﻿లూకా.
20.
ఏక్‍ ధన్మా ఆలయంమా యేసు అద్మీయే ఖారవ్నా దేవ్‍ని వాతే బోల్తోహుయిన్‍, కరతో, ప్రధాన యాజకుల్‍బి, షాస్త్రుల్‍, అజు షాణావ్‍తి మలీన్‍ వ్యతేరెకంతీ ఆయు. 
తూ ఖయ్యూ అధికారంతి తూ ఆ కామ్‍ కరూకరస్‍కీ, ఆ అధికార్‍ తూనా కోన్‍ దిధూకీ, హమారేతి బోల్‍ కరి ఇన పుఛ్చాయు. 
ఇనటేకె, మేబి తూమ్‍నా ఏక్‍ వాత్‍ పుఛ్చావుస్‍, యో మారేతి బోలో. 
యోహాన్ దిదోతె బాప్తిస్మమ్‍ ఆయుకీ, అద్మియేతి ఆయుకీ? కరి యూవ్నా పూఛావమా. 
తేదె యూవ్నే ఆ స్వర్గంతూస్‍ హుయుకరి బోల్యాతో, ఇమ్‍ హూస్యేతో తూమే ష్యే కోనమ్ముకరని కరి అప్నా పుఛావ్‍సే. ఏక్ను యేక్‍ బోలిదు. 
అద్మీయేతీస్‍ హూయూ కరి బులాయోతే అద్మీయే ఖారు అప్నా భండవ్‍తీ మార్‍రక్‍స్యే, ష్యాన కతో యోహాన్‍ ఏక్‍ ప్రవక్త కరి ఘట్‍ నమ్ముకరస్‍ కరి ఇవ్నే సోచిలీన్‍, 
తేదె యూవ్నే హామ్నా మాలంకోయిని కరి బోల్యు. 
తేదె యేసుబి యో అధికారం కెజ్జాతూ ఆయూతే మేబీ బోలిస్‍ కోయిని కరి ఇవ్నేతీ బోల్యొ. 
ఇనబాద్మా యేసు జనం హాఃరవ్తీ ఏక్‍ ఉపమానం బోలానిక్‍ల్యొ, ఏక్‍ అద్మి అంగూర్ను బాగ్‍ నాఖిన్‍, ధూనియానా పాల్‍నా ధిన్‍, దేహ్ఃఫర్ ఛల్‍జాస్‍. 
బాగ్‍ ఫీకాదీన్‍ ఇనూ పాల్‍నూ భాగ్‍ లేవనా టేకె ఏక్‍ దాసుడ్‍నా బోలీమోక్లాస్‍. యో పాల్‍నా లీరాక్యూతే యూవ్నే ఇనా మారీన్‍ ఖాళి హాతే బోలీమోక్‍ల్యు. 
తేదె అజేక్‍ దాస్‍నా బోలీమోకలామా, ఇనాబి ఇమ్మస్ మారీన్‍ ఇజ్జాత్‍ కాఢీన్‍ ఖాళి హాతే బోలిమోకలస్‍. 
బుజుబి యో తీన్‍మనూ అద్మినా బోలీమోకలామా, ఇనాబి ఇమ్మస్ లోహి నీఖా ఖార్కు గాయల్‍ కరీన్‍ బార్‍ ధకల్‍నాక్యూ. 
తేదె యో యాజమాని కీమ్‍కరూలా కరి బోలీన్‍, మారో లాఢ్‍నో ఛీయ్యోనా బోలిమోక్ల్యూతో ఇనాతోబి గౌరవించేసీకి కరి సోచ్యొ. 
కాని యూవ్నే యో యాజమానినో ఛియ్యానా దేఖీన్‍, ఆ టోట్‍ నో వారసుడ్‍ ఆనా మర్రాక్యుతో బైస్‍, ఆ టోట్‍ అప్నాస్‍ స్వంతం హూయిజాస్యే కరి ఇవ్నే బోల్లీదు. 
తేదె ఇనాబి టోట్‍నా బాధర్‍ మర్రాకీన్‍ నాకీదిధూ. ఇనటేకె యో యాజమాని యూవ్నా ష్యాత్‍ కర్షే? యేసు ఇవ్నా పుఛ్చాయో, 
యో ఆయిన్‍ యూవ్నా మర్రాకీన్‍ యో టోట్‍నా అలదాన దీస్యే కరి బోల్యొ. అద్మీయే ఖంజీన్‍ ఇమ్‍ నా హోణుకరి బోల్యు. 
యో యూవ్నా మ్హణి దేఖిన్‍, ఇమ్‍ హుస్యెతో “ఘర్‍ బాంధవాళు కామె ఆవకోయినికరి ఫేకి దిధూతె ఫత్రోస్ ‍ కోణనా ముఢ్క్యు హుయు” కరి లిఖైర్యూతె వాత్‍ ష్యాత్‍? 
“యో ఫత్రోఫర్‍ పఢతే హరేక్‍ టుక్డా హుయిజాస్యే, ఫత్రో కీనాఫర్‍ పడ్చెకి యువ్నె జగ్‍ధైజాస్యే” కరి బోల్యొ. 
ప్రధాన యాజకుల్‍బి, షాస్త్రుల్‍ యో ఉపమాన్‍ బోల్యుతే అప్నాటేకెస్‍ కరి మాలంకర్లీన్‍, తేదెస్ ఇనా ధర్లేనూ కరి దేక్యూ పణికీ యూవ్నే జనాల్‍నా దేఖిన్‍ ఢరీగయూ. 
యూవ్నే ఇన కెహు కెహూ వాతెమా ధర్లేనుకరీ ఇనా ఏన్‍ కర్‍తూహూయిన్‍, అధిపతుల్‍నా, అధికారంనా ధరైనాగ్దేనుకరి, నీతినూ అద్మియేకరి బోలైలేతె థోడు జణనా ఇనకనా బోలిమోక్‍ల్యా. 
యూవ్నే ఆయిన్‍ బోధకుడ్ తూ న్యాయంతి వాతే బోల్తోహుయిన్‍ బొదించుకరస్‍, కోన్‍ ష్యాత్‍ బోల్లీదుతోబి ఢరకోయినితిమ్‍ తూ ఖాచ్ఛీతీస్‍ దేవ్‍ని వాట్‍నా బోలుకరాస్‍ కరి హమ్నా మాలంహూంగ్రస్‍. 
ధర్మషాస్ర్తం ప్రకారంతి హమే రోమా మహారాజ్నా పన్ను బాంధనూ న్యాయంమస్‍నా? కరి ఇనా పుఛ్చాయా. 
యో యూవ్నూ సొఛ్‍నా మాలంకర్లీన్‍, ఏక్‍ దేనారంనా మన దెఖ్కాడొకరి బోల్యొ. 
ఇనాఫర్‍ కీనూ రూపం ఛాకరీ బోలామా యూవ్నే మాహరాజ్ను కరి బోల్యా. 
ఇమ్‍ హూసేతో “మహారాజొను మహారాజ్నా దెవొ, దేవ్నా దేవ్నాస్‍ దెవొ” కరి బోల్యొ. 
ఇవ్నే జనం నా హాఃమె బోల్యొతె వాతేనా యువ్నే గలత్‍ ధరనా కోహూయిని, పన్కి ఇని వాతేనా హాష్యంహుయీన్‍ షొపొహుయిగా. 
మరీగయుతె అద్మీయే అజు జీవిన్‍ ఉట్‍స్యే కోయిని కరి బోలావళు థోఢు సద్దుకయ్యుల్‍ యేసుకన ఆయిన్ ఆమ్‍ పుఛ్చాయు. 
బోధాకుడ్‍! భావణ్‍ జీవిరవానూ వోఖాత్‍స్‍ ఏక్‍నో భై లఢ్‍కా కొయిన్తే మరీగయుతో, ఇనో భైని బావణ్‍నా య్హా కర్లీన్‍, ఇనా భైనా లఢ్‍కా దేనూ కరి మోషేను ధర్మాసాస్త్రమా లిఖ్కిరాక్యొస్‍. 
ఖాత్‍ భైయ్యే థూ, యూవ్నామా మోటో భై య్హా కర్లీన్, పణికీ యో లఢ్‍కా కోయిని తీమ్‍ మరీజాస్‍. 
తేదె ఇనో భై ఇని భావణ్‍నా రాఖీలేస్‍, యో బి లడ్కా కొయినితిమ్‍ మరిగయో, 
ఇమ్మస్‍ తీన్‍మనోబి భైని బావణ్‍నా రాఖిలీన్‍ యోబి మరిజాస్‍ ఇమ్మస్‍ హాఃతేజణాబి ఇనా రాఖిలీన్‍ లడ్కాకొయిని తిమ్మస్‍ మరిగయు, 
తేదె యో బాయికోబి మరిజాస్‍. తేదె మరీగయుతే హాఃరు జీవిన్‍ ఉట్‍స్యేతో? 
యో బాయికో యో ఖాతే జణామ కీనా బావణ్‍నితర ర్హాస్యే యో ఖాతే జణానబి బావణ్‍నితర రై కాహేనా? 
ఇనటేకె యేసు ఆ ములక్‍ను అద్మీయే య్హా కర్లేతూ హుయిన్‍ కర్తూరస్‍. 
“పన్కీ మర్యుతే అద్మి జీవీవూటీన్‍ స్వర్గంమా జానుకరీ బోలావలు య్హా కర్షెకొయిని కార్లేకోయినీ.” 
“ఇవ్నే పునరుథ్‍మా భాగ్‍ హుయిన్‍, దేవదూతల్తీ భరొబార్ హుయిరసే, దేవ్ను లడ్కా. ఇనటేకె యూవ్నే కెదేబి మర్‍సే కోయిని.” 
భళుకరతే ఢాగ్నా గూర్చీ లిఖ్యూతే ఇనమా ప్రభు అబ్రాహామ్‍నో, ఇస్సాక్‍నో, యాకోబ్‍నో దేవ్‍ కరి బోల్తోహుయిన్‍, మరీహుయు ఊట్‍సే కరి మోషే బోల్యోతో, 
యో జీవ్తానస్‍ దేవ్‍ పన్కీ మర్యాహుయనా దేవ్‍ కాహే; దేవ్ను ఢోళమ హాఃరుబీ జీవ్తూ ఛాకరీ బోల్యో. 
ఇనటేకె షాస్త్రుల్‍ బోధకుడ్‍, తూ ఘను అష్యల్‍ బోల్యొకరి బోల్యా. 
బాద్మా ఇవ్నే ఇన అజు సాత్బి పుఛ్చావన కోహుయూని. 
యేసు ఇవ్నేతీ, “క్రీస్తు దావీద్‍నో ఛీయ్యో కరి జనాల్‍ కీమ్‍ బోలుక్రస్‍” కరి పుఛ్చాయో. 
మే తార వైరియేనా తార గోడనా హేట్‍ పాదపీట్‍నితర ల్యావతోడీ, తూ మర ఖావ్వాత్‍ను భాజు బేహ్ఃకరి బోలిన్‍, దేవ్‍ మారో దేవ్‍తీ బోల్యొకరి కీర్తననూ పుస్తకంమా దావీద్‍ బోలిరాక్యోస్‍. 
దావీద్‍ ఇనా ప్రభుకరి బోల్యొతొ, యోకిమ్ ఇనా ఛియ్యో హుస్యేకరి బోల్యొ. 
జనాభో హాఃరు హఃమస్తూ ర్హావమా, తేదె యేసు సీష్యుల్‍ ఆమ్‍ బోల్యొ, 
షాస్ర్తుల్‍తీ జత్తన్‍ ర్హవో, ఇవ్నే లంభ లుంగఢా పేర్లీన్‍ బజార్ని గల్లీయేమా ఫర్నూహుయిన్‍ వందనాల్‍నా కరిన్‍, విందుల్‍మా అగ్రస్థాన్‍, ప్రార్థనాను జోగోమా అగ్రపీట్‍ హోణు కరి కోషిష్‍ కర్తు ర్హాస్‍. 
యూవ్నే విధవరాల్‍నూ ఆస్తీనా లాపడ్‍లేతు హుయిన్‍, ఉఫర్‍ మాయ వేషంనూ ఘణు మోటు ప్రార్దన కర్తు ర్హాస్‍. యూవ్నే బుజు ఘణు సిక్చమల్సే. 
