamoni wowa kota Gomola, honhu ha migugu na misimo ja mwino, isi ya uchiwa mazuwa gose. Wanhu wa heni wasigale wovihola vinhu vya hewo, isi ya hewo yowa isi ya wanhu wa heni wasigale.”
ZEP 2:10 Acho ndo wohilusilwa kwa chiwalo cha kidaya kwa hewo, kwa kuwaliga na kuwabeza, wanhu wa Mkulu Nguluwi Yawele na Mong'ho.
ZEP 2:11 Mkulu Nguluwi kowakabusa, hoyojidumya milungu jeng'ha ja isi. Wanhu wa isi zeng'ha womfugamila, chila yumwe kuli isi ya heye.
ZEP 2:12 Namwe wanhu wa Kushi kahi mobagama kwa ipanga lya heye.
ZEP 2:13 Kogolola moko wa heye kasikazini, na kuidumya isi ya Ashulu. Koudita muji wa Ninawi uwe uchiwa, na kota kugunuche.
ZEP 2:14 Vilundo vya migongolo ja kufujigwa vyowasa amo, na chila igongolo lya kisolo. Mikungule na mituwe jochikala mchanya mwa mizengo jake, mituwe jolila kuli mitubuli jake, na kuli fulemu za lwizi, kwa vila ng'handa zake za mielezi zowa zilechigwe mwanzi.
ZEP 2:15 Awu ndo muji uwele nawali ulingidaya na kikala kwa kikala goya, muji uwele nawilonjela, “Ndo heni hela, haduhu yunji!” Ndaze vyouwele ulihela chinhu, na kuwa haluga ha migongolo ja kisolo! Chila hoyokola habehi kouzomela na kuubeza.
ZEP 3:1 Mochona hemwe wanhu wa Yelusalemu, mlingubunza na mkokomoche na mlingubelenhuka.
ZEP 3:2 Hamlinguhulichiza makanyo ne kukunda kukanyigwa. Hamlingitumbila kwa Mkulu Nguluwi, ne kuwa habehi na Nguluwi wa hemwe.
ZEP 3:3 Vilongozi wake ndo misimba jilingubuma, watagusa wake ndo mibwa ja kisolo jiwele na nzala ng'hatu mhela wa matinazo, hajilinguleka choneche kwa chiwalo cha mitondo.
ZEP 3:4 Waloli wake hawalingudita chinhu kwa kulolela goya na walingubelenhuka. Watambika wake nawavidita vinhu vyelile viwe vikokomoche na kwajiliza malajizo ga Nguluwi kwa chiwalo cha hewo wawo.
ZEP 3:5 Ila Mkulu Nguluwi yawele Yelusalemu ndo yatanganiche, halingudita mbuli yoneche yihile. Chila mitondo kangulajilaga hachi ya heye, ena, chila zuwa halingulemwela, ila wehile wahela soni ne hado.
ZEP 3:6 Mkulu Nguluwi kangulonga, “Nandiwadumya wanhu wa isi zinji, ngome za hewo nandizibomola. Nzila zawo nandiziwifya, haduhu yalingukola amo. Miji jawo najiwifigwa, haduhu ne yumwe yalechigwe mkomu.
ZEP 3:7 Nandijesa, ‘Ndikomya Yelusalemu wondumba na kugakunda makanyo, wahalechile kukumbuchila vyondiugazile.’ Ila wanhu wake nawali na maya lukami ga kudita madito gawo gehile.
ZEP 3:8 Lelo, mmbeteze, zuwa lyondikwima kulavya ulonjelezi. Nanyamula kuwakungajiza wanhu wa isi na undewa, na kuwalajila kuzudila kwa heni, na ng'halazi ya heni yeng'ha ing'hang'hale. Isi yeng'ha yolakazwa kwa chiluli cha fihi ya ng'halazi ya heni.
ZEP 3:9 Mhela awo ndojeliza milomo ja wanhu wa isi zeng'ha, leka walicheme itagwa lya heni Mkulu Nguluwi, na kung'holela mijito kwa kunuwila kumwe.
ZEP 3:10 Kulawa kumwambu mwa nzanda za Kushi wanhu wa heni walingufugamila heni, wanhu wa heni wawele nawasambaluka, wongalila ndolendole.
ZEP 3:11 “Zuwa alyo, hambasigwa soni, kwa chiwalo cha madito ga hemwe ga kumbelenhuka, kwa vila ndowosa hali hemwe, wala walingidaya na kiyipa ukulu. Namwe hamuweza kidaya kahi kuli chidunda cha heni chelile.
ZEP 3:12 Ndowalechela wanhu wawele liholile na walingunyenyetela, walingitumbila kikala goya kwa itagwa lya heni Mkulu Nguluwi.
ZEP 3:13 Waisilaeli wasigale, hawoileka hachi ne kulonga udesi, uhadi hauwa kuli milomo ja hewo. Wolya na kuwasa, haduhu munhu yoneche yawele kowadita wadumbe.”
ZEP 3:14 Wimbe kwa lizi likulu, gwa Siyoni, gwa Isilaeli ulavye lizi. Usangalale na kutowa luchenze kwa nhumbula ya hegwe yeng'ha, gwa Yelusalemu!
ZEP 3:15 Mkulu Nguluwi nakawosela utaguso uwele wahawafichile, nakawawinga wang'honyo wa hemwe. Mkulu Nguluwi, mndewa wa Isilaeli ka hamwe na hemwe, hamlinguganigwa kudumba magazo kahi.
ZEP 3:16 Zuwa alyo, muji wa Yelusalemu wolonjelwa, “Uleche kudumba, gwa Siyoni, wikangaze ng'hatu.
ZEP 3:17 Mkulu Nguluwi, Nguluwi wa hemwe, ka hamwe na hemwe heye ndo yawele na mong'ho wa kulohola. Heye kosangalala kwa chiwalo cha hemwe kwa kusangalala kukulu, kwa igano lya heye kowadita msindamale. Kosangalala kwa chiwalo cha hemwe kwa lwimbo lwa lizi likulu.”
ZEP 3:18 Mkulu Nguluwi kangulonga, “Ndogosa masinzo kwa hemwe, kuli mazuwa ga mnvina ziwichigwe, kwa vila ago ndo itunyo na kudeula kwa hemwe.
ZEP 3:19 Mhela awo ndowagaza weng'ha walinguwabunza hemwe. Ndowalohola vyete na kuwakungajiza wawele nawasambaluka. Ndowapa hewo lutogo na kuhulichizwa, kuli chila isi iwele nawali wabasigwe soni.
ZEP 3:20 Mhela awo ndowakungajiza hemwe, ndowegala haluga. Ndowadita mzeleche na kutogoligwa, hali wanhu weng'ha muisi, hondiwahilulila lufufu lwa hemwe, kuno mlola. Heni Mkulu Nguluwi nandonga.”
HAG 1:1 Kuli zuwa lya mwaluko lya mwezi wa sita na mwaka wa keli wa ulongozi wa mndewa Daliyo wa Pelisiya, ulonzi wa Mkulu Nguluwi naumuyila mloli Hagayi, leka yauhiliche kwa Selubabeli, mwana wa Shealitieli, chilongozi wa Yuda na kwa Yoshua, mtambika mkulu, mwana wa Yehosadaki.
HAG 1:2 Hagayi nakalonga, “Mkulu Nguluwi Yawele na Mong'ho kangulonga ahi, ‘Wanhu awa wangulonga kota mhela wa kuzenga kahi ng'handa ya Mkulu Nguluwi haunafika.’ ”
HAG 1:3 Ila ulonzi wa Mkulu Nguluwi naumbuyila heni, mloli Hagayi,
HAG 1:4 “Ndaze, yowa goya kwa hemwe kikala kuli ng'handa za hemwe zinoligwe goya kwa mbawo kuno ng'handa ya Nguluwi ndo mahame?”
HAG 1:5 Lelo, Mkulu Nguluwi Yawele na Mong'ho kangulonga hino, “Mijese leka mone kota mwangudita goya ama hebu!
HAG 1:6 Namnyala nyhadikwa nyinji, ila nambeta chido. Mwangulya ila hambe migute na mwangunwa divai ila hailinguhega. Mwanguvala nguwo ila hamlingupata ivuche. Mwangukola mijito, ila chomlingupegwa kwa chiwalo cha mijito ajo changuwa kota chinhu chiwichigwe kuli mhako utubuche.”
HAG 1:7 Mkulu Nguluwi Yawele na Mong'ho kangulonga hino, “Mijese leka mone kota mwangudita goya ama hebu!
HAG 1:8 Lelo, mlute kuli vidunda mkegale migodi leka mzenje kahi ng'handa ya heni, leka sangalale na kutogoligwa.
HAG 1:9 Namijesa kota mopata mbena nyinji, ila nampata nyindo hela. Vyomzigale kaye, nandiziwembelusa. Lekachoni? Kwa vila ng'handa ya heni naisigala mahame kuno chila yumwe wa hemwe kangugongomanya ng'handa ya heye yuye. Heni Mkulu Nguluwi Mbele na Mong'ho nandonga.
HAG 1:10 Ahyo, kwa chiwalo acho, ulanga nauleka kulagaza nhonya, najo misanga hajilingoteza mizuchila.
HAG 1:11 Nanyambuza chipalangule muisi na kuli vidunda na kuli migunda ja nyhule na kuli migunda ja mizabibu na ja mizeituni na kuli chila izuchila na wanhu na migongolo na kuli mijito ja hemwe jeng'ha.”
HAG 1:12 Hamba Selubabeli na Yoshua, hamwe na wanhu weng'ha wawele nawahiluka kulawa kuli isi ya chijenzi, nawadita kota Mkulu Nguluwi, Nguluwi wa hewo, vyoyawalonjele na kota vyowalonjelwe na mloli Hagayi, kwa vila nayali yalajizwe na Mkulu Nguluwi, Nguluwi wa hewo. Wanhu nawamdumba Mkulu Nguluwi.
HAG 1:13 Hamba Hagayi, msenga wa Mkulu Nguluwi, nakawapa wanhu usenga awu kulawa kwa Mkulu Nguluwi, “Mkulu Nguluwi kangulonga, ‘Nda hamwe na hemwe.’ ”
HAG 1:14 Ahyo, Mkulu Nguluwi nakawakangaza nhumbula Selubabeli na Yoshua, hamwe na wanhu weng'ha wawele nawahiluka kulawa kuli isi ya chijenzi, waizenje kahi ng'handa ya Nguluwi. Nawaluka kukola mijito ajo ja kuzenga kahi ng'handa ya Mkulu Nguluwi Yawele na Mong'ho, Nguluwi wa hewo,
HAG 1:15 kuli zuwa lya makumi meli na gane lya mwezi wa sita, mwaka wa keli wa ulongozi wa mndewa Daliyo.
HAG 2:1 Kuli zuwa lya makumi meli na imwe lya mwezi wa saba kuli mwaka wuwo, ulonzi wa Mkulu Nguluwi naumuyila mloli Hagayi.
HAG 2:2 Naumlonjela Hagayi yalongase na Selubabeli chilongozi wa Yuda, mwana wa Shealitieli na Yoshua, mtambika mkulu, mwana wa Yehosadaki na wanhu weng'ha wahiluche kulawa kuli isi ya chijenzi, yawalonjele hino,
HAG 2:3 “Whaani hali hemwe yasigale, yawele nakayona ayi ng'handa ya Nguluwi kuli ukulu wake wa hamwande? Lelo yangoneka ndaze kwa hemwe? Ndaze, hailingoneka kwa hemwe kota haiwele chinhu?
HAG 2:4 Ahyo, uleche kugozola hegwe Selubabeli. Wikangaze nhumbula gwa Yoshua, mwana wa Yehosadaki. Mikangaze nhumbula namwe wanhu weng'ha wa isi ayi. Mkole mijito, kwa vila heni Mkulu Nguluwi Mbele na Mong'ho, nda hamwe na hemwe.
HAG 2:5 Lomlawile Misili nandiwalonjela hemwe kota mazuwa gose ndowa hamwe na hemwe. Nding'hali hamwe na hemwe, ahyo, mleche kudumba.
HAG 2:6 “Ena, heni Mkulu Nguluwi Mbele na Mong'ho ndangulonga kota nda habehi kuvitigasa kahi ulanga na isi na bahali na isi ng'havu.
HAG 2:7 Ndowatigasa wanhu weng'ha wa isi zeng'ha na ng'hano za hewo zeng'ha zogaligwa amu, nani ndoidita ng'handa ayi iwe na ukulu. Heni Mkulu Nguluwi Mbele na Mong'ho, nandonga.
HAG 2:8 Sendi na zahabu, vyeng'ha muisi ndo vya heni. Heni Mkulu Nguluwi Mbele na Mong'ho, nandonga.
HAG 2:9 Ukulu wa Ng'handa ya Nguluwi inyale wowa ukulu kusinda wula wa ng'handa ya Nguluwi ya hamwande. Honhu aho ndo hondiwapa wanhu wa heni kikala goya na mbuli za hewo zolutilila goya. Heni Mkulu Nguluwi Mbele na Mong'ho, nandonga.”
HAG 2:10 Kuli zuwa lya makumi meli na gane lya mwezi wa tisa, kuli mwaka wa keli wa ulongozi wa Daliyo, ulonzi wa Mkulu Nguluwi Yawele na Mong'ho naumuyila mloli Hagayi na kumlonjela,
HAG 2:11 “Heni Mkulu Nguluwi Mbele na Mong'ho, ndangulonga kota uwauze watambika kuwala malajizo vyogalingulonga kuwala mbuli ayi.
HAG 2:12 Wone munhu yahole kwa lupembo lwa nguwo ya heye miwunde jiwichigwe chiuyeng'ha, hamba lupembo alo ludolize ibumunda ama muhuzi ama divai ama mafuta ama chilyo chinji, ndaze, chinhu acho chidolizwe chowa chiwichigwe chiuyeng'ha kahi?” Watambika nawedichila, “Hebu.”
HAG 2:13 Hagayi nakawauza kahi, “Ndaze, munhu yawele yakokomoche kwa kudoliza mtufi, wone yadolize chinhu chimwe hali vinhu avyo, chinhu acho chowa chikokomoche?” Watambika nawedichila, “Ena, chowa chikokomoche.”
HAG 2:14 Aho Hagayi nakawalonjela, “Mkulu Nguluwi kangulonga hino, ‘Ahyo ndo vyoiwele kwa wanhu wa isi ayi na chila chinhu chowalingudita na kahi kwa chila chinhu chowalingulavya hali honhu ha kulavila nhambiko, ndo chikokomoka.’ ”
HAG 2:15 Mkulu Nguluwi kangulonga, “Lelo mlole mbuli zozilawila. Lomuwa mng'hali kwaluka kuzenga kahi ng'handa ya heni, namwali ndaze?
HAG 2:16 Namluta kuli ibiwi lya nyhule kuno mchitumbila kumemeza vipimilo makumi meli, ila navimema vipimilo kumi hela. Namluta kuli idalamu lya divai kuno mgana kumemeza vipimilo makumi gahano, ila nammemeza vipimilo makumi meli hela.
HAG 2:17 Nandijitowa mijito ja moko ga hemwe kwa chipalangule na nhonya ya maganga na lungwi, ila hamnyhiluchile. Heni Mkulu Nguluwi nandonga.
HAG 2:18 Lehano ndo zuwa lya makumi meli na gane lya mwezi wa tisa, zuwa liwele msisi wa ng'handa ya heni Mkulu Nguluwi nausinda kuzenjigwa. Lelo, mbeteze leka mgone gala gawele golawila kwaluchila lehano.
HAG 2:19 Hanga mwahela nyhule kung'hano, najo mizabibu na mitini na mikomamanga na mizeituni hajilelile chinhu, lelo kwaluchila lehano, ndowatambichiza.”
HAG 2:20 Kuli zuwa lilyo lya makumi meli na gane lya mwezi wa tisa, ulonzi wa Mkulu Nguluwi naumuyila lwa keli Hagayi na kulonga,
HAG 2:21 “Ulongase na Selubabeli, chilongozi wa Yuda, umlonjele hino, ‘Nda habehi kuvitigasa ulanga na isi.
HAG 2:22 Ndogalamula vigoda vya undewa na kuwifya ng'hatu mong'ho wa undewa wa wanhu wa isi za chijenzi. Ndogalamula mituka jawo ja ngondo na walingwendesa mituka ajo, falasi na wakwina falasi wogwa na wochikopola kwa ipanga.
HAG 2:23 Kuli zuwa alyo, ndokuhola hegwe chitumagwa wa heni Selubabeli, mwana wa Shealitieli na kukuhagula leka ulongoze kwa itagwa lya heni. Hegwe ndo ndikuhagule. Heni Mkulu Nguluwi Mbele na Mong'ho, nandonga.’ ”
ZEC 1:1 Kuli mwezi wa nane wa mwaka wa keli wa ulongozi wa Mndewa Daliyo wa Pelisiya, ulonzi wa Mkulu Nguluwi naumuyila mloli Sekaliya, mwana wa Belekiya, mzukulu wa Ido na kulonga,
ZEC 1:2 “Heni Mkulu Nguluwi nanzudizwa ng'hatu na wasekulu wa hemwe wa katali.
ZEC 1:3 Ahyo muwalonjele wanhu kota heni Mkulu Nguluwi Mbele na Mong'ho ndangulonga kota mnyhiluchile, nani ndowahiluchila hemwe.
ZEC 1:4 Mleche kuwa kota wasekulu wa hemwe, wawele waloli walongole nawawalonjela kota Mkulu Nguluwi Yawele na Mong'ho kangulonga, ‘Mzileche nzila za hemwe zihile na madito ga hemwe gehile.’ Ila hewo hawanyhulichize ne kuwinza ulonzi wa heni.
ZEC 1:5 Lelo, wakohi wasekulu wa hemwe? Ndaze, nawo waloli wangikala mazuwa gose?
ZEC 1:6 Ndaze, wasekulu wa hemwe hawafichigwe na magazo kwa chiwalo cha kugalema malajizo ga heni na mizilo jondiwapele kwa kukolela vitumagwa wa heni waloli? Mhela awo, nawamula kuleka gehile ga hewo na kulonga kota heni Mkulu Nguluwi Mbele na Mong'ho, nanuwila kuwaditila kwa kiwhana na nzila za hewo na madito ga hewo. Ndikomya, nani ndo vyondiwaditile.”
ZEC 1:7 Kuli zuwa lya makumi meli na gane ga mwezi wa kumi na umwe, uwele ndo mwezi ulinguchemigwa Shebati, kuli mwaka wa keli wa ulongozi wa Mndewa Daliyo, ulonzi wa Mkulu Nguluwi naumuyila mloli Sekaliya, mwana wa Belekiya, mzukulu wa Ido.
ZEC 1:8 Mhela wa nechilo nandota, nandimona mhilisi yakwinile falasi mdung'hu, yawele hagati ha migodi ja mihadasi, kuli ibalalika. Kumbele kwa heye nakwali na falasi wanji wa lanji ndung'hu na wa lanji ya mivu na wa lanji nzelu.
ZEC 1:9 Lelo, nandimuuza, “Mkulu, falasi awo wana mana yachi?” Mhilisi ayo yawele nayali yolongasa na heni nakandonjela, “Ndokulajila falasi wano wana mana yachi.”
ZEC 1:10 Hamba yula mhilisi wa mwaluko yawele nayali hagati ha migodi nakalonga, “Falasi wano ndo wala wawele Mkulu Nguluwi nakawalajiza walute kuli isi yeng'ha.”
ZEC 1:11 Falasi awo nawamlonjela ayo mhilisi wa Mkulu Nguluwi, “Natuipugajiza isi yeng'ha, twangukomya, isi inasindamala.”
ZEC 1:12 Mhilisi wa Mkulu Nguluwi nakalonga, “Gwa Mkulu Nguluwi Uwele na Mong'ho, kwa mhela wachi kolutilila kuwa ulihela isungu kwa Yelusalemu na miji ja Yuda, jiwele nakujizudila kwa mhela wa miyaka makumi saba?”
ZEC 1:13 Ahyo Mkulu Nguluwi nakalonga ulonzi wa uliholile na wa isungu kwa mhilisi yawele nayali yolongasa na heni.
ZEC 1:14 Hamba ayo mhilisi nakandonjela, “Kwanguganigwa kulonga kwa lizi kota Mkulu Nguluwi Yawele na Mong'ho kangulonga hino, ‘Ndina fihi ng'hatu kwa chiwalo cha muji wa Yelusalemu na Siyoni.
ZEC 1:15 Ila nanzudizwa ng'hatu na wanhu wa isi walingijesa kota wa kuli kikala goya. Ndikomya, nandiwazudila Waisilaeli hado hela, ila wanhu wa isi azo nawawonjezela magazo.
ZEC 1:16 Ahyo, heni Mkulu Nguluwi ndangulonga kota, ndanguuhiluchila muji wa Yelusalemu kwa isungu, amo yozenjigwa ng'handa ya heni na muji wokwaluka kuzenjigwa kahi. Heni Mkulu Nguluwi Mbele na Mong'ho nandonga.’ ”
ZEC 1:17 Hamba mhilisi ayo nakandonjela ndonje mbuli ayi yinji, “Mkulu Nguluwi Yawele na Mong'ho, kangulonga hino, ‘Miji ja heni jomema kahi nyhule. Ndouhembuliza kahi muji wa Yelusalemu na kuuhagula muji awo leka uwe wa heni.’ ”
ZEC 1:18 Hamba nandola kuchanya na nandizona mbalati zine.
ZEC 1:19 Nani nandimuuza yula mhilisi yawele nayali yolongasa na heni, “Mbalati azi zina mana yachi?” Naye nakanyidichila, “Mbalati azi zanguwala wala wanhu wa isi wawele nawawasambalula wanhu wa Yuda na wa Isilaeli na wa Yelusalemu.”
ZEC 1:20 Hamba Mkulu Nguluwi nakandajila wazidahe kuponda chuma wane.
ZEC 1:21 Nambuza, “Wazidahe wano wanguya kudita choni?” Naye nakanyidichila, “Wanhu awa nawoya kuwakabusa na kuwadumya wala wanhu wa isi wawele na mong'ho, wawele nawawatowa na kuwasambalula wanhu wa isi ya Yuda.”
ZEC 2:1 Kuli kulota kunji, nandimona munhu yawele na ng'weso ya kupimila mmoko mwake.
ZEC 2:2 Lelo, nandimuuza, “Kwanguluta kohi?” Naye nakanyidichila, “Ndanguluta kupima ulefu na ugazi wa muji wa Yelusalemu.”
ZEC 2:3 Yula mhilisi yawele yolongasa na heni, nayali yoluta kwa mhilisi yunji yawele nayali yomuyila.
ZEC 2:4 Lelo, yula mhilisi yawele nayali yolongasa na heni nakamlonjela yula myage, “Ubilime ukamlonjele yula msongolo kota muji wa Yelusalemu wowa ulihela lukanzi, kwa chiwalo cha winji wa wanhu wake na migongolo jawo.
ZEC 2:5 Kwa vila Mkulu Nguluwi kangulonga kota heye yuye kowa lukanzi lwa chiluli kuwamila muji awo kuli banzi zeng'ha, naye kochikala amo kwa ukulu wake.”
ZEC 2:6 Mkulu Nguluwi kangulonga hino, “Muye! Muye! Mbilime kulawa kuli isi ya kasikazini kuwele heni nandiwasambalula kuli chila ubanzi.
ZEC 2:7 Hemwe mweng'ha mlingikala kuli isi ya Babuloni, mbilime himahima kuhiluka kuli muji wa Siyoni!”
ZEC 2:8 Mkulu Nguluwi Yawele na Mong'ho, kwa chiwalo cha ukulu wa heye nakandajiza kwa wanhu wa isi wawele nawawahola wanhu wa heye kulonga, “Ndikomya, yalinguwadoliza hemwe, kangulidoliza iziho lya heni.
ZEC 2:9 Ena, ndowagaza hewo leka wapogozi wawo wawahole.” Hamba movizela kota Mkulu Nguluwi Yawele na Mong'ho ndo yandajize.
ZEC 2:10 Mkulu Nguluwi kangulonga hino, “Hemwe wanhu wa Siyoni, mwimbe na kusangalala kwa vila ndanguya na kikala hali hemwe.
ZEC 2:11 Wanhu wa isi nyinji wochilumba na heni Mkulu Nguluwi, nawo wowa wanhu wa heni, nani ndochikala hali hemwe.” Mbuli ayo hoilawila, movizela kota Mkulu Nguluwi Yawele na Mong'ho ndo yandajize kwa hemwe.
ZEC 2:12 Isi ya Yuda yowa kahi honhu ha chiuyeng'ha ha Mkulu Nguluwi na muji wa Yelusalemu wowa kahi muji wa heye woyauhagule.
ZEC 2:13 Hemwe wanhu weng'ha, minyamalile hali Mkulu Nguluwi, kwa vila kanguya kulawa haluga ha heye helile.
ZEC 3:1 Hamba nakandajila Yoshua, mtambika mkulu, yawele yemile kumwando kwa mhilisi wa Mkulu Nguluwi na ubanzi wa kudilo wa Yoshua nalima Limazoga, leka limlonjeleze kwa ayo mhilisi.
ZEC 3:2 Mhilisi wa Mkulu Nguluwi nakalilonjela alyo Limazoga, “Mkulu Nguluwi yakung'hanuchile, hegwe Limazoga! Ena, Mkulu Nguluwi yawele nakauhagula muji wa Yelusalemu, yakung'hanuchile! Munhu ayo ndo kota chizinga chilingwaka chiwele nachinyasuligwa kulawa kuli chiluli.”
ZEC 3:3 Mhela awo Yoshua nayali yavalile mivalo jiwele na wavu, loyawele yemile kumwando kwa mhilisi.
ZEC 3:4 Mhilisi nakawalonjela vitumagwa wa heye, “Mumvule Yoshua, mivalo ja heye jiwele na wavu.” Hamba nakamlonjela Yoshua, “Ulole, nandikusila gehile gouditile, nani ndokupa mivalo ja sendi nyinji.”
ZEC 3:5 Hamba nakawalonjela wamvalize chipembelo chinojile kumutwi. Ahyo nawamvaliza chipembelo chinojile na mivalo, naye mhilisi wa Mkulu Nguluwi nayali yemile aho.
ZEC 3:6 Mhilisi wa Mkulu Nguluwi nakamlajiza Yoshua,
ZEC 3:7 “Mkulu Nguluwi Yawele na Mong'ho kangulonga hino, ‘Wone kowinza nzila za heni na kibatilila malajizo ga heni, kowa chilongozi wa ng'handa ya heni na lugagala lwake. Nani ndokukundiza uweze kuya na kuka hali wano walingwima hali heni.
ZEC 3:8 Lelo, uhulichize hegwe Yoshua hamwe na wayago wawele nawekalisa hali hegwe, wawele ndo ulajilo wa mbuli zilinguya kota ndomigala chitumagwa wa heni yalinguchemigwa Izuchila.
ZEC 3:9 Nambika hali Yoshua iganga liwele na banzi saba. Nani ndokwandika mchanya mwake na kusa gehile ga isi ayo kwa zuwa limwe hela. Ena, heni Mkulu Nguluwi Mbele na Mong'ho, nandonga.
ZEC 3:10 Kuli zuwa alyo chila yumwe komlalika yalingikalasa habehi na heye leka kusangalala kwa chiwalo cha kikala goya na kusindamala kuli mgunda wa heye wa mizabibu na mitini. Heni Mkulu Nguluwi Mbele na Mong'ho, nandonga.’ ”
ZEC 4:1 Hamba yula mhilisi yawele nayali yolongasa na heni nakahiluka na kunyinula kota vila munhu vyoyalingwinulwa kulawa kuli usinjizi.
ZEC 4:2 Nakambuza, “Kwangona choni?” Nani nandimwidichila, “Ndanguchona chinhu cha kuwichila chenje cha zahabu. Mchanya mwake hana chisaye cha mafuta na vyenje saba na chila chimwe china honhu ha kuwichila utambi saba.
ZEC 4:3 Kahi, hana mizeituni mili habehi na chisaye, umwe ubanzi wa kudilo wa chisaye na wunji ubanzi wa kumoso.”
ZEC 4:4 Lelo, nandimuuza ayo mhilisi, “Mkulu, vinhu avi vyangulajila choni?”
ZEC 4:5 Nakanyidichila, “Huvizelele kota vinhu avi vyangulajila choni?” Nandimwidichila, “Sivizelele mkulu.”
ZEC 4:6 Hamba nakandonjela, “Awu ndo ulonzi wa Mkulu Nguluwi kwa Selubabeli, ‘Haiwele kwa ludali ne kwa mong'ho, ila ndo kwa Muhe wa heni.’ Heni Mkulu Nguluwi Mbele na Mong'ho nandonga.”
ZEC 4:7 Kahi nakonjeza kulonga, “Ndaze, chidunda achi ndo chilingukulemeza? Hebu! Hegwe Selubabeli kochiselega. Nagwe kokwaluchiza kuzenga ng'handa ya Nguluwi na mhela houliwika iganga lya kuduma, wanhu wotowa luchenze na kulonga, ‘Inoga! Ena, inoga!’ ”
ZEC 4:8 Hamba ulonzi wa Mkulu Nguluwi naumbuyila na kulonga,
ZEC 4:9 “Selubabeli nakaluchiza msisi wa ng'handa ya Nguluwi na yuye ndo kosinda kuizenga ng'handa ayo. Hogolawila ago, wanhu wa heni wovizela kota heni Mkulu Nguluwi Mbele na Mong'ho, nandikulajiza kwa hewo.
ZEC 4:10 Whaani yalingulibeza zuwa lya mwaluko mdodo? Wanhu wotowa luchenze howoyona ng'weso ya kupimila mmoko mwa Selubabeli kuno ng'handa ya Nguluwi yolutilila kuzenjigwa. Avi saba ndo meho ga Mkulu Nguluwi gawele ganguzungulutaga kuli isi yeng'ha.”
ZEC 4:11 Nani nandimuuza kahi, “Ndaze, ajo migodi mili ja mizeituni jiwele ubanzi wa kudilo na wa kumoso wa chinhu cha kuwichila chenje, jangulajila choni?”
ZEC 4:12 Nandimuuza kahi, “Azi nhagala mbili za mizeituni habehi na milija mili ja zahabu jilinguhilika mafuta jangulajila choni?”
ZEC 4:13 Naye nakandonjela, “Ndaze, huvizelele?” Nani nandimwidichila, “Ena, sivizelele Mkulu!”
ZEC 4:14 Nakandonjela, “Nhagala azi ndo wala wanhu weli wawele nawabakalizwa mafuta leka wamkolele mijito Mkulu wa isi yeng'ha.”
ZEC 5:1 Vyondolile kahi nandichona chitabu changuguluka kuli ulanga.
ZEC 5:2 Yula mhilisi nakambuza, “Kwanguchona choni?” Nani nandimwidichila, “Ndanguchona chitabu changuguluka kuli ulanga, ulefu wake mita tisa na ugazi wake mita zine na nusu.”
ZEC 5:3 Lelo nakandonjela, “Mgati mwa chitabu acho namwandichigwa upanjilo uwele wouvaba isi yeng'ha. Ubanzi umwe nawandichigwa kota wahizi weng'ha wowinjigwa kuli isi na ubanzi wunji nawandichigwa kota weng'ha walingilaha udesi nawo woditilwa hihyo.
ZEC 5:4 Mkulu Nguluwi Yawele na Mong'ho nakalonga, ‘Ndougala awo upanjilo kuli ng'handa ya mhizi na ya ayo yalingilaha udesi kwa itagwa lya heni. Upanjilo awo wochikala amo na kuzidumya ng'hatu ng'handa azo hamwe na mbawo zake na maganga gake.’ ”
ZEC 5:5 Yula mhilisi yawele nayali yolongasa na heni, nakoya habehi na heni na kundonjela, “Ulole kuli ulanga leka uchone chilinguya.”
ZEC 5:6 Nani nandimuuza, “Ndo chinhu chachi acho?” Naye nakedichila, “Acho ndo chidoto chiwele na wihe wa isi yeng'ha.”
ZEC 5:7 Chidoto acho nachali na chigubiko chigongomanywe kwa chuma. Chigubiko acho nachigubuligwa, nani nandimona mdala yekalise mgati.
ZEC 5:8 Yula mhilisi nakandonjela, “Mdala ayo ndo kota wihe!” Hamba yula mhilisi nakamkundujiza mgati mwa chidoto mdala ayo na kuchigubika chidoto acho na chigubiko cha lisasi.
ZEC 5:9 Londolile kuchanya, nandiwona wadala weli wokuya kwa heni kuno wowembeluswa na mbeho. Nawali na mabawa gawele na mong'ho kota isakulang'hola. Wadala awo nawachinula chila chidoto kulutila kilanga.
ZEC 5:10 Lelo, nandimuuza yula mhilisi yawele nayali yolongasa na heni, “Wanguchihilika kohi chila chidoto?”
ZEC 5:11 Naye nakandonjela, “Wanguchihilika kuli isi ya Babuloni. Ako wozenga ng'handa kwa chiwalo cha chidoto acho na loiwa isindile kuzenjigwa, wochiwika chidoto acho kuli ng'handa ayo.”
ZEC 6:1 Nandola kuchanya kahi, nandijona mituka jine ja falasi jilinguya kulawa hagati ha vidunda vili vya shaba.
ZEC 6:2 Mutuka wa mwaluko naukwejigwa na falasi wadung'hu na wa keli naukwejigwa na falasi watitu
ZEC 6:3 na wa kadatu naukwejigwa na falasi wazelu na wa kane naukwejigwa na falasi wa lanji ya mivu, weng'ha wawele na mong'ho.
ZEC 6:4 Nandimuuza mhilisi yawele nayali yolongasa na heni, “Mkulu, mituka ajo jina mana yachi?”
ZEC 6:5 Mhilisi nakedichila, “Mituka aji ndo mbeho kulawa banzi zine za isi. Nayali hali Mkulu Nguluwi wa isi yeng'ha na sambi yanguka.
ZEC 6:6 Mutuka ulingukwejigwa na falasi watitu wanguluta kuli isi ya kasikazini na wula ulingukwejigwa na falasi wazelu wanguluta kolizinjilaga isanya na wula ulingukwejigwa na falasi wa lanji ya mivu wanguluta kusini.”
ZEC 6:7 Falasi awo wawele na mong'ho vyowawele wolawa nawali na maya ng'hatu ga kuluta kuilola isi. Naye mhilisi nakawalonjela, “Goya! Mlute mkailole isi.” Lelo nawaluta na kuilola isi.
ZEC 6:8 Hamba yula mhilisi yawele nayali yolongasa na heni nakandonjela kwa lizi, “Ulole! Wala falasi nawaluta kuli isi ya kasikazini, nawaudita muhe wa Mkulu Nguluwi usindamale.”
ZEC 6:9 Ulonzi wa Mkulu Nguluwi naumbuyila nakundonjela,
ZEC 6:10 “Ulute kwa Helidayi na Tobiya na Yedaya, wawele nawahiluka kulawa Babuloni. Ukungajize sendi na zahabu za kuhega kulawa kwa hewo na ugongomanye itaji. Hamba ulute na hewo kuli ng'handa ya Yosiya, mwana wa Sefaniya na uliwiche itaji alyo kuli mutwi wa mtambika mkulu Yoshua, mwana wa Yehosadaki.
ZEC 6:12 Hamba umlonjele kota Mkulu Nguluwi Yawele na Mong'ho kangulonga hino, ‘Hano hana munhu yalinguchemigwa Izuchila. Heye kolutilila goya hala hoyawele na kuizenga ng'handa ya heni Mkulu Nguluwi.
ZEC 6:13 Heye ndo yawele kozenga ng'handa ya heni Mkulu Nguluwi na kopegwa lutogo lwa mndewa na kikalisa kuli chigoda cha heye cha undewa leka kuwalongoza wanhu wa heye. Habehi na chigoda acho cha undewa, kochikala mtambika, nawo weli wokola mijito hamwe kwa kikala goya.
ZEC 6:14 Itaji alyo lyowichigwa kuli Ng'handa ya heni Mkulu Nguluwi kwa kukumbuchila kwa Helidayi na Tobiya na Yedaya na Yosiya, mwana wa Sefaniya.’
ZEC 6:15 “Wanhu walingikala isi za kutali wokuya kutanza kuzenga Ng'handa ya heni Mkulu Nguluwi.” Namwe movizela kota Mkulu Nguluwi Yawele na Mong'ho ndo yandajize kwa hemwe. Aga geng'ha golawila wone molihulichiza lizi lya Mkulu Nguluwi, Nguluwi wa hemwe.
ZEC 7:1 Kuli mwaka wa kane wa ulongozi wa mndewa Daliyo, zuwa lya kane lya mwezi wa tisa, uwele ndo Kisilevu, ulonzi wa Mkulu Nguluwi naumbuyila heni Sekaliya.
ZEC 7:2 Wanhu wa muji wa Beteli nawawalajiza wanhu weli, wawele ndo Shaleseli na Legemu-meleki hamwe na wanhu wa hewo, kumlanda Mkulu Nguluwi utambichizo
ZEC 7:3 na kuwauza watambika wa Ng'handa ya Mkulu Nguluwi Yawele na Mong'ho na waloli, “Ndaze, tulutilile kulombocheza na kwesela kulya kuli mwezi wa kahano kota vyotuditile kwa mhela wa miyaka minji?”
ZEC 7:4 Hamba ulonzi wa Mkulu Nguluwi Yawele na Mong'ho naumbuyila na kulonga,
ZEC 7:5 “Uwauze wanhu weng'ha wa isi na watambika, ‘Lomwesele kulya na kulombocheza kuli mwezi wa kahano na mwezi wa saba, kwa mhela wa miyaka makumi saba jipulute, ndaze, namwesela kulya kwa chiwalo cha heni?
ZEC 7:6 Ndaze, lomdile na kunwa, haiwele namulya na kunwa kwa chiwalo cha hemwe hela?’
ZEC 7:7 Ndaze, awu hauwele wula ulonzi uwele Mkulu Nguluwi nakalonga kwa kukolela waloli walongole, mhela uwele muji wa Yelusalemu hamwe na miji jilinguuzunguluta lojiwele jisindamale na mbuli zake nazali zilutilila goya, mhela uwele wanhu nawali wochikala kuli Negebu na ibalalika?”
ZEC 7:8 Ulonzi wa Mkulu Nguluwi naumbuyila heni Sekaliya na kundonjela,
ZEC 7:9 “Heni Mkulu Nguluwi Mbele na Mong'ho ndangulonga, ‘Ndikomya mwamule kwa hachi, milajile igano lya kwimilila na isungu hali hemwe.
ZEC 7:10 Mleche kuwabunza wafililwe na walume wawo ne walekwa ne wajenzi ne wazunwa. Mleche kunuwila kudita gehile hali hemwe.’
ZEC 7:11 “Ila wanhu nawalema kunyhulichiza, nawalutilila kumha heni chigosi na kudinya makutu ga hewo leka waleche kuhulika.
ZEC 7:12 Nawazidita nhumbula za hewo ziwe zigagadale kota iganga, leka waleche kuhulichiza malajizo ga heni gondigalajize kwa muhe wa heni kwa kukolela waloli walongole. Ahyo, heni Mkulu Nguluwi Mbele na Mong'ho nandiwazudila ng'hatu,
ZEC 7:13 nandonga, ‘Kwa vila nandiwachema nawo hawanyhulichize, lelo, nawo lowanyhemile siwahulichize. Heni Mkulu Nguluwi Mbele na Mong'ho nandonga.
ZEC 7:14 Nandiwasambalula kwa chivuluvumbi hali wanhu wa isi zeng'ha wawele hawawazelele. Ahyo isi yowailechile naisigala ilihela wanhu, hakuwele na munhu yoneche yawele nakekala amo, ena, isi ayo ya kunojeza nayali uchiwa.’ ”
ZEC 8:1 Mkulu Nguluwi Yawele na Mong'ho nakamha heni kahi usenga wunji.
ZEC 8:2 Awu ndo ulonzi wa Mkulu Nguluwi Yawele na Mong'ho, “Ndina fihi ng'hatu kwa chiwalo cha Siyoni, ndina fihi ng'hatu kwa chiwalo cha muji wula.
ZEC 8:3 Ndohiluka kuli Siyoni na kikala kuli muji wa Yelusalemu. Hamba Yelusalemu wochemigwa muji wa kukundigwa na chidunda cha heni Mkulu Nguluwi Mbele na Mong'ho, chochemigwa chidunda chelile.
ZEC 8:4 Wasekulu walume na wadala wokoneka kahi wekalise kuli nzila ya Yelusalemu, chila yumwe yawele na ng'hweku ya heye mmoko kwa vila nawekala miyaka minji. Heni Mkulu Nguluwi Mbele na Mong'ho nandonga.
ZEC 8:5 Nzila za muji wa Yelusalemu zomema wasongolo na wahinza wovina amo.
ZEC 8:6 Mhela awu wala wasigale nawona kota ndo mbuli ng'hulu ng'hatu, ila mwangijesa mbuli ayo ndo ng'hulu ng'hatu kwa heni Mkulu Nguluwi Mbele na Mong'ho?
ZEC 8:7 Ndowalohola wanhu wa heni kulawa kuli isi ya kolilawilaga isanya na kuli isi ya kolizinjilaga isanya. Heni Mkulu Nguluwi Mbele na Mong'ho nandonga.
ZEC 8:8 Ndowahilula leka wekale kuli muji wa Yelusalemu. Wowa wanhu wa heni, nani ndowa Nguluwi wa hewo. Ndowalongoza kwa kukundigwa na hachi.”
ZEC 8:9 Mkulu Nguluwi Yawele na Mong'ho kangulonga hino, “Hemwe muwele sambi mwanguuhulika ulonzi awu uwele wangulonjigwa na waloli wawele nawali baho mhela wa kwaluchizwa msisi wa ng'handa ya heni Mkulu Nguluwi, ‘Mikangaze leka ng'handa ya heni izenjigwe.’
ZEC 8:10 Mhela awo louwele ung'hali kufika, wanhu hawapatile sendi kwa chiwalo cha mijito jowakolile ne kwa kwazika migongolo. Hamuwele na kikala goya kwa chiwalo cha wang'honyo wa hemwe, kwa vila nanyambuza kilewa hali wanhu weng'ha.
ZEC 8:11 Ila lelo siwaditila wanhu wa isi ayi wasigale kota aho katali. Heni Mkulu Nguluwi Mbele na Mong'ho nandonga.
ZEC 8:12 Lelo ndonyala nyhadikwa za kikala goya muisi, nhonya yotowa kota vyoilinguganigwa na misanga jolavya vilyo na mizabibu jolela ng'hatu. Ago geng'ha ndowapa wanhu wa isi ayi wasigale gawe ga hewo.
ZEC 8:13 Ndikomya, hemwe wanhu wa Yuda na wa Isilaeli, mhela ukolile namoneka kota nampanjilwa hali wanhu wa isi. Ila lelo ndowalohola hemwe namwe mowatambichiza wanji. Lelo, mleche kudumba kahi, ila mikangaze nhumbula!”
ZEC 8:14 Mkulu Nguluwi Yawele na Mong'ho kangulonga hino, “Kota vyonuwile kuwegalila hemwe magazo, mhela wasekulu wa hemwe lowanzudize na siwonele isungu,
ZEC 8:15 hihyo du nanuwila kuwaditila ganojile wanhu wa Yelusalemu na wanhu wa Yuda, lelo mleche kudumba.
ZEC 8:16 Ahyo ndo vyomlinguganigwa kudita, chila yumwe wa hemwe yalonje kukomya kwa myage. Vitala vya hemwe vilavye nhaguso za hachi zilingigala kikala goya.
ZEC 8:17 Munhu yoneche hali hemwe yaleche kunuwila kudita wihe kwa myage na mleche kulavya ulolezi wa udesi, kwa vila ndangugazudila ng'hatu madito ago. Heni Mkulu Nguluwi nandonga.”
ZEC 8:18 Ulonzi wa Mkulu Nguluwi Yawele na Mong'ho naumbuyila kahi heni Sekaliya na kulonga,
ZEC 8:19 “Mazuwa ga kwesela kulya ga kuli mwezi wa kane na mwezi wa kahano na mwezi wa saba na mwezi wa kumi, jowa ndo mihela ja kusangalala na luchenze, jowa ndo mnvina kwa wanhu wa Yuda. Lelo, mgane kukomya na kikala goya.”
ZEC 8:20 Mkulu Nguluwi Yawele na Mong'ho kangulonga hino, “Wanhu wenji wa isi za chijenzi na wenyeng'haye wa kuli miji minji woluta mujini Yelusalemu.
ZEC 8:21 Wenyeng'haye wa muji umwe woluta kwa wenyeng'haye wa muji uyage na kuwalonjela, ‘Tukomya, tulute hamwe kumfugamila Mkulu Nguluwi Yawele na Mong'ho na kumlanda utambichizo!’
ZEC 8:22 Ena, wanhu wenji na wanhu wa isi wawele na mong'ho woluta Yelusalemu kufugamila heni Mkulu Nguluwi Mbele na Mong'ho na kundanda utambichizo.
ZEC 8:23 Mhela awo wanhu kumi kulawa chila isi na chila ndonga womibata Myuda yumwe na kibata nguwo ya heye na kumlonjela, ‘Twangugana kuluta hamwe na hegwe, kwa vila natuhulika kota Nguluwi ka hamwe na hemwe.’ Heni Mkulu Nguluwi Mbele na Mong'ho nandonga.”
ZEC 9:1 Ulonzi wa Mkulu Nguluwi, Mkulu Nguluwi kangulonga kuwala wanhu wa Hadalaki na wa Damasiko, “Meho ga wanhu na ga nhanzi zeng'ha za Isilaeli, gomgalamchila Mkulu Nguluwi,
ZEC 9:2 kahi muji wa Hamati ulingubakana na muji wa Hadalaki mbaka miji ja Tilo na Sidoni, hanga jangoneka jina luhala ng'hatu.
ZEC 9:3 Muji wa Tilo nawizenjela ngome iwele nzinzili, nauwika sendi kota nhimbwisi, na zahabu kota wavu mnzila.
ZEC 9:4 Ila Mkulu kohola lufufu lwa heye lweng'ha, lufufu lwa heye kolwinjiza mbahali, na kuulakaza muji awo kwa chiluli.
ZEC 9:5 Muji wa Ashikeloni wogona ago na kudumba, nawo muji wa Gasa wogalawata kwa usungu, mbaka Ekiloni kahi wowa hihyo, kwa vila kitumbila kwake kokuka. Muji wa Gasa wokwajiliza mndewa, nawo Ashikeloni wowa ulihela wanhu.
ZEC 9:6 Wajenzi wochikala kuli muji wa Ashidodi, nani ndokudumya kidaya kwa Wafilisti.
ZEC 9:7 Ndolemeza kulya miwunde jiwele na danda na chilyo choneche chiwele ndo izudizo. Wala wosigala wowa lufufu lwa heni, kota lukolo lumwe kuli Yuda. Wanhu wa Ekiloni wowa wa heni kota vyowawele Wayebusi.
ZEC 9:8 Ndoyamila isi ya heni, ndowalemeza wamizi waleche kukola amo. Haduhu munhu yowabunza kahi wanhu wa heni, kwa vila kwa meho ga heni, nandiwona vyowagaziche.”
ZEC 9:9 Mtowe luchenze hemwe wanhu wa Siyoni! Mlandule lizi, hemwe wanhu wa Yelusalemu! Ulole, mndewa wa hemwe kanguya kwa hemwe, kanguya kwa hachi ya kulongoza na kusumya! Ndo yaliholile, nakakwina idogowi, lyana lya idogowi.
ZEC 9:10 Kojidumya mituka ja ngondo kuli isi ya Isilaeli na falasi wa ngondo kulawa kuli muji wa Yelusalemu, nawo upinde wa ngondo wobenigwa. Kowikula kikala goya kwa wanhu wa isi, ulongozi wa heye wokwenela kulawa bahali mbaka bahali, kulawa lwanda lwa Eyufulate mbaka kuli kuduma kwa isi.
ZEC 9:11 Mkulu Nguluwi kangulonga hino, “Kwa chiwalo cha ilagano lya heni na hemwe, ilagano liwele nalitawizwa kwa danda, ndowagombola wanweng'hwa wa hemwe, wawele nawawohigwa kuli ikulubila lilihela mazi.
ZEC 9:12 Hemwe wanweng'hwa muwele na kitumbila, mhiluche kuli ngome ya hemwe. Lelo ndanguwawikulila kota ndowahilulila ganojile mala keli.
ZEC 9:13 Yuda ndomdita yawe upinde wa heni, Isilaeli nandimdita msale wa heni. Gwa Siyoni! Wanhu wa hegwe ndowadita wawe kota ipanga, kuwatowa wanhu wa Ugilichi, wowa kota ipanga lya yazidahe.”
ZEC 9:14 Mkulu Nguluwi kolawila kwa wanhu wa heye, kotoza misale jake kota lumwemwesa. Mkulu Nguluwi Yawele na Ludali kopemba mhalamhanda, kofika hamwe na chivuluvumbi cha kusini.
ZEC 9:15 Mkulu Nguluwi Yawele na Mong'ho kowamila wanhu wa heye, nawo wowadumya wang'honyo wa hewo. Wotowa iyowe kuli ngondo kota wagalile, woibohola danda ya wang'honyo wa hewo. Yochililika kota danda ya nhambiko, ibakalizwe kuli mbalati za hali honhu ha kulavila nhambiko kulawa mchisaye.
ZEC 9:16 Mhela awo, Mkulu Nguluwi, Nguluwi wa hewo, kowalohola, kwa vila hewo ndo chilundo cha heye, nawo wopulika kuli isi ya heye, kota maganga ga sendi nyinji gawele kuli itaji.
ZEC 9:17 Ndaze kunoga na kinoliga kwa hewo vyokuwele! Wasongolo na wahinza wodedemka, kwa winji wa nyhule na divai inyale.
ZEC 10:1 Mumlande Mkulu Nguluwi yawape hemwe nhonya za luhela. Mkulu Nguluwi ndo yalingigala ng'hungugu ya nhonya, ndo yalinguwapa wanhu nhonya ndodo, na kujidita mizuchila jidedemche kuli migunda kwa chiwalo cha weng'ha.
ZEC 10:2 Kwa vila jimalukolo ja hewo ja kulagulila ndo upoka hela, walaguzi wa hewo wangulagula udesi, wangulavya ulotezi wa uhadi, na kuwahembuliza wanhu hela. Ahyo wanhu wa Yuda wangulubaluba kota ing'holo, wangugazika kwa vila wahela mdimi.
ZEC 10:3 Mkulu Nguluwi kangulonga hino, “Nanzudila ng'hatu kwa chiwalo cha wadimi awo, ndowazapa awo vilongozi. Heni Mkulu Nguluwi Mbele na Mong'ho, ndochamila chilundo cha heni, chiwele ndo lukolo lwa Yuda. Ndowadita wawe falasi wa heni wazidahe kuli kitowa ngondo.
ZEC 10:4 Kulawa kuli lukolo lwa Yuda, wolawila vilongozi wa vilivinji, vilongozi wawele nzinzili kota iganga lya msisi, wawele nzinzili kota chigingi cha ihema, wawele na mong'ho kota upinde wa ngondo.
ZEC 10:5 Wanhu wa Yuda wowa kota wazidahe kuli ngondo, wowabiga wang'honyo wa hewo kuli nhope mnzila. Wochitowa, kwa vila heni Mkulu Nguluwi nda hamwe na hewo, nawo wowabasa soni mbaka walingukwina falasi.
ZEC 10:6 “Ndowadita wanhu wa Yuda weme nzinzili, na kuwalohola walelwa wa Yusufu. Ndowahilula hali haluga ha hewo, kwa vila ndanguwonela isungu. Wowa kota wanhu wawele siwalemile aho hamwande, kwa vila heni ndo Mkulu Nguluwi, Nguluwi wa hewo, ndowedichila.
ZEC 10:7 Wanhu wa Isilaeli wowa wanhu wazidahe kuli kitowa ngondo, wosangalala lukami kota wanhu wanwele divai. Wana wa hewo wogona ago na kusangalala, womema usangalalo mnhumbula za hewo kwa chiwalo cha heni Mkulu Nguluwi.
ZEC 10:8 “Ndowachema wanhu wa heni na kuwakungajiza hamwe, nanuwila kuwagombola, nawo wowa wenji kota aho mwaluko.
ZEC 10:9 Hanga nandiwasambalula hali wanhu wa isi, ila wong'humbuchila howowa kuli isi za kutali. Hewo hamwe na wana wa hewo wosulupuka, na kuhiluka haluga ha hewo.
ZEC 10:10 Ndowahilula kulawa kuli isi ya Misili, na kuwakungajiza kulawa Ashulu. Ndowegala kuli isi ya Gileadi na Lebanoni, aho, howa haduhu honhu ha kuhega kwa chiwalo cha hewo.
ZEC 10:11 Wokola kuli bahali ya magazo, nani ndozitowa nhigu zake, mazi menji ga lwanda lwa Naili gokala. Kidaya kwa Ashulu kokusigwa, na ng'hweku ya undewa wa Misili yokwajilila.
ZEC 10:12 Ndowadita wanhu wa heni wawe nzinzili, nawo wonyhulichiza na kikala kwa kunojeza heni. Heni Mkulu Nguluwi nandonga.”
ZEC 11:1 Uchumule lwizi ja hegwe, gwa Lebanoni, leka chiluli chilakaze mielezi ja hegwe!
ZEC 11:2 Mlomboleze, hemwe migodi ja misonobali, kwa vila mielezi najilakala. Migodi ajo ja lutogo najiwifigwa! Hemwe mialoni ja Bashani mlombocheze, kwa vila chihulo chikulu nachitemigwa!
ZEC 11:3 Uhuliche kulombocheza kwa vilongozi! Lutogo lwa hewo naluwifigwa! Uhuliche lizi lya lyana isimba! Chisosolo cha lwanda lwa Yolodani nachiwifigwa!
ZEC 11:4 Mkulu Nguluwi, Nguluwi wa heni, nakalonga hino, “Chilolele chilundo cha ming'holo jilinguganigwa kudumuligwa singo.
ZEC 11:5 Walingugula wangujidumulaga singo ila hawalingugazigwa na walinguguza wangulonga, ‘Yatogoligwe Mkulu Nguluwi! Lelo tuna lufufu.’ Mbaka wadimi wawo hawalingujonela isungu.
ZEC 11:6 Heni Mkulu Nguluwi ndangulonga kota siwonela isungu kahi wanhu wa isi. Ndomleka chila munhu mmoko mwa myage na chila munhu mmoko mwa mndewa wa heye. Nawo woidumya isi, nani simlohola yoneche mmoko mwa hewo.”
ZEC 11:7 Lelo, nandiwa mdimi wa ming'holo jiwele najali jiluta kudumuligwa singo, kwa vila namhegwa mijito na wala walingugula na kuguza ming'holo. Nanyhola ng'hweku mbili, imwe nandiichema Uganililo na iyage nandiichema Uhamwe, hamba nanduta kudima ming'holo.
ZEC 11:8 Nandemwela kuwemilila wadimi wanji wadatu kwa vila nawanzudiza, ahyo nandiwakopola kwa mhela wa mwezi umwe.
ZEC 11:9 Lelo, nandijilonjela ming'holo, “Siwa mdimi wa hemwe kahi. Yawele kobagama, yabagame! Yawele kodumigwa, yadumigwe! Na wala wawele wosigala, wedakule.”
ZEC 11:10 Nandiihola yila ng'hweku ya heni yondiichemile Uganililo, nandiibena leka kulajila kota ilagano lyoyaliditile Mkulu Nguluwi na wanhu wa heye nalibenigwa.
ZEC 11:11 Ilagano alyo nalibenigwa zuwa lilyo. Wala walingugula na kuguza ming'holo wawele nawali wondola, nawavizela kota ulonzi wa Mkulu Nguluwi nayali yolonga kwa kukolela madito ga heni.
ZEC 11:12 Hamba nandiwalonjela, “Wone mwangona ndo goya, mumhe heni sendi yondilinguganigwa kupegwa kwa chiwalo cha mijito jong'holile, ila wone mwangona haiwele goya, mleche kumha heni.” Lelo, nawamha heni migwala makumi gadatu ja sendi.
ZEC 11:13 Lelo Mkulu Nguluwi nakandonjela, “Ujiwiche kuli ng'hano ya ng'handa ya Nguluwi.” Sendi azo zomhegwe nazali kwa chiwalo cha mijito ja heni. Ahyo nandijihola jila migwala makumi gadatu ja sendi, nandijiwika kuli ng'hano ya ng'handa ya Mkulu Nguluwi.
ZEC 11:14 Hamba nandiibena yila ng'hweku ya keli ilinguchemigwa Uhamwe, ahyo nandiubena wula uhamwe wa Yuda na Isilaeli.
ZEC 11:15 Mkulu Nguluwi nakandonjela kahi, “Widite kahi mdimi, ila mhela awu uwe kota mdimi mpoka!”
ZEC 11:16 Kwa vila ndomigala kuli isi mdimi yohambe yalilolele goya ing'holo ama kulipala ing'holo lilingulubaluba ama kuliteleka mikwandi lilumile ne kulipa chilyo ing'holo likomu. Ila kolya miwunde ja ming'holo jinonile mbaka uzayo.
ZEC 11:17 “Kochona mdimi mpoka, yalingujileka ming'holo ja heye! Ipanga liudumule moko wa heye, na iziho lya heye lya kudilo lyusigwe! Moko wake uwe ng'hochele, iziho lya heye lya kudilo lileche kulola.”
ZEC 12:1 Awu ndo ulonzi wa Mkulu Nguluwi kuwala Isilaeli. Mkulu Nguluwi yalinguutandazula ulanga, yalingujiwika misisi ja isi na kumha munhu ukomu, kangulonga hino,
ZEC 12:2 “Ndoudita muji wa Yelusalemu uwe kota chizombe cha divai na wanhu wa isi ziwele hafungo hake wonwa na kuzebeduka kota wagalile. Muji wa Yelusalemu houtowigwa, miji jeng'ha ja Yuda jotowigwa.
ZEC 12:3 Zuwa alyo ndoudita muji wa Yelusalemu uwe kota iganga liwele na itunyo likulu kwa wanhu weng'ha na yoneche yawele kolinyasula kochilumiza yuye. Wanhu wa isi zeng'ha muisi wochikungajiza leka kuutowa muji awo.
ZEC 12:4 Kuli zuwa alyo ndomdita chila falasi yawe na lunhwinhwi na mkwina falasi wake ndomdita yawe na lukwale. Ndowadita falasi wa wanhu wa isi zinji waleche kulola, ila nhanzi ya Yuda ndoyamila. Heni Mkulu Nguluwi nandonga.
ZEC 12:5 Hamba vilongozi wa Yuda vyowochilonjela mnhumbula za hewo, ‘Wanhu wa Yelusalemu wana mong'ho kwa vila Mkulu Nguluwi Yawele na Mong'ho, ndo Nguluwi wa hewo.’
ZEC 12:6 “Kuli zuwa alyo, ndowadita vilongozi wa Yuda wawe kota ikala lipwituche ng'hatu kuli ngodi nyinji. Ena, kota chenje chilingwaka kuli ibiwi lya nyhule zikalile. Wowalakaza wanhu wa isi zeng'ha wawele hafungo ha hewo. Ila wanhu wa Yelusalemu wolutilila kuwa na kikala goya kuli muji wa hewo.
ZEC 12:7 “Ndowatanza wanhu wa Yuda tandi, leka walelwa wa Daudi na wanhu wa Yelusalemu waleche kiwona kota wana lutogo ng'hatu kusinda wanhu wa nhanzi ya Yuda. Heni Mkulu Nguluwi nandonga.
ZEC 12:8 Kuli zuwa alyo ndowamila wanhu wa muji wa Yelusalemu, wawele ng'hochele ng'hatu hali hewo wowa na mong'ho ng'hatu kota mndewa Daudi. Walelwa wa Daudi wowalongoza wanhu wa Yuda kota wahilisi wa heni. Heni Mkulu Nguluwi nandonga.
ZEC 12:9 “Kuli zuwa alyo ndowadumya wanhu wa isi walingugana kuutowa muji wa Yelusalemu.
ZEC 12:10 Walelwa wa Daudi na wenyeng'haye wa muji wa Yelusalemu ndowamemeza nhumbula ya isungu na ya kulanda, nawo womlola yula wamtubule. Womlombochezela ng'hatu kota munhu vyoyalingumlombochezela mwana wa heye wa udewele ama kota munhu vyoyalingumlombochezela mlelwa wa heye wa mwaluko.
ZEC 12:11 Kuli zuwa alyo kowa na kulombocheza kukulu kuli muji wa Yelusalemu kota kulombocheza kwa chiwalo cha Hadadi-limoni kuli ibalalika lya Megido.
ZEC 12:12 Isi yolombocheza, chila lukolo lolombocheza luliyeka, walume waliyeka na wadala waliyeka. Lukolo lwa Daudi lolombocheza luliyeka na lukolo lwa Natani luliyeka
ZEC 12:13 na lukolo lwa Lawi luliyeka na lukolo lwa Shimeyi luliyeka.
ZEC 12:14 Ivyazi lyeng'ha lisigale lyolombocheza, walume waliyeka na wadala waliyeka.
ZEC 13:1 “Kuli zuwa alyo yolawila nzasa ya kweliza gehile na kukokomoka kwa walelwa wa Daudi na wanhu weng'ha wa Yelusalemu.
ZEC 13:2 Mhela awo ndogosa matagwa ga jimalukolo ja milungu kuli isi, hagokumbuchilwa kahi. Wala walingidita kota hewo ndo waloli ndowosa hamwe na nhumbula za hewo zikokomoche za kufugamila jimalukolo. Heni Mkulu Nguluwi Mbele na Mong'ho nandonga.
ZEC 13:3 Wone munhu yoneche kochidita kota mloli, mhaza na mayake yampondile womlonjela, ‘Kwanguganigwa ubagame kwa vila kwangulonga udesi kwa itagwa lya Mkulu Nguluwi.’ Nawo womkopola hoyowa yolavya uloli.
ZEC 13:4 Kuli zuwa alyo chila mloli kobasigwa soni kwa chiwalo cha gala goyalonjile hala loyawele yolavya uloli. Hawovala mivalo ja milaika leka kuwahada wanhu,
ZEC 13:5 ila chila yumwe kolonga, ‘Heni siwele mloli, nda mlimi hela. Nandali ndikola mijito aji ja ulimi kulawa kuli usongolo wa heni.’
ZEC 13:6 Wone munhu komuuza yumwe wa hewo, ‘Vilonda avi vyouwele navyo kumgongo nakuvipata ndaze?’ Heye komwidichila, ‘Nandivipata kuli ng'handa ya goloko wa heni.’ ”
ZEC 13:7 Mkulu Nguluwi Yawele na Mong'ho nakalonga hino, “Winuche, gwa ipanga! Winuche leka umtowe mdimi wa heni, ena, mdimi yalingung'holela mijito. Umtowe mdimi leka ming'holo jisambaluche. Ndogolola moko wa heni, kuwasubula wanhu wawele ng'hochele.
ZEC 13:8 Wanhu weli hali wanhu wadatu wa kuli isi wodumigwa, munhu yumwe hela hali wanhu wadatu wa kuli isi ndo kolechigwa ne kudumigwa. Heni Mkulu Nguluwi nandonga.
ZEC 13:9 Wanhu awo wawele nawalechigwa, ndowajeza na kuweliza, kota munhu yalinguhovuga sendi, ena, kota zahabu vyoilingwelizwa. Wondanda, nani ndowedichila. Ndolonga, ‘Awa ndo wanhu wa heni,’ nawo wolonga, ‘Mkulu Nguluwi, ndo Nguluwi wa hetwe.’ ”
ZEC 14:1 Zuwa lya Mkulu Nguluwi lyanguya, zuwa liwele vinhu viwele naviholigwa kulawa kwa hemwe, wang'honyo wa hemwe wochigawila kuno mlola.
ZEC 14:2 Mkulu Nguluwi kowakungajiza wanhu wa isi zeng'ha leka kuutowa muji wa Yelusalemu. Muji woholigwa na vinhu vya kuli ng'handa za hewo zeng'ha vyoholigwa na wadala woditigwa wawase na wang'honyo wa hewo kwa lupichi. Nusu ya wenyeng'haye wa muji wohilikwa kuli isi ya chijenzi, ila nusu isigale hawokusigwa mgati mwa muji.
ZEC 14:3 Hamba Mkulu Nguluwi kolawa na kuwatowa wanhu wa isi azo, kota vyoyalingudita mazuwa gose kuli zuwa lya ngondo.
ZEC 14:4 Kuli zuwa alyo kokwima mchanya mwa chidunda cha mzeituni chiwele kolilawilaga isanya mwa muji wa Yelusalemu. Chidunda acho chotulika hagati kwaluchila kolilawilaga isanya mbaka kolizinjilaga isanya na kwambuza ibindi likulu. Nusu imwe ya chidunda yolutila kasikazini na nusu iyage kusini.
ZEC 14:5 Namwe mobilima kukolela kuli ibindi alyo lya chidunda cha Mkulu Nguluwi kwa vila ibindi alyo lyokwenela mbaka Aseli. Mobilima kota wasekulu wa hemwe vyowalibilime limachinyina mhela wa ulongozi wa mndewa Usiya wa Yuda. Hamba Mkulu Nguluwi, Nguluwi wa heni, kokuya hamwe na welile weng'ha.
ZEC 14:6 Mhela awo kowa haduhu lumuli ne chipute ne seluji.
ZEC 14:7 Lyowa zuwa lya chiuyeng'ha, zuwa lilihela nemisi ne nechilo, zuwa lilinguzeleka na Mkulu Nguluwi. Mhela wa matinazo houfika lumuli lolutilila kuwa baho.
ZEC 14:8 Kuli zuwa alyo mazi ganojile gochililika kulawa kuli muji wa Yelusalemu, nusu ya mazi ago gochililika kuluta kuli bahali ya kolilawilaga isanya na nusu iyage kuli bahali ya kolizinjilaga isanya, mhela wa chipalangule na mhela wa luhela.
ZEC 14:9 Mkulu Nguluwi kowa mndewa yaliyeka hali isi yeng'ha. Kuli zuwa alyo kowa Mkulu Nguluwi yumwe hela na itagwa lya heye lyowa itagwa lya chiuyeng'ha.
ZEC 14:10 Isi yeng'ha kwaluchila Geba, kasikazini mwa Yuda mbaka Limoni, kusini kwa Yelusalemu, yowa kota ibalalika lya Alaba. Ila muji wa Yelusalemu wopona mchanya honhu hake, kulawa hali Lwizi lwa Benjamini mbaka hali honhu ha Lwizi lwa Katali na mbaka kuli Lwizi lwa Hafungo na kulawa kuli Ilingo lya Hananeli mbaka hali honhu ha kukamila divai ha mndewa.
ZEC 14:11 Wanhu wochikala kuli muji wa Yelusalemu kwa vila muji awo hauwifigwa kahi, ena wanhu wochikala amo kwa kikala goya.
ZEC 14:12 Aga ndo magazo gawele Mkulu Nguluwi kowegalila wanhu wa isi zeng'ha wawele nawoya kitowa na Yelusalemu. Ng'huli za hewo zokola kuno wang'hali wakomu na meho ga hewo gokola gawele kuli mitubuli jake na myango za hewo zokola ziwele kuli milomo ja hewo.
ZEC 14:13 Kuli zuwa alyo ukabuso ukulu kulawa kwa Mkulu Nguluwi wowafika wanhu na chila munhu komtowa myage.
ZEC 14:14 Wanhu wa Yuda wochitowa hala kuli muji wa Yelusalemu. Lufufu lwa wanhu wa isi zeng'ha zilinguizunguluta isi ya Yuda lokungajizwa. Wokungajiza zahabu na sendi na mivalo minji ng'hatu.
ZEC 14:15 Magazo ga hihyo gowafika falasi na migongolo kota midogowi mikulu na ngamiya na midogowi na migongolo jeng'ha jiwele amo kuli kambi za wang'honyo.
ZEC 14:16 Hamba wala wasulupuche hali wanhu wa isi zeng'ha wawele nawoya kuutowa muji wa Yelusalemu, wowa wokuya Yelusalemu chila mwaka kumfugamila Mkulu Nguluwi Yawele na Mong'ho, yawele ndo mndewa na kudita mnvina ya vibumuli.
ZEC 14:17 Wone wanhu wa isi yoneche hawoluta Yelusalemu kumfugamila mndewa, Mkulu Nguluwi Yawele na Mong'ho, nhonya haitowa kuli isi ya hewo.
ZEC 14:18 Wone wanhu wa Misili nawo hawoluta kilumba, hawopata nhonya. Mkulu Nguluwi kowegalila magazo gawele gowafika wanhu weng'ha wawele hawoluta kuli mnvina ya vibumuli.
ZEC 14:19 Ago gowa ndo magazo gawele gowafika wanhu wa isi ya Misili hamwe na wanhu wa isi zeng'ha wawele hawaiditile mnvina ya vibumuli.
ZEC 14:20 Mhela awo nhogo za falasi zokwandichigwa ulonzi awu, “Welile kwa Mkulu Nguluwi.” Viya vya kutelechela kuli ng'handa ya Mkulu Nguluwi vyowa kota visaye vyelile hali honhu ha kulavila nhambiko.
ZEC 14:21 Chila chiya kuli muji wa Yelusalemu na isi ya Yuda chowa chiwichigwe chiuyeng'ha kwa Mkulu Nguluwi Yawele na Mong'ho na weng'ha walinguya kulavya nhambiko wovihola viya avyo na kutelechela miwunde ja nhambiko. Kuli zuwa alyo hakuwa na walingugula na kuguza vinhu kuli ng'handa ya Mkulu Nguluwi Yawele na Mong'ho.
MAL 1:1 Ulonzi wa Mkulu Nguluwi naumuyila Malachi yawalonjele Waisilaeli.
MAL 1:2 Mkulu Nguluwi kangulonga, “Nandiwagana hemwe.” Ila wanhu wa Isilaeli wanguuza, “Nakutugana ndaze?” Mkulu Nguluwi kanguwedichila, “Ndaze, Esau hawele mng'holoze Yakobo? Nandimhagula Yakobo,
MAL 1:3 ila nandimlema Esau, nani nandividita vidunda vya heye viwe uchiwa na uhalizi wa heye nandijilechela mikanhu.”
MAL 1:4 Esau, yawele ndo Edomu, kangulonga, “Hanga natuhondigwa, togazenga kahi mahame.” Ila Mkulu Nguluwi Yawele na Mong'ho kangulonga hino, “Woweza kugazenga kahi, ila ndogabomola. Wochemigwa wanhu wa isi yihile, mazuwa gose wa kuli ng'halazi ya heni Mkulu Nguluwi.”
MAL 1:5 Hemwe homgona ago kwa meho ga hemwe, movizela na kulonga, “Ukulu wa Mkulu Nguluwi naupuluta kuli mbaka ja isi ya Isilaeli.”
MAL 1:6 Mkulu Nguluwi Yawele na Mong'ho kanguwalonjela hino hemwe watambika mlingumbeza, “Mwana kangumhulichizaga mhaza wa heye na chitumagwa kangumdumbaga mkulu wa heye. Wone heni nda mhaza wa hemwe, lekachoni hamlingunyhulichiza? Wone heni nda Mkulu wa hemwe, lekachoni hamlingundumba? Mwanguuza, ‘Natukubeza ndaze?’
MAL 1:7 Mwangumbeza kwa kundavila nhambiko ya chilyo chohambe chikundigwe hali honhu ha kulavila nhambiko ha heni. Ila hemwe mwanguuza, ‘Natukuzudiza ndaze?’ Mwangunzudiza kwa kuhazudila honhu ha heni ha kulavila nhambiko.
MAL 1:8 Homndavila nhambiko ya igongolo lyohambe lilole ama chete ama lilingutamika, ndaze, awo hauwele wihe? Ndaze, chilongozi konojezwa ama kokuditila ganojile wone komha ndolendole ya igongolo kota alyo? Heni Mkulu Nguluwi Mbele na Mong'ho, nandonga.”
MAL 1:9 Ahyo lelo hemwe watambika mumlande Nguluwi leka yatonele isungu. Wone mwangumlavila ndolendole kota azo, ndaze, kowakunda hemwe?
MAL 1:10 Mkulu Nguluwi Yawele na Mong'ho kangulonga, “Nandali ndigana ng'hatu wone yahawele na munhu yumwe hali hemwe, yawele yahahindile lwizi ja ng'handa ya heni leka mleche kubwina chiluli chohambe chitanze chinhu hali honhu ha kulavila nhambiko ha heni! Silingunojezwa na hemwe na sizikunda nhambiko za hemwe zomlingundavila.
MAL 1:11 Wanhu wa isi zeng'ha kulawa kolilawilaga isanya mbaka kolizinjilaga isanya, wangulitogola itagwa lya heni na chila honhu wangufunyizila heni ubani na kundavila nhambiko zilinguganigwa, kwa vila itagwa lya heni Mkulu Nguluwi Mbele na Mong'ho, lyangutogoligwa hali wanhu wa isi zeng'ha.
MAL 1:12 Ila mwangulidita itagwa lya heni libezigwe kwa kijesa kota chisaga cha heni choweza kuditigwa chiwe chikokomoche na chilyo chake nachibezigwa.
MAL 1:13 Mwangumbeza kwa kulonga, ‘Mbuli azi nazitudita tutoche ng'hatu.’ Mwangungalila nhambiko za migongolo jomjipatile kwa kuboka ama jiwele vyete ama jilingutamika. Ndaze, mbochele nhambiko azo kulawa kwa hemwe? Heni Mkulu Nguluwi Mbele na Mong'ho, ndanguuza.
MAL 1:14 Yapanjilwe munhu yoneche yalingujeza kunyhada, yalingulagana kwa chilaho kota kongalila nhambiko ya igongolo ilume liwele goya kulawa kuli chilundo cha heye cha migongolo, ila kangundavila nhambiko ya igongolo lilumile. Ulole, heni nda mndewa mkulu na wanhu wa isi zeng'ha wangundumba. Heni Mkulu Nguluwi Mbele na Mong'ho, nandonga.”
MAL 2:1 Mkulu Nguluwi Yawele na Mong'ho kanguwalonjela hino watambika, “Lelo malajizo aga ndo kwa chiwalo cha hemwe watambika.
MAL 2:2 Mwanguganigwa kuleka kulibeza itagwa lya heni, wone hamnyhulichiza, ndowapanjila, ndoupanjila utambichizo wa hemwe. Ena, nandiupanjila kwa vila hamlingugawinza malajizo ga heni.
MAL 2:3 Lole, ndowagaza wana wa hemwe na kubakaliza midohe ja migongolo ja hemwe ja nhambiko kumeho kwa hemwe. Ndowawinga leka muwe kutali na heni.
MAL 2:4 Ahyo movizela kota nandiwapa hemwe mzilo awu leka ilagano lya heni na nhanzi ya Lawi likale mhela winji. Heni Mkulu Nguluwi Mbele na Mong'ho, nandonga.
MAL 2:5 “Kuli ilagano alyo, nandilagana na hewo kota wowa na ukomu na kikala goya, nani nandiwapa geng'ha, leka wandumbe na kunyhulichiza, nawo nawandumba na kulidumba itagwa lya heni.
MAL 2:6 Malanguso ga hewo nagali ga kukomya na hawalanguse udesi. Heni na hewo natikala kwa kikala goya. Haiwele kota nawadita hachi hela, ila nawawalangusa wanji kuleka kudita gehile.
MAL 2:7 Watambika wanguganigwa kuwalangusa wanhu uwanzi wa kukomya kuwala Nguluwi. Wanhu walutilile kilangusa gondilingugana kwa hewo, kwa vila watambika ndo wasenga wa Mkulu Nguluwi Yawele na Mong'ho.
MAL 2:8 “Ila hemwe watambika namgalamka na kuileka nzila ya hachi. Malanguso ga hemwe nagawalongoza wanhu wenji kuli kudita gehile. Namlibena ilagano lyondiliditile na hemwe. Heni Mkulu Nguluwi Mbele na Mong'ho, nandonga.
MAL 2:9 Lelo nandiwambuza mbezigwe na kuditigwa mdeule hali wanhu weng'ha, kwa vila hamziwinzile nzila za heni, ila namlajila uganililo kuli mbuli za malajizo.”
MAL 2:10 Ndaze, hetwe tweng'ha hatuwele wana wa mhaza yumwe? Ndaze, hetwe tweng'ha hatulumbigwe na Nguluwi yumwe? Lekachoni lelo twangihada twetwe kwa kulibeza ilagano lya Mkulu Nguluwi lyoyaliditile na wasekulu wa hetwe?
MAL 2:11 Wanhu wa Yuda wahela makundo kwa Nguluwi na kudita izudizo kuli Isilaeli na kuli muji wa Yelusalemu. Nawaidita ng'handa ya Mkulu Nguluwi yalinguigana ibezigwe. Kahi nawawahesa wadala walingujifugamila milungu.
MAL 2:12 Mkulu Nguluwi yawose kulawa kuli walelwa wa Yakobo wanhu walingudita mbuli ayo. Iwe kota ahyo mbaka howowa wolavya nhambiko hali Mkulu Nguluwi Yawele na Mong'ho.
MAL 2:13 Mzidi wa ago geng'ha, mwanguhagubika honhu ha kulavila nhambiko ha Mkulu Nguluwi kwa mahozi ga hemwe, mwangulila na kulombocheza kwa vila halinguzigana kahi nhambiko zomlingumlavila.
MAL 2:14 Mwanguuza, “Lekachoni halinguzikunda?” Mkulu Nguluwi halinguzikunda kwa vila kanguvizela hazelu kota nakulibena ilagano lya hegwe kwa mche wa usongolo wa hegwe. Hauwele wa kukundigwa kwa heye hanga nakulagana hali Nguluwi kota wahawele wa kukundigwa kwa heye.
MAL 2:15 Ndaze, Nguluwi hawaditile mweng'ha weli muwe lukuli lumwe na muhe yumwe? Ndaze, nayali yonuwila choni vyoyagaditile ago? Ndikomya nayali yonuwila hemwe mponde wana wawele womdumba heye. Ahyo milolele leka hawe haduhu ne yumwe hali hemwe yawele kowa kahela makundo kwa mche wake.
MAL 2:16 Mkulu Nguluwi, Nguluwi wa Isilaeli kangulonga, “Ndanguizudila kalatasi ya luleko. Ndanguzudila wone yumwe wa hemwe kangumditila vibi mche wake. Milolele leka hawe haduhu ne yumwe hali hemwe yawele kowa kahela makundo kwa mche wake. Heni Mkulu Nguluwi Mbele na Mong'ho, nandonga.”
MAL 2:17 Namumtunya Mkulu Nguluwi kwa ulonzi wa hemwe. Namwe mwanguuza, “Natumtunya ndaze?” Namumtunya vyomlonjile, “Mkulu Nguluwi kanguwona kota wanhu walingudita gehile ndo wanoga na kanguwagana.” Ama homuuza, “Ka kohi yula Nguluwi yawele na hachi?”
MAL 3:1 Mkulu Nguluwi Yawele na Mong'ho kangulonga, “Mlole ndangumlajiza msenga wa heni yalongole kumwando kwa heni kumbichila goya nzila. Mkulu yomlingumpala kokuya kuli ng'handa ya Nguluwi baho du. Msenga yomlingumbeteza kwa maya ng'hatu kokuya na kowikula ilagano lya heni.”
MAL 3:2 Ila whaani yoweza kwimilila kuli zuwa alyo hoyokuya? Whaani yawele yokwima na kwimilila hoyolawila? Heye ndo kota chiluli ching'hang'hale chilingweliza chuma na kota sabuni ya yalinguhovuga nguwo.
MAL 3:3 Kokuya kutagusa kota munhu yalingweliza sendi. Koweliza walelwa wa Walawi, kota munhu yalingweliza zahabu ama sendi. Hamba Mkulu Nguluwi kowa na wanhu wawele womlavila nhambiko kwa nzila ya hachi.
MAL 3:4 Ahyo nhambiko za wanhu wa Yuda na wanhu wa Yelusalemu zomnojeza Mkulu Nguluwi kota nhambiko za wanhu wa katali, kota kuli miyaka ja katali.
MAL 3:5 Mkulu Nguluwi Yawele na Mong'ho kangulonga, “Ndowahejelela hemwe leka kuwatagusa. Ndolavya ulolezi kwa wahawi na wang'hondwa na walingilaha kwa udesi na walinguwabunza wanhu walingukola mijito na walinguwabunza wadala wafililwe na walume wawo na walekwa na walinguwabunza hachi wajenzi, wala wohambe wandumbe.”
MAL 3:6 Mkulu Nguluwi kangulonga, “Heni ndo Mkulu Nguluwi, silingugaluka, kwa chiwalo acho hemwe walelwa wa Yakobo hamdumigwe.
MAL 3:7 Kulawa mhela wa wasekulu wa hemwe, namjibeza mizilo ja heni na kuleka kujiwinza. Lelo, heni Mkulu Nguluwi Mbele na Mong'ho ndangulonga, ‘Mngalamchile, nani ndowagalamchila.’ Ila mwanguuza, ‘Tokugalamchila ndaze?’
MAL 3:8 Nani ndanguwauza, ‘Ndaze, ndo goya munhu kumsukula Nguluwi? Ila hemwe mwangusukula heni.’ Ila mwanguuza, ‘Twangukusukula ndaze?’ Ena! Mwangusukula heni zaka na nhambiko.
MAL 3:9 Hemwe na wanhu wa isi ya hemwe yeng'ha nampanjilwa kwa chiwalo cha kusukula heni.
MAL 3:10 Migale zaka zeng'ha kuli ng'hano za heni, leka haluga ha heni hawe na chilyo cha kuhega. Mnjeze kwa mbuli ayo, namwe mokona kota sichumula mitubuli ja kilanga na kuwamizila utambichizo winji. Heni Mkulu Nguluwi Mbele na Mong'ho, nandonga.
MAL 3:11 Ndojilemeza minhu jilinguwifya leka jileche kuwifya kahi mbena za hemwe. Mizabibu ja hemwe kuli migunda hajileka kulela mafuza. Heni Mkulu Nguluwi Mbele na Mong'ho, nandonga.
MAL 3:12 Wanhu wa isi zeng'ha wowachema hemwe wanhu watambichizwe, kwa vila isi ya hemwe yowa isi ya kusangalala. Heni Mkulu Nguluwi Mbele na Mong'ho, nandonga.”
MAL 3:13 Mkulu Nguluwi kangulutilila kulonga, “Ulonzi wa hemwe nawali ung'hang'hale kwa heni. Ila mwangulonga, ‘Natulonga choni hali hegwe?’
MAL 3:14 Hemwe namlonga, ‘Kumkolela mijito Nguluwi kwahela chinhu cha mzidi. Hana chinhu chachi cha mzidi kibatilila malajizo ga heye na kujenda kota wanhu walingulombocheza hali heye Mkulu Nguluwi Yawele na Mong'ho?
MAL 3:15 Vyotulingona, kota walingidaya ndo walingusangalala mazuwa gose. Kwa wehile, wangulutilila goya. Wangumjeza Nguluwi, ila hawalingugazigwa.’ ”
MAL 3:16 Wanhu walingumdumba Mkulu Nguluwi nawalongasa hewo kwa hewo, naye Mkulu Nguluwi nakahulika kulongasa kwa hewo. Kumwando kwa heye nachiwichigwa chitabu cha kukumbuchila, chiwele nachandichigwa kuwala wala wawele nawali womdumba Mkulu Nguluwi na kulitogola itagwa lya heye.
MAL 3:17 Nayandichingwa hino, “Mkulu Nguluwi Yawele na Mong'ho kangulonga, ‘Wowa wanhu wa heni. Wowa ng'hano ya heni ya chiuyeng'ha kuli zuwa lila hondikwima na kudita chondilingunuwila. Siwaditila vibi kota vila mhaza vyoyowa yohambe yamditile vibi mwanage yalingumkolela mijito.
MAL 3:18 Aho movizela kahi kulivinji kuwele hali watanganiche na wehile, ena, hali wanhu walingumkolela mijito Nguluwi na wala wohambe wamkolele mijito.’ ”
MAL 4:1 Mkulu Nguluwi Yawele na Mong'ho kangulonga, “Ndikomya zuwa lyanguya. Nalyo lyangwaka kota itanulu. Walingidaya na wehile weng'ha wotozigwa amo na kulakazwa kota mibeleje jikalile, wolakazwa ng'hatu mbaka hawe haduhu ne ulajilo.
MAL 4:2 Ila kwa chiwalo cha hemwe mlingundumba, isanya lya hachi lyokuya kwa hemwe, liwele na ludali lwa kulohola kuli ivuche lyake. Namwe molawa mgati kuno mnyonzokanyonzoka kota ilogota lilechelwe kulawa kuli ibani.
MAL 4:3 Zuwa alyo mowabiganga wehile, nawo wowa kota mivu hasi ha nzayo za hemwe zuwa lila hodindita mbuli azo. Heni Mkulu Nguluwi Mbele na Mong'ho, nandonga.
MAL 4:4 Mkumbuchile malajizo na mizilo ja heni jondimlajize Musa, chitumagwa wa heni kula kuli chidunda cha Holebu, leka yawalajize wanhu weng'ha wa Isilaeli.
MAL 4:5 “Lole, ndomlajiza kwa hemwe mloli Eliya kung'hali zuwa lila likulu na lya kukabusa lya Mkulu Nguluwi halinafika.
MAL 4:6 Mloli Eliya kowahanyisa wasekulu na wana wa hewo, wone haiwa ahyo, ndokuya na kuidumya isi ya hemwe.”
MAT 1:1 Yesu Kilistu kalawila mlukolo lwa Daudi na Daudi nayali wa lukolo lwa Abulahamu na achi ndo chitabu cha lukolo lwa heye.
MAT 1:2 Abulahamu nakamponda Isaka. Isaka nakamponda Yakubu. Na Yakubu nakamponda Yudasi na wakulugwe.
MAT 1:3 Yudasi nakamponda Pelesi na Sela mayao nayali Tamali. Pelesi nakamponda Hesiloni, na Hesiloni nakamponda Lami,
MAT 1:4 Lami nakamponda Aminadabu na Aminadabu nakamponda Nashoni. Na Nashoni nakamponda Salimoni.
MAT 1:5 Salimoni nakamponda Boasi, mayake Boasi nayali Lahabu, Boasi na Lutu nawamponda Obedi, na Obedi nakamponda Jese.
MAT 1:6 Na heye Jese nakamponda mndewa Daudi, na Daudi nakamponda Solomoni na mayake Solomoni nayali Bath-Sheba mdala wa Uliya.
MAT 1:7 Na Solomoni nakamponda Lohoboamu. Na Lohoboamu nakamponda Abiya. Na Abiya nakamponda Asa,
MAT 1:8 na Asa nakamponda Yohoshafati. Na Yohoshafati nakamponda Yolamu. Na Yolamu nakamponda Usiya,
MAT 1:9 na Usiya nakamponda Josamu na Josamu nakamponda Ahasi. Na Ahasi nakamponda Hesekiya,
MAT 1:10 na Hesekiya nakamponda Manase. Na Manase nakamponda Amoni. Na Amoni nakamponda Yosiya,
MAT 1:11 na Yosiya nakamponda Yekoniya na wang'holoze. Awo wali mhela Wayahudi wawele mchihamo kuza ako Babiloni.
MAT 1:12 Kulawa Wayahudi vyowawele mchihamo kuza ako Babiloni, Yekoniya nakamponda Sheatieli, na Sheatieli nakamponda Selubabeli,
MAT 1:13 na Selubabeli nakamponda Abiudi. Na Abiudi nakamponda Eliakimu, na Eliakimu nakamponda Asoli,
MAT 1:14 na Asoli nakamponda Sadoki. Na Sadoki nakamponda Akimu, na Akimu nakamponda Eliudi,
MAT 1:15 na Eliudi nakamponda Eleasali. Na Eleasali nakamponda Masani, na Masani nakamponda Yakubu,
MAT 1:16 na Yakubu nakamponda Yusufu, mlume wa Maliya mayake Yesu, yalinguchemigwa Kilistu.
MAT 1:17 Lelo hamba kwali na lulelo kumi na vine. Kulawa Abulahamu mbaka Daudi, na kumi na vine viyage kulawa Daudi mbaka Wayahudi vyowawele mchihamo kuza ako Babiloni, na kumi na vine viyage kulawa baho mbaka mhela wa Kilistu Mlohozi.
MAT 1:18 Lelo ahi ndo vyoyavumbuche Yesu Kilistu. Maliya, mayake Yesu, nakabanichilwa na Yusufu. Ila lowali wang'hali kihola kota munhu na mdala wa heye nakewona kana himila kwa ludali lwa Muhe Yelile.
MAT 1:19 Yusufu mzenjele wa Maliya. Kwa vila nayali munhu nayali yodita ganojile, nahaganile kumbasa soni hazelu, ahyo nakagana kubena izenjele kwa uviso.
MAT 1:20 Vyoyali yochijesa mbuli ayo, mhilisi wa Mkulu kamlawila koyawasile kalota yolonjelwa kota, “Yusufu, mwana wa Daudi, uleche kudumba kumhola Maliya yawe mchewako, kwa vila heye kana himila kwa ludali lwa Muhe Yelile.
MAT 1:21 Koponda mwana mlume, na hegwe komha itagwa Yesu, kwa vila heye ndo yowalohola wanhu wa heye kuli gehile ga hewo.”
MAT 1:22 Lelo aga geng'ha nagalawila kwenela kwa ula ulonzi wa Mkulu loyalonjile kukolela mloli,
MAT 1:23 “Mdala yohanating'hana na mlume kowa na himila na koponda mwana mlume na hewo womchema itagwa Imanueli izeleche Nguluwi kahamwe na hetwe.”
MAT 1:24 Yusufu vyoyalilimche kamhola Maliya kota mhilisi wa Mkulu vyoyamlonjele yadite.
MAT 1:25 Ila Yusufu nahamzelele Maliya hebu chilukuli mbaka vyoyapondile mwana mlume. Na heye Yusufu nakamchema mwana itagwa lyake Yesu.
MAT 2:1 Yesu nakapondigwa mujini Betelehemu, mkowa wa Yudeya mhela Helodi loyali Mndewa. Baho du loyapondigwe, walola nhondwe kulawa kolilawilaga isanya nawoya Yelusalemu
MAT 2:2 nawauza, “Kakohi mwana yaleleche yowa Mndewa wa Wayahudi? Tuyona nhondwe ya heye ilawile kolilawilaga isanya tuya kumfugamila.”
MAT 2:3 Mndewa Helodi vyoyahuliche mbuli ayo na kadeula ng'hatu. Na wanhu weng'ha wali Yelusalemu nawadeula.
MAT 2:4 Leka, nakawachema hamwe watambika wakulu na walangusa wa malajizo ga Musa na kuwauza, “Ahi kohi koyoleleka Yesu Kilistu?”
MAT 2:5 Na hewo wedichila, “Mujini Betelehemu uwele Yudeya. Yandichigwe na mloli wa Nguluwi kuta,
MAT 2:6 “Ee Betelehemu iwele kuli isi ya Yuda, hegwe huwele mdodo ng'hatu kuli luga lutanganiche lwa Yuda, mina kwa hegwe, kolawila mlongozi, yowalongoza wanhu wa heni, Isilaeli.”
MAT 2:7 Baho, Helodi nakawachema awala walola nhondwe kwa uviso, na kawauza kota hanili aila nhondwe loiwalawile.
MAT 2:8 Hamba kawalajiza Betelehemu yolonga, “Mlute mkampale mwana, na wone mmone, muye mndojele na heni ndute ndikamfugamile.”
MAT 2:9 Lowamhulichize mndewa, awala walola nhondwe waluta. Baho ila nhondwe lowaiwene kulawa kolilawilaga isanya, na iwalongola na iluta kwima mchanya na hala hoyawele mwana.
MAT 2:10 Lowaiwene ayo nhondwe, nawasangalala heko.
MAT 2:11 Leka, wenjila mng'handa, nawamona yula mwana hamwe na Maliya mayake, wenamiza na wamfugamila. Hamba wachumula vinhu vyowegale vya kumigalila mwana, wampa ndolendole zahabu na ubani na mafuta galinguguzigwa kwa migwala minji galinguchemigwa manemane.
MAT 2:12 Nguluwi nakawalemeza wolota waleche kuhiluka kwa Helodi, ahyo wahiluka kukolela nzila inji.
MAT 2:13 Lowochile awala wajenzi, mhilisi wa Mkulu kamlawila Yusufu yolota, nakamlonjela, “Winuche! Mhole mwana hamwe na mayake, mbilimile Misili. Mikale kuko mbaka hondikulonjela, mina Helodi kangumpala kumkopola ayu mwana.”
MAT 2:14 Ahyo, Yusufu kenuka kamhola mwana na mayake, woka nechilo wabilimila Misili.
MAT 2:15 Kekala kuko mbaka Helodi loyafile. Mbuli ayo naikoleka leka ulonzi woyalonjile Mkulu kukolela mloli wenele, “Nandimchema mwana wa heni kulawa Misili.”
MAT 2:16 Helodi loyawene awala walola nhondwe hawahiluche wambada, nakazudila heko. Kalajiza kukopoligwa wana weng'ha wasongolo kuli muji wa Betelehemu wawele na ukulu wa miyaka mili na hasi wakopoligwe. Nakadita ahyo kota vyoyavizelele kulawa kwa wala walola nhondwe.
MAT 2:17 Baho ndo lwenela luzi ulonjigwe kukolela mloli Yelemiya.
MAT 2:18 “Luzi luhulikwa ako Lama, chililo na kulombocheza kwinji. Laheli kanguwalilila wana wa heye, nakangulema kunyamalila, mina weng'ha wabagama.”
MAT 2:19 Helodi loyabagame, mhilisi wa Mkulu kamlawila Yusufu yolota kula Misili,
MAT 2:20 nakumlonjela, “Winuche! Umuhole mwana na mayake mhiluche ku isi ya Isilaeli, mina wala waganile kumkopola mwana ayo wabagama.”
MAT 2:21 Leka, Yusufu kenuka, kamhola mwana na mayake nakahiluka isi ya Isilaeli.
MAT 2:22 Ila Yusufu vyoyahuliche kota Achelausi mwanage Helodi, kahola chigoda cha mhaza wa heye, kawa mndewa wa Yudeya, na kadumba kuhiluka ako. Na kalonjelwa menji goyalotile, baho kaluta kikala Galilaya.
MAT 2:23 Na kahamila luga lwake luchemigwe Nasaleti. Ndo wenele ulonzi ulonjigwe kukolela Waloli. “Munhu kochemigwa Mnasaleti.”
MAT 3:1 Mhela wula Yohani Mbatiza loyoyile honhu hagunuche kuli Yudeya, nakaluka kudamla.
MAT 3:2 Kawalonjela, “Mumgalamchile Nguluwi, kwa vila undewa wa kilanga wahabehi.”
MAT 3:3 Ayu Yohani nayali ndo yula mloli Isaya vyo yasimile mbuli ya heye loyalonjile. “Munhu yumwe kanguchema honhu hagunuche. ‘Mgongomanyileni Mkulu nzila ya heye, mgolole nzila ya heye ya kukola.’ ”
MAT 3:4 Yohani nakavala nguwo ihonigwe na milaika ja ngamiya, yakowele izabi lya igozi mchuno. Chilyo cha heye chali nzije na hanombwa.
MAT 3:5 Wanhu kulawa Yelusalemu na kulawa nzingo zeng'ha za Yudeya na kulawa isi yeng'ha habehi na lwanda lwa Yolodani nawamlutila,
MAT 3:6 nawalonga gehile gowaditile na heye kawabatiza mli lwanda lwa Yolodani.
MAT 3:7 Ila loyawene Mafalisayo na Masadukayo wenji wokuya kwa heye kubatizigwa, kawalonjela, “Hemwe lulelo lwa izoka! Yalikohi yowadeteleza kota moibilima ng'halazi ya Nguluwi ilihabehi kuya?
MAT 3:8 Mlajile kwa madito kota mumgalamchila Nguluwi.
MAT 3:9 Mleche kijesa kota sambi moibilima ng'halazi ya Nguluwi kwa kulonga, Mhaza wa hetwe Abulahamu! Ndanguwalonjelani ng'hatu, Nguluwi kana ludali lwa kugagalula aga maganga gawe wana wa Abulahamu.
MAT 3:10 Iwago liwichigwa goya kuli mizabi ja igodi. Chila mgodi wohambe ulele mafuza ganojile, wotemangwa na kutajigwa mchiluli.
MAT 3:11 Heni ndanguwabatiza kwa mazi kuwalajila kota mumgalamchila Nguluwi. Ila heye yokuya kumbele kwa heni, kana ludali kusinda heni, na heni silinguganigwa kupapa makwamba ga heye. Heye kowabatizani kwa Muhe Yelile na kwa chiluli.
MAT 3:12 Heye kana luhelo lwa kuyugulila nyhadikwa, yalunde uhemba wa heye mli ng'hano, na mibadu kojisoma kwa chiluli chohambe chizime.”
MAT 3:13 Mhela awo Yesu nakalawa Galilaya nakafika mlwanda lwa Yolodani, nakamlutila Yohani leka yabatizigwe na heye.
MAT 3:14 Ila Yohani nakajeza kumlemeza yolonga, “Ndaze, hegwe kwanguya kwa heni? Heni baha ndo ndilinguganigwa kubatizigwa na hegwe!”
MAT 3:15 Ila Yesu nakamwidichila, “Uleche hela iwe hino kwa sambi, mina ndo vyoilinguganigwa kugadita gala geng'ha ganojile.” Aho Yohani nakakunda.
MAT 3:16 Baho Yesu loyasindile kubatizigwa, vyoyalawile kuzibila mlimazi, nabaho kilanga kugubuka nakona Muhe wa Nguluwi yodulika kota nziwa nakwima mmutwi wa heye.
MAT 3:17 Nawahulika lizi kilanga ilonga, “Ayu ndo mwana wa heni ndimganile, nojezwa na heye.”
MAT 4:1 Hamba Muhe Yelile kamlongoza Yesu kuluta honhu hagunuche kujezigwa na Limazoga.
MAT 4:2 Navyoyesele kulya chinhu mazuwa makumi gane nemisi na nechilo, na mwiso kehulika nzala.
MAT 4:3 Hamba Limazoga lyuya kwa Yesu nakumlonjela, “Wone ukomya hegwe uli Mwana wa Nguluwi, ugalonjele aga maganga gawe mibumunda.”
MAT 4:4 Yesu kedichila kalonga, “Yandichigwa kuli Maandiko Matakatifu. ‘Munhu howa mkomu kwa ibumunda hela, leka kwa chila ulonzi woyolonga Nguluwi.’ ”
MAT 4:5 Hamba Limazoga nalimuhola mbaka Yelusalemu Muji Welile, kamuwika kuchanya chinhembenhembe kuli chinduwiko cha ng'handa ya Nguluwi,
MAT 4:6 nakamlonjela, “Wone uwele Mwana wa Nguluwi, yetoze hanyi, mina yandichigwa muli Maandiko Matakatifu. “ ‘Nguluwi kowalajiza wahilisi wa kilanga wa heye kwa mbuli ya hegwe,’ Na, ‘Wokuhola mmoko mwawo, uleche kikwang'hwala magulu ga hegwe mmiganga.’ ”
MAT 4:7 Yesu nakamlonjela, “Yandichigwa kahi muli Maandiko Matakatifu. “ ‘Uleche kumjeza Mkulu, Nguluwi wa hegwe.’ ”
MAT 4:8 Hamba Limazoga nalimhola Yesu na kumhilika kuli chidunda chikulu na kumlajila undewa weng'ha uli muisi.
MAT 4:9 Limazoga nalimlonjela, “Avino vyeng'ha ndokupa wone ufugamile na kinamiza kwa heni.”
MAT 4:10 Aho, Yesu nakamlonjela, “Uche ahano Limazoga! Gandichigwa muli Maandiko Matakatifu. ‘Umfugamile Mkulu Nguluwi wa hegwe, na umditile heye yaliyeka.’ ”
MAT 4:11 Baho, Limazoga limleka Yesu na wahilisi wa kilanga woya kumtanza.
MAT 4:12 Yesu loyahuliche kota Yohani Mbatiza kebatigwa na kuhindilwa mchinweng'ho, nakoka kaluta Galilaya.
MAT 4:13 Nakoka Nasaleti, nakaluta kikala Kapanaumu muji uli hafungo na ilamba lya Galilaya, mu mmbaka mwa wilaya za Sebuluni na Nafutali. Nakekala kuko
MAT 4:14 na ndo vyowenele ula ulonzi ulonjigwe na mloli Isaya.
MAT 4:15 “Isi ya Sebuluni na isi ya Nafutali, kulutila kuli bahali mwambu ya lwanda lwa Yolodani, Galilaya, isi ya wanhu wa isi zeng'ha!
MAT 4:16 Wanhu walingikala kuli jiza, walona lumuli lukulu. Na hewo wekale kuli isi ya jiza na chibehelo cha kubagama, lumuli luwamwemwesela.”
MAT 4:17 Kulawila mhela ula Yesu nakaluka kulangusa yolonga, “Mumgalamchile Nguluwi, kwa vila undewa wa kilanga wa habehi!”
MAT 4:18 Yesu loyali yojendajenda hafungo mwa ilamba lya Galilaya, nakawona wanhu weli munhu na mng'holoze, wali walowa somba. Yumwe Simoni yachemigwe Petili hamwe na mng'holoze Andeleya wolowa somba na utandawala.
MAT 4:19 Yesu kawalonjela, “Mmbinze, na heni ndowaditani hemwe wavula wanhu.”
MAT 4:20 Baho wauleka utandawala wawo, wamuwinza Yesu.
MAT 4:21 Kaluta kumwando kawona wanhu wanji weli kahi munhu na mng'holoze, wali Yakubu na Yohani wana wa Sebedayo. Awo wali wekale mitumbwi na mhaza wawo Sebedayo wowika goya utandawala wawo. Yesu kawachema.
MAT 4:22 Baho du woka wauleka aula mtumbwi hamwe na mhaza wawo, wamuwinza Yesu.
MAT 4:23 Yesu nakakola Galilaya yeng'ha yolangusa mli ng'handa za kusalila na yodamla Mbuli Inojile ya Undewa wa Nguluwi. Na kuwosela chila matamwa gowalinago wanhu.
MAT 4:24 Mbuli nayali yodita Yesu na yenela isi yeng'ha ya Siliya, lelo wanhu wawegala wanhu weng'ha wawele watamwa na chila matamwa, wanhu wawele na chijeni, na wanhu wawele na chinzilisa na wanhu wali chete, ahyo Yesu nakawosela matamwa weng'ha.
MAT 4:25 Chilundo cha wanhu na wali womuwinza heye, kulawila Galilaya na kulawila honhu hawele na mji wa Dekapoli kulawila Yelusalemu na Yudeya na isi ili kumwambu na lwanda lwa Yolodani.
MAT 5:1 Yesu nakawona wanhu wenji, kakwina hali chidunda nakikalisa. Walanguswa nawamzenjelela.
MAT 5:2 Na heye kaluka kuwalangusa.
MAT 5:3 “Wobweda kwa wawele ng'hochele mli muhe, mina undewa wa kilanga ndo wa hewo!
MAT 5:4 Wobweda kwa walingisinza, mina Nguluwi kowasangalaza.
MAT 5:5 Wobweda kwa hewo waholile, mina woihalila isi!
MAT 5:6 Wobweda kwa wawele na nzala na ng'halu ya kukola gatanganiche, mina Nguluwi kowagutiza.
MAT 5:7 Wobweda kwa wawele na isungu kwa wanji, mina na heye Nguluwi kowonela isungu.
MAT 5:8 Wobweda kwa wawele na nhumbula zilihela nongwa, mina womona Nguluwi.
MAT 5:9 Wobweda kwa walingigala makundo, mina wochemigwa wana wa Nguluwi.
MAT 5:10 Wobweda kwa wawele kugaya kwa kukola gatanganiche, mina undewa wa kilanga ndo wa hewo.
MAT 5:11 “Mbweda hemwe wanhu wowaliga na kuwabocheleza, na kuwasinjizila vinhu vihile, kwa mbuli ya heni.
MAT 5:12 Msangalale na kusechelela, kwa vila chonolo chompegwa chowa chikulu kilanga. Avyo ndo wawabocheleze waloli wawele bahano muisi hemwe hamnoya.
MAT 5:13 “Hemwe mwa mwino wa wanhu muisi, wone mwino uwe ulihela unoni, wonojezwa na choni? Haiwa chinhu ng'hatu, ila yotajigwa kunze na kubijigwa na wanhu.
MAT 5:14 “Hemwe mwa lumuli lwa wanhu muisi yeng'ha! Muji uzenjigwe kuchidunda, hauchivisa hebu.
MAT 5:15 Kuduhu wanhu hawawesaga chenje na kugubika na chidoto, ila wawikaga honhu ha kuwichila chenje uwamulichila wanhu wawele mng'handa.
MAT 5:16 Vivila, iwagana wone lumuli lwenu luwe lumulika hali wanhu, leka wagone gala ganojile gomditile, wakamtogole Mhaza wa hemwe yawele kilanga.
MAT 5:17 “Mleche kijesa kota mbuya kutengula malajizo ga Musa na ulanguso wa waloli. Suyile kutengula, mbuya kugomanjiza.
MAT 5:18 Ndanguwalonjela ndikomya, mbaka baho isi yeng'ha na kilanga hovikola, kuduhu ne honhu hadodo ng'hatu gandichigwe kuli malajizo hokusigwa, mbaka geng'ha genele.
MAT 5:19 Leka, yoneche yobena mzilo uli udodo kwa weng'ha, na kuwalangusa wanhu wanji wakole kota hihyo, ayo kowa mdodo ng'hatu kuli Undewa wa Nguluwi. Ila yula yobatilila na kuwalangusa wanhu wanji, heye kowa mng'hangala kuli undewa wa kilanga.
MAT 5:20 Mina vyondiwalonjelani, ganojile ga hemwe wone hagawele gapulute ng'hatu kusinda gala ga Mafalisayo na walangusa wa malajizo ga Musa, hamkwinjila ng'oo kuli undewa wa kilanga.
MAT 5:21 “Mina muhulika kota wanhu wa katali na walonjelwa. ‘Uleche kukopola. Heye yokopola yomgana yataguswe.’
MAT 5:22 Ila heni ndanguwalonjelani, munhu yoneche yomzudila mng'holoze, yomlapa kutaguswa. Yalingumbeza mng'holoze, kohilikwa kwa walingutagusa. Yalingumchema mng'holoze. ‘Hegwe kwa mpoka,’ Kanguganigwa kwinjila kuli chiluli cha Jehanamu.
MAT 5:23 Leka, wone uhiliche nhambiko ya hegwe hali honhu ha kulavila nhambiko na baho ukumbuchila kota kwangilewa na mng'holozo,
MAT 5:24 ileche nhambiko yowigale hali honhu ha kulavila nhambiko, uhiluche wikale na mng'holozo mihanyise gamale, ndo uhiluche kulavya nhambiko kwa Nguluwi.
MAT 5:25 “Mihanyise na munhu yakulonjeleze hegwe himahima muwele mnzila, wone huditile ayo, homluta honhu ha kutagusa, kokuhilika kwa mtagusa na heye kokuwika mmoko wa wamizi na hewo wokuhindila mchinweng'ho.
MAT 5:26 Ndangukulonjelani ndikomya, hulawa hebu amo, mbaka ulavye sendi ya mwiso.
MAT 5:27 “Muhulika kota wanhu na walonjelwa. ‘Mleche kudita ung'hondwa!’
MAT 5:28 Ila heni ndanguwalonjela, Yomlola mdala kwa kumgana, kowa yaditile ung'hondwa mnhumbula mwa heye.
MAT 5:29 Lelo wone iziho lyako lya kudilo likudite uwifye, ling'ondole na kulitaga kutali. Igana ng'hatu kutaga chitomo chimwe mlukuli, kwa lukuli lweng'ha kwinjila kuli chiluli cha Jehanamu.
MAT 5:30 Wone moko wa hegwe wa kudilo, ukudite uwifye, uteme utaje kutali. Yowa goya uwe ulihela moko umwe, leka lukuli lweng'ha lwinjile kuli chiluli cha Jehanamu.
MAT 5:31 “Na ilonjigwa nakatali kahi, ‘Yalingumleka mchewake, imgana yamwandichile kalatasi ya luleko.’
MAT 5:32 Leka heni ndanguwalonjelani, wone mlume yamleche mchewake, kwa mbuli yoneche ila haiwele ya ung'hondwa kanguwifya kwa kumdita mdala yawe mng'hondwa, na munhu yoneche yomhola mdala yalechigwe, kangudita ung'hondwa.
MAT 5:33 “Kahi na muhulika kota wanhu wa katali nawalonjelwa. ‘Uleche kuleka vyowilahe, udite vila vyowilahile kwa Mkulu.’
MAT 5:34 Leka heni ndanguwalonjela, mleche kilaha ng'hatu, haiwele kilanga, kwa vila ndo chigoda cha undewa cha Nguluwi.
MAT 5:35 Haiwele kwa isi, kwa vila ndo chigoda cha heye cha kuwichila magulu, haiwele kwa Yelusalemu kwa vila ndo honhu ha mndewa mkulu.
MAT 5:36 Na uleche kilaha kwa mutwi wa hegwe, kwa vila hujeza hebu kuidita mnvili imwe iwe nzelu, ama iwe nhitu.
MAT 5:37 Houlonga, ‘Ena’ iwe ‘Ena,’ Na houlonga, ‘Hebu,’ Leka ng'hatu iwe ‘Hebu.’ Choneche chonjezeche kwa ago kulawa kwa ayula mwihe.
MAT 5:38 “Muhulika kota nailonjigwa. ‘Iziho kwa iziho na izino kwa izino.’
MAT 5:39 Ila heni ndanguwalonjelani, uleche kumhilusila munhu mwihe. Munhu yakuzabule izeze lya kudilo, mgalamlile kahi na lya kumoso.
MAT 5:40 Munhu yokuhilika kuli chitala yogana kukuholela igwanda lyako, mleche yahole kahi na ikoti lyako.
MAT 5:41 Munhu yokukola lupichi kidwika momholo ya heye utali wa chilomita imwe, widwiche chilomita mbili.
MAT 5:42 Yokulanda umupe, na uleche kumuhinduchizila chigosi yalingugana umwaziche chinhu.
MAT 5:43 “Muhulika kota vyoilonjigwe. ‘Migane lomlingikala hamwe habehi, na kumwihilwa nayali kihilwa na hegwe.’
MAT 5:44 Leka heni ndanguwalonjela, muwagane na wang'honyo wa hemwe, na kuwalandila walinguwabocheleza hemwe.
MAT 5:45 Leka muwe wana wa Mhaza wa hemwe yawele kilanga. Heye kawaga yowamulichila lumuli awala wehile na watanganiche na kuwatowela nhonya awala wehile na watanganiche.
MAT 5:46 Hambi mopegwa chinhu chachi, kwa kuwagana walinguwagana hemwe? Kuduhu, na wakongoza sendi za kodi waditaga hiho!
MAT 5:47 Wone mlinguwalamusa wang'holozenu yeka, ndaze, mowa mditile vinhu vya hihi hela? Na wanhu hawawele Wayahudi waditaga hiho.
MAT 5:48 Leka muwe mtanganiche kota Mhaza wa hemwe yawele kilanga vyoyatanganiche.
MAT 6:1 “Mwilolele, mleche kudita madito ganojile hali wanhu leka moneche na hewo. Lomdita hino, Mhaza wa hemwe yawele kilanga howatogola hebu.
MAT 6:2 “Lelo loumtanza mnzunwa, uleche kitogola hali wanhu kota wadesi vyowalingudita kuli ng'handa ya kusalila na mnzila, wopala wanhu wawatogole. Ndangulonga ndikomya, wowa wabochele chonolo cha hewo.
MAT 6:3 Ila hegwe houmtanza mnzunwa, udite ahyo kota yula yondilingumgana ng'hatu wa habehi na hegwe yaleche kuvizela choudita.
MAT 6:4 Ulavye utanzi wa hegwe kwa uviso, Mhaza wa hegwe yalingugona gavisigwe, kokutogola.
MAT 6:5 “Lomlanda, mleche kudita kota wahadi. Hewo waganaga kwima na kutambichiza mng'handa ya kusalila na mfungo mwa nzila wogana wanhu wawalole. Ndangulonga ndikomya, awo mina wabochela chonolo cha hewo.
MAT 6:6 Ila hegwe houlanda, winjile mchihengo na uhinde lwizi, hamba umlande Mhaza halingoneka. Na heye Mhaza wa hegwe, yalingugona gavisigwe, kokutogola.
MAT 6:7 “Lomlanda, uleche kuhabuka gamwe gago kota wanhu hawamzelele Nguluwi. Hewo wangijesa kota Nguluwi kowahulichiza kwa vila wangulonga ulonzi winji.
MAT 6:8 Mleche kiwhana na hewo, Mhaza wa hemwe kovizela chomgana hala mng'hali ne kumlanda!
MAT 6:9 Lelo ahino ndo mlinguganigwa kulanda. “ ‘Mhaza wa hetwe uwele kilanga, itagwa lya hegwe litogoligwe,
MAT 6:10 undewa wa hegwe uye, lyougana likoleche hano mu isi, liwe kota vyoliwele kilanga.
MAT 6:11 Utugalile lehano chilyo cha hetwe chotulingugana.
MAT 6:12 Utusile gala gotuwifile, kota vila hetwe vyo tuwosele wala watuzudize.
MAT 6:13 Uleche kutwinjiza kuli kujezigwa, Ila utulohole na yula mwihe.’ (Kwa vila undewa ndo wa hegwe, na ludali, na ukulu mbaka mazuwa gose. Ena.)
MAT 6:14 “Mina lomuwosela wanhu gehile gowaditile, Mhaza wa hemwe yawele kilanga, kowosela hemwe gehile gomditile kahi.
MAT 6:15 Ila wone mleche kuwosela wanhu wanji gehile gowaditile, na heye Mhaza, howosela hemwe gehile gomditile.
MAT 6:16 “Homukwesela kulya, mleche kudita kota wadesi, hewo wakwisukaga kumeho, wogana wanhu wawalole kota wesela kulya. Ndanguwalonjela ndikomya, kota hewo, mina wabochela chonolo cha hewo.
MAT 6:17 Ila hegwe wone wesele kulya, uhovuje kumeho na ubakalize mafuta kumutwi kwa hegwe.
MAT 6:18 Leka wanhu waleche kuvizela kota kwesela kulya, ila uzeleche hela na Mhaza wa hegwe halingoneka. Na heye Mhaza wa hegwe yalingona gavisigwe, kokutogola.
MAT 6:19 “Mleche kiwichila lufufu hano muisi kuwele na mifukuzi na ng'angaga ili nguwifya, na wahizi wokwinjila na kuhiza.
MAT 6:20 Miwichile ng'hano kilanga kuwele kuduhu mifukuzi na ng'angaga wolemwa kuwifya, na wahizi hawokwinjila kuhiza.
MAT 6:21 Leka ahala hoiwele ng'hano ya hegwe, ndo na nhumbula ya hegwe hoiwa.
MAT 6:22 “Iziho ndo lumuli lwa lukuli. Wone iziho lyako liwe likomu, lukuli lweng'ha lowa mlumuli.
MAT 6:23 Wone iziho lyako liwe litamwa, lelo lukuli lweng'ha lowa lutitile, na wone lumuli luwele mgati mlukuli lwako, luwe kuli jiza, lelo alyo jiza lya kudumbiza ng'hatu!
MAT 6:24 “Haduhu munhu yokola mijito kwa wakulu weli. Mina komzudila yumwe na kumgana yunji, ama kowa yomhulichiza yumwe na kumbeza yunji. Howeza kumfugamila Nguluwi na lufufu.
MAT 6:25 “Ndanguwalonjelani hemwe, mleche kijesa kuli ukomu wa hemwe, molya choni ama monwa choni leka muwe na ukomu, ama movala choni. Ndaze, ukomu unoga kusinda chilyo na lukuli lunoga kusinda nguwo.
MAT 6:26 Mvilole videje, havilingunyala nyhadikwa, havilingubeta nyhadikwa, kahi vyahela ng'hano. Leka ahyo Mhaza wa hemwe kilanga kanguwahombela. Lelo hemwe mnoga kusinda awo.
MAT 6:27 Ndaze, hagati ha hemwe kuna munhu kwa mbuli ya lunhwinhwi yoweza kuhejeza ne saa imwe ya kikala mu isi?
MAT 6:28 “Ndaze mwangijesa chomvala? Mlole uluwa wa kisolo vyoulingutitima! Hagalingukola chinhu choneche.
MAT 6:29 Ila ndanguwalonjelani, na heye Solomoni, na lufufu lwake lweng'ha, nahavalile goya kota uluwa umwenga kuli uluwa umwenga.
MAT 6:30 Nguluwi yalingugana mahamba gawe na mibadu, na misolo lehano jangutitima na mitondo janguvunda na kujisoma mchiluli! Ndaze, howaditilani hemwe mzidi? Hemwe wanhu muwele na makundo mado!
MAT 6:31 “Leka mleche kuwa na lunhwinhwi. ‘Tolya choni? Tonwa choni? Na tovala choni?’
MAT 6:32 Mina vyeng'ha vyangugailwa na wanhu hawamzelele Nguluwi. Mhaza yawele kilanga, kavizela kota mwangugana vinhu vyeng'ha avyo.
MAT 6:33 Ahyo mijeseni tandi undewa wa Nguluwi, na gala goyogana heye na ago geng'ha kowapa hemwe na vinhu viyage.
MAT 6:34 Leka, mleche kuwa na lunhwinhwi na ga mitondo. Mitondo yowa na nongwa yake. Nongwa ya zuwa imwe yowatosani kwa zuwa ayo.
MAT 7:1 “Mleche kuwatagusa wanhu wanji, mleche namwe kutaguswa na Nguluwi.
MAT 7:2 Kwa vila vyomuwatagusa wanji, na hemwe namwe vyomtagusigwa hihyo na Nguluwi, chipimilo chichila cho mpimila kwa wanji, ndo Nguluwi choyopimila kwa hemwe.
MAT 7:3 Lekachoni, kwanguchona chibanzi chiwele miziho lya mng'holozo, ila uleka kuchona ching'anzi chiwele miziho lya hegwe?
MAT 7:4 Ama, koweza ndaze kumlonjela mng'holozo kota, ‘Mng'holozangu tandi ndikuse chibanzi chiwele miziho lya hegwe,’ Akuno nagwe uwele na ching'anzi chiwele miziho lya hegwe?
MAT 7:5 Kwamdesi hegwe! Use tandi chibanzi chiwele miziho lyako ndo koweza kulavya ching'anzi chiwele miziho lya mng'holozo.
MAT 7:6 “Mleche kutozela mibwa vinhu vilavigwe kwa Nguluwi, waleche kugaluka na kuwalumaga. Na hihyo mleche kutozela migubi vinhu vyenu vyelile, waleche kuvibiganga.
MAT 7:7 “Mlande namwe mopegwa, na mpale namwe movyona, na mhodize lwizi, namwe mochumulilwa.
MAT 7:8 Mina yoneche yolanda kopegwa, na yalingupala kachonaga na yohodiza lwizi, kochumulilwa.
MAT 7:9 Hambi kabaho yumwe mwa hemwe, wone mwana wa heye yamlande ibumunda komha iganga?
MAT 7:10 Ama, wone yalande somba, komha izoka?
MAT 7:11 Kota lelo hemwe, hanga lomwihile, mvizela kuwapa wana wa hemwe vinhu vinojile, ndangukomya Mhaza wa kilanga, kodita vikulu ng'hatu na kowapa ganojile awala weng'ha walingumlanda.
MAT 7:12 “Vyeng'ha vyo mlingugana wanhu wawaditileni hemwe, muwaditile hewo hiho. Ahi ndo vyogalingulonga malajizo ga Musa na malanguso ga waloli.
MAT 7:13 “Mwinjile kukolela lwizi luzisili. Kwa vila nzila ilikulongoza kuli kudumigwa ngazi, na lwizi lwa kwinjilila amo lugazi, walinguluta nzila ayo wenji.
MAT 7:14 Ila nzila ilikulongoza kuli ukomu nzisili, na lwizi lwa kwinjilila amo luzisili, wanhu wachefu hela ndo woizela nzila ayo.
MAT 7:15 “Mwilole na Waloli wa udesi. Hewo wanguya kwa hemwe wokoneka kota ming'holo kwa kunze, ila kwa mgati mibwa ja kisolo jing'hang'hale.
MAT 7:16 Mowazela kwa madito ga hewo. Ndaze, wanhu hubawaga ububu hali migodi ja miwa na misada kuli mbijili? Hebu!
MAT 7:17 Leka, igodi linojile lilelaga mafuza ganojile, na igodi lihile lilelaga mafuza gehile.
MAT 7:18 Igodi linojile halilelaga mafuza gehile, na igodi lihile halilelaga mafuza ganojile.
MAT 7:19 Chila igodi halilingulela mafuza ganojile, wotemigwa na kutozigwa mchiluli.
MAT 7:20 Kwa hino, mowazela waloli wa udesi kwa madito ga hewo.
MAT 7:21 “Haiwele chila munhu yondonjela, ‘Mkulu, Mkulu’ Kokwinjila kuli Undewa wa Nguluwi, leka yula yokweneza yaganile Mhaza wa heni yawele kilanga.
MAT 7:22 Wenji wondonjela zuwa lila lya utaguso, ‘Mkulu, Mkulu! Kwa itagwa lyako natwali tulangusa usenga wa hegwe na kwa itagwa lyako tulavya vijeni na kukola vinduzanduza vinji.’
MAT 7:23 Aho, ndowalonjela, ‘Nasiwazelele hemwe ng'oo, muche kumwando kwa heni, hemwe mlingudita gehile.’
MAT 7:24 “Chila munhu yohulika gondilonga, na kugawika mnhumbula, kewhana na munhu yawele na nyhala yazenjile ng'handa hali italawe.
MAT 7:25 Nhonya itowa na nzanda zimema tendemaa, mbeho iputa, kuigwisa aila ng'handa. Ila ng'handa haigwile kwa vila na izenjigwa mitalawe.
MAT 7:26 “Ila yoneche yalinguhulika gondilonga ne kugawika mnhumbula, kewhana na munhu mpoka yazenjile ng'handa hali sangalaza.
MAT 7:27 Nhonya itowa na nzanda zimema na mbeho iputa nakuitigasa ng'handa, nayo igwa luu! Kahi kugwa ako kwali kukulu.”
MAT 7:28 Yesu vyoyasindile kulonga ulonzi awo, wanhu weng'ha na wamemile honhu hala nawabubuwala na ulanguso wa heye.
MAT 7:29 Hawele kota walangusa wa malajizo ga Musa, ila nakalangusa kwa ludali.
MAT 8:1 Yesu vyoyeduliche kuchidunda, na kawona wanhu wenji womuwinza heye.
MAT 8:2 Lelo nakoya munhu yumwe yawele na uswema, kafugama kumwando kwa heye na kulonga, “Mkulu, wone ulingugana, kombusila utamwa wondilingugula.”
MAT 8:3 Yesu kagolola moko, kamdoliza na kulonga, “Ndangugana wezuligwe,” Bahala du munhu yula, kawa mkomu uswema umlawa.
MAT 8:4 Hamba Yesu nakamlonjela ayula munhu kata, “Ulole, uleche kumlonjela munhu yoneche, ila ulute kilajila kwa watambika wakulole kota kuwa mkomu, hamba leka wanji walavye ulolezi na hamba ulavye nhambiko kota vyoyalajize Musa.”
MAT 8:5 Yesu loyaliyokwinjla kuli muji wa Kapanaumu, kating'hana na mkulu wa wamizi mloma kamlutila, kamdedeza,
MAT 8:6 yolonga, “Mkulu, chitumagwa wa heni, kawasa kaye, kazilika lukuli na kangutamika lukami.”
MAT 8:7 Yesu nakamlonjela, “Ndokuya kumlohola.”
MAT 8:8 Ayo mkulu wa wamizi Mloma nakamlonjela, “Mkulu, siganigwe winjile mng'handa ya heni. Ila ulonje ulonzi hela na chitumagwa wa heni kowa mkomu.
MAT 8:9 Mina, na heni nani, nda munhu mbele hasi ha ludali lwa wanji, ndanawo wamizi hasi ha heni. Ndangumlonjela yumwe, ‘Ulute!’ Na heye kanguluta, na yunji, ‘Uye!’ Na heye kanguya, na chitumagwa wa heni, ‘Udite chinhu chino,’ Na heye kangudita.”
MAT 8:10 Yesu vyo yahuliche ago, na kabubuwala, na kuwalonjela wanhu wawele womuwinza heye, “Ndanguwalonjelani ndikomya, sinamona munhu yawele na makundo kota aga, kweng'ha Isilaeli.
MAT 8:11 Lelo ndanguwalonjela kota wanhu wenji wokuya kulawa kolilawila isanya na kolizinjila, na kikala hanyi hali ndiya hamwe na Abulahamu, na Isaka, na Yakubu kuli undewa wa kilanga.
MAT 8:12 Ila hewo wawele kuganigwa kuli undewa awo, wotozigwa kunze kuli kutitu, ako ndo kowolila na kujejeda mizino.”
MAT 8:13 Yesu na nakamlonjela ayula ofisa Mloma, “Ulute kaye na go ukundile gowa gakoleche kwa hegwe.” Na ayula chitumagwa wa heye kawa mkomu bahala.
MAT 8:14 Yesu nakafika kaye kwa Petili, na kamfika mkweye Petili yotamika yawasile mchinhanda, yapwituche lukami.
MAT 8:15 Baho, Yesu kamdoliza yula mamo mmoko na bahala utamwa umleka, kenuka na kwaluka kuwawichila chilyo.
MAT 8:16 Vyoifichile matinazo, wanhu wawegala wanhu wenji wawele na vijeni, na heye kwa ulonzi hela, kawinga vijeni avyo. Na kawosela wanhu weng'ha matamwa ga hewo.
MAT 8:17 Nakadita hino kukomya gala goyalonjile Mloli Isaya genele. “Heye yuye kauhola unghochele wa hetwe, Nakapika matamwa ga hetwe.”
MAT 8:18 Yesu vyoyawawene chilundo cha wanhu wamkulumbile, nakawalonjela walanguswa wa heye walute kumwambu kwa ilamba.
MAT 8:19 Mlangusa yumwe wa malajizo ga Musa kamlutila nakumlonjela, “Mlangusa, heni ndokuwinza koneche kouluta.”
MAT 8:20 Yesu kamwidichila, “Mibwa ja kisolo jina mhalika, na videje vya kuulanga vina vimvulila, ila mwana wa munhu, kahela honhu ha kuwasiliza mutwi na kwesela.”
MAT 8:21 Hamba munhu yunji, yawele mli walanguswa wa heye, nakamlonjela, “Mkulu, ung'hundize tandi ndute ndikamtile mhaza wa heni.”
MAT 8:22 Ila Yesu nakamlonjela, “Umbinze heni! Waleche wabagame wawatile wayao wabagame.”
MAT 8:23 Yesu nakenjila mli itumbwi na wali hamwe na walanguswa.
MAT 8:24 Baho du, nhigu nailawila kilamba, nhigu yaluka kugubika itumbwi na itumbwi lyaluka kutigasika na kumema mazi. Yesu nayali yawasile ng'hatu.
MAT 8:25 Walanguswa na waluta akula koyawasile, na wamlanda wolonga, “Mkulu yawalohole na aila nhigu.”
MAT 8:26 Yesu kawalonjela, “Hemwe wanhu muwele na makundo mado, leka choni mwangudumba?” Hamba kenuka na kuilonjela aila nhigu na mbeho nayali iputa, inyamalile na inyamalila tulu.
MAT 8:27 Wanhu weng'ha na wekala wabubuwale, walonga, “Ayu munhu wachi? Nhigu na mbeho vyangumuhulika.”
MAT 8:28 Yesu loyoyile kuli isi ya Wagadala, kumwambu na alila ilamba, kating'hana na walume weli walawile kuli mipalika kuwele na vilaga. Wanhu awa wali na chijeni kumutwi, chiwang'ang'aze heko mbaka wanhu wawele wodumba kukola nzila ayo.
MAT 8:29 Na hewo bahala wayowa, “Kwangugana choni na hetwe, hegwe mwana wa Nguluwi?, Ndaze, kuya kutugaza mhela haunoya?”
MAT 8:30 Habehi na honhu aho, kwali na migubi minji jidimwa.
MAT 8:31 Lelo avyo vijeni vimdedeza, “Wone ulingugana kutuwinga, utuleche twinjile kuli jila migubi.”
MAT 8:32 Yesu kajilonjela, “Aya mlute.” Baho vijeni viwalawa wanhu wala, na kwinjila kwa migubi. Chilundo cheng'ha cha migubi jichina mnyenje na kwinjila milamba, na migubi jeng'ha jibagama.
MAT 8:33 Wadimi wa ajo migubi nawabilima, waluta kaye. Ako walavya mbuli zeng'ha loziwalawile na mbuli ziwalawile wala wanhu wawele na vijeni vihile
MAT 8:34 Leka wanhu weng'ha wa ula muji nawalawa, wamlutila Yesu, na lowamuwene, wamlonjela yoche kuli isi ya hewo.
MAT 9:1 Yesu nakenjila mitumbwi nakahiluka kuluga kwa heye koyalingikala, kwa kuloka ilamba.
MAT 9:2 Aho wanhu na wamigalila munhu yaziliche lukuli yawasile mchinhanda. Yesu vyoyawene makundo ga hewo, nakamlonjela yula munhu yaziliche, “Mwanangu, wikangaze, kusilwa gehile gouditile.”
MAT 9:3 Wamwe wa walangusa wa malajizo ga Musa nawaluka kijesa, “Munhu ayu kangumkovula Nguluwi!”
MAT 9:4 Yesu nakavizela choni chowochijesa, kawalonjela, “Lekachoni mli na majesa gehile kuli mnhumbula za hemwe?
MAT 9:5 Lilikohi liwele ubewe ng'hatu. Kulonga, ‘Kusilwa gehile ga hegwe,’ Ama kulonga, ‘Wime ujende?’
MAT 9:6 Lelo ndangugana mvizele kota Mwana wa Munhu kanao ludali muisi lwa kuwosela wanhu gehile ga hewo.” Aho nakamlonjela yula munhu yaziliche, “Winuche, uhole chinhanda cha hegwe, ulute kaye.”
MAT 9:7 Ayula munhu nayaziliche nakenuka, kaluta kaye.
MAT 9:8 Wanhu weng'ha wamemile hala lowagawene ago, nawabubuwala na kudumba, na wamtogola Nguluwi kwa ludali alo loyawapele wanhu.
MAT 9:9 Yesu nakoka ahala honhu, navyoyali yoluta kamona munhu yumwe itagwa lyake Matei, yekalise mchituka cha kodi. Yesu nakamlonjela, “Umbinze.” Na heye Matei kenuka, nakumuwinza.
MAT 9:10 Yesu loyali mng'handa yolya chilyo, wakongoza kodi na wawele na gehile nawoya kikala hamwe na walanguswa wa heye.
MAT 9:11 Mafalisayo wamwe na lowagawene ago, wawalonjela walanguswa wa heye, “Lekachoni mlangusa wa hemwe kangulya hamwe na wakongoza kodi na wadita gehile?”
MAT 9:12 Yesu nakawahulika, nakalonga, “Wanhu wawele wakomu hawalingugana mlaguzi hebu, ila awala wawele watamwa.
MAT 9:13 Lelo mkelanguse ulonzi awu, ‘Ndangugana isungu, haiwele nhambiko.’ Heni suyile kuwachema wanhu wala watanganiche, leka wawele na gehile.”
MAT 9:14 Hamba walanguswa wa Yohani Mbatiza wamuuza, “Hetwe twangwesela kulya na Mafalisayo wangwesela kulya mala nyinji, iwa ndaze walanguswa wa hegwe hambe wesele kulya?”
MAT 9:15 Yesu nakawedichila, “Ndaze, walalikwe kuli mnvina ya kuhesa wanguganigwa kulila kwa kulombocheza mkasano yawele baho hamwe na hewo? Hebu, Ena! Ila mhela wofika aho mkasano kokusigwa hali hewo, aho ndo wokwesela kulya.
MAT 9:16 “Haduhu munhu yahonelezaga nguwo nyale kuli nguwo ya katali. Mina chila chilaka chodeganga aila nguwo ya katali, na ahala hahonelezwe howa hagazi.
MAT 9:17 Na kuduhu munhu yowika divai ya lehano, kuli chizombe cha igozi cha katali. Howodita hino, achila chizombe cha igozi na divai yobohoka. Na achila chizombe chowa cha kutaga. Lelo iwaga hino, divai ya lehano, iwikagwa mli chizombe chinyale, na vyeng'ha vili, chizombe na divai vyowichigwa goya.”
MAT 9:18 Yesu loyali yolonga ago, chilongozi yumwe Myahudi nakoya, kenamiza nakulonga, “Mhinza wa heni kabagama sambi. Ila, ndangukulanda tuche ukamuwichile moko wa hegwe na heye kowa mkomu.”
MAT 9:19 Baho Yesu nakoka hamwe na walanguswa wa heye kamuwinza.
MAT 9:20 Mdala yumwe, nayali yotamika kulawa danda katali ng'hatu, mihela kumi na mili, nakamuwinza Yesu kumbele, nakadoliza lupembo lwa nguwo ya Yesu.
MAT 9:21 Nakadita ahyo kwa vila nakejesa mnhumbula. “Londidoliza hela nguwo ya heye, ndowa mkomu.”
MAT 9:22 Yesu kahinduka nakamona, nakamlonjela, “Mhinza wikangaze! Makundo ga hegwe gakulohola.” Mamo ayo kaloholigwa bahala.
MAT 9:23 Hamba Yesu na kenjila mng'handa ya yula chilongozi, loyawawene wapemba mluli mchililo na chilundo cha wanhu wolila na kulombocheza,
MAT 9:24 Kawalonjela, “Weng'ha mlawe kunze, mhinza ayu hafile, kawasa hela.” Na hewo nawamseka.
MAT 9:25 Baho, chilundo cha wanhu lochilawile kunze, Yesu kenjila mng'handa, kamibata ayo mhinza moko, na heye kema.
MAT 9:26 Mbuli ayo na yenela kweng'ha mu isi ila yeng'ha.
MAT 9:27 Yesu nakoka ahala honhu, na loyaliyoluta, wohambe walole weli nawamuwinza aku wotowa iyowe, “Mwana wa Daudi utonele isungu!”
MAT 9:28 Yesu loyenjile mng'handa awala wohambe walole weli wamlutila, na heye kawauza, “Ndaze, mwangukunda kota ndoweza kuwaditilani mbuli ayo?” Na hewo wamwidichila, “Ena, Mkulu.”
MAT 9:29 Aho Yesu kadoliza meho gawo, nakulonga, “Na iwe kota vyomlingukunda.”
MAT 9:30 Na bahala meho gawo gagubuka nawaluka kulola kahi. Yesu kawalonjela, “Mleche kumlonjela munhu yoneche mbuli ayi.”
MAT 9:31 Ila hewo woka, weneza mbuli ya Yesu kuli isi ila yeng'ha.
MAT 9:32 Wanhu lowali wokuka, wanji nawamigalila Yesu munhu yumwe yawele yohambe yalonje kwa vila nayali na chijeni.
MAT 9:33 Baho du acho chijeni lochilawile, munhu yula nayawele hambe yalonje kaluka kulonga kahi. Wanhu nawabubuwala na kulonga, “Mbuli kota ino hainalawila koneka kuli isi ino ya Isilaeli!”
MAT 9:34 Ila Mafalisayo wawa wolonga, “Kanguwinga vijeni kwa ludali lwa mkulu wa vijeni.”
MAT 9:35 Yesu nakajendela miji jeng'ha na vijiji, nakalangusa kuli ng'handa za kusalila za hewo yodamla Mbuli Inojile ya Undewa wa Nguluwi, yolohola matamwa geng'ha na vyeng'ha vilingugaza.
MAT 9:36 Lelo vyoyawene vilundo vya wanhu, nakawonela isungu kwa vila wali watochile na wawele na lunhwinhwi kota ming'holo jilihela mdimi.
MAT 9:37 Aho nakawalonjela walanguswa wa heye, “Mbena nyinji, ila wakola mijito wachefu.
MAT 9:38 Lelo mumlande Mkulu yalajize wakola mijito wabene mbena ya heye.”
MAT 10:1 Yesu nakawachema walanguswa wa heye kumi na weli, hamwe nakuwapa ludali lwa kuwinga vijeni vihile na kuwosela wanhu matamwa.
MAT 10:2 Aga hano ndo matagwa ga hewo watumigwa kumi na weli, kwaluka na Simoni yochemigwa Petili na mkulugwe Andeleya na Yakubu na mkulugwe Yohani wana wa Sebedayo.
MAT 10:3 Na kahi Filipo na Batolomeo na Tomasi na Matei nayali mkongoza kodi na Yakubu mwana wa Alufayo na Tadei na
MAT 10:4 Simoni yalawile Kanaani na Yudasi Isikalioti yambelenhuche Yesu.
MAT 10:5 Awa kumi na weli nawalajizwa na Yesu kota hino, “Mleche kuluta kuli wanhu wa isi, na mleche kwinjila kuli muji wa Wasamaliya.
MAT 10:6 Hemwe mlute kwa wanhu wa Isilaeli wajilile kota ming'holo.
MAT 10:7 Mlute mkawalonjele kota ‘Undewa wa kilanga wa habehi.’
MAT 10:8 Muwosele matamwa wanhu walingutamika, na muwahilusile ukomu wafile, muwalohole awala walingutamika kizada, na mlavye jimazoga. Mpegwa ne kulavya sendi, namwe mlavye ne kuhola sendi.
MAT 10:9 Mleche kuhola zahabu na sendi zeng'ha zila mmihako jenu.
MAT 10:10 Mleche kuhola mhako komluta, na igwanda linji na makwamba na ne ng'hweku ila. Wakola mijito wopegwa chowogana.
MAT 10:11 “Na wone mfiche muji woneche ama chijiji, na wone munhu yowabochela, mikale baho mbaka zuwa homkuka.
MAT 10:12 Homkwinjila mng'handa muwalamse wenyeng'haye.
MAT 10:13 Wone wenyeng'haye wa ng'handa wanguganigwa ulamso awo, kikala goya kopona hamwe na hewo. Ila wone hawalinguganigwa, lelo kikala goya kwa hemwe kowahiluchila hemwe.
MAT 10:14 Na wone munhu yoneche yolema kuwabochela na kuwahulika, muche kuli ng'handa ayo na mkung'hune nhimbwisi iwele mmagulu ga hemwe.
MAT 10:15 Ndanguwalonjelani ndikomya, zuwa lya utaguso, heye kolajila isungu ng'hatu kwa wanhu wa Sodoma na Gomola kusinda awo wanhu wa honhu aho!
MAT 10:16 “Mlole ndanguwalajiza hemwe kota ming'holo hali mibwa ja kisolo. Muwe wasugu kota izoka, na muwe mholile kota ng'hunda.
MAT 10:17 Milolele, wokuya wowebata, na kuwahilika kuli ng'handa za kutagusa na wowasubulani na ng'hobwa kuli ng'handa za kusalila.
MAT 10:18 Mohilikwa kwa vilingozi na wandewa kwa chiwalo cha heni, leka mlavye ulolezi kwa hewo na wanhu wa isi.
MAT 10:19 Lelo wone wawebate, mleche kuwa na lunhwinhwi kota molonga choni, na molonga ndaze, baho mopegwa choni cha kulonga.
MAT 10:20 Ulonzi womlonga, haulawa kwa hemwe, wolawa kwa ludali lwa heye Muhe wa Mhaza yowa yolonga mgati mwa hemwe.
MAT 10:21 “Walume wowahilika wang'holozawo wakopoligwe, na wahaza wodita hihyo kwa wana wawo. Na wana wowagaluchila wawalelile wakopoligwe.
MAT 10:22 Wanhu weng'ha wawazudilani hemwe kwa chiwalo cha itagwa lya heni. Leka heye yokwimilila, mbaka mwiso, koloholigwa.
MAT 10:23 Wanhu one wawabuze wala walingikala luga lumwe, mbilimile kuli luga lunji. Ndangukomya kota hamsinda hebu kulangusa miji jeng'ha ja Isilaeli loyanghali Mwana wa Muhu hanoya.
MAT 10:24 “Mlanguswa hawaga mkulu kwa mlangusa, na kuduhu chitumagwa kawaga mkulu kwa mkulu wa heye.
MAT 10:25 Lelo mlanguswa yafande kota mlangusa na chitumagwa yafande kota mkulu wa heye. Wone nawamchema mkulu wa ivyazi Belisebuli, ndaze, hawowachema wanhu wanji wa ivyazi alyo matagwa gehile lukami?
MAT 10:26 “Mleche kudumba wanhu, cheng'ha chigubikwe, chowa chigubuligwe, na mbuli ya uviso, yowichigwa hazelu.
MAT 10:27 Londiwalonjelani hemwe kung'hali kutitu, mhiluchile kulonga kuli kuzelu, na mbuli lomhuliche ilonjigwa kuuviso, muilonje hazelu.
MAT 10:28 Mleche kuwadumba hewo wawele kukopola lukuli, ila walingulemwela kukopola muhe. Leka hemwe iwagana ng'hatu kumdumba yula yawele kukopola lukuli hamwe na nhumbula kuli chiluli cha Jehanamu.
MAT 10:29 Kwa silinje imwe yougula semembe, na semembe ne imwe yogwa hasi ne kugana Mhaza wa hemwe.
MAT 10:30 Ila kwa hemwe, na mnvili zeng'ha za kumutwi mwa hemwe ziwazigwa.
MAT 10:31 Lelo uleche kudumba, hemwe mhega kusinda semembe wenji.
MAT 10:32 “Chila munhu yalingulonga kwa mlomo wa heye hazelu kota heye wa heni, heni kahi ndomkunda hali Mhaza wa heni yawele kilanga.
MAT 10:33 Ila yoneche yula yombela heni hali wanhu, na heni ndombela hali Mhaza wa heni yawele kilanga.
MAT 10:34 “Mleche kijesa kota mbuya kuwegalilani kikala goya muisi, suyile kigala kikala goya, ila ipanga.
MAT 10:35 Mina mbuya kuwatowaniza hagati ha munhu na mhaza wa heye, mhinza na mayake, mkasano na mkweye.
MAT 10:36 Na wang'honyo wa munhu ndo wanhu wa haluga hake.
MAT 10:37 “Yawele ngumgana mhaza ama mayake kusinda yalikungana heni, silingumgana. Yalingumgana mwana ama mhinza kusinda heni, silingumgana.
MAT 10:38 Munhu wone hapichile msalaba wa heye na kumbinza, silingumgana.
MAT 10:39 Yawele ngibatilila ukomu wa heye, kouwajiliza, ila yawele nguwajiliza ukomu wa heye kwa mbuli ya heni, kowanawo.
MAT 10:40 “Yalinguwabochelani, kangumbochela heni, na yalingumbochela heni, kangumbochela yula yanhumile.
MAT 10:41 Heye yombochela Mloli kwa vila ka Mloli kangwajiliza Uloli. Na yawele ngumbochela munhu yatanganiche kwa vila kanoga, kokwajiliza kunoga kwa heye.
MAT 10:42 Ndanguwalonjelani ndikomya, yoneche yompa yumwe wa wadodo awa chizombe cha mazi gazizime kwa vila mlanguswa wa heni, kopegwa chonolo cha heye.”
MAT 11:1 Yesu loyasindile kuwalajiza walanguswa kumi na weli, nakalawa aho, kaluta kulangusa na kudamla kuli miji ja hewo.
MAT 11:2 Yohani Mbatiza yawele mchinhweng'ho nakahulika mbuli ya madito ga Kilistu. Baho, nakawalajiza walanguswa wa heye,
MAT 11:3 wamuuze, “Ndaze, hegwe ndo yula yalinguya ama tumbeteze yunji?”
MAT 11:4 Yesu kedichila, “Mlute mkamlonjele Yohani mbuli zomlinguhulika na kuzona.
MAT 11:5 Wawele hambe walole, wangulola, na wali chete, wangujenda, na walingugula chipata wahovujigwa, na hawalinguhulika, wanguhulika, na wabagame wanguzilipuka kuwa wakomu. Na Mbuli Inojile yangudamligwa kwa wawele wazunwa.
MAT 11:6 Kobweda munhu yula yawelehela majesa kwa heni.”
MAT 11:7 Walanguswa wa Yohani lowali wokuka, Yesu kadamla ga Yohani kuli wanhu na kulonga, “Lomwali mluta kwa Yohani akula kugunuche, mwali kijesa momona munhu wachi? Ndaze, namgana mlyone idete litigaswa na mbeho? Hebu!
MAT 11:8 Lelo namluta kulola munhu yalindaze, ndaze, namwali ngijesa momona munhu yavalile goya utabuli? Hebu! Wanhu walinguvala goya wekalaga mli ng'handa za wandewa.
MAT 11:9 Ila mndonjele na mluta kulola choni? Mloli? Ena, gahega kwa mloli.
MAT 11:10 “Ayu ndo yalingulonjigwa kuli Maandiko Matakatifu, “ ‘Ulole, heni ndomigala msenga wa heni yakulongole, heye yokugololela nzila ya kukola hegwe.’
MAT 11:11 Ndanguwalonjelani ndikomya, wamwe mwa wana weng'ha wa wanhu, hanalawila yawele mkulu kusinda Yohani Mbatiza. Leka hino, yula yawele mdodo ng'hatu kuli undewa wa kilanga, ndo mkulu kusinda heye.
MAT 11:12 Kulawa mhela wa Yohani Mbatiza mbaka lehano, undewa wa kilanga wangugazigwa lukami, na wanhu wang'hanuche wangujeza kuusukula kwa lupichi.
MAT 11:13 Malanguso geng'ha ga waloli na malajizo mbaka mhela wa Yohani, wali ulonga mbuli mhela uno.
MAT 11:14 Wone moweza kukunda lelo, Yohani ndo Eliya, yawele nguya.
MAT 11:15 Yawele na makutu na yahuliche.
MAT 11:16 “Lelo ndouwhaniza na choni lulelo alu? Ndo kota wasongolo wekale mluga, wawa wochilonjela chilundo chimwe kwa chiyage,
MAT 11:17 “ ‘Tuwatowela ngoma ila hamvinile! Twimba lwimbo lwa kulombocheza ila hamlomboleze!’
MAT 11:18 Mina Yohani nakoya, hadile na hanwele divai, na hewo nawalonga, ‘Chijeni chimwaluka.’
MAT 11:19 Mwana wa munhu, loyezile, nayali yolya na kunwa, na wanhu na walonga, ‘Mlole munhu ayu, kangulya lukami na kugala, yeganile na wakongoza kodi na wehile,’ Leka luhala lwa Nguluwi na lutanganika kwa madito ga heye.”
MAT 11:20 Hamba Yesu nakaluka kujikalalila miji jila jikolile vinduzanduza vinji, wanhu hawamgalamchile Nguluwi kwa kugaleka gehile gowaditile.
MAT 11:21 “Mane gwegwe Kolasini! Mane gwegwe Betisaida! Mina, na iwe vinduzanduza vyo mlajilwe na vikoleche Tilo na Sidoni, wanhu weng'ha na wahawele wavalile migunila na kubakala mivu kumeho, kulajila kota wagaleka gehile na kumgalamchila Nguluwi.
MAT 11:22 Ndangukomya, kwa hemwe, kota zuwa lya utaguso, Nguluwi kowonela isungu wanhu wa Tilo na Sidoni kusinda hemwe.
MAT 11:23 Na kwa hegwe Kapanaumu, kwangugana uguluche uliyeka kilanga? Koduliswa hasi kuli isi ya wabagame, mina kota vinduzanduza vikoleche kwa hegwe vyahakoleche kula Sodoma, muji awo wahawele ukomu mbaka lehano.
MAT 11:24 Ila ndangukulonjelani ndikomya, zuwa lya utaguso, hegwe kogazigwa ng'hatu kusinda Sodoma.”
MAT 11:25 Mhela awo Yesu nakalonga, “Ndangukutogola hegwe Mhaza, Mkulu wa kilanga na wa isi, mina kuwavisa wawele na luhala na nyhala mbuli zino, kuwagubulilila wana wadodo.
MAT 11:26 Ena, Mhaza, kota vila vyoikunojeze.
MAT 11:27 “Mhaza wa heni kamha vinhu vyeng'ha. Kuduhu ne yumwe yamzelele mwana ila Mhaza, kuduhu yamzelele Mhaza ila Mwana, na yoneche yula Mwana yogana kumgubulila.
MAT 11:28 Muye kwa heni hemwe mweng'ha muwele kugaya na kupapa itunyo, na ndowapa honhu ha kwesela.
MAT 11:29 Miwohe nila ya heni na milanguse kwa heni, mina heni ndina isungu na nhumbula iholile na nhumbula za hemwe zosindamala.
MAT 11:30 Kwa vila nila ya heni ya lobwalobwa na itunyo lya heni lya ubewe.”
MAT 12:1 Mhela awo, Yesu loyali yokola mmigunda Zuwa lya Kwesela, walanguswa wali na nzala na waluka kubenanga miso ja uhemba wolya.
MAT 12:2 Mafalisayo vyowagawene ago, na wamlonjela Yesu, “Ulole walanguswa wa hegwe, wangudita mbuli zohambe zikundigwe kudita Zuwa lya Kwesela.”
MAT 12:3 Yesu nakawalonjela, “Ndaze, hamsomile vyoyakolile Daudi loyali na nzala heye na wayage.
MAT 12:4 Heye nakenjila mng'handa ya Nguluwi na kulya jila mibumuda ja nhambiko jiwichigwe helile ha Nguluwi. Heye ne awo wayage hambe wakundigwe kulya mibumunda ajo ila watambika waliyeng'ha.
MAT 12:5 Ama ndaze, hamsomile kuli chitabu cha malajizo ga Musa kota, Zuwa lya Kwesela, watambika wawifyaga kuli Ng'handa ya Nguluwi, na hawalingijesa kota wawifya?
MAT 12:6 Lelo ndanguwalonjelani kuta hano hana chikulu kusinda Ng'handa ya Nguluwi.
MAT 12:7 Wone na muwe mvizelele ulonzi uno, ‘Ndangugana isungu haiwele nhambiko,’ Na mwahawataguse kwa wihe wanhu walihela nongwa.
MAT 12:8 Mina Mwana wa Munhu ndo Mkulu kana ludali na Zuwa lya Kwesela”.
MAT 12:9 Yesu na koka aho, nakenjila mng'handa ya kusalila ya hewo.
MAT 12:10 Kwali na munhu yawele na moko ung'ong'onale. Lelo wanhu nawamuuza Yesu, “Ndaze, yowa goya kulohola wanhu Zuwa lya Kwesela?” Na wamuuza hino wagana wamibate ha kumtagusila.
MAT 12:11 Ila Yesu nakawalonjela, “Yalikohi hali hemwe, yawele na ing'holo lila linjile mlikulubila. Ndaze, homibata na kumlavya amo Zuwa lya Kwesela?
MAT 12:12 Ila, munhu kahega kusinda ing'holo! Lelo iwa goya kudita ganojile Zuwa lya Kwesela?”
MAT 12:13 Hamba nakamlojela ayula munhu, “Ugolole moko wa hegwe.” Nakaugolola, nawo uwa mkomu ng'hatu kota ula uyage.
MAT 12:14 Lelo Mafalisayo na walawa kunze, waluka kupwepwa ndaze vyowomkopola Yesu.
MAT 12:15 Ila Yesu loyavizelele mbuli ayo, nakalawa honhu hala. Wanhu wenji nawamuwinza, nakawalohola watamwa weng'ha,
MAT 12:16 nakawalemeza waleche kuwalonjela wanhu mbuli za heye,
MAT 12:17 leka gala goyalonjile mloli Isaya genele.
MAT 12:18 “Mlole chitumagwa wa heni yondimhagule, ndimganile heni yawele ngunojeza mnhumbula. Ndowika muhe wa heni kwa heye, na heye kodamla utaguso wa heni kuli isi zeng'ha.
MAT 12:19 Holema hebu, na hotowa iyowe, na lizi lya heye haluhulikwa kuli nzila.
MAT 12:20 Hobena hebu idenje lifinangwe, na hoputa hebu utambi ulingufung'ha iyosi, mbaka youdita utaguso unojile ulongoze.
MAT 12:21 Kwa heye isi zeng'ha zochitumbila.”
MAT 12:22 Aho wanhu wamigala munhu yawele yohambe yalole na yawele yolemwela kulonga kwa vila nayali na chijeni. Yesu kamlohola ayula munhu na baho kaluka kulonga na kulola.
MAT 12:23 Wanhu weng'ha wamemile ahala nawabubuwala na kulonga, “Ndaze, yowa ayu ndo Mwana wa Daudi?”
MAT 12:24 Ila Mafalisayo lowahuliche ago, walonga, “Munhu ayu kangulavya vijeni kwa ludali lwa Belisebuli mkulu wa vijeni.”
MAT 12:25 Yesu, yawele yavizelele majesa ga hewo, kawalonjela, “Undewa woneche ugawanuche vilundo vilingitwanza, haulingikala hebu, na mji woneche ama nhanzi yoneche igawanuche vilundo vilingilewa, vyosumigwa.
MAT 12:26 Wone Limazoga limuwinga Limazoga, lyangilemela liliyeka. Lelo undewa wa heye wokwimaze?
MAT 12:27 Wone heni ndilingulavya vijeni kwa ludali lwa Belisebuli, lelo wala vitumagwa wa hemwe walavyaga vijeni kwa ludali lwani, lwa Limazoga? Hebu! Ahyo, vitumagwa wa hemwe wokunda kuwatagusa hemwe kota mwiha.
MAT 12:28 Ila wone heni ndanguwinga vijeni kwa ludali lwa Muhe wa Nguluwi, lelo mvizele kota Undewa wa Nguluwi mina ukuyilani hemwe.
MAT 12:29 “Ama, koweza ndaze munhu kwinjila mng'handa ya munhu yawele na mong'ho na kumsukula lufufu lwa heye, ne kwaluka kumuwoha ayo munhu yawele na mong'ho? Aho ndo koweza kumsukula lufufu lwa heye.
MAT 12:30 “Yoneche hambe yebande na heni, kangundema, na yoneche hambe yekungajize hamwe na heni, kangusambalula.
MAT 12:31 Kwa mbuli ayo, ndanguwalonjelani, wanhu wokusilwa gehile na ukovuzi wa hewo weng'ha, ila hawokusilwa wihe wa kumkovula Muhe Yelile.
MAT 12:32 Kahi, yawele ngulonga ulonzi wa kumkovula Mwana wa Munhu kolechigwa, ila yula yawele ngulonga ulonzi wa kumlemela Muhe Yelile, hokusilwa hebu, iwe kuli isi ino, ama kuli isi ikuya.
MAT 12:33 “Mdite igodi liwe linojile na mafuza gake gowa ganojile, mdite uwe wihile na mafuza gake gowa gehile. Igodi lizelekaga kwa mafuza gake.
MAT 12:34 Hemwe ulelo wa izoka! Molonga ndaze mbuli zinojile hanga hemwe mli na wihe? Mina munhu hulongaga kwa gala gamemile mnhumbula.
MAT 12:35 Munhu yalinaisungu hulavyaga mbuli zinojile kuli ng'hano za heye zinojile, na munhu yehile hulavyaga mbuli zihile kuli ng'hano ya heye yihile.
MAT 12:36 “Lelo ndanguwalonjelani, zuwa lya utaguso wanhu woganigwa kwidichila mbuli ya chila ulonzi wihile walingulonga.
MAT 12:37 Mina kwa ulonzi wa hegwe kokundigwa kuwa kutanganika, na kwa ulonzi wa hegwe kotagusigwa kuna nongwa.”
MAT 12:38 Hamba wamwe wa walangusa wa malajizo ga Musa na Mafalisayo nawamlonjela Yesu, “Mlangusa, twangugana kuwona ulajilo kulawa kwa hegwe.”
MAT 12:39 Na heye kawedichila, “Lulelo lwihile lulingulema kumkunda Nguluwi!” Mwangugana ulajilo, hampegwa ulajilo ila ulajilo wa mloli Yona.
MAT 12:40 Kota vila Yona loyekale mazuwa gadatu kubunguzuka mbaka kuswa mmunda mwa Nyangumi, ndo vyoiwa kwa Mwana wa Munhu yochikala hasi mazuwa gadatu kubunguzuka mbaka liswa.
MAT 12:41 Wanhu wa Ninawi wolawila mhela wa kutagusigwa kwa wihe, na hewo wochitagusa chilelo achi kota china wihe. Mina Waninawi nawamgalamchila Nguluwi kwa mbuli ya kudamla kwa Yona, na hano hana chikulu kusinda Yona!
MAT 12:42 Malikiya wa kusini kulawila mhela lulelo awu houtagusigwa kwa wihe, na heye kochitagusa kota china wihe. Mina heye nakajenda kulawa isi ya kutali, nakuya kuhulichiza ulonzi wa luhala wa Solomoni, na hanga hano kuwele na chikulu kusinda Solomoni.
MAT 12:43 “Chijeni chihile lochiwinjigwa kwa munhu, chibemelaga kugunuche chipala honhu ha kwesela, chilemwela.
MAT 12:44 Ahi chochilonjelela, ‘Ndohiluka kaye kondawile.’ Ila lochihiluka na kuhafika hazelu halihela chinhu na kunoligwa,
MAT 12:45 vilutaga kuvihola vijeni viyage saba, vihile kusinda heye, na weng'ha huyaga kumwinjila ayo munhu. Na munhu ayu huwaga yagaziche lukami kusinda aho hamwande. Ndo vyoiwa kwa lulelo alu lwihile.”
MAT 12:46 Yesu nayali yang'hali yolonga na chilundo cha wanhu mhela mayake na wang'holoze lowoyile na kwima hanze, nawagana kulonga na heye.
MAT 12:47 Lelo munhu yumwe nakamlonjela, “Mayako na wang'holozo wa kunze, wangugana kulonga na hegwe.”
MAT 12:48 Ila Yesu kamwidichila munhu ayo, “Mayangu yalikohi? Na wang'holozangu ndo walikohi?”
MAT 12:49 Hamba kaugolola moko wa heye kwa walanguswa wa heye, nakulonga, “Awa ndo mayangu na wang'holozangu!
MAT 12:50 Mina yoneche yalingudita vyoyogana Mhaza wa heni nayali kilanga, ayo ndo mng'holozangu, na lumbulyangu, na mayangu.”
MAT 13:1 Zuwa lilila, Yesu nakalawa ila ng'handa, kaluta na kikalisa hafungo mwa ilamba na kulangusa.
MAT 13:2 Chilundo chikulu cha wanhu nachimzunguluta mbaka Yesu kakwina mli itumbwi, kekalisa. Wanhu weng'ha nawema mnyhenje ya ilamba,
MAT 13:3 na heye Yesu nakawalonjela mbuli nyinji kwa nhelo. “Mhulichize! Mnyalaji nakaluta kunyala nyhadikwa.
MAT 13:4 Loyali yonyala nyhadikwa, zinji nazigwa mnzila, videje vyuya nakulya.
MAT 13:5 Zinji nazigwa hali maganga hawele hela misanga minji. Zota himahima kwa vila misanga jali michefu.
MAT 13:6 Isanya lolulawile, zikala kwa vila nzabi zalihela mong'ho, zikoboka.
MAT 13:7 Zinji nazigwa hali migodi ja miwa, miwa jikula nakuzipilinjila.
MAT 13:8 Nyhadikwa zinji nazigwa hali misanga jinojile, zota, nazilela lukami, nyhadikwa zinji mala miya, nyhadikwa zinji mala makumi sita, na nyhadikwa zinji mala makumi gadatu.”
MAT 13:9 Yesu nakasindila kwa kulonga, “Yawele na makutu ga kuhulika na yahuliche!”
MAT 13:10 Walanguswa wa heye wamlutila, wamuuza, “Lekachoni kwangulonga na wanhu kwa nhelo?”
MAT 13:11 Yesu kawedichila, “Hemwe mpegwa kuvizela uviso wa undewa wa kilanga, ila hewo hebu.
MAT 13:12 Mina, munhu yawele na chinhu kopegwa nakonjezelwa, ila munhu yalihela chinhu, na chila choyawele nacho choholigwa.
MAT 13:13 Ndo mina ndangulonga na hewo kwa nhelo, kwa vila wangulola ila hawalingona, wanguhulichiza ila hawalinguhulika, ne kuvizela.
MAT 13:14 Kwa hewo genela gala yalonjile mloli Isaya, “ ‘Kuhulika mohulika, ila homvizela. Kulola molola, ila hamkona hebu.
MAT 13:15 Mina nyhala za wanhu awa zibowala, wagadinya makutu gawo, wadinya meho gawo. Hanga, wahalolile kwa meho gawo, wahahuliche kwa makutu gawo, wahavizelele kwa nyhala zawo, na kungaluchila, kangulonga Mkulu, na heni ndahawalohole.’ ”
MAT 13:16 Yesu nakalonga kahi, “Mobweda hemwe, mina meho genu gangulola na makutu genu ganguhulika.
MAT 13:17 Ndanguwalonjelani ndikomya, waloli na wanhu wanji watanganiche nawagana kugona gala gomlingugona, hawagawene, na kuhulika gala gomhuliche hemwe, hawagahuliche.
MAT 13:18 “Lelo hemwe milanguse nhelo ayi ya mnyalaji.
MAT 13:19 Yoneche yalinguhulika ulonzi wa mbuli ya Undewa wa Nguluwi kahulika ila havizelele, ndo kota zila nyhadikwa zigwile mnzila, Mwihe huyaga na kusukula chila chinyaligwe mnhumbula ya heye.
MAT 13:20 Ayila nyhadikwa ilagale hali italawe ndo kiwhana na munhu yahuliche usenga awo na baho kanguubochela kwa usangalalo.
MAT 13:21 Ila halilingwinjila mgati mwa hewo, hulutilila kibatilila usenga awo hado hela, na mhela wa kugaya ama nongwa hovilawila kwa mbuli ya usenga awo, kangugozola baho.
MAT 13:22 Ayila nyhadikwa ilagale hagati ha migodi ja miwa, ndo kiwhana na munhu yalinguhulika awo usenga, ila lunhwinhwi wa isi ino na uvedelo wa lufufu hubananga usenga awo, na heye halingulela mafuza.
MAT 13:23 Aila nyhadikwa ilagale hali misanga jinojile ndo kiwhana na munhu yalinguhulika ulonzi awo na kuuzela, nayo hulela, imwe mala miya, yinji mala makumi sita na yinji mala makumi gadatu.”
MAT 13:24 Yesu kawalonjela wanhu nhelo yinji, “Undewa wa kilanga uwhana kota hino. Munhu yanyalile nyhadikwa inojile kuli mgunda wa heye.
MAT 13:25 Ila hamihe imwe wanhu lowali wawasile, mwihe wa heye nakoya, kanyala misolo hagati ha uhemba, koka.
MAT 13:26 Lelo nyhadikwa loyotile na kwaluka kubahula, misolo najo najaluka koneka.
MAT 13:27 Vitumagwa wa yula yawele na mgunda wamlutila, wamlonjela, ‘Mkulu, nahaunyalile nyhadikwa inojile kuli mgunda wa hegwe. Lelo misolo jilawa kohi?’
MAT 13:28 Heye nakawedichila, ‘Mwihe ndo yaditile ahyo.’ Lelo vitumagwa wa heye wamuuza, ‘Ndaze, kwangugana tuche tukajing'umbule?’
MAT 13:29 Na heye kawedichila, ‘Hebu, mleche baho homkungajiza misolo, mong'umbula na uhemba kahi.
MAT 13:30 Mleche vikule hamwe mbaka mhela wa mbena. Mhela awo ndowalonjela walingubeta, mkungajize tandi misolo mjiwohe chilundochilundo cha kugasoma. Ila uhemba mukungajize mkauwiche kung'hano ya heni.’ ”
MAT 13:31 Yesu nakawalonjela nhelo yinji, “Undewa wa kilanga wangiwhana na munhu yanyalile nyhadikwa ndodo ng'hatu kuli mgunda wa heye.
MAT 13:32 Yiyo nyhadikwa ndodo ng'hatu, ila wone yote, iwaga igodi likulu kusinda migodi jeng'ha. Na videje vya kuulanga vyuyaga kuzenga vimvulila mli mitagala jake.”
MAT 13:33 Yesu na kalutilila kuwalonjele nhelo yinji, kalonga, “Undewa wa kilanga ufanda kota hino. Mdala yumwe nakahola nungo kahanza na utimbo vijemo vili, mbaka utimbo weng'ha ufuluma.”
MAT 13:34 Yesu nayali yolangusa wanhu weng'ha na kuwalonjela vinhu vyeng'ha kwa nhelo. Na nayali hambe yalonje chinhu kwa hewo ne kulonga kwa nhelo.
MAT 13:35 Na kadita hino, leka kweneza agala gowalonjile waloli. “Ndolonga na hewo kwa nhelo, ndogawika hazelu gavisigwe kulawa kulumbigwa kwa isi.”
MAT 13:36 Hamba Yesu nakawalaga wala wanhu, nakwinjila mng'handa. Walanguswa wa heye wamhejelela, wamlonjela, “Tutang'hulile nhelo ayi ya misolo yangutulangusa choni?”
MAT 13:37 Yesu kawalonjela, “Yanyalile zila nyhadikwa zinojile ndo Mwana wa Munhu.
MAT 13:38 Mgunda ndo isi, na nyhadikwa inojile ndo wanhu woyile kuli Undewa wa Nguluwi, na misolo ndo wanhu walutile kwa Limazoga.
MAT 13:39 Na mwihe yanyalile misolo ndo Limazoga na mbena ndo kuduma kwa ukulu na wabetaji ndo wahilisi wa kilanga.
MAT 13:40 Kota vila misolo vyojilingukungajizwa hamwe na kusomigwa mchiluli, ndo vyoiwa kuduma kwa mhela.
MAT 13:41 Mwana wa Munhu kowalajiza wahilisi wa kilanga wa heye wawawiche hamwe kuli undewa wa heye wala weng'ha wali ngwambuza gehile, na weng'ha walingudita gehile.
MAT 13:42 Wahilisi wowatoza kuli ivuche lya chiluli, na ako wolila na kujejeda mizino.
MAT 13:43 Hamba, wala watanganiche wong'ala kota isanya kuli undewa wa Mhaza wa hewo. Yawele na makutu nayahuliche!
MAT 13:44 “Undewa wa kilanga uwhana na chinhu chivisigwe kuli mgunda. Munhu yumwe kachivibula, kachivisa kahi. Nakasangalala ng'hatu leka kaluta kuguza geng'ha goyawele nago, nakuzagula mgunda ula.
MAT 13:45 “Kahi, undewa wa kilanga uwhana na mguzavinhu yumwe nayali yopala lulu inojile,
MAT 13:46 loyapatile lulu imwe ya sendi nyinji ng'hulu, nakaluta, nakaguza geng'ha goyawele nago, nakagombola lulu ila.
MAT 13:47 “Kahi, undewa wa kilanga uwhana na utandawala utozigwe kuli bahali, wibata somba za nhanzi nyinji ng'hatu.
MAT 13:48 Loumemile, wanhu nawaukwega hafungo, wekala, wahagula somba zinojile wawika mgati mli vidoto vyawo, na wehile wawataga.
MAT 13:49 Ndo vyoiwa kuduma kwa mhela, wahilisi wa kilanga wolawila, wowabagula wanhu wehile na wanhu watanganiche,
MAT 13:50 na kuwataga awo wehile kuli ivuche lya chiluli. Ako wolila na kujejeda mizino.”
MAT 13:51 Yesu kawauza, “Ndaze, mvizela mbuli azi zeng'ha?” Nawamwidichila, “Ena.”
MAT 13:52 Heye nakawalonjela, “Leka ahyo, chila mlangusa wa malajizo ga Musa yalinguwa mlanguswa wa undewa wa kilanga kangiwhana na nayali na ng'handa yalingulavya kuli ng'hano ya heye vinhu vinyale na vya katali.”
MAT 13:53 Yesu loyasindile kulonga nhelo azo, nakoka honhu aho,
MAT 13:54 kaluta kuli chijiji cha hakaye hake. Ako kawa yowalangusa wanhu kuli ng'handa za kusalila za hewo mbaka wabubuwala, walonga, “Ayu kaupata kohi luhala alu na kohi koyapeligwe ludali lwa kudita vinduzanduza avi?
MAT 13:55 Ndaze, ayu hawele yula mwana wa selemala? Ndaze, mayake hawele nguchemigwa Maliya? Na wakulugwe achina Yakubu na Yusufu na Simoni na Yudasi?
MAT 13:56 Na walumbuze ndaze, hawawele hamwe na hetwe? Lelo kagapata kohi aga geng'ha?”
MAT 13:57 Lelo wawa namajesa na heye. Ila Yesu kawalonjela, “Mloli halekaga kutogoligwa, ila kuli isi ya heye na hakaye hake!”
MAT 13:58 Leka ahyo, haditile vinduzanduza vinji hala kwa vila lowalemile kukunda ga heye.
MAT 14:1 Mhela awo Helodi mndewa wa Galilaya nakahulika lutogo lwa Yesu.
MAT 14:2 Lelo kawalonjela vitumagwa wa heye, “Munhu ayu ndo Yohani Mbatiza, kazilipuka kulawa kowabagame, ndo mina ludali lwa vinduzanduza lwangukola mijito mgati mwake.”
MAT 14:3 Helodi ndo heye yakundize Yohani yebatigwe na kuwohigwa na ng'weso na kumuwika mchinweng'ho kwa mbuli ya Helodiya, mdala wa Filipo, mng'holoze.
MAT 14:4 Chambuzo ndo kota vila Yohani loyali yamlonjele Helodi, “Haiwa goya hebu hegwe kumhola Helodiya!”
MAT 14:5 Helodi nakagana yamkopole Yohani, ila nakadumba Wayahudi kwa vila nawamona Yohani ndo mloli.
MAT 14:6 Kuli mnvina ya kukumbuchila kuvumbuka kwa heye Helodi, mhinza wa Helodiya nakavina hali wajenzi. Helodi nakanojezwa,
MAT 14:7 mbaka kelaha kompha ayo mhinza choneche choyolanda.
MAT 14:8 Na heye, aku yohajizwa na mayake, nakalanda, “Umhe sambi baha mchisaye mutwi wa Yohani Mbatiza.”
MAT 14:9 Mndewa nakesinza, ila kwa mbuli ya kula kilaha koyelahile na kwa mbuli ya wala wajenzi walalikwe, kalajiza yapegwe chila choyalandile.
MAT 14:10 Lelo Helodi nakamlajiza munhu kuchinweng'ho yamdumule mutwi Yohani.
MAT 14:11 Mutwi wa heye wigaligwa kuli chisaye, nawamha yula mhinza, na heye kamhilichila mayake.
MAT 14:12 Walanguswa wa Yohani nawoya, wauhola mtufi wa heye, wautila. Hamba wamhilichila nguto Yesu.
MAT 14:13 Yesu loyahuliche mbuli ayo, nakoka honhu hala kwa itumbwi, nakaluta honhu hanji hawele hela wanhu. Ila wanhu nawahulika mbuli, wamuwinza kwa magulu kulawa mujini.
MAT 14:14 Lelo loyeduliche kumwani, nakona lung'hongola lwa wanhu, nakawonela isungu, kawosela matamwa watamwa wa hewo.
MAT 14:15 Loifichile matinazo, walanguswa wa heye wamlutila wamlonjela, “Honhu aha twa kisolo, na saa za nemisi zipuluta. Lelo uwalaje wanhu walute kuli vijiji wakagombole chilyo.”
MAT 14:16 Yesu nakawalonjela, “Haiwaganile kuluta, muwape hemwe chilyo.”
MAT 14:17 Ila hewo nawamlonjela, “Twanajo mibumunda jihano na somba mbili hela.”
MAT 14:18 Yesu nakawalonjela, “Ndigalileni hano.”
MAT 14:19 Nakawalonjela wanhu wekalise hali misolo. Hamba Yesu kaihola jila mibumunda na somba mbili, kalola kuchanya kilanga, katambichiza. Kahi kamogola ajo mibumunda, kawapa walanguswa wa heye, na hewo wawapa wanhu.
MAT 14:20 Wanhu weng'ha nawalya, weguta. Hamba walanguswa wakungajiza upumunizo, wamemeza vidoto kumi na vili.
MAT 14:21 Weng'ha wadile wali walume wafichile elufu zihano, ne kuwaza wadala na wana.
MAT 14:22 Baho, Yesu nakawalajiza walanguswa wa heye wakwine mli itumbwi, wamlongole kumwambu mwa ilamba mhela heye yowalaga wanhu.
MAT 14:23 Loyewelajile wanhu, kakwina kuchidunda nayali yeka kulanda. Loiwele nemisi, heye nayali ako yaliyeng'ha,
MAT 14:24 na mhela awo lila itumbwi nalyali kutali na misanga nalifika habehi na hagati mwa ilamba, ila nalyali ligaya kwa vila mbeho nayali iuhilusa.
MAT 14:25 Nechilo, behi na kubwemwenzuka, Yesu nakawawinza walanguswa yojenda mchanya mmazi.
MAT 14:26 Walanguswa wa heye lowamuwene yojenda mchanya mmazi nawadumba ng'hatu, nawalonga, “Idimu!” Nawatowa iyowe kwa kudumba.
MAT 14:27 Baho, Yesu nakalonga na hewo, “Msindamale, nda heni. Mleche kudumba!”
MAT 14:28 Petili nakamlonjela, “Mkulu, wone uli hegwe, undajize njende mchanya mmazi mbuye kwa hegwe.”
MAT 14:29 Yesu nakalonga, “Ena uye.” Lelo Petili nakadulika kulawa kuli lila itumbwi, nakajenda mchanya mmazi, nakamlutila Yesu.
MAT 14:30 Ila loyawene ila mbeho, nakadumba, nakaluka kudidimila, nakalila kwa lizi lya kuchanya, “Mkulu, undohole.”
MAT 14:31 Aho, Yesu nakagolola moko wa heye, kamibata na kumlonjela, “Hegwe uli na makundo mado! Lekachoni waliudumba?”
MAT 14:32 Hamba nawakwina mli itumbwi, na mbeho inyamalila.
MAT 14:33 Weng'ha nawawele mgati mwa itumbwi nawamfugamila, walonga, “Tukomya hegwe ndo Mwana wa Nguluwi.”
MAT 14:34 Nawaloka ilamba, nawafika isi ya Genesaleti.
MAT 14:35 Wanhu wa ako lowamzelele, weneza mbuli heng'ha kuli honhu hala. Baho, nawamigalila Yesu watamwa weng'ha,
MAT 14:36 nawamlanda wawakundile wadolize hela lupembo lwa nguwo ya heye. Na hewo weng'ha wadolize waloholigwa.
MAT 15:1 Hamba Mafalisayo na walangusa wa malajizo ga Musa woya kulawa Yelusalemu, wamlutila Yesu, wamuuza,
MAT 15:2 “Lekachoni walanguswa wa hegwe hawalingudumba malanguso tubochele kwa wasekulu wa hetwe? Hawalinguhovuga moko goya kota vila vyoilinguganigwa!”
MAT 15:3 Yesu nakawedichila, “Lekachoni namwe hamlingudumba malajizo ga Nguluwi ila mwanguganilila gombochele hemwe?
MAT 15:4 Nguluwi nakalonga, ‘Wahulichize mhaza na mayako,’ kahi ‘Nayalingumliga mhaza wa heye ama mayake, imgana yakopoligwe.’
MAT 15:5 Ila hemwe mwangulangusa kota wone munhu yawe na chinhu choyaganile kumtanza mhaza wa heye ama mayake, ila nakulonga, ‘Nhambiko ayi ndimlavila Nguluwi,’
MAT 15:6 Lelo halinguganigwa kahi kumfugamila mhaza wa heye! Ndo vyomlingubeza ulonzi wa Nguluwi kwa kuwinza malanguso ga hemwe.
MAT 15:7 Hemwe wahadi! Isaya nakalagula vinojile ng'hatu kwa hemwe.
MAT 15:8 “Nguluwi nakalonga, ‘Wanhu awa wangufugamila kwa ulonzi hela, ila mnhumbula mwao wa kutali na heni.
MAT 15:9 Kufugamila kwa hewo kwiha, mina wangulangusa mbuli za wanhu kota malajizo ga Nguluwi.’ ”
MAT 15:10 Yesu nakauchema lula lung'hongola lwa wanhu, nakawalonjela, “Mhulichize, mvizele!
MAT 15:11 Chinhu chilingumdita munhu wavu hachiwele chila chilingwinjila mgati, ila chila chilingulawa mgati. Acho ndo chilingumdita munhu wavu.”
MAT 15:12 Hamba walanguswa wamlutila, wamlonjela, “Ndaze, kuvizela kota Mafalisayo nawazudizwa lowahuliche ulonzi wa hegwe?”
MAT 15:13 Ila heye nakawedichila, “Chila chotile chohachinyaligwe na mhaza wa heni yawele kilanga, wong'humbuligwa.”
MAT 15:14 Muwaleche hewo wawo! Hewo hawalingulola, vilongozi wa hawalingulola, na wone halingulola yamlongoze halingulola, weng'ha weli wokwinjila mli ikulubila.
MAT 15:15 Petili nakalonga, “Ututanghulile ayo nhelo.”
MAT 15:16 Yesu nakalonga, “Leka na hemwe hamlinguvizela?
MAT 15:17 Ndaze, hamvizelele kota chila chilingwinjila hamlomo changuluta kumunda na hamba kulawa kunze kucholo?
MAT 15:18 Ila mbuli zilingulawa kumlomo hulawaga mnhumbula, na ago ndo galingumdita munhu yawe mwavu.
MAT 15:19 Mina mnhumbula mlawaga majesa ga kukopola na ung'hondwa na uhonzolomo na uhizi na ulonzi wa uhadi na kukovula.
MAT 15:20 Ago ndo galingumdita munhu wavu. Ila kulya ndiya ne kuhovuga moko hamditile munhu yawe mwavu.”
MAT 15:21 Yesu nakoka honhu hala nakaluta kikala kuli honhu ha Tilo na Sidoni.
MAT 15:22 Lelo mdala yumwe yawele Mkanaani wa isi ayo kamuyila, kakwiniza lizi kalonga, “Mkulu, Mwana wa Daudi, umbonele isungu. Mhinza wa heni kangugazigwa na chijeni chihile.”
MAT 15:23 Ila Yesu nahamwidichile. Lelo walanguswa wa heye wamlutila, wamlonjela, “Mlonjele yoche kwa vila kangutuwinzawinza yotowa iyowe.”
MAT 15:24 Yesu nakamwidichila, “Situmigwe ila kwa wanhu wa Isilaeli wajilile kota ming'holo.”
MAT 15:25 Ahyo yula mdala nakoya, kamfugamila, nakulonga, “Mkulu unhanze.”
MAT 15:26 Yesu nakamwidichila, “Hainojile kuhola chilyo cha wana na kutozela mibwa.”
MAT 15:27 Ahyo mdala nakamwidichila, “Ndangukomya, Mkulu, ila na mibwa najo jilyaga usanyangwa ulingulagala kuchisaga.”
MAT 15:28 Yesu nakamwidichila, “Mdala, makundo ga hegwe makulu, lelo uditilwe kota vyoulingulanda.” Yula mhinza wa heye kawa mkomu bahala.
MAT 15:29 Yesu nakalawa aho kaluta hafungo mwa ilamba lya Galilaya, nakakwina mchidunda, kekalisa.
MAT 15:30 Wanhu wenji lukami nawamuyila womigalila waziliche lukuli, wohambe walole, wali chete, wohambe walonje, na wanji wenji wowawele watamwa, nawawawika hamwando hali magulu, na heye nakawosela matamwa ga hewo.
MAT 15:31 Lung'hongola lwa wanhu naububuwala ng'hatu louwene wala hanawalingulonga, wangulonga na wala nawaziliche lukuli wawa wakomu na wala walichete wangujenda na wohambe walole, wangulola na wanhu nawamtogola Nguluwi wa Isilaeli.
MAT 15:32 Lelo Yesu kawachema walanguswa wa heye, nakalonga, “Ndanguwonela isungu wanhu awa kwa vila wali baha na heni kwa mazuwa gadatu, na sambi wahela chilyo. Siviganile walute ne kulya, waleche kuzilika mnzila.”
MAT 15:33 Walanguswa nawamlonjela, “Hano twa kisolo, topata kohi chilyo cha kuhega kwa wanhu weng'ha awa?”
MAT 15:34 Yesu nakawauza, “Mwanajo mibumunda jilinga?” Nawamwidichila, saba na tusomba tuchefu.
MAT 15:35 Lelo Yesu nakawalonjela wanhu wekalise hanyi.
MAT 15:36 Kahola jila mibumunda saba na tula tusomba, kamtogola Nguluwi, kavimogola, kawapa walanguswa, na hewo wawagawila wanhu.
MAT 15:37 Weng'ha walya, weguta. Hamba walokoteza upumunizwa, wamemeza vidoto saba.
MAT 15:38 Awo wadile wali walume elufu zine, ne kuwaza wadala na wana.
MAT 15:39 Lelo Yesu nakawalaga wanhu, nakakwina mli itumbwi, nakaluta honhu kulinguchemigwa Magadani.
MAT 16:1 Mafalisayo na Masadukayo nawamlutila Yesu, na kwa kumjeza, wamlanda yawalajile ulajilo kulawa kilanga.
MAT 16:2 Ila Yesu nakawedichila, “Hoifika matinazo hemwe mlongaga, ‘Luhela lowa lunojile kwa vila kilanga kudung'uwala.’
MAT 16:3 Na lufuku mwangulonga, ‘Lehano nhonya yotowa, kwa vila kuulanga kudung'uwala na ng'hungugu igubika.’ Lelo hemwe mvizela ng'hatu kuwaza luhela kwa kulola kilanga vyokuli, ila kuvizela ulajilo wa luhela loza kuwa ndaze hamvizelele.
MAT 16:4 Lulelo lwihile lulingulema kumkunda Nguluwi! Lwangugana ulajilo, hachipegwa ulajilo woneche ula, ila ulajilo wa Yona.” Lelo kawaleka, kaluta.
MAT 16:5 Walanguswa wa heye lowalochile kumwambu mwa ilamba, wefika wasemwa kuhola mibumunda.
MAT 16:6 Yesu kawalonjela, “Milole na muwe meho na usaso wa Mafalisayo na Masadukayo.”
MAT 16:7 Ila hewo wawa wochilonjelela, “Kangulonga hino kwa vila hatuholile mibumunda.”
MAT 16:8 Yesu nakagazela majesa gawo, kawalonjela, “Hemwe wanhu muli na makundo mado! Ndaze mwangilonjelela kwa mbuli ya vyomlihela mibumunda?
MAT 16:9 Ndaze, mng'hali kuvizela? Ndaze, hamlingukumbuka londimogole ajila mibumunda jihano kwa chiwalo cha wanhu elufu zihano? Ndaze, na mmemeza vidoto vilinga vya upumunizo?
MAT 16:10 Ama, ajila mibumunda saba jowapegwe wala wanhu elufu zine, ndaze, nammemeza vidoto vilinga vya upumunizo.
MAT 16:11 Hambi hamlinguvizela kota sali ndilonga kwa mbuli ya mibumunda? Mwilole na usaso wa Mafalisayo na Masadukayo!”
MAT 16:12 Ahyo walanguswa na wavizela kota nakawalonjela welole haiwele usaso wa mibumunda, ila na malanguso ga Mafalisayo na Masadukayo.
MAT 16:13 Yesu loyafichile nzingo ya Kaisalia Filipo, nakawauza walanguswa wa heye, “Wanhu wangulonga Mwana wa Munhu ka whaani?”
MAT 16:14 Nawamwidichila, “Wanji wangulonga hegwe ndo Yohani Mbatiza, wanji wangulonga hegwe ndo Eliya, na wanji wangulonga hegwe ndo Yelemiya ama yumwe wa waloli.”
MAT 16:15 Yesu nakawauza, “Na hemwe ndaze, mwangulonga heni nda whaani?”
MAT 16:16 Simoni Petili nakedichila, “Hegwe ndo Kilistu Mlohozi, Mwana wa Nguluwi yawele mkomu.”
MAT 16:17 Yesu nakalonga, “Kubweda hegwe Simoni mwana wa Yona,” “Kwa vila hawele munhu yakugubulile mbuli ino, ila Mhaza wa heni yawele kilanga.
MAT 16:18 Na heni ndangukulonjela, hegwe ndo Petili, na hali italawe alino ndokwimiza chilundo cha wanhu walingumkunda Kilistu cha heni, na mong'ho wa kubagama hauweza kuusumya.
MAT 16:19 Ndokupa chichumulilo cha undewa wa kilanga, chila chouhinda muisi, chohindigwa kilanga na chila chouchumula muisi, chochumuligwa kilanga.”
MAT 16:20 Hamba nakawalemeza walanguswa waleche kumlonjela munhu yoneche kota heye ndo Kilistu Mlohozi.
MAT 16:21 Kulawa mhela awo Yesu nakaluka kuwalonjela walanguswa wa heye ne kuvisa, “Ndanguluta Yelusalemu, na ako wakulu, watambika wakulu na walangusa wa malajizo ga Musa, wongaza ng'hatu. Wong'hopola ila zuwa lya kadatu, ndozilipuka.”
MAT 16:22 Aho Petili kamhola Yesu hafungo, nakaluka kumng'hanuchila, “Uleche kulonga hino Mkulu! Mbuli ayi haikufika hebu!”
MAT 16:23 Ila Yesu kahinduka, nakamlonjela Petili, “Uche kumwando kwa heni, Limazoga! Hegwe ndo ngwamo kwa heni. Majesa ga hegwe hagawele ga chinguluwi ila ga chiwunhu.”
MAT 16:24 Hamba Yesu nakawalonjela walanguswa wa heye, “Munhu yoneche yogana kumbinza heni, imgana yeleme yuye, yahole msalaba wa heye, yambinze.
MAT 16:25 Mina, munhu yogana kuulohola ukomu wa heye yuye, kouwajiliza.
MAT 16:26 Ila munhu yokwajiliza ukomu wa heye kwa mbuli ya heni, kogapata. Ndaze, munhu kowa na choni chinojile wone koihaliza isi yeng'ha hanga youkwajiliza ukomu wa heye?
MAT 16:27 Mana, Mwana wa Munhu kokuya kuli ukulu wa Mhaza wa heye hamwe na wahilisi wa kilanga wa heye, na ahyo ndo chila munhu kopegwa kota vyoyaditile.
MAT 16:28 Ndanguwalonjelani ndikomya, wowa wanji bahano hawobagama wang'hali kumona Mwana wa Munhu yokuya kuli undewa wa heye.”
MAT 17:1 Logakwete mazuwa sita, Yesu nakawahola Petili na Yakubu na Yohani mng'holoze, nakaluta nawo waliyeka kuchaya kuchidunda chikulu.
MAT 17:2 Ako, Yesu nakagaluka kumeho hali hewo, kumeho kwa heye nakung'hala kota isanya na nguwo zoyavalile ziwa nzelu kota lumuli.
MAT 17:3 Musa na Eliya nawawalawila, wali wolongasa na heye.
MAT 17:4 Aho Petili nakamlonjela Yesu, “Mkulu, inoga kwa hetwe kuwa hano! Hougana ndozenga vibumuli vidatu. Chimwe cha hegwe na chimwe cha Musa na chimwe cha Eliya.”
MAT 17:5 Loyali yang'hali yolonga ahyo, ng'hungugu nzelu iwagubika, na lizi ihulikwa kulawa kuli ayo ng'hungugu, “Ayu ndo Mwana wa heni ndimganile, ndilingunojezwa na heye. Mhulichizeni.”
MAT 17:6 Walanguswa vyowahuliche ahyo wagwa chifugama, nawadumba ng'hatu.
MAT 17:7 Yesu nakawalutila, kawadoliza, nakalonga, “Mwime mleche kudumba!”
MAT 17:8 Lowalolile kuchanya hawamuwene munhu, ila Yesu nayaliyeka.
MAT 17:9 Lelo lowali wodulika kulawa kuchidunda, Yesu nakawadeuza, “Mleche kumlonjela munhu mbuli yomuwene mbaka Mwana wa Munhu loyozilipuka kulawa kowabagame.”
MAT 17:10 Hamba walanguswa nawamuuza, “Lekachoni walangusa wa malajizo ga Musa wangulonga igana tandi Eliya yoye?”
MAT 17:11 Yesu nakawedichila, “Mkomya, Eliya kokuya tandi kuwika goya mbuli zeng'ha.
MAT 17:12 Ila ndanguwalonjelani, Eliya mina koya na hewo nahawamzelele, ila nawamditila vila vyowaganile. Hihyo du, Mwana wa Munhu kogazigwa mmoko mwawo.”
MAT 17:13 Aho wala walanguswa nawavizela kota yaliyowalonjela mbuli ya Yohani Mbatiza.
MAT 17:14 Lowaufichile kahi lula lung'hongola lwa wanhu, munhu yumwe nakamlutila Yesu, kafugama,
MAT 17:15 nakalonga, “Mkulu, monele isungu mwana wa heni kwa vila kana chinzilisa, kahi kangugazigwa lukami, mala nyinji heye kagugwa mchiluli na mmazi.
MAT 17:16 Nandimigala kwa walanguswa wa hegwe ila walemwela kumlohola.”
MAT 17:17 Yesu nakedichila, “Hemwe lulelo lulihela makundo, lwajilile! Ndochikala na hemwe mbaka hanili? Ndowemilila hemwe mbaka hanili? Mmigale hano ayo mwana.”
MAT 17:18 Lelo Yesu nakaching'hanuchila chila chijeni, na heye chimlawa, na yula mwana kawa mkomu mhela wuwo.
MAT 17:19 Hamba walanguswa nawamlutila Yesu chinyele, nawamuuza, “Lekachoni hetwe tulemwela kulavya chila chijeni?”
MAT 17:20 Yesu nakawedichila, “Kwa vila makundo ga hemwe mado. Ndanguwalonjelani ndikomya, wone hela muwe na makundo mado kota nyhule ndodo ya haladali, moweza kuchilonjela chidunda achi, ‘Ulawe hano ulute hala,’ Nawo woluta. Kuduhu ne chinhu chilemwelwa kwa hemwe.”
MAT 17:21 Vijeni vya nhanzi ino havilavyagwa hihi hela, ila kwa kulanda na kwesela kulya.
MAT 17:22 Lowali hamwe ako Galilaya, Yesu nakawalonjela, “Mwana wa Munhu kanguzawichigwa mmoko mwa wanhu.
MAT 17:23 Womkopola, ila zuwa lya kadatu kulawa kubagama, kozilipuligwa.” Walanguswa nawesinza ng'hatu.
MAT 17:24 Lowafichile Kapanaumu wanhu wali wokongoza kodi ya ng'handa ya Nguluwi nawamlutila Petili, wamuuza, “Ndaze, mlangusa wa hemwe kalavyaga kodi ya Ng'handa ya Nguluwi?”
MAT 17:25 Petili nakedichila, “Ena, nakalavyaga.” Lelo Petili loyenjile mgati mwa ng'handa, yang'hali longa luzi, Yesu nakamuuza, “Simoni, hegwe kwangona ndaze? Wandewa wa isi hukongozaga kodi kulawa kwa whaani? Kulawa kwa wanhu wa isi, ama kulawa kwa wajenzi?”
MAT 17:26 Petili nakedichila, “Kulawa kwa wajenzi.” Yesu nakamlonjela, “Hino lelo, hailinguwalapa wanhu wa isi.
MAT 17:27 Ila kwa vila tuleche kuwazudizani, mlute kuli ilamba mkatoze ndoano, ulowe somba ya mwaluko kugwila, ugubule kumlomo, na mgati kozifika sendi za zaka. Uhole ukamhe kwa chiwalo cha heni na ya hegwe.”
MAT 18:1 Mhela wula walanguswa nawamlutila Yesu, nawamuuza, “Yalikohi yawele mkulu ng'hatu kuli undewa wa kilanga?”
MAT 18:2 Yesu nakamchema mwana yumwe, kamwimiza hagati hawo,
MAT 18:3 hamba nakalonga, “Ndanguwalonjelani ndikomya, wone hamgaluche na kuwa kota wana wadodo, hamkwinjila hebu kuli Undewa wa Nguluwi kilanga.”
MAT 18:4 Yoneche yochihanyisa kota mwana ayu, ayo ndo yawele mkulu kuli undewa wa kilanga.
MAT 18:5 Yoneche yombochela mwana yumwe kota ayu kwa itagwa lyangu, kangumbochela heni.
MAT 18:6 “Yoneche yomwambuza kuwifya yumwe wa awa wana wadodo walingung'hunda, yowa inoga yafunjigwe iganga likulu lya lwala na kukabajizwa kuli lwene lwa bahali.
MAT 18:7 Yochona isi yeng'ha kwa mbuli ya majezo ga kudita gehile. Majezo ago igana galawile, ila kochona yula munhu yula yovyambuza.
MAT 18:8 “Wone moko ama mgulu wa hegwe ukwambuze kikwang'hwala, udumule na kuutaga kutali na hegwe. Chiba kwa hegwe kwinjila kuli ukomu kuno ulihela moko ama magulu kuwala kutagwa kuli chiluli cha mazuwa gose ne kuduma uwele na moko meli na magulu meli.
MAT 18:9 Na iziho lyako wone likwambuze kikwang'hwala, wuse na kulitaga kutali na hegwe. Inoga kwa hegwe kwinjila kuli ukomu kuno uwele na iziho limwe, uleka kutajigwa kuli chiluli cha Jehanamu uwele na meho ga hegwe geng'ha meli.
MAT 18:10 “Milole! Mleche kumbeza yumwe wa wadodo wano. Ndanguwalonjelani, wahilisi wa kilanga wabaho mazuwa gose kumwando ha Mhaza wa heni yawele kilanga.
MAT 18:11 Mina mwana wa munhu nakoya kuwalohola wala wajilile.
MAT 18:12 Mwangona ndaze? Munhu nayali na ming'holo miya, wone yajilize limwe, kodita ndaze? Kowaleka wala makumi tisa na tisa kuchidunda, nakuluta kumpala yula yajilile.
MAT 18:13 Hoyompata, ndanguwalonjelani ndikomya, kosangalala kwa chiwalo cha ayo kusinda vyoyosangalala kwa chiwalo cha wala makumi tisa na tisa hawajilile.
MAT 18:14 Hihyo du, Mhaza wa hemwe wa kilanga halingugana ne yumwe wa awa wadodo yajilile.
MAT 18:15 “Mng'holozo wone yakuditile vibi, ulute ukamlonjele muwele hemwe mliyeka. Wone yakuhuliche kowa umpatile mng'holozo.
MAT 18:16 Wone halingukuhulika, mhole munhu yumwe ama weli hamwe na hegwe, leka kwa udedezi wa walolezi weli ama wadatu, chila nongwa yoditikwa.
MAT 18:17 Wone hambe yawahuliche awo, chilonjele chilundo cha wanhu walingumkunda Kilistu. Na wone hambe yahuliche chilundo cha wanhu walingumkunda Kilistu, na yawe kwa hegwe kota wanhu wohawamzelele Nguluwi na wakongoza sendi.
MAT 18:18 “Ndanguwalonjelani ndikomya, chila chomuhinda muisi chohindigwa kilanga, na chila chomchumula muisi chochumuligwa kilanga.
MAT 18:19 Kahi ndanguwalonjelani ndikomya, weli wa hemwe wakundile kuwa hamwe hano muisi kwa mbuli yoneche ya kulanda, Mhaza wa heni wa kilanga kowaditila mbuli yiyo.
MAT 18:20 Kwa vila heng'ha hala walingiting'hana weli ama wadatu kwa itagwa lya heni, heni ndabaho hali hewo.”
MAT 18:21 Hamba Petili kamlutila Yesu, kamuuza, “Mkulu, ndaze, mng'holozangu wone yanditile vibi, ndimleche lwa kalinga? Mala saba?”
MAT 18:22 Yesu nakamwidichila, “Silingulonga mala saba hela,” Ila makumi saba mala saba.
MAT 18:23 Ndo mina undewa wa kilanga ufanda kota mndewa yumwe yaganile kukagula uwazo wa vitumagwa wa heye.
MAT 18:24 Kukagula lokwaluche, kegalilwa munhu yumwe yawele daigwa sendi elufu kumi.
MAT 18:25 Munhu ayo yalihela chinhu cha kuhilusa, ahyo mkulu wa heye nakagana yaguzigwe heye na mchewake na wanage na vinhu vyeng'ha vyoyalinavyo, kulipila lila deni.
MAT 18:26 Lelo ayo chitumagwa kafugama kumwando ha heye, nakalonga, “Umbeteze na heni ndolipa deni lyeng'ha.”
MAT 18:27 Yula mkulu na kamonela isungu, kamlechela lila deni, kamlechela yalute.
MAT 18:28 “Ila ayo chitumagwa nakoka, kamfika yumwe wa vitumagwa wayage yawele na deni lya heye sendi denali miya imwe. Kamibata, kamdinga lumelo yolonga, ‘Ulipe deni lyako!’
MAT 18:29 Ayo chitumagwa miyage kamfugamila, kamlanda, ‘Umbeteze nani ndokulipa!’
MAT 18:30 Ila heye haviganile, leka kamuwika mchinweng'ho mbaka hoyolipa deni.
MAT 18:31 “Lelo vitumagwa wayage vyowawene mbuli ayo wawa na masinzo ng'hatu, nawaluta kumlonjela mkulu wa hewo mbuli ilawile.
MAT 18:32 Aho yula mkulu kamchema ayo chitumagwa, nakumlonjela, ‘Hegwe kwa chitumagwa wihile ng'hatu! Nakundanda nani ndikulechela ideni lya hegwe lyeng'ha.
MAT 18:33 Ndaze, haikuganile nagwe kumonela isungu chitumagwa muyago kota heni vyondikonele isungu?’
MAT 18:34 Lelo ayo mkulu nakazudila lukami, nakamlavya ayo chitumagwa yagazigwe mbaka baho hoyolipa deni lyeng'ha.”
MAT 18:35 Yesu nakasindila kwa kulonga, “Na Mhaza wa heni yawele kilanga kowaditilani hihyo wone chila yumwe wa hemwe yolema kumlechela mng'holoze kwa nhumbula ya heye yeng'ha.”
MAT 19:1 Yesu loyasindile kulonga mbuli azo, nakalawa Galilaya, kaluta Yudeya, kumwambu mwa lwanda lwa Yolodani.
MAT 19:2 Wanhu wenji na wamuwinza ako, na wawele watamwa nakawosela matamwa gawo.
MAT 19:3 Mafalisayo wamwenga nawamuyila, wamuuza wojeza kumgwiliza, “Ndaze, yowa goya mlume kumha luleko mchewake kwa mbuli yoneche yeng'ha ila?”
MAT 19:4 Yesu nakawedichila, “Ndaze, hamsomile kuli Maandiko Matakatifu kota Nguluwi yamlumbile munhu kulawila mwaluko nakalumba mlume na mdala?
MAT 19:5 Baho nakalonga, ‘Ndo mina mlume kangumlekaga mhaza na mayake, na kilumba hamwe na mdala wa heye, nawo weli wowa lukuli lumwe.’
MAT 19:6 Leka ahyo, hewo hawele weli kahi ila yumwe. Lelo choyalumbanize Nguluwi, munhu yaleche kulekaniza.”
MAT 19:7 Ila Mafalisayo nawamuuza, “Lekachoni lelo Musa nakatulajiza mdala yapegwe kalatasi ya luleko na kulechigwa?”
MAT 19:8 Yesu nakawedichila, “Musa nakawakundila kuwaleka wadala wa hemwe kwa vila mwali na nhumbula zigagadale. Ila haiwele hino kulawa mhela Nguluwi loyalumbile.
MAT 19:9 Lelo ndanguwalonjelani, yoneche yomleka mchewake ila kwa mbuli ya ung'hondwa, nakuhola mdala yunji, kangudita ung'hondwa.”
MAT 19:10 Walanguswa wa heye nawamlonjela, “Wone mbuli za mlume na mdala ndo azo, inoga tuleche ng'hatu kuhola.”
MAT 19:11 Yesu nakamlonjela, “Haiwele weng'ha walinguweza kuibochela mbuli ayi, ila wala hela wowatambichizwe na Nguluwi.
MAT 19:12 Mina hana mbuli zinji za kuleka kuhola, wanji kwa vila waleleka hiho, wanji kwa vila waditigwa hino na wanhu, na wanji nawagana waleche kuhola kwa mbuli ya undewa wa kilanga. Yoneche yoweza kubochela ilanguso ali nayabochele.”
MAT 19:13 Hamba wanhu nawamigalila Yesu wana wadodo leka yawawichile moko na kuwalandila na kuwakumbatiza, ila walanguswa nawawang'hanuchila.
MAT 19:14 Yesu nakalonga, “Muwaleche awo wana wadodo woye kwa heni, mleche kuwalemeza, mina undewa wa kilanga ndo wa wanhu wafandile kota wana awa.”
MAT 19:15 Lelo kawawichila moko na kuwakumbatiza, hamba koka honhu aho.
MAT 19:16 Munhu yumwe nakamuyila Yesu, nakumuuza, “Mlangusa, ndite choni chinojile leka ndiuhalile ukomu wa mazuwa gose ne kuduma?”
MAT 19:17 Yesu nakamlonjela, “Lekachoni kwangumbuza kuli Mbuli Inojile? Kabaho yumwe hela yanojile. Wone ugana kwinjila kuli ukomu wa mazuwa gose, ibate malajizo ga Nguluwi.”
MAT 19:18 Yula munhu nakamuuza, “Malajizo galikohi?” Yesu nakalonga, “Uleche kukopola, uleche kudita ung'hondwa, uleche kuhiza, na uleche kulavya ulolezi wa udesi,
MAT 19:19 Wahulichize mhaza na mayako, na migane na mlingikalasa halibehi kota vyoulingigana gwegwe.”
MAT 19:20 Ayo msongolo nakamlonjela, “Ago geng'ha ndagudita, ndite choni kahi?”
MAT 19:21 Yesu nakamlonjela, “Wone ulingugana ukangaliche, ulute ukaguze vinhu vya hegwe, uwape wazunwa sendi azo, na hegwe kowa na ng'hano kilanga, hamba uye umbinze.”
MAT 19:22 Ayo msongolo loyahuliche ago, nakaluta yawele na masinzo, mina nayali na lufufu lwinji.
MAT 19:23 Aho Yesu nakawalonjela walanguswa wa heye, “Ndanguwalonjelani ndikomya haiwa ubewe kwa yawele na lufufu kwinjila kuli undewa wa kilanga.
MAT 19:24 Kahi ndanguwalonjelani, yowa ubewe kwa ngamiya kukola kuli itubuli lya chihomo, kuleka kwa yawele na lufufu kwinjila kuli Undewa wa Nguluwi.”
MAT 19:25 Wala walanguswa lowahuliche ahyo wabubuwala ng'hatu, nawamuuza, “Lelo yalikohi yoloholigwa?”
MAT 19:26 Yesu kawalola, kalonga, “Kwa munhu mbuli ayi haiditikwa ne hado, ila kwa Nguluwi mbuli zeng'ha zoditikwa.”
MAT 19:27 Hamba Petili nakalonga, “Na hetwe ndaze? Tuleka geng'ha natukuwinza hegwe, lelo tokwambulila choni?”
MAT 19:28 Yesu nakamlonjela, “Ndanguwalonjelani ndikomya, Mwana wa Munhu lohochikala hali chigoda cha undewa cha ukulu wa heye kuli isi inyale, hemwe mumuwinzile mochikala hali vigoda vya undewa muwatagusa nhanzi kumi na mbili za Isilaeli.
MAT 19:29 Na chila munhu yalechile ng'handa ama wang'holoze ama lumbu ama mhaza ama mayake ama wana ama migunda, kwa mbuli ya heni, kobochela mala miya mzidi, na wowa na ukomu wa mazuwa gose ne kuduma.
MAT 19:30 Ila wawele wa mwaluko wowa wa mwiso, na wawele wa mwiso wowa wa mwaluko.
MAT 20:1 “Undewa wa kilanga ufanda kota ahi. Munhu yawele na mgunda wa zabibu, yedawile kuza pala wanhu wa kukola mijito kuli mgunda wa heye.
MAT 20:2 Kalongasa na hewo kowapa sendi denali imwe ya mijito ya zuwa imwe, hamba kawahilika kuli mgunda wa heye wa mizabibu.
MAT 20:3 Nakalawa kuli saa zidatu mitondo, kawona wanhu wanji wemile hali soko, walihela mijito ya kukola.
MAT 20:4 Kawalonjela, ‘Mlute na hemwe mkakole mijito kuli mgunda wa zabibu, nani ndowapa sendi ya mijito ya zuwa imwe kota wayenu.’
MAT 20:5 Baho waluta. Ayo yawele na mgunda kalawa kahi kuli saa sita na saa tisa, kadita hihyo.
MAT 20:6 Naloifichile kuli saa kumi na imwe matinazo, kalawa kahi, kawafika wanji wemile hahala hali soko. Baho, kawauza, ‘Ndaze mwimile hano nemisi yeng'ha mlihela mijito?’
MAT 20:7 Wamwidichila, ‘Kwa vila kuduhu munhu yatupele mijito.’ Na heye nakawalonjela, ‘Mlute namwe mkakole mijito kuli mgunda wa heni wa mizabibu.’
MAT 20:8 “Lokutitile, ayo yawele na mgunda wa zabibu nakamlonjela mlolela ng'hano wa heye, ‘Wacheme wakola mijito uwape sendi zawo, ukwaluchila wala woyile wa mwiso, na kusindila kwa wala watomile kuya.’
MAT 20:9 Lelo nawoya wala waluche mijito saa kumi na imwe, wabochela chila yumwe sendi denali imwe ya mijito ya zuwa imwe.
MAT 20:10 Wala waluche lowoyile, wali wochijesa wopegwa nyinji ng'hatu, ila na hewo wapegwa chila yumwe sendi denali imwe ya mijito ya zuwa imwe.
MAT 20:11 Wabochela sendi zawo, nakwaluka kumng'ung'utila yula mkulu.
MAT 20:12 Walonga, ‘Wanhu awa woya mwiso wakola mijito kwa saa imwe hela, ndaze kuwaditila twiwhana na hewo hanga hetwe twimilila mijito ng'hangala zuwa yeng'ha na isanya ling'ang'ale?’
MAT 20:13 “Aho yula mkulu kamwidichila yumwe wa hewo, ‘Wang'holozangu siwabunzile chinhu! Ndaze, hatulongane ndokupani sendi denali imwe ya mijito ya zuwa imwe?
MAT 20:14 Uhole chotulongane ulute. Ndangugana ndimpe na ayu wa mwiso iwhanile na hegwe.
MAT 20:15 Ndaze, haiwa goya heni kudita ndiviganile na sendi za heni? Ndaze, kwangona maya kwa vila vyondili na nhumbula inojile?’ ”
MAT 20:16 Yesu nakasinda kwa kulonga, “Ahyo, wawele wa mwiso wowa wa mwaluko na wa mwaluko sambi wowa wa mwiso.”
MAT 20:17 Yesu loyali yoluta Yelusalemu, nakawahola wala walanguswa kumi na weli honhu ha uyeka, na mnzila kawalonjela,
MAT 20:18 “Mhulichize!” “Twanguluta Yelusalemu, na ako Mwana wa Munhu kowichigwa mmoko mwa watambika wakulu na walangusa wa malajizo ga Musa, na hewo womtagusa kwa wihe yabagame.
MAT 20:19 Womuwika kwa wanhu hawawele Wayahudi leka wambeze, yasubuligwe ng'hobwa na kugazigwa na kumkopola kwa kumuwamba mumsalaba, ila zuwa lya kadatu kulawa yabagame kozilipuligwa.”
MAT 20:20 Aho mayawo wana wa Sebedayo nakamuyila Yesu hamwe na wanage, kafugama kumwando koyali na kumlanda chinhu.
MAT 20:21 Yesu kamuuza, “Kwangugana choni?” Ayo mamo nakamlonjela, “Ulonje kota kuli undewa wa hegwe, awa wana wa heni weli wochikala yumwe kudilo kwa hegwe na yumwe kumoso.”
MAT 20:22 Yesu nakamlonjela, “Hamvizelele mwangulanda choni! Ndaze, moweza kunwela chizombe cha kugazigwa chondinwela heni?” Wamwidichila, “Toweza.”
MAT 20:23 Yesu kawalonjela, “Mwangukomya monwela chizombe cha kugazigwa chondinwela heni, ila kikala kudilo ama kumoso kwa heni haiwele mbuli ya heni kudita, mbuli ayo Mhaza wa heni nakawahagula walinguganigwa kikala honhu hala na kahi nakawagongomanyila honhu kwa chiwalo cha hewo.”
MAT 20:24 Wala walanguswa wanji kumi lowahuliche ago, wawazudila awo wang'holozawo weli.
MAT 20:25 Ahyo Yesu nakawachema, kawalonjela, “Mvizela vilongozi wa isi zinji walongozaga wanhu wawo kwa lupichi, na wakulu awo wawemililaga wanhu wawo.
MAT 20:26 Ila kwa hemwe ileche kuwa ahyo, leka yalingugana yawe mkulu hali hemwe, yawe chitumagwa wa weng'ha,
MAT 20:27 na yalingugana yawe wa mwaluko hali hemwe, igana yawe chitumagwa wa hemwe.
MAT 20:28 Hihyo vyoiwele, Mwana wa Munhu hoyile kukolelwa mijito, ila kuwakolela mijito na kuulavya ukomu wa heni kwa ulohozi wa wanhu wenji.”
MAT 20:29 Yesu loyali yokuka kuli muji wa Yeliko, lung'hongola lwa wanhu nalumuwinza.
MAT 20:30 Lelo kwali na wohambe walole weli wekale hafungo mwa nzila, na lowahuliche kota Yesu yaliyokola aho, nawachemeleza, “Mkulu, Mwana wa Daudi, utonele isungu!”
MAT 20:31 Lula lung'hongola lwa wanhu luwang'anuchila na kuwalonjela wanyamalile. Ila hewo walutilila kuchemelela, “Mkulu, Mwana wa Daudi, utonele isungu!”
MAT 20:32 Yesu nakema, kawachema na kuwauza, “Mwangugana ndiwaditile choni?”
MAT 20:33 Nawamwidichila, “Mkulu, twangulanda meho ga hetwe gagubuligwe.”
MAT 20:34 Lelo Yesu kawonela isungu, kawadoliza meho gawo, na bahala waluka kulola goya, wamuwinza.
MAT 21:1 Yesu na walanguswa wa heye lowafichile behi na Yelusalemu wafichile Betifage kuli chidunda cha Mizeituni, nakawalajiza walanguswa wa heye weli,
MAT 21:2 nakawalonjela, “Mlute mbaka hali chijiji chiwele kumwando kwa hemwe molifika idogowi na mwana idogowi liwohigwe. Jichumuleni mujigale kwa heni.
MAT 21:3 Wone munhu yawauze chiwalo, mumlonjele ‘Mkulu kangujigana,’ Na heye kowalechelani baho.”
MAT 21:4 Mbuli ino na ikoleka leka gala galonjigwe na mloli wa Nguluwi genele,
MAT 21:5 “Muulonjele muji wa Siyoni, ulole, Mndewa wa hegwe kanguya! Kaliholile na kakwina idogowi, mwana wa idogowi.”
MAT 21:6 Ahyo, wala walanguswa nawadita kota Yesu vyoyawalajize.
MAT 21:7 Waligala lila idogowi na mwanage, watambalika nguwo za hewo mchanya hao na Yesu kekalisa mchanya mwake.
MAT 21:8 Lung'hongola lwa wanhu nawazanza nguwo zawo mbalabala, na wanji watema miputi ja migodi wanzanza mbalabala.
MAT 21:9 Lung'hongola lwa wanhu walongole na wala walingumuwinza wakwiniza lizi. “Lutogo kwa Mwana wa Daudi! Nguluwi yamtogole heye yalinguya kwa itagwa lya Mkulu! Lutogo kwa Nguluwi kuchanya!”
MAT 21:10 Yesu loyaliyokwinjila Yelusalemu, muji weng'ha naumema luchenze. Wanhu wali wouza, “Ayu ka whaani?”
MAT 21:11 Wanhu kuli lula lung'hongola lwa wanhu walonga, “Ayu ndo Yesu mloli wa Nguluwi, kangulawa Nasaleti isi ya Galilaya.”
MAT 21:12 Lelo Yesu nakenjila mli Ng'handa ya Nguluwi, kawawinga wanhu kunze wali woguza na kugula vinhu mgati mwa ng'handa ya Nguluwi. Kagudula visaga vya wala wali wovunza sendi, kagudula vigoda vya wala wali woguza ng'hunda.
MAT 21:13 Kawalonjela, “Yandichigwa kuli Maandiko Matakatifu, ‘Ng'handa ya heni yochemigwa ng'handa ya kulandila.’ Ila hemwe muigalula iwa mhalika ya wabokaji!”
MAT 21:14 Wawele hambe walole na waziliche ng'huli nawamlutila kuko kuli Ng'handa ya Nguluwi, na heye kawalohola.
MAT 21:15 Lelo watambika wakulu na walangusa wa malajizo ga Musa nawazudila lowawene vinduzanduza vyoyaditile Yesu, na kahi wana lowali wochemelela kuli Ng'handa ya Nguluwi wolonga, “Lutogo kwa Mwana wa Daudi.”
MAT 21:16 Ahyo wamlonjela, “Ndaze, hulinguhulika chowolonga?” Yesu nakawedichile, “Ena, ndanguhulika! Ndaze, hamnasoma Maandiko aga? “ ‘Kuwalangusa wana wadodo na wali chali wanguwa na lutogo ng'hatu.’ ”
MAT 21:17 Leka, kawaleka, kalawa kunze ya muji wa Betaniya, nakuwasa kuko.
MAT 21:18 Yesu loyali yohiluka kuli muji lokuwele kung'hali lufuku, nakona nzala.
MAT 21:19 Nakalyona igodi limwe lya misada hafungo mwa nzila, kalilutila, ila kalifika lilihela mafuza goneche leka mahamba yeka. Lelo kalilonjela, “Uleche kulela kahi mafuza mazuwa gose!” Baho alyo igodi lya misada naliswina.
MAT 21:20 Walanguswa lowawene wabubuwala wolonga, “Lekachoni igodi ali lya misada liswina baho du?”
MAT 21:21 Yesu nakawedichila, “Ndanguwalonjelani ndikomya, wone muwe na makundo ne kuwa na majesa, moweza kudita vyonditile kuli lila igodi lya misada, leka nawone mchilonjele chidunda chino, ‘Ung'humbuche ukagwe kuli bahali,’ Yokoleka hihyo.
MAT 21:22 Na muwe na makundo, choneche chomumlanda Nguluwi mopegwa.”
MAT 21:23 Yesu nakenjila mli Ng'handa ya Nguluwi, kawa yolangusa. Loyali yolangusa, watambika wakulu na wasekelu wa wanhu wamuuza, “Kwangudita mbuli zino kwa ludali lwachi? Yalikohi yakupele ludali luno?”
MAT 21:24 Yesu kawedichila, “Na heni ndowauzani chinhu chimwe, lomkwidichila, leka nani ndowalonjelani ndangudita mbuli azi kwa ludali lwachi.
MAT 21:25 Ndanguwauza mndonjele, ndaze, ludali lwa Yohani lwa kubatiza nalulawa kwa whaani? Ndaze, nalulawa kwa Nguluwi ama kwa wanhu?” Ila naweuza hewo kwa hewo hino, “Hotulonga, ‘Naulawa kilanga, kotuuza, Lelo lekachoni hamumkundile?’
MAT 21:26 Ila hotulonga, ‘Nalulawa kwa wanhu,’ Twangudumba wanhu wamemile mina hewo weng'ha wangukunda kota Yohani ndo mloli wa Nguluwi.”
MAT 21:27 Lelo nawamwidichila, “Hatuvizelele!” Na heye Yesu nakawalonjela, “Na heni kahi siwalonjela ndangudita mbuli zino kwa ludali lwachi.
MAT 21:28 “Hemwe mwangijesa ndaze kwa mbuli ayi, kwali na munhu yumwe nayali na wana weli. Nakamlonjela yula wa mwaluko, ‘Mwanangu, lehano ulute ukadite mijito kuli mgunda wa zabibu.’
MAT 21:29 Yula msongolo nakamlonjela, ‘Ndema!’ Hamba kagalusa kaluta kumgunda.
MAT 21:30 Yula mhaza nakamlonjela mwana wa keli hiho, na heye kedichila, ‘Ena mhaza ndoluta!’ Ila halutile kukola mijito.
MAT 21:31 Ndaze, yalikohi kuli awa weli yaditile kota vyoyaganile mhaza wa heye?” Wamwidichila, “Ayula wa mwaluko.” Lelo Yesu kawalonjela, “Ndanguwalonjelani ndikomya, wakongoza sendi na wahonzolomo wokwinjila kuli Undewa wa Nguluwi kusinda hemwe.
MAT 21:32 Yohani na koya kwa hemwe kawalajila nzila inojile ya ukomu, na hemwe hamumkundile, ila wakongoza sendi na wahonzolomo nawamkunda. Nahomuwene ago geng'ha hemwe mlema ne kumfugamila na kumkunda.”
MAT 21:33 Yesu kalonga, “Hulichizeni nhelo yinji. Munhu yumwe yawele na ng'handa nakalima mgunda wa zabibu, nakazungulusila lugagala, kabawa ideho lya kukamila divai, kazenga mumo mnala kahi. Hamba nakawabasila walimi, heye koka nakaheluka isi ya kutali.
MAT 21:34 Mhela wa kubeta loufichile, nakawalajiza vitumagwa kwa wala wanhu wakahole chasi cha mbena ya heye.
MAT 21:35 Wala wanhu wawebata awo vitumagwa, yumwe wamsubula, yunji wamkopola na yunji wamtowa na maganga.
MAT 21:36 Ayo munhu nakawalajiza vitumagwa wanji, wenji kupuluta wala wa mwaluko. Wala wanhu wawaditila hihila.
MAT 21:37 Vyokudumile kamlajiza mwanagme aku yochijesa, ‘Womhulichiza mwana wa heni.’
MAT 21:38 Ila wala wanhu lowamuwene mwanage walonga hewo kwa hewo, ‘Ayu ndo yohalila, tumkopole leka tuhole uhalizi wa heye!’
MAT 21:39 Leka, wamibata, wamlavya kunze ya ula mgunda wa zabibu, wamkopola.
MAT 21:40 “Yesu nakawauza lelo, ayo yawele na mgunda wa zabibu loyokuya, kowadita ndaze awo wanhu?”
MAT 21:41 Hewo wamwidichila, “Kowabagamiza vibi awo wehile,” “Na ula mgunda wa zabibu kowapa walimi wanji wowa wompa chasi cha mbena mhela wake.”
MAT 21:42 Aho Yesu kawalonjela, “Ndaze, hamsomile mbuli ino kuli Maandiko Matakatifu? “ ‘Iganga lya kuzenjela walilemile walinguzenga, sambi liwa iganga likulu lya msisi. Mkulu ndo yaditile mbuli ayi, nayo ndo ya kububuwaza ng'hatu kwa hetwe!’
MAT 21:43 “Yesu nakonjezela kulonga,” Ahyo ndanguwalonjelani, “Undewa wa Nguluwi wokusigwa kwa hemwe na kupegwa wanhu hawawele Wayahudi walingulavya mafuza ganojile.
MAT 21:44 Yoneche yogwa mchanya mwa iganga alyo kobeneka pasapasa, na wone iganga limgwile munhu yoneche, lyomhondanga.”
MAT 21:45 Watambika wakulu na Mafalisayo lowahuliche azo nhelo za heye kanguwalonga hewo.
MAT 21:46 Lelo wali wopala chinhu cha kumibata, ila nawaliwodumba wanhu kwa vila hewo nawavizela heye Yesu nayali mloli wa Nguluwi.
MAT 22:1 Yesu nakalonga nawo kahi kwa nhelo,
MAT 22:2 “Undewa wa kilanga wiwhana kota hino, kwali na mndewa yamditichile mwanage mnvina ya kuhesa.
MAT 22:3 Lelo kawalajiza vitumagwa wawacheme walalikwe woye kuli mnvina, ila wala walalikwe walema kuya.
MAT 22:4 Kawalajiza kahi vitumagwa wanji, yolonga, ‘Muwalonjele wala walalikwe, ndiya ya heni ya goya sambi, isenga lya heni na ilogota lihatile wachinjigwa, chila chinhu cha goya, muye kuli izenjele.’
MAT 22:5 Ila hewo hawang'ulile, waluta, yumwe kumgunda kwa heye, yunji kuli mbuli za heye,
MAT 22:6 na wanji wawebata awala vitumagwa wawaliga na kuwakopola.
MAT 22:7 Yula mndewa nakazudila, kawalajiza wamizi wa heye wakawabagamize awo wakopolaji na kuwasomela luga lwao.
MAT 22:8 Hamba kawalonjela vitumagwa wa heye, ‘Ndiya ya izenjele ya goya ng'hatu, ila walalikwe wachakachaka.
MAT 22:9 Lelo mlute kuli nzila mhanda na woneche wala womuwafika wachemeni woye kuli izenjele.’
MAT 22:10 Wala vitumagwa walawa, waluta kunzila wawegala wanhu weng'ha, wehile na wanojile. Ng'handa ya izenjele na imema wajenzi.
MAT 22:11 “Mndewa loyenjile kawona wajenzi, kamona munhu yumwe yawele havalile nguo za mnvina.
MAT 22:12 Mndewa kamuuza, ‘Mng'holozangu, kwinjila ndaze hano houvalile ivalo lya mnvina?’ Ila heye nakanyamalila tulu.
MAT 22:13 Aho mndewa kawalonjela vitumagwa, ‘Muwopeni magulu na moko mkamtaje kunze kuli kutitu, ako kolila na kujejeda mizino.’ ”
MAT 22:14 Yesu nakasinda kwa kulonga, “Walalikwa wenji, ila wahaguligwe wachefu.”
MAT 22:15 Hamba, Mafalisayo waluta, welonjelela nzila ya kumgwiliza Yesu kwa ulonzi wa heye.
MAT 22:16 Lelo wawalajiza vitumagwa wa hewo hamwe na walanguswa wa chilundo cha Helodi. Nawamuuza, “Mlangusa, tuvizela kota hegwe kwa munhu wakitumbila, na kota kwa kulangusa nzila ya Nguluwi kwa kukomya ng'hatu, hulingumdumba munhu yoneche, mina ukulu wa munhu hauwele chinhu kwa hegwe.
MAT 22:17 Lelo tulonjele majesa ga hegwe. Ndaze, iwa goya ama hebu kulavya kodi kwa mndewa wa Loma?”
MAT 22:18 Ila Yesu nakavizela wihe wa hewo wowalingijesa nakuwalonjela, “Hemwe wahadi lekachoni mwangunjeza?
MAT 22:19 Mndajile sendi yomlingulavila kodi.” Na hewo wamlavila igwala lya sendi.
MAT 22:20 Lelo Yesu nakawauza, “Mutwi na itagwa ali ndo lya whaani?”
MAT 22:21 Nawamwidichila, “Ndo cha mndewa wa Loma.” Aho Yesu kawalonjela, “Lelo ga mndewa wa Loma mmigalile mndewa wa Loma na ga Nguluwi mmigalile Nguluwi.”
MAT 22:22 Lowahuliche ahyo nawabubuwala wamleka, woka.
MAT 22:23 Zuwa alyo, wamwe wa Masadukayo nawawele wolonga wabagame hawozilipuka nawamlutila Yesu.
MAT 22:24 Lelo nawamlonjela, “Mlangusa, Musa nakalonga munhu yaholile mdala wone yabagame ne kulela mwana, imgana mng'holoze, yamhole yula mdala mlekwa, leka yamlelele wana mng'holoze.
MAT 22:25 Lelo aha hetu kwali na wanhu saba wa lulelo lumwe. Wa mwaluko nakabagama ne kulela mwana, ayula mdala mlekwa nakaholeka kahi na mng'holoze.
MAT 22:26 Iwa hihyo kwa wakeli na wakadatu, mbaka weng'ha saba.
MAT 22:27 Awo weng'ha lowabagame, na yula mdala nakabagama.
MAT 22:28 Lelo zuwa lya wabagame kuzilipuka mdala ayo kowa mdala wa yalikohi kwa wala walume saba? Mina weng'ha saba namhola yuye.”
MAT 22:29 Yesu nakawedichila, “Hemwe muwifya kwa vila hamgazelele Maandiko Matakatifu ne mong'ho wa Nguluwi.
MAT 22:30 Mina wabagame howozilipuka hawohesa ne kuhesigwa hebu, wowa kota wahilisi wa kilanga.
MAT 22:31 Ila kwa mbuli ya kuzilipuka kwa wabagame, ndaze, hamsomile gala goyawalonjele Nguluwi? Nakawalonjela,
MAT 22:32 ‘Heni nda Nguluwi wa Abulahamu na wa Isaka na wa Yakubu!’ Lelo heye hawele Nguluwi wa wabagame ila ndo Nguluwi wa wawele wakomu.”
MAT 22:33 Lula lung'hongola lwa wanhu loluhuliche ahyo, lububuwala kwa ulanguso wa heye.
MAT 22:34 Masadukayo lowahuliche kota Mafalisayo wahela chinhu chinji cha kumuuza kahi Yesu, nawating'hana hamwe.
MAT 22:35 Yumwe wa hewo, mtagusa, nakamuuza Yesu kwa kumjeza,
MAT 22:36 “Mlangusa, malajizo galikohi ndo gawele makulu kuli utaguso?”
MAT 22:37 Yesu nakamwidichila, “ ‘Umgane Mkulu Nguluwi wa hegwe kwa nhumbula ya hegwe yeng'ha na kwa muhe wa hegwe weng'ha na kwa luhala lwa hegwe lweng'ha.’
MAT 22:38 Ali ndo ilajizo liwele likulu na lya mwaluko.
MAT 22:39 Lya keli iwhana na lilyo, ‘Umgane youlingikalasa habehi kota vyoulingigana gwegwe baho.’
MAT 22:40 Malajizo ga Musa gandichigwe na waloli wa Nguluwi gangitumbila mizilo aji mili.”
MAT 22:41 Mafalisayo lowating'hane hamwe, Yesu nakawauza,
MAT 22:42 “Hemwe mwangona ndaze mbuli ya Kilistu Mlohozi? Ka mwana wa whaani?” Wamwidichila, “Mwana Daudi.”
MAT 22:43 Yesu kawalojela, “Lelo iwa ndaze,” “Kota kwa ludali lwa Muhe Yelile Daudi kangumchema heye ‘Mkulu’? Mina nakalonga,
MAT 22:44 “ ‘Mkulu nakamlonjela Mkulu wa heni, wikale nzingo ya kudilo kwa heni, mbaka ndiwawiche wang'honyo wa hegwe hasi ha magulu ga hegwe.’
MAT 22:45 Lelo wone Daudi kangumchema Kilistu ‘Mkulu,’ iwa ndaze yawe mwana wa heye?”
MAT 22:46 Kuduhu munhu yoneche yajezile kumwidichila chinhu. Na kulawa zuwa lila kuduhu ne munhu kahi yajezile kumuuza chinhu.
MAT 23:1 Hamba Yesu kawalonjela wanhu wamemile hamwe na walanguswa wa heye, Nakalonga.
MAT 23:2 Nakawalonjela, Walangusa wa malajizo ga Musa na Mafalisayo wana ludali lwa kutang'hula malajizo.
MAT 23:3 Lelo mibatilile na kudita choneche chowowalonjelani. Ila mleche kuwinza chowodita, mina hawalingudita gala gowalingudamla kwa wanhu.
MAT 23:4 Wawohaga mifulusi na kuwapapiza wayawo mmayega, ila hewo wawo wangulema kugolola ne chidole wapape.
MAT 23:5 Hewo huditaga madito gawo leka wanhu wawone. Mlole ukulu wa vibende vilingulajila Malajizo mchihanga na mmoko na mlole kugonzoka kwa lupembo lwa utabuli wa mikoti jawo.
MAT 23:6 Huganaga kikala honhu hatanganiche kuli mnvina na vigoda vitanganiche kuli ng'handa za kusalila.
MAT 23:7 Waganaga kulamsigwa kwa kutogoligwa kuli masoko na wogana kuchemigwa na wanhu, “Mlangusa.”
MAT 23:8 Ila hemwe mleche chemigwa ng'oo “Mlangusa,” mina mlangusa wa hemwe ndo yumwe hela, hemwe mweng'ha mwa lukolo lumwe.
MAT 23:9 Namleche kumchema munhu yoneche “Mhaza,” Hano hali isi, mina Mhaza wa hemwe ndo yumwe hela, yawele kilanga.
MAT 23:10 Namleche kuchemigwa, “Vilongozi,” Mina mlongozi wa hemwe ndo yumwe hela, yuye Kilistu Mlohozi.
MAT 23:11 Yawele mng'hangala hali hemwe yawe chitumagwa wa hemwe.
MAT 23:12 Yochikwiniza koduliswa, na yoneche yawele liholile kokwinizwa.
MAT 23:13 “Mochona mwemwe walangusa wa malajizo ga Musa na Mafalisayo, mwawahadi! Mwanguhinda lwizi lwa undewa wa kilanga hali meho ga wanhu. Hemwe mwemwe hamlingwinjila mng'handa, na mwanguwalemeza wanji walingugana kwinjila wenjile.
MAT 23:14 Mochona mwemwe walangusa wa malajizo na Mafalisayo, mwawahadi! Mwanguwabunza na kwa usugu mwanguwasukula walekwa ng'handa za hewo na kisinjizila kota mwa wanhu wanojile kwa kulanda kwa kulutilila. Lelo kwa mbuli ahyo mogazigwa lukami.
MAT 23:15 “Mochona mwemwe walangusa wa malajizo ga Musa na Mafalisayo, mwawahadi! Mwanguheluka kuli bahali na isi zinji leka muwe munhu yumwe yawinze dini ya hemwe. Homuwa na heye, mwangumdita yalute kuli chiluli cha Jehanamu kusinda hila vyoyawele.
MAT 23:16 “Mochona mwemwe vilongozi hambe mlole! Hemwe mwangulangusa, ‘Wone munhu yochilaha kwa Ng'handa ya Nguluwi, kilaha ako hakuwele chinhu, ila one yelahe kwa zahabu ya Ng'handa ya Nguluwi, kilaha ako kwangumibata.’
MAT 23:17 Hemwe hambe mlole wapoka! Chakohi chitanganiche ng'hatu? Dhahabu ama Ng'handa ya Nguluwi lilinguidita ayo dhahabu iwe yelile?
MAT 23:18 Kahi mwangulonga kuta one munhu yelahe kwa honhu ha kulavila nhambiko haiwele chinhu, ila one yelahe kuli nhambiko iwichigwe hachanya ha alitale, kilaha ako humbataga.
MAT 23:19 Hemwe mohambe mlole! Chakohi chiwele chitanganiche ng'hatu, aila nhambiko, ama hala hali honhu ha kulavila nhambiko ndo halinguidita ayo nhambiko iwe yelile?
MAT 23:20 Munhu yalingilaha kwa hala honhu helile kelaha kwa hala kuli honhu ha kulavila nhambiko, na choneche chiwichigwe hachanya hake.
MAT 23:21 Na yalingilaha kwa Ng'handa ya Nguluwi kelaha kwa ayo Ng'handa ya Nguluwi na kahi kwa yula Nguluwi yekale mgati.
MAT 23:22 Na yalingilaha kwa kilanga kelaha kwa chigoda cha undewa cha Nguluwi, na kwa heye Nguluwi yalingikala mchigoda acho.
MAT 23:23 Mochona mwemwe walangusa wa malajizo ga Musa na Mafalisayo, wahadi! Mwangulavya kwa Nguluwi chinhu chimwe kulawa kuli vinhu kumi na tangawizi kota vila mahamba galingununyilila, binzali na jila na aku mleka vinhu vitanganiche kuli Malajizo ga Musa kota vila mbuli zilingutagusa goya na isungu na makundo. Ahi ndo vyomlinguganigwa kudita ne kusemwa zila zinji.
MAT 23:24 Vilongozi wohambe mlole! Mwangusa chinhu chidodo kota ng'honzi kuli vyakunwa, ila mwangumela chinhu chikulu kota isenga.
MAT 23:25 “Mochona mwemwe walangusa wa malajizo ga Musa na Mafalisayo, wahadi! Mwanguhovuga chizombe na chisaye kwa kunze, ila mgati mwanguleka chimemile ubuhu vinhu vihile vya ubochelezi.
MAT 23:26 Mfalisayo yohambe ulole! Uhovuje chizombe mgati tandi na kunze kowa kuzelu hihyo.
MAT 23:27 “Mochona mwemwe walangusa wa malajizo ga Musa na Mafalisayo, wahadi! Mfanda kota vilaga. Mwangubakaliza lung'halilo luzelu kwa kunze gangoneka gangung'ala, ila kwa mgati gamemile mizeje ja wabagame na chila chinhu chihile.
MAT 23:28 Vivila kahi na hemwe mwangoneka na wanhu kwa kunze kota mtanganika, ila kwa mgati mmemile uhadi na wihe.
MAT 23:29 “Mochona mwemwe walangusa wa malajizo ga Musa na Mafalisayo, wahadi! Mwanguzenga vilaga vya waloli na kung'haliza vilaga vya wanhu watanganiche.
MAT 23:30 Mwangulonga, ‘Kota hetwe natwalingikala mhela wa wasekulu wa hetwe twangihanza na hewo kuli mbuli ya kuwakopola waloli.’
MAT 23:31 Hambi mwangulavya ulolezi mwemwe baho kota hemwe mwa wana wa wanhu wawakopole waloli.
MAT 23:32 Ena, mgongomanye jila mijito jowaluche wasekulu wa hemwe.
MAT 23:33 Hemwe lulelo lwa mizoka jiwele na dunga! Mouhusa ndaze utaguso wa chiluli cha Jehanamu.
MAT 23:34 Ndo mina heni ndanguwahilichila hemwe waloli, wanhu wawele na luhala na walangusa wa malajizo ga Musa, mowakopola na kuwagaza wamwe wa hewo, na wanji mowasubula ng'hobwa kuli ng'handa za kusalila na kuwapala kuli chila honhu.
MAT 23:35 Hino nongwa yeng'ha yokuyilani kwa mbuli ya danda yeng'ha ya wanhu watanganiche iboholigwe mchanya mwa isi. Ena, kulawa kukopoligwa kwa Abeli nayali hela nongwa mbaka kukopoligwa kwa Sakaliya, mwana wa Balakia, yula mumkopole kuli Ng'handa ya Nguluwi hala honhu helile na honhu ha kulavila nhambiko.
MAT 23:36 Ndanguwalonjelani ndikomya, lulelo alu logazigwa kwa mbuli ino ya kukopola.
MAT 23:37 “Yelusalemu! Gwa Yelusalemu! Kwanguwakopola waloli na kuwatowa kwa maganga wala watumigwe kwa hegwe. Lwa kalinga njeza kuwakungajiza wana wa hegwe kwa heni kota vila ng'huku vyoilingukungajiza vinziya vya heye hasi hali mbawa za heye, ila hegwe nahuviganile!
MAT 23:38 Hambi lelo, ng'handa ya hegwe yolekwa chihame.
MAT 23:39 Ndanguwalonjelani, humbona kahi mbaka mhela houlonga, ‘Yatambichizwe ayo yalinguya kwa itagwa lya Mkulu.’ ”
MAT 24:1 Yesu nakalawa kuli Ng'handa ya Nguluwi, naloyali yoluta, walanguswa wa heye nawamlutila, wamlajila vyoizenjigwe goya Ng'handa ya Nguluwi.
MAT 24:2 Yesu kawalonjela, “Ena, moweza kugalola aga geng'ha! Ndanguwalonjelani ndikomya, kuduhu ne iganga limwe lipona aho mchanya mwa liyage, chila chinhu chowifigwa.”
MAT 24:3 Yesu loyali yekale mchanya mwa chidunda cha Mzeituni, walanguswa nawamlutila chinyele hafungo, nawamuuza, “Utulonjele mbuli azi zolawila hanili? Chilajilo chachi chitulajila kuya kwa hegwe na kuduma kwa mhela?”
MAT 24:4 Yesu kawedichila, “Milolele mleche kuhadigwa na munhu.
MAT 24:5 Mina wenji wolawila wolonga chila yumwe kota, ‘Heni ndo Kilistu Mlohozi’ Na hewo wowajiliza wanhu wenji.
MAT 24:6 Mohulika mbuli ya ngondo na uhesi wa ngondo, ila mleche kisinza, mina ago gokuya kulawila, ila kuduma kung'hali.
MAT 24:7 Isi imwe yochitowa na isi iyage, undewa umwe wochitowa na undewa uyage. Ahano na ahala howa na nzala na jimachinyina.
MAT 24:8 Geng'ha ago ndo kota mwaluko wa usungu wa kulela mwana.
MAT 24:9 “Hamba wowalavya leka mgazigwe na kukopoligwa. Isi zeng'ha zowazudilani kwa mbuli ya itagwa lya heni.
MAT 24:10 Kahi, wenji woleka makundo ga hewo, wochibagula na kizudila.
MAT 24:11 Wolawila waloli wenji wa udesi wowajiliza wanhu wenji.
MAT 24:12 Kwa mbuli ya konjezeka kwa wehile, igano lya munhu lyotita.
MAT 24:13 Ila munhu yula yokwimilila mbaka kuduma ndo heye yoloholigwa.
MAT 24:14 Leka, kuduma hakunafika, Mbuli Inojile ya Undewa wa Nguluwi yodamligwa kota ulolezi kwa isi zeng'ha.
MAT 24:15 “Lelo lomkona ‘Izudizo lilinguwifya Ng'handa ya Nguluwi,’ Lilonjigwe na mloli wa Nguluwi Danyeli lima honhu Helile, yalingusoma yavizele vyoili.”
MAT 24:16 Aho, wawele Yudeya na wabilimile kuchidunda.
MAT 24:17 Yawele kuchanya mwa chinduwiko cha ng'handa ya heye, yaleche kidulika kuhola chinhu mng'handa.
MAT 24:18 Yawele kumgunda yaleche kuhiluka kumbele kuhola nguwo ya heye.
MAT 24:19 Wochona wawo wamama wawele na himila na walingonyeza zuwa azo!
MAT 24:20 Mumlande Nguluwi leka kubilima kwa hemwe kuleche kuwa mhela wa mbeho ama Zuwa lya Kwesela!
MAT 24:21 Mina mhela awo kowa na kugaya ng'hatu kohakunalawila kuli mwaluko wa isi mbaka lehano, na hailawila kahi.
MAT 24:22 Wone zuwa azo naziwe hazipunguzigwe, kuduhu munhu ne yumwe yahawele yoloholigwa, ila zuwa azo zipunguzigwa na Nguluwi kwa mbuli ya wala wahaguligwe.
MAT 24:23 “Lelo munhu yowalonjelani mazuwa ago, ‘Mlole Kilistu Mlohozi kahano’ Ama ‘Ka ahala,’ mleche kukunda.
MAT 24:24 Mina wokuya Kilistu wa udesi na waloli wa udesi. Wodita ulajilo ukulu na vinduzanduza leka wojeza kuwajiliza wala wahaguligwe na Nguluwi.
MAT 24:25 Mhulichize, mina nandiwalonjela mhela haunafika.
MAT 24:26 Lelo howowalonjelani, ‘Mlole, ka kugunuche,’ Mleche kuluta ako, ama, ‘Mlole, kevisa mng'handa,’ Mleche kunda.
MAT 24:27 Mina kota vila lumwemwesa lwa limlungu kulawa kolilawilaga isanya mbaka kolizibilaga isanya, ahyo ndo vyoiwa kuya kwa Mwana wa Munhu.
MAT 24:28 Ahala hohawele mtufi, ndo hojimema mikungule.
MAT 24:29 “Hala hokumala kugaya ako, isanya lowichigwa jiza na nyelezi halibunguzuka. Nhondwe zolagala kulawa kilanga na mong'ho ubatilile vinhu avyo vyeng'ha wotigaswa.
MAT 24:30 Hamba, ulajilo wa Mwana wa Munhu wokoneka kilanga, na aho nhanzi zeng'ha muisi zodama, womona Mwana wa Munhu yokuya ha ng'hungugu ya kilanga yawele na ludali na ukulu lwinji.
MAT 24:31 Na heye kowalajiza wahilisi wa kilanga wa heye wawele na mhalamhanda ilinguyowa ng'hatu, na hewo wowakungajiza wahaguligwe wa heye kuli nzingo zeng'ha zine, kulawila kilanga kweng'ha.
MAT 24:32 “Kwa ikuyu milanguse nhelo ayi, hala nhagala lozikwaluka kutitima na kubahula, mwanguvizela kota mhela wa nhonya wa habehi.
MAT 24:33 Hihyo du hemwe homkona mbuli zino zeng'ha ziditikwa, mvizele kota Mwana wa Munhu kahabehi kuya.
MAT 24:34 Ndanguwalonjelani ndikomya, lulelo alu halubagama vinhu avi vyeng'ha havinalawila.
MAT 24:35 Ulanga na isi zopuluta, ila ulonzi wa heni haupuluta hebu.
MAT 24:36 “Ila, kwa mbuli ya zuwa ama saa ayo, kuduhu munhu yavizelele yokuya hanili, ne wahilisi wa kilanga, ne Mwana. Mhaza yaliyeng'ha ndo yavizelele.
MAT 24:37 Kota hila vyonaiwele mhela wa Nuhu, ndo vyoiwa kuya kwa Mwana wa Munhu.
MAT 24:38 Mina mhela awo, mazi tendema nalogang'hali lawila, wanhu wali wolya na kunwa, wohola na kuholeka, mbaka Nuhu loyenjile mgati mwa itumbwi ling'hangala.
MAT 24:39 Nahawavizelele kwali na choni mbaka gala mazi tendema logalawile, gawabagamiza weng'ha. Ndo vyoiwa mhela Mwana wa Munhu hoyokuya.
MAT 24:40 Mhela awo wanhu weli wowa kumgunda, yumwe koholigwa na yumwe kolechigwa.
MAT 24:41 Wadala weli wowa wobalasa sokolo, yumwe koholigwa na yumwe kulechigwa.
MAT 24:42 “Lelo mikale meho, kwa vila hamvizelele zuwa hoyokuya Mkulu wa hemwe.
MAT 24:43 Mvizele hino, wone yawele na ng'handa nayavizele mhizi hoyokuya yahawele meho, nahalileka ng'handa ya heye ibenigwe.
MAT 24:44 Leka ahyo, mwime goya, kwa vila Mwana wa Munhu kokuya saa yohamuizelele.”
MAT 24:45 Yesu kalutilila kulonga, “Yalikohi lelo chitumagwa wa kitumbila na yawele na luhala, wone mkulu wa heye yamuwiche hachanya ha wanhu weng'ha, yawape chilyo kwa mhela wuwula?
MAT 24:46 Kobweda yula chitumagwa wone mkulu wa heye loyohiluka komfika yodita ahyo.
MAT 24:47 Ndanguwalonjelani ndikomya, komuwika chitumagwa ayo yalolelaje lufufu lwa heye lweng'ha.
MAT 24:48 Ila wone chitumagwa yehile yelonjele mnhumbula, ‘Mkulu wa heni kakawa kuhiluka,’
MAT 24:49 Hamba nakwaluka kuwatowa vitumagwa wayage, nakwaluka kulya na kunwa hamwe na walingugala,
MAT 24:50 mkulu wa heye mpogozi kokuya zuwa lohalizelele na saa yohaizelele.
MAT 24:51 Komgaza vibi na kumuwika mchilundo chimwe na wadesi. Ako kowa na chililo na kujejeda mizino.
MAT 25:1 “Mhela awo, undewa wa kilanga ufanda kota wahinza kumi waholile vyenje vya hewo, waluta kumbochela mkasano.
MAT 25:2 Wahano wa hewo wali wapoka na wahano wanji wali na luhala.
MAT 25:3 Wala wapoka nawahola chenje za hewo, ila hawaholile na mafuta ga kuwesela.
MAT 25:4 Ila wala wawele na luhala nawahola mibuli ja mafuta gawo hamwe na chenje za hewo.
MAT 25:5 Kwa vila mkasano na kakawila kuya, wala wahinza weng'ha nawasinzila, wawasa.
MAT 25:6 Hagati ha nechilo kwali na iyowe, ‘Mwela yoo, Mkasano kanguya mlute kumbochela.’
MAT 25:7 Aho wala wahinza weng'ha walilimka, waviwika goya vyenje vya hewo.
MAT 25:8 Wala wapoka wawalonjela wala wawele na luhala, ‘Mtujidile mafuta mado ga hemwe mina vyenje vya hetwe vyanguzima.’
MAT 25:9 Ila wala nawawele na luhala wawalonjela, ‘Hogotukwila hebu hetwe na hemwe! Igana mlute kowalinguguza mkegulile mwemwe!’
MAT 25:10 Lelo wala wahinza wapoka lowalutile kugula mafuta, mkasano nakafika. Wala wahinza nawawele goya wenjila hamwe na heye mli ng'handa ya mkasano, hamba lwizi luhindigwa.
MAT 25:11 Hamba wala wahinza wanji nawoya, wachema, ‘Mkulu, mkulu, tuchumulile!’
MAT 25:12 Ila heye kawedichila, ‘Ndanguwalonjela ndikomya, siwazelele hemwe.’ ”
MAT 25:13 Hamba Yesu nakasinda kwa kulonga, “Lelo mikale meho, kwa vila hamzelele zuwa ne saa.
MAT 25:14 “Mhela awo Undewa wa Nguluwi wowa kota munhu yumwe yalingwinula majendo kuluta honhu hamwambu, nakawachema vitumagwa wa heye, walolele lufufu lwake.
MAT 25:15 Nakampa chila yumwe kota mong'ho wa heye vyouwele, yumwe kampa sendi mihako jihano, yunji mihako mili ja sendi na miyage mhako umwe wa sendi, hamba koka.
MAT 25:16 Lelo yula yapegwe sendi mihako jihano kakola mijito najo kawa na chonjezeche mihako jihano jiyage.
MAT 25:17 Vivyo na yula yapegwe mihako mili, kazidita zonjezeka mihako mili jiyage.
MAT 25:18 Ila yula yapegwe mhako umwe, kaluta kabawa hasi, kaivisa ula mhako wa sendi za mkulu wa heye.
MAT 25:19 “Mhela loupulute, yula mkulu nakahiluka, nakaluka kukagula hisabu ya zowapatile na kutumiya sendi za heye.
MAT 25:20 Chitumagwa yapegwe migwala jihano nakoya yaholile migwala jihano jonjezeche, nakamlonjela, ‘Mkulu, nakunipa migwala jihano, hano hana migwala jihano jiyage jonjezeche jomhatile.’
MAT 25:21 Mkulu wa heye nakamlonjela, ‘Goya, chitumagwa unojile na wakitumbila. Kunoga kuli mbuli ndodo, ndokudita uwe mlolezi wa mbuli zitanganiche. Uye usangalale hamwe na mkulu wa hegwe.’
MAT 25:22 “Chitumagwa yapegwe migwala mili ja sendi nakoya, kalonga, ‘Mkulu, nakunipa migwala mili. Uhole migwala mili jiyage zonjezeche zomhatile.’
MAT 25:23 Mkulu wa heye nakamlonjela, ‘Goya, chitumagwa unojile na wakitumbila. Kuwa wakitumbila kwa mbuli ndodo, ndokudita uwe utanganiche mbuli zitanganiche. Uye usangalale hamwe na mkulu wa hegwe.’
MAT 25:24 “Ila yula yapegwe sendi igwala limwe nakoya, kalonga, ‘Mkulu, ndivizela hegwe kwa munhu yang'ang'ale, hegwe kubetaga hala hounyalile, na kukungajiza hala hosanzanze.
MAT 25:25 Nandumba, nandilivisa igwala lya hegwe hasi. Uhole lelo igwala lya hegwe.’
MAT 25:26 “Mkulu wa heye nakamlonjela, ‘Hegwe kwa chitumagwa wihile na mgata! Kuvizela kota heni sibetaga hala hosinyalile, na kukungajiza hawele hosanzanze.
MAT 25:27 Naikugana lelo, kuuwika mhako wa sendi ya heni hali hazina, na heni ndaholile mhako wa sendi wa heni na zila zonjezeche!
MAT 25:28 Lelo msukuleni ayo mhako wa sendi namkampe yula yawele na mihako kumi.
MAT 25:29 Mina, yawele na chinhu kopegwa na konjezelwa. Ila yula yawele hela chinhu, na chila chidodo choyawele nacho choholigwa.
MAT 25:30 Na kwa mbuli ya ayu chitumagwa yawele hatanganiche, mlavyeni kunze kuli jiza! Ako kowa na chililo na kujejeda mizino.’
MAT 25:31 “Mhela Mwana wa munhu yawele Mndewa loyokuya kuli ukulu wa heye na wahilisi wa kilanga weng'ha hamwe na heye, aho kochikala mchanya mwa chigoda cha heye cha undewa chiukulu.
MAT 25:32 Isi zeng'ha zoting'hanika kumwando kwa heye, na heye kowabagula kota vila mdimi yalingubagula ming'holo na mhene.
MAT 25:33 Kowawika wanhu walingudita yaviganile Nguluwi nzingo ya kudilo kwa heye na wanhu wehile kowawika nzingo ya kumoso kwa heye.
MAT 25:34 “Hamba Mndewa kowalonjela wala wawele nzingo ya heye kudilo, ‘Muye hemwe mtambichizwe na Mhaza wa heni, bocheleni undewa muwichilwe kulawila kulumbigwa kwa isi.
MAT 25:35 Mina ndali na nzala, hemwe mingalila chilyo, ndali na ng'halu, hemwe mingalila mazi, ndali mjenzi hemwe mmbochela,
MAT 25:36 ndali mwazi, mnvaliza, ndali mtamwa, hemwe muya kundola, ndali mchinweng'ho hemwe muya kunjendela.’
MAT 25:37 Aho, awo wanhu watanganiche womwidichila mndewa ‘Mkulu, hanili natukona uwele na nzala na hetwe tukigalila chilyo, ama uwele na ng'halu na hetwe tukigalila mazi?
MAT 25:38 Hanili natukona uwele mjenzi na hetwe tukubochela hakaye hetu, ama ulihela nguwo na hetwe tukuvaliza?
MAT 25:39 Hanili natukona uwele mtamwa ama uwele mchinweng'ho na hetwe tuya kukujendela?’
MAT 25:40 Mndewa kowedichila, ‘Ndanguwalonjelani ndikomya, chila chinhu chomumditile yumwe wa awa wang'holozangu wadodo, mnditila heni.’
MAT 25:41 “Hamba kowalonjela wala wehile wawele nzingo ya kumoso kwa heye, ‘Ucheni kumwando kwa heni hemwe mpanjilwe! Mlute kuli chiluli cha mazuwa gose ne kuduma yawichilwe Limazoga na wahilisi wa kilanga wa heye.
MAT 25:42 Ndali na nzala hemwe hamhele chilyo, ndali na ng'halu hemwe hamhele mazi.
MAT 25:43 Ndali mjenzi hemwe hammbochele, ndali mtamwa na mchinweng'ho hemwe hamuyile kundola.’
MAT 25:44 “Aho na hewo womwidichila, ‘Mkulu, hanili natukona uwele na nzala ama ng'halu, uwele mjenzi ama ulihela nguwo, na uwele mtamwa ama ulimchinweng'ho, hetwe hatukuditile chinhu?’
MAT 25:45 Na heye kowedichila, ‘Ndanguwalonjelani ndikomya, chila lomlemile kumditila mbuli azi yumwe wa wanhu awa wadodo, namlema kunditila heni.’
MAT 25:46 Lelo awa woluta kuli kugazigwa kwa mazuwa gose, ila wala watanganiche woluta kuli ukomu wa mazuwa gose ne kuduma.”
MAT 26:1 Yesu loyasindile kulonga ago geng'ha, kawalonjela walanguswa wa heye,
MAT 26:2 “Mvizela kota mazuwa meli galinguya kowa na mnvina ya Pasaka, na Mwana wa Munhu kolavigwa leka yawambigwe.”
MAT 26:3 Mhela awo watambika wakulu na wasekulu wa wanhu nawating'hana kuli chipepela cha Kayafa, mtambika mkulu.
MAT 26:4 Walongasa vyowomibata Yesu kwa chinyele hamba wamkopole.
MAT 26:5 Ila walonga, “Mbuli ayo ileche kukoleka mhela wa mnvina ya Pasaka, kuleche kulawila kilewa na kibagula hali wanhu.”
MAT 26:6 Yesu loyali Betaniya, hakaye kwa Simoni, yawele nguchemigwa Mkoma,
MAT 26:7 mdala yumwe yawele na libuli lya alabasta iwele na unhunyhililo wa sendi nyinji, kamuyila hala mchisaga hoyekale kulya chilyo, kamgudulila awo unhunyhililo kumutwi.
MAT 26:8 Walanguswa wa heye lowawene ago nawazudila walonga, “Ya choni kuwifya aku?”
MAT 26:9 Unhunyhililo awu wahaguzigwe kwa sendi nyinji na wahapegwe wazunwa.
MAT 26:10 Yesu nakagazela majesa gawo, kawalonjela, “Ndaze lekachoni mwangumgaza ayu mdala? Heye kanditila mbuli inojile.
MAT 26:11 Wazunwa mwanawo mazuwa geng'ha, ila heni siwa na hemwe mazuwa gose.
MAT 26:12 Ayu mdala loyali yonjidila unhunyhililo nayali yombika goya kwa kutiligwa kwa heni mchilaga.
MAT 26:13 Ndanguwalonjelani ndikomya, koneche kweng'ha muisi Mbuli Inojile yodamligwa, chinhu chino choyaditile ayu mdala chodamligwa kwa kumkumbuchila heye.”
MAT 26:14 Hamba, Yudasi Isikalioti, yumwe wa wala kumi na weli, nakaluta kwa watambika wakulu,
MAT 26:15 kawalonjela, “Mondigalila choni wone ndimlavye Yesu kwa hemwe?” Wamuwazila migwala makumi gadatu ga sendi,
MAT 26:16 na baho Yudasi nayali yopala ndaze vyoyombelenhuka Yesu.
MAT 26:17 Zuwa lya mwaluko lya mnvina ya mibumunda johajiwichigwe usaso, walanguswa nawamlutila Yesu wamuuza, “Kwangugana kohi tukuwichile goya ndiya ya Pasaka?”
MAT 26:18 Heye nakawedichila, “Luteni kuli muji kwa munhu yumwe, mumlonjele, ‘Mlangusa kangulonga, mhela wa heni ufika, kwa hegwe ndolya Pasaka hamwe na walanguswa wa heni.’ ”
MAT 26:19 Walanguswa wadita kota Yesu vyoyawalajize, nawawika goya ndiya ya Pasaka.
MAT 26:20 Lokuwele matinazo, Yesu kekalisa mchisaga hamwe na walanguswa wa heye kumi na weli.
MAT 26:21 Lowali wolya, Yesu kalonga, “Ndanguwalonjelani ndikomya, yumwe wa hemwe kombelenhuka.”
MAT 26:22 Walanguswa nawesinza ng'hatu, waluka kiuza yumweyumwe, “Mkulu, ndaze nda heni?”
MAT 26:23 Yesu kedichila, “Heye yodiliza ibumunda hamwe na heni kuli chisaye ndo heye yombelenhuka. Kulya hamwe nayali ndo ulajilo wa kigana.
MAT 26:24 Ena, Ndangukomya Mwana wa Munhu kobagama kota Maandiko Matakatifu vyogawele longa mbuli ya heye, ila mane yuye munhu ayo yalingumgalamka Mwana wa Munhu! Nayahawele goya munhu ayo wone nahaleleche.”
MAT 26:25 Yudasi, ndo yula yaganile kumbelenhuka, kamuuza, “Mlangusa, ndaze nda heni?” Yesu kamwidichila, “Ena hegwe kulonga.”
MAT 26:26 Nalowali wolya, Yesu kahola ibumunda, kamtogola Nguluwi, kaumogola, kawagawila walanguswa yolonga, “Mhole mulye, alu ndo lukuli lwa heni.”
MAT 26:27 Hamba kahola chizombe, katambichiza, kawapa yolonga, “Munwe weng'ha,
MAT 26:28 mina ayi ndo danda ya heni ilingweneza ilagano lya Nguluwi na wanhu wa heye, danda ilingubohoka kwa chiwalo cha wanhu weng'ha kuwosela gehile ga hewo.
MAT 26:29 Ndanguwalonjelani, sinwa kahi divai ya zabibu mbaka zuwa lila ndinwa divai inyale hamwe na hemwe kuli undewa wa Mhaza wa heni.”
MAT 26:30 Lowasindile kwimba lwimbo, woka, nawaluta kuli chidunda cha Mizeituni.
MAT 26:31 Hamba Yesu nakawalonjela, “Nechilo ayi ya lehano, hemwe mweng'ha mombilima na kundeka ndiliyeka, mina Maandiko Matakatifu gangulonga, “ ‘Ndomtowa mdimi, na chilundo cha ming'holo chosambaluka.’
MAT 26:32 Ila londizilipuka, ndowalongola Galilaya.”
MAT 26:33 Petili nakamlonjela Yesu, “Wone hewo wawe na majesa na hegwe nakukuleka, heni sikuleka hebu.”
MAT 26:34 Yesu nakamlonjela, “Ndangukulonjela ndikomya, nechilo yiyino izogolo halineka, kombela kadatu.”
MAT 26:35 Petili nakamlonjela, “Wone iwe inganile kubagama, sikubela ng'oo.” Na wala walanguswa wanji weng'ha nawalonga hihyo.
MAT 26:36 Hamba Yesu kaluta nawo kuli kamgunda ka migodi Getisemane, kawalonjela walanguswa wa heye, “Mikale hano na heni ndute hala hamwando ndikalande.”
MAT 26:37 Nakawahola Petili na wana weli wa Sebedayo, nakaluka kuwa na masinzo na kugaya.
MAT 26:38 Aho nakawalonjela, “Ndina masinzo lukami mnhumbula habehi kubagama. Mikale baha meho hamwe na heni.”
MAT 26:39 Lelo nakaluta hamwando hado, kagwa chifunama, kalanda, “Mhaza wa heni, wone vyoiwa, chizombe achi chikole hafungo, ila haiwele vyondilingugana heni, leka kota vyoulingugana hegwe.”
MAT 26:40 Nakawalutila wala walanguswa kawafika wawasile. Nakamlonjela Petili, “Ndo kulonga mlemwela kikala meho hamwe na heni ne saa imwe?
MAT 26:41 Mikale meho na kulanda mleche kwinjila kuli kujezigwa. Muhe wa munhu wangugana kudita ganojile ila lukuli lwa ng'hochele.”
MAT 26:42 Nakaluta kahi lwa keli kulanda, “Mhaza wa heni, wone hailinguganigwa chizombe cha magazo chikole heni ne kuchinwa, leka igano lya hegwe lyenele.”
MAT 26:43 Nakawalutila kahi, nakawafika wawasile, mina meho gawo nagali gebatigwe na usinjizi.
MAT 26:44 Baho, kawaleka, nakaluta kulanda lwa kadatu kwa luzi lulula.
MAT 26:45 Hamba kawalutila wala walanguswa, kawalonjela, “Ndaze, mng'hali muwasile na kwesela? Mlole! Mhela wuya, Mwana wa Munhu kanguwichigwa mmoko mwa wanhu wawele na gehile.
MAT 26:46 Mwinuche tucheni. Mlole! Kanguya yula munhu yalingunhyinduka.”
MAT 26:47 Lelo Yesu naloyang'hali yolonga na hewo, baho nakoya Yudasi, yumwe wa wala kumi na weli. Hamwe na heye woya na wanhu wenji wawele na mipanga na nyimbati kulawa kwa watambika wakulu na wasekulu wa wanhu.
MAT 26:48 Ayo yaganile kumbelenhuka Yesu, nayali yawapele ulajilo yolonga, “Yula munhu yondimnonela mizeze ndo heye, mibateni.”
MAT 26:49 Baho, Yuda kamhejelela Yesu, nakamlonjela, “Ulamche, mlangusa!” Hamba kamnonela.
MAT 26:50 Yesu nakawalonjela, “Mng'holozangu, udite chouwinzile kudita.!” Aho wala wanhu woya, wamibata Yesu, wamuwika mmoko.
MAT 26:51 Yumwe wa wala wawele hamwe na Yesu nakagolola moko, nakasomola ipanga, kamtowa chitumagwa wa Mtambika Mkulu, nakamdumula ikutu.
MAT 26:52 Aho Yesu nakamlonjela, “Hiluse ipanga lyako muyala, mina yoneche yalingutowa kwa ipanga, kobagama kwa ipanga.
MAT 26:53 Ndaze, hamvizelele kota ndahawezile kumlanda Mhaza wa heni na heye yahangalile wamizi vilundo kumi na vili vya wahilisi wa kilanga?
MAT 26:54 Ila gokwenela ndaze Maandiko Matakatifu galingulonga kota vyoilinguganigwa ilawile?”
MAT 26:55 Mhela wuwo Yesu kalulonjela alo lung'hongola lwa wanhu woyile kumibata, “Ndaze, muya kundibata kwa nyimbati na mipanga kota vila heni nda mbokaji? Chila zuwa ndali mng'handa ya Nguluwi ndilangusa, na hamndibate!
MAT 26:56 Ila aga geng'ha gakoleka leka Maandiko Matakatifu ga waloli genele.” Hamba walanguswa weng'ha nawamleka, nawabilima.
MAT 26:57 Lelo awo wanhu wamibate Yesu nawamhilika hakaye kwa Kayafa, mtambika mkulu, kowekungajize walangusa wa malajizo ga Musa na wasekulu.
MAT 26:58 Petili nakamuwinza Yesu kwa kutali mbaka kuchipepela cha mtambika mkulu, kenjila mng'handa hamwe na wamizi leka yalole mbuli zizangulawila.
MAT 26:59 Lelo watambika wakulu na balaza lyeng'ha nawapala ulolezi wa udesi kwa Yesu wogana wamkopole,
MAT 26:60 ila hawawene chinhu choneche chila, hanga nawoya walolezi wenji wa udesi. Mwiso nawoya walolezi weli,
MAT 26:61 nawalonga, “Munhu ayu nakalonga, ‘Ndoweza kugwisa Ng'handa ya Nguluwi na kuizenga kahi kwa mazuwa gadatu.’ ”
MAT 26:62 Mtambika mkulu nakema kamuuza Yesu, “Ndaze, hulingwidichila ne chinhu? Wanhu awa wangulavya ulolezi wachi kwa hegwe?”
MAT 26:63 Ila Yesu nakanyamalila tulu. Kahi mtambika mkulu nakamlonjela, “Wilahe kwa itagwa lya Nguluwi yawele mkomu, tulonjele kota hegwe ndo Kilistu Mlohozi, mwana wa Nguluwi!”
MAT 26:64 Yesu nakamlonjela, “Ena, hegwe kwangulonga! Ila ndanguwalonjelani, kulawa sambi momona Mwana wa Munhu yekale kudilo kwa yula Mkulu yawele na ludali yokuya kuchanya kuli ng'hungugu kilanga.”
MAT 26:65 Baho mtambika mkulu kadega nguwo za heye, kalonga, “Kamkovula Nguluwi! Twangugana choni kahi? Sambi muhulika yomkovula Nguluwi kwa heye.
MAT 26:66 Hemwe mwangona ndaze?” Hewo wamwidichila, “Imgana yabagame!”
MAT 26:67 Hamba wamtemela mite kumeho, wamzabula kwa viganza. Wanji lowali womzabula kwa viganza,
MAT 26:68 nawalonga, “Hegwe Kilistu Mlohozi, tulagulile lelo, yalikohi yakutowile?”
MAT 26:69 Petili yaliyekale kunze kunzingo. Lelo chitumagwa yumwe mdala kamlutila, nakalonga, “Hegwe wali hamwe na Yesu wa Galilaya.”
MAT 26:70 Petili nakabela kwa weng'ha wala, nakalonga, “Sivizelele choni choulonga.”
MAT 26:71 Loyali yolawa mlwizi, chitumagwa yunji mdala nakamona, nakawalonjela wala wawele hala, “Munhu ayu nayali hamwe na Yesu wa Nasaleti.”
MAT 26:72 Petili nakabela kahi aku yochilaha, “Simzelele munhu ayo.”
MAT 26:73 Hamba hado hela, wanhu wawele hala wamlutila Petili, wamlonjela, “Twangukomya, hegwe nagwe kwa yumwe wa hewo, mina kuzeleka kwa aila ndonga hela kota hegwe kulawila Galilaya.”
MAT 26:74 Aho Petili nakaluka kipanjila na kilaaha yolonga, “Heni simzelele munhu ayo!” Baho du izogolo nalika.
MAT 26:75 Petili nakakumbuchila ulonzi woyalonjelwe na Yesu, “Izogolo halineka, kombela kadatu kota hunzelele heni.” Lelo Petili kalawa kunze, nakalila lukami.
MAT 27:1 Lokubwemwenzuche, watambika wakulu weng'ha na wasekulu wa wanhu nawaheha mbuli ya Yesu wogana wamkopole.
MAT 27:2 Wamuwoha luzabi, wamuhola, wamuhilika kwa Pilato mkulu wa mkowa yahaguligwe na mndewa wa Loma.
MAT 27:3 Aho, Yudasi, yula yambelenhuche Yesu, loyawene kota mina wamtagusa kwa wihe Yesu, nakawa na masinzo lukami, nakawahilusila watambika wakulu vila vihande makumi gadatu vya sendi.
MAT 27:4 Nakawalonjela, “Ndita gehile kwa kumlavya munhu yawele hela nongwa yakopoligwe.” Ila hewo walonga, “Yangutuwala choni hetwe? Ayo mbuli ya hegwe.”
MAT 27:5 Na heye nakataga zila sendi mng'handa ya Nguluwi, nakalawa kunze, kaza kinhweng'ha.
MAT 27:6 Watambika wakulu nawazihola zila sendi, walonga, “Haiwa goya kuziwika kuli ng'hano ya ng'handa ya Nguluwi, mina ndo sendi za danda.”
MAT 27:7 Baho naweuza, nawahola zila sendi wazagula mgunda wa ilongo, hawe honhu ha kutilila wajenzi.
MAT 27:8 Ndo mina mbaka lehano mgunda awo wanguchemigwa, “Mgunda wa Danda.”
MAT 27:9 Ahyo ulonzi wa mloli Yelemiya wenela, “Nawahola vihande makumi gadatu vya sendi, kwa kihwana na yula munhu, yawele wanhu wa Isilaeli wamguzile,
MAT 27:10 nawagula mgunda wa ilongo kwa sendi zizo, kota vila mkulu vyoyandajize.”
MAT 27:11 Yesu nawamwimiza kumwando kwa mkulu wa mkowa. Lelo mkulu wa mkowa nakamuuza, “Ndaze, hambi hegwe ndo mndewa wa Wayahudi?” Yesu nakamwidichila, “Ena, hegwe nakulonga.”
MAT 27:12 Ila watambika wakulu na wasekulu nalowali womuuza, nayali hambe yawedichile.
MAT 27:13 Ahyo Pilato nakamuuza, “Ndaze, hulinguhulika ulonjelezi awo weng'ha walingulavya kwa hegwe?”
MAT 27:14 Ila Yesu hedichile ne chinhu, ahyo mkulu wa mkowa nakabubuwala ng'hatu.
MAT 27:15 Nayali izoweleche mhela wa mnvina ya Pasaka mkulu wa mkowa kuwachumulila Wayahudi munhu yumwe wamganile yawele mchinweng'ho.
MAT 27:16 Mhela awo nakwali na munhu yumwe yawele mchinweng'ho yazeleche lukami, itagwa lyake Balaba.
MAT 27:17 Ahyo, wanhu loweting'hane hamwe, Pilato nakawauza, “Mwangugana ndimchumulile yalikohi kuli awa weli, Balaba ama Yesu yalinguchemigwa Kilistu Mlohozi?”
MAT 27:18 Nakalonga hino kwa vila nakavizela kota nawamigala kwa heye kwa mbuli ya kumonela fihi hela.
MAT 27:19 Pilato naloyawele yekale hali chigoda cha heye cha utaguso, mdala wa heye nakamhilichila usenga awu, “Uleche kiyinjiza kuli utaguso wa munhu yuno yatanganiche, mina lehano ngazika lukami londali ndilota kwa mbuli ya heye.”
MAT 27:20 Ila watambika wakulu na wasekulu nawawakola lupichi wanhu walande Balaba yachumulilwe na Yesu yabagame.
MAT 27:21 Mkulu wa mkowa nakawauza, “Yalikohi kuli awa weli yomlingugana ndimchumulile?” Wamwidichila, “Balaba!”
MAT 27:22 Pilato nakawauza, “Lelo ndite choni na Yesu yalinguchemigwa Kilistu Mlohozi?” Weng'ha nawalonga, “Yawambigwe mumsalaba!”
MAT 27:23 Pilato nakauza, “Lekachoni? Nakadita wihe wachi?” Hewo nawalutilila kutowa iyowe, “Yawambigwe mumsalaba!”
MAT 27:24 Baho, Pilato loyawene kota hawalingukunda chila choyaliyolonga, na ivuche nalyali lyaluche, nakahola mazi, nakahovuga moko hali wala wanhu wamemile, nakalonga, “Heni ndamduhu kwa mbuli ya kubagama kwa munhu ayu, mane mwemwe baho!”
MAT 27:25 Wanhu weng'ha nawalonga, “Danda ya heye na iwe kwa hetwe na wana wa hetwe!”
MAT 27:26 Aho Pilato nakawachumulila Balaba kulawa mchinweng'ho, na Yesu yazapigwe ng'hobwa hamba nakamlavya yawambigwe mumsalaba.
MAT 27:27 Hamba wamizi wa Pilato nawamwinjiza Yesu mng'handa ya mkulu wa Loma, wekungajiza chilundo cheng'ha.
MAT 27:28 Wamvula nguwo, wamvalisa ikanzu lya chiundewa.
MAT 27:29 Hamba watowa itaji lya miwa ifandile kota chipembelo, wamvalisa kumutwi, wamuwichila kahi idenje kuli moko wa heye wa kudilo. Wamfugamila kumwando kwa heye, wambeza wolonga, “Ulamche Mndewa wa Wayahudi!”
MAT 27:30 Wamtemela mite, walihola lila idenje, wamsubulila kumutwi.
MAT 27:31 Lowasindile kumbeza, wamvula lila ikanzu, wamvalisa nguwo za heye, hamba wamhilika kumuwamba mumsalaba.
MAT 27:32 Lowali woluta, nawamfika munhu yumwe itagwa lyake Simoni, mwenyeng'haye wa Kilene, wamizi wamkola lupichi yapiche msalaba wa Yesu.
MAT 27:33 Lowafichile honhu halihochemigwa Goligota, hazeleche honhu ha “Izeje lya Mutwi”.
MAT 27:34 Wamnweza mhanzanyo wa divai na chinhu chiliusungu. Ila Yesu loyajezile nakalema kunwa.
MAT 27:35 Wamuwamba Yesu mumsalaba, hamba wegawila nguwo za heye kwa kuzitowela simbi.
MAT 27:36 Nawekala baho, wawa womlolela.
MAT 27:37 Hachanya ha mutwi wa heye nawawika utaguso wa heye wandichigwe, “Ayu ndo Yesu, Mndewa wa Wayahudi.”
MAT 27:38 Wabokaji weli nawawambigwa mumsalaba hamwe na heye, yumwe kudilo na yumwe kumoso.
MAT 27:39 Wanhu wawele wokola honhu hala wali womliga na wotigasa mitwi jawo na kulonga,
MAT 27:40 “Hegwe! Ndo nakivuna kota kogwisa ng'handa ya Nguluwi na kuizenga kuli mazuwa gadatu? Lelo ilohole gwegwe. Wone hegwe uli Mwana wa Nguluwi, uduliche mumsalaba!”
MAT 27:41 Vivyo du na watambika wakulu hamwe na walangusa wa malajizo ga Musa na wasekulu nawambeza wolonga,
MAT 27:42 “Nakawalohola wanji, ila kilohola yuye kangulemwa! Hambi, heye ndo Mndewa wa Isilaeli! Hambi, lelo yeduliche hasi kulawa mumsalaba, na hetwe tomkunda.
MAT 27:43 Naketumbila Nguluwi na kulonga eti heye ndo Mwana wa Nguluwi, lelo Nguluwi yamlohole one yalingumgana.”
MAT 27:44 Hihyo na wala wabokaji wawambigwe hamwe na Yesu mumsalaba nawaliwomliga.
MAT 27:45 Kulawila saa tisa matinazo, jiza naigubika isi yeng'ha.
MAT 27:46 Loifichile saa tisa matinazo, Yesu nakalila kwa lizi likulu, “Eloi, Eloi, lema sabakitani?” Ilinguzeleka, “Nguluwi wa heni, Nguluwi wa heni, lekachoni kundeka?”
MAT 27:47 Ila wala nawemile hala lowahuliche ahyo walonga, “Kangumchema Eliya.”
MAT 27:48 Yumwe wa hewo nakabilima, nakahola sichi, kadiliza kuli divai izazame, kawika mli idenje, kamha yanwe.
MAT 27:49 Wanji nawalonga, “Tandi tulole wone Eliya kanguya kumlohola.”
MAT 27:50 Baho, Yesu nakalila kahi kwa lizi likulu, hamba muhe nauleka lukuli.
MAT 27:51 Baho ipaziya ligazi lya kudinya honhu helile ng'hatu ha ng'handa ya Nguluwi lidejeka vihande vili kulawa kuchanya mbaka hasi, isi naitigasika, mitalawe najitulika,
MAT 27:52 vilaga navigubuka na wanhu wenji wa Nguluwi welile nawabagame, wazilipuligwa,
MAT 27:53 na hewo, loyazilipuche heye Yesu, walawa mvilaga, wenjila Yelusalemu muji welile, woneka na wanhu wenji.
MAT 27:54 Lelo mkulu wa wamizi na wamizi wa Yesu lowawene limachinyina na gala galawile, nawadumba heko, nawalonga, “Ena, kwa kukomya munhu ayu nayali Mwana wa Nguluwi.”
MAT 27:55 Honhu aho hali na wadala wenji wolola kwa kutali. Awo wadala ndo wala wamuwinzile Yesu kulawila Galilaya womtanza.
MAT 27:56 Mumo wali Maliya Madelena, Maliya mayao Yakubu na Yusufu, hamwe na mayao wana wa Sebedayo.
MAT 27:57 Loifichile matinazo, mina nakoya munhu yawele na lufufu mwenyeng'haye wa Alimataya, itagwa lyake Yusufu. Na heye kahi nayali mlanguswa wa Yesu.
MAT 27:58 Nakamlutila Pilato, nakalanda yapegwe lukuli lwa Yesu. Baho, Pilato nakakunda yapegwe.
MAT 27:59 Yusufu nakaluhola lula lukuli, kaubumbiliza sanda nzelu ng'hatu,
MAT 27:60 nakuwika mgati mwa chilaga chinyale choyali yahongole kuli italawe. Hamba kabidusa iganga ikulu kadinya hali lwizi lwa chilaga, koka.
MAT 27:61 Maliya Madelena na yula Maliya yunji wali wekale wolola chilaga.
MAT 27:62 Hamitondo, zuwa iyage ila ya kwesela, watambika wakulu na Mafalisayo nawamlutila Pilato,
MAT 27:63 nawalonga, “Mkulu, tukumbuchila kota yula mhadi loyali mkomu nakalonga ‘Zuwa lya kadatu ndozilipuka.’
MAT 27:64 Lelo twangugana chilaga chilolelwe na wamizi mbaka zuwa lya kadatu, leka walanguswa wa heye waleche kuya nakumuhiza na kuwalonjela wanhu kota kazilipuka. Udesi awu wa kuduma wowa wihile lukami kusinda ula wa mwaluko.”
MAT 27:65 Pilato nakawalonjela, “goya, mwanawo wamizi, mlute mkalolele kota vyomvizelele.”
MAT 27:66 Lelo waluta walolela chilaga, nawazenjelela mchanya mwa iganga na wawaleka baho wamizi wololela.
MAT 28:1 Loimalile Zuwa lya Kwesela, behi na kubwemwenzuka zuwa ila ya Jumapili, Maliya Madelena na yula Maliya yunji, nawaluta kulola chila chilaga.
MAT 28:2 Baho du nakulawila limachinyina, mhilisi wa kilanga wa Mkulu nakadulika kulawa kilanga, kalibidusa lila iganga hafungo, nakulikalila.
MAT 28:3 Nakoneka kota lumwemwesa na nguwo zoyavalile zali nzelu chweya!
MAT 28:4 Wamizi wa chila chilaga nawakakama aku wodumba heko, nawazilika kota wanhu wabagame.
MAT 28:5 Ila yula mhilisi wa kilanga nakawalonjela wala wadala, “Hemwe mleche kudumba! Ndivizela kota mwangumpala Yesu yawambigwe mumsalaba.
MAT 28:6 Haduhu hano mina kazilipuka kota vyonayalonjile. Muye mlole honhu howamuwichile.
MAT 28:7 Lelo mlute himahima mkawalonjele walanguswa wa heye kuta kazilipuka kulawa kowabagame, na sambi kanguwalongola Galilaya, ako momona heye. Mkumbuche ulonzi awu wondiwalonjele.”
MAT 28:8 Wawele wodumba na kusangalala kukulu, awo wadala nawoka himahima hali chilaga, nawabilima kuluta kuwalonjela walanguswa wa heye.
MAT 28:9 Baho, Yesu nakating'hana na hewo, nakalonga, “Mlamche hemwe.” Hewo wadala wamlutila, webata magulu ga heye na kumfugamila.
MAT 28:10 Hamba Yesu nakawalonjela, “Mleche kudumba! Luteni mkawalonjele wang'holozangu walute Galilaya, na ako wombona.”
MAT 28:11 Wala wadala lowaliwoluta, wamwe wa wamizi wa chilaga nawaluta kuli muji kulonga kwa wakulu wa watambika kwa zila mbuli zeng'ha lozilawile.
MAT 28:12 Lelo nawating'hana hamwe na wasekulu, lowasindile kudogola, wawapa wala wamizi sendi nyinji
MAT 28:13 wolonga, “Hemwe molonga ahi, ‘Walanguswa wa heye nawoya nechilo, wahiza lukuli lwa heye hetwe lotwali tuwasile.’
MAT 28:14 Na one mkulu wa mkowa yaizele mbuli ayi, hetwe tolonga na heye leka hemwe mleche kugazigwa.”
MAT 28:15 Wala wamizi nawazihola zila sendi, nawadita kota vyowalanguswe. Mbuli ayo yenela hali Wayahudi weng'ha mbaka lehano.
MAT 28:16 Wala walanguswa kumi na yumwe nawaluta Galilaya kuli chila chidunda choyawalajize Yesu.
MAT 28:17 Lowamuwene, wamfugamila, hanga wanji wali na majesa.
MAT 28:18 Yesu nakoya habehi, kawalonjela, “Mpegwa ludali lweng'ha kilanga na muisi.
MAT 28:19 Luteni lelo, mkawadite wanhu wa isi zeng'ha wawe walanguswa wa heni, muwabatize kwa itagwa lya Mhaza na lya Mwana na lya Muhe Yelile.
MAT 28:20 Muwalanguse kibatilila malajizo geng'ha gondiwapele. Na heni nda hamwe na hemwe mazuwa geng'ha, mbaka kuduma kwa isi.”
MAR 1:1 Ayi ndo Mbuli Inojile ya Yesu Kilistu Mlohozi, Mwana wa Nguluwi.
MAR 1:2 Nayaluka kota vyoyandichigwe mli chitabu cha mloli Isaya, “Nguluwi nakalonga, ndomigala msenga wa heni yakulongole, yula yokugongomanyila nzila ya hegwe.
MAR 1:3 Munhu kanguyoweleza kugunuche, Mgongomanyileni Mkulu nzila ya heye, mgolole nzila ya heye ya kukola!”
MAR 1:4 Yohani Mbatiza nakalawila kugunuche, yodamla kota, wanhu weng'ha mumgalamchile Nguluwi na kubatizigwa leka Nguluwi yawosele gehile ga hewo.
MAR 1:5 Wanhu kulawa nzingo zeng'ha za Yudeya na wenyeng'haye weng'ha wa Yelusalemu nawamlutila, nawalonga gehile gowaditile, na heye nakawabatiza kuli lwanda lwa Yolodani.
MAR 1:6 Yohani nakavala nguwo ihonigwe kwa milaika ja ngamiya, yakowele isali lya igozi mchuno. Nayali yolya nzije na hanombwa.
MAR 1:7 Nakadamla yolonga, “Munhu yalinguya kumbele kwa heni, kowa mkulu kwa heni, heni sijeza kinamiza na kudohola ng'weso za makwamba ga heye.
MAR 1:8 Heni ndanguwabatiza kwa mazi, ila heye kowabatiza kwa Muhe Yelile.”
MAR 1:9 Mhela wuwo Yesu nakafika kulawa Nasaleti muisi ya Galilaya, na Yohani nakambatiza kuli lwanda lwa Yolodani.
MAR 1:10 Baho du naloyalawile mmazi, nakona ulanga ugubuche, na Muhe Yelile yomdulichila kota ng'hunda.
MAR 1:11 Lizi Iihulikwa kulawa kilanga, “Hegwe ndo mwanangu ndikuganile, nojezwa na hegwe.”
MAR 1:12 Baho du Muhe Yelile nakamdita yalute kugunuche,
MAR 1:13 ako nakekala mazuwa makumi gane yojezigwa na Limazoga. Migongolo ja kisolo najali kuko, na wahilisi wa kilanga waza kumtanza.
MAR 1:14 Yohani loyawohigwe mchinweng'ho, Yesu nakaluta isi ya Galilaya, yodamla Mbuli Inojile ya Nguluwi.
MAR 1:15 Nakalonga, “Mhela naufika. Undewa wa Nguluwi wa habehi! Mwesa mumgalamchile Nguluwi, muikunde Mbuli Inojile na muibochele.”
MAR 1:16 Yesu loyali yojenda mfungo mwa ilamba lya Galilaya, nakawona wavula somba weli, Simoni na Andeleya mdodowe Simoni, wovula somba na utandawala.
MAR 1:17 Yesu nakawalonjela, “Mmbinze nani ndowaditani hemwe muwe wavula wanhu.”
MAR 1:18 Baho waleka utandawala wa hewo wamuwinza.
MAR 1:19 Loyalutile hamwando nakawona wanage Sebedayo Yakubu na Yohani. Nawali mgati mwa itumbwi wowika goya utandawala wawo.
MAR 1:20 Baho du Yesu nakawachema, na hewo wamleka mhaza wa hewo Sebedayo muli itumbwi hamwe na wakolamijito, nawamuwinza.
MAR 1:21 Nawafika kuli muji wa Kapanaumu, naloifichile Zuwa lya Kwesela, Yesu nakenjila mung'handa ya kusalila, nakaluka kulangusa.
MAR 1:22 Wanhu weng'ha wekala wabubuwale na gala goyali yolangusa, mina nahali yolangusa kota walangusa wa malajizo ga Musa, ila nayali yolangusa kwa ludali.
MAR 1:23 Baho nakenjila munhu mula kuli ng'handa ya kusalila yawele na chijeni chihile,
MAR 1:24 nakachemeleza lizi, “Kuna choni na hetwe, hegwe Yesu wa Nasaleti? Nakuya kutudumya? Tuvizela hegwe kwa whaani, hegwe kwa msenga Yelile yatumigwe na Nguluwi.”
MAR 1:25 Yesu nakaching'hanuchila acho chijeni chihile yolonga, Nyamalile! “Mlawe munhu ayu.”
MAR 1:26 Hamba chila chijeni chihile chimtigisatigisa ayo munhu, nakalila kwa lizi likulu, hamba chimlawa munhu yula.
MAR 1:27 Wanhu wesa wawele ahala honhu, nawali wabubuwale, naweuza, “Mbuli zachi azi? Aga ndo malanguso majenzi, munhu ayu kana ludali mbaka lwa kuvilonjela vijeni vihile, navyo vyangumhulichiza.”
MAR 1:28 Mbuli azi za Yesu nazenela kweng'ha kuli isi ya Galilaya.
MAR 1:29 Yesu na walanguswa wa heye, hamwe na Yakubu na Yohani, nawalawa kuli ng'handa ya kusalila, nawaluta mbaka kuli ng'handa ya Simoni na Andeleya.
MAR 1:30 Mamo wa mdala wa Simoni nayali yotamika yawasile muchinhanda. Yesu loyafichile nawamlonjela mbuli ya ayo mtamwa.
MAR 1:31 Yesu nakamlutila ayo mamo, nakamibata moko nakamwinula. Baho utamwa umleka nakaluka kuwawichila chilyo.
MAR 1:32 Matinazo, isanya lolizinjile, nawamigalila Yesu watamwa weng'ha na munhu yawele na chijeni.
MAR 1:33 Wanhu weng'ha wa muji ula nawekungajiza kunze kwa lwizi.
MAR 1:34 Na heye Yesu nakawosela wanhu wenji wawele na matamwa menji, na nakawinga vijeni vinji, ila havikundize vijeni kulonga chinhu mina vyali vimzelele kota heye ka whaani.
MAR 1:35 Hamitondo, kung'hali lufuku, Yesu nakalawa, nakaluta honhu ha uyeng'ha kumlanda Nguluwi.
MAR 1:36 Hamba Simoni na wayage nawaluta kumpala koyali.
MAR 1:37 Lowamuwene, wamlonjela, “Chila munhu kangukupala.”
MAR 1:38 Yesu nakawalonjela, “Tucheni tulute honhu hanji hali habehi ndikadamle Mbuli Inojile ako kahi, mina acho ndo chingale.”
MAR 1:39 Hamba nakoka kaluta yojenda isi yeng'ha ya Galilaya, yodamla mng'handa za kusalila Mbuli Inojile kuno yolavya vijeni vihile.
MAR 1:40 Munhu yumwe yawele na uswema nakamlutila Yesu, kafugama, nakamlanda na kumlonjela, “Wone ulingugana kombusila utamwa wondilingugula.”
MAR 1:41 Yesu kamonela isungu, nakagolola moko wa heye, kamdoliza na kumlonjela, “Ndangugana uhovujigwe!”
MAR 1:42 Baho du utamwa wa chipata umleka munhu ayo, nakahovujigwa.
MAR 1:43 Hamba Yesu nakamlonjela yula munhu yoche, kuno yomlajiza,
MAR 1:44 nakalonga, “Ulole uleche kumlonjela munhu yoneche mbuli ayi, ila ulute ukelajile kwa mtambika mkulu kota vyoyalajize Musa, wakukagule na walavye ulolezi kota nakuhovugwa. Hamba ulavye nhambiko kwa kulajila kota uwa mkomu.”
MAR 1:45 Ila yula munhu kaluta, kweneza mbuli ayo kweng'ha na kulonga mbuli nyinji. Yesu nakalemwela kwinjila muji woneche yokoneka, imgana kikala kunze, honhu ha uyeng'ha. Ahyo, wanhu nawamlutila kulawila kweng'ha.
MAR 2:1 Logakolile mazuwa mado, Yesu nakahiluka Kapanaumu wanhu nawahulika kota nakahiluka hakaye.
MAR 2:2 Wanhu wenji nawoya wamema mluga nakwali hela honhu ha kukola kuluta hali lwizi. Yesu nayali yodamla usenga wa heye,
MAR 2:3 mhela awo wanhu wane nawoya, wamigale munhu kwa Yesu, yumwe yaziliche.
MAR 2:4 Ila kwa vila wanhu nawali wenji, nawalemwela kumgala habehi na Yesu. Ahyo, nawatubula kuchanya kuchinduwiko honhu hoyawele Yesu. Lowatubule honhu, wamdulisa ayo munhu yawele yawasile mumcheka.
MAR 2:5 Yesu loyawene vyowawele na makundo, nakamlonjela ayo munhu yaziliche. “Mwanangu, kusilwa gehile gouditile.”
MAR 2:6 Wamwenga wa walangusa wa malajizo ga Musa, nawawele ahala honhu, nawenjilwa na majesa mnhumbula mwawo,
MAR 2:7 Munhu ayu “Lekachoni ayu kangulonga hino? Kangumkovula Nguluwi! Kuduhu munhu yawele na ludali lwa kumusila munhu gehile, ila Nguluwi yaliyeka.”
MAR 2:8 Yesu nakavizela gala gowali wochijesa, nakawalonjela, “Lekachoni mwangijesa ahyo mnhumbula za hemwe?
MAR 2:9 Lilikohi liwele ubewe, kumlonjela ayu munhu yaziliche, ‘Kusilwa gehile ga hegwe,’ Ama kumlonjela, ‘Winuche! Uhole mcheka ujende?’
MAR 2:10 Lelo ndangugana mvizele kota heni Mwana wa Munhu ndina ludali lwa kuwosela wanhu gehile muisi.” Aho nakamlonjela yula munhu yaziliche,
MAR 2:11 “Ndangukulonjela wime, uhole mcheka wako ulute kaye.”
MAR 2:12 Wanhu weng'ha nawali womlola ayo munhu. Ayo mtamwa kenuka, nakahola mcheka wa heye kaluta kaye. Wanhu weng'ha nawabubuwala na kumtogola Nguluwi kuno wolonga, “Hatunayona mbuli kota ayi.”
MAR 2:13 Yesu nakahiluka kahi hafungo mwa ilamba lya Galilaya. Lung'hongola lwa wanhu nalumlutila, na heye kaluka kuwalangusa.
MAR 2:14 Loyali yokola, kamona Lawi mwanage Alufayo, yekalise mchituka cha kodi, Yesu nakamlonjela, “Umbinze!” Lawi kenuka, kamuwinza.
MAR 2:15 Hamba, Yesu nayali yolya chilyo mng'handa ya Lawi, wakongoza kodi weng'ha na awala wawele na gehile, waliwolya hamwe na Yesu na walanguswa wa heye, nawali wenji wamuwinzile Yesu.
MAR 2:16 Walangusa wa malajizo ga Musa wala nawawele Mafalisayo, lowamuwene Yesu yolya na wanhu wawele na gehile na wakongoza kodi, wawauza walanguswa wa heye, walonga, “Lekachoni kangulya na wadita gehile?”
MAR 2:17 Yesu vyoyawahuliche nakawalonjela, “Wanhu wawele wakomu hawalingumlapa mteleka mikwandi, ila wawele watamwa. Suyile kuwachema wanhu wala watanganiche, ila mbuya kwa wanhu wawele na gehile.”
MAR 2:18 Mhela umwe walanguswa wa Yohani na walanguswa wa Mafalisayo nawali wokwesela kulya. Wanhu nawoya, nawamuuza Yesu, “Lekachoni walanguswa wa Yohani na wa Mafalisayo nawali wokwesela kulya, ila walanguswa wa hegwe hambe wesele kulya?”
MAR 2:19 Yesu nakawedichila, “Yalalikwe kuli mnvina ya kuhesa, kokwesela ndaze kulya wone yawe hamwe na mkasano? Hebu! Mhela weng'ha hoyowa hamwe na mkasano hokwesela kulya hebu.
MAR 2:20 Mhela wokwiza hala mkasano hoyokusigwa kuli hewo, mhela awo ndo wokwesela kulya.
MAR 2:21 “Haduhu munhu yoweza kuhona chibende chinyale kuli nguwo ya katali. Wone yadite ahyo, achila chibende chinyale choswina kulawa kuli yila nguwo ya katali, ileka ugazi ukulu.
MAR 2:22 Munhu hambe yajele divai ya lehano kuli chizombe cha igozi cha katali, wone udite ahyo divai aila yotula achila chizombe cha igozi cha katali, divai na chizombe cha igozi chila vyotajigwa. Iwaga hino, uwiche divai mli chizombe cha igozi chinyale.”
MAR 2:23 Nalyali Zuwa lya Kwesela Yesu nayali yokola na walanguswa wa heye kuli migunda ja wanhu jiwele na ngano, wopulula miso wolya.
MAR 2:24 Mafalisayo nawalonga, “Ulole, walanguswa wa hegwe wanguwifya wangudita chohachikundigwe kudita Zuwa lya Kwesela?”
MAR 2:25 Yesu nakawalonjela, “Hambi hamsomile Daudi na wayage navyowaditile mhela lowali na nzala?
MAR 2:26 Heye nakenjila mng'handa ya Nguluwi, nakalya jila mibumunda jiwichigwe kumwando kwa Nguluwi. Mbuli ayi naikoleka mhela Abiatali naloyali mtambika mkulu. Na ndo watambika waliyeng'ha nawakundizwe kulya mibumunda ajo. Ila Daudi nakajilya na nakawapa wayage kahi.”
MAR 2:27 Hamba Yesu nakawalonjela, “Zuwa lya Kwesela naliwichigwa kwa chiwalo cha wanhu, haiwele wanhu kwa chiwalo cha Zuwa lya Kwesela.
MAR 2:28 Ahyo Mwana wa Munhu ndo Mkulu wa Zuwa lya Kwesela na kana ludali lwa alyo Zuwa lya Kwesela.”
MAR 3:1 Yesu nakenjila kahi mng'handa ya kusalila nakwali na munhu yawele na moko uziliche.
MAR 3:2 Wanhu wamwe nawali wopala chinhu cha kumvilizila Yesu, nawali womlola kodita choni kwa ayula munhu yawele na moko uziliche, komlohola ama hebu vyoiwele Zuwa lya Kwesela.
MAR 3:3 Yesu nakamlonjela ayula munhu yawele na moko uziliche, “Uye hano hamwando.”
MAR 3:4 Hamba Yesu nakawauza wanhu wala, “Malajizo ga hetwe gangutukundiza ndaze kudita Zuwa lya Kwesela? Kudita mbuli inojile ama kudita mbuli yihile? Kulohola ukomu wa munhu ama kukopola?” Ila hewo nahawalonjile chinhu.
MAR 3:5 Aho nakawalola weng'ha kuno yazudile, nakawa na masinzo kwa vila navyowawele na nhumbula zihile. Hamba nakamlonjela ayula munhu yawele na moko uziliche, “Ugolole moko wa hegwe!” Na heye nakagolola moko na baho uwa mkomu kahi.
MAR 3:6 Baho Mafalisayo nawalawa kunze, nawalongasa hamwe na wanhu wa chilundo cha Helodi ndaze vyowomdumya Yesu.
MAR 3:7 Yesu nakoka aho hamwe na walanguswa wa heye, nakaluta hafungo mwa ilamba, na lung'hongola lwa wanhu lumuwinza. Wanhu awo nawali walawile kuli isi za Galilaya na Yudeya,
MAR 3:8 na miji ja Yelusalemu na Idumea, kumwambu mwa lwanda lwa Yolodani na Tilo na Sidoni. Lung'hongola alo lwa wanhu nalumlutila Yesu kwa vila naluhulika mbuli nyinji nazoyali yaditile.
MAR 3:9 Yesu nakawalonjela walanguswa wa heye wamuwichile goya itumbwi limwe, leka lung'hongola lwa wanhu waleche kummemelela.
MAR 3:10 Nayali yawosile matamwa wanhu wenji, na watamwa weng'ha nawali wofyela wogana wamdolize.
MAR 3:11 Wanhu wawele na vijeni vihile lowamuwene, nawetoza kumwando kwa heye na kuchemeleza kwa lizi, “Hegwe kwa Mwana wa Nguluwi!”
MAR 3:12 Ila Yesu nakawalonjela kwa kuwang'hanuchila waleche kuwalonjela wanhu kota heye kawhaani.
MAR 3:13 Yesu nakoka nakakwina kuchidunda nakawachema wala yawaganile. Na hewo nawamlutila,
MAR 3:14 nakawahagula kumi na weli, nakawachema watumigwa. Nakawalonjela, “Ndiwahagulani hemwe muwe hamwe na heni, hamba ndowalajiza mlute kuwadamlila wanhu Mbuli Inojile.
MAR 3:15 Mowa na ludali lwa kuwinga vijeni.”
MAR 3:16 Awa ndo kumi na weli yawahagule, Simoni yula Yesu yampele itagwa lya Petili,
MAR 3:17 na kahi Yakubu na Yohani wanage Sebedayo. Yesu nakawapa awa wana weli itagwa Boanelige, izeleche “Wanalubumo.”
MAR 3:18 Na kahi Andeleya na Filipo na Batolomeo na Matei na Tomasi na Yakubu mwanage Alufayo na Simoni yalawile Kanaani na Tadayo
MAR 3:19 na Yudasi Isikalioti yambelenhuche Yesu.
MAR 3:20 Hamba Yesu nakaluta hakaye hake, kahi wanhu nawamema mbaka Yesu na walanguswa wa heye, nawalemwela kuwa mhela wa kulya.
MAR 3:21 Wang'holoze vyowahuliche ago, nawaluta kumhola kwa vila wanhu nawalonga kota kapunganika.
MAR 3:22 Walangusa wa hewo wa malajizo ga Musa walawile Yelusalemu nawalonga, “Kana chijeni chihile chilinguchemigwa Belisebuli! Ayo ndo mkulu wa vijeni, na heye ndo yalingumpa ludali lwa kusa vijeni vihile.”
MAR 3:23 Yesu nakawachema na kwaluka kuwalonjela kwa nhelo, kalonga, “Yowa ndaze Limazoga limuwinje Limazoga miyage?
MAR 3:24 Wone undewa umwenga wogawanuka vilundo vilingitwanza, undewa awo hauweza kikala.
MAR 3:25 Kahi, wone ivyazi ligawanuche keli, lilingitowa, ivyazi alyo halichikala lyosumigwa.
MAR 3:26 Wone undewa wa Limazoga ugawanuche chilundo, hauchikala, lelo wokwaga ng'hatu.
MAR 3:27 “Kuduhu munhu yokwinjila mng'handa ya munhu yawele na mong'ho kumsukula vinhu vyeng'ha ne kumuwopa ayo yawele na mong'ho na ng'weso hafungo, aho ndo koweza kumsukula vinhu vya heye.
MAR 3:28 “Ena ndanguwalonjelani ndikomya, Nguluwi kowosela gehile gawo geng'ha na kukovula kwa hewo kweng'ha,
MAR 3:29 ila yalingumkovula Muhe Yelile, ayu hokusilwa gehile ga heye ng'oo, kwa vila kawifya, kana wihe wa mazuwa gose.”
MAR 3:30 Yesu nakalonga ago, kwa vila nawali womlonga “Kana vijeni vihile.”
MAR 3:31 Hamba mayake Yesu na wang'holoze nawoya ahala honhu, hoyali yolangusa Yesu, nawema kunze, nawamlajiza munhu yenjile mng'handa yakamcheme.
MAR 3:32 Wanhu nawali wamemile kwa heye. Lelo wanhu nawamlonjela, “Mayako na wang'holozo wa kunze wangukupala hegwe.”
MAR 3:33 Yesu nakamlonjela, “Mayangu na wang'holozangu ndo whaani?”
MAR 3:34 Aho nakawalola awala wekale ahala honhu, nakalonga, “Mlole! Awa ndo mayangu na wang'holozangu.
MAR 3:35 Munhu yoneche yawelingudita goyalingugana Nguluwi ayo ndo mng'holozangu na lumbulyangu na mayangu.”
MAR 4:1 Yesu nakaluka kuwalangusa wanhu hafungo mwa ilamba. Wanhu wenji nawammemelela mbaka naimgana yenjile mitumbwi na kikalisa. Wanhu weng'ha nawali wekale musangalaza hafungo mwa ilamba.
MAR 4:2 Nayali yowalangusa menji kwa nhelo, na kuli malanguso ga heye nakawalonjela,
MAR 4:3 “Mhulichize, mnyalaji nakaluta kunyala nyhadikwa.
MAR 4:4 Loyali yonyala nyhadikwa, zinji nazigwa mnzila, videje vyuya vidobola vilya.
MAR 4:5 Zinji nazigwa honhu hawele na italawe, hawele hela misanga minji. Nazota himahima kwa vila misanga najali michefu.
MAR 4:6 Isanya lolilawile, zilakala na kwa vila mizabi najali mchanya mchanya hela, zikala.
MAR 4:7 Zinji nazigwa hali migodi ja miwa, na jila miwa jikula zipilinjila zila nyhadikwa nazo hazilelile nyhule.
MAR 4:8 Ila zinji nazigwa hali misanga jinojile, zota zikula zilela imwe mala makumi gadatu, na imwe mala makumi sita na imwe mala miya.”
MAR 4:9 Yesu nakawalonjela, “Yawele na makutu ga kuhulika na yahuliche.”
MAR 4:10 Yesu vyoyaponile yeka, wamwe wa wala wamhuliche nawamlutila hamwe na wala kumi na weli, nawamuuza mbuli ya ayo nhelo.
MAR 4:11 Na heye nakawalonjela, “Hemwe mpegwa kuuzela uviso wa undewa wa Nguluwi, ila wanji wala wawele kunze wolonjelwa chila chinhu kwa nhelo,
MAR 4:12 leka, “ ‘Walole ng'hatu, ila waleche kona. Wahuliche ng'hatu, ila waleche kuvizela. Nawahadite ahyo, wahamhiluchile Nguluwi, na heye yahawosele gehile ga hewo.’ ”
MAR 4:13 Hamba Yesu nakawalonjela, “Ndaze, hemwe hamuizelele nhelo ayi? Modita ndaze lelo, kuizela nhelo yoneche yila?
MAR 4:14 Mnyalaji kangunyala ulonzi wa Nguluwi.
MAR 4:15 Wanhu wanji ndo kota zila nyhadikwa zinyaligwe mnzila hawele ulonzi hounyaligwe. Ila bahala du lowohulika, Limazoga lyuyaga na kusa ulonzi awo unyaligwe mgati mwa hewo.
MAR 4:16 Wanhu wanji ifanda kota nyhadikwa inyaligwe hali italawe. Baho du lowouhulika awo ulonzi, hubochela kwa kusangalala ng'hatu.
MAR 4:17 Ila hambe uwenjile na kuwa na mizabi mgati mwa hewo, hulutilila kibatilila hado hela, na mhela wa ugayo ama wihe houlawila kwa mbuli ya ulonzi awo, baho wangugozola.
MAR 4:18 Wanhu wanji ndo kota zila nyhadikwa zigwile hali migodi jiwele na miwa. Ahyo ndo kiwhana na wanhu wala walinguhulika awo ulonzi,
MAR 4:19 ila lunhwinhwi lwa isi ino na kunojezwa na lufufu na maya kuwenjila na kuwifyanga ulonzi awo, nawo haulela mafuza.
MAR 4:20 Ila wanji ifanda kota zila nyhadikwa zinyaligwe kuli misanga jinojile. Awa wohulika ulonzi awo, woubochela, wolela mafuza, wanji mala makumi gadatu, na wanji mala makumi sita, na wanji mala miya imwe.”
MAR 4:21 Yesu nakalonga kahi, “Ndaze, wanhu nawawesaga chenje na kigala mng'handa na kugubika na chidoto ama kuwika mlukweme? Hebu! Nawawikaga honhu ha kuwichila chenje.
MAR 4:22 Chila chinhu chivisigwe chowichigwa hazelu na chila chinhu chigubikwe chogubuligwa.
MAR 4:23 Ahyo, yawele na makutu ga kuhulika yahuliche.”
MAR 4:24 Nakawalonjela kahi, “Mhulichize goya chomhulika! Chipimilo chichila chomlinguwapimila wanhu wanji ndo chicho Nguluwi kowapimila namwe, kahi mokonjezelwa ng'hatu.
MAR 4:25 Yawele na chinhu kopegwa na chinji. Heye yawele hela chinhu, na chila choyojesa kanacho choholigwa.”
MAR 4:26 Yesu nakalonga, “Undewa wa Nguluwi ufanda kota hino, munhu nakanyala nyhadikwa kumgunda.
MAR 4:27 Nechilo kanguwasa na nemisi kangulola na nyhadikwa zangulutilila kukula, ila heye havizelele chilingukoleka.
MAR 4:28 Misanga jangudita mizuchila kukula na kulela mafuza, mwaluko kuzuka mahamba madeche, hamba liso na mwiso nyhule mgati mwa liso.
MAR 4:29 Aho wone nyhule ipye, munhu ayo kokwaluka kuhola chimaje cha kebenela kwa vila mhela wa mbena ufika.”
MAR 4:30 Yesu nakawauza, “Tuuwhanize Undewa wa Nguluwi na chinhu chachi? Tudamle kwa nhelo yachi?
MAR 4:31 Ufanda kota hino, munhu nakahola nyhadikwa ya haladali iwele ndodo ng'hatu kusinda zeng'ha na kuinyala mmisanga.
MAR 4:32 Mhela udo hela, yokota na kuwa igodi likulu kusinda migodi jeng'ha kumgunda. Nhagala ziwaga ng'hulu videje vya kuulanga vyuyaga kuzenga vimvulila vyawo mlubehelo lwa nhagala za alyo igodi.”
MAR 4:33 Yesu nakawadamlila usenga wa heye kwa nhelo nyinji, nakadamla na hewo kota vila vyowawezile kuhulika.
MAR 4:34 Heye Yesu nahayali yolangusa chinhu ne kuwika nhelo, ila wone yawe hamwe na walanguswa wa heye, nayali yowatang'hulila goyalonjile.
MAR 4:35 Isanya vyoliswele, Yesu nakawalonjela awala walanguswa wa heye, “Tuloche kumwambu mwa ilamba.”
MAR 4:36 Lelo nawawaleka wanhu wamemile, walanguswa nawenjila amo kuli itumbwi, nakwali na mitumbwi jinji aho.
MAR 4:37 Baho du nakwali na mbeho, na kutiguka kwa mazi kuli ilamba, itumbwi nalyaluka kumema mazi.
MAR 4:38 Heye Yesu nakawasa yawichile mutwi mchegamo, awala walanguswa wamwinula wamlonjela, “Mlangusa, ndaze hulingona kota hetwe tobagama kwa mazi?”
MAR 4:39 Lelo nakenuka kailonjela yila mbeho, “Nyamalile!” Vivila nakailonjela nhigu ya ilamba, “Tulu! Nyamalile!” Baho mbeho nainyamalila na nakwali tulu.
MAR 4:40 Yesu nakawalonjela awala walanguswa wa heye, “Lekachoni mwangudumba? Ndaze, mng'hali hela makundo?”
MAR 4:41 Na hewo nawadumba heko walonga, “Ayu munhu wachi lelo, mbaka nhigu na mbeho vyangumuhulichiza?”
MAR 5:1 Yesu na walanguswa wa heye nawafika kuli isi ya Wagelasi, kumwambu mwa ilamba lya Galilaya.
MAR 5:2 Baho du Yesu vyoyalawile kuli itumbwi nakating'hana na munhu yawele yochikala kuwele na vilaga. Ayo munhu nayali na chijeni chihile.
MAR 5:3 Nayali yochikala kuli vilaga, nakwali kuduhu munhu yajezile kumhejelela yamibate yojeza kumkoweleza na minyololo.
MAR 5:4 Mala nyinji nawajeza kumkoweleza minyololo moko na magulu, nakadumulaga na kusa chuma chowamkoweleze nalyo. Ayu munhu nayali na mong'ho ng'hatu nakwali kuduhu munhu wa kumibata.
MAR 5:5 Nemisi na nechilo nayali yochikala kuli vilaga mchidunda yotowa iyowe na kitemangatemanga kwa maganga.
MAR 5:6 Loyamuwene Yesu kwa kutali, nakambilimila, kenamiza.
MAR 5:7 Nakalonga kwa lizi ng'hulu, “Kuna choni na heni, hegwe Yesu Mwana wa Nguluwi yawele kuchanya? Kwa itagwa lya Nguluwi ndangukulanda uleche kungaza!”
MAR 5:8 Nakalonga ahyo kwa vila Yesu nayali yamlonjele, “Chijeni chihile yamlawe munhu ayo.”
MAR 5:9 Yesu nakamuuza, “Itagwa lyako whaani?” Na heye nakedichila, “Itagwa lyangu chilundo cha wamizi, mina hetwe twa wenji.”
MAR 5:10 Vijeni vimdedeza Yesu yaleche kuviwinga avyo vijeni mli isi yila.
MAR 5:11 Nakwali na lung'hongola lukulu lwa migubi jidimigwa kuli chidunda.
MAR 5:12 Ahyo, vila vijeni vimlanda, “Utugale kuli ajo migubi, tujinjile.”
MAR 5:13 Yesu nakavikundiza, avyo vijeni vihile, navijinjila jila migubi. Lung'hongola lweng'ha lwa migubi jifichile elufu mbili najifiduka mnyenje mwa chidunda na kwinjila milamba, najibagama.
MAR 5:14 Wadimi wa ajo migubi nawabilima, nawadamla mbuli azo kuli miji na kumigunda. Wanhu nawoya kulola galawile.
MAR 5:15 Wala wanhu navyowamlutile Yesu, nawamona yula munhu yawele na chijeni yekale hanyi, yawele na luhala lwake na yavalile nguwo, na wala wanhu nawadumba.
MAR 5:16 Awala wanhu vyowagawene gala gogalawile kwa munhu yawele na chijeni na ajila migubi,
MAR 5:17 nawamlonjela Yesu yoche kuli isi ya hewo.
MAR 5:18 Yesu navyoyali yokwinjila kuli itumbwi, yula munhu yosigwe vijeni nakamlanda yamkundize kulutasa.
MAR 5:19 Yesu nakalema, nakamlonjela, “Ulute kaye kwako, kawalonjele wang'holozo mbuli zeng'ha ziwele Mkulu zoyakuditile na vyoyakonele isungu.”
MAR 5:20 Ayula munhu nakaluta, nakaluka kudamla kuli muji wa Dekapoli mbuli zeng'ha Yesu zoyamditile, wanhu nawekala webubuwale.
MAR 5:21 Yesu nakaloka kahi mwambu iyage ya ilamba kwa itumbwi. Lung'hongola lwa wanhu nalwikungajiza kumwando hake, na heye nayali yemile hafungo mwa ilamba.
MAR 5:22 Aho Jailo yawele chilongozi wa sinagogi nakoya, loyamuwene Yesu nakafugama hali magulu ga Yesu.
MAR 5:23 Nayali yolonga yolanda, “Mhinza wa heni mdodo kangutamika behi kubagama. Dedede ndangulanda tuche kaye ukamuwichile moko yaloholigwe yawe mkomu.”
MAR 5:24 Yesu nakoka hamwe na Jailo. Wanhu wenji nawamuwinza na kumema chila ubanzi.
MAR 5:25 Nakwali na mdala, nayali na utamwa kwa kulawa danda miyaka kumi na mili.
MAR 5:26 Mdala ayu nakagazika lukami, nakawalutila wateleka mikwandi wenji ne kuloholigwa hebu. Nakataga sendi nyinji ne ulohozi, ila nakalutilila kugazika.
MAR 5:27 Na vyoyahuliche goyalingudita Yesu, ndo nakaluta na ahyo nakafyela kuli lung'hongola lwa wanhu wawele hamwe na Yesu na kudoliza nguwo ya heye.
MAR 5:28 Nakadita ahyo, mina nayali yolonga yaliyeka, “Wone ndibate nguwo ya heye, ndowa mkomu.”
MAR 5:29 Nakebata nguwo ya Yesu, na danda yoyali ilawa bahala du nakona naileka kulawa. Na heye nakehulika mlukuli lwake kawa mkomu.
MAR 5:30 Yesu nakavizela, nakona mong'ho wa heye uwa udo, nakahinduka nakauza, nakalonga, “Whaani yebate nguwo ya heni?”
MAR 5:31 Walanguswa nawamwidichila, nawalonga, “Ulole wanhu vyowamemile, lekachoni kwanguuza whaani yakibate?”
MAR 5:32 Ila Yesu nakalutilila kulola yamone ayo yaditile hino.
MAR 5:33 Aho yula mdala yavizelele choni nachimlawile, nakaluta yokakama kuno yodumba, nakafugamila mmagulu ga Yesu, nakamlonjela yokomya gose galawile.
MAR 5:34 Yesu nakamlonjela, “Mhinza, makundo ga hegwe gakulohola. Ulute goya, uwe mkomu ulawe ng'hatu utamwa wa hegwe.”
MAR 5:35 Yesu navyoyali yang'hali yolonga, wanhu nawoya kulawa hakaye kwa Jailo chilongozi wa ng'handa ya kusalila, nawamlonjela, “Mina mhinza wa hegwe nakabagama. Uleche kumtunya mlangusa.”
MAR 5:36 Ila Yesu ne kulola chowalonjile nakamlonjela Jailo chilongozi wa sinagogi, “Uleche kudumba, ukunde hela.”
MAR 5:37 Yesu hamkundize munhu yoneche kulutasa, ila Petili na Yakubu na Yohani mng'holoze Yakobo.
MAR 5:38 Nawafika kaye kwa Jailo chilongozi wa sinagogi, Yesu nakawona wanhu wapunganiche nakahulika kuyowa na chililo na kulombocheza kwinji.
MAR 5:39 Yesu nakenjila mng'handa nakawalonjela wanhu, “Lekachoni mwangupunganika? Lekachoni mwangulila? Mwana habagame kawasa hela.”
MAR 5:40 Wanhu nawamseka Yesu, ahyo nakawalavya wose kunze, nakawahola mhaza na mayake mhinza yula, na wala walanguswa wa heye wadatu, nawenjila kuchihengo kowawichile lukuli lwa mhinza.
MAR 5:41 Yesu nakamibata moko, nakamlonjela ayula mhinza yabagame nakalonga, “Talita, kumi,” Mina, “Muhinza ndangukulonjela, ulilimche!”
MAR 5:42 Baho mhinza nakalilimka, nakaluka kujendajenda, nayali na miyaka kumi na mili, aga logalawile, wanhu weng'ha nawekala wabubuwale lukami.
MAR 5:43 Yesu nakawalemeza wanhu waleche kumlonjela munhu. Hamba nakawalonjela wamgalile chilyo ayula mhinza yalilimche yalye.
MAR 6:1 Yesu nakalawa koyali, nakaluta hakaye hake Nasaleti koyalawile, yelongoze na walanguswa wa heye.
MAR 6:2 Lolifichile Zuwa lya Kwesela, nakaluka kuwalangusa mng'handa ya kusalila. Nakwali na wanhu wenji na nawali wohulichiza na wekala wabubuwale, weuza walonga, “Nakagalavya kohi aga gose? Kahi luhala lwachi loyapegwe ayu? Kahi, kangudita ndaze vinduzanduza avi vyoyalingudita?
MAR 6:3 Hambi ayu hawele selemala, mwana wa Maliya mng'holoze na Yakubu na Yose na Yudasi na Simoni? Ndaze walumbuze hawalingikala baha na hetwe?” Hamba nawambeza!
MAR 6:4 Yesu nakawalonjela, “Waloli wa Nguluwi watogolagwa kweng'ha kula, ila hawatogolagwa hakaye hawo na kwa wang'holozawo.”
MAR 6:5 Yesu nahaditile vinduzanduza hala honhu, ila nakawawichila moko watamwa wachefu, na kuwalohola.
MAR 6:6 Yesu nakabubuwala kwa vila wanhu awa nawalema kukunda. Hamba Yesu nakavijendela vila vijiji vya habehi yowalangusa wanhu.
MAR 6:7 Yesu nakawachema awala walanguswa kumi na weli, nakawalajiza weliweli, nakawapa ludali lwa kuwinga vijeni vihile.
MAR 6:8 Kawalajiza kalonga, “Mleche kuhola chinhu komluta, mleche kuhola chilyo ne sendi ne mhako, mhole ng'hweku yeka.
MAR 6:9 Mvale makwamba, ila mleche kuhola igwanda lya keli.”
MAR 6:10 Kahi nakawalonjela, “Honeche hombocheligwa, mikale hali ng'handa yiyo mbaka homkuka honhu aho.
MAR 6:11 Honhu honeche, wone wanhu wolema kuwabochela ne kuhulika gomlangusa, muche mkung'hune nhimbwisi mmagulu genu iwe ulolezi wa kuwapanjila hewo.”
MAR 6:12 Awala walangusa nawoka na kuwadamlila wanhu Mbuli Inojile na kuwalonjela wamgalamchile Nguluwi.
MAR 6:13 Nawalavya vijeni vinji na wawabakaliza mafuta watamwa waloholigwa.
MAR 6:14 Helodi mndewa wa Galilaya nakahulika goyalingudita Yesu, mina lutogo lwake nalwenela honhu heng'ha. Wanhu wamwe nawali wolonga, “Yohani Mbatiza kazilipuka, ndo mina mong'ho uno wangukola mijito mgati mwake.”
MAR 6:15 Wanhu wanji nawali wolonga, “Munhu ayu ndo Eliya,” na wanji nawali wolonga, “Ayu ndo mloli wa Nguluwi, kota awala waloli wa katali.”
MAR 6:16 Mndewa Helodi vyoyahuliche, nakalonga, “Ayo ndo Yohani mbatiza yondimdumule mutwi, nakazilipuka!”
MAR 6:17 Aho hamwande heye Helodi nakalajiza Yohani yebatigwe, yahindilwe mchinweng'ho, nakadita hino kwa vila nakamhesa Helodiya, nayawele mdala wa Filipo. Filipo nayali mng'holoze Helodi.
MAR 6:18 Yohani Mbatiza nayali yomlonjela Helodi, “Haiwa goya kuhesa mdala wa mng'holozo Filipo.”
MAR 6:19 Helodiya nakawika ching'honi mnhumbula, mbaka yamkopole Yohani, lelo nayali yolemwela kokwaluka ndaze!
MAR 6:20 Helodi nayaliyomdumba Yohani, kwa vila nakavizela Yohani nayali Yelile na yatanganiche, ahyo nayali yomwamila, waleche kumdita vibi. Helodi nakagana kumhulichiza Yohani, hanga loyamhuliche, nakawa na masinzo.
MAR 6:21 Zuwa limwe Helodiya nakapata mhumu. Zuwa lya kudita kukumbuchila kwa zuwa lyoyapondigwe Helodi, naloyawaditile mnvina wawele wakulu kwa heye na wakulu wa wamizi na wakulu weng'ha wawele wochikala kuli isi ya Galilaya.
MAR 6:22 Mhinza wa Helodiya nakenjila mng'handa na kuvina goya, awala wakulu na Helodi na wajenzi wanji nawanojezwa. Mndewa Helodi nakamlonjela ayula mhinza, “Undande chinhu choneche choulingugana na heni ndokupa.”
MAR 6:23 Kahi na kwa ulonzi winji wa kilaha, nakamlonjela, “Ndangilaha kota choneche choundanda, ndokupa, mbaka nusu ya undewa wa heni.”
MAR 6:24 Aho yula mhinza nakalawa kunze kumuuza mayake, “Ndande choni?” Na heye nakamwidichila, “Ulande mutwi wa Yohani Mbatiza.”
MAR 6:25 Mhinza yula nakamhiluchila mndewa yobilima na kumlonjela, “Ndangulanda ndigalile sambi baha mchisaye mutwi wa Yohani Mbatiza.”
MAR 6:26 Mndewa Helodi nakesinza ng'hatu, ila kwa vila nakelaha, hali wala wajenzi wezile mchilyo, nahamlemele hebu.
MAR 6:27 Lelo mndewa Helodi nakawalajiza mwamizi yakegale mutwi wa Yohani. Mwamizi nakaluta, nakumdumula mutwi Yohani mla mchinweng'ho,
MAR 6:28 nakegala mutwi wa Yohani Mbatiza uwichigwe mchisaye, nakamha mhinza na mhinza nakamigalila mayake.
MAR 6:29 Walanguswa wa Yohani lowahuliche mbuli ayo, nawaluta kuuhola mtufi wa Yohani, wazakuutila mchilaga.
MAR 6:30 Watumigwa nawahiluka, nawekungajiza hamwe hali Yesu, nawamlonjela geng'ha gowaditile na kulangusa.
MAR 6:31 Yesu nakawalonjela, “Tulute tuliyeka honhu ha uviso tukesele tandi.” Nakalonga ahyo kwa vila nakwali na wanhu wenji lukami wawele wofika aho na kuka mbaka Yesu na walanguswa wa heye nahawawele na mhumu wa kulya chilyo.
MAR 6:32 Lelo nawoka waliyeka kwa itumbwi, nawaluta honhu hawele hela wanhu.
MAR 6:33 Ila wanhu wenji nawawona woluta, nawawazela. Lelo wenji nawalawa chila muji na kubilimila kuko kowalutile Yesu na walanguswa wa heye, nawawalongola kufika.
MAR 6:34 Lowaduliche kumwani, Yesu nakona lung'hongola lwa wanhu, nakawonela isungu, kwa vila nawali kota ming'holo jilihela mdimi. Nakaluka kuwalangusa mbuli nyinji.
MAR 6:35 Nemisi naipuluta, walanguswa wamlutila Yesu, nawamlonjela, “Honhu aha twa kisolo, na sambi lyangutita.
MAR 6:36 Igana uwalaje wanhu walute kumigunda na kuli vijiji vili habehi, wakagule vilyo.”
MAR 6:37 Ila Yesu nakawalonjela, “Muwape hemwe ndiya.” Na hewo nawamuuza, “Lelo tulute tukagule mibumunda kwa sendi denali miya mbili zihejile sendi za kuhega myezi nane, na kuwegalila chilyo?”
MAR 6:38 Yesu nakawauza, “Mwanajo mibumunda jilinga? Mlute mkalole.” Navyowalolile, nawamlonjela, “Jabaha mibumunda jihano na somba mbili.”
MAR 6:39 Yesu nakawalajiza walanguswa wawalonjele wanhu weng'ha wekalise vilundo honhu hawele na misolo midodi.
MAR 6:40 Na hewo nawekalisa kuli vilundo vya wanhu miya imwe miya imwe na vya wanhu makumi gahano makumi gahano.
MAR 6:41 Hamba Yesu nakahola ajila mibumunda jihano na somba mbili, nakalola kilanga, nakatambichiza. Nakamogola nakawapa walanguswa wa heye wawagawile wanhu. Na zila somba mbili nazo nakawapa weng'ha.
MAR 6:42 Wanhu wose nawalya, weguta.
MAR 6:43 Walanguswa nawakungajiza chilyo chisigale, mibumunda na somba, navimema vidoto kumi na vili.
MAR 6:44 Walume nawadile ajo mibumunda nawali wafichile elufu zihano.
MAR 6:45 Baho Yesu nakawalonjela walanguswa wenjile mli itumbwi wamlongole walute Betisaida, kumwambu mwa ilamba, mhela heye yolulaga lung'hongola lwa wanhu.
MAR 6:46 Yesu vyoyawalajile wala wanhu, nakaluta kuchidunda kumlanda Nguluwi.
MAR 6:47 Loifichile matinazo, itumbwi nalyali hagati ha ilamba, na heye Yesu nayali yaliyeka hafungo mwa ilamba.
MAR 6:48 Lelo nakawona walanguswa wa heye wochitunya kutowa mitela ja itumbwi, kwa vila mbeho nayali iputa. Behi na kubwemwenzuka, Yesu nakawawinza akuno yojenda mchanya mmazi, nakagana kuwapuluta.
MAR 6:49 Ila lowamuwene yojenda hali mazi, nawejesa idimu, nawatowa iyowe.
MAR 6:50 Mina weng'ha lowamuwene nawadumba lukami. Baho Yesu nakalonga na hewo, “Msindamale, nda heni. Mleche kudumba!”
MAR 6:51 Hamba nakakwina mitumbwi mowawele, na mbeho inyamalila. Walanguswa nawabubuwala ng'hatu,
MAR 6:52 kwa vila nawali wang'hali kuvizela ulanguso wa jila mibumunda. Luhala lwa hewo nalung'hali lububuwale.
MAR 6:53 Nawaloka ilamba, nawafika isi ya Genesaleti, nawemiza itumbwi.
MAR 6:54 Lowalawile mli itumbwi wanhu nawamzela Yesu baho.
MAR 6:55 Lelo himahima nawazunguluta isi yila yeng'ha, nawaluka kuwahola watamwa wawasile mmicheka jawo, nawawegala chila honhu kowahuliche Yesu ka kuko.
MAR 6:56 Chila honhu Yesu koyalutile, ku vijiji ama kuli miji ama kuli migunda, wanhu nawawawika watamwa mluga, nawamlanda wadolize lupembo lwa nguwo ya heye. Na weng'ha wadolize nawaloholigwa.
MAR 7:1 Mafalisayo wamwe na walangusa wa malajizo ga Musa, nawalawile Yelusalemu, nawating'hana kumwando kwa Yesu.
MAR 7:2 Nawawona kota wamwe wa walanguswa wa heye wowawele wolya chilyo na moko gakokomoche, mina ne kuhovuga moko.
MAR 7:3 Mina Mafalisayo na Wayahudi wanji weng'ha, nawebatililaga gowalangusigwe na wasekulu wawo, hawalyaga chinhu ne kuhovuga moko gawo goya.
MAR 7:4 Kahi, hawalyaga chinhu choneche kulawa kuli soko, mbaka wachihovuje tandi. Kahi nawalangusigwa kulawa katali kota vila mbuli ya kuhovuga nego na vizombe na vinhu vya shaba.
MAR 7:5 Lelo Mafalisayo na walangusa wa malajizo ga Musa, nawamuuza Yesu, “Lekachoni, walanguswa wa hegwe hawalinguwinza kota ulanguso wotubochele kwa wasekulu, wangulya na moko gakokomoche?”
MAR 7:6 Yesu nakedichila, “Wahadi hemwe! Mloli wa Nguluwi Isaya nakalagula goya mbuli za hemwe vyoyandiche, “Nguluwi nakangulonga, ‘Wanhu awa, wangufugamila kwa ulonzi hela, Ila mnhumbula mwao, wa kutali na heni.’ ”
MAR 7:7 Kufugamila kwa hewo kwiha, mina wangulangusa mbuli za wanhu, kota Malajizo ga Nguluwi!
MAR 7:8 “Hemwe mwanguleka ilajizo lya Nguluwi, na mwangibatilila gomlanguswe na wanhu.”
MAR 7:9 Yesu nakalutilila kulonga, “Hemwe mna nzila ya usugu kwa kuleka malajizo ga Nguluwi, kwa chiwalo cha kuwinza mabochelo ga hemwe!
MAR 7:10 Mina Musa nakalajiza, wahulichize mhaza na mayako za hemwe, na yalingumliga mhaza ama mayake, imgana yabagame.
MAR 7:11 Ila hemwe, mwangulangusa, ‘Wone munhu yawe na chinhu cha kumtanza mhaza wa heye ama mayake, ila yolonga kota chinhu acho ndo Kolibani’ izeleche, ndolendole kwa Nguluwi,
MAR 7:12 lelo hailinguganigwa kahi kumtanza mhaza wa heye ama mayake.
MAR 7:13 Ahi ndo vyomlingubeza ulonzi wa Nguluwi kwa chiwalo cha ulanguso womlingibochelela. Kahi mwangudita mbuli nyinji kota zino.”
MAR 7:14 Hamba Yesu nakaluchema lula lung'hongola lwa wanhu, nakawalonjela, “Mnyhulichize mweng'ha, na mvizele.
MAR 7:15 Kuduhu chinhu chilingwinjila mgati mwa munhu kulawa kunze chilingumdita munhu mwavu. Ila chilingulawa mgati mwa munhu ndo chilingumdita munhu yawe mwavu.”
MAR 7:16 Nayawele na makutu ga kuhulika, nayahuliche!
MAR 7:17 Loyalulechile lula lung'hongola lwa wanhu na kwinjila mng'handa, walanguswa wa heye nawamlanda yawagubulile nhelo yila.
MAR 7:18 Yesu, nakawalonjela, “Ndaze, na hemwe hamvizelele? Ndaze, hamvizelele kota chinhu chilingumwinjila munhu kulawa kunze, hachimdita munhu yawe mwavu,
MAR 7:19 kwa vila hachilingumwinjila munhu mnhumbula, ila kumunda, na hamba cholavigwa kunze kucholo?” Kwa kulonga hino Yesu nakavikundiza vilyo vyeng'ha.
MAR 7:20 Nakalutilila kulonga, “Chilingulawa mgati mwa munhu ndo vilingumdita munhu yawe mwavu.
MAR 7:21 Mina kulawa mgati, mnhumbula ya munhu mwangulawa majesa gehile, ung'hondwa na uhizi, na kuboka,
MAR 7:22 ubuhu na wihe na udesi na upoka na maya na kidaya na uhesi na maligo.
MAR 7:23 Aga gesa, gangulawa mgati mwa munhu, ndo galingumdita munhu yawe mwavu.”
MAR 7:24 Hamba Yesu nakoka aho, nakaluta wilaya ya Tilo. Ako nakenjila hali ng'handa imwe na haganile munhu yavizele, ila nahawezile kivisa.
MAR 7:25 Mdala yumwe nayali na mwana mhinza yawele na chijeni chihile, nakahulika mbuli za Yesu. Lelo nakoya kamfugamila na kitoza kumwando kwa magulu ga Yesu.
MAR 7:26 Mdala nayali Mgilichi yapondigwe Silofoinike kuli isi ya Siliya, nakamlanda Yesu yamlavye mwanage chijeni chihile.
MAR 7:27 Yesu nakalonga, “Tandi wana wegute, kwa vila hainojile kuhola chilyo cha wana na kutozela mibwa.”
MAR 7:28 Ila ayula mdala nakedichila, nakalonga, “Kukomya, Mkulu, ila na mibwa wone jikale hasi ha chisaga jiwaga jilya usanyangwa wa wana.”
MAR 7:29 Yesu nakamlonjela ayula mdala, “Kwa chiwalo cha ulonzi awo, ulute kaye. Chijeni nachimlawa mhinza wa hegwe!”
MAR 7:30 Lelo nakaluta kaye, nakamfika mwanage yawasile mchinhanda mkomu, chijeni chimlawile.
MAR 7:31 Yesu nakoka wilaya ya Tilo, nakakolela Sidoni, nakafika kuli ilamba lya Galilaya, nakakolela muji wa Dekapoli.
MAR 7:32 Wanhu nawamigala munhu yohambe yalonje na kuhulika, nawamlanda Yesu yamuwichile moko gake mtamwa.
MAR 7:33 Yesu nakamhola nakaluta naye kutali na wanhu, nakahola chidole nakenjiza kuli makutu, nakatema mite nakamibata umiyango.
MAR 7:34 Hamba Yesu nakalola kilanga, yolanda kwa Nguluwi aku yogugumila, nakamlonjela ayula munhu “Efata,” Mina “Ugubuche.”
MAR 7:35 Baho du makutu ga heye nagagubuka na umiyango wa heye ugonzoka nakaluka kulonga goya hela.
MAR 7:36 Yesu nakawalonjela wanhu waleche kumlonjela munhu. Ila vyoyawalemeze kuwalonjela wanhu hewo ndo kota kawalajiza kuwalonjela wanhu goyodita.
MAR 7:37 Wanhu weng'ha nawahuliche nawali wabubuwale, wolonga, “Kangudita geng'ha goya, kanguwagubula meho wohambe walole, na wohambe walonje, wangulonga!”
MAR 8:1 Mhela awo, ikugusi lya wanhu wenji naliting'hana kahi, chilyo nachowawele nacho nachimala. Lelo Yesu nakawachema walanguswa wa heye, na kuwalonjela,
MAR 8:2 “Ndanguwonela isungu wanhu awa, kwa vila natikala hamwe mazuwa gadatu, na chilyo chowawelenacho nachimala.
MAR 8:3 Wone ndiwalonjele walute kaye ne kulya, wanji wozilika mnzila. Mina wanji nawalawa kutali ng'hatu.”
MAR 8:4 Walanguswa nawamuuza, “Hano twa kisolo, topata kohi chilyo cha kuhega kwa wanhu weng'ha awa?”
MAR 8:5 Yesu nakawauza, “Mwanajo mibumunda jilinga?” Hewo nawamwidichila, “Saba.”
MAR 8:6 Yesu nakawalonjela wanhu wekalise hanyi, nakahola ajila mibumunda saba, kata malumbo Nguluwi, nakamogola, nakawapa walanguswa wawape wanhu, na walanguswa wadita hiho.
MAR 8:7 Nakwali na tusomba tuchefu, Yesu nakahola, kata malumbo Nguluwi, nakawapa walanguswa wawamogolele wanhu walye.
MAR 8:8 Wanhu weng'ha nawalya, weguta, nawali wanhu wafichile elufu zine. Walokoteza usanyangwa, navimema vidoto saba.
MAR 8:9 Na hewo wadile nawali wanhu elufu zine. Yesu nakawalaga,
MAR 8:10 na baho nakakwina mli itumbwi hamwe na walanguswa wa heye, nakaluta kuli wilaya ya Dalimanuta.
MAR 8:11 Mafalisayo nawoya kwa Yesu, nawaluka kilewa na heye. Nawagana kumjeza Yesu, yawalajile ulajilo kulawa kilanga.
MAR 8:12 Yesu nakesinza mnhumbula, nakalonga, “Lekachoni lulelo alu lwangugana ulajilo? Hebu! Ndanguwalonjela ndikomya! Lulelo alu halupegwa ulajilo woneche wula.”
MAR 8:13 Nakawaleka, nakenjila kahi mitumbwi, nakaluka majendo kuluta kumwambu mwa ilamba.
MAR 8:14 Walanguswa nawasemwa kigala mibumunda minji mitumbwi lyawo, nawahola limwe hela.
MAR 8:15 Yesu nakawalonjela, “Milolele na usaso wa Mafalisayo na usaso wa Helodi.”
MAR 8:16 Walanguswa naweuza waliyeka walonga, “Kangulonga hino kwa vila nahatuholile mibumunda?”
MAR 8:17 Yesu nakagazela majesa gawo, nakawalonjela, “Lekachoni mwangijesa vyomlihela mibumunda? Ndaze, mng'hali kuvizela? Ndaze, nhumbula za hemwe zilemwela kuvizela?
MAR 8:18 Ndaze, mna meho na hamlingulola? Mna makutu na hamlinguhulika? Hambe mkumbuche
MAR 8:19 mhela hondiwamogolele mibumunda jihano, kwa wanhu elufu zihano, na mlokoteza vidoto vilinga vya upumunizo?” Nawedichila, “Kumi na vili.”
MAR 8:20 Yesu nakawauza, “Na ahala londiwamogole mibumunda saba, nalowadile wanhu elufu zine, namlokoteza vidoto vilinga vya upumunizo?” Wedichila, “Saba.”
MAR 8:21 Lelo nakawauza hewo, “Mng'hali hamvizelele?”
MAR 8:22 Nawoya Betisaida, ako wanhu nawamigala munhu yohambe yalole kwa Yesu na kumlanda yamibate.
MAR 8:23 Yesu kamibata moko ayula munhu, nakaluta naye kutali na ahala honhu, nakamtemela mite kumeho, hamba Yesu nakawika moko kumeho kwa heye kamuuza, “Ndaze, kwangona choni?”
MAR 8:24 Yula munhu nakalola kuchanya na kulonga, “Ena, ndanguwona wanhu wokoneka kota migodi jijenda.”
MAR 8:25 Yesu nakahiluchila kuwika moko kumeho kwa munhu yula. Sambi nakagubula ng'hatu meho, meho gake gahiluka kulola kota katali. Chila chinhu nayali yochona goya.
MAR 8:26 Yesu nakamhilusa kaye akuno yomlonjela, “Uleche kuhiluka kuli chijiji.”
MAR 8:27 Yesu na walanguswa wa heye nawaluta kuli vijiji habehi na Kaisalia Filipo. Nalowawele mnzila, Yesu nakawauza walanguswa wa heye, “Mndonjele, wanhu wangulonga heni nda whaani?”
MAR 8:28 Nawamwidichila, “Wanji wangulonga hegwe kwa, Yohani Mbatiza, wanji wangulonga kwa Eliya na wanji kahi wangulonga hegwe kwa yumwe wa waloli wa Nguluwi.”
MAR 8:29 Yesu nakawauza!, “Na hemwe ndaze, mwangulonga heni nda whaani?” Petili nakedichila, “Hegwe ndo Kilistu Mlohozi yahaguligwe na Nguluwi.”
MAR 8:30 Hamba Yesu nakawalemeza, “Mleche kumlonjela munhu kota, heni nda whaani.”
MAR 8:31 Hamba Yesu nakaluka kuwalangusa walanguswa wa heye, “Mwana wa Munhu koganigwa kugazigwa na kulemigwa na wakulu na watambika wakulu na walangusa wa malajizo ga Musa. Kota kokopoligwa na logopuluta mazuwa gadatu kulawa hoyabagame, kozilipuka.”
MAR 8:32 Yesu nakawalonjela mbuli ayi hazelu. Aho, Petili nakamhola hafungo, nakaluka kumng'hanuchila.
MAR 8:33 Ila Yesu nakahinduka, nakawalola walanguswa wa heye, nakamng'hanuchila Petili yolonga, “Uche kwa heni Limazoga! Majesa ga hegwe hagawele ga Chinguluwi ila ndo ga chiwunhu hela.”
MAR 8:34 Hamba nakachema ikugusi lya wanhu hamwe na walanguswa wa heye, na kuwalonjela, “Wone munhu yoneche yogana kumbinza heni, imgana yeleme yuye, yahole msalaba wa heye, yambinze.
MAR 8:35 Wone munhu yogana kulohola ukomu wa heye, kowajiliza, ila munhu yalingwajiliza ukomu wa heye, kwa chiwalo cha Mbuli Inojile, koulohola.
MAR 8:36 Ndaze, munhu kowa na choni chinojile wone koihalila isi yeng'ha na kwajiliza ukomu wa heye? Ndita hebu!
MAR 8:37 Kuduhu ne chinhu munhu choyodita leka yauhiluse ukomu wa heye kahi.
MAR 8:38 Wone munhu yoneche kuli lulelo alu lwihile na hambe lumdumbe Nguluwi, yalingumbonela soni heni na malanguso ga heni, na heni Mwana wa Munhu ndomonela soni munhu ayo, mhela hoyokuya muli ukulu wa Mhaza wa heye hamwe na wahilisi wa kilanga welile wa Nguluwi.”
MAR 9:1 Yesu nakalutilila kuwalonjela, “Ndanguwalonjelani ndikomya, wabaha wanji bahano hotuli hawobagama ne kuwona Undewa wa Nguluwi ukuya kwa ukulu.”
MAR 9:2 Mazuwa sita logapulute, Yesu nakawahola Petili na Yakubu na Yohani, kuchanya kuchidunda chikulu waliyeka. Ako, Yesu nakagaluka kumeho hali hewo,
MAR 9:3 nguwo yoyavalile naigaluka iwa nzelu chweya, nakwali kuduhu munhu yoneche muisi aha yojeza kuidita nzelu vila.
MAR 9:4 Eliya na Musa nawawalawila, wolongasa na Yesu.
MAR 9:5 Petili nakamlonjela Yesu, “Mlangusa, inoga heko hetwe twa hano. Lelo tuzenje vibumuli vidatu, chimwe cha hegwe na chimwe cha Musa na chimwe cha Eliya.”
MAR 9:6 Heye na wayage nawadumba heko nahawavizelele cha kulonga.
MAR 9:7 Hamba nailawila ng'hungugu iwagubika, na lizi ihulikwa kulawa kuli aila ng'hungugu ilonga, “Ayu ndo Mwanangu ndimganile, mumhulichize heye.”
MAR 9:8 Baho walanguswa awo nawalola nzingo zeng'ha, ila hawamuwene ne munhu, ila Yesu yaliyeka hamwe na hewo.
MAR 9:9 Lelo nalowali wodulika kulawa kuchidunda, Yesu nakawalemeza waleche kumlonjela munhu yoneche mbuli yowaiwene, mbaka Mwana wa Munhu loyozilipuka kulawa kowabagame.
MAR 9:10 Lelo nawebata ilajizo alyo, ila hewo nawali wochilonjela ndo choni kuzilipuka kulawa kuli wabagame.
MAR 9:11 Nawamuuza Yesu, “Lekachoni walangusa wa malajizo ga Musa wangulonga igana tandi Eliya yoye?”
MAR 9:12 Heye nakawedichila, “Ena, Eliya kanguya tandi kuwika goya geng'ha. Ahyo, lekachoni lelo yandichigwa kuli Maandiko Matakatifu kota Mwana wa Munhu kogazigwa lukami na kubezigwa?
MAR 9:13 Ila ndanguwalonjelani, Eliya mina koya, na wanhu nawamditila vyowaganile, kota vyoyandichigwe kuli Maandiko Matakatifu.”
MAR 9:14 Lowawafichile wala walanguswa wanji, nawona lung'hongola lwa wanhu aho. Na wamwe wa walangusa wa malajizo ga Musa nawali wochilewa na hewo.
MAR 9:15 Bahala wanhu lowamuwene Yesu, weng'ha nawabubuwala ng'hatu, nawambilimila wakamlamse.
MAR 9:16 Yesu nakawauza walanguswa wa heye, “Mwangilewa choni na hewo?”
MAR 9:17 Aho munhu yumwe kulawa mumula mowali wanhu nakamwidichila, “Mlangusa ndimigala mwana wa heni kwa hegwe, kana chijeni chimditile yalemwele kulonga.
MAR 9:18 Wone chijeni chimwaluche, chomgwisa na kumdita yalavye ifulo kumlomo, kochijejeda mizino na kukala bee. Ndiwalonjela awa walanguswa wamlavye chijeni ila walemwela.”
MAR 9:19 Yesu nakawalonjela, “Hemwe lulelo lulihela makundo! Ndochikala na hemwe mbaka nili? Ndowemilila mbaka nili? Ndigalileni heni ayo mwana.”
MAR 9:20 Nawamigala heye kwa Yesu. Baho du, acho chijeni lochimuwene Yesu, nachimdita yawe na chinzilisa, na heye mwana nakagwa hasi, yogalawata na kulawa ifulo kumlomo.
MAR 9:21 Yesu nakamuuza mhaza wa ayo mwana, “Nakawa hino kulawila nili?” Na heye nakamwidichila, “Kulawila kuli uwana wa heye.”
MAR 9:22 “Mala nyinji chijeni nachiwaga chimgwisa mchiluli na mmazi, leka chimbagamize ng'hatu. Lelo wone ulinguweza, utonele isungu na ututanze!”
MAR 9:23 Yesu nakamlonjela, “Lekachoni kwangulonga wone ulinguweza? Mbuli yeng'ha yowa goya kwa munhu yawele na makundo.”
MAR 9:24 Aho, yula mhaza nakayowa kwa lizi, “Ndangukunda! Unhanze kwa mbuli ya kulema kukunda.”
MAR 9:25 Yesu loyawene lung'hongola lwa wanhu lukonjezeka himahima kumwando kwa heye, nakaching'hanuchila chila chijeni chihile, “Chijeni ulingumdita ayu mwana yawe yolemwela kulonga na kuhulika, ndangukulajiza, mlawe mwana ayu na uleche kumwinjila kahi.”
MAR 9:26 Aho chila chijeni nachikwiniza lizi, nachimgwisa yula mwana hasi, hamba nachimlawa. Mwana nakoneka kota mtufi, wanhu wenji nawalonga, “Nakabagama!”
MAR 9:27 Ila Yesu nakamibata moko na kumwinula, na heye nakema.
MAR 9:28 Lelo Yesu loyenjile mng'handa, walanguswa wa heye nawamuuza kwa chinyele, “Lekachoni hetwe tulemwela kulavya chila chijeni?”
MAR 9:29 Na heye nakawalonjela, “Chijeni kota achi hachilawa mbaka kwa kumlanda Nguluwi hela.”
MAR 9:30 Yesu na walanguswa nawoka nawaluta kunji kukolela Galilaya. Yesu nahaganile wanhu wavizele kota nakoya.
MAR 9:31 Kwa vila nayali yowalangusa walanguswa wa heye yolonga, “Mwana wa munhu kanguzawichigwa mmoko womkopola, kochikala mchilaga na zuwa lya kadatu kozilipuka.”
MAR 9:32 Walanguswa nahawavizelele mbuli ayo, ila nawadumba kumuuza.
MAR 9:33 Walanguswa nawoya Kapanaumu. Naloyawele mng'handa, Yesu nakawauza, “Namwali miwuza choni kula mnzila?”
MAR 9:34 Ila hewo nawanyamalila nahawamwidichile, mina mnzila nawali wochilewa kota whaani yawele mkulu ng'hatu kwa hewo.
MAR 9:35 Yesu nakekalisa hanyi, nakawachema walanguswa kumi na weli, nakawalonjela, “Yalingugana yawe wa mwaluko, igana yawe wa mwiso na yawe chitumagwa wa weng'ha.”
MAR 9:36 Hamba nakamhola mwana mdodo, nakamwimiza hagati ha hewo, nakamkumbatiza, hamba nakawalonjela,
MAR 9:37 “Munhu yoneche yombochela mwana kota ayu kwa itagwa lya heni, kangumbochela heni, na yalingumbochela heni, halingumbochela heni ndiliyeka, ila kangumbochela heye yanhumile.”
MAR 9:38 Yohani nakamlonjela, “Mlangusa, natumona munhu yumwe yolavya chijeni kwa itagwa lyako, natwe natujeza kumlemeza kwa vila heye nahawele hamwe na hetwe.”
MAR 9:39 Ila Yesu nakawalonjela, “Mleche kumlemeza,” Mina kuduhu munhu yalingudita vinduzanduza kwa itagwa lyangu, na baho koweza kulonga gehile kwa heni.
MAR 9:40 Munhu yoneche yohambe yatulemele twa hamwe.
MAR 9:41 Munhu yoneche yowapani chizombe cha mazi ga kunwa, kwa vila hemwe ndo wanhu wa Kilistu, ndangukomya holemwela hebu kupegwa ndolendole ya heye.
MAR 9:42 Yoneche yomwambuza yumwe wa awa wadodo walingung'hunda, kuwifya, igana munhu ayo kumkoweleza iganga likulu lya lwala msingo na kutozigwa kuli bahali.
MAR 9:43 Wone moko wa hegwe ukwambuze kuwifya, udumule. Inoga kwinjila kuli ukomu kuno uwele na moko umwe, kusinda uwe na moko meli na kwinjila kuli chiluli cha Jehanamu.
MAR 9:44 Amo mhiko hazifaga na chiluli chilinguwalakaza hambe chizime.
MAR 9:45 Na wone mgulu wa hegwe ukwambuze kikwang'hwala, udumule. Inoga kwinjila kuli ukomu ulihela mgulu umwe, kusinda kuwa na migulu jeng'ha mili na kwinjila kuli chiluli cha Jehanamu.
MAR 9:46 Amo mhiko zilingudakula hambe zife na chiluli chilungulakaza hambe chizime.
MAR 9:47 Na wone iziho lyako likwambuze kuwifya, ulyuse na ulitaje. Inoga kwinjila kuli Undewa wa Nguluwi kuno uwele na iziho limwe hela, kusinda kuwa na meho geng'ha meli na kwinjila kuli chiluli cha Jehanamu.
MAR 9:48 Amo kuwele na mhiko zilingudakula hambe zife, na chiluli chohambe chizime.
MAR 9:49 “Mina chila munhu kowichigwa mwino kwa chiluli.
MAR 9:50 Mwino unona, ila wone wajilize unoni wake wononezwa na choni? Muwe na mwino mgati mwenu na kikala goya hali hemwe.”
MAR 10:1 Yesu nakoka ahala nakaluta kuli mkowa wa Yudeya, mbaka kumwambu mwa lwanda lwa Yolodani. Wanhu wenji nawamlutila kahi, na heye nakawalangusa kota vyoyoditaga.
MAR 10:2 Lelo Mafalisayo nawamlutila, na kwa kumjeza nawamuuza, “Ndaze, yowa goya kwa munhu kumha luleko mchewake?”
MAR 10:3 Yesu nakawedichila, “Musa nakawapa Malajizo gachi?”
MAR 10:4 Hewo nawedichila walonga, “Musa nakakundiza munhu yamwandichile kalatasi ya luleko mchewake na kumleka.”
MAR 10:5 Yesu nakawalonjela, “Musa nakawandichila ilajizo alyo, kwa vila loyawene vyomuwele na nhumbula zigagadale.
MAR 10:6 Ila kulawila mwaluko vila Nguluwi loyalumbile isi, nakalumba mlume na mdala, kota vila Maandiko Matakatifu vyogalonjile.
MAR 10:7 Ndo mina mlume kangumlekaga mhaza na mayake, na kilumba hamwe na mdala wa heye,
MAR 10:8 nawo weli wowa lukuli lumwe. Hawowa weli, ila lukuli lumwe.
MAR 10:9 Lelo choyalumbanize Nguluwi, munhu yaleche kulekaniza.”
MAR 10:10 Lowahiluche kahi mng'handa, walanguswa wa heye nawamuuza mbuli ayo.
MAR 10:11 Na heye nakawalonjela, “Wone mlume yomleka mchewake, na kuhola mdala yunji, kangudita ung'hondwa kwa mchewake.
MAR 10:12 Hihyo du, wone mdala yomleka mlume wa heye, kwa kuholigwa kwa mlume yunji, na heye kangudita ung'hondwa.”
MAR 10:13 Wanhu nawamigalila Yesu wana wadodo, yawawichile moko, ila wala walanguswa nawawang'hanuchila.
MAR 10:14 Yesu vyoyawene ahyo, nakazudila, nakawalonjela, “Muwaleche awo wana wadodo woye kwa heni, mleche kuwalemeza, kwa vila Undewa wa Nguluwi ndo kwa wanhu wafandile kota wana wano.
MAR 10:15 Ndanguwalonjelani ndikomya, munhu yoneche yohambe yabochele Undewa wa Nguluwi kota mwana mdodo, hokwinjila hebu amo.”
MAR 10:16 Hamba nakawapagata wana awo, nakawawichila moko, nakawatambichiza.
MAR 10:17 Yesu loyaluche kahi majendo ga heye, munhu yumwe nakamuyila yobilima, nakafugama kumwando kwa heye, nakamuuza, “Mlangusa unojile, ndite choni ndiuhalile ukomu wa mazuwa gose ne kuduma?”
MAR 10:18 Yesu nakamwidichila, “Lekachoni kwangundonjela noga? Haduhu munhu yanojile ila yumwe, Nguluwi yaliyeng'ha.
MAR 10:19 Kugazela Malajizo, ‘Uleche ung'hondwa, uleche kukopola, uleche kuhiza, uleche kulavya ulolezi wa udesi, uleche kuhada, uwahulichize mhaza na mayako.’ ”
MAR 10:20 Heye nakamwidichila, “Mlangusa, ago geng'ha ndigabata kulawila londali msongolo.”
MAR 10:21 Yesu nakamlola, nakanojezwa na heye, nakamlonjela, “Nakwisilwa na chinhu chimwe, ulute ukaguze vinhu vyeng'ha vyouwele navyo, sendi azo ukawegalile awala wawele wazunwa, nagwe kowa na ng'hano kilanga, hamba umbinze.”
MAR 10:22 Loyahuliche ago, nakesinza, nakaluta yawele na masinzo, kwa vila nayali na lufufu lwinji.
MAR 10:23 Yesu nakawalola walanguswa wa heye, nakawalonjela walanguswa wa heye, “Mlole vyoiwa ngondo kwa wawele na lufufu kwinjila kuli Undewa wa Nguluwi.”
MAR 10:24 Walanguswa nawabubuwala kwa ulonzi wa heye. Yesu nakawalonjela kahi, “Wanangu, yowa ngondo ng'hatu kwinjila kuli Undewa wa Nguluwi!
MAR 10:25 Yowa ubewe kwa ngamiya kufyela kuli itubuli lya chihomo, kusinda yawele na lufufu kwinjila kuli Undewa wa Nguluwi.”
MAR 10:26 Walanguswa nawabubuwala ng'hatu naweuza, “Lelo yalikohi yoloholigwa?”
MAR 10:27 Yesu nakawalola na kulonga, “Kwa munhu hela haiditikwa ne hado, ila kwa Nguluwi mbuli zeng'ha zoditikwa.”
MAR 10:28 Petili nakamlonjela, “Na hetwe ndaze? Natuleka geng'ha, natukuwinza!”
MAR 10:29 Yesu nakalonga, “Ndanguwalonjelani ndikomya, chila munhu yalechile ng'handa ama wang'holoze ama lumbu ama mayake ama mhaza ama wanage ama migunda kwa chiwalo cha heni na kwa Mbuli Inojile,
MAR 10:30 kobochela mala miya mzidi mhela awu wa sambi, ng'handa ama lumbu ama wang'holoze ama mayake ama wana ama migunda hamwe na kugazigwa, na kuli mhela ukuya kobochela ukomu wa mazuwa gose.
MAR 10:31 Ila wenji wawele wa mwaluko wowa wa mwiso, na wawele wa mwiso, wowa wa mwaluko.”
MAR 10:32 Yesu na walanguswa wa heye, nalowali mnzila kuluta Yelusalemu na Yesu yawele yawalongole, walanguswa nawali wodumba, na wanhu wamuwinzile nawadumba. Yesu nakawahola kahi hafungo wala walanguswa kumi na weli, nakaluka kuwalonjela gala gozakumlawila,
MAR 10:33 “Mnyhulichize! Twanguluta Yelusalemu, na ako Mwana wa Munhu kowichigwa mmoko mwa watambika wakulu na walangusa wa malajizo ga Musa, na hewo womtagusa kwa wihe yabagame na kumuwika mmoko mwa wanhu wohawawele Wayahudi,
MAR 10:34 na hewo womseka na womtemela mite na kumtowa kwa himbati na kumkopola. Ila zuwa lya kadatu kulawa nahoyabagame kozilipuka.”
MAR 10:35 Yakubu na Yohani wana wa Sebedayo, nawamlutila Yesu nawamlonjela, “Mlangusa, twangugana utuditile chinhu chotukulanda.”
MAR 10:36 Yesu nakawauza!, “Mwangugana ndiwaditile choni?”
MAR 10:37 Nawamwidichila, “Utukundize kikala chigoda cha hegwe cha Undewa, yumwe kudilo kwa hegwe na yumwe kumoso kuli ukulu wa hegwe.”
MAR 10:38 Yesu nakawalonjela, “Hamvizelele mwangulanda choni. Ndaze, moweza kunwela chizombe cha magazo chondinwela na kubatizigwa kota vyondibatizwa?”
MAR 10:39 Nawamwidichila, “Toweza.” Yesu nakawalonjela, “Chizombe chondinwela, monwela na mobatizigwa kwa nzila yila yondibatizigwa.
MAR 10:40 Ila yalikohi yochikala kudilo ama kumoso kwa heni, haiwele mbuli ya heni kuwalonjela, ila honhu hala nahagongomanyigwa kwa wala wahaguligwe.”
MAR 10:41 Awala walanguswa wanji kumi lowahuliche ago, nawaluka kuzudizwa na Yakubu na Yohani.
MAR 10:42 Ahyo, Yesu nakawachema, nakawalonjela, “Mvizela kota wala walingujesigwa kota vilongozi wa isi, nawawalongozaga wanhu wa hewo kwa lupichi, na wakulu awo nawawemililaga wanhu wawo.
MAR 10:43 Ila kwa hemwe ileche kuwa hino, leka yalingugana yawe mkulu hali hemwe, imgana yawe chitumagwa wa hemwe.
MAR 10:44 Yalingugana yawe wa mwaluko, igana yawe chitumagwa wa weng'ha.
MAR 10:45 Mina Mwana wa Munhu hoyile kukolelwa mijito, ila kuwakolelamijito na kuulavya ukomu wa heye, kwa chiwalo cha ulohozi wa wanhu wenji.”
MAR 10:46 Lelo nawafika Yeliko, Yesu na walanguswa wa heye, nawali wolawa na lung'hongola lwa wanhu. Yumwe nayawele yohambe yalole yalinguchemigwa Balitimayo mwana wa Timayo nayali yekalise hafungo mwa nzila.
MAR 10:47 Loyahuliche Yesu yalawile Nasaleti kangukola ahala honhu, nakaluka kukwiniza lizi, “Yesu Mwanage Daudi umbonele isungu!”
MAR 10:48 Wanhu wenji nawamng'hanuchila leka yanyamalile, ila heye nakalutilila kukwiniza lizi, “Mwana wa Daudi, umbonele isungu.”
MAR 10:49 Yesu nakema nakalonga, “Mumcheme.” Baho, nawamchema ayo yohambe yalole, nawamlonjela, “Wikangaze, wime, kangukuchema.”
MAR 10:50 Na heye nakatozela hafungo ivalo lyake, nakazumilila na kumlutila Yesu.
MAR 10:51 Yesu nakamuuza, “Kwangugana ndikuditile choni?” Ayula yohambe yalole nakamlonjela, “Mlangusa ndangulanda kulola kahi.”
MAR 10:52 Yesu nakamlonjela, “Ulute. Makundo ga hegwe gakulohola.” Baho yula yohambe yalole kawa yolola, nakamuwinza Yesu mnzila.
MAR 11:1 Yesu naloyali habehi kwinjila Yelusalemu, nawafika Betifage na Betaniya, habehi na chidunda cha Mizeituni. Yesu nakawalajiza walanguswa wa heye weli,
MAR 11:2 nakawalonjela, “Mlute hali chijiji chiwele kumwando kwa hemwe. Lomkwinjila amo, molifika idogowi lyana liwohigwe, ling'hali kolamijito joneche. Mlichumulile mligale.
MAR 11:3 Wone munhu yawauze, lekachoni mwangudita ahyo? Mumlonjele, Mkulu kanguligana kolihilusa hamba.”
MAR 11:4 Baho, nawaluta, nawalifika idogowi lyana limwe likoweligwe hali lwizi. Nalowali wolidohola,
MAR 11:5 wanhu wamwenga wawele hala nawawauza, “Lekachoni mwangulidohola alyo idogowi lyana?”
MAR 11:6 Walanguswa nawawedichila kota vyowalonjelwe na Yesu, nawo nawawaleka waluta nalyo.
MAR 11:7 Nawamhilichila Yesu alyo idogowi lyana, nawamtandichila nguwo za hewo kuli idogowi na Yesu kakwina kekalisa.
MAR 11:8 Wanhu wenji nawazanza nguwo za hewo mbalabala, wanji nawalambalika miputi ja migodi jowatemile kumigunda.
MAR 11:9 Wanhu weng'ha walongole na wawele kumbele nawakwiniza lizi wolonga, “Lutogo! Yamtambichizwe ayo yalinguya kwa itagwa lya Mkulu!
MAR 11:10 Utambichizwe Undewa ulinguya wa mhaza wa hetwe Daudi. Yatogoligwe Nguluwi kuchanya kilanga.”
MAR 11:11 Yesu nakenjila Yelusalemu nakaluta mbaka kuli luga lwa Ng'handa ya Nguluwi, nakalolalola, nakona chila chinhu cha goya. Na kwa vila nayali matinazo, nakaluta Betaniya hamwe na wala kumi na weli.
MAR 11:12 Hamitondo, nalowali wolawa Betaniya, Yesu nakona nzala.
MAR 11:13 Lelo nakalyona kwa kutali igodi lya misada liwele na mahamba menji, nakalihejelela habehi leka yalole kota lina mafuza goneche. Loyaufichile, nakalyona lilihela mafuza, ila mahamba yeka, kwa vila hawali mhela wa kulela mafuza.
MAR 11:14 Baho nakalilonjela lila igodi, “Kwaluchila lehano na mazuwa gose munhu yoneche yaleche kulya mafuza ga hegwe.” Walanguswa wa heye nawahulika ulonzi awo.
MAR 11:15 Lelo nawafika Yelusalemu. Yesu nakenjila kuli Ng'handa ya Nguluwi nakaluka kuwawinga wanhu wawele woguza na kugula vinhu amo. Nakagudula visaga vya wala wawele wovunza sendi, na wala wawele woguza ng'hunda.
MAR 11:16 Nahamkundile munhu yoneche kukolela mijito kuli Ng'handa ya Nguluwi yaholile chinhu.
MAR 11:17 Hamba nakawalangusa, “Yandichigwa kuli Maandiko Matakatifu, Nguluwi nakalonga, ‘Ng'handa ya heni yochemigwa ng'handa ya kulandila kwa chiwalo cha nhanzi zeng'ha.’ Ila hemwe muigalula iwa mhalika ya wabokaji!”
MAR 11:18 Watambika wakulu na walangusa wa malajizo ga Musa lowahuliche ago, nawaluka kupala nzila ya kumkopola, ila nawamdumba kwa vila wanhu wenji nawabubuwala na malanguso ga heye.
MAR 11:19 Loliswele, Yesu na walanguswa wa heye nawoka honhu hala.
MAR 11:20 Mitondo kung'hali lufuku, nalowali wokola, nawalyona lila igodi lya mafuza nalikala ng'ong'ona lyeng'ha, mbaka mizabi.
MAR 11:21 Petili nakakumbuchila gala nagakoleche, nakamlonjela Yesu, “Mlangusa, ulole lila igodi lya misada lyoulipanjile, vyolikalile.”
MAR 11:22 Yesu nakawalonjela, “Muwe na makundo kwa Nguluwi.
MAR 11:23 Ndanguwalonjelani ndikomya, munhu yochilonjela chidunda achi, ‘Ung'humbuche ukagwe kuli bahali,’ ne kona majesa mnhumbula ya heye, ila yokunda kota mbuli zeng'ha zoyolonga zokoleka, koditilwa mbuli ayo.
MAR 11:24 Lelo ndanguwalonjelani, homumlanda chinhu Nguluwi, mkunde kota mchibochela, na hemwe mopegwa.
MAR 11:25 Homumlanda Nguluwi, mumlechele chila munhu yawaditileni vibi, leka Mhaza wa hemwe yawele kilanga yawosele hemwe gehile gomditile.”
MAR 11:26 “Ila wone hamlinguwalechela wanji, na Mhaza wa hemwe yawele kilanga howowosela hebu hemwe gehile genu gomditile.”
MAR 11:27 Lelo nawafika kahi Yelusalemu. Yesu naloyali yojenda kuli Ng'handa ya Nguluwi, watambika wakulu na walangusa wa malajizo ga Musa na wasekulu wamlutila,
MAR 11:28 nawamuuza, “Kwangudita mbuli zino kwa ludali lwachi? Yalikohi yakupele ludali lwa kukola mbuli azi?”
MAR 11:29 Ila Yesu nakawalonjela, “Ndowauzani chinhu chimwe, lomkwidichila, nani kahi ndowalonjelani ndangudita mbuli azi kwa ludali lwachi.
MAR 11:30 Ndaze, ludali lwa Yohani lwa kubatiza nalulawa kilanga ama kwa wanhu? Mnyidichile.”
MAR 11:31 Nawaluka kiwuza hewo wawo, “Tolongaze? Hotulonga, nalulawa kilanga kotuuza, lelo lekachoni hamumkundile Yohani?
MAR 11:32 Ila hotulonga, nalulawa kwa wanhu.” Nawadumba lung'hongola lwa wanhu wamemile kwa vila weng'ha nawakunda kota Yohani nayali mloli wa Nguluwi.
MAR 11:33 Lelo nawamwidichila Yesu, “Hetwe hatuvizelele.” Na heye Yesu nakawalonjela, “Na heni siwalonjela ndangudita mbuli zino kwa ludali lwachi.”
MAR 12:1 Yesu nakaluka kulonga na hewo kwa nhelo, “Nakwali na munhu yumwe nakalima mgunda wa zabibu. Nakazungulusila lugagala, na hagati nakabawa izimbo lya kukamila divai, nakazenga chidandalo kahi. Nakawabasila mgunda awo walimi, na kaheluka isi ya kutali.
MAR 12:2 Mhela wa kubeta, nakamlajiza chitumagwa wa heye kwa wala walimi, yakamigalile chasi cha mbena cha mgunda wa heye wa zabibu.
MAR 12:3 Wala walimi, nawamibata, wamsubula, nawamhilusa ne chinhu.
MAR 12:4 Nakamlajiza kahi chitumagwa yunji, ayu kahi nawamlumiza mutwi na kumditila mbuli za kumbasa soni.
MAR 12:5 Yula yawele na mgunda nakamlajiza chitumagwa yunji, na heye nawamhola nawamkopola. Na wamwenga wenji walajizwe nawatowigwa na wanji nawakopoligwa.
MAR 12:6 Yoyaponile kulajizwa nayali mwanage mlume yamganile. Hamba nakamlajiza kwa yawabasile mgunda, nakejesa kata, ‘Hanji womhulichiza mwana wa heni.’
MAR 12:7 Ila wala walimi nawelonjela hewo wawo walonga, ‘Ayu ndo yohalila, lelo tumkopole na mgunda wa zabibu tohalila hetwe!’
MAR 12:8 Baho wamibata ayula yatumigwe, nawamkopola wamtaga kutali na hawele mgunda wa zabibu.”
MAR 12:9 Yesu nakawauza, “Yowa ndaze kwa ayula yawele na mgunda wa zabibu? Ndanguwalonjela, kokuya kuwabagamiza wanhu weng'ha na kuwabasila wanhu wanji aula mgunda.
MAR 12:10 Ndaze, hamsomile Maandiko aga? “Alila iganga lyowalilemile walinguzenga, liwa iganga likulu lya msisi.
MAR 12:11 Mkulu ndo yaditile mbuli ayi, nayo ndo ya kububuwaza ng'hatu kwa hetwe.”
MAR 12:12 Watambika wakulu na walangusa wa Malajizo ga Musa na wasekulu, nawavizela kota nhelo ayi nayali kwa chiwalo cha hewo. Lelo nawajeza kumibata, ila nawalidumba ikugusi lya wanhu. Lelo nawamleka, nawaluta.
MAR 12:13 Lelo Mafalisayo wamwenga na vitumagwa wa chilundo cha Helodi, nawatumigwa leka wamgwilize Yesu kwa ulonzi wa heye.
MAR 12:14 Nawamlutila, na kumlonjela, “Mlangusa, tuvizela kota hegwe ndo munhu utanganiche ulingulonga kwa kukomya na hulingumdumba munhu yoneche. Na ukulu wa munhu hauwele chinhu kwa hegwe, ila kwangulangusa kukomya kweng'ha kuwala Nguluwi. Ndaze, yowa goya kulavya kodi kwa mndewa wa Loma, ama hebu? Tulavye ama tuleche kulavya?”
MAR 12:15 Ila Yesu nakavizela uhadi wa hewo, nakawalonjela, “Lekachoni mwangunjeza? Mndajile alyo igwala ndililole.”
MAR 12:16 Nawamlajila. Na heye nakawauza, “Mutwi na itagwa ali ndo lya whaani?” Nawamwidichila, “Ndo wa mndewa wa Loma.”
MAR 12:17 Yesu nakawalonjela, “Ga Kaizali mmigalile Kaizali, na ga Nguluwi mmigalile Nguluwi. Nawabubuwala ng'hatu na heye.”
MAR 12:18 Masadukayo, nawawele wolonga kota kuduhu uzilipuko kwa wabagame, nawamlutila Yesu na kumuuza,
MAR 12:19 “Mlangusa, Musa nakatulajiza hino, wone munhu yabagame na kuleka mchewake ne kuwa na mwana, mng'holoze imgana yamhalile ayo mdala yafililwe na mlume wa heye, leka yampondele wana mng'holoze.
MAR 12:20 Lelo nakwali na wanhu saba wa lukolo lumwe. Wa mwaluko nakahola, nakabagama ne kuwa na mwana.
MAR 12:21 Na mng'holoze wa keli nakamhola yula mdala yafililwe na mlume wa heye, na heye kahi nakabagama ne kuleka mwana, na mng'holoze wa kadatu iwa hihyo.
MAR 12:22 Weng'ha saba nawabagama ne kuleka mwana. Hamba na yula mdala yafililwe na mlume wa heye nakabagama.
MAR 12:23 Lelo zuwa lya wabagame kuzilipuka, mdala ayo kowa mdala wa yalikohi? Weng'ha saba nawali wamhesile.”
MAR 12:24 Yesu nakawalonjela, “Hemwe muwifya kwa vila hamgazelele Maandiko Matakatifu ne mong'ho wa Nguluwi.
MAR 12:25 Mina wabagame howozilipuka hawohesa ne kuhesigwa hebu, wowa kota wahilisi wa kilanga.
MAR 12:26 Ila mbuli ya kuzilipuka kwa wabagame, ndaze, hamsomile chitabu cha Musa kuli honhu ha chila chisosolo lochali chikwaka chiluli? Nguluwi nakamlonjela Musa, heni ndo Nguluwi wa Abulahamu na Nguluwi wa Isaka na Nguluwi wa Yakubu.
MAR 12:27 Lelo heye hawele Nguluwi wa wabagame, ila heye ka Nguluwi wa wawele wakomu. Hemwe muwifya ng'hatu.”
MAR 12:28 Mlangusa yumwenga wa malajizo ga Musa nakoya, nakahulika kilewa kwa hewo. Loyawene Yesu nakawedichila goya Masadukayo, nakalawila na kumuuza, “Kuli Malajizo geng'ha ga Nguluwi, lilikohi liwele likulu kupuluta geng'ha?”
MAR 12:29 Yesu nakamwidichila, “Lya mwaluko ndo ali, ‘Hulichize Isilaeli! Mkulu Nguluwi wa hetwe ndo yaliyeka Mkulu.
MAR 12:30 Umgane Mkulu Nguluwi wa hegwe kwa nhumbula ya hegwe yeng'ha na kwa muhe wa hegwe weng'ha na kwa luhala lwako lweng'ha na kwa mong'ho wa hegwe weng'ha.’
MAR 12:31 Na lya keli ndo ali, umgane youlingikalasa habehi, kota vyoulingigana gwegwe baho. Kuduhu ilajizo linji liwele likulu kupuluta gano.”
MAR 12:32 Lelo yula mlangusa wa malajizo ga Musa nakamlonjela, “Goya Mlangusa! Kulonga kukomya kota Nguluwi ndo yumwe hela na kuduhu yunji ila heye.
MAR 12:33 Na igana munhu kumgana Nguluwi kwa nhumbula yeng'ha na kwa luhala lweng'ha na kwa mong'ho weng'ha na kumgana youlingikalasa habehi kota vyoulingigana gwegwe baho. Mbuli ayi ndo itanganiche ng'hatu kupuluta kulavya nhambiko ya miwunde na nhambiko za kulakazwa.”
MAR 12:34 Yesu navyoyawene kota ayu munhu nakamwidichila goya, nakamlonjela, “Hegwe huwele kutali na Undewa wa Nguluwi.” Kulawila aho, kuduhu ne munhu yajezile kumuuza chinhu.
MAR 12:35 Yesu naloyali yolangusa mng'handa ya Nguluwi, nakauza, “Lekachoni walangusa wa Malajizo ga Musa wangulonga kota Kilistu Mlohozi ndo mwana wa Daudi?
MAR 12:36 Heye Daudi yolongozwa na Muhe Yelile nakalonga, “ ‘Mkulu Nguluwi nakamlonjela mkulu wa heni, wikale hano kudilo kwa heni, mbaka ndiwawiche wang'honyo wa hegwe hasi ha magulu ga hegwe.’
MAR 12:37 “Heye Daudi nakamchema Kilistu Mkulu. Lelo Kilistu Mlohozi kowa ndaze mwana wa Daudi?” Lung'hongola lwa wanhu nalwali lumuhulichiza kwa usangalalo.
MAR 12:38 Kuli malanguso ga heye, Yesu nakalonga, “Milolele na walangusa wa Malajizo ga Musa, walingugana walingukolakola wavalile mikanzu milefu na kulamsigwa na wanhu chiukulu kuli masoko, na kugana kikalisa honhu hatanganiche kuli ng'handa za kusalila,
MAR 12:39 na kuhagula honhu hatanganiche mng'handa za kusalila na honhu hatanganiche hali mnvina.
MAR 12:40 Na kuwabunza ng'handa kwa usugu wawo, wadala wafililwe na walume wawo, aku wochisinjizila kumlanda Nguluwi kwa kulutilila! Wogazigwa lukami kwa wihe wa hewo.”
MAR 12:41 Yesu nakekala habehi na honhu nahowali wolavya ndolendole. Nakawa yolola wanhu wenji lowali wolavya sendi na kujela mli isanduku lya ndolendole kuli ng'handa ya Nguluwi. Wawele na lufufu wenji nawalavya sendi nyinji.
MAR 12:42 Aho nakoya mamo yumwe yafililwe na mlume wa heye, mzunwa, nakalavya migwala mili midodo ja sendi.
MAR 12:43 Aho Yesu nakawachema walanguswa wa heye, nakuwalonjela, “Ndanguwalonjelani ndikomya, mamo ayu yafililwe na mlume wa heye, mzunwa, nakalavya chasi chinji mli isanduku lya ndolendole kusinda chowalavile wanji weng'ha.
MAR 12:44 Mina wanhu wawele na lufufu nawalavyaga ndolendole kulawa kuli lufufu nalowawele nawo. Ila ayu mamo kwa uzunwa wa heye, nakalavya chila chinhu choyawele nacho.”
MAR 13:1 Yesu navyoyali yolawa kuli Ng'handa ya Nguluwi, yumwe wa walanguswa wa heye nakamlonjela, “Mlangusa, ulole ng'handa vyoizenjigwe goya na maganga aga vyoganojile mlukanzi.”
MAR 13:2 Yesu nakamlonjela, “Ndaze, kwanguzona ng'handa azi ng'hulu? Kuduhu iganga ne limwe liwele lyopona mchanya mwa liyage, chila chinhu chobomoligwa.”
MAR 13:3 Yesu loyali yekale mchanya mwa chidunda cha Mzeituni yolola kuli Ng'handa ya Nguluwi, Petili na Yakubu na Yohani na Andeleya nawamuuza kwa uviso.
MAR 13:4 Nawamlonjela, “Utulonjele mbuli azi zolawila nili? Ulajilo wachi wotulajila kota mbuli zabehi kulawila?”
MAR 13:5 Yesu nakawalonjela, milolele, mleche kuhadigwa na munhu.
MAR 13:6 Mina wenji wokuya kwa itagwa lya heni, chila yumwe yolonga heye ndo heni. Na hewo wowajiliza wanhu wenji.
MAR 13:7 Lomhulika mbuli ya ngondo na uhesi wa ngondo, mleche kisinza. Mbuli azo zolawila, ila kuduma kung'hali.
MAR 13:8 Nhanzi imwe yochitowa na iyage, undewa umwe wochitowa na undewa uyage, ahyo kowa na limachinyina na nzala. Mbuli azi ndo kota vila usungu wa mwaluko wa mamo kuponda mwana.
MAR 13:9 Ila hemwe milolele. Mina wanhu wowahilika hemwe kuli vitala na kuwatowa kuli ng'handa za kusalila. Mohilikwa kwa vilingozi na wandewa kwa chiwalo cha heni, leka mlavye ulolezi kwa hewo.
MAR 13:10 Ila lokung'hali kufika mwiso, Mbuli Inojile yodamligwa tandi kwa wanhu weng'ha.
MAR 13:11 Na hewo howowawika hemwe mmoko na kuwahilika kuli chitala, mleche kuwa na lunhwinhwi kwa gala gomlonga, mhela ula houfika, mlonje choneche chompegwa, mina ulonzi womlonga haulawa kwa hemwe, ila wolawa kwa Muhe Yelile.
MAR 13:12 Wanhu wowahilika wang'holozawo wakopoligwe, na wahaza wodita hihyo kwa wana wawo. Na wana wowabelenhuka wawapondile leka wakopoligwe.
MAR 13:13 Wowazudilani kwa chiwalo cha heni, ila munhu yula yokwimilila mbaka kuduma ndo heye yoloholigwa.
MAR 13:14 “Lomkona ‘Izudizo lilinguwifya’ likwima honhu hohawele hake. Yalingusoma yavizele vyoilinguzeleka, aho wawele Yudeya wabilimile kuchidunda.
MAR 13:15 Yawele kuli chinduwiko cha ng'handa, yaleche kidulika kwinjila mng'handa ya heye kuhola chinhu.
MAR 13:16 Yawele kumgunda yaleche kuhiluka kaye kuhola igwanda lyake.
MAR 13:17 Yowa ngondo kwa wachimai wawele na himila na walingonyeza mazuwa ago!
MAR 13:18 Mumlande Nguluwi leka mbuli azo zileche kulawila mhela wa mbeho.
MAR 13:19 Mina mhela awo kowa na kugaya kohakunalawila kulawila Nguluwi loyalumbile isi mbaka lehano, na hailawila kahi.
MAR 13:20 Wone Mkulu nahawapunguzile mazuwa ago, haduhu munhu yahawele yoloholigwa. Ila kwa chiwalo cha wahaguligwe na Nguluwi, nakapunguza mazuwa ago.
MAR 13:21 “Lelo munhu hoyowalonjela hemwe, ‘Mlole, Kilistu Mlohozi ka hano,’ ama ‘Mlole ka ahala,’ mleche kukunda.
MAR 13:22 Mina wokuya Kilistu wa udesi na waloli wa udesi. Wodita ulajilo na vinduzanduza wojeza kuwajiliza wala wahaguligwe na Nguluwi.
MAR 13:23 Ila hemwe milolele, heni nandiwalonjela mbuli yeng'ha loing'hali kulawila.
MAR 13:24 “Lelo mazuwa ago, kugaya ako hokumala, isanya lyowichigwa jiza na nyelezi halibunguzuka.
MAR 13:25 Nhondwe zolagala kulawa kilanga na mong'ho ubatilile vinhu avyo vyeng'ha wotigaswa!
MAR 13:26 Aho wanhu womona Mwana wa Munhu yokuya kuli ng'hungugu kwa ludali lwinji na ukulu.
MAR 13:27 Hamba kowalajiza wahilisi wa heye wa kilanga wawakungajize wahaguligwe na Nguluwi kulawa nzingo zeng'ha zine, kulawila kuli isi yeng'ha na kilanga kweng'ha.
MAR 13:28 “Kwa ikuyu milanguse nhelo ayi, hala nhagala lozikwaluka kubahula, mwanguvizela kota mhela wa nhonya wa habehi.
MAR 13:29 Hihyo namwe homkona mbuli azo zilawila, mvizele kota ka habehi kuya.
MAR 13:30 Ndanguwalonjelani ndikomya, mbuli azi zeng'ha zolawila kung'hali lulelo alu kubagama.
MAR 13:31 Ulanga na isi zopuluta, ila ulonzi wa heni haupuluta hebu.
MAR 13:32 “Ila, kwa mbuli ya zuwa ama saa ayo kuduhu ne yumwe yavizelele kokuya nili, ne wahilisi wa kilanga ne Mwana, ila Mhaza yaliyeng'ha ndo yavizelele.
MAR 13:33 Milolele na kikala meho, mina hamvizelele mhela awo wokuya nili.
MAR 13:34 Yowa kota munhu yalinguka hakaye na kwinula majendo kuwalechela vitumagwa wa heye ludali, chila yumwe na mijito ya heye, nakamlonjela mwamizi wa lwizi yawe meho.
MAR 13:35 Lelo mikale meho, mina hamvizelele mkulu wa ng'handa kohiluka nili, hanji yowa matinazo ama nechilo ama lufuku ama mitondo.
MAR 13:36 Milolele leka hoyokuya ne hemwe kuvizela, yaleche kuwafika muwasile.
MAR 13:37 Gondilinguwalonjela hemwe, ndanguwalonjela weng'ha, mikale meho!”
MAR 14:1 Nagapona mazuwa meli ifiche mnvina ya Pasaka na Mibumunda johajiwichigwe usaso. Watambika wakulu na walangusa wa Malajizo ga Musa wali wopala nzila ya kumibata Yesu kwa chinyele wamkopole.
MAR 14:2 Ila nawalonga, “Tuleche kumibata mhela wa mnvina ya Pasaka, wanhu wotulemela.”
MAR 14:3 Yesu nayali Betaniya hakaye ha Simoni nayawele na uswema. Naloyali mchisaga yolya chilyo, mdala yumwe yawele na libuli lya alabasta lilinguguzigwa kwa sendi nyinji na mafuta galingunhunyhilila ga nado inojile ilinguguzigwa kwa sendi nyinji nakoya, nakachumula alyo libuli, nakumjidila Yesu mafuta ago kumutwi.
MAR 14:4 Wanhu wamwe nawawele aho nawazudila, nawelonjela, “Lekachoni kanguwifya mafuta aga?
MAR 14:5 Gahaguzigwe kwa sendi denali miya zidatu zilinguhega kwa mwezi umwe ng'hatu, na kupegwa wazunwa.” Nawamng'hanuchila ayo mamo.
MAR 14:6 Ila Yesu nakawalonjela, “Mumleche, lekachoni mwangumgaza? Nakanditila mbuli inojile.
MAR 14:7 Wazunwa wa hamwe na hemwe mazuwa gose, ila heni siwa na hemwe mazuwa gose.
MAR 14:8 Heye nakadita vyoyawezile, nakalujidila lukuli lwangu mafuta galingunhunyhilila kuuwika goya kutiligwa mchilaga.
MAR 14:9 Ndanguwalonjelani ndikomya, koneche muisi Mbuli Inojile hoidamligwa, chinhu chino choyaditile ayu mdala chodamligwa chiwalo cha kumkumbuchila heye.”
MAR 14:10 Hamba Yudasi Isikalioti, yumwe wa awala kumi na weli, nakaluta kwa watambika wakulu, leka yambelenhuche Yesu.
MAR 14:11 Watambika wakulu lowahuliche mbuli ayo, nawasangalala, nawalagana na heye wompa sendi. Lelo Yuda nakaluka kupala ndaze vyoyombelenhuka.
MAR 14:12 Zuwa lya mwaluko lya mnvina ya mibumunda johajiwichigwe usaso, mhela ula ing'holo lyana lya Pasaka hukopoligwa, walanguswa wa heye nawamuuza, “Kwangugana kohi tukuwichile goya ndiya ya Pasaka?”
MAR 14:13 Lelo Yesu nakawalajiza walanguswa wa heye weli yowalonjela, “Mlute kuli muji, na amo moting'hana na munhu yumwe yedwichile chiya cha mazi. Mumuwinze,
MAR 14:14 mbaka kuli ng'handa yoyokwinjila, mkamlonjele yawele na ng'handa kota, mlangusa kangulonga, chakohi chihengo cha heye choyodila ndiya ya Pasaka hamwe na walanguswa wa heye?
MAR 14:15 Na heye kowalajila chihengo chikulu chizenjigwe mchanya mwa chiyage chiwichigwe goya na kunoligwa. Mtuwichile goya mumo ndiya ya Pasaka.”
MAR 14:16 Walanguswa nawoka, nawaluta kuli muji, nawafika chila chinhu cha goya kota Yesu vyoyawalonjele. Nawawika goya ndiya ya Pasaka.
MAR 14:17 Loifichile matinazo, Yesu nakoya hamwe na walanguswa wa heye kumi na weli.
MAR 14:18 Lowawele wekale mchisaga wolya, Yesu nakalonga, “Ndanguwalonjelani ndikomya, yumwe wa hemwe yalingulya hamwe na heni kombelenhuka.”
MAR 14:19 Aho walanguswa wa heye nawaluka kisinza, nawamuuza yumweyumwe, “Ndaze, nda heni?”
MAR 14:20 Yesu nakawalonjela, “Yumwe wa hemwe kumi na weli, yalingudiliza ibumunda hamwe na heni mchisaye.
MAR 14:21 Ndangukomya Mwana wa Munhu kobagama kota Maandiko Matakatifu vyogalingulonga mbuli ya heye, ila mane yuye munhu ayo yalingumbelenhuka Mwana wa Munhu. Nayahawele goya munhu ayo wone nahapondigwe.”
MAR 14:22 Nalowali wolya, Yesu nakahola ibumunda, nakota malumbo, nakaumogola, kawapa walanguswa wa heye yolonga, “Mhole, alu ndo lukuli lwangu.”
MAR 14:23 Hamba kahola chizombe, nakalonga malumbo kwa Nguluwi, nakawapa, weng'ha nawanwa mli chizombe acho.
MAR 14:24 Yesu nakawalonjela, “Ayi ndo danda ya heni ilingulajila ilagano lya Nguluwi, danda ilingubohoka kwa chiwalo cha wanhu wenji.
MAR 14:25 Ndanguwalonjela ndikomya, siwila kunwa divai kahi na hemwe, mbaka zuwa honwa divai inji kuli undewa wa Nguluwi.”
MAR 14:26 Lowasindile kwimba lwimbo, nawoka, nawaluta kuli chidunda cha Mizeituni.
MAR 14:27 Yesu nakawalonjela walanguswa wa heye, “Hemwe mweng'ha mobilima mondeka ndiliyeka, mina Maandiko Matakatifu gangulonga, “ ‘Ndomtowa mdimi, na ming'holo jeng'ha josambaluka.’
MAR 14:28 Ila londizilipuka, ndowalongola Galilaya.”
MAR 14:29 Petili nakamlonjela, “Wone hewo weng'ha wawe na majesa na hegwe na kukuleka, heni sikuleka hebu!”
MAR 14:30 Yesu nakamlonjela Petili, “Ndangukulonjela ndikomya, nechilo yiyino, izogolo halineka lwa keli, kombela kadatu.”
MAR 14:31 Ila Petili nakamwidichila yekangaze nakalonga, “Wone ingane kubagama hamwe na hegwe, sikubela ng'oo.” Walanguswa weng'ha nawalonga hihyo.
MAR 14:32 Lelo nawafika kuli kagunda kalinguchemigwa Getisemane. Yesu nakawalonjela walanguswa wa heye, “Mikale baha, mhela heni ndimlanda Nguluwi.”
MAR 14:33 Hamba nakawahola Petili na Yakubu na Yohani, nakaluka kuwa na masinzo na kugaya.
MAR 14:34 Nakawalonjela, “Ndina masinzo lukami mnhumbula behi na kubagama. Mikale hano na muwe meho.”
MAR 14:35 Nakaluta hamwando, naketoza hasi, nakalanda kwa Nguluwi, wone ilinguganigwa, yaleche kukolela saa ayo ya kugazigwa.
MAR 14:36 Nakalonga, “Mhaza wa heni, hegwe kuna ludali lwa vinhu vyeng'ha. Umbusile achi chizombe, ila ileche kuwa kota vyondilingugana heni, leka kota vyougana hegwe.”
MAR 14:37 Hamba nakahiluka kwa walanguswa wala wadatu, nakawafika wawasile. Lelo nakamuuza Petili, “Simoni, lekachoni nakuwasa? Nakulemwela kikala meho ne saa imwe?”
MAR 14:38 Hamba nakawalonjela, “Mikale meho na kulanda leka mleche kwinjila kuli kujezigwa. Muhe wa munhu wangugana kudita ganojile, ila lukuli lwa ng'hochele.”
MAR 14:39 Nakaluta kahi kumlanda Nguluwi yohiluchila ulonzi wuwula.
MAR 14:40 Hamba nakahiluka kahi kwa walanguswa, nakawafika wawasile. Meho gawo nagali gebatigwe na usinjizi. Nahawalizelele lya kumwidichila.
MAR 14:41 Loyoyile lwa kadatu nakawalonjela, “Mng'hali muwasile na kwesela? Lelo ihega! Saa ifika. Mwana wa Munhu kanguwichigwa mmoko mwa wanhu wawele na gehile.
MAR 14:42 Mlilimche, tucheni. Mlole, yula munhu yalingumbelenhuka ka habehi.”
MAR 14:43 Yesu naloyawele yang'hali yolonga, Yudasi yumwe wa wala kumi na weli, nakafika hamwe na chilundo cha wanhu wawele na mipanga na nyimbati. Wanhu awo nawalajizwe na watambika wakulu, na walangusa wa Malajizo ga Musa na wasekulu.
MAR 14:44 Yuda yambelenhuche nakawapa ulajilo, “Yula munhu yondimnonela ndo heye, mibateni na kumuhilika hali wamizi.”
MAR 14:45 Yuda loyafichile du, nakamlutila Yesu nakumlonjela, “Mlangusa!” Hamba kamnonela.
MAR 14:46 Lelo awo wanhu nawamibata Yesu, nawamuwika mmoko.
MAR 14:47 Yumwe wa wala wawele wemile aho hamwe na Yesu, nakasomola ipanga, nakamtowa nalyo chitumagwa wa mtambika mkulu, nakamdumula ikutu.
MAR 14:48 Yesu nakawalonjela, “Ndaze, muya na mipanga na nyimbati kota heni nda mbokaji?
MAR 14:49 Chila zuwa nandali hamwe na hemwe ndilangusa kuli Ng'handa ya Nguluwi, lekachoni hamundibate? Ila sambi igana Maandiko Matakatifu genele.”
MAR 14:50 Aho walanguswa weng'ha nawamleka, nawabilima.
MAR 14:51 Nakwali na msongolo yumwe nayawele yomuwinza Yesu yawele, msongolo ayo nayali yavalile igolole. Nawo nawajeza kumibata.
MAR 14:52 Ila heye nakasulupuka, nakauleka lila igolole, nakubilima kuno yawele mwazi.
MAR 14:53 Lelo nawamhilika Yesu kwa mtambika mkulu kuwele na watambika wakulu weng'ha na wasekulu na walangusa wa Malajizo ga Musa nakowali woting'hana.
MAR 14:54 Petili nakamuwinza Yesu kwa kutali, nakenjila mgati mwa lugagala lwa mtambika mkulu, nakekala hamwe na wamizi yokota chiwambilo.
MAR 14:55 Watambika wakulu na chitala cheng'ha nawaliwopala ulolezi wa kumtagusa Yesu leka wamkopole, ila hawauwene.
MAR 14:56 Wanhu wenji nawalavya ulolezi wa udesi kwa Yesu, ila ulolezi wa hewo hawiwhanile.
MAR 14:57 Hamba wanji nawema, na kulavya ulolezi wa udesi wolonga,
MAR 14:58 “Natumhulika munhu ayu yolonga, ‘Ndogwisanga Ng'handa ayi ya Nguluwi izenjigwe kwa moko ga wanhu, na kwa mazuwa gadatu ndoizenga yinji yohaizenjigwe kwa moko ga wanhu.’ ”
MAR 14:59 Ila, ulolezi wa hewo nahawiwhanile.
MAR 14:60 Mtambika mkulu nakema hagati hawo, nakamuuza Yesu, “Ndaze, hulingwidichila ne chinhu? Wanhu awa wangulavya ulolezi wachi kwa hegwe?”
MAR 14:61 Ila heye nakanyamalila tulu! Nahalonjile ne chinhu. Mtambika mkulu nakamuuza kahi Yesu, “Ndaze, hegwe ndo Kilistu Mlohozi yatambichizwe na Nguluwi, Mwana Nguluwi mkulu?”
MAR 14:62 Yesu nakedichila, “Ena, nda heni. Kahi, momona Mwana wa Munhu yekale kudilo kwa Nguluwi Yawele na Mong'ho, yalinguya kuli ng'hungugu kulawa kilanga.”
MAR 14:63 Aho mtambika mkulu nakadadula ivalo lyake kulajila kota nakazudila ng'hatu, na kulonga, “Twangugana ulolezi wachi kahi?
MAR 14:64 Mumhulika vyoyalingumkovula Nguluwi! Hemwe mwangona ndaze?” Weng'ha nawamula kota imgana yabagame.
MAR 14:65 Lelo wamwe wa hewo nawaluka kumtemela mite, nawamgubika kumeho na kumtowa na kumlonjela, “Tulagulile lelo, yalikohi yakutowile!” Na vitumagwa nawamhola na kumtowa mizeze.
MAR 14:66 Petili naloyawele yang'hali hasi kuli lugagala, yumwe wa vitumagwa wadala wa mtambika mkulu nakoya.
MAR 14:67 Naloyamuwene Petili yokota chiwambilo, nakamlola na kumlonjela, “Nagwe nawali hamwe na Yesu Mnasaleti.”
MAR 14:68 Ila Petili nakabela, “Mane, sigazelele goulonga!” Hamba Petili nakoka, nakaluta kunze kuluga. Aho izogolo nalika.
MAR 14:69 Yula chitumagwa naloyamuwene kahi Petili, nakaluka kahi kuwalonjela wanhu nawawele wemile aho, “Munhu ayu ka yumwe wa hewo.”
MAR 14:70 Petili nakabela kahi. Hado hela, wanhu nawawele wemile aho nawamlojela Petili, “Twangukomya hegwe kwa yumwe wa hewo, mina hegwe kwa Mgalilaya.”
MAR 14:71 Ila Petili nakaluka kipanjila na kilaha yolonga, “Heni simzelele munhu ayu yomlingulonga mbuli za heye.”
MAR 14:72 Baho du, izogolo nalika lwa keli. Lelo Petili nakakumbuchila vila Yesu navyoyamlonjele, “Izogolo halineka lwa keli, kombela kadatu.” Petili nakagwa chifunama nakalila lukami.
MAR 15:1 Vyoifichile lufuku, watambika wakulu nawawika chitala na wasekulu na walangusa wa Malajizo ga Musa, nawamkowela Yesu wamhilichila Pilato.
MAR 15:2 Pilato nakamuuza Yesu yolonga, “Hegwe kwa mndewa wa Wayahudi?” Yesu nakedichila, nakalonga, “Ena, hegwe nakulonga.”
MAR 15:3 Watambika wakulu nawamvilizila Yesu mbuli nyinji.
MAR 15:4 Pilato nakamuuza kahi Yesu lwa keli, “Hambe ulonje chinhu? Ulole vyowokulonjeleza menji.”
MAR 15:5 Ila Yesu halonjile ne luzi, mbaka Pilato kabubuwala.
MAR 15:6 Chila mhela wa mnvina ya Pasaka, Pilato nakamchumulilaga munhu yumwe yawele mchinweng'ho yaganigwe na wanhu.
MAR 15:7 Lelo nakwali na munhu yawele yochemigwa Balaba, nayali yawichigwe mchinweng'ho hamwe na wanhu wanji kwa chiwalo cha kukopola.
MAR 15:8 Wanhu wenji nawamlutila Pilato womlanda yawaditile kota navyoyali yoditaga.
MAR 15:9 Pilato nakawauza yolonga, “Mwangugana ndimchumulile mndewa wa hemwe wa Wayahudi?”
MAR 15:10 Nakalonga ahyo kwa vila nakavizela kota watambika wakulu, nawamigala Yesu kwa heye kwa kumonela fihi hela.
MAR 15:11 Ila watambika wakulu nawawasonjeleza wanhu wamlande Pilato yawachumulile Balaba.
MAR 15:12 Pilato nakedichila kwa kuuza yolonga, “Ndimchumulile ayu mlingumchema mndewa wa Wayahudi?”
MAR 15:13 Wanhu weng'ha nawatowa iyowe kahi wolonga, “Mumuwambe ayo mumsalaba.”
MAR 15:14 Ila Pilato nakawauza, “Lekachoni? Nakadita choni chihile?” Ila hewo nawalutilila kutowa iyowe, “Muwambeni mumsalaba!”
MAR 15:15 Pilato nakagana kulinojeza alila likugusi lya wanhu, nakamchumulila Balaba kulawa mchinweng'ho. Nakalajiza Yesu yazapigwe ng'hobwa, hamba nakamlavya yawambigwe mumsalaba.
MAR 15:16 Hamba wamizi nawamhilika Yesu kuli chitala, mng'handa ya mkulu wa Loma, nawakungajiza chilundo cheng'ha cha wamizi.
MAR 15:17 Nawamvaliza ikanzu lya chiundewa liwele na lanji ya zambalau, nawatowa ng'hata ya miwa ifandile kota chipembelo, nawamuwichila kumutwi.
MAR 15:18 Nawaluka kumlamsa wata, “Ulamche Mndewa wa Wayahudi!”
MAR 15:19 Nawamtowa na idenje kumutwi, nawamtemela mite, nawamfugamila na kumwinamila.
MAR 15:20 Lowasindile kumbeza, nawamvula lila ikanzu, nawamvalisa nguwo ya heye wamhilika kuza kumuwamba mumsalaba.
MAR 15:21 Nalowali mnzila, nawating'hana na munhu yumwe yalinguchemigwa Simoni, mwenyeng'haye wa Kilene. Heye nayali mhaza wa Alekizanda na Lufo, mhela awo nayali yolawa kumgunda kuza kuli muji. Lelo nawamlonjela yapiche msalaba wa Yesu kwa lupichi.
MAR 15:22 Hamba nawamhilika Yesu mbaka honhu hawele hochemigwa Goligota, hazeleche kota Izeje lya Mutwi.
MAR 15:23 Nawamha divai wahanzile na mikwandi ja kuhoza usungu, ila Yesu nakalema kunwa.
MAR 15:24 Nawamuwamba mumsalaba, nawegawila nguwo za heye kwa kuzitowela simbi leka wamhagule yalikohi yohola choni.
MAR 15:25 Nayali saa tatu mitondo howamuwambile Yesu mumsalaba.
MAR 15:26 Na nongwa ya Yesu nayandichigwa mchibao chiwichigwe mchanya mwa msalaba, “Mndewa wa Wayahudi.”
MAR 15:27 Hamwe na Yesu nawawawamba wabokaji weli, yumwe kumoso na yumwe kudilo kwa Yesu.
MAR 15:28 Aho nagenela Maandiko Matakatifu galingulonga, “Nakawichigwa hamwe na wehile.”
MAR 15:29 Wanhu nawowali wokola honhu aho, nawali wotigasa mitwi jawo na kulonga, “Nawali ulonga koigwisa ng'handa ya Nguluwi na kuizenga kwa mazuwa gadatu.”
MAR 15:30 Lelo uduliche mumsalaba wilohole gwegwe.
MAR 15:31 Na hewo watambika wakulu na walangusa wa malajizo ga Musa nawambeza walonga, “Heye nakawalohola wanji, ila kangulemwela kilohola yuye.
MAR 15:32 Hambi hegwe ndo Kilistu Mlohozi, Mndewa wa Isilaeli! Yeduliche kulawa mumsalaba leka tone na kukunda.” Na wanhu wala weli wawambigwe mumsalaba hamwe na heye nawamliga.
MAR 15:33 Kulawa saa sita nemisi, mbaka saa tisa matinazo, isi yeng'ha nayali na jiza.
MAR 15:34 Loifichile saa tisa matinazo, Yesu nakalila kwa lizi likulu, nakalonga, “Eloi, Eloi, lema sabakitani?” Ilinguzeleka, “Nguluwi wa heni, Nguluwi wa heni, lekachoni nakundeka?”
MAR 15:35 Wanhu wenji nawamemile ahala, lowahuliche ahyo, nawalonga, “Mhulichize. Kangumchema Eliya.”
MAR 15:36 Munhu yumwe nakahola libofyabofya, nakadilizila mli divai na chinhu chiliusungu, nakawika kuli idenje nakamha Yesu yanwe aku yolonga, “Tulole kota Eliya kokuya kukulohola.”
MAR 15:37 Yesu nakatowa iyowe na kubagama.
MAR 15:38 Lelo ipaziya liwele mli ng'handa ya Nguluwi naligawanize honhu helile ng'hatu nalidejeka hagati kulawa kuchanya mbaka hanyi.
MAR 15:39 Mkulu wa wamizi nayawele ahala, vyoyawene Yesu vyoyabagame, nakalonga, “Kakomya ayu nayali Mwana wa Nguluwi.”
MAR 15:40 Nawali baho wadala wamwe wolola kwa kutali, yumwe wa awo yali, Maliya Madelena na Salome na Maliya mamo wa Yakubu mdodo na Yose.
MAR 15:41 Awa nawamuwinza Yesu naloyawele Galilaya na kumkolela mijito, nakwali na wadala wanji wenji woyile Yelusalemu hamwe na heye!
MAR 15:42 Mhela wa matinazo nawali ufichile. Alyo nalyali zuwa lya kiwika goya, zuwa lilingulongola Zuwa lya Kwesela.
MAR 15:43 Aho nakoya Yusufu mwenyeng'haye wa Alimataya. Nayali munhu yumwe wa wanhu wakulu kuli chitala, nayali yobeteza kuya kwa Undewa wa Nguluwi. Lelo nakamlutila Pilato ne kudumba, nakalanda yapegwe lukuli lwa Yesu.
MAR 15:44 Pilato nakabubuwala heko vyoyahuliche kota Yesu kabagama. Lelo nakamchema mkulu wa wamizi, nakamuuza kota Yesu nakabagama hamuwa.
MAR 15:45 Pilato nakalonjelwa na mkulu yula wa wamizi kota Yesu nayali yabagame katali, nakamkundila Yusufu yahole lukuli lwa Yesu.
MAR 15:46 Aho Yusufu nakagula sanda iwele na utabuli uzelu, nakaudulisa hasi lukuli, nakahola sanda inojile ng'hatu na kufunjiliza lukuli na kaluta kuwika kuli chilaga chihongoligwe kuli italawe liwele kota mhalika. Nakalihejeza iganga hali lwizi.
MAR 15:47 Nawo Maliya Madelena na Maliya mayake Yose na nawahona aho honhu hoyatiligwe.
MAR 16:1 Zuwa lya Kwesela lolimalile, Maliya Madelena na Salome na Maliya mayake Yakubu, nawagula mafuta ga kunhunyhilila wakaubakalize lukuli lwa Yesu.
MAR 16:2 Lufuku zuwa lya Jumapili, nawafika kuli chilaga, isanya lyolwaluche kulawila.
MAR 16:3 Na hewo nawali wochilonjela, “Yalikohi yotuhejezela alila iganga hala hali lwizi lwa chilaga?” Nalyo nalyali ling'hangala lukami.
MAR 16:4 Nalyo nalyali ling'hangala lukami ila lowalolile, nawalyona iganga mina lihejezigwe hafungo.
MAR 16:5 Nalowenjile mchilaga, nawamona msongolo yumwe yavalile ikanzu izelu, yekale nzingo ya kudilo, nawabubuwala aku wodumba ng'hatu.
MAR 16:6 Ila ayo msongolo nakawalonjela, “Mleche kububuwala na kudumba. Mwangumpala Yesu yalawile Nasaleti yawambigwe mumsalaba. Kazilipuka, haduhu hano. Mlole honhu howamuwichile.
MAR 16:7 Lelo mlute mkawalonjele walanguswa wa heye hamwe na Petili. Nakawalongolani kula Galilaya. Ako momona kota vyoyawalonjele.”
MAR 16:8 Lelo nawalawa hala mchilaga wobilima, ena nawakakama kwa kudumba na kububuwala ng'hatu, nahawamlonjele munhu yoneche chinhu, kwa vila nawadumba lukami.
MAR 16:9 Yesu loyazilipuche kung'hali lufuku Jumapili, nakelajila tandi kwa Maliya Madelena, yula yalavigwe vijeni vihile saba.
MAR 16:10 Maliya Madelena nakaluta, nakuwalonjela wala wawele hamwe na Yesu na mhela awo nawali wolombocheza na kulila.
MAR 16:11 Ila nalowahuliche kota Yesu ka mkomu na kota Maliya Madelena nakamona, hawamkundile.
MAR 16:12 Hamba Yesu nakawalawila walanguswa weli yawele vinji. Awo walanguswa nawali woluta kumgunda.
MAR 16:13 Na hewo kahi nawaluta kuwalonjela wayawo. Na hewo kahi hawakundile.
MAR 16:14 Hamba Yesu nakawalawila awala walanguswa kumi na yumwe nalowawele wolya hamwe mchisaga. Nakawang'hanuchila lukami kwa chiwalo cha kuleka kukunda na ibamba lyawo, mina nahawawakundile wala wamuwene hala loyazilipuche.
MAR 16:15 Lelo nakawalonjela, “Mlute kuli isi zeng'ha mkadamle Mbuli Inojile kwa wanhu weng'ha.
MAR 16:16 Yalingukunda na kubatizigwa koloholigwa. Yohambe yakunde kotagusigwa kwa wihe.
MAR 16:17 Na ulajilo awu, wochibanda na wula wa wala walingukunda. Kwa itagwa lyangu wolavya vijeni na wolonga kwa ulonzi unyale.
MAR 16:18 Wone webate izoka ama wone wanwe chinhu choneche chiwele na dunga, haiwadita chinhu chihile hebu. Wowawichila moko watamwa, nawo wowa wakomu.”
MAR 16:19 Mkulu Yesu loyasindile kulonga nawo, nakaholigwa kuka kilanga, nakekala nzingo ya kudilo kwa Nguluwi.
MAR 16:20 Walanguswa wa Yesu nawaluta wodamla chila honhu. Mkulu nakadita mijito hamwe nawo na kwimiza nzinzili usenga awo kwa ulajilo uwele hamwe na hewo.
LUK 1:1 Mkulu Teofili, Wanhu wenji wadita kota vila vyowadahile kwandika vinhu vila vilawile hagati hahetwe.
LUK 1:2 Nawandika vinhu vyotulonjelwe na awala waviwene avyo kwa meho ga hewo kulawa kwaluche na kudamla Mbuli Inojile.
LUK 1:3 Ahyo mkulu Teofili, lekachoni na heni ndola goya vinhu avyo vyeng'ha kulawa kwaluche, nambona hata heni ndikwandichile goya vila vilawile.
LUK 1:4 Ndangudita hino leka hegwe nagwe uvizele kukomya kweng'ha kuli vinhu vyoulanguswe.
LUK 1:5 Mihela Helodi loyali mndewa wa Yudeya, kwali na mtambika yumwe itagwa lyake Sakaliya, heye nayali mchilundo cha watambika cha Abiya. Mdala wa heye nakachemigwa Elisabeti, heye nayali wa lukolo lwa mtambika Aluni.
LUK 1:6 Weng'ha weli watanganiche hali meho ga Nguluwi, wochikala kwa kuwinza vyoyolonga na kulajiza Mkulu Nguluwi.
LUK 1:7 Nawalihela mwana, lekachoni Elisabeti nayali mhende, na weng'ha weli wali walalile lukami.
LUK 1:8 Zuwa limwe Sakaliya nayali yodita mijito ja kutambika kuli Ng'handa ya Nguluwi, lekachoni nayali nzamu ya heye ya kulavya nhambiko.
LUK 1:9 Kota vyoili chihendo cha watambika, simbi imgubuchila Sakaliya kwinjila Ng'handa ya Mkulu kufunyiza ubani.
LUK 1:10 Wanhu wenji wali wamemile kunze wolanda Nguluwi mhela awo wa kufunyiza ubani.
LUK 1:11 Hamba mhilisi wa Mkulu Nguluwi kamlawila Sakaliya, kema kudilo kwa honhu ha kulavila nhambiko ha kufunyiza ubani.
LUK 1:12 Sakaliya loyamuwene, nakatinuka vibi, yokakama aku yodumba.
LUK 1:13 Ila mhilisi wa kilanga nakamlonjela, “Sakaliya, uleche kudumba! Nguluwi kahulika kulanda kwa hegwe. Mdala wa hegwe Elisabeti kokulelela mwana mlume, hegwe kompa itagwa Yohani.
LUK 1:14 Hegwe kosangalala na kusechelela ng'hatu, na wanhu wenji wosechelela kuleligwa heye.
LUK 1:15 Kowa mng'hangala hali Mkulu. Honwa divai wala chinhu chigazaga. Komema Muhe Yelile kulawa mmunda mwa mamo wa heye.
LUK 1:16 Kowahilusa wanhu wenji wa Isilaeli wampale Mkulu, Nguluwi wa hewo.
LUK 1:17 Komlongolela Mkulu, kowa na mong'ho na ludali lwa mloli wa Nguluwi, Eliya, kowadita wahaza na wana wegane. Kowagalamla wanhu wohambe wamkunde Nguluwi wawe na majesa gatanganiche, na kuwakola wanhu wekale goya kumbochela Mkulu.”
LUK 1:18 Sakaliya nakamuuza ayo mhilisi wa kilanga, “Hino ndovizela ndaze kota mbuli ayi yakukomya? Heni ndala, na mdala wa heni kalala.”
LUK 1:19 Yula mhilisi wa kilanga nakamlonjela, “Heni Gabulieli, ndilingwima hali Nguluwi. Heye ndo yanhumile kuya kulonga na hegwe na kukulonjela mbuli ayi inojile.
LUK 1:20 Ila kwa vila hambe ukunde mbuli ayi yoilawila kwa mihela jake, kolemwela kulonga mbaka ago gondikulonjele, galawile.”
LUK 1:21 Mhela awo, wala wanhu wali wombeta Sakaliya, wabubuwala vyoyali yokawila kulawa mli Ng'handa ng'hulu ya Nguluwi.
LUK 1:22 Vyoyalawile kunze ya Ng'handa ya Nguluwi, nakalemwela kulonga nawo, ahyo nawavizela kona maono mla mng'handa ya Nguluwi. Kwa vila nayali yolemwela kulonga, ila yaliyolajila na moko.
LUK 1:23 Mhela wa heye wa kudita mijito kuli Ng'handa ng'hulu ya Nguluwi lo umalile, kahiluka kaye.
LUK 1:24 Hamba kuli mazuwa mado, mhazwa wa heye Elisabeti kawa na himila, kekala haluga mg'handa myezi jihano. Kalonga,
LUK 1:25 “Mkulu kanditila aga. Sambi kandajila isungu lya heye. Kambusila soni iwele na heni hali wanhu.”
LUK 1:26 Kuli mwezi wa sita wa himila ya Elisabeti, Nguluwi kamlajiza mhilisi wa kilanga yalinguchemigwa Gabulieli, yalute kuli muji ulinguchemigwa Nasaleti, kuli isi ya Galilaya.
LUK 1:27 Nakoya kwa mhinza yumwe yalinguchemigwa Maliya, yabanichilwe na munhu yumwe itagwa lyake Yusufu wa lukolo lwa mndewa Daudi.
LUK 1:28 Mhilisi wa kilanga nakaluta kwa heye, kamlamusa, “Kulamka! Mkulu Nguluwi kahamwe na hegwe, naheye kakutambichiza ng'hatu!”
LUK 1:29 Maliya loyahuliche luzi awo, nakesinza lukami, kaza ngijesa mnhumbula ya heye, kulamsa aku kwa ndaze?
LUK 1:30 Ila yula mhilisi wa kilanga nakamlonjela, “Maliya, uleche kudumba! Nguluwi kakugalila kunoga kwa heye.
LUK 1:31 Ahino, kowa na himila, hamba kolela mwana wa udewele mlume na komchemela itagwa Yesu.
LUK 1:32 Heye kowa mng'hangala na kochemigwa Mwana wa Nguluwi nayali kuchanya ng'hatu. Mkulu Nguluwi komdita yawe mndewa kota vyoyali sekulu wa heye Daudi.
LUK 1:33 Kowa mndewa wa lukolo lwa Yakubu kolutilila, na undewa wa heye wowa hela kuduma!”
LUK 1:34 Maliya nakamlonjela mhilisi wa kilanga, “Heni, sinating'hana na mlume. Lelo ago gowa ndaze?”
LUK 1:35 Yula mhilisi wa kilanga nakamlonjela, “Muhe Yelile kokudulichila, na mong'ho wa Nguluwi lokugubika. Kwa mbuli ayo, mwana yelile yoleligwa kochemigwa, Yelile mwana wa Nguluwi.
LUK 1:36 Ulole, Elisabeti mng'holoze heye! Wanhu nawamchemile mhende, leka sambi kana himila ya myezi sita, nakulala koyalalile.
LUK 1:37 Mina kwa Nguluwi kuduhuli mbuli iwele ngulemwelwa.”
LUK 1:38 Maliya kalonga “Heni nda chitumagwa wa Mkulu, iwe kota vyoulonjile.” Hamba yula mhilisi wa kilanga nakoka.
LUK 1:39 Logakolile mazuwa mado, Maliya nakawoha majendo kuluta himahima mbaka mji umwe, uwele mchidunda cha Yuda.
LUK 1:40 Ako nakenjila mng'handa ya Sakaliya, kamlamsa Elisabeti.
LUK 1:41 Elisabeti lowahuliche kulamusa kwa Maliya, chali chitigasika mmunda mwa heye. Elisabeti kamemezwa Muhe Yelile,
LUK 1:42 na heye kalonga kwa lizi likulu, “Kutambichizwa kusinda wadala weng'ha, na mwana youmulela kotambichizwa.
LUK 1:43 Heni nda whaani, leka mamo wa Mkulu wa heni yanjendele?
LUK 1:44 Lonyhuliche ulamso wa hegwe, chali mmunda mwa heni chitagasika kwa kusangalala.
LUK 1:45 Kutambichizwa ng'hatu hegwe kwa kukunda mbuli ya Mkulu, kwa vila yowa ikomya kwa gala Mkulu goyakulonjile hegwe!”
LUK 1:46 Maliya kalonga, “Nhumbula ya heni yangumutogola Mkulu,
LUK 1:47 na muhe wa heni wangusangalala kwa Mbuli ya Nguluwi mlohozi wa heni,
LUK 1:48 Lekachoni kang'humbuka, chitumagwa wa heye yaholile! Kulawa sambi na kulutilila, wanhu weng'ha wonyhema mtambichizwa,
LUK 1:49 kwa vinhu vikulu Nguluwi vyoyaditile. Itagwa lya Nguluwi lyela.
LUK 1:50 Kulawa ulelo awu na kulutilila, kawalajila Isungu weng'ha walingumdumba heye.
LUK 1:51 Kadita mbuli ng'hulu kwa moko wa heye. Kawasambalula wali na mnvimnvi majesa ga mnhumbula za hewo.
LUK 1:52 Kawadulisa wandewa kulawa mvigoda vya hewo vya undewa, nakawakwiniza wala waholile.
LUK 1:53 Wali na nzala kawagutiza vinhu vinojile, wali na lufufu kawaleka walute moko yeng'ha.
LUK 1:54 Kambochela Isilaeli chitumagwa wa heye, yokumbuka isungu lyake.
LUK 1:55 Kota vonawalongane na wakulu wa hetwe, Abulahamu na ulelo wa heye mazuwa gose.”
LUK 1:56 Maliya nakekala na Elisabeti myezi jidatu, hamba kahiluka kaye kwa heye.
LUK 1:57 Mhela wa Elisabeti kulela naufika, kalela mwana mlume.
LUK 1:58 Wanhu wahabehi na haluga hake nawahulika Mkulu Nguluwi kamonela isungu ng'hatu, nawasangalala hamwe na heye.
LUK 1:59 Hamba mazuwa nane nagafika ga kumwinjiza yula mwana ikumbi, wazangugana kumchemela itagwa lya mhaza wa heye, Sakaliya.
LUK 1:60 Ila mayake kalonga, “Hebu! Kochemigwa Yohani.”
LUK 1:61 Wamlonjela, “Lekachoni haduhu munhu mlukolo lwenu, yalinguchemigwa itagwa ali?”
LUK 1:62 Wamgodeza mhaza wa mwana yalonje, mwanage yapegwe itagwa lyachi.
LUK 1:63 Heye kalanda chibao cha kwandika kandika hino, Yohani ndo itagwa lyake, weng'ha wekala wabubuwale.
LUK 1:64 Bahala umyango na mlomo wa Sakaliya ugubuka kazangulonga kahi yomtogola Nguluwi.
LUK 1:65 Woga nauwenjila wanhu weng'ha wa hala habehi, na mbuli azo zenela chila honhu mchidunda cha Yudeya.
LUK 1:66 Weng'ha wahuliche mbuli ayo, nawejesa mnhumbula zawo wolonga, mwana ayu kowa ndaze? Mana loneka ludali lwa Mkulu Nguluwi lwali hamwe na heye.
LUK 1:67 Sakaliya, mhaza wa Yohani, kamemezwa Muhe Yelile, kazangulonga lizi lya Nguluwi.
LUK 1:68 Yatogolwe Mkulu Nguluwi wa Isilaeli, kawoyela na kuwagombola wanhu wa heye.
LUK 1:69 Katugalila mlohozi mkulu nayali na ludali, lukolo lwa Daudi mtumigwa wa heye.
LUK 1:70 Na katulonjela aho katali kukolela kuli waloli wa heye welile.
LUK 1:71 Hino kotulohola mmoko mwa watwihilwe hetwe, na kulawa mmoko mwa wanhu weng'ha wehile.
LUK 1:72 Kalonga kowonela isungu wakulu wa hetwe, na kukumbuchila ilagano lyelile.
LUK 1:73 Kamlahila Abulahamu sekulu wa hetwe.
LUK 1:74 Kutulohola mmoko mwa wanhu watwihilwe, tuwafugamile ne kudumba,
LUK 1:75 Tuwe welile na watanganiche hali heye, mazuwa geng'ha ga ukomu wa hetwe.
LUK 1:76 Na hegwe go mwana wa heni, kochemigwa mloli wa Mkulu Nguluwi nayali kuchanya ng'hatu, komlongola Nguluwi mwana komgongomanyila nzila,
LUK 1:77 kowatagusila wanhu kota woloholigwa, na kusilwa gehile gowaditile.
LUK 1:78 Nguluwi wa hetwe kana isungu. Kotusomolela lumuli lya ulohozi lituyila kulawa kuchanya.
LUK 1:79 Nakuwamwesela weng'ha wekale kutitu kuli kwaga, na yalongoze migulu ja hetwe mnzila ya kikala goya.
LUK 1:80 Mwana kakula na ludali mli Muhe. Nekekala kugunuche mbaka loyelajile kwa wanhu wa Isilaeli.
LUK 2:1 Zuwa lila mndewa wa Loma Agusto nakalajiza, yogana wanhu weng'ha wa isi ila wawazigwe.
LUK 2:2 Kuwazigwa ako kwali kulongole, mhela Kulenio loyali mkulu wa Siliya.
LUK 2:3 Weng'ha nawaluta kuza kuwazigwa, chila munhu kaye koyekalaga.
LUK 2:4 Yusufu nakalawa muji wa Nasaleti kuli isi ya Galilaya nakaluta muji wa Betelehemu ya mkowa wa Yudeya koyaleligwe mndewa Daudi. Yusufu nakaluta ako kwa vila nayali wa lukolo lwa Daudi.
LUK 2:5 Nakaluta kuza wazigwa hamwe na mchewake Maliya heye Maliya nayali na himila.
LUK 2:6 Lowali ako zuwa lyake lya kulela Maliya nalifika,
LUK 2:7 nakalela mwana wa mwaluko wa udewele mlume, kamvika vibende vya chiwhana na kumuwasiliza mulibani lya kulisila misenga. Kwa vila nawahusa honhu ha kuwasa kuli ng'handa za wajenzi.
LUK 2:8 Honhu aho kwali na wadimi wochikala meho hamihe wololela migongolo jowafujile kwa kibochelela.
LUK 2:9 Mhilisi wa mkulu kawalawila ne kulonga, na ukulu wa Nguluwi uwamwesela nzingo zeng'ha wadumba.
LUK 2:10 Mhilisi wa kilanga nakawalonjela, “Mleche kudumba ikugalilani Mbuli Inojile iwoyele wanhu weng'ha.
LUK 2:11 Kwa vila, lehano kuli honhu ha Daudi, kaleligwa mlohozi kwa mbuli ya hemwe yuye Kilistu mkulu mlohozi yahaguligwe na Nguluwi.
LUK 2:12 Achi chokulajilani hemwe mochifika chali chivalizigwe nguwo za chiwana yawasilizwe hali honhu ha kudila misenga.
LUK 2:13 Baho chilundo chikulu cha wahilisi wa kilanga chilongozwa na ahyo mhilisi, wazangumtogola Nguluwi wolonga.”
LUK 2:14 “Tumtogole Nguluwi wa kilanga, kikala goya muisi kuli wanhu yawaganile!”
LUK 2:15 Bahala mhilisi wa kilanga nakoka na kuhiluka kilanga, wadimaji wazangilonjela. “Tucheni mbaka Betelehemu tukalilole ali lilawile lyotulonjelwe na Mkulu.”
LUK 2:16 Waluta wobilima, wamfika Maliya na Yusufu na yula mwana yawasilizwe honhu ha kulisila misenga,
LUK 2:17 Awo wadimi lowamuwene ayo mwana wawalonjela wayao mbuli yowahuliche ya ayo mwana.
LUK 2:18 Weng'ha wahuliche ago wekala mlomo mwazi mbuli zowalonjelwe na awo wadimi.
LUK 2:19 Ila Maliya nakagawika na kijesa aga geng'ha mnhumbula ya heye.
LUK 2:20 Wala wadimi wahiluka kaye kowekalaga kuno womtogola Nguluwi kwa geng'ha gowahuliche na kugona, geng'ha gawa hihila kota vowalonjelwe.
LUK 2:21 Mazuwa nane logafichile ga kumwinjiza ikumbi ayo mwana, nakapegwa itagwa lilila lya Yesu lyonayapeligwe na mhilisi wa kilanga yang'hali hola nyinda.
LUK 2:22 Mazuwa logafichile ga Maliya na Yusufu za kuhovugwa kota voiganigwe na malajizo ga Musa, wakulu awo nawamuhola yula mwana waluta naye Yelusalemu wamuwiche kumwando kuli ng'handa ya Nguluwi.
LUK 2:23 Mli mzilo wa mkulu yandichigwa. “Chila mwana mlume yalongole kuleligwa, yalavigwe kwa Mkulu.”
LUK 2:24 Kahi nawaluta wakalavye nhambiko, ng'hunda mbili kota mzilo wa Mkulu Nguluwi vyoulingulonga.
LUK 2:25 Mihela ajo ako Yelusalemu kwali na munhu yumwe, nayali yanojile na yalingumdumba Nguluwi itagwa lyake Simoni, heye yaliyobeteza ulohozi wa Isilaeli. Muhe Yelile nayali hamwe na heye.
LUK 2:26 Muhe Yelile naimtawiza kota hobagama hebu mbaka yamone Kilistu wa Mkulu.
LUK 2:27 Yolongozwa na Muhe Yelile, Simoni nakenjila kuli luga lwa Ng'handa ya Nguluwi, wahaza wa Yesu wamgala mwana wa hewo wamditile kota vyoilinguganigwa na malajizo ga Musa,
LUK 2:28 Simoni nakambochela ayo mwana mmoko mwa heye kuno yomtogola Nguluwi yolonga,
LUK 2:29 “Lelo Nguluwi Mkulu kudita choulonjile, mkundize chitumagwa wa hegwe yalute kwa kikala goya.
LUK 2:30 Mina kwa meho gangu ndiwona ulohozi wa hegwe,
LUK 2:31 uwichile woneche na wanhu weng'ha,
LUK 2:32 alu ndo lumuli louwamwesele wanhu wa isi, na ukulu kwa wanhu wa hegwe Isilaeli.”
LUK 2:33 Mhaza wa Yesu na mayake newekala mlomo mwazi kwa ulonzi woyaliyolonga Simeoni kuli yula mwana.
LUK 2:34 Simoni kamtambichiza nakamlonjela Maliya mayake ayu mwana kahaguligwa na Nguluwi kuwifya na kigala ulohozi, kowalohola wanhu wenji wa Isilaeli. Heye kowa ulajilo wa chinhu chilemigwa na wanhu.
LUK 2:35 Majesa ga wanhu wenji gozangoneka hazelu usungu uwele ukali kota ipanga woihoma nhumbula ya hegwe.
LUK 2:36 Hali na munhu yumwe yatumigwe mdala itagwa lyake Ana mhinza wa Fanueli wa nhanzi ya Asheli. Nekekala na mlume mihela saba kulawa loyaholigwe.
LUK 2:37 Nakekala nayali hela mlume mbaka mihela ajo yawele mng'hangala wa miyaka makumi nane na gane mihela ajo jeng'ha nekekala hali Ng'handa ya Nguluwi yokwesela kulya na kulanda nemisi na nechilo,
LUK 2:38 Mihela jijo kalawa kumwando kamtogola Nguluwi na kudamla mbuli za ayo mwana kwa wanhu weng'ha awala wali wobeteza ugombozi wa Yelusalemu.
LUK 2:39 Maliya na Yusufu lowaditile geng'ha gowalonjeligwe na mzilo wa Mkulu Nguluwi, wahiluka kaye kwawo Nasaleti wilaya ya Galilaya.
LUK 2:40 Mwana kakula kawa na ludali na luhala lukami, kunoga kwa Nguluwi kwali na heye.
LUK 2:41 Chila mhela wahaza wa Yesu nawazowela kuluta Yelusalemu wone iwe mnvina ya Pasaka.
LUK 2:42 Yesu navyoyali na miyaka kumi na mili weng'ha waluta kuli mnvina vowazowele,
LUK 2:43 Mnvina loimalile nawaluka kuhiluka kaye kwawo, ila msongolo Yesu nakapona Yelusalemu ne wahaza wa heye kuvizela.
LUK 2:44 Nawavizela nayali hamwe na chilundo cha wanhu wawele ngilongoza, wajenda misi yeng'ha, hamba waluka kumpala hali wanhu yoyawazowele.
LUK 2:45 Lowawene hambe wamone nawahiluka Yelusalemu wompala.
LUK 2:46 Zuwa lya kadatu nawamfika kuli luga lwa Ng'handa ya Nguluwi hamwe na walangusa wa malajizo yowahulichiza na kuwauza mbuli.
LUK 2:47 Weng'ha wahuliche ulonzi wa heye wekala mlomo mwazi luhala loyali nalo kwa kwidichila gowali womuuza.
LUK 2:48 Wahaza wake lowamuwene wekala mlomo mwazi. Mayake kamuuza, “Gwa gomwana lekachoni kutuditila ahi? Mhaza wa hegwe na heni twali tukupala kwa isungu.”
LUK 2:49 Heye kawalonjela, “Lekachoni mnzengumala? Hamvizelele nanganigwa ndikale mng'handa ya Mhaza wa heni?”
LUK 2:50 Wahaza wa heye hawavizelele chila choyali yowalonjela.
LUK 2:51 Yesu kahiluka hamwe mbaka aho Nasaleti, kawahulika. Mayake kawika geng'ha gala mnhumbula.
LUK 2:52 Yesu kakula kwa lukuli na kwa luhala na kwakumnojeza Nguluwi na kuwanojeza wanhu kahi.
LUK 3:1 Yali miyaka ja kumi na jihano ja undewa wa Kaizali Tibeliyo na Pontio Pilato nayali yolongoza honhu ha Yudeya na Helodi nayali yolongoza honhu ha Galilaya na mng'holoze Filipo nayali yolongoza honhu ha Itulea hamwe na honhu ha Tlakoniti, hamba Lusania nayali yolongoza honhu ha Abilene kahi.
LUK 3:2 Anasi na Kayafa wali watambika wakulu. Mihela ajo lizi lya Nguluwi nalimuyila Yohani mwanage Sakaliya kuli honhu hagunuche.
LUK 3:3 Yohani nakaluta mweng'ha mla mbakane na lwanda lwa Yolodani. Kazangulangusa wanhu, mumgalamchile Nguluwi na kubatizigwa leka Nguluwi yawosele gehile.
LUK 3:4 Vyoyandichigwe mchitabu cha mloli Isaya, “Lizi lya munhu lyanguchema hagunuche, ‘Mgongomanyileni Mkulu nzila ya heye, mgolole nzila za heye ya kukola.
LUK 3:5 Hagwile howa hatiligwe, mla mwinuche mowa muselegwe, habinuche howa hagoloswe, nzila zihile zowa zigoloswe.
LUK 3:6 Na weng'ha womona Nguluwi yowalohola wanhu!’ ”
LUK 3:7 Wanhu wenji wali wokuya hala kubatizwa na Yohani na heye kazanguwalonjela, “Hemwe lulelo lwa izoka, yalikohi yowadeteleza kota moibilima ng'halazi ya Nguluwi ilihabehi kuya?
LUK 3:8 Mlajile kwa madito kota mumgalamchila Nguluwi. Mleche kwaluka sambi kota moibilima ng'halazi ya Nguluwi kwa kulonga, mhaza wa hetwe Abulahamu. Ndanguwalonjelani ng'hatu, Nguluwi kana ludali lwa kugagalula aga maganga gawe wana wa Abulahamu.
LUK 3:9 Iwago liwichigwa goya kuli mizabi ja igodi. Chila mgodi wohambe ulele mafuza ganojile, wotemangwa na kutajigwa mchiluli.”
LUK 3:10 Wala wanhu wamemile wamuuza, lelo tudite choni?
LUK 3:11 Nakawedichila, “Yawele na migwanda mili yamgawile nayali hela, hihyo nayali na ndiya yadite hiho.”
LUK 3:12 Wakongoza sendi nawo woya kubatizigwa, wamuuza, “Mlangusa tudite ndaze?”
LUK 3:13 Heye nakawalonjela, “Mleche konjeza kuhola chila chima chiwichigwe.”
LUK 3:14 Wamizi nawo wamuuza, “Hetwe natwe tudite choni? Kawedichila, mleche kuhola chinhu cha munhu kwa ludali kahi ne kumtagusa munhu kwa udesi, chikukwileni chila cho mpegwa.”
LUK 3:15 Weng'ha wali wobeteza chinhu chimwenga, waluka kiuza mnhumbula za hewo zilingumlapa Yohani. Wazanguvizela heye ndo Kilistu Mlohozi yahaguligwe na Nguluwi.
LUK 3:16 Baho Yohani kawalonjela weng'ha, “Heni ndanguwabatiza kwa mazi, ila kanguya myangu nayali na ludali kusinda heni. Sijeza kudohola ng'weso za makwamba ga heye. Heye kowa yobatiza kwa Muhe Yelile na kwa chiluli.
LUK 3:17 Heye kana luhelo lwa kuyugulila nyhadikwa, yalunde uhemba kuli ng'hano, na mibadu kojisoma kwa chiluli hambe chizime.”
LUK 3:18 Hamwe na luzi lwinji, Yohani nakawahimiliza wanhu yowadamlila Mbuli Inojile.
LUK 3:19 Ila Yohani nakamdeuza mndewa Helodi, kamuwala, nakamhola Helodiya mdala wa mng'holoze na kumdita mdala wa heye, hamba nakadita ganji menji gehile.
LUK 3:20 Kahi Helodi nakadita chinhu chinji chihile kwa kumuhindila Yohani mchinweng'ho.
LUK 3:21 Wanhu weng'ha lowabatizigwe, Yesu naye nakabatizigwa. Hoyali yomlanda Nguluwi, ulanga naugubuligwa,
LUK 3:22 Muhe Yelile imlagalila kota ng'hunda na lihulikwa lizi kulawa kilanga ilonga, “Hegwe ndo mwanangu ndikuganile, nojezwa na hegwe.”
LUK 3:23 Yesu loyaluche kukola mijito, nayali na miyaka makumi gadatu, wanhu wali wochijesa heye mwana wa Yusufu mwanage Heli.
LUK 3:24 Heli nayali mwanage Matati na Matati nayali mwanage Lawi na Lawi nayali mwanage Meleki na Meleki nayali mwanage Yanai na Yanai nayali mwanage Yusufu,
LUK 3:25 Yusufu nayali mwanage Matasia na Matasia nayali mwanage Amosi na Amosi nayali mwanage Nahumu na Nahumu nayali mwanage Hesili na Hesili nayali mwanage Nagai,
LUK 3:26 Nagai nayali mwanage Maati na Maati nayali mwanage Matasia na Matasia nayali mwanage Shemeni na Shemeni nayali mwanage Yoseki na Yoseki nayali mwanage Yuda,
LUK 3:27 Yuda nayali mwanage Yoanani na Yohanini nayali mwanage Lisa na Lisa nayali mwanage Selubabeli nayali mwanage Shatieli na Sheatieli nayali mwanage Neli,
LUK 3:28 Neli nayali mwanage Meliki na Meliki nayali mwanage Adi nayali mwanage Kosamu na Kosamu nayali mwanage Elimadamu na Elimadamu nayali mwange Eli,
LUK 3:29 Eli yula nayali mwanage Yoshuwa na Yoshuwa nayali mwanage Elieseli na Elieseli nayali mwanage Yolimu na Yolimuyali mwanage Matati na Matati nayali mwanage Lawi,
LUK 3:30 na Lawi nayali mwanage Simeoni na Simeoni nayali mwanage Yudasi na Yudasi nayali mwanage Yusufu na Yusufu nayali mwanage Yonamu na Yonamu nayali mwanage Eliakimu,
LUK 3:31 na Eliakimu nayali mwanage Melea na Melea nayali mwanage Mena, na Mena nayali mwanage matata na Matata nayali mwanage Natani na Natani nayali mwanage Daudi,
LUK 3:32 na Daudi nayali mwanage Jese na Jese nayali mwanage Obedi na Obedi nayali mwanage Boasi na Boasi nayali mwanage Salimoni na Salimoni nayali mwanage Nashoni,
LUK 3:33 na Nashoni nayali mwanage Aminadabu, na Aminadabu nayali mwanage Alini na Alini nayali mwanage Hesiloni na Hesiloni nayali mwanage Pelesi na Pelesi nayali mwanage Yudasi,
LUK 3:34 Na Yudasi nayali mwanage Yakubu na Yakubu nayali mwanage Isaka na Isaka nayali mwanage Abulahamu, na Abulahamu nayali mwanage Tela na Tela nayali mwanage Naholi,
LUK 3:35 Na Naholi nayali mwanage Selugi, na Selugi nayali mwanage Leu na Leu nayali mwanage Pelagi na Pelegi nayali mwanage Ebeli na Ebeli nayali mwanage Sala,
LUK 3:36 na Sala nayali mwanage Kainamu, na Kainamu nayali mwanage Afakisadi na Afakisadi nayali mwanage Shemu na Shemu nayali mwanage Nuhu na Noa nayali mwanage Lameki,
LUK 3:37 Na Lameki nayali mwanage Metusela na Metusela nayali mwanage Henoki na Henoki nayali mwanage Yaledi na Yaledi nayali mwanage Mahalaleli na Mahalaleli nayali mwanage Kainamu.
LUK 3:38 Na Kainamu nayali mwanage Enoshi na Enoshi nayali mwanage Seti na Seti nayali mwanage Adamu na Adamu nayali mwana wa Nguluwi.
LUK 4:1 Yesu kalawa mlwanda lwa Yolodani yamemile Muhe Yelile, na Muhe ayo kamlongoza mbaka kugunuche.
LUK 4:2 Ako nakajezigwa na Limazoga mazuwa makumi gane. Mazuwa ago geng'ha hadile chinhu choneche chila, na logamalile mazuwa ago, kaihulika nzala
LUK 4:3 Limazoga limlonjela, “Wone uwele Mwanage Nguluwi, lilonjele iganga lino ligaluke kuwa ibumunda.”
LUK 4:4 Yesu nakamwidichila, “Yandichigwa, ‘Munhu howa mkomu kwa ibumunda hela.’ ”
LUK 4:5 Hamba Limazoga limhola mbaka kuchanya ng'hatu na kamlajila undewa weng'ha uli muisi.
LUK 4:6 Nabaho Limazoga limlonjela Yesu, “Ndokupa undewa na ludali lwa vinhu vyeng'ha vino, kwa vila vinhu vyeng'ha vya heni, na ndoweza kumha yeng'ha yula yondanda.
LUK 4:7 Avi vyeng'ha vyowa vya hegwe, wone ufugamile heni.”
LUK 4:8 Yesu nakamwidichila, “Yandichigwa, ‘Umfugamile Mkulu, Nguluwi wa hegwe na umditile heye yaliyeka.’ ”
LUK 4:9 Na baho Limazoga limhola Yesu mbaka Yelusalemu limkwiniza kuli ludandalo lwa Ng'handa ya Nguluwi, limlonjela, “Kota uwele Mwana wa Nguluwi wilagaze kulawa hano mbaka hasi.
LUK 4:10 Kwa vila yandichigwa, ‘Nguluwi kowalajiza wahilisi wa kilanga wa heye wakwamilile.’
LUK 4:11 Na, ‘Hewo wokuhola mmoko mwawo, leka uleche kikwang'hwala magulu ga hegwe mmiganga.’ ”
LUK 4:12 Hamba Yesu nakamwidichila, “Yandichigwa, ‘Uleche kumjeza Mkulu Nguluwi wa hegwe.’ ”
LUK 4:13 Limazoga vyolisindile kumjeza chila nzila, hamba kamleka mbaka mhela ukundigwe.
LUK 4:14 Nabaho Yesu kahiluka Galilaya yawele yamemile mong'ho wa Muhe Yelile, mbuli za heye zenela Galilaya na kuli isi zeng'ha zilihabehi.
LUK 4:15 Na heye kazanguwalangusa wanhu mli ng'handa za kusalila, na kekala yotogoligwa na weng'ha.
LUK 4:16 Baho Yesu nakaluta Nasaleti, honhu hoyakulile, kuli Zuwa lya Kwesela, kenjila mli ng'handa ya kusalila kota chili chihendo cha heye. Kema leka yasome Maandiko Matakatifu kwa lizi.
LUK 4:17 Kabochela chitabu cha mloli wa Nguluwi wa Nguluwi Isaya. Kagubula na kusoma honhu handichigwe hino!
LUK 4:18 “Muhe wa Mkulu, kahachanya ha heni, kwa vila kanyhagula heni ndiwegalile wazunwa Mbuli Inojile, kanhuma ndiwadamlile wawele mchinweng'ho wodoholigwa, wala wohambe walole wozangulola, na kuwalohola walinguleligwa,
LUK 4:19 na kudamla mhela ufika wa Mkulu kuwalohola wanhu wa heye.”
LUK 4:20 Na baho kachigubika chila chitabu, kampa chitumagwa, kekalisa hasi. Wanhu weng'ha wekalile mli ng'handa ya kusalila wamnogolela meho.
LUK 4:21 Na heye kaluka kuwalonjela, “Maandiko Matakatifu, lehano genela mli makutu genu.”
LUK 4:22 Weng'ha wakwejigwa na heye, wekala wabubuwale na mbuli zinojile zoyaliyolonga, nawauza “Ambi! Ayu hawele mwana wa Yusufu?”
LUK 4:23 Na heye nakawalonjela, “Ndivizela mondonjela ulonzi awu, ‘Mganga, wilohole uliyeka.’ Geng'ha gotuhuliche kudita Kapanaumu, gadite hano haluga hako.”
LUK 4:24 Kalutilila ngulonga, “Ndangulonga ndikomya, Mloli hotogoligwa hakaye hake.
LUK 4:25 Ila mhulichize, ndangukomya kwali na wadala wenji walekwa kuli isi ya Isilaeli mihela ja Eliya. Mihela awo, nhonya haitowile mhela wa miyaka jidatu na nusu, ahyo kwali na nzala ng'hulu kuli isi yeng'ha.
LUK 4:26 Ahyo, Eliya hatumigwe kwa mgane yoneche Isilaeli ila kwa mdala mlekwa wa Salefati kuli isi ya Sidoni.
LUK 4:27 Kahi mhela wa Mloli Elisha kwali na wanhu wenji wawele na uswema kuli isi ya Isilaeli, haduhu munhu yoneche yaloholigwe, ila Naamani yuye mwenyenghaye wa isi ya Siliya.”
LUK 4:28 Wanhu weng'ha nawekale mli ng'handa ya kusalila lowahuliche ago, wazudila lukami.
LUK 4:29 Wema, wamlavya Yesu hanze ya haluga hawo, na kumigala hachanya mchidunda wogana wamtoze hasi.
LUK 4:30 Ila Yesu kakola bahala hagati ya howali, kaluta kaye.
LUK 4:31 Na baho Yesu kadulika mbaka Kapanaumu, wilaya ya Galilaya, Zuwa lya Kwesela kekala yowalangusa wanhu.
LUK 4:32 Wabubuwala kwa ulanguso wa heye, kwa vila nayali yolangusa kota nayali na ludali.
LUK 4:33 Mla mli ng'handa ya kusalila mwali na munhu nayali na chijeni chihile kazanguyowa.
LUK 4:34 “Kuna choni na hetwe, hegwe Yesu wa Nasaleti? Nakuya kutudumya? Tuvizela hegwe kwa whaani, hegwe kwa msenga Yelile yatumigwe na Nguluwi!”
LUK 4:35 Yesu kachideuza acho chijeni yolonga, “Nyamalile! Ulawe kuli munhu ayu! Chila chijeni lochimgwisile hanyi yula munhu chilawa chileka kumdita ne chinhu.”
LUK 4:36 Wanhu weng'ha wekala wabubuwale, wazangilonjela “Aku kulangusa kwachi? Munhu yuno kana mong'ho na ludali lwa kuving'hanuchila vijeni vihile, navyo vyangumhulika.”
LUK 4:37 Ahyo mbuli za Yesu zenela chila honhu muli isi ila.
LUK 4:38 Yesu kalawa mla mli ng'handa ya kusalila, kaluta kaye kwa Simoni, mamo yumwe, mkweye Simoni nayali yotamika lukami, nawamlanda Yesu yamuse utamwa.
LUK 4:39 Yesu koya na kema behi na mdala yula kaudeuza ula utamwa, utamwa umleka na baho mdala yula kenuka na kwaluka kuwawichila chilyo.
LUK 4:40 Isanya lolyali lizinga, weng'ha wawele na watamwa wawo nawawegala kwa heye, na heye kawawichila moko gake mchanya chila yumwe na kawosela matamwa weng'ha.
LUK 4:41 Vijeni viwalawa wanhu wenji, wazanguyowa wolonga, “Hegwe ndo Mwana wa Nguluwi!” Ila Yesu kawadeuza, kawalemeza kulonga, nawavizela kota heye nayali Kilistu Mlohozi.
LUK 4:42 Mitondo kung'hali lufuku, Yesu nakoka kaluta honhu ha uyeng'ha kulihela wanhu. Wanhu wazangumpala, na lowamuwene, wamlemeza yaleche kuka.
LUK 4:43 Ila heye nakawalonjela, “Nganigwa kudamla Mbuli Inojile ya Undewa wa Nguluwi kuli miji jiyage kahi, kwa vila achi ndo Nguluwi choyanhumile kudita.”
LUK 4:44 Ahyo kalutilila kuwadamlila wanhu kuli ng'handa za kusalila za isi ya Yudeya.
LUK 5:1 Zuwa limwe, Yesu yaliyemile hafungo mwa ilamba lya Genesaleti, wanhu wenji wali wamzungulute wochibana, wohulichiza mbuli ya Nguluwi.
LUK 5:2 Kajona mitumbwi mili hafungo mli ilamba, hewo walowa somba wali wochile, wohovuga utandawala wawo.
LUK 5:3 Yesu kenjila mli itumbwi limwe lya Simoni, nakamlonjela yauhejeze hatali chidogo kulawa hafungo mwa ilamba mbaka mmazi. Na baho kekala mumo mli itumbwi na kulangusa lung'hongola lwa wanhu.
LUK 5:4 Loyasindile kulangusa, nakamlonjela Simoni, Iigale itumbwi mbaka hagati kuli mazi menji na baho mkatoze utandawala wa hemwe mlowe somba.
LUK 5:5 Simoni nakamwidichila, “Mkulu tujeza kuvula somba hamihe yeng'ha hatupatile ne chinhu ila kwa vila hegwe kulonga ndotoza utandawala.”
LUK 5:6 Lowaditile ahyo wavula somba nyiji, mbaka utandawala wa hewo na waluka kudaduka.
LUK 5:7 Wawachema wayao wali mli itumbwi liyage woye wawatanze. Woya wamemeza somba mitumbwi jeng'ha mili na behi jahazibile.
LUK 5:8 Simoni Petili loyawene gala, kafugama hoyali Yesu kalonga, “Mkulu uche habehi na heni! Heni nda munhu ndili na gehile!”
LUK 5:9 Simoni na wayage weng'ha wabubuwala kwa vila vyowalowile somba nyinji vila.
LUK 5:10 Hihyo Yakubu na Yohani, wanage Sebedayo, wala wali walowa hamwe na Simoni. Yesu nakamlonjela Simoni, “Uleche kudumba, kulawa sambi kozanguwa mlowa wanhu.”
LUK 5:11 Ahyo, lowajigale jila mitumbwi hafungo mwa ilamba waleka geng'ha kumuwinza Yesu.
LUK 5:12 Yali hino, Yesu loyali kuli miji jimwenga ja ako, munhu yumwe nayali na uswema lukuli lweng'a kamona. Leka, munhu ayo kagwa chifunama kamlanda Yesu, “Mkulu wone ulingugana kombusila utamwa wondilingugula!”
LUK 5:13 Yesu nakagolola moko, kamdoliza na kulonga, “Ndangugana wezuligwe!” Bahala ula uswema umlawa.
LUK 5:14 Yesu nakamlonjela, “Uleche kumlonjela ne munhu. Ila ulute wikelajile kwa mtambika mkulu, ulavye nhambiko kwa kwezigwa kwa hegwe kota vyoyalajize Musa, Ahyo wanhu weng'ha walavye ulolezi kota hegwe kuwa mkomu.”
LUK 5:15 Ila Mbuli za Yesu zenela chila honhu, na wanhu wenji na woya kumhulichiza na kuwosela matamwa gawo.
LUK 5:16 Ila heye nakaluta nayali yeng'ha honhu hali haduhu wanhu, na kulanda.
LUK 5:17 Zuwa limwe Yesu nayali yolangusa. Mafalisayo na walangusa wa Malajizo ga Musa, kulawa chila chijiji cha Galilaya na Yudeya na Yelusalemu, wali wekalise baho. Ludali lwa Mkulu lwali hamwe na heye kwa kuwalohola watamwa.
LUK 5:18 Wanhu wamwe na woya, wampapile munhu yaziliche kumwe, wojeza kumwinjiza mng'handa wamuwiche kumwando kwa Yesu.
LUK 5:19 Ila nawalemwela kwinjila mng'handa kwa vila wanhu wenji wali wekale. Ahyo wamkwinhiza ayo yaziliche kuchinduwiko, nawatubula kuchinduwiko, wamdulisa ayo yaziliche mchinhanda cha heye, wamuwika hagati hali lung'hongola lwa wanhu hali Yesu.
LUK 5:20 Yesu voyawene vyowawele na makundo, nakamlonjela ayo munhu yaziliche, “Goloko kusilwa gehile ga hegwe.”
LUK 5:21 Walangusa wa malajizo ga Musa na Mafalisayo wazangiuza, “Hino ayu yalihi nayali yokovula? Haduhuli munhu yolohola gehile ila Nguluwi nayali yeng'ha!”
LUK 5:22 Yesu nakavizela majesa ga hewo, kawauza, “Lekachoni mwangijesa mnhumbula za hemwe?
LUK 5:23 Lilikohi liwele ubewe ng'hatu. Kulonga, ‘Kusilwa gehile ga hegwe,’ Ama kulonga, ‘Wime ujende?’
LUK 5:24 Ila ndangugana mvizele kota, Mwana wa Munhu kana ludali lwa kuwosela wanhu gehile ga hewo, mno muisi yeng'ha.” Baho nakamlonjela yula yaziliche, “Winuche uhole chinhanda cha hegwe, ulute kaye!”
LUK 5:25 Baho yula munhu yoyekale yaziliche kenuka kumwando kwa hewo, kedwika chinhanda cha heye na kaluta kaye, kuno yomtogola Nguluwi.
LUK 5:26 Wanhu weng'ha nawabubuwala ng'hatu! Na kudumba na kumtogola Nguluwi kuno wolonga, “Tuvyona vinduzanduza lehano.”
LUK 5:27 Hamba, Yesu kalawa kunze, kamona mkongoza kodi yumwe nayali nguchemigwa Lawi, yekalise mchituka cha kodi. Yesu nakamlonjela, “Umbinze!”
LUK 5:28 Na baho kenuka, kaleka chila chinhu, kamuwinza.
LUK 5:29 Na baho Lawi kamditila Yesu mnvina ng'hulu kaye hake. Na chilundo cha wakongoza kodi na wanhu wanji na wekala hamwe na hewo.
LUK 5:30 Ila Mafalisayo na walangusa wa malajizo ga Musa wamwe, wazangulonga wowalonjela wala walanguswa wa Yesu, walonga, “Lekachoni muwele ngulya na kunwa na wakongoza kodi na wadita gehile?”
LUK 5:31 Yesu nakawedichila, “Wanhu wawele wakomu hawalingumlapa mteleka mikwandi, ila wawele watamwa.
LUK 5:32 Suyile kuwachema wanhu wala wanojile, ila wala wawele na gehile wamgalamchile Nguluwi.”
LUK 5:33 Wanhu wanji wamlonjela Yesu, “Walanguswa wa Yohani Mbatiza wali wokwesela kulya na kulanda, na wa Mafalisayo waditaga hiho, ila walanguswa wahegwe wangulya na kunwa.”
LUK 5:34 Yesu nakawedichila, “Lelo wala walalikwe kuli mnvina ya kuhesa waganigwa kwesela kulya na mkasano nayali na mnvina nayali hamwe na hewo? Hebu!
LUK 5:35 Ila mhela wokuya hoyokusigwa mkasano nayali na mnvina hali hewo, baho wokwesela kulya.”
LUK 5:36 Yesu nakawalonjela nhelo ayi, “Haduhu munhu yalingukanha chibende chinyale na kuhoneleza kuli nguwo ya katali. Wone yadite ahyo, koiwifya ila nguwo inyale, chila chilingulawa kuli nguwo inyale hachiwana na nguwo ya katali.
LUK 5:37 Kahi kuduhu munhu yowika divai ya lehano kuli chizombe cha igozi cha katali. Kwa vila wone yadite hino, divai ya lehano yozatula jila mihako, divai yobohoka na mihako jotulika.
LUK 5:38 Divai ya lehano yowichigwa mli vizombe vya igozi vinyale.
LUK 5:39 Kuduhu munhu yalingunwa divai ya katali, na baho yogana kunwa divai ya lehano. Kwa vila kolonga ‘Divai ya katali inona lukami.’ ”
LUK 6:1 Zuwa limwe lya kwesela, Yesu na walanguswa wa heye nayali yokola mli migunda ja uhemba. Walanguswa wa heye wazangubena mibeleje ja uhemba, wazangupugusa nyhule na moko, wolya.
LUK 6:2 Mafalisayo wamwenga nawawauza, “Lekachoni mwangudita mbuli hambe ikundigwe kudita Zuwa lya Kwesela?”
LUK 6:3 Yesu nakawedichila kawalonjela, “Hamsomile vyonayaditile Daudi na wayage lowali na nzala?
LUK 6:4 Heye nakenjila ng'handa ya Nguluwi, nakahola mibumunda jilavigwe kwa Nguluwi kalya na kuwapa wayage. Malajizo hambe gakundize wanhu wanji kulya mibumunda ajo, ila wakulu wa watambika yeng'ha.”
LUK 6:5 Ahyo Yesu kuwalonjela, “Mwana wa Munhu ndo Mkulu wa Zuwa lya Kwesela.”
LUK 6:6 Zuwa linji lya Zuwa lya Kwesela, Yesu nakenjila mng'handa ya kusalila, kuwalangusa mla mng'handa mwali na munhu yumwe nayali na moko wakudilo uziliche.
LUK 6:7 Walangusa wa malajizo ga Musa na Mafalisayo wamwenga nawekala wopala chinhu cha kumlonjeleza Yesu. Ahyo wazangubeteza walole komlohola munhu kuli Zuwa lya Kwesela.
LUK 6:8 Ila Yesu nakavizela gowalingijesa, nakamlonjela yula nayali na moko uziliche, “Winuche uye wime hano.” Yula munhu kaluta kema hagati.
LUK 6:9 Baho Yesu nakamlonjela. “Ndangukuuzani hemwe, kuli Malajizo ga hetwe ikundigwa hemwe kudita choni kuli Zuwa lya Kwesela? Kudita ganojile ama kudita gehile? Kulohola ukomu wa munhu ama kwajiliza?”
LUK 6:10 Kawalola wanhu weng'ha wowekalile hala, na baho nakamlonjela yula yaziliche moko, “Ugolole moko wa hegwe.” Na heye kadita hiho na moko wa heye uwa mkomu kahi.
LUK 6:11 Ila hewo wazanguzudila ng'hatu wazangilonjela wawo chinhu chachi chihile chowomditila Yesu.
LUK 6:12 Zuwa limwe Yesu nakaluta kuchidunda kulanda, yalimeho kuko hamihe yeng'ha yomlanda Nguluwi.
LUK 6:13 Mitondo lokuchele kawachema wala walanguswa wa heye, kawahagula kumi na weli kulawa mumula mli hewo na kuwachema watumigwa.
LUK 6:14 Awo ndo Simoni yula Yesu yampele itagwa lya Petili na Andeleya mng'holoze na Yakubu na Yohani na Filipo na Batolomeo na
LUK 6:15 Matei na Tomasi na Yakubu mwana wa Alufayo na Simoni yalinguchemigwa mtowanila isi ya Isilaeli na
LUK 6:16 Yudasi mwana wa Yakubu na Yudasi Isikalioti yula hamba yamhinduche Yesu.
LUK 6:17 Yesu loyeduliche hamwe na walanguswa wa heye mchidunda, Yesu nakema honhu hawele na ibindi hamwe na chilundo cha walanguswa wa heye na lung'hongola lwa wanhu walawile nzingo zeng'ha kulawa Yudeya na Yelusalemu na kulawa kumwhani ya Tilo na Sidoni.
LUK 6:18 Weng'ha nawoya kumhulichiza Yesu na waloholigwa matamwa gawo. Vivila wanhu waliwogazigwa na chijeni chihile na woya na kuloholigwa.
LUK 6:19 Wanhu weng'ha nawagana kumdoliza Yesu, nawona mong'ho wali ulawa mgati mwa heye na weng'ha waloholigwa.
LUK 6:20 Yesu kawalola walanguswa wa heye, kalonga, “Mbweda hemwe wazunwa, kwa vila Undewa wa Nguluwi wa hemwe.
LUK 6:21 Mbweda hemwe mli na nzala sambi, kwa vila hamba mogutizwa. Mbweda hemwe muwele kulila sambi, kwa vila moza sechelela.
LUK 6:22 Mbweda hemwe wanhu wokwihilani, wokubagulani na kuwaliga, na kuwalonga hemwe mwiha kwa mbuli ya Mwana wa Munhu.
LUK 6:23 Msangalale na kuvina ago hogolawila, kwa vila chonolo chomuwichilwe kilanga chikulu. Kwa vila wasekulu wa hemwe na wawaditila waloli wa Nguluwi hiho.
LUK 6:24 Ila mane mwemwe hemwe muwele na lufufu, mina mhela wa hemwe wa kusechelela umala.
LUK 6:25 Mane mwemwe hemwe muwelengiguta sambi, mina hamba mohulika nzala! Mochona hemwe muwelenguseka sambi, mina hamba mozangulila!
LUK 6:26 Mogaya ng'hatu kota wanhu weng'ha, wone wanhu wawatogole, mina wasekulu wawo nawawaditila hiho waloli wa udesi.
LUK 6:27 “Ila ndangukulonjelani hemwe muwelengunyhulichiza, muwagane wang'honyo wa hemwe, muwadile ganojile wakwihileni.
LUK 6:28 Muwatambichize wala wawelenguwapanjilani, muwalandile kwa Nguluwi wawele nguwaditila gehile.
LUK 6:29 Munhu wone yakutowe izeze limwe mgalamlile na lya keli. Munhu wone yakusukule ikoti mlechele yahole na igwanda lyako.
LUK 6:30 Chila munhu yokulanda chinhu umhe, na munhu wone yakusukule chinhu cha hegwe uleche kumlonjela yakuhilulile.
LUK 6:31 Waditileni wanhu kota vila vyomlingugana wanhu wawaditileni hemwe.
LUK 6:32 “Na wone mzenguwagana wala walinguwagana hemwe yeng'ha, mopegwa choni? Haduhu. Kwa vila na wehile nawo wanguwagana wala walinguwagana hewo.
LUK 6:33 Kahi wone mzenguwaditila ganojile wala wali nguwaditila hemwe ganojile mopegwa choni? Wehile nawo waditaga hiho.
LUK 6:34 Na wone muwaziche wala mlingona wokuhilusilani lelo mopegwa choni? Wehile nawo wawazikaga wali na gehile wayawo wogana wahilusilwe hihila.
LUK 6:35 Hebu, ila hemwe muwagane wang'honyo wa hemwe, na muwaditile ganojile, muwaziche mleka kugana kuhilusilwa na baho chila chompegwa chowa chikulu mowa wana wa Nguluwi mkulu nayali kuchanya ng'hatu. Kwa vila heye kana isungu na wala wohambe wamtogole na wanhu wehile.
LUK 6:36 Muwe na isungu kota Nguluwi wa hemwe vyoyawele na isungu.
LUK 6:37 “Mleche kuwatagusa wanhu wanji, namwe hamtagusigwa na Nguluwi, mleche kuwatagusa kwa wihe wanhu namwe hatagusigwa kwa wihe. Muwalechele wanji kwa gowaditile namwe molechelwa.
LUK 6:38 Muwape wanji gowawele ngugana, hemwe namwe mopegwa. Mobochela chipimo chinojile chimemile, chobamandizwa na kusunyunyiza sunyunyiza mbaka kubohoka. Kwa vila chipimilo chichila chomulinguwapimila wanji na heye Nguluwi kopimila chichila.”
LUK 6:39 Na baho Yesu kawalonjela nhelo imwe, wone muhnu yohambe yalole komlongoza miyage hambe yalole? Weng'ha weli wokwinjila mli ikulubila.
LUK 6:40 Mlanguswa hambe yamsinde mlangusa, ila yalingulanguswa wone yasinde, kanguwa kota mlangusa wa heye.
LUK 6:41 “Ila kochona ndaze chibanzi chiwele miziho lya mng'holozo, ila uleka kuchona ching'hanzi chiwele miziho lya hegwe.
LUK 6:42 Koweza ndaze kumlonjela mng'holozo, ‘Mng'holozangu, Bete ndikuse chibanzi chiwele miziho lyako,’ Na kuno hambe uchone ching'hanzi chiwele miziho lya hegwe? Kwa mdesi hegwe! Tandi use chibanzi chiwele miziho lyako aho koweza kulavya ching'hanzi chiwele miziho lya mng'holozo.
LUK 6:43 “Igodi linojile halilelaga mafuza gehile, na hiho igodi lihile halilelaga mafuza ganojile.
LUK 6:44 Chila igodi lyozeleka kwa mafuza gake. Yangoneka wanhu hawabawaga masada kuli migodi jili na miwa, kahi hawabawaga ububu kulawa kuli mikwangwasale.
LUK 6:45 Munhu yanojile kangulavya ganojile, gawichigwe mnhumbula mwa heye, na munhu yehile kangulavya gehile kulawa mnhumbula ya heye, kwa vila munhu kalongaga kulawa gala gamemile mnhumbula ya heye.
LUK 6:46 “Lekachoni mwangunyhema, ‘Mkulu, Mkulu’ Na kuno hambe mdite gondilonga?
LUK 6:47 Munhu yoneche yokuya kwa heni na kunyhulichiza na kugadita.
LUK 6:48 Ayo kewhana na munhu yazenjile ng'handa, yula yabawile msisi wa heye mchanya hali italawe na kuzenga ng'handa ya heye baho, nhonya ng'hulu na itowa mazi menji na gamema, lukolola lwa mazi luitowa ila ng'handa, ilemwela kutigasika, lekachoni, naizenjigwa goya yimile.
LUK 6:49 Ila munhu yoneche yawelenguhulika aga gondilonga ila hambe yadite chinhu, ayo kewhana na munhu yazenjile ng'handa hali sangalaza, habawile msisi. Lulawa lwanda lumemile, lutowa ng'handa ila, igwa luu! Itugunika yeng'ha.”
LUK 7:1 Yesu loyalonjile gala goyaganile wanhu wahulichize, nakaluta Kapanaumu.
LUK 7:2 Ako kwali na mkulu wa wamizi mloma, nayali na chitumagwa yomgana lukami. Yula chitumagwa wa heye yaliyotamika behi ya kubagama.
LUK 7:3 Yula mkulu wa wamizi wa Loma loyahuliche mbuli za Yesu kawalonjela wakulu wamwe wayahudi wakamlonjele yoye yamusile utamwa yula mpogozi.
LUK 7:4 Lowafichile kwa Yesu, wamdedeza ng'hatu, wolonga, “Munhu ayu imgana yaditilwe mbuli ayo.
LUK 7:5 Mina heye yuye kanguwagana wanhu wa hetwe na isi ya hetwe, na ndo yatuzenjele ila ng'handa ya kusalila.”
LUK 7:6 Yesu nakaluta hamwe na hewo. Hoyali behi kwinjila kaye ha yula mkulu wa wamizi Mloma, kawalajiza wala weganaga wakamlonjele Yesu, “Mkulu siganigwe winjile mng'handa ya heni.
LUK 7:7 Ndo mina siwene ndanguganigwa mbuye kouli hegwe, ila ulonje ulonzi hela, chitumagwa wa heni kowa mkomu.
LUK 7:8 Mina, na heni nani, nda munhu mbichigwa hali ludali lwa wanji, ndanawo wamizi hasi ha heni. Ndangumlonjela yumwe, ‘Ulute!’ Na heye kanguluta, na yunji, ‘Uye!’ Na heye kanguya, na chitumagwa wa heni, ‘Udite chinhu chino,’ Na heye kangudita.”
LUK 7:9 Yesu loyahuliche ago, nakabubuwala, kamtogola yula mkulu. Hamba kawagalamchila wala wali womuwinza, kalonga, “Ndanguwalonjelani, sinamona munhu yawele na makundo kota aga, mli isi yeng'ha ya Isilaeli.”
LUK 7:10 Wala wanhu lowafichile kaye wamfika yula chitumagwa yotamika yawele mkomu.
LUK 7:11 Hamba Yesu nakaluta honhu hamwe hawele nguchemigwa Naini, na wala walanguswa na wanhu wanji, newelongoza.
LUK 7:12 Hoyali behi na lwizi lukulu lwa kwinjila hali honhu, walawila wanhu wawele wamholile msongolo yumwe yajile, mwana yaganigwe na mamo yumwe yalechelelwe. Wanhu wenji wahala wali hamwe na ayo mamo.
LUK 7:13 Mkulu loyamuwene ayo kamonela isungu, nakamlonjela, “Uleche kulila.”
LUK 7:14 Hamba kazakuchidoliza chinhanda chili na munhu yabagame, wala wali wamholile wema. Hamba kalonga, “Msongolo! Ndangukulonjela, winuche!”
LUK 7:15 Yula yajile kenuka, kekalisa, kaluka kudamla. Hamba Yesu kamhola kamgala kuli maiwake.
LUK 7:16 Wanhu weng'ha wazangudumba, wazangumtogola Nguluwi wolonga, “Mloli mkulu wa Nguluwi kalawila hotuli. Nguluwi koya kuwalohola wanhu wa heye.”
LUK 7:17 Mbuli azo zenela Yudeya kweng'ha na isi ya habehi.
LUK 7:18 Wala walanguswa wa Yohani wamlonjela mbuli zeng'ha zilonjigwe zilingumlapa Yesu. Heye Yohani nakawachema weli mwa wala walanguswa wa heye kawalonjela,
LUK 7:19 walute kwa Mkulu wamuuze, “Hegwe ndo yula yalinguya, ama tumbete munhu yunji?”
LUK 7:20 Wala weli yawalanguse lowafichile hali Yesu wamlonjela, “Yohani Mbatiza katulonjela tuye kwa hegwe tukuuze, ‘Hegwe ndo yula nayali nguya, ama tumbeteze munhu yunji?’ ”
LUK 7:21 Mhela awo, Yesu yaliyowosela matamwa wanhu wenji walingugazigwa na matamwa, wali na vijeni vihile, na wanhu wenji wohambe walole wazangulola.
LUK 7:22 Yolawa Yesu kawalonjela, “Mlute mkamlonjele Yohani gala gomgahuliche na kugona, wali wohambe walole wangulola, wali na magulu gaziliche wangujenda. Wali na uswema wangwela, wohambe wahuliche wanguhulika, wafile katali wanguzilipuka, wazunwa wangudamlilwa Mbuli Inojile.
LUK 7:23 Kabweda yula munhu yohambe yandeme heni na gala gondilingudita!”
LUK 7:24 Aho watumigwa na Yohani lowochile, Yesu kaluka kuwalonjela wanhu wenji wamemile, gala gomlapa Yohani, “Lomlutile kumlola Yohani kugunuche, na mijesa yawele munhu wachi? Hambi na mijesa kowa kota isoli litigaswa na mbeho?
LUK 7:25 Lelo namluta kulola munhu nayali ndaze? Namluta kumlola munhu yavalile goya? Hebu! Wanhu wawele nguvala goya na wali na ukomu unojile wangikala mli ng'handa za wandewa!
LUK 7:26 Lelo mndonjele hambi namluta kumlola munhu wachi? Namluta kumlola mloli wa Nguluwi? Ena! Ndanguwalonjelani hemwe, ila nammona mng'hangala kusinda Mloli wa Nguluwi.
LUK 7:27 Nguluwi kangulonga, ayu Yohani ndo yawele ngulonjigwa mli Maandiko Matakatifu, ‘Ulole heni ndangumigala msenga yakugololele nzila ya hegwe.’
LUK 7:28 Yesu kasinda kwa kulonga, ndangukulonjelani, wanhu weng'ha haduhu yawele mkulu ng'hatu kusinda Yohani Mbatiza. Ahyo, yula nayali mdodo ng'hatu kuli Undewa wa Nguluwi, ndo mkulu kusinda heye.”
LUK 7:29 Wanhu weng'ha, na wakongoza kodi lowahuliche ago, nawatogola kunoga kwa Nguluwi ahyo nawakunda kubatizigwa na Yohani.
LUK 7:30 Ila Mafalisayo na wala wavizelele goya Malajizo ga Musa, nawalema kumhulichiza Nguluwi, kwa vila nawalema kubatizigwa na Yohani.
LUK 7:31 Yesu nakalonga, “Ulelo awu ndiuwhanize na chinhu chachi? Ndo wanhu wali ndaze?
LUK 7:32 Kota wasongolo wawele wekalise kuli soko wochichema na kilonjela, ‘Tuwatowelani mluli ila hamvinile! Twimba nzimbo za chililo, ila hamlilile.’
LUK 7:33 Yohani Mbatiza nakoya kazanguwoha na hanwele ujimbi, hemwe mlonga, ‘Kana chijeni!’
LUK 7:34 Heye mwana wa munhu koya, kazangulya na kunwa, hemwe mlonga, ‘Mloleni, mlya chila chinhu ayu mgalaji, kangigana na wakongoza kodi, na wehile.’
LUK 7:35 Ila luhala lwa Nguluwi loneka lunoga kwa wala weng'ha walinguikunda.”
LUK 7:36 Mfalisayo yumwe nakamchema Yesu kaye koyekalaga kulya ndiya ya hamihe hamwe na heye. Aho Yesu nakaluta kuli ng'handa ya Mfalisayo, na kekalisa kulya ndiya.
LUK 7:37 Kuli ula mji hali mamo yumwe yawele na gehile. Loyahuliche Yesu kamng'handa ya ayo Mfalisayo, nakahola chupa ya alabasta iwelenguguzigwa kwa sendi nyinji imemile mafuta galingunhunyhilila ng'hatu.
LUK 7:38 Koya kema habehi hali magulu ga Yesu, kalila, na mahozi gake gasa gumlagalila Yesu mmagulu. Ayo mdala kaza kubagusa magulu ga Yesu kwa mnvili zake. Hamba kamnonela magulu na kumbakaliza gala mafuta gawele ngunhunyhilila.
LUK 7:39 Yula Mfalisayo yamchemile Yesu yawene ahyo, kazangijesa mnhumbula, “Wone munhu ayu na yawe Mloli wa Nguluwi, yahavizelele mdala ayu yamdolize, kandaze, kana gehile!”
LUK 7:40 Yesu nakamlonjela ayo Mfalisayo, yamchemile, “Simoni ndina chinhu cha kukulonjela.” Heye Simoni nakamlonjela, “Ena mlangusa undonjele.”
LUK 7:41 Yesu kaluka kulonga, “Wanhu weli wamwaziche munhu sendi, yumwe nayali yamwaziche sendi zihejile msahala wa mhela umwe na nusu, na yunji sendi denali miya zihano zihejile msahala wa mwezi umwe na nusu.
LUK 7:42 Lowalemwelile kumhilulila gowaziche ayo munhu, nahawadaile weng'ha weli, awo weli yalikohi yomgana lukami munhu yula yawaziche?”
LUK 7:43 Simoni nakedichila, “Ndangijesa ndo Yula yalechelwe sendi nyinji zoyawele ngudaigwa.” Yesu nakamlonjela “Goya.”
LUK 7:44 Hamba kagalamka kwa yula mdala kalonga, “Simoni kwangumona ayu mdala?, Heni honyinjile aha haluga hako humhele mazi ga kuhovujila magulu gangu, ila mdala ayu kanyhovuga magulu gangu na mahozi gake na kumbagusa na mnvili za heye.
LUK 7:45 Hegwe hundamse kwa kunonela, ila ayu myago mdala kulawa nyhinjile hano nayali yoganonela magulu gangu.
LUK 7:46 Hegwe hulajile isungu lyako kwa kumbakaliza mafuta ga ngulingunhunyhilila mmutwi, ila ayu myago mdala kadita ahyo kambakaliza magulu gangu.
LUK 7:47 Ahyo ndangukulonjela, ayu mdala kangungana ng'hatu, na ndo koselwa gehile ga heye menji. Ila munhu yoselwe gehile mado kangugana mado.”
LUK 7:48 Na baho Yesu nakamlonjela yula mdala, “Kusilwa geng'ha gehile gouditile.”
LUK 7:49 Aho wala wali hamwe mchisanya wazangiuza, “Munhu ayu kandaze kangumusila munhu gehile goyaditile?”
LUK 7:50 Heye Yesu nakamlonjela yula mdala, “Makundo ga hegwe gakulohola, ulute goya.”
LUK 8:1 Ago logapulute, Yesu nakakola mwesa yowadamlila Mbuli Inojile ya Undewa wa Nguluwi. Wala kumi na weli nawelongoza hamwe.
LUK 8:2 Na wadala wamwe wala Yesu nayawosele chijeni na matamwa, nawelongoza hamwe. Awo wali Maliya yachemigwe Madelena, yula nayosigwe vijeni vihile saba,
LUK 8:3 na Yohana mdala wa Kusa, mkola mijito mng'hangala wa Helodi. Wadala wali hamwe na Yesu ndo achina Susana na wadala wanji. Awo wadala wali wamditila Yesu kwa lufufu lwao hewo.
LUK 8:4 Mihela jimwe chilundo cha wanhu chali chimema, na wanhu wali womuyila Yesu kulawa chila honhu. Heye kawalonjela nhelo ayi.
LUK 8:5 “Mnyalaji nayaliyomiza azo nyhadikwa, zimwe nazigwa mnzila, wakola nzila wazibiga, videje vya kuulanga vilya.
LUK 8:6 Zinji nazigwa hali maganga, lozotile zikala lozisowile mazi.
LUK 8:7 Zinji nazigwa hali migodi jiwele na miwa. Jila migodi ja miwa jikula, nyhadikwa lozotile zipilinjilwa.
LUK 8:8 Zinji nazigwa hali misanga jinojile zota na zilela veduu!” Loyalonjile ahyo, kachemeleza lizi, kalonga, “Lelo mhuliche, yawele na makutu ga kuhulika nayahuliche!”
LUK 8:9 Walanguswa nawamuuza Yesu, nhelo ayi yangutulangusa choni?
LUK 8:10 Heye kawalonjela, “Hemwe mpegwa kuzizela zila zivisigwe za Undewa wa Nguluwi, ila awo wanji hebu, leka hewo wangulonjelwa kwa kulanguswa, leka, wone wazengulola waleche kugona, na wone wahuliche waleche kuvizela.
LUK 8:11 “Lelo nhelo ayi yangulonga ahi, nyhadikwa ndo ulonzi wa Nguluwi.
LUK 8:12 Zila zigwile mnzila zangulajila wala wanhu wawelenguhulika ulonzi wa Nguluwi, hamba lyokuya Limazoga lyanguzusa mnhumbula za hewo, waleche kukunda waloholigwe.
LUK 8:13 Zila zigwile hali italawe ndo wala walinguhulika awo ulonzi wanguubochela wasangalale. Ila kota zila nyhadikwa, ila wala wanhu wahela mizabi wangukunda hado hela, ila howojezigwa, wangugozola.
LUK 8:14 Zila zigwile mli igodi liwele na miwa, ndo zangulangusa wala wanhu wawelenguhulika ula ulonzi, hado hela, lowoluta wangubanigwa na kudumba, na vinhu vinojile vya isi, na hambe walele mafuza gakangale.
LUK 8:15 Na zila zigwile mli misanga jinojile, ndo wala wanhu wawelenguhulika ulonzi awo, wangibatilila mnhumbula, awo wangwimilila mbaka wangulela mafuza.
LUK 8:16 “Wanhu hawawesaga chenje na kuchigubika chidoto ama kuwika mluvungu lwa chinhanda. Ila wawikaga kuli honhu ha kuwichila chenje wogana wanhu lowokwinjila mla mng'handa wazengulola chila chenje.
LUK 8:17 “Chila chinhu chivisigwe chogubuligwa na chila chinhu chigubikwe, chozeleka na kuwichigwa hazelu.
LUK 8:18 “Lelo milolele vyomuwelenguhulika, mina yawele na chinhu kokonjezelwa, ila yula yalihela chinhu, chila choyalingijesa kanacho choholigwa.”
LUK 8:19 Aho mamo na wang'holoze Yesu wamuyila, ila na walemwela kumhejelela habehi wanhu nawamema lukami.
LUK 8:20 Munhu yumwe nakamlonjela Yesu, “Mayako na wang'holozo wakunze wangugana wakone.”
LUK 8:21 “Ila Yesu kawalonjela wanhu, mayangu na wang'holozangu ndo wala walinguhulika lizi lya Nguluwi na kibatilila.”
LUK 8:22 Zuwa limwe Yesu nakakwina mli itumbwi limwe hamwe na wala walanguswa, kawalonjela, “Tuloche ilamba mbaka kumwambu.” Waluka kuluta.
LUK 8:23 Lowali woluta mli itumbwi, Yesu nakebatigwa na usinjizi. Kawasa. Nhigu ya mazi ng'hangala yaluka kuputa, mazi galuka kwinjila mli itumbwi, kwaluka kwiha,
LUK 8:24 wala walanguswa wamlutila Yesu, wamwinula wolonga, “Mkulu, Mkulu! Tozangumala!” Yesu kenuka kaideuza ila nhigu na mbeho, baho vileka, kuwa tulu!.
LUK 8:25 Yesu kawauza, “Gakohi makundo ga hemwe?” Ila hewo wazangupulisa na kudumba kuno wochilonjela ayu ndo whaani? “Kanguilonjela nhigu na mbeho vyangumuhulika?”
LUK 8:26 Yesu nawalanguswa wa heye nawalutilila na majendo. Wafika mwhani ya isi ya Wagelasi ili kumwambu kwa ilamba lya Galilaya.
LUK 8:27 Loyali yodulika mwhani, munhu yumwe yawele na chijeni hala kulawa katali, ayo munhu hali yovala nguwo kahi nayali hambe yochikala kaye ila nakekalaga kuwele na vilaga!
LUK 8:28 Loyamuwene Yesu ketoza hanyi hoyali Yesu na kulonga lizi likulu, “Hegwe Yesu Mwana wa Nguluwi Mkulu, yawele kuchanya ng'hatu, kuna choni na heni ndangukulanda uleche kungaza!”
LUK 8:29 Nakalonga ahyo Yesu yaliyochilonjela acho chijeni chihile mlawe munhu ayu. Chijeni acho chihile nachimuyilaga ayo munhu mala nyinji. Wanhu nawamuwohaga na minyololo na kumhindila, ila myao nakadoholaga vyowamuwohile kangubilimiswa na acho chijeni chihile mbaka honhu hagunuche.
LUK 8:30 Yesu kamuuza, itagwa lyako kwa whaani? Heye kedichila itagwa lyangu chilundo cha wamizi. Mina mimazoga minji ja mumu.
LUK 8:31 Avyo vijeni vimdedeza uleche kutugala kuli ikulubila.
LUK 8:32 Honhu hala hali na migubi minji jidimigwa mchidunda. Ahyo, avyo vijeni vilawe viwenjile. Baho Yesu kawakundiza.
LUK 8:33 Avyo vijeni vimlawa yula munhu, wazakwinjila kuli migubi, jila migubi jilawa jifiduka jizakwinjila kuli ilamba lya mazi jibagama.
LUK 8:34 Wala wadimi lowagawene ago geng'ha galawile nawabilima waza kuwalonjela wanhu mbuli azo kuli miji na kumigunda.
LUK 8:35 Wanhu woya kulola galawile, wamlutila Yesu Wamona yula munhu yalavigwe chijeni yekalise habehi na Yesu yavalile nguwo yawele na luhala lwake luhiluche, wanhu weng'ha wadumba.
LUK 8:36 Wala wanhu waliwene alyo lilawile wawasimila wayao, vila ayo munhu yawele na chijeni voyaloholigwe.
LUK 8:37 Wenyeng'haye wa isi ya Gelasi, nawadumba heko! Wazangumlonjela Yesu yoche, baho Yesu nakakwina kahi mli itumbwi, koka
LUK 8:38 Yula munhu yalavigwe vijeni kazangumdedeza Yesu walutase. Ila Yesu hakundile, ila nakamlonjela
LUK 8:39 “Hiluche kaye kalonje geng'ha Nguluwi goyakuditile.” Yula munhu kaluta yodamla chila honhu hali muji ula gala geng'ha Yesu goyamditile.
LUK 8:40 Yesu loyahiluche nzingo iyage ya ilamba, wanhu wenji wambochela kwa mina wali wombeteza
LUK 8:41 Baho koya munhu yumwe yawele nguchemigwa Jailo, mkulu wa ng'handa ya kusalila, kafugama mmagulu ga Yesu kamlanda yalute kaye kwa heye,
LUK 8:42 Mina mwanage mdala yawele na miyaka kumi na mili, nayali mtamwa lukami behi na kubagama. Yesu loyali yoluta, wanhu waza kummemelela chila nzingo
LUK 8:43 Aho hali na mdala yumwe hali wala wanhu wamemile, nayali na utamwa wa kulawa danda miyaka kumi na mili. Na heye nakalavya sendi nyinji kwa walaguzi yochiteleka, ila haduhuli yamlohole.
LUK 8:44 Ayo mdala nakamuwinza Yesu mmbele, nakadoliza lupembo lwa nguwo ya heye. Baho kaloholigwa utamwa wa heye wa kulawa danda.
LUK 8:45 Yesu kauza, “Yalikohi yandolize?” Weng'ha walonga haduhuli munhu yakudolize. Wanhu weng'ha walema ila Petili kalonga, “Mkulu wanhu wenji wakuzunguluta na kiminyangaminyanga.”
LUK 8:46 Ila Yesu kalonga, “Kakuko munhu yandolize, mina nambona mong'ho wa heni wa kulohola undawa.”
LUK 8:47 Yula mdala yawene howeza kivisa kalawa yokakama kuno yodumba, ketoza mmagulu ga Yesu. Hala nakamlonjela Yesu kumwando hali wanhu weng'ha chimwambuze kumdoliza Yesu na vyoyosigwe utamwa bahala.
LUK 8:48 Yesu nakamlonjela yula mdala, “Mhinza, makundo ga hegwe gakulohola. Ulute goya.”
LUK 8:49 Yesu loyali yang'hali yodawala, Jailo chilongozi wa ng'handa ya kusalila kegalilwa na chitumagwa nguto kulawa kaye. “Mina mhinza we hegwe nakabagama, lekachoni, uzengumgaza Mlangusa lukami.”
LUK 8:50 Yesu loyahuliche ago nakamlonjela Jailo, “Uleche kudumba ukunde! Heye kowa mkomu.”
LUK 8:51 Loyafichile kaye kwa Jailo hamkundize munhu kwinjila mg'handa hamwe na heye, ila Petili nayali yeng'ha. Yohani, na Yakubu na wahaza wa ayo mdala.
LUK 8:52 Wanhu weng'ha wali wowemba na kwimbilila. Ila Yesu kawalonjela, “Mleche kuwemba, yuno mwana habagame kawasa hela!”
LUK 8:53 Hewo wazangumseka mina nawavizela yula mwana kabagama.
LUK 8:54 Ila Yesu kambata moko kalonga, “Gomwana winuche!”
LUK 8:55 Muhe wa heye imuhiluchila, bahala kalilimka. Yesu kawalonjela mgalileni ndiya.
LUK 8:56 Wala wahaza wahuliche wabubuwala, ila Yesu kawalonjela waleche kumlonjela ne munhu ago galawile.
LUK 9:1 Yesu nakawachema hamwe walanguswa wa heye kumi na weli na kawapa mong'ho na ludali lwa kulavya vijeni na kuwosela wanhu matamwa.
LUK 9:2 Na baho kawalajiza walute kudamla mbuli ya Undewa wa Nguluwi na kuwosela wanhu matamwa.
LUK 9:3 Kawalonjela, “Lomkuka mleche kuhola chinhu choneche chila, mleche kuhola ng'hweku ne mhako ne ndiya ne sendi ne igwanda lya keli.
LUK 9:4 Chila ng'handa yoneche yomkwinjila na kubocheligwa, mikale mumo mbaka lomkuka kuli muji awo.
LUK 9:5 Na wanhu wone waleme kukubochelani mlawe aho honhu, namwe lomlawa mkung'hune nhimbwisi iwele mmagulu genu iwe ulolezi wa kuwapanjila hewo.”
LUK 9:6 Walanguswa waluka kuluta, na wakola mli vijiji wodamla Mbuli Inojile na kuwosela wanhu matamwa chila honhu.
LUK 9:7 Helodi mndewa wa Galilaya loyahuliche mbuli zeng'ha lozilawile, kadumba ng'hatu kwa vila wanhu wenji na wekala wolonga kota Yohani Mbatiza kazilipuka kulawa koyabagame.
LUK 9:8 Wamwe walonga Eliya kalawila na wamwe walonga yumwe wa waloli wakatali kazilipuka kulawa kowabagame.
LUK 9:9 Ila mndewa Helodi kalonga, “Yohani ndimdumula mutwi. Hambi! Zino zondihulika mbuli za heye yalihi?” Ahyo kagana yamone Yesu.
LUK 9:10 Wala watumigwa lowahuliche, wamlonjela Yesu chila chinhu chowaditile. Yesu kawahola waliyeng'ha, kaluta nawo mbaka chijiji chiwelenguchemigwa Betisaida.
LUK 9:11 Ila wanhu lowavizelele koyalutile, nawamuwinza. Yesu kawabochela, kalonga na hewo mbuli za Undewa wa Nguluwi na kawalohola wala waliwogana kuloholigwa.
LUK 9:12 Isanya lolyaluche kuzinga, walanguswa kumi na weli waluta na kumlonjela, “Walonjele wanhu walute kuli vijiji na migunda ja habehi, wekepalile chilyo na honhu ha kuwasa, kwa vila honhu aha twa kisolo.”
LUK 9:13 Ila Yesu kawedichila, “Muwape hemwe chilyo walye.” Hewo wamwidichila, “Hetwe twanajo mibumunda jihano na somba mbili. Mane twangona tulute twetwe tukawagulile ndiya wanhu weng'ha awa!”
LUK 9:14 Walume waliyeng'ha wali hala, wali elufu zihano. Yesu kawalonjela wala walanguswa, “Muwalonjele wanhu wekalise hasi chila honhu walume elufu zihano.”
LUK 9:15 Wala walanguswa wadita hihila, na wanhu weng'ha wekala hasi.
LUK 9:16 Baho Yesu kahola jila mibumunda jihano na zila somba mbili, kalola kuchanya kilanga, katambichiza, kamogola mibumunda na somba na kawapa walanguswa wa heye wawagawile wanhu.
LUK 9:17 Wanhu weng'ha walya, na weguta. Walokoteza usanyangwa uponile vimema vikowe kumi na vili.
LUK 9:18 Zuwa limwenga Yesu nayali yomlanda Nguluwi yaliyeka. Walanguswa wamuyila na heye kawauza, “Hambi Wanhu wangulonga heni nda yalihi?”
LUK 9:19 Na Hewo wamwidichila, “Wamwe wangulonga hegwe Yohani Mbatiza, wamwe wangulonga hegwe Eliya, na wamwe wangulonga yumwe wa waloli wa Nguluwi wakatali yazilipuche kulawa kowabagame.”
LUK 9:20 Na heye kawauza, “Na hemwe mwangulonga heni nda whaani?” Petili kedichila, “Hegwe ndo Kilistu Mlohozi yahaguligwe na Nguluwi.”
LUK 9:21 Na baho Yesu kawalonjela waleche kumlonjela ne munhu chinhu chino.
LUK 9:22 Hamba kawalonjela, “Mwana wa munhu koganigwa kugazigwa ng'hatu na kulemigwa na walalile na watambika wakulu na walangusa wa malajizo ga Musa. Kokomigwa, ila zuwa lya kadatu kozilipuka.”
LUK 9:23 Na baho kawalonjela wanhu weng'ha, munhu yoneche yogana kumbinza heni yeleme yuye, yahole msalaba wa heye yambinze.
LUK 9:24 Kwa vila munhu yoneche yogana kuulohola ukomu wa heye kowajiliza, ila munhu nayali ngwajiliza ukomu wa heye kwa mbuli ya heni koulohola.
LUK 9:25 Ndaze, munhu yowa na chila chinhu mu isi yeng'ha, ila yowajiliza ukomu wa heye, munhu ayo kopata choni chinojile?
LUK 9:26 Wone munhu yambonele soni na gala gondilingulangusa, mwana wa munhu komonela soni ayo munhu mihela joyokuya mu ukulu wa heye na wa Mhaza na wahilisi wa kilanga welile.
LUK 9:27 Ndangukulonjelani ndikomya, wabahano wanhu hawobagama mbaka wawone Undewa wa Nguluwi.
LUK 9:28 Mazuwa nane kulawa loyalonjile mbuli azo, Yesu nakawahola Petili na Yohani na Yakubu, kaluta nawo kuchidunda kulanda.
LUK 9:29 Yesu Loyali yolanda, chihanga cha heye chigaluka na livalo liwa izelu chwee!
LUK 9:30 Na baho wanhu weli woneka wolonga na heye. Wanhu awo wali Musa na Eliya,
LUK 9:31 nawoneka wana ukulu wa kilanga, na wolonga na Yesu mbuli za heye zizangulawila ako Yelusalemu.
LUK 9:32 Petili na wayage wali wawasile, ila lowalilipuche, wawona ukulu wa Yesu na wanhu weli na wali wemile hamwe na heye.
LUK 9:33 Awo wanhu wala lowamlechile Yesu, Petili nakamlonjela Yesu. “Mkulu, goya hetwe tikale hano! Leka tuzenje vibumuli vidatu, chimwe cha hegwe na chimwe cha musa na chimwe cha Eliya.” Petili na havizelele hebu choyaliyolonga.
LUK 9:34 Petili loyalutilile kulonga ago, ng'hungugu ilawila iwagubika, na ng'hungugu ila loiwoyele wala walaguswa nawadumba ng'hatu lowagubichwe na ng'hungugu ayo!.
LUK 9:35 Lizi ilonga kulawa mli ila ng'hungugu, “Ayu ndo mwana wa heni ndimhagule, muhulichize heye.”
LUK 9:36 Lizi loihulikwe, Yesu nakoneka nayali yeng'ha. Walanguswa wanyamalila na hawamlonjele ne munhu mbuli ayo yowaiwene.
LUK 9:37 Mitondo yake, Yesu na wala walanguswa wadatu lowali wodulika kulawa kuchidunda, lung'hongola lwa wanhu wenji naluting'hana na Yesu.
LUK 9:38 Mumula mli wanhu wenji kalawila munhu kachemeleza lizi yolonga, “Mlangusa! Ndangukulanda umlole mwana wa heni, ka mwana yaliyeng'ha yonditumbila!
LUK 9:39 Chijeni chimgazaga, na chimditaga yanzenguyowa, chimditaga chinzilisa na ifulo lilawaga kumlomo, chilemaga kumleka na kumzuhulanga.
LUK 9:40 Nandiwalanda walanguswa wa hegwe wamlavye chijeni acho, ila walemwela.”
LUK 9:41 Yesu kedichila, “Hambi hemwe ulelo lulihela makundo, wajilile na uli na gehile! Ndochikala na hemwe mbaka nili?” Na baho nakamlonjela munhu yula, “Ngalile msongolo wa hegwe hano.”
LUK 9:42 Msongolo yula loyezile, chila chijeni nachimgwisa hanyi chimzilisa. Yesu nakaching'hanuchila chila chijeni chihile na kumlohola yula, na baho kamhilusila mhaza wa heye.
LUK 9:43 Walanguswa weng'ha wekala wabubuwale kwa ukulu woyawele nawo Nguluwi. Wala wanhu lowang'hali bahala wabubuwale mbuli zila zoyaditile, Yesu kawalonjela wala woyalinguwalangusa,
LUK 9:44 “Mhulichize chino cho ndikulonjelani! Mwana wa Munhu kanguzawichigwa mmoko mwa wanhu.”
LUK 9:45 Ila hewo hawauzelele hebu uviso wa ulonzi awo, kwa vila nauvisigwa kwa hewo waleche kuvizela hebu, na hewo wadumba kumuuza Yesu.
LUK 9:46 Wala walanguswa walikiuza hewo kwa hewo, yalihi yawele mkulu ng'hatu hali hetwe.
LUK 9:47 Yesu kagona majesa ga hewo, kamhola mwana mdodo, kamuwika habehi na hewo.
LUK 9:48 Na baho Kawalonjela, “Munhu yoneche yawele ngumbochela mwana mdodo ayu, kwa itagwa lyangu kangumbochela heni, na munhu yoneche yele ngumbochela heni, kangumbochela yula yanhumile. Kwa vila munhu nayali mdodo homuli, ayo mkulu kusinda weng'ha.”
LUK 9:49 Yohani nakamlonjela Yesu. “Mkulu tumona munhu yolavya chijeni kwa itagwa lya hegwe. Tumlemeza kudita vila, kwa vila hetwe hatulikilongoza na heye.”
LUK 9:50 Ila Yesu nakamlonjela Yohani na walanguswa wamwe, “Mleche kumlemeza! Kwa vila munhu yula yokulemele hegwe, kahamwe na hegwe.”
LUK 9:51 Mazuwa ga kuholigwa kwa Yesu kilanga louwele habehi, Yesu kagana kuluta Yelusalemu.
LUK 9:52 Kawalajiza walanguswa wamlongole, walute kuli chijiji chimwe chili muisi ya Samaliya kumuwichila goya chila chinhu.
LUK 9:53 Ila wenyeng'haye wa hala, hawaganile kumbochela, kwa vila nawavizela kota nayali yoluta Yelusalemu.
LUK 9:54 Walanguswa wa heye, Yohani na Yakubu lowagawene ago, wamuuza Yesu, “Mkulu, hambi kwangugana tuchilonjele chiluli chiwadulichile kulawa kilanga uwalakaze weng'ha?”
LUK 9:55 Ila heye kawagalamchila kawadeuza.
LUK 9:56 Na baho Yesu na walanguswa wa heye waluta kuli chijiji chiyage.
LUK 9:57 Lowali wokola mnzila, munhu yumwe nakamlonjela Yesu, “Ndokuwinza koneche kouluta.”
LUK 9:58 Yesu kawalonjela, “Mibwa ja kisolo jina mhalika na videje vya kuulanga vina vimvulila, ila mwana wa munhu kahela honhu ha kuwasiliza mutwi na kwesela.”
LUK 9:59 Hamba Yesu nakamlonjela munhu yumwenga, “Umbinze.” Ila munhu ayo kalonga, “Mkulu ung'hundize tandi ndute ndikamtile mhaza wa heni.”
LUK 9:60 Yesu kamwidichila, “Waleche wabagame wawatile wayao wabagame, ila hegwe ulute kadamle kuya kwa Undewa wa Nguluwi.”
LUK 9:61 Munhu yumwenga nakamlonjela, “Ndokuwinza hegwe Mkulu, ila undeche ndikawalaje wang'holozangu kaye.”
LUK 9:62 Yesu nakamlonjela, “Munhu yoneche yengibata ihuka kulima kumgunda, baho yolola kumbele, hambe yaganigwe kuli Undewa wa Nguluwi.”
LUK 10:1 Hamba, Mkulu nakawahagula wanhu wanji sabini na weli, kawalajiza weliweli, wamlongole chila honhu na chila chijiji hoyaganile heye kuluta.
LUK 10:2 Kawalonjela, “Mbena nyinji, ila wakola mijito wachefu. Lelo mumlande Mkulu yalajize wakola mijito wabene mbena ya heye.
LUK 10:3 Mluteni, ndanguwalajiza hemwe kota wana ming'holo kuli mibwa ja kisolo
LUK 10:4 Mleche kuhola sendi ne mhako ne makwamba na mleche kwima na kumlamsa munhu yoneche mnzila.
LUK 10:5 Ng'handa yoneche yila yomkwinjila, mlongole na kuwalamsa ahi, ‘Mikale goya mng'handa ino.’
LUK 10:6 Wone kuwe baho na munhu yalingugana kikala goya, kikala goya kowa hamwe na heye, wone hebu kikala goya kowahiluchilani.
LUK 10:7 Mikale mli ng'handa yiyo, mulye na kunwa cheng'ha chila chowawichilani, kwa vila mkola mijito kangugana yapegwe sendi za heye. Mleche kulabajila kulawa ng'handa imwe kuli nyinji.
LUK 10:8 Wone mfiche kuli muji na wanhu wawabochelani, mulye chilyo chompegwa.
LUK 10:9 Muwosele matamwa wali ku muji awo, na muwalonjele, Undewa wa Nguluwi wa habehi na hemwe.
LUK 10:10 Ila wone mwinjile kuli muji na wanhu waleme kuwabochela, mlawe namwe lomkola mnzila za hewo, mlonje,
LUK 10:11 ‘Na nhimbwisi za hakaye ha hemwe jeng'ha jing'hang'hanile mmagulu getu twangujikung'huna hali hemwe. Ila mvizele Undewa wa Nguluwi wa habehi na hemwe!’
LUK 10:12 Ndangulonga ndikomya, kuli zuwa lya utaguso, Nguluwi koutagusa muji ula vikulu kusinda yila ya wanhu wa Sodoma.
LUK 10:13 “Mane gwegwe, muji wa Kolasini! Kozakugaya! Hegwe muji wa Betisaida kozagaya! Kwa vila kota vinduzanduza vikoleke Tilo na Sidoni, wanhu wa hala wahavalile mivalo ja kulombocheza na kubakala mivu kulajila kota wamgalamchila Nguluwi.
LUK 10:14 Kuli zuwa lya utaguso Nguluwi kowatagusa hemwe vikulu kusinda yila ya Tilo na Sidoni.
LUK 10:15 Na hegwe Kapanaumu! Ndaze kogana kiinula mbaka kilanga? Hebu! Kozabiduswa mbaka kuli isi ya wabagame!”
LUK 10:16 Yesu nakawalonjela walanguswa wa heye, “Munhu yoneche yalinguwahulichiza hemwe, kangunyhulichiza heni, na yalingulema kuwabochela hemwe, kangundema heni. Na yula yalingulema kumbochela, kangulema kumbochela yula yanhumile.”
LUK 10:17 Hamba wala mkumi saba na weli nawahiluka wasangalale, wolonga, “Mkulu na vijeni vihile vituhulika lotuchemile itagwa lya hegwe.”
LUK 10:18 Yesu kawedichila, “Na ndilyona Limazoga lyolagala kulawa kilanga kota lumuli.
LUK 10:19 Ndiwapa ludali lwa kubiga mizoka na nyinje na mong'ho weng'ha wa kuwasumya wakwihileni, na kuduhu chinhu chiwalumiza.
LUK 10:20 Ahyo mleche kusangalala kwa vila lomuwene vijeni viwahuliche, ila msangalale kwa vila matagwa genu gandikwa kilanga.”
LUK 10:21 Mhela wuwula, Yesu kasangalala kwa Muhe Yelile ya Nguluwi. Na baho kalonga, “Ndangumtogola, Mhaza, Mkulu wa kilanga na muisi, na kuwavisa wali na luhala na wasomile mbuli azi, kuwagubulila wana wadodo. Ena Mhaza, ahyo ndo vouganile.”
LUK 10:22 Hamba kalonga, “Mhaza wa heni kanipa vinhu vyeng'ha. Kuduhu yamzelele Mwana ila Mhaza, na kuduhu yamzelele Mhaza ila Mwana, na yoneche yula Mwana yogana kumgubulila heye.”
LUK 10:23 Hamba kawahinduchila walanguswa wa heye na kulonga nawo chinyele, “Wabweda wanhu wala walinguvyona vinhu vyomlinguvyona hemwe!
LUK 10:24 Ndangukulonjelani ndikomya, waloli wenji na wandewa nawagana kugona aga gomlingugona hemwe, ila hawagawene, na kuhulika gala gomhuliche hemwe, hawagahuliche.”
LUK 10:25 Munhu yumwe yagazelele ng'hatu malajizo ga Musa koya kwa Yesu kumjeza, kamuuza, “Mlangusa, hambi ndite ndaze ndiuhole ukomu wa mazuwa gose ne kuduma?”
LUK 10:26 Yesu kamwidichila, “Malajizo gangulonga ndaze? Hegwe kugazela ndaze?”
LUK 10:27 Munhu yula kamwidichila, “ ‘Mgane Mkulu Nguluwi kwa nhumbula ya hegwe yeng'ha na kwa muhe wa hegwe weng'ha na kwa mong'ho wa hegwe weng'ha na kwa luhala lwako lweng'ha’ Na ‘Umgane youlingikalasa habehi kota, kota vyoulingigana gwegwe baho.’ ”
LUK 10:28 Yesu kamwidichila, “Kwidika goya, udite ahyo nagwe kozanguwa mkomu.”
LUK 10:29 Ila munhu yula yogana kiwona kanoga, aho nakamuuza Yesu, “Yali behi na heni kakohi?”
LUK 10:30 Yesu kamwidichila, “Kwali na munhu yumwe yalawile kulawa Yelusalemu kuza Yeliko. Loyali mnzila, kebatigwa na wahizi wamsukula vyeng'ha vyoyali navyo na kumtowa. Wamleka yawasile bahala kota yabagame.
LUK 10:31 Baho mtambika yumwe kakola kuli nzila ila loyamuwene munhu yula yatowigwe, kakola hafungo.
LUK 10:32 Vivila na Mulawi yumwe voyafichile hala na kumona munhu yatowigwe, na heye kakola hafungo.
LUK 10:33 Ila Msamalia yumwe loyaliyojenda, nakafika hala hoyali yula munhu yatowigwe, na heye loyamuwene, kamonela isungu.
LUK 10:34 Kamhejelela habehi, kambumba vilonda vya heye, na kuvibakaliza mafuta na Divai. Hamba kamkwiniza mchanya mwa idogowi lyake, kamigala mbaka kuli ng'handa ya wajenzi na kumwimilila.
LUK 10:35 Mitondo Msamaliya yula kalavya sendi denali mbili zihejile msahala wa mazuwa meli kamlechela mlolela ng'handa ya wajenzi nakamlonjela, ‘Muguze ayu munhu, choneche chonzezeche kwa chuguzo, ndokuhilusila hondihiluka.’ ”
LUK 10:36 Hamba Yesu kamuuza munhu yula, “Hambi kuli wala wanhu wadatu, yalikohi yalajile kota munhu wa habehi na heye, yula munhu yatowigwe na wabokaji?”
LUK 10:37 Na Yula munhu yavizelele ng'hatu Malajizo ga Musa, kedichila, “Yula yamonele isungu.” Yesu nakamlonjela, “Leka nagwe ulute kadite hiho.”
LUK 10:38 Yesu na walanguswa wa heye lowali woluta mnzila, wenjila mli chijiji chimwe. Mdala yumwe nayali nguchemigwa Malita nakambochela hakaye hake.
LUK 10:39 Mdala yula nayali kikala na mkulugwe nayali nguchemigwa Maliya, ayu nakekalisa habehi na Mkulu. Na heye na kekala yohulichiza ulanguso wa Yesu.
LUK 10:40 Ila Malita nayali yodita mbuli ziyage nyinji, kamlutila Yesu na kumuuza, “Mkulu hambi hulingona mng'holozangu voyandechile mbuli zeng'ha ndidita ndiliyeng'ha?, Mlonjele yoye yanhanze!”
LUK 10:41 Mkulu kamwidichila, “Malita, Malita! Kwanguhangawa na kugaya na vinhu vinji,
LUK 10:42 Ila Changuganigwa chinhu chimwe hano. Maliya kahagula chinhu chinojile, chili kuduhu munhu yomsukula.”
LUK 11:1 Zuwa limwe Yesu nayali honhu hamwe yolanda. Loyasindile kulanda, mlanguswa wa heye yumwe nakamlonjela, “Mkulu, twangukulanda tulanguse kulanda kota Yohani Mbatiza voyawalanguse walanguswa wa heye.”
LUK 11:2 Yesu nakawalonjela, “Lomlanda, mlonje hino, “ ‘Mhaza, itagwa lya hegwe litogoligwe, undewa wa hegwe uye.
LUK 11:3 Utugalile chila zuwa chilyo cha hetwe chotulingugana.
LUK 11:4 Utusile gehile getu, kota hetwe vyotulinguwosela hewo weng'ha watuzudize. Uleche kutwinjiza muli kujezigwa.’ ”
LUK 11:5 Hamba Yesu nakawalonjela walanguswa wa heye, “Tulonje yumwe wa hemwe kanguluta kaye kwa goloko wa heye nechilo na kumlonjela, ‘Goloko, ndangukulanda unyipe chilyo,
LUK 11:6 lekachoni goloko wa heni kakolela haluga hangu yolawa koyalutile, na heni ndahela ne chilyo cha kumha’
LUK 11:7 Na tulonje yula goloko nayali mng'handa kangwidichila, ‘Uleche kunganza! Chihindilo mina chihindigwa, na heni na wanangu tuwasa. Hambe nyhinuche ndikupe chinhu choneche chila.’
LUK 11:8 Ndanguwalonjelani, leka wone hoyile kukupa lekachoni ni goloko wa heye, ila kwavila hulingona soni kulutilila kulanda, kokwinuka na kukupa chila choulanda.
LUK 11:9 “Ahyo ndanguwalonjelani, Mlande, namwe mopegwa, na mpale, namwe mochona, mhodize, namwe mochumulilwa.
LUK 11:10 Mina yoneche yolanda kopegwa, na yalingupala kachonaga na yohodiza lwizi, kochumulilwa.
LUK 11:11 Hino mhaza yalikohi wone mwana wa heye yamlande somba, heye komupa izoka? Wone yamlande libumunda, heye kompa iganga.
LUK 11:12 Ama yalikohi wone mwana wa heye yamlande ifinga kompa nyhinje?
LUK 11:13 Wone hemwe hanga muwele wehile, mvizela kuwapa wana wa hemwe vinhu vinojile, ndangukomya Mhaza wa hemwe wa kilanga kodita vikulu ng'hatu, kowapa Muhe Yelile wala walingumlanda?”
LUK 11:14 Zuwa limwe Yesu nayali yolavya chijeni chihile chilingumudita munhu yumwe yaleche kulonga. Acho chijeni lochilawile, yula munhu kaza ngulonga. Wanhu wenji wabubuwala ng'hatu.
LUK 11:15 Ila wanhu wamwenga bahala walonga, “Kangulavya vijeni kwa ludali lwa Belisebuli, mkulu wa vijeni.”
LUK 11:16 Wanhu wamwe nawagana kumjeza Yesu, ahyo yawalajile ulajilo kulawa kilanga.
LUK 11:17 Ila Yesu nakavizela chowochijesa mnhumbula za hewo, kawalonjela, “Undewa weng'ha wula ugawanuche vilundo vilingitwanza, havilutilila ng'hatu. Kahi lukolo lyochitowa lyosumigwa.
LUK 11:18 Wone Limazoga lizengugawanuka lilyo, hino undewa wa heye wokwima ndaze? Ndangulonga hino kwavila hemwe mwangulonga heni ndangulavya vijeni kwa ludali lwa Belisebuli.
LUK 11:19 Wone heni ndilingulavya vijeni kwa ludali lwa Belisebuli, lelo wala wana wa hemwe walavyaga vijeni kwa ludali lwani, lwa Limazoga? Hebu! Ahyo, wana wa hemwe wokunda kuwatagusa hemwe kota mwiha.
LUK 11:20 Ila wone heni ndanguwinga vijeni kwa ludali lwa Nguluwi, mvizele kota Undewa wa Nguluwi mina ukuyilani hemwe.
LUK 11:21 “Munhu nayali na ludali yokwamila ng'handa ya heye kwa migoha, vinhu vya heye vya goya.
LUK 11:22 Ila wone munhu nayali na ludali lung'hangala ng'hatu yoye kumtowa, komsukula migoha jeng'ha yawele kidaila, na kuhola vinhu vya heye vyeng'ha na kuvitaganga.
LUK 11:23 Yoneche yohambe yebande na heni, kangundema, na yoneche hambe yekungajize hamwe na heni, kangusambalula.
LUK 11:24 “Chijeni chihile lochiwinjigwa kwa munhu, chibemhelaga honhu hagunuche, chipala honhu ha kwesela. Wone hachipatile, changulonga, ‘Ndohiluka kaye kwa heni.’
LUK 11:25 Lochihiluka na kuchifika chigoda cha heye chihovugwe na kunoligwa,
LUK 11:26 choluta kuvihola vijeni vinji saba vihile kusinda heye. Na hevyo vyeng'ha vyoluta na kikala aho. Ahyo ayo munhu kowa yogazigwa ng'hatu kusinda aho hamwande.”
LUK 11:27 Yesu loyali yolonga ago, mdala yumwe hala hali wanhu wamemile kalonga kwa lizi likulu, “Kabweda mdala yakulelile na kukonyeza!”
LUK 11:28 Yesu nakedichila, “Wabweda wala weng'ha walinguhulika ulonzi wa Nguluwi na kudita vila vyouwaganile kukola.”
LUK 11:29 Wanhu wenji lowali wommemelela Yesu, heye kalutilila kuwalonjela, “Lulelo alu ndo lulelo lwihile lulingugana ulajilo! Kuduhu munhu yowapa ulajilo ila ulajilo wa Yona.
LUK 11:30 Kota vila Yona vyoyali ulajilo kwa wanhu wa Ninawi, ndo hihyo Mwana wa Munhu kowa ulajilo kwa wanhu wa lulelo alu.
LUK 11:31 Malikiya wa kusini kulawila mhela wanhu awo howotagusigwa kwa wihe, na heye kowatagusa kwa wihe. Mina heye nakajenda kulawa isi ya kutali, nakuya kuhulichiza ulonzi wa luhala wa Solomoni, na hanga hano kuwele na chikulu kusinda Solomoni.
LUK 11:32 Wanhu wa Ninawi wolawila mhela wa kutagusigwa kwa wihe, na hewo wochitagusa lulelo alu kota luna wihe. Mina Waninawi nawamgalamchila Nguluwi kwa mbuli ya kudamla kwa Yona, na hano hana chikulu kusinda Yona!
LUK 11:33 “Haduhu munhu yawelenguwesa chenje na kuvisa awu kugubika na chidoto. Ila chenje chiwikagwa honhu ha kuwichila chenje leka wanhu wokwinjila wazengulola lumuli.
LUK 11:34 Iziho lyako ndo chenje cha lukuli lwa hegwe. Wone iziho lyako liwe lilola, lukuli lwako lweng'ha lowa na lumuli. Ila liziho lyako wone liwe hambe lilole, na lukuli lwako lweng'ha lowa hatitile.
LUK 11:35 Lelo wilolele, lumuli louwele nalo mgati luleche kutita.
LUK 11:36 Ahyo wone lukuli lwako lweng'ha luna lumuli, na haduhu honhu hatitile, baho lumuli lowa chila honhu, kota vila chenje lochikumwemwesela lumuli lwake.”
LUK 11:37 Yesu loyasindile kulonga, Mfalisayo yumwe nakamlanda yalute haluga hake yalye ndiya hamwe na heye. Ahyo Yesu kaluta, kekalisa kulya ndiya.
LUK 11:38 Mfalisayo ayo kabubuwala loyawene Yesu yolya ndiya nekuhovuga moko.
LUK 11:39 Mkulu nakamlonjela, “Hemwe Mafalisayo mwanguhovuga chizombe na luhelo kwa kunze, ila mgati mwa hemwe mmema ubuhu na ubokaji na wihe.
LUK 11:40 Mwawapoka hemwe! Hino heye yalumbile kunze si heye yula yalumbile mgati?
LUK 11:41 Ila muwape wazunwa vinhu mlinavyo, na Nguluwi kosangalala ng'hatu na chila chinhu chomdita chowa chelile.
LUK 11:42 “Mochona hemwe Mafalisayo! Lekachoni mwangulavya zaka za vinhu kota vila chizanga na tangawizi, na mboga ziyage zinji za mahamba, ila mwanguleka mbuli zilingutagusa goya na mwanguleka kumgana Nguluwi. Ahi ndo vyomlinguganigwa kudita ne kusemwa zila zinji.
LUK 11:43 “Mochona hemwe Mafalisayo! Lekachoni mwangugana kikalisa mli vigoda vya kumwando kuli ng'handa za kusalila, na kulamsigwa kwa ukulu kuli masoko.
LUK 11:44 Mochona hemwe kwa vila mfanda kota vilaga vilihela vilajilo, wanhu wangujenda mchanya hake nekuvizela.”
LUK 11:45 Yumwe wa wala wavizelele ng'hatu Malajizo ga Musa nakamwidichila Yesu, “Mlangusa, vyoulonga ayo kwangutuliga hetwe!”
LUK 11:46 Yesu nakamlonjela, “Na hemwe walangusa wa Malajizo mochona! Mwanguwadwika wanhu mhomolo zohambe ziholeche, kuno hemwe mwemwe hambe muwatanze ne kwa chidole hela.
LUK 11:47 Mochona hemwe! Mwanguzenga vilaga vya waloli wa Nguluwi, na waloli wawo wa Nguluwi nawakopoligwe na wasekulu wa hemwe.
LUK 11:48 Na hemwe sambi mwangulavya ulolezi kwa chila chowaditile wasekulu wa hemwe, mina hewo nawawakopola waloli, namwe mwanguzenjela vilaga.
LUK 11:49 Ahyo kwa mbuli ino, luhala lwa Nguluwi lwangulonga ahi, ‘Ndowegalila waloli na watumigwa, wowakopola wamwe na kuwagaza wamwe.’
LUK 11:50 Ahyo wanhu wa lulelo alu lotagusigwa kwa kuwakopola waloli weng'ha kulawa isi loilumbigwe,
LUK 11:51 kulawa kukopoligwa kwa Abeli mbaka kukopoligwa kwa Sakaliya, yula nawamkopole hagati ha honhu ha kulavila nhambiko na honhu helile. Ena, ndanguwalonjelani, lulelo alu logazigwa kwa kuwakopola awo weng'ha.
LUK 11:52 “Mochona hemwe walangusa wa malajizo! Mwanguvisa chichumulilo cha lwizi lwa ng'handa ya luhala. Hemwe mwemwe hamkwinjila, na mwanguwalemeza wanji kwingila.”
LUK 11:53 Yesu loyaliyolawa hala, wala Mafalisayo na walangusa wa malajizo ga Musa nawaluka kumpinga, na wakamchokoza kwa kumuuza mbuli nyinji,
LUK 11:54 wogana wamgwilize luzi loyolonga kota kawifya.
LUK 12:1 Mhela wula, wanhu wenji lukami nawamema mbaka nawazangibiga. Yesu nakaluka kuwalonjela walanguswa wa heye tandi, “Milolele na ulanguso wihile wa Mafalisayo ulinguwahada.
LUK 12:2 Chinhu choneche chigubikwe chogubuligwa, na chila chivisigwe chozeleka.
LUK 12:3 Ahyo chila chomlonga kutitu, wanhu wochihulika hali lumuli, na chila chomlonga kwa kupwepwa mliyeng'ha mchihengo, chodamlwa mchanya mli ng'handa.
LUK 12:4 “Ndangukulonjelani hemwe tuwele ngigana, mleche kuwadumba wawele ngukopola lukuli, hamba howoweza kudita chinhu chinji chihile.
LUK 12:5 Ndokulajilani yula yalinguganigwa kudumbigwa. Mdumbe Nguluwi, wone yakopole munhu, kana ludali lwa kumtaga muli chiluli cha Jehanamu. Ndangulonga, mdumbeni ayo.
LUK 12:6 “Ndaze, semembe wahano haviguzwa kwa sendi mbili? Ila kuduhu na chideje nechimwe chisemigwa na Nguluwi.
LUK 12:7 Lelo hata mnvili za mitwi jenu ziwazigwa zeng'ha. Mleche kudumba, lekachoni hemwe mganigwa kusinda videje!
LUK 12:8 “Ndangukulonjelani ndikomya, munhu yoneche yalikung'hunda hali wanhu, Mwana wa Munhu na heye komkunda hali wahilisi wa kilanga wa Nguluwi.
LUK 12:9 Ila munhu yoneche yalingundema hali wanhu, Mwana wa Munhu na heye komlema hali wahilisi wa kilanga wa Nguluwi.
LUK 12:10 “Munhu yoneche yawelengulonga ulonzi wa kumbeza Mwana wa Munhu kolecheligwa, ila munhu yoneche yalingumkovula Muhe Yelile holecheligwa hebu.
LUK 12:11 “Lowowagala hemwe kuli ng'handa za kusalila na kumwando kwa wakulu na vilongozi, mleche kuwa na lunhwinhwi ndaze vyomchigombela na vyomkwidichila.
LUK 12:12 Mina Muhe Yelile yokulangusani mihela jijo chila chomganigwa kulonga.”
LUK 12:13 Munhu yumwe muli wanhu wala wamemile nakamlonjela, “Mlangusa, mlonjele mng'holozangu tiigawile vinhu vyoyalechile mhaza wa hetwe.”
LUK 12:14 Yesu nakamlonjela, “Hegwe, yalikohi yambichile heni ndiwe ndiwamulila ama mgawaniza wa vinhu vya hemwe?”
LUK 12:15 Hamba Yesu nakawalonjela weng'ha, “Milolele na ubuhu, mina ukomu wa munhu hauwele kuli vinhu loyawele navyo!”
LUK 12:16 Kahi Yesu nakawalonjela nhelo, “Kwali na munhu nayali na lufufu na nayali na mgunda ulelile lukami.
LUK 12:17 Ayo munhu kazangijesa mnhumbula ya heye, ‘Lelo ndodita ndaze? Ndahela honhu ha kuhega kuwika chilyo cha heni.’
LUK 12:18 Hamba kelonjela, ‘Ndodita ahi, ndobomola ng'hano za heni na kuzenga zinji zili ng'hangala ng'hatu. Mumo hondiwika chilyo na vinhu vya heni vyeng'ha.
LUK 12:19 Hamba ndoilonjela nhumbula ya heni, lelo ndiwichila vinhu vya kulya vinojile mihela na mihela. Ahyo wesele, widile, winwele na usangalale!’
LUK 12:20 Ila Nguluwi nakamlojela, ‘Mpoka hegwe! Lehano nechilo muhe wa hegwe yoholigwa! Vinhu vyeng'ha vyowilundile vyowa vyaani?’ ”
LUK 12:21 Kahi Yesu nakasinda kwa kulonga, “Ahyo ndo vyoiwa kwa munhu yawelengilundila lufufu kwa heye, na hambe yewichile lufufu kwa Nguluwi”.
LUK 12:22 Hamba Yesu nakawalonjela walanguswa wa heye, “Na ahyo ndangukulonjelani, mleche kijesa kwa mbuli ya chilyo yomgana leka mikale, na nguwo zomgana mvalize ng'huli za hemwe.
LUK 12:23 Kwa vila ukomu unoga kusinda chilyo, na lukuli lunoga kusinda nguwo.
LUK 12:24 Mjilole ajo mibondwa, havilingunyala nyhadikwa, havilingubeta nyhadikwa kahi jahela ng'hano, leka ahyo Nguluwi Mhaza wa hemwe wa kilanga kanguwahombela. Hemwe mnoga ng'hatu kusinda videje.
LUK 12:25 Ndaze, hagati ha hemwe kuna munhu kwa mbuli ya lunhwinhwi yoweza kuhejeza ne saa imwe ya kikala muisi?
LUK 12:26 Lelo wone mlemwa kukola mbuli ndodo kota ayo, iwandaze mwangutochela azo mbuli zinji?
LUK 12:27 Mlole uluwa vyoulingutitima. Hagalingukola chinhu cha kiditila mibadu. Ndangukulonjelani, na heye Solomoni na lufufu lwake lweng'ha, nahavalile goya kota uluwa umwenga kuli uluwa umwenga.
LUK 12:28 Nguluwi yalingugana mahamba gawe na mibadu, na misolo lehano jangutitima na mitondo janguvunda na kujisoma mchiluli! Ndaze, howaditilani hemwe mzidi? Hemwe wanhu muwele na makundo mado!
LUK 12:29 “Ahyo mleche kugayila choni cho mulya na choni cho munwa, na mleche kudumba.
LUK 12:30 Mina ago geng'ha wanhu hawamzelele Nguluwi wangugagayila. Mhaza wa hemwe wa kilanga, kavizela kota mwangugana vinhu avi.
LUK 12:31 Ahyo mijeseni tandi Undewa wa Nguluwi, na vinhu avi mopegwa.
LUK 12:32 “Mleche kudumba, hemwe walanguswa wa heni, lekachoni Mhaza wa hemwe wa kilanga kangugana kuwapa hemwe undewa.
LUK 12:33 Mguze vinhu vyomlinavyo, muwagalile sendi wazunwa. Miditile mihako johambe jilale, na kiwichila ng'hano kilanga, ako hambe imale. Ako wahizi hambe wahize, na mifukuzi hambe jiwifye.
LUK 12:34 Kwa vila hala ng'hano ya hegwe hoyili, ndo na nhumbula ya hegwe hoiwa.
LUK 12:35 “Miwiche goya kwa chila chinhu chilawila, na vyenje vya hemwe viwe vikwaka.
LUK 12:36 Muwe kota wanhu wali ngubeta mkulu wa hewo yahiluche kulawa kuli mnvina ya kuhesa. Loyohiluka na kudumiza lwizi, bahala walute wamchumulile.
LUK 12:37 Wosangalala ng'hatu wala wahilisi wa kilanga mkulu wa hewo loyohiluka kowafika wobeteza! Ndangukulonjelani ndikomya, ahyo mkulu kochiwopa isali mchuno, wochikalasa hali ndiya na kowakolela mijito.
LUK 12:38 Wosangalala ng'hatu wone yoye nechilo hagati ama kuzangucha kowafika wali meho.
LUK 12:39 Mvizele hino, wone yawele na ng'handa nayavizele mhela hoyokuya mhizi, nahalileka ng'handa ya heye ibenigwe na mhizi.
LUK 12:40 Na hemwe hihyo miwiche goya, mina Mwana wa Munhu kokuya saa yohamuizelele.”
LUK 12:41 Petili nakamlonjela, “Mkulu, hino nhelo awo wangutulonjela hetwe yeng'ha ama wanhu weng'ha?”
LUK 12:42 Mkulu nakedichila, “Hino yalikohi chitumagwa wa kitumbila na yawele na luhala, yula mkulu wa heye yozangumuwika mchanya mwa vitumagwa wanji, na yawape wanhu chilyo kwa mhela wuwula?
LUK 12:43 Kobweda yula chitumagwa wone mkulu wa heye loyohiluka komfika yodita ahyo.
LUK 12:44 Ndanguwalonjelani ndikomya, komuwika chitumagwa ayo yalolelaje lufufu lwake lweng'ha.
LUK 12:45 Ila ayo chitumagwa wone yazengulonga mnhumbula ya heye, ‘Mkulu wa heni hambe yahiluche hima.’ Hamba kaluka kuwatowa vitumagwa wayage, walume na wadala, na kwaluka kulya na kunwa mbaka kugala.
LUK 12:46 Mkulu wa heye kohiluka zuwa lyohejesile na kuli saa yohaizelele mpogozi. Na heye komgaza na kumuwika hamwe na wala walihela makundo.
LUK 12:47 “Yula chitumagwa yavizelele choyogana mkulu wa heye, ila nahewichile goya kudita choyaganigwe kudita na mkulu wa heye, chitumagwa ayo kotowigwa lukami.
LUK 12:48 Ila yula yalingudita galingulapa kutowigwa ne kuvizela, kotowigwa hado. Munhu yapeligwe vinhu vinji, kodaigwa vinhu vinji, na munhu yoneche yapeligwe vinhu vinji ng'hatu, kodaigwa vinhu vinji ng'hatu.
LUK 12:49 “Mbuya kubwinha chiluli isi yeng'ha, na ndangugana ndiwe mbesile katali!
LUK 12:50 Ndanawo ubatizo wa kugazigwa ndilinguganigwa kuubochela, na heni ndangugaya lukami mbaka imale!
LUK 12:51 Hino mwangijesa mbuya kigala kikala goya muisi? Nehado! Siwuyile kigala kikala goya ila kibagula.
LUK 12:52 Na tangia sambi, wanhu wa ivyazi lya wanhu wahano wochibagula, wadatu kwa weli na weli kwa wadatu.
LUK 12:53 Mhaza kochibagula na wana wa heye wasongolo, na wana wasongolo wochibagula na mhaza wa hewo. Mamo kochibagula na wahinza wa heye na mhinza kochibagula na mamo wa heye. Mkweye mdala kochibagula na mkweye, na mkwe kochibagula na mkweye mdala wa heye.”
LUK 12:54 Yesu nakawalonjela kahi wala wanhu wamemile, “Lomuyona ng'hungugu ilawila kolizinjilaga zuwa, bahala mwangulonga, ‘Nhonya yotowa,’ Na mwangukomya yangutowa.
LUK 12:55 Na lomkona mbeho ya ilawila kusini, mwangulonga, ‘Kowa na ivuche,’ Na kwanguwa hiho.
LUK 12:56 Hemwe wahadi! Mvizela kumeho kwa isi na ulanga, iwandaze hambe mvizele mina ya mihela aji?
LUK 12:57 “Lekachoni mwangulemwela kwamula mbuli zinojile za kudita?
LUK 12:58 Mina wone munhu yakulonjeleze yakugale kuli ng'handa ya kutagusila, nayali goya hegwe mihanyise na heye mung'hali mluta mnzila. Leka yaleche kukugala kuli mtagusa, na heye mtagusa kokugala kwa wamizi, na hewo wokwinjiza mchinweng'ho.
LUK 12:59 Hulawa ako kuchinweng'ho, ndangukulonjela, mbaka housinda kulavya sendi ya mwiso ya zila zoulingudaigwa.”
LUK 13:1 Mhela wuwo, wanhu wamwe nawamlonjela Yesu mbuli za wanhu wa Galilaya wala Pilato nayawakopole mihela lowali womlavila Nguluwi nhambiko.
LUK 13:2 Heye Yesu nakawalonjela, “Hino hemwe mwangijesa Wagalilaya awo wali wehile ng'hatu kusinda Wagalilaya wanji kwa vila wechona ahyo?
LUK 13:3 Nehado! Ndanguwalonjelani, wone na hemwe hamumgalamchile Nguluwi, mobagama kota wawo.
LUK 13:4 Ama mwangijesa wala wanhu kumi na wanane wala nawagwililwe na muhonyo kula Siloamu wabagama, wali wehile kusinda wanhu weng'ha wawele Yelusalemu?
LUK 13:5 Nehado! Ndanguwalonjelani, wone na hemwe hamumgalamchile Nguluwi, mobagama kota wawo.”
LUK 13:6 Hamba Yesu nakawalonjela nhelo ayi, “Munhu yumwe nayali na igodi wa mafuza ya tini kumgunda wa heye wa zabibu. Ayo munhu kaluta kubawa mafuza, ila kalifika halilelile ifuza ne limwe.
LUK 13:7 Nakamlonjela yawelengulolela mgunda, ‘Mlolele! Kwa mihela midatu ndali ndikuya ndigana mbawe mafuza kuli igodi ali, na heni sambulile ne chinhu. Uteme! Lekachoni uzenguifya misanga hela?’
LUK 13:8 Ila ayo yawelengulolela mgunda nakedichila, ‘Mkulu, uleche mhela awu yeng'ha, na heni ndiuhalile na kuuwichila midohe.
LUK 13:9 Wone ulele, goya! Ila wone haulelile, koutema.’ ”
LUK 13:10 Kuli Zuwa lya Kwesela, Yesu nayali yolangusa mli ng'handa ya kusalila.
LUK 13:11 Na aho hali na mdala yumwe nayali na chijeni chihile chimditile yawe mtamwa miyaka kumi na minane. Na heye nayali na chiduhi, na nayali yolemwela kwima yagoloche.
LUK 13:12 Yesu loyamuwene, kamchema, nakamlonjela, “Mamo, utamwa wouwelenawo wusigwa!”
LUK 13:13 Hamba Yesu kamuwichila moko yula mamo, na bahala yula mamo kagoloka, kaluka kumtogola Nguluwi.
LUK 13:14 Ila chilongozi wa ng'handa ya kusalila nakazudila lekachoni Yesu kamusa munhu utamwa Zuwa lya Kwesela. Ahyo kawalonjela wala wanhu wamemile hala, “Mwanago mazuwa sita ga kukola mijito. Kuli mazuwa ago, muye musilwe matamwa genu, ila mleche kuya kuli Zuwa lya Kwesela.”
LUK 13:15 Ahyo Mkulu nakamwidichila, “Hemwe wahadi! Hino kuna munhu yoneche kuli hemwe hali dohola isenga ama idogowi lya heye kulawa mli ng'handa yaligale kunwa mazi kuli Zuwa lya Kwesela?
LUK 13:16 Lelo hano kabaho mhinza wa Abulahamu, na heye nakawohigwa na Limazoga miyaka kumi na nane. Lelo hainojile kumdoholela kuli Zuwa lya Kwesela?”
LUK 13:17 Yesu loyasindile kulonga ago, wala weng'ha wamwihile wazangona soni, ila wanhu nawasangalala kwa vinduzanduza vyoyaditile Yesu.
LUK 13:18 Yesu nakauza, “Hambi Undewa wa Nguluwi wa ndaze? Hambi ndiuhwane na choni?
LUK 13:19 Lufanda kota nyhadikwa ndodo kusinda zeng'ha ilinguchemigwa haladali, yaiholile munhu na kuinyala mumgunda wa heye. Nyhadikwa ayo yota, hamba liwa igodi ikulu mbaka videje vya kuulanga vizenga vimvulila mli nhagala zake.”
LUK 13:20 Kahi Yesu nakauza, “Hambi Undewa wa Nguluwi ndiuhwanize na choni?
LUK 13:21 Ufanda kota nungo yaiholile mamo yumwe na kahanza na utimbo vijemo vidatu, mbaka utimbo weng'ha ufuluma.”
LUK 13:22 Yesu nakalutilila na majendo kuluta Yelusalemu. Loyali mzila, nakakolela kuli miji na vijiji aku yowalangusa wanhu.
LUK 13:23 Munhu yumwe kamuuza, “Mkulu, hambi wanhu woloholigwa wado?” Yesu nakawedichila,
LUK 13:24 “Mikangaze kukolela kuli lwizi luzisili, mina ndangukulonjelani, wanhu wenji wojeza kwinjila, ila howoweza.
LUK 13:25 Mihela jokuya nayali na ng'handa kokwima na kuhinda lwizi, namwe mokwima kunze na kudumiza lwizi mlonga, ‘Mkulu, tuchumulile lwizi.’ Ila heye kowalonjela, ‘Siwazelele hemwe na komlawile kohi’
LUK 13:26 Namwe molonga, ‘Tudile na kunwa hamwe na hegwe, na hegwe nakulangusaga muli muji wa hetwe.’
LUK 13:27 Ila heye kolonga kahi, ‘Sivizelele hemwe mlawa kohi. Muche kumwando kwa heni, hemwe mweng'ha mlingudita gehile!’
LUK 13:28 Aho ndo homuwa mlila na kujejeda mizino, aho momona Abulahamu na Isaka na Yakubu, na waloli weng'ha wawele hali Undewa wa Nguluwi, na hemwe mtozigwa kunze!
LUK 13:29 Wanhu wokuya kulawa kolilawilaga isanya na kula kolizinjilaga isanya, kulawa kasikazini na kusini, wochikala na kulya hali Undewa wa Nguluwi.
LUK 13:30 Ena, wala wawele wa mwiso wowa wa mwaluko, na wala wawele wa mwaluko wowa wa mwiso.”
LUK 13:31 Mihela jijo Mafalisayo wamwe nawamlutila Yesu, wamlonjela, “Uche hano ulute honhu hanji, lekachoni Helodi kangugana yakukopole.”
LUK 13:32 Yesu nakawalonjela, “Mlute mkalilonjele alyo libwa lya kisolo ahi, ‘Lehano na mitondo ndanguwinga vijeni na kuwosela wanhu matamwa, haucha ndosinda mijito ja heni.’
LUK 13:33 Ahyo ingana lehano na mitondo na haucha, ndokwinulila majendo, lekachoni haiwa goya mloli wa Nguluwi yakopoligwe hanze ha Yelusalemu.
LUK 13:34 “Yelusalemu! Gwa Yelusalemu! Kwanguwakopola waloli na kuwatowa kwa maganga wala watumigwe kwa hegwe. Lwa kalinga njeza kuwakungajiza wana wa hegwe kwa heni kota vila ng'huku vyoilingukungajiza vinziya vya heye hasi hali mbawa za heye, ila hegwe nahuviganile!
LUK 13:35 Mlole! Mlechelwa ng'handa ya hemwe! Na heni ndangukulonjelani ndikomya, hammbona kahi mbaka homlonga, ‘Yatambichizwe ayo yalinguya kwa itagwa lya Mkulu.’ ”
LUK 14:1 Zuwa limwe lya kwesela, Yesu nakaluta kulya ndiya ha kaye ha mkulu yumwe wa Mafalisayo. Wanhu wali aho wali womlola kwa kumtegela.
LUK 14:2 Munhu yumwe yoyali na safula nakamlutila Yesu.
LUK 14:3 Yesu nakawauza walangusa wa Malajizo na Mafalisayo, “Hino Malajizo ga hetwe gangutukundiza hetwe kumusila munhu utamwa Zuwa lya Kwesela ama hebu?”
LUK 14:4 Ila hewo wekala wenyamalile. Yesu kamibata ayo mtamwa, kamusila utamwa, nakamlonjela yalute.
LUK 14:5 Hamba kawalonjela, “Yali kohi hemwe mwanage ama isenga lya heye wone linjile hali izimbo Zuwa lya Kwesela halikulilavya bahala?”
LUK 14:6 Ila hewo walemwela kwidichila chinhu.
LUK 14:7 Yesu loyawawene wala walalikwe vowali wohagula kikala kuli vigoda vya kumwando, nakawalonjela weng'ha kwa nhelo ayi;
LUK 14:8 “Wone munhu yakulaliche kuli mnvina ya kuhola, uleche kikalisa kuli vigoda vya kumwando. Leka munhu yunji mkulu kusinda hegwe koweza kuya,
LUK 14:9 na munhu yawalaliche weng'ha kokuwiyila na kukulonjela, ‘Mlechele ayu honhu aha.’ Baho kodeula na kuluta kikala kuli vigoda vya kumbele.
LUK 14:10 Ila wone hegwe uchemigwe honhu, kekale kumbele, leka munhu yula yakulaliche loyokuyila, yakulonjele, ‘Goloko, winuche uye wikale kuno kuli na vigoda vya kumwando,’ baho kotogoligwa hali wanhu weng'ha wekalise hamwe na hegwe.
LUK 14:11 Kwa vila munhu yoneche yochikwiniza, koduliswa, na munhu yoneche yawele liholile kokwinizwa.”
LUK 14:12 Hamba Yesu nakamlonjela yula yamlaliche, “Wone kowalalika wanhu kulya chilyo cha nemisi ama cha nechilo, uleche kuwalalika womiganaga ama wang'holozo ama wanhu wa habehi na haluga hako wali na lufufu. Kwa vila wone udite ahyo, hewo nawo wokulalika hakaye hawo, na ahyo wokuhilulila chila chouwaditile.
LUK 14:13 Ila wone loudita mnvina, walaliche wali wazunwa na waziliche lukuli na wali chete na wali hambe walole
LUK 14:14 na hegwe kowa utambichizwe na Nguluwi. Mina wawo wali hela chinhu cha kukuhilusila. Nguluwi kokuhilusila kuli zuwa wanhu wanojile howozilipuligwa.”
LUK 14:15 Yumwe wa wala wanhu wekalise hamwe na Yesu loyahuliche ago, nakamlonjela, “Kabweda munhu yozangulya ndiya mu Undewa wa Nguluwi.”
LUK 14:16 Yesu nakamlonjela, “Munhu yumwe nakadita mnvina ng'hulu kawalalika wanhu wenji,
LUK 14:17 Mhela wa kulya loufichile, nakamlonjela chitumagwa wa heye yakawalonjele walalikwe, ‘Muye, chila chinhu cha goya’
LUK 14:18 Ila weng'ha nawalema, chila munhu nayali na mbuli ya kukola. Munhu wa mwaluko nakamlonjela yula chitumagwa, ‘Ngula mgunda, ahyo ndangugana ndikaulole. Ndangulanda undeche.’
LUK 14:19 Munhu yunji nakalonga, ‘Ngula misenga kumi ja kulimila kumgunda, lelo ndamnzila ndute ndikajijeze. Ndangulanda undeche.’
LUK 14:20 Yunji nakalonga, ‘Ndimhola mdala, ahyo ndolemwela kuya.’
LUK 14:21 “Ayo chitumagwa kahiluka, nakamlonjela mkulu wa heye ayo mbuli. Na heye loyahuliche ago, kazudila, nakamlonjela yula chitumagwa, ‘Lute himahima nzila ng'hulu na nzila ndodo za miji, ukawalonjele wanhu wali wazunwa, na waziliche lukuli, na wohambe walole, na wali chete woye.’
LUK 14:22 Hamba yula chitumagwa nakalonga, ‘Mkulu, ago goulajize mina gakoligwa, ila na sambi honhu hanji hang'hali hanamema.’
LUK 14:23 Yula mkulu nakamlonjela chitumagwa wa heye, ‘Lute kuli nzila ng'hulu na mbakane uwakole wanhu lupichi woye wenjile leka ng'handa ya heni imeme.
LUK 14:24 Mina ndangukulonjelani, haduhu ne yumwe kuli wala walalichigwe yolya chilyo kuli mnvina ya heni!’ ”
LUK 14:25 Aho wanhu wenji lowali womuwinza Yesu, Yesu nakawagalamchila, kawalonjela,
LUK 14:26 “Munhu yoneche howa mlanguswa wa heni, wone hanganile heni ng'hatu kusinda vyoyalinguwagana mhaza wa heye na mamo wa heye na mdala wa heye na wanage na wang'holoze na walumbuze.
LUK 14:27 Munhu yoneche wone hapapile msalaba wa heye na kumbinza, kolemwela kuwa mlanguswa wa heni.
LUK 14:28 “Mina yalikohi munhu yumwe homuli, wone yagane kuzenga ilingo, holongola kikalisa yalole kana vinhu vikwila kugomanjiza mijito ya heye?
LUK 14:29 Kwa vila wone kokwaluka kubawa msisi, na wone yalemwele kugomanjiza, wanhu womseka.
LUK 14:30 Hamba wolonga, ‘Munhu ayu nakaluka kuzenga, ila kalemwela kugomanjiza mijito ya heye!’
LUK 14:31 “Ama mndewa wachi wone yagane kuza kitowa na mndewa yunji, hochikalisa hasi tandi yejese kokwimilila kwa wamizi wa heye elufu kumi kitowa na mndewa nayali na wamizi elufu makumi meli?
LUK 14:32 Wone yone hokwimilila, kowalonjela vitumagwa wa heye wakamdedeze yula mndewa yang'hali kutali waleche kitowa wekale goya.
LUK 14:33 Na hemwe namwe hihyo, wone munhu halechile chila chinhu choyali nacho howeza kuwa mlanguswa wa heni.
LUK 14:34 “Mwino unona, ila wone uwe haunonile, wonojezwa na choni mbaka uwe unonile kahi?
LUK 14:35 Hambe ikole ne chinhu kuwika kuli mgunda wala kuhanza na midohe, wanhu woitaga kunze. Yali na makutu ga kuhulichizila, nayahuliche!”
LUK 15:1 Zuwa limwe wakongoza kodi na wanhu wenji wawelengudita gehile nawaluta kumuhulichiza Yesu.
LUK 15:2 Mafalisayo na walangusa wa malajizo ga Musa wazakung'ung'uta, “Mlole munhu ayu! Kanguwabochela wadita gehile, kahi kangulya na hewo!”
LUK 15:3 Yesu nakawalonjela nhelo ayi.
LUK 15:4 “Wone, munhu yawele na ming'holo miya imwe, wone yone limwe lyajilile, kodita choni? Kojileka jila makumi tisa na tisa mviwala, na kanguluta kupala lila lyajilile mbaka yalyone.
LUK 15:5 Na wone yalyone, kosangalala na kolipika mmayega,
LUK 15:6 na kumuhilika haluga. Hamba kanguwachema wali ngigana na wanhu wa habehi na heye na kuwalonjela, ‘Tusangalale hamwe, kwa vila ndilyona lila ling'holo lyangu nalyajilile.’
LUK 15:7 Kahi ndangukulonjelani, kowa na kusangalala ng'hatu kilanga kwa mdita gehile yumwe kumgalamchila Nguluwi, kusinda wanhu makumi tisa na tisa watanganiche wohambe wagane woselwe gehile.
LUK 15:8 “Ama mwangona ndaze? Mdala yumwe nayali na migwala kumi, wone yajilize imwe, kangudita choni? Kobwinha chenje, kofajila ng'handa na kupala mholemhole mbaka yayone.
LUK 15:9 Wone yayone, kanguwachema weganaga na wanhu wa habehi na heye, yolonga, ‘Msangalale hamwe na heni, kwa vila ndilyona ligwala lya heni nalyajilile’
LUK 15:10 Hihyo ndangukulonjelani, wahilisi wa kilanga wa Nguluwi wosangalala kwa nayali na gehile yumwe yalingumgalamchila Nguluwi.”
LUK 15:11 Yesu nakalutilila kuwalonjela, “Kwali na munhu yumwe nayali na wana weli wasongolo.
LUK 15:12 Yula mdodo nakamlonjela mhaza wa heye, ‘Mhaza, nyipe uhalizi wa vinhu vya heni sambi.’ Ahyo mhaza yula kawagawila lufufu lwa heye lweng'ha wala wana weli.
LUK 15:13 Logakolile mazuwa mado, yula mdodo munhu kaguza vinhu vyeng'ha vyoyahalizwe na mhaza wa heye, hamba koka na kuluta isi ya kutali. Ako nakawifyanga sendi za heye chakachaka.
LUK 15:14 Loyasindile kidila chila chinhu, nailawila nzala ng'hulu isi ila, na heye kaluka kugaya.
LUK 15:15 Ahyo nakaluta kukola mijito kwa munhu yumwe nayali mwenyeng'haye wa isi ila, na heye kamuhilika kuli mgunda wa heye yawe yohombela migubi.
LUK 15:16 Kazangugana kulya chilyo jiwele ngulya migubi, ila haduhu munhu yampele.
LUK 15:17 Nyhala lozaluche kuhiluka, nakelonjelela, ‘Kula kuluga kwa mhaza wa heni kuna wakola mijito wenji wawele kulya na kulechelela. Iwa ndaze heni hano ndagubagama kwa nzala?
LUK 15:18 Ndokuka na kuluta kwa mhaza wa heni ndimlonjele kota, Mhaza, ndita gehile kwa hegwe, na ndita gehile kilanga na kwa hegwe Nguluwi.
LUK 15:19 Hambe nganigwe kuchemwa mwana wa hegwe kahi, ndite kota yumwe wa vitumagwa wa hegwe.’
LUK 15:20 Ahyo keyinula kaluta kwa mhaza wa heye. “Ila loyali yang'hali kutali, mhaza wa heye kamona. Kamonela isungu, kambilimila, kamlamsa kwa kumkumbatiza na kumnonela.
LUK 15:21 Yula mwana nakamlonjela, ‘Mhaza, mbifya kilanga na kwa hegwe Nguluwi na ndita gehile kwa hegwe. Hambe nganigwe kuchemigwa nda mwana wa hegwe.’
LUK 15:22 Ila mhaza wa heye nakawalonjela vitumagwa, ‘Himahima! Migale nguwo inojile mumvalize. Mvicheni pete mchidole cha heye na makwamba mmagulu ga heye!
LUK 15:23 Hamba mkome lila lisenga ilogota lihatile, tulye na tudite mnvina ng'hangala!
LUK 15:24 Kwa vila ayu mwana wa heni nayali yabagame ila lelo kazilipuka, nakajilila ila lelo koneka’ Ahyo waluka kudita mnvina.
LUK 15:25 “Mvina voyali ilutilila, yula mkulugwe nayali kumgunda. Loyali yohiluka na kuwa behi na haluga, kahulika nzimbo na wanhu wovina.
LUK 15:26 Kamchema chitumagwa yumwe, kamuuza, ‘Hana choni?’
LUK 15:27 Yula chitumagwa nakamlonjela, ‘Mng'holozako kahiluka haluga, na mhaza wa hegwe kakoma isenga ilogota lihatile loyamuwene yawele mkomu.’
LUK 15:28 “Ayo msongolo mkulu kazudila ng'hatu, kalema kwinjila mng'handa. Mhaza wa heye kalawa kunze na kumdedeza yenjile mng'handa.
LUK 15:29 Ila heye nakedichila, ‘Wijese, mihela jeng'ha heni nandikukolela mijito kota chitumagwa, na silemile kuhulichiza ilajizo lya hegwe ne zuwa limwe. Kumha choni? Humhele ne kamhene kamwe kadodo ndite mnvina na wotiganaga!
LUK 15:30 Ila ayu mwanago yawifile vinhu vya hegwe chakachaka na wang'hondwa loyoile kumchinjila isenga ilogota lihatile!’
LUK 15:31 Mhaza wa heye nakamwidichila, ‘Gomwana wa heni, mihela jeng'ha wali wikale na heni, na chila chinhu chondali nacho nachali cha hegwe.
LUK 15:32 Ila itugana tudite mnvina kwa vila ayu mng'holozako nayali yabagame, lelo kamkomu, nayali yajilile lelo koneka.’ ”
LUK 16:1 Yesu nakawalangusa wala walanguswa, “Muhu yumwe nayali na lufufu, nayali na mkola mijito. Wanhu nawamlonjela ayu mkola mijito wa hegwe kangulya chaka vinhu vya yula yamuwichile,
LUK 16:2 Yula nayali na lufufu kamchema nakamlonjela, ‘Mbuli zachi za hegwe zondili nguhilika? Undajile choukolele lufufu lwa heni? Mina hegwe huza nguwa chitumagwa kahi.’
LUK 16:3 Yula chitumagwa kejesa, Ayu mkulu kangumbusa kuli kumwandichila, ndodita ndaze kuluta kumgunda siweza, kuluta kulanda kota wali hela chinhu, ndangona soni.
LUK 16:4 Ndivizela lya kudita, aho hoyombinga wanhu waze ngunyhema kowekalaga.
LUK 16:5 “Yolawa kawachema weng'ha walinguganigwa na yula nayali yowandichila yumweyumwe, nakamlonjela yalongole, ‘Zilinga uli ngudaigwa mkulu wa heni?’
LUK 16:6 Heye nakedichila mibiga ja kutelechela mafuta miya na imwe ga mzeituni. ‘Yula nayandikaga nakamlonjela. Hole ai iwele ngulajila voili ngudaigwa, kalise himahima wandiche hamsini.’
LUK 16:7 Kahi kamuuza munhu yunji yalingudaigwa, ‘Hegwe kangukudai zilinga?’ Heye nakedichila migunila miya ja uhemba. ‘Hole ayi ilingulajila voulingudaigwa, wandiche samanini.’
LUK 16:8 “Ila yula mkulu kamtogola ayo yandikaga voyali wakitumbila nayali yakolile luhala, mina wanhu wa ayi isi wana luhala na mbuli za hewo zihile kusinda wanhu wa lumuli.”
LUK 16:9 Heye Yesu kazangulonga, “Heni ndangukulonjelani migane na wanhu kulawa kuli lufufu lwihile lwa isi, lozimala mobocheligwa na hewo, mozangikala mazuwa gose ne kuduma.
LUK 16:10 Munhu yoneche yalinguganigwa muli mbuli ndodo. Kowa yaganigwe muli mbuli ng'hangala. Ila munhu halingukundigwa kuli mbuli ndodo, howeza kukundigwa kuli mbuli ng'hulu.
LUK 16:11 Wone hemwe wanhu wohambe wakukundeni kuli lufufu lwihile lwa amu muisi, munhu yachi yokupani lufufu lwa kukomya?
LUK 16:12 Na wone hambe mkundigwe kuli lufufu haluwele lwa hemwe, munhu yachi yokupani lufufu luzeleche?
LUK 16:13 “Haduhu chitumagwa yokola mijio kwa wakulu weli, kwa vila ama komzudila yumwe na kumgana yunji, ama kochilongozaga na yula yumwe na kumbeza ayo yunji. Homfugamila Nguluwi na lufufu.”
LUK 16:14 Ila Mafalisayo lowahuliche ago geng'ha, ila hewo wali wogana lukami lufufu, wambeza Yesu.
LUK 16:15 Aho nakawalojela, “Hemwe mwangilola mnoga hali wanhu, ila Nguluwi kavizela mnhumbula ya hemwe. Mina chila chilingoneka chikulu hali wanhu, Nguluwi kochona acho chiha.
LUK 16:16 “Mizilo na gala gandichigwe na waloli gali mbaka mihela ja Yohani Mbatiza. Kulawa aho Mbuli Inojile ya Undewa wa Nguluwi wangutagusigwa, na chila munhu kangwinjila kwa ludali.
LUK 16:17 Ila isi yeng'ha na kilanga vyokusigwa chimdawalo hela kusinda helufi imwe ya malajizo gandichigwe kusigwa.
LUK 16:18 “Yoneche yamleche mchewake na kuhola yunji, mng'hondwa, na yoneche nayali kumhola mdala yalechigwe mng'hondwa.
LUK 16:19 “Kwali na munhu yumwe nayali na lufufu, nayali yovala mivalo ja sendi nyinji ng'hatu na kitani chinojile na kudita mnvina chila yokwinuka.
LUK 16:20 Kahi kwali na munhu yumwe nayali nguchemigwa Lasalo, yula nayali na vilonda lukuli lweng'ha nayali womigala mli lwizi lwa yula nayali na lufufu.
LUK 16:21 Nakaganaga yalye usanyangwa uwele ngulagala kulawa mli mchisanya ya yula nayali na lufufu, na ganji, mibwa jali jikuya jimyanga vilonda vya heye!
LUK 16:22 “Lelo yula munhu nayali hela chinhu kaholigwa na Nguluwi, mhilisi wa kilanga nakamhola, kekala habehi na Abulahamu na yula nayali na lufufu kaga, nakatiligwa.
LUK 16:23 Na yula nayali na lufufu yawele yogazigwa kula kuli isi ya wabagame, kenula meho ga heye, kamona Abulahamu kwa kutali na Lasalo yekale hafungo.
LUK 16:24 Hamba kachema kwa lizi, ‘Mhaza Abulahamu, mbonele isungu, mlonjele Lasalo yadolize chidole cha heye mli mazi yahoze umyango wa heni mina ndangugazigwa kuno kuli chiluli.’
LUK 16:25 “Ila Abulahamu nakedichila, ‘Kumbuche mwanangu hegwe na kupegwa ganojile lowali uchikala muisi, na Lasalo nakabochela gehile. Lelo heye kanguhozigwa na hegwe kwangugazigwa.
LUK 16:26 Ila na ago geng'ha, hotuli hetwe na komli hemwe hawichigwa ikulubila ikulu, ili wawele ngugana kuya kumuli kulawa kuno walemwele, na wawele komuli walemwele kuya kuno kotuli.’
LUK 16:27 Ayo nayali na lufufu nakalonga, ‘Lelo mhaza Abulahamu ndangukulanda umlajize yalute kaye kuli ng'handa ya mhaza wa heni.
LUK 16:28 Mina ndina wang'holozangu wahano yalute yawakanye waleche kuya kuno kuli kugazigwa.’
LUK 16:29 “Ila Abulahamu nakamlonjela, ‘Wang'holozo wanago Maandiko Matakatifu ga Musa na waloli wanji wa Nguluwi wowalonjela ago, waleche wawahulichize hewo chowolonga.’
LUK 16:30 Ila heye nakalonga, ‘Hebu mhaza Abulahamu! Ila wone munhu yazilipuche kulawa wanhu wajile na kuwalutila, womgalamchila Nguluwi.’
LUK 16:31 Heye Abulahamu nakalonga, ‘Wone hambe wagasome Gandichigwe ga Musa na waloli wanji wa Nguluwi, howojesa hebu! Wone yalute yazilipuche kulawa wanhu wabagame!.’ ”
LUK 17:1 Hamba Yesu nakawalonjela wala walanguswa wa heye, “Havileka kulawila vinhu vilingujeza wanhu kudita gehile, ila kochona yula yojeza.
LUK 17:2 Naigana yafunjigwe iganga likulu lya lwala msingo na kutozigwa mli mlwanda, kuleka heye kumwambuza munhu yumwe wa awa wadodo kuwifya.
LUK 17:3 Milolele! Wone mng'holozo yakuditile gehile mdeuze, wone yakunde kumgalamchila Nguluwi, yamgalachile.
LUK 17:4 Kahila wone yakuzudize mala saba kwa zuwa limwe na yohiluchila kouli yolonga, ‘Ndimgalamchila Nguluwi,’ goya yakundile.”
LUK 17:5 Wala watumigwa nawamlonjela, “Mkulu tonjezele makundo.”
LUK 17:6 Heye mkulu nakawedichila, Wone makundo ga hemwe na gawe mado kota nyhule ndodo ya haladali, mwahajezile kulilonjela ali igodi lya Mfolosadi ng'holeche ukenjile mli lwanda, nawo wawahuliche.
LUK 17:7 “Tulonje hemwe munhu yumwe kana chitumagwa nayali ngukola mijto ya kumgunda ama kangudima ming'holo lelo yohiluka kulawa kumgunda, komlonjela ayo chitumagwa himahima uye ulye ndiya?
LUK 17:8 Hebu! Komlonjela nhelechele ndiya wikale ung'holela mijito mbaka londisinda kulya na kunwa, ndo nagwe ulye.
LUK 17:9 Homnonela ayo mpogozi kwa vila nakakola goyalonjelwe.
LUK 17:10 Na hemwe namwe wone mdite gomlonjelwe, mlonje, ‘Hetwe wapogozi wohambe tupegwe chinhu, tukola gala gotulonjelwe tukole hela.’ ”
LUK 17:11 Yesu loyali yojenda kuza Yelusalemu nakakola mmbaka mwa Samaliya na Galilaya.
LUK 17:12 Loyali yokwinjila mli chijiji chimwe, naketing'ha na wanhu kumi wali na uswema, wemile kutali.
LUK 17:13 Wachemeleza lizi wolonga, “Yesu mlangusa tonele isungu!”
LUK 17:14 Loyawawene nakawalonjela, “Mlute mkelajile kwa watambika.” Lowaliwoluta, nawona kuhovujigwa.
LUK 17:15 Myawo yumwe yonile nakoselwa mayamwa, kahiluka kamtogola Nguluwi kwa lizi ing'hangala.
LUK 17:16 Ketoza kumwando kuli magulu ga Yesu kuno yomnonela. Ayo nayali Msamalia.
LUK 17:17 Aho Yesu nakalonga, “Nandisile matamwa mwali kumi? Wala tisa wakohi?
LUK 17:18 Haduhuli yunji yahiluche kumtogola Nguluwi ila ayu mjenzi yaliyeng'ha?”
LUK 17:19 Yesu nakamlonjela yula munhu, “Winuche, ulute, makundo gako gakulohola.”
LUK 17:20 Mhela umwe Mafalisayo nawamuuza Yesu, “Undewa wa Nguluwi wokuya nili?” Heye nakawalonjela, “Undewa wa Nguluwi haukuya ukoneka.
LUK 17:21 Kahi haduhu munhu yolonga, wahano, ama wahala. Lelo Undewa wa Nguluwi wa mgati mwenu.”
LUK 17:22 Hamba kawalonjela walanguswa, “Mazuwa ganguya moza ngugana kulola zuwa limwe lya mwana wa munhu, ila hamyona.
LUK 17:23 Na wanhu wokulonjelani, ‘Mlole ka hala!’ Ama ‘Mlole ka hano!’ Ila hemwe mleche kulawa kahi mleche kuwawinza.
LUK 17:24 Mina kota hila lumwemwesa lwa limlungu ne kulonga lumwesa kilanga nzingo imwe mbaka iyage, ndo voiwa zuwa alyo Mwana wa Munhu loyokuya.
LUK 17:25 Ila ago gang'hali, kogazigwa lukami na kulemigwa na lulelo alu.
LUK 17:26 Kota vyonaiwele mhela wa Nuhu ndo vyoiwa hoyokuya Mwana wa Munhu.
LUK 17:27 Wanhu nawalyaga na kunwa wohola na kuholeka mbaka mhela ula Nuhu loyenjile mli itumbwi ling'hangala. Mazi metemete logalawile na kuwakopola weng'ha.
LUK 17:28 Yowa kota vyoilawile mhela wa Loti. Wanhu wazangulya na kunwa, kugula na kuguza, kunyala nyhadikwa na kuzenga.
LUK 17:29 Ila zuwa Loti loyochile sodoma, maganga ga chiluli nagalawila gazangutowa kota nhonya kulawa kilanga na kuwakopola weng'ha.
LUK 17:30 Ndo vyoiwa zuwa alyo Mwana wa Munhu loyogubuligwa.
LUK 17:31 “Zuwa alyo, wone munhu yawele chinduwiko mwa ng'handa ya heye, yaleche kudulika yahole vinhu vya heye vili mng'handa nayali kumgunda yaleche kuhiluka koyalawile.
LUK 17:32 Mkumbucheni mchewake Loti.
LUK 17:33 Munhu yalingugana kululohola lukuli lwa heye kolwajiliza, na munhu yolwajiliza kolulohola.
LUK 17:34 Ndangukulonjelani, zuwa alyo wanhu weli wowa wawasile hamihe, yumwe koholigwa na yunji kolechigwa.
LUK 17:35 Wadala weli wowa wotwanga ndiya hamwe. Yumwe koholigwa na yunji kolechigwa.”
LUK 17:36 Wanhu weli wowa kumgunda, yumwe koholigwa na yunji kolechigwa.
LUK 17:37 Wamuuza kohi Mkulu? Kawalonjela, “Hawele na mtufi, ndo hojimema mikungule.”
LUK 18:1 Hamba Yesu nakawasimila walanguswa wa heye nhelo ayi, imgana munhu yaze kumlanda Nguluwi ne kugozola.
LUK 18:2 Nakalonga, “Kuli honhu hamwe kwali na mtagusa yumwe nayali yomuwinza Nguluwi, kahi nahamjesaga ne munhu.
LUK 18:3 Na honhu aho, kwali na mamo yumwe yalechelelwe, nakamlutilaga ayo mtagusa yomlanda yamtagusile goya kulawa kwa munhu nayali ngumhwihilwa.
LUK 18:4 Mihela minji ayo mtagusa nahaganaga kumlewela ayo mamo, ila mwiso kazangulonga, ‘Wone hambe ndimjese Nguluwi na wanhu,
LUK 18:5 Ila ayu mdala kanguya yongaza, ndomleweleza wone siditile ahyo kozanguya hano mwiso konhosa lukami.’ ”
LUK 18:6 Mkulu nakawalonjela, “Muhulika vyoyalonjile ayo mtagusa yehile.
LUK 18:7 Lelo Nguluwi howalewela wala yawahagule, wala wali ngulanda nemisi na nechilo? Koleka kuwahulichiza?
LUK 18:8 Ndangukulonjela kowalewela himahima. Kahi, kowa kuduhu makundo amu muisi mhela Mwana wa Munhu loyokuya?”
LUK 18:9 Hamba Yesu nakawalonjela kahi nhelo kota hino, wala wanhu nawewonaga watanganika na kuwabeza wayawo wanji.
LUK 18:10 “Nakalonga, Wanhu weli nawaluta mluga lwa ng'handa ya Nguluwi kuza kulanda Nguluwi, yumwe Mfalisayo, na yunji mkongoza kodi.
LUK 18:11 “Ayo Mfalisayo kema hafungo na kumlanda Nguluwi mnhumbula, ‘Gwa Nguluwi, malumbo, heni siwele kota wala wawele wadesi, wawele wabuhu na wang'hondwa na walinguboka. Malumbo, heni siwele kota ayu mkongoza sendi.
LUK 18:12 Ndangwesela kulya mazuwa meli, ndangulavya imwe ya kumi ya lufufu londiwele kupegwa.’
LUK 18:13 “Ila yula mkongoza sendi, nayali yemile kwa kutali henule ne meho gake kilanga, ila nakebata chipambaga kuno yesinzile kulajila kana masinzo, kalonga, ‘Gwa Nguluwi mbonele isungu heni ndiwele na gehile!’
LUK 18:14 Ndangukulonjelani,” “Ayu mkongoza sendi kahiluka kaye yawele yakundigwe na Nguluwi kusinda yula Mfalisayo. Mina, chila yalingikwiniza koduliswa, na yoneche yawele liholile, kokwinizwa.”
LUK 18:15 Wanhu wamigalila Yesu wana wadodo yawawichile moko. Walanguswa wawawene nawawang'hanuchila.
LUK 18:16 Ila Yesu nakawachema hoyali yolonga, “Muwaleche awo wana wadodo woye kwa heni, mleche kuwalemeza, mina Undewa wa Nguluwi wanguwagana wanhu kota awa.
LUK 18:17 Ndanguwalonjelani ndikomya ng'hatu, munhu yohambe youbochele Undewa wa Nguluwi kota mwana mdodo, hokwinjila kuli undewa awo.”
LUK 18:18 Mkulu yumwe wa Wayahudi nakamuuza Yesu, “Mlangusa yanojile, ndite ndaze leka mhegwe ukomu wa mazuwa gose ne kuduma?”
LUK 18:19 Yesu nakamuuza, “Lekachoni kwangundonjela noga? Haduhu munhu yanojile ila yumwe, Nguluwi yaliyeng'ha.
LUK 18:20 Kujizela mizilo, ‘Uleche ung'hondwa, uleche kukopola, uleche kuhiza, uleche kumwimilila munhu udesi, uwahulichize mhaza na mayako.’ ”
LUK 18:21 Heye nakalonga, “Ago geng'ha ndigabata kulawila londali msongolo.”
LUK 18:22 Yesu loyahuche ago nakamlonjela, “Kwanguganigwa kudita chinhu chimwe, uguze chila chinhu, wagawile wanzunwa, na hegwe kowa na ng'hano kilanga, hamba uye umbinze.”
LUK 18:23 Ila ayo munhu loyahuliche ago, yawele na masinzo, kwa vila, nayali na lufufu lwinji.
LUK 18:24 Yesu loyamuwene kangugana ahyo, nakalonga, “Kota voiwa nongwa kwa wali na lufufu, wolemwela kwinjila kuli Undewa wa Nguluwi!
LUK 18:25 Ahi ndo yowa ubewe kwa Ngamiya lyoweza kukola mlinanga ya chihomo kusinda nayali na lufufu kwinjila kuli Undewa wa Nguluwi.”
LUK 18:26 Wala wanhu wahuliche ago, nawalonga, “Yalikohi yoloholigwa?”
LUK 18:27 Yesu kawalonjela, “Gali ngulemweligwa kwa wanhu. Kwa Nguluwi zoditikwa.”
LUK 18:28 Heye Petili nakamuuza, “Na hetwe ndaze? Tuleka geng'ha natukuwinza!”
LUK 18:29 Yesu nakawalomjela, ndangukulonjelani ndikomya, “Munhu yalechile ng'handa ama mdala ama mkulugwe ama wamlelile na wana kwa Undewa wa Nguluwi,
LUK 18:30 Kobochela menji ng'hatu mhela awu wa sambi, na mhela ukuya ukomu wa mazuwa gose ne kuduma.”
LUK 18:31 Yesu nakawahola hafungo wala walanguswa, kawalonjela, “Mhulichize! Twanguluta Yelusalemu na ako chila chinhu chandikwe na waloli gomlapa Mwana wa Munhu, gowa gakoligwe.
LUK 18:32 Mina kowichigwa mmoko mwa wanhu hawawele Wayahudi, na hewo womditila gehile na kummizila mite.
LUK 18:33 Womtowa na ng'hobwa, womkopola, ila zuwa lya kadatu kulawa loyabagame, kozilipuka.”
LUK 18:34 Ila hewo nahawavizelele mbuli ne imwe, nawavisigwa ulonzi awo, nahawavizelele choni chilingulonjigwa.
LUK 18:35 Mhela Yesu loyali habehi kwinjila Yeliko, kwali na munhu yumwe hambe yalole yekalise mnzila yolanda,
LUK 18:36 Yahuliche wanhu wokola kauza, “Hana choni?”
LUK 18:37 Wamlonjela, “Yesu wa Nasaleti kangukola hano.”
LUK 18:38 Heye nakachemeleza lizi yolonga, “Yesu Mwana wa Daudi, umbonele isungu!”
LUK 18:39 Kwangugana ndikuditile ndaze? Wala wanhu walongole wamdeuza wamlonjela nyamalile ila heye hahuliche kaza nguchemeleza lizi, “Mwana wa Daudi, umbonele isungu.”
LUK 18:40 Yesu kema kawalonjela wamigale hoyali. Yula munhu yohambe yalole loyoile habehi, Yesu nakamuuza,
LUK 18:41 “Kwangugana ndikuditile choni?” Nakedichila, “Mkulu ndangulanda ndizengulola kahi.”
LUK 18:42 Yesu nakamlonjela, “Ulole! Makundo ga hegwe gakulohola.”
LUK 18:43 Bahala yula yawele yohambe yalole kazangulola. Kamuwinza Yesu kuno yomtogola Nguluwi. Wala wanhu weng'ha lowawene ago, wamtogola Nguluwi.
LUK 19:1 Yesu nakenjila mujini Yeliko, loyali yokola mnzila za honhu aho.
LUK 19:2 Kalawila munhu yumwe, itagwa lyake Sakayo. Ayo nayali chilongozi wa wakongoza sendi na kahila nayali munhu nayali na lufufu.
LUK 19:3 Kagana kulola Yesu munhu wachi, lelo wanhu wali wenji lukami, ila heye nayali chifude na kalemwela kumona.
LUK 19:4 Ahyo! Nakabilima kumwando, kakwina mchanya mli ikuyu leka wamone Yesu, mina nayali yokolela aho.
LUK 19:5 Yesu loyafichile honhu hala, nakalola mchanya nakamlonjela, “Sakayo, uduliche hasi himahima, mana lelo hano ndogana nsinde haluga hako.”
LUK 19:6 Sakayo kedulika himahima, kambochela yasangalale.
LUK 19:7 Wanhu weng'ha lowawene ago, waluka kulonga longa, “Kaluta kikala na munhu yawele na gehile.”
LUK 19:8 Ila Sakayo kenuka nakamlonjela Yesu, “Hulichize Mkulu! Heni ndowapa wali hela vinhu nusu ya vinhu vya heni na wone ndimlande munhu chinhu, ndomhilusila kota acho mala zine.”
LUK 19:9 Yesu nakamlonjela, “Lehano ulohozi uya ng'handa ayi, mina ayo na heye mwana wa lukolo lwa Abulahamu.
LUK 19:10 Mina Mwana wa Munhu koya kupala na kulohola wajilile.”
LUK 19:11 Mhela wanhu lowang'hali wohulichiza ago, Yesu nakawalangusa kwa nhelo yolonga, aho yalibehi na Yelusalemu, na wanhu wavizela mhela wuwu, Undewa wa Nguluwi wokwiza.
LUK 19:12 Aho nakawalonjela, “Kwali na munhu yumwe yatanganiche na kadita majendo kuluta isi ya kutali yakabochele undewa, hamba yahiluche.
LUK 19:13 Yang'hali kuka kawachema wala watumagwa kumi, kampa chila munhu sendi zihejile msahala wa myezi jidatu na kuwalonjela, ‘Mgulile vinhu mzenguguza mbaka londihiluka.’
LUK 19:14 Ila wanhu wanji nawamwihilwa na wawalajiza watumagwa walute wakalonje! ‘Tumlema ayu yaleche kuwa mndewa wa hetwe.’
LUK 19:15 “Aho munhu loyapeligwe undewa nakahiluka, bahala kalonga wala watumagwa wapeligwe sendi wachemigwe. Yogana yavizele chila munhu zilela zilinga.
LUK 19:16 Yula yalongoligwe kupegwa kalawila kalonga, ‘Mkulu zoumhele, ndizonjeza mala kumi.’
LUK 19:17 Heye nakamlonjela, ‘Goya,’ Hegwe kwa chitumagwa unojile! Kunoga kuli mbuli ndodo, kowa ulongoza miji kumi!,
LUK 19:18 Chitumagwa wa keli koya, nakalonga, ‘Mkulu, nguza zonjezeka mala zihano ya zila zoumhle!’
LUK 19:19 Heye nakamlonjela, ‘Nagwe kowa mkulu wa miji jihano.’
LUK 19:20 “Chitumagwa yunji koya, kalonga, ‘Mkulu, uhole sendi zako, nandizivisa goya mchibende,
LUK 19:21 nandumba hegwe kwa munhu yang'ang'ale, kwangusa chohuwichile, na kubeta cho hunyalile.’
LUK 19:22 Heye nakamlonjela, ‘Vyoulonjile ahyo ndokutagusa kwa mlomo wa hegwe, hegwe kwa chitumagwa wihile! Nakuvizela heni nda munhu yang'ang'ale, ndangubeta vyosinyalile.’
LUK 19:23 Lekachoni huwichile sendi kuli wanhu walingonjeza londikuya nyhole na zila zonjezeche?
LUK 19:24 “Aho nakawalonjela wala wali hala, ‘Msukuleni alyo igwala limwe, na mumhe yula yawele na zila zonjezeche mala kumi.’
LUK 19:25 Hewo anwamlonjela, ‘Ila Mkulu heye kanazo zonjezeche mala kumi!’
LUK 19:26 ‘Heye nakawalonjela,’ ‘Chila yawele na chinhu, kokonjezelwa chiyage, ila yula yawele hela chinhu, chila chidodo choyawele nacho, choholigwa.
LUK 19:27 Na sambi, wala wohambe wagane ndiwe mndewa wa hewo, muwagale aha, muwakopole nani ndilola.’ ”
LUK 19:28 Yesu nakalonga ago, yolawa nakalongola kumwando kuza Yelusalemu.
LUK 19:29 Hoyali habehi na Betifage na Betaniya, behi na chidunda cha Mizeituni, nakawalajiza walanguswa wa heye weli.
LUK 19:30 Nakawalonjela, “Mlute hali chijiji chiwele kumwando kwa hemwe. Lomuwa mukwinjila mchijiji, molifika mwana idogowi liwohigwe halina kwinigwa na munhu, mdohole mligale hano.
LUK 19:31 Wone munhu yawauze, lekachoni mlingulidohola, mlonje ‘Mkulu kangumgana.’ ”
LUK 19:32 Wolawa waluta wafika kota Yesu voyawalonjele.
LUK 19:33 Lowali wolidohola lila lidogowi, hewo wawauza, “Lekachoni mlingulidohola ali idogowi?”
LUK 19:34 Hewo nawawalonjela, “Mkulu kangumgana.”
LUK 19:35 Wolawa waligala lila idogowi kwa Yesu. Wolawawahola nguwo za hewo watambalika hamgongo mwa idogowi, wamkwiniza Yesu mchanya wa alyo idogowi.
LUK 19:36 Yesu kazanguluta yawele mchanya mli idogowi. Na wanhu nawazanza nguwo za hewo mbalabala.
LUK 19:37 Loyali behi na Yelusalemu, hali mduliko wa chidunda cha Mizeituni, walanguswa wa heye na wanhu wenji wazakwimba na kumtogola Nguluwi kwa lizi ling'hangala kwa mbuli ng'hulu zowaziwene;
LUK 19:38 Wazangulonga, “Yamtambichize Mndewa yokuya kwa itagwa lya Mkulu. Kikala goya kuchanya kilanga, na ukulu ng'hatu kwa Nguluwi!”
LUK 19:39 Aho Mfalisayo wamwe wala wali hala hali wanhu wamemile, nawamlonjela, “Mlangusa,” “Walonjele walanguswa wa hegwe wanyamalile!”
LUK 19:40 Yesu nakawalonjela, “Ndangukulonjelani wone awa wenyamalile, ago maganga gochemeleza lizi.”
LUK 19:41 Loyali habehi ng'hatu na kuwona muji wa Yelusalemu, Yesu nakaulilila,
LUK 19:42 yolonga, “Yaligoya hegwe nagwe lelo hano mbuli ilingigala makundo! Ila, lelo gavisigwa mmeho gako.
LUK 19:43 Mina zuwa lyanguya wakwihilwe wokuzungulusila lugagala, wokuzunguluta na kukibata kulawa nzingo zeng'ha.
LUK 19:44 Wokukopola hegwe na wanhu walingikala amo, howokulechela ne iganga likwima mli iganga liyage, kwa vila, hauzelele ula mhela Nguluwi hoyokuyila kukulohola.”
LUK 19:45 Yesu nakenjila mli Ng'handa ya Nguluwi, kaluka kuwawinga kunze wanhu walinguguza vinhu.
LUK 19:46 Nakawalonjela, “Yandichigwa, ‘Ng'handa ya heni yowa ng'handa ya kulandila.’ Ila hemwe muigalula mhalika ya wabokaji!”
LUK 19:47 Chila zuwa Yesu kazanguwalangusa ng'handa ya Nguluwi. Watambika wakulu na walangusa wa malajizo ga Musa na wakulu wa wanhu nawagana kumkopola,
LUK 19:48 Ila hewo hawaliwene lya kudita, mina wanhu weng'ha wali wekale tulu womhulichiza chila luzi.
LUK 20:1 Zuwa limwe, Yesu nayali yawalangusa wanhu honhu ha kusalila na kuwatagusila Mbuli Inojile, watambika wakulu na walangusa wa malajizo ga Musa na wakulu wamwe nawoya,
LUK 20:2 Walonga, “Tulonjele! Kwangudita mbuli azi kwa ludali lwachi, ama yalikohi yakupele ludali luno?”
LUK 20:3 Yesu nakawalonjela. “Na heni ndowauzani,
LUK 20:4 ludali lwa Yohani lwa kubatiza nalulawa kilanga kwa Nguluwi ama kwa wanhu?”
LUK 20:5 Ila hewo nawalonga ahi, “Wone tulonje nalulawa kilanga, kotuuza, ‘Lekachoni hamumkundile?’
LUK 20:6 Na wone tulonje nalulawa kwa wanhu, wanhu weng'ha wa hano wotutowa na maganga, mina weng'ha nawakunda kota Yohani nayali mloli wa Nguluwi.”
LUK 20:7 Nawamlonjela, “Hatuvizelele alo ludali nalulawa kohi.”
LUK 20:8 Yesu nakawalonjela, “Na heni siwalonjela ndangudita mbuli zino kwa ludali lwachi.”
LUK 20:9 Yesu kazangulangusa wanhu yolonga kwa nhelo ayi, “Munhu yumwe nakalima mgunda wa zabibu, nakawabasila walimi, heye nakaheluka isi ya kutali, kekala ako mihela minji.
LUK 20:10 Mhela wa kubeta, ayo munhu kemigala chitumagwa kwa wala walimile yakahole kumgunda gojilelile mizabibu. Ila wala walimile wamsubula ayo chitumagwa na kumhilusa ne chinhu.
LUK 20:11 Yula munhu nakamigala chitumagwa yunji, ila hewo kahila wamtowa ayo chitumagwa na kumbasa soni na kumhilusa ne chinhu.
LUK 20:12 Kahi kamigala wa kadatu, heye ayo lowamlumize, wamuwinga.
LUK 20:13 Yula yawele na mgunda nakejesa, ‘Ndodita choni? Ndomgala mwana wa heni ndimganile, yolonga heye womhulichiza.’
LUK 20:14 Wala walingulima lowawene, wazangilonjela, ‘Ayu ndo yohalila. Tumkopole leka kuhalila kwa heye kuwe kwa hetwe.’
LUK 20:15 Lelo Nawamlavya hafungo mwa mgunda wa mizabibu. Wamkopola.?” Yesu nakauza, “Yula yawele na mgunda kowadita ndaze wala walimi?”
LUK 20:16 “Kokuya kuwabagamiza awala walingulima, na kowapa walimi wanji awo mgunda wa zabibu.” Wanhu lowahuliche yolonga ahyo, nawalonga, “Hebu haiwa ahyo!”
LUK 20:17 Ila Yesu kawalola, nakawalonjela gano, “Maandiko Matakatifu gana mana yachi? “ ‘Iganga lilemigwe na walinguzenga, lelo liwa iganga likulu lya msisi!’
LUK 20:18 Wone munhu yogwa mchanya mwa iganga alyo, kobeneka pasapasa na wone iganga limgwile munhu yoneche, lyomhondanga.”
LUK 20:19 Walangusa wa malajizo ga Musa na watambika wakulu nawavizela, yaliyowalangusa kwa nhelo ayo yowalangusa hewo, wazangugana wambate bahala, ila nawadumba wanhu
LUK 20:20 Wazangupala mhela unojile. Wapala wanhu wazengidita wanoga, kumuuza. Aho wali wogana wambate na kumgala kuli ludali lwa chilongozi.
LUK 20:21 Wala wapugajizi nawamlonjela, “Mlangusa, tuvizela hegwe kwangulangusa na kulonga aku wokomya, tuvizela hambe umbagule munhu, kwangulangusa nzila za Nguluwi.
LUK 20:22 Lelo tulonjele iwa goya kumpa mndewa wa Loma kodi?”
LUK 20:23 Yesu nakavizela aho wangumjeza, nakawalonjela,
LUK 20:24 “Mndajile sendi ayo. Ndaze mutwi na itagwa ali ndo lya whaani?” “Mutwi wa Kaizali.” Nawedichila.
LUK 20:25 Yesu nakawalomjela, “Goya, mmigalile Kaizali gawele ga Kaizali na mmigalile Nguluwi gawele ga Nguluwi.”
LUK 20:26 Aho hali wanhu walemwela kumgwiliza, wekala tulu wochijesa vyoyawalonjele.
LUK 20:27 Wala Masadukayo, nawawele walonga kuduhu uzilipuko kwa wabagame, woya hali Yesu, wazangulonga.
LUK 20:28 “Mlangusa, Musa nakatwandichila, ‘Wone mng'holozo yumwe yaje ne kulela mwana, yogana munhu yumwe wa lukolo lwenu yamhalile ayo mdala, yamlelele wana mng'holoze.’
LUK 20:29 Lelo mhela umwe kwali na wanhu saba wa lukolo lumwe. Yula yalongole kamhola, hamba nakabagama ne kulela mwana.
LUK 20:30 Mng'holoze wa keli nakamhola yula mdala mlekwa, naye kahi nakabagama.
LUK 20:31 Na wakadatu hiho. Wazanguluta hiho mbaka weng'ha saba nawabagama haduhu yalechile mwana kuli yula mdala.
LUK 20:32 Logadumile, yula mdala na heye nakabagama.
LUK 20:33 Lelo zuwa lya wabagame kuzilipuka mdala ayo kowa mdala wa yalikohi? Weng'ha saba na wali wamhesile.”
LUK 20:34 Yesu nakawalonjela, “Walume na wadala wa mihela aji wanguhola na kuholeka,
LUK 20:35 Ila wala Nguluwi yowawika mbaka mhela wa kuzilipuka, howohesa ne kuhesigwa hebu.
LUK 20:36 Awo howobagama kahi, kwa vila, wowa kota wahilisi wa kilanga wa Nguluwi. Na ndo wana wa Nguluwi mina hewo walawa kuli wanhu wabagame.
LUK 20:37 Ila kuzilipuka kwa wabagame, Musa kahi nakakunda mbuli azo kuli gandichigwe gelile. Yolajila hala honhu hali chisosolo lochali chikwaka chiluli, kangumchema Mkulu kota Nguluwi wa Abulahamu na Nguluwi wa Isaka na Nguluwi wa Yakubu. Lelo heye hawele,
LUK 20:38 Nguluwi wa wanhu wabagame, ila Nguluwi wa wanhu wakomu, mina wala yawachemile kowali, wangikala na heye.”
LUK 20:39 Walangusa wa malajizo ga Musa nawalonga, “Mlangusa kwidichila goya ng'hatu.”
LUK 20:40 Mina huganile kumuuza kahi chinhu chinji.
LUK 20:41 Yesu nakauza, “Lekachoni wanhu walingulonga Kilistu Mlohozi ndo mwana wa Daudi?
LUK 20:42 Mina yuye Daudi kangulonga mlichitabu cha heye cha zabuli, “ ‘Mkulu, nakamlonjela Mkulu wa heni, kalise nzingo ya heni ya kudilo,
LUK 20:43 mbaka ndiwawiche wang'honyo wa hegwe, wawe chigoda cha kuwichila magulu ga hegwe.’
LUK 20:44 Daudi na kamchema ahyo heye, ‘Mkulu,’ Yowa ndaze lelo, Kilistu Mlohozi yawe mwana wa Daudi?”
LUK 20:45 Yesu nakawalonjela walanguswa hali wanhu weng'ha,
LUK 20:46 “Milolele na walangusa wa malajizo ga Musa hewo waganaaga kukola wavalile kanzu, wangana kulamsigwa na wanhu watanganiche kuli masoko. Na kikalisa kumwando mli ng'handa za kusalila na kuhola vigoda vya kumwando hali mnvina.
LUK 20:47 Wanguwabunza wadala walekwa na wangihada hewo wanoga kwa kulanda kwa sala zihejile. Zuwa Nguluwi loyowazapa wanhu, wotagusigwa kwa wihe lukami ng'hatu!”
LUK 21:1 Yesu nakalola kweng'ha, kawona wanhu wali na lufufu wojela ndolendole zowegale mli isanduku lya ndolendole kuli ng'handa ya Nguluwi,
LUK 21:2 kahi nakamona mamo yumwe mlekwa mzunwa yolavya mumo migwala mili midodo.
LUK 21:3 Nakalonga, “Ndangukulonjelani ndikomya, mamo ayu mlekwa nakalavya nyinji ng'hatu kusinda wanhu weng'ha.
LUK 21:4 Mina wanhu wawele na lufufu nawalavya ndolendole kulawa kuli lufufu nalowawele nawo. Ila ayu mamo kwa uzunwa wa heye, kalavya chila chinhu choyawele nacho.”
LUK 21:5 Walanguswa wamwe wali wolonga mbuli za Ng'handa ya Nguluwi, vyoizenjigwe na maganga ga sendi nyinji, na vinhu vyowalavile kwa Nguluwi. Yesu nakalonga,
LUK 21:6 “Aga geng'ha go mgona zuwa likuya haduhu iganga nelimwe lya ng'handa lisigala mchanya mwa iganga liyage, chila chinhu chowifigwa.”
LUK 21:7 Wanhu nawamuuza Yesu, “Mlangusa, mbuli azo zolawila nili? Choni chowa ulajilo wa mbuli azo zahabehi kulawila?”
LUK 21:8 Yesu nakawalonjela, “Milolele, mleche kubadigwa, mina wanhu wenji wokuya kwa kukolela itagwa lya heni wolonga, ‘Heni nda Kilistu Mlohozi yahaguligwe na Nguluwi, Mhela wa habehi. Ila hemwe mleche kuwawinza!’
LUK 21:9 Lelo lomhulika mbuli za ngondo na kugazigwa, mleche kutigasigwa, mina ago golongola kulawila, ila kuduma kwa geng'ha kung'hali.”
LUK 21:10 Yesu nakalutilila kulonga, “Isi imwe yochitowa na isi iyage, na undewa umwe wochitowa na undewa uyage.
LUK 21:11 Chila honhu howa na jimachinyina mikulu, kowa na nzala na matamwa ga kulecheza. Kowa na vinduzanduza vya kudumbigwa na ulajilo mkulu kilanga.
LUK 21:12 Ila logowa gang'hali kulawila ago geng'ha, wokubatani, wokugazani na kuwagalani mli ng'handa za kusalila na kuwawika mchinweng'ho. Mohilikwa kuli wandewa na vilongozi kwa chiwalo cha itagwa lya heni,
LUK 21:13 leka mlavye ulolezi kwa hewo.
LUK 21:14 Ila hemwe mleche kuwa na lunhwinhwi ndaze vyomchigombela.
LUK 21:15 Kwa vila nene ndokupani ulonzi wa kulonga na wanhu wakwihileni howoweza kiziganila na hemwe kahi howoibeza.
LUK 21:16 Molemigwa na wakulu wa hemwe na wang'holozenu na wanhu weng'ha womiganaga. Nawo wowakopola wamwe wa hemwe.
LUK 21:17 Wanhu weng'ha wokulemani kwa nongwa ya kumbinza heni.
LUK 21:18 Ila nemnvili imwe haikwajilila mmitwi ja hemwe.
LUK 21:19 Kwa kwimilila kwa hemwe, molohola ukomu wa hemwe.
LUK 21:20 “Lomuuwona muji wa Yelusalemu uzumgulutwe na wamizi, mvizele kuwifigwa kwake kwa habehi.
LUK 21:21 Aho wawele Yudeya wabilimile kuchidunda, wala wawele mli muji walawe na wala wawele kumgunda waleche kwinjila kuli muji awo.
LUK 21:22 Mazuwa ago ndo mazuwa ga kugazigwa, leka geng'ha gandikwe galawile.
LUK 21:23 Mane wawo wala wawele na himila na walingonyeza zuwa azo! Mina muli isi mowa na nongwa ng'hulu ng'hatu na ng'halazi ya Nguluwi yowoyela wanhu awa.
LUK 21:24 Wamwenga wakopoligwa kwa ipanga, wamwenga wochibatigwa woholigwa mli isi zeng'ha, na muji wa Yelusalemu wobijigwa na isi zinji, mbaka mhela houkuya.
LUK 21:25 “Kowa na vinhu vyokoneka kuli zuwa na nyelezi na nondwe. Wanhu weng'ha muisi wozangugaya kwa chiwalo cha kudumba mtigasiko wa nigu za bahali.
LUK 21:26 Wanhu wozilika kwa kudumba, wololela mbuli ziza ngulawila muisi, mina mong'ho ubatilile vinhu avyo vyeng'ha wotigaswa,
LUK 21:27 Hamba womona Mwana wa Munhu yokuya kuli ng'hungugu. Yali na ludali na ukulu lwinji.
LUK 21:28 Mhela mbuli azo lozikwaluka kulawila, mwinuche na kwinula mitwi jenu mchanya, mina kugomboligwa kwa hemwe kwa habehi.”
LUK 21:29 Hamba nakawalangusa yolonga kwa nhelo, “Mlole ikuyu na migodi jinji jeng'ha.
LUK 21:30 Wone mone galuka kuzuka mahamba, mvizela mhela wa nhonya wa habehi.
LUK 21:31 Namwe hihyo, homkona mbuli azo zilawila, mvizele Undewa wa Nguluwi wa habehi.
LUK 21:32 “Ndanguwalonjelani ndikomya, lulelo alu halubagama gang'hali ago geng'ha kulawila.
LUK 21:33 Ulanga na isi zopuluta, ila ulonzi wa heni haupuluta hebu.
LUK 21:34 “Muwe meho nhumbula za hemwe zileche kuganilila kuli vinhu vinji vya ukomu awu, kudita kuli mbuli zihile na mijito ja amu muisi. Zuwa alyo lyokuyilani ne kuvizela.
LUK 21:35 Mina chokuyilani kota chinhu chitejigwe, wanhu weng'ha wali ngikala muli isi.
LUK 21:36 Milolele, mze ngulanda leka muwe na ludali lwa kukola mli mbuli azo zeng'ha zilawila, na kwima kumwando kuli Mwana wa Munhu.”
LUK 21:37 Zuwa alyo, nemisi, Yesu nayali yowalangusa wanhu Mng'handa ya Nguluwi ila hamihe nakalutaga kuli chidunda cha Mizeituni na kikala ako.
LUK 21:38 Wanhu weng'ha nawalutaga hali Ng'handa ya Nguluwi kung'hali lufuku. Wazengumhulichiza.
LUK 22:1 Mnvina ya mibumunda hajisasile, ilinguchemigwa Pasaka, nayali habehi.
LUK 22:2 Watambika wakulu na walangusa wa malajizo ga Musa wazangupala nzila ya kumkopola Yesu, ila nawawadumba wanhu.
LUK 22:3 Na baho Limazoga limwinjila Yudasi yalinguchemigwa Isikalioti, yumwe wa wala walanguswa kumi na weli.
LUK 22:4 Ahyo nakaluta kwa wakulu wa watambika na walolezi wa ng'handa ya Nguluwi, nakalonga nawo vila vyoyomuhinduchila Yesu.
LUK 22:5 Na hewo wasechelela nawalagana kumha sendi.
LUK 22:6 Yudasi nakakunda na kazangupala mhumhu ya kumhinduchila Yesu ne wanhu kuvizela.
LUK 22:7 Zuwa lya mnvina ya mibumunda hajisasile wali habehi. Ahyo ndo vyoili mwanaing'holo kolavigwa nhambiko ya Pasaka.
LUK 22:8 Yesu nakawalajiza Petili na Yohani kawalonjela, “Mlute mkatugongomanyile mnvina ya Pasaka tulye.”
LUK 22:9 Hewo nawamuuza, “Kohi kotuluta kugongomanyila ndiya?”
LUK 22:10 Nakawedichila, “Mhulichize! Lomuwa mluta mjini, moting'hana na mlume yawele yedwichile chiya cha mazi. Mumuwinze mbaka ng'handa yoyokwinjila.
LUK 22:11 Na mumlonjele yawele na ng'handa, ‘Mlangusa kanguuza, chilikohi chihengo cha wajenzi choyodila Pasaka hamwe na walanguswa?’
LUK 22:12 Na heye kokulajilani chihengo chikulu cha mchanya mina chiwichigwe goya, mgongomanyile mumo.”
LUK 22:13 Nawaluta wona hihila kota Yesu vyoyawalonjele. Na hewo nawawika goya ndiya ya Pasaka.
LUK 22:14 Mhela loufichile, Yesu kawahola watumigwa wa heye na kikala na hewo mchisanya.
LUK 22:15 Nakawalonjela, “Ndangugana kulya hamwe na hemwe mnvina ayi ya pasaka nding'hali kugazigwa!
LUK 22:16 Kwa vila ndangukulonjelani, silya kahi mbaka kuli Undewa wa Nguluwi.”
LUK 22:17 Hamba kahola chizombe cha divai, katambichiza, kalonga, “Mbochele chino munwe mweng'ha.
LUK 22:18 Ndangukulonjelani kulawa sambi sinwa divai kahi mbaka undewa wa Nguluwi houkuya.”
LUK 22:19 Hamba kahola ibumunda, katambichiza na kamogola, kawapa walanguswa wa heye yolonga, “Alu ndo lukuli lwa heni, loulavigwa kwa mbuli ya hemwe. Mdite hino lomng'humbuka heni.”
LUK 22:20 Kahi hiho na chizombe, loyadile kalonga, “Chizombe chino cha ilagano lya sambi lilingulajila kwa danda ya heni yoibohoka kwa mbuli ya hemwe.
LUK 22:21 “Ila loleni! Munhu yula yongalamka kabahano kangulya hamwe na heni!.
LUK 22:22 Mwana wa Munhu kanguluta kukopoligwa kota voyaganile Nguluwi, ila mane munhu yula yamuhinduche.”
LUK 22:23 Aho wazangiuza wawo yeng'ha yalikohi yodita mbuli ayo.
LUK 22:24 Nakulawila kitwanza hali walanguswa yalikohi yozanguwa mkulu ng'hatu hali hewo weng'ha.
LUK 22:25 Yesu nakawalonjela, “Vilongozi wa isi walongozaga wanhu kwa lupichi na hewo wochichema ‘Watanza wanhu.’
LUK 22:26 Ila hemwe ileche kuwa ahyo, nayali mkulu hali hemwe imgana yawe mdodo kusinda weng'ha, na yawele mkulu imagana yawe kota chitumagwa.
LUK 22:27 Kwa vila yalikohi nayali mkulu? Yula yalingikalisa mchisanya na kulya, ama yula nayali chitumagwa? Hebu! Yowa yula yalingikala mcchisanya na kulya ndiya! Ahyo, heni nda hano hagati ha hemwe kota mkolamijito.
LUK 22:28 “Hemwe ndo mponile na heni, mhela weng'ha wa kujezigwa kwa heni.
LUK 22:29 Kota mhaza wa heni voyangalile heni undewa wuwula. Na heni nani, ndangukupani hemwe undewa.
LUK 22:30 Molya na kunwa mchisanya ya heni kuli undewa wa heni na kikalisa mvigoda vya undewa na kutagusa nhanzi kumi na mbili za Isilaeli.
LUK 22:31 “Simoni, Simoni! Hulichize! Limazoga lyangugana kuwabetani hemwe kota munhu yobeta uhemba.
LUK 22:32 Ila heni ndokulandila kwa Nguluwi leka makundo ga hegwe galeche kuwa mado. Wone uhiluche kuli heni wasindamize nhumbula wang'holozo.”
LUK 22:33 Petili nakalonga, “Mkulu, heni ng'hunda kuluta na hegwe mchinweng'ho na kuli kubagama.”
LUK 22:34 Yesu nakamlonjela, “Ndangukulonjela Petili, lehano izogolo ling'hali kwika, kombela kadatu kota hunzelele heni.”
LUK 22:35 Hamba Yesu kawauza walanguswa wa heye. “Hala ndiwalajize mli hela sendi ne mhako ne makwamba, namwisilwa chinhu?” Nawamwidichila, “Hatwisilwe ne chinhu hebu!”
LUK 22:36 Yesu nakawalonjela, “Ila sambi yoneche yula yalihela mhako wa sendi yahole. Na nayali na mhako yadite hiho! Na nayali hela ipanga, yaguze ikoti lyake yagule umwe.
LUK 22:37 Kwa vila Maandiko Matakatifu galonga, ‘Na heye kohanzwa hamwe na wehile,’ Ndanguwalonjelani, geng'ha gandichigwe mbuli ya heni, ganguza kuduma.”
LUK 22:38 Walanguswa nawalonga, “Mkulu ulole hano hana mipanga mili.” Nakawalonjela, “Ikwila!”
LUK 22:39 Yesu koka na kuluta kuli chidunda cha Mizeituni kota vyoyazowele, walanguswa wa heye na hewo wamuwinza.
LUK 22:40 Loyafichile ako nakawalonjela, “Mlande leka mleche kwinjila kuli kujezigwa.”
LUK 22:41 Na baho kawaleka, kaluta honhu hatali hado ha munhu kutoza iganga, kafugama, kalanda.
LUK 22:42 “Mhaza wone ulingugana, umbusile chino chizombe cha kugazigwa kwa heni, ila haiwele vyondigana heni, leka kota vyoulingugana hegwe gakoleke.”
LUK 22:43 Aho mhilisi kulawa kilanga kalawila kaza kumtanza.
LUK 22:44 Yawele mli usungu ukulu, kakobanya kulanda ng'hatu, na chituguti chiwele kota danda, kizangulagala hasi.
LUK 22:45 Loyasindile kulanda, kawahiluchila walanguswa wa heye, nakawafika wawasile, kwa vila nawali na masinzo lukami.
LUK 22:46 Nakawalonjela, “Lekachoni muwasile? Mwinuche mlande mleche kwinjila kuli kujezigwa.”
LUK 22:47 Yesu loyali yolutilila kulonga, lung'hongola lwa wanhu, welongoze na yula nayachemagwe Yudasi, yumwe wa wala kumi na weli. Yudasi kumlamsa Yesu kwa kumnonela.
LUK 22:48 Ila Yesu nakamlonjela, “Yudasi! Kwangumlavya Mwana wa Munhu kwa kumnonela?”
LUK 22:49 Walanguswa nawekale hamwe na Yesu, lowawene mbuli zila zilawile, nawauza, “Mkulu tuwahenje na mipanga?”
LUK 22:50 Na myao yumwe kamtowa kwa ipanga chitumagwa yumwe wa mtambika mkulu, nakamdumula ikutu lya kudilo.
LUK 22:51 Baho Yesu nakalonga. “Leka ayi ikwila!” Kalidoliza lila ikutu na kumlohola.
LUK 22:52 Hamba Yesu nakawalonjela watambika wakulu na walolezi wa ng'handa ya Nguluwi woyile kumibata. “Muya na mipanga na nyimbati kundibata kota heni nda mbokaji?
LUK 22:53 Londali hamwe na hemwe chila zuwa na ndikala hamwe na hemwe mli ng'handa ya Nguluwi, hambichile hali ludali lwa hemwe hebu. Ila saa ino ya hemwe, na undewa wa kutitu.”
LUK 22:54 Wambata Yesu na kumhola, waluta naye kuli ng'handa ya mtambika mkulu. Petili kazangumuwinza kumbele nayali kutali.
LUK 22:55 Nawawesa chenje hagati hali luga, wekalisa hamwe, Petili na kekalisa hamwe na hewo.
LUK 22:56 Chitumagwa yumwe mdala loyamuwene Petili yekalise behi na chenje, kazangumlola na kalonga, “Munhu ayu nayali hamwe na Yesu.”
LUK 22:57 Ila Petili nakabela mbuli ila yolonga, “Mdala hegwe, simzelele yuno youmlonga!”
LUK 22:58 Hamba munhu yunji nakamona Petili, kalonga, “Na hegwe nagwe kwa yumwe wa hewo!” Ila Petili kedichila kalonga, “Mkulu, hebu! Siwele heni!”.
LUK 22:59 Baho saa imwe hamwande, munhu yumwe kakangaza yolonga, “Ndangukomya, munhu yuno nayali hamwe na Yesu kwa vila heye naye nakalawa Galilaya.!”
LUK 22:60 Ila Petili kedichila, “Munhu hegwe, sivizelele ne choulingulonga!” Na baho loyali yang'hali yolonga, izogolo nalika.
LUK 22:61 Mkulu kahinduka kamlola Petili. Petili nakakumbuchila gala gonayamlonjele Yesu. “Lehano izogolo halina kwika kombela mala zidatu kota hunzelele.”
LUK 22:62 Petili kalawa kunze, nakalila lukami.
LUK 22:63 Wala wanhu wali womlolela Yesu wazangumtowa na kumbeza.
LUK 22:64 Wamuwoha chibende kumeho, wazangumuuza, “Tulagulile lelo, yalikohi yakutowile?”
LUK 22:65 Wazangumlonjela mbuli nyinji za kumliga Yesu.
LUK 22:66 Loifichile mitondo, balaza lya wasekulu, watambika wakulu na walangusa wa malajizo ga Musa nawating'hana hamwe mchitala na kumchema Yesu.
LUK 22:67 Nawalonga, “Tulonjele! Hegwe kwa Kilistu Mlohozi yahaguligwe na Nguluwi?” Yesu nakawedichila, “Wone ndikulonjeleni hamkunda,
LUK 22:68 na wone ndikuuzeni, hamkwidichila hebu.
LUK 22:69 Ila kulawa sambi na kulutilila, Mwana wa Munhu kowa yekalise kudilo kwa Nguluwi nayali na mong'ho weng'ha.”
LUK 22:70 Weng'ha nawamuuza, “Hambi hegwe kwa Mwana wa Nguluwi?” Na heye kawedichila, “Hemwe mwangulonga heni nda mwana wa Nguluwi.”
LUK 22:71 Wazangulonga, “Hambi topala chinhu chachi kahi? Hetwe baha tuhulika yolonga kwa mlomo wa heye du!”
LUK 23:1 Hamba, wanhu weng'ha wenuka, wamigala Yesu kwa Pilato.
LUK 23:2 Waluka kumlonjeleza wolonga, “Tumfika munhu ayu yowahada wanhu wa hetwe, yowalemeza kulavya kodi kwa mndewa wa Loma na kichema heye Kilistu Mlohozi yahaguligwe na Nguluwi.”
LUK 23:3 Pilato nakamuuza, “Hegwe kwa mndewa wa wayahudi?” Yesu kedichila nakamlonjela, “Hegwe kulonga.”
LUK 23:4 Pilato nakawalonjela watambika wakulu na wala wanhu wamemile, “Sichiwene chinhu cha kumtagusa munhu yuno.”
LUK 23:5 Ila Hewo wang'ang'anila walonga, “Nakanguwasonjeleza wanhu vibi wetowe na undewa wa Loma kwa ulanguso wa udesi muli isi yeng'ha ya Yudeya, kaluchila Galilaya na sambi ka hano.”
LUK 23:6 Pilato loyahuliche ago, nakawauza, “Munhu ayu mwenyeng'haye wa Galilaya?”
LUK 23:7 Loyavizelele Yesu nayali hasi ha ulongozi wa mndewa Helodi, kamgala kwa Helodi, mhela awo nayali Yelusalemu.
LUK 23:8 Helodi loyamuwene Yesu kazangusechelela ng'hatu. Kwa vila nakagana kumona kulawa mazuwa menji. Nakahulika mbuli za heye, na kagana yamone yodita vinduzanduza.
LUK 23:9 Lelo kamuuza Yesu mbuli nyinji kwa mhela uhejile, ila Yesu hedichile ne chinhu.
LUK 23:10 Watambika wakulu na walangusa wa malajizo ga Musa, wema wamlonjeleza Yesu kwa lupichi.
LUK 23:11 Helodi hamwe na wala walingulolela wazangumbasa soni Yesu na kumbeza, wolawa wamvalisa nguwo ya chiundewa, wamhilula kwa Pilato.
LUK 23:12 Helodi na Pilato, wala aho katali wali wehilwe, kulawa zuwa lilila wazangigana.
LUK 23:13 Pilato nakawachema watambika wakulu na vilongozi na wanhu.
LUK 23:14 Baho nakawalonjela, “Mmigala munhu ayu kwa heni, mlonga kota nayali yowahada wanhu. Lelo mhulichize! Na heni ndizipugajiza mbuli za heye, ila sonile ne chinhu choyawifile kuli mbuli azo zomumlonjeleze.
LUK 23:15 Si nene yeng'ha, na heye Helodi hachiwene ne chinhu choyawifile munhu ayu chilingumgana yakomigwe.
LUK 23:16 Ahyo ndangugana yazapigwe ng'hobwa hamba ndomlechela.”
LUK 23:17 Kwa vila kaganigwa yamlechele munhu yumwe kwa wala wawele mchinweng'ho kuli mnvina ya Pasaka.
LUK 23:18 Ila lung'hongola lweng'ha lwa wanhu wachemeleza hamwe, “Mkopoleni munhu ayo na utuchumulile Balaba!”
LUK 23:19 Balaba nayali yahindilwe kwa kwambuza wanhu kuhinduka kuli muji na kukopola.
LUK 23:20 Pilato nakagana kumlechela Yesu, yolawa kalongana nawo kahi,
LUK 23:21 ila hewo wachemeleza, “Muwambeni mumsalaba, muwambeni mumsalaba.”
LUK 23:22 Pilato nakawalonjela lwa kadatu, “Kadita choni chihile? Hambe ndichone chinhu chimwambuza yabagame, ndolajiza yasubuligwe ng'hobwa, hamba ndomlechela.”
LUK 23:23 Ila hewo waza nguchemeleza lukami ng'hatu twangugana Yesu yawambigwe mumsalaba, hamba lizi lyawo lihulikwa hamba wakundizwa chowaganile.
LUK 23:24 Pilato nakalonga iditigwe kota vyowalingugana.
LUK 23:25 Kachumula kamlavya yula walingumgana, yula yawohigwe kwa kwambuza kuhinduka na kukopola wanhu, yolawa kamlavya Yesu wamditile vowogana.
LUK 23:26 Lowali womgala wating'hana na munhu yumwe nayali nguchemigwa Simoni mwenyeng'haye wa Kilene, nayali yolawa kumgunda. Wamibata wamdwika ula msalaba yauhole kumbele kwa Yesu.
LUK 23:27 Lung'hongola lwa wanhu lwali lumuwinza, wali mumo wadala womlilila na kumuwembela.
LUK 23:28 Yesu kagalamka nakawalonjela, “Hemwe wadala wa Yelusalemu! Mleche kundilila heni, ila mililile mwemwe na wana wa hemwe!
LUK 23:29 Kwa vila mazuwa ganguya mozangulonga, ‘Wabweda wala wali mhende, hewo hawalelile na hambe wonyeze wana!’
LUK 23:30 Baho wanhu wokwaluka kuvilonjela vidunda, ‘Tugwile!’ Na vidunda, ‘Tugubicheni!’
LUK 23:31 Kwa vila wanhu wangudita vinhu avi kuli igodi idodi, ahyo yowa ndaze kwa igodi likalile?”
LUK 23:32 Wanhu wanji weli wehile na wegaligwa bahala, wakopoligwe hamwe na Yesu.
LUK 23:33 Lowafichile honhu hamwe hali nguchemigwa, “Izeje lya mutwi,” Baho wamuwamba Yesu mumsalaba hamwe na wala wabokaji, yumwe kudilo na yumwe kumoso.
LUK 23:34 Yesu nakalonga, “Mhaza uwalechele kwa vila hawavizelele hebu chowalingudita.” Wahola nguwo zonayavalaga kwa kuzitowela simbi.
LUK 23:35 Wanhu wema wazanguwalola. Wakulu wa Wayahudi wazangubeza wolonga, “Kawalohola wanhu wanji, lelo yelohole yuye wone heye yawele Kilistu Mlohozi yahaguligwe na Nguluwi!”
LUK 23:36 Wamizi nawo wazangumbeza, waluta wampa divai izazame.
LUK 23:37 Wolonga, “Wilohole uliyeka wone hegwe ndo uli Mndewa wa Wayahudi.”
LUK 23:38 Mchanya ha msalaba wa heye, na wandika mbuli ino, “Yuno ndo Mndewa wa Wayahudi.”
LUK 23:39 Yumwe wa wala wabokaji wawambigwe hamwe na Yesu nakamliga Yesu kalonga, “Hambi hegwe hauwele Kilistu Mlohzi!? Wilohole gwegwe na hetwe.”
LUK 23:40 Ila yula mbokaji yumwe, kamdeuza miyage, yolonga, “Hegwe hambe umdumbe Nguluwi hebu? Hegwe nagwe kwa mumo kuli kutagusigwa kwa wihe hihyo.
LUK 23:41 Hetwe, twangutagusigwa hano kwa mbuli zihile zotuditile. Ila ayu munhu haditile ne chinhu chihile.”
LUK 23:42 Hamba nakamlonjela Yesu, “Yesu! Ung'humbuche loukwinjila Undewa wa hegwe.”
LUK 23:43 Yesu nakamlonjela, “Ndangukulonjela ndikomya lelo hano kowa hamwe na heni kuli lubehelo kuchanya kwa Nguluwi.”
LUK 23:44 Yali iwele saa sita nemisi; jiza ligubika isi yeng'ha mbaka saa tisa
LUK 23:45 na ipaziya lya honhu helile ng'hatu kuli ng'handa ya Nguluwi lidejeka vibende vili.
LUK 23:46 Yesu nakalila kwa kuchemelela, “Mhaza mmoko wa hegwe ndanguwika muhe wa heni.” Na loyalonjile hino, nakatwesemka lwa mwiso.
LUK 23:47 Mkulu wa wamizi wa Loma, loyawene gogalawile, kamtogola Nguluwi yolonga, “Kakomya, ayu nayali munhu yanojile.”
LUK 23:48 Na wanhu weng'ha wali aho wamemile wololela mbuli ayo, vyowawene ago galawile wahiluka kuluga wotowa vipambaga kwa kulajila masinzo.
LUK 23:49 Wala wanhu weng'ha wamzelele Yesu na wala wadala wamuwinzile Galilaya, wema kutali wolola vinhu avyo.
LUK 23:50 Kwali na munhu yumwe itagwa lya heye Yusufu, Mwenyeng'haye wa chijiji chimwe cha Wayahudi chilinguchemigwa Alimataya. Nayali munhu yanojile yodita galinguganigwa na Nguluwi.
LUK 23:51 Nakekala yobeteza kuya kwa Undewa wa Nguluwi, ila heye nayali munhu wa Alimataya muji umwenga wa Wayahudi, yumwe wa wakulu wa kutagusa, hakundile chila chowadile wayage.
LUK 23:52 Heye kaluta kwa Pilato, kalanda yapegwe lukuli lwa Yesu.
LUK 23:53 Kaludulisa hasi, kaugubichiza sanda inojile ng'hatu, kauwika mchilaga chihongoligwe mmitalawe na hachinawichigwa ne lukuli mgati.
LUK 23:54 Zuwa alyo lyali Ijumaa, lya kiwika goya Zuwa lya Kwesela gali gokwaluka.
LUK 23:55 Wala wadala nawelongoze hamwe na Yesu kulawa Galilaya nawamuwinza Yusufu, wahona hala honhu hali chilaga na wawona lukuli lwa Yesu houwichigwe.
LUK 23:56 Na baho wahiluka kuluga, waza hola mafuta ga kunhunyhilila na Malihamu ga kulukumbika lukuli lwa Yesu. Kuli Zuwa lya Kwesela, nawesela kota Malajizo ga Musa vyogalingugana.
LUK 24:1 Jumapili kung'hali lufuku ng'hatu, wadala wahola mafuta ga kunhunyhilila gowawichile na waluta kuli chilaga.
LUK 24:2 Walifika lila iganga lowadinyile chilaga, lihejele kutali na lwizi lwa chilaga.
LUK 24:3 Wenjile mgati mchilaga hawauwene lukuli lwa Mkulu Yesu.
LUK 24:4 Wang'hali wabubuwale na mbuli ayo, bahala wanhu weli wavalile nguwo nzelu chweya! Wema behi na howali.
LUK 24:5 Wadala wazangudumba ng'hatu na wenamiza hanyi. Ila wala wanhu wawalonjela, “Lekachoni mwangumpala nayali mkomu kuli wanhu wabagame?
LUK 24:6 Yesu haduhu hano, nakazilipuka. Mkumbuchile vyonayakulonjeleni loyali kula Galilaya,
LUK 24:7 ‘Mwana wa Munhu kolavigwa kulimhoko ga wanhu wehile, hewo womgaza na kumuwamba mumsalaba, ila zuwa lya kadatu kozilipuka.’ ”
LUK 24:8 Baho wala wadala wakumbuchila mbuli ila yoyawalonjele.
LUK 24:9 Lowahiluche kulawa kuchilaga, wawalonjela mbuli yila wala walanguswa kumi na yumwe na wanhu weng'ha.
LUK 24:10 Walonjile mbuli azo kwa watumigwa wali, Maliya Madelena na Yohana na Maliya mayake Yakubu na wadala wanji wawele hamwe kuli chilaga.
LUK 24:11 Watumigwe na wona mbuli azo kota hazitanganiche, nahawakundile.
LUK 24:12 Ila Petili kalawa hala na kubilima mbaka kuli chilaga. Loyafichile, kenamiza na kusunjilila mgati, baho kayona ila sanda. Kahiluka kaye aku yabubuwale kwa gala galawile.
LUK 24:13 Kuli zuwa lilila, wanhu weli walwele walanguswa wa Yesu wali woluta kuli chijiji chilinguchemigwa Emau, utali wa chilomita kumi na imwe kulawa Yelusalemu.
LUK 24:14 Wazangulonga mbuli zila za vinhu vyeng'ha lozilawile.
LUK 24:15 Lowaliwolonga na kiuza, heye Yesu nakalawila, kaza kilongoza na hewo.
LUK 24:16 Wazakumona na meho ila hawali womzela kota ndo Yesu.
LUK 24:17 Yesu nakawauza, “Mbuli zachi zino zomlonga kuno mjenda?” Wema tulu, wakwisuche kumeho kuno wesinzile.
LUK 24:18 Yumwe yalinguchemigwa Kiliopasi, nakamlonjela, “Hegwe kwa mjenzi hano Yelusalemu, hugazelele galawile ako mazuwa gano?”
LUK 24:19 Yesu nakawauza, “Mbuli zachi?” Na hewo nawamwidichila, “Mbuli zimlawile Yesu wa Nasaleti, heye nayali mloli wa Nguluwi, yadahile kulangusa mbuli zeng'ha hali Nguluwi na hali wanhu weng'ha.
LUK 24:20 Watambika wakulu na wakulu wa hetwe wamigala kwa wakulu wa Loma yatagusigwe kwa wihe kubagama, na hewo wamuwamba mumsalaba.
LUK 24:21 Hetwe natukunda kota heye ndo yawagombole Waisilaeli. Lelo kwa ago geng'ha lehano zuwa lya kadatu kulawa lovilawile vinhu avyo.
LUK 24:22 Vivila wadala wamwenga kulawa mchilundo cha hetwe watinuswa ng'hatu. Mitondo kung'hali lufuku nawaluta kuli chilaga.
LUK 24:23 Ila hawaluwene lutufi lwake. Wahiluka walonga walawilwa na wahilisi wa kilanga walonjelwa ka mkomu.
LUK 24:24 Wanhu wamwenga kulawa mchilundo cha hetwe, waluta kuli chilaga, na hewo wona kota wadala wala vyowalonjile, ila heye hawamuwene.”
LUK 24:25 Na baho Yesu nakawalonjela, “Lekachoni mli wapoka ahi na nhumbula za hemwe hambe zikunde geng'ha galonjigwe na waloli wa Nguluwi?
LUK 24:26 Haimganile Kilistu Mlohozi yahaguligwe na Nguluwi kugazigwa, na hamba yenjile mli ukulu wa heye?”
LUK 24:27 Na Yesu kawagubulila mbuli zeng'ha zilingumgana heye kuli Maandiko Matakatifu, kwaluchila chitabu cha Musa mbaka gandichigwe na waloli wa Nguluwi weng'ha.
LUK 24:28 Lowali behi na chijiji chowaliwoluta, Yesu kedita kota kangulutilila na majendo kumwando.
LUK 24:29 Ila hewo wamlanda wolonga, “Wikale hamwe na hetwe kwa vila zuwa liswa, chilo changwinjila.” Baho kenjila wekala hamwe.
LUK 24:30 Loyali yekalise hamwe na hewo kulya ndiya, kahola ibumunda, katambichiza kamogola kawapa.
LUK 24:31 Bahala meho gawo gagubuligwa na wamzela ndo Yesu, ila heye na kajilila hawamuwene kahi.
LUK 24:32 Wazangulonga hewo kwa hewo, “Nhumbula za hetwe ha zali zimweka mgati mwa hetwe loyali yolonga na hetwe mnzila na kutudamlila goya Maandiko Matakatifu?”
LUK 24:33 Bahala hihila woka, wahiluka Yelusalemu, kula wawafika wala watumigwa kumi na yumwe, wehanzile na wanhu wanji.
LUK 24:34 Walonga ng'hatu, “Mkulu kazilipuka kamlawila Simoni.”
LUK 24:35 Wala watumigwa weli nawawalonjela wayao mbuli zeng'ha zowalawile mnzila, na vyowamzelele Mkulu kwa kumogola ibumunda.
LUK 24:36 Bahala lowali wochilonjela ago. Yesu kema hagati howali, nakawalonjela, “Mikale goya.”
LUK 24:37 Watinuka na wazangudumba na wejesa kota wangulyona ilaika
LUK 24:38 Na heye kawalonjela, “Lekachoni mwangisinza? Na mmemile majesa Mnhumbula za hemwe?
LUK 24:39 Ila Mlole moko na magulu ga heni nda yuye. Mbateni mndole, mina ilaika lyahela lukuli na mizeje kota vyommbona.”
LUK 24:40 Na loyasindile kulonga ago, kawalajila moko na magulu.
LUK 24:41 Lowali wekale wabubuwale aku hambe wakunde kwa kusangalala, nakawauza, “Hano mwanacho chinhu cheng'ha chila cha kulya?”
LUK 24:42 Wampa somba ibanichigwe.
LUK 24:43 Yesu kahola na kalya weng'ha womona.
LUK 24:44 Hamba nakawalonjela, “Ahino ndokota vonandikulonjeleni londali hamwe na hemwe. Goye geng'ha ga heni, mizilo ja Musa na gandichigwe kuli vitabu vya waloli na zabuli.”
LUK 24:45 Na baho Yesu kawagubulila luhala yogana wavizele Maandiko Matakatifu
LUK 24:46 Nakawalonjela, “Yandichigwa hino, Kilistu Mlohozi kogazigwa na zuwa lya kadatu kozilipuka.
LUK 24:47 Na baho iganigwa kwa itagwa lya heye isi zeng'ha kulawa Yelusalemu zidamuligwe mbuli zinojile kota wanhu wanguganigwa kumgalamchila Nguluwi na Nguluwi kowosela gehile ga hewo.
LUK 24:48 Na hemwe mokwimilila mbuli azo, na azo ziganigwa mkazilavile ulolezi.
LUK 24:49 Na Heni baha ndowegalila yula Mhaza nayalagane na hetwe komlajiza, ila mbeteze mbaka homchigalilwa mong'ho kulawa kilanga.”
LUK 24:50 Yolawa kawalongoza hafungo ha muji mbaka Betaniya, na heye kenula mhoko gake kuchanya na kawatambichiza.
LUK 24:51 Loyawawichile moko na kuatambichiza, kawaleka, kaholigwa kuluta kilanga.
LUK 24:52 Na hewo wamfugamila wahiluka Yelusalemu, wawele wasangalale ng'hatu,
LUK 24:53 Wekala kuli luga lwa ng'handa ya Nguluwi womtogola Nguluwi, mhela weng'ha.
JOH 1:1 Aho mwaluko kwali na yumwe yochemigwa Luzi, na heye luzi nayali hamwe na Nguluwi, na heye Luzi nayali Nguluwi.
JOH 1:2 Kulawa mwaluko Luzi nayali hamwe na Nguluwi.
JOH 1:3 Kwa kukolela heye, vinhu vyeng'ha navilumbigwa. Kuduhu chinhu ne chimwe chilumbigwe kuduhu heye.
JOH 1:4 Heye nayali mwaluko wa ukomu, na auno ukomu wali lumuli lwa wanhu.
JOH 1:5 Na lumuli alo lwangumwesela kutitu, na ako kutitu kulemwela kuusuma.
JOH 1:6 Nguluwi nakamlajiza munhu yumwe, itagwa lyake Yohani.
JOH 1:7 Ayo nakoya yawalonjele wanhu weng'ha mbuli za alo lumuli, wanhu weng'ha wahuliche ulonzi wa heye na wakunde.
JOH 1:8 Heye hawele alo lumuli, ila nakoya hela kuwalonjela wanhu mbuli ya alo lumuli.
JOH 1:9 Alu ndo lumuli lwa kukomya ng'hatu, lumuli lulinguya kuli isi na kuwamulichila wanhu weng'ha.
JOH 1:10 Lelo Luzi nayali mu isi, na kukolela heye Nguluwi nakalumba isi, ila wanhu wa isi nahawamkundile heye.
JOH 1:11 Nakoya hali isi ya heye yuye, ila wanhu wali hali isi hake hawambochele.
JOH 1:12 Ila wala wanhu wambochele na wamkundile, nakawapa ludali lwa kuwa wana wa Nguluwi.
JOH 1:13 Hawali wana wa Nguluwi kwa nyhala za chiwunhu, kahi kwa ludali lwa lukuli na ligano lya munhu, ila kwa heye yawaditile wana wa Nguluwi kwa danda ya heye.
JOH 1:14 Na heye luzi kawa munhu na kikala kwa hetwe. Na hetwe tuwona ukulu wa heye, ukulu wa heye yawele Mwana yaliyeka wa Mhaza, kamema isungu na kukomya.
JOH 1:15 Yohani nakawalonjela wanhu mbuli ya heye, nayali yochemelela yolonga, “Ayu ndo ndalindilonga hala hondonjile, ‘Kanguya munhu yumwe hambele hangu, yawele mkulu kwa heni, kwa vila nayalibaha heni sinavumbuka.’ ”
JOH 1:16 Kwa winji wa isungu lyake, hetwe tweng'ha tubochela kunoga kwa heye.
JOH 1:17 Nguluwi katupa Malajizo kukolela Musa, ila Yesu Kilistu katugalila kunoga kwa heye na kukomya.
JOH 1:18 Kuduhu munhu yamuwene Nguluwi mhela woneche ula. Mwanage yaliyeka, yewhanile na Nguluwi, yawele hamwe na Mhaza, ayo ndo yatuditile tumzele Nguluwi.
JOH 1:19 Na awu ndo ulolezi Yohani nayaulavile mhela vilongozi wa Wayahudi kula Yelusalemu loyawalajize watambika wa Walawi kwa heye wamuuze, “Hegwe kwa whaani?”
JOH 1:20 Yohani nahalemile kwidichila goyauzigwe, ila heye kalonga yodamla, “Heni siwele Kilistu Mlohozi.”
JOH 1:21 Baho wamuuza, Lelo hegwe kwa whaani? Hegwe uli Eliya? Kawedichila, Hebu. Heni siwele Eliya! Wamuuza, Lelo hegwe kwa Mloli? Heye kedichila, Hebu!
JOH 1:22 Ahyo wamuuza, “Lelo kwa whaani? Kwangulonga ndaze kwa hegwe gwegwe? Tulonjele leka tuwahilusile ko kowutulajize goukwidichila.”
JOH 1:23 Yohani kawedichila, “Heni ndo yula mloli Isaya yalonjile mbuli za heye kuta, “ ‘Lizi lya munhu lyanguhulikwa hagunuche, mgongomanyileni Mkulu nzila ya heye!’ ”
JOH 1:24 Awo wanhu wali watumigwa na chikundi chichemigwe Mafalisayo.
JOH 1:25 Hamba wamuuza Yohani, “Wone hegwe huli Kilistu Mlohozi na huwele Eliya na huwele mloli wa Nguluwi, lelo Iekachoni kwangubatiza wanhu?”
JOH 1:26 Yohani nakedichila, “Heni ndangubatiza kwa mazi, ila hali hemwe kabaho yumwe yo hamzelele.
JOH 1:27 Kulawa heni kanguya yunji hambele hangu, na heni siganigwa hebu kudohola ng'weso za makwamba ga heye.”
JOH 1:28 Geng'ha aga nagalawila akula Betaniya, kumwambu kwa lwanda lwa Yolodani, Yohani koyali yobatiza wanhu.
JOH 1:29 Mitondo iyage, Yohani nakamona Yesu yokuya koyali, kata, Mlole, “Mwanaing'holo lya Nguluwi, yalingusa gehile ga wanhu wa isi yeng'ha!
JOH 1:30 Ayu ndo munhu nandonjile mbuli za heye hala hondonjile, ‘Kanguya munhu kumbele kwa heni, yawele mkulu kwa heni, kwa vila nayalibaha heni sinavumbuka!’
JOH 1:31 Heni hano nasimzelele, ila mbuya kuwabatiza kwa malenga leka wanhu wa Isilaeli wamzele.”
JOH 1:32 Yohani kalavya ulolezi wa heye kalonga, “Nandimona Muhe Yelile yodulika kota ng'hunda kulawa kilanga ikwima kumutwi kwa heye.
JOH 1:33 Heni nasimzelele, ila yula Yanhumile heni ndiwabatize wanhu kwa malenga nakandonjela, ‘Munhu yula youmona Muhe Yelile yomlagalila kulawa kilanga na kikala mchanya hake, ayu ndo yobatiza kwa Muhe Yelile.’
JOH 1:34 Heni ndimona na kukunda kuta ayu ka Mwana wa Nguluwi.”
JOH 1:35 Hamitondo, Yohani nayali yemile na Walanguswa wa heye weli.
JOH 1:36 Vyowamuwene Yesu yokola, kalonga, “Mlole! Ayu ndo Mwanaing'holo wa Nguluwi!”
JOH 1:37 Awala walanguswa weli nawamhulika Yohani yolonga ago, wamuwinza Yesu.
JOH 1:38 Lelo Yesu nakahinduka, na loyawawene awo walanguswa womuwinza heye, kawauza, “Mwangupala choni?” Hewo nawedichila, “Labi, kwangikala kohi?” (Labi mina yake mlangusa).
JOH 1:39 Yesu nakawalonjela, “Muye, na hemwe mohona.” Hewo walanguswa wamuwinza, wahona honhu hoyali ngikala, wawasa na heye zuwa alyo. Yali ifichile saa kumi matinazo.
JOH 1:40 Andeleya, mng'holoze Simoni Petili, nayali yumwe wa awo weli wamhuliche Yohani yolonga ago, ahyo wamuwinza Yesu.
JOH 1:41 Andeleya vyoyamfichile mkulugwe, Simoni, nakamlonjela, “Tumona Kilistu Mlohozi.”
JOH 1:42 Hamba kamwigala Simoni kwa Yesu. Na heye Yesu kamlola Simoni, nakamlonjela, “Itagwa lyako ni Simoni mwana Yohani. Ila kulawa sambi kochemigwa Kefa.” Chigiliki itagwa Petili lilinguzeleka kota italawe.
JOH 1:43 Zuwa liyage Yesu nakalapa yalute Galilaya. Kamfika Filipo nakamlonjela, “Umbinze.”
JOH 1:44 Filipo nayali mwenyeng'haye wa Betisaida, muji yoyalingikala Andeleya na Petili.
JOH 1:45 Na heye Filipo nakamfika Natanaeli, nakamlonjela, “Natumona munhu Musa yamwandiche mchitabu cha Malajizo, na waloli, Yesu mwana wa Yusufu, wa Nasaleti.”
JOH 1:46 Natanaeli kamuza Filipo, “Ahi chinhu chinojile choweza kulawa Nasaleti?” Filipo kamwidichila, “Uye ulole.”
JOH 1:47 Yesu vyowamuwene Natanaeli yokuwa kwa heye, kasima mbuli za heye zeng'ha, nakawalonjela, “Mlole, ayu ndo Muisilaeli ng'hatu, kuduhuli udesi mgati mwake.”
JOH 1:48 Natanaeli kamuuza Yesu kalonga, “Kunzela ndaze heni?” Yesu nakamwidichila, “Nandikona ahala nalowikale hasi hali igodi lya msada, lonaung'hali chemigwa na Filipo nandikona.”
JOH 1:49 Natanaeli kedichila, Mlangusa, hegwe ndo Mwana wa Nguluwi! Kahi uli Mndewa wa Isilaeli.
JOH 1:50 Yesu nakamlonjela Natanaeli kalonga, “Kwangukunda kwa vila ndikulonjela nandikona hasi hali igodi lya msada? Kogona makulu kusinda aga.”
JOH 1:51 Yesu nakalutilila kuwalonjela hewo kalonga, “Ndanguwalonjela ndikomya, mokona kilanga kugubuka na wahilisi wa kilanga wa Nguluwi wokwina na kudulika ha Mwana wa Munhu.”
JOH 2:1 Zuwa lya kadatu kwali na mnvina ya munhu yohesa ako Kana Galilaya, na mayake Yesu nayali baho.
JOH 2:2 Heye Yesu nayali yalalikwe kuli mnvina ya kuhesa hamwe na walanguswa wa heye.
JOH 2:3 Divai vyoimalile, mayake Yesu nakamlonjela mwanage kalonga, “Wahela divai.”
JOH 2:4 Yesu nakamwidichila mayake kalonga, “Mamo lekachoni ulingundonjela mbuli ino, mhela wa heni hainoya.”
JOH 2:5 Mayake Yesu nakawalonjela wakolamijito kalonga, “Choyowalonjela kukola, mkole hihyo.”
JOH 2:6 Baho kwali na mibiga sita ja maganga, ibiga limwe lyali lihega kuwika madebe meli ama gadatu. Jali jiwichigwe aho kwa mbuli ya kihendo cha Wayahudi cha kihovuga.
JOH 2:7 Yesu nakawalonjela awala wanhu wali wotanza ahala honhu kalonga, “Mjele malenga aji mbiga jimeme.” Wawika malenga mli mibiga mbaka jimema.
JOH 2:8 Hamba kawalonjela, “Lelo deheni mumgalile mkulu wa mvina auno.”
JOH 2:9 Mkulu wa mnvina nakagajeza ago malenga gagaluche kuwa divai. Heye nahavizelele koilawile, ila wala vitumagwa wadehile gala malenga nawavizela. Mkulu wa mvina kamchema mkasano,
JOH 2:10 nakamlonjela, “Chila munhu kagugongomanya Divai inojile ilongole, na wone wanhu wawe wagalile, ndo kangulavya aila ihile. Leka hegwe kuwika ujimbi inojile mbaka sambi!”
JOH 2:11 Yesu nakadita ulajilo awu wa mwaluko ako Kana, mli isi ya Galilaya. Ako nakalajila ukulu wa heye, na walanguswa wa heye wamkunda.
JOH 2:12 Ago logapulute, Yesu nakadulika hamwe na mamo wa heye, wang'holoze na walanguswa wa heye. Waluta Kapanaumu, kula nawekala kwa mazuwa mado.
JOH 2:13 Mnvina ng'hulu ya Pasaka ya Wayahudi nayali habehi. Ahyo Yesu nakaluta Yelusalemu.
JOH 2:14 Loyenjille mli Ng'handa ya Nguluwi, nakawafika wanhu woguza misenga na ming'holo na ng'hunda, na kwali wanhu wanji wali wovunza sendi wachikale muli visanya jawo.
JOH 2:15 Baho kabota ng'hobwa ya isali, kaluka kuwawinga wanhu weng'ha na misenga na ming'holo jawo hanze ha Ng'handa ya Nguluwi. Kagwisa visanya ja awala wavunza sendi na kuboholanga sendi zawo.
JOH 2:16 Nakawalonjela wala waweleguza ng'hunda kalonga, “Muuse vinhu avi aha. Mleche kugalula ng'handa wa Mhaza wa heni kuta soko!”
JOH 2:17 Awala walanguswa wakumbuchila Maandiko Matakatifu gangulonga, “igano lyangu kwa ng'handa ya hegwe kong'hopola.”
JOH 2:18 Wayahudi wamwe nawamuuza Yesu, “Kodita chinduza nduza chachi, kutulajila kuta kwanayo hachi ya kudita aga?”
JOH 2:19 Yesu nakawedichila kawalonjela, “Beneni ng'handa ino ya Nguluwi na heni ndoizenga kwa mazuwa gadatu.”
JOH 2:20 Wayahudi nawalonga, “Ng'handa ayi ya Nguluwi naizenjigwa kwa mihela makumi gane na sita. Hegwe koizenga ndaze kwa mazuwa gadatu hela?”
JOH 2:21 Ila ng'handa nayali yolonga Yesu nayali lukuli lwake.
JOH 2:22 Loyazilpuche kulawa koyatiligwe, awala walanguswa wakumbuchila nagoyalonjile Yesu. Ahyo nawakunda Maandiko Matakatifu na luzi loyalonjile Yesu.
JOH 2:23 Yesu loyalutile Yelusalemu kuli mnvina ya Pasaka, wanhu wenji nawamkunda wawene ulajilo wa vinduzanduza vyoyaditile.
JOH 2:24 Ila Yesu hali yowakunda kwa vila nakawazela weng'ha.
JOH 2:25 Nahaviganile kulonjelwa choneche kuli mbuli za wanhu kwa vila nakagazela goya galimgati mwa nhumbula za hewo.
JOH 3:1 Kwali na Mkulu yumwe wa Wayahudi, itagwa lyake lyali Nikodemo. Mkulu ayu nayali mli chilundo cha Mafalisayo.
JOH 3:2 Nechilo imwe nakaluta kwa Yesu na kumuuza, “Mlangusa, tuvizela kota hegwe uli mlangusa yatumigwe na Nguluwi, kwa vila kuduhu munhu yolajila viduzanduza kota vyoudita hegwe wone hawele na ludali lya Nguluwi.”
JOH 3:3 Yesu nakedichila, “Ndanguwalonjelani ndikomya, kuduhu munhu yowona Undewa wa Nguluwi mbaka yavumbuche lwa keli.”
JOH 3:4 Nikodemo nakauza, “Yowa ndaze munhu mkulu yavumbuche lwa keli? Hambi koweza kwinjila kuli munda wa mayake ndo yavumbuche lwa keli!”
JOH 3:5 Yesu nakamlonjela, “Ndanguwalonjelani ndikomya, kuduhu munhu yokwinjila kuli Undewa wa Nguluwi wone havumbuche kwa malenga na kwa Muhe Yelile.
JOH 3:6 Munhu kovumbuka chilukuli na Mhaza wa heye na mayake, ila kovumbuka kwa Muhe Yelile.
JOH 3:7 Uleche kijesa vyondikulonjele kota igana mvumbuche lwa keli.
JOH 3:8 Mbeho iputaga kweng'ha kota vyoilingugana, hegwe kohulika lizi vyoidita, ila kowa huvizelele kota kohi koulawila na kohi kouluta. Ahi ndo vyoili kwa munhu yaleligwe kwa Muhe Yelile.”
JOH 3:9 Nikodemo nakamuuza, “Mbuli azi zowa ndaze?”
JOH 3:10 Yesu nakedichila, “Hegwe uli mlangusa mkulu ahano Isilaeli ila hugazelele agano?
JOH 3:11 Ndangukulonjela ndikomya, twangulonga agala tugazelele na twangulonga ulolezi kwa agala tugawene, ila kuduhu munhu yowakola lupichi kubochela aga tutumigwe.
JOH 3:12 Wone hamkundile hondiwalonjele mbuli za isi ino, hambi mokunda ndaze hondiwalonjela mbuli za kilanga?
JOH 3:13 Kuduhu munhu yalutile kilanga ila heye Mwana wa Munhu, yaduliche kulawa kilanga.”
JOH 3:14 Kota vila Musa vyowenule izoka lya shaba akula kugunuche, hiho yowa kuli Mwana wa Munhu kokwinuligwa kuchanya,
JOH 3:15 leka munhu yoneche yomkunda yawe na ukomu wa mazuwa gose ne kuduma.
JOH 3:16 Nguluwi nakawagana wanhu wa isi, mbaka kamigala Mwanage yaliyeng'ha leka chila munhu yomkunda yaleche kubagama ila yawe na ukomu wa mazuwa gose ne kuduma.
JOH 3:17 Nguluwi hamwigale Mwanage kuli isi leka yawataguse wanhu, ila kamigala yawalohole.
JOH 3:18 Munhu yoneche yamkundile Yesu kahela utaguso, ila munhu yohomkunda, mina katagusigwa, kwavila kalema kumkunda Mwana yaliyeng'ha wa Nguluwi.
JOH 3:19 Utaguso awo ndo uno. Lumuli luya kuli isi yeng'ha ila wanhu nawagana kutitu woleka lumuli, kwa vila madito gawo geha.
JOH 3:20 Chila munhu yalingudita gehile kangulema lumuli, nahokuya kuli lumuli mina halingugana gehile ga heye goneche.
JOH 3:21 Leka munhu yoneche yalingudita ga kukomya galingumnojeza Nguluwi koyaga kuli lumuli, leka madito ga heye goneche gaditigwa kwa kumtogola Nguluwi.
JOH 3:22 Kumala kwa ago, Yesu nakafika mkowa wa Yudeya hamwe na walanguswa wa heye. Nakekala ako hamwe na hewo hado, yowabatiza wanhu.
JOH 3:23 Yohani na heye nayali yobatiza wanhu ako Ainoni, behi na Salemu, mina ako kwali na malenga menji. Wanhu nawaluta kwa heye, na heye nakawabatiza.
JOH 3:24 Mhela awo Yohani nayang'hali hindilwa mchinwengho.
JOH 3:25 Kitwanza nakulawila hagati kwa wamwe wa walanguswa wa Yohani na Myahudi yumwe kuli chihendo cha kihovuga leka wamlande Nguluwi.
JOH 3:26 Walanguswa awo nawamlutila Yohani na kumlonjela, “Mlangusa, yula munhu yawele hamwe na hegwe kumwambu kwa Yolodani, na hegwe ulonjile mbuli za heye, sambi na heye kangubatiza, na wanhu weng'ha wanguluta kwa heye!”
JOH 3:27 Yohani nakamlonjela, “Munhu howeza kuwa na chinhu wone hapeligwe kulawa kilanga.
JOH 3:28 Na hemwe namwe moweza kulavya ulolezi kota nandonga, ‘Heni siwele Kilistu Mlohozi, ila nhumigwa leka ndimlongole!’
JOH 3:29 Mkasano wa heye mzenjele, ila mganwa wa mzenjele, yalingwima na kuhulichiza, kasechelelaga hoyohulika mzenjele yolonga. Ndo usangalalo wa heni vyowenele.
JOH 3:30 Imgana heye yazidi kuwa na ukulu, na heni ndiwe mdodo.”
JOH 3:31 Munhu yawele nguya kulawa kilanga ka mkulu kwa weng'ha, yalingulawa kuli isi ndo wa isi, na hulongaga mbuli za isi. Ila yalinguya kulawa kilanga mkulu kusinda weng'ha.
JOH 3:32 Heye kalongaga gala goyawene na kugahulika, ila kuduhu ne munhu yalingukunda usenga wa heye.
JOH 3:33 Ila munhu yoneche yalingukunda usenga wa heye kangukangaza kuta Nguluwi kangukomya ng'hatu.
JOH 3:34 Yula yatumigwe na Nguluwi kangulonga ulonzi wa Nguluwi, mina Nguluwi kampaga munhu Muhe wa heye kulihela mmbaka.
JOH 3:35 Mhaza kangumgana Mwana wa heye na kangumpa vinhu vyeng'ha mmoko mwake.
JOH 3:36 Yalingumkunda Mwana kanawo ukomu wa mazuwa gose, yohambe yamkunde Mwana howa na ukomu wa mazuwa gose ne kuduma, na heye kopona kuli kuzudila kwa Nguluwi.
JOH 4:1 Mafalisayo nawahulika kota, Yesu kangikala yowapata na kuwabatiza walanguswa wenji kusinda Yohani.
JOH 4:2 Heye Yesu nayali hambe yabatize wanhu, walanguswa ndo wali wobatiza wanhu.
JOH 4:3 Yesu vyoyahuliche ago gowaliwolonga wanhu, koka Yudeya nakahiluka Galilaya.
JOH 4:4 Loyali yoluta mnzila naimgana yakolele Samaliya.
JOH 4:5 Lelo loyafichile Sukali, muji umwe wa Samaliya, habehi na mgunda wa Yakubu nayampele mwanage Yusufu.
JOH 4:6 Honhu aho hali na ideho lya Yakubu. Yesu vyoyali yatochile kujenda, kekalisa hanyi hafungo ha ideho. Yali iluta saa sita nemisi.
JOH 4:7 Baho koya mdala wa Samaliya kudeha malenga. Yesu nakamlonjela, “Umhe malenga nyinwe.”
JOH 4:8 Mhela awo walanguswa wa heye nawaluta kuli muji kugula ndiya.
JOH 4:9 Yula mdala Msamalia nakalonga, “Hegwe kwa Myahudi na heni nda Msamaliya, iwa ndaze kwangundanda malenga ga kunwa?” Kwa vila Wayahudi na Wasamaliya hawahangaga vinhu.
JOH 4:10 Yesu nakamwidichila, “Hegwe na uvizele choyokupa Nguluwi, na munhu wachi yalingukulanda malenga, na wahamlandile heye malenga galingigala ukomu nayahakupele.”
JOH 4:11 Mdala yula kamuuza, “Mkulu, hegwe kwahela chinhu cha kudehela malenga, na ideho liluta hasi lukami, kogapata kohi malenga ga ukomu?
JOH 4:12 Hambi hegwe kwa mkulu kusinda mhaza wa hetwe Yakubu yatupele ideho lino, heye kanwa malenga gano na wanage na misenga jake?”
JOH 4:13 Yesu nakedichila, “Wanhu weng'ha walingunwa malenga aga, woza ngona ng'halu kahi,
JOH 4:14 ila munhu yonwa malenga ga heni hokona ng'halu ne hado. Malenga gowa nzasa imwigalila malenga ga ukomu. Kahi gompa ukomu wa mazuwa gose ne kuduma.”
JOH 4:15 Ayula mdala nakamlonjela Yesu, “Mkulu, umhe heni ago malenga ndeche kuyona ng'halu iyage na ndoleka kuya ahano kudeha malenga.”
JOH 4:16 Yesu nakamlonjela ayula mdala, “Ulute kamcheme mlume wa hegwe uye naye ahano.”
JOH 4:17 Ayula mdala nakamwidichila, “Ndahela mlume.” Yesu nakedichila, “Nakukomya vyoulonjile kwahela mlume.
JOH 4:18 Nakuholigwa na walume wahano, na mlume ulingikala naye sambi hawele mlume wa hegwe. Goulonga kukomya.”
JOH 4:19 Yula mdala nakamlonjela, “Mkulu, ndangukona hegwe kwa mloli wa Nguluwi.
JOH 4:20 Wasekulu wa hetwe wali wotambichiza Nguluwi kuli chidunda chino, ila hemwe Wayahudi mwangulonga Yelusalemu ndo honhu ha kutambichiza Nguluwi.”
JOH 4:21 Yesu nakamlonjela yula mdala, “Mdala ukunde gondilonga, mhela wanguya wanhu howomtambichiza Nguluwi kuli chidunda chino ama kula Yelusalemu.
JOH 4:22 Hemwe Wasamaliya hamzelele yalikohi wa kumtambichiza, ila hetwe Wayahudi tumzela yalikohi wa kumtambichiza, kwa vila ulohozi wolawa kwa Wayahudi.
JOH 4:23 Ila mhela wanguya nawabaha ufika, walingutambichiza wokomya, womtambichiza Mhaza wolongozwa kwa Muhe Yelile na kukomya.
JOH 4:24 Nguluwi ndo Muhe. Ahyo wanhu walingumtambichiza, wamtambichize kwa kulongozwa kwa Muhe na kukomya.”
JOH 4:25 Mdala nakamlonjela Yesu hino, “Ndivizela kota Masiha yochemigwa Kilistu Mlohozi kokuya. Hoyokuya, kotulonjela hetwe mbuli zeng'ha.”
JOH 4:26 Yesu nakamwidichila, “Heni ndo nene ndilingulonga na hegwe!”
JOH 4:27 Baho du, walanguswa nawahiluka, wabubuwala vyowamfichile Yesu yolonga na mdala. Ila kwali kuduhu ne yumwe yamuuzile ayula mdala kota, “Kwangugana choni?” Nakumuuza Yesu, “Ndaze kwangulonga na ayu mdala?”
JOH 4:28 Hamba ayula mdala nakaleka chiya cha malenga, kahiluka kuluga kuwalonjela wanhu,
JOH 4:29 Muye mlole, munhu yandonjele heni geng'ha gong'holile, kowa yawele Kilistu Mlohozi?
JOH 4:30 Baho wanhu nawoka kuli muji nawaluta koyali Yesu.
JOH 4:31 Mhela wuwo walanguswa wali womdedeza Yesu, “Mlangusa, ulye chilyo.”
JOH 4:32 Ila heye nakawedichila, “Ndina chilyo cha kulya cho hamchizelele hebu.”
JOH 4:33 Walanguswa nawaluka kiwuza hewo waliyeka, “Hambi kwali na munhu yamigalile chilyo?”
JOH 4:34 Yesu nakawalonjela, “Chilyo cha heni chowa kudita vyoyaganile heye yanhumile na kukola mbuli zoyalajize.
JOH 4:35 Vyomzowele kulonga, ‘Jinghali myezi jine hela mhela wa mbena.’ Ila ndangukulonjelani mlole goya kuli migunda, vilyo vikangala goya kubenigwa.
JOH 4:36 Ayula yokola mijito ya mbena, kowa yopegwa sendi, na kukungajiza chilyo kuli ukomu wa mazuwa gose ne kuduma, yumwe yonyala na yumwe yobena, weng'ha wowa wosechelela hamwe.
JOH 4:37 Kwa vila ulonzi awu ukomya, yumwe konyala na yumwe kobena.
JOH 4:38 Ndiwalajiza hemwe mkabene kuli migunda johamkolile mijito, wanji wochitunya hala na hemwe mohola hela.”
JOH 4:39 Wasamaliya kuli muji ula nawamkunda Yesu kota ayula mdala vyoyawalonjele, “Kandonjela geng'ha gonditile.”
JOH 4:40 Wasamaliya vyowoyile kwa Yesu, nawamdedeza yekale na hewo. Yesu kekala na hewo mazuwa meli.
JOH 4:41 Wanhu wenji ng'hatu nawakunda kwa mbuli ya usenga wa Yesu.
JOH 4:42 Wamlonjela ayula mdala, “Hetwe hambe tukunde hela kwa mbuli ya ulonzi wa hegwe, ila hetwe twetwe tumhulika na tuvizela kota ayu ndo Mlohozi wa isi yeng'ha.”
JOH 4:43 Lowekale mazuwa meli, Yesu koka aho kaluta Galilaya.
JOH 4:44 Kwa vila Yesu nakatawiza, “Mloli hatogolagwa hebu kuli isi ya heye.”
JOH 4:45 Lelo vyowafichile Galilaya, wanhu ahala wambochela, kwa vila nawo nawaluta kuli mnvina ya Pasaka, nawagona geng'ha gowaditile ako Yelusalemu kuli mnvina ila.
JOH 4:46 Yesu nakafika kahi ako Kana iwele Galilaya, konayagalule malenga gawa divai. Kwali na mkulu wa wamizi mloma, nayali na mwana mtamwa ako Kapanaumu.
JOH 4:47 Lelo mkulu ayo wa isi loyahuliche Yesu koya yolawila Yudeya mbaka Galilaya, kaluta kumlanda yamlohole mwanage msongolo yawele mtamwa lajilaji.
JOH 4:48 Yesu nakamlonjela, “Kuduhu munhu ne yumwe, yokunda mbaka yavyone vinduzanduza na ulajilo.”
JOH 4:49 Ayula mkulu wa undewa wa isi nakamlonjela Yesu, “Mkulu, dedede, tulute himahima mwanangu hanabagama.”
JOH 4:50 Yesu nakamlonjela, “Ulute kaye komfika mwanago yawele mkomu.” Ayula munhu nakakunda goyalonjile Yesu, koka kaluta kaye.
JOH 4:51 Vyoyali yoluta mnzila kuza kaye, kating'hana na vitumagwa wa heye, nawamlonjela, mwanago mkomu.
JOH 4:52 Heye nakawauza, wali mhela wachi? Nawamlonjela, “Yali ifichile saa saba nemisi, utamwa lowaluche kumlechela.”
JOH 4:53 Baho ayula mkulu nakakumbuchila nayali ndo mihela jijila Yesu vyoyamlonjele kota, “Mwanago kowa mkomu.” Baho ivyazi lyake nawakunda goyalonjile Yesu.
JOH 4:54 Achi chali chinduzanduza cha keli Yesu yalajile vyoyalawile Yudeya kuluta Galilaya.
JOH 5:1 Vyogamalile ago Yesu nakaluta Yelusalemu. Na ako kwali na mnvina ya Wayahudi.
JOH 5:2 Ako Yelusalemu habehi na chihindilo chikulu luchemigwa Chihindilo cha ming'holo, kwali na izimbo na hafungo hake hali na vibumuli vihano, Waebulaniya wali wochema Betisata.
JOH 5:3 Na mumo mvibumuli mwali na watamwa wenji wawasile habehi na hali vibumuli, vipofu na wali chete na waziliche lukuli, wekale wobeteza malenga gatiguligwe.
JOH 5:4 Kwa vila mhilisi wa Nguluwi kawaga yokuya na kwinjila mli malenga na kugatigulanga na heye yokwaluka kwinjila, kawaga yaloholigwe.
JOH 5:5 Baho kwali na munhu yumwe mtamwa, yekale yotamika mihela makumi gadatu na nane.
JOH 5:6 Yesu vyoyamuwene munhu ayula yatambalize baho, kavizeela kota yaliyokugula kulawa katali. Ahyo nakamuuza, “Ndaze, kwangugana uwe mkomu?”
JOH 5:7 Ayula mtamwa nakedichila, “Mkulu, ndahela munhu ahano wa kunyasula wanhumbuchize mchihengo cha izimbo malenga ho gatiguche. One njeze kwinjila, munhu yunji kangulongola.”
JOH 5:8 Yesu nakamwidichila, nakamlonjela, “Winuche uhole mcheka wa hegwe ujende.”
JOH 5:9 Baho du, ayula mtamwa kawa mkomu, kahola mcheka wa heye kaluka kujenda. Mbuli ayi na ikoleka Zuwa lya Kwesela.
JOH 5:10 Wayahudi wamwenga, wamlonjela yula munhu yaloholigwe, “Lehano ndo Zuwa lya Kwesela haiwa goya kupika lutenvu lwako.”
JOH 5:11 Munhu yaloholigwe nakawedichila, “Munhu yanditile hino kandonjela nyhole lutenvu lwangu njende.”
JOH 5:12 Wamuuza heye wata, “Yalikohi yakulonjele hegwe widwiche lutenvu lwako ujende?”
JOH 5:13 Heye nahamzelele munhu yamlohole, kwa vila Yesu nayali yochile honhu hala, na baho kwali na lung'hongola lwa wanhu.
JOH 5:14 Hamba Yesu nakamfika ayula munhu yaloholigwe mli Ng'handa ya Nguluwi, na kumlonjela, “Uhulichize sambi kwa mkomu, uleche kudita gehile kahi, uleche kufichigwa na mbuli ihile lukami.”
JOH 5:15 Hamba ayula munhu kaluta kuwalonjela wakulu wa Wayahudi, nakawalonjela Yesu ndo yaditile hino.
JOH 5:16 Hamba wakulu wa Wayahudi waluka kumonela fihi Yesu, kwa vila nakadita mbuli ayo kuli Zuwa lya Kwesela.
JOH 5:17 Yesu nakawedichila kawalonjela kata, “Mhaza wa heni kangukola mijito mazuwa gose, na heni ndangudita hiho.”
JOH 5:18 Kwa mbuli ya ulonzi awo, wakulu wa Wayahudi walutilila kupala nzila ya kugana kumkopola, hawali kwa vila nakabena mlongo weka wa Zuwa lya Kwesela, ila akula kulonga Nguluwi wali Mhaza wa heye, na ahyo kedita heye kota Nguluwi.
JOH 5:19 Yesu nakawedichila, “Ndangulonga ndikomya, Mwana hokola chila chinhu yaliyeka, koweza kudita chila choyodita Mhaza, kwa vila choyodita Mhaza, Mwana kodita hihila.
JOH 5:20 Mhaza kangumgana mwanage na komlajila chila chinhu chowodita Mhaza, kahi komlajila mbuli ng'hulu kusinda ayi, na mweng'ha mobubuwala.
JOH 5:21 Kota vila Mhaza vyoyowazilipula wabagame na kuwapa ukomu, hihyo na heye Mwana kowapa ukomu wala walingugana.
JOH 5:22 Mhaza homtagusa munhu yoneche, mbuli yeng'ha ya utaguso kamlechela Mwana,
JOH 5:23 leka wanhu weng'ha wamdumbe Mwana, kota vyowalingumdumba Mhaza. Heye wali hambe wamdumbe Mwana halingumdumba Mhaza yamtumile.
JOH 5:24 “Ndangulonga ndikomya, heye yohulika mbuli ya heni, na kukunda ga heye Yanhumile kowanawo ukomu wa mazuwa gose ne kuduma. Hotagusigwa hebu, kowa yalochile kulawa kuli kubagama kwinjila kuli ukomu.
JOH 5:25 Ndangulonga ndikomya, mhela wanguya na mina ufika, aho awala wabagame wohulika lizi ya Mwana wa Nguluwi, na hewo woihulika wowa na ukomu.
JOH 5:26 Kota vila Mhaza yawele kwaluka kwa ukomu, hihyo kahi vyoyomtogola mwanage yawele mwaluko wa ukomu.
JOH 5:27 Nakamwigalila mwanage ludali lwa kutagusa, kwa vila yawele Mwana wa Munhu.
JOH 5:28 Mleche kuta ndangudeta, mina mhela wanguya weng'ha wabagame woihulika lizi lya heye Nguluwi.
JOH 5:29 Na hewo wozilipuka kulawa kowabagame, na awala waditile ganojile, wozilipuka na kuwa wakomu, na awala waditile gehile wozilipuka na kutagusigwa.
JOH 5:30 “Heni siweza kudita cheng'ha chila, ndangutagusa kota vyonyuliche kwa Mhaza, na utaguso wa heni unoga, kwa vila silingudita vyondigana heni, ila vyoyogana heye Yanhumile.”
JOH 5:31 “Wone ndichinojeza ndiliyeka, wanhu howokunda ago gondonjile kuta ndikomya.
JOH 5:32 Ila kabaho yumwe yolovya ulolezi wa heni, na heni ndivizela kuta geng'ha goyolonga kwa heni kakomya.
JOH 5:33 Hemwe na mlajiza usenga kwa Yohani na ulolezi wa heni yoyalonjile kakomya.
JOH 5:34 Heni silingitumbila ulolezi wa wanhu, ila ndagulonga mbuli zino leka mloholigwe.
JOH 5:35 Yohani nayali kota chenje chikwaka na kumulika na hemwe namwimilila kusechelela alo lumuli kwa mhela udo.
JOH 5:36 Ila heni ndangilavila ulolezi kwa mbuli ya heni loyali mkulu ng'hatu kusinda ula wa Yohani. Kwa vila mbuli zondilingukola, mbuli zoyamhele Mhaza ndite, azo zangulajila kota Mhaza ndo yanhumile.
JOH 5:37 Na heye Mhaza yanhumile kangulavya ulolezi. Hemwe hamnahulika lizi lya heye, ne kumona kumeho.
JOH 5:38 Usenga wa hemwe haulingikala mgati mwa hemwe mina mlema kumkunda yula yanhumile.
JOH 5:39 Hemwe mgalolaga goya Maandiko Matakatifu mchijesa kota mgati mwake mopata ukomu wa mazuwa gose ne kuduma, na aku Gandichigwe gago gangulavya ulolezi wa mbuli za heni.
JOH 5:40 Lelo hemwe mwangulema kuwa kwa heni leka muwe na ukomu.
JOH 5:41 “Silingupala kutogoligwa na munhu.
JOH 5:42 Ila nandiwazela hemwe, ndivizela kota hemwe hamlingumgana Nguluwi.
JOH 5:43 Heni mbuya kwa ludali lwa Mhaza wa heni, ila hambochele. Ila munhu yunji loyokuya kwa ludali lwake, mombochela.
JOH 5:44 Mokunda ndaze hanga hemwe mwangugana kutogoligwa hemwe kwa hemwe baho, na hamlingupala kutogoligwa na heye yawele yeka Nguluwi?
JOH 5:45 Mleche kijesa kota heni ndoyowalonjeleza kwa Mhaza. Musa yomlingitumbila ndo yowalonjeleza.
JOH 5:46 Wone na muwe mumkundile ng'hatu Musa, mwahang'hundile heni kahi, kwa vila Musa nakandika mbuli za heni.
JOH 5:47 Wone hamlingukunda gala goyandiche Musa, hambi mokunda ndaze ulonzi wa heni?”
JOH 6:1 Ago logapulute, Yesu nakaloka ilamba lya Galilaya, ama ilamba Tibeliya.
JOH 6:2 Chilundo chikulu cha wanhu nachimuwinza Yesu kwa wanhu awo wali wagawene goyalajile kwa kuwosa matamwa.
JOH 6:3 Yesu nakaluta kuchanya kuchidunda, kekalisa hanyi na walanguswa wa heye.
JOH 6:4 Mnvina ya Pasaka ya Wayahudi nayali habehi.
JOH 6:5 Yesu nakalola kufungo, nakona lung'hongola lwa wanhu wokuya kuli heye. Ahyo nakamlonjela Filipo, “Kohi kotugula chilyo cha kuwagutiza wanhu weng'ha awa?”
JOH 6:6 Yesu nakalonga ahyo kwa kumjeza Filipo, kwavila nakavizela choni chowodita!
JOH 6:7 Filipo nakedichila, “Itugana tuwe na sendi denali miya mbili nyinji za kugula chilyo cha kulya wanhu weng'ha wano!”
JOH 6:8 Yumwe wa awala walanguswa, Andeleya yawele mkulugwe na Simoni Petili, nakalonga,
JOH 6:9 “Hana msongolo baha, kana mibumunda jihano na somba mbili, na vyokwila choni kwa wanhu weng'ha awa?”
JOH 6:10 Yesu nakalonga, “Namuwalonjele wanhu wekalise hanyi.” Baho wanhu weng'ha wekalisa hanyi, kwali na walume kota elufu zihano hino.
JOH 6:11 Yesu kahola ajila mibumunda, katambichiza na kawamogolela awala wanhu wekalise, kadita hihila na zila somba. Wanhu weng'ha walya kota vyowaganile mbaka weguta.
JOH 6:12 Vyowegute, Yesu nakawalonjela walanguswa, “Mlokoteze chilyo chisigale, tuleche kwajiliza chilyo ne hado.”
JOH 6:13 Walokoteza upumunizo wa mibumunda na somba, vimema vidoto kumi na vili vyowalechelele wala wanhu.
JOH 6:14 Vyowawene ulajilo wa vila vinduzanduza vyoyaditile Yesu, wanhu ahala walonga kota wakomya ayu ndo mloli wa Nguluwi yawele kuya kuli isi.
JOH 6:15 Hamba Yesu wavizelele kota wangugana yoye wamkabajize yawe mndewa vyohaviganile, baho nakoka, kaluta kahi kukula kuchidunda.
JOH 6:16 Loyali lufuku, walanguswa wa Yesu wadulika mbaka kuli ilamba.
JOH 6:17 Wakwina mli itumbwi leka waloche kuluta Kapanaumu. Nechilo injila, Yesu nayali yang'hali kuwahejelela hebu.
JOH 6:18 Ilamba lyaluka kutiguka kwa vila mbeho nayali iputa.
JOH 6:19 Walanguswa lowali walutile utali wa chilometa zihano ama sita hino, nawamona Yesu yojenda mchanya mmalenga, yohejelela itumbwi. Nawadumba heko.
JOH 6:20 Ila Yesu nakawalonjela, “Nda heni! Mleche kudumba!”
JOH 6:21 Hamba nawagana kumwinula kumwinjiza mgati mli itumbwi, na baho itumbwi nalifika kumwambu hafungo koyali yoluta.
JOH 6:22 Mitondo, chilundo cha awala wanhu wekale hafungo mwa ilamba, na wavizela kota itumbwi limwe hela na lipona ahala honhu. Yesu nahalutile na awala walanguswa, ila walanguswa nawaluta waliyeka.
JOH 6:23 Mitumbwi jinji kulawa Tibeliya najuya honhu hala wanhu howadile mibumunda Mkulu loyasindile kumtogola Nguluwi.
JOH 6:24 Wanhu awo lowawene ahala honhu haduhuli Yesu na walanguswa wa heye, weng'ha wakwina mli ajila mitumbwi na waluta Kapanaumu kumpala Yesu.
JOH 6:25 Wanhu vyowamuwene Yesu kumwambu kwa ilamba, wamuuza, “Mlangusa, kuya nili hano?”
JOH 6:26 Yesu nakedichila, “Ndangulonga ndikomya, mwangumhala heni haiwele kwa vila vyomuwene ulajilo, ila kwa vila namulya mibumunda na miguta.
JOH 6:27 Mleche kugayila chilyo chilingola, iponile migayile chilyo chilingikala kwa mbuli ya ukomu wa mazuwa gose ne kuduma. Achi ndo chilyo choyowapani Mwana wa munhu kwa vila kahaguligwa na kukundigwa na Nguluwi Mhaza.”
JOH 6:28 Hewo nawamuuza Yesu, “Tudite choni leka tuweze kudita choyalingugana Nguluwi?”
JOH 6:29 Yesu nakawedichila, “Ayi ndo mijito yalingugana Nguluwi mdite, mumkunde yula yamlajize.”
JOH 6:30 Aho, nawamlonjela, “Kolajila chinduzanduza chachi tuchone ndo tukukunde? Kodita chinhu chachi?
JOH 6:31 Wasekulu wa hetwe nawalya tubumunda kula kugunuche, kota gandichigwe vyogalonjile, ‘Na kawalavila hewo chilyo cha kulawa kilanga walye.’ ”
JOH 6:32 Yesu nakawalonjela, “Ndanguwalonjelani ndikomya, Musa hawapele mibumunda kulawa kilanga, Mhaza wa heni ndo yawapele hemwe mibumunda kulawa kilanga.
JOH 6:33 Libumunda lya Nguluwi, ndo ayula yodulika hasi kulawa kilanga yochigala ukomu kwa wanhu wa isi.”
JOH 6:34 Nawamlonjela wata, “Mkulu, tupegwe hetwe mibumunda mazuwa gose.”
JOH 6:35 Yesu nakawalonjela, “Heni nda chilyo chilingigala ukomu. Heye yokuwa kwa heni hokona nzala hebu, na hewo wokunda ga heni wowa hela ng'halu ng'oo.
JOH 6:36 Nandikulonjelani, mmbona heni ila hamlingukunda.
JOH 6:37 Weng'ha wondipegwa na Mhaza, wokuya kwa heni, na heni simtoza kunze munhu yoneche yokuya kwa heni,
JOH 6:38 kwa vila mbuya hanyi kulawa kuchanya kilanga haiwele kwa kudita kota vyondiviganile, ila kwa gala yalingugana Mhaza yanhumile.
JOH 6:39 Goyalingugana yula yanhumile ndo aga, ndeche kumwajiliza ne yumwe kwa wala yowamhele, ila ndiwazilipule hewo weng'ha zuwa lya kuduma.
JOH 6:40 Choyalingugana Mhaza, ndo achi chila yomona Mwana na kumkunda yawe na ukomu wa mazuwa gose ne kuduma, na heni ndomzilipula zuwa lya kuduma.”
JOH 6:41 Lelo Wayahudi nawaluka kung'ung'uta kwa vila Yesu nakalonga, “Heni nda libumunda lyuyile hasi kulawa kuchanya kilanga.”
JOH 6:42 Hamba nawalonga, “Ayu munhu hawele Yesu mwanage Yusufu siyuyu? Tumzela Mhaza na mayake! Lelo yandaze yolonga heye kedulika kulawa kuchanya kilanga?”
JOH 6:43 Yesu nakedichila kawalonjela, “Mleche kung'ung'uta mwemwe kwa mwemwe.
JOH 6:44 Kuduhu munhu yokuya kuli heni, wone Mhaza yanhumile hamkwejile kuli heni, heni ndomzilipula zuwa lya kuduma.
JOH 6:45 Waloli nawandika wata, ‘Wanhu weng'ha wowa walangusigwe na Nguluwi.’ Heye yohulika ga Mhaza na yelanguse ga heye, kokuya kuli heni.
JOH 6:46 Chondilonga ndo achi, kuduhu munhu yoneche wamuwene Mhaza, ila yula yalawile kwa Nguluwi, ayo ndo yuye yeka yamuwene Nguluwi.
JOH 6:47 Ndangukulonjelani ndikomya, heye munhu yokunda kowa na ukomu wa mazuwa gose ne kuduma.
JOH 6:48 Heni nda chilyo chilingigala ukomu.
JOH 6:49 Wasekulu wa hemwe na walya chilyo chichemigwe mana akula kugunuche nawabagama.
JOH 6:50 Achi ndo chilyo chuyile kulawa kilanga, yula yolya chilyo acho hobagama hebu.
JOH 6:51 Heni nda chilyo chilingigala ukomu chiduliche kulawa kilanga, wone munhu yalye chilyo chino, kochikala lukami. Na chilyo chondimpa heni, chowa lukuli lwangu ndilulavya kuli ukomu wa wanhu wa isi.”
JOH 6:52 Baho hewo Wayahudi nawaluka kulonga longa akuno wazudile, wata, “Yowa ndaze ayu munhu yatupe lukuli lwake tulye?”
JOH 6:53 Yesu nakawalonjela, “Ndanguwalonjela ndikomya, wone hamdile lukuli lwa Mwana wa Munhu, na kunwa danda ya heye, mowa hela ukomu mgati mwa hemwe.
JOH 6:54 Yula yolya lukuli lwangu na kunwa danda ya heni, kanawo ukomu wa mazuwa gose ne kuduma, heni ndomzilipula zuwa lya kuduma.
JOH 6:55 Lukuli lwangu ndo chilyo ng'hatu, na danda ya heni, ndo cha kunwa ng'hatu.
JOH 6:56 Yoneche yolya lukuli lyangu na kunwa danda ya heni, kochikala mgati mwa heni na heni mgati mwa heye.
JOH 6:57 Mhaza nayali mkomu kanhuma heni, na ndamkomu kwa mbuli ya heye. Na heye yolya lukuli lwa heni, kowa na ukomu kwa heni.
JOH 6:58 Achi ndo chilyo chiduliche hanyi kulawa kilanga, hachiwhanile kota chilyo chowadile wasekulu wabagame. Ila hewo wolya achi chilyo wowa na ukomu wa mazuwa gose.”
JOH 6:59 Yesu nakalonga agano koyali yolangusa mng'handa ya kusalila ako Kapanaumu.
JOH 6:60 Walanguswa wenji nawamuwinzile Yesu nawahulika ago, walonga, “Ulanguso uno yowa ngondo kuuzela, yalikohi yoweza kuhulichiza?”
JOH 6:61 Yesu nakavizeela halonjelwe na munhu, walanguswa wa heye wali wong'ung'uta, nakawauza, “Mbuli ayi, yanguwadita hemwe mdumbe?
JOH 6:62 Hamba yowa ndaze, wone mmone Mwana wa Munhu yokwina kuza kula koyalawile?
JOH 6:63 Muhe ndo ulingigala ukomu, ludali lwa munhu luliyeng'ha haludita chinhu. Ulonzi wo ndikulonjelani, ndo Muhe wa Nguluwi na ulingigala ukomu.
JOH 6:64 Kuna yumwe mwa hemwe kowa hambe yakunde.” Yesu nakalonga hino kwa vila nakavizela koya na wanji hawokunda na yumwe komhinduka.
JOH 6:65 Wolawa aho kalonga kahi, “Ahi ndo inhumile ndiwalonjele hemwe, kuduhu munhu yokuya kuli heni mbaka yadite goyalajize Mhaza.”
JOH 6:66 Kulawa kwa ago, wenji wa walanguswa wa Yesu nawahiluka kumbele wolema kulutasa na heye kahi.
JOH 6:67 Yesu kawauza na awala kumi na weli, “Na hemwe namwe mwangugana kuka?”
JOH 6:68 Simoni Petili kamwidichila, “Mkulu, toza kwa whaani? Hegwe kuna ulonzi ulingigala ukomu wa mazuwa gose ne kuduma.
JOH 6:69 Hetwe twangukunda na kuvizela kota hegwe uli yumwe Yelile yalawile kwa Nguluwi.”
JOH 6:70 Yesu nakedichila, “Ndiwahagula hemwe kumi na weli, siditile hino? Lelo yumwe wa hemwe, kagaluka Limazoga!”
JOH 6:71 Yaliyolonga agala goyokola Yudasi, mwana wa Simoni Isikalioti. Kwa vila Yudasi ndo yomhinduka, hanga na nayali yumwe wa awala kumi na weli.
JOH 7:1 Logamalile ago, Yesu nayali yojenda ako Galilaya. Nahaganile kujenda mkowa wa Yudeya kwa vila wandewa wa Wayahudi wali wogana wamkopole.
JOH 7:2 Mnvina ya Wayahudi ya vibumuli nayali habehi.
JOH 7:3 Lelo wang'holoze Yesu nawamlonjela, “Ulawe ahano, ulute Yudeya leka walanguswa wa hegwe wazone mbuli zoulingudita.
JOH 7:4 Munhu halingudita vinhu kwa uviso wone walingugana yazeleche kwa wanhu. Kwa vila kwangudita mbuli zino, lelo wilajile kwa isi yeng'ha
JOH 7:5 Na wang'holoze Yesu nawo hawamkundile!”
JOH 7:6 Lelo Yesu nakawalojela, “Mhela wa heni unojile haufichile hebu, ila kwa hemwe chila mhela unoga.
JOH 7:7 Isi yeng'ha haiwazudila hemwe, ila heni yanguzudila kwa vila heni ndangulavya ulolezi wake kuta goyalingudita geha.
JOH 7:8 Hemwe mlute kuli mnvina ayo. Heni siluta hebu ako kuli mnvina, mhela wa heni unojile haufichile.”
JOH 7:9 Nakalonga ago hamba kapona kuko Galilaya.
JOH 7:10 Wang'holoze lowalutile kuli mnvina, na Yesu naye nakaluta, ila halutile hazelu nakaluta kwa uviso.
JOH 7:11 Wakulu wa Wayahudi wali wompala heye kuli mnvina ila nawauza, “Kakohi?”
JOH 7:12 Kwali na kuheha kwinji hali wanhu wala. Wamwe wa hewo nawalonga, “Kamunhu yanojile.” Wanji nawalonga, “Hebu! Kanguwajiliza wanhu.”
JOH 7:13 Ila kwali kuduhu munhu yajezile kulonga mbuli za heye hazelu kwa kudumba wandewa wa Wayahudi.
JOH 7:14 Mnvina ila loyali ifichile hagati, Yesu naye nakaluta kuli ng'handa ya Nguluwi, nakaluka kulangusa.
JOH 7:15 Lelo Wayahudi na wabubuwala na kulonga, “Munhu ayu kapata kohi elimu na heye halutile kusule?”
JOH 7:16 Aho Yesu nakawedichila, “Ulanguso wondilingulangusa hauwele wa heni, ila ulawa kwa yula yanhumile.
JOH 7:17 Munhu yalingugana kudita gala goyogana Nguluwi, kovizele kota ulanguso wa heni ulaya kwa Nguluwi, ama heni ndangilonjela hela.
JOH 7:18 Heye yalingilonjela hela yuye kangupala kitogola yuye, ila yalingupala kumtogola yula yamtumile, ayo wa kitumbila, na mgati mwake mwahela wihe woneche ula.
JOH 7:19 Ndaze, Musa hawapele utaguso? Ahyo, kuduhu ne yumwe wa hemwe yalinguwinza mizilo. Iekachoni mwangugana kung'hopola?”
JOH 7:20 Aho wanhu nawamwidichila, “Kuna chijeni hegwe yalikohi yalingugana yakukopole?”
JOH 7:21 Yesu nakawedichila, “Kuna mbuli imwe yonditile, na hemwe mwangububuwala.
JOH 7:22 Musa nakawapa chila chihendo cha kwinjiza ikumbi. Na chihendo acho hachilawile kwa Musa. Ila na vilawa kwa wasekulu. Sambi hemwe mwangwinjiza munhu ikumbi kuli Zuwa lya Kwesela.
JOH 7:23 Hino lelo, munhu kenjizagwa ikumbi kuli Zuwa lya Kwesela, ila yolema malajizo ga Musa galeche kubezigwa, lekachoni mwangunzudila kwa vila ndimdita munhu yawe mkomu ng'hatu Zuwa lya Kwesela?
JOH 7:24 Mleche kutagusa mbuli kwa kulola kunze hela, lavyeni utaguso utanganiche.”
JOH 7:25 Wamwe wa wanhu wa Yelusalemu nawalonga, “Ndaze, yula munhu walingumpala wamkopole hawele yuyu?
JOH 7:26 Mlole sambi! Kanguwakanya hazelu, na kuduhu munhu yalingumlonjela ne chinhu. Ndaze, iwa kota vilongozi wa wamzela ng'hatu ayu ndo Kilistu Mlohozi?
JOH 7:27 Kilistu Mlohozi hoyokuya kuduhu munhu yovizela honhu yalawile, ila hetwe tuvizela koyalawile munhu yuno.”
JOH 7:28 Lelo Yesu vyoyali yolangusa kuli ng'handa ya Nguluwi kakwiniza lizi na kulonga, “Hambi mvizela. Na kondawile mvizela! Ahyo, suyile kwa ludali lyangu heni baha, ila heye yanhumile heni ndo wakukomya, na hemwe hamzelele.
JOH 7:29 Ila heni ndimzela kwa vila ndawa kwa heye, na heye ndo yanhumile.”
JOH 7:30 Lelo wanhu na wagana kumibata, ila kuduhu munhu yajezile kumibata kwa vila mhela wa heye hainoya hebu.
JOH 7:31 Wenji kulichila chilundo cha wanhu nawamkunda, nawalonga, “Ndaze, Kilistu Mlohozi loyokuya kodita ulajilo mkulu ng'hatu kusinda ayu?”
JOH 7:32 Mafalisayo nawawahulika wanhu woheha mbuli azo za Yesu. Lelo hewo hamwe na watambika wakulu wawalajiza wamizi wamibate.
JOH 7:33 Yesu nakalonga, “Nding'hali na hemwe mhela uchefu, hamba ndoluta kwa heye Yanhumile.
JOH 7:34 Momhala heni, ila hammbona hebu, na hala hondiwa hemwe hamfika hebu.”
JOH 7:35 Vilongozi wa Wayahudi nawalonga hewo kwa hewo, “Munhu ayu koluta kohi kotulemwela kumfika? Koluta kwa Wayahudi wasambaluche hali Wagilichi, na kuwalangusa Wagilichi?
JOH 7:36 Kana mana yachi hoyolonga, ‘Momhala ila hambona, na hala hondiwa hemwe hamfika hebu?’ ”
JOH 7:37 Zuwa lila lya kuduma lya mnvina ahyo nayali zuwa itanganiche. Yesu nakema, kachemeleza, “Munhu yoneche yawele na ng'halu, yoye kwa heni yanwe.
JOH 7:38 Kota vyogolonga Maandiko Matakatifu, ‘Munhu yalingung'hunda heni, nzanda za malenga galingigala ukomu gobogoma kuli nhumbula ya heye.’ ”
JOH 7:39 Nakalonga ago kwa mbuli ya Muhe yawele kwa wala wamkundile heye wombochela. Mhela awo Muhe Yelile nayali hanafika kwa vila Yesu nayali hanapegwa ukulu na Nguluwi.
JOH 7:40 Wanhu wamwe nawamemile hala nawahulika ulonzi awo, nawalonga, “Kakomya munhu ayu ndo yula Mloli!”
JOH 7:41 Wanji nawalonga, “Ayu ndo Kilistu Mlohozi!” Ila wanji nawalonga, “Ndaze, hambi mlohozi kolawa Galilaya!
JOH 7:42 Maandiko Matakatifu gangulonga ndaze? Gangulonga, Kilistu Mlohozi kolawa lukolo lwa Daudi, kopondigwa ako Betelehemu, muji wa Daudi!”
JOH 7:43 Kwa mbuli ya Yesu nakulawila kibagula hali wanhu wala wamemile.
JOH 7:44 Wanhu wamwe nawagana kumibata ila kuduhu yajezile kumdoliza.
JOH 7:45 Hamba wala wamizi nawahiluka kwa watambika wakulu na Mafalisayo, na hewo nawauza, “Lekachoni hammigale?”
JOH 7:46 Wamizi wawedichila, “Kuduhu munhu yadahile kulonga kota heye!”
JOH 7:47 Mafalisayo yawauza, “Ndaze, na hemwe namwe kawabadani?
JOH 7:48 Ndaze, mina mmona ne chilongozi yumwe wa wanhu, ama yumwe wa Mafalisayo yamkundile heye?
JOH 7:49 Ila awa wanhu hawauzelele mzilo wa Musa, wapanjilwa na Nguluwi!”
JOH 7:50 Mfalisayo yumwe nayali hala, nayali Nikodemo na yalutile kwa Yesu katali, heye nakawalonjela wayage,
JOH 7:51 “Ndaze, mzilo wa hetwe haulingumtagusa munhu ne kumhulika na kuvizela kangudita choni?”
JOH 7:52 Na hewo wamwidichila, “Ndaze, hegwe nagwe kulawa Galilaya? Lelo kagakagule Maandiko Matakatifu nagwe kogona kota Galilaya hakulingulawa Mloli.”
JOH 7:53 Hamba chila munhu kaluta kaye kwake.
JOH 8:1 Yesu nakaluta kuchidunda cha Mizeituni.
JOH 8:2 Mitondo kung'hali lufuku, Yesu nakaluta kahi kuli Ng'handa ya Nguluwi. Wanhu weng'ha wammemelela, na heye kekalisa na nayali yowalangusa.
JOH 8:3 Walangusa wa malajizo ga Musa na Mafalisayo nawamwigala mng'handa mdala wamwibate wodita ung'hondwa. Hamba wamuwika hagati.
JOH 8:4 Nawamlonjela Yesu, “Mlangusa, mdala ayu kebatigwa kuli ung'hondwa.
JOH 8:5 Kuli Malajizo, Musa kalajiza mdala kota ayu kanguganigwa yatowigwe na maganga mbaka yabagame. Lelo hegwe kwangulonga ndaze?”
JOH 8:6 Nawalonga hino kumjeza Yesu, wogana wapalile honhu ha kumtagusa, ila Yesu kenamiza na kukwada na chidole hasi.
JOH 8:7 Lowawele womuuza lukami, kenuka na kuwalonjela, “Yumwe wa hemwe, yawele hela gehile, yamtozele iganga lya mwaluko mdala yuno.”
JOH 8:8 Hamba kenamiza kahi, kaza kwaandika hasi.
JOH 8:9 Lowahuliche ago, waaluka kuka yumweyumwe, walongole wakulu kuli mdodo. Yesu nakapona waliyeka na ayula mdala yemile bahala.
JOH 8:10 Yesu loyenuche, nakamuuza ayula mdala, “Wakohi awala wanhu? Ndaze, haduhu ne yumwe yakutaguse kwa wihe?”
JOH 8:11 Nakedichila, “Kuduhu ne yumwe, mkulu.” Yesu nakamlonjela, “Goya, na heni sikutagusa kwa wihe hebu, ila ulute uleche kudita kahi gehile.”
JOH 8:12 Yesu nakawalonjela Mafalisayo, “Heni nda lumuli lwa isi, munhu yoneche yombinza heni, hojenda kutitu, ila kowa na lumuli lwa ukomu.”
JOH 8:13 Mafalisayo nawamlonjela Yesu, “Hegwe kwangulavya ulolezi uliyeka kota kwa lumuli, awo ulolezi hulingukomya.”
JOH 8:14 Yesu nakedichila, “Hebu!,” “Wone ndilingilavila ulolezi ndiliyeka, agala gondiwalonjele ndangukomya kwa vila ndivizela kondawile na kondiluta. Hemwe hamvizelele kondawile na kondiluta.
JOH 8:15 Hemwe mwangutagusa kota wanhu vyowalingutagusa, heni silingumtagusa ne munhu.
JOH 8:16 Ila wone nhaguse, ndahataguse kwa kukomya kwa vila siwele ndiliyeng'ha kwa alino. Mhaza yanhumile kahamwe na heni.
JOH 8:17 Yandichigwa kuli Malajizo ga hemwe kota, wone wanhu weli walavye ulolezi, wowa wokomya.
JOH 8:18 Ndangilavila ulolezi ndiliyeng'ha kuta nda whaani, na heye Mhaza yanhumile kuli isi, kangulonga hihyo.”
JOH 8:19 Hewo nawamuuza Yesu, “Mhaza wa hegwe kakohi?” Heye nakawedichila, “Hemwe hamnzelele heni wala hamzelele Mhaza wa heni?” “Wone namnzele heni, mwahamzelele na Mhaza wa heni.”
JOH 8:20 Yesu nakalonga ago vyoyaliyolangusa kuli Ng'handa ya Nguluwi, kuluhengo kowawichile vinhu vyowalavile mli isanduku lya ndolendole. Na kuduhu munhu yamibate, kwa vila mhela wa heye kibatika wali ung'hali.
JOH 8:21 Yesu kahiluchila kuwalonjela, “Ndanguka, ila hemwe mowa mmhala na mobagama na gehile genu. Kondiluta heni hemwe hamfika.”
JOH 8:22 Vilongozi wa Wayahudi nawalonga, “Kanguluta kikopola yaliyeng'ha. Lekachoni kangulonga, kondiluta hemwe hamfika hebu?”
JOH 8:23 Yesu nakawedichila, “Hemwe mwa wanhu wa baha hasi, heni ndawa kuchanya. Hemwe mwa wa isi ino, heni silawile isi ino.
JOH 8:24 Ndo mana ndiwalonjeleni, kota mobagama kuli gehile gomditile, na mobagama kwa gehile, wone hamlingukunda kota, ‘Heni ndo yuye.’ ”
JOH 8:25 Hewo wamuuza, “Hegwe kwa whaani?” Yesu nakedichila, “Kota agala gondiwalonjeleni kulawa mwaluko!
JOH 8:26 Ndanago menji ga kulonga na ga kuwatagusa hemwe, ila heye yanhumile kangukomya. Na heni ndanguwalonjela wanhu muisi, mbuli zila hela zonyhuliche kulawa kwa heye.”
JOH 8:27 Hawavizelele kota Yesu yaliyolonga mbuli ya Mhaza.
JOH 8:28 Hamba Yesu nakalonga na hewo, “Baho hommwinula Mwana wa Munhu, movizela kota, ‘Heni Ndo Yuye’ Hamba movizela kota silingudita kwa ludali lwangu, mina ndangulonga Mhaza goyandanguse.
JOH 8:29 Na yula yanhumile heni twahamwe handechile ndiliyeng'ha kwa vila mazuwa gose ndangukola agala galingumnojeza.”
JOH 8:30 Wanhu wenji lowahuliche ago yalonjile nawamkunda.
JOH 8:31 Yesu nayali yowalonjela awala Wayahudi waliwomkunda, Ndangukomya wone mkunde gondiwalangusa, mowa walanguswa wa heni ng'hatu.
JOH 8:32 Ahyo movizela kukomya, nako kukomya kowalekani hemwe milejehe.
JOH 8:33 Na hewo wamwidichila wata, “Hetwe twa ivyazi lya Abulahamu, na hatuwele vitumagwa wa munhu yoneche. Lekachoni kwangulonga, ‘Mowa milejehe?’ ”
JOH 8:34 Yesu nakawalonjela, “Ndangulonga ndikomya, munhu yoneche yalingudita gehile, kowa chitumagwa wa gehile.
JOH 8:35 Chitumagwa hawaga yehanzile na lukolo mazuwa gose, ila mwana kawaga wa lukolo lulula mazuwa gose.
JOH 8:36 Wone Mwana yawaleche milejehe, mowa milejehe ng'hatu.
JOH 8:37 Ndivizela kota mwa ivyazi lya Abulahamu. Ila mwangugana mng'hopole kwa vila hamlingubochela gondilinguwalangusa.
JOH 8:38 Ndangulonga agala gondigawene kwa Mhaza wa heni, ila hemwe namwe mwangudita kota vyomlonjelwe na mhaza wa hemwe.”
JOH 8:39 Hewo nawamwidichila, “Mhaza wa hetwe Abulahamu.” Yesu nakawalonjela, “Wone namuwe ivyazi lya Abulahamu, mwahaditile kota vyoyaditile heye.
JOH 8:40 Geng'ha gonditile ndo kuwalonjela ga kukomya gonyhuliche kwa Nguluwi, ila hemwe mwangujeza kung'hopola. Abulahamu haditile chinhu kota chino!
JOH 8:41 Hemwe mwangukola cho yakolile mhaza wa hemwe.” Hewo wamlonjela wata, “Hetwe hatuwele vilokote, twanaye Mhaza yumwe hela, na heye ndo Nguluwi.”
JOH 8:42 Yesu kawalonjela, “Wone Nguluwi nayawe Mhaza wa hemwe, mwahanganile heni, kwa vila mbuya kulawa kwa Nguluwi, na sambi nda hano. Suyile kwa ludali lwangu nene, leka heye nakanhuma.
JOH 8:43 Lekachoni hamlinguweza gondilinguwalonjela? Kwa vila hambe muhulichize usenga wa heni.
JOH 8:44 Hemwe mwa wana wa mhaza wa hemwe, Limazoga, choyalingugana mhaza wa hemwe, ndo mlingugana kudita. Heye koyaluchile nayali yokopola, na hemile kuli kukomya, kwa vila munhu ayu nayali mdesi. Wone yalonje udesi, kangulajila kota vyoyali, hambi nayali mdesi mhaza wa udesi.
JOH 8:45 Ila kwa vila heni ndanguwalonga ndikomya, ndo mina hemwe hamlingukunda.
JOH 8:46 Yalikohi yumwe mwa hemwe yolavya ulolezi kota heni ndita gehile? Wone ndilingulonga ndikomya, iwa ndaze hamlingukunda ga heni?
JOH 8:47 Munhu wa Nguluwi kahulikaga ulonzi wa Nguluwi, ila hemwe hamuwele wanhu wa Nguluwi, ndo mina hamlinguhulika.”
JOH 8:48 Wayahudi nawamliga Yesu wamuuza walonga, “Hegwe kwa Msamalia na kuna Limazoga?”
JOH 8:49 Yesu nakawedichila, “Ndahela Limazoga, ndangumtogola Mhaza wa heni, ila hemwe mwangumbeza heni.
JOH 8:50 Heni silingupala ukulu ndiliyeka, ila kuna yumwe yalingupala ukulu awo, na heye ndo mtagusa.
JOH 8:51 Ndanguwalonjela ndikomya, munhu yoneche yobochela gondilingulangusa hobagama hebu.”
JOH 8:52 Hamba Wayahudi wamlonjela wata, “Sambi twangukunda kota hegwe kuna Limazoga! Abulahamu kabagama, na waloli nawabagama, kahi hegwe kwangulonga munhu yobochela goulangusa hobagama hebu!
JOH 8:53 Hegwe kwangidita kwa mng'hangala kusinda Mhaza wa hetwe Abulahamu yabagame? Na waloli nawo nawabagama. Hegwe kwangidita kwa whaani?”
JOH 8:54 Yesu nakedichila, “Wone na iwe kitogola heni ndiliyeka kwali hela mbuli. Heye yotogola ga heni ndo Mhaza wa heni, ayu yomlonga kowa Nguluwi wa hemwe.
JOH 8:55 Hamumzelele heye, ila heni, ndimzela. Wone ndonje simzelele ndowa ndilonga udesi kota hemwe vyomuwele wadesi. Ndimzela na ndangukunda ulonzi wa heye.
JOH 8:56 Mhaza wa hemwe Abulahamu nakasechelela kalyona zuwa lya kuwa kwa heni, kawona na kasangalala.”
JOH 8:57 Wayahudi nawamlonjela Yesu wata, “Ung'hali fika mihela kumi jihano. Kumonela kohi Abulahamu?”
JOH 8:58 Yesu nakawedichila, “Ndanguwalonjela ndikomya, Abulahamu naloyang'hali kuvumbuka, nene ndali baha.”
JOH 8:59 Hamba nawalokota maganga kumtozela Yesu, ila Yesu koka Mng'handa ya Nguluwi.
JOH 9:1 Yesu loyali yokola nakamona munhu yumwe, hambe yalole kulawa yaleleche.
JOH 9:2 Walanguswa nawamuuza, “Mlangusa! Whaani yaditile gehile, munhu ayu, ama wahaza wa heye, yaleleche hambe yalole?”
JOH 9:3 Yesu nakedichila, “Mbuli ayi hailawile kwa kudita gehile ga heye, ila na kalela hambe yalole leka ludali lya Nguluwi loneche lukola mijito mgati mwa heye.
JOH 9:4 Kung'hali nemisi itugana kulutilila kukola mijito ja yula yanhumile, mina chilo changuya munhu howeza kukola mijito.
JOH 9:5 Mhela londing'hali muisi, heni nda lumuli lya isi.”
JOH 9:6 Vyoyalonjile ago, Yesu katema lite hasi kadita nhope kambakaliza yula yohambe yalole mmeho,
JOH 9:7 Nakamlonjela, “Ulute ukahovuge kumeho kuli izimbo lya Siloamu.” Aho ayula munhu kaluta kuhovuga kumeho na kahiluka yolola.
JOH 9:8 Lelo yalingikala habehi na heye wala wamzelele kuta aho ha ulongolo nayali mzunwa mlandaji, nawalonga, “Ayu hawele yula mzunwa yekalisaga na kulanda?”
JOH 9:9 Wamwe wata, “Ayu ndo heye,” Wanji nawalonga, “Hebu hawele heye, wewhana hela.” Ila heye nakawalonjela, “Nda nene!”
JOH 9:10 Hewo nawamuuza wata, “Iwa ndaze sambi kwangulola?”
JOH 9:11 Heye nakedichila, “Yula munhu yochemigwa Yesu, nakahola nhope, kambakaliza kumeho na kundonjela, ‘Lute kihovuje kuli izimbo lya Siloamu.’ Aho heni nduta, ndizanawa, nakwaluka kulola. Kuhovuga kumeho, baho du mbona meho gangu galuka kulola.”
JOH 9:12 Hewo nawamuuza wata, “Kakohi heye?” Nakawedichila, “Heni sivizelele!”
JOH 9:13 Hamba wanhu wamhola ayula munhu yohambe yalole, wamhilika kuli Mafalisayo.
JOH 9:14 Zuwa lila Yesu vyoyamditile ayula munhu mitope yalole, lyali Zuwa lya Kwesela.
JOH 9:15 Hamba Mafalisayo nawamuuza munhu ayo, wata, “Kulola ndaze?” Heye nakawalonjela, “Kambaka nhope mmeho, na heni ndizahovuga mazi, na sambi ndangulola.”
JOH 9:16 Mafalisayo wamwe nawalonga, “Munhu ayu halawile kwa Nguluwi, mina hambe yebate Malajizo ga Zuwa lya Kwesela.” Ila wamwe walonga, “Yowa ndaze munhu yawele na gehile kulajila vinduzanduza kota avino?”
JOH 9:17 Hamba nawamuuza kahi yula munhu yawele nayali yohambe yalole, “Vila heye kakugubula meho, kwangulonga ndaze kuli munhu ayo?” Heye nakawedichilla, “Heye ka mloli wa Nguluwi!”
JOH 9:18 Vilongozi wa Wayahudi, nahawakundile kuta munhu ayo nayali hambe yalole tangia kalonga na sambi kangulola, mbaka wawachemile wahaza wa heye.
JOH 9:19 Wolawa, wawauza wahaza wa heye, “Ayu ndo mdodo wa hemwe mwangulonga nakalela hambe walole? Lelo kalola ndaze?”
JOH 9:20 Wahaza wa heye wedichila, “Tuvizela ayu mdodo wa hetwe, na kalela hambe walole.
JOH 9:21 Lelo kalola ndaze, hatuvizelele, kahi hatuvizelele yula wamgubule meho. Mumuuze yuye, heye ndo munhu mkulu, kochilohola yuye.”
JOH 9:22 Wahaza wa heye nawalonga ahyo, kwa vila wali wowadumba wakulu wa Wayahudi, hewo wali walongane ku munhu yoneche wovumila kuta Yesu ndo Kilistu Mlohozi kowinjigwa kunze mwa ng'handa ya kusalila.
JOH 9:23 Ndo mina wahaza wa heye walonjile, “Heye mkulu mumuuze.”
JOH 9:24 Lwa keli kahi, wamchema ayula munhu yaloholigwe na nayali hambe yalole wamlonjela wata, “Wilahe kwa Nguluwi yawele na ukulu, kota kotulonjela ukomya, tuvizela kota ayula munhu yakulohole nayali na gehile.”
JOH 9:25 Heye nakawedichila, “Wone nayali na gehile heni sivizelele. Ila chinhu chimwe ndivizela. Ndali hambe ndole, na sambi ndangulola.”
JOH 9:26 Nawamuuza, “Kakuditila choni? Na kakugubula ndaze meho ga hegwe?”
JOH 9:27 Ayula munhu nakawalonjela, “Ndiwalonjela na hemwe hamunyhulichize, lekachoni mwangugana kuhulika kahi? Namwe mwangugana muwe walanguswa wa heye?”
JOH 9:28 Ila hewo wamliga wolonga, “Hegwe kwa mlanguswa wa heye, hetwe twa walanguswa wa Musa.
JOH 9:29 Hetwe tuvizela kuta Nguluwi nakalonga na Musa, ila munhu ayu hatuvizelele kangulawa kohi!”
JOH 9:30 Heye nakawalonjela, “Mbuli ayi ya kububuwaza! Hemwe hamzelele kalawa kohi, ila kangubula meho ga heni!
JOH 9:31 Tuvizela Nguluwi hawahulichizaga wanhu wali na gehile, ila kamhulichizaga yoneche yalingumhulichiza na magano ga heye.
JOH 9:32 Kulawa katali haina hulikwa munhu kamgubula meho ga munhu yaleleche hambe yalole.
JOH 9:33 Wone ayu munhu yawe halawile kwa Nguluwi, hali dita choneche.”
JOH 9:34 Hewo nawamwidichila wata, “Hegwe kuvumbuka na kukulila mli gehile, lelo kwangujeza kutulangusa hetwe?” Wamuwinga kulawa kuli Ng'handa ya kusalila.
JOH 9:35 Yesu vyoyahuliche wamuwinga mli Ng'handa yakusalila, kampala ayula munhu, nakumuuza, “Kwangumkunda Mwana wa Munhu?”
JOH 9:36 Ayula munhu nakedichila, “Mkulu, undonjele heye ka whaani, leka ndimkunde.”
JOH 9:37 Yesu nakamlonjela, “Mina kumona, na heye ndo mlingulongasa na hegwe sambi.”
JOH 9:38 Ayula munhu kalonga, “Ndangukunda Mkulu!” Na baho kamwinamila Yesu.
JOH 9:39 Yesu nakalonga, “Heni mbuya muisi kutagusa wanhu, hewo hawalingulola walole, na walingijesa wangulola waleche kulola.”
JOH 9:40 Mafalisayo wamwe wali hamwe na heye nawahulika ulonzi awo, nawamuuza wata, “Ndaze, kwangulonga na hetwe hambe tulole?”
JOH 9:41 Yesu nakedichila, “Wone na muwe hambe mlole, mwahawele hela nongwa, ila lelo hemwe mwangulonga, hetwe twangulola, na ahyo mwangulajila mng'hali na nongwa.”
JOH 10:1 Yesu nakalonga kata hino, “Ndangulonga ndikomya, wone munhu yogana kwinjila mli mibani ja ming'holo ne kukolela hali lwizi, na kwinjila kwa kukwina kulukanzi mwa mibani, ayo kowa muhizi na mbokaji.
JOH 10:2 Munhu yalingukolela hali lwizi lwa mibani, ayo ndo kowa mdima ming'holo yanojile.
JOH 10:3 Mlolela mibani komchumulila, na ming'holo ja heye johulika mluzi wa mdimi, kowa wojichema ming'holo kwa matagwa, na kujilongoza kunze.
JOH 10:4 Wone wajilavye kunze, heye kowa yalongole kumwando na ming'holo jimuwinza kumbele, kwa vila jowa jihulika lizi lya mdimi.”
JOH 10:5 Ming'holo hajimuwinza munhu mjenzi, ila jombilima, kwa vila hajizelele lizi lya heye.
JOH 10:6 Yesu nakawalonjela nhelo ayi, ila hewo nahawavizelele choni choyaganile kuwalonjela.
JOH 10:7 Yesu nakahiluchila kulonga, “Ndanguwalonjela ndikomya, heni ndo hali lwizi lwa kukolela ming'holo.
JOH 10:8 Hewo woyile heni sinoya, awo wowa wahizi na wabokaji, ila ming'holo hajiwahulika hewo.
JOH 10:9 Heni ndo lwizi lwa kukolela, munhu yoneche yokwinjila kukolela hali heni, kowa yaloholigwe, yokwinjila na kulawa kunze, na kuwona mhale.
JOH 10:10 Muhizi koyaga hela kuhiza na kukopola na kuwifya. Heni mbuya hela, ndiwape hemwe ukomu, ukomu wenele.
JOH 10:11 “Heni nda mdimi nojile, yawele kuya na kukopoligwa kwa kujilohola ming'holo.
JOH 10:12 Wone hawele mdimi yanojile, na ming'holo hajiwele ja heye, wone yalyone libwa lya kisolo likuya, kobilima na kuleka ming'holo jiliyeka. Aho libwa lyochibata na kibagulanga nakachene ming'holo.
JOH 10:13 Munhu yavisigwe kangubilima, kwa vila heye ka munhu wa mijito hela, kahela isungu na ming'holo.
JOH 10:14 Heni nda mdimi nojile. Ndiwazele wali wa heni, na hewo wali wa heni wanzela.
JOH 10:15 Kota vila Mhaza vyoyanzelele, na heni vyondimnzelele Mhaza. Heni ndangulavya ukomu wa heni kwa chiwalo cha mingholo.
JOH 10:16 Na ming'holo jinji ndigalilwe heni, hajiwele hamwe na jiyawo, ndojiwinza na kujihanza ha jiyawo, johulika lizi lya heni na jowa mchilundo chimwe chili na mdimi yumwe.
JOH 10:17 “Mhaza kangungana heni, kwa vila ndangukunda kulavya ukomu wa heni, leka hamba ndiuhiluse kahi.
JOH 10:18 Kuduhu munhu yowa na ludali lwa kusa ukomu wa heni. Ndangulavya kota vyonganile heni. Ndoweza kuulavya na kuuhilusa kahi. Ahi ndo Mhaza wa heni vyoyandajize heni kudita.”
JOH 10:19 Kahi kwali na kibagula kwa hewo Wayahudi kwa aula ulonzi woyalonjile Yesu.
JOH 10:20 Wanhu wenji nawalonga, “Kana Limazoga! Kana lukwale! Iwa ndaze mwangumuhulichiza heye?”
JOH 10:21 Ila wanhu wanji nawalonga, “Munhu yawele na chijeni, kowa yolonga kota hino! Yowa ndaze Limazoga limlohole munhu nayali yohambe yalole?”
JOH 10:22 Ako Yelusalemu kwali na mnvina ya kukumbuchila kwela kwa Ng'handa ya Nguluwi kwa Nguluwi. Mhela awo kwali na mbeho.
JOH 10:23 Yesu nayali yojenda mchipepela cha Solomoni, kuli Ng'handa ya Nguluwi.
JOH 10:24 Wayahudi vyowamuwene, wammemelela na kumuuza, wata, “Kotuleka mu uviso mbaka nili? Utulonjele kukomya, hegwe ndo Kilistu Mlohozi.”
JOH 10:25 Yesu nakawedichila, “Mina ndiwalonjela, ila hemwe hamlingukunda hebu. Vinhu vyondilingudita vifanda kota heye yandajize heni ndite.
JOH 10:26 Ila hemwe hamkunda hebu, vyohamuwele ming'holo ja heni.
JOH 10:27 Ming'holo ja heni jihulikaga lizi lya heni, na heni ndijizela na jangumbinza.
JOH 10:28 Ndanguwapa ukomu wa mazuwa gose ne kuduma, na hawobagama hebu, na kuduhu munhu yoweza kuwalavya mmoko wa heni.
JOH 10:29 Mhaza wa heni ndo yamhele awo, wawele mng'hangala kusinda weng'ha, na hewo hawokwaga mazuwa gose, na kuduhu munhu yomboka mmoko wa heni.
JOH 10:30 Heni na Mhaza twa yumwe.”
JOH 10:31 Wayahudi nawalokota maganga, leka wamtowe.
JOH 10:32 Yesu nakawalonjela, “Ndiwalajilani mbuli nyinji kulawa kwa Mhaza. Ilikohi kuli azo zilinguwadita msubule na maganga?”
JOH 10:33 Wayahudi nawamwidichila wata, “Hatulingugana tukutowe na maganga kwa agala ganojile gouditile, ila vyoumkovula Nguluwi. Kwa vila hegwe kwa munhu hela, ila kwangidita kota Nguluwi!”
JOH 10:34 Yesu nakedichila, “Ndaze, hayandichigwe kuli chitabu cha Malajizo ga hemwe kota Nguluwi kalonga, ‘Heni ndonga hemwe mwa milungu?’
JOH 10:35 Nguluwi kawachema milungu wala wapeligwe usenga wa heye, na hetwe tuvizela kota Maandiko Matakatifu gangukomya ng'hatu mazuwa gose.
JOH 10:36 Kota vila Mhaza kanyhagula heni na kunhuma kuli isi yeng'ha, mwangumlonjela, kwangukovula, kwa vila nandonga, ‘Heni nda mwana wa Nguluwi.’
JOH 10:37 Wone muwene silingudita mijito johaganile Mhaza wa heni, mleche kung'hunda.
JOH 10:38 Ila wone ndilingudita, na hemwe mlema kung'hunda heni, yowa goya wone mkunde gondilingudita, aho mowa mvizelele kota, Mhaza kangikala mgati mwa heni, na heni ndangikala mgati mwa Mhaza.”
JOH 10:39 Nawalapa kahi wamibate Yesu, ila heye kasulupuka mmoko mwawo.
JOH 10:40 Yesu nakaluta kahi mwambu mwa lwanda lwa Yolodani, honhu Yohani nayali yobatiza, nakekala kuko.
JOH 10:41 Wanhu wenji nawoya walonga, “Yohani nahaditile ulajilo woneche,” “Geng'ha gowalonjile kwa munhu ayu nakakomya.”
JOH 10:42 Wanhu wenji wa ako nawamkunda Yesu.
JOH 11:1 Munhu yumwe nayali yochemigwa Lasalo nayali mtamwa. Munhu ayo nayali yochikala hali muji wa Betaniya. Muji awo ndo kwali hakaye ha Maliya na lumbulye Malita.
JOH 11:2 Maliya ayu ndo yuyula yambakaze Mkulu Yesu mafuta ga kubakaliza na kubagusa kwa mnvili za heye. Lelo Lasalo, lumbulye ndo nayali yotamika.
JOH 11:3 Awala wadala wahilika usenga kwa Yesu walonga, “Mkulu, mkulugwe ulingumgana Lasalo kangutamika.”
JOH 11:4 Yesu vyoyahuliche ago, nakalonga, “Utamwa awu haumkopola hebu Lasalo, ila ni kwa mbuli ya ukulu wa Nguluwi. Lasalo kotamika leka kwa kukolela ayo Mwana wa Nguluwi yapegwe ukulu.”
JOH 11:5 Yesu nakamgana heko Malita na lumbulye na mkulu wawo Lasalo.
JOH 11:6 Vyoyahuliche kota Lasalo mtamwa, kekala bahala hoyawele mazuwa gayage meli.
JOH 11:7 Hamba nakawalonjela walanguswa wa heye, “Tucheni tuhiluche Yudeya.”
JOH 11:8 Walanguswa nawamwidichila, “Mlangusa, kusemwa mhela udo hela Wayahudi vyowali wogana kukusubula na maganga, kahi kwangugana uhiluche kuko?”
JOH 11:9 Yesu nakawalonjela, “Zuwa limwe lina saa kumi na meli, si ndo vyoili? Lelo heye yojenda kuzelu hochikwang'wala hebu, kwavila kanguwona uzelu.
JOH 11:10 Ila wone munhu yojenda nechilo, kochikwang'hbwala, kwa vila kahela lumuli mgati mwa heye.”
JOH 11:11 Yesu nakalonga ago na konjezela, “Mganwa wa hetwe Lasalo kawasa, heni ndoluta ndikamwinule.”
JOH 11:12 Walanguswa nawedichila, “Mkulu, wone yawasile kowa mkomu.”
JOH 11:13 Yesu nayali yolonga mbuli ya kubagama kwa Lasalo, ila walanguswa hewo nawavizela kota Lasalo kawasa hela.
JOH 11:14 Hamba Yesu nakawatubulila kalonga, “Lasalo kabagama.
JOH 11:15 Ndangusangalala kwavila nasali ako ila mkunde. Lelo tucheni koyali.”
JOH 11:16 Tomasi nayali yochemigwa mnyambili kawalonjela walanguswa wayage kalonga, “Tucheni na hetwe tukabagame hamawe na heye.”
JOH 11:17 Yesu vyoyafichile, nakafika wamtilile Lasalo katali mazuwa gane nagakola.
JOH 11:18 Betaniya kwali kutali kwa kota maili zidatu hino kulawa Yelusalemu.
JOH 11:19 Wayahudi wenji nawoya kuwahembuliza Malita na Maliya kwa kufiligwa na lumbulyawo Lasalo.
JOH 11:20 Malita vyoyahuliche kota Yesu kanguya, nakaluta kumbochela, ila heye Maliya nakapona hakaye.
JOH 11:21 Malita nakamlonjela Yesu, “Mkulu, na uwe baha, lumbulyangu hali bagama!
JOH 11:22 Ila ndivizela kota na sambi, Nguluwi kokupa choneche choumlanda!”
JOH 11:23 Yesu nakamlonjela Malita, “Lumbulyake heye kozilipuka kahi.”
JOH 11:24 Malita nakedichila, “Ndivizela kota kozilipuka kuli zuwa lya kuduma.”
JOH 11:25 Yesu nakamlonjela, “Heni nda uzilipulo na ukomu. Munhu yoneche yalingung'hunda, kowa mkomu Ila wone yabagame.
JOH 11:26 Na munhu yoneche yalingikala na kung'hunda hobagama hebu! Lelo kwangukunda aga?”
JOH 11:27 Malita nakedichila, “Ena Mkulu! Ndangukunda kota hegwe uli Kilistu Mlohozi, Mwana wa Nguluwi yalinguya muisi.”
JOH 11:28 Malita vyoyalonjile ago, nakahiluka mng'handa na kumchema lumbulye Maliya hafungo yaliyeka. Nakamlonjela, “Mlangusa koya, kangukuchema hegwe.”
JOH 11:29 Maliya vyoyahuliche ago, nakenuka na kubilimila kunze kumbochela Yesu.
JOH 11:30 Yesu nayali yang'hali kwinjila hali chijiji chila, nayali yang'hali hahala honhu Malita hoyamting'hanize.
JOH 11:31 Wayahudi nawekale hamwe na Maliya womhoza vyowamuwene yokwinuka yolawa kunze, nawo nawenuka na kulawa kunze. Nawejesa kota kanguluta ko wamtilile Lasalo yakalile kahi.
JOH 11:32 Maliya vyoyafichile koyali Yesu na vyoyamuwene, nakafugama mmagulu ga Yesu, nakamlonjela, “Mkulu, na uwe baha, lumbulyangu nahambe yabagame!”
JOH 11:33 Yesu vyowamuwene Maliya yolila, na awala Wayahudi welongozase nawo wolila, nakawa na masinzo ng'hatu mnhumbula mwa heye na kwinjililwa na isungu.
JOH 11:34 Yesu nakawauza, “Mumuwika kohi?” Nawamwidichila wata, “Mkulu, uye ulole.”
JOH 11:35 Yesu nakalila mahozi.
JOH 11:36 Wayahudi nawalonga wata, “Mlole navyoyali yamganile lukami!”
JOH 11:37 Baho wanhu wanji nawalonga wata, “Hino hawele yuyu yamgubule meho ayula yohambe yalole? Nakalemwela ndaze kumdita Lasalo yaleche kubagama?”
JOH 11:38 Yesu vyoyali na isungu ng'hatu mnhumbula mwa heye, nakaluta kuli chilaga. Chilaga acho chali mhalika, kahi liganga likulu naliwichigwa hamlango.
JOH 11:39 Yesu nakawalonjela, “Muse iganga hali lwizi.” Malita, lumbulye Lasalo nakalonga, “Mkulu, kaluka kunhung'ha, kwa vila kawichigwa mchilaga lehano zuwa lya kane!”
JOH 11:40 Yesu nakamlonjela Malita, “Sikulonjele kota wone ukundile kowona ukulu wa Nguluwi?”
JOH 11:41 Nawosa iganga hali lwizi na baho Yesu kalola kuchanya, nakalonga, “Ndangukutogola Mhaza kwa vila hegwe kwangunyhulichiza.
JOH 11:42 Ndivizela kota kwangunyhulika heni mazuwa gose. Ila ndangulonga aga kwa chiwalo cha wanhu awa leka wakunde kota hegwe ndo unhumile heni.”
JOH 11:43 Vyoyalonjile ago, nakachema kwa lizi ng'hulu kalonga, “Lasalo, ulawe kunze!”
JOH 11:44 Lasalo nakalawa kunze, moko na magulu gawopigwe na sanda, na chibende chimgubike chihanga. Yesu nakawalonjela wanhu, “Mumdohole na mumleche yalute.”
JOH 11:45 Wayahudi weng'ha wawele ahala kwa Maliya nawagona goyaditile Yesu, nawamkunda.
JOH 11:46 Ila wamwe wa hewo nawahiluka kwa Mafalisayo nawawalonjela goyaditile Yesu.
JOH 11:47 Baho Mafalisayo na wakulu wa watambika wating'hana wata, “Tudite ndaze? Mlole vinduzanduza vyoyalingulajila na kudita munhu ayu!
JOH 11:48 Wone tumleche, wanhu weng'ha womkunda heye, hamba wakulu wa Loma wohola isi ya hetwe na kuwifya ng'handa ya Nguluwi ya hetwe!”
JOH 11:49 Munhu yumwe wa hewo nayali yochemigwa Kayafa nayali Mtambika Mkulu mhela ula nakawalonjela, “Hemwe hamchizelele chinhu!
JOH 11:50 Hamvizelele kota yowa goya munhu yumwe yabagame kwa mbuli ya wanhu wenji, kuleka isi yeng'ha igwiswe?”
JOH 11:51 Kayafa halonjile ago kwa ludali lya heye, ila kwa vila nayali Mtambika Mkulu mhela ula, yaliyolonga kota Yesu kanguzabagama kwa mbuli ya isi ya hewo.
JOH 11:52 Kahi haiwele hela kwa hewo, ila kahi kowegala hamwe wanhu wa Nguluwi wasambaluche.
JOH 11:53 Ahyo kulawa zuwa lila wakulu wa Wayahudi waliwoheha na kupala nzila ya kumkopola Yesu.
JOH 11:54 Ahyo Yesu nahawele yojenda hazelu hagati mwa Wayahudi, ila kalawa aho, nakaluta honhu habehi na hagunuche, hali muji wa Efulaimu. Kekala kuko na walanguswa wa heye.
JOH 11:55 Mnvina ya Pasaka ya Wayahudi vyoyali habehi, wanhu wenji wali woluta Yelusalemu kulavya nhambiko kihovuga yawe Yelile Pasaka ing'hali.
JOH 11:56 Wali wompala Yesu, na vyowamemile mli Ng'handa ya Nguluwi, weuza wata, “Hemwe mwangijesa ndaze? Hino hokuya hebu kuli ino mnvina?”
JOH 11:57 Mtambika mkulu na Mafalisayo nawalavya ilajizo kota wone munhu yamone Yesu koyali, yoye yalonje wakamibate.
JOH 12:1 Mazuwa sita vyogaponile kulutila Pasaka, Yesu nakahiluka Betaniya, konayali kikala Lasalo, yula Yesu yamzilipule kulawa kwa wabagame.
JOH 12:2 Ako nawamwichila Yesu chilyo cha nechilo. Malita nayali yoyawichila vilyo, na Lasalo nayali yumwe wa awala wekale hali chisanya na Yesu.
JOH 12:3 Maliya nakahola nusu lita ya mafuta galingununyhilila ga nado galinguguzigwa kwa sendi nyinji, nakambakaliza Yesu magulu, hamba kaibagusa na mnvili za heye. Na ng'handa yeng'ha naimema unusi wa kununyhilila.
JOH 12:4 Yudasi Isikalioti, yumwe wa walanguswa wa Yesu, ayula yokuya kumhinduka Yesu nakalonga,
JOH 12:5 “Hambi iwa ndaze, Mafuta aga gahaguzigwe kwa sendi denali miya zidatu zilinguhega kwa mwezi umwe ng'hatu na sendi azo wapegwe wazunwa?”
JOH 12:6 Yudasi nahalonjile ago kwa vila nakawonela isungu wazunwa, ila kwa vila nawali wojenda na muhako wa sendi, na mala inji nayali yohiza sendi.
JOH 12:7 Ila Yesu nakalonga, “Mleche kumgaza ayu mdala. Mumleche yawiche ago mafuta kwa chiwalo cha zuwa lya kutiligwa lukuli lwangu.
JOH 12:8 Wazunwa mwanawo mazuwa geng'ha, ila hamuwa na heni mazuwa geng'ha.”
JOH 12:9 Wayahudi wenji nawahulika kota Yesu nayali Betaniya, ahyo nawaluta kuko. Hewo hawalutile kumlola Yesu hela, ila kahi nawaluta kumlola Lasalo yawele ayula Yesu yamzilipule kulawa kwa wabagame.
JOH 12:10 Ahyo wakulu wa watambika nawagana wamkopole Lasalo na heye,
JOH 12:11 mina kwa chiwalo cha Lasalo Wayahudi wenji nawawalema wandewa wa hewo na kumkunda Yesu.
JOH 12:12 Zuwa iyage, wanhu wenji nawoyile kuli mnvina ya Pasaka nawahulika kota Yesu kanguwa Yelusalemu.
JOH 12:13 Baho wahola miputi ja mgoda wa mitende na waluta kuza kumbochela mnzila aku wotowa luchenze, wolonga, “Mtogoleni Nguluwi, watambichizwe yula yokuya kwa itagwa lya Mkulu. Mtogoleni mndewa wa Isilaeli!”
JOH 12:14 Yesu nakapegwa idogowi, kakwina ku mung'ho, kota Maandiko Matakatifu vyogalonjile.
JOH 12:15 “Uleche kudumba biti Siyoni, ulole Mndewa wa hegwe kanguya, nakakwina mwana wa idogowi.”
JOH 12:16 Mhela wula walanguswa nahawavizelele. Hamba Yesu vyoyatogoligwe, baho nawakumbuchila kota ago nagandichigwa kwa mbuli ya heye, na wanhu nawamditila ago.
JOH 12:17 Lung'hongola lwa wanhu nawawele hamwe na Yesu hoyali yomchema Lasalo kulawa kuchilaga, na kumzilipula kulawa kwa wabagame nawalutilila kulavya ulolezi wa mbuli ila.
JOH 12:18 Ahyo wanhu wenji nawaluta kumbochela Yesu kwa vila nawahulika kota kalajila chinduzanduza chino.
JOH 12:19 Mafalisayo wangilonjela wata, “Mwangulola! Hotuweza kudita choneche! Mlole isi yeng'ha yangumuwinza heye!”
JOH 12:20 Kwali na Wagilichi wamwe hali wanhu walutile Yelusalemu kutambichiza mhela wa mnvina ya Pasaka.
JOH 12:21 Nawamlutila Filipo, mwenyeng'haye wa Betisaida muli muji wa Galilaya, nawamlonjela, “Mkulu, twangugana tumone Yesu.”
JOH 12:22 Filipo nakaluta kumlonjela Andeleya, na hewo weli walutasa kumlonjela Yesu.
JOH 12:23 Yesu nakawedichila, “Mhela wa Mwana wa Munhu kubochela ukulu ufika!
JOH 12:24 Ndanguwalonjela ndikomya, nyhule imwe ya uhemba wone haigwile hali misanga na kola yopona imwe. Ila wone yole, yolela nyhule nyinji za uhemba.
JOH 12:25 Munhu yoneche yougana ukomu wa heye kowajiliza, ila munhu yoneche youlema ukomu wa heye muisi ino kouwika kwa mbuli ya ukomu wa mazuwa gose ne kuduma.
JOH 12:26 Munhu yoneche yalingugana yawe chitumagwa wa heni kanguganigwa yambinze, Ieka honhu honeche hondiwa, ndo baho mkolamijito wa heni hoyowa. Na munhu yowa chitumagwa wa heni Mhaza wa heni komtogola.”
JOH 12:27 “Sambi Nhumbula ya heni yangugazika lukami, na ndonje choni? Ahi ndonje, ‘Mhaza, umbusile mhela uno’ Hebu. Nambuya muisi kwa mbuli ya kukolela kuli mhela uno wa kugazigwa.
JOH 12:28 Mhaza, litogole itagwa lyako!” Aho lizi ihulikwa kulawa kilanga, “Ndilitogola, na kahi ndolitogola.”
JOH 12:29 Wanhu wenji nawemile ahala honhu nawahulika lizi alyo, wamwe wata lyali linguluwi, na wanji walonga wata, “Mhilisi wa kilanga nayali yolonga na heye!”
JOH 12:30 Yesu nakawedichila, “Luzi alo haluhulikwe kwa mbuli ya heni, ila kwa mbuli ya hemwe.
JOH 12:31 Sambi ndo mhela wa utaguso wa isi ino, na Limazoga mndewa wa isi ino woza kumgamula.
JOH 12:32 Heni hondikwinuligwa kulawa hasi ha isi ino, ndomkwega chila munhu yoye kwa heni.”
JOH 12:33 Kwa ulonzi awu, nakalajila vyoyobagama.
JOH 12:34 Lung'hongola lwa wanhu wedichila wata, “Malajizo ga hetwe gatulonjela kota, Kilistu Mlohozi kochikala mazuwa gose. Lelo iwa ndaze kwangulonga Mwana wa Munhu kanguganigwa yenuligwe? Ndo yalikohi ayo Mwana wa Munhu?”
JOH 12:35 Yesu nakedichila, “Lumuli lung'hali na hemwe kwa mhela udo. Mjende muwelenalo lumuli kutitu hakunawafika munhu yojenda kutitu havizelele koyoluta.
JOH 12:36 Kwa vila mlinalo lumuli, mkunde alo lumuli muwe wanhu wali na lumuli.” Yesu vyoyasindile kulonga ago, nakaluta kutali na hewo.
JOH 12:37 Hanga Yesu nakalajila vinduzanduza vyeng'ha vila hali hewo, ila hewo nawalema kukunda.
JOH 12:38 Ahyo ulonzi yalonjile Mloli Isaya ukola, “Mkulu, kakohi yakundile gotuwalonjele? Na ludali lwa Mkulu lulajilwa kwa wali kohi?”
JOH 12:39 Ahyo nawalemwela kukunda, kota vila Mloli Isaya lowalonjile kahi,
JOH 12:40 “Nguluwi kawadinya meho gawo, kahi kahazanya nyhala za hewo, leka waleche kulola kwa meho gawo, na waleche kuvizela kwa nyhala za hewo. Leka waleche kunyhinduchila heni, na heni ndahawalohole.”
JOH 12:41 Isaya nakalonga aga vyoyauwene Ukulu wa Yesu, nakalonga mbuli za heye.
JOH 12:42 Ahyo, vilongozi wenji wa Wayahudi wali womkunda Yesu. Ila kwa kudumba Mafalisayo, nahawali yolonga mbuli ayo hazelu kwa kudumba kuwinjigwa mli ng'handa ya kusalila.
JOH 12:43 Nayali yogana kutogoligwa na wanhu kusinda kutoligwa na Nguluwi.
JOH 12:44 Hamba Yesu nakalonga kwa kuchemelela, “Munhu yokunda ga heni, halingukunda ga heni ndiliyeka, ila kangukunda na ga heye yanhumile.
JOH 12:45 Munhu yalingumbona heni, kangumona na heye yanhumile heni.
JOH 12:46 Heni ndo lumuli, nambuya kuli isi leka wanhu weng'ha wawelengung'hunda ga heni waleche kupona kuli kutitu.
JOH 12:47 Wone munhu yahuliche mbuli ya Nguluwi na kibata, heni simtagusa hebu. Suyile kutagusa wanhu wa isi, ila mbuya kuilohola.
JOH 12:48 Munhu yawele ngundema heni, yohakundile mbuli ya heni kanaye yumwe wa kumtagusa, mbuli ayo ndonjile ndo yomtagusa muli zuwa lya kuduma.
JOH 12:49 Kwa vila heni hambendonje kwa ludali lwa heni, ila Mhaza yanhumile kandajiza gala gawele kulapigwa kulonga.
JOH 12:50 Na heni nandivizela kota ilajizo lya heye lwangigala ukomu wa mazuwa gose ne kuduma. Ahyo ndangulonga gala hela Mhaza goyanhumile ndonje.”
JOH 13:1 Yali zuwa imwe habehi na mnvina ya Pasaka, Yesu nakavizela kota mhela wa heye wowa ufichile wa kuka muisi ino na kuluta kuli Mhaza wa heye. Nakawagana ng'hatu wanhu wa isi ino wawele wa heye, ligano lya heye lyalihela mwiso.
JOH 13:2 Yesu na walanguswa wa heye wali wolya chilyo cha nechilo. Limazoga lyali limwinjile mnhumbula ya Yudasi mwana Simoni Isikalioti yamhinduche Yesu.
JOH 13:3 Yesu nakavizela kota Mhaza kampa chila chinhu mmoko mwake. Na kavizela kota nakalawa kwa Nguluwi, na kanguhiluka kwa Nguluwi.
JOH 13:4 Baho nakenuka hala hoyekale, nakawika hafungo igolole lyake, nakahola chibende, kawoha mchuno mwake.
JOH 13:5 Hamba kawika malenga mchisaye, nakaluka kuwahovuga walanguswa magulu akuno yowabagusa na chila chibende choyawohile mchuno.
JOH 13:6 Vyoyafichile hali Simoni Petili, na heye Petili nakamlonjela, “Mkulu, kwangugana kunyhovuga magulu heni?”
JOH 13:7 Yesu nakamwidichila, “Huvizelele chondilingukola sambi, ila kovizela hamba.”
JOH 13:8 Petili nakamlonjela Yesu, “Hegwe hunyhovuga heni magulu gangu ng'oo!” Yesu nakamlonjela, “Wone hulingugana ndikuhovuge, huwa mlanguswa wa heni.”
JOH 13:9 Simoni Petili nakedichila, “Mkulu, uleche kuhovuga magulu yeka! Uhovuge na moko na mutwi weng'ha!”
JOH 13:10 Yesu nakalonga, “Munhu yojile haimnojeza kihovuga kahi, ila magulu hela, ila na lukuli lweng'ha. Hemwe mwangung'hala ila haiwele mweng'ha.”
JOH 13:11 Yesu nakamzela yalikohi yomhinduka, ndo mana yalonjile, “Hemwe weng'ha mwangung'hala ila yumwe hangalile hebu.”
JOH 13:12 Yesu vyoyasindile kuwahovuga migulu walanguswa, kavala igolole, kahiluka koyali yekalise kalonga, “Hambi mvizela vyondalindidita kwa hemwe?”
JOH 13:13 Mwangunyhema heni Mlangusa na Mkulu, iwa goya mwagudita hino, ahi ndo vyondili.
JOH 13:14 Heni ndili Mkulu na Mlangusa wa hemwe ndiwahovuga magulu genu, ahyo na hemwe namwe mwanguganigwa mihovuje magulu genu.
JOH 13:15 Heni ndiwalajilani nzila ya kudita, leka na hemwe namwe mdite kota vyondiwaditile.
JOH 13:16 Ndanguwalonjelani ndikomya ng'hatu, chitumagwa hawaga mkulu kusinda Mkulu wa heye, na mpogozi hawaga Mkulu kwa ayula yamtumile.
JOH 13:17 Lelo vyomgazelele ago, mobweda hala homgadita ago.
JOH 13:18 “Silingulonga kwa hemwe mweng'ha. Ndiwazela wondiwahagule. Ila yanguganigwa Maandiko Matakatifu gakomye, kota vyogalonjile, ‘Heye yadilize hamwe na heni, kongaluka.’
JOH 13:19 Ndiwalonjelani mbuli azo sambi zing'hali lawila, wone zilawile mkunde kota ‘Heni nda Heye.’
JOH 13:20 Ndanguwalonjela ndikomya, munhu yalingumbochela yula yondilingumtuma, kangumbochela heni, na heye yalingumbochela heni, kangumbochele heye yanhumile.”
JOH 13:21 Vyoyalonjile ago, mli muhe wa Yesu nakaluka kuwa na masinzo kawalonjela ne kuvisa chinhu, “Ndanguwalonjela ndikomya ng'hatu, yumwe wa hemwe kongaluka.”
JOH 13:22 Walanguswa welola aku wochijesa na kiuza hewo kwa hewo, wata, “Iwa ndaze mbuli ayi? Yalikohi yodita ago?”
JOH 13:23 Mlanguswa yumwe yaganigwe ng'hatu nayali yekale habehi na Yesu.
JOH 13:24 Simoni Petili nakamlajila moko, kalonga, “Umuuze Mlangusa, kangulonga kwa mbulli ya yalikohi?”
JOH 13:25 Ayula mlanguswa kaluta habehi ng'hatu na Yesu, kauza, “Mkulu, yalikohi yodita ago?”
JOH 13:26 Yesu nakedichila, “Yula yondimpa ibumunda lyondilize mchizombe na ndompa, ayu ndo heye.” Baho kamogola ibumunda, kadilizila mchisaye nakampa Yudasi, mwana Simoni Isikalioti.
JOH 13:27 Baho Yudasi vyoyabochele ibumunda kulawa kwa Yesu, Limazoga limwinjila. Yesu nakamlonjela Yudasi, “Udite himahima goulingugana kudita.”
JOH 13:28 Ila kwali kuduhu munhu ne yumwe ahala yavizelele iwa ndaze yomlonjela hino.
JOH 13:29 Kwa vila Yudasi nayali muwika sendi, hewo nawejesa kota Yesu kangumlonjela yakagule vinhu vilinguganigwa kuli mnvina ya Pasaka hamba yakawape wazunwa.
JOH 13:30 Yudasi kabochela libumunda, na baho kalawa kunze. Yali nechilo.
JOH 13:31 Yudasi vyoyochile, Yesu nakalonga, “Sambi ukulu wa Mwana wa Munhu wozangoneka, na Nguluwi kangupegwa ukulu mgati mwa heye.
JOH 13:32 Na wone ukulu wa Nguluwi ugubuligwa mgati mwa Mwana, lelo na heye Nguluwi koulajila ukulu wa Mwana mgati mwa heye, kodita ago baho.
JOH 13:33 Wanangu, nding'hali na hemwe kwa mhela udo hela. Momhala, ila sambi ndanguwalonjelani gala gondiwalonjele vilongozi wa Wayahudi, ‘Hamluta kondiluta heni!’
JOH 13:34 Na sambi ndanguwapa ilajizo linyale, migane, migane kota vyondiwaganile hemwe.
JOH 13:35 Wone migane, chila munhu kovizela kota mwa walanguswa wa heni.”
JOH 13:36 Simoni Petili nakamuuza Yesu, “Kohi kouluta Mkulu?” Yesu nakedichila, “Hujeza kumbinza sambi kondiluta, ila kombinza hamba.”
JOH 13:37 Petili nakamuuza, “Mkulu, lekachoni ndeche kukuwinza sambi? Heni ndokwimilila mbaka kubagama kwa mbuli ya hegwe.”
JOH 13:38 Yesu nakedichila, “Hambi koweza kubagama kwa mbuli ya heni? Ndangukulonjela ndikomya ng'hatu, ne izogolo halineka, kombela kadatu kota hunzelele heni!”
JOH 14:1 Yesu nakawalonjela, “Mleche kusumajila mnhumbula za hemwe. Mumkunde Nguluwi, mng'hunde na heni.
JOH 14:2 Kaye kwa Mhaza wa heni kuna honhu henji ha kikala, wone hayali ahyo, nandahawalonjeleni. Sambi ndanguluta kuwawichila honhu.
JOH 14:3 Wone ndute kuwawichilani goya honhu ha hemwe, ndohiluka kuwahola nene, na mochikala honhu hondikale heni.
JOH 14:4 Na muizela nzila ya kuluta ako kondiluta.”
JOH 14:5 Tomasi nakamuuza, “Mkulu, hatukuzelele kouluta, lelo toizela ndaze nzila ayo?”
JOH 14:6 Yesu nakamwidichila, “Heni ndo nzila na kukomya na ukomu. Kuduhu munhu yoluta kwa Mhaza wone hakolile kwa heni.
JOH 14:7 Wone mlingunzela heni, mwangumzela na Mhaza wa heni. Na kulawa sambi mumzela, kahi mina mmona.”
JOH 14:8 Filipo nakamlonjela, “Mkulu, utulajile ayo Mhaza, acho weng'ha ndochotulingugana.”
JOH 14:9 Yesu nakawedichila, “Nandikala na hemwe mhela weng'ha, nagwe Filipo hunanzela? Heye yambwene heni kamona Mhaza. Iwa ndaze ulonga, ‘Tulajile Mhaza?’
JOH 14:10 Ndaze, huwele kukunda kota heni nda mgati mwa Mhaza, na heye Mhaza ka mgati mwa heni? Mbuli zondiwalonjele hemwe hambe ndonje kwa ludali lwa heni. Mhaza nayali mgati mwa heni kangukola mijito.
JOH 14:11 Chiba Mkunde heni hondilonga, heni ndangikala mgati mwa Mhaza, na Mhaza kangikala mgati mwa heni. Wone hebu, ukunde kwa vila vinduzanduza vyondilingudita.
JOH 14:12 Ndangulonga ndikomya, yalingukunda kodita mbuli zondilingudita heni, kodita mbuli ng'hulu ng'hatu, kwavila ndanguluta kwa Mhaza.
JOH 14:13 Choneche chomlanda kwa itagwa lyangu ndodita, leka Mhaza yapegwe ukulu mgati mwa Mwana.
JOH 14:14 Wone mlande chinhu choneche kwa itagwa lyangu, ndowaditilani.
JOH 14:15 “Wone mlingungana heni, mochibatilila malajizo ga heni.
JOH 14:16 Na heni ndomlanda Mhaza, na heye kowegalila Mtanzi yunji, na heye kochikala na hemwe mazuwa gose.
JOH 14:17 Heye ndo Muhe Yelile wa Nguluwi wa kukomya. Wanhu wa isi hoimbochela heye kwa vila hoimona na kumzela heye. Ila hemwe mumzela kwa vila kochikala na heye kowa mgati mwa hemwe.
JOH 14:18 “Siwaleka mliwachiwa, ndokuya kahi kwa hemwe.
JOH 14:19 Ipona hachefu wanhu wa isi hawombona heni kahi, ila hemwe mombona. Na vyondili mkomu, namwe mowa wakomu.
JOH 14:20 Zuwa lila holikuya, movizela kota nda mgati mwa Mhaza, na hemwe mwa mgati mwa heni, na heni mgati mwa hemwe.
JOH 14:21 “Munhu yoneche yalingubochela malajizo ga heni na kibata, heye ndo yalingungana heni. Na heye yalingungana heni, Mhaza wa heni komgana, na heni ndomgana nakilajila kwa wanhu wose.”
JOH 14:22 Yudasi hawele yula Yudasi Isikalioti nakalonga, “Mkulu, yowa ndaze hegwe wilajile kwa heye na haiwele kwa wanhu wa isi?”
JOH 14:23 Yesu nakamwidichila, “Munhu yula yongana heni, kokunda gondanguse. Mhaza wa heni komgana heye, na heni na Mhaza tokuya kikala hamwe na heye.
JOH 14:24 Munhu yula yohambe yangane heni, halingukunda ulanguso wa heni. Ulonzi womuhuliche hauwele wa heni, ila wa Mhaza yanhumile heni.”
JOH 14:25 “Ndiwalonjelani vinhu avi vyonding'hali hamwe na hemwe.
JOH 14:26 Mtanzi ayo Muhe Yelile, Mhaza yomigala kwa itagwa lyangu ayo ndo kowalangusa hemwe chila chinhu na kowadita mkumbuchile gala gose gondiwalonjele.”
JOH 14:27 “Ndanguwalechelani kikala goya, ndanguwapa kikala goya kwa heni. Silingulapa kota vila isi vyoilingudita. Mleche kuwa na masinzo mnhumbula za hemwe, kahi mleche kudumba.
JOH 14:28 Muhulika ndiwalonjela hemwe, ‘Ndanguka, ila ndokuya kahi kwa hemwe.’ Wone mlingungana heni, mwahasangalale kwa vila ndanguluta kwa Mhaza, Mhaza ndo mkulu kwa heni.
JOH 14:29 Ndiwalonjelani vinhu avi sambi havinalawila, leka wone vilawile hemwe mkunde.
JOH 14:30 Silonga na hemwe mbuli nyinji, kwa vila Limazoga Mndewa wa isi ino kanguya. Na heye kahela ludali kwa heni.
JOH 14:31 Ila isi yanguganigwa ivizele kota ndangumgana Mhaza, ndovila ndangukola chila chinhu chowalajize Mhaza.” “Mwime, tucheni.”
JOH 15:1 “Heni ndo mzabibu wa kukomya, Mhaza wa heni ndo mlimi.
JOH 15:2 Chila nhagala yohambe ilele mafuza ndanguitema, na chila nhagala iwele ngulela ndanguidahulila ilele mafuza menji.
JOH 15:3 Hemwe muwa mwelile kwa mbuli ya ula ulonzi wondiwalonjele.
JOH 15:4 Mikale mgati mwa heni, na heni mgati mwenu. Nhagala hailela mafuza iliyeka, ila wone ibatilile kuli igodi yolela mafuza, na hiho hemwe hamlela mafuza wone hamikale mgati mwa heni.”
JOH 15:5 “Heni nda mzabibu, na hemwe mwa nhagala. Yalingikala mgati mwa heni, na heni mgati mwa heye, ayo kolela mafuza menji. Hamkola ne chinhu choneche mliyeka.
JOH 15:6 Munhu yoneche wone yekale mgati mwa heni kowa yatajigwe kunze kota nhagala ikalile. Wanhu woilokota nhagala ayo na kuitoza kuli chiluli ilakale.
JOH 15:7 Wone mikale mgati mwa heni na ulonzi wa heni wikale mgati mwa hemwe, mlande chinhu choneche chomlapa mopegwa.
JOH 15:8 Ukulu wa Mhaza wa heni wokoneka wone mlela mafuza menji na muwe walanguswa wa heni.
JOH 15:9 Heni ndiwagana hemwe kota vila Mhaza vyoyanganile heni. Mikale mvizela kota heni ndanguwagana.
JOH 15:10 Wone mibate malajizo ga heni mopona mli igano lyangu kwa hemwe, kota vila heni vyondibate malajizo ga Mhaza na kupona mli igano lyake.”
JOH 15:11 “Ndanguwalonjelani mbuli zino leka kusangalala kwa heni kikale mgati mwenu, na kusangalala kwa hemwe kuwe kwenele.
JOH 15:12 Ndanguwalajiza hino, migane. Migane kota vyondiwaganile heni.
JOH 15:13 Kuduhu igano ikulu ng'hatu kusinda igano lya munhu kuulavya ukomu wa heye kwa wanhu yawaganile.
JOH 15:14 Na hemwe mwa goloko wa heni wone mkola kota vyondilinguwalajiza.
JOH 15:15 Hemwe siwachema hemwe vitumagwa lekachoni, chitumagwa hawaga havizelele mkulu wa heye chowodita. Leka ndanguwachema hemwe goloko wa heni, kwavila ndiwalonjela geng'ha gonyhuliche kwa Mhaza wa heni.
JOH 15:16 Hamuwele hemwe mnyhagule heni, ila heni ndiwahagula hemwe nandiwalajiza mlute mkalele mafuza menji na mafuza gawelengikala lukami. Mhaza wa heni kowapa hemwe choneche chomlanda kwa itagwa lyangu.
JOH 15:17 Alyo ilajizo lya heni ndo ali, migane.”
JOH 15:18 “Wone wanhu wa isi wawazudile hemwe, mkumbuchile kota nawaluka kunzudila heni.
JOH 15:19 Wone namuwe wanhu wa isi ino, wanhu wa isi nawawaganile hemwe kota wanhu wa heye. Kota vila hemwe lohamuwele wanhu wa isi, ila heni ndiwahagulani hali wanhu wa isi, ndo mina isi yanguwazudila.
JOH 15:20 Mkumbuchile vyondiwalonjele, ‘Chitumagwa hawaga mkulu kusinda heye.’ Wone wanhu wangazile heni, wowagaza na hemwe kahi. Wone webate mbuli ya heni, wochibata mbuli ya hemwe.
JOH 15:21 Ila ago geng'ha wokuditilani hemwe kwa vila mwa wanhu wa heni, hawamzelele yula yanhumile.
JOH 15:22 Wone nandeche kuya kulonga na hewo, nahawali kuwa na gehile. Ila sambi hawoweza kulonga kota wahela gehile.
JOH 15:23 Munhu yawele kunzudilila heni, kangumzudila na Mhaza wa heni.
JOH 15:24 Wone nasiditile kwa hewo mbuli zohazinakoleka na munhu yunji, nahayali na gehile. Ila sambi wagona gonditile, wanzudila heni kahi wanzudila heni na Mhaza wa heni.
JOH 15:25 Aga nagalawila kota vyogandichigwe kuli Malajizo, ‘Wanzudila heni hela hihi.’ ”
JOH 15:26 “Loyokuya ayo mtanzi ndilingumlajiza kwa hemwe kulawa kwa Mhaza, ayo Muhe Yelile yalingulavya kukomya kwa Nguluwi, yalingulawa kwa Mhaza, heye kondavila ulolezi heni.
JOH 15:27 Na hemwe namwe mondavila ulolezi, kwa vila mwali na heni kulawa mwaluko.”
JOH 16:1 “Nandiwalonjela ago mleche kuleka kunghunda heni.
JOH 16:2 Wanhu yowawinga hemwe kuli Misinagogi ja hewo. Kahi mhela wanguya, heye yowakopola hemwe kochijesa kota kangumnojeza Nguluwi.
JOH 16:3 Wanhu wowaditilani ago kwa vila hawamzelele Mhaza, kahi hawanzelele heni.
JOH 16:4 Ila ndanguwalonjelani ago leka howokwaluka kudita ago, mkumbuchile kota nandiwalonjelani.” “Siwalonjeleni mbuli azo kulawa mwaluko kwa vila ndali hamwe na hemwe.
JOH 16:5 Ila sambi ndanguluta kwa heye yanhumile, na kuduhu ne yumwe yalingumbuza, ‘Kwanguluta kohi’
JOH 16:6 Kwa vila ndiwalonjeleni mbuli azi, nhumbula za hemwe zimema masinzo.
JOH 16:7 Ila ndanguwalonjela ndikomya, inoga kwa hemwe heni mbuche, kwa vila wone silutile, Mtanzi hokuya kwa hemwe. Leka wone ndute, ndomlajiza yoye kwa hemwe.
JOH 16:8 Heye hoyokuya, kowalavila ulolezi wanhu wa isi kota majesa ga hewo geha kwa mbuli ya gehile, na kwa mbuli ya linojile na lihile, na kwa mbuli ya utaguso wa Nguluwi kwa wanhu.
JOH 16:9 Hewo wawifwa kwa mbuli ya kudita lihile na linojile kwa vila walema kukunda ga heni.
JOH 16:10 Hewo wawifwa kwa mbuli ya linojile na lihile kwa vila ndanguluta kwa Mhaza, na hemwe hambona kahi.
JOH 16:11 Kahi wawifwa kuli mbuli ya utaguso kwa vila Limazoga mkulu wa isi ino katagusigwa lumwenga.
JOH 16:12 “Ndanazo mbuli nyinji za kuwalonjela, ila hamuweza kwimilila kwa sambi.
JOH 16:13 Aho, hoyokuya ayo Muhe yalingulajila kukomya kwa Nguluwi, na kuwadita hemwe mvizele kukomya kweng'ha, ayo holonga kwa ludali lwake, ila kolonga goyahuliche, na kuwalonjeleni vinhu vikuya.
JOH 16:14 Heni ndotogoligwa na heye kwa vila kowalajilani gowapeligwe na heni.
JOH 16:15 Vyeng'ha vyoyalinavyo Mhaza ndo vya heni, ndo vila ndiwalonjeleni kota ayo Muhe Yelile kowalonjela hemwe gala goyapeligwe na heni.
JOH 16:16 “Mhela udo hela hammbona hebu, na mhela udo hamba mombona kahi.”
JOH 16:17 Walanguswa wamwe naweuza, “Iwa ndaze yotulonjela, ‘Unghali mhela udo hammbona, na kahi mhela udo mombona?’ Na kahi kangulonga, ‘Kwavila ndanguluta kwa Mhaza.’ ”
JOH 16:18 “Iwa ndaze vyoyolonga, ‘Ung'hali mhela udo?’ Hatuvizelele choyolonga!”
JOH 16:19 Yesu nakavizela kota wangugana kumuuza, aho kawalonjela, “Mwangiuza gala gondonjile, ‘Ung'hali mhela udo hammbona, na mhela udo mombona kahi?’
JOH 16:20 Ndanguwalonjelani ndikomya, hemwe molila na kulombocheza, ila wanhu wa isi wosechelela. Mowa na masinzo, ila masinzo ga hemwe gogaluka kusangalala.
JOH 16:21 Mdala hoyolela kawaga na masinzo kwa vila mhela wa usungu wa heye ufika. Ila wone yalele, kawaga yasemwile aula usungu woyauwene kwa vila kawaga yasangalale kwa chali chileleche muisi.
JOH 16:22 Na kwa hemwe vyoili, sambi mna masinzo, ila ndokuya kwa hemwe kahi. Hemwe mowa na usangalalo mnhumbula za hemwe, na kuduhu ne yumwe yokusa awo usangalalo wa hemwe.
JOH 16:23 “Zuwa alyo hamndanda ne chinhu. Ndanguwalonjelani ndikomya, choneche chomlanda kwa Mhaza kwa itagwa lyangu, kowapani.
JOH 16:24 Mbaka sambi hamnalanda chinhu kwa itagwa lyangu. Mlande na hemwe mopegwa leka usangalalo wa hemwe wenele.
JOH 16:25 “Ndiwalonjeleni mbuli azo kwa nhelo. Ila mhela wanguya siwandilonga na hemwe kwa nhelo. Ndowa ndiwalonjela ne kuvisa gawele ga Mhaza.
JOH 16:26 Zuwa alyo momlanda Mhaza kwa itagwa lyangu, heni hambe ndiwalonjele kota ndomlanda Nguluwi kwa mbuli ya hemwe,
JOH 16:27 kwa heye Mhaza yuye kanguwagana hemwe. Kanguwagana hemwe kwa vila hemwe mwangungana heni, na kung'hunda kota ndawa kwa Nguluwi.
JOH 16:28 Heni nandawa kwa Mhaza mbuya muisi, na sambi ndanguileka isi, ndanguhiluka kwa Mhaza.”
JOH 16:29 Hamba walanguswa wa heye nawamuuza wata, “Sambi kwangulonjela hazelu ne kulonga kwa nhelo.
JOH 16:30 Sambi tuvizela kota kuvizela vinhu vyeng'ha. Twahela kahi chinhu choneche cha kukuuza, ahi yangutudita tukunde hegwe kwangulawa kwa Nguluwi.”
JOH 16:31 Yesu nakawauza, “Mwangukunda sambi?
JOH 16:32 Mhela wanguya, kahi mina ufika, aho hemwe mweng'ha mosambaluka chila yumwe hakaye hake, na heni mondeka ndiliyeka. Ila siwa yeka hebu, Mhaza kahamwe na heni.
JOH 16:33 Ndanguwalonjelani mbuli azo leka muwe na kikala goya kwa kibanda na heni. Isi yowadita muwe mgaya ng'hatu. Ila msindamale. Heni ndiisinda isi yeng'ha!”
JOH 17:1 Yesu loyasindile kulonga ago, nakalola kuchanya kilanga, kalonga, “Mhaza, mhela ufika. Umpe ukulu Mwanago leka na heye yakupe ukulu.
JOH 17:2 Mina nakumpa Mwanago ludali kwa wanhu weng'ha leka yawape ukomu wa mazuwa gose ne kuduma awo woumpele.
JOH 17:3 Na ukomu wa mazuwa gose ne kuduma ndo awu, kukuzele hegwe, uwele uliyeng'ha Nguluwi wa kukomya ng'hatu, na wamzele Yesu Kilistu woumigale.
JOH 17:4 Heni ndiwalajila ukulu wa hegwe kuli isi, mijito joumhele kukola ngongomanya.
JOH 17:5 Sambi Mhaza, umhe ukulu houli hegwe, ukulu ula wondali nawo isi hainalumbigwa.
JOH 17:6 “Ndikudita hegwe uzeleche kwa hewo woumhele kulawa muisi. Wali wanhu wa hegwe, na hegwe kunipa wawe wa heni, na hewo webata ulonzi wa hegwe.
JOH 17:7 Sambi wavizela kota vinhu vyeng'ha vyoumhele vilawa kwa hegwe.
JOH 17:8 Ndiwalonjela ulonzi woundonjele, na hewo waubochela. Wavizela kota kukomya heni ndawa kwa hegwe, na wangukunda kota hegwe nakunhuma.
JOH 17:9 “Ndanguwalandila awo. Hambe ndiwalandile wanhu wa isi ayi, ila ndanguwalandila hewo woumhele, mina ndo wanhu wa hegwe.
JOH 17:10 Geng'ha gondilinago galawa kwa hegwe, na geng'ha goulinago ga heni! Na ukulu wa heni ulajilwa kukolela hewo woumhele.
JOH 17:11 Sambi ndanguya kwa hegwe, siwele kahi muisi, ila hewo wa amu muisi. Mhaza Welile, uwawiche goya kwa ludali lwa itagwa lyako, itagwa lyoumhele wawe chinhu chimwe kota hetwe vyotuli yumwe.
JOH 17:12 Vyondali na hewo, nandiwawika goya kwa itagwa lyako lyoumhele. Heni ndali ndiwamila hewo, na kuduhu ne yumwe yajilile, ila yula munhu yahaguligwe kwajilila leka gala Maandiko Matakatifu genele.
JOH 17:13 Na sambi ndanguya kwa hegwe, nandonjile mbuli zino kuli isi leka wameme usangalalo wa heni mnhumbula za hewo.
JOH 17:14 Heni ndiwapa usenga wa hegwe, na wanhu wa isi naiwehilwa hewo kwa vila hawawele wa isi ayi, kota heni vyosiwele yumwe wa isi ino.
JOH 17:15 Silingulanda uwose kuli isi ino, ila ndangulanda uwamile na lila Limazoga lihile.
JOH 17:16 Hewo hawawele wa isi, kota heni vyosiwele wa isi.
JOH 17:17 Uwawichile moko hegwe kwa kula kukomya, ulonzi wa hegwe ndo kukomya.
JOH 17:18 Kota vila vyounhumile kuli isi, nani ndanguwalajiza hewo kuli isi.
JOH 17:19 Na kwa mbuli ya hewo ndangiwichila moko kwa hegwe, leka kwa kukomya na hewo nawo wawe wawichilwe moko ng'hatu.
JOH 17:20 “Silinguwatambichiza hewo yeka, ila kwa weng'ha wawelengung'hunda heni kwa usenga wa hewo waudamle.
JOH 17:21 Ndanguwatambichiza leka hewo wawe yumwe. Mhaza, ndangulanda wawe mgati mwa hetwe, kota vyouwele mgati mwa heni, na heni mgati mwa hegwe. Ndangulanda wawe yumwe isi ikunde kota nanhumigwa na hegwe.
JOH 17:22 Ndiwapa ukulu kota woumhele heni, leka wawe yumwe, kota hetwe vyotuli yumwe.
JOH 17:23 Ahi ndo kulonga, heni ndangikala mgati mwa hewo na hewo wangikala mgati mwa heni. Ndangulanda wawe chinhu chimwe ng'hatu, leka wanhu wa isi wavizele kota heni nhumigwa na hegwe, na kwanguwagana kota vyoulingungana heni.
JOH 17:24 “Mhaza, kunipa awo, na heni ndangugana wawe hala hondili leka wawone ukulu woumhele. Awu ndoukulu woumhele kwa vila nakungana heni isi hainalumbigwa.
JOH 17:25 Mhaza unojile, wanhu wa isi hawakuzelele hegwe, ila heni ndikuzela na hewo wavizela kota hegwe ndo unhumile.
JOH 17:26 Ndiwalajila hewo kota vyouli, na ndolutilila kudita ahyo, leka igano lyouwele nalyo kwa heni likale mgati mwa hewo, na heni ndikale mgati mwa hewo.”
JOH 18:1 Yesu vyoyasindile kulonga ago, nakoka na walanguswa wa heye na kuloka nzanda nayali ichemigwa Kediloni. Baho kwali na kamgunda ka migodi, na heye nakenjila mumo na walanguswa wa heye.
JOH 18:2 Yudasi, yula mwana Isikalioti yamhinduche Yesu nakahazela honhu hala kwa vila mala nyinji Yesu na walanguswa nawali woting'hana baho.
JOH 18:3 Ahyo Yudasi na chilundo cha wamizi na vitumagwa walawile kwa watambika wakulu na Mafalisayo woya kuli kamgunda kala ka migodi. Nawawele waholile vimwemwesa, vyenje na vinhu vya kutowela.
JOH 18:4 Yesu nakavizela vyeng'ha vizangulawila, kahejela hamwando, nakawauza, “Mwangumpala munhu yachi?”
JOH 18:5 Hewo nawedichila, “Yesu wa Nasaleti!” Yesu nakawedichila, “Heni ndo nene!” Yudasi, yula yamhinduke Yesu nayali yemile hamwe na hewo.
JOH 18:6 Yesu vyoyawalonjele, “Heni ndo nene,” Wahiluka kumbele na kugwa hanyi.
JOH 18:7 Yesu nakahiluchila kuwauza kahi, “Yalikohi mlingumpala?” Nawamwidichila, “Yesu wa Nasaleti.”
JOH 18:8 Yesu nakawalonjela, “Mina ndiwalonjela kota heni ndo nene. Wone mlingumhala heni, muwaleche awo wanji walute.”
JOH 18:9 Yesu nakalonga ago leka galawile gala goyalonjile, “Mhaza, simtajile ne yumwe kuli wala woumhele.”
JOH 18:10 Simoni Petili nakasomola ipanga lyoyalinalyo, nakamdumula ikutu lya kudilo lya chitumagwa yumwe wa mtambika mkulu na kulilagaza. Itagwa lya chitumagwa ayo ndo Malikusi.
JOH 18:11 Baho Yesu nakamlonjela Petili, “Uhiluse ipanga lyako muyala! Ndaze, ndeche kunwela chizombe cha kugazigwa choyamhele Mhaza?”
JOH 18:12 Chilundo cheng'ha cha wamizi na chilongozi wa vitumagwa wa Wayahudi wamibata Yesu na wamuwoha.
JOH 18:13 Wamhilika kwa Anasi, mkweye Kayafa. Kayafa nayali mtambika mkulu mhela awo.
JOH 18:14 Yali yuyu Kayafa nayawalonjele wakulu wa Wayahudi kota yowa goya wone munhu yumwe yabagame kwa wanhu weng'ha.
JOH 18:15 Simoni Petili na mlanguswa yunji wali wochibandabanda womuwinza Yesu. Ayula mlanguswa yunji nakazeleka na Mtambika Mkulu, ahyo nakenjila mchipepela cha ng'handa ya mkulu wa Watambika hamwe na Yesu.
JOH 18:16 Petili nayali yemile kunze, behi na chihindilo. Ayula mlanguswa yunji nayali yazeleche na mtambika mkulu nakamlonjela mdala nayali mlola chihindilo, na baho kamwinjiza Petili mng'handa.
JOH 18:17 Ayula mdala nakamuuza Petili, “Hegwe nagwe huli mlanguswa wa munhu yuno?” Petili nakedichila, “Hebu! Siwele heni.”
JOH 18:18 Vitumagwa na wamizi wa ng'handa nawali wabwinhile chiwambilo kwa vila nakwali na mbeho lukami, nawema wokota chiwambilo acho. Petili na heye nayali yemile bahala na hewo wokota chiwambilo.
JOH 18:19 Hamba mtambika mkulu nakamuuza Yesu mbuli za walanguswa wa heye na ulanguso wa heye.
JOH 18:20 Yesu nakedichila, “Ndali ndilonga hazelu na chila munhu. Ulanguso weng'ha ndali ndidita kuli ng'handa ya kusalila na Ng'handa ya Nguluwi, kuko Wayahudi weng'ha nawoya wali hamwe. Silonjile chinhu choneche chila kwa uviso.
JOH 18:21 Iwa ndaze kahi kwangumbuza heni? Uwauze wanhu wowahuliche londanguse. Hewo wavizela vyondonjile.”
JOH 18:22 Yesu loyali yolonga hino, mwamizi yumwe nayali yemile hala kamzabula yolonga, “Ahyo ndo vyoulingumwidichila Mtambika Mkulu?”
JOH 18:23 Yesu nakamwidichila, “Wone ndonjile vibi, ulajile wihe wa heni, ila wone silonjile vibi, lekachoni kwangunzabula?”
JOH 18:24 Hamba Anasi nakamhilika Yesu yawele yawopigwe kwa Mtambika Mkulu yachemigwe Kayafa.
JOH 18:25 Simoni Petili nayang'ali yemile bahala yokota chiwambilo. Ahyo wanhu wanji nawamuuza, “Hegwe nagwe huwele yumwe wa walanguswa wa munhu yula?” Heye Petili kabela kalonga, “Hebu! Siwele heni!”
JOH 18:26 Chitumagwa yumwe wa mtambika mkulu, mng'holoze na munhu yatemigwe ikutu na Petili, nakamuuza Petili, “Hambi nasikuwene hegwe hamwe na heye akula kuli kamgunda ka migodi?”
JOH 18:27 Kahi Petili kabela kalonga, “Hebu!” Baho izogolo nalika.
JOH 18:28 Vyoiwele lufuku, Yesu nakaholigwa kulawa mng'handa ya Kayafa, wamigala kuli chilongozi mkulu wa isi ya Yudeya. Wakulu wa Wayahudi nahawenjile mng'handa ya mkulu wa isi ya Yudeya, kwa vila hawaganile kubena mzilo leka waweze kulya goya ndiya ya Pasaka.
JOH 18:29 Ahyo Pilato nakalawa kunze, nakawauza, “Munhu ayu kadita choni chihile mbaka mmigale kwa heni?”
JOH 18:30 Nawamwidichila, “Nahatwalimigala kwa hegwe, wone nayawe haditile chinhu chihile.”
JOH 18:31 Pilato nakawalonjela, “Mumhole hemwe mkamtaguse kota malajizo ga hemwe.” Wayahudi nawedichila, “Hetwe hatukundigwe kutagusa munhu yoneche yakopoligwe!”
JOH 18:32 Aga nagalawila wenele ulonzi wa Yesu hoyalonjile yolajila vyoyobagama.
JOH 18:33 Pilato nakahiluka mng'handa ya mkulu wa isi ya Yudeya, kamchema Yesu, nakamuuza, “Hegwe ndo uli mndewa wa Wayahudi?”
JOH 18:34 Yesu nakedichila, “Awo ulonzi wa hegwe, ama wa munhu yunji kakulonjela mbuli ya heni?”
JOH 18:35 Pilato nakedichila, “Kwangijesa heni nda Myahudi? Wanhu wa hegwe, na wakulu wa Watambika wakigale kwa heni. Hambi kudita choni?”
JOH 18:36 Yesu nakalonga, “Undewa wa heni hauwele wa isi ino. Wone Undewa wa heni na uwe wa isi ino. Walanguswa wa heni newekangaze ndeche kibatigwa na wakulu wa Wayahudi, ila sambi undewa wa heni hauwele wa ahano!”
JOH 18:37 Baho Pilato nakamuuza, “Hambi hegwe kwa mndewa?” Yesu nakedichila, “Hegwe kulonga kota heni nda mndewa! Heni navumbuka nakuya kuli isi ino kwa mbuli imwe, kuwalonjela wanhu kukomya. Na chila munhu yalingukunda kukomya konyhulichiza heni.”
JOH 18:38 Pilato nakauza, “Kukomya ndo choni?” Pilato loyamalile kulonga mbuli azo, kalawa kunze kwa Wayahudi, kawalonjela, “Heni siuwene wihe weng'ha ula kwa munhu yuno.
JOH 18:39 Ila hemwe mna chihendo cha kumchumulila mnweng'hwa yumwe kuli Pasaka. Lelo mwangugana ndimchumulile Mndewa wa Wayahudi?”
JOH 18:40 Nawamwidichila heye woyoweleza, “Hebu! Hawele ayu! Tuchumulile Balaba!” Balaba nayali mbokaji.
JOH 19:1 Pilato nakawalonjela wamhole Yesu wamsubule na ng'hobwa.
JOH 19:2 Wamizi wahola miwa, watowa kota ng'hata ya miwa ifandile kota chipembelo, wamvalisa kumutwi wahola ikanzu lya chiundewa wamvalisa.
JOH 19:3 Woya kwa Yesu wata, “Ulamche, Mndewa wa Wayahudi!” Akuno womsubula.
JOH 19:4 Pilato kalawa kunze kahi, nakawalonjela, “Mlole, ndangumigala heye kunze kwa hemwe, leka mvizele kota heni sinachona chinhu choneche cha kumtagusa.”
JOH 19:5 Baho Yesu nakalawa kunze yavalile ng'hata ya miwa ifandile kota chipembelo na ikanzu lya chiundewa. Pilato nakawalonjela, “Mlole, heye munhu ndo ayu!”
JOH 19:6 Watambika wakulu na wamizi vyowamuwene Yesu, wayoweleza wata, “Muwambe mumsalaba! Muwambe mumsalaba!” Pilato nakawalonjela, “Mumhole hemwe mkamuwambe mumsalaba. Heni simuwene na chinhu choneche cha kumtagusa.”
JOH 19:7 Wayahudi nawalonga, “Hetwe twanalyo ilajizo, na kwa ilajizo alyo, imgana yabagame kwa vila kedita Mwana wa Nguluwi.”
JOH 19:8 Pilato vyoyahuliche ago, nakadumba heko.
JOH 19:9 Nakahiluka mng'handa ya mkulu wa isi ya Yudeya, nakamuuza Yesu, “Hegwe kulawila kohi?” Ila Yesu hamwidichile ne chinhu.
JOH 19:10 Pilato nakamlonjela Yesu, “Kwangulema kulonga na heni? Huvizelele kota ndina ludali lwa kukulechela ama kukuwamba mumsalaba?”
JOH 19:11 Yesu nakamwidichila, “Wahawele hela ludali kwa heni, wone hupeligwe na Nguluwi. Lelo munhu yandigale kwa hegwe ndo kana gehile ng'hatu.”
JOH 19:12 Pilato vyowahuliche hino, nakapala nzila ya kumlechela Yesu. Ila Wayahudi wayoweleza wata, “Wone umlechele ayo, huwele goloko wa mndewa wa Lumi. Kwa vila munhu yochidita kota Mndewa kangumbeza Mndewa wa Loma.”
JOH 19:13 Baho Pilato vyowahuliche ulonzi awo, nakamlavya Yesu kunze, kekalisa mchigoda cha mtagusa, honhu halihochemigwa, “Luga lwa mabwe”. Waebulaniya waliwochema Gabasa.
JOH 19:14 Yali zuwa lya kiwika goya na Pasaka, mhela wa saa sita nemisi. Pilato nakawalonjela Wayahudi, “Ayuno hano mndewa wa hemwe!”
JOH 19:15 Ila Wayahudi wayoweleza wata, “Muse! Muse! Muwambe muchitango!” Pilato nakawauza, “Mwangugana heni ndikamuwambe mumsalaba Mndewa wa hemwe?” Watambika wakulu nawamwidichila, “Mndewa tulinaye hetwe ndo Mndewa wa Loma hela!”
JOH 19:16 Pilato nakamlavya Yesu, kawapa hewo mmoko mwao wakamuwambe mumsalaba. Aho nawamhola Yesu.
JOH 19:17 Yesu nakalawa kunze yapichile msalaba wa kumuwambila mbaka honhu halihochemigwa izeje lya mutwi, kwa Chiebulaniya Goligota.
JOH 19:18 Wamuwamba Yesu mumsalaba hamwe na wanhu wanji weli, yumwe kumoso na yumwe kudilo, heye nayali hagati.
JOH 19:19 Pilato nakandika mchibao, kawika kuchanya mumsalaba hali Yesu, “Yesu Mnasaleti, Mndewa wa Wayahudi.”
JOH 19:20 Wayahudi wenji nawali wosoma ibango alyo kwa vila hala howamuwambile Yesu kwali habehi na muji walingikala wanhu. Na ibango alyo lyali lyandichigwe kwa Chiebulaniya na Chilumi na Chigiliki.
JOH 19:21 Mtambika Mkulu nakamlonjela Pilato, “Uleche kwandika ‘Mndewa wa Wayahudi,’ Ila ‘Munhu ayu nakalonga, Heni nda Mndewa wa Wayahudi.’ ”
JOH 19:22 Pilato nakedichila, “Chonyandiche nyandika sigalamla hebu!”
JOH 19:23 Wamizi vyowamuwambile Yesu, wahola nguwo zoyavalile, wegawila vilundo vine, chila munhu chilundo chimwe. Wahola na nguwo ya heye yinji itawigwe kwa chibende chimwe chohachihonigwe.
JOH 19:24 Lelo welonjelela waliyeka wata, “Tuleche kuidega ayi, tulitowele simbi tulole yalikohi yohola.” Mbuli ayi naikoleka galawile Maandiko Matakatifu galingulonga, “Wegawila nguwo za heni, na zila zomvalile wazitowela simbi.” Ahyo ndo vyowaditile awala wamizi.
JOH 19:25 Habehi na ahala howamuwambile Yesu mumsalaba, wali wemile Maliya mayake Yesu na lumbu wa mayake na Maliya mdala wa Kileopa na Maliya Madelena.
JOH 19:26 Yesu vyoyamuwene mayake yemile na mlanguswa wa heye yamganile lukami ahala honhu nakamlonjela, “Mamo, sambi ayo ndo mwanago.”
JOH 19:27 Kahi baho nakamlonjela ayula mlanguswa, “Sambi ayo ndo mayako.” Kulawa hala, mlanguswa yula kamhola mayake kuza kikala na heye kaye.
JOH 19:28 Yesu nakavizela kota geng'ha gamala, na leka Maandiko Matakatifu galawile kalonga, “Ndangona ng'halu.”
JOH 19:29 Kwali na chisaye ahala chiwele na divai izazame, wadilizila ibofyabofya, nawawopa mli nhagala ya isopolo, wamuwichila Yesu hamlomo yanwe.
JOH 19:30 Yesu vyoyanwele aila divai izazame, nakalonga, “Lelo imala!” Hamba kenamiza mutwi wa heye, muhe nauleka lukuli.
JOH 19:31 Yali zuwa lya Kiwika goya na Pasaka, na mitondo yake nayali Zuwa lya Kwesela. Wayahudi nahawaviganile ng'huli zikale mmisalaba kuli Zuwa lya Kwesela kwavila zuwa alyo lyali likulu. Ahyo nawamlanda Pilato magulu ga wanhu hewo wawambigwe gabenigwe na ng'huli zawo zusigwe.
JOH 19:32 Baho wamizi waluta kubena magulu ga munhu wa mwaluko na wa keli wawambigwe hamwe na Yesu.
JOH 19:33 Ila vyowafichile kwa Yesu, wona yabagame katali hela, ahyo hawambenile magulu.
JOH 19:34 Yumwe mwa awala wamizi kamhoma igoha mlubavu lwa Yesu, baho du vilawa danda na malenga.
JOH 19:35 Na heye yagawene ago, kangundavila ulolezi leka hemwe namwe mkunde. Na ago gondilonga ng'homya, na heye kavizela kota nayali yolonga yokomya.
JOH 19:36 Mbuli ayo naikoleka galawile Maandiko Matakatifu, “Kuduhu chizeje ne chimwe chowobena.”
JOH 19:37 Kahi Maandiko Matakatifu gangulonga, “Womlola yula yowamtubule.”
JOH 19:38 Hamba Yusufu, mwenyeng'hahye wa Alimataya nakamlanda Pilato yamkundile kuhola lukuli lwa Yesu. Yusufu nayali mlanguswa yumwe wa Yesu ila kwa uviso kwa vila nakawadumba wakulu wa Wayahudi. Pilato nakamkundila yahole. Ahyo Yusufu nakaluta kuhola lukuli lwa Yesu.
JOH 19:39 Nikodemo, ayula nayalutile kwa Yesu nechilo, nakaluta hamwe na Yusufu yaholile mhanzanyo wa manemane na udi kilo makumi gadatu.
JOH 19:40 Ahyo wauhola lukuli lwa Yesu na kaubumbiliza kwa sanda inojile ng'hatu hamwe na mafuta ga kunhunyhilila na udi, kota vyowazowele Wayahudi howomtila munhu.
JOH 19:41 Honhu aho howamuwambile Yesu kwali kamgunda, na muli kamgunda ako kwali na chilaga chinyale, hachinawichigwa ne lukuli mgati mwake.
JOH 19:42 Kwa vila zuwa lya Kiwika goya kwa Wayahudi nayali habehi, na chilaga chali habehi, wauwika mtufi wa Yesu mumo.
JOH 20:1 Hamitondo zuwa lya Jumapili kung'hali lufuku, Maliya Madelena nakaluta kuli chilaga, nakalyona iganga lyowadinyile hali lwizi lwa chilaga lihejezwe hafungo.
JOH 20:2 Baho nakaluta yobilima kwa Simoni Petili na kwa yula mlanguswa yunji yaganigwe na Yesu. Nakawalonjela, “Wamusa Mkulu mchilaga na hatuvizelele kohi kowamuwichile.”
JOH 20:3 Petili hamwe na yula mlanguswa yunji nawaluta kuli chilaga.
JOH 20:4 Weng'ha weli nawaluta wobilima, ila yula mlanguswa yunji nayali yobilima lukami kusinda Petili, nakalongola kufika kuli chilaga.
JOH 20:5 Loyenamize na kusunjilila mgati nakona sanda, ila henjile mgati.
JOH 20:6 Hamba Simoni Petili nakoya yomuwinza, nakenjila mgati. Na heye naye nakayona sanda iwele hafungo,
JOH 20:7 na chila chibende chonawambumbilize Yesu kumutwi. Chibende acho nahachali hamwe na sanda, ila chali chikungajizwe na kuwichigwa chiliyeka hafungo.
JOH 20:8 Hamba yula mlanguswa yunji yawahiche kuza kuchilaga kenjila mgati, kavyona na kukunda.
JOH 20:9 Nawang'hali kuvizela Maandiko Matakatifu vyogalonjile, kota naimgana kuzilipuka kwa wabagame.
JOH 20:10 Hamba wala walanguswa nawahiluka kaye.
JOH 20:11 Maliya nakapona yemile habehi na chilaga kunze kuno yolila. Vyoyang'hali yolila, kenamiza yalole mgati mchilaga.
JOH 20:12 Kawona wahilisi wa kilanga wa Nguluwi weli wavalile nguwo nzelu ng'hatu wekalise, yumwe kumutwi na yumwenga kuli magulu ahala na howauwichile lukuli lwa Yesu.
JOH 20:13 Wahilisi wala nawamuuza, “Mamo, kwangulila choni?” Nakawedichila, “Wamusa Mkulu wa heni, sivizelele kohi kowamuwichile!”
JOH 20:14 Maliya loyasindile kulonga, kagalamka kumbele, kamona Yesu yemile hafungo, ila nahavizelele kota ndo nayali Yesu.
JOH 20:15 Yesu nakamuuza, “Mamo, kwangulila choni? Yalikohi youlingumpala?” Maliya kejesa kota munhu yula nayali mwamizi wa mgunda, aho nakamlonjela, “Mhaza, wone umusile, undonjele kohi koumuwichile ndoluta kumhola.”
JOH 20:16 Yesu nakamlonjela, “Maliya!” Maliya kamgalamuchila na kulonga kwa Chiebulaniya, “Laboni!” Laboni ili na mina, Mlangusa.
JOH 20:17 Yesu nakamlonjela Maliya, “Uleche kimbata, kwa vila nding'hali hiluka kilanga kwa Mhaza. Ila ulute kwa wang'holozangu uwalonjele, heni ndanguhiluka kilanga kwa Mhaza kahi Mhaza wa hemwe, Nguluwi wa heni kahi Nguluwi wa hemwe.”
JOH 20:18 Maliya Madelena nakaluta kuwalonjela walanguswa ndimona Mkulu hamba nakawalonjela gala goyamlonjele.
JOH 20:19 Yali Jumapili matinazo, walanguswa wali wekale hamwe wehindile mng'handa kwa vila wali wowadumba wakulu wa Wayahudi. Hamba Yesu nakawalawila na kwima hagati howali, nakawalonjela, “Mikale goya!”
JOH 20:20 Vyoyasindile kulonga hino, kawalajila moko na lubavu lwake. Walanguswa nawasangalala heko vyowamuwene Mkulu.
JOH 20:21 Yesu nakahiluchila kahi kulonga, “Mikale goya. Kota Mhaza vyoyanhumile heni, na heni ndanguwalajiza hemwe.”
JOH 20:22 Loyasindile kulonga ago, nakawaputila na kuwalonjela, “Mbochele Muhe Yelile.
JOH 20:23 Wone muwosele wanhu gehile gowaditile, wokusilwa, ila wone mleme kuwosela gehile gowaditile, howokusilwa hebu!”
JOH 20:24 Tomasi yachemigwe mnyambili, yumwe wa wala walanguswa kumi na weli nayali haduhu hala hoyezile Yesu.
JOH 20:25 Baho walanguswa wamwenga nawamlonjela Tomasi, “Tumona Mkulu!” Tomasi nakawedichila, “Sikunda hebu mbaka ndizone ng'hovu za misumali na kwinjiza chidole cha heni kuli ng'hovu azo, na kwinjiza moko wa heni mlubavu lwa heye.”
JOH 20:26 Vyoifichile mazuwa nane, walanguswa wali hamwe kahi mla mng'handa. Tomasi na heye nayali hamwe na wayage. Vihindilo vyali vihindigwe, ila Yesu nakenjila na kwima hagati, nakalonga, “Mikale goya!”
JOH 20:27 Hamba Yesu nakamlonjela Tomasi, “Uwiche chidole cha hegwe ahano, na ulole moko gangu. Kahi uwiche moko gako kuli ng'hovu za heni. Uleche kuwa munhu ulihela makundo!”
JOH 20:28 Tomasi nakamwidichila, “Hegwe Mkulu wa heni! Hegwe Nguluwi wa heni!”
JOH 20:29 Yesu nakamlonjela, “Kwangukunda vyoumbwene? Wabweda wanhu hewo wakundile ne kumbona hebu!”
JOH 20:30 Yesu vyoyekale na walanguswa, nakalajila vinduzanduza vinji lukami, vinji nahavyandichigwe mchitabu chino.
JOH 20:31 Ila aga gandichigwa leka kuwadita hemwe mkunde kota Yesu ndo Kilistu Mlohozi, Mwana wa Nguluwi, na kukolela heye, mowa na ukomu kwa ludali lwa itagwa lyake.
JOH 21:1 Vyogamalile ago, Yesu nakawalawila kahi walanguswa saba kuli ilamba lya Tibeliya, nayali ahi,
JOH 21:2 Simoni Petili na Tomasi yachemigwe mnyambili na Natanaeli mwenyeng'haye wa Kana isi ya Galilaya na wana Sebedayo weli na walanguswa wa Yesu weli wali wekale hamwe.
JOH 21:3 Simoni Petili nakawalonjela wayage, “Ndanguluta kulowa somba.” Hewo nawamlonjela, “Toluta hamwe,” Ahyo waluta wali muitumbwi waluta, ila hawebate ne somba nechilo yeng'ha.
JOH 21:4 Zuwa vyolyali lilawila, nawamona Yesu yemile hafungo ha ilamba, ila walanguswa hawavizelele kota nayali heye.
JOH 21:5 Hamba Yesu nakawauza, “Wasongolo, hamlowile ne somba?” Nawedichila, “Hebu! Ne chinhu.”
JOH 21:6 Yesu nakawalonjela, “Mtoze utandawala kudilo mwa itumbwi mochibata somba.” Hewo wadita kota vyoyawalonjele, watoza utandawala naumema somba, nawali wolemwela kukwega utandawala vyoumemile somba nyinji.
JOH 21:7 Baho mlanguswa yaganigwe na Yesu nakamlonjela Simoni Petili, “Ayu ndo Mkulu.” Petili vyoyahuliche kota nayali Yesu, kavala nguwo ya heye kwa vila nayali hanavala, na baho kenjila kuli malenga.
JOH 21:8 Ila wala walanguswa wanji nawoya mli itumbwi akuno wokwega utandawala umemile somba. Hawawele kutali na hafungo, kwali utali wa kota magulu miya.
JOH 21:9 Vyowafichile hafungo, wachona chiluli cha makala na mchanya hake hawichigwe somba na mibumunda.
JOH 21:10 Baho Yesu nakawalonjela hewo, “Migale somba nyhefu zo mibate sambi.”
JOH 21:11 Simoni Petili kakwina mli itumbwi, kakwega utandawala umemile somba kufungo, kwali na somba ng'hangala zifichile miya na makumi gahano na zidatu. Hanga na somba zeng'ha azo, utandawala haudejeche.
JOH 21:12 Yesu nakawalonjela, “Muye mulye.” Kuduhu ne mlanguswa yumwe yajezile kumuuza, “Kwa whaani?” Kwa vila nawavizela kota nayali Mkulu.
JOH 21:13 Yesu nakaluta, kalavya ibumunda, kawapa. Kahi kadita hiho kwa zila somba.
JOH 21:14 Ahi kahi nayali lwa kadatu Yesu kuwalawila walanguswa, kulawa vyo yazilipuche.
JOH 21:15 Vyowasindile kulya, Yesu nakamlonjela Simoni Petili, “Simoni mwana Yohani, kwangungana ng'hatu kusinda awa?” Petili nakedichila, “Ena Mkulu, hegwe kuvizela kota ndangukugana.” Yesu nakamlonjela, “Ulolele wanaming'holo ja heni.”
JOH 21:16 Yesu nakamlonjela kahi, “Simoni mwana Yohani, kwangungana ng'hatu?” Petili nakedichila, “Ena Mkulu, hegwe kuvizela kota ndangukugana.” Yesu nakamlonjela, “Ulolele goya ming'holo ja heni.”
JOH 21:17 Lwa kadatu Yesu nakahiluchila kumuuza Petili, “Simoni mwana Yohani, kwangungana heni ng'hatu?” Petili nakesinza Yesu vyowamuzile lwa kadatu, “Kwangungana heni?” Heye nakedichila, “Mkulu, kuvizela vinhu vyeng'ha. Kuvizela kota ndangukugana.” Yesu nakamlonjela, “Ulolele ming'holo ja heni.
JOH 21:18 Ndangukulonjela ndikomya, vyouwele msongolo, nakuvala vyouganile na kuluta kouganile. Ila vyouwa ulalile, kogolola moko ga hegwe na munhu yunji kokibata na kukuhilika honhu hohuganile.”
JOH 21:19 Kwa kulonga ahyo, Yesu nayali yolajila nzila Petili vyoyobagame na kumtogola Nguluwi. Hamba nakamlonjela Petili, “Umbinze heni.”
JOH 21:20 Petili nakagalamka, kamona yula mlanguswa yaganigwe na Yesu yowawinza. Mlanguswa ayo ndo ayula nayekale wamwenga vyowali hamwe wolya, na ndo wamuuzile, “Mkulu, yalikohi yokuhinduka?”
JOH 21:21 Petili vyoyamuwene, nakamuuza Yesu, “Mkulu, yowa ndaze kwa munhu yuno?”
JOH 21:22 Yesu nakamwidichila, “Wone ndilingugana yekale mbaka hondikuya, hegwe yangukulapa choni? Hegwe umbinze heni!”
JOH 21:23 Na mbuli ayo nayenela kwa wala walanguswa kota mlanguswa ayu hobagama hebu. Ila Yesu nahalonjile kota hobagama hebu, ila nakalonga, “Wone ndilingugana yekale mbaka hondikuya, hegwe yangukulapa choni?”
JOH 21:24 Ayu ndo mlanguswa yalonjile mbuli zino na kuzandika. Na hetwe tuvizela kota goyalonjile kakomya ng'hatu.
JOH 21:25 Yesu nakadita mbuli zinji nyinji. Wone vyeng'ha naviwe vyandichigwe mli vitabu, chimwe kwa chiyage, ndangulonga kota isi yeng'ha haiwa na honhu ha kuwika vitabu avyo.
ACT 1:1 Mkulu Teofili kuli chitabu cha heni cha mwaluko nanyandika mbuli zila Yesu zoyaditile na kulangusa kulawila mwaluko wa mijito ja heye,
ACT 1:2 mbaka zuwa lila loyaholigwe kilanga. Hala naloyang'hali kuholigwa kilanga nakawalajiza kwa ludali lwa Muhe Yelile wala watumigwa yawahagule.
ACT 1:3 Kwa mhela wa mazuwa makumi gane hala hoyabagame nayali yowalawila lawila na kilajila kota nayali mkomu. Nawamona, na heye nakalonga gala ga Undewa wa Nguluwi.
ACT 1:4 Mhela loyeting'hane hamwe na hewo nakawalonjela ahi, “Mleche kuka Yelusalemu, ila mbeteze ilagano lyoyawalonjele Mhaza, ila yomina namhuliche ndilonga.
ACT 1:5 Yohani nakabatiza kwa mazi, logokuya mazuwa mado, hemwe mobatizigwa kwa Muhe Yelile.”
ACT 1:6 Ahyo watumigwa loweting'hane hamwe na Yesu, nawamuuza, “Lelo Mkulu mhela awu ndo houwahilusila Waisilaeli undewa wa hewo?”
ACT 1:7 Ila Yesu nakawalonjela, “Mhela na mbuli azo vya hasi ha ludali lwa Mhaza wa heni, kahi hambe iwalape hemwe kuvizela yowa nili.
ACT 1:8 Ila mhela Muhe Yelile loyowadulichilani, mobochela mong'ho na mowa walolezi wa heni kuli Yelusalemu na kuli mkowa wa Yudeya na Samaliya, mbaka kuduma kwa isi yeng'ha.”
ACT 1:9 Loyalonjile ago, weng'ha wawele womlola, kaholigwa kilanga, ng'hungugu imvisa hawamuwene kahi.
ACT 1:10 Lowali wang'hali wolola kilanga, yawele yoluta, baho wanhu weli wawele wavalile nguwo nzelu pee, wema behi na hewo,
ACT 1:11 nawalonga, “Hemwe wanhu wa Galilaya, yandaze mwimile mlola kilanga? Yesu ayu yaholigwe kulawa kwa hemwe kuluta kilanga, kokuya kahi kota hiho vyomumuwene yoluta kilanga.”
ACT 1:12 Hamba watumigwa wahiluka Yelusalemu kulawa kuli chila chidunda chilinguchemigwa chidunda cha Mizeituni, chiwele kilomita imwe kulawa mujini.
ACT 1:13 Lowafichile mujini nawenjila mli chihengo chiwele kuchanya mula mowali wochikala, na hewo wali Petili na Yohani na Yakubu na Andeleya na Filipo na Tomasi na Batolomeo na Matei na Yakubu mwana wa Alufayo na Simoni Zelote na Yudasi mwana wa Yakubu.
ACT 1:14 Awa weng'ha nawekungajiza hamwe kumlanda Nguluwi, hamwe na wadala wamwenga na Maliya mayake Yesu na wang'holoze.
ACT 1:15 Zuwa limwe, Petili nakema hali wala wanhu wawele womkunda wala wali wekungajize, hamwe wanhu weng'ha wali miya imwe na makumi meli,
ACT 1:16 nakalonga, “Wang'holozangu, nayali ilapa honhu ha Maandiko Matakatifu gakoleche, honhu hala Muhe Yelile, kwa ulonzi wa Daudi, nakolonga mbuli za Yudasi yula yawalongoze kuza kumibata Yesu.
ACT 1:17 Yudasi nayali yumwe wa chilundo cha hetwe, mina nakahaguligwa tuwe hamwe mli mijito ya hetwe.”
ACT 1:18 Heye nakagula mgunda kwa zila sendi zoyazipalile kwa madito ga heye gehile, nakagwa hasi nakutulika lida, utumbu wa heye ubohoka kunze.
ACT 1:19 Wanhu weng'ha walingikala Yelusalemu nawahulika mbuli ayo ikoleche, na ahyo kwa ulonzi wa hewo, wauchema ula mgunda Hakeli Dama, Izeleche, “Mgunda wa danda,”
ACT 1:20 “Lelo yandichigwa muli chitabu cha zabuli, “ ‘Mng'handa mwa heye mopona mahame, munhu yoneche yaleche kikala mgati amo.’ Kahi yandichigwa, “ ‘Munhu yunji yahole mijito ya heye.’
ACT 1:21 Lelo munhu yumwe mli wala welongoze na hetwe mhela weng'ha Mkulu Yesu loyali yokwinula majendo hamwe na hetwe, yahaguligwe kilumba na hetwe.
ACT 1:22 Ahyo kangulapigwa yawe yumwe wa wala welongoze na hetwe kulawila Yohani loyali yobatiza mbaka zuwa lila Yesu loyaholigwe kulawa kwa hetwe kuluta kilanga. Ayo kochilumba hamwe na hetwe kukola na kulavya ulolezi wa uzilipuko wa Yesu.”
ACT 1:23 Aho nawachema matagwa ga wanhu weli, wa mwaluko Yusufu yachemigwe Balisaba ama kahi Yusto na wakeli Matiya.
ACT 1:24 Hamba nawamlanda Nguluwi, “Mkulu hegwe kwanguzizela nhumbula za wanhu weng'ha. Ahyo, utulajilile hali awa weli yalikohi youmhagule,
ACT 1:25 leka yahole honhu hano ha mijito ja uchitumagwa woyalechile Yudasi nakaluta honhu hake yuye.”
ACT 1:26 Nawatowa simbi, simbi imgwila Matiya, na heye konjezwa mli wala watumigwa wanji kumi na yumwe.
ACT 2:1 Zuwa lya Pendekosti lolifichile, wanhu weng'ha wali wekungajize hamwe.
ACT 2:2 Bahala lizi lihulikwa kulawa kilanga, iputa ifandile kota mbeho ng'hali, uimemeza ng'handa ila yeng'ha yowali wekale.
ACT 2:3 Hamba navilawila vinhu vyoneche kota milapi ja chiluli, visambalula na kugwa kwa chila yumwe wa hewo.
ACT 2:4 Weng'ha wamemezwa Muhe Yelile, nawaluka kulonga ulonzi winji kota hila Muhe vyoyawadahize kulonga.
ACT 2:5 Na ako Yelusalemu wali kuko Wayahudi, wanhu walingumkunda Nguluwi, walawile chila nhanzi ya isi yeng'ha na kilanga.
ACT 2:6 Lowahuliche lizi alyo, chilundo chikulu cha wanhu nachikungajiza. Weng'ha watinuka lukami kwa vila chila yumwe wa hewo nakawahulika awo wanhu wa Nguluwi wolonga kwa ulonzi wohawavumbuche nawo.
ACT 2:7 Wabubuwala na kulunduwala walonga, “Lelo awa weng'ha tulinguwahulika wolonga ahi, hawawele wenyeng'haye wa Galilaya?
ACT 2:8 Iwa ndaze lelo, kuta chila munhu kanguwahulika wolonga kwa ulonzi wohawavumbuche nawo?
ACT 2:9 Wayetu wamwenga Wapalisi na Wamedi na Waelami na wamwenga ndo wenyeng'haye wa Mesopotamiya na Yudeya na Kapadokia na Ponto na mkowa wa Asiya
ACT 2:10 na Fulugiya na Pamfiliya na Misili na honhu ha Libiya behi na Kulene, wayetu wamwenga ndo wajenzi kulawa Loma,
ACT 2:11 na Wayahudi na wanhu wahinduchile na kwinjila kuli nzila ya kumfugamila Nguluwi ya Chiyahudi, wamwenga walawa Kilete na Alabiya. Hetwe tweng'ha twanguwahulika wolonga kwa ulonzi wotuvumbuche nawo mbuli ng'hulu za Nguluwi.”
ACT 2:12 Weng'ha nawabubuwala kuno wochiuza, “Ayi mina yangutulangusa choni?”
ACT 2:13 Ila wamwe wawabeza wolonga, “Wanhu awa wagala divai inyale ya lehano!”
ACT 2:14 Ila Petili nakema hamwe na wala kumi na yumwe kaluka kuwadamlila wanhu kwa lizi likulu, “Wang'holozangu Wayahudi na hemwe mweng'ha mlingikala hano Yelusalemu, mhulichize goya ulonzi wondilonga.
ACT 2:15 Wanhu awa hawagalile kota vyomlinguvizela, sambi ya saa tatu hela mitondo?
ACT 2:16 Kukomya ndo kota mbuli ayi ndo ila yoyalonjile Yoeli nayawele mloli wa Nguluwi,
ACT 2:17 “ ‘Mli mazuwa gala ga kuduma, nakalonga Nguluwi, ndowajidila wanhu weng'ha Muhe wa heni. Wana wa hemwe wa chilume na wachidala wolavya uloli. Wasongolo wa hemwe wokona ulotezi, na wasekulu wa hemwe wolota.
ACT 2:18 Ena, na vitumagwa wa heni wachilume na wachidala, ndowajidila Muhe wa heni mazuwa gala, na hewo wolavya uloli.
ACT 2:19 Ndodita vinduzanduza mchanya kilanga, na ulajilo hasi muisi, kowa na danda na chiluli na miyosi jizidahe,
ACT 2:20 isanya lyoditilwa jiza, na isaye lyowa lidung'hu kota danda, hala hainalawila zuwa lila likulu na iwele na ukulu wa Mkulu.
ACT 2:21 Aho yoneche yomchema Mkulu kwa utanzi, koloholigwa.’
ACT 2:22 “Wanhu wa Isilaeli, mhulichize ulonzi awu! Yesu wa Nasaleti nayali munhu yula Nguluwi kamlajila kwa ludali lwa ulajilo na vinduzanduza na kububuwaza na vila Nguluwi vyoyaditile hali hemwe kukolela heye, kota vyomvizelele.
ACT 2:23 Kota navyoyaganile heye kulawa mwaluko, Nguluwi nakalamula kuta Yesu yawichigwe mmoko mwa hemwe, na hemwe mumkopola kwa kuwalechela wanhu wehile wamuwambe mumsalaba.
ACT 2:24 Ila Nguluwi nakamzilipula, kamlohola kuli usungu wa kubagama mina na haiganigwe ng'hatu kubagama kumuwohe.
ACT 2:25 Mina Daudi nakalonga mbuli za Mkulu kota ahi, “ ‘Nandimonaga Mkulu kumwando kwa heni mazuwa gose, kahamwe nzingo ya heni ya kudilo, nani hambe nhigasiche.
ACT 2:26 Ahyo, nhumbula ya heni yangusangalala, na lumyango lwangu nalutowa luchenze lwa kusangalala. Na lukuli lwa heni lochikala muli kitumbila,
ACT 2:27 kwa vila hegwe Nguluwi, huileka nhumbula ya heni kuli isi ya wabagame, ne humkundiza yelile wa hegwe yole mchilaga.
ACT 2:28 Kundajila nzila za ukomu, kumemeza usangalalo kwa kuwa baho hegwe!’
ACT 2:29 “Wang'holozangu, ndangugana kuwalonjela ndikangaze mbuli zimfichile Daudi, sekulu wa hetwe yatanganiche. Heye nakabagama na katiligwa, kahi chilaga cha heye cha bahano hakaye hetu mbaka lehano.
ACT 2:30 Ila kwa vila Daudi nayali mloli wa Nguluwi, nakavizela kuta Nguluwi kamlahila kuta komhaliza yumwe wa lulelo lwa heye yawe mndewa wa honhu hake.
ACT 2:31 Daudi nakona kung'hali mbuli zoyodita Nguluwi na ahyo nakalonga gala ga uzilipuko wa Kilistu mlohozi hala hoyalonjile, “ ‘Halechigwe kuli isi ya wabagame, lukuli lwa heye halolile mli chilaga.’
ACT 2:32 “Lelo Nguluwi nakamzilipula ayu Yesu na hetwe tweng'ha twa walolezi wa mbuli ayi.
ACT 2:33 Heye loyakwinizwe na kuwichigwa na Nguluwi nzingo ya heye ya kudilo, nakabochela kwa heye mhaza yula Muhe Yelile nayalagane na hetwe, nakatujidila ayo Muhe. Acho ndo mlinguchona sambi na kuhulika.
ACT 2:34 Mina heye Daudi, hakwinile mbaka kilanga, ila heye nakalonga. “ ‘Mkulu nakamlonjela Mkulu wa heni, kalise nzingo ya heni ya kudilo,
ACT 2:35 mbaka ndiwadite wang'honyo wa hegwe wawe chigoda cha kuwichila magulu ga hegwe.’
ACT 2:36 “Wanhu weng'ha wa Isilaeli wangulapigwa kuvizela kuta ayo Yesu yomumgazile, ndo yuye yula Nguluwi yamditile yawe Mkulu na Kilistu Mlohozi!”
ACT 2:37 Lelo wanhu lowahuliche ahyo, wahomwa nhumbula, nawamuuza Petili na watumigwa wayage, “Wang'holozetu tudite ndaze?”
ACT 2:38 Petili nakedichila, “Mumgalamchile Nguluwi na chila yumwe wa hemwe yabatizigwe kwa itagwa lya Yesu Kilistu, leka musilwe gehile ga hemwe na kubochela ndolendole ndo iwele Muhe Yelile.
ACT 2:39 Mina, ilagano lila lyomuwichilwe hemwe, na lyomuwichilwe na wana wa hemwe, na kwa wanhu weng'ha walingikala kutali na kwa chila munhu yula mkulu Nguluwi wa hetwe komchema kwa heye.”
ACT 2:40 Kwa ulonzi unji winji, Petili nakalajiliza na kuwahimiliza wanhu yolonga, “Milohole na lulelo alu lwihile.”
ACT 2:41 Wenji nawaukunda ulonzi wa heye, wabatizigwa. Wanhu wawele elufu zidatu wonjezeka kuli chila chilundo zuwa alyo.
ACT 2:42 Awa weng'ha walutilila kilangusa kwa watumigwa. Hamba nawalutilila kikala hamwe chilukolo na kumogola ibumunda na kumlanda Nguluwi.
ACT 2:43 Vinduzanduza vinji na kububuwaza navilajilwa kwa kukolela watumigwa na chila munhu nakadumba.
ACT 2:44 Wanhu weng'ha wawelengumkunda Nguluwi wazanguwa chinhu chimwe na vinhu vya hewo wazangigawila.
ACT 2:45 Wali woguza lufufu lwawo na vinhu vya hewo hamba nawegawila sendi kota chila munhu vyoyalapile.
ACT 2:46 Nawalutilila kiting'hana hamwe chila zuwa kuli Ng'handa ya Nguluwi. Ila mhela wa kumogola mibumunda, naweting'hana mli ng'handa za hewo walya hamwe ndiya ayo kwa usangalalo na nhumbula igonzoche.
ACT 2:47 Nawamtogola Nguluwi, nakuganigwa na wanhu weng'ha. Chila zuwa Mkulu nakawonjezela wanhu kuli lng'hongola lwa lwawo lwa wala wanhu nawali woloholigwa.
ACT 3:1 Zuwa limwe, saa tisa nemisi, Petili na Yohani wali woluta Ng'handa ya Nguluwi, mhela wa kumlanda Nguluwi.
ACT 3:2 Mhela awo wanhu wali wompika munhu yumwe chete kulawila loyaleleche. Wanhu awo wali womuwika ayo munhu chila zuwa muli chihindilo cha Ng'handa ya Nguluwi ulinguchemigwa Chihindilo Chinojile, leka yalande choneche kwa wala wokwinjila Ng'handa ya Nguluwi.
ACT 3:3 Loyawawene Petili na Yohani wokwinjila Ng'handa ya Nguluwi, nakawalanda wampe choneche.
ACT 3:4 Petili na Yohani wamnogolela meho, heye Petili nakamlonjela, “Tulole!”
ACT 3:5 Heye nakawagalamchila, yochitumbila hanji kopegwa chinhu choneche kwa hewo.
ACT 3:6 Hamba Petili nakamlonjela, “Ndahela sendi ne zahabu, ila chila chondilinacho ndokupa. Kwa itagwa lya Yesu Kilistu wa Nasaleti, wime na ujende!”
ACT 3:7 Kahi, nakamibata moko wa kudilo, kamwinula. Baho magulu na mafugamilo ga heye nagali na ludali.
ACT 3:8 Kanyozoka, kema kaluka kujenda. Hamba kenjila na hewo Ng'handa ya Nguluwi, yojenda na kunyozoka nyozoka kuno yomtogola Nguluwi.
ACT 3:9 Wanhu weng'ha wawele aho nawamona yojenda na kumtogola Nguluwi.
ACT 3:10 Lowavizelele kuta ndo yula yaliyolanda behi na chila Chihindilo Chinojile cha Ng'handa ya Nguluwi, nawabubuwala lukami na kulemwela kuvizela gamlawile.
ACT 3:11 Wanhu weng'ha, wang'hali wabubuwale ng'hatu, nawaluka kubilimila honhu hali nguchemigwa “Chipepela cha Solomoni,” Hala yula munhu nayali yang'hali yawebate Petili na Yohani.
ACT 3:12 Lelo Petili yawawene wanhu awo nakawalonjela, “Wanhu wa Isilaeli, lekachoni mwangububuwala kwa mbuli ayi? Lekachoni mwangutunogolela meho kota ndo kwa mong'ho wa hetwe ama kwela kwa hetwe twetwe ndo kumditile munhu ayu yajende?”
ACT 3:13 Nguluwi wa Abulahamu na Isaka na Yakubu, Nguluwi wa wasekulu wa hetwe yamtogole chitumagwa wa heye Yesu. Heye ndo yuyula mmuwichile mmoko ga wakulu na kumlema hali Pilato, hanga Pilato yaganile kumlechela.
ACT 3:14 Yali yelile na yanojile, ila hemwe namumlema, namumgana munhu yunji yawele mkopolaji yalechelwe.
ACT 3:15 Lelo mumkopola yula nayaditile mwaluko wa ukomu. Ila Nguluwi nakamzilipula, na hetwe twa walolezi wa mbuli ayo.
ACT 3:16 Itagwa lya Yesu na makundo mli itagwa alyo ndo vimpele ludali munhu ayu mlingumona nakumzela. Makundo kwa Yesu ndo gamusile ng'hatu munhu ayu kota vyommona mweng'ha.
ACT 3:17 “Lelo wang'holozangu, hemwe na wakulu wa hemwe namdita mbuli azo kwa kuleka kuvizela.
ACT 3:18 Lelo Nguluwi ndo vyoyaditile gala goyadamle aho katali kwa kukolela waloli weng'ha, mina naimlapa Kilistu Mlohozi wa heye yagaziche.
ACT 3:19 Lelo mumgalamchile Nguluwi, leka heye yawosele gehile ga hemwe.
ACT 3:20 Mdite ahyo leka Mkulu yawape mhela wa kwesela na kuwagalila yula Kilistu Mlohozi, yula ndo Yesu.
ACT 3:21 Ilapa yapone kuko kilanga mbaka houfika mhela wa kugongomanya vinhu vyeng'ha, kota Nguluwi vyoyalonjile kwa kukolela waloli wa heye welile kulawila katali.
ACT 3:22 Kwa vila Musa mina nakalonga, ‘Mkulu Nguluwi wa hemwe kokugalilani hali wang'holozenu mloli wa Nguluwi kota heni. Mumhulichize heye kwa mbuli zeng'ha zoyowalonjela.
ACT 3:23 Yoneche homuhulichiza Mloli ayo kobaguligwa kutali na wanhu wa Nguluwi na kudumigwa.’
ACT 3:24 Waloli weng'ha, kwaluchila Samweli na wala wamuwinzile, nawadamla mbuli azi zila zali zikoleka mazuwa gaga.
ACT 3:25 Malagano gala Nguluwi goyalavile kwa kukolela waloli ndo kahi kwa mbuli ya hemwe, na mwangilumba kuli ilagano Nguluwi lyoyaditile na wasekulu wa hemwe, kota voyamlonjele Abulahamu, ‘Kwa kukolela walelwa wa hegwe na ivyazi lyeng'ha lyako muisi lyotambichizwa.’
ACT 3:26 Lelo Nguluwi nakamzilipula chitumagwa wa heye kwa mbuli ya hemwe tandi, nakamlajiza yakugalileni utambichizo kwa kumdita chila munhu wa hemwe yalekane ng'hatu na gehile ga heye.”
ACT 4:1 Petili na Yohani lowang'hali wowadamlila wanhu, watambika na wakulu wa wamizi wa ng'handa ya Nguluwi hamwe na Masadukayo nawafika.
ACT 4:2 Nawazudila lukami, mina awo watumigwa wali wowadamlila wanhu kuta Yesu nakazilipuka, mbuli ilingulajila wabagame wozilipuka.
ACT 4:3 Hamba wawebata na kwa vila nechilo nayali ikwinjila, wazanguwamila mbaka hamitondo.
ACT 4:4 Ila wenji nawahuliche awo ulonzi nawakunda, na chilundo cha wanhu chizangonjezeka kwa kuwaza iwa ifichile walume elufu zihano.
ACT 4:5 Mitondo wakulu wa Wayahudi, wasekulu na walangusa wa malajizo ga Musa naweting'hana hamwe ako Yelusalemu.
ACT 4:6 Neweting'hana hamwe na Anasi mtambika mkulu na Kayafa na Yohani na Alekizanda na wanji wali wa lukolo lwa mtambika mkulu.
ACT 4:7 Lowawemize Petili na Yohani kumwando kuli hewo, nawawauza, “Hemwe mwangudita mbuli azi kwa mong'ho wachi ama kwa itagwa lya munhu yachi?”
ACT 4:8 Aho Petili yawele yamemile Muhe Yelile, nakawalonjela, “Vilongozi na wakulu wa wanhu!
ACT 4:9 Wone mwangutuuza lelo hano chila chidito chinojile choyaditilwe yula munhu nayali chete na vyoyaditigwe yawe mkomu,
ACT 4:10 lelo, hemwe na wanhu weng'ha wa Isilaeli mwangulapigwa kuvizela kuta munhu ayu kema kumwando kwa hemwe lelo hano, mkomu ng'hatu, kwa itagwa lya Yesu Kilistu wa Nasaleti yula hemwe namumuwambile mumsalaba, ila Nguluwi nakamzilipula.
ACT 4:11 Ayu ndo yula Maandiko Matakatifu gangulonga, “ ‘Iganga lyowalilemile walinguzenga, lelo liwa iganga likulu lya msisi.’
ACT 4:12 Haduhu ulohozi hambe upegwe kwa munhu yunji yoneche, mina hasi mwa ulanga, kuduhu itagwa linji Nguluwi yatupele hetwe toweza kuloholigwa nalyo.”
ACT 4:13 Awo wakulu wa kutagusa, wawele wavizelele kuta Petili na Yohani wali wanhu hawasomile ne kuwa na uwanzi woneche ila na wabubuwala vyonawadahile kulonga ne kudumba. Wali wavizelele kuta wali welumbile na Yesu.
ACT 4:14 Ila lowamuwene yula munhu yosilwe utamwa yemile hamwe na hewo, hawalonjile chinhu.
ACT 4:15 Ahyo nawawalonjela walawe kunze kuli chitala, na hewo nawapona mng'handa waliyeng'ha wolongasa chinyele.
ACT 4:16 Wakulu wa utaguso wazangiuza, “Tudite choni na wanhu awa? Chila munhu yalingikala Yelusalemu kanguvizela kuta ulajilo wa chinduzanduza achi na kububuwaza aku kukoleka, na hetwe hatubela mbuli ayi.
ACT 4:17 Ila wone tugana mbuli ayi ileche kwenela ng'hatu kuli wanhu wesa, tuwadeuze waleche kulonga na munhu yoneche kwa itagwa lya Yesu.”
ACT 4:18 Ahyo wawachema kahi mung'handa, waleche kuwalonjela wanhu honhu honeche kahi waleche kulangusa kwa itagwa lya Yesu.
ACT 4:19 Ila Petili na Yohani nawawedichila, “Mwamule mwemwe wone inoga hali Nguluwi kuwahulichiza hemwe kuleka kumhulichiza Nguluwi.
ACT 4:20 Hetwe hatuleka ng'oo kulonga mbuli zila zotuziwene na kuhulika.”
ACT 4:21 Lelo awo wasekulu wa kutagusa wawadeuza kwa kuwang'hang'halila ng'hatu, hamba wawalechela. Hawawagazile kwa vila wanhu weng'ha nawali womtogola Nguluwi kwa mbuli ayo ilawile.
ACT 4:22 Ayo munhu yoselwe utamwa nayali na ukulu upulute miyaka makumi gane.
ACT 4:23 Bahala lowalechelwe, Petili na Yohani wahiluka kwa wayao, wawalonjela gala gowalonjelwe na watambika wakulu na wasekulu.
ACT 4:24 Na hewo lowahuliche mbuli azo welumba hamwe na wayao kumlanda Nguluwi wakangaze wolonga, “Mkulu, hegwe ulumbile ulanga na isi, bahali na vyeng'ha vilimumo!
ACT 4:25 Ndo umditile chitumagwa wa hegwe, mhaza wa hetwe Daudi, yalonje kwa ludali lwa Muhe Yelile, “ ‘Lekachoni wanhu wa isi zeng'ha wazudila? Lekachoni wanhu wangijesa wihe?
ACT 4:26 Wandewa wa isi mina nawewika goya, na vilongozi wa isi naweting'hana hamwe, kumlema Mkulu na Kilistu Mlohozi.’
ACT 4:27 Mina, hino ndo vyoili Helodi na Pontio Pilato na wanhu wa Isilaeli na wanhu wa isi zinji, vyowating'hane baha mujini, kumlemela Yesu chitumagwa wa hegwe Yelile yula youmhagule yawe Kiliistu Mlohozi.
ACT 4:28 Ena, naweting'hana wogana wadite mbuli zila zouganile na kuwika goya kulawila mwaluko kwa ludali na igano lya hegwe.
ACT 4:29 Ila lelo, hegwe Mkulu, ulole kukabusa kwa hewo ututanze hetwe vitumagwa wa hegwe kudamla lizi lya hegwe ne kudumba.
ACT 4:30 Golose moko wa hegwe leka uwalohole wanhu. Dite ulajilo na vinduzanduza kwa itagwa lya Yesu chitumagwa wa hegwe Yelile.”
ACT 4:31 Lowasindile kumlanda Nguluwi, hala honhu howali weting'hane hatigaswa, na weng'ha wamema Muhe Yelile. Weng'ha walutilila kudamla lizi lya Nguluwi ne kudumba.
ACT 4:32 Nhanzi yeng'ha ya chilundo cha wanhu walingumkunda Kilistu wali na nhumbula na Muhe yumwe. Haduhu ne yumwe nayali na chinhu choneche yachiwiche chiwe cha heye yaliyeng'ha, ila nawewigawila vyeng'ha vyowalinavyo.
ACT 4:33 Watumigwe nawalavya ulolezi kwa ludali lwinji kuzilipuka kwa Mkulu Yesu, na Nguluwi kawapa kunoga kwa heye kwinji.
ACT 4:34 Haduhu ne munhu nayesilwe chinhu, mina wawele na migunda ama ng'handa waliwoziguza,
ACT 4:35 na kuwapa watumigwa azo sendi, na kigawila chila munhu vyoyalingulapa.
ACT 4:36 Kwali na Mlawi yumwe yaleleche Kupulo, itagwa lya heye Yusufu, yula watumigwa nawamchema Banaba, izeleche “Munhu yawelenguwakangaza nhumbula wanhu.”
ACT 4:37 Heye naye nayali na mgunda nakauguza nakahola zila sendi kawegalila watumigwa.
ACT 5:1 Munhu yumwe yalinguchemigwa Ananiya na mdala wa heye Safila nawaguza mgunda wa hewo vivila.
ACT 5:2 Ila mdala wa heye yawele yavizelele, Ananiya nakewichila chasi cha sendi zoyapatile na chasi chiyage kawapa watumigwa.
ACT 5:3 Hamba, Petili nakamuuza, “Ananiya, lekachoni Limazoga yenjile mnhumbula ya hegwe na kukudita umuhade Muhe Yelile kwa kiwichila sendi zoupatile kwa kuguza ula mgunda?
ACT 5:4 Hala hunaliguza lyali lyako, na louliguzile, azo sendi zali za hegwe ukolele chougana. Lelo lekachoni uganile kudita mbuli ili ahi mnhumbula ya hegwe? Humuhadile munhu, kumhada Nguluwi!”
ACT 5:5 Ananiya loyahuliche ahyo kagwa hasi nakabagama. Wanhu weng'ha wahuliche mbuli ayo ilawile nawadumba lukami.
ACT 5:6 Wasongolo weza, nawagubika mtufi wa heye waulavya kunze nawautila mchilaga.
ACT 5:7 Logamalile masaa gadatu hino, mchewake yawele hanavizela galawile, kenjila mla mng'handa.
ACT 5:8 Petili nakamlonjela, “Ndonjele! Azi sendi ndo zompatile kwa kuguza ula mgunda?” Heye nakamlonjela? “Ena zizo.”
ACT 5:9 Yolawa Petili nakamlonjela, “Lekachoni lomilanguse kumhada Muhe wa Mkulu? Hulichize! Wala wanhu walutile kumtila mchilaga mlume wa hegwe, sambi wa mchihilindilo na hegwe nagwe wokuhola kahi.”
ACT 5:10 Bahala Safila nakagwa mli magulu ga Petili nakabagama. Wala wasongolo lowenjile, wamfika mina yabagame, ahyo nawamlavya kunze, wamtila mchilaga behi na mlume wa heye.
ACT 5:11 Chilundo cha wanhu walingumkunda Kilistu na wanhu wanji wahuliche mbuli ayo nawadumba lukami.
ACT 5:12 Watumigwe nawalajila vinduzanduza na kububuwaza kwinji hali wanhu. Wanhu wa wamkundile Yesu wali wochiting'hana hamwe mli chipepela cha Solomoni.
ACT 5:13 Munhu yunji hela nayali yodumba kilongoza na hewo. Ahyo wanhu wenji wala hawawele wa makundo ago, nawawatogola.
ACT 5:14 Wanhu wenji walume na wadala nawamkundile Mkulu, nawonjezeka mli chilundo cha hewo.
ACT 5:15 Na wanhu wali wowagala watamwa wa hewo mnzila na kuwawasiliza mchanya mli vinhanda na mmicheka Petili wone yakole, wogana chibehelo cha heye chiwadolize wanhu wamwenga.
ACT 5:16 Wanhu wenji nawoya wolawila honhu hafungofungo ha Yelusalemu, wowegala watamwa wa hewo na wala wali na chijeni chihile, na hewo weng'ha wosilwa utamwa.
ACT 5:17 Hamba mtambika mkulu na wayage wali wa chilundo cha Masadukayo wa honhu aho, wawonela maya watumigwa.
ACT 5:18 Hamba, wawebata watumigwa wawahindila mchinweng'ho.
ACT 5:19 Ila hamihe mhilisi wa Mkulu na kachumula chihindilo cha chinweng'ho, kawalavya kunze, nakawalonjela,
ACT 5:20 “Mlute na mwime mng'handa hali Ng'handa ya Nguluwi mkawalonjele wanhu ulonzi weng'ha wa ukomu awu.”
ACT 5:21 Watumigwe nawakunda, nawenjila mli Ng'hada ya Nguluwi kung'hali lufuku, nawaluka kulangusa. Mtambika mkulu na wayage lowafichile nawachema nhing'hano ng'hulu na wakulu weng'ha wa utaguso na vilongozii wa Wayahudi, wawalajiza wanhu kuchinhweng'ho leka wakawegale wala watumigwa.
ACT 5:22 Ila wala vitumagwa lowafichile ako hawawafichile mla mowawahindile. Ahyo nawahiluka, wazalonga luzi mnhing'hano,
ACT 5:23 wolonga, “Natufika honhu howahindilwe hahindigwe chila nzingo na wamizi wololela mchihindilo. Ila lotuchumule mla mg'handa hatumuwene munhu yoneche.”
ACT 5:24 Mkulu wa wamizi wa ng'handa ya Nguluwi na watambika wakulu lowahuliche mbuli ayo wazangudumba, waleche kuvizela gawapatile.
ACT 5:25 Keza munhu yumwe, nakawalonjela, “Wala wanhu womuhindile mchinhweng'ho, ahi sambi wa Ng'handa ya Nguluwi, wangulangusa wanhu.”
ACT 5:26 Aho mkulu wa wamizi wa ng'handa ya Nguluwi hamwe na wanhu wa heye nawaluta ng'handa ya Nguluwi, kuwegala. Ila hawawebate kwa lupichi, mina nawadumba wanhu wowatowa na maganga.
ACT 5:27 Hamba wawegala, wawemiza kumwando hali chitala. Mtambika mkulu nakawalonjela,
ACT 5:28 “Natuwalemeza ng'hatu kulangusa kwa itagwa lya munhu ayu, lelo mvumiza malanguso ga munhu ayu kwesa Yelusalemu, lelo mwangugana kutuwichila nongwa ya kubagama kwa munhu ayu.”
ACT 5:29 Aho Petili, yawele hamwe na wala watumigwa wanji, nakedichila, “Igana kumuhulichiza Nguluwi kusinda wanhu.
ACT 5:30 Nguluwi wa hetwe nakamzilipula Yesu kulawila hala hemwe homumkopole na kumuwamba mumsalaba.
ACT 5:31 Ayu ndo yula yakwinizwe na Nguluwi mbaka nzingo ya heye ya kudilo. Kawa chilongozi na mlohozi, leka yawadahize wanhu wa Isilaeli wamgalamchile Nguluwi, na kusilwa gehile ga hewo.
ACT 5:32 Na hetwe twanguvumila mbuli ayo, na heye Muhe Yelile yula Nguluwi yawapele wala walingumuhulichiza, kangulavya ulolezi kwa mbuli ilawile.”
ACT 5:33 Wanhu weng'ha wawele hala mchitala lowahuliche ahyo wazudila, wazangugana kuwakopola watumigwa.
ACT 5:34 Ila Mfalisayo yumwe nayali nguchemigwa Gamalieli yula nayali mlangusa wa malajizo ga Musa nayatanganiche ng'hatu hali wanhu weng'ha, nakema mchitala, kagana wala watumigwa walavigwe kunze hado.
ACT 5:35 Hamba nakawalonjela wala wanhu wa kutagusa, “Wanhu wa Isilaeli, mijese hala hamnakola chila chomlingugana kuwakolela wanhu awa!
ACT 5:36 Katali hado, nakalawila munhu yumwe itagwa lya heye Seuda, kazangidita kota kamunhu yatanganiche na wanhu wafichile miya zine welongoza na heye. Ila nakakopoligwa, na chilundo cheng'ha cha heye chisambaluka na kwaga.
ACT 5:37 Kahi, heni hamba, mhela ula wa kuwazigwa wanhu, nakalawila Yudasi wa Galilaya. Na heye ayu nakawakwega wanhu wamuwinza, ila na heye nakakopoligwa na wala waliwomuwinza wasambaluka.
ACT 5:38 Na kahi heni sambi ndangukulonjelani, mleche kuwaditila wanhu awa chinhu choneche chila, mina wone mbuli ayi ya hewo yaluchizwe na wanhu, yokwaga iliyeng'ha.
ACT 5:39 Ila wone yaluchizwe na Nguluwi, haiwele hela kota molemwa kuwasumya, ila mochifika mumlema Nguluwi!” Hamba, wekundiza na heye.
ACT 5:40 Ahyo wawachema wala watumigwa, hamba nawawalonjela watowigwe ng'hobwa na kuwalemeza waleche kulangusa kwa itagwa lya Yesu, hamba nawawaleka walute.
ACT 5:41 Ahyo watumigwa nawalawa hala mchitala wawele wasangalale, mina nawalapigwa kubasigwa soni kwa itagwa lya Yesu.
ACT 5:42 Chila zuwa wazangulangusa na kudamla mli Ng'handa ya Nguluwi na ng'handa za wanhu Mbuli Inojile kota Yesu ndo Kilistu Mlohozi yahaguligwe.
ACT 6:1 Hamba, lung'hongola lwa walanguswa vyolwali luvila ng'hatu, nakulawila kung'hung'huta hali wanhu walingukunda walingulonga Chigilichi na wala walingulonga Chiebulaniya. Wala walingulonga Chigilichi waliwong'hung'uta kota walekwa wa hewo wali wosemwigwa kuli kugawilwa vinhu vyowali wolapa chila zuwa.
ACT 6:2 Ahyo, watumigwa kumi na weli nawaichema nhanzi yeng'ha ya walanguswa, nawalonga, “Hainojile hetwe tuleche kudamla lizi lya Nguluwi hamba tuzengigayila kigawila vinhu vyotulingugana kwa malapo ya chila zuwa.
ACT 6:3 Ahyo wang'holozetu, mhagule hali hemwe wanhu saba watanganiche, wamemile Muhe na luhala lwa kumuhulichiza Nguluwi, na hetwe towapa hemwe ludali alo lwa kigawila vinhu.
ACT 6:4 Twetwe baha, tochinweg'ha kumlanda Nguluwi na mijito ya kudamla ulonzi wa Nguluwi.”
ACT 6:5 Mbuli ayo iwanojeza nhanzi ya wanhu weng'ha wa Nguluwi. Wamhagula Stefani, munhu nayali na makundo makulu na yamemile Muhe Yelile nawamhagula kahi Filipo na Pilokolo na Nikanoli na Timona na Pamena na Nikolao wa Antiokiya yula mhela umwe nayali yahinduchile na kwinjila kuli nzila ya Chiyahudi ya kumfugamila Nguluwi.
ACT 6:6 Nawawawika kumwando kwa watumigwa, na hewo nawawalandila na kuwawichila moko.
ACT 6:7 Lizi lya Nguluwi luza kwenela na wanhu wa Nguluwi ako Yelusalemu wonjezeka ng'hatu, na chilundo chikulu cha watambika nawabochela makundo ga Yesu.
ACT 6:8 Stefani nakabochela kunoga kwinji kwa Nguluwi, ludali lwinji na kazangulajila vinduzanduza hali wanhu.
ACT 6:9 Ila wanhu wamwenga nawalawila wetwanjize na Stefani. Wanhu awo wamwenga wali wa ng'handa imwe ya kusalila ilinguchemigwa, ng'handa ya wanhu welejehe, na hewo nawalawa Kulene na Alekizandilia, wamwenga nawalawa Kilikiya na mkowa wa Asiya.
ACT 6:10 Ila nawalemwa kitwanza na heye kwa mbuli ya luhala lwake na yula Muhe Yelile yamlongoze mhela loyalonjile.
ACT 6:11 Ahyo nawawasonjeleza wanhu wamwe walonje, “Tumhulika Stefano yolonga mbuli za kumliga Musa na kumliga Nguluwi.”
ACT 6:12 Kwa chiwalo acho, nawawasonjeleza wanhu na wasekulu na walangusa wa malajizo ga Musa. Lelo wamuyila Stefani, wamibata wamigala hali chitala chikulu.
ACT 6:13 Wawegala mchitala walolezi wa udesi wala nawalonga, “Munhu ayu hambe yaleche kulonga ulonzi wa kuliga honhu helile na malajizo ga Musa.
ACT 6:14 Mina natumhulika yolonga ayo Yesu wa Nasaleti kowifya ng'hatu ng'handa ya Nguluwi na kuchigalamla chihendo chila chotubochele kwa Musa.”
ACT 6:15 Weng'ha wawele mli chitala wamnogolela meho Stefani, wona kumeho kwa heye kuwele kota mhilisi wa kilanga.
ACT 7:1 Lelo mtambika mkulu nakamuuza Stefani, “Ndaze! Mbuli azi kwangukomya ndo vyozili?”
ACT 7:2 Stefani nakedichila, “Wang'holozangu na wahaza wa heni, mnyhulichize! Nguluwi wa ukulu nakamlawila Mhaza wa hetwe Abulahamu loyali yochikala Mesopotamiya, naloyang'hali kikala Halani,
ACT 7:3 Nguluwi nakamlonjela, ‘Uche muisi ya hegwe, uwaleche wang'holozo, ulute kuli isi yondikulajila.’
ACT 7:4 Ahyo Abulahamu nakoka muisi ya Kalidayo na kuza kikala Halani. Nakoka ako mhaza wa heye lonayabagame, Nguluwi nakamusa mbaka isi ayi yomlingikala hemwe sambi.
ACT 7:5 Nguluwi nahampele ne honhu hamwe hadodo ha isi ayi iwe ya heye, leka ahyo, nakalagana na heye kota komha isi ayi iwe ya heye na ya walelwa wa heye, hanga mhela awu hawele na mwana.
ACT 7:6 Nguluwi nakamlonjela ahi, ‘Lulelo lwa hegwe loza kikala isi ilingulongozwa na wanhu wanji, ako woditigwa wapogozi na kuditigwa vibi kwa mhela wa miyaka miya na jine.
ACT 7:7 Ila heni ndoitagusa ayo isi iwadita hemwe wapogozi. Hamba ndowalavya kuli isi ayo woye wafugamile heni Nguluwi honhu aha.’
ACT 7:8 Hamba Nguluwi nakadita na heye ilagano liwele kwinjila ikumbi ndo liwa ulajilo wa ilagano lya heye. Ahyo, Abulahamu nakamwinjiza ikumbi mwanage Isaka zuwa lya nane hala hoyaleleche. Na Isaka, hihyo, nakamwinjiza Yakubu. Na heye Yakubu nakawenjiza wala wana kumi na weli wawele ndo wasekulu wa hemwe.”
ACT 7:9 “Wala wana wa Yakubu, nawamonela maya Yusufu, nawamuguza muupogozi Misili. Ila Nguluwi nayali hamwe na heye,
ACT 7:10 nakamlohola kuli magazo ga heye gesa. Nguluwi nakamganila isungu na luhala hali Falao, Mndewa wa Misili, na heye Falao nakamuwika yawe mng'hangala wa ila isi na ng'handa ya chiundewa.
ACT 7:11 Hamba nakulawila nzala ng'hulu kuli isi yeng'ha ya Misili na Kanani, nayambuza kugaya kukulu. Wasekulu wa hetwe hawawele nachoneche cha kulya.
ACT 7:12 Hamba Yakubu loyahuliche mbuli kuta ako Misili kwali na chilyo, nakawalajiza wanage, wawele ndo wasekulu wa hetwe, waluche kuluta ako Misili kuli majendo ga mwaluko.
ACT 7:13 Mli majendo ga hewo ga keli, Yusufu nakelajila kwa wang'holoze, na Falao Mndewa wa Misili, nakaizela nhanzi ya Yusufu.
ACT 7:14 Yusufu nakawalajiza wasenga wamcheme Yakubu na nhanzi yeng'ha, weng'ha wanhu makumi saba na wahano woye Misili.
ACT 7:15 Ahyo, Yakubu nakaluta Misili kula heye na wanage nawabagama.
ACT 7:16 Mitufi ja hewo najigaligwa mbaka Shekemu, jiwichigwa mli vilaga vila Abulahamu nayali yagulile kwa nhanzi ya Hamoli kwa chasi chimwe cha sendi.
ACT 7:17 “Mhela lowali habehi Nguluwi yagongomanye ilagano loyampele Abulahamu, wanhu kula Misili wali mina wonjezeche nakuwa wenji ng'hatu.
ACT 7:18 Hamba, yula mndewa yumwe nahamzelele Yusufu nakaluka kulongoza ako Misili.
ACT 7:19 Nakaiditila nhanzi ya hetwe wihe, kawaditila wasekulu wa hetwe na kuwakola lupichi wawawiche hanze wana wawele vyali leka wabagame.”
ACT 7:20 Musa nakaleligwa mhela awo. Yali mwana yanojile ng'hatu. Nakaleligwa mng'handa ya Nguluwi kwa myezi jidatu.
ACT 7:21 Na loyalavigwe kunze yabagame, mhiza wa Falao, Mndewa nakamhola, na heye kamlela kota mwanage.
ACT 7:22 Musa nakalanguswa luhala lweng'ha lwa Wamisili kawa na ludali lwa kulonga na kudita vinhu.
ACT 7:23 “Loyali na ukulu wa miyaka makumi gane nakalapa kuza kuwalola wang'holoze Waisilaeli.
ACT 7:24 Ako nakamona myao yumwe yoditilwa vibi na Mmisili, nakaluta kumgombola, na kuwalipiza hewo, kamkopola yula munhu.
ACT 7:25 Musa nakejesa kota Waisilaeli wayage nawavizela kota Nguluwi yahetumbile heye kuwalohola, ila nahawavizelele ahyo.
ACT 7:26 Mitondo yake, nakawona Waisilaeli weli wochitowa, kajeza kuwahanyisa yolonga, ‘Mwalukolo, lekachoni kilumiza mwemwe yeng'ha?’
ACT 7:27 Yula nayali yomtowa miyage nakamkundujiza Musa hafungo yolonga, ‘Whaani yakuwichile hegwe uwe chilongozi na mlewezi wa hetwe?’
ACT 7:28 ‘Kwangugana kung'hopola kota vyoumkopole yula Mmisili mitondo?’
ACT 7:29 Loyahuliche ago, Musa nakadwina, kazakikala kuli isi ya Midiani na ako kalela wana weli.
ACT 7:30 “Mihela makumi gane logafichile, mhilisi wa Mkulu nakamlawila Musa kuli chisosolo chilingwaka chiluli kula kugunuche behi na chidunda cha Sinai.
ACT 7:31 Musa nakabubuwala ng'hatu kona alyo lilawile mbaka kahejela behi yasunjilile, ila kahulika lizi lya Mkulu,
ACT 7:32 ‘Heni nda Nguluwi wa sekulu wa hegwe Nguluwi wa Abulahamu na Nguluwi wa Isaka na Nguluwi wa Yakubu.’ Musa kaza kukakama yodumba hajezile kahi kulola ng'hatu.
ACT 7:33 Mkulu nakamlonjela, ‘Vule makwamba ga hegwe, mina aha honhu houkwima ndo honhu Helile.
ACT 7:34 Ndigona ng'hatu, gehile gowalinguditilwa wanhu wa heni kula Misili. Nyhulika chililo cha hewo, na heni mbuya kuwagombola. Ahyo lelo, ndokulajiza Misili.’
ACT 7:35 “Ayu Musa ndo yula wanhu wa Isilaeli nawamlemile lowalonjile, ‘Whaani yakuwichile hegwe uwe chilongozi na mlewezi wa hetwe?’ Kukolela yula mhilisi wa kilanga yamlawila kuli chila chisosolo nachiwele ngwaka chiluli, Nguluwi nakamlajiza ayo Musa yawe chilongozi na mlohozi.
ACT 7:36 Ndo yula yawalongoze wala wanhu walawe Misili kwa kulajila vinduzanduza na kububuwaza mli isi ya Misili, mli bahali ya Shamu na kugunuche, kwa mhela wa miyaka makumi gane.
ACT 7:37 Musa ndo yula yawalonjele wanhu wa Isilaeli, ‘Nguluwi kokuhagulilani hemwe mloli, kota vyoyanhumile heni, na heye kolawa mli lukolo lwa mwemwe baho.’
ACT 7:38 Chilundo cha wanhu walingumkunda Kilistu lochikungajize hamwe kula kugunuche, Musa ndo nayali ako kota msenga hali awo wasekulu wa hetwe na ayo mhilisi wa kilanga yalonjile na heye kuli chidunda cha Sinai. Ndo heye yapeligwe ula ulonzi wa ukomu yatigalile hetwe.
ACT 7:39 “Ila heye ndo yula wasekulu wa hetwe nawalemile kumuhulichiza, wamkundujiza hafungo. Wazangugana kuhiluka Misili.
ACT 7:40 Nawamlonjela Aluni, ‘Tugongomanyile milungu jojitulongoza mnzila. Mina hatuvizelele gamfichile ayo Musa yatulongoze kulawila isi ya Misili.’
ACT 7:41 Aho ndo howegongomanyile jimalukolo ja isenga ilogota, wachitambichila na kiditila mvina chinhu chiditigwe na moko ga hewo wawo.
ACT 7:42 Ila Nguluwi nakoka hagati ha hewo, kawaleka wafugamile nhondwe za kilanga, kota voyandichigwe mli chitabu cha waloli wa Nguluwi, “ ‘Hemwe wanhu wa Isilaeli! Siwele heni, mndavile nhambiko na ndolendole kwa miyaka makumi gane kula kugunuche!
ACT 7:43 Hemwe na mchihola chibumuli cha mlungu Moloki, na limalukolo lya nhondwe ya mlungu wa hemwe Lefani. Jimalukolo jomditile ndo jomulingufugamila. Ahyo ndowahilika hemwe muwe wapogozi kutali kupuluta Babiloni!’
ACT 7:44 “Kula kugunuche wahaza wa hetwe wali na lila Ihema lya Nguluwi. Naligongomanywa kota Nguluwi navyoyamlonjele Musa yadite, hihila kota voyalajilwe chila chinhu.
ACT 7:45 Hamba wasekulu wa hetwe wazangibochela hewo kwa hewo lila Ihema lya Nguluwi, mbaka mhela wa Yoshuwa. Lowaiholile ila isi kwa zila isi Nguluwi nayaziwinjile hali meho ga hewo. Ahyo nalikala mbaka mhela wa Daudi.
ACT 7:46 Daudi nakaganigwa lukami na Nguluwi, nakamlanda Nguluwi yamkundize heye yamzenjele honhu helile heye yawele Nguluwi wa Yakubu.
ACT 7:47 Ila Solomoni ndo nayamzenjele Nguluwi ng'handa.
ACT 7:48 “Ahyo, Nguluwi Mkulu hambe yekale muli ng'handa zizenjigwe na wanhu, kota mloli wa Nguluwi vyoyalingulonga,
ACT 7:49 “ ‘Mkulu kangulonga, kilanga ndo chigoda cha heni cha undewa, na isi yeng'ha ndo chigoda cha heni cha kuwichila magulu.
ACT 7:50 Lelo ng'handa ilindaze yomuweza kunzenjela, na honhu hachi hondikwesela? Nene baha ndo ndividitile vinhu avi vyeng'ha?’ ”
ACT 7:51 Hamba Stefani nakalonga, “Hemwe mna ibamba ng'hatu! Nhumbula na makutu ga hemwe ndo kota wanhu wa isi wohambe wamzelele Nguluwi. Hemwe ndo kota wasekulu wa hemwe. Mazuwa geng'ha mwangumlema Muhe Yelile.
ACT 7:52 Lelo kakuko mloli wa Nguluwi yoneche yula wasekulu wa hetwe hawamgazile? Nawawakopola awo Nguluwi yawalajize wadamle kuya kwa heye yatanganiche. Na hemwe mumhinduka, mumkopola.
ACT 7:53 Hemwe na mbochela lilajizo lya Nguluwi, lila ligaligwe kuli hemwe na mhilisi wa kilanga, ila hamulikundile.”
ACT 7:54 Wala wasekulu wa chitala lowahuliche ago, wazudila ng'hatu, wamjejedela mizino kwa kuzudila.
ACT 7:55 Ila Stefani yawele yamemile Muhe Yelile, nakalola kuchanya kilanga, kawona ukulu wa Nguluwi na Yesu yemile ubanzi wa kudilo wa Nguluwi.
ACT 7:56 Nakalonga, “Mlole! Ndangona kilanga kugubuligwe na Mwana wa Munhu yemile ubanzi wa kudilo wa Nguluwi.”
ACT 7:57 Aho, wanhu weng'ha wawele hala mchitala, nawatowa iyowe na kudinya makutu ga hewo kwa moko gawo. Hamba wamdavila weng'ha hamwe,
ACT 7:58 wamlavya hanze ha muji ula, wamtowa maganga. Wala walolezi nawawika mikoti ja hewo hali wamizi wa msongolo yumwe itagwa lya heye Saulo.
ACT 7:59 Nawalutilila kumtowa Stefani na maganga, aku yomlanda Nguluwi, “Mkulu Yesu, ubochele Muhe wa heni!”
ACT 7:60 Kafugama, kalila kwa lizi likulu, “Mkulu uleche kuwakalalila kwa gehile aga.” Loyalonjile ahyo, nakabagama.
ACT 8:1 Saulo na heye nakachona acho chikoleche cha kukopola kota chinoga. Zuwa alyo wanhu wa Nguluwi ako Yelusalemu nawaluka kugazigwa lukami. Chilundo cha wanhu walingumkunda Kilistu cheng'ha, ila wala yeng'ha watumigwa, nawalapigwa kusambaluka wamwenga kuli honhu ha migunda ja Yudeya na Samaliya.
ACT 8:2 Wanhu walingumnojeza Nguluwi nawamtila Stefani na kumditila ulombolizi ukulu.
ACT 8:3 Mhela wuwo Saulo nayali yowagaza wanhu wa Nguluwi. Nakaluta chila ng'handa kachilavya kunze chilundo cha wanhu walingumkunda Kilistu, walume na wadala, kawajela mchinweng'ho.
ACT 8:4 Wala wanhu wesambaluche, chila honhu howabilimile waluta wodamla ila Mbuli Inojile.
ACT 8:5 Filipo nakenjila mli muji wa Samaliya na kwaluka kumdamla kota Kilistu Mlohozi kwa wenyeng'haye wa aho.
ACT 8:6 Wanhu nawaluta kuhulichiza goya ula usenga wa Filipo na kulola ulajilo wa vila vinduzanduza vyoyaditile.
ACT 8:7 Mina vijeni vihile naviwakwinile wanhu wenji naviwalawa kuno vitowa iyowe, na kahi wanhu wanji wawele waziliche vitomo na vyete nawaloholigwa.
ACT 8:8 Kwali na usangalalo ukulu honhu aho hesa.
ACT 8:9 Lelo kwali na munhu yumwe yalinguchemigwa Simoni yula mina nayali yadidiche uhawi wa heye honhu aho na kuwabubuwaza wanhu wa Samaliya, na kiwona kota heye ka munhu mkulu ng'hatu.
ACT 8:10 Wanhu weng'ha, wadodo na wakulu, nawamhulichiza wolonga, “Simoni ndo ludali lwa Chinguluwi lulinguchemigwa, ‘Ludali Lukulu.’ ”
ACT 8:11 Nawamuwinza lukami kwa vila nayali yowabubuwaliza kwa uhawi wa heye kulawila katali.
ACT 8:12 Ila lowaukundile usenga wa Filipo gala ga Mbuli Inojile ya Undewa wa Nguluwi na itagwa lya Yesu Kilistu, nawabatizigwa, wadala na walume.
ACT 8:13 Na ayo Simoni nakakunda, naloyasindile kubatizigwa na nayali yochilongoza na Filipo, nakabubuwala kwa ulajilo wa vinduzanduza na kububuwaza kulingukoleka.
ACT 8:14 Wala watumigwa wa Nguluwi lowali kula Yelusalemu lowalonjelwe kota wenyeng'haye wa Samaliya na hewo wabochela lizi lya Nguluwi, nawawalajiza ako Petili na Yohani.
ACT 8:15 Lowafichile ako nawawalandila awo wanhu wamkundile Yesu wabochele Muhe Yelile.
ACT 8:16 Mina mhela awo Muhe Yelile nayang'hali kumdulichila munhu ne yumwe kwa hewo, nawali wabatizigwe hela kwa itagwa lya Mkulu Yesu.
ACT 8:17 Lelo Petili na Yohani wawawichila moko awo wanhu, na hewo wambochela Muhe Yelile.
ACT 8:18 Aho Simoni nakavizela kota kwa kuwichilwa moko ga watumigwa, nawapegwa Muhe Yelile. Ahyo nakagana kuwapa Petili na Yohani sendi yolonga,
ACT 8:19 “Mumhe na heni ludali alo, leka yoneche yondimuwichila moko, yabochele Muhe Yelile.”
ACT 8:20 Ila Petili nakedichila, “Mwajilile kutali hegwe na sendi za hegwe, kwa vila kwangijesa kogula ludali lwa Chinguluwi kwa sendi!
ACT 8:21 Kwahela honhu honeche kahi kwahela kudita galingumnojeza Nguluwi kuli mijito ajo kwa vila nhumbula ya hegwe haiwele goya hali meho ga Nguluwi.
ACT 8:22 Lelo umgalamchile Nguluwi na umlande Mkulu na heye koweza kukusila majesa kota awo.
ACT 8:23 Kwangoneka kwa heni kwangumbonela maya na kuwopigwa na wihe.”
ACT 8:24 Simoni nakamlonjela, “Mndandile kwa Mkulu lileche kunyhuila lyoneche kwa ago gomlonjile.”
ACT 8:25 Petili na Yohani lowalavile ulolezi wa hewo na kudamla usenga wa Mkulu, nawahiluka Yelusalemu. Lowali wohiluka nawadamla Mbuli Inojile mli vijiji vinji vya Samaliya.
ACT 8:26 Mhilisi wa Mkulu nakamlonjela Filipo, “Wiwiche goya ulute kusini kwa kukolela nzila ilingulawila Yelusalemu kuluta Gasa.” Nzila ayo yangukolela kugunuche.
ACT 8:27 Lelo Filipo nakewika goya, kaluka kwinula majendo. Mhela wuwo kwali na munhu yumwe nayawele mkulu kuli isi ya Isiopiya, yula nayali yoheluka kuza kaye. Ayo munhu nayali mlolela ng'hano ya Kandake, navyowali wochemigwa Wandewa wa chidala wa Isiopiya. Munhu ayo nayali yalutile ako Yelusalemu kumlanda Nguluwi na mhela awo nayali yohiluka yakwinile mtuka ya kukwejigwa na midogowi.
ACT 8:28 Loyali yoheluka yawele mumtuka, nayali yochisomela chitabu cha Isaya yawele mloli wa Nguluwi.
ACT 8:29 Ahyo, Muhe Yelile nakamlonjela Filipo, “Lute behi na mutuka ayo milongoze.”
ACT 8:30 Filipo na kaibilimila ila mutuka, nakamhulika ayo munhu yosoma chitabu cha mloli Isaya. Aho Filipo nakamuuza, “Ago goulingusoma kugazela?”
ACT 8:31 Ayo munhu nakedichila, “Ndovizela ndaze ne munhu kundongoza?” Aho nakamchema Filipo yakwine kuchanya, yekalise hamwe na heye.
ACT 8:32 Na, honhu ha Maandiko Matakatifu hoyali yosoma nayali ahi, “Yali kota ing'holo lyali lichigaligwa kuchinjigwa, tulu kota hila mwanaing'holo litupuligwa milaika, heye halavile lizi ne hado.
ACT 8:33 Nakabasigwa soni na kwimigwa hachi. Haduhu munhu yoweza kuvizela gala ga ulelo wa heye, mina ukomu wa heye wusigwa muisi.”
ACT 8:34 Ahyo Mwisiopia mkulu, nakamlanda Filipo, “Ndonjele, ayo mloli wa Nguluwi kangulonga chinhu chachi? Kangulonga mbuli azi kumlapa yuye ama ga munhu yunji?”
ACT 8:35 Lelo Filipo yokwaluchila na honhu ha ago Maandiko Matakatifu, nakamlonjela Mbuli Inojile imlapile Yesu.
ACT 8:36 Lowali wang'hali wolutilila na majendo, nawafika honhu hawele na mazi, na ayo mkulu nakalonga, “Honhu aha hana mazi, lelo hana chinhu choneche cha kundemeza kubatizigwa?”
ACT 8:37 Filipo nakamlonjela, “Wone ulingukunda kwa nhumbula ya hegwe yeng'ha kwanguweza kubatizigwa.” Na heye nakalonga, “Ena ndangukunda Yesu Kilistu ndo Mwana wa Nguluwi.”
ACT 8:38 Lelo ayo mkulu nakalajiza aila mutuka yime, weng'ha weli Filipo na yula mkulu chitumagwa wedulika hasi mmazi. Heye Filipo nakambatiza.
ACT 8:39 Lowalawile mmazi Muhe wa Mkulu nakamdita Filipo yajilile. Heye mkulu chitumagwa hamuwene kahi, ila heye nakalutilila na majendo ga heye yawele yasangalale.
ACT 8:40 Filipo kefika yawele Asotusi, kakola mli miji jeng'ha yodamla Mbuli Inojile mbaka hoyafichile Kaisaliya.
ACT 9:1 Mhela awo Saulo nayali yakangaze kuwakabusa na kuwakopola walanguswa wa Mkulu. Kaluta kwa mtambika mkulu,
ACT 9:2 kalanda yapegwe lyandiko lya uzeleso kwa ng'handa za kusalila kula Damasiko, leka wone yafiche ako walume ama wadala walinguwinza nzila ayo, yawebate na kuwegala Yelusalemu.
ACT 9:3 Ila loyali mnzila behi kufika Damasiko, bahala lumuli lulawile kilanga lumwesela nzingo zeng'ha.
ACT 9:4 Kagwa hasi na kuhulika lizi limlonjela, “Saulo, Saulo! Lekachoni ulingungaza?”
ACT 9:5 Na heye Saulo nakauza, “Kwa whaani hegwe, Mkulu?” Nakedichila, “Heni nda Yesu ulingumgaza.
ACT 9:6 Ila wime lelo, winjile mjini na ako kolonjelwa ulinguganigwa kudita.”
ACT 9:7 Wala wanhu wali woheluka na Saulo na wema bahala, ne kulonga chinhu, nawahulika lizi ila hawamuwene munhu.
ACT 9:8 Saulo nakenuka kulawa mmisanga, ila loyagubule meho ga heye kona halingona ne chinhu. Leka wanhu wamlongoza kwa kumbata moko mbaka Damasiko.
ACT 9:9 Saulo nakekala mazuwa gadatu ne kulola, na mhela awo hadile na hanhwele chinhu choneche.
ACT 9:10 Lelo ako Damasiko kwali na mlanguswa yumwe yalinguchemigwa Ananiya. Mkulu nakamlonjela mli uloli, “Ananiya!” Ananiya nakedichila, “Ndahano Mkulu.”
ACT 9:11 Heye Mkulu nakamlonjela, “Wiwiche goya ulute kuli nzila ilinguchemigwa, igoloche, na kuli ng'handa ya Yudasi umlande munhu yumwe yalawile Talso yalinguchemigwa Saulo. Sambi kangumlanda Nguluwi.
ACT 9:12 Mli uloli kona munhu yalinguchemigwa Ananiya yokwinjila mng'handa na kumuwichila moko leka yazengulola kahi.”
ACT 9:13 Ila Ananiya nakedichila, “Mkulu, nyhulika mbuli za munhu ayu kulawa kwa wanhu wenji na gala gehile goyalinguwaditila wanhu wa hegwe welile ako Yelusalemu.
ACT 9:14 Koya hano Damasiko, yawele na ludali kulawa kwa watambika wakulu kuwebata wanhu weng'ha walingitumbila na kukufugamila hegwe.”
ACT 9:15 Ila Mkulu nakamlonjela, “Hegwe lute, mina ndimhagula heye yawe chitumagwa wa heni, yalidamle itagwa lya heni kwa wanhu hawawele Wayahudi na wandewa wa hewo na kwa wanhu wa Isilaeli.
ACT 9:16 Heni ndomlajila geng'ha gomlapa kugazika kwa itagwa lya heni.”
ACT 9:17 Ananiya kaluta, nakenjila mli ayo ng'handa loyawele Saulo na kumuwichila moko kumutwi. Nakalonga, “Mng'holozangu Saulo, Mkulu Yesu yuye yakulawile louwele kunzila kuya kuno. Nakandajiza heni leka uwe ulola kahi na kumemezwa Muhe Yelile.”
ACT 9:18 Baho vinhu kota mibadu vigwa kulawa mumeho ga Saulo, kaza ngulola kahi, kema kabatizigwa.
ACT 9:19 Na loyadile ndiya. Ludali lwa heye lumuhiluchila. Saulo nakekala mazuwa mado hamwe na walanguswa ako Damasiko.
ACT 9:20 Baho nakaluka kudamla kuli ng'handa za kusalila yolonga Yesu ndo Mwana wa Nguluwi.
ACT 9:21 Wanhu weng'ha wamhuliche nawabubuwala, walonga, “Munhu ayu ndo yuyula yawakopole wala wali wolanda kwa itagwa lili kula Yelusalemu! Kahi nakoya hano kwa mbuli ya kuwebata wanhu awo kuwegala kwa watambika wakulu!”
ACT 9:22 Saulo nakonjezeka kuwa na ludali kuli kudamla, na kwa vila nakakunda kota Kilistu Mlohozi yahaguligwe na Nguluwi, Wayahudi wa ako Damasiko nawahangaluka ng'hatu.
ACT 9:23 Logapulute mazuwa menji, Wayahudi newekungajiza na kudita mnvinvi ya kumkopola Saulo,
ACT 9:24 ila Saulo nakahulika chilinguganigwa kukoleka. Hamihe na nemisi nawalolela vihindilo vya kwinjila mjini leka wamkopole.
ACT 9:25 Ila mhela wa hamihe walanguswa nawali hamwe na heye nawamhola, wamdulisa hasi yawele mizandu ikulu kwa kukolela kuli ugazi nauwele mulukanzi uzunguluche muji.
ACT 9:26 Saulo loyafichile Yelusalemu nakajeza kilumba na wala walanguswa. Ila weng'ha nawamdumba hawakundile kuta heye yuye kawa mlanguswa hamwe na hewo.
ACT 9:27 Aho, Banaba nakoya kamhola Saulo, kamigala kuli watumigwa na kuwalonjela Saulo vyoyamuwene Mkulu mnzila na hila Mkulu vyoyalonjile na heye. Nakawalonjela Saulo vyoyadamle ne kudumba kula Damasiko kwa itagwa lya Yesu.
ACT 9:28 Ahyo Saulo nakekala hamwe na hewo, nakaijendela Yelusalemu yeng'ha yodamla mbuli ya Mkulu ne kudumba.
ACT 9:29 Kahi nakadawala na kitwanza na Wayahudi wali wolonga Chigilichi, ila hewo nawajeza kumkopola.
ACT 9:30 Wala wayage lowalizelile lila, wamhola Saulo, wamigala kuli muji wa Kaisaliya, nawamleka yalute Talso.
ACT 9:31 Mhela awo chilundo cha wanhu walingumkunda Kilistu chali chochikala goya hose hala Yudeya na Galilaya na Samaliya. Wanhu wenji nawekangazwa nhumbula na Muhe Yelile na konjezeka na kikala kwa kumhulichiza Mkulu.
ACT 9:32 Petili loyali yoheluka chila honhu nakafika kahi kuli wanhu welile wawele wochikala Luda.
ACT 9:33 Ako nakamfika munhu yumwe yalinguchemigwa Ainea yula kwa miyaka nane nayali yawasile muchinhanda kwa vila nayali yaziliche.
ACT 9:34 Lelo Petili nakamlonjela, “Ainea, Yesu Kilistu kangukulohola. Winuche utandiche chinhanda cha hegwe.” Ainea baho du nakenuka.
ACT 9:35 Wanhu weng'ha wa Luda na Shaloni nawamona Ainea, na weng'ha wamgalamchila Mkulu.
ACT 9:36 Kwali na mlanguswa yumwe mdala mjini Yopa yalinguchemigwa Tabita kwa Chigilichi ndo Dolikasi, izeleche, “Chifuno.” Ayo mdala nayali yodita ganojile na kuwatanza wazunwa mazuwa gose.
ACT 9:37 Mhela awo nakogula, kabagama. Wanhu wauhovuga mtufi wa heye, wauwika mli chihengo cha kuchanya.
ACT 9:38 Yopa haiwele kutali ng'hatu na Luda, ahyo walanguswa lowahuliche kota Petili nayali Luda, wawalajiza wanhu weli kwa heye na usenga, “Uye kwa hetwe himahima vyouhega.”
ACT 9:39 Baho du, Petili nakaluta hamwe na hewo. Loyafichile kegaligwa kuli chila chihengo. Ako walekwa wanji na wamzunguluta Petili wolila na kumlajila mikoti na mivalo Dolikasi nayali yogongomanya mhela loyali mkomu.
ACT 9:40 Petili kawalavya kunze weng'ha kafugama kamlanda Nguluwi. Hamba kagalamchila ula mtufi. Nakalonga, “Tabita, winuche.” Baho nakagubula meho ga heye, na loyamuwene Petili, kekalisa.
ACT 9:41 Petili nakamtanza kwima, hamba nakawachema wala wanhu wa welile na wala walekwa, nakamigala kuli hewo yawele mkomu.
ACT 9:42 Mbuli ayo ikoleche nayenela chila honhu ako Yopa, na wanhu wenji nawamkunda Mkulu.
ACT 9:43 Petili nekekala mazuwa mado ako Yopa, yochikala kwa munhu yumwe yalingugongomanya ngozi yalinguchemigwa Simoni.
ACT 10:1 Kwali na munhu yumwe ako Kaisaliya yalinguchemigwa Kolineli, mkulu wa wamizi wa chilundo chimwe chilinguchemigwa, “Chilundo cha Italia.”
ACT 10:2 Yali munhu yanojile, heye hamwe na ivyazi lyake lyeng'ha, wali womfugamila Nguluwi, nayali yoditika vinhu vinji kwa kuwatanza wazunwa wa Chiyahudi na nayali yomlanda Nguluwi mazuwa gose.
ACT 10:3 Yali ifichile saa tisa nemisi, mli uloli nakona, mhilisi wa kilanga wa Nguluwi yokwinjila mng'handa na kumlonjela, “Kolineli!”
ACT 10:4 Kolineli nakamnogelela meho ayo mhilisi kuno yodumba, nakamlonjela, “Kuna choni mng'hangala?” Ayo mhilisi nakamlonjela, “Nguluwi nakabochela kulanda kwa hegwe na ndolendole za hegwe kwa wazunwa na hozisemwa hebu.
ACT 10:5 Lelo walajize wanhu Yopa wakamcheme munhu yumwe yalinguchemigwa Simoni, kwa itagwa linji Petili.
ACT 10:6 Heye kamng'handa ya Simoni mgongomanya ngozi yula ng'handa ya heye ya behi na Bahali.”
ACT 10:7 Ayo mhilisi wa kilanga yalonjile ago loyochile, Kolineli nakawachema vitumagwa weli wa ng'handa na yumwe wa wamizi nayali yomuwinza Nguluwi,
ACT 10:8 Nakawalonjela geng'ha galawile, kawalajiza Yopa.
ACT 10:9 Mitondo, awo wanhu wadatu wang'hali mli majendo, ila behi na Yopa, Petili nakakwina mchinduwiko cha ng'handa. Yali iwele hagati nemisi leka yamlande Nguluwi.
ACT 10:10 Nakona nzala lukami, kazangugana yalye chilyo. Chilyo lyochali chigogomanywa, kalota.
ACT 10:11 Nakona ulanga ugubuligwe na chinhu kota igolole likulu liduliswa hasi liwele libatigwe mhembo zake zine.
ACT 10:12 Mgati mwa alyo igolole mwali chila nhanzi ya migongolo, migongolo jilingutambala na videje vya kilanga.
ACT 10:13 Nakahulika lizi limlonjela, “Petili, winuche uchinje, ulye!”
ACT 10:14 Petili nakedichila, “Hebu, Mkulu, sinajeza hebu chinhu chila chiwele chikokomoche ama chiwele mzilo.”
ACT 10:15 Ila lizi naihulikwa kahi naimlonjela, “Uleche kuvichema vikokomoka vinhu vila Nguluwi vyoyavyelize!”
ACT 10:16 Mbuli ayi naikoleka mala zidatu, hamba lila igolole lihiluswa kilanga.
ACT 10:17 Petili loyali yang'hali yabubuwale kwa gala goyagawene, wala wanhu watumigwa na Kolineli, lowaiwene ng'handa ya Simoni, nawafika mchihindilo,
ACT 10:18 nawachema kwa lizi, “Hambi hano hana mjenzi amu yalinguchemigwa Simoni Petili?”
ACT 10:19 Petili nayali yang'hali yogana kugazela gala yalotile, na baho Muhe nakamlonjela, “Hulichize! Hana wanhu wadatu hano wangukupala.
ACT 10:20 Duliche himahima na uleche kudumba kuluta na hewo mina nene ndo ndiwalajize.”
ACT 10:21 Petili nakadulika hasi, kawalonjela awo wanhu, “Heni ndo yula mlingumpala. Lekachoni muyile?”
ACT 10:22 Hewo nawamlonjela, “Mkulu wa wamizi Kolineli yula yawele munhu yanojile, yalingumuwinza Nguluwi na munhu yatanganiche hali Wayahudi weng'ha, nakatulajiza. Nakalonjelwa na mhilisi wa kilanga yakucheme kaye kwa heye yahulichize choneche cho ulinacho cha kulonga.”
ACT 10:23 Petili nakawachema mng'handa kawapa honhu ha kuwasa mihe yila. Mitondo yake Petili nakenula majendo hamwe na hewo, na wamwe wa wang'holoze wa ako Yopa nawali hamwe nawo.
ACT 10:24 Zuwa lya keli nawafika Kaisaliya na ako Kolineli nayali yowabeta hamwe na ivyazi na wanhu walingikala habehi yawalaliche.
ACT 10:25 Petili loyali yokwinjila, Kolineli nakalawa kunze kumbochela, nakafugama hoyali na kinamiza hasi ng'hatu.
ACT 10:26 Ila Petili nakamwinula, nakamlonjela, “Winuche, mina heni nda munhu hela.”
ACT 10:27 Petili nakalutilila kulongasa na Kolineli, lowawele wokwinjila mng'handa mowawafichile wanhu wenji wamemile.
ACT 10:28 Petili nakawalonjela, “Hemwe mvizela kota Myahudi yoneche kalemezwa na malajizo ga nzila ya kumfugamila Nguluwi kitanza na wanhu wa isi zinji. Ila Nguluwi nakandajiza ndeche kumjesa munhu yoneche kuta mwavu ama kakokomoka.
ACT 10:29 Lelo kwa mbuli ayo, lomnyemile mbuya ne kusujila. Lelo ndangukuuzani, lekachoni mnyhemile?”
ACT 10:30 Kolineli nakalonga, “Mazuwa gadatu logapulute mhela kota awu, iwele nemisi, ndali ndimlanda Nguluwi mng'handa kuchihengo cha heni. Baho du! Munhu yawele yavalile ivalo lizelu pee! Nakema kumwando kwa heni,
ACT 10:31 nakalonga, ‘Kolineli! Kumlanda Nguluwi na ndolendole za hegwe kwa wazunwa, zikundigwa na Nguluwi.
ACT 10:32 Mlajize munhu yumwe Yopa yakamcheme munhu yalinguchemigwa Simoni, kwa itagwa linji Petili, kamng'handa ya Simoni mgongomanya ngozi behi na bahali.’
ACT 10:33 Ahyo nandikugalila usenga ne kukawila, na hegwe kunoza kuya. Lelo hetwe twa hamwando ha Nguluwi, kuhulichiza choneche chila Mkulu choyakuganile kulonga.”
ACT 10:34 Aho Petili nakaluka kulonga, “Lelo ndivizela ndangukomya kota Nguluwi hambe yabagule.
ACT 10:35 Munhu wa isi yoneche yalingumuwinza Nguluwi na kudita ganojile kangubocheligwa na heye.
ACT 10:36 Awu ndo usenga wa Nguluwi yawagalile wanhu wa Isilaeli, yodamla Mbuli Inojile ilingigala kikala goya kukolela Yesu Kilistu ndo yawele Mkulu wa wanhu weng'ha.
ACT 10:37 Hemwe mvizela mbuli ilawile mli isi yeng'ha ya Wayahudi kwaluchila Galilaya kupuluta ula ubatizo woyadamle Yohani.
ACT 10:38 Mumzela Yesu wa Nasaleti na Nguluwi vyoyamhagule na kumjidila Muhe Yelile na mong'ho. Nguluwi nayali hamwe na heye, heye nakaluta ako na ako yodita ganojile kuwalohola weng'ha walingulongozwa na Limazoga.
ACT 10:39 Hetwe twa walolezi wa gala geng'ha goyagakolile mli isi ya Yudeya na Yelusalemu. Nawamkopola kwa kumuwamba na kumniniza mumsalaba,
ACT 10:40 ila Nguluwi nakamzilipula zuwa lya kadatu kulawila loyabagame, kamdita yoneche,
ACT 10:41 haiwele kwa wanhu weng'ha, leka kwa wala Nguluwi mina yawahagule wawe walolezi wa heye, tuta hetwe tudile na kunwa hamwe na heye hala hoyazilipuche.
ACT 10:42 Nakatulajiza kuidamla Mbuli Inojile kwa wanhu weng'ha na kulavya ulolezi kota heye ndo Yesu yahaguligwe na Nguluwi yawe mtagusa wa wawele wakomu na wabagame.
ACT 10:43 Waloli wa Nguluwi weng'ha, nawalonga mbuli za heye kota chila munhu yomkunda kokusigwa gehile ga heye geng'ha kwa itagwa lya heye.”
ACT 10:44 Mhela Petili loyali yang'hali yolonga ulonzi awo, Muhe Yelile nakawadulichila weng'ha wali wohulichiza usenga awo.
ACT 10:45 Wala Wayahudi wamkundile Kilistu woyile hamwe na Petili yalawile Yopa nawabubuwala kona Nguluwi kawajidila ndolendole ya Muhe Yelile wanhu hawawele Wayahudi.
ACT 10:46 Mina nawawahulika wolonga kwa ulonzi vinjivinji womtogola Nguluwi. Aho Petili nakalonga,
ACT 10:47 “Wanhu awa wambochela Muhe Yelile kota hetwe vyotumbochele. Lelo ka baho yoneche yowadinyila waleche kubatizigwa kwa mazi?”
ACT 10:48 Hamba, nakalajiza wabatizigwe kwa itagwa lya Yesu Kilistu. Baho nawamlanda Petili yekale na hewo mazuwa mado.
ACT 11:1 Watumigwe na wanhu wamkundile Kilistu kula Yudeya nawahulika kota wanhu hawawele Wayahudi wali wabochele lizi lya Nguluwi.
ACT 11:2 Lelo Petili loyahiluche Yelusalemu, wala Wayahudi wakundile nawaganile wanhu hawawele Wayahudi wenjile ikumbi, nawejesa wolonga,
ACT 11:3 “Hegwe kuluta kikala na wanhu hawenjile ikumbi na kulya na hewo!”
ACT 11:4 Aho Petili nakaluka kulonga na hewo ne kuvisa gala gaditigwe kulawila mwaluko.
ACT 11:5 “Zuwa limwe londali ndimlanda Nguluwi ako Yopa, nambona ulotezi, nambona chinhu kota igolole likulu lidulika hasi kulawa kilanga liwele libatigwe mhembo zeng'ha zine, liwichigwa hafungo ha heni.
ACT 11:6 Nasunjilila goya mgati mwa lila igolole nambona migongolo jiwele na magulu gane na migongolo ja kisolo na jiwele ngutambala na videje vya kilanga.
ACT 11:7 Hamba nyhulika lizi lindonjela, ‘Petili winuche, uchinje, ulye.’
ACT 11:8 Ila heni nandonga, ‘Hebu Mkulu, mina choneche chikokomoche kwa heni hachinajeza kwinjila kumlomo kwa heni.’
ACT 11:9 Lila lizi lihulikwa kahi kulawa kilanga, ‘Uleche kuvichema vikokomoche vinhu Nguluwi yavihovuje.’
ACT 11:10 Mbuli ayo naikoleka mala zidatu hamba vyeng'ha vihiluswa kilanga.
ACT 11:11 Baho du, wanhu wadatu wali watumigwa kwa heni kulawila Kaisaliya, nawafika hali ng'handa yondali ndikala.
ACT 11:12 Muhe nakandonjela ndute hamwe na hewo ndeche kujesa. Awa wanhu sita wa lukolo lumwe nawelongoza na heni kuza Kaisalia na ako natwinjila mng'handa ya Kolineli.
ACT 11:13 Heye nakatulonjela vyoyamuwene mhilisi wa kilanga yemile mng'handa ya heye na kumlonjela, ‘Mlajize munhu Yopa yakamcheme munhu yumwe yalinguchemigwa Simoni, kwa itagwa linji Petili.
ACT 11:14 Heye kokulonjela gala hegwe na lukolo lwa hegwe vyomloholigwa.’
ACT 11:15 Honyaluche hela kulonga, Muhe Yelile nakawadulichila kota hila vyoyatudulichile hetwe hala mwaluko.
ACT 11:16 Aho ng'humbuchila ula ulonzi Mkulu woyalonjile, ‘Yohani nakabatiza kwa mazi, ila hemwe mobatizwa kwa Muhe Yelile.’
ACT 11:17 Lelo wone Nguluwi yawapele wanhu hawawele Wayahudi ndolendole yiyila yotupegwe twetwe lotumkundile Mkulu Yesu Kilistu, lelo heni nda whaani mbaka ndimbeze Nguluwi?”
ACT 11:18 Lowahuliche ahyo, nawaleka kitwanza, nawamtogola Nguluwi wolonga, “Nguluwi kawapa wanhu hawawele Wayahudi mhumhu ya kumgalamchila Nguluwi leka wapegwe ukomu!”
ACT 11:19 Kwa kugazigwa konakulawile mhela Stefani loyakopoligwe, wanhu walingumkunda Kulistu nawesambalula. Wamwe nawaluta mbaka Foinike, Kupulo na Antiokiya wodamla ula usenga kwa Wayahudi yeka.
ACT 11:20 Ila wayao wamwenga walawile Kupulo na Kulene, nawaluta Antiokiya waudamla awo usenga kwa Wagilichi wowadamlila Mbuli Inojile ya Mkulu Yesu.
ACT 11:21 Mkulu nakawatanza na wanhu wenji nawakunda na kumgalamchila Mkulu.
ACT 11:22 Mbuli ayo naihulikwa na chilundo cha wanhu walingumkunda Kilistu ako Yelusalemu. Ahyo nawamlajiza Banaba yalute Antiokiya.
ACT 11:23 Loyafichile ako nakona isungu lya Nguluwi kwa wala wanhu, nakasangalala na kuwahimiliza weng'ha wekale kwa kitumbila Mkulu.
ACT 11:24 Banaba nayali munhu yawele yanojile na yamemile Muhe Yelile na makundo. Chilundo chikulu cha wanhu nachikwejigwa kwa Mkulu.
ACT 11:25 Hamba, Banaba nakaluta Talso kumpala Saulo.
ACT 11:26 Loyamuwene kamigala Antiokiya. Na hewo weng'ha weli nawekala na chila chilundo cha wanhu walingumkunda Kilistu kwa mhela umwe wolangusa chilundo chikulu cha wanhu. Ako Antiokiya, ndo kwa mwaluko walanguswa nawachemigwa Wakilistu.
ACT 11:27 Mhela wuwo waloli wa Nguluwi wenji nawoya Antiokiya kulawila Yelusalemu.
ACT 11:28 Lelo myao yumwe yalinguchemigwa Agabo nakema, na kwa ludali lwa Muhe Yelile kalagula kowa na nzala ng'hulu kuli isi yeng'ha. Nzala ayo nailawila mhela wa ulongozi wa Klaudiyo.
ACT 11:29 Wala walanguswa nawamula chila munhu kwa chila choyalinacho yegale chiwatanze wala wanhu wa lukolo lumwe walingikala Yudeya.
ACT 11:30 Nawadita ahyo na kumha Banaba na Saulo azo sendi zikungajizwe na kuhilikwa wazigale wawo kwa wasekulu vilongozi wa wanhu walingumkunda Kilistu.
ACT 12:1 Habehi na mhela wuwo, mndewa Helodi nakaluka kuchigaza chilundo cha wanhu walingumkunda Kilistu wamwenga.
ACT 12:2 Nakamkopola kwa ipanga Yakubu, mng'holoze Yohani.
ACT 12:3 Loyawene madito aga ganguwanojeza Wayahudi, nakalutilila, kamibata Petili. Ayo naikoleka mhela wa mvina za mibumunda jilihela usaso.
ACT 12:4 Loyabatigwe, Petili nakawohigwa mchinweng'ho, nakawichigwa mmoko mwa vilundo vine vya wamizi wane. Helodi nakalapa kumlavya hazelu loimala mvina ya Pasaka.
ACT 12:5 Lelo Petili loyali mchinweng'ho, chilundo cha wanhu walingumkunda Kilistu chali chomlandila kwa Nguluwi vihejile ng'hatu.
ACT 12:6 Nechilo, Petili loyalikuza lavigwa na Helodi hazelu, Petili nayali yawasile hagati ha wamizi weli. Yali yawohigwe na minyololo mili, na wamizi wali wokwamila mchihindilo chikulu cha chinweng'ho.
ACT 12:7 Baho du, mhilisi wa Mkulu nakema habehi na heye na lumuli nalumulichila chila chihengo cha chinweng'ho. Mhilisi nakamdoliza Petili mulubavu kamlilimla yolonga, “Uche himahima!” Bahala du jila minyololo najoyawohigwe mmoko najidumka na kulagala hanyi.
ACT 12:8 Mhilisi wa kilanga nakamlonjela, “Wiwohe isali lyako, uvale makwamba gako.” Heye kadita hihyo. Hamba mhilisi ayo nakamlonjela, “Uvale ikoti lyako, umbinze.”
ACT 12:9 Petili nakamuwinza kunze ila nahavizelele kota ago gaditigwe na ayo mhilisi wa kilanga gali ga kukomya, nakejesa kota nayali yolota.
ACT 12:10 Nawapuluta chihindilo cha mwaluko cha wamizi na cha keli, hamba nawafika mchihindilo cha chuma cha kulawila kunze kuluta kuli muji. Acho chihindilo nachichumuka chiliyeka, na hewo walawa kunze. Nawali wojenda mnzila imwe na baho du yula mhilisi wa kilanga nakamleka Petili nayali yeka.
ACT 12:11 Aho ndo Petili hoyavizelele galawile, nakalonga, “Lelo ndo ndivizela kakomya ng'hatu kota Mkulu nakamlajiza mhilisi wa kilanga wa heye kandohola kulawa mmoko ga Helodi na kulawa kuli mbuli zila zose wanhu wa Isilaeli waliwozibeteza.”
ACT 12:12 Loyavizelele ayo nakaluta lumwe mbaka haluga ha Maliya mayake Yohani yochemigwa Malichi. Amo mng'handa wanhu wali wekungajize womlanda Nguluwi.
ACT 12:13 Petili nakahodiza mchihindilo cha kunze na chitumagwa yumwe mhinza yochemigwa Loda nakaluta mchihindilo kumwidichila.
ACT 12:14 Ayo mhinza nakalizela lizi lya Petili nakasangalala ng'hatu, lelo honhu ha kuchumula, kabilimila mng'handa na kuwalonjela kota Petili kema kunze hali chihindilo.
ACT 12:15 Nawamlonjela yula mhinza, “Kuna lukwale!” Ila heye nakemilila kota nayali yokomya. Na hewo nawamlonjela, “Ayo ka mhilisi wa kilanga wa heye.”
ACT 12:16 Mhela awo Petili nakalutilila kuhodisa. Hamba nawachumula chihindilo wamwona Petili, wekala wabubuwale.
ACT 12:17 Petili nakawagololela moko wenyamalile mye, kawasimila Mkulu vyoyamlavile mchinweng'ho. Hamba nakawalonjela wakalonje kwa Yakubu na wala wang'holoze, hamba nakoka kaluta honhu hanji.
ACT 12:18 Lokuchele, nakulawila lunhwinhwi ng'hatu kwa wala wamizi kwa gala gamfichile Petili.
ACT 12:19 Helodi nakalajiza wampale ila nahawamuwene ng'oo. Lelo nakalajiza wala wamizi wauzigwe, kalavya ilajizo wakopoligwe. Hamba nakalawa ako Yudeya kaluta Kaisaliya ako nakoyekale.
ACT 12:20 Helodi nakezudizwa ng'hatu na wanhu wa Tilo na Sidoni. Ila hewo nawamhilichila wasenga. Nawampala Blasto tandi yawe banzi ya hewo. Blasto nayali chilongozi wa wamizi wa mijito mng'handa ya mndewa. Hamba nawaluta kwa Helodi wamlande kuwe na kikala goya, kwa vila isi yaliitumbila isi ya undewa kwa chilyo.
ACT 12:21 Zuwa limwe ihaguligwe lolifichile, Helodi yavalile ivalo lya chiundewa yekalise mchigoda cha undewa nakawadamlila wanhu.
ACT 12:22 Wala wanhu nawatowa iyowe kwa kusangalala wolonga, “Ali lizi lya milungu, haliwele lya munhu.”
ACT 12:23 Baho du mhilisi wa Mkulu kamgwisa Helodi hanyi kwa vila nahamtogole Nguluwi. Kadakulwa na ichango, nakabagama.
ACT 12:24 Lizi lya Nguluwi nalonjezeka kwenela na kukula.
ACT 12:25 Banaba na Saulo lowasindile mijito ya hewo, nawoka kahi Yelusalemu, nawamuhola Yohani yalinguchemigwa Malichi.
ACT 13:1 Kuli chilundo cha wanhu walingumkunda Kilistu ako Antiokiya kwali na wanhu wamwe nawali waloli wa Nguluwi na walangusa. Wamwenga wa hewo wali Banaba na Simoni yachemigwe Mtitu na Lukio wa Kilene na Manaeni yonayakulase hamwe na mndewa Helodi hamwe na Saulo.
ACT 13:2 Lowali wodita nhambiko zawo kwa Mkulu na kwesela kulya, Muhe Yelile nakalonga, “Mmbagulile Banaba na Saulo kwa mijito yondiwachemele.”
ACT 13:3 Lelo lowalandile kwa Nguluwi na kwesela kulya ng'hatu, nawawawichila moko, wawaleka walute.
ACT 13:4 Lelo Banaba na Saulo lowatumigwe na Muhe Yelile, nawadulika mbaka Seleukia, na kulawila ako, nawakwina mli itumbwi mbaka chihilwa cha Kupulo.
ACT 13:5 Lowafichile Salami nawadamla lizi lya Nguluwi mng'handa za kusalila za Wayahudi. Wali hamwe na Yohani yowatanza.
ACT 13:6 Nawajenda nzingo zeng'ha za chihilwa mbaka Pafo. Ako nawamfika mhawi yumwe Myahudi yochemigwa Baali Yesu yochidita kota mloli.
ACT 13:7 Ayo munhu yalihamwe na Seligio Paoli, mkulu wa chila chihilwa, yawele na luhala ng'hatu. Seligio Paoli nakawachema Banaba na Saulo leka yahulichize lizi lya Nguluwi.
ACT 13:8 Ila yula mhawi Elima kota vyoyali yochemigwa kwa Chigiliki, nakajeza kuwalemela leka yamlemeze ayo mkulu wa chihilwa yaleche kugalamchila makundo ga Kikilistu.
ACT 13:9 Lelo Saulo yochemigwa Paoli yawele yamemile Muhe Yelile, nakamnogolela meho ayo mhawi,
ACT 13:10 nakalonga, “Kwa mdesi na kwa mhadi ng'hatu hegwe! Hegwe kwa mwana wa Limazoga hegwe! Hegwe kwa mwihe wa choneche chinojile, hambe uleche ne hado kuzihada nzila za Mkulu zigoloche.
ACT 13:11 Lelo moko wa Mkulu wokudita vibi, meho hagolola na kolemwela kulona lumuli lwa isanya kwa mhela udo. Baho du chila chinhu chiwa kota ng'hungugu na jiza kwa heye, nakaluka kuluta kuno na aku yopala munhu wa kumibata moko yamlongoze.”
ACT 13:12 Yula mkulu wa chihilwa loyawene ago, nakawa munhu yalingumkunda Kilistu Nguluwi nakabubuwala ng'hatu malanguso goyahuliche gamlapile Mkulu.
ACT 13:13 Kulawila Pafo, Paoli na wayage nawakwina itumbwi waluta mbaka Pega ako Pamfiliya, ila Yohani nakawaleka, kahiluka Yelusalemu.
ACT 13:14 Ila hewo nawalutilila na majendo kulawa Pega mbaka Antiokiya muisi ya Pisidia. Zuwa lya Kwesela nawenjila mli ng'handa ya kusalila, wekalisa.
ACT 13:15 Lowasindile kusoma mchitabu cha malajizo ga Musa na gandichigwe ga waloli wa Nguluwi, wala vilongozi wa ng'handa ya kusalila nawawahilichila luzi wolonga, “Wang'holozangu, wone muwele na mbuli ya kuwalonjela wanhu chinhu cha kuwahimiliza, namuwalonjele.”
ACT 13:16 Paoli nakema kalavya ulajilo kwa moko, nakaluka kulonga. “Wanhu wa Isilaeli na wanhu wanji weng'ha mlingumngumfugamila Nguluwi, mhulichize!
ACT 13:17 Nguluwi wa wanhu awa wa Isilaeli nakawahagula wasekulu wa hetwe, nakawadita awa wawe nhanzi ya wanhu lowali wajenzi kula Misili. Nguluwi nakawalavya ako kwa ludali lwa heye lukulu.
ACT 13:18 Nakemilila kwa miyaka makumi gane kula kugunuche.
ACT 13:19 Nakazidumya nhanzi zeng'ha za isi ya Kanani nakawapa awo wanhu wa heye ila isi iwe ya hewo.
ACT 13:20 Miyaka miya nane na makumi gahano najipuluta. “Hamba kawapa watagusa wawalongoze mbaka mhela wa Samweli loyali mloli wa Nguluwi.
ACT 13:21 Aho nawagana wawe na mndewa, na Nguluwi kawapa Saulo, mwana wa Kishi wa nhanzi ya Benjamini, yawe mndewa wa hewo kwa mhela wa miyaka makumi gane.
ACT 13:22 Loyamusile Sauli, Nguluwi nakamhagula Daudi, yawe mndewa wa hewo. Nguluwi nalalonga ahi kwa mbuli ya Daudi, yolonga, ‘Ndimona Daudi mwana Jese, ndo munhu yawele na nhumbula ya kumbinza, munhu yula yodita geng'ha gondilingugana kugadita.’
ACT 13:23 Kulawila muli lukolo lwa Daudi, Nguluwi, kota vyoyalagane, kawagalila wanhu wa Isilaeli Mlohozi, ayu ndo Yesu.
ACT 13:24 Yesu lonayang'hali kwaluka kudita mijito, Yohani nakamlongola yowadamlila wanhu weng'ha wa Isilaeli kota yanguwalapa wamgalamchile Nguluwi nakubatizigwa.
ACT 13:25 Yohani loyali yosinda kulonga lizi lya heye nakawalonjela wanhu, Mwanguvizela heni nda whaani, mlohozi? Heni Siwele yula muli ngumbeteza. Ayo yalinguya kunyhalila heni, kamng'hangala kusinda heni, sijeza ne kudohola ng'weso za makwamba ga heye.”
ACT 13:26 “Wang'holozangu, lukolo lwa Abulahamu, na wanhu wanji weng'ha muli ngumfugamila Nguluwi! Usenga awu wa ulohozi migalilwa hemwe.
ACT 13:27 Mina wenyeng'haye wa Yelusalemu na wakulu wa hewo nahawamzelele Yesu kota mlohozi, kahi hawavizelele lizi lya waloli wa Nguluwi gali ngusomigwa chila Zuwa lya Kwesela. Ahyo, nawadita ulonzi wa waloli wa Nguluwi wenele kwa kumtagusa heye yabagame.
ACT 13:28 Hanga, hawawene chinhu chilingumwambuza yabagame, nawamlanda Pilato yamtaguse yabagame.
ACT 13:29 Hala howakwete geng'ha gali gandichigwe kumlapa heye, wamdulisa kulawila mumsalaba, wamtila mchilaga.
ACT 13:30 Ila na Nguluwi nakamzilipula.
ACT 13:31 Heye kwa mazuwa menji, nakawalawila wala welongoze hamwe kulawila Galilaya mbaka Yelusalemu. Awo ndo wawele sambi walolezi wa heye kuli wanhu wa Isilaeli.
ACT 13:32 Na hetwe tuya hano kuwagalila Mbuli Inojile, mbuli yiyila yoyalagane na wasekulu wa hetwe kowegalila,
ACT 13:33 Gakoleka lelo kwa chiwalo cha kutulapa hetwe wazukulu wa hewo kwa kumzilipula Yesu. Kota vyoyandichigwe muli Zabuli ya keli. “ ‘Hegwe kwa mwanangu, heni lehano ndangulonga, weng'ha wavizele kota heni nda Nguluwi mhaza wa hegwe.’
ACT 13:34 Na gala ga kumzilipula. Yaleche kuhiluka ako nakola, Nguluwi nakalonga ahi, “ ‘Ndokupa utambichizo welile na mbuli za kukomya, zila zotulagane na Daudi.’
ACT 13:35 Ena na muli honhu hanji ha lwimbo lwa Zabuli kangulonga, “ ‘Nguluwi homleka Yelile wa heye yole.’
ACT 13:36 Ila nahawele Daudi, nayakolile gala goyalingugana Nguluwi mhela wa heye, hamba kabagama na kuza tiligwa behi na wahaza wa heye, na mtufi wa heye lola.
ACT 13:37 Ila yula Yesu Nguluwi nayamzilipule naholile hebu.
ACT 13:38 Ahyo mvizele wang'holozangu, kukolela munhu ayo, usenga ulingulapa kusilwa gehile, wangudamligwa kwa hemwe.
ACT 13:39 Na chila munhu yalingumkunda Yesu kangusilwa gehile geng'ha. Chinhu nachali hambe chikundizwe kuli malajizo ga Musa.
ACT 13:40 Milolele lelo, mleche kiting'hana na gala galonjigwe na waloli wa Nguluwi,
ACT 13:41 “ ‘Mhulichize hemwe mlingubeza, mpubuse mwajilile! Mina chinhu chondilingudita sambi, mhela wa hemwe, ndo chinhu cho hamkunda hala munhu yakulonjeleni!’ ”
ACT 13:42 Paoli na Banaba lowali wolawa muli ila ng'handa ya kusalila, wala wanhu nawawalanda woye kahi Zuwa lya Kwesela ilingwiza, walongase goya mbuli azo.
ACT 13:43 Nhing'hano ayo loimalile, Wayahudi wenji na wanhu hawawele Wayahudi wali wenjile nzila ya Chiyahudi yakumuwinza Nguluwi, nawawawinza Paoli na Banaba. Aho awo watumigwa nawadawala na hewo, wawakangaza nhumbula walutilile wetumbila isungu lya Nguluwi.
ACT 13:44 Zuwa lya Kwesela loyuyile, behi chila munhu honhu hala nakoya kuhulichiza lizi lya Mkulu.
ACT 13:45 Ila Wayahudi lowaliwene alyo ilundo lya wanhu nawona maya, nawalema choyali yolonga Paoli na kumliga.
ACT 13:46 Ahyo, Paoli na Banaba nawalonga kwa ludadali ng'hatu, walonga, “Lyali liganigwa lizi lya Nguluwi liwafichile hemwe tandi, ila kwa vila namlema na kiwona hambe mganigwe kupegwa ukomu wa mazuwa gose ne kuduma, lelo twangukulekani twanguwalutila wanhu hawawele Wayahudi.
ACT 13:47 Mina Mkulu Nguluwi nakatulajiza ahi, “ ‘Ndikuwika hegwe uwe lumuli lwa wanhu hawawele Wayahudi, leka uwegalile wanhu ulohozi kwa wanhu wa isi.’ ”
ACT 13:48 Wanhu hawawele Wayahudi lowahuliche mbuli azo nawasangalala, watogola wolonga usenga wa Mkulu Nguluwi unoga ng'hatu, na wala wawele wahaguligwe kubochela ukomu wa mazuwa gose ne kuduma, wawa wamkundile Nguluwi.
ACT 13:49 Ulonzi wa Mkulu Nguluwi wenela chila honhu kuli honhu hala.
ACT 13:50 Vilongozi wa Wayahudi nawawasonjeleza wadala wa nhanzi ya mchanya mwa isi zohawawele Wayahudi wala wali womkunda Nguluwi, na walume wanji watanganiche wa mji ula. Nawaluka kuwagaza Paoli na Banaba, wawawinga walawe honhu hao.
ACT 13:51 Lelo watumigwa wakung'huna nhimbwisi ing'hang'hanile mmagulu gao kota upanjilo, hamba nawaluta Ikonio.
ACT 13:52 Ila awo walanguswa nawali wamemile usangalalo na Muhe Yelile.
ACT 14:1 Kula Ikonio, mbuli zali kota vyozali kula Antiokiya, Paoli na Banaba nawaluta kuli ng'handa ya kusalila ya Wayahudi nakudamla goya na wala wawele Wayahudi wenji na Wagilichi wawa wanhu walingumkunda Kilistu.
ACT 14:2 Ila Wayahudi wanji walemile kuwa wanhu wa Nguluwi nawawatumajiza na kiviluchila muli nhumbula ya wanhu hawawele Wayahudi leka wawalemele awo wanhu wa lukolo lumwe.
ACT 14:3 Paoli na Banaba nawekala ako mhela uhejile. Nawaweza kulonga ga Mkulu, na Mkulu katawiza ng'hatu luzi loyaulavile kwa mbuli ya kunoga kwa heye, na kudita vinduzanduza na kububuwaza.
ACT 14:4 Wanhu wa isi ayo nawesambaluka, wanji nawawalumba moko Wayahudi, na wamwe wali ubanzi wa watumigwa.
ACT 14:5 Hamba, wanhu hawawele Wayahudi na Wayahudi, wochitanza na wakulu wa hewo, nawagana kuwaditila vibi awo watumigwa na kuwatowa na maganga.
ACT 14:6 Watumigwa lowavizelele mbuli ayo, nawabilimila Lustila na Delibe, Miji ja Lukaonia, na honhu hanji ha habehi.
ACT 14:7 Wazangudamla Mbuli Inojile ako.
ACT 14:8 Kwali na munhu yumwe ako Lustila nayali chete kulawila loyavumbuche nayali hanajenda nehado.
ACT 14:9 Munhu ayo nayali yomhulichiza Paoli loyali yodamla. Paoli kazangumlola goya, na loyawene yawele na makundo ga kusilwa utamwa,
ACT 14:10 nakayowa, “Winuche wime kwa magulu gako!” Ayo munhu nayali chete wa magulu, baho nakenuka, nakaluka kujenda.
ACT 14:11 Wanhu wenji lowawene choyaditile Paoli, nawaluka kuyoweleza kwa ulonzi wa Chilukonia, “Milungu jituyila kwa meho ga wanhu!”
ACT 14:12 Banaba nakachemigwa Seusi, na Paoli nakachemigwa Helime, kwa vila heye ndo nayali yolonga.
ACT 14:13 Na heye mtambika wa ng'handa ya milungu ja Seusi nayali hanze ha muji kegala isenga ibuguma na nganda za uluwa hali chihindilo chikulu cha muji, heye na wala wanhu weng'ha wazangugana kuwatambichila watumigwa.
ACT 14:14 Banaba na Paoli lowahuliche ago, nawavula na kudeganga mivalo ja hewo na kubilimila kuli wala wanhu, wolonga kwa lizi likulu,
ACT 14:15 “Wang'holozangu, lekachoni muli ngudita mbuli azi? Na hetwe twayenu twa wanhu kota mwemwe. Twahano kuwadamlila Mbuli Inojile, mjileche aji jimalukolo, mumgalamchile Nguluwi yawele mkomu, Nguluwi yalumbile ulanga na isi, bahali na vinhu vyeng'ha vili mumo.
ACT 14:16 Katali Nguluwi nakawaleka wanhu wadite kota vila vyowaganile.
ACT 14:17 Ahyo Nguluwi halechile kilajila kwa mbuli zinojile zoyalinguwaditila, kanguwatowela nhonya kulawa kilanga, kanguwagalila mbena mhela wa mbena, kanguwagalila chilyo na kuzimemeza nhumbula za hemwe usangalalo.”
ACT 14:18 Hanga nawalonga ahyo na haiwele ubewe kuwalemeza wanhu waleche kuwatambichila.
ACT 14:19 Ila Wayahudi wamwe nawoya kulawila Ikonio na Antiokiya mu isi ya Pisidiya, wawadita wanhu welongoze na heye, wamtowa maganga Paoli na kumbulunha mbaka hanze ha muji wochijesa mina nakabagama.
ACT 14:20 Ila walanguswa lowekungajize na kumzunguluta, nakenuka na kuhiluka kuli muji. Mitondo yake, heye hamwe na Banaba nawaluta Delibe.
ACT 14:21 Paoli na Banaba lowadamle Mbuli Inojile ako Delibe na wanhu wenji kuwawinza, nawenula majendo kuza Antiokiya kwa kukolela Lustila na Ikonio.
ACT 14:22 Nawawakangaza wanhu walingumkunda Kilistu na kuwahimiliza wapone muli makundo. Nawawalonjela, “Itugana hetwe tweng'ha kukolela mli magazo menji leka twinjile mli Undewa wa Nguluwi.”
ACT 14:23 Nawawahagula wasekulu mli chila chilundo cha wanhu walingumkunda Kilistu kwa mbuli ya wanhu wa Nguluwi, hamba kwa kumlanda Nguluwi na kwesela kulya, nawawawika hali wamizi wa Mkulu yula wawele womkunda.
ACT 14:24 Lowakolile mli isi ya Pisidiya, nawafika Pamfiliya.
ACT 14:25 Lowadamle ula usenga ako Pega, nawaluta Ataliya.
ACT 14:26 Kulawa ako nawaheluka kwa itumbwi nawahiluka Antiokiya kula aho hamwaluko wali wawichilwe mli wamizi wa Isungu lya Nguluwi kwa mijito ila sambi mina ikoleka.
ACT 14:27 Lowafichile ako Antiokiya nawadita nhing'hano na chilundo cha wanhu walingumkunda Kilistu cha hala, nawawalonjela geng'ha Nguluwi nagoyaditile hamwe na hewo, na vyoyawachumulile wanhu hawawele Wayahudi kwinjila mli makundo.
ACT 14:28 Nawekala na wala walanguswa kwa mhela uhejile.
ACT 15:1 Wanhu wanji nawafika Antiokiya wolawila Yudeya nawaluka kuwalangusa wala wanhu wa lukolo lumwe wolonga, “Wone hamwinjile ikumbi kota mabochelo vyoyalajize Musa, hamloholigwa.”
ACT 15:2 Mbuli ayi nayambuza kitwanza ng'hatu, Paoli na Banaba lowalongase na hewo, yamulilwa Paoli na Banaba hamwe na vilongozi wa ng'handa ya Nguluwi ya Antiokiya walute Yelusalemu kuwona wala watumigwa na wasekulu kulapa mbuli ayo.
ACT 15:3 Wala wanhu nawawalaga, na hewo lowali wokolela Foinike na Samaliya nawawalonjela wanhu hawawele Wayahudi vyowamgalamchile Nguluwi. Mbuli azo ziwasangalaza ng'hatu chila chilundo cha wanhu walingumkunda Kilistu cheng'ha.
ACT 15:4 Lowafichile Yelusalemu nawabocheligwa na chilundo cha wanhu walingumkunda Kilistu, watumigwa na wasekulu, na hewo nawawalonjela gala geng'ha Nguluwi vyoyaditile hamwe na hewo.
ACT 15:5 Ila wanhu wamwe walingumkunda Kilistu wali wa chilundo cha Mafalisayo nawema, walonga, “Iwagana wanhu hawawele Wayahudi wenjile ikumbi na kulanguswa kota malajizo ga Musa vyogalingulonga.”
ACT 15:6 Lelo watumigwa na wasekulu wadita nhing'hano ya kulola mbuli ayo.
ACT 15:7 Lowataguse lukami, Petili nakema, kalonga, “Wang'holozangu, hemwe mvizela kota aho ha mwaluko Nguluwi nakanyhagula heni hali hemwe ndamle Mbuli Inojile kwa wanhu hawawele Wayahudi, wahuliche na kukunda.
ACT 15:8 Na heye Nguluwi yazizelele nhumbula za wanhu, nakatawiza kota kawakunda kwa kuwapa na hewo Muhe Yelile kota vyoyatupele hetwe.
ACT 15:9 Haditile ubagulo woneche mli hetwe na hewo, nakadita nhumbula za hewo ziwe zelile kwa vila nawamkunda Yesu.
ACT 15:10 Lelo lekachoni kumjeza Nguluwi kwa kuwadwika awo walanguswa mhomholo ne wasekulu ne hetwe natulemwela kupapa?
ACT 15:11 Ileche kuwa ahyo, leka hetwe twangukunda kota, hetwe kota hila hewo, toloholigwa kukolela igano lya Mkulu Yesu.”
ACT 15:12 Chilundo cheng'ha nachikala tulu, nachiwahulichiza Banaba na Paoli wolonga ulajilo wa vinduzanduza na kububuwaza Nguluwi vyoyaditile hali wanhu hawawele Wayahudi.
ACT 15:13 Lowasindile kulonga, Yakubu nakaluka kulonga, “Wang'holozangu mhulichize!
ACT 15:14 Simoni nakalonga hila Nguluwi aho mwaluko vyoyali yowahangawila wanhu hawawele Wayahudi, nakahagula wanhu wamwe wawe wanhu wa heye.
ACT 15:15 Mbuli ayi iwhana ng'hatu na ulonzi wa waloli wa Nguluwi, kota Maandiko Matakatifu vyogalingulonga,
ACT 15:16 “ ‘Mkulu nakalonga, lozimala mbuli azi ndohiluka, na kuzenga kahi chibumuli cha Daudi chigwile, ndogongomanya kahi mahame ga heye na kuzenga kahi.
ACT 15:17 Aho wanhu wanji weng'ha, wanhu wa isi yeng'ha ndiwachemile wawe wa heni, wompala Mkulu.
ACT 15:18 Ahyo ndo vyoyalingulonga Mkulu, yaditile chinhu achi chizeleche kulawila katali.’ ”
ACT 15:19 Yakubu nakalutilila kulonga, “Ahyo, kwamula kwa heni ndo aku, tuleche kuwagaza wanhu wali ngumgalamchila Nguluwi,
ACT 15:20 ila tuwahilichile lyandiko kuwalonjela waleche kulya vilyo vikokomoche kwa kutambichilwa vimalukolo vya milungu, miyuse na ung'hondwa, waleche kulya miwunde joneche jipobosolwe na waleche kunwa danda.
ACT 15:21 Mina kwa Mhela uhejile, ulonzi wa Musa lwali ludamligwa kuli chila honhu na kusomigwa muli ng'handa za kusalila zeng'ha za Wayahudi chila Zuwa lya Kwesela.”
ACT 15:22 Watumigwa na wasekulu, hamwe na weng'ha wa chilundo cha wanhu walingumkunda Kilistu, nachigana kuwahagula wanhu wamwenga mli hewo na kuwalajiza Antiokiya hamwe na Paoli na Banaba. Wamhagula Yudasi yalinguchemigwa Balisaba na Sila, wala nawazeleche ng'hatu hali hewo.
ACT 15:23 Wawapa lyandiko ali, “Hetwe watumigwa na wasekulu, wang'holozenu, twanguwalamsani hemwe muwele wanhu hawawele Wayahudi muwele ako Antiokiya na Siliya na Kilikiya.
ACT 15:24 Natuhulika kota wanhu wanji walawile aku kwa hetwe wakuwifyani kwa ulonzi wa hewo, nawazidita nhumbula za hemwe ziwe na lunhwinhwi. Ila nawadita ahyo ne kukundizwa na munhu yoneche kulawila kwa hetwe.
ACT 15:25 Ahyo tweng'ha hamwe tugana kuwahagula wanhu wamwe na kuwalajiza kwa hemwe, hamwe na wala tuwaganile hetwe Banaba na Paoli,
ACT 15:26 wala wambuze ukomu wa hewo kwa itagwa lya Mkulu wa hetwe Yesu Kilistu.
ACT 15:27 Ahyo twanguwalajiza Yudasi na Sila kwa hemwe, hewo wokulonjelani wawo aga gotwandiche.
ACT 15:28 Muhe Yelile na hetwe tukunda tuleche kuwadwika mhomolo zinji ila azi zitanganiche,
ACT 15:29 mleche kulya vilyo vitambichilwe na jimalukolo, mleche kunwa danda, mleche kulya miwunde ja migongolo jipobosolwe, na miyuse na ung'hondwa. Mowa mditile goya wone mleche kudita mbuli azo. Malumbo!”
ACT 15:30 Lowawalajile, awo wasenga nawaluta Antiokiya kula nawachema nhing'hano ya wanhu walingumkunda Kilistu, nawawapa alila lyandiko.
ACT 15:31 Lowasomile ago gandichigwe, ulonzi wandikwe nauwapa nhumbula ikangale, nawasangalala ng'hatu.
ACT 15:32 Yudasi na Sila, wala na hewo wali waloli wa Nguluwi, nawalongasa na awo wanhu kwa mhela uhejile wowasindamiza nhumbula na kuwemiza.
ACT 15:33 Lowekale ako hado hela, wanhu wa Antiokiya nawawalaga wowaganila kikala goya, hamba nawahiluka kwa wawatumile.
ACT 15:34 Ila Sila nakapona kumbele.
ACT 15:35 Paoli na Banaba nawapona ako Antiokiya mhela uhejile, wolangusa na kudamla mbuli ulonzi wa Mkulu, hamwe na wanhu wanji wenji.
ACT 15:36 Mazuwa mado logapulute, Paoli nakamlonjela Banaba, “Tuhiluche tukawajendele wala wanhu chila muji hala hotudamle ulonzi wa Mkulu, tikalolele twetwe vyowalingulutilila.”
ACT 15:37 Banaba nakagana wamhole na Yohani yalinguchemigwa Malichi.
ACT 15:38 Ila Paoli nahaganile wamhole Yohani Malichi, ayula ako hamwaluko nakawaleka kula Pamfiliya na kulema kitanza mli mijito ja hewo.
ACT 15:39 Lelo nakulawila kitwanza wawo yeng'ha, nawalekana. Banaba nakamhola Yohani Malichi, nawakwina meli kuza Kupulo.
ACT 15:40 Ila Paoli nakamhagula Sila, hala wanhu wa honhu aho howamuwichile hasi hali udimo wa kunoga kwa heye Mkulu, koka.
ACT 15:41 Paoli na miyage Sila nawaluta ako Siliya na Kilikiya, wokangaza nhumbula za chilundo cha wanhu walingumkunda Kilistu.
ACT 16:1 Paoli nakafika Delibe na Lustila, kula nayekale mlanguswa yumwe yalinguchemigwa Timoteyi. Mayake na heye nayali mhinza, nayali Myahudi, ila mhaza wa heye nayali Mgilichi.
ACT 16:2 Timoteyi nayali na lutogo lukulu hali wala wanhu wa Lustila na Ikonio.
ACT 16:3 Paoli nakagana Timoteyi yelongoze na heye mli majendo, ahyo nakamwinjiza ikumbi. Nakadita ahyo kwa vila Wayahudi weng'ha wali wochikala honhu aho nawavizela kuta mhaza wa Timoteyi nayali Mgilichi.
ACT 16:4 Loyali yokola chila honhu nakawalonjela wanhu malajizo gala galonjigwe na watumigwa na wasekulu kula Yelusalemu, nakawalonjela wagebate.
ACT 16:5 Ahyo chilundo cha wanhu walingumkunda Kilistu waza ngikala mli makundo na wanhu wa Nguluwi wazangonjezeka chila zuwa.
ACT 16:6 Nawakolela honhu ha Fulugiya na Galatiya leka Muhe Yelile hawakundize kudamla alo luzi mkowa wa Asiya.
ACT 16:7 Lowafichile mli mbaka ya Musia, nawajeza kwinjila mkowa wa Bisuniya, ila Muhe wa Yesu hawakundize.
ACT 16:8 Wakolela Musia, waluta ne kwima mbaka Tiloa.
ACT 16:9 Hamihe yiyo, Paoli nakona ulotezi nakamona munhu yumwe wa Makedoniya yemile hala na kumlanda, “Uloche, uye Makedoniya ututanze!”
ACT 16:10 Baho Paoli loyonile ulotezi awo tiwika goya kuza Makedoniya, ne kukawila, tuwele tuvizelele kota Nguluwi katuchema tuwadamlile Mbuli Inojile ya Mkulu.
ACT 16:11 Natulawa Tiloa, natuheluka kwa meli ne kwima mbaka Samotilake, na mitondo yake tufika Neapoli.
ACT 16:12 Natulawa ako natuluta mbaka Filipi, muji wa wilaya ya mwaluko ya Makedoniya, na kahi ako nako ndo kwali na isi nayali ilongozwa na Waloma. Natikala ako mazuwa mado.
ACT 16:13 Zuwa lya Kwesela, natulawa hanze ha muji, tuluta hafungo ha lwanda natuta ndo honhu ha kumlanda Nguluwi. Tikalisa, tudawala na wadala wekungajize honhu aho.
ACT 16:14 Yumwe wa wanhu wowali wotuhulichiza nayali mdala yumwe yalingumfugamila Nguluwi yalinguchemigwa Luda mwenyeng'haye wa Suatila, heye ayo nayali mguza mivalo ja sendi nyinji. Mkulu nakamgubula nhumbula ya heye mbaka kaubochela ula ulonzi woyali yolonga Paoli.
ACT 16:15 Hamba ayo mamo hamwe na wayage lowabatizigwe, nakatuchema yolonga, “Wone ng'hatu mlingona kota heni ndangumkunda Mkulu, muye hakaye hangu mikale.” Katuhimiliza tulute.
ACT 16:16 Zuwa limwe lotwali tuluta honhu hamwe ha kulanda Nguluwi, mhinza chitumagwa yumwe yawele na chijeni chihile, nayawele na ludali lwa kulagula naketing'hana na hetwe. Mhinza ayo nayali yawapele wakulu kwa ulaguzi wa heye.
ACT 16:17 Ayo mhinza nakamuwinza Paoli na hetwe, kayoweleza na kulonga, “Awa wanhu wa vitumagwa wa Nguluwi Mkulu. Wangukudamlilani vila vyomloholigwa.”
ACT 16:18 Kazangudita ahyo yohiluchila chila zuwa, mbaka zuwa limwe Paoli nakazudila, kamgalamchila na kuchilonjela acho chijeni, “Ndangukulonjela kwa itagwa lya Yesu Kilistu, mlawe ayu!” Baho du, acho chijeni chimlawa.
ACT 16:19 Wala wakulu wa wapogozi wapeligwe lufufu na yula mdala kota kitumbila kwa hewo kwa kupegwa lufufu kumala, wawebata Paoli na Sila, wawabulunha mbaka kuli luga lwa kuguzila vinhu howawele wakulu.
ACT 16:20 Nawawalonjeleza kwa mtagusa wolonga, “Wanhu awa ndo Wayahudi na wangudita ivuche kuli muji wa hetwe.
ACT 16:21 Wangulangusa uzowelo ula hetwe wanhu wa Loma hambe tukundizwe kukunda na kuziwinza.”
ACT 16:22 Ilundo lya wanhu welongoza na kuwavumuchila, na wala watagusa wawavula mivalo ja hewo kwa lupichi, walonga watowigwe ng'hobwa.
ACT 16:23 Lowatowigwe lukami wawichigwa mchinweng'ho, na mwamizi wa ng'handa nakalonjelwa yawawiche hasi hali udimo ukulu.
ACT 16:24 Kwa kulajizwa ahyo, ayo mwamizi kawawika kuli chihengo cha kugati ng'hatu mwa chinweng'ho na kuwoha magulu ga hewo kwa ngwamo.
ACT 16:25 Behi na chilo ng'hatu, Paoli na Sila wali womlanda Nguluwi na kwimba nzimbo za kumtogola Nguluwi, kuno wayao wanji mchinweng'ho wohulichiza.
ACT 16:26 Baho kulawila limachinyhina likulu litigasa msisi wa chinhweng'ho. Vihindilo vyeng'ha vichumuka na ng'weso za uswawi zowawopigwe awo wahindilwe zilekana.
ACT 16:27 Mwamizi wa chinhweng'ho loyalilimche nakona vihindilo vya chinweng'ho vichumuche, na kejesa kota wahindilwe weng'ha wabilima, ahyo kasomola ipanga lyake, kazangugana kikopola.
ACT 16:28 Ila Paoli nakamchema kwa lizi likulu, “Uleche kikopola, hetwe tweng'ha twa baha.”
ACT 16:29 Lowamchemile munhu yegale lumuli, ayo mwamizi wa chinweng'ho nakabilimila mng'handa, ketoza hali magulu ga Paoli na Sila kuno yokakama na kudumba.
ACT 16:30 Hamba nakawalongoza kunze, kawauza, “Wakulu, ndite ndaze ndiwe ndoloholigwe?”
ACT 16:31 Hewo nawamlonjela, “Mkunde mkulu Yesu na hegwe koloholigwa na lukolo lwako lweng'ha.”
ACT 16:32 Baho, wamdamlila ulonzi wa Mkulu heye hamwe na nhanzi ya heye yeng'ha.
ACT 16:33 Yula mwamizi kawahola hamihe yiyila kawahovuga vilonda vya hewo, hamba heye na ivyazi lya heye lyeng'ha nawabatizigwa baho.
ACT 16:34 Hamba nakawahola Paoli na Sila kaye kwa heye, nakawapa chilyo. Heye na ivyazi lya heye lyeng'ha wadita mvina kwa vila wali womkunda Nguluwi.
ACT 16:35 Mitondo yake lufuku, watagusa wawalajiza wakulu wa hewo wolonga, “Wadoholeni wala wanhu.”
ACT 16:36 Yula mwamizi wa chihindilo nakamlonjela Paoli, “Watagusa watumiliza luzi mchumulilwe. Lelo mlawe mlute goya.”
ACT 16:37 Ila Paoli nakamlonjela, “Ndaze? Kwa vila hatuwifile chinhu, wotutowa na ng'hobwa na hawavizelele hetwe twa wenyeng'haye wa Loma. Kahi, nawatuhindila mchinweng'ho na sambi wangugana kutuchumulila kwa uviso! Ne hado! Twangulapa wawo woye hano watuchumulile.”
ACT 16:38 Awo wakulu wawalonjela awo watagusa mbuli ayo, lowahuliche kuta Paoli na Sila wali wanhu wa Loma nawadumba.
ACT 16:39 Ahyo waluta kulanda dedede na hamba wawalavya mchinweng'ho wawalanda walawe mli muji ula.
ACT 16:40 Paoli na Sila nawalawa muli chinweng'ho, waluta kuluga kwa Luda. Ako newewona na chilundo cha wanhu walingumkunda Kilistu, hamba woka.
ACT 17:1 Kwa kukolela Ampifoli na Apoloniya, nawaheluka mbaka Tesalonike kula kwali na ng'handa ya kusalila ya Wayahudi.
ACT 17:2 Paoli nakelongoza na hewo kota vyoyazowele, kalutilila kulongasa na hewo mazuwa gadatu ga kwesela, yowalangusa Maandiko Matakatifu.
ACT 17:3 Yaliyowalonjela kota imgana Kilistu Mlohozi kugazigwa na kuzilipuka. Kawalonjela, “Yesu yula yondilikumdamla kwa hemwe ndo Kilistu Mlohozi.”
ACT 17:4 Wayao wamwe nawakunda welongoza na Paoli na Sila. Kahi, wanhu wenji Wagilichi walingumfugamila Nguluwi hamwe na wadala wenji wang'hangala nawelongoza na hewo.
ACT 17:5 Ila Wayahudi nawona maya, wawakungajiza wanhu wehile kulawa kuli honhu ha kuguzila vinhu, wadita chilundo na kwaluchiza ivuche mujini kweng'ha. Waikumbila ng'handa ya Yasoni wochijesa wowafika amo Paoli na Sila wawegale mchalanza.
ACT 17:6 Ila nahawawawene, ahyo nawambuluna Yasoni na wanhu walingumkunda Kilistu wanji mbaka kwa wakulu wa Muji, wayowa, “Wanhu awa wali woihazanya isi yeng'ha na sambi wa baha hali muji.
ACT 17:7 Yasoni nakawavisa hakaye hake. Weng'ha wangudita vinji na ilajizo lya Kaizali wolonga hino, ‘Kakuko mndewa yunji yalinguchemigwa Yesu.’ ”
ACT 17:8 Kwa kulonga ahyo wawenjiza majesa wakulu wa muji na chilundo cha wanhu.
ACT 17:9 Wambuza Yasoni na wayage walavye sendi, hamba wawalechela walute.
ACT 17:10 Hamihe wala wanhu walingumkunda Kilistu wawahimiliza Paoli na Sila walute Belea. Baho du lowafichile ako, nawaluta kuli ng'handa ya kusalila ya Wayahudi.
ACT 17:11 Wanhu wa ako wali wohulika ng'hatu kusinda wanhu wa Tesalonike. Nawaubochela lula luzi kwa igano likulu, wawa wolola goya Maandiko Matakatifu chila zuwa, leka kujeza kulola kota gala gowalonjile Paoli na Sila gali gakukomya.
ACT 17:12 Wayao wamwe nawakundile na kahi wadala wa Chigiliki wala wang'hangala na walume kahi.
ACT 17:13 Ila Wayahudi wa Tesalonike lowahuliche kota Paoli nayali yodamla ulonzi wa Nguluwi ako Belea, nawaluta ako, waluka kigala ivuche na kutumajiza vilundo vya wanhu.
ACT 17:14 Wala wanhu nawamhilika himahima Paoli yalute mwhani ila Sila na Timoteyi nawapona Belea.
ACT 17:15 Wala wanhu wamhiliche Paoli nawaluta hamwe na heye mbaka Asene. Hamba wahiluka hamwe na ilajizo kulawa kwa Paoli kota Sila na Timoteyi wamuwinze himahima vyoiwa.
ACT 17:16 Paoli loyali yowabeta Sila na Timoteyi ako Asene, nhumbula ya heye naizudila lukami loyawene honhu aho vyohamemile jimalukolo.
ACT 17:17 Nakalongasa na Wayahudi na wanhu wamwe wali womkunda Nguluwi mli ng'handa ya kusalila ya Wayahudi, hali luga hamwe na weng'ha wala woyile.
ACT 17:18 Wanji nawali wowawinza Epikulo na Stoiki wetwanza na heye. Wamwe walonga, “Kangugana kulonga choni ayu munhu?” Kwa vila Paoli nayali yodamla gala ga Yesu na gala ga kuzilipuka, wamwe walonga, “Yangoneka kangudamla gala ga milungu ja chijenzi.”
ACT 17:19 Ahyo nawamhola Paoli, wamigala Aleopago, walonga, “Twangugana kuvizela ayi mbuli inyale yowali ulonga.
ACT 17:20 Vinhu vimwe vyotuhuliche kwa makutu ga hetwe gangoneka kota vyakububuwaza kwa hetwe. Twangugana kuvizela mbuli azi zandaze.”
ACT 17:21 Wanhu wa Asene na wanhu wanji wa ako wali wotumiya mihela ja hewo jeng'ha kisimila na kuhulichiza mbuli zinyale.
ACT 17:22 Paoli nakema hali chalanza cha Aleopago, nakalonga, “Wanhu wa Asene! Ndangona hemwe, mwangoneka ndo wanhu muizelele ng'hatu nzila ya kumfugamila Nguluwi,
ACT 17:23 mina londali ndikola aku na ako ndilola chinhu chomlingufugamila hemwe, nambona honhu hamwe helile handikwe, ‘Kwa Nguluwi yohazeleche.’ Lelo ayo yomuwele ngumfugamila hamvizelele, ndo yondilingumdamla kwa hemwe.”
ACT 17:24 “Nguluwi yalumbile isi yeng'ha na vyeng'ha vili mumo, ndo Mkulu wa kilanga na isi, heye hambe yekale mli ng'handa za Nguluwi zizenjigwe na wanhu.
ACT 17:25 Kahi hambe yaditichilwe kwa moko ga wanhu kota vila kangugana chinhu choneche chila, mina heye yula ndo yalinguwapa wanhu ukomu na ndo na kuwapa wanhu chila chinhu.
ACT 17:26 Kwa kukolela munhu yumwe nakalumba nhanzi zeng'ha muisi na kuzidita zikale kuli isi yeng'ha. Nakawika goya ng'hatu mhela unojile na kohi wanhu awo woza kikala.
ACT 17:27 Nakadita ahyo, leka wanhu awo wampale, na hanji wampale heye kota vyowalingumzela. Ahyo Nguluwi hawele kutali na chila yumwe wa hetwe.
ACT 17:28 Kota vyoyalonjile munhu yumwe, “ ‘Mgati mwa heye hetwe twangikala. Twangibatilila, na twa baha.’ Na kota wadekulizi wa hemwe vyowalonjile, “ ‘Hetwe twa wana wa heye.’ ”
ACT 17:29 “Wone lelo, hetwe twa wana wa Nguluwi, hailinguganigwa kumjesa Nguluwi iwe kota zahabu, sendi ama iganga lihongoligwe na kunoligwa na wanhu.
ACT 17:30 Nguluwi nakadita kota halolile mihela jila wanhu lowali wapoka. Ila sambi, nakalajiza wanhu weng'ha wamgalamchile Nguluwi kulawila nzila za hewo zihile.
ACT 17:31 “Mina nakawika zuwa lila yowatagusa wanhu wa isi yeng'ha walingudita ganojile kwa kukolela munhu yumwe yamhagule. Nguluwi kawawichila hazelu weng'ha mbuli ayi kwa kumzilipula munhu ayo!”
ACT 17:32 Lowamhuliche Paoli yolonga mbuli ya kuzilipuka kwa wabagame, wayao wamwe waseka, ila wamwe nawalonga, “Wangugana kukuhulika kahi mbuli ayi.”
ACT 17:33 Ahyo, Paoli nakawaleka, kalawa hala mchitala.
ACT 17:34 Ila wanhu wamwe nawelongoza na heye, wawa wanhu walingumkunda Kilistu. Wamwe wa awo wali Dionisio wa Aleopago na mdala yumwe yalinguchemigwa Damali na wanhu wanji.
ACT 18:1 Logapulute ago, Paoli nakoka Asene, nakuluta Kolinto.
ACT 18:2 Ako Kolinto, nakamfika Myahudi yumwe yalinguchemigwa Akula mlelwa wa Ponto. Akula hamwe na mdala wa heye yalinguchemigwa Pilisika, wali wahiluche mazuwa gagala kulawa Italiya kwa vila Kaizali Klaudiyo nayali yalonjile Wayahudi weng'ha woche Loma. Paoli nakaluta kuwona,
ACT 18:3 kwa vila wali wawanzi wa kuhona mahema kota heye, Paoli kekala na yokola mijito na hewo kwa vila yaliyochikala kwa kugongomanya mihema kota hewo.
ACT 18:4 Chila Zuwa lya Kwesela nakadita nhing'hano ya kulongasa mli ng'handa ya kusalila yojeza kuwakwega Wagilichi na Wayahudi.
ACT 18:5 Sila na Timoteyi lowafichile kulawa Makedoniya, Paoli nakaluka kuditila mhela wa heye weng'ha kudamla na kuwalonjela Wayahudi kuta Yesu ndo Kilistu Mlohozi.
ACT 18:6 Lowamlemele na kwaluka kumliga, nakakung'huna nguwo za heye hali hewo yolonga, “Wone mwajilile mane mwemwe heni ndahela nongwa yoneche ya mbuli ayo. Na kulawila sambi ndowalutila wanhu hawawele Wayahudi.”
ACT 18:7 Nakalawa aho kaluta kikala kuli ng'handa ya munhu yumwe yalingumfugamila Nguluwi yalinguchemigwa Tito Yusto, yula ng'handa ya heye nayali behi na ng'handa ya kusalila.
ACT 18:8 Kilisipo, chilongozi wa ng'handa ya kusalila ayo, nakamkunda heye Mkulu hamwe na wan'hu weng'ha. Wakolinto wenji nawauhulichiza usenga awo, nawakunda na kubatizigwa.
ACT 18:9 Zuwa limwe hamihe, Mkulu nakamlonjela Paoli muli ulotezi, “Uleche kudumba, ulutilile kudamla Mbuli Inojile ne kugozola,
ACT 18:10 mina heni nda hamwe na hegwe. Haduhu munhu yumwe yojeza kukulumiza mina hano mujini hana wanhu wenji wawele ubanzi wa heni.”
ACT 18:11 Paoli nekekala ako yolangusa ulonzi wa Nguluwi hali hewo kwa mhela umwe na nusu.
ACT 18:12 Ila mhela Galio loyali mkulu wa mkowa wa Akaya, Wayahudi nawamvada Paoli hamwe na kumigala kuli utaguso.
ACT 18:13 Nawalonga, “Twangumlonjeleza munhu ayu kwa kuwatumajiza wanhu wamfugamile Nguluwi hila vyohaiganigwe na malajizo ga Musa.”
ACT 18:14 Hala Paoli loyang'hali kulonga, Galio nakawalonjela Wayahudi, “Mhulichize hemwe Wayahudi! Wone mbuli ayi naiwe ya wihe na ng'hunda kuwahulichiza.
ACT 18:15 Ila wone iwele lya kitwanza kulapa ulonzi na matagwa na malajizo ga hemwe, mwamule mwemwe. Heni ndema kuwa mtagusa wa mbuli azo!”
ACT 18:16 Baho, nakawawinga kulawa hali honhu ha kutagusila.
ACT 18:17 Na hewo weng'ha wamibata Sostene yula nayawele chilongozi wa ng'handa ya kusalila, wamtowa bahala honhu ha kutagusila. Ila Galio nahadumbulile chinhu acho ne hado.
ACT 18:18 Paoli nekekala na awo wanhu walingumkunda Kilistu ako Kolinto kwa Mazuwa menji. Hamba nakawalaga, kakwina meli kaluta Siliya hamwe na Pilisika na Akula. Ako Kenkilea, nakabeya mnvili ziwele kumutwi kwa heye kwa chila chilaho nachoyawichile.
ACT 18:19 Nawafika Efeso na aho Paoli nakawaleka Pilisika na Akula, nakaluta ng'handa ya kusalila ya Wayahudi, kalongasa na Wayahudi.
ACT 18:20 Nawamlanda yekale na hewo mazuwa menji ila heye nahaganile.
ACT 18:21 Ila loyali yokuka, nakalonga, “Nguluwi wone yagane ndokuya kwa hemwe kahi.” Nakoka Efeso kwa meli.
ACT 18:22 Meli nayima Kaisaliya, na heye Paoli nakaluta Yelusalemu kuchilamsa chilundo cha wanhu walingumkunda Kilistu, hamba nakaluta Antiokiya.
ACT 18:23 Nakekala ako mhela udo, hamba kalutilila na majendo kwa kukolela Galatiya na Fulugiya yowakangaza nhumbula walanguswa weng'ha.
ACT 18:24 Myahudi yumwe yalinguchemigwa Apolo, mlelwa wa Alekizandilia, nakafika Efeso. Yali munhu yawele na luhala lwa kulonga na uwanzi ukulu wa Maandiko Matakatifu.
ACT 18:25 Yali yalanguswe gala ga nzila ya Mkulu, na yawele pwiyapwiya, nakalonga mbuli za Yesu nakalangusa kwa kuvizela ubatizo wa Yohani.
ACT 18:26 Pilisika na Akula lowahuliche yolonga kwa udaho mli ng'handa ya kusalila ya Wayahudi, wamhola kwa hewo wamlangusa ayo nzila ya Nguluwi vinojile ng'hatu.
ACT 18:27 Apolo loyaganile kuluta Akaya, awo wanhu nawamkangaza nhumbula kwa kuwandichila walanguswa kula Akaya wambochele. Loyafichile ako, nakawatanza ng'hatu wala wanhu wawele ngukunda kwa utambichizo wa Nguluwi,
ACT 18:28 mina nakalutililila kwa udaho nakawa sumya Wayahudi hazelu yowavumizila kwa Maandiko Matakatifu kota Yesu ndo Kilistu Mlohozi.
ACT 19:1 Mhela Apolo loyali Kolinto, Paoli nayali yojenda honhu ha bala, nakafika Efeso nakawafika walanguswa wa Yesu wamwenga.
ACT 19:2 Nakawauza, “Lelo lomuwele wanhu walingumkunda Kilistu nambochela Muhe Yelile?” Wedichila, “Hebu! Ne kuhulika kuta kuna Muhe Yelile hatunahulika.”
ACT 19:3 Heye nakalonga, “Lelo nambochela ubatizo uli ndaze?” Wedichila, “Ubatizo wa Yohani.”
ACT 19:4 Heye Paoli nakalonga, “Ubatizo wa Yohani wali wa kota wanhu wamgalamchila Nguluwi. Yohani nakawalonjela wanhu wamkunde yula yalinguya kuhalila honhu hake, heye ndo Yesu.”
ACT 19:5 Lowahuliche ago, wabatizigwa kwa itagwa lya Mkulu Yesu.
ACT 19:6 Baho, Paoli kawawichila moko, na Muhe Yelile kawadulichila, waluka kulonga ulonzi unjiunji na kudamla usenga wa Nguluwi.
ACT 19:7 Weng'ha hamwe wali wanhu wafichile kumi na weli.
ACT 19:8 Kwa mhela wa myezi jidatu, Paoli nayali yoluta muli ng'handa za kusalila za Wayahudi, kawa yolongasa na hewo gakuwanojeza ng'hatu mbuli ya Undewa wa Nguluwi.
ACT 19:9 Ila wamwe wali wajuvi, walema kukunda, waluka kulonga vibi gala ga ayo nzila ya Mkulu hali nhing'hano ya wanhu. Aho Paoli nakalekana na hewo, kawahola hafungo wala walanguswa wa heye, kaza kulongasa na hewo chila zuwa muli ng'handa ya kusomela ya Tulano.
ACT 19:10 Kawa yodita hiho mbaka mihela mili mbaka wanhu weng'ha wa Asiya, Wayahudi na Wagilichi, wahulika ulonzi wa Mkulu.
ACT 19:11 Nguluwi nakadita vinduzanduza vya kububuwaza kwa moko ga Paoli.
ACT 19:12 Wanhu wali wohola vibende na mivalo jinji joyali yokolela mijito Paoli wazigala kwa watamwa, na hewo wosigwa matamwa ga hewo, na hewo wali na vijeni vihile na avyo vijeni viwalawa.
ACT 19:13 Wayahudi wamwe wali wowinga vijeni vihile nawaluta aku na ako wojeza kwa itagwa lya Mkulu Yesu kwa wala wawele wakwinigwe na vijeni vihile. Wali wolonga, “Ndanguwalonjela kwa itagwa lya Yesu yula Paoli yawele yomdamla.”
ACT 19:14 Wana saba wa Sikewa, mtambika mkulu wa Wayahudi, wali hamwe na awo wawele wodita ahyo.
ACT 19:15 Ila vijeni vihile naviwalonjela, “Tumzela Yesu kahi tumzela Paoli, ila hemwe mwa whaani?”
ACT 19:16 Hamba yula munhu yawele na chijeni kawanyozochela weng'ha kawasumya ludali. Na awo wana wa Sikewa wabilima muli ila ng'handa wawele mwazi wawele na vilonda.
ACT 19:17 Chila munhu ako Efeso, Myahudi na hawele Mgilichi, nakahulika alyo lilawile. Weng'ha wazangudumba, walitogola itagwa lya Mkulu Yesu.
ACT 19:18 Wanhu wenji walingumkunda Kilistu nawelavya hazelu wavumila mbuli zowali waditile.
ACT 19:19 Wamwenga wali wakolile mbuli za uhawi aho katali, wakungajiza maandiko ga hewo, wagasoma mchiluli hali hewo weng'ha. Nawejesa winji wa sendi kwa maandiko ago, wona yangufichila sendi za kuhega msahala wa myezi jihano.
ACT 19:20 Kwa mbuli ayo, ulonzi wa Mkulu naulutilila kwenela nakuwa na ludali ng'hatu.
ACT 19:21 Ago logakoleche, Paoli nakahagula kuluta Yelusalemu kwa kukolela Makedoniya na Akaya. Nakalonga, “Londifika ako, yondapa kuyona Loma.”
ACT 19:22 Ahyo nakawalajiza wanhu weli watanzi wa heye. Timoteyi na Elasito, walongole kuza Makedoniya, na heye kapona kwa mazuwa mado hela ako Asiya.
ACT 19:23 Mhela awo ndo nakulawile ivuche ikulu ako Efeso chambuzwe na ayo nzila ya Mkulu.
ACT 19:24 Kwali na mponzi wa migwala yumwe itagwa lya heye Demetiliyo, yula yawele na mijito ya kugongomanya jimalukolo ja ng'handa ya mlungu wa chidala yalinguchemigwa Alitemi. Madito ago nagawagalila wawanzi wa heye kuwa na lufufu lwinji ng'hatu.
ACT 19:25 Demetiliyo nakawakungajiza awo wakola mijito hamwe na wanji wawele na mijito kota ajo, kawalonjela, “Hemwe wanhu, mvizela kota lufufu lwetu lwangulawa na kuguzigwa aku.
ACT 19:26 Lelo mochiwonela mwemwe mbuli Paoli zoyalingudita, haiwele baha yeng'ha Efeso, ila Asiya yeng'ha. Heye kanguwatumajiza na kuwagalamula wanhu wakunde kota jila milungu jigongomanywe na wanhu haiwele Nguluwi ne hado.
ACT 19:27 Ahyo yiha kota vila vinhu vyotulinguguza vyowa na itagwa lihile ng'hatu. Haiwele ahyo yeng'ha, kahi mbuli ayo yoidita ng'handa ya mlungu wa chidala Alitemi si chinhu cha kutanganika. Hamba lutogo lwa ayo Asiya na isi yeng'ha iwele ngumfugamila zomala!”
ACT 19:28 Lowahuliche ahyo, wazudila, waluka kuyowa, “Mkulu ndo Alitemi wa Efeso!”
ACT 19:29 Muji weng'ha umema ivuche. Wamibata Gayo na Alistako, wenyeng'haye wa Makedoniya, wala wawele woyile hamwe na Paoli, wabilima na hewo mbaka mchifelebe cha kuvinila.
ACT 19:30 Paoli nakagana kitima muli awo wanhu, ila wala walanguswa nawamlemeza.
ACT 19:31 Vilongozi wanji wa awo mkowa wa Asiya, wali weganile ng'hatu na heye, nawazangumlonjela Paoli womdedeza yaleche kiyambuza kwa kuluta mchifelebe cha kuvinila.
ACT 19:32 Mhela awo chila munhu nayali yobumuka, wamwe ali na wanji lila, mbaka ila nhing'hano itizika. Wenji nahawavizelele choni chambuze kuting'hana kwa hewo.
ACT 19:33 Kwa vila Wayahudi nawamdita Alekizanda yoye kumwando, wanhu wamwe muli chila chilundo nawejesa kota ndo heye. Alekizanda nakawagololela wala wanhu moko yogana kigombela hali chila chilundo cha wanhu.
ACT 19:34 Ila lowavizele kuta heye Myahudi, weng'ha kwa lizi limwe wayowa nakulonga, “Mkulu ndo Alitemi wa Efeso!” Walutilila kubumuka hiho kwa masaa meli.
ACT 19:35 Hamba mwandisi wa muji kawadita wanyamalile nakawalonjela, “Wanhu wa Efeso, chila munhu kavizela kota muji awu wa Efeso ndo mwamizi wa ng'handa ya mlungu Alitemi na mwamizi wa limalukolo lilagale kulawa kilanga.
ACT 19:36 Haduhu munhu yobela mbuli ayo. Lelo mnyamalile, mleche kudita choneche chila ne kilolela.
ACT 19:37 Muwachema wanhu awa aha hanga hawaibezile ng'handa ya mlungu, kahi nekumliga mlungu wa hetwe wa chidala.
ACT 19:38 Lelo wone Demetiliyo na wakola mijito wayage wana ga kutagusa ga kuwalapa wanhu awa, ha kuko mchitala, na wakulu wa mikoa, woweza kutagusigwa kuko.
ACT 19:39 Wone muwele na nongwa zinji mzihiliche kuli nhing'hano itanganiche.
ACT 19:40 Twahatagusigwe kwa kwambuza ivuche kwa galawile lehano. Ivuche ali halitanganiche na kutudita kulavya chila cha kunojeza ivuche alyo.”
ACT 19:41 Loyasindile kulonga ago, nakabena nhing'hano.
ACT 20:1 Lila ivuche lolimalile Paoli nakawachema hamwe wala walanguswa. Hamba nakawalaga kaheluka kaza Makedoniya.
ACT 20:2 Nakakolela honhu ha zila isi yowakangaza wanhu nhumbula kwa ulonzi winji. Hamba nakafika Ugilichi.
ACT 20:3 Kula nayekale myezi jidatu. Loyali yochiwika goya kuza Siliya, nakavizela Wayahudi wangugana kumditila chinhu chihile, kahiluka kwa kukolela Makedoniya.
ACT 20:4 Sapatulo, mwana wa Pilo, kulawa Belea, nakelongoza na heye, kahi Alistako na Sekundo kulawa Tesalonike, Gayo kulawa Delibe, Timoteyi na Tukiko na Tilofimo wa mkowa wa Asiya.
ACT 20:5 Awo nawatulongola na kutubeteza kula Tiloa.
ACT 20:6 Hetwe, hala mnvina ya mibumunda hajisasile loimalile, natukwina meli kulawa Filipi na mazuwa gahano logapulute tufika Tiloa. Ako natikala kwa juma imwe.
ACT 20:7 Zuwa lya Kwesela matinazo, natiting'hana kubena mibumunda. Kwa vila Paoli mina nakagana kuka mitondo yake, nakawadamlila wanhu na kulongasa na hewo mbaka nechilo.
ACT 20:8 Muli, chihengo chotwali mchanya, mwali na vyenje vinji vilupila.
ACT 20:9 Msongolo yumwe yalinguchemigwa Eutuko nayali yekalise midilisa hasi mhela Paoli loyali yowadamlila wanhu. Eutuko nakaluka kusinzila hadohado na hamba usinjizi umibata, nakagwa hasi kulawa kuchanya kuli dali ya keli. Wamlokota mina yabagame katali.
ACT 20:10 Ila Paoli nakedulika hasi, kenamiza, kumkumbatiza na kulonga, “Mleche kudumba mina hana ukomu ung'hali mgati mwa heye.”
ACT 20:11 Hamba Paoli kanenuka kahi kakwinha kudali, kamogola ibumunda, kalya. Kalutilila kudamla mbaka lufuku, hamba koka.
ACT 20:12 Wala wanhu wamhola yula msongolo kuluga yawele mkomu ng'hatu, wawa na chihembulizo chikulu.
ACT 20:13 Hetwe natukwina meli tulongola kuza Aso kula twaamholile na Paoli. Ndo navyoyewichile goya, mina nakagana kufika ako kwa kukolela isi ya kigongo.
ACT 20:14 Nakatufika kula Aso, tumukwiniza muli meli tuluta na heye Mitulene.
ACT 20:15 Kulawa ako natuheluka tufika Kio mitondo yake. Zuwa lya keli, tujela lyuma lya kwimiza meli mmazi ako Samo na mitondo yake tufika Mileto.
ACT 20:16 Paoli nayali yogana kulutilila na majendo kwa meli kwa kukolela Efeso leka yaleche kukawila ng'hatu ako Asiya. Yali yogana yafiche himahima Yelusalemu kwa mnvina ya Pentekosti wone naiganiche.
ACT 20:17 Kulawa Mileto Paoli nakalajiza wasekulu wa chilundo cha wanhu walingumkunda Kilistu wa ako Efeso weting'hane na heye.
ACT 20:18 Lowafichile nakawalonjela, “Mvizela vyonandikale na hemwe kulawila zuwa lila lofichile muisi ya Asiya.
ACT 20:19 Mvizela hila vyonandimkolela mijito Mkulu kwa uliholile weng'ha, kwa mahozi na ugayo woufichile heni na igayo lya mnvimnvi za Wayahudi.
ACT 20:20 Mvizela sisujile ne hado kuwadamlila hazelu na mng'handa za hemwe na kuwalangusa choneche chila chiwatanzeni.
ACT 20:21 Nandiwakanya weng'ha Wayahudi, kahila na Wagilichi, wamgalamchile Nguluwi kahi kumkunda Mkulu wa hetwe Yesu.
ACT 20:22 Lelo muhulichize! Heni ndiwele ngumhulichiza Muhe ndanguluta Yelusalemu ne kuvizela chindawila ako.
ACT 20:23 Chondivizelele ndo kota Muhe Yelile komvumila chila honhu chinweng'ho cha kugazigwa ndo chilingubeteza.
ACT 20:24 Ila hambe ndiwone ukomu wa heni kuta chinhu ng'hatu ila fola sinde ula utanzi Mkulu wa heni Yesu yamhele ndiukole, iwele ndo kudamla Mbuli Inojile ya isungu lya Nguluwi.
ACT 20:25 “Ng'hola muli hemwe mweng'ha ndidamla mbuli ya Undewa wa Nguluwi. Lelo ndivizela haduhu ne yumwe wa hemwe yombona kahi.
ACT 20:26 Lelo ndanguwalonjelani ndikomya wone kulawile munhu yumwe kajilila heni ndahela nongwa.
ACT 20:27 Kwa vila nasigozole ne hado kuwadamlila geng'ha goyali yogana Nguluwi.
ACT 20:28 Milolele mwemwe, mchilolele chila chilundo cha Muhe Yelile kawawika hemwe muwe walolezi wa Nguluwi. Mudime chilundo cha wanhu walingumkunda Kilistu yawegale kwa danda ya heye.
ACT 20:29 Ndivizela goya ng'hatu heni londikuka michewe jing'hang'hale jowabateni na hajiwa na chilundo cha hemwe.
ACT 20:30 Kulawa mli hemwe wolawila wanhu wozangulonga udesi na kuwahada walanguswa wawinze wawo yeng'ha.
ACT 20:31 Ahyo muwe meho, mkumbuchile kwa miyaka jidatu, hamihe na nemisi, sitochile kumdeuza munhu yoneche hali hemwe kwa mahozi.
ACT 20:32 “Na sambi ndanguwawika hemwe hasi ha wamizi wa Nguluwi na ulonzi wa isungu lya heye. Heye kana ludali lwa kuwazenga na kuwadahiza isungu lya Nguluwi lyoyawawichile wanhu wa heye.
ACT 20:33 Heni siganile ne hado migwala ne zahabu ne mivalo ja munhu yoneche.
ACT 20:34 Mvizela hemwe mwemwe kota nang'hola mijito kwa moko ga nene baha, namhegwa gondilapa na gawayangu.
ACT 20:35 Ndali ndiwalangusani kwa kukola mijito ahyo twangulapa kuwatanza wawele ng'hochele, tukumbuchila ula ulonzi woyalonjile Mkulu wa hetwe Yesu yuye, ‘Kowa na utambichizo houlavya kusinda kubochela.’ ”
ACT 20:36 Loyalonjile ago, Paoli nakafugama hamwe na hewo, nakamlanda Nguluwi.
ACT 20:37 Weng'ha wali wolila, nalowali womlaga Paoli kwa igano likulu.
ACT 20:38 Mbuli iwasinzile ng'hatu nayali mbuli yoyalonjile kuta howomona kahi. Hamba wamsindichiza mbaka muli meli.
ACT 21:1 Lotilajile na hewo, tukwina meli tung'wang'wazala mbaka Kosi. Mitondo yake tufika Lode, na kulawila ako natuluta Patala.
ACT 21:2 Ako, natuifika meli ilinguluta Foinike, tukwina tuheluka.
ACT 21:3 Hotufichile honhu ha kuweza kuyona Kupulo, natukola nzingo ya kusini tuluta Siliya. Tujela lyuma lya kwimiza meli honhu hali muji wa Tilo, aho meli nayali inenula mhomolo yoipichile.
ACT 21:4 Ako tuwafika wanhu walingumkunda Kilistu, tikala na hewo kwa mhela wa juma imwe. Walanguswa awo wa Kilistu wali wodamla kwa ludali lwa Muhe Yelile, nawamlonjela Paoli yaleche kuluta Yelusalemu.
ACT 21:5 Ila mhela wa hetwe nawoumalile tuka. Weng'ha hamwe na wadala na wana wa hewo nawatuhilichiza mbaka hanze ha muji ula. Lotufichile mwhani, tweng'ha natufugama tumlanda Nguluwi.
ACT 21:6 Hamba tilaga, hetwe tukwina meli, hewo nawahiluka kowalawile.
ACT 21:7 Natulutilila na majendo kuluta Tilo natufika Tolemaisi, hala natuwalamsa wanhu walingumkunda Kilistu, tikala nawo zuwa limwe.
ACT 21:8 Mitondo yake tuka tuluta Kaisaliya. Ako natuluta kaye kwa Filipo mdamla Mbuli Inojile. Heye nayali yumwe wa wala saba wahaguligwe kuwa watanzi wa ng'handa ya Nguluwi ya kula Yelusalemu.
ACT 21:9 Yali na wahinza wane wali na uwanzi wa kubochela usenga wa Nguluwi na kulonga.
ACT 21:10 Lotikale ako mazuwa mado, mloli wa Nguluwi yumwe yalinguchemigwa Agabo nakeza kulawila Yudeya.
ACT 21:11 Katuyila kahola msipi wa Paoli, kewoha mmoko na mmagulu, kalonga, “Muhe Yelile kangulonga ahi, ‘Wayahudi kula Yelusalemu womuwoha hihi munhu yawele na isali awu na kumigala mmoko mwa wanhu hawawele Wayahudi.’ ”
ACT 21:12 Lotuhuliche ago, hetwe na wala wanhu wanji wali aho wamdedeza Paoli yaleche kuluta Yelusalemu.
ACT 21:13 Ila Paoli nakedichila, “Mwangugana kudita choni? Mwangugana kuigalila nhumbula ya heni ngozolo kwa mahozi? Ng'hunda haiwele kuwichigwa mng'handa kula Yelusalemu, ila kubagama kwa itagwa lya Mkulu Yesu.”
ACT 21:14 Lotulemwelile kumdedeza tunyamalila, tulonga hela. “Lyoyalingugana Mkulu likoleche!”
ACT 21:15 Lotikale hala kwa mhela udo, natuwoha mhomholo za hetwe, twinula majendo kuza Yelusalemu.
ACT 21:16 Wanhu wamwenga walingumkunda Kilistu wa Kaisaliya nawaluta hamwe na walanguswa. Watugala hakaye ha Mnasoni yula twali kuza kikala na heye kwa mhela udo. Mnasomi nayali mwenyeng'haye wa Kupulo na nayali yawele ngumkunda Kilistu kwa mazuwa menji.
ACT 21:17 Lotufichile Yelusalemu, wanhu walingumkunda Kilistu nawatubochela goya ng'hatu.
ACT 21:18 Mitondo yake Paoli nakaluta kumlamsa Yakubu, na wasekulu weng'ha wa chilundo cha wanhu walingumkunda Kilistu wali baho.
ACT 21:19 Paoli yoyawalamse, nakawalonjela geng'ha Nguluwi goyali yaditile kwa wanhu walingumkunda Kilistu kwa kukolela utanzi wa heye.
ACT 21:20 Lowahuliche ago, wamtogola Nguluwi. Hamba wamlonjela Paoli lelo kwangona wanhu maelufu menji wawele Wayahudi, sambi wawa wanhu walingumkunda Kilistu na weng'ha wangibata malajizo ga Musa.
ACT 21:21 Lowahuliche mbuli za hegwe kuta wali ulangusa Wayahudi walingikala muli wanhu hawawele Wayahudi kota waleche kujesa Malajizo ga Musa, waleche kuwenjinza wana wa hewo ikumbi na waleche kuwinza mzilo wa Wayahudi.
ACT 21:22 Lelo mbuli zowa ndaze? Yangoneka wovizela kota hegwe mina kufika aha.
ACT 21:23 Lelo udite kota vyotulingukulonjela. Wabahano wanhu wane wawichile kilaha kwa Nguluwi.
ACT 21:24 Wilumbe na hewo mli kulanda kwa kihovuga goya hameho ga Nguluwi, ulavye na kodi vyoilingulapigwa, hamba wabeigwe mnvili ziwele mmitwi ja hewo. Ahyo, wanhu weng'ha wovizela kota mbuli zila nazowalonjelwe za hegwe hazitanganiche, na hegwe uliyeng'ha ung'hali uchikala kwa kuwinza malajizo ga Musa
ACT 21:25 Kulapa wala wanhu hawawele Wayahudi natuwandichila natuwalonjela mbuli nazotuganile, waleche kulya choneche chitambichizwe na milungu ja udesi, waleche kunwa danda, waleche kulya miwunde ja migongolo jipobosolwe, na weyuse na ung'hondwa.
ACT 21:26 Mitondo yake Paoli nakawahola wala wanhu kadita nhambiko ya kihovuga hamwe na hewo. Hamba nakenjila mng'handa ya Nguluwi kalonga kuduma kwa zuwa lya kihovuga na ila nhambiko ilavigwa kwa chila munhu.
ACT 21:27 Mhela wa mazuwa ago saba logali behi kumala, Wayahudi wali walawile mkowa wa Asiya nawamona Paoli mli ng'handa ya Nguluwi. Wambuza wanhu weng'ha wazudila mli chila chilundo cha wanhu, wamibata.
ACT 21:28 Wayoweleza, “Wanhu wa Isilaeli, mtutanze! Ayu ndo yula munhu yalingulangusa wanhu chila honhu mbuli zila zilingubeza wanhu wa Isilaeli, zilingubeza malajizo ga Musa na honhu aha helile. Sambi nakawenjiza wanhu hawawele Wayahudi mng'handa ya Nguluwi na kuhadita hakokomoche honhu hano helile.”
ACT 21:29 Chambuzo cha kulonga ahyo waliwamuwene Tilofimo, mwenyeng'haye wa Efeso, yawele hamwe na Paoli mujini, waza nguvuiza kota Paoli nayali yamwinjize mng'handa ya Nguluwi.
ACT 21:30 Honhu hala hesa hawa na ivuche, wanhu woya kulawila nzingo zeng'ha, wamibata Paoli, wambulunha, wamlavya mng'handa ya Nguluwi, na baho vihindilo vyesa vya ng'handa ya Nguluwi navihindigwa.
ACT 21:31 Nawagana kumkopola Paoli, ila mbuli na zimfichila mkulu wa wamizi wa Chiloma kuta Yelusalemu yesa nayali imemile ivuche.
ACT 21:32 Baho du, mkulu wa chilundo kawahola wamizi na mkulu wawo, nawabilimila kulichila chilundo cha wanhu. Hewo lowamuwene yula mkulu wa ilundo lya wamizi waleka kumtowa Paoli.
ACT 21:33 Mkulu wa ilundo kamlutila Paoli, kamibata na kulonga yawopigwe minyololo mili. Hamba wauza, “Munhu wachi ayu, na kadita choni?”
ACT 21:34 Wamwe mli chila chilundo cha wanhu wali wohabuka chinhu achi na wanji wahabuka chinji. Kawalonjela wanhu wa heye wamgale Paoli muli ngome.
ACT 21:35 Paoli naloyafichile mli muukwinilo, wamizi nawalapigwa kumpapa kwa vila hali na ivuche lya wanhu.
ACT 21:36 Kwa vila lung'hongola lwa wanhu lwali lomuwinza wayoweleze, “Mkomeni!”
ACT 21:37 Lowali womwinjiza mgati mwa ngome, Paoli nakamlanda mkulu wa wamizi yolonga, “Ndoweza kukulonjela chinhu?” Yula mkulu wa wamizi nakamlonjela, “Hambi kuchizela Chigiliki?
ACT 21:38 Hambi hegwe huwele yula Mmisili. Aha mazuwa gaga yaluchize ivuche na kuwalongoza wanhu wehile elufu zine mbaka kugunuche?”
ACT 21:39 Paoli nakedichila, “Heni nda Myahudi, mlelwa wa Talso ako Kilikiya, mlelwa wa muji utanganiche. Dedede, ng'hundize ndawale na wanhu.”
ACT 21:40 Yula mkulu wa wamizi nakamkundiza. Paoli nakema mchanya ha chikwinilo, kawapunjila moko wala wanhu na lowekale tulu, nakaluka kulongasa na hewo kwa Chieblaniya.
ACT 22:1 “Wahaza na wang'holozangu, mnyhulichize ng'hatu londichigombela hali hemwe!”
ACT 22:2 Lowahuliche yolonga na hewo kwa Chieblaniya wekala tulu ng'hatu kusinda aho mwaluko. Na heye Paoli kazangulonga.
ACT 22:3 “Heni nda Myahudi, mlelwa wa Talso ako Kilikiya. Ila nang'hulila hali muji wuwu, hali ulanguso wa Gamalieli, nandanguswa kwa malajizo gatanganiche ga wahaza wa hetwe. Nandilavya kwa nhumbula yeng'ha kwa Nguluwi kota hemwe mwemwe vyomuli ahi lehano.
ACT 22:4 Nandiwagaza na kuwakopola wala wanhu wali wowinza nzila ayi. Nandiwabata walume na wadala na kuwahindila mchinweng'ho.”
ACT 22:5 Mtambika mkulu na watagusa weng'ha wa wasekulu wanguvumila mbuli ayi. Kulawa kwa hewo nambochela gowandichilwe wala wanhu Wayahudi wali ako Damasiko. Nanduta Damasiko leka ndiwabate awo wanhu walingumkunda Kilistu na kuwagala wawohigwe mbaka Yelusalemu ndilapa watowigwe.
ACT 22:6 “Lelo londali mnzila behi kufika Damasiko, nayali saa sita nemisi, lumuli lukulu kulawa kilanga lulawila lumwemwesa nzingo zeng'ha.
ACT 22:7 Aho nanyigwa hasi, nyhulika lizi lindonjela, ‘Saulo, Saulo! Lekachoni kwangungaza?’
ACT 22:8 Heni mbuza, ‘Kwa whaani hegwe, Mkulu?’ Na heye nakandonjela, ‘Heni nda Yesu wa Nasaleti yula hegwe ulingumgaza.’
ACT 22:9 Wala wayangu nawalona lula lumuli, ila nahawahuliche lizi lya yula yalonjile na heni.
ACT 22:10 Ndilawa heni mbuza, ‘Ndite ndaze Mkulu?’ Na heye Mkulu nakandonjela, ‘Wime, lute Damasiko na ako kolonjelwa geng'ha gala gouganigwa kudita.’
ACT 22:11 Kwa lumwemwesa lula lukali sali ndilola, ahyo naiwagana wala wayangu waze kundongoza kwa kimbata moko mbaka fika Damasiko.
ACT 22:12 “Ako nakwali na munhu yumwe yalinguchemigwa Ananiya, munhu muwinza Nguluwi, yalinguhulika malajizo ga Musa na yatanganiche ng'hatu hali Wayahudi nawali wochikala Damasiko.
ACT 22:13 Heye nakoya kundola, kema behi na heni, nakalonga, ‘Mng'holozangu Saulo! Lole kahi.’ Baho du kahi ndizangulola, nandimlola.
ACT 22:14 Hamba Ananiya nakalonga, ‘Nguluwi wa wasekulu wa hetwe kakuhagula leka uvizele goyalingugana na kumona yula yatanganiche na kumhulika yuye yolonga kulawila hamlomo hake.
ACT 22:15 Mina konditila ulolezi kwa wanhu weng'ha uwalonjela gala gougawene na kugahulika.
ACT 22:16 Lelo ya choni kukawila ng'hatu? Wime, ubatizigwe na kusilwa gehile ga hegwe kwa kulichema itagwa lya heye.’
ACT 22:17 “Lelo nanyhiluka Yelusalemu, nalondali ndilanda mli ng'handa ya Nguluwi, nambona ulotezi.
ACT 22:18 Nandimona Mkulu yondonjela, ‘Hima! Uche Yelusalemu himahima mina wanhu wa hano howoukunda ulolezi wa hegwe kwa mbuli ya heni.’
ACT 22:19 Heni nanyidichila, ‘Mkulu, hewo wavizela kuta heni ndo yula yaliyokola mli ng'handa za kusalila nyinji za Wayahudi na kuwebata na kuwatowa wala wali ngukukunda.
ACT 22:20 Na kuta mhela mlolezi wa hegwe Stefani loyakopoligwe, heni aha ndali hala, nang'hunda acho chikoleche na kwamila mikoti ja wala wali womkoma.’
ACT 22:21 Heye Mkulu nakandonjela, ‘Lute, ndokulajiza kutali kwa wanhu hawawele Wayahudi.’ ”
ACT 22:22 Mbaka aha, wala wanhu wali womuhulichiza, ila loyalonjile ulonzi awo, nawaluka kubwamuka, “Mkopoleni! Munhu nayali ahyo hambe yaganigwe kikala muisi.”
ACT 22:23 Wazanguluta wohabuka habuka kuno wotigasa mikoti jawo na kutoza nhimbwisi milanga.
ACT 22:24 Mkulu wa wamizi nakawalajiza wanhu wa heye wamgale Paoli mli ngome. Nakawalonjela wamtowe ng'hobwa leka wamuuze na wavizele chambuze Wayahudi kutowa iyowe.
ACT 22:25 Ila lowamuwohile wogana wamtowe ng'hobwa, Paoli kamuuza mkulu wa wamizi yumwe nayali yemile aho, “Lelo malajizo ganguwakundiza hemwe kumtowa ng'hobwa munhu wa Loma yang'hali tagusigwa?”
ACT 22:26 Yula mkulu wa wamizi loyahuliche ago, nakamlonjela mbuli mkulu wa wamizi yolonga, “Kwangugana kudita choni? Munhu ayu wa Loma!”
ACT 22:27 Mkulu wa wamizi nakamlutila Paoli, kamuuza, “Ndonjele, hegwe kwa munhu wa Loma?” Paoli nakedichila, “Ena.”
ACT 22:28 Mkulu wa wamizi nakalonga, “Heni nani nda munhu wa Loma ila kwa kulavya vinhu vikulu.” Paoli nakedichila, “Ila heni nda munhu wa Loma kwa kuvumbuka.”
ACT 22:29 Wala wanhu wali wewichile goya kumpugajiza Paoli baho nawajilila. Yula mkulu wa wamizi nakadumba loyavizelele kuta Paoli ndo munhu wa Loma na nayali mina yawohigwe ng'weso.
ACT 22:30 Mitondo yake, mkulu wa wamizi nakagana kuvizela gatanganiche, gala Wayahudi wali wamuwichile Paoli. Ahyo, kamdohola Paoli ng'weso, kawalonjela watambika wakulu wanhu weng'ha wa utaguso wating'hane. Hamba nakamigala Paoli, nakamwimiza hali watagusa.
ACT 23:1 Paoli nakawanogolela meho wala watagusa, hamba nakaluka kulonga, “Wang'holozangu, mbaka lelo hano ndali ndichikala na igano linojile hali Nguluwi.”
ACT 23:2 Aho Ananiya mtambika mkulu nakawalonjela wala wali wemile behi na Paoli wamzabule mumlomo.
ACT 23:3 Hamba Paoli nakawalonjela, “Na heye Nguluwi kokuzabula hegwe uwele unojile kwa kunze, mgati umemile wihe! Koweza ndaze kikala aho unhaguse chiutaguso na kuno hegwe gwegwe kwangubena malajizo kwa kulonga nhowigwe?”
ACT 23:4 Wanhu wali wemile hala nawamlonjela Paoli, “Hegwe kwangumliga mtambika mkulu wa Nguluwi!”
ACT 23:5 Paoli nakedichila, “Wang'holozangu, nasivizelele kota heye mtambika mkulu. Mina Maandiko gangulonga ahi, ‘Uleche kulonga vibi gala ga chilongozi wa wanhu wa hegwe.’ ”
ACT 23:6 Mhela wula Paoli naloyavizelele kuta honhu hamwe ha watagusa wala wali ndo Masadukayo na yinji Mafalisayo. Hamba nakakwiniza lizi hali watagusa, “Wang'holozangu, heni ndo Mfalisayo, mwana wa Mfalisayo. Heni ndigaligwa muutaguso kwa vila ndangitumbila kuta wabagame wozilipuka.”
ACT 23:7 Loyalonjile ago, ivuche ikali nalyaluka hewo kwa hewo. Mafalisayo na Masadukayo wala wanhu weting'hane wambuza kibagula honhu heli.
ACT 23:8 Acho chiwalo chali achi, Masadukayo wangibatilila kuta wabagame hambe wazilipuche, kuduhu wahilisi wa kilanga, na muhe kuduhu. Ila Mafalisayo wangukunda ago geng'ha gadatu.
ACT 23:9 Ivuche nalyonjezeka na wamwe wa walangusa wa malajizo ga Musa na chilundo cha Mafalisayo nawema na kulavya igayo lya hewo kwa lupichi, “Hambe tone choneche chihile mli munhu ayu, hanji muhe ama mhilisi wa kilanga nakadawala na heye!”
ACT 23:10 Kilewa nakulutilila mbaka mkulu wa chilundo nakadumba kuta Paoli yasapangwe viundeviunde. Ahyo nakawalonjela wamizi wa heye kwinjila mli lila ilundo, wamlavye Paoli na kumhilusa mgati mwa ngome.
ACT 23:11 Mihe yizile, mkulu nakema behi na Paoli, nakamlonjela, “Uleche kudumba! Kunhawiza hano Yelusalemu, kodita hihyo na mujini Loma.”
ACT 23:12 Lokuchele, Wayahudi nawadita nhing'hano ya uyeka. Welaha, “Hatulya na hatunwa mbaka hotuwa tumkopole Paoli.”
ACT 23:13 Wanhu wahejile makumi gane ndo waganile chiuviso kudita ahyo.
ACT 23:14 Hamba nawaluta kwa watambika wakulu na wasekulu, wolonga, “Hetwe tilaha kuta hatujeza choneche kuli mimelo ja hetwe mbaka aho hotuwa tumkopole Paoli.
ACT 23:15 Lelo hemwe hamwe na watagusa galeni usenga kwa mkulu wa wamizi leka yamigale Paoli kuli hemwe mchivilizila mwangugana kuvizela ng'hatu mbuli za heye. Natukunda kumkopola hanafika habehi.”
ACT 23:16 Ila mwana wa lumbulye Paoli nakahulika ago gowolongasa, ahyo nakaluta mgati mwa ngome, nakamlonjela Paoli mbuli ayo.
ACT 23:17 Aho Paoli kamchema mwamizi yumwe, nakamlonjela, “Mhole ayu msongolo lute na heye kwa mkulu wa wamizi, kana chinhu cha kukulonjela.”
ACT 23:18 Mwamizi nakamhola ayo msongolo, kaluta naye kwa mkulu wa wamizi, kalonga, “Yula mnweng'hwa Paoli kanyhema kandanda ndimgale ayu msongolo kwa hegwe mina kana chinhu cha kukulonjela.”
ACT 23:19 Mkulu wa wamizi kambata ayo msongolo moko, kamgala honhu ha uyeka, nakamuuza, “Kuna choni cha kundonjela?”
ACT 23:20 Heye nakalonga, “Wayahudi wahadana wakulande umgale Paoli muutaguso wochivilizila kuta watagusa wangugana kuvizela mbuli zitanganiche ng'hatu za heye.
ACT 23:21 Ila hegwe uleche kukunda mina hana wanhu makumi gane wekale goya kumvada. Welaha kuleka kulya ne kunwa chinhu mbaka howowa wamkopole. Sambi mina wa goya, wangubeteza ukundizo wa hegwe.”
ACT 23:22 Mkulu wa wamizi nakamlonjela, “Uleche kumlonjela munhu yoneche kuta hegwe kungalila mbuli azo.” Hamba nakamleka yalute.
ACT 23:23 Mkulu wa wamizi nakawachema wamizi weli kawalonjela, “Wicheni wamizi miya mbili na wakwina falasi makumi saba na wamizi miya mbili wa migoha, walute Kaisaliya. Migongomanye kuka hala hainafika saa tatu lelo hano hamihe.
ACT 23:24 Muwiche falasi wamwe awo kwa Paoli, mhiliche goya kwa Felisi chilongozi wa mkowa.”
ACT 23:25 Hamba ayo mkulu wa mkowa nakandika ahi.
ACT 23:26 “Heni Klaudiyo Lusia ndangukwandichila hegwe mkulu Felisi, chilongozi wa mkowa. Ulamche chilongozi!
ACT 23:27 Wayahudi nawamibata munhu yumwe hachefu tele wamkopole. Wone nandeche kulonga kuta heye munhu wa Loma. Ahyo nanduta hamwe na wamizi ndimlohola.
ACT 23:28 Nandimhilika kumwando kwa watagusa wa hewo wakulu ndilapa ndivizele chila chimuwalile hewo wamtaguse.
ACT 23:29 Nandivizela kuta kutagusa ako kwali gali gala ga kuwala honhu hamwe ha malajizo ga hewo na ahyo sonile kuta kadita choneche chilingumwambuza yakopoligwe ama yawohigwe mchinweng'ho.
ACT 23:30 Londonjelwe kuta Wayahudi wali waditile chiuviso kumkopola, nangana kumgala kwa hegwe, ndiwalonjela wataguswa wa heye wegale utaguso wa hewo kwa hegwe.”
ACT 23:31 Awo wamizi nawamhola Paoli kota vyowalonjelwe, wamgala hamihe yiyila mbaka Antipatili.
ACT 23:32 Mitondo wamizi wa magulu wahiluka kuli ngome, wawaleka wala wamizi wakwina falasi walutilile na majendo ga hewo hamwe na Paoli.
ACT 23:33 Lowafichile Kaisaliya nawampa mkulu wa mkowa gala maandiko na kumuwika Paoli hasi ha ulongozi wa heye.
ACT 23:34 Felisi loyasomile ago maandiko nakamuuza kulawila mkowa wachi? Loyalonjelwe kuta nayali yalawile mkowa wa Kilikiya,
ACT 23:35 kalonga, “Ndohulichiza nongwa ya hegwe wone wawele na nongwa wafiche.” Hamba nakalonga Paoli yawichigwe hasi ha udimi mng'handa ya undewa wa Helodi.
ACT 24:1 Mazuwa gahano logapulute, mtambika mkulu Ananiya nakoya Kaisaliya hamwe na wasekulu wamwe na wakili yumwe yalinguchemigwa Telutilo. Nawamlutila yula mkulu wa mkowa wamlonjela nongwa ya hewo kwa Paoli.
ACT 24:2 Paoli nakachemigwa, na Telutilo kachumula nongwa ahi. “Mkulu Felisi, ulongozi wa hegwe unojile wigala kikala goya na ugalamlo wa kung'hang'haniza wangukoleka kwa kunojeza isi ya hetwe.
ACT 24:3 Natubochela mbuli ayi kwa usangalalo ng'hatu na kulavya malumbo menji kwa hegwe chila honhu.
ACT 24:4 Ila ne kwajiliza mihela ja hegwe ng'hatu, twangulanda kwa isungu lya hegwe lyeng'ha, uhulichize aga machefu gotigale.
ACT 24:5 Tuvizela munhu yuno nakeha lukami. Heye kaluchizaga ivuche muli Wayahudi chila honhu muisi na kahi ndo chilongozi wa chilundo cha Wanasaleti.
ACT 24:6 Kahi nakajeza kukovula ng'handa ya Nguluwi, na hetwe tumibata.
ACT 24:7 Ila Lusia, mkulu wa chilundo cha wamizi, kenjilila hagati, kamhola kwa ludali kulawila mmoko mwa hetwe.
ACT 24:8 Hamba nakawalonjela wawele na nongwa na heye woye kumwando kwa hegwe. Gwegwe baho kwa kumuuzauza, koizela mbuli ya nongwa yotumigalile kwa hegwe.”
ACT 24:9 Na hewo Wayahudi watawiza nongwa ahyo wolonga kuta ago geng'ha gali gakukomya.
ACT 24:10 Hamba chilongozi Felisi wa mkowa kamchemeleza Paoli yalonje, na heye Paoli kalonga, “Ndangusangalala kigombela hali hegwe ndivizela kuta hegwe mtagusa wa isi ayi kwa miyaka minji.
ACT 24:11 Kwanguweza kuvizela gapulute mazuwa kumi na meli hela kulawila ndutile kumfugamila Nguluwi kula Yelusalemu.
ACT 24:12 Wayahudi hawafichile ndilongasa na munhu yoneche. Hawafichile nditumajiza wanhu ng'handa ya Nguluwi, kahi ne mli ng'handa za kusalila za Wayahudi, kahi honhu hanji honeche muli muji woneche.
ACT 24:13 Kahi hawoweza kutawiza nongwa yowalavile kwa heni.
ACT 24:14 Chondili ngukunda hali hegwe ndo achi, heni ndangumfugamila Nguluwi wa hetwe ndichikala kwa kuwinza nzila ila hewo wanguichema chilundo cha kwaluchiza. Ndangukunda mbuli zeng'ha zandichigwe muli malajizo ga waloli wa Nguluwi.
ACT 24:15 Heni ndangitumbila Nguluwi, na hewo wangitumbila lilyo, kota wanhu wanojile na wehile, wozilipuka.
ACT 24:16 Ahyo ndangupajila ng'hatu na igano linojile hali Nguluwi na wanhu.
ACT 24:17 “Londikale kutali kwa miyaka mido, nanyiluka Yelusalemu leka ndiwegalile wanhu wayangu utanzo wa kulavya nhambiko.
ACT 24:18 Mhela londali ndidita ago, ndo lowafichile ng'handa ya Nguluwi, londali mina ng'holile yila nhambiko ya kihovuga. Hakwali na ilundo lya wanhu ne ivuche.
ACT 24:19 Ila kwali na Wayahudi wanji walawile muji wa Asiya, awo ndo nawalapigwe wawe aha hali hegwe na kulavya nongwa ya hewo wone wana chinhu choneche cha kulonga kwa heni.
ACT 24:20 Ama, waleche awa wali aha, walonje wihe wauwene kwa heni, mhela wonyimile hali chitala cha hewo chikulu,
ACT 24:21 ila wowa ulonzi wondonjile honyimile hali hewo, ‘Mwangunhagusa lelo hano kwa vila ndangibatilila kota wabagame wozilipuka!’ ”
ACT 24:22 Aho, Felisi, heye nayali yavizelele nzila ya wanhu awo, nakaiwika zuwa linji ya kulutilila kuhulichizwa nongwa ayo. Kawalonjela, “Ndolavya utaguso wa nongwa ayo mhela Lusia, mkulu wa chilundo cha wamizi, loyokuya aha.”
ACT 24:23 Hamba nakamlonjela yula mwamizi yamuwiche Paoli mchinweng'ho, ila waze kumlechela lechela na wang'holoze waleche kulemezwa kumgalila gala goyolapa.
ACT 24:24 Logamalile mazuwa mado, Felisi nakoya hamwe na mdala wa heye Dulusila yula nayali Myahudi. Kalonga Paoli yegaligwe, kamhulichiza yolonga gala ga kumkunda Yesu Kilistu.
ACT 24:25 Ila mhela Paoli loyaluche kulonga gala gatanganiche, kilemela kudita chinhu na zuwa Nguluwi yoitagusa isi, Felisi nakadumba, nakalonga, “Kwa sambi koweza kuluta, ndokuchema kahi hondiwa na mumhu.”
ACT 24:26 Mhela wuwo nayali yochitumbila kuta Paoli komhonga sendi. Kwa chiwalo achi nakamchema Paoli lundogondogo na kulongasa na heye.
ACT 24:27 Lojimalile miyaka mili, Polikio Festo nakahola honhu ha Felisi, kawa chilongozi wa mkowa. Kwa vila nakagana kiganiza kwa Wayahudi, Felisi nakamleka Paoli mchinweng'ho.
ACT 25:1 Mazuwa gadatu lowafichile kuli mkowa, Festo nakalawa Kaisaliya, nakaluta Yelusalemu.
ACT 25:2 Watambika wakulu hamwe na vilongozi wa Wayahudi nawamlonjela gala ga kulapa nongwa nayali imuwala Paoli. Nawamdedeza Festo.
ACT 25:3 Yawaditile igano kwa kumigala Paoli Yelusalemu, wali wataguse chiuviso wamkopole wang'hali mnzila.
ACT 25:4 Ila Festo nakalonga, “Paoli kosigala mchinweng'ho kula Kaisaliya na heni ndoluta ako behi yiyi.
ACT 25:5 Walecheni vilongozi wa hemwe walute ako hamwe na heni wakalavye nongwa ya hewo kuli heye wone yaditile choneche chihile.”
ACT 25:6 Festo nekekala na hewo kwa mhela wa mazuwa nane ama kumi hino, hamba nakahiluka Kaisaliya. Mitondo yake nakaluta muutaguso, nakalonga Paoli yegaligwe mng'handa.
ACT 25:7 Mhela Paoli loyafichile, Wayahudi wala wali walawile Yelusalemu nawamzunguluta waluka kulavya nongwa nyinji ng'hulu zila hawawezile kutawiza.
ACT 25:8 Kwa kigombela, Paoli nakalonga, “Heni siditile lihile lyoneche lya kulapa malajizo ga Wayahudi, kahi si kwa ng'handa ya Nguluwi, ne ga kumlapa Kaizali mndewa mkulu wa Loma.”
ACT 25:9 Festo nakagana kiganiza kwa Wayahudi ahyo nakamuuza Paoli, “Ndaze kwangugana kuluta Yelusalemu na ako ukataguswe hali heni kwa chiwalo cha nongwa ayi?”
ACT 25:10 Paoli nakedichila, “Ndangwima hali chigoda cha utaguso wa Kaizali mndewa mkulu wa Loma, na ahano bahano ndo hondilinguganigwa kupegwa utaguso. Kota vyouvizelele goya, siwaditile Wayahudi wihe woneche.
ACT 25:11 Lelo wone fichigwe wihe ulingundapa ngazigwe mbaka kubagama, hambe ndande kusilwa wihe awo. Ila wone kuduhu yalingukomya muli nongwa woyalavile wanhu awa, haduhu munhu yombika kwa hewo. Ndangugana nongwa ya heni ihilikwe kwa Kaizali mndewa mkulu wa Loma!”
ACT 25:12 Lelo Festo loyalongane na wakulu wa heye, nakamlonjela Paoli, “Kulanda lufani, lelo koluta kwa Kaizali mndewa mkulu wa Loma.”
ACT 25:13 Mazuwa mado hamba, mndewa Agilipa na Belinike nawafika Kaisaliya kumlamsa Festo.
ACT 25:14 Wali ako mazuwa mado na heye Festo nakamlonjela mndewa nongwa ya gala ga Paoli, “Hana munhu yumwe hano yula Felisi nakamleka mchinweng'ho.
ACT 25:15 Londutile Yelusalemu watambika wakulu na wasekulu wa Wayahudi nawalavya nongwa na kundanda ndimtaguse yagazigwe.
ACT 25:16 Ila heni nandiwalonjela kuta hatuzowele Waloma kumlavya munhu yatowigwe hala yawele na nongwa hana ting'hana na wamlavile nongwa na kupegwa honhu ha kigombela kulapa ayo nongwa.
ACT 25:17 Lelo lowafichile aha sikawile, ila nandita nhing'hano hali honhu ha kutagusila mitondo yake, ndonga munhu ayo yegaligwe.
ACT 25:18 Wawele na nongwa na heye nawema, ila hawalavile nongwa yihile kota vyondali ndivijesa.
ACT 25:19 Ila wali na kilewa kudo na heye hamwe na heye kulapa kufugamila kwa kumlapa munhu yumwe Yesu yula nayabagame, Paoli kangibatilila kuta mkomu.
ACT 25:20 Nasivizelele lya kudita kwa nongwa ayo. Hamba nandimuuza Paoli wone yaganile kuluta kutagusigwa kuli chitala kula Yelusalemu kwa chiwalo cha nongwa ayo.
ACT 25:21 Ila Paoli nakalema, nakalanda yalechigwe mchinweng'ho mbaka lwamulilo lwa nongwa ayo uditikwe na Kaizali mndewa mkulu wa Loma. Ahyo nangana yekale mchinweng'ho mbaka aho hondigana kumuhilika kwa Kaizali mndewa mkulu wa Loma.”
ACT 25:22 Hamba mndewa Agilipa nakamlonjela Festo, “Nangana kumuhulika ayo munhu nene baha.” Festo nakamlonjela, “Komuhulika mitondo.”
ACT 25:23 Mitondo yake, mndewa Agilipa na Belinike nawafika kwa mnvina muli chalanza cha nhing'hano wawele welongoze na wakulu wa wamizi na vilongozi wa muji. Festo nakalajiza Paoli yegaligwe kuli chalanza cha nhing'hano.
ACT 25:24 Hamba Festo kalonga, “Mndewa Agilipa na weng'ha muwele hano hamwe na hetwe! Aha kumwando kwa hemwe hana munhu yumwe yula nhanzi yeng'ha ya Wayahudi hano na kula Yelusalemu nawatowa iyowe kuta hambe yaganigwe yekale kahi.
ACT 25:25 Heni nasiwene kuta nayali yaditile choneche chihile mbaka yalapigwe kutagusigwa na kugazigwa mbaka kubagama. Ila kwa vila Paoli heye mina nakalanda nongwa ya heye kuhulichizwa na Kaizali mndewa mkulu wa Loma ngana kumigala hano.
ACT 25:26 Kwa heni ndahela mbuli yenele ila ndoweza kumwandichila Kaizali mndewa mkulu wa Loma gala ga kulapa heye. Ndo mina ndimigale hano hali hemwe na hali hegwe mndewa Agilipa, ila londimlolile, ndoweza kuwa na lya kukwandichila.
ACT 25:27 Kwa mina yowa chinhu cha kusecheza kumgala mnweng'hwa ne kulonga nongwa ilingumuwala.”
ACT 26:1 Hamba mndewa Agilipa nakamlonjela Paoli, “Kwangukundizwa kigombela.” Aho Paoli kagolola moko wa heye kegombela ahi,
ACT 26:2 “Mndewa Agilipa, ndangiwona nhambichizwa kigombela hali hegwe kwa kulapa ila nongwa yeng'ha Wayahudi wali wolonga gala ga heni.
ACT 26:3 Kwa vila hegwe ndo kuvizela gala ga Wayahudi na vinhu vyowalingitwanza kwa hewo, ndangulanda unyhulichize kwa kwimilila.
ACT 26:4 “Wayahudi wavizela mbuli za heni kulawila uwana, na hila vyondikale kulawila mwaluko hali isi ya heni mbaka ako Yelusalemu.
ACT 26:5 Wanzela kwa mhela uhejile, na wotawiza, wone wagane, kota kulawila mwaluko nandikala kota yumwe wa chilundo cha Mafalisayo nawawele womfugamila Nguluwi vitanganiche ng'hatu kusinda wanji.
ACT 26:6 Na sambi nda hano lekachoni nhagusigwe ndangitumbila lila ilagano Nguluwi lyowelagane na wasekulu wa hetwe.
ACT 26:7 Ako kilagana, ndo kukula kuli ngitumbilwa na nhanzi kumi na mbili za isi ya hetwe. Womfugamila Nguluwi kwa igano nemisi na hamihe. Mng'hangala mndewa, Wayahudi wangumbichila nongwa kwa kukunda ahyo!
ACT 26:8 Hemwe mweng'ha muli hano, lekachoni hemwe wanhu mwangona kota ndo mbuli yohambe ikundigwe, kota Nguluwi kawazilipula wabagame?
ACT 26:9 “Vyondilingona heni nene nang'hunda kuta ingana kudita mbuli nyinji kulibeza itagwa lya Yesu wa Nasaleti.
ACT 26:10 Mbuli azo ndo zonditile Yelusalemu. Heni nene, ndiwele mheligwe ukulu kulawila kwa watambika wakulu, nambeza kuwenjiza mchinweng'ho wanhu wenji walingumkunda Kilistu. Nawo lowatagusigwe kubagama nang'hunda mbuli ayo.
ACT 26:11 Hamba nandiwadita watowigwe muli ng'handa za kusalila zeng'ha za Wayahudi ndiwatumajiza wakovule makundo ga hewo. Kuzudila kwa heni kwali kukulu mbaka ndiwagaza wanhu wa miji ja kutali.
ACT 26:12 “Hiho ndiwele nding'hali mmijito jijo, nanduta Damasiko mhela umwe, ndiwele na ludali na mzilo womheligwe na watambika wakulu.
ACT 26:13 Mndewa, mhela londali mnzila, isanya liliminosi, nambona lumuli lukulu kusinda lwa isanya lumwesa kulawila kilanga, unzunguluta heni na wala wayangu wotuwele hamwe mli majendo.
ACT 26:14 Hetwe tweng'ha natugwa hasi, na heni nyhulika lizi lindonjela kwa Chieblaniya, ‘Saulo, Saulo! Lekachoni ulingungaza? Kwangilumiza hela kota isenga lilingutowa teche ng'hweku ya mkulu wa heye.’
ACT 26:15 Heni mbuza, ‘Kwa whaani hegwe Mkulu?’ Heye Mkulu nakedichila, ‘Heni nda Yesu yula hegwe ulingumgaza.
ACT 26:16 Winuche lelo, wime. Ndilawila leka ndikuwiche chitumagwa na mlolezi wa heni. Kumbona heni lehano, na vinhu vyondikuvumisila hamba.
ACT 26:17 Ndowalohola kwa wanhu wa Isilaeli na ndowalohola kahi kwa wanhu hawawele Wayahudi kula kondikulajiza kwa hewo.
ACT 26:18 Kowagubula nyhala zawo na kuwadita walawe muli jiza na kwinjila muli lumuli, walawe muli ludali lwa Limazoga wangalamchile Nguluwi, leka kwa kukunda, woselwe gehile na kuhola honhu ha hewo hali wala wanhu wahaguligwe na heye Nguluwi.’
ACT 26:19 “Mndewa Agilipa, nasiwele na lyakubeza kwa ula ulotezi wondiuwene kulawila kilanga.
ACT 26:20 Ila mwaluko nanyaluka kudamla kwa wanhu wa Damasiko, hamba kwa wala wa Yelusalemu na isi yeng'ha ya Yudeya, kahi na wanhu hawawele Wayahudi. Nandiwadamlila waleche gehile na kumgalamchila Nguluwi na kulajila kwa madito kuli nhumbula za hewo.
ACT 26:21 Kwa chiwalo acho, Wayahudi newembata ndiwele mng'handa ya Nguluwi wajeza kung'hopola.
ACT 26:22 Ila Nguluwi nakanhanza, na ndo mbaka zuwa lya lelo nyima nzinzili kulavya ulolezi kwa weng'ha, wakulu na wadodo. Gondilingulonga ndo gala waloli wa Nguluwi na Musa nawalonga golawila.
ACT 26:23 Nawalonga imlapa Kilistu Mlohozi kugazigwa na yawe wa mwaluko kuzilipuka kwa wanhu wabagame, yadamle kota lumuli lwa ulohozi wanguwamwesela lelo wanhu weng'ha, Wayahudi kahi na wanhu hawawele Wayahudi.”
ACT 26:24 Paoli yafichile hano kwa kigombela kwa heye, Festo nakachemelela, “Paoli! Kuna lukwale! Kusoma lukami kwa hegwe kwangukudita uwe na lukwale!”
ACT 26:25 Paoli nakedichila, “Mndewa Festo, ndahela lukwale chondilingulonga ndo kukomya yeka.
ACT 26:26 Hegwe mndewa Agilipa kuzizela mbuli azi, ahyo ndoweza kulonga ne kudumba hali hegwe. Hambe njese kuta ago geng'ha gakoleche gazeleka na hegwe mina mbuli ayi haiditikwe chinyele.
ACT 26:27 Mndewa Agilipa, lelo kuna makundo na waloli wa Nguluwi? Ndivizela kwangukunda.”
ACT 26:28 Mndewa Agilipa nakamlonjela Paoli “Hachefu hela kondita munhu ndilingumkunda Kilistu!”
ACT 26:29 Paoli kedichila, “Ndangumlanda Nguluwi kuta, kwa mhela udo ama uhejile, haiwele gwegwe yeng'ha ila wala weng'ha walinguhulika lehano wawe kota heni, ila ndiwele hambe nyhopigwe ng'weso.”
ACT 26:30 Aho mndewa Agilipa nakema hamwe na mkulu wa mkowa na Belinike na wala weng'ha wawele hala.
ACT 26:31 Lowochile, walongasa, “Munhu ayu haditile choneche chilingumlapa igayo lya kubagama ama chinweng'ho.”
ACT 26:32 Na heye mndewa Agilipa nakamlonjela Festo, “Munhu ayu twahamchumulile wone nahalechile kulanda nongwa ya heye ihulichizwe na Kaizali mndewa mkulu wa Loma.”
ACT 27:1 Lowaganile tuheluche mbaka Italiya, nawamuwika Paoli hamwe na wanweng'ha wanji hasi ha udimi wa Yulio yula yawele chilongozi wa chilundo chilinguchemigwa “Chilundo cha wamizi.”
ACT 27:2 Natukwina meli ya kulawa Adilameto nayali iheluka na kukolela bandali zimwe za mkowa wa Asiya, natwaluka majendo. Alistako mwenyeng'haye wa Makedoniya, kulawa Tesalonike, nayali hamwe na hetwe.
ACT 27:3 Mitondo yake natufika mbandali ya Sidoni. Yulio nakamditila Paoli goya kwa kumkundiza yawone waganwa wa heye na kupegwa goyolapa.
ACT 27:4 Kulawila ako natulutilila na majendo, ila kwa vila mbeho nayali iputa lukami ituyila kwa kumwando, natukola nzingo ya chihilwa Kupulo kula mbeho nayali nyindo.
ACT 27:5 Natulawa tuloka bahali ya Kilikiya na Pamfiliya, natufika Mula, mgati mwa Lukiya.
ACT 27:6 Ayo mkulu wa wamizi nakafika meli imwe ya Alekizandiliya nayali iluta Italiya, hamba nakatukwiniza mgati.
ACT 27:7 Kwa mihela ja mazuwa menji natuheluka mholemhole, kwa kugaya natufika behi na Nido. Kwa vila mbeho nayali ing'hali ituputa, natulutilila kumwando tung'hang'hazala tuluta nzingo ya Kilete behi na lasi Salimoni kula mbeho hayali nyinji.
ACT 27:8 Natukola mfungo mholemhole tufika honhu hali nguchemigwa Bandali Inojile, behi na muji wa Laseya.
ACT 27:9 Natwesela kulya chinhu kwa mhela uhejile mbaka luhela nalwali lwihile ng'hatu. Lelo nayiha ng'hatu kuheluka na meli. Lelo Paoli nakawadeuza,
ACT 27:10 “Wang'hangala, ndangijesa kuta majendo aga gowa na ugayo na kwajiliza kwinji haiwa kwa vinhu vili muli meli yeka kahi yowa kwa ukomu wa hetwe.”
ACT 27:11 Ila mng'hangala nakakwejezwa na gala goyali yolonga mlongoza meli na yawele na meli kusinda gala goyali yolonga Paoli.
ACT 27:12 Kwa vila bandali ayo hayali honhu hanojile hakikala mhela wa mbeho, wenji nawagana kulutilila na majendo, wone iganiche mbaka Fonekisi. Fonekisi ndo bandali ya Kilete nzingo ayo nayali ilemezwa na mbeho. Na ako wekale mhela wa mbeho.
ACT 27:13 Lelo nailawila mbeho inojile ya kusi nayaluka kuputa, na hewo wavizela wokungajiza gowaliwogana, ahyo nawosa lyuma lizidahe lilingwimiza meli wendesa behi ng'hatu na mwhani ya Kilete.
ACT 27:14 Ila haupulute mhela, mbeho ng'hali nayaluka kuputa kulawila mchihilwa.
ACT 27:15 Mbeho naitowa ila meli, na kwa vila natulemwa kisumwa kuluta kotuganile, natuileka meli ibulunwe na ayo mbeho.
ACT 27:16 Chihilwa chimwe chilinguchemigwa Kauda nachitudinya hado na ayo mbeho, na lotufichile kusini natuweza, ila kwa igayo, twamiliza lila itumbwi lya meli.
ACT 27:17 Wala wanamazi walikwega lila itumbwi mugati, hamba waizungulusila meli izabi na kuiwoha kwa ludali. Nawadumba wonanahila mfungo mwa bahali hawele na Siliti, behi na mwhani ya Afilika. Ahyo nawatelemsa iguwo ligazi lilingukundujiza meli, nawaileka meli ibulunwe na mbeho.
ACT 27:18 Mbeho ilutilila kuputa na mitondo yake waluka kutoza kunze mhomholo zilimmeli.
ACT 27:19 Zuwa lya kadatu, nawaluka kahi kutoza mmazi vinhu vimwe vya mli itumbwi kwa moko ga hewo wawo.
ACT 27:20 Kwa mazuwa menji hatuliwene isanya ne nhondwe, mbeho ilutilila kuputa ng'hatu, mbaka kitumbila kwesa kutumala.
ACT 27:21 Lotikale mazuwa gahejile ne kulya ndiya, Paoli nakema hali hewo, kalonga, “Wang'holozangu, yahawele goya wone na mnyhulichize na kuleka kuheluka kulawa Kilete. Wone na mudite ahyo natwaahejile hali magazo ago na kuwifya aku kweng'ha.
ACT 27:22 Ila sambi ndangukulandani mikangaze nhumbula, haduhu ne yumwe muli hemwe yokwajiza ukomu wa heye, meli iliyeka ndo ikwaga.
ACT 27:23 Kwa vila hamitondo hamihe mhilisi wa kilanga nakandawila. Nguluwi yula heni ndilingumfugamila.
ACT 27:24 Mhilisi ayo nakandonjela, ‘Paoli, uleche kudumba! Yokugana wime hali Kaizali mndewa mkulu wa Loma, na heye Nguluwi kwa isungu lyake, kakukangaza na kuwalohola weng'ha walinguheluka na hegwe.’
ACT 27:25 Ahyo walume wayangu, mikangaze nhumbula! Kwa vila ndangumkunda Nguluwi, yowa hihila kota vyondonjelwe.
ACT 27:26 Ila yotugana kutajigwa mfungo mwa chihilwa chimwenga.”
ACT 27:27 Hamihe ha zuwa lya kumi na zine, twali tubulunwa kuno na kuno muli bahali ya Mediteleniyani. Behi na hamihe chilo ng'hatu wanamazi newejesa kota wahabehi na kigongo.
ACT 27:28 Aho nawapala kwinjila kwa bahali kwa kuwoha chinhu chizidahe, wapata winjilo wa mita makumi gane, hamba nawapima kahi nawapata winjilo wa mita makumi gadatu.
ACT 27:29 Kwa kudumba kunhanhahila muli mitalawe, nawadulisa ngwamo zine kumbele mwa meli, nawalanda kuche himahima.
ACT 27:30 Wanamazi nawagana watoloche, na wali mina wadulise lila itumbwi mmazi, wochidanganyizila kuta wanguluta kudulisa ngwamo kumwando mwa meli.
ACT 27:31 Ila Paoli nakamlonjela yula mkulu wa chilundo na wamizi wa hewo, “Wone wanamazi awa hawaponile muli meli, hamlohoka.”
ACT 27:32 Aho wala wamizi nawazidohola zila nzabi zali zibatilile lila itumbwi, walileka liholigwe na mazi.
ACT 27:33 Behi na kucha, Paoli nakawadedeza weng'ha walye chilyo, “Kwa mazuwa kumi na gane mwali mdumba ne kulya chilyo, hamdile chinhu choneche.
ACT 27:34 Lelo ndanguwadedeza mulye ndiya leka mlutilile kikala. Mina nemvili imwe ya hemwe ya mitwi ja hemwe haikwajilila.”
ACT 27:35 Loyalonjile ago, Paoli kahola ibumunda, kata malumbo Nguluwi hali hewo wose, kabena kaluka kulya.
ACT 27:36 Aho weng'ha nawekangaza nhumbula, hamba walya ndiya.
ACT 27:37 Tweng'ha twali wanhu miya mbili makumi saba na sita muli meli.
ACT 27:38 Chila munhu loyadile ndiya ya kumkwila, nawapunguza itunyo lya meli kwa kutaga nyhule muli bahali.
ACT 27:39 Lokuchele, wanamazi nawalemwa kuizela isi ila, ila nawona chihilwa chimwe chiwele na misanga, walamula kuhilika meli kigongo ako wone idahiche.
ACT 27:40 Ahyo nawadumula ngwamo na kuzileka mbahali, na baho wadumula nzabi zali ziwohile chilongoza meli, hamba nawawoha ibende limwe kumwando kibata mbeho, waluta kuchihilwa hawele na ndidimila.
ACT 27:41 Ila nawafika honhu hamwe mikolola mili ja bahali jilinguting'hana, na meli inanahila. Honhu ha kumwando ha meli hali henjile mmisanga ne kutigasika. Honhu ha kumbele ha meli na haluka kubeneka viundeunde kwa kutowigwa na ludali lwa nhigu.
ACT 27:42 Wamizi nawagana kuwakoma wanweng'ha weng'ha kwa kudumba kuta wahojelele mbaka mwhani watoloche.
ACT 27:43 Ila kwa vila yula mkulu wa wamizi nakagana kumlohola Paoli, nakawalemeza waleche kudita ahyo. Nakawalonjela wala wadahile kojelela wanyozoche kulawa mmeli na kojelela mbaka hafungo mwa ilamba.
ACT 27:44 Na wanji wawinze kwa kibatilila muli mibao ama muli viunde vya meli ibeneche. Ndo hetwe tweng'ha vyotufichile wakomu hafungo mwa ilamba.
ACT 28:1 Lotufichile goya kigongo, tuvizela kota chila chihilwa changuchemigwa Malita.
ACT 28:2 Wenyeng'haye wa aho wali wanojile kwa hetwe. Nhonya nayaluka kutowa na kahi kwali na mbeho, ahyo wabwina chiluli watuchemela.
ACT 28:3 Paoli kalokota mpelo udodo wa ngodi kaza ngukoleza mchiluli. Ahyo kwa ivuche lya chiluli. Izoka lilawa mngodi limluma na kumnanahila Paoli mmoko.
ACT 28:4 Wenyeng'haye wa hala wawene lila izoka lininila muli moko wa heye waza ngilonjela, “Ayu mina kakopola munhu, kwa vila kalohoka kuduma mbahali, utaguso wa milungu haumleka kahi yazenguwa mkomu!”
ACT 28:5 Ila Paoli kalimimina lila izoka mchiluli na halumizwe nehado.
ACT 28:6 Wala wanhu wali wovizela kota kotuna ama baho yahagwile hasi na kubagama. Lowabeteze kwa mhela uhejile ne kona chinhu choneche chimfichile Paoli, wagalamla luhala lwao, walonga kota, “Heye ndo mlungu.”
ACT 28:7 Behi na honhu hala hali na mgunda wa Publio, mkulu wa chila chihilwa. Publio nakatuchemela chilugano, tuwa wajenzi wa heye mazuwa gadatu.
ACT 28:8 Lelo mhaza wa Publio nayali yawasile mchinhanda yotamika lupanzo. Paoli nakaluta kumlola na lowalandile Nguluwi, kawika moko ga heye kwa mtamwa, kamusa utamwa.
ACT 28:9 Kwa mbuli ayo, watamwa weng'ha hali chila chihilwa nawoya kusilwa utamwa.
ACT 28:10 Wanhu nawatupa ndolendole nyinji na mhela kahi lotwaluche majendo, nawajela mgati mwa meli vinhu navyotulapile.
ACT 28:11 Lojipulute myezi jidatu natwaluka kahi majendo kwa meli imwe ya Alekizandiliya iwichigwe ulajilo wa “Milungu Minyambili.” Meli ayo nayali iwichile ngwamo mchihilwa mihela jeng'ha ja mbeho.
ACT 28:12 Natufika hali muji wa Silakusa, tikala aho mazuwa gadatu.
ACT 28:13 Kulawila ako natiyinula majendo, tuzunguluta na tufika Legio. Logapulute mazuwa gadatu, mbeho nayaluka kuputa kulawila kusini, na mazuwa meli logapulute tufika muji wa Potioli.
ACT 28:14 Ako natuwafika wanhu walingumkunda Kilistu wamwe watulanda tikale na hewo juma imwe. Ahi ndo vyotufichile Loma.
ACT 28:15 Kula Loma wanhu walingumkunda Kilistu, lowalonjelwe mbuli za hetwe, nawoya kututing'haniza kuli Soko lya Apiyo na honhu halinguchemigwa Ng'handa zidatu za kwesela wajenzi na kuwasa. Paoli loyawawene kata malumbo Nguluwi, nakekangaza nhumbula.
ACT 28:16 Lotufichile Loma Paoli nakakundizwa kikala yaliyeng'ha hamwe na mwamizi yumwe wa kumlolela.
ACT 28:17 Logapulute mazuwa gadatu, Paoli nakawachema hamwe vilongozi wa Chiyahudi wa honhu aho. Lowelundile Paoli kawalonjela, “Wang'holozangu, heni kwa vila siditile chinhu choneche chihile kahi sibezile mizilo ja wasekulu wa hetwe, nandibatigwa kula Yelusalemu na kuwichigwa mmoko mwa Waloma.
ACT 28:18 Waloma lowambuzile na kona ndahela nongwa yoneche, nawagana kundechela,
ACT 28:19 ila Wayahudi wamwe nawabela mbuli ayo, na heni ndapigwa kukana lufaa kwa Kaizali mndewa mkulu wa Loma, kwa vila sali na choneche cha kuwatagusa wanhu wayangu.
ACT 28:20 Kwa ahyo ndanda kiwona na kudawala na hemwe, mina mbohigwa aji minyololo kwa vila mlohozi wa wanhu wa Isilaeli walingitumbila, koya.”
ACT 28:21 Hewo wamlonjela, “Hetwe hatunabochela maandiko goneche galawile Yudeya, kahi haduhu mng'holozetu yoneche yafichile aha na kulavya mbuli zila awu kulonga choneche chihile cha hegwe.
ACT 28:22 Ila twangijesa igana tuhuliche kwa hegwe mbuli zili kumutwi kwa hegwe. Mina lyotulinguvizela hetwe acho chilundo cha hegwe changulemigwa chila honhu.”
ACT 28:23 Hamba walonga na heye zuwa lya kuting'hana, na wenji nawafika ako koyali ngikala. Kulawila lufuka mbaka matinazo Paoli nakawagubulila gala ga Undewa wa Nguluwi, yojeza kuwadita wakunde mbuli ya Yesu kwa kukolele malajizo ga Musa na maandiko ga waloli wa Nguluwi.
ACT 28:24 Wanhu wamwe nawakunda ulonzi wa heye na wamwe hawakundile.
ACT 28:25 Hawa na ubagulo hewo kwa hewo. Lowali woluta, Paoli nakalonga mbuli ayi, “Ng'homya gala Muhe Yelile goyawalonjele wasekulu wa hemwe kwa kukolele mloli wa Nguluwi Isaya.
ACT 28:26 Yolonga, “ ‘Ulute kwa wanhu awa ukawalonjele, kuhulika mohulika, ila homvizela, kulola molola, ila hamkona hebu.
ACT 28:27 Mina nyhala za wanhu awa zibowala, wagadinya makutu gawo, wadinya meho gawo. Hanga, wahalolile kwa meho gawo, wahahuliche kwa makutu gawo, wahavizelele kwa nyhala zawo, na kungaluchila, kangulonga Mkulu, na heni ndahawalohole.’ ”
ACT 28:28 Hamba Paoli kalonga, “Mvizele lelo, usenga wa Nguluwi kuwala ulohozi wangigaligwa kwa wanhu hawawele Wayahudi. Hewo wohulichiza.”
ACT 28:29 Paoli loyalonjile ago, Wayahudi weyuchila kuno wawele wochitwanza lukami hewo kwa hewo.
ACT 28:30 Kwa mhela wa miyaka mili Paoli nakekala muli ng'handa yoyapanjile yuye, kaza nguwachemela wanhu weng'ha woyile kumlamsa.
ACT 28:31 Yali yodamla Undewa wa Nguluwi na kulangusa gala ga Mkulu Yesu Kilistu kwa udaho ne chilemezi.
ROM 1:1 Heni Paoli, chitumagwa wa Yesu Kilistu. Nguluwi nakanyhema ndiwe mtumigwa na kunyagula ndiwe ndiwadamlila wanhu Mbuli Inojile ya heye.
ROM 1:2 Aho katali, Nguluwi nakalagana na wanhu kwa Mbuli Inojile kukolela waloli wa heye kuli Maandiko Matakatifu.
ROM 1:3 Ayi Mbuli Inojile ya heni yangumdamla Mwana wa Nguluwi, Mkulu wa hetwe Yesu Kilistu, heye kwa lukuli nakavumbuka mlukolo lwa Daudi.
ROM 1:4 Ila heye nakatawizwa yawe mwana wa Nguluwi kwa ludali lwa Muhe Yelile kwa kumzilipula Yesu Kilistu Mkulu wa hetwe.
ROM 1:5 Kwa nzila ya heye, tubochela kunoga kwa heye tuwe watumigwa kwa chiwalo cha Kilistu, leka tuwadite wanhu hawawele Wayahudi wenamize kwa chiwalo cha makundo.
ROM 1:6 Na hemwe kahi muwele ako Loma, hemwe namchemigwe na Nguluwi, muwe wanhu wa heye Yesu Kilistu.
ROM 1:7 Lelo ndaguwandichila hemwe mweng'ha muli ako Loma mlinguganigwa na Nguluwi, mchemigwe muwe wanhu wa heye welile. Nguluwi mhaza wa hetwe na Mkulu wa hetwe Yesu Kilistu, yawape hemwe utambichizo na kikala goya.
ROM 1:8 Nding'hali kwaluka geng'ha, ndangumnonela Nguluwi wa heni, kukolela Yesu Kilistu kwa hemwe mweng'ha, kwa vila makundo ga hemwe gangudamligwa na wanhu weng'ha muisi.
ROM 1:9 Nguluwi yondilingumfugamila kwa nhumbula ya heni yeng'ha chila zuwa kwa kulavya ulolezi wa Mbuli Inojile ya Mwana wa heye, kotawiza kota heni hambe ndikusemweni,
ROM 1:10 chila zuwa hondimlanda Nguluwi. Ndangumlanda Nguluwi, wone yagane yamhalile mhela unojile wa kuya kuwajendela.
ROM 1:11 Mina ndangugana ng'hatu ndikoneni ndiwagawile na hemwe ndolendole za chimuhe za kuwakangaza.
ROM 1:12 Gondilingulonga hano, weng'ha heni na hemwe tikangaze, hemwe kwa makundo ga heni na kwa makundo ga hemwe.
ROM 1:13 Hemwe wang'holozangu ndangugana mvizele hino, nangana kukujendelani mbaka sambi ndemezwa. Nangana wanhu wamkunde Nguluwi hali hemwe, kota wanhu nawamkundile hali wanhu hawawele Wayahudi.
ROM 1:14 Namhegwa mijito ya kuwadamlila wanhu weng'ha, Wagilichi na hawawele Wagilichi, wasugu na wapoka.
ROM 1:15 Ndo mina heni ndangugana ng'hatu kuwadamlila Mbuli Inojile hemwe kahi mlingikala ako Loma.
ROM 1:16 Hambe ndiyonele soni Mbuli Inojile, kwa vila ina mong'ho wa Nguluwi lwa kumlohola chila munhu yalingukunda, mwaluko kwa Wayahudi, na hamba kwa wanhu hawawele Wayahudi.
ROM 1:17 Mina Mbuli Inojile yangulajila hazelu Nguluwi vyoyawele nguwadita wanhu watanganiche kwa heye, wanhu wanguwa ahi kwa kukunda, kulawila mwaluko mbaka kuduma. Kota vyogandichigwe mli Maandiko Matakatifu, “Munhu yanojile kwa Nguluwi kochikala kwa kukunda.”
ROM 1:18 Nguluwi kalajila kuzudila kwa heye kulawila kilanga, iwalawile weng'ha walingumbeza Nguluwi na kudita gehile, wala weng'ha walingudita kukomya kuleche kuzeleka.
ROM 1:19 Gala galingumdita Nguluwi yazeleche kwa hewo ga hazelu ng'hatu, kwa vila heye Nguluwi nakagadita gazeleche kwa hewo.
ROM 1:20 Kulawila zuwa Nguluwi vyoyalumbile isi, ludali lwa heye mazuwa gose, na ukulu wa heye, havikoneka hazelu, hanga havilingoneka kwa meho, vyanguzeleka ng'hatu. Wanhu woweza kugazela kwa vinhu navyoyalumbile Nguluwi. Ahyo wahela chinhu cha kigwala.
ROM 1:21 Hanga lowamzelele Nguluwi, hawalingumtogola kota Nguluwi wa hewo na hambe wate malumbo, lelo chowalingijesa chali chaupoka na nhumbula za hewo ziwa nhitu.
ROM 1:22 Wangidaya wana luhala aku wawele wapoka.
ROM 1:23 Waleka kumtogola Nguluwi yalingikala mazuwa gose, ila wangujifugamila jimalukolo jiwhanile na wanhu walingubagama na videje ama migongolo na vilumbigwe vilingutambala.
ROM 1:24 Ahyo Nguluwi nakawaleka wawinze maya gehile ga nhumbula za hewo na kudita mbuli za soni mli ng'huli za hewo.
ROM 1:25 Wangugalamla kukomya kwa Nguluwi kwa udesi, wanguvitogola na wanguvifugamila vinhu vilumbigwe na Nguluwi, ila hawalingumtogola heye yalumbile yalinguganigwa kutogoligwa mazuwa gose! Ena.
ROM 1:26 Kwa vila wangudita ahyo, Nguluwi nakawaleka wawinze gala gehile. Na wadala wa hewo, wanguleka kuwasa na walume kota vyowalumbigwe, wangigana hewo kwa hewo.
ROM 1:27 Na walume nawo hiho waleka kuwasa na wadala kota vyowalumbigwe, wangigana hewo kwa hewo. Wangiditila mbuli za soni walume kwa walume, ahyo wangigalila wawo kugazigwa kwa gala gehile ga hewo gowaditile.
ROM 1:28 Kwa vila wanhu awo nawaleka kumzela Nguluwi kwa luhala lwawo, Nguluwi nakawaleka wawinze luhala lwa hewo lwajilile, wadite gala hawaganigwe kudita.
ROM 1:29 Wanhu awa wamema wihe weng'ha, wihe na maya na kugana kuwifya na kugana vinhu vya wanhu wanji na kukopola na kilewa na uhadi na kuwifya. Wanguheha
ROM 1:30 na kulonga vinhu vihile kwa wanhu wanji na wangumzudila Nguluwi na wawele na maligo na wawele na mnvivi na kidaya na walingijesa kudita gehile na walingulema kuwahulichiza wahaza wa hewo.
ROM 1:31 Wahela luhala na hambe webate ilagano na hawalinguwanojeza ne kuwonela isungu wanhu wanji.
ROM 1:32 Wanguvizela kota kuli malajizo gatanganiche ga Nguluwi wanhu walingudita vinhu kota avyo wanguganigwa kubagama. Hawalingulutilila kudita vinhu avyo viliyeng'ha, ila kuno wanguwatogola wanhu walingudita mbuli azo.
ROM 2:1 Ahyo gwa miyangu, wone ulinguwatagusa wanhu wanji kwa wihe, huchigombela hebu hanga hegwe uwe whaani. Kwa vila vyouwatagusa kwa wihe wanhu wanji, aku nagwe ulingudita gala gowalingudita hewo kwangipanjila gwegwe uliyengha.
ROM 2:2 Natwe tuvizela kutagusa kwa Nguluwi kwa wanhu walingukola mbuli kota azo. Natwe tuvizela kota utaguso wa Nguluwi wangukoleka kwa kukomya.
ROM 2:3 Ila hegwe uli nguwatagusa wanhu wali ngudita mbuli kota azo, na kahila nagwe kwangukola gago, hambi kwangiijesa kota kobudala utaguso wa Nguluwi?
ROM 2:4 Ama kwangubeza igano lya heye ling'hangala lya Nguluwi, kubeteza kwa heye ne kuvizela, ahyo isungu lya heye lyangugana kukulongoza umgalamchile Nguluwi?
ROM 2:5 Ila hegwe uwele na nhumbula igagadale, na ulingubeza wa kuleka gehile, ahyo kwangimemezela gwegwe uliyeng'ha kugazigwa kwa zuwa lila lya kuzudila mhela ula utaguso utanganiche wa Nguluwi loyoulajila.
ROM 2:6 Zuwa alyo Nguluwi komlipa chila munhu kwa chila nachoyaditile.
ROM 2:7 Wala wanhu walingulutilila kudita ganojile, aku wopala ukulu na koneka kana lutogo na kuleka kubagama. Wanhu awa Nguluwi kowapa ukomu wa mazuwa gose.
ROM 2:8 Ila wala wamwe wali na uyengha, walingulema mbuli zinojile na kuwinza gehile, ndangukomya Nguluwi kowatagusa kwa ng'halazi ya heye.
ROM 2:9 Kugaya na usungu womuyila chila munhu yoneche yalingudita gehile, mwaluko kwa Wayahudi hamba kahi kwa wanhu hawawele Wayahudi.
ROM 2:10 Heye Nguluwi kowapa ukulu na koneka kana lutogo na kikala goya kwa wala walingudita ganojile. Mwaluko kwa Wayahudi hamba kwa wanhu hawawele Wayahudi.
ROM 2:11 Mina Nguluwi hambe yambagule munhu yoneche.
ROM 2:12 Wala walingudita gehile aku walihela Malajizo ga Musa, wokwaga walihela Malajizo na wala walingudita gehile aku wawele na Malajizo ga Musa, wotaguswa kwa Malajizo.
ROM 2:13 Kwa vila hawawele wala walinguhulika Malajizo ndo wala walingukundigwa na Nguluwi, ila wala walingibata Malajizo ndo wowazigwa kota wangunoza hali Nguluwi.
ROM 2:14 Wanhu hawawele Wayahudi wahela Malajizo ga Musa. Ila wokola chila chilingulawa mnhumbula za hewo kota Malajizo vyogalingugana, wawo hewo wowa na malajizo hali hewo hanga walihela Malajizo ga Musa.
ROM 2:15 Mbuli za hewo zowalingudita zangulajila kuta galinguganigwa na Malajizo gandikwa mnhumbula za hewo. Nhumbula za hewo zangulajiza kuta aku ndo kukomya, kwa vila majesa ga hewo gangulajila wone wangudita ganojile ama gehile.
ROM 2:16 Aga golawila zuwa lya utaguso hala Nguluwi kukolela Yesu Kilistu hoyotagusa mbuli za uviso za wanhu, kota Mbuli Inojile yondamle vyoilingulonga.
ROM 2:17 Lelo hegwe ndaze? Wone kwangichema gwegwe Myahudi, kwangitumbila Malajizo kwangidaila kuta munhu wa Nguluwi.
ROM 2:18 Wone hegwe kuvizela chila choyalingugana Nguluwi udite na koweza kuhagula ganojile kwa vila Malajizo gakulangusa.
ROM 2:19 Wone hegwe kwangiwona munhu yalingulongoza wanhu hambe walole, na lumuli lwa wanhu wawele kutitu,
ROM 2:20 wone hegwe kwa mlangusa wa wapoka na wala hawanavizela malanguso, kwa vila kwangijesa kuli malajizo kwanako kudaha kweng'ha na kukomya.
ROM 2:21 Lelo hegwe kwangulangusa wanji, lekachoni hambe wilanguse gwegwe uliyengha? Kwanguwadamlila wayago waleche kuhiza, hambi hegwe hambe uhize?
ROM 2:22 Hegwe ulinguwalonjela wanhu, mleche ung'hondwa, hambi hegwe hulingudita ung'hondwa? Kwanguzudila jimalukolo ja milungu ja udesi na ndaze hegwe hulinguhiza mli ng'handa azo za milungu?
ROM 2:23 Kwangidaila Malajizo ga Nguluwi, hambi hegwe hulingumbeza Nguluwi kwa kulema kibata Malajizo ga heye?
ROM 2:24 Kota hila Maandiko Matakatifu vyogalingulonga, “Kwa mbuli ya hemwe Wayahudi, wanhu hawawele Wayahudi waliliga itagwa lya Nguluwi.”
ROM 2:25 Kwinjila ikumbi ndo chowa chinhu chinojile wone wibatilile Malajizo, ila wone hulingibatilila Malajizo kwangiwhana na munhu yula hanenjila ikumbi.
ROM 2:26 Wone munhu hawele Myahudi, henjile ikumbi, wone yakole kota Malajizo vyogalingugana, Nguluwi homuwaza kota munhu yenjile ikumbi?
ROM 2:27 Wanhu hawawele Wayahudi wala wang'hali kwinjila ikumbi lya chilukuli ila wangibatilila Malajizo, wowatagusa kwa gehile hemwe Wayahudi kwa vila hamlingibatilila Malajizo hanga muwele na Malajizo gandichigwe.
ROM 2:28 Ndo kulonga, haiwele chila munhu nayali ngoneka kwa kunze Myahudi ndo Myahudi ng'hatu na munhu howa Myahudi ng'hatu wone yenjile ikumbi chilukuli.
ROM 2:29 Myahudi ng'hatu ndo yula yawele Myahudi wa mgati, yula yenjile ikumbi mnhumbula. Ayi ndo mijito ya Muhe wa Nguluwi, hachiwele chinhu cha Malajizo gandichigwe. Munhu yawele ahyo kangutogoligwa na Nguluwi, na haiwele kwa wanhu.
ROM 3:1 Lelo Myahudi kana choni ng'hatu kusinda wanhu wanji? Hambi kwinjila ikumbi chiwa chinhu chitanganiche?
ROM 3:2 Ena, kuna vinhu vikulu vinji. Cha mwaluko Nguluwi nakawapa Wayahudi usenga wa heye.
ROM 3:3 Lelo yowa ndaze wone wayawo wamwe hawawele wa kukundigwa? Ndaze, mbuli ayi yokusa kukundigwa kwa Nguluwi?
ROM 3:4 Ne hado! Nguluwi kopona wa kukundigwa mazuwa gose, na chila munhu kokoneka mdesi. Kota Maandiko Matakatifu vyogalingulonga kumlapa Nguluwi, “Chila houlonga, mbuli za hegwe zowa za kukomya, na houtagusa hegwe kwangusinda.”
ROM 3:5 Ila wone gehile ga hetwe gangulajila kota Nguluwi kangudita ganojile, lelo tulonje choni? Tulonje Nguluwi kanguwifya wone yatutaguse? Aha ndangulonga chiwunhu.
ROM 3:6 Ne hado! Wone na iwe ahyo, Nguluwi yahawataguse ndaze wanhu wa isi?
ROM 3:7 “Wone udesi wa heni wangonjeza kukomya kwa Nguluwi na wangonjeza ukulu wa heye, lelo lekachoni ndangutagusigwa ndina gehile?”
ROM 3:8 “Lekachoni hambe tulonje, tuleche kudita gehile leka ganojile goye?” Wanhu wanji nawandiga, nawalonga kota heni ndangulangusa mbuli azo. Wotagusigwa kota vyoilingulapigwa.
ROM 3:9 Tulonje choni lelo? Hetwe Wayahudi tutanganika kusinda wanhu wanji? Ne hado! Kota navyondiwalonjele aho katali, kuta Wayahudi na wanhu weng'ha hawawele Wayahudi wana gehile.
ROM 3:10 Kota Maandiko Matakatifu vyogalingulonga! “Kwa Nguluwi haduhuli ne yumwe yanojile,
ROM 3:11 haduhuli munhu ne yumwe yavizelele, haduhu ne yumwe yalingumpala Nguluwi.
ROM 3:12 Weng'ha wamleka Nguluwi, weng'ha hawatanganiche hali Nguluwi, haduhuli yalingudita ganojile, haduhuli ne yumwe.
ROM 3:13 Mimelo ja hewo kota chilaga chilimwazi, myango za hewo zangulonga udesi. Mumlomo mwa hewo mwangulawa ulonzi uwele na dunga kota ya izoka.
ROM 3:14 Mgati mwa milomo ja hewo jilunda upanjilo uwele usungu.
ROM 3:15 Magulu ga hewo gangubilimila kukopola.
ROM 3:16 Chila howoluta wangwambuza kubagama na kugaza.
ROM 3:17 Hawavizelele kikala goya,
ROM 3:18 hambe wamdumbe Nguluwi.”
ROM 3:19 Lelo tuvizela kuta Malajizo ga Musa vyogalingulonga, gangulonga na wanhu wala wawele na Malajizo leka chila munhu yaleche kigombela, na wanhu weng'ha watagusigwe na Nguluwi.
ROM 3:20 Ahyo haduhu munhu yoneche yalinguwazigwa katanganika ama kanoga hali Nguluwi, kwa kudita vyogalingugana Malajizo, leka Malajizo gangutugana tilolele kudita gehile.
ROM 3:21 Ila lelo, Nguluwi kaidita nzila ya heye ya kuwadita wanhu wawe watanganiche hali heye izeleche. Nzila ayi hailingitumbila Malajizo. Vivila vitabu vyandichigwe na Musa na vya waloli, vyangutawiza vinhu avi.
ROM 3:22 Nguluwi kanguwakunda wanhu wawe watanganiche hali heye kwa kumkunda Yesu Kilistu. Nguluwi kangudita ahyo kwa wanhu weng'ha walingumkunda Kilistu, haduhuli kibagula kweng'ha kwa Wayahudi na wanhu wanji.
ROM 3:23 Wanhu weng'ha wadita gehile na wamalilwa na ukulu wa Nguluwi.
ROM 3:24 Ila kwa ndolendole ya utambichizo wa Nguluwi, wanhu weng'ha wanguditigwa watanganiche kwa kukolela kwa Yesu Kilistu yalinguwagombola.
ROM 3:25 Nguluwi nakamlavya Yesu Kilistu kwa danda ya heye, yawe nzila ya kuhilula wihe wa wanhu kwa gala gowaditile, kwa kumkunda heye na kadita ahyo leka yalajile heye kuta katanganika. Kwa vila aho katali kuli kubeteza kwa heye, nakaleka kuwagaza wanhu kwa gehile galongole kuditikwa.
ROM 3:26 Lelo sambi kanguwinza gehile ga wanhu yawalajile kutanganika kwa heye. Mina heye Nguluwi kanoga na kumdita munhu yoneche yatanganiche yalingumkunda Yesu.
ROM 3:27 Lelo toweza kidayila choni? Haduhu! Kwa chinhu chachi? Hambi kwa kibata Malajizo? Hebu! Ila kwa vila twangukunda.
ROM 3:28 Mina Nguluwi kangumkunda munhu yawe yatanganiche kwa kukunda, ila haiwele kwa kibata Malajizo ga Musa.
ROM 3:29 Hambi Nguluwi ndo Nguluwi wa Wayahudi waliyeka? Hambi na heye hawele Nguluwi wa wanhu wanji? Ena, heye ndo Nguluwi wa wanhu weng'ha.
ROM 3:30 Nguluwi ndo yumwe, na heye nakawadita wenjile ikumbi wawe watanganiche kwa makundo ga hewo, na wanhu hawenjile ikumbi kahi kwa makundo ga hewo.
ROM 3:31 Lelo ndaze, twanguwika malajizo hafungo mwa makundo aga? Ne hado, ila twanguwinza Malajizo.
ROM 4:1 Lelo tulonje ndaze mbuli za Abulahamu, mhaza wa hetwe nakabochela choni?
ROM 4:2 Kwa vila, wone Abulahamu nakawazigwa kota yatanganiche kwa gala goyaditile, yahawele na chinhu cha kidayila, ila haiwele hali Nguluwi.
ROM 4:3 Mina Maandiko Matakatifu gangulonga, “Abulahamu nakamkunda Nguluwi na heye Nguluwi nakamuwaza kuta katanganika.”
ROM 4:4 Munhu hoyokola mijito halingupegwa kota ndolendole, ila kangupegwa kota ifungu lya heye.
ROM 4:5 Ila wone munhu hambe yetumbile madito ga heye, ila kangumkunda Nguluwi yalinguwosela wehile, lelo kwa makundo ga hewo, Nguluwi nakamkunda kota katanganika.
ROM 4:6 Daudi nakalonga chinhu chichi, hoyalonjile chiba kwa munhu yula Nguluwi yamkundile kota katanganika, ne kulola madito ga heye.
ROM 4:7 “Chiba wala woselwe gehile gowaditile, Na wihe wa hewo wusigwa.
ROM 4:8 Chiba munhu yula wone wihe wa heye Mkulu hambe yakumbuchile!”
ROM 4:9 Lelo ndaze, kusangalala aku koyalingulonga Daudi kwa wala wenjile ikumbi yeka ama kwa wala hawenjile ikumbi? Ne hado, vivila na wanhu hawenjile ikumbi, kota vyondongole kulonga, “Abulahamu nakakunda, na heye Nguluwi nakamkunda kota katanganika.”
ROM 4:10 Ndaze, Abulahamu nakawazigwa kuta nakatanganika honayali yang'hali kwinjila ikumbi, ama hoyenjile ikumbi? Nakawazigwa kuta nakatanganika loyang'hali kwinjila ikumbi na haiwele loyenjile ikumbi.
ROM 4:11 Abulahamu nakenjila ikumbi hamba, na kwinjila kwa heye ikumbi kuwa ulajilo wa kulajila kuta Nguluwi kamkunda kota katanganika kwa chiwalo cha makundo ga heye, hala nayawele hanenjila ikumbi. Ahyo, Abulahamu kawa mhaza wa wanhu walingumkunda Nguluwi hanga hawenjile ikumbi leka wakundigwe na Nguluwi kota watanganika kwa heye.
ROM 4:12 Vivila Abulahamu ka mhaza wa wanhu wenjile ikumbi, ila haiwele kwa kwinjila ikumbi yeka, leka kwa vila wanguwinza nzila ya makundo ga mhaza wa hetwe Abulahamu nayoyawele nayo naloyang'hali kwinjila ikumbi.
ROM 4:13 Nguluwi nakalagana na Abulahamu na nhanzi ya heye kota isi yeng'ha yahawele ya hewo. Woibochela isi yeng'ha haiwele kwa vila Abulahamu nakadita kota Malajizo vyogalonjile, ila kwa vila nakamkunda Nguluwi nakukundigwa kuta katanganika.
ROM 4:14 Kwa vila wone gala goyalagane Nguluwi wangupegwa wanhu wala walingibatilila Malajizo hela, lelo makundo hagowa chinhu na vivila chila choyalonjile Nguluwi hachiwa chinhu.
ROM 4:15 Malajizo gangwambuza kuzudila kwa Nguluwi, ila wone kuduhu Malajizo nahakwalinguwa na wihe.
ROM 4:16 Ahyo ilagano lyangitumbila makundo, leka ilagano lila lyoneche kota ndolendole ya Nguluwi kwa nhanzi zeng'ha za Abulahamu, haiwele kwa wala walingibatilila Malajizo waliyeng'ha, ila vivila kwa wala walingikala kwa makundo kota vyonayekale Abulahamu, nayawele mhaza wa chimuhe wa hetwe tweng'ha.
ROM 4:17 Kota Maandiko Matakatifu vyogali ngulonga, “Ndikuhagula uwe mhaza wa isi nyiji.” Ilagano lino lyakukomya hali Nguluwi yakundigwe na Abulahamu. Nguluwi yalinguwapa ukomu wabagame, na vinhu vilikuduhu vyanguwakuko.
ROM 4:18 Abulahamu nakakunda na kutumbila hanga nakwali kuduhu chinhu cha kitumbila, ahyo kawa mhaza wa isi nyinji. Kota Maandiko Matakatifu vyogolonga, “Lulelo lwa hegwe lowa lwinji metemete!”
ROM 4:19 Abulahamu nayali na ukulu wa mihela behi miya imwe, ila makundo ga heye hagapunguche hanga yavizelele kota lukuli lwake luwa kota lufile, howa na mwana na mche wake Sala, nayali mhende.
ROM 4:20 Abulahamu nahawele na majesa na ilagano lya Nguluwi, ila nakawa na ludali kwa makundo ga heye, ahyo nakamtogola Nguluwi.
ROM 4:21 Na kavizela ng'hatu kota Nguluwi kanguweza kukola gala goyalagane.
ROM 4:22 Ahyo kwa makundo ga heye, “Nguluwi nakalonga Abulahamu ka munhu yatanganiche.”
ROM 4:23 Mbuli ayi, “Nakamkunda kota katanganika,” Handichilwe yuye nayali yeng'ha,
ROM 4:24 vivila twangwandichilwa na hetwe tuwazigwe na Nguluwi kota tukunda, yamzilipule Mkulu wa hetwe Yesu Kilistu.
ROM 4:25 Heye nakalavigwa yabagame kwa gehile ga hetwe, hamba nakazilipuka leka tuwe watanganiche.
ROM 5:1 Lelo kwa vila tuditwa tuwe watanganiche kwa makundo, lelo twangikala goya na heye Nguluwi kukolela Mkulu wa hetwe Yesu Kilistu.
ROM 5:2 Kwa kitumbila kwa hetwe, Yesu nakatigala kuli kunoga kwa heye Nguluwi motulingikala sambi, na twangusangalala kwa kubeteza ukulu wa Nguluwi.
ROM 5:3 Ena, haiwele ago hela, kahi twangusangalala mli magazo ga hetwe, tuvizela magazo gangigala ubetezo,
ROM 5:4 nawo ubetezo wangigala utanganizo, na utanganizo wangigala utumbilo.
ROM 5:5 Kitumbila hambe kumbase munhu soni, mina Nguluwi nakejidila mnhumbula za hetwe igano lyake kukolela Muhe Yelile yatupele hetwe.
ROM 5:6 Lotwali hela ludali, mhela Nguluwi loyauhagule lowuyile, Kilistu nakabagama kwa wihe wa hetwe.
ROM 5:7 Haiwele ubewe kwa munhu kubagama kwa chiwalo cha munhu yatanganiche, ila hanji munhu kobagama kwa chiwalo cha munhu yanojile.
ROM 5:8 Ila Nguluwi nakalajila kangutugana, mina lotwali tung'hali na gehile, Kilistu nakabagama kwa mbuli ya hetwe.
ROM 5:9 Ila kwa vila tuditwa tuwe watanganiche kwa danda ya Kilistu, yangoneka ng'hatu kotulohola kulawa kuli kuzudila kwa Nguluwi.
ROM 5:10 Lotwali tung'hali wang'honyo wa heye Nguluwi, natuhanyiswa na heye kwa kubagama kwa mwana wa heye. Kwa vila lelo natuhanyiswa na heye, yangulajila ng'hatu toloholigwa kwa ukomu wa Kilistu!
ROM 5:11 Ila haiwele ago yeng'ha, ila weng'ha twangumwemwetela kwa gala yaditile Nguluwi, kukolela kwa Mkulu wa hetwe Yesu Kilistu yula yatuhanyise na Nguluwi.
ROM 5:12 Gehile nagenjila muisi kukolela munhu yumwe, na kubagama nakwinjila kwa kukolela gehile. Ahyo, kubagama nakwenela kwa wanhu weng'ha, kwa vila weng'ha nawadita gehile.
ROM 5:13 Gang'hali Malajizo kuwa kuko, gehile galikuko mli isi yeng'ha, ila gehile hambe gawazigwe kota wihe hala hohali haduhu Malajizo.
ROM 5:14 Ila kwaluchila mhela wa Adamu mbaka mhela wa Musa, kubagama nakulongoza na wala hawaditile gehile kota ga Adamu, ga kumhinduka Nguluwi. Adamu nakewhana na Kilistu nayezile hamba.
ROM 5:15 Ila wihe wa Adamu hauwhanile na utambichizo wa Nguluwi. Mina, hanga gehile ga munhu yumwe kwambuza kubagama kwa wanhu weng'ha, kwa isungu lya munhu yumwe, yawele ndo Yesu Kilistu, Nguluwi nakawonjezela weng'ha utambichizo na ndolendole za heye.
ROM 5:16 Ndolendole ya Nguluwi haiwhanile na wihe wa munhu yumwe. Kwa vila munhu yumwe loyaditile gehile, Nguluwi nakatagusa, ila hala lowawifile wanhu wenji, Nguluwi nakegala ndolendole ya kuwadita watanganiche.
ROM 5:17 Kwa wihe wa munhu yumwe, kubagama nakulongoza kukolela munhu ayo yumwe. Ila yangoneka hazelu, choyaditile munhu yumwe, yawele ndo Yesu Kilistu, ndo chikulu ng'hatu. Weng'ha walingubochela utambichizo ukulu wa Nguluwi na ndolendole ng'hulu yakuditwa kutanganika, wolongoza kuli ukomu kukolela Yesu Kilistu.
ROM 5:18 Lelo kota hila kwa gehile ga munhu yumwe vyogegale utaguso kwa wihe wa wanhu weng'ha, hihyo du chinhu chimwe chinojile kwa Nguluwi, chowagombola wanhu weng'ha na changuwapa kutanganika na ukomu.
ROM 5:19 Kulema kuhulichiza kwa munhu yumwe, wanhu weng'ha nawadita gehile, hiho kwa kufugama kwa munhu yumwe kawadita wenji wawe watanganiche hali heye Nguluwi.
ROM 5:20 Malajizo nagalawila, gambuza konjezeka kwa gehile, ila hala gehile logonjezeche, kunoga kwa heye Nguluwi nakonjezeka ng'hatu.
ROM 5:21 Kota hila gehile vyogalongoze kwa kubagama, vivila utambichizo wa Nguluwi wolongoza kwa gatanganiche na kutuhilika kuli ukomu mazuwa gose kwa kukolela Yesu Kilistu Mkulu wa hetwe.
ROM 6:1 Tulonje choni lelo? Tulutilile kusigala kuli gehile leka kunoga kwa heye Nguluwi konjezeche?
ROM 6:2 Ne hado! Hetwe natubagama, na hatulongozwa kahi na gehile, lelo tolutilila ndaze kulongozwa na gehile?
ROM 6:3 Hambi mvizela lotubatizigwe natilumba na Yesu Kilistu? Hetwe natilumba kuli kubagama kwa heye kwa kubatizigwa.
ROM 6:4 Hamba, lotubatizigwe natutilwa hamwe na heye, nakilumba kuli kubagama kwa heye, leka kota hila Kilistu vyoyazilipuche kuli wanhu wabagame kwa ukulu wa mhaza, hetwe natwe twikale mli ukomu unyale.
ROM 6:5 Mina wone hetwe tilumba na heye mli kubagama kota heye, vivila tochilumba na heye kwa kuzilipuligwa kuli wabagame kota heye.
ROM 6:6 Kwa vila natuvizela wunhu wa hetwe wa katali naubagamizwa hamwe na Kilistu mumsalaba, leka ludali lwa gehile luwele mlukuli lwa hetwe luwifigwe, ahyo tuleche kahi kuwa wapogozi wa gehile.
ROM 6:7 Kwa vila hotubagama, twangugomboligwa kulawa kuli ludali lwa gehile.
ROM 6:8 Lelo wone tubagame hamwe na Kilistu, twangukunda tochikala na heye.
ROM 6:9 Kwa vila natuvizela Kilistu mina kazilipulwa kuli wanhu wabagame, na hobagama kahi, kubagama hakumlongoza kahi.
ROM 6:10 Ahyo, kwa vila nakabagama lwa kamwe hela, gehile gahela ludali, na ukomu woyawele ngikala sambi kangulongozwa na Nguluwi.
ROM 6:11 Ila hemwe kahi miwone mwemwe kota mbagama kwa kulongozwa na gehile, ila mwawakomu kwa Nguluwi kukolela Yesu Kilistu.
ROM 6:12 Ahyo, gehile galeche kuwalongoza kahi mli ng'huli za hemwe zilingukubagama, leka mleche kuwinza maya ga lukuli.
ROM 6:13 Kahi mleche kulavya vitomo vya hemwe vya lukuli vilongozwe na gehile kota vinhu vya kuditila wihe. Ila milavye hemwe mwemwe kwa Nguluwi kota wanhu wazilipulwe kulawa wanhu wabagame, mlavye vitomo vya hemwe vidite gala ganojile kota vyoyalingugana Nguluwi.
ROM 6:14 Mina, gehile hogowalongoza kahi, kwa vila hemwe hamlingulongozwa na malajizo, ila hemwe mwangulongozwa na kunoga kwa heye.
ROM 6:15 Lelo tulonje choni? Tudite gehile kwa vila hatulingulongozwa na malajizo, ila twangulongozwa na kunoga kwa heye? Ne hado!
ROM 6:16 Ndangukomya ng'hatu, mvizela wone milavye hemwe mwemwe kota wapogozi na kumhulichiza munhu yunji, hemwe mwanguwa wapogozi wa ayo mlingumhulichiza. Homuwa wapogozi wa gehile momalila kuli kubagama, homuwa wapogozi kwa kumhulichiza Nguluwi, mokoneka mtanganiche kwa Nguluwi.
ROM 6:17 Ila malumbo kwa Nguluwi, hanga namwali wapogozi wa gehile, ila lelo mwangibata ng'hatu mnhumbula malanguso geng'ha gala gombochele.
ROM 6:18 Mgomboligwa kulawa muupogozi wa gehile, muwa wapogozi wa utanganizo.
ROM 6:19 Aha ndangulonga hano ndangutumiya ulonzi uzeleche wa wanhu, lekachoni kwa ung'hochele wa hemwe mwemwe. Kwa vila mhela umwe vyomilavile vitomo vya ng'huli za mwemwe kuditila wihe na kuwifya, hihyo mlavye vitomo vya ng'huli za hemwe kwa kuwadita muwe mwelile.
ROM 6:20 Lomwali wapogozi wa gehile mwali milejehe kulawila kuli kutanganika.
ROM 6:21 Lelo mpata choni zuwa lila kwa mbuli zila mwanguzonela soni sambi? Mina golawa mwa mbuli azi ndo kubagama!
ROM 6:22 Ila lelo mina mgomboligwa kulawa mli upogozi wa gehile namuwa vitumagwa wa Nguluwi, chonjezeche kwa hemwe sambi ndo welo, na chilawila ndo ukomu wa mazuwa gose.
ROM 6:23 Mina chonolo cha gehile ndo kubagama, ila ndolendole yalingulavya Nguluwi ndo ukomu wa mazuwa gose kuli kilumba na Yesu Kilistu, Mkulu wa hetwe.
ROM 7:1 Wang'holozangu ndangona mogazela aga gondilingulonga, kwa vila ndangulonga na wanhu wagazelele malajizo. Malajizo gangumlongoza munhu mhela yawele mkomu.
ROM 7:2 Kota hila, mdala yaholeche kanguwohigwa na malajizo mhela weng'ha mlume wa heye yang'hali mkomu, ila wone mlume wa heye yabagame, mdala ayo halingulongozwa na malajizo.
ROM 7:3 Ahyo, ayo mdala wone yekale na mlume yunji mhela mlume wa heye yang'hali mkomu, kochemigwa mng'hondwa, ila wone mlume yabagame, ayo mdala hambe yalongozwe kahi na malajizo, howa mng'hondwa hanga yaholeche na mlume yunji.
ROM 7:4 Hiho du, na hemwe wang'holozangu nambagama, hamlingulongozwa kahi na Malajizo kwa vila milumba na lukuli lwa Kilistu, lelo muwa wanhu wa heye wazilipuligwe kuli wanhu wabagame, leka tumditile Nguluwi ganojile.
ROM 7:5 Mina lotwali tuchikala aku tulongozwa na lukuli, maya ya gehile nagenuligwa na Malajizo, na zikola mijito mli ng'huli za hetwe na geng'ha tugaditile gatugalila kubagama.
ROM 7:6 Ila sambi tilejeha kuli Malajizo, kwa vila natubagama, na kahi hatulongozwa kuli mbuli yila ituditile wapogozi. Ahyo lelo twangumfugamila Nguluwi mli nzila ya sambi ya Muhe Yelile na haiwele kwa nzila ya katali ya malajizo gandichigwe.
ROM 7:7 Tulonje choni lelo, tute malajizo ndo gehile? Ne hado! Ila kukolela Malajizo, salikuvizela gehile ndo choni. Wone Malajizo hagalilonga, “Uleche kugana chinhu cha muyago.” Salikuvizela kota kugana kula ndo kwiha.
ROM 7:8 Kwa malajizo ago, gehile nagapata honhu ha kuwa na maya mgati mwa heni. Kwa vila ne malajizo gehile ndo chinhu chifile.
ROM 7:9 Katali londali mkomu ne malajizo, ila mzilo wowuyile gehile nagenela mli ukomu wa heni, nani ndali kota mbagame.
ROM 7:10 Nambona mzilo awo ulinguganigwa wigale ukomu, ila kwa heni ungalila kubagama.
ROM 7:11 Kwa vila gehile nagapata honhu ha kutumiya malajizo gala, inyhada na kung'hopola.
ROM 7:12 Ahyo lelo, Malajizo gela, na mzilo wela, yangumnojeza Nguluwi, na unoga.
ROM 7:13 Lelo chila chinojile, chingalila kubagama? Ne hado! Ikoleka hino leka gehile goneche hazelu kota geha, chikoleche chila chinojile na kwambuza kubagama kwa heni. Ahyo gehile, kwa kukolela ula mzilo, naulajila ng'hatu vyowihile lukami.
ROM 7:14 Natuvizela kota Malajizo gangulawa kwa Muhe Yelile, lelo heni nda munhu yawele na lukuli, nguzwa kota mpogozi wa gehile.
ROM 7:15 Sivizelele cho ndilingukola, mina chila cho ndilingulapa hambe ndichikole, ila chila cho ndili kuchizudila chondilikudita.
ROM 7:16 Wone ndidita chimbele cha hila vyondigana heni, ayi yangulajila ndangugakunda ng'hatu gala Malajizo ndo ganoga.
ROM 7:17 Lelo siwele heni nene ndili ngudita chinhu acho, ila gala gehile gali mgati mwa heni.
ROM 7:18 Nandivizela haduhu linojile lyoneche mgati mwa heni, kota uwunhu wa heni. Kwa vila ndangugana kudita ganojile, ila ndangulemwela.
ROM 7:19 Mina silingudita gala ganojile gondigana, ila ndangudita lila lihile lyosiganile
ROM 7:20 Wone ndidita chimbele chondigana heni, ayi yangilajila siwele heni ndilingudita ago, ila gala gehile gali mgati mwa heni ndo galingudita ahyo.
ROM 7:21 Lelo nandiuzela mzilo awu, londigana kudita ganojile, ila ndangufika lila lihile ndo ndilingulihagula.
ROM 7:22 Mgati ng'hatu mwa nhumbula ya heni ndangusangalalila malajizo ga Nguluwi.
ROM 7:23 Ila ndangona mna malajizo ganji galingukola mijito mlukuli lwa heni. Malajizo ago gangilema na malajizo ga luhala lwangu, na yangundita ndiwe mpogozi wa malajizo ga gehile galingudita mijito mlukululi lwa heni.
ROM 7:24 Nda mzunwa heni! Yalihi yondohola kuli lukuli alu lulikundigala kuli kubagama?
ROM 7:25 Malumbo kwa Nguluwi yalingudita ago kwa kukolela kwa mkulu wa hetwe Yesu Kilistu! Ahi ndo vyondili heni ndiliyeng'ha, kwa luhala lwa heni, ndangugakolela mijito malajizo ga Nguluwi, ila chiwunhu, nda mpogozi wa malajizo ga gehile.
ROM 8:1 Ahyo lelo haduhu utaguso kwa wihe wa wala wawele wa heye Kilistu Yesu.
ROM 8:2 Mina malajizo ga Muhe ulingigala ukomu kwa kilumba na Kilistu Yesu gangombola kulawila kuli malajizo ga gehile na kubagama.
ROM 8:3 Chila chilingulemwa kuditikwa na Malajizo ga Musa, kwa vila lukuli luwele na gehile lwali hela ludali, Nguluwi nakadita ago kwa kumlajiza mwana wa heye nayawele na lukuli kota lwa hetwe tuwele na gehile, ahyo nakatagusa kwa wihe gehile gawele mlukuli alo.
ROM 8:4 Nguluwi nakadita kutanganika ako leka kwenela kwa chila chinhu chilinguganigwa kuli Malajizo chikoleche mgati mwa hetwe, wala tulingikala kwa Muhe Yelile, nahaiwele kwa lukuli luwele na gehile.
ROM 8:5 Mina, wala walingikala kwa kuwinza vyolugana lukuli, luhala lwao lwangulongozwa na majesa ga mlukuli. Ila wala walingikala vyoyogana Muhe Yelile, luhala lwao lwangulongozwa na majesa ga Muhe.
ROM 8:6 Kwa vila luhala lulingulongozwa na lukuli luwele na gehile lwangubagama, ila luhala lulingulongozwa na Muhe lwanguwa lukomu na kikala goya.
ROM 8:7 Luhala lulingulongozwa na lukuli ndo vilinguwadita wanhu wamzudile Nguluwi, kwa vila hambe wakunde Malajizo ga Nguluwi, nahawogokunda.
ROM 8:8 Wanhu walinguwinza maya ga lukuli howomganiza Nguluwi.
ROM 8:9 Ila hemwe, Muhe wa Nguluwi wone yekale mgati mwa hemwe, hamlongozwa na lukuli, ila mwangulongozwa na Muhe. Wone munhu yoneche kahela Muhe wa Kilistu, ayo hawele wa Kilistu.
ROM 8:10 Ila wone Kilistu ka mgati mwa hemwe, na hanji ng'huli za hemwe zaga kwa gehile, kwa hemwe Muhe ndo ukomu kwa vila mditwa muwe mtanganiche.
ROM 8:11 Wone Muhe wa Nguluwi yula yamzilipule Kilistu kuli wanhu wabagame, kangikala mgati mwa hemwe, lelo ayo Nguluwi vivila yamzilipule Yesu kuli wanhu wabagame kozipa ukomu ng'huli za hemwe zilingoneka za kubagama, kodita ahyo kukolela Muhe wa heye yalingikala mgati mwa hemwe.
ROM 8:12 Lelo wang'holozangu, twanayo mbuli, hambe tuganigwe kikala kota ng'huli za hetwe za wihe vyozilingugana kikala.
ROM 8:13 Kwa vila wone mikale kwa kuwinza malapo ga ng'huli vyozigana ng'hatu mobagama. Ila wone kwa nzila ya Muhe mogadumya madito ga hemwe gehile, mochikala.
ROM 8:14 Mina wala weng'ha walingulongozwa na Muhe wa Nguluwi, awo ndo wana wa Nguluwi.
ROM 8:15 Mina hambochele Muhe leka yalinguwadita hemwe wapogozi kahi na kuwadumbiza, ila mbochela Muhe yalinguwadita hemwe wana wa Nguluwi, na kwa ludali lwa Muhe, hetwe twangumchema Nguluwi, “Aba,” izeleche “Mhaza!”
ROM 8:16 Na ayo Muhe wa Nguluwi katawiza na nhumbula za hetwe kota hetwe twa wana wa Nguluwi.
ROM 8:17 Lelo kwa vila hetwe twa wana wa Nguluwi, ahyo hetwe twa wahalizi wa Nguluwi, twanguhaliza hamwe na Kilistu, wone tugazike na heye, vivila tikale na heye hali ukulu wa heye.
ROM 8:18 Ndangona kuta magazo ga mhela awu wa sambi ne hado hauwele chinhu wone tuwhanize na ula ukulu woulajilwa kwa hetwe.
ROM 8:19 Vilumbigwe vyeng'ha vyangumbeteza kwa lwao ng'hatu, Nguluwi yawalajile wana wa heye.
ROM 8:20 Mina vilumbigwe naviwikwa vyoneche haviwele chinhu, ila haiwele kwakugana hewo, ila kota navyoyaganile Nguluwi. Leka ahyo wabaho utumbilo,
ROM 8:21 mina avyo navyo vilumbigwe vyogomboligwa kuli upogozi wa kuwifya, na vinjile hali ukulu wa wana wa Nguluwi.
ROM 8:22 Mina tuvizela mbaka sambi baha, vilumbigwe vyeng'ha vyangulila kwa usungu kota wa kulela mwana.
ROM 8:23 Kahi haiwele hihyo vilumbigwe viliyeng'ha, ila na hetwe tuwele na ayo Muhe, yawele wamwaluko wa ndolendole za Nguluwi, natwe twangulila mgati mwa hetwe, aku tubeteza Nguluwi yatudite tuwe wana wa heye, nhumbula za hetwe zigomboligwe.
ROM 8:24 Mina kwa utumbilo awu hetwe tuloholigwa. Ila utumbilo wahela chinhu mina wone tuchone chila lotuchitumbila. Mina kakohi yalingitumbila chila choyalinguchona?
ROM 8:25 Wone tulingitumbila chila hatunachona hebu, twangubeteza kwa kwimilila.
ROM 8:26 Hiho du, na heye Muhe kangututanza muli ung'hochele wa hetwe. Mina hatuvizelele vyotulinguganigwa kulanda, ila Muhe heye kangutulandila kwa Nguluwi, kwa kung'ung'utila hambe kulonjeke.
ROM 8:27 Na heye Nguluwi yalingulola mbaka mgati mwa nhumbula za hetwe, kavizela Majesa ga heye Muhe, kwa vila ayo Muhe kanguwalandila wanhu wa Nguluwi kwa kuwinza vyoyogana Nguluwi.
ROM 8:28 Tuvizela kota, mbuli zeng'ha zangukoleka goya, kwa wanhu weng'ha walingumgana Nguluwi, mina wala yawachemile kwa chiwalo cha kugana kwa heye.
ROM 8:29 Mina awo yawahagule kulawila katali, ndo yawahagule wewhane na Mwanage, leka Mwanage yawe wa mwaluko mli wang'holoze wenji.
ROM 8:30 Lelo wala Nguluwi yawahagule ndo wala yawachemile, na awo yawachemile ndo wala yawaditile watanganiche ndo awo yawahanzanye na ukulu wa heye.
ROM 8:31 Kwa mbuli azo zeng'ha, tulonje choni lelo? Wone Nguluwi yawele hamwe na hetwe, yalikohi yoza kutulemela?
ROM 8:32 Nguluwi hamlemeze hanga nayawele mwanage wa udewele, ila nakamlavya kuli hetwe tweng'ha! Nakatugalila mwanage, ahyo, ndaze, hotugalila kwa kubweda vinhu vyeng'ha hamwe na heye?
ROM 8:33 Munhu wachi yowalonjeleza wahaguligwe na Nguluwi? Heye Nguluwi yuye nakawakunda kota watanganika!
ROM 8:34 Munhu wachi yowatagusa kwa wihe? Kuduhu! Mina Kilistu Yesu ndo yabagame, kahi nakazilipuka kuli wanhu wabagame kangikala kulume kwa Nguluwi heye ndo yuyo yalingutulandila!
ROM 8:35 Munhu wachi yotubagula na igano lya Kilistu? Ndaze ndo kugaya ama kugazigwa ama magazo ama nzala ama kwisilwa nguwo ama hali nongwa ama kubagama?
ROM 8:36 Kota Maandiko Matakatifu vyogalingulonga, “Kwa mbuli ya hegwe, twangwimilila kubagama misi na chilo, twanguditilwa kota ing'holo lya kubagamizwa.”
ROM 8:37 Hebu, mli mbuli azi zeng'ha, tusumya ng'hatu kwa kukolela heye yatuganile.
ROM 8:38 Mina ndivizela ng'hatu kota haduhuli chinhu chiweza kutubagula na igano lya heye, ne kubagama ne ukomu ne wahilisi wa kilanga ama wala walingulongoza kilanga ne galingulawila sambi ne golawila hamba, ne ulongozi
ROM 8:39 ne gala gawele kuchanya, ne gala gawele hasi ng'hatu, ne choneche chilumbigwe, haduhu chitubagula na igano lya Nguluwi liwele mli Yesu Kilistu Mkulu wa hetwe.
ROM 9:1 Ndangulonga ndikomya, heni nda munhu wa Kilistu hambe ndoje udesi. Majesa ga heni aku golongozwa na Muhe Yelile, yangundonjela hambe ndonje udesi.
ROM 9:2 Ndangugana kulonga ahi, ndina masinzo makulu na usungu wohambe umale mnhumbula ya heni.
ROM 9:3 Wone nandite chinhu choneche cha kuwatanza wang'holozangu, ndahajezile kulanda kupanjilwa na Nguluwi na kubaguligwa na Kilistu.
ROM 9:4 Awo ndo wanhu wa Isilaeli wala Nguluwi nayawahagule wawe wana wa heye, kawating'haniza kuli ukulu wa heye, nakadita ilagano na hewo, nakuwapa malajizo ga heye, na nzila ya kumfugamila na malagano ga heye.
ROM 9:5 Hewo ndo wazukulu wa wasekulu wa Waebulaniya, na heye Kilistu, kuli wunhu wa heye, kalawila mli lukolo lwao. Nguluwi yalingulongoza hali geng'ha, nayatogoligwe mazuwa gose! Ena.
ROM 9:6 Hambe ndoje Malagano ga Nguluwi gagaluka, mina haiwele wanhu weng'ha wa Isilaeli ndo wanhu wa Nguluwi.
ROM 9:7 Kahi hawawele walelwa weng'ha wa Abulahamu ndo wobochela malagano ga Nguluwi. Ila kota Maandiko Matakatifu vyogalingulonga, “Walelwa wa heye wolawila kwa Isaka.”
ROM 9:8 Mina, haiwele wala wavumbuche chilukuli ndo wana wa Nguluwi, ila wana wala wavumbuche kwa malagano ga Nguluwi awo ndo wochemigwa wana wa Abulahamu.
ROM 9:9 Kwa vila Nguluwi choyalagane ndo achi, “Mhela utanganiche ndohiluka, na heye Sala kolela mwana.”
ROM 9:10 Kahi hagawele ago hela, ila na heye Lebeka nakaponda wanyambili kwa mhaza yumwe heye ndo Isaka, sekulu wa hetwe.
ROM 9:11 Hanga, wala wana lowang'hali kuvumbuka, na lowang'hali kudita linojile ama lihile, leka Nguluwi yoneche kana ludali lwa kuhagula,
ROM 9:12 loyohagula kanguhagula kota vyoyogana heye, halingulola choyalingukola munhu. Kwa kulajila ago, Nguluwi nakamlonjela Lebeka, “Sekulu kowa chitumagwa wa yula msongolo.”
ROM 9:13 Kota Maandiko Matakatifu vyogali ngulonga, “Ndimgana Yakubu, ila ndimwihilwa Esau.”
ROM 9:14 Lelo tulonje choni? Ndaze, Nguluwi halingutagusa vitanganiche? Ne hado!
ROM 9:15 Mina nakamlonjela Musa, “Ndomonela isungu munhu yula yondigana kumonela isungu, ndochisinza kwa munhu yula yondilingugana ndisinze.”
ROM 9:16 Ahyo, ago geng'ha gangitumbila isungu lya Nguluwi. Na haiwele choyagana munhu ama choyalingudita munhu.
ROM 9:17 Mina Maandiko Matakatifu gangulonga ahi kwa Falao, “Nandikudita uwe mndewa kwa mijito ayi, leka ndajile ukulu wa heni, na itagwa lya heni lizeleche kuli isi yeng'ha.”
ROM 9:18 Ahyo, Nguluwi kangumonela isungu munhu yoneche yalingugana, na wone yagane kumdita munhu yawe msugu komdita yawe ahyo.
ROM 9:19 Hanji kombuza, “Wone mbuli za hino, lekachoni Nguluwi kangugona gehile ga hetwe gotulingudita? Yalikohi yoweza kugabela gala goyalingugana Nguluwi?”
ROM 9:20 Ila hegwe mng'holazangu, lekachoni mbaka umwidichile ahyo Nguluwi? Lelo chiya chojeza kumuuza yachiwumbile, “Lekachoni umbumbile kota ahi?”
ROM 9:21 Mlumba viya kana ludali lwa kugongomanyila ilongo lyoyalingugana, na kuwumba viya vili kwa ilongo lilila, chimwe kwa mbuli ng'hulu na chinji kwa mbuli ndodo.
ROM 9:22 Ahyo ndo vyoiwele kwa Nguluwi. Nakagana kulajila ng'halazi ya heye, na kulajila ludali lwake. Ila nakawemilila wanhu wala nawaganigwe kudumigwa na ng'halazi ya heye.
ROM 9:23 Heye yuye nakagana kuulajila winji wa ukulu wa heye, yatujidile hetwe tuganigwe kubochela isungu lya heye, hetwe mina yatuwichile goya kulawila katali tubochela ukulu wa heye.
ROM 9:24 Mina hetwe ndo wala nayawachemile, haiwele kulawila kuli Wayahudi yeng'ha ila kulawila kuli wanhu hawawele Wayahudi.
ROM 9:25 Kota Mkulu navyoyalonjle mli chitabu cha mloli Hoseya, “Wala, ‘nahawawele wanhu wa heni’ ndowachema, ‘Wanhu wa heni!’ Na heye sikuganile, kochemigwa, ‘Mganigwa wa heni,’
ROM 9:26 Na hala howawele, ‘Hemwe hamuwele wa heni’ aho wochemigwa, ‘Wana wa Nguluwi yawele mkomu.’ ”
ROM 9:27 Vivila mloli Isaya, nakalonga kwa usungu kwa chiwalo cha wanhu wa Isilaeli, “Wone wanhu wa Isilaeli ndo wenji kota misanga ja kumwhani, ndo wado hela woloholigwa,
ROM 9:28 Mkulu hokawila kutagusa himahima isi yeng'ha.”
ROM 9:29 Kota Isaya vyoyalongole kulonga, “Kota Mkulu wa wamizi hatulechele wana wamwe wa Isilaeli, twahawele kota Sodoma, twahewhanile na Gomola.”
ROM 9:30 Lelo tulonje choni? Wanhu hawawele Wayahudi hawaditile chinhu leka wawe watanganiche, nawaditikwa wawe watanganiche kwa makundo ga hewo
ROM 9:31 ila wanhu wa Isilaeli wala nawapalile malajizo ga kuwadita wawe watanganiche, nahawagawene.
ROM 9:32 Lekachoni lelo? Kwa vila nawetumbila madito ga hewo honhu ha kitumbila makundo. Ahyo, nawekwang'wala hali, “Iganga lya kikwang'wala.”
ROM 9:33 Kota vyogalingulonga Maandiko Matakatifu, “Ulole, mbika iganga ako Siyoni, alyo lyanguwadita wanhu wekwang'wale, mbika mgamba, ulinguwadita wanhu wagwe. Ila munhu yoneche yomkunda hobasigwa soni hebu!”
ROM 10:1 Wang'holozangu, kwa nhumbula ya heni yeng'ha ndangugana, ndanguwalandila kwa Nguluwi Waisilaeli wayangu waloholigwe.
ROM 10:2 Mina kutawiza hewo welavya kumgana Nguluwi. Ila nahawavizelele kudita navyoyaliyogana Nguluwi.
ROM 10:3 Mina hawavizelele hila Nguluwi vyoyalinguwadita wanhu wawe watanganiche, nawo waluchiza vihendo vya hewo wawo na hawaikundile ayo nzila ya Nguluwi ya kuwadita watanganiche.
ROM 10:4 Mina kwa kuya kwa heye Kilistu, Malajizo nagaduma, leka weng'ha walingukunda wawe watanganiche.
ROM 10:5 Kulapa kuwa utanganiche, kwa kuwinza malajizo, Musa nakandika ahi, “Munhu yoneche yalinguhulichiza Malajizo kochikala.”
ROM 10:6 Ila kwa mbuli ya kutanganika hali meho ga Nguluwi kwa nzila ya makundo, Maandiko Matakatifu gangulonga hino, “Uleche kulonga mnhumbula mwa hegwe, yalihi yokwina kilanga kumdulisa Kilistu?”
ROM 10:7 Kahi uleche kulonga, “Yalihi yodulika kwi ikulubila?” Ako ndo kumzilipula Kilistu.
ROM 10:8 Maandiko Matakatifu gangulonga ahi, “Usenga awo wa Nguluwi wa behi na hegwe, wa hamlomo wa hegwe na mnhumbula ya hegwe” Na ayo ndo mbuli ya makundo gotulingudamla.
ROM 10:9 Houvumila kwa mlomo wa hegwe kuta Yesu ndo Mkulu na kukunda mnhumbula ya hegwe kuta Nguluwi nakamzilipula kuli wanhu wabagame, kolohoka.
ROM 10:10 Mina munhu kangukunda kwa nhumbula kanguditigwa yatanganiche na kuvumila kwa mlomo leka yaloholigwe.
ROM 10:11 Maandiko Matakatifu gangulonga, “Chila yalingumkunda, hobasigwa soni hebu.”
ROM 10:12 Mbuli ayi kwa weng'ha, mina haduhu yalivinji hali Wayahudi na hawawele Wayahudi, kwa vila Nguluwi ka Mkulu kwa wanhu weng'ha, na heye kana isungu ng'hatu kwa weng'ha walingumchema heye.
ROM 10:13 Mina Maandiko Matakatifu gangulonga, “Chila munhu yolanda kwa itagwa lya Mkulu, koloholigwa.”
ROM 10:14 Lelo womlanda ndaze heye yula hambe wamkunde? Hamba womkunda ndaze yula hawanahulika mbuli za heye? Na wohulika ndaze mbuli za heye wone kuduhu munhu yalingudamla?
ROM 10:15 Na wanhu wodamla ndaze wone hawatumigwe? Kota Maandiko Matakatifu vyogalingulonga, “Ndo mbuli ya kunojeza lukami kuya kwa wala walingudamla Mbuli Inojile!”
ROM 10:16 Ila haiwele wanhu weng'ha waikundile Mbuli Inojile ya Nguluwi. Mina Isaya nakalonga, “Mkulu, yalikohi yokunda usenga wa hetwe?”
ROM 10:17 Ahyo lelo, makundo ganguya kwa kuhulika usenga, na awo usenga wanguya kwa ulonzi wa Kilistu.
ROM 10:18 Lelo ndanguuza, ndaze, hawauhuliche awo usenga? Ena nawauhulika, kota Maandiko Matakatifu vyogalingulonga, “Lizi lya hewo lyenela isi yeng'ha, ulonzi wa hewo uheluka nzigo za isi yeng'ha.”
ROM 10:19 Kahi ndanguuza, hambi wanhu wa Isilaeli nahawavizelele? Musa heye nakalongola kulonga, “Ndokuditani muwonele maya wanhu wa isi inji, ndokuditani muwang'hang'halile, wanhu wapoka.”
ROM 10:20 Kahi Isaya hadumbile kulonga, “Wala wanhu hawamhalile wambona, ndilajila kwa hewo hambe wauze mbuli za heni.”
ROM 10:21 Ila kwa mbuli ya Isilaeli, Nguluwi kangulonga, “Misi yeng'ha nandiwagololela moko ga heni wanhu hawalingunyhulichiza na wajuvi.”
ROM 11:1 Lelo ndanguuza ndaze, Nguluwi nakawalema wanhu wa heye? Ne hado! Hawalemile hebu! Heni nda Muisilaeli, mlelwa wa Abulahamu, nda munhu wa nhanzi ya Benjamini.
ROM 11:2 Nguluwi hawalemile wanhu wa heye nayawahagule kulawila mwaluko. Mwangukumbuka vyogalingulonga Maandiko Matakatifu gala ga Eliya mhela yamng'hung'hutile Nguluwi kwa mbuli ya Isilaeli,
ROM 11:3 “Mkulu, wawakopola Waloli wa hegwe na kubomola honhu ha kulavila nhambiko za hegwe. Heni ndiliyeka ndiponile, na hewo wangugana kung'hopola!”
ROM 11:4 Lelo Nguluwi nakamwidichila choni? Nakamlonjela, “Ndiwichila wanhu elufu saba wala hawamfugamile mlungu wa udesi Baali.”
ROM 11:5 Lelo ndo vyoiwele mhela awu wa sambi, wa baho wanhu wado wala Nguluwi yawahagule kwa chiwalo cha kunoga kwa heye.
ROM 11:6 Uhaguzi wa heye wangulawa kwa utambichizo wa Nguluwi, na haiwele kwa mbuli ya madito ga hewo. Mina, wone uhaguzi wa heye nawitumbile madito ga wanhu, utambichizo wa heye hawali nguwa utanganiche.
ROM 11:7 Lelo ndaze? Wanhu wa Isilaeli hawachiwene chila chowali wochipala, ila weng'ha wahaguligwe nawachona. Wanji nawambuzwa nhumbula za hewo ziwe zigagadale,
ROM 11:8 kota vyogalingulonga Maandiko Matakatifu. “Nguluwi kazidita nhumbula za hewo zigagadale, na mbaka lelo hano hambe walole kwa meho ga hewo, ne kuhulika na makutu ga hewo.”
ROM 11:9 Na heye Daudi kangulonga, “Mnvina za hewo ziwe midiwa ja kuwagwiliza, wagwe na kugazigwa.
ROM 11:10 Meho ga hewo gatite waleche kulola. Mhungo za hewo zibinuche kwa kugaya mazuwa gesa!”
ROM 11:11 Lelo ndanguuza, hambi Wayahudi wekwang'hwala mbaka wagwa ng'hatu? Ne hado! Ila kwa kuwifya kwa hewo ulohozi uwoyela wanhu wanji, leka Wayahudi wawonele maya.
ROM 11:12 Ila wone wihe wa Wayahudi wambuza kuya utambichizo winji kwa isi yeng'ha, na nongwa za hewo, zigala utambichizo winji kwa wanhu hawawele Wayahudi. Hambi Wayahudi weng'ha wone wamgalamchile Nguluwi, utambichizo haukonjezeka ng'hatu.
ROM 11:13 Lelo ndanguwalonjelani hemwe wanhu wohamuwele Wayahudi. Kwa vila heni nda mtumigwa kwa wanhu hawawele Wayahudi, ndangidayila vyondilingudita.
ROM 11:14 Ndangugana ndiwadite wanhu wayangu wakoneleni hemwe maya, leka mbeze kuwalohola wayao wamwenga.
ROM 11:15 Mina kwa kulemigwa kwa hewo nakuwadita wanhu wating'hanizwe na Nguluwi, yowa ndaze mhela lowokundigwa na Nguluwi? Wabagame wozilipuka!
ROM 11:16 Wone chiwunde cha mwaluko cha ibumunda nachilavigwa kwa Nguluwi, ibumunda lyeng'ha lyanguwa lya heye, mizabi ja migodi wone jinoje, na nhagala za igodi ziwaga zinojile kahi.
ROM 11:17 Ena, nhagala zimwe za mzeituni mkagunda nazitemigwa, na honhu hake hawichigwa na kuwohigwa nhagala za mzeituni wa kisolo. Hemwe wanhu hamuwele Wayahudi mwangiwhana na mzeituni wa kisolo, na sambi mwanguhanzanyika na ukomu wa Chimuhe wa Wayahudi.
ROM 11:18 Ahyo, mleche kuwabeza wala watemigwe kota nhagala! Na wone kuna lya kidayila, hambi mwangidayila choni? Mvizele kuta hamuwele hemwe mlingujimiza ajo mizabi, ila mizabi ndo jilinguwemiza hemwe.
ROM 11:19 Ila molonga, “Nhagala nazitemigwa leka tuwichigwe hetwe honhu hake.”
ROM 11:20 Goya! Nagatemigwa kwa chiwalo cha kwanjila makundo, ila hegwe kwangwima kwa kukunda kwa hegwe. Ila uleche kidaya, leka wilolele.
ROM 11:21 Wone Nguluwi hawawonele isungu Wayahudi wewhanile na nhagala za chaluchizo, hambi Nguluwi kowalekani hemwe?
ROM 11:22 Lelo mlole, Nguluwi vyoyawele na isungu na vyoyang'hang'hale. Heye kang'hang'hala kwa wala wagwile, ila kana isungu kwa hemwe wone mlutilila kikala mli igano lya heye, ila wone hebu, vivila namwe motemigwa.
ROM 11:23 Na hewo Wayahudi, hihyo, wone waleche wihe wa hewo wa makundo wohiluswa honhu hala ha mwaluko, kwa vila Nguluwi koweza kudita ahyo.
ROM 11:24 Hemwe wanhu hamuwele Wayahudi kwa chaluchizo mfanda kota nhagala za mzeituni wa kisolo, ila musigwa ako, muwichigwa muli mzeituni mkagunda honhu hala kwa chaluchizo hapawele ha hemwe. Ila Wayahudi kwa chaluchizo ndo kota mzeituni mli kamgunda, na yowa mbuli ya ubewe ng'hatu kwa hewo kuwichigwa na kuwohigwa kahi muli igodi lilyo lya hewo.
ROM 11:25 Wang'holozangu ndangugana mvizele ng'hatu kukomya kuvisigwe mleche kiwona mna luhala lukami. Usugu wa Wayahudi wali wa mhela udo hela mbaka wanhu hawawele Wayahudi lowowa wamhiluchile Nguluwi.
ROM 11:26 Aho Waisilaeli weng'ha woloholigwa, kota vyogalingulonga Maandiko Matakatifu, “Mlohozi kokuya kulawila Siyoni, kowusa wihe wa lukolo lwa walelwa wa Yakubu.
ROM 11:27 Ali ndo ilagano lyondilingudita na hewo, mhela hundikusa wihe wa hewo.”
ROM 11:28 Kwa vila wanguilema Mbuli Inojile, Wayahudi wawa wehilwe na Nguluwi, ila kwa lutogo lwa hemwe wanhu hawawele Wayahudi. Ila kwa vila nawahaguligwa na Nguluwi, wang'hali woganigwa na Nguluwi kwa chiwalo cha wasekulu wa hewo.
ROM 11:29 Mina Nguluwi wone yawape ndolendole za hewo na kuwahagula, hambe mng'ung'utile chila choyaditile.
ROM 11:30 Aho mwaluko hemwe namleka kumhulichiza Nguluwi ila sambi mpegwa isungu lya heye, na kwa hewo Wayahudi keleka kumhulichiza Nguluwi.
ROM 11:31 Vivila kota hemwe lombochele utambichizo, Wayahudi nawo sambi, wangumleka Nguluwi leka hewo nawo wabochele isungu lya Nguluwi
ROM 11:32 Mina Nguluwi kawawoha wanhu weng'ha mli kubelenhuka kwa hewo leka yawonele isungu weng'ha.
ROM 11:33 Lufufu na luhala na uwanzi wa Nguluwi ndo lukulu lukami. Utaguso wa heye hambe upugajizwe na nzila za heye hazilinguzeleka. Kota vyogalingulonga Maandiko Matakatifu.
ROM 11:34 “Yalikohi yajezile kugazela Majesa ga Mkulu? Yalikohi yolongasa na heye.
ROM 11:35 Yalikohi yalongole kumha chinhu, na heye Nguluwi yamhilusile chinhu acho?”
ROM 11:36 Kwa vila vinhu vyesa vyangulawa kwa heye, na vyabaho kukolela heye na kwa chiwalo cha heye. Ukulu uwe na heye mazuwa gose! Ena.
ROM 12:1 Ahyo, wang'holozangu, kwa vila Nguluwi kana isungu lukami, ndangukulandani kwa nhumbula yeng'ha, milavye kwa Nguluwi kota nhambiko iling'homu, yelile na ilingunojeza. Aku ndo kumfugamila Nguluwi.
ROM 12:2 Mleche kwiga chihendo cha isi ayi, leka Nguluwi yadite mgalamko mgati kwa hemwe kwa kugalamla nyhala za hemwe. Aho ndo homvizela kugana kwa Nguluwi na kuvizela inojile ilingunojeza na ikwilile.
ROM 12:3 Kwa utambichizo woyamhele Nguluwi, ndangukulonjelani hemwe mweng'ha, chila munhu yaleche kiwona mkulu kusinda vila vyoyalinguganigwa yawe, ila milolele hemwe mwemwe kota Nguluwi vyoyamgawile chila munhu makundo ga heye.
ROM 12:4 Kwa vila mli lukuli lumwe mna vitomo vinji, na chila chitomo chimwe changukola mijito jake.
ROM 12:5 Hiho na hetwe hanga twa wenji, twa lukuli lumwe kwa kilumba na Kilistu, na chila yumwe ka chitomo cha miyage.
ROM 12:6 Ahyo twanao uwanzi winji kota vila kunoga kwa heye kotupeligwe. Yawele na ndolendole ya uloli na yauditile kota makundo ga heye vyogali.
ROM 12:7 Na munhu yawele na ndolendole ya uchitumagwa na yaudite. Na munhu yawele na ndolendole ya kulangusa na yalanguse.
ROM 12:8 Na munhu yawele na ndolendole ya kuwahoza wanji nayadite ahyo. Na munhu yalingumgawila miyage choyawelenacho nayadite ahyo kwa isungu. Na munhu yawele chilongozi na yalongoze kwa kwimilila, na munhu yalingudita mbuli ya isungu nayadite ahyo kwa kusangalala.
ROM 12:9 Igano lya hemwe liwe hela udesi woneche. Mzudile mbuli yoneche yihile, mibatilile linojile.
ROM 12:10 Migane chilukolo, mihulichize hemwe kwa hemwe, chila yumwe yaluche kumjesa miyage chiukulu.
ROM 12:11 Mleche kuwa wagata kuli kumkolela mijito Mkulu, ila muwe msangalale mli muhe za hemwe zeng'ha kuli kumfugamila Mkulu.
ROM 12:12 Kitumbila kwa hemwe kokuwicheni hemwe chila zuwa msangalale, muwe na ubetezo mli kugaya, na kumlanda Nguluwi mhela weng'ha.
ROM 12:13 Muwatanze wanhu wa Nguluwi mli malapo ga hewo, muwabochele wajenzi kwa isungu.
ROM 12:14 Muwatambichize wala walinguwagaza hemwe, muwatambichize na mleche kuwapanjila.
ROM 12:15 Msangalale hamwe na wawele ngusangalala, mlile hamwe na wanhu walingulila.
ROM 12:16 Mikale hamwe kwa kihanyisa hemwe kwa hemwe. Mleche kidaya, ila mkunde kikala na wanhu wawele wazunwa. Mleche kiwona muwele na luhala lukami.
ROM 12:17 Mleche kuhilula lihile kwa lihile. Mdite mbuli zinojile hali wanhu weng'ha.
ROM 12:18 Kota vyoilingulapigwa kikala goya na wanhu weng'ha na muwe na igano kwa wanhu weng'ha.
ROM 12:19 Waganwa wa heni, mleche kuhilulila, ila mlecheleni Nguluwi mbuli ayo, mina Maandiko Matakatifu gangulonga, “Kuhilula chibida ndo kwa chiwalo cha heni, nani ndohiluchiza, kalonga Mkulu.”
ROM 12:20 Kupuluta kwa ago, Maandiko gangulonga, “Mng'honyo wa hegwe wone yawe na nzala, mgalile ndiya, wone yawe na ng'halu, mgalile mazi yanwe. Mina kwa kudita ahyo komdita yone usungu mnhumbula kota makala ga chiluli mchanya muli mutwi wa heye.”
ROM 12:21 Uleche kukunda kusumigwa na wihe, ila usumye wihe kwa kudita mbuli zinojile.
ROM 13:1 Chila munhu kangulapigwa kuwahulichiza walingulongoza isi, kwa vila kuduhu munhu yolongoza wone Nguluwi hamlechile yalongoze, Nguluwi yaliyeka ndo yalinguwapa vilongozi ludali lwa kulongoza.
ROM 13:2 Yalingubeza ulongozi wa vilongozi kangubeza ilajizo lya Nguluwi, na hewo walingudita ahyo wotagusigwa.
ROM 13:3 Mina walingulongozwa hambe wadumbigwe na wanhu wanojile, ila wangudumbigwa na wanhu walingudita gehile. Lelo kwangugana uleche kumdumba munhu yawele na ulongozi? Udite ganojile na heye kokutogola.
ROM 13:4 Mina heye ndo chitumagwa wa Nguluwi yalingukola mijito kwa mbuli ya hegwe inojile. Ila wone udite gehile, yokulapa kumdumba, mina heye ng'hatu kana ludali lwa kukugaza. Heye chitumagwa wa Nguluwi, kuwalajila magazo ga heye kwa wala walingudita wihe.
ROM 13:5 Ahyo ilapa kuwahulika wakulu wa isi, haiwele kwa chiwalo cha kudumba magazo ga Nguluwi, leka kahi kwa vila nhumbula ya hegwe kovizela choulingugana kudita.
ROM 13:6 Kwa chiwalo chicho hemwe mwangulavya kodi, kwa vila wakulu wa isi wangumkolela mijito Nguluwi, wone waze ngukola gala gawele nguwalapa.
ROM 13:7 Milolele, muwape weng'ha chila munhu choyalingulapigwa, munhu wa ushulu, yapegwe ushulu na munhu wa kodi na yapegwe kodi na yalingudumbigwa nayadumbigwe na yalingugana katogo na yatogoligwe.
ROM 13:8 Mleche kudaigwa na munhu yoneche, ila liwe idayo lya kigana yeka. Yalinguwagana wanhu wanji kanguwinza Malajizo.
ROM 13:9 Mina Malajizo aga, “Uleche ung'hondwa na uleche kukopola na uleche kugana” na zinji zoneche, zamumo mli ilajizo ali limwe, “Mgane mng'holozo kota vyoulingigana gwegwe.”
ROM 13:10 Yalingumgana mng'holoze hambe yamditile vibi. Ahyo, igano ndo kwenela kwa Malajizo geng'ha.
ROM 13:11 Ganji ya ago, hemwe sambi mvizela kota twa mli mhela wachi, sambi ndo mhela wa kulilimka, kwa vila, ulohozi wa hetwe wahabehi ng'hatu sambi kusinda mhela ula wotwaluche kukunda.
ROM 13:12 Hamihe yangumala na nemisi yahabehi kwinjila. Ahyo, tuleche kudita wihe wa jiza, tudite ganojile ga lumuli.
ROM 13:13 Na tikale goya kota wanhu walingikala nemisi, na haiwele kwa kulya lukami na kugala, wavu na ung'hondwa na kilewa na maya.
ROM 13:14 Lelo milumbe na Mkulu Yesu Kilistu, hamba mleche kuwinza maya ga ng'huli za hemwe vyozilingugana.
ROM 14:1 Mumbochele mluga henu munhu yawele na makundo mado, ila mleche kitwanza na Majesa ga heye yaliyeka.
ROM 14:2 Wanhu hawewhanile, yumwe makundo ga heye gangumkundiza kulya chila chinhu, ila yunji makundo ga heye mado, kangulya mboga za misolo hela.
ROM 14:3 Munhu yalingulya chila chinhu yaleche kumbeza yula nayali ngulemwela kulya chila chinhu, na yula yalingulya mboga za misolo yeng'ha, yaleche kumtagusa nayali ngulya chila chinhu, mina Nguluwi kamkunda.
ROM 14:4 Hegwe kwa whaani mbaka ujeze kumtagusa chitumagwa wa yunji? Wone yeme ama yagwe alyo ndo ilapo lya Mkulu wa heye. Na kokwima nzinzili, mina Mkulu kanguweza kumwimiza.
ROM 14:5 Munhu kangijesa kota zuwa limwe litanganika kusinda zuwa linji, yunji kangijesa kota mazuwa gose gewhana. Chila munhu yeme nzinzili kuli chila chilingulongoza luhala lwa heye.
ROM 14:6 Yalinguchelekulila zuwa limwenga litanganiche, kanguchelekulila zuwa alyo kwa chiwalo cha Nguluwi, na heye yalingulya ndiya imwenga kangudita ahyo kwa kumtogola Mkulu, mina kanguta malumbo Nguluwi kwa ndiya yoyampele. Hiho na heye yalinguleka kulya ndiya imwenga, ayo kangudita kwa chiwalo cha kumtogola Mkulu, na heye kahi kangumtogola Nguluwi.
ROM 14:7 Mina haduhu munhu yoneche hali hetwe yalingikala kwa chiwalo cha kumditila mijito heye yuye, kahi haduhu yalingubagama kwa chiwalo cha heye yuye.
ROM 14:8 Mina wone tikale twangikala kwa chiwalo cha kumditila mijito Mkulu, wone tubagame twangubagama kwa chiwalo cha Mkulu. Ahyo, wone tuwe wakomu ama tubagame, hetwe twa wa heye Mkulu.
ROM 14:9 Mina Kilistu nakabagama, kazilipuka leka yawe Mkulu wa wakomu na wabagame.
ROM 14:10 Lekachoni hegwe, kwangumtagusa mung'holozo? Nagwe lekachoni ulingumbeza mng'holozo? Hetwe tweng'ha tokwima hali chigoda cha utaguso cha Nguluwi.
ROM 14:11 Mina Maandiko Matakatifu gangulonga, Mkulu kangulonga, “Kota vyondilingikala, chila munhu kofugamila, na chila munhu kovumila kuta heni nda Nguluwi.”
ROM 14:12 Ahyo lelo, chila yumwe wa hetwe, kokwidichila kwa chiwalo cha madito ga heye yuye hali Nguluwi.
ROM 14:13 Lelo tuleche kitagusa, ila tilolele tuleche kuwa chambuzo cha wang'holozetu kikwang'wala na kuwambuza wagwe mli gehile.
ROM 14:14 Heni mbele kuli Mkulu Yesu, ndivizela ng'hatu kuwa kuduhu chilyo choneche chikokomoche kochaluchile. Ila wone munhu yone chilyo chimwe chikokomoka, acho ndo chokokomoka kwa heye.
ROM 14:15 Lelo wone umuhezuze mng'holozo kwa chilyo choulingulya, hegwe kwahela igano. Chilyo choulingulya chileche kuwa chambuzo cha kwajilila mng'holozo, yula Kilistu yabagame kwa chiwalo cha heye!
ROM 14:16 Lelo mleche kukunda chomulinguchona chinojile, chilonjigwe kota chikovuligwe.
ROM 14:17 Mina Undewa wa Nguluwi hauwele kwa chinhu cha kulya na kunwa, ila yangulapa kutanganika, kikala goya na kusangalala kulingigaligwa na Muhe Yelile.
ROM 14:18 Mina munhu yoneche yalingumkolela mijito Kilistu kota ahi, kangumnojeza Nguluwi, na kangukundigwa na wanhu.
ROM 14:19 Ahyo mibatilile mbuli zilingigala kikala goya, na galingutanza kizenga mwemwe baho.
ROM 14:20 Lelo uleche kuwifya mijito ja Nguluwi kwa kiziganila chilyo. Vilyo vyesa vinoga, Ila haiwele goya munhu kulya chilyo choneche chimwabuza munhu yunji yekwang'hale mli gehile.
ROM 14:21 Chiba kuleka kulya miwunde na kunwa ujimbi ama kudita choneche chila chlingwambuza mng'holozo yagwe mli gehile.
ROM 14:22 Lelo wibatilile choulingukunda hegwe na Nguluwi wa hegwe. Watambichizwa wala wohambe wetaguse wawo kwa vila vinhu vyowalingijesa kota vinoga.
ROM 14:23 Ila yula munhu yalingujesa chila chilyo choyalingulya, kangutaguswa kwa wihe wone yalye. Mina hadile kwa makundo. Na, choneche wone munhu hambe yadite kwa makundo acho ndo gehile.
ROM 15:1 Hetwe tuwele na makundo makulu twangulapigwa kuwatanza wala wawele na makundo mado wesumwe na ung'hochele wa hewo. Tuleche kinojeza hetwe tuliyeka.
ROM 15:2 Chila munhu kangulapigwa kumnojeza mng'holoze kwa isungu leka ayo na heye yadahe kizenga muli makundo.
ROM 15:3 Mina Kilistu henojeze yaliyeka, ila nayali kota vyogalingulonga Maandiko, “Maligo geng'ha kowakulijile hegwe gambuyila heni.”
ROM 15:4 Mina geng'ha gandichigwe katali nagandichigwa kwa chiwalo cha kutulangusa hetwe kwa ubetezo na kikangaza kotulingupegwa na ago Maandiko Matakatifu, tuwe na lya kitumbila.
ROM 15:5 Nguluwi nayali mwaluko wa ubetezo na yalinguwapa hemwe lunojenoje lweng'ha. Yakuganileni muwe na chinhu chimwe kota heye Kilistu Yesu navyoyali,
ROM 15:6 leka hemwe mweng'ha, kwa nhumbula imwe na lizi limwe, mtogoleni Nguluwi, Mhaza wa Mkulu wa hetwe Yesu Kilistu.
ROM 15:7 Ahyo, michemele hemwe kota heye Kilistu vyoyawachemile hemwe leka Nguluwi yatogoligwe.
ROM 15:8 Mina, ndangukulonjelani Kilistu nayali chitumagwa kwa Wayahudi leka yalajile kukomya kwa Nguluwi, leka gala malagano yawichile Nguluwi kwa wasekulu wa hetwe gakoleche kwa kukomya,
ROM 15:9 leka na hewo wanhu hawawele Wayahudi, wamzele na kumtogola Nguluwi kwa chiwalo cha isungu lya heye. Kota vyogalingulonga Maandiko Matakatifu, “Ahyo ndokutogola hali wanhu hawawele Wayahudi, ndokwimba lutogo lwa itwagwa lyako.”
ROM 15:10 Kahi Maandiko gangulonga, “Msangalale, hemwe wanhu hamuwele Wayahudi, msangalale hamwe na wanhu wa heye.”
ROM 15:11 Na kahi, gangulonga, “Hemwe hamuwele Wayahudi, mtogoleni Mkulu, hemwe wanhu weng'ha, mtogoleni.”
ROM 15:12 Kahi mloli Isaya kangulonga, “Kuli lukolo lwa Jese kulawila munhu, na heye kowalongoza wanhu hawawele Wayahudi, na hewo womtumbila.”
ROM 15:13 Lelo Nguluwi nayali chaluko cha kitumbila, yakumemezeni usangalalo weng'ha na kikala goya kwa makundo ga hemwe, kitumbila kwa hemwe kuze ngonjezeka kwa mong'ho wa Muhe Yelile.
ROM 15:14 Wang'holozangu, heni ndivizela ng'hatu kota hemwe mmema kunoga na kudaha kweng'ha, na moweza kilangusa hemwe kwa hemwe.
ROM 15:15 Mli lyandiko ali nandikwandichilani vinhu vinji ne kudumba, ndikukumbusani kahi. Ndita ahyo kwa isungu lyoyamhele Nguluwi,
ROM 15:16 leka ndiwe kota chitumagwa wa Yesu Kilistu kwa wanhu hawawele Wayahudi. Ndangiditila kota mtambika kudamla Mbuli Inojile ya Nguluwi leka wanhu hawawele Wayahudi wawe nhambiko ilingukundigwa na Nguluwi, nhambiko ilingwezigwa na Muhe Yelile.
ROM 15:17 Ahyo ndiwele ndilumbile na Kilistu Yesu, ndoweza kidayila madito ga heni kwa chiwalo cha Nguluwi.
ROM 15:18 Hambe njeze kulonga chinhu chinji choneche ila chila hela Kilistu Yesu choyaditile kwa kung'holela heni leka wanhu hawawele Wayahudi wamhulichize heye. Nakadita ahyo kwa ulonzi na madito,
ROM 15:19 kwa ludali lwa vinduzanduza na lububuwazo na kwa ludali lwa Muhe wa Nguluwi. Lelo kwa kwinula majendo ga chila honhu, kwaluchila kula Yelusalemu mbaka isi ya Iluliko, nandiwadamlila ng'hangaze Mbuli Inojile ya Kilistu.
ROM 15:20 Chondilingugana heni mazuwa geng'ha, ndamle Mbuli Inojile hali isi zila Kilistu halinguzeleka, leka ndeche kuzenga hali msisi uwichigwe na munhu yunji.
ROM 15:21 Kota vyogalingulonga Maandiko Matakatifu, “Wanhu weng'ha hawalonjelwe mbuli za heye, wokona, na wala hawanahulika mbuli za heye wovizela.”
ROM 15:22 Kwa chiwalo acho mazuwa menji nandemezwa kuya kwa hemwe.
ROM 15:23 Kwa vila sambi sinda mijito ja heni kuli isi azi, na kwa vila kwa mihela minji nangana ng'hatu kuya kwa hemwe kuwalolani.
ROM 15:24 Ndangugana kudita ahyo sambi. Ndowajendelani ndiwele mmajendo kuza Sipaniya na ndangugana hemwe kunhanza fiche ako, hondisinda kusangalala kikala na hemwe mhela udo.
ROM 15:25 Ila kwa sambi ndanguluta kuwaditila uchitumagwa wanhu welile kula Yelusalemu.
ROM 15:26 Mina wanhu wa Makedoniya na wanhu wa Akaya wangugana kuwatanza wanhu wa Nguluwi wawele wazunwa ako Yelusalemu.
ROM 15:27 Hewo wawo wagana kudita ahyo, ila nawaganigwa kudita ahyo. Kwa vila wone wanhu hawawele Wayahudi, wangubochela utambichizo wa chimuhe kulawila kwa Wayahudi, na hewo nawo wangulapigwa kuwatanza Wayahudi kuli malapo ga hewo ga chiisi.
ROM 15:28 Londisinda kukola mijito ajo na kuwapa Wayahudi chila chikongozigwe na wanhu kwa mbuli ya hewo, ndokujendelani hemwe ndiwele mmajendo kuza Sipaniya.
ROM 15:29 Ndivizela kuta londikuya kwa hemwe ndokugalilani utambichizo winji wa Kilistu.
ROM 15:30 Lelo wang'holozangu, ndanguwalanda kwa Mkulu wa hetwe Yesu Kilistu na kwa igano lya Muhe Yelile, miyambe moko kwa kundandila kwa Nguluwi.
ROM 15:31 Mndandile ndawe goya muli wala hambe wamkunde Kilistu wawele Uyahudi, mndandile mijito ja heni jiwe goya ako Yelusalemu gakundigwe na wanhu wa Nguluwi wawele ako Yudeya.
ROM 15:32 Ahyo, wone Nguluwi yagane, hanji ndokuya kwa hemwe kwa nhumbula isangalale, nyesele hamwe na hemwe.
ROM 15:33 Nguluwi yawele chaluko cha kikala goya yawe hamwe na hemwe! Ena!
ROM 16:1 Ndangugana kumzelesa kwa hemwe lumbuliyetu Foebe yula yawele chitumagwa yanojile mli chilundo cha wanhu walingumkunda Kilistu chiwele ako Kenkilea.
ROM 16:2 Mbocheleni kwa itagwa lya Mkulu kota vyowalingubocheligwa na wanhu wa Nguluwi. Mumtanze choneche choyowalanda kwa hemwe, kwa vila heye nakawatanza wanhu wenji vivila nakanhanza na heni.
ROM 16:3 Mndamsile Pilisika na Akula, wakola mijito wayangu mli uchitumagwa wa Kilistu Yesu.
ROM 16:4 Hewo, hado hela nawagana wakopoligwe kwa chiwalo cha heni. Wangulapigwa kulonjelwa malumbo, haiwele kwa heni yeka ila kahi kulawila kwa vilundo vya wanhu walingumkunda Kilistu hawawele Wayahudi.
ROM 16:5 Mndamsileni chilundo cha wanhu walingumkunda Kilistu weng'ha, walingiting'hana haluga hawo. Mndamsileni mganwa wa heni Epaineto yula yawele wa mwalukokumkunda Kilistu kuli isi ya Asiya.
ROM 16:6 Mndamsile Maliya yula yaditile mijito kwa kukangaza kwa mbuli ya hemwe.
ROM 16:7 Mndamsile Andolonikasi na Yunia, Wayahudi wayangu, wotuwohigwe mchinweng'ho hamwe na heni, hewo wazeleka goya mli watumigwa, nawo wali walongole kumkunda Kilistu heni londing'hali.
ROM 16:8 Mndamsile Ampiliato, mganwa wa heni mkulu mli kilumba na Mkulu.
ROM 16:9 Mndamsile Alubano, mkola mijito muyangu mli uchitumagwa wa Kilistu, na vivila mndamsile kahi mganwa wa heni mkulu Staku.
ROM 16:10 Mndamsile Apelesi yula yazeleche kota wa kukomya kwa heye Kilistu. Mndamsile kwa wanhu weng'ha wawele muli ng'handa ya Alistobulo.
ROM 16:11 Mndamsile Helodiana, Myahudi muyangu, na kwa nhanzi yesa ya Nalikisi welumbile na wanhu wamkundile Mkulu Kilistu.
ROM 16:12 Mndamsile Tulufena na Tuluifosa wali ngukola mijito mli uchitumagwa wa Mkulu, na mganwa wa heni Pelisi yula yaditile menji kwa chiwalo cha Mkulu.
ROM 16:13 Mndamsile Lufo, munhu yadahile ng'hatu mli mijito ja Mkulu, na mayake heye yula nayawele vivila mayangu.
ROM 16:14 Mndamsile Ansikilito na Filegoni na Helime na Patuloba na Helima na wang'holoze weng'ha wawele hamwe na hewo.
ROM 16:15 Mndamsile Filologo na Yulia na Nelea na lumbulye na Olimpa na wanhu weng'ha wa Nguluwi wawele hamwe na hewo.
ROM 16:16 Milamse hemwe kwa mwemwe kwa kulajila igano lya Kilistu. Mwangulamswa na chilundo cha wanhu walingumkunda Kilistu weng'ha.
ROM 16:17 Wang'holozangu, ndanguwalanda milolele na wala weng'ha walingwambuza wayao webagule na kuwadita wanhu wanji wagwe, waleche kibata malanguso gombochele, mikale nawo kutali.
ROM 16:18 Mina wanhu wali ahyo hambe wamkolele mijito Kilistu Mkulu wa hetwe, ila wangujifugamila mida ja hewo wawo. Kwa ulonzi wa hewo wa usugu na kudamla kwa hewo kwa kuhembuliza kwa wanhu wanojile wawele ubewe kuwahada.
ROM 16:19 Mina hemwe mwanguzeleka kwa wanhu weng'ha kwa kuhulika Mbuli Inojile, ahyo sangalala na hemwe. Ndangukuganilani muwe na nyhala mli mbuli zinojile, na mleche kudita gehile.
ROM 16:20 Na heye Nguluwi nayali chaluko cha kikala goya, hokawila kulifiminda Limazoga hasi hali magulu ga hemwe. Kunoga kwa heye Mkulu wa hetwe Yesu Kilistu kuwe na hemwe.
ROM 16:21 Timoteyi, mkola mijito muyangu, kangukulamsani. Kahi na Lukio hiho, Yasoni na Sosipetili, wanhu wayangu, wangukulamsani.
ROM 16:22 Na heni Telitio, ndilingwandika lyandiko ali, ndangukulamsani kwa itagwa lya Mkulu.
ROM 16:23 Gayo mwenyeng'haye wa heni na chilundo cha wanhu walingumkunda Kilistu weng'ha, walingiting'hana kwa heye, kangukulamsani. Elasito muwika lufufu lwa muji awu, hamwe na mng'holozetu Kwato, wangukulamsani.
ROM 16:24 Utambichizo wa mkulu wa hetwe Yesu Kilistu uwe na hemwe mweng'ha! Ena!
ROM 16:25 Lelo sambi natumtogole Nguluwi, yanguweza kuwadita hemwe mwime nzinzili mli ila Mbuli Inojile ya Yesu Kilistu yondamle, na mli ula uviso ugubuligwe kulawila katali.
ROM 16:26 Ila lelo, uviso awo naugubuligwa kwa kukolela gandichigwe na waloli, na kwa malajizo ga Nguluwi wa mazuwa gose wilajila kwa wanhu weng'ha, leka wanhu wesa wakunde na wahulichize.
ROM 16:27 Kuli ukulu wa heye Nguluwi nayali yeka yawele na luhala, yatambichizwe kwa nzila ya kukolela Yesu Kilistu, Mazuwa gose! Ena.
1CO 1:1 Heni Paoli, nyhemigwe ndiwe mtumigwa wa Kilistu Yesu, kwa igano lya Nguluwi, hamwe na mng'holozetu Sostenesi.
1CO 1:2 Twanguwandichila hemwe muwele chilundo cha wanhu walingumkunda Kilistu muwele kuli muji wa Kolinto, hemwe mditwa muwe mwelile kuli kilumba na Kilistu Yesu, namchemigwa muwe wanhu wa Nguluwi, hamwe na wanhu weng'ha kweng'ha walingumlanda kwa itagwa lya Mkulu wa hetwe Kilistu Yesu, yawele Mkulu wa hewo na hetwe kahi.
1CO 1:3 Nguluwi Mhaza wa hetwe na Mkulu Yesu Kilistu yawape hemwe kunoga kwa heye na kikala goya.
1CO 1:4 Ndanguta malumbo kwa Nguluwi wa heni, mazuwa gose, kwa chiwalo cha kunoga kwa heye yawapele hemwe kukolela Kilistu Yesu.
1CO 1:5 Kwa vila milumba hamwe na Kilistu hemwe mbweda chila chinhu, mbweda kuli kudamla na luhala lweng'ha.
1CO 1:6 Mina usenga ulingumuwala Kilistu ukangazwa ng'hatu mgati mwa hemwe.
1CO 1:7 Ahyo, hamwisilwe na ndolendole yeng'ha ya Muhe Yelile, kota vyomlingumbeteza Mkulu Yesu Kilistu yagubuligwe.
1CO 1:8 Na heye kowemiza hemwe mbaka hoidumila, leka moneche mlihela wihe kuli zuwa lya Mkulu wa hetwe Yesu Kilistu.
1CO 1:9 Nguluwi ndo wa kitumbila, heye nakawachema hemwe muwe chinhu chimwe na Mwanage Yesu Kilistu Mkulu wa hetwe.
1CO 1:10 Wang'holozangu kuli Kilistu, walume na wadala, ndanguwadedeza kwa itagwa lya Mkulu wa hetwe Yesu Kilistu, mikundize kuli chila mbuli yomlonga, leka mleche kibagula hemwe kwa hemwe. Muwe mihanzile ng'hatu kwa gomjesile na chomgana kudita.
1CO 1:11 Wang'holozangu kuli Kilistu, walume na wadala, wanhu wamwe walawile kuli nhanzi ya Kilowe na wandonjela kota mwangilewa.
1CO 1:12 Nandonga ahila kwa vila chila munhu kangulonga lya heye, ayu kangulonga, “Heni nda wa Paoli,” Yunji, “Heni nda wa Apolo” Na yunji kolonga, “Heni nda wa Kefa” Na yunji “Heni nda wa Kilistu.”
1CO 1:13 Ndaze, Kilistu nakagawanuka? Hebu. Ndaze, ndo Paoli nakawambigwa mumsalaba kwa chiwalo cha hemwe? Ndaze, hemwe nambatizigwa leka muwe walanguswa wa Paoli?
1CO 1:14 Ndangulonga malumbo Nguluwi losimbatize munhu ne yumwe wa hemwe ila Kilisipo na Gayo.
1CO 1:15 Ahyo, kuduhu munhu ne yumwe yolonga kota nakabatizigwa leka yawe mlanguswa wa heni.
1CO 1:16 Ndangukumbuchila vivila nandimbatiza Stefanasi na ivyazi lyake, ila sikumbuchile hebu kota nandimbatiza munhu yunji.
1CO 1:17 Kilistu hanhumile heni kuya kubatiza, ila kanhuma heni kuwadamlila wanhu Mbuli Inojile na kudamla ne kitumbila luhala lwa wanhu, leka kubagama kwa Yesu mumsalaba kuleche kwajiliza ludali lwake.
1CO 1:18 Mina usenga kwa chiwalo cha kubagama kwa Kilistu mumsalaba ndo mbuli ya upoka hela kwa wala walingwajilila, ila kwa hetwe tulinguloholigwa, twangona mong'ho wa Nguluwi.
1CO 1:19 Mina Gandichigwe galonga, “Ndowifya nyhala za wanhu wawele na nyhala, na luhala lwa wawanzi ndotaga kutali.”
1CO 1:20 Lelo kakohi yawele na nyhala? Lelo kakohi mlangusa wa malajizo ga Musa? Na kakohi yalingidita yawezile kitwanza mhela awu? Nguluwi kaidita nyhala ya isi ayi iwe upoka ng'hatu!
1CO 1:21 Mina, kwa nyhala za heye Nguluwi, wanhu hawomzela Nguluwi kwa nyhala za hewo. Ila Nguluwi kagana kuwalohola wala walingukunda kukolela usenga ula walingudamla, wanguwona kota upoka.
1CO 1:22 Wayahudi wangugana ulajilo na Wagilichi wangugana nyhala.
1CO 1:23 Ila hetwe, twanguwadamlila mbuli ya Kilistu yawambigwe mumsalaba, mbuli ilingoneka kota kikwang'hwala kwa Wayahudi na upoka kwa wala hawawele Wayahudi.
1CO 1:24 Ila kwa wala wachemigwe na Nguluwi, Wayahudi na wala wanhu hawawele Wayahudi, Kilistu ndo yawele mong'ho wa Nguluwi na luhala lwa Nguluwi.
1CO 1:25 Mina chilingoneka kota upoka wa Nguluwi, china luhala kusinda usugu wa munhu, na chila chilingoneka kota ng'hochele kwa Nguluwi, china ludali kusinda ludali lwa munhu.
1CO 1:26 Wang'holozangu, mkumbuchile mhela lomchemigwe na Nguluwi, wenji wa hemwe nawalihela luhala kwa majesa ga chiwunhu, na hawawele wenji nawawele na ludali ama wanhu wawele na ukulu.
1CO 1:27 Ndo kulonga, Nguluwi nakagahagula gala isi naigona gachipoka, leka yawabase soni wawele na luhala, Nguluwi nakagahagula gala isi naigona gang'hochela leka yawabase soni wawele na ludali.
1CO 1:28 Na kahi Nguluwi nakagahagula gala gawele gabezigwe na wanhu wa isi, leka kuwifya gala galingoneka na wanhu kota gatanganika.
1CO 1:29 Nguluwi nakadita ahi, leka munhu yoneche yaleche kitogola hali Nguluwi.
1CO 1:30 Ila Nguluwi heye ndo yawalumbile hemwe na Yesu Kilistu. Nguluwi nakamdita Kilistu yawe luhala lwetu. Kukolela heye tuwichigwa goya hamwe na Nguluwi, tuwa wanhu welile na twilejehe.
1CO 1:31 Lelo kota Maandiko Matakatifu vyogallingulonga, “Heye yogana kitogola, yetogole kwa gala goyakolile Mkulu.”
1CO 2:1 Wang'holozangu, walume na wadala, lombuyile kwa hemwe, siwadamlile uviso wa kukomya kwa Nguluwi, kwa ulonzi ulinguwanojeza wanhu ama kwa luhala lwa wanhu.
1CO 2:2 Hala hondali na hemwe, nasivizelele choneche, ila nangana ndimzele Yesu Kilistu yula yawambigwe mumsalaba.
1CO 2:3 Lelo hombuyile kwa hemwe, ndali ng'hochele na ndikakama lukami kwa kudumba.
1CO 2:4 Kwa usenga na kudamla kwa heni, hauwele kwa ulonzi uwele na nyhala za kuwadita wanhu wakwejigwe, ila kwa ulajilo winji wa mong'ho wa Muhe wa Nguluwi,
1CO 2:5 leka makundo ga hemwe, hambe getumbile luhala lwa munhu, ila iwe kwa mong'ho wa Nguluwi.
1CO 2:6 Ndanguwadamlila usenga wa luhala kwa wala wakangale kuli makundo, ila haiwa luhala lwa isi ayi na haiwele kwa vilongozi wa isi ayi ilingwajiliza ludali.
1CO 2:7 Twanguwadamlila luhala lwa Nguluwi luvisigwe na luhaguligwe na kihanza ukulu wa heye hala isi hainalumbigwa.
1CO 2:8 Kuduhu ne chilongozi yumwe wa isi ino yaluzelele luhala luno. Wone na wawe wavizelele hino, nahawali kumuwamba mumsalaba Mkulu wa ukulu.
1CO 2:9 Ila ndo kota Maandiko Matakatifu vyogalingulonga, “Mbuli zohambe zoneche na iziho, ne makutu kuhulika, mbuli wanhu zohambe wejese mnhumbula, azo ndo Nguluwi yawawichile wala walingumgana.”
1CO 2:10 Ila Nguluwi katugubulila hetwe kwa Muhe. Mina Muhe Yelile, kangusakula chila chinhu chiwele mgati ng'hatu mwa Nguluwi.
1CO 2:11 Yalikohi yoweza kuvizela vinhu vya mgati mwa munhu wone haiwele muhe wa heye yuye? Vivyo, kuduhu yavizelele mbuli za Nguluwi, ila Muhe wa Nguluwi.
1CO 2:12 Lelo hetwe hatubochele muhe wa wanhu wa isi, ila tubochela Muhe yalajizwe na Nguluwi leka yatudite tuvizele gala gotupeligwe hela na Nguluwi.
1CO 2:13 Lelo hetwe twangulonga, haiwele kwa ulonzi wotulangusigwe kwa luhala lwa munhu, ila twangulonga kwa ulonzi wotulangusigwe na Muhe wa kukomya, twangulonga mbuli za Muhe kwa wala wawele na Muhe wa Nguluwi.
1CO 2:14 Munhu yohawele na Muhe wa Nguluwi, hobochela mbuli za Muhe wa Nguluwi. Kwa heye munhu ayo, mbuli azo ndo upoka yeka, gangupuluta luhala lwake, mina ganguweza kuzeleka hela kwa utanzi wa Muhe.
1CO 2:15 Ila munhu yawele na ayo Muhe wa Nguluwi, koweza kugazela geng'ha, na haduhu munhu yoweza kumtagusa.
1CO 2:16 Gandichigwe gangulonga, “Yalikohi yoweza kuvizela majesa ga Mkulu? Yalikohi yoweza kumlangusa Mkulu?” Ila hetwe twanago majesa ga Kilistu.
1CO 3:1 Wang'holozangu, heni nasijezile kulonga na hemwe kota wanhu wawele na Muhe wa Nguluwi ila nandonga na hemwe kota wanhu wa chiisi, kota wana wadodo kuli kumkunda Kilistu.
1CO 3:2 Nandiwapa itombo na haiwele kwa chilyo chikavu, kwa vila namwali hamkundile kuchibochela. Na mbaka sambi baha hamkunda hebu.
1CO 3:3 Mina hemwe mng'hali wanhu wa chiisi, mwangikala kwa vihendo vya chiisi. Ndaze, silingukomya kota mng'hali na maya na kilewa hemwe kwa hemwe? Mbuli zino zangulajila ng'hatu hemwe mng'hali wanhu wa chiisi, na mwangikala kota wanhu wa chiisi.
1CO 3:4 Yumwe wa hemwe hoyolonga, “Heni ndangumuwinza Paoli,” Na yunji kolonga, “Heni ndangumuwinza Apolo,” Ndaze, ayo hailingulajila kota mng'hali ngikala kota wanhu wa isi ino hela?
1CO 3:5 Apolo ndo yalihi? Na Paoli ndo yalihi? Hetwe twa vitumagwa hela wa Nguluwi natuwegalilani hemwe makundo. Chila yumwe wa hetwe kangukola mijito kota vyoyapeligwe na Mkulu.
1CO 3:6 Heni na nyala nyhadikwa, Apolo kaboholela mazi, ila yaiditile nyhadikwa yote ndo Nguluwi.
1CO 3:7 Yatanganiche hawele yula yanyalile nyhadikwa, ama yula yaboholele mazi, wakitumbila ndo Nguluwi yaiditile nyhadikwa yote.
1CO 3:8 Munhu yanyalile na yaboholele mazi weng'ha wewhana, na Nguluwi komonola chila yumwe kota vyoyekangaze kukola choyalajizwe.
1CO 3:9 Mina hetwe twangukola mijito hamwe na Nguluwi, na hemwe mwa kota mgunda wa Nguluwi, hemwe mwa kota ng'handa ya Nguluwi.
1CO 3:10 Kwa kitumbila kunoga kwa heye koyamhele Nguluwi, mbika msisi kota yalinguzenga yadahile yawele na luhala, na munhu yunji kanguzenga mchanya mwake, ila chila yumwe yawe msugu yolola vyoyozenga mchanya mwa msisi awu.
1CO 3:11 Kuduhu munhu yoweza kuwika msisi unji yoleka ula uwichigwe katali, msisi awo ndo Yesu Kilistu.
1CO 3:12 Mchanya mwa msisi awo munhu koweza kuzenga kwa zahabu, sendi ama kwa maganga ga sendi nyinji ng'hatu, koweza kuzenjela migodi, chimundi na midete.
1CO 3:13 Kunoga kwa mijito ya chila yumwe kokoneka mhela wa zuwa lila lya utaguso. Hambi zuwa ayo, acho chiluli cholajila mijito ya chila munhu, chiluli chojeza kona kota mijito ya hewo nainoga.
1CO 3:14 Wone choyazenjile munhu kuchanya mwa awo msisi hachilakazwa na acho chiluli, munhu ayo kobochela ndolendole.
1CO 3:15 Ila wone choyazenjile cholakazwa, leka kokwajiliza choyaganigwe kubochela, ila heye koloholigwa kota yaponele nzagunzagu kulawa mchiluli.
1CO 3:16 Ndaze, hamvizelele kota hemwe mwa ng'handa ya Nguluwi, na Muhe wa Nguluwi kangikala mgati mwa hemwe?
1CO 3:17 Lelo wone munhu yawifye ng'handa ya Nguluwi, Nguluwi komuwifya heye, mina ng'handa ya Nguluwi yela, namwe mwa kota ng'handa ya Nguluwi.
1CO 3:18 Mleche kibada! Munhu yoneche hali hemwe yochiwona kana luhala lwa chiisi, kabweda yawe mpoka leka yawe na luhala lwa kukomya.
1CO 3:19 Hambi, luhala lwa wanhu wa isi ayi ndo upoka hali Nguluwi. Mina Maandiko Matakatifu gangulonga, “Nguluwi kawagwilizaga wawele na luhala kuli usugu wa hewo.”
1CO 3:20 Na kahi, “Mkulu kavizela kota majesa ga wawele na luhala hagawele chinhu.”
1CO 3:21 Lelo munhu yaleche kidayila chila chowalingudita wanhu. Mina chila chinhu ndo cha hemwe.
1CO 3:22 Yawe Paoli ama Apolo ama Kefa, isi yeng'ha ama ukomu ama kubagama ama mbuli za sambi ama mbuli za hamba, vyeng'ha ndo vya hemwe.
1CO 3:23 Hemwe mwa wa Kilistu, na Kilistu ndo wa Nguluwi.
1CO 4:1 Munhu nayatone hetwe kota twa vitumagwa wa Kilistu, wotupeligwe udaho wa kudamla uviso wa Nguluwi.
1CO 4:2 Na chilinguganigwa kwa yoneche yula yapeligwe chinhu cha kukola, lelo imgana yawe wa kitumbila.
1CO 4:3 Kwa heni haiwele chinhu, wone nhagusigwe na hemwe, ama na utaguso wa chiwunhu, na sichitagusa ndiliyeng'ha.
1CO 4:4 Mgati mwa nhumbula ya heni kuduhu chinhu chinhagusa kwa mbuli yoneche, ila ayo hailingulajila kota ndahela nongwa. Mkulu ndo yalingunhagusa heni.
1CO 4:5 Lelo mleche kutagusa mhela loung'hali, mbeteze mbaka Mkulu hoyokuya. Heye kogavumbula gala gali kutitu gavisigwe, na kulajila hazelu gala gawele mnhumbula za wanhu. Nabaho chila yumwe kubochela lutogo lwake kulawila kwa Nguluwi.
1CO 4:6 Wang'holozangu, ndimtumila Apolo na heni kwa chiwalo cha hemwe, leka kukolela hetwe milanguse ulonzi awu, “Mibatilile gandichigwe.” Mleche kidayila munhu yumwe na kumbeza yunji.
1CO 4:7 Yalikohi yokubagula nakukona hegwe kota kunoga kusinda yunji? Kuna chinhu chachi hegwe chohupeligwe? Na wone uwe upegwe, iwa ndaze kwangidaya kota hupeligwe?
1CO 4:8 Ena! Mgabochela geng'ha nagomganile! Muwa na lufufu! Muwa wandewa hetwe tulihaduhu! Ndangugana muwe wandewa, leka tuwe wandewa hamwe na hetwe.
1CO 4:9 Ndangijesa Nguluwi katudita hetwe watumigwa tuwe wanhu wa mwiso ng'hatu, kota wanhu watagusigwe kubagama, mina tugaluka mnvina hali isi yeng'ha, hali wahilisi wa kilanga na hali wanhu.
1CO 4:10 Hetwe twawapoka kwa mbuli ya Kilistu, ila hemwe mna luhala kwa kilumba hamwe na Kilistu! Hetwe twa ng'hochele, hemwe mna ludali. Hetwe twangubezigwa ila hemwe mwangutogoligwa.
1CO 4:11 Mbaka sambi, hetwe tuna nzala na ng'halu, twahela chakuvala, twangutowigwa na viganza, twahela hakuwasa.
1CO 4:12 Kahi twangugaya na kukola mijito kwa moko getu. Howotuliga, hetwe twanguwalandila utambichizo, howotugaza hetwe twangwimilila.
1CO 4:13 Howotusinjizila, twangwidichila goya. Mbaka sambi hetwe twangoneka kota vinhu vikokomoche vya isi, lelo hetwe twangoneka kwa chila munhu, kota vinhu vyavu.
1CO 4:14 Silingwandika aga geng'ha leka ndiwabase soni, ila ndanguwakanya kota wana wa heni ndiwaganile.
1CO 4:15 Mina na wone muwe na wanhu elufu kumi wa kuwamila kuli kilumba na Yesu Kilistu, mwahela wahaza wenji, hambi kuli kilumba na Kilistu, heni ndo ndiwalelile kwa kudamla Mbuli Inojile.
1CO 4:16 Ahyo, ndanguwadedeza, mdite kota vyondilingudita heni.
1CO 4:17 Ahyo, ndangumlajiza Timoteyi kwa hemwe. Heye ndo mwanangu ndimganile na yatanganiche kuli kilumba na Mkulu. Ayo kowakumbusani nzila yondilinguwinza kuli kilumba na Yesu Kilistu, nzila yondilingulangusa chila honhu kuli chilundo cha wanhu walingumkunda Kilistu.
1CO 4:18 Wamwe wa hemwe mina waluka kidaya wochijesa kota sikuya kahi kwa hemwe kuwajendela.
1CO 4:19 Ila, Mkulu wone yagane, ndokuya kwa hemwe himahima, na baho ndokona nene baha, hachiwele chila hela chowolonga, ila na ludali lowalinalo awo walingidaya.
1CO 4:20 Mina Undewa wa Nguluwi hauwele kwa ulonzi hela, ila wa mong'ho.
1CO 4:21 Ndaze, mwangugana chilikohi? Mbuye kwa hemwe na ng'obwa, ama mbuye na muhe wa igano na uliholile?
1CO 5:1 Zabaho mbuli zitanganiche kota kuna ung'hondwa hali hemwe, na awo ung'hondwa wihile ng'hatu mina haunalawila hali wanhu wo hawamzelele Nguluwi. Ndonjelwa kota, kuna yumwe wa hemwe kangikala na mdala wa mhaza wa heye!
1CO 5:2 Iwa ndaze lelo mwangidaya? Nayali goya kwa hemwe kulombocheza, na ayo yaditile chinhu acho yawinjigwe hali hemwe.
1CO 5:3 Nani, kwa ubanzi wa heni, ifanda kwa lukuli ndakutali na hemwe, leka ahyo, kwa muhe ndabaho hamwe na hemwe, hino, kota vila ndabaho, mina ndimtagusa munhu ayo yaditile chinhu acho cha soni kota heni nda aho hamwe na hemwe.
1CO 5:4 Mhela homting'hana hamwe kwa itagwa lya Mkulu Yesu, nani nda hamwe na hemwe kwa chimuhe, na ludali lwa Mkulu wa hetwe Yesu lwa baho,
1CO 5:5 mumuwiche munhu ayo mmoko mwa Limazoga, leka lukuli lwake luwifigwe na muhe wa heye iloholigwe zuwa lila Mkulu hoyowatagusa wanhu.
1CO 5:6 Kidaya kwa hemwe hakunojile! Ndaze, hamzelele kota usaso udo wosasiza utimbo weng'ha?
1CO 5:7 Mihovuje, mkataje kutali usaso wa katali wa gehile. Leka muwe utimbo unyale wohauwichigwe usaso kota vyomlinguganigwa kuwa, mina Kilistu mwanaing'holo lya Pasaka wa hetwe kalavigwa nhambiko.
1CO 5:8 Lelo tudite mnvina ayo, ilihela usaso ula wa katali, usaso wa wihe na gehile, ila kwa ibumunda haliwichigwe usaso, ndo ibumunda linojile na kukomya.
1CO 5:9 Nandiwandichila kuli lyandiko liyaje, kota mleche kihanza na wang'hondwa.
1CO 5:10 Silingulonga kota mleche kihanza na wanhu weng'ha wohawamzelele Nguluwi, wawele wang'hondwa na wabuhu na wahizi na walingufugamila jimalukolo. Mina kwa kileka na hewo weng'ha na iwagana hemwe muche ng'hatu kuli isi ino.
1CO 5:11 Chonyandiche ndo chino, mleche kihanza na mng'holozo yawele Mkilistu yawele mng'hondwa na mbuhu na yalingufugamila jimalukolo na yawele na maligo na yalingugala na mhizi. Munhu yawele hino, na kulya mleche kulya na heye.
1CO 5:12 Ndaze, mbuli ya heni kuwatagusa wanhu wawele kunze kwa chilundo cha wanhu walingumkunda Kilistu? Awo Nguluwi kowatagusa. Ndaze, hemwe hamganigwe kuwatagusa wala wawele kuli wanhu wa hemwe baho?
1CO 5:13 Heye Nguluwi kowatagusa awo wawele kunze. Kota Gandichigwe vyogolonga, “Mumuwinje kutali munhu yehile yawele hali hemwe!”
1CO 6:1 Iwa ndaze yumwe wa hemwe kumlonjeleza mng'holoze hali utaguso wa wanhu hawamzelele Nguluwi yoleka kumlonjeleza hali wanhu wa Nguluwi?
1CO 6:2 Ndaze, hamzelele kota wanhu wa Nguluwi wowatagusa wanhu wa isi ayi? Wone lelo, isi yotagusigwa na hemwe, lekachoni hamlingugana kutagusa kuli mbuli ndodo?
1CO 6:3 Ndaze, hamzelele kota hetwe towatagusa wahilisi wa kilanga? Ahyo totagusa ng'hatu mbuli ndodo za ukomu awu ziwele muisi.
1CO 6:4 Wone muwe mchilewa, ndaze, muwachema wawe watagusa hanji hawazeleche kuli chilundo cha wanhu walingumkunda Kilistu wawataguse hemwe?
1CO 6:5 Ndangulonga aga kuwabasa soni hemwe! Hambi kuduhu ne yumwe hali hemwe yawele na luhala lwa kijesa nongwa za wang'holoze?
1CO 6:6 Ila Mkilistu komuhilika Mkilistu miyage kuli mchitala, yomleka yataguswe na watagusa wohambe wakunde na hawamzelele Nguluwi.
1CO 6:7 Ako kilonjeleza mwemwe kwa mwemwe kwangulajila ng'hatu kota mlemwela! Ndaze, yowa mbuli inojile ng'hatu kwa hemwe wanhu kuwaditila wihe? Yowa inojile ng'hatu kwa hemwe kusukulwa lufufu lomuwelenalo.
1CO 6:8 Ila, lelo hemwe ndo mwanguwaditila wihe na kuwaboka kahi, ago mwanguwaditila Wakilistu wayenu!
1CO 6:9 Ndaze, hamzelele kota wanhu wehile hawowa na honhu kuli Undewa wa Nguluwi? Mleche kibada! Hawawele wanhu wagoni na wang'hondwa na walingufugamila jimalukolo na wala walinguwasa na walume wayao.
1CO 6:10 Hawawele wahizi na wabuhu na walingugala na walinguheha na wabokaji na walinguliga hewo weng'ha hawowa na honhu kuli Undewa wa Nguluwi.
1CO 6:11 Wamwe wa hemwe mwali hiho, ila namusilwa gehile ga hemwe na mditwa welile na muwa mtanganiche kwa Nguluwi kwa itagwa lya Mkulu Yesu Kilistu na kwa Muhe wa Nguluwi wa hetwe.
1CO 6:12 Munhu koweza kulonga, “Kwa heni chila chinhu chikundigwa kwa malajizo.” Ila haviwele vyeng'ha vinoga kwa heni. Ndangukunda kota chila chinhu chinoga kwa heni ila ndema chinhu choneche chila chindongoze.
1CO 6:13 Hamba munhu nyunji koweza kulonga, “Ndiya kwa chiwalo cha munda, na munda kwa chiwalo cha ndiya.” Goya, ila Nguluwi koviwifya vyeng'ha vili. Lukuli lwa munhu haluwele kwa ung'hondwa, ila kwa chiwalo cha kumditila Mkulu, na heye Mkulu kanguulolela lukuli.
1CO 6:14 Kwa ludali lwake Nguluwi nakamzilipula Mkulu kuli wabagame, vivila na heye kotuzilipula na hetwe.
1CO 6:15 Ndaze, hamzelele kota ng'huli za hemwe ndo vitomo vya lukuli lwa Kilistu? Lelo nyhole vitomo vya Kilistu ndividite viwe vya uhonzolomo? Ne hado!
1CO 6:16 Ahyo, hamvizelele, yalingilumba na mhonzolomo kawaga lukuli lumwe na heye? Kota vyoyandichigwe mli Maandiko Matakatifu, “Na hewo weli wowa lukuli lumwe.”
1CO 6:17 Ila yula yelumbile na Mkulu kawaga hamwe na heye chimuhe.
1CO 6:18 Mikale kutali na ung'hondwa. Gehile geng'ha galinguditigwa kunze hagalingulumiza lukuli ila mng'hondwa huditaga gehile mli lukuli lwake heye.
1CO 6:19 Ndaze, hamzelele kota ng'huli za hemwe ndo ng'handa ya Muhe Yelile yawele mgati mwa hemwe, yomumbochele kulawila kwa Nguluwi? Hemwe baho, mwa wa Nguluwi.
1CO 6:20 Nakawagula kwa bei ng'hulu. Ahyo mumtogole Nguluwi kwa ng'huli za hemwe.
1CO 7:1 Lelo kwa mbuli zila zomwandiche kota, inoga wanhu waleche kuhola,
1CO 7:2 ila kwa vila kuna ung'hondwa ng'hatu, chila mlume yawe na mdala wake yuye na chila mdala yawe na mlume wake yuye.
1CO 7:3 Mlume kanguganigwa yadite galinguganigwa kwa mdala wa heye, na heye mdala yadite galinguganigwa kwa mlume wa heye.
1CO 7:4 Mdala kahela ludali hali lukuli lwa heye, ila mlume wa heye kanawo. Hamba, hiho du mlume kahela ludali hali lukulli lwa haye, ila mdala wa heye kanawo.
1CO 7:5 Mleche kiyima chila yumwe, ila kwa kulagana kwa mhela udo hela, leka muwe na mhela wa kulanda. Hamba mihiluchile kahi leka Limazoga lileche kuwajeza kwa vila hamuweza kilemeza.
1CO 7:6 Ndilinguwalonjelani sambi ndo majesa gangu hela, haliwele ilajizo.
1CO 7:7 Nangana wanhu weng'ha wawe kota heni vyondili, ila chila munhu kanayo ndolendole ya heye yapeligwe na Nguluwi, yumwe kana ino na yunji kana yila.
1CO 7:8 Kwa wala walume hawanahola na wala wadala hawanaholeka, ndanguwalonjela kota inoga wekale kota heni vyondili.
1CO 7:9 Ila wone hamuweza kilongoza mwemwe, leka muhole, mina inoga kuhola kuleka kumema maya ga chilukuli.
1CO 7:10 Kwa wala weholile ndanguwapa ilajizo ali, na haiwele ya heni, ila ya Mkulu. Mwanamche yaleche kileka na mlume wa heye,
1CO 7:11 Ila wone yeleche na heye, na baho yekale ne kuholeka, ama hebu, wehanyise wawe hamwe kahi na mlume wa heye. Mlume na heye yaleche kumwandichila luleko mchewake.
1CO 7:12 Kwa wala wanji ndangulonga, heni, haiwele Mkulu, ndangulonga hino, wone mlume Mkilistu kana mdala yawele hambe yamkunde Kilistu, na ayo mdala kakunda kulutilila kikala na heye, yaleche kumwandichila luleko.
1CO 7:13 Na wone mdala Mkilistu kana mlume yalihela makundo kwa Kilistu, na ayo mlume kangukunda kulutilila kikala na heye, lelo mdala ayo yaleche kumwandichila luleko.
1CO 7:14 Kwa vila ayo mng'holozo yohambe yamkunde Kilistu, kobocheligwa kwa Nguluwi kwa kukolela mdala wa heye, na ayo mdala yohambe yamkunde Kilistu kubocheligwa kwa Nguluwi kwa kukolela mlume wa heye. Leka vila, wana wawo na wahawele wehile kota vyoili, ila hambi sambi wabocheligwa na Nguluwi.
1CO 7:15 Ahyo, wone yula yohambe yamkunde Kilistu kangugana kumleka miyage yawele Mkilistu, leka yamleche hela. Aho yula mlume Mkilistu ama mdala, kowa yelejehe. Mina Nguluwi kawachema hemwe mikale goya.
1CO 7:16 Hegwe mwanamche Mkilistu, kovizela ndaze kota huweza kumlohola mlume wa hegwe? Ama hegwe mlume Mkilistu, kovizela ndaze kota huweza kumlohola mdala wa hegwe?
1CO 7:17 Ahyo, chila yumwe na yekale kota vyouganigwe na Mkulu, na yekale kota vyoyachemigwe na Nguluwi. Ali ndo ilajizo lyondanguse kuli vilundo vya wanhu walingumkunda Kilistu.
1CO 7:18 Wone munhu yenjile ikumbi kambochela Nguluwi, ayo yaleche kivisa kota kenjila ikumbi, na wone loyachemigwe nayali hanenjila ikumbi, leka yaleche kwinjila ikumbi.
1CO 7:19 Mina kwinjila ikumbi ama hanenjila ikumbi haiwele chinhu, chitanganiche ng'hatu ndo kibata malajizo ga Nguluwi.
1CO 7:20 Hino chila yumwe yapone vivila navyoyawele kota mhela ula vyoyachemigwe.
1CO 7:21 Ndaze, hegwe wali mpogozi mhela wouchemigwe? Uleche kona vibi, ila wone uwe na mhela wa kilejeha, udite.
1CO 7:22 Mina heye yachemigwe na Mkulu nayali mpogozi, ayo kawaga munhu yelejehe wa Mkulu. Na kahi hiho na yula yachemigwe yawele munhu yelejehe, kawaga mpogozi wa Kilistu.
1CO 7:23 Hemwe mweng'ha mguligwa hela kwa bei ng'hulu, ahyo mleche kahi kuwa wapogozi wa wanhu.
1CO 7:24 Wang'holozangu, chila yumwe wa hemwe, yekale kwa kilumba na Nguluwi kota vyoyachemigwe.
1CO 7:25 Lelo kwa mbuli ya wahinza hawanaholeka na hawanahola, heni ndahela ilajizo kulawa kwa Mkulu, ila ndangulavya gondijesile heni kota kwa isungu lyomheligwe na mkulu ndanguganigwa kuwa wa kitumbila.
1CO 7:26 Lelo vyondilingona heni, kwa nongwa iwele aha sambi, ndangijesa kota na igana munhu yapone kota vyoyali.
1CO 7:27 Ndaze, mina kuhola? Uleche kugana kumleka mchewako. Ndaze, hegwe hunahola? Leka uleche kuhola.
1CO 7:28 Ila wone uhole kowa huditile gehile, na mhinza wone yaholeche kowa haditile gehile. Ila wanhu kota awo wogaya ng'hatu kuli ukomu awu, ila heni nangana ago galeche kuwafika hemwe.
1CO 7:29 Wang'holozangu, ndangugana kulonga hino, mhela uponile udo. Na kulawila sambi wala waholile wekale kota vila hawanahola,
1CO 7:30 na wala walingulila wawe kota hawalingulila, na wala walingusechelela wawe kota hawalingusechelela, na wala walingugula wawe kota wahela chinhu chowagulile.
1CO 7:31 Na hewo wawele na chakukola na vinhu vya isi ino, wawe kota wahela chakukola ng'hatu. Mina isi ayi kota vyotuzelele yangukola.
1CO 7:32 Ndangugana hemwe mleche kuwa na lunhwinhwi. Munhu yalihela mdala kakolaga mijito ja Mkulu, leka yamnojeze Mkulu.
1CO 7:33 Mlume yaholile kahangawaga na mbuli ya vinhu vya isi, kwa vila kangugana kumnojeza mchewake,
1CO 7:34 na heye kangukwejigwa banzi mbili. Mdala hanaholeka ama hanating'hana na mlume kahangawaga na mbuli ya Mkulu leka yawe yelile lukuli na Muhe. Ila mdala yaholeche, kahangawaga na mbuli za vinhu vya isi leka yamnojeze mlume wa heye.
1CO 7:35 Ndanguwalonjelani aga kwa vila ndangugana kuwatanza hemwe, na haiwele kuwalemezeni. Ndangugana hemwe mdite ganojile, na milavye mwemwe baho kuli mijito ja Mkulu, ne kukwejigwa na mbuli zinji.
1CO 7:36 Wone munhu kangona kota halingumditila goya mhinza mkasano wa heye, wone yone mhinza ayo kalala kwa vila mihela ja heye ja kuholeka jipuluta, wone koweza kihola na heye, yadite ahyo, wone yamhole hodita gehile.
1CO 7:37 Ila wone ayo mlume yagane yuye kwa nhumbula ya heye kuleka kuhola, na wone yoweza kulongoza maya ga chilukuli, ayo kangudita goya kwa kuleka kumhola mhinza ayo.
1CO 7:38 Ahyo, yula yokwamula kuhola mhinza kangudita goya, na yula yalingulema kuhola kangudita goya ng'hatu.
1CO 7:39 Mdala yaholeche kanguwohigwa na mlume wa heye mhela weng'ha mlume wa heye hoyowa mkomu. Ila mlume wa heye wone yabagame, mdala ayo kowa yelejehe, na wone yagane koweza kuholeka na munhu yoneche hela yawele Mkilistu.
1CO 7:40 Ila, vyondilingona heni, kobweda ng'hatu kota yapone hihyo vyoyali. Ago ndo Majesa gangu, na ndangijesa heni kahi ndanaye Muhe wa Nguluwi.
1CO 8:1 Sambi yanguwala vilyo vitambichizwe jimalukolo. Tuvizela kota hetwe tweng'ha twa wawanzi, ila uwanzi awo wanguwadita wanhu wawe wochidaya, ila igano lyanguzenga.
1CO 8:2 Munhu yochijesa kota kachizela chinhu, ndangukomya hachizelele ne chinhu kota vyoilingumgana kuchizela.
1CO 8:3 Ila chila munhu yalingumgana Nguluwi, ayo kazeleka na Nguluwi.
1CO 8:4 Lelo kuli mbuli ya vilyo vitambichizwe jimalukolo, tuvizela kota jimalukolo haiwele chinhu muisi, tuvizela kota Nguluwi ndo yumwe hela.
1CO 8:5 Hanga kuwele na vinhu vilinguchemigwa mimlungu kuli isi ama kilanga, na hanga wanhu wangulonga kuna mimlungu na wakulu wenji,
1CO 8:6 ila hetwe tuna Nguluwi yumwe, Mhaza, yalumbile vinhu vyeng'ha, na kwa heye hetwe twangikala. Kahi twanaye Mkulu yumwe hela, Yesu Kilistu, kwa kukolela heye vinhu vyeng'ha vilumbigwa na hetwe twangikala kwa kukolela heye.
1CO 8:7 Ila haiwele chila munhu yawele na uwanzi uno. Mina wabaho wanhu wanji wazowele kutambichiza jimalukolo, wanhu wanji mbaka sambi howolya chilyo acho wangijesa kota vilyo vitambichizwe jimalukolo. Na kwa vila nhumbula za hewo ng'hochele, wangiwona mzilo.
1CO 8:8 Ila chilyo hachiweza kutuhilika habehi ng'hatu na Nguluwi. Wone tuleche kulya hatwisilwa na chinhu, na wone tulye hatukonjezelwa chinhu.
1CO 8:9 Ila, milolele, aku kilejeha kwa kukola mijito minji hemwe mleche kuwambuza wawele na makundo ng'hochele wagwe kuli gehile.
1CO 8:10 Wone munhu yawele na nhumbula yohaisindamale, yakone hegwe uwele na uwanzi ulya vilyo avyo mng'handa ya jimalukolo, ahyo, hochikangaza hebu kulya vilyo vitambichizwe jimalukolo?
1CO 8:11 Ahyo, ayo munhu yawele na makundo ng'hochele, mng'holoze Kilistu nayabagame kwa chiwalo cha heye, kokwajilila kwa chila hegwe kwanguchichema luhala.
1CO 8:12 Wone mlinguwaditila gehile ahi Wakilistu wayenu, na kulumiza kukunda kwa hewo kudo, namwe mwangumditilla gehile Kilistu.
1CO 8:13 Ahyo, wone chilyo chondilingulya changumwambuza Mkilistu muyangu yagwe kuli gehile, silya iwunde mazuwa gose, ndeche kumdita heye yagwe kuli gehile.
1CO 9:1 Ndaze, heni siwele munhu ndilejehe? Ndaze, heni siwele mtumigwa? Ndaze, heni simuwene Yesu Mkulu wa hetwe? Ndaze, hemwe hamuwele mlawile kwa mijito ya heni kuli kilumba na Mkulu?
1CO 9:2 Hanga wone kwa heni siwele mtumigwa kwa wanhu wanji, ila kwa hemwe heni nda mtumigwa. Hemwe mwa ulajilo wa utumigwa wa heni, kwa kula kilumba hamwe na Mkulu.
1CO 9:3 Ahi ndo vyondichigombela kwa wanhu howondema heni,
1CO 9:4 Ndaze, hambi hetwe hatuganigwe kulya na kunwa kwa chiwalo cha mijito ja hetwe?
1CO 9:5 Ndaze, twahela ludali lwa kumhola mdala Mkilistu kuli majendo ga hetwe, kota vila vyowalingudita watumigwa wanji, wang'holoze na Mkulu, na Kefa?
1CO 9:6 Ama heni na Banaba ndo tulinguganigwa kukola mijito leka tupegwe vinhu vitudita tikale?
1CO 9:7 Ndaze, mwamizi wachi yoweza kigulila mgoha yuye? Mlimi wa mgunda wachi yawele hambe yalye mafuza kuli mgunda wa heye wa zabibu? Mdimi wachi yawele hambe yanwe itombo kuli misenga joyadimile?
1CO 9:8 Ndaze, ndangulonga mbuli zino chiwunhu hela? Ndaze, Malajizo ga Musa nago hagalingulonga hiho?
1CO 9:9 Yandichigwa kuli Malajizo ga Musa, “Uleche kulidinya mlomo isenga holipulula nyhule za mpunga na liso.” Ndaze, ndo kulonga Nguluwi kangujihangawila misenga?
1CO 9:10 Ndaze, vyoyalonjile ahyo, halonjile mbuli za hetwe? Ena, aga na gandichigwa kwa mbuli ya hetwe, mina yula yalingulima na yalingubeta, chila yumwe kana lutogo lwa kitumbila mbena.
1CO 9:11 Wone hetwe tunyalile nyhadikwa ya chimuhe hali hemwe, ndaze, chowa chinhu chikulu ng'hatu wone tubete kwa hemwe vinhu vya hetwe vya chila zuwa?
1CO 9:12 Wone wanhu wanji wana ludali lwa kitumbila ago kulawila kwa hemwe, ndaze, hetwe twahela ludali ng'hatu kusinda hewo? Ila hetwe hatutumiye ludali alo, leka hetwe natwimilila mbuli zeng'ha tuleche kulemeza choneche cha Mbuli Inojile ya Kilistu
1CO 9:13 Ndaze, hamvizelele kota wawele vitumagwa kuli ng'handa ya Nguluwi wopegwa chilyo cha hewo baho, na walingulavya nhambiko hali honhu ha kulavila nhambiko wopegwa vinhu vya nhambiko ayo?
1CO 9:14 Mkulu nakalajiza hiho, wala walinguwadamlila wanhu Mbuli Inojile wapegwe ndiya ya hewo kulawila mumo.
1CO 9:15 Ila, heni situmiye ago ne imwe. Na sandiche aga leka mnditile heni aga, yowa goya kwa heni kubagama kuli munhu kubeza kula kitogola kwa heni hela.
1CO 9:16 Wone ndilingudamla Mbuli Inojile, ayo haiwele mbuli ya kivunila, ayo ndo mijito yomheligwe. Mane nene, wone silingudamla Mbuli Inojile.
1CO 9:17 Wone nandite mijito ayi kwa kugana nene baha, ndahapegwe chonolo, ila wone ndilingukola mijito ayi ne kugana nene baha, ayo yangulajila kota Nguluwi kanipa mijito ayi ndiikole.
1CO 9:18 Lelo ndangubochela chonolo chachi? Msahala wa heni wowa chinhu chachi, londiwadamlila wanhu Mbuli Inojile, silingugana kupegwa chinhu choneche, nasilanda sendi kuli mijito ya kudamla Mbuli Inojile.
1CO 9:19 Heni nda munhu ndilejehe, siwele mpogozi wa munhu yoneche, ila ndangidita ahyo kuwa mpogozi wa chila munhu, leka ndimpalile Kilistu wanhu wenji ng'hatu.
1CO 9:20 Kuli Wayahudi na ndikala kota Myahudi leka ndiwebate Wayahudi, kwa wala walingulongozwa na malajizo ga Musa, nandikala kota ndangulongozwa na malajizo ga Musa, leka ndiwebate hewo walingulongozwa na Malajizo ga Musa, hanga nene baha silingulongozwa na Malajizo ga Musa.
1CO 9:21 Kwa wala hawawele na malajizo ga Musa, nandikala kota ndahela malajizo, leka ndiwebate wala walihela Malajizo ga Musa. Ahi haiwele ngulajila kota ndahela malajizo hali Nguluwi, ila ndina malajizo ga Kilistu.
1CO 9:22 Kwa hewo wawele ng'hochele, ndidita ng'hochele leka ndiwebate awo wawele ng'hochele. Ndidita chila chinhu kwa weng'ha leka ndiwalohole kuli chila nzila.
1CO 9:23 Ndangudita aga geng'ha kwa chiwalo cha Mbuli Inojile, leka ndihanze mli faida ya usenga.
1CO 9:24 Ndaze, hamvizelele kota wanhu howobilima, weng'ha wangubilima, ila yumwe hela yalinguwalongola wayage, ndo kabochelaga chonolo? Ubilime ahyo, leka upegwe chonolo.
1CO 9:25 Munhu yoneche yalingugana kuwalongoza wayage walingubilima, tandi kangiwika goya, huditaga ahyo leka wapegwe lutogo lulinguwifigwa. Ila hetwe twangudita ahyo tupegwe chonolo chohambe chihe kwa mazuwa gose.
1CO 9:26 Ahyo ndangubilima kota munhu yalingugana kulongoza, silingitowa kota munhu yalingitowa na mbeho.
1CO 9:27 Ndanguukangaza lukuli lwangu na kuudita uwe kota mpogozi wa heni, ndangudita ahyo leka ndeche kulemigwa hondisinda kuwadamlila usenga wanhu wanji.
1CO 10:1 Wang'holozangu ndangugana mvizele kota wasekulu wa hetwe weng'ha na wali hasi ha ulolelo wa ila ng'hungugu, na kwa vila weng'ha na waloka goya yila bahali.
1CO 10:2 Weng'ha nawabatizwa leka wawe wa Musa kuli yila ng'hungugu na kuli yila bahali.
1CO 10:3 Weng'ha na walya chilyo chichila cha chimuhe.
1CO 10:4 Nawanwa kahi chakunwa chichila cha chimuhe. Mina nawanwa kulawila kuli lila italawe lya chimuhe liwawinzile, italawe alyo lyali heye Kilistu.
1CO 10:5 Leka ahyo, Nguluwi nahanojezwe na wenji wa hewo, na mitufi jawo najitagangwa kugunuche.
1CO 10:6 Lelo aga nagalawila kota kutulangusa hetwe, gangutulonga hetwe tuleche kugana wihe kota hewo navyowauganile.
1CO 10:7 Mleche kuwa kota wafugamila jimalukolo kota wamwe vyowaditile, kota vyogalingulonga gandichigwe, “Wanhu nawekala hasi, kulya na kunwa, nawema nakuvina vibi.”
1CO 10:8 Natuleche kudita ugoni kota wamwe wa hewo vyowaditile ung'hondwa, wabagama zuwa imwe wanhu elufu makumi meli na zidatu (23,000).
1CO 10:9 Tuleche kumjeza Kilistu Mkulu kota wamwe wa hewo vyowamjezile, wamwe nawabagama kwa kudondigwa na mizoka.
1CO 10:10 Tuleche kung'hung'huta kota wamwe wa hewo vyowaliwong'hung'huta, nawakopoligwa na mhilisi wa kubagama yalajizwe na Nguluwi.
1CO 10:11 Lelo mbuli azo zeng'ha naziwalawila hewo leka kutulangusa hetwe, na gandichigwa kutulemeza hetwe tuwele ngikala kuli mhela wa kuduma ulihabehi.
1CO 10:12 Ahyo, yula yalingijesa kota kema goya yelolele yaleche kugwa.
1CO 10:13 Majezo gompegwe, hagawele majenzi kwa munhu. Nguluwi ndo wa kitumbila, na heye howaleka mjezigwe kusinda ludali lwenu, ila homjezigwa, heye kowapa kahi ludali lwa kwimilila na nzila ya kulawa amo goya.
1CO 10:14 Kwa ahyo, ndiwaganile heni, mleche nhambiko za jimalukolo.
1CO 10:15 Ndangulonga na hemwe, kota wanhu wawele na luhala, mijese mwemwe aga gondilingulonga.
1CO 10:16 Hotutambichiza chizombe cha chilyo cha Mkulu, ndaze, hambe tihanze na danda ya Kilistu? Na hotumogola ibumunda, hatulingihanza na lukuli lwa Kilistu?
1CO 10:17 Kwa vila ibumunda alyo limwe, hetwe, hambi vyotuli wenji, twa lukuli lumwe, mina weng'ha twangimogolela ibumunda lilyo.
1CO 10:18 Muwalole wanhu wa Isilaeli, wala walingulya nhambiko hali honhu ha kulavila nhambiko wangilumba na nhambiko azo zilavigwe kwa Nguluwi.
1CO 10:19 Lelo ndonje choni? Ndaze, chilyo chilavigwe jimalukolo chitanganika kwa chilyo? Ndaze, jimalukolo, ndo chinhu chikulu?
1CO 10:20 Ne hado! Chondilonga cha hino, nhambiko walingulavya wanhu wohawamzelele Nguluwi wangulavila milungu, haiwele Nguluwi. Na heni siviganile ng'oo hemwe muwe milumbile na milungu.
1CO 10:21 Hamuweza kuchinwela chizombe cha Mkulu na aku mnwela chizombe cha milungu, hamuweza kulya hali chisaga cha Mkulu na hali chisaga cha milungu.
1CO 10:22 Ndaze, twangugana kumdita Mkulu yawe na maya? Ndaze, twangijesa tuna ludali ng'hatu kusinda heye?
1CO 10:23 “Vinhu vyeng'ha vikundigwa kuli malajizo,” Ila haviwele vyeng'ha vinojile. “Vinhu vyeng'ha vikundigwa kwa malajizo,” Ila vyeng'ha havilinguwakangaza.
1CO 10:24 Munhu yoneche yaleche kipalila ganojile yuye, ila yepalile ganojile ga miyage.
1CO 10:25 Mlye choneche chila chilinguguzigwa kuli soko, ne kuuzauza, kwa chiwalo cha majesa gawele mnhumbula za hemwe.
1CO 10:26 Hino gandichigwe gangulonga, “Isi na vyeng'ha vilimumo vya heye Mkulu.”
1CO 10:27 Wone munhu hawele hambe yamkunde Kilistu yawalalicheni namwe mwangugana kuluta, mlye choneche choyawawichileni ne kuuzauza kwa chiwalo cha nhumbula za hemwe kuwa na majesa.
1CO 10:28 Wone munhu yoneche yawalonjelani, “Chilyo achi chitambichizigwa jimalukolo,” Uleche kulya kwa yula yakulonjele na kwa chiwalo cha kusa majesa kuli nhumbula ya hegwe.
1CO 10:29 Ndangulonga, “Kwa chiwalo cha majesa ga nhumbula,” Haiwele nhumbula ya hemwe, ila kwa chiwalo cha nhumbula ya yula yawalonjeleni. Mombuza, “Lekachoni kilejeha kwa heni kitumbile nhumbula ya munhu yunji?
1CO 10:30 Wone ndanguta malumbo Nguluwi kwa chilyo chondilingulya, lekachoni munhu yunji yandeuze kwa chilyo chondilingulya?”
1CO 10:31 Lelo choneche chomdita chiwe kulya ama kunwa, mdite vyeng'ha kwa nzila ikoneka kota ukulu wa Nguluwi wangulajilwa.
1CO 10:32 Mleche kuwa ngwamo kwa Wayahudi ama kwa wanhu hawawele Wayahudi ama kwa chilundo cha wanhu walingumkunda Kilistu.
1CO 10:33 Mfande kota heni, ndangugana kuwanojeza wanhu kwa geng'ha ndilingugadita. Kwa vila ndema kubweda ndiliyeka, ila ndangugana wanhu weng'ha wabwede leka waloholigwe.
1CO 11:1 Mnyijize heni kota vyondilingumwijiza Kilistu.
1CO 11:2 Ndanguwatogolani kwa vila mwangung'humbuka na kwa vila lombatilile gala malanguso gondiwapele.
1CO 11:3 Ila ndangugana kahi mvizele kota Kilistu ndo mutwi wa chila mlume, na mlume ndo mutwi wa mdala wa heye, na Nguluwi ndo mutwi wa Kilistu.
1CO 11:4 Lelo chila mlume yolanda ama yalingulavya usenga ulawile kwa Nguluwi, aku yagubiche mutwi wa heye, ayo kangumbeza Kilistu.
1CO 11:5 Na mdala hoyolanda ama kulavya uloli wa Nguluwi ne kugubika mutwi wa heye, kangumbeza mlume wa heye, yalingudita hino kewhana hela na mdala yabeyile mnvili ziwele mli mutwi wa heye.
1CO 11:6 Mdala yolema kugubika mutwi wa heye, inoga yabeye mnvili za heye. Ila soni kwa mdala kukang'hana ama kubeya mnvili za heye, ahyo, inoga yagubiche mutwi wa heye.
1CO 11:7 Hainojile kwa mlume kugubika mutwi, kwa vila heye ndo ulajilo wa Nguluwi na chilolelo cha ukulu wa Nguluwi, ila mdala ndo chilolelo cha ukulu kwa Mlume.
1CO 11:8 Mlume halawile kwa mdala, ila mdala kalawa kwa Mlume.
1CO 11:9 Mlume halumbigwe kwa mbuli ya mdala, ila mdala kalumbigwa kwa mbuli ya mlume.
1CO 11:10 Ahyo kwa chiwalo cha wahilisi wa kilanga, mdala kanguganigwa yagubiche mutwi wa heye kwa ulajilo ka hasi ha ludali lwa mlume wa heye.
1CO 11:11 Ila, kuli kilumba Mkulu, mdala hawele chinhu kulihela mlume, na heye mlume hawele chinhu kulihela mdala.
1CO 11:12 Kota vila mdala vyoyalawile kwa mlume, hihyo mlume kalelagwa na mdala, ila chila chinhu kulawila kwa Nguluwi.
1CO 11:13 Mwamulile mwemwe, ndaze, imgana mdala kumlanda Nguluwi ne kugubika chinhu kumutwi?
1CO 11:14 Kwa nzila Nguluwi navyoyalumbile isi, yangulajila kota mlume kuwa na mnvili zizuzumche zangubasa soni kwa heye yuye.
1CO 11:15 Ila kwa mdala kuwa na mnvili zisoloche ndo ukulu kwa heye, kapegwa mnvili zisoloche zimgubiche.
1CO 11:16 Wone munhu yalingugana kitwanza kwa mbuli ayi, lelo na yavizele kota hetwe twahela chihendo chinji, na chilundo cha wanhu walingumkunda Kilistu cha Nguluwi chahela vihendo viyage.
1CO 11:17 Londing'hali ndiwapa malajizo aga, siweza ne hado kuwatogola hemwe kuli agano galinguya, nhing'hano za hemwe kuli kumkunda Nguluwi mwangudita gehile kusinda ganojile.
1CO 11:18 Kwaluka kwa geng'ha, ndanguhulika kota homting'hana hamwe kulawilaga kilewa hali hemwe. Nani ndangukunda hachefu hela.
1CO 11:19 Mina igana kulawile kibagula hali hemwe, kulajila yalihi hali hemwe yatanganiche hali Nguluwi.
1CO 11:20 Homting'hana mwangijesa kota mwangulya chilyo cha Mkulu, ila haiwele ahyo!
1CO 11:21 Mina homulya chila munhu kangukobanya kulya chilyo cha heye yuye ne kumbeteza miyage, hanga yangoneka kota wamwe wa hemwe wana nzala, na wanji wagala!
1CO 11:22 Ndaze, hamuweza kulya na kunwa muwele hakaye henu? Ama ndaze, mwanguchibeza chilundo cha wanhu walingumkunda Kilistu cha Nguluwi na kuchibasa soni awo walihela chinhu? Ndiwalonjele choni? Ndiwatogole? Hebu! Haiwele kwa mbuli ino.
1CO 11:23 Mina heni nambochela kwa Mkulu gala malajizo gondiwalecheleni, kota matinazo yila Mkulu Yesu loyahinduchigwe, nakahola ibumunda,
1CO 11:24 kamtogola Nguluwi, kaumogola mvihande, kalonga, “Awu ndo lukuli lwangu kwa mbuli ya hemwe, mdite hino kwa kung'humbuka.”
1CO 11:25 Nabaho, loyasindile kulya, kahola chizombe, kalonga, “Achi ndo chizombe cha ilagano lya sambi, lilaganwe kwa danda ya heni. Mdite hino, chila homunwa chizombe chino, kwa kung'humbuka heni.”
1CO 11:26 Mina chila homulya ibumunda lino na kunwa chizombe chino, mwangudamla kubagama kwa Mkulu mbaka hoyokuya kahi.
1CO 11:27 Ahyo, chila munhu yolya alyo ibumunda ama kunwa chizombe cha Mkulu kwa nzila yihile, kowa na wihe wa kuuditila gehile lukuli na danda ya Mkulu.
1CO 11:28 Lelo chila munhu tandi yelole yuye, hamba yalye ibumunda alyo na kunwa chizombe acho,
1CO 11:29 mina munhu yalingulya na kunwa ne kijesa mbuli ya lukuli lwa Mkulu, kangulya na kunwa utaguso wa heye yuye.
1CO 11:30 Ndo mina kwa mbuli ayi, wenji wang'hochele na watamwa na wanji wabagama.
1CO 11:31 Ila wone tuwe twilolile twetwe goya hatwali taguswa na Nguluwi.
1CO 11:32 Ila homtagusigwa na Mkulu, twangulangusigwa tuwe tudumba, leka tuleche kutagusigwa kwa wihe hamwe na wanhu wa isi.
1CO 11:33 Ahyo, wang'holozangu, homting'hana kulya chilyo cha Mkulu, chila munhu yambeteze miyage.
1CO 11:34 Na wone kuli na yoneche yawele na nzala, na yalye hakaye hake, leka kuting'hana kwa hemwe kuleche kwambuza kutaguswa na Nguluwi. Ila, kwa zila mbuli zinji, ndowalonjelani hondikuya.
1CO 12:1 27Wang'holozangu, lelo ndangugana kulonga mbuli za ndolendole za chimuhe, silingungugana hemwe mleche kuzizela goya mbuli zino.
1CO 12:2 Mvizela kota, lomwali mng'hali kumzela Nguluwi, namlongozwa na kwajilizwa na jimalukolo johambe jilonje.
1CO 12:3 Lelo mvizele kota munhu yoneche yalingulongozwa na Muhe wa Nguluwi kolemwela kulonga, “Yesu yapanjilwe!” Na hiho, munhu yoneche kolemwela kulonga, “Yesu ndo Mkulu,” Wone hambe yalongozwe na Muhe Yelile.
1CO 12:4 Kuna ndolendole za chimuhe zili vinji, ila Muhe yalingulavya ndo yumwe.
1CO 12:5 Kuna mbuli zili vinji za uchitumagwa, ila Mkulu yoditichilwa uchitumagwa ndo yumwe.
1CO 12:6 Kuna mbuli zili vinji za madito, ila Nguluwi ndo yumwe, yalingukola mijito jeng'ha hali wanhu weng'ha.
1CO 12:7 Muhe Yelile kangilajila kwa nzila zili vinji kwa chila munhu, kwa unojenoje wa weng'ha.
1CO 12:8 Muhe humpaga yumwe usenga wa luhala na yunji usenga wa udaho, vyoyogana Muhe yuyo.
1CO 12:9 Muhe yuyo humpaga yumwe makundo na humpaga yunji ludali lwa kusa matamwa,
1CO 12:10 humpaga yumwe ludali lwa kudita vinduzanduza na yunji ludali lwa kuwalonjela wanhu usenga ulawile kwa Nguluwi, yunji ludali lwa kuvizela vila vilingulawa kwa Muhe Yelile, na haviwele vya Muhe Yelile, humpaga yumwe ludali lwa kulonga luzi lohalulinguzeleka, na yunji ludali lwa kutang'hula.
1CO 12:11 Azo zeng'ha ndo mbuli za Muhe Yelile yuyo yumwe, yalingumpa chila munhu ludali luli vinji, kota vyoyogana heye yuye.
1CO 12:12 Kota vila lukuli lumwe luwele na vitomo vinji, na vitomo avyo vyeng'ha hanga viwele vinji, vyanguudita lukuli lumwe, hino ndo vyoili kwa Kilistu.
1CO 12:13 Mina hetwe, wone tuwele Wayahudi ama wanhu hawawele Wayahudi, vitumagwa ama wanhu welejehe, tweng'ha tubatizigwa kwa Muhe Yelile yumwe kuli lukuli alo lumwe, na tweng'ha tupegwa Muhe Yelile yuyo tunwe.
1CO 12:14 Lukuli lwahela chitomo chimwe hela, ila lwanavyo vitomo vinji.
1CO 12:15 Wone mgulu naulonje, “Kwa vila heni siwele moko, lelo heni siwele wa lukuli,” Ndaze, wahadumile kuwa chitomo cha lukuli? Hebu!
1CO 12:16 Wone ikutu na lilonje, “Kwa vila heni siwele iziho, lelo heni siwele wa lukuli,” Ndaze, kwa mbuli ayo lyahadumile kuwa chitomo cha lukuli? Hebu!
1CO 12:17 Wone lukuli lweng'ha na luwe iziho, munhu yahahuliche ndaze? Na wone lukuli lweng'ha na luwe ikutu, munhu yahanusile ndaze?
1CO 12:18 Ila kota vyoili, Nguluwi nakaviwika goya vitomo avyo kuli lukuli kota vyoyaganile.
1CO 12:19 Wone vitomo vyeng'ha vyahawele chitomo chimwe, lukuli lwahawele kohi!
1CO 12:20 Kukomya kwa hino, vitomo vya lukuli vya vinji, ila lukuli lumwe.
1CO 12:21 Lelo iziho haliweza kuulonjela moko, “Ndikulema hegwe.” Na mutwi hauweza kugalonjela magulu, “Ndiwalema hemwe.”
1CO 12:22 Ila menji ga ago, yangoneka kota vitomo vila vya lukuli vilingoneka kota vyang'hochele, ndo vitanganiche ng'hatu.
1CO 12:23 Kahi, vitomo vila vyotulingijesa kota vyangubasa soni, ndo tulinguviwika goya ng'hatu, vitomo vya lukuli havilingoneka vitanganiche ng'hatu, vyanguwichigwa goya,
1CO 12:24 ila vitomo vilingoneka kota havilinguganigwa kuwichigwa goya. Nguluwi heye kaviwika hamwe vitomo vya lukuli goya, kachiwika goya chitomo chila chilihela ukulu.
1CO 12:25 Leka kuwe kuduhu ulekano kuli lukuli, ila vitomo vyeng'ha vilolele kwa chila chimwe.
1CO 12:26 Wone chitomo chimwe chilumila, vitomo vyeng'ha vyolumila hamwe na acho. Chitomo chimwe wone chitogoligwe, vitomo vyeng'ha husechelela hamwe na acho.
1CO 12:27 Lelo hemwe mweng'ha mwa lukuli lwa Kilistu, chila yumwe mwa hemwe ka chitomo cha awo lukuli.
1CO 12:28 Nguluwi kawika kuli chilundo cha wanhu walingumkunda Kilistu, kwaluka watumigwa, keli waloli, kadatu walangusa, hamba kawika wala wawele na ndolendole ya kudita vinduzanduza, konjenza mong'ho na kutanza, ludali lwa kulongoza na wawele ngulonga luzi lujenzi.
1CO 12:29 Mweng'ha hamuwele watumigwa. Mweng'ha hamuwele waloli. Mweng'ha hamuwele walangusa. Mweng'ha mwanawo ludali lwa kudita vinduzanduza.
1CO 12:30 Weng'ha wahela ndolendole ya kusa matamwa. Weng'ha wahela ndolendole ya kulonga luzi lujenzi. Weng'ha hawavizelele kutang'hula luzi lujenzi.
1CO 12:31 Lelo muwe na maya ga kubochela ndolendole inojile ng'hatu. Na heni sambi ndowalajilani nzila inojile kusinda azi zinji.
1CO 13:1 Leka wone ndonje ndonga za wanhu na ziwe za wahilisi wa kilanga, ila wone siwele na igano, heni ndofanda kota lizi lya idebe lilihela chinhu ama nhogo.
1CO 13:2 Kahi, wone ndiwe na ndolendole ya kudamla usenga ulawile kwa Nguluwi, ndizizele zivisigwe na kuvizela chila chinhu, na wone ndoweza kuwa na makundo geng'ha na kuweza kuhejeza vidunda, ila wone siwele na igano, heni siwele chinhu.
1CO 13:3 Hondilavya lufufu lwangu lweng'ha na kuwegalila wazunwa, na kahi hondilavya lukuli lwangu wausome, wone siwele na igano ayo haindita ndiwe na choneche chila.
1CO 13:4 Yawele na igano kokwimilila, kawaga na isungu, yawele na ligano kahela maya, halingivuna, na hali ngidadambala.
1CO 13:5 Yawele na igano kangulajila kudumba, hapalaga konjezwa, na hazudilaga himahima, hawikaga vinhu vihile mnhumbula.
1CO 13:6 Hasechelelaga wihe, ila kasechelelaga ga kukomya.
1CO 13:7 Yawele na igano kemililaga vyeng'ha na kukunda vyeng'ha na ketumbilaga vyeng'ha.
1CO 13:8 Igano lyahela kuduma ng'oo. Wone kuwele na usenga ulawile kwa Nguluwi. Vyeng'ha vyokwaga zuwa limwe, kota ludali lwa kulonga luzi lujenzi, vyomala, kota kuna udaho, nawo wokwaga.
1CO 13:9 Mina uwanzi wa hetwe hauwele wimile nzinzili, na kudamla usenga kulawille kwa Nguluwi ndo ludo hela.
1CO 13:10 Ila hala Nguluwi hovidita vyeng'ha, vila vyeng'ha vyohaviditikwe vyokwaga.
1CO 13:11 Londali mwana mdodo nandali ndilonga chiwana, nandivizela chiwana, nandijesa chiwana. Ila sambi, hanga ndili munhu ng'hangale, mbuli za chiwana ndizileka.
1CO 13:12 Vyotulingona sambi ndo kota chihanga chififize kuli chilolelo, ila baho hamba tozangona chihanga kwa chihanga. Sambi ndanguvizela kota hayenele hela, ila baho hamba ndogazela geng'ha goya, kota vila Nguluwi loyanzelele heni.
1CO 13:13 Lelo gangupona aga gadatu, makundo na utumbilo na igano, ila liwele likulu kwa geng'ha ndo igano.
1CO 14:1 Mikangaze kuwa na igano. Vivila mdite aku mng'ang'anila kubochela ndolendole ya Muhe Yelile, na kahi kula kudaha ng'hatu kudamla usenga ulawile kwa Nguluwi.
1CO 14:2 Yawele ngulonga luzi halulinguzeleka, halingulonga na wanhu, ila kangulonga na Nguluwi. Kuduhu munhu yalinguvizela choyalingulonga, heye kangulonga kwa ludali lwa Muhe mbuli zivisigwe.
1CO 14:3 Ila yadahile kudamla usenga ulawile kwa Nguluwi, kangulonga na wanhu kwa mbuli ya kuwazenga, kuwasangalaza na kuwakangaza nhumbula.
1CO 14:4 Yalingulonga luzi halulinguzeleka kangizenga yuye. Ila yadahile kulonga usenga ulawile kwa Nguluwi, kanguwazenga chilundo cha wanhu walingumkunda Kilistu.
1CO 14:5 Lelo nangana hemwe mweng'ha mlonje kwa luzi halulinguzeleka, nangana ng'hatu mdahe kulonga usenga ulawile kwa Nguluwi, mina munhu yadahile kulonga usenga ulawile kwa Nguluwi ndo yawele wa kitumbila ng'hatu kusinda yula yalingulonga luzi halulinguzeleka, hanga hela, yawe baho munhu yalinguvizela azo mbuli na kutang'hula leka chilundo cha wanhu walingumkunda Kilistu wazenjigwe.
1CO 14:6 Ahyo, wang'holozangu, wone mbuye kwa hemwe na kulonga na hemwe kwa luzi halulinguzeleka yowanojeza choni? Haiwanojeza ne chinhu, nhaga hela wone ndowalonjelani ugubulo wa Nguluwi ama kudaha kunji ama usenga ulawile kwa Nguluwi ama ulanguso unji.
1CO 14:7 Ndo vyoili kwa vinhu vilihela ukomu vilingulavya luzi kota mluli ama igombogombo. Ndaze, munhu koweza ndaze kuuzela lwimbo lulinguvinigwa kota vinhu avyo havilingulavya luzi luli vinji ng'hatu hovitowigwa?
1CO 14:8 Mhalamhanda hoitowigwa vibivibi, yalikohi kochiwika goya kwa kitowa?
1CO 14:9 Hiho du na hemwe, wone umyango wa hemwe haulingulonga chinhu chilinguzeleka, yalikohi koweza kuvizela chinhu choulingulonga? Ulonzi wa hemwe wokwajilila kuli mbeho.
1CO 14:10 Lwabaho luzi lwinji kuli isi, ila kuduhu ne umwe usowile ulanguso.
1CO 14:11 Ila wone heni sivizelele luzi loyalingulonga munhu yumwe, heni nda mjenzi kwa munhu ayo na heye naye kowa mjenzi kwa heni.
1CO 14:12 Hiho du kwa hemwe, kwa vila mwangugana kupegwa ndolendole ya Muhe, mikangaze ng'hatu kubochela vila vilinguwatanza kuwazenga chilundo cha wanhu walingumkunda Kilistu.
1CO 14:13 Leka ahyo, yalingulonga luzi halulinguzeleka, yalande yawe yoweza kutang'hula.
1CO 14:14 Mina, hondilanda kwa luzi halulinguzeleka muhe wa heni ndo yalingulanda, ila luhala lwangu lwangupona hela.
1CO 14:15 Ndite choni lelo? Ndolanda kwa muhe wa heni, ndolanda kwa luhala lwangu, ndokwimba kwa muhe wa heni, ndokwimba kahi kwa luhala lwangu.
1CO 14:16 Houmtogola Nguluwi kwa muhe wa hegwe hela, kujeza ndaze munhu wa hihi hela yawele mnhing'hano kwidichila kulanda kwa hegwe kwa malumbo kwa kulonga, “Ena,” Wone havizelele choulonga?
1CO 14:17 Kulanda kwa hegwe kwa malumbo kwa Nguluwi yowa ukomya ng'hatu, ila ayo yunji haimkangaza hebu.
1CO 14:18 Ndanguta malumbo Nguluwi hambi heni ndangulonga luzi halulinguzeleka kusinda hemwe mweng'ha.
1CO 14:19 Ila hali nhing'hano na chilundo cha wanhu walingumkunda Kilistu, ndangugana ng'hatu kulonga ulonzi luhano lohalulinguzeleka leka ndiwalanguse wanji, kuli kulonga ulonzi elufu kwa luzi halulinguzeleka.
1CO 14:20 Wang'holozangu, mleche kuwa kota wana kuli nyhala za hemwe, kwa wihe, muwe kota mwana chali, ila kwa kijesa muwe kota wanhu wakangale.
1CO 14:21 Yandichigwa kuli Maandiko Matakatifu, Mkulu kangulonga hino, “Kwa nzila ya wali ngulonga luzi halulinguzeleka, na milomo ja wajenzi, ndolonga na wanhu wa heni, ila hanga wanhu wa heni howonyhulichiza.”
1CO 14:22 Ahyo lelo, kulonga luzi halulinguzeleka ndo ulajilo, haiwele kwa mbuli ya wanhu wawele na makundo, ila kwa wala hawalingukunda, ila kudaha kulonga usenga ulawile kwa Nguluwi kwa mbuli ya wala walingukunda na haiwele kwa wala walihela makundo.
1CO 14:23 Lelo wone kahi chilundo cha wanhu walingumkunda Kilistu howoting'hana hamwe, na weng'ha kwaluka kulonga luzi lujenzi, wone woye wanhu wa hihi hela ama walihela makundo, ndaze, hawolonga kota hemwe mnalukwale?
1CO 14:24 Ila weng'ha howolonga usenga wa Nguluwi, yokuya munhu wa hihi hela ama halingukunda, geng'ha goyohulika gomkundiza wihe wa heye yuye, wotaguswa na gala gowahuliche.
1CO 14:25 Uviso wa nhumbula ya heye gogubuligwa, na heye kofugama na kumtogola Nguluwi yolonga, “Ndangukomya Nguluwi ka hamwe na hemwe.”
1CO 14:26 Wang'holozangu, lelo tulonje choni? Homting'hana hamwe kumfugamila Nguluwi, yumwe yembe lwimbo, yunji yalavye ulanguso, yunji yawe na ugubulo ulawile kwa Nguluwi, yunji yalajile kudaha kulonga kwa luzi halulinguzeleka na yunji yatang'hule golonjigwa. Geng'ha gawe kwa mbuli ya kuwazenga chilundo cha wanhu wa Nguluwi.
1CO 14:27 Wawe baho wanhu wadahile kulonga kwa luzi halulinguzeleka, walonje weli ama wadatu, waleche kuwa wenji, kahi yumweyumwe, na yawe baho munhu wa kugazela na kuwatang'hulila wayage.
1CO 14:28 Ila wone kuduhu yadahile kugazela na kutang'hula, lelo yalingulonga luzi halulinguzeleka yanyamalile kuli nhing'hano, yalonje yaliyeka heye na Nguluwi.
1CO 14:29 Kwa mbuli ya wala wadahile kulonga usenga ulawile kwa Nguluwi, walonje weli ama wadatu, na wanji walole ulonzi wa hewo.
1CO 14:30 Wone yumwe hoyolonga na yunji yalinguhulichiza kapegwa ugubulo kulawila kwa Nguluwi, lelo yula yalingulonga yanyamalile.
1CO 14:31 Mina mweng'ha mwanguweza kulonga usenga ulawile kwa Nguluwi, yumwe kwa yunji, leka mweng'ha milanguse na kukangazwa mnhumbula.
1CO 14:32 Kudaha kulonga usenga ulawile kwa Nguluwi, iganigwa chilongozwe na ayo muhe yawele na udaho awo.
1CO 14:33 Mina Nguluwi hawele Nguluwi wa kilewa, ila Nguluwi wa kikala goya. Kota chilundo cha wanhu walingumkunda Kilistu welile,
1CO 14:34 wadala wanyamalile tulu kuli nhing'hano za vilundo vya wanhu walingumkunda Kilistu. Hawalingukundizwa kulonga, ila wawe waholile kota vyogalingulonga malajizo ga Wayahudi.
1CO 14:35 Wone na wawele na gakuuza, wawauze walume wa hewo kaye, mina yowa soni kwa wadala kulonga kowating'hane chilundo cha wanhu walingumkunda Kilistu.
1CO 14:36 Ndaze, mwangijesa ulonzi wa Nguluwi ulawa kwa hemwe mwemwe ama hambi ukuyilani mliyeng'ha?
1CO 14:37 Wone munhu yoneche kangijesa heye ndo mloli wa Nguluwi ama hambi kapegwa ndolendole ya chimuhe, na yavizele kota aga ndikwandichilani hemwe ndo malajizo ga Mkulu.
1CO 14:38 Ila munhu havizelele avyo, lelo munhu yaleche kumng'ula munhu ayo.
1CO 14:39 Ahyo, lelo wang'holozangu, mwanguganigwa kugana kulonga usenga ulawile kwa Nguluwi, ila mleche kumlemeza munhu kulonga luzi halulinguzeleka.
1CO 14:40 Ila geng'ha gakoleche kwa kunoza na kwa kiwika goya.
1CO 15:1 Lelo wang'holozangu, ndangugana kuwakumbusani yila Mbuli Inojile yondiwadamlile, na hemwe namuibochela iwele ndo msisi wa makundo ga hemwe gemile hagati hake.
1CO 15:2 Usenga wondiwadamlile ndo Mbuli Inojile. Na wone mlingigagamiza kwa ulonzi wondiwadamlileni moloholigwa, wone kukunda kwa hemwe hakuwele hihi hela!
1CO 15:3 Heni nandiwapa hemwe mbuli zitanganiche ng'hatu zombochele heni, kota Kilistu nakabagama kwa gehile ga hetwe, kota Maandiko Matakatifu vyogalonjile.
1CO 15:4 Hino nakatiligwa, nakazilipuka zuwa lya kadatu kulawila loyabagame kota Maandiko Matakatifu vyogalonjile.
1CO 15:5 Hino nakamlawila tandi Kefa, na hamba nakawalawila wala kumi na weli.
1CO 15:6 Hamba nakawalawila wang'holoze mzidi ya miya zihano kamwe, wenji wa hewo wang'hali wakomu na sambi, ila wamwe wabagama katali.
1CO 15:7 Hamba nakamlawila Yakubu kahi nakawalawila watumigwa weng'ha.
1CO 15:8 Kulawila awo weng'ha, nakandawila na heni, heni yondali munhu yavumbuche mhela wohautanganiche.
1CO 15:9 Mina heni nda mdodo ng'hatu hali watumigwa na baho silinguganigwa kuchemigwa mtumigwa, lekachoni nandichigaza chilundo cha wanhu walingumkunda Kilistu cha Nguluwi.
1CO 15:10 Ila, kwa utambichizo wa heye Nguluwi, ndiwa kota vyondili, na utambichizo wa heye kwa heni hauwele hela. Heni ng'hola mijito kusinda weng'ha, sali heni, ila ndo Isungu lya Nguluwi ulingudita mijito hamwe na heni.
1CO 15:11 Ila, wone iwe hewo ndo walingudamla ama heni ndilingudamla Mbuli Inojile, achi ndo tulingudamla, na achi ndo mlingukunda.
1CO 15:12 Lelo hanga usenga wotulingudamla kota Kilistu kazilipuka kulawila kowabagame, ndaze wamwe wa hemwe wangujeza kulonga kota kuduhu uzilipuko wa wabagame?
1CO 15:13 Wone kuduhu uzilipuko wa wabagame, lelo na Kilistu na heye hazilipuche.
1CO 15:14 Wone Kilistu hazilipuche, hambi kudamla kwa hetwe kwahela chinhu na makundo ga hetwe, gahela chinhu.
1CO 15:15 Konjezeka kwa ago, hetwe twahawele walolezi wa udesi hali Nguluwi, mina natulonga kota Nguluwi nakamzilipula Kilistu kulawila kowabagame na hanji heye hamzilipule wone ndo kukomya kota Kilistu nahazilipuligwe.
1CO 15:16 Mina, wone iwe kukomya kota wabagame hawazilipuligwa, lelo na heye Kilistu hazilipuche.
1CO 15:17 Vivila, wone Kilistu hazilipuligwe, lelo makundo genu gaga hela, mng'hali na gehile genu.
1CO 15:18 Konjezeka kwa ago, wala weng'ha wabagame lowali hamwe na Kilistu wajilila ng'hatu.
1CO 15:19 Wone kitumbila kwa hetwe kuli Kilistu kwa ukomu awu hela wa sambi, lelo twa wanhu wakonelwa isungu ng'hatu hali wanhu wanji weng'ha wa isi.
1CO 15:20 Ila kukomya kwa hino, Kilistu kazilipuligwa kulawila kowabagame. Nayali wa mwaluko kwa wala wanhu weng'ha kuzilipuligwa kuli wabagame.
1CO 15:21 Mina kota vila kubagama vyokigalilwe muisi na munhu yumwe, hiho na kuzilipuka nako kulawila wabagame kwambuzwa na munhu yumwe.
1CO 15:22 Kota vila wanhu weng'ha vyowalingubagama kwa kilumba na Adamu, hihyo weng'ha wozilipuligwa kwa kilumba na Kilistu.
1CO 15:23 Ila chila yumwe kwa chihendo cha heye, kwaluka Kilistu, hamba wala wawele wa heye Kilistu mhela Kilistu hoyokuya.
1CO 15:24 Kumala kwa ago, mwiso wokuya mhela Kilistu yomhilusila Nguluwi Mhaza undewa, kwa kuwifya chila chilongozi wa vijeni vihile, na ludali na mong'ho.
1CO 15:25 Mina Kilistu imgana yalongoze mbaka Nguluwi howasumya weng'ha wamwihile heye na kuwawika hali magulu gake.
1CO 15:26 Mwihe wa mwiso kukopoligwa ndo kubagama.
1CO 15:27 Mina, gandichigwe gangulonga, “Nguluwi kawika vinhu vyeng'ha hasi hali magulu gake.” Ndo vyoiwa kota Nguluwi halingwinjila hali chilundo acho cha vinhu, mina heye ndo yalinguviwika vinhu avyo hasi ha Kilistu.
1CO 15:28 Ila vinhu vyeng'ha hoviwichigwa hasi hali undewa wa Kilistu, ndo baho na heye Mwana, yochiwika hasi ha Undewa wa Nguluwi, yaviwichile vyeng'ha hali undewa wa heye, leka Nguluwi yalongoze kuchanya kwa vyeng'ha ng'hatu.
1CO 15:29 Wone kuduhu uzilipuko, ndaze wanhu wala wabatizigwe kwa mbuli ya wabagame wangubeteza kupegwa choni? Wone wabagame hawalinguzilipuligwa, ya choni kubatizigwa kwa honhu ha wanhu wabagame?
1CO 15:30 Na hetwe, ya choni kwinjilila vinhu vilingigala nongwa chila saa?
1CO 15:31 Wang'holozangu, heni twangilola na kubagama chila zuwa! Lutogo londilinalo na mbuli ya hemwe kuli kilumba hamwe na Kilistu Yesu Mkulu wa hetwe.
1CO 15:32 Wone igano lyangu lyahawele lya chiwunhu hela, kula kitowa kwa heni na migongolo jing'ang'ale kula Efeso kwahangalile chinhu chachi? Wone wanhu hawalinguzilipuka, lelo “Tulye na kunwa, mina mitondo twangubagama.”
1CO 15:33 Waleche kuwabada! “Yomiganile yehile kawifyaga nhumbula inojile.”
1CO 15:34 Mleche kuwa na majesa gehile! Mwaluche kikala goya, na mhiluchile ganojile ga hemwe. Wamwe wa hemwe hawamzelele Nguluwi ng'hatu. Ahi ndanguwalonjelani, yowa soni ng'hatu kwa hemwe!
1CO 15:35 Ila munhu koweza kuuza, “Wabagame wozilipuka ndaze? Wowa na lukuli luli ndaze?”
1CO 15:36 Ako ndo kuuza kwa chipoka! Hounyala nyhadikwa, wone haibagame, haikota hebu.
1CO 15:37 Chounyala ndo nyhadikwa hela, hanji ya ngano, ama nyhadikwa inji, na haliwele lizuchila lyeng'ha lilingota hamba.
1CO 15:38 Nguluwi huipaga ayo nyhadikwa yoneche vyoyaganile heye, chila nyhadikwa iwaga ikoneka uyeka.
1CO 15:39 Ng'huli za vilumbigwe vyeng'ha haziwhanile. Ng'huli za wanhu ziwhana, na za migongolo za vinji, za videje za vinji na ng'huli za somba nazo za vinji.
1CO 15:40 Zabaho ng'huli za kilanga na za muisi, kunoga kwa ng'huli za kilanga kwa vinji, na kunoga kwa ng'huli za muisi kwa vinji.
1CO 15:41 Kwabaho kunoga kwa isanya, kunoga kwa nyelezi na kunoga kwa nhondwe, na nhondwe nazo haziwhanile kwa kunoga.
1CO 15:42 Ndo vyoili kuli uzilipuko wa wabagame, kota vila nyhadikwa, lukuli lutilagwa hanyi lwangola, ila holuzilipuligwa lwangoneka kota halolile.
1CO 15:43 Hutilagwa kuli soni, wozilipuligwa kuli ukulu, hutilagwa kuli ng'hochele, wozilipuligwa luwele na ludali.
1CO 15:44 Houtiligwa luwaga lukuli lwa chiwunhu, houzilipuligwa luwaga lukuli lwa chimuhe. Wone kuna lukuli lwa chiwunhu na hamba kuna lukuli lwa chimuhe.
1CO 15:45 Mina Gandichigwe galonga, “Munhu yaluche Adamu, nakalumbigwa na Nguluwi leka yawe na ukomu,” Ila Adamu wa mwiso ndo Muhe yalinguwapa wanhu ukomu.
1CO 15:46 Ila lulingulongola kwa hegwe, haluwaga lula lukuli lwa chimuhe, ila lula lukuli lwa chiwunhu, hamba lula lukuli lwa chimuhe.
1CO 15:47 Munhu yaluche Adamu, na kalumbigwa kwa misanga, nakalawa mmisanga, Adamu wa keli nakalawa kilanga.
1CO 15:48 Wala wawele wa muisi wafanda kota heye yalumbigwe kwa misanga, wala wawele wa kilanga wafanda kota yula yalawile kilanga.
1CO 15:49 Wiwhana kota yula yalumbigwe kwa misanga, hiho du tochiwhana na yula yalawile kilanga.
1CO 15:50 Lelo wang'holozangu, ndangulonga hino, chila chiditikwa kwa lukuli na danda hachiweza kuhalila Undewa wa Nguluwi, na chilinguweza kola, hachiweza kuhalila chila hachilinguweza kola.
1CO 15:51 Mhulichize, ndanguwalonjelani zivisigwe, hetwe hatubagama tweng'ha, ila tweng'ha togalamligwa.
1CO 15:52 Mhela wa mhalamhanda ya mwiso, kwa nukuta imwe hela, kudinya na kulola. Mina mhalamhanda ya mwiso hoilila, wabagame wozilipuligwa kuli koneka kota hawobagama kahi, na hetwe togaluswa.
1CO 15:53 Mina chila chilingubagama, chigana chigaluswe kota chila chohambe chibagame.
1CO 15:54 Lelo lukuli alu lulihambe lole, haluweza kugalusa lula lulingola, na chila chilingola hachigalusa chila chohambe chole kwa mhela ula, baho du houkomya ula ulonzi wandichigwe, “Kubagama kwezuligwa, ukulu wenela!”
1CO 15:55 “Kubagama, ukulu wa hegwe wa kohi? Kubagama, wakohi mong'ho wako wa kulumiza?”
1CO 15:56 Kubagama kuwaga na mong'ho wa kulumiza kwa chiwalo cha gehile. Na ludali lwa gehile lwangulawa kuli malajizo ga Musa.
1CO 15:57 Ila tumtogole Nguluwi yatugalile ukulu kukolela Mkulu wa hetwe Yesu Kilistu.
1CO 15:58 Lelo wang'holozangu ndiwaganile, mwime goya na mikangaze. Mlutilile vivila kung'ang'anila kuli mijito ja Mkulu, mvizela kota gomkola kuli mijito ja Mkulu haikwaga hela.
1CO 16:1 Lelo kwa mbuli ila ya ndolendole ya chilundo cha wanhu walingumkunda Kilistu, mdite kota vyondichilajize chilundo cha wanhu welile walingumkunda Kilistu cha ako Galatiya.
1CO 16:2 Chila zuwa lya jumapili, chila yumwe wa hemwe yawiche chasi cha sendi zoyopata, yawiche goya leka mleche kukungajiza sendi mhela hondikuya.
1CO 16:3 Mhela hondikuya kwa hemwe, ndowalajiza wala womuwahagula wahiliche lyandiko na ndolendole za hemwe Yelusalemu.
1CO 16:4 Wone ingana na heni ndute kahi, leka, woluta hamwe na heni.
1CO 16:5 Ndokuya kwa hemwe mbaka honhu ha Makedoniya, kwa vila ndangukolela Makedoniya.
1CO 16:6 Mane ndochikala kwa hemwe kwa chipindi chido, ama ndochikala hamwe na hemwe myezi jeng'ha ja mkungu, leka mnhanze kulutilila na majendo kweng'ha kondiluta.
1CO 16:7 Silingugana kukola kwa hemwe himahima na kulutilila na majendo. Ndangugana kikala kwa hemwe kwa mhela udo, wone Mkulu yang'undize.
1CO 16:8 Ila ndopona baha kuli muji wa Efeso mbaka zuwa lya Pendekosti.
1CO 16:9 Lwizi lwamwanzi kwa mbuli ya mijito ya heni aha, hanga walingundema nawo wa wenji.
1CO 16:10 Timoteyi hoyokuya, mlole yaleche kuwa yodumba chinhu cheng'ha chila mhela yowa hamwe na hemwe, mina kangukola mijito ya Mkulu kota heni.
1CO 16:11 Leka ahyo munhu yoneche yaleche kumbeza, ila mumtanze yalutilile na majendo gake goya, leka kahi yahiluche kwa heni, mina heni ndangumbeteza hamwe na wang'holozetu.
1CO 16:12 Kwa mbuli ya mng'holozetu Apolo, ndimdedeza ng'hatu yoye kwa hemwe hamwe na wang'holozetu wanji, Ila halingugana kuya ng'hatu sambi leka kokuya hala howa na mhumhu.
1CO 16:13 Miwiche goya, mwimilile kuli kukunda, muwe wasugu na muwele na ludali.
1CO 16:14 Chila chomdita chiwe chididikwa kwa igano.
1CO 16:15 Wang'holozangu, muizela nhanzi ya Stefanasi, hewo na wanhu waluche ng'hatu kukunda Ukilistu hala Akaya, na welavya kuwa vitumagwa kwa wanhu wa Nguluwi. Ndanguwadedeza hemwe wang'holozangu,
1CO 16:16 muwakunde wanhu kota awo, na ulongozi wa chila munhu yalingudita mijito na kitanza hamwe na hewo.
1CO 16:17 Ndangusangalala ng'hatu hambi Stefanasi na Fotunato na Akaiko woya, wadinya hala hali hagazi kwa kuka kwa hemwe.
1CO 16:18 Wasindamiza muhe wa heni na wa hemwe kahi, leka hino inoga muwe muwazela wanhu kota awa.
1CO 16:19 Chilundo cha wanhu weng'ha wa Nguluwi wa Asiya wanguwalamsani, Akula na Pilisika hamwe na chilundo cha wanhu walingumkunda Kilistu weng'ha wawele hakaye hawo wanguwalamseni ng'hatu kwa kilumba hamwe na Mkulu.
1CO 16:20 Wang'holozenu weng'ha aha wanguwalamsani. Namwe milamse kwa kulajila igano lya Kilistu.
1CO 16:21 Heni, Paoli, ndanguwalamseni hondikwandika kwa moko gangu heni.
1CO 16:22 Yoneche halingumgana Mkulu, na yapanjilwe. Mkulu wa hetwe, uye!
1CO 16:23 Kunoga kwa heye Mkulu Yesu uwe hamwe na hemwe.
1CO 16:24 Igano lyangu liwe kwa hemwe kuli kilumba hamwe na Kilistu Yesu.
2CO 1:1 Heni Paoli, mtumigwa wa Kilistu Yesu. Nguluwi ndo yanyhagule ndiwe mtumigwa. Twa hamwe na mng'holozangu Timoteyi twanguwalamsani. Twanguwandichilani hemwe chilundo cha wanhu walingumkunda Kilistu muwele ako Kolinto, hamwe na wanhu weng'ha welile wa chila honhu kuli Akaya.
2CO 1:2 Twanguwaganilani utambichizo na kikala goya kulawila kwa Nguluwi Mhaza wa hetwe na Mkulu Yesu Kilistu.
2CO 1:3 Yatambichizwe yawele Mhaza na Nguluwi wa Mkulu wa hetwe Yesu Kilistu, Mhaza wa isungu, Nguluwi wa usangalalo weng'ha.
2CO 1:4 Heye katutanza hetwe kuli magazo ga hetwe, leka natwe tuwasangalaze wanji kuli chila magazo kwa usangalalo wuwo wotulingubochela kulawila kwa Nguluwi.
2CO 1:5 Kota vila magazo ga Kilistu vyogalingonjezeka kwa hetwe, hihyo du ndo usangalalo wa hetwe wangonjezeka kukolela Kilistu.
2CO 1:6 Wone tulingugaya ng'hatu, leka kwa mbuli ya kusangalala na ulohozi wa hemwe. Hotusangalala ndo kwa mbuli ya kuwadita hemwe msangalale na kiwika hamwe muwe na ludali lwa kwimilila kugaya kukula kotugaya hetwe.
2CO 1:7 Kahi, kitumbila kotulinako kwa mbuli ya hemwe yima nzinzili, kwa vila tuvizela kota hommilumba kuli kugaya kwa hetwe, mochihanza kahi na kusangalala kwa hetwe.
2CO 1:8 Wang'holozangu, twangugana mvizele vila vyotugayile kula mkowa wa Asiya, natugaya ng'hatu kupuluta mong'ho wetu wa kwimilila, mbaka natwajiliza utumbilo wa kuwa wakomu.
2CO 1:9 Mgati mwa nhumbula za hetwe, natona kota tutagusigwa kubagama, avi navilawila leka tuleche kitumbila twetwe baha. Ila twitumbile Nguluwi yalinguwazilipula wabagame.
2CO 1:10 Heye nayatulohole kuli nongwa ng'hulu ya kubagama, na kangulutilila kutulohola, hetwe tumuwichila utumbilo kota kotulohola kahi.
2CO 1:11 Hemwe wone mwangutulumba moko kwa kutulandila. Ahyo, utambichizo wotupegwa kwa chiwalo cha kulanda kwa wanhu wenji ahyo, viwe vimbusambusa vya wanhu wenji ng'hatu kumtogola Nguluwi kwa chiwalo cha hetwe.
2CO 1:12 Hetwe twangidayila chinhu chimwe, luhala lwetu lwangutulajila kota kwa welo na uzelu wa nhumbula, ulingulawa kwa Nguluwi, hauwele kwa luhala lwa lukuli, ila kwa kunoga kwa heye Nguluwi, tikala hano muisi, hali hemwe mwemwe.
2CO 1:13 Twanguwandichila hemwe mbuli zomlinguweza kuzisoma na kuzizela. Ndanguvijesa kota movizela goya ng'hatu,
2CO 1:14 hanga mbaka sambi mnzela hado hela. Tuvizela kota kuli zuwa lila lya Mkulu Yesu moweza kutonela hetwe lutogo kota na hetwe vyotuliwangunela hemwe lutogo.
2CO 1:15 Londiwa na utumbilo awo, nangana kuya kwa hemwe leka mpegwe utambichizo lwa keli.
2CO 1:16 Nangana kukolela kwa hemwe ndilimmajendo kuluta mkowa wa Makedoniya na mhela wa kuhiluka kahi, leka mbochele kutanzwa kwa hemwe kwa majendo ga heni kuluta Yudeya.
2CO 1:17 Ndaze, mwangijesa vyombichile hino ndiwa kota munhu yalihela lwimo? Ndaze, mwangijesa kota ndangukola vyombonile kwa majesa ga chiwunhu na kota ndangulonga “Ena, ena” Na “Hebu, hebu” Baho du?
2CO 1:18 Nguluwi ndo wa kitumbila ng'hatu, lelo chila chotuwalonjele hemwe haiwele mbuli ya “Ena” Na “Hebu”.
2CO 1:19 Mina Kilistu Yesu, mwana wa Nguluwi, yula, heni na Silivani na Timoteyi, tumdamlile kwa hemwe, nahawele munhu wa “Ena” Na “Hebu,” Ila heye nayali wa “Ena” Ya Nguluwi.
2CO 1:20 Kwa vila malagano geng'ha ga Nguluwi gawa “Ena”. Lelo kwa mbuli ino, “Ena” Ya hetwe yangulonjigwa kukolela Kilistu kwa chiwalo cha ukulu wa Nguluwi.
2CO 1:21 Nguluwi heye ndo yawele kutwimiza hetwe na hemwe kahi kuli Kilistu, na ndo heye yuye yatuhagule,
2CO 1:22 Ndo haye yatuwichile ulajilo wa kuwa wanhu wa heye na kutugalila Muhe mnhumbula ya hetwe kota vyoyemilile kwa mbuli zeng'ha zoyatuwichile.
2CO 1:23 Nguluwi ndo yawele mlolezi wa heni, heye kaizela nhumbula ya heni! Heni suyile kahi Kolinto kwa mbuli ya kuwaditani mone usungu.
2CO 1:24 Hatulingugana kuwakola lupichi kwa kukunda kwa hemwe, hemwe mwa goya kuli kukunda kwa hemwe. Chomlinguganigwa ndo kukola mijito hamwe kwa chiwalo cha kusangalala kwa hemwe.
2CO 2:1 Lelo ndita ndeche kuwajendela kahi kuwegalila masinzo.
2CO 2:2 Mina wone hemwe muwe misinzile, lelo yalikohi yowahembuliza, leka wowa wawala muwegalile masinzo?
2CO 2:3 Ndo mina ndiwandichile, nasiganile kuya kwa hemwe na kisinza na hemwe mlingitumbila ng'hatu kusangalala kwa heni. Ndangukomya ng'hatu kota wone heni sangalale, hemwe mweng'ha mwangusangalala.
2CO 2:4 Londiwandichile aho katali kuli kisinza na kung'ung'uta mnhumbula na kwa mahozi menji, haiwele kwa chiwalo cha kuwegalila masinzo hemwe, ila kwa chiwalo cha kuwalajilani kota ndanguwagana ng'hatu.
2CO 2:5 Wone kuna munhu yalingumdita yunji yawe na masinzo, hambe yandite heni ndisinze, leka kawadita hemwe mweng'ha muwe na masinzo, na siganile ndiwe ng'ang'ale lukami.
2CO 2:6 Kugaya koyagayile kulawa kwa wenji wa hemwe imkwila.
2CO 2:7 Iponile chiba kwa hemwe kumhoza nhumbula munhu ayo na kumwimiza nhumbula leka yaleche kisinza na kugozola ng'hatu.
2CO 2:8 Ahyo, ndanguwadedeza, mumlajile kota kahi mwangumgana ng'hatu.
2CO 2:9 Longanile heni kwandika lila lyandiko lyali kugana kuvizela kota mwima nzinzili kukunda kuli chila mbuli.
2CO 2:10 Wone mumlechela munhu, na heni ndowalechela. Mina hondiwalechela, kota ndangukomya ndanacho cha kuwalechela, ndanguwalechela hali Kilistu kwa chiwalo cha hemwe,
2CO 2:11 leka tuleche kumdita Limazoga yatubade, mina tuvizela usugu wa heye vyouli.
2CO 2:12 Lofichile Tiloa kudamla Mbuli Inojile ya Kilistu, ndifika lwizi lwa mwanzi kwa chiwalo cha mijito ya Mkulu.
2CO 2:13 Ila nandisinza ng'hatu kwa vila simfichile mng'holozangu Tito. Ndo mina nandiwalaga weng'ha hala nakuluta Makedoniya.
2CO 2:14 Ila, malumbo kwa Nguluwi yalingutulongoza chila mhela kuli majendo ga kusumya kwa Kilistu. Heye katuditaga tweneze kukomya kwa Kilistu kota kunhunyhilila goya chila honhu.
2CO 2:15 Mina hetwe ndo kota unhunyhililo wa Kilistu, yila Kilistu yamlavile Nguluwi, kuli wala walinguloholigwa na hewo walingwajilila.
2CO 2:16 Kwa wala walingwajilila, kunhunyhilila ako ndo kubagama, ila kwa wala walinguloholigwa, kunhunyhilila ako ndo ukomu. Yalikohi lelo, yalinguweza kwimilila kuli mijito kota ayo?
2CO 2:17 Hetwe hatuwele kota wanji wawele nguguza ulonzi wa Nguluwi, ila hetwe twangudamla kwa kugoloka hali Nguluwi, kota wanhu tulajizwe na Nguluwi, tuli hamwe na Kilistu.
2CO 3:1 Ndaze, twangwaluka kahi kitogola twetwe baha? Ndaze, twangugana lyandiko lya ulajilo kwa hemwe, ama kulawa kwa hemwe, kota wanhu wanji?
2CO 3:2 Hemwe mwemwe ndo lyandiko lya hetwe, lyandiko lyandichigwe mnhumbula ya hetwe, lyanguzeleka na kusomigwa na wanhu weng'ha.
2CO 3:3 Izeleka kota hemwe ndo lyandiko lya Kilistu yaihiliche kwa moko ga hetwe. Lyandiko alyo halyandikwe kwa wino, ila kwa Muhe wa Nguluwi yawele mkomu, na hayandikwe mchanya mwa chihande cha iganga, ila mchanya mwa nhumbula za wanhu.
2CO 3:4 Twangulonga hino kwa vila twangitumbila Nguluwi kukolela Kilistu.
2CO 3:5 Haiwele kota hetwe twanguweza kudita choneche kwa ludali lwetu, ila ludali lwa hetwe lweng'ha lwangulawa kwa Nguluwi.
2CO 3:6 Mina heye ndo yatuditile titumbile tuwe vitumagwa wa ilagano lya sambi lohaliwele ilagano lya malajizo lyandichigwe, ila ilagano lya Muhe Yelile. Mina malajizo gandichigwe gegalaga kubagama, ila Muhe kangigala ukomu.
2CO 3:7 Malajizo nagawichigwa kwa kwandichigwa kuchanya mwa vihande vya maganga. Hanga vyoiwele kuduma kwa heye kuwa kubagama, ukulu wa heye wali ukulu ng'hatu leka wana wa Isilaeli waleche kuulola chihanga cha Musa kwa mbuli ya kung'ala kwa heye. Kahi kung'ala ako kwali hado hela. Lelo wone kukoleka kwa chila chambuze kubagama na ikoleka kwa ukulu winji kota awo,
2CO 3:8 lelo, mijito ja Muhe yina ukulu mng'hangala ng'hatu.
2CO 3:9 Lelo wone mijito ilingigala utaguso kwa wihe kwa wanhu yina ukulu, yowa kota mijito ilingigala kutanganika yowa na ukulu mng'hangala ng'hatu.
2CO 3:10 Ahyo, kwali na ukulu nawajilize ukulu kwa chiwalo cha ukulu mng'hangala ng'hatu.
2CO 3:11 Mina wone iwe chila chilingubilabila chali na ukulu, na kulihela majesa chila chiwele cha mazuwa gose, chowa na ukulu mng'hangala ng'hatu.
2CO 3:12 Kwa vila vyotuwele na utumbilo awu, twangulonga ne kudumba ng'hatu.
2CO 3:13 Hetwe hatulingukola kota Musa nayagubiche chihanga kwa chibende leka wanhu wa Isilaeli waleche kuwona kula kuduma kwa kupulika kula kulingubilabila.
2CO 3:14 Ila luhala lwao lububuwala. Mbaka lehano lilingusomigwa ilagano lya Katali, chigubiko acho ching'ali. Chigubiko acho cholavigwa hala du, munhu hochilumba na Kilistu.
2CO 3:15 Ena, mbaka lehano baha chila hohalingusomigwa Malajizo ga Musa, nhumbula za hewo ziwaga zigubikwe kwa chila chibende.
2CO 3:16 Ila, mhela munhu yomgalamchila Mkulu, chibende acho changulavigwa.
2CO 3:17 Lelo “Mkulu” Ndo Muhe, na hala hoyali Muhe wa Mkulu, ndo hawele na kilejeha.
2CO 3:18 Lelo hetwe weng'ha wotuwele na vihanga vyohavigubikwe, twangona kota kuli chilolelo, kulajila ukulu wa Mkulu, twangubadiliswa twiwhane ng'hatu kulawila ukulu mbaka ukulu. Ahyo ndo mijito ya Muhe wa Mkulu.
2CO 4:1 Lelo Nguluwi kwa isungu lyake, katulechela mijito ayi na aho hatugozola hebu.
2CO 4:2 Ila tugalema ng'hatu geng'ha ga soni na ga chinyele. Hatulingikala kahi kwa kubadwa ama kwa kwanzanya ulonzi wa Nguluwi, ila kwa kulajila kukomya twangilajila kota tutanganika, majesa ga wanhu gotulajila hetwe hali Nguluwi.
2CO 4:3 Mina, wone Mbuli Inojile yotulingudamla ivisigwa, ivisigwa hela kwa wala walingwajilila.
2CO 4:4 Awo hawalingukunda kwa vila lila Limazoga nguluwi wa isi ino, liziwika jiza nyhala za hewo waleche kuwona hazelu lumuli lwa Mbuli Inojile ya ukulu wa Kilistu, yewhanile ng'hatu na Nguluwi.
2CO 4:5 Mina hatulingudamla twetwe baha, ila Yesu Kilistu yawele Mkulu, hetwe baha tuli vitumagwa wa hemwe kwa chiwalo cha Yesu.
2CO 4:6 Nguluwi heye yalonjile, “Lumuli na lumwemwese kulawa kutitu,” Ndo yawele kulangaza nhumbula ya hetwe, na kutugalila lumuli lwa uwanzi wa ukulu wa Nguluwi ulingumwemwesa kuli chihanga cha Yesu Kilistu.
2CO 4:7 Lelo hetwe tuwele na ng'hano ayi twa kota vinhu vya ilongo, leka yoneche hazelu kota ludali alo lukulu lwangulawa kwa Nguluwi hauwele kwa twetwe baha.
2CO 4:8 Chila zuwa twangugaya, ila hatulingusindamizwa, twanguwa na majesa, ila hatulingugozola,
2CO 4:9 Twangugazigwa, ila hatulingulechigwa ne kutanzwa, na hanga tugwisigwa hanyi, hatudumigwe.
2CO 4:10 Mhela weng'ha twali tuhola mlukuli lwetu kubagama kwa Yesu, leka ukomu wa heye Yesu kahi woneche mlukuli lwetu.
2CO 4:11 Ena, mhela weng'ha twangikala kuli nongwa ya kubagama, kwa chiwalo cha Yesu, leka ukomu wa heye Yesu woneche mlukuli mwetu lulingubagama.
2CO 4:12 Ayi ndo ilingunamana kota mgati mwa hetwe kubagama kwangukola mijito, ila mgati mwa hemwe ukomu wangukola mijito.
2CO 4:13 Yandichigwa, “Nang'hunda ndo mina nandonga.” Na hetwe kahi, wone tuwe na muhe yuyo wa makundo, twangukunda, na kwa chiwalo acho ndo twangulonga.
2CO 4:14 Tuvizela kota Nguluwi yula yamzilipule Mkulu Yesu, kotuzilipula na hetwe kahi hamwe na Yesu na kutuwika kumwando kwa heye hamwe na hemwe.
2CO 4:15 Geng'ha aga ndo kwa kuwanojeza hemwe, na utambichizo wa Nguluwi louwafichila wanhu wenji ng'hatu, na malumbo nago gonjezeche ng'hatu, kumpa ukulu Nguluwi.
2CO 4:16 Kwa chiwalo acho hatulingugozola. Hanga vyoulumbigwe kwa kunze twangulala, ila kwa mgati nhumbula za hetwe zanguditigwa ubewe zuwa kwa zuwa.
2CO 4:17 Mina kugaya kwa hetwe ndo kudo, kahi kwa hado hela, ila yotugalila ukulu ulingupuluta ubetezo weng'ha, ukulu wa mazuwa gose.
2CO 4:18 Ahyo tuleche kuvilola vilingoneka, leka tulole vyohambe vyoneche. Ndo mina vilingoneka vya mhela udo hela, ila havilingoneka ndo vya mazuwa gose.
2CO 5:1 Mina tuvizela kota ihema ali lyotulingikala sambi aha muisi ndo alu lukuli lwetu, houwifigwa, Nguluwi kotupa honhu hanji ha kikala kilanga, ng'handa ya mazuwa gose yohaizenjigwe kwa moko ga wanhu.
2CO 5:2 Mina kuli ihema ali twangugugumila, tulolela kwa kugana ng'hatu, kupegwa lukuli lwa hetwe luli ako kilanga.
2CO 5:3 Kwa vila hotupegwa alo lukuli lwa kilanga, hatukoneka kota twa mwazi.
2CO 5:4 Lotung'ali kuli ihema ali lya isi, twangulila na kupapizwa itunyo, haiwele kota twangugana kuuvula awu lukuli lwa chiisi, ila twangugana tuvalizwe ula wohambe ubagame, leka ula ulingubagama, wangugaluswa kuwa lukuli lwa ukomu wa mazuwa gose.
2CO 5:5 Nguluwi heye na katuwichila kugaluka ako, na heye katupa Muhe wa heye yawe yochibatilila geng'ha goyatuwichile.
2CO 5:6 Twima goya mazuwa gose. Tuvizela kota kikala kuli lukuli alu hela ndo kikala kutali na ng'handa ya hetwe na Mkulu.
2CO 5:7 Mina twangikala kwa makundo, na haiwele kwa gala tulingugona.
2CO 5:8 Ila twima nzinzili na twahaganile kuka hali lukuli awu lotulingikala na kuhamilila kwa Mkulu.
2CO 5:9 Ahyo, mbuli itanganiche ng'hatu, ndo kumnojeza heye, tuwe tuchikala baha muisi ama kuko.
2CO 5:10 Mina tweng'ha itugana twime kumwando hali chigoda cha utaguso cha Kilistu, leka chila yumwe yabochele gaganigwe kwa mbuli zoyaditile mhela loyali ngikala muisi kwa ganojile ama gehile.
2CO 5:11 Lelo hetwe tuvizela kota choni mbuli ya kumdumba Mkulu, na baho twangujeza kuwakwega wanhu. Nguluwi katuzela goya ng'hatu, na heni ndangitumbila kota na hemwe kahi mtuzela goya ng'hatu.
2CO 5:12 Haiwele kota kahi twangujeza kidedeza kwa hemwe, ila twangugana kuwapa hemwe mbuli za hetwe za kona lutogo kwa hemwe. Leka muwedichile wala walingitumbila vyowali kwa kunze kuleka vyowali mnhumbula.
2CO 5:13 Wone twangoneka tuwele na luweje, ahyo ndo kwa mbuli ya Nguluwi, na wone tuwele na nyhala ng'hatu, ahyo ndo kwa mbuli ya hemwe.
2CO 5:14 Igano lya Kilistu lyangutwimila hetwe tuli nguwazela kota munhu yumwe hela ndo yabagame kwa mbuli ya weng'ha, na ahyo weng'ha nawabagama.
2CO 5:15 Nakabagama kwa chiwalo cha wanhu weng'ha, leka walingikala waleche kuwa wakomu kahi, kwa chiwalo cha hewo wawo, ila kwa mbuli ya heye yabagame, na kuzilipuligwa kwa chiwalo cha hewo.
2CO 5:16 Lelo kulawila sambi, hetwe hatulingumlola munhu kota munhu hela. Na iwe kwa mhela umwe natumjeza Kilistu kwa majesa ga chiwunhu, sambi haiwele ahyo kahi.
2CO 5:17 Munhu yoneche yowa hamwe na Kilistu kawaga chilumbigwe chinyale, mbuli za katali zikola, mbuli inyale yuya.
2CO 5:18 Geng'ha ndo mijito ja Nguluwi yalingutuhanyisa hetwe na heye kukolela Kilistu, nakhama hetwe mijito ja kuwahanyisa wanhu na heye.
2CO 5:19 Ndo kulonga, Nguluwi, nayali yoihanyisa isi na heye kukolela Kilistu, ne kuwika kumutwi gehile ga hewo wanhu. Heye katupa usenga kwa chiwalo cha kuwahanyisa wanhu na heye.
2CO 5:20 Lelo hetwe twahano kwa chiwalo cha Kilistu, na heye Nguluwi kangutulajiza hetwe kuwadedeza hemwe. Twanguwalandeni kwa chiwalo cha Kilistu, mihanyise na Nguluwi.
2CO 5:21 Kilistu nayali hela gehile, ila Nguluwi nakamdita yawe na gehile kwa mbuli za hetwe, leka hetwe kwa kuwa hamwe naheye, tuwe twihanzile kuli utanganiko wa heye Nguluwi.
2CO 6:1 Lelo hotuwa wakola mijito hamwe na Nguluwi, twanguwadedeza mleche kukunda kula kunoga kwa heye mkubochele kulawila kwa Nguluwi waje hela!
2CO 6:2 Nguluwi kangulonga hino, “Mhela ukundigwe, nandikuhulichiza, muhela wa ulohozi, nandikutanza.” Lelo sambi ndo mhela ukundigwe, sambi ndo zuwa lya ulohozi!
2CO 6:3 Hino tuleche kuwa na nongwa yoneche kuli uchitumagwa wa hetwe, hatulingugana kumuwichila munhu yoneche chinhu choneche chimlemeza.
2CO 6:4 Hanji, twangilajila kota tukomya vitumagwa wa Nguluwi kwa chila chinhu, kwa kwimilila kwinji mhela wa kugazigwa, kuhangawa na kugaya.
2CO 6:5 Tutowigwa, tuwichigwa mchinweng'ho na kuzonoligwa hazelu, tukola mijito na tutoka, twikala meho ne kulya chinhu.
2CO 6:6 Twangilajila twa vitumagwa wa Nguluwi kwa kunoga nhumbula, luhala, kwimilila na isungu, kwa Muhe Yelile, na kwa igano lilihela udesi.
2CO 6:7 Kwa usenga ulingukomya na kwa mong'ho wa Nguluwi. Kutanganika ndo chinhu chotulingitumbila kuli kumvaba munhu na kilolela twetwe baha.
2CO 6:8 Twangutogoligwa na kubezigwa, twangulijigwa na kutogoligwa. Twangoneka kota twawadesi, hanga hetwe twangulonga tukomya,
2CO 6:9 kota wanhu hawalinguzeleka, hanga twanguzeleka goya, kota walingubagama kota vyomlingona, hetwe twa twawakomu ng'hatu. Twangugazigwa ila hatulingudumigwa
2CO 6:10 Twanguditigwa tisinze, ila twangusangalala mazuwa geng'ha. Twangoneka kota twa wazunwa ila twanguwadita wenji wawe na lufufu, twahela chinhu, ila twanguwa na vinhu vyeng'ha.
2CO 6:11 Wang'holozangu Wakolinto, tulongasa menji na hemwe kwa ugazi ng'hatu, natuwagubulila nhumbula ya hetwe.
2CO 6:12 Wone mwangona kota kuna chinhu choneche chila chilinguwalemeza, chinhu acho cha kuko kwa hemwe, na haiwele kwa banzi ya hetwe.
2CO 6:13 Sambi ndangulonga na hemwe kota vila vyondilonga na wana wa heni, mgubule nhumbula za hemwe kota hetwe vyotuditile.
2CO 6:14 Mleche kibanda hamwe na wanhu hawalingukunda. Ndaze, kutanganika na wihe vyochihanza hamwe? Ndaze, lumuli na jiza vyochihanza hamwe?
2CO 6:15 Ndaze, Kilistu kochihanyisa na Limazoga? Ndaze, yalingukunda kangihanza na hambe yakunde?
2CO 6:16 Ng'handa ya Nguluwi yangiwhana ndaze na jimalukolo ja udesi? Mina hetwe ndo Ng'handa ya Nguluwi yawele mkomu. Kota heye Nguluwi vyoyalonjile, “Ndochikala mgati mwa hewo, na kikala hali hewo, ndowa Nguluwi wa hewo, na hewo wowa wanhu wa heni.”
2CO 6:17 Ahyo, Mkulu kangulonga kahi, “Mlawe howali hewo, mkekale hafungo na hewo, mleche kudoliza chinhu chikokomoche, nani ndowabochela.
2CO 6:18 Heni ndowa Mhaza wa hemwe, na hemwe mowa wana wa heni, walume kwa wadala, kalonga Mkulu yawele na ludali.”
2CO 7:1 Lelo wotiganile, hotupegwa ilagano ali lyeng'ha, na twihovuje na choneche chilingutigula lukuli na muhe wa hetwe, tuwe twelile ng'hatu na kikala kwa kumfugamila Nguluwi.
2CO 7:2 Mtulechele mhumhu hali nhumbula za hemwe! Hatumzudize ne munhu yoneche, hatumlumize na kumhada ne munhu yoneche.
2CO 7:3 Silingulonga mbuli zino kwa chiwalo cha kumtagusa kwa wihe munhu, mina, kota vyondonjile, hemwe mwa mnhumbula za hetwe, tubagame hamwe, twikale hamwe.
2CO 7:4 Ndivizela kota mwima nzinzili ng'hatu hondilonga na hemwe, ndangona lutogo lukami kwa hemwe! Kuli kugaya kwa hetwe, mhegwa chihembulizo chikulu na kusangalala ng'hatu.
2CO 7:5 Na hotufichile Makedoniya hatwesele. Chila nzingo kwali na kugaya, kunze kilewa, mgati mwa nhumbula za hewo mwali na majesa.
2CO 7:6 Ila Nguluwi, yalinguwasangalaza wazunwa, katukangaza nhumnbula hetwe kahi kwa kuya kwa heye Tito.
2CO 7:7 Natwe hatusangalale kwa kuya kwa heye, ila vivila kwa mbuli yila yomtusangalaze. Tito nakatulonjela vila vyomuwele kugana kumbona. Vila vyomulingisinza na vyomulingilavya kwa chiwalo cha gala galawile. Ahyo, sambi ndangusangalala ng'hatu.
2CO 7:8 Mina, leka kwa lila lyandiko lya heni ndiwapa majesa, silingona mbuli ya kung'ung'uta. Ena, ndangona kota lyandiko alyo na liwadita misinze, ila hado hela.
2CO 7:9 Sambi ndangusangalala, haiwele vyondili na masinzo, ila kwa vila masinzo ga hemwe gawadita mgalula gomlapile na kumgalamchila Nguluwi ng'hatu. Mditwe misinze kota navyoyaganile Nguluwi, kwa chiwalo acho, hatuwalumize hemwe vyoneche hila.
2CO 7:10 Kuwa na masinzo vyoyaganile Nguluwi kigalaga kugaluka kwa nhumbula, kugaluka kuli ngigala ulohozi, hino kuduhu mbuli ya kung'ung'uta. Ila masinzo ga chiisi, gangigala kubagama.
2CO 7:11 Lelo moweza kugona galawile kwa kona masinzo vyoyaganile Nguluwi, hemwe mpegwa sambi kuwa wanhu walingikangaza na wawele na liwuzo. Mwangutinuka na kudumba, mwangikangaza na mwa goya kona vinhu vikoleka goya. Hemwe yoneka ng'hatu kwa chila nzila kota muwe mwelile kuli mbuli ino.
2CO 7:12 Ahyo, hanga nanyandika lila lyandiko, haiwele kwa chiwalo cha yula yawifile, ama kwa chiwalo cha yula yaditilwe wihe. Nanyandika leka yoneche hazelu hali Nguluwi vyompajile kwa chiwalo cha hetwe.
2CO 7:13 Na ndo mina hetwe na tusangalala ng'hatu. Haiwele na tusangalala hela, ila kahi Tito nakatudita tusangalale kwa kula kusangalala koyalinako kuli muhe wa heye navyoisangalale.
2CO 7:14 Heni ndiwatogola lukami hali heye, na kwa mbuli ayo nasibasigwe soni hebu. Tuwalonjelani tukomya ng'hatu, na kula kuwatogola hemwe hali Tito nayali mbuli ya kukomya ng'hatu.
2CO 7:15 Ahyo igano lya heye lya nhumbula kwa hemwe lyangonjezeka ng'hatu yokumbuchila hemwe vyomlingukunda, na vyomubochele kwa kudumba na kukakama kulajila kuhulichiza.
2CO 7:16 Ndangusangalala ng'hatu kota ndanguweza kitumbila hemwe lukami kwa chila mbuli.
2CO 8:1 Wang'holozangu, twangugana kuwegalilani mbuli za utambichizo wa Nguluwi, yawapele chilundo cha wanhu walingumkunda Kilistu wa ako Makedoniya.
2CO 8:2 Wala wanhu wa ako Makedoniya, nawajezigwa ng'hatu kwa kugaya, ila kusangalala kwa hewo kwali kukulu, leka wali wolavya kwa moko meli, hanga nawawele wazunwa ng'hatu.
2CO 8:3 Ndoweza kulavya ulolezi kota nawalavya ne kukolwa lupichi, na isungu ng'hatu kota vyoluwele mong'ho wawo na kupuluta ng'hatu. Kota navyowaganile hewo wawo,
2CO 8:4 nawatulanda kwa kutudedeza ng'hatu wapegwe mhumhu ya kihanza kuli mijito ayi ya kuwatanza wanhu wa Nguluwi ako Yudeya.
2CO 8:5 Ayo nayali mbuli yotwalingitumbila ng'hatu! Mwaluko nawelavya hewo wawo kwa Mkulu, hamba welavya wawo kwa hetwe kahi, kwakuwinza vyoyalingugana Nguluwi.
2CO 8:6 Kwa mbuli ayo, natumdededeza Tito yaluche mijito ajo yawatanze kahi walutilile kusinda mijito aji ja kulavya kwa isungu hali hemwe.
2CO 8:7 Mwemwe muwa na vinji kwa chila chinhu, makundo na ludali lwa kulonga na uwanzi na kikangaza kweng'ha kwa kudita ganojile, na ligano lyenu kwa hetwe. Ahyo, twangulolela muwe mnojile kuli mijito aji ja kulavya.
2CO 8:8 Siwapa hemwe ilajizo, ila ndangugana hela kulajila ndaze wanji vyowalingikanganza kuwatanza, leka mvizele igano lyenu vyolili lya kukomya.
2CO 8:9 Mina, hemwe mkuzela kunoga kwa heye Mkulu wa hetwe Yesu Kilistu, heye, hanga nayali na lufufu, nakedita mzunwa kwa chiwalo cha hemwe, leka kwa uzunwa wa heye, yawadite muwe na lufufu.
2CO 8:10 Kwa chiwalo chino, lelo ndanguwalonjelani hino, igana kwa hemwe kukola sambi gala gomwaluche mhela upulute. Hemwe mwali mwaluche kukola na mwamulile kukola ahyo.
2CO 8:11 Lelo mgongomanye mijito ayo ya kulavya, na wone vila navyomganile aho mwaluko kutanza, lelo mikangaze hihyo kudita avyo vyomuwele navyo.
2CO 8:12 Mina wone munhu yawele ngugana kutanza, Nguluwi kabochelaga chila choyoweza kulavya, halingulola vinhu vila vyomlihela.
2CO 8:13 Chondilingugana haiwele kota mwanguganigwa kiyinjiza kuli magazo kwa chiwalo cha kuwatanza wanhu wanji, ila igana kuwe na kiwhana.
2CO 8:14 Chila chomlinacho sambi chonjezeche chiwatanze wala walingugana, leka na hewo lowowa na chonjezeche, wawatanze hemwe kuli vila vyomlingugana, na ahyo, kuwe na kiwhana.
2CO 8:15 Kota vyogandichigwe, “Nayakungajize kwa winji na hawele na chonjezeche, na yula yakungajize tudo nahesilwe.”
2CO 8:16 Ndanguta malumbo Nguluwi, yawichile mgati mwa nhumbula ya Tito, ako kugana kondilinako heni kwa kuwatanza hemwe.
2CO 8:17 Haiwele hela kota nakakunda lotulandile, ila kahi nayali yogana ng'hatu kuwatanza, leka nakagana heye yuye kuya komuli.
2CO 8:18 Hamwe na heye, twangumlajiza mng'holozetu yumwe yawele na katogo kwa mbuli ya kudamla Mbuli Inojile yenela kuli chilundo cha wanhu walingumkunda Kilistu wang'ha.
2CO 8:19 Menji ga ago, heye kahaguligwa na chilundo cha wanhu walingumkunda Kilistu yawe muyetu kuli majendo mhela hotuhilika mijito ayi ya kudondola, mijito yotulingukola kwa chiwalo cha ukulu wa Mkulu na kuzeleka kwa igano lya hetwe linojile.
2CO 8:20 Twangugana kilega na nongwa lozikuya kulawila, kwa mbuli ya ndolendole ayi ya sendi nyinji zotulinguziditila mijito.
2CO 8:21 Vyotulingugana hetwe ndo kudita ganojile, haiwele hali Mkulu hela, ila kahi hali wanhu.
2CO 8:22 Lelo hamwe na wang'holozetu awo, tumlajiza mng'holozetu yunji yawele mala nyinji tumpele majezo menji, natumona kota kangugana ng'hatu kututanza, na sambi kangikangaza ng'hatu kwa vila kana makundo ga heye lukami na hemwe.
2CO 8:23 Tito ndo muyangu, twangukola mijito hamwe kwa chiwalo cha hemwe, ila kwa awa wang'holozetu wanji walinguya kilumba na hewo, awo ndo wasenga wa chilundo cha wanhu walingumkunda Kilistu, wangumtogola Kilistu.
2CO 8:24 Ahyo, mulajile hali chilundo cha wanhu walingumkunda Kilistu kota twangukomya ng'hatu. Kota mwanguwagana na kuwazelesa kota natuganigwa kidaya kwa chiwalo cha hemwe.
2CO 9:1 Haiganile kwandika ng'hatu kuli mijito ayo ya hemwe kwa chiwalo cha wanhu wa Nguluwi.
2CO 9:2 Ndivizela vyomuwele na nhumbula ya kutanza, na ndangitumbila hemwe kwa chiwalo acho, hali wanhu wa Makedoniya. Nandiwalonjela, “Wang'holozetu wa Akaya wema nzinzili kulawila mhela upulute.” Ahyo, kikangaza kwa hemwe kuwahimiliza wanhu wenji lukami.
2CO 9:3 Lelo ndiwalajiza wang'holozetu awo, leka lutogo lwetu kuli hemwe yoneche kota hauwele ulonzi hela, na kota mwima nzinzili ng'hatu na kututanza kwa hemwe kota vyomlonjile.
2CO 9:4 Ndo mina wone wanhu wa Makedoniya wanguya hamwe na heni na hatuwafichile mwimile nzinzili, hetwe tobaswa soni ng'hatu kwa vila navyotwitumbile hemwe, namwe vivila mokona soni.
2CO 9:5 Kwa ahyo, mbona inoga kuwalanda awa wang'holozangu wamlongole heye kuya kwa hemwe, wawiche goya ndolendole ya hemwe ng'hulu yomilahile. Nayo ilajile kukomya kota ndo ndolendole ilavilwe hela kwa kugana na haiwele kwa kukola lupichi.
2CO 9:6 Mkumbuchile, “Yalingunyala tudo kabetaga tudo, yalingunyala menji kabetaga menji.”
2CO 9:7 Chila yumwe, lelo na yalavye kota vyoyalingugana, kwa nhumbula na haiwele kwa masinzo ama kwa kukolwa lupichi, mina Nguluwi kaganaga yula yawele kulavya kwa usangalalo.
2CO 9:8 Nguluwi koweza kuwapa hemwe utambichizo weng'ha umemile, leka muwe chila zuwa na chila chinhu chomlingugana, na hihyo mlutilile kutanza kuli chila mijito inojile.
2CO 9:9 Kota vyogandichigwe, “Heye kalavyaga kutanganika kwa wazunwa, isungu lyake liwaga lya mazuwa gose.”
2CO 9:10 Na Nguluwi yalingumpa mlimi nyhadikwa na ibumunda kwa chilyo, kowapa hemwe kahi nyhadikwa zomlingugana, na kozidita zote, zikule na kuwapa mbena nyinji kwa kutanganika kwa hemwe.
2CO 9:11 Heye kuwadita hemwe muwe na lufufu kulutilila kwa chila chinhu, leka wanhu wagane kumtogola Nguluwi kwa mbuli ya ndolendole za hemwe zowalingubochela kwa moko getu.
2CO 9:12 Mina mijito ayi yelile yomlingukola haiwele kota yowatanza gala gowalingugana wanhu wa Nguluwi hela, ila kahi yowambuza wanhu wenji wamtogole Nguluwi ng'hatu.
2CO 9:13 Kulawila kwa ulajilo ulingulajilwa kwa mijito ayi ya hetwe, wanhu womtogola Nguluwi kwa chiwalo cha kukunda kwa hemwe, kwa Mbuli Inojile ya Kilistu yomlingumfugamila na kahi kwa chiwalo cha isungu lomlinguwapa hewo na wanhu weng'ha.
2CO 9:14 Kwa ahyo, wowalandileni hemwe kwa igano lya nhumbula kwa chiwalo cha utambichizo uwele wauyeka yawagalileni Nguluwi.
2CO 9:15 Tumtogole Nguluwi kwa ila ndolendole ya heye ipulute ng'hatu.
2CO 10:1 Heni Paoli nene baha ndilingoneka kota ndina soni hondiwa hamwe na hemwe, ila ndangung'anuka londili kutali na hemwe, ndanguwadedeza kwa isungu lyake Kilistu.
2CO 10:2 Ndanguwalandani mleche kunyambuza ndiwe ng'anuche lukami mhela hondikuya, mina ndangukomya ndoweza kuwa ng'anuche kwa weng'ha wala walingutujesa kota twangikala kota wanhu wa isi.
2CO 10:3 Ndangukomya twangikala muisi, ila hatulingitowa vita kota wanhu wa chiisi vyowalingitowa.
2CO 10:4 Mina vinhu vyotulingitumbila kuli ngondo za hetwe haviwele vinhu vya muisi, ila ndo ludali lwa Nguluwi luli nguwifya lugagala lweng'ha lwa watwihilwe. Twanguwifya ndonga zeng'ha za udesi,
2CO 10:5 na kubomola chila chilemezi cha kidaya chiwichigwe kumlemela kudaha kwa Nguluwi. Twangugahola majesa geng'ha na kugadita gamfugamile Kilistu.
2CO 10:6 Lomuwa mwimile nzinzili kuli kufugamila, hetwe tokwima nzinzili kugaza chila chihendo cha kuleka kufugamila chila chinhu.
2CO 10:7 Hemwe mwangulola mbuli kwa kunze hela. Ndaze, kabaha munhu yoneche yalingijesa kota heye ndo wa Kilistu? Ena! Lelo yejese vivila kota hetwe kahi twangitumbila Kilistu kota heye vyoyawele wa Kilistu.
2CO 10:8 Leka wone ndingonjezela kuli kidaya kwa heni kwa mbuli ya lula ludali loyatupele Mkulu, ludali lwa kuwazenga na hauwele wa kuwabomola, leka ahyo silingijesa ne hado.
2CO 10:9 Silingugana mijese kota ndangugana kuwakabusa hemwe kwa lyandiko lya heni.
2CO 10:10 Munhu koweza kulonga, “Baluwa za Paoli ndo zing'anuka lukami na ziwele na ulonzi ufandile kota itunyo, ila heye yuye hoyowa hamwe na hetwe ndo munhu yalihela mong'ho, na hala hoyolonga ulonzi wa heye uwaga kota hauwele chinhu.”
2CO 10:11 Munhu yalingulonga ahyo chiba yakumbuche kota kuduhu vinji kwa gala tulingwandika kuli lyandiko mhela lotuwele kutali, na gala gotugadita mhela hotuwa hamwe na hemwe.
2CO 10:12 Kwa vyeng'ha vila hatwalijeza kiwika ama kiwahana na wala wanhu walingitogola hewo. Wanhu walingidita hewo ndo chipimo cha kipimila, na wanhu walingiwhaniza hewo kwa hewo, ndo wapoka.
2CO 10:13 Ila hetwe hambe tidaye ng'hatu, kidaya ako kupona kuli yila mijito yoyatupele Nguluwi, mijito yoitudita kuya kahi mbaka kwa hemwe.
2CO 10:14 Hatulochile mbaka yotuwichilwe mhela lotuyile kwa hemwe. Hetwe twali wa mwaluko kuya kwa hemwe tuwagalilani Mbuli Inojile ya Kilistu.
2CO 10:15 Lelo hatuchidayila mijito yowaditile wanji kupuluta chipimilo chotupegwe, leka twangitumbila kota makundo ga hemwe gokonjezeka hali hemwe kwa chipimilo choyatuwichile Nguluwi.
2CO 10:16 Aho toweza kuidamla Mbuli Inojile kuli isi zinji, kutali na hemwe, na haiwa inojile kidayila mijito yowaditile wanhu wanji honhu hanji.
2CO 10:17 Ila kota vyogandichigwe, “Yula yalingona lutogo na yone lutogo kwa choyaditile Mkulu.”
2CO 10:18 Yalingukundigwa hawaga yula yalingitogola yuye, ila yula yalingutogoligwa na Mkulu.
2CO 11:1 Namnyimilile hado tandi, na wone heni ndampoka! Ena, mnyimilile hado.
2CO 11:2 Ndangonelani maya ila ndo maya ga Nguluwi, mina hemwe ndo kota mhinza yohanating'hana na mlume ndimholile kulawa kwa mlume yumwe hela ndo yawele Kilistu.
2CO 11:3 Ila ndangudumba kota vila lila izoka kwa uhadi wa heye wa udesi, nakamhada Hawa, majesa ga hemwe goweza kugaluswa muwe mwelile, mkaleche kukunda kwa hemwe kulingukomya kwa Kilistu.
2CO 11:4 Mina munhu yoneche yokuya na kumdamla Yesu nayali vinji na yula tumdamle, hemwe mwangumbochela kwa moko meli, ama mwangumkunda muhe kuli yula Muhe Yelile yomumbochele ama Mbuli Inojile ilivinji ng'hatu na yila yomuibochele kulawila kwa hetwe.
2CO 11:5 Silingijesa kota heni nda mdodo kuli awo walinguchemigwa “Watumigwa wakulu.”
2CO 11:6 Hanji sidahile kulonga, ila kudaha ndanako, mbuli ayi tuilajila hazelu kwa hemwe, chila honhu na chila mhela.
2CO 11:7 Heni nandamla kwa hemwe Mbuli Inojile ya Nguluwi ne kulanda sendi, ndalindidedeza leka ndiwakwinize hemwe. Ndaze, nandita vibi?
2CO 11:8 Londitile mijito hali hemwe, gondalindigana na gaguligwa na chilundo cha wanhu walingumkunda Kilistu wanji. Ndali kota vila nandiwaboka hewo zowalinazo leka ndiwatumichile hemwe.
2CO 11:9 Londali na hemwe simgazile ne munhu yoneche longanile sendi, wang'holozangu walawile Makedoniya nawengalila chila chinhu chonganile. Ndali meho ng'hatu ndeche kuwagaza kwa kunhanza kwa vinhu vyeng'ha vila, na ndolutilila kudita hiho.
2CO 11:10 Ndangilaha kwa kula kukomya kwa Kilistu kuli mgati mwa heni, kota kuduhu chindemeza kidayila mbuli ayo honeche kuli isi ya Akaya.
2CO 11:11 Hambi ndangulonga ahyo kwa vila eti siwaganile hemwe? Nguluwi kavizela kota ndanguwagana!
2CO 11:12 Ndolutilila kudita kota vyondilingudita sambi wala “Watumigwa wakulu”. Leka ndeche kuwapa honhu wala walingupala honhu, honhu ha kidaya kota eti wangudita mijito kota hetwe.
2CO 11:13 Mina, hewo ndo watumigwa wa udesi, wakola mijito wa udesi walingidita kota watumigwa wa Kilistu.
2CO 11:14 Hanji, haiwa chinhu chijenzi, mina Limazoga nalyo livilizilaga kota mhilisi wa lumuli.
2CO 11:15 Kwa ahyo, haiwa mbuli njenzi, na hewo watumigwa wa Limazoga wangivilizila kota watumigwa watanganiche. Mwiso hewo wopegwa chila chowaganigwe kwa madito ga hewo.
2CO 11:16 Kahi ndangulonga, munhu yaleche kunjesa kota ndampoka. Ila wone mlingijesa ahyo, lelo mmbone kota ndampoka leka na heni ndiwe na cha kidayila hado hela.
2CO 11:17 Chondilonga sambi hachiwele chila choyandajize Mkulu, kwa chiwalo achi cha kidaya, ndangulonga hela kota munhu mpoka.
2CO 11:18 Kwa vila wenji wangidaya kota wanhu wa isi, naheni kahi ndochidaya.
2CO 11:19 Hemwe ndo muwele na luhala, leka mina hemwe mwanguwemilila wapoka!
2CO 11:20 Mwangumwimilila munhu yalinguwadita hemwe wapogozi, munhu yalinguwambuza na nayali nguwakadiliza na nayali nguwabeza na kuwatowa kumeho!
2CO 11:21 Kwa soni ndangukunda kota hetwe twali ng'hochele. Na iwe vyoiwele, ila wone hana munhu yoneche yalingujeza kidayila chinhu, ndangulonga kota munhu mpoka, heni nandangujeza kahi kidaya.
2CO 11:22 Ndaze, hewo ndo Waebulaniya? Na heni nda Muebulaniya. Ndaze, hewo ndo Waisilaeli? Na heni nda Muisilaeli. Hewo ndo lulelo lwa Abulahamu? Na heni nda lulelo lwa Abulahamu.
2CO 11:23 Ndaze, hewo ndo vitumagwa wa Kilistu? Na heni, ndangulonga ago chilukwale, nda chitumagwa wa Kilistu kusinda hewo. Heni nandita mijito iwele itunyo ng'hatu, nandikala kuchinweng'ho mala nyinji ng'hatu na nhowigwa kwa ng'obwa mala nyinji ng'hatu na nyejelela kubagama mala nyinji ng'hatu.
2CO 11:24 Mala zihano na nzapigwa zila ng'hobwa makumi gadatu na tisa za Wayahudi.
2CO 11:25 Na nzapigwa ng'hobwa mala zidatu, na nhowigwa na maganga mala imwe, nambenechelwa na meli mbahali mala zidatu, na mumo mbasa meho nechilo yeng'ha na kusinda nemisi yeng'ha ndikwelela mmazi.
2CO 11:26 Chila mala kuli majendo ndali nditing'hana na kumema kwa mazi mlwanda na nongwa za migongolo na nongwa kulawa kwa Wayahudi wayangu na kulawa kwa wanhu hawawele Wayahudi na nongwa za kuli muji na nongwa za kisolo na nongwa za mbahali na nongwa kulawa kwa wang'holozangu wadesi.
2CO 11:27 Ndita mijito na kugaya, mbasa meho ne kuwa hela usinjizi mala nyinji, ndiwa na nzala na ng'halu, mala nyinji ndiswa na nzala na kwesela kulya chinhu na kikala ndikakama kwa mbeho ndili mwazi.
2CO 11:28 Kuleka ganji menji, chila zuwa ndaguganigwa kudita mijito ja chilundo cha wanhu walingumkunda Kilistu weng'ha.
2CO 11:29 Wone munhu yoneche ka ng'hochele. Na heni kahi mbaga ng'hochele na munhu wone yoneche yakwimize, naheni kahi mbaga na lunhwinhwi.
2CO 11:30 Wone indape kidaya, lelo ndochidayila ung'hochele wa heni.
2CO 11:31 Nguluwi yawele Mhaza wa Mkulu Yesu, itagwa lyake litambichizwe mazuwa gose, heye Kavizela kota silingulonga udesi.
2CO 11:32 Londali Damasiko, mkulu wa mkowa, yawele hasi ha mndewa Aleta, nayali yokwamila muji wa Damasiko leka yembate.
2CO 11:33 Ila, mgati mwa chiseje ching'hangala, nanduliswa kunze kukolela ugazi naluwele kulukanzi, namhulusuka mmoko mwa heye.
2CO 12:1 Ndangidaya lelo, hanga hainojile! Ila sambi ndolonga kuli mbuli ya uloli na ugubulo woyamhele Mkulu.
2CO 12:2 Ndimzela munhu yumwe Mkilistu, mihela kumi na jine jilutile nakanyasuligwa mbaka ulanga wa kadatu. Nasivizelele kota nayali ako kwa lukuli ama kwa muhe, Nguluwi kavizela.
2CO 12:3 Ndanguhiluchila, ndivizela kota munhu ayo nakanyasuligwa mbaka kulubehelo kilanga. Ila sivizelele kota nayali ako kwa lukuli ama kwa muhe, Nguluwi nakavizela.
2CO 12:4 Ako Paladiso, nakahulika mbuli za uviso, munhu zohalingukundigwa kulonga.
2CO 12:5 Lelo ndochidayila munhu wa kota ayo, na haiwele kwa heni ndiliyeka, ila kwa chiwalo cha ung'hochele wa heni.
2CO 12:6 Wone nangane kidaya, nasalinguwa mpoka ne hado, mina nandahalonjile ga kukomya yeng'ha. Ila sichidaya, siviganile munhu yanjese ng'hatu kwa vila yalingona na kuhulika kwa heni.
2CO 12:7 Ila, leka ndeche kidaya ng'hatu kwa chiwalo cha kubochela ugubulo wa kububuwaza, nambikwa kuli lukuli lwa heni chinhu chilingundumiza kota miwa. Chinhu chila ndo kota msenga wa Limazoga kwa kunhowa na kundemeza ndeche kidaya ng'hatu.
2CO 12:8 Nandimdedeza Mkulu mala zidatu kwa mbuli ino indawe.
2CO 12:9 Ila nakandonjela, “Kunoga kwa heni wangukukwila kwa chiwalo cha hegwe, mina ludali lwangu lwanguwa lukulu ng'hatu mhela hegwe houwa ng'hochele,” Lelo ng'hunda ng'hatu, kidayaila ung'hochele wa heni, leka ludali lwa Kilistu wikale mchanya mwa heni.
2CO 12:10 Ahyo, ndangukunda ng'hatu ung'hochele na kubeza na nongwa na wihe na magazo, kwa chiwalo cha Kilistu. Mina hondiwa ng'hochele, ndo hondiwa na ludali.
2CO 12:11 Ndiwa kota mpoka, ila hemwe mng'ola lupichi ndiwe ahyo. Hemwe ndo namganigwe kunhogola. Mina, hanga heni siwele chinhu, kwa vyoneche, heni siwele mdodo kusinda hewo wala walingichema, “watumigwa wakulu.”
2CO 12:12 Vinduzanduza na kububuwaza kulingulajilwa hazelu kota heni nda mtumigwa, nagakoleka hali hemwe kwa kwimilila kweng'ha.
2CO 12:13 Ndaze, nampunguchilwa na choni ng'hatu kusinda vilundo vya wanhu walingumkunda Kilistu vinji, hanga hela kota heni kwa ubanzi wa heni siwagazeni kutanzwa na hemwe? Ndiwalechela kwa chiwalo cha mbuli ayo!
2CO 12:14 Sambi nda goya ng'hatu kuya kwa hemwe mala ya kadatu, na siwagazani. Mina chondilingupala hachiwele lufufu lwa hemwe, ila ndo mwemwe baho. Nakatali iwaga goya wahaza kuwawichila wana ng'hano, na haiwele kwa wana kuwawichila wahaza wa hewo.
2CO 12:15 Heni ndangukunda ng'hatu kulavya chondilinacho, na kilavya heni baha ng'hatu, kwa chiwalo cha kuwatanza hemwe. Ndaze, mongana hado kwa vila heni ndanguwagana hemwe ng'hatu?
2CO 12:16 Lelo mokunda kota siwele itunyo kwa hemwe. Ila hanji munhu yunji kolonga, “Kwa vila Paoli ka msugu, kawahadeni.”
2CO 12:17 Ndaze, heni nandiwabunzani kukolela msenga yoneche yula nandimlajize kwa hemwe?
2CO 12:18 Heni nandimlanda Tito, nandimlajiza kwa hemwe na mng'holozetu yunji. Ndaze, Tito nakawabunzani? Ndaze, hamvizelele kota hetwe tuwa tulongozwa na muhe yuyula, na chihendo cha hetwe chimwe?
2CO 12:19 Hanji mwangijesa kota mbaka sambi tuwa tuchigombela twetwe hali hemwe! Ila, twangulonga mbuli zino hali Nguluwi, tuwele tilumbile na Kilistu. Mbuli azo zeng'ha, waganigwe na heni, ndo kwa chiwalo cha kuwakangaza hemwe.
2CO 12:20 Ndangudumba, hanji hondikuya kwa hemwe ndowafika hila vyosiviganile, naheni yongana ndiwe vyohamviganile. Ndangudumba hanji howa na kitowa na maya na kilema na ibamba na uhesi na kupwepwa na kidaya na ivuche hali hemwe.
2CO 12:21 Ndangudumba hanji aho hondikuya kahi hali Nguluwi wa heni kondita ndiwe liholile hali hemwe, na heni ndolombocheza kwa chiwalo cha wenji wa wala waditile gehile ila hawamgalamchile Nguluwi na maya ga hewo na ung'hondwa lowauditile.
2CO 13:1 Ayi ndo mala ya heni ya kadatu kuya kwa hemwe. “Chila nongwa yotagusigwa kwa ulolezi wa wanhu weli ama wadatu,” Kota vyoyandichigwe.
2CO 13:2 Naminandonga, nakota vyoyali majendo ga keli, sambi ndangulonga kahi mbele kutali, wala weng'ha waditile wihe ne kulema kudedeza, na kahi wala wanji, londikuya, ndowa hela isungu.
2CO 13:3 Mokona mwemwe kota Kilistu kangulonga mgati mwa heni. Kwa hemwe Kilistu hawele ng'hochele, ila ludali lwake lwangukola mijito hali hemwe.
2CO 13:4 Mina leka wone yagazigwe kwa kuwambigwa mumsalaba kwa chiwalo cha ung'hochele, ila sambi kangikala kwa ludali lwa Nguluwi. Hetwe kahi twa ng'hochele kwa kilumba na heye ila tochikala na heye kwa mong'ho wa Nguluwi kwa chiwalo cha hemwe.
2CO 13:5 Milole hemwe mwemwe mvizele kota mwangukomya mwanago makundo. Milole mwemwe baho. Ndaze, hamvizelele kota Yesu Kilistu kamumo mgati mwa hemwe? Wone hebu, lelo hemwe mlemwela.
2CO 13:6 Ila ndangitumbila kota hemwe baho, mvizela kota hetwe hatulemwele.
2CO 13:7 Twangumlanda Nguluwi mleche kudita wihe woneche, ila tuleche koneka kota wanhu wamalile kuhola, ila muwe mdita ganojile, leka wone hetwe twangoneka tuwa tulemwele.
2CO 13:8 Mina tolemwela kubela kukomya, ila ludali lotulinawo ndo lwa kweneza ako kukomya.
2CO 13:9 Twangusangalala kota hetwe twa ng'hochele, ila hemwe mna ludali, ahyo twangulanda muwe wanhu wenele.
2CO 13:10 Lelo ndangwandika lyandiko ali mbele kutali, leka londifika kwa hemwe ndeche kuwang'hanuchila hemwe kwa lula ludali loyamhele Mkulu, ena, ludali lwa kuzenga na hauwele lwa kuwawifya.
2CO 13:11 Wang'holozangu, sambi ndaguwalagani! Mjeze kuwa mwenele na kusangalala, mibatilile geng'ha gondiwalonjele, muwe chinhu chimwe, mikale goya. Na heye Nguluwi wa igano na kikala goya kowa hamwe na hemwe.
2CO 13:12 Milamse chila yumwe kwa kulajila igano lya Kilistu.
2CO 13:13 Wanhu weng'ha wa Nguluwi wawele kuno wanguwalamsani.
2CO 13:14 Utambichizo wa Mkulu Yesu Kilistu na igano lya Nguluwi na Muhe Yelile, viwe na hemwe mweng'ha.
GAL 1:1 Heni Paoli mbele mtumigwa haiwle kawa ludali lwa wanhu, ila kwa kusaha kwa Yesu Kilistu na Nguluwi Mhaza yamzilipule Yesu kuli wabagame,
GAL 1:2 heni na wang'holozangu weng'ha wawele hamwe na heni twanguwandichila chilundo cha wanhu walingumkunda Kilistu weng'ha wa ako Galatiya.
GAL 1:3 Twangukuganilani utambichizo na kikala goya kulawile kwa Nguluwi Mhaza wa hetwe na kwa Mkulu Yesu Kilistu.
GAL 1:4 Kilistu nakelavya yuye kwa chiwalo cha gehile ga hetwe galawile na igano lya Nguluwi wa hetwe na Mhaza, leka yatugombole kuli isi ayi ihile ya sambi.
GAL 1:5 Nguluwi yatogoligwe, wa mazuwa gose! Ena.
GAL 1:6 Mwangumbumbuwaza, lekachoni mwangumleka himahima Nguluwi yawachemile kuli utambichizo wa Kilistu, na mwanguwinza usenga unji ulingoneka kota Mbuli Inojile.
GAL 1:7 Ndangukomya, kuduhu Mbuli Inojile yinji. Ila ndangulonga aga kwa vila, wakuko wanhu walinguwawifyanga, na walingugana kuyajiliza Mbuli Inojile ya Kilistu.
GAL 1:8 Ila, wone iwe yumwe wa hetwe ama mhilisi wa kilanga, kowadamlilani usenga unji na ulivinji na ula wotuwadamlileni hetwe, leka ayo nayapanjilwe na Nguluwi!
GAL 1:9 Kota navyondongole kulonga, na sambi ndangulonga kahi, wone munhu yoneche yowadamulilani usenga ulivinji na ula yomina mbochele, na ayo yapanjilwe na Nguluwi!
GAL 1:10 Hambi ndangugana kumnojeza whaani, wanhu ama Nguluwi? Hebu! Nangane kuwanojeza wanhu, salinguwa chitumagwa wa Kilistu.
GAL 1:11 Wang'holozangu ndangugana mvizele kota ila Mbuli Inojile yondiwadamlile hailawile kwa wanhu.
GAL 1:12 Na heni sibochele kulawila kwa munhu yoneche, na silanguswe na munhu. Yesu Kilistu yuye ndo yangubulile.
GAL 1:13 Kwa vila, namuhulika vyonandali ndichikala katali kwa kibatilila dini ya Chiyahudi, navyondichigazile ng'hatu chilundo cha wanhu walingumkunda Kilistu cha Nguluwi, na kugana kuwadumya ng'hatu.
GAL 1:14 Ena, heni nandiwalongola Wayahudi wayangu wenji wotukulase kuli kibatilila dini ya Chiyahudi, nangaya ng'hatu kibatilila malanguso ga wasekulu wa hetwe.
GAL 1:15 Ila Nguluwi, kwa kunoga kwa heye, nayali yanyhagule londing'hali vumbuka, nakanyhema ndiwe chitumagwa wa heye.
GAL 1:16 Bahala navyoyawene yowa goya kungubulila Mwanage mgati mwangu leka ndikadamle Mbuli Inojile ya heye kwa wanhu hawawele Wayahudi, nasibilimile kuza kumuuza munhu yoneche,
GAL 1:17 na silutile Yelusalemu kwa wala nawawele walongole kuwa watumigwa, nanduta tandi mkowa wa Alabiya, hamba nanyhiluka kuli muji wa Damasiko.
GAL 1:18 Hamba, lojipulute mihela jidatu, nanduta Yelusalemu kiwona na Kefa. Kefa kwa Chigiliki Petili, nandikala kwa heye mazuwa kumi na gahano.
GAL 1:19 Ila siwawene watumigwa wanji ila Yakubu, mng'holoze Mkulu Yesu.
GAL 1:20 Nguluwi kavizela kota, aga gondilinguwandichilani, silingulonga udesi.
GAL 1:21 Hamba nanduta kuli isi za Siliya na Kilikiya.
GAL 1:22 Mhela awo, heni baha nasizeleche kwa chilundo cha wanhu walingumkunda Kilistu kula Yudeya.
GAL 1:23 Chowali wachizelele ndo chila hela chowahuliche, “Munhu yula yonayali yotugaza aho katali, lelo kangudamla makundo gagala gonayali yojeza kugajiliza.”
GAL 1:24 Ahyo, nawamtogola Nguluwi kwa chiwalo cha heni.
GAL 2:1 Hamba, lojipulute mihela kumi na jine, nanduta kahi Yelusalemu hamwe na Banaba, vivila nandimhola Tito.
GAL 2:2 Nanduta ako kwa vila Nguluwi nakangubulila. Nanhing'hana na vilongozi chinyele, nandiwalonjela awo vilongozi usenga wa Mbuli Inojile yondamle kwa wanhu hawawele Wayahudi. Nandita ahyo, leka mijito ja heni ileche kwajilila hela.
GAL 2:3 Ila, naheye myangu Tito, nayawele Mgilichi, hakoligwe lupichi kwinjila ikumbi,
GAL 2:4 hanga kwali na wang'holozetu wanji wa udesi nawaganile yenjile ikumbi. Wanhu awa naweyinjiza hewo kwa usugu na kupugajiza kilejeha kotulinako kuli kilumba na Yesu Kilistu, leka watudite tuwe wapogozi wa hewo.
GAL 2:5 Hatikundize na hewo ne hado, leka kukomya kwa Mbuli Inojile, kupone na hemwe mazuwa gose.
GAL 2:6 Ila wanhu wala walingulonjigwa ndo vilongozi, wone wokomya wali ahyo ama hebu, kwa heni haiwele chinhu, mina Nguluwi hambe yataguse kwa kulola mbuli ya kunze, wanhu awa hawawele na majesa ga kunyonjezela.
GAL 2:7 Ila, hewo nawavizela kota Nguluwi nayali yanhumile kudamla Mbuli Inojile kwa wanhu hawawele Wayahudi, kota vila Petili navyoyatumigwe kuwadamlila Wayahudi Mbuli Inojile.
GAL 2:8 Mina, yula yamditile Petili yawe chitumagwa kwa Wayahudi, ndo yanditile heni nani ndiwe chitumagwa kwa wanhu hawawele Wayahudi.
GAL 2:9 Lelo Yakubu na Kefa na Yohani, wawele woneche kuwa vilongozi wang'hangala, nawavizela kuwa Nguluwi nakanipa heni utambichizo awo, nawatubata hetwe moko Banaba na heni, uwe ulajilo wa kuwa hamwe. Hetwe natuganigwa kugongomanya mijito kuli wanhu hawawele Wayahudi, na hewo nawo, wakakole mijito kwa Wayahudi.
GAL 2:10 Weng'ha nawatulanda chinhu chimwe hela, tuwakumbuche na kuwatanza wazunwa wamkundile Kilistu, na heni nanguchidita chinhu acho.
GAL 2:11 Ila Kefa loyafichile muji wa Antiokiya, nandimlemela hazelu hela, kwa vila nayali yawifile.
GAL 2:12 Kwa vila, lokung'hali wanhu wamwe wonawali watumigwa na Yakubu kuya aho, Petili nayali yolya hamwe na wanhu hawawele Wayahudi. Ila, lowagomole, nakaluka kiyengula mholemhole na kibagula kulya hamwe na wanhu hawawele Wayahudi, kwa vila nayali yowadumba wala wali wowakolaniza lupichi wanhu kwinjila ikumbi.
GAL 2:13 Wayahudi wanji nawelumba na Petili kuli chidito achi cha uhadi, na heye Banaba vivila nakafichigwa na uhadi wawo.
GAL 2:14 Leka, lombone kota kwimizwa kwa hewo kuli kukomya kwa Mbuli Inojile hakugoloche, nandimlonjela Kefa hali wanhu weng'ha, “Hanga hegwe kwa Myahudi, kwangikala kota wanhu hawawele Wayahudi na haiwele kota Myahudi! Kwanguweza ndaze lelo, kujeza kuwakola lupichi wanhu hawawele Wayahudi kikala kota Wayahudi?”
GAL 2:15 Ndangukomya, hetwe twa Wayahudi kwa kuvumbuka, na hatuwele wanhu hawawele Wayahudi wachemigwe wana gehile.
GAL 2:16 Hetwe, tuvizela kwa kukomya kuta munhu howeza kuditikwa yawe yatanganiche hali Nguluwi kwa kuwinza malajizo, ila kwa kumkunda hela Yesu Kilistu. Ahyo na hetwe natwe tumtogola Kilistu leka natwe tuwe tutanganiche kukolela makundo ga hetwe kwa Kilistu, na haiwele kwa kuwinza malajizo, mina kuduhu munhu yoditigwa yatanganiche kwa kudita kota ilinguganigwa na malajizo.
GAL 2:17 Wone twetwe baha tuditwa tuwe tutanganiche, kwa kilumba na Kilistu twangoneka kuta tuna gehile, ndaze, mbuli ayi yanguzeleka kota Kilistu ka chitumagwa kuli kudita gehile? Ne hado!
GAL 2:18 Nambifya nzila ya kitumbila malajizo. Wone lelo ndiizenga kahi, ndangoneka kota heni nda mwihe.
GAL 2:19 Mina, kwa chiwalo cha malajizo, heni mbagama, malajizo gago nagang'hopola, ndiwe ndikala kwa chiwalo cha Nguluwi. Heni mbagama hamwe na Kilistu mumsalaba,
GAL 2:20 na sambi ndangikala, ila siwele heni kahi, Kilistu kangikala mgati mwa heni. Kikala aku kondilingikala sambi ndangikala kwa makundo, makundo kuli Mwana wa Nguluwi yanganile nakaulavya ukomu wa heye kwa chiwalo cha heni.
GAL 2:21 Hambe ndeme Isungu lya Nguluwi. Wone munhu nakaditagwa yawe yatanganiche kukolela kibatilila malajizo, lelo Kilistu nakabagama hela!
GAL 3:1 Hemwe Wagalatiya, muwa wapoka ng'hatu! Whaani yawahawileni? Mbuli ya kugazigwa kwa heye Yesu Kilistu naisimilwa hazelu hali meho ga hegwe.
GAL 3:2 Ndangugana ndivizele hela chinhu chimwe kulawila kwa hemwe, ndaze, nambochela Muhe wa Nguluwi kwa vila namgana kweneza malajizo ama kwa chiwalo cha kuhulika na kukunda Mbuli Inojile?
GAL 3:3 Ndaze, hemwe mwawapoka kota ahyo? Hemwe namwaluka geng'ha kwa kutanzigwa na Muhe wa Nguluwi, ndaze, mwangugana lelo kusumya kwa ludali lwenu mwemwe lwa chiwunhu?
GAL 3:4 Ndaze, magazo geng'ha nagowapatileni hemwe hagawele chinhu? Hebu, hambe iwe ahyo!
GAL 3:5 Ndaze, Nguluwi kawapaga Muhe wa heye na kudita vinduzanduza hali hemwe kwa vila mwangweneza galinguganigwa na malajizo, ama kwa vila mwanguihulika Mbuli Inojile na kuikunda?
GAL 3:6 Kota Maandiko Matakatifu vyogalingulonga, “Abulahamu nakamkunda Nguluwi na kwa makundo ga heye, Nguluwi nakamuwazila kota katanganika.”
GAL 3:7 Lelo mvizele kota wala weng'ha wawelengumkunda Nguluwi, awo ndo wawele wana ng'hatu wa Abulahamu.
GAL 3:8 Maandiko Matakatifu nagalajila kung'hali kota Nguluwi kowadita wanhu hawawele Wayahudi kuta watanganiche kukolela makundo. Ahyo Maandiko Matakatifu nagalongola kumdamlila Abulahamu Mbuli Inojile, “Kuli hegwe nhanzi za isi zeng'ha zotambichizwa.”
GAL 3:9 Lelo wala walingumkunda Nguluwi wangutambichizwa hamwe na Abulahamu yakundile.
GAL 3:10 Ila wala weng'ha wangitumbila hela kweneza galingulapigwa na malajizo, awo wopanjilwa na Nguluwi. Mina Maandiko Matakatifu gangulonga, “Yoneche hambe yebate na kweneza geng'ha gandichigwe kuli chitabu cha malajizo, kopanjilwa na Nguluwi”
GAL 3:11 Kangukomya kuta kuduhu munhu yalingoneka yatanganiche kwa Nguluwi kwa kibatilila malajizo, mina Gandichigwe gangulonga, “Yatanganiche kuli makundo kochikala.”
GAL 3:12 Ila malajizo hagalingitumbila makundo, ila Gandichigwe gangulonga, “Yalingweneza vinhu vilingulapigwa na malajizo, kochikala kwa vinhu avyo.”
GAL 3:13 Kilistu nakatulohola kuli kupanjilwa kwa chiwalo cha malajizo kwa kuhola kupanjilwa ako kwa chiwalo cha hetwe, mina Gandichigwe gangulonga, “Kapanjilwa munhu yoneche yawele lukuli lwake luninizwe migodi.”
GAL 3:14 Mbuli ayi naikoleka leka aula utambichizo woyapegwe Abulahamu uwadulichile wanhu hawawele Wayahudi kukolela Kilistu Yesu. Ahyo nzila ya makundo, tumbochele yula Muhe Nguluwi yalagane na hetwe.
GAL 3:15 Wang'holozangu, tandi ndiwalonjele wanhu vyowalingudita chila zuwa, haduhuli munhu yoweza kupunguza ama konjeza chinhu kuli malagano hali hetwe wanhu weli. Malagano wone gamale kukoleka, na kuwichigwa ulajilo kuduhuli munhu yalinguwika hafungo ama konjezela chinhu chila nachowalagane.
GAL 3:16 Lelo Abulahamu nakapegwa malagano, heye hamwe na mlelwa wa heye. Gandichigwe hambe galonje, “Na walelwa wa heye,” Kulajila wanhu wenji, ila gangulonga, “Na mlelwa wa heye,” Kulajila yumwe, na heye ndo Kilistu.
GAL 3:17 Chondilingugana kulonga ndo achi, Nguluwi nakadita ilagano na Abulahamu, nakalitawiza, malajizo nagoyile mihela miya zine na makumi gadatu hamba, hagoweza kutang'ula, ama kusa ng'hatu chila nachoyalonjile.
GAL 3:18 Mina, wone ndolendole ya Nguluwi yangitumbila malajizo, lelo hambe itumbile kahi ilagano lya Nguluwi. Hambi, kwa vila Nguluwi nakamnojeza Abulahamu kwa chila nachoyalonjile.
GAL 3:19 Lelo malajizo gangukola mbuli yachi? Nagonjezwa aho leka kulajila uhonzolomo ndo chinhu chachi, mbaka hoyogomola yula mlelwa yaleligwe mlli lukolo lwa Abulahamu, yapeligwe alila ilagano. Malajizo nagagaligwa na wahilisi wa kilanga kwa moko ga mhanyisi.
GAL 3:20 Ndangukomya ng'hatu, mhanyisi halinguganigwa wone mbuli ayo yangumlapa munhu yumwe, na Nguluwi ndo yumwe.
GAL 3:21 Ndaze, Malajizo gangitwanza na malagano ga Nguluwi? Ne hado! Mina, wone nakulavigwe Malajizo nagalinguwagalila wanhu ukomu, lelo twahaditikwe watanganiche kukolela Malajizo.
GAL 3:22 Ila hebu, Maandiko Matakatifu mina galonga kota isi yeng'ha ya hasi ha ulongozi wa wihe, na ahyo, wawelengukunda wapegwe lila ilagano yalavile Nguluwi, kwa makundo ga Yesu Kilistu, wopegwa wala walingukunda.
GAL 3:23 Lotung'hali kupegwa makundo, malajizo nagatudita wanweng'hwa, tubeteza makundo ago gagubuligwe.
GAL 3:24 Lelo ahyo malajizo nagatulongoza kuza kwa Kilistu, leka kukolela makundo tuditwe watanganiche hali Nguluwi.
GAL 3:25 Ila kwa vila gala makundo mina gafika, lelo hatulingulongozwa kahi na malajizo.
GAL 3:26 Kwa makundo, hemwe mweng'ha muwa wana wa Nguluwi kwa kilumba na Kilistu Yesu.
GAL 3:27 Hemwe mweng'ha mbatizigwe milumba na Kilistu muwa kota heye Kilistu.
GAL 3:28 Ahyo, kuduhuli kahi ubagulo kwa Myahudi na wanhu hawawele Wayahudi, mpogozi na munhu yelejehe, mlume na mdala. Mweng'ha mwa chinhu chimwe kwa kilumba na Yesu Kilistu.
GAL 3:29 Hanga, hemwe mwa wanhu wa heye Kilistu, lelo mwa walelwa wa Abulahamu, na mobochela gala gotulaganwe na Nguluwi.
GAL 4:1 Leka, ndangulonga ahi, yalinguhalila, wone yawe yang'hali mwana kangiwhana na mpogozi, hanga lufufu lweng'ha ndo lwa heye mhaza.
GAL 4:2 Mhela awo weng'ha kowa mmoko ga wala wawelengumlela na wala walingumlolela lufufu lwake mbaka mhela ula uwichigwe na mhaza wa heye.
GAL 4:3 Vyoili na hetwe vyonatwali tung'hali wana, natwali wapogozi wa ludali lulingulongoza isi yeng'ha.
GAL 4:4 Ila mhela ula utanganiche vyowenele, Nguluwi nakamlajiza Mwanaje yavumbuche na mdala, naye nakekala kwa kulongozwa na malajizo,
GAL 4:5 leka yawagombole wala walingulongozwa na malajizo leka hetwe tuwe wana wa Nguluwi.
GAL 4:6 Kwa vila hemwe sambi mwa wanage, Nguluwi nakamlajiza Muhe wa Mwanage mnhumbula ya hemwe, Muhe yawelengulila “Aba,” Ilinguzeleka “Mhaza.”
GAL 4:7 Leka, hegwe huwele mpogozi kahi, ila mwana. Na wone mwa wana, ahyo, hemwe mobochela geng'ha Nguluwi goyawawichile wana wa heye.
GAL 4:8 Katali lomwali hamumzelele Nguluwi, namwali wapogozi wa jila milungu ja udesi.
GAL 4:9 Ila sambi, kwa vila mumzela Nguluwi, ama tulonje mzeleka na Nguluwi, mwanguweza ndaze kahi kuhiluka kwa jila Mimazoga mizunwa na ng'hochele, ahyo mwangugana muwe wapogozi wa hewo kahi?
GAL 4:10 Mng'hali muwinza zuwa na myezi na milimo na mihela!
GAL 4:11 Ndangudumba kuta mijito jong'holile kwa chiwalo cha hemwe, jaga hela!
GAL 4:12 Wang'holozangu, ndanguwadedeza mfande kota heni, kwa vila nani nda kota hemwe. Hamnditile wihe woneche.
GAL 4:13 Kota vyomvizelele kula kuwadamlilani kwa mwaluko Mbuli Inojile, kwa vila nandali mtamwa,
GAL 4:14 Ahyo, mhela ula hambezile ne kundema kwa chiwalo cha utamwa wa heni uwawichile kuli kujezigwa, ila nambochela kota mhilisi wa kilanga ama yuye Yesu Kilistu.
GAL 4:15 Na msangalala, lelo kulawila choni? Ndangilaha kuta mhela ula namwahawezile kung'umbula meho ga hemwe na kumha heni.
GAL 4:16 Ndaze lelo ndiwa mwihe wa hemwe kwa vila ndanguwalonjela ndikomya?
GAL 4:17 Awo wanhu wanji wangukugayilani hemwe, ila nhumbula za hewo hazinojile. Wangugana kuwabagulani hemwe na heni, leka hemwe muwagayile hewo.
GAL 4:18 Lelo inoga chila zuwa kudita mbuli inojile ng'hatu kuwagayilani wanji kuli mbuli zinojile, na haiwele mhela heni hondiwa hamwe na hemwe.
GAL 4:19 Wanangu, kota hila mamo yawele na himila vyoyalingona usungu mhela wa kulela, na heni ndanguwonela usungu kahi mbaka aho Kilistu vyoyowa yalumbigwe mgati mwa hemwe.
GAL 4:20 Ndangugana nandiwe na hemwe sambi, mina ndahalonjile mholemhole kwa chiwalo cha hemwe! Ndina majesa ng'hatu na hemwe!
GAL 4:21 Ndonjeleni, hemwe mlingugana kulongozwa na malajizo, ndaze, hambe muhuliche vyogalingulonga malajizo?
GAL 4:22 Mina yandichigwa kuli chitabu cha malajizo ga Musa, kota Abulahamu nayali na wana weli, yumwe kwa mdala mpogozi na wakeli kwa mdala yelejehe.
GAL 4:23 Yula mdala yawele mpogozi, nakalela mwana kota wanhu wanji vyowalingulela, ila yula mdala yelejehe nakalela kulawila kuli ilagano lya Nguluwi.
GAL 4:24 Mbuli azi ziwa ziwhanile, kwa vila mamo awo weli ndo kiwhana na malagano meli, Hagali yula wanage waleleche mu upogozi yangulajila ilagano liwichigwe kuli chidunda cha Sinai.
GAL 4:25 Hagali kangulajila chidunda cha Sinai chiwele Alabiya, na ndo kiwhana na Yelusalemu iwele sambi, iwele mupogozi hamwe na wanage heye.
GAL 4:26 Ila Yelusalemu ili kuchanya kilanga ndo muji uwele wilejehe, na hewo ndo maiwetu,
GAL 4:27 kwa vila Maandiko Matakatifu gangulonga, “Usechelele, hegwe uwele mhende yohambe ulele, utowe luchenze, hegwe ulelile mwana, yohulinguhulika usungu wa kulela mwana, mina mdala yula yalechigwe kana wana wenji, kusinda wa yula yawele na mlume.”
GAL 4:28 Lelo wang'holozangu, hetwe twa wana, kwa chiwalo cha Nguluwi nachoyalagane na hetwe, kota vyoyawele Isaka.
GAL 4:29 Ila wone vila zuwa lila yula mwana yaleleche kukolela lukuli, vyoyamgazile mwana yula yaleleche kwa ludali lwa Muhe wa Nguluwi, hiho ndo vyoili sambi.
GAL 4:30 Ila Maandiko Matakatifu gangulonga ndaze? Gangulonga, “Muwinje mamo mpogozi hamwe na mwanage mina wana wa mpogozi hohalila hamwe na wana wa mamo yelejehe.”
GAL 4:31 Ahyo, leka mng'holozangu, hetwe hatuwele wana wa yula mamo mpogozi ila twa wana wa mamo yelejehe.
GAL 5:1 Kilistu nakatugombola, nakagana tupone tilejehe. Lelo mwime goya mleche kukunda muwe wapogozi kahi.
GAL 5:2 Muhulichize! Nda heni Paoli ndilingulonga na hemwe! Wone mkunde kwinjila ikumbi, Kilistu howatanza ne chinhu.
GAL 5:3 Ndangulonga kahi ne uviso, chila yalingukunda kwinjila ikumbi yangumlapa yebatilile malajizo ga Musa geng'ha.
GAL 5:4 Hemwe mlingugana kuwa mtanganiche kukolela malajizo, mibagula na Kilistu. Muuleka Isungu lya Nguluwi.
GAL 5:5 Ila hetwe, twanawo utumbilo kota Nguluwi kotudita tuwe watanganiche kukolela makundo. Acho ndo chotulingubeteza ng'hatu, kwa ludali lwa Muhe wa Nguluwi.
GAL 5:6 Mina wone twilumbile na Kilistu Yesu, kwinjila ikumbi ama kuleka kwinjila ikumbi hakuwele chinhu, ila chinhu chikulu ndo makundo galingukola mijito kwa igano.
GAL 5:7 Namwali mdita goya, lelo whaani yawalemeze kibatilila kukomya?
GAL 5:8 Yaditile chinhu acho hawele Nguluwi yawachemile.
GAL 5:9 Kota vyowalonjile, “Usaso udo hela wagadusa chidoto cheng'ha cha utimbo!”
GAL 5:10 Kwa vila tilumba na Mkulu, ndangukomya nhumbula za hemwe hazigaluka. Ila ayo yowahanzanyani, yawe munhu yoneche yula kotagusigwa na Nguluwi.
GAL 5:11 Wang'holozangu wone ndilutilila kudamla mbuli ya ikumbi lelo lekachoni ndangugazigwa? Wone na iwe ahyo, kudamla kwa heni kwa chiwalo cha msalaba wa Kilistu, hawalingigala chikwang'hwalo.
GAL 5:12 Ndangugana wanhu awo wawele kuwahanzanyani walute kutali na hemwe, wakesaule wawo!
GAL 5:13 Hemwe wang'holozangu, namchemigwa muwe wanhu welejehe. Ila kilejeha ako kuleche kuwa chivilizilo cha kulongozwa na maya genu ga wihe, ila mwanguganigwa mikolele mijito hemwe kwa hemwe kwa igano.
GAL 5:14 Mina malajizo geng'ha ga Musa gagwenezwa kuli kibata ulonzi awu umwe, “Mgane muyago kota vyoulingigana gwegwe baho.”
GAL 5:15 Ila wone mochiluma na kidakula kota migongolo, milolele mleche kilumiza mwemwe baho!
GAL 5:16 Lelo ndangulonga ahi, ukomu wa hemwe ulongozwe na Muhe wa Nguluwi, na hemwe homuwinza kahi maya ga wihe gawele mgati mwa hemwe.
GAL 5:17 Kwa vila, maya ga wihe gawele mgati mwetu hambe vikundize na yalingugana Muhe wa Nguluwi na gala galinguganigwa na Muhe hambe vikundize na maya ga wihe. Vinhu avi vili vyangilewa, ahyo, Muhe wa Nguluwi yokulongoza hamdita hela choneche choulingugana kudita gwegwe baho.
GAL 5:18 Wone mlongozwe na Muhe Yelile, lelo hamulongozwa kahi na malajizo.
GAL 5:19 Lelo madito ga wanhu walinguwinza maya ga wihe gawele mgati mwao gazeleka, ung'hondwa na uhonzolomo na wavu,
GAL 5:20 kufugamila jimalukolo na uhawi na ung'honyo na kilewa na maya na kuzudila na ubuhu na kiyowele na kilema na kibagula,
GAL 5:21 kiwonela chiziho na kugala na kudongoka na vinhu vinji vilingiwhana na avyo. Ndanguwakanyani kahi kota vyondiwakanyile hamwande, wanhu walingudita mbuli kota azo hawokwinjila kuli undewa wa Nguluwi.
GAL 5:22 Munhu yalingulongozwa na Muhe Yelile vinhu avi vyokoneka mgati mwa heye, igano na kusechelela na kikala goya na kwimilila na kunoga na yalingulavya vinhu ne kiwuza na yalingukundigwa,
GAL 5:23 uliholile na kilongoza. Kuduhu malajizo galinguweza kulema mbuli azo.
GAL 5:24 Wala wawele na Yesu Kilistu wagagaza majesa gehile na maya ga hewo gehile nagawele mgati mwa ng'huli za hewo.
GAL 5:25 Muhe Yelile katupa ukomu, lelo vivila tumleche yalongoze ukomu wa hetwe.
GAL 5:26 Lelo tuleche kidaya na tuleche kichokoza na kiwonela maya.
GAL 6:1 Wang'holozangu, wone mmone munhu yunji yawifile, lelo hemwe mlingulongozwa na Muhe Yelile, mumlonjele munhu ayo mholemhole yawe goya, ila milolele mleche namwe kujezigwa.
GAL 6:2 Midwiche mhomholo za hemwe kwa hemwe, kwa kudita ahyo mokweneza malajizo ga Kilistu.
GAL 6:3 Munhu wone yewone heye ndo chinhu, na aku hawele chinhu, munhu ayo kangihada yuye.
GAL 6:4 Ila chila yumwe na yelole goya vyoyalingudita heye yuye. Wone uwe unojile, lelo kanguweza kona lutogo kwa chiwalo cha gala goyaditile ne kuwa hela na chiwalo cha kiwhaniza na munhu yunji.
GAL 6:5 Mina chila munhu kochidwika mhomholo ya heye yuye.
GAL 6:6 Yalingulanguswa ulonzi wa Nguluwi na yamuhanze mlangusa wa heye kuli gala geng'ha ganojile.
GAL 6:7 Mleche kihada, Nguluwi hambe yaditilwe nhelo. Kwa vila chowanyalile wanhu ndo chowobeta.
GAL 6:8 Yalingunyala kwa kunojeza maya gehile mgati mwa heye, kobeta kubagama, ila yula yalingunyala kunojeza Muhe wa Nguluwi, kobeta kwa ayo Muhe ukomu wa mazuwa gose ne kuduma.
GAL 6:9 Lelo tuleche kutoka kudita ganojile, kwa vila tobeta mbena kuli mhela wuwula wone hatutuguniche.
GAL 6:10 Lelo chila hotupata mhumhu tuwaditile ganojile wanhu weng'ha ng'hatu wanhu wamkundile Yesu.
GAL 6:11 Mlole navyondiwandichile kwa nyandiko ng'hulu, kwa moko ga heni baha.
GAL 6:12 Wala walingugana koneka wanoga kwa mbuli ya lukuli ndo walingugana kuwakola lupichi hemwe mwinjile ikumbi. Leka waleche kugazigwa kwa chiwalo cha msalaba wa Kilistu.
GAL 6:13 Leka wala nawenjile ikumbi hawalingukunda malajizo ga Musa, ila wanguwagana hemwe mwinjile ikumbi leka wedayile chila chikoleche mlukuli lwenu.
GAL 6:14 Ila heni silingidayila chinhu choneche, ila msalaba wa Mkulu wa hetwe Yesu Kilistu kukolela awo, vinhu vyeng'ha vigazigwa kwa chiwalo cha heni, nani nangazika kwa chiwalo cha isi.
GAL 6:15 Kwinjila ikumbi ama kuleka kwinjila ikumbi haiwele chinhu, chilinguganigwa ndo kuwa chilumbigwe chinyale.
GAL 6:16 Na weng'ha walinguwinza nzila ayi kwa kikala goya na isungu kwa hewo, makundo na utambichizo wikale na hewo na kwa Waisilaeli, wawele wanhu wa Nguluwi.
GAL 6:17 Lelo kulawila sambi munhu yoneche yaleche kungaza, kwa vila ng'hovu zondilinazo mlukuli mwangu zangulajila kuta heni nda mpogozi wa Yesu.
GAL 6:18 Wang'holozangu, kunoga kwa Mkulu wa hetwe Yesu Kilistu kuwe hamwe na hemwe. Ena.
EPH 1:1 Heni Paoli ndili mtumigwa wa Yesu Kilistu kwa ligano lya Nguluwi. Ndanguwandichilani hemwe wanhu wa Nguluwi ako Efeso, muwele mtanganiche kuli kilumba na Yesu Kilistu.
EPH 1:2 Ndanguwaganilani utambichizo na kikala goya kulawila kwa Nguluwi Mhaza wa hetwe na kwa Mkulu Yesu Kilistu.
EPH 1:3 Yatogoligwe Nguluwi na Mhaza wa Mkulu wa hetwe Yesu Kilistu! Kwa vila kuli kilumba na Kilistu katutambichiza kwa kutuganila utambichizo wa Chimuhe kilanga.
EPH 1:4 Ahyo, isi naloing'hali kulumbigwa, Nguluwi nakatuhagula tuwe wa heye kuli kilumba na Kilistu leka tuwe welile tulihela wihe hali heye. Kwa chiwalo cha igano lya heye,
EPH 1:5 Nguluwi nayali yaganile kulawila mwaluko, kutigala kwa heye kota wanage kukolela Yesu Kilistu. Ndo vyoyaganile na chimnojeze.
EPH 1:6 Lelo tumtogole Nguluwi kwa chiwalo cha utambichizo wa heye uwele na ukulu woyatupele hela, kwa kukolela mwanage yamganile!
EPH 1:7 Mina kwa danda ya heye Kilistu hetwe twangilejeha, kuta twangusilwa gehile ga hetwe. Ndo vyouwele ukulu wa kunoga kwa Nguluwi,
EPH 1:8 yatupele bwelele! Kwa luhala na nyhala za heye zeng'ha.
EPH 1:9 Na Nguluwi katuzelesa gala ga heye gonayavisile, go yaganile na kudita. Nakanojezwa na kugana kudita kuli Kilistu.
EPH 1:10 Ago gokoleka mazuwa gala Nguluwi yawichile, mhela wone ufiche ndokungajiza hamwe vilumbigwe vyeng'ha na chila chinhu kilanga na kuli isi, Kilistu kowa mkulu wa vinhu avyo vyeng'ha.
EPH 1:11 Vinhu vyeng'ha navikoleka kota Nguluwi navyoyaganile, na Nguluwi yatuhagule hetwe tuwe wa heye, kukolela Yesu Kilistu kota navyoyaganile, nakagana ahi kulawila mwaluko.
EPH 1:12 Lelo hetwe tulongole kitumbila Kilistu twangulapigwa kumtogola Nguluwi kwa mbuli ya ukulu wa heye!
EPH 1:13 Na hemwe kahi wanhu hamuwele Wayahudi, namuuhulika usenga ukomya kwa Mbuli Inojile iwagalileni ulohozi. Namumkunda Kilistu, na Nguluwi nakawawika ulajilo hemwe kwa kilumba na Kilistu, muwe wanhu wa heye kwa kuwapani yula Muhe Yelile yoyalagane na hetwe kutugalila.
EPH 1:14 Ayo Muhe ndo kotawiza kupegwa geng'ha gala ga Nguluwi yalonjile kuwegalila wanhu wa heye, na mbuli ayi yangutawiza kota Nguluwi kowadita welejehe ng'hatu weng'ha wawele wa heye. Lelo tumtogole Nguluwi kwa ukulu wa heye!
EPH 1:15 Kwa chiwalo acho, kulawila hony'uliche mbuli ya makundo ga hemwe kwa Mkulu Yesu, na igano lya hemwe kwa wanhu weng'ha wa Nguluwi.
EPH 1:16 Silechile ng'oo kuta malumbo Nguluwi kwa chiwalo cha hemwe. Ndanguwakumbuka kuli kulanda kwa heni,
EPH 1:17 leka Nguluwi wa Mkulu wa hetwe Yesu Kilistu, Mhaza yawele na ukulu, yawape Muhe wa heye yowapa luhala na kuwagubulilani leka mumzele goya Nguluwi.
EPH 1:18 Ndangumlanda Nguluwi yawadite mvizele goya, ula utumbilo woyachemeleni na ukulu wa heye ula woyawawichile wanhu wa heye.
EPH 1:19 Muweze kuvizela vyoyawele na ludali luwele lukulu ng'hatu kwa chiwalo cha hetwe wotulingukunda. Ludali alo, lwangudita mijito mgati mwa hetwe ndo kiwhana na ludali lula lukulu ng'hatu.
EPH 1:20 Imzilipule Kilistu kuli wabagame, nakamkalichiza nzingo ya kudilo kuwele honhu hake ha ulongozi kilanga.
EPH 1:21 Ako kilanga, Kilistu kangulongoza hali chila undewa na ludali na ukulu na kolongoza hali chila ukulu ulinguhega na chila itagwa lilinguchemigwa kuli isi ayi na kuli isi ilinguya.
EPH 1:22 Nguluwi kamuwika Yesu hali ludali lwa vinhu vyeng'ha, na kumuwika kuli chilundo cha wanhu wa Nguluwi yawe mutwi wa chilundo cha wanhu walingumkunda Kilistu.
EPH 1:23 Chilundo cha wanhu wa Nguluwi ndo lukuli lwa Kilistu, na kwenela kwa heye, yalingweneza vinhu vyeng'ha chila honhu.
EPH 2:1 Katali hemwe namwali kota mbagame kwa chiwalo cha wihe na gehile ga hemwe.
EPH 2:2 Mhela wula na mikala mli wihe na gehile na kuwinza nzila zihile za isi ayi, kota vila Mkulu wa gehile yawele na ludali lwa muulanga. Mkulu wa gehile ndo Limazoga muhe yawele nguwalongoza sambi wanhu hambe wamuwinze Nguluwi.
EPH 2:3 Na hetwe natwe tweng'ha na twali kota hewo wanji, kikala kwa maya gehile gali mgati mwa hetwe na kudita hela mbuli zila lukuli na luhala lwetu zilingugana. Hetwe natiwhana na hewo, na kota vila vyotuwele natuganigwa kubochela kuzudila kwa Nguluwi.
EPH 2:4 Naye Nguluwi nayali na isungu ng'hatu. Nakatugana kwa igano lyohambe liwazigwe.
EPH 2:5 Lelo hanga natwali tuwele tubagame kwa chiwalo cha gehile, nakatudita tuwe wakomu hamwe na Kilistu. Kwa kunoga kwa Nguluwi hemwe mloholigwa.
EPH 2:6 Kwa kilumba na Kilistu Yesu, Nguluwi na katuzilipula hamwe na heye, tikale hamwe na heye kilanga.
EPH 2:7 Nakadita aga kulajila mhela ula ukulu wa utambichizo wa heye yoyatupele kwa kunoga kuli kilumba kwa hetwe na Kilistu Yesu.
EPH 2:8 Mina kwa kunoga kwa Nguluwi, mloholigwa kwa makundo. Makundo ago hagalawile na kigayila kwa hemwe, ila ndo ndolendole za Nguluwi.
EPH 2:9 Na hambe lilawile na madito ga hemwe baho, yaleche munhu yoneche kidayila chinhu.
EPH 2:10 Hetwe twa wana wa heye Nguluwi, na kilumba na Kilistu Yesu, nakatulumba kwa chiwalo cha kikala kwa madito ganojile goyawichile tugadite.
EPH 2:11 Mleche kusemwa aho katali, hemwe mwali hamzelele Nguluwi, namchemigwa “Hawenjile ikumbi” Na Wayahudi wawele ngichema, “Wenjile ikumbi,” Kwa chiwalo cha chikoleche mlukuli lwao, kwa moko ga wanhu kulajila kota ndo ulajilo wa wamwe wa wanhu wa Nguluwi.
EPH 2:12 Kahi mkumbuche mhela ula, hemwe namwali hamzelele Kilistu, hemwe nambaguligwa na wanhu wa Isilaeli, mwali wajenzi kwa vila mwali hela chinhu choneche cha kudita kuli malagano na Nguluwi. Namwikala kuli isi ayi aku mlihela utumbilo na kota wanhu hawamzelele Nguluwi.
EPH 2:13 Aho katali, namwali kutali kwa kumzela Nguluwi, ila sambi kwa chiwalo cha kilumba na Kilistu Yesu, hemwe migaligwa habehi kwa danda ya Kilistu.
EPH 2:14 Leka Kilistu yuye katigalila kikala goya kwa kuwadita Wayahudi na wanhu hawawele Wayahudi kuwa nhanzi imwe. Kwa kulavya nhambiko lukuli lwa heye nakosa ung'honyo hali hewo nauwele kota lukanzi uwabagule.
EPH 2:15 Nakosa gala Malajizo hamwe na vihendo vyake, leka yawadite Wayahudi na wanhu hawawele Wayahudi wawe chinhu chimwe kwa kilumba na heye, kwa kudita ahyo nakachigala kikala goya.
EPH 2:16 Kwa kaudumya lukuli lwa heye mumsalaba, Kilistu nakadumya ung'honyo wa hewo, nakazihanyisa nhanzi azo ziwe kota lukuli lumwe, na kuzihanyisa na Nguluwi.
EPH 2:17 Leka, Kilistu nakoya nakaidamla Mbuli Inojile ya kikala goya kwa hemwe wanhu wohamuwele Wayahudi muwele kutali na Nguluwi, na kahi kwa Wayahudi wawele habehi na Nguluwi.
EPH 2:18 Ahyo, kwa kukolela Kilistu, hetwe tweng'ha, Wayahudi na wanhu hawawele Wayahudi, twangukundigwa kumlutila Mhaza kwa Muhe Yelile yumwe.
EPH 2:19 Lelo hemwe hamuwele wajezi kahi, na hamuwele wanhu wa kunze. Hemwe mwa wanhu wanji hamwe na wanhu wa Nguluwi, na mwa wanhu wa nhanzi ya Nguluwi.
EPH 2:20 Na hemwe namwe vivila mzenjigwa mchanya mwa msisi uwichigwe na watumigwa na waloli, na heye Kilistu Yesu yuye ndo kota iganga ikulu lilingibatilila ng'handa.
EPH 2:21 Kukolela heye ng'handa yeng'ha yangibatililwa hamwe na kukula na kuwa Ng'handa yelile ng'hulu ya Nguluwi kwa chiwalo cha Mkulu.
EPH 2:22 Kwa kilumba na heye, vivila hemwe namwe mwanguzenjigwa hamwe na weng'ha wanji, muwe hakikala Nguluwi kukolela Muhe wa heye.
EPH 3:1 Kwa mbuli ayi, heni Paoli nda mchinweng'ho kwa vila nda chitumagwa wa Yesu Kilistu kwa chiwalo cha hemwe hamuwele Wayahudi, ndangumlanda Nguluwi.
EPH 3:2 Ndangukomya mina muhulika kota Nguluwi kwa kunoga kwa heye, nakanipa mijito ayi ndiwakolele hemwe.
EPH 3:3 Nguluwi nakangubulila ndiizele mbuli ayi ivisigwe, kota navyondongole kwandika kwa uchefu mbuli ayi,
EPH 3:4 homsoma goya gala gonyandiche, moweza kuvizela ndaze vyondiizelele mbuli ayo ivisigwe ya Kilistu.
EPH 3:5 Katali wanhu nahawagubulilwe mbuli ayi ivisigwe, ila lelo Nguluwi kawagubulila watumigwa na waloli wa heye welile kwa kukolela Muhe Yelile.
EPH 3:6 Mbuli ivisigwe ndo ayi, kukolela Mbuli Inojile wanhu hawawele Wayahudi na Wayahudi wangubochela hachefu kwa gala Nguluwi yawapele wanhu wa heye, weng'ha wanguwa lukuli lumwe na wangubochela hamwe ilagano lilila lya Nguluwi kukolela Kilistu Yesu.
EPH 3:7 Heni nanditigwa chitumagwa wa Mbuli Inojile kwa utambichizo wa uyeng'ha woyamhele Nguluwi, kwa ludali lwa heye lukulu.
EPH 3:8 Heni nda mdodo kwa wanhu weng'ha wa Nguluwi, ila kamha kunoga kwa heye, leka ndiwadamlile wanhu hawawele Wayahudi lufufu lwa Kilistu hambe uwazigwe,
EPH 3:9 na kuwadita wanhu waizele mbuli ya Nguluwi ivisigwe vyoilingukola mijito. Nguluwi yawele mlumba wa vinhu vyeng'ha nakaivisa mbuli ayo kulawila katali,
EPH 3:10 kwa chiwalo acho, kukolela chilundo cha wanhu walingumkunda Kilistu, wakulu na wawele na ukulu wa kilanga wauzele luhala lwa Nguluwi luli vinji.
EPH 3:11 Nguluwi nakadita ahyo kota vyoyaganile mazuwa gose kwa kukolela Yesu Kilistu Mkulu wa hetwe.
EPH 3:12 Lelo kwa kilumba na Kilistu na kwa makundo kwa heye, hetwe twangujeza kumlutila Nguluwi ne kudumba.
EPH 3:13 Ahyo, ndangukulandani mleche kugozola kwa chiwalo cha magazo gondilingugapata kwa chiwalo cha hemwe, mina ndangudita ahyo kwa chiwalo cha ukulu wa hemwe.
EPH 3:14 Kwa chiwalo acho, ndangumfugamila Mhaza,
EPH 3:15 yawele chaluchizo cha nhanzi zeng'ha muisi na kilanga kangubochela itagwa lya heye litanganiche.
EPH 3:16 Ndangumlanda Nguluwi, kota winji wa utambichizo wa heye ukulu, yawapeni kwa ludali lwa Muhe wa heye, ludali lwa kwima nzinzili mgati mwa hemwe,
EPH 3:17 na heye Kilistu yekale mnhumbula ya hemwe kwa makundo. Ndangumlanda muwe na mizabi na msisi kuli igano.
EPH 3:18 Leka mvizele hamwe na wanhu wa Nguluwi vila igano lya Kilistu vyolilingwenela kwa ugazi na ulefu, kwa pima na fudi.
EPH 3:19 Ena, muwe mvizelele igano lya Kilistu liwele ngupuluta luhala lweng'ha, mmemezwe ng'hatu ukulu weng'ha wa Nguluwi.
EPH 3:20 Tumtogole Nguluwi, kwa mong'ho wake ulingudita mijito mgati mwa hetwe koweza kudita mbuli ng'hulu kusinda gala tulinguweza kulanda ama kijesa,
EPH 3:21 Nguluwi yatogoligwe kukolela chilundo cha wanhu walingumkunda Kilistu na kukolela Yesu na kuli lulelo lweng'ha, mazuwa gose! Ena.
EPH 4:1 Lelo heni nda mnweng'wa kwa vila ndangumfugamila Mkulu, ndanguwalanda mikale kota Nguluwi vyoyalinguwagana mikale.
EPH 4:2 Mhela weng'ha msindamale, liholile na muwele na ubetezo, mwimilile hemwe kwa hemwe kwa igano.
EPH 4:3 Mdite ibamba lya kuwika chigota chilingigaligwa na Muhe kwa kukolela kikala goya kulinguwadita muwe hamwe.
EPH 4:4 Kuna lukuli lumwe lwa Kilistu na Muhe Yelile yumwe, kota vila utumbilo umwe womchemelwe na Nguluwi.
EPH 4:5 Kuna Mkulu yumwe, makundo gamwe na ubatizo umwe.
EPH 4:6 Kuna Nguluwi yumwe na Mhaza wa weng'ha, yawele Mkulu wa weng'ha, kangudita mijito yeng'ha na kuli geng'ha.
EPH 4:7 Na chila yumwe wa hetwe kapegwa ndolendole kota vyoyapegwe na Kilistu.
EPH 4:8 Kota vyogawele ngulonga Gandichigwe, “Vyo yakwinile kwa Nguluwi kuchanya ng'hatu, nakawahola wanweng'hwa wenji, nakawapa wanhu ndolendole.”
EPH 4:9 Lelo vyoiwele ngulojigwa, “Na kakwina mchanya,” Yangulonga ndaze? Yangulonga kuta tandi nakedulika mbaka hasi ng'hatu muisi.
EPH 4:10 Ahyo, yula yaduliche hano muisi ndo yaheluche kilanga leka yaimemeze isi.
EPH 4:11 Ndo yawapele wanhu ndolendole, nakawahagula wanhu wanji wawe watumigwa, wanji waloli, na wanji wadamla Mbuli Inojile na wanji wadimi na ulangusa.
EPH 4:12 Nakadita ahyo leka yawawiche goya wanhu weng'ha wa Nguluwi kwa chiwalo cha mijito ya Kilistu kuli kuwimiza lukuli lwa Kilistu.
EPH 4:13 Na ahyo hetwe tweng'ha twilumbe tuwe hamwe kuli makundo na kumzela Mwana wa Nguluwi, tuwe wanhu wawele na makundo gemile ng'hatu kota Kilistu vyoyawele.
EPH 4:14 Lelo hatuwa kahi kota wana wadodo, kutigaswa na nhigu ya mazi na kutigaswa ako na ako kwa mbeho kwa malanguso walingwaluka wanhu wahadi.
EPH 4:15 Ila, wone tibatilile mbuli zilingukomya kwa nhumbula ya igano, towa tukulile mgati mwa heye yawele mutwi, ayo ndo Kilistu.
EPH 4:16 Hali ulongozi wa heye vitomo vyeng'ha vya lukuli vyangibatana hamwe, na lukuli lweng'ha lwangibatililwa hamwe kwa vitomo vyake. Ahyo wone chila chitomo wone chidite mijito ya heye goya, lukuli lweng'ha lwangukula na kizenga kuli igano.
EPH 4:17 Lelo kwa itagwa lya Mkulu, ndanguwalonjelani, mleche kulutilila kikala kahi kota wanhu wohawamzelele Nguluwi, wawele na Majesa ga upoka,
EPH 4:18 na nyhala za hewo za kutitu. Wakutali na ukomu yalingulavya Nguluwi kwa chiwalo cha upoka wa hewo na kwa chiwalo cha luhala lwa hewolutiliwale.
EPH 4:19 Wanhu wajilila na wahela soni, wenjila muli uhadi na mazuwa geng'ha wangudita wihe.
EPH 4:20 Ila hemwe nahamumzelele Kilistu.
EPH 4:21 Namuhulika goya mbuli za heye, namwe namlangusa goya kukomya uwele kuli Yesu.
EPH 4:22 Namlangusa muuleche awu wunhu wa hemwe wa katali, ulingiwifya kwa maya ga udesi.
EPH 4:23 Muhe wa hemwe na nyhala za hemwe zigaluche.
EPH 4:24 Muuvale wunhu wa sambi uwele ulumbigwe kwa kukomya kiwhana na Nguluwi kuli kutanganika na kwela.
EPH 4:25 Kwa ahyo, mleche kulonga udesi. Hemwe mweng'ha mlonje mkomya na wayenu, kwa vila hetwe tweng'ha twa wanhu wa lukuli lumwe lwa Kilistu.
EPH 4:26 Wone mzudile, mleche kulongozwa na heye kudita gehile na kahi mleche kikala mzudile misi yeng'ha.
EPH 4:27 Mleche kulipa Limazoga mhumu.
EPH 4:28 Munhu yawele yohiza, yaleche kuhiza kahi, ila yakole mijito kwa moko ga heye ganojile yapate chinhu cha kuwapa wazunwa.
EPH 4:29 Mbuli yihile ileche kulawa muli milomo ja hemwe, ila mlonje ulonzi unojile ulinguwazenga wanhu, leka goumlingulonga, yawatanze wanhu walinguwahulichizani.
EPH 4:30 Mleche kumzudiza Muhe Yelile wa Nguluwi, kwa vila kukolela heye, hemwe muwichigwa ulajilo wa Nguluwi kwa chiwalo cha zuwa lya kugomboligwa.
EPH 4:31 Lelo mleche kizudila, mleche kizudiza, iyowe na maligo. Mleche wihe weng'ha!
EPH 4:32 Ila miwonele isungu na mitanze, miyuse gehile hemwe kwa hemwe, kota Nguluwi vyoyawosele gehile kukolela Kilistu.
EPH 5:1 Kwa vila hemwe mwa wana waganigwe na Nguluwi, miwhane na heye.
EPH 5:2 Mikale kwa kigana, kota Kilistu vyoyatuganile na kuulavya ukomu wa heye kota nhambiko, ilingununyilila goya na nhambiko ilingumnojeza Nguluwi.
EPH 5:3 Kwa vila hemwe mwa wana wa Nguluwi, ung'hondwa ama wihe weng'ha ula ama ubuhu, havilinguganigwa kulonjigwa hali hemwe. Mina mbuli azi hazinojile kwa welile wa Nguluwi
EPH 5:4 Mleche kulonga ulonzi ulingubasa soni, gaupoka, aga geng'ha haganojile kwa hemwe mwemwe. Inoga mlonje ulonzi wa kumtogola Nguluwi.
EPH 5:5 Ahyo mvizele ng'hatu kota mng'hondwa ama munhu mdesi ama mhadi ama mwavu, mhadi kangiwhana na munhu yalingufugamila jimalukolo, ama munhu yoneche kota ayo, houhalila hebu undewa wa Kilistu na wa Nguluwi.
EPH 5:6 Mleche kukunda kubadigwa na munhu kwa ulonzi wa upoka, kwa vila kuzudila kwa Nguluwi kowoyela wanhu wala hambe wamkunde.
EPH 5:7 Lelo mleche kitanza na hewo.
EPH 5:8 Katali hemwe namwali kutitu, ila sambi mwa kuli lumuli kwa kilumba na Mkulu ahyo mikale kota wana wa lumuli.
EPH 5:9 Mina lumuli alu lwanguwegalila wanhu wawe wanojile na watanganiche na kukomya.
EPH 5:10 Mjeze kuvizela gala gawele ngumganiza Mkulu.
EPH 5:11 Mleche kudita gehile, galingulawa kuli giza, ila mgalavye hazelu.
EPH 5:12 Mbuli iwele nguditigwa kwa kivisa yanguwa soni ne kuisimila.
EPH 5:13 Na mbuli ila iwele nguditigwa kuli lumuli, kukomya kwa heyo kulajilwa,
EPH 5:14 kwa vila lumuli lwangudita mbuli zeng'ha zoneche. Ndo mina Gandichigwe gangulonga, “Ulilimche hegwe youwasile, uzilipuche kuli wanhu wabagame, na heye Kilistu kokumwesela.”
EPH 5:15 Lelo milolele vyomlingikala. Mleche kikala kota wapoka, ila mikale kota wanhu wawele na luhala.
EPH 5:16 Mtumiye goya mhela muwele nawo, kwa vila mazuwa aga geha.
EPH 5:17 Mleche kuwa wapoka, ila mjeze kuvizela gala goyalingugana Mkulu.
EPH 5:18 Mleche kugala ujimbi, mina awo wowalumiza, ila mmemezwe na Muhe Yelile.
EPH 5:19 Milonjele ulonzi wa kidekuliza, nzimbo na nhelo za kunhumbula, mmwimbile na mumtogole Mkulu mnhumbula ya hemwe.
EPH 5:20 Mazuwa geng'ha mumtogole Mhaza Nguluwi kwa itagwa lya Mkulu wa hetwe Yesu Kilistu.
EPH 5:21 Chila yumwe yamhulichize miyage kota vyayalingumhulika Kilistu.
EPH 5:22 Hemwe wadala muwahulichize walume wa hemwe kota vyomulingumhulichiza Mkulu.
EPH 5:23 Mina mlume ndo mutwi wa mchewake kota Kilistu vyoyawele mutwi wa Ng'handa ya Nguluwi, na heye Kilistu Mlohozi yuye kachigombola chilundo cha wanhu walingumkunda Kilistu nawo ndo lukuli lwake.
EPH 5:24 Wadala wawahulichize walume wa hewo kota chilundo cha wanhu walingumkunda Kilistu vyochilingumhulichiza Kilistu.
EPH 5:25 Namwe walume, muwagane wadala wa hemwe kota Kilistu vyoyachiganile chilundo cha wanhu walingumkunda Kilistu, mbaka kuulavya ukomu wa heye kwa chiwalo cha chilundo cha wanhu walingumkunda Kilistu.
EPH 5:26 Nakadita ahyo leka kwa ulonzi wa heye, yaulavye kwa Nguluwi, hala yoyalihovuje kuli mazi,
EPH 5:27 leka, yepatile heye chilundo cha walingukunda wawele welile na wanojile ng'hatu, chilundo cha wanhu walingumkunda Kilistu wawele hela chinhu chihile, ama udesi ama wihe unji, ila chiwele chelile chilihela wihe.
EPH 5:28 Vivila walume wawagane wadala wa hewo kota ng'huli za hewo. Mlume yalingumgana mchewake kangigana yuye.
EPH 5:29 Kuduhuli munhu yawele nguulema lukuli lwa heye, ila kangulisa na kuulolela kota Kilistu vyoyalinguchiditila chilundo cha wanhu walingumkunda Kilistu,
EPH 5:30 mina hetwe tweng'ha twa vitomo vya lukuli lwa heye.
EPH 5:31 Kota Maandiko Matakatifu vyogalingulonga, “Ndo mina mlume kangumlekaga mhaza na mayake, na kilumba hamwe na mdala wa heye, nawo weli wowa lukuli lumwe.”
EPH 5:32 Uviso awu ndo lukulu, ila heni ndangulonga mbuli ya chiwalo cha Kilistu Yesu na chilundo cha wanhu walingumkunda Kilistu.
EPH 5:33 Ila chila mlume yamgane mchewake kota vyoyalingigana yuye, na chila mdala yamhulichize mlume wa heye.
EPH 6:1 Hemwe mowana, muwahulichize wahaza wa hemwe kota vyoyalingugana Mkulu, kwa vila kwa kudita ahyo, ndo chinhu chinojile.
EPH 6:2 “Wahulichize mhaza na mayako,” Ama ndo mzilo wa mwaluko kuli ilagano,
EPH 6:3 “Leka wikale mihela minji lukami muisi.”
EPH 6:4 Hemwe namwe wahaza, mleche kuwazudiza wana wa hemwe, muwalele kwa kuwalangusa na kuwapa malanguso ga Mkulu wa hetwe Yesu Kilistu.
EPH 6:5 Hemwe wapogozi muwahulichize wakulu wa hemwe wa hano muisi, kwa nhumbula ya hemwe yeng'ha, kota vyomlingumhulichiza Kilistu.
EPH 6:6 Mleche kinojeza mhela mlingudita mijito hali hewo, ila mdite mijito kota vitumagwa wa Kilistu, mdite kwa nhumbula za hemwe zeng'ha kota Nguluwi vyoyalingugana.
EPH 6:7 Homdita mijito, mdite kwa usangalalo kota mwangumditila Mkulu, na haiwele kota mwanguwakolela mijito wanhu.
EPH 6:8 Mkumbuche mkulu kowapa ndolendole wanhu weng'ha, wapogozi ama welejehe kwa gala ganojile walingudita.
EPH 6:9 Namwe wakulu mlinguditilwa mijito, muwaditile gagala wapogozi wa hemwe mleche kuwadumbiza, mina hemwe mvizela hemwe na wapogozi wa hemwe mna Mkulu yumwe yawele kilanga na heye kahela ubagulo.
EPH 6:10 Hamba ndangukuganani mikale goya kwa kilumba na Mkulu na ludali lwake.
EPH 6:11 Mvale silaha zoyawapele Nguluwi yaweze kulema nzila zihile za Limazoga.
EPH 6:12 Mina hatulingitowa na wanhu, ila twangitowa na ludali lwihile luwele kilanga, vilongozi wakulu na ludali lwihile lwa jiza lwa mazuwa aga.
EPH 6:13 Ahyo mvale silaha zompegwe na Nguluwi, leka zuwa ihile hoikuya muweze kitowa na mng'honyo na homsinda kitowa na heye, mowa mng'hali mkamale.
EPH 6:14 Ahyo, mikale goya, mvale isali lya kukomya mchuno mwa hemwe, utanganicho uwe kota ivalo lya kidumbiza mmambaga za hemwe,
EPH 6:15 na muwadamlile wanhu Mbuli Inojile ya kikala goya kota vyomlinguvala makwamba.
EPH 6:16 Mhela weng'ha mibate ngao ya makundo, leka muweze kuputa milapi ja chiluli cha yula mwihe.
EPH 6:17 Na mbochele ulohozi kota kofia ya hemwe ya chuma, na ulonzi wa Nguluwi kota ipanga wompegwe na Muhe Yelile.
EPH 6:18 Mdite aga geng'ha kwa kulanda, mumlande Nguluwi yawatanze. Mhela weng'ha kota Muhe Yelile vyoyalinguwalongoza. Ahyo mlutilile kulanda ne kugozola, mazuwa geng'ha muwalandile wanhu wa Nguluwi.
EPH 6:19 Vivila mndandile heni, leka Nguluwi yamhe chakulonga, leka ndoje ne kudumba wanhu wavizele uviso wa Mbuli Inojile.
EPH 6:20 Mina heni nda msenga wa Mbuli Inojile mbele mchinweng'ho. Mndandile ndamle ne kudumba Mbuli Inojile kota vyondilinguganigwa.
EPH 6:21 Tukiko, mng'holozetu mganwa na chitumagwa yatanganiche kuli mijito ya Mkulu, kowalonjelani mbuli za heni ahyo movizela chondilingudita.
EPH 6:22 Ahyo ndangumlajiza kwa hemwe leka yawalonjele mbuli za hetwe na yawakangaze nhumbula.
EPH 6:23 Ndanguwaganilani kikala goya na makundo hemwe wang'holozangu, hamwe na ligano lilingulawa kwa Nguluwi Muhaza na ulingulawa kwa Mkulu Yesu Kilistu
EPH 6:24 Ndangumlanda Nguluwi yawape utambichizo wanhu weng'ha walingumgana Mkulu wa hetwe Yesu Kilistu kwa ligano halilingumala.
PHI 1:1 Heni Paoli na Timoteyi, vitumagwa wa Yesu Kilistu, twanguwandichilani hemwe wanhu wa Nguluwi ako Filipi muwele milumbile na Yesu Kilistu, na kahi, vilongozi na watanzi wa chilundo cha wanhu walingumkunda Kilistu.
PHI 1:2 Twanguwaganilani mbochele kunoga na kikala goya kulawa kwa Nguluwi Mhaza na kwa Mkulu Yesu Kilistu.
PHI 1:3 Ndanguta malumbo Nguluwi, chila mhela hondiwakumbukani,
PHI 1:4 na chila mhela wombele nguwalandilani hemwe mweng'ha, ndangulanda kwa usangalalo,
PHI 1:5 kwa vila vyomilumbile hamwe na heni kuli kudamla Mbuli Inojile kulawila mhela ula wa mwaluko mbaka lehano.
PHI 1:6 Lelo ndanguvizela ng'hatu kota Nguluwi nayaluche mijito ayi inojile mgati mwenu, koilutiliza mbaka yasinde kuli zuwa lya kuhiluka kwa Yesu Kilistu.
PHI 1:7 Vivila kota vyondilinguganigwa kuwajeselani hemwe mweng'ha, kwa vila hemwe mwa mnhumbula ya heni. Hemwe mwa hamwe na heni kuli mhumu yoyamhele Nguluwi ya kuigombela Mbuli Inojile, wone ndiwe mchinweng'ho ama ndiwe ndilejehe.
PHI 1:8 Mina Nguluwi ndo mlolezi wa heni, ndangulonga ndikomya, vila vyombele na maya ga kugana kuwonani, kwa igano lilingulawa kwa Yesu Kilistu.
PHI 1:9 Ndangumlanda Nguluwi, igano lyenu lyonjezeche ng'hatu, muwe na uwanzi wa kukomya na luhala lweng'ha,
PHI 1:10 leka muweze kuhagula mbuli iwele inojile ng'hatu. Aho ndo homuwa mwelile na mlihela nongwa yoneche yila kuli zuwa lila lya kuhiluka kwa Kilistu.
PHI 1:11 Hamba, ukomu wa hemwe wowa umemile mbuli zinojile zila zilingumnojeza Nguluwi, zilingulawa kwa Yesu Kilistu kwa mbuli ya ukulu na kumtogola Nguluwi.
PHI 1:12 Wang'holozangu, ndangugana mvizele kota mbuli zeng'ha zindawile zinhanza ng'hatu kulutilila kudamla Mbuli Inojile.
PHI 1:13 Kwa ago geng'ha, wamizi weng'ha wa ng'handa ya mndewa hamwe na wanji wavizela kota nda mchinweng'ho kwa vila heni ndangumkolela mijito Kilistu.
PHI 1:14 Nakuno heni kuwa mchinweng'ho, kuwadita wang'holozangu wenji wetumbile ng'hatu Mkulu, na kuweza ng'hatu kudamla usenga wa Nguluwi ne kudumba.
PHI 1:15 Ndangukomya, wamwe wa hewo wangumdamla Kilistu kwa vila wana fihi na ndo wanhu wawele kilewa, ila wanji wangumdamla Kilistu kwa kugana kuwatanza wanhu.
PHI 1:16 Awa wangudita ahyo kwa igano, kwa vila wavizela kota Nguluwi kanipa heni mbuli ayi ya kuigombela Mbuli Inojile.
PHI 1:17 Wala wanji wangumdamla Kilistu kwa kudadambala na haiwele kwa nhumbula inojile, wochijesa kota wonyonjezela magazo ga heni mchinweng'ho.
PHI 1:18 Haiwele chinhu! Heni ndangusangalala wone wanhu wangudamla usenga wa Kilistu kwa chila nzila, iwe kwa fihi ama kwa kukomya. Kahi ndolutilila kusangalala.
PHI 1:19 Kwa vila ndivizela kota kwa kulanda kwa hemwe na kwa utanzi ulingulawa kwa Muhe wa Yesu Kilistu, ndoloholigwa.
PHI 1:20 Chondilingugana ng'hatu na kitumbila ndo kota kuduhu chinhu chimbasa soni, leka ndokwima nzinzili mazuwa gose na sambi ng'hatu hondidamla leka kuli ukomu wa heni weng'ha, hondiwa mkomu ama mbagame, ndimdite Kilistu yatanganiche.
PHI 1:21 Kwa heni kuwa mkomu ndo Kilistu, na kubagama ndo chonolo ng'hatu.
PHI 1:22 Wone kwa kuwa mkomu ndoweza kudita mijito iwele na chonolo ng'hatu, lelo sivizelele nyhagule choni!
PHI 1:23 Ndiyenu ndangukwejigwa kuno na kuno kwa azo mbuli mbili. Ndangugana kuleka ukomu awu nakuluta kikala hamwe na Kilistu, kwa vila mbuli ayo inoga ng'hatu.
PHI 1:24 Ila ndo mbuli itanganiche ng'hatu kwa hemwe wone ndiwe ndilutilila kikala.
PHI 1:25 Ndangukomya kuli mbuli ayi, ahyo ndivizela kota ndolutilila kikala hamwe na hemwe mweng'ha, leka ndiwatanze makundo na usangalalo konjezeka.
PHI 1:26 Lelo vyondiwa hamwe na hemwe kahi, mowa na chiwalo cha kona lutogo kwa heni, kuli kilumba kwa hemwe na Yesu Kilistu.
PHI 1:27 Lelo mbuli itanganiche ndo kota vihendo vya hemwe viwhane na vyoilingugana Mbuli Inojile ya Kilistu, leka wone njeze kuya kwa hemwe ama ndemwele, igana nyhuliche hela kota mwangwima nzinzili muwa na nhumbula imwe, kahi kwa nhumbula ayo imwe, mwangitowa ngondo kwa chiwalo cha makundo galingulawa mli Mbuli Inojile.
PHI 1:28 Mleche kuwadumba wawehilwe hemwe, ila muwe mwimile nzinzili na acho chowalajila kota wosumika, kwa vila Nguluwi ndo yalingudita ago.
PHI 1:29 Mina hemwe mpegwa mhumu na Nguluwi ya kumditila Kilistu, haiwele hela kumkunda ila kahi kwa kugazigwa kwa chiwalo cha heye.
PHI 1:30 Sambi milumba hamwe na heni kuli kitowa ngondo ya kulewela Mbuli Inojile. Ngondo ayi ndo yila muyonile ndichitowa aho mwaluko na ndo mlinguhulika nding'hali ndichitowa mbaka sambi.
PHI 2:1 Ndaze, kikala kwa hemwe kuli kilumba na Yesu Kilistu kwanguwakangaza? Ndaze, igano lya heye lyanguwahembuliza? Ndaze, mwahamwe na Muhe Yelile na muwele na nhumbula inojile na kiwonela isungu?
PHI 2:2 Lelo mndite heni sangalale ng'hatu kwa kuwa na majesa ga uhamwe, igano limwe, nhumbula imwe na mchijesa hamwe.
PHI 2:3 Mleche kudita chinhu choneche kwa fihi ama kwa kidaya hela, ila kwa kuholondala na igano hemwe kwa hemwe, na chila yumwe yamone miyage kota katanganika kusinda heye yuye.
PHI 2:4 Chila munhu yaleche kupala mbuli zoyalingugana heye yuye hela, ila yalole mbuli zowalingugana wayage.
PHI 2:5 Muwe na majesa gagala kota yawelenago Yesu Kilistu.
PHI 2:6 Heye vyoyali, nayali Nguluwi ng'hatu, Ila hejesile kota kula kiwhana na Nguluwi, ndo chinhu cha kibatilila.
PHI 2:7 Ila kwa kugana kwa heye yuye, na kagaleka ago geng'ha, nakedita kota vyoyawele chitumagwa, nakavumbuka kota munhu, kota vila wanhu wanji vyowalinguvumbuka.
PHI 2:8 Nayali liholile na kuhulichiza geng'ha mbaka kabagama, ena, kabagama mumsalaba.
PHI 2:9 Kwa mbuli ayo, Nguluwi nakamkwiniza kuchanya ng'hatu, nakapegwa itagwa liwele likulu kusinda matagwa geng'ha.
PHI 2:10 Leka, kwa kutanganika kwa itagwa lya Yesu, vilumbigwe vyeng'ha kilanga na mu isi na kuli isi ya wabagame, vyomfugamila heye,
PHI 2:11 Na chila lumyango nalulonje, Yesu Kilistu ndo Mkulu, kwa ukulu wa Nguluwi Mhaza.
PHI 2:12 Lelo wang'holozangu, kota hila navyomnyhulichize mazuwa gesa vyonandali hamwe na hemwe, na sambi vyombele kutali na hemwe mlutilile kunyulichiza. Mkole mijito kwa kudumba na kukakama mlajile kwa madito ga hemwe kota mloholigwa,
PHI 2:13 kwa vila Nguluwi ndoyalingudita mijito ng'hatu mgati mwa hemwe, na kuwapa nhumbula ya kugana na ludali lwa kudita mbuli yoyalingugana heye yuye.
PHI 2:14 Mkole chila chinhu ne kung'ung'uta na kuwa hela ibamba,
PHI 2:15 leka muwe wanhu welile, walihela nongwa, kota wana walingumhulichiza Nguluwi na walingikala kuli isi yihile na wanhu wajilile. Mobunguzuka hali hewo kota nhondwe zilingumwemwesa kuulanga,
PHI 2:16 wone mibate ng'hatu usenga ulingigala ukomu. Na aho ndo heni hondiwa na mbuli ya kidayila kwa hemwe kuli zuwa hoyohiluka Kilistu, ileche kuya koneka ng'hatu kota kikangaza kwa heni na mijito ya heni nahavyajile hela.
PHI 2:17 Na wone ukomu wa heni wojidigwa uwe kota nhambiko hamwe na mijito ya hemwe ilingukundigwa, iwele nhambiko hali Nguluwi. Heni ndosangalala ng'hatu na kuwahanza hemwe mweng'ha usangalalo awo.
PHI 2:18 Hiho du namwe mwanguganigwa kusangalala na kihanza na heni usangalalo wa hemwe.
PHI 2:19 Ila ndangitumbila kwa Mkulu Yesu yondilingitumbila kota ndoweza kumlajiza Timoteyi kwa hemwe behi yiyi, leka nhumbula ya heni ihembulizwe kwa kuvizela mbuli za hemwe.
PHI 2:20 Ndahela munhu yunji kota heye yawele nguwaditila kwa nhumbula yeng'ha.
PHI 2:21 Wanji wanguditika hela mbuli za hewo wawo woleka kuditika mbuli za Yesu Kilistu.
PHI 2:22 Kwa vila hemwe mwemwe mvizela katogo ka Timoteyi navyoyakolile mijito hamwe na heni kota vila mwana na mhaza kuli kudamla Mbuli Inojile.
PHI 2:23 Ahyo, ndangitumbila kumlajiza kwa hemwe behi yiyi hondivizela vila mbuli za heni vyozindutila.
PHI 2:24 Ndangitumbila Mkulu kota heni nani ndabehi kuya kwa hemwe.
PHI 2:25 Mbona ingana kumlajiza kwa hemwe mng'holozetu Epafulodito, yawele mkola mijito myangu kuli kuigombela Mbuli Inojile ya Kilistu hamwe na heni vivila heye mtumigwa wa hemwe mumlajize yanhanze.
PHI 2:26 Kangugana ng'hatu kuya kuwonani hemwe mweng'ha, nakagaya lukami kota hemwe mhulika luzi kota nayali mtamwa.
PHI 2:27 Ena, nayali mtamwa habehi nakubagama. Ila Nguluwi nakamonela isungu, na haiwele heye yaliyeka, leka na heni kahi ndeche kuwa na usungu ukulu.
PHI 2:28 Lelo ndangugana ng'hatu kumlajiza kwa hemwe, leka hommona muwe msangalale kahi, na masinzo ga heni goche.
PHI 2:29 Lelo mbocheleni kwa usangalalo weng'ha kota mng'holozo kuli Mkulu. Mwanguganigwa kuwahulichiza wanhu wawele kota heye,
PHI 2:30 kwa vila heye nayali behi na kubagama kwa chiwalo cha mijito ya Kilistu, nakambuza ukomu wa heye leka yanhanze heni kwa gala hemwe nahamwali kuhega kunhanza.
PHI 3:1 Konjezela kwa ago, wang'holozangu, msangalale kuli kilumba na Mkulu. Hambe nhoche kuwila gala gomina nyandiche hala hamwande, mina gowatanza ng'hatu.
PHI 3:2 Milolele na awo walingudita wihe, awo wafanda kota misochi, wanhu walinguwakola lupichi kwinjila ikumbi.
PHI 3:3 Hetwe ndo wanhu wenjile ikumbi kwa kukomya, haiwele hewo, kwa vila hetwe twangumfugamila Nguluwi kwa kulongozwa na Muhe wa heye, na kidayila kuli kilumba na Yesu Kilistu. Hatulingitumbila vinhu vilingukoleka mlukuli.
PHI 3:4 Ila heni ndahawezile kitumbila mbuli azo, na wone kuna munhu yalingijesa kota koweza kitumbila mbuli azo za lukuli, heni nani ndimsumya,
PHI 3:5 heni nanyinjila ikumbi zuwa lya nane kulawila vyovumbuche, kahi heni nda munhu wa isi ya Isilaeli wa nhanzi ya Benjamini, Muebulaniya ng'hatu. Kwa chiwalo cha kibatilila malajizo ga Musa goyapegwe na Nguluwi, heni nandali Mfalisayo,
PHI 3:6 nandikangaza ng'hatu mbaka kuvigaza vilundo vya wanhu walingumkunda Kilistu. Na kwa chiwalo cha kudita mbuli zinojile, zilingigaligwa kwa kuwinza malajizo, heni ndali hela nongwa yoneche.
PHI 3:7 Ila kwa chiwalo cha Kilistu, ago geng'ha vyonandali kijesa kota ndo gamha chonolo, sambi ndangugona kota hagawele na chinhu.
PHI 3:8 Ena, hagawele ago hela, ila ndangona kota chila chinhu chaga hela, kwa chiwalo cha mbuli ng'hulu ng'hatu, ya kumzela Yesu Kilistu Mkulu wa heni. Kwa chiwalo cha heye ng'hunda kutaga kutali chila chinhu, ndigona ago geng'ha kota midohe, leka ndiwe hamwe na Kilistu,
PHI 3:9 na kilumba na heye ng'hatu. Heni kahi ndema kula koneka ndinojile hali Nguluwi, kulinguya kwa kuwinza malajizo. Ila ndangoneka kota ndinojile hali Nguluwi kwa kumkunda Kilistu, ulingulawa kwa Nguluwi kukolela makundo.
PHI 3:10 Chondilingugana hela ndo kumzela Kilistu na kuwona mong'ho wa kuzilipuka kwa heye, kilumba na heye mli magazo ga heye, na kiwhana na kuli kubagama kwa heye.
PHI 3:11 Na heni nani, ndangitumbila kota ndozilipuligwa.
PHI 3:12 Hambe ndonje kota mina fika ama ndiwa nhanganiche. Ndangulutilila kikangaza kupegwa yila ndolendole, kwa chiwalo cha heye, Yesu Kilistu kembata ndiwe wa heye.
PHI 3:13 Ndangukomya wang'holozangu, silingulonga kota mina mhegwa ndolendole ayo, ila ndangudita mbuli imwe, ndangusemwa gala gapulute na kikangaza kugebatilila gala gawele kumwando kwa heni.
PHI 3:14 Lelo ndangubilima fiche mwiso, leka mbochela yila ndolendole ya ukomu wa mazuwa gose, ndolendole ayo ndo nyhemo ya Nguluwi ya kuluta kilanga kukolela kilumba na Yesu Kilistu.
PHI 3:15 Hetwe tweng'ha tukangale kuli ukomu wa hetwe wa kilumba na Yesu Kilistu, twanguganigwa kijesa mbuli azo. Ila wone wamwe wa hemwe wangijesa vinji, lelo Nguluwi kowagubulilani mbuli ayo.
PHI 3:16 Hamwe na ago geng'ha, tulutilile kumwando kuli nzila yiyo yonatuiwinzile mbaka sambi baha.
PHI 3:17 Wang'holozangu, muwinze vyondilingudita heni, milanguse kwa wala walingikala kota ahyo, kota vyotuwalonjelani hemwe.
PHI 3:18 Nandikulonjelani mbuli ayi mala nyinji, na sambi ndanguwila kahi kwa mahozi, hana wanhu wenji wangikala kota wang'honyo wa usenga wa kubagama kwa Yesu Kilistu hala mumsalaba.
PHI 3:19 Kuduma kwa hewo ndo kuwifyigwa, wangudita kunojeza ng'huli za hewo kota ndo mlungu wa hewo, wangidayila mbuli za hewo za soni na kijesa hela mbuli za isi ayi.
PHI 3:20 Ila hetwe twa wenyeng'haye wa kilanga, na twangumlolela ng'hatu mlohozi wa hetwe Mkulu Yesu Kilistu yoye kulawa ako.
PHI 3:21 Heye kogalamla ng'huli za hetwe ziwele ng'hochele, na kuidita iwhane na lukuli lwa heye luwele na ukulu ng'hatu, kwa ludali lulula lulingumdita yaviwiche vinhu vyeng'ha hali ulongozi wa heye.
PHI 4:1 Ahyo, wang'holozangu wondilingukuganani, wondilingugana ng'hatu kukonani, hemwe muwele usangalalo wa heni na chipembelo cha kusumya kwa heni, vyomlingulapigwa kwima nzinzili kuli kilumba na Mkulu.
PHI 4:2 Ndanguwadedezani, hemwe Euwodia na Suntike, mikale kwa kihulichiza kota mwalukolo milumbile kwa Mkulu.
PHI 4:3 Nagwe mkola mijito myangu yondilingitumbila, ndangukugana uwatanze wadala awo, kwa vila wangikangaza kuli kukola mijito ja kweneza Mbuli Inojile hamwe na heni, hamwe na Kelemensi na wakola mijito wayangu weng'ha, wawele matagwa ga hewo gandichigwa kuli chitabu cha ukomu.
PHI 4:4 Lelo msangalale ng'hatu kuli kilumba kwa hemwe na Mkulu. Ndangulonga kahi, msangalale!
PHI 4:5 Uliholile wa hemwe uzeleche kwa wanhu weng'ha. Mkulu ka habehi kuya.
PHI 4:6 Mleche kuwa na lunhwinhwi kwa chinhu choneche chila, ila kwa chila mbuli, mumlande Nguluwi kwa chiwalo cha vinhu vyomlingugana, mumlande kwa kuta malumbo Nguluwi.
PHI 4:7 Na ako kikala goya kulingulawila kwa Nguluwi iwele ng'hulu kusinda nyhala za wanhu, yokwamila goya nhumbula za hemwe na nyhala za hemwe kuli kilumba na Yesu Kilistu.
PHI 4:8 Hamba wang'holozangu, mibatilile mbuli zeng'ha za kukomya, goneche galingutogoligwa, galingukundigwa na Nguluwi, goneche gawele gelile, ga kunojeza na gatanganiche.
PHI 4:9 Mgadite gala gomilanguse na kubochela kulawila kwa heni, mbuli zomuhuliche na kugona kulawa kwa heni. Na heye Nguluwi yalingutudita tikale goya, kowa hamwe na hemwe.
PHI 4:10 Kuli kilumba kwa heni na Mkulu nasangalala ng'hatu, kwa kona mwangung'humbuka kahi kunhanza. Ndema kulonga kota hamsemwile kunjesa, ila namng'hali hamonile mhumu ya kudita ahyo.
PHI 4:11 Hambe ndonje ahyo sambi kwa vila ndangugana chinhu, mina ndilangusa ndeme kugana vinhu mzidi kwa vila vyondilinavyo.
PHI 4:12 Ndivizela kikala na vinhu vinji ama kuwa hela vinhu. Ndilangusa mbuli zeng'ha, ndiwe na nzala ama kiguta, kupegwa vinji ama kuwa na vido.
PHI 4:13 Ndoweza kudita chila mbuli kwa vila Kilistu kangunipa ludali.
PHI 4:14 Leka ahyo, hemwe namdita goya kwa kunhanza kuli magazo ga heni.
PHI 4:15 Hemwe Wafilipi mvizela mwemwe baho kota mwaluko wa kudamla Mbuli Inojile, lonandali ndikuka Makedoniya, hemwe mliyeng'ha ndo muwele chilundo cha wanhu walingumkunda Kilistu mnhanzile, hemwe mliyeng'ha ndo muwele hamwe na heni kuli kubochela vinhu na kuwatanza wanji.
PHI 4:16 Aho navyombele ndigana kutanzwa kula Tesalonike namingalila utanzi, kahi nahaiwele mala imwe hela.
PHI 4:17 Haiwele hela kota ndangugana kubochela ndolendole, chondilingugana monjezelwe kuli gala geng'ha ganojile gomditile.
PHI 4:18 Lelo mina mbochela vinhu vyeng'ha vyommhele, kahi ndo vinji ng'hatu kusinda vyonganile. Ndina chila chinhu kwa vila sambi Epafulodito mina kengalila ndolendole za hemwe. Ndolendole azo ndo kota nhambiko iwele ngununyhilila goya, nhambiko iwele ngukundigwa na kumnojeza Nguluwi.
PHI 4:19 Lelo Nguluwi wa heni, kwa ukulu wa lufufu lwa heye kukolela Yesu Kilistu, kowapani vinhu vya hemwe vyeng'ha vyomlingugana.
PHI 4:20 Ukulu uwe kwa Nguluwi wa hetwe na Mhaza wa hetwe, mazuwa gose. Ena.
PHI 4:21 Ndanguwalamsani wanhu wa Nguluwi weng'ha walingumkunda Kilistu Yesu. Wang'holozangu wawele hamwe na heni hano wangukulamsani.
PHI 4:22 Wanhu wa Nguluwi wa hano, na ng'hatu wala wawele kuli ng'handa ya mndewa wa Loma, wangukulamsani.
PHI 4:23 Ndanguwalandilani isungu lya Mkulu wa hetwe Yesu Kilistu.
COL 1:1 Heni Paoli, mtumigwa wa Yesu Kilistu kota Nguluwi vyoyaganile, hamwe na mng'holozangu Timoteyi,
COL 1:2 twanguwandichilani hemwe wanhu wa Nguluwi wa ako Kolosai, wang'holozetu muwele ngukundigwa kuli kilumba na Yesu Kilistu. Twanguwaganilani isungu lya Nguluwi hamwe na kikala goya kulawila kwa Mhaza wa hetwe.
COL 1:3 Mazuwa gose twanguta malumbo Nguluwi, Mhaza wa Mkulu wa hetwe Yesu Kilistu, mhela hotuwalandila,
COL 1:4 mina tuhulika mbuli ya makundo ga hemwe kuli Kilistu Yesu na kwa mbuli ya igano lyenu kwa wanhu wa Nguluwi.
COL 1:5 Makundo ga hemwe na igano lyenu vyejemela kuli kitumbila gomuwichilwe kilanga. Mina mhulika kwa ako kitumbila hala hamwande mhela lomdamlilwe usenga wa kukomya uwele ndo Mbuli Inojile.
COL 1:6 Ayi Mbuli Inojile vyoifichile kwa hemwe, naiwadita wanhu wadite ganojile na kwenela muisi yeng'ha kota vila navyoyaditile kwa hemwe kulawila zuwa lila lomhuliche mbuli ya isungu lya Nguluwi na kuizela iwele ya kukomya.
COL 1:7 Namilangusa isungu lya Nguluwi kulawila kwa Epafula, mtanzi muyetu tulingumgana, yawele ndo mkolamijito wakukundigwa kwa Kilistu kwa chiwalo cha hetwe.
COL 1:8 Heye naye, nakatigalila mbuli za igano lyenu lyompegwe na Muhe wa Nguluwi.
COL 1:9 Kwa chiwalo acho, twali tuwalandileni mazuwa gose kulawila mhela lotuhuliche mbuli ya hemwe. Twangumlanda Nguluwi yawadite hemwe mvizele goya gala goyalingugana, hamwe na nyhala zeng'ha na uwanzi wotupegwa na Muhe wa Nguluwi.
COL 1:10 Aho moweza kikala kota vyoyalingugana Mkulu na kudita galingumnojeza mazuwa gose. Kwa nzila ayo, moweza kudita mbuli zinjizinji zinojile, namwe molutilila kukula kuli kumzela Nguluwi.
COL 1:11 Nguluwi yawapeni ludali kwa udaho wa ukulu wa heye leka muweze kubeteza na kwimilila chila chinhu kwa usangalalo,
COL 1:12 na kuta malumbo Mhaza, yawaditile hemwe mkundigwe kubochela mbuli zila yawawichile wanhu wa heye kuli undewa wa lumuli.
COL 1:13 Nguluwi nakatulohola kuli ludali lwa jiza, nakutwinjiza kuli undewa wa Mwanage yamganile.
COL 1:14 Kwa heye twangugomboligwa, mina twangusilwa gehile ga hetwe.
COL 1:15 Kilistu kangoneka ng'hatu kota kewhana na Nguluwi, yohalingoneka, heye nayali baha vinhu vyeng'ha naving'hali lumbigwa.
COL 1:16 Mina kwa heye vinhu vyeng'ha navilumbigwa, chila chinhu muisi na kilanga, vinhu vilingoneka na havilingoneka, wone iwe wandewa, vilongozi, wakulu na wawele na mong'ho. Vyeng'ha navilumbigwa kukolela heye na kwa chiwalo cha heye.
COL 1:17 Heye nayalibaha kung'hali lumbigwa kwa vinhu vyeng'ha, kwa kilumba na Kilistu, vinhu vyeng'ha vilutilila kuwa bahala honhu hake.
COL 1:18 Heye ndo mutwi wa lukuli lwake, lukuli ndo chilundo cha wanhu walingumkunda Kilistu weng'ha. Heye ndo chaluchizo cha ukomu, mlelwa wa mwaluko kuzilipuligwa, Leka yawe wa mwaluko kuli vinhu vyeng'ha.
COL 1:19 Kwa vila Nguluwi nakagana Unguluwi wa heye woneche mgati mwa Kilistu.
COL 1:20 Kwa nzila ya Mwanage, Nguluwi nakahanyisa vinhu vyeng'ha vilumbigwe vimhiluchile heye, na kwa danda ya mwanage ibohoche mumsalaba, nakadita kikala goya, na vinhu vyeng'ha muisi na kilanga.
COL 1:21 Aho mhela umwe hemwe kahi namwali kutali na Nguluwi na mwali wang'honyo wa heye kwa majesa ga hemwe na madito ga hemwe gehile.
COL 1:22 Ila sambi, Nguluwi kawahanyisa hemwe kukolela Mwanage nayawele munhu na kubagama, leka yawawiche hemwe kumwando kwa heye, muwa wanhu wa Nguluwi, walihela nongwa na ne kulonjigwa vibi.
COL 1:23 Mwanguganigwa, ila kulutilila na kibatilila nzila yiyila kuli makundo, namleche kukunda kutigaswa kulawila kuli utumbilo ula wompegwe mhela womhuliche Mbuli Inojile. Heni Paoli ndiwa chitumagwa wa ayo Mbuli Inojile iwele idamligwe kwa chila munhu muisi.
COL 1:24 Na sambi ndangusechelela kugazigwa kwa chiwalo cha hemwe, mina kwa kugazigwa aku aha muisi, ndangutanza kwenela kwa chila chipunguche kuli kugazigwa kwa Kilistu kwa chiwalo cha lukuli lwake, mina ndo chilundo cha wanhu walingumkunda Kilistu.
COL 1:25 Nani nditigwa na Nguluwi ndiwe chitumagwa wa chilundo cha wanhu walingukunda Kilistu. Mijito yiyo ndo kudamla ulonzi wa Nguluwi uzeleche goya.
COL 1:26 Usenga awo wanhu nawavisigwa waleche kuuzela, kulawila lulelo lwa katali, ila sambi nakawalajila wanhu wa heye.
COL 1:27 Nguluwi nakagana kuwazelesa awo, vila uviso vyouwele mkulu na ukulu vyowenele kwa wanhu hawawele Wayahudi, nayo ndo ayi, Kilistu ka mgati mwa hemwe, na heye ndo yalingugalila utumbilo kota tochihanza kuli ukulu wa Nguluwi.
COL 1:28 Kwa mbuli ayo twangumdamla Kilistu kwa wanhu weng'ha, twanguwakanya na kuwalangusa weng'ha kwa nyhala yeng'ha, leka tuweze kumigala chila yumwe yawele yakangale kumwando kwa Nguluwi kuli kilumba na Kilistu.
COL 1:29 Kwa mbuli ayo heni ndangudita mijito na ndikangaza kwa ludali lukulu lwa Kilistu lulingukola mijito mgati mwa heni.
COL 2:1 Ndangugana mvizele vyondilingikangaza kwa chiwalo cha hemwe na kwa chiwalo cha wanhu wa Laudikeya na kwa chiwalo cha weng'ha hawanzelele.
COL 2:2 Ndangudita ahi leka ndiwakangaze nhumbula na kilumbiza mli igano, leka wawe wadahile kuwa na uwanzi ukulu ng'hatu, waweze kuvizela uviso wa Nguluwi, uwele ndo kumzela Kilistu yuye.
COL 2:3 Mgati mwake mvisigwa ng'hano zeng'ha za nyhala na luhala.
COL 2:4 Lelo ndanguwalonjelani, mleche kubadigwa na munhu yoneche kwa ulonzi wa udesi na hanji gawe gangoneka kota ndo ga kunojeza ng'hatu.
COL 2:5 Kwa vila wone ndiwe kutali na hemwe, ndanguwajesani lukami, ila mgati mwa muhe wa heni nda hamwe na hemwe, na ndangusangalala kona azo mbuli za hemwe vyozilinguluta goya na vyomlingwima nzinzili kuli makundo kwa Kilistu.
COL 2:6 Kwa vila hemwe mumkunda Yesu Kilistu yawele Mkulu, lelo mikale kuli kilumba na heye.
COL 2:7 Muwe na mizabi mgati mwake, mizenjele mchanya mwake na kwima goya kuli makundo kota vyomlanguswe. Muwe mmemile malumbo.
COL 2:8 Mlole, lelo munhu yaleche kuwadita muwe wapogozi wa heye, kwa malanguso ga heye ga udesi hela, galingulawa mli malanguso ga wanhu na kota isi vyoilingugana, na haiwele yalingulangusa Kilistu yuye.
COL 2:9 Mina mgati mwa lukuli lwa Kilistu, amo mwangikala Unguluwi weng'ha.
COL 2:10 Namwe mpegwa ukomu ng'hatu kuli kilumba na heye. Heye ka mutwi wa vilongozi wa vijeni vyeng'ha vilingulongoza na viwele na ludali lweng'ha.
COL 2:11 Kuli kilumba na Kilistu hemwe namwinjila ikumbi, ila haiwele kwa ikumbi lilingukoleka na wanhu mlukuli, ila ikumbi lilinguditikwa na Kilistu yuye, leka kuwadita wanhu wagomboligwe kulawa kuli ludali lwa gehile.
COL 2:12 Mhela lombatizigwe na mtiligwa hamwe na Kilistu, na kuli kubatizigwa namzilipuligwa kahi hamwe na heye kwa kukunda kuli mong'ho wa Nguluwi yamzilipule Kilistu.
COL 2:13 Mhela umwe namwe mwali kota mbagame kwa mbuli ya gehile ga hemwe na kwa vila hemwe namwali wanhu hawawele Wayahudi. Ila Nguluwi nakawapa hemwe ukomu hamwe na Kilistu. Heye katusila gehile ga hetwe geng'ha,
COL 2:14 nakosela kutali gehile ga hetwe geng'ha, gandichigwe gawele kutulonjeleza, hamwe na malajizo gake nagawele na ung'honyo kwa hetwe, nakosa galeche kuwa hala kahi kwa kugatowelela mumsalaba.
COL 2:15 Aku kumsalaba Kilistu nakawaboka ludali lwao avyo vijeni vilongozi na wakulu wawo, nakuwabasa soni hali wanhu kwa kuwabuluna kota wanhu walingujenda lung'hongola kulajila majendo ga kusumya kwa heye.
COL 2:16 Ahyo, lelo mleche kukunda kupegwa mzilo na munhu yoneche kwa chiwalo cha vilyo ama vyakunwa, mazuwa ga mnvina na mnvina ya mwezi uyage ama Zuwa lya Kwesela.
COL 2:17 Mbuli za kota hino ndo isisila hela lya gala galinguya, kukomya kuko ndo Kilistu.
COL 2:18 Mleche kukunda munhu yoneche yawasukule chila chomuwele nacho, yalingidaya kota heye kaholondala na yalingufugamila wahilisi wa kilanga. Na kiwika kuli uloli wa heye yuye na kidaya hela, munhu kota ayo kabubuwanika kwa luhala lwake lwa chilukuli,
COL 2:19 nakebagula na Kilistu yawele mutwi wa awo lukuli. Kwa kulongozwa na Kilistu, lukuli lweng'ha lwanguliswa na kilumbizwa hamwe kwa vitomo vyake na midanha jake, nawo wokula kota vyoyalingugana Nguluwi.
COL 2:20 Hemwe mbagama hamwe na Kilistu na kugomboligwa kuli ludali lwa vijeni viwele na ludali lwa isi na kota isi vyoilingugana. Lekachoni, lelo kikala kahi kota vila namwali wa isi ino? Iwa ndaze kuwichilwa malajizo?
COL 2:21 “Mleche kibata achi, mleche kujeza chilyo chila, mleche kudoliza chila?”
COL 2:22 Mbuli azo zeng'ha zangulapa na vinhu vilinguwifigwa baho du hovitumiligwa, ago ndo malajizo na malanguso ga wanhu hela.
COL 2:23 Ndangukomya, malajizo ago gangoneka kota ga nyhala kwa mbuli ya kufugamila wewichile wawo na kuholondala kwa udesi na kuuditila lukuli kwa kung'ang'ala ila mbuli azo haziweza ng'oo kulemeza maya gehile ga lukuli.
COL 3:1 Lelo hemwe mzilipuche hamwe na Kilistu, mijese ng'hatu mbuli za kilanga, kula Kilistu koyali, kekala nzingo ya kudilo kwa Nguluwi.
COL 3:2 Muwe mchijesa ng'hatu mbuli za ako kilanga, na haiwele mbuli za aha muisi.
COL 3:3 Mina hemwe mbagama na ukomu wa hemwe uvisigwa hamwe na Kilistu kuli Nguluwi.
COL 3:4 Ukomu wa hemwe ndo Kilistu, na mhela hoyolawila ndo namwe kahi homlawila na kihanza hamwe na heye kuli ukulu.
COL 3:5 Lelo mkopole choneche chiwele mgati mwenu chiwele cha muisi na ung'hondwa na wavu na maya ga kudita ung'hondwa na maya gehile na maya ga kuwa na lufufu lwinji ndo kufugamila jimalukolo.
COL 3:6 Kwa chiwalo cha mbuli azo kuzudila kwa Nguluwi kowoyela weng'ha wohambe wamhulichize.
COL 3:7 Mhela umwe hemwe kahi namikala kuli ago, ukomu wa hemwe houwinzile mbuli azo.
COL 3:8 Ila sambi mwanguganigwa kuleka mbuli azi zeng'ha, kuzudila na mnvimnvi na maligo na kwihilwa na kukovula na uhesi galeche kulawila kumlomo kwa hemwe.
COL 3:9 Mleche kilonjela udesi, kwa vila hemwe mina mvula ula wunhu wa katali hamwe na madito gake geng'ha gehile.
COL 3:10 Namvala wunhu unyale. Awu wangulutilila kugaluswa na Nguluwi, yawele mlumba wa heye, kwa kiwhana na heye leka mumzele Nguluwi ng'hatu.
COL 3:11 Kuli mbuli ino, kuduhu kahi cha Mgilichi ama cha Myahudi, yenjile ikumbi na yula henjile ikumbi, mjenzi ama mwenyeng'haye, mpogozi na munhu yelejehe. Kilistu ndo chila chinhu, na kamumo kuli geng'ha.
COL 3:12 Hemwe mwa wanhu wa Nguluwi, heye nakawagana na kuwahagula muwe wa heye. Ahyo, lelo mvale nhumbula ya isungu na nhumbula inojile na uliholile na kuholondala na kwimilila.
COL 3:13 Mwimilile mwemwe kwa mwemwe na kilechela, munhu yowa na mbuli yoneche kwa miyage, kanguganigwa kulechela gakoleche kota Mkulu vyoyawalecheleni hemwe.
COL 3:14 Kwa ago geng'ha, mibatilile igano, kwa vila igano liting'hanizaga chila chinhu kuli uhamwe wenele.
COL 3:15 Nako kikala goya kwa Kilistu kulongoze mnhumbula ya hemwe, kwa vila Nguluwi kawachemani muwe mikale goya kuli lukuli alo lumwe. Kahi mte malumbo.
COL 3:16 Ulonzi wa Kilistu umema ng'hatu mgati mwa hemwe. Milanguse na kikanya kwa nyhala zeng'ha. Mwimbe zabuli na nzimbo za kumtogola na kumfugamila Nguluwi. Aku mmwimbila Nguluwi mta malumbo mnhumbula za hemwe.
COL 3:17 Na chila chomdita kwa ulonzi ama madito, mdite mweng'ha kwa itagwa lya Mkulu Yesu na kuta malumbo Nguluwi Mhaza kukolela heye.
COL 3:18 Hemwe wadala mholigwe, muwahulichize walume wa hemwe, kwa vila ndovyoyogana Mkulu.
COL 3:19 Na hemwe wakasano, waganeni wadala wa hemwe, na mleche kuwa mng'ang'ale kwa hewo.
COL 3:20 Hemwe wana, muwahulichize wahaza wa hemwe kwa chila chinhu, ahyo mina mwangumnojeza Mkulu.
COL 3:21 Namwe wahaza, mleche kuwahangawaila wana wa hemwe, wone haiwele ahyo, wowa na ngozolo.
COL 3:22 Hemwe wapogozi, muwahulichize wakulu wa hemwe wa muisi kuli mbuli zeng'ha, na haiwele mhela howalinguwalola kwa vila mwangugana kinojeza kwa hewo, leka mdite ahyo kwa nhumbula yeng'ha, kwa mbuli ya kumwinamila Mkulu.
COL 3:23 Chila chomdita, mdite kwa nhumbula yeng'ha, kota vila mwangumditila Mkulu Yesu na haiwele kwa kumditila munhu.
COL 3:24 Mvizele kota mobochela chonolo kulawa kwa Mkulu Yesu choyawawichile wanhu wa heye, kwa vila mwangumkolela mijito Mkulu Yesu Kilistu!
COL 3:25 Yawele ngudita wihe, kohilusilwa wihe wa heye vyouwele, Nguluwi halingutagusa kwa kulola kumeho.
COL 4:1 Namwe wakulu, muwaditile ganojile wapogozi wa hemwe na vyoyalingugana Nguluwi, mvizela kota namwe kahi mwanaye Mkulu kilanga.
COL 4:2 Mleche kuleka kumlanda Nguluwi, na homlanda muwe milolela, muwe mta malumbo Nguluwi.
COL 4:3 Vivila mtulandile natwe kahi leka Nguluwi yatupe mhumu ya kudamla usenga wa mbuli zivisigwe za Kilistu. Na kwa mbuli ayo heni sambi nda mchinweng'ho.
COL 4:4 Lelo mndandile, mbeze kudamla hazelu mbuli ayo kota vyoilinguganigwa.
COL 4:5 Muwe na nyhala kuli kikala kwa hemwe na wanhu wohambe wamkunde Kilistu, mdita goya kwa chila mhumu yomlinayo.
COL 4:6 Mazuwa gose, kulonga kwa hemwe kuwe kunojile na kwa kuwatanza wanhu, kahi mwanguganigwa kuvizela vila vyomwidichila chila munhu.
COL 4:7 Mng'holozetu Tukiko tulingumgana ng'hatu, mkola mijito wa kukundigwa na chitumagwa muyetu, tulingukola na heye mijito ya Mkulu, kowalonjelani mbuli za heni zeng'ha.
COL 4:8 Ndo mina ndangumlajiza heye kwa hemwe, leka yawakangaze nhumbula za hemwe kwa kuwalonjela mbuli za hetwe.
COL 4:9 Kanguya hamwe na Onesimo, mng'holozetu tumganile na wakukundigwa, ayo ndo muyenu. Wowapani mbuli za vinhu vyeng'ha vilingukoleka hano.
COL 4:10 Alistako, yawele kuchinweng'ho hamwe na heni, kanguwalamsani, na hihyo Malichi, binamu wa heye Banaba kanguwalamsani, yawele namlonjelwe mbuli za heye, wone yoye, mumbochele.
COL 4:11 Na heye Yoshuwa yalinguchemigwa Yusto, kanguwalamsani. Mli wala Wayahudi mina wabochele makundo, awa hela waliyeng'ha ndo wakola mijito wayangu kwa mbuli ya Undewa wa Nguluwi, nawo wawa utanzi ukulu kwa heni.
COL 4:12 Epafula, yawele yumwe wa hemwe na chitumagwa wa Kilistu Yesu, kanguwalamsani. Mazuwa gose kanguwalandilani hemwe ne kutoka ng'hatu leka mwime goya mkangaze na kwima nzinzili kwa mbuli yeng'ha yalingugana Nguluwi.
COL 4:13 Ndoweza kuwa mlolezi kota kangudita mijito vinojile lukami kwa mbuli ya hemwe na kwa mbuli ya wanhu wa Laudikeya na Hielapoli.
COL 4:14 Lukasi munhu wa hetwe tumganile yaizelele mikwandi, na Dema, wanguwalamsani.
COL 4:15 Ulamso wa hetwe kwa wang'holozetu wa Laudikeya. Mlamseni lumbuliyangu Nimfa hamwe na chilundo cha wanhu walingumkunda Kilistu chilinguting'hana hakaye hake.
COL 4:16 Lomsinda kusoma lyandiko ali, mikangaze muwape wayenu wa Laudikeya kuli chilundo cha wanhu walingumkunda Kilistu, na lila lyandiko ndiwandichile wanhu wa Laudikeya, wawape hemwe msome.
COL 4:17 Mlonjeleni Alikipo yadite goya yila mijito yapeligwe na Mkulu.
COL 4:18 Ndangwandika aga kwa moko wa nene baha, ulamso kulawa kwa heni Paoli. Mkumbuchile kota nda mchinweng'ho, kunoga kwa Nguluwi kuwe na hemwe.
1TH 1:1 Heni Paoli hamwe na Silivani na Timoteyi, twanguwandichilani hemwe chilundo cha wanhu walingumkunda Kilistu ako Tesalonike, muwele ndo wanhu wa heye Nguluwi Mhaza, na wa Mkulu Yesu Kilistu. Twangukuganilani kunoga kwa Nguluwi na kikala goya.
1TH 1:2 Twanguta malumbo Nguluwi mazuwa gose kwa chiwalo cha hemwe mweng'ha na kuwakumbukani mazuwa gose kuli kulanda kwa hetwe.
1TH 1:3 Wala hatulinguleka kukumbuka hali Nguluwi Mhaza wa hetwe, vila vyomlingulajila makundo ga hemwe kwa madito, navyomlinguyila mijito kwa chiwalo cha igano lya hemwe, na twangukumbuka utumbilo wa hemwe vyowimile nzinzili kuli Mkulu wa hetwe Yesu Kilistu.
1TH 1:4 Wang'holozangu, tuvizela kota Nguluwi kanguwaganani na kuwahagula muwe wanhu wa heye,
1TH 1:5 mina mhela wotudamle yila Mbuli Inojile na haiwele kwa mlomo hela, ila kahi kwa mong'ho na kwa Muhe Yelile, tuwele tuvizelele ng'hatu kota usenga awo nawali wa kukomya. Mvizela vila navyotikale hamwe na hemwe, natikala kwa kuwatanza hemwe.
1TH 1:6 Hemwe mwangutuwinza kota vyotulingudita hetwe, kahi navyoyalingudita Mkulu. Hanga namgazigwa ng'hatu, namuubochela usenga awo kwa usangalalo ulingulawa kwa Muhe Yelile.
1TH 1:7 Lelo hemwe mwangudita vinojile, na wanhu wamkundile Kilistu wa Makedoniya na Akaya wanguwawinza hemwe.
1TH 1:8 Mina, kwa kikangaza kwa hemwe usenga wa Mkulu uhulikwa haiwele ako Makedoniya na Akaya hela, ila makundo ga hemwe kwa Nguluwi genela kweng'ha. Kahi hambe tugane konjeza choneche kwa alyo,
1TH 1:9 kwa vila wanhu awo wangusima vila navyomtubochela hala hotuwajendelani, vila navyomlechile kufugamila jimalukolo na kumgalamchila na kumkolela mijito Nguluwi yawele ngikala na wa kukomya.
1TH 1:10 Na kahi wangutulonjela, mwangumbeteza Mwanage kulawa kilanga, heye Yesu, yawele yazilipuligwe na Nguluwi na yawele yatulohole kuli kuzudila kwa Nguluwi kulinguya.
1TH 2:1 Wang'holozangu, mwemwe baho mvizela kota kuwajendela hemwe kwa hela chinhu.
1TH 2:2 Mvizela kota vyotugazigwe na kulijigwa kula Filipi lotung'hali fika kwa hemwe Tesalonike. Hanga kwali na kitwanza kwinji, Nguluwi wa hetwe nakatudita tuleche kudumba kuwadamlilani Mbuli Inojile.
1TH 2:3 Mbuli yotulingukangaza kwa hemwe haiwele mbuli ilingitumbila udesi ama majesa gehile na hatuviganile kumhada munhu yoneche.
1TH 2:4 Ila, mazuwa gose hetwe twangulonga kota vila Nguluwi vyoyalingugana kwa vila nakatona kota toweza na katupa kudamla ayi Mbuli Inojile. Hatulingugana kuwanojeza wanhu ne hado, ila twangugana kumnojeza Nguluwi yawele yavizelele nhumbula za hetwe vyozili mbaka mgati.
1TH 2:5 Nguluwi ndo mlolezi, kota vyomvizelele, hetwe hatulonjile kwa kuwadedeza leka kuvisa maya ga hetwe gehile ga kugana kupegwa lufufu kwa uviso,
1TH 2:6 Hatupalile kutogoligwa na wanhu, hanji kulawa kwa hemwe ama kulawa kwa munhu yoneche.
1TH 2:7 Hetwe tuwele watumigwa wa Kilistu, twahajezile kulanda vinhu vinji kwa hemwe, ila hetwe twali waliholile hali hemwe kota vyoyawele mamo vyoyalinguwalela wanage.
1TH 2:8 Na tuwagana hemwe ng'hatu natona inoga kuwegalila Mbuli Inojile yotupegwe na Nguluwi, haiwele ahyo hela, ila kahi na ukomu wa hetwe. Kwa vila hemwe ndo wanhu tulinguwagana ng'hatu.
1TH 2:9 Wang'holozetu, mwangukumbuka vila vyotukolile mijito na kitunya. Hala hotuwadamlile Mbuli Inojile ya Nguluwi, tukola mijito nemisi na nechilo leka tuleche kumha munhu yoneche mijito ya kutulela.
1TH 2:10 Hemwe mwanguweza kuwa walolezi, na Nguluwi kahi ka mlolezi, kota madito ga hetwe hali hemwe mlingukunda Kilistu nagali ganojile, galingumnojeza Nguluwi na galihela nongwa.
1TH 2:11 Mvizela kota hetwe natumditila chila yumwe wa hemwe kota hila mhaza vyoyawele nguwaditila wana wa heye yuye.
1TH 2:12 Hetwe natuwakanya na tuwakangaza nhumbula na kuwadedeza ng'hatu, leka mikale kota vyoyalingugana Nguluwi yawele nguwachemani muwe hamwe kuli undewa na ukulu wa heye.
1TH 2:13 Kahi twanayo mbuli inji ya kuta malumbo Nguluwi, vyotuwagalile usenga wa Nguluwi, hemwe namuuhulika na muubochela. Haiwele kota vila usenga wa munhu, ila kota usenga wa Nguluwi, ndangukomya ndo vyouwele. Mina ulonzi wa Nguluwi ndo ulingukola mijito chila zuwa mgati mwa hemwe mlingukunda.
1TH 2:14 Wang'holozangu, hemwe namting'hana na mbuli zizila zowating'hane nazo wanhu wa Nguluwi kula Yudeya na vilundo vya wanhu walingumkunda Yesu Kilistu. Hemwe na mgazigwa na wanhu wayenu kota vila hewo navyowagazigwe na wayawo Wayahudi,
1TH 2:15 nawamkopole Mkulu Yesu na waloli, na watugaza na hetwe natwe. Wanhu awo wangumzudiza Nguluwi, kahi ndo wang'honyo wa chila munhu!
1TH 2:16 Mbaka nawajeza kutulemeza kuwadamlila wanhu hawawele Wayahudi usenga uzanguwagalila ulohozi, ahyo ndo vyowamemezwe gehile gowaditile mazuwa gose. Ila sambi kuzudila kwa Nguluwi kuwagwila.
1TH 2:17 Wang'holozangu, kileka kwa hemwe na hetwe, kwali kwa mhela udo hela, kahi kileka ako kwali kwa lukuli hela na haiwele chimuhe. Mhela udo hamba, natwali tugana kiwona na hemwe kahi.
1TH 2:18 Ahyo, natugana kuwajendela kahi. Na heni Paoli, nanjeza kuya kwa hemwe mala nyinji ila Limazoga nalitudita tulemwele kuya.
1TH 2:19 Ndaze, hotukwima hali Mkulu Yesu mhela hoyokuya, chipembelo cha kulajila kusumya kwa hetwe chowa choni? Yowa ndo hemwe mwemwe, muwele ndo utumbilo wa hetwe na usangalalo wa hetwe.
1TH 2:20 Ena, hemwe ndo ukulu na usangalalo wa hetwe!
1TH 3:1 Mwiso hatuwezile kwimilila ng'hatu. Lelo natwamula kupona tuliyeng'ha kukula Asene,
1TH 3:2 na kumlajiza kwa hemwe mng'holozetu Timoteyi, yawele ndo mkola mijito muyetu kwa chiwalo cha Nguluwi kuli kudamla Mbuli Inojile ya Kilistu. Natumlajiza leka yawakangaze nhumbula na kuwakangaza kuli makundo ga hemwe,
1TH 3:3 leka makundo ga munhu yoneche hali hemwe galeche kutigasika kwa chiwalo cha magazo ago. Hemwe mvizela kota twanguganigwa kupegwa magazo.
1TH 3:4 Mina nalotuwele hamwe na hemwe, natuwalonjela kota togazigwa, na kota mvizelele, ndo navyoilawile.
1TH 3:5 Ahyo, na ndemwa kwamilila kahi, ndo mina nandimlajiza Timoteyi kwa hemwe, ndivizele mbuli za makundo ga hemwe. Ileche kuwa hanji mwihe nakawajeza na mijito yeng'ha yotuditile hali hemwe yajilile hela!
1TH 3:6 Sambi Timoteyi mina kahiluka, na heye katulonjela mbuli zinojile kwa chiwalo cha makundo na igano lye hemwe. Katulonjela kota mwangutujesela ganojile mazuwa gose, na kota mwangugana kutona hetwe kota hetwe vyotuwele kugana ng'hatu kuwonani.
1TH 3:7 Lelo wang'holozangu, kwa mbuli ya makundo ga hemwe gatukangaza nhumbula heko, kuli nongwa na magazo ga hetwe geng'ha,
1TH 3:8 mina sambi twangikala ng'hatu wone hemwe mwangwima nzinzili kuli kilumba na Mkulu.
1TH 3:9 Sambi toweza kuta malumbo Nguluwi wa hetwe kwa chiwalo cha hemwe. Twanguta malumbo kwa kusangalala kotuwele nako hali heye kwa chiwalo cha hemwe.
1TH 3:10 Twangulutilila kumlanda Nguluwi nechilo na nemisi kwa nhumbula ya hetwe yeng'ha leka tuwe na mhumu ya kuwonani hemwe meho kwa meho leka tujeze kuwika goya gapunguche kuli makundo ga hemwe.
1TH 3:11 Twangumlanda Nguluwi, Mhaza wa hetwe, na Mkulu wa hetwe Yesu, yatuchumulile nzila ya kuya ako kwa hemwe.
1TH 3:12 Mkulu yawadahize hemwe igano lyenu wonjezeche ng'hatu na kuwagana wanhu weng'ha lukami, kota vila hetwe vyotulinguwagana hemwe.
1TH 3:13 Ahyo komha ludali mnhumbula za hemwe, namwe mowa mlihela nongwa na mwelile hali Nguluwi na Mhaza wa hetwe mhela wa Mkulu wa hetwe Yesu hoyokuya hamwe na wanhu wa heye weng'ha.
1TH 4:1 Ahyo, wang'holozangu, milangusa kulawa kwa hetwe vila vyomlinguganigwa kikala leka kumnojeza Nguluwi. Na mkomya, namwali mchikala ahyo. Sambi twangukulandani na kuwalonjelani kwa itagwa lya Mkulu Yesu mdite vinojile kupuluta avyo.
1TH 4:2 Mina mvizela gala malanguso gotuwapele natuwapa kwa ludali lwa Mkulu Yesu.
1TH 4:3 Nguluwi kangugana hemwe muwe welile na miyuse ng'hatu na mbuli ya ung'hondwa.
1TH 4:4 Chila yumwe wa hemwe, kanguganigwa kuvizela kikala goya na mdala wa heye kuli kwela na kutanganika,
1TH 4:5 na haiwele kwa maya gehile kota wanhu wanji wohambe wamzele Nguluwi.
1TH 4:6 Lelo wang'holozangu, munhu yoneche yaleche kumditila vibi ama kumhada miyage kwa mbuli ayi. Namina tuwalonjela ago na kuwafundani kota Mkulu kowagaza walingudita mbuli azo.
1TH 4:7 Nguluwi hatuchemile tikale kuli uhonzolomo, ila tikale kota wanhu welile.
1TH 4:8 Kwa ahyo lelo, yawele ngubeza malanguso ago hambe yambeze munhu, ila kangumbeza Nguluwi yuye yawele nguwapani Muhe Yelile.
1TH 4:9 Kuduhu mbuli ya kuwandichilani chiwalo cha kuwagana wang'holozenu walingumkunda Kilistu. Mwemwe baho mlanguswa na Nguluwi vila vyomlinguganigwa kigana.
1TH 4:10 Namwali muwaditila ahyo wang'holozenu weng'ha chila honhu kuli Makedoniya. Lelo wang'holozangu, twangukulandani mdite vinojile ng'hatu kupuluta ago.
1TH 4:11 Mikangaze kikala goya ng'hatu ne kubilima aku na aku, chila yogaila mbuli za heye yuye na yakole mijito kwa moko ga heye yuye kota navyotuwalajize hala hamwande.
1TH 4:12 Kwa mbuli ayo, mopegwa lutogo kulawila kwa wala hawawele ngumkunda Kilistu na hamuwa na mbuli ya kugana kitumbila wanji kwa gala gomlingugana.
1TH 4:13 Wang'holozangu, twangugana mvizele kukomya kwa chiwalo cha wala wabagame, leka mleche kisinza kota wanhu wanji walihela chinhu cha kitumbila.
1TH 4:14 Hetwe twangukunda kota Yesu nakabagama na kazilipuka, ahyo hetwe twangukunda kota Nguluwi kowegala hamwe na Yesu hoyohiluka, wala weng'ha wabagame wawele womkunda.
1TH 4:15 Ali lotulinguwalonjelani ndo ulonzi wa Mkulu, hetwe tulingikala sambi, lotowa tuponile wakomu mhela Mkulu hoyokuya, ndangukomya hatuwalongola wala mina wabagame.
1TH 4:16 Mina holavigwa ilajizo, lizi lya mhilisi mkulu na lizi lya mhalamhanda ya Nguluwi, na heye Mkulu kodulika hasi kulawilla kilanga. Ndo wala wabagame wawele womkunda Kilistu wozilipuligwa tandi.
1TH 4:17 Hamba hetwe tuwele wakomu, tuponile, mhela awo tokungajizwa hamwe na hewo kuli ng'hungugu kumting'aniza Mkulu kulanga. Ahyo towa hamwe ng'hatu na Mkulu.
1TH 4:18 Lelo migane na mikangaze nhumbula kwa ulonzi awu.
1TH 5:1 Wang'holozangu, silinguganigwa kuwandichilani kwa hemwe, mhela na mihela mbuli azi hozilawila.
1TH 5:2 Mina mwemwe baho mvizela kota zuwa lya Mkulu hoyohiluka baho du kota mhizi vyoyalinguya nechilo.
1TH 5:3 Wanhu vyowoza ngulonga, “Hekala goya na chila chinhu cha goya.” Ndo kuwifya vyokuwagwililani baho du! Mbuli azo zolawila baho du kota usungu ulingumuyila mdala yalingulela mwana, wala wanhu hawoweza kuibilima.
1TH 5:4 Ila hemwe, wang'holozangu hamuwele kutitu, na zuwa alyo hailinguganigwa kukuyilani hemwe baho du kota vila muhizi vyoyalinguya.
1TH 5:5 Hemwe mweng'ha mwa wanhu muwele ngikala kuli lumuli, wanhu wa nemisi. Hetwe hatuwele wanhu wa nechilo ne wala wa kutitu.
1TH 5:6 Lelo tuleche kuwasa kota wanji, twanguganigwa kikala meho na kilongoza twetwe baha.
1TH 5:7 Walinguwasa, wanguwasa nechilo, na walingugala, wangugala nechilo.
1TH 5:8 Ila hetwe twa wanhu wa nemisi na twanguganigwa tuwe tuchilongoza twetwe baha hado. Twanguganigwa kuvala makundo na igano kota nguwo ya kigubika mmambaga, na kitumbila kwa hetwe kwa ulohozi kota kofiya ya lyuma.
1TH 5:9 Mina Nguluwi hatuhagule leka tusumigwe na kuzudila kwa heye, ila tupegwe ulohozi kukolela Mkulu wa hetwe Yesu Kilistu,
1TH 5:10 yula nayabagame kwa chiwalo cha hetwe, leka tikale hamwe na heye, tuwele wakomu ama tubagame hala hoyohiluka.
1TH 5:11 Ahyo mikangaze nhumbula hemwe kwa hemwe na kitanza kota vyomlingudita sambi.
1TH 5:12 Wang'holozangu, twangukulandani muwahulichize vilongozi wa hemwe, wala walinguwalongoza na kuwakanya kuli ukomu kwa kilumba na Mkulu.
1TH 5:13 Muwe mtanganiche ng'hatu na kuwalajila igano kwa mbuli ya mijito yowalingukola. Muwe mikala goya hali hemwe.
1TH 5:14 Wang'holozangu, twanguwalandani muwakanye wagata, muwakangaze nhumbula wanhu wawele wazunwa na muwatanze wanhu wawele ng'hochele na muwemilile wanhu weng'ha.
1TH 5:15 Mloleleni munhu yoneche yaleche kumhilusila miyage wihe kwa wanhu wawaditile wihe, ila majesa ga hemwe gawe kiditila ganojile na kuwaditila wanhu weng'ha ganojile.
1TH 5:16 Msangalale mazuwa gose,
1TH 5:17 mumlande Nguluwi chila zuwa,
1TH 5:18 na tute malumbo kuli chila mbuli. Ago ndo yalingugana Nguluwi kuli ukomu wa hemwe kuli kilumba na Kilistu Yesu.
1TH 5:19 Mleche kulemeza mijito ya Muhe Yelile,
1TH 5:20 mleche kubeza usenga ulingulawa kwa Nguluwi.
1TH 5:21 Ila mjeze chila chinhu na mgakunde gala gawele ganojile,
1TH 5:22 na mikale kutali na chila chinhu chihile.
1TH 5:23 Heye Nguluwi yalingutudita tikale goya, yawahovuje ng'hatu kwa chila nzila na kwamila ukomu wa hemwe weng'ha, uwele ndo muhe na nhumbula na lukuli lwa hemwe, leka moneche mlihela nongwa yoneche mhela wa kuya kwa heye Mkulu wa hetwe Yesu Kilistu.
1TH 5:24 Heye yalinguwachema hemwe kodita ahyo, kwa vila ndo wakukundigwa.
1TH 5:25 Wang'holozangu, mtulandile kwa Nguluwi na hetwe kahi.
1TH 5:26 Muwalamuse wang'holozenu weng'ha kwa igano na kwa kiyamba moko.
1TH 5:27 Ndanguwalajizani kwa itagwa lya Mkulu, muwasomele lyandiko ali wanhu weng'ha walingumkunda Kilistu.
1TH 5:28 Isungu lya Mkulu wa hetwe Yesu Kilistu liwe na hemwe.
2TH 1:1 Heni Paoli hamwe na Silivani na Timoteyi, twanguwandichilani hemwe chilundo cha wanhu walingumkunda Kilistu ako Tesalonike, wawele wanhu wa Nguluwi Mhaza wa hetwe na wa Mkulu Yesu Kilistu.
2TH 1:2 Twanguwalandilani kwa Nguluwi mhaza wa hetwe na kwa Mkulu Yesu Kilistu, yawape isungu lya heye na kikala goya.
2TH 1:3 Wang'holozetu, twanguganigwa kuta malumbo Nguluwi mazuwa gose kwa chiwalo cha hemwe. Igana kwa hetwe kudita ahyo kwa vila makundo ga hemwe gangukula lukami na kigana hemwe kwa hemwe kwangonjezeka lukami.
2TH 1:4 Ndo mina hetwe twangidayila hemwe hali vilundo vya wanhu walingumkunda Kilistu, vya Nguluwi. Twangidaya kwa vila mwangulutilila kuli makundo na kwimilila kuli nongwa na magazo geng'ha gomuwele ngupegwa.
2TH 1:5 Ago geng'ha gangulajila kota utaguso wa Nguluwi unoga mazuwa gose, nayo yangigala mkundigwe kuli undewa wa heye Nguluwi uwele hemwe mwangigayila.
2TH 1:6 Nguluwi kodita mbuli inojile, kowahilulila magazo wala walinguwagaza hemwe,
2TH 1:7 na koweseleza hemwe womlingugazigwa, na hetwe natwe. Kodita mbuli alyo mhela Mkulu Yesu hoyolawila kulawa kilanga hamwe na wahilisi wa kilanga wa heye wawele na ludali.
2TH 1:8 Na kuwagaza wala wawele ngumlema Nguluwi kwa ilapi lya chiluli na kahi wala hambe waikunde Mbuli Inojile ya Mkulu wa hetwe Yesu.
2TH 1:9 Utaguso wa hewo wowa kubagamizwa mazuwa gose ne kuduma na kubaguligwa kutali na meho ga Mkulu na ukulu wa ludali lwa heye.
2TH 1:10 Zuwa hoyokuya leka yapegwe lutogo kulawa kwa wanhu wa heye na kutanganika kulawa kwa welile weng'ha walingukunda. Namwe kahi mowa hali hewo, kwa vila namuukunda ula usenga loyawagalile.
2TH 1:11 Ndo mina twanguwalandilani mazuwa gose. Twangumlanda Nguluwi wa hetwe yawadahize kukundigwa kikala vila vyoyawachemile mikale. Twangumlanda, kwa mong'ho wake, yeneze geng'ha ganojile mlingugana kudita na kahi yeneze mijito ja hemwe ja makundo.
2TH 1:12 Twangulanda ahyo, leka itagwa lya Mkulu wa hetwe Yesu lipegwe ukulu kulawila kwa hemwe, namwe mopegwa ukulu kulawila kwa heye kwa isungu lya Nguluwi wa hetwe na ya Mkulu Yesu Kilistu.
2TH 2:1 Lelo wang'holozetu, kwa chiwalo cha kuya Mkulu wa hetwe Yesu Kilistu, na kukungajizwa kwa hetwe hali heye,
2TH 2:2 twanguwalandani, mleche kisinza mli muhe za hemwe himahima, na kahi mleche kutinuka kwa mbuli ilingulonga kota zuwa lya Mkulu mina yuya. Hanji, yangujesigwa mbuli ayo lilawila kwa ulaguzi woneche, kudamla ama lyandiko ilingulonjigwa kota ilawa kwa hetwe.
2TH 2:3 Mleche kukunda kubadigwa na munhu yoneche kwa mbuli yoneche yila. Mina zuwa ayo haikuya mbaka tandi zuwa lya wanhu Kumlema Nguluwi kukulu kulawile na munhu yula yalinguchemigwa mwihe yoneche, yawele mwiso wa heye ndo kubagamizwa ng'hatu.
2TH 2:4 Heye kovilema vinhu vyeng'ha vila wanhu walinguvichema mlungu, ama chinhu walinguchifugamila, na kochikwiniza mchanya mwa chila chinhu, hanji kokwinjila na kikalisa mli Ng'handa ya Nguluwi yochidita kota heye yuye ndo Nguluwi.
2TH 2:5 Ndaze, hambe mkumbuche kota nandiwalonjelani aga geng'ha mhela vyonandali hamwe na hemwe?
2TH 2:6 Ila kuna chinhu chiwele ngumlemeza sambi, namwe mchizela chinhu acho. Lelo munhu ayo mwihe kokoneka mhela wa heye uwichigwe.
2TH 2:7 Lelo munhu yula yalinguchemigwa mwihe, na ahyo, ludali lwihile lwa yula mwihe mina zaluka kukola mijito sambi kwa uviso, ila hokoneka mbaka yula yawele ngumlemeza yosigwe.
2TH 2:8 Aho ndo munhu yula yalinguchemigwa mwihe hoyolawila, ila Mkulu Yesu hoyolawila komkopola kwa muhe wa mlomo wa heye na kumdumya kwa lumweka lwa kuya kwa heye.
2TH 2:9 Ayo munhu yalinguchemigwa mwihe kokuya yawele na ludali lwa Limazoga na kudita vinduzanduza vya chila mbuli na ulajilo na kububuwaza kwa udesi,
2TH 2:10 na kudita uhadi kwa chila nzila kwa wala walingwajilila. Awo wokwajilila kwa vila hawaubochele na kugana kula kukomya leka waloholigwe.
2TH 2:11 Kwa chiwalo acho, Nguluwi kawawika walongozwe na ludali lwa kuhadigwa na wakunde mbuli za udesi.
2TH 2:12 Ahyo wanhu weng'ha hambe wakunde kukomya, ila wangusechelela gehile, wotagusigwa.
2TH 2:13 Twanguganigwa kumtogola Nguluwi mazuwa gose kwa chiwalo cha hemwe wang'holozetu, hemwe mlinguganigwa na Mkulu, mina Nguluwi kawahagula kulawila mwaluko leka mloholigwe, kwa ludali lwa Muhe Yelile muwe wanhu wa heye welile kwa chiwalo cha hemwe kukunda ulonzi wa kukomya.
2TH 2:14 Nguluwi nakawachemelani mbuli ayi kukolela Mbuli Inojile yotuwadamlileni, nakawachema leka namwe muwe na honhu kuli ukulu wa Mkulu wa hetwe Yesu Kilistu.
2TH 2:15 Lelo wang'holozangu, mleche kutigasika na kibatilila gala malanguso gotuwalanguseni kwa kudamla kwa hetwe na gala gotuwandichile.
2TH 2:16 Twangumlanda Mkulu wa hetwe Yesu Kilistu yuye na Nguluwi Mhaza wa hetwe nayawele yatuganile na yatupele isungu lya heye, nakatudita tukole mbuli zinojile na kutukangaza mazuwa gose ne kuduma na kutupa utumbilo wa kukomya,
2TH 2:17 kanguzikangaza nhumbula za hemwe na kuwadita muwe na ludali kuli kudita na kulonga gawele ganojile.
2TH 3:1 Hamba, wang'holozetu, mtulandile leka usenga wa Mkulu ulutilile kwenela himahima na kubocheligwa goya kota vila vyouwele hali hemwe.
2TH 3:2 Mlande kahi leka Nguluwi yatulohole na wanhu wasowile isungu na wehile, mina haiwele weng'ha walingukunda usenga awu.
2TH 3:3 Ila Mkulu ndo wakitumbila, heye kowadita mwime nzinzili na kuwamila goya na yula Mwihe.
2TH 3:4 Mkulu katugalila utumbilo kota mwangudita na molutilila kudita gala gotuwalonjelani.
2TH 3:5 Mkulu yalongoze nhumbula za hemwe kuli kulizela igano lya Nguluwi na kuli kwimilila tulingupegwa na Kilistu.
2TH 3:6 Wang'holozangu, twanguwalajiza kwa itagwa lya Mkulu wa hetwe Yesu Kilistu, mibagule na wanhu weng'ha walingumkunda Kilistu wawele wagata na wawele hambe wawinze malanguso gotuwalanguse.
2TH 3:7 Hemwe baho mvizela kota mwanguganigwa kiwhana na hetwe. Hetwe nalotwali na hemwe nahatwali wagata,
2TH 3:8 hatudile chilyo kwa munhu yoneche ne kumha chinhu. Na tukola mijito kwa kikangaza na magazo misi na mihe leka tuleche kumha munhu yoneche hali hemwe, mijito ya kutulela.
2TH 3:9 Natwahalandile kutanzwa na hemwe, ila natudita ahyo kwa vila natugana mtwijize hetwe.
2TH 3:10 Vyonatwali hamwe na hemwe twali tuwalonjelani, “Munhu yoneche yohaganile kukola mijito, yaleche kulya chilyo.”
2TH 3:11 Twangulonga mbuli ayo kwa vila tuhulika kota wabaho wamwe wa hemwe wagata na hawalingudita choneche, ila wanguwa videlenya kwa mbuli za wanhu wanji.
2TH 3:12 Kwa litagwa lya Mkulu wa hetwe Yesu Kilistu twanguwalajiza na kuwakanya wanhu awo wekale vyoilinguganigwa na wakole mijito leka wawe na vinhu vya kuwatanza hewo.
2TH 3:13 Ila hemwe wang'holozetu, mleche kutoka kudita ganojile.
2TH 3:14 Wone munhu yoneche hambe yahulichize usenga awu wotuwegalileni, lelo mumzele munhu ayo, na mumuwiche hazelu munhu ayo leka yone soni.
2TH 3:15 Ila mleche kumona munhu ayo kota mng'honyo wa hemwe, ila mumlonje kota vila mng'holozenu.
2TH 3:16 Mkulu yuye yalingigala kikala goya, kowapani hemwe kikala goya mazuwa gose na kwa chila nzila. Mkulu yawe na hemwe mweng'ha.
2TH 3:17 Heni Paoli, ndanguwalamsani kwa kuwandichila lyandiko ali kwa moko wa nene baha na ahi ndo vyondilinguwika ulajilo kuli chila lyandiko lyondiwandichile.
2TH 3:18 Isungu lya mkulu wa hetwe Yesu Kilistu liwe hamwe na hemwe mweng'ha.
1TI 1:1 Heni nda Paoli, chitumagwa wa Kilistu Yesu kwa ilajizo lya Nguluwi mlohozi wa hetwe na Kilistu Yesu tuwele ngitumbila,
1TI 1:2 ndangukwandichila hegwe Timoteyi mwanangu ng'hatu kuli makundo. Ndangukulandila kwa Nguluwi Mhaza na Kilistu Yesu Mkulu wa hetwe yakupe utambichizo na isungu na kikala goya.
1TI 1:3 Ndangugana wikale ako Efeso, walonjele kota vyondikulandile vyonandali ndiluta Makedoniya. Wakuko wanhu wamwe ako wawele ngulangusa malanguso ga udesi. Muwalemeze wanhu awo.
1TI 1:4 Walonjele weleche na zila ndano zowawele ngulonga na mbuli zilikuduhu za lung'hongola lwa wasekulu, luwele ngigala hela ibamba, hazilinguwazenga wanhu kuli mijito ya Nguluwi izeleche kwa makundo.
1TI 1:5 Chiwalo cha mzilo awu ndo kigala igano liwele ngulawila kuli nhumbula ilihela nongwa na kugana kudita ganojile na makundo ga kukomya.
1TI 1:6 Wanhu wanji wahadigwa na kuhinduchila ndonga zohaziwele zitanganiche.
1TI 1:7 Wangugana wawe walangusa wa Malajizo ga Musa, ila hambe wavizele ulonzi wa hewo wawo wowalingulonga ama mbuli yowawele ngukunda.
1TI 1:8 Tuvizela kota malajizo ndo ganoga, vyoilingukundigwa kota vyoilinguganigwa.
1TI 1:9 Ila twanguvizela kota malajizo ga Musa hambe gawichigwe kwa chiwalo cha wanhu wanojile, ila kwa chiwalo cha wanhu wehile na wanhu hambe wamkunde Nguluwi na wanhu hambe wamfugamile Nguluwi na wanhu wawele na gehile na wala hawelile na wanhu hawamzelele Nguluwi na wanhu wawele nguwakopola wahaza wa hewo na wamai zao, ama wawele ngukopola woneche wala.
1TI 1:10 Malajizo gawichigwa kwa chiwalo cha wahozolomo na walinguwasa na walume wayao na wawele nguwaguza wanhu na wadesi na wawele ngulavya ulolezi wa udesi ama wawele ngudita choneche chiwele vinji na malanguso ga kukomya.
1TI 1:11 Kwa wanhu malanguso ago gangoneka kuli Mbuli Inojile ya ukulu wa Nguluwi yalingutambichiza na iwele heni mhegwa ndiidamle.
1TI 1:12 Ndanguta malumbo Mkulu wa hetwe Kilistu Yesu mlohozi yamhele ludali kwa chiwalo cha mijito ja heni. Ndanguta malumbo kwa kumbona heni kota nhanganiche, nakanyhagula ndiwe chitumagwa wa heye.
1TI 1:13 Aho katali heni nandimliga na kumgaza na kumditila mbuli zihile ne kona isungu. Ila Nguluwi nakambonela isungu, kwa vila nandali hela makundo, ahyo, nandita ago nekuvizela chondali ndikola.
1TI 1:14 Ila Mkulu wa hetwe nakamha isungu lya heye kwa winji, nakhama makundo na igano kuli kilumba na Kilistu Yesu.
1TI 1:15 Ulonzi awu ndo wa kukomya na kukundigwa, na kahi wanguganigwa kukundigwa ng'hatu, Kilistu Yesu nakoya muisi kuwalohola wawele na gehile. Na heni nani ndina gehile ng'hatu kusinda hewo weng'ha,
1TI 1:16 ila Nguluwi na kambonela isungu, leka, Kilistu Yesu yalajile kwimilila kwa heye kweng'ha kwa heni mbele na gehile kusinda weng'ha, kota kiwhana kwa wala weng'ha wowa hamba womkunda na kubochela ukomu wa mazuwa gose.
1TI 1:17 Kwa heye yawele Mndewa wa mazuwa gose, yawele hambe yabagame na hambe yoneche na yawele Nguluwi yaliyeng'ha, kwa heye viwe lutogo na ukulu mazuwa gose na mazuwa gose! Ena.
1TI 1:18 Mwanangu Timoteyi, ndangukupa ilajizo alino kwa mbuli ya uloli woulonjigwe katali kwa chiwalo cha hegwe. Uhole ulonzi awo viwe vinhu vya hegwe vya kitowela vita goya,
1TI 1:19 na ibate makundo ga hegwe na kudita ganojile. Wanhu wanji hawahulichize kutanganika kwa hewo na ahyo nawagawifya makundo ga hewo.
1TI 1:20 Hali hewo ndo Humenayo na Alekizanda wondiwagazila kwa kuwalechela weting'hane na ludali lwa Limazoga, mbuli ayi yowalangusa waleche kumliga Nguluwi.
1TI 2:1 Ung'hali kudita chinhu choneche chila, mumlande Nguluwi kwa gala gomlingugana na kumfugamila Nguluwi na kuwalandila wanji na kuta malumbo, zilavigwe kwa Nguluwi kwa chiwalo cha wanhu weng'ha,
1TI 2:2 na muwalandile Wandewa kwa Nguluwi na weng'ha wawele mli ulongozi, leka tuwe twikale mli ukomu uholile na kikala goya hamwe na kumdumba Nguluwi na vyoulingikala goya.
1TI 2:3 Mbuli ayi inoga na lyangukundigwa na Nguluwi yawele Mlohozi wa hetwe,
1TI 2:4 yawele ngugana wanhu weng'ha waloholigwe na kuvizela kukomya.
1TI 2:5 Mina kakuko Nguluwi yumwe, na kahi kakuko yumwe yawele nguwahanyisa wanhu na Nguluwi, munhu ayo ndo Yesu Kilistu,
1TI 2:6 yangoneka kota ulolezi kwa mhela utanganiche, Nguluwi kangugana kuwagombola wanhu wa heye.
1TI 2:7 Kwa chiwalo acho, heni nandajizigwa ndiwe chitumagwa na mdamla wa wanhu hawawele Wayahudi, ndiudamle usenga wa makundo na kukomya. Ndangulonga ndikomya, hambe ndonje udesi!
1TI 2:8 Lelo ndangugana homting'hana walume wawele na nhumbula zelile, ndo wenule moko howolanda kwa Nguluwi, ne kuzudila na walihela ibamba.
1TI 2:9 Vivyo du, wadala wavale mivalo jilingukundigwa hali wanhu, hamwe na madito ganojile na haiwele kwa kinoliga kwa kudalanga mnvili na kinoliga kwa zahabu na lulu na nguwo zilinguguligwa kwa sendi nyinji,
1TI 2:10 ila kwa madito ganojile kota vyoiwele nguganigwa kwa wadala wawele ngumfugamila Nguluwi.
1TI 2:11 Wadala wanguganigwa wekale wanyamalile tulu na wawe wohulichiza mhela wa kilangusa.
1TI 2:12 Heni hambe ndimkundize mdala yamlanguse ama yamkalile kumutwi mlume, kanguganigwa yekale yenyamalile tulu.
1TI 2:13 Mina Adamu na kalumbigwa mwaluko, hamba Hawa.
1TI 2:14 Na haiwele Adamu yahadigwe, ila mdala ndo yahadigwe, nakenjila kuli kudita gehile.
1TI 2:15 Ila mdala koloholigwa kwa kuponda wana, wone yekale kuli makundo na igano na kwela na madito ganojile.
1TI 3:1 Ulonzi awu wa kukomya, munhu yawele ngugana kuwa vilongozi wa chilundo cha walingukunda wakilistu.
1TI 3:2 Ila, chilongozi wa chilundo cha wanhu walingumkunda Kilistu, kanguganigwa yawe munhu yalihela nongwa yoneche na kanguganigwa yawe na mdala yumwe hela na yalingidima yuye na yalingikala goya na wanhu na luhala na yaleche kuwa mbuhu na yoweza kulangusa.
1TI 3:3 Yaleche kuwa yogala na yotowa wanhu, ila yawe yaholondale, yawele ngugana kikala goya na yaleche kuwa munhu wa kugana sendi.
1TI 3:4 Yanguganigwa yawe munhu yawele nguweza kulongoza goya ivyazi lya heye, na yawadite wanage wekale kwa kusindamala na wawele na madito ganojile kwa wanhu weng'ha.
1TI 3:5 Mina wone munhu hambe yaweze kulongoza goya ng'handa ya heye, koweza ndaze kuchilongoza chilundo cha wanhu walingumkunda Kilistu cha Nguluwi?
1TI 3:6 Heye halinguganigwa yawe munhu yamkundile Kilistu mhela wuwu, yaleche kidaya na kutagusigwa kota vila Limazoga navyolitagusigwe.
1TI 3:7 Kanguganigwa kahi yawe munhu yalinguhulichizwa na wanhu weng'ha wa Nguluwi, yaleche kugwa kuli kubaswa soni na kugwila kuli idiwa lya Limazoga.
1TI 3:8 Watanzi, vivila wanguganigwa wawe wanhu walinguhulichiza ng'hatu, waleche kuwa wadesi, wawe wanhu wawele hambe wagale ama wabuhu wa sendi zipaligwe kwa nzila yihile.
1TI 3:9 Wanguganigwa wawe webatilile ng'hatu kukomya kuli mgati mwa makundo.
1TI 3:10 Leka tandi wajezigwe na hamba wone woneche walihela wihe kwa hewo, lelo hewo wadite mijito ayo.
1TI 3:11 Hiho, wadala nawo yanguganigwa wawe na madito ganojile ng'hatu na walingutogoligwa na wanhu na waleche kuwa wahesi na walingidima ila wawele kukundigwa kuli chila chinhu.
1TI 3:12 Mtanzi kanguganigwa yawe mlume wa mdala yumwe na yalingulola goya lukolo lwa heye na kulola goya wanage.
1TI 3:13 Mina walingudita utanzi wa hewo goya, wanguwadita wanhu wanji wawahulichize na woweza kwima nzinzili ne kudumba kuli makundo ga hewo kwa kilumba na Kilistu Yesu.
1TI 3:14 Londikwandichila lyandiko ali ndangitumbila kota ndokuya kukona hegwe mhela wuwu wa sambi.
1TI 3:15 Ila wone wang'hawize, lyandiko ali lyokuzelesa ndaze vyotuting'hana twetwe baha hali wanhu walingumkunda Kilistu, wawele ndo wanhu wa Nguluwi yawele mkomu na yawele ndo izengo na msisi wa kukomya.
1TI 3:16 Kuduhuli kuuzauza kuli uviso wa kukunda kwa hetwe. Heye nakalawila yewhanile na munhu, nakoneka na Muhe Yelile nakamlajila kota kakundigwa hali nguluwi. Nakoneka na wahilisi wa kilanga. Nakadamligwa hagati ha isi yeng'ha. Nakakundigwa honeche hali isi, nakaholigwa kilanga kwa Nguluwi.
1TI 4:1 Muhe Yelile kangulonga ne kuvisa kota, mhela wa kuduma wanji wochibagula na makundo, wohulichiza muhe yalinguhada na malanguso ga Limazoga.
1TI 4:2 Malanguso ago gangwenezwa na wanhu wawele wahadi na wadesi, ludali lwa hewo lwa kuhagula ganojile na gehile ubagama kota vila usomigwa kwa chiluli cha lyuma.
1TI 4:3 Wanhu awo wangulangusa kota vibi kihola na wanguwalemeza wanhu kulya vilyo vinji. Ila Nguluwi nakalumba vilyo vila leka wanhu wawele wamkundile na kuvizela kota wangukomya walye chila chinhu choyachilumbile kwa kuta malumbo Nguluwi.
1TI 4:4 Chila chinhu choyachiumbile Nguluwi chinoga, kuduhuli chiwele kulemigwa, wone vibocheligwe kwa kuta malumbo Nguluwi,
1TI 4:5 kwa vila ulonzi wa Nguluwi na kulanda kwanguchidita chinhu achi chikundigwe hali Nguluwi na makundo ga kukomya goulingugawinza.
1TI 4:6 Wone uwapa malajizo ago wang'holozo, kowa chitumagwa yanojile wa Kilistu Yesu, ulutilila kukula chimuhe kwa ulonzi wa makundo na malanguso gakukomya, gala hegwe goulanguswe.
1TI 4:7 Ila hegwe Timoteyi, uleme ndano zila zohaziwele za Nguluwi na za chipoka. Wizoweze kikala kuli ukomu ulingumnojeza Nguluwi.
1TI 4:8 Kigololagolola vitomo vya lukuli vyangututanza lukami, ila kizoweza kikala kwa kumnojeza Nguluwi kwa chila chinhu kunoga lukami, mina kwangilagana ukomu wa sambi na ukomu ulinguya hamba.
1TI 4:9 Ulonzi awo ndo wa kuvumilwa ng'hatu na wanguganigwa kukundigwa.
1TI 4:10 Hetwe twangikangaza na kukola mijito kwa kupajila, kwa vila tumuwichila utumbilo wa hetwe Nguluwi yawele mkomu na yawele ndo mlohozi wa wanhu weng'ha, na ng'hatu wala walingumkunda Kilistu.
1TI 4:11 Ulanguse mbuli azo na uwahimilize wanhu wadite mbuli azo.
1TI 4:12 Uleche munhu yoneche yakubeze kwa vila hegwe kwa msongolo, ila wikangaze uwe wakwijizwa kwa walingukunda, kuli ulonzi wa hegwe na madito ga hegwe na igano na makundo na ukomu ulingumnojeza Nguluwi.
1TI 4:13 Mazuwa gose ulutilile kuwasomela wanhu Maandiko Matakatifu, kudamla na kulangusa mbaka hondikuya.
1TI 4:14 Uleche kubeza yila ndolendole ya chimuhe iwele mgati mwa hegwe, kwa kukolela usenga wa waloli hala nhing'hano ya wasekulu ya wanhu walingumkunda Kilistu lowakutambichize.
1TI 4:15 Wijese ng'hatu kwa mbuli azo zeng'ha, na wikangaze kuli kugadita leka kwinuka kwa hegwe koneche na wanhu weng'ha.
1TI 4:16 Wilolele ng'hatu mbuli za hegwe na malanguso ga hegwe. Ulutilile kudita ago, mina houdita ahyo, kochilohola gwegwe baho na kuwalohola wala walingukuhulichiza.
1TI 5:1 Uleche kumng'hanuchila sekulu, ila ulonje na heye kota mhaza wa hegwe. Uwaditile wasongolo kota wang'holozo,
1TI 5:2 na hewo wadala wawele wakulu kota maiwako na wahinza kota walumbuzo, wiyamile kuli kwela kweng'ha.
1TI 5:3 Muwahulichize wadala wafililwe na walume wa hewo, wawele hela utanzi woneche.
1TI 5:4 Ila mdala yafililwe na mlume na yawele na wana ama wazukulu, awo yanguwalapa kilangusa na kukola gala galinguwalapa hewo welanguse kudita gala galingumnojeza Nguluwi kwa lukolo lwa hewo na kuwahilulila ganojile wahaza wa hewo na wasekulu wa hewo gowawaditile aho mwaluko, ahyo ndo mbuli ilingumnojeza Nguluwi.
1TI 5:5 Mdala yafililwe na mlume ng'hatu, yalihela munhu wa kumtanza, kamwichila Nguluwi utumbilo wa heye na kulutilila kulanda Nguluwi yamtanze nechilo na nemisi.
1TI 5:6 Ila mdala yafililwe na mlume wa heye, yalingugana kikala kuli ukomu wa unojenoje, ayo ndo kota kabagama, hanga yang'hali mkomu.
1TI 5:7 Uwalonjele wanhu awa wadite ago, leka waleche koneka wana nongwa.
1TI 5:8 Wone munhu hambe yawalole goya wanhu wa nhanzi ya heye, ng'hatu wala wanhu wa haluga hake, lelo munhu ayo kabela makundo, na ndo keha ng'hatu kusinda munhu yohambe yamkunde Kilistu.
1TI 5:9 Uleche kumwandika mchitabu mdala yafililwe na mlume, yoneche yawele na ukulu wa mihela makumi sita. Kahi yawe yaholeche kamwe hela,
1TI 5:10 na yawe munhu yawele ngulonjigwa goya na wanhu kwa madito ganojile, yawalelile wana wa heye goya, yawabochele wajenzi haluga hake na yawahovuje magulu wanhu wa Nguluwi na yawatanze wanhu nawawele na magazo na yekangaze kudita mbuli zinojile.
1TI 5:11 Uleche kuwandichiza wadala wahinza wafililwe na walume, hanji wone maya ga hewo ga lukuli gowa wogana waholeche kahi, wogaluka na womleka Kilistu,
1TI 5:12 na hewo wokoneka wahela makundo kwa chiwalo cha ilagano lya hewo lya aho mwaluko.
1TI 5:13 Wadala wafililwe na walume wangilangusa kufanda kota wagata, hewo wangwaluka kwajiliza mhela wa hewo kwa kubemela ng'handa mbaka ng'handa, kahi chihile ng'hatu wangwaluka kuwaheha wanhu, na kiyinjiza kuli mbuli za wanhu wanji, kuno wolonga mbuli zila zohawalapigwe kulonga.
1TI 5:14 Ahyo nangana wadala wahinza wafililwe na walume waholeche, wawe na wana na kulolela ng'handa za hewo leka yehile yaleche kuwa na mhumhu ya kulonga mbuli yihile ya kutulapa hetwe.
1TI 5:15 Mina wadala wahinza wafililwe na walume wawo, wanji wagaluka na kuliwinza Limazoga.
1TI 5:16 Ila wone mamo yalingukunda yalinawo wang'holoze wafililwe na walume, kangulapigwa kuwatanza, leka yaleche kuchilechela chilundo cha wanhu walingumkunda Kilistu, kudita mijito ayo, leka chilundo cha wanhu walingumkunda Kilistu chidite mijito ya kuwatanza wala wadala wanji wafililwe na walume walihela utanzi woneche ula.
1TI 5:17 Vilongozi wa chilundo cha wanhu walingumkunda Kilistu, wanguganigwa wapegwe vinhu keli ng'hatu, nawo ndo wala wawele ngikangaza ng'hatu kuli kudamla na kulangusa.
1TI 5:18 Na kahi Maandiko Matakatifu gangulonga, “Uleche kudinya mlomo wa isenga houdita mijito ya kupulula nyhule za uhemba.” Na kahi mkola mijito kangulapigwa kulipigwa.
1TI 5:19 Uleche kukunda kubochela nongwa ya sekulu yalingulongoza chilundo cha walingukunda, wone hayalavigwe ulolezi wa wanhu weli ama wadatu.
1TI 5:20 Wala wawele ngudita gehile wang'hanuchilwe hazelu, leka wanji wadumbe.
1TI 5:21 Ndangukulajiza hali Nguluwi, hali Kilistu Yesu na hali wahilisi wa kilanga welile, mibatilile malajizo aga ne kuleka ne limwe, kahi uleche kumzudila munhu na uleche kumganilila munhu yoneche kwa chila chinhu choulingudita.
1TI 5:22 Uleche kumdita munhu yawe chilongozi himahima kwa chiwalo cha kuwa chitumagwa wa mkulu. Uleche kihanza kuli gehile ga wanhu wanji, ila wikale welile kwa kumnojeza Nguluwi.
1TI 5:23 Kulawila sambi, uleche kunwa mazi hela, ila unwe divai nyindo kwa chiwalo cha munda wa hegwe, kwa vila kwangugula baho na baho.
1TI 5:24 Gehile ga wanhu wanji gangoneka hazelu lowang'hali hilikwa kuli utaguso. Ila gehile ga wanji gokoneka hala howohilikwa kuli utaguso.
1TI 5:25 Hihyo na madito ganojile gangoneka hazelu, na gala hagali ngoneka hazelu hogoweza kuvisigwa.
1TI 6:1 Wapogozi weng'ha wangulapigwa kuwahulichiza wakulu wa hewo kuli chila mbuli, leka kuleche kuwa na chiwalo cha wanhu kuliliga itagwa lya Nguluwi na malanguso ga hetwe.
1TI 6:2 Wapogozi ama wakulu wa hewo walingumkunda Kilistu, waleche kuwabeza kwa vila wanguwalola kota wa Wakilistu wayao hela. Ila hewo wangulapigwa kuwafugamila goya ng'hatu, mina wala wakulu awo, walingubweda ng'hatu kwa madito ga wapogozi, kahi ndo wanhu walingumkunda Nguluwi walinguwagana. Kwangulapigwa kulangusa na kudamla mbuli azi.
1TI 6:3 Munhu yoneche yalingulangusa malanguso ga udesi, na yalingulema ulonzi wa kukomya wa Mkulu wa hetwe Yesu Kilistu na kikala kota vyoyalingugana Nguluwi,
1TI 6:4 ayo kamema kidaya na havizelele choneche. Ndo munhu wa kugana ibamba na ivuche muli ulonzi yeka, na ayo yangwambuza maya na kilewa na maligo na Majesa gehile,
1TI 6:5 na ibamba lilihela kuduma kulawila kwa wanhu wawele na nyhala ziwifigwe, kahi wahela cha kukomya ng'hatu. Walingijesa kota kumditila Nguluwi ndo nzila ya kumigalila lufufu.
1TI 6:6 Ndangukomya, kumditila Nguluwi, koweza kumdita munhu yawe na lufufu ng'hatu, wone kanguganigwa kukundizwa kwa vinhu vyoyawele navyo.
1TI 6:7 Mina hatigale chinhu choneche aha muisi na hatuhola chinhu choneche hotukuka amu muisi.
1TI 6:8 Kwa ahyo lelo, wone tuwele na chilyo na nguwo kwanguganigwa kukundizwa navyo.
1TI 6:9 Ila wala walingugana kuwa na lufufu wangugwa kuli kujezigwa na kugwila kuli idiwa lya maya menji gehile ga chipoka na zakigala magazo, gawele kuwakwega mbaka kuli kuwifyigwa na kubagama.
1TI 6:10 Mina kugana lukami sendi ndo kwaluka kwa wihe weng'ha. Wanhu wangugana ng'hatu kiyipa sendi mbaka wangulubaluba kutali na makundo, na nhumbula za hewo zimema masinzo menji.
1TI 6:11 Ila hegwe, munhu wa Nguluwi, wiyuse na mbuli azo. Wibatilile koneka yawele na isungu hali Nguluwi na kudita gala ganojile na makundo na igano na kubeteza na kubudala.
1TI 6:12 Ubilime kota vyouweza kwa kikangaza kugasumya majezo kuli makundo, ukapegwe chonolo cha ukomu wa mazuwa gose louchemigwe na Nguluwi, mhela loukundile gwegwe baho, ago makundo ga hegwe hali walolezi wenji.
1TI 6:13 Ndangukulajiza hali Nguluwi yalinguvipa vinhu vyeng'ha ukomu na hali Yesu Kilistu yalavile ulolezi na kuulonga heye kukomya hali Pontio Pilato,
1TI 6:14 uhulichize ilajizo alyo na kudita kwa makundo mbaka zuwa lya kuhiluka kahi, Mkulu wa hetwe Yesu Kilistu.
1TI 6:15 Kuya kwa heye kahi, koditikwa mhela utanganiche uwichigwe na Nguluwi yatogoligwe na Chilongozi yaliyeng'ha, Mndewa wa wandewa na Mkulu wa wakulu.
1TI 6:16 Heye yaliyeka kangikala mazuwa gose kuli lumuli luwele hambe luhejelelwe na munhu. Kuduhu munhu mina yamonile ama yogana kumona. Kwa heye iwe lutogo na kulongoza kwa mazuwa gose! Ena.
1TI 6:17 Uwalajize wanhu wawele na lufufu kuli mbuli za isi ya sambi, waleche kidaya na waleche kuwika utumbilo wa hewo kuli lufufu lohaluwele lwa kitumbila, ila wetumbile Nguluwi, yawele wa kunyenyetela kangutigalila vinhu vyeng'ha vitusangalaze.
1TI 6:18 Uwalajize wadite madito ganojile, wadite mijito nyinji zinojile na wawe wonyenyetela na wawe wemile nzinzili kuwapa kwa kunyenyetela wanhu wanji vinhu vya hewo.
1TI 6:19 Kwa mbuli ayo, wawo wochiwichila ng'hano iwele ndo msisi wimile kwa mhela ulinguya. Aho woweza kiholela ukomu uwele ndo ukomu wa kukomya.
1TI 6:20 Gwaa Timoteyi, uwiche goya geng'ha gala goupegwe. Wiyuse na ulonzi haulingumnojeza Nguluwi na ibamba lya chipoka kwa chila chowalingichema wanhu wanji, wanguchema uwanzi.
1TI 6:21 Mina wanhu wanji wedaya kota wana awo uwanzi na chilawile aho, wajiliza makundo. Ndanguwaganilani weng'ha Isungu lya Nguluwi!
2TI 1:1 Heni Paoli, mbele mtumigwa wa Yesu Kilistu kota vyoyaganile Nguluwi, Nguluwi nakandajiza ndiidamle mbuli yila ya ukomu yoyalagane kuli kilumba na Kilistu Yesu.
2TI 1:2 Ndangukwandichila hegwe mwanangu yondikuganile Timoteyi. Ndangukuganila kunoga kwa Nguluwi na isungu na kikala goya kulawila kwa Nguluwi Mhaza na Kilistu Yesu Mkulu wa hetwe.
2TI 1:3 Ndanguta malumbo Nguluwi yula yombele kumkolela mijito kwa nhumbula ilihela nongwa kota vyowaditile wasekulu wa heni. Ndanguta malumbo Nguluwi chila hondikumbuchila kuli kulanda kwa heni, nechilo na nemisi.
2TI 1:4 Ndangukumbuchila mahozi ga hegwe na ndangugana ng'hatu kukona, leka memezwe na kusangalala.
2TI 1:5 Ndangukumbuchila makundo ga hegwe ga kukomya, makundo nayawele nago papa wa hegwe Loisi na kahi mayako Eunike. Ndangukunda kahi kota hegwe nagwe kwanago.
2TI 1:6 Ndo mina ndangukukumbusa uidite iwe ipwituche yila ndolendole iwele mgati mwa hegwe, youpegwe na Nguluwi hala hondikuwichile moko wa heni.
2TI 1:7 Mina Muhe wotupegwe na Nguluwi hauwele wa kutudita tuwe tudumba, ila ndo yalingutugalila mong'ho na igano na kilongoza twetwe.
2TI 1:8 Lelo uleche kona soni kulavya ulolezi kwa chiwalo cha Mkulu wa hetwe, na kahi uleche kona soni kwa chiwalo cha heni mbele mnweng'hwa kwa chiwalo cha heye. Ila wimilile kilumba kuli magazo kwa chiwalo cha Mbuli Inojile, kota hila ludali loupegwe na Nguluwi.
2TI 1:9 Heye nakatulohola, nakatuchema tuwe wanhu welile wa heye yuye, haiwele kwa chiwalo cha madito ga hetwe ganojile gotugaditile, ila kwa chiwalo cha majesa ga heye na isungu lya heye. Nakatugalila isungu alyo kukolela Kilistu Yesu kulawa katali isi loing'hali lumbigwa.
2TI 1:10 Ila isungu lya Nguluwi, ligubuligwa kwa hetwe sambi kwa kuya kwa heye mlohozi wa hetwe, Kilistu Yesu. Heye kadumya ludali lwa kubagama na kukolela Mbuli Inojile nakaugubula ukomu ulihela kubagama.
2TI 1:11 Heni nyhaguligwa na Nguluwi ndiwe mtumigwa na mlangusa kwa chiwalo cha kudamla Mbuli Inojile,
2TI 1:12 kwa chiwalo acho, ndo mina ndangugazika kota ahi. Silingona soni kwa chiwalo acho, kwa vila ndimzela yula yondimkundile. Ndangukomya kota koweza kwamila chila choyamhele mbaka zuwa lila hoyohiluka kahi.
2TI 1:13 Wibatilile goya ula ulanguso wa kukomya wondikulanguse gawe ulajilo kwa hegwe na kupona kuli makundo na igano lyako liwele kuli kilumba na Kilistu Yesu.
2TI 1:14 Vinhu vila vinojile vyoupegwe uvyamile kwa ludali lwa Muhe Yelile yalingikala mgati mwa hetwe.
2TI 1:15 Kota vyouvizelele, wanhu weng'ha walingikala kuli mkowa wa Asiya wandeka, hamwe na hewo wamumo Fugelo na Helimogene.
2TI 1:16 Mkulu yayonele isungu lukolo lwa Onesifolo, kwa vila nakang'hangaza nhumbula chila mhela, kahi nahambonele soni kwa vila nandali mchinweng'ho,
2TI 1:17 ila hala du loyafichile muji wa Loma, nakaluka kumhala lukami mbaka kambona.
2TI 1:18 Mkulu yamonele isungu kwa zuwa lila lya utaguso! Nagwe kuvizela goya ng'hatu mbuli zila zeng'ha, Onesifolo loyanditile kula Efeso.
2TI 2:1 Lelo hegwe mwanangu, uwe na ludali kuli kunoga kwa Nguluwi kotupegwe kuli kilumba na Kilistu Yesu.
2TI 2:2 Uhole gala malanguso gouhuliche ndidamla hali walolezi wenji, ukawalanguse gago wanhu walingukundigwa, wala wawele woweza kuwalangusa wanji kahi.
2TI 2:3 Nagwe wimilile kuli magazo hamwe na hetwe kota mkola mijito yanojile kwa Kilistu Yesu.
2TI 2:4 Mwamizi yawele kuli ngondo, kangiwika kutali na mijito ya kikala kwa chila zuwa, ila kangudita mijito ya kuli ngondo leka yaweze kumnojeza chilongozi wa wamizi.
2TI 2:5 Vivila munhu yalingitwanza na wayage kuli kubilima, howeza kusumya na kupegwa chonolo cha kusumya, mbaka yagomanjize malajizo gawichigwe.
2TI 2:6 Mlimi yalimile ng'hatu, kangulapigwa yawe wa mwaluko kupegwa mbena.
2TI 2:7 Wijese aga gondilingukulonjela, mina Mkulu kokutanza uvizele chila chinhu.
2TI 2:8 Mkumbuchile Yesu Kilistu yazilipuligwe, nayali wa lukolo lwa Daudi, kota vyoilingulonga Mbuli Inojile yondilingudamla.
2TI 2:9 Na yila kwa chiwalo cha heye, heni ndangugazika na mbopigwa minyololo kota munhu yawele ngudita wihe, ila ulonzi wa Nguluwi hauweza kuwopigwa na minyololo.
2TI 2:10 Ahyo, ndangwimilila chila chinhu kwa chiwalo cha wala wahaguligwe na Nguluwi, leka hewo kahi wapegwe na ulohozi ulinguya kwa kukolela Yesu Kilistu, ula ulingigala ukulu wa mazuwa gose.
2TI 2:11 Ulonzi awu ndo wa kukomya, “Wone natubagama hamwe na Kilistu, kahi tochikala hamwe na heye.
2TI 2:12 Lotulutilila kwimilila, kahi tolongoza hamwe na heye. Hotumbela, kahi na heye kotubela hetwe.
2TI 2:13 Lotuwa wanhu hatuwele wa kukundigwa, heye kangupona wakukundigwa mazuwa gose, mina heye howeza kibela yuye.”
2TI 2:14 Lelo uwalonjele wanhu wa hegwe waleche kusemwa mbuli azi na kuwafunda hali Nguluwi waleche kitwanza kwa mbuli ya ulonzi. Kitwanza ako hakunojile, mina kwangigala hela kuwifya kukulu kwa wala walinguhulika.
2TI 2:15 Wikangaze kudita galingumnojeza Nguluwi uwe chitumagwa hambe yone soni kuli mijito ya heye na yawele kulangusa ulonzi wa kukomya wa Nguluwi kota vyoilinguganigwa.
2TI 2:16 Wiyuse na nhelo za chipoka na hazilingumnojeza Nguluwi, kwa vila azo zangonjeza kuwadita wanhu wekale kutali na Nguluwi.
2TI 2:17 Ulanguso awo ufanda kota chilonda chilingukula himahima na chilingudakula lukuli. Wanhu wamwe walanguse chinhu acho ndo Humenayo na Fileto.
2TI 2:18 Awa wajilila ng'hatu kutali na mbuli ya kukomya na wangukopola makundo ga wanhu kwa kulonga uzilipuko tulingubeteza mina ukoleka.
2TI 2:19 Ila kukomya kwa Nguluwi kwima nzinzili kota iganga lya msisi na mchanya mwake wandichigwa ulonzi awu, “Mkulu kanguwazela wala wawele wa heye,” Na chila yalingulonga hewo ndo wa Mkulu, waleche wihe.
2TI 2:20 Kuli ng'handa ng'hulu kuna visaye na vinhu vya chila mbuli, vinji viditikwa kwa sendi na zahabu, zangutumiligwa chiuyeng'ha na vinji viditikwa kwa migodi na ilongo zangutumiligwa kwa mbuli za chila zuwa.
2TI 2:21 Lelo wone munhu yewiche yawe yelile kwa kibagula kutali na mbuli zihile, kowa chinhu cha mijito ya uyeng'ha, kwa vila kahaguligwa na kangumnojeza Mkulu wa heye na kewika goya kwa chila mijito inojile.
2TI 2:22 Wiyuse na maya ga chisongolo, udite gatanganiche na makundo na igano na kikala goya hamwe na wanhu weng'ha wawele womlanda Mkulu kwa nhumbula ilihela nongwa.
2TI 2:23 Wiyuse kitwanza kwa chipoka, uvizela kota ago gegalaga kilewa.
2TI 2:24 Chitumagwa wa Mkulu halinguganigwa kilewa. Imgana yawe liholile kwa wanhu weng'ha, yavizelele kulangusa na yalingwimilila.
2TI 2:25 Kanguganigwa yawakanye mholemhole wala walingumbela heye, kwa vila hanji Nguluwi kowapa mhumu ya kumgalamchila heye, leka wakuzele kukomya.
2TI 2:26 Ahyo, nyhala za hewo zowahiluchila kahi, nakuwadita wasulupuche kuli idiwa lya Limazoga yawagwilize na kuwadita wawinze goyalingugana.
2TI 3:1 Ukumbuchile kota, kuli mazuwa ga kuduma kowa na mhela wa magazo.
2TI 3:2 Wanhu wowa wochigana yeng'ha, wawele ngugana ng'hatu sendi na wawele ngidaya na wawele ngilola na walingumliga Nguluwi na wawele hambe wawahulichize wahaza wa hewo na wohambe walonje malumbo na wohambe walingumfugamile Nguluwi.
2TI 3:3 Wanhu wohambe wagane kuhanyiswa na walihela isungu na wasonjelezi na walingulemwa kilongoza na wang'hanuche na walingugana kilewa choneche chiwele chinojile.
2TI 3:4 Wowa wowahinduka wayao na wawele na walingudita chinhu ne kijesa na wamemile ibamba na wogana kiheweza ng'hatu ne kumgana Nguluwi.
2TI 3:5 Kwa kuwalola, wokoneka kota wanhu walingumfugamila Nguluwi, ila wolema mong'ho wake. Wiyuse ng'hatu na wanhu awo.
2TI 3:6 Wanhu awo walutaga kuli ng'handa za wanhu na kuwahada wadala wafililwe na walume wa hewo leka wawahulichize hewo. Wadala awo ndo wala wapoka wamemile mitunyo ja gehile na walingulongozwa kwa maya ga chila mbuli,
2TI 3:7 wadala awo wawele ngujeza kilangusa mazuwa gose, ila hawoweza ng'oo kuvizela kukomya.
2TI 3:8 Wanhu awo wangulema kukomya kota vila Yane na Yambule navyowambelile Musa. Wanhu awo luhala lwawo lwajilila na makundo ga hewo gajilila hela.
2TI 3:9 Wanhu awo, hawoweza kulutilila ng'hatu, mina upoka wa hewo wokoneka hazelu kwa weng'ha. Ndo vyoili kwa hewo Yane na Yambule.
2TI 3:10 Hegwe, kuwinza ulanguso wa heni na vyondikale heni na mbuli ya heni kuli ukomu na Majesa ga heni na makundo na wimililo wa heni na igano lya heni na kubetezo kwa heni,
2TI 3:11 kugaya kwa heni na magazo gangu. Kugazela geng'ha gandawile ako Antiokiya na Ikonio na Lustila. Nanyimilila magazo vikulu ng'hatu! Ila Mkulu nakandohola kuli mbuli azo zeng'ha.
2TI 3:12 Chila munhu yalingugana kikala kuli ukomu wa kumnojeza Nguluwi kuli kilumba na Kilistu Yesu, kogazigwa.
2TI 3:13 Wanhu wehile na wahadi wowa wehile ng'hatu, wowahada wanji, nawo wawo wohadigwa.
2TI 3:14 Ila hegwe ulutilile kikala kuli kukomya kula ulanguswe naukundile ng'hatu. Kwa vila kuwazela goya wala nawakulanguse,
2TI 3:15 kwangukumbuka kota kulawila vyouwele mwana, kugazela Maandiko Matakatifu gawele goweza ngukupa luhala lulingigala ulohozi kwa kukolela makundo gawele kwa Kilistu Yesu.
2TI 3:16 Maandiko Matakatifu gandichigwa kwa kuwichigwa Muhe wa Nguluwi na ganoga kwa kulangusa kukomya na kukanya wanhu kuli wihe wa hewo na kuwika goya wihe wowaditile na kuwalongoza wanhu wekale kuli ukomu wa kumnojeza Nguluwi,
2TI 3:17 leka munhu yalingumditila Nguluwi, yawe na chila chinhu choyalingugana kuli mijito ayo na ahyo yaweze goya kudita chila mijito inojile.
2TI 4:1 Ndangukulajiza hali meho ga Nguluwi na hali meho ga Kilistu Yesu yowatagusa wanhu wawele wakomu na wabagame, na kwa vila kanguya kulongoza na heye ndo Mndewa,
2TI 4:2 ndangukulajiza udamle awo usenga wa Nguluwi, ung'ang'anile kudamla kuli mhela unojile ama mhela haunojile na ung'anuche na kukanya na kuwakangaza nhumbula wanhu houwalangusa kwa wimililo weng'ha.
2TI 4:3 Mina, wokuya mhela uwele wanhu hawohulichiza ulanguso wa kukomya, ila wosangalaza maya gawo wawo na kikungajizila walangusa bwelele wowalonjela mbuli zila hela walingugana kuhulichiza.
2TI 4:4 Wolema kuuhulichiza kukomya, wogalamchila ndano za udesi.
2TI 4:5 Ila, hegwe uwe wilolela kuli chila mbuli na wimilile magazo na ukole mijito ya munhu yalingudamla Mbuli Inojile na wime nzinzili kuli mijito ya hegwe kwa Nguluwi.
2TI 4:6 Mina mhela wa heni wa kubagama wabehi, na danda ya heni yojidigwa kota vila watambika walingujida nhambiko ya divai hali meho ga Nguluwi.
2TI 4:7 Ndikangaza kuli kubilima, ndita goya kota munhu yalingitwanza kuli kubilima na makundo ndigawika goya.
2TI 4:8 Na sambi ipona hela kupegwa chonolo chila cha kudita ganojile hali meho ga Nguluwi na chonolo acho ndopegwa zuwa lila na Mkulu yawele mtagusa yalingutagusa goya na haiwele heni hela, ila hamwe na wala weng'ha walingubeteza kwa igano koneka kwa heye.
2TI 4:9 Wikangaze kuya kwa heni behi yiyi.
2TI 4:10 Mina Dema nakagana ng'hatu mbuli za isi ayi nakandeka kaza Tesalonike. Kilesike nakaluta Galatiya na Tito nakaluta Dalimatiya.
2TI 4:11 Lukasi yaliyeka ndo yawele aha hamwe na heni. Umuhole Malichi uye na heye, kwa vila koweza kunhanza kuli mijito ja heni.
2TI 4:12 Nandimlajiza Tukiko yalute kula Efeso.
2TI 4:13 Houkuya ndingalile ikoti lyangu nandililechile kwa Kalipo kula Tiloa, ndingalile kahi na vila vitabu, ng'hatu vila viditikwe kwa ngozi.
2TI 4:14 Yula mponzi yalinguchemigwa Alekizanda kanditila mbuli ya wihe winji, Mkulu komlipizila kwa ago madito ga heye.
2TI 4:15 Hegwe nagwe vivila wilolele na heye kwa vila nakaulema ng'hatu usenga wa hetwe.
2TI 4:16 Mhela londali ndichigombela hala mwaluko, kuduhu munhu nayemile ubanzi wa heni, weng'ha nawandeka. Ndangumlanda Nguluwi yawosele nongwa kwa mbuli ayo.
2TI 4:17 Ila Mkulu nakekala hamwe na heni, nakamha ludali, mbaka nambeza kuudamla usenga weng'ha, leka wanhu hawawele Wayahudi wauhuliche, na ahyo nandoholigwa kuli utaguso wa kubagama kota vila kuloholigwa kuli mlomo wa isimba.
2TI 4:18 Mkulu kondohola na mbuli zeng'ha zihile na kunyhola aku yonyamila goya mbaka kuli undewa wa heye wa kilanga. Ukulu uwe wa heye mazuwa gose! Ena.
2TI 4:19 Uwalamse Pilisika na Akula, hamwe na lukolo lwa Onesifolo.
2TI 4:20 Elasito nakapona ako kuli isi ya Kolinto, na heye Tilofimo nandimleka ako kuli isi ya Mileto kwa vila nayali mtamwa.
2TI 4:21 Udite himahima kuya mhela wa mbeho loung'hali kuya. Ebulo na Pude na Lino na Klaudia, vivila na wanhu weng'ha walingumkunda Kilistu wangukulamsani.
2TI 4:22 Mkulu yawe na hegwe kuli muhe wa hegwe. Kunoga kwa Nguluwi kuwe na hemwe mweng'ha.
TIT 1:1 Heni Paoli, mtumigwa wa Nguluwi na msenga wa Yesu Kilistu ndangwandika. Heni nyhaguligwa kutanza kuzenga makundo ga wahaguligwe na Nguluwi, leka kuwalongoza wavizele kukomya na kikala kwa kumnojeza Nguluwi,
TIT 1:2 kukomya ako kwangutigalila utumbilo wa ukomu wa mazuwa gose. Nguluwi yawele hambe yalonje udesi, nayalagane hala isi hainalumbigwa, kotigalila ukomu awo,
TIT 1:3 na mhela utanganiche loufichile. Nakaugubula usenga wa heye kwa kudamla, na heni namhegwa kwa kukundigwa usenga awo ndiudamle kota navyoyalajize Nguluwi, mlohozi wa hetwe.
TIT 1:4 Ndangukwandichila hegwe Tito, mwanangu wa kukomya kuli makundo ga hetwe. Nguluwi Mhaza, na Kilistu Yesu mlohozi wa hetwe, wakupe isungu lyawo na kikala goya.
TIT 1:5 Nandikuleka Kilete leka uwiche goya zila mbuli nalozing'hali kugongomanywa goya, na kuwahagula wasekulu vilongozi wa chilundo cha wanhu walingukunda Kilistu kuli chila muji kota vyondikulajize.
TIT 1:6 Sekulu chilongozi wa chilundo cha wanhu walingumkunda Kilistu, imlapa yawe munhu yawele hela nongwa, yawele na mdala yumwe hela, na wana wa heye wanguganigwa wawe walingumkunda Kilistu hawalinguzeleka kota wajuvi ama wawele wohambe wahulichize.
TIT 1:7 Mina kwa vila chilongozi wa chilundo cha wanhu walingumkunda Kilistu, ndo yalingulola mijito ya Nguluwi, imlapa yawe munhu yawele hela nongwa. Yawe yohambe yedaye na yohambe yazudile himahima na yohambe yagale ujimbi na kitowanga ama maya gehile ga kugana lufufu.
TIT 1:8 Imgana yawe na nhumbula ya kuwabochela wajenzi na yalingugana mbuli zinojile. Yangumlapa yawe na luhala na yalingudita mbuli kota vyoilinguganigwa na yalingudita galingumnojeza Nguluwi, yelile na yawele na madito ganojile na yalingilongoza yuye.
TIT 1:9 Imgana yebatilile goya usenga ula wa kukomya kota vyoulingulanguswa. Ndo vyoyoweza kuwakangaza nhumbula wanhu wanji kwa ulanguso ulingukomya ng'hatu na kuziwika hazelu nongwa za wala wohambe wakunde ulanguso awo.
TIT 1:10 Mina wabaho wanhu wenji wala walawile kuli chilundo cha Chiyahudi wawele ngumkunda Kilistu, wawele ndo wajuvi, na walinguwajiliza wanji kwa upoka wawo.
TIT 1:11 Igana kuwang'hanuchila waleche ulonzi wa hewo, kwa vila wanguwifya lukolo lweng'ha kwa kulangusa mbuli zohaziganigwe kulanguswa, wangudita ahyo leka wapegwe sendi.
TIT 1:12 Na yumwe wa waloli wa hewo, yawele Mkilete, nakalonga, “Wakilete wangulonga udesi mazuwa gose, wafanda kota migongolo jihile, migata na jilingugana kulya lukami!”
TIT 1:13 Mbuli ayo ndo ya kukomya, na kwa chiwalo acho, uwang'hanuchile ng'hatu leka wawe wemile nzinzili kuli makundo.
TIT 1:14 Waleche kulutilila kuhulichiza ndano za udesi hela za chiyahudi na malajizo ga chiwunhu galingulawila kwa wanhu walemile kukomya.
TIT 1:15 Chila chinhu chelile, kwa wanhu welile hali meho ga Nguluwi, ila kuduhu chinhu chelile kwa wanhu wehile na wohambe wamkunde Nguluwi, kwa vila ludali lwa hewo lwa kuhagula ganojile ama gehile gawifigwa.
TIT 1:16 Wanhu kota awo wangidaya kota wamzela Nguluwi, ila kwa madito gawo wangumbeza. Ndo wanhu wa kuzudiza ng'hatu na wajuvi, hawawele wanojile kuli kudita mbuli yoneche inojile.
TIT 2:1 Ila hegwe ikugana kudamla ulanguso wa wakukomya.
TIT 2:2 Uwalonjele wasekulu kota wanguganigwa wawe woweza kilongoza, wawe na luhala na walinguhulichizwa na wanhu weng'ha na wawe wemile nzinzili kuli makundo gawo na igano na kwimilila.
TIT 2:3 Hihila kahi walonjele wadala walalile wawe na madito galingumnojeza Nguluwi na waleche kuwa wasonjelezi ama wopogozi wa ujimbi, ila wanguganigwa kulangusa mbuli zinojile,
TIT 2:4 leka kuwakanya wahinza waholigwe kuwagana walume wa hewo na wana wawo,
TIT 2:5 waweze kilongoza na wawe welile mnhumbula, walole goya ng'handa za hewo, na wawele na madito ganojile na wawahulichize walume wa hewo, leka usenga wa Nguluwi uleche kukovuligwa.
TIT 2:6 Hihila, wawahimilize wasongolo waweze kilongoza.
TIT 2:7 Kuli mbuli zeng'ha gwegwe baho kwanguganigwa kuwa na lwila lwa madito ganojile. Na kuli malanguso ga hegwe gawe ga kukomya na galeche kuwa ga mdawalo.
TIT 2:8 Ulonzi wa hegwe uleche kuwa na wihe woneche leka wang'honyo wa hegwe wone soni, lowowa wahela choneche chihile cha kulonga kwa mbuli ya hetwe.
TIT 2:9 Wapogozi wanguganigwa kuwahulichiza wakulu wawo na kuwanojeza kuli mbuli zeng'ha. Waleche kitwanza na hewo,
TIT 2:10 ama kuhiza vinhu vyawo. Ila wanguganigwa kulajila kota wanoga na wa kukundigwa ng'hatu, leka kwa madito gawo geng'ha, wagadite malanguso ga Nguluwi mlohozi wa hetwe kota gela na ga kunojeza kwa chila nzila.
TIT 2:11 Mina isungu lya Nguluwi lilingigala ulohozi kwa wanhu weng'ha, ligubuligwa.
TIT 2:12 Isungu lya Nguluwi lyangutudita tuleme wihe weng'ha na maya ga isi, tuweze kilongoza, tikale kwa kutanganika na kikala kwa kumhulichiza Nguluwi kuli isi ayi ya sambi,
TIT 2:13 tuwele tubeteza zuwa lila lya kusangalala ng'hatu lyotulingitumbila, mhela houlawila ukulu wa Nguluwi mkulu na mlohozi wa hetwe Yesu Kilistu.
TIT 2:14 Heye nakelavya kwa mbuli ya hetwe leka yatugombole kulawa kuli wihe weng'ha na kutudita tuwe wanhu welile wa heye, wanhu wawelengugana kudita ganojile.
TIT 2:15 Lelo ulanguse mbuli azo zeng'ha na utumiye ludali lwako lweng'ha na kuwahimiliza na kuwalonjela welolele walingukuhulichiza hegwe. Munhu yoneche yaleche kukubeza hegwe.
TIT 3:1 Muwakumbuse wanhu kuwahulichiza vilongozi wawele na ludali, kuwahulichiza na wadahe kudita mbuli zeng'ha zinojile.
TIT 3:2 Walonjele waleche kumliga munhu yoneche, ila wekale goya na kihulichiza mazuwa gose, wawe chila mhela waholile kwa chila munhu.
TIT 3:3 Mina, aho katali hetwe natwali wapoka na wajuvi na twajilile. Natwali wapogozi wa maya na chila mbuli za kugana kinojeza. Natikala mli ukomu wa wihe na fihi, wanhu nawatuzudila natwe natuwazudila.
TIT 3:4 Ila mhela isungu na igano lyake Nguluwi Mlohozi wa hetwe lougubuligwe,
TIT 3:5 nakatulohola hetwe. Haiwele kwa mbuli yoneche inojile yotuditile, ila kwa isungu lyake nakatulohola hetwe, kukolela Muhe Yelile yatuditile tuwe wanage wa kupondigwa lwa keli na kumha ukomu unyale kwa kutuhovuga kwa mazi.
TIT 3:6 Nguluwi nakatugalila Muhe Yelile kwa winji ng'hatu kwa kukolela Yesu Kilistu, Mlohozi wa hetwe,
TIT 3:7 leka kwa kunoga kwa Nguluwi, tukundigwe kuwa tunojile hali meho gake na kuubochela ukomu wa mazuwa gose wotulingitumbila.
TIT 3:8 Mbuli ayi ndo ya kukomya. Ndangukugana uzibatilile mbuli azi, leka wala wawele ngumkunda Nguluwi welavye wawo kudita ganojile, mbuli azi zinoga na zina utanzi kwa wanhu weng'ha.
TIT 3:9 Ila wiyuse na kitwanza kwa chipoka na kilewa kwa mbuli ya kuvizela matagwa menji ga lulelo lwa wasekulu. Mbuli azi zahela utanzi woneche ndo ga hihi hela.
TIT 3:10 Munhu yalingwambuza kibagula umng'hanuchile kwa mwaluko na lwa keli, hamba umleme.
TIT 3:11 Kuvizela kota munhu yafandile kota ayo kajilila ng'hatu na gehile ga heye gangutawiza kota kawifya.
TIT 3:12 Londimlajiza kwa hegwe Alitema ama Tukiko, wikangaze kuya aku Nikopoli undole, mina nangana kikala ako mhela wa mbeho.
TIT 3:13 Wikangaze kumtanza Senasi yawele mlangusa wa malajizo na Apolo leka waweze kwaluka majendo ga hewo, na uwalole kota wana chila chinhu chowalingugana.
TIT 3:14 Yanguwalapa wanhu wa hetwe welanguse kudita ganojile mhela weng'ha leka wawe na vinhu vyowalingugana kuli ukomu wa hewo, waleche kikala hihi hela.
TIT 3:15 Wanhu weng'ha wawele hamwe na heni wanguwalamsani. Uwalamse wang'holozetu kuli makundo. Kunoga kwa heye Nguluwi kuwe na hemwe mweng'ha.
PHM 1:1 Heni Paoli nda mchinweng'ho kwa chiwalo cha kumkolela mijito Kilistu Yesu. Heni hamilwe na Timoteyi mng'holozetu kuli Kilistu, ndangukwandichila hegwe Filimeni tukuganile, mkolamijito myetu,
PHM 1:2 na lumbulyetu Afiya na mtowa ngondo muyetu Alikipo na wanhu walingumkunda Kilistu, walingiting'hana hakaye hako.
PHM 1:3 Ndanguwaganilani Nguluwi Mhaza yawapeni isungu na kikala goya kulawila kwa Nguluwi Mhaza wa hetwe na kwa Mkulu Yesu Kilistu.
PHM 1:4 Mhela weng'ha heni hondilanda, ndangukukumbuka hegwe Filimeni na kuta malumbo Nguluwi,
PHM 1:5 kwa vila ndanguhulika mbuli ya makundo ga hegwe kwa Mkulu Yesu na igano lya hegwe kwa wanhu wa Nguluwi.
PHM 1:6 Ndangulanda makundo ago gouwele nguwalonjela wanhu wanji, gawadahize muwe na uwanzi wenele ng'hatu na vinhu vyeng'ha vinojile vyotulingupegwa kuli kilumba kwa hetwe na Kilistu.
PHM 1:7 Mng'holozangu, igano lya hegwe lingalila kusangalala kukulu na kung'hangaza nhumbula ng'hatu! Nagwe kukangaza nhumbula za wanhu wa Nguluwi.
PHM 1:8 Lelo kwa ahyo, ndahawezile, ne kudumba ng'hatu, londiwa mng'holozo kuli kilumba na Yesu Kilistu, kukulajiza udite choulingulapigwa kudita
PHM 1:9 ila kwa chiwalo cha igano, ndangona yagoya ng'hatu ndikulande. Ndangudita hino hanga heni nda Paoli, ndalile na sambi kahi nda mchinweng'ho kwa chiwalo cha kumkolela mijito Yesu Kilistu.
PHM 1:10 Lelo ndangulanda, umtanze mwana wa heni Onesimo, yawele mwana wa heni kuli kilumba na Kilistu, kwa vila nandiwa kota mhaza wa heye londali mchinweng'ho.
PHM 1:11 Ndo Onesimo yuyula nayali hambe yawe na utanzi, ila sambi kana utanzi kwa hetwe weng'ha, heni na hegwe kahi.
PHM 1:12 Lelo ndangumhilusa kwa hegwe, na heye ndo ndimganile ng'hatu.
PHM 1:13 Nangana yekale na heni yanhanze honhu ha hegwe mhela awu mbele mchinweng'ho kwa chiwalo cha kudamla Mbuli Inojile.
PHM 1:14 Ila siganile kudita chinhu choneche ne kukulonjela hegwe. Kahi nasiganile ne kukukola lupichi unditile mbuli zinojile, ila nangana udite kota nhumbula ya hegwe vyoilingugana.
PHM 1:15 Hanji, Onesimo nakoka kwa hegwe kwa mhela udo hela, leka uwe na heye kahi mazuwa gose.
PHM 1:16 Na heye sambi hawele mpogozi wa hihi hela, ila lelo, ayu kapuluta ng'hatu kuupogozi, heye ka mng'holozetu tumganile. Ndo wa kitumbila ng'hatu kwa heni, na kwa hegwe, kota munhu muyetu na mng'holozetu kuli kilumba na Mkulu.
PHM 1:17 Ila wone ulingunzela heni kota nda mng'holozo kuli kilumba na Mkulu, mbochele heye kota hila wali umbochela nene baha.
PHM 1:18 Wone nayali yakuditile wihe, ama nayali yodaigwa na hegwe, lelo heni ndokuhilusila.
PHM 1:19 Ndangwandika mbuli ayi kwa moko gangu nene, heni Paoli ndohilusa! Kahi silingugana kukulonjela kota na hegwe nagwe ndangukudai mbaka ukomu wa hegwe.
PHM 1:20 Ena, mng'holozangu, unditile mbuli ayo kwa chiwalo cha itagwa lya Mkulu, usangalaze nhumbula ya heni kuli kilumba na Yesu Kilistu.
PHM 1:21 Ndangwandika nditumbila kota kodita achi chondilingukulajiza, kahi ndivizela kota kodita mzidi wa aga gondilikukulanda.
PHM 1:22 Hamwe na ago mngongomanyile honhu ha kuwasa, mina ndangitumbila kota kwa kulanda kwa hegwe, Nguluwi konhanza ndikujendele.
PHM 1:23 Epafula, mnweng'hwa muyangu, yawele mchinweng'ho hamwe na heni kwa chiwalo cha kumkolela mijito Yesu Kilistu, kangukulamsa.
PHM 1:24 Nawo achina Malichi na Alistako na Dema na Lukasi, wakolamijito wayetu, wangukulamsani.
PHM 1:25 Ndanguwalandila hemwe isungu lya Mkulu wa hetwe Yesu Kilistu liwe na hemwe mweng'ha.
HEB 1:1 Aho katali, Nguluwi nakalonga na wasekulu wa hetwe mala nyinji kwa nzila zinjizinji na kwa kukolela waloli,
HEB 1:2 ila mazuwa gano ga kuduma nakalonga na hetwe kukolela Mwanage. Heye ndo yawele kukolela Nguluwi nakalumba ulanga na isi na vinhu vyeng'ha vilimumo, nakamhagula na kuvidita vinhu vyeng'ha viwe vya heye.
HEB 1:3 Heye ndo lung'halo lwa ukulu wa Nguluwi, na kiwhana ng'hatu na vyoyali heye Nguluwi, yoiyegamiza isi kwa ulonzi wake luwele na ludali. Hanga loyasindile kuwahovuga wanhu na wihe wa hewo, nakekala ako kuchanya kilanga, nzingo ya kudilo kwa Nguluwi mkulu.
HEB 1:4 Mwana ndo mkulu kuleka mhilisi wa kilanga, kota vila itagwa loyapegwe na Nguluwi lyangulajila kota ndo likulu kusinda itagwa lyao.
HEB 1:5 Mina Nguluwi hamlonjele hebu ne yumwe wa wala wahilisi wa kilanga, “Hegwe ndo mwana wa heni, lehano ndangulonga, weng'ha wavizele kota heni nda mhaza wa hegwe.” Na wala hamlonjele mhilisi yoneche, “Heni ndowa Mhaza wa heye, na heye kowa mwana wa heni.”
HEB 1:6 Ila Nguluwi loyali yomlajiza Mwanage wa udewele kuli isi nakalonga, “Wahilisi wa kilanga weng'ha wamfugamile.”
HEB 1:7 Ila kwa mbuli ya wahilisi wa kilanga nakalonga, “Nakawadita wahilisi wa kilanga wa heye wawe mbeho, na vitumagwa wa heye wawe ilapi lya chiluli.”
HEB 1:8 Ila kwa Mwanage, Nguluwi nakalonga, “Undewa wa hegwe, gwaa Nguluwi, wangikala mazuwa gose! Hegwe kwanguwalongoza goya wanhu wa hegwe.
HEB 1:9 Hegwe nakugana gatanganiche na kuzudila wihe, kwa chiwalo acho, Nguluwi, yawele Nguluwi wa hegwe, nakakuhagula hegwe, kawaleka wayago, ahyo, nakakumemeza usangalalo.”
HEB 1:10 Na kahi, nakalonga, “Mkulu, aho mwaluko, nakuwika msisi wa isi, na kilanga ndo mijito ya moko ga hegwe.
HEB 1:11 Azo zokwaga, ila hegwe kopona ng'hatu, zeng'ha zolala kota nguwo.
HEB 1:12 Kozibinabina kota lutemvu, nazo zogaluswa kota igolole lilalile, Ila hegwe ndo yuyula du, na ukomu wa hegwe hauduma hebu.”
HEB 1:13 Nguluwi nahamlonjele ne yumwe wa wahilisi wa kilanga wa heye, “Wikale nzingo ya heni ya kudilo, mbaka ndiwadite wang'honyo wa hegwe wawe chigoda cha kuwichila magulu ga hegwe.”
HEB 1:14 Lelo wahilisi wa kilanga ndo choni? Ila ndo muhe hela wawele vitumagwa wa Nguluwi na wala wawele ngulajizwa kuwatanza wala woubochela ulohozi.
HEB 2:1 Ahyo tulole goya ng'hatu geng'ha tugahuliche, leka tuleche kuholigwa mholemhole na mbeho na kwajilila.
HEB 2:2 Mbuli zila zowapegwe wasekulu wa hetwe kukolela wahilisi wa kilanga na ulajilwa kota ukomya, leka munhu yoneche nayali hambe yauwinze na kugalamka nakatagusigwa kota vyoiganigwe.
HEB 2:3 Lelo hetwe tosulupuka ndaze utaguso wone tubeza ulohozi ukulu kota uno? Mwaluko, Mkulu yuye nakaudamla ulohozi awu, na wala wamhuliche nawatulonjela ng'hatu, kota wangukomya.
HEB 2:4 Nguluwi kahi nakonjeza kulajila kukomya ako kwa kudita chila mbuli ya vinduzanduza na chinhu cha kububuwaza, na kwa kuwagawaniza wanhu ndolendole za Muhe Yelile kota vyoyogana yuye baho.
HEB 2:5 Nguluwi hawawichile wahilisi wa kilanga wailongoze isi inyale ilinguya, ila isi yila tulingusima mbuli zake.
HEB 2:6 Kahi kuli Maandiko Matakatifu honhu hanji hangulonga, “Munhu ndo choni, leka umjese, munhu ndo choni leka umlolele?
HEB 2:7 Kumdita hado hela yawe hasi kusinda wahilisi wa kilanga, kumvika chipembelo cha ukulu na kinamizilwa,
HEB 2:8 Nakuwika chila chinhu hasi ha heye.” Na kuli kuviwika vinhu vyeng'ha hali heye, Nguluwi nahalechile chinhu choneche chileche kulongozwa na heye, ila kwa sambi, hatulingona munhu yovilongoza vinhu vyeng'ha.
HEB 2:9 Ila twangumona Yesu, Nguluwi yamditile kwa mhela udo hela, yawe hasi kusinda wahilisi wa kilanga, leka kwa kunoga kwa Nguluwi koyatulajile hetwe, Yesu nakabagama kwa mbuli ya wanhu weng'ha. Kwa chiwalo cha magazo mbaka kubagama kwa heye, lelo twangumona kavichigwa chipembelo cha ukulu na kinamizilwa.
HEB 2:10 Yali inojile ng'hatu kwa Nguluwi, yalingulumba na kwimiza vinhu vyeng'ha, nakamdita Yesu yawe yogongomanya kukolela kugazigwa, leka yawegale wana wenji wehanze ukulu wa heye. Mina Yesu yuye du, ndo yalinguwalohola wanhu.
HEB 2:11 Heye yalinguwahovuga wanhu wihe wa hewo, hamwe na wala wahovujigwe, weng'ha wanaye Mhaza yumwe. Ndo mina Yesu halingona soni kuwachema hewo, wang'holoze.
HEB 2:12 Kota vyoyalingulonga kwa Nguluwi, “Ndowasimila wang'holozangu madito ga hegwe, kuli nhing'hano ya hewo ndokwimba lutogo lwa hegwe.”
HEB 2:13 Kahi kangulonga, “Ndomuwichila Nguluwi lyondilingitumbila.” Nakalutilila kulonga, “Heni nda hano hamwe na wanhu yamhele Nguluwi wawe wanangu.”
HEB 2:14 Kota vila wana vyowawele na lukuli na danda kota wahaza wa hewo, hiho du, kahi na heye Yesu nakoya yafandile kota hewo, leka kwa kubagama kwa heye, yalisumye Limazoga liwele na ludali lwa kubagama.
HEB 2:15 Yesu nakadita ago, leka yawachumulile welejehe wala wawele kwa kudumba kubagama, wawa wapogozi kuli ukomu wa hewo weng'ha.
HEB 2:16 Mina yanguzeleka kota, heye hoyile kwa kuwatanza wahilisi wa kilanga, ila nakoya kuwatanza lulelo lwa Abulahamu.
HEB 2:17 Ndo mina naimgana yawe kota wang'holoze heye kwa chila chinhu, leka yawe mtambika mkulu wa hewo yawele wa kitumbila na yawele na isungu kuli kumkolela mijito Nguluwi, leka gehile ga wanhu gosigwe.
HEB 2:18 Kwa vila Yesu nakemilila kugazigwa hoyajezigwe, ahyo koweza kuwatanza kahi wala walingujezigwa.
HEB 3:1 Wang'holozangu, mchemigwe na Nguluwi kilanga muwe wa heye, mijese ng'hatu Yesu yalajizwe na Nguluwi na yawele mtambika mkulu wa makundo ga kulonga kwa mlomo wa hegwe.
HEB 3:2 Heye nayali wa kukundigwa kwa Nguluwi, nakamhagula kukola mijito ya heye kota vila Musa loyali wa kukundigwa kuwakolela mijito kuli ng'handa ya Nguluwi nawawele wanhu wa Waisilaeli.
HEB 3:3 Ila Yesu kanguganigwa kutogoligwa ng'hatu kusinda Musa kota vila mzenga ng'handa kopegwa ukulu kusinda ayo ng'handa.
HEB 3:4 Chila ng'handa huzengagwa na munhu yumwe, ila Nguluwi ndo yalinguzenga vinhu vyeng'ha.
HEB 3:5 Musa heye nayali chitumagwa wa kukundigwa kuli mijito ayo ya heye yeng'ha hali ng'handa ya Nguluwi, na mijito ayo ya heye, nayali ulolezi wa geng'ha Nguluwi goyolonga aho hamba.
HEB 3:6 Ila Kilistu ndo wa kukundigwa kota mwana yawele na ludali kuli ng'handa ya Nguluwi. Hetwe twetwe ndo ng'handa ya heye wone tulutilile kwima nzinzili kuli kikangaza nhumbula na tulutilile kidayila kuli kitumbila kotuwele nako.
HEB 3:7 Kwa ahyo lelo, kota vyoyolonga Muhe Yelile kuli Maandiko Matakatifu, “Wone muhuliche lizi lya Nguluwi lehano,
HEB 3:8 mleche kuwa na nhumbula zigagadale, kota mhela ula wasekulu wa hemwe lowamhinduche Nguluwi, zuwa lila lowamjezile kula kugunuche.
HEB 3:9 Ako wasekulu wa hemwe nawanjeza, hanga nawagona geng'ha gonditile kwa mihela makumi gane!
HEB 3:10 Kwa mbuli ahyo nandiwazudilila wanhu awo nakulonga, mazuwa geng'ha wanguwinza nzila za hewo, hawavizelele ng'oo nzila za heni.
HEB 3:11 Lelo nanzudila nandilaha, ‘Hawokwinjila ng'oo honhu hangu ha kwesela!’ ”.
HEB 3:12 Lelo wang'holozangu, milolele yaleche kuwabaho yoneche hali hemwe yawele na nhumbula yihile hila na yohambe yakunde mbaka kibagula na Nguluwi yawele mkomu.
HEB 3:13 Ila vyomlutilila kuhulika ulonzi awo “Lehano” wangusomigwa kuli Maandiko Matakatifu, mwanguganigwa kikangaza nhumbula, chila zuwa, leka munhu yoneche hali hemwe yaleche kuwa mjuvi kwa chiwalo cha kuhadigwa na kudita gehile.
HEB 3:14 Kwa vila hetwe tweng'ha hamwe twa wawinza wa Kilistu mlohozi, wone tochibatilila goya mbaka kuduma, kwima nzinzili kotwalinako aho mwaluko.
HEB 3:15 Mleche kusemwa, Maandiko Matakatifu gangulonga hino, “Wone muhuliche lizi lya Nguluwi lehano, mleche kudita nhumbula za hemwe ziwe zigagadale, kota mhela ula wamhinduche Nguluwi.”
HEB 3:16 Na walikohi wahuliche lizi ya heye nawamhinduche Nguluwi? Ndo wala weng'ha walongozigwe na Musa kulawila Misili.
HEB 3:17 Nguluwi nakawazudilila wanhu wachi kwa mihela makumi gane? Nakawazudila wala waditile gehile, nawabagama kula kugunuche.
HEB 3:18 Nguluwi loyelahile, “Howokwinjila ng'oo honhu hangu ha kwesela,” nayali yowalonga walikohi? Yali yolonga kwa wala wamhinduche.
HEB 3:19 Lelo twangona kota hawenjile ako kulubehelo kwa vila nahawakundile.
HEB 4:1 Lelo kwa vila ing'hali baho yila mbuli ya kulagana yoyalonjile Nguluwi ya kwinjila hali honhu ha kwesela ha heye, tilolele leka yumwe hali hetwe yaleche kulemwela kwinjila mli lubehelo alo.
HEB 4:2 Mina Mbuli Inojile idamligwa kwa hetwe kota vila vyoidamligwe kwa hewo wanhu wa katali. Ila usenga awo hauwatanzile ne chinhu choneche, mina nawauhulika ila hawelumbile kwa kukunda na wala wauhuliche usenga ula.
HEB 4:3 Lelo hetwe tulingukunda twangupegwa kwesela ako koyatulonjele Nguluwi. Kota vyoyalonjile, “Nanzudila ndilaha, ‘Hawokwinjla ng'oo honhu hangu hakwesela!’ ” Nguluwi nakalonga ago hanga mijito ya heye nayali imalile kulawila loyalumbile isi.
HEB 4:4 Mina Maandiko gangulonga honhu hanji, mbuli za zuwa lya saba, “Nguluwi nakesela zuwa lya saba, nakaleka mijito ja heye zeng'ha.”
HEB 4:5 Kahi Maandiko gangulonga, “Hawokwinjila ng'oo honhu hangu ha kwesela.”
HEB 4:6 Ahyo, ipona kwa wanhu wanji kwinjila honhu ha kwesela, ila wala wa mwaluko kuhulika Mbuli Inojile hawenjile ng'oo kwa vila nawalema kuhulichiza.
HEB 4:7 Nguluwi nakawika zuwa linji ilinguchemigwa “Lehano.” Nakalonga hamba kwa nzila ya Daudi ulonzi woumalile kulonjigwa, “Wone muhuliche lizi ya Nguluwi lehano, mleche kugagadala nhumbula.”
HEB 4:8 Wone Yoshuwa nayawe yawafichize wanhu awo honhu hala ha kwesela, Nguluwi hayalilonga hamba mbuli ya zuwa iyage.
HEB 4:9 Kwa ahyo, lelo kung'hali baho kwesela kwa wanhu wa Nguluwi, kota vila Nguluwi vyoyesele kuli zuwa lya saba.
HEB 4:10 Wone, chila yokwinjila honhu ha kwesela ha Nguluwi, kokwesela kuli mijito ya heye kota vila Nguluwi vyoyalechile mijito ya heye na kwesela.
HEB 4:11 Lelo twikangaze kwinjila kuli honhu aho ha kwesela, leka kuwe kuduhu ne yumwe hali hetwe yolema kuhulichiza kota hewo vyowaditile.
HEB 4:12 Usenga wa Nguluwi ukomu na una ludali, ndo unoleka kusinda ipanga liwele na kunoleche kwili. Lyangwinjila kota ipanga mbaka mgati hawele wunhu na muhe, lilingudumula mbaka mgati mwa vitomo vya lukuli na mafuta gawele mgati mwa izeje. Ulonzi awo wangupembula kugana majesa ga nhumbula za wanhu.
HEB 4:13 Kuduhu chilumbigwe choneche chivisigwe kumwando ha Nguluwi, chila chinhu chigubuligwa hali meho gake heye hanga kwa heye toganigwa kulonga gala geng'ha gotuditile.
HEB 4:14 Twanaye mtambika mkulu kusinda weng'ha yenjile mbaka kilanga, Yesu, yawele mwana wa Nguluwi. Lelo tibatilile ng'hatu kukunda kotudamle kwa milomo ja hetwe.
HEB 4:15 Ayu mtambika mkulu wa hetwe yoweza kutonela isungu kwa ung'hochele wa hetwe, heye yuye nakajezigwa kwa chila mbuli kota hetwe ila haditile gehile.
HEB 4:16 Lelo natuchihejelele ne kudumba chigoda cha undewa cha Nguluwi yawele yanojile, tubochele isungu lya heye na kunoga kwa Nguluwi, leka vitutanze kuli mhela hotugana.
HEB 5:1 Chila mtambika mkulu kanguhaguligwa na kuwichigwa na Nguluwi kulawa hali wanhu. Heye kangukola mijito ja Nguluwi kwa chiwalo cha wanhu, kulavya ndolendole na nhambiko kwa chiwalo cha gehile.
HEB 5:2 Hanga heye yuye kang'hochele kwa kujezigwa kota wanhu wanji kuli nzila nyinji za kudita wihe, koweza kuwaditila kwa isungu wala wanhu wajilile na walingudita nongwa, kwa vila hawavizelele.
HEB 5:3 Kwa mbuli ayo kanguganigwa kulavila nhambiko haiwele kwa mbuli ya wanhu hela, ila kahi kwa chiwalo cha gehile ga heye yuye.
HEB 5:4 Kuduhu munhu yoweza kiyinula yawe mtambika mkulu. Chila mtambika mkulu kahagulagwa na Nguluwi kota na vyoiwele kwa Aluni.
HEB 5:5 Hihyo du na heye Kilistu, heye heyenule yuye yawe mtambika mkulu, ila nakahaguligwa na Nguluwi na kumlonjela, “Hegwe ndo mwana wa heni, heni lehano ndangulonga, heni nda mhaza wa hegwe.”
HEB 5:6 Nakamlonela heye kahi honhu hanji, kuli Maandiko Matakatifu, “Hegwe ndo mtambika mkulu mazuwa gose, kota vyoiwele kwa utambika wa Melikisedeki.”
HEB 5:7 Yesu loyali yochikala hano muisi, nakamlanda Nguluwi kwa chililo na kulavya mahozi, yawele na ludali lwa kumlohola kuli kubagama, na heye nakahulichizwa kwa vila nakamnojeza Nguluwi.
HEB 5:8 Ila, hanga nayali Mwana wa Nguluwi, nakelangusa kumhulichiza Nguluwi kukolela kugazigwa.
HEB 5:9 Naloyasindile kukola mijito yoyapegwe na Nguluwi, ahyo ndo vyoyawalongoze wanhu weng'ha wamhulichize kuli ulohozi wa mazuwa gose,
HEB 5:10 na heye Nguluwi nakalonga, weng'ha wavizele kota, heye ndo mtambika mkulu, kota vyouwele utambika wa Melikisedeki.
HEB 5:11 Twanago menji ga kulonga kwa mbuli ino, ila haiwele mbuli ya ubewe kuwalonjela kwa vila hemwe hamlinguvizela himahima.
HEB 5:12 Kwa mhela awu hemwe mwahaganigwe kuwa walangusa, ila mng'hali mwangugana munhu wa kuwalangusani ulanguso wa mwaluko kuli mbuli ya usenga wa Nguluwi. Mhiluka kuli kong'ha itombo honhu ha kulya chilyo chibabale.
HEB 5:13 Chila munhu yoganigwa kong'ha itombo yang'hali mwana, havizelele kudita gala malanguso ga mbuli za kutanganika.
HEB 5:14 Ila chilyo chibabale ndo kwa chiwalo cha wanhu wakangale, wala wavizelele kubagula ganojile na gehile, kwa chiwalo cha kugazela malanguso na madito ga kumnojeza Nguluwi.
HEB 6:1 Lelo tugaleche kulangusa kahi gala malanguso ga mwaluko kwa chiwalo cha Kilistu, tuhejele kumwando kwa gala malanguso gakangale, na haiwele kulutilila kibatilila kuli ulanguso wa kileka na madito hagalingutanza chinhu na ga mwaluko kumkunda Nguluwi,
HEB 6:2 na ulanguso kwa nzila nyinji za ubatizo na kuwichilwa moko na kuzilipuka kwa wabagame na utaguso wa mazuwa gose.
HEB 6:3 Alyo tolidita, wone Nguluwi hoyokundiza.
HEB 6:4 Yowa nongwa kuwahilusa wanhu waleche gehile kahi, wanhu wawele wavizelele kukomya kwa Nguluwi na wajezile ndolendole za kilanga na welumbile hamwe kubochela Muhe Yelile,
HEB 6:5 na kujeza usenga unojile wa Nguluwi na mong'ho wa isi ilinguya,
HEB 6:6 hamba wamgalamchile Nguluwi kahi, yowa nongwa kwa vila hewo kota wangumuwamba kahi mumsalaba Mwana wa Nguluwi lwa keli na kumbasa soni hazelu.
HEB 6:7 Misanga jiwele kutowelwa nhonya baho na koteza mizuchila ilingigala mbena kwa mlimi itambichizwa na Nguluwi.
HEB 6:8 Ila wone misanga ajo jote migodi ja miwa na misoli, jahela utanzi, behi jopanjilwa na Nguluwi na ako mwiso ndo kusomigwa na chiluli.
HEB 6:9 Wang'holozangu hanga tulonjile ahyo, twima nzinzili kota mwa mnzila inojile iwele ndo nzila ilinguwalongoza kuli ulohozi.
HEB 6:10 Nguluwi halingudita ng'oo mbuli zohaziganigwe, heye hoisemwa hebu mijito yomkolile na igano lyomlajile kwa chiwalo cha heye kuli utanzi womuwapele wanhu wa heye walimgumkunda Kilistu na womlingulutilila kuwapa sambi baha.
HEB 6:11 Natwe twangugana ng'hatu chila yumwe wa hemwe yalajile kikangaza kukula mbaka kuduma, leka gala mlingitumbila genele.
HEB 6:12 Ahyo mleche kuwa wagata, ila muwe kota wala walingukunda na wali ngwimilila, wabochele gala gawele Nguluwi yalagane na hewo kowapa.
HEB 6:13 Nguluwi loyamlonjele Abulahamu komha chila yalagane kumha, nakelaha kwa itagwa lyake heye, mina kuduhu yawele mkulu kusinda Nguluwi yawele kwa yuyo yahawezile kilaha.
HEB 6:14 Nguluwi nakalonga, “Ndangukomya ng'hatu, ndokutambichiza na ndokupa lulelo lwinji.”
HEB 6:15 Abulahamu nakabeteza kwa kwimilila ng'hatu na hino nakabochela chila choyalagane Nguluwi komha.
HEB 6:16 Wanhu howochilaha, welahaga kwa yumwe yawele mkulu kusinda hewo, na kilaha kwangulajila kukomya kwa chila chilonjigwe na kuusaga ibamba lyesa.
HEB 6:17 Na heye Nguluwi nakawika nzinzili chila choyalonjile kwa kilaha, ahyo nakawalajila hazelu kota wala wobochela chila choyalagane, hogaluka ng'oo.
HEB 6:18 Lelo kuna vinhu vino vili, chila choyalonjile Nguluwi na kilaha, vyohaviwele galuka na kwa mbuli ya avyo Nguluwi howeza kulonga udesi. Kwa ahyo hetwe totubilimile wamizi wa heye, twangupegwa nhumbula ya kibatilila ng'ang'ani kitumbila kuwichigwe kumwando kwa hetwe.
HEB 6:19 Twanako kitumbila kuwele kota ngwamo yoibatilile ukomu wa hetwe. Na kitumbila ako lyangupuluta muli paziya mbaka honhu helile ng'hatu.
HEB 6:20 Yesu yuye kalongola kwinjila mumo kwa mbuli ya hetwe na kawa mtambika mkulu mazuwa gose, kota vyouwele utambika wa Melikisedeki.
HEB 7:1 Ayo Melikisedeki nayali mndewa wa Salemu, na mtambika wa mkulu Nguluwi. Abulahamu loyali yohiluka kulawa kuli ngondo koyawakopole wandewa, na heye Melikisedeki nakaluta kiting'hana na heye, na Melikisedeki nakamtambichiza Abulahamu.
HEB 7:2 Na heye Abulahamu nakampa chilundo chimwe cha kumi cha vinhu vyeng'ha vyoyabochile. Mana ya itagwa Melikisedeki ndo “Mndewa yatanganiche,” Kahi kwa vila heye nayali mndewa wa Salemu, itagwa lyake lyanguzeleka kota, “Mndewa wa kikala goya.”
HEB 7:3 Mhaza wa heye na mayake hawalinguzeleka, na lukolo lwake halulinguzeleka, hailinguzeleka nakavumbuka hanili ama nakabagama hanili. Kangiwhana kota Mwana wa Nguluwi, na kangulutilila kuwa mtambika mazuwa gose.
HEB 7:4 Lelo mwangona munhu ayu vyoyali mkulu. Mbaka Sekulu wa hetwe Abulahamu nakampa chilundo chimwe cha kumi ya vinhu vyeng'ha vyoyaholile kulawa kuli ngondo.
HEB 7:5 Tuvizela kahi kota mgati mwa malajizo yandichigwa, ulelo lwa Lawi wawele watambika, ndo wanguganigwa kuhola chilundo cha kumi kulawa kwa wanhu, wala wawele wang'holozawo, hanga na hewo ndo ulelo lwa Abulahamu.
HEB 7:6 Ila ayo Melikisedeki hawele wa lukolo lwa Lawi, ila heye nakabochela chilundo cha kumi kulawila kwa Abulahamu, kahi nakamtambichiza heye nayalagane na Nguluwi.
HEB 7:7 Kuduhu mbuli ne hado kota yalingumumtambichiza ndo mkulu kusinda yula yalingutambichilwa.
HEB 7:8 Kahi, awo watambika walingubochela chilundo chimwe cha kumi, ndo wanhu wahihi hela wawele mwiso wa hewo walingubagama, ila ahano yangutawiza kota yalingubochela chilundo chimwe cha kumi, yani Melikisedeki, hambe yabagame.
HEB 7:9 Lawi ndo sekulu wa wala weng'ha wawele ngubochela chilundo chimwe cha kumi. Ahyo, ndo tolonga kota, Lawi naye nakalavya chilundo chimwe cha kumi kukolela Abulahamu,
HEB 7:10 kwa vila Lawi nayali mgati mwa lukuli lwa sekulu wa heye Abulahamu, mhela Melikisedeki loyating'hane na heye.
HEB 7:11 Kulawa kuli watambika wa Walawi, wanhu wa Isilaeli, kwa chiwalo cha utambika nawabochela malajizo. Lelo wone wanhu nawahawele watanganiche kwa mijito ya Walawi, nakwahawele kahi na chiwalo cha kulawila utambika unji, vyoulingiwhana na utambika wa Melikisedeki, na hauwele ula wa Aluni.
HEB 7:12 Mina utambika ula hougaluka, ndo na malajizo nago ganguganigwa gagaluche.
HEB 7:13 Na heye mkulu wa hetwe yawele mbuli azo zeng'ha zangulonjigwa kwa heye, nayali wa nhanzi yinji, na kuduhu ne yumwe wa nhanzi ayo ya heye yawahiche kudita mijito kuli honhu ha kulavila nhambiko mhela loyawele mtambika.
HEB 7:14 Mina naizeleka kota heye Mkulu, nakalawila kuli nhanzi ya Yudasi, nauwele Musa nahalonjile ulonzi woneche wula kwa chiwalo cha utambika kwa nhanzi ayo.
HEB 7:15 Kahi mbuli ayi yahazelu ng'hatu, kwa vila kalawila mtambika yunji yalingiwhana na Melikisedeki.
HEB 7:16 Heye haditilwe mtambika kwa malajizo ga chiwunhu kwa kulola kangulawila lukolo lwachi, ila kwa mong'ho wa ukomu wa mazuwa gose.
HEB 7:17 Mina Maandiko gangulonga, “Hegwe ndo mtambika mazuwa gose, kota vyozilingutawiza mbuli za utambika wa Melikisedeki.”
HEB 7:18 Lelo ula mzilo wa mwaluko kwa chiwalo cha utambika nawali usigwe kwa vila nawali ng'hochele, na hauwele wa kuhega chinhu.
HEB 7:19 Mina malajizo ago hagaditile chinhu choneche chila chiwe goya. Ila sambi, honhu ha heye hawichigwa kitumbila ng'hatu, kwa chiwalo acho toweza kumhejelela Nguluwi.
HEB 7:20 Kwa konjezela kwa ago geng'ha, ahano Nguluwi nakelaha. Ila mhela wala wanji lowaditikwe watambika nakwalihela kilaha.
HEB 7:21 Ila Yesu nakaditikwa mtambika kwa kilaha mhela Nguluwi loyamlonjele, “Mkulu kelaha, na hogalusa kugana kwa heye, ‘Hegwe ndo mtambika mazuwa gose.’ ”
HEB 7:22 Lelo kwa chiwalo cha kilaha aku, Yesu kawa yumwe yadtile ilagano linojile ng'hatu lilawile.
HEB 7:23 Kahi, awo watambika wanji nawali wenji kwa vila chila mhela wa heye kubagama loufichile nakabagama, ahyo nawalemwela kulutilila na mijito ya utambika.
HEB 7:24 Ila kwa vila Yesu kamkomu mazuwa gose, utambika wa heye hauduma hebu.
HEB 7:25 Ahyo, heye koweza ng'hatu kuwalohola weng'ha walingumlutila Nguluwi kukolela heye, mina heye kamkomu mazuwa gose kuwalandila kwa Nguluwi.
HEB 7:26 Lelo Yesu ndo kota mtambika mkulu yatanganiche kwa chiwalo cha hetwe na yawele yelile na nayawele hela nongwa na yalihela gehile mgati mwa heye na yeyusile kutali na wanhu wawele na gehile na yenuligwe kuchanya kilanga koyawele Nguluwi.
HEB 7:27 Heye nayali vinji na watambika wakulu wanji, heye nahaganile kulavya nhambiko chila zuwa, mwaluko kwa chiwalo cha gehile ga heye yuye, hamba kwa chiwalo cha gehile ga wanhu. Heye nakadita ahyo kamwe hela kwa chiwalo cha wanhu weng'ha, loyelavile nhambiko heye yuye.
HEB 7:28 Malajizo ganguwawika wanhu wawele ng'hochele kuli utambika ukulu, ila ilagano lya Nguluwi yaditile kwa kilaha liwele lyuyile honhu ha malajizo imhagula Mwana, yawele yatanganiche mazuwa gose.
HEB 8:1 Lelo mbuli itanganiche kuli aga tulingulonga ndo ali, hetwe twanaye mtambika mkulu wa kota hino, yawele ngikala honhu ha ludali lkuli chigoda cha Undewa cha Nguluwi wa kilanga.
HEB 8:2 Heye nakakola mijito ya mtambika mkulu na Honhu Helile Ng'hatu, hawele hala mgati mwa lila ihema lya kukomya lizenjigwe na Mkulu, halizenjigwe na munhu.
HEB 8:3 Chila mtambika mkulu kahaguligwa kumlavila Nguluwi ndolendole na nhambiko, na hino mtambika mkulu wa hetwe imgana heye yawe na chinhu cha kulavya nhambiko.
HEB 8:4 Kota heye Kilistu na yawe wa hano muisi, yahawele ng'oo mtambika, kwa vila wabaho watambika wanji wangulavya nhambiko kota malajizo vyogalingugana.
HEB 8:5 Mijito ja hewo ja chiutambika ndo kiwhana hela kwa gala gali kilanga. Mina Musa loyali behi kuigomanjiza lila ihema, Nguluwi nakamlonjela, “Udite chila chinhu kwa kuwinza kula kiwhana ya lila ihema lyoulajilwe kula kuchidunda.”
HEB 8:6 Ila sambi Yesu kabochela mijito ya utambika iwele inojile kusinda ya hewo, kota vila uhanyisi woyawichile hagati ha wanhu na Nguluwi ndo kanoga ng'hatu, kwa vila lina kunoga kwake kuli ilagano lya mbuli zitanganiche ng'hatu.
HEB 8:7 Mina kota lila ilagano lya sambi naliwehela nongwa, kwahawele na mbuli ya ilagano lya keli.
HEB 8:8 Ila Nguluwi nakona wanhu wa heye wana nongwa nakalonga, “Mazuwa ganguya, kalonga Mkulu, aho hondidita ilagano linyale, na wanhu wa Isilaeli na wanhu wa Yudasi.
HEB 8:9 Ilagano ali haliwa kota lila londitile na wasekulu wawo mazuwa gondiwalongoze kwa moko kulawa isi ya Misili. Hawawele wakitumbila kwa ilagano lya heni, na hiho heni siwang'ulile.
HEB 8:10 Mkulu kangulonga, ali ndo ilagano lyondidita na wanhu wa Isilaeli, hogakwete mazuwa ago. Ndowika malajizo gangu mluhala lwao, nakwandika mnhumbula za hewo, heni ndowa Nguluwi wa hewo, na hewo wowa wanhu wa heni.
HEB 8:11 Kuduhu nehado yalingumlangusa mkala miyage, wala yalingumlonjela mng'holeze, ‘Umzele Mkulu.’ Kwa vila weng'ha wonzela heni, wadodo na wang'hangala.
HEB 8:12 Ndowalechela kwa gala waditile, na sikumbuchila kahi wihe wa hewo.”
HEB 8:13 Kwa kulonga mbuli ya ilagano lya sambi, Nguluwi nakalilaliza lila litomile, na cheng'ha chilingulala na kuwa chilalile ng'hatu chahabehi kuka.
HEB 9:1 Ilagano lya mwaluko nalyali na vihendo vyake vya kumkolela mijito Nguluwi, nahali na ihema lyelile lyakufugamila hano mu isi.
HEB 9:2 Nahazenjigwa ihema hali chihengo cha mwaluko, nahachemigwa Honhu Helile. Amo mwali na honhu ha kuwichila chenje, chisaga na mibumunda jilavigwe kwa Nguluwi.
HEB 9:3 Mgati mwa ihema, kwali na vihengo vili vigawanuche kwa igubiko, chihengo cha keli nachichemigwa Honhu Helile ng'hatu.
HEB 9:4 Amo mwali na alitale ya zahabu kwa mbuli ya kufunyizila ubani, na isanduku lya Ilagano, lyali liwichigwe zahabu nzingo zeng'ha, na mgati mwake mwali na chiya cha zahabu chiwele na chilyo chizeleche kota mana, ng'hweku ya Aluni iwele ibahule misolo na uluwa, na vila vibao vyandichigwe ilagano.
HEB 9:5 Mchanya mwa alyo isanduku kwali na vilumbigwe vifandile kota wahilisi, vilingulajila kota hala honhu hana ukulu wa Nguluwi na mbawa zawo nazigonzoligwa kugubika chigubiko cha isanduku mchanya mwa honhu halingusigwa gehile. Ila sambi hatuweza kulonga kwa mgati ng'hatu kuli mbuli azo.
HEB 9:6 Vinhu avyo naviwichigwa goya na hamba iwa chihendo kwa watambika kwinjila chila zuwa kuli ihema lya kunze kudita mbuli za utambika.
HEB 9:7 Ila mtambika mkulu yaliyeka ndo yalingwinjila kuli chila chihengo cha keli, naye huditaga hiho mala imwe hela kwa mhela, nakaganigwa kigala danda ya kumlavila Nguluwi kwa mbuli ya heye yuye na kwa mbuli ya gehile ga wanhu waditile ne kuvizela.
HEB 9:8 Kwa nzila ayi, Muhe Yelile kangulajila kota kwa vila lila ihema lya mwaluko nalyali ling'hali limile, nzila ya kwinjila Honhu Helile ng'hatu hainachumuligwa.
HEB 9:9 Nhelo ayi yangulajila mbuli vyoiwele mhela wa sambi, iwele ndolendole na nhambiko zangulavigwa kwa Nguluwi, ila haziweza kusa itunyo lya gehile kulawa kuli nhumbula za wanhu walingumfugamila Nguluwi.
HEB 9:10 Mbuli azi zeng'ha zangukoleka kwa chiwalo cha ndiya na vyakunwa na vihendo vinji vya mvina ya kihovuga. Mbuli azo zeng'ha haziwele za chimuhe, na ludali lwake ludumaga mhela Nguluwi hodita goya vinhu vyeng'ha.
HEB 9:11 Ila Kilistu mina koya, yawele ndo mtambika mkulu wa mbuli zinojile, gawele gafichile sambi. Heye kenjila kuli ihema likulu ng'hatu liwele ligongomanyilwe ng'hatu, yohaiditikwe na wanhu, nahaiwele honhu ha isi ino ilumbigwe.
HEB 9:12 Heye nakenjila Honhu Helile ng'hatu mala imwe hela, haholile danda ya mhene na isenga ilogota, ila danda ya heye yuye, kukolela ayi, katugalila ugombozi wa mazuwa gose.
HEB 9:13 Wanhu nawawele wavu kuli mbuli za kumfugamila Nguluwi nawaweza kuhovujigwa na kwela mlukuli mwao howamizilwe danda ya mhene na ya ibuguma hamwe na mivu ja isenga ilogota.
HEB 9:14 Ila, kwa danda ya Kilistu, mbuli ng'hulu ng'hatu ziditagwa! Kwa ludali lwa Muhe wa Nguluwi wa mazuwa gose, Kilistu nakelavya yuye nhambiko igongomanyilwe ng'hatu kwa Nguluwi. Danda ya heye yotudita tuwe twelile kwa gala tulingudita galingigala kubagama, leka tumditile mijito Nguluwi yawele mkomu.
HEB 9:15 Ahyo heye ndo mhanyisi wa ilagano lya sambi amla wala wachemigwe na Nguluwi woweza kutambichilwa mazuwa gose vyowalaganwe na Nguluwi. Kubagama kwa heye kwanguwagombola wanhu kulawila kwa ula wihe wowaditile mhela wa lila ilagano lya mwaluko.
HEB 9:16 Ulonzi wa ilagano lyangudita mijito hela wone kubagama kwa awo yaulonjile awo uhalizi woneka ndo kukomya.
HEB 9:17 Uhalizi hauweza kuditikwa mbaka kulawile kubagama, kwa vila uhalizi wahela ludali wone yauwandiche yang'hali mkomu.
HEB 9:18 Ndo mina nalila ilagano lya mwaluko halyaluche kukola mijito kulihela danda.
HEB 9:19 Chinhu cha mwaluko, Musa kuwadamlila wanhu weng'ha mizilo jeng'ha kota vyoiwele kuli malajizo, hamba nakahola danda ya isenga ilogota hamwe na mazi, na kwa nhagala za isopolo na mhamba ndung'hu na kumizila chila chitabu cha malajizo na wanhu weng'ha.
HEB 9:20 Musa nakalonga, “Ayi ndo danda ilingutawiza ilagano lilajizwe na Nguluwi mlihulichize.”
HEB 9:21 Vivila Musa nakamizila danda lila ihema na vinhu vya mijito ja utambika kwa kumfugamila Nguluwi.
HEB 9:22 Ena, na kuli malajizo behi chila chinhu chohovugwa kwa kuboholigwa danda, na ne kuwa hela danda, haukusigwa gehile.
HEB 9:23 Vinhu vino vya aha vyanguganigwa kuhovujigwa kwa danda, navyo ndo kiwhana hela na mbuli za kukomya za kilanga. Ila vinhu vya kilanga yangugana nhambiko iwele inojile ng'hatu.
HEB 9:24 Mina Kilistu nahenjile Honhu Helile hazenjigwe na wanhu, ilinguwhanizwa hela na chila chinhu chiwele kilanga. Heye nakenjila kilanga kuko du koyawele sambi, kangwima kumwando kwa Nguluwi kwa mbuli ya hetwe.
HEB 9:25 Mtambika mkulu wa Wayahudi kenjilaga Honhu Helile ng'hatu chila mhela yawele na danda ya igongolo, ila Kilistu henjile amo leka yelavye yaliyeng'ha mala nyinji.
HEB 9:26 Mina naiwe ahyo, Kilistu nayahaganigwe kugazigwa mala nyinji kulawila kulumbigwa kwa isi. Ila kwa kukomya, mhela awu hozihejela mwiso, heye nakalawila mala imwe hela kulavya wihe kwa kilavya heye yuye nhambiko.
HEB 9:27 Lelo wone vila chila munhu kobagama mala imwe hela, hamba kokwima kumwando hali utaguso wa Nguluwi,
HEB 9:28 hihyo du Kilistu na heye nakelavya nhambiko mala imwe hela kwa mbuli ya kusa gehile ga wenji. Hoyohiluka lwa keli, haiwele kwa chiwalo cha kusa gehile, ila ndo kwa chiwalo cha kuwalohola wala walingumbeteza.
HEB 10:1 Kwa vila malajizo ga Musa ndo isisila hela lya mbuli zinojile hozikuya na haiwele kota vyogalingoneka ikomya kwa zila mbuli zinji, nhambiko zizila za malajizo zilingulavilwa mhela na mhela, hazihega ng'oo kuwadita wala walingumfugamila wawe wagongomanyizwe.
HEB 10:2 Kota awo wanhu walingumfugamila Nguluwi nawahovujigwe ng'hatu gehile ga hewo, nahawalingiwona kahi kota wana gehile, na nhambiko azo zeng'ha zahadumile.
HEB 10:3 Ila nhambiko azo zangukoleka chila mhela kuwakumbusa wanhu wavizele kota wana wihe.
HEB 10:4 Mina danda ya isenga ibuguma na mhene haiweza ng'oo kulavya gehile.
HEB 10:5 Ndo mina Kilistu loyali yokuya kuli isi, nakamlonjela Nguluwi, “Huganile nhambiko ne vinhu vya kumlavila Nguluwi, Ila kumbichila lukuli.
HEB 10:6 Nhambiko za kulakaza nimwa ama za kusa gehile hambe zikunojeze.
HEB 10:7 Aho nandonga, ‘Nda hano Hegwe Nguluwi, kudita kota vyouganile kota vyoyandichigwe mbuli ya heni kuli chitabu cha Maandiko Matakatifu.’ ”
HEB 10:8 Mwaluko nakalonga, “Hambe ugane ne kunojezwa na nhambiko na ndolendole na nhambiko za kulakaza na nhambiko za kusa gehile.” Nakalonga ahyo hanga nhambiko azi zeng'ha zilavyagwa kota vyogalingugana malajizo.
HEB 10:9 Hamba nakalonga, “Nda hano, Hegwe Nguluwi, nda goya kudita kota vyoulingugana.” Ahino Nguluwi nakosa nhambiko zali zikoleka aho mwaluko, na honhu hake nakawika nhambiko inji imwe, nhambiko iwele ndo Kilistu yuye.
HEB 10:10 Kwa vila Yesu Kilistu nakadita kota navyoyaganile Nguluwi, hetwe twanguhovujigwa tuwe welile kwa kulawa mli gehile ga hetwe, kwa yila nhambiko ya lukuli lwa heye loyalavile mala imwe hela.
HEB 10:11 Chila mtambika Myahudi nakaditaga mijito ya kumfugamila Nguluwi na kulavya nhambiko zizila mala nyinji, nhambiko haziweza ng'oo kusa gehile.
HEB 10:12 Ila Kilistu nakalavya nhambiko imwe kwa mbuli ya gehile, nhambiko iwele na ludali mazuwa gose, hamba nakekala honhu ha ludali nzingo ya kudilo kwa Nguluwi,
HEB 10:13 kulawila mhela awo, kangubeteza wamwihile wawichigwe hasi ha magulu gake.
HEB 10:14 Lelo kwa nhambiko ya heye imwe, kawadita wawe wagongomanywe mazuwa gose wala walingusigwa gehile ga hewo.
HEB 10:15 Na heye Muhe Yelile kangutawiza ulolezi wa heye. Kangwaluka nakulonga,
HEB 10:16 Kangulonga Mkulu, “Ali ndo ilagano londidita na hewo, mazuwa galinguya kalonga Mkulu. Ndowika malajizo ga heni mnhumbula mwao, na kuzandika mnyala zawo.”
HEB 10:17 Hamba nakonjezela kalonga, “Sivijesa ng'oo kahi gehile ga hewo na wala wihe wowalingudita.”
HEB 10:18 Lelo hogokusigwa gehile, hakuwa na chiwalo kahi cha kulavya nhambiko ya kusa gehile.
HEB 10:19 Lelo mng'holozangu, kwa danda ya Yesu twangupegwa nhumbula yohambe idumbe ya kwinjila Honhu Helile Ng'hatu.
HEB 10:20 Heye katuchumulila nzila inyale, nzila ilikutulongoza kuli ukomu, kukolela lila igubiko, luwele ndo lukuli lwake yuye.
HEB 10:21 Lelo twanaye mtambika mkulu yatanganiche yawele na ludali kwa mbuli ya ng'handa ya Nguluwi.
HEB 10:22 Kwa ahyo, tumhejelele Nguluwi kwa nhumbula zelile na makundo ga kukomya, kwa nhumbula zelile kulawa kuli majesa gehile, na kwa ng'huli zihovujigwe kwa mazi ganojile.
HEB 10:23 Tibatilile ng'hatu ne kutigasika kitumbila kwa hetwe kotulonjile kwa mlomo, mina Nguluwi yaditile malagano ga heye ndo yawele wakitumbila.
HEB 10:24 Twitanze kiditila kwa mbuli ya kiyonjezela kikangaza kwa kigana na kudita ganojile.
HEB 10:25 Tuleche kuleka yila mbuli ya kiting'hana hamwe, kota vila vihendo vya wanhu wanji vyowawele hambe wating'hane, kota vyomlingona, zuwa lila lya Mkulu yahabehi.
HEB 10:26 Mina, lotulutilila kudita gehile kwa kugana twetwe baha, hala hotuvizelele kukomya, kuduhu nhambiko ilinguweza kulavigwa kahi kwa chiwalo cha kusa gehile.
HEB 10:27 Lilingupona ndo kubeteza hela kwa kukakama utaguso wa Nguluwi na chiluli ching'hang'hale lochiwabagamiza weng'ha walingumlema Nguluwi.
HEB 10:28 Munhu yoneche hambe yahulichize malajizo ga Musa, kobagama ne kumonela isungu kuwele na ulolezi wa wanhu weli ama wadatu.
HEB 10:29 Ndaze, munhu yula yalingumbeza Mwana wa Nguluwi na kuibeza danda ya ilagano lya Nguluwi imditile yawe yahovujigwe, munhu yalingumliga Muhe wa Nguluwi yalingutigalila isungu lya heye, kopegwa utaguso ukulu ulindaze?
HEB 10:30 Mina natumzela yula yalonjile, “Heni ndohilusila chibida, heni ndohilusila,” Na heye nayalonjile kahi, “Mkulu kowatagusa wanhu wa heye.”
HEB 10:31 Ndo mbuli ya kudumba ng'hatu wone Nguluwi yakibate na kutagusigwa.
HEB 10:32 Mkumbuchile logalawile mazuwa gala ga mwaluko lommwemweselwe lumuli lwa Nguluwi. Hanga zuwa zila namfikwa na kugazigwa kwinji, hemwe namwimilila.
HEB 10:33 Mala inji namligwa na kubasigwa soni hazelu, mala inji namwima hamwe na wala wagazigwe kota mwemwe.
HEB 10:34 Namilumba kuli kugazigwa kwa wawele mchinweng'ho na lombochigwe lufufu lwenu namwimilila kwa kusangalala, mina namvizela kota mwanawo lufufu lunojile ng'hatu na lwakikala mazuwa gose.
HEB 10:35 Lelo mleche kwajiliza kitumbila kwa hemwe, mina wowagalilani ndolendole ng'hulu.
HEB 10:36 Mwanguganigwa kuwa na wimililo leka mweneze ligano lya Nguluwi na kubochela chila choyalagane kudita.
HEB 10:37 Mina kota vyogalingulonga Maandiko Matakatifu, “Ing'hali hado hela, na yula yalinguya, kokuya, na hokawa hebu.
HEB 10:38 Ila munhu yalingudita ganojile kochikala kwa makundo, ila loyohiluka kumbele, heni sinojezwa na heye.”
HEB 10:39 Lelo hetwe twamduhu hali wala walinguhiluka kumbele na kwajilila, ila hetwe twamumo na wala walingukunda na kuloholigwa.
HEB 11:1 Kuwa na makundo ndo kuwa na kukomya kwa mbuli zotungitumbila, kutawiza ng'hatu mbuli zila zohatuziwene.
HEB 11:2 Mina wasekulu wa katali nawatogoligwa na Nguluwi kwa makundo ga hewo.
HEB 11:3 Kwa makundo hetwe tuvizela kota isi yeng'ha nailumbigwa kwa ulonzi wa Nguluwi, vinhu vilingoneka kulawila kuli vinhu havilingoneka.
HEB 11:4 Kwa makundo Abeli nakamlavila Nguluwi nhambiko inojile ng'hatu kusinda ila ya Kaini. Kwa makundo ga heye nakatawizwa na Nguluwi yawe yodita galingumnojeza Nguluwi. Nguluwi yuye nakanojezwa na nhambiko za heye. Kwa makundo ga heye hanga nakabagama, yang'hali yotulonjela.
HEB 11:5 Kwa makundo Henoki nakaholigwa na Nguluwi, yaleche kubagama. Honeche kahi kwa vila Nguluwi nakamhola. Loyali hanaholigwa, kota Maandiko Matakatifu gangulonga, heye nakamnojeza Nguluwi.
HEB 11:6 Lelo wone kwahela makundo yowa nongwa kwa munhu kumnojeza Nguluwi. Kwa vila chila munhu yalingumlutila Nguluwi imgana yakunde kota Nguluwi kabaho, na kuwapa chonolo wala walingumpala.
HEB 11:7 Kwa makundo Nuhu nakamhulichiza makanyo ga Nguluwi kwa mbuli za hamba zohambe zoneche. Nakazenga ila safina moyaloholigwe heye hamwe na lukolo lwake. Kulawila kwa ago, isi yeng'ha itagusigwe kwa wihe, na heye Nuhu nakoneka nakamnojeza katanganika kwa makundo.
HEB 11:8 Kwa makundo Abulahamu nakamhulichiza Nguluwi loyachemigwe yalute kuli isi iwele Nguluwi yalonjile khoma iwe ya heye. Abulahamu nakoka, hanga nahavizelele koyali yoluta.
HEB 11:9 Kwa makundo nakekala kota mjenzi kuli isi yalaganwe na Nguluwi. Nakekala ako kuli ihema kota vyowekale Isaka na Yakubu. Na hewo kahi nawelumba kuli kilagana kukula.
HEB 11:10 Mina Abulahamu nayali yobeteza mji uwele na msisi wouwa baho mazuwa gose, mji uwele Nguluwi yuye nayawele muwanzi na kuuzenga.
HEB 11:11 Kwa makundo na Sala nayawele mhende nakakunda kota Nguluwi kana mong'ho wa kudita gala yalagane, ahyo, nakaweza kuhola himila hanga nayali yalalile.
HEB 11:12 Ahyo, kulawila kuli munhu ayo yumwe, Abulahamu, yawele kota vila munhu yabagame, nawalawila wanhu wenji hawawazigwe kota vila nhondwe za kilanga na kota vila sangalaza za mwhani.
HEB 11:13 Wanhu weng'ha awa nawabagama wawele na makundo. Nawabagama lohawanabochela mbuli ziwele Nguluwi zoyali yalagane nawo, ila kwa kutali kota nawagona, wasechelela, na kulonga hazelu kota hewo wali wajenzi na wali mmajendo mu isi.
HEB 11:14 Wanhu walingulonga mbuli kota azo, wangulajila ng'hatu kota wanguipala isi ya kukomya.
HEB 11:15 Kwa kukomya wone na wawe wanguijesa isi yowalawile katali, wahawezile kuhiluka kuko.
HEB 11:16 Ila sambi wangugana isi inojile ng'hatu, ndo iwele isi ya kilanga. Ndo mina Nguluwi halingulola aga howomchema heye Nguluwi wa hewo, kwa vila heye yuye mina kasinda kuwagomanyila muji.
HEB 11:17 Kwa makundo Abulahamu nakamlavya nhambiko mwanage Isaka mhela Nguluwi hoyamjezile. Ayo Abulahamu yuye du, hanga nakabochela chila chowelagane na Nguluwi, ila nakakunda kumlavya mwanage wa udewele yawe nhambiko,
HEB 11:18 hanga Nguluwi nayali yamlonjele, “Lulelo lwako lolawila kwa Isaka.”
HEB 11:19 Abulahamu nakakunda kuta Nguluwi koweza kuwazilipula wabagame, na kwa nzila yinji, Abulahamu ndo kota vila nakampata kahi Isaka yalawile kowabagame.
HEB 11:20 Kwa makundo Isaka nakawatambichiza Yakubu na Esau, kuli za ukomu wa hewo wa hamba.
HEB 11:21 Kwa makundo Yakubu loyali habehi kubagama nakawatambichiza chila yumwe wa wana wa Yusufu, aku yomfugamila Nguluwi yawele yegamile yila ng'hweku ya heye.
HEB 11:22 Kwa makundo Yusufu loyali habehi kubagama nakalonga mbuli ya kulawa kwa Waisilaeli kuli isi ya Misili, na kahi nakawalechela ilajizo lya mbuli ya chowalinguganigwa kudita kwa chiwalo cha mizeje ja heye.
HEB 11:23 Kwa makundo wahaza wa Musa nawamvisa ayo mwana kwa myezi jidatu loyaleleche. Kwa vila nawamona kota ka mwana yanojile ng'hatu, nahawalidumbile lila ilajizo lya mndewa wa Misili.
HEB 11:24 Kwa makundo Musa loyawele munhu mkulu, nakalema kuchemigwa mwana wa mhinza wa Falao mndewa wa Misili.
HEB 11:25 Nakona inoga kugazika hamwe na wanhu wa Nguluwi kuleka kusechelela udevelo wa gehile kwa mhela udo hela.
HEB 11:26 Nakavizela kota kugazika kwa mbuli ya Kilistu Mlohozi kunoga ng'hatu kusinda lufufu lweng'ha lwa isi ya Misili, mina nayali yololela chonolo cha hamba.
HEB 11:27 Kwa makundo Musa nakoka kulawa isi ya Misili ne kudumba ng'halazi ya Mndewa, na hahiluche kumbele, kota vila munhu yamuwene yula Nguluwi halingoneka.
HEB 11:28 Kwa makundo, na ndoyaluche Pasaka nakulajiza danda imizigwe mchanya mwa lwizi, leka yula mhilisi yalingukopola yaleche kuwakopola walelwa wa mwaluko wa Isilaeli.
HEB 11:29 Kwa makundo wanhu wa Isilaeli nawaloka bahali ya Shamu kota vila kwali kigongo, ila Wamisili lowajezile kuloka kota wawo nawazibila mmazi.
HEB 11:30 Kwa makundo, Waisilaeli nawazunguluta ngome ya muji wa Yeliko kwa mazuwa saba na ngome ayo naigwa.
HEB 11:31 Kwa makundo, Lahabu yawele mng'hondwa habagame hamwe na wala wamlemile Nguluwi, kwa vila nakawabochela goya hakaye hake wala wasakuzi Waisilaeli.
HEB 11:32 Lelo ndonje choni ng'hatu? Mhela haulinguhega hebu, kulonga mbuli ya Gidioni na Balaki na Samsoni na Yefuta na Daudi na Samweli na waloli wa Nguluwi.
HEB 11:33 Kwa makundo awa weng'ha nawetowa ngondo na isi yinji nawawasumya wandewa. Nawalongoza kwa nzila iwaditile wanhu wadite ganojile, nawabochela gala Nguluwi yalagane na hewo. Nawajidinya milomo ja misimba,
HEB 11:34 nawazimya viluli vilupila, nawalohoka kubagama kwa ipanga, wali watuguniche ila nawapegwa mong'ho. Nahawawele wodumba kuli ngondo, nawawabilimisa wamizi wachijenzi.
HEB 11:35 Na wadala wakundile nawahilulilwa wanhu wa hewo wabagame wawele wazilipuligwe. Ila wamwe wa hewo nawalema kuchumulilwa, nawagazigwa mbaka kubagama leka wazilipuligwe nakwinjila kuli ukomu unojile ng'hatu.
HEB 11:36 Wanji nawazomeligwa na kutowigwa ng'hobwa, na wanji nawawohigwa minyololo na kutozigwa mchinweng'ho.
HEB 11:37 Nawatowigwa na maganga mbaka kubagama, nawadaduligwa kwa misumeno viunde, nawakopoligwa kwa ipanga. Nawazunguluta zunguluka wavalile igozi lya ming'holo na igozi lya mhene, wali wanhu wazunwa, wagazigwe na kuditilwa mbuli zihile.
HEB 11:38 Isi nahaiganigwe kuwa na wanhu awo. Nawali wojendajenda kugunuche na kuvidunda, wochikala kuli mipalika na minila ja isi.
HEB 11:39 Wanhu awa weng'ha nawatogoligwa na Nguluwi kwa chiwalo cha makundo ga hewo. Ila, hawabochele gala nawalaganwe na Nguluwi.
HEB 11:40 Mina Nguluwi nayali yalongole kutuwichila goya vinhu vinojile ng'hatu kwa hetwe, leka hewo wafichile kuli kugongomanya hamwe na hetwe.
HEB 12:1 Ahyo, hetwe twanacho chilundo chikulu cha walolezi kumwando kwa hete. Lelo tuse chila chingwamo chilingutulemeza, na kahi gehile gala gatunanahile. Tubilime kwa kwimilila kuli kubilima kuwichigwe kumwando kwa hetwe.
HEB 12:2 Tumlole Yesu yawele ndo yaluchize makundo ga hetwe na ndo heye yogomanjiza. Kwa chiwalo cha kusangalala iwele iwichigwe kumwando kwa heye, nakemilila kubagama mumsalaba, ne kudumba soni ya heye, na sambi kangikala honhu ha ukulu kuli nzingo ya kudilo kwa chigoda cha Undewa wa Nguluwi.
HEB 12:3 Mijese zila mbuli zimfichile Yesu, vyoyemilile kulemigwa kukulu na wanhu wawele na gehile. Lelo mleche kutweguka na kugozola.
HEB 12:4 Mina kuli kitowa na gehile, hemwe hamitowile mbaka mbohole danda.
HEB 12:5 Ndaze, msemwa wula ulonzi wa kuwakangaza Nguluwi yawachemile hemwe kota wana wa heye? “Mwanangu, uleche kubeza makanyo ga Mkulu, nauleche kugozola houng'hanuchilwa.
HEB 12:6 Mina Mkulu komkanya yoneche yalingumgana, komzapa ng'hobwa chila yalingukunda kota kamwanage.”
HEB 12:7 Mwimilile kuzapigwa ng'hobwa kwa vila ndo ulanguso, Nguluwi huwaditilaga hemwe kota wanage. Mina ndo mwana wachi hambe yang'hanuchilwe na kuzapigwa na mhaza wa heye?
HEB 12:8 Ila wone homzapigwa kota wana wanji, lelo hemwe hamuwele wana wa heye, ila mwana chilokote.
HEB 12:9 Menji kwa ago, hetwe twanguwahulichiza wahaza wa hetwe wa hano muisi watulelile na hala howotuzapa. Lelo twanguganigwa kumhulichiza ng'hatu Mhaza wa hetwe wa chimuhe leka tulutilile kuwa wakomu.
HEB 12:10 Wahazwa wa hetwe hano mu isi nawatuzapa hado, kota hewo vyowawene inoga, ila Nguluwi kangutukanya kwa chiwalo cha kututanza twetwe baha, leka tuwe welile kota heye.
HEB 12:11 Mhela hotuzapigwa haiwele mbuli inojile ila ya kigala masinzo. Ila wala walanguswe kuwahulichiza, hamba wobeta chonolo cha kikala goya kuli ukomu ulingumnojeza Nguluwi.
HEB 12:12 Lelo mikanagaze moko ga hewe katochile na kukangaza mifugamilo ga hemwe gawele ng'hochele.
HEB 12:13 Mlutilile kudita nzila igoloche kuli magulu ga hemwe, leka chila yawele na magulu gaziliche yaleche kulumizwa, ila yawe mkomu.
HEB 12:14 Mikangaze kikala goya na wanhu weng'ha. Mikale mwelile, kwa vila kuduhu munhu yomona Mkulu ne kuwa na ukomu kota awo.
HEB 12:15 Mikangaze ng'hatu munhu yoneche yaleche kwajiliza isungu lya Nguluwi. Muwe meho leka izabi liliusungu lileche kuzuka hali hemwe na kuwegalila wanhu wenji magazo kwa dunga ya heye.
HEB 12:16 Milolele leka homuli haleche kuwa na munhu mhonzolomo ama munhu yohamzelele Nguluwi kota Esau, yaguzile uhalizi wa heye wa mlelwa wa mwaluko kwa chilyo chido hela.
HEB 12:17 Hemwe mvizela kota nahala hoyaganile kuhola kahi ula utambichizo uwele wa heye, nakalemelwa, kwa vila hapegwe kahi mhumhu ya kumgalamchila Nguluwi hanga nayaliyopala kwa kulila mahozi.
HEB 12:18 Hemwe hamfichile kuli chidunda cha Sinai, uwele kibatika, hamfichile kuli chiluli chilingwaka, hawele na jiza na chimbunga,
HEB 12:19 kuhulikwa kubuma kwa lizi lya mhalamhanda na lizi lya ulonzi. Wala wanhu wa Isilaeli nawahulika lizi alo nawalanda waleche kuhulika kahi lizi linji,
HEB 12:20 ahyo hawawezile kwimilila ilajizo lilavigwe, “Yoneche yodoliza mchidunda achi na yawe munhu ama igongolo, kotowigwa maganga mbaka kubagama.”
HEB 12:21 Ago geng'ha gangoneka kota gakudumbiza ng'hatu, mbaka Musa nakalonga, “Ndangudumba na kukakama.”
HEB 12:22 Ila hemwe mfika kuli chidunda cha Siyoni, kuli muji wa Nguluwi yawele mkomu. Mfika Yelusalemu, muji wa kilanga, kuwele wating'hane wahilisi wa kilanga wenji kwa maelufu menji wasangalale.
HEB 12:23 Mfika kuli nhing'hano ng'hulu ya walelwa wa mwaluko wa Nguluwi, wawele na matagwa gawo gandichigwe kilanga. Mwangwima kumwando kwa Nguluwi yawele mtagusa wa weng'ha, na hawele na muhe za wanhu walingudita ganojile, waditikwe wa kugongomanya.
HEB 12:24 Mfika kwa Yesu yawele mhanyisi kuli ilagano lya sambi, na danda ya heye imizigwe yangulonga mbuli zinojile kusinda yila ya Abeli.
HEB 12:25 Lelo milolele, mleche kulema kumuhulichiza ayo yalingulonga na hemwe. Kota wala walemile kumhulichiza yula yawakanyile hano mu isi hawowa wakomu, hetwe tohega ndaze kuwa wakomu wone tulingulema kumhulichiza yula yalingutukanya kulawila kilanga?
HEB 12:26 Mhela wula lizi lyake nalitigasa isi, ila sambi nakalagana kahi, “Ndoitigasa haiwele isi hela, ila na ulanga kahi.”
HEB 12:27 Ulonzi awu, “kwa mala inji kahi” Wangulajila kota vinhu vyeng'ha vya katali vilingutigasigwa vyokusigwa, ila vila vinhu vinyale vyopona hovitigasika hebu.
HEB 12:28 Hetwe lelo, tute malumbo, kwa vila twangubochela undewa wohautigasika. Tute malumbo na kumnojeza Nguluwi kuli kumfugamila Nguluwi kuli kuhondigwa nhumbula na kumhulichiza ng'hatu,
HEB 12:29 kwa kukomya Nguluwi wa hetwe ndo chiluli chilingulupila ng'hatu na chilingulakaza nimwa.
HEB 13:1 Mlutilile kigana chilukolo.
HEB 13:2 Mleche kusemwa kuwabochela wajenzi, mina kwa kudita ahyo wanhu wanji nawawabochela wahilisi wa kilanga ne kuvizela.
HEB 13:3 Muwakumbuche wala wawele mchinweng'ho ifande kota hemwe namwe mwamchinweng'ho hamwe na hewo. Muwakumbuche wala wali kugazigwa ifande kota vila hemwe ndo mwangugazigwa kota hewo.
HEB 13:4 Kihola nakudumbigwe ng'hatu na wanhu weng'ha, mlume na mdala waleche kujenda na wanhu wanji. Nguluwi kowatagusa wahonzolomo na wang'hondwa.
HEB 13:5 Mleche kuwa wanhu wakugana sendi ng'hatu, mkunde na vila vinhu vyomlinavyo. Heye Nguluwi nakalonga, “Sikuleka ng'oo, ne sikutaga ng'oo.”
HEB 13:6 Ndo mina twanguweza kulonga, “Mkulu ndo yalingunhanza heni, sidumba ng'oo. Munhu kondita choni?”
HEB 13:7 Muwakumbuche vilongozi wa hemwe wawadamlileni usenga wa Nguluwi. Mlole goya vila navyowekale mbaka kubagama. Muwinze makundo ga hewo.
HEB 13:8 Yesu Kilistu ndo yuyula hamitondo, lehano na mazuwa gose.
HEB 13:9 Mleche kuzukwanzwa zukwanzwa aku na kula kwa malanguso ganji gali vinji ga chijenzi. Kunoga kwa Nguluwi ndo unoga kwa kwimiza nhumbula za hetwe na haiwele mizilo kwa mbuli ya chilyo, mizilo ajo hajimtanzile ne munhu yoneche.
HEB 13:10 Hetwe twanaho honhu ha kulavila nhambiko hawele wala wang'hali wodita mijito mgati mwa ihema lya Wayahudi wahela ludali lwa kulya vinhu vilavigwe nhambiko.
HEB 13:11 Mtambika mkulu wa Chiyahudi kegalaga danda ya migongolo kuli Honhu Helile ng'hatu na kuilavya nhambiko kwa mbuli ya gehile, ila miwunde ja ajo migongolo hulakazagwa nimwa kunze kwa chiluli chilupila kunze mwa kambi.
HEB 13:12 Ndo mina Yesu kahi, leka yawelize wanhu kwa danda ya heye, nakagazigwa na kubagama kunze kwa muji.
HEB 13:13 Lelo natuleche kudumba, tumlutile ako kunze mwa kambi, tukalemigwe kota vyoyalemigwe heye.
HEB 13:14 Mina hano mu isi twahela muji wa kikala mazuwa gose, ila twanguulolela muji ula ulinguya.
HEB 13:15 Lelo kukolela Yesu, mazuwa gose tumlavile Nguluwi nhambiko ya kitogola, mina ayo nhambiko ndo ulonzi wa hetwe hotulonga Yesu ndo Mkulu.
HEB 13:16 Mleche kusemwa kudita ganojile na kitanza, mina azi ndo nhambiko zilingumnojeza Nguluwi.
HEB 13:17 Minamize kwa walinguwalongoza na kibatilila malajizo ga hewo, hewo wanguzilolela nhumbula za hemwe nemisi na nechilo, na woganigwa kumlonjela Nguluwi mbuli ya mijito ya hewo yowaditile. Wone minamize kwa hewo wodita mijito ja hewo kwa kusechelela, waleche kona kota itunyo, leka wozidita kwa masinzo, mina ayo haiwatanza hemwe.
HEB 13:18 Mtulandile na hetwe. Tuvizela ng'hatu kota nhumbula za hetwe hazilingutulonjela kota twanawo wihe, kwa vila twangugana kuwa na madito ganojile kuli mbuli zeng'ha.
HEB 13:19 Ndanguwadedeza ng'hatu mndandile kwa Nguluwi leka yanyiluse kwa hemwe himahima vyoilinguganigwa.
HEB 13:20 Nguluwi yalingutupa kikala goya, yamzilipule Mkulu wa hetwe Yesu Kilistu kwa chiwalo cha danda ya heye, ilajile kukomya kwa ilagano lya mazuwa gose, yawele ndo mdimi mkulu wa ming'holo.
HEB 13:21 Ndangulanda Heye yawegalile hemwe na chila madito ganojile leka mdite kota vyoyalingugana. Kahi kwa kukolela Yesu Kilistu, Heye yadite mgati mwa hemwe gala galingumnojeza Heye. Kwa Yesu Kilistu Ukulu uwe kwa heye, mazuwa gose. Ena.
HEB 13:22 Lelo wang'holozangu, ndanguwadedeza mbochele usenga awu kwa kwimilila. Ali ndo lyandiko lido hela lyondiwandichileni.
HEB 13:23 Ndangugana kuwalonjelani kota mng'holozetu Timoteyi mina kachumulilwa mchinweng'ho. Wone nayafiche hano yawahiche, ndokuya na heye hondikuya kwa hemwe.
HEB 13:24 Muwalamse vilongozi wa hemwe weng'ha welile hamwe na wanhu wa Nguluwi! Wang'holozetu wawele Italiya wanguwalamsani.
HEB 13:25 Twanguwalandilani mweng'ha isungu lya Nguluwi.
JAM 1:1 Heni Yakubu, chitumagwa wa Nguluwi na wa Mkulu Yesu Kilistu, ndanguwalamsani hemwe nhanzi kumi na mbili, zisambaluche kuli isi yeng'ha!.
JAM 1:2 Wang'holozangu, msangalale mhela homfichigwa na nongwa zinjizinji,
JAM 1:3 kwa vila mvizela kota kujezigwa kwa makundo ga hemwe kwangigala kwimilila.
JAM 1:4 Mlole kota kwimilila kwa hemwe kowafichiza mbaka kuduma, kowadita mkangale leka muwe mwenele kwa chila chinhu ne kwisilwa na chinhu choneche.
JAM 1:5 Ila wone yumwe wa hemwe kahela luhala, lelo kanguganigwa yamlande Nguluwi, yalinguwapa wanhu weng'ha kwa winji na kwa isungu, na heye kopegwa.
JAM 1:6 Ila kanguganigwa kulanda kwa makundo ne kuwa na lunhwinhwi wa chinhu choneche. Munhu yawele na lunhwinhwi ndo kota nhigu ya bahali iwele kukundujizwa na kutagangwa na mbeho.
JAM 1:7 Munhu kota ayo yaleche kijesa kota kobochela chinhu choneche kulawa kwa Mkulu.
JAM 1:8 Munhu yawele na majesa meli, kanguyegayega mnzila ya heye kuli vinhu vyeng'ha yalinguvikola.
JAM 1:9 Mng'holozo yawelengukunda na yawele mzunwa, kangulapigwa yasangalale mhela Nguluwi hoyomwinula,
JAM 1:10 na heye yawele na lufufu kangulapigwa yasangalale mhela Nguluwi hoyomdulisa. Mina yawele na lufufu kokwaga kota uluwa wa kisolo.
JAM 1:11 Isanya isomozaga na ivuche lyake ling'hang'hale na mizuchila jangukala bee! Na uluwa wangugwa hasi na kunoga kwesa kwangwiha. Hiho, yawele na lufufu kobagamizwa hoyowa mli mijito ya heye.
JAM 1:12 Kabweda munhu yalingupona yokundigwa kuli majezo, hoyoleka kwa kusumya, kopegwa chonolo cha ukomu Nguluwi yalagane na hewo walingumgana.
JAM 1:13 Wone munhu yajezigwe yaleche kulonga, “Ndangujezigwa na Nguluwi.” Mina Nguluwi halingujezigwa kwa wihe, na heye halingumjeza munhu yoneche kwa wihe.
JAM 1:14 Chila munhu kangujezigwa hoyokwejigwa na kugwila kuli maya ga heye gehile.
JAM 1:15 Maya gehile hogokangala, gangigala wihe, nawo wihe houkangala, hamba wangigala kubagama.
JAM 1:16 Wang'holozangu ndiwaganile, mleche kuhadigwa!
JAM 1:17 Chila ndolendole inojile na yenele na haipunguche yangudulika kulawa kilanga kwa Mhaza, mlumba vimulimuli vyeng'ha viwele kuulanga na jiza hambe yagaluche na kahela ulajilo woneche wa kulajila kota kogaluka.
JAM 1:18 Kwa igano lyake yuye, nakatugalila ukomu unyale kukolela ulonzi wa heye wa kukomya, na katudita tuwe honhu ha mwaluko hali vilumbigwe vya heye vyeng'ha.
JAM 1:19 Wang'holozangu ndiwaganile, mvizele mbuli ayi! Chila munhu yaleche kukawila kuhulika ila yakawile kulonga na kuzudila.
JAM 1:20 Kwa vila wanhu wawelenguzudila howeza kudita ganojile hali Nguluwi.
JAM 1:21 Lelo mgaleche gehile na wihe womlinawo, mbochele kwa nhumbula iholile ula ulonzi unyalilwe mnhumbula za hemwe, ali lyoweza kuwalohola hemwe.
JAM 1:22 Mleche kihada mwemwe yeka kwa kuhulichiza ulonzi hela, ila mgaditile mijito.
JAM 1:23 Yoneche yalinguhulichiza ulonzi awo ila halingudita choyalingulonga, kewhana na munhu yalingilola kumeho hali chilolelo,
JAM 1:24 kochilola yuye, hamba kanguluta na baho kangisemwa vyoyali.
JAM 1:25 Ila munhu yalingulola goya malajizo ga kugongomanya, galinguwapa wanhu kilejeha, munhu yalingulutilila kudita ago, na haiwele kuhulika hela, ila kangibatilila, munhu ayo Nguluwi komwinula kuli chila chinhu choyalingudita.
JAM 1:26 Wone munhu yochijesa mnhumbula kota kangumfugamila Nguluwi, ila kangulemwela kuulemeza umyango wa heye, kangihada yuye na kumfugamila kwa heye hakulingumtanza chinhu.
JAM 1:27 Kumfugamila Nguluwi Mhaza wa hetwe kunojile na kulihela nongwa hali heye ndo aku, kuwatanza wana walekwa na wadala wafililwe na walume wawo kuli magazo gawo na kilolela gwegwe baho uleche kujeligwa wavu na mbuli zihile za isi ayi.
JAM 2:1 Wang'holozangu, kota vyotulingumkunda Mkulu wa hetwe Yesu Kilistu Mkulu wa ukulu, mleche kuwaganilila wanhu.
JAM 2:2 Wone munhu yumwe yawele na lufufu yavalile pete ya zahabu na nguwo zinojile kangwinjila hali nhing'hano ya hemwe na baho du nakenjila munhu yawele mzunwa yavalile nguwo zidejeche,
JAM 2:3 wone umbochele goya yula yavalile goya na kumlonjela, “Wikale hano honhu hawele hanojile.” Ila kwangumlonjela yula mzunwa, “Gwa! Wime ahala,” ama “Wikale aha hasi.”
JAM 2:4 Hambi ako hakuwele kuwabagula wanji? Ndaze, na mwemwe baho vyomlingutagusa hamlingulongozwa na majesa gehile?
JAM 2:5 Wang'holozangu mnyhulichize, Nguluwi kawahagula wanhu wazunwa walihela lufufu wa isi ayi leka wawe na makundo kwa winji, na kubochela undewa yoyalagane nawo walingumgana.
JAM 2:6 Ila hemwe mwanguwabeza wanhu wazunwa. Ndaze, wawele na lufufu hawawele ndo wawo walinguwadidimiza hemwe na kuwakwega kuli vigoda vya utaguso?
JAM 2:7 Ndaze, hawawele ndo wawo walinguliga itagwa lila linojile lya Kilistu muwele hemwe ndo wanhu wa heye?
JAM 2:8 Mowa mdita goya wone mlinguwinza lila ilajizo lya Undewa wa Nguluwi lyandichigwe mli Maandiko Matakatifu, “Umgane muyago mli habehi kota vyoulingigana gwegwe baho.” Mowa mdita mbuli zinojile
JAM 2:9 Ila wone muwe mganilila wanhu, mwangudita gehile, na malajizo ago ga Nguluwi, gangulajila kota wanhu awo hawalinguwinza malajizo.
JAM 2:10 Mina munhu yoneche wone yobeza ilajizo limwe hela kuli Malajizo ga Nguluwi, kowa na nongwa ya kaleka kuwinza malajizo geng'ha.
JAM 2:11 Mina yuyula yalonjile “Uleche kudita ung'hondwa,” Ndo yalonjile “Uleche kukopola”. Ahyo, wone hegwe hulingudita ung'hondwa ila kwangukopola, hegwe hambe uwinze malajizo gose ga Nguluwi.
JAM 2:12 Lelo mlonje na kudita kota wanhu wokuya kutagusigwa kwa Malajizo galingigala kilejeha.
JAM 2:13 Mina Nguluwi homonela isungu hoyomtagusa munhu yalingidaya yasowile isungu. Ila isungu lya Nguluwi lyangusumya utaguso.
JAM 2:14 Wang'holozangu, yotanza choni wone munhu yoneche yalonje kota kana makundo, ila halingulajila kwa madito? Ndaze, ago makundo goweza kumlohola?
JAM 2:15 Hambi chila zuwa tulonje, kuna mng'holozo yasauche ama yalihela chilyo.
JAM 2:16 Yotanza choni homumlonjela, “Ulute goya, ukote chiluli upwituche na kiguta,” Ne kumha vinhu vyalingugana kuli ukomu wa heye?
JAM 2:17 Ahyo, makundo ga wawo hela ne madito, ibagama.
JAM 2:18 Ila munhu yumwe koweza kulonga, “Hegwe kwanago makundo na heni ndina madito.” Heni ndokwidichila, “Undajile munhu yoweza kuwa na makundo ga kulihela madito!” Goya!. Na heni ndokulajila makundo ga heni kwa madito.
JAM 2:19 Ndaze, hegwe ulingukunda kota kabaho Nguluwi yumwe hela? Goya! Ila na jimazoga jangukunda ago, najo jangukakama kwa kudumba.
JAM 2:20 Kwa mpoka hegwe! Ndaze, ahyo kwangugana kulajilwa kota makundo kuli hela madito kwa hela chinhu?
JAM 2:21 Ahi, sekulu wa hetwe Abulahamu nakakundigwa ndaze kota kanginojeza hali meho ga Nguluwi? Ndo kwa madito ga heye, hala nayamlavile nhambiko mwana wa heye Isaka kuli honhu ha kulavila nhambiko.
JAM 2:22 Lelo kwangona makundo ga heye nagaluta hamwe na madito gake na kahi makundo ga heye nagagongomanyizwa kwa madito ga heye.
JAM 2:23 Na Maandiko Matakatifu aga genela, “Abulahamu nakamkunda Nguluwi na ahyo nakawazigwa kota katanganika.” Na ahyo, Abulahamu nakachemigwa mganwa wa Nguluwi.
JAM 2:24 Lelo mwangona kota munhu kanguwazigwa kota kangumnojeza Nguluwi kwa kukolela madito, na haiwele kwa kukolela makundo galiyeka.
JAM 2:25 Nayali hihi vivila kwa yula mng'hondwa Lahabu. Heye nayali yawazigwe kamnojeza Nguluwi, kwa gala goyaditile hala loyawabochele goya wala wapugajizi Waisilaeli na kuwatanza walawe kwa kukolela nzila yinji.
JAM 2:26 Mina kota vila lukuli luwele hela muhe ubagama, ahi vivila makundo kuli hela madito ibagama.
JAM 3:1 Wang'holozangu, wenji wa hemwe waleche kuwa na maya ga kujeza kuwa walangusa. Kota vyomvizelele, hetwe walangusa, topegwa utaguso ukulu ng'hatu kusinda wanji.
JAM 3:2 Mina hetwe tweng'ha twanguwifya kuli mbuli nyinji. Munhu yohambe yekwang'wale kuli ulonzi, ayo ka munhu yatanganiche, koweza kulongoza wunhu wa heye.
JAM 3:3 Mlole, hetwe tweng'ha twanguwoha chipande chido cha chuma kwa ng'weso mmilomo ja falasi leka watuhulichize, na kwa kukolela ayo, toweza kuwalongoza koneche kotugana.
JAM 3:4 Kahi mlole mitumbwi mikulu, hanga ndo ng'hulu ng'hatu, jangukundujizwa na mbeho ng'hulu, ila jangulongozwa na itela idodo ng'hatu, kweng'ha koyogana kuluta mlongoza itumbwi.
JAM 3:5 Ahi vivila umyango ndo chitomo chidodo ng'hatu cha lukuli, ila wanguweza kidayila mbuli ng'hulu ng'hatu. Mlole chiluli chido choweza kusoma chisosolo chikulu.
JAM 3:6 Nawo umyango ufanda kota chiluli. Umyango umema wihe wa chila mbuli. Umyango ndo honhu hado ha lukuli lwa hetwe, ila naugalaga wihe kuli lukuli lweng'ha. Umiyango usomaga ukomu wa hetwe kulawa kuvumbuka mbaka kubagama. Kwa vila nawo wangusomigwa na chiluli cha Jehanamu.
JAM 3:7 Mina chila nhanzi ya migongolo na videje na vilingutambala na vinhu viwele mbahali, vyangudimigwa navyo mina navifujigwa na wanhu.
JAM 3:8 Ila kuduhu munhu yawezile kudima umyango, mina umyango ndo chinhu chihile, chilinguyegayega na chimema dunga ilingukopola wanhu,
JAM 3:9 kwa umyango twanguta malumbo Mkulu na Mhaza wa hetwe, na kwa umyango wuwo, twanguwapanjila wanhu, wanhu wawele walumbigwe kwa kiwhana na Nguluwi.
JAM 3:10 Mgati mwa mlomo umwe mwangulawa ulonzi wa kutogola na wa kupanjila. Wang'holozangu, mbuli azi hazilinguganigwa kuwa vila.
JAM 3:11 Ndaze, nzasa imwe yoweza kulavya mazi ganojile na mazi gawele usungu kuli ideho limwe?
JAM 3:12 Wang'holozangu, ikuyu lyoweza kulela mafuza ga masada? Ama igodi lya ing'hongo lyoweza kulela mafuza ga mtini? Vivila nzasa ilingulavya mazi gawele na mwino haiweza kulavya mazi ganojile.
JAM 3:13 Yalihi yawele na luhala na nyhala hali hemwe? Lelo yalajile mbuli yila kwa madito ga heye ganojile kuli majendo ga heye ganojile na kwa madito ga heye ga uliholile galingukoleka kuli uliholile na luhala.
JAM 3:14 Ila wone nhumbula za hemwe zimema fihi na usungu, na kigana mwemwe baho, lelo mleche kujeza kugubika kukomya kwa kidaya kwa luhala lwa hemwe.
JAM 3:15 Luhala kota alo halulingudulika kulawa kilanga, ila ndo lwa chiisi, na lwa chiwunhu, kahi ndo lwa Chimazoga.
JAM 3:16 Mina honhu hawele na fihi na kigana mwemwe baho, ndo hawele na nongwa na chila mbuli yihile.
JAM 3:17 Ila luhala lulingulawa kuchanya kilanga, mwaluko yela, na kahi yangugana kikala goya, yangugana uliholile na kuwahulichiza wanhu wanji. Imema isungu na madito ganojile, yangulela mafuza ga madito ganojile na yahela ubagulo na wala walingidaya wanoga aku wawele wahadi.
JAM 3:18 Wanhu walingugana kikala goya, wonyala nyhadikwa zinojile, na wobeta mbena za kumnojeza Nguluwi.
JAM 4:1 Ngondo na kilewa hali hemwe vyangulawila kohi? Vyangulawa kuli maya ga hemwe gawelengilewa mgati mli hemwe.
JAM 4:2 Mwangugana kuwa na vinhu ila kwa vila hampegwa hebu, mwangugana kukopola, mwangugana ng'hatu kupegwa vinhu, ila hampegwa hebu, ahyo mwangilewa na kitowa. Hamuweza kupegwa chila chinhu chomlingugana kwa vila hamlinguchilanda kulawila kwa Nguluwi.
JAM 4:3 Nahomlanda hampegwa hebu kwa vila mwangulanda kwa luso lwihile, mwangumlanda Nguluwi leka mugutize maya ga hemwe.
JAM 4:4 Hemwe mwa wanhu wohamlingukunda kota wang'hondwa. Ndaze, hamvizelele kuwa mganwa wa isi, kangidita mng'honyo wa Nguluwi? Lelo heye yogana mbuli za chiisi kangidita yuye kihilwa na Nguluwi.
JAM 4:5 Mleche kijesa kota Maandiko Matakatifu, gangulonga ulonzi wa hihi hela, vyogalingulonga, “Muhe yawele Nguluwi kamuwika mgati mwa hetwe, kana fihi ng'hatu.”
JAM 4:6 Ila kunoga kwa Nguluwi kotulingupegwa na heye, kuna ludali ng'hatu, kota vyogalingulonga Maandiko, “Nguluwi kangitwanza na wawele na kidaya, ila kanguwapa kunoga kwa heye wanhu wawele liholile.”
JAM 4:7 Lelo mumhulichize Nguluwi. Mulileme Limazoga na heye kowabilimeni.
JAM 4:8 Mhejeleleni Nguluwi, na heye kowahejelela hemwe. Kuhovuga moko ga hemwe mwihile na kuhovuga nhumbula za hemwe, hemwe muwele na majesa meli
JAM 4:9 Misinze na kulila na kulombocheza. Kuseka kwa hemwe kugaluche kuwa chililo, na kusangalala kwa hemwe kugaluche kuwa masinzo makulu.
JAM 4:10 Muwe liholile kumwando kwa Mkulu na heye kowakwiniza.
JAM 4:11 Wang'holozangu, chila yumwe yaleche kumlonjela miyage. Yula yalingumlonga vibi mng'holoze na kumtagusa, ayo kanguilonga vibi malajizo na kugatagusa malajizo. Wone utagusa malajizo, ila hegwe hulinguidita malajizo, ila kwanguitagusa.
JAM 4:12 Nguluwi yaliyeng'ha ndo yalinguyimiza malajizo na kutagusa. Ndo yuye yaliyeng'ha yalinguweza kulohola na kubagamiza. Lelo hegwe ulingumtagusa muyago kwa whaani?
JAM 4:13 Munyhulichize lelo, hemwe mlingulonga, “Lehano ama mitondo, toluta kuli muji wunji, tochikala kula kwa mhela umwe, toguza vinhu na kupegwa lufufu.”
JAM 4:14 Hemwe hamlinguvizela ukomu wa hemwe woneche vyouwa mitondo. Ukomu wa hemwe ndo choni?. Kwa vila hemwe mwa kota ng'hungugu lilingoneka mhela udo hela, hamba lyangwaga.
JAM 4:15 Hemwe namwahaganigwe kulonga, “Wone Mkulu yagane, tochikala na kudita hino na hino.”
JAM 4:16 Ila sambi mwangidaya na kitogola. Kidaya kwa hemwe kweng'ha kwa hino ndo geha.
JAM 4:17 Lelo munhu yalinguvizela kudita ganojile, nahalingudita, kwa heye ayo ndo gehile.
JAM 5:1 Lelo muhulichize hemwe wanhu muwele na lufufu na mlingulongoza, mlile na kutowa iyowe kwa kukolela nongwa zilinguwoyela hemwe.
JAM 5:2 Lufufu lwenu lola na nguwo za hemwe nazidakulwa na nyejesi.
JAM 5:3 Zahabu na sendi za hemwe zigwa lungwi na lungwi lwake lowa ulolezi hali hemwe, nalo lodakula ng'huli za hemwe kota dunga. Hemwe mikungajizila lufufu mli mazuwa aga ga kuduma.
JAM 5:4 Hamuwapele sendi wanhu walimile mli migunda ja hemwe, mhulichize iyowe lya hewo, chililo cha wakolamijito walingubeta migunda ja hemwe, chikwinjila hali makutu ga Mkulu wa wamizi yawele na ludali.
JAM 5:5 Mikala muisi kwa kisangalaza nhumbula na udevelo. Mineneheza mwagoya zuwa lya kudumuligwa singo.
JAM 5:6 Muwatagusa kwa wihe na kuwakopola wanhu wawele hela nongwa, na hewo hambe wetwanze na hemwe.
JAM 5:7 Lelo wang'holozangu, mwimilile mbaka Mkulu hoyokuya. Mlole mlimi vyoyalingubeteza kwa wimililo mizuchila ja heye jilavye mbena inojile. Heye kangubeteza kwa kwimilila kulawila nhonya ya ng'humbusa walimi na luhela mbaka hala hoyobeta.
JAM 5:8 Hemwe namwe mkangaze nhumbula za hemwe, na kwimilila nzinzili, mina zuwa lya kuya heye Mkulu lyahabehi.
JAM 5:9 Wang'holozangu, mleche king'ung'utila chila yumwe, leka Nguluwi yaleche kuwatagusa. Milolele, mtagusa kahabehi, kema hali lwizi.
JAM 5:10 Wang'holozangu, muwakumbuche waloli wa Nguluwi, nawegale usenga woyalonjile Mkulu, mlole navyowemilile magazo, namwe mfande kota hewo.
JAM 5:11 Twanguwachema wanhu awo wabweda kwa vila nawemilila. Namuhulika mbuli ya kwimilila kwa Ayubu, na mvizela vila Mkulu navyoyamditile mwiso. Kwa vila Mkulu ka liholile na kamema isungu.
JAM 5:12 Kwa konjezela wang'holozangu, lomuwele ngilaha, mleche kilaha kwa kilanga, na kwa isi na kwa chinhu choneche. Mlonje, “Ena” Wone mlingugana kulonga ena. Namwe mlonje, “Hebu” Wone mlingugana kulonga hebu, leka mleche kutaguswa na Nguluwi.
JAM 5:13 Hali hemwe hana munhu yafichilwe na nongwa? Yalande kwa Nguluwi. Ama hana munhu yawele yasangalale? Kanguganigwa kwimba nzimbo za kutogola Nguluwi.
JAM 5:14 Ndaze, kabaho mtamwa hali hemwe? Kanguganigwa kuwachema wasekulu wa chilundo cha wanhu walingumkunda Kilistu, nawo womlandila kwa itagwa lya Mkulu na kumbakaliza mafuta.
JAM 5:15 Ahyo, nawo howolanda kwa makundo, mtamwa kowa mkomu, na Mkulu komwinula, na gehile goyaditile gokusigwa.
JAM 5:16 Lelo milonjele chila yumwe wihe wa hemwe, na milandile leka musilwe matamwa. Kulanda kwa munhu yalitanganiche kuna mong'ho wa kudita menji.
JAM 5:17 Eliya nayali munhu kota hetwe. Heye nakalanda kwa kukangaza ng'hatu nhonya ileche kutowa, na nhonya nahaitowile hali isi kwa mihela jidatu na myezi sita.
JAM 5:18 Hamba nakalanda kahi, na kilanga kigala nhonya, na isi ilavya vilyo.
JAM 5:19 Wang'holozangu, wone munhu yumwe yehadigwe na yajilile kutali na kukomya, na munhu yunji yakamhiluse,
JAM 5:20 muvizele kota, yula yomhilusa yawele na gehile kulawa kuli nzila ya heye ya kwajilila, komlohola munhu ayo kuli kubagama, na gehile menji gokusigwa.
1PE 1:1 Heni Petili mbele mtumigwa wa Yesu Kilistu, ndanguwandichila hemwe mhaguligwe na Nguluwi, muwele ngikala kota wajenzi msambaluche ako Ponto na Galatiya na Kapadokia na Asiya na Bisuniya.
1PE 1:2 Kulawila katali Nguluwi Mhaza nakawazela na nakawahagula hemwe kota navyoyaganile heye yuye na mditwa wanhu mwelile kukolela mijito ya Muhe Yelile, muwe mumhulichiza Yesu Kilistu na kwelizwa na danda ya heye. Ndanguwalandilani kunoga kwa Nguluwi na kikala goya kwinji.
1PE 1:3 Yatogoligwe Nguluwi na Mhaza wa Mkulu wa hetwe Yesu Kilistu! Kwa isungu lya heye likulu natupegwa ukomu unyale, leka tupegwe utumbilo uwele na ukomu, kwa kukolela kuzilipuka kwa heye Yesu Kilistu,
1PE 1:4 na ahyo, twangubeteza kupegwa mbuli zila zinojile ziwele Nguluwi nakawawichila wanhu wa heye. Ako kilanga, kuwele mbuli azo hazikola hebu, ne kuwifigwa ama kubilabila.
1PE 1:5 Hemwe muwele kwa makundo mwangwamilwa goya kwa mong'ho wa Nguluwi kwa chiwalo cha kubochela ulohozi ulinguya mbaka kuduma kwa mhela.
1PE 1:6 Msangalale kwa chiwalo cha mbuli ayo, hanga sambi, kwa hado hela, yowagana kisinza kwa chiwalo cha majezo gali vinji.
1PE 1:7 Majezo gawele chiwalo cha heye kukundiza makundo ga hemwe. Na zahabu yiyo ilingujezigwa kwa chiluli, nayo yanguwifigwa, kahi na makundo ga hemwe, gawele ganojile kusinda zahabu, igana gajezigwe, leka iwe yimile nzinzili. Aho mwiso kuwe na lutogo na ukulu na kudumbigwa zuwa lila Yesu Kilistu hoyogubuligwa.
1PE 1:8 Hemwe mwangumgana, hanga hamnamona na mwangumkunda hanga hamlingumona sambi. Ahyo, mwangusangalala ng'hatu kwa usangalalo ukulu haulingusimilwa.
1PE 1:9 Kwa vila mwangubochela chonolo cha makundo ga hemwe, uwele ndo ulohozi wa ukomu wa hemwe.
1PE 1:10 Waloli wa Nguluwi nawasakula sakula na kulolalola ng'hatu, na hewo nawalavya uloli wa isungu lya Nguluwi nauwele wompegwa hemwe.
1PE 1:11 Nawajeza kuvizela mhela wachi na hanili, mhela woyaulajile muhe wa Kilistu loyawele mgati mwa hewo, yalonjile mbuli ya magazo gomfika Kilistu na ukulu ukuya.
1PE 1:12 Nguluwi nakawagubulila kota mbuli azo nahaziwele za hewo wawo, ila nawagaditila mijito mbuli zao kwa chiwalo cha hetwe, gawele sambi gadamligwa kwa hemwe kulawa kwa wala wasenga wowadamlilani Mbuli Inojile kwa ludali lwa Muhe Yelile yalajizwe kulawila kilanga. Mbuli azo na wahilisi wa kilanga wangugana kuzizela.
1PE 1:13 Ahyo, lelo mwime goya ng'hatu na kikala meho kudita chinhu choneche. Muwiche majesa na kitumbila kwa hemwe kwesa kuli isungu lya Nguluwi lila wompegwa mhela Yesu Kilistu hoyokoneka.
1PE 1:14 Hemwe wana wa Nguluwi wawele nakinamiza, mleche kukunda ng'oo kuwinza kahi maya gehile gomuwele nago mhela lomuwele hamvizelele kukomya kumlapa Nguluwi.
1PE 1:15 Ila mwanguganigwa kuwa mwelile kuli madito ga hemwe geng'ha, kota vila Nguluwi yawachemeni vyoyawele Yelile.
1PE 1:16 Maandiko gangulonga, “Muwe mwelile kwa vila heni nda yelile.”
1PE 1:17 Homumlanda Nguluwi mwangumchema Mhaza, lelo mvizele kota heye komtagusa chila yumwe kwa kuwinza madito ga heye, ne kubagula. Ahyo mtumiye mhela wa hemwe uponile aha hali ujenzi kuli kwa kumdumba heye Nguluwi.
1PE 1:18 Mina mwanguvizela kota hemwe namgomboligwa kuli madito ga hemwe gehile kulawila kwa wasekulu wa hemwe. Ila nahamgomboligwe kulawila kwa vinhu vilinguwifigwa, kwa sendi ama zahabu,
1PE 1:19 ila kwa danda ya Kilistu iwele inojile ng'hatu, yawele kota mwanaing'holo nayawele hela wihe na idowa.
1PE 1:20 Heye nayali yahaguligwe na Nguluwi mhela isi naing'hali lumbigwa, nakagubuligwa mazuwa aga ga kuduma kwa chiwalo cha hemwe.
1PE 1:21 Kwa kukolela heye, mwangumkunda Nguluwi yamzilipule na kumha ukulu, ahyo kwa makundo na utumbilo wa hemwe wa ga kwa Nguluwi.
1PE 1:22 Lelo kwa kuhulichiza kukomya, hemwe mweliza muhe wa hemwe na kuwagana wayenu ne kuwa hela udesi, ila migane kwa nhumbula yeng'ha yelile.
1PE 1:23 Mina mpondigwa lwa keli kwa kukolela ulonzi wa Nguluwi uwele ukomu mazuwa gose, nahaiwele kulawila kuli nyhadikwa ilingubagama, ila kulawila kuli nyhadikwa yohambe ibagame.
1PE 1:24 Kota Maandiko Matakatifu vyogalingulonga, “Chila munhu ndo kota misolo, na ukulu wa heye weng'ha ndo kota uluwa. Misolo jikalaga na uluwa wake wangugwa.
1PE 1:25 Ila ulonzi wa Mkulu wangikala mazuwa gose.” Ulonzi awo ndo Mbuli Inojile yila idamligwe kwa hemwe.
1PE 2:1 Lelo mleche wihe weng'ha na udesi na kidita kunoga na fihi na maligo,
1PE 2:2 kota vila vyali viwele na ng'halu ya itombo, namwe kahi mwanguganigwa muwe na ng'halu ya itombo liwele ndo ulonzi wa Nguluwi, leka kwa ludali lwake muweze kikala kuli kugomboligwa.
1PE 2:3 Maandiko Matakatifu vyogalingulonga, “Lelo mvizela kota Mkulu kana isungu.”
1PE 2:4 Lelo mumlutile Mkulu! Heye ndo iganga likomu nalilemigwe na wanhu, ila alyo lihaguligwa na Nguluwi na katogo ng'hatu.
1PE 2:5 Namwe kota maganga gawele makomu, mzengwa muwe ng'handa ya chimuhe, amo mowa mdita mijito kota watambika welile, kulavya nhambiko za chimuhe zilingumnojeza Nguluwi kwa kukolela Yesu Kilistu.
1PE 2:6 Ila wala wohambe wakunde, Maandiko Matakatifu gangulonga, “Mwela yoo! Ndanguwika iganga ako Siyoni, iganga lya msisi lya kuli nzingo, lihaguligwe na liwele na katogo ng'hatu. Munhu yomkunda ayo hobasigwa soni hebu.”
1PE 2:7 Kwa hemwe womlingukunda, iganga alyo lina katogo ng'hatu, ila kwa wala wawele hambe wakunde, “Iganga lyowalilemile walinguzenga, sambi liwa iganga likulu lya msisi.”
1PE 2:8 Kahi Maandiko gangulonga, “Iganga alyo ndo iganga lya kikwang'wala, na italawe lya kuwagwisa wanhu.” Wanhu wangikwang'wala kwa vila hawalingukunda ula usenga na ahyo nawawichilwa ahyo kulawila katali.
1PE 2:9 Ila hemwe ndo lukolo luhaguligwe, Watambika wa Mndewa, nhanzi yelile na wanhu wa heye Nguluwi, womhaguligwe kudamla madito makulu ga Nguluwi goyawachemelani kulawila kuli jiza, na kuwenjizani kuli lumuli lwake lwa kububuwaza.
1PE 2:10 Katali hemwe nahamuwele wanhu wa Nguluwi, ila sambi hemwe ndo wanhu wa heye, katali nahampegwe isungu lya Nguluwi, ila sambi mbochela isungu.
1PE 2:11 Moloko, ndanguwadedeza hemwe kota wajenzi na mlingupwiyanga aha muisi, mleche maya ga chilukuli zilingitwanza na muhe.
1PE 2:12 Vyomlingikala hali wanhu wohambe wamzele Nguluwi, mwanguganigwa muwe mnojile ng'hatu, leka howokuvilizilani kota mwangudita gehile, waweze kugona madito ga hemwe ganojile na ahyo wamtogole Nguluwi zuwa lya kuya kwa heye.
1PE 2:13 Lelo muwahulichize vilongozi wa wanhu hano muisi kwa chiwalo cha Mkulu, kahi mumhulichize mndewa yawele chilongozi mkulu.
1PE 2:14 Muwahulichize wasenga wawele wahaguligwe na heye kuwagaza wawifile na kuwatogola waditile ganojile.
1PE 2:15 Mina Nguluwi kangugana muwadite wanyamalile ulonzi wa chipoka wa wanhu wawele hela luhala kwa madito ganojile gomlingudita.
1PE 2:16 Mikale kota wanhu welejehe, ila mleche kuwa kilejeha kwa hemwe kuwe kuvisila wihe. Mikale kota vitumagwa wa Nguluwi.
1PE 2:17 Muwahulichize wanhu weng'ha, muwagane wang'holozenu walingumkunda Kilistu na mumhulichize Nguluwi na kahi mumhulichize mndewa.
1PE 2:18 Hemwe vitumagwa, muwahulichize ng'hatu wakulu wa hemwe, haiwele hela kwa wawele na isungu na ganojile, ila na wala wang'ang'ale.
1PE 2:19 Mina wone mwangwimilila magazo gohamganigwe, ila kwa vila mvizela kota Nguluwi kangugana ahyo, lelo Nguluwi kowatambichiza.
1PE 2:20 Mina mopegwa chonolo chachi, homkwimilila kutowigwa kwa chiwalo cha nongwa ya hemwe? Ila wone mlingwimilila magazo hanga mditile ganojile, Nguluwi kowatambichiza kwa chiwalo acho.
1PE 2:21 Ago ndo gomchemelwe, mina Kilistu yuye nakagazigwa kwa chiwalo cha hemwe, kawalechelani ulajilo leka muwinze nzila ya heye.
1PE 2:22 Heye nahaditile gehile, na wala halonjile ulonzi woneche wa uhadi.
1PE 2:23 Naloyalijigwe, heye hedichile kwa maligo na loyagazigwe heye nahadumbize, leka nakawika utumbilo wa heye kwa Nguluwi, mtagusa yalingutagusa kwa kutanganika.
1PE 2:24 Heye yuye nakapika gehile ga hetwe kuli lukuli lwake mchanya mwa msalaba, leka tubagame kwa chiwalo cha gehile na kikala kwa chiwalo cha kutanganika. Kwa kulumizwa kwa heye, hemwe musilwa matamwa.
1PE 2:25 Hemwe namwali kota ming'holo jajijlile, ila sambi mumhiluchila Mdimi na Mwamizi wa kikala kwa hemwe.
1PE 3:1 Hemwe wadala, muwahulichize walume wa hemwe, leka wone wawe baho walume wawele hambe wakunde ulonzi wa Nguluwi, wakunde kwa kulola madito ga hemwe. Haiwa lupichi kwa hemwe kulonga ulonzi,
1PE 3:2 kwa vila wokona madito ga hemwe logawele gelile na gamkuhulichiza Nguluwi.
1PE 3:3 Kuli kinoliga kwa hemwe, kuleche kuwa kinoliga kwa kunze, kota vila mbuli ya kudalanga mnvili kwa vinji na kuvala vinhu vya zahabu na nguwo zinojile.
1PE 3:4 Ila kinoliga kwa hemwe, kwanguganigwa kuwe mgati mwa nhumbula za hemwe, ila kinoliga kuli vinhu vyohambe viwifigwe, kota vila, muhe wa uliholile na kusindamala, uwele na katogo ng'hulu ng'hatu hali Nguluwi.
1PE 3:5 Ndo vyowenolije aho katali wadala nawawele welile womtumbila Nguluwi, nawawahulichiza ng'hatu walume wa hewo.
1PE 3:6 Kwa ulajilo Sala nakamhulichiza Abulahamu na kumchema Mkulu. Hemwe sambi muwa wahinza wa heye wone mdite ganojile ne kudumba chinhu choneche chila.
1PE 3:7 Hihyo du namwe walume, kuli kikala na wadala wa hemwe mwanguganigwa kuvizela kota hewo wahela mong'ho kota hemwe, ahyo mikale goya na hemwe, mina na hewo kahi wobochela hamwe na hemwe ndolendole ya ukomu yalinguwapa Nguluwi. Aho kulanda kwa hemwe hakuwichilwa chilemezi.
1PE 3:8 Kuduma, ndangulonga ahi, mwanguganigwa muwe na nhumbula imwe na majesa gamwe na mwanguganigwa kigana chilukolo kuwa liholile na kinamizila hemwe kwa hemwe.
1PE 3:9 Mleche kuwahilusila wanhu lihile kwa lihile, ama iligo kwa iligo, ila muwapetele mazi, mina hemwe namchemigwa na Nguluwi leka mpegwe utambichizo.
1PE 3:10 Kota vyogalingulonga Maaandiko Matakatifu, “Yalingugana kubweda, na kona mazuwa ganojile, yelemeze umyango wa heye, uleche kulonga ulonzi wihile na yeyuse kulonga udesi.
1PE 3:11 Yeyuse na wihe, yadite ganojile, yapale na kibatilila kikala goya.
1PE 3:12 Mina Mkulu kawalolaga goya, wanhu watanganiche, na kuhulichiza kulanda kwa hewo, ila nakadinyaga makutu kwa walingudita wihe.”
1PE 3:13 Yalihi yoweza kuwalumiza hemwe wone mibatilila kudita ganojile?
1PE 3:14 Ila hanga wone yanguwagana kugazika kwa chiwalo cha kudita ganojile, lelo mbweda. Mleche kuwadumba wanhu wala, na mleche kuwa na lunhwinhwi.
1PE 3:15 Ila mumtogole Kilistu mlinhumbula za hemwe kota Mkulu. Muwe mwelile nzinzili chila zuwa kumwidichila yoneche yowauzani kwa utumbilo uwele mgati mwa hemwe,
1PE 3:16 ila mdite ahyo kwa uliholile na kuhulichiza. Muwe mgazelele ganojile na gehile, leka homlijigwa wala walingulonga wihe kwa chiwalo cha madito ga hemwe ganojile kota walingumkunda Kilistu, wone soni.
1PE 3:17 Mina inoga kugazika kwa chiwalo cha kudita ganojile, wone Nguluwi yagane, kuleka kugazika kwa chiwalo cha kudita gehile.
1PE 3:18 Mina Kilistu yuye nakagazika na nakabagama kwa chiwalo cha gehile ga hemwe, nakabagama kamwe hela naihega, munhu yanojile kwa chiwalo cha wihe, leka yawahiliche hemwe kwa Nguluwi. Nakakopoligwa chilukuli ila nakaditigwa yawe mkomu kwa ludali lwa Muhe Yelile,
1PE 3:19 na nakaluta kuwadamlila wala muhe nawawele mchinweng'ho.
1PE 3:20 Hewo ndo wala nawalemile kumhulichiza Nguluwi loyawabeteze kwa kwimilila, mhela Nuhu loyali yogongomanya itumbwi ing'hangala ilinguchemigwa safina. Mgati mwa itumbwi alyo ing'hangala ilinguchemigwa safina, ndo wanhu wachefu hela, mina wanhu nane ndo waloholigwe kuli mazi,
1PE 3:21 uwele ulajilo wa kubatizigwa kuli kuwalohola hemwe sambi. Kubatizigwa hakuwele ndo mbuli ya kusa chikwe mlukuli, ila ndo ilagano lya wanhu kwa Nguluwi, chilinguditikwa kuli nhumbula inojile. Ako kubatizigwa ndo kulinguwalohola kukolela uzilipuko wa Yesu Kilistu.
1PE 3:22 Yawele yalutile kilanga na sambi kekala nzingo ya kudilo kwa Nguluwi, kangulongoza wahilisi wa kilanga, wakulu na wawele ludali na mong'ho.
1PE 4:1 Lelo kwa vila Kilistu nakagazika chilukuli, namwe kahi mwanguganigwa kwima nzinzili mli Majesa ago ga heye, mina munhu yagaziche chilukuli, kangileka ng'hatu kuli gehile.
1PE 4:2 Kulawila sambi, lelo ukomu uponile kikala aha hali isi wanguganigwa kulongozwa kota vyoyaganile Nguluwi, haiwele kwa maya gehile ga chilukuli.
1PE 4:3 Mhela upulute mwali na mhela uhejile wa kudita mbuli zihile zowalingudita wanhu hawamzelele Nguluwi. Namikala kwa kubweda, kiganilila na kilewa na mvina ziwele na kugala lukami zilingihanza na ung'hondwa na kufugamila jimalukolo kwihile.
1PE 4:4 Sambi, wanhu awo wohambe wamzele Nguluwi wangububuwala vyowokona kota hamlingihanza na hewo kuli mbuli ya kumema wihe ng'hatu, ahyo wanguwaligani.
1PE 4:5 Ila woganigwa kulonga wawo kwa chiwalo cha mbuli ayo hali Nguluwi yawele yewichile goya kuwatagusa wawele wakomu na wabagame.
1PE 4:6 Ndo mina Mbuli Inojile naidamligwa mbaka kwa hewo wabagame, hanga howosinda kutagusigwa kuli ukomu wa hewo wa chilukuli kota wanji, leka wekale chimuhe kota vila Nguluwi vyoyalingikala.
1PE 4:7 Kuduma kwa vinhu vyeng'ha kwa habehi. Ahyo, mwanguganigwa muwe na luhala, na kilongoza leka muweze kulanda.
1PE 4:8 Na konjezela ago, migane kwa nhumbula ya hemwe yeng'ha, mina igano lyangugubika gehile menji.
1PE 4:9 Mibochele mwemwe kwa mwemwe haluga henu ne kung'ung'uta.
1PE 4:10 Chila yumwe kanguganigwa yaditile mijito ndolendole yoyapegwe na Nguluwi. Kwa chiwalo cha wanhu wanji kota chilongozi yalingulola goya ndolendole nyinji za Nguluwi.
1PE 4:11 Munhu yalingudamla, nayadamle ulonzi wa Nguluwi, yalingukola mijito ja Nguluwi, kanguganigwa kukola mijito kwa ludali loyapegwe na Nguluwi, leka kuli mbuli zeng'ha, Nguluwi yenuligwe kwa kukolela Yesu Kilistu, ahyo, ukulu na ludali ndo vya heye mazuwa gose! Ena.
1PE 4:12 Wang'holozangu, mleche kububuwala kwa chiwalo cha majezo gang'ang'ale galinguwagaza, kota chinhu chijenzi chillinguwalawilani.
1PE 4:13 Leka msangalale kota mwangilumba kuli magazo ga Kilistu, muwe na usangalalo winji mhela hoyohiluka kahi na ukulu wa heye.
1PE 4:14 Mbweda hemwe wone mwangulijigwa kwa chiwalo cha kumkunda Kilistu, msangalale kwa vila mbuli ayo yangulajila kota Muhe wa Nguluwi yawele na ukulu, kangikala na hemwe.
1PE 4:15 Haleche kuwa na munhu hali hemwe yawele nguganigwa kugazigwa kwa vila heye ndo mkopolaji ama mhizi ama mwihe ama mhesi.
1PE 4:16 Ila wone munhu yagaziche kwa vila ndo munhu yalingumkunda Kilistu, lelo yaleche kona soni ila yamtogole Nguluwi kwa vila munhu ayo kanguchemigwa kwa itagwa lya Kilistu.
1PE 4:17 Mhela wa utaguso uya na utaguso awo wangwaluka na wanhu wa heye Nguluwi yuye. Wone utaguso awo wangwaluchila kwa hetwe twetwe, lelo kuduma kwake kowa ndaze kwa wala wohambe wakunde Mbuli Inojile ya Nguluwi?
1PE 4:18 Kota Maandiko Matakatifu Vyogalingulonga, “Yowa nongwa kwa wanhu walingumdumba Nguluwi kuloholigwa, yowa ndaze lelo kwa wala wanhu watanganiche na wawele na gehile?”
1PE 4:19 Ahyo, wala walingugazigwa kwa kuwinza vyoyaganile Nguluwi, wanguganigwa, kwa madito ga hewo ganojile, kiwika hasi ha Yawalumbile hewo nayawele ndo wa kukundigwa ng'hatu.
1PE 5:1 Heni nda sekulu chilongozi wa chilundo cha wanhu walingumkunda Kilistu, mbele ndigawene magazo ga Kilistu na ndochilumba kuli ukulu wougubuligwa, ndanguwadedezani hemwe wasekulu vilongozi wayangu.
1PE 5:2 Mdime alila ilundo lyompegwe na Nguluwi, mlilolele haiwele kwa lupichi ila kwa kugana mwemwe baho, kota vyoyalingugana Nguluwi. Mkole mijito ayo haiwele kwa maya ga sendi, ila mdite kwa nhumbula ya hemwe yeng'ha.
1PE 5:3 Mleche kuwalongoza kwa lupichi wanhu awo wawichigwe hali wamizi wa hemwe, ila muwe ulajilo kwa alyo ilundo.
1PE 5:4 Na mhela Mdimi Mkulu hoyokuya kahi, hemwe mobochela chipembelo cha ukulu hachilingubilabila!
1PE 5:5 Hiho du namwe wasongolo mleche kitwanza kuli ulongozi wa wasekulu. Hemwe mweng'ha mwanguganigwa kinamiza leka muwe miditila mijito kwa chila yumwe, mina Maandiko Matakatifu, galonga, “Nguluwi kanguwalema wawele kidaya, ila kanguwapa isungu lya heye walinginamiza.”
1PE 5:6 Lelo muwe liholile hasi ha moko wa Nguluwi uwele na mong'ho, leka yawakwinize mhela wa heye.
1PE 5:7 Mumuwichile nongwa za hemwe zeng'ha, mina heye kanguwamila.
1PE 5:8 Milolele, mikale meho! Mng'honyo wa hemwe Limazoga lyangusanzalima kota isimba lilingubuma lipala munhu wa kumulya nengaga.
1PE 5:9 Mwime nzinzili kuli makundo na kumlema, mvizela kota wang'holozenu kuli isi yeng'ha wangufichigwa na magazo gago.
1PE 5:10 Ila homsinda kugazika mhela udo hela, Nguluwi yawele chaluchizo cha isungu lyeng'ha, na yawele yowachemani muwe hamwe kuli ukulu wa heye wa mazuwa gose kuli kilumba na Kilistu, heye yuye kowagomanjizilani na kuwadita mwime nzinzili na ludali na msisi wimile nzinzili.
1PE 5:11 Ludali luwe kwa heye mazuwa gose! Ena.
1PE 5:12 Ndiwandichilani baluwa ayi iwele na ulonzi uchefu, kwa utanzi wa Silivani, mng'holozetu yondimzelele na kumkunda. Ndangugana kuwakangazani nhumbula na kulavya ulolezi kota mbuli ayi ndo isungu lya Nguluwi kwa kukomya. Mwime nzinzili kuli isungu alyo.
1PE 5:13 Chilundo cha wayenu, wahaguligwe na Nguluwi ahano hondilinguhachema Babiloni wanguwalamsani. Vivila mwanangu Malichi kanguwalamsani.
1PE 5:14 Milamse kwa ulajilo wa igano lya Kilistu. Ndanguwaganilani kikala goya hemwe muwele wa heye Kilistu.
2PE 1:1 Heni Simoni Petili mbele chitumagwa na mtumigwa wa Yesu Kilistu, ndanguwandichila hemwe mpegwe makundo ganojile ng'hatu kota gotupegwe hetwe kwa kukolela kwa kunoga kwa heye Nguluwi na Mlohozi wa hetwe Yesu Kilistu.
2PE 1:2 Ndanguwaganilani mpegwe kunoga kwa Nguluwi na kikala goya metemete kuli kumzela Nguluwi na Yesu Mkulu wa hetwe.
2PE 1:3 Kwa ludali lwa Nguluwi, katigalila mbuli yeng'ha tulingugana leka tikale kuli ukomu wa kumnojeza heye na kwa kumzela heye yatuchemile tuwe hamwe kuli ukulu na kunoga kwa heye yuye.
2PE 1:4 Kwa mbuli ayo, katugalila ndolendole ng'hulu na za katogo nazoyalagane, leka kwa ndolendole azo, miyuse ng'hatu na maya gawelenguwifya amu muisi na kuwa na honhu kuli uchinguluwi wa heye.
2PE 1:5 Kwa chiwalo acho, mikangaze kwa konjeza makundo ga hemwe kwa kunoga ng'hatu na kunoga kwa hemwe kwa uwanzi,
2PE 1:6 uwanzi wa hemwe kwa kilongoza gwegwe na kwa kilongoza wonjeze kwimilila na kwimilila kwa hemwe kwa kudita galingumnojeza Nguluwi,
2PE 1:7 kuli mbuli za kudita galingumnojeza Nguluwi, wonjeze igano kwa wayago walingumkunda Kilistu, na menji ga ago, wonjeze igano kwa wanhu weng'ha.
2PE 1:8 Homuwa na mbuli azo kwa winji, hamuwa wagata ila mowa mnojile ng'hatu kuli kumzela Mkulu wa hetwe Yesu Kilistu.
2PE 1:9 Ila munhu yasowile mbuli azo kawa hambe yalole na howeza kona goya na kasemwa kota nakahovugwa gehile ga heye ga katali.
2PE 1:10 Ahyo, wang'holozangu, mtatamale ng'hatu kuidita ayo nyhemo ya hemwe yomchemigwe na Nguluwi iwe mbuli ya kukomya kuli ukomu wa hemwe na wone mikale ahyo, hamgwa ng'oo mli gehile.
2PE 1:11 Mina kwa kudita ahyo, mokundizwa ng'hatu kwinjila kuli undewa wa mazuwa gose wa Mkulu na Mlohozi wa hetwe Yesu Kilistu.
2PE 1:12 Ahyo, ndolutilila kuwakumbusani mazuwa geng'ha mbuli azi, hanga mina mgazela na mwima nzinzili kuli kukomya kumbochela.
2PE 1:13 Ndangijesa ndo mbuli inojile kwa heni, mhela weng'ha hondikala aha muisi, kuwakangazani nhumbula na kuwakumbusani mbuli azi.
2PE 1:14 Ndivizela kota ndahabehi kubagama na kuleka lukuli alu lulingubagama kota Mkulu Yesu Kilistu navyoyandonjele hazelu.
2PE 1:15 Lelo ndochikangaza leka hala hondibagama heni muweze kugakumbuka aga chila mhela.
2PE 1:16 Mhela lotuwalanguseni mbuli ya ukulu wa kuya kwa heye Mkulu wa hetwe Yesu Kilistu, nahatutumbile ndano zisimilwe hela na wanhu. Hetwe natona ukulu wa heye kwa meho ga twetwe baha.
2PE 1:17 Hetwe natwali baho mhela loyapegwe lutogo na ukulu kulawila kwa Nguluwi Mhaza, mhela lizi naloimuyile kulawila kwa heye yawele ukulu mkulu, ilonga, “Ayu ndo Mwana wa heni ndimganile na yanojezwe na heye.”
2PE 1:18 Kahi hetwe baha natuhulika lizi ayo kulawila kilanga mhela lotuwele hamwe na heye kuchanya mwa chila chidunda Chelile.
2PE 1:19 Kahi, usenga wa waloli wangweneza mbuli ayo, namwe mwangudita goya homibatilila, mina ndo kota lumuli lulingulangaza honhu heng'ha hawele na jiza mbaka zuwa lila hoibwemwenzuka na lumuli lwa nhondwe ya lufuku holangaza mnhumbula za hemwe.
2PE 1:20 Menji ga ago, ila, mvizele kota kuduhu munhu yoneche yoweza kutang'hula kota vyoyalingugana yuye uloli uwele kuli Maandiko Matakatifu.
2PE 1:21 Mina kuduhu usenga wa chiuloli ulingulawa kwa kugana munhu, ila hamba wanhu nawalavya uloli navyowalongozwe na Muhe Yelile.
2PE 2:1 Nahalawila waloli wa udesi hali wanhu, na hihyo du walangusa wa udesi wolawila hali hemwe. Wanhu awo wokwinjiza kwa uviso malanguso ga kwajiliza na hambi kumbela Mkulu yawagombole na kwa nzila ayo wokwambuza baho du kudumigwa kwa hewo.
2PE 2:2 Kahi wanhu wenji woziwinza azo nzila za hewo za kubasa soni na kwa chiwalo cha hewo wanji woibeza nzila ya kukomya.
2PE 2:3 Kwa maya ga hewo gehile wowaholela sendi za hemwe kwa kuwalonjelani usenga wa udesi. Ila kwa mhela ulutilile sambi utaguso wa hewo na mina ulavigwa katali, na munhu yalinguwadumya hewo kameho!
2PE 2:4 Wone wahilisi wa kilanga nalowaditile gehile, Nguluwi nahawonele isungu, nakawawika kuli magazo kuwele na jiza totolo, wawohigwe wobeteza zuwa yila ya utaguso.
2PE 2:5 Nguluwi nahaiyonele isungu isi ya aho katali, ila nakegala nhonya ng'hulu ng'hatu, naimemeze mazi tendema mchanya mwa isi yila ya wanhu nawawele wohambe wamhulichize Nguluwi, ila Nuhu nayawadamlile wanhu mbuli za kudita ganojile, heye nakamlohola hamwe na wanhu wanji saba.
2PE 2:6 Nguluwi nakajitagusa kwa wihe miji ja Sodoma na Gomola, nakajilakaza kwa chiluli mbaka nhimwa, nakajidita jiwe ulajilo wa mbuli ziwafika wanhu wohambe wamhulichize Nguluwi.
2PE 2:7 Nakamlohola Loti, munhu yatanganiche, yawele yang'ung'ute ng'hatu kwa madito gehile ga wanhu awo waditile gehile.
2PE 2:8 Lutu nakekala hali wanhu awo na kwa mazuwa menji nhumbula ya heye inojile, nayali igazika ng'hatu naloyahuliche na kugona madito ga hewo gehile.
2PE 2:9 Ahyo, lelo Mkulu kavizela vila vyoyowalohola kuli majezo wanhu walingumnojeza Nguluwi na vyoyowawika wanhu wohambe wamhulichize Nguluwi kuli magazo mbaka zuwa yila ya utaguso,
2PE 2:10 ndo wala walinguwinza maya gehile ga lukuli na kubeza ulongozi. Walangusa awo wa udesi ndo wajuvi na wawele kidaya, wanguviliga na hawalinguvidumba vilumbigwe vya kuchanya viwele na ukulu.
2PE 2:11 Ila na awo wahilisi wa kilanga wawele na ludali na mong'ho kusinda walangusa wa udesi, hawowatagusa ne kuwaliga awo hali Mkulu.
2PE 2:12 Wanhu awo walinguliga choneche chila chohambe wachizele, iwhana na migongolo jisowile nyhala jilinguleligwa na hamba jangibatigwa na kuchinjigwa. Wodumigwa kwa kuwifya kwa hewo wawo,
2PE 2:13 na wohilusilwa magazo kwa magazo gowambuze. Wangusangalala kugutiza maya ga hewo ga chilukuli na kugala, kahi iwele misi ng'hatu. Awo wanguwadita hemwe mbezigwe na mbaswe soni kuli chilundo cha hemwe mhela howochihanza na hemwe kuli mnvina za hemwe, aku wosangalala kwa nzila za hewo za wihe.
2PE 2:14 Meho ga hewo gamema maya ga ung'hondwa na ludali lwao lwa kudita gehile halulinguduma. Wanguwalongoza wanhu wawele ng'hochele mbaka kuli midiwa ja gehile. Nhumbula za hewo zizowela kuwa na maya ga lufufu. Wanhu awo wapanjilwa na Nguluwi.
2PE 2:15 Waileka nzila igoloche, wajilila na kuwinza nzila yoyawinzile Balaamu, mwana wa Baoli yawele yaganile kupegwa lufufu kwa kudita uhadi,
2PE 2:16 nakang'hanuchilwa kwa chiwalo cha wihe wa heye. Idogowi halilingulonga, nalilonga kwa lizi ya munhu, nalidumya lukwale kwa ayo mloli.
2PE 2:17 Walangusa awo wa udesi ndo kota nzasa zikalile, na kota ng'hungugu ilingukundujizwa na chimbunga, honhu howawichilwe kikala ndo honhu hawele na jiza totolo!
2PE 2:18 Wangulonga ulonzi wa kidaya na hauwele utanganiche na kwa maya ga hewo gehile ga chilukuli kuwahada wala wawele ngwaluka kukunda hihi behi kulawa kwa wanhu walingikala kuli uhadi.
2PE 2:19 Wangulagana na wanhu wanji kota wowa welejehe, aku wawo baho ndo wapogozi wa wajililo, mina munhu ndo mpogozi wa choneche chila chilingumlongoza.
2PE 2:20 Wanhu wasulupuche kuli kwajilila kwa isi kwa kumzela Mkulu na Mlohozi wa hetwe Yesu Kilistu, hamba nawakunda kugwilizwa na kulongozwa kahi na kwajilila ako, wowa vibi ng'hatu kusinda aho mwaluko.
2PE 2:21 Nayahawele kuba kwa hewo wone nahawavizelele ng'oo nzila ayo ya kutanganika, kusinda kuizela na hamba kuileka na kwajiliza mzilo welile nawowabochele.
2PE 2:22 Yabaho nhelo ilingulonga, Libwa lihiluchilaga goyadechile yuye, na yinji ilingulonga, igubi mina lihovujigwe ligalawataga kahi mli nhope! Ndo vyoili sambi kwa hewo.
2PE 3:1 Wang'holozangu, ayi sambi ndo baluwa ya keli yondiwandichile. Kuli baluwa azo mbili njeza kulilimla majesa ganojile mluhala lwenu kwa kuwakumbusani mbuli azi.
2PE 3:2 Ndangugana mkumbuche ulonzi ulonjigwe na waloli welile na wula mzilo wa Mkulu na Mlohozi wompegwe na watumigwa wa hemwe.
2PE 3:3 Tandi ndangugana mvizele kota mazuwa ga kuduma gokuya, wanhu wawele madito ga hewo gangulongozwa na maya ga hewo gehile. Wowaseka kota wanhu wapoka,
2PE 3:4 na kulonga, “Nakalagana na hetwe kota kokuya! Ndaze, sambi kakohi? Mbuli ndo zizila kulawila wasekulu wa hetwe nalowabagame, vinhu ndo vivila kota naviwele mwaluko wa isi vyoilumbigwe!”
2PE 3:5 Wanhu awo, kwa kugana kwa hewo hela wangusemwa kota katali Nguluwi nakalonga, nako kilanga na isi nazilumbigwa. Isi nailumbigwa kulawila kuli mazi, naiditikwa kwa mazi.
2PE 3:6 Na kwa mazi ago, gala mazi nagamemile tendema gaiditile isi ya mhela ula idumigwe.
2PE 3:7 Ila kilanga na isi za sambi zanguwichigwa kwa ulonzi wuwula wa Nguluwi kwa chiwalo cha kuwifigwa kwa chiluli. Ziwichigwa kwa chiwalo cha zuwa lila iwele wanhu wohambe wamhulichize Nguluwi wotagusigwa na kudumigwa.
2PE 3:8 Ila, wang'holozangu, mleche kusemwa chinhu chimwe! Kwa Mkulu zuwa imwe ya kota mihela elufu, na mihela elufu ya kota zuwa imwe.
2PE 3:9 Mkulu halingukawa kuditila gala goyalagane kota wanhu wanji vyowalingijesa kota kokawila. Ila heye kangwimilila kwa chiwalo cha hemwe, mina, halingugana ne yumwe wa hemwe yajilile, ila kanguwakwega weng'ha wamgalamchile Nguluwi.
2PE 3:10 Zuwa lya mkulu yokuya kota mhizi. Zuwa alyo, ulanga wokuka kwa lizi ng'hulu luu! Vinhu vyake vya kilanga vyokwaga havikoneka kahi, nayo isi yokuka hamwe na chila chinhu chiwele mgati mwake.
2PE 3:11 Lelo kwa vila chila chinhu chowifigwa kota ahyo, ndaze, hemwe mwanguganigwa kuwa wanhu wa nhanzi yachi? Mwanguganigwa kikala mwelile na kumnojeza Nguluwi,
2PE 3:12 homuibeteza zuwa lila lya Nguluwi na kuidita yuye himahima zuwa iwele kilanga kulakazwa nimwa na kuwifigwa na vinhu vyake vya kilanga vyosungumuligwa kwa ivuche.
2PE 3:13 Ila hetwe twangikala, kwa kulola kula kulagana kwa heye, twangubeteza kilanga kunyale na isi inyale, iwele imemile kutanganika.
2PE 3:14 Ahyo wang'holozangu, homuwa muibeteza zuwa lila, mikangaze kuwa mnojile ng'hatu ne wihe hali Nguluwi, na muwe mchikala goya na heye.
2PE 3:15 Mwanguganigwa kona kwimilila kwa Mkulu kuwa ndo mhumhu walingupegwa wanhu leka waloholigwe, kota Paoli mng'holozetu yotumganile navyoyawandichile kwa luhala kota navyoyapegwe na Nguluwi.
2PE 3:16 Ago ndo yalingulonga kuli baluwa za heye zeng'ha hoyosimila mbuli ayo. Zabaho mbuli zinji kuli baluwa za heye zohaziwele ubewe kuzizela, mbuli iwele wanhu wapoka, wohawemile nzinzili, wagagalulaga kota vyowalingugagalusa honhu hanji ha Maandiko Matakatifu. Ahyo wangigalila kudumigwa kwa hewo wawo.
2PE 3:17 Ila hemwe, wang'holozangu, mvizela mbuli ayi. Lelo muwe milolela mleche kugaluswa na nongwa za wanhu wehile na kugwa kulawila kuli kwima nzinzili kwa hemwe.
2PE 3:18 Ila mlutilile kukula kuli kunoga kwa Nguluwi na kuli kumzela Mkulu wa hetwe na mlohozi Yesu Kilistu. Ukulu uwe kwa heye, sambi na mbaka mazuwa gose! Ena.
1JO 1:1 Twanguwandichilani hemwe, mbuli ya ulonzi ulingigala ukomu, nayawele kulawila mwaluko. Hetwe tumhulika na kumona kwa meho ga hetwe baha, natumlola na kumibata kwa moko ga hetwe baha.
1JO 1:2 Ukomu awo loulawile, hetwe natuwona na sambi twangulonga mbuli zake na kuwalonjelani mbuli ya ukomu awo wa mazuwa gose ne kuduma uwele kwa Mhaza na lowilajile kwa hemwe.
1JO 1:3 Lotuchiwene na kuhulika ndo tuliwanguwadamlila hemwe kahi, leka namwe muwe hamwe na hetwe kuli kikala hamwe tuwele nako na Mhaza na Mwanage Yesu Kilistu.
1JO 1:4 Twanguwandichila hemwe mbuli azi leka tumemezwe na kusangalala ng'hatu.
1JO 1:5 Lelo mbuli yotuihuliche kulawila kwa heye Yesu na yotulinguwadamlilani ndo ayi, Nguluwi ndo lumuli na kuduhu jiza lyoneche mgati mwake.
1JO 1:6 Hotulonga kota twahamwe na heye na baho twangikala mjiza, hatuwa tulonga tukomya kwa ulonzi na madito.
1JO 1:7 Ila hotuchikala kuli lumuli, kota na heye vyoyali kuli lumuli, lelo towa hamwe twetwe baha na danda ya heye Yesu Kilistu, Mwanage yangutuhovuga wihe wa hetwe.
1JO 1:8 Hotukunda kota hatulingudita wihe, twangibada twetwe baha, na kukomya hakuwele mgati mwetu.
1JO 1:9 Ila hotukunda kota tudita wihe, lelo Nguluwi ndo wa kitumbila yalingudita ganojile, heye kotusila gehile ga hetwe na kutuhovuga wihe weng'ha wotuditile.
1JO 1:10 Hotulonga kota hatuditile gehile, towa tumditile Nguluwi mdesi, na ulonzi wa heye hauwele mgati mwetu.
1JO 2:1 Wanangu, ndanguwandichilani mbuli azi, leka mleche kudita gehile. Ila wone ilawile munhu yadite wihe, twanaye yumwe yalingutulandila kwa Mhaza, ndo heye Yesu Kilistu yatanganiche.
1JO 2:2 Kilistu ndo nhambiko ilingulavya gehile ga hetwe, hagawele gehile ga hetwe hela, ila kahi gehile ga isi yeng'ha.
1JO 2:3 Hotuhulichiza malajizo ga Nguluwi, towa tukomya kota tumzela.
1JO 2:4 Munhu hoyolonga kota kangumzela, ila halinguhulichiza malajizo ga heye, munhu ayo ndo mdesi, na kahela cha kukomya mgati mwake.
1JO 2:5 Ila munhu yoneche yalingibatilila ulonzi wa Nguluwi, ayo ndo yawele na ligano ng'hatu lya Nguluwi mgati mwake. Hino ndo vyotuweza kuwa tukomya kota twangilumba na heye,
1JO 2:6 munhu yoneche yolonga kota kelumba na Nguluwi, heye kanguganigwa kikala kota navyoyekale Yesu Kilistu.
1JO 2:7 Wang'holozangu, mzilo awu wondilinguwandichilani hauwele unyale ndo wuwula wa katali nawomwali nawo kulawila mwaluko. Mnzilo awo wa katali ndo ula usenga nawomuhuliche.
1JO 2:8 Lelo ahyo, mzilo awu, wondinguwandichilani ndo unyale, na wangukomya vyoulingoneka mgati mwa Kilistu na mgati mwenu kahi. Mina jiza lyanguka, na lumuli lwa kukomya lwaluka kubunguzuka.
1JO 2:9 Munhu yoneche yolonga kota kamumo mlumuli, ila kangumzudila mng'holoze, munhu ayo yang'hali mjiza.
1JO 2:10 Munhu yoneche yalingumgana mng'holoze kamlumuli, na kuduhu choneche mgati mwa heye chimdita munhu yunji kudita gehile.
1JO 2:11 Ila yalingumzudila mng'holoze kamjiza, kangujenda mjiza, na havizelele kohi koyoluta, mina jiza limdita yawe hambe yalole.
1JO 2:12 Ndanguwandichila hemwe wana kwa vila gehile ga hemwe gosigwa kwa gala gaditigwe na Yesu Kilistu.
1JO 2:13 Ndanguwandichilani hemwe wahaza kwa vila mumzela heye nayawele baha kulawila mwaluko. Ndanguwandichilani hemwe wasongolo na wahinza kwa vila mumsumya yula mwihe.
1JO 2:14 Ndanguwandichilani hemwe wana kwa vila mumzela Mhaza. Ndanguwandichilani hemwe wahaza kwa vila mumzele heye nayawele baha kulawila mwaluko. Ndanguwandichilani hemwe wasongolo na wahinza kwa vila mna mong'ho, ulonzi wa Nguluwi wa mgati mwenu na mumsumya yula mwihe.
1JO 2:15 Mleche kuigana isi na vinhu vyoneche vya isi ino. Munhu yalinguigana isi, howeza kumgana Nguluwi Mhaza.
1JO 2:16 Vinhu vyeng'ha vya isi, maya gehile ga lukuli na vinhu vyeng'ha walinguvyona wanhu nakuvigana na kidaya kulinguya kwa kuwa na lufufu, vyeng'ha avyo havilingulawa kwa Mhaza, ila vyangulawa kwa isi.
1JO 2:17 Isi hamwe na vinhu vyeng'ha vilinguganigwa vyangukola, ila munhu yalingudita vyoyogana Nguluwi, kangikala mazuwa gose.
1JO 2:18 Mowana, kuduma kwa habehi! Mina mhulika kota mng'honyo wa Kilistu kanguya, na sambi wang'honyo wenji wa Kilistu mina woya, na ahyo tuvizela kota kuduma kwa habehi.
1JO 2:19 Wanhu awo woka kulawila kwa hetwe, kwa vila kwa kukomya nahawawele wa hetwe na ndo mina nawatuleka. Wone nawawe wa hetwe, wahaponile hamwe na hetwe, ila kuka kwa hewo, kwangulajila kota nahawawele wa hetwe ng'oo.
1JO 2:20 Ila hemwe, namjidilwa Muhe Yelile na Kilistu, na ahyo muizela kukomya ng'hatu.
1JO 2:21 Lelo ndanguwandichila, haiwele kwa vila hamuuzelele kukomya, ila kwa vila mvizela, na kahi mvizela kota udesi woneche haulingulawa mli kukomya.
1JO 2:22 Mdesi ndo yalikohi? Ndo yula yalingulema kota Yesu hawele Kilistu Mlohozi yahaguligwe na Nguluwi. Munhu wa hino ndo mng'honyo wa Kilistu, kangumbeza Mhaza na Mwana.
1JO 2:23 Mina munhu yoneche yalingumbeza Mwana kangumbela kahi Mhaza, na munhu yoneche yalingumkunda Mwana, kangumkunda Mhaza kahi.
1JO 2:24 Lelo usenga ula womuhuliche kulawila mwaluko na wikale mnhumbula mwenu. Wone usenga awo womuhuliche kulawila mwaluko uchikala mgati mwenu, lelo mochikala mazuwa gose kuli kilumba kwa Mwana na Mhaza.
1JO 2:25 Achi ndo Kilistu choyalagane na hetwe, ukomu wa mazuwa gose ne kuduma.
1JO 2:26 Ndiwandichila aga kwa chiwalo cha wala wanhu walingugana kuwajiliza hemwe.
1JO 2:27 Ila, kwa ubanzi wa hemwe, Kilistu nakawajidila mafuta kwa Muhe wa heye. Na wone Muhe Yelile yalutilile kikala mgati mwenu, hamlingugana kulanguswa na munhu yoneche. Mina heye kanguwalangusani chila chinhu, na malanguso ga heye ndo ga kukomya hagawele ga udesi. Lelo mibatilile malanguso ga ayo Muhe Yelile na kupona kuli kilumba na Kilistu.
1JO 2:28 Ena, mowana, lelo mikale mgati mwake leka mhela hoyolawila tuwe tikale ne kudumba ne kuwa na chinhu cha kivisa kwa soni zuwa lya kuya kwa heye kahi.
1JO 2:29 Mvizela kota Kilistu kangumnojeza Nguluwi ng'hatu, lelo mwanguganigwa kuvizela kahi kota chila munhu yalingudita ganojile ndo mwana wa Nguluwi.
1JO 3:1 Mlole lelo, Mhaza navyoyatuganile lukami mbaka twanguchemigwa wana wa Nguluwi! Twangukomya ndo vyotuli. Ndo mina wanhu wa isi hawatuzelele hetwe, kwa vila haumzelele Nguluwi.
1JO 3:2 Wang'holozangu wondiwaganile, hetwe twa wana wa Nguluwi sambi, ila ing'hali hainakoneka goya ndaze vyotuwa. Ila tuvizela kota mhela Kilistu hoyokuya kahi, tochiwhana na heye kwa vila tomona vila vyoyali.
1JO 3:3 Chila munhu yawele na utumbilo awu kuli Kilistu, kochihovuga yawe yelile kota heye Kilistu vyoyawele yelile ng'hatu.
1JO 3:4 Chila munhu yalingudita gehile, kangubena ilajizo lya Nguluwi, mina kudita gehile ndo kubena malajizo ga Nguluwi.
1JO 3:5 Mwanguvizela kota Kilistu nakoya kusa gehile ga hetwe, na mgati mwa heye kuduhu gehile goneche.
1JO 3:6 Lelo chila yalingikala kuli kilumba na Kilistu halingudita gehile, ila chila munhu yalingudita gehile na hamuwene ne hado na kumzela Kilistu.
1JO 3:7 Lelo wanangu, mleche kukunda kuhadigwa na munhu yoneche. Munhu yalingudita ganojile, kangoneka kangudita galingumnojeza Nguluwi kota heye Kilistu vyoyawele ngumnojeza heye.
1JO 3:8 Kwa vila yalingudita gehile ndo wa Limazoga, mina Limazoga lidita gehile kulawila mwaluko. Ila Mwana wa Nguluwi nakoya muisi kuwifya mijito ja Limazoga.
1JO 3:9 Chila yawele mwana wa Nguluwi holutilila kudita gehile, mina ukomu unyale wa Nguluwi wa mgati mwa heye, hodita gehile kwa vila heye ka mwana wa Nguluwi.
1JO 3:10 Ila munhu yoneche halingudita mbuli zitanganiche, ama halingumgana mng'holoze, ayo hawele mwana wa Nguluwi. Ahi ndo vyotuweza kuvizela wana wa Nguluwi na wana wa Limazoga.
1JO 3:11 Na awu ndo usenga womuhuliche kulawila mwaluko, twanguganigwa kigana!
1JO 3:12 Tuleche kuwa kota Kaini nayawele kwa kulongozwa na yula Mwihe, nakamkopola mng'holoze Abeli. Na lekachoni nakamkopola? Kwa vila madito ga heye nagali gehile, ila gala ga mng'holoze nagali gatanganiche!
1JO 3:13 Lelo wang'holozangu, mleche kububuwala aho isi hoiwalema hemwe.
1JO 3:14 Hetwe tuvizela kota mina tukola kulawila kuli kubagama na kwinjila kuli ukomu kwa vila twanguwagana wang'holozetu. Munhu yalihela igano kangupona yebatililwe kulii ludali lwa kubagama.
1JO 3:15 Chila munhu yalingumzudila mng'holoze ndo mkopolaji, namwe mwanguvizela kota mkopolaji yoneche yula kahela ukomu wa mazuwa gose ne kuduma mgati mwake.
1JO 3:16 Hetwe tuya kuvizela igano ndo choni, kwa vila Kilistu nakaulavya ukomu wa heye kwa chiwalo cha hetwe. Natwe vivila twanguganigwa kulavya ukomu wa hetwe kwa chiwalo cha wang'holozetu.
1JO 3:17 Lelo munhu wone yawe na lufufu lwa aha muisi, hamba yamone mng'holoze yawele na nongwa, ila heye yawe na nhumbula igagadale, koweza ndaze kulonga kota kangumgana Nguluwi?
1JO 3:18 Wanangu, igano lya hetwe lileche kuwa ulonzi hela, ila liwe lya kukomya na kulajilwa kwa madito.
1JO 3:19 Ahyo ndo vyotuweza kukomya kota hetwe twamumo kuli kukomya na hatuwa tudumba hali Nguluwi.
1JO 3:20 Ila hanga wone nhumbula za hetwe zangututagusa kwa wihe, tuvizela kota Nguluwi ndo mng'hangala kusinda nhumbula za hetwe na kahi heye kanguchizela chila chinhu.
1JO 3:21 Wang'holozangu, wone nhumbula za hetwe zahela nongwa kwa hetwe, twahela cha kudumba hali Nguluwi,
1JO 3:22 na kubochela kwa heye choneche chotulingulanda, mina twanguhulichiza mzilo wa heye na kudita gala galingumnojeza heye.
1JO 3:23 Mnzilo wa heye ndo awu, kumkunda Mwanage Yesu Kilistu na kigana kota vyoyatulajize hetwe.
1JO 3:24 Yalinguhulichiza mzilo wa Nguluwi kangikala kuli kilumba na Nguluwi na Nguluwi kangikala kuli kilumba na heye. Kwa kukolela Muhe Yelile Nguluwi yatigalile, hetwe twanguvizela kota Nguluwi kangikala kuli kilumba na hetwe.
1JO 4:1 Wang'holozangu, mleche kukunda chila munhu yalingulonga kana Muhe wa Nguluwi, ila mumjeze kota munhu ayo kangulongozwa na Muhe wa Nguluwi ama hebu, mina waloli wenji wa udesi walawila muisi.
1JO 4:2 Ayi ndo nzila ya kuvizela kota munhu yawele na Muhe wa Nguluwi. Chila yalingukunda kota Yesu Kilistu nakoya kawa munhu, munhu ayo kanaye Muhe wa Nguluwi.
1JO 4:3 Ila munhu yoneche yohambe yamkunde Yesu ahyo, kahela ayo Muhe wa Nguluwi. Munhu ayo kana muhe yawele ndo mng'honyo wa Kilistu, namwe namina muhulika kota kanguya na sambi mina koya muisi.
1JO 4:4 Ila hemwe wana wa heni, hemwe ndo wana wa Nguluwi na muwasumya awo waloli wa udesi, mina Muhe Yelile yawele mgati mwa hemwe kana ludali kusinda Limazoga liwele lya isi.
1JO 4:5 Hewo waloli wa udesi wangulonga mbuli za isi, nayo isi yanguwahulichiza kwa vila hewo ndo wanhu wa isi.
1JO 4:6 Ila hetwe twa wanhu wa Nguluwi. Munhu yalingumzela Nguluwi kangutuhulichiza, munhu hawele wa Nguluwi hotuhulichiza ng'oo. Lelo kwa nzila ayo toweza kuvizela vili vinji hali Muhe wa kukomya na muhe wa udesi.
1JO 4:7 Wang'holozangu, tigane, mina igano lyangulawa kwa Nguluwi. Chila munhu yawele na igano ndo mwana wa Nguluwi na kangumzela Nguluwi.
1JO 4:8 Munhu yalihela igano halingumzela Nguluwi, mina Nguluwi ndo igano.
1JO 4:9 Nguluwi nakalajila igano lya heye kwa kumlajiza Mwanage wa udewele muisi, leka tuwe na ukomu kwa kukolela heye.
1JO 4:10 Igano lya kukomya ndo ali, haiwele kota hetwe natwali tumganile Nguluwi, ila heye nakatugana na nakamlajiza Mwanage yawe nhambiko ya uhanyisi kwa kutulavila gehile ga hetwe.
1JO 4:11 Wang'holozangu, wone Nguluwi nakatugana ahyo, lelo natwe twanguganigwa kigana.
1JO 4:12 Kuduhu munhu mina yawele yamonile Nguluwi ng'oo, ila wone tigane, Nguluwi kangikala mgati mwa hetwe na igano lya heye lyenela mgati mwa hetwe.
1JO 4:13 Twanguvizela kota twangikala kuli kilumba na heye, na Nguluwi kangikala mwa hetwe, kwa vila heye nakatupa Muhe yalingikala mgati mwa hetwe.
1JO 4:14 Hetwe tona na kuwalonjela wanji kota Mhaza nakamlajiza Mwanage yawe Mlohozi wa wanhu wa isi.
1JO 4:15 Chila munhu yalingulonga kwa mlomo wa heye kota Yesu ndo mwana wa Nguluwi, Nguluwi kangikala mgati mwa munhu ayo, na heye kangikala mgati mwa Nguluwi.
1JO 4:16 Lelo hetwe tuvizela na twangukunda igano lyoyawele nalyo Nguluwi kwa hetwe. Nguluwi ndo igano na chila munhu yalingugana wayage, kangikala kuli kilumba na Nguluwi na Nguluwi kangikala mgati mwa heye.
1JO 4:17 Leka tikale kota Kilistu, na kikala kuli isi ayi, hamba towa na igano lyenele na towa na utumbilo kuli zuwa lila lya utaguso.
1JO 4:18 Hawele na igano hahela kudumba, ena, igano lya kukomya lyanguwinga kudumba kweng'ha. Lelo munhu yalingudumba kahela igano lya kukomya, wanhu wangudumba kwa vila kuna utaguso.
1JO 4:19 Hetwe twanalo igano kwa vila Nguluwi nakatugana tandi.
1JO 4:20 Munhu wone yalonje kangumgana Nguluwi aku yomzudila mng'holoze, ayo munhu ka mdesi. Mina wone munhu yohambe yamgane mng'holoze yalingumona, koweza ndaze kumgana Nguluwi yohalingumona.
1JO 4:21 Lelo awu ndo mzilo woyatupele Kilistu, yalingumgana Nguluwi kanguganigwa kahi kumgana mng'holoze.
1JO 5:1 Chila munhu yokunda kota Yesu ndo Kilistu Mlohozi, ayo ndo mwana wa Nguluwi. Chila yomgana mhaza kangumgana na mwanage kahi.
1JO 5:2 Ahi ndo vyotulinguvizela kota twanguwagana wana wa Nguluwi, ndo kwa kumgana Nguluwi na kuhulichiza mzilo wa heye,
1JO 5:3 mina kumgana Nguluwi ndo kuwinza mzilo wa heye, mzilo wa heye hauwele itunyo,
1JO 5:4 mina chila yawele mwana wa Nguluwi koweza kusumya isi. Natwe twanguisumya isi kwa makundo ga hetwe.
1JO 5:5 Yalikohi lelo yoweza kuisumya isi? Ndo yula yalingukunda kota Yesu ndo Mwana wa Nguluwi.
1JO 5:6 Yesu Kilistu ndo yezile kwa mazi ga ubatizo wa heye na kwa danda ya kubagama kwa heye. Hezile kwa mazi hela, ila kwa mazi na kwa danda. Na heye Muhe kangutawiza kota ndo kukomya kwa vila Muhe ndo kukomya.
1JO 5:7 Lelo wabaho walolezi wadatu,
1JO 5:8 Muhe wa Nguluwi na mazi na danda. Awa wadatu wangikundiza.
1JO 5:9 Twangukunda ulolezi wa wanhu, ila ulolezi wa Nguluwi una mong'ho ng'hatu na awu ndo ulolezi yaulavile Nguluwi kwa chiwalo cha mwanage.
1JO 5:10 Yalingumkunda mwana wa Nguluwi kanawo ulolezi awo mgati mwa heye ila yawele yohambe yamkunde Nguluwi kangumdita heye yawe mdesi, mina haukundile ulolezi yaulavile Nguluwi kwa chiwalo cha mwanage.
1JO 5:11 Na ulolezi wuwo ndo awu, Nguluwi nakatupa Ukomu wa mazuwa gose ne kuduma na ukomu awo ndo wa mli mwanage.
1JO 5:12 Yoneche yawelengumkunda Mwana wa Nguluwi kanawo ukomu awo, na yohambe yamkunde Mwana wa Nguluwi, kahela ukomu.
1JO 5:13 Ndanguwandichila leka muwe mvizela kota mwanawo ukomu wa mazuwa gose ne kuduma hemwe mlingukunda mli itagwa lya Mwana wa Nguluwi.
1JO 5:14 Natwe hatulingudumba hali Nguluwi, kwa vila twangukunda kota hotumlanda choneche kota vyoyogana heye, kotuhulichiza.
1JO 5:15 Heye katuhulichizaga chila hotumlanda na kwa vila tuvizela ng'hatu kota katuhulichizaga chila hotumlanda kahi tuvizela kota kotupa chila chotulingumlanda.
1JO 5:16 Munhu hoyomona mng'holoze kadita wihe wohambe wumhiliche kuli kubagama, kanguganigwa kumlandila kwa Nguluwi, na heye Nguluwi komha ukomu. Ndangulonga mbuli ayi kwa chiwalo cha wala waditile gehile, hagawele ga kubagama. Ila wabaho wihe ulingumhilika munhu kuli kubagama. Nani silonga kota mwanguganigwa kumlanda Nguluwi kwa chiwalo cha mbuli ayo.
1JO 5:17 Chila munhu yalingudita gohambe gamnojeze Nguluwi ndo gehile, ila hana gehile hambe gamhiliche munhu kuli kubagama.
1JO 5:18 Tuvizela kota chila yawele mwana wa Nguluwi halingudita gehile, kwa vila Mwana wa Nguluwi, kangwamilwa na heye na yula Mwihe howeza kumdoliza.
1JO 5:19 Tuvizela kota hetwe twa wana wa heye Nguluwi hanga isi yeng'ha yangulongozwa na yula Mwihe.
1JO 5:20 Tuvizela kahi kota Mwana wa Nguluwi koya, nakatugalila uwanzi leka tumzele Nguluwi wa kukomya, tikale mgati mwa Nguluwi wa kukomya kuli kilumba na Mwanage, Yesu Kilistu. Ayu ndo Nguluwi wa kukomya, na ayu ndo ukomu wa mazuwa gose ne kuduma.
1JO 5:21 Hemwe wanangu, miyuse kuli kufugamila jimalukolo!
2JO 1:1 Heni sekulu, ndangukwandichila hegwe mamo, uhaguligwe na Nguluwi hamwe na wana wa hegwe ndilinguwagana kuli kukomya. Haiwele heni ndiliyeng'ha ndilinguwagana, ila wala weng'ha walinguuzela kula kukomya, wanguwagana,
2JO 1:2 kwa vila kukomya kwangikala mgati mwa hetwe na wolutilila kuwa baho mazuwa gose.
2JO 1:3 Ndanguwalandila kunoga kwa Nguluwi na isungu na kikala goya zilingulawa kwa Nguluwi Mhaza na kwa Yesu Kilistu, Mwana wa Mhaza, ziwe hamwe na hetwe kuli kukomya na igano.
2JO 1:4 Nasangalala ng'hatu kona kota wamwe wa wana wa hegwe, wangikala kuli kukomya kota Nguluwi Mhaza vyoyatulajize.
2JO 1:5 Lelo ndangukwandichila hegwe Mamo, tweng'ha tulingumkunda Kilistu tigane. Kulanda aku hakuwele mzilo unyale, ila ndo mzilo wuwula wotuwele nawo kulawila mwaluko.
2JO 1:6 Na ali ndo igano, kikala kwa kuhulichiza mzilo wa Nguluwi. Mnzilo womuhuliche kulawila katali ndo awu, mwanguganigwa mweng'ha kikala kuli igano.
2JO 1:7 Wahadi wenji wenela kuli isi yeng'ha, wanhu wawele hambe wakunde kota Yesu Kilistu koya kwa hetwe, yawele na lukuli lwa munhu. Munhu yalingulonga ago ka mng'honyo wa Kilistu.
2JO 1:8 Lelo milolele hemwe leka mleche kwajiliza chila chomchiditile mijito, ila mpegwe chonolo cha hemwe chenele.
2JO 1:9 Munhu yoneche yawele hambe yebatilile kuli malanguso ga Kilistu, ila yalingubelenuka, kahela Nguluwi. Ila yalingikala kuli malanguso ago kanaye Mhaza na Mwana.
2JO 1:10 Lelo wone munhu yoye kwa hemwe ne kuwegalileni malanguso ago, mleche kumbochela hakaye henu, ne kumlamsa.
2JO 1:11 Mina yalingumlamsa na munhu ayo, kangihanza na heye kuli madito ga heye gehile.
2JO 1:12 Kwa vila ndanazo mbuli nyinji za kuwalonjelani, na sambi siviganile kudita ahyo kwa kwandika, ila ndangitumbila kuwajendelani na kulonga na hemwe tuchilola leka kusangalala kwa hetwe kwenele.
2JO 1:13 Wanhu walingumkunda Kilistu wa ahano wangukulamsa.
3JO 1:1 Heni nda sekulu, ndangukwandichila hegwe mng'holozangu Gayo, yondikuganile ng'hatu kuli kukomya.
3JO 1:2 Mng'holozangu, ndangukuganila chila mbuli inojile na ndangukuganila uwe mkomu mlukuli kota vyouwele ukomu wa hegwe wa chimuhe.
3JO 1:3 Nasangalala lukami, wang'holozangu wamwe lowafichile ahano, nakundonjela heni vila hegwe vyoulinguhulichiza kukomya na vyoulingulutilila kikala kuli kukomya.
3JO 1:4 Kuduhu chinhu chilingusangalaza ng'hatu kota kuhulika wana wa heni wangikala mli kukomya.
3JO 1:5 Mng'holozangu ndikuganile, hegwe ndo wakukundigwa kuli chila mijito youkola kwa wang'holozo, hanga wawe wajenzi.
3JO 1:6 Wang'holozetu awo wachilonjela chilundo cha wanhu walingumkunda Kilistu aha kwa mbuli ya igano lya hegwe. Dedede, uwatanze vila ilingumnojeza Nguluwi leka walutilile na majendo gawo.
3JO 1:7 Mina wangwaluka majendo ga hewo kuli uchitumagwa wa Kilistu ne kubochela utanzi woneche kulawila kwa wanhu wohambe wamkunde Kilistu.
3JO 1:8 Lelo hetwe twanguganigwa kuwatanza wanhu awa, leka natwe tudahe kilumba kuli mijito ja hewo yakudita kukomya kuzeleche.
3JO 1:9 Nanyandika baluwa nyindo kwa chilundo cha wanhu walingumkunda Kilistu, ila Diotelefe yawele yogana kuwa chilongozi wa hewo, halingugana ng'hatu kunyhulichiza.
3JO 1:10 Lelo hondikuya ndoziwika hazelu mbuli zeng'ha zoyalingudita, na ulonzi wihile woyalingutulavila na udesi woyalingulonga kwa hetwe. Na heye kangulema kuwabochela awo wang'holoze wawele mmajendo na kahi kanguwalemeza wanhu wanji walingugana kuwabochela na kangujeza kuwawinga mli chilundo cha wanhu walingumkunda Kilistu.
3JO 1:11 Mng'holozangu, uleche kuwinza ulajilo wihile, ila unojile. Chila yalingudita ganojile ka wa Nguluwi, ila yalingudita mbuli zihile, hanamzela Nguluwi.
3JO 1:12 Chila munhu kangumtogola Demetiliyo, ena, kukomya kuko kwangutawiza mbuli ya heye. Natwe kahi twangulavya ulolezi wa hetwe kwa heye nagwe kwanguvizela kota chotulonga twangukomya.
3JO 1:13 Ndanazo mbuli nyinji za kukulonjela, ila silinguvigana kwandika kuli baluwa ayi.
3JO 1:14 Ndangutumbila kukona mazuwa mado hela, na baho todogola goloko.
3JO 1:15 Ndangukuganila wikale goya. Wang'holozo wangukulamsa. Walamse wang'holozetu chila yumwe.
JUD 1:1 Heni nda Yuda, chitumagwa wa Yesu Kilistu, kahi heni nda mdodowe Yakubu, ndanguwandichilani hemwe mchemigwe na Nguluwi na muwelengikala kuli igano lya Nguluwi Mhaza, na kwamilwa na Yesu Kilistu.
JUD 1:2 Ndangukuganilani isungu na kikala goya na igano kwa winji kulawa kwa Nguluwi viwe na hemwe.
JUD 1:3 Wang'holozangu, nandali na majesa ga kuwandichilani kwa chiwalo cha wula ulohozi wotuwele hamwe, ila mbona ingana ndiwandichilani ndiwahimilizani mlutilile na ibamba kwa chiwalo cha makundo gala Nguluwi yawapele wanhu wa heye kamwe hela kwa mhela weng'ha.
JUD 1:4 Mina wanhu wohawamzelele Nguluwi wapegwa kiyinjiza kwa uviso hali hetwe, wanhu wawele, kwa chiwalo cha kupegwa lufufu kulawila kuli ukomu wa hewo wihile, wagalusa usenga wa isungu lya Nguluwi wa hetwe na kumbeza Yesu Kilistu yawele yaliyeng'ha Chilongozi na Mkulu wa hetwe leka wadite ung'hondwa. Ila, Maandiko Matakatifu nagalonga kulawila katali, utaguso ulinguwabeta wanhu awo.
JUD 1:5 Lelo ndangugana kuwakumbusani zimwe, hanga aga namina mlonjelwa ng'hatu kamwe, mkumbuche vila Mkulu navyoyawalohole wanhu wa Isilaeli na kuwalavya kuli isi ya Misili, ila hamba nakawadumya wala nawowali hambe wakunde.
JUD 1:6 Mkumbuchile wala wahilisi wa kilanga nawaganile wawe na ukulu kusinda nawowawele nawo, ahyo, nawaleka honhu hawo howaganigwe kikala. Nguluwi nakawawika honhu hawele na jiza na kuwawoha kwa minyololo mazuwa gose leka watagusigwe zuwa yila ng'hulu.
JUD 1:7 Mkumbuche kahi Sodoma na Gomola, na miji ja hafungo hake, wenyeng'haye wa aho nawadita kota wala wahilisi wa kilanga, nawadita ung'hondwa na kiditila mbuli mlukuli zilingulemezwa, nawapegwa utaguso wa chiluli mazuwa gose ne kuduma, leka iwe ikanyo kwa wanhu weng'ha.
JUD 1:8 Ahyo ndo vyowawele wanhu awa. Kululuta kwa hewo kwanguwalongoza kuli kujela wavu ng'huli za hewo wawo, nakubeza ludali lwa Nguluwi na kuliga vilumbigwe vikulu vya kilanga.
JUD 1:9 Na heye Mikaeli, yumwe wa wahilisi wakulu wa kilanga, nahaditile ahyo. Kwa kula kitwanza hali heye na Limazoga kwa chiwalo cha kijesa lukuli lwa Musa, Mikaeli nahajezile kumtagusa Limazoga kwa maligo, ila nakalonga, “Mkulu yuye nayakudeuze!”
JUD 1:10 Ila wanhu awa wanguliga choneche chohawachizelele, wosumigwa kwa mbuli zizila zowazizelele kwa vihendo vyao, kota vyojivizelele migongolo jiwele hela luhala.
JUD 1:11 Mane wawo! Wanhu awo wawinza vihendo vivila vya Kaini. Kwa chiwalo cha sendi, weyinjiza kuli nongwa yiyila ya Balaamu. Wabelenuka kota Kola vyoyabelenuche na wasumigwa kota heye vyoyasumigwe.
JUD 1:12 Kwa iyowe lyawo lilihela nyhala na kwa kiganilila wawo, wanhu awo ndo walinguwaditila vibi mnvina ya hemwe yomlingudita kwa igano. Wafanda kota ng'hungugu iwele hela nhonya ilingwezuligwa na mbeho. Hewo wafanda kota migodi jilagaze mahamba johambe jilele mafuza, jibagame ng'hatu, jing'humbuligwe.
JUD 1:13 Wanhu awo wafanda kota nhigu ng'hulu ya bahali, na madito ga hewo ga soni gangoneka kota ifulo. Hewo wafanda kota nhondwe ziwele ngulubaluba ziwele ziwichilwa mazuwa gose honhu ha jiza ng'hulu.
JUD 1:14 Na heye Henoki, yawele lulelo lwa saba kulawila Adamu, nakalagula ahi kwa wanhu awo, “Mwela yoo! Mkulu kokuya hamwe na wahilisi wa kilanga wa heye welile wenji wohambe wawazigwe,
JUD 1:15 kuwatagusa wanhu weng'ha, na kuwagaza weng'ha wohambe wamnojeze Nguluwi kwa chiwalo cha madito ga hewo geng'ha gehile gowaditile ne kumdumba Nguluwi na kwa chiwalo cha ulonzi weng'ha wihile ula wanhu wehile nawamlijile nawo!”
JUD 1:16 Wanhu awa ndo wawele ngung'ung'uta mazuwa gose na kupala nongwa za wanji, na kuwatogola wanhu wanji ng'hatu kwa chiwalo cha kupegwa vinhu.
JUD 1:17 Ila hemwe moloko, mkumbuchile gala gomlonjelwe aho katali na watumigwa wa Mkulu wa hetwe Yesu Kilistu.
JUD 1:18 Nawawalonjelani, “Mazuwa ga kuduma, wolawila wanhu walinguwinza maya ga wanhu wohambe wamdumbe Nguluwi, na hewo, wowaseka hemwe kota wapoka.”
JUD 1:19 Awo wanhu wehile ndo wawele nguwambuza hemwe mibagule, wanhu wa maya ga isi, wawele hela Muhe wa Nguluwi.
JUD 1:20 Ila hemwe, ndilinguwaganani heni, mizenje mwemwe kuli makundo ga hemwe gelile ng'hatu. Mlande kwa ludali lwa Muhe Yelile.
JUD 1:21 Na kupona kuli igano lya Nguluwi, mumbeteza Mkulu wa hetwe Yesu Kilistu yawele na isungu lya heye, kowagalalilani ukomu wa mazuwa gose ne kuduma.
JUD 1:22 Muwe na isungu kwa wanhu wawele na lunhwinhwi.
JUD 1:23 Muwalohole kwa kuwanyasula kulawa mchiluli. Kwa wanji muwe na isungu hamwe na kilolela, ila mzudila mbaka na nguwo za hewo za maya gehile.
JUD 1:24 Kwa heye yadahile kuwemilila hemwe mleche kugwa kuli gehile na kuwegala hemwe kwa usangalalo mbaka kumwando kwa ukulu wa heye.
JUD 1:25 Kwa heye yawele yaliyeng'ha Nguluwi, Mlohozi wa hetwe, uwe ukulu na kuzeleka ng'hatu na ludali na mong'ho kukolela Yesu Kilistu Mkulu wa hetwe, kulawila mazuwa gose na sambi na mbaka mazuwa gose galinguya! Ena.
REV 1:1 Awu ndo ugubulo yaulavile Yesu Kilistu, yapegwe na Nguluwi leka yawalajile vitumagwa wa heye mbuli ilingulapa kulawila habehi. Kilistu nakamlajiza mhilisi wa kilanga yamlonjele chitumagwa wa heye Yohana mbuli ayo.
REV 1:2 Yohani nakasimila geng'ha goyawene, gawele ndo ulonzi wa Nguluwi na vinhu vyeng'ha Yesu Kilistu vyoyalonjile na kudita.
REV 1:3 Kabweda heye munhu yawele ngusoma chitabu achi chiwele na usenga wa chiuloli na wabweda hewo wawelenguhulika na kuhulichiza gandichigwe mchitabu achi, mina mhela wa mbuli ayi wahabehi.
REV 1:4 Heni Yohana ndanguwandichila vilundo saba vya wanhu walingumkunda Kilistu viwele mkowa wa Asiya. Ndanguwaganilani isungu lya Nguluwi na kikala goya kulawila kwa heye yawele na nayawele baho na yalinguya. Na kulawawila kwa muhe saba wawele hali chigoda cha heye cha undewa,
REV 1:5 na kulawila kwa Yesu Kilistu, mlolezi wa kukundigwa, wa mwaluko kuzilipuligwa kulawila kuli kubagama, na yawele chilongozi wa wandewa wa isi. Heye kangutugana, na kwa danda ya heye ibohoche mumsalaba, katudita twilejehe kulawila kuli gehile ga hetwe,
REV 1:6 na katudita hetwe tuwe undewa wa watambika, tumditile mijito Nguluwi, Mhaza wa heye. Kwa heye Yesu Kilistu gawe ukulu na ludali, mazuwa gose! Ena.
REV 1:7 Mwela yoo! Kanguya na ng'hungugu! Chila munhu komona, na wala wamhomile. Nhanzi zeng'ha muisi zolombocheza kwa chiwalo cha heye. Ahi ndo vyoiwa, Ena.
REV 1:8 “Heni nda mwaluko na kuduma kwa chila chinhu,” Kangulonga Mkulu Nguluwi Yawele na Ludali, nayawele baho yawele aha na yalinguya.
REV 1:9 Heni nda Yohana, mng'holozenu, kwa nzila ya kilumba na Yesu, nda hamwe na hemwe kuli kugazigwa kuli undewa wa heye na kwimilila ng'hatu. Heni nanyilikwa kuli chihilwa chiwelenguchemigwa Patimo kwa vila ndali ndidamla ulonzi wa Nguluwi na kula kukomya koyagubule Yesu.
REV 1:10 Lelo kuli zuwa lya Mkulu, namemezwa na Muhe nanyulika kumbele kwa heni lizi ling'angala kota lizi lya mhalamhanda.
REV 1:11 Ayo lizi nailonga, “Wandiche kuli chitabu gala gouwele ngugona, uchihiliche kuli vilundo saba vya wanhu walingumkunda Kilistu, Efeso na Simulina na Peligamoni na Suatila na Salide na Filadelifiya na Laudikeya.”
REV 1:12 Lelo nanyinduka ndimone ayo yalonjile na heni, na mbona vinhu saba vya zahabu vya kuwichila chenje,
REV 1:13 na hagati ha vinhu saba vya zahabu vya kuwichila chenje nakwali na yumwe yafandile kota Mwana wa munhu, na heye nayali yavalile ikanzu lilefu na isali lya zahabu mmhambaga.
REV 1:14 Mutwi wa heye na mnvili za heye zali nzelu chweya kota mhamba, na meho ga heye nagali kota ilapi lya chenje,
REV 1:15 magulu ga heye nagali ng'halang'hala kota shaba ihovujigwe kuli mfuo wa chiluli, na lizi lya heye lyali kota lizi lya kubogoma kwa mazi.
REV 1:16 Kuli moko wa heye wa kudilo nayali yebate nhondwe saba, na kumlomo kwa heye na kulawa ipanga liwele na ukali unoligwe kweng'ha kwili. Chihanga cha heye naching'hala ng'hatu kota isanya lya nemisi.
REV 1:17 Lelo vyondimuwene hela, nanyigwa hali magulu ga heye kota mtufi. Ila heye kawika moko wa heye wa kudilo mchanya mwa heni, nakalonga, “Uleche kudumba! Heni ndo wa mwaluko na wa kuduma.
REV 1:18 Heni ndo yuye yawele mkomu! Nandali mbagame, ila, mwela yoo, sambi ndamkomu mazuwa gose. Ndanalo ludali lwa kubagama na kuli isi ya wabagame.
REV 1:19 Lelo sambi wandiche mbuli ayi youiwene, mbuli iwelengulawila sambi na gala golawila hamba.
REV 1:20 Uviso wa nhondwe zila saba zouziwene kuli moko wa heni wa kudilo na uviso wa vila vinhu saba vya zahabu vya kuwichila chenje ndo awu, zila nhondwe saba ndo wahilisi wa kilanga wa vilundo vya wanhu walingumkunda Kilistu, na vila vinhu saba vya zahabu vya kuwichila chenje, ndo vilundo saba vya wanhu walingumkunda Kilistu.
REV 2:1 “Kwa mhilisi wa kilanga wa chilundo cha wanhu walingumkunda Kilistu wa ako Efeso wandiche ahi. “Awu ndo usenga ulawile kwa heye yalingibata zila nhondwe saba kuli moko wa heye wa kudilo na yalingujenda hagati ha vinhu saba vya zahabu vya kuwichila chenje.
REV 2:2 Ndigazela madito ga hegwe geng'ha, na kikangaza kwa hegwe na kwimilila kwa hegwe. Ndivizela kota hambe uwemilile wanhu wehile, kahi kuwajeza wala walingichema watumigwa, nawo hebu, nakuvizela kota wadesi,
REV 2:3 kahi hegwe nawali ubeteza na kwimilila magazo kwa chiwalo cha kung'olela mijito heni, na hutochile hebu.
REV 2:4 Ila ndanayo mbuli imwe hela kwa hegwe, sambi baha hegwe hulingungana kahi kota aho mwaluko.
REV 2:5 Lelo ukumbuche hala nakougwile! Umgalamchile Nguluwi na kudita kota vyouditile hala mwaluko. Ila wone huditile ahyo, ndanguya kwa hegwe na kuchusa chinhu cha hegwe cha zahabu cha kuwichila chenje.
REV 2:6 Ila ndangukutogola kwa chinhu chimwe, kota kwangugazudila madito ga Wanikolai, kota nani vyondilingugazudula.
REV 2:7 “Yawele na makutu, yahuliche gala Muhe wa Nguluwi yalinguwalonjela vilundo vya wanhu walingumkunda Kilistu! “Yasindile ndomkundiza kulya mafuza ga igodi lya ukomu uwele kuli kagunda ka Nguluwi.
REV 2:8 “Kwa mhilisi wa kilanga wa chilundo cha wanhu walingumkunda Kilistu ako Simulina wandiche ahi. “Awu ndo usenga ulingulawa kwa heye yawele ndo wa mwaluko na wa kuduma, nayawele yabagame na sambi kamkomu.
REV 2:9 Ndivizela kugazigwa kwa hegwe, ndivizela kahi uzunwa wa hegwe, hanga kwa kukomya, hegwe ndo uwele na lufufu! Ndivizela kuliga kowakulijile wala wawelengichema wawo ndo Wayahudi ila hawawele Wayahudi wakukomya, ila ndo chilundo cha Limazoga.
REV 2:10 Uleche kudumba ne hado, gala gawele kukulapa kugazigwa. Uhulichize! Mwihe kangugana kuwajeza kwa kuwachema wamwe wa hemwe mchinweng'ho, namwe mowa na magazo kwa mhela wa mazuwa kumi. Muwe wanhu wakukundigwa mbaka kubagama, nani ndowapani chipembelo cha ukomu.
REV 2:11 “Yawele na makutu, yahuliche gala Muhe wa Nguluwi yalinguvilonjela vilundo vya wanhu walingumkunda Kilistu! “Heye yasindile holumizwa na kubagama lwa keli.
REV 2:12 “Kwa mhilisi wa kilanga wa chilundo cha wanhu walingumkunda Kilistu ako Peligamoni wandiche ahi. “Awu ndo usenga ulingulawa kwa heye yawele na alyo ipanga likali mmoko linoleche kweng'ha kwili.
REV 2:13 Ndivizela koulingikala, hegwe kwangikala honhu hala hawele na chigoda cha undewa cha Limazoga! Nagwe ung'hali ubatilila itagwa lya heni, na hulemile makundo ga hegwe kwa heni, hanga mhela ula wa Antipasi mlolezi wa heni, mbele ngitumbila, loyakopoligwe hala halingikala Limazoga.
REV 2:14 Ila ndanawo ulonzi udo kwa chiwalo cha hegwe. Kwa vila kwanawo ako wanhu wamwe walingibata malanguso ga Balaamu, heye yamlanguse Balaki yawawichile ngwamo Waisilaeli, leka walye vinhu vilavigwe nhambiko kwa jimalukolo na kudita ung'hondwa.
REV 2:15 Hihyo du, hegwe nagwe kwanawo wanhu wamwe walingibata malanguso ga Wanikolai.
REV 2:16 Lelo umgalamchile Nguluwi, na wone humgalamchile Nguluwi, ndanguya kwa hegwe ne kukawila. Na heni ndodita ngondo kwa hewo kwa alyo ipanga lilingulawa kuli mlomo wa heni.
REV 2:17 Heye yawele na makutu, yahuliche ulonzi awu uwele Muhe yalinguwalonjela vilundo vya wanhu walingumkunda Kilistu! “Yasindile ndompa chila chilyo chivisigwe chilinguchemigwa mana. Ndomha kahi iganga izelu lyandichigwe itagwa lya sambi loliwele, kuduhuli munhu yalizelele itagwa alyo ila wala wawele ngulibochela.
REV 2:18 “Kwa mhilisi wa kilanga wa chilundo cha wanhu walingumkunda Kilistu ako Suatila wandiche ahi. “Awu ndo Usenga wa Mwana wa Nguluwi, yawele na meho galingumwemwesa kota ilapi lya chiluli, na magulu ga heye gangung'hala kota shaba ihovujigwe.
REV 2:19 Ndigazela madito ga hegwe na igano na makundo na vyoulinguwatanza wayago na kwimilila kwa hegwe. Mhela awu hegwe kwangudita goya ng'hatu kusinda hala mwaluko.
REV 2:20 Ila ndina mbuli imwe kwa hegwe ya kukukanya, kwangumwimilila yula mdala Yesebeli yawelengichema mloli. Yawelenguwajiliza na kuwahada vitumagwa wa heni wadite ung'hondwa na kulya vinhu vitambichilwe jimalukolo.
REV 2:21 Nani ndimha mhumhu yamgalamchile Nguluwi, ila kangulema kuleka ung'hondwa wa heye.
REV 2:22 Mwela yoo! Sambi ndomgaza kwa kumigalila matamwa, na awo walingudita ung'hondwa hamwe na heye, wofichigwa na magazo makulu wone hawamgalamchile Nguluwi kwa madito ga hewo gehile gowaditile hamwe na heye,
REV 2:23 nani ndowakopola walingumuwinza. Na vilundo vya wanhu walingumkunda Kilistu vyeng'ha, izeleche kota heni ndo ndilinguvizela majesa gawo na nhumbula za hewo. Nani ndompa chila yumwe wa hemwe kota vyogawele madito ga heye.
REV 2:24 “Ila ndanguwalonjela hemwe wanji muwele ako Suatila, woneche weng'ha hawawele na malanguso ago, wohamvizelele chila chilinguchemigwa uviso wa Limazoga, kota vila vyowalingulonga, siwapani itunyo linji.
REV 2:25 Mibatilile ng'hatu chomlangusigwe, mbaka hondikuya.
REV 2:26 “Na heye yasindile na yawelenguhulichiza na kulutilila kudita mbuli yombele ngugana mpaka kuduma, ndompa ludali lwa kulongoza wanhu wa nhanzi zeng'ha,
REV 2:27 na heye kowadima kwa ng'hweku ya chuma, na kuwabenanga kota vinhu vya mponzi vibenanjike, nakuwawifya wawe kota vigaye vya chiya.
REV 2:28 Kopegwa ludali lulula lombochele kulawila kwa Mhaza wa heni. Nani ndompa ludali alo, kahi ndompa nhondwe ya lufuku.
REV 2:29 “Yawele na makutu, yahuliche ulonzi awu, Muhe wa Nguluwi yalinguvilonjela vilundo vya wanhu walingumkunda Kilistu!
REV 3:1 “Kwa mhilisi wa kilanga wa chilundo cha wanhu walingumkunda Kilistu cha Salide wandiche ahi. “Awu ndo usenga ulingulawa kwa yula yawele na muhe saba wa Nguluwi na nhondwe saba, ndangulonga ahi, ndizizela mbuli za hegwe zeng'ha, kwanguvizela kota kwa mkomu, aku ubagame!
REV 3:2 Uwe munhu wa kikala meho, ukakangaze mbuli ziponile, zilingugana kubagama. Mina, sonile madito ga hegwe kota genela hali Nguluwi wa heni,
REV 3:3 lelo, ukumbuche vila navyoubochele na vila navyouhuliche, uhulichize ago na umgalamchile Nguluwi. Wone hauwasile meho, ndokuya kota mhizi hegwe ne kuvizela saa hondikuya.
REV 3:4 Ila wakuko wanhu wachefu ako Salide, wanhu wohawawichile nguwo za hewo wavu. Na hewo woluta hamwe na heni aku wavalile nguwo nzelu, kwa vila woneka wanguganigwa kuvala ahyo.
REV 3:5 Heye yasindile kovalizwa ahyo, kwa nguwo nzelu. Nani sikusa itagwa lyake kulawila kuli chitabu cha ukomu, kahi ndolonga kwa mlomo wa heni, kota ndo wa heni hali Mhaza wa heni na hali mhilisi wa kilanga.
REV 3:6 “Yawele na makutu, yagahuliche gala Muhe wa Nguluwi vyoyalinguvilonjela vilundo vya wanhu walingumkunda Kilistu.
REV 3:7 “Kwa mhilisi wa kilanga wa chilundo cha wanhu walingumkunda Kilistu cha Filadelifiya wandiche ahi! “Awu ndo usenga kulawa kwa heye yawele yelile na yawele wa kukomya na yawele na chichumulilo cha Daudi. Heye yalinguchumula kuduhu yoweza kuhinda, na heye yalinguhinda kuduhu munhu yoweza kuchumula.
REV 3:8 Ndizizela mbuli za hegwe zeng'ha! Gwela yoo, ndikupa chihindilo chichumuligwe kumwando kwa hegwe, uwele kuduhu munhu yoweza kuuhinda, ndivizela kota hegwe kuna mong'ho udo, ila kuhulichiza ulonzi wa heni, nahulibelile itagwa lya heni.
REV 3:9 Gwela yoo, ndangukupa wanhu wawele wa chilundo cha Limazoga, walingilonga kota ndo Wayahudi, nawo hebu, ila wangulonga udesi. Ulole, ndowadita woye kufugama hali magulu ga hegwe na kuvizela kota ndikugana.
REV 3:10 Kwa vila hegwe kuhulichiza ilajizo lya heni lya kwimilila, heni nani ndokwamila ulawe goya, kuli mhela wa kuwifigwa uwele kuyila isi yeng'ha, kuwajeza walingikala kuli isi.
REV 3:11 Ndanguya kwa hegwe himahima! Wibatilile goya chouwele nacho, yaleche kuya munhu kukuboka chonolo cha kulajila kusumya.
REV 3:12 “Heye yasindile ndomdita yawe mgamba kuli ng'handa ya Nguluwi wa heni, na holawa amo ng'oo. Kahi nani ndomwandika heye itagwa lya Nguluwi wa heni na itagwa lya muji wa Nguluwi wa heni, ayo Yelusalemu inyale, ulingudulika kulawila kilanga kwa Nguluwi wa heni. Ndomwandika itagwa lya heni linyale.
REV 3:13 “Yawele na makutu, yagahuliche gala Muhe wa Nguluwi yalinguvilonjela vilundo vya wanhu walingumkunda Kilistu!
REV 3:14 “Kwa mhilisi wa kilanga wa chilundo cha wanhu walingumkunda Kilistu cha Laudikeya wandiche ahi. “Awu ndo usenga ulingulawa kwa heye yalinguchemigwa Ena, mlolezi yakundigwe na wakukomya, mbele chilongozi wa vilumbigwe vyeng'ha navyoyalumbile Nguluwi, kangulonga ahi.
REV 3:15 Ndizizela mbuli za hegwe zeng'ha! Ndivizela kota hegwe hauwele upwituche ama hauwele uzizime. Na inoga nauwe uzizime ama upwituche.
REV 3:16 Ila kwa vila hegwe kwa ufufunongo, hupwituche na huwele uzizime, behi ndokudeka.
REV 3:17 Kwa vila kwangulonga, ‘Heni ndina lufufu, ndina chila chinhu.’ Silingugana chinhu choneche, aku, hulinguvizela kota hegwe ndo ng'hochele, kwanguganigwa konelwa isungu, mzunwa hegwe na hulingulola na kahi kusauka!
REV 3:18 Ndangukulanda ugule zahabu kwa heni ihovujigwe kwa chiluli leka uwe na lufufu ng'hatu. Kahi inoga ugule kahi nguwo nzelu, uvale na kugubika soni ya kusauka kwa hegwe. Kahi ugule mikwandi ukajele mmeho ga hegwe, leka ulole.
REV 3:19 Heni ndo mbele kumng'hanuchila na kumgaza yoneche yondilingumgana. Ayo wikangaze kwa kumgalamchila Nguluwi.
REV 3:20 Gwela yoo! Heni ndangwima hali lwizi na kugong'honda na kuchemeleza. Munhu wone yahuliche lizi lya heni na kuchumula lwizi, ndokwinjila hakaye hake na kulya hamwe na heye, na heye kolya hamwe na heni.
REV 3:21 Heye yasumile ndomdita yekalise hamwe na heni hali chigoda cha undewa, kota vila heni baha vyongongomanye, nandiza kikalisa hamwe na Mhaza wa heni hali chigoda cha undewa.
REV 3:22 “Yawele na makutu, yahuliche ulonzi awu, Muhe wa Nguluwi vyoyalingulonga na vilundo vya wanhu walingumkunda Kilistu!”
REV 4:1 Kulawila ago, nandali na uloli, nambona lwizi lugubuka kilanga. Na yila lizi ya mwaluko yondiihuliche kota lizi ya mhalamhanda nailonga na heni, “Ukwine mbaka aku, nani ndokulajila mbuli zozilawila aho hogolawila aga.”
REV 4:2 Baho du namemezwa na Muhe wa Nguluwi, nambona chigoda cha undewa chiwichigwa kula kilanga, na yumwe yekalise mchigoda chila.
REV 4:3 Na yekalise mchigoda chila nayali yong'hala kota alimasi na kota iganga idung'hu linojile, na ipinde lya nhonya liwele ling'halile kota mabwe, nauchizunguluta chila chigoda cha undewa.
REV 4:4 Nakwali na vigoda makumi meli na gane, navizunguluta chila chigoda cha undewa na mchanya mwa vila vigoda nambona wasekulu makumi meli na gane, wekale, wavalile nguwo nzelu na vipembelo mmitwi nawali na vipembelo vya zahabu.
REV 4:5 Kuli chila chigoda cha undewa, nakwali kulawa lumwemwesa na lizi lya limlungu. Na vimuli saba vya chiluli vyali vikwaka kumwando kwa chila chigoda cha undewa, vimuli avyo saba ndo muhe saba wa Nguluwi.
REV 4:6 Kumwando kwa chila chigoda cha undewa, nakwali na chinhu chiwhanile na bahali ya chilolelo, nachali chwee kota iganga lilingung'hala lukami. Na kuli banzi zeng'ha za chila chigoda, nakuzunguluta, nakwali na vilumbigwe vikomu vine, vilumbigwe avyo navyali vimemile meho kumwando na kumbele.
REV 4:7 Chilumbigwe acho cha mwaluko nachali kota isimba, na chilumbigwe cha keli nachali kota isenga ibuguma na chilumbigwe acho cha kadatu, nachali nakumeho kota kumeho kwa munhu na chilumbigwe cha kane nachali kota ikungule lilinguguluka.
REV 4:8 Vilumbigwe avyo vine, chila chimwe nachali na mbawa sita, navyali vimemile meho mgati na kunze. Navyali hambe vyesele misi na nechilo, vilonga, “Yelile, yelile, yelile, Mkulu Nguluwi Yawele na Ludali lweng'ha, yalibaha na nayawele na yalinguya.”
REV 4:9 Chila mhela vilumbigwe avyo vine hovimtogola na kulonga heye ndo mkulu na kuta malumbo ayo yekalise mchanya mwa chigoda cha undewa, na yalingikala mazuwa gose.
REV 4:10 Na wala wasekulu makumi meli na gane, wangigwisa hali yula yalingikala mwa chila chigoda cha undewa na kumfugamila heye yawele mkomu mazuwa gose. Nawo wanguwika vipembelo vya hewo hamwando ha chila chigoda cha undewa, wolonga,
REV 4:11 “Mkulu na Nguluwi wa hetwe, ndo gwegwe baho wa kubochela, ukulu na lutogo na mong'ho, kwa vila hegwe ndo ulumbile vinhu vyeng'ha, na kota vyouganile hegwe navyalibaha, navyo navilumbigwa.”
REV 5:1 Hamba nandiyona kalatasi ibinigwe kuli moko wa kudilo wa yula yekalise mchanya mwa chigoda cha undewa, na kalatasi ayo ibinigwe nayali yandichigwe mgati na kunze na kuwohigwa kwa ihota mala saba.
REV 5:2 Nandimona mhilisi wa kilanga yawele na mong'ho yodamla kwa lizi ng'hulu, “Yalikohi yawele na katogo na yalinguganigwa kubena mihota jiwichigwe mihuli na kuchigubula chitabu chibinigwe?”
REV 5:3 Nahakuwele ne yumwe kilanga na muisi na hasi ha isi, yoweza kuchigubula acho chitabu chibinigwe, ama kuilola mgati mwake.
REV 5:4 Nani nandila ng'hatu kwa vila nahoneche ne yumwe wa kugubula chitabu acho chibinigwe, ama kuilola mgati mwake.
REV 5:5 Na yumwe wa wala wasekulu nakandonjela, “Uleche kulila, ulole, Isimba lya nhanzi ya Yudasi na lulelo lwa Daudi, heye kasumya. Heye koweza kubena jila mihota saba jiwele na mihuli na kuchigubula chila chitabu chibinigwe.”
REV 5:6 Hamba, nambona hala hagati ha chila chigoda cha undewa Mwanaing'holo nakema, yazungulutwe na wala wawele na ukomu wane, na wala wasekulu. Ayo Mwanaing'holo nakoneka kota yakopoligwe, yawele na mbalati saba na meho saba, ziwele ndo Muhe saba wa Nguluwi zilajizwe kuli isi yeng'ha.
REV 5:7 Yula Mwanaing'holo, nakaluta nakuchihola chila chitabu kuli moko wa heye wa kudilo wa yula yekale mchanya mwa chila chigoda cha undewa.
REV 5:8 Naloyachiholile chila chitabu, awo wawele na ukomu wane na wala wasekulu makumi meli na gane nawafunama hali Mwanaing'holo. Chila yumwe wa hewo yawele na igombogombo na chifunyizi cha zahabu chimemile ubani, jiwele ndo kulanda kwa wanhu wa Nguluwi.
REV 5:9 Nawo nawemba lwimbo lunyale wolonga, “Hegwe uliyeng'ha kuna katogo ka kuhola chitabu acho, na kubena mihota ja mihuli jake, kwa vila hegwe nakukopoligwa, na kwa danda ya hegwe kumgulila Nguluwi wa hetwe, wanhu kulawa chila nhanzi na ndonga na ivyazi na isi yeng'ha.
REV 5:10 Kuwadita wawe undewa na watambika wamditile mijito Nguluwi wa hetwe, na hewo wolongoza isi yeng'ha.”
REV 5:11 Kahi nandola, nanyulika lizi ya wahilisi wa kilanga wenji ng'hatu, huweza kuwawaza. Kulawila nzingo zeng'ha za wala wawele na ukomu na za wala wasekulu wekale kuzunguluta chigoda cha undewa,
REV 5:12 walonga kwa lizi ng'hulu, “Mwanaing'holo yakopoligwe, ndo heye yaliyeng'ha wa kubochela ludali na lufufu na luhala na mong'ho, na ukulu na lutogo na kuhulichizwa.”
REV 5:13 Hamba nanyulika vilumbigwe vyeng'ha kilanga na muisi na hasi ha isi na mbahali vilonga, “Kwa heye yekalise kuli chigoda cha undewa, na kwa heye Mwanaing'holo, kuwe na lutogo na kuhulichizwa na ukulu na ludali, mazuwa gose na mazuwa gose.”
REV 5:14 Na wala wawele na ukomu wane nawalonga, “Ena!” Na wala wasekulu wagwa chifunama, nawatambichiza.
REV 6:1 Hamba nambona baho Mwanaing'holo loyabenile imwe ya jila mihota saba, nanyhulika yumwe wa wala vilumbigwe wawele na ukomu wane wolonga, kwa lizi ng'hulu kota ya limlungu, “Uyee!”
REV 6:2 Heni nandola, nambona kwali na falasi mzelu na heye yamkwinile nayali na ipinde, nakapegwa chipembelo, na heye nakalawa yawele yasumile, yawele na ludali lwa kulutilila kusumya.
REV 6:3 Hamba Mwanaing'holo nakabena ihota lya keli, nandimhulika yula chilumbigwe wa keli yawele na ukomu yolonga, “Uyee!”
REV 6:4 Nakalawa falasi yumwe yunji, mdung'hu ng'hatu, na heye yamkwinile nakapegwa ludali lwa kusa kikala goya muisi, leka wanhu wekopole, na heye nakapegwa ipanga ikulu.
REV 6:5 Hamba Mwanaing'holo nakabena ihota lya kadatu, nandimhulika chilumbigwe yula wa kadatu yawele na ukomu yolonga, “Uyee!” Nandola na ulole, nakwali na falasi yumwe mtitu na heye yamkwinile nayali na mzani mmoko mwake.
REV 6:6 Nanyulika kota lizi hali awo wawele na ukomu wane, ilonga, “Chibaba chimwe cha utimbo wa ngano kwa migwala ja mijito ya zuwa limwe na vibaba vidatu vya uhemba kwa igwala limwe, ila uleche kuwifya mafuta na divai.”
REV 6:7 Hamba, Mwanaing'holo nakabena ihota lya kane. Na ndimuhulika yula chilumbigwe wa kane yawele na ukomu, yolonga, “Uyee!”
REV 6:8 Nani nandola, nambona falasi yumwe yawele na lanji ya chivu, na heye yamkwinile itagwa lyake ndo Kubagama na Isi ya Wabagame, nawamuwinza kumbele. Nawo nawapegwa ludali kwa lobo imwe ya isi, wawakopole wanhu kwa ipanga na nzala na utamwa na migongolo jing'ang'ale ja kisolo.
REV 6:9 Naloyabenile ihota lya kahano, nambona hala mlukweme lwa honhu ha kulavila nhambiko ha kufunyizila mifunyizi hana muhe wa hewo wakopoligwe kwa chiwalo cha kudamla usenga wa Nguluwi na kulutilila kulonga kukomya kowaukundile.
REV 6:10 Nawalila kwa lizi likulu, wolonga, “Hegwe Mkulu uwele ngulongoza, uwele welile na wa kukomya, mbaka nili kowa ubeteza kuwatagusa wala weng'ha walingikala hali isi kwa chiwalo cha kukopoligwa kwa hetwe?”
REV 6:11 Nawapegwa chila yumwe ikanzu lilefu izelu, nawalonjelwa walutilile kubeteza mhela udo, mbaka vitumagwa wayawo na wayawo walingumkunda Kilistu, walinguganigwa kukopoligwa kota hewo, howokopoligwa.
REV 6:12 Hamba nambona, mhela Mwanaing'holo vyoyabenile ihota lya sita, nakwali na limachinyina, isanya nalyali ititu kota igunila ititu na nyelezi yeng'ha nayali ndung'hu kota danda,
REV 6:13 na nhondwe za ulanga nazigwa mchanya mwa isi kota mafuza mabowa ga ikuyu gawele ngugwa galingutigaswa na mbeho ng'hali.
REV 6:14 Ulanga nausigwa kota mcheka ubinigwe, na chila chidunda na chihilwa nachusigwa kulawila honhu nachiwele hamwande.
REV 6:15 Na hamba, wandewa wa isi na wakulu walingulongoza na vilongozi wa wamizi na wawele na lufufu na wawele na mong'ho na chila mpogozi na munhu yelejehe, wevisile mhalika na mmitalawe ja vidunda,
REV 6:16 wavilonjela avyo vidunda na ajo mitalawe, “Mtugwile, mkatuvise kutali na heye yekalise mchigoda cha undewa na kutali na kuzudila kwa Mwanaing'holo!
REV 6:17 Mina, zuwa iwele ng'hulu, ya kutagusigwa kwa hewo. Yalikohi yoweza kwima nzinzili?”
REV 7:1 Logakwete ago nandiwona wahilisi wa kilanga wane wemile kuli nzingo zine za isi, wolemeza mbeho zine za isi leka mbeho zileche kuputa mchanya mwa isi na wala mchanya mwa bahali na wala mchanya mwa mgodi woneche.
REV 7:2 Hamba nandimona mhilisi yunji yokwina kulawila kolilawilaga isanya, yawele na muhuli wa Nguluwi yawele mkomu, yowakwinizila lizi ng'hulu wala wahilisi wa kilanga wane, wapeligwe ludali lwa kuwifya isi na bahali.
REV 7:3 Yula mhilisi nakalonga, “Mleche kuwifya isi wala bahali na wala migodi, mbaka hotusinda kuwajela muhuli vitumagwa wa Nguluwi wa hetwe mli vihanga vya hewo.”
REV 7:4 Nanyulika hisabu ya hewo wajeligwe muhuli kuli nhanzi ya Waisilaeli, wanhu lachi imwe na makumi gane na zine elufu.
REV 7:5 Wa nhanzi ya Yudasi wanhu kumi na mbili elufu wawichigwe muhuli na wa nhanzi ya Lubeni wanhu kumi na mbili elufu wawichigwe muhuli na wa nhanzi ya Gadi, wanhu kumi na mbili elufu wawichigwe muhuli.
REV 7:6 Wa nhanzi ya Asheli, wanhu kumi na mbili elufu wawichigwe muhuli na wa nhanzi ya Nafutali, wanhu kumi na mbili elufu wawichigwe muhuli na wa nhanzi ya Manase, wanhu kumi na mbili elufu wawichigwe muhuli.
REV 7:7 Wa nhanzi ya Simoni, wanhu kumi na mbili elufu wawichigwe muhuli na wa nhanzi ya Lawi, wanhu kumi na mbili elufu wawichigwe muhuli na wa nhanzi ya Isakali, wanhu kumi na mbili elufu wawichigwe muhuli.
REV 7:8 Wa nhanzi ya Sebuluni, wanhu kumi na mbili elufu wawichigwe muhuli na wa nhanzi ya Yusufu, wanhu kumi na mbili elufu wawichigwe muhuli na wa nhanzi ya Benjamini, wanhu kumi na mbili elufu wawichigwe muhuli.
REV 7:9 Hogakwete ago ulole nambona likugusi lya wanhu uwele kuduhu munhu yoweza kuwaza, wanhu wa chila isi na chila nhanzi na lukolo na ndonga, wemile kumwando mwa chigoda cha undewa na kumwando kwa Mwanaing'holo, wavalile nguwo nzelu na miputi ja uchindu mmoko mwao.
REV 7:10 Nawakwiniza lizi wolonga, “Ulohozi wangulawa kwa Nguluwi wa hetwe yekale kuli chigoda cha undewa na vivila wangulawa kwa Mwanaing'holo.”
REV 7:11 Na Wahilisi wa kilanga weng'ha wokwima nzingo zeng'ha za chila chigoda cha undewa na za awo wasekulu na wala wawele na ukomu wane, nawo nawagwa wafuname kumwando kwa chila chigoda cha undewa, wamtambichila Nguluwi,
REV 7:12 wolonga, “Ena! Kutogola na ukulu na luhala na malumbo na mong'ho na kuhulichiza kwa Nguluwi wa hetwe, mazuwa gose, Ena!”
REV 7:13 Nakedichila yumwe wa wala wasekulu, yondonjela, ndaze! “Wanhu awa wavalizwe nguwo nzelu ndo whaani? Na walawa kohi?”
REV 7:14 Nandimwidichila, “Mkulu, kuvizela hegwe!” Nakandonjela, “Awa ndo walingulawa kuli gala magazo makulu, nawo wahovuga nguwo za hewo na kuzidita ziwe nzelu chwee! Kuli danda ya Mwanaing'holo.
REV 7:15 Ahyo, wa kumwando kwa chigoda cha undewa cha Nguluwi, nawo wangumkolela Nguluwi mijito, nemisi na nechilo kuli ng'handa ya heye. Heye yalingikala kuli chigoda cha undewa kowamila.
REV 7:16 Howokona nzala kahi wala howokona ng'halu. Wala isanya na wala ivuche ling'hang'ale haliwalakaza.
REV 7:17 Mina, ayo Mwanaing'holo yawele hagati ya chigoda cha undewa, kowadima. Na kowalongoza kuli nzasa ya mazi gawele na ukomu. Na Nguluwi kogabagusa mahozi geng'ha kuli meho ga hewo.”
REV 8:1 Mwanaing'holo loyabenile ihota lya saba, nakwali tulu kilanga kwa mhela wa nusu saa.
REV 8:2 Nani nandiwona wahilisi wa kilanga saba walingwima kumwando kwa Nguluwi, nawo nawapegwa mhalamhanda saba.
REV 8:3 Na mhilisi wa kilanga yunji nakeza, nakema kumwando mwa honhu ha kulavila nhambiko yawele na chifunyizi cha zahabu, nakapegwa ubani mwinji, leka yaujele hamwe na kulanda kwa wanhu wa Nguluwi weng'ha mchanya mwa alitale ya zahabu, iwele kumwando kwa chigoda cha undewa.
REV 8:4 Na iyosi lya ula ubani naukwina kumwando kwa Nguluwi hamwe na kulanda kwa wanhu wa Nguluwi kulawila mmoko mwa wahilisi wa kilanga walingwima kumwando kwa Nguluwi.
REV 8:5 Na ayo mhilisi wa kilanga nakahola chifunyizi chichila, nakachimemeza makala ga chiluli kulawa kuli honhu ha kulavila nhambiko, nakachitoza kuli isi, nakulawila na limlungu na lizi na kumwemwesa na limachinyina.
REV 8:6 Na wala wahilisi wa kilanga saba wawele na mhalamhanda saba, nawedita wa goya leka wapembe.
REV 8:7 Mhilisi wa mwaluko nakapemba mhalamhanda. Nakulawila na nhonya ya maganga na chiluli vibatane na danda, navitozwa mchanya mwa isi. Imwe ya kadatu mwa isi najisomigwa na imwe ya kadatu ya migodi naisomigwa na mahamba madeche geng'ha nagalakala.
REV 8:8 Mhilisi wa kilanga wa keli nakapemba mhalamhanda. Chinhu chifandile kota chidunda chikulu chilingwaka chiluli, nachitozwa kuli bahali. Imwe ya kadatu hawa na danda.
REV 8:9 Imwe ya kadatu ya vilumbigwe vinji naviwele mbahali na viwele na ukomu navibagama, na imwe ya kadatu ya mitumbwi mikulu nachiwifigwa.
REV 8:10 Mhilisi wa kilanga wa kadatu, nakapemba mhalamhanda. Nhondwe ng'hulu nailagala kulawila kilanga, ikwaka kota chenje, nakugwila kuli imwe ya kadatu ya nzanda na mli nzasa za mazi.
REV 8:11 Na itagwa lyake yila nhondwe naichemigwa usungu. Imwe ya kadatu ya gala mazi gawa ga usungu, na wanhu wenji nawabagama kwa mazi ago, kwa vila nagajelwa usungu.
REV 8:12 Hamba, mhilisi wa kilanga wa kane nakapemba mhalamhanda. Isanya na nyelezi na nhondwe navitowigwa na kwajiliza imwe ya kadatu ya kulavya lumuli. Imwe ya kadatu ya nemisi nahaiwele na lumuli lwa isanya. Imwe ya kadatu ya nechilo nahaiwele na lumuli lwa nyelezi na nhondwe.
REV 8:13 Hamba nambona na kuhulika ikungule limwe liguluka mchanya ng'hatu kilanga, lilonga kwa lizi ng'hulu, “Wogaya, wogaya, wogaya wawo, walingikala mchanya mwa isi! Mhela wahilisi wa kilanga wadatu waponile howopemba mhalamhanda za hewo!”
REV 9:1 Mhilisi wa kilanga wa kahano nakapemba mhalamhanda. Nambona nhondwe ilawile kilanga, ilagala mchanya mwa isi, na heye nakapegwa chichumulilo cha kwinjilila kuli ikulubila.
REV 9:2 Nakalichumula ikulubila lyohambe lidume, nakulawa kota iyosi lya itanulu ikulu. Isanya na ulanga naviwichigwa jiza kwa iyosi lya ikulubila alyo.
REV 9:3 Nzije nazilawa kuli iyosi alyo, nawenjila muisi, nawapegwa ludali kota wa nyinje.
REV 9:4 Nazilonjelwa waleche kuwifya misolo na mahamba ga isi, ne chinhu choneche chiwele chideche, ne igoda lyoneche, ila wawawifye hela wala wanhu wasowile muhuli wa Nguluwi kuli vihanga vya hewo.
REV 9:5 Nawapegwa malajizo kota waleche kuwakopola, ila wagazigwe myezi jihano. Na usungu wa magazo nawali kota munhu yalumigwe na nyinje.
REV 9:6 Na mazuwa gala, wanhu wopala kubagama, wala howokona ng'oo. Nawo wopala nzila ya kubagama ila hawoyona ng'oo.
REV 9:7 Nakoneka kwa azo nzije, nakwali kota falasi wawichigwe goya kwa ngondo. Mchanya mwa vitwi vya hewo nawali na vinhu vifandile kota chipembelo cha zahabu na kumeho kwa hewo nakwali kota wanhu.
REV 9:8 Na hewo nawali na mnvili kota mnvili za wadala wawele na mnvili ndefu na mizino jawo najali kota mizino ja isimba.
REV 9:9 Mhambaga za hewo nazali zigubikwe na chinhu kota ngwamo ya chuma. Lizi lya mbawa za hewo nazali kota lizi ya mutuka ilingukwejigwa na falasi wenji walingubilima himahima kuza ku ngondo.
REV 9:10 Nawo nawali na michila kota ja nyinje na michila ja hewo jali na ludali lwa kuwagaza wanhu myezi jihano.
REV 9:11 Wanaye mndewa, na heye ndo chitumagwa wa Limazoga lya isi ya wabagame na itagwa lyake kwa Chiebulaniya ndo Abadoni na kwa Kiyunani kanalo itagwa lyake Apoliyoni ilinguzelaka kota, “Yalingugaza.”
REV 9:12 Kugaya kwa mwaluko mina kupuluta, ila ulole, kung'hali kugaya kwili kulinguya hamba.
REV 9:13 Hamba, mhilisi wa kilanga wa sita nakapemba mhalamhanda ya heye. Nanyulika lizi ilawile kuli zila mbalati zine za honhu ha kulavila nhambiko ha zahabu hawele kumwando kwa Nguluwi,
REV 9:14 lizi ayo naimlonjela yula mhilisi wa sita nayawele na mhalamhanda, “Uwachumule awo wahilisi wa kilanga wawohigwe habehi na lwanda lukulu lwa Eyufulate!”
REV 9:15 Wala vitumagwa wane wa Limazoga nawachumulilwa, nawawele wawichigwe goya kwa yila saa na zuwa na mwezi na mhela, leka wakopole imwe ya kadatu ya wanhu muisi.
REV 9:16 Nanyulika awo wamizi walingukwina falasi nawali miliyoni miya mbili.
REV 9:17 Ahyo navyombonile awo falasi na wakwinile falasi kuli ulotezi wa heni, wawele na ngwamo za chuma mhambaga, ziwele kota chiluli, ziwele na lanji ya ndung'hu na buluu na njano na vitwi vya falasi awo ndo kota vitwi vya isimba na kuli milomo jawo mwangulawa milapi ja chiluli na iyosi na baluti ilingwaka,
REV 9:18 Kwa mbuli azo za kugaya kwa kadatu, nagakopola imwe ya kadatu ya wanhu muisi, iwele ndo iyosi na baluti ilingwaka naiwele ilawa kuli milomo ja awo falasi,
REV 9:19 ludali lwa awo falasi nalwali mmilomo jawo na kuli michila jawo. Michila jawo najali kota mizoka najali na mitwi, nawawalumiza wanhu.
REV 9:20 Wanhu wanji waponile, wohawakopoligwe kwa kugazigwa ako, hawamgalamchile Nguluwi na hawalechile kufugamila vinhu wagongomanye kwa moko ga hewo, wala hawalechile kutambichila jimazoga na jimalukolo ja zahabu na ja sendi na shaba na ja maganga na ja migodi, johajidahile kulola na kuhulika na kujenda.
REV 9:21 Wala wohambe wamgalamchile Nguluwi na kuleka kukopola na uhawi na ung'hondwa na uhizi.
REV 10:1 Hamba nambona mhilisi wa kilanga yunji yawele na ludali yodulika kulawa kilanga, yavalizwe ng'hungugu na ipinde lya nhonya mchanya mwa mutwi wa heye, na chihanga cha heye nachali kota isanya, na magulu ga heye kota mizengo ja chiluli.
REV 10:2 Mmoko wa heye nekebata chitabu chidodo chigubuligwe. Nakawika mgulu wa heye wa kudilo mchanya mwa bahali, nawo mgulu wa kumoso mchanya mwa isi.
REV 10:3 Nakuchema kwa lizi ng'hulu kota isimba lilingubuma. Naloyakwinize lizi, mibumo saba naidichila kota limlungu.
REV 10:4 Ajo mibumo saba lojilavile lizi, nandali ndikale goya kwandika, ila nanyhulika lizi kulawila kilanga ilonga, “Ulonzi wa ajo mibumo saba uwiche uviso, uleche kwandika!”
REV 10:5 Hamba yula mhilisi wa kilanga yondimuwene, yokwima mchanya mwa bahali na mchanya mwa isi, nakenula moko wa heye wa kudilo kulajila kilanga,
REV 10:6 nakelaha kwa itagwa lya Nguluwi yalingikala mazuwa gose, heye yazilumbile kilanga na isi na bahali na vinhu vyeng'ha viwele mumo, nakalonga, “Mhela wa kubeteza umala.
REV 10:7 Ila mhela yula mhilisi wa kilanga wa saba hoyopemba mhalamhanda. Majesa ga uviso ga Nguluwi kwa mbuli zoyaganile zokwenela, kota navyoyawadamlile waloli nawawele vitumagwa wa heye.”
REV 10:8 Hamba lizi yila yonyuliche kulawila kilanga aho mwaluko, nailonga na heni kahi, ilonga, “Ulute, ukachihole chila chitabu chigubuligwe kuli moko wa yula mhilisi wa kilanga yemile mchanya mwa bahali na mchanya mwa isi.”
REV 10:9 Nandimlutila yula mhilisi wa kilanga nakumlonjela kota umhe chila chitabu chidodo. Nakandonjela, “Chihole, ulye, kuli mlomo wa hegwe chowa nomwenomwe kota hanombwa, ila mmumda wa hegwe chowa chausungu!”
REV 10:10 Nandichihola chila chitabu chidodo kuli moko wa yula mhilisi wa kilanga, nandichilya, nacho nachiwa nomwenomwe kota hanombwa mumlomo mwangu, ila lomelile nachali chausungu mmunda mwa heni.
REV 10:11 Hamba, nawandonjela, “Kwanguganigwa kulavya uloli kwa chiwalo cha wanhu wenji wa isi na nhanzi na ndonga na wandewa!”
REV 11:1 Hamba, nawapegwa idenje liwele kota ng'hweku ya kupimila, ndonjelwa, “Winuche ukapime ng'handa ya Nguluwi na honhu ha kulavila nhambiko ha kufunyizila ubani na kuwawaliza wanhu wawele kutambichiza mng'handa ya Nguluwi.
REV 11:2 Ila uleche luga luwele kunze kwa ng'handa ya Nguluwi uleche kupima vihengo vya kunze, mina awo wapegwa wanhu hawawele Wayahudi, wawele nguubiga mji welile kwa mhela wa myezi makumi gane na meli.
REV 11:3 Nani ndowalajiza walolezi wa heni weli leka walavye usenga kulawa kwa Nguluwi kwa mhela wa mazuwa elufu moja miya mbili na makumi sita, wawele wavalile migunila.”
REV 11:4 Awo walolezi weli ndo kiwhana na migodi mili ja mizeituni na vinhu vili vya kuwichila chenje viwele ngwima hali Mkulu wa isi.
REV 11:5 Ila munhu wone yajeze kuwadumya, chiluli cholawa kumlomo kwa hewo wawo na kuwadumya wehile wa hewo, chila munhu yojeza kudumya, kobagama kota ahyo.
REV 11:6 Vitumagwa wa Nguluwi wana ludali lwa kudinya kilanga, nhonya ileche kutowa mhela wowolavya uloli. Kahi wana ludali lwa kugagalamla mazi gawe danda, na kuitowa isi na chila mbuli za kudumya kwa chila mhela howogana wawo.
REV 11:7 Ila howosinda kulavya ulolezi awo, igongolo ling'ang'ale lilingulawa mlikulubila, lyochitowa na hewo, na kuwakopola.
REV 11:8 Mitufi ja hewo jopona kuli nzila za muji ukulu nawoyagazigwe Mkulu wa hewo. Itagwa lya kupagazwa lya muji awo lyanguchemigwa Sodoma ama Misili.
REV 11:9 Wanhu weng'ha na chila isi na nhanzi na donga na lukolo na lanji wolola mitufi ajo kwa mhela wa zuwa zidatu na nusu, na howokundiza ziwichigwe mchilaga.
REV 11:10 Wanhu wawele ngikala muisi wosechelela kubagama kwa hewo weli. Wodita mvina na kihilichila ndolendole, mina waloli awa weli na wali wawagazile lukami wanhu wa isi.
REV 11:11 Logamalile mazuwa gala gadatu na nusu, muhe wa ukomu kulawa kwa Nguluwi naiwenjila, nawo nawema, wanhu weng'ha wawawene nawadumba lukami.
REV 11:12 Hamba, awo waloli weli nawahulika lizi ling'angala kulawa kilanga iwalonjela, “Mkwine mbaka kuno.” Nawo nawakwina kuchanya kilanga kuli ng'hungugu, aku wang'honyo wa hewo wowalola.
REV 11:13 Mhela wuwo, nakulawila limachinyina likulu lya isi na imwe ya kumi ya muji naigwa. Wanhu elufu saba nawabagama kwa limachinyina lila. Wanhu waponile nawadumba ng'hatu na kumtogola Nguluwi wa kilanga.
REV 11:14 Aku kugaya kwa keli kupuluta, ila kugaya kwa kadatu kwanguya himahima.
REV 11:15 Muhilisi wa kilanga wa saba na kapemba mhalamhanda ya heye. Lizi ling'angala naihulikwa kilanga ilonga, “Undewa wa isi sambi uwa undewa wa Mkulu Nguluwi wa hetwe na Kilistu Mlohozi, na heye kolongoza mazuwa gose!”
REV 11:16 Hamba wala wasekulu makumi meli na gane, wawele ngikalisa kuli vigoda vya undewa, hala hoyawele Nguluwi na nawagwa chifunama, nawamtambichila Nguluwi.
REV 11:17 Wone walonje, “Twanguta malumbo hegwe Mkulu Nguluwi wa hetwe, uwele na ludali, wouwele na uwele na ulinguya, mina kwa ludali lwa hegwe lukulu, kwangwaluka kulongoza.
REV 11:18 Wanhu wa isi zeng'ha nawali wazudile, ila kuzudila kwa hegwe kuya, ena mhela wa kuwatagusa wabagame. Wuwo ndo mhela wa kuwonola vitumagwa wa hegwe wawele ndo waloli, na wanhu wa hegwe weng'ha welile walingulitogola itagwa lya hegwe, wakulu kwa wadodo wewhana. Kahi ndo mhela wa kuwadumya weng'ha walinguidumya isi.”
REV 11:19 Hamba, ng'handa ya Nguluwi iwele kilanga naigubuligwa, na Isanduku lya heye lya Ilagano nalyoneka mli ng'handa ya Nguluwi, nakulawila kumwemwesa na lizi na limlungu na limachinyina na nhonya ya maganga ng'hulu lukami.
REV 12:1 Hamba ulajilo ukulu nawoneka kilanga, nakwali na mdala yavalizwe isanya na isaye nalyali hasi hali magulu ga heye na mmutwi wa heye, nakavalizwa chipembelo cha nhondwe kumi na mbili.
REV 12:2 Nayali na himila, na heye nakalila kwa usungu uwele kota wula usungu wa kulela mwana.
REV 12:3 Hamba nawoneka ulajilo unji kilanga, na ulole, izoka likulu lidung'hu, lyali na vitwi saba na mbalati kumi na chila mutwi nachali na chipembelo.
REV 12:4 Mchila wa alyo izoka likulu naubuluna imwe ya kadatu ya nhondwe za kuulanga, nakuzilagaza muisi. Hamba lila izoka likulu nalima kumwando kwa yula mdala yawele behi na kulela leka hoyolela, limmele yula mwana.
REV 12:5 Hamba yula mdala nakalela mwana mlume, heye yowadima wanhu wa isi zeng'ha kwa ng'hweku yiyo ya chuma. Mwana wa heye nakanyasuligwa mbaka kwa Nguluwi kuli chigoda cha heye cha undewa.
REV 12:6 Yula mdala nakabilimila kuchiwala, koyawele na honhu hoyawichigwe na Nguluwi, leka wamhe chilyo ako, kwa mhela wa mazuwa elufu imwe na miya mbili na makumi sita.
REV 12:7 Nakwali na ngondo kilanga, Mikaeli hamwe na wahilisi wa kilanga wayage wa kilanga nawetowa na lila izoka likulu, na lila izoka nalyo nalitowa na hewo hamwe na vitumagwa wa heye,
REV 12:8 ila izoka na vitumagwa wa heye nahawasumile wala honhu hawo honeche kahi kilanga.
REV 12:9 Lelo izoka alyo nalitozwa hanyi muisi, izoka alyo ndo lila lya katali, liwele nguchemigwa Chijeni ama Limazoga, lliwele nguihada wanhu weng'ha wa isi, ena nalitozigwa muisi hamwe na vitumagwa weng'ha wa heye.
REV 12:10 Nanyulika lizi likulu kilanga, ilonga, “Sambi Nguluwi kanguwalohola wanhu wa heye na Nguluwi mndewa wa hetwe kangulajila ludali lwake, na Kilistu Mlohozi wa heye kangulajila ludali lwa heye. Mina yula yalinguwasonjeleza wanhu wa hetwe nemisi na nechilo katozigwa hasi
REV 12:11 Wang'holozetu nawamsumya kwa danda ya Mwanaing'holo na kulutilila kuwalonjela wanhu wanji ulonzi wa Nguluwi, mina hawadumbile kulavya ukomu wa hewo, nawali goya kubagama.
REV 12:12 Ahyo, msechelele, hemwe kilanga, namwe mlingikala amo. Ila wochona kwa isi na bahali! Kwa vila lila Limazoga lidulika kwa hemwe liwele lizudile ng'hatu, livizelele kota lina mhela udo hela.”
REV 12:13 Izoka alyo likulu vyoliwene kota nalitozigwa muisi, nalyaluka kumpugajiza mdala yula yapondile mwana mlume ligana kumkopola.
REV 12:14 Mdala yula nakapegwa mbawa mbili za ikungule, leka yaguluche, yalute kuchiwala mbaka kuli honhu hake, aho hoyololigwa goya kwa mihela jidatu na nusu.
REV 12:15 Lila izoka nalideka mazi kota lwanda luwele na mazi menji kumbele kwa ayo mdala, leka yaholigwe na lwanda lula.
REV 12:16 Ila isi naimtanza mdala ayo, naigubuka kota mlomo, nakuumela lwanda lula, ulawile kuli mlomo wa alyo izoka.
REV 12:17 Izoka nalizudizwa na yula mdala, naliluta kudita ngondo kwa lulelo lwa heye luponile lwa ayo mdala, weng'ha walinguhulichiza mzilo woyawichile Nguluwi, kuli kukomya kugubuligwe na Yesu.
REV 12:18 Hamba izoka nalima hafungo mwa bahali.
REV 13:1 Hamba nambona igongolo limwe lilawa kuli bahali, liwele na vitwi saba na mbalati kumi, na chila mbalati nayali na chipembelo, na itagwa lya kumliga Nguluwi nalyandichigwa kuli chila mutwi.
REV 13:2 Lila igongolo, ndiliwene, nalyali lifandile kota iduma vila, na magulu gake nagali kota magulu ga likatoka na mlomo wa heye nawali kota mlomo wa isimba. Lila izoka, nalimha lila igongolo mong'ho wake na chigoda cha heye cha undewa na ludali lwinji.
REV 13:3 Mutwi umwe wa alyo igongolo, nawoneka kota nawali ulumizwe vibi lukami behi kubagama, ila chilonda acho nachali chiponile. Wanhu wa isi yeng'ha nawabubuwazwa na igongolo lila na kumuwinza.
REV 13:4 Wanhu weng'ha nawalifunamila alila izoka kwa vila nalimpa alila igongolo ludali lwake. Hewo nawalifunamila alila igongolo, wolonga, “Yalikohi yewhanile na igongolo alino? Kahi yalikohi yoweza kitowa na heye?”
REV 13:5 Alila igongolo nalikundigwa kulonga ulonzi wa kidaya na wa kumliga Nguluwi. Nakapegwa ludali lwa kudita mijito ja heye, myezi makumi gane na meli.
REV 13:6 Lelo nakaluka kumliga Nguluwi na kuliliga itagwa lya heye, na kuliga honhu halingikala Nguluwi, na wala weng'ha walingikala kilanga.
REV 13:7 Igongolo ling'ang'gale nalikundizwa kitowa ngondo na kuwasumya wanhu wa Nguluwi, nakapegwa na ludali kwa wanhu wa chila isi na chila nhanzi na lukolo na ndonga.
REV 13:8 Wanhu weng'ha wawele ngikala muisi womfugamila, ila wala hela wawele matagwa ga hewo gandichigwa kuli chitabu cha ukomu cha Mwanaing'holo yakopoligwe kulawila mwaluko wa isi.
REV 13:9 “Yawele na makutu ga kuhulika, nayahuliche!
REV 13:10 Yaganigwe kubatigwa kuli ngondo, kobatigwa kuli ngondo. Wa kukopoligwa kwa ipanga, na heye kokopoligwa kwa ipanga. Ayi ndo nyhemo kwa wanhu wa Nguluwi wawe na kwimilila na makundo.”
REV 13:11 Hamba nambona igongolo linji, likwina kulawila kuli isi, nalyo nalyali na mbalati mbili kota za mwanaing'holo, nalilonga kota izoka.
REV 13:12 Nalyo nalyali na ludali lweng'ha lwa lila igongolo lya mwaluko. Naliditila mijito ludali alo kumwando kwa alyo igongolo, naliikola lupichi isi yeng'ha na weng'ha wawele mumo, walifugamile lila igongolo lya mwaluko, yawele na ng'hovu ya chila chilonda cha kubagama chiponile.
REV 13:13 Lelo ali igongolo lya keli nalilajila vinduzanduza vikulu, mbaka kudita chiluli kudulika kulawila kilanga uye mchanya mwa isi kumwando kwa wanhu weng'ha.
REV 13:14 Nalyo naliwahada wala walingikala muisi kwa vinduzanduza avyo vyoyapegwe kudita hali alyo igongolo lya mwaluko. Igongolo alyo, naliwalonjela walingikala muisi, wagomanjize limalukolo kwa kulitogola lila igongolo naliwele lilumizwe vibi, ila naliwa likomu kahi.
REV 13:15 Nalipegwa kujela ukomu kuli lila limalukolo lya igongolo lya mwaluko, na lila limalukolo lya igongolo lilonje, na kuwakopola wanhu weng'ha wohambe wafugamile limalukolo lya igongolo.
REV 13:16 Naliwadita weng'ha, wadodo na wakulu, na wawele na lufufu kwa wazunwa, na welejehe kwa wapogozi, wawichigwe ndonya kuli moko wa hewo wa kudilo, ama kuli vihanga vya hewo,
REV 13:17 Kahi nalilemeza munhu yoneche yaleche kugula wala kuguza chinhu, ila yawele na ndonya yila, iwele ndo itagwa lya igongolo lila ama namba ya itagwa lya heye.
REV 13:18 Aha ndo luhala lulinguganigwa. Heye yawele na nyhala kangutang'ula winji wa igongolo alyo, mina ndo winji wa chiwunhu, na namba yake ndo miya sita makumi sita na sita.
REV 14:1 Hamba, nambona Mwanaing'holo yemile mchanya mwa chidunda cha Siyoni, hamwe na wanhu wa heye, lachi imwe na elufu makumi gane na zine, wawele na itagwa lya heye na itagwa lya mhaza wa heye, lyandichigwe kuli vihanga vya hewo.
REV 14:2 Kahi nanyulika lizi kulawila kilanga, kota lizi ya kubogoma kwa mazi menji, na kota lizi lya limlungu lilingubalanuka. Ayo lizi yonyuliche, nayali kota lizi ya watowa ching'hweleng'hwele, walingutowa ving'hweleng'hwe vya hewo,
REV 14:3 na wali wokwimba lwimbo lunyale kumwando kwa chigoda cha undewa, na kumwando kwa wala vilumbigwe wawele na ukomu wane, na wala wasekulu, na kuduhuli munhu yajezile kilangusa lwimbo ula, ila wala wanhu nawagomboligwe kuli isi.
REV 14:4 Awa ndo nahawawele wakokomoche kwa kuwasa na wadala, kwa vila nahawana wasa na wadala ng'oo. Awa ndo walingumuwinza Mwanaing'holo chila hoyoluta. Awa wagomboligwa kuli wanhu, nawali wa mwaluko kulavigwa kwa Nguluwi na kwa Mwanaing'holo kota mafuza ga kulimbula.
REV 14:5 Mli milomo ja hewo, hawoneche udesi. Mina nawalihela wihe.
REV 14:6 Hamba nambona mhilisi wa kilanga yunji, yoguluka hagati ya kilanga, yawele na Mbuli Inojile ya mazuwa gose ne kuduma, yowadamlila awo walingikala mchanya mwa isi na chila isi na nhanzi na lukolo na ndonga,
REV 14:7 yolonga kwa lizi ng'hulu, “Mumdumbe Nguluwi na kuutogola ukulu wa heye, mina mhela wa kuwatagusa wanhu wuya. Mumtambichile heye yaditile kilanga na isi na bahali na nzasa za mazi.”
REV 14:8 Hamba mhilisi wa kilanga yunji wa keli na kawinza, yolonga, “Ugwa, muji ukulu wa Babiloni ugwa, mina hegwe ndo yawanwezile isi zeng'ha divai ya heye ing'hang'hale ilinguwambuza wanhu wawe na maya ga kudita ung'hondwa!”
REV 14:9 Mhilisi wa kilanga wa kadatu, nakawinza, yolonga kwa lizi likulu, “Munhu yoneche yolifugamila alyo igongolo, na limalukolo lyake, na kuibochela ndonya kuli chihanga cha heye, ama kuli moko wa heye,
REV 14:10 heye yuye konwa divai ya kuzudila kwa Nguluwi ijidigwe mli chizombe cha kuzudila kwa heye, ne kuhanzanywa na mazi. Munhu ayo kogazigwa kuli chiluli na kwa baluti kumwando mwa wahilisi wa kilanga welile na kumwando kwa Mwanaing'holo.
REV 14:11 Iyosi lya chiluli liwele nguwagaza wangukwina mchanya mazuwa gose. Wanhu awo walingulifugamila alyo igongolo ling'ang'ale na limalukolo lya heye na kuwichigwa ulajilo wa itagwa lya heye, hawowa na mhumu nemisi na nechilo.”
REV 14:12 Ahyo ndo wanhu wa Nguluwi vyowalinguganigwa, mina wala wanhu wawele nguwinza mzilo wa Nguluwi na wawele na makundo kwa Yesu, wawe wemilile.
REV 14:13 Hamba, nyhulika lizi lilawa kilanga lilonga, “Wandiche! Kulawila sambi, wabweda wanhu wawele ngubagama welumbile na Mkulu.” Heye Muhe kangulonga, “Ena! Wokwesela kulawa kuli magazo ga hewo, mina wosangalala kwa chiwalo cha mijito ya kitunya kwa hewo.”
REV 14:14 Hamba nandola aku, nakwali na ng'hungugu nzelu aho. Mchanya mwa ng'hungugu ayo nakwali na yumwe yawele kota Mwana wa Munhu. Heye nayali yavalile chipembelo cha zahabu kumutwi, na kibata sengo mmoko mwa heye.
REV 14:15 Hamba, mhilisi wa kilanga yunji nakalawa mli ng'handa ya Nguluwi ya ako kilanga, na kwa lizi ng'hulu, naimlonjela yula yekalise mchanya mwa ng'hungugu, “Dedede, ukolele mijito sengo ya hegwe, ukabete mbena, mina mhela wa mbena wuya, mbena ya isi ya goya.”
REV 14:16 Lelo yula na yawele yekalise mchanya mwa ng'hungugu na kupujila sengo ya heye muisi, na mbena ya isi ibetigwa.
REV 14:17 Hamba, na heye mhilisi wa kilanga miyage kalawa kuli ng'handa ya Nguluwi iwele kilanga yebate sengo iwele ng'hali.
REV 14:18 Hamba, mhilisi wa kilanga miyage yawele na ludali lwa chiluli, nakalawa kuli honhu ha kulavila nhambiko, nakamlonjela kwa lizi ling'angala yula mhilisi yawele na sengo ng'ali, “Nagwe ukanole ayo sengo ya hegwe, ukapuje sanha za mizabibu ja isi, mina zabibu za heye zipya!”
REV 14:19 Hamba, mhilisi wa kilanga ayu nakataga sengo ya heye muisi, nakakana sanha za izabibu lya isi, nakazinjiza honhu ha kukamila zabibu, honhu hawele na kuzudila kwa Nguluwi.
REV 14:20 Zabibu zikamigwe mgati mwa alyo ikamilo liwele kunze kwa muji, na danda ilawa kuli ikamilo alyo yanguchililika kota lwanda na kumema mbaka wimo wa mita imwe na nusu na ulefu uwele ngufika kilomita miya zidatu.
REV 15:1 Hamba nambona ulajilo wunji ukulu na wa kububuwaza kilanga, nakwali aho wahilisi wa kilanga saba wawele na nongwa saba za kuduma, kwa nongwa azo saba, kuzudila kwa Nguluwi nakwenela.
REV 15:2 Hamba, nambona chinhu kota ulajilo wa bahali ya chilolelo ihanzigwe hamwe na chiluli. Nambona wala wanhu walisumile lila igongolo na limalukolo na namba ya itagwa lya heye, nawali wemile hafungo ha bahali ya chilolelo, wawele na ving'hweleng'hwele vyowapegwe na Nguluwi.
REV 15:3 Nawali wokwimba lwimbo lwa Musa chitumagwa wa Nguluwi, na lwimbo lwa Mwanaing'holo, wolonga, “Mkulu Nguluwi Yawele na Ludali, madito ga hegwe ndo makulu na ga kububuwaza ng'hatu! Hegwe mndewa wa isi zeng'ha, nzila za hegwe zitanganika na za kukomya.
REV 15:4 Mkulu yalikohi yohambe yakudumbe hegwe? Yalikohi yohambe yalitogole itagwa lya hegwe? Hegwe uliyeng'ha ndo welile. Wanhu wa isi zeng'ha wokuyila, na kukutambichila hegwe. Mina madito ga hegwe ganojile goneka.”
REV 15:5 Logakwete ago, nambona, ng'handa ya Nguluwi igubuligwe kilanga, namgati mwake nambona ihema lya ulolezi wa kuwa baho Nguluwi,
REV 15:6 na wala wahilisi wa kilanga saba, wawele na nongwa saba, nawalawa amo mng'handa ya Nguluwi, wavalizwe nguo za kitani zinojile, na zing'alile, wawopigwe mhambaga mwa hewo misali ja zahabu.
REV 15:7 Yumwe wa vila vilumbigwe wane wawele na ukomu nakawapa wala wahilisi wa kilanga saba, visaye saba vya zahabu, vimemile kuzudila kwa Nguluwi, yalingikala mazuwa gose.
REV 15:8 Ng'handa ya Ngulwi naimemezwa iyosi lilingulawila kuli ukulu na ludali lwa Nguluwi. Na hapawele na munhu yadahile kwinjila mng'handa ya Nguluwi, mbaka kuduma kwa nongwa saba za wala wahilisi wa kilanga saba.
REV 16:1 Hamba, nanyulika lizi ling'angala kulawa kuli ng'handa ya Nguluwi iwalonjela wala wahilisi wa kilanga saba, “Mlute mkabohole vila visaye saba vya kuzudila kwa Nguluwi kuli isi.”
REV 16:2 Lelo mhilisi wa mwaluko nakaluta nakubohola chisaye cha heye mchanya mwa isi. Baho du, mipu jihile na ja kulumiza ng'hatu na jiwafika weng'ha wawele na ndonya ya lila igongolo na wala walifugamile limalukolo lya heye.
REV 16:3 Mhilisi wa keli nakabohola chisaye cha heye mbahali. Na ago mazi ga bahali nagagaluka danda kota danda ya munhu yabagame, na vilumbigwe vyeng'ha naviwele na ukomu mbahali navibagama.
REV 16:4 Mhilisi wa kadatu na kabohola chisaye cha heye kuli nzanda na nzasa za mazi, navyo navigaluka danda.
REV 16:5 Heni nandimuhulika mhilisi wa kilanga mwamizi wa mazi yolonga, “Hegwe kudita kota navyoiganigwe, kutagusa goya mbuli ayo. Hegwe welile, uwele baha na uwele bahano!
REV 16:6 Kwa vila nawabohola danda ya wanhu wa Nguluwi, na ya waloli, na hegwe kuwapa danda wanwe, kwa vila nawaganigwa ahyo!”
REV 16:7 Nanyulika ayo lizi ilawile kuli honhu ha kulavila nhambiko ilonga, “Ena, Mkulu Nguluwi Yawele na Ludali, hegwe kwangulavya utaguso utanganiche na wa kukomya!”
REV 16:8 Hamba, mhilisi wa kane nakabohola chisaye cha heye mchanya mwa isanya. Isanya nalipegwa ludali lwa kuwalakaza wanhu kwa chiluli cha heye.
REV 16:9 Wanhu nawalakazwa vibi ng'hatu, nawo nawaliliga itagwa lya Nguluwi yawele na ludali hali nongwa azo. Ila nahawamgalamchile Nguluwi na kumtogola.
REV 16:10 Hamba, mhilisi wa kahano nakabohola chisaye cha heye mchanya mwa chigoda cha undewa cha lila igongolo. Undewa wa igongolo alyo nauwichigwa jiza, wanhu nawadakula umyango wa hewo kwa chiwalo cha usungu,
REV 16:11 nawamliga Nguluwi wa kilanga kwa chiwalo cha usungu wa hewo na kwa chiwalo cha mipu ja hewo. Ila hawamgalamchile Nguluwi kwa madito ga hewo gehile.
REV 16:12 Hamba, mhilisi wa sita nakabohola chisaye cha heye mchanya mwa lwanda lukulu uwele nguchemigwa Eyufulate. Mazi gake nagakala, ahyo naiwichigwa nzila igongomanywe kwa wandewa walingulawa kolilawilaga isanya.
REV 16:13 Hamba, nambona vijeni vihile vidatu viwhanile na mibula, vilawa kuli mlomo wa lila izoka likulu na chimwe nachilawa kuli mlomo wa lila igongolo na chimwe nachilawa kuli mlomo wa yula mloli wa udesi.
REV 16:14 Awa muhe wadatu wa vijeni viwele ngulajila vinduzanduza. Ndo wanguluta kwa wandewa wa isi yeng'ha na kuwakungajiza hamwe kwa chiwalo cha ngondo ng'hulu kuli zuwa lila lya Nguluwi yawele na ludali.
REV 16:15 “Mkulu kangulonga! Heni ndanguya kota mhizi! Kabweda yula yalingikala meho na kuvala nguwo za heye leka yaleche kuluta mwanzi aku na kula na kudeula hali wanhu.”
REV 16:16 Lelo vijeni avyo nawawakungajiza awo wandewa honhu hawele nguchemigwa kwa Chiebulaniya ndo Amagedoni.
REV 16:17 Hamba, mhilisi wa saba nakabohola chisaye cha heye kulanga. Lizi ling'angala ihulikwa kulawa kuli chigoda cha undewa, kuli ng'handa ya Nguluwi, ilonga, “Yenela!”
REV 16:18 Nakulawila kumwemwesa, iyowe na limlungu na limachinyina liwele halinalawila Nguluwi yawalumbile wanhu muisi.
REV 16:19 Muji ula ukulu na utuligwa honhu hadatu, najo miji ja isi yeng'ha najigwa. Babiloni, muji ula ukulu Nguluwi hausemwile, nakaunweza chizombe cha divai ya kuzudila kwa heye kukulu.
REV 16:20 Vihilwa vyeng'ha navyuka, navyo vidunda nahavyoneche kahi.
REV 16:21 Nhonya ya maganga makulu gawele na itunyo wa kota kilo makumi gahano chila limwe, naiwatowela wanhu. Hewo nawamliga Nguluwi kwa chiwalo cha kutowa kwa nhonya ayo ya maganga. Ena, kutowa kwa nhonya ayo ya maganga nalyali ling'angala ng'hatu.
REV 17:1 Yumwe wa wala wahilisi wa kilanga saba wawele na chisaye nakoya, kandonjela, “Uye, na heni ndokulajila utaguso woyapegwe yula mdala mng'hondwa, ndo muji ula uzenjigwe hafungo ha mazi menji.
REV 17:2 Wandewa wa isi wadita ung'hondwa hamwe na heye, na wawele ngikala muisi wagala divai ya ung'hondwa wa heye.”
REV 17:3 Hamba, londali nding'hali ndilongozwa na muhe wa Nguluwi, nandiwona ndiholigwa na mhilisi wa Nguluwi mbaka kuchiwala. Ako ndimona mdala yekalise mchanya mwa igongolo idung'hu ng'hatu. Igongolo alyo nalyali lyandichigwe chila honhu matagwa ga kumliga Nguluwi, yawele na mitwi saba na mbalati kumi.
REV 17:4 Mdala ayo nayali yavalile nguwo za lanji ya zambalawe na ndunghu, na nayali yenolije kwa zahabu, maganga ga sendi nyinji na lulu. Mmoko wa heye nekebata chizombe cha zahabu chonachali chimemile wihe na mbuli zihile zilingulajila ung'hondwa wa heye.
REV 17:5 Nayali yandichigwe mchihanga cha heye itagwa lya nhelo “Babiloni mng'hangala, mamo wa wang'hondwa na wa mbuli zeng'ha zihile ng'hatu muisi.”
REV 17:6 Ndimona ayo mdala yagalile danda ya wanhu wa Nguluwi, na danda ya wanhu wabagame kwa chiwalo cha kumdamla Yesu. Vyondimuwene nambubuwala ng'hatu.
REV 17:7 Ila mhilisi wa kilanga nakandonjela, “Lekachoni kububuwala? Heni ndokulonjela mana ivisigwe ya mdala ayo na igongolo alyo yawelengulihola liwele na mitwi saba na mbalati kumi.
REV 17:8 Alyo igongolo lyouliwene, nalyali likomu aho mwaluko ila sambi libagama. Na ahyo, lyahabehi lyokwina kulawa kuli lila ikulubila, ila lyosumigwa. Walingikala muisi wobubuwala, ena wanhu weng'ha wawele matagwa gawo hagandichigwe kuli chitabu cha ukomu kwaluchila mwaluko wa isi, wobubuwala kulyona alyo igongolo liwele aho mwaluko lichikala, hamba nalibagama na sambi lyangulawila kahi!
REV 17:9 “Aha ndo luhala na nyhala vyanguganigwa kwa kuvizela vinhu avi! Avyo vitwi saba ndo vidunda saba viwele ayo mdala kangikalisa mchanya mwake. Vitwi avyo kahi ndo wandewa saba.
REV 17:10 Hali awo wandewa saba, wahano kota ingamiya, yumwe yang'hali yolongoza na yula yunji hanafika, na heye kolongoza kwa mhela udo.
REV 17:11 Alyo igongolo liwele lyali lichikala aho mwaluko ila sambi hambe lichikale ndo mndewa wa nane. Heye naye kahamwe na awo saba, na kanguluta kuli kudumigwa.
REV 17:12 “Zila mbalati kumi zouziwene ndo wandewa wawele wang'hali kwaluka kulongoza. Ila wopegwa ludali lwa kulongoza kwa mhela wa saa imwe hamwe na alyo igongolo.
REV 17:13 Chowogana awa kumi ndo chimwe, nawolipa alyo ligongolo mong'ho na ludali lwa hewo weng'ha.
REV 17:14 Wochitowa ngondo na Mwanaing'holo, ila Mwanaing'holo hamwe na wala yawachemile na kuwahagula wawele wakitumbila, kowasumya kwa chiwalo cha heye yawele ndo Mkulu wa wakulu na mndewa wa wandewa.”
REV 17:15 Muhilisi nakandonjela, “Gala mazi ugawene hala hoyekale yula mng'hondwa, ndo ikugusi lya wanhu wa chila isi na nhanzi na lukolo na ndonga.
REV 17:16 Mbalati zila kumi zouziwene na lila igongolo womwihilwa ayo mng'hondwa. Wohola chila chinhu choyawele nacho na kumleka mwanzi, wolya miwunde ja heye na kolakazwa kwa chiluli.
REV 17:17 Mina Nguluwi kawika mnhumbula za hewo leka wadite vyoyogana heye, wekundize hewo wawo na kumha alyo igongolo ludali lwao lwa kulongoza mbaka aho gala goyalonjile Nguluwi hogokwenela.
REV 17:18 “Yula mdala yoyamuwene ndo ula muji ukulu uwele ulonjigwe kwa chiwalo cha wandewa wa isi.”
REV 18:1 Hamba, nandimona mhilisi wa kilanga yunji yodulika kulawila kilanga. Nayali na ludali lukulu, na isi naimulikwa kwa kung'ala kwake.
REV 18:2 Nakakwiniza lizi kwa iyowe, yolonga, “Kugwa, muji ukulu wa Babiloni kugwa! Lelo kuwa hakaye ha vijeni na jimazoga, kuwa hakaye ha mideje jihile na migongolo ja kuzudiza ng'hatu.
REV 18:3 Kwa vila nhanzi zeng'ha nazigala divai ng'hali ya hegwe iwele na mong'ho ulinguwambuza kudita ung'hondwa, hewo wandewa wa isi wadita ung'hondwa hamwe na hegwe. Hewo nawaguza vinhu vya isi wana lufufu lwinji kulawila kubweda kwinji lukami kwa hegwe ne kuduma.”
REV 18:4 Hamba, nanyhulika lizi liyage kulawa kilanga ilonga, “Wanhu wa heni, muche kuli muji awo wa Babiloni. Leka mleche kihanza kuli ung'hondwa wa heye, mleche kihanza kuli gehile ga heye.
REV 18:5 Mina wihe wa heye uwa winji ng'hatu, uchilunda mbaka kilanga, na Nguluwi hagasemwile gehile ga heye.
REV 18:6 Mditileni Babiloni kota vyoyawaditileni hemwe, mumhilusile mala ya keli kwa gala goyawaditileni, muhanzileni mchizombe cha heye divai ng'hali mala keli. Kota chakunwa choyakuwichile hegwe.
REV 18:7 Mumhe magazo na usungu vyoilingumlapa kwa kidaya kwa heye, kota ukulu na kulawila kikala kwa heye kwa kubweda. Kangilonjela mnhumbula ahi, ‘Aha ndangikala heni mndewa wa chidala. Heni siwele munhu yafiligwe na mlume, siwa kahi na usungu ng'oo!’
REV 18:8 Kwa chiwalo acho nongwa za heye zomfika heye kwa zuwa imwe, utamwa na masinzo na nzala. Kolakazwa na chiluli, mina Mkulu Nguluwi yawele kumtagusa heye kana mong'ho.”
REV 18:9 Wandewa wa isi waditile ung'hondwa na heye na kikala na heye kwa kubweda wolombocheza na kulila mhela wowokona iyosi lya kulakazwa kwa heye.
REV 18:10 Wangwima kutali kwa chiwalo cha kudumba magazo ga heye na kulonga, “Kochona, kochona! Hegwe Babiloni, muji ukulu uwele na mong'ho! Kwa mhela wa saa imwe hela utaguso wa hegwe uya.”
REV 18:11 Waguza vinhu wa muisi wolila na kulombocheza kwa wula muji, kwa vila kuduhuli munhu yogula kahi vinhu vya heye,
REV 18:12 kuduhu kahi wakugula zahabu za heye na maganga ga sendi na vinhu vilingupulika na lulu na kitani na nguwo za lanji ya zambalau na halili na ivalo idung'hu na vinhu vya chila mbuli kuli migodi ja chiuyeng'ha na vinhu vya mbalati za nhembo na vya migodi jiwele na sendi nyinji na shaba na chuma na mabwe
REV 18:13 na mdalasini na ndugwa na ubani na manemane na udi na divai na mafuta na utimbo ulinimwanimwa wa ngano na ngano na isenga na ing'holo na falasi na mutuka lilingukwejigwa na falasi na wapogozi wa hewo na kikala kwa wanhu.
REV 18:14 Waguza vinhu wamlonjela Babiloni, “Mafufugo geng'ha goulolelile gajilila, na lufufu na lutogo vimala, huvipata kahi!”
REV 18:15 Waguza vinhu wawele na lufufu lwinji kulawila na muji awo, wokwima kutali kwa chiwalo cha kudumba kwa magazo ga heye, wolila na kulombocheza,
REV 18:16 wolonga, “Kochona, kochona! Muji awu ukulu. Kuzowela kuvala mivalo ja kitani na nguwo za lanji ya zambalau na ndung'hu na kinoliga kwa zahabu na maganga ga sendi nyinji na lulu!
REV 18:17 Kwa saa imwe hela lufufu lwa hegwe lumala!” Hamba waligwendesa meli weng'ha na walimmajendo wawo na wana mazi weng'ha walingukola mijito mbahali, nawema kwa kutali,
REV 18:18 na vyowaliwene iyosi lya chiluli chila chilakaze, nawalila kwa lizi, “Hainalawila hetwe kuwona muji ukulu kota awu!”
REV 18:19 Weboholela nimbwisi mchanya mmutwi mwa hewo wolila kwa lizi na kulombocheza, “Kochona, kochona! Hegwe muji ukulu! Wanhu weng'ha wawele na meli zilinguheluka mbahali nawapata lufufu lwinji kulawila kuli lufufu lwako. Kwa mhela wa saa imwe hela kwajiliza chila chinhu!”
REV 18:20 “Usechelele hegwe kilanga, kwa chiwalo cha kuwifya kwa heye. Msechelele wanhu wa Nguluwi, vitumagwa na waloli! Mina Nguluwi kautagusa muji awo, kwa chiwalo cha mbuli yomuwaditile hemwe!”
REV 18:21 Hamba, mhilisi wa kilanga yumwe yawele na mong'ho nakenula iganga liwele likulu lya lwala, kalitaga mbahali yolonga, “Kwa mong'ho awo, ahi ndo Babiloni vyoyotajigwa na kwajilila ng'hatu.
REV 18:22 Lizi lya ching'hweleng'hwele na lizi lya wapemba miluli na mhalamhanda hozihulikwa kahi mgati mwa hegwe muji awo. Kuduhuli muwanzi wa mijito yoneche yila, ila yokoneka mwa hegwe kahi, na lizi lya iganga lya lwala holihulikwa kahi mgati mwa hegwe.
REV 18:23 Lumuli lwa chenje haukoneka kahi mgati mwa hegwe, lizi lya munhu yalinguhesa na yalinguhesigwa hazihulikwa kahi mgati mwa hegwe. Waguza vinhu wa hegwe nawali wanhu wazeleche muisi, na kwa uhawi wa hegwe isi zeng'ha nazajilizwa!”
REV 18:24 Muji awo wa Babiloni nautagusigwa, kwa chiwalo cha amo koneka danda ya waloli wa Nguluwi na danda za wanhu wa Nguluwi na za wanhu weng'ha wakopoligwe muisi.
REV 19:1 Logakwete ago, nanyhulika lizi kota lizi ng'hulu ya ikugusi lya wanhu wenji kilanga wolonga, “Yatogoligwe Nguluwi! Ugombozi na ukulu na mong'ho vyeng'ha ndo vya heye Nguluwi wa hetwe!
REV 19:2 Mina utaguso wa heye ndo utanganika na wa kukomya. Kamtagusa yula mng'hondwa, mkulu nayawele yayajilize isi kwa ung'hondwa wa heye. Nakamgaza kwa chiwalo cha kuwakopola vitumagwa wa heye!”
REV 19:3 Nawalonga lwa keli, “Yatogoligwe Nguluwi! Iyosi lya chiluli chilingulakaza muji awo wokwina kilanga mazuwa gose!”
REV 19:4 Na wala wasekulu makumi meli na wane, na vila vilumbigwe vikomu vine, navifunama, navimtambichila Nguluwi yekalise mchanya mwa chigoda cha undewa, wolonga, “Ena! Yatogoligwe Nguluwi!”
REV 19:5 Lizi ilawa kuli chila chigoda cha undewa, ilonga, “Mtogoleni Nguluwi hemwe vitumagwa wa heye weng'ha, hemwe mlingumdumba, wadodo kwa wakulu.”
REV 19:6 Nanyhulika lizi kota lizi ya ikugusi likulu lya wanhu na lizi lya mazi menji galingubogoma ng'hatu, ilonga, “Yatogoligwe Nguluwi! Mina Mkulu Nguluwi wa hetwe yawele na ludali kangulongoza!
REV 19:7 Tusangalale na kutowa luchenze, tumtogole! Kwa vila mhela wa mnvina ya kuhesa kwa Mwanaing'holo uya, na mdala mkasano kewika goya.
REV 19:8 Na heye nakakundizwa, kuvalizwa nguwo ya kitani inojile, ilingung'hala!” Nguwo ayo ya kitani linojile ndo madito ganojile ga wanhu wa Nguluwi.
REV 19:9 Na heye nakandonjela, “Wandiche aga, ‘Wabweda wala walalichigwe kuli mnvina ya kuhesa ya Mwanaing'holo!’ ” Kahi kandonjela, “Awu ndo ulonzi wa kukomya wa Nguluwi.”
REV 19:10 Lelo heni nanyigwa hali magulu ga heye, nangana ndimfugamile. Ila heye kandonjela, “Leka! Heni nda chitumagwa hela kota hegwe na wang'holozo, tweng'ha twangumdamla Yesu. Ila mtambichile Nguluwi! Mina kukomya kugubuligwe na Yesu ndo ulinguwalangazila waloli.”
REV 19:11 Hamba, nambona kilanga kugubuligwe, na ako nakwali Falasi yumwe mzelu, na heye yamkwinile, nayali yochemigwa Wakitumbila na Yatanganiche. Na heye ndo kangutagusa na kitowa kwa chiwalo cha mbuli zigoloche.
REV 19:12 Na meho ga heye nagali kota ilapi lya chiluli na mchanya mwa mutwi wa heye mwali na vipembelo vinji. Na heye kana itagwa lyandichigwe, kuduhu munhu yoneche yavizelele ila heye yuye.
REV 19:13 Nayali yavalizwe nguwo nazilwechigwe mli danda, itagwa lya heye lyanguchemigwa “Ulonzi wa Nguluwi”.
REV 19:14 Wamizi wa kilanga nawamuwinza wawele wakwinile falasi wazelu na wavalile nguwo za kitani nzelu chweya.
REV 19:15 Ipanga linoleche lyangulawa mumlomo mwake leka yawatowe wanhu wa isi zeng'ha. Na heye kowadima kwa ng'hweku ya chuma, na kuikama divai kuli honhu ha kukamila ha kuzudila kwa Nguluwi yawele na ludali.
REV 19:16 Na heye kana itagwa lyandikwa kuli nguwo ya heye na mihaza lyake, “Mndewa wa wandewa, na Mkulu wa wakulu.”
REV 19:17 Hamba, nandimona mhilisi wa kilanga yumwe yemile hali isanya. Nakalila kwa lizi ng'hulu, yavilonjela videje vyeng'ha vidodo vilinguguluka kilanga, “Muye mting'hane kwa mnvina ya Nguluwi iwele ng'hulu,
REV 19:18 leka mulye miwunde ja wandewa na wakulu wa wamizi na miwunde ja wanhu wawele na mong'ho na miwunde ja falasi na ja wanhu walingukwina falasi na miwunde ja wanhu weng'ha, welejehe na wapogozi, wadodo kwa wakulu.”
REV 19:19 Hamba, nandilyona alila igongolo hamwe na mndewa wa isi na mwamizi wa hewo wekungazije hamwe leka wetowe ngondo na yula yonayali yekalise mchanya mwa falasi yula kahi na wamizi wa heye.
REV 19:20 Ila alyo igongolo nalibatigwa, hamwe na yula mloli wa udesi, heye yaditile vinduzanduza honhu ha heye, na kwa avyo vinduzanduza, nakawahada wanhu wala waibochele yila ndonya ya alyo igongolo, nawo hewo walifugamile limalukolo lya heye. Alyo igongolo na ayo mloli wa udesi, nawatozwa wawele wakomu kuli lila ilamba lya chiluli lilingwaka kwa maganga galingwaka,
REV 19:21 na wamizi wa hewo nawabagama kwa ipanga lilawile kumlomo kwa yula yakwinile falasi. Na mideje jeng'ha jochiguta kwa mitufi ja ng'huli za hewo.
REV 20:1 Hamba, nandimona mhilisi wa kilanga yumwe yodulika kulawa kilanga yawele na chichumulilo cha ikulubila na minyololo mikulu mmoko mwa heye.
REV 20:2 Nakalibata lila izoka lya katali, ndo Vijeni ama Limazoga nakaliwoha na wula mnyololo kwa mihela elufu imwe.
REV 20:3 Mhilisi nakalitoza kuli ikulubila na kuhinda lwizi lwa kwinjilila ako na kuwika ihota na muhuli, leka lileche kuweza kahi kwajiliza wanhu wa isi zeng'ha mbaka aho mihela elufu imwe hojimala. Ila hojimala mihela ajo, yomgana kudoholigwa kahi, ila kwa mhela udo hela.
REV 20:4 Hamba, nambona vigoda vya undewa na wanhu wekalise mchanya, wanhu awo nawapegwa ludali lwa kutagusa. Nambona kahi muhe wa wala wakopoligwe kwa chiwalo cha kukunda kukomya wa Yesu na kweneza ulonzi wa Nguluwi. Awo nahawalifugamile alyo igongolo, ama limalukolo lyake, ne kuwichigwa ndonya mvihanga vya hewo ama mmoko mwa hewo. Nawapegwa kahi ukomu nawalongoza kahi hamwe na Kilistu kwa mihela elufu imwe.
REV 20:5 Wala wayage wabagame hawapatile ukomu mbaka mazuwa elufu imwe genele. Awu ndo uzilipulo wa mwaluko.
REV 20:6 Wabweda na kahi ndo welile hewo weng'ha wawele mli uzilipulo awu wa mwaluko. Kubagama kwa keli hakuwa na ludali hali hewo, wowa watambika wa Nguluwi na wa Kilistu, na wolongoza hamwe na heye kwa mazuwa elufu imwe.
REV 20:7 Mihela ajo elufu imwe hojimala, Limazoga lyodoholelwa kulawa kuchinweng'ho.
REV 20:8 Lelo kolawa kunze, kokwaluka kwajiliza wanhu wa isi zeng'ha wasambaluche chila honhu muisi, wanhu awa wanguchemigwa Gogu na Magogu. Limazoga lyowakungajiza hamwe kwa chiwalo cha ngondo, na hewo wowa wenji kota misanga ja kumwani.
REV 20:9 Nawasambaluka kuli isi yeng'ha, waizunguluta kambi ya wanhu wa Nguluwi na muji wa Nguluwi yalinguugana. Ila chiluli nachidulika kulawa kilanga, nakuwalakaza.
REV 20:10 Na lila Limazoga nalyali liwajiliza wanhu, lyotajigwa mgati mwa ilamba lilingwaka chiluli cha baluti, amo lyamumo lila igongolo na yula mloli wa udesi, na hewo wogazigwa nemisi na nechilo, mazuwa gose.
REV 20:11 Hamba, nambona chigoda cha undewa chikulu chizelu, na yula yawele ngikalisa hali chigoda acho. Isi na kilanga vyajilila hali meho ga heye, na havyoneche kahi.
REV 20:12 Hamba, nandiwona wanhu wakulu kwa wadodo, nawema hali chigoda cha undewa, na vitabu vigubuligwa. Hamba chitabu chiyage, ndo chiwele chitabu cha ukomu, nacho chogubuligwa kahi. Wabagame wogazigwa kota vyogawele madito ga hewo, kota vyoyandichigwe mgati mwa vitabu avyo.
REV 20:13 Bahali yowalavya kunze wabagame wawele mgati mwa heye, kubagama na isi ya wabagame vyowalavya kunze wabagame wawele mgati mwake. Chila yumwe nakatagusigwa kwa gala goyaditile.
REV 20:14 Hamba, kubagama na isi ya wabagame navitajigwa mli ilamba lya chiluli. Ilamba alyo lya chiluli ndo kubagama kwa keli.
REV 20:15 Munhu yoneche itagwa lya heye halyandichigwe kuli chitabu cha ukomu, nakatajigwa kuli ilamba lya chiluli.
REV 21:1 Hamba, nambona ulanga unyale na isi inyale. Ulanga ula wa mwaluko na isi ila ya mwaluko navyali vipulute, nayo bahali nayali haduhuli kahi.
REV 21:2 Ndiwona muji welile, Yelusalemu inyale, udulika kulawa kwa Nguluwi kilanga. Nawali uwichigwe goya kota mdala yahesigwe yenolije kiting'hana na mlume wa heye.
REV 21:3 Kulawa baho nanyulika lizi likulu kulawa kuli chigoda cha undewa ilonga, “Gwela yoo! Hakaye ha Nguluwi ndo hamwe na wanhu. Kochikala hamwe na hewo, na hewo wowa wanhu wa heye, na heye kowa Nguluwi wa hewo.
REV 21:4 Heye kobagusa mahozi ga hewo geng'ha, mina kubagama kowa kuduhuli ng'hatu na wala usungu na wala chililo na wala kutama, kwa vila vinhu vya mwaluko vipuluta!”
REV 21:5 Hamba, yula yekalise mchigoda cha undewa nakalonga, “Gwela yoo, ndangudita vyeng'ha viwe vinyale.” Kahi nakandonjela, “Wandiche mbuli ayi, mina ulonzi awu ndo wa kitumbila na wa kukomya!”
REV 21:6 Hamba, nakandonjela, “Genela! Heni ndo Alufa na Omega, mwaluko na kuduma. Yawele na ng'halu ndompa chinhu chakunwa kulawa kuli nzasa ya mazi ga ukomu ne kulavya sendi.
REV 21:7 Heye yoneche yalingusumya aga, kobochela acho, nani ndowa Nguluwi wa heye na heye kowa mwanangu.
REV 21:8 Ila wanhu walingudumba na wohambe wakunde na walihela luhala na wakopolaji na wang'hondwa na wahawi na walingufugamila jimalukolo na wadesi weng'ha honhu ha hewo howa mgati mwa lila ilamba lilingwaka chiluli na baluti, ako ndo kubagama kwa keli.”
REV 21:9 Hamba, yumwe wa wala wahilisi wa kilanga saba wawele na vila visaye saba navimemile nongwa saba za kuduma, nakoya na kundonjela, “Uye! Na heni ndokulajila mdala yahesigwe mche wa Mwanaing'holo!”
REV 21:10 Lelo Muhe umema kwa heni, na heye mhilisi kanyilika mchanya mwa chidunda chikulu ng'hatu chiling'wemang'wema. Kandajila muji welile wa Yelusalemu, udulika kulawa kwa Nguluwi kilanga,
REV 21:11 Naupulika kwa ukulu wa Nguluwi. Kupulika kwake nakwali kota iganga lya sendi nyinji kota vila yasipi ilingupulika kota chilolelo.
REV 21:12 Nawali na lukanzi lulefu na lukulu luzungulute muji awo, luwele na lwizi migazi kumi na mbili, na chila lumwe na lwimililwa na mhilisi wa kilanga. Mchanya mwa chila lwizi nahandichigwa limwe lya matagwa ga nhanzi kumi na mbili za Isilaeli.
REV 21:13 Kwali na lwizi migazi midatu, ubanzi wolilawila isanya lwizi migazi midatu, kaskazini lwizi migazi midatu na kusini lwizi migazi midatu na kolizinjila isanya lwizi migazi midatu.
REV 21:14 Lukanzi lwa muji awo lwali luzenjigwe mchanya mwa maganga ga msisi kumi na meli, na mchanya mwa chila iganga hali handichigwe itagwa limwe lya wala vitumagwa kumi na weli wa Mwanaing'holo.
REV 21:15 Ila, yula mhilisi yonayali yolonga na heni nayali na ng'hweku ya zahabu leka yaupime muji awo na lwizi lugazi lwa heye na lukanzi lwa heye.
REV 21:16 Muji awo nawali na banzi zine zilingiwhana, ung'wemang'wema na ugazi nawiwhana. Lelo mhilisi nakaupima muji awo kwa ng'hweku ya heye, nawali na ung'wemang'wema wiwhanile na ugazi na wiwhanile kuza kuchanya, kota kilomita elufu mbili na miya zine.
REV 21:17 Hamba, nakapima lukanzi lwake nalo, lwali na ugazi wa mita makumi sita na sita kwa chipimilo cha meho ga chiwunhu, ndo chiwele mhilisi wa kilanga chonayapimile.
REV 21:18 Lukanzi alo nalwali luzenjigwe kwa maganga madung'hu ga sendi nyinji, na muji wuwo nawali uzenjigwe kwa zahabu inojile, ilingung'hala kota chilolelo.
REV 21:19 Maganga ga msisi wa lukanzi awo nagali ganolijigwe kwa chila iganga lya sendi nyinji. Iganga lya mwaluko lya msisi lyali iganga lya sendi nyinji lidung'hu, lya keli lya yakuti samawati, lya kadatu kalikedoni, lya kane zumalidi,
REV 21:20 lya kahano salidoniki, lya sita akiki, lya saba kilisolito, lya nane zubalajadi, lya tisa topazi, lya kumi kilisopilaso, lya kumi, imwe yasintho na lya kumi na mbili ametisto.
REV 21:21 Na jila lwizi migazi kumi na mbili, najali na lulu kumi na mbili na chila lwizi lugongomanywa kwa lulu imwe. Na chila nzila ng'hulu ya muji naigongomanywa kwa zahabu inojile, ilingupulika kota chilolelo.
REV 21:22 Siwene Ng'handa ya Nguluwi kuli muji awo, mina Mkulu Nguluwi Yawele na Ludali na yula Mwanaing'holo ndo ng'handa ya Nguluwi ya muji awo.
REV 21:23 Muji awo hambe ulape isanya ne nyelezi kuung'alichila, mina ukulu wa Nguluwi wanguung'alachila na Mwanaing'holo ndo lumuli lwa muji awo.
REV 21:24 Wanhu wa isi wochikala kuli lumuli lwake na wandewa wa isi wougalila lufufu lwa hewo.
REV 21:25 Lwizi migazi ja muji awo jowa jichumuligwe nemisi yeng'ha, kwa vila hakuwa na nechilo amo.
REV 21:26 Wanhu wa isi zeng'ha wougalila muji awo, ukulu na lufufu lwa isi.
REV 21:27 Ila kuduhuli chinhu choneche chiwele chihile chikwinjila amo, ne munhu yoneche yodita mbuli ya kuzudiza ama ya udesi hokwinjila amo. Ndo wala hela wandichigwe kuli chitabu cha ukomu cha Mwanaing'holo ndo wokwinjila kuli muji awo.
REV 22:1 Hamba, mhilisi nakandajila lwanda lwa mazi galingigala ukomu galingupulika kota chilolelo, gangulawila mchigoda cha undewa cha Nguluwi na cha Mwanaing'holo.
REV 22:2 Lwanda alo naluloka hagati ha muji. Hafungo ha lwanda alo kwali na igodi lya ukomu lilingulela mafuza mala kumi na mbili kwa mhela, iwele ndo mala imwe chila mwezi, na mahamba ga alyo igodi ndo mikwandi ja kuwegalila mong'ho wanhu wa isi zeng'ha.
REV 22:3 Haduhuli munhu ne chinhu choneche chipanjilwe na Nguluwi chiwa kuli muji awo. Chigoda cha undewa cha Nguluwi na cha Mwanaing'holo chowa kuli muji awo, na vitumagwa wa heye womfugamila.
REV 22:4 Wochiwona meho kwa meho na heye, na itagwa lya heye lyokwandikwa mli vihanga vya hewo.
REV 22:5 Nechilo kowa kuduhuli kahi, na howolapa lumuli lwa chenje ama lwa isanya kahi hebu, mina Mkulu Nguluwi kowamwemwesela, na hewo wolongoza kota wandewa mazuwa gose.
REV 22:6 Hamba, mhilisi wa kilanga nakandonjela, “Ulonzi awo ndo wa kukomya na wa kitumbila. Mkulu Nguluwi yawelenguwapa waloli walonje usenga wa heye kwa Muhe wa heye, nakamlajiza mhilisi wa heye yawalajile watumigwa wa heye mbuli zozilingulawila sambi baha.”
REV 22:7 “Mwela yoo!” “Ndanguya himahima. Wabweda wala webatilile mbuli ya uloli uwele mli chitabu achi.”
REV 22:8 Heni Yohana, nandigona na kuhulika mbuli ayi. Vyonanyuliche na kona, nanyigwa hali magulu ga ayo mhilisi wa kilanga yandajile mbuli azi, nangana kumfugamila.
REV 22:9 Ila heye nakandonjela, “Leka kudita ahyo! Heni nda chitumagwa hela kota hegwe na wang'holozo waloli na weng'ha wawele nguhulichiza malajizo gawele muli chitabu achi. Mumfugamile Nguluwi!”
REV 22:10 Kahi kandonjela, “Uleche kudita kota uviso mbuli ya uloli iwele muli chitabu achi, mina mhela wa kulawila kwa ago wahabehi.
REV 22:11 Wanhu walingudita wihe na walutilile kudita wihe, na yawele yakokomoche yalutilile kuwa yakokomoche. Yawele ngudita ganojile nayalutilile kudita ganojile, na yawele yelile nayalutilile kuwa yelile.”
REV 22:12 Yesu kangulonga, “Muhulichize! Ndanguya himahima hamwe na igano lyondimpa chila yumwe kulawila kuli madito ga heye.
REV 22:13 Heni ndo Alufa na Omega, wa mwaluko na wa kuduma. Wa kwaluchila na wa kuduma kwa chila chinhu.”
REV 22:14 Wabweda, wala walinguhovuga nguwo za hewo, wadahe kuwa wakundizwe kwa kulya ifuza lya igodi lilingigala ukomu, na ludali lwa kwinjila kuli lwizi migazi ja muji.
REV 22:15 Ila wala walingudita vibi kota migongolo, wahawi, wang'hondwa, walingukopola, walingufunamila jimalukolo na weng'ha walingugana kulonga udesi, wochikala kunze kwa muji.
REV 22:16 “Heni Yesu, ndimlajiza mhilisi wa kilanga yawalonjele mbuli ayi kuli vilundo vya wanhu walingumkunda Kilistu. Heni nda lulelo lwa lukolo lwa Daudi. Heni ndo nhondwe ilingupulika lufuku!”
REV 22:17 Muhe wa Nguluwi na Mdala yalinguhesigwa, wangulonga, “Uye!” Chila munhu yalinguhulika ali, na yalonje, “Uye!” Yawele na ng'halu yoye na yalingugana mazi ga ukomu nayahole ne kulavya sendi.
REV 22:18 Heni ndanguwakanya weng'ha walinguhulika mbuli za uloli uwele kuli chitabu achi, munhu yoneche yokonjeza choneche kuli mbuli ayo, Nguluwi komonjezela nongwa zandichigwe kuli chitabu achi.
REV 22:19 Munhu yoneche yopungula choneche kuli ulonzi wa uloli uwele kuli chitabu achi, Nguluwi komsukula honhu ha heye kuli lila igodi lya ukomu na honhu ha heye kuli muji welile, uwele ulonjeligwe kuli chitabu achi.
REV 22:20 Yesu yalingulavya kukomya kwa heye kuli mbuli ayi kangulonga, “Ndangukomya ndanguya himahima.” Heni Yohana ndangulonga, ena uye Mkulu Yesu!
REV 22:21 Ndanguwaganilani wanhu weng'ha wa Nguluwi isungu lya Mkulu Yesu. Ena.
