﻿అపొ.
27.
హామే ఝాజ్‍‍ చఢీన్‍ ఇటలీ జానూ కరి సోచీల్దో తెదె, ఇవ్నే పౌలునా బుజు థోడు జణు ఖైదిల్‍నా రోమ రాజో సైన్య అధికారి హూయోతే యూలి కరి ఏక్ జణానా అప్పగించ్యా. 
ఆసియానా సేడె ఛాతె హాఃయారేవ్‍నా జావాళు అద్రమత్తియ హాఃయర్‍నూ ఝాజ్‍ చఢీన్‍ హామే నిక్యా; మాసిదోనియుడ్‍నూ థెస్సలోనిక హాఃయార్‍నో అరిస్తార్కు హామార కేడె థో. 
తినబుజా ధన్నే సీదోన్‍నా ఆయా. తెదె యూలి. పౌల్‍ఫర్‍ గోర్‍ కరీన్‍, యో ఇనూ దోస్తుల్‍ కనా జైన్‍ పాల్‍పోందన హాఃజె ఇనా జా కరి బోల్యు. 
బుజు ఏజ్గాతూ నికనబాద్మా హాఃమెను వాయిరో మారామా కుప్రనా జోగొ ఝాజ్‍నా ఛలాయా. 
బుజు కిలికియనాబి పంపూలియాన హాఃమే ఛాతె ధర్యావ్‍ దాటీన్‍ లుకియమా ఛాతే మూరకు గయా. 
ఏజ్గా సైన్యాధికారి ఇటలీ జానుకరి ఛాతె అలెగ్జాండ్రియ హాఃయార్‍నూ ఝాజ్‍ మాలంకరీన్‍ హామ్నా ఇనమా చఢయు. 
కెత్రాకీ ధన్ ఢీలె చాలిన్‍, కెత్రూకి మ్హీనత్‍ పడీన్‍ క్నీదు హఃయర్నా హాఃమే ఆయా తెదె వాయిరో హామ్నా నాజవాదేవమా క్రేతునా జోగొ కరి సల్మోనేనా సేడే కరి ఝాజ్నా ఛలాయా. 
ఘను మిన్హత్‍ పడీన్‍ ఇనా డాటీన్‍, అష్యల్‍నుజోగొమా గయా. ఇనాసేడె లసైయ కరి హాఃయార్‍ థూ. 
ఘణా ధన్‍ హూవానా బాద్మా ఉపాస్‍నూ ధన్బి తెదేస్‍ హూయిజవామా ప్రయాణం కరన ముసిభత్మా థూ. 
తెదె పౌల్‍ హఃయాబ్, ఆ ప్రయాణంథీ హాఃమాన్‍నాహో, ఝజ్‍నస్‍ కాహేతిమ్‍ అప్ను జాన్‍నబి ఖత్రాబి నుక్‍షాన్‍ హూసే కరి మన సోచాంగ్రస్‍ కరి బోలిన్‍ గుర్కాయో. 
హుయుతోబి సైన్యాదికారి పౌల్‍ బోల్యొతె నానమ్మిన్‍, ఝాజ్‍ ఛలావవాళో నావికుడ్‍నుబి, ఝాజ్‍నూ మాలిక్‍ బోల్యుతేస్‍ నమ్యు. 
రుజు ఠణ్నూధన్‍ గుజారనా యో రేవు అనుకూల్‍నా హూవామా ఏజ్గాథూ నాకీన్‍ వీల్‍హుయుతో ఫీనిక్సునా జైన్‍ ఏజ్గా ఠణ్‍నా ధన్‍ కాఢీయే కరి ఘణా అద్మీయే హూఃజ్‍ బోల్యా. యో నైరుతి వాయవ్వదిక్కు మ్హణీ ఛాతే క్రేతు రేవుమా థూ. 
బుజు నూ వాయిరో ఢీలే వాగుకరమా ఇవ్నే ఇవ్నూ హూఃజ్‍ అసేల్‍నూ కాహే కరి సోచిన్‍ లంగరేత్తిన్‍ క్రేతునా సేడె ఝాజ్‍నా ఛలాయా. 
థొడు వోహాఃత్‍నా బాద్‍మా ఊరకులోను కరి ఏక్ మోటో వాయిరో క్రేతునా వుఫర్‍ కరి మార్యు. 
ఇనమా ఝాజ్‍ ఫసిజైన్‍ వాయిరోనా హాఃమే జవానకో హూయినితె అగడీ జవానా మ్హేంధిన్‍ వాయిరోమా మర్లీఛలేగా. 
బాద్మా కౌద కరి ఏక్ న్హానూ ద్వీపంనా బాజూమాకరీ ఇనా ఛలావమా పడవనా భచైలేవనా ఘాణు ముష్కీల్‍ హుయిగు. 
ఇనా ఉఫర్‍ పాడీన్‍ భాందనా బాద్‍మా షింద్రా హాఃరులీన్‍ జ్హాజ్‍నా ఆష్పీస్‍ ఘట్‍ లప్టీన్‍ భాంద్యా. బుజు సూర్తిస కరి రేతినూ ఉడ్డోఫర్‍ పడ్‍స్యుషికి ఢరీన్‍, జ్హాజ్‍నూ ఛాద్రీయే వుతారీన్‍, మర్లీ ఛలీగు. 
ఘణు వాయిరో వాగ్‍తూ ర్హవమా బుజాధన్నే హాఃమాన్‍ హాఃరూ భార్‍ ఫేఖానిక్యు. 
తీన్మాను ధన్నే ఇవ్నా హాతేహూఃస్‍ ఝాజ్‍నూ రాఛాబి ఫేకీదిదూ. 
థోడు ధన్‍ సూర్యుడ్‍బిహో, షుక్కార్‍బిహో నాదేఖైన్‍ మోటు వాయిరో హామారఫర్‍ మారమా జాన్‍థీ భచీజాస్యుకరీ ఆహాఃస్‍ ఛలీగు. 
యూవ్నే ఘణా ధన్‍ ఖాణు కోయింన్తె ర్హవామా పౌల్‍ యూవ్నా ఇఛ్మా భిరిన్‍ హాఃయాప్‍వో, తుమే మారు వాత్‍ హాఃమ్‍జీన్‍ క్రేతుథూ నానికాన్‍థూ. తెదె ఆ ఖత్రా, నుక్చాన్‍ కోహుయు హోత్‍ని. 
హాంకేతోబి హిమ్మత్‍ లాయిలేవో కరి తూమ్‍నా గింజుకరుస్‍; ఝాజ్‍నా తప్ప తూమారమా కినాబి జాన్‍నా ఖత్రా కోహూయుని. 
మే కీనోకీ, కినా సేవకరుకరుస్‍కీ, యో దేవ్‍నూ దూత ఛలీగుతే రాతే మార కనా భిరిన్‍, 
పౌల్‍ ఢర్‍నకో; తూ రోమరాజు హాఃమే భిరాను ఛా; హాధేక్‍ ఝాజ్‍మా బయల్దేరిర్యూతే ఇవ్నే హాఃరవ్‍నా దేవ్‍ తూనా ధీ రాక్యోస్‍ కరి మారేతి బోల్యు. 
ఇనహాఃజే హాఃయాప్‍వో, హిమ్మత్‍ లాయిలేవో; మారేతి బోల్యుతిమ్‍ జరగ్‍సే కరి మే దేవ్నా నమ్ముకరుస్‍. 
హూయుతోబి అప్నె మర్లీజైన్‍ ఖయూబి ఏక్ ద్వీపంఫర్‍ ఫడానూ ఛా కరి బోల్యు. 
ఛౌధమనూ ధన్నా రాత్‍ ఆయుతేదె హామే అద్రియ మద్యధరా ధర్యావ్‍మా హంఖడ్‍ హీంఖడ్‍ మర్లీ జౌంకరాతో ఆధిరాత్‍మా ఝాజ్‍నూ అద్మీయే ఖయూకీ ఏక్ దేహ్‍ః సేడే ఛా కరి వుహించి 
బుడుదు భొజొ నాఖిన్‍ దేఖమా ఏక్‍ ఖోః ఈహ్‍ః అడుగు ఘధార్‍ ఛాకరీ మాలంకర్యు. బుజున్‍బి థోడు దూర్‍ జవాన బాద్‍మా, బుజు బుడుదు నాఖిన్‍ దేఖమా చార్‍ఈహ్‍ః అడుగు ఘధార్‍ ఛాకరీ మాలంకర్యు. 
తెదె ఫత్రానూ తిప్పల్‍నూ జోగొ పడ్‍స్యుకీ షీకి కరి ఢరీన్‍, యూవ్నే జ్హాజ్‍నూ మైహ్‍ తూ చార్‍ లంగరుల్‍ నాఖిన్‍ కెదె వ్హాణహు హూసే కరి కాస్లీన్‍ థూ. 
హుయుతో ఝాజ్‍నూ అద్మి ఝాజ్‍ మ్హేందిన్‍ నాషీజానూ కరి దేఖీన్‍, ఇవ్నే అనివిమథూ లంగరు నాఖాంతర నానుఝాజ్‍నా ధర్యావ్‍మా ఉత్రాయి నాఖ్య. 
ఇనహాఃజే పౌలు అవ్నే ఝాజ్‍మా ర్హయ్యాతోస్‍ పన్కి తుమె ఛుఖైలీషూ కోయిని కరి సైన్యాధిపతి, సైనికుల్‍థి బోల్యు. 
ఎగ్గిస్‍ సైనికుల్‍ ఝాజ్‍ షీంధ్రా వ్హాడీన్‍ ఇనా మర్లీ జవాదిదూ. 
వ్హాణు హూంకరాతో పౌల్‍ ఛౌధ రోజ్‍థూ తుమె కాయిబి నా ఖైన్‍ ఉపాస్‍థి కాస్లీన్‍ ఛా. 
ఇనటేకె ఖాణు ఖవో కరి తూమ్‍నా మంగిలేకురుస్‍; ఆ తూమారు జాన్‍నా భచావనా మధత్‍హూసే. తూమారమా కినా ముఢ్‍క్యానూ ఏక్ కేహ్‍ఃతోబి నషించే కోయిని కరి బోల్తోహూయిన్‍, ఖాణు ఖవో కరి హాఃరవ్‍నా బతిమాల్యు. 
ఆ వాతె బోలిన్‍, ఏక్ రోటొ పాడీ ధర్లీన్‍ హాఃరవ్‍నా హాఃమే దేవ్‍నా కృతజ్ఞత దీన్‍ ఇనా తోఢీన్‍ ఖవాన గయూ. 
తెదె హాఃరు హిమ్మత్‍ లాయిన్‍ ఖాణు ఖవానిక్యు. 
ఝాజ్‍మా ఛియ్యేతే హామే హాఃర భేఖొః ఖడ్తిన్ ఫర్ ఛో జణా. 
ఇవ్నే హాఃరు ఖైన్‍ జాన్ దరిన్ బాద్‍మా, ఘౌనా ధర్యావ్‍మా ఫేఖినాఖిన్‍ జ్హాజ్‍నా హాల్కు కర్యా. 
వ్హాణు హుయుతేదె యో ఖయూ దేహ్‍ఃకీ యూవ్నే హాఃణాత్‍ ధర్యా కోయిని, పన్కి ఖందేనూ ఏక్ ధర్యావ్‍నూ ఏక్ పాయ్‍న దేఖిన్‍, హూవా ఏత్రే జ్హాజ్‍నా ఇనామా ధఖల్‍నూ కరి సోచ్యు. 
ఇనటేకె లంగరుల్‍నూ షింధ్రా వ్హాడీన్‍ ఇనా ధర్యావ్‍మా మ్హేందిన్‍ చుక్కానుల్‍నూ కట్లు ఛోడిన్‍ హాఃమేనూ తేరానూ ఛాద్రీనా వాయిరోనా ఉఫర్‍పాడిన్‍ హాఃమే ఛలాయా పన్కీ 
బే ఛాల్‍తుపాణిమా రేతిను జోగొమా అట్కీజైన్‍ ఝాజ్‍నా మెట్ట ధరాయు. ఇనహాఃజే ఝాజ్‍నూ అగ్లు భాగ్‍ పహిఃజైన్‍ హాల్యు కోయిన్‍తిమ్‍ రైగు, పాష్లు భాగ్‍ పాణీను జుఖాళోనా మార్‍నా బద్దల్‍ హుయి జవామతూస్‍. 
ఖైదిల్‍మా ఏక్ జణుబి తిరాక్‍ మారిన్‍ నా ఛుఖైలేనూతిమ్‍ ఇవ్నా ధరీన్‍ మర్రాక్‍ దేనూ కరి సైనికుల్నా సోచ్‍మా ఆయు పన్కీ 
సైన్యాధికారి పౌల్‍నా భచావ్‍నూ కరి సోచీన్‍ ఇవ్నూ సోచ్‍ నాహువదేనూ తిమ్‍, అగడీ తిరాక్‍ మారవాళు ధర్యావ్‍మా కూధిన్‍ భార్‍ ఠగర్‍ఫర్‍ జానూకరీ 
బాకీనూ అద్మీయే పెలుకుల్‍ఫర్‍, చెక్కల్‍ఫర్ ఛల్‍జాను కరి హూఖందిదో. ఇమ్మస్‍ హాఃరూబి ఛుఖైలిన్‍ భార్‍ పడ్యు. 
