MAT 1:1 ಹೈರಿತೆ ಯೇಸು ಕ್ರಿಸ್ತನಿ ಗುರುಗುರಬ್‍ಲ್ಯಾನಿ ಪಟ್ಟಿ: ಯೇಸು ದಾವೀದನೊ ಖಾಂದಾನ್‌ವಾಳೊ, ದಾವೀದ ಅಬ್ರಹಾಮನೊ ಖಾಂದಾನ್‌ವಾಳೊ.
MAT 1:2 ಅಬ್ರಹಾಮ್ ಇಸಾಕನೊ ಬಾ, ಇಸಾಕ್ ಯಾಕೋಬನೊ ಬಾ, ಯಾಕೋಬನ ಯೆಹೂದ ಅಜು಼ ಇನ ಭೈಯೇ ಪೈದಹುಯ.
MAT 1:3 ಯೆಹೂದ ಪೆರೆಚ ಅಜು಼ ಜೆರಹಾನೊ ಬಾ (ಅವ್ಣಿ ಆಯ ತಾಮರ), ಪೆರೆಚ ಹೆಚ್ರೋನನೊ ಬಾ, ಹೆಚ್ರೋನ ಅರಾಮನೊ ಬಾ.
MAT 1:4 ಅರಾಮ ಅಮ್ಮಿನಾದಾಬನೊ ಬಾ, ಅಮ್ಮಿನಾದಾಬ ನಹಶೋನನೊ ಬಾ, ನಹಶೋನ ಸಲ್ಮೋನನೊ ಬಾ.
MAT 1:5 ಸಲ್ಮೋನಬಿ ರಾಹಾಬನೊ ಛಿಯ್ಯೊ ಬೋವಜ, ಬೋವಜಬಿ ರೂತ್‍ನೊ ಛಿಯ್ಯೊ ಓಬೇದ, ಓಬೇದ ಇಷಯನೊ ಬಾ.
MAT 1:6 ಇಷಯ ದಾವೀದ್‌ ರಾಜಾ಼ನೊ ಬಾ, ದಾವೀದ ಸೊಲೊಮೋನನೊ ಬಾ (ಸೊಲೊಮೋನ್ನಿ ಆಯ ಪಹಿಲೆ ಉರಿಯಾನಿ ಬಾವಣ್‍ ಹುಯಿರ‍್ಹೀಥಿ),
MAT 1:7 ಸೊಲೊಮೋನ ರೆಹಬ್ಬಾಮ್ನೊ ಬಾ, ರೆಹಬ್ಬಾಮ ಅಬೀಯನೊ ಬಾ, ಅಬೀಯ ಆಸನೊ ಬಾ.
MAT 1:8 ಆಸನ ಯೆಹೋಷಾಫಾಟನೊ ಬಾ, ಯೆಹೋಷಾಫಾಟ ಯೆಹೋರಾಮನೊ ಬಾ, ಯೆಹೋರಾಮ ಉಜ್ಜೀಯಾನೊ ಬಾ.
MAT 1:9 ಉಜ್ಜೀಯ ಯೋತಾಮನೊ ಬಾ, ಯೋತಾಮ ಆಹಾಜನೊ ಬಾ, ಆಹಾಜ ಹಿಜ್ಕೀಯಾನೊ ಬಾ.
MAT 1:10 ಹಿಜ್ಕೀಯ ಮನಸ್ಸೆನೊ ಬಾ, ಮನಸ್ಸೆ ಆಮೋನನೊ ಬಾ, ಆಮೋನ ಯೋಷೀಯಾನೊ ಬಾ.
MAT 1:11 ಯೋಷೀಯಾನ ಯೆಕೊನ್ಯ ಅಜು಼ ಇನ ಭೈಯೇ ಪೈದಹುಯ. ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರ್‌ಲಿಗಯೂತೆ ಯೋ ವಖ್ಹತ್‌ಮ ಅವ್ಣೆ ಪೈದಹುಯುತೆ.
MAT 1:12 ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರಿಲೀನ್ ಜಾ಼ವಾನ ಬಾದ್‌ಮ, ಪೈದಹುಯುತೆ ಇವ್ಣಿ ಖೇಣಿ, ಯೆಕೊನ್ಯ ಶೆಯಲ್ತಿಯೇಲ್‌ನೊ ಬಾ, ಶೆಯೆಲ್ತಿಯೇಲ್ ಜೆರುಬ್ಬಾಬೆಲ್‍ನೊ ಬಾ.
MAT 1:13 ಜೆರುಬ್ಬಾಬೆಲ್ ಅಬಿಹೂದನೊ ಬಾ, ಅಬಿಹೂದ ಎಲ್ಯಕೀಮ್‌ನೊ ಬಾ, ಎಲ್ಯಕೀಮ್ ಅಜೋರನೊ ಬಾ.
MAT 1:14 ಅಜೋರ ಸದೋಕನೊ ಬಾ, ಸದೋಕ ಅಖೀಮನೊ ಬಾ, ಅಖೀಮ ಎಲಿಹೂದನೊ ಬಾ.
MAT 1:15 ಎಲಿಹೂದ ಎಲಿಯಾಜರನೊ ಬಾ, ಎಲಿಯಾಜರ ಮತ್ತಾನನೊ ಬಾ, ಮತ್ತಾನ ಯಾಕೋಬನೊ ಬಾ.
MAT 1:16 ಯಾಕೋಬ ಯೋಸೇಫ್‌ನೊ ಬಾ, ಯೋಸೇಫ ಮರಿಯನೊ ಬಾವ್ರಿ. ಮರಿಯ ಯೇಸುನಿ ಆಯ, ಯೇಸುನ, ಬಚಾ಼ಡವಾಳೊ ಕ್ರಿಸ್ತ ಕರಿ ಚಿಕರ್ತುಥು.
MAT 1:17 ಅಬ್ರಹಾಮ್‍ಥು ಧರಿನ್ ದಾವೀದತೋಡಿ ಚೌ಼ಧ ಮುಂಡಿ, ದಾವೀದ್‌ಥು ಧರಿನ್ ಬಾಬೇಲ್‌ನ ಧರಿಲಿಗಯೂತೆ ಇವ್ಣಾತೋಡಿ ಚೌ಼ಧ ಮುಂಡಿ, ಬಾಬೇಲ್‌ನ ಧರಿಲಿಗಯೂತೆ ಹಿಜ್ಜಾ಼ಥು ಧರೀನ್ ಕ್ರಿಸ್ತಲಗು ಚೌ಼ಧ ಮುಂಡಿ.
MAT 1:18 ಯೇಸು ಕ್ರಿಸ್ತ ಪೈದಹುಯೊತೆ ಕಿಮ್‌ಕತೊ; ಇನಿ ಆಯ ಮರಿಯನ ಯೋಸೇಫ್‌ಥಿ ಖ್ಹಗೈ ನಾಖಿರಾಖ್ಯೂಥು, ಕತೋಬಿ ಇವ್ಣೊ ವ್ಯಹಾ ಹುವಾನ ಅಗಾಡಿಸ್, ಯೋ ಪವಿತ್ರಾತ್ಮಾಥಿ ಬೇಜೂನಿ ಹುಯಿರ‍್ಹೀಥೀತೆ ಇನ ಮಾಲುಮ್‌ಪಡ್ಯು.
MAT 1:19 ಯೋಸೇಫ ಏಕ್‌ ನೀತಿವಾಳೊ ಅದ್ಮಿ ಹುಯಿರ‍್ಹೋಥೊ, ಇನಖ್ಹಾಜೆ ಯೋಸೇಫ ಅದ್ಮಿನ ಖ್ಹಾಮ್ಣೆ ಮರಿಯನಿ ಖ್ಹರಮ್‌ ನಾ ಕಾಡ್ಣು ಕರಿ, ಕಿನಾಬಿ ಮಾಲುಮ್‌ಪಡ್ಣುನಾತೆ ಇಮ್‌, ಖ್ಹಗೈನ ತೋಡಿನಾಕ್‌ಣು ಕರಿ ಥೊ.
MAT 1:20 ಯೋ ಇಮ್‌ ಸೋಚುಕರಾನಿ ವಖ್ಹತ್‌ಮ, ದೇವ್ನದೂತನೆ ಇನ ಖ್ಹೋಣ್ಯಮ ದೆಖೈನ್, “ದಾವೀದನೊ ಖಾಂದಾನ್‌ವಾಳ ಯೋಸೇಫ, ಮರಿಯನ ತಾರಿ ಬಾವಣ್‍ ಕರಿಲ್ಯವಾನ ಡರ್‌ನಕೊ. ಯೋ ಪವಿತ್ರಾತ್ಮಥೀಸ್ ಬೇಜೂನಿ ಹುಯಿರ‍್ಹೀಸ್ತೆ.
MAT 1:21 ಯೋ ಏಕ್‌ ಪರ್ಖ್ಹೊ ಲಡ್ಕಾನ ಜ಼ಣ್‌ಶೆ, ತೂ ಇನ ಯೇಸುಕರಿ ನಾಮ್ ಮ್ಹೇಲ್ನು. ಶನಕತೊ, ಯೋ ಇನ ಅದ್ಮಿಯೇವ್ನ ಪಾಪ್‌ಮಾಥು ಬಚಾ಼ವ್‍ಶೆ” ಕರಿ ಬೋಲ್ಯೊ.
MAT 1:22 ಪ್ರಭುನೆ ಪ್ರವಾದಿಯೇನ ಮ್ಹೋಡವಾಟೆ ಬೋಲಾಯೋತೆ ವಾತೆ ಖ್ಹಾರು ಚಾ಼ಲಾನಟೇಕೆ, ಆ ಖ್ಹಾರು ಚಾ಼ಲ್ಯುತೆ.
MAT 1:23 ಯೋ ವಾತೆ ಶಾತ್‌ಕತೊ, “ಹಂದೇಖೊ, ಏಕ್‌ ಕವಾರಿ ಬೇಜೂನಿ ಹುಯಿನ್, ಏಕ್‌ ಛಿಯ್ಯಾನ ಜ಼ಣ್‌ಶೆ. ಅಜು಼ ಇನ, ‘ಇಮ್ಮಾನುವೇಲ್’ ಕರಿ ನಾಮ್ ಮ್ಹೇಲ್‌ಶೆ!” ಇಮ್ಮಾನುವೇಲ್ ಕತೊ, “ದೇವ್ ಅಪ್ಣ ಜೋ಼ಡೆ ಛಾ಼” ಕರಿ.
MAT 1:24 ಯೋಸೇಫ ನಿಂದರ್‌ಮಾಥು ಹೊಷಾರಿ ಹುಯಿನ್ ಉಠಾನ ಬಾದ್‌ಮ, ದೇವ್ನದೂತನೆ ಬೋಲ್ಯೋತೆ ಇಮ್ಮಸ್, ಮರಿಯನ ವ್ಯಹಾ ಕರಿಲಿದೊ.
MAT 1:25 ಕತೋಬಿ ಮರಿಯ ಛಿಯ್ಯೊ ಪೈದಾಕರಾತೋಡಿ, ಯೋಸೇಫ ಇನಜೋ಼ಡೆ ಖ್ಹುತೊಕೊಯ್ನಿ. ಯೋಸೇಫ್‌ನೆ ಯೋ ಲಡ್ಕಾನ ಯೇಸು ಕರಿ ನಾಮ್ ಮ್ಹೇಲ್ಯೊ.
MAT 2:1 ಹೆರೋದ ರಾಜ಼ ಹುಯಿರ‍್ಹೊಥೋತೆ ವಖ್ಹತ್‌ಮ, ಯೂದಾಯ ತಬರ್‌ಖಾನು ಬೇತ್ಲೆಹೇಮ್ ಕರಿ ಗಾಮ್ಮ ಯೇಸು ಪೈದಹುಯೊ. ಅನಬಾದ್‌ಮ, ಥೋಡು ಗ್ಯಾನಿ ಅದ್ಮಿಖ್ಹಾರು, ಪೂರಬ್ ದಿಕ್ನು ದೇಖ್ಹ್‌ಥು ಯೆರೂಸಲೇಮ್‌ನ ಆಯಿನ್,
MAT 2:2 “ಯೆಹೂದ್ಯರ್‌ನೊ ರಾಜಾ಼ ಹುಯಿನ್ ಪೈದಹುಯುತೆ ಲಡ್ಕು ಕಿಜ಼್ಜಾ ಛಾ಼? ಯೋ ಪೈದಾಹುಯು ಕರಿ ಖ್ಹಣೇದ್ ವತಾಳಸ್ತೆ ಶುಕ್ಕರ್‌ನ, ಹಮೆ ಪೂರಬ್ ದಿಕ್‍ಥು ದೇಖಿನ್, ಇನ ಆಡ್‍ಪಡಿನ್ ಖ್ಹಲಾಮ್ ಕರಾನ ಐರ‍್ಹಾಸ್” ಕರಿ ಬೋಲ್ಯು.
MAT 2:3 ಅನಖ್ಹಮ್‌ಜಿನ್, ರಾಜ಼ ಹೆರೋದನ ಅಜು಼ ಇನಜೋ಼ಡೆ ಯೆರೂಸಲೇಮ್‌ನು ತಮಾಮ್‌ ಅದ್ಮಿನ ದಿಲ್ಮ ಘಣು ಕಲಾವ್ಣಿ ಹುಯು.
MAT 2:4 ತದೆ ಹೆರೋದನೆ ಯೆಹೂದ್ಯರ್‌ನ ಖ್ಹಾರಸ್ ಗಲ್‌ಢಯಾಜಕರ್‌ನ ಅಜು಼ ವಚನ್ ಶಿಕಾಡವಾಳ ಪೊಂಡಿತ್‍ನ ಎಕ್ಟು ಕರೀನ್, “ಕ್ರಿಸ್ತ ಪೈದಾ ಹೋಣುತೆ ಕಿಜ಼್ಜ?” ಕರಿ ಪುಛಾ಼ಯೊ.
MAT 2:5 ಇವ್ಣೆ ಇನ, “ಯೂದಾಯ ತಬರ್‌ಖಾನು ಬೇತ್ಲೆಹೇಮ್ಮಾಸ್, ಶನಕತೊ-ಪ್ರವಾದಿವ್‍ನೆ ಅಮ್‍ಬೋಲ್ಯುಕಿ;
MAT 2:6 ಯೆಹೂದ ತಬರ್‌ಖಾನು ಬೇತ್ಲೆಹೇಮ್, ಯೆಹೂದನು ಮುಖ್ಯ ಖ್ಹಯೇರೇಥಿ, ತೂ ಎತ್ರೇಬಿ ಶಾತ್ ನ್ಹಾನು ಕಾಹೆ. ಶನಕತೊ ತಾರ ಮಹಿಥು ಏಕ್‌ ಅದಿಕಾರಿ ಆವ್‌ಶೆ, ಯೋ ಮಾರು ಅದ್ಮಿ ಹುಯಿರ‍್ಹೂತೆ ಇಸ್ರಾಯೇಲ್‌ನ ಚ಼ಲಾವವಾಳೊ! ಕರಿ ಪ್ರವಾದಿನ ಹಾತೆ ಲಿಖೈರ‍್ಹುಸ್” ಕರಿ ಬೋಲ್ಯೊ.
MAT 2:7 ತದೆ ಹೆರೋದನೆ ಕಿನಾಬಿ ಮಾಲುಮ್‌ಕೊಂತೆ ಇಮ್‌, ಯೋ ಗ್ಯಾನಿ ಅದ್ಮಿಖ್ಹಾರಾನ ಬುಲೈನ್, ಯೋ ಶುಕ್ಕರ್ ದೆಖಾಯೂತೆ ಬರೋಬರ್‌ನಿ ವಖ್ಹತ್‌ನ ಪುಛೈ಼ಲಿದೊ.
MAT 2:8 ಅಜು಼ ಇವ್ಣುನ, “ತುಮೆ ಜೈ಼ನ್ ಬರೋಬರ್‌ಥಿ ಯೋ ಲಡ್ಕಾನ ಢೂಂಡೊ, ಅಜು಼ ಯೋ ಮಳಾನ ಬಾದ್‌ಮ ಮನ ಬೋಲೊ, ಮೇಬಿ ಅಯಿನ್ ಯೋ ಲಡ್ಕಾನ ಆಡ್‍ಪಡಿನ್ ಖ್ಹಲಾಮ್‌ಕರುಸ್” ಕರಿ ಬೋಲಿನ್ ಇವ್ಣುನ ಬೇತ್ಲೆಹೇಮ್‌ನ ಮೋಕ್ಲಿದಿದೊ.
MAT 2:9 ಇವ್ಣೆ ರಾಜಾ಼ನಿ ವಾತೆ ಖ್ಹಮ್‌ಜಿನ್‌, ವಳ್ಯುಜಾ಼ತುಥೂತೆ ತದೆ ಪೂರಬ್ ದೇಖ್ಹ್‌ಮ ಇವ್ಣುನ ದೆಖಾಯುಥೂತೆ ಯೋ ಶುಕ್ಕರ್ ಇವ್ಣುನ ಪಾಛು಼ ದೆಖಾಯು. ಇವ್ಣೆ ಯೋ ಶುಕ್ಕರ್‌ನ ದೇಖಿನ್, ಘಣು ಖ್ಹುಶಿಖಾದು! ಯೋ ಶುಕ್ಕರ್ ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲ್ತುಹುಯಿನ್, ಲಡ್ಕು ಥೂತೆ ಝ಼ಗೋಕನ ಆಯಿನ್ ಭೀರಿಗಯು.
MAT 2:11 ತದೆ ಇವ್ಣೆ ಯೋ ಘರ್‌ಮ ಜೈ಼ನ್, ಯೋ ಲಡ್ಕಾನ ಇನಿ ಆಯ ಮರಿಯನ ದೇಖಿನ್, ಇನ ಆಡ್‍ಪಡಿನ್ ಆರಾದನೆ ಕರ‍್ಯು. ಅಜು಼ ಇವ್ಣೆ ಲೈರಾಖ್ಯುಥೂತೆ ಇನಾಮ್ನ ಬುತ್ತಾವ್‍ನ ಛೋ಼ಡಿನ್ ಇನಾಮಾಥು ಖ್ಹೊನ್ನು, ಖ್ಹಾಲರ‍್ಯೊ ಅಜು಼ ರಕ್ತಬೋಳನ ಕಾಡಿನ್ ಇನ ಕಾಣ್ಕೆ ದಿದು.
MAT 2:12 ಅನಬಾದ್‍ಮ ದೇವ್ ಇವ್ಣ ಖ್ಹೋಣ್ಯಮ ದೆಖೈನ್, “ತುಮೆ ಹೆರೋದಕನ ಪಾಛು಼ ಫರಿ ನಾ ಜಾ಼ವ್ಣು” ಕರಿ ಝೇತಾವಖ್ಹತರ್, ಇವ್ಣೆ ಬಿಜೇಕ್ ವಾಟೆಕರಿ ಇವ್ಣ ದೇಖ್ಹ್‌ನ ಪಾಛು಼ಫರಿ ಚ಼ಲ್ಯುಗಯು.
MAT 2:13 ಇವ್ಣೆ ಜಾ಼ವಾನ ಬಾದ್‌ಮ, ದೇವ್ನದೂತ ಯೋಸೇಫ್‌ನ ಖ್ಹೋಣ್ಯಮ ದೆಖೈನ್, “ಹೆರೋದ ಆ ಲಡ್ಕಾನ ಮಾರಿನಾಕ್ಣು ಕರಿ ಢೂಂಡುಕರಾಸ್, ಇನಖ್ಹಾಜೆ ತೂ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಈಜಿಪ್ಟ್ ದೇಖ್ಹ್‌ನ ಮಿಲೈ ಜಾ಼. ಅಜು಼ ಮೇ ಬೋಲಾತೋಡಿ ಹಿಜ್ಗಾ಼ಸ್ ರ‍್ಹೇ” ಕರಿ ಬೋಲ್ಯೊ.
MAT 2:14 ತದೆ ಯೋಸೇಫ ಉಠೀನ್, ರಾತ್ನಿ ವಖ್ಹತ್‌ಮಾಸ್‌, ಯೋ ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಈಜಿಪ್ಟ್‌ನ ನಿಕ್ಳಿಗಯೊ.
MAT 2:15 ಹೆರೋದ ಮರಾತೋಡಿ ಯೋ ಹಿಜ್ಗಾ಼ಸ್ ಥೊ. “ಮಾರ ಛಿಯ್ಯಾನ ಮೇ ಈಜಿಪ್ಟ್ ದೇಖ್ಹ್‌ಮಾಥು ಬುಲಾಯೊ” ಕರಿ ಪ್ರಭುನ ಪ್ರವಾದಿನ ಮ್ಹೋಡಥಿ ಬೋಲಾಯೋತೆ ವಾತೆ ಅಮ್ ಪೂರಹುಯು.
MAT 2:16 ಯೋ ಗ್ಯಾನಿ ಅದ್ಮಿಖ್ಹಾರು ಇನ ಠಗೈನಾಖ್ಯು ಕರಿ ಹೆರೋದನೆ ಘಣು ಖೀಜ಼್‌ ಕರೀನ್‌, ಇವ್ಣೇಥಿ ಪುಛಾ಼ಯೊಥೋತೆ ವಖ್ಹತ್‌ನ ಬರೋಬರ್‌ಥಿ ಮಾಲುಮ್ ಕರ‍್ಲಿನ್, ಆಳ್‌ನ ಖ್ಹಾರು ಮೋಕ್ಲಿನ್, ಬೇತ್ಲೆಹೇಮ್ ಅಜು಼ ಇನ ಅಶ್‌ಪಿಶ್‍ ಖ್ಹಾರುಸ್ ಗಾಮ್‌ನು, ಬೇ ವರಖ್ಹ್‌ನ ಮಹಿನು ಖ್ಹಾರಸ್ ಪರ್ಖ್ಹಾ ಲಡ್ಕಾನ ಮಾರಿನಾಖಿದೆವ್ಣು ಕರಿ ಹುಕುಮ್ ದಿದೊ.
MAT 2:17 ಯೆರೆಮೀಯ ಕರಿ ಪ್ರವಾದೀನೆ ಬೋಲ್ಯೋತೆ ವಾತೆ ಯೋ ಹಗಾಮ್ಮ ಪೂರಹುಯು ಯೋ ಶಾತ್‌ಕತೊ,
MAT 2:18 “ರಾಮಾಮ ಬಳೆಳ್ಹಾಟ್ ಖ್ಹಮ್‌ಜಾ಼ಯು, ರೊವಣ್-ಝೊವಣ್ಣು ಅವಾಜ಼್ ಹುಯು; ರಾಹೇಲ್‍ ಇನ ಲಡ್ಕಾವ್‍ನಖ್ಹಾಜೆ ರದನ್ಯಕರಿನ್, ಇವ್ಣೆ ಮರಿಗಯೂತೆ ಇನಖ್ಹಾಜೆ, ಸಮಾಧಾನ್ ಕೋಹುಯಿನಿ” ಕರಿ ಬೋಲಾನುಸ್.
MAT 2:19 ಹೆರೋದ ಮರಿಜಾ಼ವಾನ ಬಾದ್‌ಮ, ಈಜಿಪ್ಟ್‌ಮ ದೇವ್ನದೂತ ಯೋಸೇಫ್‌ನ ಖ್ಹೋಣ್ಯಮ ದೆಖೈನ್,
MAT 2:20 “ತೂ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಪಾಛು಼ಫರಿನ್ ಇಸ್ರಾಯೇಲ್‌ ದೇಖ್ಹ್‌ನ ಜಾ಼, ಶನಕತೊ ಲಡ್ಕಾನು ಜಾನ್‌ ಕಾಡ್ಣುಕರಿ ಥೋತೆ ಯೋ ಮರಿಗಯೊ” ಕರಿ ಬೋಲ್ಯೊ.
MAT 2:21 ತದೆ ಯೋಸೇಫ್‌ನೆ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಪಾಛು಼ಫರಿ ಇಸ್ರಾಯೇಲ್‌ ದೇಖ್ಹ್‌ನ ಗಯೊ.
MAT 2:22 ಕತೋಬಿ ಆರ್ಖೆಲಾಯನೆ ಇನೊ ಬಾ ಹೆರೋದಾನ ಬದಲ್ ಯೂದಾಯನ ಚ಼ಲವ್‍ಕರಾಸ್‌ ಕರಿ ಖ್ಹಮ್‌ಜಿನ್‌, ಹಿಜ಼್ಜಾ ಜಾ಼ವಾನ ಡರ‍್ಯೊ. ತದೆ ಯೋಸೇಫ್‌ನೆ ಖ್ಹೋಣ್ಯಮ ದೇವ್ನಿ ಹುಕುಮ್‌ನ ಲೀನ್, ಗಲಿಲಾಯ ತಬರ್‌ಖಾನ ಗಯೊ.
MAT 2:23 ಅಜು಼ ನಜ಼ರೇತ್ ಕರಿ ಗಾಮ್ಮ ಆಯಿನ್ ಹಿಜ್ಗಾ಼ ಘರ್ ಕರೀನ್ ಥೊ. ಅನೇಥಿ ಇನ, “ನಜ಼ರೇತ್‌ವಾಳೊ ಕರಿ ನಾಮ್ ಆವ್‌ಶೆ” ಕರಿ ಪ್ರವಾದಿಯೇನೆ ಬೋಲ್ಯೂತೆವಾತೆ ಪೂರಹುಯು.
MAT 3:1 ಯೋ ದನೂಮ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಯೂದಾಯಾನಿ ಉಜ್ಜಾ಼ಡಿ ಝ಼ಗೋಮ ಬೋಧನೆನ ಬೋಲ್ತೊಹುಯಿನ್,
MAT 3:2 “ಪಾಪ್‌ಥಿ ಫರಿನ್ ನಿಕ್ಳೊ, ಶನಕತೊ ಸೊರ್ಗ ರಾಜ್ಯ ಖನ್ನೆ ಐಗೈ!” ಕರಿ ಬೋಲ್ತೊನಿಕ್‌ಳ್ಯೊ.
MAT 3:3 “ಪ್ರಭುನಿ ವಾಟ್ನ ಖ್ಹವಾರೊ; ಇನಿ ವಾಟ್ನ ಖ್ಹೂದುಕರೊ! ಕರಿ ಉಜ್ಜಾ಼ಡಿ ಝ಼ಗೋಮ ಚಿಕ್ರಾವಾಳಾನಿ ಅವಾಜ಼್ ಛಾ಼” ಕರಿ ಪ್ರವಾದಿ ಯೆಶಾಯನೆ ಬೋಲ್ಯೋತೆ ಅನಿಸ್‌ ಬಾರೇಮ.
MAT 3:4 ಯೋಹಾನನು ಲುಂಗ್ಡ ಊಟ್ನ ಕೇಖ್ಹ್‌ಥಿ ಬಣಿರ‍್ಹೂಥು; ಇನಿ ಕಂಬರ್‌ನ ಚಾ಼ಂಬ್ಡಾನು ಕಂಬರ್‌ಪಟೊ ಭಾಂದಿರಾಕ್‌ತೋಥೊ, ಚಿಡ್ಡೋಬಿ ಜ಼ಂಗಳ್ನಿ ಶೇತ್‌ ಇನು ಖಾಣು ಹುಯಿರ‍್ಹುಥು.
MAT 3:5 ಅದ್ಮಿಖ್ಹಾರು ಯೆರೂಸಲೇಮ್‌ಥುಬಿ, ಹಿಡಿ ಯೂದಾಯ ತಬರ್‌ಖಾಥುಬಿ, ಅಜು಼ ಯೊರ್ದನ್‌ ನದ್ದಿನು ಅಶ್‌ಪಿಶ್‍ ಥೂತೆ ಖ್ಹಾರ ತಬರ್‌ಖಾಥುಬಿ ಇನಾಕನ ಆಯಿನ್;
MAT 3:6 ಇವ್ಣು-ಇವ್ಣು ಪಾಪ್ನ ಕಬೂಲಿಲೀನ್‌, ಯೊರ್ದನ್‌ ನದ್ದಿಮ ಯೋಹಾನಥಿ ಬ್ಯಾಪ್ತಿಸ್ಮ ಕರೈಲೆವ್‌ಕರ್ತುಥು.
MAT 3:7 ಕತೋಬಿ ಫರಿಸಾಯರ್‌ವಾಳಮ ಅಜು಼ ಸದ್ದುಕಾಯವಾಳಮ ಕೈಯೆಕ್ಕಿ ಜ಼ಣು ಇನಾಕನ ಬ್ಯಾಪ್ತಿಸ್ಮ ಕರೈಲೆವಾನ ಆವ್‍ಕರಾತೆ ದೇಖಿನ್‌, ಯೋಹಾನನೆ ಇವ್ಣುನ, “ಅಲಾ ಖ್ಹಾಪ್‌ನಿ ಪಿಳ್ಗಿವಾಳವೊ! ಖ್ಹಾಮ್ಣೆ ಉಳ್ಯಾವತೆ ದೇವ್ನ ಇರಾದೇಥಿ ತುಮೆ ಬಚಿಜಾ಼ಶು ಕರಿ, ತುಮೂನ ಬೋಲ್ಯುತೆ ಕೋಣ್?
MAT 3:8 ಇಮ್‍ಕತೊ, ತುಮೆ ಪಾಪ್ನ ಮ್ಹೇಲಿನ್ ಫರಿಗಯಕರಿ ವತಾಳನಖ್ಹಾಜೆ ಬರೋಬರ್‌ಥಿ ಚಾ಼ಲ್‌ಮ ವತಾಳೊ.
MAT 3:9 ಅಬ್ರಹಾಮ್‌ ಹಮಾರೊ ಗುರು ಕರಿ ಬೋಲಾಥಿ ತುಮೆ ದೇವ್ನ ನಿಶಥ್ಥಿ ಬಚಿಜಾ಼ಶು ಕರಿ ನಕೊ ಸೋಚೊ, ಮೇ ತುಮೂನ ಬೋಲುಸ್ಕಿ, ದೇವ್ ಅಬ್ರಹಾಮ್‌ನಖ್ಹಾಜೆ ಆ ಬಂಡೇವ್‌ಥಿಬಿ ಲಡ್ಕಾವ್ನ ಉಬ್‍ಜಾ಼ವ್‍ಶೆ ಕರಿ ತುಮೂನ ಬೋಲುಸ್.
MAT 3:10 ಹಮ್ಕೇಸ್‌ ಝಾ಼ಡಾವ್‍ನಿ ಜ಼ಡ್‌ಪರ್‌ ಕುರ‍್ಹಾಡಿ ಮ್ಹೇಲೈರ‍್ಹಿಸ್; ಇನಖ್ಹಾಜೆ ಅಛ್ಛು಼ ಪಂಡು ದೇಯಿಕೊಂತೆ ಹರೇಕ್ ಝಾ಼ಡಾವ್‌ನ ಕತ್ರಿನ್‌ ಆಗ್‌ಮ ನಾಕ್‌ಶೆ.
MAT 3:11 ಮೇತೊ ಮನ್ ಫರಾವನ ತುಮೂನ ಪಾಣಿಥಿ ಬ್ಯಾಪ್ತಿಸ್ಮ ಕರವ್‍ಕರುಸ್. ಕತೋಬಿ ಮಾರ ಬಾದ್ಮ ಆವವಾಳೊ ಮಾರೇಥಿಬಿ ಶಕತ್‌ವಾಳೊ. ಇನಿ ಖೋಖ್ಹ್‌ಡಾನ ಢೋವಾನಾಬಿ ಮೇ ಲ್ಹಾಯೇಕ್‍ಕೊಯ್ನಿ; ಯೊ ಪವಿತ್ರಾತ್ಮಥಿಬಿ ಆಗ್‍ಥೀಬಿ ತುಮೂನ ಬ್ಯಾಪ್ತಿಸ್ಮ ಕರಾವ್‌ಶೆ.
MAT 3:12 “ಇನ ಹಾತ್‌ಮ ಖ್ಹುಪ್‌ಡು ಧರಿರಾಖ್ಯೋಸ್‌, ಇನ ಖಳಾಮಾನು ರಾಶ್‌ನ ತೂರಿನ್‌, ಅಛ಼್ಛ ಕರೀನ್, ಘವ್‌ನ ಕಣ್ಗಿಮ ಭರಿಲೀನ್‌ ಪೊಟ್ಟಾನ ಉಝಾ಼ವಕೊಂತೆ ಆಗ್‌ಮ ಬಾಳಿನಾಕ್‌ಷೆ” ಕರಿ ಬೋಲ್ಯೊ.
MAT 3:13 ಯೋ ದನೂಮ ಯೇಸು ಯೋಹಾನಥಿ ಬ್ಯಾಪ್ತಿಸ್ಮ ಕರೈಲೇವ್ಣು ಕರಿ ಗಲಿಲಾಯ ತಬರ್‌ಖಾಥು ಯೊರ್ದನ್‌ ನದ್ದಿಕನ ಆಯೊ.
MAT 3:14 ತದೆ ಯೋಹಾನನೆ, “ಮೇ ತಾರೇಥಿ ಬ್ಯಾಪ್ತಿಸ್ಮ ಕರೈಲೆವ್ಣುತೆ, ಕತೋಬಿ ತೂ ಮಾರಕನ ಐರ‍್ಹೋಸ್ತೆ ಕಿಮ್?” ಕರಿ ಬೋಲ್ಯೊ.
MAT 3:15 ಕತೋಬಿ ಯೇಸುನೆ ಇನ, “ಹಮ್ಕೆ ಆ ಕರಾನ ಮಾನಿಜಾ಼. ಅಮ್ ಕರಾಥಿ ಅಪ್ಣೆ ದೇವ್ನಿ ಖ್ಹಾರಿಸ್ ಮರ್ಜಿನ ಪೂರಕರಾನಿತರ ಉಶೆ” ಕರಿ ಬೋಲ್ತಾನ, ಯೋಹಾನನೆ ಮಾನಿಗಯೊ.
MAT 3:16 ಯೇಸು ಬ್ಯಾಪ್ತಿಸ್ಮ ಕರೈಲೀನ್, ಭಾರ್‌ ನಿಕಳ್‌ತಾಸ್ನ ಆಬ್‍ಫಾಟೀನ್, ದೇವ್‌ನು ಆತ್ಮ ಪರ‍್ಯಾವಾನಿಘೋಣಿ ಇನಾಪರ್‌ ಉತ್ರಿನ್ ಆಯೂತೆ ಯೇಸುನೆ ದೇಖ್ಯೊ.
MAT 3:17 ತದೆ ಪರಲೋಕ್‌ಮಾಥು ಏಕ್‌ ಅವಾಜ಼್ ಹುಯು, “ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನೇಥಿ ಮೇ ಘಣು ಖ್ಹುಶಿ ಛೂ಼” ಕರಿ ಠವ್‌ಕೊ ಖ್ಹಮಜ್‍ಪಡ್ಯು.
MAT 4:1 ತದೆ ಯೇಸುನ ಶೈತಾನ್‌ಥಿ ಶೋದನೆ ಹುವಾನಟೇಕೆ, ದೇವ್‌ನು ಆತ್ಮಾನೆ ಇನ ಉಜ್ಜಾ಼ಡಿ ಝ಼ಗೋಮ ಚ಼ಲಾಯೊ.
MAT 4:2 ಯೇಸು ಚಾ಼ಳಿಖ್ಹ್ ರೋಜ಼್‌ ರಾತ್‌-ದನ್ ಉಪವಾಸ್ ರ‍್ಹವಾನ ಬಾದ್‌ಮ, ಇನ ಭುಕ್‌ಲಾಗ್ಯು.
MAT 4:3 ತದೆ ಶೈತಾನ್‍ ಯೇಸುಕನ ಆಯಿನ್, “ತೂ ದೇವ್‌ನೊ ಛಿಯ್ಯೊ ಉಶೇತೊ, ಆ ಬಂಡಾವ್‍ನ ರೋಟೊ ಹುವಾನಿಘೊಣಿ ಹುಕುಮ್‌ ದೇ” ಕರಿ ಬೋಲ್ಯೊ.
MAT 4:4 ಕತೋಬಿ ಯೇಸುನೆ, “ಅದ್ಮಿ ಖಲಿ ರೋಟೊ ಖಾವಾಥೀಸ್‌ ಕೋ ಬಚಾ಼ನಿ, ದೇವ್ನ ಮ್ಹೋಡವಾಟೆ ನಿಕ್ಳಾಸ್ತೆ ಹರೇಕ್ ವಾತೆಥೀಸ್‌ ಬಚಾ಼ಸ್ತೆ’ ಕರಿ ವಚನ್‌ಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯೊ.
MAT 4:5 ತದೆ ಶೈತಾನ್ನೆ ಯೇಸುನ ಪವಿತ್ರ ನಂಗರ್ ಯೆರೂಸಲೇಮ್‌ನ ಬುಲೈಲಿಜೈ಼ನ್ ಮಂದಿರ್‌ನ ಉಪ್ಪರ್‌ಲಿ ಟೇಕ್‌ಡಿನಿ ಝ಼ಗೋಪರ್ ಭೀರಾಖಿನ್,
MAT 4:6 “ತೂ ದೇವ್‌ನೊ ಛಿಯ್ಯೊ ಉಶೇತೊ, ಹಜ್ಜಾ಼ಥೊ ಹೇಟ್ ಕೂದ್, ‘ದೇವ್ ತಾರಿ ಬಾರೇಮ ಇನ ದೂತರ್‌ನ ಹುಕುಮ್‌ ದಿಶೆ; ತಾರ ಗೋಡೊ ಬಂಡಾನ ಠೋಕರ್ ನಾಲಗ್ನುತೆ ತಿಮ್‌ ಯೋ ತುನ ಹಾತ್‌ಮ ಪಾಡಿಲಿಶೆ. ಕರೀಬಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯೊ.
MAT 4:7 ತದೆ ಯೇಸುನೆ, “ತಾರೊ ದೇವ್‌ ಹುಯಿರ‍್ಹೋತೆ ಪ್ರಭುನ ತರೀಪ್‌ಶ ನಾ ಕರ‍್ನು’ ಕರೀಬಿ ವಚನ್‌ಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯೊ.
MAT 4:8 ಅನಬಾದ್‌ಮ, ಶೈತಾನ್ನೆ ಯೇಸುನ ಘಣ ಊಚಾ಼ ಪಹಾಡ್‌ಪರ್ ಬುಲೈಲಿಜೈ಼ನ್‌, ಜಗತ್‌ನು ಖ್ಹಾರಸ್ ರಾಜ್ಯನ, ಅಜು಼ ಇನಿ ಖ್ಹಾರಿಸ್ ರಾಜ್ಯನ ವೈಭವನ ಇನ ವತಾಳಿನ್.
MAT 4:9 “ತೂ ಮನ, ಆಡ್‍ಪಡಿನ್ ಆರಾದನೆ ಕರ‍್ಯೋತೊ, ಆ ಖ್ಹಾರಸ್ನ ಮೇ ತುನ ದೆವುಸ್‌” ಕರಿ ಬೋಲ್ಯೊ.
MAT 4:10 ತದೆ ಯೇಸುನೆ, “ಇನ, ಶೈತಾನ್‍ ತೂ ಹಟಿಜಾ಼! ‘ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ಎಕ್ಕಸ್ ಜ಼ಣಾನ ಆರಾದನೆ ಕರ‍್ನು ಅಜು಼ ಸೇವೆ ಕರ‍್ನು ಕರಿ ವಚನ್‌ಮ ಲೀಖೈರ‍್ಹುಸ್” ಕರಿ ಬೋಲ್ಯೊ.
MAT 4:11 ತದೆ ಶೈತಾನ್ನೆ ಇನ ಮ್ಹೆಂದಿನ್ ಚ಼ಲೆಗಯೊ. ಅಜು಼ ದೇವ್‌ನು ದೂತರ್ ಆಯಿನ್, ಇನಿ ಸೇವಾ-ಚಾ಼ಕ್ರಿ ಕರ‍್ಯು.
MAT 4:12 ಯೋಹಾನನ ಜೇಲ್‌ಮ ಕೋಂಡಿನ್‌ ಘಾಲಿದಿದು ಕರಿ ಯೇಸುನೆ ಖ್ಹಮ್‌ಜಿನ್‌, ಯೋ ಝ಼ಗೋನ ಮ್ಹೆಂದಿನ್, ಗಲಿಲಾಯ ತಬರ್‌ಖಾನ ಚ಼ಲೆಗಯೊ.
MAT 4:13 ತದೆ ಯೇಸು ನಜ಼ರೇತ್ ಕರಿ ಗಾಮ್‌ನ ಮ್ಹೆಂದಿನ್, ಹಿಜ್ಜಾ಼ಥೊ ನಿಕ್ಳಿನ್ ಗಲಿಲಾಯ ದರ‍್ಯಾವ್‍ನ ಖನ್ನೆ ಥೂತೆ ಕಪೆರ್ನೌಮ್ ಕರಿ ಗಾಮ್ಮ ಆಯಿನ್ ರ‍್ಹಿಯೊ. ಆ ಗಾಮ್‍ ಜೆಬಲೋನ್‌ ಅಜು಼ ನಫ್ತಾಲಿ ಕರಿ ತಬರ್‌ಖಾಮ ಥೂ.
MAT 4:14 ಅನೇಥಿ ಪ್ರವಾದಿ ಯೆಶಾಯಥಿ ಬೋಲಾಯೋತೆ ವಾತೆ ಚಾ಼ಲ್ಯು. ಯೋ ಶಾತ್‌ಕತೊ,
MAT 4:15 “ಜೆಬಲೋನ್‌ ತಬರ್‌ಖೊ, ಅಜು಼ ನಫ್ತಾಲಿ ತಬರ್‌ಖೊ, ಯೊರ್ದನ್‌ ನದ್ದಿನು ಪಾರ್ಲಿ ಬಾಜೂ಼ಮ, ದರ‍್ಯಾವ್‍ಭಣಿ ಛಾ಼ತೆ ತಬರ್‌ಖೊ, ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರು ಛಾ಼ತೆ ಗಲಿಲಾಯ ತಬರ್‌ಖೊ,
MAT 4:16 ಅಮ್ ಅಂಧಾರಾಮ ಜಿವ್‍ಕರ್ತುಥೂತೆ ಆ ತಬರ್‌ಖಾನು ಅದ್ಮಿಖ್ಹಾರು ಮೋಟು ಉಜಾ಼ಖ್ಹ್‌ ದೆಖಾಯು. ಮರಣ್ಣಿ ಛಾ಼ಳೊ ಢಪೈರ‍್ಹುಥುತೆ ತಬರ್‌ಖಾಮ ಜಿವ್‍ಕರ್ತುಥೂತೆ ಇವ್ಣಾಪರ್ ಉಜಾ಼ಳು ಘೈಗೈಗು.”
MAT 4:17 ತಪ್‌ಥೊ ಯೇಸು, ಪಾಪ್‌ಥಿ ಫರಿನ್ ನಿಕ್ಳೊ, ಶನಕತೊ ಸೊರ್ಗ ರಾಜ್ಯ ಖನ್ನೆ ಐಗು!” ಕರಿ ಖಬರ್‌ನ ಬೋಲ್ತೊನಿಕ್‌ಳ್ಯೊ.
MAT 4:18 ಯೇಸು ಗಲಿಲಾಯ ದರ‍್ಯಾವ್ನ ಕನಾರೆಕರಿ ವಳ್ಯೊಜಾ಼ತೊಥೊ. ತದೆ, ಬೇ ಭೈಯೇ ಜಾ಼ಳು ನಾಖುಕರ್ತಥಾತೆ ದೇಖ್ಯೊ. ಇವ್ಣೆ ಕೋಣ್‌ಕತೊ, ಪೇತ್ರ ಕರಿ ಬೋಲೈಲಿದೋತೆ ಸೀಮೋನ, ಅಜು಼ ಇನೊ ಭೈ ಅಂದ್ರೆಯನ ದೇಖ್ಯೊ. ಅವ್ಣೆ, ಮಾಛ಼್ಲ ಖ್ಹಾವಾಳ ಹುಯಿರ‍್ಹಾಥ.
MAT 4:19 ಯೇಸುನೆ ಇವ್ಣುನ, “ಮಾರ ಕೇಡೆ ಆವೊ, ಮೇ ತುಮೂನ ಮಾಛ಼್ಲ ಖ್ಹಾವಾಳಾನಿತರ ಕಾಹೆ ಅದ್ಮಿನ ಖ್ಹಾವಾಳಾನಿತರ ಬಣವುಸ್. ಕರಿ ಬೋಲ್ಯೊ.
MAT 4:20 ಇಮ್‌ ಬೋಲ್ತಾಸ್‌ನ ಇವ್ಣೆ ಇವ್ಣು ಜಾ಼ಳುಖ್ಹಾರು ಮ್ಹೆಂದಿನ್, ಇನ ಕೇಡೆ ಗಯ.
MAT 4:21 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಬಿಜೂ಼ ಬೇ ಭೈಯೇನ ದೇಖ್ಯೊ, ಇವ್ಣೆ ಕೋಣ್‌ಕತೊ, ಜೆಬೆದಾಯನೊ ಛಿಯ್ಯೊ ಯಾಕೋಬನಾಬಿ ಅಜು಼ ಇನೊ ನ್ಹಾನೊ ಭೈ ಯೋಹಾನ್ನ ದೇಖ್ಯೊ. ಇವ್ಣೆ ಡೋಣ್‌ಮ ಜಾ಼ಳಾನ ಬರೋಬರ್ ಕರುಕರ್ತಥ. ಯೇಸುನೆ ಇವ್ಣುನಾಬಿ ಬುಲಾಯೊ.
MAT 4:22 ತದ್‌ನು-ತದೇಸ್‌ ಇವ್ಣೆ ಡೋಣ್ಣಾ ಅಜು಼ ಇವ್ಣ ಬಾನ ಮ್ಹೆಂದಿನ್, ಯೇಸುನ ಕೇಡೆ ಗಯ.
MAT 4:23 ಬಾದ್‌ಮ ಯೇಸು ಗಲಿಲಾಯ ಅಖ್ಖೂಸ್ ಫರೀನ್, ಹಿಜ್ಜಾ಼ನು ಯೆಹೂದ್ಯರ್‌ನ ಸಬೆ ಭರಾವಾನು ಮಂದಿರ್‌ಮ ಬೋಲಿದೇತೊಹುಯಿನ್‌, ದೇವ್ನಿ ರಾಜ್ಯನಿ ಬಾರೇಮನು ಅಛ್ಛಿ ಖಬರ್‌ನ ಬೋಲ್ತೊಹುಯಿನ್‌, ಅದ್ಮಿಮ ಥೂತೆ ಖ್ಹಾರೀಸ್‍ ತರ‍್ಹಾನು ರೋಗ್‌-ರಾಯನ ಅಛ್ಛು಼ ಕರ್ತೊ ಆಯೊ.
MAT 4:24 ಇನಿ ಬಾರೇಮಾನಿ ಖಬರ್ ಸಿರಿಯ ದೇಖ್ಹ್‌ ಅಖ್ಖುಸ್ ಫೈಲಿಗಯು. ತದೆ ಆದ್ಮಿಖ್ಹಾರು ರೋಗ್‌ಮ ರ‍್ಹವಾಳನ ಯೇಸುಕನ ಲಾಯು, ಇವ್ಣಾಮ ಕೈಯೆಕ್ಕಿ ತರ‍್ಹಾನು ರೋಗ್‌-ರಾಯಥಿ ತರಪ್‌ಡುಕರ್ತುಥೂತೆ ಅಜು಼ ಭೂತ್‌ ಧರಿರಾಖ್ಯುಥೂತೆ, ಮಿರ್‌ಘಿ ಥೂತೆ ಅಜು಼ ಲಕ್‍ವೊ ಮಾರಿರಾಖ್ಯುಥೂತೆ ಇವ್ಣ ಅಖ್ಖಾನ ಇನಕನ ಲಾಯು. ಯೇಸುನೆ ಇವ್ಣ ಖ್ಹಾರಸ್ನ ಅಛ್ಛು಼ ಕರ‍್ಯೊ.
MAT 4:25 ಗಲಿಲಾಯ, ದೆಕಪೊಲಿ, ಯೆರೂಸಲೇಮ್‌, ಯೂದಾಯ ತಬರ್‌ಖಾಥು, ಅಜು಼ ಯೊರ್ದನ್‌ ನದ್ದಿನು ಪಾರ್ಲಿ ಬಾಜು಼ಥು, ಆದ್ಮಿಖ್ಹಾರು ಝೂ಼ಂಡೆ-ಝೂ಼ಂಡೆ ಹುಯಿನ್, ಯೇಸುನ ಪೀಠೆ ಗಯು.
MAT 5:1 ಯೇಸುನೆ ಅದ್ಮಿನಿ ಝೂ಼ಂಡೆನ ದೇಖಿನ್‌, ಪಹಾಡ್‌ಪರ್ ಚ಼ಢೀನ್‌ ಬೆಶಿಗಯೊ. ತದೆ ಇನ ಶಿಷ್ಯರ್‌ ಆಯಿನ್, ಇನ ಅಶ್‌ಪಿಶ್‌ ಭರಾಯ,
MAT 5:2 ತದೆ ಯೇಸುನೆ ಇವ್ಣುನ ಶಾತ್‌ ಬೋಲಿಶಿಕಾಡ್ಯೊಕತೊ,
MAT 5:3 “ಕೋಣ್ ಆತ್ಮಮ ಗರೀಬ್ ಹುಯಿರ‍್ಹವಾಳ, ಇವ್ಣೆ ಖ್ಹುಶಾಲಿವಾಳು ಹುಯಿರ‍್ಹುಸ್; ಸೊರ್ಗ ರಾಜ್ಯ ಇವ್ಣುಸ್‌ ಹುಯಿರ‍್ಹುಸ್‍!
MAT 5:4 ಕೋಣ್ ದುಖ್‌ಮ ಛಾ಼ಕಿ, ಇವ್ಣೆ ಧನ್ಯ ಹುಯಿರ‍್ಹುಸ್‍ ದೇವ್ ಇವ್ಣುನ ಸಮಾಧಾನ್‍ ದಿಶೆ.
MAT 5:5 ಖ್ಹಮಾಳಿಲ್ಯವಾಳು ಧನ್ಯ, ಇವ್ಣೆ ಧರ್ತಿಪರ್ ಖ್ಹುಶಾಲಿವಾಳು ಹುಯಿರ‍್ಹುಸ್‍. ದೇವ್ನೆ ಶಾತ್ ವಾತೆ ದೀರಾಖ್ಯೊಸ್ಕಿ, ಯೋ ಇವ್ಣುನ ಮಳ್‌ಶೆ.
MAT 5:6 ಕೋಣ್ ದೇವ್ನಿ ಮರ್ಜಿನಿಘೋಣಿ ಕರಾನ ಘಣು ಆಖ್ಹ್ ಕರಾಸ್ಕಿ, ಇವ್ಣೆ ಧನ್ಯ ಹುಯಿರ‍್ಹಾಸ್; ದೇವ್ ಇವ್ಣುನ ಹಕ್ಲಾಲ್‌ ಹುವಾನಿತರ ಕರ್ಶೆ.
MAT 5:7 ಕೋಣ್ ಬಿಜಾ಼ನ ಗೋರ್‌ ಕರಾಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ‍್ಹುಸ್‍. ದೇವ್ ಇವ್ಣಾಪರ್ ಗೋರ್‌ ಕರ್ಶೆ!
MAT 5:8 ಕೋಣ್ ದಿಲ್ಮ ಪಾಕ್‌ ರ‍್ಹೇಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ‍್ಹುಸ್‍. ಇವ್ಣೆ ದೇವ್ನ ದೇಕ್‌ಶೆ;
MAT 5:9 ಕೋಣ್ ಸಮಾಧಾನ್ ಕರಾನ ಮ್ಹಿನತ್ ಕರಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ‍್ಹುಸ್‍, ಇವ್ಣೆ ದೇವ್ನ ಲಡ್ಕಕರಿ ಬೋಲೈಲಿಶೆ.
MAT 5:10 ಕೋಣ್ ದೇವ್ನಿ ಮರ್ಜಿನಿಘೋಣಿ ರ‍್ಹವಾನಖ್ಹಾಜೆ ಖ್ಹತಾಪ್ಣಿನ ಖ್ಹಮಾಳಿಲೇಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ‍್ಹುಸ್‍. ಸೊರ್ಗ ರಾಜ್ಯ ಇವ್ಣುಸ್‌ ಹುಯಿರ‍್ಹುಸ್‍!
MAT 5:11 “ಮಾರ ಖ್ಹಾಜೇಥಿ ಅದ್ಮಿಖ್ಹಾರು ತುಮೂನ ಖ್ಹರಮ್‌ ಕಾಡಿನ್, ಖ್ಹತೈನ್, ತುಮಾರಪರ್ ಖ್ಹಾರಿಸ್ ತರ‍್ಹಾನು ಖರಾಬ್‌ನ ಬೋಲಿನ್, ಝೂ಼ಟಿ ಲಗಾಡ್ಯುತೊ, ತುಮೆ ಧನ್ಯ ಹುಯಿರ‍್ಹಾಸ್‌.
MAT 5:12 ಖ್ಹುಶಿ ಕರೊ ಅಜು಼ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ತುಮಾರೇಥೀಬಿ ಅಗಾಡಿ ಥೂತೆ ಪ್ರವಾದಿಯೆನಾಬಿ ಅಮ್ಮಸ್ ಖ್ಹತಾಯುನಿ.
MAT 5:13 ತುಮೆ ಧರ್ತಿನ ಮೀಟ್‌ ಹುಯಿರ‍್ಹಾಸ್‌. ಮೀಟಸ್‌ ಫಿಕ್ಕು ಹುಯಿಗುತೊ, ಇನ ಬಿಜು಼ ಶನೇಥಿ ರುಚ಼್‍ ದ್ಯವಾನ ಉಶೆ? ಅದ್ಮಿಖ್ಹಾರು ಇನ ಭಾರ್‌ ನಾಖಿನ್ ವಾಟ್‌ಪರ್ ಚಾ಼ಲವಾಳು ಇನ ಖುಂದ್ಲಾನ ಲ್ಹಾಯಕ್‌ ಪಣ್ಕಿ ಬಿಜ಼ ಖೆವ ಕಾಮ್ನಾಬಿ ಕೋಆವಾನಿ.
MAT 5:14 “ತುಮೆ ಹಿಡಿ ಜಗತ್ನ ಉಜಾ಼ಳು ಹುಯಿರ‍್ಹಾಸ್‌. ಪಹಾಡ್‌ಪರ್ ಭಂದೈರ‍್ಹುತೆ ಗಾಮ್‍ ಲಪಿರ‍್ಹೆಯಿಕೊಯ್ನಿ.
MAT 5:15 ಅಜು಼ ಕೋಣ್‌ಬಿ ದೀವೊ ಲಗಾಡಿನ್, ಕೋಳ್ಗಾನಹೇಟ್ ಮ್ಹೇಲಾಕೊಯ್ನಿ; ಅನಬದಲ್ ಘರ್‌ಮ ಛಾ಼ತೆ ಹರೇಕ್ನ ಉಜಾ಼ಳು ದ್ಯವಾನಿತರ ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಸ್.
MAT 5:16 ಅಮ್ಮಸ್ ತುಮಾರು ಉಜಾ಼ಳು ಅದ್ಮಿನ ಖ್ಹಾಮ್ಣೆ ಉಜಾ಼ಖ್ಹ್‌ ಹುವಾದೆ, ಅನೇಥಿ ತುಮೆ ಕರಾತೆ ಅಛ್ಛು಼ಕಾಮ್ನ ಇವ್ಣೆ ದೇಖಿನ್‌, ಸೊರ್ಗಾಮ ಛಾ಼ತೆ ತುಮಾರ ಬಾನ ಖ್ಹರಾವ್‌ಶೆ.
MAT 5:17 ಮೋಶೇನು ಧರ್ಮಶಾಸ್ತ್ರನ ರ‍್ಹವೊ, ಪ್ರವಾದಿನು ಬೋಧನೆನ ರ‍್ಹವೊ, ಕಾಡಿನಾಖನಖ್ಹಾಜೆ ಮೇ ಆಯೋಕರಿ ನಕೊ ಸೋಚೊ. ಕಾಡಾನಖ್ಹಾಜೆ ಕಾಹೆ, ಇನ ಪೂರ ಕರಾನಖ್ಹಾಜೆ ಆಯೊ.
MAT 5:18 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಆಬ್ಬಿ ಧರ್ತಿ ಮಟಿಜಾ಼ಶೆ, ಧರ್ಮಶಾಸ್ತ್ರಮ ಛಾ಼ತೆ ಖ್ಹಾರುಸ್ ಚಾ಼ಲಾಲಗುಬಿ ಇನಮಾನು ಏಕ್‌ ನ್ಹಾನು ಲಿಖ್ಯೂಬಿ ರ‍್ಹವೊ, ನಾತೊ ಏಕ್‌ ಟಿಪ್‌ಕ್ಯುಬಿ ಮಟ್‌ಶೆ ಕೊಯ್ನಿ.
MAT 5:19 ಇನಖ್ಹಾಜೇಸ್, ಆ ಹುಕುಮ್‌ನಿ ನ್ಹಾನಿಶಿ ಏಕ್‌ ವಾತ್ನಬಿ ಮ್ಹೇಲಿನ್ ಚಾ಼ಲವಾಳೊ ಅಜು಼ ಬಿಜಾ಼ನಾಬಿ ಇಮ್ಮಸ್ ಚಾ಼ಲಾನ ಶಿಕಾಡವಾಳೊ, ಸೊರ್ಗ ರಾಜ್ಯಮ ಖ್ಹಾರೇಥಿ ನ್ಹಾನೊ ಕರಿ ಬೋಲೈಲಿಶೆ. ಕತೋಬಿ ಯೋಸ್ ಯೋ ಹುಕುಮ್ನಿಮತ್ ಚಾ಼ಲಿನ್, ಬಿಜಾ಼ನಾಬಿ ಇಮ್ಮಸ್ ಚಾ಼ಲಾನ ಶಿಕಾಡವಾಳೊ, ಸೊರ್ಗ ರಾಜ್ಯಮ ಮಹಾನ್ ಕರಿ ಬೋಲೈಲಿಶೆ.
MAT 5:20 ಮೇ ತುಮೂನ ಶಾತ್‌ ಬೋಲುಸ್‌ಕತೊ, ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳು ಪಂಡಿಥ್ಥಿಬಿ ಅಜು಼ ಫರಿಸಾಯರ್‌ನಿ ನೀತಿಥೀಬಿ ತುಮಾರಿ ನೀತಿ ಜಾ಼ಖ್ಹತ್ ನಾ ಹುಯಿರ‍್ಹೀಕತೊ, ತುಮೆ ಸೊರ್ಗ ರಾಜ್ಯಮ ಜಾ಼ಶುಕೊಯ್ನಿ.
MAT 5:21 “ಅದ್ಮಿನ ಖೂನಿ ನಾ ಕರ್ನು, ಇಮ್‌ ಖೂನಿಕರವಾಳನ ನ್ಯಾವ್‍ನಿ ತೀರ್ಪ್‌ನ ಭೀರಾಕ್‌ಶೆ’ ಕರಿ ತುಮಾರು ಶಾಣುಖ್ಹಾರು ಬೋಲಿರಾಖ್ಯುಸ್ತೆ ತುಮೆ ಖ್ಹಮ್‌ಜಿರಾಖ್ಯಾಸ್‌.
MAT 5:22 ಕತೋಬಿ ಮೇ ತುಮೂನ ಶಾತ್‌ ಬೋಲಸ್‍ಕತೊ, ತುಮೆ ತುಮಾರ ಭೈಪರ್ ಖೀಜ಼್ ಖಾವಾಳೊ ಹರೇಕ್ ಜ಼ಣೋಬಿ ತುಮೆ ನ್ಯಾವ್‍ನಿ ತೀರ್ಪ್‌ಮ ಪಡ್‍ಶು, ಅಜು಼ ತುಮೆ ತುಮಾರ ಭೈನ, ‘ಏ ಬಿಣ್‍ಅಕ್ಲಿ’ ಕರಿ ಬೋಲ್ಯಾತೊ, ತುಮೂನ ನ್ಯಾವ್‍ನಿ ಸಭೆನಖ್ಹಾಮ್ಣೆ ಭೀರಾಕ್‌ಶೆ, ಅಜು಼, ‘ಏ ಫಾಲ್ತು’ ಕರಿ ಬೋಲವಾಳೊ, ನರಕ್‌ನಿ ಆಗ್‌ಮ ಪಡ್‌ಶೆ.
MAT 5:23 ಇನಖ್ಹಾಜೇಸ್ ತೂ ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆ ಲಾಯೊತೆ, ತಾರ ಭೈನ ದಿಲ್ಮ ತಾರಪರ್ ಶಾತ್‌ತೋಬಿ ವಹೇರ್‌ ಛಾ಼ ಕರಿ ತಾರಿ ಯಾದ್ಮ ಆಯುತೊ,
MAT 5:24 ತು ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆಸ್ ಮ್ಹೆಂದಿನ್, ಪಹಿಲೆ ಜೈ಼ನ್‌, ತಾರ ಭೈನ ಜೋ಼ಡೆ ಏಕ್‌ಹೂ. ಇನ ಬಾದ್‌ಮ ಐನ್, ತಾರಿ ಕಾಣ್ಕೆನ ದೇವ್ನ ದೇ.
MAT 5:25 “ತಾರೊ ವಿರೋದಿ ತುನ ನ್ಯಾವ್ನಖ್ಹಾಜೆ ನ್ಯಾಯದೀಶಕನ ಖೇಚಿಲೀಜಾ಼ವನ ಅಗಾಡಿಸ್ ತೂ ವಾಟ್‌ಪರಸ್ ಹೇಳ್‍ಮೇಳ್‍ ಹುಯಿಜಾ಼. ನತರ್‌ಕಿ ತಾರೊ ವಿರೋದಿ ತುನ ನೈಯಾಕನ ಖೇಚಿಲಿಜಾ಼ಶೆ. ಯೋ ನಯ್ಯೊ ಜೇಲ್‌ನ ಶಿಪಾಯಿನ ಹಾತ್ಮ ದಿಶೆ ಅಜು಼ ತೂ ಜೇಲ್‌ಮ ಫೆಕೈಜೀಶ್.
MAT 5:26 ತೂ ಏಕ್‍ ಕಾಖ್ಹ್‌ಬಿ ಬಚೈಶ್‍ಕೊಂತೆ ತಾರಾಮ ಛಾ಼ತೆ ಅಖ್ಖು ಪೈಶು ಫೇಡಾವಲಗೂಬಿ ಹಿಜ್ಜಾ಼ಥೊ ಆವಾನ ಉಶೇಸ್‍ ಕೊಯ್ನಿ ಕರಿ ಮೇ ಖ್ಹಾಚಮಾಬಿ ಬೋಲುಸ್.
MAT 5:27 “ವ್ಯಬಿಚಾರ್‌ ನಾ ಕರ‍್ನು’ ಕರಿ ಬೋಲಾಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌.
MAT 5:28 ಕತೋಬಿ ಮೇ ತುಮೂನ ಬೋಲುಸ್ಕಿ, ಕೋಣ್‌ತೋಬಿ ಬಿಜಿ ತಯೇಡಾನ ದೇಖಿನ್‌, ಇನಾಪರ್ ಆಖ್ಹ್ ಕರ‍್ಯೋತೊ, ಯೋ ತದ್ದೇಸ್ ಇನ ಮನ್‌ಮ ಯೋ ತಯೇಡಾನಿ ಜೋ಼ಡೆ ವ್ಯಬಿಚಾರ್‌ ಕರಾವಾಳೊ ಹುಯಿರ‍್ಹೋಸ್.
MAT 5:29 ತಾರೊ ಖಾವೊ ಡೋಳೊ ತುನ ಪಾಪ್‌ಮ ಖ್ಹಪ್‌ಡವಾನು ಉಶೇತೊ, ಇನ ಕಚ಼್‌ಕೋರಿ ಫೇಕಿದೆ, ತಾರು ಹಿಡೀ ಶರೀರ್ ನರಕ್ಮ ಪಡಾಥೀಬಿ, ತಾರು ಶರೀರ‍್ನು ಏಕ್‌ ಭಾಗ್‌ ನಾ ರ‍್ಹಯುತೋಬಿ ತುನ ಅಛ್ಛು಼ ಕಾಹೆಕಿ ಶು.
MAT 5:30 ತಾರೊ ಖಾವೊ ಹಾತ್ ತುನ ಪಾಪ್‌ಮ ಖ್ಹಪ್‌ಡವಾನು ರ‍್ಹಿಯುತೊ, ಇನ ಕತ್ರೀನ್ ಫೇಕಿದೆ! ತಾರು ಹಿಡಿ ಶರೀರ್ ನರಕ್ಮ ಪಡಾಥೀಬಿ, ತಾರು ಶರೀರ್‌ನು ಏಕ್‌ ಭಾಗ್‌ ನಿಕ್ಳಿಜಾ಼ವಾನುಸ್‌ ತುನ ಅಛ್ಛು಼ ಕಾಹೆಕಿ ಶು.
MAT 5:31 ಇನಿ ಬಾವಣ್ಣ ಮ್ಹೇಲಿದ್ಯವಾಳೊ, ಇನ ತಲಾಕ್‌ನು ಕಾಗತ್‌ ಲೀಖಿದೀನ್‌ ಮ್ಹೇಲ್ನು ಕರಿ ಬೋಲೈರ‍್ಹುಸ್ ಎತ್ರೇಸ್.
MAT 5:32 ಕತೋಬಿ ಮೇ ತುಮೂನ ಬೋಲುಸ್ಕಿ, ವ್ಯಬಿಚಾರ‍್ನಿ ಕಾರಣ್‌ ಕೊಂತೆಸ್ ಇನಿ ಬಾವಣ್ಣ ಮ್ಹೇಲಿದ್ಯವಾಳೊ ಯೋಸ್ ಇನಿ ಬಾವಣ್ಣ ವ್ಯಬಿಚಾರ್‌ಮ ಪಡಾನ ಜಿಮ್ಮೇದಾರಿ ಉಶೆ. ನಾಹುಯಿನ್ ಬಾವ್ರಿ ಮ್ಹೇಲಿಹುಯಿನ ವ್ಯಹಾ ಕರಿಲ್ಯವಳೋಬಿ ವ್ಯಬಿಚಾರಿ ಹುಯಿಜಾ಼ಸ್.
MAT 5:33 “ಝೂ಼ಟಿ ಆಣ್ ನಾ ಲೇವ್ಣು ; ಕತೋಬಿ ತುಮೆ ಪ್ರಭುಕನ ಬೋಲಿಲಿದೋತೆ ತಿಮ್ಮಸ್ ಚಾ಼ಲಿಲೇವ್ಣು ಕರಿ ಗಯೋತೆ ಜ಼ಮಾನಾನ ಅದ್ಮಿಯೇವ್ನ ಬೋಲ್ಯುತೆ ತುಮುನ ಮಾಲುಮಸ್ ಛಾ಼ನಿ.
MAT 5:34 ಕತೋಬಿ ಮೇ ತುಮೂನ ಬೋಲಾನು ಶಾತ್‍ಕತೊ, ಆಣೆಸ್ ನಾಲೇವ್ಣು. ಆಬ್‍ಪರ್‌ ಆಣ್ ನಕೊ ಲೇವೊ; ಯೋ ದೇವ್‌ನು ಸಿಂಹಾಸನ್.
MAT 5:35 ಧರ್ತಿಪರ್ ಆಣ್‌ ಕರೋನಕೊ ಯೋ ದೇವ್‌ನು ಗೋಡಾಮ್ಹೇಲಾನು ಕುಡ್‌ಶಿ’ ಯೆರೂಸಲೇಮ್‌ಪರ್ ಆಣ್ ನಾ ಕರ‍್ನು, ಶನಕತೊ ಯೆರೂಸಲೇಮ್‌ ಯೋ ಮಹಾನ್ ರಾಜಾ಼ನು ನಂಗರ್ ಹುಯಿರ‍್ಹುಸ್‍.
MAT 5:36 ತಾರ ಮಾಥಪರ್‌ಬಿ ಆಣ್ ನಾ ಲೇವ್ಣು; ಶನಕತೊ, ಏಕ್‌ ಕೇಖ್ಹ್‌ನ ಜಿನ್‌ಕುಬಿ ಧೋಳು ರ‍್ಹವೊ, ನತರ್‌ಕಿ ಕಾಳು ರ‍್ಹವೊ ಕರಾನ ತುನ ಕೊವುಶೇನಿ.
MAT 5:37 ಕತೋಬಿ ತುಮಾರಿ ವಾತೆ ಹೋ ಕತೊ ಹೋ, ಕೊಯ್ನಿಕತೊ, ಕೊಯ್ನಿ ಕರಿ ರ‍್ಹೇವಾದೆ. ಅನೇಥಿ ಜಾ಼ಖ್ಹತ್ ಬೋಲ್ಯಾತೊ, ಯೋ ಶೈತಾನ್‌ಥಿ ಆಯುಹುಯು ಕರಿ.
MAT 5:38 “ಡೋಳಾನ ಬದಲ್ ಡೋಳೊ, ದಾತ್ನ ಬದಲ್ ದಾತ್‌’ ಕಡಾವ್ಣು ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್.
MAT 5:39 ಕತೋಬಿ ಮೇ ತುಮೂನ ಬೋಲಾನು ಶಾತ್‍ಕತೊ, ಕೋಣ್‌ತೋಬಿ ತುನ ಖರಾಬ್ ಕರ‍್ಯುತೊ, ಯೋ ಅದ್ಮಿನ ಬದ್‌ಲಾ ನಕೊ ಲೀಶ್‌. ಕೋಣ್‌ತೋಬಿ ಏಕ್‌ಜ಼ಣು ತಾರ ಖಾವಕಲ್ಲಪರ್ ಮಾರ‍್ಯುತೊ, ಇನ ಬಿಜೇಕ್ ಕಲ್ಲು ವತಾಳ್.
MAT 5:40 ಅಜು಼ ಕೋಣ್‌ತೋಬಿ ತಾರ ಜೋ಼ಡೆ ಝಂಝಟ್‍ ಕರೀನ್, ತಾರ ಮಹಿನಲುಂಗ್ಡಾನ ಛೀನೈಲೇವ್ಣುಕರಿ ತೀರ್ಮಾನ್‌ ಕರವಾಳಾನ, ಉಪ್ಪರ್ ಪೇರ‍್ಹಿರಾಖ್ಯೋತೆ ಝ಼ಗ್ಗಾನಾಬಿ ಮ್ಹೆಂದೆ.
MAT 5:41 ಏಕ್‌ ಜ಼ಣೊ ತುನ ಏಕ್‌ ಮೈಲ್ ದೂರ್ ಆವ್‌ಕರಿ ಜು಼ಲಮ್‌ ಕರ‍್ಯುತೊ ಇನಜೋ಼ಡೆ ಬೇ ಮೈಲ್ ದೂರ್ ಜಾ಼.
MAT 5:42 ಕೋಣ್‌ತೋಬಿ ತಾರಕನ ಶಾತ್ತೋಬಿ ಮಾಂಗ್ಯುತೊ, ಇನ ದೇ; ತಾರಕನ ಕರಜ಼್ ಮಾಂಗವಾಳನ ಮ್ಹೋಡು ನಕೊ ಫರೈಲೀಶ್‌.
MAT 5:43 “ತಾರ ಭೀಡೆವಾಳಾನ ಪ್ಯಾರ್ ಕರ್‌ ಅಜು಼ ತಾರ ದುಶ್‌ಮನ್ನ ವಹೇರ್‌ ಕರ‍್ನು’ ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್.
MAT 5:44 ಕತೋಬಿ ಮೇ ತುಮೂನ ಬೋಲಾನು ಶಾತ್‌ಕತೊ, ತುಮಾರ ದುಶ್‌ಮನ್ನ ಪ್ಯಾರ್ ಕರೊ; ತುಮೂನ ಖ್ಹತಾವವಾಳನಟೇಕೆ ದೇವ್ನ ಪ್ರಾರ್ಥನೆ ಕರೊ.
MAT 5:45 ಅಮ್ ಕರ‍್ಯಾತೊ, ಪರ್‌ಲೋಕ್‌ಮ ಛಾ಼ತೆ ತುಮಾರ ಬಾನ ತುಮೆ ಲಡ್ಕಾಉಶು. ಯೋ ಖರಾಬ್ನ ಉಪ್ಪರ್‌ಬಿ ಅಛ್ಛಾ಼ನ ಉಪ್ಪರ್‌ಬಿ ಇನೊ ಚಾ಼ಂದ್ನು ಉಜಾ಼ಳು ಪಡಾನಿಘೋಣಿ ಕರಾಸ್, ನೀತಿವಾಳಾನ ಉಪ್ಪರ್‌ಬಿ ಅನೀತಿವಾಳಾನ ಉಪ್ಪರ್‌ಬಿ ಪಾಣಿ ವರ್ಖ್ಹಾವಸ್‌.
MAT 5:46 ತುಮೂನ ಪ್ಯಾರ್ ಕರಾವಾಳನಾಸ್‌ ತುಮೆ ಪ್ಯಾರ್ ವತಾಳ್ಯಾತೊ ದೇವ್ ತುಮೂನ ಶನ ಇನಾಮ್ ದಿಶೆ? ಶುಂಕವಶೂಲ್‍ ಕರವಾಳುಬಿ ಅಮ್ಮಸ್ ಕರಾಸ್ನಿ!
MAT 5:47 ತುಮೆ ಖಲಿ ತುಮಾರ ದೋಸ್ತಿ ಖ್ಹಾರಾನಾಸ್ ಮಾನ್-ಮರ‍್ಯಾದಿ ವತಾಳ್ಯಾತೊ, ಇನಾಮ ಶಾತ್‌ ಬಡೈಮಾರಿಲೆವಾನು ಛಾ಼? ದೇವ್ನ ಪರ್‌ಖ್ಯುಕೊಂತೆ ಅದ್ಮಿ ಖ್ಹಾರುಬಿ ಇಮ್ಮಸ್ ಕರಾಸ್ನಿ!
MAT 5:48 ಇನಖ್ಹಾಜೇಸ್, ಪರಲೋಕ್‍ಮ ಛಾ಼ತೆ ತುಮಾರೊ ಬಾ ಖೆವಿಸ್ ಗಲ್ತಿಕೊಂತೆ ಛಾ಼ತೆ ಇಮ್‌, ತುಮೇಬಿ ಗಲ್ತಿಕೊಂತೆ ಇಮ್‌ ರ‍್ಹವೊ.
MAT 6:1 ಅದ್ಮಿ ದೇಖಾದೆ ಕರಿ ತುಮೆ ಇವ್ಣ ಖ್ಹಾಮೆ ತುಮಾರು ಅಛ್ಛು಼ಕಾಮ್ನ ನಾ ಕರ‍್ನು. ಇಮ್‌ ಕರ‍್ಯಾತೊ, ಸೊರ್ಗಾಮ ಛಾ಼ತೆ ತುಮಾರ ಬಾಕನ ತುಮೂನ ಶಾತ್ಬಿ ಇನಾಮ್ ಕೋ ಮಳ್‌ಶೇನಿ.
MAT 6:2 ಇನಖ್ಹಾಜೇಸ್ ತು ಧರಮ್ ದ್ಯವಾನಿ ವಖ್ಹತ್‌ಮ, ನಕೊ ಫೂಕಿಲೇವೊ. ಅದ್ಮಿಥಿ ಖ್ಹರಾವ್ಣಿ ಕರಿಲೇವ್ಣುಕರಿ ಖೋಟ್ ದಿಲ್‌ವಾಳು ಯೆಹೂದ್ಯರ್‌ಬಿ ಸಬೆ ಭರಾವಾನು ಮಂದಿರ್‌ಮ ಅಜು಼ ಗಲ್ಲಿಯೇಮ ಅಮ್ಮಸ್ ಕರಾಸ್. ಮೇ ಖ್ಹಾಚಮಾಬಿ ಬೋಲುಸ್ಕಿ, ಇವ್ಣುನ ಮಳ್‌ಣುತೆ ಧನ್ಯವಾದ್ ತದೇಸ್‌ ಮಳಿಗಯು.
MAT 6:3 ಕತೋಬಿ ತುಮೆ ಧರಮ್ ದ್ಯವಾನಿ ವಖ್ಹತ್‌ಮ, ತಾರೊ ಖಾವಹಾತೆ ದಿದೋತೆ ಧರಮ್, ತಾರೊ ಡಾವ ಹಾತ್‌ನಾಬಿ ನಾ ಮಾಲುಮ್‌ ಪಡ್‌ಣೂತೆ ಇಮ್‌ ದೇ.
MAT 6:4 ಅಜು಼ ದಿಲ್ಮ ಚಾ಼ಲಾತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.
MAT 6:5 “ತುಮೆ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ಖೋಟ್ ದಿಲ್‌ವಳಾನಿಮತ್‌ ನಕೊ ಪ್ರಾರ್ಥನೆ ಕರ್‌; ಅದ್ಮಿಖ್ಹಾರು ದೇಖಾದೆಕರಿ ಇವ್ಣೆ ಸಬೇನು ಮಂದಿರ್‌ಮ ಅಜು಼ ಗಲ್ಲಿಯೇನು ಚೌ಼ಕ್‌ಮ ಭೀರಿನ್‌, ಪ್ರಾರ್ಥನೆ ಕರಾನ ಆಖ್ಹ್‌ಕರಾಸ್‌. ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಇವ್ಣುನ ಮಳ್‌ಣುತೆ ಇನಾಮ್ ತದ್ದೇಸ್ ಮಳಿಗಯು.
MAT 6:6 ಕತೋಬಿ ತೂ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತಾರ ಮಹಿನಕೋಣಾಮ ಜೈ಼ನ್, ಬಾಕಲ್‌ ಲಗಾಡಿನ್, ದಿಲ್ಮ ಛಾ಼ತೆ ತಾರ ಬಾನ ಪ್ರಾರ್ಥನೆ ಕರ್‌. ತದೆ ದಿಲ್ಮ ಚಾ಼ಲಾಸ್ತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.
MAT 6:7 “ತೂ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ದೇವ್ನ ಪರ್ಖಾಕೊಂತೆ ಅದ್ಮಿ ಬೋಲಾಸ್ತೆ ಇಮ್‌, ಮತ್ಲಬ್‌ಕೊಂತೆ ವಾತೇನ ಘಡಿಕೇಡೆ ನಕೊ ಬೋಲ್. ಇವ್ಣೆ ಘಣಿ ವಾತೆ ಬೋಲ್ಯಾತೊ, ಇವ್ಣಿ ಪ್ರಾರ್ಥನೆ ದೇವ್ ಖ್ಹಮಜ಼್‌ಶೆ ಕರಿ ಸೋಚ಼ಸ್‌.
MAT 6:8 ಇನಖ್ಹಾಜೇಸ್ ತುಮೆ ಇವ್ಣಿನಿಘೋಣಿ ನಕೊ ಕರೊ, ತುಮೆ ತುಮಾರ ಬಾಕನ ಮಾಂಗಿಲ್ಯವಾನ ಅಗಾಡಿಸ್, ತುಮೂನ ಶಾತ್‌ ಜ಼ರೂರತ್ ಛಾ಼ ಕರಿ ಇನ ಮಾಲುಮ್‌.
MAT 6:9 ಇನಖ್ಹಾಜೇಸ್, ತುಮೆ ಸೊರ್ಗಾನ ಬಾನ ಅಮ್ ಪ್ರಾರ್ಥನೆ ಕರ‍್ನು:
MAT 6:10 ಸೊರ್ಗಾಮ ಛಾ಼ತೆ ಮಾರೊ ಬಾ: ತಾರು ನಾಮ್ ಪರಿಶುದ್‌ಕರಿ ಗಣ್ತಿ ಹುವಾದೆ. ತಾರಿ ರಾಜ್ಯ ಆವಾದೆ; ತಾರಿ ಮರ್ಜಿ ಸೊರ್ಗಾಮ ಚಾ಼ಲಾಸ್ತೆ ಇಮ್ಮಸ್, ಧರ್ತಿಪರ್‌ಬಿ ಚಾ಼ಲಾದೆ.
MAT 6:11 ಹಮ್ಕೆ ಹಮೂನ ದನ್‌ಪರೋಜ಼್‌ನು ಖಾಣು ದೇ.
MAT 6:12 ಹಮಾರ ವಿರೋದ್ ಗಲತ್‌ ಕರಾವಾಳನ, ಹಮೆ ಮಾಪ್‌ ಕರೇಸ್ತೆ ಇಮ್ಮಸ್, ಹಮಾರಿ ಗಲ್ತಿನ ತೂ ಮಾಪ್‌ಕರ್‌.
MAT 6:13 ಹಮೂನ ಶೋದನೆಮ ನಕೊನಾಕ್‌, ಕತೋಬಿ ಶೈತಾನ್‌ಥಿ ಹಮೂನ ಛೋ಼ಡಾವ್.’
MAT 6:14 ತುಮೆ ಅದ್ಮಿಖ್ಹಾರನಿ ಗಲತ್‌ನ ಮಾಪ್‌ ಕರ‍್ಯಾತೊ, ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮಾರಿ ಗಲತ್‍ನಾಬಿ ಮಾಪ್‌ ಕರ್ಶೆ.
MAT 6:15 ಕತೋಬಿ ತುಮೆ ಅದ್ಮಿನು ಗಲತ್‌ನ ಮಾಪ್‌ ನಾ ಕರ‍್ಯಾತೊ, ತುಮಾರೊ ಬಾ ಹುಯಿರ‍್ಹೋತೆ ದೇವ್‌ಬಿ ತುಮಾರು ಗಲತ್‌ನ ಮಾಪ್‌ ಕೋ ಕರ್‌ಶೇನಿ.
MAT 6:16 “ತುಮೆ ಉಪವಾಸ್ ಕರಾನಿ ವಖ್ಹತ್‌ಮ, ಖೋಟ್ ದಿಲ್‌ವಾಳನಿಘೋಣಿ ಮ್ಹೋಡು ನಾ ಮುರ್‌ಝೈ಼ಲೇಣು. ಇವ್ಣೆ ಉಪವಾಸ್ ಛಾ಼ ಕರಿ ಅದ್ಮಿಯೇನ ವತಾಳಿಲೆವಾನಖ್ಹಾಜೆ ಇವ್ಣು ಮ್ಹೋಡಾನ ಇಮ್‌ ಕರಿಲೇಸ್, ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಇವ್ಣುನ ಮಳ್‌ಣುತೆ ಇನಾಮ್ ತದೇಸ್‌ ಮಳಿಗಯು.
MAT 6:17 ಕತೋಬಿ ತೂ ಉಪವಾಸ್ ಕರಾನಿ ವಖ್ಹತ್‌ಮ, ಮುಡ್‌ಕ್ಯಾನ ತೇಲ್ ಲಗಾಡಿಲೀನ್‌, ಮ್ಹೋಡು ಧೊಯಿಲೆ.
MAT 6:18 ಅಮ್ ಕರ‍್ಯೋತೊ, ತೂ ಉಪವಾಸ್ ಛಾ಼ ಕರಿ ಅದ್ಮಿಯೇನ ಮಾಲುಮ್‌ ಕೋ ಪಡ್‌ಶೇನಿ, ಕತೋಬಿ ದಿಲ್ಮ ರ‍್ಹವಾಳ ತಾರ ಬಾನ ಯೋ ಮಾಲುಮ್‌ಪಡ್‍ಶೆ. ದಿಲ್ಮ ಚಾ಼ಲಸ್ತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.
MAT 6:19 “ಜಗತ್‌ಪರ್ ತುಮಾರಖ್ಹಾಜೆ ಧನ್‌ದೌಲತ್‌ನ ನಕೊ ಜ಼ಮಕರಿಲೇವೊ, ಹಜ್ಜಾ಼ ಇನ ಕಿಲಪ್‍ಧರೀನ್‌, ಕೋರ‍್ಹಖೈನ್‌, ನಾಶ್ ಹುಯಿಜಾ಼ಸ್ ಅಜು಼ ಚೋ಼ರ್ ಖ್ಹಾರು ಘರ್‌ನ ಫೋಡಿನ್, ಇನ ಚೋ಼ರಿ ಕರಿಲಿಶೆ.
MAT 6:20 ಕತೋಬಿ ಸೊರ್ಗಾಮ ಶೊತ್‍ ಕರಿರಾಖೊ. ಹಿಜ್ಜಾ಼ ಯೋ ಕೋರ‍್ಹ ಖೈನ್‌, ಕಿಲಪ್‍ ಧರೀನ್ ಲುಕ್ಷಾನ್ ಕೋ ಹುವಾನಿ, ಅಜು಼ ಚೋ಼ರ್ ಖ್ಹಾರು ಘರ್‌ಫೋಡ್‍ಶೇಬಿ ಕೊಯ್ನಿ. ಚೋ಼ರೀಬಿ ಕರಾಕೊಯ್ನಿ.
MAT 6:21 ಶನಕತೊ ತುಮಾರಿ ಶೊತ್‌ ಕಿಜ್ಜಾ಼ ರ‍್ಹೇಸ್ಕಿ, ಹಿಜ್ಜಾ಼ಸ್ ತುಮಾರೊ ದಿಲ್‌ಬಿ ರ‍್ಹೇಸ್‌.
MAT 6:22 “ಡೋಳಾ ಶರೀರ್‌ನ ದಿವಾನಿಘೋಣಿ ಹುಯಿರ‍್ಹುಸ್‍. ತಾರ ಡೋಳ ಬರೋಬರ್ ರ‍್ಹಯಾತೊ, ತಾರು ಶರೀರ್ ಅಖ್ಖುಸ್, ಉಜಾ಼ಳು ಹುಯಿರ‍್ಹಿಷೆ.
MAT 6:23 ಕತೋಬಿ ತಾರ ಡೋಳಾ ಖರಾಬ್ ರ‍್ಹಯಾತೊ, ತಾರು ಶರೀರ್ ಅಖ್ಖುಸ್ ಅಂಧಾರು ಹುಯಿರ‍್ಹಿಷೆ. ತಾರಮಾನು ಉಜಾ಼ಳುಸ್‌ ಅಂಧಾರು ಹುಯಿರ‍್ಹಯುತೊ, ಯೋ ಕೆತ್ರೆ ಖತರ್‌ನಾಕ್ ಹುಯಿರ‍್ಹಿಶೆ!
MAT 6:24 “ಕೋಣ್‌ಬಿ ಬೇ ಯಜಮಾನ್ನ ಸೇವೆಕರಾನ ಕೊಹೊಯ್ನಿ. ಯೋ ಏಕ್‌ನ ವಹೇರ್‌ ಕರೀನ್, ಬಿಜೇಕ್‌ನ ಪ್ಯಾರ್ ಕರ್ಶೆ; ನತರ್ ಏಕ್‌ನ ಜೋ಼ಡೆ ಅಛ್ಛಿಂತ್ರ ರ‍್ಹೀನ್, ಬಿಜೇಕ್‌ನ ಫಿಕ್ಕರ್‌ಕೊಕರ್ಷೇನಿ. ತುಮೆ ದೇವ್‍ನಾಬಿ, ಪೈಶಾನಾಬಿ ಭೇನಾ ಏಕ್‌ದಮ್ ಸೇವೆ ಕರಾನ ಕೋಹುವ್ವಾನಿ.
MAT 6:25 ಇನಖ್ಹಾಜೇಸ್ ಮೇ ತುಮೂನ ಬೋಲುಸ್ಕಿ, ಜಿವಾನಖ್ಹಾಜೆ ಶಾತ್‌ ಖಾಣು ಅಜು಼ ಪೀಣು ಕರಿ ಬೋಲಾನಿ ಬಾರೇಮರ‍್ಹವೊ, ನತರ್‌ಕಿ ಶರೀರ್‌ನ ಹೋಣುತೆ ಲುಂಗ್ಡಾವ್‍ನಿ ಬಾರೇಮರ‍್ಹವೊ ವೇಚ಼್‌ಣೆ ನಕೊ ಕರೊ. ಖಾಣಥೀಬಿ ಜಾನ್‌, ಅಜು಼ ಲುಂಗ್ಡಾವ್‍ಥೀಬಿ ಶರೀರ್ ಮಹಾನ್ ಕಾಹೆಕಿ ಶು?
MAT 6:26 ಆಕಾಶ್‌ಪರ್ ಉಡಾಸ್ತೆ ಜಿನಾವರ್‌ನ ದೇಖೊ, ಯೋ ಪಿಕಾವಕೊಯ್ನಿ, ವ್ಹಾಡಕೊಯ್ನಿ, ಕಣ್ಗಿ ಭರಿನ್ ಮ್ಹೇಲಾಕೊಯ್ನಿ. ಇಮ್‌ ರ‍್ಹಯುತೋಬಿ, ಸೊರ್ಗಾಮ ಛಾ಼ತೆ ತುಮಾರೊ ಬಾ, ಯೋ ಖ್ಹಾರಾನ ಪಾಳಿನ್ ಪರ್ವೇಶ್ ಕರಾಸ್. ಇವ್ಣೆಥಿಬಿ ತುಮೆ ಕೆತ್ರೇಕ್ಕಿ ಊಚ಼ ಹುಯಿರ‍್ಹಾಸ್ನಿ?
MAT 6:27 ತುಮೆ ವೇಚ಼್‌ಣೆ ಕರಿನ್‌ ಏಕ್‌ ಘಡಿತೋಬಿ ಜಾ಼ಖ್ಹತ್ ಜಿವಾನ ತುಮಾರಮ ಕಿನೇಥೀಬಿ ಉಶೇಕಿ ಶು?
MAT 6:28 ಎತ್ರೇಸ್ ಕಾಹೆತೆ ಪೇರ‍್ಹಾನ ಲುಂಗ್ಡಾನಿ ಬಾರೇಮ ಶನ ಫಿಕರ್ ಕರೋಸ್? ಜ಼ಂಗ್‍ಳಿಫೂಲ್‍ ಫುಟಾಸ್ತೆ ತರಿಕಾನ ದೇಖೊ: ಯೋ ಮ್ಹಿನತ್ ಕರಕೊಯ್ನಿ, ಖ್ಹುದ್‌ನಖ್ಹಾಜೆ ಲುಂಗ್ಡಾಬಿ ಬಣೈಲೇಯ್ ಕೊಯ್ನಿ.
MAT 6:29 ರ‍್ಹಯುತೋಬಿ ಮೇ ತುಮೂನ ಬೋಲುಸ್ಕಿ, ರಾಜ಼ ಸೊಲೊಮೋನ್ ಇನಾಕನ ಥೂತೆ ಖ್ಹಾರೂಸ್ ವೈಭೋಗ್‌ಥಿಬಿ ಪೇರ್‌ವಾಖ್ಹ್‌ನ ಪೇರ‍್ಹಿರಾಖ್ಯೊಥೋತೆ ವಖ್ಹತ್‍ಮಾಬಿ, ಆ ಫೂಲ್‌ಮ ಏಕ್‌ನ ಛಾ಼ತೆ ಶನ್‌ಗಾರ್ ಎತ್ರೆ ಇನ ಕೋ ಥೂನಿ.
MAT 6:30 ಅಲಾ, ದರ್ರಾಶಿ ವಿಶ್ವಾಸ್‌ವಾಳ, ಹಮ್ಕೆರ‍್ಹೀನ್‌ ಕಾಲ್‌ ಚು಼ಲ್ಹಾಮ ಬಳಿಜಾ಼ವಾನ ಜ಼ಂಗ್‌ಳಿ ಘಾಖ್ಹ್‌ನ ದೇವ್ ಅಮ್ ಪೇರ‍್ಹಾಯೋತೊ, ಅನೇಥಿಬಿ ಜಾ಼ಖ್ಹತ್ ತುಮೂನ ಹೋಡಾವ್‌ಶೆ, ಫೇರಾವ್‌ಶೆ ಕೊಯ್ನಿಕಿಶು?
MAT 6:31 ಇನಖ್ಹಾಜೇಸ್, ಶಾತ್‌ ಖಾಣು? ಕರಿ ರ‍್ಹವೊ, ನತರ್‌ಕಿ ಶಾತ್‌ ಪೀಣು?ಕರಿ ರ‍್ಹವೊ, ಶಾತ್ ಫೇರ್‌ನು? ಕರಿ ಬೋಲಾನಿ ಬಾರೇಮ ರ‍್ಹವೊ ವೇಚ಼್‌ಣೆ ನಕೊ ಕರೊ.
MAT 6:32 ಆ ತಮಾಮ್‍ನಖ್ಹಾಜೆ ದೇವ್‌ಮ ಅಲಕ್‌ ಅದ್ಮಿಖ್ಹಾರು ಕದೇಬಿ ವೇಚ಼್‌ಣೆ ಕರಸ್. ಆ ಖ್ಹಾರು ತುಮೂನ ಜ಼ರೂರತ್ ಛಾ಼ಕರಿ ಪರಲೋಕ್‍ಮ ಛಾ಼ತೆ ತುಮಾರ ಬಾನ ಮಾಲುಮ್.
MAT 6:33 ಅನಬದಲ್, ತುಮೆ ಪಹಿಲೆ ದೇವ್ನು ರಾಜ್ಯನಖ್ಹಾಜೆ ಅಜು಼ ಇನಿ ನೀತಿನ ಖ್ಹಾಜೇಬಿ ತರ್ಖ್ಹೊ. ತದೆ ಅನಜೋ಼ಡೆ ಯೋ ಖ್ಹಾರೂಸ್ ಮಳ್‌ಶೆ.
MAT 6:34 ಇನಖ್ಹಾಜೇಸ್, ಕಾಲ್ನಿ ಬಾರೇಮ ಫಿಕರ್ ನಕೊ ಕರೊ; ಕಾಲ್‌ನೊ ದನ್ ಇನಿ ಬಾರೇಮ ಯೋಸ್ ಫಿಕರ್ ಕರಿಲಿಶೆ. ಯೋ ದನ್ನಿ ಖ್ಹತಾಪ್ಣಿ ಯೋ ದನ್‌ಮಾಸ್ ಬಶ್‌.
MAT 7:1 “ತುಮೆ, ಬಿಜಾ಼ನ ತೀರ್ಪ್‌ ನಕೊ ಕರೊ, ತದೆ ದೇವ್‌ಬಿ ತುಮೂನ ತೀರ್ಪ್‌ ಕೋ ಕರ್‌ಶೇನಿ.
MAT 7:2 ತುಮೆ ಬಿಜಾ಼ನ ಕಿಮ್ ತೀರ್ಪ್‌ ಕರಾಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ತೀರ್ಪ್ ಕರ್ಶೆ, ಅಜು಼ ತುಮೆ ಬಿಜಾ಼ನ ಕಿಮ್ ಮಾಪಿನ್‌ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪಿನ್‌ ದಿಶೆ.
MAT 7:3 ‘ತೂ ತಾರ ಡೋಳಾಮ ಛಾ಼ತೆ ಪೇದಡ್‌ನಿ ಬಾರೇಮ ಸೋಚ್ಯೊಕೊಂತೆ, ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿನಿ ಬಾರೇಮ ಸೋಚಾಸ್ತೆ ಕಿಮ್?
MAT 7:4 ತು ತಾರ ಭೈನ, ಭೈ ತಾರ ಡೋಳಾಮ ಛಾ಼ತೆ ಕಾಕ್ರಿನ ಕಾಡುಸ್‌ ಆವ್’ ಕರಿ ತು ಕಿಮ್ ಬೋಲಾಸ್? ತಾರ ಡೋಳಾಮ ಪೇದಡಸ್‌ ಛಾ಼ನಿ?
MAT 7:5 ಅಲಾ ಠಗಾರ! ತಾರ ಡೋಳಾಮ ಛಾ಼ತೆ ಪೇದಡ್‌ನ ಪಹಿಲೆ ಕಾಡ್, ತದೆ ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿ ತುನ ಅಛ್ಛಿನಿತರ ದೆಖಾವ್‌ಶೆ.
MAT 7:6 ಪರಿಶುದ್ ರಾಛ಼ವ್‍ನ ಕುತ್‌ರ‍್ಯಾವ್‍ನ ನಕೊ ನಾಖೊ; ಯೊ ಪಾಛು಼ಫರಿ ತುಮಾರಪರ್ ಪಡಿನ್ ಕಲ್ಡಿನಾಕ್ಷೆ. ಮುತ್ತ್ ಖ್ಹಾರು ಡೂಕರ್‌ನ ಖ್ಹಾಮ್ಣೆ ರಂಚೊ಼ ನಕೊ. ಯೊಅಖ್ಖು ಯೊ ಮುತ್ನ ಖುಂದ್ಲಿನಾಕ್ಷೆ.
MAT 7:7 “ಮಾಂಗಿಲೇವೊ, ತದೆ ತುಮೂನ ದೇವಾವ್‌ಶೆ; ಢೂಂಡೊ, ತದೆ ತುಮೂನ ಮಳ್‌ಶೆ; ಖಟ್‌ಖಟಾವೊ, ತುಮುನ ಬಾಕಲ್‌ ನಿಕಳ್‌ಶೆ,
MAT 7:8 ಶನಕತೊ ಮಾಂಗವಾಳ ಹರೇಕ್‌ನ ದೆವಾವ್‌ಶೆ, ಅಜು಼ ಢೂಂಡವಾಳನ ಮಳ್‌ಶೆ, ಕೋಣ್ ಖಟ್‌ಖಟಾವಸ್ಕಿ ಇನ ಬಾಕಲ್ ಕಡಾವ್‌ಶೆ.
MAT 7:9 ತುಮಾರಾಮ ಕೋಣ್‌ತೋಬಿ ರೋಟೊ ಮಾಂಗವಾಳ ಛಿಯ್ಯಾನ ಬಂಡೊ ದಿಶುಕಿ ಶು?
MAT 7:10 ನತರ್‌ಕಿ ಮಾಛ಼್‌ಲು ಮಾಂಗ್ಯೊತೊ, ಖ್ಹಾಪ್‍ನ ದಿಶೆ!
MAT 7:11 ಇಮ್‍ಕತೊ ಖರಾಬ್ ಹುಯಿರ‍್ಹಾತೆ ತುಮೇಸ್ ತುಮಾರ ಲಡ್ಕಾವ್‍ನ ಅಛ್ಛು಼ ರಾಛ಼ವ್‌ನ ದೆವಾಪರ್, ಪರಲೋಕ್‌ನೊ ತುಮಾರೊ ಬಾ, ಇನಾಕನ ಮಾಂಗವಾಳನ ಕೆತ್ರೇಕ್ಕಿ ಅಛ್ಛು಼ ರಾಛ಼ವ್‍ನ ದಿಶೆಕೊಯ್ನಿಕಿ ಶು?
MAT 7:12 ಅದ್ಮಿಖ್ಹಾರು ತುಮೂನ ಶಶ್ಶಾತ್ ಕರ‍್ನುಕರಿ ತುಮೆ ಆಖ್ಹ್ ಕರೋಸ್ಕಿ, ಯೋಸ್ ತುಮೆ ಇವ್ಣುನ ಕರೊ: ಮೋಶೇನು ಧರ್ಮಶಾಸ್ತ್ರ ಅಜು಼ ಪ್ರವಾದಿಯೇನು ವಚನ್ನು ಮತ್‌ಲಬ್ ಆಸ್ ಹುಯಿರ‍್ಹೂಸ್.
MAT 7:13 ನ್ಹಾನ ಬಾಕಲ್ ವಾಟೆಕರಿ ಮಹಿ ಜಾ಼ವೊ, ಶನಕತೊ ನರಕ್‌ನ ಜಾ಼ವಾನು ಬಾಕಲ್ ಝಾ಼ಲು ಅಜು಼ ಇನಾಮ ಚಾ಼ಲಿ ಜಾ಼ವಾನು ಶುಲ್ಬ, ಅಜು಼ ಇನಾಮ ಜಾ಼ವಾಳು ಅದ್ಮಿ ಘಣು.
MAT 7:14 ಕತೋಬಿ ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನು ಬಾಕಲ್‌ ನ್ಹಾನು ಅಜು಼ ಇನಾಮ ಜಾ಼ವಾನ ಮುಶ್ಕಿಲ್, ಯೋ ಮಾರಗ್‌ನ ಢೂಂಡಿಲ್ಯವಾಳು ಥೋಡುಸ್ ಅದ್ಮಿ.
MAT 7:15 ಝೂ಼ಟ ಪ್ರವಾದಿಯೇನಿ ಬಾರೇಮ ಹೊಷಾರ್‌ಥಿ ರ‍್ಹವೊ; ಇವ್ಣೆ ಮೇಂಢಾನು ಪೇರ್‌ವಾಖ್ಹ್‌ನ ಘಾಲಿಲೀನ್‌ ತುಮಾರಕನ ಆವ್‌ಶೆ, ಕತೋಬಿ ಮಹಿ ದೇಖ್ಯುತೊ ಇವ್ಣೆ ಖ್ಹಾಚಮಾಬಿ ಝಂಜೋ಼ಡಿ ಖವಾಳ ಜ಼ರಕ್‌ನಿಘೋಣಿ ಹುಯಿರ‍್ಹೂಸ್.
MAT 7:16 ತುಮೆ ಇವ್ಣಿ ಚಾ಼ಲ್‌ಥೀಸ್ ಇವ್ಣುನ ಮಾಲುಮ್‌ ಕರಿಲಿಶು. ಕಾಟಾನಿ ಡಾಗೇಮ ದ್ರಾಕ್ಷಿನು ಪಂಡಾ ಅಜು಼ ದತ್ತೂರಿನ ಝಾ಼ಡಾವ್‌ಮ ಅಂಜೀರ್‌ನ ಪಂಡಾ ಮ್ಹೇಲಾಸ್ಕಿ ಶು?
MAT 7:17 ಇಮ್ಮಸ್ ಅಛ್ಛು಼ ಝಾ಼ಡು ಅಛ್ಛು಼ಸ್ ಪಂಡು ದೇಸ್, ಕತೋಬಿ ಕೀಡ್‌ಣು ಝಾ಼ಡು ಖ್ಹಡ್ಯುಪಂಡು ದೇಸ್.
MAT 7:18 ಅಛ್ಛು಼ ಝಾ಼ಡು ಖ್ಹಡ್ಯು ಪಂಡು ಕೋ ದೇಯ್ನಿ, ಅಜು಼ ಕೀಡ್‌ಣು ಝಾ಼ಡು ಅಛ್ಛು಼ ಪಂಡು ಕೋ ದೇಯ್ನಿ.
MAT 7:19 ಅಜು಼ ಅಛ್ಛು಼ ಪಂಡು ದೇಯಿಕೊಂತೆ ಹರೇಕ್ ಝಾ಼ಡನ ಕತ್ರೀನ್, ಆಗ್‌ಮ ನಾಖಾಸ್.
MAT 7:20 ಅಮ್ ಝೂ಼ಟಿ ಪ್ರವಾದಿಯೇನು ಚಾ಼ಲ್‌ಥೀಸ್ ತುಮೆ ಇವ್ಣುನ ಮಾಲುಮ್‌ ಕರಿಲಿಶು.
MAT 7:21 “ಮನ, ‘ಪ್ರಭು, ಪ್ರಭು’ ಕರಿ ಬೋಲವಾಳು ಖ್ಹಾರು ಸೊರ್ಗ ರಾಜ್ಯಮ ಜಾ಼ಶೆಕರಿ ನಕೊಲ್ಹಾವೊ. ಕತೋಬಿ ಸೊರ್ಗಾಮ ಛಾ಼ತೆ ಮಾರ ಬಾನಿ ಮರ್ಜಿನಿಘೋಣಿ ಚಾ಼ಲವಾಳುಸ್ ಸೊರ್ಗ ರಾಜ್ಯಮ ಜಾ಼ಶೆ.
MAT 7:22 ನ್ಯಾವ್‍ನಿ ತೀರ್ಪ್‌ನ ದನ್ಮ ಕೈಯೆಕ್ಕಿ ಅದ್ಮಿ ಮನ, ‘ಪ್ರಭು, ಪ್ರಭು’ ತಾರ ನಾಮ್‌ಪರ್‌ ಹಮೆ ಪ್ರವಾದ್‌ನೆ ಬೋಲ್ಯ, ತಾರ ನಾಮ್‍ಪರ್ ಹಮೆ ಭೂತ್‌ನ ಖ್ಹಾರು ಕಾಡ್ಯ ಅಜು಼ ಕೈಯೆಕ್ಕಿ ಮಹಾನ್ ಕಾಮ್ನ ಕರ‍್ಯಾ, ಕರಿ ಬೋಲ್‌ಶೆ.
MAT 7:23 ತದೆ ಮೇ ಇವ್ಣುನ, ತುಮೆ ಕೋಣ್‌ಕರಿ ಮನ ಮಾಲುಮಸ್ ಕೊಯ್ನಿ. ಮಾರೇಥಿ ದೂರ್ ಹಟಿಜಾ಼ವೊ, ತುಮೆ ಖರಾಬ್ ಅದ್ಮಿ ಹುಯಿರ‍್ಹಾಸ್!” ಕರಿ ಬೋಲಿಶ್.
MAT 7:24 “ಇನಖ್ಹಾಜೇಸ್, ಆ ಮಾರಿ ವಾತೇನ ಖ್ಹಮ್‌ಜಿನ್‌, ಅನೀನಿಘೋಣಿ ಚಾ಼ಲವಾಳು ಹರೇಕ್ ಜ಼ಣು ಬಂಡಾಪರ್ ಘರ್ ಭಾಂದಿಲೇಸ್ತೆ ಅಕ್ಲಿ ಅದ್ಮಿನಿಘೋಣಿ ಹುಯಿರ‍್ಹೂಸ್.
MAT 7:25 ಭಾಂದಾನ ಬಾದ್ಮ ಅಪಟ್-ಜ಼ಪಟ್‌ನೊ ಪಾಣಿ ವರ್ಶೀನ್, ನದ್ದಿಯೆ ಭರೈನ್ ಆಯು, ಅಜು಼ ಚಾರ‍್ಹೆ ಆಡಿಥು ವ್ಹಾಯಿರೊ ವಾಗಿನ್ ಯೋ ಘರ್‌ನ ಮಾರ್ ಪಡ್ಯು. ಕತೋಬಿ ಯೋ ಘರ್ ಬಂಡಾಪರ್ ಭಂದೈರ‍್ಹೂಥೂತೆ ಇನಖ್ಹಾಜೆ, ಯೋ ರಡ್‍ಕ್ಯು ಕೊಯ್ನಿ.
MAT 7:26 ಕತೋಬಿ ಆ ಮಾರಿ ವಾತೇನ ಖ್ಹಮ್‌ಜಿನ್‌ಬಿ, ಇನೀನಿಘೋಣಿ ಚಾ಼ಲಕೊಂತೆ ಹರೇಕ್ ಜ಼ಣು ರೇತಿಪರ್ ಘರ್ ಭಾಂದಿಲೇಸ್ತೆ ಬುಧ್ಧು ಅದ್ಮಿನಿಘೋಣಿ ಹುಯಿರ‍್ಹೂಸ್.
MAT 7:27 ಭಾಂದಾನ ಬಾದ್‌ಮ, ಅಪಟ್‌ಝ಼ಪಟ್‌ನೊ ಪಾಣಿ ವರ್ಶೀನ್, ನದ್ದಿಯೆ ಭರೈನ್ ಆಯು, ಅಜು಼ ಚಾರ‍್ಹೆ ಆಡಿಥು ವಹಿರೊ ವಾಗಿನ್, ಯೋ ಘರ್‌ನ ಮಾರ್ ಪಡ್ಯು. ತದೆ ಯೋ ಘರ್ ಧಡಮ್‌ ಕರಿ ರಡ್ಕಿ ಗಯು.
MAT 7:28 ಯೇಸುನೆ ಆ ಖ್ಹಾರಿ ವಾತೇನ ಬೋಲಿನ್ ಖತಮ್ ಕರಾನ ಬಾದ್ಮ, ಇನೆ ಬೋಲಿವತಾಳ್ಯೋತೆ ಇನಿ ಬಾರೇಮ ಅದ್ಮಿಖ್ಹಾರು ಘಣು ಆಶ್ಚರ್ಯಖಾದು.
MAT 7:29 ಶನಕತೊ, ಯೇಸು ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೇನಿಘೋಣಿ ಕಾಹೆತೆ ಅದಿಕಾರ್ ರ‍್ಹವಾಳಾನಿತರ ಬೋಲಿ ವತಾಳ್‌ತೋಥೊ.
MAT 8:1 ಯೇಸು ಪಹಡ್ ಉತ್ರಿನ್ ಆವಾದಿನ್, ಅದ್ಮಿನು ಏಕ್‌ ಝೂ಼ಂಡ್‌ ಇನ ಪೀಠೆ ಗಯು.
MAT 8:2 ತದೆ ಖೋಡ್‍ ಲಗ್ಯೋಹುಯೊ ಏಕ್‌ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್‌ಣ್ಯ ಟೇಕಿನ್, “ಪ್ರಭು, ತೂ ಮನ್ ಕರ‍್ಯೋತೊ, ಮನ ಶುದ್ದಿ ಕರೆಜಾ಼ಯ್” ಕರಿ ಬೋಲ್ಯೊ.
MAT 8:3 ಯೇಸುನೆ ಹಾತ್‌ ಖ್ಹಾಮ್ಣೆ ಕರೀನ್, ಇನ ಛೀಮಿನ್‌, “ಮನ ಮನ್ ಛಾ಼, ಶುದ್ದಿ ಹೂ” ಕರಿ ಬೋಲ್ಯೊ. ತದ್‌ನು-ತದ್ದೇಸ್ ಯೋ ಅದ್ಮಿನ ಖೋಡ್‍ ಅಛ್ಛು಼ ಹುಯಿಗಯು.
MAT 8:4 ತದೆ ಯೇಸುನೆ ಇನ, “ಖ್ಹಮಜ಼್! ಕಿನಾಬಿ ನಕೊ ಬೋಲೀಶ್‌; ಕತೋಬಿ ಯಾಜಕಕನ ಜೈ಼ನ್ ತಾರು ಆಂಗ್‌ತನ್‌ ವತಾಳಿನ್ ಮೋಶೇನೆ ನೇಮ್‌ಶಾಯೋತೆ ಕಾಣ್ಕೆನ ದೇ; ಅನೇಥಿ ಅದ್ಮಿಖ್ಹಾರಾಮ ತುನ ಅಛ್ಛು಼ ಹುಯಿಗಯು ಕರಿ ಸಬೂತ್ ರ‍್ಹಿಶೆ” ಕರಿ ಬೋಲ್ಯೊ.
MAT 8:5 ಯೇಸು ಕಪೆರ್ನೌಮ್‌ನ ಆವಾದಿನ್, ಖ್ಹೋಶಿಪಾಯಿನೊ ಮೋಟಾನೆ ಇನಾಕನ ಗಿಂಗೈನ್,
MAT 8:6 “ಪ್ರಭು, ಮಾರೊ ಸೇವಕ್ ಲಖ್‌ವೊ ಮಾರಿನ್, ಘರ್‌ಮ ಛಾ಼ದ್ರಿಪರ್‌ ಪಡ್ಯೋಸ್‌ ಅಜು಼ ಅಜಾ಼ಥಿ ಘಣು ತರಪ್‌ಡುಕರಾಸ್” ಕರಿ ಬೋಲಿಲಿದೊ.
MAT 8:7 ಯೇಸುನೆ, “ಮೇ ಆಯಿನ್, ಇನ ಅಛ್ಛು಼ ಕರುಸ್” ಕರಿ ಬೋಲ್ಯೊ.
MAT 8:8 ತದೆ ಯೋ ಖ್ಹೋಶಿಪಾಯಿನೊ ಮೋಟಾನೆ, “ಪ್ರಭು, ತೂ ಮಾರ ಘರ್‌ಕನ ಆವಾಯೆತ್ರೆ ಮೇ ಲ್ಹಾಯೇಕ್‌ನೊ ಕಾಹೆ. ತೂ ಖಲಿ ಏಕ್‌ ವಾತೆ ಬೋಲ್ಯೋತೊ ಬಶ್‌, ಮಾರ ಸೇವಕ್‌ನ ಅಛ್ಛು಼ ಉಶೆ.
MAT 8:9 ಮೇಬಿ ಬಿಜೇಕ್ ಅದಿಕಾರ್‌ನ ಹಾತ್‍ಹೇಟ್ ರ‍್ಹವಾಳೊ, ಮಾರ ಅದೀನ್‌ಮಾಬಿ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್‌ ಜ಼ಣಾನ ‘ಜಾ಼’ ಕರಿ ಬೋಲ್ಯೊತೊ ಜಾ಼ಸ್‌; ಬಿಜ್ಜೇಕ್‌ ಜ಼ಣಾನ, ‘ಆವ್’ ಕರಿ ಬೋಲ್ಯೋತೊ, ಆವಸ್; ಮಾರ ಆಳ್‌ನ, ‘ಅಮ್ನು-ಅಮ್ನು ಕರ್‌’ ಕರಿ ಬೋಲ್ಯೋತೊ, ಯೋ ಕರಸ್” ಕರಿ ಬೋಲ್ಯೊ.
MAT 8:10 ಯೇಸುನೆ ಅನಖ್ಹಮ್‌ಜಿನ್, ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್‌ತುಥೂತೆ ಇವ್ಣುನ, “ಮೇ ಅವ್ಡಿ ಮೋಟಿ ವಿಶ್ವಾಸ್‌ನ ಇಸ್ರಾಯೇಲ್‌ ಅದ್ಮಿಮಾಬಿ ಕೋ ದೇಖ್ಯೋನಿ ಕರಿ ತುಮೂನ ಖ್ಹಾಚಮಾಬಿ ಬೋಲುಸ್.
MAT 8:11 ಅತ್ರೇಸ್ ಕಾಹೆತೆ, ಮೇ ತುಮೂನ ಬೋಲುಸ್ಕಿ, “ಪೂರಬ್ ಪಶ್ಚಿಮ್ ದಿಕ್ ಭಣೀಥು ಅದ್ಮಿ ಐನ್, ಸೊರ್ಗನು ರಾಜ್ಯಮ ಅಬ್ರಹಾಮ್‌, ಇಸಾಕ್ ಅಜು಼ ಯಾಕೋಬನ ಜೋ಼ಡೆ ಖಾಣನ ಬೇಖ್ಹ್‌ಶೆ;
MAT 8:12 ಕತೋಬಿ ಕೋಣ್ ಆ ರಾಜ್ಯಮ ಮಳವಾಳೊಕಿ ಇವ್ಣೆ ಭಾರ್ ಅಂಧಾರಾಮ ಫೆಕೈಜಾ಼ಶೆ; ಹಿಜ್ಜಾ಼ ಇವ್ಣೆ ರೊವ್‌ಶೆ ಅಜು಼ ಕರ್‌-ಕರ್‌ ದಾತ್‌ ಚಾ಼ವಾನು ಉಶೆ” ಕರಿ ಬೋಲ್ಯೊ.
MAT 8:13 ಅಜು಼ ಯೇಸುನೆ ಯೋ ಖ್ಹೋಶಿಪಾಯಿನೊ ಮೋಟಾನ, “ತೂ ವಿಶ್ವಾಸ್ ಕರ‍್ಯೊತೆ ಇಮ್ಮಸ್ ತುನ ಹುವಾದೆ, ಘರೆ ಜಾ಼” ಕರಿ ಬೋಲ್ಯೊ. ಯೋಸ್‌ ವಖ್ಹತ್‌ಮ ಇನ ಸೇವಕ್‌ನ ಅಛ್ಛು಼ ಹುಯಿಗಯು.
MAT 8:14 ಅನಕೇಡೆಥು ಯೇಸು ಪೇತ್ರಾನ ಘರ್‌ಕನ ಆಯಿನ್, ಹಿಜ್ಜಾ಼ ಇನಿ ಖ್ಹಾಖ್ಹು ತಾವ್ ಐನ್, ಬಿಛಾ಼ವ್ಣಿಪರ್ ಖ್ಹುತಿಥೀತೆ ದೇಖ್ಯೊ.
MAT 8:15 ಯೇಸುನೆ ಇನ ಹಾತ್ನ ಛೀಮ್ಯೊ; ಛೀಮ್‌ತಾಸ್ನ ತಾವ್ ಉತ್ರಿಗಯೊ, ಅಜು಼ ಯೋ ಉಠೀನ್ ಇನಿ ಚಾ಼ಕ್ರಿ ಕರಿ.
MAT 8:16 ಖ್ಹಾಂಜ಼್ ಹುವ್ವಾದೀನ್, ಭೂತ್‌ ಧರಿರಾಖ್ಯುಥೂತೆ ಘಣ ಅದ್ಮಿನ ಯೇಸುಕನ ಬುಲೈಲಾಯು; ಯೇಸುನೆ ಖಲಿ ವಾತೆಥೀಸ್‌ ಭೂತ್‌ಖ್ಹಾರು ಕಾಡ್ಯೊ ಅಜು಼ ರೋಗ್‌ಮ ಥೂತೆ ಖ್ಹಾರಾನ ಅಛ್ಛು಼ ಕರ‍್ಯೊ.
MAT 8:17 ಅನೇಥಿ, “ಖ್ಹುದ್ ಇನೇಸ್‌ ಅಪ್ಣು ರೋಗ್‌-ರಾಯನ ಪಾಡಿಲಿದೊ, ಅಜು಼ ಅಪ್ಣ ಅಜಾ಼ನ ಢೊಯಿಲಿದೊ” ಕರಿ ಯೆಶಾಯ ಪ್ರವಾದಿಥಿ ಬೋಲೈತೆ ವಾತೆ ಚಾ಼ಲಾನಖ್ಹಾಜೆ ಯೇಸುನೆ ಆ ಖ್ಹಾರು ಕರ‍್ಯೊ.
MAT 8:18 ಯೇಸುನೆ ಇನ ಅಶ್‌ಪಿಶ್‌ಥೂತೆ ಅದ್ಮಿನಿ ಭೀಡ್‌ಣ ದೇಖಿನ್‌, ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಜಾ಼ವ್ಣುಕರಿ ಇನ ಶಿಷ್ಯರ್‌ನ ಹುಕುಮ್‌ ದಿದೊ.
MAT 8:19 ತದೆ ಮೋಶೆನಿ ವಚನ್ ಶಿಕಾಡವಾಳೊ ಏಕ್‌ ಜ಼ಣೊ ಐನ್, ಯೇಸುನ, “ಗುರು, ತೂ ಕಿಜ್ಗಾ಼ ಗಯೊತೋಬಿ ಮೇ ತಾರ ಪೀಠೇಸ್‌ ಆವ್‍ಸ್‌” ಕರಿ ಬೋಲ್ಯೊ.
MAT 8:20 ಯೇಸುನೆ ಇನ, “ನ್ಹೋರಿಯೆನ ಘವಿಯೆ ಛಾ಼, ಅಜು಼ ಆಬ್‌ಪರ್ ಉಡಾತೆ ಜಿನಾವರ್‌ನ ಖ್ಹಾರು ಮ್ಹಾಳೊ ಛಾ಼, ಕತೋಬಿ ಅದ್ಮಿನ ಛಿಯ್ಯಾನ ಮುಡ್‌ಕ್ಯು ಟೇಕಯೆವ್ಡಿ ಝ಼ಗೋಬಿ ಕೊಯ್ನಿ” ಕರಿ ಬೋಲ್ಯೊ.
MAT 8:21 ಶಿಷ್ಯರ್‌ಮ ಬಿಜೇಕ್‌ನೆ, “ಪ್ರಭು, ಮೇ ಪಹಿಲೆ ಜೈ಼ನ್‌ ಮಾರ ಬಾನ ಧಪ್‌ನೈದೀನ್‌ ಆವಾನ ಮನ ಹುಕುಮ್ ದೆ” ಕರಿ ಬೋಲ್ಯೊ.
MAT 8:22 ಯೇಸುನೆ ಇನ, “ಮಾರ ಪೀಠೆ ಆವ್, ಮರ‍್ಯಹುಯಾಸ್‌ ಇವ್ಣಮ ಮರಿಗಯೂತೆ ಇನ ಮಾಟಿ ಕರಾದೆ” ಕರಿ ಬೋಲ್ಯೊ.
MAT 8:23 ಯೇಸು ಡೋಣ್‌ಪರ್‌ ಚ಼ಢ್ಯೊ, ಅಜು಼ ಇನ ಶಿಷ್ಯರ್‌ಬಿ ಇನಜೋ಼ಡೆ ಗಯ.
MAT 8:24 ಎಕ್ಕಸ್‌ದಮ್‌, ಮೋಟೊ ವಹಿರೊ ದರ‍್ಯಾವ್‌ಮ ಹುವಾಲಗ್ಯೊ, ಅಜು಼ ಝೋ಼ಕಾಳ್ಯೊ ಆಯಿನ್ ಡೋಣ್ಣಾ ಢಾಪಿನಾಖನಿತರ ಹುಯು. ಕತೋಬಿ ಯೇಸು ಖ್ಹುತೋಥೊ.
MAT 8:25 ಶಿಷ್ಯರ್‌ ಯೇಸುಕನ ಜೈ಼ನ್‌, ಇನ ಉಠಾಡಿನ್, “ಪ್ರಭು, ಹಮೂನ ಬಚಾ಼ಡ್‍! ಹಮೆ ಮರ‍್ವಾನ ಆಯಾನಿ!” ಕರಿ ಬೋಲ್ಯ.
MAT 8:26 ಯೇಸುನೆ, “ತುಮೆ ಶನ ಡರೋಸ್ತೆ? ತುಮೂನ ಕಮ್‍ವಿಶ್ವಾಸ್ ಛಾ಼!” ಕರಿ ಬೋಲಿನ್, ಉಠೀನ್‌ ವಹಿರನಾಬಿ, ದರ‍್ಯಾವ್ನ ಗುರ್‌ಕಾಯೊ, ತದೆ ಖ್ಹಾರೂಸ್ ಖ್ಹೊಪೊ ಪಡಿಗಯು.
MAT 8:27 ಹರೇಕ್ ಜ಼ಣು ಅಶ್ಚರ್ಯ ಖೈನ್, “ಆ ಕಿಮ್ನೊ ಉಶೆ? ವಹಿರೋಬಿ, ದರ‍್ಯಾವ್‌ಬಿ ಜಿನು ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ?” ಕರಿ ಬೋಲ್ಯು.
MAT 8:28 ಅನಬಾದ್‍ಮ ಯೇಸು ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಗದರೇನ್‌ ಕರಿ ತಬರ್‌ಖಾನ ಆವಾದಿನ್, ಭೂತ್‌ ಧರಿರಾಖ್ಯುಥೂತೆ ಬೇ ಜ಼ಣು ಮಖ್ಹಾಣ್ಯನಿ ಘವಿಮಾಥೊ ನಿಕ್ಳಿನ್‌, ಇನಖ್ಹಾಮ್ಣೆ ಆಯು. ಇವ್ಣೆ ಘಣು ಚ಼ಂಢಾಳಿ ಹುಯಿರ‍್ಹುಥೂತೆ ಇನಖ್ಹಾಜೆ ಯೋ ವಾಟೆ ಕೋಣ್‌ಬಿ ಕೋ ಫರ್ತುಥೂನಿ.
MAT 8:29 ತದೇಸ್‌ ಇವ್ಣೆ, “ದೇವ್ನ ಛಿಯ್ಯಾ, ಹಮಾರೇಥಿ ತುನ ಶಾತ್‌ ಛಾ಼? ವಖ್ಹತ್ ಆವಾನ ಆಗಾಡಿಸ್‌ ಹಮೂನ ನಿಶತ್ ದ್ಯಾವಾನ ಐರ‍್ಹೋಸ್ಕಿ ಶು?” ಕರಿ ಚಿಕ್ರಿನ್ ಬೋಲ್ಯೊ.
MAT 8:30 ದರ್ರಾಶಿ ದೂರ್ ಪಾರಸ್ ಡೂಕರ್‌ನಿ ಏಕ್‌ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು.
MAT 8:31 ಯೋ ಭೂತ್‌ಖ್ಹಾರು, “ತೂ ಹಮೂನ ಅವ್ಣ ಮಹಿಥು ನಖ್ಹಾಡ್‌ತೊ ಉಶೇತೊ, ಯೋ ಡೂಕರ್‌ನಿ ಝೂ಼ಂಡ್‌ನ ಮಹಿ ಮೋಕಲ್” ಕರಿ ಗಿಂಗೈಲಿದು.
MAT 8:32 ಯೇಸುನೆ ಇವ್ಣುನ, “ಜಾ಼ವೊ” ಕರಿ ಬೋಲ್ಯೊ. ತದೆ ಯೋ ಭೂತ್‌ಖ್ಹಾರು ಇವ್ಣ ಭೇ ಜ಼ಣಾನ ಮ್ಹೆಂದಿನ್, ಡೂಕರ್‌ನ ಮಹಿ ಪೆಶಿಗಯು. ತದ್‌ನು-ತದ್ದೇಸ್ ಡೂಕರ್‌ಖ್ಹಾರು ನಾಶಿನ್, ಪಹಡ್‌ನಿ ಕಥಾರ್‌ಪರ್‌ಥು ದರ‍್ಯಾವ್‌ಮ ಪಡೀನ್, ಡುಬಿನ್ ಮರಿಗಯು.
MAT 8:33 ತದೆ ಡೂಕರ್‌ ಚ಼ರಾವವಾಳು ಇವ್ಣೆ ಗಾಮ್‌ನ ಮಹಿ ನಾಶಿ ಜೈ಼ನ್‌, ಭೂತ್‌ ಧರಿರಾಖ್ಯುಥೂತೆ ಇವ್ಣುನ ಚಾ಼ಲ್ಯುತೆ ಖ್ಹಾರಿಸ್ ಬಾರೇಮ ಬೋಲ್ಯು.
MAT 8:34 ತದೆ ಯೋ ತಬರ್‌ಖಾನು ಖ್ಹಾರುಸ್‌ ಅದ್ಮಿ ಯೇಸುನ ಮಳಾನಖ್ಹಾಜೆ ಆಯು; ಅಜು಼ ಇವ್ಣ ತಬರ್‌ಖಾನ ಮ್ಹೆಂದಿನ್ ಜಾ಼ ಕರಿ ಇನ ಗಿಂಗೈಲಿದು.
MAT 9:1 ಯೇಸುನೆ ಡೋಣ್‌ ಚ಼ಢೀನ್, ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಇನ ಗಾಮ್‌ನ ಪಾಛೊ಼ ಗಯೊ.
MAT 9:2 ಹಿಜ್ಜಾ಼ ಥೋಡ ಜ಼ಣಾನೆ ಬಿಛಾ಼ವ್ಣಿಪರ್ ಪಡ್ಯುಥೂತೆ ಏಕ್‌ಜ಼ಣೊ ಲಕ್‍ವೊ ಮಾರ‍್ಯುಹುಯಾನ, ಯೇಸುಕನ ಪಳ್ಳಿನ್‌ ಆಯು. ಇನೆ ಇವ್ಣಿ ವಿಶ್ವಾಸ್‌ನ ದೇಖಿನ್‌, ಯೋ ಲಕ್‍ವೊ ಮಾರ‍್ಯಹುಯಾನ, “ಮಾರ ಛಿಯ್ಯಾ, ಹಿಮ್ಮತ್‌ ರಾಕ್! ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
MAT 9:3 ಹಿಜ್ಜಾ಼ ಥೂತೆ ಮೋಶೇನು ವಚನ್‍ ಶಿಕಾಡವಾಳು ಶಾಸ್ತ್ರೀಮ ಥೋಡಜ಼ಣಾನೆ, “ಆ ಅದ್ಮಿ ದೇವ್ನಿ ವಿರೋದ್ ಬೋಲಾಸ್ನಿ!” ಕರಿ ಇವ್ಣ-ಇವ್ಣ ಮಹಿ ಬೋಲಿಲಿದು.
MAT 9:4 ಇವ್ಣೆ ಇಮ್‌ ಸೋಚುಕರಾತೆ ಯೇಸುನೆ ಮಾಲುಮ್‌ ಕರೀಲಿನ್‌, ಇವ್ಣುನ, “ಶನ ತುಮೆ ತುಮಾರ ಮನ್‌ಮ ಅಮ್ ಖರಾಬ್ ಸೋಚೋ಼ಸ್ತೆ?
MAT 9:5 ಕೆಹು ಶುಲ್ಬ? ‘ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗಯು’ ಕರಿ ಬೋಲಾನುಕಿ, ‘ಉಠೀನ್, ಚಾ಼ಲ್’ ಕರಿ ಬೋಲಾನು?
MAT 9:6 ಕತೋಬಿ ಅದ್ಮಿನೊ ಛಿಯ್ಯಾನ ಪಾಪ್‌ಖ್ಹಾರು ಮಾಪ್‌ ಕರಾನ ಧರ್ತಿಪರ್ ಹಕ್‌ ಛಾ಼ ಕರಿ ಮೇ ತುಮೂನ ವತಾಳುಸ್‌” ಕರಿ ಬೋಲಿನ್,ಯೋ ಲಕ್‌ವೊ ಮಾರಿರಾಖವಾಳನ, “ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್‌, ಘರೆ ಜಾ಼!” ಕರಿ ಬೋಲ್ಯೊ.
MAT 9:7 ತದೆ ಯೋ ಅದ್ಮಿ ಉಪ್ಪರ್ ಉಠೀನ್, ಘರೆ ಗಯೊ.
MAT 9:8 ಅದ್ಮಿಖ್ಹಾರು ಅನದೇಖಿನ್‌, ಡರಿನ್‌, ದೇವ್ನೆ ಅದ್ಮಿನ ಅಮ್ನಿ ಅದಿಕಾರ್ ದಿದೋತೆ ಇನಖ್ಹಾಜೆ ದೇವ್ನ ಖ್ಹರಾಯು.
MAT 9:9 ಯೇಸು ಹಿಜ್ಜಾ಼ಥೊ ಜಾ಼ತೊರ‍್ಹವಾನಿ ವಖ್ಹತ್‌ಮ, ಶುಂಕ ಮಾಂಗವಾಳೊ ಮತ್ತಾಯ ಕರಿ ಏಕ್‌ ಜ಼ಣೊ, ಶುಂಕ ಮಾಂಗಾನಿ ಝ಼ಗೋಪರ್ ಬೆಠೊಥೋತೆ ದೇಖಿನ್, ಯೇಸು ಇನ, “ಮಾರ ಪೀಠೆ ಆವ್” ಕರಿ ಬೋಲ್ಯೊ. ತದೆ ಮತ್ತಾಯ ಉಠೀನ್, ಇನ ಪೀಠೆ ಗಯೊ.
MAT 9:10 ಅನಕೇಡೆಥು, ಯೇಸು ಇನ ಘರ್‌ಮ ಖಾಣನ ಬೆಠೋರ‍್ಹವಾನಿ ವಖ್ಹತ್‌ಮ, ಘಣು ಅದ್ಮಿ ಶುಂಕ ಮಾಂಗವಾಳು ಅಜು಼ ಪಾಪಿಖ್ಹಾರು ಐನ್, ಯೇಸು ಅಜು಼ ಇನ ಶಿಷ್ಯರ್‌ನ ಜೋ಼ಡೆ ಖಾಣನ ಬೇಶಿಗಯು.
MAT 9:11 ಫರಿಸಾಯರ್‌ನೆ ಅನದೇಖಿನ್‌, ಯೇಸುನ ಶಿಷ್ಯರ್‌ನ, “ತುಮಾರೊ ಗುರು ಶುಂಕ ಮಾಂಗವಾಳನ ಅಜು಼ ಪಾಪಿ ಖ್ಹಾರಾನ ಜೋ಼ಡೆ ಶನ ಖಾಣುಖಾಸ್ತೆ?” ಕರಿ ಬೋಲ್ಯು.
MAT 9:12 ಅನ ಖ್ಹಮ್‌ಜಿನ್ ಯೇಸುನೆ, ಇವ್ಣುನ, “ಅಛ್ಛು಼ರ‍್ಹಾವಾಳಾನ ವೈದ್ಯ ಹೋಣುಕೊಯ್ನಿ, ರೋಗ್‌ಮ ರ‍್ಹಾವಾಳನ ವೈದ್ಯಹೋಣು.
MAT 9:13 ತುಮೆ ಜೈ಼ನ್‌, ‘ಮನ ಜಾನ್ವರ್‌ನು ಬಲಿ ನಕೊ, ಗೋರಸ್‌ ಹೋಣುತೆ’ ಕರಿ ಧರ್ಮಶಾಸ್ತ್ರಮ ಲೀಖೈರ‍್ಹೂಸ್ತೆ ವಚನ್ನಿ ಮತ್‌ಲಬ್ ಶಿಕಿಲೇವೊ. ಮೇ ಆಯೋತೆ ನೀತಿವಾಳ ಅದ್ಮಿಯೇನ ಬುಲಾವನ ಕಾಹೆ, ಕತೋಬಿ ಪಾಪಿ ಖ್ಹಾರಾನ ಬುಲಾವಾನಖ್ಹಾಜೆ ಆಯೋತೆ” ಕರಿ ಬೋಲ್ಯೊ.
MAT 9:14 ಅನಬಾದ್‍ಮ, ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನನು ಶಿಷ್ಯರ್‌ ಯೇಸುಕನ ಆಯಿನ್, “ಹಮೇಬಿ, ಫರಿಸಾಯರ್‌ಬಿ ತದೆ-ತದೆ ಉಪವಾಸ್ ಕರಿಯೇಸ್, ಕತೋಬಿ ತಾರು ಶಿಷ್ಯರ್‌ ಶನ ಉಪವಾಸ್ ಕೋ ಕರಾನಿ?” ಕರಿ ಪುಛಾ಼ಯು.
MAT 9:15 ಯೇಸುನೆ ಇವ್ಣುನ, “ವ್ಯಹಾನ ಛ಼ತ್‍ಮ ಆಯೂತೆ ಅದ್ಮಿ ಇವ್ಣ ಜೋ಼ಡೆ ನೌಶೊ ರ‍್ಹವಾತೋಡಿ ಇವ್ಣುನ ದುಖ್ ರ‍್ಹಿಶೇಕಿ ಶು? ಕೊಯ್ನಿ! ಕತೋಬಿ ನೌಶೊ ಇವ್ಣಾಕಂಥು ಮ್ಹೆಂದಿನ್ ಜಾ಼ವಾನಿ ವಖ್ಹತ್ ಆವ್‌ಶೆ, ತದೆ ಇವ್ಣೆ ದುಖ್ ಕರ್ಶೆ ಅಜು಼ ಉಪವಾಸ್ ಕರ್ಶೆ” ಕರಿ ಬೋಲ್ಯೊ.
MAT 9:16 “ಅಜು಼ ಕೋಣ್‌ಬಿ ನವು ಲುಂಗ್ಡಾನು ಥಿಗ್‌ಳು ಜೂ಼ನ ಲುಂಗ್ಡಾನ ಕೇಡೆಲಗಾಡಿನ್‌ ಶಿವಾಕೊಯ್ನಿ. ಇಮ್‌ ಕರ‍್ಯುತೊ, ಯೋ ನವು ಲುಂಗ್ಡಾನು ಥಿಗ್‌ಳು ಖೇಚಾ಼ವಸ್ತೆ ಇನಖ್ಹಾಜೆ, ಯೋ ಜೂ಼ನು ಲುಂಗ್ಡು ಬಿಜೂ಼ಬಿ ಜಾ಼ಖ್ಹತ್ ಫಾಟಿಜಾ಼ಸ್‌.
MAT 9:17 ಅತ್ರೇಸ್ ಕಾಹೆತೆ, ಜೂ಼ನಿ ಚಾ಼ಂಬ್ಡಾನಿ ತಿತ್ತಿಯೇಮ ನವು ದ್ರಾಕ್ಷಿನುರಖ್ಹ್‌ ಭರಿನ್‌ ಕೋ ಮ್ಹೇಲಾನಿ, ಇಮ್‌ ಮ್ಹೇಲ್ಯುತೊ ಚಾ಼ಂಬ್ಡಾನಿ ತಿತ್ತಿಯೆ ಫುಟಿನ್‌, ದ್ರಾಕ್ಷಿನು ರಖ್ಹ್‌ ಭಾರ್ ರಂಚೈ಼ಜಾ಼ಸ್‌, ಅಜು಼ ತಿತ್ತಿಯೇಬಿ ಬರ್ಬಾತ್ ಹುಯಿಜಾ಼ಸ್. ಇನಖ್ಹಾಜೇಸ್ ನವು ದ್ರಾಕ್ಷಿನು ರಖ್ಹ್‌ನ ನವಿ ತಿತ್ತಿಯೇಮ ಭರಿನ್‌ ಮ್ಹೇಲಾಸ್, ತದೆ ಭೇಬಿ ಬಚಿಜಾ಼ಸ್‌” ಕರಿ ಬೋಲ್ಯೊ.
MAT 9:18 ಯೇಸು ಇವ್ಣಿ ಜೋ಼ಡೆ ಆ ವಾತೆ ಬೋಲುಕರಾನಿ ವಖ್ಹತ್‌ಮ, ಯೆಹೂದ್ಯರ್‌ನೊ ಏಕ್‌ ಅದಿಕಾರಿ ಇನಾಕನ ಆಯಿನ್, ಇನಖ್ಹಾಮ್ಣೆ ಢುಕ್‌ಣ್ಯಟೇಕಿನ್, “ಮಾರಿ ಛೋ಼ರಿ ಹಂಕೇಸ್‌ ಮರಿಗೈ; ತೋಬಿ ತೂ ಐನ್ ಇನಾಪರ್‌ ಹಾತ್‌ ಮ್ಹೇಲ್ಯೋತೊ ಯೋ ಜಿವ್‌ತಿ ಉಶೆ” ಕರಿ ಗಿಂಗೈಲಿದೊ.
MAT 9:19 ತದೆ ಯೇಸು ಉಠೀನ್, ಇನ ಕೇಡೆ ಗಯೊ, ಅಜು಼ ಇನ ಶಿಷ್ಯರ್‌ ಇನ ಪೀಠೆ ಗಯ.
MAT 9:20 ಭಾರ ವರಖ್ಹ್‌ಥು ಮುಟ್ನು ರೋಗ್‌ಥೀತೆ ಏಕ್‌ ತಯೇಡ ಥಿ ಯೋ ಯೇಸುನ ಪೀಠೇಥಿ ಆಯಿನ್, ಇನ ಝ಼ಗ್ಗಾನು ಕನಾರಿನ ಛೀಮಿ.
MAT 9:21 ಯೋ ತಯೇಡ, “ಮೇ ಇನ ಲುಂಗ್ಡಾನ ಛೀಮೀತೊ ಬಶ್‌, ಮನ ಅಛ್ಛು಼ ಹುಯಿಜಾ಼ಶೆ” ಕರಿ ಇನು ಯೋಸ್ ಬೋಲಿಲಿದಿ.
MAT 9:22 ತದೆ ಯೇಸುನೆ ಫರೀನ್, ಇನಾಭಣಿ ದೇಖಿನ್‌, “ಛೋ಼ರಿ ಧಿಲ್‌ಪತ್‌ಥಿ ರ‍್ಹೇ! ತಾರಿ ವಿಶ್ವಾಸ್‌ಥೀಸ್‌ ತುನ ಅಛ಼್ಛುಹುಯು” ಕರಿ ಬೋಲ್ಯೊ. ಯೋಸ್‌ ವಖ್ಹತ್‌ಮ ಯೋ ತಯೇಡಾನ ಗುಣ್‌ಹುಯು.
MAT 9:23 ಅನಕೇಡೆಥು ಯೇಸು ಯೋ ಅದಿಕಾರಿನ ಘರೆ ಆಯೊತದೆ, ಹಿಜ್ಜಾ಼ ವಾಖ್ಹ್‌ಳಿ ವಜಾ಼ಡವಾಳನ ಅಜು಼ ಗಲಾಟ್ ಕರುಕರ್ತುಥೂತೆ ಅದ್ಮಿಖ್ಹಾರಾನ ದೇಖಿನ್‌,
MAT 9:24 “ಭಾರ್‌ ಜಾ಼ವೊ, ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!” ಕರಿ ಬೋಲ್ತಾನ, ಇವ್ಣೆ ಖ್ಹಾರು ಯೇಸುನ ದೇಖಿನ್ ನಕ್ಲೆಕಾಡಿ ಹಾಶ್ಯು.
MAT 9:25 ಅದ್ಮಿಖ್ಹಾರಾನ ಭಾರ್‌ ಮೋಕ್ಲಾನ ಬಾದ್ಮ, ಯೇಸು ಮಹಿ ಜೈ಼ನ್‌, ಯೋ ಛೋ಼ಕ್ರಿನೊ ಹಾತ್‌ ಧರ್‌ತಾನ, ಯೋ ಉಠಿ ಭೀರಿಗೈ.
MAT 9:26 ಆ ಖಬರ್ ಯೋ ದೇಖ್ಹ್‌ ಅಖ್ಖುಸ್ ಫೈಲಿಗಯು.
MAT 9:27 ಯೇಸು ಹಿಜ್ಜಾ಼ಥೊ ಜಾ಼ವಾನಿ ವಖ್ಹತ್‌ಮ, ಬೇ ಜ಼ಣು ಕಾಣು, “ದಾವೀದ್‌ನ ಛಿಯ್ಯಾ, ಹಮಾರಪರ್‌ ಗೋರ್‌ ಕರ್‌!” ಕರಿ ಜೋ಼ರೇಖ್ಹು ಚಿಕರ್ತು ಹುಯಿನ್, ಇನ ಪೀಠೆ ಗಯ.
MAT 9:28 ಯೇಸು ಘರ್‌ನ ಮಹಿ ಜಾ಼ವಾದಿನ್, ಯೋ ಭೇ ಕಾಣು ಇನಾಕನ ಆಯು, ಇನೆ ಇವ್ಣುನ, “ಮೇ ತುಮೂನ ಅಛ್ಛು಼ ಕರೆಜಾ಼ಯ್ ಕರಿ ತುಮೆ ನಂಬೋಸ್ಕಿ ಶು?” ಕರಿ ಪುಛಾ಼ಯೊ. ಇವ್ಣೆ, “ಓಹೋಲಾ, ಪ್ರಭು!” ಕರಿ ಜವಾಬ್‌ ದಿದು.
MAT 9:29 ತದೆ ಯೇಸುನೆ ಇವ್ಣ ಡೋಳಾ ಛೀಮಿನ್‌, “ತುಮೆ ವಿಶ್ವಾಸ್ ಕರ‍್ಯಾತೆ ಇಮ್ಮಸ್, ತುಮೂನ ಹುವಾದೆ!” ಕರಿ ಬೋಲ್ಯೊ.
MAT 9:30 ತದೆ ಇವ್ಣ ಡೋಳಾ ದೆಖಾವಲಗ್ಯ. ಅಜು಼ ಯೇಸುನೆ ಇವ್ಣುನ, “ಆ ಬಾರೇಮ ಕಿನಾಬಿ ನಾ ಬೋಲ್‌ನು!” ಕರಿ ಇವ್ಣುನ ಝೇತಾಯೊ.
MAT 9:31 ಕತೋಬಿ ಇವ್ಣೆ ಹಿಜ್ಜಾ಼ಥು ಚ಼ಲ್ಯೂಜೈ಼ನ್, ಯೇಸುನಿ ಬಾರೇನಿ ಖಬರ್‌ನ ಯೋ ದೇಖ್ಹ್‌ ಅಖ್ಖು ಫೈಲೈದಿದು.
MAT 9:32 ಇವ್ಣೆ ಭೇ ಜ಼ಣು ಹಿಜ್ಜಾ಼ಥು ಜಾ಼ವಾನಿ ವಖ್ಹತ್‌ಮ, ಥೋಡು ಅದ್ಮಿನೆ ಭೂತ್‌ ಧರಿರಾಖ್ಯುಥೂತೆ ಏಕ್‌ ಮುಕ್ಕಾನ ಯೇಸುಕನ ಲಾಯು.
MAT 9:33 ಯೇಸುನೆ ಯೋ ಭೂತ್‌ನ ನಖ್ಹಾಡಾನ ಬಾದ್ಮ, ಯೋ ಮುಕ್ಕೊ ವಾತೆ ಬೋಲಾಲಗ್ಯೊ. ತದೆ ಯೋ ಅದ್ಮಿಖ್ಹಾರು, “ಇಸ್ರಾಯೇಲ್‌ಮ ಅಮ್ನು ಕಾಮ್ನ ಹಮೆ ಕದೇಸ್‌ ಕೋ ದೇಖಿರಾಖ್ಯಾನಿ!” ಕರಿ ಆಶ್ಚರ್ಯಖಾದು.
MAT 9:34 ಕತೋಬಿ ಫರಿಸಾಯರ್‌ನೆ, “ಭೂತ್‌ ಖ್ಹಾರಾನೊ ಯಜಮಾನ್ನಿ ಮದತ್‌ಥೀಸ್ ಯೇಸು ಭೂತ್‌ನ ಖ್ಹಾರು ಕಾಡಸ್ತೆ” ಕರಿ ಬೋಲ್ಯು.
MAT 9:35 ಯೇಸು ಖ್ಹಾರ ಖ್ಹಯೇರ್‌ಮ ಅಜು಼ ಗಾಮ್ಮ ಕರಿ ಫರ್ತೊಹುಯಿನ್, ಇವ್ಣಿ ಸಬೆ ಭರಾವಾನು ಮಂದಿರ್‌ಮ ಬೋಲಿದೇತೊಹುಯಿನ್‌, ರಾಜ್ಯನಿ ಅಛ್ಛಿ ಖಬರ್‌ನ ಬೋಲ್ತೊಹುಯಿನ್, ಖ್ಹಾರಿಸ್ ತರ‍್ಹಾನು ರೋಗ್‌-ರಾಯನ ಅಛ್ಛು಼ ಕರ್ತೊ ಆಯೊ.
MAT 9:36 ಕತೋಬಿ ಅದ್ಮಿನಿ ಭೀಡ್ ದೇಖಿನ್‌, ಇವ್ಣೆ ಖ್ಹಾರು ಕುರುಬಕೊಂತೆ ಮ್ಹೇಂಢವ್‌ನಿ ಘೊಣಿ ಖ್ಹತಿರ‍್ಹೂತೆ ಅಜು಼ ಮದತ್‌ಕೊಂತೆ ಇಮ್‌ ಛಾ಼ ಕರಿ ಬೋಲಿನ್, ಇವ್ಣಾಪರ್ ಗೋರ್‌ ಖಾದೊ.
MAT 9:37 ತದೆ ಯೇಸುನೆ ಇನ ಶಿಷ್ಯರ್‌ನ, “ಅನಾಜ಼್ ಜಾ಼ಖ್ಹತ್ ಛಾ಼, ಕತೋಬಿ ಕಾಮ್ ಕರಾವಾಳು ಕಮ್;
MAT 9:38 ಇನಖ್ಹಾಜೇಸ್ ಅನಾಜ಼್ ಪಿಕಾವಳೊ ಯಜಮಾನ್ನ, ತಾರು ಅನಾಜ಼್‌ನ ಎಕ್ಟು ಕರಾನಖ್ಹಾಜೆ ಕಾಮ್‌ವಾಳಾನ ಮೋಕಲ್ ಕರಿ ಬಿಂತಿ ಕರೊ” ಕರಿ ಬೋಲ್ಯೊ.
MAT 10:1 ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಎಕ್ಕದಮ್‌ ಬುಲೈನ್, ಭೂತ್‌ಖ್ಹಾರು ಕಾಡಾನ ಅಜು಼ ಖ್ಹಾರಿಸ್ ತರ‍್ಹಾನು ರೋಗ್‌-ರಾಯನ ಅಛ್ಛು಼ ಕರಾನ ಇವ್ಣುನ ಅದಿಕಾರ್ ದಿದೊ.
MAT 10:2 ಯೋ ಭಾರಜ಼ಣ ಅಪೊಸ್ತಲರ‍್ನು ನಾಮ್ ಕೆಹುಕತೊ: ಪಹಿಲೊ ಪೇತ್ರ ಕರಿ ಬೋಲೈಲಿದೋತೆ ಸೀಮೋನ, ಇನೊ ಭೈ ಅಂದ್ರೆಯ, ಜೆಬೆದಾಯನೊ ಛಿಯ್ಯೊ ಯಾಕೋಬ ಅಜು಼ ಇನೊ ಭೈ ಯೋಹಾನ.
MAT 10:3 ಫಿಲಿಪ್ಪ ಅಜು಼ ಬಾರ್ತೊಲೊಮಾಯ, ತೋಮ, ಶುಂಕವಾಳೊ ಮತ್ತಾಯ, ಅಲ್ಫಾಯನೊ ಛಿಯ್ಯೊ ಯಾಕೋಬ, ತದ್ದಾಯ,
MAT 10:4 ದೇಖ್ಹ್‌ನೊ ಭಕ್ತ ಕರಿ ಬೋಲೈಲಿದೋತೆ ಸೀಮೋನ, ಯೇಸುನ ಧೊಕೇಥಿ ಧರಿದಿದೋತೆ ಇಸ್ಕರಿಯೋತ ಯೂದ, ಅವ್ಣೇಸ್.
MAT 10:5 ಆ ಭಾರ ಜ಼ಣಾನ ಯೇಸು ಮೋಕ್ಲಾನಿ ವಖ್ಹತ್‌ಮ, ಇವ್ಣುನ ಶಾತ್‌ ಬೋಲಿನ್ ಮೋಕ್‌ಲ್ಯೊ ಕತೊ, “ಯೆಹೂದ್ಯರ್‌ಕಾಹೆತೆ ಅದ್ಮಿನ ಗಾಮ್‌ಭಣಿ ರ‍್ಹವೊ, ಸಮಾರಿಯಾನು ಖೆವುಸ್‌ ಗಾಮ್ಮ ರ‍್ಹವೊ ನಕೊಜಾ಼ಶು.
MAT 10:6 ಅನಬದಲ್ ಗುಮೈಗಯೂತೆ ಮೇಂಢನಿಘೋಣಿ ಛಾ಼ತೆ ಇಸ್ರಾಯೇಲ್‌ನ ಅದ್ಮಿಕನ ಜಾ಼ವೊ.
MAT 10:7 ಜೈ಼ನ್‌, ‘ಸೊರ್ಗನು ರಾಜ್ಯ ಖನ್ನೆ ಐಗು’ ಕರಿ ಬೋಲಿವತಾಳೊ.
MAT 10:8 ರೋಗ್‌ವಾಳಾನ ಅಛ್ಛು಼ಕರೊ, ಮರ‍್ಯಾಹುಯಾನ ಜಿವ್ತು ಕರೊ, ಖೋಡ್‍ ಲಗ್ಯಹುಯಾನ ಪಾಕ್‌ಕರೊ ಅಜು಼ ಭೂತ್‌ಖ್ಹಾರು ಕಾಡೊ. ತುಮೂನ ಫುಗಟ್‌ಮ ಮಳಿರ‍್ಹೂಸ್‌ ಇನಖ್ಹಾಜೆ ಫುಗಟ್‌ಮ ದೆವೊ.
MAT 10:9 ತುಮಾರಿ ಚ಼ಂಚಿಮ ಖ್ಹೊನ್ನು, ರೂಪು ನಾತೊ ತಾಂಬಾನು ಪೈಶಾ ರ‍್ಹವೊ, ನಕೊ ಲೀಜಾ಼ವೊ;
MAT 10:10 ಜಾ಼ವಾನಿ ವಖ್ಹತ್‌ಮ, ಝೋ಼ಳಿ ರ‍್ಹವೊ, ಬೇ ಕುಡ್‌ತಾ ರ‍್ಹವೊ, ಖೋಖ್ಹ್‌ಡು ರ‍್ಹವೊ, ಲಠ್ಠೊ ರ‍್ಹವೊ ನಕೊ ಲೀಜಾ಼ಶು. ಕಾಮ್ ಕರಾವಾಳ ಆಳ್‌ನ ಶಾತ್‌ ಜ಼ರೂರತ್ ಛಾ಼ಕಿ ಯೋ ಇನ ದೆವಾವ್‌ಶೆ.
MAT 10:11 ತುಮೆ ಖೆವತೋಬಿ ಖ್ಹಯೇರ್‌ಮ ನತರ್‌ಕಿ ಗಾಮ್ಮ ಗಯಾತೊ, ಹಿಜ್ಜಾ಼ ಕೋಣ್ ಅಛ್ಛು಼ಕರಿ ಪುಛೈ಼ಲೀನ್‌, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವಾತೋಡಿ ಯೋಸ್ ಝ಼ಗೋಮ ರ‍್ಹವೊ.
MAT 10:12 ತುಮೆ ಏಕ್‌ ಘರ್‌ಮ ಜಾ಼ವಾನಿ ವಖ್ಹತ್‌ಮ, ‘ತುಮೂನ ಸಮಾಧಾನ್ ಮಳಾದೆ’ ಕರಿ ಬೋಲೊ.
MAT 10:13 ಯೋ ಘರ್‌ಮಾನು ಅದ್ಮಿ ತುಮೂನ ಬುಲೈಲಿದುತೊ, ತುಮಾರಿ ಸಮಾಧಾನ್ ಇವ್ಣುನ ಮಳಾದೆ. ಕತೋಬಿ ಇವ್ಣೆ ತುಮೂನ ನಾ ಬುಲೈಲಿದುತೊ, ತುಮಾರಿ ಸಮಾಧಾನ್ ಪಾಛು಼ಫರಿ ತುಮುನಾಸ್ ಆವಾದೆ.
MAT 10:14 ಖೆವತೋಬಿ ಘರ್‌ವಾಳು ನತರ್‌ಕಿ ಗಾಮ್‌ವಾಳು ತುಮೂನ ನಾ ಬುಲೈಲಿದುತೊ, ನತರ್‌ಕಿ ತುಮಾರಿ ವಾತೆನ ನಾ ಖ್ಹಮ್‌ಜುತೊ, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ತುಮಾರ ಗೋಡಾನ ಲಗ್ಯುತೆ ಧೂಳ್‌ನ ಝ಼ಟ್‌ಕಿ ದೆವೊ.
MAT 10:15 ನ್ಯಾವ್‍ನಿ ತೀರ್ಪ್‌ನ ದನ್ಮ ಇಮ್ನ ಗಾಮ್‌ನಿ ಹಾಲ್‌ ಸೊದೋಮ್ ಅಜು಼ ಗೊಮೋರ್‌ ತಬರ್‌ಖಾನಿ ಹಾಲ್‌ಥೀಬಿ ಖರಾಬ್ ರ‍್ಹಿಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್” ಕರಿ ಬೋಲ್ಯೊ.
MAT 10:16 “ಖ್ಹಮ್‌ಜೊ಼! ಜ಼ರಕ್‌ನ ಮಹಿ ಮೇಂಢವ್‌ನ ಮೋಕ್ಲಾತೆ ಇಮ್‌ ಮೇ ತುಮೂನ ಮೋಕ್ಲುಕರುಸ್. ಇನಖ್ಹಾಜೇಸ್ ತುಮೆ ಖ್ಹಾಪ್‌ನಿತರ ಚಾ಼ತುರ್ ಅಜು಼ ಪರ‍್ಯಾವಾನಿಘೋಣಿ ಖೋಟ್‌ಕೊಂತೆ ಇಮ್‌ ರ‍್ಹವೊ.
MAT 10:17 ಅದ್ಮಿನಿ ಬಾರೇಮ ಜ಼ತನ್ ರ‍್ಹವೊ, ಶನಕತೊ ಇವ್ಣೆ ತುಮೂನ ಧರೀನ್, ನ್ಯಾವ್ ಕರಾನಿ ಸಭೆಮ ಖೇಚಿಲಿಜಾ಼ಶೆ, ಅಜು಼ ಇವ್ಣಿ ಸಬೆ ಭರಾವಾನು ಮಂದಿರ್‌ಮ ತುಮೂನ ಕೊಳ್ಡೇಥಿ ಮಾರ್‌ಶೆ.
MAT 10:18 ಮಾರಖ್ಹಾಜೆ ತುಮೂನ ಅದಿಕಾರಿ ಅಜು಼ ರಾಜಾ಼ವ್‌ನ ಖ್ಹಾಮ್ಣೆ ಲೀಜಾ಼ಶೆ; ಅಮ್ ಇವ್ಣುನಾಬಿ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿವೋನಾಬಿ ತುಮೆ ಸಬೂತ್ ಹುಯಿರ‍್ಹಿಶು.
MAT 10:19 ಇವ್ಣೆ ತುಮೂನ ಧರಿದ್ಯವಾನಿ ವಖ್ಹತ್‌ಮ, ತುಮೆ ಶಾತ್‌ ವಾತೆ ಬೋಲ್‌ನು, ಕಿಮ್ ವಾತೆ ಬೋಲ್ನುಕರಿ ಸೋಚೊ ನಕೊ; ತುಮೆ ಶಾತ್‌ ಬೋಲ್ನುಕರಿ ಯೋ ವಖ್ಹತ್ ಆವಾದಿನ್, ತುಮೂನ ದೆವಾವ್‌ಶೆ.
MAT 10:20 ವಾತೆ ಬೋಲವಾಳ ತುಮೆ ಕಾಹೆ; ತುಮಾರೊ ಬಾನೊ ಪವಿತ್ರ ಆತ್ಮಾಸ್‌ ತುಮಾರ ಮ್ಹೋಡವಾಟೆ ವಾತೆ ಬೋಲ್‌ಶೆ.
MAT 10:21 ಭೈ ಉಠೀನ್ ಇನ ಶೊಂತ್‌ ಭೈಯೇನ, ಅಜು಼ ಬಾ ಉಠೀನ್ ಇನ ಶೊಂತ್‌ ಲಡ್ಕಾವ್‍ನ ಧರೀನ್, ಮರೈನಾಖಾನ ದಿನಾಕ್‌ಶೆ, ಲಡ್ಕಾ ಇವ್ಣ ಆಯ-ಬಾನಿ ವಿರೋದ್ ಉಠೀನ್, ಇವ್ಣುನ ಮರಾವ್‌ಶೆ.
MAT 10:22 ಮಾರ ಕಾಮ್ನಖ್ಹಾಜೆ ಹರೇಕ್ ಜ಼ಣು ತುಮೂನ ವಹೇರ್‌ ಕರ್ಶೆ. ಕತೋಬಿ ಖ್ಹರ್ತಿಲಗು ಖ್ಹಮಾಳಿಲ್ಯವಾಳು ರಕ್ಷಣೆ ಲಿಶೆ.
MAT 10:23 ಏಕ್‌ ಗಾಮ್ಮ ತುಮೂನ ಖ್ಹತಾಯೂತೊ, ಬಿಜ್ಜೇಕ್‌ ಗಾಮ್‌ನ ಮಿಲೈ ಜಾ಼ವೊ, ಅದ್ಮಿನೊ ಛಿಯ್ಯೊ ಆವಾನಮಹಿ ತುಮೆ ಇಸ್ರಾಯೇಲ್‌ ಅದ್ಮಿನು ಖ್ಹಾರಸ್ ಗಾಮ್ಮ ಫರೀನ್, ತುಮಾರು ಕಾಮ್ ಖತಮ್ ಕೊಕರಿರಾಕ್‌ಶುನಿ ಕರಿ ಮೇ ತುಮೂನ ಖ್ಹಾಚಾಮಬಿ ಬೋಲುಸ್.
MAT 10:24 ಶಿಷ್ಯ ಗುರುಥಿ ಮೋಟೊ ಕಾಹೆ; ಆಳ್‌ ಇನ ಯಜಮಾನ್‍ಥಿ ಮೋಟೊ ಕಾಹೆ.
MAT 10:25 ಶಿಷ್ಯ ಇನ ಗುರುನಿಮತ್‌ ಬಣ್ಯೋತೊ ಬಶ್‌, ಅಜು಼ ಆಳ್‌ ಇನ ಯಜಮಾನ್ನಿ ಮತ್‍ ಬಣ್ಯೋತೊ ಬಶ್‌. ಘರ್‌ನೊ ಯಜಮಾನ್ನಸ್‌, ಬೆಲ್ಜೆಬೂಲ್ ಕರಿ ಇವ್ಣೆ ಚಿಕ್‌ರ‍್ಯುತೊ, ಯೋ ಘರ್‌ನ ಬಿಜಾ಼ಖ್ಹಾರ ಅದ್ಮಿನ ಅಜು಼ಕೆತ್ರೆ ಖರಾಬ್ ನಾಮ್‍ಥಿ ಚಿಕರ್‌ಶೆ ಕೊಯ್ನಿಕಿಶು?
MAT 10:26 ಇನಖ್ಹಾಜೇಸ್ ಅದ್ಮಿನ ದೇಖಿನ್‌ ಡರೊನಕೊ, ಲಪೈರ‍್ಹೂತೆ ಖ್ಹಾರುಸ್‌ ಭಡಕಿಜಾಶೆ, ಅಜು಼ ಶಿಕಾಡಿ ಬೋಲಾಸ್ತೆ ಹರ್‌ವಾತೆ ಉಜಾ಼ಳಾಮ ಭಾರ್‌ ಮಾಲುಮ್‌ ಪಡ್‌ಶೆ.
MAT 10:27 ಮೇ ಅಂಧಾರಾಮ ತುಮೂನ ಬೋಲುಸ್ತೆ ಇನ ತುಮೆ ಉಜಾ಼ಳಾಮ ಬೋಲೊ. ಅಜು಼ ಕಾನ್‌ಮ ಬೋಲುಸ್ತೆ ಇನ ಘರ್‌ನ ಛ಼ತ್‍ಪರ್‌ಥು ಭೀರಿನ್‌ ಚಿಕ್ರಿನ್ ಬೋಲಿನ್ ಫೈಲಾವೊ.
MAT 10:28 ಅತ್ರೇಸ್ ಕಾಹೆತೆ, ಶರೀರ್‌ನ ಮರ್‌ನಾಖಿನ್ ಆತ್ಮನ ಮಾರಾನ ಕೋ ಹುವ್ವಾನಿತೆ ಅದ್ಮಿನ ದೇಖಿನ್‌ ನಕೊ ಡರೊ; ಕತೋಬಿ ಆತ್ಮಾನ ಅಜು಼ ಶರೀರ್‌ನ ಭೇನ ನರಕ್ಮ ನಾಖಿನ್ ಬರ್ಬಾತ್ ಕರಾವಾಳೊ ದೇವ್ನ ದೇಖಿನ್ ಡರೊ.
MAT 10:29 ಖಲಿ ಏಕ್ಕಾಖ್ಹ್‌ನ ಏಕ್‌ ಜೋ಼ಡು ಚು಼ರಕ್‌ಲಿಯೇನ ವೇಚಾ಼ಸ್ನಿ, ತೋಬಿ ಇನಾಮಾಥು ತುಮಾರೊ ಬಾನಿ ಮರ್ಜಿಕೊಂತೆ ಯೋ ಚು಼ರಕ್‌ಲೀಮ ಏಕ್‌ಬಿ ಜ಼ಮೀನ್‌ಪರ್ ಕೋ ಪಡಾನಿ.
MAT 10:30 ಕತೋಬಿ ತುಮೂನಾತೊ, ತುಮಾರೊ ಮುಡ್‌ಕ್ಯಾನೊ ಕೇಖ್ಹ್‌ ಜಿನ್‌ಕುಬಿ ಖ್ಹಾರುಸ್‌ ಗಣೈರ‍್ಹೂಸ್‌.
MAT 10:31 ಇನಖ್ಹಾಜೇಸ್ ಡರೊ ನಕೊ; ಕೈಏಕ್ಕಿ ಚು಼ರಕ್‌ಲಿಯೇಥೀಬಿ ತುಮೇಸ್ ಘಣ ಮೋಟ ಹುಯಿರ‍್ಹಾಸ್‌.
MAT 10:32 “ಕೋಣ್ ಅದ್ಮಿನ ಖ್ಹಾಮ್ಣೆ ಯೋ ಮಾರವಾಳೊಕರಿ ಬೋಲಸ್ಕಿ, ಮೇಬಿ ಇನ ಸೊರ್ಗಾಮ ಛಾ಼ತೆ ಮಾರ ಬಾನ ಖ್ಹಾಮ್ಣೆ ಯೋ ಮಾರ ಭಣಿವಾಳೊ ಕರಿ ಬೋಲಿಶ್.
MAT 10:33 ಕತೋಬಿ ಕೋಣ್ ಅದ್ಮಿನ ಖ್ಹಾಮ್ಣೆ ಯೇಸುವಾಳೊ ಕಾಹೆ ಕರಿ ಬೋಲಸ್ಕಿ, ಮೇಬಿ ಇನ ಸೊರ್ಗಾಮ ಛಾ಼ತೆ ಮಾರ ಬಾನ ಖ್ಹಾಮ್ಣೆ ಯೋ ಮಾರ ಭಣಿವಾಳೊ ಕಾಹೆಕರಿ ಬೋಲಿಶ್.
MAT 10:34 ಧರ್ತಿಪರ್ ಶಾಂತಿ ದ್ಯವಾನ ಮೇ ಆಯೊ ಕರಿ ನಕೊ ಸೋಚೊ, ಶಾಂತಿ ಪೈದಾಕರಾನ ಕಾಹೆ, ಪಣ್ಕಿ ತಲ್ವಾರ್‌ ಪಾಡಾನ ಆಯೋತೆ.
MAT 10:35 ಛಿಯ್ಯಾನ ಅಜು಼ ಬಾನ, ಛೋ಼ರಿನ ಅಜು಼ ಆಯನ, ವ್ಹವ್‌ನಾಬಿ ಅಜು಼ ಖ್ಹಾಖ್ಹುನ ಮಹಿ ವಿರೋದ್‌ ಪೈದಾ ಕರಾನಖ್ಹಾಜೆ ಮೇ ಆಯೋತೆ.
MAT 10:36 ಅಮ್ ಏಕ್‌ ಅದ್ಮಿನ ಇನು ಶೊಂತ್‌ ಘರ್‌ವಾಳುಸ್‌ ದುಶ್‌ಮನ್‌ ಉಶೆ.
MAT 10:37 ಬಾನ ರ‍್ಹವೊ, ಆಯಾನ ರ‍್ಹವೊ, ಮಾರೇಥಿಬಿ ಜಾ಼ಖ್ಹತ್ ಪ್ಯಾರ್‌ಕರ‍್ಯುತೊ ಮನ ಲ್ಹಾಯೇಕ್‌ನೊ ಕಾಹೆ. ಛಿಯ್ಯಾನ ರ‍್ಹವೊ, ಛೋ಼ರಿನ ರ‍್ಹವೊ ಮಾರೇಥಿಬಿ ಜಾ಼ಖ್ಹತ್ ಪ್ಯಾರ್‌ಕರ‍್ಯುತೊ ಮಾರೊ ಶಿಷ್ಯ ಹುವಾನ ಲ್ಹಾಯಕ್‌ ಕಾಹೆ.
MAT 10:38 ಕೋಣ್ ಇನಿ ಶಿಲ್‌ಬೇನ ಪಳ್ಳಿನ್‌, ಮಾರ ಪೀಠೆ ಕೋ ಆವಾನಿಕಿ, ಯೋ ಮಾರೊ ಶಿಷ್ಯ ಹುವಾನ ಲ್ಹಾಯೇಕ್‌ನೊ ಕಾಹೆ.
MAT 10:39 ಇನು ಶೊಂತ್‌ ಜಾನ್ನ ಬಚಾ಼ಡಿಲೇವ್ಣು ಕರಿ ಕರಾವಾಳೊ ಇನ ಗುಮೈಲಿಶೆ; ಕತೋಬಿ ಮಾರಖ್ಹಾಜೆ ಇನು ಶೊಂತ್‌ ಜಾನ್ನ ಗುಮೈಲ್ಯವಾಳೊ ಇನ ಬಚಾ಼ಡಿಲಿಶೆ.
MAT 10:40 “ಕೋಣ್‌ತೋಬಿ ತುಮೂನ ಬುಲೈಲಿದುತೊ, ಇವ್ಣೆ ಮನ ಬುಲೈಲೆವಾದಾಖ್ಹಲ್‌; ಮನ ಬುಲೈಲೆಸ್ತೆ ಇವ್ಣೆ ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲೆವಾದಾಖ್ಹಲ್‌,
MAT 10:41 ಪ್ರವಾದಿನ, ಆ ಪ್ರವಾದಿ ಕರಿ ಸ್ವಾಗತ್‍ಕರೀನ್ ಬುಲೈಲೆವಾಳಾನ, ಪ್ರವಾದಿನ ಆವ್‌ಶೇತೆ ಇನಾಮ್ ಲೀಲಿಶೆ. ಅಜು಼ ಧರ್ಮಿನ, ಯೋ ಏಕ್‌ ಧರ್ಮಿಕರಿ ಬುಲೈಲೆವಾಳಾನ, ಧರ್ಮಿನ ಆವ್‌ಶೇತೆ ಇನಾಮ್ ಮಳ್‌ಶೆ.
MAT 10:42 ಆ ನ್ಹಾನಾವ್‍ಮ ಏಕ್‌ ಜ಼ಣಾನ ಯೇಸುನೊ ಶಿಷ್ಯಕರಿ ಬೋಲಿನ್ ಕೋಣ್‌ತೋಬಿ ಏಕ್‌ ತಾಂಬ್ಯೊ ಪಾಣಿ ಪಿಯ್ಯಾನ ದಿದುತೋಬಿ, ಇನ ಆವ್‌ಶೇತೆ ಇನಾಮ್ ಛು಼ಕ್‌ಶೆಸ್‌ ಕೊಯ್ನಿ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್” ಕರಿ ಬೋಲ್ಯೊ.
MAT 11:1 ಯೇಸುನೆ ಇನ ಭಾರ ಶಿಷ್ಯರ‍್ನ ಬೋಲ್ನುತೆ ಖ್ಹಾರುಸ್‌ ಬೋಲಿನ್ ಖತಮ್ ಕರಾನ ಬಾದ್ಮ, ಹಿಜ್ಜಾ಼ಥೊ ನಿಕ್ಳಿನ್, ಅಛ್ಛಿ ಖಬರ್‌ ಬೋಲಿವತಾಳಾನ ಅಜು಼ ಶಿಕಾಡಾನಖ್ಹಾಜೆ ಖನ್ನೇನ ಗಾಮ್ಮ ಗಯೊ.
MAT 11:2 ಬ್ಯಾಪ್ತಿಸ್ಮ ದೆವಾಳೊ ಯೋಹಾನನೆ, ಕ್ರಿಸ್ತ ಕರುಕರ್ತೊಥೋತೆ ಕಾಮ್ ಖ್ಹಾರಾನಿ ಬಾರೇಮ ಜೇಲ್‌ಮ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಥೋಡ ಜ಼ಣಾನ ಇನಾಕನ ಮೋಕ್‌ಲ್ಯೊ.
MAT 11:3 ಇವ್ಣೆ ಯೇಸುನ, “ಯೊಹಾನ್ನೆ ಬೋಲ್ಯೋತೆ ಇಮ್‌ ಆವ್ಣುತೆ ಯೋ ತೂಸ್ಕಿಶು, ನಾತೊ ಹಮೆ ಬಿಜೇಕ್‌ನಖ್ಹಾಜೆ ಟಿವಾವ್‌ಣು?” ಕರಿ ಪುಛಾ಼ಯ.
MAT 11:4 ಯೇಸುನೆ, “ಜೈ಼ನ್‌, ತುಮೆ ಶಾತ್‌ ಖ್ಹಮ್‌ಜ್ಯ ಅಜು಼ ದೇಖ್ಯಾಕಿ ಇನಿ ಬಾರೇಮ ಯೋಹಾನ್ನ ಬೋಲೊ:
MAT 11:5 ಕಾಣಾವ್ನ ಡೋಳಾ ಆವ್‌ಶೆ, ಲಂಗ್ಡು ಖ್ಹಾರು ಚಾ಼ಲ್‌ಷೆ, ಖೋಡ್‍ ರ‍್ಹವಾಳು ಪಾಕ್‌ ಉಶೆ, ಭೈರಾವ್‍ನ ಖ್ಹಮ್‌ಜಾ಼ವ್‌ಶೆ, ಮರಿಗಯುಹುಯು ಜಿವ್ತು ಉಟ್‌ಶೆ, ಅಜು಼ ಗರೀಬ್‌ನ ಸುವಾರ್ತೆ ಬೋಲಾವ್‌ಶೆ.
MAT 11:6 ಮಾರಿ ಬಾರೇಮ ಶಕ್ ಕರಾಕೊಂತೆ ಇವ್ಣೇಸ್‌ ಧನ್ಯ ಹುಯಿರ‍್ಹುಸ್‍” ಕರಿ ಬೋಲ್ಯೊ.
MAT 11:7 ಯೋಹಾನನು ಶಿಷ್ಯರ್‌ ಹಿಜ್ಜಾ಼ಥು ನಿಕ್ಳಿನ್ ಜ಼ವ್‍ಕರ್ತುಥೂತೆ ವಖ್ಹತ್‌ಮ, ಯೇಸುನೆ ಯೋಹಾನ್ನಿ ಬಾರೇಮ ಯೋ ಅದ್ಮಿನಿ ಝೂ಼ಂಡ್‌ನ ಶಾತ್‌ ಬೋಲ್ಯೊಕತೊ, “ತುಮೆ ಶಾತ್‌ ದೇಕ್ಣು ಕರಿ ಉಜ್ಜಾ಼ಡಿ ಝ಼ಗೋಮ ಗಯಾಥ? ವಹಿರಾಮ ಹಲಾಸ್ತೆ ಘಾಖ್ಹ್‌ನ ಡಂಟ್‍ನಾಕಿಶು?
MAT 11:8 ಕೊಯ್ನಿಕತೊ, ಶಾತ್‌ ದೇಕ್ಣುಕರಿ ಗಯಾಥ? ಶನ್ಗಾರ್‌ನ ಲುಂಗ್ಡ ಪೇರ‍್ಹಿರಾಖಾಸ್ತೆ ಅದ್ಮಿನಾಕಿ ಶು? ಅಛ಼್ಛ ಶನ್‌ಗಾರ‍್ನಲುಂಗ್ಡಾ ಪೇರ‍್ಹಿರಾಖಾಸ್ತೆ ಖ್ಹಾರು ರಾಜಾ಼ನ ಮಹೇಲ್‌ಮ ರ‍್ಹೇಸ್‌!
MAT 11:9 ಇಮ್‍ಕತೊ ಶಾತ್‌ ದೇಖಾನ ಗಯಾಥ? ಏಕ್‌ ಪ್ರವಾದಿನಕಿ ಶು? ಓಹೊ, ಪ್ರವಾದಿಥೀಬಿ ಮೋಟಾನ ತುಮೆ ದೇಖ್ಯಾಕರಿ ತುಮೂನ ಖ್ಹಾಚಮಾಬಿ ಬೋಲುಸ್.
MAT 11:10 “ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್‌, ಯೋ ತೂ ಜಾ಼ವಾನಿ ವಾಟ್ನ ಬರೋಬರ್‌ ಕರ್ಶೆ’ ಕರಿ ಕಿನಿ ಬಾರೇಮ ವಚನ್‌ಮ ಲೀಖೈರೂಸ್ಕಿ, ಯೋ ಅದ್ಮಿ ಯೋಹಾನಸ್‌.
MAT 11:11 ತಯೇಡಾನ ಪೇಟೆ ಪೈದಹುಯುತೆ ಖ್ಹಾರಾನ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ್‌ಥಿ ಮೋಟು ಕೋಣ್‌ಬಿ ಕೊಯ್ನಿ. ತೋಬಿ ಪರ್‌ಲೋಕ್ ರಾಜ್ಯಮ ಛಾ಼ತೆ ನ್ಹಾನೊ ಜಿನ್‌ಕುಬಿ ಯೋಹಾನ್‌ಥಿ ಮಹಾನ್ ಹುಯಿರ‍್ಹೋಸ್ ಕರಿ ಮೆ ತುಮೂನ ಖ್ಹಾಚಮಾಬಿ ಬೋಲುಸ್.
MAT 11:12 ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನ ಹಗಾಮ್‌ಥು ಧರೀನ್ ಹಂಕೆತೋಡಿ ಸೊರ್ಗ ರಾಜ್ಯನಿ ಘಣು ಜು಼ಲಮ್‌ನ ಝೇಲ್‌ನು ಪಡ್ಯು, ಅಜು಼ ಜು಼ಲಮ್‌ ಕರಾವಾಳು ಅದ್ಮಿ ಇನ ಛಿನೈಲೇಣು ಕರಿ ಕರಾಸ್.
MAT 11:13 ತಮಾಮ್‌ ಪ್ರವಾದಿ ಅಜು಼ ಧರ್ಮಶಾಸ್ತ್ರ ಯೋಹಾನ ಆವಾತೋಡಿ ದೇವ್ನಿ ರಾಜ್ಯನಿ ಬಾರೇಮ ಬೋಲ್ಯು.
MAT 11:14 ಇವ್ಣೆ ಬೋಲ್ಯುತೆ ಇನ ನಂಬಾನ ತುಮೂನ ಮನ್ ಉಶೇತೊ, ಆ ಯೋಹಾನಸ್‌ ಆವಾಳೊ ಎಲೀಯಕರಿ ಬೋಲಾನಿತರ ಹುವಾಸ್ನಿ.
MAT 11:15 ಖ್ಹಮ್‌ಜಾ಼ನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ!
MAT 11:16 “ಹಮ್ಕೆ ಮೆ ಆ ಹಗಾಮ್ನ ಪಿಳ್ಗಿನ ಮೆ ಖಿವಿ ಪರಕ್ಮ ಬೋಲು? ಅವ್ಣೆ ಬಜಾ಼ರ್‌ಮ ಬೆಠೂತೆ ಲಡ್ಕಾವ್‍ನಿಘೋಣಿ ಹುಯಿರ‍್ಹುಸ್‍. ಏಕ್‌ ಝೂ಼ಂಡ್‌ನ ಲಡ್ಕಾ ಬಿಜ್ಜೇಕ್‌ ಝೂ಼ಂಡ್‌ನ ಲಡ್ಕಾವ್‍ನ ಚಿಕ್ರಿನ್,
MAT 11:17 ‘ಹಮೆ ತುಮಾರಖ್ಹಾಜೆ ವಾಖ್ಹ್‌ಳಿ ವಜಾ಼ಡ್ಯ ತುಮೆ ಖೇಲ್ಯಕೊಯ್ನಿ; ಹಮೆ ಅಂದ್ರೋಖ್ಹ್‌ನು ಗೀದ್‌ ಬೋಲ್ಯ, ಕತೋಬಿ ತುಮೆ ರೋಯಾಕೊಯ್ನಿ!’ ಕರಿ ಬೋಲಾಸ್.
MAT 11:18 ಕಿಮ್‌ಕತೊ, ಯೋಹಾನ ಆಯೊ, ಯೋ ಖಾತೋಥೊಕೊಯ್ನಿ ಅಜು಼ ಪೀತೋಥೊಕೊಯ್ನಿ, ಅಜು಼ ಅದ್ಮಿಖ್ಹಾರು, ‘ಇನ ಭೂತ್‌ ಧರಿರಾಖ್ಯುಸ್’ ಕರಿ ಬೋಲ್ಯು.
MAT 11:19 ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರ‍್ಹೊಥೊ. ಅದ್ಮಿಖ್ಹಾರು ಇನ, ‘ಆ ಅದ್ಮಿ ಖಾಣನು ಮರ್‌ತೇಲ್‌ ಅಜು಼ ಪೀಕುಡ್ಕ ಹುಯಿರ‍್ಹೋಸ್! ಶುಂಕ ಮಾಂಗವಾಳನೊ ಅಜು಼ ಪಾಪಿ ಖ್ಹಾರಾನೊ ದೋಸ್ತ್’ ಕರಿ ಬೋಲಾಸ್, ಕತೋಬಿ ದೇವ್ನಿ ಗ್ಯಾನ್ ಖ್ಹಾಚಿಸ್ ಕರಿ ಬೋಲಾನು ಇನ ಕಾಮ್‌ಥೀಸ್‌ ಮಾಲುಮ್‌ ಪಡಾಸ್‌” ಕರಿ ಬೋಲ್ಯೊ.
MAT 11:20 ತದೆ ಯೇಸುನೆ ಯೋ ಕೈಯೆಕ್ಕಿ ಮಹಾನ್ ಕಾಮ್‌ಖ್ಹಾರು ಕರ‍್ಯೊತೆ ಗಾಮ್‌ವಾಳು ಪಾಪ್ನ ಮ್ಹೇಲಿನ್ ಫರ‍್ಯುಕೊಂತೆ ದೇಖಿನ್‌, ಇವ್ಣುನ ಗುರ್‌ಕಾವಲಗ್ಯೊ.
MAT 11:21 “ಅಯ್ಯೋ ಖೊರಾಜಿನ್‌ ಖ್ಹಯೇರ್, ತುಮಾರಿ ಹಾಲ್ನ ಶಾತ್‌ ಬೋಲು ಬೆತ್ಸಾಯಿದ, ತುಮಾರಿ ಹಾಲ್ನಬಿ ಶಾತ್‌ ಬೋಲು! ತುಮಾರಾಮ ಚಾ಼ಲ್ಯುತೆ ಮಹಾನ್ ಕಾಮ್‌ಖ್ಹಾರು ತೂರ್ ಅಜು಼ ಸೀದೋನ್ ಖ್ಹಯೇರ್‌ಮ ಚಾ಼ಲ್ಯುಹೋತ್ತೊ, ಹಿಜ಼್ಜಾವಾಳು ಕದೇಸ್‌ಕಿ ಛೈ಼ನೊಕೋಥ್‌ಳೊ ಲಪೇಟಿಲೀನ್, ರಾಕ್‌ಮ ಬೇಶಿನ್, ಇವ್ಣು ಪಾಪ್ನ ಮ್ಹೇಲಿನ್, ಫರಿಗಯುಹೋತ್‌!
MAT 11:22 ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತುಮಾರಿ ಹಾಲ್‌ಥೀಬಿ ತೂರ್ ಅಜು಼ ಸೀದೋನ್ ಖ್ಹಯೇರ‍್ನಿ ಹಾಲ್‌ ಅಛ್ಛಿ ರ‍್ಹಿಶೆ ಕರಿ ಮೇ ತುಮೂನ ಬೋಲುಸ್!
MAT 11:23 ಅಲಾ ಕಪೆರ್ನೌಮ್ ಗಾಮ್‍, ತೂ ಸೊರ್ಗಾಮ ಪಡೈಲೀಶ್‌ಕರಿ ಸೋಚಾಸ್ಕಿ ಶು? ಕೊಯ್ನಿ! ತುನ ಪಾತಾಳ್ಮ ನಾಕ್‌ಶೆ! ತಾರಾಮ ಚಾ಼ಲ್ಯುತೆ ಅದ್ಭುತ್‌ಕಾಮ್‌ಖ್ಹಾರು ಸೊದೋಮ್‌ಮ ಚಾ಼ಲ್ಯುಹೋತ್ತೊ, ಯೋ ಖ್ಹಯೇರ್ ಹಂಕೆತೋಡಿ ರ‍್ಹಯುಹೋತ್‌.
MAT 11:24 ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತಾರಿ ಹಾಲ್‌ಥೀಬಿ ಸೊದೋಮ್ ತಬರ್‌ಖಾನಿ ಹಾಲ್‌ ಅಛ್ಛಿ ರ‍್ಹಿಶೆ ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
MAT 11:25 ಯೋ ವಖ್ಹತ್‌ಮ ಯೇಸುನೆ ಶಾತ್‌ ಬೋಲ್ಯೊಕತೊ, “ಬಾ, ಸೊರ್ಗ ಅಜು಼ ಧರ್ತಿನೊ ಯಜಮಾನ್! ತುನೆ ಗ್ಯಾನಿ ಅಜು಼ ಅಕ್ಲಿಥಿ ಅದ್ಮಿಥಿ ಆ ವಾತೆನ ಲಪಾಡಿನ್ ಶಾತ್ಬಿ ಮಾಲುಮ್‌ಕೊಂತೆ ಇವ್ಣುನ ವತಾಳಿರಾಖ್ಯೋತೆ ಇನಖ್ಹಾಜೆ ಮೇ ತುನ ಧನ್ಯವಾದ್ ಕರುಸ್.
MAT 11:26 ಓಹೋಲಾ ಬಾ, ಅಮ್ಮಸ್ ಕರಾನು ಅಛ್ಛು಼ಕರಿ ತುನ ದೆಖಾಯು.”
MAT 11:27 “ಮಾರೊ ಬಾ ಮನ ಖ್ಹಾರುಸ್‌ ಮಾರ ಹಾತ್ಮ ದೀರಾಖ್ಯೊಸ್. ಬಾನ ಮ್ಹೆಂದಿನ್ ಕೋಣ್‌ಬಿ ಛಿಯ್ಯಾನ ಮಾಲುಮ್‌ ಕರಿರಾಖ್ಯುಕೊಯ್ನಿ, ಅಜು಼ ಛಿಯ್ಯಾನ ಮ್ಹೆಂದಿನ್ ಕೋಣ್‌ಬಿ ಬಾನ ಮಾಲುಮ್‌ ಕರಿರಾಖ್ಯುಕೊಯ್ನಿ ಅಜು಼ ಛಿಯ್ಯೊ ಬಾನ ಕಿನ ವತಾಳ್ಣುಕರಿ ಆಖ್ಹ್‌ಕರಾಸ್ಕಿ, ಇವ್ಣೆ ಬಾನ ಮಾಲುಮ್‌ ಕರಿಲಿಶೆ.
MAT 11:28 “ಅಲಾ ಥಕಿರ‍್ಹವಾಳ, ಭೋಜೊ ಪಾಡಿರಾಖವಾಳ, ತುಮೆ ಖ್ಹಾರು ಮಾರಕನ ಆವೊ; ಮೇ ತುಮುನ ಅರಾಮ್‌ ದೆವುಸ್‌.
MAT 11:29 ಮೇ ಹಂಕಾರ್‌ಭರ‍್ಯೊ ಕಾಹೆ ಅಜು಼ ಕೌಳೊ ದಿಲ್‌ವಾಳೊ ಹುಯಿರ‍್ಹೋತೆ ಇನಖ್ಹಾಜೆ, ಮಾರು ನೊಗಾನ ತುಮಾರಪರ್ ಪಾಡಿಲೀನ್ ಮಾರೇಥಿ ಶಿಕಿಲೇವೊ. ತದೆ ತುಮಾರು ಆತ್ಮಾನ ಅರಾಮ್‌ ಮಳ್‌ಶೆ.
MAT 11:30 ಶನಕತೊ ಮಾರು ನೊಗ ಪೋಲು ಹುಯಿರ‍್ಹುಸ್‍ ಅಜು಼ ಮಾರು ಭೋಜ಼್‌ ಕಮ್‍ ವಜ಼ನ್ನು ಹುಯಿರ‍್ಹುಸ್‍” ಕರಿ ಬೋಲ್ಯೊ.
MAT 12:1 ಯೋ ದನೂಮ ಸಬ್ಬತ್‌ನ ರೋಜೆ ಯೇಸು ಅನಾಜ಼್ ಪಿಕಿಹುಯು ಖೇತರ್‌ಮಾಕರಿ ಚಾ಼ಲಿನ್ ಜಾ಼ವಾನಿ ವಖ್ಹತ್‌ಮ, ಇನ ಶಿಷ್ಯರ್‌ನ ಭುಕ್ ಲಾಗಲಗ್ಯುಥು, ಇನಖ್ಹಾಜೆ ಇವ್ಣೆ ಬುಟ್ಟಾ ತೋಡಿನ್, ಖಾವಲಗ್ಯಾಥ.
MAT 12:2 ಅನದೇಖಿನ್‌ ಫರಿಸಾಯರ್‌ನೆ ಯೇಸುನ, “ಹಂದೇಕ್‌, ತಾರು ಶಿಷ್ಯರ್‌ ಧರ್ಮಶಾಸ್ತ್ರನು ವಿರೋದ್ ಸಬ್ಬತ್‌ ದನ್ಮ ಕರ್ನುನಾತೆ ಕಾಮ್ನ ಕರುಕರಸ್” ಕರಿ ಬೋಲ್ಯು.
MAT 12:3 ತದೆ ಯೇಸುನೆ ಇವ್ಣುನ, “ದಾವೀದ್‌ನಾಬಿ, ಇನ ಜೋ಼ಡ್ಮ ರ‍್ಹವಾಳಾನ ಭುಕ್ ಲಾಗಖ್ಹತರ್‌, ದಾವೀದ್‌ನೆ ಶಾತ್‌ ಕರ‍್ಯೊ ಕರಿ ತುಮೆ ಪಢ್ಯಾಕೊಯ್ನಿಕಿಶು?
MAT 12:4 ದಾವೀದ್‌ನೆ ದೇವ್ನ ಮಂದಿರ್‌ಮ ಜೈ಼ನ್‌, ಯಾಜಕರಸ್‌ ಖಲಿಖಾವ್ಣುಥುತೆ ಪಣ್ಕಿ, ದಾವೀದ್ ರ‍್ಹವೊ, ಇನ ಜೋ಼ಡ್ಮ ರ‍್ಹವಾಳು ರ‍್ಹವೊ, ನಾ ಖಾವ್ಣುಕರಿ ಖಾನುಲ್‌ ರ‍್ಹಯುತೋಬಿ, ದೇವ್ನ ಝಾ಼ಳ್‌ಉತಾರನ ರೋಟಾನ ಖಾದೋನಿ?
MAT 12:5 ಅತ್ರೇಸ್ ಕಾಹೆತೆ, ಸಬ್ಬತ್‌ ದನ್ಮ ಯಾಜಕರ್‌ ಮಂದಿರ್‌ಮ ಸಬ್ಬತ್‌ ದನ್ನ ಮೈಲಾಪ್‍ ಕರ‍್ಯುತೋಬಿ ಇವ್ಣೆ ಅಪರಾದ್‌ಕೊಂತೆ ರ‍್ಹೇಸ್. ಇನತುಮೆ ಮೋಶೆನ ಧರ್ಮಶಾಸ್ತ್ರಮ ಪಢ್ಯಕೊಯ್ನಿಕಿ ಶು?
MAT 12:6 ಕತೋಬಿ ಮೇ ತುಮೂನ, ಮಂದಿರ್‌ಥೀಬಿ ಮೋಟೊ ಹಜ್ಜಾ಼ ಛಾ಼ ಕರಿ ಬೋಲುಸ್.
MAT 12:7 ‘ಮನ ಜಾನ್ವರ್‌ನು ಬಲಿ ನಕೊ, ಗೋರಸ್ ಹೋಣುತೆ’ ಕರಿ ಧರ್ಮಶಾಸ್ತ್ರಮ ಬೋಲಾಸ್ತೆ ಇನಿ ಮತ್‌ಲಬ್ ತುಮೂನ ಖ್ಹಾಚಮಾಬಿ ಮಾಲುಮ್‌ ರ‍್ಹಯುಹೋತ್ತೊ, ಗಲತ್‌ ಕರಾಕೊಂತೆ ಇವ್ಣಾಪರ್ ತುಮೆ ಗಲತ್‌ ಕೋ ಲಗಾಡ್ಯಹೋತ್ನಿ.
MAT 12:8 ಅದ್ಮಿನೊ ಛಿಯ್ಯೊ ಸಬ್ಬತ್‌ ದನ್ನ ಪ್ರಭು ಹುಯಿರ‍್ಹೋಸ್” ಕರಿ ಬೋಲ್ಯೊ.
MAT 12:9 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಯೆಹೂದ್ಯರ್‌ನ ಸಬೆ ಭರಾವಾನು ಮಂದಿರ್‌ಮ ಗಯೊ.
MAT 12:10 ಹಿಜ್ಜಾ಼ ಹಾತ್‌ ಝೂ಼ಟೊ ಪಡಿಹುಯು ಏಕ್‌ ಅದ್ಮಿಥು. ತದೆ ಥೋಡು ಜ಼ಣು ಯೇಸುಪರ್‌ ಗಲ್ತಿ ಲಗಾಡ್‌ಣು ಕರಿ, ಇವ್ಣೆ ಇನ, “ಸಬ್ಬತ್‌ ದನ್ಮ ಅಛ್ಛು಼ ಕರಾನು ಅಪ್ಣ ಧರ್ಮಶಾಸ್ತ್ರಮ ಬರೋಬರ್‌ಕಿ ಶು?” ಕರಿ ಪುಛಾ಼ಯು.
MAT 12:11 ಯೇಸುನೆ, “ತುಮಾರಮ ಕಿನಾಕನಾತೋಬಿ ಎಕ್ಕಸ್ ಮೇಂಢು ರ‍್ಹೀನ್, ಸಬ್ಬತ್‌ ದನ್ಮ ಯೋ ಮೇಂಢು ಖಾಡ್‌ಮ ಪಡಿಗಯೂತೊ ಯೋ ಇನ ಧರೀನ್, ಉಪ್ಪರ್ ಪಾಡ್‌ಶೆಕೊಯ್ನಿಕಿ ಶು?
MAT 12:12 ಮೇಂಢಥೀಬಿ ಅದ್ಮಿ ಕೈಯೆಕ್ಕಿ ಮಹಾನ್ ಹುಯಿರ‍್ಹುಸ್‍! ಇನಖ್ಹಾಜೇಸ್ ಸಬ್ಬತ್‌ ದನ್ಮ ಅಛ್ಛು಼ಕಾಮ್ ಕರಾನು ಅಪ್ಣಿ ಧರ್ಮಶಾಸ್ತ್ರಮ ಬರೋಬರಸ್‌ ಹುಯಿರ‍್ಹುಸ್‍” ಕರಿ ಜವಾಬ್‌ ದಿದೊ.
MAT 12:13 ಅನಕೇಡೆಥು ಯೇಸುನೆ ಯೋ ಹಾತ್‌ ಝೂ಼ಟೊ ಪಡಿಹುಯು ಅದ್ಮಿನ, “ತಾರೊ ಹಾತ್‌ ಖ್ಹಾಮ್ಣೆ ಕರ್‌” ಕರಿ ಬೋಲ್ಯೊ; ಇನೆ ಖ್ಹಾಮ್ಣೆ ಕರ‍್ಯೊ. ತದೆ ಇನೊ ಹಾತ್‌ ಅಛ್ಛು಼ ಹುಯಿನ್, ಬಿಜ್ಜೇಕ್‌ ಹಾತ್ನಿ ಘೋಣಿ ಹುಯಿಗಯು.
MAT 12:14 ತದೆ ಫರಿಸಾಯರ್ ಖ್ಹಾರು ಭಾರ್‌ಜೈ಼ನ್‌, ಯೇಸುನ ಖೆವಿ ತರೀಕಾಥಿ ಮಾರಿಯೆ ಕರಿ ಸೋಚ್ಯು.
MAT 12:15 ಯೇಸುನೆ ಇನಿ ವಿರೋದ್ ಇವ್ಣೆ ಸೋಚುಕರಾತೆ ಇನ ಮಾಲುಮ್‌ ಕರಿಲೀನ್, ಹಿಜ್ಜಾ಼ಥೊ ಚ಼ಲೆಗಯೊ; ಮೋಟಿ ಭೀಡ್ ಇನ ಪೀಠೆ ಗಯು. ಅರಾಮ್‌ಕೊಂತೆ ಖ್ಹಾರಾವ್‌ನ ಇನೆ ಅಛ್ಛು಼ ಕರ‍್ಯೊ.
MAT 12:16 ಅಜು಼ ಇನಿ ಬಾರೇಮ ಬಿಜಾ಼ನ ನಾ ಬೋಲ್‌ನು ಕರಿ ಅದ್ಮಿ ಖ್ಹಾರಾನ ಝೇತಾಯೊ.
MAT 12:17 ದೇವ್ನೆ ಪ್ರವಾದಿ ಯೆಶಾಯನ ಮ್ಹೋಡೇಥಿ ಬೋಲಾಯೋತೆ ಖ್ಹಾಚ಼ನ, ಚ಼ಲಾವಾನಖ್ಹಾಜೆ ಯೇಸುನೆ ಆ ಖ್ಹಾರು ಕರ‍್ಯೊತೆ:
MAT 12:18 ಹಂದೇಕ್‌, ಮಾರೊ ಸೇವಕ್, ಅನ ಮೇ ಚೂ಼ಣಿ ರಾಖ್ಯೋಸ್, ಆ ಮಾರೊ ಪ್ಯಾರ್‌ನೊ ಹುಯಿರ‍್ಹೋಸ್, ಅನೇಥಿ ಮೇ ಖ್ಹುಶಿ ಛೂ಼. ಮೇ ಮಾರು ಆತ್ಮಾನ ಇನಾಪರ್‌ ರಾಖುಸ್, ಅಜು಼ ಯೋ ಅಲಕ್‌ ಅದ್ಮಿವೋನಾಬಿ ಮಾರಿ ನ್ಯಾವ್‌ನ ಬೋಲಿವತಾಳ್‌ಶೆ.
MAT 12:19 ಯೋ ಲಡೈ ಕರಾಕೊಯ್ನಿ ಅಜು಼ ಚಿಕ್ರಾಕೊಯ್ನಿ; ಗಲ್ಲಿಯೇಮ ಇನಿ ಅವಾಜ಼್ ಕಿನಾಬಿ ಖ್ಹಮ್‌ಜಾ಼ವಕೊಯ್ನಿ.
MAT 12:20 ಚ಼ಗ್‌ದೈಗಯುತೆ ಡಂಟ್‍ನ ಯೋ ತೋಡಾಕೊಯ್ನಿ, ಉಝ಼ವ್‍ಕರಾತೆ ದಿವೋನಾಬಿ ಯೋ ಉಝಾ಼ವಕೊಯ್ನಿ, ನ್ಯಾವ್‌ನ ಜೀತಾತೋಡಿ ಯೋ ಲಗ್ಯುರ‍್ಹೀಶೆ.
MAT 12:21 ಅಜು಼ ಅಲಕ್‌ ಅದ್ಮಿಖ್ಹಾರು ಇನ ನಾಮ್‌ಪರ್‌ ಭರೋಖ್ಹೊ ಕರ್ಶೆ.
MAT 12:22 ಭೂತ್‌ ಧರಿರಾಖ್ಯುಥೂತೆ ಇನಖ್ಹಾಜೇಥಿ ಕಾಣು ಅಜು಼ ಮುಕ್ಕು ಹುಯಿರ‍್ಹುಥೂತೆ ಏಕ್‌ ಜ಼ಣಾನ ಯೇಸುಕನ ಲಾಯು. ಇನೆ ಇನ ಅಛ್ಛು಼ ಕರ್ತಾನ, ಇನ ಡೋಳಾ ಅಜು಼ ವಾತೆ ಆಯು.
MAT 12:23 ತದೆ ಯೇಸುನೆ ಕರ‍್ಯೊತೆ ಇನ ದೇಖಿನ್, ಅದ್ಮಿಖ್ಹಾರು ಆಶ್ಚರ್ಯಖೈನ್, “ಆ ದಾವೀದ್‌ನೊ ಛಿಯ್ಯೊಕಿ ಶು?” ಕರಿ ಬೋಲಿಲಿದು.
MAT 12:24 ಕತೋಬಿ ಫರಿಸಾಯರ್‌ನೆ ಅನಖ್ಹಮ್‌ಜಿನ್, “ಭೂತ್‌ ಖ್ಹಾರಾನೊ ಯಜಮಾನ್ ಹುಯಿರ‍್ಹೋತೆ ಬೆಲ್ಜೆಬೂಲ್‌ನಿ ಮದತ್‌ಥೀಸ್ ಆ ಭೂತ್‌ ಖ್ಹಾರಾನ ಕಾಡಸ್‌ ಪಣ್ಕಿ, ಬಿಜು಼ ಶನೇಥೀಬಿ ಕಾಹೆ” ಕರಿ ಬೋಲ್ಯು.
MAT 12:25 ಯೇಸುನೆ ಇವ್ಣಿ ಸೋಚ್ನ ಮಾಲುಮ್‌ ಕರಿಲೀನ್, “ಕೆಹು ರಾಜ್ಯ ಫುಟ್‌ ಪಡೀನ್, ಇನಿ ವಿರೋದ್ ಯೋಸ್‌ ಭೀಡಾಸ್ಕಿ, ಯೋ ರಾಜ಼್ ಬರ್ಬಾತ್ ಹುಯಿಜಾ಼ಶೆ. ಇಮ್ಮಸ್ ಏಕ್‌ ಘರ್‌ಮ ರ‍್ಹವೊ, ಖ್ಹಯೇರ್‌ಮ ರ‍್ಹವೊ ಫುಟ್‌ ಪಡೀನ್, ಖ್ಹುದ್‌ನಿ ವಿರೋದ್ ಭೀಡಾಲಗಾಸ್ಕಿ, ಇಮ್ನು ಘರ್ ಅಜು಼ ಖ್ಹಯೇರ್ ಪಡಿಜಾ಼ಸ್‌.
MAT 12:26 ಇಮ್ಮಸ್‌ ಶೈತಾನ್ ಶೈತಾನ್ನ ನಖ್ಹಾಡ್ಯುತೊ ಇನಿ ವಿರೋದ್ ಲಡೈಭೀಡಾನಿತರ ಹುಯು, ಇಮ್‍ರ‍್ಹಯುತೊ ಇನಿ ರಾಜ್ಯ ಕಿಮ್ ಭೀರ‍್ಹಿಷೆ?
MAT 12:27 ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಭೂತ್‌ಖ್ಹಾರು ಕಾಡುಸ್‌ ಕರಿ ತುಮೆ ಬೋಲೋಸ್‌. ಇಮ್‍ಕತೊ, ತುಮಾರು ಶಿಷ್ಯರ್‌ಖ್ಹಾರು ಕಿನಿ ಶಕಥ್ಥಿ ಭೂತ್‌ಖ್ಹಾರನ ಕಾಡಸ್‌? ಇನಖ್ಹಾಜೇಸ್ ತುಮಾರು ಅದ್ಮಿಸ್‌ ತುಮೂನ ನ್ಯಾವ್ ಕರ್ಶೆ.
MAT 12:28 ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಕಾಹೆ, ಕತೋಬಿ ದೇವ್ನಿ ಆತ್ಮಾನಿ ಶಕಥ್ಥಿ ಭೂತ್‌ಖ್ಹಾರನ ಕಾಡ್ತೊ ಉಶೇತೊ, ದೇವ್ನಿ ರಾಜ್ಯ ತುಮಾರ ಖನ್ನೆ ಆಯಿಗೈಯು ಕರಿ ಆ ವತಾಳಸ್‍.
MAT 12:29 ಅತ್ರೇಸ್ ಕಾಹೆತೆ, ಕೋಣ್‌ಬಿ ಪಹಿಲೆ ಏಕ್‌ ಶಕತ್‌ವಾಳ ಅದ್ಮಿನ ಭಾಂದ್ಯುನಾತೊ, ಇನ ಘರ್‌ಮ ಪೇಶಿನ್, ಇನು ಶೊತ್‌ನ ಲೂಟಾನ ಕೋ ಹುವಾನಿ, ಪಹಿಲ್‌ವಾಣ್ಣ ಭಾಂದಾನ ಬಾದ್‌ಮ, ಇನ ಘರ್‌ನ ಲೂಟೆಜಾ಼ಯ್‌.
MAT 12:30 ಮಾರ ಜೋ಼ಡ್ಮ ಮಳಾಕೊಂತೆ ಇವ್ಣೆ ಮಾರು ವಹೇರ‍್ಯು ಹುಯಿರ‍್ಹುಸ್‍. ಮಾರ ಜೋ಼ಡ್ಮ ಎಕ್ಟು ಕರಾಕೊಂತೆ ಇವ್ಣೆ ಛಿದ್ರಾವವಾಳು ಹುಯಿರ‍್ಹುಸ್‍.
MAT 12:31 ಇನಖ್ಹಾಜೇಸ್ ಮೇ ತುಮೂನ ಬೋಲುಸ್, ಅದ್ಮಿಖ್ಹಾರು ಕರಾತೆ ಹರೇಕ್ ಪಾಪ್ನ ಅಜು಼ ಗಾಳೆನಿ ವಾತೇನ ಮಾಪಿ ಛಾ಼; ಕತೋಬಿ ಪವಿತ್ರಾತ್ಮನ ವಿರೋದ್ ವಾತೆ ಬೋಲವಾಳಾನ ಮಾಪಿಕೊಯ್ನಿ.
MAT 12:32 ಕೋಣ್‌ತೋಬಿ ಅದ್ಮಿನೊ ಛಿಯ್ಯಾನ ವಿರೋದ್ ವಾತೆ ಬೋಲ್ಯುತೊ ಇನ ಮಾಪಿ ಛಾ಼; ಕತೋಬಿ ಪವಿತ್ರಾತ್ಮನಿ ವಿರೋದ್ ವಾತೆ ಬೋಲ್ಯುತೊ ಇನ ಆ ಜಗತ್‌ಮ ಹಮ್ಕೆಬಿ ಕೊಯ್ನಿ, ಕದೇಬಿ ಮಾಪಿಸ್‍ಕೊಯ್ನಿ.
MAT 12:33 “ತುಮೂನ ಅಛ್ಛು಼ ಪಂಡು ಹೋಣುಕತೊ ತುಮಾರಕನ ಅಛ್ಛು಼ ಝಾ಼ಡು ರ‍್ಹೇಣು. ತುಮಾರು ಝಾ಼ಡು ಅಛ್ಛು಼ ನಾ ರ‍್ಹಯೂತೊ, ಯೋ ಖರಾಬ್ ಪಂಡಾನಸ್‌ ಮ್ಹೇಲ್‌ಶೆ, ಏಕ್‌ ಝಾ಼ಡು ಕಿಮ್ನು ಕರಿ ಬೋಲಾನು ಯೋ ಮ್ಹೇಲಾತೆ ಪಂಡಾಥೀಸ್‌ ಮಾಲುಮ್‌ ಪಡಾಸ್‌”.
MAT 12:34 ಅಲಾ ಖ್ಹಾಪ್‌ನ ಖಾನ್‌ದಾನ್‌ವಾಳ! ತುಮೆ ಖರಾಬ್ ರ‍್ಹವಾಪರ್, ತುಮಾರ ಮ್ಹೋಡವಾಟೆ ಅಛ಼್ಛು ವಾತೆ ಕಿಮ್ ನಿಕಳ್‌ಶೆ? ದಿಲ್ಮ ಭರೈರ‍್ಹೇಸ್ತೇಸ್‌ ಮ್ಹೋಡವಾಟೆ ನಿಕ್ಳಾಸ್‌.
MAT 12:35 ಏಕ್‌ ಅಛ್ಛು಼ ಅದ್ಮಿ ಇನಿ ಕಣ್ಗಿಮಾಥು ಅಛ಼್ಛು ರಾಛ಼ವ್‍ನ ಭಾರ್ ಕಾಡಸ್‌; ಏಕ್‌ ಖರಾಬ್ ಅದ್ಮಿ ಇನು ಖರಾಬ್ ಕಣ್ಗಿಮಾಥು ಖರಾಬ್ ರಾಛ಼ವ್‍ನ ಭಾರ್‌ಕಾಡಸ್‌.
MAT 12:36 ಅತ್ರೇಸ್ ಕಾಹೆತೆ, ಮೇ “ತುಮೂನ ಶಾತ್‌ ಬೋಲುಸ್‌ಕತೊ, ಅದ್ಮಿಖ್ಹಾರು ಫಾಯಿದೊಕೊಂತೆ ಬೋಲಾಸ್ತೆ ಹರೇಕ್ ವಾತೇನಿ ಬಾರೇಮ ನ್ಯಾವ್‍ನಿ ತೀರ್ಪ್‌ನ ದನ್ಮ ಗಣ್ತಿ ದೇವ್ಣುಪಡ್‌ಶೆ.
MAT 12:37 ತಾರಿ ವಾತೆಥೀಸ್‌ ತೂ ನೀತಿವಾಳೊಕರಿ ತೀರ್ಪ್‌ ಮಳ್‌ಶೆ; ಅಜು಼ ತಾರಿ ವಾತೆಥೀಸ್‌ ತೂ ಅಪರಾದಿಕರಿ ತೀರ್ಪ್ ಮಳ್‌ಶೆ” ಕರಿ ಬೋಲ್ಯೊ.
MAT 12:38 ತದೆ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ಮ ಥೋಡು ಜ಼ಣು ಯೇಸುನ, “ಗುರು, ತೂ ಅದ್ಭುತ್ ಕರಾನು ದೇಕ್ಣು ಕರಿ ಹಮೆ ಆಖ್ಹ್ ಕರಿಯೇಸ್” ಕರಿ ಬೋಲ್ಯು.
MAT 12:39 ಯೇಸುನೆ, “ಆ ಜ಼ಗ್‌ನು ಅದ್ಮಿ ಖರಾಬ್ ಅಜು಼ ಪಾಪಿ ಹುಯಿರ‍್ಹುಸ್‍, ಅವ್ಣೆ ಅದ್ಭುತ್ ಕಾಮ್ ದೇಕ್ಣು ಕರಿ ಆಖ್ಹ್ ಕರಾಸ್. ಕತೋಬಿ ಯೋನ ಕರಿ ಪ್ರವಾದಿಮ ಹುಯೂತೆ ಅದ್ಭುತ್ ಕಾಮಸ್ ಪಣ್ಕಿ, ಬಿಜು಼ ಕೆಹೂಬಿ ಕೊಯ್ನಿ.
MAT 12:40 ಯೋನ ಕಿಮ್ ತೀನ್ ರಾತ್‌-ದನ್ ಮೋಟಮಾಛ್ಲಾ಼ನ ಪೇಟ್‌ಮ ಥೋಕಿಇಮ್ಮಸ್‌, ಅದ್ಮಿನೊ ಛಿಯ್ಯೊ ತೀನ್ ರಾತ್‌-ದನ್ ಧರ್ತಿನ ಮಹಿ ರ‍್ಹಿಶೆ.
MAT 12:41 ನ್ಯಾವ್‍ನ ತೀರ್ಪ್‌ನ ದನ್ಮ ನಿನವೆ ನಂಗರ್‌ವಾಳು ಆ ಪಿಳ್ಗಿವಾಳಾನ ವಿರೋದ್ ಭೀರಿನ್‌, ತುಮೆ ಗಲತ್‌ ಕರಿ ಬೋಲ್‌ಶೆ. ಇವ್ಣೆ ಯೋನಾನೆ ಬೋಲ್ಯೋತೆ ವಚನ್ನ ಖ್ಹಮ್‌ಜಿನ್‌, ಪಾಪ್ನ ಮ್ಹೇಲಿನ್ ದೇವ್ ಭಣಿ ಫರಿಗಯು. ಕತೋಬಿ ಮೇ ತುಮೂನ ಬೋಲುಸ್ಕಿ, ಯೋನಾಥೀಬಿ ಮೋಟೊ ಹಜ್ಜಾ಼ ಛಾ಼!
MAT 12:42 ಶೆಬಾ ದೇಖ್ಹ್‌ನಿ ರಾಣಿ ನ್ಯಾವ್‍ನ ತೀರ್ಪ್‌ನ ದನ್ಮ ಆ ಪಿಳ್ಗಿನಿ ವಿರೋದ್ ಭೀರಿನ್‌, ತುಮೆ ಗಲತ್‌ ಕರಿ ಬೋಲ್‌ಶೆ. ಯೋ ಸೊಲೊಮೋನ್ನಿ ಗ್ಯಾನ್ನಿ ವಾತೇನ ಖ್ಹಮ್‌ಜಾ಼ನಖ್ಹಾಜೆ ಜಗತ್ನ ಕಡ್‍ಶೀಥಿ ಆಯಿ. ಕತೋಬಿ ಮೇ ತುಮೂನ ಬೋಲುಸ್ಕಿ, ಸೊಲೊಮೋನ್‌ಥೀಬಿ ಊಚೊರ‍್ಯವಾಳೊ ಹಜ್ಜಾ಼ ಛಾ಼!
MAT 12:43 “ಭೂತ್‌ ಏಕ್‌ ಅದ್ಮಿನ ಮ್ಹೇಲಿನ್ ನಿಕ್ಳಿಜಾ಼ವಾನ ಬಾದ್ಮ, ಅರಾಮ್‌ ಕರಾನಖ್ಹಾಜೆ ಝ಼ಗೊ ಢೂಂಡ್‌ತುಹುಯಿನ್, ಪಾಣಿಕೊಂತೆ ಝ಼ಗೋಮ ವನ್‌ವನ್ತು ರ‍್ಹೇಸ್.
MAT 12:44 ಕತೋಬಿ ಅರಾಮ್‌ ಕರಾನ ಝ಼ಗೊ ಮಳಾಕೊಂತೆ ದೇಖಿನ್‌, ಯೋ, “ಮೇ ಮ್ಹೆಂದಿನ್ ಆಯೋತೆ ಮಾರ ಘರ್‌ನ ಫಾಛು಼ ಫರೀನ್ ಜ಼ವುಸ್‌” ಕರಿ ಬೋಲಿನ್, ಪಾಛು಼ ಯೋ ಘರ್‌ಕನ ಆಯಿನ್, ಯೋ ಘರ್ ಖಾಲಿ ಪಡ್ಯುತೆ ಅಜು಼ ಝ಼ಡೈಶನ್‌ಗಾರ್‌ ಹುಯಿರ‍್ಹೂತೆ ದೇಖಿನ್‌,
MAT 12:45 ಜೈ಼ನ್‌, ಇನೇಥಿಬಿ ಖರಾಬ್ ಹುಯಿರ‍್ಹೂತೆ ಬಿಜು಼ ಖ್ಹಾತ್ ಭೂತ್‌ನ ಇನ ಜೋ಼ಡೆ ಬುಲೈಲಿನ್ ಆವಸ್. ಇವ್ಣೆ ಯೋ ಅದ್ಮಿನ ಮಹಿ ಪೇಶಿನ್, ಹಿಜ್ಜಾ಼ಸ್ ರ‍್ಹವಾಲಗಸ್‌, ತದೆ ಯೋ ಅದ್ಮಿನಿ ಖ್ಹರ್ತಿಮಾನಿ ಹಾಲ್‌ ಪಹಿಲೆಥೀಬಿ ಖರಾಬ್ ಹುಯಿಜಾ಼ಸ್. ಅಮ್ಮಸ್ ಆ ಪಿಳ್ಗಿನು ಖರಾಬ್ ಅದ್ಮಿನ ಉಶೆ” ಕರಿ ಬೋಲ್ಯೊ.
MAT 12:46 ಯೇಸು ಅದ್ಮಿನಿ ಝೂ಼ಂಡ್‌ನ ಜೋ಼ಡೆ ಬಿಜೂ಼ಬಿ ವಾತೆ ಬೋಲುಕರಾನಿ ವಖ್ಹತ್‌ಮ, ಇನಿ ಆಯಾಬಿ ಇನ ಭೈಯೇ ಅಯಿನ್, ಇನಜೋ಼ಡೆ ವಾತೆ ಬೋಲ್‌ನು ಕರಿ ಭಾರ್‌ಭೀರ‍್ಯು.
MAT 12:47 ತದೆ ಏಕ್‌ ಜ಼ಣಾನೆ ಯೇಸುನ, “ಹಂದೇಕ್‌, ತಾರಿ ಆಯಾಬಿ, ತಾರ ಭೈಯೇ, ತುನ ವಾತೆ ಬೋಲ್‌ನು ಕರಿ ಭಾರ್‌ ಭಿಯ್ಯುಸ್” ಕರಿ ಬೋಲ್ಯು.
MAT 12:48 ಯೇಸುನೆ, “ಮಾರಿ ಆಯ ಕೋಣ್? ಮಾರ ಭೈಯೇ ಕೋಣ್? ಕರಿ ಬೋಲಿನ್,
MAT 12:49 ಶಿಷ್ಯರ್‌ ಭಣಿ ಹಾತ್‌ ವತಾಳಿನ್ “ಹಂದೇಖೊ! ಅವ್ಣೆಸ್‌ ಮಾರಿ ಆಯ ಅಜು಼ ಮಾರ ಭೈಯೇ”.
MAT 12:50 ಪರ್‌ಲೋಕ್‌ಮ ಛಾ಼ತೆ ಮಾರ ಬಾನಿ ಮರ್ಜಿನಿ ಘೋಣಿ ಕೋಣ್ ಚಾ಼ಲಾಸ್ಕಿ, ಯೋಸ್‌ ಮಾರೊ ಭೈ, ಮಾರಿ ಭೇನ್ ಅಜು಼ ಮಾರಿ ಆಯ ಹುಯಿರುಸ್‌” ಕರಿ ಬೋಲ್ಯೊ.
MAT 13:1 ಯೋಸ್‌ ದನ್ಮ ಯೇಸು ಘರ್‌ಥೊ ನಿಕ್ಳಿನ್, ದರ‍್ಯಾವ್‍ನ ಕನಾರೆಕನ ಜೈ಼ನ್‌, ಬೇಶಿಗಯೊ.
MAT 13:2 ಘಣು ಅದ್ಮಿ ಇನಾಕನ ಎಕ್ಟುಹುಯಿನ್ ಆಯೂತೆ ಇನಖ್ಹಾಜೆ ಯೇಸು ಡೋಣ್‌ಮ ಚ಼ಢೀನ್‌, ಬೇಶಿಗಯೊ ಯೋ ಅದ್ಮಿಖ್ಹಾರು ಕನಾರಿಕನ ಭೀಯೂಥು.
MAT 13:3 ತದೆ ಯೇಸುನೆ ಇವ್ಣುನ ಮತ್ಲಬ್‌ನಿ ಖೇಣಿಯೇಥಿ ಕೈಏಕ್ ವಾತೆನಿ ಬಾರೇಮ ಬೋಲ್ಯೊ.
MAT 13:4 “ಖೇತರ್‌ ಕರಾವಾಳೊ ಏಕ್‍ಜ಼ಣೊ ಪಂಡಾ ಛಿಡ್ಕಾನಖ್ಹಾಜೆ ಗಯೊ. ಯೋ ಪಂಡಾ ಛಿಡ್ಕಾನಿ ವಖ್ಹತ್‌ಮ, ಥೋಡ ಪಂಡಾ ವಾಟ್ನಿ ಪಾಕ್ತಿಮ ಪಡ್ಯು ಜಿನಾವರ್‌ ಖ್ಹಾರು ಆಯಿನ್ ಇನ ಚ಼ರಿಲಿದು.
MAT 13:5 ಅಜು಼ ಥೋಡ ಪಂಡಾ ಜಾ಼ಖ್ಹತ್ ಮಾಟಿಕೊಂತೆ ಬಂಡಾನಿ ಜ಼ಮೀನ್‌ಪರ್ ಪಡ್ಯು; ಹಿಜ಼್ಜಾ ಛಿವರ್‌ ಮಾಟಿ ಥೀತೆ ಇನಖ್ಹಾಜೆ ಯೋ ಒಗ್ಗಿಸ್‌ಮ ಫುಟಿ ಆಯು.
MAT 13:6 ಕತೋಬಿ ತಡ್ಕೊ ಪಡಾದೀನ್‌, ಯೋ ಶೊಶಿಯೆ ಮಹಿತೋಡಿ ಜ಼ಡೆ ಕೋ ಮ್ಹೇಲಿರಾಖ್ಯುಥುಂತೆ ಇನಖ್ಹಾಜೆ ಖ್ಹುಕೈಗಯು.
MAT 13:7 ಅಜು಼ ಥೋಡ ಪಂಡಾ ಕಾಟಾನ ಡಾಗ್‌ಮ ಪಡ್ಯು, ಕಾಟಾನು ಝಿಕ್ರುಖ್ಹಾರು ಮೋಟುಹುಯಿನ್, ಯೋ ಶೊಶಿಯೇನ ದಾಬಿನಾಖ್ಯು.
MAT 13:8 ಕತೋಬಿ ಅಜು಼ ಥೋಡ ಪಂಡಾ ಅಛ್ಛಿ ಜ಼ಮೀನ್‌ಪರ್‌ ಪಡೀನ್, ಫುಟೀನ್, ಪಂಡು ಮ್ಹೇಲ್ಯು; ಥೋಡು ಖ್ಹೋ ಪಂಡಾಎತ್ರು, ಥೋಡು ತೀನಿಖ್ಹ್‌ ಪಂಡಾಎತ್ರು, ಥೋಡು ಡೋಡಿಖ್ಹ್‌ ಪಂಡಾಎತ್ರು” ಮ್ಹೇಲ್ಯು.
MAT 13:9 “ಖ್ಹಮ್‌ಜಾ಼ನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ” ಕರಿ ಬೋಲ್ಯೊ.
MAT 13:10 ಬಾದ್ಮ ಯೇಸುನ ಶಿಷ್ಯರ್‌ ಇನಾಕನ ಆಯಿನ್, “ತೂ ಅದ್ಮಿನ ಜೋ಼ಡೆ ವಾತೆಬೋಲಾನಿ ವಖ್ಹತ್‌ಮ ಮತ್ಲಬ್‌ನಿ ಖೇಣಿಯೇಥಿ ಶನಬೋಲಾಸ್ತೆ?” ಕರಿ ಪುಛಾ಼ಯ.
MAT 13:11 ಯೇಸುನೆ ಇವ್ಣುನ, “ಸೊರ್ಗ ರಾಜ್ಯನಿ ಬಾರೇಮಾನಿ ಖ್ಹಾಚಿನ ಮಾಲುಮ್‌ ಕರಿಲ್ಯವಾನು ಕಿಮ್ ಕರಿ ಬೋಲಾನು ತುಮೂನ ದೆವೈರ‍್ಹೂಸ್‌, ಪಣ್ಕಿ ಇವ್ಣ ಕಾಹೆ.
MAT 13:12 ಶನಕತೊ ಕಿನಾಕನ ಛಾ಼ಕಿ ಇವ್ಣುನ ಬಿಜೂ಼ಬಿ ಜಾ಼ಖ್ಹತ್ ದೆವಾವ್‌ಶೆ; ಕತೋಬಿ ಕಿನಾಕನ ಕೊಯ್ನಿಕಿ ಇನಾಕಂಥು ಛಾ಼ತೆ ಥೋಡುಬಿ ಕಾಡಿಲಿಶೆ.
MAT 13:13 ಮೇ ಇವ್ಣ ಜೋ಼ಡೆ ಮತ್ಲಬ್‌ನಿ ಖೇಣಿಯೇಥಿ ವಾತೆ ಬೋಲುಸ್ತೆ ಶನಖ್ಹಾಜೆ ಕತೊ, ಇವ್ಣುನ ಡೋಳಾ ರ‍್ಹಯುತೋಬಿ ದೇಖಾಕೊಯ್ನಿ ಅಜು಼ ಕಾನ್‌ ರ‍್ಹಯುತೋಬಿ ಖ್ಹಮ್‌ಜಾ಼ಕೊಯ್ನಿ ಅಜು಼ ಪರ್ಖಾ ಕೊಯ್ನಿ.
MAT 13:14 ಅಮ್ ಯೆಶಾಯನೆ ಬೋಲ್ಯೋತೆ ಪ್ರವಾದ್‌ನೆ ಇವ್ಣಾಮ ಚಾ಼ಲಸ್. ಯೋ ಶಾತ್‌ಕತೊ ಆ ಅದ್ಮಿಖ್ಹಾರು ಖ್ಹಮ್‌ಜ಼್‌ಶೆ ಅಜು಼ ಖ್ಹಮಜ಼್‌ತೂಸ್‌ ರ‍್ಹಿಶೆ, ಕತೋಬಿ ಇವ್ಣುನ ಮಾಲುಮ್‌ ಕೋ ಪಡ್‌ಶೇನಿ; ಇವ್ಣೆ ದೇಕ್‌ಶೆ ಅಜು಼ ದೇಕ್‌ತೂಸ್‌ ರ‍್ಹಿಶೆ, ಕತೋಬಿ ಇವ್ಣುನ ದೆಖಾವ್‌ಶೆ ಕೊಯ್ನಿ;
MAT 13:15 ಆ ಅದ್ಮಿ ಖ್ಹಾರಾನೊ ದಿಲ್‌ ಬಂಡೊ ಹುಯಿರ‍್ಹೋಸ್, ಅಜು಼ ಅವ್ಣ ಡೋಳಾ ಮೂಚೈ಼ರ‍್ಹಾಸ್, ಅವ್ಣೆ ಡೋಳಾಥಿ ದೇಖಿನ್‌, ಕಾನ್‍ಥಿ ಖ್ಹಮ್‌ಜಿನ್‌, ದಿಲ್‌ಥಿ ಪರ್ಖಿನ್, ಮಾರಭಣಿ ಫರಿಜೈ಼ನ್‌ ಮಾರೇಥಿ ಅಛ್ಛು಼ ನಾಹೊಣುಕರಿ ತೀರ್ಮಾನ್‌ ಕರಿರಾಖ್ಯುಸ್‌ಕರಿ ಬೋಲಾನುಸ್‌ ಯೋ ಪ್ರವಾದ್‌ನೆ.
MAT 13:16 ಇನಖ್ಹಾಜೆ ತುಮೆ ಧನ್ಯರ್ ಹುಯಿರ‍್ಹಾಸ್. ಶನಕತೊ ತುಮಾರ ಡೋಳಾ ದೆಖಾವಸ್ ಅಜು಼ ತುಮಾರೊ ಕಾನ್‌ ಖ್ಹಮ್‌ಜಾ಼ಸ್‌.
MAT 13:17 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ದೇಖುಕರಾತೆ ಕಾಮ್‍ಅಖ್ಖಾನ ಕೈಯೆಕ್ಕಿ ಪ್ರವಾದಿ ಖ್ಹಾರುಬಿ ಅಜು಼ ಕೈಯೆಕ್ಕಿ ನೀತಿವಾಳು ಅದ್ಮಿಖ್ಹಾರು ದೇಕ್ಣುಕರಿ ಆಖ್ಹ್‌ಕರ‍್ಯು ತೋಬಿ ಇವ್ಣೆ ದೇಖಾನ ಕೋ ಹುಯುನಿ. ತುಮೆ ಖ್ಹಮ್‌ಜು಼ಕರಾತೆ ಸಮಾಚಾರ‍್ನ ಇವ್ಣೆ ಖ್ಹಮಜ಼್‌ಣು ಕರಿ ಆಖ್ಹ್‌ ಕರ‍್ಯುತೋಬಿ ಖ್ಹಮ್‌ಜ್ಯು ಕೊಯ್ನಿ.
MAT 13:18 “ಪಂಡಾ ಛಿಡ್ಕಾವಾಳನಿ ಬಾರೇಮಾನು ಮತ್ಲಬ್‌ ಖ್ಹಮ್‌ಜೊ಼.
MAT 13:19 ಪರ್‌ಲೋಕ್ ರಾಜ್ಯನಿ ಖಬರ್‌ನ ಖ್ಹಮ್‌ಜಿನ್‌, ಪರ್ಖಿ ನಾಲಿದುತೊ, ಶೈತಾನ್‍ ಆಯಿನ್, ಯೋ ಅದ್ಮಿನ ಮನ್‌ಮ ಪಡ್ಯುತೆ ಇನ ಕಾಡಿನಾಖಸ್‌, ಆ ಅದ್ಮಿಸ್‌ ಪಂಡಾ ಪಡ್ಯುತೆ ವಾಟ್ನಿ ಶೇಡೆನು ಝ಼ಗೊ ಹುಯಿರ‍್ಹುಸ್‍.
MAT 13:20 ಏಕ್‌ ಜ಼ಣೊ ವಚನ್ನ ಖ್ಹಮಜ಼್‌ತಾಸ್‌, ಖ್ಹುಶಿಥಿ ಇನ ಮಾನಿಲೇಸ್; ಕತೋಬಿ ಜ಼ಡ್‌ಕೊಂತೆ ಇನಖ್ಹಾಜೆ ಯೋ ಖಲಿ ಥೋಡುಸ್ ದನ್ ರ‍್ಹೇಸ್
MAT 13:21 ಶನಕತೊ ಇನ ಜ಼ಡ್‌ಕೊಂತೆ ಇನಖ್ಹಾಜೆ ಯೋ ಥೋಡಹಗಾಮ್‍ ಖಲಿರ‍್ಹೀನ್ ಯೊ ವಚನ್ನಖ್ಹಾಜೆ ಖ್ಹತಾಪ್ಣಿ ರ‍್ಹವೊ ಲತಾಡ ರ‍್ಹವೊ ಆಯೂತೊ ಒಗ್ಗಿಸ್ ಠೊಕ್‍ರೈ ಪಡಿಜಾ಼ಸ್‌. ಆಸ್ ಪಂಡಾ ಪಡ್ಯುತೆ ಬಂಡಾನಿ ಜ಼ಮೀನ್ ಹುಯಿರ‍್ಹುಸ್‍.
MAT 13:22 ಏಕ್‌ ಜ಼ಣೊ ವಚನ್ನ ಖ್ಹಮ್‌ಜುತೋಬಿ, ಆ ಜಗತ್ನಿ ಪಶ್ತಾವ್ಣಿ ಅಜು಼ ಧನ್‌-ದೌಲತ್‌ಪರ್‌ನಿ ಪ್ಯಾರ್ ಯೋ ವಚನ್ನ ದಾಬಿನಾಖಸ್‌, ಇನಖ್ಹಾಜೆ ಯೋ ಫಲ್ ಕೋದೇಯ್ನಿ. ಆಸ್ ಕಾಟಾನ ಝಿಕ್ರಾನು ಝ಼ಗೋಪರ್ ಪಡ್ಯಾತೆ ಪಂಡು ಹುಯಿರ‍್ಹುಸ್‍.
MAT 13:23 ಏಕ್‌ ಜ಼ಣೊ ವಚನ್ನ ಖ್ಹಮ್‌ಜಿನ್‌, ಇನ ಪರ್ಖಿಲಿನ್‌, ಯೋ ಖ್ಹೋಯೆತ್ರು, ಅಜು಼ ತೀನೀಖ್ಹ್‌ಎತ್ರು, ಬಿಜು಼ ಥೋಡು ಡೋಡಿಖ್ಹ್‌ಎತ್ರು ಫಲ್‍ದೇಸ್. ಯೋಸ್‌ ಅಛ್ಛಿ ಝ಼ಗೊಮ ಪಡ್ಯುತೆ ಪಂಡು ಹುಯಿರ‍್ಹೋಸ್ ಕರಿ ಬೋಲ್ಯೊ.
MAT 13:24 ಯೇಸುನೆ ಬಿಜ್ಜೇಕ್‌ ಮತ್ಲಬ್‌ನಿ ಖೇಣಿನ ಇವ್ಣುನ ಬೋಲ್ಯೊ: ಯೋ ಶಾತ್‌ಕತೊ, “ಸೊರ್ಗನಿ ರಾಜ್ಯ ಅಛ಼್ಛ ದಾಣಾನ ಖೇತರ್‌ಮ ನಾಖ್ಯೋತೆ ಏಕ್‌ ಅದ್ಮಿನಿಪರಕ್ ಘೋಣಿ ಛಾ಼.
MAT 13:25 ಕತೋಬಿ ಏಕ್‌ ರಾತೆ ಅದ್ಮಿಖ್ಹಾರು ಖ್ಹುತುರ‍್ಹವಾನಿ ವಖ್ಹತ್‌ಮ, ಯೋ ಅದ್ಮಿನು ದುಶ್‌ಮನ್‌ ಐನ್, ಘವ್‌ನ ಮಹಿ ಶತ್ತೇನ ಛಿಡ್ಕಿನ್‌ ಚ಼ಲೆಗಯೊ.
MAT 13:26 ಘಾವ್ ಫುಟಿನ್‌ ಬುಟ್ಟಾ ನಿಕ್ಳಾದಿನ್‌, ಇನಜೋ಼ಡೆ ಶತ್ತೇಬಿ ಫುಟಿ ಆಯು.
MAT 13:27 ತದೆ ಯೋ ಅದ್ಮಿನು ಆಳ್‌ಖ್ಹಾರು ಇನಾಕನ ಆಯಿನ್, “ಯಜಮಾನ್, ತುನೆ ತಾರ ಖೇತರ್‌ಮ ಅಛ಼್ಛ ದಾಣಾವ್‍ನ ನಾಖ್ಯೋಥೋನಿ; ಶತ್ತೇ ಕಿಜ್ಗಾ಼ಥು ಆಯು?” ಕರಿ ಫುಛಾ಼ಯು.
MAT 13:28 ಯೊ ಯಜಮಾನ್ನೆ, “ಆ ಏಕ್‌ ದುಶ್‌ಮನ್ನೆ ಕರ‍್ಯೊತೆ ಕಾಮ್” ಕರಿ ಬೋಲ್ಯೊ. ತದೆ ಆಳ್‌ನೆ, “ಹಮೆ ಜೈ಼ನ್‌, ಶತ್ತೇನ ಉಖ್ಡಿನಾಖೇಕಿ ಶು?” ಕರಿ ಫುಛಾ಼ಯು.
MAT 13:29 ತದೆ ಇನೆ, “ನಕೊ, ಶನಕತೊ ಶತ್ತೇ ಉಖ್ಡಾನಿ ವಖ್ಹತ್‌ಮ, ತುಮೆ ಘವ್‌ನಾಬಿ ಉಖ್ಡಿನಾಕ್‍ಶು.
MAT 13:30 ಇನಖ್ಹಾಜೇಸ್ ಖ್ಹುಗ್ಗೀನು ದನ್ ಆವಾತೋಡಿ ಭೇಬಿ ಜೋ಼ಡ್ಮಾಸ್ ಫುಟಾದೆ. ಖ್ಹುಗ್ಗೀನ ದನ್ಮ ಮೇ ವ್ಹಾಡವಾಳನ, ‘ಪಹಿಲೆ ಶತ್ತೇನ ಉಖ್ಡಿನಾಖಿನ್‌, ಇನ ಭಾರೊ ಭಾಂದಿ ಬಾಳಿನಾಖೊ, ಅಜು಼ ಘವ್‌ನ ಎಕ್ಟು ಕರೀನ್, ಮಾರಿ ಕಣ್ಗಿಮ ಭರೊ’ ಕರಿ ಬೋಲಿಶ್” ಕರಿ ಬೋಲ್ಯೊ.
MAT 13:31 ಯೇಸುನೆ ಬಿಜೇಕ್ ಮತ್ಲಬ್‌ನ ಇವ್ಣುನ ಬೋಲ್ಯೊ: ಯೋ ಶಾತ್‌ಕತೊ, “ಸೊರ್ಗನು ರಾಜ್ಯ ಅಮ್ ಹುಯಿರ‍್ಹೂಸ್. ಕಿಮ್‌ಕತೊ, ಏಕ್‌ ಜ಼ಣಾನೆ ರಾಯಿನ ದಾಣಾನ ಲೀಜೈ಼ನ್, ಇನ ಖೇತರ್‌ಮ ಛಿಡ್‌ಕ್ಯೊ.
MAT 13:32 ಯೋ ರಾಯಿನೊ ದಾಣೊ ಖ್ಹಾರಾಸ್ ಬಿಂಜೋ಼ಳಾಥೀಬಿ ನ್ಹಾನು ಹುಯಿರ‍್ಹುಸ್‍, ತೋಬಿ ಯೋ ಫುಟಾನ ಬಾದ್ಮ ಖ್ಹಾರಸ್ ಭಾಜಿಪಾಲಾನ ಝಾ಼ಡ್‌ಥೀಬಿ ಮೋಟು ಹುಯಿನ್, ಝಾ಼ಡು ಹುವ್ವಾಸ್‌, ತದೆ ಆಬ್‍ಪರ್‌ ಉಡಾತೆ ಜಿನಾವರ್‌ ಖ್ಹಾರು ಆಯಿನ್, ಇನಿ ಡಾಳಿಯೇಮ ಮ್ಹಾಳೊ ಭಾಂದಿನ್‍ ವಖ್ಹಸ್‌” ಕರಿಬೋಲ್ಯೊ.
MAT 13:33 ಯೇಸುನೆ ಅಜೂ಼ಬಿ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, “ಸೊರ್ಗನು ರಾಜ್ಯ ಅಮ್ ಹುಯಿರ‍್ಹುಸ್‍. ಕಿಮ್‌ಕತೊ, ಏಕ್‌ ತಯೇಡಾನೆ ಶೋಡಾನ ಲೀಜೈ಼ನ್, ತೀನ್ ಶೇರ್ ಆಟಾಮ ಕಲೈನ್ ಮ್ಹೇಲಾಖ್ಹತರ್‌, ಯೋ ಆಟೊ ಖ್ಹಾರುಸ್‌ ಫುಗಿಆಯು.
MAT 13:34 ಯೇಸುನೆ ಆ ವಾತೆಖ್ಹಾರು ಅದ್ಮಿನಿ ಭೀಡ್‌ಣ ಮತ್ಲಬ್‌ನಿ ಖೇಣಿಯೇಥೀಸ್‌ ಬೋಲ್ಯೊ; ಮತ್ಲಬ್‌ನಿ ಖೇಣಿ ಕೊಂತೆ ಶಾತ್ಬಿ ಕೋ ಬೋಲ್ಯೋನಿ.
MAT 13:35 ಅಮ್ಮಸ್, “ಮೇ ಬೋಲಾನಿ ವಖ್ಹತ್‌ಮ ಮತ್ಲಬ್‌ನಿ ಖೇಣಿಯೇಥಿ ಬೋಲಿಶ್; ಜಗತ್‌ ಉಬ್‌ಜ್ಯುತೆ ತಪ್‌ಥು ಲಪೈರ‍್ಹುಥೂತೆ ಬಾರೇಮ ಮೇ ಇವ್ಣುನ ಬೋಲಿಶ್” ಕರಿ ಪ್ರವಾದಿನ ಮ್ಹೋಡೆ ಬೋಲಾಯೋತೆ ವಾತೇನ ಯೇಸುನೆ ಅಮ್ ಕರ‍್ಯೊ.
MAT 13:36 ಯೇಸು ಅದ್ಮಿನ ಮ್ಹೆಂದಿನ್, ಘರೆ ಜಾ಼ವಾನ ಬಾದ್ಮ, ಇನ ಶಿಷ್ಯರ್‌ ಇನಾಕನ ಆಯಿನ್, “ಖೇತರ್‌ಮಾನು ಶತ್ತೇನಿ ಬಾರೇಮಾನು ಮತ್ಲಬ್‌ನ ಹಮೂನ ಬೋಲಿವತಾಳ್” ಕರಿ ಬೋಲ್ಯ.
MAT 13:37 ಯೇಸುನೆ, “ಅಛ್ಛು಼ ಪಂಡು ನಾಖವಾಳೊ ಕತೊ ಅದ್ಮಿನೊ ಛಿಯ್ಯೊ;
MAT 13:38 ಖೇತರ್‌ಕತೊ ಆ ಜಗತ್‌; ಅಛ್ಛು಼ ಪಂಡುಕತೊ ದೇವ್ನಿ ರಾಜ್ಯನು ಅದ್ಮಿಖ್ಹಾರು; ಶತ್ತೆಕತೊ ಶೈತಾನ್‍ ಭಣಿವಾಳು ಕರಿ;
MAT 13:39 ಶತ್ತೇ ನಾಖ್ಯೋತೆ ದುಶ್‌ಮನ್‌ಕತೊ ಶೈತಾನ್ ಕರಿ. ಖ್ಹುಗ್ಗೀನ ದನ್‌ಕತೊ ಜಗತ್‌ನು ಖ್ಹರ್ತಿನ ದನ್‌ಕರಿ ಅಜು಼ ವ್ಹಾಡವಾಳುಕತೊ ದೇವ್ನು ದೂತರ್ ಕರಿ.
MAT 13:40 ಕಿಮ್ ಶತ್ತೇನ ಉಖ್ಡಿನ್ ಬಾಳಿನಾಖಸ್ಕಿ, ಇಮ್ಮಸ್ ಜಗತ್‌ನು ಖ್ಹರ್ತಿನ ದನ್ಮ ಚಾ಼ಲ್‌ಷೆ.
MAT 13:41 ಅದ್ಮಿನೊ ಛಿಯ್ಯೊ ಇನ ದೂತರ್‌ನ ಮೋಕ್ಲಿನ್, ಇವ್ಣೆ ಇನ ರಾಜ್ಯಮ ಕೋಣ್ ಪಾಪ್ ಅಜು಼ ಖರಾಬ್‌ಕರಾನಿತರ ಕರ‍್ಯುಕೀ ಇಮ್ನ ಅದ್ಮಿಖ್ಹಾರನ ಎಕ್ಟು ಕರೀನ್‌,
MAT 13:42 ಅಜು಼ ಇನಿ ರಾಜ್ಯಮಾಥು ಭಾರ್‌ ಕಾಡಿನ್ ಆಗ್‌ನ ಕುಂಡಾಮ ನಾಕ್‌ಶೆ. ಹಿಜ್ಜಾ಼ ಇವ್ಣೆ ರೊವ್‌ಶೆ ಅಜು಼ ಕರ್‌-ಕರ್‌ ದಾತ್‍ಚಾ಼ವ್‍ಶೆ
MAT 13:43 ತದೆ ನೀತಿವಾಳು ಅದ್ಮಿಖ್ಹಾರು ಚಾ಼ಂದ್‍ನಿಘೋಣಿ ಚ಼ಮಕ್‌ತುಹುಯಿನ್ ಇವ್ಣ ಬಾನಿ ರಾಜ್ಯಮ ರ‍್ಹಿಶೆ. ಖ್ಹಮ್‌ಜಾ಼ನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ” ಕರಿ ಬೋಲ್ಯೊ.
MAT 13:44 “ಸೊರ್ಗನು ರಾಜ್ಯ ಅಮ್ ಹುಯಿರ‍್ಹೂಸ್. ಕಿಮ್‌ಕತೊ, ಏಕ್‌ ಜ಼ಣಾನೆ ಖೇತರ್‌ಮ ಲಪಿರ‍್ಹೂತೆ ನಿಧಿನ ದೇಖಿನ್‌, ಇನ ಪಾಛು಼ ಖೇತರ್‌ಮಾಸ್‌ ಖೋಂದಿ ಘಾಲಿದೀನ್‌, ಇನೇಥಿ ಘಣು ಖ್ಹುಶಿಹುಯಿನ್ ಜೈ಼ನ್‌, ಇನಾಕನ ಥೂತೆ ಖ್ಹಾರುಸ್‌ ವೇಚಿನಾಖಿದೀನ್‌, ಆಯಿನ್ ಯೋ ಖೇತರ್‌ನ ಮೋಲ್‌ಲೀಲಿದೊ.
MAT 13:45 “ಸೊರ್ಗನು ರಾಜ್ಯ ಅಮ್ ಹುಯಿರ‍್ಹೂಸ್. ಕಿಮ್‌ಕತೊ, ಅಛ಼್ಛು ಮುತ್‌ಅಖ್ಖಾನ ಢೂಂಡಾಸ್ತೆ ಏಕ್‌ ಧಂದೊ ಕರಾವಾಳೊ,
MAT 13:46 ಘಣ ಮೋಲ್ನು ಏಕ್‌ ಮುತ್ನ ದೇಖಿನ್‌, ಹಿಜ್ಜಾ಼ಥೊ ಜೈ಼ನ್‌, ಇನಾಕನ ಥೂತೆ ಖ್ಹಾರುಸ್‌ ವೇಚಿನ್, ಯೋ ಮುತ್ನ ಮೋಲ್‌ಲೀಲಿದೊ.
MAT 13:47 “ಸೊರ್ಗಾನು ರಾಜ್ಯ ಅಮ್ ಹುಯಿರ‍್ಹೂಸ್. ಕಿಮ್‌ಕತೊ, ಥೋಡು ಜ಼ಣು ಮಾಛ್ಲು಼ ಧರಾವಾಳಾನೆ ಜಾ಼ಳಾನ ದರ‍್ಯಾವ್‌ಮ ನಾಖ್ಯು, ತದೆ ಖ್ಹಾರಿಸ್ ರಖ್ಹಮ್‌ನು ಮಾಛ್ಲು಼ ಇನಾಮ ಖ್ಹಪ್‌ಡ್ಯು.
MAT 13:48 ಜಾ಼ಳು ಭರಾವಾನ ಬಾದ್‌ಮ, ಇನ ಕನಾರೆ ಖೇಚಿಲೈನ್‌, ಬೇಶಿನ್, ಅಛ಼್ಛ ಮಾಛ್ಲಾ಼ವ್ನ ಟೋಕ್ರಾವ್‍ಮ ಭರಿಲೀನ್‌, ಖರಾಬ್ ಮಾಛ್ಲಾ಼ವ್ನ ಫೇಕಿನಾಖಿದಿದು.
MAT 13:49 ಅಮ್ಮಸ್ ಜಗತ್ನ ಖ್ಹರ್ತಿಮ ಚಾ಼ಲ್‌ಷೆ. ದೇವ್‌ನು ದೂತರ್ ಆಯಿನ್, ಧರ್ಮಿ ಅದ್ಮಿಯೇನ ಮಹಿಥು ಖರಾಬ್ ಅದ್ಮಿಯೇನ ಅಲಕ್ ಕರೀನ್,
MAT 13:50 ಇವ್ಣುನ ಆಗ್‌ನ ಕುಂಡಾಮ. ಹಿಜ್ಜಾ಼ ಇವ್ಣೆ ರೊವ್‌ಶೆ ಅಜು಼ ಕರ್‌-ಕರ್‌ ದಾತ್‍ಚಾ಼ವ್‍ಶೆ” ಕರಿ ಬೋಲ್ಯೊ.
MAT 13:51 ಯೇಸುನೆ ಇನ ಶಿಷ್ಯರ್‌ನ, “ಆ ಖ್ಹಾರಿ ವಾತೆನಿ ಮತ್‌ಲಬ್ ತುಮೂನ ಮಾಲುಮ್‌ಪಡ್ಯುಕಿ ಶು?” ಕರಿ ಪುಛಾ಼ಯೊ. ಇವ್ಣೆ, “ಓಹೊ” ಕರಿ ಜವಾಬ್‌ ದಿದಾ.
MAT 13:52 ತದೆ ಯೇಸುನೆ ಇನ ಶಿಷ್ಯರ್‌ನ, “ಅಮ್‌ಕತೊ, ಸೊರ್ಗ ರಾಜ್ಯನು ಶಿಷ್ಯರ್‌ ಬಣ್ಯೂತೆ ಹರೇಕ್ ಮೋಶೆನಿ ವಚನ್‍ ಶಿಕಾಡವಾಳು ಶಾಸ್ತ್ರಿಯೆ, ಘರ್‌ನೊ ಯಜಮಾನ್ನಿಘೋಣಿ ಹುಯಿರ‍್ಹೂಸ್, ಯೋ ಯಜಮಾನ್ ಇನ ಘರ್‌ನಿ ಕಣ್ಗಿಮ ಜ಼ಮ ಕರಿರಾಖ್ಯೋತೆ ನವು ಅಜು಼ ಜೂ಼ನ ರಾಛಾ಼ನಖ್ಹಾರು ಭಾರ್‌ ಕಾಡಸ್‌” ಕರಿ ಬೋಲ್ಯೊ.
MAT 13:53 ಯೇಸು ಆ ಮತ್ಲಬ್‌ನಿ ಖೇಣಿಯೇನ ಬೋಲಾನ ಬಾದ್‌ಮ, ಹಿಜ್ಜಾ಼ಥೊ ನಿಕ್ಳಿನ್,
MAT 13:54 ಇನ ಶೊಂತ್‌ ಗಾಮೆ ಗಯೊ. ಹಿಜ್ಜಾ಼ ಯೇಸು ಯೆಹೂದ್ಯರ್‌ನ ಸಬೆ ಭರಾವಾನು ಮಂದಿರ್‌ಮ ಅದ್ಮಿನ ಬೋಲಿವತಾಳ್ಯೊ, ತದೆ ಅದ್ಮಿಖ್ಹಾರು ಇನ ಖ್ಹಮ್‌ಜಿನ್‌, ಆಶ್ಚರ್ಯಖೈನ್, “ಅನ ಅಮ್ನಿ ಗ್ಯಾನ್ ಅಜು಼ ಅಮ್ನು ಅದ್ಭುತ್‌ಕಾಮ್‌ಖ್ಹಾರು ಕರಾನು ಕಿಜ್ಜಾ಼ಥು ಮಳ್ಯು?
MAT 13:55 ಆ ಯೋ ಖೋಡ್‌ಶಾನು ಖ್ಹಾಮನ್‌ ಕರಾವಾಳಾನೊ ಛಿಯ್ಯೊ ಕಾಹೆಕಿ ಶು? ಅನಿಆಯ ಮರಿಯ ಕಾಹೆಕಿ ಶು? ಯಾಕೋಬ, ಯೋಸೇಫ, ಸೀಮೋನ್‌ ಅಜು಼ ಯೂದ ಅನ ಭೈಯೇ ಕಾಹೆಕಿ ಶು?
MAT 13:56 ಅನಿ ಭೇನೆ ಖ್ಹಾರಿ ಹಜ್ಜಾ಼ಸ್ ರ‍್ಹೇಸ್‌ನಿ? ಇಮ್‍ಕತೊ, ಆ ಖ್ಹಾರು ಅನ ಕಿಜ್ಜಾ಼ಥು ಮಳ್ಯು?” ಕರಿ ವಾತೆ ಬೋಲಿಲಿದು. ಅಜು಼ ಯೇಸುನ ಝಿಟ್ಕಾರವಾಳು ಹುಯು.
MAT 13:57 ತದೆ ಯೇಸುನೆ ಇವ್ಣುನ, “ಪ್ರವಾದಿನ ಅಲ್ಹಾವ್ ಅದ್ಮಿ ಮರ್ಯಾದಿ ದೇಸ್, ಕತೋಬಿ ಶೊಂತ್‌ ಗಾಮ್‌ನು ಅದ್ಮಿನರ‍್ಹವೊ, ಶೊಂತ್‌ ಘರ್‌ನು ಅದ್ಮಿನರ‍್ಹವೊ ಮರ್ಯಾದಿ ಕೋ ದೇಯ್ನಿ” ಕರಿ ಬೋಲ್ಯೊ.
MAT 13:58 ಇವ್ಣೆ ಇನ ನಂಬ್ಯುಕೊಂತೆ ಇನಖ್ಹಾಜೆ, ಯೇಸುನೆ ಹಿಜ್ಜಾ಼ ಘಣು ಅದ್ಭುತ್‌ಕಾಮ್ನ ಕೋ ಕರ‍್ಯೋನಿ.
MAT 14:1 ಯೋ ದನೂಮ, ಹೆರೋದ ಗಲಿಲಾಯಮ ರಾಜ಼್‌ಭಾರ್‌ ಚ಼ಲಾವ್‍ ಕರ್ತೊಥೊ, ಅದ್ಮಿಖ್ಹಾರು ಯೇಸುನಿ ಬಾರೇಮ ಬೋಲುಕರ್ತುಥೂತೆ ಇನೆ ಖ್ಹಮ್‌ಜೊ.
MAT 14:2 ಇನಖ್ಹಾಜೆ ಇನೆ ಇನ ಸೇವಕರ್‌ನ, “ಖ್ಹಾಚಮಾಬಿ ಯೇಸುಸ್‌ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಹುಯಿರ್‍ಹೊಸ್, ಯೋಸ್‍ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್. ಇನಖ್ಹಾಜೇಸ್ ಆ ಖ್ಹಾರು ಅದ್ಭುತ್ ಕರಾನ ಶಕತ್ ಮಳಿರ‍್ಹೀಸ್ತೆ” ಕರಿ ಬೋಲ್ಯೊ.
MAT 14:3 ಹೆರೋದನೆ ಹೆರೋದ್ಯನಖ್ಹಾಜೆ ಯೋಹಾನ್ನ ಧರೈನ್, ಭಂದೈನ್, ಜೇಲ್‌ಮ ಕೋಂಡಿ ಘಲಾಯೋಥೊ. ಆ ಹೆರೋದ್ಯ ಹೆರೋದನೊ ಮೋಟೊ ಭೈ ಫಿಲಿಪ್ಫನಿ ಬಾವಣ್‍ ಹುಯಿರ‍್ಹೀಥಿ.
MAT 14:4 ಯೋಹಾನ ಹೆರೋದಾನ, “ತೂ ಹೆರೋದ್ಯನ ರಾಖಿರಾಖ್ಯೋತೆ ನ್ಯಾವ್‌ಕಾಹೆ” ಕರಿ ಬೋಲ್ತೊರ‍್ಹೇತೋಥೊ.
MAT 14:5 ಹೆರೋದ ಯೋಹಾನ್ನ ಮರೈನಾಕ್ಣು ಕರಿ ಥೊ, ತೋಬಿ ಅದ್ಮಿಖ್ಹಾರು ಯೋಹಾನ ಏಕ್‌ ಪ್ರವಾದಿ ಕರಿ ಮಾನ್‌ತುಥೂತೆ ಇನಖ್ಹಾಜೆ, ಅದ್ಮಿನ ಡರ್‌ಥಿ ಇನ ಮರಾಯೊ ಕೊಯ್ನಿ.
MAT 14:6 ಹೆರೋದನೊ ಪೈದಾಖ್ಹ್‌ನೊ ದನ್ಮ, ಹೆರೋದ್ಯನಿ ಛೋ಼ರಿ ಹೆರೋದ ಅಜು಼ ಇನ ಮೆಹೆಮಾನ್ನ ಖ್ಹಾಮ್ಣೆ ನಾಚಿನ್ ವತಾಳಿ. ಅನೇಥಿ ಹೆರೋದನ ಘಣು ಖ್ಹುಶಿ ಹುಯು.
MAT 14:7 ಇನಖ್ಹಾಜೆ ಇನೆ, “ತೂ ಶಾತ್ ಬೋಲಿಲಿದಿತೋಬಿ, ಮೇ ತುನ ದೆವುಸ್‌” ಕರಿ ಯೋ ಛೋ಼ಕ್ರಿನ ವಾಗ್ದಾನ್‌ದಿದೊ
MAT 14:8 ತದೆ ಇನಿ ಆಯ ಶಾತ್‌ ಮಾಂಗಿಲೆವ್ಣು ಕರಿ ಇನ ಬೋಲಿದಿದಿ. ತದೆ ಇನೆ, “ಹಮ್ಕೆ, ಹಜ್ಜಾ಼ಸ್ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಪತ್ತರ್‌ಮ ಮಂಗೈನ್, ಮನ ದೇವ್ಣು” ಕರಿ ಬೋಲಿ.
MAT 14:9 ಯೋ ವಾತೇಥಿ ರಾಜಾ಼ನ ದುಖ್ ಹುಯು, ತೋಬಿ ಇನೆ ಇನ ಮೆಹಮಾನ್ ಅಖ್ಖಾನ ಖ್ಹಾಮ್ಣೆ ಆಣ್ ದಿದೋತೆ ಇನಖ್ಹಾಜೆ, ಇನೆ ಮಾಂಗಿತೆ ಇನ ದೇವ್ಣುಕರಿ ಹುಕುಮ್‌ ದಿದೊ.
MAT 14:10 ಅಜು಼ ಆಳ್‌ನ ಮೋಕ್ಲಿನ್, ಜೇಲ್‌ಮ ಕೋಂಡಿ ಘಾಲಿರಾಖ್ಯುತೆ ಹಿಜ್ಜಾ಼ ಯೋಹಾನನು ಮುಡ್‌ಕ್ಯು ಕತ್ರಾಯೊ.
MAT 14:11 ಇವ್ಣೆ ಯೋಹಾನ್ನ ಮುಡ್‌ಕ್ಯಾನ ಪತ್ತರ್‌ಮ ಲೈನ್‌, ಯೋ ಛೋ಼ಕ್ರಿನ ದಿದು. ಇನೆ ಯೋ ಮುಡ್‌ಕ್ಯಾನ ಇನಿ ಆಯಕನ ಲೀಗೈ.
MAT 14:12 ಯೋಹಾನನು ಶಿಷ್ಯರ್‌ ಆಯಿನ್, ಇನು ಧಡ್‌ನ ಪಳ್ಳಿಜೈ಼ನ್‌, ಘವಿಮ ಘಾಲ್ಯು. ಅನಕೇಡೆಥು ಇವ್ಣೆ ಯೇಸುಕನ ಜೈ಼ನ್‌, ಚಾ಼ಲ್ಯುತೆ ಬಾರೇಮ ಬೋಲ್ಯು.
MAT 14:13 ಯೇಸುನೆ ಯೋಹಾನ್ನಿ ಬಾರೇಮಾನು ಖಬರ್‌ನ ಖ್ಹಮ್‌ಜಿನ್‌, ಯೋ ಝ಼ಗೋನ ಮ್ಹೆಂದಿನ್, ಡೋಣ್‌ ಚ಼ಢೀನ್‌, ಎಕ್ಕಸ್ ಜ಼ಣೊ ಉಜ್ಜಾ಼ಡಿ ಝ಼ಗೋನ ಚ಼ಲೆಗಯೊ. ಅನ ಖ್ಹಮ್‌ಜಿನ್‌ ಅದ್ಮಿಖ್ಹಾರು, ಇವ್ಣ-ಇವ್ಣ ಗಾಮ್‌ನ ಮ್ಹೆಂದಿನ್, ಗೋಡೇಥೀಸ್‌ ಚಾ಼ಲಿನ್ ಯೇಸುನ ಪೀಠೆಗಯು.
MAT 14:14 ಯೇಸು ಡೋಣ್‌ಮಾಥು ಭಾರ್‌ ಆಯಿನ್, ಅದ್ಮಿನಿ ಘಣಿ ಮೋಟಿ ಭೀಡ್‌ಣ ದೇಖಿನ್‌, ಇವ್ಣಾಪರ್ ಗೋರ್‌ಖೈನ್, ರೋಗ್‌ಮ ರ‍್ಹವಾಳಾನ ಖ್ಹಾರು ಅಛ್ಛು಼ ಕರ‍್ಯೊ.
MAT 14:15 ಖ್ಹಾಂಜ಼್ ಹುವ್ವಾದೀನ್, ಇನ ಶಿಷ್ಯರ್‌ ಇನಾಕನ ಐನ್, “ಆ ಉಜ್ಜಾ಼ಡಿ ಝ಼ಗೊ, ಅಜು಼ ವಖ್ಹತ್‍ಬಿ ಘಣಿ ಹುಯಿಗೈ. ಆ ಅದ್ಮಿಖ್ಹಾರು ಇವ್ಣಖ್ಹಾಜೆ ಖಾಣನು ರಾಛು಼ ಲ್ಯವಾನಟೇಕೆ, ಇವ್ಣುನ ಗಾಮೆ ಬೋಲಿಮೋಕಲ್‌” ಕರಿ ಬೋಲ್ಯ.
MAT 14:16 ಯೇಸುನೆ ಇವ್ಣುನ, “ಅದ್ಮಿಖ್ಹಾರು ಜಾ಼ವಾನು ನಕೊ, ತುಮೇಸ್ ಇವ್ಣುನ ಖಾವಾನ ಶಾತ್‌ತೋಬಿ ದೆವೊ!” ಕರಿ ಬೋಲ್ಯೊ.
MAT 14:17 ತದೆ ಶಿಷ್ಯರ್‌ನೆ, “ಹಜ್ಜಾ಼ ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಎತ್ರುಸ್ ಛಾ಼ತೆ” ಕರಿ ಜವಾಬ್‌ ದಿದಾ.
MAT 14:18 ತದೆ ಯೇಸುನೆ, “ಇನ ಹಜ್ಜಾ಼ ಮಾರಕನ ಲೀನ್, ಆವೊ” ಕರಿ ಬೋಲ್ಯೊ.
MAT 14:19 ಅಜು಼ ಅದ್ಮಿ ಖ್ಹಾರಾನ ಘಾಖ್ಹ್‌ಪರ್‌ ಬೇಖ್ಹೊ ಕರಿ ಬೋಲಿನ್, ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾನ ಪಾಡಿಲೀನ್, ಆಬ್‍ಭಣಿ ದೇಖಿನ್‌, ದೇವ್ನ ಧನ್ಯವಾದ್ ಕರೀನ್, ಯೋ ರೋಟಾವ್ನ ತೋಡಿನ್, ಶಿಷ್ಯರ್‌ನ ಹಾತ್‌ಮ ದಿದೊ. ಶಿಷ್ಯರ್‌ನೆ ಅದ್ಮಿನಿ ಝೂ಼ಂಡ್‌ನ ದಿದಾ.
MAT 14:20 ತಮಾಮ್‌ ಅದ್ಮಿ ಖೈನ್ ಬಶ್‌ಹುಯು. ಉಬ್‍ರ‍್ಯುತೆ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯು.
MAT 14:21 ಖಾಣು ಖಾದೂತೆ ಇವ್ಣಾಮ ತಯೇಡ ಅಜು಼ ಲಡ್ಕಾವ್ನ ಮ್ಹೆಂದಿನ್, ಪರ್ಖ್ಹಾ ಅದ್ಮಿಸ್‌ ಕಮ್‌ಶಿಕಮ್ ಪಾಚ಼್ ಹಜಾ಼ರ್‌ಜ಼ಣು ಥೂ.
MAT 14:22 ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಮೇ ಆ ಅದ್ಮಿನಿ ಭೀಡ್‌ಣ ಮೋಕ್ಲಾನ ಮಹಿ, ತುಮೆ ಡೋಣ್‌ ಚ಼ಢೀನ್, ಪಹಿಲೆ ಪಾರ್ಲಿ ಕನಾರೆ ಜಾ಼ವೊ” ಕರಿ ಬೋಲ್ಯೊ.
MAT 14:23 ಅದ್ಮಿನಿ ಭೀಡ್‌ಣ ಮೋಕ್ಲಾನ ಬಾದ್‌ಮ, ಪ್ರಾರ್ಥನೆ ಕರಾನಖ್ಹಾಜೆ ಯೋ ಎಕ್ಲೋಸ್ ಪಹಾಡ್‌ಪರ್ ಗಯೊ. ದನ್ ಡುಬಾನ ಬಾದ್‌ಮ, ಯೇಸು ಎಕ್ಲೋಸ್ ಹಿಜ್ಜಾ಼ ಥೊ.
MAT 14:24 ಎತ್ರಾಸ್‌ಮ ಡೋಣ್‌ ಜ಼ಮೀನ್‌ಥಿ ಘಣಿ ದೂರ್ ಜೈ಼ರ‍್ಹೀಥಿ, ಅಜು಼ ಖ್ಹಾಮ್ಣೆನೊ ವಹಿರೊ ವಾಗುಕರ್ತೊಥೋತೆ ಇನಖ್ಹಾಜೆ, ಡೋಣ್‌ ದರ‍್ಯಾವ್‌ನ ಇಚ಼್‌ಮ ಜ್ಹೋಕಾಳ್ಯನ ಮಾರ್‌ಮ ಖ್ಹಪ್‌ಡಿರ‍್ಹೀಥಿ.
MAT 14:25 ವ್ಹಾಣ್‌ಖ್ಹತ್ರೆ ಚಾರ್‌ ಘಂಟಾ ಹುಯಿರ‍್ಹುಥು, ತದೆ ಯೇಸು ದರ‍್ಯಾವ್‌ಪರ್ ಚಾ಼ಲ್ತೊಹುಯಿನ್‌ ಶಿಷ್ಯರ್‌ ಭಣಿ ಆಯೊ.
MAT 14:26 ದರ‍್ಯಾವ್‌ಪರ್ ಚಾ಼ಲ್ತೊವಳ್ಯಾವಾತೆ ಯೇಸುನ ಶಿಷ್ಯರ್‌ನೆ ದೇಖಿನ್‌, ಘಬ್‌ರೈಗಯ. ಅಜು಼ ಭೂತ್‌ಕರಿ ಸೋಚಿನ್, ಡರ್‌ಥಿ ಚಿಕ್‌ರ‍್ಯ.
MAT 14:27 ತದ್‌ನು-ತದ್ದೇಸ್ ಯೇಸುನೆ ವಾತೆ ಬೋಲಿನ್ ಇವ್ಣುನ, “ಹಿಮ್ಮತ್‌ ರ‍್ಹವಾದೆ; ಆ ಮೇಸ್! ಡರೊ ನಕೊ!” ಕರಿ ಬೋಲ್ಯೊ.
MAT 14:28 ತದೆ ಪೇತ್ರನೆ, “ಪ್ರಭು, ಆ ತೂಸ್ ಉಶೇತೊ, ಮನ ಪಾಣಿಪರ್‌ ಚಾ಼ಲಿನ್ ತಾರಕನ ಆವಾನ ಹುಕುಮ್ ದೇ” ಕರಿ ಬೋಲ್ಯೊ.
MAT 14:29 ಯೇಸುನೆ ಇನ, “ಆವ್!” ಕರಿ ಜ಼ವಾಬ್‌ದಿದೊ. ತದೆ ಪೇತ್ರ ಯೇಸುಕನ ಜಾ಼ವಾನಖ್ಹಾಜೆ ಡೋಣ್‌ಮಾಥು ಉತ್ರಿನ್, ಪಾಣಿಪರ್‌ ಚಾ಼ಲಲಗ್ಯೊ.
MAT 14:30 ಕತೋಬಿ ವ್ಹಯಿರಾನ ರಪಾಟಾನ ದೇಖಿನ್‌ ಡರಿನ್, ಪಾಣಿಮ ಡುಬಾಲಗ್ಯೊ ಅಜು಼ “ಪ್ರಭು, ಮನ ಬಚಾ಼ಡ್‍!” ಕರಿ ಚಿಕ್‌ರ‍್ಯೊ.
MAT 14:31 ಯೋಸ್ ವಖ್ಹತ್‌ಮ ಯೇಸು ಹಾತ್‌ ಖ್ಹಾಮ್ಣೆ ಕರೀನ್, ಇನ ಧರೀನ್, “ಏ ಕಮ್‍ವಿಶ್ವಾಸ್‍ವಾಳ! ತೂ ಶನ ಶಕ್ ಕರ‍್ಯೊ?” ಕರಿ ಬೋಲ್ಯೊ.
MAT 14:32 ಇವ್ಣೆ ಡೋಣ್‌ಮ ಚ಼ಢಾನ ಬಾದ್‌ಮ, ವಹಿರೊ ಭೀರಿಗಯೊ.
MAT 14:33 ತದೆ ಡೋಣ್‌ಮ ಥಾತೆ ಶಿಷ್ಯರ್‌ನೆ, “ಖ್ಹಾಚ಼ಮಾಬಿ ತೂ ದೇವ್‌ನೊ ಛಿಯ್ಯೊ” ಕರಿ ಬೋಲಿನ್, ಯೇಸುನ ಆರಾದನೆ ಕರ‍್ಯಾ.
MAT 14:34 ಇವ್ಣೆ ದರ‍್ಯಾವ್‍ನ ಮ್ಹೇಲಿನ್, ಗೆನೆಜರೇತ್‍ ಝ಼ಗೋನಿ ಕನಾರೆಕನ ಆಯಾ.
MAT 14:35 ಯೋ ಝ಼ಗೊವಾಳು ಯೇಸುನಿ ಖ್ಹಣೇದ್ ಧರೀನ್, ಇವ್ಣೆ ಯೋ ಅಶ್‌ಪಿಶ್‌ನು ತಬರ್‌ಖಾಮ ಖ್ಹಾರು ಬೋಲಿಮೋಕ್ಲಿನ್, ರೋಗ್‌ಮ ರ‍್ಹವಾಳ ತಮಾಮ್‌ನ ಯೇಸುಕನ ಬುಲೈ ಮಂಗಾಯು.
MAT 14:36 ಇವ್ಣೆ ಯೇಸುನ, “ಆ ರೋಗ್‌ಮ ರ‍್ಹವಾಳಾನ ತಾರು ಲುಂಗ್ಡಾನು ಕೋಣೊತೋಬಿ ಛೀಮಾನ ಮ್ಹೇಲ್‌” ಕರಿ ಗಿಂಗೈಲಿದು. ಅಜು಼ ಇನು ಲುಂಗ್ಡು ಛೀಮ್ಯೂತೆ ಹರೇಕ್ನ ಅಛ್ಛು಼ ಹುಯು.
MAT 15:1 ಬಾದ್‌ಮ ಯೆರೂಸಲೇಮ್‌ಥು ಫರಿಸಾಯರ್ ಅಜು಼ ಮೋಶೆನಿ ವಚನ್ನ ಶಿಕಾಡವಾಳು ಶಾಸ್ತ್ರಿಯೆ ಯೇಸುಕನ ಆಯಿನ್,
MAT 15:2 “ತಾರು ಶಿಷ್ಯರ್‌ ಅಪ್ಣ ಶಾಣವ್‌ಥಿ ಆಯೂತೆ ಆದತ್‌ನ ಶನ ಪಾಡಿನ್ ಚಾ಼ಲಕೊಯ್ನಿ? ಇವ್ಣೆ ಹಾತ್‌ ಧೊವಾಕೊಂತೆ ಖಾಣು ಖಾಸ್ನಿ” ಕರಿ ಪುಛಾ಼ಯು.
MAT 15:3 ಯೇಸುನೆ ಇವ್ಣುನ, “ತುಮೆ ತುಮಾರಿ ಆದತ್‌ನ ಪಾಡಿ ಚಾ಼ಲಾನಖ್ಹಾಜೆ ದೇವ್ನಿ ಹುಕುಮ್‌ನ ಶನ ತೋಡೊಸ್ತೆ?
MAT 15:4 ಕಿಮ್‌ಕತೊ, ‘ಆಯ-ಬಾನ ಮರ್ಯಾದಿ ದೇವ್ಣು, ಆಯನ ರ‍್ಹವೊ, ಬಾನ ರ‍್ಹವೊ ಶಾಪ್ನ-ಶಬರ್‌ ದೆವಾಳಾನ ಮರಣ್ ದಂಡ್‌ ಹೋಣು’ ಕರಿ ದೇವ್ನೆ ಬೋಲಿರಾಖ್ಯೊಸ್.
MAT 15:5 ಕತೋಬಿ ತುಮೆತೋ, ಕೋಣ್‌ತೋಬಿ ಇನ ಬಾನ ರ‍್ಹವೊ, ಆಯಾನ ರ‍್ಹವೊ ದೇಖಿನ್‌, ‘ಮೇ ತಾರಿ ಖ್ಹದ್ದರ್‌ನಖ್ಹಾಜೆ ದೇವ್ಣುಥೂತೆ ಇನ ದೇವ್ನಖ್ಹಾಜೆ ಮುಡಪ್‍ ಕರ‍ಖ್ಯೊಸ್’ ಕರಿ ಬೋಲ್ಯೋತೊ,
MAT 15:6 ಯೋ ಇನ ಆಯ-ಬಾನ ಮರ್ಯಾದಿ ದೆವಾನು ಜ಼ರೂರತ್ ಕೊಯ್ನಿ ಕರಿ ಬೋಲಿದೆವೋಸ್‌. ಅಮ್ ಕರಾಥಿ ತುಮಾರಿ ಆದತ್‍ಥೀಸ್‍ ದೇವ್ನಿ ಹುಕುಮ್‌ನ ಫಾಯಿದೊಕೊಂತೆ ಇಮ್‌ ಕರಿರಾಖ್ಯಾಸ್.
MAT 15:7 ತುಮೆ ಖೋಟ್ ದಿಲ್‌ವಾಳ! ಯೆಶಾಯನೆ ತುಮಾರಿ ಬಾರೇಮ ಬರೊಬರ್‌ಥೀಸ್‌ ಪ್ರವಾದ್‌ನೆ ಕರಿರಾಖ್ಯೋಸ್! ಯೋ ಶಾತ್‌ಕತೊ: ದೇವ್ನೆ ಬೋಲ್ಯೋಕಿ,
MAT 15:8 ‘ಆ ಅದ್ಮಿಖ್ಹಾರು ವಾತೇಥಿ ಮನ ಮರ್ಯಾದಿ ದೇಸ್, ಕತೋಬಿ ಅವ್ಣೊ ದಿಲ್‌ ಮಾರೇಥಿ ದೂರ್ ಛಾ಼.
MAT 15:9 ಅದ್ಮಿನ ಖ್ಹೂಜ಼್‌ನಿತರ ಶಿಕಾಡ್ತು ಆಯೂತೆ ಇನಾಸ್ ದೇವ್ನಿ ಹುಕುಮ್‌ನಿಘೋಣಿ ಬೋಲಿಶಿಕಾಡವಾಳ ಅವ್ಣೆ ಮನ ಆರಾದನೆ ಕರಾನು ಕಾಮ್ನಕೊಯ್ನಿ.
MAT 15:10 ಅನಕೇಡೆಥು ಯೇಸುನೆ ಅದ್ಮಿನಿ ಝೂಂಡ್‌ನ ಖನ್ನೆ ಬುಲೈನ್ ಇವ್ಣುನ, ಕಾನ್‌ ದೀನ್, “ಖ್ಹಮ್‌ಜೊ಼, ಅಜು಼ ಮಾಲುಮ್‌ ಕರಿಲೆವೊ!
MAT 15:11 ಬಾಕನ ಮಹಿಜಾ಼ಸ್ತೆ ಯೋ ಅದ್ಮಿನ ಮೈಲುಕರಾಕೊಯ್ನಿ, ಮ್ಹೋಡಾನ ಮಹಿಥು ಭಾರ್ ನಿಕ್ಳಾಸ್ತೆ ಯೋಸ್‌ ಅದ್ಮಿನ ಮೈಲುಬಣಾವಸ್‌” ಕರಿ ಬೋಲ್ಯೊ.
MAT 15:12 ತದೆ ಶಿಷ್ಯರ್‌ ಯೇಸುಕನ ಆಯಿನ್, “ತುನೆ ಬೋಲ್ಯೋತೆ ವಾತೇನ ಖ್ಹಮ್‌ಜಿನ್‌, ಫರಿಸಾಯರ್‌ವಾಳು ಇರಾದೊ ಕರ‍್ಯುತೆ ತುನ ಮಾಲುಮ್‌ಪಡ್ಯು ಕಿಶು?” ಕರಿ ಬೋಲ್ಯೊ.
MAT 15:13 ಯೇಸುನೆ, “ಪರಲೋಕ್‍ಮ ಛಾ಼ತೆ ಮಾರೊ ಬಾ ಗಾಡ್ಯೊಕೊಂತೆ ಝಾ಼ಡಖ್ಹಾರನ ಜ಼ಡ್‌ ಖ್ಹಮೇಥು ಉಖ್ಡಿ ನಾಕ್‌ಶೆ” ಕರಿ ಜವಾಬ್‌ ದಿದೊ.
MAT 15:14 “ಇವ್ಣಿ ಬಾರೇಮ ಫಿಕರ್ ನಕೊ ಕರೊ! ಇವ್ಣೆ ಕಾಣು ಹುಯಿರ‍್ಹುಸ್‍, ಬಿಜಾ಼ನ ವಾಟ್‌ ವತಾಳನ ಜಾ಼ಸ್‌, ಕಾಣೊ ಕಾಣಾನ ವಾಟ್‌ ವತಾಳ್ಯೊತೊ ಇವ್ಣೆ ಭೇ ಜ಼ಣು ಖಾಡ್‌ಮ ಪಡಾಸ್‌” ಕರಿ ಬೋಲ್ಯೊ.
MAT 15:15 ತದೆ ಪೇತ್ರನೆ, “ಆ ಮತ್ಲಬ್‌ನಿ ಖೇಣಿನ ಹಮೂನ ಬೋಲಿವತಾಳ್” ಕರಿ ಬೋಲ್ಯೊ.
MAT 15:16 ಯೇಸುನೆ ಇವ್ಣುನ, ಬಿಜಾ಼ನಿ ಘೋಣಿ ತುಮೂನಾಬಿ ಬುದ್ಧಿ ಕೊಯ್ನಿಕಿ ಶು?
MAT 15:17 ಮ್ಹೋಡಾಮ ಜಾ಼ಸ್ತೆ ಖ್ಹಾರುಸ್‌, ಪೇಟ್‌ಮ ಜೈ಼ನ್‌, ಇನಕೇಡೆಥು ಭಾರ್‌ಮ ನಿಕ್ಳಿಜಾ಼ಸ್ ಕರಿ ಬೋಲಾನು ತುಮೂನ ಮಾಲುಮ್‌ ಕೋ ಪಡ್ಯುನಿಕಿ ಶು?
MAT 15:18 ಕತೋಬಿ ಮ್ಹೋಡಾಮಾಥು ನಿಕ್ಳಾಸ್ತೆ ವಾತೆ ಇನ ದಿಲ್‌ಮಾಥು ಆವಸ್, ಆಸ್ ಅದ್ಮಿನ ಅಶುದ್ಧ ಬಣಾವಸ್ತೆ.
MAT 15:19 ಕಿಮ್‌ಕತೊ, ದಿಲ್‌ಮಾಥು ಖರಾಬ್‌ಸೋಚ಼್‌, ಖೂನ್‌ಕರಾನು, ವ್ಯಬಿಚಾರ್‌, ಅಜು಼ ಪಾಪೇಲುಕಾಮ್‍, ಚೋ಼ರಿಕರಾನು, ಅಜು಼ ಗಾಳೆಅಖ್ಖು ಭಾರ್‌ ನಿಕ್ಳಾಸ್‌.
MAT 15:20 ಅಮ್ನುಸ್‌ಖ್ಹಾರು ಅದ್ಮಿನ ಮೈಲುಬಣಾವಾಸ್ತೆ. ಕತೋಬಿ ಇವ್ಣೆ ಬೋಲಾತೆ ಇಮ್‌ ಹಾತ್‌ ಧೊವಾಕೊಂತೆ ಖಾಣು ಖವಾನು ಅದ್ಮಿನ ಅಶುದ್ಧ ಕೋಬಣಾವಾನಿ” ಕರಿ ಬೋಲ್ಯೊ.
MAT 15:21 ಯೇಸು ಯೋ ಝ಼ಗೋನ ಮ್ಹೆಂದಿನ್, ತೂರ್ ಅಜು಼ ಸೀದೋನ್ ಖ್ಹಯೇರ‍್ನ ಖನ್ನೇನು ತಬರ್‌ಖಾನ ಚ಼ಲೆಗಯೊ.
MAT 15:22 ಯೋ ಮುಲಕ್‌ಮ ರ‍್ಹೇತಿಥೀತೆ ಕಾನಾನ್‌ವಾಳಿ ಏಕ್‌ ತಯೇಡ ಇನಾಕನ ಆಯಿನ್, “ದಾವೀದ್‌ನ ಛಿಯ್ಯಾ! ಪ್ರಭು, ಮಾರಪರ್ ಗೋರ್‌ ಕರ್‌! ಮಾರಿ ಛೋ಼ರಿಮ ಭೂತ್ ಛಾ಼ ಅಜು಼ ಘಣಿ ಖರಾಬ್ ಹಾಲ್‌ಮ ಯೋ ಛಾ಼” ಕರಿ ಚಿಕ್ರಿನ್ ಬೋಲಿ.
MAT 15:23 ಕತೋಬಿ ಯೇಸುನೆ ಇನ ಶನೀಶ್ ಜವಾಬ್‌ ಕೋ ದಿದೋನಿ, ತದೆ ಇನ ಶಿಷ್ಯರ್‌ನೆ ಯೇಸುಕನ ಆಯಿನ್, “ಯೋ ತಯೇಡಾನ ಮೋಕ್ಲಿದೆ! ಯೋ ಚಿಕರ್ತಿ ಹುಯಿನ್ ಅಪ್ಣ ಪೀಠೇಸ್ ವಳಿಆವಸ್‌!” ಕರಿ ಗಿಂಗಾಯು.
MAT 15:24 ತದೆ ಯೇಸುನೆ ಫರೈನ್ ಬೋಲ್ಯೋಕಿ, “ಗುಮೈಗಯೂತೆ ಮೇಂಢವ್‌ನಿ ಘೋಣಿ ಛಾ಼ತೆ ಇಸ್ರಾಯೇಲ್‌ನು ಅದ್ಮಿನ ಮ್ಹೆಂದಿನ್ ಬಿಜ಼ ಕಿನಾಕನಾಬಿ ದೇವ್ನೆ ಮನ ಮೋಕ್‌ಲ್ಯೊಕೊಯ್ನಿ” ಕರಿ ಬೋಲ್ಯೊ.
MAT 15:25 ತದೆ ಯೋ ತಯೇಡ ಯೋಸ್‌ ಆಯಿನ್, ಇನ ಆಡ್‍ಪಡಿನ್, ಪ್ರಭು ಮನ ಮದತ್‌ಕರ್‌!” ಕರಿ ಗಿಂಗೈ.
MAT 15:26 ಯೇಸುನೆ ಇನ, “ಲಡ್ಕಾ ಖಾವಾನು ರೋಟಾವ್ನ ಪಾಡೀನ್, ಕುತ್‌ರ‍್ಯಾವ್‍ನ ನಾಖಾನು ಬರೋಬರ್‌ಕೊಯ್ನಿ” ಕರಿ ಜವಾಬ್‌ ದಿದೊ.
MAT 15:27 ಯೋ ತಯೇಡಾನೆ, “ಯೋ ವಾತೆ ಖ್ಹಾಚಾಸ್‌ಲಾ ಪ್ರಭು, ಕುತ್‌ರ‍್ಯು ಖ್ಹಾರು ಇವ್ಣೊ ಯಜಮಾನ್ನು ಮೇಜ್‌ಪರ್‌ಥು ಹೇಟ್ ಪಡಾಸ್ತೆ ರೋಟಾನು ಟುಕ್ಡಾವ್‍ನ ಖಾಸ್ನಿ” ಕರಿ ಬೋಲಿ.
MAT 15:28 ತದೆ ಯೇಸುನೆ ಇನ, “ಬಾಯಿ, ತಾರಿ ವಿಶ್ವಾಸ್ ಘಣಿ ಮೋಟಿ! ತಾರ ಮನ್‌ಮ ಛಾ಼ತೆ ಇಮ್ಮಸ್ ತುನ ಹುವಾದೆ” ಕರಿ ಜವಾಬ್‌ ದಿದೊ. ಯೋಸ್ ವಖ್ಹತ್‌ಮ ಇನಿ ಛೋ಼ರಿನ ಅಛ಼್ಛುಹುಯು.
MAT 15:29 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಗಲಿಲಾಯ ದರ‍್ಯಾವ್‌ಕನ ಆಯಿನ್, ಪಹಾಡ್‌ಪರ್ ಚ಼ಢೀನ್ ಬೇಶಿಗಯೊ.
MAT 15:30 ತದೆ ಅದ್ಮಿಖ್ಹಾರು ಝೂ಼ಂಡ್‌-ಝೂ಼ಂಡ್‌ ಹುಯಿನ್, ಇನಾಕನ ಆಯು, ಇವ್ಣೆ ಲಂಗ್ಡು, ಕಾಣು, ಮುಕ್ಕು, ಹಾತ್‌-ಗೋಡಕೊಂತೆ ಅಜು಼ ಕೈಯೆಕ್ಕಿ ಬಿಜಿ ತರ‍್ಹಾನು ರೋಗ್‌-ರಾಯಮ ರ‍್ಹವಾಳ ಅದ್ಮಿನ ಯೇಸುನ ಗೋಡಾಕನ ಲಯಿನ್ ಮ್ಹೇಲ್ಯು. ಯೇಸುನೆ ಇವ್ಣುನ ಅಛ್ಛು಼ ಕರ‍್ಯೊ.
MAT 15:31 ಮುಕ್ಕುರ‍್ಹಾವಾಳು ವಾತೆ ಬೋಲ್ಯೂತೆ, ಹಾತ್‌ಗೋಡಾಕೊಂತೆ ಅದ್ಮಿಖ್ಹಾರು ಅಛ್ಛು಼ ಹುಯೂತೆ, ಲಂಗ್ಡುಖ್ಹಾರು ಚಾ಼ಲ್ಯುತೆ, ಕಾಣಾವ್ನ ಡೋಳಾ ಆಯೂತೆ, ಅದ್ಮಿಖ್ಹಾರು ದೇಖಿನ್‌ ಆಶ್ಚರ್ಯಖಾದು ಅಜು಼ ಇಸ್ರಾಯೇಲ್‌ನೊ ದೇವ್ನ ಸ್ತುತಿ ಕರ‍್ಯು.
MAT 15:32 ಯೇಸುನೆ ಇನ ಶಿಷ್ಯರ್‌ನ ಖನ್ನೆ ಬುಲೈನ್, ಇವ್ಣುನ, “ಆ ಖ್ಹಾರ ಅದ್ಮಿನ ದೇಖಿನ್‌, ಮನ ಗೋರ್‌ಲಾಗಸ್‌, ಅವ್ಣೆ ಮಾರಕನ ಆಯಿನ್, ತೀನ್ ದನ್ ಹುಯಿಗಾ; ಇವ್ಣುನ ಖಾಣನ ಶಾತ್ಬಿ ಕೊಯ್ನಿ; ಅವ್ಣುನ ಭುಕ್ಯುಸ್‌ ಮೋಕ್ಲಾನ ಮನ ಮನ್‌ಕೊಯ್ನಿ; ಜಾ಼ವಾನಿ ವಖ್ಹತ್‌ಮ ಅವ್ಣೆ ಥಕಿಜಾ಼ಶೆ” ಕರಿ ಬೋಲ್ಯೊ.
MAT 15:33 ಶಿಷ್ಯರ್‌ನೆ ಯೇಸುನ, “ಅತ್ರಾಅದ್ಮಿನ ಬಶ್‌ ಹುವ್ವಾಎತ್ರು ಖಾಣು ಆ ಉಜ್ಜಾ಼ಡಿ ಝ಼ಗೋಮ ಹಮೂನ ಕಿಜ್ಗಾ಼ಥು ಮಳ್‌ಶೆ?” ಕರಿ ಬೋಲ್ಯ.
MAT 15:34 ಯೇಸುನೆ, “ತುಮಾರಕನ ಕೆತ್ರ ರೋಟಾ ಛಾ಼?” ಕರಿ ಪುಛಾ಼ಯೊ. ಶಿಷ್ಯರ್‌ನೆ, “ಹಮಾರಕನ ಖ್ಹಾತ್ ರೋಟಾ ಅಜು಼ ಥೋಡು ನ್ಹಾನಿಮಾಛ್ಲಿಯೆ ಛಾ಼” ಕರಿ ಬೋಲ್ಯು.
MAT 15:35 ತದೆ ಯೇಸುನೆ ಅದ್ಮಿನಿ ಝೂ಼ಂಡ್‌ನ ಜ಼ಮೀನ್‌ಪರ್ ಬೇಖ್ಹೊ ಕರಿ ಹುಕುಮ್‌ದಿದೊ.
MAT 15:36 ಯೋ ಖ್ಹಾತ್ ರೋಟಾ ಅಜು಼ ಯೋ ಮಾಛ಼್‌ಲಾವ್ನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಶಿಷ್ಯರ್‌ನ ಹಾತ್‌ಮ ದಿದೊ. ಶಿಷ್ಯರ್‌ನೆ ಅದ್ಮಿನಿ ಝೂ಼ಂಡ್‌ನ ವಾಟಪಾಡಿ ದಿದಾ.
MAT 15:37 ಅದ್ಮಿಖ್ಹಾರು ಖೈನ್, ಹಕ್ಲಾಲ್‌ಹುಯು. ಉಭ್‌ರ‍್ಯುತೆ ಟುಕ್ಡಾವ್‌ನ ಜ಼ಮಾಕರ್ತಖ್ಹತರ್ ಖ್ಹಾತ್ ಟೋಕ್ರಾ ಭರಾಯು.
MAT 15:38 ಖಾಣು ಖಾದೂತೆ ಇವ್ಣಾಮ ತಯೇಡ ಅಜು಼ ಲಡ್ಕಾವ್‍ನ ಮ್ಹೆಂದಿನ್, ಪರ್ಖ್ಹಾ ಅದ್ಮಿಸ್‌ ಚಾರ್ ಹಜಾ಼ರ್‌ ಜ಼ಣು ಥೂ.
MAT 15:39 ಅನಕೇಡೆಥು ಯೇಸುನೆ ಯೋ ಅದ್ಮಿನಿ ಝೂ಼ಂಡ್‌ನ ಮೋಕ್ಲಿದೀನ್, ಡೋಣ್‌ಪರ್‌ ಚ಼ಢೀನ್, ಮಗದಾನ್ ತಬರ್‌ಖಾನ ಗಯೊ.
MAT 16:1 ಫರಿಸಾಯರ್ ಅಜು಼ ಸದ್ದುಕಾಯವಾಳು ಯೇಸುನ ಖ್ಹಪ್‌ಡಾವ್ಣು ಕರಿ ಇನಾಕನ ಐನ್, ತೂ ಆಬ್‍ಥೊ ಆಯೊಹುಯೊ ಕರಿ ವತಾಳನಖ್ಹಾಜೆ ಹಮೂನ ಏಕ್‌ ಅದ್ಭುತ್ ಕರಿನ್ ವತಾಳ್ ಕರಿ ಬೋಲ್ಯು.
MAT 16:2 ತದೆ ಯೇಸುನೆ ಇವ್ಣುನ, “ಖ್ಹಾಂಜ಼್‌ನಿ ವಖ್ಹತ್‌ಮ ತುಮೆ ಆಬ್‍ ಲಾಲ್‍ಹುಯಿರ‍್ಹೋತೊ, ‘ಅಪ್ಣುನ ಅಛ್ಛು಼ ಮೋಸಮ್ ರ‍್ಹಿಶೆ’ ಕರಿ ಬೋಲೋಸ್.
MAT 16:3 ವ್ಹಾಣಾನು ಆಬ್‍ ವಾದ್‍ಳೇಥಿ ಢಪೈನ್ ಕಾಳೊ ಅಜು಼ ಲಾಲ್ ಹುಯಿರ‍್ಹೋತೊ, ‘ಆಜ಼್ ಪಾಣಿ ವರಖ್ಹ್‌ಶೆ’ ಕರಿ ಬೋಲೋಸ್ ಕಾಹೆಕಿ ಶು? ದನ್ನಿ ಹಾಲ್-ಚಾ಼ಲ್ ದೇಖಿನ್, ಆ ಅಮ್, ಯೋ ಇಮ್‌ ಕರಿ ಖ್ಹಣೇದ್ ಕರಾನ ತುಮೂನ ಮಾಲುಮ್; ಕತೋಬಿ ಆ ವಖ್ಹತ್‌ನಿ ಖ್ಹಣೇದ್‍ನಿ ಮತ್‌ಲಬ್ ತುಮೂನ ಮಾಲುಮ್ ಕೊಯ್ನಿಕಿಶು?
MAT 16:4 ಖರಾಬ್ ಅಜು಼ ಪಾಪಿ ಹುಯಿರ‍್ಹೂತೆ ಆ ಪಿಳ್ಗೀನು ಅದ್ಮಿ ಏಕ್‌ ಅದ್ಭುತಾನ ದೇಕ್ಣು ಕರಿ ಆಖ್ಹ್ ಕರಾಸ್! ಯೋನನ ಚಾ಼ಲ್ಯುತೆ ಅದ್ಭುತ್ ಕಾಮಸ್ ಪಣ್ಕಿ ಬಿಜು಼ ಕೆಹೂಬಿ ಇವ್ಣುನ ಮಳ್‌ಶೆ ಕೊಯ್ನಿ!” ಕರಿ ಜವಾಬ್‌ ದೀನ್, ಇವ್ಣುನ ಮ್ಹೆಂದಿನ್ ಚ಼ಲೆಗಯೊ.
MAT 16:5 ಯೇಸು ಅಜು಼ ಇನ ಶಿಷ್ಯರ್‌ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಗಯ, ತದೆ ಶಿಷ್ಯರ್‌ನೆ ರೋಟ ಪಳ್ಳಿಜಾ಼ವಾನು ಭೈಕಿಗಯಾಥಾ.
MAT 16:6 ಯೇಸುನೆ ಇವ್ಣುನ, “ಜ಼ತನ್ ರ‍್ಹವೊ! ಫರಿಸಾಯರ್ ಅಜು಼ ಸದ್ದುಕಾಯವಾಳನು ಶೋಡ ನಾಖ್ಯುಹುಯು ಆಟಾನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಬೋಲ್ಯೊ.
MAT 16:7 ತದೆ ಇವ್ಣೆ, “ಅಪ್ಣೆ ರೋಟಾ ಲಾಯಕೊಂತೆ ಇನಖ್ಹಾಜೆ ಅಮ್ ಬೋಲ್ಯೊಕಿ ಶುಕಿ” ಕರಿ ಇವ್ಣ-ಇವ್ಣಾಮ ಬೋಲಿಲಿದು.
MAT 16:8 ಯೇಸುನೆ ಇವ್ಣೆ ಬೋಲಿಲೆವ್‍ಕರಾತೆ ಮಾಲುಮ್‌ಕರಿನ್, ಇವ್ಣುನ, “ಕಮ್‍ವಿಶ್ವಾಸ್‍ವಾಳ! ರೋಟಾ ಕೊಯ್ನಿ ಕರಿ ಬೋಲಾನಿ ಬಾರೇಮ ಶನ ವಾತೆ ಬೋಲಿಲೆವ್‍ಕರಾಸ್ತೆ?
MAT 16:9 ತುಮೂನ ಬಿಜೂ಼ಬಿ ಮಾಲುಮ್ ಕರ‍್ಯಾಕೊಯ್ನಿಕಿ ಶು? ತುಮೂನ ಯಾದ್ ಕೊಯ್ನಿಕಿ ಶು? ಯೋ ಪಾಚ಼್ ರೋಟಾನ ಪಾಚ಼್ ಹಜಾ಼ರ್‌ ಅದ್ಮಿನ ಖಡಾವಾನ ಬಾದ್‌ಮ ಕೆತ್ರ ಟೋಕ್ರಾ ತುಮೆ ಭರ‍್ಯಾಥ?
MAT 16:10 ಎತ್ರೇಸ್ ಕಾಹೆತೆ ಯೋ ಖ್ಹಾತ್ ರೋಟಾನ ಚಾರ್ ಹಜಾ಼ರ್ ಅದ್ಮಿನ ಖಡಾವಾನ ಬಾದ್‌ಮ ತುಮೆ ಕೆತ್ರ ಟೋಕ್ರಾ ಭರ‍್ಯಾಥ?
MAT 16:11 ಮೇ ರೋಟಾನಿ ಬಾರೇಮ ವಾತೆ ಬೋಲ್ಯೋತೆ ಕಾಹೆ ಕರಿ ತುಮೂನ ಮಾಲುಮ್ ಪಡ್ಯುಕೊಯ್ನಿತೆ ಕಿಮ್? ಜ಼ತನ್! ಫರಿಸಾಯರ್ ಅಜು಼ ಸದ್ದುಕಾಯವಾಳನು ಶೋಡಾ ಪಡ್ಯುಹುಯು ಆಟಾನಿ ಬಾರೇಮ ಹೊಷಾರ್‌ಥಿ ರ‍್ಹವೊ” ಕರಿ ಬೋಲ್ಯೊ.
MAT 16:12 ತದೆ ಇನ ಶಿಷ್ಯರ್‌ನೆ ರೋಟಾಮ ನಾಖಾತೆ ಶೋಡಾನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಕಾಹೆ ಯೇಸುನೆ ಅಪ್ಣುನ ಬೋಲ್ಯೊತೆ, ಫರಿಸಾಯರ್ ಅಜು಼ ಸದ್ದುಕಾಯವಾಳು ಬೋಲಿ ಶಿಕಾಡಸ್ತೆ ಇನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಇನೆ ಬೋಲ್ಯೊತೆ ಕರಿ ಇವ್ಣೆ ಮಾಲುಮ್ ಕರಿಲಿದು.
MAT 16:13 ಯೇಸು ಫಿಲಿಪ್ಪನು ಕೈಸರೆಯ ಕರಿ ಖ್ಹಯೇರ‍್ನು ಇಟಾರಮ್ಮ ಗಯೊ. ಹಿಜ್ಜಾ಼ ಇನ ಶಿಷ್ಯರ್‌ನ, “ಅದ್ಮಿನೊ ಛಿಯ್ಯೊ ಹುಯಿರ‍್ಹೋತೆ ಮನ ಅದ್ಮಿಖ್ಹಾರು ಕೋಣ್ ಕರಿ ಬೋಲಾಸ್?” ಕರಿ ಪುಛಾ಼ಯೊ.
MAT 16:14 ಇವ್ಣೆ ಇನ, “ಥೋಡು ಜ಼ಣು ತುನ, ‘ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ’ ಕರಿ ಬೋಲಾಸ್, ಬಿಜು಼ ಥೋಡು ಜ಼ಣು, ‘ಎಲೀಯ’ ಕರಿ ಬೋಲಾಸ್, ಅಜು಼ ಥೋಡು ಜ಼ಣು, ಯೆರೆಮೀಯ ನತರ್‌ಕಿ ಪ್ರವಾದೀಮ ಏಕ್‌ ಜ಼ಣೊ’ ಕರಿ ಬೋಲಾಸ್” ಕರಿ ಜವಾಬ್‌ ದಿದಾ.
MAT 16:15 ಯೇಸುನೆ ಇವ್ಣುನ, “ತುಮೆ ಮನ ಕೋಣ್ ಕರಿ ಬೋಲೋಸ್?” ಕರಿ ಪುಛಾ಼ಯೊ.
MAT 16:16 ತದೆ ಸೀಮೋನ ಪೇತ್ರನೆ, “ತೂ ಆವ್ಣುತೆ ಕ್ರಿಸ್ತ, ಜಿವ್ತೊ ದೇವ್‌ನೊ ಛಿಯ್ಯೊ” ಕರಿ ಜ಼ವಾಬ್ ದಿದೊ.
MAT 16:17 ಯೇಸುನೆ, “ಯೋನಾನೊ ಛಿಯ್ಯೊ ಸೀಮೋನ, ತೂ ಧನ್ಯ ಹುಯಿರ‍್ಹೋಸ್! ಆ ಖ್ಹಾಚ಼ನ ತುನ ಮಾಲುಮ್ ಕರಾಯೂತೆ ಅದ್ಮಿನೆ ಕಾಹೆ, ಪಣ್ಕಿ ಸೊರ್ಗಾಮ ಛಾ಼ತೆ ಮಾರ ಬಾನೇಸ್ ಆ ಖ್ಹೂಜ಼್‌ ಕರಾಯೋತೆ ಕರಿ ಬೋಲ್ಯೊ.
MAT 16:18 ಅಜು಼ ಮೇ ತುನ ಶಾತ್ ಬೋಲಸ್‍ಕತೊ, ಪೇತ್ರ, ತೂ ಬಂಡೊ, ಅಜು಼ ಆ ಬಂಡಾಪರ್ ಮೇ ಮಾರಿ ಸಬೆನ ಭಾಂದೀಶ್, ಪಾತಾಳ್ನಿ ಶಕತ್‌ಬಿ ಇನ ಕದೇಬಿ ಹರಾವನ ಕೋ ಉಶೇನಿ.
MAT 16:19 ಸೊರ್ಗಾನು ರಾಜ್ಯನು ಬೀಗಾನ ಖ್ಹಾರು ಮೇ ತುನ ದಿಶ್; ಧರ್ತಿಪರ್ ತೂ ಶಾತ್ ಭಾಂದೀಶ್‌ಕಿ, ಯೋ ಸೊರ್ಗಾಮಾಬಿ ಭಂದಾವ್‌ಶೆ, ಅಜು಼ ಧರ್ತಿಪರ್ ತೂ ಶಾತ್ ಛೋ಼ಡಿಶ್‌ಕಿ, ಯೋ ಸೊರ್ಗಾಮಾಬಿ ಛೋ಼ಡಾವ್‌ಶೆ” ಕರಿ ಬೋಲ್ಯೊ.
MAT 16:20 ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಮೇಸ್ ಕ್ರಿಸ್ತ ಹುಯಿರ‍್ಹೋಸ್ ಕರಿ ಕಿನಾಬಿ ನಾ ಬೋಲ್‌ನು” ಕರಿ ಝೇತೈನ್‌ ಬೋಲ್ಯೊ.
MAT 16:21 ತಪ್‌ಥೊ ಯೇಸು, “ಮೇ ಯೆರೂಸಲೇಮ್‌ನ ಜೈ಼ನ್‌, ಹಿಜ್ಜಾ಼ ಶಾಣಾವ್‍ಥೀಬಿ, ಗಲ್‌ಢಯಾಜಕರ್‌ಥಿ, ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇಥಿ ಘಣು ಲತಾಡ ಖ್ಹಮಾಳ್‌ಣು ಅಜು಼ ಇವ್ಣೆ ಇನ ಮರ್‌ನಾಕ್‌ಶೆ; ಕತೋಬಿ ತೀನ್ ದನ್‌ಕೇಡೆ ಮೇ ಪಾಛೊ಼ ಜಿವ್ತೊಹುಯಿನ್, ಉಠೀನ್ ಆಯಿಶ್” ಕರಿ ಶಿಷ್ಯರ್‌ನ ಬೋಲಾನ ಶುರು ಕರ‍್ಯೊ.
MAT 16:22 ತದೆ ಪೇತ್ರನೆ ಯೇಸುನ, ಏಕಾಡಿ ಬುಲೈಲಿಜೈ಼ನ್, ಪ್ರಭು, ದೇವ್ ತೂ ಇಮ್ ನಕೋಸ್ ಬೋಲ್! ತುನ ಇಮ್‌ ನಾಸ್ ಹೋಣು!” ಕರಿ ಬೋಲಿನ್, ಇನ ಜಿದ್‌ಕರ‍್ಯೊ.
MAT 16:23 ತದೆ ಯೇಸುನೆ ಫರೀನ್, ಪೇತ್ರನ, “ಏ ಶೈತಾನ್, ಮಾರ ಖ್ಹಾಮ್ಣೇಥೊ ಹಟಿಜಾ಼! ತೂ ಮಾರ ಕಾಮ್ನ ಅಡ್ಡಿ ಹುಯಿರ‍್ಹೋಸ್! ತಾರಿ ಆ ಸೋಚ್ ಅದ್ಮಿನಿ ಸೋಚಸ್‌ ಪಣ್ಕಿ ದೇವ್ನಿ ಸೋಚ಼್ ಕಾಹೆ” ಕರಿ ಬೋಲ್ಯೊ.
MAT 16:24 ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಕಿನಾತೋಬಿ ಮಾರ ಪೀಠೆ ಆವ್ಣುಕರಿ ಮನ್ ಉಶೇತೊ, ಯೋ ಖ್ಹುದ್‌ನ ಭೈಕಿಜೈ಼ನ್, ಇನಿ ಶಿಲ್‌ಬೇನ ಪಾಡಿಲೀನ್, ಮಾರ ಪೀಠೆ ಆವಾದೆ.
MAT 16:25 ಇನೊ ಜಾನ್ನ ಬಚಾ಼ಡಿಲೇವ್ಣು ಕರಿ ಕರಾವಾಳು ಇನ ಗುಮೈಲಿಶೆ; ಕತೋಬಿ ಮಾರಖ್ಹಾಜೆ ಇನ ಜಾನ್ನ ಗುಮೈಲ್ಯಾವಾಳು ಇನ ಬಚಾ಼ಡಿಲಿಶೆ.
MAT 16:26 ಏಕ್‌ ಅದ್ಮಿ ಹಿಡಿ ಜಗತ್‍ನಾಸ್ ಕಮೈಲೀನ್, ಇನ ಜಾನ್ನ ಲುಕ್‌ಶಾನ್ ಕರಿಲಿದುತೋ, ಇನ ಶನಿ ಫಾಯಿದೊ? ಶನೀಸ್ ಫಾಯಿದೊ ಕೊಯ್ನಿ! ಯೋ ಅದ್ಮಿ ಬಿಜು಼ ಶಾತ್ಬಿ ದೀನ್ ಇನ ಜಾನ್ನ ಪಾಛು಼ ಬಚಾ಼ಡಿಲ್ಯವಾನ ಕೋ ಹುವಾನಿ!
MAT 16:27 ಅದ್ಮಿನೊ ಛಿಯ್ಯೊ ಇನ ಬಾನಿ ಮಹಿಮೆಥಿ ಅಜು಼ ಇನ ದೂತರ್‌ನ ಜೋ಼ಡೆ ಆವ್‌ಶೆ; ಯೋ ವಖ್ಹತ್‌ಮ ಏಕೇಕ್‌ನ ಇವ್ಣಿ ಚಾ಼ಲ್‌ನಿಘೋಣಿ ಇನಾಮ್ ದಿಶೆ.
MAT 16:28 ಮೇ ತುಮೂನ ಖ್ಹಾಚಾಮ ಬೋಲುಸ್ಕಿ, ಹಜ್ಜಾ಼ ಭಿಯುತೆ ಇವ್ಣಾಮ ಥೋಡು ಜ಼ಣು ಅದ್ಮಿನೊ ಛಿಯ್ಯೊ ಇನ ರಾಜ್ಯಮ ಆವ್‌ಶೇತೆ ದೇಖಲಗೂಬಿ ಮರ್‌ಶೆಸ್ ಕೊಯ್ನಿ” ಕರಿ ಬೋಲ್ಯೊ.
MAT 17:1 ಛೊ಼ ದನ್ನ ಬಾದ್‌ಮ ಯೇಸುನೆ ಪೇತ್ರ, ಯಾಕೋಬ ಅಜು಼ ಇನೊ ಭೈ ಯೋಹಾನ್ನ ಬುಲೈಲಿನ್, ಏಕ್‌ ಊಚಾ಼ ಪಹಡ್‌ಪರ್ ಗಯೊ. ಹಿಜ್ಜಾ಼ ಇವ್ಣುನ ಮ್ಹೆಂದಿನ್ ಕೋಣ್‌ಬಿ ಕೋ ಥೂನಿ.
MAT 17:2 ಹಿಜ್ಜಾ಼ ಇವ್ಣ ಡೋಳಾನ ಖ್ಹಾಮ್ಣೇಸ್, ಯೇಸುನು ರೂಪ್ ಬದ್ಲಿಗಯು: ಇನು ಮ್ಹೋಡು ಚಾ಼ಂದ್‍ನಿಘೋಣಿ ಝ಼ಮ್‌ಕಾಲಗ್ಯು ಅಜು಼ ಇನ ಲುಂಗ್ಡ ಉಜಾ಼ಳಾನಿಘೋಣಿ ಧೋಳುಫಟ್ ಹುಯಿಗಯು.
MAT 17:3 ಎತ್ರೇಸ್ ಕಾಹೆತೆ ಮೋಶೇಬಿ, ಎಲೀಯ ಯೇಸುನ ಜೋ಼ಡೆ ವಾತೆ ಬೋಲುಕರಾತೆ ಯೋ ತೀನ್ ಶಿಷ್ಯರ್‌ನೆ ದೇಖ್ಯ.
MAT 17:4 ತದೆ ಪೇತ್ರನೆ ಯೇಸುನ, “ಪ್ರಭು, ಹಮೆ ಹಜ಼್ಜಸ್ ರ‍್ಹವಾನು ಕೆತ್ರೇಕ್ಕಿ ಅಛ್ಛು಼ ಹುಯಿರ‍್ಹೂಸ್! ತೂ ಬೋಲ್ತೊ ಉಶೇತೊ, ಮೇ ಹಜ್ಜಾ಼ ತೀನ್ ಡೇರಾ ಠೋಕೆಸ್, ಏಕ್‌ ತುನ, ಏಕ್‌ ಮೋಶೇನ ಅಜು಼ ಏಕ್‌ ಎಲೀಯನ” ಕರಿ ಬೋಲ್ಯೊ.
MAT 17:5 ಯೋ ಅಮ್ ಬೋಲುಕರಾನಿ ವಖ್ಹತ್‌ಮಾಸ್‌, ಏಕ್‌ ಉಜಾ಼ಖ್ಹ್‌ನು ವಾದ್‌ಳು ಐನ್, ಇವ್ಣಾಪರ್ ಢಪಾಯು, ಅಜು಼ ಯೋ ವಾದ್ಳಾನ ಮಹಿಥು, “ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನೇಥಿ ಮೇ ಘಣು ಖ್ಹುಶಿ ಛೂ಼!” ಕರಿ ಏಕ್‌ ಅವಾಜ಼್ ಆಯೊ.
MAT 17:6 ಶಿಷ್ಯರ್‌ನೆ ಆ ಅವಾಜ಼್‌ನ ಖ್ಹಮ್‌ಜಿನ್‌, ಡರ್‌ಥಿ ಮ್ಹೋಡು ಹೇಟ್ ಕರೀನ್, ಜ಼ಮೀನ್‌ಪರ್ ಊಂಧಾ ಪಡಿಗಯ.
MAT 17:7 ತದೆ ಯೇಸು ಇವ್ಣಾಕನ ಐನ್, ಇವ್ಣುನ ಛೀಮಿನ್‌, “ಉಪ್ಪರ್ ಉಠೊ, ಡರೊ ನಕೊ!” ಕರಿ ಬೋಲ್ಯೊ.
MAT 17:8 ತದೆ ಇವ್ಣೆ ಡೋಳಾ ಪಾಡಿನ್ ದೇಖ್ಯ, ತದೆ ಯೇಸು ಎಕ್ಕಸ್ ಜ಼ಣೊ ಥೊ, ಬಿಜು಼ ಕೋಣ್‌ಬಿ ಕೋ ಥೂನಿ.
MAT 17:9 ಇವ್ಣೆ ಯೋ ಪಹಡ್‌ಪರ್‌ಥು ಉತ್ರಿನ್ ಆವಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, “ತುಮೆ ಹಮ್ಕೆ ದೇಖ್ಯಾತೆ ಇನ ಅದ್ಮಿನೊ ಛಿಯ್ಯೊ ಮರಿನ್‌, ಪಾಛೊ಼ ಜಿವ್ತೊ ಹುಯಿನ್, ಉಠಿ ಆವಾತೋಡಿ, ಕಿನಾಬಿ ನಾ ಬೋಲ್‌ನು” ಕರಿ ಹುಕುಮ್‌ದಿದೊ.
MAT 17:10 ತದೆ ಶಿಷ್ಯರ್‌ನೆ ಯೇಸುನ, “ಕ್ರಿಸ್ತ ಆವಾನಿ ಅಗಾಡಿ ಎಲೀಯ ಆವ್ಣುಕರಿ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಬೋಲಾಸ್ತೆ ಶನ?” ಕರಿ ಪುಛಾ಼ಯ.
MAT 17:11 ಯೇಸುನೆ ಇವ್ಣುನ, “ಎಲೀಯ ಪಹಿಲೆ ಆವ್ಣುಕರಿ ಇವ್ಣೆ ಬೋಲಾಸ್ತೆ ಬರೊಬರಸ್, ಖ್ಹಾಚಮಾಬಿ ಎಲೀಯ ಆಯಿನ್, ಖ್ಹಾರುಸ್ ಖ್ಹವಾರ್‌ಶೆ.
MAT 17:12 ಕತೋಬಿ ಮೇ ತುಮೂನ ಶಾತ್‌ ಬೋಲುಸ್‌ಕತೊ, ಎಲೀಯ ಅಗಾಡಿಸ್ ಐನ್‌ಬಿ, ಚ಼ಲೆಗಯೊ. ಕತೋಬಿ ಅದ್ಮಿಖ್ಹಾರು ಇನಿ ಖ್ಹಣೇದ್ ಕೋ ಧರ‍್ಯುನಿ, ಅಜು಼ ಇವ್ಣ ಮನ್‌ಮ ಆವಾತೆ ಇಮ್‌ ಇನ ಕರ‍್ಯು. ಇನ ಕರ‍್ಯುತೆ ಇಮ್ಮಸ್ ಅದ್ಮಿನ ಛಿಯ್ಯಾನಾಬಿ ಇವ್ಣೇಥಿ ಖ್ಹತಾಪ್ಣಿ ಉಶೆ” ಕರಿ ಜ಼ವಾಬ್ ದಿದೊ.
MAT 17:13 ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನಿ ಬಾರೇಮ ಯೇಸು ವಾತೆ ಬೋಲುಕರಾಸ್ತೆ ಕರಿ ಶಿಷ್ಯರ್‌ನೆ ತದೆ ಮಾಲುಮ್‌ ಕರಿಲಿದ.
MAT 17:14 ಯೇಸು ಅಜು಼ ಇನ ಶಿಷ್ಯರ್‌ ಪಾಛು಼ ಫರೀನ್ ಅದ್ಮಿನಿ ಝೂ಼ಂಡ್‌‍ಕನ ಆವಾದಿನ್, ಏಕ್‌ ಜ಼ಣೊ ಯೇಸುಕನ ಐನ್, ಇನಖ್ಹಾಮ್ಣೆ ಗುಡ್‍ಘ್ಯ ಟೇಕಿನ್,
MAT 17:15 “ಪ್ರಭು, ಮಾರ ಛಿಯ್ಯಾನ ಗೋರ್‌ ಕರ್‌! ಇನ ಮಿರ್‌ಘಿ ಲಾಗಿರ‍್ಹೂಸ್, ಇನೇಥಿ ಯೋ ಘಣು ತರಪ್‌ಡುಕರಾಸ್. ಯೋ ತದೆ-ತದೆ ಆಗ್‌ಮಾಬಿ ಪಾಣಿಮಾಬಿ ಪಡ್‌ತೊರ‍್ಹೇಸ್.
MAT 17:16 ಮೇ ಇನ ತಾರ ಶಿಷ್ಯರ್‌ಕನ ಬುಲೈಲಿ ಆಯೊ, ಕತೋಬಿ ಇನ ಅಛ್ಛು಼ ಕರಾನ ಇವ್ಣ ಹಾತೆ ಕೋ ಹುಯೋನಿ” ಕರಿ ಬೋಲ್ಯೊ.
MAT 17:17 ಯೇಸುನೆ, “ಏ, ವಿಶ್ವಾಸ್‌ಕೊಂತೆ ಬುಧ್ಧು ಖಾಂದಾನ್‌ವಾಳ! ಬಿಜು಼ ಕೆತ್ರ ದನ್ ಮೇ ತುಮಾರ ಜೋ಼ಡೆ ರ‍್ಹೇಣು? ಬಿಜು಼ ಕೆತ್ರ ದನ್ ತುಮೂನ ಖ್ಹಮಾಳ್‌ಣು? ಯೋ ಛೋ಼ಕ್ರಾನ ಹಜ್ಜಾ಼ ಮಾರಕನ ಬುಲೈಲಿ ಆವೊ!” ಕರಿ ಬೋಲ್ಯೊ.
MAT 17:18 ಯೇಸುನೆ ಯೋ ಛೋ಼ಕ್ರಮ ಥೂತೆ ಭೂತ್‌ನ ಗುರ್‌ಕಾವಖ್ಹತರ್, ಯೋ ಭೂತ್ ಇನ ಮ್ಹೆಂದಿನ್ ನಿಕ್ಳಿಗಯು. ಯೋಸ್ ವಖ್ಹತ್‌ಮ ಇನ ಅಛ್ಛು಼ ಹುಯಿಗಯು.
MAT 17:19 ಅನಕೇಡೆಥು ಯೇಸು ಎಕ್ಲೋಸ್ ರ‍್ಹವಾನಿ ವಖ್ಹತ್‌ಮ, ಇನ ಶಿಷ್ಯರ್‌ ಇನಾಕನ ಆಯಿನ್, “ಯೋ ಭೂತ್‌ನ ಕಾಡಾನ ಹಮಾರೇಥಿ ಶನ ಕೋ ಹುಯೂನಿತೆ?” ಕರಿ ಪುಛಾ಼ಯ.
MAT 17:20 ತದೆ ಯೇಸುನೆ ಇವ್ಣುನ, “ತುಮಾರಿ ವಿಶ್ವಾಸ್ ಕಮ್ ಥೀತೆ ಇನಖ್ಹಾಜೇಸ್ ತುಮೂನ ಕೋ ಹುಯೂನಿ, ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ರಾಯಿನ ದಾಣ ಎವ್ಡಿ ವಿಶ್ವಾಸ್ ತುಮೂನ ರ‍್ಹಯೂತೊ,
MAT 17:21 ತುಮೆ ಆ ಪಹಡ್‌ಣ, ‘ಹಜ್ಜಾ಼ಥು ಹಿಜ್ಜಾ಼ ಜಾ಼!’ ಕರಿ ಬೋಲ್ಯಾತೋಬಿ ಯೋ ಜಾ಼ಶೆ. ತುಮಾರ ಹಾತೆ ಹುವ್ವಾಕೊಂತೆ ಕಾಮ್ ಏಕ್‌ಬಿ ಕೋ ರ‍್ಹಿಶೇನಿ” ಕರಿ ಬೋಲ್ಯೊ.
MAT 17:22 ಶಿಷ್ಯರ್‌ ಖ್ಹಾರು ಎಕ್ಕದಮ್‌ ಗಲಿಲಾಯಮ ಆವಾದಿನ್, ಯೇಸುನೆ ಇವ್ಣುನ, “ಅದ್ಮಿನ ಛಿಯ್ಯಾನ ಅದ್ಮಿಖ್ಹಾರಾನ ಹಾತ್‌ಮ ದೆವೈಜಾಶೆ.
MAT 17:23 ಇವ್ಣೆ ಇನ ಮಾರಿನಾಕ್‌ಶೆ! ಕತೋಬಿ ತೀನ್ ದನ್‌ಕೇಡೆ ಯೋ ಪಾಛೊ಼ ಜಿವ್ತೊ ಹುಯಿನ್, ಉಠಿ ಆವ್‌ಶೆ” ಕರಿ ಬೋಲ್ಯೊ. ಅನ ಖ್ಹಮ್‌ಜಿನ್‌, ಶಿಷ್ಯರ್‌ನ ಘಣು ದುಖ್ ಹುಯು.
MAT 17:24 ಯೇಸು ಅಜು಼ ಇನ ಶಿಷ್ಯರ್‌ ಕಪೆರ್ನೌಮ್ ಆವಾದಿನ್, ಮಂದಿರ್‌ನಖ್ಹಾಜೆ ಶುಂಕ ಮಾಂಗವಾಳು ಪೇತ್ರಕನ ಆಯಿನ್, “ತುಮಾರೊ ಗುರು ಮಂದಿರ್‌ನ ದೇವ್ಣುತೆ ಶುಂಕಾನ ಭಾಂದಾ ಕೊಯ್ನಿಕಿ ಶು?” ಕರಿ ಪುಛಾ಼ಯು.
MAT 17:25 ತದೆ ಪೇತ್ರನೆ, “ಒಹೊ, ಭಾಂದ್‌ಶೆ” ಕರಿ ಬೋಲ್ಯೊ. ಪೇತ್ರ ಘರ್‌ಮ ಆವಾದಿನ್, ಯೇಸುನೆ ಇನೇಥಿ ಪಹಿಲೇಸ್, “ಸೀಮೋನ, ತುನ ಕಿಮ್ ದೆಖಾವಸ್? ಆ ಧರ್ತಿಪರ್‌ಲ್ಯ ರಾಜ಼ಖ್ಹಾರು ಕಿನಾಕಂಥು ಶುಂಕ ಮಾಂಗಾಸ್? ಶೊಂತ್ ದೇಖ್ಹ್‌ನ ಅದ್ಮಿಥೀಕಿ ನತರ್‌ಕಿ ಪರೈದೇಖ್ಹ್‌ವಾಳ ಅದ್ಮಿಕಂಥು ಮಾಂಗಾಸ್?” ಕರಿ ಬೋಲ್ಯೊ.
MAT 17:26 ಪೇತ್ರನೆ, “ಪರೈ ದೇಖ್ಹ್‌ವಾಳಕಂಥು” ಕರಿ ಜವಾಬ್‌ ದಿದೊ. ತದೆ ಯೇಸುನೆ ಪೇತ್ರನ, “ಇಮ್‍ಕತೊ, ಶೊಂತ್ ದೇಖ್ಹ್‌ವಾಳು ಶುಂಕ ಭಾಂದಾನು ಕೊಯ್ನಿ ಕರಿ ಬೋಲ್ಯೊ.
MAT 17:27 ತೋಬಿ ಶುಂಕ ಮಾಂಗವಾಳು ಅಪ್ಣಿ ಬಾರೇಮ ಖಟು ಕರಾನು ನಕೊ. ಇನಖ್ಹಾಜೆ ತೂ ದರ‍್ಯಾವ್‍ನ ಜೈ಼ನ್, ಗಳ್‌ ನಾಖಿನ್, ಪಹಿಲೆ ಮಳಾಸ್ತೆ ಮಾಛ಼್‌ಲಾನ ಮ್ಹೋಡಾನ ಕಾಡಿ ದೇಕ್, ಇನಾಮ ಶುಂಕ ಭಾಂದಾನ ಹೋಣುತೆ ಏಕ್‌ ಪೈಶಾನು ಬಿಲ್ಲು ಮಳ್‌ಶೆ. ಇನ ಲಯಿನ್, ಅಪ್ಣ ಭೇ ಜ಼ಣಾನು ಕರಿ ಬೋಲಿನ್ ದೇ” ಕರಿ ಬೋಲ್ಯೊ.
MAT 18:1 ಯೋ ವಖ್ಹತ್‌ಮ ಶಿಷ್ಯರ್‌ ಯೇಸುಕನ ಆಯಿನ್, “ಸೊರ್ಗಾನು ರಾಜ್ಯಮ ಖ್ಹಾರೇಥಿ ಮೋಟು ಕೋಣ್?” ಕರಿ ಪುಛಾ಼ಯ.
MAT 18:2 ಇನಖ್ಹಾಜೆ ಯೇಸುನೆ ಏಕ್‌ ಅಡ್ಡಾಣಿ ಲಡ್ಕಾನ ಬುಲೈನ್, ಶಿಷ್ಯರ್‌ನ ಖ್ಹಾಮ್ಣೆ ಭಿರಾಖಿನ್,
MAT 18:3 “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಪಾಛು಼ ಫರೀನ್, ಆ ಅಡ್ಡಾಣಿ ಲಡ್ಕಾನಿ ಘೋಣಿ ನಾ ಹುಯಾತೊ, ತುಮೆ ಸೊರ್ಗಾನು ರಾಜ್ಯಮ ಜಾ಼ಶುಸ್ ಕೊಯ್ನಿ.
MAT 18:4 ಕೋಣ್ ಅಡ್ಡಾಣಿ ಲಡ್ಕಾನಿಘೊಣಿ ಇನು ಯೋ ಝು಼ಕೈಲೇಸ್ಕಿ, ಯೋಸ್ ಸೊರ್ಗಾನು ರಾಜ್ಯಮ ಖ್ಹಾರೇಥಿ ಮೋಟೊ.
MAT 18:5 ಅತ್ರೇಸ್ ಕಾಹೆತೆ ಕೋಣ್‌ತೋಬಿ ಮಾರ ನಾಮ್‌ಪರ್‌ ಅಮ್ನಏಕ್ ಅಡ್ಡಾಣಿ ಲಡ್ಕಾನ ಬುಲೈಲೇಸ್ಕಿ, ಯೋ ಮನ ಬುಲೈಲ್ಯವಾಳೊ ಹುಯಿರ‍್ಹೊಸ್.
MAT 18:6 ಮಾರಪರ್ ವಿಶ್ವಾಸ್ ಕರಾವಾಳ ಆ ನ್ಹಾನಾವ್‍ಮ ಏಕ್‌ನ ಕೋಣ್‌ತೋಬಿ ಭೀರಾಖ್ಯೂತೊ, ಇಮ್‌ನಾನ ಘಲೆಂಡ ಕೇಡೆ ಘಟ್ಟಿನ ಬಂಡಾನ ಭಾಂದಿನ್, ಗಧಾರ್ ದರ‍್ಯಾವ್‌ಮ ಡುಬೈನಾಖಾನುಸ್ ಇನ ಅಛ್ಛು಼.
MAT 18:7 ಜಗತ್ನಿ ಹಾಲ್ನ ಶಾತ್ ಬೋಲು! ಶನಕತೊ, ಅದ್ಮಿನ ಪಾಪ್‌ಮ ಚ಼ಲಾವವಾಳು ರಾಛು಼ಖ್ಹಾರು ಛಾ಼! ಇಮ್ನು ರಾಛು಼ಖ್ಹಾರು ಕದೇಬಿ ಚಾ಼ಲ್‌ಷೆ. ಕತೋಬಿ ಇಮ್‌ ಹುವ್ವಾನಿಘೋಣಿ ಕರಾಸ್ತೆ ಯೋ ಅದ್ಮಿನಿ ಹಾಲ್ನ ಶಾತ್ ಬೋಲು!
MAT 18:8 “ತಾರೊ ಹಾತ್ ನತರ್‌ಕಿ ತಾರೊ ಗೋಡೊ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ, ಇನ ಕತ್ರೀನ್ ಫೇಕಿದೆ! ಬೇ ಹಾತ್ ಅಜು಼ ಬೇ ಗೋಡ ರ‍್ಹೀನ್, ಹರ್‌ಹಮೇಶಾನಿ ಆಗ್‌ಮ ಫೆಕಾವಥೀಬಿ, ಹಾತ್‌-ಗೋಡಕೊಂತೆ ಹರ್‌ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನೂಸ್ ತುನ ಅಶೇಲ್.
MAT 18:9 ತಾರೊ ಡೋಳೊ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ, ಇನ ಕಚ಼್‌ಕೋರಿನ್ ಫೇಕಿದೆ! ಬೇ ಡೋಳಾ ರ‍್ಹೀನ್ ನರಕ್‌ನಿ ಆಗ್‌ಮ ಫೆಕಾವಥೀಬಿ ಎಕ್ಕಸ್ ಡೋಳೊ ರ‍್ಹೀನ್, ಹರ್‌ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನೂಸ್ ತುನ ಅಶೇಲ್.
MAT 18:10 ಆ ನ್ಹಾನಾವ್‍ಮ ಏಕ್‌ನಾಬಿ ಕಡ್‌ತೆಲ್ ಕರಿ ನಕೊ ಸೋಚ಼್‌ಶು. ಸೊರ್ಗಾಮ ಅವ್ಣು ದೂತರ್ ಸೊರ್ಗಾಮ ಛಾ಼ತೆ ಮಾರ ಬಾನು ಮ್ಹೋಡಾನ ಹಮೇಶ ದೇಕ್ತುರ‍್ಹೇಸ್ ಕರಿ ಮೇ ತುಮೂನ ಬೋಲುಸ್.
MAT 18:11 ಅದ್ಮಿನೊ ಛಿಯ್ಯೊ ಖರಾಬ್ ಹುಯಿಗಹುಯಾನ ಢೂಂಡಿನ್ ಬಚಾ಼ಡನ ಆಯೊ.
MAT 18:12 ತುಮೂನ ಕಿಮ್ ದೆಖಾವಸ್? ಏಕ್‌ ಅದ್ಮಿಕನ ಖ್ಹೋ ಮೇಂಢರ‍್ಹೀನ್, ಇನಾಮ ಏಕ್‌ ಮೇಂಢು ಗುಮೈಗಯೂತೆ, ಯೋ ಅದ್ಮಿ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ಮೇಂಢಾನ ಮ್ಹೆಂದಿನ್, ಗುಮೈಗಯೂತೆ ಯೋ ಮೇಂಢಾನ ಢೂಂಡಾನ ಜಾ಼ಯಿಕೊಯ್ನಿಕಿ ಶು?
MAT 18:13 ಗುಮೈಗಯೂತೆ ಯೋ ಮೇಂಢು ಮಳ್ಯುತೊ, ಗುಮಾಯುಕೊಂತೆ ಯೋ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ಮೇಂಢವ್‌ಥೀಬಿ ಯೋ ಏಕ್‌ ಮೇಂಢಾನಖ್ಹಾಜೆ ಜಾ಼ಖ್ಹತ್ ಖ್ಹುಶಿ ಕರಾಸ್ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್.
MAT 18:14 ಇಮ್ಮಸ್ ಆ ನ್ಹಾನಾವ್‍ಮ ಏಕ್‌ಬಿ ಖರಾಬ್ ನಾ ಜಾ಼ವ್ಣು ಕರಿ ಬೋಲಾನುಸ್ ಸೊರ್ಗಾಮ ಛಾ಼ತೆ ತುಮಾರ ಬಾನಿ ಮರ್ಜಿ.
MAT 18:15 ತಾರೊ ಭೈ ತಾರಿ ವಿರೋದ್ ಗಲತ್‌ ಕರ‍್ಯೋತೊ, ತೂ ಜೈ಼ನ್, ಯೋ ಎಕ್ಲೋಸ್ ರ‍್ಹವಾನಿ ವಖ್ಹತ್‌ಮ, ಇನಿ ಗಲ್ತಿನ ಇನ ಬೋಲಿವತಾಳ್. ಯೋ ತಾರಿ ವಾತೇನ ಖ್ಹಮ್‌ಜಿಗಯೋತೊ ತಾರ ಭೈನ ತೂ ಪಾಛೊ಼ ಕಮೈಲಿದೊ ಕರಿ.
MAT 18:16 ಕತೋಬಿ ಯೊ ತಾರಿ ವಾತೆನ ನಾ ಖ್ಹಮ್‌ಜ್ಯೋತೊ, ತಾರ ಜೋ಼ಡೆ ಬಿಜು಼ ಏಕ್‌ ನತರ್‌ಕಿ ಬೇ ಜ಼ಣಾನ ಬುಲೈಲಿ ಇನಾಕನ ಜಾ಼, ಶನಕತೊ ‘ಹರೇಕ್ ವಾತೇನ ಬೇ ನತರ್‌ಕಿ ತೀನ್ ಅದ್ಮಿನಿ ಸಾಕ್ಷಿ ರ‍್ಹೇಣು.
MAT 18:17 ಯೋ ಇವ್ಣಿ ವಾತೇನಾಬಿ ನಾ ಖ್ಹಮ್‌ಜ್ಯೊತೊ, ಸಭೆನ ಬೋಲ್, ಯೋ ಸಬೇನಿ ವಾತೇನಾಬಿ ನಾ ಖ್ಹಮ್‌ಜ್ಯೋತೊ ಯೋ ದೇವ್‌ಮ ವಿಶ್ವಾಸ್‍ಕರಾಕೊಂತೆ ನತರ್‌ಕಿ ಶುಂಕ ಮಾಂಗವಾಳ ಅದ್ಮಿನಿಘೋಣಿ ಇನ ದೇಕ್.
MAT 18:18 ಮೇ ತುಮೂನ ಖ್ಹಾಚಮಾಬಿ ಬೋಲುಸ್: ತುಮೆ ಆ ಧರ್ತಿಪರ್ ಶಶ್ಶಾತ್ ಭಾಂದಾಸ್ಕಿ, ಯೋ ಖ್ಹಾರು ಸೊರ್ಗಾಮಾಬಿ ಭಂದೈರ‍್ಹೀಶೆ, ಅಜು಼ ತುಮೆ ದರ್ತಿಪರ್ ಶಶ್ಶಾತ್ ಛೋ಼ಡಾಸ್ಕಿ ಯೋ ಖ್ಹಾರು ಸೊರ್ಗಾಮಾಬಿ ಛೋ಼ಡಾವ್‌ಶೆ.
MAT 18:19 ಎತ್ರೇಸ್ ಕಾಹೆತೆ, ತುಮಾರಾಮ ಬೇ ಜ಼ಣು ಆ ಧರ್ತಿಪರ್ ಎಕ್ಕಸ್ ಮನ್‌ಥಿ ಶಾತ್‌ ಮಾಂಗಿಲಿದುತೋಬಿ ಸೊರ್ಗಾಮ ಛಾ಼ತೆ ಮಾರೊ ಬಾ ಇವ್ಣುನ ದಿಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್.
MAT 18:20 ಶನಕತೊ ಬೇ ನತರ್‌ಕಿ ತೀನ್ ಜ಼ಣು ಮಾರ ನಾಮ್‍ಪರ್ ಕಿಜ್ಗಾ಼ ಎಕ್ಟು ಹುಯಿನ್ ಐರ‍್ಹೇಸ್ಕಿ ಹಿಜ್ಜಾ಼ ಇವ್ಣ ಇಚ಼್‌ಮ ಮೇ ರ‍್ಹೆವುಸ್‌.
MAT 18:21 ತದೆ ಪೇತ್ರನೆ ಯೇಸುಕನ ಆಯಿನ್, “ಪ್ರಭು, ಮಾರೊ ಭೈ ಮಾರಿ ವಿರೋದ್ ಗಲತ್‌ ಕರ‍್ಯೋತೊ, ಮೇ ಇನ ಕೆತ್ರಿಹಲ್ಲ ಮಾಪ್‌ ಕರ‍್ನು? ಖ್ಹಾತ್ ಹಲ್ಲಾಕಿ ಶು?” ಕರಿ ಇನ ಪುಛಾ಼ಯೊ.
MAT 18:22 ಯೇಸುನೆ, “ಖ್ಹಾತ್ ಹಲ್ಲಾ ಕಾಹೆ, ಖ್ಹಾತ್ ಖ್ಹಡ್‌ತೀನಿಖ್ಹ್ ಹಲ್ಲ” ಕರಿ ಜವಾಬ್‌ ದಿದೊ.
MAT 18:23 “ಶನಕತೊ ಸೊರ್ಗ ರಾಜ್ಯನ ಇನ ಸೇವಕರ್‌ಥಿ ಪೈಶಾನಿ ಇಶಾಬ್ ಲೇವ್ಣುಕರಿ ತೀರ್ಮಾನ್ ಕರಾಸ್ತೆ ಏಕ್‌ ರಾಜಾ಼ನಿಘೋಣಿ ಛಾ಼.
MAT 18:24 ಯೋ ಇಶಾಬ್ ಲ್ಯವಾನು ಶುರುಕರ್‌ತಾನ, ಕರೋಡೊ ರಪ್ಯ ದೇವ್ಣುಥೂತೆ ಏಕ್‌ನ ಇನಾಕನ ಲಾಯು.
MAT 18:25 ಯೋ ಕರಜ಼್ ಫೇಡಾನ ಇನಾಕನ ಶಾತ್ಬಿ ಕೋ ಥೂನಿತೆ ಇನಖ್ಹಾಜೆ, ಇನ ಯಜಮಾನ್ನೆ, ‘ಇನಾಬಿ ಇನಿ ಬಾವಣ್‍ ಅಜು಼ ಲಡ್ಕಾವ್‍ನ, ಅಜು಼ ಇನಾಕನ ಛಾ಼ತೆ ಖ್ಹಾರಸ್ನ ವೇಚಿನ್, ಯೋ ಕರಜ಼್‌ನ ಫೇಡ್‍ಣು’ ಕರಿ ಹುಕುಮ್ ದಿದೊ.
MAT 18:26 ತದೆ ಯೋ ಆಳ್‌ನೆ ಇನ ರಾಜಾ಼ನ ಆಡ್‍ಪಡಿನ್, ‘ರಾಜಾ಼, ಜ಼ರ ಖ್ಹಮಾಳಿಲೇ, ಮೇ ತುನ ದೇವ್ಣುತೆ ಖ್ಹಾರುಸ್ ಫೇಡುಸ್’ ಕರಿ ಇನ ಗಿಂಗೈಲಿದೊ.
MAT 18:27 ಅನ ದೇಖಿನ್ ಯೋ ಯಜಮಾನ್ನೆ ಇನ ಆಳ್‌ಪರ್ ಗೋರ್‌ಖೈನ್, ಯೋ ದೇವ್ಣುತೆ ಖ್ಹಾರು ಕರಜ಼್‌ನ ಮಾಫ್‌ಕರೀನ್, ಇನ ಜಾ಼ವಾನ ಮ್ಹೆಂದಿದೊ.
MAT 18:28 “ಅನಕೇಡೆಥು ಯೋ ಆಳ್‌ ಭಾರ್‌ಆಯಿನ್, ಇನ ಥೋಡ ಪೈಶಾ ದೇವ್ಣುಥೂತೆ ಇನ ಜೋ಼ಡ್ಮ ಕಾಮ್ ಕರಾವಾಳೊ ಆಳ್‌ನ ದೇಖಿನ್, ಇನಿ ನ್ಹೇಟಿ ಭೀಚಿನ್, ‘ಮಾರು ಕರಜ಼್ ಫೇಡ್ಲ!’ ಕರಿ ಬೋಲ್ಯೊ.
MAT 18:29 ತದೆ ಯೋ ಆಳ್‌ನೆ ಇನ ಗೋಡಾಪರ್ ಪಡೀನ್, ‘ಜ಼ರ ಖ್ಹಮಾಳಿಲೇ, ಮೇ ಫೇಡುಸ್!’ ಕರಿ ಗಿಂಗೈಲಿದೊ.
MAT 18:30 ಕತೋಬಿ ಇನೆ ಮಾನ್ಯೊಕೊಂತೆ, ಇನ ಧರೀನ್, ಕರಜ಼್ ಫೇಡಾತೋಡಿ ಇನ ಜೇಲ್‌ಮ ಘಲಾಯೊ.
MAT 18:31 ತದೆ ಅನ ದೇಖ್ಯೂತೆ ಬಿಜಾ಼ಖ್ಹಾರ ಆಳ್‌ನೆ ಘಣು ದುಖ್ ಖೈನ್, ಯಜಮಾನ್‍ಕನ ಆಯಿನ್, ಚಾ಼ಲ್ಯುತೆ ಇನಿ ಬಾರೇಮ ಖ್ಹಾರುಸ್ ಇನ ಬೋಲ್ಯು.
MAT 18:32 ತದೆ ಯಜಮಾನ್ನೆ ಯೋ ಆಳ್‌ನ ಬುಲೈನ್, ‘ತೂ ಖರಾಬ್ ಆಳ್‌! ತೂ ಮನ ಬೋಲಿಲೇತಾನ, ಮನ ದೇವ್ಣುತೆ ಯೋ ಖ್ಹಾರೂಸ್ ಕರಜ಼್‌ನ ಮೇ ಮ್ಹೆಂದಿದೋನಿ.
MAT 18:33 ಮೇ ತಾರಪರ್ ಗೋರ್‌ ವತಾಳ್ಯೊತೆ ಇಮ್ಮಸ್, ತೂಬಿ ತಾರ ಜೋ಼ಡ್ಮ ಕಾಮ್ ಕರಾವಾಳೊ ಯೋ ಆಳ್‌ನ ಮಾಪ್‌ ನಾ ಕರ್ನುಥೂಕಿ ಶು?’ ಕರಿ ಬೋಲಿನ್,
MAT 18:34 ಯಜಮಾನ್ನೆ ಖೀಜ಼್‌ ಕರೀನ್‌, ಇನ ದೇವ್ಣುಥೂತೆ ಖ್ಹಾರುಸ್ ಕರಜ಼್ ಫೇಡಾತೋಡಿ, ಇನ ದಂಡ್‌ ದ್ಯವಾನಖ್ಹಾಜೆ ಜೇಲ್‌ಮ ಘಲಾಯೊ.
MAT 18:35 ತುಮಾರಾಮ ಹರೇಕ್ ಜ಼ಣು ಇನ ಭೈನ ದಿಲ್‌ಥಿ ಮಾಪ್‌ ನಾ ಕರ‍್ಯಾತೊ, ಸೊರ್ಗಾಮ ಛಾ಼ತೆ ಮಾರೊ ಬಾಬಿ ತುಮೂನ ಯೋ ರಾಜಾ಼ನೆ ಕರ‍್ಯೊತೆ ಇಮ್ಮಸ್ ಕರ್ಶೆ” ಕರಿ ಬೋಲ್ಯೊ.
MAT 19:1 ಯೇಸುನೆ ಆ ಖ್ಹಾರಿ ವಾತೇನ ಬೋಲಾನ ಬಾದ್‌ಮ, ಗಲಿಲಾಯನ ಮ್ಹೆಂದಿನ್, ಯೊರ್ದನ್‌ ನದ್ದಿನು ಪಾರ್ಲಿ ಬಾಜೂ಼ಮ ಥೂತೆ ಯೂದಾಯ ತಬರ್‌ಖಾನ ಗಯೊ.
MAT 19:2 ಕೈಯೆಕ್ಕಿ ಅದ್ಮಿನಿ ಮೋಟಿ ಝೂ಼ಂಡ್‌ ಇನ ಪೀಠೆ ಗಯು, ಅಜು಼ ಯೇಸುನೆ ಇವ್ಣುನ ಹಿಜ್ಜಾ಼ ಅಛ್ಛು಼ ಕರ‍್ಯೊ.
MAT 19:3 ತದೆ ಫರಿಸಾಯರ್‌ವಾಳು ಯೇಸುಕನ ಆಯಿನ್ ಇನ ಫಖ್ಹಾವ್ಣು ಕರಿ, “ಏಕ್‌ ಜ಼ಣೊ ಖೆವಿತೋಬಿ ಏಕ್‌ ಭಾಮ್‌ಥಿ ಇನಿ ಬಾವಣ್ಣ ಮ್ಹೇಲಿದ್ಯವಾನು ಬರೊಬರ‍್ನಿ ನಿಯಮ್‌ ಕಿಶು?” ಕರಿ ಪುಛಾ಼ಯು.
MAT 19:4 ತದೆ ಯೇಸುನೆ, “ಅದ್ಮಿನ ಉಬ್‌ಜಾ಼ಯೋತೆ ಇನೆ ಶುರುವಾತ್‌ಥೂಸ್ ಇವ್ಣುನ ಪರ್ಖ್ಹೊ ತಯೇಡಕರಿ, ಬಣಾಯೊ ಕರಿ ವಚನ್‌ಮ ಛಾ಼ತೆ ಇನ ತುಮೆ ಪಢಿರಾಖ್ಯಕೊಯ್ನಿಕಿ ಶು?
MAT 19:5 ಇನಖ್ಹಾಜೆ ದೇವ್ನೆ, ಇನ ಆಯ-ಬಾನ ಮ್ಹೇಲಿನ್, ಇನಿ ಬಾವಣ್‍ಥಿ ಮಳಾಸ್. ಇವ್ಣೆ ಭೇ ಜ಼ಣು ಎಕ್ಕಸ್ ಶರೀರ್ ಹುಯಿನ್ ರ‍್ಹಿಶೆ’ ಕರಿ ಬೋಲ್ಯೋತೆ.
MAT 19:6 ಇನಖ್ಹಾಜೇಸ್ ಬಿಜು಼ ಖ್ಹಾಮ್ಣೆ ಇವ್ಣೆ ಬೇಜ಼ಣ ಕಾಹೆ, ಎಕ್ಕಸ್ ಶರೀರ್‌ ಹುಯಿರ‍್ಹಾಸ್. ಇನಖ್ಹಾಜೇಸ್ ದೇವ್ನೆ ಮಳಾಯಹುಯಾನ ಅದ್ಮಿ ಅಲಕ್‌ನಾಸ್ ಕರ‍್ನು” ಕರಿ ಬೋಲ್ಯೊ.
MAT 19:7 ತದೆ ಪರಿಸಾಯರ್‌ನೆ ಯೇಸುನ, “ಇಮ್‍ಕತೊ, ಏಕ್‌ ಪರ್ಖ್ಹೊ ತಲಾಕ್‌ನು ಕಾಗತ್‌ ಲೀಖಿದೀನ್‌, ಇನಿ ಬಾವಣ್ಣ ಮ್ಹೇಲಿದಿಯ್ಯೆಜಾ಼ಯ್ ಕರಿ ಮೋಶೇನೆ ಹಮೂನ ಹುಕುಮ್‌ ದಿದೋನಿ ಶನ?” ಕರಿ ಪುಛಾ಼ಯು.
MAT 19:8 ತದೆ ಯೇಸುನೆ ಇವ್ಣುನ, “ಮೋಶೆನೆ ತುಮಾರ ಮೊಂಡಿದಿಲ್‌ನ ದೇಖಿನ್, ತುಮಾರಿ ಬಾವಣ್ಣ ಮ್ಹೇಲಿದ್ಯವಾನ ಹುಕುಮ್ ದಿದೋತೆ. ಕತೋಬಿ ಶುರುವಾತ್‌ಥೂಸ್ ಅಮ್ ಕೋಥೂನಿ.
MAT 19:9 ಮೇ ತುಮೂನ ಶಾತ್‌ ಬೋಲುಸ್‌ಕತೊ, ವ್ಯಬಿಚಾರ‍್ನಿ ಕಾರಣ್‌ ಕೊಂತೆಸ್ ಇನಿ ಬಾವಣ್ಣ ಮ್ಹೇಲಿದಿನ್, ಬಾವ್ರಿ ಮ್ಹೇಲಿಹುಯಿನ ವ್ಯಹಾ ಕರಿಲ್ಯವಾಳೊ ವ್ಯಬಿಚಾರಿ ಹುಯಿರ‍್ಹೋಸ್” ಕರಿ ಬೋಲ್ಯೊ.
MAT 19:10 ತದೆ ಇನ ಶಿಷ್ಯರ್‌ನೆ ಇನ, “ಬಾವಣ್ಣಿ ಬಾರೇಮ ಬಾವ್ರಿ ಅಮ್ಮಸ್ ಚಾ಼ಲಿಲೇವ್ಣು ಕರಿ ಉಶೇತೊ, ವ್ಯಹಾ ಕರಾಕೊಯ್ನಿತೇಸ್ ರ‍್ಹವಾನುಸ್ ಅಛ್ಛು಼” ಕರಿ ಬೋಲ್ಯ.
MAT 19:11 ಯೇಸುನೆ, “ಆ ವಾತೇನ ಮಾನಿಲ್ಯವಾನು ದೇವ್‍ಥಿ ಕಿನ ದೆವೈರ‍್ಹೂಸ್ಕಿ ಇವ್ಣೇಸ್ ಪಣ್ಕಿ, ಬಿಜು಼ ಕೋಣ್‌ಬಿ ಇನ ಮಾನಿಲ್ಯವಾನ ಕೋ ಹುವಾನಿ.
MAT 19:12 ಪರ್ಖ್ಹಾ ಅದ್ಮಿ ವ್ಯಹಾ ಕರಾಕೊಯ್ನಿತೆ ಇನ ಬಿಜಿ-ಬಿಜಿ ಕಾರಣ್ ಛಾ಼. ಕೆಹುಕತೊ, ಥೋಡು ಜ಼ಣು ಆಯಾನ ಗರಬ್‌ಮಾಥೂಸ್ ವ್ಯಹಾ ಕರಾನ ಲ್ಹಾಯಕ್‌ಕೊಂತೆ ಇಮ್‌ ಪೈದಾಹುವ್ವಾಸ್; ಅಜು಼ ಥೋಡು ಜ಼ಣು ಅದ್ಮಿನ ಹಾತೆ ಇಮ್‌ ಕರೈಲೇಸ್; ಕತೋಬಿ ಬಿಜು಼ ಥೋಡು ಜ಼ಣು ಸೊರ್ಗಾನು ರಾಜ್ಯನಖ್ಹಾಜೆ ವ್ಯಹಾ ಕರಾಕೊಯ್ನಿ. ಕಿನ ಆ ವಾತೇನ ಮಾನಾನ ಹುವಾಸ್ಕಿ ಇವ್ಣೆ ಮಾನಿಲೇಸ್.
MAT 19:13 ಥೋಡು ಜ಼ಣು ಇವ್ಣ ಅಡ್ಡಾಣಿ ಲಡ್ಕಾವ್‍ನ ಯೇಸುಕನ ಲೈನ್‌, ಇವ್ಣಾಪರ್ ಹಾತ್ ಮ್ಹೇಲಿನ್, ಪ್ರಾರ್ಥನೆ ಕರ‍್ನು ಕರಿ ಬೋಲಿಲಿದು, ಕತೋಬಿ ಶಿಷ್ಯರ್‌ನೆ ಇವ್ಣುನ ಗುರ್‌ಕಾಯು.
MAT 19:14 ತದೆ ಯೇಸುನೆ, “ಅಡ್ಡಾಣಿ ಲಡ್ಕಾವ್‍ನ ಮ್ಹೇಲೊ, ಮಾರಕನ ಆವಾನ ಇವ್ಣುನ ಭೀರಾಖೊ ನಕೊ, ಶನಕತೊ ಸೊರ್ಗಾನು ರಾಜ್ಯ ಇಮ್‌ವಾಳನೂಸ್” ಕರಿ ಬೋಲಿನ್,
MAT 19:15 ಇವ್ಣಾಪರ್ ಹಾತ್‌ ಮ್ಹೇಲಿನ್, ಹಿಜ್ಜಾ಼ಥೊ ಚ಼ಲೆಗಯೊ.
MAT 19:16 ಏಕ್‌ ಹಲ್ಲ ಏಕ್‌ ಅದ್ಮಿ ಯೇಸುಕನ ಆಯಿನ್, “ಗುರು, ಮನ ಹಮೇಶಾನಿ ಜಿ಼ಂದ್‌ಗಿ ಮಳ್‌ಣುಕತೊ ಮೇ ಖೆವು ಅಛ಼್ಛು ಕಾಮ್ನ ಕರ‍್ನು?” ಕರಿ ಪುಛಾ಼ಯೊ.
MAT 19:17 ತದೆ ಯೇಸುನೆ ಇನ, “ಅಛ್ಛಾ಼ನಿ ಬಾರೇಮ ತೂ ಮನ ಪುಛಾ಼ವಾಸ್ತೆ ಶನ? ದೇವ್ ಎಕ್ಕಸ್ ಜ಼ಣೊ ಅಛ್ಛೊ಼. ಕತೋಬಿ ತುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಹೋಣುಕತೊ, ದೇವ್ನಿ ಖ್ಹಾರಿ ಹುಕುಮ್‌ನಿಘೋಣಿ ಚಾ಼ಲಿಲೇ” ಕರಿ ಬೋಲ್ಯೊ.
MAT 19:18 ಯೋ ಅದ್ಮಿನೆ, “ಖೆವಿ ಖ್ಹಾರಿ ಹುಕುಮ್?” ಕರಿ ಪುಛಾ಼ಯೊ. ಯೇಸುನೆ, “ಖೂನಿ ನಾಹೋಣು; ವ್ಯಬಿಚಾರ್ ನಾ ಕರ‍್ನು; ಚೋ಼ರಿ ನಾ ಕರ‍್ನು; ಬಿಜಾ಼ಪರ್ ಝೂ಼ಟಿ ಸಾಕ್ಷಿ ನಾ ಬೋಲ್‌ನು;
MAT 19:19 ತಾರ ಆಯ-ಬಾನ ಮರ್ಯಾದಿ ದೇವ್ಣು; ಅಜು಼ ತಾರು ತೂ ಕಿಮ್ ಪ್ಯಾರ್ ಕರಿಲೇಸ್ಕಿ, ಇಮ್ಮಸ್ ತಾರ ಭೀಡೆವಾಳಾನ ಪ್ಯಾರ್ ಕರ‍್ನು;
MAT 19:20 ಯೋ ಜಾ಼ನ್ಜ಼ಮಾನ್ ಅದ್ಮಿನೆ, “ಮೇ ಆ ಖ್ಹಾರಿಸ್ ಹುಕುಮ್‌ನಿಘೋಣಿ ಚಾ಼ಲಿರಾಖ್ಯೋಸ್. ಬಿಜು಼ ಶಾತ್ಬಿ ಕಮ್ ಹುಯಿರ‍್ಹುಸ್ಕಿ ಶು?” ಕರಿ ಪುಛಾ಼ಯೊ.
MAT 19:21 ಯೇಸುನೆ ಇನ, “ತೂ ಪಕ್ಕಾ ಹೋಣುಕರಿ ಉಶೇತೊ, ಜೈ಼ನ್, ತಾರು ಶೊತ್ನ ಖ್ಹಾರು ವೇಚಿನ್, ಇನೇಥಿ ಆವಸ್ತೆ ಪೈಶಾನ ಗರೀಬ್‌ನ ದೇ, ತದೆ ಸೊರ್ಗಾಮ ತುನ ಶೊತ್ ರ‍್ಹಿಶೆ. ಅನಕೇಡೆಥು ತೂ ಐನ್, ಮಾರ ಪೀಠೆ ಆವ್!” ಕರಿ ಬೋಲ್ಯೊ.
MAT 19:22 ಯೋ ಜಾ಼ನ್ಜ಼ಮಾನ್ ಅದ್ಮಿನೆ ಅನ ಖ್ಹಮ್‌ಜಿನ್‌, ಘಣು ದುಖ್‌ಥಿ ಚ಼ಲೆಗಯೊ. ಶನಕತೊ ಯೋ ಘಣೊ ಶೌಕಾರ್ ಹುಯಿರ‍್ಹೋಥೊ.
MAT 19:23 ತದೆ ಯೇಸುನೆ ಇನ ಶಿಷ್ಯರ್‌ನ, “ಮೇ ತುಮೂನ ಖ್ಹಾಚ ಬೋಲುಸ್: ಶೌಕಾರ್ ಅದ್ಮಿ ಸೊರ್ಗಾನು ರಾಜ್ಯಮ ಜಾ಼ವಾನು ಘಣು ಮುಶ್ಕಿಲ್.
MAT 19:24 ಒಹೊ, ಶೌಕಾರ್ ಅದ್ಮಿ ದೇವ್‌ನು ರಾಜ್ಯಮ ಜಾ಼ವಾಥೀಬಿ, ಊಟ್‍ ಖ್ಹುಯಿನ ಡೋಳವಾಟೆಕರಿ ಪೇಶಿಜಾ಼ವನು ಶುಲ್ಬ ಕರಿ ಮೇ ತುಮೂನ ಪಾಛೊ಼ ಬೋಲುಸ್” ಕರಿ ಬೋಲ್ಯೊ.
MAT 19:25 ಅನ ಖ್ಹಮ್‌ಜಿನ್‌, ಶಿಷ್ಯರ್‌ನೆ ಘಣು ಆಶ್ಚರ್ಯಥಿ, “ಇಮ್‍ಕತೊ, ಕಿನ ರಕ್ಷಣೆ ಮಳ್‌ಶೆ?” ಕರಿ ಪುಛಾ಼ಯ.
MAT 19:26 ಯೇಸುನೆ ಇನ ಶಿಷ್ಯರ್‌ ಭಣಿ ಠರ್‌ಕೈ ದೇಖಿನ್, “ಆ ಅದ್ಮಿಥಿ ಹುವ್ವಾಕೊಯ್ನಿ, ಕತೋಬಿ ದೇವ್‍ಥಿ ಖ್ಹಾರುಸ್ ಹುವಾಸ್” ಕರಿ ಬೋಲ್ಯೊ.
MAT 19:27 ತದೆ ಪೇತ್ರನೆ, “ಹಂದೇಕ್‌! ಹಮೆ ಖ್ಹಾರೂಸ್ ಮ್ಹೆಂದಿನ್, ತಾರ ಪೀಠೆ ಐಗಯ. ಹಮೂನ ಶಾತ್ ಮಳ್‌ಶೆ?” ಕರಿ ಪುಛಾ಼ಯೊ.
MAT 19:28 ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚ ಬೋಲುಸ್: ನವಜ಼ಗ್‍ಮ ಅದ್ಮಿನೊ ಛಿಯ್ಯೊ ಇನಿ ಮಹಿಮೆನಿ ಸಿಂಹಾಸನ್‌ಪರ್ ಬೇಖ್ಹ್‌ಶೆ, ತದೆ ಮಾರ ಪೀಠೆ ಆಯಾತೆ ತುಮೆ ಭಾರ ಜ಼ಣಾಬಿ ಸಿಂಹಾಸನ್‌ಪರ್ ಬೇಶಿನ್, ಇಸ್ರಾಯೇಲ್‌ನ ಭಾರ ಖೂಮ್‍ವಾಳನ ನ್ಯಾವ್‍ಫೇಡ್‍ಶು.
MAT 19:29 ಅಜು಼ ಮಾರ ನಾಮ್‍ಪರ್ ಘರ್‌ನರ‍್ಹೆವೊ, ಭೈಯೇನ ರ‍್ಹವೊ, ಭೇನೇನ ರ‍್ಹವೊ, ಬಾನ ರ‍್ಹವೊ, ಆಯಾನ ರ‍್ಹವೊ, ಲಡ್ಕಾವ್ನ ರ‍್ಹವೊ, ಖೇತರ್‌ನ ರ‍್ಹವೊ ಮ್ಹೇಲಿದಿದೂತೆ ಹರೇಕ್ನ ಖ್ಹೋ ಪಟ್ ಜಾ಼ಖ್ಹತ್ ಮಳ್‌ಶೆ ಅಜು಼ ಹರ್‌ಹಮೇಶಾನಿ ಜಿ಼ಂದ್‌ಗೀಬಿ ಮಳ್‌ಶೆ.
MAT 19:30 ಕತೋಬಿ ಹಮ್ಕೆ ಅಗಾಡಿ ಛಾ಼ತೆ ಕೈಯೆಕ್ಕಿ ಜ಼ಣು ಪಾಛ಼ಳ್ ಹುಯಿಜಾ಼ಶೆ ಅಜು಼ ಪಾಛ಼ಳ್ ಛಾ಼ತೆ ಕೈಯೆಕ್ಕಿ ಜ಼ಣು ಅಗಾಡಿ ಹುಯಿಜಾ಼ಶೆ.
MAT 20:1 ಸೊರ್ಗಾನು ರಾಜ್ಯ ಏಕ್‌ ದ್ರಾಕ್ಷಿನೊ ಬಾಗ್‌ನೊ ಯಜಮಾನ್ನಿಘೋಣಿ ಛಾ಼.ಏಕ್‌ ದನ್ನೆ ವ್ಹಾಣಾನು ಯೋ ಇನ ಬಾಗ್‌ಮ ಕಾಮ್ ಕರಾನಖ್ಹಾಜೆ ಥೋಡ ಕೂಲಿಆಳ್‍ನ ಬುಲಾವನ ನಿಕ್‌ಳ್ಯೊ.
MAT 20:2 ಇನೆ ದನ್ನ ಏಕ್‌ ಕೂಲಿ ಆಳ್‌ನ ಏಕ್‌ ರೂಪಾನಬಿಲ್ಲಾ ದೆವುಸ್ ಕರಿ ವಾತೆ ಕರೀನ್, ಯೋ ಆಳ್‌ನ ಖ್ಹಾರು ಇನ ಬಾಗ್‌ಮ ಬೋಲಿ ಮೋಕ್‌ಲ್ಯೊ.
MAT 20:3 ಅನಕೇಡೆಥು ಯೋ ಬಾಗ್‌ನೊ ಯಜಮಾನ್ ಕಮ್‍ಶಿಕಮ್ ನೌ ಘಂಟಾನ ಪಾಛೊ಼ ಘರ್‌ಥೊ ನಿಕ್ಳಿನ್, ಬಜಾ಼ರ್‌ನಿ ಝ಼ಗೋಕನ ಜೈ಼ನ್, ಹಿಜ್ಜಾ಼ ಥೋಡು ಜ಼ಣು ಫಾಯಿದೊಕೊಂತೆ ಭೀರ‍್ಯುಥೂತೆ ದೇಖಿನ್,
MAT 20:4 ಇವ್ಣುನ, “ತುಮೇಬಿ ಮಾರ ದ್ರಾಕ್ಷಿನ ಬಾಗ್‌ಮ ಜೈ಼ನ್ ಕಾಮ್ ಕರೊ. ತುಮೂನ ಮೇ ನೀತಿನಿ ಕೂಲಿ ದೆವುಸ್’ ಕರಿ ಬೋಲ್ಯೊ.
MAT 20:5 ತದೆ ಇವ್ಣೆ ಬಾಗ್‌ಮ ಗಯು. ಯೋ ಯಜಮಾನ್ ಪಾಛೊ಼ ಕಮ್‌ಶಿಕಮ್ ಭಾರ ಘಂಟಾನ ಅಜು಼ ತೀನ್ ಘಂಟಾನ ಏಕ್‌ ಹಲ್ಲ ಬಜಾ಼ರ್‌ನಿ ಝ಼ಗೋಕನ ಗಯೊ.
MAT 20:6 ಖ್ಹುಮಾರ್ ಪಾಚ಼್ ಘಂಟಾನ ಏಕ್‌ ಹಲ್ಲ ಯೋ ಯಜಮಾನ್ ಬಿಜೇಕ್ ಹಲ್ಲ ಬಜಾ಼ರ್‌ನಿ ಝ಼ಗೋಕನ ಜೈ಼ನ್, ಹಿಜ್ಜಾ಼ ಭೀರ‍್ಯುಥೂತೆ ಥೋಡ ಅದ್ಮಿನ ಇನೆ ದೇಖಿನ್, ‘ತುಮೆ ದನ್‌ಭರ್ ಫಾಯಿದೊಕೊಂತೆ ಚು಼ಪ್‌ಕೆಸ್ ಶನ ಭೀಯಾಸ್?’ ಕರಿ ಪುಛಾ಼ಯೊ.
MAT 20:7 ತದೆ ಇವ್ಣೆ, ‘ಕೋಣ್‌ಬಿ ಹಮೂನ ಕಾಮ್ನ ಬುಲಾಯು ಕೊಯ್ನಿ’ ಕರಿ ಬೋಲ್ಯು. ಯೋ ಯಜಮಾನ್ನೆ, ‘ಇಮ್‍ಕತೊ, ತುಮೆ ಜೈ಼ನ್, ಮಾರ ದ್ರಾಕ್ಷಿನ ಬಾಗ್‌ಮ ಕಾಮ್ ಕರೊ’ ಕರಿ ಬೋಲ್ಯೊ.
MAT 20:8 ಖ್ಹಾಂಜ಼್ ಹುವ್ವಾದೀನ್, ಬಾಗ್‌ನೊ ಯಜಮಾನ್ನೆ ಕಾಮ್ ಕರಾವಾಳಾನ ದೇಖಿಲೇಸ್ತೆ ಇನ ಬುಲೈನ್, ‘ಖ್ಹಾರೇಥಿ ಪಾಛ಼ಳ್ ಆಯೂತೆ ಆಳ್‌ಥಿ ಶುರುಕರೀನ್, ಪಹಿಲೆ ಆಯೋತೆ ಆಳ್‌ತೋಡಿ ಖ್ಹಾರಾನಿ ಕೂಲಿನ ದೇ’ ಕರಿ ಬೋಲ್ಯೊ.
MAT 20:9 ಪಾಚ಼್ ಘಂಟಾನ ಕೂಲಿನ ಆಯುಥೂತೆ ಆಳ್‌ ಖ್ಹಾರಾನಾಬಿ ಏಕೇಕ್‌ ರೂಪಾನುಬಿಲ್ಲಾ ಮಳ್ಯು.
MAT 20:10 ಅನಕೇಡೆಥು ಪಹಿಲೆ ಕಾಮ್‌ಪರ್ ಆಯುಥೂತೆ ಇವ್ಣೆ ಆಯಿನ್, ಹಮೂನ ಜಾ಼ಖ್ಹತ್ ಕೂಲಿ ಮಳ್‌ಶೆ ಕರಿ ಸೋಚ್ಯು; ಕತೋಬಿ ಇವ್ಣುನಾಬಿ ಏಕೇಕ್‌ ರೂಪಾನುಬಿಲ್ಲಾ ಮಳ್ಯು.
MAT 20:11 ಇವ್ಣೆ ಯೋ ಪೈಶಾನ ಲೀಲಿನ್‌, ಯೋ ಬಾಗ್‌ನ ಯಜಮಾನ್‍ಪರ್ ಮಶ್ಲಾ ಮಾರ್‌ತುಹುಯಿನ್,
MAT 20:12 ‘ಪಾಛ಼ಳ್ ಆಯೂತೆ ಆ ಎಕ್ಕಸ್ ಘಂಟೊ ಕಾಮ್ ಕರ‍್ಯು, ಕತೋಬಿ ಹಮೆಖ್ಹಾರು ದನ್‌ಭರ್ ತಡ್ಕಾಮ ಮ್ಹಿನತ್ ಕರೀನ್, ಕಾಮ್ ಕರ‍್ಯಾ, ತೋಬಿ ತುನೆ ಹಮೂನ ದಿದೋತೆ ಎತ್ರುಸ್ ಇವ್ಣುನಾಬಿ ದಿದೋನಿ!’ ಕರಿ ಬೋಲ್ಯು.
MAT 20:13 ತದೆ ಬಾಗ್‌ನೊ ಯಜಮಾನ್ನೆ ಯೋ ಆಳ್‌ಮ ಏಕ್‌ನ, ‘ಹಂದೇಕ್‍ಲ, ದೋಸ್ತ್, ಮೇ ತುನ ಠಗಾಯೊ ಕೊಯ್ನಿ. ತೂ ಏಕ್‌ ರೂಪಾನ ಕಾಖ್ಹ್‌ನಖ್ಹಾಜೆ ಏಕ್‌ ದನ್ನು ಕಾಮ್ ಕರುಸ್ ಕರಿ ಮಾನಿಗಯೊಥೋನಿ?
MAT 20:14 ಅಲ್ಲೆ, ತಾರಿ ಕೂಲಿ, ಅನ ಲೀನ್ ಘರೆ ಜಾ಼. ತುನ ದಿದೋತೆ ಇಮ್ಮಸ್, ಆ ಪಾಛ಼ಳ್ ಆಯೋತೆ ಇನಾಬಿ ಮನ ಮನ್ ಛಾ಼.
MAT 20:15 ಮಾರ ಶೊಂತ್ ಪೈಶಾನ ಮಾರು ಮನ್ಆವಾತೆ ಇಮ್‌ ಕರಾನ ಮನ ಹಕ್‍ಕೊಯ್ನಿಕಿ ಶು? ಮೇ ಇವ್ಣುನ ಅಛ಼್ಛು ಕರ‍್ಯೊತೆ ಇನಖ್ಹಾಜೆ ತೂ ಬಳಾಪೊ ಕರಾಸ್ಕಿ ಶು?’ ಕರಿ ಬೋಲ್ಯೊ.
MAT 20:16 “ಅಮ್ಮಸ್ ಪಾಛ಼ಳ್ ರ‍್ಹವಾಳು ಅಗಾಡಿ ಹುಯಿಜಾ಼ಶೆ, ಅಜು಼ ಅಗಾಡಿ ರ‍್ಹವಾಳು ಪಾಛ಼ಳ್ ಹುಯಿಜಾ಼ಶೆ.
MAT 20:17 ಯೇಸು ಯೆರೂಸಲೇಮ್ಮ ಜ಼ವ್‍ಕರಾನಿ ವಖ್ಹತ್‌ಮ, ಭಾರ ಜ಼ಣ ಶಿಷ್ಯರ್‌ನ ಏಕ್‌ ತರಬ್‌ ಬುಲೈನ್, ವಾಟ್‌ಪರ್ ಚಾ಼ಲ್ತೊಹುಯಿನ್‌, ಇವ್ಣುನ,
MAT 20:18 “ಹಂದೇಖೊ, ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಹಿಜ್ಜಾ಼ ಅದ್ಮಿನೊ ಛಿಯ್ಯಾನ ಗಲ್‌ಢಯಾಜಕರ್‌ನ ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನ ಹಾತ್‌ಮ ಧರಿದಿನಾಕ್‌ಶೆ.
MAT 20:19 ಇವ್ಣೆ ಇನ ಮರಣ್ ದಂಡ್‌ ದೀನ್, ಇನ ಖ್ಹರಮ್‌ ಕಾಡಾನ, ಕೊಳ್ಡೇಥಿ ಮಾರಾನ ಅಜು಼ ಶಿಲ್‌ಬೇಪರ್ ನಾಖಾನಖ್ಹಾಜೆ ಪರೈ ಜಾ಼ತ್‌ವಾಳಾನ ಹಾತ್‌ಮ ದಿನಾಕ್‌ಶೆ. ಕತೋಬಿ ಮರೀನ್ ತೀನ್ ದನ್‌ಕೇಡೆ ಯೋ ಪಾಛೊ಼ ಜಿವ್ತೊಹುಯಿನ್ ಆವ್‌ಶೆ” ಕರಿ ಬೋಲ್ಯೊ.
MAT 20:20 ತದೆ ಜೆಬೆದಾಯನಿ ಬಾವಣ್‍ ಇನ ಭೇ ಪರ್ಖ್ಹಾ ಲಡ್ಕಾನ ಜೋ಼ಡೆ ಯೇಸುಕನ ಐನ್, ಇನಖ್ಹಾಮ್ಣೆ ಆಡ್‍ಪಡಿನ್, ಮಾರಿ ಏಕ್‌ ಬಿಂತಿನ ಚ಼ಲೈದೇಣು ಕರಿ ಬೋಲಿಲಿದಿ.
MAT 20:21 ಯೇಸುನೆ ಇನ, “ತುನ ಶಾತ್ ಹೋಣು?” ಕರಿ ಪುಛಾ಼ಯೊ. ತದೆ ಇನೆ, “ಮನ ಹುಕುಮ್‌ಕರ್‌ ತಾರಿ ರಾಜ್ಯಮ ಮಾರ ಬೇ ಛಿಯ್ಯಾಮ ಏಕ್‌ ಜ಼ಣೊ ತಾರಿ ಖಾವಿ ಬಾಜು಼ಮ ಅಜು಼ ಏಕ್‍ಜ಼ಣೊ ತಾರಿ ಡಾವಿ ಬಾಜು಼ಮ ಬೇಖ್ಹಾನ ಬೋಲ್‌ಕರಿ ಬೋಲಿ
MAT 20:22 ಯೇಸುನೆ ಇನ ಛಿಯ್ಯಾವ್‍ನ, “ತುಮೆ ಶಾತ್ ಮಾಂಗಿಲಿದ ಕರಿ ತುಮೂನ ಮಾಲುಮ್ ಕೊಯ್ನಿ. ಮೇ ಪೀಣುತೆ ಖ್ಹತಾಪ್ಣಿನ ರಾಛ಼ಮ ತುಮೆ ಪಿಯ್ಯಾನ ಉಶೇಕಿ ಶು?” ಕರಿ ಪುಛಾ಼ಯೊ. ಇನ ಇವ್ಣೆ, “ಹಮೂನ ಹುವಾಸ್” ಕರಿ ಜ಼ವಾಬ್‍ದಿದಾ.
MAT 20:23 ತದೆ ಯೇಸುನೆ ಇವ್ಣುನ, “ಮೇ ಪೀಣುತೆ ರಾಛ಼ಮ ತುಮೇಬಿ ಪೀಶು. ಕತೋಬಿ ಮಾರಿ ಖಾವಿ ಬಾಜೂ಼ಮ ಅಜು಼ ಡಾವಿ ಬಾಜೂ಼ಮ ಕೋಣ್ ಬೇಖ್ಹ್‌ಶೆ ಕರಿ ಚೂ಼ಣವಾಳೊ ಮೇ ಕಾಹೆ. ಮಾರೊ ಬಾ ಯೋ ಝ಼ಗೋನ ಕಿನ ಕರಿ ಮ್ಹೇಲಿರಾಖ್ಯೋಸ್ಕಿ ಇವ್ಣುನಾಸ್ ಯೋ ಮಳ್‌ಶೆ” ಕರಿ ಬೋಲ್ಯೊ.
MAT 20:24 ಉಬ್‌ರ‍್ಯಾತೆ ದಖ್ಹ್‌ ಜ಼ಣ ಶಿಷ್ಯರ್‌ನೆ ಅನ ಖ್ಹಮ್‌ಜಿನ್‌, ಯೋ ಬೇ ಭೈಯೇಪರ್ ಖೀಜ಼್‌ಖಾದ.
MAT 20:25 ಕತೋಬಿ ಯೇಸುನೆ ಇವ್ಣ ಖ್ಹಾರಾನ ಇನಾಕನ ಬುಲೈನ್ ಇವ್ಣುನ, “ಯೆಹೂದ್ಯರ್‌ಕಾಹೆತೆ ಅದ್ಮಿನ ಅದಿಕಾರ್‌ಮ ರ‍್ಹವಾಳು ಇವ್ಣಾಪರ್ ಹಂಕಾರ್‌ಥಿ ಅದಿಕಾರ್ ಚ಼ಲಾವಸ್, ಅಜು಼ ಮೋಟು ಅದಿಕಾರಿಖ್ಹಾರು ಇವ್ಣಪರ್ ಜು಼ಲಮ್‌ಥಿ ಹಕ್ನ ಚ಼ಲಾವಸ್ ಕರಿ ಹಮೂನ ಮಾಲುಮ್.
MAT 20:26 ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಕೋಣ್‌ತೋಬಿ ಮೋಟು ಹೋಣು ಕರಿ ಉಶೇತೊ, ಯೋ ತುಮಾರೊ ಸೇವಕ್ ಹುಯಿರ‍್ಹವಾದೆ.
MAT 20:27 ಅಜು಼ ತುಮಾರಾಮ ಅಖ್ಖೇಥಿ ಖ್ಹಾಮ್ಣೆ ರ‍್ಹವಾನ ಆಖ್ಹ್‌ಕರವಾಳೊ ಕೋಣ್‌ತೋಬಿ ಉಶೇತೊ, ಯೋ ತುಮಾರೊ ಸೇವಕ್ ಹುಯಿರ‍್ಹೇಣು.
MAT 20:28 ಅಮ್ಮಸ್ ಅದ್ಮಿನೊ ಛಿಯ್ಯೋಬಿ ಸೇವೆ ಕರೈಲ್ಯವಾನಖ್ಹಾಜೆ ಕೋ ಆಯೋನಿ, ಪಣ್ಕಿ ಸೇವೆ ಕರಾನ ಅಜು಼ ಇನೊ ಜಾನ್ನ ದೀನ್, ಕೈಯೆಕ್ಕಿ ಅದ್ಮಿನ ಛೋ಼ಡೈಲ್ಯವಾನಖ್ಹಾಜೆ ಆಯೊ” ಕರಿ ಬೋಲ್ಯೊ.
MAT 20:29 ಯೇಸು ಅಜು಼ ಇನ ಶಿಷ್ಯರ್‌ ಯೆರಿಕೋಥು ಚ಼ಲ್ಯಾಜ಼ವ್‍ಕರ್ತಥಾತೆ ವಖ್ಹತ್‌ಮ, ಅದ್ಮಿನಿ ಮೋಟಿ ಭೀಡ್ ಇನ ಪೀಠೆ ಗಯು.
MAT 20:30 ತದೆ ಮಾರಗ್‌ನ ಶೇಡೆ ಬೆಠಾಥಾತೆ ಬೇ ಜ಼ಣ ಕಾಣಾನ ಯೇಸು ಹಜ್ಜಾ಼ಸ್‌ಕರಿ ವಳ್ಯೊಜಾ಼ಸ್ ಕರಿ ಖ್ಹಮ್‌ಜಿನ್‌, “ಪ್ರಭು, ದಾವೀದ್‌ನ ಛಿಯ್ಯಾ! ಹಮಾರಪರ್ ಗೋರ್‌ಕರ್‌” ಕರಿ ಚಿಕ್ರಾಲಗ್ಯಾ.
MAT 20:31 ಯೋ ಭೀಡ್‌ಮ ಥೂತೆ ಅದ್ಮಿಖ್ಹಾರು ಇವ್ಣುನ ಗುರ್‌ಕೈನ್, “ಖ್ಹೊಪೇಥಿರ‍್ಹವೊ” ಕರಿ ಬೋಲ್ಯು. ತೋಬಿ ಭೇ ಕಾಣಾವ್ನೆ ಬಿಜೂ಼ಬಿ ಜೋ಼ರೇಖ್ಹು ಚಿಕ್ರಿನ್, “ಪ್ರಭು, ದಾವೀದ್‌ನ ಛಿಯ್ಯಾ! ಹಮಾರಪರ್ ಗೋರ್‌ ಕರ್‌” ಕರಿ ಬೋಲ್ಯ.
MAT 20:32 ತದೆ ಯೇಸುನೆ ಭೀರಿನ್, ಇವ್ಣುನ ಬುಲೈನ್, “ಮೇ ತುಮೂನ ಶಾತ್ ಕರ‍್ನು?” ಕರಿ ಇವ್ಣುನ ಪುಛಾ಼ಯೊ.
MAT 20:33 ಇವ್ಣೆ, “ಪ್ರಭು, ಹಮಾರ ಡೋಳಾ ದೆಖಾವಾನಿಘೋಣಿ ಕರ್ಲಾ!” ಕರಿ ಬೋಲ್ಯು.
MAT 20:34 ತದೆ ಯೇಸುನೆ ಇವ್ಣಾಪರ್ ಗೋರ್‌ಖೈನ್, ಇವ್ಣ ಡೋಳಾನ ಛೀಮ್ಯೊ. ತದ್‌ನು ತದ್ದೇಸ್ ಇವ್ಣ ಡೋಳಾ ಐಗಯ, ಅಜು಼ ಇವ್ಣೆ ಇನ ಪೀಠೆ ಗಯ.
MAT 21:1 ಯೇಸು ಅಜು಼ ಇನ ಶಿಷ್ಯರ್‌ ಯೆರೂಸಲೇಮ್‌ನ ಖನ್ನೆ-ಖನ್ನೆ ಐನ್, ಆಲಿವ್ ಪಹಾಡ್‌ಕನ ಛಾ಼ತೆ ಬೆತ್ಫಗೆ ಕರಿ ಗಾಮ್‌ಕನ ಆಯಾ. ತದೆ ಯೇಸುನೆ ಇನ ಬೇ ಶಿಷ್ಯರ್‌ನ ಬುಲೈನ್,
MAT 21:2 “ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ, ಜಾ಼ತಸ್‌ನ ಹಿಜ್ಜಾ಼ ಭಂದೈರ‍್ಹೀಶೆತೆ ಗಧೇಡಾನ ಅಜು಼ ಇನಜೋ಼ಡೆ ಛಾ಼ತೆ ಇನ ಚೆಲ್ಕಾನ ದೇಕ್‌ಶು; ಯೋ ಭೇನ ಛೋ಼ಡಿಲಿನ್, ಮಾರಕನ ಲ್ಯಾವೊ.
MAT 21:3 ಕೋಣ್‌ತೋಬಿ ತುಮೂನ ಶಾತ್‌ತೋಬಿ ಬೋಲ್ಯೂತೊ, ‘ಪ್ರಭುನ ಆ ಹೋಣುಕಸ್; ಅಜು಼ ಒಗ್ಗಿಸ್‌ಮ ಯೋ ಅನ ಮೋಕ್ಲಿದಿಶೆ’ ಕರಿ ಬೋಲೊ” ಕರಿ ಬೋಲಿನ್ ಮೋಕ್‌ಲ್ಯೊ.
MAT 21:4 ಏಕ್‌ ಪ್ರವಾದೀನ ಮ್ಹೋಡವಾಟೆ ಬೋಲಾಯೋತೆ ವಾತೆ ಚಾ಼ಲಾನಖ್ಹಾಜೆ ಅಮ್ ಹುಯೂತೆ: ಯೋ ವಾತೆ ಶಾತ್ ಕತೊ,
MAT 21:5 ಚೀಯೋನ್ ನಂಗರ‍್ನ ಬೋಲೊ, ದೇಕ್ ತಾರೊ ರಾಜ಼ ತಾರಕನ ವಳ್ಯಾವಸ್, ಯೋ ಖ್ಹುದ್‌ನ ಝು಼ಕೈಲೀನ್, ಗಧೇಡಾಪರ್ ಬೇಶಿನ್, ಒಹೊ, ಗಧೇಡಾನ ಚೆಲ್ಕಪರ್‌ ಬೇಶಿನ್ ವಳ್ಯಾವಸ್’ ಕರಿ ಬೋಲಾನುಸ್.
MAT 21:6 ತದೆ ಶಿಷ್ಯರ್‌ ಜೈ಼ನ್, ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಕರ‍್ಯು.
MAT 21:7 ಇವ್ಣೆ ಗಧೇಡಾನ ಅಜು಼ ಗಲ್‌ಢ ಚೆಲ್ಕಾನ ಲೈನ್‌, ಇನಪರ್ ಇವ್ಣ ಲುಂಗ್ಡಾವ್‍ನ ನಾಖ್ಯು. ಯೇಸು ಇನಾಪರ್ ಚ಼ಢೀನ್ ಬೇಶಿಗಯೊ.
MAT 21:8 ತದೆ ಅದ್ಮಿನಿ ಝೂ಼ಂಡ್‌ಮ ಥೂತೆ ಘಣು ಅದ್ಮಿ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು, ಬಿಜು಼ ಥೋಡಾನೆ ಝಾ಼ಡಾನಿ ಡಾಳಿಯೇನ ಕತ್ರಿಲೈನ್, ವಾಟ್‌ಪರ್ ನಾಖ್ಯು.
MAT 21:9 ಯೇಸುನ ಖ್ಹಾಮ್ಣೆ ಅಜು಼ ಪೀಠೆ ಝೂ಼ಂಡ್‌ಥಿ ವಳ್ಯುಜಾ಼ತುಥೂತೆ ಅದ್ಮಿಖ್ಹಾರು, “ದಾವೀದ್‌ನ ಛಿಯ್ಯಾನ ಸ್ತುತಿಹುವ್ವಾದೆ! ಪ್ರಭು ದೇವ್ನ ನಾಮ್‌ಪರ್‌ ಆವಾಳಾನ ಆಶೀರ್ವಾದ್‌ ಹುವಾದೆ! ಉಪ್ಪರ್‌ಲ್ಯ ಲೋಕಾಮ ದೇವ್ನ ಧನ್ಯವಾದ್ ಹುವಾದೆ!” ಕರಿ ಚಿಕ್‌ರ‍್ಯು.
MAT 21:10 ಯೇಸು ಯೆರೂಸಲೇಮ್‌ನ ಜಾ಼ವಾದಿನ್, ಯೋ ಖ್ಹಯೇರ್ ಅಖ್ಖುಸ್ ಚಿಕ್ರಾಣ್ ಪಡೀನ್, “ಆ ಕೋಣ್?” ಕರಿ ಅದ್ಮಿಖ್ಹಾರು ಪುಛಾ಼ಯು.
MAT 21:11 ತದೆ ಯೋ ಅದ್ಮಿನಿ ಝೂ಼ಂಡ್‌ನೆ, “ಆ ಪ್ರವಾದಿ ಹುಯಿರ‍್ಹೋತೆ ಯೇಸು, ಆ ಗಲಿಲಾಯಾನು ನಜ಼ರೇತ್‌ವಾಳೊ” ಕರಿ ಜವಾಬ್‌ ದಿದು.
MAT 21:12 ಯೇಸು ಮಂದಿರ್‌ಮ ಜೈ಼ನ್, ಹಿಜ್ಜಾ಼ ವೇಚ಼ವಾಳ ಅಜು಼ ಲ್ಯವಾಳ ತಮಾಮ್‌ ಅದ್ಮಿನ ಭಾರ್‌ ನಖ್ಹಾಡಿದಿದೊ. ಪೈಶಾ ತೋಡಾವಾನು ಧಂದೊ ಕರಾವಾಳಾನ ಅಜು಼ ಪರ‍್ಯಾವೊ ವೇಚ಼ವಾಳಾನು ಮೇಜ್‌ನ ರಡ್‌ಕೈನಾಖಿದಿದೊ.
MAT 21:13 ಅಜು಼ ಇವ್ಣ ಖ್ಹಾರಾನ, “ದೇವ್ನೆ ಬೋಲ್ಯೋತೆ ಇಮ್‌, ‘ಮಾರಿ ಮಂದಿರ್‌ ಪ್ರಾರ್ಥನೇನು ಘರ್ ಕರಿ ಬೋಲೈಲಿಶೆ’ ಕರಿ ವಚನ್‌ಮ ಲೀಖೈರ‍್ಹೂಸ್‌ನಿ ಕತೋಬಿ ತುಮೆ ಇನ ಚೋ಼ರ್‌ನಿ ಲಪಾನಿ ಘವಿ ಕರುಕರಸ್!” ಕರಿ ಬೋಲ್ಯೊ.
MAT 21:14 ತದೆ ಕಾಣು ಅಜು಼ ಲಂಗ್ಡುಖ್ಹಾರು ಮಂದಿರ್‌ಮ ಇನಾಕನ ಆಯು, ಯೇಸುನೆ ಇವ್ಣುನ ಅಛ್ಛು಼ ಕರ‍್ಯೊ.
MAT 21:15 ಕತೋಬಿ ಗಲ್‌ಢಯಾಜಕರ್‌ ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನೆ ಯೇಸುನೆ ಕರ‍್ಯೊತೆ ಆಶ್ಚರ್ಯನು ಕಾಮ್ನಖ್ಹಾರು ಅಜು಼ ದಾವೀದ್‌ನ ಛಿಯ್ಯಾನ ಸ್ತುತಿಹುವ್ವಾದೆ ಕರಿ ಮಂದಿರ್‌ಮ ಚಿಕ್ರುಕರ್ತುಥೂತೆ ಲಡ್ಕಾವ್ನ ದೇಖಿನ್, ಖೀಜ಼್‌ಖಾದು.
MAT 21:16 ಇನಖ್ಹಾಜೆ ಇವ್ಣೆ ಯೇಸುನ, “ಅವ್ಣೆ ಬೋಲುಕರಾತೆ ಇನ ತೂ ಖ್ಹಮ್‌ಜು಼ಕರಾಸ್ಕಿ ಶು?” ಕರಿ ಪುಛಾ಼ವ್‌ತಾನ, ಯೇಸುನೆ, “ಓಹೊ, ಖ್ಹಮ್‌ಜು಼ಕರೂಸ್, ‘ಅಡ್ಡಾಣಿ ಲಡ್ಕಾವ್‍ನ ಮ್ಹೋಡವಾಟೆ ಅಜು಼ ದೂದ್ ಪಿಯ್ಯಾವಾಳ ಲಡ್ಕಾವ್ನ ಮ್ಹೋಡವಾಟೆ ಸ್ತುತಿ ಕರಾಯೊ’ ಕರಿ ವಚನ್‌ಮ ಛಾ಼ತೆ ಇನ ತುಮೆ ಪಢ್ಯಾಕೊಯ್ನಿಕಿ ಶು?” ಕರಿ ಬೋಲ್ಯೊ.
MAT 21:17 ಅನಕೇಡೆಥು ಯೇಸು ಇವ್ಣುನ ಮ್ಹೆಂದಿನ್, ಖ್ಹಯೇರ್‌ಥು ನಿಕ್ಳಿನ್, ಬೇಥಾನ್ಯ ಗಾಮ್ಮ ಐನ್, ಹಿಜ್ಜಾ಼ಸ್ ರಾತ್‌ ಕಾಡ್ಯೊ.
MAT 21:18 ತಿನವ್ಹಾಣೆ ಯೇಸು ಪಾಛೊ಼ಫರಿ ಯೆರೂಸಲೇಮ್‌ ಖ್ಹಯೇರ‍್ನ ಜಾ಼ವಾನಿ ವಖ್ಹತ್‌ಮ, ಯೇಸುನ ಭುಕ್‌ಲಾಗ್ಯು.
MAT 21:19 ಇನೆ ವಾಟ್ನ ಶೇಡೆಏಕ್‌ ಅಂಜೀರ್‌ನ ಝಾ಼ಡಾನ ದೇಖಿನ್, ಇನಖನ್ನೆ ಜೈ಼ನ್, ಇನಾಮ ಖಲಿ ಪಾಂದ್‍ಡುಸ್ ಪಣ್ಕಿ, ಬಿಜು಼ ಶಾತ್ಬಿ ಕೋಥುಂತೆ ದೇಖಿನ್, “ಅನಾಪರ್‌ಥು ತೂ ಬಿಜು಼ ಕದೆಕದೇಬಿ ಪಂಡು ನಾ ಮ್ಹೇಲ್‌ನೂತೆ ಇಮ್‌ ಹುವಾದೆ!” ಕರಿ ಬೋಲ್ಯೊ. ತದ್‌ನು-ತದ್ದೇಸ್ ಯೋ ಅಂಜೀರ್‌ನು ಝಾ಼ಡು ಖ್ಹುಕೈಗಯು.
MAT 21:20 ಶಿಷ್ಯರ್‌ನೆ ಅನ ದೇಖಿನ್, ಆಶ್ಚರ್ಯಖೈನ್, “ಅಂಜೀರ್‌ನು ಝಾ಼ಡ್ ಎಕ್ಕಸ್ ಘಡೀಮ ಖ್ಹುಕೈಗಯೂತೆ ಕಿಮ್?” ಕರಿ ಪುಛಾ಼ಯ.
MAT 21:21 ಯೇಸುನೆ, “ತುಮುನ ಖ್ಹಾಚ ಬೋಲುಸ್, ತುಮೆ ಗುಮಾನಿ ಕರಾಕೊಂತೆ ಇಮ್‌ ವಿಶ್ವಾಸ್ ಕರ‍್ಯಾತೊ, ಮೇ ಆ ಅಂಜೀರ್‌ನ ಝಾ಼ಡಾನ ಕರ‍್ಯೊತೆ, ಇಮ್ಮಸ್, ತುಮೇಬಿ ಕರ್ಶು. ಅಜು಼ ಎತ್ರೆಸ್ ಕಾಹೆತೆ,ಆ ಪಹಾಡ್‌ನ, ‘ತೂ ಉಖ್‌ಡೈ ಜೈ಼ನ್, ದರ‍್ಯಾವ್‌ಮ ಪಡ್’ ಕರಿ ಬೋಲ್ಯಾತೋಬಿ ಯೋ ಉಶೆ.
MAT 21:22 ತುಮೆ ನಂಬಿನ್, ಪ್ರಾರ್ಥನೆಮ ಶಾತ್ ಮಾಂಗೋಸ್‌ಕಿ ಯೋ ತುಮೂನ ಮಳ್‌ಶೆ” ಕರಿ ಬೋಲ್ಯೊ.
MAT 21:23 ಯೇಸು ಪಾಛೊ಼ ಮಂದಿರ್‌ಮ ಐನ್, ವಚನ್ನ ಬೋಲಿದೆವ್‍ಕರಾನಿ ವಖ್ಹತ್‌ಮ, ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಇನಾಕನ ಆಯಿನ್, “ತೂ ಖೆವಿ ಹಕ್‌ಥಿ ಆ ಖ್ಹಾರು ಕರುಕರಸ್? ಆ ಹಕ್ನ ತುನ ದಿದೂತೆ ಕೋಣ್?” ಕರಿ ಪುಛಾ಼ಯು.
MAT 21:24 ಯೇಸುನೆ ಇವ್ಣುನ, “ಮೇ ತುಮೂನ ಏಕ್‌ ಸವಾಲ್ ಪುಛಾ಼ವ್‍ಸ್, ತುಮೆ ಮನ ಜ಼ವಾಬ್ ದಿದಾತೊ, ಮೇ ಹಕ್‌ಥಿ ಆ ಖ್ಹಾರು ಕರುಸ್ ಕರಿ ತುಮೂನ ಬೋಲುಸ್.
MAT 21:25 ಬ್ಯಾಪ್ತಿಸ್ಮ ದ್ಯವಾನಿ ಹಕ್ ಯೋಹಾನ್ನ ಕಿಜ್ಜಾ಼ಥಿ ಆಯಿ? ಪರಲೋಕ್‌ಥೀಕಿ, ನತರ್‌ಕಿ ಅದ್ಮಿಥಿ?” ಕರಿ ಪುಛಾ಼ಯೊ. ತದೆ ಇವ್ಣೆ, “ದೇವ್‍ಥಿ ಆಯು ಕರಿ ಅಪ್ಣೆ ಬೋಲ್ಯಾತೊ, ‘ಇಮ್‍ಕತೊ, ತುಮೆ ಇನ ಶನ ನಂಬ್ಯಾಕೊಯ್ನಿ’ ಕರಿ ಅಪ್ಣುನ ಬೋಲ್‌ಶೆ.
MAT 21:26 ‘ಅದ್ಮಿಥಿ ಆಯು’ ಕರಿ ಬೋಲ್ಯಾತೊ, ಅಪ್ಣುನ ಅದ್ಮಿನೊ ಡರ್‌ ಛಾ಼” ಕರಿ ಇವ್ಣ-ಇವ್ಣ ಮಹಿಸ್ ಬೋಲಿಲಿದು. ಶನಕತೊ, ಯೋಹಾನ ಏಕ್‌ ಪ್ರವಾದಿ ಕರಿ ತಮಾಮ್‌ ಅದ್ಮಿ ಶಕ್‌ಕೊಂತೆ ಇಮ್‌ ನಂಬಿರಾಖ್ಯುಥು.
MAT 21:27 ಇನಖ್ಹಾಜೆ ಇವ್ಣೆ, “ಹಮೂನ ಮಾಲುಮ್ ಕೊಯ್ನಿ” ಕರಿ ಯೇಸುನ ಜ಼ವಾಬ್ ದಿದು. ತದೆ ಯೇಸುನೆ ಇವ್ಣುನ, “ಮೇಬಿ ಖೆವಿ ಹಕ್‌ಥಿ ಆ ಖ್ಹಾರು ಕರುಸ್ ಕರಿ ತುಮೂನ ಕೋ ಬೋಲೂನಿ” ಕರಿ ಬೋಲ್ಯೊ.
MAT 21:28 “ಕತೋಬಿ ತುಮೂನ ಕಿಮ್ ದೆಖಾವಸ್? ಏಕ್‌ ಅದ್ಮಿನ ಬೇ ಛಿಯ್ಯಾ ಥಾ. ಇನೆ ಇನ ಮೋಟಾ ಛಿಯ್ಯಾಕನ ಜೈ಼ನ್, ‘ಛಿಯ್ಯಾ, ಆಜ಼್ ತೂ ಜೈ಼ನ್, ದ್ರಾಕ್ಷಿನ ಬಾಗ್‌ಮ ಕಾಮ್ ಕರ್‌’ ಕರಿ ಬೋಲ್ತಾನ,
MAT 21:29 ಇನೆ, ‘ಮೇ ಕೋ ಜ಼ವ್‍ನಿ’ ಕರಿ ಬೋಲೀನ್‌ಬಿ, ಬಾದ್‌ಮ ಮನ್ ಫರೈಲಿನ್, ಬಾಗ್‌ಮ ಗಯೊ.
MAT 21:30 ಇನಕೇಡೆಥು ಬಾನೆ ನ್ಹಾನ ಛಿಯ್ಯಾಕನ ಜೈ಼ನ್, ಯೋಸ್ ವಾತೇನ ಬೋಲ್ಯೊ. ತದೆ ಇನೆ, ‘ಜ಼ವುಸ್‌ಲಾ ಬಾ’ ಕರಿ ಬೋಲಿನ್‌ಬಿ ಕೋಸ್‍ಗಯೋನಿ.
MAT 21:31 ಇವ್ಣ ಭೇಮ ಬಾನಿ ಮರ್ಜಿನಿಘೋಣಿ ಚಾ಼ಲಿಲಿದುತೆ ಕೋಣ್?” ಕರಿ ಪುಛಾ಼ವ್‌ತಾನ, ಇವ್ಣೆ, “ಮೋಟೊ ಛಿಯ್ಯೋಸ್” ಕರಿ ಬೋಲ್ಯು. ತದೆ ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚ ಬೋಲುಸ್: ಶುಂಕ ಮಾಂಗವಾಳು ಅಜು಼ ಶೂಳೆ ತಯೇಡ ಖ್ಹಾರಿ ತುಮಾರೇಥಿ ಅಗಾಡಿ ದೇವ್ನಿ ರಾಜ್ಯಮ ಜಾ಼ಶೆ.
MAT 21:32 ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ತುಮಾರಕನ ಆಯಿನ್, ತುಮೂನ ಜಿವಾನೊ ಬರೋಬರ್‌ನ ಮಾರಗ್‌ನ ವತಾಳ್ಯೊ, ತೋಬಿ ತುಮೆ ಇನ ನಂಬ್ಯಾಕೊಯ್ನಿ; ಕತೋಬಿ ಶುಂಕ ಮಾಂಗವಾಳು ಅಜು಼ ವ್ಯಬಿಚಾರ್‌ ಕರವಾಳು ಖ್ಹಾರು ಇನ ನಂಬ್ಯು. ಅನ ದೇಖಿನ್‌ಬಿ ತುಮೆ ತುಮಾರು ಮನ್‍ಫರಾಯಕೊಯ್ನಿ, ಇನಾಬಿ ನಂಬ್ಯಾ ಕೊಯ್ನಿ.
MAT 21:33 “ಬಿಜೇಕ್ ಮತ್ಲಬ್‌ನಿ ಖೇಣಿನ ಖ್ಹಮ್‌ಜೊ಼: ಏಕ್‌ ಜ಼ಮೀನ್‌ದಾರ್ ಥೊ. ಇನೆ ಇನಿ ಜ಼ಮೀನ್‌ಮ ದ್ರಾಕ್ಷಿನೊ ಬಾಗ್‌ನ ಬಣೈನ್, ಇನ ಅಶ್‌ಪಿಶ್ ವಾಡ್‌ಗಿ ನಖೈನ್, ದ್ರಾಕ್ಷಿನೊರಖ್ಹ್ ಕಾಡಾನಖ್ಹಾಜೆ ಖಾಡ್ ಖೋಂದೈನ್, ಕಾವ್ಲಿನಖ್ಹಾಜೆ ಅಟ್‌ಲೊ ಭಂದಾಯೊ. ಅನಕೇಡೆಥು ಯೋ ಬಾಗ್‌ನ ಇನೆ ವಾರ್‌ನ ಕರಾವಾಳನ ಹಾತ್‌ಮ ದೀನ್, ದೇಖ್ಹ್‌ಪರ್ ಚ಼ಲೆಗಯೊ ಕರಿ ಯೇಸುನೆ ಬೋಲ್ಯೊ.
MAT 21:34 ಪಂಡಾ ತೋಡಾನಿ ವಖ್ಹತ್ ಆವಾದಿನ್, ಇನ ಆವ್ಣುತೆ ಭಾಗ್‌ ಲ್ಯವಾನಖ್ಹಾಜೆ ಯೋ ವಾರ್‌ನ ಕರಿರಾಖವಾಳಕನ ಇನ ಆಳ್‌ನ ಖ್ಹಾರು ಮೋಕ್‌ಲ್ಯೊ.
MAT 21:35 ಕತೋಬಿ ಯೋ ವಾರ್‌ನ ಕರಿರಾಖವಾಳಾವ್‍ನೆ ಇನ ಆಳ್‌ನ ಖ್ಹಾರು ಧರೀನ್, ಏಕ್‌ನ ಮಾರ‍್ಯು, ಬಿಜೇಕ್‌ನ ಮಾರಿಸ್‌ನಾಖ್ಯು, ಅಜು಼ ಏಕ್‌ನ ಬಂಡಾ ಫೇಕಿನ್ ಮಾರ‍್ಯು.
MAT 21:36 ಯೋ ಬಾಗ್‌ನ ಯಜಮಾನ್ನೆ ಪಾಛೊ಼ ಅಗಾಡಿ ಮೋಕ್‌ಲ್ಯೋಥೋತೆ ಇನೇಥಿಬಿ ಜಾ಼ಖ್ಹತ್ ಆಳ್‌ನ ಖ್ಹಾರು ಮೋಕ್‌ಲ್ಯೊ. ವಾರ್‌ನ ಕರಿರಾಖವಾಳನೆ ಇವ್ಣುನಾಬಿ ಇಮ್ಮಸ್ ಕರ‍್ಯು.
MAT 21:37 ಬಾದ್‌ಮ, ‘ಮಾರ ಛಿಯ್ಯಾನ ತೋಬಿ ಮರ್ಯಾದಿ ದಿಶೆ’ ಕರಿ ಬೋಲಿನ್, ಇನ ಛಿಯ್ಯಾನ ಇವ್ಣಾಕನ ಮೋಕ್‌ಲ್ಯೊ.
MAT 21:38 ಕತೋಬಿ ಯೋ ವಾರ್‌ನ ಕರಿರಾಖವಾಳು ಖ್ಹಾರು ಇನ ಛಿಯ್ಯಾನ ದೇಖಿನ್, ‘ಆಸ್ ಮಾಲಿಕ್‌ನೊ ಛಿಯ್ಯೊ, ಆವೊ, ಅನ ಮಾರಿನಾಖಿದಿಯ್ಯೆ, ತದೆ ಇನು ಶೊತ್ ಅಪ್ಣು ಹುಯಿಜಾ಼ಶೆ’ ಕರಿ ಇವ್ಣ-ಇವ್ಣಾಮ ವಾತೆ ಬೋಲಿಲೀನ್,
MAT 21:39 ಇನ ಧರೀನ್, ದ್ರಾಕ್ಷಿನ ಬಾಗ್‌ಥಿ ಭಾರ್ ಫೇಕಿನ್, ಇನ ಮಾರಿನಾಖ್ಯು.
MAT 21:40 ಇಮ್‍ಕತೊ, ದ್ರಾಕ್ಷಿನೊ ಬಾಗ್‌ನೊ ಯಜಮಾನ್ ಆವಾದಿನ್, ಯೋ ವಾರ್‌ನ ಲೀರಾಖ್ಯುಥೂತೆ ಇವ್ಣುನ ಶಾತ್ ಕರ್ಶೆ?” ಕರಿ ಯೇಸುನೆ ಇವ್ಣುನ ಪುಛಾ಼ಯೊ.
MAT 21:41 ಇವ್ಣೆ ಇನ, “ಯೋ ಖರಾಬ್ ಅದ್ಮಿ ಖ್ಹಾರಾನ ಮಾರಿನಾಖಿದೀನ್, ಖ್ಹುಗ್ಗೀನ ದನ್ಮ ಇನು ವಾಟೊ ಬರೋಬರ್‌ಥಿ ದ್ಯವಾಳ ಬಿಜ಼ ವಾರ್‌ನ ಕರಾವಾಳಾನ ಇನ ಬಾಗ್‌ನ ದಿಶೆ” ಕರಿ ಜವಾಬ್‌ ದಿದು.
MAT 21:42 ಯೇಸುನೆ ಇವ್ಣುನ, “ಘರ್ ಭಾಂದಾವಾಳು ನಕೊಕರಿ ಧಕೇಲೈ ಗಯೋತೆ ಬಂಡೋಸ್, ಅಖ್ಖೇಥಿ ಹೋಣುತೆ ಕೋಣಾನೊ ಬಂಡೊ ಹುಯೊ. ‘ಆ ಪ್ರಭುನೇಸ್ ಕರ‍್ಯೊತೆ, ಆ ಅಪ್ಣ ಡೋಳಾಮ ಆಶ್ಚರ್ಯ ದೆಖಾವಸ್!’ ಕರಿ ಧರ್ಮಶಾಸ್ತ್ರಮ ಛಾ಼ತೆ ತುಮೆ ಕದೆತೋಬಿ ಪಢ್ಯಾಕೊಯ್ನಿಕಿ ಶು?
MAT 21:43 ಇನಖ್ಹಾಜೇಸ್ ಮೇ ತುಮೂನ ಬೋಲುಸ್ಕಿ: ದೇವ್ನಿ ರಾಜ್ಯನ ತುಮಾರಕಂಥು ಕಾಡಿಲೀನ್, ದೇವ್ನಿ ಮರ್ಜಿನಿಘೋಣಿ ಚಾ಼ಲಾಸ್ತೆ ಅದ್ಮಿನ ದೆವಾವ್‌ಶೆ.
MAT 21:44 ಆ ಬಂಡಾಪರ್ ಪಡಾವಾಳು ಟುಕ್‌ಡಾ-ಟುಕ್‌ಡಾ ಹುಯಿಜಾ಼ಶೆ; ಅಜು಼ ಆ ಬಂಡೊ ಕಿನಾಪರ್ ಪಡಾಸ್ಕಿ, ಇವ್ಣುನ ಬುಕ್‍ನು-ಬುಕ್‍ನು ಕರಿನಾಕ್‌ಶೆ” ಕರಿ ಬೋಲ್ಯೊ.
MAT 21:45 ಗಲ್‌ಢಯಾಜಕರ್‌ ಅಜು಼ ಫರಿಸಾಯರ್‌ನೆ ಯೇಸುನೆ ಬೋಲ್ಯೋತೆ ಮತ್ಲಬ್‌ನಿ ಖೇಣಿಯೇನ ಖ್ಹಮ್‌ಜಿನ್‌, ಆ ಅಪ್ಣೀಸ್‌ ಬಾರೇಮ ಬೋಲ್ಯೋತೆ ಕರಿ ಮಾಲುಮ್‌ ಕರಿಲೀನ್,
MAT 21:46 ಇನ ಧರ್‌ನು ಕರಿ ಕರ‍್ಯು. ಕತೋಬಿ ಅದ್ಮಿಖ್ಹಾರು ಯೇಸುನ ಪ್ರವಾದಿ ಕರಿ ಮಾನಿರಾಖ್ಯುಥೂತೆ ಇನಖ್ಹಾಜೆ ಅದ್ಮಿಥಿ ಡರಿಗಯು.
MAT 22:1 ಯೇಸುನೆ ಬಿಜೂ಼ಬಿ ಮತ್ಲಬ್‌ನಿ ಖೇಣಿಥಿ ಅದ್ಮಿ ಖ್ಹಾರಾನ ಬೋಲ್ಯೋಕಿ,
MAT 22:2 “ಸೊರ್ಗಾನು ರಾಜ್ಯ ಇನ ಛಿಯ್ಯಾನಿ ವ್ಯಹಾ ಕರ‍್ಯೊತೆ ಏಕ್‌ ರಾಜಾ಼ನಿಘೋಣಿ ಛಾ಼.
MAT 22:3 ಇನೆ ವ್ಯಹಾನು ಮಿಝ಼್‌ವಾನ್ ಖಾವಾನ ಬುಲಾಯೊಥೋತೆ ಮೆಹೆಮಾನ್ನಖ್ಹಾರು ಬುಲಾವಾನಟೇಕೆ ಇನ ಆಳ್‌ನ ಖ್ಹಾರು ಮೋಕ್‌ಲ್ಯೊ, ಕತೋಬಿ ಇವ್ಣುನ ಆವಾನ ಮನ್ ಕೋ ಥೂನಿ.
MAT 22:4 ತದೆ ಇನೆ ಪಾಛೊ಼ ಬಿಜಾ಼ಖ್ಹಾರ ಆಳ್‌ನ ಬುಲೈನ್, ‘ತುಮೆ ಜೈ಼ನ್, ಮೇ ಮಿಝ಼್‌ವಾನ್ನ ಬುಲಾಯೊಥೋತೆ ಇವ್ಣುನ, ಹಂದೇಖೊ, ಮಿಝ಼್‌ವಾನ್ ತೈಯಾರ್ ಹುಯಿಗಯು, ಮಾರು ಢಾಂಡಾವ್‍ನ ಅಜು಼ ಪಲ್ಯಹುಯ ಮೇಂಢಾವ್ನ ರ‍್ಹೇ಼ಖ್ಹಯ್‌ರಾಖ್ಯೋಸ್; ಖ್ಹಾರುಸ್ ತೈಯಾರ್ ಹುಯಿಗಯು. ವ್ಯಹಾನು ಮಿಝ಼್‌ವಾನ್ ಖಾವಾನ ಆವೊ’ ಕರಿ ಬೋಲೊ” ಕರಿ ಹುಕುಮ್‌ ದೀನ್, ಮೋಕ್‌ಲ್ಯೊ.
MAT 22:5 ಕತೋಬಿ ಇವ್ಣೆ ಮಜು಼ರಸ್ ಕರ‍್ಯುಕೊಂತೆ ಏಕ್‌ ಜ಼ಣೊ ಖೇತರ್‌ನ, ಏಕ್‌ ಜ಼ಣೊ ಧಂದಾನ ಚ಼ಲೆಗಯೊ.
MAT 22:6 ಬಿಜು಼ ಥೋಡು ಜ಼ಣು ಯೋ ಆಳ್‌ನ ಖ್ಹಾರು ಧರೀನ್, ಇವ್ಣುನ ಮಾರಿನ್, ಮರ್‌ನಾಖಿದಿದು.
MAT 22:7 ತದೆ ಯೋ ರಾಜಾ಼ನೆ ಘಣು ಖಿಜೈ಼ನ್, ಇನು ದಂಡ್‌-ದಳ್‌ವಾಯಿನ ಮೋಕ್ಲಿನ್, ಇನ ಆಳ್‌ನ ಖೂನಿಯೇವ್ನ ಮರೈನಾಖ್ಯೊ ಅಜು಼ ಇವ್ಣು ಖ್ಹಯೇರ‍್ನ ಬಾಳಿನಾಖ್ಯೊ.
MAT 22:8 ಅನಕೇಡೆಥು ಇನೆ ಇನ ಆಳ್‌ ಖ್ಹಾರಾನ, “ವ್ಯಹಾನು ಮಿಝ಼್‌ವಾನ್ ತೈಯಾರ್ ಛಾ಼, ಕತೋಬಿ ಮೇ ಬುಲಾಯೊಥೋತೆ ಅದ್ಮಿಖ್ಹಾರು ಇನ ಲ್ಹಾಯಕ್‌ನು ಕೋ ಥೂನಿ.
MAT 22:9 ಇನಖ್ಹಾಜೇಸ್ ತುಮೆ ಗಲ್ಲಿ-ಗಲ್ಲಿಯೇಮ ಜೈ಼ನ್, ತುಮೂನ ದೆಖಾವಸ್ತೆ ಅದ್ಮಿಖ್ಹಾರಾನ ಬುಲಾವೊ” ಕರಿ ಬೋಲ್ಯೊ.
MAT 22:10 ಇಮ್ಮಸ್ ಯೋ ಆಳ್‌ಖ್ಹಾರು ಗಲ್ಲಿ ಗಲ್ಲಿಯೇಮ ಜೈ಼ನ್, ಅಛ಼್ಛು ಖರಾಬ್ ಕರಿ ದೇಖ್ಯುಕೊಂತೆ, ಇವ್ಣುನ ಮಳಾತೆ ಖ್ಹಾರ ಅದ್ಮಿನ ಎಕ್ಟು ಕರಿನ್, ಬುಲೈಲಿ ಆಯೊ; ಅಮ್ ಯೋ ವ್ಯಹಾನುಮಂಟಪ್ ಅಖ್ಖುಸ್ ಅದ್ಮಿ ಭರೈಗಯು.
MAT 22:11 ಅನ ಬಾದ್‌ಮ ಯೋ ರಾಜಾ಼ನೆ ಖಾಣನ ಬೆಠುಥೂತೆ ಇವ್ಣುನ ದೇಖಾನಖ್ಹಾಜೆ ಆಯೊ, ತದೆ ವ್ಯಹಾನು ಲುಂಗ್ಡ ಪೇರ‍್ಹಿರಾಖ್ಯುಕೊಂತೆ ಏಕ್‌ ಅದ್ಮಿನ ದೇಖಿನ್,
MAT 22:12 ‘ಅಲಾ ದೋಸ್ತ್, ವ್ಯಹಾನು ಲುಂಗ್ಡ ಕೊಂತೆ ತೂ ಕಿಮ್ ಮಹಿ ಆಯೊ?’ ಕರಿ ಪುಛಾ಼ಯೊ. ಕತೋಬಿ ಯೋ ಅದ್ಮಿನೆ ಶಾತ್ಬಿ ಜ಼ವಾಬ್ ಕೋ ದಿದೋನಿ.
MAT 22:13 ತದೆ ಯೋ ರಾಜಾ಼ನೆ ಇನ ಆಳ್‌ನ ಖ್ಹಾರು, ‘ಅನ ಹಾತ್-ಗೋಡ ಭಾಂದಿನ್, ಭಾರ್‌ ಅಂಧಾರಾಮ ಫೇಕಿದೆವೊ’ ಕರಿ ಬೋಲ್ಯೊ. ಹಿಜ್ಜಾ಼ ಅದ್ಮಿಖ್ಹಾರು ರೊವ್‌ತುಹುಯಿನ್, ಕರ್‌-ಕರ್‌ ದಾತ್‌ ಚಾ಼ವ್ತು ರ‍್ಹಿಶೆ.
MAT 22:14 ಅಮ್ ಬುಲಾಯೂತೆ ಘಣು ಅದ್ಮಿನ, ಕತೋಬಿ ಚೂ಼ಣಾಯೂತೆ ಥೋಡುಸ್ ಅದ್ಮಿ” ಕರಿ ಯೇಸುನೆ ಬೋಲ್ಯೊ.
MAT 22:15 ತದೆ ಫರಿಸಾಯರ್ ಜೈ಼ನ್, ಯೇಸುನ ವಾತೇಮ ಖ್ಹಪ್‌ಡಾವ್ಣು ಕರಿ ವಾತೆ ಕರಿಲೀನ್, ಇನಾಕನ ಆಯು.
MAT 22:16 ಪರಿಸಾಯರ್‌ನು ಶಿಷ್ಯರ್‌ಮ ಥೋಡಾನ ಅಜು಼ ಹೆರೋದ ಭಣಿವಾಳ ಥೋಡು ಅದ್ಮಿನ ಮೋಕ್‍ಲ್ಯು. ಇವ್ಣೆ ಐನ್, “ಗುರು, ತೂ ಖ್ಹಾಚಿಸ್ ಬೋಲಾಸ್ ಕರಿ ಹಮೂನ ಮಾಲುಮ್. ತೂ ಅದ್ಮಿನಖ್ಹಾಜೆ ಛಾ಼ತೆ ದೇವ್ನಿ ಮರ್ಜಿನಿ ಬಾರೇಮ ಖ್ಹಾಚಿಸ್ ಬೋಲಿವತಾಳಸ್, ಎತ್ರೇಸ್ ಕಾಹೆತೆ ಅದ್ಮಿಖ್ಹಾರು ಶಾತ್‌ ಸೋಚ್‌ಶೆ ಕರಿ ಬೋಲಾನಿ ಬಾರೇಮ ತುನ ಫಿಕರ್ ಕೊಯ್ನಿ, ಶನಕತೊ, ತು ಕಿನಾಬಿ ಮ್ಹೋಡು ದೇಖಿನ್, ವಾತೆ ಬೋಲಾಕೊಯ್ನಿ.
MAT 22:17 ಇನಖ್ಹಾಜೇಸ್ ಹಮೂನ ಬೋಲ್, ಕೈಸರ್‌ನ ಶುಂಕ ಭಾಂದಾನು ನಿಯಮ್‌ಕಿ ಕೊಯ್ನಿ? ತುನ ಕಿಮ್ ದೆಖಾವಸ್?
MAT 22:18 ಯೇಸುನೆ ಇವ್ಣಿ ಖರಾಬ್ ಚಾ಼ಲ್‌ನ ಮಾಲುಮ್‌ ಕರಿಲೀನ್, “ತುಮೆ ಖೋಟ್ ದಿಲ್‌ವಾಳ! ತುಮೆ ಮನ ಖ್ಹಪ್‌ಡಾವ್ಣು ಕರಿ ಶನ ದೇಖೋಸ್ತೆ?
MAT 22:19 ಶುಂಕ ಭಾಂದಾಸ್ತೆ ಪೈಶಾನ ಮನ ವತಾಳೊ!” ಕರಿ ಬೋಲ್ಯೊ. ಇವ್ಣೆ ಏಕ್ಕಾಖ್ಹ್‌ ಲಯಿನ್ ಇನ ದಿದು.
MAT 22:20 ತದೆ ಯೇಸುನೆ ಇವ್ಣುನ, “ಅನಾಪರ್ ಕಿನು ರೂಪ್ ಅಜು಼ ಕಿನುನಾಮ್‍ ಛಾ಼ತೆ?” ಕರಿ ಪುಛಾ಼ಯೊ.
MAT 22:21 ಇವ್ಣೆ, “ಕೈಸರ್‌ನು” ಕರಿ ಜ಼ವಾಬ್ ದಿದು. ತದೆ ಯೇಸುನೆ ಇವ್ಣುನ, “ಇಮ್‍ಕತೊ, ಕೈಸರ್‌ನು ಶಾತ್ ಛಾ಼ಕಿ, ಯೋ ಕೈಸರ್‌ನ ದೆವೊ, ಅಜು಼ ದೇವ್‌ನು ಶಾತ್‌ ಛಾ಼ಕಿ, ಯೋ ದೇವ್ನ ದೆವೊ” ಕರಿ ಬೋಲ್ಯೊ.
MAT 22:22 ಇವ್ಣೆ ಆ ವಾತೇನ ಖ್ಹಮ್‌ಜಿನ್‌, ಆಶ್ಚರ್ಯಖೈನ್, ಇನ ಮ್ಹೆಂದಿನ್, ಚ಼ಲ್ಯುಗಯು.
MAT 22:23 ಯೋಸ್ ದನ್ನೆ ಸದ್ದುಕಾಯವಾಳು ಯೇಸುಕನ ಆಯು. ಅವ್ಣೆ ಮರ‍್ಯುಹುಯು ಅದ್ಮಿ ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ ಕರಿ ಬೋಲಾವಾಳು.
MAT 22:24 ಇವ್ಣೆ ಯೇಸುನ, “ಗುರು, ಏಕ್‌ ಅದ್ಮಿ ಲಡ್ಕಾಕೊಂತೆ ಮರಿಗೋತೊ, ಇನಿ ಬಾವಣ್ಣ ಇನೊ ಭೈ ಕರಿಲೇವ್ಣು, ಅಜು಼ ತದೆ ಇವ್ಣುನ ಲಡ್ಕಾ ಹುಯಾತೊ, ಯೋ ಲಡ್ಕಾ ಮರ‍್ಯೋತೆ ಭೈನ ಲಡ್ಕಾ ಹುಯಿರ‍್ಹಿಶೆ ಕರಿ ಮೋಶೆನೆ ಬೋಲಿರಾಖ್ಯೊಸ್.’
MAT 22:25 ಹಜ್ಜಾ಼ ಖ್ಹಾತ್ ಜ಼ಣ ಭೈಯೆ ಥಾ. ಮೋಟೊ ಭೈ ವ್ಯಹಾ ಕರಿಲೀನ್, ಲಡ್ಕಾ ಕೊಯ್ನಿತೇಸ್ ಮರಿಗಯೊ, ಇನಖ್ಹಾಜೇಸ್ ಇನ ಭೈನೆ ಇನಿ ಬಾವಣ್ಣ ಕರಿಲಿದೊ.
MAT 22:26 ಯೋ ಬೇನೊ ಭೈನಾಬಿ ಇಮ್ಮಸ್ ಹುಯು, ಅಮ್ಮಸ್ ತೀನ್ನೊ ಭೈನಾಬಿ, ಅಜು಼ ಖ್ಹರ್ತಿಮ ಖ್ಹಾತೆ ಭೈಯೇನಾಬಿ ಇಮ್ಮಸ್ ಹುಯು.
MAT 22:27 ಆ ಖ್ಹಾರಾನ ಬಾದ್‌ಮ ಯೋ ತಯೇಡಾಬಿ ಮರಿಗೈ.
MAT 22:28 ಇಮ್‍ಕತೊ, ಮರವಾಳು ಜಿವ್ತುಹುಯಿನ್, ಆವ್‌ಶೇತೆ ತದೆ ಯೋ ತಯೇಡ ಖೆವಾನಿ ಬಾವಣ್‍ ಹುಯಿರ‍್ಹಿಶೆ? ಇವ್ಣೆ ಖ್ಹಾರಾಸ್ ಇನ ವ್ಯಹಾ ಕರಿಲಿದಾಥಾನಿ?” ಕರಿ ಪುಛಾ಼ಯು.
MAT 22:29 ಯೇಸುನೆ ಇವ್ಣುನ, “ತುಮೆ ಕೆತ್ರೆ ಗಲ್ತಿಮ ಪಡ್ಯಾಸ್ತೆ ದೇಖೊ! ಶನಕತೊ ತುಮೂನ ದೇವ್ನಿ ವಚನ್‌ಬಿ ನಾತೊ ದೇವ್ ಕೆತ್ರೆ ಶಕತ್‌ವಾಳೊ ಕರೀಬಿ ಮಾಲುಮ್‌ಕೊಂತೆ ಇನಖ್ಹಾಜೇಸ್.
MAT 22:30 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ತದೆ, ಇವ್ಣೆ ಸೊರ್ಗಾನು ದೂತರ್‌ನಿ ಘೋಣಿ ರ‍್ಹಿಶೆ, ಅಜು಼ ಇವ್ಣೆ ವ್ಯಹಾ ಕರ್ಶೆ ಕೊಯ್ನಿ.
MAT 22:31 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ಬಾರೇಮ ದೇವ್ನೆ ಬೋಲ್ಯೋತೆ ಇನ ತುಮೆ ಪಢ್ಯಾಕೊಯ್ನಿಕಿ ಶು?
MAT 22:32 ‘ಮೇ ಅಬ್ರಹಾಮ್‌ನೊ ದೇವ್, ಇಸಾಕನೊ ದೇವ್, ಯಾಕೋಬನೊ ದೇವ್ ಕರಿ ಯೋ ಜಿವ್ತಾ ಅದ್ಮಿನೊ ದೇವ್ ಹುಯಿರ‍್ಹೋಸ್, ಪಣ್ಕಿ ಮರ‍್ಯಾಹುಯಾನೊ ಕಾಹೆ” ಕರಿ ಬೋಲ್ಯೊ.
MAT 22:33 ಅದ್ಮಿಖ್ಹಾರು ಇನ ಖ್ಹಮ್‌ಜಿನ್‌, ಯೋ ಬೋಲಿವತಾಳಾಸ್ತೆ ಬಾರೇಮ ಆಶ್ಚರ್ಯ ಖಾದು.
MAT 22:34 ಯೇಸುನೆ ಬರೋಬರ್‌ನು ಜ಼ವಾಬ್‌ದೀನ್, ಸದ್ದುಕಾಯವಾಳನು ಮ್ಹೋಡು ಭಾಂದ್ಯೊ ಕರಿ ಫರಿಸಾಯರ್‌ನೆ ಖ್ಹಮ್‌ಜಿನ್‌, ಇವ್ಣೆ ಎಕ್ಟು ಹುಯಿನ್ ಹಿಜ್ಜಾ಼ ಆಯು.
MAT 22:35 ಇವ್ಣಾಮ ಥೋತೆ ಮೋಶೆನಿ ವಚನ್‍ ಶಿಕಾಡವಾಳೊ ಶಾಸ್ತ್ರಿಮ ಏಕ್‍ಜ಼ಣೊ ವಾತೆಥಿ ಯೇಸುನ ಖ್ಹಪ್‌ಡಾವ್ಣು ಕರಿ,
MAT 22:36 “ಗುರು, ಧರ್ಮಶಾಸ್ತ್ರನಿ ನಿಯಮ್ ಖ್ಹಾರೇಥಿ ಮೋಟಿ ಹುಕುಮ್ ಖೆವಿ?” ಕರಿ ಪುಛಾ಼ಯೊ.
MAT 22:37 ಯೇಸುನೆ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ತಾರೊ ಪೂರ ದಿಲ್‌ಥಿ, ಪೂರ ಜಾನ್‌ಥಿ, ತಾರೊ ಪೂರ ಮನ್‌ಥಿ ಪ್ಯಾರ್‌ಕರ‍್ನು.
MAT 22:38 ಆಸ್ ಖ್ಹಾರೇಥಿ ಮೋಟಿ ಅಜು಼ ಮುಖ್ಯ ಹುಕುಮ್‌.
MAT 22:39 ಆಸ್ ಹುಕುಮ್‌ನಿಘೋಣಿ ಛಾ಼ತೆ ಬೇನೆ ಮುಖ್ಯ ಹುಕುಮ್ ಖೆವಿಕತೊ, ತಾರು ತೂ ಕಿಮ್ ಪ್ಯಾರ್ ಕರಾಸ್ಕಿ ಇಮ್ಮಸ್, ತಾರ ಭೀಡೆವಾಳಾನ ಪ್ಯಾರ್ ಕರ‍್ನು’ ಕರಿ ಬೋಲನುಸ್.
MAT 22:40 ಹಿಡಿ ಮೋಶೇನು ಧರ್ಮಶಾಸ್ತ್ರ ಅಜು಼ ಪ್ರವಾದೀನು ವಚನ್‌ಖ್ಹಾರು ಆ ಬೇಸ್ ಹುಕುಮ್‌ಪರ್ ಟಿಕ್ಯುಸ್ತೆ” ಕರಿ ಬೋಲ್ಯೊ.
MAT 22:41 ಫರಿಸಾಯರ್ ಖ್ಹಾರು ಎಕ್ಟು ಹುಯಿನ್ ಆವಾದಿನ್, ಯೇಸುನೆ ಇವ್ಣುನ,
MAT 22:42 ಆವ್ಣುತೆ ಕ್ರಿಸ್ತನಿ ಬಾರೇಮ ತುಮಾರಿ ಸೋಚ್ ಶಾತ್? ಯೋ ಕಿನೊ ಛಿಯ್ಯೊ?” ಕರಿ ಪುಛಾ಼ಯೊ. ಇವ್ಣೆ, “ಯೋ ದಾವೀದ್‌ನೊ ಛಿಯ್ಯೊ” ಕರಿ ಜ಼ವಾಬ್ ದಿದು.
MAT 22:43 ತದೆ ಯೇಸುನ, ದಾವೀದನೊ ಛಿಯ್ಯೊಕರಿ ಬೋಲ್ಯು. ತದೆ ಇನೆ,ಇಮ್‍ಕತೊ, ದಾವೀದಸ್‌, ಪವಿತ್ರಾತ್ಮನಿ ಖ್ಹಯಾಲ್‌ಥಿ ಇನ ಪ್ರಭುಕರಿ ಬುಲಾಯೋನಿ, ಯೋ ಕಿಮ್?
MAT 22:44 ಮೇ ತಾರ ದುಶ್‌ಮನ್ನ ಖ್ಹಾರು ತಾರ ಗೋಡ ಹೇಟ್ ನಾಖಾಲಗು, ಮಾರಿ ಖಾವಿ ಬಾಜೂ಼ಮ ಬೆಠೋರೆ ಕರಿ ಪ್ರಭುನೆ ಮಾರ ಮಾಲಿಕ್‌ನ ಬೋಲ್ಯೊ’ ಕರಿ ಪವಿತ್ರಾತ್ಮಥಿ ಬೋಲ್ಯೋನಿ.
MAT 22:45 ದಾವೀದಸ್‌ ಕ್ರಿಸ್ತನ ಪ್ರಭುಕರಿ ಬೋಲಾಪರ್, ಕ್ರಿಸ್ತ ದಾವೀದ್‌ನೊ ಛಿಯ್ಯೊ ಕಿಮ್ ಉಶೆ?” ಕರಿ ಬೋಲ್ಯೊ.
MAT 22:46 ಯೇಸುನೆ ಪುಛಾ಼ಯೋತೆ ಇನ ಕಿನಾಬಿ ಜ಼ವಾಬ್ ದ್ಯವಾನ ಕೋ ಹುಯೂನಿ, ಅತ್ರೇಸ್ ಕಾಹೆತೆ ತಪ್‌ಥು ಇನ ಬಿಜು಼ ಶಾತ್ಬಿ ಸವಾಲ್‌ಕರಾನ ಇವ್ಣೆ ಹಿಮ್ಮತ್ ಕೋ ಕರ‍್ಯುನಿ.
MAT 23:1 ಅನಕೇಡೆಥು ಯೇಸುನೆ ಅದ್ಮಿನಿ ಝೂ಼ಂಡ್‌ನ ಅಜು಼ ಇನ ಶಿಷ್ಯರ್‌ನ ಬೋಲ್ಯೊ.
MAT 23:2 ಪಂಡಿತ್‍ಖ್ಹಾರುಬಿ ಫರಿಸಾಯವಾಳೂಬಿ ಮೋಶೆನಿ ಖುಡ್‍ಶಿಪರ್ ಬೆಠುರ‍್ಹುಸ್‍. ಶಾಸ್ತ್ರಿಯೇನ ಅಜು಼ ಪರಿಸಾಯರ್‌ನ ಹಕ್‌ ಛಾ಼.
MAT 23:3 ಇನಖ್ಹಾಜೇಸ್ ತುಮೆ ಇವ್ಣೆ ಬೋಲಾತೆ ಇನಖ್ಹಾರಾನ ಖ್ಹಮಜ಼್‌ಣು ಅಜು಼ ಇನೀನಿಘೋಣಿ ಚಾ಼ಲ್ನು; ಇವ್ಣೆ ಕತೋಬಿ ಚಾ಼ಲಿಲೇಸ್ತೆ ಇಮ್‌ ನಾ ಚಾ಼ಲಿಲೇವ್ಣು, ಶನಕತೊ ಇವ್ಣೆ ಬೋಲಾತೆ ಇಮ್‌ ಇವ್ಣೇಸ್ ಕೋ ಕರಾನಿ.
MAT 23:4 ಇವ್ಣೆ ಘಣು ವಜ಼ನ್ನು ಭೋಜಾ಼ನ ಭಾಂದಿನ್, ಅದ್ಮಿನ ಖಾಂದಾಪರ್ ನಾಖಾಸ್, ಕತೋಬಿ ಇವ್ಣೆತೊ ಚಿಟಂಗ್‌ಳಿಥೀಬಿ ಇನ ಕೋ ಛೀಮಾನಿ.
MAT 23:5 ಇವ್ಣೆ ಅದ್ಮಿನ ಖ್ಹಾರು ದೆಖಾವಾದೆ ಕರಿ ಇವ್ಣು ಕಾಮ್ನ ಕರಾಸ್. ವಚನ್ ಲೀಖೈರ‍್ಹೂತೆ ಪಟ್ಟಿಯೇನ ತಾಳ್ವಪರ್ ಅಜು಼ ಡಂಟ್‌ಪರ್ ಭಾಂದಿರಾಖಾಸ್ತೆ ದೇಖೊ. ಇವ್ಣೆ ಪೇರ‍್ಹಾಸ್ತೆ ಝ಼ಗ್ಗಾವ್‍ನ ಗೊಂಡಾನ ಲಾಂಬು ಕರಿಲೇಸ್!
MAT 23:6 ಅತ್ರೇಸ್ ಕಾಹೆತೆ, ಮಾನ್-ಮಿಝ್‍಼ವಾನೇನಿ ಝ಼ಗೋಮ ಖ್ಹಾರು ಖ್ಹಾರೇಥಿ ಖ್ಹಾಮ್ಣೆ, ಅಜು಼ ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಅಖ್ಖಾನ ದೆಖಾವಾನಿಘೋಣಿ ಖ್ಹಾಮ್ಣೆ ಬೇಖ್ಹ್‌ಣು ಕರಿ ಇವ್ಣೆ ಆಖ್ಹ್‌ ಕರಾಸ್.
MAT 23:7 ದುಕಾನೇನಿ ಗಲ್ಲಿಯೇಮ ಅದ್ಮಿಖ್ಹಾರು ಇವ್ಣುನ ಖ್ಹಲಾಮ್ ಕರ‍್ನು ಕರಿ ಅಜು಼ ಗುರುಕರಿ ಬೋಲೈಲೇವ್ಣು ಕರಿ ಬೋಲನುಸ್ ಇವ್ಣಿ ಆಖ್ಹ್.
MAT 23:8 ಕತೋಬಿ ತುಮೆ ಗುರು ಕರಿ ನಕೊ ಬೋಲೈಲಿಶು; ಶನಕತೊ ಕ್ರಿಸ್ತ ಎಕ್ಕಸ್‍ಜ಼ಣೊ ತುಮೂನಛಾ಼ತೆ ಗುರು ಅಜು಼ ತುಮೆಖ್ಹಾರು ಭೈಯೇ ಭೇನೆನಿಘೋಣಿ ಹುಯಿರ‍್ಹಾಸ್.
MAT 23:9 ಆ ಧರ್ತಿಪರ್ ತುಮೆ ಕಿನಾಬಿ ‘ಬಾ’ ಕರಿ ನಕೊ ಚಿಕರ್‌ಶು, ಶನಕತೊ ಸೊರ್ಗಾಮ ಛಾ಼ತೆ ಎಕ್ಕಸ್ ಜ಼ಣೊ ತುಮಾರೊ ಬಾ ಹುಯಿರ‍್ಹೂಸ್.
MAT 23:10 ಅಜು಼ ತುಮೆ ‘ಮೋಟೊ’ ಕರಿ ನಕೊ ಬೋಲೈಲಿಶು; ಶನಕತೊ ಕ್ರಿಸ್ತ ಎಕ್ಕಸ್ ಜ಼ಣೊ ತುಮಾರೊ ಮೋಟೊ.
MAT 23:11 ತುಮಾರಾಮ ಮಹಾನ್ ಕರಿ ರ‍್ಹವಾಳೊ ತುಮಾರೊ ಆಳ್‌ನಿಘೋಣಿ ರ‍್ಹೇಣು.
MAT 23:12 ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹೇಟು ಹುಯಿಜಾ಼ಶೆ, ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ.
MAT 23:13 “ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ಅದ್ಮಿಖ್ಹಾರು ಸೊರ್ಗಾನು ರಾಜ್ಯಮ ಜಾ಼ವಾನು ಬಾಕಲ್‌ನ ತುಮೆ ಖ್ಹಾಮ್ಣೆ ಮೂಚಿನಾಖೋಸ್, ತುಮೇಬಿ ಮಹಿ ಕೋಜಾ಼ಯ್ನಿ ಅಜು಼ ಮಹಿ ಜಾ಼ವ್ಣುಕರಿ ಕರಾವಾಳಾನಾಬಿ ಕೋ ಮ್ಹೇಲೋನಿ.
MAT 23:14 ಅಲಾ ಠಗಾರು ಖ್ಹಾರ ಪಂಡಿತ್ ಪರಿಸಾಯವಾಳ ಅದ್ಮಿಖ್ಹಾರು ದೇಖಾದೆಕರಿ ಲಾಂಬಿ ಪ್ರಾರ್ಥನೆ ಕರೋಸ್ ತುಮೆ ಮುಂಡಚ್ಚಿನ ಶೊತ್‌ನ ಗಳಿಲಿನ್ ನಾಟಕ್ ಕರೋಸ್. ಇನಖ್ಹಾಜೆ ತುಮೆ ಘಣಿ ನಿಶತ್‌ ಲೀಲಿಶು.
MAT 23:15 ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ಏಕ್‌ ಜ಼ಣಾನ ತುಮಾರಿ ಧರಮ್ಮ ಮಳೈಲ್ಯವಾನಖ್ಹಾಜೆ ದರ‍್ಯಾವ್‍ನ ಖ್ಹಾರು ಉಲಾಂಗಿನ್, ಬಿಜ಼-ಬಿಜ಼ ದೇಖ್ಹ್‌ನ ಜಾ಼ವೋಸ್. ಅಜು಼ ಯೋ ಮಳಾನ ಬಾದ್‌ಮ ತುಮಾರೇಥಿ ಬೇ ಪಟ್ ನರಕ್‌ನ ಜಾ಼ವಾನಿಘೋಣಿ ಇನ ಕರೋಸ್!
MAT 23:16 ವಾಟ್‌ ವತಾಳವಾಳ ಕಾಣ ಅದ್ಮಿಯೆ, ತುಮಾರಿ ಹಾಲ್ನ ಶಾತ್‌ ಬೋಲು! ಏಕ್‌ ಜ಼ಣೊ ಮಂದಿರ್‌ಪರ್ ಆಣ್ ಲಿದೋತೊ, ಯೋ ಶಾತ್ ಆಣ್ ಕಾಹೆ, ಕತೋಬಿ ಏಕ್‌ ಜ಼ಣೊ ಮಂದಿರ್‌ನು ಖ್ಹೊನ್ನಾಪರ್‌ ಆಣ್ ಲಿದೋತೊ, ಇನ ಚ಼ಲಾವ್ಣುಸ್ ಚ಼ಲಾವ್ಣು’ ಕರಿ ಬೋಲೋಸ್.
MAT 23:17 ತುಮೆಖ್ಹಾರು ಕಾಣ ಬುಧ್ಧು ಹುಯಿರ‍್ಹಾಸ್! ಕೆಹು ಮೋಟು? ಖ್ಹೊನ್ನುಕಿ, ಮಂದಿರ್‌? ಖ್ಹೊನ್ನಾನ ಪರಿಶುದ್ ಕರ‍್ಯುತೆ ಮಂದಿರ್‌ ಕಾಹೇಕಿಶು?
MAT 23:18 ಎತ್ರೇಸ್ ಕಾಹೆತೆ, ‘ಏಕ್‌ ಜ಼ಣೊ ಚಾ಼ಚ಼ರ್‌ಪರ್ ಆಣ್ ಲಿದೋತೊ, ಯೋ ಶಾತ್ ಆಣ್ ಕಾಹೆಕರಿ ಬೋಲೊಸ್‍, ಕತೋಬಿ ಇನಮಾನಿ ಕಾಣ್ಕೆಪರ್‌ ಆಣ್ ಲಿದುತೋ ಇನ ಚ಼ಲಾವ್ಣುಸ್ ಚ಼ಲಾವ್ಣು’ ಕರಿ ತುಮೆ ಬೋಲೋಸ್.
MAT 23:19 ತುಮೆ ಕೆತ್ರೆ ಕಾಣ ಹುಯಿರ‍್ಹಾಸ್! ಕೆಹು ಮೋಟು? ಕಾಣ್ಕೆಕಿ, ಕಾಣ್‌ಕೆನ ಪಾಕ್‌ ಕರಾಸ್ತೆ ಚಾ಼ಚ಼ರ್‌?
MAT 23:20 ಚಾ಼ಚ಼ರ್‌ಪರ್ ಆಣ್ ಲ್ಯವಾಳೊ, ಖಲಿ ಚಾ಼ಚ಼ರ್‌ಪರಸ್ ಕಾಹೆ, ಇನಾಪರ್ ಮ್ಹೇಲಾಸ್ತೆ ಖ್ಹಾರಿಸ್ ಕಾಣ್ಕೆಪರ್ ಆಣ್ ಲ್ಯಾವದಾಖ್ಹಲ್;
MAT 23:21 ಮಂದಿರ್‌ಪರ್ ಆಣ್ ಲ್ಯವಾಳೊ, ಖಲಿ ಮಂದಿರ್‌ಪರಾಸ್‌ ಕಾಹೆ, ಇನಾಮಹಿ ರ‍್ಹವಾಳೊ ದೇವ್‌ಪರ್‌ಬಿ ಆಣ್ ಲ್ಯಾವದಾಖ್ಹಲ್.
MAT 23:22 ಅಜು಼ ಸೊರ್ಗಪರ್ ಆಣ್ ಲ್ಯವಾಳೊ, ದೇವ್ನಿ ಸಿಂಹಾಸನ್‍ಪರ್‌ಬಿ, ಇನಾಪರ್ ಬೇಖ್ಹಾವಾಳಪರ್‌ಬಿ ಆಣ್ ಲ್ಯಾವದಾಖ್ಹಲ್.
MAT 23:23 ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮಾರಕನ ಛಾ಼ತೆ ಹರೇಕ್‍ಮಾಬಿ ಪುದೀನ, ಖ್ಹೋಪ್ ಅಜು಼ ಜೀರಮಾಬಿ ದಖ್ಹ್‌ಮ ಏಕ್‌ ಭಾಗ್‌ ದೇವ್ನ ಕರಿ ತುಮೆ ದೆವೋಸ್. ಕತೋಬಿ ಧರ್ಮಶಾಸ್ತ್ರಮ ಬೋಲಾಸ್ತೆ ನ್ಯಾವ್‌ನಾಬಿ, ಗೋರ್‌ನಾಬಿ ಅಜು಼ ವಿಶ್ವಾಸ್‍ನಾಬಿ ಮ್ಹೇಲಿಲಿದಾ. ಆ ಖ್ಹಾರಿ ಹುಕುಮ್‌ನಿಘೋಣಿ ಪಹಿಲೆ ಚಾ಼ಲೊ ಅಜು಼ ಯೋ ಖ್ಹಾರು ಕರಾನಬಿ ನಕೊ ಮ್ಹೇಲೊ.
MAT 23:24 ವಾಟ್‌ ವತಾಳವಾಳ ಕಾಣ! ತುಮೆ ಮಛ್ಛರ್‌ನ ಛಾ಼ಣಿನ್ ಕಾಡೋಸ್, ಕತೋಬಿ ಊಟ್ನ ಗಳಿಲೆವೊಸ್!
MAT 23:25 ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ತುಮಾರು ಹಂಡ್‌ಕು ಅಜು಼ ಥಾಳಿ ಭಾರ್‌ ಪಾಕ್‌ಥಿ ಮಾಂಜ಼ಸ್. ಕತೋಬಿ ಇನಮಹಿ ದೋಚಿಲ್ಯವಾನುಬಿ, ಲಾಲಚ಼್‌ಥೀಬಿ ಭರೈರ‍್ಹೇಸ್.
MAT 23:26 ಫರಿಸಾಯರ್ ತುಮೆ ಕಾಣ ಹುಯಿರ‍್ಹಾಸ್! ಪಹಿಲೆ ಹಂಡ್ಕನ ಮಹಿ ಅಛ್ಛಿನಿತರ ಧೋವೊ, ತದೆ ಹಂಡ್ಕನ ಭಾರ್‌ಬಿ ಪಾಕ್‍ ಹುಯಿಜಾ಼ಶೆ.
MAT 23:27 ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹೋಸ್! ತುಮೆ ಚು಼ನ್ನೊ ಮರೈರ‍್ಹೇಯಿತೆ ಮಖ್ಹಾಣ್ಯನಿಘೋಣಿ ಹುಯಿರ‍್ಹಾಸ್. ಯೋ ಮಖ್ಹಾಣ್ಯ ಭಾರ್‌ ಅಛ್ಛು಼ ದೆಖಾವಸ್, ಕತೋಬಿ ಮಹಿ ಮರ‍್ಯಾಮುರ್ದಾನ ಹಡ್‌ಕ್ಯಾ ಅಜು಼ ಖ್ಹಾರಿಸ್ ತರ‍್ಹಾನು ಖ್ಹಡ್ಯು ಭರೈರ‍್ಹೇಸ್.
MAT 23:28 ಇಮ್ಮಸ್ ತುಮೇಬಿ, ಭಾರ್‌ಲ್ಯ ಅದ್ಮಿವೋನ ನೀತಿವಾಳ ಕರಿ ದೆಖಾವೋಸ್, ಕತೋಬಿ ತುಮಾರ ಮಹಿ, ಖೋಟ್ ಅಜು಼ ಪಾಪ್ ಭರೈರ‍್ಹೂಸ್.
MAT 23:29 ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ಪ್ರವಾದಿ ಖ್ಹಾರಾನಖ್ಹಾಜೆ ಅಛ್ಛಿ ಮಖ್ಹಾಣ್ಯನಿ ಘವಿಯೇನ ಬಣಾವೋಸ್, ಅಜು಼ ನೀತಿವಾಳಾನ ಮಖ್ಹಾಣ್ಯವ್‍ನ ಶನ್‌ಗಾರ್ ಕರೋಸ್;
MAT 23:30 ಹಮಾರ ಗುರುಗುರುಬ್‌ಲ್ಯವ್‍ನ ಜಂಗ್‌ಮ ಹಮೆ ರ‍್ಹಯಾಹೋತ್ತೊ, ಆ ಪ್ರವಾದಿ ಖ್ಹಾರಾನ ಮಾರ‍್ಯುತೆ ಖೂನಿಮ ಭಾಗಿ ಹುಯಹೊತ್‍ಕೊಯ್ನಿ’ ಕರಿ ಬೋಲೋಸ್.
MAT 23:31 ಇಮ್‍ಕತೊ, ತುಮೆ ಪ್ರವಾದಿ ಖ್ಹಾರಾನ ಮಾರ‍್ಯೂತೆ ಇವ್ಣ ಲಡ್ಕಾ ಹಮೆ ಕರಿ ತುಮಾರು ತುಮೇಸ್ ಸಾಕ್ಷಿ ಬೋಲಿಲೆವೊಸ್.
MAT 23:32 ಅಛ್ಛು಼ಸ್, ತುಮಾರ ಗುರುಗುರಬ್‍ಲ್ಯಾನಿ ಪಾಪ್ನ ತುಮೆ ಪೂರ ಕರೊ!
MAT 23:33 ಅಲ ಖ್ಹಾಪ್ ಅಜು಼ ಖ್ಹಾಪ್‌ನಿ ಪಿಳ್ಗಿವಾಳ, ತುಮೆ ನರಕ್‌ನಿ ತೀರ್ಪ್‌ಥಿ ಛು಼ಕ್‍ಶು ಕರಿ ಕಿಮ್ ಸೋಚೋ಼ಸ್?
MAT 23:34 ಇನಖ್ಹಾಜೇಸ್ ಮೇ ಬೋಲುಸ್ಕಿ, ಮೇ ತುಮಾರಕನ ಪ್ರವಾದಿಯೇನಾಬಿ, ಗ್ಯಾನಿ ಅದ್ಮಿಖ್ಹಾರಾನಾಬಿ ಅಜು಼ ಬೋದಕರ್‌ ಖ್ಹಾರಾನ ಮೋಕ್ಲೀಶ್; ತುಮೆ ಇವ್ಣಾಮ ಥೋಡಾನ ಮಾರಿನಾಕ್‌ಶು, ಅಜು಼ ಥೋಡಾನ ಶಿಲ್‌ಬೇಪರ್ ನಾಕ್‌ಶು ಅಜು಼ ಬಿಜು಼ ಥೋಡಾನ ತುಮಾರಿ ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಕೊಳ್ಡೇಥಿ ಮಾರಿನ್ ಗಾಮ್‌ಥು-ಗಾಮ್‍ ನಖ್ಹಾಡಿಲಿಜಾ಼ಶು.
MAT 23:35 ಅಮ್ ನೀತಿವಾಳೊ ಹುಯಿರ‍್ಹೋತೆ ಹೇಬೆಲ್‍ನು ಲ್ಹೊಯಿಥಿ ಧರೀನ್, ತುಮೆ ಮಂದಿರ್‌ನಾಬಿ ಅಜು಼ ಚಾ಼ಚ಼ರ್‌ನ ಇಚ಼್‌ಮ ಮಾರಿನಾಖ್ಯಾತೆ ಬರಕೀಯಾನೊ ಛಿಯ್ಯೊ ಜಕರೀಯಾನು ಲ್ಹೋಯಿತೋಡಿ, ಧರ್ತಿಪರ್ ರಂಚಾ಼ಯುತೆ ಹರೇಕ್ ನೀತಿವಾಳಾನು ಲ್ಹೋಯಿನು ಮಾರ್ ತುಮಾರ ಮುಡ್‌ಕ್ಯಪರ್ ಆವ್‌ಶೆ.
MAT 23:36 ಮೇ ತುಮೂನ ಖ್ಹಾಚಾಮ ಬೋಲುಸ್, ಅಖ್ಖು ಅಪರಾದ್‌ ಆ ಪಿಳ್ಗಿಪರ್ ಆವ್‌ಶೆ!
MAT 23:37 ಯೆರೂಸಲೇಮ್‌, ಯೆರೂಸಲೇಮ್‌! ಪ್ರವಾದಿ ಖ್ಹಾರಾನೊ ಜಾನ್‌ ಕಾಡಾವಾಳಿ! ದೇವ್ನೆ ತಾರಕನ ಮೋಕ್‌ಲ್ಯೊತೆ ಅದ್ಮಿಖ್ಹಾರಾನ ಬಂಡೊ ಫೇಕಿನ್, ಮಾರವಾಳಿ! ಮುರ್‌ಗಿ ಚೇಲ್ಕಾನ ಇನಿ ಪಾಖ್ಡಿಯೆಮ ಪೆಖ್ಹಾಡಿಲೇಯಿತೆ ಇಮ್‌, ತಾರ ಲಡ್ಕಾವ್ನ ಮೇ ಪೆಖ್ಹಾಡಿಲೇವ್ಣು ಕರಿ ಮನ ಕೆತ್ರಿಕ್ಕಿಹಲ್ಲ ಮನ್‍ಹುಯು, ಕತೋಬಿ ತುನ ಪಣ್ಕಿ ದಿಲ್‌ ಕೋಥುನಿ.
MAT 23:38 ಹಂದೇಕ್, ತಾರಿ ಮಂದಿರ್‌ ಉಜ್ಜಾ಼ಡಿ ಪಡಿಜಾ಼ಶೆ.
MAT 23:39 ಹಂಕೇಥು ಧರೀನ್, ‘ಪ್ರಭುನ ನಾಮ್‌ಪರ್‌ ಆವಾಳಾನ ಆಶೀರ್ವಾದ್‌ ಹುವಾದೆ’ ಕರಿ ತುಮೆ ಬೋಲಾತೋಡಿ, ತುಮೆ ಮನ ಪಾಛು಼ ದೇಕ್‌ಶುಸ್ ಕೊಯ್ನಿ ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
MAT 24:1 ಅನಕೇಡೆಥು ಯೇಸು ಮಂದಿರ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ಮಂದಿರ್‌ ಭಂದೈರ‍್ಹೀತೆ ತರೀಕಾನ ಇನ ವತಾಳ್ಣು ಕರಿ ಇನ ಶಿಷ್ಯರ್‌ ಇನಾಕನ ಆಯಾ.
MAT 24:2 ತದೆ ಯೇಸುನೆ, “ತುಮೆ ಆ ಖ್ಹಾರು ದೇಖುಕರಾಸ್‌ನಿ ಹಜ್ಜಾ಼ ಏಕ್‌ ಬಂಡಾಪರ್ ಬಿಜೇಕ್ ಬಂಡೊ ಭೀರಿಶೆ ಕೊಯ್ನಿ; ಅಖ್ಖಾಸ್ನ ರಡ್‌ಕೈನಾಖಿದಿಶೆ ಕರಿ ಮೇ ತುಮೂನ ಖ್ಹಾಚಾಮ ಬೋಲುಸ್” ಕರಿ ಬೋಲ್ಯೊ.
MAT 24:3 ಯೇಸುನೆ ಆಲಿವ್‌ ಪಹಡ್‌ಪರ್ ಬೆಠೋಥೋತೆ ತದೆ ಇನ ಶಿಷ್ಯರ್‌ ಇನಾಕನ ಅಲಕ್‌ಥಿ ಆಯಿನ್, “ಆ ಖ್ಹಾರು ಕದೆ ಚಾ಼ಲ್‌ಷೆ? ತೂ ಆಯಿಶ್‍ತೆ ಅಜು಼ ಆ ಜಗತ್ನಿ ಖ್ಹರ್ತಿ ಹುವಾನ ಖ್ಹಣೇದ್‍ಕಿ ಶು? ಹಮೂನ ಬೋಲ್” ಕರಿ ಪುಛಾ಼ಯಾ.
MAT 24:4 ಯೇಸುನೆ ಇವ್ಣುನ, “ಕೋಣ್‌ಬಿ ತುಮೂನ ಠಗಾವ಼್ಣುನಾತೆ ಇಮ್‌, ಜ಼ತನ್‌ಥಿ ರ‍್ಹವೊ.
MAT 24:5 ಶನಕತೊ, ಕೈಯೆಕ್ಕಿ ಜ಼ಣು ಆಯಿನ್, ಮಾರು ನಾಮ್‌ಲೀನ್, ‘ಮೇ ಕ್ರಿಸ್ತ, ಮೇ ಕ್ರಿಸ್ತ’ ಕರಿ ಬೋಲಿನ್, ಘಣ ಅದ್ಮಿನ ವಾಟ್‌ ಭೈಕಾವ್‌ಶೆ.
MAT 24:6 ಅತ್ರೇಸ್ ಕಾಹೆತೆ ತುಮಾರ ಖನ್ನೆ ಜಂಗ್ ಭೀಡುಕರಾತೆ ಅವಾಜ಼್ ಅಜು಼ ದೂರ್‌ಮ ಚಾ಼ಲುಕರಾತೆ ಜಂಗ್‌ನಿ ಬಾರೇಮಾನಿ ಖಬರ್ ತುಮೆ ಖ್ಹಮಜ಼್‌ಶು, ಕತೋಬಿ ಡರ್‌ಶು ನಕೊ. ಖ್ಹರ್ತಿ ಆವಾನ ಅಗಾಡಿ ಆ ಖ್ಹಾರು ಚಾ಼ಲ್ನುಸ್ ಚಾ಼ಲ್ನು.
MAT 24:7 ದೇಖ್ಹ್‌ನ ವಿರೋದ್ ದೇಖ್ಹ್‌, ರಾಜ್ಯನ ವಿರೋದ್ ರಾಜ್ಯ ಉಟ್‌ಶೆ; ಖ್ಹಾರಿಸ್ ಬಾಜೂ಼ಮ ಕಾಳ್ದುಕಾಳ್ ಉಶೆ ಅಜು಼ ಜ಼ಮೀನ್ ಹಲ್‌ಶೆ.
MAT 24:8 ಆ ಖ್ಹಾರು ಲಡ್ಕಾ ಪೈದಾ ಹುವಾನಿ ವಖ್ಹತ್‌ಮ ಆವಾಸ್ತೆ ಪಹಿಲಿ ಅಜಾ಼ನಿಘೋಣಿ ಹುಯಿರ‍್ಹುಸ್‍ ಎತ್ರೇಸ್.
MAT 24:9 ತದೆ ತುಮೂನ ಧರೀನ್ ದಂಡನೆ ದೀನ್ ಮಾರ ನಾಮ್ನಖ್ಹಾಜೆ ಹರೇಕ್ ದೇಖ್ಹ್‌ವಾಳು ತುಮೂನ ವಹೇರ್‌ ಕರ್ಶೆ.
MAT 24:10 ಯೋ ವಖ್ಹತ್‌ಮ ಕೈಯೆಕ್ಕಿ ವಿಶ್ವಾಸಿಖ್ಹಾರು ಪಿನ್‌ಮಾಟಿಜಾ಼ಶೆ; ಏಕ್‌ನ-ಏಕ್‌ ಧೋಕೇಥಿ ಧರಿದಿಶೆ ಅಜು಼ ಏಕ್‌ಪರ್‌-ಏಕ್‌ ವಹೇರ್‌ ಕರ್ಶೆ.
MAT 24:11 ಘಣು ಜ಼ಣು ಝೂ಼ಟುಪ್ರವಾದಿ ಖ್ಹಾರು ಆಯಿನ್, ಕೈಯೆಕ್ಕಿ ಅದ್ಮಿನ ಖ್ಹಾರು ಠಗಾವ್‌ಶೆ.
MAT 24:12 ಅತ್ರೇಸ್ ಕಾಹೆತೆ ಜಗತ್‌ಮ ಖರಾಬ್ ಜಾ಼ಖ್ಹತ್ ಹುಯಿಜಾ಼ಶೇತೆ ಇನಖ್ಹಾಜೆ ಘಣ ಅದ್ಮಿನಿ ಪ್ಯಾರ್ ಠಂಡು ಪಡಿಜಾ಼ಶೆ.
MAT 24:13 ಕತೋಬಿ ಖ್ಹರ್ತಿತೋಡಿ ಖ್ಹಮಾಳಿಲ್ಯವಾಳಾನ ರಕ್ಷಣೆ ಲಿಶೆ.
MAT 24:14 ರಾಜ್ಯನು ಆ ಅಛ್ಛಿ ಸಮಾಚಾರ್ ಜಗತ್‌ನು ತಮಾಮ್‌ ದೇಖ್ಹ್‌ವಾಳ ಅದ್ಮಿನ ಸಾಕ್ಷಿನಟೇಕೆ ಬೋಲಾವ್‌ಶೆ; ತದೆ ಖ್ಹರ್ತಿನದನ್‍ ಆವ್‌ಶೆ.
MAT 24:15 “ಪ್ರವಾದಿ ದಾನಿಯೇಲ್‌ನೆ ಬೋಲ್ಯೋತೆ, ‘ಬರ್ಬಾತ್ ಕರಾವಾಳು ಗಲೀಜ಼್ ರಾಛು಼’ ಪವಿತ್ರ ಝ಼ಗೋಪರ್ ಭೀರಾವನು ತುಮೆ ದೇಕ್‌ಶು. ಅನ ಪಢವಾಳು ಅನಿ ಮತ್ಲಬ್ ಶಾತ್‌ ಕರಿ ಪರ್ಖಿಲ್ಯವಾದೆ.
MAT 24:16 ಯೋ ವಖ್ಹತ್‌ಮ ಯೂದಾಯಮ ರ‍್ಹವಾಳು ಪಹಾಡೋಮ ಮಿಲೈಜಾ಼ಣು.
MAT 24:17 ಕೋಣ್‌ತೋಬಿ ಏಕ್ಜ಼ಣೊ ಇನ ಘರ್‌ನ ಛ಼ತ್‍ಪರ್‌ ರ‍್ಹಯೋತೊ, ಯೋ ಹೇಟ್ ಉತ್ರಿನ್ ಶಾತ್‌ತೋಬಿ ಪಾಡಿಲೇಣು ಕರಿ ಘರ್‌ನ ಮಹಿ ಜೈ಼ನ್, ವಖ್ಹತ್ ಬರ್ಬಾತ್ ನಾ ಕರ‍್ನು.
MAT 24:18 ಅಜು಼ ಕೋಣ್‌ತೋಬಿ ಏಕ್‌ ಜ಼ಣೊ ಖೇತರ್‌ಮ ರ‍್ಹಯೋತೊ, ಯೋ ಇನೊ ಝ಼ಗ್ಗೊ ಪಾಡಿಲೇಣು ಕರಿ ಪಾಛೊ಼ಫರಿ ಘರೆ ನಾ ಜಾ಼ವ್ಣು.
MAT 24:19 ಯೋ ದನೂಮ ಬೇಜೂನಿ ಅಜು಼ ದೂದ್ ಪಿಡಾವವಾಳಿ ತಯೇಡಾವ್ನ ಉಷೇತೆ ಹಾಲ್ನ ಶಾತ್ ಬೋಲು!
MAT 24:20 ತುಮೆ ಮಿಲೈಜಾ಼ಣುತೆ ದನ್ ಠಣ್‌ನೊ ದನ್ ನಾತೊ ಸಬ್ಬತ್‌ನೊ ದನ್ ನಾ ಹುಯಿರ‍್ಹೇಣು ಕರಿ ದೇವ್ನ ಪ್ರಾರ್ಥನೆ ಕರೊ!
MAT 24:21 ಶನಕತೊ ಯೋ ವಖ್ಹತ್‌ಮ ಘಣು ಲತಾಡ ರ‍್ಹಿಶೆ. ಜಗತ್‌ ಉಬ್‌ಜ್ಯುತೆ ತಪ್‌ಥು ಧರೀನ್, ಹಮ್ಕೆಲಗು ಕದೇಸ್‌ ಅಮ್ನು ಲತಾಡ ಕೋ ಐರ‍್ಹೂನಿ. ಬಿಜು಼ ಖ್ಹಾಮ್ಣೆಬಿ ಕೋ ಆವ್‌ಶೇನಿ.
MAT 24:22 ದೇವ್ ಯೋ ಖ್ಹಾರ ದನ್ನ ಕಮ್ ನಾ ಕರ‍್ಯೋತೊ, ಏಕ್‌ ಅದ್ಮಿ ಜಿನ್‌ಕುಬಿ ಬಚಿಜಾಶೆಕೊಯ್ನಿ; ಕತೋಬಿ ಇನೆ ಚೂ಼ಣಿಲಿದೊತೆ ಅದ್ಮಿನಖ್ಹಾಜೆ ದೇವ್ ಯೋ ಖ್ಹಾರ ದನ್ನ ಕಮ್ ಕರ್ಶೆ.
MAT 24:23 ಯೋ ವಖ್ಹತ್‌ಮ ಕೋಣ್‌ತೋಬಿ ತುಮೂನ, ‘ದೇಖೊ, ಕ್ರಿಸ್ತ ಹಜ್ಜಾ಼ ಛಾ಼! ನಾತೊ, ಯೋ ಹಿಜ್ಜಾ಼ ಛಾ಼! ಕರಿ ಬೋಲ್ಯುತೊ, ಇನ ನಕೊ ನಂಬ್‌ಶು.
MAT 24:24 ಶನಕತೊ ಝೂ಼ಟುಕ್ರೈಸ್ತರ್‌ ಖ್ಹಾರು ಅಜು಼ ಝೂ಼ಟು ಪ್ರವಾದಿಖ್ಹಾರು ದೆಖೈನ್, ಇವ್ಣೇಥಿ ಹುಯೂತೊ ದೇವ್‍ಥಿ ಚೂ಼ಣೈರ‍್ಹವಾಳನಾಬಿ ಠಗಾವಾನಖ್ಹಾಜೆ, ಅದ್ಭುತ್‌ಕಾಮ್‌ ಅಜು಼ ಅಶ್ಚರ್ಯನು ಕಾಮ್‌ಖ್ಹಾರು ಕರಿ ವತಾಳ್‌ಶೆ.
MAT 24:25 ಖ್ಹಮ್‍ಜೊ! ಮೇ ತುಮೂನ ಆ ಖ್ಹಾರು ಚಾ಼ಲಾನ ಅಗಾಡಿಸ್ ಇನಿ ಬಾರೇಮ ಬೋಲಿರಾಖ್ಯೊಸ್.
MAT 24:26 ಇನಾಖ್ಹಾಜೆ ಕೋಣ್‌ತೋಬಿ ತುಮೂನ, “ಹಂದೇಖೊ, ಕ್ರಿಸ್ತ ಉಜ್ಜಾ಼ಡಿ ಝ಼ಗೋಮ ಛಾ಼’ ಕರಿ ಬೋಲ್ಯೂತೊ, ನಕೊ ಚಲ್ಯಾಜಾ಼ಶು, ‘ಹಂದೇಖೊ, ಯೋ ಮಹಿನಕೋಣಾಮ ಛಾ಼’ ಕರಿ ಬೋಲ್ಯೂತೊ, ನಕೊ ನಂಬ್‌ಶು.
MAT 24:27 ಶನಕತೊ ವಿಜ಼್‌ಳಿ ದನ್‌ನಿಕ್‌ಳಾ ಭಣೀಥು ದೆಖೈನ್, ದನ್ ಡುಬಾಭಣೀನು ಬಾಜು಼ತೋಡಿ ಚ಼ಮ್‌ಕಾಸ್ತೆ ಇಮ್ಮಸ್ ಅದ್ಮಿನೊ ಛಿಯ್ಯೊಬಿ ಆವ್‌ಶೆ.
MAT 24:28 ಮುರ್ದು ಕಿಜ಼್ಜ ಪಡ್ಯುರ‍್ಹೇಸ್ಕಿ, ಹಿಜ್ಜಾ಼ಸ್ ಗರದ್‍ಖ್ಹಾರು ಎಕ್ಟುಹುವಾಸ್.
MAT 24:29 ಯೋ ಖ್ಹಾರು ದನ್ನು ಖ್ಹತಾಪ್ಣಿ ಖತಮ್ ಹೋತಾಸ್‌ನ, ಚಾ಼ಂದ್ ಕಾಳೊಪಡಿಜಾ಼ಶೆ, ಚ಼ಂದರ್‌ಮೊ ಉಜಾ಼ಳು ಕೋದಿಶೇನಿ, ಆಬ್‍ಪರ್‌ಥು ಶುಕ್ಕರ್ ಖ್ಹಾರು ಖಂಕರ್‌ಶೆ, ಅಜು಼ ಆಬ್‍ಮ ಛಾ಼ತೆ ಶಕತ್‌ಖ್ಹಾರಿ ಕಾಪ್‌ಶೆ.
MAT 24:30 ತದೆ ಅದ್ಮಿನೊ ಛಿಯ್ಯಾನ ವತಾಳವಾಳಿ ಖ್ಹಣೇದ್ ಆಬ್‍ಮ ದೆಖಾವ್‌ಶೆ. ತದೆ ಧರ್ತಿಪರ್ ಛಾ಼ತೆ ತಮಾಮ್‌ ಖೂಮ್‍ವಾಳು ಛಾ಼ತಿಪರ್ ಮಾರಿಲಿಶೆ ಅಜು಼ ಅದ್ಮಿನೊ ಛಿಯ್ಯೊ ಶಕತ್‌ಥೀಬಿ, ಮಹಾನ್ ಮಹಿಮೆಥೀಬಿ ಆಬ್‍ನ ವಾದ್ಳಪರ್ ಆವ್‌ಶೇತೆ ಇನ ದೇಕ್‌ಶೆ.
MAT 24:31 ಅಜು಼ ಯೋ ತುತ್ತೂರಿನೊ ಮೋಟೊ ಅವಾಜ಼್‌ಥಿ, ಇನ ದೂತರ್‌ನ ಜ಼ಮೀನ್ನಿ ಚಾರ‍್ಹೆ ಬಾಜೂ಼ಮ ಮೋಕಲ್‌ಶೆ, ಇವ್ಣೆ ಇನೆ ಚೂ಼ಣಿಲಿದೊತೆ ಇವ್ಣುನ ಆಬ್‌ನ ಏಕ್‌ ಬಾಜು಼ಥು ಧರಿನ್ ಬಿಜೇಕ್ ಬಾಜೂ಼ಲಗು ಎಕ್ಟು ಕರ್ಶೆ.
MAT 24:32 ಅಂಜೀರ್‌ನ ಝಾ಼ಡಾನಿ ಖೇಣಿಥಿ ತುಮೆ ಅಕ್ಕಲ್‍ಶಿಕೊ. ಇನಿ ಡಾಳಿಯೆ ಹರಿಗಾರ್ ಕವ್ಳಿ ಹುಯಿನ್, ಪಾಂದ್‌ಡ ಮ್ಹೇಲಾಲಗ್ಯುತೊ ತಡ್ಕಾನ ಹಗಾಮ್‌ ಖನ್ನೆ ಐಗು ಕರಿ ತುಮೆ ಮಾಲುಮ್‌ ಕರಿಲೇವೊಸ್ನಿ.
MAT 24:33 ಇಮ್ಮಸ್, ತುಮೇಬಿ ಆ ಖ್ಹಾರು ದೇಖಾನಿ ವಖ್ಹ್‌ತೆ ಯೋ ದನ್ ಖನ್ನೆಛಾ಼, ಬಾಕಲ್‍ಕನಸ್‍ ಛಾ಼ಕರಿ ಮಾಲುಮ್ ಕರಿಲೆವೊ.
MAT 24:34 ಹಮ್ಕೆ ಜಿವ್ತು ಛಾ಼ತೆ ಅದ್ಮಿಖ್ಹಾರು ಮರ್‌ವಾನ ಮಹಿಸ್ ಆ ಖ್ಹಾರು ಚಾ಼ಲ್‌ಶೇತೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್.
MAT 24:35 ಆಬ್-ಧರ್ತಿ ಮಟಿಜಾ಼ಶೆ, ಕತೋಬಿ ಮಾರಿ ವಾತೆಖ್ಹಾರಿ ಕದೇಬಿ ಮಟ್‌ಶೆಸ್ ಕೊಯ್ನಿ.
MAT 24:36 ಎತ್ರೇಸ್ ಕಾಹೆತೆ, ಯೋ ದನ್ನಿ ಬಾರೇಮ ರ‍್ಹವೊ, ಯೋ ವಖ್ಹತ್‌ನಿ ಬಾರೇಮ ರ‍್ಹವೊ, ಮಾರ ಬಾನ ಮಾಲುಮ್ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ಕೊಯ್ನಿ; ಪರ್‌ಲೋಕ್‌ಮ ಛಾ಼ತೆ ದೇವ್‌ನು ದೂತರ್‌ನಾಬಿ ಮಾಲುಮ್‌ಕೊಯ್ನಿ; ಛಿಯ್ಯಾನಾಬಿ ಮಾಲುಮ್‌ಕೊಯ್ನಿ.
MAT 24:37 ನೋಹಾನ ದನ್ಮ ಚಾ಼ಲ್ಯುತೆ ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್‌ಶೇತೆ ದನ್ಮ ಚಾ಼ಲ್‌ಷೆ.
MAT 24:38 ಕಿಮ್‌ಕತೊ, ತೋಫಾನ್ ಆವಾನ ಅಗಾಡಿ ಅದ್ಮಿಖ್ಹಾರು ಖಾತು-ಪೀತು ಹುಯಿನ್, ವ್ಯಹಾ ಕರ್ತುಹುಯಿನ್, ವ್ಯಹಾ ಕರಿದೇತುಹುಯಿನ್ ಥೂ. ನೋಹಾನೆ ಜ಼ಹಾಜ಼್‌ನ ಮಹಿ ಚ಼ಢ್ಯೋತೆ ದನ್‌ಮಾಬಿ ಇವ್ಣೆ ಇಮ್ಮಸ್ ಕರುಕರ್ತುಥು.
MAT 24:39 ತೋಫಾನ್ನು ಪಾಣಿ ಐನ್, ತಮಾಮ್‌ನ ವವ್ಹಾಡಿಲೀನ್, ಜಾ಼ವಾತೋಡಿ ಇವ್ಣೆ ಶಾತ್ಬಿ ಮಾಲುಮ್‌ಕೊಂತೆ ಇಮ್‌ ಥೂ. ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್‌ಶೇತೆ ತದೇಬಿ ರ‍್ಹಿಶೆ.
MAT 24:40 ಯೋ ವಖ್ಹತ್‌ಮ ಖೇತರ್‌ಮ ಬೇ ಜ಼ಣು ಕಾಮ್ ಕರ್ತು ರ‍್ಹಿಶೆ, ಏಕ್‌ಜ಼ಣಾನ ಪಾಡಿಲಿಶೆ, ಅಜು಼ ಏಕ್‌ ಜ಼ಣಾನ ಮ್ಹೆಂದಿಶೆ.
MAT 24:41 ಬೇ ತಯೇಡ ಬೇಶಿನ್, ಘಟ್ಟಿ ದಳುಕರ್‌ಶೆ, ಏಕ್‌ನ ಪಳ್ಳಿಶೆ ಏಕ್‌ನ ಮ್ಹೆಂದಿಶೆ.
MAT 24:42 ಇನಖ್ಹಾಜೇಸ್ ತುಮಾರೊ ಪ್ರಭು ಆವ್‌ಶೇತೆ ದನ್ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿ ರ‍್ಹವೊ.
MAT 24:43 ಚೋ಼ರ್ ಆವಾನಿ ವಖ್ಹತ್ ಘರ್‌ನ ಯಜಮಾನ್ನ ಮಾಲುಮ್ ರ‍್ಹಯುಹೋತ್ತೊ, ಯೋ ಹೊಷಾರಿ ರ‍್ಹೀನ್, ಇನ ಘರ್‌ನ ಕೋ ತೋಡಾದಿದೊಹೋತ್ನಿ.
MAT 24:44 ಇನಖ್ಹಾಜೇಸ್ ತುಮೇಬಿ ಕದೇಬಿ ತೈಯಾರ್ ರ‍್ಹೇಣು, ಶನಕತೊ ತುಮೆ ಸೋಚಾಸ್‌ಕೊಂತೆ ವಖ್ಹತ್‌ಮ ಅದ್ಮಿನೊ ಛಿಯ್ಯೊ ಆವ್‌ಶೆ.
MAT 24:45 ಇಮ್‍ಕತೊ, ಯಜಮಾನ್ ಇನ ಘರ್‌ಮ ಕಾಮ್ ಕರಾವಾಳ ಆಳ್‌ನ ಖ್ಹಾರು ಬರೋಬರ್‌ನಿ ವಖ್ಹತ್‌ಮ ಖಾಣು ದ್ಯವಾನಖ್ಹಾಜೆ ಇವ್ಣಾಪರ್ ನೇಮ್‌ಶಾಯೋತೆ ನಿಯತ್‍ವಾಳೊಬಿ ಅಕ್ಲಿಆಳ್‌ ಕೋಣ್?
MAT 24:46 ಯಜಮಾನ್ ಆವಾನಿ ವಖ್ಹ್‌ತೆ, ಕೆಹೊ ಆಳ್‌ ಆ ಖ್ಹಾರು ಕರುಕರಾತೆ ದೇಕ್‌ಶೇಕಿ, ಯೋ ಆಳ್‌ ಧನ್ಯ ಹುಯಿರ‍್ಹೋಸ್!
MAT 24:47 ಇಮ್ನ ಆಳ್‌ನ ಯೋ ಇನು ಖ್ಹಾರೂಸ್ ಧನ್‌-ದೌಲತ್‌ಪರ್ ಅದಿಕಾರಿಹುಯಿನ್ ನೇಮ್‌ಶಾವ್‌ಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್.
MAT 24:48 ಕತೋಬಿ ಯೋ ಆಳ್‌ ಖರಾಬ್ ರ‍್ಹಯೋತೊ, ಇನೊ ಯಜಮಾನ್ ಒಗ್ಗಿಸ್‌ಮ ಕೋ ಆವ್‌ಶೇನಿ ಕರಿ ಇನ ಮನ್‌ಮ ಸೋಚಿಲೀನ್,
MAT 24:49 ಇನ ಜೋ಼ಡ್ಮ ಕಾಮ್‌ಕರವಾಳ ಬಿಜಾ಼ಖ್ಹಾರ ಆಳ್‌ನ ಮಾರಲಗ್‌ಶೆ ಅಜು಼ ಪೀ ಕುಡ್‌ಕಾವ್‍ನ ಜೋ಼ಡೆ ಖಾತೊ-ಪೀತೊ ರ‍್ಹಿಶೆ.
MAT 24:50 ತದೆ ಏಕ್‌ ದನ್ನೆ ಯೋ ಆಳ್‌ ಸೋಚಾಸ್‌ಕೊಂತೆ ದನ್ಮ ಅಜು಼ ಇನ ಮಾಲುಮಸ್ ಪಡಾಕೊಂತೆ ವಖ್ಹತ್‌ಮ ಯೋ ಇನೊ ಯಜಮಾನ್ ಐನ್,
MAT 24:51 ಇನ ಕತ್ರೀನ್, ಟುಕ್‌ಡಾ-ಟುಕ್‌ಡಾ ಕರೀನ್, ಖೋಟ್ ದಿಲ್‌ವಾಳಾನ ನಾಖಾಸ್ತೆ ಝ಼ಗೋಪರ್ ಇನ ನಾಕ್‌ಶೆ. ಹಿಜ್ಜಾ಼ ಯೋ ರೋವ್‌ತೊ ಹುಯಿನ್, ಕರ್‌-ಕರ್‌ ದಾತ್‌ ಚಾ಼ವ್‌ಶೆ.
MAT 25:1 ಯೋ ವಖ್ಹತ್‌ಮ ಸೊರ್ಗಾನು ರಾಜ್ಯ ದೀವೊ ಖ್ಹಾರು ಪಾಡಿಲೀನ್, ನೌಶೊನ ಮಳಾನ ಜಾ಼ಸ್ತೆ ದಖ್ಹ್‌ ಜ಼ಣಿ ಕವಾರಿನಿಘೋಣಿ ರ‍್ಹಿಶೆ.
MAT 25:2 ಇನಾಮ ಪಾಚ಼್ ಜ಼ಣಿ ಬುಧ್ಧು ಅಜು಼ ಪಾಚ಼್ ಜ಼ಣಿ ಅಕ್ಲಿ ಹುಯಿರ‍್ಹೀಥಿ.
MAT 25:3 ಬುಧ್ಧು ಕವಾರಿಯೇನೆ ಇವ್ಣು ದೀವೋನ ಪಾಡಿಲಿದಿಯೆ, ಕತೋಬಿ ಜಾ಼ಖ್ಹತ್ ಆಲಿವ್‍ತೇಲ್‌ನ ಕೋ ಪಾಡಿಲಿದಿಯೇನಿ.
MAT 25:4 ಅಕ್ಲಿ ಕವಾರಿಯೇನೆ ದೀವೋನ ಜೋ಼ಡೆ ಕಟೋರಿಮ ತೇಲ್‌ನಾಬಿ ಪಾಡಿಲಿದಿಯೆ.
MAT 25:5 ನೌಶೊ ಆವಾನ ಧೇರ್ ಹೋತಾಖ್ಹತರ್, ಇವ್ಣೆ ಖ್ಹಾರು ಝೂಕಾರೆ ಮಾರಿನ್, ಖ್ಹುಯಿಗಯ್ಯೆ.
MAT 25:6 ಕತೋಬಿ “ಅಧಿರಾತ್ಮ, ‘ಹಂದೇಖೊ, ನೌಶೊ ವಳ್ಯಾವಸ್! ಇನ ಮಳಾನಖ್ಹಾಜೆ ಆವೊ!’ ಕರಿ ಅವಾಜ಼್ ಆಯು.
MAT 25:7 ತದೆ ಯೋ ದಖ್ಹ್‌ ಕವಾರಿಯೆ ಉಠೀನ್, ಇವ್ಣ ದೀವೋನ ತೈಯಾರ್ ಕರಿಲಿದಿಯೆ.
MAT 25:8 ತದೆ ಯೋ ಬುಧ್ಧು ಕವಾರಿಯೇನೆ ಅಕ್ಲಿ ಕವಾರಿಯೇನ, ‘ತುಮಾರ ತೇಲ್‌ಮ ಹಮೂನ ಥೋಡು ದೆವೊ; ಶನಕತೊ, ಹಮಾರೊ ದೀವೊ ಉಝಾ಼ವಾನ ಆಯೊ’ ಕರಿ ಬೋಲಿಯೆ.
MAT 25:9 ತದೆ ಅಕ್ಲಿ ಕವಾರಿಯೇನೆ, ‘ಕೊಯ್ನಿ, ‘ತುಮೂನ ದಿದುತೊ, ಹಮುನಾಬಿ ತುಮೂನಾಬಿ ಪೂರಾಕೊಂತೆ ಇಮ್‌ ಹುಯಿಜಾ಼ಶೆ. ತುಮೆ ವೇಚಾ಼ವಾಳಾಕನ ಜೈ಼ನ್, ಮೋಲ್ ಲೀಲೆವಾನೂಸ್ ಅಛ್ಛು಼’ ಕರಿ ಜ಼ವಾಬ್ ದಿದಿಯೆ.’
MAT 25:10 ಯೋ ಬುಧ್ಧು ಕವಾರಿಯೆ ತೇಲ್ ಲ್ಯಾವಾನ ಜಾ಼ವಾದಿನ್, ನೌಶೊ ಆಯೊ. ತೈಯಾರ್ ರ‍್ಹವಾಳಿಯೆ ವ್ಯಹಾನು ಮಿಝ಼್‌ವಾನ್ ಖಾವಾನಖ್ಹಾಜೆ ಇನಜೋ಼ಡೆ ಮಹಿ ಗಯ್ಯೆ. ತದೆ ಬಾಕಲ್ ಮೂಚೈ಼ಗಯು.
MAT 25:11 ಅನ ಬಾದ್‌ಮ ಯೋ ಬುಧ್ಧು ಕವಾರಿಯೆ ಆಯಿನ್, ‘ಪ್ರಭು, ಪ್ರಭು ಮಹಿ ಆವಾನ ಬಾಕಲ್ ಕಾಡ್’ ಕರಿ ಚಿಕ್ರಿಲಿದಿಯೆ
MAT 25:12 ತದೆ ಯೋ ನೌಶಾನೆ, ‘ತುಮೆ ಕೋಣ್ ಕರಿ ಮನ ಮಾಲುಮ್ ಕೊಯ್ನಿ, ಕರಿ ಮೇ ಖ್ಹಾಚಮಾಬಿ ಬೋಲುಸ್’ ಕರಿ ಬೋಲ್ಯೊ.”
MAT 25:13 ಅಜು಼ ಯೇಸುನೆ ಖ್ಹರ್ತಿಮ ಬೋಲ್ಯೋಕಿ, “ಯೋ ದನ್‍ರ‍್ಹವೊ, ವಖ್ಹತ್‌ರ‍್ಹವೊ ತುಮೂನ ಮಾಲುಮ್‌ಕೊಂತೆ ಇನಖ್ಹಾಜೇಸ್ ಹೊಷಾರ್‌ಥಿರ‍್ಹವೊ.
MAT 25:14 “ಸೊರ್ಗಾನು ರಾಜ಼್ ಇನ ಘರ್‌ನ ಮ್ಹೆಂದಿನ್ ಬಿಜೇಕ್ ದೇಖ್ಹ್‌ನ ಗಯೋತೆ ಅದ್ಮಿನಿಘೋಣಿ ಹುಯಿರ‍್ಹೂಸ್. ಯೋ ಅದ್ಮಿ ಜಾ಼ವಾನ ಅಗಾಡಿ ಇನ ಆಳ್‌ನ ಖ್ಹಾರು ಬುಲೈನ್, ಇನು ಧನ್‌-ದೌಲತ್‌ನ ದೇಖಿಲ್ಯವಾನಖ್ಹಾಜೆ ಇವ್ಣುನ ನೇಮಕ್‍ಕರ‍್ಯೊ.
MAT 25:15 ಇನೆ ಏಕ್‌ನ ಪಾಚ಼್ ಹಜಾ಼ರ್, ಖ್ಹೊನ್ನಾನು ಬಿಲ್ಲು, ಬಿಜೇಕ್‌ನ ಬೇ ಹಜಾ಼ರ್, ಅಜು಼ ಬಿಜೇಕ್ ಜ಼ಣಾನ ಏಕ್‌ ಹಜಾ಼ರ್. ಅಮ್ ಇವ್ಣ ಇವ್ಣ ತಾಖತ್‌ ಎತ್ರೆ ಇವ್ಣುನ ದೀನ್, ಬಿಜೇಕ್ ದೇಖ್ಹ್‌ನ ಚ಼ಲೆಗಯೊ.
MAT 25:16 ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಲಿದಾಹುಯಾನೆ ಇನ ಲೀಜೈ಼ನ್, ಧಂದೊ ಕರಾನ ನಾಖಿನ್, ಇನೇಥಿ ಬಿಜು಼ ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಕಮೈಕರ‍್ಯೊ.
MAT 25:17 ಇಮ್ಮಸ್ ಬೇ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಮಳ್ಯುಹುಯೊ ಬಿಜು಼ ಬೇ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಕಮಾಯೊ.
MAT 25:18 ಕತೋಬಿ ಏಕ್‌ ಹಜಾ಼ರ್ ಬಿಲ್ಲು ಮಳ್ಯಾಹುಯಾನೆ ಜೈ಼ನ್, ಬಲ್ಡಾಮ ಖಾಡ್ ಖೋಂದಿನ್, ಇನು ಯಜಮಾನ್ನು ಬಿಲ್ಲಾನ ಲಪಾಡಿನಾಖ್ಯೊ.
MAT 25:19 ಘಣ ದನ್ನ ಬಾದ್‌ಮ ಯೋ ಆಳ್‌ ಖ್ಹಾರಾನೊ ಯಜಮಾನ್ ಫಾಛೊ಼ ಆಯಿನ್, ಇವ್ಣೇಥಿ ಇಶಾಬ್ ಮಾಂಗ್‌ತಾನ,
MAT 25:20 ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಲಿದಾಹುಯಾನೆ ಖ್ಹಾಮ್ಣೆ ಆಯಿನ್, ಇನಜೋ಼ಡೆ ಬಿಜು಼ ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲಾ ಲಯಿನ್, ‘ಪ್ರಭು, ತುನೆ ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಮನ ದಿದೋಥೋನಿ, ಹಂದೇಕ್, ಇನಜೋ಼ಡೆ ಬಿಜು಼ ಪಾಚ಼್ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಕಮೈರಾಖ್ಯೋಸ್’ ಕರಿ ಬೋಲ್ಯೊ.
MAT 25:21 ತದೆ ಇನ ಯಜಮಾನ್ನೆ ಇನ, ‘ಶಬಾಶ್, ತೂ ಅಛ್ಛೊ಼ ಅಜು಼ ಭರೋಖ್ಹಾನೊ ಆಳ್‌! ಹುಯಿರ‍್ಹೋಸ್!’ ತೂ ಥೋಡಾಮ ನಿಯಥ್ಥಿ ರ‍್ಹಯೋತೆ ಇನಖ್ಹಾಜೆ, ಮೇ ತುನ ಮೋಟಾ ಕಾಮ್‌ಪರ್ ನೇಮ್‌ಶಾವುಸ್. ಐನ್, ಮಾರಿ ಖ್ಹುಶಿಮ ಭಾಗ್‌ ಹೂ’ ಕರಿ ಬೋಲ್ಯೊ.
MAT 25:22 “ತದೆ ಬೇ ಹಜಾ಼ರ್ ಖ್ಹೊನ್ನಾನು ಬಿಲ್ಲು ಲಿದೊಹುಯೊ ಆಳ್‌ ಖ್ಹಾಮ್ಣೆ ಐನ್, ಪ್ರಭು, ‘ತುನೆ ಮನ ಬೇ ಹಜಾ಼ರ್ ಖ್ಹೊನ್ನಾನು ಬಿಲ್ಲು ದಿದೊಥೋನಿ, ಹಂದೇಕ್, ಬಿಜು಼ ಬೇ ಹಜಾ಼ರ್ ಕಮೈರಾಖ್ಯೋಸ್’ ಕರಿ ಬೋಲ್ಯೊ.
MAT 25:23 ಇನ ಯಜಮಾನ್ನೆ ಇನ, ‘ಶಬಾಶ್! ತೂ ಅಛ್ಛೊ಼ ಅಜು಼ ಭರೋಖ್ಹಾನೊ ಆಳ್‌ ಹುಯಿರ‍್ಹೋಸ್!’ ತೂ ಥೋಡಾಮ ನಿಯಥ್ಥಿ ರ‍್ಹಯೋತೆ ಇನಖ್ಹಾಜೆ, ‘ಮೇ ತುನ ಮೋಟಾ ಕಾಮ್‌ಪರ್ ನೇಮ್‌ಶಾವುಸ್, ತೂ ಐನ್, ಮಾರಿ ಖ್ಹುಶಿಮ ಭಾಗ್‌ ಹೂ!’ ಕರಿ ಬೋಲ್ಯೊ.
MAT 25:24 ಅನ “ಬಾದ್‌ಮ ಏಕ್‌ ಹಜಾ಼ರ್ ಖ್ಹೊನ್ನಾನು ಬಿಲ್ಲು ದೇವ್ಣುಥೂತೆ ಇನೆ ಖ್ಹಾಮ್ಣೆ ಆಯಿನ್, ‘ಪ್ರಭು, ತೂ ಕಠಣ್‌ ಅದ್ಮಿಕರಿ ಮನ ಮಾಲುಮ್; ತೂ ಛಿಡ್‌ಕ್ಯೊಕೊಂತೆ ಇನ ವ್ಹಾಡವಾಳೊ, ತೂ ಗಾಡ್ಯೊಕೊಂತೆ ಅನಾಜ಼್‌ನ ಎಕ್ಟು ಕರಾವಾಳೊ.
MAT 25:25 ಮೇ ಡರಿನ್, ತಾರ ಪೈಶಾನ ಜ಼ಮೀನ್‌ಮ ಲಪಾಡಿರಾಖ್ಯೊಥೊ. ಹಂದೇಕ್, ತಾರು ತುನಾಸ್ ದೆವ್‍ಕರೂಸ್’ ಕರಿ ಬೋಲ್ಯೊ.
MAT 25:26 ತದೆ ಇನ ಯಜಮಾನ್ನೆ, ‘ತೂ ಖರಾಬ್ ಅಜು಼ ಶೋಂಬೇರಿ ಆಳ್‌ ಹುಯಿರ‍್ಹೋಸ್! ಮೇ ಛೀಡ್‌ಕ್ಯೊಕೊಂತೆ ಹಿಜ್ಜಾ಼ ವ್ಹಾಡವಾಳೊ, ಮೇ ಗಾಡ್ಯೊಕೊಂತೆ ಅನಾಜ಼್‌ನ ಎಕ್ಟು ಕರಾವಾಳೊ ಕರಿ ತುನ ಮಾಲುಮ್ ಥೂಕಿ ಶು?
MAT 25:27 ಇಮ್‍ಕತೊ, ತೂ ಮಾರ ಪೈಶಾನ ಬಡ್ಡಿಪರ್ ದೇವ್ಣುಥು, ತದೆ ಮೇ ಆಯಿನ್, ಮಾರ ಪೈಶಾನ ಬಡ್ಡಿ ಖ್ಹಮೇದ್ ಲೀಲಿದೊಹೋತ್’ ಕರಿ ಬೋಲ್ಯೊ.
MAT 25:28 ಅಜು಼ ಇನ ಆಳ್‌ ಖ್ಹಾರಾನ, ‘ಆ ದೇವ್ಣುತೆ ಯೋ ಪೈಶಾನ ಲೀನ್, ದಖ್ಹ್‌ ಹಜಾ಼ರ್ ಖ್ಹೊನ್ನಾನು ಬಿಲ್ಲಾ ಛಾ಼ತೆ ಇನ ದೆವೊ.
MAT 25:29 ಕಿನಾಕನ ಥೋಡು ಛಾ಼ಕಿ ಇವ್ಣುನ ಬಿಜೂ಼ಬಿ ದೆವಾವ್‌ಶೆ, ಅಜು಼ ಇನ ಹೋಣುತೆ ಇನೇಥಿಬಿ ಜಾ಼ಖ್ಹತ್ ಇನ ಮಳ್‌ಶೆ; ಕತೋಬಿ ಕಿನಾಕನ ಶಾತ್ಬಿ ಕೊಯ್ನಿಕಿ, ಇನಾಕಂಥು ಇನಾಕನ ಛಾ಼ತೇಬಿ ಥೋಡು ಕಾಡಿಲಿಶೆ.
MAT 25:30 ಅನಕೇಡೆಥು ಯೋ ಯಜಮಾನ್ನೆ, ಕಾಮ್ನಕೊಂತೆ ಆ ಖರಾಬ್ ಆಳ್‌ನ ಭಾರ್ ಅಂಧಾರಾಮ ನಾಖಿದೆವೊ; ಹಿಜ್ಜಾ಼ ಆ ರೊವ್‌ತೊಹುಯಿನ್, ಕರ್‌-ಕರ್‌ ದಾತ್‌ ಚಾ಼ವ್‌ಶೆ’ ಕರಿ ಬೋಲ್ಯೊ.
MAT 25:31 ಅತ್ರೇಸ್ ಕಾಹೆತೆ ಅದ್ಮಿನೊ ಛಿಯ್ಯೊ ಇನಿ ಮಹಾನ್ ಮಹಿಮೆಥಿ ತಮಾಮ್‌ ದೇವ್‌ನು ದೂತರ್‌ನ ಜೋ಼ಡೆ ಆವಾನಿ ವಖ್ಹತ್‌ಮ, ಯೊ ಇನಿ ಮಹಿಮೆನು ಸಿಂಹಾಸನ್‍ಪರ್ ಬೇಖ್ಹ್‌ಶೆ.
MAT 25:32 ಅಜು಼ ತಮಾಮ್‌ ದೇಖ್ಹ್‌ನು ಅದ್ಮಿಖ್ಹಾರು ಇನಖ್ಹಾಮ್ಣೆ ಎಕ್ಟು ಉಶೆ. ಚ಼ರಾವವಾಳೊ ಬೋಕ್‍ಡಾವ್‍ ಅಜು಼ ಮೇಂಢವ್‌ನ ಅಲಕ್ ಕರಾತೆ ಇಮ್ಮಸ್, ಯೊ ಇವ್ಣುನ ಅಲಕ್ ಕರೀನ್,
MAT 25:33 ಮೇಂಢವ್‌ನ ಇನಿ ಖಾವಿ ಬಾಜೂ಼ಮ ಅಜು಼ ಬೋಕ್‍ಡಾವ್ನ ಇನಿ ಡಾವಿ ಬಾಜೂ಼ಮ ಭೀರಾಕ್‌ಶೆ.
MAT 25:34 ತದೆ ರಾಜಾ಼ ಇನಿ ಖಾವಿ ಬಾಜೂ಼ಮ ಭಿಯುತೆ ಅದ್ಮಿ ಖ್ಹಾರಾನ, ‘ಮಾರ ಬಾನೆ ಆಶೀರ್ವಾದ್‌ ಕರ‍್ಯೊತೆ ತುಮೆ ಆವೊ, ಜಗತ್‌ ಉಬ್‌ಜ್ಯುತೆ ತಪ್‌ಥು ತುಮಾರಖ್ಹಾಜೆ ತೈಯಾರ್ ಹುಯಿರ‍್ಹೂತೆ ರಾಜ್ಯನ ಅಲ್ಲೇವೊ.
MAT 25:35 ಮೇ ಭುಕ್ಯೊ ಥೊ, ತುಮೆ ಮನ ಖಾಣು ದಿದಾ; ಮೇ ಟೋಖ್ಹ್‌ಮ ಥೊ, ತುಮೆ ಮನ ಪಿಯ್ಯಾನ ದಿದಾ; ಮೇ ಪರೈ ಅದ್ಮಿಹುಯಿನ್ ಥೊ, ತುಮೆ ಮನ ಮಳೈಲಿದ;
MAT 25:36 ಮೇ ಉಘಾಡೊ ಥೊ, ತುಮೆ ಮನ ಪೇರ‍್ಹಾನ ಲುಂಗ್ಡಾದಿದಾ; ಮೇ ರೋಗ್‌ಮ ಪಡ್ಯೋಥೊ, ತುಮೆ ಮನ ದೇಕ್-ಭಾಲ್ ಕರ‍್ಯಾ; ಮೇ ಜೇಲ್‌ಮ ಥೊ, ತುಮೆ ಮನ ದೇಖಾನ ಆಯಾಥಾ’ ಕರಿ ಬೋಲ್‌ಶೆ.
MAT 25:37 ತದೆ ಯೋ ಧರ್ಮಿ ಅದ್ಮಿಖ್ಹಾರು, ‘ಪ್ರಭು, ಕದೆ ತೂ ಭುಕ್ಯೊ ಥೋತೆ ದೇಖಿನ್, ಹಮೆ ಖಾಣು ದಿದಾ? ನಾತೊ ಕದೆ ತೂ ಟೋಖ್ಹ್‌ಮ ಥೋತೆ ದೇಖಿನ್, ತುನ ಪಿಯ್ಯಾನ ದಿದಾ?
MAT 25:38 ಕದೆ ತೂ ಪರೈ ಅದ್ಮಿ ಹುಯಿರ‍್ಹೊಥೋತೆ ದೇಖಿನ್, ಹಮೆ ತುನ ಮಳೈಲಿದ? ನಾತೊ ಕದೆ ತೂ ಉಘಾಡೊ ಥೋತೆ ದೇಖಿನ್, ಹಮೆ ತುನ ಪೇರ‍್ಹಾನ ಲುಂಗ್ಡ ದಿದಾ?
MAT 25:39 ಕದೆ ತೂ ರೋಗ್‌ಮ ಥೋತೆ ದೇಖಿನ್, ನಾತೊ ಜೇಲ್‌ಮಥೋತೆ ದೇಖಿನ್, ಹಮೆ ತುನ ದೇಖಾನ ಆಯಾಥಾ?’ ಕರಿ ಬೋಲ್‌ಶೆ.
MAT 25:40 ತದೆ ಯೋ ರಾಜಾ಼ ಫರೈನ್, ‘ಆ ಮಾರ ಭೇನೆ-ಭೈಯೇಮ ಕಡ್‌ತೇಲ್‌ನಿಮತ್ ಥೂತೆ ಏಕ್‌ನ ತುಮೆ ಶಶ್ಶಾತ್ ಕರ‍್ಯಾಕಿ, ಯೋ ಮನಾಬಿ ಕರಾದಾಖ್ಹಲ್ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್’ ಕರಿ ಬೋಲ್‌ಶೆ!
MAT 25:41 ಅನಕೇಡೆಥು ಯೋ ರಾಜ಼ ಇನಿ ಡಾವಿ ಬಾಜೂ಼ಮ ಭೀರ‍್ಯೂತೆ ಅದ್ಮಿಖ್ಹಾರಾನ, ‘ಮಾರೇಥಿ ದೂರ್ ಹಟಿಜಾ಼ವೊ, ತುಮೆ ದೇವ್ನಿ ಶಾಪ್ನ ಹೇಟ್ ಛಾ಼! ಮನ ಮ್ಹೆಂದಿನ್, ಶೈತಾನ್ನ ಅಜು಼ ಇನ ದೂತರ್‌ನಖ್ಹಾಜೆ ತೈಯಾರ್ ಹುಯಿರ‍್ಹೂತೆ ಹರ್‌ಹಮೇಶಾನಿ ಆಗ್‌ಮ ಜೈ಼ನ್, ಪಡೊ!
MAT 25:42 ಮೇ ಭುಕ್ಯೊ ಥೊ, ತುಮೆ ಮನ ಖಾಣು ಕೋ ದಿದಾನಿ; ಮೇ ಟೋಖ್ಹ್‌ಮ ಥೊ, ತುಮೆ ಮನ ಪಿಯ್ಯಾನ ಕೋ ದಿದಾನಿ;
MAT 25:43 ಮೇ ಪರೈ ಹುಯಿನ್ ಥೊ, ತುಮೆ ಮನ ಮಳೈಲಿದಾಕೊಯ್ನಿ; ಮೇ ಉಘಾಡೊ ಥೊ, ತುಮೆ ಮನ ಪೇರ‍್ಹಾನ ಲುಂಗ್ಡ ಕೋ ದಿದಾನಿ; ಮೇ ರೋಗ್‌ಮ ಥೊ, ತುಮೆ ಮನ ದೇಕ್‌ಭಾಲ್‌ ಕೋ ಕರ‍್ಯಾನಿ; ಮೇ ಜೇಲ್‌ಮ ಥೊ, ತುಮೆ ಮನ ದೇಖಾನ ಕೋಆಯನಿ’ ಕರಿ ಬೋಲ್‌ಶೆ.
MAT 25:44 ತದೆ ಇವ್ಣೆ ಇನ, ‘ಪ್ರಭು, ಕದೆ ತೂ ಭುಕ್ಯೊ ಥೋತೆ, ನಾತೊ ಟೋಖ್ಹ್‌ಮ ಥೋತೆ, ನಾತೊ ಪರೈಹುಯಿನ್ ಥೋತೆ, ನಾತೊ ರೋಗ್‌ಮ ಥೋತೆ, ನಾತೊ ಜೇಲ್‌ಮಥೋತೆ ದೇಖಿನ್, ಹಮೆ ತುನ ಮದತ್ ಕರ‍್ಯಾಕೊಂತೆ ಗಯ?’ ಕರಿ ಪುಛಾ಼ವ್‌.
MAT 25:45 ತದೆ ಯೋ ರಾಜ಼ ಫರೈನ್ ಇವ್ಣುನ, ‘ತುಮೆ ಆ ನ್ಹಾನಾವ್‍ಮ ಕಡ್‌ತೇಲ್‌ನಿಮತ್ ಛಾ಼ತೆ ಏಕ್‌ನ ಶಶ್ಶಾತ್ ಕೋ ಕರ‍್ಯಾನಿಕಿ, ಯೋ ಮನಾಬಿ ಕರ‍್ಯಾಕೊಯ್ನಿ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್’ ಕರಿ ಬೋಲ್‌ಶೆ.
MAT 25:46 ತದೆ ಖರಾಬ್ ಅದ್ಮಿ ಖ್ಹಾರಾನ ಹರ್‌ಹಮೇಶಾನಖ್ಹಾಜೆ ಡಂಡ್ ಉಶೆ ಅಜು಼ ಧರ್ಮಿ ಖ್ಹಾರಾನ ಹರ್‌ಹಮೇಶಾನಿ ಜಿ಼ಂದ್‌ಗಿ ಮಳ್‌ಶೆ.
MAT 26:1 ಯೇಸುನೆ ಆವಾತೆಖ್ಹಾರಿ ಬೋಲಿನ್ ಖತಮ್ ಕರಾನ ಬಾದ್‌ಮ, ಇನ ಶಿಷ್ಯರ್‌ನ,
MAT 26:2 “ಬಿಜು಼ ಬೇ ದನ್ಮ ಪಸ್ಕ ಪೂಜಾ಼ ಆವ್‍ಶೆಕರಿ ತುಮೂನ ಮಾಲುಮ್; ತದೆ ಅದ್ಮಿನೊ ಛಿಯ್ಯಾನ ಶಿಲ್‌ಬೇಪರ್ ನಾಖಾನಖ್ಹಾಜೆ ಇವ್ಣಹಾತ್ಮ ದಿನಾಕ್‌ಶೆ” ಕರಿ ಬೋಲ್ಯೊ.
MAT 26:3 ತದೆ ಗಲ್‌ಢಯಾಜಕರ್‌ಬಿ ಅಜು಼ ಶಾಣುಖ್ಹಾರು ಮಹಾಯಾಜಕ್ ಕಾಯಫನ ಮಹೇಲ್‌ಮ ಮಳೀನ್ಆಯು,
MAT 26:4 ಯೇಸುನ ಕಿನಾಬಿ ಮಾಲುಮ್‌ಕೊಂತೆ ಇಮ್‌ ಧರೀನ್, ಮರೈನಾಕ್ಣು ಕರಿ ವಾತೆ ಕರಿಲಿದು.
MAT 26:5 “ತೋಬಿ ಪೂಜಾ಼ನಿ ವಖ್ಹತ್‌ಮ ನಾ ಧರ್‌ನು, ಶನಕತೊ ಅಪ್ಣ ಅದ್ಮಿಮ ಕಲ್ಹಾಗಟ್ ಪಡಿಜಾ಼ಶೆ” ಕರಿ ಬೋಲಿಲಿದು.
MAT 26:6 ಯೇಸು ಬೇಥಾನ್ಯಮ ಸೀಮೋನ್ನ ಘರ್‌ಮ ಥೊ, ಆ ಸೀಮೋನ್ ಅಗಾಡಿ ಖೋಡ್‍ವಾಳೊ ಹುಯಿರ‍್ಹೋಥೊ.
MAT 26:7 ಯೇಸು ಖಾಣು ಖಾವಾನಿ ವಖ್ಹತ್‌ಮ, ಏಕ್‌ ತಯೇಡ ಘಣ ಮೋಲ್ನು ವಾನು ತೇಲ್ನ ಧೋಳ ಬಂಡಾನಿ ಶೀಶಿಮ ಲೀನ್, ಇನಾಕನ ಆಯಿನ್, ಯೋ ತೇಲ್ನ ಇನ ಮಾಥಪರ್ ರಂಚಿ.
MAT 26:8 ಅನ ದೇಖಿನ್, ಶಿಷ್ಯರ್‌ನೆ ಖೀಜ಼್ ಕರ‍್ಯಾ, ಅಜು಼, “ಆ ವಾನು ತೇಲ್ನ ಶನ ಲುಕ್ಷಾನ್ ಕರಿ?
MAT 26:9 ಆ ತೇಲ್ನ ಘಣ ಪೈಶಾನ ವೇಚಿನ್, ಆವಾಸ್ತೆ ಪೈಶಾನ ಗರೀಬ್‌ನ ದಿಯ್ಯೆಜಾ಼ಯಿಥೂನಿ?” ಕರಿ ಬೋಲ್ಯ.
MAT 26:10 ಯೇಸುನೆ ಇವ್ಣೆ ಬೋಲುಕರಾತೆ ಮಾಲುಮ್‌ ಕರಿಲೀನ್ ಇವ್ಣುನ, “ತುಮೆ ಆ ತಯೇಡಾನ ಶನ ಖ್ಹತವ್‍ಕರಸ್ತೆ? ಅನೆ ಮಾರಖ್ಹಾಜೆ ಘಣು ಅಛ್ಛು಼ಕಾಮ್ ಕರಿರಾಖೀಸ್.
MAT 26:11 ಗರೀಬ್ ಅದ್ಮಿಖ್ಹಾರು ಕದೇಬಿ ತುಮಾರಕನ ರ‍್ಹಿಶೆ, ಕತೋಬಿ ಮೇ ಹಮೇಶ ತುಮಾರಕನ ರ‍್ಹೀಶ್ ಕೊಯ್ನಿ.
MAT 26:12 ಮೇ ಮರ್‌ವಾನ ಬಾದ್‌ಮ, ಮಾರು ಶರೀರ್‌ನ ಮಖ್ಹಾಣ್ಯು ಕರಾನಟೇಕೆ, ಅನೆ ಮಾರ ಆಂಗ್‌ತನ್‌ಪರ್ ವಾನು ತೇಲ್ನ ರಂಚಿರಾಖಿಸ್.
MAT 26:13 ಮೇ ತುಮುನ ಖ್ಹಾಚಮಾಬಿ ಬೋಲುಸ್, ಹಿಡಿ ಜಗತ್‌ಮ ಆ ಅಛ್ಛಿ ಖಬರ್ ಕಿಜ಼್ಜ-ಕಿಜ಼್ಜ ಬೋಲಾವ್‌ಶೇಕಿ, ಹಿಜ್ಜಾ಼ ಖ್ಹಾರು ಅನೆ ಕರೀತೆ ಇನಾಬಿ ಅನಿ ಯಾದ್‌ನಖ್ಹಾಜೆ ಬೋಲ್‌ಶೆ” ಕರಿ ಬೋಲ್ಯೊ.
MAT 26:14 ಅನ ಬಾದ್‌ಮ ಭಾರ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಇಸ್ಕರಿಯೋತ ಯೂದಾನೆ ಗಲ್‌ಢಯಾಜಕರ್‌ಕನ ಜೈ಼ನ್,
MAT 26:15 “ಮೇ ಇನ ಧೋಕೇಥಿ ಧರಿದಿದೋತೊ, ತುಮೆ ಮನ ಶಾತ್ ದಿಶು?” ಕರಿ ಪುಛಾ಼ಯೊ. ತದೆ ಇವ್ಣೆ ಡೋಡಿಖ್ಹ್‌ ರೂಪಾನು ಬಿಲ್ಲಾನ ಗಣೀನ್, ಇನ ದಿದು.
MAT 26:16 ತಪ್‌ಥೊ ಯೂದ ಯೇಸುನ ಧರಿದ್ಯವಾನಿ ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೂಕರ್ತೊಥೊ.
MAT 26:17 ಖಾಟುಕೊಂತೆ ರೋಟಾನು ಪೂಜಾ಼ನ ಪಹಿಲ ದನ್ನೆ, ಶಿಷ್ಯರ್‌ ಯೇಸುಕನ ಐನ್, “ಹಮೆ ತಾರಖ್ಹಾಜೆ ಪಸ್ಕಾನು ಖಾಣನ ಕಿಜ಼್ಜಾ ತೈಯಾರ್ ಕರ‍್ನು?” ಕರಿ ಪುಛಾ಼ಯಾ.
MAT 26:18 ತದೆ ಯೇಸುನೆ ಇವ್ಣುನ, “ತುಮೆ ಖ್ಹಯೇರ್‌ಮ ಮೇ ವತಾಳ್ಯೊತೆ ಇನಕನ ಜೈ಼ನ್ ಇನ, ‘ಮಾರಿ ವಖ್ಹತ್ ಖನ್ನೆ ಐಗೈ, ತಾರ ಘರ್‌ಮ ಮಾರ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖವುಸ್ ಕರಿ ಗುರುನೆ ಬೋಲ್ಯೊ’ ಕರಿ ಬೋಲೊ.”
MAT 26:19 ಶಿಷ್ಯರ್‌ನೆ ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಕರ‍್ಯಾ ಅಜು಼ ಪಸ್ಕಾನ ಖಾಣನ ತೈಯಾರ್ ಕರ‍್ಯಾ.
MAT 26:20 ಖ್ಹಾಂಜ಼್ ಹುವ್ವಾದೀನ್, ಯೇಸು ಇನ ಭಾರ ಶಿಷ್ಯರ್‌ನ ಜೋ಼ಡೆ ಖಾಣನ ಬೇಶಿಗಯೊ.
MAT 26:21 ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, “ಮೇ ಖ್ಹಾಚಮಾಬಿ ಬೋಲುಸ್ಕಿ, ತುಮಾರಾಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ” ಕರಿ ಬೋಲ್ಯೊ.
MAT 26:22 ತದೆ ಶಿಷ್ಯರ್‌ ಖ್ಹಾರು ಘಣು ದುಖ್‌ಥಿ, “ಪ್ರಭು, ಖ್ಹಾಚಮಾಬಿ ಮೇ ಕಾಹೆ ಕೊಯ್ನಿ?” ಕರಿ ಏಕ್‌ನ ಬಾದ್ಮ ಏಕ್‌ ಇನ ಪುಛಾ಼ವಲಗ್ಯಾ.
MAT 26:23 ಯೇಸುನೆ, “ಕೋಣ್ ಮಾರ ಜೋ಼ಡ್ಮ ಕಟೋರಿಮ ಚೋ಼ಪ್‌ಡಾಸ್ಕಿ, ಯೋಸ್ ಮನ ಧೋಕೇಥಿ ಧರಿದ್ಯವಾಳೊ” ಕರಿ ಬೋಲ್ಯೊ.
MAT 26:24 ವಚನ್‌ಮ ಲೀಖೈರ‍್ಹೂತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಮರ್‌ಶೆ, ಕತೋಬಿ ಕೋಣ್ ಅದ್ಮಿನೊ ಛಿಯ್ಯಾನ ಧರಿದಿಶೇಕಿ, ಇನಿ ಹಾಲ್ನ ಶಾತ್‌ ಬೋಲು! ಯೋ ಅದ್ಮಿ ಪೈದಾ ನಾಸ್ ಹುಯುಹೊತ್ತೊ ಇನ ಅಛ್ಛು಼ ಥೂ.
MAT 26:25 ತದೆ ಇನ ಧೋಕೇಥಿ ಧರಿದೇಣು ಕರಿ ಥೋತೆ ಯೂದಾನೆ, “ಗುರು, ಖ್ಹಾಚಮಾಬಿ ಯೋ ಮೇತೊ ಕಾಹೆನಿ?” ಕರಿ ಪುಛಾ಼ಯೊ. ಯೇಸುನೆ ಇನ, “ತೂಸ್ ಬೋಲ್ಯೋನಿ” ಕರಿ ಜ಼ವಾಬ್ ದಿದೊ.
MAT 26:26 ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ರೋಟಾನ ಪಾಡೀನ್,ದೇವ್ನ ಧನ್ಯವಾದ್‌ ಕರೀನ್, ಇನ ತೋಡಿನ್, ಇನ ಶಿಷ್ಯರ್‌ನ ದೀನ್, “ಅಲ್ಲೇವೊ, ಅನಖಾವೊ, ಆ ಮಾರು ಶರೀರ್” ಕರಿ ಬೋಲ್ಯೊ.
MAT 26:27 ಅನಕೇಡೆಥು ಕಟೋರಿನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇವ್ಣುನ ದೀನ್, “ತುಮೆ ಖ್ಹಾರು ಅನಾಮ ಪೀಯ್ಯೊ.
MAT 26:28 ಆ ಮಾರು ಲ್ಹೋಯಿ, ಆ ದೇವ್‌ನು ನವು ಒಪ್ಪಂದಾನನ ಮುದ್ರೊ ಮರೈಹುಯು ಮಾರು ಲ್ಹೊಯಿ; ಕೈಯೆಕ್ಕಿ ಅದ್ಮಿನು ಪಾಪ್‌ಖ್ಹಾರು ಮಾಪ್‌ ಕರಾನಖ್ಹಾಜೆ ರಂಚಾ಼ಯುತೆ ಮಾರು ಲ್ಹೊಯಿ.
MAT 26:29 ಮೇ ತುಮೂನ ಬೋಲುಸ್ಕಿ, ಹಂಕೇಥು ಧರೀನ್, ಬಾನಿ ರಾಜ್ಯಮ ನವು ದ್ರಾಕ್ಷಿನು ರಖ್ಹ್‌ ಪಿಯ್ಯಾನ ದನ್‌ತೋಡಿ, ಅನ ಮೇ ಪಾಛೊ಼ ಪೀಶಸ್ ಕೊಯ್ನಿ” ಕರಿ ಬೋಲ್ಯೊ.
MAT 26:30 ಅನಕೇಡೆಥು ಇವ್ಣೆ ಸ್ತುತಿನು ಗೀದ್‌ ಬೋಲಿನ್ ಆಲಿವ್ ಪಹಡ್‌ಕನ ಚ಼ಲೇಗಯ.
MAT 26:31 ತದೆ ಯೇಸುನೆ ಇವ್ಣುನ, “ಆ ರಾತೆ ತುಮೆ ಖ್ಹಾರುಸ್ ಮನ ಮ್ಹೆಂದಿನ್, ಮಿಲೈಜಾ಼ಶು; ದೇವ್ ವಚನ್‌ಮ ಬೋಲುಕರಸ್ ಮೆ ಮೇಂಢ ಚ಼ರಾವವಾಳಾನ ಮರ್‌ನಾಕಿಶ್, ತದೆ ಮಂಧಾಮಾಥು ಮೇಂಢ ಛಿಡ್‌ಗರ್‌ ಹುಯಿಜಾ಼ಶೆ,
MAT 26:32 ಕತೋಬಿ ಮೇ ಜಿವ್ತೊಹುಯಿನ್, ಉಠಾನ ಬಾದ್‌ಮ ತುಮಾರೇಥಿ ಅಗಾಡಿ ಗಲಿಲಾಯ ಜೈ಼ಶ್” ಕರಿ ಬೋಲ್ಯೊ.
MAT 26:33 ತದೆ ಪೇತ್ರನೆ ಯೇಸುನ, “ಖ್ಹಾರು ಡರಿನ್, ತುನ ಮ್ಹೆಂದಿದಾತೋಬಿ ಮೇ ತುನ ಮ್ಹೇಲಿಶ್ ಕೊಯ್ನಿ” ಕರಿ ಬೋಲಾಖ್ಹತರ್,
MAT 26:34 ಯೇಸುನೆ ಪೇತ್ರನ, “ಖ್ಹಾಚಮಾಬಿ ತುನ ಬೋಲುಸ್ಕಿ, ಆ ರಾತೇಸ್ ಮುರ್‌ಗೊ ಬಾಂಗ್‌ ದ್ಯವಾನ ಅಗಾಡಿ ತೂ ಮಾರಿ ಬಾರೇಮ, ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊ.
MAT 26:35 ಪೇತ್ರನೆ, “ಮೇ ತಾರ ಜೋ಼ಡ್ಮ ಮರಾನು ರ‍್ಹಯುತೋಬಿ, ಮೆ ತುನ ಮಾಲುಮ್‌ ಕೊಯ್ನಿ ಕರಿ ಕೋ ಬೋಲಿಶ್‌ನಿ” ಕರಿ ಬೋಲ್ಯೊ. ಅಜು಼ ಬಿಜಾ಼ಖ್ಹಾರ ಶಿಷ್ಯರ್‌ನೇಬಿ ಇಮ್ಮಸ್ ಬೋಲ್ಯ.
MAT 26:36 ಅನಕೇಡೆಥು ಯೇಸು ಇನ ಶಿಷ್ಯರ್‌ನ ಜೋ಼ಡೆ ಗೆತ್ಸೆಮನೆ ಕರಿ ಬಾಗ್‌ನ ಗಯೊ, ಇವ್ಣುನ, “ಹಜ್ಜಾ಼ಸ್ ಬೇಖ್ಹೊ, ಮೇ ಹಿಜ್ಜಾ಼ ಜೈ಼ನ್, ಪ್ರಾರ್ಥನೆ ಕರೀನ್, ಆವುಸ್‌” ಕರಿ ಬೋಲ್ಯೊ.
MAT 26:37 ಅಮ್ ಬೋಲಿನ್, ಪೇತ್ರ ಅಜು಼ ಜೆಬೆದಾಯನ ಛಿಯ್ಯಾವ್‍ನ ಇನಜೋ಼ಡೆ ಬುಲೈಲಿ ಗಯೊ. ತದೆ ಯೇಸುನ ಘಣು ಘಬ್ರಾವ್‍ಣಿ ಹುಯು ಅಜು಼ ಯೋ ದುಖ್‌ಥಿ ಭರೈಗೊ.
MAT 26:38 ಅಜು಼ ಯೇಸುನೆ ಇವ್ಣುನ, “ಮಾರೊ ಜಾನ್‌ ಮರ‍್ವಎತ್ರೆ ದುಖ್‌ಮ ಛಾ಼. ತುಮೆ ಹಾಸ್‌ರ‍್ಹೀನ್, ಮಾರ ಜೋ಼ಡೆ ಹೊಷಾರಿ ರ‍್ಹವೊ” ಕರಿ ಬೋಲ್ಯೊ.
MAT 26:39 ಅನಕೇಡೆಥು ಯೋ ಜ಼ರ ಖ್ಹಾಮ್ಣೆ ಜೈ಼ನ್, ಜ಼ಮೀನ್‌ಪರ್ ಆಡೊ ಪಡೀನ್, “ಮಾರೊ ಬಾ, ಹೋತು ಉಶೇತೊ, ಆ ವದೇಖ್ಹಾನಿ ಕಟೋರಿ ಮನ ಮ್ಹೆಂದಿನ್ ಜಾ಼ವಾನಿಘೋಣಿ ಕರ್‌! ತೋಬಿ ಮಾರಿ ಮರ್ಜಿನಿಘೋಣಿ ಕಾಹೆ, ತಾರಿ ಮರ್ಜಿನಿ ಘೊಣಿಸ್ ಹುವಾದೆ” ಕರಿ ಪ್ರಾರ್ಥನೆ ಕರ‍್ಯೊ.
MAT 26:40 ಅನ ಯೇಸು ಯೋ ಶಿಷ್ಯರ್‌ಕನ ಆಯಿನ್, ಇವ್ಣೆ ಖ್ಹುತಾತೆ ದೇಖಿನ್, ಪೇತ್ರನ, “ಅಮ್‌ಕಿ ಶು? ತುಮೆ ಮಾರ ಜೋ಼ಡೆ ಏಕ್‌ ಘಡೀಬಿ ಹೊಷಾರಿ ರ‍್ಹವಾನ ಕೋ ಹೋಯ್ನಿಕಿ ಶು?
MAT 26:41 ಶೋದನೆಮ ಪಡ್ಣುನಾತೆ ಇಮ್‌ ಹೊಷಾರಿ ರ‍್ಹೀನ್, ಪ್ರಾರ್ಥನೆ ಕರೊ. ಮನ್ ಛಾ಼ ಖ್ಹಾಚಸ್, ಕತೋಬಿ ಶರೀರ್‌ನ ಶಕತ್ ಪುರಾಕೊಯ್ನಿ” ಕರಿ ಬೋಲ್ಯೊ.
MAT 26:42 ಬಿಜು಼ ಪಾಛೊ಼ ಭೇನೆಹಲ್ಲ ಜೈ಼ನ್, “ಮಾರೊ ಬಾ, ಮೇ ಆ ವದೇಖ್ಹಾನಿ ಕಟೋರಿನ ಪಿಯ್ಯಾಶೆ, ಆ ಮನ ಮ್ಹೆಂದಿನ್ ನಾ ಜಾ಼ವ್ಣುಕರಿ ತಾರಿ ಮರ್ಜಿ ಉಶೇತೊ, ತಾರಿ ಮರ್ಜಿನಿಘೋಣಿಸ್ ಹುವಾದೆ” ಕರಿ ಬೋಲಿನ್, ಪ್ರಾರ್ಥನೆ ಕರ‍್ಯೊ.
MAT 26:43 ಅನ ಬಾದ್‌ಮ ಪಾಛೊ಼ ಶಿಷ್ಯರ್‌ಕನ ಐನ್, ಇವ್ಣೆ ಖ್ಹುತಾತೆ ದೇಖ್ಯೊ; ಇವ್ಣ ಡೋಳಾಮ ನಿಂದರ್‌ ಚು಼ವ್‍ಕರ್ತಿಥಿ.
MAT 26:44 ಅನಕೇಡೆಥು ಪಾಛೊ಼ ಇವ್ಣುನ ಮ್ಹೆಂದಿನ್ ಜೈ಼ನ್, ಯೋಸ್ ವಾತೇನ ಬೋಲ್ತೊಹುಯಿನ್, ತೀನ್ನೆಹಲ್ಲ ಪ್ರಾರ್ಥನೆ ಕರ‍್ಯೊ.
MAT 26:45 ಬಾದ್‌ಮ ಯೋ ಬಿಜು಼ ಪಾಛೊ಼ಫರಿನ್, ಇನ ಶಿಷ್ಯರ್‌ಕನ ಆಯಿನ್, “ತುಮೆ ಬಿಜೂ಼ಬಿ ಖ್ಹುಯಿನ್, ಅರಾಮ್‌ ಕರುಕರಾಸ್ಕಿ ಶು? ಹಂದೇಖೊ, ಅದ್ಮಿನೊ ಛಿಯ್ಯಾನ ಪಾಪಿ ಅದ್ಮಿಯೇನ ಹಾತ್‌ಮ ದೆವೈಜಾ಼ಶೆ.
MAT 26:46 ಉಠೊ, ಜ಼ಯ್ಯೆ. ಮನ ಧೋಕೇಥಿ ಧರಿದ್ಯವಾಳೊ ಖನ್ನೆಸ್‌ ಐರ‍್ಹೋಸ್” ಕರಿ ಬೋಲ್ಯೊ.
MAT 26:47 ಯೇಸು ಅಜೂ಼ಬಿ ವಾತೆ ಬೋಲುಕರಾತೆ ತದ್ದೇಸ್, ಇನ ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ ಹಿಜ್ಜಾ಼ ಆಯೊ.ಇನ ಜೋ಼ಡ್ಮ ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಬೋಲಿ ಮೋಕ್‌ಲ್ಯುತೆ ಅದ್ಮಿನಿ ಏಕ್‌ ಮೋಟಿ ಝೂ಼ಂಡಸ್ ತಲ್ವಾರೆ ಅಜು಼ ಲಠ್ಠ ಧರಿಲಿನ್ ಹಿಜ್ಜಾ಼ ಆಯು.
MAT 26:48 ಯೇಸುನ ಧೋಕೇಥಿ ಧರಿದ್ಯವಾಳೊ ಯೋ ಅದ್ಮಿನಿ ಝೂ಼ಂಡ್‌ನ, “ಮೇ ಕಿನ ಬುಚ್ಚಾ಼ ದೆವ್‌ಸ್ಕಿ ಯೋಸ್‌ ತುಮೂನ ಹೋಣುತೆ ಅದ್ಮಿ. ಇನ ಧರೊ!” ಕರಿ ಖ್ಹಣೇದ್ ಬೋಲಿ ದೀರಾಖ್ಯೊಥೊ
MAT 26:49 ಇಮ್ಮಸ್ ಯೂದ ಯೇಸುನ ಖನ್ನೆ ಜೈ಼ನ್, “ಗುರು, ಶೂಲ” ಕರಿ ಬೋಲಿನ್, ಇನ ಬುಚ್ಚಾ಼ ದಿದೊ.
MAT 26:50 ತದೆ ಯೇಸುನೆ, “ದೋಸ್, ತೂ ಕರಾನ ಆಯೋತೆ ಕಾಮ್ ಆಸ್ಕಿಶು?” ಕರಿ ಬೋಲ್ಯೊ. ತದೆ ಇವ್ಣೆ ಖನ್ನೆ ಐನ್, ಯೇಸುಪರ್ ಹಾತ್‌ ನಾಖಿನ್, ಇನ ಧರ‍್ಯು.
MAT 26:51 ಧರ್‌ತಾಸ್‌ನ ಯೇಸುನ ಜೋ಼ಡ್ಮ ಥೂತೆ ಇವ್ಣಾಮ ಏಕ್‌ನೆ, ಇನಿ ತಲ್ವಾರ್‌ನ ಕಾಡಿನ್, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನು ಕಾನ್ನ ಕತ್ರಿನಾಖ್ಯೊ.
MAT 26:52 ತದೆ ಯೇಸುನೆ ಇನ, “ತಾರಿ ತಲ್ವಾರ್‌ನ ಕಷ್‌ಬಂದ್‌ನಿ ಚ಼ಂಚಿಮ ಪಾಛು಼ ಘಾಲ್‌; ತಲ್ವಾರ್‌ಥಿ ಮಾರವಾಳು ಖ್ಹಾರು ತಲ್ವಾರ್‌ಥೀಸ್ ಮರ್‌ಶೆ.
MAT 26:53 ಮೇ ಮಾರ ಬಾನ ಬೋಲಿಲಿದೋತೊ, ಯೋ ಮನ ಮದತ್ನಖ್ಹಾಜೆ ದೇವ್ ದೂತರ್‌ನು ಭಾರ ದಂಡ್‌-ದಳ್‌ವಾಯಿನಿ ಝೂ಼ಂಡ್‌ನ ಮೋಕಲ್‌ಶೆ ಕರಿ ತುನ ಮಾಲುಮ್‌ ಕೊಯ್ನಿಕಿ ಶು?
MAT 26:54 ಕತೋಬಿ ಇಮ್‌ ಮೋಕ್‌ಲ್ಯೋತೊ, ಮನ ಅಮ್ನು ಖ್ಹಾರು ಹೋಣು ಕರಿ ವಚನ್‌ಮ ಬೋಲೈತೆ ವಾತೆ ಕಿಮ್ ಚಾ಼ಲ್‌ಷೆ?” ಕರಿ ಬೋಲ್ಯೊ.
MAT 26:55 ಯೋಸ್‍ ವೇಳ್ಮ ಯೇಸು ಝೂ಼ಂಡ್‍ಭಂದೈನ್ ಆಯಿರ‍್ಹುಥೂತೆ ಅದ್ಮಿವೋನ, “ಚೋ಼ರ್‌ನ ಧರಾನಿಘೋಣಿ ತಲ್ವಾರೆ ಅಜು಼ ಲಠ್ಠ ಪಳ್ಳಿನ್‌, ಮನ ಧರಾನಖ್ಹಾಜೆ ಆಯಾಕಿ ಶು? ಮೇ ದನ್‍ರೋಜ಼್, ಮಂದಿರ್‌ಮ ಬೇಶಿನ್, ವಚನ್ ಬೋಲಿನ್ ದೇವ್‌ಕರ್‌ತೊಥೋತೆ ತದೆ ತುಮೆ ಮನ ಧರ‍್ಯಾಕೊಯ್ನಿ.
MAT 26:56 ಕತೋಬಿ ಪ್ರವಾದಿ ಖ್ಹಾರು ಲೀಖ್ಯೂತೆ ವಚನ್ ಪೂರಹುವಾನ ಟೇಕೆ ಅಮ್ ಹುಯು” ಕರಿ ಬೋಲ್ಯೊ. ತದೆ ತಮಾಮ್‌ ಶಿಷ್ಯರ್‌ ಇನ ಮ್ಹೆಂದಿನ್, ನಾಶಿ ಚ಼ಲೇಗಯ.
MAT 26:57 ಯೇಸುನ ಧರ‍್ಯೂತೆ ಇವ್ಣೆ ಇನ ಗಲ್‌ಢಯಾಜಕ್‌ನ ಕಾಯಫನ ಘರೆ ಲೀನ್‌ಗಯು. ಹಿಜ್ಜಾ಼ ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೆ, ಅಜು಼ ಶಾಣು ಖ್ಹಾರು ಎಕ್ಟು ಹುಯಿನ್ ಐರ‍್ಹುಥು.
MAT 26:58 ಪೇತ್ರ ದೂರ್‌ಥೋಸ್ ಯೇಸುನ ಪೀಠೆ-ಪೀಠೆ ಜಾ಼ತೊಹುಯಿನ್, ಮಹಾಯಾಜಕ್‌ನ ಘರ್‌ನ ಖ್ಹಾಮ್ಣೆನು ಬಲ್ಡತೋಡಿ ಆಯಿನ್, ಮಹಿ ಧಕೆಲ್‌ತೊ ಅಯಿನ್, ಇನಿ ಹಾಲ್ ಶಾತ್‌ ಉಷೆಕರಿ ದೇಕ್ಣು ಕರಿ, ಕಾವ್ಲಿನ ಶಿಪಾಯಿನ ಜೋ಼ಡೆ ಜೈ಼ನ್, ಬೇಶಿಗಯೊ.
MAT 26:59 ತದೆ ಗಲ್‌ಢಯಾಜಕರ್‌ ಅಜು಼ ಯೆಹೂದಿ ಪಂಚಾಯತ್‌ನು ಹಿಡಿ ಅದ್ಮಿ ಶಾತ್‌ತೋಬಿ ಗಲತ್‌ ಸಬೂತ್ ಢೂಂಡಿನ್, ಯೇಸುನ ಮರೈನಾಖಿದೇಣು ಕರಿ ಕರ‍್ಯು.
MAT 26:60 ಘಣು ಅದ್ಮಿ ಖ್ಹಾಮ್ಣೆ ಆಯಿನ್, ಯೇಸುಪರ್ ಝೂ಼ಟಿ ಸಾಕ್ಷಿಯೆ ಬೋಲ್ಯು, ತೋಬಿ ಇವ್ಣಿ ಸಾಕ್ಷಿಮ ಶಾತ್ಬಿ ಗಲತ್‌ ಮಳ್ಯುಕೊಯ್ನಿ. ಖ್ಹರ್ತಿಮ ಬೇ ಅದ್ಮಿ ಖ್ಹಾಮ್ಣೆ ಆಯಿನ್,
MAT 26:61 “ದೇವ್‌ನು ಮಂದಿರ್‌ನ ರಡ್‌ಕೈ ನಾಖಿದೀನ್, ತೀನ್ ದನ್ಮ ಅನ ಪಾಛು಼ ಭಾಂದಾನ ಮನ ಹುವಾಸ್ ಕರಿ ಆ ಅದ್ಮಿನೆ ಬೋಲ್ಯೊ” ಕರಿ ಬೋಲ್ಯು.
MAT 26:62 ತದೆ ಗಲ್‌ಢೊಯಾಜಕ್‌ನೆ ಉಠಿ ಭೀರಿನ್, ಯೇಸುನ, “ತೂ ಶಾತ್ಬಿ ಜವಾಬ್ ಕೋ ದೇಯ್ನಿಕಿ ಶು? ಅವ್ಣೆ ತಾರಪರ್ ಬೋಲುಕರಸ್ತೆ ಆ ಸಾಕ್ಷಿ ಖ್ಹಾಚಸ್‌ಕಿ ಶು?” ಕರಿ ಪುಛಾ಼ಯೊ.
MAT 26:63 ಕತೋಬಿ ಯೇಸು ಖ್ಹೊಪ್ ಥೊ. ತದೆ ಮಹಾಯಾಜಕ್‌ನೆ ಪಾಛೊ಼, “ತುನ ಜಿವ್ತೊ ದೇವ್ನ ನಾಮ್‌ಪರ್‌ ಆಣ್‍ಲೀನ್, ಪುಛಾ಼ವುಸ್, ತೂ ದೇವ್‌ನೊ ಛಿಯ್ಯೊ ಕ್ರಿಸ್ತಸ್‌ಕಿಶು? ಹಮೂನ ಬೋಲ್” ಕರಿ ಬೋಲ್ಯೊ.
MAT 26:64 ಯೇಸುನೆ ಇನ, “ತುನೇಸ್ ಬೋಲ್ಯೋನಿ; ಅತ್ರೇಸ್ ಕಾಹೆತೆ ಮೇ ತುಮೂನ ಬೋಲುಸ್ಕಿ, ಹಂಕೇಥು ಅದ್ಮಿನೊ ಛಿಯ್ಯೊ ಮಹಾನ್ ಶಕತ್‌ವಾಳಾನಿ ಖಾವಿಬಾಜು಼ಮ ಬೆಠೊರ‍್ಹಿಶೇತೆ ಅಜು಼ ಆಬ್‍ನ ವಾದ್ಳಪರ್ ಬೇಶಿನ್ ಆವ್‌ಶೇತೆ ತುಮೆ ದೇಕ್‌ಶು!” ಕರಿ ಬೋಲ್ಯೊ.
MAT 26:65 ತದೆ ಮಹಾಯಾಜಕ್‌ನೆ ಇನ ಲುಂಗ್ಡಾನ ಫಾಡಿಲೀನ್, “ಆ ದೇವ್ನ ದೂಷಣೆ ಕರಾನಿ ವಾತೆ! ಅನೇಥಿ ಬಿಜು಼ ಖೆವಿ ಸಾಕ್ಷಿ ಅಪ್ಣುನ ಹೋಣು? ಅನೆ ದೇವ್ನ ಗಾಳೆಕರಾನಿ ವಾತೆ ಬೋಲ್ಯೋತೆ ತುಮೇಸ್ ಖ್ಹಮ್‌ಜ್ಯಾನಿ?
MAT 26:66 ತುಮೂನ ಕಿಮ್ ದೆಖಾವಸ್?” ಕರಿ ಬೋಲ್ಯೊ. ತದೆ ಇವ್ಣೆ, “ಆ ದೋಶಿ ಬಿಜು಼ ಮರ್‌ವಾನ ಲ್ಹಾಯಕಸ್ ಛಾ಼” ಕರಿ ಜ಼ವಾಬ್ ದಿದು.
MAT 26:67 ಅಜು಼ ಇವ್ಣೆ ಯೇಸುನ ಮ್ಹೋಡಾಪರ್ ಥೂಕಿನ್, ಇನ ಗುಖ್ಹ್‌ತೊ ದಿದು; ಥೋಡು ಜ಼ಣು ಇನ ಕಲ್ಲಪರ್ ಮಾರಿನ್,
MAT 26:68 “ಕ್ರಿಸ್ತ, ತುನ ಮಾರ‍್ಯೂತೆ ಕೋಣ್? ಹಮೂನ ಪ್ರವಾದ್‌ನೆ ಬೋಲ್?” ಕರಿ ಬೋಲ್ಯು.
MAT 26:69 ಪೇತ್ರ ಭಾರ್‌ ಚೌ಼ಕ್‌ಮ ಬೆಠೋಥೊ, ಹಿಜ್ಜಾ಼ ಏಕ್‌ಜ಼ಣಿ ದಾಸಿ ಇನಾಕನ ಐನ್, “ತೂಬಿ ಗಲಿಲಾಯಾನೊ ಯೇಸುನ ಜೋ಼ಡೆ ಥೋನಿ” ಕರಿ ಬೋಲಿ.
MAT 26:70 ಕತೋಬಿ ಇನೆ, “ಕೊಯ್ನಿ, ತೂ ಶಾತ್‌ ಬೋಲುಕರಾಸ್ಕಿ ಮನ ಮಾಲುಮ್‌ ಕೊಯ್ನಿ” ಕರಿ ಖ್ಹಾರಾನ ಖ್ಹಾಮ್ಣೆ ಬೋಲ್ಯೊ.
MAT 26:71 ಅಜು಼ ಯೋ ನಿಕ್ಳಿನ್, ಬಾಕಲ್‍ಭಣಿ ಚ಼ಲೆಗಯೊ. ತದೆ ಹಿಜ಼್ಜಾ ಥೀತೆ ಬಿಜೇಕ್ ಆಳ್‌ನೆ ಇನ ದೇಖಿನ್, ಹಿಜ್ಜಾ಼ ಥೂತೆ ಅದ್ಮಿ ಖ್ಹಾರಾನ, “ಆಬಿ ನಜ಼ರೇತ್‌ನೊ ಯೇಸುನ ಜೋ಼ಡೆ ಥೊ” ಕರಿ ಬೋಲಿ.
MAT 26:72 ಪಾಛೊ಼ ಪೇತ್ರನೆ, “ಕೊಯ್ನಿ, ಯೋ ಅದ್ಮಿ ಕೋಣ್ ಕರಿ ಮನ ಮಾಲುಮ್ ಕೊಯ್ನಿ” ಕರಿ ಆಣ್‍ಲೀನ್, ಬೋಲ್ಯೊ.
MAT 26:73 ಜ಼ರಘಡಿನ ಬಾದ್‌ಮ ಹಿಜ಼್ಜಾ ಭಿಯುಥೂತೆ ಅದ್ಮಿಖ್ಹಾರು ಪೇತ್ರಕನ ಆಯಿನ್, “ಖ್ಹಾಚ಼ಮಾಬಿ ತೂಬಿ ಇವ್ಣಾಮ ಏಕ್‍ಜ಼ಣೊ,ಕರಿ ತೂ ವಾತೆ ಬೋಲಾಸ್ತೆ ತರಿಕಾಥಿಸ್ ಮಾಲುಮ್ ಪಡಾಸ್‌” ಕರಿ ಬೋಲ್ಯು.
MAT 26:74 ತದೆ ಪೇತ್ರನೆ, ಇನುಯೋಸ್ ಆಣ್‌ಪ್ರಮಾಣ್‌ಲೀನ್ ಯೋ ಅದ್ಮಿ ಮನ ಮಾಲುಮಸ್‌ಕೊಯ್ನಿ” ಕರಿ ಬೋಲ್ಯೊ. ತದ್‌ನು-ತದೇಸ್‌ ಮುರ್‌ಗೊ ಬಾಂಗ್‌ ದಿದೊ.
MAT 26:75 ತದೆ ಪೇತ್ರನೆ, ಮುರ್‌ಗೊ ಬಾಂಗ್‌ದ್ಯವಾನ ಅಗಾಡಿ, ತೀನ್‍ಹಲ್ಲ ಮಾರಿ ಬಾರೇಮ, ಯೋ ಮನ ಮಾಲುಮ್ ಕೊಯ್ನಿ! ಕರಿ ತೂ ಬೋಲಿಶ್” ಕರಿ ಯೇಸುನೆ ಇನ ಬೋಲ್ಯೊಥೋತೆ ವಾತೆನ ಯಾದ್‌ಕರಿನ್, ಭಾರ್ ಜೈ಼ನ್, ಖ್ಹಡ್‌ಕ್ಯಾಭರೀನ್ ರೋಯೊ.
MAT 27:1 ವ್ಹಾಣ್‌ಖ್ಹತ್ರೇಸ್ ಖ್ಹಾರಾಸ್ ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಯೇಸುನ ಮರೈನಾಖಿದೇಣು ಕರಿ ಇನಿ ವಿರೋದ್ ವಾತೆ ಕರಿಲೀನ್,
MAT 27:2 ಇನ ಖ್ಹಂಕ್‌ಳಿಥಿ ಭಂದೈನ್, ಬುಲೈಲಿಜೈ಼ನ್,ರೋಮ್‌ನೊ ರಾಜ್ಯಪಾಲ್ ಹುಯಿರ‍್ಹೊಥೋತೆ ಪಿಲಾತನ ಹಾತ್‌ಮ ದಿದು.
MAT 27:3 ಯೇಸುನ ಧೋಕೇಥಿ ಧರಿದಿದೋತೆ ಯೂದಾನೆ, ಯೇಸುನ ಮರಣ್ ದಂಡ್‌ನು ತೀರ್ಪ್ ಹುಯು ಕರಿ ದೇಖಿನ್, ಪಶ್‌ತೈನ್, ಯೋ ಡೋಡಿಖ್ಹ್‌ ರೂಪಾನು ಬಿಲ್ಲಾನ ಗಲ್‌ಢಯಾಜಕರ್‌ ಅಜು಼ ಶಾಣವ್‍ಕನ ಲೀಜೈ಼ನ್,
MAT 27:4 “ಶಾತ್ಬಿ ಗಲ್ತಿಕೊಂತೆ ಅದ್ಮಿನ ಧೋಕೇಥಿ ಮರೈನಾಖಿದ್ಯವಾನ ಧರಿ ದೀನ್, ಮೇ ಪಾಪ್ ಕರ‍್ಯೊ” ಕರಿ ಬೋಲ್ಯೊ. ತದೆ ಇವ್ಣೆ, “ಇನ ಹಮೆ ಶಾತ್ ಕರಿಯೆ? ಯೋ ತಾರು ಮಾಮ್ಲ!” ಕರಿ ಜ಼ವಾಬ್ ದಿದು.
MAT 27:5 ತದೆ ಯೂದಾನೆ ಯೋ ಪೈಶಾನ ಮಂದಿರ್‌ಮ ಫೇಕಿದಿನ್, ಹಿಜ್ಜಾ಼ಥೊ ಜೈ಼ನ್, ಟೀಪೊ ಲೀನ್, ಮರಿಗಯೊ.
MAT 27:6 ಗಲ್‌ಢಯಾಜಕರ್‌ನೆ ಯೋ ಪೈಶಾನ ಪಾಡಿಲೀನ್, “ಆ ಪೈಶಾ ಏಕ್‌ ಅದ್ಮಿನ ಲ್ಹೋಯಿನಖ್ಹಾಜೆ ದಿದೂತೆ, ಇನಖ್ಹಾಜೆ ಅನ ಮಂದಿರ್‌ನಿ ಹುಂಡಿಮ ನಾಖಾನು ಅಪ್ಣಿ ನಿಯಮ್ನ ವಿರೋದ್ ಹುಯಿರ‍್ಹೂಸ್” ಕರಿ ಬೋಲ್ಯೊ.
MAT 27:7 ಅನಕೇಡೆಥು ಇವ್ಣೆ ವಾತೆ ಕರಿಲೀನ್, ಯೋ ಪೈಶಾಥಿ ಪರೈ ದೇಖ್ಹ್‌ನು ಅದ್ಮಿಯೇನ ಮಾಟಿ ಕರಾನಖ್ಹಾಜೆ ಏಕ್‌ “ಕುಂಭಾರ‍್ನು ಖೇತರ್‌” ಕರಿ ಜ಼ಮೀನ್ನ ಮೋಲ್ ಲಿದು.
MAT 27:8 ಅನಖ್ಹಾಜೆಸ್ ಅದ್ಮಿಖ್ಹಾರು ಯೋ ಖೇತರ್‌ನ ಹಂಕೆತೋಡಿ, ‘ಲ್ಹೋಯಿನು ಖೇತರ್‌’ ಕರಿ ನಾಮ್‍ಥಿ ಚಿಕ್ರಾಸ್.
MAT 27:9 ಅಮ್ ಹುವಾಥಿ ಪ್ರವಾದಿ ಯೆರೆಮೀಯನೆ ಬೋಲ್ಯೋತೆ ವಾತೆ ಚಾ಼ಲಿಗೈ, ಯೋ ಶಾತ್‌ಕತೊ, ಇವ್ಣೆ ಯೋ ಡೋಡಿಖ್ಹ್‌ ರೂಪಾನು ಬಿಲ್ಲಾನ ಲೀನ್,ಆ ಇಸ್ರಾಯೇಲ್‌ಮ ಥೋಡಾನೆ ಇನ ಜಾನ್ನ ಭಾಂದ್ಯೂತೆ ಮೋಲ್” ಕರಿ ಬೋಲನುಸ್ ಯೋ ವಚನ್
MAT 27:10 ಪ್ರಭುನೆ ಹುಕುಮ್ ದಿದೋತೆ ಇಮ್ಮಸ್, ಇನೇಥಿ ಕುಂಭಾರ‍್ನು ಖೇತರ್‌ನ ಮೋಲ್‍ಲಿಧು.
MAT 27:11 ತದೆ ಯೇಸು ಪಿಲಾತನ ಖ್ಹಾಮ್ಣೆ ಭಿಯ್ಯುಥೊತೆ ತದೆ ಇನೆ ಇನ, “ತೂ ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಪುಛಾ಼ಯೊ. ಯೇಸುನೆ ಇನ, “ತುನೇಸ್ ಬೋಲ್ಯೋನಿ” ಕರಿ ಜ಼ವಾಬ್ ದಿದೊ.
MAT 27:12 ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಇನಾಪರ್ ಘಣು ಗಲತ್‌ ಲಗಾಡುಕರ್ತುಥು, ತೋಬಿ ಯೇಸುನೆ ಶಾತ್ಬಿ ಜವಾಬ್‌ ಕೋ ದಿದೋನಿ.
MAT 27:13 ತದೆ ಪಿಲಾತನೆ ಯೇಸುನ, “ಅವ್ಣೆ ತಾರಾಪರ್ ಅತ್ರೆ ಗಲ್ತಿ ಲಗಾಡುಕರಾಸ್ತೆ, ತೂ ಖ್ಹಮ್‌ಜು಼ಕರಾಕೊಯ್ನಿಕಿ ಶು?” ಕರಿ ಬೋಲ್ಯೊ.
MAT 27:14 ಕತೋಬಿ ಯೇಸುನೆ ಇನಿ ಏಕ್‌ ವಾತೆನಾಬಿ ಜ಼ವಾಬ್ ಕೋ ದಿದೋನಿ, ಅನ ದೇಖಿನ್, ಯೋ ರಾಜ್ಯಪಾಲ್‌ನ ಘಣು ಆಶ್ಚರ್ಯ ಹುಯು.
MAT 27:15 ಪಸ್ಕ ಪೂಜಾ಼ನಿ ವಖ್ಹತ್‌ಮ ಕೋಂಡಿ ಘಾಲಿರಾಖಾತೆ ಅದ್ಮಿಮ, ಅದ್ಮಿಖ್ಹಾರು ಕಿನ ಬೋಲಸ್ಕಿ, ಇನ ಭಾರ್ ಮ್ಹೇಲಾನು ರಾಜ್ಯಪಾಲ್‌ನು ಆದತ್ ಹುಯಿರ‍್ಹೀಥಿ.
MAT 27:16 ಯೋ ವಖ್ಹತ್‌ಮ ಯೇಸು ಬರಬ್ಬ ಕರಿ ಏಕ್‍ಜ಼ಣಾನ ಜೇಲ್‌ಮ ಘಾಲಿರಾಖ್ಯುಥು.
MAT 27:17 ಅದ್ಮಿಖ್ಹಾರು ಪಿಲಾತಕನ ಎಕ್ಟು ಹುಯಿನ್ ಆವಾದಿನ್, ಇನೆ ಇವ್ಣುನ, “ಮೇ ತುಮಾರಖ್ಹಾಜೆ ಕಿನ ಮ್ಹೇಲಿದೇಣು ಬರಬ್ಬಾನಾಕಿ, ಕ್ರಿಸ್ತ ಕರಿ ಬೋಲೈಲ್ಯವಾಳೊ ಯೇಸುನ?” ಕರಿ ಪುಛಾ಼ಯೊ.
MAT 27:18 ಅದ್ಮಿಖ್ಹಾರು ಬಳಾಪೇಥಿ ಯೇಸುನ ಧರೀನ್, ಇನ ಹಾತ್‌ಮ ದೀರಾಖ್ಯುಸ್‌ ಕರಿ ಪಿಲಾತನ ಮಾಲುಮ್‌ ಥು.
MAT 27:19 ಅತ್ರೇಸ್ ಕಾಹೆತೆ, ಪಿಲಾತ ನ್ಯಾವ್‍ನಿ ಖುಡ್‍ಶಿಪರ್ ಬೆಠೊರ‍್ಹವಾನಿ ವಖ್ಹತ್‌ಮ ಇನಿ ಬಾವಣ್ಣೆ, “ಯೋ ಅದ್ಮಿನ ಶಾತ್ಬಿ ನಕೊ ಕರೀಶ್, ಯೋ ನೀತಿವಾಳೊ ಹುಯಿರ‍್ಹೊಸ್, ಗಯೋತೆ ರಾತೆ ಖ್ಹೋಣ್ಯಮ ಮನ ಘಣು ಖ್ಹತಾಪ್ಣಿ ಹುಯು” ಕರಿ ಇನ ಬೋಲಿನ್ ಮೋಕ್ಲಿ.
MAT 27:20 ಕತೋಬಿ ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಬರಬ್ಬನ ಮ್ಹೇಲಿದೇಣು, ಯೇಸುನ ಮರೈನಾಕ್ಣು ಕರಿ ಪಿಲಾತನ ಬೋಲಿಲೇವ್ಣು ಕರಿ ಅದ್ಮಿಯೇನ ಬೋಲಿದಿದು.
MAT 27:21 ಪಿಲಾತನೆ ಇವ್ಣುನ, “ಆ ಬೇಮ ತುಮಾರಖ್ಹಾಜೆ ಕಿನ ಮ್ಹೇಲಿದೇಣು?” ಕರಿ ಪುಛಾ಼ಯೊ. ಇವ್ಣೆ, “ಬರಬ್ಬಾನ” ಕರಿ ಜ಼ವಾಬ್ ದಿದು.
MAT 27:22 ತದೆ ಪಿಲಾತನೆ, “ಇಮ್‍ಕತೊ, ಕ್ರಿಸ್ತ ಕರಿ ಬೋಲೈಲ್ಯವಾಳೊ ಯೇಸುನ ಮೇ ಶಾತ್‌ ಕರ‍್ನು?” ಕರಿ ಇವ್ಣುನ ಪುಛಾ಼ಯೊ. ತದೆ ಇವ್ಣೆ ಖ್ಹಾರಾಸ್, “ಇನ ಶಿಲ್‌ಬೇಪರ್ ಮರಾವ್!” ಕರಿ ಜ಼ವಾಬ್ ದಿದಾ.
MAT 27:23 ಕತೋಬಿ ಪಿಲಾತನೆ, “ಶನ? ಅನೆ ಶನಿ ಗಲ್ತಿ ಕರಿರಾಖ್ಯೋಸ್?” ಕರಿ ಬೋಲ್ಯೊ. ತದೆ ಇವ್ಣೆ, “ಇನ ಶಿಲ್‌ಬೆಪರ್ ಮರಾವ್!” ಕರಿ ಬಿಜೂ಼ಬಿ ಜೋ಼ರೇಖ್ಹು ನಳ್ಡೊ ತಾಣಿನ್ ಬೋಲ್ಯು.
MAT 27:24 ತದೆ ಪಿಲಾತನೆ ಮೇ ಕೆತ್ರು ಕರ‍್ಯೊತೋಬಿ ಚಾ಼ಲ್‌ಷೆ ಕೊಯ್ನಿ, ಅದ್ಮಿಖ್ಹಾರು ಕಲ್ಹಾಗಟ್ ಕರೆಜಾ಼ಯ್ ಕರಿ ಮಾಲುಮ್ ಕರಿಲೀನ್, ಪಾಣಿ ಲೀನ್, ಅದ್ಮಿನ ಖ್ಹಾಮ್ಣೆ ಇನ ಹಾತ್ನ ಧೊಯಿಲಿನ್, “ಆ ಅದ್ಮಿನ ಮರೈನಾಖನ ಮೇ ಜಿಮ್ಮೇದಾರ್ ಕಾಹೆ, ಆ ತುಮೇಸ್ ಕರುಕರಸ್ತೆ!” ಕರಿ ಬೋಲ್ಯೊ.
MAT 27:25 ತದೆ ಝೂ಼ಂಡ್‌ಮ ಥೂತೆ ಹಿಡಿ ಅದ್ಮಿನೆ, “ಆ ಅದ್ಮಿನ ಮರೈನಾಖಿದ್ಯವಾನಿ ಜಿಮ್ಮೇದಾರ್ ಹಮಾರಪರ್ ಅಜು಼ ಹಮಾರ ಲಡ್ಕಾಪರ್ ಪಡಾದೆ!” ಕರಿ ಬೋಲ್ಯು.
MAT 27:26 ತದೆ ಪಿಲಾತನೆ ಬರಬ್ಬಾನ ಇವ್ಣುನ ಮ್ಹೇಲಿದಿದೊ, ಅಜು಼ ಯೇಸುನ ಕೊಳ್ಡೇಥಿ ಮರೈನ್, ಶಿಲ್‌ಬೆಪರ್ ನಾಖಾನ ದಿನಾಖ್ಯೊ.
MAT 27:27 ಅನಕೇಡೆಥು ಪಿಲಾತನು ಸಿಪಾಯಿಖ್ಹಾರು ಯೇಸುನ ರಾಜ಼ನ ಮಹೇಲ್‌ಮ ಬುಲೈಲೀಜೈ಼ನ್, ಹಿಡಿ ದಂಡ್‌-ದಳವಾಯಿಸ್ ಹಿಜ಼್ಜ ಎಕ್ಟು ಹುಯಿನ್ ಭರೈರ‍್ಹೂಥು.
MAT 27:28 ಇವ್ಣೆ ಯೇಸುನ ಲುಂಗ್ಡಾವ್‍ನ ಕಾಡಿನಾಖಿನ್, ಲಾಲ್‍ಝ಼ಗ್ಗಾನ ಇನ ಫೇರೈನ್,
MAT 27:29 ಕಾಟಾನ ವೇಲಾಥಿ ಏಕ್‌ ಕಿರೀಟ್‍ನ ವಣಿನ್, ಇನ ಮಾಥಪರ್‌ ಘಾಲ್ಯು ಅಜು಼ ಖಾವೊ ಹಾತ್ಮ ಏಕ್‌ ಲಠ್ಠೊ ದೀನ್, ಇನಖ್ಹಾಮ್ಣೆ ಗುಡ್‍ಘ್ಯ ಟೇಕಿನ್, “ಯೆಹೂದ್ಯರ್‌ನ ರಾಜ಼! ತುನ ಜಯ ಹುವಾದೆ” ಕರಿ ಬೋಲಿಲಿನ್ ನಕ್ಲೆ ಕರ‍್ಯು,
MAT 27:30 ಇವ್ಣೆ ಇನಪರ್ ಥೂಕಿನ್, ಯೋ ಲಠ್ಠಾನ ಛಿನೈಲಿನ್‌, ಇನೇಥಿ ಇನ ಮುಡ್‌ಕ್ಯಪರ್ ಮಾರ‍್ಯು,
MAT 27:31 ಅಮ್ ಇನಿ ನಕ್ಲೆ ಕಾಡಾನ ಬಾದ್‌ಮ, ಯೋ ಝ಼ಗ್ಗಾನ ಕಾಡಿನ್, ಇನ ಲುಂಗ್ಡಾವ್‍ನ ಇನ ಪಾಛು಼ ಫೇರೈನ್, ಶಿಲ್‌ಬೆಪರ್ ಮಾರಾನಖ್ಹಾಜೆ ಲೀಗಯು.
MAT 27:32 ಇವ್ಣೆ ಖ್ಹಯೇರ‍್ನ ಭಾರ್‌ ಜ಼ವ್‍ಕರಾನಿ ವಖ್ಹತ್‌ಮ, ಸಿರೇನ್ ಖ್ಹಯೇರ‍್ನೊ ಸೀಮೋನ್‌ ಕರಿ ಏಕ್‌ ಜ಼ಣಾನ ಧರೀನ್, ಯೇಸುನಿ ಶಿಲ್‌ಬೆ ಪಾಡ್‌ಕರಿ ಶಿಪಾಯಿಖ್ಹಾರು ಇನ ಜು಼ಲಮ್‌ ಕರ‍್ಯು.
MAT 27:33 ಅಜು಼ ಇವ್ಣೆ ಗೊಲ್ಗೊಥಾ ಕರಿ ಝ಼ಗೋಪರ್ ಆಯಾ, ಗೊಲ್ಗೊಥಾ ಕತೊ, “ಖೋಪ್ರಿನಿ ಝ಼ಗೊ” ಕರಿ.
MAT 27:34 ಹಿಜ್ಜಾ಼ ಇವ್ಣೆ ಇನ ಕಡು ಮಳಾಯುಹುಯು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದಿದು; ಇನೆ ಲಜ಼ತ್‌ ದೇಖಿನ್‌ ಪಿಯಾನ ಕೊಹುಯುನಿ.
MAT 27:35 ಅನಕೇಡೆಥು ಇವ್ಣೆ ಇನ ಶಿಲ್‌ಬೆಪರ್ ನಾಖ್ಯು ಅಜು಼ ಚೀಟ್ ನಾಖಿನ್ ಇನ ಲುಂಗ್ಡಾವ್‍ನ ಇವ್ಣಾಮ ವಾಟ ಪಾಡಿಲಿದು.
MAT 27:36 ಅನ ಬಾದ್‌ಮ ಇವ್ಣೆ ಹಿಜ್ಜಾ಼ಸ್ ಬೇಶಿನ್, ಇನ ವಖ್ಹ್‌ತಿ ಕರಾಲಗ್ಯು.
MAT 27:37 ಅತ್ರೇಸ್ ಕಾಹೆತೆ ಇವ್ಣೆ ಯೇಸುಪರ್ ಲಗಾಡ್ಯುತೊ ಗಲ್ತಿನು ಲೀಖಿಹುಯು ಪಲ್ಗಾನ, ಮುಡಕ್ಯಪರ್‌ನಿ ಉಪ್ಪರ್‌ಲಿ ಬಾಜು಼ ಶಿಲ್‌ಬೆಪರ್ ಲಗಾಡ್ಯು: ಯೋ ಶಾತ್‌ಕತೊ, “ಆ ಯೇಸು, ಯೆಹೂದ್ಯರ್‌ನೊ ರಾಜ಼” ಕರಿ.
MAT 27:38 ತದೆ ಬೇ ಜ಼ಣ ಚೋ಼ರ್‌ನ ಲಯಿನ್, ಏಕ್‌ಜ಼ಣಾನ ಯೇಸುನಿ ಖಾವಿ ಬಾಜೂ಼ಮ ಅಜು಼ ಬಿಜೇಕ್‌ ಜ಼ಣಾನ ಇನಿ ಡಾವಿ ಬಾಜೂ಼ಮ ಇನಿ ಜೋ಼ಡೆ ಶಿಲ್‌ಬೆಪರ್ ಠಂಗಾಯು.
MAT 27:39 ಹಿಜ್ಜಾ಼ಕರಿ ಜಾ಼ವಾಳು ಅದ್ಮಿಖ್ಹಾರು ಮುಡ್‌ಕ್ಯು ಠಶ್‌ಕೈನ್ ದೂಷಣೆ ಕರ್ತುಹುಯಿನ್,
MAT 27:40 “ಮಂದಿರ್‌ನ ಫೋಡಿನ್, ಇನ ತೀನ್ ದನ್ಮ ಪಾಛು಼ ಭಾಂದಾವಾಳ, ತಾರು ತೂಸ್ ಬಚಾ಼ಡಿಲೆ! ತೂ ದೇವ್‌ನೊ ಛಿಯ್ಯೋಸ್ ಉಶೇತೊ, ಶಿಲ್‌ಬೆಪರ್‌ಥು ಉತ್ರಿನ್, ಹೇಟ್ ಆವ್!” ಕರಿ ಬೋಲಿನ್, ಇನ ಚಿಂಘಾವ್‍ಕರ್ತೂಥು.
MAT 27:41 ಇಮ್ಮಸ್ ಗಲ್‌ಢಯಾಜಕರ್‌ಬಿ, ಮೋಶೆನಿ ವಚನ್‍ ಶಿಕಾಡವಾಳು ಶಾಸ್ತ್ರಿಖ್ಹಾರು ಅಜು಼ ಶಾಣುಖ್ಹಾರು,
MAT 27:42 “ಇನೆ ಬಿಜಾ಼ನಖ್ಹಾರು ಬಚಾ಼ಡ್ಯೊ, ಕತೋಬಿ ಇನು ಯೋಸ್ ಬಚಾ಼ಡಿಲ್ಯವಾನ ಕೋ ಹೋಯ್ನಿ! ಆ ಇಸ್ರಾಯೇಲ್‌ನೊ ರಾಜಾ಼ ಕಾಹೆಕಿ ಶು? ಆ ಹಮ್ಕೆ ಶಿಲ್‌ಬೆಪರ್‌ಥು ಉತ್ರಿನ್ ಹೇಟ್ ಆಯೋತೊ, ತದೆ ಹಮೆ ದೇಖಿನ್, ಇನಾಮ ವಿಶ್ವಾಸ್ ಕರ್ಶು!
MAT 27:43 ಆ ದೇವ್ನ ಮಾನಿರಾಖ್ಯೊಸ್‌ನಿ, ಅಜು಼ ದೇವ್ನ ಆ ಹೋಣು ಉಶೇತೊ, ದೇವಸ್ ಇನ ಛೋ಼ಡಾವಾದೆ! ಮೇ ದೇವ್‌ನೊ ಛಿಯ್ಯೊ ಕರಿ ಇನೇಸ್‌ ಬೋಲಿಲಿದೋನಿ!” ಕರಿ ಬೋಲಿನ್ ಚಿಂಘಾಯು.
MAT 27:44 ಇನ ಜೋ಼ಡ್ಮ ಆಜು಼ಬಾಜು಼ನ ಶಿಲ್‌ಬೆಪರ್ ಮರೈರ‍್ಹೂಥೂತೆ ಭೇ ಚೋ಼ರ್‌ನೇಬಿ ಇಮ್ಮಸ್ ಬೋಲಿನ್, ಇನಿ ಖ್ಹರಮ್‌ಕಾಡ್ಯು.
MAT 27:45 ಧೊಪಾರ್‌ ಹುವ್ವಾದೀನ್, ಹಿಡಿ ದೇಖ್ಹ್‌ಪರ್ ಅಂಧಾರು ಢಪೈನ್, ತೀನ್ ಘಂಟತೋಡಿ ಇಮ್ಮಸ್ ಥೂ.
MAT 27:46 ಖ್ಹುಮಾರ್ ತೀನ್ ಘಂಟಾನ ಯೇಸು, “ಏಲಿ, ಏಲಿ, ಲಮಾ ಸಬಕ್ತಾನಿ?” ಕತೊ, “ಮಾರೊ ದೇವ್, ಮಾರೊ ದೇವ್, ತೂ ಶನ ಮನ ಹಾತ್‌ ಮ್ಹೆಂದಿದೋತೆ?” ಕರಿ ಜೋ಼ರ್ ಆವಾಜ಼್‌ಥಿ ಚಿಕ್‌ರ‍್ಯೊ.
MAT 27:47 ಹಿಜ್ಜಾ಼ ಭಿಯ್ಯುಥೂತೆ ಥೋಡು ಜ಼ಣು ಅನ ಖ್ಹಮ್‌ಜಿನ್‌, “ಆ ಎಲೀಯನ ಚಿಕ್ರುಕರಾಸ್!” ಕರಿ ಬೋಲ್ಯು.
MAT 27:48 ತದೇಸ್‌ ಇವ್ಣಾಮ ಏಕ್‌ ಜ಼ಣಾನೆ, “ಗುಂಜ಼್‌ನ ಪಾಡೀನ್, ಖಾಟ ರಖ್ಹ್‌ಮ ಡುಬೈನ್, ಲಠ್ಠಾಕೇಡೆ ಅಟ್‌ಕೈನ್, ಯೇಸುನ ಪಿಯ್ಯಾನ ದಿದೊ.
MAT 27:49 ಅಜು಼ ಥೋಡ ಜ಼ಣಾನೆ, “ಠೇರೊ! ಎಲೀಯ ಆಯಿನ್, ಅನ ಬಚಾ಼ಡಾಸ್ಕಿ ಶುಕಿ?” ಕರಿ ಬೋಲ್ಯು.
MAT 27:50 ಅನಕೇಡೆಥು ಯೇಸುನೆ ಪಾಛೊ಼ ಜೋ಼ರೆಖ್ಹು ಚಿಕ್ರಿನ್ ಜಾನ್‌ ಮ್ಹೇಲ್ಯೊ.
MAT 27:51 ತದೆ ಯೆರೂಸಲೇಮ್ ಮಂದಿರ್‌ಮ ಠಂಗೈರಾಖ್ಯುಥೂತೆ ಪಡ್‌ದೊ ಉಪ್ಪರ್‌ಥು ಧರಿನ್ ಹೇಟ್‌ತೋಡಿ ಫಾಟಿನ್, ಬೇ ಭಾಗ್‌ ಹುಯಿಗಯು. ಧರ್ತಿಕಾಪ್ಯು ಅಜು಼ ಬಂಡಾ ಫುಟಿಗಯು,
MAT 27:52 ಮಖ್ಹಾಣ್ಯನಿ ಘವಿಯೆ ನಿಕ್ಳಿಗಯು, ಅಜು಼ ಮರಿಗಯುಥೂತೆ ಕೈಯೆಕ್ಕಿ ದೇವ್‌ನು ಅದ್ಮಿಖ್ಹಾರಾನು ಶರೀರ್ ಪಾಛು಼ ಜಿವ್ತು ಹುಯಿನ್ ಉಠಿ ಆಯು.
MAT 27:53 ಯೇಸು ಜಿವ್ತೊಉಠಾನ ಬಾದ್‌ಮ, ಯೋ ಘವಿನ ಮ್ಹೆಂದಿನ್, ಪವಿತ್ರ ನಂಗರ್ ಹುಯಿರ‍್ಹೂತೆ ಯೆರೂಸಲೇಮ್ಮ ಜೈ಼ನ್, ಕೈಯೆಕ್ಕಿ ಅದ್ಮಿಯೇನ ದೆಖಾಯೊ.
MAT 27:54 ಖ್ಹೋಶಿಪಾಯಿನೊ ಮೋಟಾನೆ ಅಜು಼ ಇನಜೋ಼ಡೆ ಯೇಸುನ ಕಾವ್ಲಿ ಕರುಕರ್ತುಥೂತೆ ಇವ್ಣೆ ಜ಼ಮೀನ್ ಹಲ್ಯುತೆ ಅಜು಼ ಚಾ಼ಲ್ಯುತೆ ಖ್ಹಾರಸ್ನ ದೇಖಿನ್, ಘಣು ಡರಿನ್, “ಖ್ಹಾಚಮಾಬಿ ಆ ದೇವ್‌ನೊ ಛಿಯ್ಯೊ ಹುಯಿರ‍್ಹೋಥೊ!” ಕರಿ ಬೋಲ್ಯು.
MAT 27:55 ಅತ್ರೇಸ್ ಕಾಹೆತೆ ಕೈಯೆಕ್ಕಿ ಜ಼ಣಿ ತಯೇಡ ಹಿಜ್ಜಾ಼ ದೂರ್‌ಥು ಭೀರಿನ್, ಇನ ದೇಖುಕರ್ತಿಥಿಯ್ಯೆ, ಅವ್ಣೆ ಖ್ಹಾರಿ ಯೇಸುನಿ ಸೇವೆ ಕರ್ತಿಹುಯಿನ್, ಗಲಿಲಾಯಾಥು ಇನ ಪೀಠೇಸ್ ಐರ‍್ಹೀಥಿಯ್ಯೆ.
MAT 27:56 ಅವ್ಣಾಮ ಮಗ್ದಲನಿ ಮರಿಯ, ಯಾಕೋಬ ಅಜು಼ ಯೋಸೇಫನಿ ಆಯ ಮರಿಯಬಿ, ಅಜು಼ ಜೆಬೆದಾಯನಿ ಬಾವಣ್‌ಬಿ ಥೀ.
MAT 27:57 ಖ್ಹಾಂಜ಼್ ಹುವಾದಿನ್, ಅರಿಮಥಾಯ ಗಾಮ್‌ನೊ ಯೋಸೇಫ ಕರಿ ಏಕ್ಜ಼ಣೊ ಶೌಕಾರಿ ಆಯೊ, ಆಬಿ ಯೇಸುನೊ ಶಿಷ್ಯ ಹುಯಿರೋಥೊ.
MAT 27:58 ಅನೆ ಪಿಲಾತಕನ ಜೈ಼ನ್, ಯೇಸುನು ಶರೀರ್‌ನ ಮನ ದೆವಾಡ್ ಕರಿ ಬೋಲಿಲಿದೊ, ತದೆ ಪಿಲಾತನೆ ಯೇಸುನು ಶರೀರ್ ಯೋಸೇಫನ ದೇವ್ಣುಕರಿ, ಹುಕುಮ್ ದಿದೊ.
MAT 27:59 ಯೋಸೇಫನೆ ಯೋ ಶರೀರ್‌ನ ಲೀನ್, ಇನ ಶುದ್‍ ಕೋರಧೊಳ ಲುಂಗ್ಡಾಥಿ ಲಪೇಟಿನ್,
MAT 27:60 ಬಂಡಾಮ ಖೋಂದಿ ಬಣೈರಾಖ್ಯೊಥೋತೆ ಇನಿ ಶೊಂತ್ ನವಿ ಘವೀನಖ್ಹಾಮ್ಣೆ ಮೋಟಿ ಬಂಡಾನಿ ಚಿಪಾಟ್‌ನ ಮ್ಹೇಲಿನ್ ಯೋ ಘವಿನ ಮೂಚಿನ್, ಚ಼ಲೆಗಯೊ.
MAT 27:61 ಮಗ್ದಲನಿ ಮರಿಯ ಅಜು಼, ಯೋ ಬಿಜೇಕ್ ಮರಿಯ ಹಿಜ್ಜಾ಼ ಘವೀನ ಖ್ಹಾಮ್ಣೆ ಬೇಠಿಥಿಯೆ.
MAT 27:62 ತಿನವ್ಹಾಣೆ, ಕತೊ ಸಬ್ಬತ್‌ ದನ್ ಖತಮ್ ಹುವಾನ ಬಾದ್‌ಮ, ಗಲ್‌ಢಯಾಜಕರ್‌ ಅಜು಼ ಫರಿಸಾಯರ್ ಪಿಲಾತಕನ ಜೈ಼ನ್,
MAT 27:63 “ಯಜಮಾನ್, ಯೊ ಝು಼ಟೆಲೊ ಜವ್ತೊಥೋತೆ ತದೆ, ‘ತೀನ್ ದನ್ ಬಾದ್‌ಮ ಮೆ ಪಾಛೊ಼ ಜಿವ್ತೊ ಹುಯಿನ್ ಉಠಿ ಐಶ್‌’ ಕರಿ ಬೋಲ್ಯೊತೆ ವಾತೆ ಹಮಾರ ಯಾದ್ಮ ಛಾ಼,
MAT 27:64 ಇನಖ್ಹಾಜೇಸ್ ತೀನ್ ದನ್‌ತೋಡಿ, ಇನಿ ಘವೀನ ಜ಼ತನ್‌ಥಿ ವಖ್ಹ್‌ತಿ ಕರಾನಖ್ಹಾಜೆ ಹುಕುಮ್ ದೇ, ನತರ್‌ಕಿ, ಇನ ಶಿಷ್ಯರ್‌ ಐನ್ ಇನಿ ಶರೀರ್‌ನ, ಚೋ಼ರೇಖ್ಹು ಪಾಡಿಲಿಜೈ಼ನ್ ಮರ‍್ಯೊಹುಯೊ ಜಿವ್ತೊ ಹುಯಿನ್ ಉಠಿರ‍್ಹೋಸ್, ಕರಿ ಬೋಲೆಜಾ಼ಯ್ ತದೆ ಪಹಿಲಿ ಝೂ಼ಟಿಥೀಬಿ, ಖ್ಹರ್ತಿಮಾನಿ ಝೂ಼ಟಿ ಘಣು ಖರಾಬ್ ಹುಯಿಜಾ಼ಶೆ” ಕರಿ ಬೋಲ್ಯು.
MAT 27:65 ತದೆ ಪಿಲಾತನೆ ಇವ್ಣುನ; ವಖ್ಹ್‌ತಿ ಕರವಾಳನ” ಬುಲೈಲಿ “ಜಾ಼ವೊ,ಅಜು಼ ತುಮುನ ಹೋಣುತೆ ಇಮ್‌ ಜ಼ತನ್‌ಥಿ ಘವೀನ ವಖ್ಹ್‌ತಿ ಕರೊ” ಕರಿ ಬೋಲ್ಯೊ.
MAT 27:66 ತದೆ ಇವ್ಣೆ ಜೈ಼ನ್, ಘವಿನ ಮುದ್ರೊಮಾರಿನ್, ಶಿಪಾಯಿನ ಕಾವ್ಲಿನ ಮ್ಹೇಲಿನ್, ಘವೀನ ಜ಼ತನ್ ಕರ‍್ಯು.
MAT 28:1 ಸಬ್ಬತ್‌ನೊ ದನ್ ಹುವಾನ ಬಾದ್‌ಮ, ಐತ್‍ವಾರ್‌ನ ದನ್ನೆ ವ್ಹಾಣೇಸ್ ವೇಳಿ, ಮಗ್ದಲನಿ ಮರಿಯ ಅಜು಼ ಯೋ ಬಿಜೇಕ್‌ಜ಼ಣಿ ಮರಿಯ ಯೇಸುನು ಮಖ್ಹಾಣ್ಯನಿ ಘವಿಕನ ಐಯ್ಯೆ.
MAT 28:2 ತದೆ ಎಕ್ಕದಮ್‌ ಜೋ಼ರೇಖ್ಹು ಜ಼ಮೀನ್ ಹಲ್ಯು; ಪ್ರಭುನೊ ಏಕ್‌ ದೂತ ಆಬ್‍ಪರ್‌ಥು ಉತ್ರಿ ಐನ್, ಯೋ ಘವಿನ ಮೂಚೈ಼ರ‍್ಹುಥೂತೆ ಬಂಡಾನ ಹಿಜ್ಜಾ಼ಥು ಗಿರ್‌ಗಡೈನ್, ಇನಾಪರ್ ಬೇಶಿಗಯೊ.
MAT 28:3 ಇನು ರೂಪ್ ವಿಜ಼್‌ಳಿನಘೋಣಿ ಥೂ, ಇನ ಲುಂಗ್ಡ ಬರಪ್‌ನಿಘೋಣಿ ಧೋಳುಫಟ್ ಥೂ.
MAT 28:4 ಹಿಜ್ಜಾ಼ ವಖ್ಹ್‌ತಿ ಕರುಕರ್ತುಥೂತೆ ಶಿಪಾಯಿ ಖ್ಹಾರು ಡರ್‌ಥಿ ಧರ್‌ಧರ್‌ ಕಾಪಿನ್ ಮರ‍್ಯಾ ಮುರ್ದಾನಿಘೋಣಿ ಹುಯಿಗಯು.
MAT 28:5 ತದೆ ಯೋ ದೇವ್‌ನೊ ದೂತನೆ ಯೋ ತಯೇಡಾವ್‍ನ, “ತುಮೆ ಡರೊನಕೊ, ಶಿಲ್‌ಬೆಪರ್ ಮಾರ‍್ಯುಥೂತೆ ಯೇಸುನ ತುಮೆ ಢೂಂಡುಕರಾಸ್ ಕರಿ ಮನ ಮಾಲುಮ್.
MAT 28:6 ಯೋ ಹಜ್ಜಾ಼ ಕೊಯ್ನಿ; ಇನೆ ಬೋಲ್ಯೊಥೋತೆ ಇಮ್ಮಸ್ ಮರಣ್‌ಮಾಥೊ ಜಿವ್ತೊ ಹುಯಿನ್, ಉಠಿರ‍್ಹೋಸ್. ಹಜ್ಜಾ಼ ಆವೊ, ಯೋ ಖ್ಹುತೊಥೋತೆ ಝ಼ಗೋನ ದೇಖೊ.
MAT 28:7 ಹಮ್ಕೆ ಒಗ್ಗಿಸ್ ಜೈ಼ನ್, ಇನ ಶಿಷ್ಯರ್‌ನ ಬೋಲ್ಯೊಕಿ, ‘ಮರಿಗಯೊಹುಯೊ ಪಾಛೊ಼ ಜಿವ್ತೊಹುಯಿನ್ ಉಠ್ಯೊ ಅಜು಼ ತುಮಾರೇಥಿ ಅಗಾಡಿ ಗಲಿಲಾಯನ ವಳ್ಯೊಜಾ಼ಸ್; ಹಿಜ್ಜಾ಼ ತುಮೆ ಇನ ದೇಕ್‌ಶು!’ ಕರಿ. ಮೇ ಬೋಲ್ಯೋತೆ ವಾತೆ ಖ್ಹಾರಿ ಯಾದ್ಮ ರ‍್ಹವಾದೆ” ಕರಿ ಬೋಲ್ಯೊ.
MAT 28:8 ತದೆ ಇವ್ಣೆ ಡರ್‌ಥೀಬಿ, ಘಣಿ ಖ್ಹುಶಿಥಿ ಒಗ್ಗಿಸ್‌ಮ ಯೋ ಮಖ್ಹಾಣ್ಯನಿ ಘವಿಕಂಥು ನಿಕ್ಳಿನ್, ಇನ ಶಿಷ್ಯರ್‌ನ ಬೋಲಾನಖ್ಹಾಜೆ ಮಿಲಯ್ಯೆ಼.
MAT 28:9 ತದೆ ಎಕ್ಕದಮ್‌ ಯೇಸು ಇವ್ಣುನ ದೆಖೈನ್, “ತುಮೂನ ಸಮಾಧಾನ್‍ ಹುವಾದೆ” ಕರಿ ಬೋಲ್ಯೊ. ಇವ್ಣೆ ಇನ ಖನ್ನೆ ಆಯಿನ್, ಇನ ಗೋಡ ಧರೀನ್, ಇನ ಆರಾದನೆ ಕರಿಯೆ.
MAT 28:10 ಯೇಸುನೆ ಇವ್ಣುನ, “ಡರೊ ನಕೊ, ಮಾರ ಭಯೇಕನ ಜೈ಼ನ್, ಗಲಿಲಾಯಾನ ಆವಾನ ಬೋಲೊ. ಹಿಜ್ಜಾ಼ ಇವ್ಣೆ ಮನ ದೇಕ್‌ಶೆ” ಕರಿ ಬೋಲ್ಯೊ.
MAT 28:11 ಯೋ ತಯೇಡ ಖ್ಹಾರಿ ಜಾ಼ತಿ ವಖ್ಹತ್‌ಮ, ವಖ್ಹ್‌ತಿ ಕರುಕರ್ತುಥೂತೆ ಶಿಪಾಯಿಮ ಥೋಡು ಜ಼ಣು ಖ್ಹಯೇರ್‌ಮ ಜೈ಼ನ್, ಚಾ಼ಲ್ಯುತೆ ಬಾರೇಮ ಖ್ಹಾರೂಸ್ ಗಲ್‌ಢಯಾಜಕರ್‌ನ ಖ್ಹಾಮ್ಣೆ ಬೋಲ್ಯು.
MAT 28:12 ಗಲ್‌ಢ ಯಾಜಕರ್ ಶಾಣಾವ್ನ ಜೋ಼ಡೆ ಮಳಿನ್, ವಾತೆ ಕರಿಲೀನ್, ಯೋ ಶಿಪಾಯಿಯೇನ ಇವ್ಣೆ ಘಣ ಪೈಶಾದೀನ್,
MAT 28:13 “ರಾತ್ಮ ಹಮೆ ಖ್ಹುತಾರ‍್ಹವಾನಿ ವಖ್ಹತ್‌ಮ, ಇನ ಶಿಷ್ಯರ್‌ ಆಯಿನ್, ಇನ ಮುರ್ದಾನ ಚೋ಼ರೇಖ್ಹು ಪಳ್ಳಿ ಗಯ ಕರಿ ಬೋಲೊ.
MAT 28:14 ಆ ಖಬರ್ ರಾಜ಼್‌ಭಾರ್ ಚ಼ಲಾವವಾಳಾನ ಕಾನ್‌ಮ ಪಡ್ಯೂತೊ, ಹಮೆ ಇನಜೋ಼ಡೆ ವಾತೆಕರಿನ್, ತುಮಾರಾಮ ಗಲ್ತಿಕೊಯ್ನಿ ಕರಿ ಖ್ಹಮ್‍ಜಾ಼ಡ್‍ಶು, ತದೆ ತುಮೂನ ಶನೋಸ್ ಡರ್‌ ಕೋ ರ‍್ಹಿಶೇನಿ” ಕರಿ ಬೋಲ್ಯು.
MAT 28:15 ಯೋ ಶಿಪಾಯಿಯೇನೆ ಪೈಶಾ ಲೀಲಿನ್‌, ಇವ್ಣುನ ಶಾತ್ ಬೋಲಿದಿದೂಥೂಕಿ ಇಮ್ಮಸ್ ಕರ‍್ಯು. ಆ ವಾತೆ ಹಮ್ಕೆಲಗೂಬಿ ಯೆಹೂದ್ಯರ್‌ಮ ಫೈಲಿರ‍್ಹೂಸ್.
MAT 28:16 ಬಾದ್‌ಮ ಗ್ಯಾರ‍್ಹ ಜ಼ಣ ಶಿಷ್ಯರ್‌ ಯೇಸುನೆ ಬೋಲಿವತಾಳ್ಯೋತೆ ಗಲಿಲಾಯನು ಏಕ್‌ ಪಹಾಡ್‌ಕನ ಗಯ.
MAT 28:17 ಹಿಜ್ಜಾ಼ ಯೇಸುನ ದೇಖಿನ್, ಇನಖ್ಹಾಮ್ಣೆ ಆರಾದನೆ ಕರ‍್ಯು, ಕತೋಬಿ ಇವ್ಣಾಮ ಥೋಡು ಜ಼ಣು ಶಕ್ ಕರ‍್ಯು.
MAT 28:18 ಯೇಸು ಇವ್ಣ ಖನ್ನೆ ಆಯಿನ್, “ಸೊರ್ಗಾಮಾಬಿ, ಧರ್ತಿಪರ್‌ಬಿ ಖ್ಹಾರೀಸ್‍ ಅದಿಕಾರ್ ಮನ ದೆವೈರ‍್ಹೀಸ್.
MAT 28:19 ಇನಖ್ಹಾಜೆ ತುಮೆ ಜೈ಼ನ್, ಖ್ಹಾರ ದೇಖ್ಹ್‌ಮ ಛಾ಼ತೆ ಅಲಕ್ ಅಲಕ್ ವಾತೆ ಬೋಲಾವಳು ಅದ್ಮಿ ಖ್ಹಾರಾನ ಮಾರ ಶಿಷ್ಯರ್‌ ಬಣಾವೊ: ಇವ್ಣುನ ಬಾ, ಛಿಯ್ಯೊ ಅಜು಼ ಪವಿತ್ರಾತ್ಮನ ನಾಮ್‌ಪರ್‌ ಬ್ಯಾಪ್ತಿಸ್ಮ ದೆವೊ.
MAT 28:20 ಅಜು಼ ಮೇ ತುಮೂನ ಹುಕುಮ್‌ ದೀರಾಖ್ಯೋತೆ ಖ್ಹಾರಸ್ನ ಇವ್ಣೆ ಪಾಡಿ ಚಾ಼ಲಾನಿಘೋಣಿ ಇವ್ಣುನ ಬೋಲಿವತಾಳೊ. ಅಜು಼ ಯಾದ್ಮ ರ‍್ಹವಾದೇಕಿ ಜಗತ್‌ನು ಖ್ಹರ್ತಿ ಹುವಾಲಗೂಬಿ, ಹಮೇಶ ಮೇ ತುಮಾರ ಜೋ಼ಡೆಸ್ ರ‍್ಹೀಶ್” ಕರಿ ಬೋಲ್ಯೊ.
MAR 1:1 ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ, ಯೇಸು ಕ್ರಿಸ್ತನಿ ಬಾರೇಮ, ಅಛ್ಛಿ ಸಮಾಚಾರ್‌ನಿ ಶುರುವಾತ್.
MAR 1:2 ಪ್ರವಾದಿ ಯೆಶಾಯನ ದಪ್ತರ್‌ಮ ಲೀಖೈರ‍್ಹೂತೆ ತಿಮ್, “ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್, ಯೋ ತಾರಿ ವಾಟ್ನ ಬರೋಬರ್‌ ಕರ್ಶೆ.
MAR 1:3 ಏಕ್‌ ಜ಼ಣೊ ಉಜ್ಜಾ಼ಡಿ ಝ಼ಗೋಮ, “ಪ್ರಭುನಿ ವಾಟ್ನ ಖ್ಹವಾರೊ, ಇನಿ ವಾಟ್ನ ಖ್ಹೂದು ಕರೊ” ಕರಿ ಚಿಕ್ರುಕರಾಸ್.
MAR 1:4 ಅಮ್ ಕರಿ ಪ್ರವಾದಿ ಹುಯಿರ‍್ಹೊಥೋತೆ ಯೆಶಾಯನ ಪುಸ್ತಕ್‌ಮ ಲೀಖೈರ‍್ಹೂಸ್ತೆ ಇಮ್ಮಸ್, ಯೋಹಾನ ಉಜ್ಜಾ಼ಡಿ ಝ಼ಗೋಮ ದೆಖೈನ್, ಅದ್ಮಿ ಖ್ಹಾರಾನ, “ತುಮೆ ಪಾಪ್ ಕರಾನು ಮ್ಹೇಲಿನ್ ದೇವ್ ಭಣಿ ಫರೊ ಅಜು಼ ಬ್ಯಾಪ್ತಿಸ್ಮ ಲೇವೊ, ತದೆ ದೇವ್ ತುಮಾರು ಪಾಪ್ನ ಮಾಪ್‌ ಕರ್ಶೆ” ಕರಿ ಬೋಲ್ತೊಹುಯಿನ್ ಬ್ಯಾಪ್ತಿಸ್ಮ ದೆವ್‍ಕರ್‌ತೋಥೊ.
MAR 1:5 ತದೆ ಯೂದಾಯ ತಬರ್‌ಖ ಭಣೀಥು ಅಜು಼ ಯೆರೂಸಲೇಮ್‍ ಖ್ಹಯೇರ್‌ಥು ಘಣು ಅದ್ಮಿ ಯೋಹಾನಕನ ಜೈ಼ನ್, ಇವ್ಣ-ಇವ್ಣ ಪಾಪ್ನ ಕಬೂಲಿಲೀನ್‌, ಇನ ಹಾತೇಖ್ಹು ಯೊರ್ದನ್‌ ನದ್ದಿಮ ಬ್ಯಾಪ್ತಿಸ್ಮ ಕರೈಲೆವ್‌ಕರ್ತುಥು.
MAR 1:6 ಯೋಹಾನ ಊಟ್ನ ಕೇಖ್ಹ್‌ಥಿ ಬಣಾಯುಹುಯು ಲುಂಗ್ಡು ಪೇರ‍್ಹೀರಾಕ್ತೊಥೊ, ಕಂಬರ್‌ನ ಚಾ಼ಂಬ್ಡಾನು ಕಂಬರ್‌ಪಟೊ ಭಾಂದಿರಾಕ್‌ತೋಥೊ ಅಜು಼ ಚಿಡ್ಡೋಬಿ ಜ಼ಂಗಳ್ನಿ ಶೇತ್‌ ಇನು ಖಾಣು ಹುಯಿರ‍್ಹುಥು.
MAR 1:7 ಯೋಹಾನನೆ ಅದ್ಮಿಖ್ಹಾರನ, “ಮಾರೇಥಿಬಿ ಶಕತ್‌ವಾಳೊ ಮಾರ ಪೀಠೆ ವಳ್ಯಾವಸ್; ಮೇ ಝು಼ಕಿನ್‌ ಇನಿ ಖೋಖ್ಹ್‌ಡಾನಿ ಡೋರಿ ಛೋ಼ಡಾನಾಬಿ ಲ್ಹಾಯೇಕ್‍ಕೊಯ್ನಿ ಕರಿ ಬೋಲಿವತಾಳ್ಯೊ.
MAR 1:8 ಮೇ ತುಮೂನ ಪಾಣಿಥಿ ಬ್ಯಾಪ್ತಿಸ್ಮ ದೆವಾಡುಸ್; ಕತೋಬಿ ಯೋತೊ ತುಮೂನ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ದೆವಾಡ್‌ಶೆ” ಕರಿ ಬೋಲಿವತಾಳ್ಯೊ.
MAR 1:9 ಏಕ್‌ ದನ್ನೆ ಯೇಸು ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್‌ಥು ಐನ್, ಯೊರ್ದನ್‌ ನದ್ದಿಮ ಯೋಹಾನಥಿ ಬ್ಯಾಪ್ತಿಸ್ಮ ಕರೈಲಿದೊ.
MAR 1:10 ಯೇಸು ಬ್ಯಾಪ್ತಿಸ್ಮ ಲೀನ್, ಪಾಣಿಮಾಥೊ ಭಾರ್‌ ನಿಕಳ್‌ತಾಸ್ನ, ಸೊರ್ಗ ನಿಕ್ಳಿನ್, ದೇವ್‌ನು ಆತ್ಮ ಪರ‍್ಯಾವಾನಿಘೋಣಿ ಇನಾಪರ್ ಉತ್ರಿನ್‌ ಆಯೂತೆ ದೇಖ್ಯೊ.
MAR 1:11 ತದೆ ಪರಲೋಕ್‌ಮಾಥು “ತೂ ಮಾರೊ ಪ್ಯಾರ್‌ನೊ ಛಿಯ್ಯೊ, ತಾರೇಥಿ ಮೇ ಘಣು ಖ್ಹುಶಿ ಛೂ಼” ಕರಿ ಏಕ್‌ ಅವಾಜ಼್ ಖ್ಹಮಜ್‌ಪಡ್ಯು.
MAR 1:12 ತದ್‌ನು-ತದ್ದೇಸ್ ಯೇಸುನ ಪವಿತ್ರಾತ್ಮನೆ ಉಜ್ಜಾ಼ಡಿ ಝ಼ಗೋಮ ಚ಼ಲಾಯೊ.
MAR 1:13 ಹಿಜ್ಜಾ಼ ಯೇಸು ಚಾ಼ಳಿಖ್ಹ್ ರೋಜ಼್ ಥೊ, ಜ಼ಂಗ್‌ಳಿ ಜಿನಾವರ್‌ಬಿ ಹಿಜ್ಜಾ಼ ಥೂ. ತದೆ ಶೈತಾನ್‌ಥಿ ಯೇಸು ಶೋದನೆಮ ಪಡ್ಯೊ. ಅಜು಼ ದೇವ್ ದೂತರ್ ಖ್ಹಾರುಐನ್ ಇನಿ ಸೇವಾ-ಚಾ಼ಕ್ರಿ ಕರ‍್ಯು.
MAR 1:14 ಯೋಹಾ‍ನನ ಜೇಲ್‌ಮ ಕೋಂಡಿನ್‌ ಘಾಲಿದೆವಾನ ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನ ಆಯಿನ್ ದೇವ್ನಿ ಸುವಾರ್ತೆನ ಅಮ್ ಬೋಲಿ ಒತಾಳ್ಯೊಕಿ,
MAR 1:15 “ದನ್‌ಖ್ಹಾರ ಭರೈಗ, ದೇವ್ನಿ ರಾಜ್ಯ ಖನ್ನೆ ಐಗು! ತುಮಾರು ಪಾಪ್ನ ಖ್ಹಾರು ಮ್ಹೇಲಿನ್ ದೇವ್‌ಭಣಿ ಫರಿನ್, ದೇವ್ನಿ ಅಛ್ಛಿ ಸಮಾಚಾರ‍್ನ ನಂಬೊ!” ಕರಿ ಬೋಲ್ಯೊ.
MAR 1:16 ಏಕ್‌ ದನ್ನೆ ಯೇಸು ಗಲಿಲಾಯ ದರ‍್ಯಾವ್ನ ಕನಾರೆಕರಿ ವಳ್ಯೊಜಾ಼ತೊಥೊ. ತದೆ ಜಾ಼ಳು ನಾಖುಕರ್ತಥಾತೆ ಸೀಮೋನ್‌ ಅಜು಼ ಇನೊ ನ್ಹಾನೊ ಭೈ ಅಂದ್ರೆಯನ ದೇಖ್ಯೊ. ಅವ್ಣೆ ಮಾಛ಼್ಲ ಖ್ಹಾವಾಳ ಹುಯಿರ‍್ಹಾಥ.
MAR 1:17 ಯೇಸುನೆ ಇವ್ಣುನ, “ಮಾರ ಕೇಡೆ ಆವೊ, ಮೇ ತುಮೂನ ಮಾಛ಼್ಲ ಖ್ಹಾವಾಳಾನಿತರ ಕಾಹೆ ಅದ್ಮಿನ ಖ್ಹಾವಾಳಾನಿತರ ಬಣವುಸ್. ಕರಿ ಬೋಲ್ಯೊ.
MAR 1:18 ಅಮ್ ಬೋಲ್ತಾಸ್‌ನ ಇವ್ಣೆ ಇವ್ಣು ಜಾ಼ಳುಖ್ಹಾರು ಮ್ಹೆಂದಿನ್ ಯೇಸುನ ಕೇಡೆ ಗಯ.
MAR 1:19 ಯೇಸು ಬಿಜು಼ ಜ಼ರ ಖ್ಹಾಮ್ಣೆ ಜೈ಼ನ್, ಜೆಬೆದಾಯನೊ ಛಿಯ್ಯೊ ಯಾಕೋಬನಾಬಿ ಅಜು಼ ಇನೊ ನ್ಹಾನೊ ಭೈ ಯೋಹಾನ್ನ ದೇಖ್ಯೊ. ಇವ್ಣೆ ಡೋಣ್‌ಮ ಜಾ಼ಳಾನ ಬರೋಬರ್ ಕರುಕರ್ತಥ.
MAR 1:20 ದೇಕ್‍ತಾಸ್, ಇವ್ಣುನಾಬಿ ಬುಲಾಯೊ; ಬುಲಾವ್‍ತಾಸ್‍ನ ಇವ್ಣೆ ಇವ್ಣೊ ಬಾ ಜೆಬೆದಾಯನ ಕೂಲಿಆಳ್‍ನ ಜೋ಼ಡೆ ಡೋಣ್‌ಮ ಮ್ಹೆಂದಿನ್ ಯೇಸುನ ಕೇಡೆ ಗಯ.
MAR 1:21 ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಕಪೆರ್ನೌಮ್ ಕರಿ ಗಾಮ್‌ನ ಗಯ, ಹಿಜ್ಜಾ಼ ಸಬ್ಬತ್‌ ದನ್ನೆ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್ ವಚನ್ ಬೋಲಿದೆವಾನಿಕ್‍ಳ್ಯೊ.
MAR 1:22 ಅದ್ಮಿಖ್ಹಾರು ಯೇಸುನಿ ಭೋದನ್ನ ಖ್ಹಮ್‌ಜಿನ್‌, ಘಣು ಆಶ್ಚರ್ಯಖಾದು. ಶನಕತೊ ಯೋ ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೇನಿಘೋಣಿ ಕಾಹೆತೆ, ಅದಿಕಾರ್ ರ‍್ಹವಾಳಾನಿತರ ವಾಕ್ಯ ಬೋಲ್ತೊಥೊ.
MAR 1:23 ತದೆ ಯೋ ಸಬೆ ಭರಾವಾನು ಮಂದಿರ್‌ಮ ಭೂತ್‌ ಧರಿರಾಖ್ಯುಥೂತೆ ಏಕ್‌ ಅದ್ಮಿ ಆಯು.
MAR 1:24 ಯೋ ಚಿಕ್ರಿನ್, “ನಜ಼ರೇತ್‌ನೊ ಯೇಸು, ಹಮಾರೇಥಿ ತುನ ಶಾತ್‌ ಛಾ಼? ಹಮೂನ ಬರ್ಬಾತ್ ಕರಾನ ಆಯೊಕಿ ಶು? ತು ಕೋಣ್ ಕರಿ ಮನ ಮಾಲುಮ್; ತೂ ದೇವ್‌ನೊ ಪವಿತ್ರ್‌ ಛಿಯ್ಯೊ ಹುಯಿರ‍್ಹೋಸ್” ಕರಿ ಬೋಲ್ಯು.
MAR 1:25 ಯೇಸುನೆ ಯೋ ಭೂತ್‌ನ ಗುರ್‌ಕೈನ್, “ಖ್ಹೊಪ್‌ರ‍್ಹೆ, ಅನ ಮ್ಹೆಂದಿನ್ ಭಾರ್‌ನಿಕಳ್‌” ಕರಿ ಬೋಲ್ಯೊ.
MAR 1:26 ತದೆ ಯೋ ಭೂತ್‍ನೆ ಯೋ ಅದ್ಮಿನ ಧಡಾಶಮರೈನ್, ಜೋ಼ರೇಖ್ಹು ಚಿಕ್ರಿನ್ ಭಾರ್‌ ನಿಕ್ಳಿಗಯು.
MAR 1:27 ಅನ ದೇಖಿನ್‌ ಅದ್ಮಿಖ್ಹಾರು ಆಶ್ಚರ್ಯಖೈನ್, “ಆ ಶಾತ್ ನವಿ ತರ‍್ಹಾಥಿ ಬೋಲಿ ದೇಯಿತೆ? ಯೇಸು ಅದಿಕಾರ್‌ಥಿ ಭೂತ್‌ಅಖ್ಖಾನಬಿ ಹುಕುಮ್‌ ದೇಸ್‌ನಿ, ಭೂತ್‌ ಖ್ಹಾರುಬಿ ಇನಿ ವಾತ್ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ ಏಕ್‌ ಬೋಲಿಲಿದು.
MAR 1:28 ಜ಼ಲ್ದೀಸ್‍ಮ ಯೇಸುನಿ ಬಾರೇಮನಿ ಖಬರ್ ಗಲಿಲಾಯ ತಬರ್‌ಖಾನು ಖ್ಹಾರಿ ಬಾಜು಼ಮ ಫೈಲಿಗಯು.
MAR 1:29 ಬಾದ್‌ಮ ಇವ್ಣೆ ಸಬಾಮಂದಿರ್‌ಥ ನಿಕ್ಳಿನ್‌ ಯಾಕೋಬಬಿ ಯೋಹಾನ್ನ ಜೋ಼ಡೆ ಸೀಮೋನ್‍ಬಿ ಅಂದ್ರೆಯನ ಘರ್‌ಕನ ಗಯ.
MAR 1:30 ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ತಾವ್ ಐನ್ ಖ್ಹುತೀಥಿ, ಒಗ್ಗಿಸ್‌ಮ ಇವ್ಣೆ ಇನಿ ಬಾರೇಮ ಯೇಸುನ ಬೋಲ್ಯು.
MAR 1:31 ಯೇಸು ಸೀಮೋನನಿ ಖ್ಹಾಖ್ಹುನ ಖನ್ನೆ ಜೈ಼ನ್, ಇನೊ ಹಾತ್ ಧರೀನ್ ಉಠಾಡ್‌ತಾಖ್ಹತರ್‌, ಇನೊ ತಾವ್ ಉತ್ರಿಗಯೊ. ತದೆ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.
MAR 1:32 ದನ್ ಡುಬಾನ ಬಾದ್‌ಮ ಖ್ಹಾಂಜ಼್‍ನು, ಅದ್ಮಿಖ್ಹಾರು ರೋಗ್‌ಮ ರ‍್ಹವಾಳ ಖ್ಹಾರಾನ ಅಜು಼ ಭೂತ್ ಧರಿರಾಖವಾಳ ಖ್ಹಾರಾನ ಯೇಸುಕನ ಲೀನ್ ಆಯು.
MAR 1:33 ಗಾಮ್‍ ಅಖ್ಖೂಸ್ ಯೋ ಘರ್‌ನ ಬಾಕಲ್‌ನ ಖ್ಹಾಮ್ಣೆ ಭರೈರ‍್ಹೂಥು.
MAR 1:34 ತದೆ ಯೇಸು ಖ್ಹಾರಿ ತರ‍್ಹಾನು ರೋಗ್‍ವಾಳ ಘಣ ಅದ್ಮಿನ ಅಛ್ಛು಼ ಕರ‍್ಯೊ. ಅಜು಼ ಘಣು ಭೂತ್ ಖ್ಹಾರು ಕಾಡ್ಯೊ, ಯೋ ಭೂತ್ ಖ್ಹಾರಾನ ಯೇಸು ಕೋಣ್‌ಕರಿ ಮಾಲುಮ್ ಥು, ಇನಾಖ್ಹಾಜೆ ಯೋ ಭೂತ್ ಖ್ಹಾರಾನ ವಾತ್ ಬೋಲಾದಿದೊಕೊಯ್ನಿ.
MAR 1:35 ಇನ ವ್ಹಾಣೇಸ್ ವೇಳಿ ದನ್ ನಿಕ್ಳಾನ ಅಗಾಡಿ, ಅಂಧಾರು ರ‍್ಹಾವಾನಿಸ್ ವಖ್ಹತ್‌ಮ, ಯೇಸು ಉಠೀನ್ ಘರ್ ಮ್ಹೆಂದಿನ್ ಉಜ್ಜಾ಼ಡಿ ಝ಼ಗೋಪರ್ ಜೈ಼ನ್, ಪ್ರಾರ್ಥನೆ ಕರುಕರ್ತೊಥೊ.
MAR 1:36 ಬಾದ್‌ಮ ಸೀಮೋನ್‍ಬಿ ಇನ ಜೋ಼ಡ್ಮ ರ‍್ಹವಾಳು ಯೇಸುನ ಢೂಂಡ್‌ತುಹುಯಿನ್ ಹಿಜ್ಜಾ಼ ಆಯು.
MAR 1:37 ಹಿಜ್ಜಾ಼ ಯೇಸುನ ಮಳಿನ್, “ಅಖ್ಖುಜ಼ಣು ತುನಾಸ್ ಢೂಂಡುಕರಾಸ್” ಕರಿ ಬೋಲ್ಯು.
MAR 1:38 ತದೆ ಯೇಸುನೆ ಇವ್ಣುನ, “ಅಪ್ಣೆ ಖನ್ನೆ ಛಾ಼ತೆ ಬಿಜ಼ಖ್ಹಾರ ಗಾಮ್‌ನಾಬಿ ಜ಼ಯ್ಯೆ಼. ಹಿಜ್ಜಾ಼ಬಿ ಮೇ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು; ಅನಾಸ್‍ಖ್ಹಾಜೆ ಮೇ ಐರ‍್ಹೋಸ್ತೆ” ಕರಿ ಖ್ಹಮ್‌ಜಾ಼ಡ್ಯೊ.
MAR 1:39 ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನು ಖ್ಹಾರಿ ಬಾಜು಼ಮ ಜೈ಼ನ್, ಸಬೆ ಭರಾವಾನು ಮಂದಿರ್‌ಮ ದೇವ್ನಿ ಅಛ್ಛಿ ಖಬರ್‌ನ ಬೋಲ್ತೊಹುಯಿನ್, ಭೂತ್‌ಖ್ಹಾರು ಕಾಡುಕರ್ತೊಥೊ.
MAR 1:40 ಖೋಡ್‍ ಲಾಗಿಹುಯು ಏಕ್‌ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್‌ಣ್ಯ ಟೇಕಿನ್, “ಮನ ಅಛ್ಛು಼ ಕರಾನ ತಾರೇಥಿ ಹುವಾಸ್, ತುನ ಮನ್ ಉಶೇತೊ ಮನ ಶುದ್ದಿ ಕರೆಜಾ಼ಯ್” ಕರಿ ಗಿಂಗೈಲಿದೊ.
MAR 1:41 ತದೆ ಯೇಸುನೆ ಇನಾಪರ್ ಘಣು ಗೋರ್‌ಖೈನ್, ಇನ ಹಾತೇಖ್ಹು ಛೀಮಿನ್‌, “ಮನ ಮನ್ ಛಾ಼; ಶುದ್ದಿ ಹೂ” ಕರಿ ಬೋಲ್ಯೊ.
MAR 1:42 ಅಮ್ ಬೋಲ್ತಾಸ್‌ನ ಇನು ಖೋಡ್‌ಖ್ಹಾರು ನಿಕ್ಳಿಜೈ಼ನ್, ಯೋ ಪಾಕ್‌ ಹುಯಿಗೊ.
MAR 1:43 ತದೆ ಯೇಸುನೆ ಇನ ಝೇತೈನ್‌, “ಹಂದೇಕ್, ಮೇ ತುನ ಅಛ್ಛು಼ ಕರ‍್ಯೊ ಕರಿ ಕಿನಾಬಿ ನಕೊ ಬೋಲೀಶ್‌; ಕತೋಬಿ ತು ಯಾಜಕಕನ ಜೈ಼ನ್ ತಾರು ಆಂಗ್‌ತನ್‌ ವತಾಳಿನ್ ಮೋಶೇನೆ ಶುದ್ದಿನಖ್ಹಾಜೆ ಹುಕುಮ್‌ ದೀರಾಖ್ಯೋತೆ ಇಮ್‌, ಕಾಣ್ಕೆ ಖ್ಹಾರು ಲೀಜೈ಼ನ್ ದೇ. ಯೋಅಖ್ಖು ಅದ್ಮಿವೋನ ಸಾಕ್ಷಿ ಹುಯಿರ‍್ಹವಾದೆ ಅಮ್ ಕರಿ ಬೋಲಿನ್ ಇನ ಒಗ್ಗಿಸ್ ಮೋಕ್ಲಿದಿದೊ.
MAR 1:45 ಕತೋಬಿ ಯೋ ಚ಼ಲ್ಯೂಜೈ಼ನ್, ಯೇಸುನೆ ಇನ ಅಛ್ಛು಼ ಕರ‍್ಯೊ ಕರಿ ಬೋಲಿನ್‌ ಖ್ಹಾರಿ ಬಾಜು಼ಮ ಫೈಲೈನಾಖ್ಯು. ಅನೇಥಿ ಯೇಸು ಬಿಜು಼ ಖೆವ ಗಾಮ್ಮಾಬಿ ಖ್ಹಾರಾನ ದೆಖಾವಾನಿ ಘೋಣಿ ಜಾ಼ವಾನ ಕೋ ಹುಯುನಿ. ಇನಾಖ್ಹಾಜೆ ಯೇಸು ಭಾರ್‌ ಉಜ್ಜಾ಼ಡಿ ಝ಼ಗೋಮ ಜೈ಼ನ್ ಥೊ, ತೋಬಿ ಚಾರ‍್ಹೆ ಆಡಿಥು ಅದ್ಮಿಖ್ಹಾರು ಇನಾಕನ ಅವ್‌ಕರ್ತುಥು.
MAR 2:1 ಥೋಡ ದನ್ನ ಬಾದ್‌ಮ ಯೇಸು ಕಪೆರ್ನೌಮ್ ಗಾಮ್ಮ ಪಾಛೊ಼ ಗಯೊ, ಅಜು಼ ಯೋ ಘರ್‌ಮ ಛಾ಼ ಕರಿ ಖಬರ್ ಫೈಲಿಗಯು.
MAR 2:2 ಅನ ಖ್ಹಮ್‌ಜಿನ್‌ ಘಣು ಅದ್ಮಿ ಐನ್ ಭರೈಜೈ಼ನ್, ಘರ್‌ನ ಮಹಿ ಗೋಡೊ ಮ್ಹೇಲಾನಬಿ ಝ಼ಗೊ ಕೋ ಥೂನಿ, ಬಾಕಲ್‍ಕನಾಬಿ ಝ಼ಗೊ ಕೋ ಥೂನಿ. ಯೇಸು ಇವ್ಣುನ ವಚನ್ ಬೋಲಿ ದೆವ್‍ಕರ್‌ತೋಥೊ.
MAR 2:3 ತದೆ ಚಾರ್ ಅದ್ಮಿನೆ, ಏಕ್‌ಜ಼ಣೊ ಲಕ್‍ವೊ ಮಾರ‍್ಯುಹುಯಾನ ಹಿಜ್ಜಾ಼ ಪಳ್ಳಿನ್‌ ಆಯು.
MAR 2:4 ಹಿಜ್ಜಾ಼ ಅದ್ಮಿನಿ ಭೀಡ್ ಭರೈರ‍್ಹಿಥೀತೆ ಇನಾಖ್ಹಾಜೆ, ಮಹಿ ಯೇಸುಕನ ಇನಲೀನ್ ಆವಾನ ಕೋ ಹುಯೂನಿ. ಇನಾಖ್ಹಾಜೆ ಇವ್ಣೆ ಯೋ ಘರ್‌ನ ಛ಼ತ್‍ಪರ್‌ ಚ಼ಢೀನ್, ಯೇಸುನಿ ನೇರ್ ಉಪ್ಪರ್ ಛ಼ತ್‍ನ ಥೋಡು ಕಾಡಿನಾಖಿದೀನ್, ಮೋಟಿ ಖೀಂಡ್ ಬಣೈನ್ ಇನಾಮಾಕರಿ ಯೋ ಲಕ್‍ವೊ ಮಾರಿರಾಖವಾಳನ ಖ್ಹುಡೈರಾಖ್ಯುಥೂತೆ ಬಿಛಾ಼ವ್ಣಿ ಖ್ಹಮೇದ್ ಇಮ್ಮಸ್ ಹೇಟ್ ಉತಾರ‍್ಯು.
MAR 2:5 ಯೇಸುನೆ, ಇವ್ಣೆ ಎತ್ರೇ ಇನಾಪರ್ ವಿಶ್ವಾಸ್ ಕರ‍್ಯುತೆ ದೇಖಿನ್, ಯೋ ಲಕ್‍ವೊ ಮಾರಿರಾಖವಾಳನ, “ಛಿಯ್ಯಾ, ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
MAR 2:6 ಹಿಜ್ಜಾ಼ ಮೋಶೇನು ವಚನ್‍ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಬೆಠೂಥು.
MAR 2:7 ಇವ್ಣೆ, “ಆ ಅಮ್ ಶನ ಬೋಲಾಸ್ತೆ? ಆ ದೇವ್ನ ಚಿಂಘಾವ್ಣಿ ಕರಾನಿ ವಾತೆ, ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್‌ಖ್ಹಾರು ಮಾಪ್‌ ಕರಾನ ಹುವಾನು? ಕರಿ ಇವ್ಣ-ಇವ್ಣ ದಿಲ್ಮ ಸೋಚಾಲಗ್ಯು.
MAR 2:8 ಯೇಸುನೆ ತದ್‌ನು-ತದೇಸ್‌ ಇವ್ಣೆ ಮನ್‌ಮ ಇಮ್‌ ಸೋಚುಕರಾತೆ ಮಾಲುಮ್ ಕರಿಲೀನ್, “ತುಮೆ ತುಮಾರ ದಿಲ್ಮ ಶನ ಅಮ್ ಸೋಚುಕರಾಸ್ತೆ?
MAR 2:9 ಕೆಹು ಶುಲ್ಬ? ಆ ಲಕ್‌ವೊ ಮಾರಿರಾಖವಾಳನ, ‘ತಾರು ಪಾಪ್‌ಖ್ಹಾರು ಮಾಪ್ ಹುಯಿಗಯು’ ಕರಿ ಬೋಲಾನುಕಿ, ನಾತೊ ‘ಉಠೀನ್ ತಾರಿ ಬಿಛಾ಼ವ್ಣಿ ಪಳ್ಳಿನ್‌ ಚಾ಼ಲ್’ ಕರಿ ಬೋಲಾನು?
MAR 2:10 ಕತೋಬಿ ಮೇ ತುಮೂನ ಅದ್ಮಿನೊ ಛಿಯ್ಯಾನ ಜ಼ಮೀನ್‌ಪರ್ ಪಾಪ್‌ಖ್ಹಾರು ಮಾಪ್‌ಕರಾನ ಹಕ್‌ ಛಾ಼, ಕರಿ ವತಾಳುಸ್‌” ಅಮ್ ಬೋಲಿನ್ ಯೋ ಲಕ್‌ವೊ ಮಾರಿರಾಖವಾಳ ಭಣಿ ದೇಖಿನ್,
MAR 2:11 “ಉಟ್, ತಾರಿ ಬಿಛಾ಼ವ್ಣಿ ಪಳ್ಳಿನ್‌, ಘರೆ ಜಾ಼! ಕರಿ ಮೇ ತುನ ಬೋಲುಸ್” ಕರಿ ಬೋಲ್ಯೊ.
MAR 2:12 ಅಮ್ ಬೋಲ್ತಾಸ್‌ನ ಇನೆ ಉಠೀನ್, ಇನಿ ಬಿಛಾ಼ವ್ಣಿನ ಪಳ್ಳಿನ್, ಅಖ್ಖಾನ ದೇಕ್ತಾಡೋಳೆ ಭಾದರ್ ಚ಼ಲೆಗಯೊ. ಅನ ದೇಖಿನ್ ಖ್ಹಾರುಜ಼ಣು ಘಣು ಅಶ್ಚರ್ಯಹುಯಿನ್, “ಹಮೆ ಹಂಕೆತೋಡಿ ಕದೇಬಿ ಅಮ್ನು ದೇಖೀಸ್‌ರಾಖ್ಯಕೊಯ್ನಿ” ಕರಿ ದೇವ್ನ ಸ್ತುತಿ ಕರ್ತುಹುಯಿನ್ ಬೋಲ್ಯು.
MAR 2:13 ಯೇಸು ಪಾಛೊ಼ಫರಿನ್ ಗಲಿಲಾಯ ದರ‍್ಯಾವ್ನ ಕನಾರೆಕನ ಗಯೊ. ಅದ್ಮಿನಿ ಝೂ಼ಂಡ್‌ಖ್ಹಾರು ಇನಾಕನ ಆವಾದಿನ್, ಯೇಸು ಇವ್ಣುನ ವಚನ್ ಬೋಲಿ ದೆವಾಲಗ್ಯೊ.
MAR 2:14 ಯೇಸು ಹಿಜ್ಜಾ಼ಥೊ ಜಾ಼ತೊರ‍್ಹವಾನಿ ವಖ್ಹತ್‌ಮ, ಶುಂಕ ಮಾಂಗಾನಿ ಝ಼ಗೋಪರ್‌ ಬೆಠೊಥೋತೆ ಅಲ್ಫಾಯನೊ ಛಿಯ್ಯೊ ಲೇವಿನ ದೇಖಿನ್, “ಮಾರ ಪೀಠೆ ಆವ್” ಕರಿ ಬುಲಾಯೊ. ಯೋ ಉಠೀನ್ ಯೇಸುನ ಪೀಠೆ ಗಯೊ.
MAR 2:15 ಅನ ಬಾದ್‌ಮ ಯೇಸು ಲೇವಿನ ಘರ್‌ಮ ಖಾಣನ ಬೆಠೋಥೊ. ಇನ ಪೀಠೆ-ಪೀಠೆ ಆಯುಹುಯು ಘಣು ಜ಼ಣು ಶುಂಕ ಮಾಂಗವಾಳು ಅಜು಼ ಪಾಪಿಖ್ಹಾರು, ಯೇಸು ಅಜು಼ ಇನ ಶಿಷ್ಯರ್‌ನ ಜೋ಼ಡೆ ಖಾಣನ ಬೆಠೂಥು.
MAR 2:16 ಹಿಜ್ಜಾ಼ ಪರಿಸಾಯರ್‌ನಿ ಝೂ಼ಂಡ್‌ವಾಳು ಹುಯಿರ‍್ಹುಥೂತೆ, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಮ ಥೋಡು ಜ಼ಣು, ಯೇಸು ಶುಂಕ ಮಾಂಗವಾಳನ ಅಜು಼ ಪಾಪಿ ಅದ್ಮಿನ ಜೋ಼ಡೆ ಖಾಣು ಖಾತಾನ ದೇಖ್ಯು. ತದೆ ಇವ್ಣೆ ಯೇಸುನ ಶಿಷ್ಯರ್‌ನ, “ಯೋ ಅಮ್ನಅದ್ಮಿನ ಜೋ಼ಡೆ ಶನ ಖಾಣು ಖಾಸ್ತೆ?” ಕರಿ ಬೋಲ್ಯು.
MAR 2:17 ಅನ ಖ್ಹಮ್‌ಜಿನ್‌ ಯೇಸುನೆ, “ಅಛ್ಛು಼ರ‍್ಹಾವಾಳನ ವೈದ್ಯನಿ ಜ಼ರೂರತ್ ಕೊಯ್ನಿ, ರೋಗ್‌ಮ ರ‍್ಹಾವಾಳನ ವೈದ್ಯನಿ ಜ಼ರೂರತ್ ಛಾ಼. ಮೇ ಆಯೋತೆ ನೀತಿವಾಳನ ಬುಲಾವನ ಕಾಹೆ, ಪಾಪಿ ಖ್ಹಾರಾನ ಬುಲಾವನ ಆಯೋತೆ” ಕರಿ ಬೋಲ್ಯೊ.
MAR 2:18 ಬಾಪ್ತಿಸ್ಮ ದ್ಯವಾಳೊ ಯೋಹಾನನು ಶಿಷ್ಯರ್‌ಬಿ, ಫರಿಸಾಯರ್‌ನು ಶಿಷ್ಯರ್‌ ಉಪವಾಸ್ ಥು. ತದೆ ಥೋಡು ಅದ್ಮಿ ಯೇಸುಕನ ಆಯಿನ್, “ಯೋಹಾನನು ಶಿಷ್ಯರ್‌ಬಿ ಫರಿಸಾಯರ್‌ನು ಶಿಷ್ಯರ್‌ ಖ್ಹಾರು ಉಪವಾಸ್ ರ‍್ಹೇಸ್‌ನಿ, ತಾರು ಶಿಷ್ಯರ್‌ ಶನ ಉಪವಾಸ್ ಕೋ ರ‍್ಹೇಯ್ನಿ?” ಕರಿ ಪುಛಾ಼ಯು.
MAR 2:19 ತದೆ ಯೇಸುನೆ ಇವ್ಣುನ, “ವ್ಯಹಾನ ಆಯೂತೆ ಅದ್ಮಿ ಇವ್ಣ ಜೋ಼ಡೆ ನೌಶೊ ರ‍್ಹವಾಪರ್ ಉಪವಾಸ್ ರಹೆಜಾ಼ಯ್‌ ಕಿಶು? ನೌಶೊ ವ್ಯಹಾನಘರ್‌ಮ ಇವ್ಣ ಜೋ಼ಡೆ ರ‍್ಹಾವಾಲಗು ಇವ್ಣೆ ಉಪವಾಸ್ ಕೋ ರ‍್ಹೇಯ್ನಿ.
MAR 2:20 ಕತೋಬಿ, ನೌಶೊನ ಇವ್ಣಕಂಥು ಲೀಜಾ಼ವಾನ ದನ್ ಆವ್‌ಶೆ, ಯೋ ದನ್‌ಮಾಸ್ ಇವ್ಣೆ ಉಪವಾಸ್ ರ‍್ಹಿಶೆ.
MAR 2:21 ಕೋಣ್‌ಬಿ ಫಾಟಿಹುಯು ಜೂ಼ನ ಲುಂಗ್ಡಾನ ಕೇಡೆ ನವು ಲುಂಗ್ಡಾನು ಥಿಗ್‌ಳು ಲಗಾಡಿನ್ ಶಿವಾಕೊಯ್ನಿ, ಇಮ್‌ ಶಿವಿತೊ ಯೋ ನವು ಲುಂಗ್ಡಾನು ಥಿಗ್‌ಳು ಖೇಚಾ಼ವಸ್ತೆ ಇನಖ್ಹಾಜೆ, ಯೋ ಜೂ಼ನು ಲುಂಗ್ಡು ಬಿಜೂ಼ಬಿ ಜಾ಼ಖ್ಹತ್ ಫಾಟಿಜಾ಼ಸ್‌.
MAR 2:22 ಇಮ್ಮಸ್ ಕೋಣ್‌ಬಿ ಜೂ಼ನಿ ಚಾ಼ಂಬ್ಡಾನಿ ತಿತ್ತಿಯೇಮ ನವು ದ್ರಾಕ್ಷಿನು ರಖ್ಹ್‌ ಭರಿ ಮ್ಹೇಲಾಕೊಯ್ನಿ, ಇಮ್‌ ಭರಿ ಮ್ಹೇಲ್ಯೂತೊ, ಯೋ ನವು ದ್ರಾಕ್ಷಿನು ರಖ್ಹ್‌ ಯೋ ಜೂ಼ನಿ ಚಾ಼ಂಬ್ಡಾನಿ ತಿತ್ತಿನ ಫೋಡಿನಾಖಸ್. ತದೆ ದ್ರಾಕ್ಷಿನು ರಖ್ಹ್‌ಬಿ ಚಾ಼ಂಬ್ಡಾನಿ ತಿತ್ತಿಯೇಬಿ ಭೇ ಖರಾಬ್ ಹುಯಿಜಾ಼ಸ್. ಇನಾಖ್ಹಾಜೆ ನವು ದ್ರಾಕ್ಷಿನ ರಖ್ಹ್‌ನ ನವ ಚಾ಼ಂಬ್ಡಾನಿ ತಿತ್ತಿಯೇಮ ಭರಿ ಮ್ಹೇಲಾಸ್” ಕರಿ ಬೋಲ್ಯೊ.
MAR 2:23 ಯೇಸು ಸಬ್ಬತ್‌ನ ರೋಜೆ, ಇನ ಶಿಷ್ಯರ್‌ನ ಜೋ಼ಡೆ ಖೇತರ್‌ಮಾಕರಿ ವಳ್ಯೊಜಾ಼ತೋಥೊ, ತದೆ ಇನ ಶಿಷ್ಯರ್‌ನೆ ಖಾವಾನಖ್ಹಾಜೆ ಥೋಡು ಬುಟ್ಟಾ ತೋಡಿಲಿದ.
MAR 2:24 ಫರಿಸಾಯರ್‌ವಾಳು ಅನ ದೇಖಿನ್ ಯೇಸುನ, “ದೇಕ್, ಅವ್ಣೆ ಸಬ್ಬತ್‌ ದನ್ಮ ನಿಯಮ್‌ಕೊಂತೆ ಕಾಮ್ ಶನ ಕರಾಸ್?” ಕರಿ ಬೋಲ್ಯು.
MAR 2:25 ಯೇಸುನೆ ಇವ್ಣುನ, “ದಾವೀದ್‌ಬಿ ಇನ ಜೋ಼ಡ್ಮ ರ‍್ಹವಾಳು ಖಾಣು ಕೊಂತೆ ವಖ್ಹತ್‌ಮ, ಜಾ಼ಖ್ಹತ್ ಭುಕ್ ಲಾಗಖ್ಹತರ್, ದಾವೀದ್‌ನೆ ಶಾತ್‌ ಕರ‍್ಯೊ ಕರಿ ತುಮೆ ಕದೇಬಿ ಪಢ್ಯಾಕೊಯ್ನಿಕಿಶು?
MAR 2:26 ಇನೆ ಗಲ್‌ಢಯಾಜಕ್ ಅಬಿಯಾತರ್‌ನ ಹಗಾಮ್ಮ ದೇವ್ನ ಮಂದಿರ್‌ಮ ಜೈ಼ನ್‌, ಯಾಜಕರಸ್‌ ಖಲಿಖಾವ್ಣುಥುತೆ ಪಣ್ಕಿ ಕೋಣ್‌ಬಿ ನಾ ಖಾವ್ಣುಕರಿ ತದ್ನಿ ಖಾನುಲ್‌ಮ, ದೇವ್ನ ಖ್ಹಾಮೆ ಮ್ಹೇಲಾತೆ ರೋಟಾನ ಖೈನ್, ಇನ ಜೋ಼ಡ್ಮ ರ‍್ಹಾವಾಳನಾಬಿ ದಿದೋನಿ?” ಕರಿ ಬೋಲ್ಯೊ.
MAR 2:27 ಅಜು಼ ಯೇಸುನೆ ಇವ್ಣುನ, “ಅದ್ಮಿನ ಅಛ್ಛಾ಼ನಖ್ಹಾಜೆ ದೇವ್ನೆ ಸಬ್ಬತ್ ದನ್ನ ಬಣಾಯೋತೆ ಪಣ್ಕಿ, ಸಬ್ಬತ್‌ ದನ್ನ ದಾಬುಕ್ಮ ರ‍್ಹಾವಾನಟೇಕೆ ಅದ್ಮಿ ಖ್ಹಾರಾನ ಕೋ ಬಣೈರಾಖ್ಯೋನಿ.
MAR 2:28 ಅನಖ್ಹಾಜೆಸ್ ಅದ್ಮಿನೊ ಛಿಯ್ಯೊ, ಸಬ್ಬತ್‌ ದನ್ಮಾಬಿ ಪ್ರಭು ಹುಯಿರ‍್ಹೋಸ್” ಕರಿ ಬೋಲ್ಯೊ.
MAR 3:1 ಬಿಜೇಕ್ ದನ್ನೆ ಯೇಸು ಸಬೆ ಭರಾವನು ಮಂದಿರ್‌ಮ ಗಯೊ. ಹಿಜ್ಜಾ಼ ಹಾತ್‌ ಝೂ಼ಟೊ ಪಡಿಹುಯು ಏಕ್‌ ಅದ್ಮಿಥು.
MAR 3:2 ಹಿಜ್ಜಾ಼ ಥೋಡು ಅದ್ಮಿ ಯೇಸುಪರ್‌ ಗಲ್ತಿ ಲಗಾಡನಖ್ಹಾಜೆ, ಸಬ್ಬತ್‌ ದನ್ಮ ಯೋ ಹಾತ್‌ ಝೂ಼ಟೊ ಪಡಿಹುಯು ಅದ್ಮಿನ ಅಛ್ಛು಼ ಕರಾಸ್ಕಿ ಶುಕಿ, ಕರಿ ಜ಼ಪೀನ್ ದೇಖುಕರ್ತುಥು.
MAR 3:3 ಯೇಸುನೆ ಯೋ ಹಾತ್‌ ಝೂ಼ಟೊ ಪಡ್ಯೊಹುಯೊ ಅದ್ಮಿನ, “ಉಠೀನ್ ಖ್ಹಾರಾನ ಇಚ಼್‌ಮ ಐನ್ ಭೀರೆ” ಕರಿ ಬೋಲ್ಯೊ.
MAR 3:4 ತದೆ ಯೇಸುನೆ ಇವ್ಣುನ, “ಸಬ್ಬತ್‌ ದನ್ಮ ಧರ್ಮಶಾಸ್ತ್ರನಿ ನಿಯಮ್‌ನು ಕಾಮ್‌ಕರಾನು ಖೆವು? ಅಛ಼್ಛುಕರಾನುಕಿ ಖರಾಬ್‌ಕರಾನು? ಜಾನ್‌ ಬಚಾ಼ಡಾನುಕಿ, ಕಾಡಾನು?” ಕರಿ ಬೋಲಾಖ್ಹತರ್ ಇವ್ಣೆ ಖ್ಹೊಪ್‌ ಥು.
MAR 3:5 ತದೆ ಯೇಸು ಖೀಜ಼್‌ಥಿ ಚಾರ‍್ಹೆ ಬಾಜು಼ ದೇಖಿನ್‌, ಇವ್ಣೊ ದಿಲ್‌ ಬಂಡಾನಿ ಘೋಣಿ ಹುಯಿರ‍್ಹೋತೆ ಇನಾಖ್ಹಾಜೆ ಇನ ಘಣು ದುಖ್ ಹುಯು. ತದೆ ಯೋ ಹಾತ್ ಝೂ಼ಟೊ ಪಡ್ಯೊಹುಯೊ ಅದ್ಮಿನ, “ತಾರೊ ಹಾತ್ ಖ್ಹಾಮ್ಣೆ ಕರ್‌” ಕರಿ ಬೋಲ್ಯೊ. ಯೋ ಖ್ಹಾಮ್ಣೆ ಹಾತ್ ಕಾಡ್ತಾ, ಇನೊ ಹಾತ್ ಅಛ್ಛೊ಼ ಹುಯಿಗಯೊ.
MAR 3:6 ತದೆ ಫರಿಸಾಯರ್ ಖ್ಹಾರು ಭಾರ್‌ಜೈ಼ನ್‌ ಒಗ್ಗಿಸ್‌ಮ ಹೆರೋದ ರಾಜ಼ ಭಣಿವಾಳನ ಜೋ಼ಡೆ ಮಶ್ಲತ್ ಭಂದೈನ್, ಯೇಸುನ ಖೆವಿ ತರೀಕಾಥಿ ಮಾರ‍್ಯೆ ಕರಿ ಸೋಚ್ಯು.
MAR 3:7 ಅನ ಬಾದ್‌ಮ ಯೇಸು ಇನ ಶಿಷ್ಯರ್‌ನ ಜೋ಼ಡೆ ದರ‍್ಯಾವ್‌ಕನ ಗಯೊ. ಗಲಿಲಾಯ ತಬರ್‌ಖಾಥು ಅಜು಼ ಯೂದಾಯ ತಬರ್‌ಖಾಥು ಘಣು ಅದ್ಮಿ ಇನ ಪೀಠೆ ಗಯು.
MAR 3:8 ಎತ್ರೇಸ್ ಕಾಹೆತೆ ಯೇಸು ಅಮ್ನು-ಅಮ್ನು ಕಾಮ್ ಕರಾಸ್ ಕರಿ ಖ್ಹಮ್‌ಜಿನ್‌, ಯೂದಾಯ ತಬರ್‌ಖಾಥು, ಯೆರೂಸಲೇಮ್ ಖ್ಹಯೇರ್‌ಭಣಿಥುಬಿ, ಇದುಮಾಯ ತಬರ್‌ಖಾಭಣಿಥು, ಯೊರ್ದನ್‌ ನದ್ದಿನು ಪಾರ್ಲಿ ಬಾಜು಼ಥು, ತೂರ್ ಅಜು಼ ಸೀದೋನ್ ಖ್ಹಯೇರ್‌ಥು ಘಣು ಅದ್ಮಿ ಯೇಸುಕನ ಆಯು.
MAR 3:9 ಅದ್ಮಿನಿ ಝೂ಼ಂಡ್‌ ಜಾ಼ಖ್ಹತ್ ಥೀತೆ ಇನಾಖ್ಹಾಜೆ ಯೇಸುನೆ, ಅದ್ಮಿಖ್ಹಾರು ಇನಾಪರ್‌ ಪಡೀನ್ ಧಕೇಲ್‌ಶೆ ಕರಿ ಇನ ಶಿಷ್ಯರ್‌ನ, “ಮಾರಖ್ಹಾಜೆ ಏಕ್‌ ಡೋಣ್ಣಾ ಖ್ಹವಾರಿ ಮಿಛಾ಼ಣೊ” ಕರಿ ಬೋಲ್ಯೊ.
MAR 3:10 ಶನಕತೊ ಯೇಸುನೆ ಘಣ ಅದ್ಮಿನು ರೋಗ್‌ ಅಛ್ಛು಼ ಕರ‍್ಯೊಥೋತೆ ದೇಖಿನ್, ರೋಗ್‌ಮ ರ‍್ಹವಾಳು ಖ್ಹಾರು ಇನ ಛೀಮ್‌ನು ಕರಿ ಧಕೇಲ-ಧಕೇಲಿ ಕರ್ತುಥು.
MAR 3:11 ಅಜು಼ ಭೂತ್ ಧರೀರಾಖ್ಯುಹುಯು ಅದ್ಮಿಖ್ಹಾರು ಯೇಸುನ ದೇಖಾತೋಡಿ ಇನ ಗೋಡಾಪರ್ ಪಡ್‌ತೂಥು; ಇವ್ಣಮಾನು ಭೂತ್‌ಖ್ಹಾರು, “ತೂ ದೇವ್‌ನೊ ಛಿಯ್ಯೊ!” ಕರಿ ಚಿಕರ್ತುಥು”.
MAR 3:12 ಕತೋಬಿ ಯೇಸುನೆ ಯೋ ಕೋಣ್ ಕರಿ, ಅದ್ಮಿನ ಖ್ಹಾಮೆ ನಾ ಬೋಲ್‌ನು ಕರಿ ಭೂತ್‌ನ ಖ್ಹಾರು ಝೇತಾಯೊ.
MAR 3:13 ಬಾದ್‌ಮ ಯೇಸು ಏಕ್‌ ಪಹಡ್‌ಪರ್ ಚ಼ಢೀನ್, ಇನ ಕೋಣ್-ಕೋಣ್ ಹೋಣುಕಿ ಇವ್ಣುನ ಬುಲಾಯೊ. ತದೆ ಇವ್ಣೆ ಇನಾಕನ ಆಯು.
MAR 3:14 ಇವ್ಣಮಾಥು ಯೇಸು ಭಾರ ಜ಼ಣಾನ ಚೂ಼ಣಿನ್ ಅಪೊಸ್ತಲರ್ ಕರಿ ನಾಮ್‌ದಿದೊ. ಯೋ ಭಾರ ಜ಼ಣ ಇನ ಜೋ಼ಡೆ ರ‍್ಹೇವ್ಣುಕರಿ ಅಜು಼ ದೇವ್ನಿ ಅಛ್ಛಿ ಖಬರ್‌ನ ತಮಾಮ್‌ ಅದ್ಮಿನ ಬೋಲಿದೆವಾನ ಖ್ಹಾಜೆ ಮೋಕಲ್‌ನು ಕರಿ,
MAR 3:15 ಅಜು಼ ಭೂತ್‌ಖ್ಹಾರು ಕಾಡಾನ ಅದಿಕಾರ್‌ವಾಳ ಹುಯಿರ‍್ಹೇಣು ಕರಿ ಇವ್ಣುನ ಅಲಕ್ ಕಾಡಿಮ್ಹೇಲ್ಯೊ.
MAR 3:16 ಯೋ ಭಾರಜ಼ಣ ಕೋಣ್-ಕೋಣ್‌ಕತೊ, ಯೇಸುನೆ ಪೇತ್ರ ಕರಿ ನಾಮ್ ಮ್ಹೇಲ್ಯೋತೆ ಸೀಮೋನ;
MAR 3:17 ಜೆಬೆದಾಯನ ಲಡ್ಕಾ ಹುಯಿರ‍್ಹಾಥಾತೆ ಯಾಕೋಬಬಿ, ಇನೊ ನ್ಹಾನೊ ಭೈ ಯೋಹಾನ. ಯೇಸುನೆ ಅವ್ಣುನ ಬೊವನರ್ಗೆಸ್‌ ಕರಿ ನಾಮ್ ದಿದೊ, ಅಮ್‌ಕತೊ “ವಿಜ಼್‌ಳಿನ ಚೆಲ್ಕ” ಕರಿ.
MAR 3:18 ಅಜು಼ ಅಂದ್ರೆಯ, ಫಿಲಿಪ್ಪ, ಬಾರ್ತೊಲೊಮಾಯ, ಮತ್ತಾಯ, ತೋಮ, ಅಲ್ಫಾಯನೊ ಛಿಯ್ಯೊ ಯಾಕೋಬ, ತದ್ದಾಯ, ದೇಖ್ಹ್‌ನ ಪ್ಯಾರ್ ಕರಾವಾಳೊ ಕರಿ ಬೋಲೈಲಿದೋತೆ ಸೀಮೋನ,
MAR 3:19 ಅಜು಼ ಯೇಸುನ ಧೋಕೇಥಿ ಧರಿದಿದೋತೆ ಇಸ್ಕರಿಯೋತ ಯೂದ, ಅವ್ಣೇಸ್.
MAR 3:20 ಅನ ಬಾದ್‌ಮ ಯೇಸು ಘರೆ ಆವಾದಿನ್, ಪಾಛು಼ ಅದ್ಮಿ ಭರೈಗಯು, ಅನೇಥಿ ಯೇಸುನಾಬಿ ಇನ ಶಿಷ್ಯರ್‌ನ ಖಾಣುಬಿ ಖಾವಾನ ವಖ್ಹತ್ ಕೋ ಥೀನಿ.
MAR 3:21 ಯೇಸುನ ಘರ್‌ವಾಳಾನೆ ಇನ ದಿವಾನು ಲಾಗಿರ‍್ಹೂಸ್ ಕರಿ ಅದ್ಮಿಖ್ಹಾರು ಬೋಲಾತೆ ಖ್ಹಮ್‌ಜಿನ್‌, ಇನ ಘರೆ ಬುಲೈಲಿನ್ ಆವಾನಟೇಕೆ ನಿಕ್‌ಳ್ಯು.
MAR 3:22 ಎತ್ರೇಸ್ ಕಾಹೆತೆ ಯೆರೂಸಲೇಮ್‌ಥು ಆಯುಹುಯು ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು, “ಆ ಯೇಸುನ ಬೆಲ್ಜೆಬೂಲ್ ಧರಿರಾಖ್ಯೋಸ್‌! ಯೋ ಭೂತ್‌ನೊ ಯಜಮಾನ್ನಿ ಮದತ್‌ಥೀಸ್ ಯೇಸು ಭೂತ್‌ನಖ್ಹಾರು ಕಾಡಸ್ತೆ” ಕರಿ ಬೋಲುಕರ್ತೂಥು.
MAR 3:23 ಯೇಸುನೆ ಇವ್ಣುನ ಖನ್ನೆ ಬುಲೈನ್, ಇವ್ಣುನ ಮತ್ಲಬ್‌ನಿ ವಾತೆಖ್ಹು ಬೋಲ್ಯೋಕಿ: ಶೈತಾನ್ ಶೈತಾನ್ನಸ್ ಕಿಮ್ ಕಾಡ್‌ಶೆ?
MAR 3:24 ಏಕ್‌ ರಾಜ಼್‌ಭಾರ್‌ನು ಅದ್ಮಿ ಭಾಗ್‌ ಪಡಿನ್, ಇವ್ಣ ಇವ್ಣಾಸ್‍ಮ ಲಡೈ ಪಡಾಲಗ್ಯೂತೊ, ಯೋ ರಾಜ್ಯ ಪಡಿಜಾ಼ಶೆ.
MAR 3:25 ಏಕ್‌ ಘರ್‌ಮ ಭಾಗ್‌ ಪಡಿನ್ ಏಕ್‌ಥಿ ಏಕ್‌ ಲಡೈ ಕರಾಲಗ್ಯುತೊ ಯೋ ಘರ್ ಫುಟಿಜಾ಼ಸ್.
MAR 3:26 ಇಮ್ಮಸ್ ಶೈತಾನ್ ಉಠೀನ್ ಇನು ಭೂತ್‌ಖ್ಹಾರನ ಯೋಸ್ ನಖ್ಹಾಡ್ಯೋತೊ ಯೋ ಭಾಗ್‌ ಹುಯಿನ್‌, ಇನು ರಾಜ಼್‌ಭಾರ್ ರ‍್ಹಿಶೆಕೊಂತೆ ಖತಮ್ ಹುಯಿಜಾ಼ಶೆ.
MAR 3:27 ಎತ್ರೇಸ್ ಕಾಹೆತೆ ಕೋಣ್‌ತೋಬಿ ಏಕ್‌ ಜ಼ಣು ಅಗಾಡಿ ಏಕ್‌ ಶಕತ್‌ವಾಳ ಅದ್ಮಿನ ಭಾಂದ್ಯುನಾತೊ, ಇನ ಘರ್‌ಮ ಜೈ಼ನ್‌, ಇನು ಶೊತ್ ಖ್ಹಾರು ಚೋ಼ರಿ ಕರಾನ ಕೋ ಹುವಾನಿ. ಕತೋಬಿ ಯೋ ಇನ ಭಾಂದಿನಾಖಿದೆವಾನ ಬಾದ್‌ಮ ಇನ ಘರ್‌ಮ ಲೂಟಿ ಕರೆಜಾ಼ಯ್.
MAR 3:28 ಯೇಸುನೆ “ತುಮೂನ ಮೇ ಖ್ಹಾಚಾಮ ಬೋಲುಸ್ಕಿ, ಅದ್ಮಿಖ್ಹಾರು ಕರಾತೆಅಖ್ಖು ಪಾಪ್‌ನಾಬಿ ದೂಷಣೆನಾಬಿ ಕ್ಷಮಾಪಣ್ ಮಳ್‌ಶೆ.
MAR 3:29 ಕತೋಬಿ ಪವಿತ್ರಾತ್ಮನಿ ಚಿಂಘಾವ್ಣಿ ಕರಾವಾಳನ ಕದೇಬಿ ಮಾಪಿ ಕೋ ಮಳ್‌ಶೆನಿ. ಯೋ ಹಮೇಶಾಬಿ ಮಾಪ್‌ಕರಾನ ಕೋ ಹುವ್ವಾನಿತೆ ಪಾಪ್‌ಮ ಪಡಿಗಯೊ” ಕರಿ ಬೋಲ್ಯೊ.
MAR 3:30 ಇವ್ಣೆ ಇನ, “ಭೂತ್‌ ಧರಿರಾಖ್ಯುಸ್” ಕರಿ ಬೋಲುಕರ್ತೂಥೂತೆ ಇನಾಖ್ಹಾಜೆ ಯೇಸುನೆ ಅಮ್ ಬೋಲ್ಯೋತೆ.
MAR 3:31 ತದೆ ಯೇಸುನಿ ಆಯಾಬಿ ಇನ ನ್ಹಾನ ಭೈಯೇ ಹಿಜ್ಜಾ಼ ಐನ್, ಭಾರ್ ಭೀರಿನ್‌ ಇನ ಬುಲಾಯು.
MAR 3:32 ತದೆ ಯೇಸುನ ಅಶ್‌ಪಿಶ್‌ ಭರೈರ‍್ಹುಥೂತೆ ಅದ್ಮಿಖ್ಹಾರು ಇನ, “ತಾರಿ ಆಯ, ಭೇನೆ ಅಜು಼ ತಾರ ಭೈಯೇ ತುನ ಢೂಂಡಿನ್ ಭಾರ್‌ ಭಿಯ್ಯುಸ್ ದೇಕ್” ಕರಿ ಬೋಲ್ಯು.
MAR 3:33 ತದೆ ಯೇಸುನೆ ಇವ್ಣುನ, “ಮಾರಿ ಆಯ ಕೋಣ್? ಮಾರ ಭೈಯೇ ಕೋಣ್?” ಕರಿ ಬೋಲೀನ್‌,
MAR 3:34 ಇನ ಅಶ್‌ಪಿಶ್‌ ಬೆಠುಥೂತೆ ಅದ್ಮಿನ ದೇಖಿನ್‌, “ಹಂದೇಕ್‌! ಅವ್ಣೇಸ್ ಮನ ಆಯಾಬಿ, ಮಾರ ಭೈಯೇ!
MAR 3:35 ಕೋಣ್ ದೇವ್ನಿ ಮರ್ಜಿನಿ ಘೋಣಿ ಚಾ಼ಲಾಸ್ಕಿ ಯೋಸ್‌ ಮಾರೊ ಭೈ, ಮಾರಿ ಭೇನ್, ಮಾರಿ ಆಯ ಹುಯಿರುಸ್‌” ಕರಿ ಬೋಲ್ಯೊ.
MAR 4:1 ಯೇಸು ಪಾಛೊ಼ ಗಲಿಲಾಯ ದರ‍್ಯಾವ್‍ನ ಕನಾರೆಕನ ವಚನ್ ಬೋಲಿ ದೆವ್‌ಕರ್ತೋಥೊ. ಘಣು ಅದ್ಮಿ ಇನಾಕನ ಐನ್ ಭರೈರ‍್ಹುಥೂತೆ ಇನಖ್ಹಾಜೆ ಯೇಸುನೆ ಪಾಣಿಮ ಭೀಥಿತೆ ಡೋಣ್‌ಪರ್‌ ಚ಼ಢೀನ್‌ ಬೇಶಿಗಯೊ. ಯೋ ಅದ್ಮಿಖ್ಹಾರು ಭಾರ್‌ ಕನಾರೆಕನ ಭರೈರ‍್ಹೂಥು.
MAR 4:2 ತದೆ ಯೇಸುನೆ ಇವ್ಣುನ ಮತ್ಲಬ್‌ನಿ ಖೇಣಿಯೇಥಿ ಘಣಿ ಬಾರೇಮ ಬೋಲಿದಿದೊ.
MAR 4:3 ಇನೆ ಬೋಲ್ಯೋಕಿ, “ಹೈಕಡ್ ಖ್ಹಮ್‌ಜೊ಼! ಏಕ್‌ ಅದ್ಮಿ ಖೇತರ್‌ಮ ಪಂಡಾ ಛಿಡ್ಕಾನಖ್ಹಾಜೆ ಗಯೊ.
MAR 4:4 ಯೋ ಪಂಡಾ ಛಿಡ್ಕಾನಿ ವಖ್ಹತ್‌ಮ ಥೋಡ ಪಂಡಾ ವಾಟ್ನ ಶೇಡೆ ಪಡೀನ್‌ ಜಿನಾವರ್‌ ಖ್ಹಾರು ಆಯಿನ್‌ ‍ಇನ ಚ಼ರಿಲಿದು.
MAR 4:5 ಬಿಜು಼ ಥೋಡ ಪಂಡಾ ಜಾ಼ಖ್ಹತ್ ಮಾಟಿಕೊಂತೆ ಬಂಡಾನಿ ಜ಼ಮೀನ್‌ಪರ್ ಪಡ್ಯು, ಛಿವರ್‌ ಮಾಟಿ ಥೀತೆ ಇನಖ್ಹಾಜೆ ಪಂಡಾ ಒಗ್ಗಿಸ್‌ಮ ಫುಟಿ ಆಯು.
MAR 4:6 ಕತೋಬಿ ದನ್ ಚ಼ಢೀನ್ ತಡ್ಕೊ ಪಡಾನ ಬಾದ್‌ಮ, ಯೋ ಶೊಶಿಯೆ ಮುರ್‌ಝೈ಼ಗಯು. ಅಜು಼ ಮಹಿತೋಡಿ ಜ಼ಡೆ ಕೋ ಮ್ಹೇಲಿರಾಖ್ಯುಥುಂತೆ ಇನಖ್ಹಾಜೆ, ಯೋ ಶೊಶಿಯೆ ಒಗ್ಗಿಸ್‌ಮ ಖ್ಹುಕೈಗಯು.
MAR 4:7 ಅಜು಼ ಥೋಡ ಪಂಡಾ ಕಾಟಾನ ಡಾಗ್‌ಮ ಪಡ್ಯು. ಯೋ ಕಾಟಾನು ಝಿಕ್ರುಖ್ಹಾರು ಮೋಟುಹುಯಿನ್, ಯೋ ಶೊಶಿಯೇಪರ್‌ ಮೂಚೈ಼ಜೈ಼ನ್ ಫುಟಾನ ಕೋ ಮ್ಹೇಲ್ಯೂನಿ. ಅನಖ್ಹಾಜೆ ಯೋ ಶೊಶಿಯೆ ಪಂಡಾ ಮ್ಹೇಲ್ಯು ಕೊಯ್ನಿ.
MAR 4:8 ಬಿಜು಼ ಥೋಡ ಪಂಡಾ ಅಛ್ಛಿ ಜ಼ಮೀನ್‌ಪರ್‌ ಪಡ್ಯ. ಯೋ ಪಂಡಾ ಫುಟೀನ್, ಮೋಟು ಹುಯು ಅಜು಼ ಪಂಡಾ ಮ್ಹೇಲ್ಯು: ಇನಾಮಾನು ಥೋಡು ಡೋಡಿಖ್ಹ್‌ ಪಂಡಾಲಗು, ಥೋಡು ತೀನಿಖ್ಹ್‌ ಪಂಡಾಲಗು, ಅಜು಼ ಥೋಡು ಖ್ಹೋ ಪಂಡಾಲಗು ಮ್ಹೇಲ್ಯು”.
MAR 4:9 ಬಾದ್‌ಮ ಯೇಸುನೆ, “ಕಿನ-ಕಿನ ಖ್ಹಮ್‌ಜಾ಼ನ ಕಾನ್‌ ಛಾ಼ಕಿ, ಇವ್ಣೆ ಕಾನ್‌ ಜೋ಼ಡಿ ಖ್ಹಮ್‌ಜೊ಼!” ಕರಿ ಬೋಲ್ಯೊ.
MAR 4:10 ಬಾದ್‌ಮ ಯೇಸು ಎಕ್ಲೊ ರ‍್ಹವಾನಿ ವಖ್ಹತ್‌ಮ, ಇನು ಭಾರ ಶಿಷ್ಯರ್‌ ಅಜು಼ ಇನಜೋ಼ಡೆ ರ‍್ಹವಾಳು ಬಿಜು಼ ಖ್ಹಾರು ಅದ್ಮಿ ಇನಾಕನ ಐನ್, ಯೋ ಮತ್ಲಬ್‌ನಿ ಖೇಣಿಯೇನಿ ಬಾರೇಮ ಪುಛಾ಼ಯು.
MAR 4:11 ತದೆ ಯೇಸುನೆ ಇವ್ಣುನ ಫರೈನ್ ಬೋಲ್ಯೋಕಿ, “ದೇವ್ನಿ ರಾಜ್ಯನಿ ಲಪಿರ‍್ಹೀತೆ ಖ್ಹಾಚಿ ವಾತೆಖ್ಹಾರಿ ತುಮೂನ ದೆವೈರ‍್ಹೀಸ್. ಕತೋಬಿ ಬಿಜು಼ ಖ್ಹಾರು ಭಾರ್‌ಲ್ಯು ಅದ್ಮಿ, ಯೋ ಖ್ಹಾರಿ ವಾತೆನ ಮತ್ಲಬ್‌ನಿ ಖೇಣಿಯೇಥಿ ಖ್ಹಮ್‌ಜಾ಼ಸ್‌.
MAR 4:12 ಶನಕತೊ, ‘ಇವ್ಣೆ ಡೋಳೆಖ್ಹು ದೇಖ್ಯುತೋಬಿ ದೆಖಾವ್ಣು ನಾ; ಕಾನ್‍ಥಿ ಖ್ಹಮ್‌ಜುತೋಬಿ ಪರಖ್‌ಣು ನಾ. ಇಮ್‌ ಕಾಯಿತೋಬಿ ದೇಖಿ, ಪರ್ಖಿಲಿದುತೊ, ಇವ್ಣೆ ದೇವ್ ಭಣಿ ಫರಿಜಾ಼ಶೆ, ಅಜು಼ ದೇವ್ ಇವ್ಣುನ ಮಾಪ್‌ ಕರಿನಾಕ್‌ಶೆ ಕರೀಸ್, ಯೋ ಖ್ಹಾರಿ ಖ್ಹಾಚಿ ಲಪಡೈರ‍್ಹೀಸ್’.
MAR 4:13 ಬಾದ್‌ಮ ಯೇಸುನೆ ಇವ್ಣುನ, “ಆ ಮತ್ಲಬ್‌ನಿ ಖೇಣಿ ತುಮೂನ ಮಾಲುಮ್‌ಪಡ್ಯು ಕೊಯ್ನಿಕಿ ಶು? ಇಮ್‍ಕತೊ, ಮೇ ಬೋಲುಸ್ತೆ ಬಿಜಿಖ್ಹಾರಿ ಮತ್ಲಬ್‌ನಿ ಖೇಣಿಯೇನ ತುಮೆ ಕಿಮ್ ಮಾಲುಮ್‌ ಕರ್ಶು?
MAR 4:14 ಯೋ ಪಂಡಾ ಛಿಡ್ಕಾವಾಳೊ ಕತೊ ದೇವ್ನಿ ವಚನ್ನ ಬೋಲಿದ್ಯವಾಳೊ ಕರಿ.
MAR 4:15 ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮಜ಼್‌ತಾಸ್‌, ಶೈತಾನ್ ಐನ್ ಇವ್ಣಮಾನಿ ವಚನ್ನ ಕಾಡಿನಾಖಿದೇಸ್. ಅವ್ಣೇಸ್ ಪಂಡಾ ಪಡ್ಯಾತೆ ವಾಟ್ನ ಶೇಡೆನಿ ಮಾಟಿ ಹುಯಿರ‍್ಹುಸ್‍.
MAR 4:16 ಬಿಜು಼ ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮಜ಼್‌ತಾಸ್‌, ಖ್ಹುಶಿಥಿ ಒಗ್ಗಿಸ್‌ಮ ಮಾನಿಜಾ಼ಸ್. ಕತೋಬಿ ಯೋ ವಚನ್ನ ಇವ್ಣ ಮಹಿ ಜ಼ಡ್‌ ಮ್ಹೇಲಿನ್ ಫುಟಾದೇಯಿಕೊಯ್ನಿ. ಇವ್ಣೆ ಥೋಡಾಸ್ ದನ್ ದೇವ್ನಿ ವಚನ್ನ ನಂಬಾಸ್, ಬಾದ್‌ಮ ಯೋ ವಚನ್ನಖ್ಹಾಜೆ ಬಿಜಾ಼ಥಿ ಖ್ಹತಾಪ್ಣಿ ನಾತೊ ವದೇಖ್ಹೊ ಆಯುತೊ, ಜ಼ಲ್ದೀಸ್‍ಮ ಪಡಿಜಾ಼ಸ್‌. ಅವ್ಣೇಸ್ ಪಂಡಾ ಪಡ್ಯಾತೆ ಬಂಡಾಪರ್‌ನಿ ಮಾಟಿ ಹುಯಿರ‍್ಹೂಸ್.
MAR 4:18 ಬಿಜು಼ ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮ್‌ಜುತೋಬಿ, ಜಗತ್ನಿ ಸೋಚ್‌ಮಾಬಿ, ಧನ್‌-ದೌಲತ್‌ಪರ್‌ನಿ ಲಾಲಚ್‍ಮಾಬಿ, ಅಜು಼ ಬಿಜಿ ಖ್ಹಾರಿ ತರ‍್ಹಾನಿ ಆಖ್ಹ್ ಇವ್ಣ ಮಹಿ ಭರೈನ್, ಇವ್ಣೆ ಖ್ಹಮ್‌ಜುತೆ ದೇವ್ನಿ ವಚನ್ನ ಉಪ್ಪರ್ ಮೂಚಿನ್ ದಾಬಿದೇಸ್. ಇನಾಖ್ಹಾಜೆ ಇವ್ಣೆ ಫಲ್ ಕೋದೇಯ್ನಿ. ಅವ್ಣೇಸ್ ಯೋ ಕಾಟಾನಿ ಝಿಕ್ರಾವ್‌ಮ ಪಂಡಾ ಪಡ್ಯಾತೆ ಝ಼ಗೊ ಹುಯಿರ‍್ಹೂಸ್.
MAR 4:20 ಬಿಜು಼ ಥೋಡು ಅದ್ಮಿ ಪಂಡಾ ಪಡ್ಯಾತೆ ಅಛ್ಛಿ ಜ಼ಮೀನ್ ಹುಯಿರ‍್ಹೂಸ್. ಅವ್ಣೆ ವಚನ್ನ ಖ್ಹಮ್‌ಜಿನ್‌, ಇನ ಮಾನಿಲೇಸ್ ಅಜು಼ ಡೋಡಿಖ್ಹ್‌ ತೋಡಿ, ತೀನಿಖ್ಹ್‌ ತೋಡಿ ಅಜು಼ ಖ್ಹೋ ತೋಡಿ ಜಾ಼ಖ್ಹತ್-ಜಾ಼ಖ್ಹತ್ ಪಂಡಾ ಮ್ಹೇಲಾಸ್” ಕರಿ ಬೋಲ್ಯೊ.
MAR 4:21 ಅತ್ರೇಸ್ ಕಾಹೆತೆ ಯೇಸುನೆ ಇವ್ಣುನ, “ಕೋಣ್‌ಬಿ ದೀವೊ ಲಗಾಡಿನ್ ಹಂಡಾಮಾಕಿ ನಾತೊ ಪಲಂಗ್‌ನ ಹೇಟ್‌ಕಿ ಲಪಾಡಿನ್ ಮ್ಹೇಲಾಸ್ಕಿ ಶು? ಇಮ್‌ ಕಾಹೆತೆ, ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಕೊಯ್ನಿಕಿ ಶು?
MAR 4:22 ಲಪೈರ‍್ಹೂತೆ ಖ್ಹಾರುಸ್‌ ಉಜಾ಼ಳಾಮ ಭಾರ್‌ ದೆಖಾವ್‌ಶೇಸ್‌ ದೆಖಾವ್‌ಶೆ, ಮೂಚೈ಼ರ‍್ಹವಾನು ಖ್ಹಾರು ನಿಕಳ್‌ಶೇಸ್ ನಿಕಳ್‌ಶೆ.‌
MAR 4:23 ಖ್ಹಮ್‌ಜಾ಼ನ ಕಾನ್‌ ರ‍್ಹವಾಳು ಖ್ಹಾರು ಕಾನ್‌ ಜೋ಼ಡಿ ಖ್ಹಮ್‌ಜೊ಼!” ಕರಿ ಬೋಲ್ಯೊ.
MAR 4:24 ಬಿಜು಼ ಇವ್ಣುನ ಯೇಸುನೆ, “ತುಮೆ ಖ್ಹಮ್‌ಜಾ಼ತೆ ವಚನ್ನ ಮನ್ ಲಗಾಡಿನ್ ಖ್ಹಮ್‌ಜೊ಼! ತುಮೆ ಅಲಕ್ನಿ ಬಾರೇಮ ಕಿಮ್ ಮಾಪಿನ್‌ ದೇಸ್ಕಿ, ಇಮ್ಮಸ್ ದೇವ್‌ಬಿ‌ ತುಮೂನ ಮಾಪ್‌ಶೆ, ಎತ್ರೇಸ್ ಕಾಹೆತೆ ಇನೇಥಿಬಿ ಜಾ಼ಖ್ಹತ್ ತೂಕ್‌ಶೆ.
MAR 4:25 ಕಿನಾಕನ ಛಾ಼ಕಿ ತಿನ ಬಿಜೂ಼ಬಿ ದೆವಾವ್‌ಶೆ, ಕಿನಾಕನ ಕೊಯ್ನಿಕಿ ಇವ್ಣಕಂಥು ಛಾ಼ತೇಬಿ ಥೋಡು ಕಾಡಿಲಿಶೆ” ಕರಿ ಬೋಲ್ಯೊ.
MAR 4:26 ಯೇಸುನೆ ಬಿಜೂ಼ಬಿ ಇವ್ಣುನ ಬೋಲ್ತೋಹುಯಿನ್, “ದೇವ್ನಿ ರಾಜ್ಯ ಅಮ್ ಛಾ಼, ಕಿಮ್‌ಕತೊ; ಏಕ್‌ ಜ಼ಣೊ ಇನಿ ಜ಼ಮೀನ್‌ಮ ಪಂಡಾ ಛಿಡ್‌ಕ್ಯೊ.
MAR 4:27 ಅಜು಼ ಯೋ ಅದ್ಮಿ ರಾತ್‌ನು ಖ್ಹುವ್ವಾನು, ವ್ಹಾಣಾನು ಉಠಿರ‍್ಹವಾನು ಕರ್ತುರ‍್ಹೇಸ್‌. ಅಮ್ ರ‍್ಹವಾನಿ ವಖ್ಹತ್‌ಮ ಇನ ಮಾಲುಮಸ್ ಪಡಾಕೊಂತೆ ಪರಕ್ಮ ಯೋ ಪಂಡಾ ಫುಟಿನ್ ಮೋಟ ಹುವಾಸ್.
MAR 4:28 ಜ಼ಮೀನ್ ಪಹಿಲೆ ಅನಾಜ಼್ ಉಬ್‌ಜಾ಼ವಸ್, ಕಿಮ್‌ಕತೊ ಪಹಿಲೆ ಡೀರಿಯೆ ದೆಖಾವಸ್, ಇನಾಕೇಡೆಥು ಬುಟ್ಟು ನಿಕ್ಳಾಸ್, ಬಾದ್‌ಮ ಬುಟ್ಟುಭರಿ ದಾಣ ಭರಾವಸ್.
MAR 4:29 ಅನಾಜ಼್ ಪಿಕ್‌ವಾನ ಬಾದ್‌ಮ, ಯೋ ಅದ್ಮಿ ಖ್ಹುಗ್ಗೀನ ಹಗಾಮ್ ಐಗುಕರಿ, ಪಿಕಾವಾಳೊ ದರಾತಿಥಿ ಇನ ವ್ಹಾಡಲಗಾಸ್” ಕರಿ ಬೋಲ್ಯೊ.
MAR 4:30 ಬಿಜು಼ ಯೇಸುನೆ ಬೋಲ್ಯೋಕಿ, “ದೇವ್‌ನು ರಾಜ್ಯ ಅಮ್ ಕರಿ ಅಪ್ಣೆ ಶನ ಜೋ಼ಡೆ ಏಕ್‌ ಕರಿಯೆ? ನಾತೊ ಅಪ್ಣೆ ಖೆವಿ ಮತ್ಲಬ್‌ನಿ ಖೇಣಿ ಬೋಲಿನ್ ದೇವ್ನಿ ರಾಜ಼್‌ನ ವತಾಳೆ. ‌
MAR 4:31 ಯೋ ಅಮ್ ಹುಯಿರ‍್ಹೂಸ್, ಏಕ್‌ ಅದ್ಮಿ ಜಗತ್‌ಮ ಖ್ಹಾರೇಥಿ ನ್ಹಾನು ಪಂಡು ಹುಯಿರ‍್ಹೂತೆ, ರಾಯಿನ ದಾಣಾನ ಪಾಡಿನ್, ಜ಼ಮೀನ್‌ಮ ಗಾಡಸ್.
MAR 4:32 ಥೋಡ ದನ್ನ ಬಾದ್‌ಮ ಯೋ ಮೋಟು ಹುಯಿನ್, ಖ್ಹಾರ ಭಾಜಿಪಾಲಾನ ಝಾ಼ಡೆಥೀಬಿ ಮೋಟು ಹುಯಿನ್, ಮೋಟಿ-ಮೋಟಿ ಡಾಳಿಯೆ ಮ್ಹೇಲಾಸ್. ತದೆ ಆಬ್‌ಮಾಥು ಉಡಂತು ಜಿನಾವರ್‌ ಖ್ಹಾರು ಮ್ಹಾಳೊ ಭಾಂದಿನ್ ವಖ್ಹಾಸ್” ಕರಿ ಬೋಲ್ಯೊ.
MAR 4:33 ಯೇಸುನೆ ಅಮ್ನಿ ಖ್ಹಾರಿ ಘಣಿ ಮತ್ಲಬ್‌ನಿ ಖೇಣಿಯೇಥಿ, ಅದ್ಮಿಖ್ಹಾರು ಕೆತ್ರೆ ಮನ್ ಲಗಾಡಿನ್ ಖ್ಹಮ್‌ಜಿನ್‌ ಪರ್ಖಾನ ಹುವ್ವಾಸ್‌ಕಿ, ಎತ್ರೇಸ್ ದೇವ್ನಿ ವಚನ್ ಬೋಲಿ ಖ್ಹಮ್‌ಜಾ಼ಡ್ಯೊ.
MAR 4:34 ಯೋ ಶಾತ್‌ ಬೋಲ್ಯೊತೋಬಿ ಮತ್ಲಬ್‌ನಿ ಖೇಣಿಯೇಥೀಸ್‌ ಬೋಲ್ತೋಥೊ. ಕತೋಬಿ ಇನ ಶಿಷ್ಯರ್‌ಕನ ಅಲಕ್ ರ‍್ಹವಾನಿ ವಖ್ಹತ್‌ಮ, ಯೋ ಖ್ಹಾರಿ ಮತ್ಲಬ್‌ನಿ ಖೇಣಿಯೇನ ಛೋ಼ಡಿನ್ ಖ್ಹಮ್‌ಜಾ಼ಡ್‌ತೊಥೊ.
MAR 4:35 ಯೋ ದನ್ನೆ ಖ್ಹಾಂಜ಼್ ಹುಯಿಜಾ಼ತಖ್ಹತರ್‌ ಯೇಸುನೆ ಇನ ಶಿಷ್ಯರ್‌ನ, “ಚಾ಼ಲೊ, ದರ‍್ಯಾವ್‍ನ ಪಾರ್ಲಿ ಕನಾರಿ ಜ಼ಯ್ಯೆ಼” ಕರಿ ಬೋಲ್ಯೊ.
MAR 4:36 ತದೆ ಶಿಷ್ಯರ್‌ಖ್ಹಾರು ಯೋ ಅದ್ಮಿನಿ ಭೀಡ್‌ಣ ಮ್ಹೆಂದಿನ್, ಯೇಸು ಬೆಠೋಥೋತೆ ಯೋಸ್ ಡೋಣ್‌ಪರ್‌ ಚ಼ಢಿನ್‌ ಇಮ್ಮಸ್ ಇನ ಬುಲೈಲಿನ್ ಗಯ. ಇವ್ಣ ಜೋ಼ಡ್ಮ ಬಿಜಿ ಖ್ಹಾರಿ ಡೋಣ್‌ಬಿ ಥಿ.
MAR 4:37 ಜಾ಼ತಿವಖ್ಹತ್‌ಮ ಏಕ್‌ದಮ್ ಮೋಟೊ ವಹಿರೊ ವಾಗಿನ್, ಮೋಟೊ ಝೋ಼ಕಾಳ್ಯೊ ಉಠೀನ್ ಯೋ ಡೋಣ್ಣಾ ಮಾರ್ ಪಡ್‌ತಾಖ್ಹತರ್, ಯೋ ಡೋಣ್‌ಮ ಪಾಣಿ ಭರಾವಲಗ್ಯೂಥು.
MAR 4:38 ಯೇಸು ಡೋಣ್ಣಾ ಪಾಛ಼್‌ಲಿ ಬಾಜು಼ಮ ಶಿರಾಣು ಟೇಕಿನ್ ಖ್ಹುತೋಥೊ. ತದೆ ಶಿಷ್ಯರ್‌ನೆ ಇನ ಉಠಾಡಿನ್, “ಗುರು, ಹಮೆ ಮರ್‌ವಾನ ಆಯಾನಿ ತುನ ಜ಼ರಾಬಿ ಫಿಕರ್‌ಕೊಯ್ನಿಕಿ ಶು? ಕರಿ ಬೋಲ್ಯ.
MAR 4:39 ತದೆ ಯೇಸುನೆ ಉಠೀನ್ ಯೋ ವಹಿರಾನ, “ಖ್ಹೊಪ್‌ ರ‍್ಹೆ!” ಅಜು಼ ದರ‍್ಯಾವ್ನ “ಶೊಪೊ ಹುಯಿಜಾ಼!” ಕರಿ ಹುಕುಮ್‌ದಿದೊ. ಅಮ್ ಬೋಲ್ತಾಸ್‌ನ ವಹಿರೊ ಖ್ಹೊಪೊ ಪಡಿಗಯು, ಅಜು಼ ಖ್ಹಾರು ಖ್ಹೊಪೊ ಪಡಿಗಯು.
MAR 4:40 ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ತುಮೆ ಶನ ಡರೋಸ್ತೆ? ಅಜೂ಼ಬಿ ತುಮೂನ ವಿಶ್ವಾಸ್ ಕೊಯ್ನಿಕಿ ಶು?” ಕರಿ ಬೋಲ್ಯೊ.
MAR 4:41 ಕತೋಬಿ ಇವ್ಣೆ ಘಣು ಡರಿಜೈನ್, “ಆ ಅದ್ಮಿ ಕೋಣ್ ಉಶೆ? ವಹಿರೋಬಿ, ದರ‍್ಯಾವ್‌ಬಿ ಜಿನು ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ ಏಕ್‌ ಬೋಲಿಲಿದು.
MAR 5:1 ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಗಲಿಲಾಯ ದರ‍್ಯಾವ್‍ನ ಪಾರ್ಲಿ ಬಾಜೂ಼ಮ ಥೂತೆ, ಗೆರಸೇನವಾಳನ ತಬರ್‌ಖಾಮ ಗಯ.
MAR 5:2 ಯೇಸು ಡೋಣ್‌ಮಾಥು ಭಾರ್‌ ಉತ್‌ರ‍್ಯೋತೆ ತದೇಸ್‌, ಭೂತ್‌ ಧರಿರಾಖ್ಯುಥೂತೆ ಏಕ್‌ ಜ಼ಣೊ ಮಖ್ಹಾಣ್ಯನು ಘವಿಮಾಥೊ ನಿಕ್ಳಿನ್‌ ಇನ ಖ್ಹಾಮೆ ಆಯು.
MAR 5:3 ಯೋ ಅದ್ಮಿ ಮಖ್ಹಾಣ್ಯನಿ ಘವಿಯೇನಿ ಝ಼ಗೋಮಸ್‌ ರ‍್ಹೇತುಥು. ಘಣಿ ಹಲ್ಲ ಇನ ಬೇಡಿಥೀಬಿ, ಲ್ಹೋಡಾನಿ ಖ್ಹಂಕ್‌ಳಿಥೀಬಿ ಭಾಂದ್ಯುತೋಬಿ ಯೋ ಖ್ಹಂಕ್‌ಳಿನ ತೋಡಿನ್, ಬೇಡಿನ ಕಾಡಿನಾಖಿದೇತೂಥು. ಬಿಜು಼ ಕೋಣ್‌ಬಿ ಇನ ಖ್ಹಂಕ್‌ಳಿಥೀಬಿ ಭಾಂದಾನ ಕೋ ಹುಯುನಿ. ಯೋ ಭೂತ್‌ ಧರಿರಾಖವಾಳನ ದಾಬುಕ್ಮ ಲ್ಯಾವಾನ ಕಿನೊ ಹಾತ್‌ಬಿ ಕೋ ಹುಯುನಿ.
MAR 5:5 ಯೋ ಕದೇಬಿ ರಾತ್‌-ದನ್ ಮಖ್ಹಾಣ್ಯನಿ ಘವಿಯೆ಼ಮಾಬಿ, ಪಹಾಡ್‌ಮಾಬಿ ಚಿಕ್ರಾಣ್ ಮ್ಹೇಲ್ತುಹುಯಿನ್, ಬಂಡಾಥಿ ಇನು ಯೋಸ್‌ ವ್ಹಾಡಿಲೇತುಥು.
MAR 5:6 ಯೋ ದೂರ್‌ಥೊ ಯೇಸುನ ದೇಖಿನ್‌; ನಾಶಿ ಐನ್, ಇನ ಢುಕ್‌ಣ್ಯಟೇಕಿನ್,
MAR 5:7 ಊಚಿ ಆವಾಜ಼್‌ಮ ಚಿಕ್ರಿನ್, “ಪರಮಂಡಲ್‌ನೊ ದೇವ್ನ ಛಿಯ್ಯಾ ಯೇಸು, ಮಾರೇಥಿ ತುನ ಶಾತ್‌ ಛಾ಼? ದೇವ್ನ ಖ್ಹಾಮ್‌ಬಿ, ಮನ ಖ್ಹತಾವ್ ನಕೊ” ಕರಿ ಬೋಲ್ಯು.
MAR 5:8 ಶನಕತೊ, “ಏ ಭೂತ್‌, ಅನ ಮ್ಹೆಂದಿನ್ ಭಾರ್‌ ನಿಕಳ್” ಕರಿ ಯೇಸುನೆ ಅಗಾಡಿಸ್ ಬೋಲಿರಾಖ್ಯೊಥೊ, ಇನಾಖ್ಹಾಜೆ ಇನೆ ಇಮ್‌ ಬೋಲ್ಯುತೆ.
MAR 5:9 ಅಜು಼ ಯೇಸುನೆ ಇನ, “ತಾರು ನಾಮ್ ಶಾತ್?” ಕರಿ ಪುಛಾ಼ವಖ್ಹತರ್, “ಮಾರು ನಾಮ್ ಝೂ಼ಂಡ್‌, ಶನಕತೊ ಹಮೆ ಢಿಂಡ್‌ಪಾಳಸ್ ಛಿಯ್ಯೆ಼!” ಕರಿ ಬೋಲ್ಯು.
MAR 5:10 ಅಜು಼, “ಹಮೂನ ಆ ತಬರ್‌ಖಾಮಾಥು ನಕೊ ನಖ್ಹಾಡ್” ಕರಿ ಯೋ ಭೂತ್ ಧರೀರಾಖ್ಯುಥೂತೆ ಅದ್ಮಿನೆ ಯೇಸುನ ಘಣು ಗಿಂಗೈಲಿದು.
MAR 5:11 ಹಿಜ್ಜಾ಼ ಖನ್ನೆಸ್‌ ಥೂತೆ ಪಹಾಡ್‌ಮ ಡೂಕರ್‌ನಿ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು.
MAR 5:12 ತದೆ ಯೋ ಭೂತ್‌ಖ್ಹಾರು ಯೇಸುನ, “ಡೂಕರ್‌ನಿ ಝೂ಼ಂಡ್‌ನ ಮಹಿ ಪೇಖ್ಹಾನ ಹಮೂನ ಬೋಲಿಮೋಕಲ್‌” ಕರಿ ಗಿಂಗೈಲಿದು.
MAR 5:13 ತದೆ ಯೇಸುನೆ ಇಮ್ಮಸ್ ಹುವಾದೆ, ಕರಿ ಹುಕುಮ್‌ ದೇತಾಖ್ಹತರ್‌ ಯೋ ಭೂತ್‌ ಖ್ಹಾರು ಯೋ ಅದ್ಮಿನ ಮ್ಹೆಂದಿನ್ ಭಾರ್ ನಿಕ್ಳಿನ್, ಡೂಕರ್‌ನಿ ಝೂ಼ಂಡ್‌ಮ ಪೇಶಿಗಯು. ತದೆ ಯೋ ಡೂಕರ್‌ಖ್ಹಾರು ನಾಶಿನ್, ಪಹಡ್‌ನಿ ಕಥಾರ್‌ಪರ್‌ಥು ದರ‍್ಯಾವ್‌ಮ ಪಡೀನ್ ದಮ್‌ ಘೋಟೈನ್‌ ಮರಿಗಯು. ಕಮ್‍ಶಿಕಮ್ ಬೇ ಹಜಾ಼ರ್‌ ಡೂಕರ್‌ ಥೂ.
MAR 5:14 ಡೂಕರ್‌ ಚ಼ರಾವವಾಳು ಖ್ಹಾರು ನಾಶಿಜೈ಼ನ್ ಯೋ ಖ್ಹಯೇರ್‌ಮಾಬಿ, ಗಾಮ್ಮಾಬಿ ಇನಿ ಬಾರೇಮ ಬೋಲ್ತಖ್ಹತರ್‌ ಇನ ದೇಖಾನಖ್ಹಾಜೆ ಅದ್ಮಿಖ್ಹಾರು ಯೇಸು ಥೋತೆ ಹಿಜ್ಜಾ಼ ಆಯು.
MAR 5:15 ಯೇಸು ಹಿಜ್ಜಾ಼ ಆಯೊ ತದೆ ಯೋ ಭೂತ್‌ನಿ ಝೂ಼ಂಡ್‌ ಧರಿರಾಖ್ಯುಥೂತೆ ಅದ್ಮಿ ಲುಂಗ್ಡಾವ್‍ನ ಪೇರ‍್ಹಿಲಿನ್, ಅಛ್ಛಿ ಖ್ಹಯಾಲ್‌ಥಿ, ಬೆಠುಥೂತೆ ದೇಖಿನ್, ಅದ್ಮಿಖ್ಹಾರು ಡರಿಗಯು.
MAR 5:16 ಚಾ಼ಲ್ಯುತೆ ಇನಿ ಬಾರೇಮ ದೇಖಿರಾಖ್ಯುಥುತೆ ಇವ್ಣೆ, ಯೋ ಭೂತ್ ಧರಿರಾಖ್ಯುಥೂತೆ ಇನ ಅಮ್-ಅಮ್ ಹುಯುತೇಬಿ, ಬಿಜು಼ ಡೂಕರ್‌ನಿ ಬಾರೇಮಾಬಿ,
MAR 5:17 ಯೋ ಐರ‍್ಹೂಥೂತೆ ಅದ್ಮಿನ ಬೋಲಾಖ್ಹತರ್ ಇವ್ಣೆ, ಇವ್ಣ ತಬರ್‌ಖಾನ ಮ್ಹೆಂದಿನ್ ಜಾ಼ ಕರಿ ಯೇಸುನ ಗಿಂಗೈಲಿದು.
MAR 5:18 ಯೇಸು ಡೋಣ್‌ ಚ಼ಢಾನಿ ವಖ್ಹತ್‌ಮ, ಯೋ ಭೂತ್‌ಖ್ಹಾರು ನಿಕ್ಳಿಗಯೂತೆ ಅದ್ಮಿ, “ಮೇಬಿ ತಾರ ಕೇಡೆಸ್ ರ‍್ಹವುಸ್” ಕರಿ ಯೇಸುನ ಗಿಂಗೈಲಿದೊ.
MAR 5:19 ಕತೋಬಿ ಯೇಸುನೆ ಇನ ರ‍್ಹವಾದಿದೊ ಕೊಯ್ನಿ. ಯೋ ಅದ್ಮಿನ, “ತೂ ತಾರ ಘರೇಬಿ, ತಾರ ಅದ್ಮಿಕನಾಬಿ ಜೈ಼ನ್‌, ಪ್ರಭುನೆ ತಾರಪರ್ ಗೋರ್‌ಕರೀನ್, ತುನ ಕೆತ್ರೆ ಮದತ್ ಕರ‍್ಯೊ ಕರಿ ಯೋ ಖ್ಹಾರಾನ ಇವ್ಣುನ ಬೋಲ್” ಕರಿ ಬೋಲ್ಯೊ.
MAR 5:20 ಇಮ್ಮಸ್ ಯೋ ಅದ್ಮಿ ಹಿಜ್ಜಾ಼ಥು ನಿಕ್ಳಿನ್ ದೆಕಪೊಲಿ ಕರಿ ತಬರ್‌ಖಾಮ ಜೈ಼ನ್, ಯೇಸುನೆ ಇನ ಕರ‍್ಯೋತೊ ಖ್ಹಾರಿ ಮದತ್‍ನ ಬೋಲಾನ ಶುರುಕರ‍್ಯು. ಅನ ಖ್ಹಮ್‌ಜಾ಼ವಾಳು ಖ್ಹಾರು ಆಶ್ಚರ್ಯಖಾದು.
MAR 5:21 ಯೇಸು ಪಾಛೊ಼ ಫರೀನ್ ಡೋಣ್‌ಮ ದರ‍್ಯಾವ್‌ಮ ಹೈಕಡ್‌ಳಿ ಬಾಜು಼ಮ ಆಯೊ. ಹಿಜ್ಜಾ಼ ದರ‍್ಯಾವ್‍ನ ಕನಾರೆ ಅದ್ಮಿನಿ ಘಣಿ ಮೋಟಿ ಝೂ಼ಂಡ್‌ ಯೇಸುನ ಅಶ್‌ಪಿಶ್ ಐನ್ ಭರಾಯು.
MAR 5:22 ತದೆ ಸಬಾಮಂದಿರ್‌ನೊ ಅದಿಕಾರಿ ಏಕ್‌ ಜ಼ಣೊ ಹಿಜ್ಜಾ಼ ಆಯೊ. ಇನು ನಾಮ್ ಯಾಯಿರ ಕರಿ. ಯೋ ಯೇಸುನ ದೇಖಿನ್, ಇನ ಗೋಡಾಪರ್ ಪಡಿನ್,
MAR 5:23 “ಮಾರಿ ಅಡ್ಡಾಣಿ ಛೋ಼ಕ್ರಿ ಮರ್‌ವಾನ ಆಯಿ; ಯೊ ಅಛ್ಛಿಹುಯಿನ್ ಬಚಾ಼ನಖ್ಹಾಜೆ ದಯಕರಿನ್ ತೂ ಐನ್‌ ಇನಾಪರ್‌ ಹಾತ್‌ ಮ್ಹೇಲ್‌, ಕರಿ ಯೇಸುನ ಘಣು ಗಿಂಗೈಲಿದೊ.
MAR 5:24 ತದೆ ಯೇಸು ಇನಜೋ಼ಡೆ ಗಯೊ, ಬಿಜು಼ ಅದ್ಮಿನಿ ಭೀಡ್‌ ಇನ ಅಶ್‌ಪಿಶ್ ಭರೈನ್ ಧಕೇಲ್‌ತುಹುಯಿನ್ ಇನ ಪೀಠೆ ಗಯು.
MAR 5:25 ಹಿಜ್ಜಾ಼ ಭಾರ ವರಖ್ಹ್‌ಥು ಮುಟ್ನು ರೋಗ್‌ಥೀತೆ ಏಕ್‌ ತಯೇಡ ಥಿ.
MAR 5:26 ಯೋ ಕೈಯೆಕ್ಕಿ ವೈದ್ಯಕನ ದೆಖಾಡಿತೋಬಿ ಘಣು ಲತಾಡ ಪಡಿರ‍್ಹೀಥಿ. ಥೂತೆ ಖ್ಹಾರು ಇನೆ ಖರ್ಚಿ ಕರಿತೋಬಿ ರೋಗ್‌ ಜಾ಼ಖ್ಹತ್ ಹುಯು ಪಣ್ಕಿ ಶಾತ್ಬಿ ಫಾಯಿದೊ ಕೋ ಹುಯುಥೂನಿ.
MAR 5:27 ಯೋ ತಯೇಡ ಯೇಸುನಿ ಬಾರೇಮ ಖ್ಹಮ್‌ಜಿನ್‌, “ಮೇ ಯೇಸುನ ಲುಂಗ್ಡಾನ ಛೀಮೀತೊ ಬಶ್‌, ಮನ ಅಛ್ಛು಼ ಹುಯಿಜಾ಼ಶೆ” ಕರಿ ಸೋಚಿನ್, ಝೂ಼ಂಡ್‌ಮ ಪೀಠೇಥು ಐನ್ ಇನ ಲುಂಗ್ಡಾನ ಛೀಮಿ.
MAR 5:29 ಛೀಮ್‌ತಾಸ್‌ ಇನ ಲ್ಹೊಯಿ ಝ಼ರಾನು ಭೀರಿಗಯು; ತದೆ ಇನೆ, ಇನ ಖ್ಹತವ್‌ಕರ್ತುಥೂತೆ ರೋಗ್‌ ನಿಕ್ಳಿಜೈ಼ನ್ ಅಛ್ಛು಼ ಹುಯಿಗಯು, ಕರಿ ಇನು ಯೋಸ್‌ ಮಾಲುಮ್‌ ಕರೀಲಿದಿ.
MAR 5:30 ತದ್‌ನು ತದೇಸ್‌ ಯೇಸುನೆ ಇನಾಮಾಥು ಶಕತ್ ಗೈತೆ ಮಾಲುಮ್‌ ಕರಿಲೀನ್, ಝೂ಼ಂಡ್‌ಮ ಪೀಠೆ ಫರೀನ್, “ಮಾರ ಲುಂಗ್ಡಾನ ಛೀಮ್ಯೂತೆ ಕೋಣ್?” ಕರಿ ಪುಛಾ಼ಯೊ.
MAR 5:31 ತದೆ ಇನ ಶಿಷ್ಯರ್‌ನೆ ಇನ, “ಅದ್ಮಿನಿ ಝೂ಼ಂಡಸ್ ತಾರಾಪರ್ ಪಡುಕರಾಸ್ ತೋಬಿ, ‘ಮನ ಛೀಮ್ಯೂತೆ ಕೋಣ್ ಕರಿ ಪುಛಾ಼ವಸ್ತೆ ಕಿಮ್?” ಕರಿ ಬೋಲ್ಯು.
MAR 5:32 ಕತೋಬಿ ಯೇಸು ಇನ ಛೀಮ್ಯೂತೆ ಕೋಣ್ ಕರಿ ಅಶ್‌ಪಿಶ್ ದೇಖೂಸ್ ಕರ್ತೊಥೊ.
MAR 5:33 ಯೋ ತಯೇಡ ಇನ ಹುಯೂತೆ ಮಾಲುಮ್‌ ಕರೀಲಿನ್‌, ಡರ್‌ಥಿ ಕಾಪ್ತಿಹುಯಿನ್‌ ಐನ್, ಯೇಸುನ ಗೋಡಾಪರ್ ಪಡೀನ್, ಖ್ಹಾರಿಸ್ ಖ್ಹಾಚಿನ ಬೋಲಿ.
MAR 5:34 ತದೆ ಯೇಸುನೆ ಇನ, “ಛೋ಼ರಿ, ತಾರಿ ವಿಶ್ವಾಸ್‌ಥೀಸ್ ತುನ ಅಛ್ಛು಼ ಹುಯೂತೆ. ಸಮಾಧಾನ್‌ಥಿ ಜಾ಼, ತುನ ಬಿಜು಼ ಪಾಛು಼ ಯೋ ರೋಗ್ ಖ್ಹತಾವ್‌ಶೆ ಕೊಯ್ನಿ” ಕರಿ ಬೋಲ್ಯೊ.
MAR 5:35 ಯೇಸು ಹಿಜ್ಜಾ಼ ಬಿಜೂ಼ಬಿ ವಾತೆ ಬೋಲುಕರ್ತೊಥೋತೆ, ಎತ್ರಾಮ ಮಂದಿರ್‌ನು ಅದಿಕಾರಿ ಭಣಿವಾಳು ಹಿಜ್ಜಾ಼ ಐನ್, “ತಾರಿ ಛೋ಼ರಿ ಮರಿಗೈ. ಅಜು಼ ಗುರುನ ಖ್ಹತಾವ್ ನಕೊ?” ಕರಿ ಬೋಲ್ಯು.
MAR 5:36 ಇವ್ಣೆ ಬೋಲ್ಯುತೆ ವಾತೆನ ಯೇಸುನೆ ಮಜು಼ರಸ್ ಕರ‍್ಯೊಕೊಂತೆ ಮಂದಿರ್‌ನು ಅದಿಕಾರಿನ, “ಡರ್‌ನಕೊ, ಖಲಿ ವಿಶ್ವಾಸ್ ರ‍್ಹವಾದೆ” ಕರಿ ಬೋಲ್ಯೊ.
MAR 5:37 ಬಿಜು಼ ಯೇಸುನೆ ಪೇತ್ರ, ಯಾಕೋಬ್ ಅಜು಼ ಯಾಕೋಬನೊ ನ್ಹಾನೊ ಭೈ ಯೋಹಾನ ಅವ್ಣುನ ಮ್ಹೆಂದಿನ್ ಕಿನಾಬಿ ಇನ ಕೇಡೆ ಆವಾದಿದೊ ಕೊಯ್ನಿ.
MAR 5:38 ಇವ್ಣೆ ಅದಿಕಾರಿನ ಘರೆ ಆಯತದೆ, ಹಿಜ್ಜಾ಼ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲುಕರಾತೆ ಬಿಜು಼ ಥೋಡು ಅದ್ಮಿ ರೊವಣ್‌ಝೋ಼ವಣ್ ಕರುಕರಾತೆ ಯೇಸುನೆ ದೇಖ್ಯೊ.
MAR 5:39 ಯೇಸು ಮಹಿ ಜೈ಼ನ್‌, “ಶನ ತುಮೆ ಚಿಕ್ರಾಣ್ ಮ್ಹೇಲುಕರಾಸ್ತೆ, ರೋವ್‌ಕರಾಸ್ತೆ? ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!” ಕರಿ ಬೋಲ್ಯೊ.
MAR 5:40 ಇವ್ಣೆ ಯೇಸುನ ದೇಖಿನ್ ನಕ್ಲೆ ಕರ‍್ಯು, ಇನಾಖ್ಹಾಜೆ ಯೇಸುನೆ ಖ್ಹಾರಾನ ಭಾರ್‌ ಮೋಕ್ಲೀನ್, ಯೋ ಛೋ಼ಕ್ರಿನ ಆಯ-ಬಾನ ಬಿಜು಼ ಇನ ತೀನ್ ಜ಼ಣ ಶಿಷ್ಯರ್‌ನ ಬುಲೈಲಿನ್ ಛೋ಼ಕ್ರಿ ಥೀತೆ ಹಿಜ್ಜಾ಼ಗಯೊ.
MAR 5:41 ಯೇಸುನೆ ಯೋ ಛೋ಼ಕ್ರಿನೊ ಹಾತ್ ಧರೀನ್, “ತಲಿಥಾಕೂಮ್” ಕರಿ ಬೋಲ್ಯೊ. ಇಮ್‌ ಕತೊ “ಅಡ್ಡಾಣಿ ಛೋ಼ಕ್ರಿ, ಮೇ ತುನ ಬೋಲುಕರುಸ್ ಉಪ್ಪರ್ ಉಟ್” ಕರಿ.
MAR 5:42 ತದ್‌ನು ತದೇಸ್‌ ಯೋ ಛೋ಼ಕ್ರಿ ಉಠೀನ್ ಹೈಕಡ್‌ ಹೀಕಡ್‌ ಚಾ಼ಲಾಲಗಿ. ಯೋ ಭಾರ ವರಖ್ಹ್‌ನಿ ಹುಯಿರ‍್ಹೀಥಿ. ಅಮ್ ಹುವಾನು ದೇಖಿನ್ ಇವ್ಣೆ ಘಣು ಆಶ್ಚರ್ಯಖಾದು.
MAR 5:43 ಯೇಸುನೆ ಇವ್ಣುನ, ಆ ಕಿನಾಬಿ ನಾ ಮಾಲುಮ್ ಪಡ್ಣು ಕರಿ ಘಣು ಝೇತೈನ್‌, “ಆ ಛೋ಼ಕ್ರಿನ ಖಾಣು ಖಡಾವೊ” ಕರಿ ಬೋಲ್ಯೊ.
MAR 6:1 ಯೇಸು ಹಿಜ್ಜಾ಼ಥೊ ನಿಕ್ಳಿನ್ ಇನ ಗಾಮೆ ಗಯೊ, ಇನ ಶಿಷ್ಯರ್‌ಬಿ ಇನ ಪೀಠೆ ಗಯ.
MAR 6:2 ಸಬ್ಬತ್‌ ದನ್ ಆವಾದಿನ್ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್‌, ದೇವ್ನಿ ವಚನ್ ಬೋಲಿ ದೆವಾನಿಕ್‌ಳ್ಯೊ. ಹಿಜ್ಜಾ಼ ಘಣು ಅದ್ಮಿಥು; ಇವ್ಣೆ ಇನಿ ವಾತೆ ಖ್ಹಮ್‌ಜಿನ್‌ ಘಣು ಆಶ್ಚರ್ಯಹುಯಿನ್, “ಆ ಖ್ಹಾರಿ ವಾತೆ ಅನ ಕಿಜ್ಜಾ಼ಥಿ ಮಳಿ? ಅನ ಅಮ್ನಿ ಗ್ಯಾನ್ ಕಿಜ್ಜಾ಼ಥಿ ಮಳಿ? ಅನ ಅದ್ಭುತ್‌ಖ್ಹಾರು ಕರಾನ ಶಕತ್ ಕಿಜ್ಜಾ಼ಥಿ ಆಯಿ?”
MAR 6:3 ಆ ಅದ್ಮಿತೊ ಖೋಡ್‌ಶಾನು ಖ್ಹಾಮನ್‌ ಕರಾವಾಳೊನಿ, ಆ ಮರಿಯನೊ ಛಿಯ್ಯೋನಿ, ಯಾಕೋಬ್, ಯೋಸೆ, ಯೂದ ಅಜು಼ ಸೀಮೋನ್ನೊ ಮೋಟೊ ಭೈನಿ? ಅಜು಼ ಅನಿ ಭೇನೆಬಿ ಹಾ಼ಸ್‌ ರ‍್ಹೇಸ್‌ನಿ?” ಕರಿ ಬೋಲಿನ್ ಯೇಸುನ ಝಿಟ್ಕಾರ‍್ಯು.
MAR 6:4 ತದೆ ಯೇಸುನೆ ಇವ್ಣುನ, “ಪ್ರವಾದಿಯೇನ ಬಿಜ಼ ಖ್ಹಾರ ಗಾಮ್ಮ ಮರ್ಯಾದಿ ದೇಸ್, ಕತೋಬಿ ಇನು ಶೊಂತ್‌ ಗಾಮ್ಮ, ಶೊಂತ್‌ ಅದ್ಮಿಮ ಅಜು಼ ಶೊಂತ್‌ ಘರ್‌ಮ ಇನ ಮರ್ಯಾದಿ ಕೋ ದೇಯ್ನಿ” ಕರಿ ಬೋಲ್ಯೊ.
MAR 6:5 ಯೇಸುನೆ ಹಿಜ್ಜಾ಼ ರೋಗ್‍ವಾಳ ಥೋಡ ಅದ್ಮಿಪರ್ ಹಾತ್‌ ಮ್ಹೇಲಿನ್ ಅಛ್ಛು಼ ಕರಾನು ಕಾಹೆತೆ ಬಿಜು಼ ಶನೂಬಿ ಅದ್ಭುತ್‌ಕಾಮ್ನ ಕರಾನ ಕೋ ಹುಯೂನಿ.
MAR 6:6 ಹಿಜ಼್ಜಾನ ಅದ್ಮಿಮ ವಿಶ್ವಾಸ್‌ಕೊಂತೆ ದೇಖಿನ್‌, ಯೇಸುನೆ ಘಣು ಆಶ್ಚರ್ಯಖಾದೊ. ಬಾದ್‌ಮ ಯೇಸು ಅಶ್‌ಪೀಶ್‌ನ ಗಾಮೆ ಜೈ಼ನ್, ದೇವ್ನಿ ವಚನ್ ಬೋಲಿದೆವಾನಿಕ್‍ಳ್ಯೊ.
MAR 6:7 ಅಜು಼ ಭಾರ ಜ಼ಣ ಶಿಷ್ಯರ್‌ನ ಏಕ್‌ದಮ್ ಬುಲೈನ್, ಇವ್ಣುನ ಭೂತ್‌ಖ್ಹಾರು ಕಾಡಾನ ಅದಿಕಾರ್ ದಿದೊ, ಬೆಬ್ಬೆ ಜ಼ಣ ಕರಿನ್‌ ಮೋಕ್‌ಲ್ಯೊ.
MAR 6:8 ಯೇಸುನೆ ಇವ್ಣುನ, “ಲಠ್ಠೊ ಮ್ಹೆಂದಿನ್ ಶಾತ್ಬಿ ನಕೊ ಲೀಜಾ಼ವೊ, ರೋಟೊ ರ‍್ಹವೊ, ಝೋ಼ಳಿ ರ‍್ಹವೊ, ಚ಼ಂಚಿಮ ಪೈಶಾ ರ‍್ಹವೊ ನಕೊ ಲೀಜಾ಼ವೊ.
MAR 6:9 ಚಪ್ಲೆ ಘಾಲಿಲೆವೊ, ಅಜು಼ ಪೇರ‍್ಹಿರಾಖ್ಯಸ್ತೆ ಕುಡ್‌ತೂಸ್‌ ಬಶ್‌, ಬಿಜೇಕ್ ಕುಡ್‌ತು ನಕೊ ಲೀಜಾ಼ವೊ” ಕರಿ ಹುಕುಮ್‌ ದಿದೊ.
MAR 6:10 ಎತ್ರೇಸ್ ಕಾಹೆತೆ ಯೇಸುನೆ ಇವ್ಣುನ, “ತುಮೂನ ಖೆವ ಘರ್‌ಮ ಬುಲೈಲೇಸ್ಕಿ, ಯೋ ಝ಼ಗೊ ಮ್ಹೇಲಿನ್‌ ಜಾ಼ವಾಲಗೂಬಿ ಯೋಸ್‌ ಘರ್‌ಮ ರ‍್ಹವಾಕರೊ.
MAR 6:11 ಅಜು಼ ಕೆವ್ಹಾಬಿ ಝ಼ಗೊವಾಳು ತುಮೂನ ನಾ ಬುಲೈಲಿದುತೊ ಅಜು಼ ತುಮಾರಿ ವಾತೆನ ನಾ ಖ್ಹಮ್‌ಜುತೊ, ಯೋ ಝ಼ಗೋಥು ನಿಕ್ಳಿ ಜಾ಼ವೊ ಅಜು಼ ತುಮಾರ ಗೋಡಾನ ಲಾಗ್ಯುತೆ ಧೂಳ್‌ನ ಝ಼ಟ್‌ಕಿ ದೆವೊ. ಆ ಇವ್ಣುನ ಝೇತಾವನು ಸಾಕ್ಷಿ ಹುಯಿರ‍್ಹಿಶೆ!” ಕರಿ ಬೋಲ್ಯೊ.
MAR 6:12 ಬಾದ್‌ಮ ಇವ್ಣೆ ಹಿಜ್ಜಾ಼ಥು ಜೈ಼ನ್‌, ಅದ್ಮಿಖ್ಹಾರನ, “ಪಾಪ್ ಕರಾನು ಮ್ಹೇಲಿನ್ ದೇವ್ ಭಣಿ ಫರೊ” ಕರಿ ದೇವ್ನಿ ವಾತೆನ ಬೋಲಿವತಾಳ್ಯು.
MAR 6:13 ಇವ್ಣೆ ಘಣು ಭೂತ್‌ಖ್ಹಾರು ಕಾಡ್ಯು ಅಜು಼ ರೋಗ್‍ವಾಳ ಘಣ ಅದ್ಮಿನ ತೇಲ್ ಲಗಾಡಿನ್ ಅಛ್ಛು಼ಕರ‍್ಯು.
MAR 6:14 ಅಜು಼ ಹೆರೋದ ರಾಜಾ಼ನೆ ಯೇಸುನಿ ಬಾರೇಮ ಖ್ಹಮ್‌ಜೊ಼, ಶನಕತೊ ಯೇಸುನು ನಾಮ್ ಖ್ಹಾರಿ ಬಾಜು಼ಮ ಫೈಲಿಗಯುಥು. ಥೋಡು ಅದ್ಮಿ ಯೇಸುನಿ ಬಾರೇಮ, “ಬ್ಯಾಪ್ತಿಸ್ಮದ್ಯವಾಳೊ ಯೋಹಾನಸ್‌ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್! ಇನಖ್ಹಾಜೇಸ್ ಮೋಟು ಅದ್ಭುತ್ ಕರಾನು ಶಕತ್ ಯೇಸುಮ ಛಾ಼ತೆ” ಕರಿ ಬೋಲ್ತುಥು.
MAR 6:15 ಥೋಡು ಜ಼ಣು, “ಯೋ ಎಲೀಯ” ಕರಿ, ಬಿಜು಼ ಥೋಡು ಜ಼ಣು, “ಘಣ ವರಖ್ಹ್‌ನ ಪೀಠೆ ಥೂತೆ ಪ್ರವಾದೀನಿ ಘೋಣಿ ಆಬಿ ಏಕ್‌ ಪ್ರವಾದಿ ಹುಯಿರ‍್ಹೋಸ್’ ಕರಿ ಬೋಲ್ಯು.
MAR 6:16 ಕತೋಬಿ ಹೆರೋದನೆ ಆ ಖ್ಹಾರಿ ವಾತೆನ ಖ್ಹಮ್‌ಜಿನ್‌, “ಮೇ ಮುಡ್‌ಕ್ಯು ಕತ್ರಾಯೊತೆ ಯೋಹಾನಸ್‌ ಆ, ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್!” ಕರಿ ಬೋಲ್ಯೊ.
MAR 6:17 ಹೆರೋದನೆ, ಇನೆ ರಾಖಿರಾಖ್ಯೊಥೋತೆ ಹೆರೋದ್ಯನಖ್ಹಾಜೆ ಯೋಹಾನ್ನ ಧರೈನ್, ಇನ ಜೇಲ್‌ಮ ಕೋಂಡಿ ಘಲೈರಾಖ್ಯೊಥೊ. ಯೋ ಹೆರೋದ್ಯ ಹೆರೋದನೊ ಭೈ ಫಿಲಿಪ್ಫನಿ ಬಾವಣ್‍.
MAR 6:18 ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಹೆರೋದಾನ, “ತೂ ತಾರ ಭೈನಿ ಬಾಯ್ಕೊನ ರಾಖಿರಾಖ್ಯೋತೆ ನಿಯಮ್‌ಕಾಹೆ!” ಕರಿ ಬೋಲ್ತೊರ‍್ಹೇತೋಥೊ.
MAR 6:19 ಅನಖ್ಹಾಜೆ ಹೆರೋದ್ಯಬಿ ಯೋಹಾನಪರ್ ದಾವೊ ರಾಖಿನ್, ಇನ ಮರೈನಾಕ್ಣು ಕರಿ ಕೆತ್ರು ಕರಿತೋಬಿ ಇನೊ ಹಾತ್‌ ಕೋ ಹುಯುನಿ.
MAR 6:20 ಹೆರೋದನ ಯೋಹಾನಕತೊ ಡರ್‌ ಥೊ ಶನಕತೊ, ಯೋಹಾನ ನೀತಿವಾಳೊಕರೀಬಿ ಅಜು಼ ಪವಿತ್ರ್‌ ಅದ್ಮಿಕರಿ ಇನ ಮಾಲುಮ್‌ ಥು, ಇನಾಖ್ಹಾಜೆ ಇನ ಜ಼ತನ್‌ಥಿ ರಾಖಿರಾಖ್ಯೋಥೊ. ಅಜು಼ ಯೋಹಾನ ಬೋಲಾತೆ ವಾತ್ನ ಖ್ಹಮ್‌ಜೊತೊ, ಇನ ದಿಲ್ಮ ಕಲಾವ್ಣಿ ಹುಯುತೋಬಿ, ಇನಿ ವಾತೆನ ಖ್ಹುಶಿಥಿ ಖ್ಹಮಜ಼್‌ತೋಥೊ.
MAR 6:21 ಹೆರೋದ್ಯನೆ ಸೋಚಿರಾಖಿಥೀತೆ ವಖ್ಹತ್ ಆಯಿ. ಕಿಮ್‌ಕತೊ ಹೆರೋದನೊ ಪೈದಾ ಹುಯೋತೆ ದನ್ ಆಯೊ, ಯೋ ದನ್ಮ ಇನೆ ಖ್ಹಾರ ಅದಿಕಾರ್‌ಮ ರ‍್ಹವಾಳ ಶಾಣಾವ್ನ ಅಜು಼ ಇನು ದಂಡ್‌-ದಳವಾಯಿನ ಚ಼ಲಾವವಾಳ ಮೋಟಾವ್ನ, ಅಜು಼ ಗಲಿಲಾಯ ತಬರ್‌ಖಾನು ಧನ್‌-ದೌಲತ್‌ವಾಳ ಗಲ್‌ಢಾವ್‌ನ ಖ್ಹಾಜೆ ಮಿಝ಼್‌ವಾನ್ ಪಿಕಾಯೊ.
MAR 6:22 ತದೆ ಹೆರೋದ್ಯನಿ ಛೋ಼ರಿ ಮಹಿ ಅಯಿನ್ ಖೇಲಿನ್, ಹೆರೋದನಾಬಿ ಇನ ಜೋ಼ಡ್ಮ ಖಾಣನ ಬೆಠುಥೂತೆ ಖ್ಹಾರಾವ್‌ನ ಖ್ಹುಶಿಕರಿ. ತದೆ ರಾಜಾ಼ನೆ ಯೋ ಛೋ಼ಕ್ರಿನ, “ತುನ ಶಾತ್‌ ಹೋಣು ಬೋಲ್?‌ ತುನ ಶಾತ್ ಹೋಣುಕತೋಬಿ ದೆವುಸ್” ಕರಿ ಬೋಲ್ಯೊ.
MAR 6:23 ಇನೆ ಘಣಿ ಶಪತ್ ಲೀನ್, “ತೂ ಶಾತ್ ಬೋಲಿಲಿದಿತೋಬಿ ದೆವುಸ್ ಕರಿ ವಾತ್ ದೆವ್‍ಕರೂಸ್, ಮಾರ ರಾಜ್ಯಮಾಥು ಆಧು ರಾಜ್ಯನ ಮಾಂಗಿಲಿದಿತೋಬಿ ತುನ ದೆವುಸ್‌” ಕರಿ ಬೋಲ್ಯೊ.
MAR 6:24 ತದೆ ಯೋ ಛೋ಼ಕ್ರಿ ಭಾರ್‌ ಇನಿ ಆಯಕನ ಜೈ಼ನ್‌, “ಮೇ ಶಾತ್‌ ಮಾಂಗಿಲೆವ್?” ಕರಿ ಪುಛೈ಼. ತದೆ ಇನಿ ಆಯನೆ, “ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಮಾಂಗಿಲೆ” ಕರಿ ಬೋಲಿ.
MAR 6:25 ಇನಿ ಆಯ ಇಮ್‌ ಬೋಲ್ತಾಸ್‌ನ, ಒಗ್ಗಿಸ್‌ಮ ಯೋ ರಾಜ಼ಕನ ಐನ್, “ಹಮ್ಕೆಸ್‌ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಪತ್ತರ್‌ಮ ಮನ ಮಂಗೈನ್ ದೆ! ಯೋಸ್ ಮಾರಿ ಬಿಂತಿ” ಕರಿ ಬೋಲಿ.
MAR 6:26 ಅನೇಥಿ ಹೆರೋದ ರಾಜಾ಼ನ ಘಣು ದುಖ್ ಹುಯು, ಕತೋಬಿ ಅಖ್ಖಾನ ಖ್ಹಾಮೆ ಇನೆ ವಾಗ್ದಾನ್‌ ದೀರಾಖ್ಯೊಥೋತೆ ಇನಖ್ಹಾಜೆ, ಹೆರೋದ್ಯನಿ ಛೋ಼ರಿನೆ ಬೋಲಿತೆ ಇನ ಕಾಡಾನ ಕೋ ಹುಯುನಿ.
MAR 6:27 ಅನಾಖ್ಹಾಜೆ ರಾಜಾ಼ನೆ ಒಗ್ಗಿಸ್‌ಮ ಕಾವ್ಲಿಕರಾವಾಳ ಶಿಪಾಯಿನ, ಜೇಲ್‌ನ ಜೈ಼ನ್‌ ಯೋಹಾನನು ಮುಡ್‌ಕ್ಯು ಕತ್ರಿಲೀನ್ ಆವಾನ ಹುಕುಮ್‌ ದೀನ್ ಮೋಕ್‌ಲ್ಯೊ. ತದೆ ಇನೆ ಯೋಹಾನ್ನ ಕೋಂಡಿ ಘಾಲಿರಾಖ್ಯುಥೂತೆ ಹಿಜ್ಜಾ಼ಜೈ಼ನ್, ಇನು ಮುಡ್‌ಕ್ಯು ಕತ್ರೀನ್,
MAR 6:28 ಇನ ಪತ್ತರ್‌ಮ ಲೈನ್‌, ಯೋ ಛೋ಼ಕ್ರಿನ ದಿದು. ಇನೆ ಯೋ ಮುಡ್‌ಕ್ಯಾನ ಇನಿ ಆಯನ ದಿದಿ.
MAR 6:29 ಯೋಹಾನನು ಶಿಷ್ಯರ್‌ ಅನಿ ಬಾರೇಮ ಖ್ಹಮ್‌ಜಿನ್‌, ಹಿಜ್ಜಾ಼ ಐನ್, ಯೋಹಾನನು ಮುರ್ದು ಪಳ್ಳಿಜೈ಼ನ್‌, ಮಖ್ಹಾಣ್ಯನಿ ಘವಿಮ ಘಾಲ್ಯು.
MAR 6:30 ಬಾದ್‌ಮ ಅಪೊಸ್ತಲರ್ ಖ್ಹಾರು ಯೇಸುಕನ ಪಾಛು಼ಫರಿ ಐನ್ ಮಳ್ಯು. ತದೆ ಇವ್ಣೆ ಅದ್ಮಿಮ ಕರ‍್ಯುತೆ ಅಜು಼ ಬೋಲಿದಿದೂತೆ ಖ್ಹಾರಸ್ನ ಯೇಸುನ ಖ್ಹಾಮ್ಣೆ ಬೋಲ್ಯು.
MAR 6:31 ತದೆ ಯೇಸುನೆ ಇವ್ಣುನ, “ಖಲಿ ತುಮೆ ಮಾರ ಜೋ಼ಡೆ ಉಜ್ಜಾ಼ಡಿ ಝ಼ಗೋಪರ್‌ ಐನ್, ಅರಾಮ್‌ ಕರಿಲೆವೊ” ಕರಿ ಬೋಲ್ಯೊ. ಶನಕತೊ ಘಣು ಅದ್ಮಿ ಹಿಜ್ಜಾ಼ ಆವಾನು ಜಾ಼ವಾನು ಕರುಕರ್ತುಥೂತೆ ಇನಾಖ್ಹಾಜೆ, ಯೇಸುನಾಬಿ ಇನ ಶಿಷ್ಯರ್‌ನ ಖಾಣು ಖಾವನಿಬಿ ವಖ್ಹತ್ ಕೋ ಥೀನಿ.
MAR 6:32 ಇನಾಖ್ಹಾಜೆ ಇವ್ಣೆ ಡೋಣ್‌ಮ ಬೇಶಿನ್ ಉಜ್ಜಾ಼ಡಿ ಝ಼ಗೋಪರ್‌ ಗಯ.
MAR 6:33 ಇವ್ಣೆ ವಳ್ಯುಜಾ಼ತುಥೂತೆ ಘಣ ಅದ್ಮಿನೆ ದೇಖಿನ್‌, ಯೇಸುಬಿ ಇನು ಶಿಷ್ಯರ್‌ ಕರಿ ಖ್ಹಣೇದ್ ಧರ‍್ಯು. ತದೆ ಖ್ಹಾರ ಗಾಮ್‌ಥು ಅದ್ಮಿಖ್ಹಾರು ವಾಟ್‌ಧರಿ ನಾಖ್ಹ್‌ತುಹುಯಿನ್, ಇವ್ಣೆಥಿಬಿ ಅಗಾಡಿ ಯೋ ಝ಼ಗೋಪರ್‌ ಆಯು.
MAR 6:34 ಯೇಸು ಹಿಜ್ಜಾ಼ ಐನ್ ಡೋಣ್‌ಪರ್‌ಥೊ ಉತ್ರಿನ್, ಘಣು ಅದ್ಮಿನಿ ಭೀಡ್ ಟಿವವ್‌ಕರ್‌ಥೂತೆ ದೇಖಿನ್‌, ಇವ್ಣಾಪರ್ ಗೋರ್‌ಖೈನ್, “ಅವ್ಣೆ ಕುರುಬಕೊಂತೆ ಮ್ಹೇಂಢವ್‌ನಿ ಘೊಣಿ ಛಾ಼ನಿ” ಕರಿ ಬೋಲಿನ್, ಇವ್ಣುನ ಘಣಿ ವಚನ್ ಬೋಲಿದಿದೊ.
MAR 6:35 ಎತ್ರಾಸ್‌ಮ ಖ್ಹಾಂಜ಼್ ಹುಯಿಗುಥು. ಇನಟೇಕೆ ಯೇಸುನ ಶಿಷ್ಯರ್‌ ಇನಾಕನ ಐನ್, “ಆ ಉಜ್ಜಾ಼ಡಿ ಝ಼ಗೊ ಬಿಜು಼ ಖ್ಹಾಂಜ಼್‌ಬಿ ಹುಯಿಗಯು.
MAR 6:36 ಅವ್ಣೆ ಖ್ಹಾರು ಅಶ್‌ಪಿಶ್‌ ಛಾ಼ತೆ ಗಾಮ್ಮ ಅಜು಼ ಖೇತರ್‌ಮ ಜೈ಼ನ್, ಇವ್ಣುನ ಖಾವನ ಶಾತ್‌ ಹೋಣುಕಿ ಯೋ ಲ್ಯವಾನಟೇಕೆ ಅವ್ಣುನ ಬೋಲಿಮೋಕಲ್‌” ಕರಿ ಬೋಲ್ಯ.
MAR 6:37 ಇಮ್‌ ಬೋಲಾಖ್ಹತರ್ ಯೇಸುನೆ ಇವ್ಣುನ, “ತುಮೇಸ್ ಇವ್ಣುನ ಖಾವಾನ ಶಾತ್‌ತೋಬಿ ದೆವೊ” ಕರಿ ಬೋಲ್ಯೊ. ತದೆ ಇವ್ಣೆ, “ಹಮೆ ಜೈ಼ನ್, ಬೇಖ್ಹೊ ರೂಪಾನ ಕಾಖ್ಹ್‌ನು ರೋಟಾ ಲೀನ್‌, ಅವ್ಣುನ ಖಾವಾನ ದೇಣೂಕಿ ಶು?” ಕರಿ ಯೇಸುನ ಫುಛಾ಼ಯು.
MAR 6:38 ತದೆ ಯೇಸುನೆ ಇವ್ಣುನ, “ತುಮಾರಕನ ಕೆತ್ರ ರೋಟಾ ಛಾ಼? ಕರಿ ಜೈ಼ನ್‌ ದೇಖೊ” ಕರಿ ಬೋಲ್ಯೊ. ಇವ್ಣೆ ಜೈ಼ನ್ ಮಾಲುಮ್ ಕರಿಲಿನ್, ಯೇಸುಕನ ಐನ್, “ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಛಾ಼” ಕರಿ ಬೋಲ್ಯು.
MAR 6:39 ತದೆ ಯೇಸುನೆ ಇನ ಶಿಷ್ಯರ್‌ನ, “ತಮಾಮ್‌ ಅದ್ಮಿನ ಹರ‍್ಯಾ ಘಾಖ್ಹ್‌ಪರ್‌ ಝೂ಼ಂಡೆ-ಝೂ಼ಂಡೆ ಕರಿ ಬೆಖ್ಹಾಡೊ” ಕರಿ ಬೋಲ್ಯೊ.
MAR 6:40 ತದೆ ಅದ್ಮಿಖ್ಹಾರು ಏಕ್‌-ಏಕ್‌ ಝೂ಼ಂಡ್‌ಮ ಖ್ಹೋ-ಖ್ಹೋ, ಅಡೈವಿಖ್ಹ್‌-ಅಡೈವಿಖ್ಹ್‌ ಜ಼ಣು ಶಾಲ್ ಹುಯಿನ್ ಬೇಶಿಗಯು.
MAR 6:41 ಬಾದ್‌ಮ ಯೇಸುನೆ ಯೋ ಪಾಚ಼್ ರೋಟ ಬೇ ಮಾಛ಼್‌ಲಾನ ಪಾಡಿಲೀನ್, ಆಕಾಶ್‌ಭಣಿ ದೇಖಿನ್, ದೇವ್ನ ಧನ್ಯವಾದ್ ಕರಿನ್, ರೋಟಾವ್ನ ತೋಡಿನ್ ಅದ್ಮಿನ ವಾಟಪಾಡಿನ್ ದೆವೊ ಕರಿ ಇನ ಶಿಷ್ಯರ್‌ನ ದಿದೊ. ಬಿಜು಼ ಯೋ ಬೇ ಮಾಛ್ಲಾ಼ನಾಬಿ ಅಖ್ಖಾ ಅದ್ಮಿನ ವಾಟಪಡಾಯೊ.
MAR 6:42 ಇವ್ಣೆ ಖ್ಹಾರೂಸ್ ಪೇಟ್‌ಭರಿ ಖೈನ್ ಬಶ್‌ಹುಯು.
MAR 6:43 ತದೆ ಶಿಷ್ಯರ್‌ನೆ ಉಭ್‌ರ‍್ಯುತೆ ರೋಟಾನ ಅಜು಼ ಮಾಛ಼್‌ಲಾನ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯು.
MAR 6:44 ಖಾಣು ಖಾದುತೆ ಇನಾಮ ಪರ್ಖ್ಹಾ ಅದ್ಮಿಸ್‌ ಪಾಚ಼್ ಹಜಾ಼ರ್‌ಜ಼ಣು ಥೂ.
MAR 6:45 ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ಮೇ ಆ ಅದ್ಮಿನಿ ಝೂ಼ಂಡ್‌ನ ಘರೆ ಬೋಲಿಮೋಕ್ಲಾನ ಮಹಿ, ತುಮೆ ಡೋಣ್‌ ಚ಼ಢೀನ್‌ ಮಾರೇಥಿ ಅಗಾಡಿ ಪಾರ್ಲಿ ಬಾಜು಼ಮ ಛಾ಼ತೆ ಬೆತ್ಸಾಯಿದ ಖ್ಹಯೇರ‍್ನ ಜಾ಼ವೊ” ಕರಿ ಜು಼ಲುಮ್‌ ಕರ‍್ಯೊ.
MAR 6:46 ಅದ್ಮಿನ ಮೋಕ್ಲಿದ್ಯವಾನ ಬಾದ್‌ಮ, ಯೇಸು ಪ್ರಾರ್ಥನೆ ಕರಾನಖ್ಹಾಜೆ ಪಹಡ್‌ಪರ್ ಗಯೊ.
MAR 6:47 ದನ್ ಡುಬಾನ ಬಾದ್‌ಮ, ಶಿಷ್ಯರ್‌ ಥಾತೆ ಡೋಣ್‌ ದರ‍್ಯಾವ್‍ನ ಇಚ಼್‌ಮ ಥು, ಕತೋಬಿ ಯೇಸು ಎಕ್ಲೋಸ್ ಕನಾರೆ ಥೊ.
MAR 6:48 ಖ್ಹಾಮ್ಣೆನೊ ವಹಿರೊ ಜೋ಼ರೇಖ್ಹು ವಾಗುಕರ್ತೊಥೋತೆ ಇನಾಖ್ಹಾಜೆ, ಶಿಷ್ಯರ್‌ ಖ್ಹಾರು ಡೋಣ್ಣಾ ಖ್ಹಾಮ್ಣೆ ಲೀಜಾ಼ವಾನ ಕೋ ಹುವ್ವಾನಿತೆ ತರಪ್‌ಡುಕರ್ತುಥೂತೆ ಯೇಸುನೆ ದೇಖ್ಯೊ. ತದೆ ಕಮ್‌ಶಿಕಮ್ ವ್ಹಾಣ್‌ಖ್ಹತ್ರೆ ಚಾರ್‌ ಘಂಟಾ ಹುಯಿರ‍್ಹುಥು. ತದೆ ಯೇಸು ದರ‍್ಯಾವ್‌ಪರ್ ಚಾ಼ಲ್ತೊಹುಯಿನ್‌ ಇವ್ಣಭಣಿ ಐನ್, ಇವ್ಣುನ ಮ್ಹೆಂದಿನ್ ಖ್ಹಾಮ್ಣೆ ಜಾ಼ವ್ಣುಕರಿ ಥೊ.
MAR 6:49 ಕತೋಬಿ ದರ‍್ಯಾವ್‌ಪರ್ ಚಾ಼ಲ್ತೊವಳ್ಯಾವಾತೆ ಯೇಸುನ ಇವ್ಣೆ ದೇಖಿನ್‌, ಭೂತ್‌ಕರಿ ಸೋಚಿನ್ ಜೋ಼ರೇಥಿ ಚಿಕ್ರಾಲಗ್ಯು.
MAR 6:50 ಶನಕತೊ ಇವ್ಣೆ ಖ್ಹಾರು ಇನ ದೇಖಿನ್‌ ಘಬ್‌ರೈ ಗಯುಥು. ತದೆ ಒಗ್ಗಿಸ್‌ಮ ಯೇಸುನೆ ಇವ್ಣ ಜೋ಼ಡೆ ವಾತೆ ಬೋಲಿನ್ ಇವ್ಣುನ, “ಹಿಮ್ಮತ್‌ಥಿರ‍್ಹೆವೊ ಮೇಸ್, ಡರೊನಕೊ!” ಕರಿ ಬೋಲ್ಯೊ.
MAR 6:51 ಬಾದ್‌ಮ ಯೇಸು ಡೋಣ್‌ ಚ಼ಢೀನ್‌ ಇವ್ಣಾಕನ ಆಯೊ, ತದೆ ವಹಿರೊ ವಾಗಾನು ಭೀರಿಗಯು. ತದೆ ಶಿಷ್ಯರ್‌ ಖ್ಹಾರು ಘಣು ಆಶ್ಚರ್ಯಖಾದು.
MAR 6:52 ಶನಕತೊ ಇವ್ಣೆ ಯೇಸುನೆ ಪಾಚ಼್ ರೋಟಾನ ಪಾಚ಼್ ಹಜಾ಼ರ್ ಅದ್ಮಿನ ಖಡಾಯೋತೆ ಇನಿ ಮತ್ಲಬ್‌ನ ಮಾಲುಮ್ ಕರ‍್ಯುಕೊಯ್ನಿ. ಇವ್ಣೊ ದಿಲ್‌ ಬಂಡೊ ಹುಯಿರ‍್ಹೋಥೊ.
MAR 6:53 ಇವ್ಣೆ ದರ‍್ಯಾವ್‍ನ ಕಾಡಿನ್ ಗೆನೆಜರೇತ್‍ ತಬರ್‌ಖಾನ ಕನಾರೆ ಪೊಚಿನ್‌ ಡೋಣ್ಣಾ ಭಾಂದ್ಯು.
MAR 6:54 ಇವ್ಣೆ ಡೋಣ್‌ಪರ್‌ಥು ಉತರ್‌ತಸ್ನ, ಹಿಜ್ಜಾ಼ನು ಅದ್ಮಿಖ್ಹಾರು ಯೇಸುನಿ ಖ್ಹಣೇದ್ ಧರ‍್ಯು.
MAR 6:55 ತದೆ ಯೋ ತಬರ್‌ಖಾನು ಖ್ಹಾರು ಅದ್ಮಿ ನಾಖ್ಹ್‌ದಾಖ್ಹ್ ಕರ್ತುಹುಯಿನ್, ರೋಗ್‌ಮ ಪಡಿರ‍್ಹವಾಳ ಖ್ಹಾರಾವ್‌ನ ಬಿಛಾ಼ವ್ಣಿಮ ನಾಖಿಲಿನ್‌ ಯೇಸು ಕಿಜ್ಜಾ಼-ಕಿಜ್ಜಾ಼ ಛಾ಼ ಕರಿ ಖ್ಹಮ್‌ಜಾ಼ಸ್ಕಿ ಹಿಜ್ಜಾ಼-ಹಿಜ್ಜಾ಼ ಲೀನ್‌ ಆಯು.
MAR 6:56 ಅಜು಼ ಯೇಸು ಖೆವ ಖ್ಹಯೇರ್‌ಮಾಬಿ, ಖೆವ ಗಾಮ್ಮಾಬಿ ನಾತೊ ಖೆವ ಖೇತರ್‌ಮಾಬಿ ಕತೊ ಕಿಜ಼್ಜಾ-ಕಿಜ಼್ಜಾ ಗಯೋಕಿ ಹಿಜ಼್ಜಾವಾಳು ರೋಗ್‌ರ‍್ಹವಾಳನ ಭಾರ್‌ ಬಜಾ಼ರ್‌ನಿ ಝ಼ಗೊ ಮ್ಹೇಲಿನ್ ಯೇಸುನ, “ತಾರು ಲುಂಗ್ಡಾನು ಕೋಣೊತೋಬಿ ಛೀಮಾನ ಮ್ಹೇಲಿದೆ” ಕರಿ ಇನ ಗಿಂಗೈಲಿದು. ಅಜು಼ ಇನ ಕೋಣ್-ಕೋಣ್ ಛೀಮ್ಯೂಕಿ ಇವ್ಣ ಖ್ಹಾರಾನೊ ರೋಗ್‌ ಅಛ್ಛು಼ ಹುಯಿಗಯೊ.
MAR 7:1 ಬಾದ್‌ಮ ಯೆರೂಸಲೇಮ್‌ಥು ಆಯುಹುಯು ಫರಿಸಾಯರ್‌ಬಿ, ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಯೇಸುಕನ ಐನ್ ಅಶ್‌ಪಿಶ್‌ ಭರಾಯು.
MAR 7:2 ತದೆ ಇವ್ಣೆ ಯೇಸುನು ಶಿಷ್ಯರ್‌ಮ ಥೋಡುಜ಼ಣು ಅಶುದ್ದ ಹಾಥ್ಥಿ ಕತೊ ಗುರುಗುರಬ್‌ಲ್ಯಥಿ ಚಾ಼ಲ್ತುಆಯುತೆ ಇಮ್‌ ಪರಿಸಾಯರ್ ಖ್ಹಾರು ಶಿಕಾಡ್ತುಥೂತೆ ಇಮ್‌, ಹಾತ್‌ ಧೋಯುಕೊಂತೆ ಖಾಣು ಖಾತಾನ ದೇಖ್ಯು.
MAR 7:3 ಫರಿಸಾಯರ್ ಅಜು಼ ಯೆಹೂದ್ಯರ್‌ನ ಖ್ಹಾರುಜ಼ಣು, ಇವ್ಣ ಶಾಣವ್‌ಥಿ ಶಿಕ್ತು ಆಯುತೆ ಇಮ್‌, ಇವ್ಣೊ ಹಾತ್‌ ಬರೋಬರ್‌ನಿ ತರೀಕಾಥಿ ಧೊವಾಕೊಂತೆ ಖಾಣು ಕೋಖಾಯ್ನಿ. ಅಜು಼ ಬಜಾ಼ರೆ ಜೈ಼ನ್ ಆಯೂತೆ ಪಾಣಿ ಛಿಡ್ಕಿಲೇಯ್‌ ಕೊಂತೆ ಖಾಯಿಕೊಯ್ನಿ. ಅತ್ರೇಸ್ ಕಾಹೆತೆ ಇವ್ಣಾಮ ಗಿಳಾಖ್ಹ್, ಕಂಚ಼್‌ನೊತಾಂಬ್ಯೊ, ಹಂಡ್‌ಕು ಖ್ಹಾರು ಮಾಂಜಿನ್ ಧೊವಾನು ಅಜು಼ ಬಿಛಾ಼ವ್ಣಿನ ಧೊವಾನು, ಅಮ್ನು ಖ್ಹಾರು ಶಾಣಾವ್‌ಥಿ ಚಾ಼ಲ್ತು ಆಯುತೆ ಇನ ಬರೋಬರ್‌ಥಿ ಕರ್ತುಥು.
MAR 7:5 ಇನಾಖ್ಹಾಜೆ ಫರಿಸಾಯರ್ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೇನೆ ಯೇಸುನ, “ತಾರು ಶಿಷ್ಯರ್‌ ಶಾಣವ್‌ನೆ ಶಿಕಾಡ್ತು ಆಯುತೆ ಆದತ್‌ನ ಇಮ್‌ ಶನ ಕೋ ಕರಾನಿ? ಚಾ಼ಲ್ತು ಆಯೂತೆ ಇಮ್‌ ಹಾತ್‌ ಧೊವಾಕೊಂತೆ ಶುದ್ದಕೊಂತೆ ಹಾತೇಖ್ಹು ಶನ ಖಾಣು ಖಾಸ್‌?” ಕರಿ ಫುಛಾ಼ಯು.
MAR 7:6 ಇಮ್‌ ಬೋಲ್ತಾನ ಯೇಸುನೆ, “ತುಮೆ ಠಗಾರು, ತುಮಾರಿ ಬಾರೇಮ ಯೆಶಾಯ ಪ್ರವಾದಿನೆ ಬರೊಬರ್‌ಥೀಸ್‌ ಪ್ರವಾದ್‌ನೆ ಕರಿರಾಖ್ಯೋಸ್. ಯೋ ಶಾತ್‌ಕತೊ, ‘ದೇವ್ನೆ ಬೋಲ್ಯೋಕಿ, ‘ಆ ಅದ್ಮಿಖ್ಹಾರು ವಾತೇಥಿ ಮನ ಖ್ಹರಾವಸ್‌, ಕತೋಬಿ ಅವ್ಣೊ ದಿಲ್‌ ಮಾರೇಥಿ ದೂರ್ ಛಾ಼’
MAR 7:7 ಅದ್ಮಿನ ಖ್ಹೂಜ಼್‌ನಿತರ ಶಿಕಾಡ್ತು ಆಯೂತೆ ಇನಾಸ್ ದೇವ್ನಿ ಹುಕುಮ್‌ನಿಘೋಣಿ! ಬೋಲಿಶಿಕಾಡವಾಳ ಅವ್ಣೆ ಮಾರ ಖ್ಹಾಮೆ ಆರಾದನೆ ಕರಾನು ಕಾಮ್ನಕೊಯ್ನಿ’ ಕರಿ ಯೋ ವಾತೆ ಹುಯಿರ‍್ಹೀಸ್!
MAR 7:8 “ತುಮೆ ದೇವ್ನಿ ಹುಕುಮ್‌ನ ಮ್ಹೇಲಿದಿನ್ ಅದ್ಮಿನೆ ಶಿಕಾಡ್ಯುತೆ ಇನ ಧರಿರಾಖ್ಯಾಸ್‌” ಕರಿ ಬೋಲ್ಯೊ.
MAR 7:9 ಯೇಸುನೆ ಬಿಜೂ಼ಬಿ ಇವ್ಣುನ, “ತುಮೆ ಕೆತ್ರೆ ಅಕ್ಲಿ ದೇಖೊ! ತುಮೆ ತುಮಾರಿ ಪದತ್ತಿನ ಪಾಡಿಚಾ಼ಲ್ನು ಕರಿ ದೇವ್ನೆ ದಿದೋತೆ ಹುಕುಮ್‌ನ ಕಾಡಿನಾಖಿದೆವೊಸ್‌ನಿ.
MAR 7:10 ‘ಆಯ-ಬಾನ ಮರ್ಯಾದಿ ದೇವ್ಣು ಕರಿ, ಅಜು಼ ಆಯನ ರ‍್ಹವೊ ಬಾನ ರ‍್ಹವೊ ಶಾಪ್ನ-ಶಬರ್‌ ದೆವಾಳಾನ ಮಾರಿನಾಖಿದೆವ್ಣು’ ಕರಿ ಮೋಶೆನೆ ಹುಕುಮ್‌ ದೀರಾಖ್ಯೊಸ್.
MAR 7:11 ಕತೋಬಿ ತುಮಾರಮ ಕೋಣ್‌ತೋಬಿ ಏಕ್‌ ಜ಼ಣು ಇನ ಆಯ-ಬಾನ ಶಾತ್‌ತೋಬಿ ದೀನ್, ಮದತ್‌ಕರ್‌ನು ಕರಿ ರ‍್ಹೇಸ್ತೆ ಯೋ ಖ್ಹಾರು ‘ಕೊರ್ಬಾನ್’ ಕರಿನಾಖ್ಯೊ” ಕರಿ ಬೋಲಿಲಿದೊತೊ,
MAR 7:12 ಯೋ ಅದ್ಮಿ ಇನ ಆಯನ ರ‍್ಹವೊ, ಬಾನ ರ‍್ಹವೊ ಬಿಜು಼ ಶಾತ್ಬಿ ದೇಕ್-ಭಾಲ್‌ ಕರ್ನುನಾತೆ ಇಮ್‌ ಭಾಮ್‌ಥಿ ಛು಼ಕಿಜಾ಼ಸ್.
MAR 7:13 ಅಮ್ ತುಮೆ ಏಕ್‌ಥಿ-ಏಕ್‌ ಬೋಲಿದೇತಾಹುಯಿನ್ ದೇವ್ನಿ ಪದತ್ತಿನ ಮರ್ಯಾದಿಕೊಂತೆ ಇಮ್‌ ಕರೋಸ್. ಅತ್ರೇಸ್ ಕಾಹೆತೆ ಅಮ್ನು ಖ್ಹಾರು ಬಿಜೂ಼ಬಿ ಕೈಯೆಕ್ಕಿ ಕರೋಸ್” ಕರಿ ಬೋಲ್ಯೊ.
MAR 7:14 ಬಾದ್‌ಮ ಯೇಸುನೆ ಅದ್ಮಿನಿ ಝೂ಼ಂಡ್‌ನ ಪಾಛೊ಼ ಖನ್ನೆ ಬುಲೈನ್ ಇವ್ಣುನ, “ಖ್ಹಾರು ಕಾನ್‌ ಜೋ಼ಡಿನ್‌ ಮಾರಿ ವಾತೆನ ಖ್ಹಮ್‌ಜೊ಼, ಅಜು಼ ಪರ್ಖಿಲೆವೊ.
MAR 7:15 ಭಾರ್‌ಥು ಮಹಿ ಜೈ಼ನ್‌ ಏಕ್‌ ಅದ್ಮಿನ ಪದತ್ತಿನಿಘೋಣಿ ಮೈಲುಕರಾನು ಏಕ್‌ಬಿ ಕೊಯ್ನಿ. ಕತೋಬಿ ಏಕ್‌ ಅದ್ಮಿನ ಮಹಿತು ಭಾರ್‌ ನಿಕ್ಳಾನುಸ್‌ ಇನ ಮೈಲುಬಣಾವಸ್‌”
MAR 7:16 “ಖ್ಹಮ್‌ಜಾ಼ನ ಕಾನ್‌ ಉಶೇತೊ ಖ್ಹಮ್‌ಜಾ಼ದೆ” ಕರಿ ಬೋಲ್ಯೊ.
MAR 7:17 ಬಾದ್‌ಮ ಯೇಸು ಖ್ಹಾರ ಅದ್ಮಿನ ಮ್ಹೆಂದಿನ್ ಘರ್‌ಮ ಆವಾದಿನ್, ಇನ ಶಿಷ್ಯರ್‌ನೆ ಯೋ ಮತ್ಲಬ್‌ಥಿ ಬೋಲ್ಯೊತೆ ವಾತೆನಿ ಬಾರೇಮ ಇನ ಫುಛಾ಼ಯು.
MAR 7:18 ತದೆ ಯೇಸುನೆ ಇವ್ಣುನ, “ಬಿಜಾ಼ನಿ ಘೋಣಿ ತುಮುನಾಬಿ ಎತ್ರೆ ಮಾಲುಮ್‌ ಪಡಾಕೊಯ್ನಿಕಿ ಶು? ಭಾರ್‌ಥು ಖಾವಾನು ರಾಛು಼ ಅದ್ಮಿನ ಮಹಿ ಜೈ಼ನ್‌ ಇನ ಗಲೀಜ಼್ ಕರಾಕೊಯ್ನಿ, ಕರಿ ತುಮೂನ ಮಾಲುಮ್‌ ಪಡ್ಯುಕೊಯ್ನಿಕಿ ಶು?
MAR 7:19 ಭಾರ್‌ಥು ಅದ್ಮಿನ ಮಹಿ ಜಾ಼ವಾನು ಖ್ಹಾರು ಇನ ದಿಲ್ಮ ಜಾ಼ಯಿಕೊಂತೆ, ಪೇಟ್‌ಮ ಜೈ಼ನ್‌ ಬಾದ್‌ಮ ಭಾರ್‌ಮ ನಿಕ್ಳಿಜಾ಼ಸ್, ಯೋ ಖ್ಹಾರು ಯೋ ಅದ್ಮಿನ ಗಲೀಜ಼್ ಕರಾಕೊಯ್ನಿ” ಕರಿ ಬೋಲ್ಯೊ. (ಅಮ್ ಬೋಲಾಥಿ, ಖಾವಾನು ಖ್ಹಾರುಸ್ ರಾಛು಼ ಶುದ್ದಕರಿ ಯೇಸುನೆ ವತಾಳಿದಿದೊ).
MAR 7:20 ಯೇಸುನೆ ಬಿಜೂ಼ಬಿ ಇವ್ಣುನ, “ಏಕ್‌ ಅದ್ಮಿನ ಮಹಿತು ನಿಕ್ಳಾನುಸ್‌ ಯೋ ಅದ್ಮಿನ ಗಲೀಜ಼್ ಕರಾಸ್.
MAR 7:21 ಮಹಿತು ಕತೊ ಅದ್ಮಿನ ದಿಲ್ನ ಮಹಿತು ಆವಾತೆ ಖರಾಬ್‌ಸೋಚ್‌, ಬಿಜೇಕ್‌ಜ಼ಣಿನ ಖ್ಹಂಗ್‌ಕರಾನು , ಚೋ಼ರಿ, ಖೂನ್‌ಕರಾನು,
MAR 7:22 ವ್ಯಬಿಚಾರ್, ಪೈಶಾನಿ ಲಾಲಚ್‌, ಬಿಜಾ಼ನ ಖರಾಬ್ ಕರಾನು, ಠಗಾವಾನು, ಪಾಪೇಲಿಆದತ್‌, ಬಳಾಪೊ ಕರಾನು, ಗಾಳೆ ದ್ಯವಾನು, ಹಂಕಾರ್, ಝ಼ಲಕ್‌ಭರ್‍ಯಾನಿ ಘೋಣಿ ಕರಾನು, ಅಮ್ನು ಖ್ಹಾರು ಖರಾಬ್ ಖ್ಹಯಾಲ್ ಭಾರ್‌ ನಿಕ್ಳಾಸ್‌.
MAR 7:23 ಅಮ್ನು ಖರಾಬ್ ಖ್ಹಾರು ಅದ್ಮಿನ ಮಹಿಥು ನಿಕ್ಳಿನ್, ಯೋ ಅದ್ಮಿನ ಗಲೀಜ಼್ ಕರಿದೇಸ್” ಕರಿ ಬೋಲ್ಯೊ.
MAR 7:24 ಹಿಜ್ಜಾ಼ಥೊ ಯೇಸು ನಿಕ್ಳಿನ್ ತೂರ್ ಕರಿ ಬೋಲಾನು ಖ್ಹಯೇರ‍್ನ ಖನ್ನೇನು ತಬರ್‌ಖಾನ ಗಯೊ. ಹಿಜ್ಜಾ಼ ಏಕ್‌ ಘರ್‌ಮ ಥೊ, ಯೋ ಹಿಜ್ಜಾ಼ ಛಾ಼ ಕರಿ ಕಿನಾಬಿ ನಾ ಮಾಲುಮ್‌ಪಡ್ಣು ಕರಿ ಥೊ, ಕತೋಬಿ ಯೋ ಮಾಲುಮ್‌ ಪಡಾಕೊಂತೆ ರ‍್ಹವಾನ ಕೋ ಹುಯುನಿ. ‌
MAR 7:25 ಒಗ್ಗಿಸ್‌ಮ ಏಕ್‌ ತಯೇಡನೆ ಯೇಸು ಹಾ ಛಾ಼ ಕರಿ ಖ್ಹಮ್‌ಜಿನ್‌, ಐನ್ ಯೇಸುನ ಗೋಡಾನ ಖ್ಹಾಮ್ಣೆ ಪಡಿ. ಇನಿ ಛೋ಼ರಿನ ಭೂತ್ ಧರಿರಾಖ್ಯುಥು.
MAR 7:26 ಯೋ ತಯೇಡ ಪರೈ ಜಾ಼ತ್‌ವಾಳಿ ಹುಯಿರ‍್ಹೀಥಿ. ಯೋ ಸಿರಿಯ ತಬರ್‌ಖಾನು ಸುರೋಪೊಯಿನಿಕ್ಯಮ ಪೈದಹುಯಿತೆ ಏಕ್‌ ಗ್ರೀಕ್‌ವಾಳಿ ಹುಯಿರ‍್ಹೀಥಿ. ಯೋ ತಯೇಡ ಇನಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್‌ ಕಾಡ್ಣು, ಕರಿ ಯೇಸುನ ಗಿಂಗಾವಲಗಿ.
MAR 7:27 ತದೆ ಯೇಸುನೆ ಇನ, “ಪಹಿಲೆ ಲಡ್ಕಾ ಪೇಟ್‌ಭರೀನ್‌ ಖವಾದೆ. ಲಡ್ಕಾ ಖಾವಾನು ರೋಟಾವ್ನ ಪಾಡೀನ್, ಕುತ್‌ರ‍್ಯಾನ ಚೆಲ್ಕಾನ ನಾಖಾನು ಬರೋಬರ್‌ಕೊಯ್ನಿ” ಕರಿ ಬೋಲ್ಯೊ.
MAR 7:28 ತದೆ ಯೋ ತಯೇಡಾನೆ, “ಹೋಲಾ ಪ್ರಭು, ತೋಬಿ ಲಡ್ಕಾ ಖಾಣು ಖವಾನಿ ಮೇಜ್‌ಪರ್‌ಥು ನಾಖಿದೇಯಿತೆ ರೋಟಾನ ಟುಕ್ಡಾನ ಹೇಟ್‌ ರ‍್ಹೇಯ್ತೆ ಕುತ್‌ರ‍್ಯಾನ ಚೆಲ್ಕ ಖಾಸ್ನಿ” ಕರಿ ಬೋಲಖ್ಹತರ್‌,
MAR 7:29 ಯೇಸುನೆ ಇನ, “ತುನೆ ಆ ವಾತ್ ಬೋಲಿತೆ ಇನಖ್ಹಾಜೆ, ತಾರಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್‌ ಮ್ಹೆಂದಿದು! ಘರೆ ಜಾ಼” ಕರಿ ಬೋಲ್ಯೊ.
MAR 7:30 ಯೋ ಇನ ಘರೆ ಜೈ಼ನ್‌ ದೇಖಾತೊ ಇನಿ ಛೋ಼ರಿ ಬಿಛಾ಼ವ್ಣಿಪರ್ ಅರಾಮ್‌ಥಿ ಖ್ಹುತೀಥಿ; ಇನ ಧರಿರಾಖ್ಯುಥೂತೆ ಭೂತ್‌ ನಿಕ್ಳಿ ಗಯುಥು.
MAR 7:31 ಬಾದ್‌ಮ ಯೇಸು ಯೋ ತೂರ್‌ನ ಖನ್ನೇನು ತಬರ್‌ಖಾನ ಮ್ಹೇಲಿನ್ ಸೀದೋನ್‌ನ ವಾಟೆಕರಿ ದೆಕಪೊಲಿ ತಬರ್‌ಖಾಮಾಕರಿ ಹುಯಿನ್ ಗಲಿಲಾಯ ದರ‍್ಯಾವ್‌ಕನ ಆಯೊ.
MAR 7:32 ತದೆ ಥೋಡು ಅದ್ಮಿನೆ ಭೈರೂಬಿ ತೊತ್‌ಳ್ಯು ಹುಯಿರ‍್ಹುಥೂತೆ ಏಕ್‌ ಜ಼ಣಾನ ಯೇಸುಕನ ಬುಲೈಲಾಯಿನ್‌, “ಅನ ಉಪ್ಪರ್ ತಾರೊ ಹಾತ್‌ ಮ್ಹೇಲ್‌” ಕರಿ ಇನ ಗಿಂಗೈಲಿದು.
MAR 7:33 ತದೆ ಯೇಸುನೆ ಇನ, ಅದ್ಮಿನಿ ಭೀಡ್‌ಮಾಥು ಏಕ್‌ ಬಾಜು಼ಮ ಬುಲೈಲಿಜೈ಼ನ್, ಯೇಸುನೆ ಇನಿ ಅಂಗ್‌ಳಿನ ಯೋ ಅದ್ಮಿನ ಕಾನ್‌ಮ ಘಾಲಿನ್, ಥೂಕಿನ್, ಇನಿ ಜೀಬ್‌ನ ಲಗಾಡಿನ್
MAR 7:34 ಉಪ್ಪರ್ ಆಕಾಶ್‌ಭಣಿ ದೇಖಿನ್‌, ಜೋ಼ರೇಥಿ ದಮ್‌ ಲೀಮ್ಹೇಲಿನ್‌, ಇನ ‘ಎಪ್ಫಥಾ’ ಕರಿ ಬೋಲ್ಯೊ, ಅಮ್‌ಕತೊ “ಉಖ್‌ಡೈ ಜಾ಼!” ಕರಿ.
MAR 7:35 ಅಮ್ ಬೋಲ್ತಾಸ್‌ನ ಇನೊ ಕಾನ್‌ ಖ್ಹಮಜ಼್ ಪಡಾಲಗ್ಯು, ಅಜು಼ ಇನಿ ಜೀಬ್‍ನಿ ಭಂದಣ್ ಛು಼ಟಿಗಿ, ಯೋ ಬರೋಬರ್‌ಥಿ ವಾತ್ ಬೋಲಾಲಗ್ಯೊ.
MAR 7:36 ತದೆ ಯೇಸುನೆ ಇವ್ಣುನ, “ಹಾ ಚಾ಼ಲ್ಯುತೆ ಬಾರೇಮ ಕಿನಾಬಿ ನಾ ಬೋಲ್‌ನು” ಕರಿ ಝೇತೈನ್‌ ಬೋಲ್ಯೊ; ತೋಬಿ ಇನೆ ಎತ್ರೆ ಝೇತೈನ್‌ ಬೋಲ್ಯೊತೋಬಿ, ಇನೇಥಿಬಿ ಜಾ಼ಖ್ಹತ್ ಇವ್ಣೆ ಫೈಲೈದಿದು.
MAR 7:37 ಅಜು಼ ಖ್ಹಮ್‌ಜಾ಼ವಾಳು ಖ್ಹಾರು ಘಣು ಅಶ್ಚರ್ಯ ಹುಯಿಜೈ಼ನ್‌, “ಯೇಸು ಖ್ಹಾರು ಅಛ್ಛು಼ಸ್ ಕರಾಸ್! ಭೈರು ಖ್ಹಾರಾನ ಕಾನ್‌ ಖ್ಹಮ್‌ಜಾ಼ವಾನಿಘೋಣಿ ಅಜು಼ ಮುಕ್ಕಾವ್ನ ಖ್ಹಾರು ವಾತೆ ಬೋಲಾನಿ ಘೋಣಿ ಕರಾಸ್!” ಕರಿ ಬೋಲಿಲಿದು.
MAR 8:1 ಯೋ ದನೂಮ ಪಾಛು಼ ಅದ್ಮಿನಿ ಭೀಡ್‌ ಭರೈನ್ ಆಯು, ಇವ್ಣುನ ಖಾಣನ ಶಾತ್ಬಿಕೊಂತೆ ದೇಖಿನ್, ಯೇಸುನೆ ಇನ ಶಿಷ್ಯರ್‌ನ ಖನ್ನೆ ಬುಲೈನ್,
MAR 8:2 “ಆ ಖ್ಹಾರ ಅದ್ಮಿನ ದೇಖಿನ್‌ ಮನ ಗೋರ್‌ಲಾಗಸ್‌, ಅವ್ಣೆ ಮಾರಕನ ಐನ್ ತೀನ್ ರೋಜ಼್ ಹುಯಿಗಾ; ಅವ್ಣುನ ಖಾಣನ ಶಾತ್ಬಿ ಕೊಯ್ನಿ.
MAR 8:3 ಅವ್ಣುನ ಅಮ್ಮಸ್ ಭುಕ್ಯು ಘರೆ ಮೋಕ್ಲಿದಿದೊತೊ, ವಾಟ್‌ಪರ್ ಭವ್‌ಳ್ಯಾಮಾರಿನ್ ರಡ್ಕಿಜಾ಼ಶೆ, ಶನಕತೊ ಅವ್ಣಾಮ ಥೋಡು ಜ಼ಣು ದೂರ್‌ಥು ಐರ‍್ಹೂಸ್‌ನಿ” ಕರಿ ಬೋಲ್ಯೊ.
MAR 8:4 ಅನ ಖ್ಹಮ್‌ಜಿನ್‌ ಇನ ಶಿಷ್ಯರ್‌ನೆ, “ಆ ಉಜ್ಜಾ಼ಡಿ ಝ಼ಗೋಮ ಅತ್ರಾಅದ್ಮಿನ ಬಶ್‌ ಹುವ್ವಾಯೆತ್ರು ಖಾಣು ಕಿಜ಼್ಜಾಥು ಲ್ಯಾವಾನ ಉಶೆ?” ಕರಿ ಬೋಲ್ಯು.
MAR 8:5 ಯೇಸುನೆ ಇವ್ಣುನ, “ತುಮಾರಕನ ಕೆತ್ರ ರೋಟಾ ಛಾ಼?” ಕರಿ ಫುಛಾ಼ಯೊ. ಇನ ಇವ್ಣೆ, “ಖ್ಹಾತ್ ರೋಟಾ ಛಾ಼” ಕರಿ ಬೋಲ್ಯು.
MAR 8:6 ತದೆ ಯೇಸುನೆ ಅದ್ಮಿನಿ ಝೂ಼ಂಡ್‌ನ ಜ಼ಮೀನ್‌ಪರ್ ಬೇಖ್ಹೊ ಕರಿ ಹುಕುಮ್‌ದಿದೊ. ಬಾದ್‌ಮ ಯೋ ಖ್ಹಾತ್ ರೋಟಾನ ಪಾಡಿಲೀನ್, ದೇವ್ನ ಧನ್ಯವಾದ್ ಕರೀನ್, ಯೋ ರೋಟಾನ ಖ್ಹಾರು ತೋಡಿನ್, “ಅಖ್ಖಾನ ವಾಟಪಾಡಿ ದೆವೊ” ಕರಿ ಇನ ಶಿಷ್ಯರ್‌ನ ದಿದೊ; ಶಿಷ್ಯರ್‌ನೆ ಇಮ್ಮಸ್ ಕರ‍್ಯು.
MAR 8:7 ಎತ್ರೇಸ್ ಕಾಹೆತೆ ಇವ್ಣಾಕನ ಥೋಡು ನ್ಹಾನಿಮಾಛ್ಲಿಬಿ ಥು. ಯೇಸುನೆ ಇನಾಬಿ ಪಾಡಿಲೀನ್ ದೇವ್ನ ಧನ್ಯವಾದ್‌ ಕರೀನ್, “ಅನಾಬಿ ವಾಟಪಾಡಿ ದೆವೊ” ಕರಿ ಶಿಷ್ಯರ್‌ನ ಬೋಲ್ಯೊ.
MAR 8:8 ಅದ್ಮಿಖ್ಹಾರು ಪೇಟ್‌ಭರೀನ್‌ ಖಾದು. ಬಾದ್‌ಮ ಶಿಷ್ಯರ್‌ನೆ ಉಭ್‌ರ‍್ಯುತೆ ಟುಕ್ಡಾವ್‌ನ ಜ಼ಮಾಕರ್ತಖ್ಹತರ್ ಖ್ಹಾತ್ ಟೋಕ್ರಾ ಭರಾಯ.
MAR 8:9 ಹಿಜ್ಜಾ಼ ಕಮ್‌ಶಿಕಮ್ ಚಾರ್ ಹಜಾ಼ರ್‌ ಅದ್ಮಿಥು. ಬಾದ್‌ಮ ಯೇಸುನೆ ಯೋ ಖ್ಹಾರ ಅದ್ಮಿನ ಮೋಕ್ಲಿದೀನ್,
MAR 8:10 ತದ್‌ನು-ತದೇಸ್‌ ಇನ ಶಿಷ್ಯರ್‌ನ ಬುಲೈಲಿನ್, ಡೋಣ್‌ಪರ್‌ ಚ಼ಢೀನ್ ದಲ್ಮನೂಥ ಕರಿ ತಬರ್‌ಖಾಮ ಚ಼ಲೆಗಯೊ.
MAR 8:11 ಬಾದ್‌ಮ ಫರಿಸಾಯರ್‌ವಾಳು ಥೋಡು ಅದ್ಮಿ ಯೇಸುಕನ ಐನ್, ಇನಜೋ಼ಡೆ ಅಬ್ಬಾಜ಼ಬ್ಬಿ ವಾತೆ ಬೋಲಾಲಗ್ಯು. ಇನಾಮ ಗಲ್ತಿ ಢೂಂಡಾನಖ್ಹಾಜೆ, “ತೂ ದೇವ್‍ಥಿ ಆಯೊ ಹುಯೊ ಕರಿ ಮಾಲುಮ್‌ ಪಡಾನಟೇಕೆ, ಆಕಾಶ್‌ಮ ಏಕ್‌ ಖ್ಹಣೇದ್‍ನು ಕಾಮ್ ಕರೀನ್ ವತಾಳ್” ಕರಿ ಬೋಲ್ಯು.
MAR 8:12 ಅನ ಖ್ಹಮ್‌ಜಿನ್‌ ಯೇಸುನೆ ಇನ ಮನ್‌ಮ ಜೋ಼ರೇಖ್ಹು ದಮ್‌ ಲೀಮ್ಹೇಲಿನ್‌, “ಆ ಪಿಳ್ಗೀನು ಅದ್ಮಿ ಅದ್ಭುತ್ ಕಾಮ್ ದೇಕ್ಣುಕರಿ ಶನ ಬೋಲಾಸ್ತೆ? ಮೇ ಖ್ಹಾಚಿಮಾಬಿ ಬೋಲುಸ್ಕಿ ಆ ಪಿಳ್ಗಿವಾಳ ಅದ್ಮಿನ ಶನು ಖ್ಹಣೇದ್‌ಬಿ ಮಳ್‌ಶೆಸ್‌ ಕೊಯ್ನಿ” ಕರಿ ಬೋಲ್ಯೊ.
MAR 8:13 ಯೇಸುನೆ ಇವ್ಣುನ ಮ್ಹೆಂದಿನ್, ಪಾಛೊ಼ಫರಿ ಡೋಣ್‌ ಚ಼ಢೀನ್‌, ದರ‍್ಯಾವ್‍ನ ಪಾರ್ಲಿ ಕನಾರೆ ಚ಼ಲೆಗಯೊ.
MAR 8:14 ಯೇಸುನ ಶಿಷ್ಯರ್‌ನೆ ಪೂರಯೆತ್ರು ರೋಟ ಪಳ್ಳಿಜಾ಼ವಾನು ಭೈಕಿ ಗಯುಥು, ಅಜು಼ ಡೋಣ್‌ಮ ಇವ್ಣಾಕನ ಎಕ್ಕಸ್ ರೋಟೊ ಥೊ.
MAR 8:15 ಯೇಸುನೆ ಇವ್ಣುನ, “ಜ಼ತನ್, ಫರಿಸಾಯರ್‌ನುಬಿ ಹೆರೋದನು ಶೋಡ ನಾಖ್ಯುಹುಯು ಆಟಾನಿ ಬಾರೇಮ ಬರೋಬರ್‌ಥಿ ದೇಖಿಲೆವೊ” ಕರಿ ಘಣು ಝೇತೈನ್‌ ಬೋಲ್ಯೊ.
MAR 8:16 ತದೆ ಇವ್ಣೆ, “ಅಪ್ಣಕನ ರೋಟೊಕೊಂತೆ ಇನಟೇಕೆ ಅಮ್ ಬೋಲ್ಯೊಕಿ ಶುಕಿ” ಕರಿ ಇವ್ಣ ಇವ್ಣಾಮ ಬೋಲಿಲಿದು.
MAR 8:17 ಯೇಸುನೆ ಇವ್ಣೆ ಬೋಲಿಲೆವ್‍ಕರಾತೆ ಮಾಲುಮ್‌ಕರಿನ್, “ರೋಟೊಕೊಂತೆ ಬಾರೇಮ ಶನ ಬೋಲಿಲೆವ್‍ಕರಾಸ್ತೆ? ಬಿಜೂ಼ಬಿ ಮಾಲುಮ್ ಪಡ್ಯುಕೊಯ್ನಿಕಿ ಶು? ತುಮಾರೊ ದಿಲ್‌ ಬಂಡೊ ಹುಯಿಗಯೊಕಿ ಶು?
MAR 8:18 ಡೋಳ ರ‍್ಹೀನ್‌ಬಿ ದೆಖಾವ ಕೊಯ್ನಿಕಿ ಶು? ಕಾನ್‌ ಛಾ಼ತೋಬಿ ಖ್ಹಮಜ಼್ ಪಡಾಕೊಯ್ನಿಕಿ ಶು? ತುಮೂನ ಯಾದ್ ಕೊಯ್ನಿಕಿ ಶು?
MAR 8:19 ಮೇ ಯೋ ಪಾಚ಼್ ರೋಟಾನ ತೋಡಿನ್ ಪಾಚ಼್ ಹಜಾ಼ರ್‌ ಅದ್ಮಿನ ದಿದೋತೆ ತದೆ ಉಭ್‌ರ‍್ಯುತೆ ಟುಕ್ಡಾವ್‍ನ ಕೆತ್ರ ಟೋಕ್ರಾಮ ಭರ‍್ಯಾಥ?” ಕರಿ ಪುಛಾ಼ವ್‌ತಖ್ಹತರ್‌, ಇವ್ಣೆ, “ಭಾರ ಟೋಕ್ರಾ” ಕರಿ ಬೋಲ್ಯು.
MAR 8:20 “ಅಜು಼ ಯೋ ಖ್ಹಾತ್ ರೋಟಾನ ತೋಡಿನ್ ಚಾರ್ ಹಜಾ಼ರ್‌ ಅದ್ಮಿನ ದಿದೋತೆ ತದೆ ಉಭ್‌ರ‍್ಯುತೆ ಟುಕ್ಡಾವ್‍ನ ಕೆತ್ರ ಟೋಕ್ರಾಮ ಭರ‍್ಯಾಥ?” ಕರಿ ಫುಛಾ಼ವ್‌ತಖ್ಹತರ್‌, ಇವ್ಣೆ, “ಖ್ಹಾತ್ ಟೋಕ್ರಾ” ಕರಿ ಬೋಲ್ಯು.
MAR 8:21 ತದೆ ಯೇಸುನೆ ಇವ್ಣುನ, “ತುಮೂನ ಬಿಜೂ಼ಬಿ ಮಾಲುಮ್ ಪಡ್ಯುಕೊಯ್ನಿಕಿ ಶು? ಕರಿ ಪುಛಾ಼ಯೊ.
MAR 8:22 ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಬೆತ್ಸಾಯಿದ ಗಾಮ್‌ನ ಆಯು. ಹಿಜ್ಜಾ಼ ಥೋಡು ಅದ್ಮಿ ಏಕ್‌ ಕಾಣಾನ ಯೇಸುಕನ ಬುಲೈಲಾಯಿನ್‌, “ಆ ಕಾಣಾನ ಛೀಮ್” ಕರಿ ಇನ ಗಿಂಗೈಲಿದು.
MAR 8:23 ಯೇಸುನೆ ಯೋ ಕಾಣಾನ ಹಾತ್ ಧರೀನ್ ಗಾಮ್‌ನ ಭಾರ್ ಬುಲೈಲೀಜೈ಼ನ್, ಇನ ಡೋಳಾಪರ್‌ ಥೂಕಿನ್, ಇನಾಪರ್‌ ಹಾತ್‌ ಮ್ಹೇಲೀನ್‌, “ತುನ ಶಾತ್‌ತೋಬಿ ದೆಖಾವಸ್ಕಿ ಶು?” ಕರಿ ಇನ ಪುಛಾ಼ಯೊ.
MAR 8:24 ಇನೆ ಮುಡ್‌ಕ್ಯು ಪಾಡಿ ದೇಖಿನ್‌, “ಮನ ಅದ್ಮಿಖ್ಹಾರು ದೆಖಾವಸ್, ಕತೋಬಿ ಇವ್ಣೆ ಝಾ಼ಡಾವ್‌ನಿಮತ್‌ ದೆಖಾವಸ್‌ತೋಬಿ ಹೈಕಡ್‌ ಹೀಕಡ್‌ ಫರುಕರಾಸ್” ಕರಿ ಬೋಲ್ಯು.
MAR 8:25 ತದೆ ಯೇಸುನೆ ಇನ ಡೋಳಾಪರ್‌ ಫಾಛೊ಼ ಇನೊ ಹಾತ್ ಮ್ಹೇಲ್ಯೊ. ಯೋ ಡೋಳ ಮ್ಹೇಲಿ ದೇಖಾಖ್ಹತರ್ ಇನ ಡೋಳ ಐಗಾಥ, ಅಜು಼ ಇನಅಖ್ಖು ಬರೋಬರ್‌ಥಿ ದೆಖಾಯು.
MAR 8:26 ಬಾದ್‌ಮ ಯೇಸುನೆ ಇನ, “ಗಾಮ್‌ನ ಮಹಿ ನಕೊ ಜಾ಼” ಕರಿ ಬೋಲಿನ್ ಇನ ಘರೆ ಮೋಕ್ಲಿದಿದೊ.
MAR 8:27 ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಫಿಲಿಪ್ಪನು ಕೈಸರೆಯ ಕರಿ ಖ್ಹಯೇರ‍್ನ ಖನ್ನೆನು ಖ್ಹಾರ ಗಾಮ್‌ನ ಜಾ಼ವ್ಣುಕರಿ ನಿಕ್‌ಳ್ಯಾ. ವಾಟ್‌ಪರ್ ಯೇಸುನೆ, “ಅದ್ಮಿಖ್ಹಾರು ಮೇ ಕೋಣ್ ಕರಿ ಬೋಲಾಸ್?” ಕರಿ ಇನ ಶಿಷ್ಯರ್‌ನ ಫುಛಾ಼ಯೊ.
MAR 8:28 ತದೆ ಇವ್ಣೆ, “ಥೋಡು ಜ಼ಣು ತುನ, ‘ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ’ ಕರಿ ಬೋಲಾಸ್, ಥೋಡು ಜ಼ಣು ತೂ ‘ಎಲೀಯ’ ಕರಿ ಬೋಲಾಸ್, ಅಜು಼ ಥೋಡು ಜ಼ಣು, ‘ತೂ ಪ್ರವಾದೀಮ ಏಕ್‌ ಜ಼ಣೊ ಹುಯಿರ‍್ಹೋಸ್’ ಕರಿ ಬೋಲಾಸ್” ಕರಿ ಬೋಲ್ಯು.
MAR 8:29 ಯೇಸುನೆ ಇವ್ಣುನ, “ತುಮೆ ಶಾತ್‌ ಬೋಲೋಸ್‌? ಮೇ ಕೋಣ್?” ಕರಿ ಫುಛಾ಼ವ್‌ತಖ್ಹತರ್‌, ಪೇತ್ರನೆ, “ತೂ ದೇವ್‍ಥಿ ಆವ್ಣುತೆ ಕ್ರಿಸ್ತ ಹುಯಿರ‍್ಹೋಸ್” ಕರಿ ಬೋಲ್ಯೊ.
MAR 8:30 ತದೆ ಯೇಸುನೆ, “ಮಾರಿ ಬಾರೇಮ ಕಿನಾಬಿ ನಾ ಬೋಲ್‌ನು” ಕರಿ ಇವ್ಣುನ ಝೇತೈನ್‌ ಬೋಲ್ಯೊ.
MAR 8:31 ಅಜು಼ ಯೇಸುನೆ, “ಅದ್ಮಿನೊ ಛಿಯ್ಯೊ ಘಣು ಲತಾಡ ಪಡ್ನು ಅಜು಼ ಶಾಣಾವ್‍ಥೀಬಿ, ಗಲ್‌ಢಯಾಜಕರ್‌ಥಿ, ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು ಇನ ಝಿಟ್ಕಾರಿನ್ ಧಕೇಲಿದಿಶೆ. ಅಜು಼ ಇನ ಮಾರಿನಾಕ್‌ಶೆ, ಮರಿಜಾ಼ವಾನ ಬಾದ್‌ಮ, ತೀನ್‌ರೋಜ಼್ ಕೇಡೆ ಯೋ ಪಾಛೊ಼ ಜಿವ್ತೊಹುಯಿನ್ ಉಠೀನ್ ಆವ್‌ಶೆ” ಕರಿ ಇನ ಶಿಷ್ಯರ್‌ನ ಬೋಲಿದ್ಯವಾನಿಕ್‍ಳ್ಯೊ.
MAR 8:32 ಯೇಸುನೆ ಆ ವಾತೆನ ಶಾತ್ಬಿ ಲಪಾಡ್ಯೊಕೊಂತೆ ಬೋಲ್ಯೊ. ತದೆ ಪೇತ್ರನೆ ಯೇಸುನ ಬಾಜು಼ಮ ಬುಲೈಲಿಜೈ಼ನ್ ಇನ, “ಅಮ್ ನಕೊ ಬೋಲ್” ಕರಿ ಜಿದ್‌ಕರ‍್ಯೊ.
MAR 8:33 ತದೆ ಯೇಸುನೆ ಪೀಠೆ ಫರೀನ್, ಇನ ಶಿಷ್ಯರ್‌ನ ದೇಖಿನ್‌, ಪೇತ್ರನ ಗುರ್‌ಕೈನ್, “ಶೈತಾನ್, ಮಾರ ಖ್ಹಾಮ್ಣೇಥೊ ಹಟಿಜಾ಼, ತಾರಿ ಸೋಚ್ ಅದ್ಮಿನಿ ಸೋಚಸ್‌ ಪಣ್ಕಿ ದೇವ್ನಿ ಸೋಚ಼್ ಕಾಹೆ” ಕರಿ ಬೋಲ್ಯೊ.
MAR 8:34 ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ ಅಜು಼ ಅದ್ಮಿನಿ ಝೂ಼ಂಡ್‌ನ ಇನಾಕನ ಬುಲಾಯೊ. ಇನೆ ಇವ್ಣುನ ಬೋಲ್ಯೋಕಿ, “ಕೋಣ್‌ತೋಬಿ ಮಾರ ಪೀಠೆ ಆವ್ಣುಕರಿ ಮನ್ ಉಶೇತೊ, ಇನು ಯೋ ಭೈಕಿನ್, ಇನಿ ಶಿಲ್‌ಬೇನ ಪಾಡಿಲೀನ್, ಮಾರ ಪೀಠೆ ಆವಾದೆ.
MAR 8:35 ಕೋಣ್‌ತೋಬಿ ಏಕ್‌ ಜ಼ಣು ಇನು ಜಾನ್‌ ಬಚಾ಼ಡಿಲೇವ್ಣು ಕರಿ ಕರ‍್ಯುತೊ, ಯೋ ಇನು ಜಾನ್‌ ಗುಮೈಲಿಶೆ; ಕತೋಬಿ ಮಾರಖ್ಹಾಜೆಬಿ ಅಜು಼ ದೇವ್ನಿ ಅಛ್ಛಿ ಖಬರ್‌ನಖ್ಹಾಜೆ, ಕೋಣ್‌ತೋಬಿ ಜಾನ್‌ ದಿದುತೊ, ಯೊ ಇನ ಬಚಾ಼ಡಿಲಿಶೆ.
MAR 8:36 ಏಕ್‌ ಅದ್ಮಿ ಹಿಡಿ ಜಗತ್‍ನಾಸ್ ಜೂತಿಲೀನ್ ಇನು ಜಾನ್‌ ಗುಮೈಲಿದುತೊ ಇನ ಶನು ಫಾಯಿದೊ? ಶನೀಸ್ ಫಾಯಿದೊ ಕೊಯ್ನಿ!
MAR 8:37 ಕೋಣ್‌ತೋಬಿ ಏಕ್‌ ಜ಼ಣು ಶಾತ್‌ತೋಬಿ ದೀನ್ ಇನೊ ಜಾನ್ನ ಪಾಛು಼ ಲಿಯ್ಯೆಜಾ಼ಯಿಕಿ ಶು?
MAR 8:38 ವ್ಯಭಿಚಾರಣಿ ಘೋಣಿ ಛಾ಼ತೆ, ಆ ಪಾಪ್‍ಭರಿ ಪಿಳ್ಗಿಮ ಕೋಣ್‌ತೋಬಿ, ಮಾರಖ್ಹಾಜೆ ಅಜು಼ ಮೇ ಬೋಲಿಶಿಕಾಡುತೆ ವಚನ್ನಖ್ಹಾಜೆಬಿ ಖ್ಹರ್‌ಮಾಯೂತೊ, ಅದ್ಮಿನೊ ಛಿಯ್ಯೋಬಿ ಇನ ಬಾನಿ ಶಕತ್‌ಥೀಬಿ ಅಜು಼ ಉಜಾ಼ಖ್ಹ್‌ಥಿ ಭರೈನ್, ಅದಿಕಾರ್‌ಥಿ ಪವಿತ್ರ ದೇವ್‌ದೂತರ್‌ನ ಜೋ಼ಡೆ ಆವಾನಿ ವಖ್ಹತ್‌ಮ, ಯೊ ಅದ್ಮಿನಿ ಬಾರೇಮ ಖ್ಹರ್‌ಮಾವ್‌ಶೆ” ಕರಿ ಬೋಲ್ಯೊ.
MAR 9:1 ಅಜು಼ ಯೇಸುನೆ ಇವ್ಣುನ, “ತುಮೂನ ಖ್ಹಾಚಾಮ ಬೋಲುಸ್ಕಿ, ಹಾ ಭಿಯ್ಯಾತೆ ತುಮಾರಾಮ ಥೋಡು ಜ಼ಣು ದೇವ್ನಿ ರಾಜ್ಯ ಶಕತ್‍ಥಿ ಆವಾನು ದೇಖಾತೋಡಿ ಮರ್‌ಶೆಸ್ ಕೊಯ್ನಿ” ಕರಿ ಬೋಲ್ಯೊ.
MAR 9:2 ಛೊ಼ ದನ್ನ ಬಾದ್‌ಮ ಯೇಸುನೆ ಪೇತ್ರ, ಯಾಕೋಬ ಬಿಜು಼ ಯೋಹಾನ್ನ ಕೇಡೆ ಬುಲೈಲಿನ್ ಊಚಾ಼ ಪಹಾಡ್‌ಪರ್ ಗಯೊ. ಹಿಜ್ಜಾ಼ ಇವ್ಣುನ ಮ್ಹೆಂದಿನ್ ಕೋಣ್‌ಬಿ ಕೋ ಥೂನಿ. ಇವ್ಣ ಡೋಳಾನ ಖ್ಹಾಮ್ಣೇಸ್, ಯೇಸುನು ರೂಪ್ ಬದ್ಲಿಗಯು.
MAR 9:3 ಯೇಸುನು ಪೆರ್ವಾಖ್ಹ್‌ಅಖ್ಖು ಧೋಳು ಫಟ್‌ ಹುಯಿನ್, ಝ಼ಮ್‌ಕಾಲಗ್ಯುಥು. ಜ಼ಮೀನ್‌ಪರ್ ಛಾ಼ತೆ ಕೆಹೊ ಧೋಬೀಬಿ ಎತ್ರೆ ಧೋಳು ಫಟ್‌ ಕರಾನ ಕೋ ಹುವ್ವಾನಿತೆ ಇಮ್‌ ಥು.
MAR 9:4 ತದೆ ಎಲೀಯಬಿ ಮೋಶೆ ಯೇಸುನ ಜೋ಼ಡೆ ವಾತೆ ಬೋಲುಕರಾನು ಯೋ ತೀನ್ ಶಿಷ್ಯರ್‌ನೆ ದೇಖ್ಯ.
MAR 9:5 ತದೆ ಪೇತ್ರನೆ ಯೇಸುನ, “ಗುರು, ಹಮೆ ಹಜ಼್ಜಸ್ ರ‍್ಹವಾನು ಅಛ್ಛು಼! ಹಮೆ ಹಜ್ಜಾ಼ ತೀನ್ ಡೇರಾ ಠೋಕೆಸ್, ಏಕ್‌ ತುನ, ಏಕ್‌ ಮೋಶೇನ ಅಜು಼ ಏಕ್‌ ಎಲೀಯನ” ಕರಿ ಬೋಲ್ಯೊ.
MAR 9:6 ಶಾತ್‌ ಬೋಲ್‌ನು ಕರಿ ಮಾಲುಮ್‌ ಕೋ ಪಡ್ಯುನಿತೆ ಇನಾಖ್ಹಾಜೆ ಪೇತ್ರನೆ ಅಮ್ ಬೋಲ್ಯೊತೆ. ಶನಕತೊ ಇವ್ಣೆ ಘಣು ಡರೀರ‍್ಹುಥು.
MAR 9:7 ಎತ್ರಾಸ್‌ಮ ವಾದ್‌ಳು ಐನ್ ಇವ್ಣಾಪರ್ ಢಪೈಗಯು. ಯೋ ವಾದ್ಳನ ಮಹಿಥು, “ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನಿ ವಾತೆನ ಖ್ಹಮ್‌ಜೊ಼!” ಕರಿ ಅವಾಜ಼್ ಆಯೊ.
MAR 9:8 ಫಕ್‌ ಕರಿ ಇವ್ಣೆ ಅಶ್‌ಪೀಶ್‌ ದೇಖಾಖ್ಹತರ್, ಇವ್ಣಿ ಜೋ಼ಡ್ಮ ಯೇಸುನ ಮ್ಹೆಂದಿನ್ ಬಿಜು಼ ಕೋಣ್‌ಬಿ ಕೋ ಥೂನಿ.
MAR 9:9 ಇವ್ಣೆ ಯೋ ಪಹಾಡ್‌ಪರ್‌ಥು ಉತ್ರಿನ್ ಆವಾನಿ ವಖ್ಹತ್‌ಮ ಯೇಸುನೆ ಇವ್ಣುನ, “ತುಮೆ ಹಮ್ಕೆ ದೇಖ್ಯಾತೆ ಇನ ಅದ್ಮಿನೊ ಛಿಯ್ಯೊ ಮರಿನ್‌ ಜಿವ್ತೊ ಹುಯಿನ್ ಉಠಿ ಆವಾತೋಡಿ, ಕಿನಾಬಿ ನಾ ಬೋಲ್‌ನು” ಕರಿ ಝೇತೈನ್‌ ಬೋಲ್ಯೊ.
MAR 9:10 ಇವ್ಣೆ ಯೋ ವಾತೆನ ಮಾನಿಗಯು, ಕತೋಬಿ, “ಮರಿನ್‌ ಜಿವ್ತೊಹುಯಿನ್ ಉಠಾನು ಕತೊ ಶಾತ್?” ಕರಿ ಇವ್ಣ-ಇವ್ಣ ಮಹಿಸ್ ವಾತೆ ಬೋಲಾಲಗ್ಯ.
MAR 9:11 ಅಜು಼ ಇವ್ಣೆ ಯೇಸುನ, “ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು ಎಲೀಯ ಅಗಾಡಿ ಆವಾನು ಜ಼ರೂರತ್ ಛಾ಼, ಕರಿ ಶನ ಬೋಲಾಸ್ತೆ?” ಕರಿ ಪುಛಾ಼ಯ.
MAR 9:12 ತದೆ ಯೇಸುನೆ, “ಎಲೀಯ ಪಹಿಲೆ ಐನ್ ಖ್ಹಾರು ಖ್ಹವಾರ್‌ಶೇತೆ ಖ್ಹಾಚಸ್. ಕತೋಬಿ ಅದ್ಮಿನೊ ಛಿಯ್ಯಾನಿ ಬಾರೇಮ, “ಯೋ ಘಣು ಲತಾಡ ಪಡೀನ್ ಅದ್ಮಿಥಿ ಧಕೇಲೈಜಾ಼ಶೆ ಕರಿ ಲೀಖೈರ‍್ಹೂಸ್‌ನಿ, ಆ ಕಿಮ್?
MAR 9:13 ಕತೋಬಿ ಮೇ ತುಮೂನ ಬೋಲೂಸ್ಕಿ, ಎಲೀಯ ಆಯೊ ಅಜು಼ ಇನಿ ಬಾರೇಮ ವಾಕ್ಯಾಮ ಲೀಖೈರ‍್ಹೂತೆ ಇಮ್‌ ಅದ್ಮಿಖ್ಹಾರು ಇವ್ಣ ಮನ್‌ಮ ಆಯುತೆ ಇಮ್‌ ಇನ ಖ್ಹತೈನ್ ಮಾರ‍್ಯು” ಕರಿ ಬೋಲ್ಯೊ.
MAR 9:14 ಬಾದ್‌ಮ ಯೇಸುಬಿ ಇನ ತೀನ್ ಶಿಷ್ಯರ್‌, ಉಭ್‌ರ‍್ಯಾತೆ ಬಿಜ಼ ಶಿಷ್ಯರ್‌ಕನ ಐನ್, ಇವ್ಣ ಅಶ್‌ಪಿಶ್ ಅದ್ಮಿನಿ ಮೋಟಿ ಭೀಡ್‌ ಭರೈರ‍್ಹುತೆ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಇವ್ಣ ಜೋ಼ಡೆ ಅಬ್ಬಾಜ಼ಬ್ಬಿ ವಾತೆಕರುರಾತೆ ದೇಖ್ಯ.
MAR 9:15 ಅಜು಼ ಇವ್ಣೆಖ್ಹಾರು ಯೇಸುನ ದೇಖಿನ್‌, ಘಣು ಆಶ್ಚರ್ಯಖಾದು, ಅಜು಼ ಇನಾಕನ ನಾಶಿ ಆಯಿ ಮಳಿನ್ ಖ್ಹಲಾಮ್ ಕರ‍್ಯು.
MAR 9:16 ತದೆ ಯೇಸುನೆ ಇನ ಶಿಷ್ಯರ್‌ನ, “ಇವ್ಣ ಜೋ಼ಡೆ ಶಾತ್‌ ಅಬ್ಬಾಜ಼ಬ್ಬಿ ವಾತೆ ಕರುಕರ್ತಥಾತೆ?” ಕರಿ ಪುಛಾ಼ಯೊ.
MAR 9:17 ತದೆ ಯೋ ಝೂ಼ಂಡ್‌ಮಾಥು ಏಕ್‌ ಜ಼ಣು, “ಗುರು, ಮಾರ ಛಿಯ್ಯಾನ ಏಕ್‌ ಮುಕ್ಕೊ ಭೂತ್‌ ಧರಿರಾಖ್ಯುಸ್, ಇನಾಖ್ಹಾಜೆ ತಾರಕನ ಬುಲೈಲಾಯೊಥೊ.
MAR 9:18 ಯೋ ಭೂತ್‌ ಕದೆ ಇನಾಪರ್‌ ಆಯುತೋಬಿ, ಇನ ಹೇಟ್‌ ರಡ್‌ಕೈದೇಸ್‌, ಬಿಜು಼ ಯೋ ಮ್ಹೋಡಾವಾಟೆ ಜ಼ಲ್‌ಭು ಕಾಡ್ತೊಹುಯಿನ್‌, ಕರ್‌-ಕರ್‌ ದಾತ್‌ ಚಾ಼ವ್ತೊಹುಯಿನ್‌ ಅಕ್‌ಡೈಜಾ಼ಸ್‌. ಇನಾಮಾಥು ಯೋ ಭೂತ್‌ನ ಕಾಡೊ ಕರಿ ತಾರ ಶಿಷ್ಯರ್‌ನ ಬೋಲಿಲಿದೊ, ಕತೋಬಿ ಇವ್ಣ ಹಾತೆ ಕೋಹುಯುನಿ” ಕರಿ ಬೋಲ್ಯು.
MAR 9:19 ತದೆ ಯೇಸುನೆ “ಏ ವಿಶ್ವಾಸ್‌ಕೊಂತೆ ಪಿಳ್ಗಿಯೆ! ಮೇ ಬಿಜು಼ ಕೆತ್ರ ದನ್ ತುಮಾರ ಜೋ಼ಡೆ ರ‍್ಹೇಣು? ಅಜು಼ ಕೆತ್ರ ದನ್ ತುಮೂನ ಖ್ಹಮಾಳ್‌ಣು? ಇನ ಮಾರಾಕನ ಬುಲೈಲ್ಯಾವೊ” ಕರಿ ಬೋಲ್ಯೊ.
MAR 9:20 ಇವ್ಣೆ ಇನ ಯೇಸುಕನ ಬುಲೈಲಾಯು. ಯೇಸುನ ದೇಕ್ತಾಸ್‌ನ, ಯೋ ಭೂತ್‌ ಯೋ ಛೋ಼ಕ್ರಾನ ಧಡಾಶ ಮರಾವಲಗ್ಯು, ಯೋ ಛೋ಼ಕ್ರು ಜ಼ಮೀನ್‌ಪರ್ ಪಡೀನ್ ಮ್ಹೋಡಾವಾಟೆ ಜ಼ಲ್‌ಭು ಕಾಡ್ತುಹುಯಿನ್‌ ತರಪ್‌ಢಾಲಗ್ಯು.
MAR 9:21 ಯೇಸು ಯೋ ಛೋ಼ಕ್ರಾನ ಬಾನ, “ಅನ ಆ ಭೂತ್‌ ಧರೀನ್ ಕೆತ್ರ ದನ್ ಹುಯ?” ಕರಿ ಪುಛಾ಼ವಖ್ಹತರ್, ಇನೆ, “ಅಡ್ಡಾಣಿಪರಸ್‌ ಆಯುಥು;
MAR 9:22 ಅಜು಼ ಅನ ಮಾರ‍್ನು ಕರಿ ಘಣಿ ಹಲ್ಲ ಆಗ್‌ಮಾಬಿ, ಪಾಣಿಮಾಬಿ ನಾಕ್ತುಥು. ತಾರ ಹಾತೆ ಶಾತ್ತೊಬಿ ಹೋತು ಉಶೇತೊ! ಹಮಾರಪರ್ ಗೋರ್‌ಕರೀನ್, ಮದತ್ ಕರ್‌” ಕರಿ ಬೋಲ್ಯು.
MAR 9:23 ಯೇಸುನೆ ಇನ, “ತಾರ ಹಾತೆ ಹೋತು ಉಶೇತೊ! ಕರಿ ಬೋಲಾಸ್ ಕಿಶು? ನಂಬವಾಳಾನ ಖ್ಹಾರುಸ್‌ ಹುವಾಸ್” ಕರಿ ಬೋಲ್ಯೊ.
MAR 9:24 ಇಮ್‌ ಬೋಲ್ತಾಸ್‌ನ ಯೋ ಛೋ಼ಕ್ರಾನ ಬಾನೆ, “ನಂಬುಸ್‌, ಮಾರಿ ವಿಶ್ವಾಸ್‌ಕಮ್‌ ಉಶೆತೋಬಿ, ಮದತ್‌ಕರ್‌” ಕರಿ ಚಿಕ್ರಿನ್ ಬೋಲ್ಯೊ.
MAR 9:25 ತದೆ ಯೇಸುನೆ ಬಿಜೂ಼ಬಿ ಅದ್ಮಿನಿ ಝೂ಼ಂಡ್‌ ಇವ್ಣ ಭಣಿ ನಾಶಿ ಉಳ್ಯಾವತೆ ದೇಖಿನ್‌, ಯೋ ಭೂತ್‌ನ ಗುರ್‌ಕೈನ್, “ಏಯ್, ಭೈರಾ ಮುಕ್ಕಾಭೂತ್‌, ಅನ ಮ್ಹೆಂದಿನ್ ಭಾರ್‌ನಿಕಳ್‌, ಪಾಛು಼ ಅನ ನಾ ಧರ್‌ನು! ಕರಿ ಮೇ ತುನ ಹುಕುಮ್‌ ದೆವ್‌ಕರುಸ್” ಕರಿ ಬೋಲ್ಯೊ.
MAR 9:26 ತದೆ ಯೋ ಭೂತ್‌ ಚಿಕ್ರಾಣ್ ಮ್ಹೇಲಿನ್, ಯೋ ಛೋ಼ಕ್ರಾನ ಧಡಾಶ ಮರೈನ್, ಇನ ಮಹಿತು ಭಾರ್‌ ನಿಕ್ಳಿಗಯು. ತದೆ ಯೋ ಛೋ಼ಕ್ರು ಮರ‍್ಯಾಹುಯಾನಿಘೋಣಿ ಪಡ್ಯುಥೂತೆ ದೇಖಿನ್‌ ಘಣ ಅದ್ಮಿನೆ, “ಆ ಮರಿಗಯು!” ಕರಿ ಬೋಲ್ಯು.
MAR 9:27 ಕತೋಬಿ ಯೇಸುನೆ ಯೋ ಛೋ಼ಕ್ರಾನ ಹಾತ್‌ ಧರಿನ್ ಉಠಾಡ್‌ತಾಖ್ಹತರ್‌, ಯೋ ಉಠಿ ಭೀರಿಗಯು.
MAR 9:28 ಯೇಸು ಘರ್‌ಮ ಆವಾದಿನ್, ಎಕ್ಲೋಸ್ ರ‍್ಹಾವಾನಿ ವಖ್ಹತ್‌ಮ, ಇನ ಶಿಷ್ಯರ್‌ನೆ, “ಯೋ ಭೂತ್‌ನ ಕಾಡಾನ ಹಮಾರೇಥಿ ಶನ ಕೋ ಹುಯೂನಿ?” ಕರಿ ಯೇಸುನ ಪುಛಾ಼ಯು.
MAR 9:29 ತದೆ ಯೇಸುನೆ, “ಆ ಜಾ಼ತ್ನು ಭೂತ್‌ನ, ಪ್ರಾರ್ಥನೆಥೀಸ್ ಪಣ್ಕಿ ಬಿಜು಼ ಶನೇಥೀಬಿ ಕಾಡಾನ ಕೋ ಹುವಾನಿ” ಕರಿ ಬೋಲ್ಯೊ.
MAR 9:30 ಯೇಸುಬಿ ಇನು ಶಿಷ್ಯರ್‌ ಹಿಜ್ಜಾ಼ಥು ನಿಕ್ಳಿನ್ ಗಲಿಲಾಯ ತಬರ್‌ಖಾಮಾಕರಿ ವಳ್ಯಜಾ಼ತಾಥ. ಯೋ ಕಿಜ಼್ಜಾ ಛಾ಼ ಕರಿ ಕಿನಾಬಿ ನಾ ಮಾಲುಮ್‌ಪಡ್ಣು ಕರಿ ಯೇಸುನ ದಿಲ್ಮ ಥು.
MAR 9:31 ಶನಕತೊ ಯೇಸು ಇನ ಶಿಷ್ಯರ್‌ನ ಬೋಲಿ ದೇತೊಹುಯಿನ್, “ಅದ್ಮಿನ ಛಿಯ್ಯಾನ, ಇನ ಮಾರಿನಾಖವಾಳಾನ ಹಾತ್‌ಮ ದೆವೈಜಾಶೆ, ಇವ್ಣೆ ಇನ ಮಾರಿನಾಕ್‌ಶೆ. ಕತೋಬಿ ಮರೀನ್ ತೀನ್ ರೋಜ಼್ ಕೇಡೆ, ಯೋ ಪಾಛೊ಼ ಜಿವ್ತೊ ಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
MAR 9:32 ಕತೋಬಿ ಇವ್ಣೆ ಯೋ ವಾತೆನ ಪರ್‌ಖ್ಯುಕೊಯ್ನಿ, ಅಜು಼ ಇನಿ ಬಾರೇಮ ಯೇಸುನ ಪುಛಾ಼ವನಾಬಿ ಡರಿಗಯು.
MAR 9:33 ಇವ್ಣೆ ಕಪೆರ್ನೌಮ್ ಗಾಮ್ಮ ಆಯ. ಅಜು಼ ಯೇಸು ಘರ್‌ಮ ರ‍್ಹವಾನಿ ವಖ್ಹತ್‌ಮ, ಇನ ಶಿಷ್ಯರ್‌ನ, “ತುಮೆ ವಾಟ್‌ಪರ್ ತುಮಾರ ತುಮಾರಸ್‌ಮ ಶಾತ್ ಅಬ್ಬಾಜ಼ಬ್ಬಿ ವಾತೆ ಕರುಕರ್ತಥಾತೆ?” ಕರಿ ಫುಛಾ಼ಯೊ.
MAR 9:34 ಕತೋಬಿ ಇವ್ಣೆ ಜವಾಬ್‌ ಕೋ ದಿದೂನಿ, ಶನಕತೊ ಇವ್ಣೆ ವಾಟ್‌ಪರ್, ಅಖ್ಖೇಥಿ ಮೋಟೊ ಕೋಣ್ ಕರಿ ಇವ್ಣ-ಇವ್ಣಾಮ ಅಬ್ಬಾಜ಼ಬ್ಬಿ ವಾತೆ ಕರುಕರ್ತಥ.
MAR 9:35 ಯೇಸು ಬೇಶಿನ್, ಇನ ಭಾರ‍ಜ಼ಣ ಶಿಷ್ಯರ್‌ನ ಬುಲೈನ್ ಇವ್ಣುನ, “ತುಮಾರಮ ಕೋಣ್‌ತೋಬಿ ಅಖ್ಖಾಮ ಅಗಾಡಿ ರ‍್ಹೇವ್ಣುಕರಿ ಉಶೇತೊ ಇನು ಯೋ ಅಖ್ಖೇಥಿ ಪಾಛ಼್‌ಲ್ಯೊ ಹೋಣು ಅಜು಼ ಅಖ್ಖಾನೊ ಸೇವಕ್ ಹುಯಿರ‍್ಹೇವ್ಣು” ಕರಿ ಬೋಲ್ಯೊ.
MAR 9:36 ಅಜು಼ ಇನೆ ಏಕ್‌ ಅಡ್ಡಾಣಿ ಲಡ್ಕಾನ ಬುಲೈನ್ ಶಿಷ್ಯರ್‌ನ ಇಚ಼್‌ಮ ಭೀರಖಾಡಿನ್‌, ಇನ ಬಥೈನ್‌ ಇವ್ಣುನ,
MAR 9:37 “ಕೋಣ್‌ತೋಬಿ ಮಾರ ನಾಮ್‌ಪರ್‌ ಅಮ್ನ ಅಡ್ಡಾಣಿ ಲಡ್ಕಾಮ ಏಕ್‌ನ ಮಳೈಲಿದೊತೊ, ಯೋ ಮನ ಮಳೈ ಲ್ಯಾವದಾಖ್ಹಲ್, ಅಜು಼ ಕೋಣ್‌ತೋಬಿ ಮನ ಮಳೈಲಿದೊತೊ, ಮನಾಸ್ ಕಾಹೆತೆ ಮನ ಮೋಕ್‌ಲ್ಯೊತೆ ಇನಾಬಿ ಮಳೈಲ್ಯಾವದಾಖ್ಹಲ್‌” ಕರಿ ಬೋಲ್ಯೊ.
MAR 9:38 ತದೆ ಯೋಹಾನನೆ ಯೇಸುನ, “ಗುರು, ಕೋಣ್‌ಕಿ ಏಕ್‌ ಜ಼ಣು ತಾರು ನಾಮ್ ಬೋಲಿನ್ ಭೂತ್ ನಖ್ಹಾಡುಕರ್ತುಥೂತೆ ಹಮೆ ದೇಖಿನ್, ಯೋ ಅಪ್ಣ ಭಣಿವಾಳು ಕಾಹೆತೆ ಇನಖ್ಹಾಜೆ, ಇನ ಭಿರಾಕಡ್, ಕರಿ ಬೋಲ್ಯ” ಕರಿ ಬೋಲ್ಯೊ.
MAR 9:39 ತದೆ ಯೇಸುನೆ, “ಇನ ನಕೊ ಭಿರಾಖಡೊ, ಮಾರ ನಾಮ್‌ಪರ್‌ ಅದ್ಭುತ್‌ ಕರೀನ್ ಏಕ್‌ದಮ್ ಮಾರಿ ಬಾರೇಮ ಖರಾಬ್ ಬೋಲಾನ ಕಿನಾಬಿ ಕೋ ಹುವಾನಿ.
MAR 9:40 ಅಪ್ಣಪರ್ ದಾವೊ ಕರಾಕೊಂತೆ ಇವ್ಣೆ ಅಪ್ಣಾಸ್‌ ಭಣಿವಾಳ ಹುಯಿರ‍್ಹುಸ್‍.
MAR 9:41 ಮೇ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಕ್ರಿಸ್ತಭಣಿವಾಳ ಕರಿ, ಕೋಣ್‌ತೋಬಿ ಏಕ್‍ಜ಼ಣೊ ತುಮೂನ ಏಕ್‌ ತಾಂಬ್ಯೊ ಪಾಣಿ ಪಿಯ್ಯಾನು ದಿದುತೋಬಿ, ಇವ್ಣುನ ಮಳ್‌ಶೆತೆ ಇನಾಮ್ ಛು಼ಕ್‌ಶೆಸ್‌ ಕೊಯ್ನಿ”.
MAR 9:42 ಅಜು಼ ಕೋಣ್‌ತೋಬಿ ಮನ ನಂಬವಾಳ ಆ ನ್ಹಾನಾವ್‍ಮ ಏಕ್‌ನಿ ವಿಶ್ವಾಸ್ ಮಾರಪರ್‌ಥು ತುಟಿ ಜಾ಼ವಾನಿಘೋಣಿ ಕರ‍್ಯೂತೊ, ಯೋ ಅದ್ಮಿನ ಘಲೆಂಡ ಕೇಡೆ ಮೋಟೊ ಘಟ್ಟಿನೊ ಬಂಡೊ ಭಾಂದೀನ್‌ ದರ‍್ಯಾವ್‌ಮ ನಾಖಿ ದಿದುತೋಬಿ ಇನ ಅಛ್ಛು಼ಸ್.
MAR 9:43 ಅತ್ರೇಸ್ ಕಾಹೆತೆ, ತಾರೊ ಹಾತ್ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ ಇನ ಕತ್ರಿ ನಾಖಿದೆ;
MAR 9:44 ಬೇ ಹಾತ್‌ ರಾಖಿನ್ ಕದೇಬಿ ಉಝಾ಼ವಾನಿ ಕಾಹೆತೆ ಆಗ್ ಹುಯಿರ‍್ಹೀತೆ ನರಕ್ಮ ಪಡಾಥೀಬಿ, ಹಾತ್‌ಕೊಂತೆ ಹರ್‌ಹಮೇಶ ರ‍್ಹವಾನಿ ಜಿ಼ಂದ್‌ಗಿ ಜಾ಼ವಾನು ತುನ ಅಶೇಲ್.
MAR 9:45 ಅಜು಼ ತಾರೊ ಗೋಡೊ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ ಇನ ಕತ್ರಿ ನಾಖಿದೆ;
MAR 9:46 ಬೇ ಗೋಡ ರ‍್ಹೀನ್ ನರಕ್ಮ ಪಡಾಥೀಬಿ ಲಂಗ್ಡೊ ಹುಯಿನ್ ಹರ್‌ಹಮೇಶ ರ‍್ಹವಾನಿ ಜಿ಼ಂದ್‌ಗೀಮ ಜಾ಼ವಾನು ತುನ ಅಶೇಲ್.
MAR 9:47 ತಾರೊ ಡೋಳೊ ತುನ ಪಾಪ್‌ಮ ಖ್ಹಪ್‌ಡವಾನು ಉಶೇತೊ, ಇನ ಕಚ಼್‌ಕೋರಿ ಕಾಡಿ ಫೇಕಿದೆ! ಬೇ ಡೋಳ ರ‍್ಹೀನ್ ನರಕ್ಮ ಪಡಾಥೀಬಿ ಎಕ್ಕಸ್ ಡೋಳೊ ರ‍್ಹೀನ್ ದೇವ್ನಿ ರಾಜ್ಯಮ ಜಾ಼ವಾನು ತುನ ಅಶೇಲ್.
MAR 9:48 ನರಕ್ಮ ಇವ್ಣುನ ಕಲ್ಡಾವಾಳೊ ಕೀಡೊ ಮರ್‌ಶೆಸ್ ಕೊಯ್ನಿ, ಇವ್ಣುನ ಬಳಾತೆ ಆಗ್ ಉಝಾ಼ವ್‌ಶೆಸ್‌ ಕೊಯ್ನಿ.
MAR 9:49 ಬಲಿ ದೆವಾನು ರಾಛಾ಼ನ ಮೀಟ್‌ಥಿ ಪಾಕ್ ಕರಾತೆ ಇಮ್‌, ಹರೇಕ್ ಅದ್ಮಿ ಆಗ್‌ಥಿ ಪಾಕ್‌ ಉಶೆ.
MAR 9:50 ಮೀಟ್‌ ಏಕ್‌ ಅಛ್ಛು಼ ರಾಛು಼ಸ್; ಕತೋಬಿ ಮೀಟಸ್‌ ಫಿಕ್ಕು ಹುಯಿಗುತೊ, ಇನ ತುಮೆ ಕಿಮ್ ಮೀಟ್‌ಣು ಲಜ಼ತ್‌ ದ್ಯವಾನ ಉಶೆ? ತುಮಾರಮ ಮೀಟ್‍ನಿಘೋಣಿ ಏಕ್‌ಥಿ-ಏಕ್‌ ಮಾನಿರ‍್ಹವಾಳಹುಯಿನ್ ಸಮಾಧಾನ್‌ಥಿ ರ‍್ಹವೊ.
MAR 10:1 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಯೂದಾಯ ತಬರ್‌ಖಾನ ಗಯೊ, ಅಜು಼ ಯೊರ್ದನ್‌ ನದ್ದಿನು ಬಿಜೇಕ್‌ ಆಡಿನು ತಬರ್‌ಖಭಣಿ ಆಯೊ. ಹಿಜ್ಜಾ಼ ಅದ್ಮಿನಿ ಝೂ಼ಂಡೆ ಇನಾಕನ ಐನ್ ಭರಾವಖ್ಹತರ್, ಯೋ ಕದೇಬಿ ಕರ್ತೊಥೋತೆ ಇಮ್ಮಸ್ ವಚನ್ ಬೋಲಿದಿದೊ.
MAR 10:2 ತದೆ ಫರಿಸಾಯರ್‌ವಾಳು ಯೇಸುಕನ ಆಯಿನ್‌ ಇನ ಫಖ್ಹಾವ್ಣು ಕರಿ ಕರ‍್ಯು. ತದೆ ಇವ್ಣೆ ಇನ, “ಅಪ್ಣಿ ಖಾನುಲ್‌ಮ, ಕೋಣ್‌ತೋಬಿ ಏಕ್‌ ಜ಼ಣೊ ಇನಿ ಬಾವಣ್ಣ ಮ್ಹೇಲಿದ್ಯವಾನು ಬರೊಬರ್‌ಕಿ ಶು? ಕರಿ ಪುಛಾ಼ಯು.
MAR 10:3 ಅನ ಖ್ಹಮ್‌ಜಿನ್‌ ಯೇಸುನೆ, “ಮೋಶೆನೆ ತುಮೂನ ಶಾತ್ ಹುಕುಮ್‌ ದೀರಾಖ್ಯೊಸ್?” ಕರಿ ಪುಛಾ಼ಯೊ.
MAR 10:4 ತದೆ ಇವ್ಣೆ, ತಲಾಕ್‌ನು ಕಾಗತ್‌ ಲೀಖಿದೀನ್‌, ಇನಿ ಬಾವಣ್ಣ ಮ್ಹೇಲಿದಿಯ್ಯೆಜಾ಼ಯ್ ಕರಿ ಮೋಶೇನೆ ಹುಕುಮ್‌ ದೀರಾಖ್ಯೊಸ್” ಕರಿ ಬೋಲ್ಯು.
MAR 10:5 ತದೆ ಯೇಸುನೆ ಇವ್ಣುನ, “ತುಮಾರ ಮೊಂಡಿದಿಲ್‌ನ ದೇಖಿನ್, ಮೋಶೆನೆ ಅಮ್ನಿ ಹುಕುಮ್ ದೀರಾಖ್ಯೋಸ್ತೆ.
MAR 10:6 ದೇವ್‌ನೇತೊ ಖ್ಹಾರು ಉಬ್‌ಜಾ಼ಯೋತೆ ತಪ್‌ಥೋಸ್‌, ‘ಅದ್ಮಿನ ಪರ್‌ಖ್ಹೊ ತಯೇಡಕರಿ ಬಣಾಯೊ,
MAR 10:7 ಅನಖ್ಹಾಜೆಸ್ ಪರ್ಖ್ಹೊ ಇನ ಆಯ-ಬಾನ ಮ್ಹೇಲಿನ್, ಇನಿ ಬಾವಣ್‍ಥಿ ಮಳಾಸ್, ಅಜು಼ ಇವ್ಣೆ ಭೇ ಜ಼ಣ ಎಕ್ಕಸ್ ಶರೀರ್ ಹುಯಿಜಾ಼ಸ್’ ಕರಿ ಲೀಖೈರ‍್ಹುಸ್.
MAR 10:8 ಅಮ್ ಬಿಜು಼ ಖ್ಹಾಮ್ಣೆ ಇವ್ಣೆ ಬೇಜ಼ಣ ಕಾಹೆ, ಎಕ್ಕಸ್ ಶರೀರ್‌ ಹುಯಿರ‍್ಹಾಸ್.
MAR 10:9 ಇನಾಖ್ಹಾಜೆ ದೇವ್ನೆ ಮಳಾಯಹುಯಾನ, ಅದ್ಮಿ ಅಲಕ್‌ನಾಸ್ ಕರ‍್ನು” ಕರಿ ಬೋಲ್ಯೊ.
MAR 10:10 ಇವ್ಣೆ ಘರ್‌ಮ ಆವಾದಿನ್, ಶಿಷ್ಯರ್‌ನೆ ಅನಿಸ್‌ ಬಾರೇಮ ಯೇಸುನ ಪುಛಾ಼ಯು.
MAR 10:11 ತದೆ ಯೇಸುನೆ ಇವ್ಣುನ, “ಕೋಣ್‌ತೋಬಿ ಏಕ್‌ ಜ಼ಣೊ ಇನಿ ಬಾವಣ್ಣ ಮ್ಹೇಲಿನ್, ಬಿಜೇಕ್‌ ಜ಼ಣಿನ ವ್ಯಹಾ ಕರೀಲಿದೊತೊ ಯೋ ಶೊಂತ್‌ ಬಾವಣ್ಣ ಧೋಕೊ ದ್ಯಾವಾಳೊ ಹುಯಿನ್, ವ್ಯಬಿಚಾರ್ ಕರಾವಾಳೊ ಹುಯಿರ‍್ಹೋಸ್.
MAR 10:12 ಇಮ್ಮಸ್ ಏಕ್‌ ಬಾವಣ್ ಇನ ಬಾವ್ರಿನ ಮ್ಹೇಲಿನ್, ಬಿಜೇಕ್ ಜ಼ಣಾನ ಕರೀಲಿದೀತೊ ಯೋಬಿ ವ್ಯಬಿಚಾರ್ ಕರಾವಾಳಿ ಹುಯಿರ‍್ಹೀಸ್” ಕರಿ ಬೋಲ್ಯೊ.
MAR 10:13 ಬಾದ್‌ಮ ಥೋಡು ಜ಼ಣು ಅಡ್ಡಾಣಿ ಲಾಡ್ಕಾವ್‍ಪರ್‌ ಯೇಸುನೊ ಹಾತ್ ಮ್ಹೆಲಾವ್ಣು ಕರಿ ಇನಾಕನ ಲಾಯು, ತದೆ ಇನ ಶಿಷ್ಯರ್‌ನೆ ಇವ್ಣುನ ಗುರ್‌ಕಾಯು.
MAR 10:14 ಯೇಸುನೆ ಅನ ದೇಖಿನ್‌, ಖೀಜ಼್ ಖೈನ್, ಇನ ಶಿಷ್ಯರ್‌ನ, “ಅಡ್ಡಾಣಿ ಲಡ್ಕಾವ್ನ ಮಾರ ಖನ್ನೆ ಆವಾನ ಮ್ಹೇಲೊ; ಇವ್ಣುನ ಭೀರಾಕೊ ನಕೊ, ಶನಕತೊ ದೇವ್‌ನು ರಾಜ್ಯ ಅಮ್‌ನಾಸ್‌ವಾಳಾನು.
MAR 10:15 ತುಮೂನ ಖ್ಹಾಚಮಾಬಿ ಬೋಲುಸ್ಕಿ ಕೋಣ್‌ತೋಬಿ ಅಡ್ಡಾಣಿ ಲಡ್ಕಾನಿ ಘೋಣಿ ದೇವ್ನಿ ರಾಜ್ಯನ ನಾ ಮಾನ್ಯೂತೊ, ಯೋ ದೇವ್ನಿ ರಾಜ್ಯಮ ಜಾ಼ಶೇಸ್ ಕೊಯ್ನಿ”.
MAR 10:16 ಅಮ್ ಬೋಲೀನ್‌ ಯೋ ಲಡ್ಕಾವ್ನ ಬಥೈನ್, ಇವ್ಣಾಪರ್ ಹಾತ್‌ ಮ್ಹೇಲಿನ್, ಆಶೀರ್ವಾದ್‌ ಕರ‍್ಯೊ.
MAR 10:17 ಯೇಸು ನಿಕ್ಳಿನ್‌ ವಾಟ್‌ ಧರೀನ್ ಜಾ಼ವಾನಿ ವಖ್ಹತ್‌ಮ, ಏಕ್‌ ಜ಼ಣೊ ನಾಖ್ಹ್‌ತೊ ಐನ್, ಇನ ಖ್ಹಾಮೆ ಗುಡ್‍ಘ್ಯ ಟೇಕಿನ್, “ಅಛ್ಛೊ಼ ಗುರು, ಹಮೇಶಾನಿ ಜಿ಼ಂದ್‌ಗಿ ಮಳ್‌ಣುಕತೊ, ಮೇ ಶಾತ್‌ ಕರ‍್ನು?” ಕರಿ ಫುಛಾ಼ಯೊ.
MAR 10:18 ತದೆ ಯೇಸುನೆ ಇನ, “ಮನ ಅಛ್ಛೊ಼ಕರಿ ಶನ ಬೋಲಾಸ್ತೆ? ದೇವ್ನ ಮ್ಹೇಲೀನ್‌ ಬಿಜು಼ ಕೋಣ್‌ಬಿ ಅಛ್ಛು಼ ಕಾಹೆ.
MAR 10:19 ‘ಖೂನಿ ನಾಹೋಣು; ವ್ಯಬಿಚಾರ್ ನಾ ಕರ‍್ನು; ಚೋ಼ರಿ ನಾ ಕರ‍್ನು; ಬಿಜಾ಼ಪರ್ ಝೂ಼ಟಿ ಇಂಜಾ಼ಮ್ ನಾ ಲಗಾಡ್‌ಣು; ಕಿನಾಬಿ ಠಗಾವ಼್ಣು ನಾ; ಆಯ-ಬಾನ ಮರ್ಯಾದಿ ದೇವ್ಣು ಕರಿ ದೇವ್ನಿ ಹುಕುಮ್‌ ಖ್ಹಾರಿ ತುನ ಮಾಲುಮ್‌ ಛಾ಼ನಿ” ಕರಿ ಬೋಲ್ಯೊ.
MAR 10:20 ಇನೆ ಯೇಸುನ, “ಗುರು, ಮೇ ಅಡ್ಡಾಣಿಪರ್‌ಥೋಸ್‌, ಆ ಖ್ಹಾರಿ ವಾತೆನಿ ಘೋಣಿ ಚಾ಼ಲ್ತೊ ವಳ್ಯಾವ್‌ಸ್‌” ಕರಿ ಬೋಲ್ಯೊ.
MAR 10:21 ತದೆ ಯೇಸುನೆ ಇನ ಠರ್‌ಕೈ ದೇಖಿನ್‌ ಪ್ಯಾರ್‌ಥಿ ಇನ, “ತಾರಮ ಏಕ್‌ ಕಮ್ ಛಾ಼. ಜಾ಼ ತಾರಕನ ಛಾ಼ತೆ ಖ್ಹಾರು ವೇಚಿನಾಖಿದೀನ್‌ ಗರೀಬ್‌ನ ದೆ, ತದೆ ತುನ ಪರ್‌ಲೋಕ್‌ಮ ಶೊತ್‌ರ‍್ಹಿಶೆ ಅಜು಼ ತು ಐನ್ ಮಾರ ಪೀಠೆ ಆವ್” ಕರಿ ಬೋಲ್ಯೊ.
MAR 10:22 ಕತೋಬಿ ಯೋ ಅದ್ಮಿ ಘಣು ಧನ್‌-ದೌಲತ್‌ವಾಳು ಹುಯಿರ‍್ಹುಥೂತೆ ಇನಾಖ್ಹಾಜೆ, ಯೇಸುನೆ ಅಮ್ ಬೋಲ್ತಾನ ಖ್ಹಮ್‌ಜಿನ್‌, ಮ್ಹೋಡು ಮುರ್‌ಝೈ಼ಲೀನ್‌, ದುಖ್‌ಥಿ ಚ಼ಲೆಗಯೊ.
MAR 10:23 ತದೆ ಯೇಸುನೆ ಅಶ್‌ಪೀಶ್‌ ಇನ ಶಿಷ್ಯರ್‌ ಭಣಿ ದೇಖಿನ್ ಇವ್ಣುನ, “ಧನ್‌ದೌಲತ್‌ವಾಳು ದೇವ್ನಿ ರಾಜ್ಯಮ ಜಾ಼ವಾನು ಘಣು ಮುಶ್ಕಿಲ್!” ಕರಿ ಬೋಲ್ಯೊ.
MAR 10:24 ಶಿಷ್ಯರ್‌ನೆ ಆ ವಾತೆನ ಖ್ಹಮ್‌ಜಿನ್‌ ಆಶ್ಚರ್ಯಖಾದು, ಯೇಸುನೆ ಪಾಛೊ಼ ಇವ್ಣುನ, “ಮಾರ ಲಡ್ಕಾ, ದೇವ್ನಿ ರಾಜ್ಯಮ ಜಾ಼ವಾನು ಘಣು ಮುಶ್ಕಿಲ್!
MAR 10:25 ಶೌಕಾರ್ ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾಥೀಬಿ ಊಟ್‍ ಖ್ಹುಯಿನ ಡೋಳವಾಟೆಕರಿ ಪೇಶಿಜಾ಼ವನು ಶುಲ್ಬ” ಕರಿ ಬೋಲ್ಯೊ.
MAR 10:26 ಅನ ಖ್ಹಮ್‌ಜಿನ್‌ ಶಿಷ್ಯರ್‌ನೆ ಬಿಜೂ಼ಬಿ ಆಶ್ಚರ್ಯಖೈನ್, “ಇಮ್‍ಕತೊ, ಕಿನ ರಕ್ಷಣೆ ಮಳ್‌ಶೆ?” ಕರಿ ಇವ್ಣ-ಇವ್ಣಾಮ ಬೋಲಿಲಿದು.
MAR 10:27 ತದೆ ಯೇಸುನೆ ಇವ್ಣುನ ಠರ್‌ಕೈ ದೇಖಿನ್, “ಆ ಅದ್ಮಿನ ಹಾಥ್ಥಿ ಕೋ ಹುವಾನಿ ಕತೋಬಿ ದೇವ್ನ ಹಾತೆ ಹುವ್ವಾಸ್‌; ದೇವ್‌ನೊ ಹಾತೆ ಕೋ ಹುವ್ವಾನಿತೆ ಏಕ್‌ಬಿ ಕೊಯ್ನಿ” ಕರಿ ಬೋಲ್ಯೊ.
MAR 10:28 ತದೆ ಪೇತ್ರನೆ ಯೇಸುನ, “ಹಂದೇಕ್‌! ಹಮೆ ಖ್ಹಾರು ಮ್ಹೆಂದಿನ್‌ ತಾರ ಪೀಠೆ ಐಗಯ” ಕರಿ ಬೋಲಾಲಗ್ಯೊ.
MAR 10:29 ತದೆ ಯೇಸುನೆ, “ತುಮೂನ ಖ್ಹಾಚ ಬೋಲುಸ್ಕಿ, ಕೋಣ್‌ತೋಬಿ ಮಾರಖ್ಹಾಜೆಬಿ ಅಜು಼ ದೇವ್ನಿ ಅಛ್ಛಿ ಖಬರ್‌ನಖ್ಹಾಜೆ ಇನ ಘರ್‌ನರ‍್ಹೆವೊ, ಭೈಯೇನ ರ‍್ಹವೊ, ಭೇನೇನ ರ‍್ಹವೊ, ಆಯಾನ ರ‍್ಹವೊ, ಬಾನ ರ‍್ಹವೊ, ಲಡ್ಕಾವ್ನ ರ‍್ಹವೊ, ಖೇತರ್‌ನ ರ‍್ಹವೊ ಮ್ಹೆಂದಿದೊ ಉಶೇತೊ,
MAR 10:30 ಇನ ಜ಼ಮೀನ್‌ಪರ್ ರ‍್ಹವಾನಿ ವಖ್ಹತ್‌ಮ ಖ್ಹೋ ಪಟ್‌ ಜಾ಼ಖ್ಹತ್ ಕೈಯೆಕ್ಕಿ ಘರ್, ಭೇನೆ, ಭೈಯೇ, ಆಯ, ಲಡ್ಕಾ, ಖೇತರ್‌ ಅಜು಼ ಅದ್ಮಿಥಿ ಲತಾಡಾಬಿ ಮಳ್‌ಶೆಸ್‌ ಮಳ್‌ಶೆ. ಅಜು಼ ವಳ್ಯಾವಾತೆ ಜಂಗ್‌ಮ ಹರ್‌ಹಮೇಶ ರ‍್ಹವಾನಿ ಜಿ಼ಂದ್‌ಗಿ ಮಳ್‌ಶೆ.
MAR 10:31 ಕತೋಬಿ ಆಜ಼್ ಅಗಾಡಿ ರ‍್ಹವಾಳು ಕೈಯೆಕ್ಕಿ ಜ಼ಣು ಪಾಛ಼ಳ್ ಹುಯಿಜಾ಼ಶೆ, ಅಜು಼ ಆಜ಼್ ಪಾಛ಼ಳ್ ರ‍್ಹವಾಳು ಕೈಯೆಕ್ಕಿ ಜ಼ಣು ಖ್ಹಾಮ್ಣೆ ಹುಯಿಜಾ಼ಶೆ” ಕರಿ ಬೋಲ್ಯೊ.
MAR 10:32 ಯೇಸುಬಿ ಇನು ಶಿಷ್ಯರ್‌ ಯೆರೂಸಲೇಮ್‌ನಿ ವಾಟ್‌ ಧರೀನ್ ವಳ್ಯಜಾ಼ತಾಥ. ಯೇಸು ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ವಳ್ಯೊಜಾ಼ತೋಥೊ, ಅನ ದೇಖಿನ್‌ ಶಿಷ್ಯರ್‌ನೆ ಘಣು ಧಡುಕೊ ಘಾಲಿಲಿದು; ಅಜು಼ ಇನ ಪೀಠೆ ಆವಾಳು ಖ್ಹಾರು ಡರಿಗಯು. ತದೆ ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಪಾಛೊ಼ ಬಾಜೂ಼ಮ ಬುಲೈಲಿಜೈ಼ನ್, ಖ್ಹಾಮ್ಣೆ ಇನ ಉಷೇತೆ ಇನಿ ಬಾರೇಮ ಬೋಲ್ಯೊ.
MAR 10:33 ಇನೆ ಇವ್ಣುನ, “ಹಂದೇಖೊ, ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಹಿಜ್ಜಾ಼ ಅದ್ಮಿನೊ ಛಿಯ್ಯಾನ ಗಲ್‌ಢಯಾಜಕರ್‌ನ ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನ ಹಾತ್‌ಮ ಧರಿದಿಶ್ಶೆ. ಇವ್ಣೆ ಇನ ಮಾರಿನಾಕ್ಣು ಕರಿ ಬೋಲಿದೀನ್‌ ಇನ ಪರೈ ಜಾ಼ತ್‌ವಾಳ ಅದ್ಮಿನ ಹಾತ್‌ಮ ದಿನಾಕ್‌ಶೆ.
MAR 10:34 ಇವ್ಣೆ ಇನ ಚಿಂಘಾವ್‌ಶೆ, ಇನಾಪರ್‌ ಥೂಕ್‌ಶೆ, ಇನ ಮೇಕ್‌ನ ಕೊಳ್ಡೇಥಿ ಮಾರ್‌ಶೆ ಅಜು಼ ಇನ ಮಾರಿನಾಕ್‌ಶೆ; ಕತೋಬಿ ತೀನ್ ರೋಜ಼್‌ನ ಬಾದ್‌ಮ ಯೋ ಪಾಛೊ಼ ಜಿವ್ತೊಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
MAR 10:35 ಬಾದ್‌ಮ ಜೆಬೆದಾಯನ ಛಿಯ್ಯಾ ಹುಯಿರ‍್ಹಾಥಾತೆ ಯಾಕೋಬಬಿ ಯೋಹಾನ, ಯೇಸುಕನ ಐನ್, “ಗುರು, ಹಮೆ ಏಕ್‌ ಬಿಂತಿಕರಿಲಿಯೇಸ್, ಇನ ತೂ ಹಮಾರಖ್ಹಾಜೆ ಚ಼ಲೈದೇಣು” ಕರಿ ಬೋಲ್ಯ.
MAR 10:36 ಯೇಸುನೆ ಇವ್ಣುನ, “ಶಾತ್ ಯೋ?” ಕರಿ ಪುಛಾ಼ಯೊ.
MAR 10:37 ತದೆ ಇವ್ಣೆ, “ತಾರಿ ಮಹಿಮೆನಿ ರಾಜ಼್‌ಮ ತು ಸಿಂಹಾಸನ್‌ಪರ್ ಬೇಖ್ಹಾನಿ ವಖ್ಹತ್‌ಮ, ಹಮೆ ಬೇ ಜ಼ಣಾಮ ಏಕ್‌ ಜ಼ಣೊ ತಾರಿ ಖಾವಿ ಬಾಜು಼ಮ, ಬಿಜ್ಜೇಕ್‌ ಜ಼ಣೊ ತಾರಿ ಡಾವಿ ಬಾಜು಼ಮ ಬೇಖ್ಹಾನಿ ಘೋಣಿ ಕರ‍್ನು” ಕರಿ ಬೋಲ್ಯ.
MAR 10:38 ಕತೋಬಿ ಯೇಸುನೆ ಇವ್ಣುನ, “ತುಮೆ ಶಾತ್‌ ಮಾಂಗಿಲಿದ ಕರಿ ತುಮುನ ಮಾಲುಮ್‌ ಕೊಯ್ನಿ. ಮೇ ಪೀಣುತೆ ವದೇಖ್ಹಾನ ರಾಛ಼ಮ ತುಮೆ ಪಿಯ್ಯಾನ ಉಶೇಕಿ ಶು? ಮನ ಉಷೇತೆ ಬ್ಯಾಪ್ತಿಸ್ಮ ಲ್ಯಾವಾನ ತುಮುನ ಉಶೇಕಿ ಶು?” ಕರಿ ಪುಛಾ಼ವಖ್ಹತರ್,
MAR 10:39 ಇವ್ಣೆ, “ಹಮಾರೇಥಿ ಹುವಾಸ್” ಕರಿ ಬೋಲ್ಯ. ತದೆ ಯೇಸುನೆ ಇವ್ಣುನ, “ಮೇ ಪೀಣುತೆ ರಾಛ಼ಮ ತುಮೇಬಿ ಪೀಶು, ಮನ ಉಷೇತೆ ಬ್ಯಾಪ್ತಿಸ್ಮ ತುಮುನಾಬಿ ಉಶೆತೆ ಖ್ಹಾಚಸ್.
MAR 10:40 ಕತೋಬಿ ಮಾರಿ ಖಾವಿ ಬಾಜು಼ಮ ರ‍್ಹವೊ, ಡಾವಿ ಬಾಜು಼ಮ ರ‍್ಹವೊ ಬೇಖ್ಹಾನಿ ಘೋಣಿ ಚೂ಼ಣಾನು ಮಾರ ಹಾತ್‌ಮ ಕೊಯ್ನಿ. ಯೋ ಕಿನಾಖ್ಹಾಜೆ ಕರಿ ದೇವ್ನೆ ಬಣೈರಾಖ್ಯೋಸ್ಕಿ, ಇವ್ಣುನಾಸ್ ಮಳ್‌ಶೆ” ಕರಿ ಬೋಲ್ಯೊ.
MAR 10:41 ಉಬ್‌ರ‍್ಯಾತೆ ದಖ್ಹ್‌ ಜ಼ಣ ಶಿಷ್ಯರ್‌ನೆ ಅನ ಖ್ಹಮ್‌ಜಿನ್‌, ಯಾಕೋಬ್ ಅಜು಼ ಯೋಹಾನಪರ್‌ ಖೀಜ಼್‌ಖಾದು.
MAR 10:42 ತದೆ ಯೇಸುನೆ ಖ್ಹಾರಾನ ಎಕ್ಕದಮ್ ಬುಲೈನ್ ಇವ್ಣುನ, “ಯೆಹೂದ್ಯರ್‌ಕಾಹೆತೆ ಅದ್ಮಿಮ, ಅದಿಕಾರ್‌ಮ ರ‍್ಹವಾಳು ಇವ್ಣಾಪರ್ ಹಂಕಾರ್‌ಥಿ ಅದಿಕಾರ್ ಚ಼ಲಾವಸ್. ಅಜು಼ ಇವ್ಣಾಮ ಮೋಟು ಖ್ಹಾರು ಜು಼ಲಮ್ಜ಼ಸ್ತಿಥಿ ಅದಿಕಾರ್ ಚ಼ಲಾವಸ್ ಕರಿ ಬೋಲಾನು ತುಮುನ ಮಾಲುಮ್‌ ಛಾ಼.
MAR 10:43 ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಕೋಣ್‌ತೋಬಿ ಮೋಟು ಹೋಣುಕರಿ ಉಶೇತೊ; ಯೋ ಬಿಜ಼ ಖ್ಹಾರಾನಿ ಸೇವಕ್ ಹುಯಿರ‍್ಹೇವ್ಣು.
MAR 10:44 ತುಮಾರಾಮ ಕೋಣ್‌ತೋಬಿ ಅಖ್ಖೇಥಿ ಖ್ಹಾಮ್ಣೆ ರ‍್ಹೇವ್ಣುಕರಿ ಉಶೇತೊ, ಯೋ ಅಖ್ಖಾನೊ ಗುಲಾಮ್ ಹುಯಿರ‍್ಹೇಣು.
MAR 10:45 ಅದ್ಮಿನೊ ಛಿಯ್ಯೋಬಿ ಸೇವೆ ಕರೈಲ್ಯವಾನಖ್ಹಾಜೆ ಕೋ ಆಯೋನಿ; ಬಿಜಾ಼ನಿ ಸೇವೆ ಕರಾನ ಅಜು಼ ಇನೊ ಜಾನ್ನ ದೀನ್ ಕೈಯೆಕ್ಕಿ ಅದ್ಮಿನ ಛೋ಼ಡೈಲ್ಯವಾನಖ್ಹಾಜೆ ಆಯೊ” ಕರಿ ಬೋಲ್ಯೊ.
MAR 10:46 ಬಾದ್‌ಮ ಇವ್ಣೆ ಯೆರಿಕೋನ ಆಯು. ತದೆ ಯೇಸು ಇನ ಶಿಷ್ಯರ್‌ನ ಜೋ಼ಡೆ ಹಿಜ್ಜಾ಼ಥೊ ನಿಕ್ಳಿನ್ ವಳ್ಯೊಜಾ಼ತೋಥೊ, ಅಜು಼ ಇನಜೋ಼ಡೆ ಅದ್ಮಿನಿ ಮೋಟಿ ಝೂ಼ಂಡ್‌ ಥಿ, ತದೆ ತಿಮಾಯನೊ ಛಿಯ್ಯೊ ಬಾರ್ತಿಮಾಯ ಕರಿ ಏಕ್‌ ಕಾಣೊ ಧರಮ್ ಮಾಂಗವಾಳೊ ಮಾರಗ್‌ನ ಶೇಡೆ ಬೆಠೋಥೊ.
MAR 10:47 ಆ ವಾಟೆ ವಳ್ಯೊಜಾ಼ಸ್ತೆ ನಜ಼ರೇತ್‌ನೊ ಯೇಸು ಕರಿ ಇನೆ ಖ್ಹಮ್‌ಜಿನ್‌, “ದಾವೀದ್‌ನ ಛಿಯ್ಯಾ, ಮಾರಪರ್ ಗೋರ್‌ಕರ್‌!” ಕರಿ ಜೋ಼ರೇಖ್ಹು ಚಿಕ್ರಾಲಗ್ಯೊ.
MAR 10:48 ಕೈಯೆಕ್ಕಿ ಅದ್ಮಿ, “ಖ್ಹೊಪೇಥಿ ರ‍್ಹೇ!” ಕರಿ ಇನ ಗುರ್‌ಕಾಯು. ತೋಬಿ ಯೋ, “ದಾವೀದ್‌ನ ಛಿಯ್ಯಾ, ಮಾರಪರ್ ಗೋರ್‌ಕರ್‌!” ಕರಿ ಬಿಜೂ಼ಬಿ ಜಾ಼ಖ್ಹತ್ ಚಿಕ್ರಿಲಿದೊ.
MAR 10:49 ತದೆ ಯೇಸುನೆ ಭೀರಿನ್, “ಇನ ಬುಲಾವೊ” ಕರಿ ಬೋಲ್ಯೊ. ಅಮ್ ಬೋಲ್ತಾನ ಇವ್ಣೆ ಯೋ ಕಾಣಾನ ಬುಲೈನ್, “ಭಾಲಿಥಿರ‍್ಹೇ, ಉಟ್, ಯೇಸು ತುನ ಬುಲಾವ್‌ಕರಾಸ್‌” ಕರಿ ಬೋಲ್ಯು.
MAR 10:50 ತದೆ ಯೋ ಇನ ಝ಼ಗ್ಗಾನ ಕಾಡಿ ಫೇಕಿನ್, ಭಶ್‌ಡಕ್ ಕರಿ ಉಠೀನ್, ಯೇಸುಕನ ಆಯೊ.
MAR 10:51 ಯೇಸುನೆ ಇನ, “ಮೇ ತುನ ಶಾತ್ ಕರ‍್ನು?” ಕರಿ ಪುಛಾ಼ಯೊ. ತದೆ ಯೋ ಕಾಣಾನ, “ಗುರು, ಮನ ಡೋಳ ದೆಖಾವಾನಿ ಘೋಣಿ ಕರ್ಲಾ” ಕರಿ ಬೋಲ್ಯೊ.
MAR 10:52 ಯೇಸುನೆ ಇನ, “ಜಾ಼, ತಾರಿ ವಿಶ್ವಾಸ್‌ಥೀಸ್ ತುನ ಅಛ್ಛು಼ ಹುಯಿಗಯು” ಕರಿ ಬೋಲ್ಯೊ. ಅಮ್ ಬೋಲ್ತಾಸ್‌ನ ಇನ ದೆಖಾವಲಗ್ಯು ಅಜು಼ ಯೋ ಮಾರಗ್‌ವಾಟೆ ಕರಿ ಯೇಸುನ ಪೀಠೆ ಗಯೊ.
MAR 11:1 ಇವ್ಣೆ ಯೆರೂಸಲೇಮ್‌ನ ಖನ್ನೆ-ಖನ್ನೆ ಐನ್, ಆಲಿವ್‌ನ ಪಹಾಡ್‌ಕನ ಛಾ಼ತೆ ಬೆತ್ಫಗೆ ಅಜು಼ ಬೇಥಾನ್ಯ ಕರಿ ಗಾಮ್‌ಕನ ಆಯ. ತದೆ ಯೇಸುನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್,
MAR 11:2 ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ, ತುಮೆ ಯೋ ಗಾಮ್‌ನ ಮಹಿ ಜಾ಼ತಸ್‌ನ, ಹಿಜ್ಜಾ಼ ಏಕ್‌ ಗಧೇಡಾನು ಚೆಲ್ಕು ಭಂದೈರ‍್ಹೀಶೆತೆ ತುಮೆ ದೇಕ್‌ಶು. ಹಂಕೆತೋಡಿ ಇನಾಪರ್‌ ಕೋಣ್‌ಬಿ ಕೋ ಬೆಠೂನಿ. ಇನ ಛೋ಼ಡಿನ್ ಹಜ್ಜಾ಼ ಲೀನ್‌ ಆವೊ.
MAR 11:3 ಅಜು಼ ಕೋಣ್‌ತೋಬಿ ತುಮುನ ಶನ ಅಮ್ ಕರುಕರಸ್ತೆ ಕರಿ ಪುಛಾ಼ಯುತೊ, ಪ್ರಭುನ ಆ ಹೋಣುಕಸ್‌, ಅಜು಼ ಒಗ್ಗಿಸ್‌ಮ ಅನ ಪಾಛು಼ ಬೋಲಿ ಮೋಕಲ್‌ಶೆ ಕರಿ ಬೋಲೊ” ಕರಿ ಬೋಲಿನ್ ಮೋಕ್‌ಲ್ಯೊ.
MAR 11:4 ತದೆ ಇವ್ಣೆ ಜೈ಼ನ್‌, ವಾಟ್ನ ಶೇಡೆಥೂತೆ ಘರ್‌ನ ಬಾಕಲ್‍ಕನ ಗಧೇಡಾನು ಚೆಲ್ಕು ಭಂದ್ಯೂತೆ ದೇಖ್ಯು. ಇನ ಛೋ಼ಡುಕರಾನಿ ವಖ್ಹತ್‌ಮ,
MAR 11:5 ಹಿಜ್ಜಾ಼ ಭಿಯುಥೂತೆ ಥೋಡು ಜ಼ಣು, “ಆ ಚೆಲ್ಕಾನ ಛೋ಼ಡಿನ್, ಶಾತ್‌ ಕರಾನ ಆಯ?” ಕರಿ ಪುಛಾ಼ಯು.
MAR 11:6 ಇವ್ಣೆ ಯೇಸುನೆ ಬೋಲಿ ಮೋಕ್‌ಲ್ಯೊಥೋತೆ ಇಮ್ಮಸ್ ಬೋಲ್ಯು, ತದೆ ಯೋ ಅದ್ಮಿಖ್ಹಾರು ಜಾ಼ವಾನ ಮ್ಹೇಲ್ಯು.
MAR 11:7 ಇವ್ಣೆ ಯೋ ಗಧೇಡಾನ ಚೇಲ್ಕಾನ ಯೇಸುಕನ ಲೈನ್‌, ಇವ್ಣ ಲುಂಗ್ಡಾವ್‍ನ ಇನಾಪರ್‌ ನಾಖ್ಯು, ತದೆ ಯೇಸು ಇನಾಪರ್ ಚ಼ಢೀನ್ ಬೇಶಿಗಯೊ.
MAR 11:8 ತದೆ ಘಣ ಅದ್ಮಿನೆ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು. ಬಿಜು಼ ಥೋಡು ಜ಼ಣು ಬಾಗ್‌ಮಾಥು ಡಾಳಿಯೇನ ಕತ್ರಿಲೈನ್ ವಾಟ್‌ಪರ್ ಬಿಛಾ಼ಯು.
MAR 11:9 ಯೇಸುನ ಖ್ಹಾಮ್ಣೆಬಿ ಪೀಠೆಬಿ ಒಳಿಜಾ಼ತುಥೂತೆ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲ್ತುಹುಯಿನ್, “ಹೊಸನ್ನ! ಪ್ರಭು ದೇವ್ನ ನಾಮ್‌ಪರ್‌ ಆವಾಳಾನ ದೇವ್ ಆಶೀರ್ವಾದ್‌ ಕರಾದೆ!
MAR 11:10 ಅಪ್ಣೊ ಬಾ ಹುಯಿರ‍್ಹೋತೆ ದಾವೀದ್‌ನಿ ರಾಜ್ಯ ಆವ್‌ಶೆ, ದೇವ್ ಇನ ಆಶೀರ್ವಾದ್‌ ಕರಾದೆ. ಉಪ್ಪರ್‌ಲ್ಯ ಲೋಕಾಮ ಛಾ಼ತೆ ದೇವ್ನ ಧನ್ಯವಾದ್ ಹುವಾದೆ!” ಕರಿ ಬೋಲ್ಯು.
MAR 11:11 ಬಾದ್‌ಮ ಯೇಸು ಯೆರೂಸಲೇಮ್‌ನ ಗಯೊ, ಹಿಜ್ಜಾ಼ ಮಂದಿರ್‌ಮ ಜೈ಼ನ್, ಚಾರ‍್ಹೆ ಬಾಜು಼ ಥೂತೆ ಖ್ಹಾರೂಸ್ ದೇಖ್ಯೊ. ಎತ್ರಾಸ್‌ಮ ಖ್ಹಾಂಜ಼್ ಹುಯಿಗಯುಥು, ಇನಾಖ್ಹಾಜೆ ಇನ ಭಾರ ಜ಼ಣ ಶಿಷ್ಯರ್‌ನ ಕೇಡೆ ಬೇಥಾನ್ಯನ ಚ಼ಲೆಗಯೊ.
MAR 11:12 ತಿನವ್ಹಾಣೆ ಇವ್ಣೆ ಬೇಥಾನ್ಯಥು ಪಾಛು಼ ಆವಾನಿ ವಖ್ಹತ್‌ಮ, ಯೇಸುನ ಭುಕ್‌ಲಾಗ್ಯು.
MAR 11:13 ತದೆ ಪಾಂದ್‌ಡು ಮ್ಹೇಲೈರ‍್ಹುಥೂತೆ ಏಕ್‌ ಅಂಜೀರ್‌ನ ಝಾ಼ಡಾನ ಯೇಸುನೆ ದೂರ್‌ಥೊ ದೇಖಿನ್‌, ಇನಾಮ ಎಖಾದು ಪಂಡು ಮಳ್‌ಶೆ ಕರಿ ಹಿಜ್ಜಾ಼ ಗಯೊ. ಕತೋಬಿ ಹಿಜ್ಜಾ಼ ಜಾ಼ವಾದಿನ್ ಖಲಿ ಪಾಂದ್‍ಡುಸ್ ಪಣ್ಕಿ, ಬಿಜು಼ ಶಾತ್ಬಿ ಕೋ ಥೂನಿ, ಶನಕತೊ ಯೋ ಅಂಜೀರ್‌ನ ಪಂಡಾ ಮ್ಹೇಲಾನ ದನ್‌ಕಾಹೆ.
MAR 11:14 ತದೆ ಯೇಸುನೆ ಯೋ ಝಾ಼ಡಾನ, “ಹಂಕೇಥು ಕೋಣ್‌ಬಿ ತಾರಾಮ ಕದೇಬಿ ಪಂಡು ನಾ ಖಾಣುತೆ ಇಮ್‌ ಹುವಾದೆ!” ಕರಿ ಬೋಲ್ಯೊ. ಅಜು಼ ಇನ ಶಿಷ್ಯರ್‌ನೆ ಆ ವಾತೆನ ಖ್ಹಮ್‌ಜ್ಯು.
MAR 11:15 ಇವ್ಣೆ ಯೆರೂಸಲೇಮ್‌ನ ಅವಾದಿನ್, ಯೇಸು ಮೋಟಿ ಮಂದಿರ್‌ಮ ಜೈ಼ನ್, ಹಿಜ್ಜಾ಼ ವೇಚ಼ವಾಳಾನ ಲ್ಯವಾಳಾನ ಭಾರ್ ನಖ್ಹಾಡಲಗ್ಯೊ. ಅಜು಼ ಇನೆ ಪೈಶಾ ತೋಡಾವಾನು ಧಂದೊ ಕರಾವಾಳಾನ ಖುಡ್‌ಶಿನಾಬಿ, ಪರ‍್ಯಾವೊ ವೇಚ಼ವಾಳಾನು ಮೇಜ್‌ನ ರಡ್‌ಕೈನಾಖಿದಿದೊ.
MAR 11:16 ಏಕ್‌ ಜ಼ಣಾನಾಬಿ ಮಂದಿರ್‌ನ ಮಹಿಕರಿ ಶಾತ್ಬಿ ಪಳ್ಳಿನ್‌ ಜಾ಼ವಾದಿದೊಕೊಯ್ನಿ.
MAR 11:17 ಅಜು಼ ಯೇಸುನೆ ದೇವ್ನಿ ವಚನ್ನ ಬೋಲಿ ದೇತೊಹುಯಿನ್, “ದೇವ್ನೆ ಬೋಲ್ಯೊತೆ ಇಮ್‌, ‘ಮಾರಿ ಮಂದಿರ್‌ ಖ್ಹಾರ ಜಾ಼ತ್‌ವಾಳ ಅದ್ಮಿನ ಪ್ರಾರ್ಥನೆನು ಘರ್ ಕರಿ ಬೋಲೈಲೀಶೆ’ ಕರಿ ಲೀಖೈರ‍್ಹೂಸ್‌ನಿ? ಕತೋಬಿ ತುಮೆ ಅನ ಚೋ಼ರ್‌ನಿ ಘವಿ ಬಣೈರಾಖ್ಯಾಸ್!” ಕರಿ ಬೋಲ್ಯೊ.
MAR 11:18 ಅನ ಖ್ಹಮ್‌ಜಿನ್‌ ಗಲ್‌ಢಯಾಜಕರ್‌ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ಼ ಯೇಸುನ ಕೆವ್ಹಿ ಭಾಮ್‌ಥಿ ಮಾರೇಜಾ಼ಯ್‌ ಕರಿ ಸೋಚಾಲಗ್ಯು. ಕತೋಬಿ ಅದ್ಮಿಖ್ಹಾರು ಯೇಸುನಿ ವಾತೆನ ಖ್ಹಮ್‌ಜಿನ್‌ ಘಣು ಅಶ್ಚರ್ಯ ಹುಯುತೆ ಇನಾಖ್ಹಾಜೆ, ಇವ್ಣೆ ಯೇಸುನ ದೇಖಿನ್‌ ಡರಿನ್ ಥು.
MAR 11:19 ಖ್ಹಾಂಜ಼್ ಹುವ್ವಾದೀನ್ ಯೇಸುಬಿ ಇನು ಶಿಷ್ಯರ್‌ ಖ್ಹಯೇರ‍್ನ ಮ್ಹೇಲಿ ಗಯ.
MAR 11:20 ತಿನವ್ಹಾಣೆ ಇವ್ಣೆ ಮಾರಗ್ ಧರಿನ್ ಆವಾನಿ ವಖ್ಹತ್‌ಮ, ಯೋ ಅಂಜೀರ್‌ನು ಝಾ಼ಡ್‌ಣ ಇವ್ಣೆ ದೇಖ್ಯ. ಯೋ ಜ಼ಡ್‌ ಖ್ಹಮೇದ್‌ಥೂಸ್‌ ಖ್ಹುಕೈಗಯೂಥು.
MAR 11:21 ತದೆ ಪೇತ್ರನೆ ಗಯೋತೆ ದನ್ನೆ ಚಾ಼ಲ್ಯುಥೂತೆ ಇನ ಯಾದ್‌ಕರಿನ್ ಯೇಸುನ, “ಗುರು ಹಂದೇಕ್‌, ತುನೆ ಶಾಪ ದಿದೊಥೋತೆ ಅಂಜೀರ್‌ನು ಝಾ಼ಡ್ ಖ್ಹುಕೈಗಯು!” ಕರಿ ಬೋಲ್ಯೊ,
MAR 11:22 ತದೆ ಯೇಸುನೆ ಇವ್ಣುನ ಫರೈನ್ ಬೋಲ್ಯೋಕಿ, “ದೇವ್‌ಪರ್‌ ವಿಶ್ವಾಸ್‌ ರ‍್ಹವಾದೆ.
MAR 11:23 ಮೇ ತುಮುನ ಖ್ಹಾಚ ಬೋಲುಸ್, ಕೋಣ್‌ತೋಬಿ ಆ ಪಹಾಡ್‌ನ, ‘ತೂ ಉಖ್‌ಡೈ ಜೈ಼ನ್, ದರ‍್ಯಾವ್‌ಮ ಪಡ್’ ಕರಿ ಬೋಲಿನ್ ಇನ ದಿಲ್ಮ ಗುಮಾನಿ ಕರ‍್ಯೊಕೊಂತೆ, ಯೋ ಬೋಲ್ಯೊತೆ ಇಮ್ಮಸ್ ಉಷೆಕರಿ ನಂಬ್ಯೋತೊ, ಯೋ ಬೋಲ್ಯೊತೆ ಇಮ್ಮಸ್ ಇನ ಉಶೆ.
MAR 11:24 ಇನಾಖ್ಹಾಜೆಸ್ ಮೇ ತುಮೂನ ಬೋಲುಸ್ಕಿ: ತುಮೆ ಪ್ರಾರ್ಥನೆ ಕರಿನ್‌ ಶಾತ್ ಮಾಂಗೋಸ್‌ಕಿ ಯೋ ತುಮೂನ ಮಳೀರ‍್ಹುಸ್ ಕರಿ ನಂಬೊ, ತದೆ ತುಮೆ ಶಶ್ಶಾತ್ ಮಾಂಗಿಲಿದಾಕಿ ಯೋ ತುಮುನ ಮಳ್‌ಶೆ.
MAR 11:25 ಎತ್ರೇಸ್ ಕಾಹೆತೆ ತುಮೆ ಭೀರಿನ್‌ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತುಮೂನ ಕಿನಾಪರ್‌ಬಿ ಶಾತ್‌ತೋಬಿ ದಾವೊ ರ‍್ಹಯೂತೊ ಇನ ಮಾಪ್‌ ಕರೊ, ತದೆ ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮೆ ಕರ‍್ಯಾತೆ ಗಲ್ತಿನ ಮಾಪ್‌ ಕರಿನಾಕ್‌ಶೆ” ಕರಿ ಬೋಲ್ಯೊ.
MAR 11:26 ಕತೋಬಿ ತುಮೆ ಮಾಪ್‌ ನಾಕರ‍್ಯಾತೊ ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮಾರಿ ಗಲತ್ನ ಮಾಪ್‌ ಕೊಕರ್‌ಶೇನಿ.
MAR 11:27 ಇವ್ಣೆ ಪಾಛು಼ ಫರೀನ್ ಯೆರೂಸಲೇಮ್‌ನ ಆಯ. ಹಿಜ್ಜಾ಼ ಯೇಸು ಮಂದಿರ್‌ನ ಮಹಿ ಜೈ಼ನ್‌ ಫರುಕರಾತೆ ವಖ್ಹತ್‌ಮ, ಗಲ್‌ಢಯಾಜಕರ್‌ನ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಯೇಸುಕನ ಐನ್,
MAR 11:28 “ತೂ ಖೆವಿ ಹಕ್‌ಥಿ ಆ ಖ್ಹಾರು ಕರಾಸ್ತೆ? ಅಮ್ನಿ ಹಕ್ ತುನ ಕೋಣ್ ದಿದು?” ಕರಿ ಇನ ಪುಛಾ಼ಯು.
MAR 11:29 ಯೇಸುನೆ ಇವ್ಣುನ, “ಮೇಬಿ ತುಮೂನ ಏಕ್‌ ಸವಾಲ್‌ ಫುಛಾ಼ವುಸ್‌, ಮನ ಜವಾಬ್‌ ದಿದಾತೊ, ಬಾದ್‌ಮ ಮೇ ಕೆವ್ಹಿ ಹಕ್‌ಥಿ ಆ ಖ್ಹಾರು ಕರುಸ್ ಕರಿ ತುಮುನ ಬೋಲುಸ್” ಕರಿ ಬೋಲಿನ್
MAR 11:30 ಬ್ಯಾಪ್ತಿಸ್ಮ ದ್ಯವಾನಿ ಹಕ್‌ ಯೋಹಾನ್ನ ಪರಲೋಕ್‌ಥಿ ಆಯುಕಿ: ಕೊಯ್ನಿ ಅದ್ಮಿಥಿ ಆಯು? ಜವಾಬ್‌ ದೆವೊ” ಕರಿ ಬೋಲ್ಯೊ.
MAR 11:31 ತದೆ ಇವ್ಣೆ ಇವ್ಣ-ಇವ್ಣ ಮಹಿಸ್ ವಾತೆಚೀತೆ ಕರ್ತುಹುಯಿನ್, “ಅಪ್ಣೆ ಶಾತ್ ಬೋಲಿಯೆ? ‘ಪರಲೋಕ್‌ಥಿ ಆಯು’ ಕರಿ ಅಪ್ಣೆ ಬೋಲ್ಯಾತೊ, ‘ಇಮ್‍ಕತೊ ತುಮೆ ಶನ ಯೋಹಾನ್ನ ನಂಬ್ಯಾಕೊಯ್ನಿ?’ ಕರಿ ಬೋಲ್‌ಶೆ,
MAR 11:32 ‘ಅದ್ಮಿಥಿ ಆಯು’ ಕರಿ ಬೋಲ್ಯಾತೊ ಶಾತ್‌ ಹುವ್ವಾಸ್‌ಕಿ” ಕರಿ ಬೋಲಾಲಗ್ಯು. ಶನಕತೊ ಯೋಹಾನ ಏಕ್‌ ಪ್ರವಾದಿ ಕರಿ ತಮಾಮ್‌ ಅದ್ಮಿ ಗುಮಾನಿಕೊಂತೆ ನಂಬಿರಾಖ್ಯುಥು. ಇನಾಖ್ಹಾಜೆ ಇವ್ಣುನ ಅದ್ಮಿನೊ ಡರ್‌ ಥೊ.
MAR 11:33 ಅನಖ್ಹಾಜೆ ಇವ್ಣೆ, “ಹಮೂನ ಮಾಲುಮ್‌ ಕೊಯ್ನಿ” ಕರಿ ಯೇಸುನ ಜ಼ಬಾಬ್‌ದಿದು. ತದೆ ಯೇಸುನೆ ಇವ್ಣುನ, “ಮೇಬಿ ಖೆವಿ ಹಕ್‌ಥಿ ಆ ಖ್ಹಾರು ಕರೂಸ್ಕಿ, ಯೋ ತುಮುನ ಕೋ ಬೋಲೂನಿ” ಕರಿ ಬೋಲ್ಯೊ.
MAR 12:1 ತದೆ ಯೇಸುನೆ ಇವ್ಣ ಜೋ಼ಡೆ ಮತ್ಲಬ್‌ನಿ ಖೇಣಿಯೇಥಿ ಬೋಲಾಲಗ್ಯೋಕಿ, “ಏಕ್‌ ಅದ್ಮಿನೆ ಏಕ್‌ ದ್ರಾಕ್ಷಿನು ಬಾಗ್ ಬಣೈನ್, ಇನ ಅಶ್‌ಪೀಶ್‌ ವಾಡ್‌ಗಿ ನಖೈನ್, ದ್ರಾಕ್ಷಿನೊ ರಖ್ಹ್‌ ಕಾಡಾನಖ್ಹಾಜೆ ಖಾಡ್ ಖೋಂದಾಯೊ ಅಜು಼ ಕಾವ್ಲಿನಖ್ಹಾಜೆ ಉಪ್ಪರ್ ಅಟ್‌ಲೊ ಭಂದಾಯೊ. ಅಜು಼ ಇನೆ ಯೋ ದ್ರಾಕ್ಷಿನಬಾಗ್‌ನ ವಾರ್‌ ಕರಾವಾಳವ್‌ನ ದೀನ್, ಘರ್‌ಥೊ ನಿಕ್ಳಿನ್ ದೇಖ್ಹ್‌ಪರ್ ಚ಼ಲೆಗಯೊ.
MAR 12:2 ಪಂಡು ಪಾಕಾನ ಹಗಾಮ್‌ ಆವಾದಿನ್, ವಾರ್‌ನ ದೀರಾಖ್ಯೊಥೋತೆ ಇವ್ಣಾಕಂಥು ದ್ರಾಕ್ಷಿನ ಪಂಡಾಮ ಭಾಗ್‌ ಲ್ಯವಾನಟೇಕೆ, ಏಕ್‌ ಆಳ್‌ನ ಇವ್ಣಾಕನ ಮೋಕ್‌ಲ್ಯೊ.
MAR 12:3 ಇವ್ಣೆ ಯೋ ಆಳ್‌ನ ಧರಿಲೀನ್, ಇನ ಮಾರಿನ್, ಖಾಲಿಹಾತೆ ಮೋಕ್ಲಿದಿದು.
MAR 12:4 ತದೆ ಯೋ ಬಾಗ್‌ನ ಯಜಮಾನ್ನೆ ಬಿಜ್ಜೇಕ್‌ ಜ಼ಣ ಆಳ್‌ನ ಮೋಕ್‌ಲ್ಯೊ; ಯೋ ವಾರ್‌ನ ಲೀರಾಖ್ಯುಥೂತೆ ಇವ್ಣೆ ಇನ ಮುಡ್‌ಕ್ಯಪರ್ ಮಾರಿನ್ ಖ್ಹರಮ್‌ ಕಾಡಿನ್ ಮೋಕ್‌ಲ್ಯು.
MAR 12:5 ಅನ ಬಾದ್‌ಮ ಯೋ ಬಾಗ್‌ನ ಯಜಮಾನ್ನೆ ಬಿಜ್ಜೇಕ್‌ ಜ಼ಣ ಆಳ್‌ನ ಮೋಕ್ಲಾಖ್ಹತರ್‌ ಇನ ಮಾರಿ ನಾಖಿದಿದು; ಅಜೂ಼ಬಿ ಕೈಯೆಕ್ಕಿ ಜ಼ಣಾನ ಮೋಕ್‌ಲ್ಯೊ, ಇವ್ಣಾಮ ಥೋಡ ಜ಼ಣಾನ ಮಾರ‍್ಯು ಅಜು಼ ಥೋಡ ಜ಼ಣಾನ ಕತ್ರಿನಾಖಿದಿದು.
MAR 12:6 ಯೋ ಬಾಗ್‌ನೊ ಯಜಮಾನ್ನೆ ಬಿಜು಼ ಎಕ್ಕಸ್ ಜ಼ಣೊ ರಹಿಗಯೋಥೊ. ಯೋ ಕೋಣ್‌ಕತೊ ಇನೊ ಲಾಡ್‌ನೊ ಛಿಯ್ಯೊ. ತದೆ ಇನೆ ಸೋಚ್ಯೊಕಿ, ‘ಮಾರ ಛಿಯ್ಯಾನ ದೇಖಿನ್‌ ಮರ್ಯಾದಿ ದಿಶೆ’ ಕರಿ ಯಜಮಾನ್ನೆ ಖ್ಹರ್ತಿಮ ಇನ ಛಿಯ್ಯಾನ ಯೋ ವಾರ್ ಕರವಾಳಾವ್‌ಕನ ಮೋಕ್‌ಲ್ಯೊ.
MAR 12:7 ಕತೋಬಿ ಯೋ ವಾರ್‌ನ ಕರಿರಾಖ್ಯೂಥೂತೆ ಅದ್ಮಿಖ್ಹಾರು ಇನ ದೇಖಿನ್‌, ‘ಆಸ್ ಬಾಗ್‌ನೊ ಯಜಮಾನ್ನೊ ಛಿಯ್ಯೊ. ಆವೊ, ಅನ ಮಾರಿನಾಖಿದಿಯ್ಯೆ, ತದೆ ಇನು ಶೊತ್ ಖ್ಹಾರು ಅಪ್ಣು ಹುಯಿಜಾ಼ಶೆ!” ಕರಿ ಏಕ್‌ನ ಜೋ಼ಡೆ ಏಕ್‌ ವಾತೆ ಕರಿಲೀನ್,
MAR 12:8 ಇನ ಛಿಯ್ಯಾನ ಧರೀನ್ ಮಾರಿನಾಖಿದೀನ್‌, ದ್ರಾಕ್ಷಿನ ಬಾಗ್‌ನ ಭಾರ್ ಫೇಕಿದಿದು.
MAR 12:9 ಇಮ್‍ಕತೊ, ದ್ರಾಕ್ಷಿನ ಬಾಗ್‌ನೊ ಯಜಮಾನ್ ಶಾತ್‌ ಕರ್ಶೆ? ಯೋ ಐನ್ ದ್ರಾಕ್ಷಿನ ಬಾಗ್‌ನ ವಾರ್‌ನ ಲೀರಾಖ್ಯುಥೂತೆ ಇವ್ಣುನ ಮಾರಿನಾಖಿದೀನ್‌, ಇನು ದ್ರಾಕ್ಷಿನ ಬಾಗ್‌ನ ಬಿಜಾ಼ನ ದಿನಾಕ್‌ಶೆ.
MAR 12:10 ‘ಘರ್ ಭಾಂದಾವಾಳು ನಕೊಕರಿ ಧಕೇಲೈ ಗಯೋತೆ ಬಂಡೋಸ್, ಹೋಣುತೆ ಕೋಣಾನೊ ಬಂಡೊ ಹುಯೊ. ಅಮ್ಕರಿ ಧರ್ಮಶಾಸ್ತ್ರಮ ಪಢಿರಾಖ್ಯಸ್ನಿ!
MAR 12:11 ಹೈರುತೆ ಪ್ರಭುನೇಸ್ ಕರ‍್ಯೊತೆ; ಆ ಅಪ್ಣ ಡೋಳಾಮ ಅಶ್ಚರ್ಯ ದೆಖಾವಸ್ನಿ!”
MAR 12:12 ಆ ಅಪ್ಣೀಸ್‌ ಬಾರೇಮ ಆ ಮತ್ಲಬ್‌ನಿ ಖೇಣಿ ಬೋಲ್ಯೊ ಕರಿ ಇವ್ಣೆ ಮಾಲುಮ್‌ ಕರಿಲೀನ್ ಯೇಸುನ ಧರ್‌ನು ಕರಿ ಕೋಶಿಶ್ ಕರ‍್ಯು. ಕತೋಬಿ ಅದ್ಮಿನ ಡರ್‌ಥಿ ಇನ ಮ್ಹೆಂದಿನ್ ಚ಼ಲಿಗಯು,
MAR 12:13 ಅನ ಬಾದ್‌ಮ ಇವ್ಣೆ ಯೇಸುನ ವಾತೆಮ ಫಖ್ಹಾವ್ಣು ಕರಿ, ಫರಿಸಾಯರ್ ಅಜು಼ ಹೆರೋದನಿ ಝೂ಼ಂಡ್‌ಥು ಥೋಡ ಜ಼ಣಾನ ಇನಾಕನ ಮೋಕ್‍ಲ್ಯು.
MAR 12:14 ಇವ್ಣೆ ಇನಾಕನ ಐನ್ ಬೋಲ್ಯೂಕಿ, “ಗುರು, ತೂ ಖ್ಹಾಚಿಸ್ ಬೋಲಾಸ್, ಕಿನಾಬಿ ದೇಖಿನ್‌ ಡರಾಕೊಯ್ನಿ, ತು ಅದ್ಮಿನು ಮ್ಹೋಡುದೇಖಿನ್‌ ವಾತೆ ಕೋ ಬೋಲಾನಿ. ಕತೋಬಿ ಅದ್ಮಿನಿ ಬಾರೇಮ ದೇವ್ನಿ ಮರ್ಜಿ ಶಾತ್‌ ಛಾ಼ಕಿ ಯೋ ಬೋಲಿವತಾಳಸ್ ಕರಿ ಹಮೂನ ಮಾಲುಮ್‌. ಕೈಸರ್‌ನ ಶುಂಕ ದೆವಾನು ನಿಯಮ್‌ಕಿ ಕೊಯ್ನಿ? ದೇಣೂಕಿ ನಾ ದೇವ್ಣು” ಕರಿ ಯೇಸುನ ಪುಛಾ಼ಯು.
MAR 12:15 ತದೆ ಯೇಸುನೆ, ಇವ್ಣೆ ಮಶ್ಲತ್ ಭಂದೈನ್ ಐರ‍್ಹೂತೆ ದೇಖಿನ್, “ಮನ ಫಖ್ಹಾವ್ಣು ಕರಿ ಶನ ದೇಖೊಸ್ತೆ? ಮನ ಏಕ್‌ ರೂಪಾನು ಬಿಲ್ಲು ಲೈನ್‌ ವತಾಳೊ” ಕರಿ ಬೋಲ್ಯೊ.
MAR 12:16 ತದೆ ಇವ್ಣೆ ಏಕ್‌ ಬಿಲ್ಲು ಲಾಯು, ತದೆ ಯೇಸುನೆ, “ಆ ಬಿಲ್ಲಾನ ಉಪ್ಪರ್ ಛಾ಼ತೆ ಮ್ಹೋಡಾನಿ ರೂಪ್‌ಬಿ ನಾಮ್ ಕಿನು?” ಕರಿ ಪುಛಾ಼ವಖ್ಹತರ್ ಇವ್ಣೆ, “ಕೈಸರ್‌ನು” ಕರಿ ಬೋಲ್ಯು.
MAR 12:17 ತದೆ ಯೇಸುನೆ, “ಇಮ್‍ಕತೊ, ಕೈಸರ್‌ನು ಶಾತ್‌ ಛಾ಼ಕಿ ಯೋ ಕೈಸರ್‌ನ ದೆವೊ, ದೇವ್ನ ದೇವ್ಣುತೆ ದೇವ್ನ ದೆವೊ” ಕರಿ ಬೋಲ್ಯೊ. ಯೇಸುನೆ ಅಮ್ ಬೋಲ್ಯೋತೆ ದೇಖಿನ್ ಇವ್ಣೆ ಘಣು ಆಶ್ಚರ್ಯಖಾದು.
MAR 12:18 ಅನ ಬಾದ್‌ಮ ಸದ್ದುಕಾಯವಾಳು ಥೋಡು ಜ಼ಣು ಯೇಸುಕನ ಆಯು.ಅವ್ಣೆ ಮರ‍್ಯುಹುಯು ಅದ್ಮಿ ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ ಕರಿ ಬೋಲಾವಾಳು. ಅವ್ಣೆ ಯೇಸುನ ಪುಛಾ಼ಯುಕಿ,
MAR 12:19 “ಗುರು, ಏಕ್‌ ಜ಼ಣೊ ಲಡ್ಕಾಕೊಂತೆ ಮರಿಗೋತೊ, ಇನಿ ಬಾವಣ್ಣ ಇನೊ ಭೈ ಕರಿಲೇವ್ಣು. ತದೆ ಇವ್ಣುನ ಲಡ್ಕಾ ಹುಯಾತೊ, ಯೋ ಲಡ್ಕಾ ಮರ‍್ಯೋತೆ ಭೈನ ಲಡ್ಕಾ ಹುಯಿರ‍್ಹಿಶೆ’ ಕರಿ ಮೋಶೆನೆ ಹಮಾರಖ್ಹಾಜೆ ಲೀಖಿರಾಖ್ಯೊಸ್.
MAR 12:20 ಖ್ಹಾತ್‌ಜ಼ಣ ಭೈಯೆ ಥಾ; ಇವ್ಣಾಮ ಪಹಿಲೊ ಭೈ ವ್ಯಹಾ ಕರೀನ್ ಲಡ್ಕಾಕೊಂತೆ ಮರಿಗಯೊ.
MAR 12:21 ಇನಿ ಬಾಯ್ಕೊನ ಇನ ಪೀಟ್‌ಣೊ ಭೈನೆ ಕರಿಲೀನ್ ಯೋಬಿ ಲಡ್ಕಾಕೊಂತೆ ಮರಿಗಯೊ. ಇಮ್ಮಸ್ ತೀನ್ನೊ ಭೈನಾಬಿ ಹುಯು,
MAR 12:22 ಇಮ್ಮಸ್ ಖ್ಹಾತೆ ಜ಼ಣಾಬಿ ಯೋ ತಯೇಡಾನ ಕರಿಲೀನ್ ಲಡ್ಕಾಕೊಂತೆ ಮರಿಗಯ. ಖ್ಹಾರಾನ ಬಾದ್‌ಮ, ಯೋ ತಯೇಡಾಬಿ ಮರಿಗೈ.
MAR 12:23 ಇಮ್‍ಕತೊ, ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ಯೋ ದನ್ಮ, ಯೋ ತಯೇಡ ಖೆವಾನಿ ಬಾವಣ್‍ ಹುಯಿರ‍್ಹಿಶೆ? ಶನಕತೊ ಖ್ಹಾತೆ ಜ಼ಣಾಬಿ ಇನ ಕರಿಲಿದಾಥಾನಿ” ಕರಿ ಬೋಲ್ಯು.
MAR 12:24 ಯೇಸುನೆ ಇವ್ಣುನ, “ತುಮೆ ಕೆತ್ರೆ ಗಲ್ತಿಮ ಶನ ಛಾ಼ಕರಿ ಮಾಲುಮ್ ಕಿಶು? ಶನಕತೊ ತುಮೂನ ದೇವ್ನಿ ವಚನ್‌ಬಿ ನಾತೊ ದೇವ್ ಕೆತ್ರೆ ಶಕತ್‌ವಾಳೊ ಕರೀಬಿ ಮಾಲುಮ್‌ಕೊಯ್ನಿ.
MAR 12:25 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ತದೆ, ಇವ್ಣೆ ಸೊರ್ಗಥು ದೇವ್‌ನು ದೂತರ್‌ನಿ ಘೋಣಿ ರ‍್ಹಿಶೆ ಅಜು಼ ವ್ಯಹಾ ಕರ್‌ಶೆಬಿ ಕೊಯ್ನಿ, ವ್ಯಹಾ ಕರಿದಿಶೇಬಿ ಕೊಯ್ನಿ.
MAR 12:26 ಕತೋಬಿ ‘ಮರವಾಳು ಜಿವ್ತುಹುಯಿನ್ ಉಟ್‍ಶೇತೆ’ ಇನಿ ಬಾರೇಮ ಬೋಲ್‌ನು ಕತೊ, ‘ಮೇ ಅಬ್ರಹಾಮ್‌ನೊ ದೇವ್, ಇಸಾಕನೊ ದೇವ್, ಯಾಕೋಬನೊ ದೇವ್’ ಕರಿ ದೇವ್ನೆ ಮೋಶೆನ ಬೋಲ್ಯೊತೆ ಇನ ಮೋಶೇನು ಪುಸ್ತಕ್‌ಮ ಆಗ್‍ನಿ ಡಾಗ್‌ನಿ ಬಾರೇಮ ಛಾ಼ತೆ ವಚನ್ನು ಭಾಗ್‌ಮ ಪಢಿರಾಖ್ಯಕೊಯ್ನಿಕಿ ಶು?
MAR 12:27 ಇವ್ಣೆ ಮರಿಗಯಾತೋಬಿ ದೇವ್ನ ಜೋ಼ಡ್ಮ ಜಿವ್ತು ಹುಯಿನ್ ಛಾ಼; ಇನಖ್ಹಾಜೆ ಯೋ ಜಿವ್ತಾನೊ ದೇವ್ ಹುಯಿರ‍್ಹೋಸ್ತೆ ಪಣ್ಕಿ ಮರ‍್ಯಾಹುಯಾನೊ ಕಾಹೆ, ತುಮೆ ತೀರ್‌ಚಾಸ್ ಗಲ್ತಿಮ ಪಡ್ಯಾಸ್” ಕರಿ ಬೋಲ್ಯೊ.
MAR 12:28 ಹಿಜ್ಜಾ಼ ಮೋಶೆನಿ ವಚನ್‍ ಶಿಕಾಡವಾಳೊ ಶಾಸ್ತ್ರಿಮ ಏಕ್‌ ಜ಼ಣೊ ಇವ್ಣೆ ಚರ್ಚೆ ಕರುಕರಾತೆ ಖ್ಹಮ್‌ಜಿನ್‌, ಯೇಸುನೆ ಸದ್ದುಕಾಯವಾಳನ ಅಛ್ಛು಼ ಜವಾಬ್‌ ದಿದೋತೆ ದೇಖಿನ್, ಯೇಸುಕನ ಐನ್, “ಖ್ಹಾರಿ ಹುಕುಮ್‌ಮ ಮೋಟಿ ಹುಕುಮ್‌ ಖೆವಿ” ಕರಿ ಪುಛಾ಼ಯೊ.
MAR 12:29 ತದೆ ಯೇಸುನೆ, “ಇಸ್ರಾಯೇಲ್‌ನು ಅದ್ಮಿ ಖ್ಹಮಜ಼್! ಖ್ಹಾರೇಥಿ ಮೋಟಿ ಹುಕುಮ್ ಖೆವಿಕತೊ, ‘ಅಪ್ಣೊ ದೇವ್ ಹುಯಿರ‍್ಹೋತೆ ಪ್ರಭು ಎಕ್ಕಸ್ ಜ಼ಣೊ ದೇವ್ ಹುಯಿರ‍್ಹೋಸ್.’
MAR 12:30 ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ಪೂರ ದಿಲ್‌ಥಿ, ಪೂರ ಜಾನ್‌ಥಿ, ಪೂರ ಮನ್‌ಥಿ, ಪೂರ ಶಕಥ್ಥಿ ಪ್ಯಾರ್ ಕರ‍್ನು.
MAR 12:31 ಅಜು಼ ಬೇನಿ ಮೋಟಿ ಹುಕುಮ್ ಖೆವಿಕತೊ, ‘ತಾರು ತು ಕಿಮ್ ಪ್ಯಾರ್ ಕರಾಸ್ಕಿ ಇಮ್ಮಸ್ ತಾರ ಭೀಡೆವಾಳಾನ ಪ್ಯಾರ್ ಕರ‍್ನು’. ಆ ಬೇ ಹುಕುಮ್‌ಥಿ ಮೋಟಿ ಹುಕುಮ್‌ ಬಿಜೇಕ್ ಖೆವಿಬಿ ಕೊಯ್ನಿ” ಕರಿ ಬೋಲ್ಯೊ.
MAR 12:32 ತದೆ ಯೋ ಶಾಸ್ತ್ರಿನೆ, “ಗುರು, ತೂ ಅಶೇಲ್ ಬೋಲ್ಯೊ, ‘ದೇವ್ ಹುಯಿರ‍್ಹೋತೆ ಪ್ರಭು ಎಕ್ಕಸ್ ಜ಼ಣೊ, ಇನ ಮ್ಹೇಲೀನ್‌ ಬಿಜು಼ ಕೋಣ್‌ಬಿ ದೇವ್ ಕೊಯ್ನಿ, ಕರಿ ತುನೆ ಬೋಲ್ಯೊತೆ ಖ್ಹಾಚಿ.
MAR 12:33 ಇನ ಪೂರ ದಿಲ್‌ಥಿ, ಪೂರ ಮನ್‌ಥಿ ಅಜು಼ ಪೂರ ಶಕಥ್ಥಿ ಪ್ಯಾರ್ ಕರ‍್ನು; ಅಜು಼ ಇನು ಯೋ ಕಿಮ್ ಪ್ಯಾರ್ ಕರಿಲೇಸ್ಕಿ, ಇಮ್ಮಸ್ ಇನ ಭೀಡೆವಾಳಾನ ಪ್ಯಾರ್ ಕರ‍್ನು. ಆ ಬೇ ಹುಕುಮ್‌ ದೇವ್ನ ಖ್ಹಾಮೆ ಅಖ್ಖಯೇಕ್‌ ಶರೀರ್‌ನ ಬಲಿದ್ಯವಾನು ದೆವಾಥೀಬಿ ಅಜು಼ ಬಿಜಿ ಖ್ಹಾರಿ ಜಾನ್ವರ್‌ನ ಬಲಿಥೀಬಿ ಮೋಟು ಹುಯಿರ‍್ಹೂಸ್” ಕರಿ ಬೋಲ್ಯೊ.
MAR 12:34 ಇನೆ ಸೋಚಿಪರ್‌ಖಿನ್ ಜವಾಬ್‌ ದಿದೊತೆ, ಯೇಸುನೆ ದೇಖಿನ್‌, “ತೂ ದೇವ್ನಿ ರಾಜ್ಯಥಿ ದೂರ್‌ಲ್ಯೊ ಕಾಹೆ” ಕರಿ ಬೋಲ್ಯೊ. ಅನ ಬಾದ್‌ಮ ಯೇಸುನ ಬಿಜು಼ ಶಾತ್ಬಿ ಪುಛಾ಼ವನ ಕಿನೇಬಿ ಹಿಮ್ಮತ್ ಕೋ ಕರ‍್ಯುನಿ.
MAR 12:35 ಯೇಸು ಮಂದಿರ್‌ಮ ವಚನ್ ಬೋಲಿದೇವ್‌ಕರ್‌ತೋಥೊ, ತದೆ ಇನೆ ಪುಛಾ಼ಯೊಕಿ, “ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು ಮೆಸ್ಸೀಯ ದಾವೀದ್‌ನೊ ಛಿಯ್ಯೊ, ಕರಿ ಬೋಲಾಸ್ನಿ, ಯೋ ಕಿಮ್ ಉಶೆ?
MAR 12:36 ‘ಮೇ ತಾರು ದುಶ್‌ಮನ್ನ ಖ್ಹಾರು ತಾರ ಗೋಡಾನ ಹೇಟ್‌ ನಾಖಾಲಗು ಮಾರಿ ಖಾವಿ ಬಾಜು಼ಮ ಬೆಠೋರೆ, ಕರಿ ಪ್ರಭು ಹುಯಿರ‍್ಹೋತೆ ದೇವ್ನೆ ಮಾರ ಮಾಲಿಕ್‌ನ ಬೋಲ್ಯೊ’ ಕರಿ ಪವಿತ್ರಾತ್ಮನೆ ದಾವೀದನ ಮ್ಹೋಡಾವಾಟೆ ಬೋಲಾಯೋನಿ.
MAR 12:37 ದಾವೀದಸ್‌ ಕ್ರಿಸ್ತನ ಪ್ರಭುಕರಿ ಬೋಲಾಪರ್ ಕ್ರಿಸ್ತ ದಾವೀದ್‌ನೊ ಛಿಯ್ಯೊ ಕಿಮ್ ಉಶೆ?” ಯೇಸುನಿ ವಾತೆನ ಘಣು ಅದ್ಮಿ ಖ್ಹುಶೀಥಿ ಖ್ಹಮ್‍ಜು಼ಕರ್ತುಥು.
MAR 12:38 ಯೇಸುನೆ ವಚನ್ ಬೋಲಿ ದೇತೊಹುಯಿನ್ ಬೋಲ್ಯೋಕಿ, “ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರಿಯೇನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಇವ್ಣೆ ಘಣ ಮೋಲ್ನು ಝ಼ಗ್ಗೊ ಪೇರ‍್ಹಿಲೀನ್‌ ಹೈಕಡ್‌ಹೀಕಡ್‌ ಫರ್‌ವಾನು, ದುಕಾನೇನಿ ಗಲ್ಲಿಮ ಅದ್ಮಿಖ್ಹಾರು ಇವ್ಣುನ ಮರ್ಯಾದಿ ದೀನ್ ಖ್ಹಲಾಮ್ ಕರ್ನುಕರಿ,
MAR 12:39 ಅಜು಼ ಸಬೆ ಭರಾವಾನು ಮಂದಿರ್‌ಮ ಅಖ್ಖಾನ ಖ್ಹಾಮೆ ಬೇಖ್ಹ್‌ಣು ಕರಿ, ಮಾನ್-ಮಿಝ಼್‌ವಾನೇನಿ ಝ಼ಗೋಮ ಅಖ್ಖಾನ ದೆಖಾವಾನಿ ಘೋಣಿ ಖ್ಹಾಮೆ ಬೇಖ್ಹ್‌ಣು ಕರಿ ಖಲಿ ಅಮ್ಮಸ್ ಆಖ್ಹ್ ಕರ್ತುರ‍್ಹೇಸ್‌.
MAR 12:40 ಇವ್ಣೆ ಮುಂಡಚ್ಚಿ ತಯೇಡಾವ್‌ನ ಠಗೈನ್ ಇವ್ಣ ಘರ್‌ನ ಲೂಟಿಲೇಸ್ ಅಜು಼ ಅದ್ಮಿನ ವತಾಳಿಲ್ಯಾವನಖ್ಹಾಜೆ ಲಾಂಬಿ ಪ್ರಾರ್ಥನೆ ಕರಾಸ್. ಅವ್ಣಪರ್ ಘಣೇಥಿ ಘಣಿ ನಿಶತ್‌ ಮಳ್‍ಶೆ” ಕರಿ ಬೋಲ್ಯೊ.
MAR 12:41 ಯೇಸು ಮಂದಿರ್‌ನಿ ಹುಂಡಿನ ಖ್ಹಾಮ್ಣೆನಿ ಬಾಜೂ಼ಮ ಬೇಶಿನ್, ಅದ್ಮಿಖ್ಹಾರು ಪೈಶಾ ನಾಖಾತೆ ದೇಖುಕರ್ತೊಥೊ. ಕೈಯೆಕ್ಕಿ ಧನ್‌-ದೌಲತ್‌ವಾಳು ಅದ್ಮಿ ಘಣು-ಘಣು ನಾಖ್ಯು.
MAR 12:42 ತದೆ ಹಿಜ್ಜಾ಼ ಏಕ್‌ ಗರೀಬ್ ಮುಂಡಚ್ಚಿ ತಯೇಡ ಐನ್, ಬೇ ತಾಂಬಾನು ಕಾಖ್ಹ್‌, ಕತೊ ಏಕ್‌ ಪೈಶಾ ನಾಖಿ.
MAR 12:43 ತದೆ ಯೇಸುನೆ ಇನ ಶಿಷ್ಯರ್‌ನ ಖನ್ನೆ ಬುಲೈನ್, “ಮೇ ತುಮೂನ ಖ್ಹಾಚ ಬೋಲುಸ್ಕಿ ಹುಂಡಿಮ ಖ್ಹಾರೇಥಿ ಜಾ಼ಖ್ಹತ್ ಆ ಗರೀಬ್ ಮುಂಡಚ್ಚಿ ತಯೇಡ ನಾಖಿರಾಖಿಸ್‌.
MAR 12:44 ಕಿಮ್ ಕತೊ, ಖ್ಹಾರು ಇವ್ಣುನ ಬಶ್‌ಹುಯಿನ್ ಉಭ್‌ರ‍್ಯುತೆ ಇನಾಮಾಥು ಥೋಡು ನಾಖ್ಯು; ಕತೋಬಿ ಆ ಹೈರಿತೆ, ಅತ್ರೆ ಗರೀಬ್ ರ‍್ಹೀನ್‌ಬಿ, ಇನಾಕನ ಥೂತೆ ಖ್ಹಾರುಸ್‌ ನಾಖಿದಿದಿ, ಇನು ಜಿವ್ಣು ಚ಼ಲಾವಾನ ಥೂತೆ ಖ್ಹಾರೂಸ್ ನಾಖಿದಿದಿ”.
MAR 13:1 ಮಂದಿರ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ಇನ ಶಿಷ್ಯರ್‌ಮ ಏಕ್‌ ಜ಼ಣಾನೆ ಇನ, “ಗುರು, ಹಂದೇಕ್‌ ಕಿಮ್ನ ಬಂಡಾ! ಆ ಮಂದಿರ್‌ನ ಕಿಮ್ ಬಣೈರಾಖ್ಯೂಸ್ತೆ!” ಕರಿ ಬೋಲ್ಯು.
MAR 13:2 ತದೆ ಯೇಸುನೆ, “ಆ ಕೆತ್ರೆ ಮೋಟುಘರ್ ಬಣೈರಾಖ್ಯೂಸ್‌ ಕರಿ ತೂ ದೇಖುಕರಾಸ್‌ ಕೊಯ್ನಿಕಿ ಶು? ಹಜ್ಜಾ಼ ಏಕ್‌ ಬಂಡಾಪರ್ ಬಿಜೇಕ್ ಬಂಡೊ ಭೀರಿಶೆ ಕೊಯ್ನಿ; ಅಖ್ಖಾಸ್ನ ರಡ್‌ಕೈನಾಖಿದಿಶೆ” ಕರಿ ಬೋಲ್ಯೊ.
MAR 13:3 ಬಾದ್‌ಮ ಯೇಸು ಆಲಿವ್‌ ಪಹಾಡ್‌ಪರ್ ದೇವ್ನಿ ಮೋಟಿ ಮಂದಿರ್‌ ಭಣಿ ಮ್ಹೋಡು ಕರೀನ್ ಬೆಠೋಥೊ. ತದೆ ಪೇತ್ರ, ಯಾಕೋಬ್, ಯೋಹಾನ ಅಜು಼ ಅಂದ್ರೆಯ ಯೇಸು ಎಕ್ಲೊ ರ‍್ಹವಾನಿ ವಖ್ಹತ್‌ಮ ಇನಾಕನ ಆಯ.
MAR 13:4 ತದೆ ಇವ್ಣೆ ಇನ, “ಆ ಖ್ಹಾರು ಕದೆ ಉಶೆ? ಆ ಖ್ಹಾರು ಹುವಾನ ವಖ್ಹತ್ ಐಗಿ ಕರಿ ಮಾಲುಮ್ ಪಡಾನಟೇಕೆ ಶಾತ್ ಚಾ಼ಲ್‌ಷೆ, ಕರಿ ಹಮೂನ ಬೋಲ್” ಕರಿ ಪುಛಾ಼ಯ.
MAR 13:5 ತದೆ ಯೇಸುನೆ ಇವ್ಣುನ, “ಹೊಷಾರ್‌ಥಿ ರ‍್ಹವೊ, ಅಜು಼ ತುಮೂನ ಕೋಣ್‌ಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ.
MAR 13:6 ಕೈಯೆಕ್ಕಿ ಜ಼ಣು ಆಯಿನ್ ಮಾರು ನಾಮ್ ಬೋಲಿಲಿನ್, ‘ಮೇ ಕ್ರಿಸ್ತ, ಮೇ ಕ್ರಿಸ್ತ’ ಕರಿ ಘಣ ಅದ್ಮಿನ ಧೋಕ ಕರ್ಶೆ.
MAR 13:7 ಅತ್ರೇಸ್ ಕಾಹೆತೆ ತುಮೆ, ಖನ್ನೆ ಜಂಗ್ ಭೀಡುಕರಾತೆ ಅವಾಜ಼್ ಅಜು಼ ದೂರ್ ಜಂಗ್ ಭೀಡುಕರಾತೆ ಖಬರ್‌ನ ಖ್ಹಮ್‌ಜ್ಯಾತೊ ಘಬ್ರಾವೊ ನಕೊ. ಅಮ್ನು ಖ್ಹಾರು ಚಾ಼ಲ್ನುಸ್ ಚಾ಼ಲ್ನು. ಕತೋಬಿ ಅನಿ ಮತ್‌ಲಬ್ ಜಗತ್‌ ಖತಮ್ ಹುಯಿಜಾ಼ವಾನ ಆಯುಕರಿ ಕಾಹೆ.
MAR 13:8 ದೇಖ್ಹ್‌ಥಿ ದೇಖ್ಹ್‌ ಲಡೈ ಪಡ್‌ಶೆ; ಏಕ್‌ ರಾಜ್ಯಪರ್ ಬಿಜೇಕ್‌ ರಾಜ್ಯ ಲಡೈನ ಉಟ್‌ಶೆ. ಖ್ಹಾರಿ ತರಬ್‌ ಜ಼ಮೀನ್ ಹಲ್‌ಶೆ, ಅಜು಼ ಕಾಳ್ದುಕಾಳ್ ಉಶೆ. ಆ ಖ್ಹಾರು ಲಡ್ಕು ಪೈದಾ ಹುವಾನಿ ವಖ್ಹತ್‌ಮ ಆವಾತೆ ಪಹಿಲಿ ಅಜಾ಼ನಿಘೋಣಿ ಹುಯಿರ‍್ಹುಸ್‍.
MAR 13:9 ಕತೋಬಿ ತುಮೆ ತುಮಾರಿ ಬಾರೇಮ ಹೊಷಾರ್‌ಥಿ ದೇಖಿಲೆವ್ಣು. ತುಮೂನ ಧರೀನ್ ನ್ಯಾವ್ ಕರಾನಿ ಸಭೆಮ ಖೇಚಿಲಿಜಾ಼ಶೆ. ತುಮುನ ಸಬೆ ಭರಾವಾನು ಮಂದಿರ್‌ಮ ಮಾರ್‌ಶೆ; ಮಾರಖ್ಹಾಜೆ ತುಮೆ ರಾಜ಼್‌ಭಾರ್‌ ದೇಖಿಲೆವಾಳಾನ ಖ್ಹಾಮ್ಣೆಬಿ ಅಜು಼ ರಾಜಾ಼ನ ಖ್ಹಾಮ್ಣೆ ಸಾಕ್ಷಿಕರಿನ್ ಭೀರಾಕ್‌ಶೆ.
MAR 13:10 ಕತೋಬಿ ಜಗತ್‌ ಖತಮ್ ಹುವಾನ ಅಗಾಡಿ, ತಮಾಮ್‌ ಜ಼ಗ್‌ಜಾ಼ತ್‌ವಾಳನ ದೇವ್ನಿ ಅಛ್ಛಿ ಸಮಾಚಾರ್‌ನ ಬೋಲ್‌ನು.
MAR 13:11 ತುಮುನ ಧರೀನ್ ನ್ಯಾವ್ ಕರಾನಿ ಝ಼ಗೊ ಲೀಗಯೂತೊ, ಶಾತ್‌ ಬೋಲ್ನುಕರಿ ಪಹಿಲೇಸ್ ಧಡುಕೊ ನಕೊಘಾಲೊ. ಯೋ ವಖ್ಹತ್‌ಮ ಶಾತ್‌ ಬೋಲ್ನುಕರಿ ದೇವ್ ಯಾದ್ ದೇಸ್ಕಿ ಯೋಸ್‌ ಬೋಲೊ. ಶನಕತೊ ತುಮೆ ಬೋಲ್‌ಶುತೆ ವಾತೆ ತುಮಾರಿ ಕಾಹೆ; ಪವಿತ್ರಾತ್ಮಾಥಿ ಐತೆ ವಾತೆ ಹುಯಿರ‍್ಹಿಶೆ.
MAR 13:12 ಅತ್ರೇಸ್ ಕಾಹೆತೆ ಏಕ್‌ ಭೈ ಇನ ಶೊಂತ್ ಭೈನ ಮಾರಿನಾಖಾನ ದಿನಾಕ್‌ಶೆ, ಇಮ್ಮಸ್ ಬಾಬಿ ಇನ ಲಡ್ಕಾವ್ನ ಮರಾವ್‌ಶೆ. ಲಡ್ಕಾ ಉಠೀನ್ ಇವ್ಣ ಆಯ-ಬಾನ ಧೋಕೊದೀನ್ ಮರಾವ್‌ಶೆ.
MAR 13:13 ಅಜು಼ ಮಾರ ನಾಮ್ನಟೇಕೆ ಹರೇಕ್ ಅದ್ಮಿ ತುಮುನ ವಹೇರ್‌ ಕರ್ಶೆ. ಕತೋಬಿ ಆಖ್ರಿ ದಮ್‌ತೋಡಿ ಖ್ಹಮಾಳಿಲ್ಯವಾಳು ದೇವ್ನಿ ನ್ಯಾವ್‍ನಿ ತೀರ್ಪ್‌ಥಿ ರಕ್ಷಣೆಲೀನ್ ಪರ್‌ಲೋಕ್‌ಮ ಜಾ಼ವಾನ ಲ್ಹಾಯಕ್‌ ಉಶೆ.
MAR 13:14 ಅತ್ರೇಸ್ ಕಾಹೆತೆ ‘ಬರ್ಬಾತ್ ಕರಾವಾಳು ಖರಾಬ್ ರಾಛು಼’ ಯೋ ಭೀರೆವ್ಣುನಾತೆ ಝ಼ಗೋಪರ್ ಭೀರಾವನು ತುಮೆ ದೇಕ್‌ಶು. ಅನ ಪಢವಾಳು, ಅನಿ ಮತ್ಲಬ್‌ನ ಪರ್ಖಿಲ್ಯಾವದೆ. ತದೆ ಯೂದಾಯಮ ರ‍್ಹವಾಳು ಪಹಾಡೋಮ ಮಿಲೈಜಾ಼ಣು.
MAR 13:15 ಕೋಣ್‌ತೋಬಿ ಏಕ್‍ಜ಼ಣೊ ಇನ ಘರ್‌ನ ಛ಼ತ್‍ಪರ್‌ ರ‍್ಹಯೋತೊ, ಯೋ ಹೇಟ್ ಉತ್ರಿನ್ ಶಾತ್‌ತೋಬಿ ಪಾಡಿಲೇಣು ಕರಿ ಘರ್‌ನ ಮಹಿ ಜೈ಼ನ್, ವಖ್ಹತ್ ಬರ್ಬಾತ್ ನಾ ಕರ‍್ನು.
MAR 13:16 ಖೇತರ್‌ಮ ರ‍್ಹವಾಳು ಕೋಣ್‌ತೋಬಿ ಝ಼ಗ್ಗೊ ಪಾಡಿಲೇಣು ಕರಿ ಪಾಛು಼ಫರಿ ಘರೆ ನಾ ಜಾ಼ವ್ಣು.
MAR 13:17 ಕತೋಬಿ ಯೋ ದನೂಮ ಬೇಜೂನಿ ಅಜು಼ ದೂದ್ ಪಿಡಾವವಾಳಿ ತಯೇಡಾವ್ನ ಉಷೇತೆ ವದೇಖ್ಹ್‌ನ ಶಾತ್‌ ಬೋಲು!
MAR 13:18 ಯೋ ದನೂಮ ಘಣು ಲತಾಡ ರ‍್ಹಿಶೆ. ಇನಾಖ್ಹಾಜೆ ಆ ಖ್ಹಾರು ವರ್ಖ್ಹಾತ್ ಅಜು಼ ಠಣ್ಣಾ ದನೂಮ ನಾ ಹೋಣು ಕರಿ ಪ್ರಾರ್ಥನೆ ಕರೊ, ಶನಕತೊ ಇಮ್‌ನೊ ವದೇಖ್ಹೊ ದೇವ್ನೆ ಜಗತ್‌ ಉಬ್‌ಜಾ಼ಯೋತೆ ತಪ್‌ಥು ಧರೀನ್ ಹಮ್ಕೆಲಗು ಕೋ ಹುಯಿರ‍್ಹೂನಿ; ಖ್ಹಾಮ್ಣೇಬಿ ಅಮ್ ಕೋ ಉಶೇನಿ.
MAR 13:20 ಪ್ರಭು ಯೋ ಖ್ಹಾರ ದನ್ನ ಕಮ್ ನಾ ಕರ‍್ಯೋತೊ, ಏಕ್‌ ಅದ್ಮಿಬಿ ಬಚಿಕೊರ‍್ಹಿಷೇನಿ. ಕತೋಬಿ ಇನೆ ಚೂ಼ಣಿಲಿದೊತೆ ಖ್ಹಾರ ಅದ್ಮಿನಖ್ಹಾಜೆ ಯೋ ಖ್ಹಾರ ದನ್ನ ಕಮ್ ಕರಿರಾಖ್ಯೋಸ್.
MAR 13:21 ತದೆ ಕೋಣ್‌ತೋಬಿ ತುಮುನ, “ದೇಖೊ, ಕ್ರಿಸ್ತ ಹಜ್ಜಾ಼ ಛಾ಼! ನಾತೊ ‘ಹಂದೇಖೊ, ಯೋ ಹಿಜ್ಜಾ಼ ಛಾ಼!” ಕರಿ ಬೋಲ್ಯುತೊ ಇನ ನಕೊ ನಂಬ್‌ಶು.
MAR 13:22 ಶನಕತೊ ಝೂ಼ಟುಕ್ರೈಸ್ತರ್‌ ಖ್ಹಾರು ಅಜು಼ ಝೂ಼ಟು ಪ್ರವಾದಿಖ್ಹಾರು ದೆಖೈನ್, ಇವ್ಣೇಥಿ ಹುಯೂತೊ ದೇವ್‍ಥಿ ಚೂ಼ಣೈರ‍್ಹವಾಳನಾಬಿ ಠಗಾವಾನಖ್ಹಾಜೆ ಅದ್ಭುತ್‌ಕಾಮ್‌ ಅಜು಼ ಅಶ್ಚರ್ಯನು ಕಾಮ್‌ಖ್ಹಾರು ಕರಿ ವತಾಳ್‌ಶೆ.
MAR 13:23 ಇನಾಖ್ಹಾಜೆ ತುಮೆ ಹೊಷಾರ್‌ಥಿ ರ‍್ಹವೊ! ಯೋ ಖ್ಹಾರು ಹುವಾನ ಅಗಾಡಿಸ್ ಇನಿ ಬಾರೇಮ ಮೇ ತುಮುನ ಬೋಲಿರಾಖ್ಯೊಸ್.
MAR 13:24 ಅತ್ರೇಸ್ ಕಾಹೆತೆ ಯೋ ದನೂಮ ಯೋ ವದೇಖ್ಹೊ ಖತಮ್ ಹುಯಿಜಾ಼ವಾನ ಬಾದ್‌ಮ ಚಾ಼ಂದ್ ಕಾಳೊಪಡಿಜಾ಼ಶೆ. ಚ಼ಂದರ್‌ಮೊ ಉಜಾ಼ಳು ಕೋ ದಿಶೇನಿ,
MAR 13:25 ಆಕಾಶ್‌ಪರ್‌ಥು ಶುಕ್ಕರ್‌ಖ್ಹಾರು ಖಂಕ್ರಾಲಗ್‌ಶೆ, ಆಕಾಶ್‌ಮ ಛಾ಼ತೆ ಶಕತ್ ಖ್ಹಾರಿ ಕಾಪಿನ್‌ ಹಟ್‌ಶೆ.
MAR 13:26 ತದೆ ಅದ್ಮಿನೊ ಛಿಯ್ಯೊ ಘಣಿ ಶಕತ್‌ಥೀಬಿ, ಉಜಾ಼ಖ್ಹ್‌ಥಿ ಘೈಗ್‌ತೊಹುಯಿನ್‌, ವಾದ್ಳಮಕರಿ ಆವಾನು ಅದ್ಮಿಖ್ಹಾರು ದೇಕ್‌ಶೆ.
MAR 13:27 ತದೆ ಯೋ ಇನ ದೂತರ್‌ನ ಜ಼ಮೀನ್ನಿ ಚಾರ‍್ಹೆ ಬಾಜೂ಼ಮ ಮೋಕ್ಲಿನ್‌ ಧರ್ತಿನ ಕಡೇಶಿಥು ಧರೀನ್ ಆಬ್‍ನಿ ಖ್ಹರ್ತಿಲಗು, ಇನೆ ಚೂ಼ಣಿಲಿದೊತೆ ಖ್ಹಾರ ಅದ್ಮಿನ ಜಗತ್‌ನು ಏಕ್‌ ಬಾಜು಼ಥು ಧರಿನ್ ಬಿಜೇಕ್ ಬಾಜೂ಼ಲಗು ಎಕ್ಟು ಕರ್ಶೆ.
MAR 13:28 ಮೋಟ ಅಂಜೀರ್‌ನ ಝಾ಼ಡಾಥಿ ಮತ್ಲಬ್‌ನಿ ಅಕ್ಕಲ್ ಶಿಕೊ. ಇನಿ ಡಾಳಿಯೆ ಹರಿಗಾರ್ ಕವ್ಳಿ ಹುಯಿನ್, ಪಾಂದ್‌ಡ ಮ್ಹೇಲಾಲಗ್ಯುತೊ, ತಡ್ಕಾನ ಹಗಾಮ್‌ ಖನ್ನೆ ಐಗು ಕರಿ ಮಾಲುಮ್‌ ಕರಿಲೇವೊಸ್ನಿ.
MAR 13:29 ಇಮ್ಮಸ್ ತುಮೇಬಿ ಆ ಖ್ಹಾರು ಹುವಾನು ದೇಖ್ಯಾತೊ, ಬಾಕಲ್‌ನ ಖನ್ನೆಸ್‌ ಥೋಕರಿ ಮಾಲುಮ್‌ ಕರಿಲೆವೊ.
MAR 13:30 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ ಆ ಜ಼ಮಾನಾನು ಅದ್ಮಿಖ್ಹಾರು ಮರ್‌ವಾನ ಮಹಿಸ್ ಆ ಖ್ಹಾರು ಚಾ಼ಲ್‌ಶೇತೆ ಕರಿ ಯಾದ್‌ರಾಖೊ.
MAR 13:31 ಆಬ್-ಧರ್ತಿ ಖ್ಹಾರು ಮಟಿಜಾ಼ಶೆ, ಕತೋಬಿ ಮಾರಿ ವಾತೆಖ್ಹಾರಿ ಮಟ್‌ಶೆಸ್ ಕೊಯ್ನಿ.
MAR 13:32 ಎತ್ರೇಸ್ ಕಾಹೆತೆ ಯೋ ದನ್ನಿ ಬಾರೇಮ ರ‍್ಹವೊ ನಾತೊ ಯೋ ಘಡಿನಿ ಬಾರೇಮ ರ‍್ಹವೊ ಮಾರ ಬಾನ ಮಾಲುಮ್ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ಕೊಯ್ನಿ; ಪರ್‌ಲೋಕ್‌ಮ ಛಾ಼ತೆ ದೇವ್‌ನು ದೂತರ್‌ನಾಬಿ ಮಾಲುಮ್‌ಕೊಯ್ನಿ, ಛಿಯ್ಯಾನಾಬಿ ಮಾಲುಮ್‌ಕೊಯ್ನಿ.
MAR 13:33 ಯೋ ವಖ್ಹತ್ ಕದೆ ಆವ್‍ಶೆಕರಿ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿರ‍್ಹವೊ, ಕದೇಬಿ ಜ಼ತನ್‌ಥಿರ‍್ಹವೊ.
MAR 13:34 ಏಕ್‌ ಅದ್ಮಿ ಇನು ಘರ್‌ನ ಮ್ಹೇಲಿನ್ ದೇಖ್ಹ್‌ಪರ್ ಜಾ಼ವಾನಿ ವಖ್ಹತ್‌ಮ, ಇನ ಸೇವಕರ್‌ನ ಬುಲೈನ್ ಘರ್‌ನ ದೇಕ್-ಭಾಲ್‌ ಕರಾನು ಕಾಮ್ನಿ ಅದಿಕಾರ್‌ನ ದಿದೊ. ಏಕೇಕ್‌ ಜ಼ಣಾನ ಇವ್ಣು-ಇವ್ಣು ಕಾಮ್‌ದೀನ್‌, ಘರ್‌ನಿ ಕಾವ್ಲಿ ಕರಾವಾಳನ ಹೊಷಾರಿ ರ‍್ಹೇಣು ಕರಿ ಹುಕುಮ್‌ ದಿದೊ. ಇಮ್ಮಸ್ ಮೇ ತುಮುನ ಹುಕುಮ್‌ ದೆವ್‍ಸ್.
MAR 13:35 ಘರ್‌ನೊ ಯಜಮಾನ್ ಖ್ಹಾಂಜೇಕಿ, ಅಧಿರಾತ್ಮ, ಮುರ್‌ಗಾ ಬಾಂಗೆಕಿ, ದನ್ ನಿಕ್ಳಾದೀನ್‌ಕಿ, ಕದೆ ಆವ್‍ಶೆಕರಿ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿ ರ‍್ಹವೊ.
MAR 13:36 ಯೋ ಮಾಲುಮಸ್ ಪಡಾಕೊಂತೆ ಇಮ್‌ ಆಯೋತೊ, ತುಮೆ ಖ್ಹುತಾರ‍್ಹವಾನು ನಾ ದೇಕ್ಣು.
MAR 13:37 ಮೇ ತುಮುನ ಬೋಲೂಸ್ತೆ ಇನ ಅಖ್ಖಾನ ಬೋಲುಸ್, ಹೊಷಾರ್‌ಥಿ ರ‍್ಹವೊ” ಕರಿ ಬೋಲ್ಯೊ.
MAR 14:1 ಪಸ್ಕ ಪೂಜ಼ ಅಜು಼ ಖಾಟುಕೊಂತೆ ರೋಟಾನಿ ಪೂಜಾ಼ನ ಬೇ ದನ್ ಥಾತೆ ತದೆ, ಗಲ್‌ಢಯಾಜಕರ್‌ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಕಿನಾಬಿ ಮಾಲುಮ್ ನಾಪಡ್ಣುತೆ ಇಮ್‌ ಯೇಸುನ ಧರೀನ್ ಮಾರಿನಾಕ್ಣು ಕರಿ ದೇಖುಕರ್ತುಥು.
MAR 14:2 ಕತೋಬಿ ಇವ್ಣೆ, “ಪೂಜಾ಼ನಿ ವಖ್ಹತ್‌ಮ ಯೇಸುನ ನಾ ಧರ್‌ನು, ಶನಕತೊ ಅದ್ಮಿಖ್ಹಾರು ಅಪ್ಣಪರ್ ಕಲ್ಹಾಗಟ್‌ನ ಉಟ್‌ಶೆ” ಕರಿ ವಾತೆ ಬೋಲಿಲಿದು.
MAR 14:3 ಯೇಸು ಬೇಥಾನ್ಯ ಗಾಮ್ಮ ಸೀಮೋನ್ನ ಘರ್‌ಮ ಥೊ, ಆ ಸೀಮೋನ್ನ ಖೋಡ್‍ ಲಾಗಿರ‍್ಹೂಥು. ಹಿಜ್ಜಾ಼ ಯೇಸು ಖಾಣು ಖಾವಾನಿ ವಖ್ಹತ್‌ಮ, ಏಕ್‌ ತಯೇಡ ನಾರ್ಡ್‌ಥಿ ಬಣಾಯುಹುಯು, ಘಣ ಮೋಲ್ನು ವಾನು ತೇಲ್ನ ಬಂಡಾನಿ ಶೀಶಿಮ ಲೀನ್ ಐನ್, ಯೋ ಶೀಶಿನ ಫೋಡಿನ್, ತೇಲ್ನ ಯೇಸುನ ಮಾಥಪರ್ ರಂಚಿ.
MAR 14:4 ಕತೋಬಿ ಹಿಜ್ಜಾ಼ ಥೂತೆ ಥೋಡು ಜ಼ಣು ಇವ್ಣ-ಇವ್ಣಮ ಖೀಜ಼್ ಖೈನ್, “ವಾನುತೇಲ್‌ನ ಲುಕ್ಷಾನ್ ಕರಾಥಿ ಶನಿ ಫಾಯಿ‍ದೊ?
MAR 14:5 ಆ ತೇಲ್ನ ತೀನ್‌ಖ್ಹೊ ರೂಪಾನು ಪಾವ್ಲನ ವೇಚಿನ್ ಗರೀಬ್‌ನ ದಿಯ್ಯೆಜಾ಼ಯಿಥೂನಿ!” ಕರಿ ಬೋಲಿನ್ ಗಾಳೆ ದಿದು.
MAR 14:6 ಕತೋಬಿ ಯೇಸುನೆ, “ಅನ ಮ್ಹೇಲೊ! ಶನ ಅನ ಖ್ಹತಾವಸ್ತೆ? ಆ ತಯೇಡ ಮಾರಖ್ಹಾಜೆ ಘಣು ಅಛ್ಛು಼ಕಾಮ್ ಕರಿರಾಖೀಸ್.
MAR 14:7 ಗರೀಬ್ ಅದ್ಮಿಖ್ಹಾರು ಕದೇಬಿ ತುಮಾರ ಜೋ಼ಡೆ ರ‍್ಹಿಶೆ, ತುಮುನ ಮನ್ ಆವಾತೆ ತದೆ, ಇವ್ಣುನ ಮದತ್ ಕರೆಜಾ಼ಯ್, ಕತೋಬಿ ಮೇ ಕದೇಬಿ ತುಮಾರಕನ ರ‍್ಹೀಶ್‌ಕೊಯ್ನಿ.
MAR 14:8 ಅನೆ ಇನೊ ಹಾತ್‌ ಕೆತ್ರೆ ಹುವ್ವಾಸ್‌ಕಿ ಎತ್ರೆ ಕರಿರಾಖೀಸ್. ಮೇ ಮರ್‌ವಾನ ಅಗಾಡಿಸ್, ಮಾರು ಶರೀರ್‌ನ ಮಖ್ಹಾಣ್ಯು ಕರಾನ ಖ್ಹವಾರನಖ್ಹಾಜೆ ಅನೆ ಅಗಾಡಿಸ್ ಮಾರ ಆಂಗ್‌ತನ್‌ಪರ್ ವಾನು ತೇಲ್‌ಲಗಾಡಿರಾಖಿಸ್‌.
MAR 14:9 “ಹಿಡಿ ಜಗತ್‌ಮ ದೇವ್ನಿ ಅಛ್ಛಿ ಖಬರ್ ಕಿಜ಼್ಜ-ಕಿಜ಼್ಜ ಬೋಲಾವ್‌ಶೇಕಿ, ಹಿಜ್ಜಾ಼-ಹಿಜ್ಜಾ಼ ಅನೆ ಕರೀತೆ ಇನಾಬಿ ಅನಿ ಯಾದ್‌ನಖ್ಹಾಜೆ ಬೋಲ್‌ಶೆ”ಕರಿ ತುಮುನ ಖ್ಹಾಚಮಾಬಿ ಬೋಲುಸ್ ಕರಿ ಬೋಲ್ಯೊ.
MAR 14:10 ಅನ ಬಾದ್‌ಮ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಇಸ್ಕರಿಯೋತ ಯೂದಾನೆ, ಯೇಸುನ ಗಲ್‌ಢಯಾಜಕರ್‌ನ ಧರಿದೇಣು ಕರಿ ಇವ್ಣಾಕನ ಗಯೊ.
MAR 14:11 ಇನೆ ಬೋಲ್ಯೋತೆ ವಾತೆನ ಖ್ಹಮ್‌ಜಿನ್‌ ಇವ್ಣುನ ಖ್ಹುಶಿ ಹುಯು, ಅಜು಼ ಯೂದಾನ, “ತುನ ಪೈಶಾ ದಿಶು ಕರಿ” ವಾತೆದಿದು. ಇನಾಖ್ಹಾಜೆ ಯೂದ ಯೇಸುನ ಧರಿದ್ಯವಾನಿ ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೂಕರ್ತೊಥೊ.
MAR 14:12 ಖಾಟುಕೊಂತೆ ರೋಟಾನು ಪೂಜಾ಼ನ ಪಹಿಲ ದನ್ನೆ, ಕತೊ ಪಸ್ಕಾನಿ ಪೂಜಾ಼ನಮೆಂಢಾನ ಚೆಲ್ಕ ರ‍್ಹೇಖ್ಹಾನ ದನ್ನೆ, ಯೇಸುನ ಶಿಷ್ಯರ್‌ ಇನ, “ಹಮೆ ಕಿಜ಼್ಜಾ ಜೈ಼ನ್‌ ತಾರಾಖ್ಹಾಜೆ ಪಸ್ಕಾನು ಖಾಣನ ಖ್ಹವಾರ್‌ನು?” ಕರಿ ಪುಛಾ಼ಯ.
MAR 14:13 ಯೇಸುನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತುಮೆ ಖ್ಹಯೇರ‍್ನ ಮಹಿ ಜಾ಼ವೊ, ಹಿಜ್ಜಾ಼ ಏಕ್‌ ಅದ್ಮಿ ಪಾಣಿನೊ ಘಡೊ ಪಳ್ಳಿನ್‌ ತುಮಾರ ಖ್ಹಾಮ್ಣೆ ಆವ್‌ಶೆ; ಇನ ಪೀಠೆ ಜಾ಼ವೊ.
MAR 14:14 ಯೋ ಖೆವ ಘರ್‌ಮ ಜಾ಼ಶೆಕಿ, ಯೋ ಘರ್‌ನ ಯಜಮಾನ್ನ, “ಮಾರ ಶಿಷ್ಯರ್‌ಬಿ ಮೇ ಪಸ್ಕಾನು ಖಾಣು ಖಾವಾನಖ್ಹಾಜೆ ಖಾಣಾನಿ ಝ಼ಗೊ ಕಿಜ಼್ಜಾ ಛಾ಼, ಕರಿ ಗುರುನೆ ಪುಛಾ಼ಯೊ ಕರಿ ಬೋಲೊ.
MAR 14:15 ತದೆ ಯೋ ಹೋಣುತೆ ಖ್ಹಾಮನ್‌ ಖ್ಹಾರು ಬರೋಬರ್‌ಥಿ ಖ್ಹವಾರೈರ‍್ಹಿಶೇತೆ, ಛ಼ತ್‍ನ ಉಪ್ಪರ್‌ಲ್ಯೊ ಮೋಟ ಕೋಣಾನ ತುಮುನ ವತಾಳ್‌ಶೆ, ಹಿಜ್ಜಾ಼ ಅಪ್ಣಖ್ಹಾಜೆ ಖ್ಹಾರು ಖ್ಹವಾರೊ” ಕರಿ ಬೋಲಿನ್ ಮೋಕ್‌ಲ್ಯೊ.
MAR 14:16 ತದೆ ಯೋ ಶಿಷ್ಯರ್‌ ಹಿಜ್ಜಾ಼ಥು ನಿಕ್ಳಿನ್, ಖ್ಹಯೇರ್‌ಮ ಜೈ಼ನ್‌, ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಥೂತೆ ದೇಖಿನ್‌; ಪಸ್ಕಾನ ಖಾಣನ ತೈಯಾರ್ ಕರ‍್ಯು.
MAR 14:17 ಖ್ಹಾಂಜ಼್ ಹುವಾನ ಬಾದ್‌ಮ, ಯೇಸು ಇನ ಭಾರ ಜ಼ಣ ಶಿಷ್ಯರ್‌ನ ಜೋ಼ಡ್ಮ ಆಯೊ.
MAR 14:18 ಇವ್ಣೆ ಖಾಣು ಖವಾನಿ ವಖ್ಹತ್‌ಮ ಯೇಸುನೆ, “ತುಮುನ ಖ್ಹಾಚಮಾಬಿ ಬೋಲುಸ್ಕಿ, ತುಮಾರಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ, ಯೋ ಮಾರ ಜೋ಼ಡ್ಮ ಖಾಣು ಖಾವಾಳೋಸ್ ಹುಯಿರ‍್ಹೋಸ್” ಕರಿ ಬೋಲ್ಯೊ.
MAR 14:19 ತದೆ ಇವ್ಣೆ ದುಖ್‌ಥಿ, “ಮೇತೊ ಕಾಹೆನಿ, ಮೇತೊ ಕಾಹೆನಿ” ಕರಿ ಏಕ್‌ನ ಬಾದ್‌ಮ ಏಕ್‌ ಇನ ಬೋಲಾಲಗ್ಯ.
MAR 14:20 ತದೆ ಯೇಸುನೆ ಇವ್ಣುನ, “ಯೋ ಮಾರ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ, ಯೋ ಮಾರ ಜೋ಼ಡ್ಮ ಕಟೋರಿಮ ಇನೊ ರೋಟೊ ಚೋ಼ಪ್‍ಡಿನ್ ಖಾವಾಳೋಸ್.
MAR 14:21 ಅದ್ಮಿನೊ ಛಿಯ್ಯೊ ಇನಿ ಬಾರೇಮ ಲೀಖೈರ‍್ಹೂಸ್ತೆ ಇಮ್ಮಸ್ ಮರ್‌ಶೇತೆ ಖ್ಹಾಚಸ್; ಕತೋಬಿ ಕೋಣ್, ಅದ್ಮಿನೊ ಛಿಯ್ಯಾನ ಧೋಕೊದೀನ್ ಧರಿದಿಶೇಕಿ ಇನಿ ಹಾಲ್ನ ಶಾತ್‌ ಬೋಲು! ಯೋ ಅದ್ಮಿ ಪೈದ ನಾಸ್ ಹುಯುಹೊತ್ತೊ ಇನ ಅಛ್ಛು಼ ರ‍್ಹಯುಹೋತ್‌!” ಕರಿ ಬೋಲ್ಯೊ.
MAR 14:22 ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ರೋಟಾನ ಪಾಡಿನ್, ದೇವ್ನ ಧನ್ಯವಾದ್‌ ಕರೀನ್, ಇನ ತೋಡಿನ್, “ಅಲ್ಲೇವೊ, ಆ ಮಾರು ಶರೀರ್” ಕರಿ ಬೋಲಿನ್ ಇನ ಶಿಷ್ಯರ್‌ನ ದಿದೊ.
MAR 14:23 ಬಾದ್‌ಮ ಕಟೋರಿನ ಪಾಡಿನ್,ದೇವ್ನ ಧನ್ಯವಾದ್ ಕರೀನ್, ಇವ್ಣುನ ದಿದೊ; ಇವ್ಣೆ ಖ್ಹಾರೂಸ್ ಇನಾಮ ಪೀದು.
MAR 14:24 ತದೆ ಯೇಸುನೆ ಇವ್ಣುನ, “ಆ ಮಾರು ಲ್ಹೋಯಿ, ಆ ದೇವ್ನೆ ಇನ ಅದ್ಮಿನ ಜೋ಼ಡೆ ಕರ‍್ಯುಹುಯು ನವು ಒಪ್ಪಂದಾನನು ಮಾರು ಲ್ಹೋಯಿ; ಆ ಘಣ ಅದ್ಮಿನಖ್ಹಾಜೆ ರಂಚಾ಼ಯುತೆ ಲ್ಹೋಯಿ.
MAR 14:25 ಮೇ ಖ್ಹಾಚಮಾಬಿ ತುಮುನ ಬೋಲುಸ್ಕಿ, “ಹಂಕೇಥು ಧರೀನ್ ಮೇ ದೇವ್ನಿ ರಾಜ್ಯಮ ನವು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದನ್‌ತೋಡಿ ಅನ ಪಾಛು಼ ಪೀಶಸ್‌ಕೊಯ್ನಿ”.
MAR 14:26 ಬಾದ್‌ಮ ಇವ್ಣೆ ಸ್ತುತಿನು ಗೀದ್‌ ಬೋಲಿನ್ ಆಲಿವ್ ಪಹಡ್‌ಕನ ಚ಼ಲೇಗಯ.
MAR 14:27 ತದೆ ಯೇಸುನೆ ಇವ್ಣುನ, “ತುಮೆ ಖ್ಹಾರುಸ್ ಮನ ಮ್ಹೆಂದಿನ್ ಮಿಲೈಜಾ಼ಶು, ಶನಕತೊ, ‘ದೇವ್ ಮೇಂಢ ಚ಼ರಾವವಾಳಾನ ಮರ್‌ನಾಕಿಶ್, ತದೆ ಮಂಧಾಮಾಥು ಮೇಂಢ ಛಿಡ್‌ಗರ್‌ ಹುಯಿಜಾ಼ಶೆ’ ಕರಿ ಲೀಖೈರ‍್ಹೂಸ್‌ನಿ.
MAR 14:28 ಕತೋಬಿ ಮೇ ಜಿವ್ತೊಹುಯಿನ್ ಉಠಾನ ಬಾದ್‌ಮ, ತುಮಾರೇಥಿ ಅಗಾಡಿ ಗಲಿಲಾಯ ಜೈ಼ಶ್”. ಕರಿ ಬೋಲ್ಯೊ.
MAR 14:29 ಕತೋಬಿ ಪೇತ್ರನೆ, “ಖ್ಹಾರು ಡರಿನ್ ತುನ ಮ್ಹೆಂದಿದುತೋಬಿ, ಮೇ ಕೋ ಮ್ಹೇಲೀಶ್‌ನಿ!” ಕರಿ ಬೋಲ್ತಖ್ಹತರ್‌,
MAR 14:30 ಯೇಸುನೆ ಪೇತ್ರನ, “ಖ್ಹಾಚಮಾಬಿ ತುನ ಬೋಲುಸ್ಕಿ ಆ ರಾತೇಸ್ ಮುರ್‌ಗೊ ಬೇ ಹಲ್ಲ ಬಾಂಗ್‌ ದ್ಯವಾನ ಅಗಾಡಿ, ತು ಮಾರಿ ಬಾರೇಮ, ‘ಯೋ ಮನ ಮಾಲುಮ್‌ಕೊಯ್ನಿ’ ಕರಿ ತೀನ್ ಹಲ್ಲ ಬೋಲಿಶ್” ಕರಿ ಬೋಲ್ಯೊ.
MAR 14:31 ಕತೋಬಿ ಪೇತ್ರನೆ ಬಿಜೂ಼ಬಿ ಕಡಕ್‌ಥಿ, “ಮೇ ತಾರ ಜೋ಼ಡ್ಮ ಮರ‍್ನುಕತೋಬಿ, ‘ತೂ ಮನ ಮಾಲುಮ್‌ ಕೊಯ್ನಿ’ ಕರಿ ಕೋಸ್ ಬೋಲಿಶ್‌ನಿ!” ಕರಿ ಬೋಲ್ಯೊ. ಅಜು಼ ಖ್ಹಾರ ಶಿಷ್ಯರ್‌ನೇಬಿ ಇಮ್ಮಸ್ ಬೋಲ್ಯ.
MAR 14:32 ಬಾದ್‌ಮ ಇವ್ಣೆ ಅಖ್ಖಾಜ಼ಣ ಗೆತ್ಸೆಮನೆ ಕರಿ ಬಾಗ್‌ಕನ ಆಯ, ಯೇಸುನೆ ಇನ ಶಿಷ್ಯರ್‌ನ, “ಹಜ್ಜಾ಼ಸ್ ಬೇಖ್ಹೊ, ಮೇ ಪ್ರಾರ್ಥನೆ ಕರೀನ್ ಆವುಸ್‌” ಕರಿ ಬೋಲ್ಯೊ.
MAR 14:33 ಅಮ್ ಬೋಲಿನ್ ಖಲಿ ಪೇತ್ರ, ಯಾಕೋಬ್ ಅಜು಼ ಯೋಹಾನ್ನ ಇನ ಜೋ಼ಡ್ಮ ಬುಲೈಲಿ ಗಯೊ. ತದೆ ಯೇಸುನ ಘಣು ಘಬ್ರಾವ್‍ಣಿ ಹುಯು ಅಜು಼ ದುಖ್‌ಥಿ ಭರೈಗೊ.
MAR 14:34 ಅಜು಼ ಇನೆ ಇವ್ಣುನ, “ಮಾರೊ ಜಾನ್‌ ಮರ‍್ವಎತ್ರೆ ದುಖ್‌ಮ ಛಾ಼. ತುಮೆ ಹಜ಼್ಜಾಸ್ ರ‍್ಹೀನ್ ಹೊಷಾರಿ ರ‍್ಹವೊ” ಕರಿ ಬೋಲಿನ್,
MAR 14:35 ಜ಼ರ ಖ್ಹಾಮ್ಣೆ ಜೈ಼ನ್, ಜ಼ಮೀನ್‌ಪರ್ ಆಡೊ ಪಡೀನ್, ಹೋತು ಉಶೇತೊ, ಯೋ ವದೇಖ್ಹಾನಿ ವಖ್ಹತ್ ಇನ ಮ್ಹೆಂದಿನ್ ಜಾ಼ವಾನಿತರ ಪ್ರಾರ್ಥನೆ ಕರೀನ್,
MAR 14:36 “ಓ ಬಾ, ಓ ಮಾರೊ ಬಾ! ತಾರೇಥಿ ಖ್ಹಾರುಸ್‌ ಹುವ್ವಾಸ್‌. ಆ ವದೇಖ್ಹಾನ ರಾಛಾ಼ನ ಮಾರೇಥಿ ಹಟಾವ್‌. ತೋಬಿ ಮಾರಿ ಮರ್ಜಿನಿ ಘೋಣಿ ಕಾಹೆತೆ ತಾರಿ ಮರ್ಜಿನಿ ಘೊಣಿಸ್ ಹುವಾದೆ” ಕರಿ ಬೋಲ್ಯೊ.
MAR 14:37 ಬಾದ್‌ಮ ಯೇಸು ಪಾಛೊ಼ಫರಿ ಐನ್ ದೇಖಾತೊ ಯೋ ತೀನ್ ಜ಼ಣ ಶಿಷ್ಯರ್‌ ನಿಂದರ್‌ ಲೆವ್‌ಕರ್ತುಥು. ತದೆ ಇನೆ ಪೇತ್ರನ, “ಸೀಮೋನ್, ಖ್ಹುತೋಸ್ಕಿ ಶು? ಏಕ್‌ ಘಡೀಬಿ ತುನ ಹೊಷಾರಿರ‍್ಹವಾನ ಕೋ ಹೋಯ್ನಿಕಿ ಶು?”
MAR 14:38 ಅಜು಼ ಇವ್ಣುನ ಬೋಲ್ಯೋಕಿ, “ಶೋದನೆಮ ಪಡ್ಣುನಾತೆ ಇಮ್‌ ಹೊಷಾರಿ ರ‍್ಹೀನ್ ಪ್ರಾರ್ಥನೆ ಕರೊ. ಮನ್ ಛಾ಼ ಖ್ಹಾಚಸ್, ಕತೋಬಿ ಶರೀರ್‌ನ ಶಕತ್ ಪೂರಕೊಯ್ನಿ.”
MAR 14:39 ಬಾದ್‌ಮ ಪಾಛೊ಼ ಜೈ಼ನ್‌, ಯೋಸ್‌ ವಾತೆನ ಬೋಲ್ತೊಹುಯಿನ್ ಪ್ರಾರ್ಥನೆ ಕರ‍್ಯೊ.
MAR 14:40 ಪಾಛೊ಼ ಐನ್ ದೇಖಾನಿ ವಖ್ಹತ್‌ಮ ಇವ್ಣೆ ಬಿಜೂ಼ಬಿ ನಿಂದರ್‌ ಲೆವ್‌ಕರ್ತುಥು; ಇವ್ಣ ಡೋಳಾಮ ನಿಂದರ್‌ ಚು಼ವ್‌ಕರ್ತುಥು. ಇನಾಖ್ಹಾಜೆ ಯೇಸುನೆ ಪುಛಾ಼ಯೋತೆ ಇನ, ಶಾತ್‌ ಬೋಲ್‌ನು ಕರಿ ಇವ್ಣುನ ಮಾಲುಮ್‌ ಕೋ ಪಡ್ಯುನಿ.
MAR 14:41 ಯೇಸುನೆ ತೀನ್ನೆ ಹಲ್ಲ ಪ್ರಾರ್ಥನೆನ ಜೈ಼ನ್ ಐನ್ ಇವ್ಣುನ, “ತುಮೆ ಹಂಕೆತೋಡಿ ಖ್ಹುಯಿನ್, ಅರಾಮ್‌ ಕರುಕರಾಸ್ಕಿ ಶು? ಬಶ್‌! ಹಂದೇಖೊ, ಅದ್ಮಿನೊ ಛಿಯ್ಯಾನ ಧರೀನ್ ಪಾಪಿ ಅದ್ಮಿನ ಹಾತ್‌ಮ ದೆವೈಜಾ಼ಶೆ.
MAR 14:42 ಉಠೊ, ಜ಼ಯ್ಯೆ. ಮನ ಧೋಕೇಥಿ ಧರಿದ್ಯವಾಳೊ ಖನ್ನೆಸ್‌ ಐರ‍್ಹೋಸ್, ದೇಖೊ” ಕರಿ ಬೋಲ್ಯೊ.
MAR 14:43 ಯೇಸು ಅಜೂ಼ಬಿ ವಾತೆ ಬೋಲುಕರಾತೆ ತದ್ದೇಸ್, ಇನ ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ, ಹಿಜ್ಜಾ಼ ಆಯೊ. ಇನ ಜೋ಼ಡ್ಮ ಗಲ್‌ಢಯಾಜಕರ್‌, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣುಖ್ಹಾರು ಬೋಲಿ ಮೋಕ್‍ಲ್ಯುಹುಯು ಏಕ್‌ ಟೋಳ್‌, ತಲ್ವಾರೆ ಅಜು಼ ಲಠ್ಠ ಧರಿಲಿನ್‌ ಹಿಜ್ಜಾ಼ ಆಯು.
MAR 14:44 ಯೇಸುನ ಧೋಕೇಥಿ ಧರಿದ್ಯವಾಳೊ ಯೋ ಝೂ಼ಂಡ್‌ವಾಳನ, “ಮೇ ಕಿನ ಬುಚ್ಚಾ಼ ದೆವ್‌ಸ್ಕಿ ಯೋಸ್‌ ತುಮೂನ ಹೋಣುತೆ ಅದ್ಮಿ. ಇನ ಧರೀನ್ ಹೊಷಾರ್‌ಥಿ ಲೀಜಾ಼ವೊ” ಕರಿ ಖ್ಹಣೇದ್ ಬೋಲಿ ದೀರಾಖ್ಯೊಥೊ.
MAR 14:45 ಯೂದ ಹಿಜ್ಜಾ಼ ಆವ್‌ತಾಸ್ನ, ಇನೆ ಯೇಸುನ ಖನ್ನೆ ಜೈ಼ನ್‌, “ಗುರು!” ಕರಿ ಬೋಲಿನ್ ಇನ ಬುಚ್ಚಾ಼ ದಿದೊ.
MAR 14:46 ತದೆ ಇವ್ಣೆ ಯೇಸುಪರ್ ಹಾತ್‌ ನಾಖಿನ್ ಇನ ಧರ‍್ಯು.
MAR 14:47 ತದೆ ಹಿಜ್ಜಾ಼ ಖನ್ನೆಸ್‌ ಭಿಯ್ಯುಥೂತೆ ಏಕ್‌ ಜ಼ಣು ಇನಿ ತಲ್ವಾರ್‌ನ ಕಾಡಿನ್, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನೊ ಕಾನ್‌ ಕತ್ರಿನಾಖ್ಯು.
MAR 14:48 ತದೆ ಯೇಸುನೆ ಇವ್ಣುನ, “ಚೋ಼ರ್‌ನ ಧರಾನಿಘೋಣಿ ತಲ್ವಾರೆ, ಲಠ್ಠ ಪಳ್ಳಿನ್‌ ಮನ ಧರಾನಖ್ಹಾಜೆ ಆಯಾಕಿ ಶು?
MAR 14:49 ಮೇ ದನ್‌ರೋಜ಼್‌ ತುಮಾರ ಜೋ಼ಡ್ಮಾಸ್ ರ‍್ಹೀನ್ ಮೋಟಿ ಮಂದಿರ್‌ಮ ವಚನ್ ಬೋಲಿ ದೆವ್‌ಕರ್ತೊಥೋತೆ, ತದೆ ತುಮೆ ಮನ ಧರ‍್ಯಾಕೊಯ್ನಿ. ತೋಬಿ ವಚನ್‌ಮ ಲೀಖೈರ‍್ಹೂತೆ ಪೂರಹುವಾನಖ್ಹಾಜೆ ಆ ಖ್ಹಾರು ಹುಯೂತೆ” ಕರಿ ಬೋಲ್ಯೊ.
MAR 14:50 ತದೆ ತಮಾಮ್‌ ಶಿಷ್ಯರ್‌ ಯೇಸುನ ಮ್ಹೆಂದಿನ್ ನಾಶಿ ಚ಼ಲೇಗಯ.
MAR 14:51 ಹಿಜ್ಜಾ಼ ಏಕ್‌ ಜಾ಼ನ್ಜ಼ಮಾನ್ ಅದ್ಮಿ, ಖಾಲಿ ಆಂಗ್‌ಪರ್‌ ಘಣ ಮೋಲ್‌ನುಲುಂಗ್ಡು ಲಪೇಟಿಲೀನ್, ಯೇಸುನ ಪೀಠೆ-ಪೀಠೆ ವಳ್ಯುಜಾ಼ತೂಥು. ಇವ್ಣೆ ಇನಾಬಿ ಧರಿಲೇವ್ಣು ಕರಿ ಕರ‍್ಯು,
MAR 14:52 ಕತೋಬಿ ಯೋ ಇನು ಕೋರಲುಂಗ್ಡಾನ ಮ್ಹೆಂದಿನ್, ಖಾಲಿಆಂಗೇಸ್‌ ನಾಶಿಗಯು.
MAR 14:53 ಬಾದ್‌ಮ ಇವ್ಣೆ ಯೇಸುನ ಗಲ್‌ಢಯಾಜಕ್‌ನ ಘರ್‌ಕನ ಲೀನ್‌ಗಯು, ಹಿಜ್ಜಾ಼ ಗಲ್‌ಢಯಾಜಕರ್‌, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಭರೈರ‍್ಹೂಥು.
MAR 14:54 ಪೇತ್ರ ದೂರ್‌ಥೋಸ್ ಯೇಸುನ ಪೀಠೆ-ಪೀಠೆ ಜಾ಼ತೋಹುಯಿನ್‌ ಗಲ್‌ಢಯಾಜಕ್‌ನ ಘರ್‌ನ ಖ್ಹಾಮ್ಣೆನು ಚೌ಼ಕ್‌ಕನ ಗಯೊ. ಹಿಜ್ಜಾ಼ ಆಗ್ ಶೇಕು ಕರ್ತುಥೂತೆ ಕಾವ್ಲಿ ಕರಾವಾಳನ ಜೋ಼ಡ್ಮ ಬೇಶಿನ್, ಯೋಬಿ ಆಗ್ ಶೇಕಾಲಗ್ಯೊ.
MAR 14:55 ತದೆ ಗಲ್‌ಢಯಾಜಕರ್‌ ಅಜು಼ ಮೋಟಿ ಸಬೇನು ಖ್ಹಾರು ಯೇಸುನ ಮರೈನಾಖಿದೇಣು ಕರಿ ಸಬೂತ್ ಢೂಂಡ್ಯು. ಕತೋಬಿ ಬರೋಬರ್‌ನಿ ಸಾಕ್ಷಿ ಮಳ್ಯುಕೊಯ್ನಿ.
MAR 14:56 ಘಣು ಅದ್ಮಿ ಯೇಸುಪರ್‌ ಝೂ಼ಟಿ ಸಾಕ್ಷಿಖ್ಹಾರಿ ಬೋಲ್ಯುತೋಬಿ ಇವ್ಣಿ ಸಾಕ್ಷಿ ಏಕ್‌ಥಿ-ಏಕ್‌ ಬರೋಬರ್ ಕೋ ಲಾಗ್ಯುನಿ.
MAR 14:57 ಬಾದ್‌ಮ ಥೋಡು ಅದ್ಮಿ ಉಠಿ ಭೀರಿನ್‌, “ಅದ್ಮಿನೆ ಭಾಂದಿರಾಖ್ಯುಸ್ತೆ ಆ ಮಂದಿರ್‌ನ ಮೇ ಫೋಡಿನಾಖಿನ್, ಅದ್ಮಿನ ಹಾತೇಖ್ಹು ಭಾಂದಾನ ಕೋ ಹುವ್ವಾನಿತೆ ಬಿಜೇಕ್‌ ಮಂದಿರ್‌ನ, ತೀನ್ ದನ್ಮ ಭಾಂದೀಶ್’ ಕರಿ ಆ ಬೋಲ್ಯೊತೆ ಹಮೆ ಖ್ಹಮ್‌ಜಿರಾಖ್ಯಾಸ್‌” ಕರಿ ಯೇಸುಪರ್‌ ಝೂ಼ಟಿ ಸಾಕ್ಷಿ ಖ್ಹಾರು ಬೋಲ್ಯು.
MAR 14:59 ತದೇಬಿ ಇವ್ಣಿ ಸಾಕ್ಷಿ ಖ್ಹಾರು ಏಕ್‌ಥಿ-ಏಕ್‌ ಬರೋಬರ್ ಕೋ ಲಾಗ್ಯುನಿ.
MAR 14:60 ತದೆ ಗಲ್‌ಢೊಯಾಜಕ್‌ನೆ ಉಠೀನ್ ಖ್ಹಾರಾನ ಖ್ಹಾಮ್ಣೆ ಭೀರಿನ್, “ತೂ ಶಾತ್ಬಿ ಜವಾಬ್ ಕೋ ದೇಯ್ನಿಕಿ ಶು? ಅವ್ಣೆ ತಾರಪರ್ ಬೋಲುಕರಸ್ತೆ ಆ ಸಾಕ್ಷಿ ಖ್ಹಾಚಸ್‌ಕಿ ಶು?” ಕರಿ ಯೇಸುನ ಪುಛಾ಼ಯೊ.
MAR 14:61 ತೋಬಿ ಯೇಸುನೆ ಶಾತ್ಬಿ ಫರೈ ಕೋ ಬೋಲ್ಯೊನಿತೆ ಖ್ಹೊಪ್‌ ಥೊ. ಪಾಛೊ಼ ಗಲ್‌ಢಯಾಜಕ್‌ನೆ, “ತೂ ಮಹಾನ್ ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಕ್ರಿಸ್ತಸ್‌ಕಿಶು?” ಕರಿ ಯೇಸುನ ಪುಛಾ಼ವಖ್ಹತರ್,
MAR 14:62 ಯೇಸುನೆ, “ಒಹೊ, ಮೇಸ್; ಎತ್ರೇಸ್ ಕಾಹೆತೆ ಅದ್ಮಿನೊ ಛಿಯ್ಯೊ, ಮಹಾನ್ ಶಕತ್‌ವಾಳೊ ದೇವ್ನ ಖಾವಿಬಾಜು಼ಮ ಬೆಠೊರ‍್ಹಿಶೇತೆ ಅಜು಼ ಆಬ್‍ನ ವಾದ್ಳಪರ್ ಬೇಶಿನ್ ಆವ್‌ಶೇತೆ ತುಮೆಖ್ಹಾರು ದೇಕ್‌ಶು!” ಕರಿ ಬೋಲ್ಯೊ.
MAR 14:63 ಅನ ಖ್ಹಮ್‌ಜಿನ್‌, ಗಲ್‌ಢಯಾಜಕ್‌ನೆ ಇನ ಝ಼ಗ್ಗಾನ ಫಾಡಿಲೀನ್, “ಅಪ್ಣುನ ಅನೇಥಿಬಿ ಅಜು಼ ಖೆವಿ ಸಾಕ್ಷಿ ಹೋಣು!
MAR 14:64 ಅನೆ ದೇವ್ನ ಗಾಳೆಕರಾನಿ ವಾತೆ ಬೋಲ್ಯೋತೆ ತುಮೆ ಖ್ಹಮ್‌ಜ್ಯಾನಿ. ತುಮುನ ಕಿಮ್ ದೆಖಾವಸ್?” ಕರಿ ಬೋಲ್ತಖ್ಹತರ್‌, ಇವ್ಣೆ ಖ್ಹಾರು ಯೇಸುನಿ ವಿರೋದ್ ಹಾತ್‌ ಪಾಡಿನ್, “ಆ, ಮರ್‌ವಾನ ಲ್ಹಾಯಕಸ್ ಛಾ಼” ಕರಿ ಬೋಲ್ಯು.
MAR 14:65 ಬಾದ್‌ಮ ಇವ್ಣಾಮ ಥೋಡು ಜ಼ಣು ಯೇಸುಪರ್‌ ಥೂಕಿನ್, ಇನ ಮ್ಹೋಡಾಪರ್ ಲುಂಗ್ಡು ನಾಖಿನ್, ಗುಖ್ಹ್‌ತೊ ದೀನ್, “ಕಿನೆ ಮಾರ‍್ಯೂಕಿ ಪ್ರವಾದ್‌ನೆ ಬೋಲ್‌ನು ದೇಖೆ!” ಕರಿ ಬೋಲ್ಯು. ಅಜು಼ ಕಾವ್ಲಿ ಕರಾವಾಳನೆ ಇನ ಕಲ್ಲಪರ್ ಮಾರಿನ್ ಇವ್ಣ ಜೋ಼ಡ್ಮ ಬುಲೈಲಿ ಗಯು.
MAR 14:66 ಯೋಸ್‌ ವಖ್ಹತ್‌ಮ ಪೇತ್ರ ಹೇಟ್‌ ಘರ್‌ನ ಖ್ಹಾಮ್ಣೆ ಥೊ. ತದೆ ಗಲ್‌ಢಯಾಜಕ್‌ನ ಆಳ್‌ಮ ಏಕ್‌ ಜ಼ಣಿ ಹಿಜ್ಜಾ಼ ಐನ್,
MAR 14:67 ಪೇತ್ರ ಆಗ್ ಶೇಕುಕರ್ತೊಥೋತೆ ದೇಖಿ. ಅಜೂ಼ಬಿ ಇನ ಖನ್ನೆಥು ಠರ್‌ಕೈ ದೇಖಿನ್, “ತೂಬಿ, ಯೋ ನಜ಼ರೇತ್‌ನೊ ಯೇಸುನ ಜೋ಼ಡ್ಮ ಥೋನಿ” ಕರಿ ಬೋಲಿ.
MAR 14:68 ತದೆ ಪೇತ್ರನೆ, “ಕೊಯ್ನಿ, ತು ಶಾತ್‌ ಬೋಲುಕರಾಸ್ಕಿ ಮನ ಮಾಲುಮ್‌ಕೊಯ್ನಿ” ಕರಿ ಬೋಲಿನ್ ಭಾರ್‌ಲಿ ಝ಼ಗೋಪರ್‌ ಗಯೊ. ಎತ್ರಾಸ್‌ಮ ಮುರ್‌ಗೊ ಬಾಂಗ್‌ ದಿದೊ.
MAR 14:69 ಹಿಜ್ಜಾ಼ ಯೋ ಆಳ್‌ನೆ ಪಾಛು಼ ಇನ ದೇಖಿನ್, ಖನ್ನೆಸ್‌ ಭಿಯುಥೂತೆ ಅದ್ಮಿ ಖ್ಹಾರಾವ್‌ನ, “ಆಬಿ ಇವ್ಣಾಮ ಏಕ್‌ ಜ಼ಣೊ” ಕರಿ ಬೋಲಾಲಗಿ.
MAR 14:70 ಕತೋಬಿ ಪೇತ್ರನೆ, “ಕಾಹೆ” ಕರಿ ಪಾಛೊ಼ ಬೋಲ್ಯೊ. ಜ಼ರಘಡಿನ ಬಾದ್‌ಮ ಹಿಜ್ಜಾ಼ ಭಿಯುಥೂತೆ ಇವ್ಣೆ ಪೇತ್ರನ, ಖ್ಹಾಚ಼ಮಾಬಿ “ಯೇಸುನ ಜೋ಼ಡ್ಮ ಥೂತೆ ಇವ್ಣಾಮ ತೂಬಿ ಏಕ್‌ ಜ಼ಣೊ ಕರಿ ಹಮೂನ ಮಾಲುಮ್, ತೂಬಿ ಗಲಿಲಾಯವಾಳೋಸ್‌” ಕರಿ ಬೋಲ್ಯು.
MAR 14:71 ಕತೋಬಿ ಪೇತ್ರನೆ, “ಖ್ಹಾಚಮಾಬಿ, ತುಮೆ ಬೋಲುಕರಾಸ್ತೆ ಯೋ ಅದ್ಮಿ ಮನ ಮಾಲುಮ್‌ಕೊಯ್ನಿ! ಮೇ ಝೂ಼ಟಿ ಬೋಲುಕರ್ತೊ ಉಶೇತೊ, ದೇವ್ನ ಮಾರ್ ಮಾರಪರ್ ಆವಾದೆ ಕರಿ” ಬೋಲಿನ್ ಶಪತ್‌ ಖಾವಲಗ್ಯೊ.
MAR 14:72 ಯೋಸ್‌ ವಖ್ಹತ್‌ಮ, ಮುರ್‌ಗೊ ಬೇನೆ ಹಲ್ಲ ಬಾಂಗ್‌ ದಿದೊ. ತದೆ ಪೇತ್ರನೆ, “ಮುರ್‌ಗೊ ಬೇ ಹಲ್ಲ ಬಾಂಗ್‌ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ ತೀನ್ ಹಲ್ಲ ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ಬೋಲಿಶ್” ಕರಿ ಯೇಸುನೆ ಇನ ಬೋಲ್ಯೊಥೋತೆ ವಾತೆನ ಯಾದ್‌ಕರಿನ್, ಯೋ ಖ್ಹಡ್‌ಕ್ಯಾ ಭರಿನ್ ರೋಯೊ.
MAR 15:1 ವ್ಹಾಣ್‌ಖ್ಹತ್ರೇಸ್ ಗಲ್‌ಢಯಾಜಕರ್‌, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ, ಮೋಟಿ ಸಬೆವಾಳು ಅಜು಼ ಶಾಣುಖ್ಹಾರು ಮಳಿನ್ ವಾತೆಕರಿಲೀನ್, ಯೇಸುನ ಭಂದೈನ್ ಲೀಜೈ಼ನ್, ಪಿಲಾತನ ಹಾತ್‌ಮ ದಿದು.
MAR 15:2 ತದೆ ಪಿಲಾತನೆ ಯೇಸುನ, “ತು ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಪುಛಾ಼ವಖ್ಹತರ್. ಯೇಸುನೆ, “ತುನೇಸ್ ಬೋಲ್ಯೋನಿ” ಕರಿ ಜವಾಬ್‌ ದಿದೊ.
MAR 15:3 ಗಲ್‌ಢಯಾಜಕರ್‌ ಯೇಸುಪರ್‌ ಘಣಿ ಗಲ್ತಿ ಲಗಾಡುಕರ್ತಾಥ. ತದೆ ಪಿಲಾತನೆ ಬಿಜೇಕ್‌ ಹಲ್ಲ ಯೇಸುನ, “ತು ಶಾತ್ಬಿ ಜವಾಬ್‌ ಕೋ ದೇಯ್ನಿಕಿ ಶು? ದೇಕ್, ಅವ್ಣೆ ತಾರಪರ್ ಕೆತ್ರು ಬೋಲುಕರಾಸ್ತೆ!” ಕರಿ ಬೋಲ್ಯೊ.
MAR 15:5 ಕತೋಬಿ ಯೇಸುನೆ ಶಾತ್ಬಿ ಜವಾಬ್‌ ಕೋ ದಿದೋನಿ. ಅನ ದೇಖಿನ್ ಪಿಲಾತನೆ ಆಶ್ಚರ್ಯಖಾದೊ.
MAR 15:6 ಪಸ್ಕ ಪೂಜಾ಼ನಿ ವಖ್ಹತ್‌ಮ ಕೋಂಡಿ ಘಾಲಿರಾಖಾತೆ ಅದ್ಮಿಮ, ಅದ್ಮಿಖ್ಹಾರು ಕಿನ ಬೋಲಸ್ಕಿ ಇನ, ಭಾರ್‌ ಮ್ಹೇಲಾನಿ ಆದತ್ ಥು.
MAR 15:7 ತದೆ ಬರಬ್ಬ ಕರಿ ಏಕ್‌ ಜ಼ಣೊ ಥೊ. ಕಲ್ಹಾಗಟ್‌ ಪಡಾನಿ ವಖ್ಹತ್‌ಮ, ಅದ್ಮಿನ ಮಾರಿನಾಖಿ ದೇಯಿತೆ ಇವ್ಣ ಜೋ಼ಡ್ಮ ಇನ ಧರಿನ್ ಕೋಂಡಿ ಘಾಲಿರಾಖ್ಯುಥು.
MAR 15:8 ತದೆ ಅದ್ಮಿಖ್ಹಾರು ಪಿಲಾತಕನ ಆಯಿ ಭರೈನ್, “ತುನೆ ಹಮೂನ ಕರ್ತೊ ಆಯೋತೆ ಇಮ್‌ ಕರ್‌” ಕರಿ ಗಿಂಗಾಯು.
MAR 15:9 ತದೆ ಗಲ್‌ಢಯಾಜಕ್‍ಖ್ಹಾರು ಬಳಾಪೇಥಿ ಯೇಸುನ ಧರಿ ದೀರಾಖ್ಯುಸ್‌ ಕರಿ ಪಿಲಾತನೆ ಮಾಲುಮ್‌ ಕರಿಲೀನ್, “ಮೇ ಯೆಹೂದ್ಯರ್‌ನ ರಾಜಾ಼ನ ತುಮುನ ಮ್ಹೇಲಿದೇಣು ಕರಿ ತುಮಾರಿ ಆಖ್ಹ್‌ಕಿ ಶು?” ಕರಿ ಪುಛಾ಼ಯೊ.
MAR 15:11 ತದೆ ಗಲ್‌ಢಯಾಜಕರ್‌ಖ್ಹಾರು, “ಬರಬ್ಬನಾಸ್ ಮ್ಹೇಲಿದೆ ಕರಿ ಬೋಲ್‌ನು” ಕರಿ ಅದ್ಮಿನ ಬೋಲಿದಿದು.
MAR 15:12 ತದೆ ಪಿಲಾತನೆ ಇವ್ಣುನ, “ಇಮ್‍ಕತೊ, ತುಮೆ ಯೆಹೂದ್ಯರ್‌ನೊ ರಾಜ಼ ಕರಿ ಬೋಲುಕರಾತೆ ಅನ, ಮೇ ಶಾತ್‌ ಕರ‍್ನು ಕರಿ ತುಮೆ ಬೋಲೋಸ್?” ಕರಿ ಪಾಛೊ಼ ಬೋಲ್ತಖ್ಹತರ್‌.
MAR 15:13 ಇವ್ಣೆ, “ಇನ ಶಿಲ್‌ಬೇಪರ್ ಮರಾವ್!” ಕರಿ ಚಿಕ್ರಿನ್ ಬೋಲಾಲಗ್ಯು.
MAR 15:14 ತದೆ ಪಿಲಾತನೆ, “ಶನ? ಅನೆ ಶನಿ ಗಲ್ತಿ ಕರಿರಾಖ್ಯೋಸ್?” ಕರಿ ಬೋಲ್ಯೊ. ಕತೋಬಿ ಇವ್ಣೆ, “ಇನ ಶಿಲ್‌ಬೆಪರ್ ಮರಾವ್!” ಕರಿ ಅಜೂ಼ಬಿ ಜೋ಼ರೇಖ್ಹು ಬಳೇಳಿನ್‌ ಬೋಲ್ಯು.
MAR 15:15 ತದೆ ಪಿಲಾತನೆ ಅದ್ಮಿನ ದಿಲ್ನ ಖ್ಹುಶಿ ಕರಾವ್ಣು ಕರಿ ಬರಬ್ಬಾನ ಇವ್ಣಖ್ಹಾಜೆ ಮ್ಹೇಲಿದಿದೊ. ಅಜು಼ ಯೇಸುನ ಮೇಕ್‌ನ ಕೊಳ್ಡೇಥಿ ಮರೈನ್ ಶಿಲ್‌ಬೆಪರ್ ನಾಖಾನ ದಿದೊ.
MAR 15:16 ಶಿಪಾಯಿಖ್ಹಾರು ಯೇಸುನ ಪಿಲಾತನಿ ಮಹೇಲ್‌ನ ಖ್ಹಾಮ್ಣೆನಿ ಝ಼ಗೋಮ ಬುಲೈಲೀಜೈ಼ನ್, ದಂಡ್‌-ದಳ್‌ವಾಯಿನ ಎಕ್ಕದಮ್‌ ಬುಲಾಯು.
MAR 15:17 ಹಿಜ್ಜಾ಼ ಶಿಪಾಯಿಖ್ಹಾರು ಯೇಸುನ ಲಾಲ್‌ಭಗ್ಮ ರಂಗ್ನು ಲುಂಗ್ಡು ಹೋಡೈನ್‌, ಕಾಟಾನಿ ಕಿರೀಟ್ನ ವಣಿನ್‌ ಇನ ಮಾಥಪರ್‌ ಘಾಲಿನ್,
MAR 15:18 “ಯೆಹೂದ್ಯರ್‌ನ ರಾಜ಼, ತುನ ಖ್ಹಲಾಮ್” ಕರಿ ಬೋಲಿನ್,
MAR 15:19 ಬೈತ್‌ನಿ ಲಾಕ್ಡಿಥಿ ಇನ ಮುಡ್‌ಕ್ಯಪರ್ ಮಾರಿನ್, ಇನಪರ್ ಥೂಕಿನ್, ಇನಾಖ್ಹಾಮೆ ಢುಕ್‌ಣ್ಯಟೇಕಿನ್, ಆಡು ಪಡ್ಯು.
MAR 15:20 ಅಮ್ ಇವ್ಣೆ ಯೇಸುನಿ ನಕ್ಲೆ ಕಾಡಾನ ಬಾದ್‌ಮ ಯೋ ಲಾಲ್‌ಭಗ್ಮ ರಂಗ್‌ನ ಲುಂಗ್ಡಾನ ಕಾಡಿನಾಖಿದೀನ್ ಇನ ಲುಂಗ್ಡಾವ್‍ನಸ್ ಪಾಛು಼ ಫೇರೈನ್ ಶಿಲ್‌ಬೆಪರ್ ಮಾರಾನಖ್ಹಾಜೆ ಬುಲೈಲಿ ಗಯು.
MAR 15:21 ತದೆ ಖೇತರ್‌ಮಾಥು ಯೋಸ್ ವಾಟೆ ಉಳ್ಯಾವ್ತೊಥೋತೆ ಕುರೇನೆ ಖ್ಹಯೇರ‍್ನೊ ಸೀಮೋನ್ನ, ಯೇಸುನಿ ಶಿಲ್‌ಬೆ ಪಾಡ್‌ಕರಿ ಶಿಪಾಯಿಖ್ಹಾರು ಜು಼ಲಮ್‌ ಕರ‍್ಯು. ಆ ಸೀಮೋನ್ ಅಲೆಕ್ಸಾಂಡರ್ ಅಜು಼ ರೂಫ ಕರಿ ಥಾತೆ ಇವ್ಣೊ ಬಾ ಹುಯಿರ‍್ಹೋಥೊ.
MAR 15:22 ಅಜು಼ ಯೇಸುನ ‘ಗೊಲ್ಗೊಥಾ’ ಕರಿ ಝ಼ಗೋಪರ್ ಬುಲೈಲಿ ಗಯು. ಗೊಲ್ಗೊಥಾ ಕತೊ “ಖೋಪ್ರಿನಿ ಝ಼ಗೊ” ಕರಿ.
MAR 15:23 ಹಿಜ್ಜಾ಼ ಇನ ರಕ್ತಬೋಳ ಮಳೈಹುಯು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದಿದು. ಕತೋಬಿ ಯೇಸುನೆ ಇನ ಪೀದೊಕೊಯ್ನಿ.
MAR 15:24 ಇವ್ಣೆ ಯೇಸುನ ಶಿಲ್‌ಬೆಪರ್ ಮಾರ‍್ಯು ಅಜು಼ ಇನ ಲುಂಗ್ಡಾವ಼್‌ಮ ಕೆಹು-ಕೆಹು, ಕಿನ-ಕಿನ ಜಾ಼ವ್ಣು ಕರಿ ಬೋಲಿನ್ ಚೀಟ್ ನಾಖಿನ್ ಇವ್ಣಾಮಸ್ ವಾಟ ಪಾಡಿಲಿದು.
MAR 15:25 ಇವ್ಣೆ ಯೇಸುನ ಶಿಲ್‌ಬೆಪರ್ ಮಾರ‍್ಯೂತೆ ತದೆ ವ್ಹಾಣನ ನೌ ಘಂಟ ಹುಯಿರ‍್ಹಾಥ.
MAR 15:26 ಇವ್ಣೆ ಯೇಸುಪರ್‌ ಲಗಾಡ್ಯುತೆ ಯೋ ಗಲ್ತಿನ ದೆಖಾವನಿ ಘೋಣಿ ಶಿಲ್‌ಬೆಪರ್ ಲೀಖಿರಾಖ್ಯುಥು. ಯೋ ಶಾತ್‌ಕತೊ, “ಯೆಹೂದ್ಯರ್‌ನೊ ರಾಜ಼” ಕರಿ.
MAR 15:27 ಯೇಸುನ ಜೋ಼ಡ್ಮ ಬೇ ಜ಼ಣ ಚೋ಼ರ್‌ನಾಬಿ ಲೈನ್‌ ಏಕ್‌ ಜ಼ಣಾನ ಇನಿ ಖಾವಿ ಬಾಜೂ಼ಮ ಅಜು಼ ಬಿಜೇಕ್‌ ಜ಼ಣಾನ ಇನಿ ಡಾವಿ ಬಾಜೂ಼ಮ ಶಿಲ್‌ಬೆಪರ್ ಮಾರ‍್ಯು.
MAR 15:28 ಆ ವಚನ್ ಗ್ರೀಕ್‌ನು ಥೋಡು ವಚನ್ನು ಭಾಗ್‌ಮ ಛಾ಼,
MAR 15:29 ಹಿಜ್ಜಾ಼ಕರಿ ಜ಼ವ್‍ಕರ್ತುಥೂತೆ ಅದ್ಮಿಖ್ಹಾರು ಯೇಸುನಿ ನಕ್ಲೆ ಕಾಡ್ಯು: ಅಜು಼ ಮುಡ್‌ಕ್ಯು ಠಶ್‌ಕಾವ್ತು ಹುಯಿನ್, “ಓಹೊ, ತೂ ಮಂದಿರ್‌ನ ಫೋಡಿನ್ ತೀನ್ ದನ್ಮ ಭಾಂದೀಶ್ ಕರಿ ಬೋಲ್ಯೋಥೊ!”
MAR 15:30 ಹಮ್ಕೆ ಶಿಲ್‌ಬೆಪರ್‌ಥು ಉತ್ರಿನ್ ಆವ್ ಅಜು಼ ತಾರು ತೂ ಬಚಾ಼ಡಿಲೆ!” ಕರಿ ಇನ ಚಿಂಘಾಯು.
MAR 15:31 ಇಮ್ಮಸ್ ಗಲ್‌ಢಯಾಜಕರ್‌ಬಿ, ಮೋಶೆನಿ ವಚನ್‍ ಶಿಕಾಡವಾಳು ಶಾಸ್ತ್ರಿಯೇ಼ಬಿ, “ಇನೆ ಬಿಜಾ಼ನ ಬಚಾ಼ಡ್ಯೊ; ಕತೋಬಿ ಇನು ಯೋಸ್ ಬಚಾ಼ಡಿಲ್ಯವಾನ ಕೋ ಹೊಯ್ನಿ.
MAR 15:32 ಇಸ್ರಾಯೇಲ್‌ನೊ ರಾಜ಼ ಹುಯಿರ‍್ಹೋತೆ ಆ ಕ್ರಿಸ್ತ ಹಮ್ಕೆ ಶಿಲ್‌ಬೆಪರ್‌ಥು ಉತ್ರಿನ್ ಆವಾದೆ! ಉತ್ರಿನ್ ಆಯೋತೊ ಹಮೆ ದೇಖಿನ್ ನಂಬ್‌ಶು” ಕರಿ ಏಕ್‌ಥಿಏಕ್‌ ಯೇಸುನಿ ನಕ್ಲೆ ಕಾಡಿನ್ ವಾತೆ ಬೋಲುಕರ್ತೂಥು. ಅಜು಼ ಇನ ಜೋ಼ಡ್ಮ ಶಿಲ್‌ಬೆಪರ್ ಮರೈರ‍್ಹೂಥೂತೆ, ಯೋ ಭೇ ಜ಼ಣಾನೇಬಿ ಇನಿ ಖ್ಹರಮ್‌ಕಾಡ್ಯು.
MAR 15:33 ಧೊಪಾರ್‌ ಹುವ್ವಾದೀನ್ ಹಿಡಿ ದೇಖ್ಹ್‌ಪರ್ ಅಂಧಾರು ಢಪೈನ್, ತೀನ್ ಘಂಟತೋಡಿ ಇಮ್ಮಸ್‌ಥು.
MAR 15:34 ತೀನ್ ಘಂಟಾನ ಯೇಸು, “ಎಲೋಹಿ, ಎಲೋಹಿ ಲಮಾ ಸಬಕ್ತಾನಿ” ಅಮ್‌ಕತೊ, “ಮಾರೊ ದೇವ್, ಮಾರೊ ದೇವ್, ತೂ ಶನ ಮನ ಹಾತ್‌ ಮ್ಹೆಂದಿದೊ?” ಕರಿ ಜೋ಼ರ್‌ ಆವಾಜ಼್‌ಥಿ ಚಿಕ್‌ರ‍್ಯೊ.
MAR 15:35 ಖನ್ನೆ ಭಿಯ್ಯುಥೂತೆ ಥೋಡು ಜ಼ಣು ಅನ ಖ್ಹಮ್‌ಜಿನ್‌, “ಹಂದೇಖೊ, ಯೋ ಎಲೀಯನ ಚಿಕ್ರುಕರಾಸ್!” ಕರಿ ಬೋಲ್ಯು.
MAR 15:36 ತದೆ ಹಿಜ್ಜಾ಼ ಥೂತೆ ಏಕ್‌ ಜ಼ಣು ನಾಶಿಜೈ಼ನ್, ಗುಂಜ಼್‌ನ ಖಾಟ ರಖ್ಹ್‌ಮ ಡುಬೈನ್, ಲಠ್ಠಾಕೇಡೆ ಅಟ್‌ಕೈನ್ ಯೇಸುನ ಪಿಯ್ಯಾನ ದೀನ್, “ಠೇರೊ! ಎಲೀಯ ಐನ್ ಅನ ಶಿಲ್‌ಬೆಪರ್‌ಥು ಉತ್ರಾವಸ್ ಶುಕಿ ದೇಖೆ!” ಕರಿ ಬೋಲ್ಯು.
MAR 15:37 ಕತೋಬಿ ಯೇಸುನೆ ಜೋ಼ರೆಖ್ಹು ಚಿಕ್ರಿನ್ ಜಾನ್‌ ಮ್ಹೇಲ್ಯೊ.
MAR 15:38 ತದೆ ಮೋಟಿ ಮಂದಿರ್‌ನೊ ಪಡ್‌ದೊ ಉಪ್ಪರ್‌ಥು ಹೇಟ್‌ತೋಡಿ ಫಾಟಿನ್, ಬೇ ಭಾಗ್‌ ಹುಯಿಗಯು.
MAR 15:39 ಯೇಸುನೆ ಆ ತರೀಕಾಥಿ ಜಾನ್‌ ಮ್ಹೇಲ್ಯೊತೆ ಇನ ಖ್ಹಾಮ್ಣೆಸ್ ಭಿಯೊಥೋತೆ ಖ್ಹೋಶಿಪಾಯಿನೊ ಮೋಟಾನೆ ದೇಖಿನ್, “ಖ್ಹಾಚಮಾಬಿ ಆ ಅದ್ಮಿ ದೇವ್‌ನೊ ಛಿಯ್ಯೊ ಹುಯಿರ‍್ಹೋಥೊ!” ಕರಿ ಬೋಲ್ಯೊ.
MAR 15:40 ಹಿಜ್ಗಾ಼ ದೂರ್‌ಥು ಭೀರಿನ್‌ ಥೋಡಿ ತಯೇಡಾಬಿ ಆ ಖ್ಹಾರು ದೇಖುಕರ್ತಿಥಿಯೆ. ಅವ್ಣಾಮ ಮಗ್ದಲನಿ ಮರಿಯ, ನ್ಹಾನೊ ಯಾಕೋಬ್ ಅಜು಼ ಯೋಸೆನಿ ಆಯ ಹುಯಿರ‍್ಹೀಥೀತೆ ಮರಿಯ ಅಜು಼ ಸಲೋಮೀಬಿ ಥಿಯೆ. ಅವ್ಣೆ ಯೇಸು ಗಲಿಲಾಯಮ ಥೋತೆ ತದೆ ಇನ ಕೇಡೆಸ್ ರ‍್ಹೀನ್ ಇನಿ ಸೇವೆ ಕರಿಹುಯೆ಼. ಎತ್ರೇಸ್ ಕಾಹೆತೆ ಯೇಸುನ ಜೋ಼ಡ್ಮ ಯೆರೂಸಲೇಮ್ ‌ಆಯೆಥೀತೆ ಬಿಜಿ ತಯೇಡಾವ್‌ಬಿ ಹಿಜ್ಜಾ಼ ಥಿಯೆ.
MAR 15:42 ತದೆ ಖ್ಹಾಂಜ಼್ ಹುಯಿಗಯುಥು; ಅಜು಼ ಯೋ ದನ್ ಖ್ಹವಾರಾನೊ ದನ್ ಹುಯಿರ‍್ಹೋಥೊ, ಕತೊ ಸಬ್ಬತ್ ದನ್ನ ಪೀಠೆನೊದನ್‌ ಹುಯಿರ‍್ಹೋಥೊ.
MAR 15:43 ತದೆ ಅರಿಮಥಾಯ ಗಾಮ್‌ನೊ ಯೋಸೇಫ ಕರಿ ಏಕ್‌ ಜ಼ಣೊ ಘಟ್ ಜಾನ್‌ಥಿ ಪಿಲಾತಕನ ಐನ್, ಯೇಸುನ ಶರೀರ್‌ನ ಮನ ದೇ ಕರಿ ಬೋಲಿಲಿದೊ. ಆ ಯೋಸೇಫ ಮೋಟಿ ಸಭೆಮ ಘಣು ಮರ್ಯಾದಿನು ಅದ್ಮಿ ಹುಯಿರ‍್ಹೋಥೊ ಅಜು಼ ದೇವ್ನಿ ರಾಜ್ಯ ಕದೆ ಆವ್‍ಶೆಕರಿ ಜ಼ಪಿರ‍್ಹೋತೊ.
MAR 15:44 ಪಿಲಾತನೆ ಯೇಸು ತದ್ದೇಸ್ ಮರಿಗಯೊ ಕರಿ ಖ್ಹಮ್‌ಜಿನ್‌ ಆಶ್ಚರ್ಯಖಾದೊ. ಅಜು಼ ಖ್ಹೋಶಿಪಾಯಿನೊ ಮೋಟಾನ ಬುಲೈನ್, “ಯೋ ತದ್ದೇಸ್ ಮರಿಗಯೊಕಿ ಶು?” ಕರಿ ಇನ ಪುಛಾ಼ಯೊ.
MAR 15:45 ಖ್ಹೋಶಿಪಾಯಿನ ಮೋಟಾಥಿ ಖ್ಹಮ್‌ಜಾ಼ನ ಬಾದ್‌ಮ, ಪಿಲಾತನೆ ಯೇಸುನ ಮುರ್ದಾನ ಯೋಸೇಫನ ದೆವಾಡ್ಯೊ.
MAR 15:46 ಯೋಸೇಫನೆ ಘಣ ಮೋಲ್ನು ಲುಂಗ್ಡಾನ ಮೋಲ್ ಲೈನ್‌, ಯೇಸುನ ಶಿಲ್‌ಬೆಪರ್‌ಥು ಉತಾರಿನ್‌, ಯೋ ಲುಂಗ್ಡಾಥಿ ಇನ ಲಪೇಟಿನ್, ಬಂಡಾನಿ ಘವಿಮ ಮ್ಹೇಲಿನ್ ಯೋ ಘವೀನ ಬಾಕಲ್‌ನ ಮೋಟೊ ಬಂಡಾಥಿ ಮೂಚ್ಯೊ.
MAR 15:47 ಹಿಜ್ಜಾ಼ ದೇಖುಕರ್‌ತಿಥಿಯೆ಼ತೆ ಮಗ್ದಲನಿ ಮರಿಯ ಅಜು಼ ಯೋಸೆನಿ ಆಯ ಮರಿಯನೆ ಯೇಸುನ ಶರೀರ್‌ನ ಮ್ಹೇಲ್ಯುತೆ ಝ಼ಗೋನ ದೇಖಿಯೆ಼.
MAR 16:1 ಸಬ್ಬತ್‌ ದನ್ ಖತಮ್ ಹುವಾನ ಬಾದ್‌ಮ, ಮಗ್ದಲನಿ ಮರಿಯ, ಯಾಕೋಬ್‍ನಿ ಆಯ ಮರಿಯ ಅಜು಼ ಸಲೋಮಿ ಯೇಸುನ ಮುರ್ದಾನ ಲಗಾಡನಖ್ಹಾಜೆ ಅಛ್ಛು಼ ವಾನುತೇಲ್‌ನ ಮೋಲ್ ಲಿದಿಯೆ಼.
MAR 16:2 ವಾರಾನು ಪಹಿಲ ದನ್ನೆ ವ್ಹಾಣ್‌ಖ್ಹತ್ರೆಸ್, ದನ್ ನಿಕಳ್‌ತಾಸ್‌ನ, ಇವ್ಣೆ ಯೇಸುನ ಮ್ಹೇಲಿರಾಖ್ಯುಥೂತೆ ಘವಿಕನ ನಿಕ್ಳಿಯೆ಼.
MAR 16:3 ಘವಿನ ಬಾಕಲ್‌ನೊ ಬಂಡೊ ಘಣೊ ಮೋಟೊ ಥೊ. ಅನಖ್ಹಾಜೆ ಇವ್ಣೆ ಆವಾನಿ ವಖ್ಹತ್‌ಮ, “ಯೋ ಬಂಡಾನ ಅಪ್ಣಟೇಕೆ ಕೋಣ್ ಕಾಡ್‌ಶೆಲಿ?” ಕರಿ ಇವ್ಣೆಇವ್ಣೇಸ್ ವಾತೆ ಬೋಲ್ತಿ ಉಳ್ಯಾವ್‌ತಿಥಿಯೆ.
MAR 16:4 ಕತೋಬಿ ಮುಡ್‌ಕ್ಯು ಪಾಡಿ ದೇಖಾತೊ ಯೋ ಬಂಡೊ ನಿಕ್ಳಿರ‍್ಹೋಥೊ.
MAR 16:5 ತದೆ ಇವ್ಣೆ ಘವಿನ ಮಹಿ ಜೈ಼ನ್, ಹಿಜ್ಜಾ಼ ಏಕ್‌ ಜಾ಼ನ್ಜ಼ಮಾನ್ ಅದ್ಮಿ ಧೋಳು ಲುಂಗ್ಡು ಪೇರ‍್ಹಿಲೀನ್‌, ಖಾವಿ ಬಾಜು಼ಮ ಬೆಠುಥೂತೆ ದೇಖಿನ್, ಇವ್ಣೆ ಡರೀಗಯ್ಯೆ಼.
MAR 16:6 ತದೆ ಇನೆ ಇವ್ಣುನ, “ಡರೊನಕೊ, ಶಿಲ್‌ಬೆಪರ್ ಮಾರ‍್ಯೂಥೂತೆ, ನಜ಼ರೇತ್‌ನೊ ಯೇಸುನ ಢೂಂಡುಕರಾಸ್ ಕರಿ ಮನ ಮಾಲುಮ್. ಯೋ ಹಜ್ಜಾ಼ ಕೊಯ್ನಿ, ಯೋ ಜಿವ್ತೊ ಹುಯಿನ್ ಉಠಿರ‍್ಹೋಸ್! ಹಂದೇಖೊ, ಆಸ್ ಇನ ಮ್ಹೇಲಿರಾಖ್ಯುಥೂತೆ ಝ಼ಗೊ.
MAR 16:7 ಹಮ್ಕೆ ಜಾ಼ವೊ ಅಜು಼ ಆ ಖಬರ್‌ನ ಇನ ಶಿಷ್ಯರ್‌ನ ಅಜು಼ ಪೇತ್ರನಬಿ ಬೋಲೊ, ‘ಯೇಸುನೆ ತುಮೂನ ಬೋಲ್ಯೊಥೋತೆ ಇಮ್ಮಸ್, ತುಮಾರೇಥಿ ಅಗಾಡಿ ಗಲಿಲಾಯನ ವಳ್ಯೊಜಾ಼ಸ್; ಹಿಜ್ಜಾ಼ ತುಮೆ ಇನ ದೇಕ್‌ಶು ಕರಿ ಬೋಲೊ” ಕರಿ ಬೋಲ್ಯೊ.
MAR 16:8 ತದೆ ಇವ್ಣೆ ಘಬ್‌ರೈಜೈ಼ನ್, ಕಾಪ್ತಿಹುಯಿನ್‌ ಭಾರ್‌ಆಯಿನ್, ಯೋ ಮಖ್ಹಾಣ್ಯನಿ ಘವಿಕಂಥು ನಾಶಿ ಚ಼ಲೀಗಯ್ಯೆ. ಇವ್ಣೆ ಡರ್‌ಥಿ, ಕಿನಾಬಿ ಶಾತ್‌ಬಿ ಕೋ ಬೋಲ್‌ಯೇನಿ.
MAR 16:9 ವಾರಾನೊ ಪಹಿಲೊ ದನ್ನೆನು (ಐತ್‍ವಾರ್‌ನ) ವ್ಹಾಣೆ, ಯೇಸು ಜಿವ್ತೊ ಹುಯಿನ್ ಉಠಾನ ಬಾದ್‌ಮ, ಮಗ್ದಲನಿ ಮರಿಯನ ಪಹಿಲಿ ಬಾರ್ ದೆಖಾಯೊ, ಆ ಮರಿಯಮಾಥು ಯೇಸುನೆ ಖ್ಹಾತ್ ಭೂತ್‌ನ ಕಾಡ್ಯೋಥೊ.
MAR 16:10 ತದೆ ಇನೆ ಜೈ಼ನ್, ಇನಕೇಡೆ ಥೂತೆ ಇವ್ಣುನ ಬೋಲಿ; ಇವ್ಣೆ ಘಣು ದುಖ್‌ಥಿ ರೊವ್‌ಕರ್ತುಥು;
MAR 16:11 “ಯೇಸು ಜಿವ್ತೊಹುಯಿನ್ ಉಠಿರ‍್ಹೋಸ್, ಮನ ದೆಖಾಯೊ” ಕರಿ ಇನೆ ಬೋಲಿತೆ ವಾತೆನ ಖ್ಹಮ್‌ಜ್ಯು, ಕತೋಬಿ ಇವ್ಣೆ ಇನ ವಿಶ್ವಾಸ್ ಕರ‍್ಯುಕೊಯ್ನಿ.
MAR 16:12 ಅನ ಬಾದ್‌ಮ, ಶಿಷ್ಯರ್‌ಮ ಬೇ ಜ಼ಣ ಏಕ್‍ ಗಾಮ್‌ನ ಚಾ಼ಲಿ ಜಾ಼ವಾನಿ ವಖ್ಹತ್‌ಮ, ಯೇಸು ಕೋಣ್‌ಬಿ ಖ್ಹಣೇದ್ ಧರಾನ ಕೋ ಹುವ್ವಾನಿತೆ ಇಮ್ನಿ ರೂಪ್‌ಮ ಇವ್ಣುನ ದೆಖಾಯೊ.
MAR 16:13 ಇವ್ಣೆ ಜೈ಼ನ್ ಬಿಜ಼ ಖ್ಹಾರಾನ ಬೋಲ್ಯು, ಕತೋಬಿ ಅವ್ಣಿ ವಾತೆನಾಬಿ ಇವ್ಣೆ ನಂಬ್ಯುಕೊಯ್ನಿ.
MAR 16:14 ಬಾದ್‌ಮ ಗ್ಯಾರ‍್ಹ ಜ಼ಣ ಶಿಷ್ಯರ್‌ ಭರೈನ್ ಖಾಣು ಖವ಼್‌ಕರ್ತಥಾತೆ ತದೆ ಯೇಸು ಇವ್ಣುನಾಬಿ ದೆಖಾಯೊ. ಯೋ ಜಿವ್ತೊ ಹುಯಿನ್ ಉಠಾನ ಬಾದ್‌ಮ, ಇನ ದೇಖಾವಾಳನಿ ವಾತೆನ ಇವ್ಣೆ ನಂಬ್ಯುಕೊಂತೆ ಇನಾಖ್ಹಾಜೆ ಯೇಸುನೆ, ಇವ್ಣುನ ವಿಶ್ವಾಸ್‍ಕೊಂತೆ ಅಜು಼ ಇವ್ಣ ಬಂಡಾನ ದಿಲ್‌ನಖ್ಹಾಜೆ ಇವ್ಣುನ ಗುರ್‌ಕಾಯೊ.
MAR 16:15 ಅನ ಬಾದ್‌ಮ ಇವ್ಣುನ, “ತುಮೆ ಜಗತ್ನಿ ಖ್ಹಾರಿ ಬಾಜು಼ಮ ಜೈ಼ನ್‌ ತಮಾಮ್‌ ಅದ್ಮಿನ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು.
MAR 16:16 ನಂಬಿನ್, ಬ್ಯಾಪ್ತಿಸ್ಮ ಕರೈಲೆವಾಳು ದೇವ್ನಿ ನ್ಯಾವ್‍ನಿ ತೀರ್ಪ್‌ಥಿ ಬಚಿನ್ ಪರ್‌ಲೋಕ್‌ಮ ಜಾ಼ಶೆ; ಕೋಣ್ ನಂಬಾಕೊಯ್ನಿಕಿ ಇವ್ಣುನ ನಿಶತ್‌ಮಳ್‌ಶೆ.
MAR 16:17 ಅತ್ರೇಸ್ ಕಾಹೆತೆ, ನಂಬವಾಳಾನ ಅದ್ಭುತ್ ಕರಾನಿ ಶಕತ್ ದೆವಾವ್‌ಶೆ; ಮಾರು ನಾಮ್ ಬೋಲಿನ್ ಭೂತ್‌ಖ್ಹಾರು ನಖ್ಹಾಡ್‌ಶೆ; ಇವ್ಣೆ ಬೋಲಿಸ್‍ರಾಖ್ಯುಕೊಂತೆ ನವಿ ಬೋಲಿಥಿ ಬೋಲ್‌ಶೆ.
MAR 16:18 ಇವ್ಣೆ ಖ್ಹಾಪ್‌ನಖ್ಹಾರು ಪಾಡ್ಯುತೋಬಿ ನಾತೊ ಝಾರ್‌ ಪೀಲಿದುತೋಬಿ ಇವ್ಣುನ ಶಾತ್ಬಿ ಖರಾಬ್ ಕೋ ಉಶೇನಿ; ಇವ್ಣೆ ರೋಗ್‌ವಾಳನ ಉಪ್ಪರ್ ಹಾತ್‌ ಮ್ಹೇಲಿತೊ ಯೋ ರೋಗ್‌ವಾಳನ ಅಛ್ಛು಼ ಹುಯಿಜಾ಼ಶೆ” ಕರಿ ಬೋಲ್ಯೊ.
MAR 16:19 ಯೇಸು ಪ್ರಭುನೆ ಇವ್ಣ ಜೋ಼ಡೆ ಆ ಖ್ಹಾರು ಬೋಲಿನ್ ಹುಯಿಜಾ಼ವಾನ ಬಾದ್‌ಮ ಇಮ್ಮಸ್ ಸೊರ್ಗಮ ಪಡೈಗಯೊ ಅಜು಼ ಯೇಸು ದೇವ್ನ ಖಾವಿ ಬಾಜು಼ಮ ಬೇಶಿಗಯೊ.
MAR 16:20 ಹೈಕಡ್ ಇನು ಶಿಷ್ಯರ್‌ ಚ಼ಲ್ಯೂಜೈ಼ನ್ ಖ್ಹಾರಿ ಬಾಜು಼ ದೇವ್ನಿ ಅಛ್ಛಿ ಖಬರ್‌ನ ಬೋಲ್ಯು. ಅಜು಼ ಪ್ರಭುನೆ ಇವ್ಣ ಜೋ಼ಡೆಸ್ ರ‍್ಹೀನ್ ಖ್ಹಣೇದ್‍ನು ಅದ್ಭುತ್ ಕಾಮ್‌ಖ್ಹಾರು ಕರಿನ್, ಇವ್ಣೆ ಬೋಲಾತೆ ಖ್ಹಾರು ಖ್ಹಾಚಿಸ್‌ಕರಿ ವತಾಳಿದೇತೊ ರ‍್ಹೇತೊಥೊ.
LUK 1:1 ಪ್ಯಾರ್‌ನೊ ಥಿಯೊಫಿಲ, ಅಪ್ಣ ಇಚ಼್‌ಮ ಚಾ಼ಲಿರ‍್ಹೀತೆ ಕಾಮ್‍ಅಖ್ಖಾನ ಇನಿ ಬಾರೇಮ ಪಹಿಲೇಥು ಡೋಳೆಖ್ಹು ದೇಖಿನ್, ದೇವ್ನಿ ಅಛ್ಛಿ ಖಬರ್‌ನ ಬೋಲಿದ್ಯವಾಳು ಅಪ್ಣುನ ಖ್ಹಮ್‌ಜಾ಼ಡ್ಯುಥೂತೆ ಇಮ್ಮಸ್, ಲೀಖಾನ ಕೈಯೆಕ್ಕಿ ಅದ್ಮಿನೆ ಕೋಶಿಶ್ ಕರಿರಾಖ್ಯುಸ್.
LUK 1:3 ಮೇಬಿ ಜ಼ಡ್‌ಥುಧರಿ ಮೂಳಿಲಗು ಅಛ್ಛಿನಿತರ ಪುಛೈ಼ನ್, ಮಾಲುಮ್‌ ಕರಿರಾಖ್ಯೋಸ್ತೆ ಇನಾಖ್ಹಾಜೆ, ಯೋ ಖ್ಹಾರಸ್ನ ಏಕಾಡಿಥು ಥಿಯೊಫಿಲ ಹುಯಿರ‍್ಹೋತೆ ತುನ ಲೀಖಿನ್ ವತಾಳನು ಅಛ್ಛು಼ಕರಿ ಮನ ಸೋಚಾ಼ಯು.
LUK 1:4 ಅನೇಥಿ ತುನ ಶಿಕಾಡ್ಯೂತೆ ಖ್ಹಾರುಸ್ ಖ್ಹಾಚು಼ಕರಿ ತೂ ಮಾಲುಮ್ ಕರಿಲಿಶ್‌.
LUK 1:5 ಹೆರೋದ ಯೂದಾಯ ಮುಲಕ್‌ನೊ ರಾಜ಼ ಹುಯಿರ‍್ಹೊಥೋತೆ ಹಗಾಮ್ಮ, ಜಕರೀಯ ಕರಿ ಏಕ್‌ ಯಾಜಕ್ ಹಿಜ್ಜಾ಼ ಥೊ, ಯೋ ಅಬೀಯ ಯಾಜಕ್‌ನೊ ಖೂಮ್‌ವಾಳೊ ಹುಯಿರ‍್ಹೋಥೊ. ಇನಿ ಬಾವಣ್ಣು ನಾಮ್ ಎಲಿಜ಼ಬೇತ್‍, ಯೋ ಆರೋನ್ನಿ ಕುಟುಂಬ್‌ವಾಳಿ ಹುಯಿರ‍್ಹೀಥಿ.‌
LUK 1:6 ಇವ್ಣೆ ಭೇ ಜ಼ಣ ದೇವ್ನ ಡೋಳಾಮ ಅಛ಼್ಛ ಹುಯಿರ‍್ಹಾಥ ಅಜು಼ ಪ್ರಭುನಿ ಖ್ಹಾರಿಸ್ ಖಾನುಲ್‌ ಅಜು಼ ಹುಕುಮ್‌ನ ಪಾಡಿ ಚಾ಼ಲಿನ್, ಜ಼ರಾಬಿ ಗಲ್ತಿಕೊಂತೆ ಇಮ್‌ ಥಾ.
LUK 1:7 ಕತೋಬಿ ಎಲಿಜ಼ಬೇತ್‌ ವಾಂಝ಼್‌ಣಿ ಹುಯಿರ‍್ಹಿಥೀತೆ ಇನಾಖ್ಹಾಜೆ ಇವ್ಣುನ ಲಡ್ಕಾ ಕೋ ಥಾನಿ. ಎತ್ರೇಸ್ ಕಾಹೆತೆ ಇವ್ಣೆ ಭೇ ಜ಼ಣ ಬುಢಾ ಹುಯಿಗಾಥ.
LUK 1:8 ಅಮ್ ರ‍್ಹಾವಾನಿ ವಖ್ಹತ್‌ಮ, ಏಕ್‌ ದನ್ನೆ ಜಕರೀಯಾನಿ ಶಾಲ್‌ವಾಳಾನ ದೇವ್ನಿ ಮಂದಿರ್‌ಮ ಯಾಜಕ್ನು ಕಾಮ್ ಕರಾನಿ ವಖ್ಹತ್ ಆವ್ತಾನ, ಜಕರೀಯ ದೇವ್ನ ಖ್ಹಾಮ್ಣೆ ಯಾಜಕ್‍ನಿಸೇವೆ ಕರುಕರ್ತೊಥೊ.
LUK 1:9 ಯಾಜಕ್‌ಖ್ಹಾರು ಮಳಿನ್, ಪ್ರಭುನಿ ಮಂದಿರ್‌ನ ಮಹಿ ಜೈ಼ನ್, ಢಪ್ಕಾರ್‌ ದ್ಯವಾನಟೇಕೆ ಚೀಟಿ ನಾಖಿನ್ ಏಕ್‌ ಯಾಜಕ್‌ನ ಚೂ಼ಣ್‌ತೂಥು. ಇಮ್‌ ಕರಾಖ್ಹತರ್ ಜಕರೀಯ ಚೂ಼ಣಾಯೊ.
LUK 1:10 ಢಪ್ಕಾರ್‌ ದ್ಯವಾನಿ ವಖ್ಹತ್‌ಮ ಭಾರ್ ಭರೈರ‍್ಹುಥೂತೆ ಅದ್ಮಿಖ್ಹಾರು ದೇವ್ನ ಪ್ರಾರ್ಥನೆ ಕರುಕರ್ತುಥು.
LUK 1:11 ತದೆ ಪ್ರಭುನೊ ದೂತ ಢಪ್ಕಾರ್‌ ದ್ಯವಾನಿ ಢಾಕ್ಣಿನ ಖಾವಿ ಬಾಜು಼ಮ ಆಯಿ ಭೀರಿನ್, ಜಕರೀಯಾನ ದೆಖಾಯೊ.
LUK 1:12 ಜಕರೀಯಾನೆ ದೇವ್‌ನೊ ದೂತನ ದೇಖಿನ್ ಧರ್‌ಧರ್‌ ಕಾಪಿನ್, ಡರ್‌ಘಲ್ಲಿದೊ.
LUK 1:13 ಕತೋಬಿ ದೇವ್‌ನೊ ದೂತನೆ ಇನ, “ಜಕರೀಯ, ಡರ್‌ನಕೊ! ದೇವ್ನೆ ತಾರಿ ಬಿಂತಿನ ಖ್ಹಮ್‌ಜಿಲಿದೊ. ತಾರಿ ಬಾವಣ್‍ ಹುಯಿರ‍್ಹೀತೆ ಎಲಿಜ಼ಬೇತ್‌ ತುನ ಏಕ್‌ ಪರ್ಖ್ಹೊ ಲಡ್ಕಾನ ಜ಼ಣಿ ದಿಶೆ. ತೂ ಯೋ ಲಡ್ಕಾನ ಯೋಹಾನ ಕರಿ ನಾಮ್ ಮ್ಹೇಲ್ನು.
LUK 1:14 ಯೋ ಲಡ್ಕಾಥಿ ತುನ ಘಣು ಖ್ಹುಶಿ ಅಜು಼ ಶಂತೋಖ್ಹ್‌ ಉಶೆ, ಎತ್ರೇಸ್ ಕಾಹೆತೆ ಯೋ ಪೈದಹುಯೊತೆ ಇನಾಟೇಕೆ ಕೈಯೆಕ್ಕಿ ಜ಼ಣು ಖ್ಹುಶೀಕರ್‌ಶೆ!
LUK 1:15 ಪ್ರಭುನ ಡೋಳಾಮ ಯೋಹಾನ ಮಹಾನ್ ಅದ್ಮಿ ಹುಯಿರ‍್ಹಿಶೆ. ಕಂದಾಯುಹುಯು ದ್ರಾಕ್ಷಿನು ರಖ್ಹ್‌ನ ರ‍್ಹವೊ ನತರ್‌ಕಿ ಕೆಹೂಬಿ ನಿಶಾನುರಖ್ಹ್‌ನ ರ‍್ಹವೊ ಯೋ ಪೀಶೆಸ್‌ ಕೊಯ್ನಿ. ಪೈದಾಖ್ಹ್‌ಥೋಸ್‌ ಯೋ ಪವಿತ್ರಾತ್ಮಥಿ ಭರೈರ‍್ಹೀಶೆ.
LUK 1:16 ಅಜು಼ ಇಸ್ರಾಯೇಲ್‌ನ ಘಣ ಅದ್ಮಿನ ಇವ್ಣೊ ದೇವ್ ಹುಯಿರ‍್ಹೋತೆ ಪ್ರಭುಭಣಿ ಫರಾವ್‌ಶೆ.
LUK 1:17 ಯೋ ಪ್ರಭುನ ಅಗಾಡಿ ಜೈ಼ನ್, ಪ್ರವಾದಿ ಎಲೀಯನಿಘೋಣಿ ಮಹಿಮೆಮಾಬಿ ಶಕತ್‍ಮಾಬಿ ಭರೈನ್, ಬಾನ ದಿಲ್ನ ಲಡ್ಕಾವ್‌ಭಣಿ ಫರಾವ್‌ಶೆ, ಅಜು಼ ಮೊಂಡಿ ಖ್ಹಾರಾನ ನೀತಿನಿ ವಾಟ್‌ಭಣಿ ಫರಾವ್‌ಶೆ. ಅಮ್‍ ಪ್ರಭುನ ಅಛ಼್ಛ ಅದ್ಮಿನ ತೈಯಾರ್ ಕರ್ಶೆ” ಕರಿ ಬೋಲ್ಯೊ.
LUK 1:18 ತದೆ ಜಕರೀಯಾನೆ ದೇವ್ನ ದೂತನ, “ತೂ ಬೋಲುಕರಾಸ್ತೆ ಉಷೆಕರಿ ಮೇ ಶನೇಥಿ ಮಾಲುಮ್‌ಕರು?‌ ಶನಕತೊ ಮೇ ಬುಢೋ ಹುಯಿಗಯೊ, ಮಾರಿ ಬಾವಣ್‌ಬಿ ಬುಢಿಯಾ ಹುಯಿಗೈ” ಕರಿ ಬೋಲ್ಯೊ.
LUK 1:19 ಇಮ್‌ ಬೋಲಾಖ್ಹತರ್ ದೇವ್‌ನೊ ದೂತನೆ, “ಮಾರು ನಾಮ್ ಗಬ್ರಿಯೇಲ್, ಮೇ ದೇವ್ನ ಖ್ಹಾಮ್ಣೆ ಭೀರ‍್ಯಾವವಾಳೊ, ತಾರ ಜೋ಼ಡೆ ವಾತೆಬೋಲಿನ್, ಆ ಸುವಾರ್ತೆನ ತುನ ಖ್ಹಮ್‍ಜಾ಼ಡನಖ್ಹಾಜೆ ದೇವ್ನೆ ಮನ ಮೋಕ್ಲಿರಾಖ್ಯೊಸ್.
LUK 1:20 ಆ ಮಾರಿ ವಾತೆ ಬರೋಬರ್‌ನಿ ವಖ್ಹತ್‌ಮ ಪೂರಉಶೆ. ಕತೋಬಿ ತುನೆ ಆ ವಾತೇನ ನಂಬ್ಯೊಕೊಂತೆ ಇನಖ್ಹಾಜೆ, ಆ ಖ್ಹಾರು ಹುವಾನ ದನ್‌ತೋಡಿ ತೂ ವಾತೆ ಕೋಬೋಲಿಶ್‍ನೀತೆ, ಮುಕ್ಕೊ ಹುಯಿರ‍್ಹೀಶ್” ಕರಿ ಜವಾಬ್‌ ದಿದೊ.
LUK 1:21 ಯೋಸ್ ವಖ್ಹತ್‌ಮ ಜಕರೀಯಾನ ಖ್ಹಾಜೆ ಭಾರ್‌ ಟಿವವ್‍ಕರ್ತುಥೂತೆ ಅದ್ಮಿಖ್ಹಾರು, ಔಡಿ ಘಡಿಲಗೂ ಯೋ ಮಂದಿರ್‌ನ ಮಹಿ ಶನ ಛಾ಼ತೆ ಕರಿ ಬೋಲಿನ್ ಆಶ್ಚರ್ಯಖಾದು.
LUK 1:22 ಯೋ ಮಂದಿರ್‌ಮಾಥೊ ಭಾರ್‌ಆಯಿನ್, ಇವ್ಣ ಜೋ಼ಡೆ ಏಕ್‌ ವಾತ್‍ಬಿ ಬೋಲ್ಯೊಕೊಂತೆ ದೇಖಿನ್, ಅನ ಮಂದಿರ್‌ಮ ಶಾತ್ಕಿ ದರ್ಶನ್ ಹುಯು ಉಶೆ ಕರಿ ಮಾಲುಮ್ ಕರಿಲಿದು. ತಪ್‌ಥೊ ಜಕರೀಯ ಮುಕ್ಕೋಸ್ ರ‍್ಹೀನ್ ಹಾತ್‌ನೊ ಝಾ಼ಲೊಥೀಸ್ ಬೋಲಿವತಾಳ್‌ತೋಥೊ.
LUK 1:23 ಮಂದಿರ್‌ಮ ಇನಿ ಯಾಜಕ್‌ನಿ ಸೇವೆನೊ ದನ್‌ಖ್ಹಾರೊ ಖತಮ್ ಹುವಾನ ಬಾದ್‌ಮ, ಜಕರೀಯ ಪಾಛೊ಼ ಇನ ಘರೆ ಚ಼ಲೆಗಯೊ.
LUK 1:24 ಥೋಡ ದನ್ನ ಬಾದ್‌ಮ ಇನಿ ಬಾಯ್ಕೊ ಎಲಿಜ಼ಬೇತ್‌ ಬೇಜೂನಿ ಹುಯಿನ್, ಪಾಚ಼್ ಮಹಿನಾತೋಡಿ ಘರ್‌ಥಿ ಭಾರ್‌ ಕೋ ನಿಕ್ಳಿನಿ.
LUK 1:25 ತದೆ ಎಲಿಜ಼ಬೇತ್‌ನೆ, “ಆ ಉಂಬರ್‌ಮ ಪ್ರಭುನೆ ಮಾರಪರ್ ಡೋಳಪಾಡಿ ದೇಖ್ಯೊ. ಅನೇಥಿ ಅದ್ಮಿಮ ಮನ ಥೂತೆ ಚಿಂಘಾವ್ಣಿನ ದೂರ್ ಕರ‍್ಯೊ” ಕರಿ ಬೋಲಿ.
LUK 1:26 ಎಲಿಜ಼ಬೇತ್‌ ಛೊ಼ ಮಹಿನಾನಿ ಬೇಜೂನಿ ಥೀತೆ ತದೆ, ದೇವ್ನೆ ಗಬ್ರಿಯೇಲ್ ಕರಿ ನಾಮ್ನ ದೂತನ ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್ಮ ಥೀತೆ ಏಕ್‌ ಕವಾರಿಕನ ಮೋಕ್‌ಲ್ಯೊ.
LUK 1:27 ಯೊ ಕವಾರಿನು ನಾಮ್ ಮರಿಯ. ದಾವೀದ್‌ ರಾಜಾ಼ನಿ ಪಿಳ್ಗಿವಾಳೊ ಹುಯಿರ‍್ಹೊಥೋತೆ ಯೋಸೇಫ್‌ನ ಜೋ಼ಡೆ ಇನಿ ಖ್ಹಗೈ ಪಡಿರ‍್ಹೀಥಿ.
LUK 1:28 ಯೋ ದೇವ್‌ನೊ ದೂತನೆ ಮರಿಯನ, “ದೇವ್ನಿ ಆಶೀರ್ವಾದ್‌ವಾಳಿ, ತುನ ಸಮಾಧಾನ್ ಹುವಾದೆ! ಪ್ರಭು ದೇವ್ ತಾರ ಜೋ಼ಡೆ ಛಾ಼!” ಕರಿ ಬೋಲ್ಯೊ.
LUK 1:29 ದೇವ್‌ನು ದೂತರ್‌ನಿ ವಾತೇನ ಖ್ಹಮ್‌ಜಿನ್‌ ಮರಿಯ ಘಬ್‌ರೈಗೈ ಅಜು಼ ಆ ವಾತೆನಿ ಮತ್‌ಲಬ್ ಶಾತ್‌ ಉಶೆ? ಕರಿ ಸೋಚಾಲಗಿ.
LUK 1:30 ತದೆ ದೇವ್‌ನೊ ದೂತನೆ ಇನ, “ಮರಿಯ ಡರ್‌ನಕೊ, ದೇವ್ನೆ ತಾರಪರ್ ಘಣಿ ಮೋಟಿ ವಾರ್‌ಖ್ಹೊ ಕರಿರಾಖ್ಯೋಸ್.
LUK 1:31 ಹಂದೇಕ್, ತೂ ಬೇಜೂನಿ ಹುಯಿನ್ ಏಕ್‌ ಪರ್ಖ್ಹೊ ಲಡ್ಕಾನ ಜ಼ಣಿಶ್, ಯೋ ಲಡ್ಕಾನ ಯೇಸು ಕರಿ ನಾಮ್ ಮ್ಹೇಲ್ನು.
LUK 1:32 ಯೋ ಮೋಟೊ ಅದ್ಮಿಹುಯಿನ್ ಪರಮಂಡಲ್‌ನೊ ದೇವ್‌ನೊ ಛಿಯ್ಯೊ ಕರಿ ಬೋಲೈಲಿಶೆ. ದೇವ್ ಹುಯಿರ‍್ಹೋತೆ ಪ್ರಭು ಇನೊ ಗುರುಗುರಬ್‌ಲ್ಯೊ ಹುಯಿರೋತೆ ದಾವೀದ್‌ನಿ ಸಿಂಹಾಸನ್ನ ಇನ ದಿಶೆ.
LUK 1:33 ಅಜು಼ ಯೋ ಯಾಕೋಬ್‍ನಿ ಪಿಳ್ಗಿಪರ್ ಹರ್‌ಹಮೇಶಾನಖ್ಹಾಜೆ ರಾಜ್‍಼ಕರ್‌ಶೆ. ಇನಿ ರಾಜ್ಯ ಖತಮಸ್ ಕೋ ಉಶೇನಿ” ಕರಿ ಬೋಲ್ಯೊ.
LUK 1:34 ತದೆ ಮರಿಯನೆ, “ಆ ಕಿಮ್ ಉಶೆ? ಮೇ ಕವಾರಿನಿ” ಕರಿ ದೇವ್‌ನೊ ದೂತನ ಬೋಲಿ.
LUK 1:35 ತದೆ ದೇವ್‌ನೊ ದೂತನೆ ಮರಿಯನ, “ತಾರಪರ್ ಪವಿತ್ರಾತ್ಮ ಆವ್‌ಶೆ ಅಜು಼ ದೇವ್ನಿ ಶಕತ್‍ ಆಯಿನ್ ತಾರಪರ್ ಢಪಾವ್‌ಶೆ, ಅನಖ್ಹಾಜೆಸ್ ಪೈದಾ ಉಷೇತೆ ಯೋ ಪವಿತ್ರ ಲಡ್ಕು ದೇವ್‌ನೊ ಛಿಯ್ಯೊ ಕರಿ ಬೋಲೈಲಿಶೆ” ಕರಿ ಜವಾಬ್‌ ದಿದೊ.
LUK 1:36 ಎತ್ರೇಸ್ ಕಾಹೆತೆ ತಾರಿ ಖನ್ನೆವಾಳಿ ಹುಯಿರ‍್ಹೀತೆ ಎಲಿಜ಼ಬೇತ್‌ ಛಾ಼ನಿ, ಯೋ ಬುಢಿಯಾ ಹುಯಿಗಿತೋಬಿ ಬೇಜೂನಿ ಛಾ಼. ಇನ ಪೇಟ್‌ಮ ಪರ್ಖ್ಹೊ ಲಡ್ಕು ಛಾ಼, ವಾಂಝ಼್‌ಣಿ ಕರಿ ಬೊಲೈಲಿದಿಥೀತೆ ಇನ ಆ ಛೋ಼ನೆ ಮಹಿನೊ.
LUK 1:37 ಶನಕತೊ ದೇವ್ನ ಹಾತೆ ಹುವ್ವಾಕೊಂತೆ ಏಕ್‌ಬಿ ಕೊಯ್ನಿ” ಕರಿ ಬೋಲ್ಯೊ.
LUK 1:38 ತದೆ ಮರಿಯನೆ, “ಮೇ ಪ್ರಭುನಿ ದಾಸಿ, ತುನೆ ಕಿಮ್ ಬೋಲ್ಯೋಕಿ ಇಮ್ಮಸ್ ಮನ ಹುವಾದೆ” ಕರಿ ಬೋಲಿ. ಅನ ಬಾದ್‌ಮ ಯೋ ದೇವ್‌ನೊ ದೂತ ಇನಕಂಥೊ ಚ಼ಲೆಗಯೊ.
LUK 1:39 ತದ್‌ನು-ತದ್ದೇಸ್ ಮರಿಯನೆ ಖ್ಹವಾರಿಲೀನ್, ಒಗ್ಗಿ-ಒಗ್ಗಿಸ್ ಪಹಾಡ್‌ನು ಮುಲಕ್‌ಭಣಿ ಥೂತೆ ಯುದಾಯ ತಬರ್‌ಖಾನು ಏಕ್‌ ಗಾಮ್‌ನ ಗೈ.
LUK 1:40 ಹಿಜ್ಜಾ಼ ಜಕರೀಯಾನ ಘರ್‌ಮ ಜೈ಼ನ್ ಎಲಿಜ಼ಬೇತ್‌ನ ಖ್ಹಲಾಮ್ ಕರಿ.
LUK 1:41 ಮರಿಯನೆ ಖ್ಹಲಾಮ್ ಕರಿ ಬೋಲಿತೆ ಅವಾಜ಼್ ಎಲಿಜ಼ಬೇತ್‌ ಖ್ಹಮಜ಼್‌ತಾನ, ಇನ ಪೇಟ್‌ಮಾನು ಲಡ್ಕು ಉಛ಼್‌ಳಿ ಪಡ್ಯು. ಅಜು಼ ಎಲಿಜ಼ಬೇತ್‌ ಪವಿತ್ರಾತ್ಮಥಿ ಭರೈಗಿ.
LUK 1:42 ಜೋ಼ರ್ ಆವಾಜ಼್‌ಥಿ ಚಿಕ್ರಿನ್ ಬೋಲಿಕಿ, “ಮರಿಯ, ದೇವ್ನೆ ತುನ ಬಿಜಿ ಖ್ಹಾರಿ ತಯೇಡಾಥೀಬಿ ಜಾ಼ಖ್ಹತ್ ಆಶೀರ್ವಾದ್‌ ಕರಿರಾಖ್ಯೋಸ್. ತೂ ಪೈದಾ ಕರೀಶ್ತೆ ಲಡ್ಕಾನ ದೇವ್ನೆ ಆಶೀರ್ವಾದ್‌ ಕರಿರಾಖ್ಯೋಸ್.
LUK 1:43 ಮಾರ ಪ್ರಭುನಿ ಆಯ ಮಾರಕನ ಆವಾಯೆತ್ರೆ ಭಾಗ್ಯ, ಮನ ಕಿಜ್ಜಾ಼ಥಿ ಮಳ್‌ಷೆ?
LUK 1:44 ಹಂದೇಕ್, ತೂ ಖ್ಹಲಾಮ್ ಕರಿ ಬೋಲಿತೆ ಅವಾಜ಼್ ಮಾರ ಕಾನ್‌ಮ ಪಡ್‌ತಾಸ್‌ನ, ಮಾರ ಪೇಟ್‌ಮಾನು ಲಡ್ಕು ಖ್ಹುಶೀಥಿ ಉಛ಼್‌ಳಿ ರಹಿಗು.
LUK 1:45 ಪ್ರಭುನೆ ತುನ ಬೋಲ್ಯೋತೆ ವಾತೆ ಉಷೆಕರಿ ನಂಬಿತೆ ಇನಖ್ಹಾಜೆ ತೂ ಧನ್ಯಹುಯಿರ‍್ಹೀಸ್”!
LUK 1:46 ತದೆ ಮರಿಯನೆ, “ಮಾರೊ ಜಾನ್‌ ಪ್ರಭುನ ಸ್ತುತಿ ಕರಾಸ್.
LUK 1:47 ದೇವ್ ಮನ ಬಚಾ಼ಡವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ ಮಾರು ಆತ್ಮ ಖ್ಹುಶಿ ಛಾ಼.
LUK 1:48 ದೇವ್ನಿ ದಾಸಿ ಹುಯಿರ‍್ಹೀತೆ ಮೇ, ಲ್ಹಾಯಕ್‌ಕೊಂತೆ ಇಮ್‍ಥೀತೆ ತದೆ, ಇನೆ ಮನ ಯಾದ್ ಕರ‍್ಯೊ! ಖ್ಹಾಚಮಾಬಿ ಹಂಕೇಥು ತಮಾಮ್‌ ಅದ್ಮಿ ಮನ ದೇವ್ನಿ ಆಶೀರ್ವಾದ್‌ವಾಳಿ ಕರಿ ಚಿಕರ್‌ಶೆ.
LUK 1:49 ಶನಕತೊ ಘಣಿ ಶಕತ್‌ವಾಳೊ ದೇವ್ ಮಾರಖ್ಹಾಜೆ ಮಹಾನ್ ಕಾಮ್‌ಖ್ಹಾರು ಕರಿರಾಖ್ಯೋಸ್. ಇನು ನಾಮ್ ಪವಿತ್ರ್‌ ಹುಯಿರ‍್ಹೂಸ್.
LUK 1:50 ಕೋಣ್ ದೇವ್‌ಮ ಪೂರ ಮನ್‌ಥಿ ಡರಿನ್ ಚಾ಼ಲಸ್ಕಿ ಇವ್ಣಾಪರ್ ದೇವ್ ಮುಂಡಿಥು ಧರಿನ್ ಮುಂಡಿಲಗೂ ಗೋರ್‌ ಕರಾವಾಳೊ ಹುಯಿರ‍್ಹೊಸ್.
LUK 1:51 ದೇವ್ನೆ ಇನಿ ಭುಜ಼್‌ನಿ ಶಕತ್ ವತಾಳಿನ್, ಹಂಕಾರ್ ಭರ‍್ಯಾ ದಿಲ್‌ವಾಳಾನ ಛಿಂಧೊಭಾಂಗ್‌ ಕರಿನಾಖ್ಯೊ.
LUK 1:52 ದೇವ್ನೆ ರಾಜಾ಼ವ್‌ನ ಸಿಂಹಾಸನ್‌ಪರ್‌ಥು ಧಕೇಲಿನ್, ಶಾತ್ಬಿಕೊಂತೆ ಗರೀಬ್‌ನ ಉಪ್ಪರ್ ಲೈರಾಖ್ಯೊಸ್.
LUK 1:53 ಯೋ ಭುಕ್ಯಾವ್‌ನ ಮಿಝ಼್‌ವಾನ್ ಖಡಾಯೊ, ಕತೋಬಿ ಧನ್‌-ದೌಲತ್‌ವಾಳಾನ ಖಾಲಿ ಹಾತೆ ಮೋಕ್ಲಿದಿದೊ.
LUK 1:54 ದೇವ್ನೆ ಅಪ್ಣ ಗುರುಗುರಬ್‍ಲ್ಯನ ವಾಗ್ದಾನ್ ದಿದೊತೆ ಇಮ್ಮಸ್, ಇನೊ ಸೇವಕ್ ಹುಯಿರ‍್ಹೋತೆ ಇಸ್ರಾಯೇಲ್‌ನೊ ಹಾತ್‌ ಧರಿರಾಖ್ಯೋಸ್‌.
LUK 1:55 ಅಬ್ರಹಾಮ್‌ನಾಬಿ ಇನಿ ಪಿಳ್ಗಿವಾಳಾನ ಹರ್‌ಹಮೇಶ ಗೋರ್‌ ವತಾಳ್ಣು ಕರಿ ಯಾದ್ ಕರಿರಾಖ್ಯೋಸ್!” ಕರಿ ಬೋಲಿ.
LUK 1:56 ಮರಿಯ ತೀನ್ ಮಹಿನಾತೋಡಿ ಎಲಿಜ಼ಬೇತ್‌ನ ಜೋ಼ಡೆ ರ‍್ಹೀನ್ ಪಾಛಿ ಫರೀನ್ ಇನ ಘರೆ ಗೈ.
LUK 1:57 ದನ್ ಭರಾವಾನ ಬಾದ್‌ಮ ಎಲಿಜ಼ಬೇತ್‌ನೆ ಏಕ್‌ ಪರ್ಖ್ಹೊ ಲಡ್ಕು ಜ಼ಣಿ.
LUK 1:58 ತದೆ ಎಲಿಜ಼ಬೇತ್‌ನ ಅಶ್‌ಪಿಶ್‌ವಾಳು ಅಜು಼ ಮಾಯಮಾತ್ರಾವ್ನೆ ಪ್ರಭುನೆ ಇನಾಪರ್‌ ಘಣು ಗೋರ್‌ ಕರ‍್ಯೊತೆ ಇನಿ ಬಾರೇಮ ಖ್ಹಮ್‌ಜಿನ್‌, ಇನಜೋ಼ಡೆ ಮಳಿನ್ ಖ್ಹುಶಿ ಕರ‍್ಯು.
LUK 1:59 ಆಟ್ ರೋಜ಼್ ಹುವ್ವಾದೀನ್, ಯೋ ಲಡ್ಕಾನ ಖ್ಹತ್ನ ಕರ‍್ನು ಕರಿ ಲಾಯು. ಇವ್ಣೆ ಯೋ ಲಡ್ಕಾನ ಜಕರೀಯಕರಿ ಬಾನೂಸ್ ನಾಮ್ ಮ್ಹೇಲ್ನು ಕರಿ ಥು.
LUK 1:60 ಕತೋಬಿ ಯೋ ಲಡ್ಕಾನಿ ಆಯ ಎಲಿಜ಼ಬೇತ್‌ನೆ, “ನಕೊ! ಯೋಹಾನ ಕರಿ ಮ್ಹೇಲ್ನು” ಕರಿ ಬೋಲಿ.
LUK 1:61 ಇಮ್‌ ಬೋಲಾಖ್ಹತರ್ ಇವ್ಣೆ, “ಕತೋಬಿ ಅಮ್ನು ನಾಮ್ ತಾರ ಮಾಯಮಾತ್ರಾಮ ಕಿನೂಸ್ ಕೊಯ್ನಿನಿ!” ಕರಿ ಇನ ಬೋಲ್ಯು.
LUK 1:62 ಬಾದ್‌ಮ ಇವ್ಣೆ ಯೋ ಲಡ್ಕಾನ ಬಾನ, ಹಾತ್‌ನೊ ಝಾ಼ಲೊ ಕರಿನ್, “ಆ ಲಡ್ಕಾನ ಕೆಹುನಾಮ್‌ ಮ್ಹೇಲ್ನು” ಕರಿ ಪುಛಾ಼ಯು.
LUK 1:63 ತದೆ ಜಕರೀಯಾನೆ ಏಕ್‌ ಲೀಖಾನು ಪಲ್ಗು ಮಂಗೈನ್ ಇನಾಪರ್, “ಇನು ನಾಮ್ ಯೋಹಾನ” ಕರಿ ಲೀಖ್ಯೊ. ತದೆ ತಮಾಮ್‌ ಅದ್ಮಿನ ಆಶ್ಚರ್ಯ ಹುಯಿಗಯು.
LUK 1:64 ತದ್‌ನು-ತದ್ದೇಸ್ ಜಕರೀಯ ಪಾಛು಼ ವಾತೆ ಬೋಲಾಲಗ್ಯೊ. ಅಜು಼ ವಾತೆ ಬೋಲ್ತೊಹುಯಿನ್ ದೇವ್ನಿ ಸ್ತುತಿ ಕರಾಲಗ್ಯೊ.
LUK 1:65 ಅನ ಖ್ಹಮ್‌ಜ್ಯೂತೆ ಅಶ್‌ಪೀಶ್‌ವಾಳ ಅದ್ಮಿಮ ಡರ್‌ ಪೇಶಿಗೊ, ಅಜು಼ ಯೂದಾಯ ತಬರ್‌ಖಾನು ಪಹಾಡಿ ಮುಲಕ್ನು ಖ್ಹಾರಿ ಬಾಜು಼ಮ ಆ ವಾತೆ ಫೈಲಿಗು.
LUK 1:66 ಖ್ಹಮ್‌ಜ್ಯೂತೆ ಖ್ಹಾರು ಅದ್ಮಿ ಆಶ್ಚರ್ಯ ಹುಯಿನ್, “ಆ ಲಡ್ಕು ಖ್ಹಾಮ್ಣೆ ಕಿಮ್ನು ಉಶೇಕಿ?” ಕರಿ ಅನಿ ಬಾರೇಮ ಮನ್‌ಮ ಸೋಚಾಲಗ್ಯು, ಅಜು಼ ಪ್ರಭುನೊ ಹಾತ್ ಯೋ ಲಡ್ಕಾಪರ್ ಥೊ.
LUK 1:67 ತದೆ ಯೋಹಾನ್ನೊ ಬಾ ಜಕರೀಯಾನೆ ಪವಿತ್ರಾತ್ಮಥಿ ಭರೈನ್ ಅಮ್ ಪ್ರವಾದ್‌ನೆ ಬೋಲ್ಯೊ:
LUK 1:68 “ಇಸ್ರಾಯೇಲ್‌ನೊ ದೇವ್ ಹುಯಿರ‍್ಹೋತೆ ಪ್ರಭುನ ಧನ್ಯವಾದ್ ಹುವಾದೆ! ಇನ ಅದ್ಮಿಕನ ಐನ್, ಇವ್ಣಾಪರ್ ಗೋರ್‌ಕರೀನ್, ಇವ್ಣುನ ಛುಟ್ಕಾರ್‌ ಕರಿರಾಖ್ಯೋಸ್;
LUK 1:69 ಇನೊ ಸೇವಕ್ ಹುಯಿರ‍್ಹೊಥೋತೆ ದಾವೀದ್‌ನ ಖಾನ್‌ದಾನ್‌ಮಾಥು ಅಪ್ಣಖ್ಹಾಜೆ ಘಣಿ ಶಕತ್‌ವಾಳೊ ಏಕ್‌ ರಕ್ಷಕ್‌ನ ದೀರಾಖ್ಯೊಸ್.
LUK 1:70 ದೇವ್ನೆ ತದೇಸ್‌ ಇನು ಪವಿತ್ರ ಪ್ರವಾದಿ ಖ್ಹಾರಾವ್‌ನ ಮ್ಹೋಡಾಥಿ ಬೋಲಾಯೊ ಥೋತೆ ಇಮ್ಮಸ್,
LUK 1:71 ಅಪ್ಣುನ ಕೋಣ್-ಕೋಣ್ ವಹೇರ್‌ ಕರುಕರ್ತುಥೂಕಿ ಇವ್ಣ ಹಾತೇಥಿ ಛೋ಼ಡೈನ್, ಅಪ್ಣ ದುಶ್‌ಮನ್‌ಥಿ ಅಪ್ಣುನ ಬಚಾ಼ಡಿರಾಖ್ಯೊಸ್.
LUK 1:72 ದೇವ್ನೆ ಅಪ್ಣ ಗುರುಗುರಬ್‍ಲ್ಯನ ಗೋರ್‌ಖೈನ್, ಪವಿತ್ರ ಒಪ್ಪಂದನ ಯಾದ್‌ಕರಿನ್,
LUK 1:73 ಅಪ್ಣೊ ಗಲ್‌ಢೊ ಹುಯಿರ‍್ಹೋತೆ ಅಬ್ರಹಾಮ್‌ನ ಜಿಭಾನ್‌ ದೀರಾಖ್ಯೋಥೋತೆ ಇಮ್‌,
LUK 1:74 ಅಪ್ಣುನ ದುಶ್‌ಮನ್ನ ಹಾತೇಖ್ಹು ಛೋ಼ಡೈನ್, ಡರ್‌ಕೊಂತೆ ಇಮ್‌ ಇನಿ ಸೇವೆ ಕರಾನಿಮತ್‌ ಅಪ್ಣುನ ಅಕ್ಲಾಶ್‌ ಬಣೈರಾಖ್ಯೊಸ್.
LUK 1:75 ಅನೇಥಿ ಅಪ್ಣೆ ಜಿವಿರ‍್ಹವಾನ ದನ್‌ಖ್ಹಾರೊ, ಇನಖ್ಹಾಮ್ಣೆ ಇಮಾನ್‌ದಾರ್ ಅಜು಼ ನೀತಿಥಿ ರ‍್ಹೇಣು ಕರಿ ಅಮ್ ಕರಿರಾಖ್ಯೋಸ್.
LUK 1:76 ಅಜು಼ ಜಕರೀಯಾನೆ, “ಮಾರು ಲಡ್ಕು, ತೂತೊ, ಪರಮಂಡಲ್‌ನೊ ದೇವ್‌ನೊ ಪ್ರವಾದಿ ಕರಿ ಬೋಲೈಲಿಶ್. ತೂ ಪ್ರಭುನ ಅಗಾಡಿ ಜೈ಼ನ್, ಇನಿ ವಾಟ್ನ ಖ್ಹವಾರವಾಳೊ ಹುಯಿರ‍್ಹೀಶ್.
LUK 1:77 “ಪಾಪ್‌ಖ್ಹಾರು ಮಾಪ್‌ ಹುವಾಥೀಸ್ ರಕ್ಷಣೆ ಮಳಾನು ಕರಿ, ಇನ ಅದ್ಮಿನ ಬೋಲವಾಳೊ ಹುಯಿರ‍್ಹಿಶೆ.
LUK 1:78 ಅಪ್ಣೊ ದೇವ್ ದಯಕರವಾಳೊ, ಇನಿ ಗೋರ್‌ಥಿ ಅಪ್ಣುನ ಭಾಗಳ್ ಫಾಟಿ. ಅನೇಥಿ ಉಪ್ಪರ್‌ಥು ದನ್ ನಿಕ್ಳಿನ್, ಅಪ್ಣಕನ ಆವ್‌ಶೆ,
LUK 1:79 ಅಜು಼ ಅಂಧಾರಮಾಬಿ, ಮರಣ್ಣಿ ಛಾ಼ಳಿಮ ರ‍್ಹವಾಳ ಖ್ಹಾರಾನ ಉಜಾ಼ಳು ದಿಶೆ, ಅಪ್ಣುನ ಸಮಾಧಾನ್ನಿ ವಾಟ್‌ ವತಾಳಿನ್ ಚ಼ಲಾವ್‌ಷೆ” ಕರಿ ಬೋಲ್ಯೊ.
LUK 1:80 ಯೋ ಲಡ್ಕು ಮೋಟು ಹುಯಿನ್ ಆತ್ಮಮಾಬಿ ಅಜು಼ ಶಕತ್‍ಮಾಬಿ ಭಡ್ಯು, ಅಜು಼ ಇಸ್ರಾಯೇಲ್‌ ಅದ್ಮಿಯೇನ ಯೋಹಾನ ದೆಖಾವಾನ ದನ್‌ಲಗೂ ಉಜ್ಜಾ಼ಡಿ ಜ಼ಂಗಳ್‌ಮ ಥೊ.
LUK 2:1 ಯೋ ದನೂಮ ಕೈಸರ್ ಅಗಸ್ಟಸ್‌ನೆ ರೋಮ್‍ನು ರಾಜ಼್‌ಭಾರ್‌ ಚಾ಼ಲುಕರಾಸ್ತೆ ಖ್ಹಾರಾಸ್ ದೇಖ್ಹ್‌ಮ ಅದ್ಮಿಖ್ಹಾರಾನಿ ಗಣ್ತಿ ಹೋಣುಕರಿ ಹುಕುಮ್ ದಿದೊ.
LUK 2:2 ಆ ಪಹಿಲಿ ಬಾರ್ ಚಾ಼ಲಿತೆ ಅದ್ಮಿನಿ ಗಣ್ತಿ ಹುಯಿರ‍್ಹುಥು. ಕುರೇನ್ಯ ಸಿರಿಯ ದೇಖ್ಹ್‌ನೊ ರಾಜ್ಯಪಾಲ್ ಹುಯಿರ‍್ಹೊಥೋತೆ ತದೆ ಆ ಚಾ಼ಲ್ಯುತೆ.
LUK 2:3 ತಮಾಮ್‌ ಅದ್ಮಿ, ಇವ್ಣು-ಇವ್ಣು ನಾಮ್ ಲಿಖಾವನಖ್ಹಾಜೆ ಇವ್ಣ-ಇವ್ಣ ಗಾಮೆ ಗಯು.
LUK 2:4 ಇನಖ್ಹಾಜೇಸ್ ಯೋಸೇಫ್‌ಬಿ ಗಲಿಲಾಯನು ನಜ಼ರೇತ್ ಕರಿ ಗಾಮ್‌ಥು ನಿಕ್ಳಿನ್ ಯೂದಾಯ ತಬರ್‌ಖಾನು ಬೇತ್ಲೆಹೇಮ್ ಕರಿ ಗಾಮ್‌ನ ಗಯೊ. ಯೋಸೇಫ ದಾವೀದ್‌ನೊ ಖಾಂದಾನ್‌ವಾಳೊ ಹುಯಿರ‍್ಹೊಥೋತೆ ಇನಖ್ಹಾಜೆ, ದಾವೀದ್‌ನು ಗಾಮ್‍ ಹುಯಿರ‍್ಹೂತೆ ಬೇತ್ಲೆಹೇಮ್‌ನ ಗಯೊ.
LUK 2:5 ಯೋಸೇಫ್‌ನಿ ಜೋ಼ಡ್ಮ ಖ್ಹಗೈ ಪಡಿರ‍್ಹಿಥೀತೆ ಮರಿಯನಾಬಿ ಕೇಡೆ ಬಲೈಲಿನ್ ಇನು ನಾಮ್ ಲಿಖಾಡೈಲ್ಯವಾನಖ್ಹಾಜೆ ಗಯೊ. ತದೆ ಯೋ ಪೂರ ದನ್ನಿ ಬೇಜೂನಿ ಥಿ.
LUK 2:6 ಇವ್ಣೆ ಬೇತ್ಲೆಹೇಮ್ಮ ಥೂತೆ ತದೆ, ಮರಿಯನ ಲಡ್ಕು ಪೈದಾ ಹುವಾನಿ ವಖ್ಹತ್ ಆಯಿ.
LUK 2:7 ತದೆ ಇನೆ ಇನು ಪಹಿಲೋಟು ಪರ್ಖ್ಹೊ ಲಡ್ಕಾನ ಜ಼ಣಿನ್ ಲುಂಗ್ಡಾಮ ಲಪೇಟಿನ್, ಛ಼ತ್ತರ್‌ಮ ರ‍್ಹವಾನ ಝ಼ಗೊಕೊಂತೆ ದೇಖಿನ್, ಇನ ಗೋದ್‌ಡಿಮ ಖ್ಹುಡೈ.
LUK 2:8 ಯೋ ತಬರ್‌ಖಾಮ ಮೇಂಢ ಚ಼ರಾವವಾಳು ಥೋಡು ಜ಼ಣು, ಯೋ ರಾತ್ಮ ಖೇತರ್‌ಮ ಇವ್ಣ ಮೇಂಢಾವ್‍ನಿ ಮಂಧಾನ ದೇಕ್‌ಭಾಲ್ ಕರುಕರ್ತುಥು.
LUK 2:9 ತದೆ ಪ್ರಭುನೊ ಏಕ್‌ ದೂತ ಐನ್, ಮೇಂಢ ಚ಼ರಾವವಾಳಾನ ಖ್ಹಾಮ್ಣೆ ಭೀರ‍್ಯೊ. ಪ್ರಭುನು ಉಜಾ಼ಖ್ಹ್‌ ಇವ್ಣ ಅಶ್‌ಪಿಶ್‍ ಭರಾಯು. ಅನ ದೇಖಿನ್ ಇವ್ಣೆ ಡರ್‌ಥಿ ಘಬ್‌ರೈಗಯು.
LUK 2:10 ಕತೋಬಿ ದೇವ್‌ನೊ ದೂತನೆ ಇವ್ಣುನ, “ಡರೊ ನಕೊ! ಮೇ ತುಮಾರಖ್ಹಾಜೆ ಅಛ್ಛಿಸಮಾಚಾರ್‌ನ ಲೈರಾಖ್ಯೊಸ್, ಅನೇಥಿ ತಮಾಮ್‌ ಅದ್ಮಿನ ಘಣು ಖ್ಹುಶಿ ಉಶೆ.
LUK 2:11 ಯೋ ಶಾತ್‌ಕತೊ, ಆಜ಼್ ದಾವೀದ್‌ನ ನಂಗರ್‌ಮ ತುಮಾರಖ್ಹಾಜೆ ಏಕ್‌ ರಕ್ಷಕ್ ಪೈದಾ ಹುಯಿರ‍್ಹೋಸ್, ಯೋ ಕೋಣ್‌ಕತೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತ.
LUK 2:12 ಯೋ ತುಮೂನ ಮಾಲುಮ್ ಪಡಾನ ಖ್ಹಣೇದ್ ಶಾತ್‌ಕತೊ, ಲುಂಗ್ಡಾಥಿ ಲಪೇಟಿಹುಯು ಏಕ್‌ ಲಡ್ಕು, ಗೋದ್‌ಡಿಮ ಖ್ಹುತುರ‍್ಹಿಶೇತೆ ತುಮೆ ದೇಕ್‌ಶು” ಕರಿ ಬೋಲ್ಯೊ.
LUK 2:13 ಯೋಸ್ ವಖ್ಹತ್‌ಮ ಪರಲೋಕ್‌ಥು ದೇವ್ ದೂತರ್‌ನು ಮೋಟಿ ಝೂ಼ಂಡ್‌ ಆಯಿನ್, ಯೋ ಪಹಿಲು ದೇವ್ ದೂತನ ಜೋ಼ಡೆ ಮಳಿನ್, ದೇವ್ನ ಸ್ತುತಿ ಕರ‍್ಯು:
LUK 2:14 “ಉಪ್ಪರ್‌ಲ್ಯಲೋಕ್‍ಮ ದೇವ್ನ ಮಹಿಮೆ ಹುವಾದೆ, ಅಜು಼ ಧರ್ತಿಪರ್ ದೇವ್ನ ಕೋಣ್ ಖ್ಹಾಜ಼ಸ್ಕಿ ಇವ್ಣುನ ಶಾಂತಿ.
LUK 2:15 ದೇವ್‌ದೂತರ್‌ ಇವ್ಣಕಂಥು ಪಾಛು಼ ಪರ್‌ಲೋಕ್ ಚ಼ಲ್ಯುಜಾ಼ವಾನ ಬಾದ್‌ಮ, ಮೇಂಢ ಚ಼ರಾವವಾಳು ಏಕ್‌ಥಿ ಏಕ್‌, “ಅಪ್ಣೆ ಹಮ್ಕೇಸ್ ಬೇತ್ಲೆಹೇಮ್‌ನ ಜೈ಼ನ್, ಪ್ರಭುನೆ, ಅಪ್ಣುನ ಮಾಲುಮ್ ಕರಾಯೋತೆ ಆ ಬಾರೇಮ, ಚಾ಼ಲ್ಯುತೆ ಇನ ದೇಖೆ” ಕರಿ ವಾತೆ ಬೋಲಿಲಿದು.
LUK 2:16 ತದೆ ಇವ್ಣೆ ಒಗ್ಗಿಸ್‌ಮ ಜೈ಼ನ್, ಮರಿಯನಾಬಿ ಯೋಸೇಫ್‌ನಾಬಿ ಅಜು಼ ಗೋದ್‌ಡಿಮ ಖ್ಹುತೂಥೂತೆ ಲಡ್ಕಾನಾಬಿ ದೇಖ್ಯು.
LUK 2:17 ಮೇಂಢ ಚ಼ರಾವವಾಳನೆ ಲಡ್ಕಾನ ದೇಖಿನ್, ಇನಿ ಬಾರೇಮ ದೇವ್‌ನೊ ದೂತನೆ ಇವ್ಣುನ ಬೋಲ್ಯೋತೆ ವಾತೇನ ಇವ್ಣ ಖ್ಹಾಮ್ಣೆ ಬೋಲ್ಯು.
LUK 2:18 ಇನ ಖ್ಹಮ್‌ಜ್ಯೂತೆ ಖ್ಹಾರಾಸ್‌ನೆ, ಮೇಂಢ ಚ಼ರಾವವಾಳು ಇವ್ಣುನ ಬೋಲ್ಯೂತೆ ವಾತೇನಖ್ಹಾಜೆ ಆಶ್ಚರ್ಯಖಾದು.
LUK 2:19 ಕತೋಬಿ ಮರಿಯನೆ ಆ ಖ್ಹಾರಿ ವಾತೆನ ಇನ ಮನ್‌ಮ ರಾಖಿನ್, ಇನಿ ಬಾರೇಮ ಸೋಚಾಲಗಿ.
LUK 2:20 ಮೇಂಢ ಚ಼ರಾವವಾಳು ಇವ್ಣೆ ದೇಖ್ಯೂತೆ ಅಜು಼ ಖ್ಹಮ್‌ಜ್ಯೂತೆ ಯೋ ಖ್ಹಾರಾನಖ್ಹಾಜೆ, ದೇವ್ನ ಗೀದ್‌ ಬೋಲ್ತು ಅಜು಼ ಸ್ತುತಿ ಕರ್ತುಹುಯಿನ್ ಪಾಛು಼ಫರಿ ಚ಼ಲ್ಯೂಗಯು. ದೇವ್‌ನೊ ದೂತನೆ ಇವ್ಣುನ ಬೋಲ್ಯೊಥೋತೆ ಇಮ್ಮಸ್ ಖ್ಹಾರು ಚಾ಼ಲಿರ‍್ಹೂಥು.
LUK 2:21 ಆಟ್ ದನ್ ಹುವ್ವಾದೀನ್, ಯೋ ಲಡ್ಕಾನ ಖ್ಹತ್ನ ಕರಾನಿ ವಖ್ಹತ್ ಆಯಿ. ತದೆ ಇನ ಯೇಸು ಕರಿ ನಾಮ್ ಮ್ಹೇಲ್ಯು. ಯೋ ಬೇಜೂನಿ ಹುವಾನ ಅಗಾಡಿಸ್ ದೇವ್‌ನೊ ದೂತನೆ ಆಸ್ ನಾಮ್ ಮ್ಹೇಲ್ನು ಕರಿ ಬೋಲ್ಯೊಥೊ.
LUK 2:22 ಪಾಕ್‍ ಹುವಾನಿ ಬಾರೇಮ ಮೋಶೇನು ಧರ್ಮಶಾಸ್ತ್ರಮ ಹುಕುಮ್‌ ದೆವೈರ‍್ಹೀಸ್‌ತೆ ಇಮ್‌ ಕರಾನ, ಯೋಸೇಫ್‌ನಾಬಿ ಮರಿಯನ ಯೋ ವಖ್ಹತ್ ಆಯಿ. ಇನಖ್ಹಾಜೆ ಇವ್ಣೆ ಯೋ ಲಡ್ಕಾನ ದೇವ್ನ ಕರಿ ಸಮರ್ಪಣ್‌ ಕರಾನ ಯೆರೂಸಲೇಮ್‌ನು ಮಂದಿರ್‌ಮ ಲೀನ್‌ ಗಯ.
LUK 2:23 ಶನಕತೊ ಪ್ರಭುನಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಇಮ್‌, ಪಹಿಲೋಟು ಪರ್ಖ್ಹೊ ಲಡ್ಕಾನ ದೇವ್ನ ಕರಿ ಸಮರ್ಪಣ್‌ ಕರ‍್ನು.
LUK 2:24 ಎತ್ರೇಸ್ ಕಾಹೆತೆ ಇವ್ಣೆ ಪ್ರಭುನ, ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಇಮ್‌, ಏಕ್‌ ಜೋ಼ಡು ಢೋಳ್‍ನ ನಾತೊ ಬೇ ಪರ‍್ಯಾವಾನು ಚೆಲ್ಕಾನ ಬಲಿ ದೇವ್ಣುಥು.
LUK 2:25 ಯೋ ಹಗಾಮ್ಮ ಯೆರೂಸಲೇಮ್ಮ ಸಿಮೆಯೋನ್‌ ಕರಿ ಏಕ್‍ಜ಼ಣೊ ಥೊ. ಯೋ ಏಕ್‌ ನೀತಿವಾಳೊ ಅಜು಼ ದೇವ್‌ಥಿ ಡರವಾಳೊ ಅದ್ಮಿ ಹುಯಿರ‍್ಹೋಥೊ, ಇಸ್ರಾಯೇಲ್‌ ಅದ್ಮಿಯೇನ ಸಮಾಧಾನ್‍ ಕರಾವಾಳೊ ಕದೆ ಆವ್‍ಶೆಕರಿ ಟಿವವ್‍ಕರ್‌ತೊಥೊ. ಅಜು಼ ಪವಿತ್ರಾತ್ಮ ಇನಿ ಜೋ಼ಡೆ ಥೊ.
LUK 2:26 ಅತ್ರೇಸ್ ಕಾಹೆತೆ ಪ್ರಭು ಮೋಕಲ್‌ಶೇತೆ ಕ್ರಿಸ್ತನ ದೇಖಾತೋಡಿ, ತೂ ಮರಿಶ್‌ ಕೊಯ್ನಿ ಕರಿ ಪವಿತ್ರಾತ್ಮನೆ ಇನ ಬೋಲಿರಾಖ್ಯೋಥೊ.
LUK 2:27 ಪವಿತ್ರಾತ್ಮಥಿ ಸಿಮೆಯೋನ್‌ ಮಂದಿರ್‌ಮ ಗಯೊ, ತದೆ ಯೋಸೇಫ್‌ಬಿ ಮರಿಯನೆ ಲಡ್ಕು ಯೇಸುನ ಧರ್ಮಶಾಸ್ತ್ರನಿ ಪದತ್ತಿಘೋಣಿ ಕರ‍್ನು ಕರಿ ಮಂದಿರ್‌ನ ಮಹಿ ಲೀನ್‌ಆಯ.
LUK 2:28 ಸಿಮಿಯೋನ್ನೆ ಯೋ ಲಡ್ಕಾನ ಹಾತ್‌ಮ ಪಾಡೀನ್, ದೇವ್ನ ಧನ್ಯವಾದ್ ಕರ್ತೊಹುಯಿನ್,
LUK 2:29 “ಪ್ರಭು, ತಾರಿ ವಾತೆ ಚಾ಼ಲಿಗಿ, ಹಮ್ಕೆ ಸಮಾಧಾನ್‌ಥಿ ಜಾ಼ವಾನ ತಾರೊ ಸೇವಕ್‌ನ ಹುಕುಮ್ ಹುವಾದೆ.
LUK 2:30 ಶನಕತೊ, ಖ್ಹುದ್ ಮಾರ ಡೋಳೆಖ್ಹು ತುನೆ ದಿದೋತೆ ರಕ್ಷಣೆನ ದೇಖಿಲಿದೊ,
LUK 2:31 ಖ್ಹಾರ ಅದ್ಮಿವೋನ ದೇಖಾನಿಘೋಣಿ ಇನ ದೀರಾಖ್ಯೊಸ್.
LUK 2:32 ಯೋ ಪರೈ ಜಾ಼ತ್‌ವಾಳ ಅದ್ಮಿನ ತಾರಿ ಮರ್ಜಿ ವತಾಳವಾಳೊ ಉಜಾ಼ಳು ಹುಯಿರ‍್ಹೋಸ್ ಅಜು಼ ತಾರು ಇಸ್ರಾಯೇಲ್ ಅದ್ಮಿವೋನ ಮಹಿಮೆ ಉಶೆ.
LUK 2:33 ಸಿಮಿಯೋನ್ನೆ ಯೋ ಲಡ್ಕಾನಿ ಬಾರೇಮ ಬೋಲ್ಯೋತೆ ವಾತೇನ ಖ್ಹಮ್‌ಜಿನ್‌, ಇನ ಆಯ-ಬಾನೆ ಆಶ್ಚರ್ಯಖಾದು.
LUK 2:34 ಸಿಮೆಯೋನ್ನೆ ಇವ್ಣುನ ಆಶೀರ್ವಾದ್‌ ಕರೀನ್, ಇನಿ ಆಯ ಮರಿಯನ, “ಆ ಲಡ್ಕಾಥಿ ಇಸ್ರಾಯೇಲ್‌ ದೇಖ್ಹ್‌ಮ ಕೈಯೆಕ್ಕಿ ಜ಼ಣು ಪಡಿಜಾ಼ಶೆ ಅಜು಼ ಕೈಯೆಕ್ಕಿ ಉಟ್‌ಶೆ. ಕೈಯೆಕ್ಕಿ ಜ಼ಣು ಅನಿ ವಿರೋದ್ ವಾತೆ ಬೋಲ್‌ಶೇತೇಸ್, ಆ ದೇವ್‍ಥಿ ಆಯೋತೆ ಕರಿ ಬೋಲಾನು ಖ್ಹಣೇದ್ ಹುಯಿರ‍್ಹಿಶೆ.
LUK 2:35 ಅಮ್ ಘಣ ಅದ್ಮಿನಿ ದಿಲ್ನಿ ವಾತೆಖ್ಹಾರಿ ಭಾರ್‌ ನಿಕಳ್‌ಶೆ. ಅಜು಼ ತಾರ ದಿಲ್ನ ತಲ್ವಾರ್‌ ಭೋಕಾವನಿಮತ್ ದುಖ್ ಉಶೆ” ಕರಿ ಬೋಲ್ಯೊ.
LUK 2:36 ಆಸ್‌ಕಾಹೆತೆ ಅಸೇರನೊ ಖೂಮ್‌ವಾಳೊ ಫನುವೇಲನಿ ಛೋ಼ರಿ ಅನ್ನಕರಿ ಏಕ್‌ ಜ಼ಣಿ ಪ್ರವಾದ್‌ನೆ ಕರಾವಾಳಿ ಥೀ. ಯೋ ವ್ಯಹಾ ಹುಯಿನ್ ಖ್ಹಾತ್ ವರಖ್ಹ್ ಬಾವ್ರಿನ ಜೋ಼ಡೆ ಬಚಿನ್ ಅಜು಼ ಯೋ ಘಣಿ ಬುಢಿಯಾ ಹುಯಿರ‍್ಹೀಥಿ.
LUK 2:37 ತದೆ ಇನ ಚಾರ್ ಉಪ್ಪರ್ ಚಾರಿಖ್ಹ್ ವರಖ್ಹ್ ಹುಯಿರ‍್ಹಾಥ ಅಜು಼ ಯೋ ಮುಂಡಚ್ಚಿ ಹುಯಿರ‍್ಹೀಥಿ. ಯೋ ದೇವ್ನಿ ಮಂದಿರ್‌ನ ಕದೇಬಿ ಮ್ಹೇಲಿನ್ ಕೋ ಜಾ಼ತಿಥಿಂತೆ, ಉಪವಾಸ್ ಅಜು಼ ಪ್ರಾರ್ಥನೆ ಕರ್ತಿಹುಯಿನ್, ರಾತ್-ದನ್ ದೇವ್ನಿ ಆರಾದನೆ ಕರ್ತಿ ರ‍್ಹೇತಿಥಿ.
LUK 2:38 ಯೋಸ್ ವಖ್ಹತ್‌ಮ, ಅನ್ನ ಯೋ ಲಡ್ಕಾನ ಆಯ-ಬಾಕನ ಅಯಿನ್, ದೇವ್ನ ಧನ್ಯವಾದ್‌ಕರಿ ಕರಿ ಅಜು಼ ಯೆರೂಸಲೇಮ್‌ನಿ ಛುಟ್ಕಾರ್‌ನಿ ಬಾರೇಮ ಟಿವವ್‍ಕರ್ತುಥೂತೆ ಖ್ಹಾರಾವ್‌ನ, ಯೋ ಲಡ್ಕಾನಿ ಬಾರೇಮ ಬೋಲಿ.
LUK 2:39 ಇವ್ಣೆ ಧರ್ಮಶಾಸ್ತ್ರಮ ಪ್ರಭುನೆ ಬೋಲಿರಾಖ್ಯುತೆ ಖ್ಹಾರುಸ್ ಕಾಮ್ ಕರಾನ ಬಾದ್‌ಮ, ಯೋಸೇಫ ಅಜು಼ ಮರಿಯ ಪಾಛು಼ಫರಿ ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್‌ನ ಗಯು.
LUK 2:40 ಯೋ ಲಡ್ಕು ಮೋಟು ಹುಯಿನ್, ಶಕತ್‍ಮಾಬಿ ಅಜು಼ ಗ್ಯಾನ್‌ಮಾಬಿ ಭರಾಯು. ದೇವ್ನಿ ದಯಾ ಇನ ಉಪ್ಪರ್‌ ಥೂ.
LUK 2:41 ಹರೇಕ್ ವರಖ್ಹ್‌ಬಿ ಯೇಸುನ ಆಯ-ಬಾ ಪಸ್ಕ ಪೂಜಾ಼ನಖ್ಹಾಜೆ ಯೆರೂಸಲೇಮ್ ಜಾ಼ತೂಥೂ.
LUK 2:42 ಯೇಸುನ ಭಾರ ವರಖ್ಹ್ ಹುವ್ವಾದೀನ್, ಇವ್ಣೆ ಜಾ಼ತೂಥೂತೆ ಇಮ್ಮಸ್, ಪಸ್ಕ ಪೂಜಾ಼ನಖ್ಹಾಜೆ ಯೆರೂಸಲೇಮ್‌ನ ಗಯು.
LUK 2:43 ಇವ್ಣೆ ಪೂಜಾ಼ನೊ ದನ್‌ಖ್ಹಾರು ಖತಮ್ ಕರೀನ್ ಪಾಛು಼ಫರಿನ್ ಆವಾನಿ ವಖ್ಹತ್‌ಮ ಛೋ಼ಕ್ರು ಯೇಸು ಯೆರೂಸಲೇಮ್ಮಸ್ ರಹಿಗು. ಇನ ಆಯ-ಬಾನ ಅನಿ ಬಾರೇಮ ಮಾಲುಮ್ ಕೋ ಥೂನಿ.
LUK 2:44 ಯೋಸೇಫ್‌ಬಿ ಮರಿಯ ಯೇಸು ಝೂ಼ಂಡ್‌‍ಮಾಸ್ ಉಷೆಕರಿ ಸೋಚಿನ್, ಏಕ್‌ ರೋಜ಼್‌ನಿ ಚಾ಼ಲ್ ಎವ್ಡಿ ಚಾ಼ಲ್‌ನಿ ಬಾದ್‌ಮ, ಇವ್ಣ ಮಾಯಮಾತ್ರಕನಾಬಿ, ರ‍್ಹವಾಳು ಖ್ಹಾರಾಕನಾಬಿ ಜೈ಼ನ್ ಢೂಂಡ್ಯು.
LUK 2:45 ಕತೋಬಿ ಕಿಜ್ಜಾ಼ಬಿ ಮಳ್ಯೊಕೊಂತೆ ಇನಖ್ಹಾಜೆ, ಯೇಸುನ ಢೂಂಡ್‌ತುಹುಯಿನ್ ಯೆರೂಸಲೇಮ್‌ನ ಪಾಛು಼ ಗಯು.
LUK 2:46 ತೀನ್ನೆ ರೋಜ಼್‌ಮ ಯೇಸುನ ಮಂದಿರ್‌ಮ ದೇಖ್ಯು, ಯೋ ಯೆಹೂದ್ಯರ್‌ನ ಬೋಧನೆ ಕರಾವಾಳಾನ ಜೋ಼ಡ್ಮ ಬೇಶಿನ್, ಇವ್ಣೆ ಬೋಲಾತೆ ಖ್ಹಮಜ಼್‌ತೊಹುಯಿನ್, ಅಜು಼ ಪಾಛು಼ ಫರೈನ್ ಸವಾಲ್‌ ಕರುಕರ್ತೊಥೊ.
LUK 2:47 ಯೇಸುನಿ ವಾತೇನ ಖ್ಹಮ್‌ಜಾ಼ವಾಳು ಖ್ಹಾರು, ಯೋ ಸೋಚಿ ಪರ್ಖಿನ್ ಗ್ಯಾನ್‌ಥಿ ಜವಾಬ್‌ ದೇಯಿತೆ ದೇಖಿನ್ ಆಶ್ಚರ್ಯಖಾದು.
LUK 2:48 ಯೇಸುನ ಆಯ-ಬಾನೆ ಇನ ಹಿಜ್ಜಾ಼ ದೇಖಿನ್ ಮ್ಹೊಡಾಪರ್ ಹಾತ್‌ ಜೋ಼ಡಿಲಿದು. ತದೆ ಇನಿ ಆಯಾನೆ, “ಮಾರ ಛಿಯ್ಯಾ, ತುನೆ ಹಮೂನ ಶನ ಅಮ್ ಕರ‍್ಯೊ? ದೇಕ್, ತಾರೊ ಬಾಬಿ ಮೇ ಘಬ್‍ರೈನ್‌, ಢೂಂಡಿನ್ ಆಯಾನಿ” ಕರಿ ಬೋಲಿ.
LUK 2:49 ತದೆ ಯೇಸುನೆ ಇವ್ಣುನ, “ತುಮೆ ಮನ ಶನ ಢೂಂಡ್‌ಣು ಥು? ಮೇ ಮಾರ ಬಾನ ಘರ್‌ಮ ರ‍್ಹೇಣು ಕರಿ ತುಮೂನ ಮಾಲುಮ್‌ ಕೊಯ್ನಿಕಿ ಶು? ಕರಿ ಜವಾಬ್‌ ದಿದೊ.
LUK 2:50 ಕತೋಬಿ ಇನೆ ಬೋಲ್ಯೋತೆ ಜ಼ವಾಬ್‌ನ ಇವ್ಣೆ ಮಾಲುಮ್ ಕರ‍್ಯುಕೊಯ್ನಿ.
LUK 2:51 ಬಾದ್‌ಮ ಯೇಸು ಇವ್ಣ ಜೋ಼ಡೆ ನಜ಼ರೇತ್‌ನ ಗಾಮ್‌ನ ಐನ್, ಹಿಜ್ಜಾ಼ ಇವ್ಣಿ ವಾತೆನ ಖ್ಹಮ್‌ಜಿನ್‌ ಥೊ. ಕತೋಬಿ ಇನಿ ಆಯ ಆ ಖ್ಹಾರಿ ವಾತೇನ ಇನ ಮನ್‌ಮ ರಾಖಿರಾಖಿಥಿ.
LUK 2:52 ಯೇಸು ಗ್ಯಾನ್‌ಮಾಬಿ ಅಜು಼ ಆಂಗ್‌ತನ್ನಿ ಶಕತ್‍ಮಾಬಿ ಭಡ್ತೊ ಆಯೊ. ಅತ್ರೇಸ್ ಕಾಹೆತೆ ದೇವ್ನಿ ಅಜು಼ ಅದ್ಮಿನಿ ದಯಾ ಇನ ಉಪ್ಪರ್‌ ಜಾ಼ಖ್ಹತ್ ಹೋತು ಆಯು.
LUK 3:1 ತಿಬೇರಿಯಸ್ ಕೈಸರ್ ಅದಿಕಾರ್ ಚ಼ಲಾವ್‍ ಕರ್ತೊಥೋತೆ ಪಂಧ್ರಾನೆ ವರಖ್ಹ್‌ಮ, ಪೊಂತ್ಯ ಪಿಲಾತ ಯೂದಾಯ ತಬರ್‌ಖಾನೊ ರಾಜ್ಯಪಾಲ್ ಹುಯಿರ‍್ಹೋಥೊ, ಹೆರೋದ ಗಲಿಲಾಯ ತಬರ್‌ಖಾನ ಚ಼ಲಾವವಾಳೊ ಹುಯಿರೋಥೊ ಅಜು಼ ಇನೊ ನ್ಹಾನೊ ಭೈ ಫಿಲಿಪ್ಪ ಇತುರಾಯ ಅಜು಼ ತ್ರಕೋನಿತಿ ಕರಿ ಮುಲಕ್ನ ಚ಼ಲಾವ್‍ಕರ್ತೋಥೊ. ಲೂಸನ್ಯ ಅಬಿಲೇನೆ ಮುಲಕ್ನ ಚ಼ಲಾವ್‍ಕರ್ತೊಥೋತೆ ವಖ್ಹತ್‌ಮ,
LUK 3:2 ಅನ್ನ ಅಜು಼ ಕಾಯಫ ಮಹಾಯಾಜಕ ಹುಯಿರ‍್ಹೊಥೋತೆ ಹಗಾಮ್ಮ, ಜಕರೀಯಾನೊ ಛಿಯ್ಯೊ ಯೋಹಾನ ಉಜ್ಜಾ಼ಡಿ ಝ಼ಗೋಮ ದೇವ್ನಿ ವಚನ್‍ ಬೋಲಾಯು.
LUK 3:3 ಇನೆ ಯೊರ್ದನ್‌ ನದ್ದಿನು ಅಶ್‌ಪಿಶ್‍ ಥೂತೆ ಖ್ಹಾರ ತಬರ್‌ಖಾಮ ಜೈ಼ನ್ ಅದ್ಮಿವೋನ “ತುಮೆ ಪಾಪ್‌ ಕರಾನು ಮ್ಹೇಲಿನ್, ದೇವ್‌ಭಣಿ ಫರೊ ಅಜು಼ ಬ್ಯಾಪ್ತಿಸ್ಮ ಲೇವೊ, ತದೆ ದೇವ್ ತುಮಾರು ಪಾಪ್ ಮಾಪ್‌ ಕರ್ಶೆ” ಕರಿ ಬೋಲ್ತೊನಿಕ್‌ಳ್ಯೊ.
LUK 3:4 ಆ ಖ್ಹಾರು ಯೆಶಾಯ ಕರಿ ಪ್ರವಾದಿನ ದಪ್ತರ್‌ಮ ಲೀಖೈರ‍್ಹೂತೆ ಇಮ್ಮಸ್ ಚಾ಼ಲ್ಯು: ಯೋ ಶಾತ್‌ಕತೊ, ಏಕ್‌ ಜ಼ಣಾನಿ ಅವಾಜ಼್ ಉಜ್ಜಾ಼ಡಿ ಝ಼ಗೋಮ ಅಮ್ ಚಿಕ್ರುಕರಾಸ್: ‘ಪ್ರಭುನಿ ವಾಟ್ನ ಖ್ಹವಾರೊ, ಇನಿ ವಾಟ್ನ ಖ್ಹೂದು ಕರೊ.
LUK 3:5 ಹರೇಕ್ ಖಾಡೊಗುಂಟೊ ಮೂಚೈ಼ಜಾ಼ಶೆ, ಹರೇಕ್ ಪಹಾಡ್-ಪರ್ಭತ್ ಶದ್ದರ್ ಹುಯಿಜಾ಼ಶೆ, ಬಿಂಗೊ ಮಾರಗ್ ಅಖ್ಖು ಖ್ಹತ್ತಡ್‍ ಉಶೆ, ಖಡ್‌ದೊಂಗ್‌ಡು ವಾಟ್‌ಖ್ಹಾರು ಶದ್ದರ್ ಉಶೆ,
LUK 3:6 ತಮಾಮ್‌ ಅದ್ಮಿ ದೇವ್ನಿ ರಕ್ಷಣೆನ ದೇಕ್‌ಶೆ” ಕರಿ ಯೋ ಅವಾಜ಼್ ಹುಯಿರ‍್ಹೂಸ್.
LUK 3:7 ಅದ್ಮಿನಿ ಝೂ಼ಂಡೆಖ್ಹಾರು ಯೋಹಾನ್ನ ಹಾತೇಥಿ ಬ್ಯಾಪ್ತಿಸ್ಮ ಕರೈಲ್ಯವಾನಟೇಕೆ ಆಯು. ತದೆ ಯೋಹಾನನೆ ಇವ್ಣುನ, “ಅಲಾ ಖ್ಹಾಪ್‌ನಿ ಪಿಳ್ಗಿವಾಳವೊ! ಖ್ಹಾಮ್ಣೆ ಉಳ್ಯಾವತೆ ದೇವ್ನ ಇರಾದೇಥಿ ಛು಼ಕಿಜಾ಼ವಾನಿಮತ್, ತುಮುನ ಝೇತಾಯುತೆ ಕೋಣ್?
LUK 3:8 ತುಮೆ ತುಮಾರು ಪಾಪ್‌ಖ್ಹಾರು ಮ್ಹೇಲಿನ್ ದೇವ್ ಭಣಿ ಫರಿಗಯ ಉಶೇತೊ, ಇನ ಬರಾಬರ್‌ಥಿ ಚಾ಼ಲ್‌ಮ ವತಾಳೊ. ಅಜು಼ ಹಮೆ ಅಬ್ರಹಾಮ್‌ನಿ ಪಿಳ್ಗಿವಾಳ ಕರಿ ತುಮಾರು ತುಮೇಸ್ ಬಡೈ ನಕೊ ಮಾರಿಲೆವೊ. ಮೇ ಬೋಲುಸ್ಕಿ, ದೇವ್‌ ಅಬ್ರಹಾಮ್‌ನಖ್ಹಾಜೆ ಆ ಬಂಡೇವ್‌ಥಿಬಿ ಲಡ್ಕಾವ್ನ ಉಬ್‍ಜಾ಼ವ್‍ಶೆ ಕರಿ ತುಮೂನ ಬೋಲುಸ್
LUK 3:9 ಹಮ್ಕೇಸ್ ಕತ್ರಾನಟೇಕೆ ಝಾ಼ಡಾವ್‍ನಿ ಜ಼ಡ್‌ಪರ್‌ ಕುರ‍್ಹಾಡಿ ಮ್ಹೇಲೈರ‍್ಹಿಸ್. ಅಛ್ಛು಼ ಪಂಡು ದೇಯಿಕೊಂತೆ ಹರೇಕ್ ಝಾ಼ಡಾವ್‌ನ ಕತ್ರಿನ್‌ ಆಗ್‌ಮ ನಾಕ್‌ಶೆ” ಕರಿ ಬೋಲ್ಯೊ.
LUK 3:10 ತದೆ ಯೋ ಅದ್ಮಿಖ್ಹಾರು, “ಇಮ್‌ ಕತೊ, ಹಮೆ ಶಾತ್ ಕರ‍್ನು?” ಕರಿ ಪುಛಾ಼ಯು.
LUK 3:11 ತದೆ ಯೋಹಾನನೆ, “ತುಮಾರಾಮ ಕಿನಾಕನ ಬೇ ಕುಡ್‌ತಾ ಛಾ಼ಕಿ ಇವ್ಣೆ, ಕೊಯ್ನಿತೆ ಅದ್ಮಿನ ದ್ಯವಾದೆ; ಖಾಣು ರ‍್ಹವಾಳು ವಾಟಪಾಡಿ ದೇವ್ಣು” ಕರಿ ಜವಾಬ್‌ ದಿದೊ.
LUK 3:12 ಶುಂಕ ವಶೂಲ್ ಕರಾವಾಳು ಥೋಡು ಜ಼ಣು ಬ್ಯಾಪ್ತಿಸ್ಮ ಕರಿಲೇವ್ಣುಕರಿ ಆಯಿನ್, “ಗುರು, ಹಮೆ ಶಾತ್‌ ಕರ‍್ನು?” ಕರಿ ಇನ ಪುಛಾ಼ಯು.
LUK 3:13 ತದೆ ಯೋಹಾನನೆ ಇವ್ಣುನ, “ತುಮೂನ ಬೋಲಿರಾಖ್ಯುತೆ ಇನೇಥಿ ಜಾ಼ಖ್ಹತ್, ತುಮೆ ವಶೂಲ್ ನಕೊ ಕರೊ” ಕರಿ ಬೋಲ್ಯೊ.
LUK 3:14 ತದೆ ಥೋಡು ಜ಼ಣು ಶಿಪಾಯಿಖ್ಹಾರುಬಿ ಆಯಿನ್, “ಹಮೆ ಶಾತ್‌ ಕರ‍್ನು?” ಕರಿ ಬೋಲಾಖ್ಹತರ್, ಇನೆ, “ಕಿನಾಪರ್‌ಬಿ ಜು಼ಲಮ್ಜ಼ಸ್ತಿ ಕರಿನ್ ಪೈಶಾ ಛಿನಾವಾನು ರ‍್ಹವೊ, ಕಿನಾಪರ್‌ಬಿ ಜ್ಹೂ಼ಟು ಇಂಜಾ಼ಮ್ ಲಗಾಡನು ರ‍್ಹವೊ ನಕೊ ಕರೊ. ತುಮೂನ ಮಳಾತೆ ಶಂಬ್‌ಳಾಮ ಖ್ಹುಶೀಥಿ ರ‍್ಹವೊ” ಕರಿ ಬೋಲ್ಯೊ.
LUK 3:15 ಅಮ್ ರ‍್ಹಾವಾನಿ ವಖ್ಹತ್‌ಮ, ಇಸ್ರಾಯೇಲ್‌ನು ಅದ್ಮಿಖ್ಹಾರು ಕ್ರಿಸ್ತ ಆವ್‍ಶೆಕರಿ ಜ಼ಪೀರ‍್ಹೂಥೂತೆ ಇನಖ್ಹಾಜೆ, ಯೋಹಾನ್ನಿ ಬಾರೇಮ ಆಶ್ಚರ್ಯಖೈನ್, “ಆಸ್ ಕ್ರಿಸ್ತ ಹುಯಿರ‍್ಹೋಸ್ಕಿ ಶುಕಿ” ಕರಿ ಇವ್ಣ ಮನ್‌ಮ ಖ್ಹಯಾಲ್ ಕರ್ಲಿದು.
LUK 3:16 ತದೆ ಯೋಹಾನನೆ ಇವ್ಣುನ, “ಮೇತೊ ತುಮೂನ ಪಾಣಿಥಿ ಬ್ಯಾಪ್ತಿಸ್ಮ ದೆವ್‍ಕರೂಸ್; ಕತೋಬಿ ಮಾರೇಥಿಬಿ ಶಕತ್‌ವಾಳೊ ವಳ್ಯಾವಸ್, ಇನಿ ಖೋಖ್ಹ್‌ಡಾನಿ ಡೋರಿ ಛೋ಼ಡಾನಾಬಿ ಮೇ ಲ್ಹಾಯೇಕ್‍ಕೊಯ್ನಿ. ಯೋ ತುಮೂನ ಪವಿತ್ರಾತ್ಮಥಿಬಿ ಅಗ್‌ಥೀಬಿ ಬ್ಯಾಪ್ತಿಸ್ಮ ದಿಶೆ.
LUK 3:17 ಇನ ಹಾತ್‌ಮ ಖ್ಹುಪ್‌ಡು ಧರಿರಾಖ್ಯೋಸ್‌, ಇನ ಖಳಾಮಾನು ಘವ್‌ನಿ ರಾಶ್‌ನ ತೂರಿನ್‌, ಅಛ಼್ಛ ಕರೀನ್, ಘವ್‌ನ ಕಣ್ಗಿಮ ಭರಿಲಿಶೆ, ಕತೋಬಿ ಪೊಟ್ಟಾನ ಉಝಾ಼ವಕೊಂತೆ ಆಗ್‌ಮ ಬಾಳಿನಾಕ್‌ಷೆ” ಕರಿ ಜವಾಬ್‌ ದಿದೊ.
LUK 3:18 ಯೋಹಾನನೆ ಬಿಜೂ಼ಬಿ ಘಣಿ ತರಿಕಾಥಿ ಅದ್ಮಿ ಖ್ಹಾರಾನ ಅಛ್ಛಿ ಖಬರ್‌ನ ಬೋಲಿದೇತೊಹುಯಿನ್‌, ತುಮಾರಿ ಸೋಚ್ನ ಬದ್‌ಲೈಲೇವ್ಣು ಕರಿ ಇವ್ಣುನ ಖ್ಹಮ್‌ಜಾ಼ಡ್‌ತೊಥೊ.
LUK 3:19 ರಾಜ್ಯಪಾಲ್ ಹುಯಿರ‍್ಹೋತೆ ಹೆರೋದನೆ ಇನಿ ಭೈನಿ ಬಾವಣ್‍ ಹುಯಿರ‍್ಹೀತೆ ಹೆರೋದ್ಯನ ಕರಿಲಿದೊಥೋತೆ ಅಜು಼ ಇನೆ ಕರ‍್ಯೊಥೋತೆ ಬಿಜಾ಼ಖ್ಹಾರ ಖರಾಬ್ ಕಾಮ್ನಟೇಕೆ ಯೋಹಾನನೆ ಇನ ಬರಾಬರ್‌ಥಿ ಗುರ್‌ಕಾಯೊ.
LUK 3:20 ಇನಖ್ಹಾಜೆ ಹೆರೋದನೆ ಯೋಹಾನ್ನ ಧರೈನ್ ಜೇಲ್‌ಮ ಕೋಂಡಿ ಘಲಾಯೊ, ಅನೇಥಿ ಇನು ಖರಾಬ್ ಕಾಮ್ ಬಿಜೂ಼ಬಿ ಜಾ಼ಖ್ಹತ್ ಹುಯು.
LUK 3:21 ಅದ್ಮಿಖ್ಹಾರು ಬ್ಯಾಪ್ತಿಸ್ಮ ಕರೈಲ್ಯವಾನ ಬಾದ್‌ಮ, ಯೇಸುಬಿ ಬ್ಯಾಪ್ತಿಸ್ಮ ಕರೈಲಿದೊ. ಯೋ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಸೊರ್ಗ ನಿಕ್‌ಳ್ಯು,
LUK 3:22 ಅಜು಼ ಪವಿತ್ರಾತ್ಮ ಶರೀರ್‌ನಿ ರೂಪ್‍ಹುಯಿನ್ ಪರ‍್ಯಾವಾನಿಘೋಣಿ ಇನಾಪರ್‌ ಉತ್‌ರ‍್ಯು. ತದೆ ಪರಲೋಕ್‌ಮಾಥು, “ತೂ ಮಾರೊ ಲಾಡ್‌ನೊ ಛಿಯ್ಯೊ, ತಾರೇಥಿ ಮೇ ಘಣು ಖ್ಹುಶಿ ಛೂ಼” ಕರಿ ಏಕ್‌ ಆವಾಜ಼್ ಆಯು.
LUK 3:23 ಯೇಸು ಸೇವೆ ಕರಾನ ಶುರುಕರ‍್ಯೊತೆ ತದೆ, ಯೋ ಡೋಡಿಖ್ಹ್‌ ವರಖ್ಹ್‌ನೊ ಥೊ. ಅದ್ಮಿನ ಡೋಳಾಮ ಯೇಸು ಯೋಸೇಫನೊ ಛಿಯ್ಯೊ, ಯೋಸೇಫ ಹೇಲಿನೊ ಛಿಯ್ಯೊ,
LUK 3:24 ಹೇಲಿ ಮತ್ಥಾತನೊ ಛಿಯ್ಯೊ, ಮತ್ಥಾತಿ ಲೇವಿನೊ ಛಿಯ್ಯೊ, ಲೇವಿ ಮೆಲ್ಕಿನೊ ಛಿಯ್ಯೊ, ಮೆಲ್ಕಿ ಯನ್ನಾಯನೊ ಛಿಯ್ಯೊ, ಯನ್ನಾಯ ಯೋಸೇಫನೊ ಛಿಯ್ಯೊ,
LUK 3:25 ಯೋಸೇಫ ಮತ್ತಥಿನೊ ಛಿಯ್ಯೊ, ಮತ್ತಥಿ ಆಮೋಸನೊ ಛಿಯ್ಯೊ, ಆಮೋಸ ನಹೂಮನೊ ಛಿಯ್ಯೊ, ನಹೂಮ ಎಸ್ಲಿನೊ ಛಿಯ್ಯೊ, ಎಸ್ಲಿ ನಗ್ಗಾಯನೊ ಛಿಯ್ಯೊ,
LUK 3:26 ನಗ್ಗಾಯ ಮಹಾಥನೊ ಛಿಯ್ಯೊ, ಮಹಾಥ ಮತ್ತಾಥಿನೊ ಛಿಯ್ಯೊ, ಮತ್ತಾಥಿಯ ಶಿಮಿನೊ ಛಿಯ್ಯೊ, ಶಿಮಿ ಯೋಸೇಖನೊ ಛಿಯ್ಯೊ, ಯೋಸೇಖ ಯೂದಾನೊ ಛಿಯ್ಯೊ,
LUK 3:27 ಯೂದ ಯೋಹಾನನೊ ಛಿಯ್ಯೊ, ಯೋಹಾನ ರೇಸನೊ ಛಿಯ್ಯೊ, ರೇಸ್‍ ಜೆರುಬ್ಬಾಬೇಲ್‌ನೊ ಛಿಯ್ಯೊ, ಜೆರುಬ್ಬಾಬೇಲ್‌ ಸಲಾಥಿಯೇಲ್‌ನೊ ಛಿಯ್ಯೊ, ಸಲಾಥಿಯೇಲ್ ನೇರಿನೊ ಛಿಯ್ಯೊ,
LUK 3:28 ನೇರಿ ಮೆಲ್ಕಿನೊ ಛಿಯ್ಯೊ, ಮೆಲ್ಕಿ ಅದ್ದಿನೊ ಛಿಯ್ಯೊ. ಅದ್ದಿ ಕೋಸಾಮನೊ ಛಿಯ್ಯೊ, ಕೋಸಾಮ ಎಲ್ಮದಾಮನೊ ಛಿಯ್ಯೊ, ಎಲ್ಮದಾಮ ಏರ್‌ನೊ ಛಿಯ್ಯೊ,
LUK 3:29 ಏರ್‌ ಯೆಹೋಶುವನೊ ಛಿಯ್ಯೊ, ಯೆಹೋಶುವ ಎಲಿಯೇಜರನೊ ಛಿಯ್ಯೊ, ಎಲಿಯೇಜರ್ ಯೋರೈಮನ್ನೊ ಛಿಯ್ಯೊ, ಯೋರೈಮನ್‌ ಮತ್ತಾತಿನೊ ಛಿಯ್ಯೊ, ಮತ್ತಾತಿ ಲೇವಿನೊ ಛಿಯ್ಯೊ,
LUK 3:30 ಲೇವಿ ಸಿಮೆಯೋನ್ನೊ ಛಿಯ್ಯೊ, ಸಿಮಿಯೋನ್ ಯೂದಾನೊ ಛಿಯ್ಯೊ, ಯೂದ ಯೋಸೇಫ್‌ನೊ ಛಿಯ್ಯೊ, ಯೋಸೇಫ ಯೋನಾಮ್‍ನೊ ಛಿಯ್ಯೊ, ಯೋನಾಮ್ ಎಲಿಯಕೀಮ್‌ನೊ ಛಿಯ್ಯೊ,
LUK 3:31 ಎಲಿಯಕೀಮ್‌ ಮೆಲೆಯಾನ್ನೊ ಛಿಯ್ಯೊ, ಮೆಲೆಯಾನ್ ಮೆನ್ನಾನ್ನೊ ಛಿಯ್ಯೊ, ಮೆನ್ನಾನ್‌ ಮತ್ತಾಥನ್ನೊ ಛಿಯ್ಯೊ, ಮತ್ತಾಥ ನಾತಾನ್ನೊ ಛಿಯ್ಯೊ, ನಾತಾನ್ ದಾವೀದನೊ ಛಿಯ್ಯೊ,
LUK 3:32 ದಾವೀದ ಇಷಯನೊ ಛಿಯ್ಯೊ, ಇಷಯ ಓಬೇದನೊ ಛಿಯ್ಯೊ, ಓಬೇದ್‌ ಬೋವಜನೊ ಛಿಯ್ಯೊ, ಬೋವಜ ಸಲ್ಮೋನ್ನೊ ಛಿಯ್ಯೊ, ಸಲ್ಮೋನ್‌ ನಹಸ್ಸೋನ್ನೊ ಛಿಯ್ಯೊ,
LUK 3:33 ನಹಸ್ಸೋನ ಅಮ್ಮಿನಾದಾಬನೊ ಛಿಯ್ಯೊ, ಅಮ್ಮಿನಾದಾಬ ಅದ್ಮಿನ್‌ನೊ ಛಿಯ್ಯೊ, ಅದ್ಮಿನ್‌ ಅರ್‌ನೈನ್ನೊ ಛಿಯ್ಯೊ, ಅರ್‌ನೈನ್‌ ಎಸ್ರೋನ್‌ನೊ ಛಿಯ್ಯೊ, ಎಸ್ರೋನ್‌ ಪೆರೆಸನೊ ಛಿಯ್ಯೊ, ಪೆರೆಸ ಯೂದಾನೊ ಛಿಯ್ಯೊ,
LUK 3:34 ಯೂದ ಯಾಕೋಬನೊ ಛಿಯ್ಯೊ, ಯಾಕೋಬ ಇಸಾಕನೊ ಛಿಯ್ಯೊ, ಇಸಾಕ್ ಅಬ್ರಹಾಮನೊ ಛಿಯ್ಯೊ, ಅಬ್ರಹಾಮ್‌ ತೆರಹನೊ ಛಿಯ್ಯೊ, ತೆರಹ ನಾಹೋರನೊ ಛಿಯ್ಯೊ,
LUK 3:35 ನಾಹೋರ ಸೆರೂಗನೊ ಛಿಯ್ಯೊ, ಸೆರೂಗ ರೆಗೂವನೊ ಛಿಯ್ಯೊ, ರೆಗೂವ ಪೆಲೆಗನೊ ಛಿಯ್ಯೊ, ಪೆಲೆಗ ಹೆಬೇರನೊ ಛಿಯ್ಯೊ, ಹೆಬೇರ ಸಾಲನೊ ಛಿಯ್ಯೊ,
LUK 3:36 ಸಾಲ ಕಾಯಿನ್ನೊ ಛಿಯ್ಯೊ, ಕಾಯಿನ್ ಅರ್‌ಫಾಕ್ಷದನ್ನೊ ಛಿಯ್ಯೊ, ಅರ್‌ಫಾಕ್ಷದನ್‌ ಶೇಮ್‌ನೊ ಛಿಯ್ಯೊ, ಶೇಮ್‍ ನೋಹಾನೊ ಛಿಯ್ಯೊ, ನೋಹ ಲಾಮೆಕನೊ ಛಿಯ್ಯೊ,
LUK 3:37 ಲಾಮೆಕ ಮತೂಷಲನೊ ಛಿಯ್ಯೊ, ಮತೂಷಲ ಹನೋಕನೊ ಛಿಯ್ಯೊ, ಹನೋಕ ಯೆರೆದ್‌ನೊ ಛಿಯ್ಯೊ, ಯೆರೆದ್ ಮಹಲಲೇಲ್‌ನೊ ಛಿಯ್ಯೊ, ಮಹಲಲೇಲ್ ಕಾಯಿನ್ನೊ ಛಿಯ್ಯೊ,
LUK 3:38 ಕಾಯಿನ ಎನೋಷನೊ ಛಿಯ್ಯೊ, ಎನೋಷ ಸೇತನೊ ಛಿಯ್ಯೊ, ಸೇತ್‌ ಆದಾಮನೊ ಛಿಯ್ಯೊ, ಅದಾಮ್‌ ದೇವ್‌ನೊ ಛಿಯ್ಯೊ.
LUK 4:1 ಯೇಸು ಪವಿತ್ರಾತ್ಮಾಥಿ ಭರೈನ್, ಯೊರ್ದನ್‌ ನದ್ದಿಥು ಪಾಛೊ಼ಫರಿನ್ ಆಯೊ. ತದೆ ದೇವ್‌ನು ಆತ್ಮಾನೆ ಇನ ಉಜ್ಜಾ಼ಡಿ ಝ಼ಗೋಮ ಚ಼ಲಾಯೊ.
LUK 4:2 ಹಿಜ್ಜಾ಼ ಶೈತಾನ್‌ಥಿ ಯೇಸು ಚಾ಼ಳಿಖ್ಹ್ ರೋಜ಼್‌ ಶೋದನೆಮ ಪಡ್ಯೊ. ಇನ ಪಾಪ್‌ಮ ಪಖ್ಹಾವಾನ ಕರ‍್ಯೊ; ಯೋ ದನೂಮ ಯೇಸುನೆ ಶಾತ್ಬಿ ಕೋ ಖಾದೋನಿ, ಇನಖ್ಹಾಜೆ ಯೋ ಖ್ಹಾರ ದನ್ ಖತಮ್ ಹುವಾನ ಬಾದ್‌ಮ ಇನ ಭುಕ್‌ಲಾಗ್ಯು.
LUK 4:3 ತದೆ ಶೈತಾನ್ನೆ ಯೇಸುನ, “ತೂ ದೇವ್‌ನೊ ಛಿಯ್ಯೊ ಉಶೇತೊ, ಆ ಬಂಡಾನ ರೋಟೊ ಹುವಾನಿಘೊಣಿ ಹುಕುಮ್‌ ದೇ” ಕರಿ ಬೋಲ್ಯೊ.
LUK 4:4 ಕತೋಬಿ ಯೇಸುನೆ, “ಅದ್ಮಿ ಖಲಿ ರೋಟೊ ಖಾವಾಥೀಸ್‌ ಕೋ ಬಚಾ಼ನಿ, ಕರಿ ಲೀಖೈರ‍್ಹುಸ್” ಕರಿ ಜವಾಬ್‌ ದಿದೊ.
LUK 4:5 ಅಜು಼ ಶೈತಾನ್ನೆ ಯೇಸುನ ಉಪ್ಪರ್ ಬುಲೈಲಿಜೈ಼ನ್‌, ಎಕ್ಕಸ್ ಘಡೀಮ ಜಗತ್‌ನು ಖ್ಹಾರಸ್ ರಾಜ್ಯನ ವತಾಳಿನ್,
LUK 4:6 “ಮೇ ತುನ ಅನಿ ಖ್ಹಾರಿಸ್ ಅದಿಕಾರ್‌ನಾಬಿ, ಶನ್‌ಗಾರ್‌ನಾಬಿ ತುನ ದೆವುಸ್” ಕರಿ ಶೈತಾನ್ನೆ ಇನ ಬೋಲ್ಯೊ, “ಆ ಖ್ಹಾರು ಮಾರ ಹಾತ್‌ಮ ಛಾ಼, ಮೇ ಕಿನ ಹೋಣುಕತೋಬಿ ಆ ದಿಯ್ಯೆಜಾ಼ಯ್”.
LUK 4:7 ತೂ ಮನ ಆಡ್‍ಪಡಿನ್ ಆರಾದನೆ ಕರ‍್ಯೋತೊ, ಆಖ್ಹಾರು ತಾರು ಉಶೆ” ಕರಿ ಬೋಲ್ಯೊ.
LUK 4:8 ತದೆ ಯೇಸುನೆ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ಎಕ್ಕಸ್ ಜ಼ಣಾನ ಆರಾದನೆ ಕರ‍್ನು ಅಜು಼ ಸೇವೆ ಕರ‍್ನು ಕರಿ ಲೀಖೈರ‍್ಹೂಸ್‌ನಿ” ಕರಿ ಜವಾಬ್‌ ದಿದೊ.
LUK 4:9 ಅನ ಬಾದ್‌ಮ ಶೈತಾನ್ನೆ ಯೇಸುನ ಯೆರೂಸಲೇಮ್‌ನ ಬುಲೈಲಿಜೈ಼ನ್ ಮಂದಿರ್‌ನ ಉಪ್ಪರ್‌ಲಿ ಟೇಕ್‌ಡಿನಿ ಝ಼ಗೋಪರ್ ಭೀರಾಖಿನ್, “ತೂ ದೇವ್‌ನೊ ಛಿಯ್ಯೊ ಉಶೇತೊ ಹಜ್ಜಾ಼ಥೊ ಹೇಟ್ ಕೂದ್,
LUK 4:10 ‘ದೇವ್ ತುನ ಬಚಾ಼ಡಾನಟೇಕೆ ಇನ ದೂತರ್‌ನ ಹುಕುಮ್‌ ದಿಶೆ,
LUK 4:11 ತಾರ ಗೋಡೊ ಬಂಡಾನ ಠೋಕರ್ ನಾಲಗ್ನುತೆ ತಿಮ್‌ ಯೋ ತುನ ಹಾತ್‌ಮ ಪಾಡಿಲಿಶೆ. ಕರೀಬಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯೊ.
LUK 4:12 ಕತೋಬಿ ಯೇಸುನೆ, “ತಾರೊ ದೇವ್‌ ಹುಯಿರ‍್ಹೋತೆ ಪ್ರಭುನ ತರೀಪ್‌ಶ ನಾ ಕರ‍್ನು ಕರೀಬಿ ಲೀಖೈರ‍್ಹೂಸ್‌ನಿ” ಕರಿ ಜವಾಬ್‌ ದಿದೊ.
LUK 4:13 ಶೈತಾನ್ ಯೇಸುನ ಖ್ಹಾರಿ ತರ‍್ಹಾನು ಶೋದನೆ ಕರಾನ ಬಾದ್‌ಮ, ಥೋಡಿ ವಖ್ಹತ್‌ನಖ್ಹಾಜೆ ಇನ ಮ್ಹೆಂದಿನ್ ಚ಼ಲೆಗಯೊ.
LUK 4:14 ಅನ ಬಾದ್‌ಮ ಯೇಸು ಪವಿತ್ರಾತ್ಮನಿ ಶಕತ್‍ಥಿ ಭರೈನ್, ಪಾಛೊ಼ಫರಿ ಗಲಿಲಾಯ ತಬರ್‌ಖಾನ ಗಯೊ. ಯೋ ತಬರ್‌ಖಾನು ಖ್ಹಾರಿ ಬಾಜು಼ಮ ಯೇಸುನಿ ಬಾರೇಮಾನು ಖಬರ್ ಫೈಲಿಗಯು.
LUK 4:15 ಯೇಸು ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಅಛ್ಛಿ ಖಬರ್‌ನ ಬೋಲಿದೆವಾಲಗ್ಯೊ, ಖ್ಹಾರುಸ್ ಅದ್ಮಿ ಇನ ಖ್ಹರಾಯು.
LUK 4:16 ಯೇಸು ಯೋ ಪಳ್ಯೋತೆ ಗಾಮ್‍ ಹುಯಿರ‍್ಹೂತೆ ನಜ಼ರೇತ್‌ನ ಆಯೊ. ಯೋ ಕರ್ತೊಥೋತೆ ಇಮ್ಮಸ್, ಸಬ್ಬತ್‌ ದನ್ಮ ಸಬೆ ಭರಾವಾನು ಮಂದಿರ್‌ಮ ಜೈ಼ನ್, ಪಢಾನಖ್ಹಾಜೆ ಉಠಿ ಭಿಯೊ.
LUK 4:17 ತದೆ ಯೆಶಾಯ ಕರಿ ಪ್ರವಾದಿನು ದಪ್ತರ್‌ನಿ ಪುಂಗ್‍ಳೀನ ಯೇಸುನ ಹಾತ್‌ಮ ದಿದು. ಇನೆ ಯೋ ಪುಂಗ್‍ಳೀನ ಛೋ಼ಡಿನ್, ಲೀಖೈರ‍್ಹೂತೆ ಝ಼ಗೋನ ದೇಖಿನ್ ಪಢ್ಯೊ, ಯೋ ವಾತೆ ಶಾತ್‌ಕತೊ,
LUK 4:18 ಪ್ರಭುನು ಆತ್ಮ ಮಾರಪರ್ ಛಾ಼, ಗರೀಬ್‌ನ ಸುವಾರ್ತೆ ಬೋಲಾನಟೇಕೆ ದೇವ್ನೆ ಮನ ಅಬಿಷೇಕ್ ಕರಿರಾಖ್ಯೋಸ್, ಧರೈಗೂತೆ ಅದ್ಮಿನ, “ತುಮೆ ಛು಼ಟಿಗಯ ಕರಿ ಅಜು಼ ಕಾಣಾವ್ನ, ತುಮುನ ಡೋಳ ದೆಖಾವ್‌ಶೆ’ ಕರಿ ಬೋಲಾನಟೇಕೆ, ಅಜು಼ ಖ್ಹತಾವ್ಣಿಮ ಛಾ಼ತೆ ಇವ್ಣುನ ಛೋ಼ಡಾವನಟೇಕೆ,
LUK 4:19 ಪ್ರಭುನೆ ಇನ ಅದ್ಮಿನ ಬಚಾ಼ಡಾನಖ್ಹಾಜೆ ನೇಮ್‌ಶಾಯೋತೆ, ವಖ್ಹತ್ ಐಗೈ ಕರಿ ಪ್ರಚಾರ್ ಕರಾನಟೇಕೆ ದೇವ್ನೆ ಮನ ಬೋಲಿ ಮೋಕ್ಲಿರಾಖ್ಯೊಸ್” ಕರಿ
LUK 4:20 ಪಢಾನ ಬಾದ್‌ಮ, ಯೋ ಪುಂಗ್‌ಳಿನ ಲಪೇಟಿನ್ ಸಬೆ ಭರಾವಾನು ಮಂದಿರ್‌ನ ಸೇವಕ್‌ನ ಹಾತ್‌ಮ ದೀನ್ ಬೇಶಿಗಯೊ. ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿನಿ ನಜ಼ರ್ ಯೇಸುಪರ್ ಥೂ.
LUK 4:21 ತದೆ ಯೇಸುನೆ ಇವ್ಣುನ, “ಮೇ ಹಮ್ಕೆ ಪಢ್ಯೋತೆ ವಚನ್ನ ತುಮೆ ಖ್ಹಮ್‌ಜೂ಼ಕರ್ತಥಾತೆ ತದ್ದೇಸ್ ಯೋ ಪೂರಹುಯು” ಕರಿ ಬೋಲ್ಯೊ.
LUK 4:22 ತಮಾಮ್‌ ಅದ್ಮಿ ಇನ ಖ್ಹರಾವಲಗ್ಯು ಅಜು಼ ಇನ ಮ್ಹೋಡಾವಾಟೆ ನಿಕ್ಳಾತೆ ವಾರ್ಖ್ಹಾನಿ ವಾತೆನ ಖ್ಹಮ್‌ಜಿನ್‌ ಆಶ್ಚರ್ಯಖೈನ್, “ಆ ಯೋಸೇಫ್‌ನೊ ಛಿಯ್ಯೊ ಕಾಹೆಕಿ ಶು? ಕರಿ ವಾತೆ ಬೋಲಿಲಿದು.
LUK 4:23 ತದೆ ಇನೆ ಇವ್ಣುನ, “ತುಮೇತೊ, ವೈದ್ಯ ತಾರು ತೂ ಅಛ್ಛು಼ ಕರಿಲೆ’ ಕರಿ ಛಾ಼ತೆ ಮತ್ಲಬ್‌ನ ಬೋಲ್‌ಶು ಕರಿ ಮನ ಅಛ್ಛಿನಿತರ ಮಾಲುಮ್‌, ಅಜು಼ ಕಪೆರ್ನೌಮ್ಮ ತುಮೆ ಖ್ಹಮ್‍ಜ್ಯಾತೆ ಯೋಸ್, ಕಾಮ್ ಆ ತಾರ ಶೊಂತ್‌ ಗಾಮ್ಮಾಬಿ ಕರ್‌ ಕರಿ ಮನ ಬೋಲ್‌ಶು,
LUK 4:24 ಕತೋಬಿ ಮೇ ತುಮೂನ ಖ್ಹಾಚ ಬೋಲುಸ್ಕಿ, ಖೆವ ಪ್ರವಾದಿನಾಬಿ ಶೊಂತ್‌ ಗಾಮ್‌ವಾಳು ಮಾನಕೊಯ್ನಿ.
LUK 4:25 ಮಾರಿ ವಾತೇನ ಖ್ಹಮ್‌ಜೊ಼: ಎಲೀಯನ ಹಗಾಮ್ಮ ತೀನ್ ವರಖ್ಹ್‌ ಛೊ಼ ಮಹಿನ ಆಬ್‍ಥು ಪಾಣಿ ಕೋ ವರ್‌ಶ್ಯೋನಿ, ತದೆ ದೇಖ್ಹ್‌ನಿ ಖ್ಹಾರಿಸ್ ಬಾಜು಼ಮ ಕಾಳ್ದುಕಾಳ್ ಹುಯು, ಅಜು಼ ಯೋ ವಖ್ಹತ್‌ಮ ಇಸ್ರಾಯೇಲ್‌ ದೇಖ್ಹ್‌ಮ ಕೆತ್ರಿಸ್ಕಿ ಮುಂಡಚ್ಚಿ ತಯೇಡ ಥೀತೆ ಖ್ಹಾಚಸ್.
LUK 4:26 ಕತೋಬಿ ದೇವ್ನೆ ಇವ್ಣಾಮ ಏಕ್‌ಜ಼ಣಾನಬಿ, ಎಲೀಯನ ಬೋಲಿ ಮೋಕ್‌ಲ್ಯೊಕೊಂತೆ, ಸೀದೋನ್ ದೇಖ್ಹ್‌ನು ಸರೆಪ್ತ ಕರಿ ಗಾಮ್ಮ ಥೀತೆ ಏಕ್‌ ಮುಂಡಚ್ಚಿನ ಘರೆ ಮೋಕ್‌ಲ್ಯೊ.
LUK 4:27 ಅಜು಼ ಎಲೀಷ ಕರಿ ಪ್ರವಾದಿನ ಹಗಾಮ್ಮ ಇಸ್ರಾಯೇಲ್ ಅದ್ಮಿಮ ಕೆತ್ರುಕ್ಕಿ ಜ಼ಣಾನ ಖೋಡ್‍ ಲಾಗಿರ‍್ಹೂತು. ಕತೋಬಿ ಇವ್ಣಾಮ ಏಕ್‌ ಜ಼ಣಾನಾಬಿ ಅಛ್ಛು಼ ಕೋ ಹುಯೂನಿತೆ ಸಿರಿಯ ದೇಖ್ಹ್‌ನೊ ನಾಮಾನ್‌ ಕರಿ ಎಕ್ಕಸ್ ಜ಼ಣಾನ ಅಛ್ಛು಼ ಹುಯು” ಕರಿ ಬೋಲ್ಯೊ.
LUK 4:28 ಆ ವಾತೇನ ಖ್ಹಮ್‌ಜಿನ್‌ ಸಬೆ ಭರಾವಾನು ಮಂದಿರ್‌ಮ ಥೂತೆ ತಮಾಮ್‌ ಅದ್ಮಿ ಘಣು ಇರಾದೊ ಖೈನ್,
LUK 4:29 ಉಠಿ ಭೀರಿನ್, ಯೇಸುನ ಗಾಮ್‌ಥು ಭಾರ್ ಧಕೇಲಿದಿದು. ಅಜು಼ ಇವ್ಣೆ ಯೇಸುನ ಇವ್ಣು ಗಾಮ್‍ ಭಂದೈರ‍್ಹೂಥೂತೆ ಪಹಾಡ್‌ನು ಕಥಾರ್‌ಪರ್ ಲೀ ಜೈ಼ನ್ ಹಿಜ್ಜಾ಼ಥು ಹೇಟ್ ಧಕೇಲಿದೇವ್ಣು ಕರಿ ಥೂ.
LUK 4:30 ಕತೋಬಿ ಯೇಸು ಇವ್ಣ ಇಚ಼್‌ಮಾಕರಿ ನಿಕ್ಳಿನ್ ಚ಼ಲೆಗಯೊ.
LUK 4:31 ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನು ಕಪೆರ್ನೌಮ್ ಕರಿ ಗಾಮ್‌ನ ಗಯೊ. ಹಿಜ್ಜಾ಼ ಸಬ್ಬತ್‌ ದನ್ನೆ ಇವ್ಣುನ ವಚನ್‍ ಬೋಲಿದಿದೊ.
LUK 4:32 ಇನೆ ಅದಿಕಾರ್‌ಥಿ ವಚನ್ ಬೋಲ್ಯೋತೆ ದೇಖಿನ್, ಇವ್ಣೆ ಘಣು ಆಶ್ಚರ್ಯಖಾದು.
LUK 4:33 ಯೋ ಸಬೆ ಭರಾವಾನು ಮಂದಿರ್‌ಮ ಭೂತ್‌ ಧರಿರಾಖ್ಯುಥೂತೆ ಏಕ್‌ ಅದ್ಮಿ ಥೂ. ಯೋ ಜೋ಼ರ್ ಆವಾಜ಼್‌ಥಿ ಚಿಕ್ರಿನ್,
LUK 4:34 “ನಜ಼ರೇತ್‌ನೊ ಯೇಸು ಹಮಾರೇಥಿ ತುನ ಶಾತ್‌ ಛಾ಼? ಹಮೂನ ಬರ್ಬಾತ್ ಕರಾನ ಹಜ್ಜಾ಼ ಐರ‍್ಹೋಸ್ಕಿ ಶು? ತೂ ಕೋಣ್ ಕರಿ ಮನ ಮಾಲುಮ್. ತೂ ದೇವ್‍ಥಿ ಬೋಲಿಮೊಕ್‌ಲ್ಯೊ ಹುಯೊ ಪರಿಶುದ್ದ ಹುಯಿರ‍್ಹೋಸ್! ಕರಿ ಬೋಲ್ಯು.
LUK 4:35 ತದೆ ಯೇಸುನೆ ಯೋ ಭೂತ್‌ನ ಗುರ್‌ಕೈನ್, “ಖ್ಹೊಪ್‌ರ‍್ಹೆ! ಅನ ಮ್ಹೆಂದಿನ್ ಭಾರ್‌ನಿಕಳ್‌” ಕರಿ ಬೋಲ್ಯೊ. ಯೋ ಭೂತ್‍ನೆ ಯೋ ಅದ್ಮಿನ ಇವ್ಣ ಖ್ಹಾಮ್ಣೆ ಹೇಟ್‌ ರಡ್‌ಕೈನ್‌, ಇನ ಶನೂಸ್ ಟಚ಼್‌ಕೊ ದಿದುಕೊಂತೆ ಮ್ಹೆಂದಿನ್ ಚ಼ಲಿಗಯು.
LUK 4:36 ಅನ ದೇಖಿನ್‌ ಅದ್ಮಿಖ್ಹಾರು ಆಶ್ಚರ್ಯಖೈನ್, “ಆ ಕಿಮ್ನಿ ವಾತೆ? ಆ ಅದಿಕಾರ್‌ಥಿ ಅಜು಼ ಶಕತ್‍ಥಿ ಭೂತ್‌ಅಖ್ಖಾನಬಿ ಹುಕುಮ್‌ ದೇಸ್‌ನಿ, ಇವ್ಣೇಬಿ ಭಾರ್‌ ನಿಕ್ಳಿಜಾ಼ಸ್‌ನಿ! ಕರಿ ಏಕ್‌ಥಿ ಏಕ್‌ ವಾತೆ ಬೋಲಿಲಿದು.
LUK 4:37 ಅಜು಼ ಯೇಸುನಿ ಬಾರೇಮನಿ ಖಬರ್ ಯೋ ತಬರ್‌ಖಾನು ಖ್ಹಾರಿ ಬಾಜು಼ಮ ಫೈಲಿಗಯು.
LUK 4:38 ಯೇಸು ಸಬಾಮಂದಿರ್‌ಥ ನಿಕ್ಳಿನ್ ಸೀಮೋನ್ನ ಘರ್‌ಕನ ಗಯೊ. ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ಜಾ಼ಖ್ಹತ್ ತಾವ್ ಚ಼ಢೀನ್ ತಲ್‌ಖುಕರ್ತಿಥಿ, ಇನಿ ಬಾರೇಮ ಇವ್ಣೆ ಯೇಸುನ ಬೋಲ್ಯು.
LUK 4:39 ತದೆ ಯೇಸುನೆ ಇನಾಕನ ಜೈ಼ನ್ ಭೀರಿನ್, ಇನ ಮ್ಹೆಂದಿನ್ ಜಾ಼ವಾನಿ ಘೋಣಿ ಯೋ ತಾವ್‌ನ ಹುಕುಮ್‌ ದೇತಾಖ್ಹತರ್‌, ತಾವ್ ಉತ್ರಿಗಯೊ. ತದ್‌ನು ತದ್ದೇಸ್ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.
LUK 4:40 ದನ್ ಡುಬಾನ ಬಾದ್‌ಮ ಥರಥರಾನು ರೋಗ್‌ವಾಳು ಥೂತೆ ತಮಾಮ್‌ ಘರ್‌ವಾಳು, ಜಾನ್ನ ಅಛ್ಛು಼ಕೊಂತೆ ಅದ್ಮಿನಖ್ಹಾರು ಯೇಸುಕನ ಬುಲೈಲಾಯು. ಹರೇಕ್ ರೋಗ್‌ವಾಳಪರ್ ಯೇಸುನೆ ಹಾತ್‌ ಮ್ಹೇಲಿನ್ ಇವ್ಣುನ ಅಛ್ಛು಼ ಕರ‍್ಯೊ.
LUK 4:41 ಭೂತ್‌ಖ್ಹಾರು ಜಿನುಕು, “ತೂ ದೇವ್‌ನೊ ಛಿಯ್ಯೊ” ಕರಿ ಬಳೆಳ್ಹಾಟ್ ಮ್ಹೇಲ್ತುಹುಯಿನ್, ಕೈಯೆಕ್ಕಿ ಅದ್ಮಿನ ಮಹಿತು ನಿಕ್ಳಿಗಯು. ಯೋ ಕ್ರಿಸ್ತ ಕರಿ ಭೂತ್‌ ಖ್ಹಾರಾನ ಮಾಲುಮ್‍ಥೂತೆ ಇನಟೇಕೆ, ಯೇಸುನೆ ಇವ್ಣುನ ವಾತೆ ನಾ ಬೋಲ್‌ನು ಕರಿ ಹುಕುಮ್‌ ದಿದೊ.
LUK 4:42 ವ್ಹಾಣ್‌ಖ್ಹತ್ರೆ ಯೇಸು ಘರ್‌ನ ಮ್ಹೇಲಿನ್ ಉಜ್ಜಾ಼ಡಿ ಝ಼ಗೋನ ಗಯೊ. ಅದ್ಮಿಖ್ಹಾರು ಯೇಸುನ ಢೂಂಡ್‌ತುಹುಯಿನ್, ಯೊ ಥೋತೆ ಝ಼ಗೋಕನ ಆಯಿನ್, ಇವ್ಣುನ ಮ್ಹೆಂದಿನ್ ನಾ ಜಾ಼ವ್ಣುತೆ ಇಮ್‌ ಇನ ಭೀರಾಖಾನ ದೇಖ್ಯು.
LUK 4:43 ಕತೋಬಿ ಯೇಸುನೆ ಇವ್ಣುನ, “ಮೇ ಬಿಜ಼ಖ್ಹಾರ ಗಾಮ್ಮಾಬಿ ದೇವ್ನಿ ರಾಜ್ಯನಿ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು, ಅನಖ್ಹಾಜೆಸ್ ದೇವ್ನೆ ಮನ ಮೋಕ್ಲಿರಾಖ್ಯೋಸ್ತೆ” ಕರಿ ಬೋಲ್ಯೊ.
LUK 4:44 ಅನ ಬಾದ್‌ಮ ಯೇಸುನೆ ಯೂದಾಯ ದೇಖ್ಹ್‌ನು ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಅಛ್ಛಿ ಖಬರ್‌ನ ಬೋಲ್ತೊಹುಯಿನ್ ನಿಕ್‌ಳ್ಯೊ.
LUK 5:1 ಏಕ್‌ ದನ್ನೆ ಯೇಸು ಗೆನೆಸರೇತ್‍ ದರ‍್ಯಾವ್‍ನ ಕನಾರಿಕನ ಭೀಯೋಥೊ. ತದೆ ಅದ್ಮಿಖ್ಹಾರು ದೇವ್ನಿ ವಚನ್ ಖ್ಹಮ್‌ಜಾ಼ನಖ್ಹಾಜೆ ಧಕೇಲ-ಧಕೇಲಿ ಹೋತುಹುಯಿನ್, ಇನ ಅಶ್‌ಪಿಶ್ ಆಯಿನ್ ಭರಾಯು
LUK 5:2 ತದೆ ದರ‍್ಯಾವ್‍ನಿ ಕನಾರಿಕನ ಭೀರಿಥೀತೆ ಬೇ ಡೋಣ್ಣಾ ಯೇಸುನೆ ದೇಖ್ಯೊ. ಮಾಛ್ಲು಼ ಖ್ಹಾವಾಳು ಖ್ಹಾರು ಡೋಣ್‌ಮಾಥು ಭಾರ್ ಆಯಿನ್, ಇವ್ಣು-ಇವ್ಣು ಜಾ಼ಳು ಧೊವ್‍ಕರ್ತೂಥು.
LUK 5:3 ಯೋ ಡೋಣೆಮಾಥು ಸೀಮೋನ್ನಿ ಏಕ್‌ ಡೋಣ್‌ಮ ಯೇಸು ಚ಼ಢೀನ್, ಕನಾರೆಕಂಥು ಜ಼ರದೂರ್ ಡೋಣ್ಣಾ ಧಕೇಲ್‍ ಕರಿ ಇನ ಬೋಲಿಲಿದೊ. ಬಾದ್‌ಮ ಡೋಣ್‌ಮ ಬೇಶಿನ್, ಯೋ ಅದ್ಮಿನಿ ಭೀಡ್‌ಣ ವಚನ್ನ ಬೋಲಿದಿದೊ.
LUK 5:4 ವಚನ್‍ ಬೋಲಿದ್ಯವಾನ ಬಾದ್‌ಮ ಯೇಸುನೆ ಸೀಮೋನ್ನ, “ಗಧಾರ್ ಪಾಣಿನಿ ಝ಼ಗೋಮ ಡೋಣ್ಣಾ ಚ಼ಲೈನ್, ಮಾಛ್ಲು಼ ಧರಾನ ಖ್ಹಾಜೆ ತುಮಾರು ಜಾ಼ಳು ನಾಖೊ” ಕರಿ ಬೋಲ್ಯೊ.
LUK 5:5 ತದೆ ಸೀಮೋನ್ನೆ, “ಗುರು, ಹಮೆ ರಾತ್ ಅಖ್ಖು ಮ್ಹಿನತ್ ಕರ‍್ಯಾತೋಬಿ, ಏಕ್‌ ಮಾಛ್ಲು಼ಬಿ ಕೋಮಳ್ಯುನಿ, ಕತೋಬಿ ತಾರಿ ವಾತ್‌ಪರ್, ಮೇ ಜಾ಼ಳು ನಾಖುಸ್” ಕರಿ ಬೋಲ್ಯೊ.
LUK 5:6 ತದೆ ಇವ್ಣೆ ಜಾ಼ಳಾವ್‍ನ ನಾಖ್ಯು. ತದೆ ಮಾಛ಼್‌ಲಾನಿ ಗುಡ್ಡಾರಾಶೆ ಜಾ಼ಳಾವ್‍ಮ ಖ್ಹಪ್‌ಡ್ಯು. ಅನೇಥಿ ಇವ್ಣು ಜಾ಼ಳು ಫಾಟಾನ ಐಲಾಗ್ಯೂಥು.
LUK 5:7 ತದೆ ಇವ್ಣೆ ಬಿಜಿ ಡೋಣ್‌ಮ ಥೂತೆ ಇವ್ಣು ಜೋ಼ಡೆವಾಳನ ಹಾತ್‌ನೊ ಝಾ಼ಲೊ ಕರೀನ್, ಮದತ್ನಖ್ಹಾಜೆ ಬುಲಾಯು. ಇವ್ಣೆ ಆಯಿನ್ ಭೇ ಡೋಣ್‌ಮ ಮಾಛ್ಲು಼ ಭರಾಖ್ಹತರ್, ಯೋ ಡೋಣೆ ಡುಬಾನಿಘೋಣಿ ಹುವ್ವಾಲಗ್ಯೂಥು.
LUK 5:8 ಅನ ದೇಖಿನ್ ಸೀಮೋನ್ ಪೇತ್ರನೆ ಯೇಸುನ ಗುಡ್‌ಘ್ಯಪರ್ ಪಡೀನ್, “ಪ್ರಭು ಮನ ಮ್ಹೆಂದಿನ್ ಜಾ಼! ಮೇ ಪಾಪಿ ಅದ್ಮಿ ಹುಯಿರ‍್ಹೋಸ್!” ಕರಿ ಬೋಲ್ಯೊ.
LUK 5:9 ಸೀಮೋನ್ನಾಬಿ ಇನ ಜೋ಼ಡ್ಮ ಥೂತೆ ಬಿಜ಼ ಖ್ಹಾರಾನಾಬಿ, ಇವ್ಣೆ ಧರ‍್ಯೂತೆ ಮಾಛ಼್‌ಲಾವ್ನ ದೇಖಿನ್ ಆಶ್ಚರ್ಯ ಹುಯು.
LUK 5:10 ಸೀಮೋನ್ನ ಜೋ಼ಡ್‍ವಾಳ ಹುಯಿರ‍್ಹಾಥಾತೆ ಜೆಬೆದಾಯನ ಛಿಯ್ಯಾ ಯಾಕೋಬ ಅಜು಼ ಯೋಹಾನನೆಬಿ ಇಮ್ಮಸ್ ಆಶ್ಚರ್ಯಖಾದು. ತದೆ ಯೇಸುನೆ ಸೀಮೋನ್ನ, “ಡರ್‌ನಕೊ, ಆಜ಼್‌ಥು ತೂ ಅದ್ಮಿನ ಖ್ಹಾವಾನು ಕಾಮ್ ಕರೀಶ್!” ಕರಿ ಬೋಲ್ಯೊ.
LUK 5:11 ಇವ್ಣೆ ಇವ್ಣು ಡೋಣೇನ ಕನಾರಿಕನ ಲಯಿನ್, ತಮಾಮ್‌ ರಾಛಾ಼ನ ಮ್ಹೆಂದಿನ್, ಯೇಸುನ ಕೇಡೆ ಗಯ.
LUK 5:12 ಏಕ್‌ ದನ್ನೆ ಯೇಸು ಏಕ್‌ ಗಾಮ್ಮ ಥೊ. ಹಿಜ್ಜಾ಼ಸ್ ಆಂಗ್‌ತನ್‌ ಅಖ್ಖುಸ್ ಖೋಡ್‍ ಲಾಗಿಹುಯು ಏಕ್‌ ಅದ್ಮಿ ಥೂ. ಯೋ ಯೇಸುನ ದೇಖಿನ್, ಇನಖ್ಹಾಮ್ಣೆ ಆಡು ಪಡೀನ್, “ಪ್ರಭು, ತೂ ಮನ್ ಕರ‍್ಯೋತೊ ಮನ ಶುದ್ದಿ ಕರೆಜಾ಼ಯ್! ಕರಿ ಗಿಂಗೈಲಿದೊ.
LUK 5:13 ಯೇಸುನೆ ಇನೊ ಹಾತ್ನ ಭಡೈನ್, ಇನ ಛೀಮಿನ್‌, “ಮನ ಮನ್ ಛಾ಼, ಶುದ್ದಿ ಹೂ” ಕರಿ ಬೋಲ್ಯೊ. ತದ್‌ನು ತದ್ದೇಸ್ ಯೋ ಅದ್ಮಿನೊ ಖೋಡ್‍ ಖ್ಹಾರು ನಿಕ್ಳಿಗಯು.
LUK 5:14 ತದೆ ಯೇಸುನೆ ಇನ, “ತೂ ಕಿನಾಬಿ ನಕೊ ಬೋಲಿಶ್, ಕತೋಬಿ ಯಾಜಕಕನ ಜೈ಼ನ್ ತಾರು ಆಂಗ್‌ತನ್ನ ವತಾಳ್, ಮೋಶೇನೆ ಹುಕುಮ್ ದೀರಾಖ್ಯೋತೆ ಕಾಣ್ಕೆದೀನ್ ತಾರಿ ಅಶ್ನಾನ್‍ಧಾನ್ನ ಚ಼ಲಾವ್‍, ಅದ್ಮಿನ ಆ ಸಾಕ್ಷಿ ಹುಯಿರ‍್ಹವಾದೆ” ಕರಿ ಹುಕುಮ್ ದಿದೊ.
LUK 5:15 ತೋಬಿ ಯೇಸುನಿ ಬಾರೇಮ ಅಜೂ಼ಬಿ ಜಾ಼ಖ್ಹತ್ ಫೈಲೈಗಯು, ಅದ್ಮಿಖ್ಹಾರು ಇನಿ ವಚನ್ ಖ್ಹಮ್‌ಜಾ಼ನಖ್ಹಾಜೆ ಅಜು಼ ಇವ್ಣು-ಇವ್ಣು ರೋಗ್‌ ಅಛ್ಛು಼ ಕರೈಲ್ಯವಾನಟೇಕೆ, ಝೂ಼ಂಡೆ-ಝೂ಼ಂಡೆ ಹುಯಿನ್ ಇನಾಕನ ಆಯು.
LUK 5:16 ಕತೋಬಿ ಯೇಸುತೊ ಉಜ್ಜಾ಼ಡಿ ಝ಼ಗೋಮ ಜೈ಼ನ್, ಪ್ರಾರ್ಥನೆ ಕರುಕರ್ತೊಥೊ.
LUK 5:17 ಏಕ್‌ ದನ್ನೆ ಯೇಸು ವಚನ್‍ ಬೋಲಿ ದೆವ್‍ಕರ್‌ತೋಥೊ. ಗಲಿಲಾಯ ಅಜು಼ ಯೂದಾಯ ತಬರ್‌ಖಾನು ತಮಾಮ್‌ ಗಾಮ್‌ಥು ಅಜು಼ ಯೆರೂಸಲೇಮ್‌ಥು ಆಯುಹುಯು ಫರಿಸಾಯರ್‌ಬಿ, ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಹಿಜ್ಜಾ಼ ಬೆಠೂಥು. ರೋಗ್‌-ರಾಯೊ ಅಛ್ಛು಼ ಕರಾನವಾಖ್ಹ್‌ತೆ ಪ್ರಭುನಿ ಶಕತ್ ಯೇಸುಮ ಥೀ.‌
LUK 5:18 ತದೆ ಥೋಡ ಪರ್ಖ್ಹಾವ್‍ನೆ ಏಕ್‌ಜ಼ಣೊ ಲಕ್‍ವೊ ಮಾರ‍್ಯುಹುಯಾನ ಬಿಛಾ಼ವ್ಣಿಪರ್ ಪಾಡಿಲಿನ್ ಆಯು. ಕತೋಬಿ ಇನಮಹಿ ಲೀಜೈ಼ನ್, ಯೇಸುನ ಖ್ಹಾಮ್ಣೆ ಮ್ಹೇಲ್ನುಕರಿ ಕರ‍್ಯುತೋಬಿ,
LUK 5:19 ಅದ್ಮಿನಿ ಭೀಡ್ ಥೀತೆ ಇನಾಖ್ಹಾಜೆ, ಇನಮಹಿ ಲೀಜಾ಼ವಾನ ವಾಟ್‌ಕೊಂತೆ ದೇಖಿನ್‌, ಇನ ಪಾಡಿಲಿನ್ ಛ಼ತ್‍ನ ಉಪ್ಪರ್ ಜೈ಼ನ್, ಛ಼ತ್‍ನ ಕಾಡಿನ್, ಇನ ಬಿಛಾ಼ವ್ಣಿ ಖ್ಹಮೇದ್ ಯೇಸುನ ಖ್ಹಾಮ್ಣೆ ಉತಾರ‍್ಯು.
LUK 5:20 ಯೇಸುನೆ ಇವ್ಣಿ ವಿಶ್ವಾಸ್‌ನ ದೇಖಿನ್‌, ಯೋ ಲಕ್‍ವೊ ಮಾರಿರಾಖವಾಳನ, “ದೇಕ್‌ಲಾ ದೋಸ್, ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
LUK 5:21 ತದೆ ಮೋಶೇನು ವಚನ್‍ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್ ಖ್ಹಾರು ಇವ್ಣ-ಇವ್ಣಾಮಸ್‌, “ಆ ಅದ್ಮಿ ಕೋಣ್ ಉಶೆ, ದೇವ್ನ ವಿರೋದ್ ವಾತೆ ಬೋಲಾಸ್ತೆ? ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್‌ಖ್ಹಾರು ಮಾಪ್‌ ಕರಾನ ಹುವಾನು? ಕರಿ ಸೋಚಾಲಗ್ಯು.
LUK 5:22 ಕತೋಬಿ ಯೇಸುನೆ ಇವ್ಣೆ ಇಮ್‌ ಸೋಚುಕರಾತೆ ಮಾಲುಮ್‌ ಕರೀಲಿನ್‌ ಇವ್ಣುನ, “ತುಮೆ ತುಮಾರ ಮನ್‌ಮ ಅಮ್ ಶನ ಸೋಚೋ಼ಸ್ತೆ?
LUK 5:23 ಕೆಹು ಶುಲ್ಬ? ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗು ಕರಿ ಬೋಲಾನುಕಿ? ಉಠಿ ಚಾ಼ಲ್ ಕರಿ ಬೋಲಾನು?
LUK 5:24 ಕತೋಬಿ ಜ಼ಮೀನ್‌ಪರ್ ಪಾಪ್‌ಖ್ಹಾರು ಮಾಪ್‌ ಕರಾನ ಅದ್ಮಿನೊ ಛಿಯ್ಯಾನ ಅದಿಕಾರ್ ಛಾ಼ ಕರಿ ಬೋಲಾನು ತುಮೂನ ಮಾಲುಮ್‌ ಪಡ್ಣು, ಕರಿ ಬೋಲಿನ್ ಯೋ ಲಕ್‌ವೊ ಮಾರಿರಾಖವಾಳ ಭಣಿ ದೇಖಿನ್‌, ‘ಉಟ್ ತಾರಿ ಬಿಛಾ಼ವ್ಣಿನ ಪಳ್ಳಿನ್‌ ಘರೆ ಜಾ಼ ಕರಿ ತುನ ಬೋಲುಸ್” ಕರಿ ಬೋಲ್ಯೊ.
LUK 5:25 ಇಮ್‌ ಬೋಲ್ತಾಸ್‌ನ ಯೋ ಇವ್ಣ ಖ್ಹಾಮ್ಣೆಸ್ ಉಠೀನ್, ಯೋ ಖ್ಹುತೊಥೋತೆ ಬಿಛಾ಼ವ್ಣಿನ ಪಳ್ಳಿನ್, ದೇವ್ನ ಖ್ಹರಾವ್‌ತೊ ಹುಯಿನ್, ಘರೆ ಗಯೊ.
LUK 5:26 ದೇಖ್ಯೂತೆ ತಮಾಮ್‌ ಅದ್ಮಿನೆ ಘಣು ಆಶ್ಚರ್ಯಖಾದು! ಅಜು಼ ಡರ್‌ಥಿ ಭರೈನ್ ದೇವ್ನ ಖ್ಹರಾಯು, ಅಜು಼ ಬೋಲ್ಯೂಕಿ, “ಆಜ಼್ ಹಮೆ ಆಶ್ಚರ್ಯನು ಬಾರೇಮ ದೇಖ್ಯ!”
LUK 5:27 ಅನ ಬಾದ್‌ಮ, ಯೇಸು ಹಿಜ್ಜಾ಼ಥೊ ಬಹರ್ ಜೈ಼ನ್, ಶುಂಕ ಮಾಂಗಾನಿ ಝ಼ಗೋಪರ್‌ ಬೆಠೊಥೋತೆ ಏಕ್‌ ಜ಼ಣಾನ ದೇಖ್ಯೊ. ಇನು ನಾಮ್ ಲೇವಿ. ಯೇಸುನೆ ಇನ, “ಮಾರ ಪೀಠೆ ಆವ್” ಕರಿ ಬುಲಾಯೊ.
LUK 5:28 ಇನೆ ಉಠೀನ್, ಖ್ಹಾರುಸ್ ಮ್ಹೆಂದಿನ್, ಯೇಸುನ ಪೀಠೆ ಗಯೊ.
LUK 5:29 ಬಾದ್‌ಮ ಲೇವಿನೆ ಇನ ಘರ್‌ಮ ಯೇಸುನಖ್ಹಾಜೆ, ಏಕ್‌ ಮೋಟಿ ಮಿಝ಼್‌ವಾನ್ ಪಿಕಾಯೊ. ಹಿಜ್ಜಾ಼ ಶುಂಕ ವಶೂಲ್ ಕರಾವಾಳು ಅಜು಼ ಬಿಜು಼ ಅದ್ಮಿಖ್ಹಾರು ಝೂ಼ಂಡ್‌ ಭರೈನ್ ಇವ್ಣ ಜೋ಼ಡೆ ಖಾಣನ ಬೆಠೂಥು.
LUK 5:30 ಅನ ದೇಖಿನ್, ಫರಿಸಾಯರ್ ಅಜು಼ ಇವ್ಣಿ ಝೂ಼ಂಡ್‌ನ ಮಳಿಹುಯು ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಖ್ಹಾರು ಯೇಸುನ ಶಿಷ್ಯರ್‌ಪರ್ ಮಶ್ಲಾ ಮಾರ್‌ತುಹುಯಿನ್, “ತುಮೆ ಶುಂಕ ಮಾಂಗವಾಳನ ಅಜು಼ ಪಾಪಿ ಖ್ಹಾರಾನ ಜೋ಼ಡೆ ಶನ ಖಾಣುಖಾಸ್ತೆ?” ಕರಿ ಬೋಲ್ಯು.
LUK 5:31 ಅನ ಖ್ಹಮ್‌ಜಿನ್‌ ಯೇಸುನೆ ಇವ್ಣುನ, “ಅಛ್ಛು಼ರ‍್ಹಾವಾಳನ ವೈದ್ಯನಿ ಜ಼ರೂರತ್ ಕೋ ಪಡಾನಿ, ಕತೋಬಿ ರೋಗ್‌ರಾಯಮ ರ‍್ಹಾವಾಳನ ವೈದ್ಯ ಹೋಣು ಪಡಾಸ್‌” ಕರಿ ಬೋಲ್ಯೊ.
LUK 5:32 ದೇವ್‌ಭಣಿ ಫರೊ ಕರಿ,ನೀತಿವಾಳ ಅದ್ಮಿಯೇನ ಬುಲಾವನ ಕಾಹೆ, ಪಾಪಿ ಖ್ಹಾರಾನ ಬುಲಾವನ ಆಯೋತೆ” ಕರಿ ಜವಾಬ್‌ ದಿದೊ.
LUK 5:33 ಥೋಡು ಅದ್ಮಿ ಯೇಸುನ, “ಯೋಹಾನನು ಶಿಷ್ಯರ್‌ ಖ್ಹಾರು ಘಡಿಕೇಡೆ ಉಪವಾಸ್ ರ‍್ಹೇಸ್‌ ಅಜು಼ ಬಿಂತಿನಿ ಪ್ರಾರ್ಥನೆ ಕರ್ತು ರ‍್ಹೇಸ್‌, ಇಮ್ಮಸ್ ಫರಿಸಾಯರ್‌ನು ಶಿಷ್ಯರ್‌ಬಿ ಉಪವಾಸ್ ಕರಾಸ್, ಕತೋಬಿ ತಾರು ಶಿಷ್ಯರ್‌ ಕದೇಬಿ ಖಾವಣ್‌ಪಿವಾಣ್‌ ಕರ್ತು ರ‍್ಹೇಸ್‌ನಿ” ಕರಿ ಬೋಲ್ಯು.
LUK 5:34 ತದೆ ಯೇಸುನೆ ಇವ್ಣುನ, “ವ್ಯಹಾನ ಛ಼ತ್‍ಮ ಅದ್ಮಿನ ಜೋ಼ಡೆ ನೌಶೊ ರ‍್ಹವಾನಿ ವಖ್ಹತ್‌ಮ ಇವ್ಣುನ ಉಪವಾಸ್ ಕರಾವಾನ ತುಮಾರೇಥಿ ಉಶೇಕಿ ಶು? ಕೊಯ್ನಿ!
LUK 5:35 ಕತೋಬಿ ನೌಶೊನ ಇವ್ಣಾಕಂಥು ದೂರ್ ಲೀಜಾ಼ವಾನ ದನ್ ಆವ್‌ಶೆ, ತದೆ ಇವ್ಣೆ ಉಪವಾಸ್ ಕರ್ಶೆ” ಕರಿ ಜ಼ವಾಬ್‌ದಿದೊ.
LUK 5:36 ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, ಕೋಣ್‌ಬಿ ನವು ಲುಂಗ್ಡಾನು ಏಕ್‌ ಥಿಗ್‍ಳಾನ ಫಾಡಿನ್, ಫಾಟಿಹುಯು ಜೂ಼ನ ಲುಂಗ್ಡಾಕೇಡೆ ಲಗಾಡಿನ್ ಶಿವಾಕೊಯ್ನಿ. ಇಮ್‌ ಶಿವ್ಯುತೊ, ಯೋ ನವು ಲುಂಗ್ಡಾನ ಫಾಡಿನ್ ಖರಾಬ್ ಕರಾದಾಖ್ಹಲ್, ಎತ್ರೇಸ್ ಕಾಹೆತೆ ನವ ಲುಂಗ್ಡಾನು ಥಿಗ್‌ಳು, ಯೋ ಜೂ಼ನ ಲುಂಗ್ಡಾಪರ್‌ ಖ್ಹಾಜ಼ಕೊಯ್ನಿ.
LUK 5:37 ಕೋಣ್‌ಬಿ ಜೂ಼ನಿ ಚಾ಼ಂಬ್ಡಾನಿ ತಿತ್ತಿಯೇಮ ನವು ದ್ರಾಕ್ಷಿನು ರಖ್ಹ್‌ನ ಭರಿನ್ ಮ್ಹೇಲಾಕೊಯ್ನಿ. ಶನಕತೊ ಯೋ ನವು ದ್ರಾಕ್ಷಿನು ರಖ್ಹ್‌, ಜೂ಼ನು ಚಾ಼ಂಬ್ಡಾನಿ ತಿತ್ತಿಯೇನ ಫೋಡಿನ್ ಭಾರ್ ರಂಚೈ಼ಜಾ಼ವಾನು ಕಾಹೆತೆ, ತಿತ್ತಿಯೇಬಿ ಖರಾಬ್ ಹುಯಿಜಾ಼ಸ್.
LUK 5:38 ಇನಖ್ಹಾಜೇಸ್ ನವು ದ್ರಾಕ್ಷಿನು ರಖ್ಹ್‌ನ ನವಿ ಚಾ಼ಂಬ್ಡಾನಿ ತಿತ್ತಿಯೇಮ ಭರಿ ಮ್ಹೇಲಾಸ್!
LUK 5:39 ಜೂ಼ನು ದ್ರಾಕ್ಷಿನು ರಖ್ಹ್‌ ಪೀದುಹುಯು ಅದ್ಮಿ, ನವು ದ್ರಾಕ್ಷಿನು ರಖ್ಹ್‌ ಹೋಣು ಕರಿ ಬೋಲಾಕೊಯ್ನಿ. ಯೋ ಜೂ಼ನು ದ್ರಾಕ್ಷಿನು ರಖ್ಹ್‌ನಾಸ್ ಅಛ್ಛು಼ಕರಿ ಬೋಲಾಸ್.
LUK 6:1 ಸಬ್ಬತ್‌ ದನ್ಮ ಯೇಸು ಅನಾಜ಼್ ಪಿಕಿಹುಯು ಖೇತರ್‌ಮಾಕರಿ ಚಾ಼ಲಿ ಒಳೆಜಾ಼ತೊಥೊ. ತದೆ ಇನ ಶಿಷ್ಯರ್‌ನೆ ಬುಟ್ಟಾ ತೋಡಿನ್, ಹಾತ್‌ಮ ಮಖ್ಹ್‌ಳಿನ್ ಖಾವಾಲಗ್ಯಾಥ.
LUK 6:2 ಅನ ದೇಖಿನ್ ಫರಿಸಾಯರ್‌ವಾಳು ಥೋಡು ಜ಼ಣು, “ಧರ್ಮಶಾಸ್ತ್ರ ಸಬ್ಬತ್‌ ದನ್ಮ ಕರ್ನುನಾತೆ ಕಾಮ್ನ ತುಮೆ ಶನ ಕರೋಸ್ತೆ?” ಕರಿ ಪುಛಾ಼ವಖ್ಹತರ್,
LUK 6:3 ಯೇಸುನೆ ಇವ್ಣುನ, “ದಾವೀದ್‌ನಾಬಿ ಇನ ಜೋ಼ಡ್ಮ ರ‍್ಹಾವಾಳನ ಭುಕ್ ಲಾಗಾನಿ ವಖ್ಹತ್‌ಮ, ದಾವೀದ್‌ನೆ ಶಾತ್‌ ಕರ‍್ಯೊ ಕರಿ ತುಮೆ ಪಢ್ಯಾಕೊಯ್ನಿಕಿಶು?
LUK 6:4 ಇನೆ ದೇವ್ನ ಘರ್‌ಮ ಜೈ಼ನ್, ಅಪ್ಣಿ ಖಾನುಲ್‌ಮ ಯಾಜಕವ್ನ ಮ್ಹೆಂದಿನ್ ಕೋಣ್‌ಬಿ ನಾ ಖಾಣುತೆ, ದೇವ್ನ ಖ್ಹಾಮ್ಣೆ ಮ್ಹೇಲಾತೆ ರೋಟಾನ ಪಾಡಿಖೈನ್, ಇನ ಜೋ಼ಡ್ಮ ರ‍್ಹಾವಾಳನಾಬಿ ದಿದೋನಿ” ಕರಿ ಜವಾಬ್‌ ದಿದೊ.
LUK 6:5 ಅಜು಼ ಯೇಸುನೆ, “ಅದ್ಮಿನೊ ಛಿಯ್ಯೊ ಸಬ್ಬತ್‌ ದನ್ನ ಪ್ರಭು ಹುಯಿರ‍್ಹೋಸ್” ಕರಿ ಬೋಲ್ಯೊ.
LUK 6:6 ಬಿಜೇಕ್ ಸಬ್ಬತ್‌ ದನ್ನೆ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್, ವಚನ್ ಬೋಲಿ ದೆವ್‍ಕರ್ತೋಥೊ. ಖಾವೊ ಹಾತ್‌ ಝೂ಼ಟೊ ಪಡೆಹುಯೊ ಏಕ್‌ ಜ಼ಣೊ ಹಿಜ್ಜಾ಼ ಥೊ.
LUK 6:7 ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳು ಯೇಸುಪರ್ ಗಲ್ತಿ ಲಗಾಡನಖ್ಹಾಜೆ ಶಾತ್‌ತೋಬಿ ಮಳಾದೆ ಕರಿ, ಯೇಸು ಸಬ್ಬತ್ ದನ್ಮ ಅಛ್ಛು಼ ಕರಾಸ್ಕಿ ಶುಕಿ ಕರಿ ಜ಼ಪೀನ್ ದೇಖುಕರ್ತುಥು.
LUK 6:8 ಕತೋಬಿ ಯೇಸುನೆ ಇವ್ಣಿ ಸೋಚ್ನ ಮಾಲುಮ್ ಕರಿಲೀನ್, ಹಾತ್‌ ಝೂ಼ಟೊ ಪಡ್ಯೊಹುಯೊ ಯೋ ಅದ್ಮಿನ, “ಉಠೀನ್, ಇಚ಼್‌ಮ ಐನ್ ಭೀರೆ” ಕರಿ ಬೋಲ್ಯೊ. ಯೋ ಅದ್ಮಿ ಉಠೀನ್ ಹಿಜ್ಜಾ಼ ಭೀರಿಗಯು.
LUK 6:9 ತದೆ ಯೇಸುನೆ ಇವ್ಣುನ, “ತುಮುನ ಏಕ್‌ ವಾತ್ ಪುಛಾ಼ವ್‍ಸ್: ಸಬ್ಬತ್‌ ದನ್ಮ ಖೆವು ಕರ್ನುಕರಿ ಅಪ್ಣಿ ಖಾನುಲ್‌ಮ ಛಾ಼? ಅಛ್ಛು಼ಕರಾನುಕಿ ಖರಾಬ್‌ಕರಾನು? ಜಾನ್‌ ಬಚಾ಼ಡಾನುಕಿ, ಜಾನ್‌ ಕಾಡಾನು?
LUK 6:10 ಅಜು಼ ಯೇಸುನೆ ಅಶ್‌ಪಿಶ್‍ ಥೂತೆ ಖ್ಹಾರಾವ್‌ನ ದೇಖಿನ್ ಯೋ ಅದ್ಮಿನ, “ತಾರೊ ಹಾತ್‌ ಖ್ಹಾಮ್ಣೆ ಕರ್‌” ಕರಿ ಬೋಲ್ಯೊ. ಇನೆ ಇಮ್ಮಸ್ ಕರ‍್ಯೊ, ತದೆ ಇನೊ ಹಾತ್‌ ಅಛ್ಛು಼ಹುಯಿಗಯು.
LUK 6:11 ಕತೋಬಿ ಪರಿಸಾಯರ್‌ಬಿ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಖೀಜ಼್ ಖೈನ್, “ಆ ಯೇಸುನ ಅಪ್ಣೆ ಶಾತ್‌ ಕರಿಯೆ?” ಕರಿ ಇವ್ಣ-ಇವ್ಣಾಮ ವಾತೆ ಬೋಲಾಲಗ್ಯು.
LUK 6:12 ಬಾದ್‌ಮ ಏಕ್‌ ದನ್ನೆ ಯೇಸು ಪ್ರಾರ್ಥನೆ ಕರಾನಖ್ಹಾಜೆ ಪಹಡ್‌ಪರ್ ಜೈ಼ನ್, ಹಿಡಿ ರಾತ್‌ ಯೋ ದೇವ್ನ ಪ್ರಾರ್ಥನೆ ಕರಾಮಸ್ ಕಾಡ್ಯೊ.
LUK 6:13 ವ್ಹಾಣು ಹುವಾನ ಬಾದ್‌ಮ, ಇನ ಶಿಷ್ಯರ್‌ನ ಖನ್ನೆ ಬುಲೈನ್, ಇವ್ಣಾಮ ಭಾರ ಜ಼ಣಾನ ಚೂ಼ಣಿನ್ ಇವ್ಣುನ ಅಪೊಸ್ತಲರ್’ ಕರಿ ನಾಮ್ ಮ್ಹೇಲ್ಯೊ.
LUK 6:14 ಇವ್ಣೆ ಕೋಣ್-ಕೋಣ್‌ಕತೊ, ಯೇಸುನೆ ಪೇತ್ರ ಕರಿ ನಾಮ್ ಮ್ಹೇಲ್ಯೋತೆ ಸೀಮೋನ, ಇನೊ ನ್ಹಾನೊ ಭೈ ಅಂದ್ರೆಯ, ಯಾಕೋಬ ಅಜು಼ ಯೋಹಾನ, ಫಿಲಿಪ್ಪ, ಬಾರ್ತೊಲೊಮಾಯ,
LUK 6:15 ಮತ್ತಾಯ, ತೋಮ, ಅಲ್ಫಾಯನೊ ಛಿಯ್ಯೊ ಯಾಕೋಬ, ಅಜು಼ ಸೀಮೋನ (ದೇಖ್ಹ್‌ನಪ್ಯಾರ್ ಕರಾವಾಳೊ ಕರಿ ಬೋಲೈಲಿದೋತೆ),
LUK 6:16 ಯಾಕೋಬನೊ ಛಿಯ್ಯೊ ಯೂದ, ಯೇಸುನ ಧೋಕೇಥಿ ಧರಿದ್ಯಾವಾಳೊ ಇಸ್ಕರಿಯೋತ ಯೂದ ಅವ್ಣೇಸ್.
LUK 6:17 ಅನ ಬಾದ್‌ಮ ಯೇಸುನೆ ಇನ ಅಪೊಸ್ತಲರ‍್ನ ಜೋ಼ಡೆ ಪಹಾಡ್ ಉತ್ರಿ ಹೇಟ್‌ ಆಯಿನ್, ಇನ ಬಿಜಾ಼ಖ್ಹಾರ ಶಿಷ್ಯರ್‌ನಿ ಮೋಟಿ ಝೂ಼ಂಡ್‌ನ ಜೋ಼ಡೆ ಶದ್ದರ್ ಜ಼ಮೀನ್‌ಪರ್ ಭೀರಿಗಯೊ. ಯೂದಾಯ ತಬರ್‌ಖಾಥು, ಯೆರೂಸಲೇಮ್‌ ಖ್ಹಯೇರ್‌ಭಣಿಥುಬಿ, ದರ‍್ಯಾವ್‍ನ ಖನ್ನೆ ಛಾ಼ತೆ ತೂರ್ ಅಜು಼ ಸೀದೋನ್ ಖ್ಹಯೇರ್‌ಥು ಆಯುಹುಯು ಅದ್ಮಿನಿ ಮೋಟಿ ಭೀಡ್ ಹಿಜ್ಜಾ಼ ಥೂ.
LUK 6:18 ಯೇಸು ಬೋಲಾತೆ ವಚನ್ನ ಖ್ಹಮ್‌ಜಾ಼ನ, ಅಜು಼ ರೋಗ್‌-ರಾಯೊ ಅಛ್ಛು಼ ಕರೈಲ್ಯವಾನಟೇಕೆ ಯೋ ಅದ್ಮಿಖ್ಹಾರು ಐರ‍್ಹುಥು. ಭೂತ್‌ ಧರಿರಾಖ್ಯುಹುಯು ಅದ್ಮಿ ಖ್ಹಾರುಬಿ ಆಯು, ಇವ್ಣಾಮಬಿ ಅಛ್ಛು಼ ಹುಯು.
LUK 6:19 ಅದ್ಮಿಖ್ಹಾರು ಯೇಸುನ ಛೀಮ್‌ಣು ಕರಿ ಕರ‍್ಯು, ಶನಕತೊ ಇನಾಮಾಥಿ ಶಕತ್‍ ನಿಕ್ಳಿನ್ ಖ್ಹಾರಾವ್‌ನ ಅಛ್ಛು಼ ಕರುಕರ್ತುಥು.
LUK 6:20 ಯೇಸುನೆ ಇನ ಶಿಷ್ಯರ್‌ ಭಣಿ ದೇಖಿನ್ ಬೋಲ್ಯೋಕಿ, “ಗರೀಬ್ ಹುಯಿರ‍್ಹವಾಳ ತುಮೆ ಖ್ಹುಶಾಲಿವಾಳು ಹುಯಿರ‍್ಹುಸ್, ದೇವ್‌ನು ರಾಜ್ಯ ತುಮಾರುಸ್!
LUK 6:21 ಭುಕ್ಯ ಛಾ಼ತೆ ತುಮೆ ಧನ್ಯ ಹುಯಿರ‍್ಹಾಸ್; ತುಮಾರು ಪೇಟ್ ಭರಾವ್‌ಶೆ! ಹಮ್ಕೆ ರೊವವಾಳ ತುಮೆ ಧನ್ಯ ಹುಯಿರ‍್ಹುಸ್; ತುಮೆ ಹಾಖ್ಹ್‌ಶು!
LUK 6:22 ಅದ್ಮಿನ ಛಿಯ್ಯಾನ ಖ್ಹಾಜೇಥಿ ಅದ್ಮಿಖ್ಹಾರು ತುಮೂನ ಖ್ಹರಮ್‌ ಕಾಡಿನ್, ದಾವೊ ಕರೀನ್, ಭಾರ್ ಕಾಡಿನಾಖಿನ್, ತುಮಾರು ನಾಮ್ ಬೋಲಾನುಬಿ ಖರಾಬ್‌ಕರಿ ಝಿಟ್ಕಾರ‍್ಯುತೊ, ತುಮೆ ಧನ್ಯ ಹುಯಿರ‍್ಹಾಸ್.
LUK 6:23 ಅಮ್ ಖ್ಹಾರು ಹುಯೂತೊ ಖ್ಹುಶಿಥಿ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ಆ ಅದ್ಮಿನು ಗುರುಗುರಬ್‍ಲ್ಯಬಿ ಪ್ರವಾದಿನ ಖ್ಹಾರು ಅಮ್ಮಸ್ ಕರ‍್ಯುನಿ.
LUK 6:24 ಕತೋಬಿ ಹಮ್ಕೆ ಶೌಕಾರ್ ರ‍್ಹವಾಳ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಅರಾಮ್‍ನಿ ಜಿ಼ಂದ್‌ಗಿ ಚ಼ಲೈಲಿದ!
LUK 6:25 ಹಮ್ಕೆ ಪೇಟ್ ಭರೈರ‍್ಹುತೆ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಭುಕ್ಯು ರ‍್ಹಿಶು! ಹಮ್ಕೆ ಹಾಖ್ಹವಾಳ ತುಮಾರಿ ಹಾಲ್ನ ಶಾತ್‌ ಬೋಲು; ತುಮೆ ಕುರ್‌ಲ್ಹಾವ್‌ಶು ಅಜು಼ ರೊವ್‌ಶು!
LUK 6:26 ಅದ್ಮಿಖ್ಹಾರು ತುಮೂನ ಖ್ಹರಾಯೂತೊ, ತುಮಾರಿ ಹಾಲ್ನ ಶಾತ್‌ ಬೋಲು! ಇವ್ಣ ಗುರುಗುರಬ್‍ಲ್ಯನೇಬಿ ಝೂ಼ಟಪ್ರವಾದಿ ಖ್ಹಾರಾನ ಇಮ್ಮಸ್ ಖ್ಹರಾಯು.
LUK 6:27 “ಕತೋಬಿ ಮಾರಿ ವಾತೇನ ಖ್ಹಮ್‌ಜಾ಼ವಾಳಾನ ಮೇ ಶಾತ್‌ ಬೊಲುಸ್‌ಕತೊ, ತುಮಾರ ದುಶ್‌ಮನ್ನ ಪ್ಯಾರ್ ಕರೊ, ತುಮಾರಪರ್ ದಾವೊ ಕರಾವಾಳಾನ ಅಛ್ಛು಼ಕರೊ.
LUK 6:28 ತುಮಾರಪರ್ ಶಾಪ್ನ-ಶಬರ್ ದ್ಯವಾಳಾನ ಆಶೀರ್ವಾದ್‌ ಕರೊ, ತುಮಾರಪರ್ ಶಬರ್‌ ದ್ಯವಾಳನಖ್ಹಾಜೆ ಪ್ರಾರ್ಥನೆ ಕರೊ.
LUK 6:29 ಕೋಣ್‌ತೋಬಿ ಏಕ್‌ಜ಼ಣು ತಾರ ಕಲ್ಲಪರ್ ಮಾರ‍್ಯುತೊ, ಇನ ಬಿಜೇಕ್ ಕಲ್ಲು ವತಾಳೊ. ತಾರು ಉಪ್ಪರ್‌ಲ್ಯು ಝ಼ಗ್ಗಾನ ಖೇಚಿ ಲ್ಯಾವಳಾನ ಮಹಿನು ಕುಡ್‌ತಾನಾಬಿ ದಿನಾಕ್.
LUK 6:30 ತಾರಕನ ಕೋಣ್‌ತೋಬಿ ಶಾತ್ತೋಬಿ ಮಾಂಗ್ಯುತೊ, ಇನ ದೇ, ತಾರು ಶೊತ್ ಛಿನೈಲ್ಯವಾಳಾನ, ಪಾಛು಼ ದೇ ಕರಿ ನಕೊ ಬೋಲ್.
LUK 6:31 ಅದ್ಮಿಖ್ಹಾರು ತುಮೂನ ಶಶ್ಯಾತ್‌ ಕರ‍್ನುಕರಿ ತುಮೆ ಆಖ್ಹ್ ಕರೋಸ್ಕಿ, ಯೋಸ್‌ ತುಮೆ ಇವ್ಣುನ ಕರೊ.
LUK 6:32 ತುಮೂನ ಪ್ಯಾರ್ ಕರಾವಾಳನಾಸ್‌ ತುಮೆ ಪ್ಯಾರ್ ವತಾಳ್ಯಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇವ್ಣುನ ಕೋಣ್ ಲಾಡ್‌ಪ್ರೀತ್‌ ಒತಾಳಸ್ಕಿ ಇವ್ಣುನಾಸ್ ಲಾಡ್‌ಪ್ರೀತ್‌ ಕರಾಸ್ನಿ.
LUK 6:33 ತುಮೂನ ಅಛ್ಛು಼ಕರಾವಾಳನಾಸ್‌ ತುಮೆ ಅಛ್ಛು಼ಕರ‍್ಯಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇಮ್ಮಸ್ ಕರಾಸ್ನಿ.
LUK 6:34 ತುಮೂನ ಕೋಣ್ ಉಧಾರ್ ಫೇಡಸ್ಕಿ, ಇವ್ಣುನಾಸ್ ಉಧಾರ್ ದಿದಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇವ್ಣೆ ದಿದೂತೆ ಎತ್ರು ಇವ್ಣುನ ಪಾಛು಼ ಮಳ್‌ಶೆ ಕರಿ ಪಾಪಿ ಅದ್ಮಿ ಖ್ಹಾರಾನ ಉಧಾರ್ ದೇಸ್‌ನಿ.
LUK 6:35 ಇನಖ್ಹಾಜೆ, ತುಮಾರ ದುಶ್‌ಮನ್ನ ಲಾಡ್‍ಪ್ರೀತ್ ಕರೊ ಅಜು಼ ಇವ್ಣುನ ಅಛ್ಛು಼ಕರೊ. ತುಮೆ ಇವ್ಣುನ ಉಧಾರ್ ದ್ಯವಾನಿ ವಖ್ಹತ್‌ಮ, ಫಾಛು಼ ಇವ್ಣೇಥಿ ಮಳ್‌ಶೆ ಕರಿ ಬೋಲಾನಿ ಆಖ್ಹ್‌ನ ಮ್ಹೆಂದಿನ್, ಉಧಾರ್ ದೆವೊ. ತದೆ ತುಮುನ ಘಣು ಇನಾಮ್ ಮಳ್‍ಶೆ ಅಜು಼ ತುಮೆ ಪರಮಂಡಲ್‌ನೊ ದೇವ್ನ ಲಡ್ಕಾಉಶು. ಯೋತೊ ಕರ್ಮಿಷ್ಟಿನಾಬಿ, ಖರಾಬ್‌ನಾಬಿ ಅಛ್ಛೊ಼ ಹುಯಿರ‍್ಹೋಸ್.
LUK 6:36 ಪರ್‌ಲೋಕ್‌ನೊ ತುಮಾರೊ ಬಾ ಗೋರ್‌ಕರಾವಾಳೊ ಹುಯಿರ‍್ಹೋತೆ ಇಮ್ಮಸ್, ತುಮೇಬಿ ಗೋರ್‌ ಕರಾವಾಳೊ ಹುಯಿರ‍್ಹೇವೊ.
LUK 6:37 “ಕಿನಿ ಬಾರೇಮಾಬಿ ತೀರ್ಪ್‌ ನಕೊ ಕರೊ, ತದೆ ದೇವ್‌ಬಿ ತುಮೂನ ತೀರ್ಪ್ ಕರ್ಶೆ ಕೊಯ್ನಿ; ಕಿನಾಪರ್‌ಬಿ ಗಲತ್‌ ನಕೊ ಲಗಾಡೊ, ತದೆ ದೇವ್‌ಬಿ ತುಮಾರಪರ್ ಗಲತ್‌ ಕೋ ಲಗಾಡ್‌ಶೇನಿ. ಬಿಜಾ಼ನ ಮಾಪ್‌ ಕರೊ, ತದೆ ದೇವ್‌ಬಿ ತುಮುನ ಮಾಪ್‌ ಕರ್ಶೆ.
LUK 6:38 ಬಿಜಾ಼ನ ದೆವೊ, ತದೆ ದೇವ್‌ಬಿ ತುಮೂನ ದಿಶೆ. ದಾಬಿ ಹಲೈನ್, ಭಾರ್‌ ರಂಚಾ಼ವಖ್ಹರ್‌ಕು ಮಾಪಿನ್‌, ತುಮಾರಿ ಝೋ಼ಳಿಮ ನಾಕ್‌ಶೆ, ತುಮೆ ಬಿಜಾ಼ನ ಕಿಮ್ ಮಾಪಿನ್ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪ್‌ಶೆ.
LUK 6:39 ಅಜು಼ ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, “ಕಾಣೊ ಕಾಣಾನ ವಾಟ್‌ ವತಾಳನ ಕೋ ಹುವಾನಿ; ಇಮ್‌ ಕರ‍್ಯೂತೊ, ಭೇ ಜ಼ಣ ಖಾಡ್‌ಮ ಪಡಿಜಾ಼ಶೆ.
LUK 6:40 ಶಿಷ್ಯ ಇನ ಗುರುಥಿ ಮೋಟೊ ಕಾಹೆ, ಕತೋಬಿ ಶಿಷ್ಯ ತಮಾಮ್‌ ಶಿಕಾನ ಬಾದ್‌ಮ, ಇನ ಗುರುನಿಮತ್‌ ಹುಯಿಜಾ಼ಸ್.
LUK 6:41 ತಾರ ಡೋಳಾಮ ಛಾ಼ತೆ ಪೇದಡ್‌ನಿ ಬಾರೇಮ ಸೋಚ್ಯೊಕೊಂತೆ, ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿನಿ ಬಾರೇಮ ಶನ ಸೋಚಸ್ತೆ?
LUK 6:42 ತಾರ ಡೋಳಾಮ ಛಾ಼ತೆ ಪೇದಡಸ್‌ ತುನ ದೆಖಾವ ಕೊಯ್ನಿನಿ. ಅಮ್ ರ‍್ಹಾವಪರ್, ತೂ ತಾರ ಭೈನ, ‘ಭೈ ತಾರ ಡೋಳಾಮ ಛಾ಼ತೆ ಕಾಕ್ರಿನ ಕಾಡುಸ್‌ ಆವ್’ ಕರಿ ಕಿಮ್ ಬೋಲಾಸ್? ಅಲ ಠಗಾರು ಪಹಿಲೆ ತಾರ ಡೋಳಾಮಾನು ಪೇದಡ್‌ನ ಕಾಡ್, ಬಾದ್‌ಮ ತಾರ ಭೈನ ಡೋಳಾಮಾನು ಕಾಕ್ರಿನ ಕಾಡಾನ ತುನ ಅಛ್ಛಿನಿತರ ದೆಖಾವ್‌ಶೆ.
LUK 6:43 ಅಛ್ಛು಼ ಝಾ಼ಡು ಖರಾಬ್ ಪಂಡು ದೇಯಿಕೊಯ್ನಿ, ಇಮ್ಮಸ್ ಖರಾಬ್ ಝಾ಼ಡು ಅಛ್ಛು಼ ಪಂಡು ದೇಯಿಕೊಯ್ನಿ.
LUK 6:44 ಹರೇಕ್ ಝಾ಼ಡು ಕಿಮ್ನು ಕರಿ ಬೋಲಾನು ಯೋ ಮ್ಹೇಲಾತೆ ಪಂಡಾಥೀಸ್‌ ಮಾಲುಮ್‌ ಪಡಾಸ್‌. ತುಮೆ ಕಾಟಾನಿಡಾಗ್‍ಮ ಅಂಜೀರ್‌ನು ಪಂಡು ತೋಡಾಕೊಯ್ನಿ ನತರ್‌ಕಿ ಕಾಟಾನಿ ಡಾಗೇಮ ದ್ರಾಕ್ಷಿನು ಪಂಡಾವ್‍ನ ಎಕ್ಟು ಕರಾಕೊಯ್ನಿ.
LUK 6:45 ಅಛ್ಛು಼ ಅದ್ಮಿ ಇನ ಮನ್‌ಮ ಜ಼ಮಕರಿರಾಖ್ಯೂತೆ ಅಛ್ಛಿ ಕಣ್ಗಿಮಾಥು ಅಛ್ಛಾ಼ನ ಭಾರ್‌ ಕಾಡಸ್‌; ಕತೋಬಿ ಖರಾಬ್ ಅದ್ಮಿ ಇನ ಮನ್‌ಮ ಜ಼ಮಕರಿರಾಖ್ಯೂತೆ ಖರಾಬ್ ಕಣ್ಗಿಮಾಥು ಖರಾಬ್‌ನ ಭಾರ್ ಕಾಡಸ್‌. ಮನ್‌ಮ ಶಾತ್‌ ಛಾ಼ಕಿ ಯೋಸ್‌ ಮ್ಹೋಡವಾಟೆ ನಿಕ್ಳಸ್‌.‌
LUK 6:46 “ತುಮೆ ಮನ, ‘ಪ್ರಭು, ಪ್ರಭು’ ಕರಿ ಚಿಕ್ರೀನ್‌ಬಿ, ಮೇ ಬೋಲುಸ್ತೆ ಇಮ್‌ ಶನ ಕೋ ಕರಾಂತೆ?
LUK 6:47 ಕೋಣ್ ಮಾರಕನ ಆಯಿನ್, ಮಾರಿ ವಾತೇನ ಖ್ಹಮ್‌ಜಿನ್‌, ಅನೀನಿಘೋಣಿ ಚಾ಼ಲವಾಳು, ಯೋ ಕಿಮ್ನೊ ಹುಯಿರ‍್ಹಿಶೆ ಕರಿ ತುಮೂನ ವತಾಳುಸ್‌.
LUK 6:48 ಯೋ ಅಛ್ಛಿನಿತರ ಖೋಂದೈನ್, ಬಂಡಾಪರ್ ಹದಿ ನಖೈನ್, ಘರ್ ಭಾಂದಾಸ್ತೆ ಅದ್ಮಿನಿಘೋಣಿ ಹುಯಿರ‍್ಹೊಸ್. ನದ್ದಿ ಭರೈನ್, ತೋಫಾನ್ ಯೋ ಘರ್‌ನ ಮಾರ್‌ಪಡ್ಯುತೋಬಿ, ಯೋ ಘರ್‌ನ ಹಲಾವಾನ ಇನ ಕೋಹುಯುನಿ. ಶನಕತೊ ಇನ ಬಂಡಾಪರ್ ಭಾಂದಿರಾಖ್ಯುಥು.
LUK 6:49 ಕತೋಬಿ ಮಾರಿ ವಾತೇನ ಖ್ಹಮ್‌ಜಿನ್‌ಬಿ, ಇನೀನಿಘೋಣಿ ಚಾ಼ಲಕೊಂತೆ ಅದ್ಮಿ ಹದಿಕೊಂತೆ ಜ಼ಮೀನ್‌ಪರ್ ಘರ್ ಭಾಂದಾವಾಳಾನಿ ಘೋಣಿ ಹುಯಿರ‍್ಹುಸ್. ತೋಫಾನ್‌ ಆಯಿನ್, ಯೋ ಘರ್‌ನ ಮಾರ್‌ಪಡ್‌ತಾನ, ಯೋ ಘರ್ ರಡ್ಕಿನ್, ಪೂರ ಬರ್ಬಾತ್ ಹುಯಿಗಯು.
LUK 7:1 ಯೇಸುನೆ ಅದ್ಮಿನ ಆ ಖ್ಹಾರಿ ವಾತೆನ ಬೋಲಿನ್ ಖ್ಹಮ್‌ಜಾ಼ಡನ ಬಾದ್‌ಮ, ಯೇಸು ಕಪೆರ್ನೌಮ್‌ನ ಗಯೊ.
LUK 7:2 ಹಿಜ್ಜಾ಼ ಖ್ಹೋಶಿಪಾಯಿನೊ ಮೋಟಾನೊ, ಪ್ಯಾರ್‌ನೊ ಆಳ್‌ ಏಕ್‌ ಜ಼ಣೊ, ರೋಗ್‌ ಆಯಿನ್ ಮರಾನಿ ಹಾಲ್‌ಮ ಥೊ.
LUK 7:3 ಯೋ ಖ್ಹೊ ಶಿಪಾಯಿನೊ ಮೋಟಾನೆ, ಯೇಸುನಿ ಬಾರೇಮ ಖ್ಹಮ್‌ಜಿನ್‌, ಯೆಹೂದ್ಯರ್‌ನ ಶಾಣವ್‍ಮ ಥೋಡ ಜ಼ಣಾನ ಇನಾಕನ ಮೋಕ್ಲಿನ್, ಇನ ಆಳ್‌ನ ಅಛ್ಛು಼ ಕರ‍್ನು ಕರಿ ಬೋಲಿಲಿದೊ.
LUK 7:4 ಇವ್ಣೆ ಯೇಸುಕನ ಆಯಿನ್, “ತಾರೇಥಿ ಮದತ್ ಕರೈಲ್ಯವಾನ ಯೋ ಅದ್ಮಿ ಲ್ಹಾಯಕ್‌ ಹುಯಿರ‍್ಹುಸ್‍.
LUK 7:5 ಯೋ ಅಪ್ಣ ಅದ್ಮಿನ ಪ್ಯಾರ್ ಕರಾವಾಳೊ ಹುಯಿರ‍್ಹೋಸ್ ಅಜು಼ ಇನೇಸ್‌ ಅಪ್ಣಖ್ಹಾಜೆ ಸಬೆ ಭರಾವನು ಮಂದಿರ್‌ನ ಭಂದೈದಿದೊತೆ” ಕರಿ ಬೋಲಿನ್ ಯೇಸುನ ಗಿಂಗಾವಲಗಾಖ್ಹತರ್‌,
LUK 7:6 ಯೇಸು ಇವ್ಣ ಜೋ಼ಡೆ ಗಯೊ. ಯೇಸು ಘರ್‌ಕನ ಆಯಿನ್ ಪೋಚಾ಼ನ ಜ಼ರ ದೂರ್ ಥೋತೆ ತದ್ದೇಸ್, ಯೋ ಖ್ಹೋಶಿಪಾಯಿನೊ ಮೋಟಾನೆ ಇನ ದೋಸ್ತ್ ಖ್ಹಾರಾವ್‌ನ ಯೇಸುಕನ ಬೋಲಿ ಮೋಕ್ಲಿನ್, “ಪ್ರಭು, ತೂ ಖ್ಹತ್‌ನಕೊ, ತೂ ಮಾರ ಘರ್‌ಕನ ಆವಾಯೆತ್ರೆ ಲ್ಹಾಯೇಕ್‌ ಮಾರಮ ಕೊಯ್ನಿ.
LUK 7:7 ಅತ್ರೇಸ್ ಕಾಹೆತೆ ತಾರಕನ ಆವಾನಾಬಿ ಮೇ ಲ್ಹಾಯೇಕ್‌ನೊ ಕಾಹೆ. ಕತೋಬಿ ತೂ ಖಲಿ ಏಕ್‌ ವಾತೆ ಬೋಲ್ಯೋತೊ ಬಶ್‌ ಮಾರ ಸೇವಕ್‌ನ ಅಛ್ಛು಼ ಉಶೆ.
LUK 7:8 ಮೇಬಿ ಬೀಜಾ಼ನ ಹಾತ್‍ಹೇಟ್ ಕಾಮ್ ಕರಾವಾಳೊ ಹುಯಿರ‍್ಹೋಸ್. ಮಾರ ಹಾತ್‌ಹೇಟ್ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್‌ ಜ಼ಣಾನ ಜಾ಼ ಕರಿ ಬೋಲ್ಯೊತೊ ಯೋ ಜಾ಼ಸ್‌, ಬಿಜ್ಜೇಕ್‌ ಜ಼ಣಾನ ಆವ್ಣುಕರಿ ಬೋಲ್ಯೋತೊ ಆವಸ್. ಮಾರ ಆಳ್‌ನ ಅಮ್ನು-ಅಮ್ನು ಕಾಮ್ ಕರ್‌ ಕರಿ ಬೋಲ್ಯೋತೊ ಯೋ ಕರಸ್” ಕರಿ ಬೋಲ್ಯೊ.
LUK 7:9 ಆ ವಾತೆನ ಖ್ಹಮ್‌ಜಿನ್‌ ಯೇಸುನೆ ಇನಿ ಬಾರೇಮ ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್‌ತುಥೂತೆ ಝೂ಼ಂಡ್‌ಣ ಫರಿ ದೇಖಿನ್‌, “ಮೇ ತುಮೂನ ಬೋಲುಸ್ಕಿ, ಮೇ ಅತ್ರೆ ಮೋಟಿ ವಿಶ್ವಾಸ್‌ನ ಇಸ್ರಾಯೇಲ್‌ ಆದ್ಮಿಮಾಬಿ ಕೋ ದೇಖ್ಯೋನಿ” ಕರಿ ಬೋಲ್ಯೊ.
LUK 7:10 ಅನ ಬಾದ್‌ಮ ಯೋ ಟಪಾಲ್ ದ್ಯವಾಳು ಪಾಛು಼ ಫರಿ ಯೋ ಅದಿಕಾರಿನ ಘರ್‌ಕನ ಜೈ಼ನ್‌, ಯೋ ಆಳ್‌ನ ಅಛ್ಛು಼ ಹುಯಿರ‍್ಹುಥೂತೆ ದೇಖ್ಯು.
LUK 7:11 ಅನ ಬಾದ್‌ಮ ಯೇಸು ನಾಯಿನ್ ಕರಿ ಏಕ್‌ ಗಾಮ್‌ನ ಗಯೊ. ಇನ ಜೋ಼ಡ್ಮ ಇನು ಶಿಷ್ಯರ್‌ ಅಜು಼ ಅದ್ಮಿನಿ ಮೋಟಿ ಝೂ಼ಂಡ್‌ಬಿ ಥೂ.
LUK 7:12 ಯೇಸು ಗಾಮ್‌ನ ಮಹಿ ಜಾ಼ವಾನು ದರ‍್ವಾಜ಼ಕನ ಆವಾದಿನ್, ಮರಿಗಯೂತೆ ಏಕ್‌ ಮುರ್ದಾನ ಗಾಮ್‌ಥಿ ಭಾರ್ ಪಳ್ಳಿನ್‌ ಉಳ್ಯಾವ್ತೂಥು. ಯೋ ಮರಿಗಯೂತೆ ಅದ್ಮಿ ಇನಿ ಆಯಾನ ಏಕ್‍ನೊ ಏಕ್‌ ಛಿಯ್ಯೊ ಹುಯಿರ‍್ಹೋಥೊ. ಇನಿ ಆಯ ಮುಂಡಚ್ಚಿ ಹುಯಿರ‍್ಹೀಥಿ, ಯೋ ಗಾಮ್‌ನು ಅದ್ಮಿನಿ ಮೋಟಿ ಝೂ಼ಂಡಸ್ ಯೋ ತಯೇಡ ಕೇಡೆ ಥು.
LUK 7:13 ಪ್ರಭುನೆ ಯೋ ತಯೇಡಾನ ದೇಖಿ ಗೋರ್‌ಖೈನ್, “ರೋವ್‌ ನಕೊ” ಕರಿ ಇನ ಬೋಲ್ಯೊ.
LUK 7:14 ಅಜು಼ ಖಾಟ್ಲಾಕನ ಜೈ಼ನ್, ಇನ ಛೀಮ್‌ತಖ್ಹತರ್‌, ಪಳ್ಳಿನ್‌ ಜಾ಼ವವಾಳು ಭೀರಿಗಯು. ತದೆ ಯೇಸುನೆ, “ಜಾ಼ನ್ಜ಼ಮಾನ್ ಛೋ಼ಕ್ರಾ ಉಟ್, ಕರಿ ಮೇ ತುನ ಬೋಲುಸ್!” ಕರಿ ಬೋಲ್ಯೊ.
LUK 7:15 ತದೆ ಯೋ ಮರಿಗಯುಥೂತೆ, ಯೋ ಛೋ಼ಕ್ರು ಉಠಿ ಬೇಶಿನ್, ವಾತೆ ಬೋಲಾಲಗ್ಯು, ತದೆ ಯೇಸುನೆ ಯೋ ಛೋ಼ಕ್ರಾನ ಇನಿ ಆಯಾನ ದಿದೊ.
LUK 7:16 ಅನ ದೇಖಿನ್, ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿ ಡರಿನ್, ದೇವ್ನ ಸ್ತುತಿ ಕರ್ತುಹುಯಿನ್, “ಏಕ್‌ ಮಹಾನ್ ಪ್ರವಾದಿ ಅಪ್ಣಕನ ಐರ‍್ಹೋಸ್! ದೇವ್ ಇನ ಅದ್ಮಿನ ಬಚಾ಼ಡಾನ ಐರ‍್ಹೋಸ್” ಕರಿ ಬೋಲ್ಯು.
LUK 7:17 ಯೇಸುನಿ ಬಾರೇಮಾನಿ ಆ ಖಬರ್‌, ಯೂದಾಯ ದೇಖ್ಹ್‌ಮ ಅಜು಼ ಇನ ಅಶ್‌ಪಿಶ್‌ನು ತಮಾಮ್‌ ಮುಲಕ್‌ಮ ಫೈಲಿಗಯು
LUK 7:18 ಯೋಹಾನನು ಶಿಷ್ಯರ್‌ ಚಾ಼ಲ್ಯುತೆ ಖ್ಹಾರಿ ಬಾರೇಮ ಯೋಹಾನ್ನ ಬೋಲ್ಯು.
LUK 7:19 ತದೆ ಯೋಹಾನನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತೂಸ್‌ಕಿ ಶು ಯೋ ಆವ್‌ಶೇತೆ ಅದ್ಮಿಕಿ? ನಾತೊ ಹಮೆ ಬಿಜೇಕ್‌ನಖ್ಹಾಜೆ ಟಿವಾವ್‌ಣು” ಕರಿ ಪುಛಾ಼ವಾನಖ್ಹಾಜೆ, ಇವ್ಣುನ ಮಾಲಿಕ್‍ಕನ ಮೋಕ್‌ಲ್ಯೊ.
LUK 7:20 ಇವ್ಣೆ ಯೇಸುಕನ ಆಯಿನ್, “ತೂಸ್‌ಕಿ ಶು ಯೋ ಆವ್‌ಶೇತೆ ಅದ್ಮಿ? ಕೊಯಿನ್ತೊ ಹಮೆ ಬಿಜ್ಜೇಕ್‌ ಅದ್ಮಿನಖ್ಹಾಜೆ ಟಿವಾವ್‌ಣು? ಕರಿ ಫುಛಾ಼ವಾನಟೇಕೆ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನೆ ಹಮೂನ ತಾರಕನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯು.
LUK 7:21 ಯೋಸ್‌ ವಖ್ಹತ್‌ಮ, ಯೇಸುನೆ ಕೈಯೆಕ್ಕಿ ಅದ್ಮಿನು ರೋಗ್‌ರಾಯೊನ ಅಛ್ಛು಼ ಕರ‍್ಯೊ, ಅಜು಼ ಭೂತ್‌ ಧರಿರಾಖವಾಳನ ಛೋ಼ಡಾಯೊ. ಅತ್ರೇಸ್ ಕಾಹೆತೆ ಘಣ ಕಾಣ ಅದ್ಮಿನ ಡೋಳಾನ ಜೋ಼ತ್ ದಿದೊ.
LUK 7:22 ಬಾದ್‌ಮ ಯೇಸುನೆ ಯೋಹಾನ್ನ ಶಿಷ್ಯರ್‌ನ, “ತುಮೆ ಹಜ಼್ಜಾ ದೇಖ್ಯಾತೆ ಅಜು಼ ಖ್ಹಮ್‍ಜ್ಯಾತೆ ಇನಿ ಬಾರೇಮ ಯೋಹಾನ್ನ ಜೈ಼ನ್ ಬೋಲೊ. ಕಾಣು ದೇಕ್‌ಶೆ, ಲಂಗ್ಡು ಚಾ಼ಲ್‌ಷೆ, ಖೋಡ್‍ ರ‍್ಹವಾಳು ಪಾಕ್‌ ಉಶೆ, ಭೈರು ಖ್ಹಮಜ಼್‌ಶೆ, ಮರಿಗಯುಹುಯು ಜಾನ್‌ ಲೀಲಿಶೆ ಅಜು಼ ಗರೀಬ್‌ನ ಸುವಾರ್ತೆ ಬೋಲವ್‍ಕರಸ್.
LUK 7:23 ಮಾರಿ ಬಾರೇಮ ಶಕ್ ಕರಾಕೊಂತೆ ಇವ್ಣೇಸ್ ಧನ್ಯ ಹುಯಿರ‍್ಹುಸ್ ಕರಿ ಬೋಲ್ಯೊ.
LUK 7:24 ಯೋಹಾನನು ಶಿಷ್ಯರ್‌ ಚ಼ಲ್ಯೂಜಾ಼ವಾದೀನ್, ಯೇಸುನೆ ಅದ್ಮಿನಿ ಝೂ಼ಂಡ್‌ನ ಯೋಹಾನ್ನಿ ಬಾರೇಮ ಬೋಲಾಲಗ್ಯೋಕಿ, “ಶಾತ್‌ ದೇಕ್ಣು ಕರಿ ತುಮೆ ಯೋಹಾನಕನ ಉಜ್ಜಾ಼ಡಿ ಝ಼ಗೋಮ ಗಯಾಥ? ವಹಿರಾಮ ಹಲಾಸ್ತೆ ಘಾಖ್ಹ್‌ನ ಡಂಟ್‍ನಾಕಿಶು?
LUK 7:25 ನಾತೊ ತುಮೆ ಶಾತ್‌ ದೇಕ್ಣುಕರಿ ಗಯಾಥ? ಶನ್ಗಾರ್‌ನ ಲುಂಗ್ಡ ಪೇರ‍್ಹಿರಾಖಾಸ್ತೆ ಅದ್ಮಿನಾಕಿಶು? ಅಮ್ನು ಲುಂಗ್ಡು ಪೇರ‍್ಹಿನ್‌ ಅರಾಮ್‌ನಿ ಜಿ಼ಂದ್‌ಗಿ ಚ಼ಲಾವವಾಳು ಖ್ಹಾರು ಮಹೇಲ್‌ಮ ರ‍್ಹೇಸ್!
LUK 7:26 ಇಮ್‍ಕತೊ ಮನ ಬೋಲೊ, ಶಾತ್‌ ದೇಕ್ಣು ಕರಿ ಬಹರ್ ಗಯಾಥ? ಪ್ರವಾದೀನಾಕಿ ಶು? ಒಹೊ ಖ್ಹಾಚಮಾಬಿ, ಮೇ ಬೋಲುಸ್ಕಿ ಏಕ್‌ ಪ್ರವಾದಿಥೀಬಿ ಮೋಟಾನ ತುಮೆ ದೇಖ್ಯ.
LUK 7:27 ‘ದೇವ್ನೆ ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್, ಯೋ ತೂ ಜಾ಼ವಾನಿ ವಾಟ್ನ ಖ್ಹೂದು ಕರ್ಶೆ’ ಕರಿ ಲೀಖೈರ‍್ಹೂಸ್ತೆ ಯೋ ಯೋಹಾನನಿಸ್ ಬಾರೇಮ
LUK 7:28 ಮೇ ತುಮೂನ ಬೋಲುಸ್ಕಿ, “ಜ಼ಮೀನ್‌ಪರ್ ತಯೇಡಾನ ಪೇಟೆ ಪೈದಹುಯುತೆ ಹರೇಕ್ ಅದ್ಮಿಮ ಯೋಹಾನಸ್‌ ಮೋಟೊ. ಕತೋಬಿ ದೇವ್ನಿ ರಾಜ್ಯಮ ಅಖ್ಖೇಥಿ ನ್ಹಾನೊ ಜಿನ್‌ಕುಬಿ ಯೋಹಾನಥಿ ಮಹಾನ್ ಹುಯಿರ‍್ಹೋಸ್.
LUK 7:29 ಯೋಹಾನ ಬೋಲ್ಯೋತೆ ಇಮ್‌ ತಮಾಮ್‌ ಅದ್ಮಿ ಅಜು಼ ಶುಂಕ ವಶೂಲ್ ಕರಾವಾಳುಬಿ ದೇವ್‌ನೊ ಮಾರಗ್ ಖ್ಹಾಚಕರಿ ಮಾನಿಲಿದು. ಇನಖ್ಹಾಜೆ ಇವ್ಣೆ ಖ್ಹಾರು ಯೊಹಾನ್ನ ಹಾತೇಥಿ ಬ್ಯಾಪ್ತಿಸ್ಮ ಕರೈಲಿದು.
LUK 7:30 ಕತೋಬಿ ಫರಿಸಾಯರ್ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಇವ್ಣಿ ಬಾರೇಮ ದೇವ್ನಿ ಮರ್ಜಿನ ಝಿಟ್ಕಾರಿನ್, ಯೋಹಾನ್ನ ಹಾತೇಖ್ಹು ಬ್ಯಾಪ್ತಿಸ್ಮ ಕೋ ಲಿದೂನಿ.
LUK 7:31 ಅಜು಼ ಯೇಸುನೆ ಅಮ್ ರ‍್ಹವಾಪರ್, “ಆ ಹಗಾಮ್ನ ಅದ್ಮಿನ ಖಿವಿ ಪರಕ್ಮ ಬೋಲು? ಇವ್ಣೆ ಕಿಮ್ಕಿ ಘೋಣಿ ಛಾ಼?
LUK 7:32 ಬಜಾ಼ರ್‌ಮ ಬೇಶಿನ್, ಹಮೆ ತುಮಾರಖ್ಹಾಜೆ ವಾಖ್ಹ್‌ಳಿ ವಜಾ಼ಡ್ಯ, ತುಮೆ ಖೇಲ್ಯಕೊಯ್ನಿ; ಹಮೆ ಅಂದ್ರೋಖ್ಹ್‌ನು ಗೀದ್‌ ಬೋಲ್ಯ, ಕತೋಬಿ ತುಮೇತೊ ರೋಯಾ ಕೊಯ್ನಿ” ಕರಿ ಬೋಲಾತೆ ಲಡ್ಕಾನಿಘೊಣಿ ಛಾ಼.
LUK 7:33 ಕಿಮ್‌ಕತೊ, ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಆಯೊ, ಯೋ ರೋಟೊ ಖಾತೋಥೊಕೊಯ್ನಿ ಅಜು಼ ದ್ರಾಕ್ಷಿನು ರಖ್ಹ್‌ ಪೀತೋಥೊಕೊಯ್ನಿ, ತುಮೆ ಇನ ಭೂತ್‌ ಧರಿರಾಖ್ಯುಸ್ ಕರಿ ಬೋಲೋಸ್.
LUK 7:34 ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರೋಸ್. ‘ತುಮೆ ಬೋಲೊಸ್ಕಿ, ದೇಖೋಲೊ, ಆ ಅದ್ಮಿ ಖಾಣನು ಮರ್‌ತೇಲ್‌ ಅಜು಼ ಪೀಕುಡ್ಕ, ಪಾಪಿಬಿ ಖರಾಬ್ ಅದ್ಮಿನೊ ದೋಸ್ತಿ” ಕರಿ.
LUK 7:35 ಕತೋಬಿ ದೇವ್ನಿ ಗ್ಯಾನ್‌ತೊ ಖ್ಹಾಚಸ್‌ಕರಿ, ಇನ ಮಾನಿಲ್ಯಾವಾಳಥೀಸ್ ಮಾಲುಮ್‌ಪಡಸ್” ಕರಿ ಬೋಲ್ಯೊ.
LUK 7:36 ಫರಿಸಾಯರ್‌ಮ ಏಕ್‌ ಜ಼ಣಾನೆ, ಯೇಸುನ ಖಾಣನ ಆವ್ಣುಕರಿ ಬೋಲಿಲಿದೊ. ಇನಾಖ್ಹಾಜೆ ಯೇಸು ಇನ ಘರೆ ಜೈ಼ನ್ ಖಾಣು ಖಾವಾನ ಬೇಶಿಗಯೊ.
LUK 7:37 ಯೋ ಗಾಮ್ಮ ಏಕ್‌ ಪಾಪೇಲಿ ತಯೇಡ ಥೀ. ಇನೆ ಯೇಸು ಯೋ ಫರಿಸಾಯರ್‌ನ ಘರ್‌ಮ ಛಾ಼ ಕರಿ ಮಾಲುಮ್‌ ಕರಿಲೀನ್, ಏಕ್‌ ಬಂಡಾನಿ ಶೀಶಿಮ ವಾನು ತೇಲ್ನ ಲೀನ್ ಹಿಜ್ಜಾ಼ ಆಯಿ.
LUK 7:38 ಯೋ ಯೇಸುನ ಪೀಠೆ ಇನ ಗೋಡಾಕನ ಭೀರಿನ್, ರೊವ್‌ತಿಹುಯಿನ್, ಇನ ಗೋಡಾನ ಆಂಝೇ಼ಖ್ಹು ಭಿಜೈ಼ನ್, ಬಾದ್‌ಮ ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ಯೇಸುನ ಗೋಡ ನೂಛಿ ಅಜು಼ ಇನ ಗೋಡಾನ ಬುಚ್ಚಾ಼ ದೀನ್, ಯೋ ವಾನು ತೇಲ್ನ ಇನ ಗೋಡಾಪರ್ ನಾಖಿ.
LUK 7:39 ಯೇಸುನ ಖಾಣನ ಬುಲಾಯೊಥೋತೆ ಫರಿಸಾಯರ್‌ನೆ ಅನ ದೇಖಿನ್, “ಆ ಪ್ರವಾದಿಸ್ ರ‍್ಹಯೊಹೋತ್ತೊ, ಇನ ಛೀಮುಕರಾತೆ ಕೋಣ್ ಕರಿ ಮಾಲುಮ್‌ ಕರಿಲಿದೊಹೋತ್; ಆ ಕಿಮ್ನು ಪಾಪ್‌ಮ ಜಿವ್ಣು ಚ಼ಲಾವ್‍ಕರಾಸ್‌ ಕರಿ ಮಾಲುಮ್‌ ಕರಿಲಿದೊಹೋತ್!”
LUK 7:40 ತದೆ ಯೇಸುನೆ, “ಸೀಮೋನ್, ತುನ ಬೊಲಾನಿ ಏಕ್‌ ವಾತ್ ಛಾ಼” ಕರಿ ಬೋಲ್ಯೊ. ತದೆ ಸೀಮೋನ್ನೆ, “ಗುರು, ಬೋಲ್” ಕರಿ ಬೋಲ್ಯೊ.
LUK 7:41 ತದೆ ಯೇಸುನೆ, “ಏಕ್‌ ಶೌಕಾರ್‌ನ ಬೇ ಜ಼ಣ ಕರ್‌ಜ್ಯಾ ಥಾ; ಏಕ್‌ ಜ಼ಣೊ ಪಾಚ಼್ ಖ್ಹೊ ರೂಪಾನ ಬಿಲ್ಲಾ ದೇವ್ಣುಥು; ಬಿಜ್ಜೇಕ್‌ ಜ಼ಣೊ ಅಡೈವಿಖ್ಹ್‌ ರೂಪಾನಬಿಲ್ಲಾ ದೇವ್ಣುಥು.
LUK 7:42 ಯೋ ಭೇ ಜ಼ಣಾನಾಬಿ ಫೇಡಾನ ಹಾತ್‌ ಕೋ ಹುಯೂನಿ. ಇನಖ್ಹಾಜೆ ಯೋ ಭೇ ಜ಼ಣಾನು ಕರಜ಼್ ಮ್ಹೆಂದಿದೊ. ಇಮ್‍ಕತೊ, ಯೋ ಭೇ ಜ಼ಣಾಮ ಕೋಣ್ ಯೋ ಶೌಕಾರ್‌ನ ಜಾ಼ಖ್ಹತ್ ಪ್ಯಾರ್ ಕರ್ಶೆ?” ಕರಿ ಬೋಲ್ಯೊ.
LUK 7:43 ಸೀಮೋನನೆ, “ಕಿನೆ ಜಾ಼ಖ್ಹತ್ ಕರಜ಼್ ಲೀರಾಖ್ಯೊಥೋಕಿ ಯೋಸ್‌ ಕರಿ ದೆಖಾವಸ್” ಕರಿ ಬೋಲ್ಯೊ. ತದೆ ಯೇಸುನೆ ಇನ, “ತುನೆ ಬರಾಬರ್‌ಥಿ ತೀರ್ಪ್‌ ದಿದೊ. ಕರಿ ಬೋಲ್ಯೊ.
LUK 7:44 ತದೆ ಯೇಸುನೆ ಯೋ ತಯೇಡ ಭಣಿ ಫರಿನ್, ಸೀಮೋನ್ನ, “ಆ ತಯೇಡಾನ ದೇಖ್ಯೊಕಿ ಶು? ಮೇ ತಾರ ಘರೆ ಆಯೊ, ತೂ ಮಾರ ಗೋಡಾನ ಪಾಣಿ ಕೋ ದಿದೋನಿ. ಕತೋಬಿ ಆತೊ, ಇನ ಡೋಳಾನ ಆಂಝೇ಼ಥಿ, ಮಾರ ಗೋಡ ಧೋಯಿನ್‌, ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ನೂಛಿ.
LUK 7:45 ತುನೆ ಮನ ಏಕ್‌ ಹಲ್ಲಾಬಿ ಬುಚ್ಚಾ಼ ಕೋ ದಿದೋನಿ, ಆತೊ ಮೇ ಮಹಿ ಆಯೊ ತಪ್‌ಥೊ ಮಾರ ಗೋಡಾನ ಬುಚ್ಚಾ಼ ದ್ಯವಾನ ಕೋ ಮ್ಹೇಲಿನಿ.
LUK 7:46 ತೂ ಮಾರ ಮುಡ್‌ಕ್ಯಾನ ತೇಲ್‌ ಲಗಾಡ್ಯೊಕೊಯ್ನಿ, ಕತೋಬಿ ಆತೊ ಮಾರ ಗೋಡಾನ ವಾನುತೇಲ್ ಲೋಥಿ.
LUK 7:47 ಇನಖ್ಹಾಜೆ ಮೇ ಬೋಲುಸ್ಕಿ, ಅನೆ ವತಾಳಿತೆ ಜಾ಼ಫ ಪ್ಯಾರ್ ದೇಖ್ಯೂತೆ, ಅನು ಪಾಪ್ ಘಣು ರ‍್ಹಯುತೋಬಿ ಮಾಪ್‌ ಹುಯಿಗಯು. ಕತೋಬಿ ಕಿನ ದರ್ರಾಖ್ಹು ಪಾಪ್ ಮಾಪ್‌ ಹುಯುಕಿ, ಯೋ ದರ್ರಾಖ್ಹು ಪ್ಯಾರ್ ಕರಾಸ್.
LUK 7:48 ತದೆ ಯೇಸುನೆ ಯೋ ತಯೇಡಾನ, “ತಾರು ಖ್ಹಾರೂಸ್ ಪಾಪ್ ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
LUK 7:49 ಯೇಸುನ ಜೋ಼ಡ್ಮ ಖಾಣನ ಬೆಠುಥೂತೆ ಖ್ಹಾರು, “ಪಾಪ್ ಖ್ಹಾರುಬಿ ಮಾಪ್‌ ಕರಿನಾಖಿದ್ಯವಾನ ಆ ಕೋಣ್?” ಕರಿ ಇವ್ಣ-ಇವ್ಣಾಮಸ್ ಬೋಲಿಲಿದು.
LUK 7:50 ಕತೋಬಿ ಯೇಸುನೆ ಯೋ ತಯೇಡಾನ, “ತಾರಿ ವಿಶ್ವಾಸಸ್ ತುನ ಬಚಾ಼ಡ್ಯು; ಶಾಂತಿಥಿ ಜಾ಼” ಕರಿ ಬೋಲ್ಯೊ.
LUK 8:1 ಅನ ಬಾದ್‌ಮ ಯೇಸು ಖ್ಹಾರ ಖ್ಹಯೇರ್‌ಮ ಅಜು಼ ಗಾಮ್ಮಾಕರಿ ಫರ್ತೊಹುಯಿನ್, ದೇವ್ನಿ ರಾಜ್ಯನಿ ಅಛ್ಛಿ ಖಬರ್‌ನ ಬೋಲ್ತೊನಿಕ್‌ಳ್ಯೊ. ಭಾರ ಜ಼ಣ ಶಿಷ್ಯರ್‌ಬಿ ಇನಜೋ಼ಡೆ ಥಾ.
LUK 8:2 ಥೋಡಿ ತಯೇಡಾಬಿ ಇನಜೋ಼ಡೆ ಥಿ. ಆ ತಯೇಡಾವ್‍ನ ಯೇಸುಥಿ ರೋಗ್‌-ರಾಯೊ ಅಛ್ಛು಼ ಹುಯೂಥು ಅಜು಼ ಭೂತ್‌ ಖ್ಹಾರು ನಿಕ್ಳಿಗಯೂಥು. ಅವ್ಣಾಮ, ಖ್ಹಾತ್ ಭೂತ್ ನಿಕ್ಳಿಗಯುಥೂತೆ (ಮಗ್ದಲ ಗಾಮ್‌ನಿ) ಮರಿಯ,
LUK 8:3 ಹೆರೋದನು ಘರ್‌ಭಾರ್‌ನು ಇಶಾಬ್ ದೆವಾಳೊ ಹುಯಿರ‍್ಹೊಥೋತೆ ಕೂಜನಿ ಬಾಯ್ಕೊ ಯೋಹಾನ್ನ, ಸುಸನ್ನ ಅಜು಼ ಕೈಯೆಕ್ಕಿ ಬಿಜಿ ತಯೇಡಾಬಿ ಥಿ. ಅವ್ಣೆ ಇವ್ಣು ಶೊಂತ್ ಪೈಶಾಥಿ ಯೇಸುನಿ ಅಜು಼ ಇನ ಶಿಷ್ಯರ್‌ನಿ ಚಾ಼ಕ್ರಿ ಕರ್ತಿಥಿಯೆ.
LUK 8:4 ಖ್ಹಯೇರೆ-ಖ್ಹಯೇರೇಥು ಕೈಯೆಕ್ಕಿ ಅದ್ಮಿಯೆ ಅವ್‌ಕರ್ತೂಥು; ಅಜು಼ ಅದ್ಮಿನಿ ಮೋಟಿ ಭೀಡ್ ಭರಾವಾದೀನ್‌, ಯೇಸುನೆ ಇವ್ಣುನ ಮತ್ಲಬ್‌ನಿ ಖೇಣಿಯೇಥಿ ಬೋಲ್ಯೊ.
LUK 8:5 ಏಕ್‌ ಜ಼ಣೊ ಪಂಡಾ ಛಿಡ್ಕಾನಖ್ಹಾಜೆ ಖೇತ್ರೆ ಗಯೊ, ಯೋ ಪಂಡಾ ಛಿಡ್ಕಾನಿ ವಖ್ಹತ್‌ಮ, ಥೋಡ ಪಂಡಾ ವಾಟ್ನ ಶೇಡೆ ಪಡೀನ್, ಖುಂದ್‌ಲೈಗು. ಆಬ್‍ಥು ಉಡಂತು ಜಿನಾವರ್ ಖ್ಹಾರು ಆಯಿನ್‌ ಇನ ಚ಼ರಿಲಿದು.
LUK 8:6 ಅಜು಼ ಥೋಡ ಪಂಡಾ ಬಂಡಾಪರ್‌ನಿ ಮಾಟಿಪರ್‌ ಪಡ್ಯು, ಯೋ ಫುಟಿನ್‌ ಮಾಟಿ ಭಿಗ್ಗಿಕೊಂತೆ ದೇಖಿನ್, ಖ್ಹುಕೈಗು.
LUK 8:7 ಅಜು಼ ಥೋಡ ಪಂಡಾ, ಕಾಟಾನ ಡಾಗ್‌ಮ ಪಡ್ಯು, ಆ ಕಾಟಾನು ಝಾ಼ಡಾ ಯೋ ಪಂಡಾವ್‍ನ ಜೋ಼ಡೆ ಫುಟಿನ್, ಶೋಶಿಯೇನ ದಾಬಿನಾಖ್ಯು.
LUK 8:8 ಬಿಜು಼ ಥೋಡ ಪಂಡಾ ಅಛ್ಛಿ ಜ಼ಮೀನ್‌ಪರ್‌ ಪಡೀನ್, ಫುಟಿನ್, ಏಕ್‌ ಪಂಡಾಪಿಟ್ ಖ್ಹೊ ಎತ್ರೆ ಪಂಡಾ ಮ್ಹೇಲ್ಯು”. ಆ ಖ್ಹಾರಿ ವಾತೆ ಬೋಲಾನ ಬಾದ್‌ಮ, ಯೇಸುನೆ, “ಕಿನ-ಕಿನ ಖ್ಹಮ್‌ಜಾ಼ನ ಕಾನ್‌ ಛಾ಼ಕಿ ಇವ್ಣೆ ಖ್ಹಮ್‌ಜಾ಼ದೆ!” ಕರಿ ಬೋಲ್ಯೊ.
LUK 8:9 ಯೇಸುನು ಶಿಷ್ಯರ್‌ ಇನ, “ಆ ಮತ್ಲಬ್‌ನಿ ಖೇಣಿನು ಮತ್‌ಲಬ್ ಶಾತ್‌” ಕರಿ ಪುಛಾ಼ಯು,
LUK 8:10 ಯೇಸುನೆ, “ದೇವ್ನಿ ರಾಜ್ಯನಿ ಖ್ಹಾಚ಼ನ ಮಾಲುಮ್ ಕರಿಲ್ಯವಾನಿ ಗ್ಯಾನ್ ತುಮೂನ ದೆವೈರ‍್ಹೂಸ್. ಕತೋಬಿ ಬಿಜಾ಼ಖ್ಹಾರ ಅದ್ಮಿನ ಡೋಳ ರ‍್ಹಯುತೋಬಿ ದೆಖಾವ್ಣುನಾತೆ, ಅಜು಼ ಕಾನ್‌ ರ‍್ಹಯುತೋಬಿ ಖ್ಹಮ್‌ಜಾ಼ವ್ಣುನಾತೆ ಇಮ್‌ ಮತ್ಲಬ್‌ನಿ ಖೇಣಿಯೇಥಿ ಬೋಲುಸ್” ಕರಿ ಜವಾಬ್‌ ದಿದೊ.
LUK 8:11 “ಆ ಮತ್ಲಬ್‌ನಿ ಖೇಣಿನು ಮತ್‌ಲಬ್ ಶಾತ್‌ಕತೊ, ಯೋ ಪಂಡು ಕತೊ ದೇವ್ನಿ ವಚನ್.
LUK 8:12 ಥೋಡು ಅದ್ಮಿ ವಚನ್ನ ಖ್ಹಮಜ಼್‌ತಾಸ್‌ನ ಶೈತಾನ್ ಆಯಿನ್, ಇವ್ಣೆ ನಂಬಿನ್, ಇವ್ಣ ರಕ್ಷಣೆ ನಾ ಮಳ್‌ಣು ಕರಿ, ಯೋ ವಚನ್ನ ಇವ್ಣ ಮನ್‌ಮಾಥು ಕಾಡಿನಾಖಿದೇಸ್. ಅವ್ಣೇಸ್ ವಾಟ್ನಶೇಡೆ ಪಡ್ಯಾತೆ ಪಂಡಾ ಹುಯಿರ‍್ಹೂಸ್.
LUK 8:13 ಥೋಡು ಅದ್ಮಿ ವಚನ್ನ ಖ್ಹಮಜ಼್‌ತಾಸ್‌ನ, ಖ್ಹುಶಿಥಿ ಇನ ಮಾನಿಲೇಸ್. ಅವ್ಣುನ ಜ಼ಡ್‌ಕೊಂತೆ ಇನಖ್ಹಾಜೆ ಜ಼ರಘಡಿಸ್ ಖಲಿ ನಂಬಸ್‍ ಶೋದನೆನ ಹಗಾಮ್ಮ ಪಡಿಜಾ಼ಸ್‌. ಅವ್ಣೇಸ್ ಬಂಡಾಪರ್ ಪಡ್ಯಾತೆ ಪಂಡಾ ಹುಯಿರ‍್ಹಾಸ್‌.
LUK 8:14 ಕಾಟಾನ ಝಿಕ್ರಾನು ಝ಼ಗೋಪರ್ ಪಡ್ಯಾತೆ ಪಂಡಾ ಕೆಹುಕತೊ, ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮ್‌ಜಾ಼ಸ್‌, ಕತೋಬಿ ಆ ಜಿವ್ಣಾನಿ ಪಶ್ತಾವ್ಣಿ, ಧನ್‌-ದೌಲತ್‌ನಿ ಭೋಗ್‌ಮ ಡುಬಿಜೈನ್, ಇವ್ಣು ಫಲ್ ಕೋದೇಯ್ನಿ.
LUK 8:15 ಪಲ್‍ವಾಯಿಹುಯಿ ಜ಼ಮೀನ್‌ಪರ್‌ ಪಡ್ಯುಹುಯು ದಾಣೊ ಕತೊ ದೇವ್ನಿವಚನ್ನ ಖ್ಹಮ್‌ಜಿನ್‌, ಖ್ಹಾಚು಼ ಅಜು಼ ಅಛ಼್ಛ ಮನ್‌ಮ ಇನ ರಾಖಿನ್, ಇವ್ಣೆ ಖ್ಹಮಾಳಿನ್ ಫಲ್ ದೇಸ್.
LUK 8:16 ಕೆಹು ಅದ್ಮಿಬಿ ದೀವೊ ಲಗಾಡಿನ್, ಹಂಡ್ಕಾನ ಹೇಟ್‌ ರ‍್ಹವೊ ನತರ್‌ಕಿ ಪಲಂಗ್‌ನ ಹೇಟ್ ರ‍್ಹವೊ ಲಪಾಡಿನ್ ಮ್ಹೇಲಾಕೊಯ್ನಿ. ಘರ್‌ಮ ಆವಾಳಾನ ಉಜಾ಼ಳು ದೆಖಾವಾನಿಘೋಣಿ, ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಸ್.
LUK 8:17 ಖ್ಹಾರಿಸ್ ಖ್ಹಾಚಿ ಭಾರ್‌ ನಿಕಳ್‌ಶೆ, ಅಜು಼ ಲಪೈರ‍್ಹೂತೆ ಖ್ಹಾರಸ್ನ ಢೂಂಡಿನ್ ಭಾರ್‌ ಲ್ಯಾವ್‌ಶೆ.
LUK 8:18 ಇನಖ್ಹಾಜೇಸ್, ತುಮೆ ಖ್ಹಮ್‍ಜಾ಼ನಿ ವಖ್ಹತ್‌ಮ, ಹೊಷಾರ್‌ಥಿ ಖ್ಹಮ್‌ಜೊ಼; ಶನಕತೊ ಕಿನಾಕನ ಛಾ಼ಕಿ ಇವ್ಣುನ ಬಿಜೂ಼ಬಿ ದೆವಾವ್‌ಶೆ, ಕತೋಬಿ ಕಿನಾಕನ ಕೊಯ್ನಿಕಿ ಇವ್ಣಾಕಂಥು, ಯೋ ಇನುಕರಿ ಸೋಚಾಸ್ತೆ ಇನಾಬಿ ಛಿನೈಲಿಶೆ.
LUK 8:19 ತದೆ ಯೇಸುನಿ ಆಯಾಬಿ ಇನ ಭೈಯೇ ಯೋ ಥೋತೆ ಹಿಜ್ಜಾ಼ ಆಯಿನ್, ಅದ್ಮಿನಿ ಝೂ಼ಂಡ್‌ಥೀತೆ ಇನಖ್ಹಾಜೆ ಯೇಸುನ ಖನ್ನೆ ಆವಾನ ಕೋ ಹುಯೂನಿ.
LUK 8:20 ಹಿಜ್ಜಾ಼ ಥೂತೆ ಇವ್ಣಾಮ ಏಕ್‌ ಜ಼ಣಾನೆ ಯೇಸುನ, “ತಾರಿ ಆಯಾಬಿ ತಾರ ಭೈಯೇ ಅಯಿನ್ ತುನ ದೇಕ್ಣು ಕರಿ, ಭಾರ್‌ ಭಿಯ್ಯುಸ್” ಕರಿ ಬೋಲ್ಯು.
LUK 8:21 ತದೆ ಯೇಸುನೆ ಇವ್ಣ ಖ್ಹಾರಾನ, “ಕೋಣ್ ದೇವ್ನಿ ವಚನ್ನ ಖ್ಹಮ್‌ಜಿನ್‌, ಇನೀನಿಘೋಣಿ ಚಾ಼ಲಸ್ಕಿ ಇವ್ಣೆಸ್ ಮನ ಆಯಾಬಿ, ಭೈಯೇಬಿ ಹುಯಿರುಸ್‌” ಕರಿ ಜವಾಬ್‌ ದಿದೊ.
LUK 8:22 ಏಕ್‌ ದನ್ನೆ ಯೇಸು ಇನ ಶಿಷ್ಯರ್‌ನ ಜೋ಼ಡೆ, ಏಕ್‌ ಡೋಣ್‌ಮ ಚ಼ಢೀನ್ ಬೇಶಿಗಯೊ, ಅಜು಼ ಇವ್ಣುನ, “ಚಾ಼ಲೊ, ಅಪ್ಣೆ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ನ ಜೈ಼ಯೆ” ಕರಿ ಬೋಲ್ಯೊ. ತದೆ ಇವ್ಣೆ ಡೋಣ್ಣಾ ಪಾಣಿಮ ಧಕೇಲಿನ್ ನಿಕ್‌ಳ್ಯು.
LUK 8:23 ಇವ್ಣೆ ಜ಼ವ್‍ಕರ್ತುಥೂತೆ ತದೆ ಯೇಸುನ ನಿಂದರ್‌ ಆಯಿನ್ ಖ್ಹುಯಿಗಯೊ. ಏಕ್‌ದಮ್ ಮೋಟೊ ವಹಿರೊ ವಾಗಿನ್, ಡೋಣ್‌ಮ ಪಾಣಿ ಭರಾವಲಗ್ಯೂಥು. ಅನೇಥಿ ಇವ್ಣೆ ಘಣಿ ಮುಶ್ಕಿಲ್‌ಮ ಪಡಿಗಯ.
LUK 8:24 ತದೆ ಶಿಷ್ಯರ್‌ ಖ್ಹಾರು ಯೇಸುಕನ ಐನ್, “ಗುರು, ಗುರು, ಹಮೆ ಮರ್‌ವಾನ ಆಯಾನಿ!” ಕರಿ ಬೋಲ್ಯ. ತದೆ ಯೇಸುನೆ ಉಠೀನ್ ವಹಿರನಾಬಿ, ಪಾಣಿನು ಝೋ಼ಕಾಳ್ಯನಾಬಿ ಗುರ್‌ಕಾಯೊ. ಗುರ್‌ಕಾವಖ್ಹತರ್ ಯೋ ಭೀರಿಗಯು ಅಜು಼ ಖ್ಹೊಪೊ ಹುಯಿಗಯು.
LUK 8:25 ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ತುಮಾರಿ ವಿಶ್ವಾಸ್‌ ಕಿಜ಼್ಜಾ ಗೈ?” ಕರಿ ಪುಛಾ಼ಯೊ. ಕತೋಬಿ ಇವ್ಣೆ ಆಶ್ಚರ್ಯಖಾದು ಅಜು಼ ಡರಿಗಯು, ಅಜು಼ ಬೋಲ್ಯೂಕಿ, “ಆ ಅದ್ಮಿ ಕೋಣ್ ಉಶೆ? ವಹಿರನಾಬಿ, ಝೋ಼ಕಾಳ್ಯನಾಬಿ ಹುಕುಮ್‌ ದೇಸ್‌ನಿ; ಯೋಅಖ್ಖುಬಿ ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ-ಏಕ್‌ ಬೋಲಿಲಿದು
LUK 8:26 ಯೇಸು ಅಜು಼ ಇನು ಶಿಷ್ಯರ್‌ ಗಲಿಲಾಯಥು ಗೆರಸೇನವಾಳನು ತಬರ್‌ಖಾನ ಆಯಿನ್ ಪೋಚ್ಯಾ.
LUK 8:27 ಯೇಸು ಕನಾರಿಪರ್ ಉತರ್‌ತಸ್ನ, ಯೋ ಗಾಮ್‌ನು ಏಕ್‌ ಜ಼ಣೊ ಇನಖ್ಹಾಮ್ಣೆ ಆಯು, ಇನ ಭೂತ್‌ ಖ್ಹಾರು ಧರಿರಾಖ್ಯುಥು. ಆ ಕೈಯೆಕ್ಕಿ ದನ್‌ಥು ಲುಂಗ್ಡುಸ್ ಫೇರ‍್ಯುಥು ಕೊಯ್ನಿ ಅಜು಼ ಘರ್‌ಮಾಬಿ ರ‍್ಹೇತೂಥು ಕೊಯ್ನಿ. ಮಖ್ಹಾಣ್ಯನಿ ಘವಿಯೆಮಾಸ್ ರ‍್ಹೇತೂಥು.
LUK 8:28 ಇನೆ ಯೇಸುನ ದೇಖಿನ್ ಬಳೇಳಿನ್‌, ಇನಖ್ಹಾಮ್ಣೆ ಪಡೀನ್, ಚೋ಼ರ್ ಆವಾಜ಼್‌ಥಿ, “ಪರಮಂಡಲ್‌ನೊ ದೇವ್ನ ಛಿಯ್ಯಾ, ಯೇಸು! ಮಾರೇಥಿ ತುನ ಶಾತ್‌ ಛಾ಼? ಮನ ಖ್ಹತೈಶ್‌ ನಕೊ ಕರಿ ತುನ ಗಿಂಗಾವುಸ್” ಕರಿ ಬೋಲಿಲಿದೊ.
LUK 8:29 ಶನಕತೊ, “ಆ ಅದ್ಮಿನ ಮ್ಹೆಂದಿನ್ ಜಾ಼!” ಕರಿ ಯೇಸುನೆ ಯೋ ಭೂತ್‌ನ ಹುಕುಮ್‌ ದಿದೋಥೊ. ಘಣಿ ಹಲ್ಲ ಯೋ ಭೂತ್‌ ಇನ ಧರ್ತುಥು, ಎತ್ರೇಸ್ ಕಾಹೆತೆ ಯೋ ಅದ್ಮಿನ ಕೋಂಡಿಘಾಲಿನ್, ಹಾತ್-ಗೋಡಾನ ಖ್ಹಂಕಳ್‌ಥಿ ಭಾಂದ್ಯುತೋಬಿ, ಯೋ ಖ್ಹಂಕ್‌ಳಿನ ತೋಡಿ ನಾಕ್ತೋಥೊ ಅಜು಼ ಯೋ ಭೂತ್ ಇನ ಉಜ್ಜಾ಼ಡಿ ಝ಼ಗೋಮ ನಖ್ಹಾಡ್‌ತೂಥು.
LUK 8:30 ಯೇಸುನೆ ಇನ, “ತಾರು ನಾಮ್ ಶಾತ್?” ಕರಿ ಪುಛಾ಼ವಖ್ಹತರ್, ಇನೆ, “ಮಾರು ನಾಮ್ ಝೂ಼ಂಡ್‌” ಕರಿ ಜವಾಬ್‌ ದಿದೊ. ಶನಕತೊ ಇನ ಘಣು ಭೂತ್ ಧರಿರಾಖ್ಯುಥು.
LUK 8:31 ಯೋ ಭೂತ್‌ಖ್ಹಾರು ಯೇಸುನ, “ಹಮೂನ ಅಂತಸ್‌ಕೊಂತೆ ಪಾತಾಳ್ಮ ನಕೊ ನಖ್ಹಾಡ್” ಕರಿ ಗಿಂಗೈಲಿದು.
LUK 8:32 ಹಿಜ್ಜಾ಼ ಖನ್ನೆಸ್‌ ಥೂತೆ ಪಹಾಡ್‌ಪರ್ ಡೂಕರ್‌ನಿ ಏಕ್‌ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು. ತದೆ ಯೋ ಭೂತ್ ಖ್ಹಾರು, “ಯೋ ಖ್ಹಾರ ಡೂಕರ್‌ಮ ಪೇಖ್ಹಾನ ಹಮೂನ ಹುಕುಮ್ ದೇ” ಕರಿ ಯೇಸುನ ಗಿಂಗೈಲಿದು. ಯೇಸುನೆ ಇಮ್ಮಸ್ ಹುವಾದೆ ಕರಿ ಬೋಲಾಖ್ಹತರ್,
LUK 8:33 ಭೂತ್‌ಖ್ಹಾರು ಯೋ ಅದ್ಮಿನ ಮಹಿತು ಭಾರ್ ಆಯಿನ್, ಡೂಕರ್‌ಮ ಪೇಶಿಗಯು. ತದೆ ಯೋ ಡೂಕರ್‌ನಿ ಝೂ಼ಂಡ್‌ ನಾಶಿನ್, ಕಥಾರ್‌ನಿ ಝ಼ಗೋಥು, ದರ‍್ಯಾವ್‌ಮ ಪಡೀನ್, ದಮ್‌ ಘೋಟೈನ್‌ ಮರಿಗಯು.
LUK 8:34 ಡೂಕರ್‌ ಚ಼ರಾವವಾಳು ಚಾ಼ಲ್ಯುತೆ ಇನ ದೇಖಿನ್, ನಾಶಿಜೈ಼ನ್, ಯೋ ಗಾಮ್ಮಾಬಿ ಅಜು಼ ಅಶ್‌ಪಿಶ್‌ನು ಖೇತರ್‌ಮಾನು ಅದ್ಮಿನ ಚಾ಼ಲ್ಯುತೆ ಇನಿ ಬಾರೇಮ ಬೋಲ್ಯು.
LUK 8:35 ತದೆ ಯೋ ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಾನಖ್ಹಾಜೆ ಯೇಸು ಥೋತೆ ಹಿಜ್ಜಾ಼ ಆಯು. ತದೆ ಭೂತ್‌ಖ್ಹಾರು ನಿಕ್ಳಿಗಯುಥೂತೆ ಯೋ ಅದ್ಮಿ ಲುಂಗ್ಡಾವ್‍ನ ಪೇರ‍್ಹಿಲಿನ್‌, ಅಛ್ಛಿ ಖ್ಹಯಾಲ್‌ಥಿ, ಯೇಸುನ ಗೋಡಾಕನ ಬೆಠುಥೂತೆ ದೇಖಿನ್, ಇವ್ಣೆ ಖ್ಹಾರು ಡರಿಗಯು.
LUK 8:36 ಚಾ಼ಲ್ಯುತೆ ಯೋ ಖ್ಹಾರಾನ ದೇಖ್ಯೂತೆ ಇವ್ಣೆ, ಯೋ ಭೂತ್ ಧರಿರಾಖ್ಯುಥೂತೆ ಇನ ಕಿಮ್ ಅಛ್ಛು಼ಹುಯು ಕರಿ ಯೋ ಖ್ಹಾರ ಅದ್ಮಿನ ಬೋಲಿವತಾಳ್ಯು.
LUK 8:37 ಗೆರಸೇನವಾಳನು ತಬರ್‌ಖಾನು ಖ್ಹಾರಾನ ಘಣು ಡರ್‌ಲಾಗ್ಯೂತೆ ಇನಖ್ಹಾಜೆ, ಇವ್ಣೆ ಯೇಸುನ, “ತೂ ಹಮೂನ ಮ್ಹೆಂದಿನ್ ಜಾ಼” ಕರಿ ಬೋಲಿಲಿದು. ಇನಖ್ಹಾಜೆ ಯೇಸು ಡೋಣ್ಣಾ ಚ಼ಢೀನ್‌, ಪಾಛು಼ ಫರಿ ಚ಼ಲೆಗಯೊ.
LUK 8:38 ಯೇಸು ಜಾ಼ವಾನಿ ವಖ್ಹತ್‌ಮ, ಭೂತ್‌ಖ್ಹಾರು ನಿಕ್ಳಿಗಯೂತೆ ಯೋ ಅದ್ಮಿ ಯೇಸುನ, “ಮೇಬಿ, ತಾರ ಕೇಡೆಸ್ ರ‍್ಹವುಸ್‌” ಕರಿ ಯೇಸುನ ಗಿಂಗೈಲಿದೊ.
LUK 8:39 ಕತೋಬಿ ಯೇಸುನೆ ಇನ, “ತೂ ಪಾಛೊ಼ ತಾರ ಘರೆ ಜಾ಼ ಅಜು಼ ದೇವ್ನೆ ತಾರಖ್ಹಾಜೆ ಶಶ್ಶಾತ್ ಕರ‍್ಯೊ ಕರಿ ಬೋಲ್” ಕರಿ ಬೋಲಿನ್ ಮೋಕ್ಲಿದಿದೊ. ಯೋ ಅದ್ಮಿ ಹಿಜ್ಜಾ಼ಥು ಚ಼ಲ್ಯೂಜೈ಼ನ್, ಯೇಸುನೆ ಇನ ಶಶ್ಶಾತ್ ಕರ‍್ಯೊ ಕರಿ ಯೋ ಗಾಮ್ಮಾಕರಿ ಬೋಲ್ತುನಿಕ್‌ಳ್ಯು
LUK 8:40 ಯೇಸು ಪಾಛೊ಼ಫರಿ ಆವಾದಿನ್ ಅದ್ಮಿಖ್ಹಾರು ಇನ ಬುಲೈಲಿದು, ಶನಕತೊ ಇವ್ಣೆ ಖ್ಹಾರು ಯೇಸುನಖ್ಹಾಜೆ ಜ಼ಪಿರ‍್ಹೂಥು.
LUK 8:41 ತದೆ ಸಬಾಮಂದಿರ್‌ನೊ ಅದಿಕಾರಿ ಹುಯಿರ‍್ಹೊಥೋತೆ ಯಾಯಿರ ಕರಿ ನಾಮ್ನೊ ಏಕ್‌ ಜ಼ಣಾನೆ ಹಿಜ್ಜಾ಼ ಆಯಿನ್, ಯೇಸುನ ಗೋಡಾಪರ್ ಪಡೀನ್, ಇನ ಘರೆ ಆವ್ಣುಕರಿ ಯೇಸುನ ಗಿಂಗೈಲಿದೊ.
LUK 8:42 ಶನಕತೊ, ಭಾರ ವರಖ್ಹ್‌ನಿ ಹುಯಿರ‍್ಹಿಥೀತೆ, ಇನಿ ಏಕ್‌ನಿ-ಏಕ್‌ ಛೋ಼ರಿ, ಮರಾನಿ ಹಾಲ್‌ಮ ಥಿ. ಯೇಸು ಯಾಯಿರನ ಘರೆ ವಳ್ಯೊಜಾ಼ತೊಥೋತೆ ತದೆ, ಅದ್ಮಿನಿ ಭೀಡ್ ಇನ ಅಶ್‌ಪಿಶ್‍ ಭರೈನ್ ಆಯು.
LUK 8:43 ಯೋ ಭೀಡ್‌ಮ ಭಾರ ವರಖ್ಹ್‌ಥು, ಮುಟ್ನು ರೋಗ್‌ಥೀತೆ ಏಕ್‌ ತಯೇಡ ಥಿ. ಯೋ ಇನಾಕನ ಥೂತೆಖ್ಹಾರುಸ್ ಖರ್ಚಿ ಕರಿತೋಬಿ, ಕೋಣ್‌ಬಿ ಇನ ಅಛ್ಛು಼ ಕೊಕರ‍್ಯುನಿ.
LUK 8:44 ತದೆ ಯೋ ತಯೇಡ ಝೂ಼ಂಡ್‌ಮ ಯೇಸುನ ಪೀಠೇಥು ಐನ್, ಇನ ಲುಂಗ್ಡಾನ ಕನಾರೀನ ಛೀಮಿ. ಛೀಮ್‌ತಾಸ್ನ ಇನ ಲ್ಹೋಯಿ ಝ಼ರಾನು ಭೀರಿಗಯು.
LUK 8:45 ತದೆ ಯೇಸುನೆ, “ಮನ ಛೀಮ್ಯೂತೆ ಕೋಣ್?” ಕರಿ ಪುಛಾ಼ಯೊ. ತಮಾಮ್‌ ಅದ್ಮಿನೆ ‘ಮೇ ಕಾಹೆ, ಮೇ ಕಾಹೆ’ ಕರಿ ಬೋಲ್ತಾನ, ಪೇತ್ರನೆ ಯೇಸುನ, “ಗುರು, ಅದ್ಮಿನಿ ಭೀಡ್ ತಾರ ಅಶ್‌ಪಿಶ್‍ ಭರೈನ್, ತಾರಪರ್ ಪಡುಕರಾಸ್‌ನಿ” ಕರಿ ಬೋಲ್ಯೊ
LUK 8:46 ತೋಬಿ ಯೇಸುನೆ, “ಕೋಣ್‌ಕಿ ಏಕ್‌ ಜ಼ಣು ಮನ ಛೀಮ್ಯು. ಮಾರೇಥಿ ಶಕತ್ ಗೈತೆ ಮನ ಮಾಲುಮ್‌ಪಡ್ಯು” ಕರಿ ಬೋಲಾಖ್ಹತರ್,
LUK 8:47 ಯೋ ತಯೇಡ ಅಜು಼ ಮೇ ಲಪಿರ‍್ಹಾವಾನ ಉಶೆಕೊಯ್ನಿ ಕರಿ ಮಾಲುಮ್‌ ಕರಿಲೀನ್, ಕಾಪ್ತಿಹುಯಿನ್‌ ಐನ್ ಯೇಸುನ ಗೋಡಾಪರ್ ಪಡೀನ್, ಇನೆ ಶನಖ್ಹಾಜೆ ಛೀಮೀತೆ ಕರಿ ಅಖ್ಖಾನ ಖ್ಹಾಮೆ ಬೋಲಿ. ಎತ್ರೇಸ್ ಕಾಹೆತೆ ಛೀಮ್‌ತಾಸ್‌ನ ಇನ ಅಛ್ಛು಼ ಹುಯಿಗಯು ಕರಿ ಬೋಲಿ.
LUK 8:48 ತದೆ ಯೇಸುನೆ ಇನ, “ಛೋ಼ರಿ, ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಹುಯು. ಶಾಂತಿಥಿ ಜಾ಼” ಕರಿ ಬೋಲ್ಯೊ.
LUK 8:49 ಯೇಸು ಆ ವಾತೆ ಬೋಲುಕರಾನಿ ವಖ್ಹತ್‌ಮ, ಸಬೆ ಭರಾವಾನು ಮಂದಿರ್‌ನು ಅದಿಕಾರಿ ಭಣಿವಾಳು ಏಕ್‌ ಜ಼ಣು ಐನ್ ಯಾಯಿರನ, “ತಾರಿ ಛೋ಼ರಿ ಮರಿಗೈ, ಅಜು಼ ಗುರುನ ಖ್ಹತಾವ್ ನಕೊ” ಕರಿ ಬೋಲ್ಯು.
LUK 8:50 ಕತೋಬಿ ಯೇಸುನೆ ಅನ ಖ್ಹಮ್‌ಜಿನ್‌, ಯಾಯಿರನ, “ಡರ್‌ನಕೊ, ಖಲಿ ವಿಶ್ವಾಸ್ ರ‍್ಹವಾದೆ, ಇನ ಅಛ್ಛು಼ ಉಶೆ” ಕರಿ ಬೋಲ್ಯೊ.
LUK 8:51 ಯೇಸು ಯೋ ಘರ್‌ಕನ ಆವಾದಿನ್ ಪೇತ್ರ, ಯೋಹಾನ, ಯಾಕೋಬ್ ಅಜು಼ ಯೋ ಛೋ಼ಕ್ರಿನ ಆಯ-ಬಾ ಇವ್ಣುನ ಮ್ಹೆಂದಿನ್, ಕಿನಾಬಿ ಇನಾಕೇಡೆ ಮಹಿ ಕೊ ಆವಾದಿದೋನಿ.
LUK 8:52 ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿ ಯೋ ಛೋ಼ಕ್ರಿನಖ್ಹಾಜೆ ರೊವ್‌ತುಹುಯಿನ್, ಛಾ಼ತಿ ಕೂಟುಕರ್ತೂಥೂ. ಅನ ದೇಖಿನ್ ಯೇಸುನೆ, “ನಕೊ ರೋವೊ, ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!” ಕರಿ ಬೋಲ್ಯೊ.
LUK 8:53 ಛೋ಼ಕ್ರಿ ಮರಿಗೈ ಕರಿ ಇವ್ಣುನ ಮಾಲುಮ್‍ಥೂತೆ ಇನಖ್ಹಾಜೆ, ಇವ್ಣೆ ಖ್ಹಾರೂಸ್ ಯೇಸುನ ದೇಖಿನ್ ಹಾಶ್ಯು.
LUK 8:54 ಕತೋಬಿ ಯೇಸುನೆ ಯೋ ಛೋ಼ಕ್ರಿನೊ ಹಾತ್‌ ಧರೀನ್, “ಪಪ್ಪಾ, ಉಪ್ಪರ್ ಉಟ್!” ಕರಿ ಬೋಲ್ಯೊ.
LUK 8:55 ತದ್‌ನು-ತದ್ದೇಸ್ ಇನ ಜಾನ್‌ಆಯು. ಯೋ ಉಠೀನ್ ಭೀರಿಗೈ. ತದೆ ಯೇಸುನೆ ಇವ್ಣುನ, “ಅನ ಖಾವಾನ ಶಾತ್‌ತೋಬಿ ದೆವೊ” ಕರಿ ಬೋಲ್ಯೊ.
LUK 8:56 ಯೋ ಛೋ಼ಕ್ರಿನ ಆಯ-ಬಾನೆ ಆಶ್ಚರ್ಯಖಾದು, ಕತೋಬಿ ಯೇಸುನೆ ಅನಿ ಬಾರೇಮ ಕಿನಾಬಿ ನಾ ಬೋಲ್‌ನು ಕರಿ ಇವ್ಣುನ ಹುಕುಮ್ ದಿದೊ
LUK 9:1 ಯೇಸುನೆ ಭಾರ ಜ಼ಣ ಅಪೊಸ್ತಲರ‍್ನ ಏಕ್‌ದಮ್ ಬುಲೈನ್, ಇವ್ಣುನ ಭೂತ್‌ಖ್ಹಾರು ಕಾಡಾನ ಅಜು಼ ರೋಗ್-ರಾಯೊ ಅಛ್ಛು಼ಕರಾನ ಶಕತ್‍ ಅಜು಼ ಅದಿಕಾರ್ ದಿದೊ.
LUK 9:2 ಅಜು಼ ದೇವ್ನಿ ರಾಜ್ಯನಿ ಬಾರೇಮ ಬೋಲಿವತಾಳಾನ ಅಜು಼ ರೋಗಿನ ಅಛ್ಛು಼ ಕರಾನ ಇವ್ಣುನ ಮೋಕ್‌ಲ್ಯೊ.
LUK 9:3 ಮೋಕ್ಲಾನಿ ವಖ್ಹತ್‌ಮ ಇವ್ಣುನ, “ಜಾ಼ವಾನಿ ವಖ್ಹತ್‌ಮ ತುಮೆ ಶಾತ್ಬಿ ನಕೊ ಲೀಜಾ಼ವೊ: ಲಠ್ಠೊ ರ‍್ಹವೊ, ಝೋ಼ಳಿ ರ‍್ಹವೊ, ಖಾಣಾನು ಬುತ್ತು ಅಜು಼ ಪೈಶಾ ರ‍್ಹವೊ ನಕೊ; ಬಿಜೇಕ್ ಕುಡ್‌ತು ಜಿನ್‌ಕುಬಿ ನಕೊ.
LUK 9:4 ತುಮೂನ ಖೆವ ಘರ್‌ಮ ಬುಲೈಲೇಸ್ಕಿ, ಯೋ ಗಾಮ್‍ ಮ್ಹೇಲಿನ್ ಜಾ಼ವಾಲಗೂಬಿ ಯೋಸ್ ಘರ್‌ಮ ರ‍್ಹವಾಕರೊ.
LUK 9:5 ಅಜು಼ ಖೆವ ಗಾಮ್ಮತೋಬಿ ತುಮೂನ ನಾ ಬುಲೈಲಿದುತೊ, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವೊ ಅಜು಼ ತುಮಾರ ಗೋಡಾನ ಲಾಗಾತೆ ಧೂಳ್‌ನ ಝ಼ಟ್‌ಕಿ ದೆವೊ. ಯೋ ಇವ್ಣುನ ಝೇತಾವನು ಸಾಕ್ಷಿ ಹುಯಿರ‍್ಹಿಶೆ.
LUK 9:6 ತದೆ ಶಿಷ್ಯರ್‌ಖ್ಹಾರು ಹಿಜ್ಜಾ಼ಥು ನಿಕ್ಳಿನ್, ಏಕ್‌ ಗಾಮ್‌ಥು ಬಿಜೇಕ್ ಗಾಮ್‍ ಜಾ಼ತುಹುಯಿನ್, ಹರೇಕ್‍ಆಡಿ ದೇವ್ನಿ ಸುವಾರ್ತೆನ ಬೋಲ್ತುಹುಯಿನ್, ರೋಗ್‌ಮ ರ‍್ಹಾವಾಳನ ಅಛ್ಛು಼ಕರ‍್ಯು
LUK 9:7 ಗಲಿಲಾಯ ತಬರ್‌ಖಾಮ ಅದಿಕಾರ್ ಚ಼ಲಾವವಾಳೊ ಹೆರೋದನೆ, ಚಾ಼ಲುಕರಾತೆ ಆ ಖ್ಹಾರಾನಿ ಬಾರೇಮ ಖ್ಹಮ್‌ಜಿನ್‌, ಇನ ಘಣು ಕಲಾವ್ಣಿ ಹುಯು. ಶನಕತೊ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್ ಕರಿ ಥೋಡು ಅದ್ಮಿ ಬೋಲುಕರ್ತೂಥು.
LUK 9:8 ಅಜು಼ ಥೋಡು ಜ಼ಣು ಎಲೀಯ ಅಪ್ಣ ಇಚ಼್‌ಮ ಐರ‍್ಹೋಸ್ ಕರಿ, ಬಿಜು಼ ಥೋಡು ಜ಼ಣು ಜೂ಼ನ ಹಗಾಮ್‍ನೊ ಪ್ರವಾದೀಮ ಏಕ್‌ ಜ಼ಣೊ ಜಿವ್ತೊಹುಯಿನ್ ಉಠಿ ಐರ‍್ಹೋಸ್ ಕರಿ ಬೋಲಿಲೆವ್‍ಕರ್ತೂಥು.
LUK 9:9 ಕತೋಬಿ ಹೆರೋದನೆ, “ಯೋಹಾನನು ಮುಡ್‌ಕ್ಯು ಕತ್ರಾಯೊತೆ; ಕತೋಬಿ ಆ ಕೋಣ್? ಅನಿ ಬಾರೇಮ ಅತ್ರುಖ್ಹಾರು ಮೇ ಖ್ಹಮ್‌ಜು಼ಸ್‌ನಿ?” ಕರಿ ಬೋಲಿನ್ ಯೇಸುನ ದೇಕ್ಣು ಕರಿ ಕರುಕರ್ತೊಥೊ
LUK 9:10 ಅಪೊಸ್ತಲರ್ ಖ್ಹಾರು ಪಾಛು಼ಫರಿ ಐನ್, ಇವ್ಣೆ ಕರ‍್ಯುತೆ ಅಖ್ಖಾನ ಯೇಸುನ ಖ್ಹಾಮ್ಣೆ ಬೋಲ್ಯು. ತದೆ ಯೇಸುನೆ ಇವ್ಣುನ ಅಲಕ್ ಕಾಡಿಲೀನ್, ಇನಜೋ಼ಡೆ ಬೆತ್ಸಾಯಿದ ಕರಿ ಗಾಮ್‌ನ ಬುಲೈಲಿ ಗಯೊ.
LUK 9:11 ಅದ್ಮಿನಿ ಭೀಡ್ ಅನ ಖ್ಹಮ್‌ಜಿನ್‌, ಯೇಸುನ ಪೀಠೆ ಗಯು ಯೇಸುನೆ ಇವ್ಣುನ ಬುಲೈಲಿನ್, ಇವ್ಣುನ ದೇವ್ನಿ ರಾಜ್ಯನಿ ಬಾರೇಮ ಬೋಲ್ಯೊ. ಅಜು಼ ಕಿನ-ಕಿನ ರೋಗ್‌ಥಿ ಅಛ್ಛು಼ ಹೋಣುಥೂಕಿ ಇವ್ಣುನ ಅಛ್ಛು಼ ಕರ‍್ಯೊ.
LUK 9:12 ದನ್ ಡುಬಾಲಗ್ಯೋಥೊ, ತದೆ ಯೋ ಭಾರ ಜ಼ಣ ಶಿಷ್ಯರ್‌ ಯೇಸುಕನ ಐನ್, “ಆ ಅದ್ಮಿನಿ ಝೂ಼ಂಡ್‌ನ ಮೋಕ್ಲಿದೆ, ಅವ್ಣೆ ಅಶ್‌ಪಿಶ್‌ ಛಾ಼ತೆ ಖ್ಹಾರ ಗಾಂಬ್‌ಡಿಮ ಜೈ಼ನ್, ಖಾವಾನ ಖಾಣು, ಖ್ಹುವ್ವಾನ ಝ಼ಗೋನ ಢೂಂಡಿಲ್ಯವಾದೆ. ಶನಕತೊ ಆ ಉಜ್ಜಾ಼ಡಿ ಝ಼ಗೊ” ಕರಿ ಬೋಲ್ಯ.
LUK 9:13 ತದೆ ಯೇಸುನೆ, “ತುಮೇಸ್ ಅವ್ಣುನ ಖಾಣು ದೆವೊ” ಕರಿ ಇವ್ಣುನ ಬೋಲ್ಯೊ. ತದೆ ಇವ್ಣೆ, “ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಮ್ಹೆಂದಿನ್, ಶಾತ್ಬಿ ಕೊಯ್ನಿ. ಹಮೆ ಜೈ಼ನ್ ಆ ಖ್ಹಾರ ಅದ್ಮಿನಖ್ಹಾಜೆ ಖಾಣು ಮೋಲ್‌ಲೀನ್ ಆವ್ಣುಕಿ ಶು?” ಕರಿ ಪುಛಾ಼ಯ.
LUK 9:14 ಹಿಜ್ಜಾ಼ ಪರ್ಖ್ಹಾ ಅದ್ಮಿಸ್‌ ಪಾಚ಼್ ಹಜಾ಼ರ್‌ಜ಼ಣು ಥೂ. ತದೆ ಯೇಸುನೆ ಇನ ಶಿಷ್ಯರ್‌ನ, “ಅದ್ಮಿನ ಖ್ಹಾರು ಏಕೇಕ್‌ ಶಾಲ್‌ಮ ಅಡೈವಿಖ್ಹ್‌-ಅಡೈವಿಖ್ಹ್‌ ಅದ್ಮಿ ಕರೀನ್ ಹೇಟ್ ಬೆಖ್ಹಾಡೊ” ಕರಿ ಬೋಲ್ತಾನ,
LUK 9:15 ಇವ್ಣೆ ಇಮ್ಮಸ್ ಬೆಖ್ಹಾಡ್ಯ.
LUK 9:16 ಬಾದ್‌ಮ ಯೇಸುನೆ ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾನ ಪಾಡಿಲೀನ್, ಪರಲೋಕ್‌ ಭಣಿ ದೇಖಿನ್, ಯೋ ರೋಟಾ ಅಜು಼ ಮಾಛ್ಲಾ಼ವ್‍ನಟೇಕೆ ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಅದ್ಮಿ ಖ್ಹಾರಾವ್‌ನ ವಾಟ ಪಡಾನಟೇಕೆ ಶಿಷ್ಯರ್‌ನ ಹಾತ್‌ಮ ದಿದೊ.
LUK 9:17 ಅದ್ಮಿಖ್ಹಾರು ಪೇಟ್‌ಭರಿ ಖೈನ್, ಬಶ್‌ಹುಯು ಅಜು಼ ಶಿಷ್ಯರ್‌ನೆ ಉಭ್‌ರ‍್ಯುತೆ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯ.
LUK 9:18 ಏಕ್‌ ದನ್ನೆ ಯೇಸು ಎಕ್ಲೋಸ್ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನ ಶಿಷ್ಯರ್‌ ಇನಾಕನ ಆಯ. ತದೆ ಯೇಸುನೆ ಇವ್ಣುನ, “ಅದ್ಮಿಖ್ಹಾರು ಮೇ ಕೋಣ್ ಕರಿ ಬೋಲಾಸ್?” ಕರಿ ಬೋಲ್ಯೊ.
LUK 9:19 ತದೆ ಶಿಷ್ಯರ್‌ನೆ, “ಥೋಡು ಅದ್ಮಿ ತುನ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಕರಿ ಬೋಲಾಸ್, ಅಜು಼ ಥೋಡು ಜ಼ಣು ಎಲೀಯ ಕರಿ ಬೋಲಾಸ್, ಅಜು಼ ಥೋಡು ಜ಼ಣು ಜೂ಼ನ ಹಗಾಮ್‍ನೊ ಪ್ರವಾದೀಮ ಏಕ್‌ ಜ಼ಣೊ ಜಿವ್ತೊಹುಯಿನ್ ಐರ‍್ಹೋಸ್ ಕರಿ ಬೋಲಾಸ್” ಕರಿ ಜವಾಬ್‌ ದಿದಾ.
LUK 9:20 ಕತೋಬಿ ಯೇಸುನೆ ಇವ್ಣುನ, “ತುಮೆ ಮನ ಕೋಣ್ ಕರಿ ಬೋಲೋಸ್?” ಕರಿ ಪುಛಾ಼ವಖ್ಹತರ್, ಪೇತ್ರನೆ, “ತೂ ದೇವ್‌ನೊ ಕ್ರಿಸ್ತ” ಕರಿ ಜವಾಬ್‌ ದಿದೊ.
LUK 9:21 ತದೆ ಯೇಸುನೆ ಇವ್ಣುನ ಅನಿ ಬಾರೇಮ ಕಿನಾಬಿ ನಾ ಬೋಲ್‌ನು ಕರಿ ಝೇತಾಯೊ.
LUK 9:22 ಅನ ಬಾದ್‌ಮ ಯೇಸುನೆ ಇವ್ಣುನ, “ಅದ್ಮಿನೊ ಛಿಯ್ಯೊ ಘಣು ಲತಾಡ ಪಡ್ನು, ಯೆಹೂದ್ಯರ್‌ನು ಶಾಣಾವ್‍ಥೀಬಿ, ಗಲ್‌ಢಯಾಜಕರ್‌ಥಿ ಅಜು಼ ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳ ಶಾಸ್ತ್ರಿಯೇಥಿ ಧಕೇಲೈಜಾ಼ಶೆ, ಅಜು಼ ಇನ ಮಾರಿನಾಕ್‌ಶೆ, ಕತೋಬಿ ತೀನ್ ದನ್ನ ಬಾದ್‌ಮ, ಯೋ ಜಿವ್ತೊಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
LUK 9:23 ಅತ್ರೇಸ್ ಕಾಹೆತೆ ಯೇಸುನೆ ಇವ್ಣ ಖ್ಹಾರಾವ್‌ನ ಶಾತ್ ಬೋಲ್ಯೊಕತೊ, “ಕೋಣ್‌ತೋಬಿ ಮಾರ ಜೋ಼ಡೆ ಆವ್ಣುಕರಿ ಉಶೇತೊ, ಇನು ಯೋ ಭೈಕಿಜೈ಼ನ್, ಹರ್‌ದನ್‌ ಇನಿ ಶಿಲ್‌ಬೇನ ಪಳ್ಳಿನ್‌, ಮಾರ ಪೀಠೆ ಆವಾದೆ.
LUK 9:24 ಕೋಣ್ ಇನೊ ಜಾನ್‌ ಬಚಾ಼ಡಿಲೇವ್ಣುಕರಿ ಕರಾಸ್ಕಿ, ಯೋ ಇನೊ ಜಾನ್‌ ಗುಮೈಲಿಶೆ, ಕತೋಬಿ ಮಾರಖ್ಹಾಜೆ ಕೋಣ್ ಇನೊ ಜಾನ್‌ ಗುಮೈಲಿಶೆಕಿ, ಯೋ ಇನೊ ಜಾನ್‌ ಬಚಿಜಾ಼ಶೆ.
LUK 9:25 ಏಕ್‌ ಅದ್ಮಿ ಹಿಡಿ ಜಗತ್‍ನಾಸ್ ಜೂತಿಲೀನ್‌ಬಿ, ಇನೊ ಜಾನ್‌ ಗುಮೈಲಿದೊತೊ, ಇನ ಶನೀಸ್ ಫಾಯಿದೊ ಕೊಯ್ನಿ!
LUK 9:26 ಕೋಣ್‌ತೋಬಿ ಮನಾಬಿ ಅಜು಼ ಮಾರಿ ವಚನ್ನಖ್ಹಾಜೆಬಿ ಖ್ಹರ್‌ಮಾಯೂತೊ, ಇನ ಅದ್ಮಿನೊ ಛಿಯ್ಯೊ ಯೋಬಿ ಇನ ಬಾನಿ ಪರಿಶುದ್ದ ದೂತರ್‌ನಾಬಿ ಛಾ಼ತೆ ಮಹಿಮೆನಿ ಜೋ಼ಡೆ ಆವಾನಿ ವಖ್ಹತ್‌ಮ ಇನಿ ಬಾರೇಮ ಖ್ಹರ್‌ಮಾವ್‌ಶೆ.
LUK 9:27 ತುಮೂನ ಖ್ಹಾಚಾಮ ಬೋಲುಸ್ಕಿ, ಹಜ್ಜಾ಼ ಭಿಯುತೆ ಇವ್ಣಾಮ ಥೋಡು ಜ಼ಣು ದೇವ್ನಿ ರಾಜ್ಯ ದೇಖಾತೋಡಿ ಮರ್‌ಶೆಸ್ ಕೊಯ್ನಿ” ಕರಿ ಬೋಲ್ಯೊ.
LUK 9:28 ಯೇಸುನೆ ಆ ಖ್ಹಾರಿ ವಾತೇನ ಬೋಲಿನ್, ಆಟ್‍ದನ್ ಹುವಾನ ಬಾದ್‌ಮ, ಪೇತ್ರ, ಯಾಕೋಬ ಅಜು಼ ಯೋಹಾನ್ನ ಬುಲೈಲಿನ್ ಪ್ರಾರ್ಥನೆ ಕರಾನಖ್ಹಾಜೆ, ಪಹಾಡ್‌ಪರ್ ಗಯೊ.
LUK 9:29 ಯೇಸು ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನು ಮ್ಹೋಡು ಬದ್ಲಿಗಯು, ಅಜು಼ ಇನು ಲುಂಗ್ಡು ಧೋಳುಫಟ್‍ಹುಯಿನ್, ಝ಼ಮ್‌ಕಾಲಗ್ಯು.
LUK 9:30 ತದ್ದೇಸ್ ಬೇ ಪರ್ಖ್ಹಾ ಇನಜೋ಼ಡೆ ವಾತೆ ಬೋಲುಕರ್ತಾಥ. ಅವ್ಣೆ ಕೋಣ್‌ಕತೊ, ಮೋಶೆ ಅಜು಼ ಎಲೀಯ.
LUK 9:31 ಅವ್ಣೆ ಪರಲೋಕ್‌ನಿ ಮಹಿಮೆಥಿ ದೆಖೈನ್, ಯೆರೂಸಲೇಮ್ಮ ಯೇಸು ಮರಿನ್‌, ದೇವ್ನಿ ಮರ್ಜಿನ ಪೂರ ಕರ್‌ಶೇತೆ ಇನಿ ಬಾರೇಮ, ಇನಜೋ಼ಡೆ ವಾತೆ ಬೋಲುಕರ್ತೂಥು.
LUK 9:32 ಪೇತ್ರ ಅಜು಼ ಇನ ಜೋ಼ಡ್ಮ ರ‍್ಹವಾಳು ಭರ್‌ನಿಂದರ್‌ಮ ಥೂ, ಕತೋಬಿ ನಿಂದರ್‌ಮಾಥು ಜಾ಼ಗಿ ಉಠೀನ್, ಯೇಸುನಿ ಮಹಿಮೆನ ಅಜು಼ ಇನಜೋ಼ಡೆ ಭಿಯಾಥಾತೆ ಯೋ ಭೇ ಜ಼ಣಾನಾಬಿ ದೇಖ್ಯು.
LUK 9:33 ಮೋಶೆ ಅಜು಼ ಎಲೀಯ ಯೇಸುನ ಮ್ಹೆಂದಿನ್, ಜಾ಼ವಾನಿ ವಖ್ಹತ್‌ಮ, ಪೇತ್ರನೆ ಯೇಸುನ, “ಗುರು, ಹಮೆ ಹಜ಼್ಜಸ್ ರ‍್ಹವಾನು ಕೆತ್ರೇಕ್ಕಿ ಅಛ್ಛು಼! ಹಮೆ ಹಜ಼್ಜಾ ತೀನ್ ಡೇರಾ ಠೋಕೆಸ್, ಏಕ್‌ ತುನ , ಏಕ್‌ ಮೋಶೇನ ಅಜು಼ ಏಕ್‌ ಎಲೀಯನ ” ಕರಿ ಬೋಲ್ಯೊ. ಪೇತ್ರನ, ಯೋ ಶಾತ್ ಬೋಲುಕರಾಸ್‌ ಕರಿ ಇನಾಸ್ ಮಾಲುಮ್ ಕೋ ಥೂನಿ.
LUK 9:34 ಪೇತ್ರ ಆ ಬೋಲುಕರಾನಿ ವಖ್ಹತ್‌ಮ, ವಾದ್‌ಳು ಐನ್, ಇನೊ ಛಾ಼ಳೊ ಇವ್ಣಾಪರ್ ಢಪಾಯು. ಅನೇಥಿ ಶಿಷ್ಯರ್‌ ಡರಿಗಯು.
LUK 9:35 ತದೆ ಯೋ ವಾದ್ಳಮಾಥು, “ಆ ಮಾರೊ ಛಿಯ್ಯೊ, ಮೇ ಚೂ಼ಣ್ಯೋತೆ ಅನಾಸ್, ಅನಿ ವಾತೇನ ಖ್ಹಮ್‌ಜೊ಼!” ಕರಿ ಏಕ್‌ ಅವಾಜ಼್ ಆಯೊ.
LUK 9:36 ಯೋ ಅವಾಜ಼್ ಭೀರಿಜಾ಼ವಾನ ಬಾದ್‌ಮ, ಯೇಸು ಎಕ್ಕಸ್ ಜ಼ಣಾನ ದೇಖ್ಯು. ಯೋ ಶಿಷ್ಯರ್‌ ಇವ್ಣೆ ದೇಖ್ಯುತೆ ಇನಿ ಬಾರೇಮ, ಏಕ್‌ ಜ಼ಣಾನಾಬಿ ಯೋ ದನೂಮ ಬೋಲ್ಯುಕೊಂತೆ ಖ್ಹೊಪೊ ಪಡಿಗಯು.
LUK 9:37 ತಿನ ಅಗ್‍ಲ್ಯ ದನ್ನೆ ಯೇಸು ಅಜು಼ ಇನ ತೀನ್ ಶಿಷ್ಯರ್‌ ಪಹಾಡ್ ಉತ್ರಿನ್ ಆಯ. ತದೆ ಅದ್ಮಿನಿ ಮೋಟಿ ಭೀಡ್‌ ಯೇಸುನ ಖ್ಹಾಮ್ಣೆ ಆಯಿ.
LUK 9:38 ಯೋ ಭೀಡ್‌ಮಾಥು ಏಕ್‌ಜ಼ಣಾನೆ, “ಗುರು, ಮಾರ ಛಿಯ್ಯಾನ ದೇಕ್‌ಕರಿ, ತುನ ಗಿಂಗಾವುಸ್. ಮನ ಆ ಎಕ್ಕಸ್ ಛಿಯ್ಯೊ ಛಾ಼ತೆ.
LUK 9:39 ಅನ ಭೂತ್ ಧರಾಸ್, ಧರ್‌ತಾಸ್‌ನ ಆ ಬಳೆಳಾಲಗಸ್, ಮ್ಹೋಡವಾಟೆ ಜ಼ಲ್‌ಭು ನಿಕ್ಳಾ ಏತ್ರೆ ಅನ ಧಡಾಶ ಮರಾವಸ್, ಅಜು಼ ಘಣು ಖ್ಹತೈನ್, ಝ಼ಗ್‌ದಾಶೆ ಯೋ ಭೂತ್ ಅನ ಮ್ಹೇಲಾಕೊಯ್ನಿ!
LUK 9:40 ಯೋ ಭೂತ್‌ನ ಕಾಡೊ ಕರಿ, ತಾರ ಶಿಷ್ಯರ್‌ನ ಗಿಂಗೈಲಿದೊ. ಕತೋಬಿ ಇವ್ಣ ಹಾತೆ ಕೋ ಹುಯೋನಿ” ಕರಿ ಚಿಕ್ರಿನ್ ಯೇಸುನ ಬೋಲ್ಯೊ.
LUK 9:41 ತದೆ ಯೇಸುನೆ, “ಏ ವಿಶ್ವಾಸ್‌ಕೊಂತೆ ಖರಾಬ್ ಪಿಳ್ಗಿಯೆ, ಮೇ ಬಿಜು಼ ಕೆತ್ರ ದನ್ ತುಮಾರ ಜೋ಼ಡೆ ರ‍್ಹೀನ್, ತುಮೂನ ಖ್ಹಮಾಳ್‌ಣು?” ಕರೊ ಜ಼ವಾಬ್‌ದಿದೊ. ಅಜು಼ ಯೋ ಅದ್ಮಿನ, “ತಾರ ಛಿಯ್ಯಾನ ಹಜ಼್ಜಾ ಬುಲೈಲಿ ಆವ್” ಕರಿ ಬೋಲ್ಯೊ.
LUK 9:42 ಯೋ ಛೋ಼ಕ್ರು ಆವ್‍ಕರಾನಿ ವಖ್ಹತ್‌ಮ, ಯೋ ಭೂತ್‌ ಇನ ಜ಼ಮೀನ್‌ಪರ್ ರಡ್‌ಕೈನ್‌, ಘಣು ಧಡಾಶ ಮರಾಯು. ಕತೋಬಿ ಯೇಸುನೆ ಯೋ ಭೂತ್‌ನ ಗುರ್‌ಕೈನ್, ಯೋ ಛೋ಼ಕ್ರಾನ ಅಛ್ಛು಼ ಕರೀನ್, ಇನ ಬಾನ ಹಾತ್‌ಮ ದಿದೊ.
LUK 9:43 ಅನ ದೇಖಿನ್ ಅದ್ಮಿಖ್ಹಾರು ದೇವ್ನಿ ಮಹಾನ್ ಶಕತ್ನಖ್ಹಾಜೆ ಆಶ್ಚರ್ಯಖಾದು. ಅದ್ಮಿಖ್ಹಾರು ಯೇಸುನೆ ಕರ‍್ಯೊತೆ ಖ್ಹಾರಿಸ್ ಕಾಮ್ನಿ ಬಾರೇಮ ಬಿಜೂ಼ಬಿ ಆಶ್ಚರ್ಯ ಕರುಕರಾತೆ ತದ್ದೇಸ್, ಯೇಸುನೆ ಇನ ಶಿಷ್ಯರ್‌ನ,
LUK 9:44 “ಮೇ ಬೋಲುಕರುಸ್ತೆ ವಾತೇನ ಭೈಕ್‌ಶು ನಕೊ; ಅದ್ಮಿನ ಛಿಯ್ಯಾನ ಅದ್ಮಿಖ್ಹಾರಾನ ಹಾತ್‌ಮ ದೆವೈಜಾಶೆ”
LUK 9:45 ಕತೋಬಿ ಇನ ಶಿಷ್ಯರ್‌ನೆ ಅನಿ ಮತ್ಲಬ್‌ನ ಪರ್‌ಖ್ಯುಕೊಯ್ನಿ. ಯೋ ವಾತೆ ಇವ್ಣೇಥಿ ಲಪೈರ‍್ಹೀಥೀತೆ ಇನಖ್ಹಾಜೆ, ಇವ್ಣೆ ಮಾಲುಮ್ ಕರ‍್ಯುಕೊಯ್ನಿ. ಅಜು಼ ಅನಿ ಬಾರೇಮ ಯೇಸುನ ಬೋಲಾನ ಡರಿಗಯು.
LUK 9:46 ಶಿಷ್ಯರ್‌ಮ ಕೋಣ್ ಮೋಟೊ ಕರಿ ಬೋಲಾನಿ ಬಾರೇಮ ವಾತೆ ನಿಕ್ಳಾಲಗಿ.
LUK 9:47 ತದೆ ಯೇಸುನೆ ಇವ್ಣಿ ದಿಲ್ನಿ ವಾತೇನ ಮಾಲುಮ್ ಕರಿಲೀನ್, ಏಕ್‌ ಅಡ್ಡಾಣಿ ಲಡ್ಕಾನ ಬುಲೈನ್, ಇನ ಪಾಕ್ತಿಮ ಭಿರಾಖಿನ್,
LUK 9:48 ಇವ್ಣುನ ಬೋಲ್ಯೊಕಿ, “ಕೋಣ್‌ತೋಬಿ ಏಕ್‌ ಜ಼ಣು ಮಾರ ನಾಮ್‌ಪರ್‌ ಆ ಅಡ್ಡಾಣಿ ಲಡ್ಕಾನ ಬುಲೈಲೇಸ್ಕಿ, ಇವ್ಣೆ ಮನ ಬುಲೈಲ್ಯವಾದಾಖ್ಹಲ್‌; ಅಜು಼ ಕೋಣ್ ಮನ ಬುಲೈಲೇಸ್ಕಿ, ಯೋ ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲ್ಯವಾದಾಖ್ಹಲ್‌. ಇನಖ್ಹಾಜೇಸ್ ತುಮಾರಾಮ ಕೋಣ್ ನ್ಹಾನೋಕಿ ಯೋಸ್ ಖ್ಹಾರೇಥಿ ಮೋಟೊ ಹುಯಿರ‍್ಹಿಶೆ” ಕರಿ ಬೋಲ್ಯೊ.
LUK 9:49 ಯೋಹಾನನೆ, “ಗುರು, ಕೋಣ್‌ಕಿ ಏಕ್‌ ಜ಼ಣು ತಾರು ನಾಮ್ ಬೋಲಿನ್ ಭೂತ್ ನಖ್ಹಾಡುಕರ್ತುಥೂತೆ ಹಮೆ ದೇಖಿನ್, ಯೋ ಹಮಾರ ಭಣಿವಾಳು ಕಾಹೆತೆ ಇನಖ್ಹಾಜೆ, ಹಮೆ ಇನ ‘ಭಿರಾಕಡ್ ಕರಿ ಬೋಲ್ಯ” ಕರಿ ಬೋಲ್ಯೊ.
LUK 9:50 ಅನ ಖ್ಹಮ್‌ಜಿನ್‌, ಯೇಸುನೆ ಯೋಹಾನ್ನ ಅಜು಼ ಬಿಜಾ಼ಖ್ಹಾರ ಶಿಷ್ಯರ್‌ನ, “ಇನ ನಕೊ ಭೀರಾಖೊ. ಶನಕತೊ ತುಮೂನ ವಹೇರ್‌ ಕರಾಕೊಂತೆ ಇವ್ಣೆ ತುಮಾರ ಭಣಿವಾಳುಸ್ ಹುಯಿರ‍್ಹೂಸ್” ಕರಿ ಬೋಲ್ಯೊ.
LUK 9:51 ಯೇಸು ಪರ್‌ಲೋಕ್‌ಮ ಪಡೈಲೆವಾನಿ ವಖ್ಹತ್ ಖನ್ನೆ ಆವಲಗಿಥೀತೆ ಇನಖ್ಹಾಜೆ, ಯೋ ಯೆರೂಸಲೇಮ್‌ನ ಜಾ಼ವಾನಟೇಕೆ ಘಟ್‌ಜಾನ್ ಕರಿಲೀನ್,
LUK 9:52 ಇನೇಥಿ ಅಗಾಡಿ ಟಪಾಲ್ ದ್ಯವಾಳಾನ ಮೋಕ್‌ಲ್ಯೊ. ಅವ್ಣೆ ಜೈ಼ನ್ ಯೇಸುನ ಹೋಣುತೆಖ್ಹಾರು ಖ್ಹವಾರನಖ್ಹಾಜೆ ಸಮಾರ್ಯವಾಳಾನು ಗಾಮ್ಮ ಆಯು.
LUK 9:53 ಯೇಸು ಯೆರೂಸಲೇಮ್‌ನ ಒಳೆಜಾ಼ತೊಥೋತೆ ಇನಖ್ಹಾಜೆ, ಹಿಜ್ಜಾ಼ನು ಅದ್ಮಿ ಇನ ಬುಲೈಲಿದುಕೊಯ್ನಿ.
LUK 9:54 ಅನ ದೇಖಿನ್, ಯೇಸುನು ಶಿಷ್ಯರ್‌ ಯಾಕೋಬ ಅಜು಼ ಯೋಹಾನನೆ, “ಪ್ರಭು, ಪರಲೋಕ್‌ಥು ಆಗ್ ಪಡೀನ್, ಅವ್ಣುನ ಬರ್ಬಾತ್ ಕರ್‌ ಕರಿ, ಹಮೆ ಹುಕುಮ್ ದೇವ್ಣು ಕರಿ, ತೂ ಆಖ್ಹ್‌ಕರಾಸ್ಕಿ ಶು?” ಕರಿ ಪುಛಾ಼ವಖ್ಹತರ್,
LUK 9:55 ಯೇಸುನೆ ಫರಿನ್, ಇವ್ಣುನ ಗುರ್‌ಕಾಯೊ.
LUK 9:56 ಬಾದ್‌ಮ ಇವ್ಣೆ ಬಿಜ಼ ಗಾಮ್‌ನ ಗಯು.
LUK 9:57 ಇವ್ಣೆ ವಾಟ್‌ಪರ್ ಜಾ಼ತುರ‍್ಹವಾನಿ ವಖ್ಹತ್‌ಮ, ಕೋಣ್ಕಿ ಏಕ್‌ ಜ಼ಣು ಯೇಸುನ, “ತು ಕಿಜ್ಗಾ಼ ಗಯೊತೋಬಿ ಮೇ ತಾರ ಪೀಠೇಸ್ ಆವ್‌ಸ್” ಕರಿ ಬೋಲ್ಯೊ.
LUK 9:58 ತದೆ ಯೇಸುನೆ ಇನ, ‘ನ್ಹೋರಿಯೆನ ಘವಿಯೆ ಛಾ಼, ಅಜು಼ ಆಬ್‌ಪರ್ ಉಡಾತೆ ಜಿನಾವರ್‌ನ ಖ್ಹಾರು ಮ್ಹಾಳೊ ಛಾ಼, ಕತೋಬಿ ಅದ್ಮಿನ ಛಿಯ್ಯಾನ ಮುಡ್‌ಕ್ಯು ಟೇಕಯೆವ್ಡಿ ಝ಼ಗೋಬಿ ಕೊಯ್ನಿ” ಕರಿ ಬೋಲ್ಯೊ.
LUK 9:59 ಅಜು಼ ಇನೆ ಬಿಜೇಕ್ ಜ಼ಣಾನ, “ಮಾರ ಪೀಠೆ ಆವ್” ಕರಿ ಬೋಲ್ಯೊ. ಕತೋಬಿ ಇನೆ, “ಪ್ರಭು, ಮೇ ಪಹಿಲೆ ಜೈ಼ನ್‌ ಮಾರ ಬಾನ ಧಪ್‌ನೈದೀನ್‌ ಆವಾನ ಮನ ಹುಕುಮ್ ದೆ” ಕರಿ ಬೋಲ್ಯೊ.
LUK 9:60 ತದೆ ಯೇಸುನೆ ಇನ, “ಮರ‍್ಯಹುಯಾಸ್‌ ಇವ್ಣಮ ಮರಿಗಯೂತೆ ಇನ ಮಾಟಿ ಕರಾದೆ! ತೂ ಜೈ಼ನ್, ದೇವ್ನಿ ರಾಜ್ಯನಿ ಬಾರೇಮ ಬೋಲಿವತಾಳ್” ಕರಿ ಬೋಲ್ಯೊ.
LUK 9:61 ಬಿಜ್ಜೇಕ್‌ ಜ಼ಣಾನೆ, “ಪ್ರಭು, ಮೇ ತಾರ ಪೀಠೆ ಆವುಸ್, ಕತೋಬಿ ಮಾರ ಘರ್‌ವಾಳಕನ ಪಹಿಲೆ, ‘ಜೈ಼ನ್ ಆವುಸ್’ ಕರಿ ಬೋಲಿನ್ ಆವುಸ್” ಕರಿ ಬೋಲ್ಯೊ.
LUK 9:62 ತದೆ ಯೇಸುನೆ ಇನ, “ನಾಗರ್‌ಪರ್ ಹಾತ್‌ ನಾಖಿನ್, ಪೀಠೆಫರಿ ದೇಖಾವಾಳು ಕೋಣ್‌ಬಿ, ದೇವ್ನಿ ರಾಜ್ಯನ ಲ್ಹಾಯೇಕ್‌ನು ಕಾಹೆ” ಕರಿ ಬೋಲ್ಯೊ.
LUK 10:1 ಅನ ಬಾದ್‌ಮ ಯೇಸು ಪ್ರಭು ಬಿಜೂ಼ಬಿ ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣಾನ ಚೂ಼ಣಿನ್, ಬೆಬ್ಬೆ ಜ಼ಣ ಕರೀನ್, ಯೋ ಜಾ಼ವ್ಣುಕರಿ ಥೋತೆ ಹರೇಕ್ ಗಾಮ್‌ನ ಅಜು಼ ಝ಼ಗೋನ ಇನೇಥಿ ಅಗಾಡಿ ಇವ್ಣುನ ಮೋಕ್‌ಲ್ಯೊ.
LUK 10:2 ಮೋಕ್ಲಾನಿ ವಖ್ಹತ್‌ಮ ಇವ್ಣುನ, “ಅನಾಜ಼್ ಜಾ಼ಖ್ಹತ್ ಛಾ಼, ಕತೋಬಿ ಎಕ್ಟು ಕರಾನ ಕಾಮ್ ಕರಾವಾಳು ಕಮ್ ಛಾ಼. ಇನಖ್ಹಾಜೆ ಅನಾಜ಼್‌ನೊ ಪ್ರಭುನ ‘ತಾರು ಅನಾಜ಼್‌ನ ಎಕ್ಟು ಕರಾನಖ್ಹಾಜೆ ಕಾಮ್‌ವಾಳಾನ ಮೋಕಲ್’ ಕರಿ ಬಿಂತಿ ಕರೊ.
LUK 10:3 ಜಾ಼ವೊ! ಜ಼ರಕ್‌ನ ಮಹಿ ಮೇಂಢಾವ್ನ ಮೋಕ್ಲಾತೆ ಇಮ್‌, ಮೇ ತುಮೂನ ಮೋಕ್ಲುಕರುಸ್.
LUK 10:4 ದೇಖೊ, ಪೈಶಾನಿ ಚ಼ಂಚಿ ರ‍್ಹವೊ, ಮಾಂಗಾನಿ ಝೋ಼ಳಿ ರ‍್ಹವೊ, ಖೋಖ್ಹ್‌ಡಾ ರ‍್ಹವೊ ನಕೊ ಲೀಜಾ಼ವೊ. ಜಾ಼ವಾನಿ ವಖ್ಹತ್‌ಮ, ವಾಟ್‌ಪರ್ ಕಿನಾಬಿ ಖ್ಹಲಾಮ್ ಕರಿ ಬೋಲಿನ್, ವಖ್ಹತ್ ಬರ್ಬಾತ್ ನಕೊ ಕರ್ಶು.
LUK 10:5 ಎತ್ರೇಸ್ ಕಾಹೆತೆ ತುಮೆ ಖೆವ ಘರ್‌ಮ ಗಯಾತೋಬಿ, ‘ಆ ಘರ್‌ನ ಶಾಂತಿ ಹುವಾದೆ’ ಕರಿ ಬೋಲೊ.
LUK 10:6 ಶಾಂತಿಥಿ ರ‍್ಹವಾನ ಆಖ್ಹ್ ಕರಾವಾಳು ಅದ್ಮಿ ಹಿಜ್ಜಾ಼ ರ‍್ಹಯೂತೊ, ತುಮಾರಿ ಆಶೀರ್ವಾದ್‌ ಇನಾಪರ್ ಟಿಕ್‌ಶೆ, ನತರ್‌ಕಿ ಯೋ ಆಶೀರ್ವಾದ್‌ ಪಾಛು಼ಫರಿ ತುಮೂನ ಆವ್‌ಶೆ.
LUK 10:7 ಯೋಸ್ ಘರ್‌ಮ ರ‍್ಹವಾಕರೊ, ಇವ್ಣೆ ಶಾತ್‌ ದೇಸ್ಕಿ ಯೋ ಖಾವೊ, ಪೀಯೊ. ಕಾಮ್ ಕರಾವಾಳ ಆಳ್‌ ಕೂಲಿನ ಲ್ಹಾಯೇಕ್ ಎತ್ರೇಸ್. ಇನಖ್ಹಾಜೆ ಏಕ್‌ ಘರ್‌ನ ಮ್ಹೆಂದಿನ್ ಬಿಜೇಕ್ ಘರ್‌ಮ ಜೈ಼ನ್ ನಕೊ ರ‍್ಹವೊ.
LUK 10:8 ಅಜು಼ ತುಮೆ ಖೆವಾತೋಬಿ ಏಕ್‌ ಗಾಮ್ಮ ಜಾ಼ವಾನ ಬಾದ್‌ಮ, ಹಿಜ್ಜಾ಼ನು ಅದ್ಮಿ ತುಮೂನ ಬುಲೈಲಿದೊತೊ, ಇವ್ಣೆ ಶಾತ್‌ ದೇಸ್ಕಿ ಯೋ ಖಾವೊ.
LUK 10:9 ಹಿಜ್ಜಾ಼ ರೋಗ್-ರಾಯಮ ರ‍್ಹೇಸ್ತೆ ಇವ್ಣ ಅಛ್ಛು಼ಕರೊ, ಅಜು಼ ಹಿಜ್ಜಾ಼ನು ಅದ್ಮಿಖ್ಹಾರಾನ ದೇವ್ನಿ ರಾಜ್ಯ ತುಮಾರ ಖನ್ನೆ ಐರ‍್ಹೀಸ್ ಕರಿ ಬೋಲೊ.
LUK 10:10 ಕತೋಬಿ ತುಮೆ ಖೆವಾತೋಬಿ ಏಕ್‍ ಗಾಮ್ಮ ಜಾ಼ವಾನ ಬಾದ್‌ಮ, ಹಿಜ್ಜಾ಼ನು ಅದ್ಮಿ ತುಮೂನ ನಾ ಬುಲೈಲಿದುತೊ, ಯೋ ಗಾಮ್‌ನಿ ಗಲ್ಲಿಯೇಮ ಜೈ಼ನ್,
LUK 10:11 ‘ಹಮಾರ ಗೋಡಾನ ಲಾಗೀತೆ, ತುಮಾರ ಗಾಮ್‌ನಿ ಧೂಳ್‌ನ ಜಿನ್‌ಕುಬಿ, ಹಮೆ ತುಮಾರಿ ವಿರೋದ್‌ ಝ಼ಟ್ಕಿ ದೆವ್‌ಕರೇಸ್. ಕತೋಬಿ ದೇವ್ನಿ ರಾಜ್ಯ ತುಮಾರ ಖನ್ನೆ ಐರ‍್ಹೀಸ್ ಕರಿ ತುಮೂನ ಮಾಲುಮ್ ರ‍್ಹವಾದೆ ಕರಿ ಬೋಲೊ.’
LUK 10:12 ಮೇ ತುಮೂನ ಬೋಲುಸ್ಕಿ, ನ್ಯಾವ್‍ನಿ ತೀರ್ಪ್‌ನ ದನ್ಮ ಯೋ ಗಾಮ್‌ನಿ ಹಾಲ್‌, ಸೊದೋಮ್ ಗಾಮ್‌ನಿ ಹಾಲ್‌ಥೀಬಿ ಖರಾಬ್ ರ‍್ಹಿಶೆ.
LUK 10:13 ಅಯ್ಯೋ, ಖೊರಾಜಿನ್‌ ಖ್ಹಯೇರ್‌, ತಾರಿ ಹಾಲ್ನ ಶಾತ್‌ಬೋಲು ಬೆತ್ಸಾಯಿದ ತುಮಾರಿ ಹಾಲ್ನ ಶಾತ್‌ ಬೋಲು! ತುಮಾರಾಮ ಚಾ಼ಲ್ಯುತೆ ಮಹಾನ್ ಕಾಮ್‌ಖ್ಹಾರು ತೂರ್ ಅಜು಼ ಸೀದೋನ್ ಖ್ಹಯೇರ್‌ಮ ಚಾ಼ಲ್ಯುಹೋತ್ತೊ, ಹಿಜ್ಜಾ಼ವಾಳು ಕದೇಸ್‌ಕಿ ಛೈ಼ನೊಕೋಥ್‌ಳೊ ಲಪೇಟಿಲೀನ್, ರಾಕ್‌ಮ ಬೇಶಿನ್, ದೇವ್ ಭಣಿ ಫರಿಗಯೂಹೋತ್.
LUK 10:14 ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತುಮೂನ ಉಷೇತೆ ಹಾಲ್‌ಥೀಬಿ ತೂರ್ ಅಜು಼ ಸೀದೋನ್ ಖ್ಹಯೇರ್‌ನ ಹುಯುತೆ ಹಾಲತ್ಪರ್ ದೇವ್‌ ಘಣು ಗೋರ್‌ ಕರ್ಶೆ.
LUK 10:15 ಕಪೆರ್ನೌಮ್, ತೂ ಪರಲೋಕ್‌ನ ಚ಼ಢೀನ್ ಜೈ಼ಶ್‌ನ? ಕೊಯ್ನಿ! ತುನ ಪಾತಾಳ್ಮ ನಾಕ್‌ಶೆ!
LUK 10:16 ಯೇಸುನೆ ಇವ್ಣುನ, “ತುಮಾರಿ ವಾತೇನ ಖ್ಹಮ್‌ಜಾ಼ವಾಳು ಮಾರಿ ವಾತೆ ಖ್ಹಮ್‌ಜಾ಼ವಾಳು ಹುಯಿರ‍್ಹೂಸ್; ತುಮೂನ ಝಿಟ್ಕಾರವಾಳು ಮನ ಝಿಟ್ಕಾರವಾಳು ಹುಯಿರ‍್ಹೂಸ್; ಮನ ಝಿಟ್ಕಾರವಾಳು ಮನ ಮೋಕ್‌ಲ್ಯೊತೆ ಇನಾಸ್ ಝಿಟ್ಕಾರವಾಳು ಹುಯಿರ‍್ಹೂಸ್” ಕರಿ ಬೋಲ್ಯೊ.
LUK 10:17 ಯೋ ಬೇ ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣು ಘಣು ಖ್ಹುಶಿಥಿ ಪಾಛು಼ಫರಿ ಆಯಿನ್, “ಪ್ರಭು, ತಾರು ನಾಮ್ ಬೋಲ್ತಾನ ಭೂತ್‌ಖ್ಹಾರು ಜಿನ್‌ಕುಬಿ ಹಮಾರಿ ಹುಕುಮ್‌ನ ಮಾನ್ಯು” ಕರಿ ಬೋಲ್ಯು.
LUK 10:18 ತದೆ ಯೇಸುನೆ ಇವ್ಣುನ, “ಶೈತಾನ್ ವಿಜ಼್‌ಳೀನಿಮತ್‌ ಪರ್‌ಲೋಕ್‌ಥು ಹೇಟ್ ಪಡಾತೆ ಮೇ ದೇಖ್ಯೊ.
LUK 10:19 ಹಂದೇಖೊ, ಖ್ಹಾಪ್‌ಪರ್‌ಬಿ, ವಿಛ್ಛಿಪರ್‌ಬಿ ಚಾ಼ಲಾನ ಅಜು಼ ದುಶ್‌ಮನ್ನಿ ಖ್ಹಾರೀಸ್‍ ಶಕತ್ನ ಹರಾವನ ಮೇ ತುಮೂನ ಅದಿಕಾರ್ ದೀರಾಖ್ಯೊಸ್. ಕೆಹೂಬಿ ತುಮೂನ ಖರಾಬ್ ಕೋ ಕರ್‌ಶೇನಿ.
LUK 10:20 ಕತೋಬಿ ಭೂತ್‌ಖ್ಹಾರು ತುಮಾರಿ ವಾತೇನ ಖ್ಹಮ್‌ಜಾ಼ಸ್‌ ಕರಿ ಬೋಲಿನ್ ಖ್ಹುಶಿ ನಕೊ ಕರೊ, ತುಮಾರು ನಾಮ್‌ಖ್ಹಾರು ಪರ್‌ಲೋಕ್‌ಮ ಲೀಖೈರ‍್ಹುಸ್ ಕರಿ ಬೋಲಿನ್ ಖ್ಹುಶಿ ಕರೊ”.
LUK 10:21 ಯೋಸ್ ವಖ್ಹತ್‌ಮ ಯೇಸು ಪವಿತ್ರಾತ್ಮಥಿ ಖ್ಹುಶಿಹುಯಿನ್, ಅಮ್ ಪ್ರಾರ್ಥನೆ ಕರ‍್ಯೊ, “ಬಾ, ಸೊರ್ಗ ಅಜು಼ ಧರ್ತಿನೊ ಯಜಮಾನ್! ಮೇ ತುನ ಧನ್ಯವಾದ್‌ ಕರುಸ್. ಶನಕತೊ ತುನೆ ಗ್ಯಾನಿ ಅಜು಼ ಅಕ್ಲಿಥಿ ಆ ವಾತೇನ ಲಪಾಡಿನ್, ಲಡ್ಕಾವ್ನ ಮಾಲುಮ್ ಕರೈರಾಖ್ಯೋಸ್. ಓಹೋಲಾ ಬಾ, ಅಮ್ಮಸ್ ತೂ ಕರ‍್ನು ಕರಿ ಥೊ.
LUK 10:22 ಮಾರೊ ಬಾ ಮನ ಖ್ಹಾರುಸ್‌ ಮಾರ ಹಾತ್ಮ ದೀರಾಖ್ಯೊಸ್, ಛಿಯ್ಯೊ ಕೋಣ್ ಕರಿ ಬಾನಸ್ ಮಾಲುಮ್ ಪಣ್ಕಿ ಬಿಜಾ಼ನ ಕಾಹೆ. ಬಾ ಕೋಣ್ ಕರಿ ಛಿಯ್ಯೋಸ್ ಪಣ್ಕಿ ಬಿಜು಼ ಕೋಣ್‌ಬಿ ಮಾಲುಮ್ ಕೋಕರಿರಾಖ್ಯೂನಿ. ಅಜು಼ ಛಿಯ್ಯೊ, ಕಿನ ಬಾನಿ ಬಾರೇಮ ಮಾಲುಮ್ ಕರಾವಸ್ಕಿ, ಇವ್ಣೆಸ್ ಬಾನ ಮಾಲುಮ್‌ ಕರಿಲ್ಯವಾಳು ಹುಯಿರ‍್ಹೂಸ್”.
LUK 10:23 ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ ಭಣಿ ಫರೀನ್, ಖಲಿ ಇವ್ಣುನ ಬೋಲ್ಯೋಕಿ, “ತುಮೆ ದೇಖುಕರಾಸ್ತೆ ಆ ಖ್ಹಾರು ದೇಖವಾಳು ಧನ್ಯರ್ ಹುಯಿರ‍್ಹೂಸ್!
LUK 10:24 ಶನಕತೊ ಘಣು ಪ್ರವಾದಿಖ್ಹಾರು ಅಜು಼ ರಾಜ಼ಖ್ಹಾರು ತುಮೆ ದೇಖುಕರಾತೆ ಆ ಖ್ಹಾರಾನ ದೇಕ್ಣು ಕರಿ ಆಖ್ಹ್ ಕರ‍್ಯುತೋಬಿ, ಇವ್ಣೆ ದೇಖ್ಯು ಕೊಯ್ನಿ. ತುಮೆ ಖ್ಹಮ್‌ಜು಼ಕರಾತೆ ಖ್ಹಮಜ಼್‌ಣು ಕರಿ ಆಖ್ಹ್‌ ಕರ‍್ಯುತೋಬಿ ಖ್ಹಮ್‌ಜ್ಯು ಕೊಯ್ನಿ ಕರಿ ಮೇ ತುಮೂನ ಬೋಲುಸ್”.
LUK 10:25 ತದೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಏಕ್‌ ಜ಼ಣು ಉಠಿ ಐನ್, ಯೇಸುನ ಖ್ಹಪ್‌ಡಾವ್ಣು ಕರಿ, “ಗುರು, ಹಮೇಶಾನಿ ಜಿ಼ಂದ್‌ಗಿ ಮಳ್‌ಣುಕತೊ ಮೇ ಶಾತ್‌ ಕರ‍್ನು? ಕರಿ ಯೇಸುನ ಫುಛಾ಼ಯೊ.
LUK 10:26 ತದೆ ಯೇಸುನೆ ಇನ, “ಮೋಶೇನು ಧರ್ಮಶಾಸ್ತ್ರಮ ಶಾತ್‌ ಲಿಖೈರ‍್ಹುಸ್? ಇನ ತೂ ಕಿಮ್ ಪಢ್ಯೋಥೊ?” ಕರಿ ಪುಛಾ಼ಯೊ.
LUK 10:27 ಇನೆ ಜವಾಬ್‌ ದಿದೋಕಿ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ, ತಾರೊ ಪೂರ ದಿಲ್‌ಥೀಬಿ, ತಾರೊ ಪೂರ ಜಾನ್‍ಥೀಬಿ, ತಾರಿ ಪೂರ ಶಕತ್‌ಥೀಬಿ, ತಾರೊ ಪೂರ ಮನ್‌ಥೀಬಿ ಪ್ಯಾರ್ ಕರ‍್ನು, ಅಜು಼ ತಾರ ಭೀಡೆವಾಳಾನ ತಾರೀನಿಘೋಣಿಸ್ ಪ್ಯಾರ್ ಕರ‍್ನು ಕರಿ ಲಿಖೈರ‍್ಹುಸ್” ಕರಿ ಜವಾಬ್‌ ದಿದೊ.
LUK 10:28 ಯೇಸುನೆ ಇನ, “ತುನೆ ಬರಾಬರ್‌ಥಿ ಜವಾಬ್‌ ದಿದೊ. ಇಮ್ಮಸ್ ಕರ್‌, ತದೆ ತೂ ಕದೇಬಿ ಜಿವ್ತು ರ‍್ಹೀಶ್ ಕರಿ ಬೋಲ್ಯೊ.
LUK 10:29 ಕತೋಬಿ ಯೋ ಅದ್ಮಿ ಇನುಯೋಸ್ ಖ್ಹಾಚು಼ ಕರಿ ಬೋಲಿ ವತಾಳಿಲ್ಯಾವನಖ್ಹಾಜೆ ಆಖ್ಹ್‌ಕರೀನ್, “ಮಾರು ಭೀಡೆವಾಳು ಕತೊ ಕೋಣ್?” ಕರಿ ಯೇಸುನ ಪುಛಾ಼ವಖ್ಹತರ್;
LUK 10:30 ಯೇಸು ಇನ ಜವಾಬ್‌ ದೇತೊಹುಯಿನ್ ಬೋಲ್ಯೋಕಿ, “ಏಕ್‌ ಅದ್ಮಿ ಯೆರೂಸಲೇಮ್‌ಥು ಟೇಕ್ಡಿ ಉತ್ರಿನ್, ಯೆರಿಕೋ ಜಾ಼ವಾನಿ ವಖ್ಹತ್‌ಮ, ಚೋ಼ರ‍್ನ ಹಾತ್‌ಮ ಖ್ಹಪ್‌ಡಿಗಯು. ಇವ್ಣೆ ಇನಾಕನ ಥೂತೆ ಖ್ಹಾರೂಸ್ ಲೂಟಿಲೀನ್, ಮರ್‌ವಾಯೆತ್ರೆ ಮಾರ್‌ತೋಡ್ ಕರೀನ್, ಮ್ಹೆಂದಿನ್ ಚ಼ಲ್ಯೂಗಯು.
LUK 10:31 ತದೆ ಕಿಮ್ಕಿ, ಏಕ್‌ ಯಾಜಕ್ ಯೋಸ್ ವಾಟೆಕರಿ ಉತ್ರಿನ್ ಜಾ಼ವಾನಿ ವಖ್ಹತ್‌ಮ, ಇನ ದೇಖಿನ್, ವೇಢೀನ್ ಚ಼ಲೆಗಯೊ.
LUK 10:32 ಇಮ್ಮಸ್ ಏಕ್‌ ಲೇವಿಬಿ ಯೋ ಝ಼ಗೋಕನ ಆಯಿನ್, ಇನ ದೇಖಿನ್, ಮ್ಹೋಡು ಕರ್ವಟ್‌ ಕರಿಲೀನ್, ಬಿಜೇಕ್ ವಾಟೆ ಚ಼ಲೆಗಯೊ.
LUK 10:33 ಕತೋಬಿ ಏಕ್‌ ಸಮಾರ್ಯವಾಳು ಚಾ಼ಲ್ತೊಹುಯಿನ್‌, ಯೋ ಥೋತೆ ಹಿಜ್ಜಾ಼ ಐನ್, ಇನ ದೇಖಿ ಗೋರ್‌ಖೈನ್,
LUK 10:34 ಇನ ಖನ್ನೆ ಜೈ಼ನ್, ಇನ ಘಾವ್‌ಪರ್ ತೇಲ್ ಅಜು಼ ದ್ರಾಕ್ಷಿನು ಕಂದಾಯುಹುಯು ರಖ್ಹ್‌ನ ನಾಖಿನ್, ಭಾಂದ್ಯು. ಅಜು಼ ಇನು ಶೊಂತ್ ಪಾಳ್ಯುಹುಯಾ ಜಾನ್ವರ್‌ಪರ್ ಇನ ಪಳ್ಳಿನ್‌, ಮಂಡಪ್‌ಕನ ಬುಲೈಲಿ ಜೈ಼ನ್, ಇನಿ ಚಾ಼ಕ್ರಿ ಕರ‍್ಯೊ.
LUK 10:35 ತಿನವ್ಹಾಣೆ ಯೋ ಸಮಾರಿಯವಾಳಾನೆ ಬೇ ರೂಪಾನು ಬಿಲ್ಲಾನ ಕಾಡಿನ್, ಛತ್ತರ್‌ವಾಳಾನ ದೀನ್, “ಅನ ದೇಕ್-ಭಾಲ್ ಕರ್‌, ಆ ಪೈಶಾಥಿ ಜಾ಼ಖ್ಹತ್ ಶಾತ್‌ತೋಬಿ ಖರ್ಚಿ ಹುಯೂತೊ, ಮೇ ಪಾಛೊ಼ಫರಿ ಆಯಿಶ್‍ತೆ ತದೆ ತುನ ದಿಶ್” ಕರಿ ಬೋಲ್ಯೊ.
LUK 10:36 “ಆ ತೀನ್ ಜ಼ಣಾಮ ಚೋ಼ರ್‌ನ ಹಾತ್‌ಮ ಖ್ಹಪ್‌ಡ್ಯೂತೆ ಇನ, ಖನ್ನೆವಾಳಾನಿಘೋಣಿ ಹುಯೋತೆ ಕೋಣ್ ಕರಿ ತುನ ಸೋಚಾ಼ವಸ್?” ಕರಿ ಪುಛಾ಼ಯೊ.
LUK 10:37 ತದೆ ಯೋ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ, “ಇನಾಪರ್ ಗೋರ್‌ ಕರ‍್ಯೊತೆ ಯೋಸ್” ಕರಿ ಜವಾಬ್‌ ದಿದೊ. ತದೆ ಯೇಸುನೆ ಇನ, “ಜಾ಼, ತೂಬಿ ಇಮ್ಮಸ್ ಕರ್‌” ಕರಿ ಬೋಲ್ಯೊ.
LUK 10:38 ಯೇಸುಬಿ ಇನು ಶಿಷ್ಯರ್‌ ಫರ್ತುಹುಯಿನ್ ಏಕ್‌ ಗಾಮ್ಮ ಆಯು. ಹಿಜ್ಜಾ಼ ಮಾರ್ಥ ಕರಿ ನಾಮ್ನಿ ಏಕ್‌ ಜ಼ಣಾನೆ ಯೇಸುನ ಇನ ಘರ್‌ಮ ಬುಲೈಲಿದಿ.
LUK 10:39 ಮಾರ್ಥನ ಮರಿಯ ಕರಿ ಏಕ್‌ ನ್ಹಾನಿ ಭೇನ್ ಥಿ. ಆ ಪ್ರಭುನ ಗೋಡಾಕನ ಬೇಶಿನ್, ಇನಿ ವಚನ್ನ ಖ್ಹಮ್‌ಜು಼ಕರ್‌ತೀಥಿ.
LUK 10:40 ಜಾ಼ಖ್ಹತ್ ಕಾಮ್ ಥೂತೆ ಇನಖ್ಹಾಜೆ ಮಾರ್ಥನೆ ಖಟುಖೈನ್, ಯೇಸುಕನ ಆಯಿನ್, “ಪ್ರಭು, ಮಾರಿ ಭೇನ್ ಮನ ಎಕ್ಕಸ್ ಜ಼ಣಿನ ಕಾಮ್ ಕರಾದೆಕರಿ ಮ್ಹೇಲಿದಿದೀನಿ, ಆ ಬಾರೇಮ ತುನ ಫಿಕರ್ ಕೊಯ್ನಿಕಿ ಶು? ಮನ ಮದತ್ ಕರಾದೆ ಕರಿ ಇನ ಬೋಲ್‌ಕರಿ ಬೋಲಿ.
LUK 10:41 ಕತೋಬಿ ಪ್ರಭುನೆ ಇನ, “ಮಾರ್ಥ, ಮಾರ್ಥ ತೂ ಕಾಮ್ನಕೊಂತೆ, ವೇಚ಼್‌ಣೆಮಾಬಿ, ಘಬ್ರಾಟಿಮಾಬಿ ಖ್ಹಪ್‌ಡಿರ‍್ಹೀಸ್.
LUK 10:42 ಕತೋಬಿ ಜ಼ರೂರತ್‌ ಹೋಣುತೆ ಎಕ್ಕಸ್, ಮರಿಯನೆ ಅಛ಼್ಛು ಚೂ಼ಣಿರಾಖಿಸ್, ಕೋಣ್‌ಬಿ ಇನೇಥಿ ಯೋ ಕಾಡಾನ ಕೋ ಉಶೇನಿ” ಕರಿ ಬೋಲ್ಯೊ.
LUK 11:1 ಏಕ್‌ ದನ್ನೆ ಯೇಸು ಏಕ್‌ ಝ಼ಗೋಪರ್ ಪ್ರಾರ್ಥನೆ ಕರುಕರ್ತೊಥೊ. ಪ್ರಾರ್ಥನೆ ಖತಮ್ ಹುವಾನ ಬಾದ್‌ಮ, ಇನ ಶಿಷ್ಯರ್‌ಮ ಏಕ್‌ ಜ಼ಣಾನೆ ಇನ, “ಪ್ರಭು, ಯೋಹಾನನೆ ಇನ ಶಿಷ್ಯರ್‌ನ ಪ್ರಾರ್ಥನೆ ಕರಾನ ಶಿಕಾಡ್ಯೋತೆ ಇಮ್ಮಸ್, ಹಮುನಾಬಿ ಪ್ರಾರ್ಥನೆ ಕರಾನ ಶಿಕಾಡ್” ಕರಿ ಬೋಲ್ಯೊ.
LUK 11:2 ತದೆ ಯೇಸುನೆ ಇವ್ಣುನ, “ತುಮೆ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ಬಾ: ತಾರು ನಾಮ್ ಪರಿಶುದ್ದ ಕರಿ ಬೋಲಾವಾದೆ, ತಾರಿ ರಾಜ್ಯ ಆವಾದೆ.
LUK 11:3 ಹಮೂನ ದನ್‌ಪರೋಜ಼್‌ನು ಖಾಣು ದೇ.
LUK 11:4 ಹಮಾರಿ ವಿರೋದ್ ಗಲತ್‌ ಕರಾತೆ ಹರೇಕ್ನ, ಹಮೆ ಮಾಪ್‌ ಕರೇಸ್ತೆ ಇಮ್ಮಸ್, ಹಮಾರಿ ಪಾಪ್ನ ಮಾಪ್‌ ಕರ್‌. ಹಮೂನ ಕಠಣ್ ಶೋದನೆಮ ನಕೊನಾಕ್‌ ಕರಿ ಬೋಲಿಲೆವೊ ಕರಿ ಬೋಲ್ಯೊ.
LUK 11:5 ಅಜು಼ ಯೇಸುನೆ ಇನ ಶಿಷ್ಯರ್‌ನ, “ತುಮಾರಾಮ ಏಕ್‌ ಜ಼ಣೊ ಅಧಿರಾತ್ಮ ಏಕ್‌ ದೋಸ್ತ್‌ನ ಘರ್‌ಕನ ಜೈ಼ನ್, ‘ದೋಸ್ ಮನ ತೀನ್ ರೋಟಾ ಉಧಾರ್ ದೇ.
LUK 11:6 ಮಾರೊ ದೋಸ್ತ್‌ಮ ಏಕ್‌ ಜ಼ಣೊ ಕಿಜ್ಜಾ಼ಕಿ ಒಳೆಜಾ಼ತೊಥೋತೆ ವಖ್ಹತ್‌ಮ, ಮಾರ ಘರ್‌ಕನ ಐರ‍್ಹೋಸ್. ಇನ ಖಾಣು ಖಡಾವಾನ ಮಾರಕನ ಶಾತ್ಬಿ ಕೊಯ್ನಿ’ ಕರಿ ಬೋಲ್ಯೊ.
LUK 11:7 ತದೆ ಯೋ ದೋಸ್ ಘರ್‌ನ ಮಹಿಥೋಸ್ ಇನ, ‘ಮನ ಖ್ಹತಾವ್ ನಕೊ; ಹಮ್ಕೆ, ಬಾಕಲ್ ಮೂಚೈ಼ರ‍್ಹೂಸ್; ಮಾರ ಅಡ್ಡಾಣಿ ಲಡ್ಕಾ ಮಾರ ಜೋ಼ಡೆ ಖ್ಹುತಾಸ್. ಮೇ ಉಠೀನ್, ತುನ ಶಾತ್ಬಿ ದ್ಯವಾನ ಕೋ ಹುವಾನಿ’ ಕರಿ ಜವಾಬ್‌ ದಿದೊತೋಬಿ ದಿಯ್ಯೆಜಾ಼ಯ್.
LUK 11:8 ತೋಬಿ ದೋಸ್ತ್‌ನಖ್ಹಾಜೆ ಉಠೀನ್ ನಾ ದಿದೊತೋಬಿ, ಯೋ ಖ್ಹರ್ಮಾವಸ್‌ಕೊಂತೆ ಮಾಂಗ್‌ತೋಸ್ ರ‍್ಹಿಶೆ ಕರಿ ಬೋಲಿನ್, ಉಠಿ ಐನ್ ಯೋ ಬೋಲಾತೆಯೆತ್ರು ಇನ ದಿಶೆ ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
LUK 11:9 “ಇನಖ್ಹಾಜೆ ಮೇ ತುಮೂನ ಬೋಲುಸ್ಕಿ, ಮಾಂಗಿಲೇವೊ, ತುಮೂನ ದೇವಾವ್‌ಶೆ. ಢೂಂಡೊ, ತುಮೂನ ಮಳ್‌ಶೆ. ಬಾಕಲ್‌ಪರ್ ಮಾರೊ, ತದೆ ತುಮೂನ ಬಾಕಲ್ ಕಾಡ್‌ಶೆ.
LUK 11:10 ಶನಕತೊ, ಮಾಂಗವಾಳ ಹರೇಕ್‌ನ ದೆವಾವ್‌ಶೆ, ಢೂಂಡವಾಳನ ಮಳ್‌ಶೆ, ಬಾಕಲ್‌ ಖಟ್‌ಖಟಾವಸ್ಕಿ ಇನ ಕಡಾವ್‌ಶೆ.
LUK 11:11 ತುಮಾರಾಮ, ಬಾ ಹುಯಿರ‍್ಹೋತೆ ಕೋಣ್‌ತೋಬಿ ಮಾಛ಼್‌ಲು ಮಾಂಗವಾಳ ಛಿಯ್ಯಾನ, ಖ್ಹಾಪ್ ದಿಶುಕಿ ಶು?
LUK 11:12 ನತರ್‌ಕಿ ಇಂಡು ಮಾಂಗಾತೆ ಛಿಯ್ಯಾನ, ವಿಛ್ಛಿ ದಿಶುಕಿ ಶು?
LUK 11:13 ಇಮ್‍ಕತೊ, ಖರಾಬ್ ಹುಯಿರ‍್ಹಾತೆ ತುಮೇಸ್, ತುಮಾರ ಲಡ್ಕಾವ್ನ ಅಛ್ಛು಼ ರಾಛು಼ಖ್ಹಾರು ದೆವಾಪರ್, ಪರಲೋಕ್‌ನೊ ತುಮಾರೊ ಬಾ, ಇನಾಕನ ಮಾಂಗಿಲ್ಯವಾಳನ ಕೈಯೆಕ್ಕಿ ಜಾ಼ಫ ಪವಿತ್ರಾತ್ಮನ ದಿಶೆ ಕೊಯ್ನಿಕಿ ಶು?” ಕರಿ ಬೋಲ್ಯೊ.
LUK 11:14 ಏಕ್‌ ಹಲ್ಲ ಯೇಸು ಮುಕ್ಕೊ ಭೂತ್‌ನ ನಖ್ಹಾಡುಕರ್ತೋಥೊ. ಕದೆ ಯೋ ಮುಕ್ಕೊ ಭೂತ್ ನಿಕ್ಳಿಗಯೂಕಿ, ತದೆ ಯೊ ಅದ್ಮಿ ವಾತೆ ಬೋಲಾಲಗ್ಯು. ಅನ ದೇಖಿನ್, ಅದ್ಮಿಖ್ಹಾರು ಆಶ್ಚರ್ಯಖಾದು.
LUK 11:15 ಕತೋಬಿ, ಇವ್ಣಾಮ ಥೋಡು ಜ಼ಣು, “ಆ, ಭೂತ್ ಖ್ಹಾರಾನೊ ಯಜಮಾನ್ ಹುಯಿರ‍್ಹೋತೆ ಬೆಲ್ಜೆಬೂಲ್‌ನೊ ಶಕಥ್ಥಿ, ಭೂತ್ ಖ್ಹಾರಾನ ಕಾಡಸ್ತೆ” ಕರಿ ಬೋಲ್ಯು.
LUK 11:16 ಬಿಜು಼ ಥೋಡು ಜ಼ಣು ಯೇಸುನ ಖ್ಹಪ್‌ಡಾವ್ಣು ಕರಿ, “ತೂ ಆಬ್‍ಮ ಏಕ್‌ ಅದ್ಭುತ್ ಕರಿನ್ ವತಾಳ್” ಕರಿ ಇನ ಬೋಲ್ಯು.
LUK 11:17 ಯೇಸುನೆ ಇವ್ಣಿ ಸೋಚ್ನ ಮಾಲುಮ್‌ ಕರಿಲೀನ್, ಇವ್ಣುನ ಬೋಲ್ಯೊಕಿ, “ಇವ್ಣ-ಇವ್ಣಾಮಸ್‌ ಭಾಗ್‌ಪಡಿಲ್ಯವಾನೊ ರಾಜ್ಯ ಬರ್ಬಾತ್ ಹುಯಿಜಾ಼ಸ್, ಇವ್ಣ-ಇವ್ಣಾಮಸ್‌ ಭಾಗ್‌ಪಡೀನ್‌, ಲಗಾತ್‌ ಭೀಡಾಲಗಸ್ತೆ ಘರ್ ತುಟಿಜಾ಼ಸ್‌,
LUK 11:18 ಇಮ್ಮಸ್ ಶೈತಾನ್, ಇನಿ ವಿರೋದ್ ಯೋಸ್‌ ಭೀಡಾಲಗ್ಯೋತೊ, ಇನಿ ರಾಜ್ಯ ಕಿಮ್ ಬಚ಼್‌ಶೆ? ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಭೂತ್‌ ಕಾಡುಸ್‌ ಕರಿ ತುಮೆ ಬೋಲೋಸ್‌ನಿ.
LUK 11:19 ಮೇ ಬೆಲ್ಜೆಬೂಲ್‌ನಿ ಶಕಥ್ಥಿ ಭೂತ್‌ಖ್ಹಾರು ಕಾಡ್ತೊ ಉಶೇತೊ, ತುಮಾರು ಅದ್ಮಿ ಕಿನಿ ಶಕಥ್ಥಿ ಭೂತ್‌ಖ್ಹಾರು ಕಾಡಸ್‌. ಅನಖ್ಹಾಜೆ ಇವ್ಣೇಸ್ ತುಮೆ ಗಲತ್‌ ಕರಿ ನ್ಯಾವ್ ಫೇಡ್‌ಶೆ.
LUK 11:20 ಕತೋಬಿ ಮೇ ದೇವ್ನಿ ಶಕಥ್ಥಿ ಭೂತ್‌ಖ್ಹಾರನ ಕಾಡ್ತೊ ಉಶೇತೊ, ದೇವ್ನಿ ರಾಜ್ಯ ತುಮಾರಕನ ಐಗೈ ಕರಿ ಆಸ್ ವತಾಳಸ್‍.
LUK 11:21 ಏಕ್‌ ಶಕತ್‌ವಾಳೊ, ಲಠ್ಠೊ, ತಲ್ವಾರ್‌ ಅಜು಼ ಜಂಗ್ ಭಿಡಾನ ಹೋಣುತೆ ಖ್ಹಾರಿಸ್ ತೈಯಾರಿ ಕರಿಲೀನ್, ಇನ ಘರ್‌ನ ವಖ್ಹ್‌ತಿ ಕರಾನಿ ವಖ್ಹತ್‌ಮ, ಇನು ರಾಛು಼ಖ್ಹಾರು ಜ಼ತನ್‍ಥೀಸ್‌ ರ‍್ಹೇಸ್‌.
LUK 11:22 ಕತೋಬಿ, ಇನೇಥಿಬಿ ಶಕತ್‌ವಾಳೊ ಐನ್ ಇನ ಹರಾವನ ಬಾದ್‌ಮ, ಯೋ ಮಾಲಿಕ್ ಇನ ಘರ್‌ನ ಜ಼ತನ್‌ಥಿ ರಾಖಾನಟೇಕೆ, ರಾಖಿರಾಖ್ಯೊಥೋತೆ ಖ್ಹಾರುಸ್‌ ರಾಛಾ಼ನ ಛಿನೈಲಿನ್‌, ಇನೆ ಲೂಟಿಲಿದೊ ಯೋ ಖ್ಹಾರಾನ, ಇವ್ಣ ಅದ್ಮಿಮ ವಾಟಪಾಡಿಲೆಸ್.
LUK 11:23 ಮಾರ ಭಣಿ ರ‍್ಹೇಯಿಕೊಂತೆ ಇವ್ಣೆ, ಖ್ಹಾಚಮಾಬಿ ಮಾರು ವಿರೋದಿ ಹುಯಿರ‍್ಹುಸ್. ಮಾರ ಜೋ಼ಡ್ಮ ಎಕ್ಟು ಕರಾನ ಮದತ್ ಕರಾಕೊಂತೆ ಇವ್ಣೆ, ಖ್ಹಾಚಮಾಬಿ ಛಿಡ್‌ಗರ್‌ ಕರಾವಾಳೊ ಹುಯಿರ‍್ಹೋಸ್.
LUK 11:24 ಏಕ್‌ ಅದ್ಮಿಮಾಥು ಭೂತ್‌ ನಿಕ್ಳಿಜಾ಼ವಾನ ಬಾದ್ಮ, ಅರಾಮ್‌ ಕರಾನಖ್ಹಾಜೆ ಝ಼ಗೊ ಢೂಂಡ್‌ತುಹುಯಿನ್, ಪಾಣಿಕೊಂತೆ ಝ಼ಗೋಮ ವನ್‌ವನ್ತು ರ‍್ಹೇಸ್. ಕತೋಬಿ ಅರಾಮ್‌ ಕರಾನ ಝ಼ಗೊ ಮಳಾಕೊಂತೆ ದೇಖಿನ್‌, ಯೋ ಭೂತ್ ಇನುಯೋಸ್, ‘ಮೇ ಮ್ಹೆಂದಿನ್ ಆಯೋತೆ, ಮಾರ ಘರೆ ಪಾಛೊ಼ಫರಿನ್ ಆವುಸ್ ಕರಿ ಬೋಲಿನ್,
LUK 11:25 ಯೋ ಘರ್‌ಕನ ಪಾಛೊ಼ಫರಿ ಆಯಿನ್, ಯೋ ಝ಼ಡೈನ್, ಅಚ್‌ಕಟ್ ಹುಯಿರ‍್ಹೂತೆ ದೇಖಸ್.
LUK 11:26 ತದೆ ಹಿಜ್ಜಾ಼ಥೊ ಜೈ಼ನ್, ಇನೇಥಿಬಿ ಖರಾಬ್ ಹುಯಿರ‍್ಹೂತೆ ಬಿಜು಼ ಖ್ಹಾತ್ ಭೂತ್‌ನ ಬುಲೈಲ್ಯಾವಸ್‌, ಯೋ ಖ್ಹಾರು ಇನ ಮಹಿ ಪೇಶಿನ್ ಹಿಜ್ಜಾ಼ಸ್ ರ‍್ಹವಾಲಗಸ್‌. ತದೆ ಯೋ ಅದ್ಮಿನಿ ಖ್ಹರ್ತಿಮಾನಿ ಹಾಲ್‌, ಪಹಿಲೆಥೀಬಿ ತೀರ್‌ಚಾಸ್ ಬಿಗ್‌ಡಿಜಾ಼ಸ್” ಕರಿ ಬೋಲ್ಯೊ.
LUK 11:27 ಯೇಸು ಆ ವಾತೆಖ್ಹಾರು ಬೋಲುಕರಾನಿ ವಖ್ಹತ್‌ಮ, ಅದ್ಮಿನಿ ಝೂ಼ಂಡ್‌ಮಾಥು ಏಕ್‌ ತಯೇಡಾನೆ, “ತುನ ಜ಼ಣಿನ್, ದೂದ್ ಪಿಡೈನ್‌, ಪಾಳಿತೆ ಯೋ ತಯೇಡ ಧನ್ಯ ಹುಯಿರ‍್ಹೀಸ್‌!” ಕರಿ ಚಿಕ್ರಿನ್ ಬೋಲಿ.
LUK 11:28 ತದೆ ಯೇಸುನೆ, “ಇನೇಥಿಬಿ, ದೇವ್ನಿ ವಚನ್ನ ಖ್ಹಮ್‌ಜೀನ್‌, ಇನ ಪಾಡಿಚಾ಼ಲವಾಳುಸ್‌ ಧನ್ಯರ್ ಹುಯಿರ‍್ಹುಸ್‍” ಕರಿ ಬೋಲ್ಯೊ.
LUK 11:29 ಅದ್ಮಿ ಝೂ಼ಂಡೆ-ಝೂ಼ಂಡೆ ಭರೈನ್ ಆವ್‍ಕರಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, “ಆ ಪಿಳ್ಗಿ ಖರಾಬ್ ಪಿಳ್ಗಿ ಹುಯಿರ‍್ಹೂಸ್! ಅವ್ಣೆ ಅದ್ಭುತ್ ಕಾಮ್ ದೇಕ್ಣು ಕರಿ ಆಖ್ಹ್ ಕರಾಸ್, ಕತೋಬಿ ಯೋನಾನಿ ಜಿ಼ಂದ್‌ಗೀಮ ಚಾ಼ಲ್ಯುತೆ ಅದ್ಭುತಾಸ್ ಪಣ್ಕಿ ಬಿಜು಼ ಅದ್ಭುತ್ ಅವ್ಣುನ ಕೋ ಮಳ್‌ಶೇನಿ.
LUK 11:30 ಯೋನ ನಿನವೆ ನಂಗರ್‌ವಾಳನ ಖ್ಹಣೇದ್ ಹುಯಿರ‍್ಹೊಥೋತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಆ ಪಿಳ್ಗಿವಾಳಾನ ಖ್ಹಣೇದ್ ಹುಯಿರ‍್ಹೋಸ್.
LUK 11:31 ನ್ಯಾವ್‌ನ ತೀರ್ಪ್‌ನ ದನ್ಮ, ಶೇಬಾನಿ ರಾಣಿ ಉಠಿ ಭೀರಿನ್, ಆ ಪಿಳ್ಗಿವಾಳಾನ, ‘ತುಮೆ ಅಪರಾದಿ’ ಕರಿ ಬೋಲ್‌ಶೆ. ಯೋ ಸೊಲೊಮೋನ್ನಿ ಚಾ಼ತುರ್ ವಾತೇನ ಖ್ಹಮ್‌ಜಾ಼ನಖ್ಹಾಜೆ ಧರ್ತಿನ ಕೈಯೆಕ್ಕಿ ದಖ್ಖನ್‌ಥಿ ಆಯಿ. ಕತೋಬಿ ಮೇ ತುಮೂನ ಬೋಲುಸ್ಕಿ, ಸೊಲೊಮೋನ್‌ಥೀಬಿ ಮೋಟೊ ಹಜ್ಜಾ಼ ಛಾ಼.
LUK 11:32 ನ್ಯಾವ್‍ನ ತೀರ್ಪ್‌ನ ದನ್ಮ ನಿನವೆ ನಂಗರ್‌ವಾಳು ಉಠಿ ಭೀರಿನ್‌, ಆ ಪಿಳ್ಗಿವಾಳಾನ, ‘ತುಮೆ ಅಪರಾದಿ’ ಕರಿ ಬೋಲ್‌ಶೆ. ಇವ್ಣೆ ಯೋನಾನೆ ಬೋಲ್ಯೋತೆ ವಚನ್ನ ಖ್ಹಮ್‌ಜಿನ್‌, ದೇವ್ ಭಣಿ ಫರಿಗಯು; ಕತೋಬಿ ಮೇ ತುಮೂನ ಬೋಲುಸ್ಕಿ, ಯೋನಾಥೀಬಿ ಮೋಟೊ ಹಜ್ಜಾ಼ ಛಾ಼!
LUK 11:33 ಕೋಣ್‌ಬಿ ದೀವೊ ಖ್ಹಲ್‌ಗೈನ್, ಲಪಾಡಿನ್ ರ‍್ಹವೊ, ನತರ್‌ಕಿ ಕೋಳ್ಗಾನಹೇಟ್ ರ‍್ಹವೊ ಮ್ಹೇಲಾಕೊಯ್ನಿ. ಘರ್‌ನ ಮಹಿ ಆವಾಳಾನ ಉಜಾ಼ಳು ದೆಖಾವಾನಿಘೋಣಿ, ದೀವೊ ಮ್ಹೇಲಾನಿ ಖಂಬಾಪರ್ ಮ್ಹೇಲಾಸ್.
LUK 11:34 ತಾರ ಡೋಳಾ ಶರೀರ್‌ನ ದಿವಾನಿಘೋಣಿ ಹುಯಿರ‍್ಹುಸ್‍. ತಾರ ಡೋಳ ಬರೋಬರ್ ರ‍್ಹಯಾತೊ, ತಾರು ಶರೀರ್ ಅಖ್ಖುಸ್ ಉಜಾ಼ಳು ರ‍್ಹಿಶೆ: ಕತೋಬಿ ತಾರ ಡೋಳ ಖರಾಬ್ ರ‍್ಹಯೂತೊ, ತಾರು ಶರೀರ್ ಅಖ್ಖುಸ್ ಅಂಧಾರು ಹುಯಿಜಾ಼ಶೆ
LUK 11:35 ಇನಖ್ಹಾಜೇಸ್, ತಾರು ಉಜಾ಼ಳು ಅಂಧಾರು ನಾ ಹೋಣುತೆ ಇಮ್‌ ದೇಖಿಲೆ.
LUK 11:36 ತದೆ ತಾರು ಆಂಗ್-ತನ್ ಅಖ್ಖುಸ್ ಉಜಾ಼ಖ್ಹ್‌ಥಿ ಭರೈನ್, ಖೆವಿ ಬಾಜು಼ಮಾಬಿ ಅಂಧಾರು ನಾರ‍್ಹಯುತೊ, ಯೋ ಉಜಾ಼ಖ್ಹ್‌ ಖ್ಹಾರಿಸ್ ಬಾಜು಼ಮ ಘೈಗ್‌ಶೆತೆ ಇಮ್ಮಸ್, ದೀವೊ ಘೈಗಾನಿ ವಖ್ಹತ್‌ಮ ಇನು ಉಜಾ಼ಖ್ಹ್‌ ತಾರಪರ್ ಘೈಗ್‌ಶೆ, “ಕರಿ ಬೋಲ್ಯೊ.
LUK 11:37 ಯೇಸುನೆ ವಾತೆ ಬೋಲಿನ್ ಖತಮ್ ಕರಾನ ಬಾದ್‌ಮ, ಫರಿಸಾಯರ್‌ವಾಳೊ ಏಕ್‌ ಜ಼ಣಾನೆ ಯೇಸುನ ಖಾಣನ ಬುಲಾಯೊ. ತದೆ ಯೇಸು ಇನ ಘರ್‌ನ ಮಹಿ ಜೈ಼ನ್‌, ಖಾಣನ ಬೇಶಿಗಯೊ.
LUK 11:38 ಯೇಸುನೆ ಹಾತ್‌ ಧೋಯೊಕೊಂತೆ ಖಾಣನ ಬೆಠೂತೆ ಯೋ ಫರಿಸಾಯವಾಳನೆ ದೇಖಿನ್, ಆಶ್ಚರ್ಯಹುಯು.
LUK 11:39 ತದೆ ಪ್ರಭುನೆ ಇನ, “ಫರಿಸಾಯರ್ ಹುಯಿರ‍್ಹಾತೆ ತುಮೆ ತುಮಾರು ಹಂಡ್‌ಕು ಅಜು಼ ಥಾಳಿ ಭಾರ್‌ ಪಾಕ್‌ಥಿ ಮಾಂಜ಼ಸ್. ಕತೋಬಿ ತುಮಾರ ಮಹಿ ಠಗಾವಾನು ಅಜು಼ ಖರಾಬ್ ಚಾ಼ಲ್ ಭರೈರ‍್ಹೂಸ್.
LUK 11:40 ಖ್ಹಯಾಲ್‌ಭರ‍್ಯಾ! ಭಾರ್‌ಲ್ಯು ಬಣಾಯೋತೆ ದೇವ್ನೇಸ್, ಮಹಿನೂಬಿ ಬಣೈರಾಖ್ಯೊಸ್ನಿ.
LUK 11:41 ಅನಖ್ಹಾಜೆಸ್ ಮಹಿ ಛಾ಼ತೆ ಇನ ಗೋರ್‌ಗರೀಬ್‌ನ ದೆವೊ, ತದೆ ತಮಾಮ್‌ ರಾಛು಼ ತುಮಾರಖ್ಹಾಜೆ ಪಾಕ್‌ ಹುಯಿಜಾ಼ಶೆ.
LUK 11:42 ಅಲಾ ಫರಿಸಾಯರ್‌ವಾಳ, ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ದೇವ್ನ ತುಮಾರಕನ ಛಾ಼ತೆ ಹರೇಕ್‌ಮ ದಖ್ಹ್‌ಮ ಏಕ್‌ ಭಾಗ್‌ ದೆವೋಸ್; ತುಮೆ ಪಿಕಾವಸ್ತೆ ಖ್ಹಾರಿಸ್ ತರ‍್ಹಾನು ಜ಼ಡಿಬೂಠಿನ ಅಜು಼ ಪುದೀನ, ಸದಾಪುಮಾಬಿ ಭಾಜಿಯೇಮ ದಖ್ಹ್‌ಮ ಏಕ್‌ ಭಾಗ್‌ ದೆವೋಸ್. ಕತೋಬಿ ನ್ಯಾವ್‌ಥಿ ಚಾ಼ಲಿಲ್ಯವಾನ ಅಜು಼ ಪ್ಯಾರ್ ವತಾಳನು ತುಮೆ ಭೈಕಿಗಯ. ಪಹಿಲೆ ತುಮೆ ಆ ಖ್ಹಾರು ಕರಾನ ಆದತ್ ಕರಿಲೇವ್ಣು, ಅಜು಼ ಯೋ ಖ್ಹಾರುಬಿ ನಾ ಭೈಕ್‌ಣು.
LUK 11:43 “ಫರಿಸಾಯರ್‌ವಾಳ, ತುಮಾರಿ ಹಾಲ್ನ ಶಾತ್‌ ಬೋಲು! ಸಬೆ ಭರಾವನು ಮಂದಿರ್‌ಮ ಪಹಿಲಿ ಝ಼ಗೊ ದ್ಯವಾನುಸ್ ತುಮೂನ ಪ್ಯಾರ್, ಅಜು಼ ದುಕಾನೇನಿ ಗಲ್ಲಿಯೇಮ ತುಮೂನ ಖ್ಹಲಾಮ್ ಕರ‍್ನು ಕರಿ ಬೋಲನುಸ್ ತುಮಾರಿ ಆಖ್ಹ್!
LUK 11:44 ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ದಬಿಗಯೂತೆ ಮಖ್ಹಾಣ್ಯನಿಘೋಣಿ ಛಾ಼. ಇನಾಪರ್ ಚಾ಼ಲವಾಳ ಅದ್ಮಿನ ತುಮೆ ಮಖ್ಹಾಣ್ಯುಕರಿ ಮಾಲುಮ್ ಕೊಯ್ನಿ.
LUK 11:45 ತದೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಮ ಏಕ್‌ ಜ಼ಣು ಯೇಸುನ, “ಗುರು, ಆ ವಾತೆ ಬೋಲಾಥಿ ತೂ ಹಮುನಾಬಿ ಖ್ಹರಮ್‌ ಕಾಡದಾಖ್ಹಲ್ ಹುಯು” ಕರಿ ಬೋಲ್ಯೊ.
LUK 11:46 ಯೇಸುನೆ ಜವಾಬ್‌ ದಿದೋಕಿ, “ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳ ಶಾಸ್ತ್ರಿಯೆ, ತುಮಾರಿ ಹಾಲ್ನಬಿ ಶಾತ್‌ ಬೋಲು! ತುಮೆ ಅದ್ಮಿಪರ್ ಢೊವಾನ ಹುವಾಕೊಂತೆ, ಎತ್ರೊ ಬೋಜೊ಼ ನಾಖೋಸ್. ಕತೋಬಿ ತುಮೇತೊ, ಯೋ ಭೋಜಾ಼ನ ಏಕ್‌ ಅಂಗ್‌ಳಿಥೀಬಿ ಛೀಮಕೊಯ್ನಿ.
LUK 11:47 ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಪ್ರವಾದಿಯೇನಖ್ಹಾಜೆ ಅಛ್ಛಿ-ಅಛ್ಛಿ ಮಖ್ಹಾಣ್ಯನಿ ಘವಿಯೇನ ಬಣಾವೋಸ್, ಇವ್ಣುನ ಮಾರ‍್ಯೂತೆ ತುಮಾರ ಗುರುಗುರಬ್‍ಲ್ಯನೇಸ್.
LUK 11:48 ಅನೇಥಿ ತುಮಾರ ಗುರುಗುರಬ್‍ಲ್ಯನೆ ಕರ‍್ಯುತೆ ಇನ, ತುಮೇಸ್ ಸಾಕ್ಷಿ ಹುಯಿರ‍್ಹಾಸ್. ಇವ್ಣ ಕಾಮ್‍ಅಖ್ಖಾನ ಮಾನಿಲಿದ ಕರಿ. ಕಿಮ್‌ಕತೊ ಇವ್ಣೆ ಪ್ರವಾದಿಯೇನ ಮಾರ‍್ಯು, ತುಮೆ ಯೋ ಮಖ್ಹಾಣ್ಯನಿ ಘವಿಯೇನ ಭಾಂದೋಸ್.
LUK 11:49 ಅನಖ್ಹಾಜೆಸ್ ದೇವ್ನಿ ಗ್ಯಾನ್ ಬೋಲಸ್ಕಿ, “ಮೇ ಇವ್ಣಾಕನ ಪ್ರವಾದಿಯೇನಾಬಿ, ಅಪೊಸ್ತಲರ್‌ನಾಬಿ ಮೋಕ್ಲೀಶ್, ಇವ್ಣಾಮ ಥೋಡ ಜ಼ಣಾನ ಮಾರಿನಾಕ್‌ಶೆ ಅಜು಼ ಥೋಡ ಜ಼ಣಾನ ಖ್ಹತಾವ್‌ಶೆ.
LUK 11:50 ಅನಖ್ಹಾಜೆಸ್, ಜಗತ್‌ ಉಬ್‍ಜೂತೆ ತಪ್‌ಥು ಮರೈನಾಖಿ ದಿದೂತೆ ತಮಾಮ್‌ ಪ್ರವಾದಿಯೇನು ಮೋತ್‌ನ, ಆ ಜ಼ಗ್‌ನು ಅದ್ಮಿ ಹುಯಿರ‍್ಹಾತೆ ತುಮೂನ ದಂಡ್‌ ಮಳ್‌ಶೆ!
LUK 11:51 ಹೇಬೆಲ್‌ಥು ಧರೀನ್, ಬಲಿನಿ ಚಾ಼ಚ಼ರ್‌ ಅಜು಼ ಮಂದಿರ್‌ನ ಇಚ಼್‌ಮ ಮರೈ ನಾಖ್ಯುತೆ ಜಕರೀಯನು ಮೋತ್‍ತೋಡಿನು ದಂಡ್‌ ತುಮೂನ ಮಳ್‌ಶೆ. ಒಹೊ, ಮೇ ತುಮೂನ ಬೋಲುಸ್ಕಿ ಯೋ ಖ್ಹಾರಾವ್‍ನಟೇಕೆ ಆ ಜ಼ಗ್‌ನು ಅದ್ಮಿನ ದಂಡ್‌ ಮಳ್‌ಶೆ!
LUK 11:52 ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳ ಶಾಸ್ತ್ರಿಯೆ ತುಮಾರಿ ಹಾಲ್ನ ಶಾತ್‌ ಬೋಲು! ದೇವ್ನಿ ಬಾರೇಮ ಶಿಕಾನಟೇಕೆ ಛಾ಼ತೆ ಬೀಗಾನ ತುಮೇಸ್ ರಾಖಿಲಿದ, ತುಮೇಬಿ ಮಹಿ ಜಾ಼ಯ್‌ಕೊಯ್ನಿ, ಬಿಜಾ಼ನಾಬಿ ಜಾ಼ವಾನ ಕೋ ಮ್ಹೇಲಾನಿ” ಕರಿ ಬೋಲ್ಯೊ.
LUK 11:53 ಯೇಸು ಹಿಜ್ಜಾ಼ಥೊ ನಿಕ್ಳಾನಿ ವಖ್ಹತ್‌ಮ, ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳು ಯೇಸುನಿ ಚಾ಼ವ್‌ಣ್ಯ ಕಾಡ್ಯು, ಅಜು಼ ಘಣಿ ಬಾರೇಮ ಇನ ಪುಛಾ಼ಯು.
LUK 11:54 ಯೇಸುನಿ ವಾತೇಮ ಶಾತ್‌ತೋಬಿ ಗಲತ್‌ ಮಳಾಸ್ಕಿ ಶುಕಿ ಕರಿ, ಇನ ಖ್ಹಪ್‌ಡಾವಾನಟೆಕೆ ಘಣು ಕೋಶಿಷ್ ಕರ‍್ಯು.
LUK 12:1 ಎತ್ರಾಸ್‌ಮ ಹಜಾ಼ರೊ ಅದ್ಮಿನಿ ಭೀಡ್ ಉಪ್ರಾಥಾಳಿ ಪಡ್ತುಹುಯಿನ್‍, ಎಕ್ಟು ಹುಯು. ತದೆ ಯೇಸುನೆ ಪಹಿಲೆ ಇನ ಶಿಷ್ಯರ್‌ನ, “ಫರಿಸಾಯನು ಶೋಡನು ಆಟಾನಿ ಬಾರೇಮ ಕತೊ, ಇವ್ಣೆ ಠಗಾವನಿ ಬಾರೇಮ ಜ಼ತನ್‌ಥಿ ರ‍್ಹವೊ,
LUK 12:2 ಲಪೈರ‍್ಹುತೆ ಖ್ಹಾರುಸ್‌ ಭಾರ್‌ ದೆಖಾವ್‌ಶೆ, ಖ್ಹಾರಿಸ್ ಖ್ಹಾಚಿ ವಾತೆ ಭಾರ್‌ ಮಾಲುಮ್ ಪಡ್‌ಶೆ.
LUK 12:3 ಅನಖ್ಹಾಜೆಸ್, ತುಮೆ ಅಂಧಾರಾಮ ಬೋಲ್ಯಾತೆ ಯೋ ಖ್ಹಾರು, ದನ್ನು ಉಜಾ಼ಳಾಮ ಖ್ಹಮ್‌ಜಾ಼ವ್‌ಶೆ, ಅಜು಼ ಕೋಣಮ ಲಪೀನ್, ಕಾನ್‌ಮ ಶಿಕಾಡಿ ಬೋಲಾಸ್ತೆ ಖ್ಹಾರಿಸ್ ವಾತೆ ಘರ್‌ನ ಛ಼ತ್‍ಪರ್‌ಥು ಖ್ಹಮ್‌ಜಾ಼ವ್‌ಶೆ.
LUK 12:4 “ಮಾರ ದೋಸ್ ಹುಯಿರ‍್ಹಾತೆ ತುಮೂನ, ಮೇ ಬೋಲುಸ್ಕಿ, ಶರೀರ್‌ನ ಮರ್‌ನಾಖಿನ್, ಇನೇಥಿ ಜಾ಼ಖ್ಹತ್ ಶಾತ್ಬಿ ಕರಾಕೊಂತೆ ಇವ್ಣುನ ದೇಖಿನ್, ನಕೊ ಡರ್‌ಶು.
LUK 12:5 ಕತೋಬಿ ತುಮೆ ಕಿನ ದೇಖಿನ್ ಡರ‍್ನು ಕರಿ ಮೇ ತುಮೂನ ಬೋಲಿದೆವುಸ್‍, ಮರಿಜಾ಼ವನ ಬಾದ್‌ಮ, ನರಕ್ಮ ನಾಖಾನಿ ಅದಿಕಾರ್ ರ‍್ಹವಾಳೊ ದೇವ್ನ ದೇಖಿನ್ ಡರೊ. ಓಹೊ, ಇನ ಎಕ್ಕಸ್ ಜ಼ಣಾಥಿ ತುಮೆ ಡರ‍್ನೂತೆ.
LUK 12:6 ಪಾಚ಼್ ಚು಼ರಕ್‌ಲಿಯೇನ ಬೇಕಾಖ್ಹ್‌ನ ವೇಚಾ಼ಕೊಯ್ನಿಕಿ ಶು? ತೋಬಿ, ಇನಾಮಾಥು ಏಕ್‌ನಾಬಿ ದೇವ್ ಭೈಕಕೊಯ್ನಿ.
LUK 12:7 ತುಮಾರೊ ಮುಡ್‌ಕ್ಯಾನೊ ಕೇಖ್ಹ್‌ ಜಿನ್‌ಕುಬಿ ಗಣೈರ‍್ಹೂಸ್‌. ಇನಖ್ಹಾಜೆ ಡರೊ ನಕೊ, ಕೈಏಕ್ಕಿ ಚು಼ರಕ್‌ಲಿಯೇಥೀಬಿ ತುಮೇಸ್ ಘಣ ಮೋಲ್‌ವಾಳ ಹುಯಿರ‍್ಹಾಸ್‌!
LUK 12:8 “ಮೇ ತುಮೂನ ಬೋಲಸ್ಕಿ, ಕೋಣ್ ಅದ್ಮಿನ ಖ್ಹಾಮ್ಣೆ ಯೋ ಮಾರವಾಳೊಕರಿ ಮಾನಿಲೇಸ್ಕಿ, ಅದ್ಮಿನೊ ಛಿಯ್ಯೋಬಿ, ದೇವ್‌ನು ದೂತರ್‌ನ ಖ್ಹಾಮ್ಣೆ ಯೋ ಮಾರವಾಳೊಕರಿ ಮಾನಿಲಿಶೆ.
LUK 12:9 ಕತೋಬಿ ಕೋಣ್ ಅದ್ಮಿನ ಖ್ಹಾಮ್ಣೆ ಯೋ ಮಾರವಾಳೊ ಕಾಹೆಕರಿ ಬೋಲಸ್ಕಿ, ಇನ ಮೇಬಿ ಮಾರ ದೇವ್ನ ದೂತರ್‌ನ ಖ್ಹಾಮ್ಣೆ, ಯೋ ಮಾರ ಭಣಿವಾಳೊ ಕಾಹೆಕರಿ ಬೋಲಿಶ್” ಕರಿ ಬೋಲ್ಯೊ.
LUK 12:10 ಅದ್ಮಿನೊ ಛಿಯ್ಯಾಪರ್ ಶಾತ್‌ತೋಬಿ ಗಲತ್‌ ವಾತೆ ಬೋಲ್ಯೂತೊ, ಇವ್ಣುನ ಮಾಪಿ ಮಳ್‌ಶೆ; ಕತೋಬಿ ಪವಿತ್ರಾತ್ಮನ ವಿರೋದ್ ಖರಾಬ್ ಬೋಲವಾಳಾನ ಮಾಪಿಕೊಯ್ನಿ.
LUK 12:11 “ಇವ್ಣೆ ತುಮೂನ, ಸಭೆ ಭರಾವನು ಮಂದಿರ್‌ಮ ರ‍್ಹವೊ, ಅದಿಕಾರಿಕನ ರ‍್ಹವೊ, ರಾಜ್ಯಪಾಲ್‌ಕನ ರ‍್ಹವೊ, ರಾಜ಼್‌ಭಾರ್‌ ಚ಼ಲಾವವಾಳ ಖ್ಹಾಮ್ಣೆ ರ‍್ಹವೊ ಖೇಚಿಲಿಗಯೂತೆ, ಇವ್ಣುನ ಶಾತ್‌ ಜವಾಬ್‌ ದೇವ್ಣು, ಕಿಮ್ ಬೋಲ್ನುಕರಿ ವೇಚ಼್‌ಣೆ ನಕೊ ಕರ್ಶು.
LUK 12:12 ಶನಕತೊ ಯೋ ವಖ್ಹತ್‌ಮ, ತುಮೆ ಶಾತ್‌ ಬೋಲ್ನುಕರಿ ಪವಿತ್ರಾತ್ಮಾಸ್‌ ತುಮೂನ ಬೋಲಿದಿಶೆ.
LUK 12:13 ಅದ್ಮಿನಿ ಝೂ಼ಂಡ್‌ಮಾಥು ಏಕ್‌ ಜ಼ಣು ಯೇಸುನ, “ಗುರು, ಮರಿಗಯೋತೆ ಹಮಾರ ಬಾನಿ ಆಸ್ತಿನ ಭಾಗ್‌ಪಾಡಿ ದ್ಯವಾದೆಕರಿ ಮಾರ ಮೋಟ ಭೈನ ಬೋಲ್’ ಕರಿ ಬೋಲಖ್ಹತರ್‌,
LUK 12:14 ತದೆ ಯೇಸುನೆ ಇನ, “ಅಲಾ ದೋಸ್, ನಯ್ಯೊಹುಯಿನ್ ರ‍್ಹವೊ ನತರ್‌ಕಿ ಆಸ್ತಿನ ಭಾಗ್‍ಪಾಡವಾಳೊ ಹುಯಿನ್ ರ‍್ಹವೊ, ಮನ ತುಮಾರ ಭೇ ಜ಼ಣಾಪರ್ ನೇಮಕ್ ಕರ‍್ಯುತೆ ಕೋಣ್?” ಕರಿ ಪುಛಾ಼ಯೊ.
LUK 12:15 ಅಜು಼ ಹಿಜ಼್ಜಾಥೂತೆ ಖ್ಹಾರುಸ್‌ ಅದ್ಮಿನ, “ಜ಼ತನ್‌ಥಿ ರ‍್ಹವೊ ಅಜು಼ ಹರೇಕ್ ತರ‍್ಹಾನು ಲಾಲಚ್‌ಥಿ ದೂರ್ ರ‍್ಹವಾನಿಮತ್ ತುಮಾರು ತುಮೆ ಬರಾಬರ್‌ಥಿ ದೇಖಿಲೆವೊ. ಶನಕತೊ ಏಕ್‌ ಜ಼ಣಾನ ಕೆತ್ರು ಧನ್‌-ದೌಲತ್ ರ‍್ಹಯುತೋಬಿ, ಯೋ ದೌಲತ್‌ ಇನ ಜಾನ್ನ ಆಧಾರ್ ಕೋ ಹುವಾನಿ.
LUK 12:16 ಅನ ಬಾದ್‌ಮ ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಏಕ್‌ ಶೌಕಾರ್ ಅದ್ಮಿ ಥೂ. ಏಕ್‌ ಹಲ್ಲ ಇನಿ ಜ಼ಮೀನ್‌ಮ ಅಛ್ಛಿನಿತರ ಅನಾಜ಼್ ಪಿಕ್ಯು.
LUK 12:17 ತದೆ ಯೋ ಇನ ಮನ್‌ಮ, ‘ಮೇ ಶಾತ್‌ಕರು? ಮಾರು ಅನಾಜ಼್ ಅಖ್ಖು ಭರಿನ್ ಮ್ಹೇಲಾನ ಝ಼ಗೊ ಕೊಯ್ನಿನಿ!’ ಕರಿ ಸೋಚಿನ್,
LUK 12:18 ‘ಮೇ ಏಕ್‌ ಕಾಮ್ ಕರುಸ್; ಮಾರಿ ಕಣ್ಗೀನ ಫೋಡೈನ್, ಇನೇಥಿಬಿ ಮೋಟಿ ಕಣ್ಗಿನ ಭಂದೈನ್, ಹಿಜ್ಜಾ಼ ಮಾರು ಖ್ಹಾರೂಸ್ ಅನಾಜ಼್‌ನ ಅಜು಼ ಬಿಜು಼ ಖ್ಹಾರೂಸ್ ರಾಛಾ಼ನ ಮ್ಹೇಲುಸ್’
LUK 12:19 ಬಾದ್‌ಮ ಮಾರು ಮೇ, ಹೇ ಜಾನ್‌, ಕೆತ್ರಾಸ್ಕಿ ವರಖ್ಹ್ ಬೇಶಿನ್ ಖಾವಯೆತ್ರು ಅನಾಜ಼್ ತಾರಕನ ಪಡ್ಯೂಸ್. ಅರಾಮ್ ಕರಿಲೆ, ಖೈಪೀನ್ ಖ್ಹುಶಿ ಕರ್‌’ ಕರಿ ಇನು ಯೋಸ್ ಬೋಲಿಲಿದೊ.
LUK 12:20 ಕತೋಬಿ ದೇವ್ ಇನ, “ಬಿಣ್‍ಅಕ್ಲಿ, ಆ ರಾತೇಸ್ ತಾರ ಜಾನ್ನ ಕಾಡಿಲಿಶೆ; ತದೆ ತುನೆ ತಾರಖ್ಹಾಜೆ ಜ಼ಮಾಕರೀನ್ ಮ್ಹೇಲಿರಾಖ್ಯೊತೆ ಯೋ ಖ್ಹಾರು ಕಿನ ಉಶೆ?” ಕರಿ ಪುಛಾ಼ಯೊ.
LUK 12:21 ಇನಖ್ಹಾಜೆ ಯೋಸ್‌, ಧನ್‌-ದೌಲತ್‌ನ ಜ಼ಮಕರಿಲ್ಯವಾಳಾನಿ ಹಾಲ್‌ಬಿ ಅಮ್ಮಸ್, ಕತೋಬಿ ದೇವ್ನ ಡೋಳಾಮ ಇವ್ಣೆ ಶೌಕಾರ್ ಕಾಹೆ.
LUK 12:22 ಅಜು಼ ಯೇಸುನೆ ಇನ ಶಿಷ್ಯರ್‌ನ, “ಅನಖ್ಹಾಜೆಸ್ ಮೇ ತುಮೂನ ಬೋಲುಸ್ಕಿ, ಜಿವಿರ‍್ಹವಾನಟೇಕೆ ಶಾತ್ ಖಾಣು ಖಾಶುಕರಿ ರ‍್ಹವೊ, ನತರ್‌ಕಿ ಶರೀರ್‌ನ ಪೆರ‍್ಹಾನ ಲುಂಗ್ಡಾವ್‍ನಟೇಕೆ ರ‍್ಹವೊ ವೇಚ಼್‌ಣೆ ನಕೊ ಕರೊ.
LUK 12:23 ಖಾಣಥೀಬಿ ಜಾನ್‌, ಅಜು಼ ಲುಂಗ್ಡಾವ್‌ಥೀಬಿ ಶರೀರ್ ಮಹಾನ್ ಹುಯಿರ‍್ಹೂಸ್.
LUK 12:24 ಕಾಂಗಣ್ಣ ಅಖ್ಖು ದೇಖೊ, ಯೋ ಪಿಕಾವಕೊಯ್ನಿ ವ್ಹಾಡಾಬಿ ಕೊಯ್ನಿ; ಇವ್ಣುನ ಜ಼ಮಕರಾನು ಘರ್‌ಬಿ ಕೊಯ್ನಿ, ಕಣ್ಗಿಬಿ ಕೊಯ್ನಿ; ಇಮ್‌ ರ‍್ಹಯುತೋಬಿ, ದೇವ್ ಇವ್ಣುನ ಖಡೈನ್ ಪಾಳಸ್. ಉಡಂತು ಜಿನಾವರ್‌ಥೀಬಿ ತುಮೆ ಕೆತ್ರೇಕ್ಕಿ ಊಚ಼ ಹುಯಿರ‍್ಹಾಸ್.
LUK 12:25 ಅನಿ ಬಾರೇಮ ವೇಚ಼್‌ಣೆ ಕರಾಥಿ, ತುಮಾರಿ ಉಂಬರ್ ಭಡಾವನ ಕೀನೇಥಿಬಿ ಉಶೇಕಿ ಶು?
LUK 12:26 ನ್ಹನ್ನಾನು ಕಾಮ್ ಕರಾನಸ್‍ ತುಮಾರ ಹಾತೆ ಕೋ ಹುವ್ವಾನಿತೆ, ಮೋಟು-ಮೋಟು ಕಾಮ್ನಿ ಬಾರೇಮ ತುಮೆ ಶನ ವೇಚ಼್‌ಣೆ ಕರೊಸ್ತೆ?
LUK 12:27 ಜ಼ಂಗ್‍ಳಿಫೂಲ್‍ ಫುಟಾಸ್ತೆ ತರಿಕಾನ ದೇಖೊ; ಯೊ ಮ್ಹಿನತ್ ಕರಕೊಯ್ನಿ ಅಜು಼ ಇನಖ್ಹಾಜೆ ಲುಂಗ್ಡಾವ್‍ನಾಬಿ ಶಿವಿಲೆಯಿಕೋಯ್ನಿ. ತೋಬಿ ಮೇ ತುಮೂನ ಬೋಲುಸ್ಕಿ, ರಾಜ಼ ಸೊಲೊಮೋನ್ನಾಬಿ, ಇನಾಕನ ಥೂತೆ ಖ್ಹಾರುಸ್‌ ಖ್ಹೋನ್ನುಖ್ಹರಪ್‌ ಅಜು಼ ರಾಜಾ಼ನು ಪೇರ್‌ವಾಖ್ಹ್‌ನ ಫೇರ‍್ಯೊತೋಬಿ, ಆ ಫೂಲ್‌ಮ ಏಕ್‌ನ ಛಾ಼ತೆ ಶನ್‌ಗಾರ್ ಇನ ಕೋ ಥೂನಿ” ಕರಿ ಬೋಲ್ಯೊ.
LUK 12:28 ಅಲಾ, ದರ್ರಾಶಿ ವಿಶ್ವಾಸ್‍ವಾಳ, ಹಮ್ಕೆರ‍್ಹೀನ್ ಕಾಲೆ ಚು಼ಲ್ಹಾಮ ಬಳಿಜಾ಼ವಾನ ಜ಼ಂಗ್‌ಳಿ ಘಾಖ್ಹ್‌ನ ದೇವ್ ಅಮ್‍ ಪೇರ‍್ಹಾಯೋತೊ ಅನೇಥಿಬಿ ಜಾ಼ಖ್ಹತ್ ತುನ ಹೊಢೈಫೆರಾವ್‍ಶೆ.
LUK 12:29 ಅನಖ್ಹಾಜೆಸ್ ಶಾತ್‌ ಖಾಣು? ಶಾತ್‌ ಪೀಣು? ಕರಿ ಬೋಲಿನ್, ಕದೇಬಿ ಸೋಚ಼್‌ತಾಹುಯಿನ್‌, ಪಸ್ತಾವೊ ನಕೊ.
LUK 12:30 ಅನಿ ಖ್ಹಾರಿ ಬಾರೇಮ, ಆ ಜಗತ್‍ನುಅದ್ಮಿ ಕದೇಬಿ ಪಸ್ತಾವಸ್. ಆ ಅಖ್ಖು, ತುಮೂನ ಜ಼ರೂರತ್ ಛಾ಼ಕರಿ ಪರಲೋಕ್‌ನೊ ತುಮಾರ ಬಾನ ಮಾಲುಮ್‌.
LUK 12:31 ಅನಬದಲ್, ದೇವ್ನು ರಾಜ್ಯನಖ್ಹಾಜೆ ತರ್ಖ್ಹೊ, ತದೆ ಆ ಖ್ಹಾರು ಯೋಸ್‌ ತುಮೂನ ದಿಶೆ” ಕರಿ ಬೋಲ್ಯೊ.
LUK 12:32 “ನ್ಹಾನಿ ಝೂ಼ಂಡ್‌, ಡರ್‌ನಕೊ; ಯೋ ರಾಜ್ಯನ ತುಮೂನ ದ್ಯವಾನ ತುಮಾರೊ ಬಾನ ಖ್ಹುಶಿ ಛಾ಼.
LUK 12:33 ತುಮಾರಕನ ಛಾ಼ತೆ ಖ್ಹಾರುಸ್‌ ವೇಚಿನ್, ಆವಸ್ತೆ ಪೈಶಾನ ಗೋರ್‌-ಗರೀಬ್‌ನ ದೇವೊ. ತುಮಾರಕನ ಫಾಟಕೊಂತೆ ಚ಼ಂಚಿಯೇನ ಕರಿಲೆವೊ, ಪರ್‌ಲೋಕ್‌ಮ ಕಮ್ ಹುವಾಕೊಂತೆ ಶೊತ್ನ ಜ಼ಮಕರಿಲೇವೊ, ಕೆಹೊ ಚೋ಼ರ್‌ಬಿ ಇನ ಖನ್ನೆ ಆವಾನ ಕೋ ಆವಾನಿ ಅಜು಼ ಇನ ಕೋರ‍್ಹ ಖೈನ್‌ ಬರ್ಬಾತ್ ಕೋ ಉಶೇನಿ.
LUK 12:34 ತುಮಾರಿ ಶೊತ್‌ ಕಿಜ್ಜಾ಼ ರ‍್ಹೇಸ್ಕಿ, ಹಿಜ್ಜಾ಼ಸ್ ತುಮಾರೊ ದಿಲ್‌ಬಿ ರ‍್ಹೇಸ್‌.
LUK 12:35 “ಶಾತ್ಬಿ ಆವೊ ತೈಯಾರ್ ರ‍್ಹವೊ, ಲುಂಗ್ಡ ಪೇರ‍್ಹಿನ್‌ ಖ್ಹವಾರಿರಾಖೊ, ತುಮಾರೊ ದೀವೊಖ್ಹಾರು ಲಾಗ್ತುರ‍್ಹವಾದೆ,
LUK 12:36 ತುಮೇತೊ, ಇವ್ಣೊ ಯಜಮಾನ್ ಆಯಿನ್, ಬಾಕಲ್ ಮಾರ್‌ತಾಸ್ ಕಾಡಾನ ತೈಯಾರ್ ರ‍್ಹೀನ್, ವ್ಯಹಾನು ಖಾಣು ಖೈನ್, ಕದೆ ಪಾಛೊ಼ಫರಿ ಆವ್‍ಶೆಕರಿ ಜ಼ಪಿರ‍್ಹೇಸ್ತೆ ಆಳ್‌ನಿಮತ್‌ ರ‍್ಹವೊ.
LUK 12:37 ಯಜಮಾನ್ ಐನ್ ಬಾಕಲ್ ಮಾರಾನಿ ವಖ್ಹತ್‌ಮ, ಇವ್ಣೆ ಬಾಕಲ್ ಕಾಡಸ್‌. ಪಾಛೊ಼ ಪ್ರಭು ಫರಿಅಯಿನ್‌, ಕೆಹೊಖ್ಹಾರೊ ಆಳ್‌ ತೈಯಾರ್ ಹುಯಿರ‍್ಹಿನ್, ಇನಖ್ಹಾಜೆ ಜ಼ಪಿರ‍್ಹೇವಾನು ಯೋ ದೇಖಾಸ್ಕಿ ಇವ್ಣೆ ಧನ್ಯ ಹುಯಿರ‍್ಹಿಶೆ! ಮೇ ತುಮೂನ ಖ್ಹಾಚಾಮ ಬೋಲುಸ್ಕಿ, ಯೋ ಇನಿ ಕಂಬರ್‌ನ ಲುಂಗ್ಡು ಭಾಂದಿಲೀನ್, ಇವ್ಣುನ ಖಾಣನ ಬೆಖ್ಹಾಡಿನ್‌, ಇವ್ಣ ಖನ್ನೆ ಐನ್, ಇವ್ಣಿ ಚಾ಼ಕ್ರಿ ಕರ್ಶೆ.
LUK 12:38 ಯೋ ಅಧಿರಾತ್ಮಾಸ್‌ಕಿ, ನತರ್‌ಕಿ ಇನೇಥಿಬಿ ಜಾ಼ಖ್ಹತ್ ವಖ್ಹತ್ ಲಗಾಡಿನಸ್ಕಿ ಆಯೊತೋಬಿ, ಕೋಣ್ ತೈಯಾರ್ ಹುಯಿರ‍್ಹೇಸ್ತೆ ಯೋ ದೇಖಾಸ್ಕಿ, ಇವ್ಣೆ ಧನ್ಯ ಹುಯಿರ‍್ಹೂಸ್.
LUK 12:39 ಆ ವಾತೆ ತುಮಾರಿ ಯಾದ್ಮ ರ‍್ಹವಾದೆ; ಚೋ಼ರ್ ಆವಾನಿ ವಖ್ಹತ್ ಘರ್‌ನ ಯಜಮಾನ್ನ ಮಾಲುಮ್ ರ‍್ಹಯುಹೋತ್ತೊ, ಯೋ ಹೊಷಾರಿ ರ‍್ಹೀನ್, ಇನ ಘರ್‌ನ ಲೂಟದಿದೊಹೋತ್‌ ಕೊಯ್ನಿ.
LUK 12:40 ಇಮ್ಮಸ್, ತುಮೇಬಿ ತೈಯಾರ್ ರ‍್ಹೇಣು, ಶನಕತೊ ತುಮೆ ಸೋಚಾಸ್‌ಕೊಂತೆ ವಖ್ಹತ್‌ಮ ಅದ್ಮಿನೊ ಛಿಯ್ಯೊ ಆವ್‌ಶೆ.”
LUK 12:41 ತದೆ ಪೇತ್ರನೆ, “ಪ್ರಭು, ತುನೆ ಆ ಮತ್ಲಬ್‌ನಿ ಖೇಣಿನ ಬೋಲ್ಯೊತೆ ಹಮಾರ ಟೇಕೆಕಿ, ಹರೇಕ್ ಅದ್ಮಿನ ಟೇಕೆ?” ಕರಿ ಪುಛಾ಼ಯೊ.
LUK 12:42 ಯೇಸುನೆ ಶಾತ್‍ಬೋಲ್ಯೊಕತೊ, ವೇಳ್‍ವೇಳ್ನ ಹೋಣುತೆ ಯೊ ಜಿನಖ್ಹ್‌ನ ಮಾಪಿನ್‌ ದ್ಯವಾನಖ್ಹಾಜೆ ಯಜಮಾನ್ನೆ ಇನ ಘರ್‌ಮ ನೇಮ್‌ಶಾಯೋತೆ ನಿಯತ್‍ವಾಳೊಬಿ ಅಕ್ಲೀಬಿ ಹುಯಿರೋತೆ ಘರ‍್ನೊಸೇವಕ ಕೋಣ್?
LUK 12:43 ಘರ್‌ನೊ ಯಜಮಾನ್ ಐನ್, ಕೆಹೊ ಆಳ್‌ ಆ ಖ್ಹಾರು ಕರುಕರಾತೆ ಕರಿ ದೇಕ್‌ಶೇಕಿ, ಯೋ ಆಳ್‌ ಧನ್ಯ ಹುಯಿರ‍್ಹೋಸ್.
LUK 12:44 ಯೋ ಯಜಮಾನ್ ಇಮ್ನ ಆಳ್‌ನ ಇನು ಖ್ಹಾರೂಸ್ ಧನ್‌-ದೌಲತ್‌ಪರ್ ಅದಿಕಾರಿಹುಯಿನ್ ನೇಮ್‌ಶಾವ್‌ಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್,
LUK 12:45 ಕತೋಬಿ ಯೋ ಆಳ್‌, ಇನೊ ಯಜಮಾನ್ ಒಗ್ಗಿಸ್‌ಮ ಕೋ ಆವ್‌ಶೇನಿ ಕರಿ ಇನ ಮನ್‌ಮ ಸೋಚಿಲೀನ್, ಬಿಜಾ಼ಖ್ಹಾರ ತಯೇಡ-ಪರ್ಖ್ಹಾ ಆಳ್‌ನ ಮಾರ್‌ತೊಹುಯಿನ್, ಖೈ-ಪೀನ್ ಉರಾಳಲಗ್ಯೊತೊ,
LUK 12:46 ತದೆ ಯೊ ಆಳ್‌ ಸೋಚಾಸ್‌ಕೊಂತೆ ದನ್ಮ ಅಜು಼ ಇನ ಮಾಲುಮಸ್ ಪಡಾಕೊಂತೆ ವಖ್ಹತ್‌ಮ, ಇನೊ ಯಜಮಾನ್ ಐನ್, ಇನ ಕತ್ರೀನ್ ಟುಕ್‌ಡಾ-ಟುಕ್‌ಡಾ ಕರೀನ್, ವಿಶ್ವಾಸ್‌ಕೊಂತೆ ಅದ್ಮಿನ ನಾಖಸ್ತೆ ಝ಼ಗೋಪರ್ ಇನ ನಾಕ್‌ಶೆ.
LUK 12:47 ಏಕ್‌ ಆಳ್‌, ಇನೊ ಯಜಮಾನ್ನ ಇನೇಥಿ ಶಾತ್‌ ಹೋಣುಕರಿ ಮಾಲುಮ್ ರ‍್ಹೀನ್‌ಬಿ, ಯೋ ತೈಯಾರ್‌ಹುಯಿನ್, ಯೋ ಕಾಮ್ನ ನಾ ಕರ‍್ಯೋತೊ, ಇನ ಬರೊಬರ್‌ನೊ ಮಾರ್ ಪಡ್‌ಶೆ.
LUK 12:48 ಕತೋಬಿ ಏಕ್‌ ಆಳ್‌ನ, ಇನೊ ಯಜಮಾನ್ನ ಇನೇಥಿ ಶಾತ್‌ ಹೋಣುಕರಿ ಮಾಲುಮ್‌ ಕೊಂತೆ, ಮಾರ್ ಖಾವಖ್ಹರ್ಕು ಕಾಮ್ ಕರ‍್ಯೋತೊ, ಇನಾಬಿ ದಂಡ್‌ ಮಳ್‌ಶೆ. ಕತೋಬಿ ಇನು ಕಾಮ್ ಶಾತ್‌ಕರಿ ಮಾಲುಮ್‌ ಕರೀನ್‍ಬಿ, ಇನ ಕರ‍್ಯುಕೊಂತೆ ಯೋ ಆಳ್‌ಥೀಬಿ, ಅನ ಕಮ್ ಮಾರ್ ಪಡ್‌ಶೆ. ಕಿನ ಜಾ಼ಖ್ಹತ್ ದೆವೈರ‍್ಹೂಸ್ಕಿ, ಇನೇಥಿ ಜಾ಼ಖ್ಹತ್ ಮಳ್‌ಶೆಕರಿ ಆಖ್ಹ್ ಕರ್ಶೆ, ಬಿಜೂ಼ಬಿ ಜಾ಼ಖ್ಹತ್ ದೆವೈರ‍್ಹೂತೆ ಇನಾಕಂಥು, ಬಿಜೂ಼ಬಿ ಜಾ಼ಖ್ಹತ್ ಮಳ್‌ಶೆಕರಿ ಆಖ್ಹ್ ಕರ್ಶೆ.
LUK 12:49 “ಮೇ ಆಯೋತೆ, ಜ಼ಮೀನ್‌ಪರ್ ಆಗ್ ನಾಕ್ಣುಕರಿ; ಅತ್ರಾಸ್‌ಮ ಯೋ ಲಾಗಿಗಯುಹೋತ್ತೊ ಮನ ಕೆತ್ರೇಕ್ಕಿ ಖ್ಹುಶಿ ಹುಯುಹೋತ್!
LUK 12:50 ಕತೋಬಿ, ಮನ ಬಿಜೇಕ್ ತರ‍್ಹಾನು ಬ್ಯಾಪ್ತಿಸ್ಮ ಏಕ್‌ ಮಳ್‌ಣು. ಯೋ ಮಳಾತೋಡಿ, ಮೇ ಘಣಿ ಖ್ಹತಾಪ್ಣಿಮ ಛೂ಼.
LUK 12:51 ಜ಼ಮೀನ್‌ಪರ್ ಶಾಂತಿ ದ್ಯವಾನಟೇಕೆ, ಮೇ ಆಯೊಕರಿ ತುಮೆ ಸೋಚೋ಼ಸ್‌ಕಿ? ಕೊಯ್ನಿ! ಶಾಂತಿ ದ್ಯವಾನ ಕಾಹೆ, ಕತೋಬಿ ತೋಡಾವಾನ ಐರ‍್ಹೋಸ್! ಕರಿ ಮೇ ತುಮೂನ ಬೋಲುಸ್.
LUK 12:52 ಕಿಮ್‌ಕತೊ, ಹಂಕೇಥು ಎಕ್ಕಸ್ ಘರ್‌ಮ ಛಾ಼ತೆ ಪಾಚ಼್ ಅದ್ಮಿಮ, ಬೇ ಜ಼ಣಾನ ವಿರೋದ್ ತೀನ್ ಜ಼ಣ ಉಠ್‍ಶೆ, ತೀನ್ ಜ಼ಣಾನ ವಿರೋದ್ ಬೇ ಜ಼ಣ ಉಟ್‌ಶೆ, ಅಮ್ ಇವ್ಣಾಮ ಭಾಗ್‌ ಪಡಿಜಾ಼ಶೆ.
LUK 12:53 ಛಿಯ್ಯಾನಿ ವಿರೋದ್ ಬಾ, ಬಾನಿ ವಿರೋದ್ ಛೀಯ್ಯೊ; ಛೋ಼ರಿನಿ ವಿರೋದ್ ಆಯ, ಆಯಾನಿ ವಿರೋದ್ ಛೋ಼ರಿ, ವ್ಹವ್‌ನಿ ವಿರೋದ್ ಖ್ಹಾಖ್ಹು, ಖ್ಹಾಖ್ಹುನಿ ವಿರೋದ್ ವ್ಹವ್ ಉಟ್‌ಶೆ.
LUK 12:54 ಎತ್ರೆಸ್ ಕಾಹೆತೆ ಯೇಸುನೆ ಅದ್ಮಿ ಖ್ಹಾರಾನಾಬಿ ಬೋಲ್ಯೋಕಿ, “ತುಮೆ ಪಶ್ಚಿಮ್ ದಿಕ್ಮ ಪಾಣಿನೊ ಮೋಡ್ ದೆಖಾವ್‌ತಾಸ್‌ನ, ‘ಪಾಣಿ ವರಖ್ಹ್‌ಶೆ’ ಕರಿ ಬೋಲಾಸ್ನಿ, ಇಮ್ಮಸ್ ಪಾಣಿ ವರ್ಖ್ಹಾಸ್.
LUK 12:55 ದಕ್ಷಿಣ್ ದಿಕ್‌ಮಾಥು ವಹಿರೊ ವಾಗಲಗ್ಯೋತೊ, ‘ಗರ್ಮಿ ಉಟ್‌ಶೆ’ ಕರಿ ತುಮೆ ಬೋಲೋಸ್, ಯೋಬಿ ಇಮ್ಮಸ್ ಹುವಾಸ್.
LUK 12:56 ಠಗಾರ‍್ಯ, ತುಮೆ ಆಬ್‍ ಧರ್ತಿನ ದೇಖಿನ್, ಇನು ಮೋಸಮ್‌ನ ತುಮೆ ಮಾಲುಮ್ ಕರಿಲೆವೋಸ್‌ನಿ, ಇಮ್‌ ರ‍್ಹವಾಪರ್, ಆ ವಖ್ಹತ್‌ನ ಪರ್ಖಾನ ತುಮೂನ ಕೋ ಹುವ್ವಾನಿಕಿ ಶು?
LUK 12:57 ಖ್ಹಾಚು಼ ಖಿವು ಕರಿ ತುಮೇಸ್ ಶನ ತೀರ್ಪ್‌ಕರಾಕೊಯ್ನಿ?
LUK 12:58 ತಾರಪರ್ ಹೊಜ಼್ಜತ್‌ಕರ್ನು ಕರಿ ಛಾ಼ತೆ ಇನ ಜೋ಼ಡೆ ನೈಯಾಕನ ಜಾ಼ವಾನಿ ವಖ್ಹತ್‌ಮ, ವಾಟ್‌ಪರಸ್ ಝ಼ಗ್ಡಾನ ಪರಿಹಾರ್‌ ಕರಾನ ಕೋಶಿಶ್ ಕರ್‌. ನತರ್‌ಕಿ ಯೋ ತುನ ನೈಯಾಕನ ಖೇಚಿಲಿಜಾ಼ಶೆ, ಯೋ ನಯ್ಯೊ ಜೇಲ್‌ನ ಶಿಪಾಯಿನ ಹಾತ್ಮ ದಿಶೆ ಅಜು಼ ಯೋ ತುನ ಜೇಲ್‌ಮ ಕೋಂಡಿಘಾಲ್‌ಶೆ.
LUK 12:59 ಏಕ್‌ ಪೈಶೂಬಿ ಜಿನುಕು ಮ್ಹೇಲ್‌ಶೆಕೊಂತೆ, ಅಖ್ಖುಸ್ ಪೈಶು ಫೇಡಾವಲಗೂಬಿ, ತೂ ಹಿಜ಼್ಜಾಥೊ ಭಾರ್‌ ಛು಼ಟಿಶ್‌ಕೊಯ್ನಿ ಕರಿ ಮೇ ತುನ ಬೋಲುಸ್” ಕರಿ ಬೋಲ್ಯೊ.
LUK 13:1 ಯೋಸ್ ವಖ್ಹತ್‌ಮ, ಹಿಜ್ಜಾ಼ ಥೂತೆ ಥೋಡು ಜ಼ಣು, ಪಿಲಾತನೆ ಗಲಿಲಾಯವಾಳನು ಲ್ಹೋಯಿನ, ಇವ್ಣೆ ದೇವ್ನ ಬಲಿದಿದೂತೆ ಲ್ಹೋಯಿನ ಜೋ಼ಡೆ ಮಳಾಯೋತೆ ಬಾರೇಮ ಯೇಸುನ ಬೋಲ್ಯು.
LUK 13:2 ತದೆ ಯೇಸುನೆ ಇವ್ಣುನ, “ಯೋ ಗಲಿಲಾಯವಾಳು ಇಮ್ನಿ ತರಿಕಾಥಿ ಮರ‍್ಯುತೆ ದೇಖಿನ್, ಇವ್ಣೆ ಬಿಜಾ಼ಖ್ಹಾರ ಗಲಿಲಾಯವಾಳಾಥೀಬಿ ಪಾಪಿ ಕರಿ ಸೋಚೋ಼ಸ್ಕಿ ಶು?
LUK 13:3 ಇಮ್‌ ನಾ ಸೋಚ್‌ನು! ಕರಿ ಮೇ ತುಮೂನ ಬೋಲುಸ್. ದೇವ್‌ಭಣಿ ಫರ‍್ಯನಾತೊ ತುಮೆಅಖ್ಖು ಇಮ್ಮಸ್ ನಾಶ್ ಹುಯಿಜಾ಼ಶು.
LUK 13:4 ಸಿಲೋಮ್‌ಮ ಊಚಿ ಭೀತ್ ಪಡೀನ್ ಮರ‍್ಯುತೆ ಯೋ ಅಠಾರ ಅದ್ಮಿ, ಯೆರೂಸಲೇಮ್ಮ ಛಾ಼ತೆ ಬಿಜಾ಼ಖ್ಹಾರಾಸ್‌ ಅದ್ಮಿಥೀಬಿ ಅಪರಾದಿ ಕರಿ ಸೋಚೋ಼ಸ್ಕಿ ಶು?
LUK 13:5 ಇಮ್‌ ಕಾಹೆ! ಕರಿ ಮೇ ತುಮೂನ ಬೋಲುಸ್. ತುಮಾರು ಪಾಪ್ನ ಮ್ಹೇಲಿನ್ ನಾ ಫರ‍್ಯಾತೊ, ತುಮೆಖ್ಹಾರುಬಿ ಇಮ್ಮಸ್ ಮರ್‌ಶು” ಕರಿ ಬೋಲ್ಯೊ.
LUK 13:6 ಅನ ಬಾದ್‌ಮ ಯೇಸುನೆ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, “ಏಕ್‌ ಅದ್ಮಿನೆ ಇನು ದ್ರಾಕ್ಷಿನು ಬಾಗ್‌ಮ ಏಕ್‌ ಅಂಜೀರ್‌ನು ಝಾ಼ಡ್‌ಣ ಪಾಳಿರಾಖ್ಯೋಥೊ. ಏಕ್‌ ಹಲ್ಲ ಯೋ ಅದ್ಮಿ ಯೋ ಝಾ಼ಡಾಮ ಪಂಡು ಢೂಂಡ್‌ತುಹುಯಿನ್, ಹಿಜ್ಜಾ಼ ಆಯು, ಕತೋಬಿ ಏಕ್‌ಬಿ ಮಳ್ಯುಕೊಯ್ನಿ.
LUK 13:7 ತದೆ ಯೋ ಅದ್ಮಿ ಬಾಗ್‌ ದೇಖಿಲ್ಯವಾಳಾನ, “ಹಂದೇಕ್, ಮೇ ತೀನ್ ವರಖ್ಹ್‌ಥೋಬಿ ಆ ಅಂಜೀರ್‌ನ ಝಾ಼ಡಾಮ ಪಂಡು ಢೂಂಡ್ತೊ ಆಯೊ, ಕತೋಬಿ ಏಕ್‌ಬಿ ಮಳ್ಯುಕೊಯ್ನಿ. ಅನ ಕತ್ರಿ ನಾಕ್! ಅನೇಥಿ ಧರ್ತಿನ ಶನಖ್ಹಾಜೆ ಫಾಯಿದೊಕೊಂತೆ ಇಮ್‌ ಹೋಣು” ಕರಿ ಬೋಲ್ಯೊ.
LUK 13:8 ತೋಬಿ ಯೋ ಬಾಗ್‌ನ ದೇಖಿಲ್ಯವಾಳಾನೆ, “ಪ್ರಭು, ಆ ವರಖ್ಹ್‌ಬಿ ಅನ ಮ್ಹೆಂದೆ; ಎತ್ರಾಮ ಮೇ ಅನ ಅಶ್‌ಪಿಶ್‍ ಖೋಂದಿನ್, ಗೋಬರ್ ನಾಖುಸ್.
LUK 13:9 ಹಮ್ಕೆನ ವರ್‌ಖ್ಹೆತೋಬಿ ಅಂಜೀರ್‌ ಮ್ಹೇಲ್ಯೂತೊ ಮ್ಹೇಲಾದೆ, ನತರ್‌ಕಿ ಅನ ಕತ್ರಿ ನಾಖಿದಿಯೇಜಾ಼ಯಿ” ಕರಿ ಜ಼ವಾಬ್‌ದಿದೊ.
LUK 13:10 ಏಕ್‌ ದನ್ನೆ ಸಬ್ಬತ್‌ಮ ಯೇಸು ಸಬೆ ಭರಾವಾನು ಮಂದಿರ್‌ಮ ವಚನ್ ಬೋಲಿದೆವ್‍ಕರ್ತೋಥೊ.
LUK 13:11 ಹಿಜ್ಜಾ಼ ಅಠಾರ ವರಖ್ಹ್‌ಥು ಭೂತ್‌ ಧರೀನ್, ಆಂಗ್‌ತನ್‌ಮ ರೋಗ್‌ ಥೂತೆ ಏಕ್‌ ತಯೇಡ ಥಿ. ಇನು ಢೋಪ್‌ರು ಝು಼ಕಿರ‍್ಹೂಥು ಅಜು಼ ಇನ ಜ಼ರಾಬಿ ಮುಡ್‌ಕ್ಯು ಉಪ್ಪರ್ ಪಾಡೀನ್, ಉಭು ಭೀರ‍್ಯಾವನ ಕೋ ಹೋತುಥೂನಿ.
LUK 13:12 ಯೇಸುನೆ ಇನ ದೇಖಿನ್, ಖನ್ನೆ ಬುಲೈನ್ ಇನ, “ಬಾಯಿ, ತಾರ ರೋಗ್‌ಥಿ ತೂ ಛು಼ಟಿಗಿ!” ಕರಿ ಬೋಲಿನ್,
LUK 13:13 ಇನಾಪರ್ ಇನೊ ಹಾತ್‌ ಮ್ಹೇಲ್ಯೊ, ಮ್ಹೇಲ್‌ತಾಸ್‌ನ ಯೋ ಉಭು ಭೀರಿಗೈ ಅಜು಼ ಇನೆ ದೇವ್ನ ಸ್ತುತಿ ಕರಿ.
LUK 13:14 ಕತೋಬಿ ಯೋ ಸಬೆ ಭರಾವಾನು ಮಂದಿರ್‌ನು ಅದಿಕಾರಿನೆ ಅನ ದೇಖಿನ್, ಸಬ್ಬತ್‌ ದನ್ಮ ಯೇಸುನೆ ಅಛ್ಛು಼ ಕರ‍್ಯೋನಿ ಕರಿ ಬೋಲಿ ಇರಾದೊ ಖೈನ್, ಅದ್ಮಿ ಖ್ಹಾರಾನ, “ಕಾಮ್ ಕರಾನ ಛೊ಼ ದನ್ ಛಾ಼, ಯೋ ದನೂಮ ಐನ್ ಅಛ್ಛು಼ ಕರೈಲೆವೊ; ಸಬ್ಬತ್‌ ದನ್ಮ ಪಣ್ಕಿ ನಕೊ!” ಕರಿ ಬೋಲ್ಯೊ.
LUK 13:15 ಯೋ ವಾತೇನ ಖ್ಹಮ್‌ಜಿನ್‌ ಪ್ರಭುನೆ ಇನ, “ತುಮೆ ಠಗಾರು ತುಮಾರಾಮ ಹರೇಕ್ ಜ಼ಣು ಸಬ್ಬತ್‌ ದನ್‌ಮಾಬಿ, ಇವ್ಣು ಢಾಂಡೊ ರ‍್ಹವೊ, ಗಧೇಡಾನ ರ‍್ಹವೊ ಕೋಠಾಮಾಥು ಛೋ಼ಡಿನ್, ಪಾಣಿ ಪಿಡಾವಾನಟೇಕೆ ಧರ್‌ಲಿ ಜಾ಼ಸ್‌ನಿ.
LUK 13:16 ಇಮ್‍ಕತೊ, ಅಠಾರ ವರಖ್ಹ್‌ಥು ಶೈತಾನ್ನೆ ಭಾಂದಿರಾಖ್ಯೋತೆ, ಆ ಅಬ್ರಹಾಮ್‌ನಿ ಪಿಳ್ಗಿವಾಳಿನ ಸಬ್ಬತ್‌ನ ದನ್ಮ ಭಂದಣ್‍ಮಾಥು ಛೋ಼ಡಾವ್‍ಣು ನಾಕಿಶು?” ಕರಿ ಜವಾಬ್‌ ದಿದೊ.
LUK 13:17 ಯೇಸುನಿ ಆ ವಾತೇನ ಖ್ಹಮ್‌ಜಿನ್‌, ಯೇಸುನ ವಹೇರ್‌ ಕರಾವಾಳು ಖ್ಹಾರಾನ ಖ್ಹರಮ್‌ಲಾಗ್ಯು. ಕತೋಬಿ ಅದ್ಮಿಖ್ಹಾರು ಯೇಸುಥಿ ಹುಯೂತೆ ತಮಾಮ್‌ ಮಹಾನ್‍ ಕಾಮ್ನಟೇಕೆ ಖ್ಹುಶಿ ಕರ‍್ಯು.
LUK 13:18 ಯೇಸುನೆ ಪುಛಾ಼ಯೋಕಿ, “ದೇವ್ನಿ ರಾಜ್ಯ ಕಿನೀನಿಮತ್‌ ಛಾ಼? ಇನ ಮೇ ಶನೇಥಿ ಏಕ್‌ಕರು?
LUK 13:19 ಯೋ ರಾಯಿನ ದಾಣಾನಿ ಘೋಣಿ ಛಾ಼. ಏಕ್‌ ಅದ್ಮಿನೆ ಇನ ಲೀಜೈ಼ನ್ ಇನ ಖೇತರ್‌ಮ ಗಾಡ್ಯು. ತದೆ ಯೋ ಮೋಟುಹುಯಿನ್, ಝಾ಼ಡು ಹುಯು ಅಜು಼ ಆಬ್‍ಪರ್‌ ಉಡಾತೆ ಜಿನಾವರ್ ಖ್ಹಾರು ಆಯಿನ್, ಯೋ ಝಾ಼ಡಾನಿ ಡಾಳಿಯೆಪರ್ ಮ್ಹಾಳ ಭಾಂದಿಲಿದು.
LUK 13:20 ಯೇಸುನೆ ಬಿಜೂ಼ಬಿ ಪುಛಾ಼ಯೋಕಿ, “ದೇವ್ನಿ ರಾಜ್ಯನ ಮೇ ಶನೇಥಿ ಏಕ್‌ಕರು?
LUK 13:21 ಯೋ ಶೋಡಾನಿ ಘೋಣಿ ಛಾ಼. ಏಕ್‌ ತಯೇಡ ಇನ ಲೀಜೈ಼ನ್, ತೀನ್ ಶೇರ್ ಆಟಾಮ ಕಲೈನ್ ಮ್ಹೇಲಾಖ್ಹತರ್‌, ಯೋ ಆಟೊ ಖ್ಹಾರುಸ್‌ ಫುಗಿಆಯು.
LUK 13:22 ಯೇಸು ಹರೇಕ್ ಖ್ಹಯೇರ್‌ಮ ಅಜು಼ ಗಾಮ್ಮ ವಚನ್ ಬೋಲಿದೇತೊಹುಯಿನ್‌, ಯೆರೂಸಲೇಮ್‌ ಭಣಿ ವಳ್ಯೊಜಾ಼ತೋಥೊ.
LUK 13:23 ತದೆ ಏಕ್‌ ಜ಼ಣಾನೆ ಯೇಸುನ, “ಪ್ರಭು, ಥೋಡು ಅದ್ಮಿನಾಸ್ ರಕ್ಷಣೆ ಮಳ್‌ಶೇಕಿ?” ಕರಿ ಪುಛಾ಼ಯೊ.
LUK 13:24 ಯೇಸುನೆ ಜವಾಬ್‌ ದಿದೋಕಿ, ನ್ಹಾನ ಬಾಕಲ್‌ ವಾಟೆಕರಿ ಮಹಿ ಜಾ಼ವಾನ ಕೋಶಿಶ್‌ ಕರೊ, ಶನಕತೊ ಘಣು ಅದ್ಮಿ ಮಹಿ ಜಾ಼ವ್ಣುಕರಿ ಕರಸ್, ಕತೋಬಿ ಇವ್ಣೊ ಹಾತ್‌ ಕೋಹುಯುನಿ.
LUK 13:25 ಘರ್‌ನೊ ಯಜಮಾನ್ ಉಠೀನ್, ಬಾಕಲ್‌ ಮೂಚಾ಼ನ ಬಾದ್‌ಮ, ತುಮೆ ಭಾರ್‌ಭೀರಿನ್, ಬಾಕಲ್‌ಪರ್ ಮಾರಿನ್, ‘ಪ್ರಭು, ಮಹಿ ಆವಾನ ಬಾಕಲ್ ಕಾಡ್! ಕರಿ ಬೋಲ್‌ಶು”. ತದೆ ಯೋ, ತುಮೆ ಕಿಜ್ಜಾ಼ವಾಳ ಕರಿ ಮನ ಮಾಲುಮ್ ಕೊಯ್ನಿ! ಕರಿ ಜವಾಬ್‌ ದಿಶೆ.
LUK 13:26 ತದೆ ತುಮೆ, “ಹಮೆ ತಾರ ಜೋ಼ಡೆ ಖಾದಾಥ, ಪೀದಾಥ. ಹಮಾರಿ ಗಲ್ಲಿಯೇಮ ತುನೆ ಹಮೂನ ವಚನ್ ಬೋಲಿದಿದೋಥೊ ಕರಿ ಬೋಲ್‌ಶು”.
LUK 13:27 ತೋಬಿ ಯೋ ತುಮೂನ, “ತುಮೆ ಕೋಣ್‌ಕಿ, ಕಿಜ್ಜಾ಼ಥ ಐರ‍್ಹಾಸ್ಕಿ ಮನ ಮಾಲುಮ್ ಕೊಯ್ನಿ! ಹಜ್ಜಾಥೊ ಹಟಿಜಾ಼ವೊ, ತುಮೆ ಖ್ಹಾರು ಖರಾಬ್ ಅದ್ಮಿ! ಕರಿ ಬೋಲ್‌ಶೆ.
LUK 13:28 ಅಬ್ರಹಾಮ್, ಇಸಾಕ್, ಯಾಕೋಬ ಅಜು಼ ತಮಾಮ್‌ ಪ್ರವಾದಿ ಖ್ಹಾರು ದೇವ್ನಿ ರಾಜ್ಯನ ಮಹಿ ರ‍್ಹಿಶೆ, ಕತೋಬಿ ತುಮೆ ಪಣ್ಕಿ ಭಾರ್‌ ರ‍್ಹಿಶು! ಅನ ದೇಖಿನ್ ಇವ್ಣೆ ರೊವ್‌ಶೆ ಅಜು಼ ಕರ್‌-ಕರ್‌ ದಾತ್‌ ಚಾ಼ವಾನು ಉಶೆ.
LUK 13:29 ಅತ್ರೇಸ್ ಕಾಹೆತೆ ಪೂರ್ವ, ಪಶ್ಚಿಮ್, ಉತ್ತರ್ ಅಜು಼ ದಕ್ಷಿಣ್ ದಿಕ್‍ಥು ಅದ್ಮಿಖ್ಹಾರು ಐನ್, ದೇವ್ನಿ ರಾಜ್ಯಮ ಮಿಝ಼್‌ವಾನ್ ಖಾಣನ ಬೇಖ್ಹ್‌ಶೆ.
LUK 13:30 ಹಮ್ಕೆ ಪಾಛ಼ಳ್ ಛಾ಼ತೆ ಅದ್ಮಿಖ್ಹಾರು, ತದೆ ಅಗಾಡಿ ರ‍್ಹಿಶೆ, ಅಜು಼ ಹಮ್ಕೆ ಅಗಾಡಿ ಛಾ಼ತೆ ಖ್ಹಾರು, ತದೆ ಪಾಛ಼ಳ್ ರ‍್ಹಿಶೆ” ಕರಿ ಬೋಲ್ಯೊ.
LUK 13:31 ಯೋಸ್ ವಖ್ಹತ್‌ಮ ಥೋಡು ಜ಼ಣು ಫರಿಸಾಯರ್ ಯೇಸುಕನ ಐನ್, ತೂ ಹಜ್ಜಾಥೊ ಚ಼ಲ್ಯೊಜಾ಼! ಹೆರೋದ ತುನ ಮಾರಿನಾಕ್ಣು ಕರಿ ಛಾ಼” ಕರಿ ಬೋಲ್ಯು.
LUK 13:32 ತದೆ ಯೇಸುನೆ ಇವ್ಣುನ, “ತುಮೆ ಜೈ಼ನ್, ಆಜ಼್ ಅಜು಼ ಕಾಲ್ ಮೇ ಭೂತ್ ಕಾಡ್ತೊಹುಯಿನ್‌, ರೋಗ್‌ರಾಯೊನ ಅಛ್ಛು಼ ಕರ್ತೊಹುಯಿನ್, ಪರ್‌ಶುನ ದನ್ನೆ ಮೇ ಮಾರು ಕಾಮ್ ಖತಮ್ ಕರ‍್ನು, ಕರಿ ಯೋ ನ್ಹೋರಿನ ಬೋಲೊ” ಕರಿ ಬೋಲ್ಯೊ.
LUK 13:33 ತೋಬಿ ಆಜ಼್ ಅಜು಼ ಕಾಲ್, ಅಜು಼ ಪರ್‌ಶುನ ದನ್ನೆತೋಡಿ ಮೇ ಫರ್‌ವಾನು ಛಾ಼. ಪ್ರವಾದಿನ ಯೆರೂಸಲೇಮಸ್ ಪಣ್ಕಿ ಬಿಜಿ ಝ಼ಗೋಪರ್ ನಾ ಮಾರ‍್ನು.
LUK 13:34 ಯೆರೂಸಲೇಮ್‌, ಯೆರೂಸಲೇಮ್‌ ತೂ, ಪ್ರವಾದಿ ಖ್ಹಾರಾನೊ ಜಾನ್‌ ಕಾಡಾವಾಳಿ. ದೇವ್ನೆ ತಾರಕನ ಮೋಕ್‌ಲ್ಯೊತೆ ಖ್ಹಾರಸ್ನ, ಬಂಡೊ ಫೇಕಿನ್ ಮಾರವಾಳಿ, ಮುರ್‌ಗಿ ಇನ ಚೇಲ್ಕಾನ ಇನಿ ಪಾಖ್ಡಿಯೆಮ ಪೆಖ್ಹಾಡಿಲೇಯಿತೆ ಇಮ್‌, ತಾರ ಲಡ್ಕಾವ್ನ ಮೇ ಪೆಖ್ಹಾಡಿಲೇವ್ಣು ಕರಿ ಮನ ಕೆತ್ರಿಕ್ಕಿಹಲ್ಲ ಮನ್‍ಹುಯು, ಕತೋಬಿ ತುನೆ ಅಮ್ ಕರಾನ ಮ್ಹೇಲಿಕೊಯ್ನಿ!
LUK 13:35 ಹಂದೇಕ್ ತಾರಿ ಮಂದಿರ್‌ ಉಜ್ಜಾ಼ಡಿ ಪಡಿಜಾ಼ಶೆ. ‘ಪ್ರಭುನ ನಾಮ್‌ಪರ್‌ ಆವಾಳಾನ ಆಶೀರ್ವಾದ್‌ ಹುವಾದೆ’ ಕರಿ ತುಮೆ ಬೋಲಾತೋಡಿ, ತುಮೆ ಮನ ದೇಕ್‌ಶುಸ್ ಕೊಯ್ನಿ, ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
LUK 14:1 ಏಕ್‌ಹಲ್ಲ ಸಬ್ಬತ್‌ ದನ್ನೆ ಯೇಸು ಫರಿಸಾಯರ್‌ನು ಮೋಟಾವ್‍ಮ ಏಕ್‌ ಜ಼ಣಾನ ಘರೆ ಖಾಣನ ಗಯೊ. ಹಿಜ್ಜಾ಼ನು ಅದ್ಮಿಖ್ಹಾರು ಯೇಸುನ ನಿಘಾ ಲಗಾಡಿನ್ ದೇಖುಕರ್ತುಥು.
LUK 14:2 ಹಿಜ್ಜಾ಼ ಯೇಸುನ ಖ್ಹಾಮೆ ಪೆಶರ್‌ ರೋಗ್‌ ಥೋತೆ ಏಕ್‌ ಜ಼ಣೊ ಥೊ.
LUK 14:3 ತದೆ ಯೇಸುನೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ನ, “ಅಪ್ಣಿ ಖಾನುಲ್‌ಮ ಸಬ್ಬತ್‌ ದನ್ಮ ಅಛ್ಛು಼ ಕರಾನು ಬರಾಬರ್‌ಕಿ ಕೊಯ್ನಿ”? ಕರಿ ಪುಛಾ಼ಯೊ.
LUK 14:4 ಕತೋಬಿ ಇವ್ಣೆ ಶಾತ್ಬಿ ಫರೈನ್ ಬೋಲ್ಯು ಕೊಯ್ನಿ. ತದೆ ಯೇಸುನೆ ಯೋ ಅದ್ಮಿನು ಹಾತ್‌ ಧರೀನ್, ಇನ ಅಛ್ಛು಼ ಕರೀನ್ ಬೋಲಿಮೋಕ್ಲಿದಿದೊ.
LUK 14:5 ತದೆ ಯೇಸುನೆ ಇವ್ಣುನ, “ತುಮಾರಾಮ ಕಿನಾತೋಬಿ ಏಕ್‌ ಜ಼ಣಾನೊ ಛಿಯ್ಯೊ ನತರ್‌ಕಿ ಢಾಂಡೊ ಸಬ್ಬತ್‌ ದನ್ಮ ಬಾವ್ಡಿಮ ಪಡಿಗಯೂತೊ ಯೋ ಇನ ಸಬ್ಬತ್ ದನ್‌ಮಾಬಿ ಉಪ್ಪರ್ ಪಾಡಕೊಯ್ನಿಕಿಶು?” ಕರಿ ಬೋಲ್ಯೊ.
LUK 14:6 ಕತೋಬಿ ಇವ್ಣೆ ಅನಿ ಬಾರೇಮ ಶನೂಸ್ ಜವಾಬ್‌ ದ್ಯವಾನ ಕೋಹುಯುನಿ.
LUK 14:7 ಖಾಣನ ಬುಲೈ ಮಂಗಾಯುತೆ ಅದ್ಮಿಖ್ಹಾರು, ಖಾಣಾನಿ ಪಹಿಲಿ ಶಾಲ್‌ಮಾನಿ ಅಛ್ಛಿ ಝ಼ಗೋಪರ್ ಬೇಖ್ಹ್‌ಣು ಕರಿ ಝ಼ಗೊ ಚೂ಼ಣುಕರ್ತುಥೂತೆ ದೇಖಿನ್, ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
LUK 14:8 ಯೋ ಶಾತ್‌ಕತೊ, “ಕೋಣ್‌ತೋಬಿ ಏಕ್‌ ಜ಼ಣು ತುನ ವ್ಯಹಾನು ಖಾಣು ಖವಾನ ಬುಲಾಯೂತೊ, ಪಂತಿಮ ಪಹಿಲೆಸ್ ನಕೊ ಬೇಶಿಶ್. ಏಕ್‌ ವೇಳ್ ತಾರೆಥೀಬಿ ಮಹಾನ್ ಅದ್ಮಿನ ಇನೆ ಬುಲೈರಾಖ್ಯೊ ಉಶೆ.
LUK 14:9 ಅಜು಼ ತುಮೂನ ಭೇ ಜ಼ಣಾನ ಬುಲಾಯೋತೆ ಯೋ ಐನ್, ‘ಆ ಝ಼ಗೊ ಅನ ಮ್ಹೆಂದೆ’ ಕರಿ ತುನ ಬೋಲಾನಿ ವಖ್ಹತ್‌ಮ, ತೂ ಖ್ಹರ್‌ಮೈನ್ ಖ್ಹಾರೇಥಿ ಛೇಟುನಿ ಝ಼ಗೋಪರ್ ಜೈ಼ನ್ ಬೇಖ್ಹ್‌ಣು ಪಡ್‌ಶೆ.
LUK 14:10 ಕತೋಬಿ ಕೋಣ್‌ತೋಬಿ ತುನ ಬುಲಾಯೂತೊ, ತೂ ಜೈ಼ನ್ ಖ್ಹಾರೇಥಿ ಛೇಟುನಿ ಝ಼ಗೋಪರ್ ಬೇಖ್ಹ್‌. ಅಮ್ ಕರ‍್ಯೋತೊ ತುನ ಬುಲಾಯೋತೆ ಯೋ ಐನ್, ‘ದೋಸ್, ಉಟ್ ಉಪ್ಪರ್‌ಲಿ ಝ಼ಗೋಪರ್ ಐನ್ ಬೇಖ್ಹ್‌’ ಕರಿ ಬೋಲ್‌ಶೆ. ತದೆ ತಾರ ಜೋ಼ಡ್ಮ ಬೆಠೂತೆ ಖ್ಹಾರಾನ ಖ್ಹಾಮೆ ತಾರಿ ಇಜ಼್ಜತ್‌ ಭಡ್‌ಶೆ.
LUK 14:11 ಶನಕತೊ ಕೋಣ್ ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹರೇಕ್‌ಜ಼ಣೊ ಹೇಟು ಹುಯಿಜಾ಼ಶೆ, ಅಜು಼ ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ ಕರಿಬೋಲ್ಯೊ.
LUK 14:12 ಅಜು಼ ಯೇಸುನೆ ಇನ ಖಾಣನ ಬುಲಾಯೋತೆ ಇನಾಬಿ ಏಕ್‌ ವಾತ್ ಬೋಲ್ಯೊ. ಯೋ ಶಾತ್‌ಕತೊ, “ತೂ ಧೊಪಾರ್‌ನಿ ವಖ್ಹತ್‌ಮ ರ‍್ಹವೊ ನತರ್‌ಕಿ ಖ್ಹಾಂಜ಼್‌ನಿ ವಖ್ಹತ್‌ಮ ರ‍್ಹವೊ, ಖಾಣಾನಖ್ಹಾಜೆ ತಾರ ದೋಸ್ತ್‌ನ ರ‍್ಹವೊ, ಭೈಯೇನ ರ‍್ಹವೊ, ತಾರ ಮಾಯಮಾತ್ರಾನ ರ‍್ಹವೊ, ಧನ್‌ದೌಲತ್‌ವಾಳ ಖನ್ನೆವಾಳ ರ‍್ಹವೊ ನಕೊಬುಲೈಶ್. ಬುಲಾಯೋತೊ, ಇವ್ಣೇಬಿ ತುನ ಪಾಛು಼ ಖಾಣನ ಬುಲಾಯೇಜಾ಼ಯ್, ಅನೇಥಿ ತುನೆ ಕರ‍್ಯೊತೆ ಕರ್ನಿನ ಭರ್ನಿ ಮಳಿಜಾ಼ಶೆ.
LUK 14:13 ಕತೋಬಿ ತೂ ಮಿಝ಼್‌ವಾನ್ ಪಿಕಾವಾನಿ ವಖ್ಹತ್‌ಮ, ಗೋರ್‌-ಗರೀಬ್‌ನ, ಪಾಂಗ್‌ಳ್ಯಾವ್ನ, ಲಂಗ್ಡಾವ್‍ನ ಅಜು಼ ಕಾಣಾವ್ನ ಬುಲಾವ್.
LUK 14:14 ತದೆ ತೂ ಧನ್ಯ ಹುಯಿಶ್, ಇವ್ಣೆ ಪಾಛು಼ಫರಿ ಶಾತ್ಬಿ ಕರಾನಕೊಂತೆ ಇವ್ಣೆ, ನೀತಿವಾಳುಖ್ಹಾರು ಮರ್‌ಣ್‌ಮಾಥು ಪಾಛು಼ ಜಿವ್ತುಹುಯಿನ್‍ ಆವಾನಿ ವಖ್ಹತ್‌ಮ ದೇವ್ ತುನ ದೇವ್ಣುತೆ ಇನ ದಿಶೆ.
LUK 14:15 ಖಾಣನ ಬೆಠುಥೂತೆ ಇವ್ಣಾಮ ಏಕ್‌ ಜ಼ಣು ಆ ವಾತೇನ ಖ್ಹಮ್‌ಜಿನ್‌, ಯೇಸುನ, “ದೇವ್ನಿ ರಾಜ್ಯಮ ಮಿಝ಼್‌ವಾನ್ ಖಾವಾನ ಬೇಖ್ಹವಾಳೋಸ್ ಧನ್ಯ ಹುಯಿರ‍್ಹೊಸ್” ಕರಿ ಬೋಲ್ಯೊ.
LUK 14:16 ತದೆ ಯೇಸುನೆ ಇನ ಬೋಲ್ಯೋಕಿ, “ಏಕ್‌ ಅದ್ಮಿನೆ ಏಕ್‌ ಮೋಟಿ ಮಿಝ಼್‌ವಾನ್ ಪಿಕೈನ್, ಕೈಯೆಕ್ಕಿ ಅದ್ಮಿನ ಬುಲಾಯೊ.
LUK 14:17 ಮಿಝ಼್‌ವಾನ್ ಖಾವಾನಿ ವಖ್ಹತ್ ಆವಾದಿನ್, ಯೋ ಅದ್ಮಿನೆ, ‘ಆವೊ, ಖಾಣು ತೈಯಾರ್ ಛಾ಼!’ ಕರಿ, ಬುಲಾಯೊಥೋತೆ ತಮಾಮ್‌ ಅದ್ಮಿನ ಬುಲಾವಾನಟೇಕೆ ಆಳ್‌ನ ಮೋಕ್‌ಲ್ಯೊ.
LUK 14:18 ಕತೋಬಿ ಇವ್ಣೆ ಖ್ಹಾರೂಸ್, ಮಾಪ್‌ ಕರ‍್ನುಕರಿ ಎಕ್ಕಸ್‌ ದಿಲ್‌ಥಿ ಬೋಲಾಲಗ್ಯು. ಪಹಿಲೆವಾಳೊ ಯೋ ಆಳ್‌ನ ದೇಖಿನ್ ಬೋಲ್ಯೋಕಿ, ‘ಮೇ ಏಕ್‌ ಖೇತರ್‌ನ ಮೋಲ್ ಲೀರಾಖ್ಯೋಸ್, ಮೇ ಜೈ಼ನ್, ಯೋ ಖೇತರ್‌ನ ದೇಖಾನು ಜ಼ರೂರತ್ ಛಾ಼; ಮನ ಮಾಪ್‌ ಕರ್‌ ಕರಿ ಬೋಲಿಲಿದೊ ಕರಿ ಬೋಲ್.’
LUK 14:19 ಬಿಜ್ಜೇಕ್‌ ಜ಼ಣಾನೆ ಬೋಲ್ಯೋಕಿ, ‘ಮೇ ಪಾಚ಼್ ಜೋ಼ಡಿ ಢಾಂಡಾವ್‍ನ ಲೀರಾಖ್ಯೋಸ್, ಇನ ದೇಖಿನ್ ಪರ್ಖಾನ ವಳ್ಯೊಜವುಸ್. ಮನ ಮಾಪ್‌ಕರ್‌ ಕರಿ ಬೋಲ್ಯೊ, ಕರಿ ಬೋಲ್.’
LUK 14:20 ಅಜೇಕ್ ಜ಼ಣಾನೆ, ‘ಹಮ್ಕೇಸ್ ಮಾರೊ ವ್ಯಹಾ ಹುಯಿರ‍್ಹೋಸ್, ಇನಖ್ಹಾಜೆ ಮನ ಆವಾನ ಕೋ ಉಶೇನಿ’ ಕರಿ ಬೋಲ್ಯೊ.
LUK 14:21 ಯೋ ಆಳ್‌ ಪಾಛು಼ಫರಿನ್, ಇನ ಯಜಮಾನ್‍ಕನ ಐನ್, ಚಾ಼ಲ್ಯುತೆ ಇನಿ ಬಾರೇಮ ಬೋಲ್ಯು. ತದೆ ಯೋ ಘರ್‌ನ ಯಜಮಾನ್ನೆ ಖೀಜ಼್ ಖೈನ್, ಇನ ಆಳ್‌ನ, ‘ತೂ ಒಗ್ಗಿಸ್‌ಮ, ಆ ಗಾಮ್‌ನು ಗಲ್ಲಿಯೇಮಾಬಿ, ಓಣಿಯೇಮಾಬಿ ಜೈ಼ನ್, ಗೋರ್‌-ಗರೀಬ್‌ನ, ಪಾಂಗ್‌ಳ್ಯಾವ್ನ, ಲಂಗ್ಡಾವ್‍ನ, ಕಾಣಾವ್ನ ಖ್ಹಾರು ಹಜ್ಜಾ಼ ಬುಲೈಲ್ಯಾವ್’ ಕರಿ ಬೋಲ್ಯೊ.
LUK 14:22 ಒಗ್ಗಿಸ್‌ಮ ಯೋ ಆಳ್‌ನೆ, ‘ಯಜಮಾನ್ ತಾರಿ ಹುಕುಮ್ ಚಾ಼ಲಿಗಿ, ಕತೋಬಿ ಬಿಜೂ಼ಬಿ ಝ಼ಗೊ ಛಾ಼’ ಕರಿ ಬೋಲ್ಯು.
LUK 14:23 ತದೆ ಇನ ಯಜಮಾನ್ನೆ ಯೋ ಆಳ್‌ನ ಬೋಲ್ಯೋಕಿ, ‘ತೂ ಜೈ಼ನ್, ಖ್ಹಾರು ಖೇತರ್‌ನು ವಾಟ್‌ಪರ್ ಅಜು಼ ವಾಡ್‌ಗಿಯೆಕನ ಛಾ಼ತೆ ಹರೇಕ್ನ ಜು಼ಲಮ್‌ಥಿ ಮಹಿ ಬುಲೈಲ್ಯಾವ್. ಮಾರು ಘರ್ ಭರಾವಾದೆ’ ಕರಿ ಬೋಲ್ಯೊ.
LUK 14:24 ಕತೋಬಿ ಮೇ ತುಮೂನ ಬೋಲುಸ್ಕಿ, ‘ಮೇ ಅಗಾಡಿ ಬುಲಾಯೊಥೋತೆ ಇವ್ಣಾಮ ಏಕ್‌ ಜ಼ಣುಬಿ ಮೇ ಕರಾಯೋತೆ ಖಾಣಾನಿ ಲಜ಼ತ್‌ನ ಛಾ಼ಕಿಬಿ ನಾ ದೇಕ್ಣು!’ ಕರಿ ಬೋಲ್ಯೊ.”
LUK 14:25 ಏಕ್‌ ಹಲ್ಲ ಘಣ ಅದ್ಮಿನಿ ಭೀಡ್ ಯೇಸುನ ಕೇಡೆ ಜ಼ವ್‍ಕರಾತೆ ವಖ್ಹತ್‌ಮ, ಯೇಸುನೆ ಫರಿನ್, ಇವ್ಣುನ ಅಮ್ ಬೋಲ್ಯೊ.
LUK 14:26 ಮಾರಕನ ಆವಾಳು ಮಾರೇಥಿ ಜಾ಼ಖ್ಹತ್, ಇನ ಆಯಬಾನ, ಬಾವಣ್‍, ಲಡ್ಕಾವ್‍ನ, ಮೋಟ ಭೈಯೆ ಭೇನೆ ಅಜು಼ ಇನ ಜಾನ್ನಬಿ ನಾ ವಹೇರ್‌ ಕರ‍್ಯೊತೊ ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೊಹುವಾನಿ.
LUK 14:27 ಕೋಣ್‌ತೋಬಿ ಇನಿ ಶಿಲ್‌ಬೇನ ಪಳ್ಳಿನ್‌, ಮಾರ ಪೀಠೆ ನಾ ಆಯೂತೆ, ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೋ ಹೊಯ್ನಿ.
LUK 14:28 ತುಮಾರಾಮ ಕೋಣ್‌ತೋಬಿ ಏಕ್‌ ಜ಼ಣು, ಏಕ್‌ ಊಚು಼ಗುಂಬಜ್‍ ಭಾಂದ್‌ಣು ಕರಿ ರ‍್ಹಯೂತೊ, ಇವ್ಣೆ ಪಹಿಲೆ ಬೇಶಿನ್, ಇನ ಭಂದಾವಾನ ಕೆತ್ರು ಖರ್ಚಿ ಉಶೆ ಕರಿ ಸೋಚ಼ಸ್‌. ಶನಕತೊ, ಯೋ ಕಾಮ್ ಪೂರ ಕರಾಯೆತ್ರೆ ಪೈಶಾ ಛಾ಼ಕಿ ಕೊಯ್ನಿ ಕರಿ ದೇಖಾನಟೇಕೆ.
LUK 14:29 ಅಮ್ ಇಶಾಬ್ ಕರ‍್ಯುಕೊಂತೆ, ಹದಿ ನಾಖಾನ ಬಾದ್‌ಮ, ಯೋ ಕಾಮ್ ಭೀರಿಗಯೂತೊ,
LUK 14:30 ದೇಖಾವಾಳು ಖ್ಹಾರು, ‘ಆ ಅದ್ಮಿ ಭಂದಾವಾನ ಶುರುಕರ‍್ಯು, ಕತೋಬಿ ಅನ ಪೂರ ಕರಾನ ಕೋಹುಯುನಿ!’ ಕರಿ ಬೋಲಿನ್, ಇನಿ ನಕ್ಲೆ ಕಾಡ್‌ಶೆ.
LUK 14:31 ಏಕ್‌ ರಾಜ಼ ಬಿಜೇಕ್ ರಾಜಾ಼ನ ಜೋ಼ಡೆ ಜಂಗ್ ಭೀಡಾನ ಜಾ಼ವಾನ ಅಗಾಡಿ, ವೀಖ್ಹ್‌ ಹಜಾ಼ರ್ ದಂಡ್‌-ದಳ್‌ವಾಯಿನ ಲೀನ್, ಜಂಗ್‌ನ ವಳ್ಯಾವಾತೆ ಯೋ ರಾಜಾ಼ನ ಜೋ಼ಡೆ, ದಖ್ಹ್‌ ಹಜಾ಼ರ್ ದಂಡ್‌-ದಳ್‌ವಾಯಿನ ಲೀಜೈ಼ನ್, ಹರಾವನ ಉಶೇಕಿ ಕೊಯ್ನಿ, ಕರಿ ಪಹಿಲೇಸ್ ಬೇಶಿನ್ ಸೋಚ಼ಸ್‌.
LUK 14:32 ಇಮ್‌ ಹರಾವನ ಕೋ ಉಶೇನಿ ಕರಿ ಮಾಲುಮ್ ಪಡ್ಯೂತೊ, ಯೋ ವಳ್ಯಾವಾತೆ ರಾಜ಼ ದೂರ್ ರ‍್ಹವಾನಿಸ್ ವಖ್ಹತ್‌ಮ, ಇನು ಖಬರ್ ದ್ಯವಾಳಾನ ಮೋಕ್ಲೀನ್, ಶಾಂತಿನು ಒಪ್ಪಂದ ಕರಿಲಿಯೆ, ಕರಿ ಬೋಲಿಲೇಸ್.
LUK 14:33 ಇಮ್ಮಸ್, ತುಮಾರಮ ಕೋಣ್‌ಬಿ ರ‍್ಹವೊ, ಇನಛಾ಼ತೆ ಖ್ಹಾರಸ್ನ ನಾ ಮ್ಹೇಲ್ಯೂತೊ, ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೋ ಹುವಾನಿ” ಕರಿ ಬೋಲ್ಯೊ.
LUK 14:34 ಮೀಟ್‌ ಏಕ್‌ ಅಛ್ಛು಼ ರಾಛು಼ಸ್. ಮೀಟಸ್‌ ಫಿಕ್ಕು ಹುಯಿಗುತೊ, ಇನ ಬಿಜು಼ಪಾಛು಼ ಶನೇಥಿ ರುಚ಼್‌ಲ್ಯಾವನು ಉಷೆ?
LUK 14:35 ಇಮ್ನು ಮೀಟ್‌ಥಿ ಜ಼ಮೀನ್ನ ರ‍್ಹವೊ, ಖಾತ್‌ನ ರ‍್ಹವೊ ಶನೂಸ್ ಫಾಯಿದೊ ಕೊಯ್ನಿ. ಇನ ಭಾರ್‌ ಫೇಕಿದೇಸ್. ಖ್ಹಮ್‌ಜಾ಼ನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ!” ಕರಿ ಬೋಲ್ಯೊ
LUK 15:1 ಏಕ್‌ ದನ್ನೆ ಯೇಸು ಬೋಲಾತೆ ವಾತೇನ ಖ್ಹಮ್‌ಜಾ಼ನಖ್ಹಾಜೆ, ಘಣು ಅದ್ಮಿ ಶುಂಕ ವಶೂಲ್ ಕರಾವಾಳು ಅಜು಼ ಪಾಪಿಖ್ಹಾರು ಇನಾಕನ ಆಯು.
LUK 15:2 ಅನ ದೇಖಿನ್ ಫರಿಸಾಯರ್ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೇನೆ, “ಆ ಪಾಪಿ ಖ್ಹಾರಾನ ಜೋ಼ಡೆ ಮಳಿನ್, ಇವ್ಣ ಜೋ಼ಡೆ ಖಾಣು ಖಾಸ್ನಿ” ಕರಿ ಯೇಸುಪರ್ ಮಶ್ಲಾ ಮಾರ‍್ಯು.
LUK 15:3 ತದೆ ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
LUK 15:4 ಯೋ ಶಾತ್‌ಕತೊ, “ತುಮಾರಾಮ ಕೋಣ್‌ತೋಬಿ ಏಕ್‌ ಜ಼ಣು, ಇನಾಕನ ಖ್ಹೋ ಮೇಂಢುರ‍್ಹೀನ್, ಇನಾಮಾನು ಏಕ್‌ ಗುಮೈಗಯೂತೆ, ಯೋ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್‌ನ ಝೂ಼ಂಡ್‌‍ಮಾಸ್ ಮ್ಹೆಂದಿನ್, ಗುಮೈಗಯೂತೆ ಯೋ ಮೇಂಢು ಮಳಾತೋಡಿ, ಇನ ಢೂಂಡಿನ್ ಜಾ಼ಯಿಕೊಯ್ನಿಕಿ ಶು?
LUK 15:5 ಯೋ ಮಳಾನ ಬಾದ್‌ಮ, ಯೋ ಅದ್ಮಿ ಖ್ಹುಶಿ ಕರ್ತುಹುಯಿನ್, ಮೇಂಢಾನ ಇನ ಖಾಂದಪರ್ ಮ್ಹೇಲಿಲೀನ್, ಘರೆಆಯಿನ್, ಇನಖ್ಹಾರ ದೋಸ್ತ್‌ನ ಅಜು಼ ಖನ್ನೆವಾಳಾನ ಎಕ್ಟುಕರಿನ್, ‘ಗುಮೈಗಯುಥೂತೆ ಯೋ ಮೇಂಢು ಮಳ್ಯು, ಮಾರ ಜೋ಼ಡೆ ಖ್ಹುಶಿಕರೊ’ ಕರಿ ಇವ್ಣುನ ಬೋಲಾಕೊಯ್ನಿಕಿ ಶು?
LUK 15:7 ಇಮ್ಮಸ್, ದೇವ್‌ಭಣಿ ಫರಾನ ಮನ್‌ಕೊಂತೆ, ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ನೀತಿವಾಳ ಅದ್ಮಿಥೀಬಿ, ದೇವ್‌ಭಣಿ ಫರಾಸ್ತೆ ಏಕ್‌ ಪಾಪಿನಿ ಬಾರೇಮ, ಪರ್‌ಲೋಕ್‌ಮ ಘಣು ಖ್ಹುಶಿಹುವ್ವಾಸ್ ಕರಿ ಮೇ ತುಮೂನ ಬೋಲುಸ್”.
LUK 15:8 ಏಕ್‌ ತಯೇಡಾಕನ ದಖ್ಹ್‌ ರೂಪಾನು ಬಿಲ್ಲು ಛಾ಼ ಕರಿ ಸೋಚೊ. ಇನಾಮಾನು ಏಕ್‌ ಬಿಲ್ಲಾನ ಯೋ ಗುಮೈಲಿದಿತೊ ಯೋ ಶಾತ್‌ ಕರ್ಶೆ? ಯೋ ತಯೇಡ ದೀವೊ ಲಗಾಡಿನ್, ಹಿಡಿ ಘರ್‌ನಾಸ್ ಝಾ಼ಡೀನ್, ಗುಮೈಗಯೂತೆ ಯೋ ಬಿಲ್ಲು ಮಳಾತೋಡಿ, ಹೊಷಾರ್‌ಥಿ ಢೂಂಡಾ ಕೊಯ್ನಿಕಿ ಶು?
LUK 15:9 ಮಳಾನ ಬಾದ್‌ಮ, ಇನಿ ದೋಸ್‌ತಿಯೆ ಖ್ಹಾರಿನ ಎಕ್ಟು ಕರಿಲೀನ್, ‘ಗುಮೈಗಯೂತೆ ಯೋ ಮಾರು ಬಿಲ್ಲು ಮಳ್ಯು, ಮಾರ ಜೋ಼ಡೆ ಖ್ಹುಶಿ ಕರೊ’ ಕರಿ ಬೋಲಾಕೊಯ್ನಿಕಿ ಶು?
LUK 15:10 ಅಮ್ಮಸ್, ದೇವ್ ಭಣಿ ಫರಾಸ್ತೆ ಏಕ್‌ ಪಾಪಿನಿ ಬಾರೇಮ, ದೇವ್‌ನು ದೂತರ್ ಖ್ಹಾರು ಖ್ಹುಶಿಕರಸ್” ಕರಿ ಬೋಲ್ಯೊ.
LUK 15:11 ಅನ ಬಾದ್‌ಮ ಯೇಸುನೆ ಅಮ್ ಬೋಲ್ಯೊ, “ಏಕ್‌ ಅದ್ಮಿನ ಬೇ ಛಿಯ್ಯಾ ಥಾ.
LUK 15:12 ನ್ಹಾನೊ ಛಿಯ್ಯಾನೆ ಇನ ಬಾನ, ‘ಬಾ, ಆಸ್ತಿಮ ಮನ ಆವ್ಣುತೆ ಭಾಗ್ನ ಹಮ್ಕೇಸ್ ದೇ’ ಕರಿ ಬೋಲ್ಯೊ. ತದೆ ಬಾನೆ ಇನಿ ಆಸ್ತಿನ ಭೇ ಛಿಯ್ಯಾನ ವಾಟ ಪಾಡಿದಿದೊ.
LUK 15:13 ಥೋಡ ದನ್ನ ಬಾದ್‌ಮ, ಯೋ ನ್ಹಾನ ಛಿಯ್ಯಾನೆ ಇನಥೂತೆ ಖ್ಹಾರೂಸ್ ವೇಚಿನ್, ಪೈಶಾ ಕರಿಲೀನ್, ದೂರ್‌ಲ್ಯಾ ದೇಖ್ಹ್‌ನ ಜೈ಼ನ್. ಹಿಜ್ಜಾ಼ ಇನ ಮನ್ ಆವಾತೆ ಇಮ್‌ ಜಿವ್ಣುಕರಿನ್, ಇನಿ ಶೊತ್ನ ಗುಮೈಲಿದೊ.
LUK 15:14 ಅಮ್ ಯೋ ಖ್ಹಾರೂಸ್ ಬರ್ಬಾತ್ ಕರಿಲ್ಯವಾನ ಬಾದ್‌ಮ, ಯೋ ದೇಖ್ಹ್‌ಮ ಕಾಳ್ದುಕಾಳ್ ಐನ್, ಶಾತಸ್‌ಕೊಂತೆ ಇಮ್ನಿ ಹಾಲ್‌ ಹುಯಿಗೈ.
LUK 15:15 ತದೆ ಯೋ ಜೈ಼ನ್, ಯೋ ದೇಖ್ಹ್‌ನ ಏಕ್‌ ಅದ್ಮಿಕನ ಕಾಮ್ಮ ಪೇಶಿಗಯೊ. ಯೋ ಅದ್ಮಿ ಇನ ಡೂಕರ್‌ ಚ಼ರಾವಾನಟೆಕೆ, ಇನ ಖೇತರ್‌ಮ ಮೋಕ್‌ಲ್ಯೊ.
LUK 15:16 ಅಮ್ ರ‍್ಹಾವಾನಿ ವಖ್ಹತ್‌ಮ, ಡೂಕರ್‌ ಖಾಸ್ತೆ ಫಳಿಯೆ ಖೈನ್‌ತೋಬಿ, ಪೇಟ್ ಭರಿಲೇವ್ಣು ಕರಿ ಯೋ ಆಖ್ಹ್ ಕರ‍್ಯೊತೋಬಿ, ಕೋಣ್‌ಬಿ ಇನ ಕೋ ದಿದೂನಿ.
LUK 15:17 ತದೆ ಇನ ಅಕ್ಕಲ್ ಅಯಿನ್, ‘ಮಾರ ಬಾಕನ ಕೈಯೆಕ್ಕಿ ಕೂಲಿಆಳ್‍ನ ಖೈನ್, ಬಶ್‌ಹುವಾಯೆತ್ರೆ ಖಾಣು ಛಾ಼. ಕತೋಬಿ ಮೇತೊ ಹಜ಼್ಜ ಭುಕ್ಯೊ ಮರುಕರೂಸ್!’
LUK 15:18 ಮೇ ಉಠೀನ್, ಮಾರ ಬಾಕನ ಜೈ಼ನ್, ಇನ ‘ಬಾ, ಪರ್‌ಲೋಕ್‌ನಿ ವಿರೋದ್ ಅಜು಼ ತಾರಿ ವಿರೋದ್ ಪಾಪ್ ಕರಿರಾಖ್ಯೋಸ್.
LUK 15:19 ಅಜು಼ ಖ್ಹಾಮ್ಣೆ ಮೇ ತಾರೊ ಛಿಯ್ಯೊ ಹುಯಿರ‍್ಹವಾನ ಲ್ಹಾಯೇಕ್ ಕೊಯ್ನಿ, ತಾರ ಕೂಲಿಆಳ್‍ಮ ಏಕ್‌ನಿಘೋಣಿ ಮನ ದೇಕ್’ ಕರಿ ಸೋಚಿಲಿದೊ.
LUK 15:20 ತದೆ ಯೋ ಉಠೀನ್, ಪಾಛು಼ ಇನ ಬಾಕನ ಗಯೊ. ಯೋ ಅಜೂ಼ಬಿ ದೂರ್ ರ‍್ಹವಾನಿಸ್ ವಖ್ಹತ್‌ಮ, ಇನೊ ಬಾ ಇನ ದೇಖಿನ್, ಗೋರ್‌ಖೈನ್, ನಾಶಿಆಯಿನ್‌, ಇನ ಬಥೈನ್ ಬುಚ್ಚಾ಼ ದಿದೊ.
LUK 15:21 ಕತೋಬಿ ಛಿಯ್ಯಾನೆ ಇನ, ‘ಬಾ, ಪರ್‌ಲೋಕ್ನ ವಿರೋದ್ ಅಜು಼ ತಾರ ಖ್ಹಾಮ್ಣೆಬಿ ಪಾಪ್ ಕರಿರಾಖ್ಯೋಸ್. ಅಜು಼ ತಾರ ಖ್ಹಾಮ್ಣೆ ಮೇ ಛಿಯ್ಯೊ ಹುಯಿರ‍್ಹವಾನ ಲ್ಹಾಯೇಕ್ ಕೊಯ್ನಿ’ ಕರಿ ಬೋಲ್ಯೊ.
LUK 15:22 ಕತೋಬಿ ಬಾನೆ ಇನ ಆಳ್‌ನ, ‘ಫಟ್‌ ಕರಿ ಘಣ ಅಛ಼್ಛ ಝ಼ಗ್ಗಾನ ಲಯಿನ್ ಅನ ಪೇರ‍್ಹಾವೊ. ಅನಿ ಅಂಗ್‌ಳೀಮ ಅಂಘೂಟಿ ಅಜು಼ ಗೋಡಾಮ ಖೋಖ್ಹ್‌ಡಾ ಘಾಲೊ.
LUK 15:23 ಅಜು಼ ಪಲೈಹುಯೊ ಕೆಲ್ಡಾನ ಲೈನ್‌ ರ‍್ಹೇಖ್ಹೊ, ಮಿಝ಼್‌ವಾನ್ ಪಿಕೈನ್ ಖ್ಹುಶಿ ಕರಿಯೆ!
LUK 15:24 ಆ ಮಾರೊ ಛಿಯ್ಯೊ ಮರಿಗಯೋಥೊ, ಪಾಛೊ಼ ಬಚಿ ಐರ‍್ಹೋಸ್; ಗುಮೈಗಯೋಥೊ ಹಮ್ಕೆ ಮಳಿರ‍್ಹೋಸ್‌’ ಕರಿ ಬೋಲ್ಯೊ. ತದೆ ಇವ್ಣೆ ಖ್ಹುಶಿ ಕರಾಲಗ್ಯು.
LUK 15:25 ಯೋಸ್ ವಖ್ಹತ್‌ಮ, ಇನೊ ಮೋಟೊ ಛಿಯ್ಯೊ ಖೇತರ್‌ಮ ಥೊ. ಯೋ ಘರ್‌ನ ಖನ್ನೆ-ಖನ್ನೆ ಆವಾನಿ ವಖ್ಹತ್‌ಮ, ವಾಜು಼ ವಜಾ಼ಡಿನ್, ಖೇಲ್‌ಕೂದ್ ಕರುಕರಾತೆ ಅವಾಜ಼್‌ನ ಖ್ಹಮ್‌ಜ್ಯೊ.
LUK 15:26 ತದೆ ಇನೆ ಆಳ್‌ಮ ಏಕ್‌ ಜ಼ಣಾನ ಇನಾಕನ ಬುಲೈನ್, ‘ಆ ಶಾತ್‌ ಚಾ಼ಲುಕರಾಸ್ತೆ’? ಕರಿ ಪುಛಾ಼ಯೊ.
LUK 15:27 ತದೆ ಆಳ್‌ನೆ ಇನ, ‘ತಾರೊ ನ್ಹಾನೊ ಭೈ ಪಾಛು಼ಫರಿ ಐರ‍್ಹೋಸ್. ಯೋ ಜ಼ತನ್‌ಥಿ ಆಯೋತೆ ಇನಖ್ಹಾಜೆ, ತಾರ ಬಾನೆ, ಯೋ ಪಲ್ಯುಹುಯು ಕೆಲ್ಡಾನ ರ‍್ಹೇಖ್ಹಾಯೊ’ ಕರಿ ಬೋಲ್ಯೊ.
LUK 15:28 ಅನ ಖ್ಹಮ್‌ಜಿನ್‌, ಇನ ಮೋಟ ಭೈನೆ ಇರಾದೊ ಖೈನ್, ಘರ್‌ನ ಮಹಿ ಗಯೊಕೊಯ್ನಿ; ತದೆ ಇನೊ ಬಾ ಭಾರ್‌ಆಯಿನ್, ‘ಮಹಿ ಆವ್’ ಕರಿ ಇನ ಗಿಂಗೈಲಿದೊ.
LUK 15:29 ಕತೋಬಿ ಇನೆ ಇನ ಬಾನ, ‘ದೇಕ್, ಅತ್ರಾವರಖ್ಹ್ ಮೇ ಆಳ್‌ನಿಮತ್‌, ತಾರಿ ಚಾ಼ಕ್ರಿ ಕರ‍್ಯೊ, ಅಜು಼ ತಾರಿ ಏಕ್‌ ವಾತೆನಾಬಿ ಝಿಟ್ಕಾರ‍್ಯೊ ಕೊಯ್ನಿ. ಇಮ್‌ ರ‍್ಹಯೊತೋಬಿ, ಮೇ ಮಾರ ದೋಸ್ತ್‌ಖ್ಹಾರಾನ ಜೋ಼ಡೆ ಖ್ಹುಶಿ ಕರಾನ ಏಕ್‌ ಬೋಕ್‍ಡೋಬಿ ತುನೆ ದಿದೊಕೊಯ್ನಿ.
LUK 15:30 ಕತೋಬಿ ಶೂಳೆಖ್ಹಾರಿನ ಭಾಂದಿಲೀನ್, ತಾರಿ ಆಸ್ತಿನ ಝ಼ಡ್‌ಪಿನ್ ಖಾದೋತೆ, ಆ ತಾರೊ ಛಿಯ್ಯೊ, ಆವ್ತಾನ, ಪಲ್ಯಹುಯ ಕೆಲ್ಡಾನ ಇನಖ್ಹಾಜೆ ರ‍್ಹೇಖ್ಹಾಯೋನಿ’ ಕರಿ ಜವಾಬ್‌ ದಿದೊ.
LUK 15:31 ತದೆ ಇನ ಬಾನೆ, ‘ಛಿಯ್ಯಾ, ತೂ ಕದೇಬಿ ಮಾರ ಜೋ಼ಡೆ ಥೊ, ಅಜು಼ ಮಾರಕನ ಛಾ಼ತೆ ಖ್ಹಾರು ತಾರುಸ್‌.
LUK 15:32 ತೋಬಿ ಖ್ಹುಶಿ ಕರಾನು, ಶಂತೋಖ್ಹ್‌ ಕರಾನು ಬರಾಬರಸ್‌. ಶನಕತೊ ಆ ತಾರೊ ಭೈ ಮರಿಗಯೋಥೊ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್, ಗುಮೈ ಗಯೋಥೊ ಮಳಿರ‍್ಹೋಸ್‌” ಕರಿ ಬೋಲ್ಯೊ.
LUK 16:1 ಯೇಸುನೆ ಇನ ಶಿಷ್ಯರ್‌ನ ಬೋಲ್ಯೋಕಿ, “ಏಕ್‌ ಶೌಕಾರ್ ಅದ್ಮಿಥು. ಇನೆ, ಇನ ಧನ್‌-ದೌಲತ್‌ನ ದೇಖಿಲ್ಯವಾನಖ್ಹಾಜೆ ಏಕ್‌ ಸೇವಕ್‌ನ ನೇಮಕ್ ಕರ‍್ಯೊಥೊ. ಥೋಡ ದನ್ನ ಬಾದ್‌ಮ, ಯೋ ಶೌಕಾರ್‌ನ ಮಾಲುಮ್ ಪಡ್ಯೂಕಿ, ಯೋ ಸೇವಕ್ ಇನ ಯಜಮಾನ್ನ ಪೈಶಾಖ್ಹಾರು ಬರ್ಬಾತ್ ಕರುಕರಸ್ ಕರಿ.
LUK 16:2 ತದೆ ಇನೆ ಸೇವಕ್‌ನ ಬುಲೈನ್, “ಆ ಶಾತ್‌? ಮೇ ತಾರಿ ಬಾರೇಮ ಖ್ಹಮ್‌ಜು಼ಕರೂಸ್ತೆ. ಮಾರಿ ಧನ್‌-ದೌಲತ್‌ನಿ ಬಾರೇಮಾನು ಖ್ಹಾರಿ ಇಶಾಬ್‍ನ ತೂ ಮನ ದೇ; ಅಜು಼ ಖ್ಹಾಮ್ಣೆ ತೂ ಮಾರ ಘರ್‌ನೊಸೇವಕ ಹುಯಿರ‍್ಹೇವಾನ ಕೋ ಉಶೇನಿ” ಕರಿ ಬೋಲ್ಯೊ.
LUK 16:3 ಅಮ್ ರ‍್ಹೇವಾನಿ ವಖ್ಹತ್‌ಮ, ಯೋ ಘರ್‌ನೊ ಸೇವಕ್‌ನೆ ಇನುಯೋಸ್, “ಮಾರೊ ಯಜಮಾನ್, ಮನ ಕಾಮ್ಮಾಥು ಕಾಡಿನಾಖಿದ್ಯವಾನ ಆಯೊ. ಮೇ ಶಾತ್‌ಕರು? ಖಾಡ್ ಖೋಂದಾನಾಬಿ ಮನ ಶಕತ್‌ಕೊಯ್ನಿ; ಧರಮ್ ಮಾಂಗಾನ ಮನ ಖ್ಹರಮ್‌ ಲಾಗಸ್.
LUK 16:4 ಆ ಘರ‍್ನೊ ಸೇವಕ್‌ಹುಯಿರ‍್ಹೋತೆ ಮನ ಕಾಮ್ಮಾಥು ಕಾಡಿನಾಖಿದ್ಯವಾನ ಬಾದ್ಮ ಅದ್ಮಿಖ್ಹಾರು ಮನ ಇವ್ಣ ಘರ್‌ಮ ಬುಲೈಲ್ಯವಾನಿಘೊಣಿ ಮೇ ಶಾತ್‌ಕರ‍್ನುಕರಿ ಮಾಲುಮ್‍ಪಡ್ಯು ಕರಿ ಸೋಚಿಲಿದೊ.
LUK 16:5 ಅನ ಬಾದ್‌ಮ, ಇನೆ ಇನೊ ಯಜಮಾನ್ನ ಕರಜ಼್ ದೇವ್ಣುತೆ ಹರೇಕ್ನ ಇನೆ ಬುಲಾಯೊ. ಪಹಿಲೆವಾಳಾನ, ‘ತೂ ಮಾರ ಯಜಮಾನ್ನ ಕೆತ್ರು ಉಧಾರ್ ದೇವ್ಣು?’ ಕರಿ ಇನೆ ಪುಛಾ಼ಯೊ.
LUK 16:6 ತದೆ ಇನೆ, ‘ಖ್ಹೊ ತಿತ್ತಿ ತೇಲ್’ ಕರಿ ಜವಾಬ್‌ ದೇತಾಖ್ಹತರ್‌, ತದೆ ಯೋ ಸೇವಕ್‌ನೆ, ‘ಆ ತಾರು ಕಾಗತ್ ಪಾಡೀನ್, ಒಗ್ಗಿಸ್ ಬೇಶಿನ್, ಅಡೈವಿಖ್ಹ್‌ ಕರಿ ಲೀಕ್’ ಕರಿ ಇನ ಬೋಲ್ಯೊ.
LUK 16:7 ಅಜು಼ ಇನೆ ಬಿಜ್ಜೇಕ್‌ ಜ಼ಣಾನ, ‘ಮಾರ ಯಜಮಾನ್ನ, ತೂ ಕೆತ್ರು ದೇವ್ಣು?’ ಕರಿ ಇನೆ ಪುಛಾ಼ವಖ್ಹತರ್, ಇನೆ, ‘ಏಕ್‌ ಹಜಾ಼ರ್ ಪಲ್ಲೊ ಘವ್‌ಕರಿ ಬೋಲ್ಯೊ. ತದೆ ಇನೆ, ‘ಅಲ್ಲೆ, ತಾರು ಕಾಗತ್, ಅನಾಪರ್ ಆಟ್ ಖ್ಹೊ ಕರಿ ಲೀಖ್’ ಕರಿ ಬೋಲ್ಯೊ.
LUK 16:8 ತದೆ ಇನ ಯಜಮಾನ್ನೆ ಅನಿ ಬಾರೇಮ ಖ್ಹಮ್‌ಜಿನ್‌, ಯೋ ಠಗಾರ‍್ಯೊ ಹುಯಿರೋತೆ ಘರ‍್ನೊಸೇವಕ್‌ನ, ‘ತುನೆ ಚಾ಼ತುರ್‌ನು ಕಾಮ್ ಕರ‍್ಯೊ’ ಕರಿ ಬೋಲಿನ್ ಖ್ಹರಾಯೊ. ಶನಕತೊ, ಆ ಜಗತ್‌ನು ಅದ್ಮಿ ಇವ್ಣಿ ಬಾರೇಮ, ಉಜಾ಼ಖ್ಹ್‌ನು ರಾಜ್ಯನ ಅದ್ಮಿಥೀಬಿ ಚಾ಼ತುರ್ ಹುಯಿರ‍್ಹೂಸ್.
LUK 16:9 ಯೇಸುನೆ ಬಿಜೂ಼ಬಿ ಬೋಲ್ಯೋಕಿ, “ಮೇ ತುಮೂನ ಬೋಲುಸ್ಕಿ, ಆ ಜಗತ್‌ಮ ಠಗಾಯಿಹುಯಿ ಧನ್‌-ದೌಲತ್‌ಥಿ, ತುಮೆ ಖ್ಹಾರಾನ ದೋಸ್ತ್ ಕರಿಲೆವೊ, ಅಮ್ ಕರ‍್ಯಾತೊ, ತುಮಾರಕನ ಛಾ಼ತೆ ಖ್ಹಾರು ನಿಕ್ಳಿಗಯೂತೋಬಿ, ಹರ್‌ಹಮೇಶ ರ‍್ಹವಾನು ಘರ್‌ಮ ತುಮೂನ ಮಳೈಲಿಶೆ.
LUK 16:10 ಥೋಡಾಮ ವಿಶ್ವಾಸ್‍ಥಿ ರ‍್ಹವಾಳು, ಜಾ಼ಖ್ಹತ್‌ಮಾಬಿ ವಿಶ್ವಾಸ್‍ಥಿ ರ‍್ಹೇಸ್, ಕತೋಬಿ ಥೋಡಾಮಸ್ ವಿಶ್ವಾಸ್‌ಕೊಂತೆ ಇವ್ಣೆ ಜಾ಼ಖ್ಹತ್‌ಮಾಬಿ ವಿಶ್ವಾಸ್‍ಥಿ ರ‍್ಹೇಯ್‌ಕೊಯ್ನಿ.
LUK 16:11 ಅಮ್ ರ‍್ಹವಾಪರ್, ಜಗತ್‌ನೂಸ್ ಧನ್‍ ದೌಲತ್‌ನಿ ಬಾರೇಮ ತುಮೆ ವಿಶ್ವಾಸ್‌ಕೊಂತೆ ರ‍್ಹಯಾತೊ, ಖ್ಹಾಚು಼ ಧನ್‌ ದೌಲತ್‌ನ ತುಮಾರ ಹಾತ್ಮ ಕೋಣ್ ದಿಶೆ?
LUK 16:12 ಬಿಜಾ಼ನಿ ಧನ್‌ ದೌಲತ್‌ನಿ ಬಾರೇಮ, ತುಮೆ ನಿಯಥ್ಥಿ ನಾ ರ‍್ಹಯಾತೊ, ತುಮಾರಿ ಧನ್‌ ದೌಲತ್‌ನ ತುಮೂನ ಕೋಣ್ ದಿಶೆ?
LUK 16:13 ಕೆಹೊ ಆಳ್‍ಬಿ ಬೇ ಯಜಮಾನ್ನ ಸೇವೆ ಕರಾನ ಕೋ ಹುವಾನಿ. ಯೋ ಏಕ್‌ನ ವಹೇರ್‌ ಕರೀನ್ ಬಿಜೇಕ್‌ನ ಪ್ಯಾರ್ ವತಾಳ್‌ಶೆ. ನತರ್‌ಕಿ ಏಕ್ಕನ ನಿಯ್ಯತ್‌ಥಿ ರ‍್ಹೀನ್, ಬಿಜೇಕ್‌ನ ಫಿಕ್ಕರ್‌ಕೊಕರ್ಷೇನಿ. ಇಮ್ಮಸ್, ತುಮೆ ದೇವ್‍ನಾಬಿ ಅಜು಼ ಪೈಶಾನ ಆ ಭೇನಿ ಸೇವೆ ಏಕ್‌ದಮ್ ಕರಾನ ಕೋ ಹುವಾನಿ.
LUK 16:14 ಫರಿಸಾಯರ್‌ವಾಳು ಆ ಖ್ಹಾರಿ ವಾತೇನ ಖ್ಹಮ್‌ಜಿನ್‌, ಇವ್ಣುನ ಪೈಶಾನಿ ಲಾಲಚ್‍ಥೀತೆ ಇನಖ್ಹಾಜೆ, ಯೇಸುನ ನಕ್ಲೆ ಕಾಡ್ಯು.
LUK 16:15 ತದೆ ಯೇಸುನೆ ಇವ್ಣುನ, “ಅದ್ಮಿನ ಖ್ಹಾಮ್ಣೆ, ತುಮೆ ಬರೊಬರ್‌ ಕರಿ ವತಾಳಿಲೇಸ್; ಕತೋಬಿ ದೇವ್ನೆ ತುಮಾರು ದಿಲ್‌ ಕಿಮ್ನು ಕರಿ ಮಾಲುಮ್‌ ಕರಿರಾಖ್ಯೋಸ್. ಅದ್ಮಿನ ಡೋಳಾಮ ಘಣ ಮೋಟಾ ಕರಿ ಬೋಲೈಲೇಸ್ತೆ ಇವ್ಣೆ, ದೇವ್ನ ಡೋಳಾಮ ಗಲೀಜ಼್ ಹುಯಿರ‍್ಹೂಸ್.
LUK 16:16 ಮೋಶೇನು ಧರ್ಮಶಾಸ್ತ್ರ ಅಜು಼ ಪ್ರವಾದಿಯೇನೆ ಲೀಖ್ಯೂತೆ ಯೋ ಖ್ಹಾರು ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನತೋಡಿಸ್. ಅನ ಬಾದ್‌ಮ, ದೇವ್ನ ರಾಜ್ಯನಿ ಸುವಾರ್ತೆ ಬೋಲಾವ್‍ಕರಾಸ್. ಅನಾಮ ತಮಾಮ್‌ ಅದ್ಮಿಖ್ಹಾರು ಜು಼ಲಮ್‌ಥಿ ಪೇಖ್ಹ್‌ಶೆ.
LUK 16:17 ಆಬ್ಬಿ ಧರ್ತಿ ಮಟಿಜಾ಼ಶೆ, ಕತೋಬಿ ಧರ್ಮಶಾಸ್ತ್ರನ ಮಹಿನು ಏಕ್‌ ಟಿಪ್‌ಕ್ಯುಬಿ ಜಿನುಕು ಮಟ್‌ಶೆ ಕೊಯ್ನಿ” ಕರಿ ಬೋಲ್ಯೊ.
LUK 16:18 ಇನಿ ಬಾವಣ್ಣ ಮ್ಹೇಲಿನ್, ಬಿಜೇಕ್‍ನ ವ್ಯಹಾ ಕರಿಲ್ಯವಾಳು ಹರೇಕ್‍ಬಿ ವ್ಯಬಿಚಾರ್ ಕರಾವಾಳು ಹುಯಿರ‍್ಹೂಸ್. ಬಾವ್ರಿ ಮ್ಹೆಂದಿದೋತೆ ತಯೇಡಾನ ವ್ಯಹಾ ಕರಿಲ್ಯವಾಳು ವ್ಯಬಿಚಾರ್ ಕರಾವಾಳು ಹುಯಿರ‍್ಹೂಸ್.
LUK 16:19 ಏಕ್‌ ಜ಼ಣೊ ಶೌಕಾರ್ ಥೊ. ಯೋ ಹರ್‌ಹಮೇಶ ಘಣಾಮೋಲ್‌ನು ರಾಯಿಜಾ಼ಮಣ್ಣ ರಂಗ್ನು ರೇಖ್ಹಮ್‌ನ ಲುಂಗ್ಡಾವ್‍ನ ಪೇರ‍್ಹಿಲೀನ್‌, ದನ್‌ರೋಜ಼್‌ ಘಣಿ ಅಕ್ಲಾಶ್‌ಥಿ ಜಿವ್ಣು ಚ಼ಲಾವ್‍ಕರ್ತೊಥೊ.
LUK 16:20 ಇನ ಘರ್‌ನ ದರ‍್ವಾಜ಼ಕನ, ಲಾಜ಼ರ್‌ ಕರಿ ಧರಮ್ ಮಾಂಗವಾಳೊ ಏಕ್‍ಜ಼ಣೊ ಪಡ್ಯೋಥೊ. ಅನು ಆಂಗ್‌ತನ್‌ ಅಖ್ಖುಸ್ ಫೋಡ-ಫುಂಗ್‌ಣಿಯೆ ಥು.
LUK 16:21 ಯೋ ಶೌಕಾರ್ ಖೈನ್ ನಾಖಸ್ತೆ ವಿಠ್ಯು ಖಾಣುತೋಬಿ ಖೈನ್, ಭುಕ್ ಮಟೈಲೇವ್ಣು ಕರಿ ಥು. ಅತ್ರೇಸ್ ಕಾಹೆತೆ ಕುತ್‌ರ‍್ಯಾ ಜಿನ್‌ಕುಬಿ ಇನು ಫೋಡಾವ್‍ನ ಚಾ಼ಟ್‌ತೂಥು.
LUK 16:22 ಅಮ್‌ರ‍್ಹವಾನಿ ವಖ್ಹತ್‌ಮ, ಥೋಡ ದನ್ನ ಬಾದ್‌ಮ, ಯೋ ಧರಮ್ ಮಾಂಗವಾಳೊ ಮರಿಗಯೊ. ತದೆ ಪರ್‌ಲೋಕ್‌ನು ದೂತರ್ ಆಯಿನ್, ಇನ ಪಳ್ಳಿ ಜೈ಼ನ್, ಅಬ್ರಹಾಮ್‌ನಿ ಛಾ಼ತಿನ ಚಿಕಾಯು. ಯೋ ಶೌಕಾರ್‌ಬಿ ಮರಿಗಯೊ, ಇನು ಮಖ್ಹಾಣ್ಯು ಕರ‍್ಯು.
LUK 16:23 ಯೋ ಪಾತಾಳ್ನ ಮಹಿ ಖ್ಹತಾಪ್ಣಿ ಪಡುಕರಾನಿ ವಖ್ಹತ್‌ಮ, ಡೋಳ ಪಾಡೀನ್, ದೂರ್‌ಥೊ ಅಬ್ರಹಾಮ್‌ನಾಬಿ ಇನಿ ಛಾ಼ತಿ ಚಿಕೈರ‍್ಹೋತೆ ಲಾಜ಼ರ್‌ನಾಬಿ ದೇಖ್ಯೊ.
LUK 16:24 ತದೆ ಇನೆ, “ಬಾ, ಅಬ್ರಹಾಮ್! ಮಾರಪರ್ ಗೋರ್‌ ಕರೀನ್, ಲಾಜ಼ರ್‌ನ ಮೋಕಲ್. ಯೋ ಇನಿ ಅಂಗ್‌ಳಿನ ಪಾಣಿಮ ಡುಬೈನ್, ಮಾರಿ ಜೀಬ್‌ನ ಠಂಡು ಕರಾದೆ, ಶನಕತೊ ಆ ಆಗ್‌ಮ ಮೇ ಘಣು ಖ್ಹತುಕರೂಸ್” ಕರಿ ಚಿಕ್ರಿನ್ ಬೋಲಿಲಿದೊ.
LUK 16:25 ಕತೋಬಿ ಅಬ್ರಹಾಮ್‌ನೆ ಇನ, “ಛಿಯ್ಯಾ, ತುನೆ ಆಖ್ಹ್ ಕರ‍್ಯೊತೆ ಖ್ಹಾರೀಸ್‍ ಖ್ಹುಶಿ, ತಾರಿ ಜಿ಼ಂದ್‌ಗೀಮ ತುನ ಮಳ್ಯು. ಇಮ್ಮಸ್, ಲಾಜ಼ರ್‌ನೆ ಲತಾಡ ಪಡ್ಯೊ ಕರಿ ಬೋಲಾನು ಯಾದ್ ಕರಿಲೆ. ಕತೋಬಿ ಹಮ್ಕೆ ಹಜ಼್ಜಾ ಅನ ಸಮಾಧಾನ್ ಛಾ಼, ಕತೋಬಿ ತುನ ಖ್ಹತಾಪ್ಣಿ ಮಳಿರ‍್ಹೀಸ್.
LUK 16:26 ಅತ್ರೇಸ್ ಕಾಹೆತೆ ಹಮಾರ ಅಜು಼ ತುಮಾರ ಇಚ಼್‌ಮ ಏಕ್‌ ಮೋಟಿ ಖಾಡ್ ಛಾ಼. ಇನಖ್ಹಾಜೇಸ್, ಹೈಕಡ್‌ತು ತುಮಾರ ಭಣಿ ಜಾ಼ವ್ಣುಕರಿ ಕರ‍್ಯುತೋಬಿ, ಜಾ಼ವಾನ ಕೋ ಹುವಾನಿ ಅಜು಼ ಹೀಕಡ್‌ತು ಕೋಣ್‌ಬಿ ಉಲಾಂಗಿನ್ ಹಮಾರಕನ ಆವಾನ ಕೋ ಹುವಾನಿ” ಕರಿ ಬೋಲ್ಯೊ.
LUK 16:27 ತದೆ ಯೋ ಶೌಕಾರ್‌ನೆ, ‘ಬಾ ಅಬ್ರಹಾಮ್, ಮೇ ತುನ ಗಿಂಗಾವುಸ್, ಲಾಜ಼ರ್‌ನ ಮಾರ ಬಾನ ಘರೆ ಮೋಕಲ್ ಕರಿ ಬೋಲಿಲಿದೊ.
LUK 16:28 ಮನ ಪಾಚ಼್ ಭೈಯೇ ಛಾ಼. ಇವ್ಣೆತೋಬಿ ಆ ಖ್ಹತಾಪ್ಣಿನಿ ಝ಼ಗೋಪರ್ ನಾ ಆವ್ಣುತೆ ಇಮ್‌, ಲಾಜ಼ರ್‌ ಜೈ಼ನ್, ಇವ್ಣುನ ಝೇತಾವಾದೆ’ ಕರಿ ಬೋಲ್ಯು.
LUK 16:29 ಕತೋಬಿ ಅಬ್ರಹಾಮ್‌ನೆ, ‘ತಾರ ಭೈಯೇಕನ ಮೋಶೆ ಅಜು಼ ಪ್ರವಾದಿಯೇನು ಪುಸ್ತಕ ಖ್ಹಾರು ಛಾ಼, ಇವ್ಣೆ ಇನ ಖ್ಹಮ್‌ಜಾ಼ದೆ’ ಕರಿ ಬೋಲ್ಯೊ
LUK 16:30 ತದೆ ಯೋ ಶೌಕಾರ್‌ನೆ, ‘ಬಾ ಅಬ್ರಹಾಮ್, ಇಮ್‌ಕಾಹೆ! ಮರ‍್ಯುಹುಯು ಕೋಣ್‌ತೋಬಿ ಏಕ್‌ ಜ಼ಣು ಪಾಛು಼ ಜಿವ್ತುಹುಯಿನ್, ಗಯೂತೊ, ಇವ್ಣೆ ದೇವ್‌ಭಣಿ ಫರ್‌ಶೆ’ ಕರಿ ಬೋಲ್ಯೊ.
LUK 16:31 ಕತೋಬಿ ಅಬ್ರಹಾಮನೆ ಇನ, ‘ಇವ್ಣೆ ಮೋಶೇನು ಅಜು಼ ಪ್ರವಾದಿಯೇನೂಸ್ ವಾತೇನ ಖ್ಹಮ್‍ಜ್ಯುನಾತೊ, ಮರ‍್ಯುಹುಯು ಏಕ್‌ ಜ಼ಣು ಜಿವ್ತುಹುಯಿನ್ ಉಠಿತೋಬಿ, ಇವ್ಣೆ ಮಾನ್‌ಶೆ ಕೊಯ್ನಿ’ ಕರಿ ಬೋಲ್ಯೊ.”
LUK 17:1 ಯೇಸುನೆ ಇನ ಶಿಷ್ಯರ್‌ನ ಬೋಲ್ಯೋಕಿ, “ಅದ್ಮಿನ ಪಾಪ್‌ಮ ಚ಼ಲಾವವಾಳು ರಾಛು಼ ಆವ್‌ಶೆಸ್‌ ಆವ್‌ಶೆ, ಕತೋಬಿ ಇಮ್‌ ಹುವ್ವಾನಿಘೋಣಿ ಕರಾಸ್ತೆ, ಯೋ ಅದ್ಮಿನಿ ಹಾಲ್ನ ಶಾತ್ ಬೋಲು!
LUK 17:2 ಆ ನ್ಹಾನಾವ್‍ಮ ಏಕ್‌ ಜ಼ಣಾನ ಪಾಪ್‌ಮ ಚ಼ಲಾವಥೀಬಿ, ಇನ ಘಲೆಂಡ ಕೇಡೆ ಘಟ್ಟಿನ ಬಂಡಾನ ಭಂದೈಲೀನ್, ದರ‍್ಯಾವ್‌ಮ ನಖೈಲ್ಯವಾನೂಸ್ ಇನ ಅಛ್ಛು಼!
LUK 17:3 ಇನಖ್ಹಾಜೇಸ್, ತುಮೆ ಕರಾತೆ ಬಾರೇಮ ಜ಼ತನ್ ರ‍್ಹವೊ! ತಾರೊ ಭೈ ಪಾಪ್ ಕರ‍್ಯೋತೊ, ಇನ ಗುರ್‌ಕಾವ್, ಏಕ್‌ ವೇಳ್ ಯೋ ಪಾಪ್ನ ಮ್ಹೇಲಿನ್ ಫರಿಗಯೋತೊ, ಇನ ಮಾಪ್‌ ಕರ್‌.
LUK 17:4 ಯೋ ದನ್ನ ಖ್ಹಾತ್ ಹಲ್ಲಾಬಿ ತುನ ಗಲತ್‍ಕರೀನ್ ಖ್ಹಾತ್‍ಹಲ್ಲಾಬಿ ತಾರಭಣಿ ಫರಿನ್, ‘ಮೇ ದಿಲ್‍ ದುಖೈಲೇವುಸ್, ಮನ ಕ್ಷಮಾಕರ್’ ಕರಿ ಬೋಲಿಲಿದೋತೊ ಇನ ಮಾಪ್‌ಕರ್‌ ಕರಿ ಬೋಲ್ಯೊ.
LUK 17:5 ಅಪೊಸ್ತಲರ‍್ನೆ ಪ್ರಭುನ, “ಹಮಾರಿ ವಿಶ್ವಾಸ್‌ನ ಭಡಾವ್” ಕರಿ ಬೋಲಿಲಿದ.
LUK 17:6 ತದೆ ಪ್ರಭುನೆ ಇವ್ಣುನ, “ರಾಯಿಯೆವ್ಡಿ ವಿಶ್ವಾಸ್‌ ತುಮೂನ ರ‍್ಹಯುತೊ, ತುಮೆ ಆ ಅಂಜೀರ್‌ನ ಝಾ಼ಡ್‌ಣ, ‘ಜ಼ಡ್‌ ಖ್ಹಮೇದ್ ಉಖ್‌ಡೈ ಜೈ಼ನ್‌, ದರ‍್ಯಾವ್‌ಮ ಗಡಿಜಾ಼!’ ಕರಿ ಬೋಲ್ಯಾತೋಬಿ, ಯೋ ತುಮಾರಿ ವಾತೇನ ಖ್ಹಮಜ಼್‌ಶೆ” ಕರಿ ಬೋಲ್ಯೊ.
LUK 17:7 “ತುಮಾರಾಮ ಕಿನಾತೋಬಿ ನಾಗ್ರಾವಾಳೊ ನತರ್‌ಕಿ ಮೇಂಢ ಚ಼ರಾವವಾಳೊ ಆಳ್‌ ಛಾ಼ ಕರಿ ಲ್ಹಾವೊ. ಯೋ ಆಳ್‌ ಖೇತರ್‌ಮಾಥು ಘರ್‌ಕನ ಆಯೂತೊ, ತುಮೆ ಇನ, ‘ಒಗ್ಗಿಆವ್, ಖಾಣನ ಬೇಖ್ಹ್‌’ ಕರಿ ಬೋಲಸ್ಕಿ ಶು?
LUK 17:8 ಕೊಯ್ನಿಸಸ್ ಕೊಯ್ನಿ! ತುಮೆ ಇನ, ‘ಮನ ಖಾಣು ತೈಯಾರ್‌ಕರ್, ಅಜು಼ ಕಂಬರ್‌ನ ಲುಂಗ್ಡು ಭಾಂದಿಲೀನ್, ಮೇ ಖೈನ್‌ಪೀಯ್ಯಾತೋಡಿ, ಮಾರಿ ಚಾ಼ಕ್ರಿಕರ್‌, ಬಾದ್‌ಮ ತೂ ಖೈನ್‌ಪೀ ಕರಿ ಬೋಲಾಕೊಯ್ನಿಕಿ ಶು?
LUK 17:9 ಇನಿ ಹುಕುಮ್‌ನಿಘೋಣಿ ಚಾ಼ಲ್ಯುತೆ ಯೋ ಆಳ್‌ನ, ‘ತುನ ಧನ್ಯವಾದ್’ ಕರಿ ಬೋಲ್‌ಶೇಕಿ ಶು?
LUK 17:10 ಅಮ್ಮಸ್, ತುಮೆ ತುಮೂನ ಹುಕುಮ್ ಕರ‍್ಯುತೆ ಇನ, ಪೂರ ಕರಾನ ಬಾದ್‌ಮ, ‘ಹಮೆ ಫಾಯಿದೊಕೊಂತೆ ಆಳ್‌ ಹುಯಿರ‍್ಹಾಸ್, ಹಮೆ ಖಲಿ ಹಮಾರು ಕಾಮ್ನ ಕರಿರಾಖ್ಯಾಸ್’ ಕರಿ ಬೋಲ್‌ನು” ಕರಿ ಬೋಲ್ಯೊ.
LUK 17:11 ಯೇಸು ಯೆರೂಸಲೇಮ್‌ ಭಣಿ ಒಳೆಜಾ಼ತೊಥೋತೆ ತದೆ, ಗಲಿಲಾಯ ಅಜು಼ ಸಮಾರ್ಯ ತಬರ್‌ಖಾನು ಇಚ಼್‌ಮಾನಿ ವಾಟೆಕರಿ ಗಯೊ.
LUK 17:12 ಏಕ್‌ ಗಾಮ್ಮ ಆವಾದಿನ್, ಹಿಜ್ಜಾ಼ ಖೋಡ್‍ ಲಾಗಿರ‍್ಹೂಥೂತೆ ದಖ್ಹ್‌ ಜ಼ಣು ಇನಖ್ಹಾಮ್ಣೆ ಆಯಿನ್, ದೂರ್ ಭೀರಿನ್‌,
LUK 17:13 “ಯೇಸು, ಗುರೂ, ಹಮಾರಪರ್‌ ಗೋರ್‌ಕರ್‌!” ಕರಿ ಚಿಕ್ರಿನ್ ಬೋಲ್ಯು.
LUK 17:14 ಯೇಸುನೆ ಇವ್ಣುನ ದೇಖಿನ್‌, “ತುಮೆ ಜೈ಼ನ್‌, ಯಾಜಕವ್ನ ತುಮಾರು ಆಂಗ್‌ತನ್‌ ವತಾಳೊ” ಕರಿ ಬೋಲ್ಯೊ. ಇವ್ಣೆ ಜಾ಼ವನಿ ವಖ್ಹತ್‌ಮಸ್, ಇವ್ಣೆ ಪಾಕ್‌ ಹುಯಿಗಯು.
LUK 17:15 ಇವ್ಣಾಮ ಏಕ್‌ ಜ಼ಣು ಇನ ಅಛ್ಛು಼ ಹುಯೂತೆ ದೇಖಿನ್‌, ಚೋ಼ರ್ ಆವಾಜ಼್‌ಥಿ, ದೇವ್ನಿ ಖ್ಹರಾವ್ಣಿ ಕರ್ತುಹುಯಿನ್, ಪಾಛು಼ಫರಿ ಆಯು.
LUK 17:16 ಯೋ ಯೇಸುನ ಗೋಡಾಪರ್ ಪಡೀನ್, ಇನ ಧನ್ಯವಾದ್ ಕರ‍್ಯು. ಯೋ ಸಮಾರ್ಯವಾಳೊ ಹುಯಿರ‍್ಹೋಥೊ.
LUK 17:17 ತದೆ ಯೇಸುನೆ ಇನ, “ದಖ್ಹ್‌ ಜ಼ಣಾನ ಅಛ್ಛು಼ ಹುಯೂನಿ? ಬಿಜು಼ ನೌ ಜ಼ಣ ಕ್ಯಾ?” ಕರಿ ಪುಛಾ಼ಯೊ.
LUK 17:18 ದೇವ್ನಿ ಸ್ತುತಿ ಕರಾನಖ್ಹಾಜೆ, ಆ ಪರೈ ದೇಖ್ಹ್‌ವಾಳಾನ ಮ್ಹೆಂದಿನ್, ಬಿಜು಼ ಕೋಣ್‌ಬಿ ಪಾಛು಼ಫರಿ ಆಯು ಕೊಯ್ನಿ ಶು? ಕರಿ ಬೋಲ್ಯೊ.
LUK 17:19 ಅಜು಼ ಯೇಸುನೆ ಇನ, “ಉಪ್ಪರ್ ಉಠೀನ್, ಜಾ಼; ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಕರ‍್ಯು” ಕರಿ ಬೋಲ್ಯೊ.
LUK 17:20 ಫರಿಸಾಯರ್‌ಮ ಥೋಡು ಜ಼ಣು ಯೇಸುನ, “ದೇವ್ನಿ ರಾಜ್ಯ ಕದೆ ಆವ್‌ಶೆ?” ಕರಿ ಫುಛಾ಼ಯು. ತದೆ ಇನೆ ಇವ್ಣುನ, “ದೇವ್ನಿ ರಾಜ಼್ ದೆಖಾವಾನಿಘೋಣಿ ಆವಾನು ಕಾಹೆ,
LUK 17:21 ಕೋಣ್‌ಬಿ, “ಹಂದೇಖೊ ಹಜ್ಜಾ಼ ಛಾ಼” ನತರ್‌ಕಿ “ಹಂದೇಖೊ ಹಿಜ್ಜಾ಼ ಛಾ಼” ಕರಿ ಬೋಲಾನ ಕೋ ಹುವಾನಿ. ಶನಕತೊ ದೇವ್ನಿ ರಾಜ್ಯ ತುಮಾರ ಮಹಿಸ್ ಛಾ಼” ಕರಿ ಬೋಲ್ಯೊ.
LUK 17:22 ಅಜು಼ ಯೇಸುನೆ ಇನ ಶಿಷ್ಯರ್‌ನ, “ಏಕ್‌ ವಖ್ಹತ್ ಆವ್‌ಶೆ, ತದೆ ತುಮೆ, ಅದ್ಮಿನೊ ಛಿಯ್ಯಾನ ದನ್ಮ ಏಕ್‌ ದನ್‌ತೋಬಿ ದೇಕ್ಣು ಕರಿ ಆಖ್ಹ್ ಕರ‍್ಯಾತೋಬಿ, ತುಮೆ ಇನ ದೇಕ್‌ಶು ಕೊಯ್ನಿ.
LUK 17:23 ಅದ್ಮಿಖ್ಹಾರು ತುಮೂನ, ‘ಹಂದೇಖೊ, ಹಜ್ಜಾ಼ ಛಾ಼!’ ನತರ್‌ಕಿ, ‘ಹಂದೇಖೊ, ಹಿಜ್ಜಾ಼ ಛಾ಼’ ಕರಿ ಬೋಲ್‌ಶೆ. ಕತೋಬಿ ತುಮೆ ಇವ್ಣ ಪೀಠೆ ನಕೊಜಾ಼ಶು.
LUK 17:24 ಶನಕತೊ, ವಿಜ಼್‌ಳಿ ಖಡ್ಕಿನ್‌, ಆಬ್‍ಮ ಏಕ್‌ ಬಾಜು಼ಥು ಬಿಜ್ಜೇಕ್‌ ಬಾಜು಼ತೋಡಿ ಚ಼ಮ್‌ಕಾಸ್ತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಇನ ದನ್ಮ ರ‍್ಹಿಶೆ.
LUK 17:25 ಕತೋಬಿ ಅನೇಥಿಬಿ ಅಗಾಡಿ, ಅದ್ಮಿನೊ ಛಿಯ್ಯೊ, ಘಣಿ ಖ್ಹತಾಪ್ಣಿ ಖೈನ್, ಆ ಹಗಾಮ್ನ ಅದ್ಮಿಥಿ ಝಿಟ್ಕಾರವ್ಣು.
LUK 17:26 ನೋಹಾನ ದನ್ಮ ಚಾ಼ಲ್ಯುತೆ ಇಮ್ಮಸ್, ಅದ್ಮಿನೊ ಛಿಯ್ಯಾನ ದನ್‌ಮಾಬಿ ಚಾ಼ಲ್‌ಷೆ.
LUK 17:27 ತಮಾಮ್‌ ಅದ್ಮಿ, ಖಾತು-ಪೀತು ಹುಯಿನ್, ವ್ಯಹಾ ಕರಿದೇತುಹುಯಿನ್‌, ವ್ಯಹಾ ಕರಿಲೇತುಹುಯಿನ್‌ ಥು. ನೋಹಾನೆ ಜ಼ಹಾಜ಼್‌ನ ಮಹಿ ಚ಼ಢ್ಯೋತೆ ದನ್‌ಮಾಬಿ ಇವ್ಣೆ ಇಮ್ಮಸ್ ಕರುಕರ್ತುಥು. ತದೆ ತೋಫಾನ್‌ ಆಯಿನ್, ತಮಾಮ್‌ ಅದ್ಮಿನ ಬರ್ಬಾತ್ ಕರಿನಾಖ್ಯು.
LUK 17:28 ಲೋಟನ ದನ್ಮ ಚಾ಼ಲ್ಯುತೆ ಇಮ್ಮಸ್ ಚಾ಼ಲ್‌ಷೆ. ಅದ್ಮಿಖ್ಹಾರು ಖಾತು-ಪೀತುಹುಯಿನ್‌, ಮೋಲ್ ಲೇತುಹುಯಿನ್‌, ವೇಚ಼್‌ತುಹುಯಿನ್‌, ಖೆತರ್‌ಮ ಗಾಡ್‌ತುಹುಯಿನ್‌, ಘರ್ ಭಾಂದ್‌ತುಹುಯಿನ್‌ ಥೂ.
LUK 17:29 ಕತೋಬಿ ಲೋಟ ಸೊದೋಮ್ ಗಾಮ್‌ನ ಮ್ಹೆಂದಿನ್ ನೀಕ್‌ಳ್ಯೋತೆ ತದೆ, ಆಬ್‍ಪರ್‌ಥು, ಆಗ್‌ನೊ ಅಜು಼ ರಂಜ಼ಕ್‌ನೊ ಪಾಣಿ ವರ್ಶಿನ್‌ ಇವ್ಣ ಖ್ಹಾರಾವ್‌ನ ಬರ್ಬಾತ್ ಕರಿನಾಖ್ಯು.
LUK 17:30 ಅದ್ಮಿನೊ ಛಿಯ್ಯೊ ದೆಖಾವ್‌ಶೇತೆ ದನ್‌ಮಾಬಿ ಅಮ್ಮಸ್ ರ‍್ಹಿಶೆ.
LUK 17:31 ಯೋ ದನ್ಮ, ಇನ ಘರ್‌ನ ಛ಼ತ್‍ಪರ್‌ ರ‍್ಹವಾಳು, ಇನು ರಾಛು಼ ಪಾಡಾನಟೆಕೆ ಹೇಟ್ ಉತ್ರಿನ್, ಘರ್‌ಮ ನಾ ಆವ್ಣು. ಇಮ್ಮಸ್, ಖೇತರ್‌ಮ ರ‍್ಹವಾಳುಬಿ ಪಾಛು಼ಫರಿ ಇನ ಘರೆ ನಾ ಜಾ಼ವ್ಣು.
LUK 17:32 ಲೋಟನಿ ಬಾವಣ್ಣ ಯಾದ್ ಕರಿಲೆವೊ!
LUK 17:33 ಕೋಣ್ ಇನೊ ಜಾನ್‌ ಬಚಾ಼ಡಿಲೇವ್ಣುಕರಿ ಕರಾಸ್ಕಿ ಯೋ ಇನ ಗುಮೈಲಿಶೆ; ಕತೋಬಿ ಕೋಣ್ ಇನೊ ಜಾನ್‌ ಗುಮೈಲೇಸ್ಕಿ ಯೋ ಇನ ಬಚಾ಼ಡಿಲಿಶೆ.
LUK 17:34 ಮೇ ತುಮೂನ ಬೋಲುಸ್ಕಿ, ಯೋ ರಾತ್ಮ ಎಕ್ಕಸ್ ಖಟಿಯಾಪರ್‌ ಬೇ ಜ಼ಣು ಖ್ಹುತುರ‍್ಹೀಶೆ, ಏಕ್‌ಜ಼ಣಾನ ಪಳ್ಳಿಶೆ, ಏಕ್‌ನ ಮ್ಹೆಂದಿಶೆ.
LUK 17:35 ಬೇ ತಯೇಡ ಎಕ್ಕಸ್ ಘಟ್ಟಿಪರ್‌ ದಳುಕರ್‌ಶೆ, ಏಕ್‌ನ ಪಳ್ಳಿಶೆ, ಏಕ್‌ನ ಮ್ಹೆಂದಿಶೆ ಕರಿ ಬೋಲ್ಯೊ.
LUK 17:36 ಖೇತರ್‌ಮ ರ‍್ಹವಾಳ ಬೇಜ಼ಣಾಮ ಏಕ್‍ಜ಼ಣೊ ಪಡೈಚ಼ಲ್ಯೊಜಾ಼ಶೆ ಬಿಜೇಕ್‍ಜ಼ಣೊ ಹಿಜ್ಜಾ಼ಸ್ ಮ್ಹೇಲೈಜಾ಼ಶೆ ಕರಿ ಬೋಲ್ಯೊ.
LUK 17:37 ತದೆ ಶಿಷ್ಯರ್‌ನೆ, “ಪ್ರಭು, ಆ ಕಿಜ್ಗಾ಼ ಉಶೆ?” ಕರಿ ಫುಛಾ಼ವಖ್ಹತರ್‌, ಯೇಸುನೆ ಇವ್ಣುನ, “ಮುರ್ದು ಕಿಜ್ಜಾ಼ಕಿ, ಹಿಜ್ಜಾ಼ಸ್ ಗರದ್‍ಖ್ಹಾರು ಎಕ್ಟುಹುವಾಸ್” ಕರಿ ಜವಾಬ್‌ ದಿದೊ.
LUK 18:1 ತದೆ ಯೇಸುನೆ ಖಟು ನಾ ಖಾಣುತೆ, ಹಮೇಶ ಪ್ರಾರ್ಥನೆ ಕರ್ತುರ‍್ಹೇವ್ಣು ಕರಿ ವತಾಳಾನಟೇಕೆ, ಇನ ಶಿಷ್ಯರ್‌ನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
LUK 18:2 ಯೋ ಶಾತ್‌ಕತೊ, “ಏಕ್‌ ಗಾಮ್ಮ ಏಕ್‌ ನಯ್ಯೊ ಥೊ. ಯೋ ದೇವ್‍ನಾಬಿ ದೇಖಿನ್ ಡರ್‌ತೋಥೊ ಕೊಯ್ನಿ, ಅಜು಼ ಅದ್ಮಿನ ಮಜೂ಼ರ್‌ ಕರ್ತೊಥೊ ಕೊಯ್ನಿ.
LUK 18:3 ಯೋಸ್ ಗಾಮ್ಮ ಏಕ್‌ ಮುಂಡಚ್ಚಿ ತಯೇಡ ಥೀ. ಯೋ ಘಡಿಕೇಡೆ ಇನಾಕನ ಐನ್, ‘ಮಾರೊ ನ್ಯಾವ್‍ಫೇಡೈನ್, ಮಾರ ದುಶ್‌ಮನ್‌ಥಿ ಮನ ಬಚಾ಼ಡ್‍’ ಕರಿ ಬೋಲ್‍ತಿರ‍್ಹೇತೀಥಿ.
LUK 18:4 ಥೋಡ ದನ್ ಇನೆ ಧ್ಯಾನ್ ಕೋ ದಿದೋನಿ. ಕತೋಬಿ ಬಾದ್‌ಮ ಇನು ಯೋಸ್, ‘ಮೇ ದೇವ್‍ನಾಬಿ ದೇಖಿನ್‌ ಡರಾವಾಳೊ ಕಾಹೆ, ಅದ್ಮಿನಾಬಿ ಮಜೂ಼ರ್‌ ಕರಾವಾಳೊ ಕಾಹೆ,
LUK 18:5 ತೋಬಿ ಆ ಮುಂಡಚ್ಚಿ ತಯೇಡ ಘಡಿಕೇಡೆ ಆಯಿನ್, ಮನ ಬೋಲ್‍ತಿರ‍್ಹೇಸ್ತೆ ಇನಖ್ಹಾಜೆ, ಮೇ ಅನಿ ನ್ಯಾವ್ ಫೇಡೈನಾಖುಸ್. ನತರ್‌ಕಿ ಆ ಘಡಿಕೇಡೆ ಆಯಿನ್ ಮನ ಖ್ಹತಾವ್‌ಶೆ!’ ಕರಿ ಬೋಲಿಲಿದೊ.”
LUK 18:6 ಅಜು಼ ಪ್ರಭುನೆ, “ಯೋ ಠಗಾರು ನೈಯಾನೆ ಬೋಲ್ಯೋತೆ ಇನ ಖ್ಹಮ್‌ಜೊ಼.
LUK 18:7 ದೇವ್ನೆ ಚೂ಼ಣ್ಯೋತೆ ಅದ್ಮಿ ರಾತ್-ದನ್ ಇನ ಮದತ್‌ಖ್ಹಾಜೆ ಬಿಂತಿಕರ‍್ಯೊತೊ, ಯೋ ಇವ್ಣಿ ಬಾರೇಮ ದೇರ್‌ಕರ‍್ಯುತೋಬಿ ಇವ್ಣಿ ನ್ಯಾವ್‌ನ ಫೇಡವಸ್‍ಕೊಂತೆ ರ‍್ಹಿಶೇಕಿ ಶು? ಯೋ ಇವ್ಣಿ ಮದತ್ ಕರಾನ ವೇರಸ್‌ ಕರ್ಶೆ ಕೊಯ್ನಿ.
LUK 18:8 ಮೇ ತುಮೂನ ಬೋಲುಸ್ಕಿ, ಯೋ ಒಗ್ಗಿಸ್‌ಮ ಇನ ಅದ್ಮಿ ಖ್ಹಾರಾನು ನ್ಯಾವ್‌ ಫೇಡ್‌ಶೆ. ಅಮ್ ರ‍್ಹಯುತೋಬಿ, ಅದ್ಮಿನೊ ಛಿಯ್ಯೊ ಆವ್‌ಶೇತೆ ತದೆ, ಜ಼ಮೀನ್‌ಪರ್ ವಿಶ್ವಾಸ್‌ನ ದೇಕ್‌ಶೇಕಿ ಶು?” ಕರಿ ಬೋಲ್ಯೊ.
LUK 18:9 ಅತ್ರೇಸ್ ಕಾಹೆತೆ, ಹಮೇಸ್ ನೀತಿವಾಳ ಕರಿ ಭರೋಖ್ಹೊ ಕರೀನ್, ಬಿಜ಼ ಖ್ಹಾರಾನ ಕಡ್‌ತೇಲ್‌ನಿಮತ್ ದೇಖಾತೆ ಇವ್ಣುನಾಬಿ, ಯೇಸುನೆ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
LUK 18:10 ಏಕ್‌ ಹಲ್ಲ ಬೇ ಜ಼ಣ ಪ್ರಾರ್ಥನೆ ಕರ‍್ನು ಕರಿ ಮಂದಿರ್‌ನ ಗಯ, ಏಕ್‌ ಜ಼ಣೊ ಫರಿಸಾಯರ್‌ವಾಳೊ ಅಜು಼ ಬಿಜೇಕ್ ಜ಼ಣೊ ಶುಂಕ ವಶೂಲ್ ಕರಾವಾಳೊ.
LUK 18:11 ಫರಿಸಾಯರ್‌ವಾಳೊ ಭೀರಿನ್, ಪ್ರಾರ್ಥನೆ ಕರಾನಿ ವಖ್ಹತ್‌ಮ, ‘ಓ ದೇವ್, ಲೂಟಿ ಕರಾವಾಳು, ಠಗಾವವಾಳು, ವ್ಯಬಿಚಾರ್‌ ಕರಾವಾಳು ಅಲಕ್ ಅದ್ಮಿವೊನಿಘೋಣಿ ಮೇ ಕಾಹೆ. ಆ ಶುಂಕ ವಶೂಲ್ ಕರಾವಾಳಾನಿ ಘೋಣಿಬಿ ಮೇ ಕಾಹೆತೆ, ಇನಖ್ಹಾಜೆ ತುನ ಧನ್ಯವಾದ್ ಕರುಸ್.
LUK 18:12 ವಾರಾನ ಬೇಹಲ್ಲ ಉಪವಾಸ್ ರ‍್ಹವುಸ್, ಅಜು಼ ಮೇ ಕಮಾವ್‌ಸ್ತೆ ಖ್ಹಾರಾಸ್‌ಮಾಬಿ ದಖ್ಹ್‌ಮ ಏಕ್‌ ಭಾಗ್‌ ದೆವುಸ್’ ಕರಿ ಬೋಲ್ಯೊ.
LUK 18:13 ಕತೋಬಿ, ಯೋ ಶುಂಕ ವಶೂಲ್ ಕರಾವಾಳೊ ದೂರ್ ಭೀರಿನ್, ಆಬ್‍ಭಣಿ ಡೋಳಪಾಡಿ ದೇಖಾನಾಬಿ ಮನ್‌ಕೊಂತೆ, ಛಾ಼ತಿ ಕೂಟ್‌ತೊ ಹುಯಿನ್, ‘ದೇವ್, ಪಾಪಿ ಹುಯಿರ‍್ಹೋತೆ ಮಾರಪರ್ ಗೋರ್‌ ಕರ್‌’ ಕರಿ ಬೋಲ್ಯು.
LUK 18:14 ಮೇ ತುಮೂನ ಬೋಲುಸ್ಕಿ, ಆ ಶುಂಕ ವಶೂಲ್ ಕರಾವಾಳುಸ್ ದೇವ್ನ ಡೋಳಾಮ ಬರೊಬರ್‌ ಕರಿ ಬೋಲೈಲಿನ್, ಘರೆ ಗಯೊ. ಕತೋಬಿ ಯೋ ಪರಿಸಾಯವಾಳೊ ಇಮ್‌ ಕೊಗಯೋನಿ. ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹರೇಕ್‌ಜ಼ಣೊ ಹೇಟು ಹುಯಿಜಾ಼ಶೆ, ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ ಕರಿಬೋಲ್ಯೊ.
LUK 18:15 ಥೋಡು ಅದ್ಮಿ ಇವ್ಣ ಅಡ್ಡಾಣಿ ಲಾಡ್ಕಾವ್‍ಪರ್‌ ಯೇಸುನೊ ಹಾತ್ ಮ್ಹೆಲಾವ್ಣು ಕರಿ ಇನಾಕನ ಲಾಯು. ಕತೋಬಿ ಅನ ದೇಖಿನ್‌ ಶಿಷ್ಯರ್‌ಖ್ಹಾರು ಇವ್ಣುನ ಗುರ್‌ಕಾಯು.
LUK 18:16 ಕತೋಬಿ ಯೇಸುನೆ ಲಡ್ಕಾವ್‍ನ ಇನ ಖನ್ನೆ ಬುಲೈನ್, “ಅಡ್ಡಾಣಿ ಲಡ್ಕಾವ್‍ನ ಮಾರಕನ ಆವಾನ ಮ್ಹೇಲೊ, ಇವ್ಣುನ ಭಿರಾಕೊ ನಕೊ, ಶನಕತೊ ದೇವ್‌ನು ರಾಜ್ಯ ಅಮ್‌ನಾಸ್‌ವಾಳಾನು.
LUK 18:17 ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್ ಅಡ್ಡಾಣಿ ಲಡ್ಕಾನಿ ಘೋಣಿ ದೇವ್ನಿ ರಾಜ್ಯನ ನಾ ಮಾನ್ಯೂತೊ, ಇವ್ಣೆ ಇನಮಹಿ ಕೋಸ್‌ಜಾ಼ಶೇನಿ” ಕರಿ ಬೋಲ್ಯೊ.
LUK 18:18 ಯೆಹೂದ್ಯರ್‌ನೊ ಏಕ್‌ ಅದಿಕಾರಿ ಯೇಸುನ, “ಅಛ್ಛೊ಼ ಗುರು, ಹಮೇಶಾನಿ ಜಿ಼ಂದ್‌ಗಿ ಮನ ಮಳ್‌ಣುಕತೊ, ಮೇ ಶಾತ್‌ ಕರ‍್ನು? ಕರಿ ಪುಛಾ಼ಯೊ.
LUK 18:19 ತದೆ ಯೇಸುನೆ ಇನ, “ಮನ ಅಛ್ಛೊ಼ ಕರಿ ಶನ ಬೋಲಾಸ್ತೆ? ದೇವ್ ಎಕ್ಕಸ್ ಜ಼ಣೊ ಅಛ್ಛೊ಼ ಪಣ್ಕಿ ಬಿಜು಼ ಕೋಣ್‌ಬಿ ಅಛ್ಛು಼ ಕಾಹೆ.
LUK 18:20 ವ್ಯಬಿಚಾರ್ ನಾ ಕರ‍್ನು, ಖೂನಿ ನಾಹೋಣು, ಚೋ಼ರಿ ನಾ ಕರ‍್ನು, ಝೂ಼ಟಿ ಇಂಜಾ಼ಮ್ ನಾ ಲಗಾಡ್‌ಣು, ತಾರ ಆಯ ಬಾನ ಮರ್ಯಾದಿ ದೇವ್ಣು ಕರಿ ಛಾ಼ತೆ ದೇವ್ನಿ ಹುಕುಮ್‌ ಖ್ಹಾರಿ ತುನ ಮಾಲುಮ್‌ ಛಾ಼ನಿ.” ಕರಿ ಬೋಲ್ಯೊ
LUK 18:21 ತದೆ ಯೋ ಅದ್ಮಿ, “ಮೇ ಅಡ್ಡಾಣಿಪರ್‌ಥೋಸ್‌ ಆ ಖ್ಹಾರು ಪಾಡಿ ಚಾ಼ಲ್ತೊ ಐರ‍್ಹೋಸ್” ಕರಿ ಫರೈನ್ ಬೋಲ್ಯೊ.
LUK 18:22 ಅನ ಖ್ಹಮ್‌ಜಿನ್‌, ಯೇಸುನೆ ಇನ, “ತೂ ಕರ್ನುತೆ ಬಿಜ್ಜೇಕ್‌ ಕಾಮ್ ಛಾ಼, ತಾರಕನ ಛಾ಼ತೆ ಖ್ಹಾರುಸ್‌ ಶೊತ್ನ ವೇಚಿನ್, ಆವಸ್ತೆ ಪೈಶಾನ ಗರೀಬ್‌ನ ದೆ. ತದೆ ಪರ್‌ಲೋಕ್‌ಮ ತುನ ಶೊತ್ ರ‍್ಹಿಶೆ; ಅಜು಼ ತೂ ಆಯಿನ್, ಮಾರ ಪೀಠೆ ಆವ್” ಕರಿ ಬೋಲ್ಯೊ.
LUK 18:23 ಕತೋಬಿ ಯೋಅದ್ಮಿ ಘಣು ದನ್-ದೌಲತ್‌ವಾಳೊ ಹುಯಿರ‍್ಹೊಥೋತೆ ಇನಖ್ಹಾಜೆ, ಆ ವಾತೆನ ಖ್ಹಮ್‌ಜೀನ್‌, ಘಣು ದುಖ್‌ ಖಾದೊ.
LUK 18:24 ತದೆ ಯೇಸುನೆ ಇನ ದೇಖಿನ್‌, ಧನ್‌ದೌಲತ್‌ವಾಳು ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾನು ಕೆತ್ರೆಕ್ಕಿ ಮುಶ್ಕಿಲ್!
LUK 18:25 ಶೌಕಾರ್ ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾಥೀಬಿ, ಊಟ್‍ ಖ್ಹುಯಿನ ಡೋಳವಾಟೆ ಪೇಶಿಜಾ಼ವನು ಶುಲ್ಬ!” ಕರಿ ಬೋಲ್ಯೊ.
LUK 18:26 ಯೇಸುನಿ ಆ ವಾತೆನ ಖ್ಹಮ್‌ಜ್ಯೂತೆ ಇವ್ಣೆ, “ಅಮ್ ರ‍್ಹಯುತೊ, ಕಿನ ರಕ್ಷಣೆ ಮಳ್‌ಶೆ” ಕರಿ ಪುಛಾ಼ಯು.
LUK 18:27 ಯೇಸುನೆ ಇವ್ಣುನ, “ಅದ್ಮಿನ ಹಾತೆ ಹುವ್ವಾಕೊಂತೆ ಕಾಮ್ ದೇವ್ನ ಹಾತೆ ಹುವ್ವಾಸ್‌” ಕರಿ ಬೋಲ್ಯೊ.
LUK 18:28 ತದೆ ಪೇತ್ರನೆ ಯೇಸುನ, “ಹಂದೇಕ್‌! ಹಮೆ ಹಮಾರು ಘರ್‌ಖ್ಹಾರು ಮ್ಹೆಂದಿನ್, ತಾರ ಪೀಠೆ ಐರ‍್ಹಾಸ್‍ನಿ!” ಕರಿ ಬೋಲ್ಯೊ.
LUK 18:29 ಅನ ಖ್ಹಮ್‌ಜಿನ್‌ ಯೇಸುನೆ ಇವ್ಣುನ, “ತುಮೂನ ಖ್ಹಾಚ ಬೋಲುಸ್ಕಿ, ಕೋಣ್ ದೇವ್ನಿ ರಾಜ್ಯನಖ್ಹಾಜೆ, ಘರ್‌ನ ರ‍್ಹವೊ, ಬಾವಣ್ಣ ರ‍್ಹವೊ, ಭೈಯೇನ ರ‍್ಹವೊ, ಆಯ-ಬಾನ ರ‍್ಹವೊ, ಲಡ್ಕಾನ ರ‍್ಹವೊ ಮ್ಹೆಂದಿದ ಉಶೇತೊ,
LUK 18:30 ಇನ ಆ ಜ಼ಗ್‌ಮಾಸ್ ಇನೇಥಿಬಿ ಜಾ಼ಖ್ಹತ್ ಮಳ್‌ಶೆ, ಅಜು಼ ಉಳ್ಯಾವತೆ ಜಂಗ್‌ಮ ಹರ್‌ಹಮೇಶ ರ‍್ಹವಾಳಿ ಜಿ಼ಂದ್‌ಗಿ ಮಳ್‌ಶೆ” ಕರಿ ಬೋಲ್ಯೊ.
LUK 18:31 ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಎಕಾಡಿ ಬುಲೈಲಿನ್, “ಖ್ಹಮ್‌ಜೊ಼! ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಅದ್ಮಿನೊ ಛಿಯ್ಯಾನಿ ಬಾರೇಮ ಪ್ರವಾದಿಯೇನೆ ಲೀಖಿರಾಖ್ಯುತೆ ಇಮ್ಮಸ್, ಹಿಜ್ಜಾ಼ ಚಾ಼ಲ್‌ಷೆ.
LUK 18:32 ಇನ ಪರೈ ಜಾ಼ತ್‌ವಾಳಾನ ಹಾತ್‌ಮ ದಿನಾಕ್‌ಶೆ, ಇವ್ಣೆ ಇನ ಚಿಂಘಾವ್‌ಶೆ, ಇನಿ ಖ್ಹರಮ್‌ ಕಾಡ್‌ಶೆ, ಅಜು಼ ಇನಾಪರ್‌ ಥೂಕ್‌ಶೆ.
LUK 18:33 ಇವ್ಣೆ ಇನ ಕೊಳ್ಡೇಥಿ ಮಾರ್‌ಶೆ ಅಜು಼ ಮಾರಿನಾಕ್‌ಶೆ, ಕತೋಬಿ ತೀನ್ನೊ ದನ್ಮ ಯೋ ಪಾಛೊ಼ ಜಿವ್ತೊಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
LUK 18:34 ಕತೋಬಿ ಅನಾಮ ಏಕ್‌ ವಾತೇನಾಬಿ ಶಿಷ್ಯರ್‌ ಪರ್‌ಖ್ಯುಕೊಯ್ನಿ; ಶನಕತೊ ಆ ವಾತೆನಿ ಮತ್ಲಬ್‌ನ ಇವ್ಣೇಥಿ ಲಪೈರ‍್ಹೂಥು, ಅಜು಼ ಯೇಸು ಶನಿ ಬಾರೇಮ ಬೋಲುಕರಾಸ್‌ ಕರಿ ಇವ್ಣುನ ಮಾಲುಮ್‌ಪಡ್ಯು ಕೊಯ್ನಿ.
LUK 18:35 ಯೇಸು ಯೆರಿಕೋನ ಖನ್ನೆ ಆವ್‍ಕರಾನಿ ವಖ್ಹತ್‌ಮ, ಹಿಜ್ಗಾ಼ ಮಾರಗ್‌ನ ಶೇಡೆ ಬೇಶಿನ್, ಏಕ್‌ ಕಾಣು ಧರಮ್ ಮಾಂಗುಕರ್ತುಥು.
LUK 18:36 ಅದ್ಮಿನಿ ಭೀಡ್ ವಳಿಜಾ಼ತಿಥೀತೆ ಖ್ಹಮ್‌ಜಿನ್‌, ಇನೆ, “ಆ ಶಾತ್‌ ಚಾ಼ಲುಕರಾಸ್ತೆ?” ಕರಿ ಪುಛಾ಼ಯೊ.
LUK 18:37 ಇವ್ಣೆ ಇನ, “ನಜ಼ರೇತ್‌ನೊ ಯೇಸು, ಆ ವಾಟೆ ಕರಿ ವಳೇಜಾ಼ಸ್” ಕರಿ ಬೋಲ್ಯು.
LUK 18:38 ತದೆ ಯೋ ಕಾಣು ಜೋ಼ರೆಥಿ ಚಿಕ್ರಿನ್, “ಯೇಸು! ದಾವೀದ್‌ನ ಛಿಯ್ಯಾ! ಮಾರಪರ್ ಗೋರ್‌ಕರ್‌” ಕರಿ ಬೋಲ್ಯೊ.
LUK 18:39 ಖ್ಹಾಮ್ಣೆ ವಳ್ಯುಜಾ಼ತುಥೂತೆ ಅದ್ಮಿ ಇನ, “ಖ್ಹೊಪ್‌ ರ‍್ಹೆ” ಕರಿ ಬೋಲಿನ್ ಗುರ್‌ಕಾಯು. ಕತೋಬಿ ಯೋ ಬಿಜೂ಼ಬಿ ಜೋ಼ರೇಥಿ ಚಿಕ್ರಿನ್, “ದಾವೀದ್‌ನ ಛಿಯ್ಯಾ! ಮಾರಪರ್ ಗೋರ್‌ ಕರ್‌” ಕರಿ ಬೋಲ್ಯೊ.
LUK 18:40 ತದೆ ಯೇಸುನೆ ಭೀರಿನ್, ಯೋ ಕಾಣಾನ ಇನಾಕನ ಬುಲಾವೊ ಕರಿ ಹುಕುಮ್‌ ದಿದೊ. ಯೋ ಕಾಣು ಖನ್ನೆ ಆವಾದಿನ್, ಯೇಸುನೆ ಇನ,
LUK 18:41 “ಮೇ ತುನ ಶಾತ್‌ ಕರ‍್ನು ಕರಿ ತಾರಿ ಆಖ್ಹ್?” ಕರಿ ಪುಛಾ಼ಯೊ. ತದೆ ಇನೆ, “ಮನ ಪಾಛು಼ ದೆಖಾವಾನಿ ಘೋಣಿ ಕರ್ಲಾ ಪ್ರಭು” ಕರಿ ಬೋಲ್ಯೊ.
LUK 18:42 ಯೇಸುನೆ ಇನ, “ತುನ ದೆಖಾವಾದೆ, ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಹುಯು” ಕರಿ ಬೋಲ್ಯೊ.
LUK 18:43 ತದ್‌ನು-ತದ್ದೇಸ್ ಇನ ದೆಖಾಯು. ಯೋ ದೇವ್ನಿ ಸ್ತುತಿ ಕರ್ತೊಹುಯಿನ್, ಯೇಸುನ ಪೀಠೆ ಗಯೊ. ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಿನ್, ದೇವ್ನಿ ಸ್ತುತಿಕರ‍್ಯು.
LUK 19:1 ಯೇಸು ಯೆರಿಕೋ ವಾಟೆಕರಿ ಒಳೆಜಾ಼ತೊಥೊ.
LUK 19:2 ಹಿಜ್ಜಾ಼ ಶುಂಕ ಮಾಂಗವಾಳನೊ ಮೋಟೊ ಹುಯಿರ‍್ಹೊಥೋತೆ ಜಕ್ಕಾಯ ಕರಿ ಏಕ್‍ಜ಼ಣೊ ಥೊ. ಯೋ ಧನ್‌-ದೌಲತ್‌ವಾಳೊ ಹುಯಿರ‍್ಹೋಥೊ.
LUK 19:3 ಯೋ ಯೇಸುನ ದೇಕ್ಣು ಕರಿ ಆಖ್ಹ್‌ಕರ‍್ಯೊ, ಕತೋಬಿ ಯೋ ಕುಳ್ಳೊ ಹುಯಿರ‍್ಹೊಥೋತೆ ಅಜು಼ ಅದ್ಮಿನಿ ಭೀಡ್‌ಥೀತೆ ಇನಖ್ಹಾಜೆ, ಯೇಸುನ ದೇಖಾನ ಕೋ ಹುಯೂನಿ.
LUK 19:4 ಇನಖ್ಹಾಜೆ ಯೋ ಯೇಸುನ ದೇಕ್ಣು ಕರಿ, ಅದ್ಮಿನಿ ಭೀಡ್‌ಣ ಖ್ಹಾಮ್ಣೆ ನಾಶಿ ಜೈ಼ನ್, ಏಕ್‌ ವಡ್‌ನ ಝಾ಼ಡ್‌ಪರ್‌ ಚ಼ಢಿಗಯೊ. ಶನಕತೊ, ಯೇಸು ಯೋಸ್‌ ವಾಟೆಕರಿ ಆವಾಳೊ ಥೊ.
LUK 19:5 ತದೆ ಯೇಸು ಹಿಜ್ಗಾ಼ ಆಯಿನ್, ಉಪ್ಪರ್ ದೇಖಿನ್‌, “ಜಕ್ಕಾಯ, ಫಟ್‌ ಕರಿ ಉತ್ರಿನ್ ಆವ್, ಶನಕತೊ ಆಜ಼್ ಮೇ ತಾರ ಘರ್‌ಮ ರ‍್ಹವಾನ ಆಯೊ” ಕರಿ ಇನ ಬೋಲ್ಯೊ.
LUK 19:6 ತದೆ ಜಕ್ಕಾಯ ಒಗ್ಗಿಸ್‌ಮ ಉತ್ರಿ ಐನ್, ಖ್ಹುಶಿಥಿ ಯೇಸುನ ಸ್ವಾಗತ್ ಕರ‍್ಯೊ.
LUK 19:7 ಅನ ದೇಖಿನ್‌ ಅದ್ಮಿಖ್ಹಾರು, “ಯೇಸು ಪಾಪಿನ ಘರ್‌ಮ ಮೆಹಮಾನ್ ಹುಯಿನ್ ವಳ್ಯೊಜಾ಼ಸ್‌” ಕರಿ ಭಣ್‌ಕ್ಯು.
LUK 19:8 ಕತೋಬಿ ಜಕ್ಕಾಯಾನೆ ಭೀರಿನ್‌, ಪ್ರಭುನ, “ಗುರು ಹಂದೇಕ್‌! ಮಾರಿ ಆಸ್ತಿಮ ಆಧು ಗೋರ್‌-ಗರೀಬ್ ದೆವುಸ್‌ ಅಜು಼ ಮೇ ಕಿನಾತೋಬಿ ಠಗೈರಾಖ್ಯೊ ಉಶೇತೊ, ಇನ ಏಕ್‌ನ ಚಾರ್ ದೆವುಸ್‌” ಕರಿ ಬೋಲ್ಯೊ.
LUK 19:9 ಅನ ಖ್ಹಮ್‌ಜಿನ್‌, ಯೇಸುನೆ ಇನ, “ಆಜ಼್ ಆ ಘರ್‌ನ ರಕ್ಷಣೆ ಐರ‍್ಹೀಸ್, ಶನಕತೊ ಆಬಿ ಅಬ್ರಹಾಮ್‌ನೊ ಪಿಳ್ಗಿವಾಳೊ ಹುಯಿರ‍್ಹೋಸ್‌ನಿ.
LUK 19:10 ಶನಕತೊ ಅದ್ಮಿನೊ ಛಿಯ್ಯೊ, ಗುಮೈಗೂತೆ ಇನ ಢೂಂಡಿನ್ ಬಚಾ಼ಡನಖ್ಹಾಜೆ ಐರ‍್ಹೋಸ್ತೆ” ಕರಿ ಬೋಲ್ಯೊ.
LUK 19:11 ಇವ್ಣೆ ಆ ವಾತೆಖ್ಹಾರಿ ಖ್ಹಮ್‌ಜು಼ಕರಾನಿ ವಖ್ಹತ್‌ಮ, ಯೇಸು ಯೋ ಯೆರೂಸಲೇಮ್‌ನ ಖನ್ನೆಸ್‌ ಪೋಚಿಗಯೊಥೋತೆ ಇನಖ್ಹಾಜೆ, ಅಜು಼ ಅದ್ಮಿಖ್ಹಾರು ದೇವ್ನಿ ರಾಜ್ಯ ಒಗ್ಗಿಸ್‌ಮ ದೆಖಾವ್‌ಶೆ ಕರಿ ಸೋಚ್ಯೂತೆ ಇನಖ್ಹಾಜೆ, ಯೇಸುನೆ ಬಿಜ್ಜೇಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
LUK 19:12 ಯೋ ಶಾತ್‌ಕತೊ, “ಏಕ್‌ ಮೋಟ ಘರ್‌ನು ಶೌಕರ್‌ ಅದ್ಮಿಥು, ಯೋ ರಾಜ಼್‌ಭಾರ್‌ಲೀನ್, ಪಾಛು಼ಫರಿ ಇನ ಘರೆ ಆವ್ಣುಕರಿ ಖ್ಹೂಜ಼್ ಕರೀನ್, ದೂರ್‌ಲ್ಯೊ ದೇಖ್ಹ್‌ನ ನಿಕ್‌ಳ್ಯೊ.
LUK 19:13 ಯೋ ಜಾ಼ವನ ಆಗಾಡಿ, ಇನ ಸೇವಕರ್‌ಮ ದಖ್ಹ್‌ ಜ಼ಣಾನ ಬುಲೈನ್, ಹರ್‌ ಏಕ್‌ನ ಖ್ಹೊನ್ನಾನು ಬಿಲ್ಲು ದೀನ್, “ಮೇ ಆವಾತೋಡಿ ಅನೇಥಿ ಧಂದೊ ಕರೊ” ಕರಿ ಇವ್ಣುನ ಬೋಲ್ಯೊ.
LUK 19:14 ಕತೋಬಿ ಇನು ಶೊಂತ್‌ ಖ್ಹಯೇರ‍್ನು ಅದ್ಮಿ ಇನಾಪರ್‌ ದಾವೊ ಕರೀನ್, ಇನ ಪೀಠೆ ಖಬರ್ ದ್ಯವಾಳಾನ ಮೋಕ್ಲಿನ್, “ಆ ಹಮಾರಪರ್‌ ರಾಜ಼್‌ಭಾರ್‌ ಚ಼ಲಾವಾನು ಹಮೂನ ಅಛ್ಛು಼ ಲಾಗಕೊಯ್ನಿ” ಕರಿ ಇನ ಬೋಲ್ಯು.‌
LUK 19:15 ತೋಬಿ ಯೋ ಅದ್ಮಿ ರಾಜ್ಯನಿ ಅದಿಕಾರಿಹುಯಿನ್ ಫಾಛೊ಼ಫರಿ ಆಯೊ. ತದೆ ಇನೆ, “ಮೇ ಖ್ಹೊನ್ನಾನು ಬಿಲ್ಲು ದಿದೊಥೋತೆ ಸೇವಕರ್‌ನ ಮಾರ ಖ್ಹಾಮೆ ಬುಲಾವೊ. ಇವ್ಣೆ ಕೆತ್ರು ಕಮೈರಾಖ್ಯುಸ್‌ ಕರಿ ಮನ ಮಾಲುಮ್‌ ಪಡ್ಣು” ಕರಿ ಹುಕುಮ್‌ದಿದೊ.
LUK 19:16 ಪಹಿಲೊ ಸೇವಕ್‌ನೆ ಇನಖ್ಹಾಮ್ಣೆ ಆಯಿನ್, “ಪ್ರಭು ತುನೆ ದಿದೋತೆ ಏಕ್‌ ಖ್ಹೊನ್ನಾನು ಬಿಲ್ಲಾಥಿ, ಮೇ ದಖ್ಹ್‌ ಖ್ಹೊನ್ನಾನು ಬಿಲ್ಲಾ ಕಮೈರಾಖ್ಯೋಸ್” ಕರಿ ಬೋಲ್ಯೊ.
LUK 19:17 ಯೋ ಇನ, “ಶಬಾಶ್! ತೂ ಅಛ್ಛೊ಼ ಸೇವಕ್! ತೂ ಥೋಡಾಮ ನಿಯಥ್ಥಿ ರ‍್ಹಯೋತೆ ಇನಖ್ಹಾಜೆ, ಮೇ ತುನ ದಖ್ಹ್‌ ಖ್ಹಯೇರ್‌ಪರ್‌ ಅದಿಕಾರಿಕರಿನ್ ಮ್ಹೇಲುಕರೂಸ್‌” ಕರಿ ಬೋಲ್ಯೊ.
LUK 19:18 ಬಿಜ್ಜೇಕ್‌ ಜ಼ಣೊ ಆಯಿನ್, “ಗುರು ತುನೆ ದಿದೋತೆ ಏಕ್‌ ಬಿಲ್ಲಾಥಿ, ಮೇ ಪಾಚ಼್ ಖ್ಹೊನ್ನಾನು ಬಿಲ್ಲಾ ಕಮೈ ಕರಿರಾಖ್ಯೋಸ್” ಕರಿ ಬೋಲ್ಯೊ.
LUK 19:19 ತದೆ ರಾಜಾ಼ನೆ ಅನ, “ತೂಬಿ ಪಾಚ಼್‌ ಖ್ಹಯೇರ್‌ಪರ್‌ ಅದಿಕಾರಿಹುಯಿನ್ ರ‍್ಹೇ” ಕರಿ ಬೋಲ್ಯೊ.
LUK 19:20 ಅನ ಬಾದ್‌ಮ ಬಿಜ್ಜೇಕ್‌ ಜ಼ಣು ಐನ್, “ಪ್ರಭು, ಅಲಾ ತುನೆ ದಿದೋತೆ ಖ್ಹೊನ್ನಾನು ಬಿಲ್ಲು. ಅನ ಏಕ್‍ ಚೌ಼ಕಾಮ ಲಪೇಟಿನ್ ಮ್ಹೇಲಿರಾಖ್ಯೊಥೊ.
LUK 19:21 ತೂ ತಾರು ಕಾಹೆತೆ ರಾಛ಼ನ ಫಳ್ಳಿ ಜಾ಼ವಾಳೊ, ತುನೆ ಛಿಡ್‌ಕ್ಯೊಕೊಂತೆ ಇನ ವ್ಹಾಡವಾಳೊ ಕಠಣ್‌ ಅದ್ಮಿಕರಿ ಬೋಲಿನ್, ತಾರೇಥಿ ಡರಿನ್, ಆ ಬಿಲ್ಲಾನ ಚೌ಼ಕಾಮ ಭಾಂದೀನ್‌, ಲಪಾಡಿರಾಖ್ಯೊಥೊ” ಕರಿ ಬೋಲ್ಯೊ.
LUK 19:22 ಅನ ಖ್ಹಮ್‌ಜಿನ್‌ ಯೋ ರಾಜ಼ ಇನ, “ತೂ ಖರಾಬ್ ಸೇವಕ್! ತಾರಿ ವಾತೆಥೀಸ್‌ ತುನ ತೀರ್ಪ್‌ ಕರುಸ್. ಮೇ ಮಾರು ಕಾಹೆತೆ ರಾಛಾ಼ನ ಪಳ್ಳಿನ್‌ ಜಾ಼ವಾಳೊ, ಮೇ ಪಿಕಾಯೊಕೊಂತೆ ಇನ ವ್ಹಾಡವಾಳೊ ಕಠಣ್ ಅದ್ಮಿಕರಿ ತುನ ಮಾಲುಮ್‌ನಿ.
LUK 19:23 ಇಮ್‍ಕತೊ, ತೂ ಮಾರು ಖ್ಹೊನ್ನಾನು ಬಿಲ್ಲಾನ ಬಡ್ಡಿಪರ್ ಶನ ಕೋ ದಿದೋನಿ?” ಕರಿ ಬೋಲ್ಯೊ.
LUK 19:24 ತದೆ ಖನ್ನೆ ಭಿಯ್ಯುಥೂತೆ ಇವ್ಣುನ ಇನೆ, “ಅನಕಂಥು, ಯೋ ಖ್ಹೊನ್ನಾನು ಬಿಲ್ಲಾನ ಲೀನ್‌, ದಖ್ಹ್‌ ಖ್ಹೊನ್ನಾನು ಬಿಲ್ಲಾ ಛಾ಼ತೆ, ಇನ ದೆವೊ” ಕರಿ ಬೋಲ್ಯೊ
LUK 19:25 ಕತೋಬಿ ಇವ್ಣೆ ಇನ, “ಪ್ರಭು, ಇನಾಕನ ಅಗಾಡಿಸ್ ದಖ್ಹ್‌ ಖ್ಹೊನ್ನಾನ ಬಿಲ್ಲಾ ಛಾ಼ನಿ” ಕರಿ ಬೋಲ್ಯು.
LUK 19:26 ತದೆ ರಾಜಾ಼ನೆ ಇವ್ಣುನ ಬೋಲ್ಯೋಕಿ, “ಮೇ ಬೋಲುಸ್ಕಿ, ಕಿನಾಕಿನ ಛಾ಼ಕಿ ಇವ್ಣುನ ಬಿಜೂ಼ಬಿ ದೇವಾವ್‌ಶೆ, ಕತೋಬಿ ಕಿನಾಕನ ಕೊಯ್ನಿಕಿ ಇವ್ಣಕಂಥು, ಛಾ಼ತೆಬಿ ಕಾಡಿಲಿಶೆ”
LUK 19:27 ಅಜು಼ ಮೇ ಇವ್ಣಾಪರ್ ರಾಜಾ಼ ನಾ ಹುಯಿರ‍್ಹೇಣು ಕರಿ ಬೋಲ್ಯುಥೂತೆ ಯೋ ಮಾರ ದುಶ್‌ಮನ್ನ ಖ್ಹಾರು, ಹಮ್ಕೆ ಹಜ಼್ಜಾ ಲೈನ್‌, ಮಾರ ಖ್ಹಾಮ್ಣೆಸ್ ಇವ್ಣುನ ಮಾರಿ ನಾಕ್ಣು!” ಕರಿ ಬೋಲ್ಯೊ.
LUK 19:28 ಆ ಖ್ಹಾರು ಬೋಲಾನ ಬಾದ್‌ಮ, ಯೇಸು ಇವ್ಣೇಥಿ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲಿನ್, ಯೆರೂಸಲೇಮ್‌ ಭಣಿಗಯೊ.
LUK 19:29 ಅನ ಬಾದ್‌ಮ ಯೇಸು, ಆಲಿವ್ ತೇಲ್‌ನುಝಾ಼ಡ್ನ ಪಹಾಡ್‌ಕನ, ಥೂತೆ, ಬೆತ್ಫಗೆ ಅಜು಼ ಬೇಥಾನ್ಯ ಕರಿ ಗಾಮ್‌ನ ಖನ್ನೆ ಆವಾದಿನ್, ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ.
LUK 19:30 ತುಮೆ ಯೋ ಗಾಮ್‌ನ ಮಹಿ ಜಾ಼ತಸ್‌ನ ಹಿಜ಼್ಜಾ ಭಂದೈರ‍್ಹೀಶೆತೆ, ಏಕ್‌ ಜಾ಼ನ್ಜ಼ಮಾನ್ ಗಧೇಡಾನ ಚೆಲ್ಕಾನ ದೇಕ್‌ಶು, ಹಂಕೆತೋಡಿ ಇನಾಪರ್‌ ಕೋಣ್‌ಬಿ ಕೋ ಬೆಠೂನಿ. ಇನ ಛೋ಼ಡಿನ್, ಹಜ್ಜಾ಼ ಧರಿಲೀನ್ ಆವೊ,
LUK 19:31 ಕೋಣ್‌ತೋಬಿ ತುಮೂನ, ‘ಅನ ಶನ ಛೋ಼ಡುಕರಾಸ್ತೆ‌?’ ಕರಿ ಫುಛಾ಼ಯುತೊ, ಪ್ರಭುನ ಆ ಹೋಣುಕಸ್‌ ಕರಿ ಬೋಲೊ” ಕರಿ ಬೋಲಿನ್ ಮೋಕ್‌ಲ್ಯೊ.
LUK 19:32 ಇವ್ಣೆ ಜೈ಼ನ್‌, ಯೇಸುನೆ ಬೋಲ್ಯೊಥೋತೆ ಇಮ್ಮಸ್ ಥೂತೆ ದೇಖ್ಯು.
LUK 19:33 ಇವ್ಣೆ ಯೋ ಗಧೇಡಾನ ಚೆಲ್ಕಾನ ಛೋ಼ಡುಕರಾನಿ ವಖ್ಹತ್‌ಮ, ಇನ ಯಜಮಾನ್ನೆ, “ಇನ ಶನ ಛೋ಼ಡುಕರಾಸ್ತೆ?” ಕರಿ ಬೋಲ್ಯು.
LUK 19:34 ತದೆ ಇವ್ಣೆ, “ಆ ಪ್ರಭುನ ಹೋಣುಕಸ್‌” ಕರಿ ಜವಾಬ್‌ ದಿದು.
LUK 19:35 ಯೋ ಗಧೇಡಾನ ಯೇಸುಕನ ಲೈನ್‌, ಇವ್ಣ ಲುಂಗ್ಡಾವ್‍ನ, ಯೋ ಗಧೇಡಾನಚೆಲ್ಕನ ಉಪ್ಪರ್ ನಾಖಿನ್, ಯೇಸುನ ಇನಾಪರ್‌ ಬೆಖ್ಹಾಡ್ಯು.
LUK 19:36 ಯೇಸು ಜಾ಼ತೊರ‍್ಹವಾನಿ ವಖ್ಹತ್‌ಮ, ಇವ್ಣೆ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು.
LUK 19:37 ಯೇಸು ಯೆರೂಸಲೇಮ್‌ನ ಖನ್ನೆ, ಆಲಿವ್ ಪಹಾಡ್‌ನು ಉತರ್‌ತಿ ಝ಼ಗೋಕನ ಆವಾದಿನ್, ಇನ ಶಿಷ್ಯರ್‌ನಿ ಮೋಟಿ ಝೂ಼ಂಡ್‌ ಖ್ಹುಶಿ ಕರ್ತುಹುಯಿನ್, ಇವ್ಣೆ ದೇಖ್ಯೂತೆ ಖ್ಹಾರಿಸ್ ಮಹಾನ್ ಕಾಮ್ನಖ್ಹಾಜೆ ಜೋ಼ರ್ ಅವಾಜ಼್‌ಥಿ ದೇವ್ನಿ ಸ್ತುತಿ ಕರ‍್ಯು.
LUK 19:38 “ಪ್ರಭುನ ನಾಮ್‌ಪರ್‌ ಆವಾಳ ರಾಜಾ಼ನ ಆಶೀರ್ವಾದ್‌ ಹುವಾದೆ ಪರ್‌ಲೋಕ್‌ಮ ಸಮಾಧಾನ್‍, ಉಪ್ಪರ್‌ಲ್ಯ ಲೋಕ್ಮ ಮಹಿಮೆ ಹುವಾದೆ!” ಕರಿ ಘಣಿಮೋಟಿ ಅವಾಜ಼್ ದೇವ್ನ ಸ್ತುತಿ ಕರಲಗ್ಯು.
LUK 19:39 ಅದ್ಮಿನಿ ಝೂ಼ಂಡ್‌ಮ ಥೂತೆ ಥೋಡು ಫರಿಸಾಯರ್‌ವಾಳು ಯೇಸುನ, “ಗುರು, ತಾರ ಶಿಷ್ಯರ್‌ನ ಖ್ಹೊಪ್‌ ರ‍್ಹವೊ ಕರಿ ಗುರ್‌ಕಾವ್” ಕರಿ ಬೋಲ್ಯು,
LUK 19:40 ತದೆ ಯೇಸುನೆ, “ಮೇ ತುಮೂನ ಬೋಲುಸ್ಕಿ, ಅವ್ಣೆ ಖ್ಹೊಪೊ ಹುಯಿಗಯೂತೊ, ಆ ಬಂಡಾಸ್ ಇವ್ಣು ಇವ್ಣೆ ಚಿಕರ್‌ಶೆ” ಕರಿ ಜವಾಬ್‌ ದಿದೊ.
LUK 19:41 ಯೇಸು ಯೆರೂಸಲೇಮ್‌ ಖ್ಹಯೇರ‍್ನ ಖನ್ನೆ ಆಯಿನ್, ಇನ ದೇಖಿನ್, ಇನಿ ಬಾರೇಮ ರೋವ್‌ತೊಹುಯಿನ್‌,
LUK 19:42 ಅಜು಼ ಬೋಲ್ಯೋಕಿ, “ಶಾಂತಿಥಿ ರ‍್ಹವಾನ ಶಾತ್‌ ಹೋಣು ಕರಿ ಬೋಲಾನು, ತೂ ಹಜ್ಜಾ಼ಸ್ ಮಾಲುಮ್‌ ಕರಿಲಿದಿಹೋತ್‌ತೊ ಕೆತ್ರೆಸ್ಕಿ ಅಛ್ಛು಼ ಥೂ! ಕತೋಬಿ ಹಮ್ಕೆ ತುನ, ಯೋ ದೇಖಾನ ಕೊ ಉಶೇನಿ,
LUK 19:43 ಏಕ್‌ ವಖ್ಹತ್ ಆವ್‌ಶೆ, ತದೆ ತಾರು ದುಶ್‌ಮನ್‌ ಖ್ಹಾರು, ತಾರ ಅಶ್‌ಪೀಶ್‌ ಭೀತ್ ಭಾಂದಿನ್, ತುನ ಖ್ಹಾರಿಸ್ ಬಾಜು಼ಥು ಕಬ್‍ಜಾ಼ ಕರೀನ್,
LUK 19:44 ಇವ್ಣೆ ತುನ ಅಜು಼ ತಾರಿ ಭೀತ್‌ನ ಮಹಿ ಛಾ಼ತೆ ಖ್ಹಾರ ಅದ್ಮಿನ ಬರ್ಬಾತ್ ಕರ್ಶೆ, ಏಕ್‌-ಬಂಡಾಪರ್ ಬಿಜ್ಜೇಕ್‌ ಬಂಡೊ ಭೀರೆವ್ಣುನಾತೆ ಇಮ್‌ ಇವ್ಣೆ ಕರ್ಶೆ, ಶನಕತೊ, ದೇವ್ನೆ ತುನ ಬಚಾ಼ಡ್‌ಣು ಕರಿ ಆಯೋತೆ ವಖ್ಹತ್‌ನ, ತೂ ಪರ್ಖಿ ಕೊಯ್ನಿ!” ಕರಿ ಬೋಲ್ಯೊ.
LUK 19:45 ಅನ ಬಾದ್‌ಮ ಯೇಸು ಮಂದಿರ್‌ಮ ಜೈ಼ನ್‌, ವೇಚ಼ವಾಳನ ಭಾರ್‌ ನಖ್ಹಾಡಲಗ್ಯೊ.
LUK 19:46 ಅಜು಼ ಇವ್ಣುನ ಬೋಲ್ಯೊಕಿ, “ದೇವ್ನೆ ಬೋಲ್ಯೊ, ‘ಮಾರಿ ಮಂದಿರ್‌ ಪ್ರಾರ್ಥನೇನು ಘರ್ ಹುಯಿರ‍್ಹಿಶೆ’ ಕರಿ ಲೀಖೈರ‍್ಹೂಸ್‌ನಿ. ಕತೋಬಿ ತುಮೆ ಅನ ಚೋ಼ರ್‌ನಿ ಲಪಾನಿ ಘವಿ ಬಣೈನಾಖ್ಯ.
LUK 19:47 ದನ್‍ರೋಜ್‍಼ ಯೇಸು ಮಂದಿರ್‌ಮ ವಚನ್‍ ಬೋಲಿದೆತೋಥೊ. ಕತೋಬಿ ಮಹಾಯಾಜಕ, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಯೇಸುನ ಮರ್‌ನಾಖಿದೇವ್ಣು ಕರಿ ಕೋಶಿಶ್ ಕರ‍್ಯು.
LUK 19:48 ಕತೋಬಿ ಇನ ಖೆವಿ ತರಿಕಾಥಿ ಮರ್‌ನಾಖಿ ದಿಯೆಜಾ಼ಯ್ ಕರಿ ಬೋಲಾನು ಇವ್ಣ ಮಾಲುಮ್‌ ಕೋ ಪಡ್ಯುನಿ, ಶನಕತೊ ಅದ್ಮಿಖ್ಹಾರು ಯೇಸುನಿ ವಾತೆನ ಚಿಂತ್‌ಲಗಾಡಿನ್, ಖ್ಹಮ್‌ಜ಼್‌ತೂಥು.
LUK 20:1 ಏಕ್‌ ದನ್ನೆ ಯೇಸು ಮಂದಿರ್‌ಮ ಅದ್ಮಿನ ವಚನ್ನ ಬೊಲಿದೇತೊಹುಯಿನ್‌, ಸುವಾರ್ತೆನ ಬೋಲುಕರ್ತೊಥೋತೆ ತದೆ, ಮಹಾಯಾಜಕ, ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣುಖ್ಹಾರು ಮಳಿನ್ ಯೇಸುಕನ ಆಯು.
LUK 20:2 ಅಜು಼ ಇವ್ಣೆ ಇನ, “ಹಮೂನ ಬೋಲ್! ಆ ಖ್ಹಾರು ಕರಾನ ತುನ ಶನಿ ಅದಿಕಾರ್ ಛಾ಼?ಅಮ್ನಿ ಹಕ್ ತುನ ಕೋಣ್ ದಿದು?” ಕರಿ ಬೋಲ್ಯು.
LUK 20:3 ತದೆ ಯೇಸುನೆ ಇವ್ಣುನ, “ಮೇಬಿ ತುಮೂನ ಏಕ್‌ ಸವಾಲ್‌ ಫುಛಾ಼ವುಸ್‌. ಮನ ಬೋಲೊ,
LUK 20:4 ಬ್ಯಾಪ್ತಿಸ್ಮ ದ್ಯವಾನಿ ಹಕ್‌, ಯೋಹಾನ್ನ ಪರಲೋಕ್‌ಥಿ ಆಯುಕಿ, ಅದ್ಮಿಥಿ ಆಯು? ಕರಿ ಪುಛಾ಼ಯೊ.
LUK 20:5 ತದೆ ಇವ್ಣೆ, “ಅಪ್ಣೆ ಶಾತ್‌ ಬೋಲಿಯೆ? ಪರ್‌ಲೋಕ್‌ಥು ಆಯು ಕರಿ ಅಪ್ಣೆ ಬೋಲ್ಯಾತೊ, ಇಮ್‍ಕತೊ, ತುಮೆ ಇನ ಶನ ನಂಬ್ಯಾಕೊಯ್ನಿ? ಕರಿ ಬೋಲ್‌ಶೆ.
LUK 20:6 ಅದ್ಮಿಥಿ ಆಯು ಕರಿ ಬೋಲ್ಯಾತೊ, ಅದ್ಮಿಖ್ಹಾರು ಯೋಹಾನ ಪ್ರವಾದಿ ಕರಿ ನಂಬಿರಾಖ್ಯುತೆ ಇನಖ್ಹಾಜೆ, ಇವ್ಣೆ ಅಪ್ಣುನ ಬಂಡೊ ಫೇಕಿ ಮಾರ್‌ಶೆ” ಕರಿ ಇವ್ಣ-ಇವ್ಣಾಮಸ್‌ ಬೋಲಿಲಿದು.
LUK 20:7 ಇನಖ್ಹಾಜೆ ಇವ್ಣೆ, “ಯೋ ಕಿಜ್ಗಾ಼ಥು ಆಯು ಕರಿ ಹಮೂನ ಮಾಲುಮ್‌ ಕೊಯ್ನಿ” ಕರಿ ಜಾ಼ವಾಬ್‌ ದಿದು.
LUK 20:8 ತದೆ ಯೇಸುನೆ ಇವ್ಣುನ, “ಆ ಖ್ಹಾರು ಖೆವಿ ಹಕ್‌ಥಿ ಕರುಸ್ ಕರಿ ಬೋಲಾನು, ಮೇಬಿ ತುಮೂನ ಕೋ ಬೋಲೂನಿ” ಕರಿ ಬೋಲ್ಯೊ.
LUK 20:9 ಬಾದ್‌ಮ ಯೇಸುನೆ ಅದ್ಮಿಯೇನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ. ಯೋ ಶಾತ್‌ಕತೊ, “ಏಕ್‌ ಅದ್ಮಿ, ಏಕ್‌ ದ್ರಾಕ್ಷಿನು ಬಾಗ್‌ನ ಬಣೈನ್, ಇನ ವಾರ್‌ನ ದೀನ್, ಬಿಜೇ಼ಕ್‌ ದೇಖ್ಹ್‌ನ ಜೈ಼ನ್‌, ಘಣ ದನ್‌ತೋಡಿ ಹಿಜ಼್ಜಾಸ್‌ ಥೊ.
LUK 20:10 ದ್ರಾಕ್ಷಿ ತೋಡಾನಿ ವಖ್ಹತ್ ಆವಾದಿನ್, ಏಕ್‌ ಆಳ್‌ನ ವಾರ್‌ನ ದೀರಾಖ್ಯೊಥೋತೆ ಇವ್ಣಾಕನ ಮೋಕ್‌ಲ್ಯೊ. ಕತೋಬಿ ಇವ್ಣೆ ಇನ ಮಾರಿನ್, ಖಾಲಿಹಾತೆ ಮೋಕ್ಲಿದಿದು.
LUK 20:11 ತದೆ ಇನೆ ಬಿಜ್ಜೇಕ್‌ ಆಳ್‌ನ ಇವ್ಣಾಕನ ಮೋಕ್ಲಾಖ್ಹತರ್‌, ಇನಾಬಿ ಮಾರಿನ್, ಖ್ಹರಮ್‌ ಕಾಡೀನ್‌, ಖಾಲಿಹಾತೆ ಮೋಕ್ಲಿದಿದು.
LUK 20:12 ತದೆ ಇನೆ ಬಿಜ್ಜೇಕ್‌ ಜ಼ಣಾನ ಮೋಕ್‌ಲ್ಯೊ; ಇವ್ಣೆ ಇನಾಬಿ ಫೋಡ ಹುವ್ವಾಎತ್ರೆ ಮಾರಿನ್, ಭಾರ್ ಫೇಕಿದಿದು.
LUK 20:13 ತದೆ ಯೋ ದ್ರಾಕ್ಷಿನೊ ಬಾಗ್‌ನೊ ಮಾಲಿಕ್‍ನೆ ಮೇ ಶಾತ್‌ಕರು? ಮಾರೊ ಲಾಡ್‌ನೊ ಛಿಯ್ಯಾನ ಮೋಕ್ಲುಸ್‌! ಇನಾತೋಬಿ ದೇಖಿನ್‌ ಮರ್ಯಾದಿ ದೇಸ್ಕಿ ಶುಕಿ! ಕರಿ ಸೋಚಿನ್ ಮೋಕ್‌ಲ್ಯೊ.
LUK 20:14 ಕತೋಬಿ ಯೋ ವಾರ್‌ನ ಲೀರಾಖ್ಯೂಥೂತೆ ಇವ್ಣೆ ಇನ ದೇಖಿನ್‌, “ಆಸ್ ಮಾಲಿಕ್‌ನೊ ಛಿಯ್ಯೊ. ಅನ ಮಾರಿನಾಖಿದಿಯ್ಯೆ, ತದೆ ಇನು ಶೊತ್ ಖ್ಹಾರು ಅಪ್ಣು ಹುಯಿಜಾ಼ಶೆ!” ಕರಿ ಏಕ್‌ಥಿ ಏಕ್‌ ಬೋಲಿಲಿದು.
LUK 20:15 ಅಜು಼ ಇನ ದ್ರಾಕ್ಷಿನ ಬಾಗ್‌ಮಾಥು ಭಾರ್ ಧಕೇಲಿನ್, ಮಾರಿನಾಕ್ಯು. ಇಮ್‍ಕತೊ, ಯೋ ದ್ರಾಕ್ಷಿನು ಬಾಗ್‌ನೊ ಯಜಮಾನ್ ಆಯಿನ್, ಇವ್ಣುನ ಶಾತ್‌ ಕರ್ಶೆ?” ಕರಿ ಯೇಸುನೆ ಪುಛಾ಼ಯೊ.
LUK 20:16 “ಯೋ ಆಯಿನ್, ವಾರ್‌ನ ಲೀರಾಖ್ಯುಥೂತೆ, ಇವ್ಣುನ ಮಾರಿನಾಖಿನ್, ಇನ ದ್ರಾಕ್ಷಿನ ಬಾಗ್‌ನ ಬಿಜಾ಼ವ್ನ ದಿಶೆ” ಕರಿ ಬೋಲ್ಯೊ. ಅನ ಖ್ಹಮ್‌ಜಿನ್‌ ಅದ್ಮಿಖ್ಹಾರು, “ಅಮ್ ನಾಹೊಣು!” ಕರಿ ಬೋಲ್ಯು.
LUK 20:17 ಕತೋಬಿ ಇವ್ಣುನ ದೇಖಿನ್ ಯೇಸುನೆ, “ಘರ್ ಭಾಂದಾವಾಳು ನಕೊಕರಿ ಝಿಟ್ಕಾರಯೋತೆ ಬಂಡೋಸ್, ಹೋಣುತೆ ಕೋಣಾನೊ ಬಂಡೊ ಹುಯೊ” ಕರಿ ಲೀಖೈರ‍್ಹೂತೆ ಇನಿ ಮತ್‌ಲಬ್ ಶಾತ್‌?” ಕರಿ ಪುಛಾ಼ಯೊ.
LUK 20:18 ಯೋ ಬಂಡಾಪರ್ ಪಡಾವಾಳು ಹರೇಕ್ ಜ಼ಣಾನ ಟುಕ್‌ಡಾ-ಟುಕ್‌ಡಾ ಕರಿನಾಕ್‌ಶೆ; ಅಜು಼ ಆ ಬಂಡೊ ಕಿನಾಪರ್ ಪಡ್‌ಶೇಕಿ, ಇನ ಬುಕ್‍ನು-ಬುಕ್‍ನು ಕರಿನಾಕ್‌ಶೆ” ಕರಿ ಬೋಲ್ಯೊ.
LUK 20:19 ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಮಹಾಯಾಜಕ ಆ ವಾತೇವ್ನ ಖ್ಹಮ್‌ಜಿನ್‌, ಆ ಹಮಾರಿ ಬಾರೆಮಾಸ್‌, ಆ ಮತ್ಲಬ್‌ನಿ ಖೇಣಿನ ಬೋಲ್ಯೊ, ಕರಿ ಮಾಲುಮ್‌ ಕರಿಲೀನ್, ಯೋಸ್‌ ವಖ್ಹತ್‌ಮ, ಯೇಸುನ ಧರ್‌ನು ಕರಿ ಕರ‍್ಯು. ಕತೋಬಿ ಅದ್ಮಿನ ಡರ್‌ಥಿ ಇನ ಧರ‍್ಯು ಕೊಯ್ನಿ.
LUK 20:20 ಅನ ಬಾದ್‌ಮ ಇವ್ಣೆ, ಯೇಸುನ ರೋಮ್‍ನು ಅಧಿಪತಿನಹಾತ್ಮ ಅಜು಼ ಇನಿ ಅದಿಕಾರಿನಾಬಿ ದೇವ್ಣು ಕರಿ ಸೋಚಿನ್, ಇನ ಧರ್‌ನು ಕರಿ ಜ಼ಪಾಲಗ್ಯು. ಅನಖ್ಹಾಜೆಸ್ ನೀತಿವಾಳಾನಿಮತ್‌ ನಾಟಕ್‍ಕರಾಸ್ತೆ ಥೋಡ ಜ಼ಣಾನ, ಯೇಸುನ ವಾತೇಮ ಖ್ಹಪ್‌ಡಾವ್ಣು ಕರಿ ಇನಾಕನ ಮೋಕ್‍ಲ್ಯು.
LUK 20:21 ಅವ್ಣೆ ಯೇಸುನ, “ಗುರು, ತೂ ಬರೊಬರ್‌ಥೀಸ್‌ ವಾತೆ ಬೋಲಾಸ್ ಅಜು಼ ವಚನ್‍ ಬೋಲಿದೇಸ್, ಕರಿ ಹಮೂನ ಮಾಲುಮ್‌. ತು ಕಿನಾಬಿ ಮ್ಹೋಡು,ದೇಖಿನ್‌, ವಾತೆ ಬೋಲಾಕೊಯ್ನಿ. ಕತೋಬಿ ದೇವ್ನಿ ರಾಜ್ಯನಿ ಬಾರೇಮಾನಿ ಖ್ಹಾಚಿನ್‌ ಅದ್ಮಿನ ಬೋಲಿ ವತಾಳಸ್‍ ಕರೀಬಿ ಹಮೂನ ಮಾಲುಮ್‌.
LUK 20:22 ಕೈಸರ್‌ನ ಶುಂಕ ಭಾಂದಾನು ನ್ಯಾವ್‌ಕಿಕೊಯ್ನಿ ಕರಿ ಹಮೂನ ಬೋಲ್” ಕರಿ ಫುಛಾ಼ಯು.
LUK 20:23 ಕತೋಬಿ ಯೇಸುನೆ, ಇವ್ಣೆ ಇನ ವಾತೆಮ ಖ್ಹಪ್‌ಡವಾನ ಕರುಕರಸ್ ಕರಿ ಮಾಲುಮ್‌ ಕರಿಲೀನ್ ಇವ್ಣುನ,
LUK 20:24 “ಮನ ಏಕ್‌ ರೂಪಾನು ಬಿಲ್ಲು ವತಾಳೊ. ಇನಾಪರ್‌ ಕಿನು ನಾಮ್‌ಬಿ ರೂಪ್ ಛಾ಼?” ಕರಿ ಪುಛಾ಼ವಖ್ಹತರ್, ಇವ್ಣೆ, “ಕೈಸರ್‌ನು” ಕರಿ ಜಾ಼ವಾಬ್‌ದಿದು.
LUK 20:25 ತದೆ ಯೇಸುನೆ ಇವ್ಣೆ, “ಇಮ್‍ಕತೊ, ಕೈಸರ್‌ನು ಶಾತ್‌ ಛಾ಼ಕಿ ಕೈಸರ್‌ನ ದೆವೊ, ಅಜು಼ ದೇವ್‌ನು ಶಾತ್‌ ಛಾ಼ಕಿ ಯೋ ದೇವ್ನ ದೆವೊ” ಕರಿ ಬೋಲ್ಯೊ.
LUK 20:26 ಅದ್ಮಿನ ಖ್ಹಾಮ್ಣೆ ಯೇಸುನ ವಾತೆಮ ಖ್ಹಪ್‌ಡವಾನ ಕೋಹುಯುನಿ, ಇನಖ್ಹಾಜೆ ಇವ್ಣೆ ಖ್ಹೊಪ್‌ ಹುಯಿಗಯು ಅಜು಼ ಯೇಸುನೆ ದಿದೋತೆ ಜ಼ವಾಬ್‌ನ ಖ್ಹಮ್‌ಜಿನ್‌, ಆಶ್ಚರ್ಯ ಖಾದು.
LUK 20:27 ಅನ ಬಾದ್‌ಮ, ಮರವಾಳು ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ’ ಕರಿ ಬೋಲಾವಾಳು ಹುಯಿರ‍್ಹೂತೆ ಸದ್ದುಕಾಯವಾಳಾಮ, ಥೋಡ ಜ಼ಣ ಯೇಸುಕನ ಐನ್,
LUK 20:28 “ಗುರು, ‘ಮೋಟೊ ಭೈನ ಬಾವಣ್‍ ರ‍್ಹೀನ್ ಯೋ ಲಡ್ಕಾಕೊಂತೆ ಮರಿಗೋತೊ, ಇನೊ ನ್ಹಾನೊ ಭೈ ಯೋ ಬಾವಣ್ಣ ಕರಿಲೀನ್ ಲಡ್ಕಾ ಪೈದಾ ಕರ‍್ನು ಅಜು಼ ಯೋ ಲಡ್ಕಾ ಮರ‍್ಯೋತೆ ಭೈನ ಲಡ್ಕಾ ಬೋಲೈಲಿಶೆ’ ಕರಿ ಮೋಶೆನೆ ಹಮಾರಖ್ಹಾಜೆ ಲೀಖಿರಾಖ್ಯೋಸ್‌ನಿ.
LUK 20:29 ಖ್ಹಾತ್‌ಜ಼ಣ ಭೈಯೆ ಥಾ. ಇವ್ಣಾಮ ಮೋಟೊ ಭೈನೆ ಬಾವಣ್‍ ಕರೀನ್, ಲಡ್ಕಾಕೊಂತೆ ಮರಿಗಯೊ.
LUK 20:30 ಅನ ಬಾದ್‌ಮ ಬೇನೊ ಭೈನೆ ಇನ ವ್ಯಹಾ ಕರೀನ್, ಬಾದ್‌ಮ ಯೋಬಿ ಮರಿಗಯೊ. ತದೆ ತೀನ್ನೊ ಭೈನೆ ಇನ ಕರಿಲಿದೊ ಅಜು಼ ಯೋಬಿ ಮರಿಗಯೊ. ಅಮ್ಮಸ್ ಖ್ಹಾತೆ ಭೈಯೇಬಿ, ಯೋ ತಯೇಡಾನ ಕರಿಲೀನ್, ಲಡ್ಕಾಕೊಂತೆ ಮರಿಗಯ.
LUK 20:32 ಆ ಖ್ಹಾರಾನ ಬಾದ್‌ಮ ಯೋ ತಯೇಡಾಬಿ ಮರಿಗೈ.
LUK 20:33 ಇಮ್‍ಕತೊ ಪಾಛು಼ ಜಿವ್ತುಹುಯಿನ್ ಉಟ್‍ಶೇತೆ ತದೆ, ಯೋ ತಯೇಡ ಖೆವಾನಿ ಬಾವಣ್‍ ಹುಯಿರ‍್ಹಿಶೆ? ಶನಕತೊ ಖ್ಹಾತೆ ಜ಼ಣಾಬಿ ಇನ ಕರಿಲಿದಾಥಾನಿ” ಕರಿ ಪುಛಾ಼ಯು.
LUK 20:34 ತದೆ ಯೇಸುನೆ ಇವ್ಣುನ, “ಆ ಜಗತ್‌ನು ತಯೇಡ ಪರ್ಖ್ಹಾ ವ್ಯಹಾ ಕರೀಲೆಸ್.
LUK 20:35 ಕತೋಬಿ ಮರಿಗಯೂತೆ ಇವ್ಣಾಮಾಥು ಪಾಛು಼ ಜಿವ್ತುಹುಯಿನ್ ಉಠಿ ಆವಾನ ಲ್ಹಾಯಕ್ ಹುಯಿರ‍್ಹೂತೆ ಅಜು಼ ಆವ್‌ಶೇತೆ ಜ಼ಗ್‌ಮ ಜಿವ್‌ಶೇತೆ ತಯೇಡ ಪರ್ಖ್ಹಾ ವ್ಯಹಾ ಕರ್ಶೆ ಕೊಯ್ನಿ, ವ್ಯಹಾ ಕರಿಲಿಶೆಬಿ ಕೊಯ್ನಿ!
LUK 20:36 ಇವ್ಣೆ ಅಜು಼ ಪಾಛು಼ ಮರ್‌ಶೆಸ್‌ಕೊಂತೆ, ದೇವ್‌ನು ದೂತರ್‌ನಿ ಘೋಣಿ ರ‍್ಹಿಶೆ. ಪಾಛು಼ ಜಿವ್ತುಹುಯಿನ್ ಉಠ್ಯೂತೆ ಇನಖ್ಹಾಜೆ, ಇವ್ಣೆ ದೇವ್ನ ಲಡ್ಕಾ ಹುಯಿರ‍್ಹಿಶೆ.
LUK 20:37 ಮರವಾಳು ಜಿವ್ತುಹುಯಿನ್, ಉಟ್‍ಶೇತೆ ಇನಿ ಬಾರೇಮ ಮೋಶೇನೆ ಅಛ್ಛಿನಿತರ ವತಾಳಿರಾಖ್ಯೊಸ್. ಬಳುಕರಾತೆ ಆಗ್‍ನಿ ಡಾಗ್‌ನಿ ಬಾರೇಮ ಲೀಖಾನಿ ವಖ್ಹತ್‌ಮ, ಪ್ರಭುನೆ, ‘ಅಬ್ರಹಾಮ್‌ನೊ ದೇವ್, ಇಸಾಕನೊ ದೇವ್, ಯಾಕೋಬನೊ ದೇವ್’ ಕರಿ ಬೋಲಿರಾಖ್ಯೊಸ್.
LUK 20:38 ಯೋ ಜಿವ್‌ತಾನೊ ದೇವ್ ಹುಯಿರೋಸ್, ಪಣ್ಕಿ ಮರ‍್ಯಾಹುಯಾನೊ ಕಾಹೆ, ಶನಕತೊ ಇನ ಡೋಳಾಮ ಇವ್ಣೆ ಖ್ಹಾರು ಜಿವ್ತುಸ್ ಛಾ಼.
LUK 20:39 ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಮ ಥೋಡು ಜ಼ಣು, “ಗುರು! ತು ಅಛ಼್ಛು ಜ಼ವಾಬ್‌ದಿದೊ” ಕರಿ ಬೋಲ್ಯು.
LUK 20:40 ಅನೇಥಿ ಇವ್ಣೆ, ಬಿಜು಼ ಶಾತ್ಬಿ ಯೇಸುನ ಪುಛಾ಼ವಾನ ಡರ‍್ಯು.
LUK 20:41 ತದೆ ಯೇಸುನೆ ಇವ್ಣುನ, “ಕ್ರಿಸ್ತ ದಾವೀದ್‌ನೊ ಛಿಯ್ಯೊ, ಕರಿ ಅದ್ಮಿಖ್ಹಾರು ಬೋಲಾಸ್ನಿ, ಯೋ ಕಿಮ್ ಉಶೆ?
LUK 20:42 ‘ಮೇ ತಾರ ವಹೇರ‍್ಯಾನ ತಾರ ಗೋಡಾನೊ ರಚ್ಚೊ಼ ಬಣಾವಲಗು ಮಾರಿ ಖಾವಿಬಾಜು಼ ಬೆಠೋರೆ’ ಕರಿ ಪ್ರಭುನೆ, ಮಾರ ಮಾಲಿಕ್‌ನ ಬೋಲ್ಯೊ, ಕರಿ ದಾವೀದ್‌ನೇಸ್ ಕೀರ್ತನೇನ ಪುಸ್ತಕ್‌ಮ ಲೀಖಿರಾಖ್ಯೊಸ್.
LUK 20:44 ದಾವೀದಸ್‌ ಇನ ‘ಪ್ರಭು’ ಕರಿ ಬೋಲಿರಾಖಪರ್‌, ಕ್ರಿಸ್ತ ದಾವೀದ್‌ನೊ ಛಿಯ್ಯೊ ಕಿಮ್ ಉಶೆ? ಕರಿ ಬೋಲ್ಯೊ.
LUK 20:45 ಅದ್ಮಿಖ್ಹಾರು ಇನಿ ವಾತೆ ಖ್ಹಮ್‌ಜು಼ಕರಾನಿ ವಖ್ಹತ್‌ಮ, ಯೇಸುನೆ ಇನ ಶಿಷ್ಯರ್‌,
LUK 20:46 ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರಿಯೇನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಲಾಂಬೊ ಝ಼ಗ್ಗೊ ಪೇರ‍್ಹಿಲೀನ್‌ ಹೈಕಡ್‌ ಹೀಕಡ್‌ ಫರಾವಾಳು, ದುಕಾನೇನಿ ಗಲ್ಲಿಮ ಅದ್ಮಿಖ್ಹಾರು ಇವ್ಣ ಖ್ಹರಾವ್ಣಿ ಕರ‍್ನು ಕರಿ ಅಜು಼ ಸಭೆ ಭರಾವನು ಮಂದಿರ್‌ಮ ಪಹಿಲಿ ಝ಼ಗೋಪರ್‌ ಅಜು಼ ಮಿಝ್‍಼ವಾನೇನಿ ಝ಼ಗೋಮ ಅಛ್ಛಿ ಝ಼ಗೋಪರ್‌ ಬೇಖ್ಹ್‌ಣು ಕರಿ ಖಲಿ ಅಮ್ನಿಸ್ ಅಖ್ಹ್‌ ಕರಾವಾಳು ಹುಯಿರ‍್ಹುಸ್.
LUK 20:47 ಅವ್ಣೆ ಮುಂಡಚ್ಚಿ ತಯೇಡಾವ್‌ನ ಘರ್‌ನ ಲೂಟಿನ್, ವತಾಳಿಲ್ಯಾವನಖ್ಹಾಜೆ ದೇವ್ನ ಲಾಂಬಿ ಪ್ರಾರ್ಥನೆ ಕರಾಸ್. ಅಥ್ರಾವ್ನ ಘಣಿ ನಿಶತ್‌ ಮಳ್‍ಶೆ!” ಕರಿ ಬೋಲ್ಯೊ.
LUK 21:1 ಯೇಸುನೆ ಮುಡ್‌ಕ್ಯು ಪಾಡೀನ್, ಶೌಕರ್‌ ಅದ್ಮಿಖ್ಹಾರು ಮಂದಿರ್‌ನಿ ಹುಂಡಿಮ ಕಾಣ್ಕೆ ನಾಖುಕರಾತೆ ಇನ ದೇಖ್ಯೊ.
LUK 21:2 ಅಜು಼ ಏಕ್‌ ಗರೀಬ್ ಮುಂಡಚ್ಚಿ ತಯೇಡ ಐನ್, ಬೇ ನ್ಹಾನು ತಾಂಬಾನು ಕಾಖ್ಹ್‌ ನಾಖಿತೆ ಇನಾಬಿ ಇನೆ ದೇಖ್ಯೊ.
LUK 21:3 “ಮೇ ತುಮೂನ ಖ್ಹಾಚ ಬೋಲುಸ್ಕಿ, ಆ ಗರೀಬ್ ಮುಂಡಚ್ಚಿ ತಯೇಡಾನೆ ಬಿಜಾ಼ಖ್ಹಾರೇಥಿ ಜಾ಼ಖ್ಹತ್ ನಾಖಿರಾಖಿಸ್‌.
LUK 21:4 ಕಿಮ್‌ಕತೊ, ಬಿಜಾ಼ಖ್ಹಾರ ಅದ್ಮಿನೆಇವ್ಣುನ ಬಶ್‌ಹುಯಿನ್ ಉಭ್‌ರ‍್ಯುತೆ ಇನಾಮಾಥು ಕಾಣ್ಕೆನ ದಿದು; ಕತೋಬಿ ಆ ಎತ್ರೆ ಗರೀಬ್ ರ‍್ಹೀನ್‌ಬಿ, ಇನಾಕನ ಥೂತೆ ಜಿವ್ಣನ ನಾಖಿದಿದಿ” ಕರಿ ಬೋಲ್ಯೊ.
LUK 21:5 ಶಿಷ್ಯರ್‌ಮ ಥೋಡು ಜ಼ಣು ಮಂದಿರ್‌ನಿ ಬಾರೇಮ, ಆ ಕೆತ್ರೆ ಖ್ಹಾಜ಼್‌ನ ಬಂಡಾವ್‍ಥಿ ಅಜು಼ ದೇವ್ನ ಕಾಣ್‌ಕೆ ದಿದೂತೆ ರಾಛ಼ವ್‍ಥಿ ಕೆತ್ರೆಕ್‌ ಅಛ್ಛು಼ ದೆಖವ್‍ಕರಾಸ್” ಕರಿ ಬೋಲಿಲಿದು.
LUK 21:6 ತದೆ ಯೇಸುನೆ ಇವ್ಣುನ, “ತುಮೆ ಆ ಖ್ಹಾರು ದೇಖುಕರಾಸ್‌ನಿ, ಏಕ್‌ ದನ್ ಆವ್‌ಶೆ, ಯೋ ದನ್ಮ ಹಜ್ಜಾ಼ ಏಕ್‌ ಬಂಡಾಪರ್ ಬಿಜ್ಜೇಕ್‌ ಬಂಡೊ ಭೀರಿಶೆ ಕೊಯ್ನಿ; ಅಖ್ಖಾಸ್ನ ರಡ್‌ಕೈನಾಖಿದಿಶೆ” ಕರಿ ಬೋಲ್ಯೊ.
LUK 21:7 ಇವ್ಣೆ ಯೇಸುನ, “ಗುರು, ಆ ಖ್ಹಾರು ಕದೆ ಉಶೆ? ಆ ಖ್ಹಾರು ಚಾ಼ಲಾನಿವಖ್ಹ್‌ತೆ ಖಿವಿ ಖ್ಹಣೇದ್ ಉಶೆ? ಕರಿ ಬೋಲಖ್ಹತರ್,
LUK 21:8 ಯೇಸುನೆ ಇವ್ಣುನ, “ಜ಼ತನ್‌ಥಿ ರ‍್ಹವೊ! ತುಮೂನ ಕೋಣ್‌ಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ. ಶನಕತೊ, ಕೈಯೆಕ್ಕಿ ಜ಼ಣು ಐನ್, ಮಾರು ನಾಮ್‌ಲೀನ್, ‘ಮೇಸ್ ಕ್ರಿಸ್ತ, ಮೇಸ್ ಕ್ರಿಸ್ತ’ ಕರಿ ಅಜು಼ ಯೋ ವಖ್ಹತ್ ಐಗೈ ಕರಿ ಬೊಲ್‌ಶೆ. ಕತೋಬಿ ಇವ್ಣ ಪೀಠೆ ನಕೊಜಾ಼ಶು.
LUK 21:9 ಅತ್ರೇಸ್ ಕಾಹೆತೆ ಜಂಗ್ ಭೀಡುಕರಾತೆ ಅಜು಼ ಕಲ್ಹಾಗಟ್‌ ಪಡುಕರಾತೆ ಇನಿ ಬಾರೇಮ ತುಮೆ ಖ್ಹಮ್‌ಜ್ಯಾತೊ, ಡರ್‌ಶು ನಕೊ; ಪಹಿಲೆ ಆ ಖ್ಹಾರು ಚಾ಼ಲಾನು ಜ಼ರೂರತ್ ಛಾ಼. ತೋಬಿ ತದ್‌ನು-ತದ್ದೇಸ್ ಅಂತ್‌ ಕೋ ಆವ್‌ಶೇನಿ” ಕರಿ ಬೋಲ್ಯೊ.
LUK 21:10 ಅಜೂ಼ಬಿ ಯೇಸುನೆ ಇವ್ಣುನ ಬೋಲ್ಯೊಕಿ, “ದೇಖ್ಹ್‌ನ ವಿರೋದ್ ದೇಖ್ಹ್‌, ರಾಜ್ಯನ ವಿರೋದ್ ರಾಜ್ಯ ಉಟ್‌ಶೆ.
LUK 21:11 ಜ಼ಮೀನ್ ಹಲ್‌ಶೆ, ಹರೇಕ್ ಬಾಜು಼ಮ ಕಾಳ್ದುಕಾಳ್‌ಬಿ ಅಜು಼ ಪಿಳಾಕ್‌ನೊ ರೋಗ್‌ ಖ್ಹಾರು ಆವ್‌ಶೆ; ಆಬ್‍ಮ ಘಣು ಖ್ಹಣೇದ್ ಆಬ್‍ಮ ಮಾಲುಮ್‍ಪಡ್‍ಶೆ.
LUK 21:12 ಕತೋಬಿ ಆ ಖ್ಹಾರು ಚಾ಼ಲಾನ ಅಗಾಡಿ, ಇವ್ಣೆ ತುಮೂನ ಧರೀನ್, ಖ್ಹತಾವ್‌ಶೆ; ತುಮೂನ ಸಬೆ ಭರಾವನು ಮಂದಿರ್‌ಮ ಜೇಲ್‌ನ ಅದಿಕಾರಿನ ದೀನ್ ಮಾರ ನಾಮ್ನಖ್ಹಾಜೆ, ರಾಜಾ಼ವ್‌ನ ಖ್ಹಾಮ್ಣೆ ಅಜು಼ ರಾಜ಼್‌ಭಾರ್ ಚ಼ಲಾವವಾಳಾನ ಖ್ಹಾಮ್ಣೆ ತುಮೂನ ಭೀರಾಕ್‌ಶೆ.
LUK 21:13 ಅನೇಥಿ ಸಾಕ್ಷಿ ಬೋಲಾನ ತುಮೂನ ನಿರ‍್ವಾಳು ಉಶೆ.
LUK 21:14 ಯೋ ವಖ್ಹತ್‌ಮ, ತುಮೆ ಶಾತ್‌ ಜವಾಬ್‌ ದೇವ್ಣುಕರಿ ಬೋಲಾನಿ ಬಾರೇಮ, ಪಹಿಲೆಸ್ ಕೊ ಸೊಚ಼್‌ಶೂನಿ ಕರಿ ತುಮಾರು ದಿಲ್‌ ಘಟ್ ಕರಿಲೆವೊ.
LUK 21:15 ಶನಕತೊ ತುಮಾರು ದುಶ್‌ಮನ್‌ ಖ್ಹಾರು, ತುಮಾರ ವಿರೋದ್ ಭೀರ‍ವಾನ ಅಜು಼ ವಾತೆ ಫರೈನ್ ಬೋಲಾನ ಕೋ ಹುವ್ವಾನಿತೆ ಇಮ್ನಿ ವಾತೆ, ಅಜು಼ ಗ್ಯಾನ್ನ ಮೇ ತುಮೂನ ದಿಶ್.
LUK 21:16 ತುಮಾರ ಆಯ-ಬಾ, ಭೈಯೇ ಮಾಯ-ಮಾತ್ರ ಅಜು಼ ದೋಸ್ತಸ್‌ ತುಮೂನ ಧರಿನ್ ದಿಶೆ. ಅಜು಼ ತುಮಾರಾಮ ಥೋಡು ಜ಼ಣಾನ ಮರ್‌ನಾಖಿದಿಶೆ.
LUK 21:17 ಅತ್ರೇಸ್ ಕಾಹೆತೆ ಮಾರನಾಮ್ನಖ್ಹಾಜೆ ಹರೇಕ್ ಜ಼ಣು ತುಮೂನ ದಾವೊ ಕರ್ಶೆ.
LUK 21:18 ತೋಬಿ, ತುಮಾರೊ ಮುಡ್‌ಕ್ಯಾನೊ ಏಕ್‌ ಕೇಖ್ಹ್‌ಬಿ ಲುಕ್‌ಶಾನ್ ಕೋ ಉಶೇನಿ.
LUK 21:19 ತುಮೆ ಖ್ಹಮಾಳಿನ್ ಭೀರ‍್ಯಾತೊ, ತುಮಾರೊ ಜಾನ್ನ ತುಮೆ ಬಚಾ಼ಡಿಲಿಶು.
LUK 21:20 “ದಂಡ್‌-ದಳವಾಯಿಖ್ಹಾರು ಯೆರೂಸಲೇಮ್‌ ಖ್ಹಯೇರ‍್ನ ಘೇರಿಲಿದುತೆ ತುಮೆ ದೇಖ್ಯಾತೊ, ಯೋ ಒಗ್ಗಿಸ್‌ಮ ಬರ್ಬಾತ್ ಹುವಾನು ಹಗಾಮ್‌ ಖನ್ನೆಆಯಿಗುಕರಿ ತುಮೆ ಮಾಲುಮ್‌ ಕರಿಲಿಶು.
LUK 21:21 ತದೆ ಯೂದಾಯಮ ರ‍್ಹವಾಳು ಪಹಾಡ್‌ಕನ ಮಿಲೈನ್‌ ಜಾ಼ವಾದೆ; ಯೋ ಖ್ಹಯೇರ್‌ಮ ರ‍್ಹವಾಳು ಇನ ಮ್ಹೆಂದಿನ್ ಚ಼ಲ್ಯುಜಾ಼ಣು ಅಜು಼ ಗಾಮ್ಮ ರ‍್ಹವಾಳು, ಯೋ ಖ್ಹಯೇರ‍್ನ ಮಹಿ ನಕೊಜಾ಼ವಾದೆ.
LUK 21:22 ಶನಕತೊ ಲೀಖೈರ‍್ಹೂತೆ ಖ್ಹಾರು ಚಾ಼ಲಾನಖ್ಹಾಜೆ, ಯೋ ದನ್ ಖ್ಹಾರು ನಿಶತ್‌ನೊ ದನ್ ಹುಯಿರ‍್ಹಿಶೆ.
LUK 21:23 ಯೋ ದನ್ಮ, ಬೇಜೂನಿ ತಯೇಡ ಅಜು಼ ದೂದ್ ಪಿಡಾವವಾಳಿ ತಯೇಡಾನಿ ಹಾಲ್ನ ಶಾತ್ ಬೋಲು! ಆ ತಬರ್‌ಖಾಪರ್ ಘಣಿ ಮೋಟಿ ವದೇಖ್ಹ್‌ ಆವ್‌ಶೆ ಅಜು಼ ದೇವ್ನೊ ಇರಾದೊ ಆ ಅದ್ಮಿ ಖ್ಹಾರಾಪರ್ ಆವ್‌ಶೆ.
LUK 21:24 ಅವ್ಣಾಮ ಥೋಡ ಜ಼ಣಾನ ತಲ್ವಾರ್‌ಥಿ ಮಾರಿನಾಕ್‌ಶೆ, ಅಜು಼ ಬಿಜಾ಼ವ್ನ ಪರೈ ದೇಖ್ಹ್‌ವಾಳು ಖ್ಹಾರು ಧರೀನ್ ಲೀಜಾ಼ಶೆ. ಪರೈ ದೇಖ್ಹ್‌ವಾಳನು ದನ್‌ಖ್ಹಾರು ಪೂರ ಹುವ್ವಾತೋಡಿ, ಯೆರೂಸಲೇಮ್ ಇವ್ಣೇಥಿ ಖುಂದ್ಲಾವ್ತುಫಂಡ್‌ಷೆ.
LUK 21:25 ಚಾ಼ಂದ್, ಚ಼ಂದರ್‌ಮೊ ಅಜು಼ ಶುಕ್ಕರ್‌ಮ ಖ್ಹಾರು ಖ್ಹಣೇದ್‍ನು ಕಾಮ್ ಮಾಲುಮ್ ಪಡ್‌ಶೆ. ಜ಼ಮೀನ್‌ಪರ್ ದರ‍್ಯಾವ್‍ನೊ ಅಜು಼ ಝೋ಼ಕಾಳ್ಯನು ಅವಾಜ಼್‌ಥಿ ಅದ್ಮಿಖ್ಹಾರು ಘಬ್‌ರೈಜಾ಼ಶೆ.
LUK 21:26 ಆಬ್‍ನಿ ಶಕತ್ ಖ್ಹಾರಿ ಹಲ್‌ಶೆತೆ ಇನಾಖ್ಹಾಜೆ, ಅದ್ಮಿಖ್ಹಾರು ಡರ್‌ಥಿ, ‘ಆ ಜಗತ್‌ ಶಾತ್‌ ಹುವಾನ ಆಯು!’ ಕರಿ ಬೋಲಿನ್ ಘಬ್‌ರೈಜಾ಼ಶೆ.
LUK 21:27 ತದೆ ಅದ್ಮಿನೊ ಛಿಯ್ಯೊ ಘಣಿ ಶಕತ್‌ಥೀಬಿ, ಮಹಾನ್ ಮಹಿಮೆಥೀಬಿ, ವಾದ್ಳಪರ್ ಆವ್‌ಶೇತೆ ಇವ್ಣೆ ದೇಕ್‌ಶೆ.
LUK 21:28 ಆ ಖ್ಹಾರು ಚಾ಼ಲಾನಿ ವಖ್ಹತ್‌ಮ, ಉಠಿ ಭೀರ‍್ಹೆವೊ, ಅಜು಼ ಮುಡ್‌ಕ್ಯು ಪಾಡಿನ್ ಉಪ್ಪರ್‌ದೇಖೊ, ಶನಕತೊ ತುಮಾರಿ ಛುಟ್ಕಾರ್ ಖನ್ನೆಸ್‌ ಅಯಿರ‍್ಹೀಸ್‍!” ಕರಿ ಬೋಲ್ಯೊ.
LUK 21:29 ಅನ ಬಾದ್‌ಮ ಯೇಸುನೆ ಇವ್ಣುನ ಏಕ್‌ ಮತ್‌ಲಬ್ ಖೇಣಿನ ಬೋಲ್ಯೊ. ಯೋ ಶಾತ್‌ಕತೊ, “ಅಂಜೀರ್‌ನ ಝಾ಼ಡ್‌ಣ ಅಜು಼ ಬಿಜ಼ ಝಾ಼ಡಾವ್‍ನಾಬಿ ದೇಖೊ.
LUK 21:30 ಯೋ ಚಿಗುರ್‌ತಾಸ್‌ನ ತುಮೆ, ತಡ್ಕಾನ ಹಗಾಮ್‌ ಖನ್ನೆ ಐಗು ಕರಿ ತುಮಾರು ತುಮೇಸ್ ಮಾಲುಮ್‌ ಕರಿಲೇವೊಸ್ನಿ.
LUK 21:31 ಇಮ್ಮಸ್, ತುಮೆ ಆ ಖ್ಹಾರು ಹುವಾನು ದೇಖಾನಿ ವಖ್ಹತ್‌ಮ, ದೇವ್ನಿ ರಾಜ್ಯ ಖನ್ನೆ ಐಗು ಕರಿ ಮಾಲುಮ್‌ ಕರಿಲೆವೊ.
LUK 21:32 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಆ ಹಗಾಮ್ನು ಅದ್ಮಿಖ್ಹಾರು ಬಚಿರ‍್ಹವಾನಿ ವಖ್ಹತ್‌ಮಾಸ್‌, ಆ ಖ್ಹಾರು ಉಶೆ!
LUK 21:33 ಆಬ್ ಧರ್ತಿ ಮಟಿಜಾ಼ಶೆ, ಕತೋಬಿ ಮಾರಿ ವಾತೆಖ್ಹಾರಿ ಮಟ್‌ಶೆಸ್ ಕೊಯ್ನಿ.
LUK 21:34 “ತುಮಾರಿ ಬಾರೇಮ ಜ಼ತನ್‌ಥಿ ರ‍್ಹವೊ! ಜಾ಼ಖ್ಹತ್ ಖಾವಾಣ್‌ಪಿವಾಣ್ಣಿ ಅಹಂಕಾರ್‌ಥೀಬಿ ಕಯೇಪ್‍ಥೀಬಿ ಜಗತ್ನಿ ಸೋಚ್‍಼ಥೀಬಿ ತುಮಾರು ಮನ್‌ ವಜ಼ನ್‍ಹುಯಿಗಯು.
LUK 21:35 ಆ ದನ್ ತುಮಾರಉಪ್ಪರ್ ಫಾಖ್ಹಾನಿ ಮತ್‍ ಆವ್‌ಶೆ. ಯೋ ಜ಼ಮೀನ್‌ಪರ್ ಛಾ಼ತೆ ಹರೇಕ್‌ಪರ್ ಆವ್‌ಶೆ.
LUK 21:36 ಇನಖ್ಹಾಜೇಸ್, ಖ್ಹಾರಿಸ್ ವಖ್ಹತ್‌ಮ ತೈಯಾರ್ ರ‍್ಹವೊ, ಚಾ಼ಲ್‌ಶೇತೆ ಆ ಖ್ಹಾರಾಮ ಬಚಿನ್, ಅದ್ಮಿನೊ ಛಿಯ್ಯಾನ ಖ್ಹಾಮ್ಣೆ ಭೀರ‍್ಯಾವನ ತುಮೆ ಶಕತ್‌ವಾಳ ಹುವಾನಟೇಕೆ, ಖ್ಹಾರಿಸ್ ವಖ್ಹತ್‌ಮ ದೇವ್ನ ಪ್ರಾರ್ಥನೆ ಕರ್ತಾಹುಯಿನ್ ಜ಼ತನ್‌ಥಿ ರ‍್ಹವೊ” ಕರಿ ಬೋಲ್ಯೊ.
LUK 21:37 ಯೇಸು ದನ್ನು ಮಂದಿರ್‌ಮ ವಚನ್ ಬೋಲಿದೇತೋಥೊ ಅಜು಼ ಖ್ಹಾಂಜ಼್‌ನು ಆಲಿವ್‌ನು ಪಹಾಡ್‌ಕನ ಜೈ಼ನ್‌ ರಾತ್‌ ಅಖ್ಖು ಹಿಜ್ಜಾ಼ಸ್ ರ‍್ಹೇತೊಥೊ.
LUK 21:38 ಅದ್ಮಿಖ್ಹಾರು ಇನಿ ವಚನ್ನ ಖ್ಹಮ್‌ಜಾ಼ನ ಟೇಕೆ, ದನ್‍ರೋಜ಼್ ಅಧಿರ‍್ಹೇಣೆಸ್‌ ಉಠೀನ್, ಮಂದಿರ್‌ಮ ಇನಾಕನ ಆವ್‌ತೂಥು.
LUK 22:1 ಖಾಟುಕೊಂತೆ ರೋಟಾನಿ ಪೂಜಾ಼, ಕತೊ ಪಸ್ಕ ಪೂಜಾ಼ನೊ ದನ್ ಖನ್ನೆ ಐಗೋಥೊ.
LUK 22:2 ಮಹಾಯಾಜಕ, ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಯೇಸುನ ಮರಾವ್ಣು ಕರಿ ಸೋಚಿನ್, ಅದ್ಮಿನ ಡರ್‌ಥಿ ಬರಾಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪಿರ‍್ಹೂಥು.
LUK 22:3 ತದೆ ಶೈತಾನ್ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೋತೆ, ಇಸ್ಕರಿಯೋತ ಯೂದಮ ಪೇಶಿಗಯೊ.
LUK 22:4 ತದೆ ಯೂದಾನೆ, ಮಹಾಯಾಜಕ ಅಜು಼ ಮಂದಿರ್‌ನ ವಖ್ಹ್‌ತಿ ಕರವಾಳಾವ್‌ಕನ ಜೈ಼ನ್‌, ಯೋ ಯೇಸುನ ಧೋಕೇಥಿ ಧರಿದ್ಯವಾನಿ ಬಾರೇಮ ಇವ್ಣ ಜೋ಼ಡೆ ವಾತೆ ಬೋಲ್ಯೊ.
LUK 22:5 ತದೆ ಇವ್ಣೆ ಖ್ಹುಶಿಖೈನ್‌, “ತುನ ಪೈಶಾ ದಿಯ್ಯೆಸ್‌” ಕರಿ ವಾತೆದಿದು.
LUK 22:6 ಇನೆ ಮಾನಿಜೈ಼ನ್, ಅದ್ಮಿನಿ ಗಲಾಟ್‌ಕೊಂತೆ ವೇಳ್ಮ, ಯೇಸುನ ಇವ್ಣುನ ಧರಿದೇಣುಕರಿ, ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೀನ್ ದೇಖುಕರ್ತೊಥೊ.‌
LUK 22:7 ಖಾಟುಕೊಂತೆ ರೋಟಾನು ಪೂಜಾ಼ನೊ ದನ್ ಆಯು. ಯೋ ದನ್‌ಮ ಯೆಹೂದ್ಯರ್ ಅದ್ಮಿಖ್ಹಾರು ಪಸ್ಕನ ಖಾಣನಖ್ಹಾಜೆ ಮೇಂಢು ರೇಖ್ಹ್‌ತೂಥು.
LUK 22:8 ಯೇಸುನೆ ಪೇತ್ರ ಅಜು಼ ಯೋಹಾನ್ನ, “ತುಮೆ ಜೈ಼ನ್‌, ಅಪ್ಣಖ್ಹಾಜೆ ಪಸ್ಕಾನು ಖಾಣನ ಖ್ಹವಾರೊ” ಕರಿ ಬೋಲ್ಯೊ.
LUK 22:9 ಇವ್ಣೆ ಇನ, “ಹಮೆ ಕಿಜ಼್ಜಾ ಜೈ಼ನ್‌, ಖ್ಹವಾರ್‌ನು” ಕರಿ ಪುಛಾ಼ಯ?
LUK 22:10 ತದೆ ಯೇಸುನೆ ಇವ್ಣುನ, “ಹಂದೇಖೊ, ತುಮೆ ಖ್ಹಯೇರ‍್ನ ಮಹಿ ಜಾ಼ತಸ್‌ನ, ಏಕ್‌ ಅದ್ಮಿ ಪಾಣಿನೊ ಘಡೊ ಪಳ್ಳಿನ್‌, ತುಮಾರ ಖ್ಹಾಮ್ಣೆ ಆವ್‌ಶೇತೆ ದೇಕ್‌ಶು. ಇನ ಪೀಠೇಸ್ ಜೈ಼ನ್, ಯೋ ಜಾ಼ಶೇತೆ ಘರ್‌ಮ ಜಾ಼ವೊ.
LUK 22:11 ಅಜು಼ ಯೋ ಘರ್‌ನ ಯಜಮಾನ್ನ, “ಹಮಾರೊ ಗುರು, ಇನ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖಾವಾನಖ್ಹಾಜೆ, ಕೋಣೊ ಕಿಜ಼್ಜಾ ಛಾ಼, ಕರಿ ತುನ ಫುಛಾ಼ಯೊ ಕರಿ ಬೋಲೊ.
LUK 22:12 ಯೊ ತುಮುನ ಖ್ಹಾರೂಸ್ ಕುಡ್‌ಶಿ ಪಲಂಗ್‌ಥಿ ಖ್ಹವಾರೈರ‍್ಹಿಶೇತೆ, ಛ಼ತ್‍ನ ಉಪ್ಪರ್‌ಲ್ಯೊ ಮೋಟ ಕೋಣಾನ ವತಾಳ್‌ಶೆ, ಹಿಜ಼್ಜಾ ಖಾಣನ ಖ್ಹವಾರೊ” ಕರಿ ಬೋಲಿನ್ ಮೋಕ್‌ಲ್ಯೊ.
LUK 22:13 ಇವ್ಣೆ ಜೈ಼ನ್‌, ಯೇಸುನೆ ಇವ್ಣುನ ಬೋಲ್ಯೊತೆ ಇಮ್ಮಸ್ ಥೂತೆ ದೇಖಿನ್, ಪಸ್ಕಾನ ಖಾಣನ ತೈಯಾರ್ ಕರ‍್ಯು.
LUK 22:14 ವಖ್ಹತ್ ಆವಾದಿನ್, ಯೇಸು ಇನ ಭಾರ ಅಪೊಸ್ತಲರ‍್ನ ಜೋ಼ಡೆ ಖಾಣನ ಬೇಶಿಗಯೊ.
LUK 22:15 ತದೆ ಯೇಸುನೆ ಇವ್ಣುನ, “ಮೇ ಖ್ಹತಾಪ್ಣಿ ಖಾವಾನ ಅಗಾಡಿ, ತುಮಾರ ಜೋ಼ಡೆ ಆ ಪಸ್ಕಾನು ಖಾಣು ಖಾಣುಕರಿ ಘಣು ಆಖ್ಹ್ ಕರ‍್ಯೋಥೊ.
LUK 22:16 ಮೇ ತುಮೂನ ಬೋಲುಸ್ಕಿ, ದೇವ್ನಿ ರಾಜ್ಯಮ ಅನಿ ಖ್ಹಾಚಿ ಮತ್‌ಲಬ್ ಪೂರ ಹುವ್ವಾತೋಡಿ, ಮೇ ಪಸ್ಕಾನು ಖಾಣನ ಪಾಛು಼ ಖೈಶಸ್‌ ಕೊಯ್ನಿ” ಕರಿ ಬೋಲ್ಯೊ.
LUK 22:17 ಅನ ಬಾದ್‌ಮ ಯೇಸುನೆ, ದ್ರಾಕ್ಷಿನು ರಖ್ಹ್‌ನಿ ಕಟೋರಿನ ಪಾಡಿನ್, ದೇವ್ನ ಧನ್ಯವಾದ್‌ಕರೀನ್‌, ಅಲ್ಲೇವೊ, ಅನ ತುಮಾರಾಮ ವಾಟ ಪಾಡಿಲೆವೊ.
LUK 22:18 ಹಂಕೇಥು ಧರೀನ್ ದೇವ್ನಿ ರಾಜ್ಯ ಆವಾತೋಡಿ, ಮೇ ಫಾಛು಼ ಆ ದ್ರಾಕ್ಷಿನು ರಖ್ಹ್‌ನ ಪೀಶಸ್ ಕೊಯ್ನಿ ಕರಿ ತುಮುನ ಬೋಲುಸ್” ಕರಿ ಬೋಲ್ಯೊ
LUK 22:19 ಇನ ಬಾದ್‌ಮ ಯೇಸುನೆ ರೋಟಾನ ಪಾಡೀನ್, ದೇವ್ನ ಧನ್ಯವಾದ್‌ ಕರೀನ್, ಇನ ತೋಡಿನ್, ಇವ್ಣುನ ದೀನ್, “ಆ ತುಮಾರಖ್ಹಾಜೆ ದೆವೈರ‍್ಹೂತೆ ಮಾರಿ ಶರೀರ್, ಮನ ಯಾದ್‌ಕರಾನಖ್ಹಾಜೆ ಅಮ್‌ಕರೊ” ಕರಿ ಬೋಲ್ಯೊ.
LUK 22:20 ಇಮ್ಮಸ್ ಖಾಣನ ಬಾದ್‌ಮ, ಯೇಸುನೆ ಕಟೋರಿನ ಪಾಡೀನ್, “ಆ ಕಟೋರಿ ತುಮಾರಖ್ಹಾಜೆ ರಂಚಾ಼ವನು ಮಾರು ಲ್ಹೋಯಿಥಿ ಬಣೈರ‍್ಹುತೆ. ನವಿ ಒಪ್ಪಂದ ಹುಯಿರ‍್ಹೂಸ್, ಅನ ಮಾರ ಲ್ಹೋಯಿಥಿ ಮುದ್ರೊ ಮರೈರ‍್ಹೂಸ್.
LUK 22:21 “ತೋಬಿ, ಹಂದೇಖೊ! ಮನ ಧೋಕೇಥಿ ಧರಿದ್ಯವಾಳೊ ಮಾರ ಜೋ಼ಡೆಸ್‌ ಖಾಣು ಖವ್‍ಕರಾಸ್‌.
LUK 22:22 ದೇವ್ನೆ ಸೋಚ್ಯೊತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಮರ್‌ಶೆ; ಕತೋಬಿ ಇನ ಧರಿದ್ಯವಾಳ ಅದ್ಮಿನಿ ಹಾಲ್ನ ಶಾತ್‌ ಬೋಲು!
LUK 22:23 ಅನ ಖ್ಹಮ್‌ಜಿನ್‌ ಇವ್ಣೆ, “ಇನ ಧೋಕೇಥಿ ಧರಾವಾಳೊ ಅಪ್ಣಾಮ ಕೋಣ್ ಉಶೆ?” ಕರಿ ಇವ್ಣ-ಇವ್ಣಾಸ್‍ಮ ಬೋಲಿಲಿದು.
LUK 22:24 ಅತ್ರೇಸ್ ಕಾಹೆತೆ, ಖ್ಹಾರೇಥಿ ಮಹಾನ್ ಕೋಣ್? ಕರಿ ಬೋಲೈಲಿಶೆ, ಕರಿ ಶಿಷ್ಯರ್‌ ಇವ್ಣ-ಇವ್ಣಾಮಸ್‌ ವಾತೆಚೀತೆ ಕರಾಲಗ್ಯು.
LUK 22:25 ತದೆ ಯೇಸುನೆ ಇವ್ಣುನ, “ಯೆಹೂದ್ಯರ್‌ಕಾಹೆತೆ ರಾಜ಼ಖ್ಹಾರು, ಇವ್ಣ-ಇವ್ಣ ಅದ್ಮಿಪರ್ ರಾಜ಼್‌ಭಾರ್‌ ಚ಼ಲಾವಸ್, ಅಜು಼ ಇವ್ಣಾಪರ್ ಅದಿಕಾರ್ ಚ಼ಲಾವವಾಳು, ‘ಅದ್ಮಿಯೇವ್‌ನು ದೋಸ್ತ್’ ಕರಿ ಬೊಲೈಲೇಸ್.
LUK 22:26 ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಮಹಾನ್ ಕರಿ ರ‍್ಹೇಸ್ತೆ ಇವ್ಣೆ ನ್ಹಾನಾವ್‍ನಿ ಮತ್‍ ರ‍್ಹೇವ್ಣು, ಶಾಣು ಕರಿ ರ‍್ಹವಾಳು ಸೇವಕನಿ ಘೋಣಿ ರ‍್ಹೇವ್ಣು.
LUK 22:27 ಕೋಣ್ ಮಹಾನ್? ಖಾಣು ಖಾವನ ಬೆಠೂತೆ ಯೋಕಿ, ಇನಿ ಚಾ಼ಕ್ರಿ ಕರಾವಾಳೊ? ಖಾವನ ಬೆಠೋಸ್ತೆ ಯೋಸ್ ಕಾಹೆಕಿಶು, ಕತೋಬಿ ಮೇ ತುಮಾರಾಮ ಚಾ಼ಕ್ರಿ ಕರಾವಾಳನಿಘೋಣಿ ಛೂ಼.
LUK 22:28 ತುಮೆ ಮಾರಿ ಖ್ಹಾರಿ ಖ್ಹತಾಪ್ಣಿಮ, ಮಾರ ಜೋ಼ಡೆ ರ‍್ಹಯಾಹುಯ.
LUK 22:29 ಮಾರೊ ಬಾ, ಮನ ರಾಜ್ಯನ ಚ಼ಲಾವಾನ ಹಕ್‌ ದಿದೋತೆ ಇಮ್ಮಸ್, ಮೇಬಿ ತುಮೂನ ಅದಿಕಾರ್ ಚ಼ಲಾವಾನ ಹಕ್‌ ದೆವುಸ್‌.
LUK 22:30 ಮಾರಿ ರಾಜ್ಯಮ ತುಮೆ, ಮಾರಿ ಮೇಜ್‌ಪರ್‌ ಖಾಶುಪೀಶು, ಅಜು಼ ಸಿಂಹಾಸನ್‌ಪರ್ ಬೇಶಿನ್, ಇಸ್ರಾಯೇಲ್‌ನ ಭಾರ ಖೂಮ್‍ವಾಳಪರ್ ಅದಿಕಾರ್ ಚ಼ಲಾವ್‌ಶು.
LUK 22:31 ಸೀಮೋನ್, ಸಿಮೋನ್! ಹಂದೇಕ್! ಶೈತಾನ್‍ ತುಮೂನ ಘವ್‌ನ ತೂರಾನಿಘೊಣಿ ಹುಕುಮ್‌ನ ಮಾಂಗಿರಾಖ್ಯೊಸ್.
LUK 22:32 ಕತೋಬಿ ತಾರಿ ವಿಶ್ವಾಸ್ ಕಮ್ ನಾ ಹೋಣುಕರಿ, ಮೇ ತಾರಿ ಬಾರೇಮ ದೇವ್ನ ಪ್ರಾರ್ಥನೆ ಕರಿರಾಖ್ಯೊಸ್ ಸೀಮೋನ್. ಅಜು಼ ತೂ ಮಾರಭಣಿ ಫರಾನ ಬಾದ್‌ಮ, ತಾರ ಭೈಯೇನ ಭಾಲಿ ದೇವ್ಣು” ಕರಿ ಬೋಲ್ಯೊ.
LUK 22:33 ಕತೋಬಿ ಇನೆ ಯೇಸುನ, “ಪ್ರಭು, ಮೇ ತಾರ ಜೋ಼ಡೆ ಜೇಲ್‌ಮ ಜಾ಼ವಾನಾಬಿ ಅಜು಼ ಮರನಾಬಿ ತೈಯಾರ್ ಛೂ಼!” ಕರಿ ಬೋಲ್ಯೊ.
LUK 22:34 ತದೆ ಯೇಸುನೆ ಇನ, “ಪೇತ್ರ, ಆ ರಾತೆ, ತೂ ಮಾರಿ ಬಾರೇಮ, ‘ಆ ಮನ ಮಾಲುಮ್ ಕೊಯ್ನಿ’ ಕರಿ ತೀನ್ ಹಲ್ಲ ಬೋಲಾತೋಡಿ, ಮುರ್‌ಗೊ ಬಾಂಗ್‌ ದಿಶೆ ಕೊಯ್ನಿ, ಕರಿ ಮೇ ತುನ ಬೋಲುಸ್” ಕರಿ ಬೋಲ್ಯೊ.
LUK 22:35 ಅಜು಼ ಯೇಸುನೆ ಇನ ಶಿಷ್ಯರ್‌ನ, “ಮೇ ತುಮೂನ ಚ಼ಂಚಿ, ಬಟ್‌ವೊ ನತರ್‌ಕಿ ಖೋಖ್ಹ್‌ಡಾ ಕೊಯ್ನಿತೆ ಮೋಕ್‌ಲ್ಯೊಥೋತೆ ತದೆ, ತುಮೂನ ಶಾತ್‌ತೋಬಿ ಕಮ್ ಹುಯುಕಿ ಶು? ಕರಿ ಪುಛಾ಼ವಖ್ಹತರ್, ಇವ್ಣೆ, “ಶಾತ್ಬಿ ಕೊಯ್ನಿ” ಕರಿ ಜವಾಬ್‌ ದಿದು.
LUK 22:36 ತದೆ ಯೇಸುನೆ ಇವ್ಣುನ, “ಕತೋಬಿ ಹಮ್ಕೆ, ಕಿನ-ಕಿನಾಕನ ಚ಼ಂಚಿ ನತರ್‌ಕಿ ಬಟ್‌ವೊ ಛಾ಼ಕಿ ಇನ ಪಾಡಿಲೆವೊ; ಅಜು಼ ಕಿನಾಕನ ತಲ್ವಾರ್‌ ಕೊಯ್ನಿಕಿ ಇವ್ಣೆ, ಇವ್ಣು ಹೋಡ್‍ಣಿನ ವೇಚಿನ್, ಏಕ್‌ ತಲ್ವಾರ್‌ನ ಲೀಲೆವ್ಣು.
LUK 22:37 ಶನಕತೊ, ಪ್ರವಾದಿಖ್ಹಾರು ಮಾರಿ ಬಾರೇಮ ಲೀಖೈರ‍್ಹೂತೆ ಇಮ್‌, ಅಪರಾದಿಮ ಏಕ್‌ ಜ಼ಣಾನಿಮತ್ ಮನ ಸೋಚ್ಯು, ಕರಿ ಬೋಲಾನು ಚಾ಼ಲ್ನುತೆ, ಇನಖ್ಹಾಜೆ ಯೋ ಪೂರ ಹುವಾನ ಆಯು.‌
LUK 22:38 ಶಿಷ್ಯರ್‌ನೆ ಇನ, “ಪ್ರಭು, ಹಂದೇಕ್‌! ಹಜ್ಜಾ಼ ಬೇ ತಲ್ವಾರ್‌ ಛಾ಼” ಕರಿ ಬೋಲ್ಯು, ತದೆ ಯೇಸುನೆ, “ಎತ್ರು ಬಶ್‌” ಕರಿ ಬೋಲ್ಯೊ.
LUK 22:39 ಯೇಸು ಯೆರೂಸಲೇಮ್‌ನ ಮ್ಹೇಲಿನ್, ಯೋ ಜಾ಼ತೊಥೋತೆ ಇಮ್ಮಸ್, ಆಲಿವ್ ಪಹಾಡ್‌ನ ಗಯೊ, ಶಿಷ್ಯರ್‌ಬಿ ಇನ ಕೇಡೆ ಗಯ.
LUK 22:40 ಯೋ ಝ಼ಗೋಪರ್‌ ಆವಾದಿನ್, ಯೇಸುನೆ ಇವ್ಣುನ, “ತುಮೆ ಶೋದನೆಮ ಪಡ್ನುನಾತೆ ಇಮ್‌, ಪ್ರಾರ್ಥನೆ ಕರೊ” ಕರಿ ಬೋಲ್ಯೊ.
LUK 22:41 ಅನ ಬಾದ್‌ಮ ಯೇಸು ಇವ್ಣುನ ಮ್ಹೆಂದಿನ್, ಬಂಡೊ ಫೇಕಎವ್ಡಿ ದೂರ್ ಜೈ಼ನ್, ಗುಡ್‍ಘ್ಯ ಟೇಕಿನ್ ಪ್ರಾರ್ಥನೆ ಕರ‍್ಯೊ,
LUK 22:42 “ಬಾ, ತಾರಿ ಮರ್ಜಿ ಉಶೇತೊ, ಆ ಖ್ಹತಾಪ್ಣಿನಿ ಕಟೋರಿನ, ಮಾರೇಥಿ ದೂರ್ ಹಟಾವ್‌; ತೋಬಿ, ಮಾರಿ ಮರ್ಜಿ ಕಾಹೆ, ತಾರಿ ಮರ್ಜಿಸ್‌ ಹುವಾದೆ” ಕರಿ ಬೋಲಿನ್ ಪ್ರಾರ್ಥನೆ ಕರ‍್ಯೊ.
LUK 22:43 ತದೆ ಪರಲೋಕ್‌ಥೊ ಏಕ್‌ ಧೂತ ಐನ್, ಯೇಸುನ ದೆಖೈನ್, ಇನ ಭಾಲಿ ದಿದೊ.
LUK 22:44 ಯೋ ಘಣಿ ದುಖ್‌ಥಿ ಬಿಜೂ಼ಬಿ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನು ಪಶುನೊ ಲ್ಹೋಯಿನು ಬೂಂದಾವ್‍ನಿಮತ್‌ ಜ಼ಮೀನ್‌ಪರ್ ಪಡ್ಯು.
LUK 22:45 ಪ್ರಾರ್ಥನೆಮಾಥು ಯೇಸು ಉಠೀನ್, ಪಾಛು಼ಫರಿ ಇನ ಶಿಷ್ಯರ್‌ಕನ ಆಯಿನ್, ದುಖ್‌ಥಿ ಭರೈನ್, ಇವ್ಣೆ ಖ್ಹುತೂಥೂತೆ ದೇಖಿನ್‌,
LUK 22:46 ಯೇಸುನೆ ಇವ್ಣುನ, “ತುಮೆ ಶನ ಖ್ಹುತಾಸ್? ಉಪ್ಪರ್ ಉಠೊ, ಅಜು಼ ತುಮೆ ಶೋದನೆಮ ಪಡ್ನುನಾತೆ ಇಮ್‌ ಪ್ರಾರ್ಥನೆ ಕರೊ” ಕರಿ ಬೋಲ್ಯೊ.
LUK 22:47 ಯೇಸು ವಾತೆ ಬೋಲುಕರಾನಿ ವಖ್ಹತ್‌ಮಾಸ್‌, ಅದ್ಮಿನಿ ಏಕ್‌ ಭೀಡ್ ಹಿಜ್ಜಾ಼ ಆಯಿ. ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ, ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲ್ತೊ ಉಳ್ಯಾವ್ತೋಥೊ. ಯೋ ಯೇಸುನ ಬುಚ್ಚಾ಼ ದ್ಯವಾನಖ್ಹಾಜೆ ಖನ್ನೆ ಆಯೊ.
LUK 22:48 ತದೆ ಯೇಸುನೆ ಇನ, “ಯೂದ, ಬುಚ್ಚಾ಼ದೀನ್‌, ಧೋಕೇಥಿ ಅದ್ಮಿನೊ ಛಿಯ್ಯಾನ ಧರಿದ್ಯವಾನ ಆಯೋಕಿ ಶು?” ಕರಿ ಬೋಲ್ಯೊ.
LUK 22:49 ಯೇಸುನ ಜೋ಼ಡ್ಮ ಥಾತೆ ಶಿಷ್ಯರ್‌ಖ್ಹಾರು ಚಾ಼ಲ್‌ಶೆತೆ ಇನ ದೇಖಿನ್‌, ಯೇಸುನ, “ಪ್ರಭು, ಹಮೆ ಹಮಾರು ತಲ್ವಾರ್‌ಥಿ ಮಾರಿಯೇಕಿ ಶು?” ಕರಿ ಪುಛಾ಼ಯು.
LUK 22:50 ಅವ್ಣಾಮ ಏಕ್‌ ಜ಼ಣೊ, ತಲ್ವಾರ್‌ಥಿ ಮಾರಿನ್, ಗಲ್‌ಢಯಾಜಕ್‌ನ ಆಳ್‌ನ ಖಾವಿ ಬಾಜು಼ನ ಕಾನ್ನ ಕತ್ರಿನಾಖ್ಯೊ.
LUK 22:51 ಕತೋಬಿ ಯೇಸುನೆ ಇನ, “ಅತ್ರೇಸ್ ಬಶ್‌!” ಕರಿ ಬೋಲಿನ್, ಯೋ ಆಳ್‌ನು ಕಾನ್ನ ಛೀಮಿನ್‌, ಇನ ಅಛ್ಛು಼ ಕರ‍್ಯೊ.
LUK 22:52 ಬಾದ್‌ಮ ಯೇಸುನೆ ಇನ ಧರಾನ ಆಯೂತೆ, ಮಹಾಯಾಜಕನ, ಮಂದಿರ್‌ನ ಕಾವ್ಲಿ ಕರಾವಾಳ ದಂಡ್‌ ದಳ್‌ವಾಯಿನ ಅಜು಼ ಸಭೆನ ಶಾಣಾವ್‍ನಾಬಿ, “ಚೋ಼ರ್‌ನ ಧರಾನಿಘೋಣಿ,ತಲ್ವಾರೆ, ಲಠ್ಠ ಪಳ್ಳಿನ್‌ ಮನ ಧರಾನ ಆಯಾಕಿ ಶು?
LUK 22:53 ಮೇ ದನ್‍ರೋಜ಼್ ದೇವ್ನಿ ಮಂದಿರ್‌ಮ ತುಮಾರ ಜೋ಼ಡೆ ಥೋತೆ ತದೆ, ತುಮೆ ಮನ ಧರ‍್ಯಾಕೊಯ್ನಿ. ಕತೋಬಿ ಆ ತುಮಾರಿ ವಖ್ಹತ್, ಅಂಧಾರನಿ ಶಕತ್ನ ಅದಿಕಾರ್ ಕರಾನಿ ವಖ್ಹತ್” ಕರಿ ಬೋಲ್ಯೊ.
LUK 22:54 ಇವ್ಣೆ ಯೇಸುನ ಧರೀನ್, ಗಲ್‌ಢಯಾಜಕ್‌ನ ಘರ್‌ನ ಮಹಿ ಲೀಗಯು. ಅಜು಼ ಪೇತ್ರ ದೂರ್‌ಥೊ ಇವ್ಣ ಪೀಠೆ-ಪೀಠೆ ಗಯೊ.
LUK 22:55 ಖ್ಹಾಮ್ಣೆನಿಝ಼ಗೋನ, ಇಚ಼್‌ಮ ಆಗ್ ಲಗಾಡಿನ್, ಇನ ಅಶ್‌ಪಿಶ್‌ ಬೆಠುಥೂತೆ, ಅದ್ಮಿನ ಜೋ಼ಡೆ ಪೇತ್ರಬಿ ಬೇಶಿಗಯೊ.
LUK 22:56 ಪೇತ್ರ ಹಿಜ್ಜಾ಼ ಉಜಾ಼ಳಾಮ ಬೆಠಿತೆ, ಏಕ್‌ ಜ಼ಣಿ ಆಳ್‌ನೆ ಠರ್‌ಖೈ ದೇಖಿನ್‌, “ಆಬಿ ಯೇಸುನ ಜೋ಼ಡೆ ಥೊ!” ಕರಿ ಬೋಲಿ.
LUK 22:57 ಕತೋಬಿ ಪೇತ್ರನೆ, “ಮನ ಯೋ ಮಾಲುಮಸ್ ಕೊಯ್ನಿಲಿ, ಬಾಯಿ!” ಕರಿ ಬೋಲ್ಯೊ.
LUK 22:58 ಜ಼ರ ಘಡಿನ ಬಾದ್‌ಮ, ಏಕ್‌ ಜ಼ಣಾನೆ ಪೇತ್ರನ ದೇಖಿನ್‌, “ತೂಬಿ ಇವ್ಣಾಮ ಏಕ್‌ ಜ಼ಣೊ ಹುಯಿರ‍್ಹೋಸ್” ಕರಿ ಬೋಲ್ಯು. ಕತೋಬಿ ಪೇತ್ರನೆ “ಮೇ ಕಾಹೇಲ ಬಾಬ!” ಕರಿ ಜವಾಬ್‌ ದಿದೊ.
LUK 22:59 ಅಜು಼ ಏಕ್‌ ಘಂಟಾನ ವಖ್ಹತ್‌ಮ, ಅಜೇಕ್‌ ಜ಼ಣಾನೆ, “ಖ್ಹಾಚಮಾಬಿ ಆಬಿ ಯೇಸುನ ಜೋ಼ಡೆ ರ‍್ಹಯೊಹುಯೊ, ಶನಕತೊ ಆಬಿ ಗಲಿಲಾಯವಾಳೊಸ್‌ನಿ!”
LUK 22:60 ಕತೋಬಿ ಪೇತ್ರನೆ, “ತೂ ಶಾತ್‌ ಬೋಲುಕರಾಸ್ತೆಕಿ ಮನ ಮಾಲುಮ್‌ ಕೊಯ್ನಿ?” ಕರಿ ಜ಼ವಾಬ್‌ದಿದೊ. ಯೋ ಬೋಲುಕರಾತೆ ವಖ್ಹತ್‌ಮಾಸ್‌, ಮುರ್‌ಗೊ ಬಾಂಗ್‌ ದಿದು.
LUK 22:61 ಪ್ರಭುನೆ ಪೀಠೆ ಫರಿನ್, ಪೇತ್ರನಸ್‌ ಠರ್‌ಕಿ ದೇಖ್ಯೊ, ತದೆ ಪೇತ್ರನೆ ಇನ, ಪ್ರಭು “ಮುರ್‌ಗೊ ಬಾಂಗ್‌ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ, ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊಥೋತೆ ವಾತೆನ ಯಾದ್ ಕರಿಲಿನ್,
LUK 22:62 ಭಾರ್‌ಜೈ಼ನ್‌, ಖ್ಹಡ್‌ಕ್ಯಾ ಭರಿನ್ ರೋಯೊ.
LUK 22:63 ಯೇಸುನ ಕಾವ್ಲಿ ಕರುಕರ್ತುಥೂತೆ ಇವ್ಣೆ, ಇನಿ ನಕ್ಲೆ ಕಾಡ್ಯು ಅಜು಼ ಇನ ಮಾರ‍್ಯು.
LUK 22:64 ಇನ ಮ್ಹೋಡಾಪರ್ ಲುಂಗ್ಡು ನಾಖಿನ್, “ತುನ ಮಾರ‍್ಯೂತೆ ಕೋಣ್? ಕರಿ ಹಮೂನ ಪ್ರವಾದ್‌ನೆ ಬೋಲ್” ಕರಿ ಬೋಲ್ಯು.
LUK 22:65 ಅಜು಼ ಇನಿಬಾರೇಮ ಕೈಏಕ್ ದೂಷಣೆ ಬೋಲಿನ್, ಖ್ಹರಮ್‌ ಕಾಡ್ಯು.
LUK 22:66 ವ್ಹಾಣು ಹುವ್ವಾದೀನ್, ಶಾಣುಖ್ಹಾರು ಅಜು಼ ಮಹಾಯಾಜಕ, ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಖ್ಹಾರು ಎಕ್ಟುಹುಯಿನ್, ಯೇಸುನ ನ್ಯಾವ್ ಫೇಡಾನಿಝ಼ಗೊಕನ ಲೀಗಯು.
LUK 22:67 “ತೂ ಕ್ರಿಸ್ತ ಉಶೇತೊ, ಹಮೂನ ಬೋಲ್?” ಕರಿ ಬೋಲ್ಯು. ತದೆ ಯೇಸುನೆ ಇವ್ಣುನ, “ಮೇ ಬೋಲ್ಯೋತೊ, ತುಮೆ ನಂಬಾಕೊಯ್ನಿ” ಕರಿ ಜವಾಬ್‌ ದಿದೊ.
LUK 22:68 ಅಜು಼, “ಮೇ ತುಮೂನ ಶಾತ್‌ತೋಬಿ ಬೋಲಿಲಿದೋತೊ ತುಮೆ ಜವಾಬ್‌ ಕೋ ದಿಶುನಿ.
LUK 22:69 ಹಂಕೇಥು, ಕತೋಬಿ ಅದ್ಮಿನೊ ಛಿಯ್ಯೊ, ಮಹಾನ್ ಶಕತ್‌ವಾಳೊ ದೇವ್ನ ಖಾವಿಬಾಜು಼ಮ ಬೆಠೊರ‍್ಹೀಶೆ” ಕರಿ ಬೋಲ್ಯೊ.
LUK 22:70 ಇವ್ಣೆ ಖ್ಹಾರೂಸ್, “ಇಮ್‍ಕತೊ, ತೂ ದೇವ್‌ನೊ ಛಿಯ್ಯೊಕಿ ಶು?” ಕರಿ ಪುಛಾ಼ಯು. ತದೆ ಯೇಸುನೆ ಇವ್ಣುನ, “ಮೇ ಯೋಸ್ ಕರಿ ತುಮೇಸ್ ಬೋಲ್ಯಾನಿ” ಕರಿ ಜವಾಬ್‌ ದಿದೊ.
LUK 22:71 ಅನ ಖ್ಹಮ್‌ಜಿನ್‌ ಇವ್ಣೆ, “ಅಪ್ಣ ಬಿಜಿ ಖೆವಿ ಸಾಕ್ಷಿನಿ ಜ಼ರೂರತ್ ಕೊಯ್ನಿ! ಅಪ್ಣೆ ಖ್ಹುದ್ ಅನೆ ಬೋಲ್ಯೋತೆ ಇನ ಖ್ಹಮ್‌ಜ್ಯಾನಿ!” ಕರಿ ಬೋಲ್ಯು.
LUK 23:1 ಹಿಜ಼್ಜಾ ಎಕ್ಟು ಹುಯಿರ‍್ಹುಥೂತೆ ತಮಾಮ್‌ ಅದ್ಮಿ ಉಠೀನ್, ಯೇಸುನ ಪಿಲಾತಕನ ಬುಲೈಲಿಗಯು.
LUK 23:2 ಹಿಜ್ಜಾ಼ ಇವ್ಣೆ ಯೇಸುಪರ್, “ಆ ಅದ್ಮಿ, ಅಪ್ಣ ಅದ್ಮಿ ಖ್ಹಾರಾನ ಗಲತ್‌ ವಾಟ್‌ಪರ್ ಲೀವಳ್ಯೊಜಾ಼ಸ್, ಇವ್ಣುನ, ‘ತುಮೆ ಕೈಸರ್‌ನ ಶುಂಕ ನಕೊ ಭಾಂದೊ’ ಕರಿ ಬೋಲಸ್, ಅತ್ರೇಸ್ ಕಾಹೆತೆ ಇನು ಯೋಸ್, ‘ಮೇ ಕ್ರಿಸ್ತ ಕರಿ ಏಕ್‌ ರಾಜ಼’ ಕರಿ ಬೋಲ್ತೊಫಂಡಾಸ್” ಕರಿ ಬೋಲಿನ್ ಗಲತ್‌ ಲಗಾಡ್ಯು.
LUK 23:3 ಪಿಲಾತನೆ ಯೇಸುನ, “ತೂ ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಪುಛಾ಼ಯೊ, ತದೆ ಯೇಸುನೆ ಇನ, “ತುನೇಸ್ ಬೋಲ್ಯೋನಿ” ಕರಿ ಜವಾಬ್‌ ದಿದೊ.
LUK 23:4 ತದೆ ಪಿಲಾತನೆ ಮಹಾಯಾಜಕರ್‌ ಅಜು಼ ಅದ್ಮಿನಿ ಭೀಡ್ನ, “ಆ ಅದ್ಮಿಮ ಮನ ಶನೀಶ್ ಗಲತ್‌ ಕೋ ದೆಖಾಯುನಿ” ಕರಿ ಬೋಲ್ಯೊ.
LUK 23:5 ಕತೋಬಿ ಇವ್ಣೆ, “ಯೂದಾಯನು ಖ್ಹಾರಸ್ ಅದ್ಮಿನ, ಆ ವಚನ್ನ ಬೋಲಿದೇತೊಹುಯಿನ್‌, ಇವ್ಣಾಮ ಕಲ್ಹಾಗಟ್ ನಾಖಿರಾಖ್ಯೋಸ್. ಅನೆ ಗಲಿಲಾಯಾಥು ಶುರು ಕರೀನ್, ಹಮ್ಕೆ ಹಜ಼್ಜಾ ಐರ‍್ಹೋಸ್ತೆ” ಕರಿ ಬಿಜೂ಼ಬಿ ಘಟ್‍ಥಿ ಬೋಲ್ಯು.
LUK 23:6 ಅನ ಖ್ಹಮ್‌ಜಿನ್‌ ಪಿಲಾತನೆ, “ಆ ಅದ್ಮಿ ಗಲಿಲಾಯವಾಳೊಕಿ ಶು? ಕರಿ ಫುಛಾ಼ಯೊ.
LUK 23:7 ಯೇಸು ಹೆರೋದ ಅದಿಕಾರ್ ಚ಼ಲಾವ್‍ಕರಾಸ್ತೆ ಗಾಮ್‌ವಾಳೊ, ಕರಿ ಪಿಲಾತನ ಮಾಲುಮ್ ಪಡ್‌ತಾನ, ಯೇಸುನ ಹೆರೋದಕನ ಮೋಕ್‌ಲ್ಯೊ, ಯೋ ದನ್ಮ ಹೆರೋದ ಯೆರೂಸಲೇಮ್ಮಾಸ್ ಥೊ.
LUK 23:8 ಯೇಸುನ ದೇಖಿನ್‌, ಹೆರೋದನ ಘಣು ಖ್ಹುಶಿಹುಯು. ಶನಕತೊ, ಇನೆ ಯೇಸುನಿ ಬಾರೇಮ ಘಣು ಖ್ಹಮ್‌ಜಿರಾಖ್ಯೊಥೊ, ಇನಖ್ಹಾಜೆ ಘಣ ದನ್‌ಥು, ಇನ ದೇವ್ಣುಕರಿ ಥೊ, ಯೇಸು ಕೆಹುತೋಬಿ ಅದ್ಭುತ್ ಕರಾತೊ, ಇನ ದೇಕ್ಣು ಕರಿ ಆಖ್ಹ್‌ಥು.
LUK 23:9 ತದೆ ಹೆರೋದನೆ ಯೇಸುನ ಕೆತ್ರು ಫುಛಾ಼ಯೊತೋಬಿ, ಯೇಸುನೆ ಇನ ಜವಾಬ್‌ ಕೋ ದಿದೋನಿ.
LUK 23:10 ಗಲ್‌ಢಯಾಜಕರ್‌ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾವಾಳು ಶಾಸ್ತ್ರಿಯೆ ಭೀರಿನ್‌, ಯೇಸುನಿ ವಿರೋದ್ ನೀಕೊಂತೇಸ್ ವಾತೆನ ಬೋಲುಕರ್ತೂಥು.
LUK 23:11 ಹೆರೋದ ಅಜು಼ ಇನು ಸಿಪಾಯಿಖ್ಹಾರು ಯೇಸುನಿ ಛಿಂಘಾವ್ಣಿ ಕರೀನ್, ನಕ್ಲೆ ಕಾಡ್ಯು. ಅಜು಼ ಘಣು ಅಛ್ಛು಼ ಝ಼ಗ್ಗಾನ ಫೇರೈನ್, ಪಾಛು಼ ಪಿಲಾತಕನ ಮೋಕ್ಲಿದಿದೊ.
LUK 23:12 ಯೋಸ್‌ ದನ್ನೆ ಹೆರೋದ ಅಜು಼ ಪಿಲಾತ ದೋಸ್ತ್‌ ಬಣ್ಯಾ. ಅನೇಥಿ ಅಗಾಡಿ ಇವ್ಣೆ ದುಶ್‌ಮನ್‌ ಹುಯಿರ‍್ಹಾಥ.
LUK 23:13 ತದೆ ಪಿಲಾತನೆ, ಮಹಾಯಾಜಕರ್‌ನ, ಅದಿಕಾರಿನ ಅಜು಼ ಅದ್ಮಿ ಖ್ಹಾರಾವ್‌ನ ಏಕ್‌ದಮ್ ಬುಲೈನ್,
LUK 23:14 ಇವ್ಣುನ, “ತುಮೆ ಆ ಅದ್ಮಿನ ಮಾರಕನ ಲೈನ್‌, ಅದ್ಮಿ ಖ್ಹಾರಾನ ಗಲತ್‌ ವಾಟ್‌ಪರ್ ಚ಼ಲಾವ್‍ಕರಾಸ್‌ ಕರಿ ಬೋಲ್ಯ, ಕತೋಬಿ ಮೇ ಅನ ತುಮಾರ ಖ್ಹಾಮ್ಣೆಸ್ ವಿಚಾರ್ ಕರ‍್ಯೊತೋಬಿ, ತುಮೆ ಲಗಾಡ್ಯತೆ ಗಲ್ತಿಮ, ಏಕ್‌ಬಿ ಆನಾಮ ಮನ ಮಳ್ಯುಕೊಯ್ನಿ.
LUK 23:15 ಹೆರೋದನಾಬಿ ಅನಾಮ ಗಲತ್‌ ಕೋ ದೆಖಾಯುನಿ, ಇನಖ್ಹಾಜೆಸ್‌, ಇನೆ ಅನ ಪಾಛು಼ ಅಪ್ಣಕನ ಮೋಕ್‌ಲ್ಯೊತೆ. ಮರಣ್ ದಂಡ್‌ ಖಾವಾಖ್ಹರ್‌ಕು ಗಲತ್‌ ಯೇಸುನೆ ಕರಿರಾಖ್ಯೊಕೊಯ್ನಿ.
LUK 23:16 ಅನಖ್ಹಾಜೆ, ಮೇ ಅನ ಕೊಳ್ಡೇಥಿ ಮರೈನ್, ಮ್ಹೆಂದೆವುಸ್” ಕರಿ ಬೋಲ್ಯೊ.
LUK 23:17 ಪಸ್ಕ ಪೂಜಾ಼ನಿ ವೇಳ್ಮ ಅದ್ಮಿಖ್ಹಾರು ಬೋಲಿಲೇಸ್ತೆ ಏಕ್‍ಜ಼ಣಾನ ಖ್ಹಾರ್ಕೊಟ್‌ಮಾಥು ಪಿಲಾತ ಭಾರ್‌ ಕಾಡಿಮ್ಹೇಲ್‍ನು ಪಡ್ಯುಥು.
LUK 23:18 ಕತೋಬಿ ಇವ್ಣೆ ಜೋ಼ರೇಖ್ಹು ಚಿಕ್ರಿನ್, “ಅನ ಮರೈನಾಕ್‌! ಹಮಾರಖ್ಹಾಜೆ ಬರಬ್ಬನ ಮ್ಹೇಲಿದೆ” ಕರಿ ಬೋಲ್ಯು.
LUK 23:19 ಖ್ಹಯೇರ್‌ಮ ಚಾ಼ಲ್ಯುಥೂತೆ ಕಲ್ಹಾಗಟ್‍ನಟೇಕೆ ಅಜು಼ ಅದ್ಮಿನ ಮರ್‌ನಾಖ್ಯುತೆ ಇನಖ್ಹಾಜೆ ಬರಬ್ಬಾನ ಜೇಲ್‌ಮ ಕೋಂಡಿ ಘಾಲಿರಾಖ್ಯುಥು.
LUK 23:20 ಪಿಲಾತನೆ ಯೇಸುನ ಛೋ಼ಡಾವ್‍ಣು ಕರಿ ಬಿಜು಼ ಪಾಛು಼ ಇವ್ಣ ಜೋ಼ಡೆ ವಾತೆ ಬೋಲ್ಯೊ.
LUK 23:21 ಕತೋಬಿ ಇವ್ಣೆ, “ಇನ ಶಿಲ್‍ಬೆಪರ್‌ ನಾಕ್! ಶಿಲ್‌ಬೆಪರ್ ನಾಕ್!” ಕರಿ ಚಿಕ್ರುಕರ್ತುಥು.
LUK 23:22 ಕತೋಬಿ ಪಿಲಾತನೆ ತೀನ್ನೆಹಲ್ಲ, “ಶನ? ಆ ಖಾರಾಬ್‌ ಶಾತ್‌ ಕರಿರಾಖ್ಯೋಸ್? ಮರಣ್ ದಂಡ್‌ ದೆವಾಖ್ಹರ್‌ಖ್ಹು ಗಲತ್‌ ಅನಾಮ ಮನ ದೆಖಾಯು ಕೊಯ್ನಿ! ಅನಖ್ಹಾಜೆ, ಮೇ ಅನ ಕೊಳ್ಡೇಥಿ ಮರೈನ್, ಮ್ಹೆಂದೆವುಸ್” ಕರಿ ಇವ್ಣುನ ಬೋಲ್ಯೊ.
LUK 23:23 ಕತೋಬಿ, ಇವ್ಣೆ ಬಿಜೂ಼ಬಿ ಜೋ಼ರೇಥಿ ಬಳೇಳ್‌ತುಹುಯಿನ್, ಯೇಸುನ ಶಿಲ್‌ಬೆಪರ್ ನಖಾವ್ಣು ಕರಿ ಬೋಲ್ಯು. ಖ್ಹರ್ತಿಮ ಇವ್ಣಿ ಚಿಕ್ರಾಣಸ್ ಜೂತಿಗೈ.
LUK 23:24 ತದೆ ಪಿಲಾತನೆ ಇವ್ಣೆ ಬೋಲಿಲಿದುತೆ ಇಮ್ಮಸ್ ಹುವಾದೆ ಕರಿ ತೀರ್ಮಾನ್ ಕರೀನ್,
LUK 23:25 ಕಲ್ಹಾಗಟ್ ಅಜು಼ ಅದ್ಮಿನ ಮರ್‌ನಾಖ್ಯುತೆ ಇನಾಟೇಕೆ, ಜೇಲ್‌ಮ ಕೋಂಡೈ ಘಲೈರ‍್ಹೂಥೂತೆ ಬರಬ್ಬನ ಮ್ಹೇಲಿದಿನ್, ಅದ್ಮಿನಿ ಮರ್ಜಿನಿಘೋಣಿ, ಯೇಸುನ ಇವ್ಣ ಹಾತ್‌ಮ ದಿನಾಖ್ಯೊ.
LUK 23:26 ಸಿಪಾಯಿಖ್ಹಾರು ಯೇಸುನ ಬುಲೈಲಿನ್ ವಳ್ಯುಜಾ಼ತುಥೂತೆ ವಖ್ಹತ್‌ಮ, ಖೇತರ್‌ಥು ವಳ್ಯಾವ್‍ತೊಥೋತೆ ಸಿರೇನ್ ಖ್ಹಯೇರ‍್ನೊ ಸೀಮೋನ್ನ ಧರೀನ್, ಇನಾಪರ್ ಶಿಲ್‌ಬೇನ ನಾಖಿನ್, ಇನ ಪಳ್ಳಿನ್‌, ಯೇಸುನ ಪೀಠೆ ಆವಾನಿಘೋಣಿ ಕರ‍್ಯು.
LUK 23:27 ಅದ್ಮಿನಿ ಮೋಟಿ ಭೀಡ್ ಇನ ಪೀಠೆಆಯಿ; ಇವ್ಣಾಮ ಥೋಡಿ ತಯೇಡಾಬಿ ಥಿಯೆ, ಇವ್ಣೆ ಯೇಸುನಖ್ಹಾಜೆ ಛಾ಼ತಿ ಕೂಟ್‌ತುಹುಯಿನ್, ರೋವ್‌ತಿ ಐಯ್ಯೆ.
LUK 23:28 ತದೆ ಯೇಸುನೆ ಪೀಠೆ ಫರೀನ್ ಇವ್ಣುನ, “ಯೆರೂಸಲೇಮ್‌ನಿ ತಿರಿಯಾವೊ! ಮಾರಖ್ಹಾಜೆ ನಕೊ ರೋವೊ, ಕತೋಬಿ ತುಮಾರಖ್ಹಾಜೆ ಅಜು಼ ತುಮಾರ ಲಡ್ಕಾವ್‍ನಖ್ಹಾಜೆ ರೋವೊ.
LUK 23:29 ಶನಕತೊ ಅಮ್ನದನ್‌ ಖ್ಹಾರ ವಳ್ಯಾವಾಸ್ಕಿ, ಯೋ ದನ್ಮ ಅದ್ಮಿಖ್ಹಾರು, ‘ವಾಂಝ಼್‌ಣಿ ಅಜು಼ ಬೇಜೂನಿ ಹುಯಿಕೊಂತೆ ಅಜು಼ ದೂದ್ ಪಿಡೈಕೊಂತೆ ತಯೇಡಾಸ್ ಧನ್ಯ’ ಕರಿ ಬೋಲ್‌ಶೆ.
LUK 23:30 ಯೋ ದನ್ಮ ಅದ್ಮಿ, ‘ಪರ್ಭತ್‌ ಹಮಾರಪರ್ ಪಡ್! ಪಹಾಡ್ ಹಮೂನ ಢಾಪಿಲೆ!’ ಕರಿ ಬೋಲ್‌ಶೆ.
LUK 23:31 ಝಾ಼ಡು ಹರ‍್ಯು ರ‍್ಹವಾನಿ ವಖ್ಹತ್‌ಮಾಸ್‌, ಅಮ್ನು ಖ್ಹಾರು ಹುಯೂತೊ, ಖ್ಹುಕೈ ಜಾ಼ಶೇತೆ ವಖ್ಹತ್‌ಮ ಶಾತ್ ಉಶೆ?” ಕರಿ ಬೋಲ್ಯೊ.
LUK 23:32 ಯೇಸುನ ಜೋ಼ಡೆಸ್ ಬಿಜ಼ ಬೇ ಜ಼ಣಾನಾಬಿ ಮಾರ‍್ನು ಕರಿ ಲೀವಳ್ಯುಜಾ಼ತುಥು, ಇವ್ಣೆ ಭೇ ಜ಼ಣಾಬಿ ಅಪರಾದಿ ಹುಯಿರ‍್ಹಾಥ.
LUK 23:33 ಇವ್ಣೆ ‘ಖೋಪ್ರಿ’ ಕರಿ ಬೋಲಾನಿ ಝ಼ಗೋಕನ ಐನ್, ಹಿಜ್ಜಾ಼ ಯೇಸುನ ಶಿಲ್‌ಬೆಪರ್ ಮಾರ‍್ಯು, ಅಜು಼ ಯೋ ಬೇ ಅಪರಾದಿಮ ಏಕ್‌ ಜ಼ಣಾನ ಖಾವಿ ಬಾಜೂ಼ಮ ಅಜು಼ ಬಿಜೇಕ್‌ ಜ಼ಣಾನ ಡಾವಿ ಬಾಜೂ಼ಮ ಶಿಲ್‌ಬೆಪರ್ ಮಾರ‍್ಯು.
LUK 23:34 ತದೆ ಯೇಸುನೆ, “ಬಾ, ಅವ್ಣುನ ಮಾಪ್‌ಕರ್‌! ಅವ್ಣೆ ಶಾತ್‌ ಕರುಕರಸ್ ಕರಿ ಅವ್ಣುನಾಸ್‌ ಮಾಲುಮ್‌ ಕೊಯ್ನಿ” ಕರಿ ಬೋಲ್ಯೊ. ಸಿಪಾಯಿಖ್ಹಾರು ಚೀಟಿ ನಾಖಿನ್, ಯೇಸುನ ಲುಂಗ್ಡಾವ್‍ನ ಇವ್ಣ-ಇವ್ಣಾಮಸ್ ವಾಟ ಪಾಡಿಲಿದು.
LUK 23:35 ಅದ್ಮಿಖ್ಹಾರು ಭೀರಿನ್‌, ಯೆಹೂದ್ಯರ್‌ನ ಅದಿಕಾರಿಖ್ಹಾರು ಯೇಸುನಿ ನಕ್ಲೆ ಕಾಡುಕರ್ತುಥೂತೆ ಇನ ದೇಖುಕರ್ತುಥು. ಇವ್ಣೆ, “ಅನೆ ಬಿಜಾ಼ನ ಬಚಾ಼ಡ್ಯೊ, ಯೋ ದೇವ್ನೆ ಚೂ಼ಣ್ಯೋತೆ ಕ್ರಿಸ್ತ ಉಶೇತೊ, ಇನು ಯೋಸ್‌ ಬಚಾ಼ಡಿಲ್ಯವಾದೆ! ಕರಿ ಬೋಲ್ಯು.
LUK 23:36 ಶಿಪಾಯಿ ಖ್ಹಾರುಬಿ ಯೇಸುನಿ ನಕ್ಲೆ ಕಾಡ್ಯು; ಇವ್ಣೆ ಯೇಸುನ ಖನ್ನೆ ಐನ್, ಕಮ್ ಮೋಲ್ನು ಕಂದಾಯುಹುಯು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದೀನ್,
LUK 23:37 “ತೂ ಯೆಹೂದ್ಯರ್‌ನೊ ರಾಜಾ಼ ಉಶೇತೊ, ತಾರು ತೂಸ್ ಬಚಾ಼ಡಿಲೆ” ಕರಿ ಬೋಲ್ಯು.
LUK 23:38 ಯೇಸುನಿ ಶಿಲ್‌ಬೆನ ಉಪ್ಪರ್, “ಆ ಯೆಹೂದ್ಯರ್‌ನೊ ರಾಜ಼” ಕರಿ ಲೀಖೈರ‍್ಹೂಥು.
LUK 23:39 ಹಿಜ್ಜಾ಼ ಶಿಲುಬೆಪರ್ ಠಂಗೈರಾಖ್ಯುಥೂತೆ ಅಪರಾದಿಮ ಏಕ್‌ ಜ಼ಣು ಯೇಸುನಿ ನಕ್ಲೆ ಕಾಡ್ತೊಹುಯಿನ್‌, “ತೂ ಕ್ರಿಸ್ತ ಕಾಹೆಕಿ ಶು? ಇಮ್‍ಕತೊ, ತೂಬಿ ಬಚಿ ಜಾ಼ ಹಮುನಾಬಿ ಬಚಾ಼ಡ್‍!” ಕರಿ ಬೋಲ್ಯೊ.
LUK 23:40 ಕತೋಬಿ ಬಿಜೇಕ್‌ ಜ಼ಣಾನೆ ಇನ ಗುರ್‌ಕೈನ್, “ತುನ ದೇವ್‌ನೂ ಡರ್‌ ಕೊಯ್ನಿಕಿ ಶು? ತುನಾಬಿ ಇಮ್ನಿಸ್ ನಿಶತ್ ಮಳಿರ‍್ಹೀಸ್‌ನಿ.
LUK 23:41 ಅಪ್ಣುನತೋಬಿ, ನಿಶತ್ ಮಳಿರ‍್ಹೀಸ್ತೆ ಇನಾಮ ನ್ಯಾವ್‌ ಛಾ಼; ಶನಕತೊ ಅಪ್ಣೆ ಕರ‍್ಯಾತೆ ಗಲತ್‌ನಖ್ಹಾಜೆ, ಅಪ್ಣುನ ನಿಶತ್ ಮಳಿರ‍್ಹಿಸ್‌. ಕತೋಬಿ ಅನೆ ಶನೀಬಿ ಗಲತ್‌ ಕೋ ಕರ‍್ಯೋನಿ!”
LUK 23:42 ಅಜು಼ ಇನೆ ಯೇಸುನ, “ಯೇಸು, ತೂ ರಾಜ್ಯಲೀನ್ ಆವಾನಿ ವಖ್ಹತ್‌ಮ, ಮನ ಯಾದ್ ಕರಿಲಿಜೊ!” ಕರಿ ಬೋಲ್ಯೊ.
LUK 23:43 ತದೆ ಯೇಸುನೆ ಇನ, “ಮೇ ತುನ ಖ್ಹಾಚ ಬೋಲುಸ್ಕಿ, ಹಮ್ಕೇಸ್ ತೂ ಮಾರ ಜೋ಼ಡೆ ಸೊರ್ಗಾಮ ರ‍್ಹೀಶ್” ಕರಿ ಬೋಲ್ಯೊ.
LUK 23:44 ತದೆ ಧೊಪಾರ್‌ ಹುಯಿಗಯುಥು, ಚಾ಼ಂದ್ ಉಜಾ಼ಳು ದ್ಯವಾನು ಭೀರಿಜೈ಼ನ್, ತೀನ್ ಘಂಟಾಲಗು, ಯೋ ಖ್ಹಾರ ದೇಖ್ಹ್‌ಪರ್ ಅಂಧಾರು ಢಫೈಗಯುಥು. ಮಂದಿರ್‌ಮ ಠಂಗೈರಾಖ್ಯುಥೂತೆ ಪಡ್‌ದೊ ಫಾಟಿನ್, ಬೇ ಭಾಗ್‌ ಹುಯಿಗಯು.
LUK 23:46 ಯೇಸು ಜೋ಼ರೆಖ್ಹು ಚಿಕ್ರಿನ್, “ಬಾ, ತಾರ ಹಾತ್‌ಮ ಮಾರು ಆತ್ಮಾನ ದೆವುಕರುಸ್‌” ಕರಿ ಬೋಲಾನ ಬಾದ್‌ಮ, ಜಾನ್‌ ಮ್ಹೇಲ್ಯೊ.
LUK 23:47 ತದೆ ಖ್ಹೋಶಿಪಾಯಿನೊ ಮೋಟಾನೆ ಚಾ಼ಲ್ಯುತೆ ಇನ ದೇಖಿನ್‌, “ಖ್ಹಾಚಮಾಬಿ ಆ ಅದ್ಮಿ ನೀತಿವಾಳೊಸ್‌ ಹುಯಿರ‍್ಹೋಥೊ!” ಕರಿ ದೇವ್ನ ಖ್ಹರಾಯೊ.
LUK 23:48 ಆ ಖ್ಹಾರು ದೆಖಾನ ಐರ‍್ಹೂಥೂತೆ ಅದ್ಮಿಖ್ಹಾರು, ಚಾ಼ಲ್ಯುತೆ ಇನ ದೇಖಿನ್‌, ದುಖ್‌ಥಿ ಛಾ಼ತಿ ಕೂಟ್‌ತುಹುಯಿನ್, ಇವ್ಣ ಘರೆ ಫಾಛು಼ಫರಿ ಗಯು.
LUK 23:49 ಯೇಸುನು ವಳ್‌ಖಿನು ಅದ್ಮಿಖ್ಹಾರು ಅಜು಼ ಗಲಿಲಾಯಾಥು ಇನ ಭೀಡೆ ಆಯುಹುಯಿ ತಯೇಡ ಖ್ಹಾರಿ ದೂರ್ ಭೀರಿನ್‌, ಚಾ಼ಲ್ಯುತೆ ಯೋ ಖ್ಹಾರಾನ ದೇಖಿಯೆ.
LUK 23:50 ಯುದಾಯ ತಬರ್‌ಖಾನು, ಅರಿಮಥಾಯ ಕರಿ ಗಾಮ್ಮ ಯೋಸೇಫ ಕರಿ ಏಕ್ಜ಼ಣೊ ಥೊ. ಯೋ ಏಕ್‌ ಅಛ್ಛು಼ ಅಜು಼ ನೀತಿವಾಳೊ ಅದ್ಮಿ ಹುಯಿರ‍್ಹುಥೊ, ದೇವ್ನಿ ರಾಜ್ಯ ಕದೆ ಆವ್‍ಶೆಕರಿ ಬೋಲಿನ್ ಟಿವವ್‍ಕರ್ತೊಥೊ. ಶಾಣಾವ್‍ನಿ ಸಭೆಮಾನು ಅದ್ಮಿಮ ಆಬಿ ಏಕ್‌ ಜ಼ಣೊ ಹುಯಿರ‍್ಹೋಥೊ, ಕತೋಬಿ ಯೆಹೂದ್ಯರ್‌ನು ಶಾಣುಖ್ಹಾರು ಯೇಸುನ ಮಾರ‍್ನು ಕರಿ ಕರ‍್ಯುತೆ ಇನ, ಅನೆ ಮಾನ್ಯೊಥೊ ಕೊಯ್ನಿ.
LUK 23:52 ಯೋ ಪಿಲಾತಕನ ಜೈ಼ನ್‌, ಯೇಸುನು ಶರೀರ್ ಮನ ದೇ ಕರಿ ಬೋಲಿಲಿದೊ.
LUK 23:53 ಇನೆ ಯೇಸುನು ಶರೀರ್‌ನ ಶಿಲ್‌ಬೆಪರ್‌ಥು ಉತಾರಿನ್‌, ಘಣ ಮೋಲ್ನು ಲುಂಗ್ಡಾಥಿ ಲಪೇಟಿನ್, ಬಂಡಾಮ ಖೋಂದಿ ರಾಖ್ಯುಥೂತೆ ಘವಿಮ ಮ್ಹೇಲ್ಯೊ. ಅನೇಥಿ ಪಹಿಲೆ ಇನಾಮ ಕಿನೂಬಿ ಮಖ್ಹಾಣ್ಯು ಮ್ಹೇಲ್ಯೂಥು ಕೊಯ್ನಿ.
LUK 23:54 ಯೋ ದನ್ ಖ್ಹವಾರಾನೊ ದನ್ ಹುಯಿರ‍್ಹೋಥೊ, ಅಜು಼ ಜ಼ರ ಘಡಿಮಾಸ್ ಸಬ್ಬತ್‌ ದನ್ ಶುರು ಹುವಾಳು ಥು.
LUK 23:55 ಗಲಿಲಾಯಥು ಯೇಸುನ ಭೀಡೆ ಆಯಿಹುಯಿ ತಯೇಡಾನೆ, ಯೋಸೇಫ್‌ನ ಜೋ಼ಡೆ ಜೈ಼ನ್‌, ಘವಿನಾಬಿ ಅಜು಼ ಯೇಸುನು ಶರೀರ್‌ನ ಮ್ಹೇಲೈರೂತೆ ತರಿಕಾನ ದೇಖ್ಯು.
LUK 23:56 ತದೆ ಇವ್ಣೆ ಪಾಛು಼ಫರಿ ಘರೆಐನ್, ಅಛ್ಛು಼ ವಾನು ಜ಼ಡಿಬೂಠಿ ಅಜು಼ ವಾನುತೇಲ್‌ನ, ಯೇಸುನ ಶರೀರ್‌ಪರ್‌ ಲಗಾಡನಖ್ಹಾಜೆ ಖ್ಹವಾರಿಯೆ, ಮೋಶೇನು ಧರ್ಮಶಾಸ್ತ್ರಮ ಹುಕುಮ್‌ ದೀರಾಖ್ಯುತೆ ಇಮ್ಮಸ್ ಇವ್ಣೆ ಸಬ್ಬತ್ ದನ್ಮ ಅರಾಮ್‌ಕರಿಯೆ.
LUK 24:1 ವಾರಾನು ಪಹಿಲದನ್ನೆ, ಅಧಿರ‍್ಹೇಣೆಸ್‌ ಯೋ ತಯೇಡ ಖ್ಹಾರಿ, ಇವ್ಣೆ ಖ್ಹವಾರಿಯೆಥೀತೆ ಅಛ್ಛು಼ ವಾನುತೇಲ್‌ನ ಪಳ್ಳಿನ್‌, ಘವಿಕನ ಗಯ್ಯೆ.
LUK 24:2 ಘವಿನ ಮೂಚಿರಾಖ್ಯುಥೂತೆ ಬಂಡೊ ನಿಕ್‌ಳೈರ‍್ಹೂಥೂತೆ ಇವ್ಣೆ ದೇಖಿನ್,
LUK 24:3 ಘವಿನ ಮಹಿ ಗಯ್ಯೆ, ಕತೋಬಿ ಹಿಜ಼್ಜಾ ಯೇಸು ಪ್ರಭುನು ಶರೀರ್ ಇವ್ಣುನ ಮಳ್ಯುಕೊಯ್ನಿ.
LUK 24:4 ಇವ್ಣೆ ಭೀರಿನ್, ಅನಿ ಬಾರೇಮ ಘಬ್ರಾವ್‌ಕರಾನಿ ವಖ್ಹತ್‌ಮ, ಚ಼ಮಕ್‌ತು ಲುಂಗ್ಡು ಫೇರಿರಾಖ್ಯುಥೂತೆ ಬೇ ಪರ್ಖ್ಹಾ ಐನ್, ಇವ್ಣಾಕನ ಭೀರ‍್ಯು.
LUK 24:5 ಯೋ ತಯೇಡ ಖ್ಹಾರಿ ಡರಿಗಯೇಥಿ. ಜ಼ಮೀನ್‍ತರಬ್‍ ಮುಡ್‌ಕ್ಯು ಝು಼ಕೈನ್‌, ಭೀರಿಗಯ್ಯೆ. ತದೆ ಇವ್ಣೆ ಇನ, “ಜಿವ್ತೊ ಹುಯಿನ್ ಉಠಿರ‍್ಹೋಸ್ತೆ ಇನ, ಮರ‍್ಯಾಹುಯಾಮ ಶನ ಢೂಂಡುಕರಾಸ್ತೆ?
LUK 24:6 ಯೋ ಹಜ್ಜಾ಼ ಕೊಯ್ನಿ, ಉಠಿರ‍್ಹೋಸ್. ಯೋ ಗಲಿಲಾಯಮ ತುಮಾರ ಜೋ಼ಡೆ ಥೋತೆ ತದೆ, ಬೋಲ್ಯೊಥೋತೆ ಇನ ಯಾದ್ ಕರಿಲೆವೊ.
LUK 24:7 ಅದ್ಮಿನೊ ಛಿಯ್ಯೊ ಪಾಪಿ ಅದ್ಮಿನ ಹಾತ್‌ಮ ದೆವೈನ್, ಶಿಲ್‌ಬೆಪರ್ ನಖೈನ್, ತೀನ್ನ ದನ್ಮ ಪಾಛೊ಼ ಉಠಿ ಆವ್‍ಶೆಕರಿ ಬೋಲ್ಯೊಥೋನಿ” ಕರಿ ಬೋಲ್ಯು.
LUK 24:8 ತದೆ ಯೋ ತಯೇಡ ಖ್ಹಾರಿ ಯೇಸುನಿ ವಾತೆನ ಯಾದ್ ಕರಿಲೀನ್,
LUK 24:9 ಮಖ್ಹಾಣ್ಯನಿ ಘವಿಕಂಥು ಪಾಛು಼ಫರಿ ಜೈ಼ನ್, ಗ್ಯಾರ‍್ಹ ಜ಼ಣ ಶಿಷ್ಯರ್‌ನ ಅಜು಼ ಬಿಜ಼ ಖ್ಹಾರಾನ ಅನಿ ಬಾರೇಮ ಬೋಲಿಯೆ.
LUK 24:10 ಯೋ ಖ್ಹಾರಿ ತಯೇಡ ಕೋಣ್-ಕೋಣ್ ಕತೊ, ಮಗ್ದಲನಿ ಮರಿಯ, ಯೋಹಾನ್ನ, ಯಾಕೋಬ್‍ನಿ ಆಯ ಮರಿಯ; ಅವ್ಣೆ ಅಜು಼ ಅವ್ಣ ಜೋ಼ಡೆ ಥೀತೆ ಬಿಜಿ ತಯೇಡ ಖ್ಹಾರಿ ಅನಿ ಬಾರೇಮ, ಅಪೊಸ್ತಲರ‍್ನ ಬೋಲಿಯೆ.
LUK 24:11 ಕತೋಬಿ, ಅಪೊಸ್ತಲರ್ ಖ್ಹಾರು ಅವ್ಣಿ ವಾತೇನ ವಿಶ್ವಾಸ್ ಕರ‍್ಯುಕೊಯ್ನಿ. ಆ ಖ್ಹಾರಿ ವಾತೆ ಚು಼ಪ್‌ಕೇನಿಸ್ ಕರಿ ಸೋಚ್ಯು.
LUK 24:12 ಕತೋಬಿ ಪೇತ್ರನೆ ಉಠೀನ್, ಘವಿಕನ ನಾಶಿಜೈ಼ನ್, ಮಹಿ ಝು಼ಕಿ ದೇಖಿನ್, ಲಪೇಟಿಥೂತೆ ಘಣ ಮೋಲ್ನು ಲುಂಗ್ಡಾನಸ್ ಪಣ್ಕಿ ಬಿಜು಼ ಶಾತ್ಬಿ ದೇಖ್ಯೊ ಕೊಯ್ನಿ. ತದೆ ಪೇತ್ರನೆ ಚಾ಼ಲ್ಯುತೆ ಇನಿ ಬಾರೇಮ ಆಶ್ಚರ್ಯ ಖಾತೊಹುಯಿನ್, ಘರೆ ಚ಼ಲೆಗಯೊ.
LUK 24:13 ಯೋಸ್ ದನ್ನೆ ಯೇಸುನು ಶಿಷ್ಯರ್‌ಮ ಬೇ ಜ಼ಣ, ಯೆರೂಸಲೇಮ್‌ಥು ಗ್ಯಾರ‍್ಹ ಕಿಲೊ ಮೀಟರ್ ಥೂತೆ, ಎಮ್ಮಾಹು ಕರಿ ನಾಮ್ನ ಗಾಮೆ ವಳ್ಯಜಾ಼ತಾಥ.
LUK 24:14 ಚಾ಼ಲ್ಯುತೆ ಯೋ ಖ್ಹಾರಿಸ್ ಬಾರೇಮ, ಇವ್ಣೆ ವಾತೆ ಬೋಲ್ತಾಹುಯಿನ್, ಒಳೆಜಾ಼ತಾಥ.
LUK 24:15 ಇವ್ಣೆ ಏಕ್‌ಥಿ-ಏಕ್‌ ವಾತೆ ಬೋಲುಕರಾನಿ ವಖ್ಹತ್‌ಮ, ಯೇಸುಸ್‌ ಖ್ಹುದ್ ಇವ್ಣ ಖನ್ನೆ ಆಯಿನ್, ಇವ್ಣ ಜೋ಼ಡೆ ಚಾ಼ಲ್ತೊ ಗಯೊ.
LUK 24:16 ಇವ್ಣೆ ಇನದೇಖ್ಯು, ಕತೋಬಿ ಇನಿ ಖ್ಹಣೇದ್ ಧರ‍್ಯುಕೊಯ್ನಿ.
LUK 24:17 ತದೆ ಯೇಸುನೆ ಇವ್ಣುನ, “ತುಮೆ ತುಮಾರ-ತುಮಾರಸ್‌ಮ ಶಾತ್‌ ಬೋಲ್ತಾಹುಯಿನ್, ಚಾ಼ಲ್ತ ವಳೆಜಾ಼ಸ್ತೆ?” ಕರಿ ಪುಛಾ಼ಯೊ. ತದೆ ಇವ್ಣೆ ಮ್ಹೋಡು ಮುರ್‌ಝೈ಼ಲೀನ್‌, ಭೀರಿಗಯು,
LUK 24:18 ಇವ್ಣಾಮ, ಕ್ಲಿಯೋಫಸ್ ಕರಿ ನಾಮ್ನೊ ಏಕ್‌ ಜ಼ಣಾನೆ, “ಯೆರೂಸಲೇಮ್‌ ಬಹಾರ್‌ಥು ಆಯೂತೆ ಹರೇಕ್ನ, ಆ ದನೂಮ ಹಾ ಚಾ಼ಲಿರ‍್ಹೀಸ್ತೆ ವಾತೆನಿ ಬಾರೇಮ, ಮಾಲುಮ್‌ ರ‍್ಹವಾಪರ್ ತುನ ಮಾಲುಮ್ ಕೊಯ್ನಿಕಿ ಶು?” ಕರಿ ಪುಛಾ಼ಯೊ.
LUK 24:19 ತದೆ ಯೇಸುನೆ, “ಖೆವಿ ವಾತೆ?” ಕರಿ ಪುಛಾ಼ಯೊ. ಇನ ಇವ್ಣೆ, “ನಜ಼ರೇತ್‌ನೊ ಯೇಸುನಿ ಬಾರೇಮ, ಯೊ ದೇವ್ನ ಅಜು಼ ಅದ್ಮಿನ ಡೋಳಾಮ ಪ್ರವಾದಿ ಹುಯಿರ‍್ಹೋಥೊ, ಕಾಮ್ಮಬಿ ಅಜು಼ ವಾತೇಮಾಬಿ ಮೋಟೊ ಪ್ರವಾದಿಹುಯಿರ‍್ಹೋಥೊ.
LUK 24:20 ಹಮಾರ ಮಹಾಯಾಜಕ ಅಜು಼ ಅದಿಕಾರಿಖ್ಹಾರು ಇನ ಮರಣ್ ದಂಡನೆ ದೀನ್, ಶಿಲ್‌ಬೆಪರ್ ಛ಼ಡಾಯು.
LUK 24:21 ಹಮೇತೊ, ಇಸ್ರಾಯೇಲ್‌ ಅದ್ಮಿವೋನ ಛೋ಼ಡಾವವಾಳೊ ಯೋಸ್ ಕರಿ ಭರೋಖ್ಹೊ ಕರಿರಾಖ್ಯಥ! ಯೋ ಖ್ಹಾರು ಚಾ಼ಲಿನ್, ಹಮ್ಕೆ ತೀನ್ ರೋಜ಼್‌ ಹುಯ.
LUK 24:22 ತೋಬಿ ಹಮಾರಮ ಥೋಡಿ ತಯೇಡ ಖ್ಹಾರಿ, ಆಶ್ಚರ್ಯನು ವಾತೆನ ಬೋಲಿಯೆ; ಇವ್ಣೆ ವ್ಹಾಣೇಸ್ ವೇಳಿ ಘವಿಕನ ಜೈ಼ನ್,
LUK 24:23 ಯೇಸುನು ಶರೀರ್ ಹಿಜ಼್ಜಾಕೊಂತೆ ದೇಖಿನ್, ಪಾಛು಼ಫರಿ ಐನ್, ಇವ್ಣೆ ದೇವ್‌ನು ದೂತರ್‌ನ ದೇಖಿಯೆ಼ ಅಜು಼ ಯೋ ಜಿವ್ತೊ ಹುಯಿರ‍್ಹೋಸ್ ಕರಿ ಬೋಲಿಯೆ.
LUK 24:24 ಹಮಾರ ಜೋ಼ಡೆ ಥೂತೆ ಇವ್ಣಾಮ ಥೋಡುಜ಼ಣು ಮಖ್ಹಾಣ್ಯಕನ ಜೈ಼ನ್ ಯೋ ಖ್ಹಾರಿ ತಯೇಡ ಬೋಲಿತೆ ಇಮ್ಮಸ್ ದೇಖ್ಯು. ಕತೋಬಿ ಯೇಸುನ ಕೋ ದೇಖ್ಯೂನಿ” ಕರಿಬೋಲ್ಯಾ.
LUK 24:25 ತದೆ ಯೇಸುನೆ ಇವ್ಣುನ, “ಅಲ ಬಿಣ್‍ಖ್ಹೈಲಾ, ಪ್ರವಾದಿಯೇನೆ ಬೋಲ್ಯಾತೆ ಇನ ವಿಶ್ವಾಸ್‌ ಕರಾಕೊಂತೆ ಮಂದ್‌ ದಿಲ್‌ವಾಳಾವೊ,
LUK 24:26 ಕ್ರಿಸ್ತ ಅಮ್ನಿಖ್ಹಾರಿ ಖ್ಹತಾಪ್ಣಿ ಖೈನ್, ಇನಿ ಮಹಿಮೆಮ ಜಾ಼ವಾನು, ಜ಼ರೂರತ್ ಛಾ಼ನಿ ಕರಿ ಬೋಲಿನ್,
LUK 24:27 ಮೋಶೆಥು ಧರೀನ್, ಖ್ಹಾರ ಪ್ರವಾದಿಯೇನು ಅಖ್ಖ ಪವಿತ್ರ ದಪ್ತರ್‌ಮ, ಇವ್ಣಿ ಬಾರೇಮ ಲೀಖೈರ‍್ಹೂತೆ ಖ್ಹಾರನ ಇವ್ಣುನ ಬೋಲಿವತಾಳ್ಯೊ.
LUK 24:28 ಇವ್ಣೆ ಜಾ಼ವ್ಣುಥೂತೆ ಗಾಮ್‌ನ ಖನ್ನೆ ಇವ್ಣೆ ಆವಾದಿನ್, ಯೇಸು ಬಿಜೂ಼ಬಿ ಖ್ಹಾಮ್ಣೆ ಜಾ಼ವಾನಿ ಘೋಣಿ ದೆಖಾಯು.
LUK 24:29 ಕತೋಬಿ ಇವ್ಣೆ ಇನ, “ಹಮ್ಕೆ ಖ್ಹಾಂಜ಼್ ಹುಯಿಗೈ, ರಾತ್ ಹೋತು ಉಳ್ಯುಜಾ಼ಸ್‌, ಹಮಾರ ಜೋ಼ಡೆ ರ‍್ಹೇ” ಕರಿ ಘಣು ಬೋಲಿಲಿದು.
LUK 24:30 ತದೆ ಯೋ ಖಾಣಾನಖ್ಹಾಜೆ ಇವ್ಣ ಜೋ಼ಡೆ ಬೇಶಿನ್, ರೋಟಾನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ತೋಡಿನ್ ಇವ್ಣುನ ದಿದೊ.
LUK 24:31 ತದೆ ಇವ್ಣ ಡೋಳ ಉಖ್ಡಾಯ ಅಜು಼ ಇವ್ಣೆ ಯೇಸುನಿ ಖ್ಹಣೇದ್ ಧರ‍್ಯು, ಕತೋಬಿ ಯೇಸು ಇವ್ಣ ಡೋಳಾನ ಖ್ಹಾಮ್ಣೇಥೊ ಮ್ಹಾಯ ಹುಯಿಗಯೊ.
LUK 24:32 ತದೆ ಇವ್ಣೆ ಏಕ್‌ಥಿ-ಏಕ್‌, “ಯೇಸು ವಾಟ್‌ಪರ್ ಅಪ್ಣ ಜೋ಼ಡೆ ವಾತೆ ಬೋಲ್ತೊಹುಯಿನ್, ವಚನ್‍ಮ ಲೀಖೈರ‍್ಹೋತೆ ಇನ ಬೋಲಿವತಾಳ್ಯೋತೆ ತದೆ, ಅಪ್ಣ ದಿಲ್ನಮಹಿ ಆಗ್ ಬಳಾನಿಘೋಣಿ ಹುಯುಕೊಯ್ನಿಕಿ ಶು?” ಕರಿ ಬೋಲ್ಯು.
LUK 24:33 ತದ್‌ನು ತದ್ದೇಸ್ ಇವ್ಣೆ ಉಠೀನ್, ಯೆರೂಸಲೇಮ್‌ನ ಗಯ. ಹಿಜ಼್ಜಾ ಗ್ಯಾರ‍್ಹ ಶಿಷ್ಯರ್‌ ಅಜು಼ ಬಿಜ಼ ಖ್ಹಾರಾನ ಜೋ಼ಡೆ ಎಕ್ಟು ಹುಯಿನ್,
LUK 24:34 ಪ್ರಭು ಉಠಿರ‍್ಹೋಸ್ತೆ ಖ್ಹಾಚಸ್! ಸೀಮೋನ್ನ ಯೋ ದೆಖಾಯೊ!” ಕರಿ ಬೋಲುಕರ್ತೂಥು.
LUK 24:35 ಅನ ದೇಖಿನ್, ಯೋ ಬೇ ಜ಼ಣಾನೇಬಿ ವಾಟ್‌ಪರ್ ಚಾ಼ಲ್ಯುತೆ ಇನ ಅಜು಼ ರೋಟೊ ತೋಡಾನಿ ವಖ್ಹತ್‌ಮ, ಇವ್ಣೆ ಇನಿ ಖ್ಹಣೇದ್ ಧರ‍್ಯೂತೆ ಇನ ಇವ್ಣುನ ಬೋಲಿವತಾಳ್ಯು.
LUK 24:36 ಇವ್ಣೆ ಭೇ ಜ಼ಣ ಆ ಬಾರೇಮ ಬೋಲುಕರಾನಿ ವಖ್ಹತ್‌ಮ, ಯೇಸು ಪ್ರಭುಸ್ ಇವ್ಣ ಇಚ಼್‌ಮ ಆಯಿ ಭೀರಿನ್, “ತುಮೂನ ಸಮಾಧಾನ್ ಹುವಾದೆ” ಕರಿ ಬೋಲ್ಯೊ.
LUK 24:37 ತದೆ ಇವ್ಣೆ ಡರ‍್ನ ಮಾರ‍್ನು ಮನ್‌ಮ ಘಬ್‌ರೈಜೈ಼ನ್, ಇವ್ಣೆ ದೇಖ್ಯೂತೆ ಭೂತ್ ಕರಿ ಸೋಚ್ಯು.
LUK 24:38 ಕತೋಬಿ ಯೇಸುನೆ ಇವ್ಣುನ, “ತುಮೆ ಶನ ಘಬ್ರಾವೋಸ್ತೆ? ಶನ ತುಮಾರ ಮನ್‌ಮ ಗುಮಾನಿ ಹುಂಕರಾಸ್ತೆ?
LUK 24:39 ಮಾರ ಹಾತ್ನ ಅಜು಼ ಗೋಡಾನ ದೇಖೊ, ಆ ಮೇಸ್ನಿ! ಮನ ಛೀಮಿ ದೇಖೊ, ತುಮೆ ದೇಖುಕರಾತೆ ಇಮ್‌ ಮನ ಬೋಟಿ ಅಜು಼ ಹಡ್‌ಕ್ಯಾ ಛಾ಼, ಕತೋಬಿ ಭೂತ್‌ನ ಆ ಖ್ಹಾರು ಕೋ ರ‍್ಹೇಯ್ನಿ.
LUK 24:40 ಆ ಖ್ಹಾರು ಬೋಲಾನ ಬಾದ್‌ಮ, ಯೇಸುನೆ ಇನೊ ಹಾತ್‌ ಅಜು಼ ಗೋಡಾನ ಇವ್ಣುನ ವತಾಳ್ಯೊ.
LUK 24:41 ಕತೋಬಿ, ಇವ್ಣೆ ಬಿಜೂ಼ಬಿ ವಿಶ್ವಾಸ್‌ಕರ‍್ಯುಕೊಂತೆ, ಖ್ಹುಶಿಥಿ ಆಶ್ಚರ್ಯ ಖಾತಾನ ದೇಖಿನ್, ಯೇಸುನೆ ಇವ್ಣುನ, “ಹಜ್ಜಾ಼ ತುಮಾರಕನ ಶಾತ್‌ತೋಬಿ ಖಾವಾನು ರಾಛು಼ ಛಾ಼ಕಿ ಶು?” ಕರಿ ಪುಛಾ಼ಯೊ.
LUK 24:42 ಇವ್ಣೆ ಭೂಂಜಿಹುಯು ಮಾಛ಼್‌ಲಾನು ಏಕ್‌ ಟುಕ್ಡಾನ ಯೇಸುನ ದಿದು.
LUK 24:43 ಯೇಸುನೆ ಇನಲೀನ್, ಇವ್ಣ ಖ್ಹಾಮ್ಣೇಸ್ ಖಾದೊ.
LUK 24:44 ಅಜು಼ ಯೇಸುನೆ ಇವ್ಣುನ, “ಮೇ ತುಮಾರ ಜೋ಼ಡೆಸ್ ಥೋತೆ ತದ್ದೇಸ್, ಆ ಖ್ಹಾರು ತುಮೂನ ಬೋಲ್ಯೊಥೋನಿ. ಮೋಶೇನು ಧರ್ಮಶಾಸ್ತ್ರ, ಪ್ರವಾದಿಯೇನು ಪುಸ್ತಕ್‌ಮ ಅಜು಼ ಕೀರ್ತನೇಮ ಮಾರಿ ಬಾರೇಮ ಲೀಖೈರ‍್ಹೂತೆ ಅಖ್ಖು ಪೂರಹುವಾನು ಜ಼ರೂರತ್ ಛಾ಼ ಕರಿ ಮೇ ತುಮೂನ ಬೋಲ್ಯೊಥೊ ಕೊಯ್ನಿಕಿ ಶು?” ಕರಿ ಬೋಲ್ಯೊ.
LUK 24:45 ಅನ ಬಾದ್‌ಮ ಇವ್ಣೆ ವಚನ್‍ಮ ಲೀಖೈರ‍್ಹೂತೆ ಇನ ಪರ್ಖಿಲವಾನಿಮತ್, ಯೇಸುನೆ ಇವ್ಣಿ ಅಕ್ಕಲ್‍ನ ಛೋ಼ಡ್ಯೊ.
LUK 24:46 ಅಜು಼ ಇವ್ಣುನ, ಕ್ರಿಸ್ತ ಖ್ಹತಾಪ್ಣಿ ಖೈನ್, ಮರಿನ್‌, ತೀನ್ನೊ ದನ್ಮ ಉಠಿ ಆವ್ಣು.
LUK 24:47 ಅಜು಼ ಪಾಪ್ನ ಮಾಪಿ ಮಳ್‌ಣುಕತೊ, ದೇವ್ ಭಣಿ ಫರೊಕರಿ ಬೋಲಾನು, ಯೆರೂಸಲೇಮ್‌ಥು ಧರೀನ್, ತಮಾಮ್‌ ದೇಖ್ಹ್‌ಮ ಇನ ನಾಮ್‌ಪರ್‌ ಬೋಲಾವ್ಣು ಕರಿ ಲೀಖೈರ‍್ಹೂಸ್‌ನಿ,
LUK 24:48 ಆ ಖ್ಹಾರಿ ಬಾರೇಮ, ತುಮೇಸ್ ಸಾಕ್ಷಿ ಹುಯಿರ‍್ಹಾಸ್‌.
LUK 24:49 ಹಂದೇಖೊ! ಮಾರೊ ಬಾ ಜಿಭಾನ್‌ ದಿದೋತೆ ಇನ, ಮೇ ತುಮಾರಾಪರ್ ಬೋಲಿ ಮೋಕ್ಲಿಶ್. ಉಪ್ಪರ್‌ಥು ತುಮಾರಪರ್ ಶಕತ್‍ ಆವಾತೋಡಿ, ಆಸ್ ಖ್ಹಯೇರ್‌ಮ ತುಮೆ ಜ಼ಪಿರ‍್ಹೇಣು ಕರಿ ಬೋಲ್ಯೊ.
LUK 24:50 ಅನ ಬಾದ್‌ಮ ಯೇಸುನೆ ಇವ್ಣುನ ಬೇಥಾನ್ಯತೋಡಿ ಬುಲೈಲಿ ಜೈ಼ನ್, ಇನೊ ಹಾತ್ ಪಾಡಿನ್, ಇವ್ಣುನ ಆಶೀರ್ವಾದ್‌ ಕರ‍್ಯೊ.
LUK 24:51 ಆಶೀರ್ವಾದ್‌ ಕರುಕರಾನಿ ವಖ್ಹತ್‌ಮ, ಯೋ ಇವ್ಣುನ ಮ್ಹೆಂದಿನ್, ಸೊರ್ಗಮ ಪಡೈಗಯೊ.
LUK 24:52 ಇವ್ಣೆ ಯೇಸುನಿ ಆರಾದನೆ ಕರ‍್ಯು ಅಜು಼ ಘಣಿ ಖ್ಹುಶಿಥಿ ಯೆರೂಸಲೇಮ್‌ನ ಪಾಛು಼ಫರಿ ಗಯು.
LUK 24:53 ಅಜು಼ ಇವ್ಣೆ ಕದೇಬಿ ಮಂದಿರ್‌ಮಾಸ್ ರ‍್ಹೀನ್, ದೇವ್ನಿ ಸ್ತುತಿಕರ‍್ಯು.
JOH 1:1 ಶುರುವಾತ್ನ ಪಹಿಲೆ ವಚನ್ ಥು; ಯೋ ವಚನ್‌ ದೇವ್‌ಕನ ಥು; ಯೋ ವಚನ್ ದೇವ್ ಹುಯಿರುಥು.
JOH 1:2 ಯೋ ವಚನ್ ಶುರುವಾತ್‌ಥೂಸ್ ದೇವ್‌ಕನ ಥೊ.
JOH 1:3 ಇನೇಥಿಸ್ ದೇವ್ನೆ ಅಖ್ಖೂಸ್ ಬಣಾಯೊ, ಬಣಾಯೋತೆ ಯೋ ತಮಾಮ್‌ ರಾಛಾ಼ಮ, ಏಕ್‌ಬಿ ಯೋ ಕೊಂತೆ ಉಬ್‍ಜ್ಯುಕೊಯ್ನಿ.
JOH 1:4 ಇನಾಮ ಜಾನ್‌ ಥು. ಯೋ ಜಾನ್‌ ಅದ್ಮಿ ಖ್ಹಾರಾನ ಉಜಾ಼ಳು ಹುಯಿರ‍್ಹುಥು.
JOH 1:5 ಯೋ ಉಜಾ಼ಳು ಅಂಧಾರಾಮ ಚ಼ಮ್‌ಕಾಸ್, ಅಜು಼ ಅಂಧಾರು ಇನ ಮಾಲುಮ್ ಕರ‍್ಯುಕೊಯ್ನಿ.
JOH 1:6 ದೇವ್ನೆ ಏಕ್‌ ಖಬರ್‌ಲ್ಯಾವಳೊ ಏಕ್‌ ಅದ್ಮಿನ ಮೋಕ್‌ಲ್ಯೊ, ಇನು ನಾಮ್ ಯೋಹಾನ.
JOH 1:7 ಯೋ ಖ್ಹಾರ ಅದ್ಮಿನ ಆ ಉಜಾ಼ಳನಿ ಸಾಕ್ಷಿ ದ್ಯವಾನ ಆಯೊ. ಶನಕತೊ ಖ್ಹಾರುಜ಼ಣು ಆ ಸಂದೇಶ್ನ ಖ್ಹಮ್‌ಜಿನ್‌ ವಿಶ್ವಾಸ್ ಕರ್ನುಕರಿ ಆಯೊ.
JOH 1:8 ಯೋಹಾನಸ್‌ ಯೋ ಉಜಾ಼ಳು ಕಾಹೆ, ಪಣ್ಕಿ ಯೋ ಉಜಾ಼ಳಾನಿ ಬಾರೇಮ ಸಾಕ್ಷಿ ದ್ಯವಾನ ಆಯೋತೆ.
JOH 1:9 ಯೊ ಖ್ಹಾಚು಼ ಉಜಾ಼ಳು ಹುಯಿರುಥು ಅಜು಼ ಯೊ ಜಗತ್‌ಮ ಆವಾಳು ಥು, ಯೊ ಅಖ್ಖಾ ಅದ್ಮಿನ ಉಜಾ಼ಖ್ಹ್‌ ದೆವಾಳು ಹುಯಿರ‍್ಹುಥು.
JOH 1:10 ವಚನ್ ಜಗತ್‌ಮ ಥು, ಅಜು಼ ದೇವ್ನೆ ಇನೇಥಿಸ್ ಜಗತ್ನ ಬಣಾಯೊ, ತೋಬಿ ಜಗತ್‌ ಇನ ಮಾಲುಮ್ ಕರ‍್ಯುಕೊಯ್ನಿ.
JOH 1:11 ಯೋ ಇನ ಶೊಂತ್‌ ದೇಖ್ಹ್‌ಮ ಆಯೊ, ತೋಬಿ ಇನು ಶೊಂತ್ ಅದ್ಮಿಸ್‌ ಇನ ಮಳೈಲಿದುಕೊಯ್ನಿ.
JOH 1:12 ಕತೋಬಿ ಕೋಣ್-ಕೋಣ್ ಇನ ಮಳೈಲಿದುಕಿ, ಕತೊ ಇನ ನಾಮ್‍ಪರ್ ವಿಶ್ವಾಸ್ ಕರ‍್ಯುಕೀ, ಇವ್ಣುನ ದೇವ್ನ ಲಡ್ಕಾ ಹುವಾನ ಹಕ್‌ ದಿದೊ.
JOH 1:13 ಇವ್ಣೆ ಲ್ಹೋಯಿನಿ ಸಂಬಂದಾಥಿ ರ‍್ಹವೊ, ಶರೀರ್‌ನಿ ಆಖ್ಹ್‌ಥೀಬಿ ರ‍್ಹವೊ, ಪರ್ಖ್ಹಾನಿ ಖ್ಹಂಗ್‌ಥಿಬಿ ರ‍್ಹವೊ ಪೈದಹುಯುತೆ ಕಾಹೆ; ದೇವ್‌ಥೀಸ್ ಪೈದಹುಯುತೆ.
JOH 1:14 ಯೋ ವಚನ್ ಅದ್ಮಿನು ರೂಪ್‍ನ ಲೀನ್ ವಾರ್‌ಖ್ಹೊಥೀಬಿ ಅಜು಼ ಖ್ಹಾಚಥೀಬಿ ಭರೈರ‍್ಹಾವಾಳೊ ಹುಯಿರೊಸ್. ಅಜು಼ ಅಪ್ಣಾಮ ಜಿವ್ಣುಕರ‍್ಯೊ. ಅಜು಼ ಅಪ್ಣೆ ಇನ ಮಹಿಮೆನ ದೇಖ್ಯ. ಯೊ ಬಾನೊ ಏಕ್‍ನೊ ಎಕ್ಕಸ್ ಛಿಯ್ಯಾನು ಮಹಿಮೆ ಹುಯಿರೊಥೊ.
JOH 1:15 ಯೋಹಾನನೆ ಇನಿ ಬಾರೇಮ ಸಾಕ್ಷಿ ಬೋಲ್ಯೊ. ಅಜು಼ ಚಿಕರ್ತೊ ಹುಯಿನ್, “ಮೇ ಕಿನಿ ಬಾರೇಮ ಬೋಲಿರಾಖ್ಯೊಸ್ಕಿ ಯೋಸ್ ಆ ಹುಯಿರೊಸ್.” ‘ಮಾರ ಪಾಛ಼ಳ್ ಆವವಾಳೊ ಛಾ಼ ಕರಿ ಕಿನಿ ಬಾರೇಮ ಬೋಲ್ಯೊಥೋಕಿ ಯೊ ಮಾರೇಥಿಬಿ ಮಹಾನ್ ಹುಯಿರೊಸ್.‌ ಶನಕತೊ ಯೊ ಮಾರ ಪೈದಾಖ್ಹ್‌ನ ಅಗ್ಗಳಸ್ ಯೋ ಥೊ’.
JOH 1:16 ಇನಿ ವಾರ್‌ಖ್ಹಾನಿ ಭರ್‌ಪೂರ್‌ಥಿಸ್, ಅಪ್ಣುನಖ್ಹಾರು ಆಶೀರ್ವಾದ್‍ಪರ್ ಆಶೀರ್ವಾದ್‌ ಮಳ್ಯು.
JOH 1:17 ಧರ್ಮಶಾಸ್ತ್ರ ಮೋಶೆಥಿ ದೇವೈರ‍್ಹುಸ್ ಕತೋಬಿ ವಾರ್‌ಖ್ಹೊಬಿ ಖ್ಹಾಚ಼ಬಿ ಕ್ರಿಸ್ತಥಿ ಆಯುತೆ.
JOH 1:18 ದೇವ್ನ ಕೋಣ್‌ಬಿ ಕದೇಬಿ ಕೊ ದೇಖ್ಯುನಿ, ಕತೋಬಿ ಏಕ್‍ನೊ ಏಕ್‌ ಛಿಯ್ಯೊ, ಯೊ ದೇವ್ನಿಘೋಣಿ ಛಾ಼. ಅಜು಼ ಬಾನಿ ಜೋ಼ಡ್ಮಾಸ್ ಛಾ಼ ಇನೇಸ್‌ ಅಪ್ಣುನ ಯೊ ಕೋಣ್ ಕರಿ ವತಾಳಿರಾಖ್ಯೊಸ್.
JOH 1:19 ಯೆರೂಸಲೇಮ್‌ನು ಯೆಹೂದ್ಯರ್‌ನ ಅದಿಕಾರಿಯೋನೆ ಯಾಜಕರ್‌ ಅಜು಼ ಲೇವಿವಾಳಾನ ಯೋಹಾನಕನ ಮೋಕ್ಲಿನ್, “ತೂ ಕೋಣ್?” ಕರಿ ಪುಛಾ಼ವನಟೇಕೆ ಮೋಕ್‍ಲ್ಯು.
JOH 1:20 ತದೆ ಯೋಹಾನನೆ ದಬಾಯೊಕೊಂತೆ, “ಮೇ ಕ್ರಿಸ್ತ ಕಾಹೆ” ಕರಿ ಖ್ಹಾರಾನ ಖ್ಹಾಮ್ಣೆ ಬೋಲ್ಯೊ.
JOH 1:21 ಇಮ್‌ರ‍್ಹಯುತೊ, “ತೂ ಎಲೀಯಕಿ‍ ಶು? ಕರಿ ಇವ್ಣೆ ಬೋಲಖ್ಹತರ್, ತದೆ ಯೋಹಾನನೆ ‘ಕಾಹೆ’ ಕರಿ ಬೋಲ್ಯೊ. “ತೂ ಆವ್ಣುಥೂತೆ ಪ್ರವಾದಿ ಕಾಹೆಕಿ ಶು?” ಕರಿ ಪಾಛೊ಼ ಬೋಲಖ್ಹತರ್, “ಮೆ ಕಾಹೆ” ಕರಿ ಇನೆ ಫರಿನ್ ಬೋಲ್ಯೊ.
JOH 1:22 ತದೆ ಇವ್ಣೆ, “ಇಮ್‍ಕತೊ, ತೂ ಕೋಣ್? ಹಮೂನ ಬೋಲ್, ಹಮೂನ ಮೋಕ್‌ಲ್ಯುತೆ ಇವ್ಣುನ ಹಮೆ ಜವಾಬ್‌ ದೇವ್ಣು; ತಾರಿ ಬಾರೇಮ ತೂ ಶಾತ್‌ ಬೋಲಾಸ್?” ಕರಿ ಪುಛಾ಼ಯು.
JOH 1:23 ಯೋಹಾನಾನೆ, ಪ್ರವಾದಿ ಹುಯಿರೋತೆ ಯೆಶಾಯನೆ ಬೋಲಾನಿತರಸ್, ‘ಪ್ರಭುನಿ ವಾಟ್ನ ಖ್ಹೂದುಕರೊ ಕರಿ ಬೋಲಾನು ಉಜ್ಜಾ಼ಡಿ ಝ಼ಗೋಮ ಚಿಕ್ರಾವಾಳಾನಿ ಅವಾಜ಼್ ಮೇಸ್’ ಕರಿ ಜ಼ವಾಬ್‌ದಿದೊ.
JOH 1:24 ಫರಿಸಾಯರ್‌ಥಿ ಮೋಕ್ಲಾಯುಹುಯು ಸಂದೇಶ್ ದ್ಯವಾಳು ಅದ್ಮಿ ಹುಯಿರುಥು.
JOH 1:25 ಇವ್ಣೆ ಯೋಹಾನ್ನ ಬೋಲ್ಯು, “ತೂ ಕ್ರಿಸ್ತಬಿ ಕಾಹೆ ಕರಿ ಬೋಲಾನು ಉಷೇತೊ ಎಲೀಯಬಿ ಕಾಹೆ, ಪ್ರವಾದೀಬಿ ಕಾಹೆ, ಇಮ್‍ಕತೊ, ತೂ ಬ್ಯಾಪ್ತಿಸ್ಮ ಶನ ದೇಸ್?” ಕರಿ ಪುಛಾ಼ಯು.
JOH 1:26 ತದೆ ಯೋಹಾನನೆ, “ಮೇ ಪಾಣಿಥಿ ಬ್ಯಾಪ್ತಿಸ್ಮ ದ್ಯವಾಳೊ, ಕತೋಬಿ ತುಮೂನ ಮಾಲುಮ್‌ಕೊಂತೆ ಏಕ್‌ ಜ಼ಣೊ ತುಮಾರ ಇಚ಼್‌ಮ ಛಾ಼.
JOH 1:27 ಯೋಸ್ ಮಾರ ಪೀಠೆ ಆವಾಳೊ ಹುಯಿರ‍್ಹೋಸ್, ಇನಿ ಖೋಖ್ಹ್‌ಡಾನಿ ಡೋರಿ ಛೋ಼ಡಾನಾಬಿ ಮೇ ಲ್ಹಾಯೇಕ್‌ಕೊಯ್ನಿ” ಕರಿ ಬೋಲ್ಯೊ.
JOH 1:28 ಆ ಅಖ್ಖೂಸ್ ಘಟನೆ ಬೇಥಾನ್ಯಮ ಚಾ಼ಲ್ಯು. ಆ ಯೊರ್ದನ್‌ ನದ್ದಿನ ಪೂರಬ್ ದಿಕ್ಮ ಛಾ಼ ಹಿಜ್ಜಾ಼ಸ್ ಯೋಹಾನ ಬ್ಯಾಪ್ತಿಸ್ಮ ದೆವ್‌ಕರ್ತೊಥೊ.
JOH 1:29 ಇನವ್ಹಾಣೆ ಯೋಹಾನನೆ ಇನಾಖನ್ನೆ ವಳ್ಯಾವ್‍ತೊಥೋತೆ ಯೇಸುನ ದೇಖಿನ್, “ದೇವ್ನ ಮೇಂಢಾನ ಚೆಲ್ಕಾನ ದೇಖೊ, ಯೊ ಜಗತ್‌ನು ಪಾಪ್ನ ದೂರ್ ಕರ್ಶೆ.”
JOH 1:30 ಅದ್ಮಿಖ್ಹಾರನ, ‘ಮಾರ ಪಾಛ಼ಳ್ ಆವಾಳೊ, ಮಾರೇಥಿಬಿ ಮಹಾನ್ ಹುಯಿರ‍್ಹೋಸ್, ಶನಕತೊ ಮೇ ಪೈದಾ ಹುವಾನ ಅಗಾಡಿಸ್ ಯೋ ಥೊ’ ಕರಿ ಮೇ ಬೋಲ್ಯೋತೆ ವಾತೆ ಅನಿಸ್ ಬಾರೇಮ ಹುಯಿರ‍್ಹೂಸ್.
JOH 1:31 ಅಜು಼ ಯೋಹಾನನೆ ಇನಿ ಸಾಕ್ಷಿದಿದೊ, “ಯೋ ಕೋಣ್ ಕರಿ ಮನಾಬಿ ಮಾಲುಮ್ ಕೋ ಥೂನಿ, ಕತೋಬಿ ಇಸ್ರಾಯೇಲ್ ಅದ್ಮಿನ ಯೋ ಕೋಣ್ ಕರಿ ಮಾಲುಮ್‌ ಕರಾವಾನಖ್ಹಾಜೆ, ಮೇ ಪಾಣಿನು ಬ್ಯಾಪ್ತಿಸ್ಮ ದೆವಾಳೊ ಹುಯಿನ್ ಆಯೋತೆ” ಕರಿ ಬೋಲ್ಯೊ.
JOH 1:32 ಅತ್ರೇಸ್ ಕಾಹೆತೆ ಯೋಹಾನ ಬೋಲ್ಯೋತೆ ಸಾಕ್ಷಿ ಶಾತ್‌ಕತೊ, “ದೇವ್‌ನು ಆತ್ಮ ಸೊರ್ಗಥು ಪರ‍್ಯಾವಾನಿಘೋಣಿ ಉತ್ರಿನ್ ಆಯೂತೆ ಅಜು಼ ಇನಾಪರ್ ಐನ್ ಬೆಠೂತೆ ಮೇ ದೇಖ್ಯೊ”.
JOH 1:33 ಯೊ ಆಸ್‍ಕರಿ ಮನಾಬಿ ಮಾಲುಮ್‌ ಕೊಯ್ನಿ, ಕತೋಬಿ ದೇವ್ನೆ ಮನ ಪಾಣಿಥಿ ಬ್ಯಾಪ್ತಿಸ್ಮ ದ್ಯವಾನ ಮೋಕ್ಲಿರಾಖ್ಯೊಸ್. ಯೊ ಮನ ಪಹಿಲೇಸ್ ಬೋಲಿರಾಖ್ಯೊಸ್, ‘ತೂ ದೇವ್ನು ಆತ್ಮ ಉಪ್ಪರ್‌ಥು ಏಕ್‌ ಅದ್ಮಿಪರ್ ಉತ್ರಿಆವಾನು ದೇಖಿಶ್‌, ಯೋಸ್‌ ಪವಿತ್ರಾತ್ಮಥಿ ಬ್ಯಾಪ್ತಿಸ್ಮ ದೆವಾಳೊ ಹುಯಿರೋಸ್’
JOH 1:34 “ಮೇ ಇನ ದೇಖ್ಯೊ, ಅಜು಼ ಯೋಸ್ ದೇವ್‌ನೊ ಛಿಯ್ಯೊ ಕರಿ ಮೇ ಸಾಕ್ಷಿ ದೆವ್‍ಕರೂಸ್” ಕರಿ ಬೋಲ್ಯೊ.
JOH 1:35 ಇನ ಅಗ್‍ಲ್ಯ ದನ್ನೆ ಯೋಹಾನ ಇನ ಬೇಜ಼ಣ ಶಿಷ್ಯರ‍್ನ ಜೋ಼ಡ್ಮ ಭಿಯೋಥೊ.
JOH 1:36 ತದೆ ಹಿಜ್ಜಾ಼ ಯೇಸು ಒಳೇಜಾ಼ತೊಥೋತೆ ದೇಖಿನ್, “ಹಂದೇಖೊ, ಬಲಿನಖ್ಹಾಜೆ ದೇವ್ನೆ ನೇಮಕ್ ಕರ‍್ಯೊತೆ ಮೇಂಢಾನು ಚೆಲ್ಕು!” ಕರಿ ಬೋಲ್ಯೊ.
JOH 1:37 ಯೋ ಭೇ ಶಿಷ್ಯರ್‌ ಯೋಹಾನ್ನಿ ಆ ವಾತೆನ ಖ್ಹಮ್‌ಜಿನ್‌, ಯೇಸುನ ಪೀಠೆ ಗಯ.
JOH 1:38 ಇವ್ಣೆ ಪೀಠೆ ವಳ್ಯವತೆ ಯೇಸುನೆ ಪಾಛೊ಼ ಫರೀನ್ ದೇಖ್ಯೊ, ತದೆ ಯೊ ಇವ್ಣುನ ಬೋಲ್ಯೊ, “ತುಮೂನ ಶಾತ್ ಹೋಣು? ತದೆ ಇವ್ಣೆ ಜ಼ವಾಬ್ ದಿದು, “ರಬ್ಬಿ, ತೂ ಕಿಜ್ಗಾ಼ ಜಿವ್ಣು ಕರಸ್?” ಕರಿ ಬೋಲ್ಯ (ರಬ್ಬಿ ಕತೊ “ಗುರು” ಕರಿ).
JOH 1:39 ಯೇಸುನೆ, “ಐನ್ ದೇಖೊ” ಕರಿ ಬೋಲ್ಯೊ. ತದೆ ಖ್ಹಾಂಜ಼್‌ನಿ ಖ್ಹುಮಾರ್, ಚಾರ್ ಘಂಟ ಹುಯಿರ‍್ಹಾಥ. ಇನಖ್ಹಾಜೆ ಇವ್ಣೆ ಇನಕೇಡೆ ಜೈ಼ನ್, ಯೋ ಥೋತೆ ಝ಼ಗೋನ ದೇಖ್ಯು, ಅಜು಼ ಯೋ ದನ್ ಇನ ಜೋ಼ಡೆಸ್ ರ‍್ಹಯು.
JOH 1:40 ಯೋಹಾನ್ನಿ ವಾತೆನ ಖ್ಹಮ್‌ಜಿನ್‌ ಯೇಸುನಿ ಪೀಠೆ ವಳೇಜಾ಼ತಥಾತೆ ಯೊ ಬೇ ಶಿಷ್ಯರ್‌ಮ ಸೀಮೋನ್ ಪೇತ್ರನೊ ಭೈ ಹುಯಿರ‍್ಹೋತೆ ಅಂದ್ರೆಯಬಿ ಏಕ್‌ ಜ಼ಣೊ.
JOH 1:41 ಅನೆ ಪಹಿಲೆ ಇನ ಭೈ ಹುಯಿರ‍್ಹೋತೆ ಸೀಮೋನ್‌ಕನ ಜೈ಼ನ್‌, “ಹಮೂನ ಮೆಸ್ಸೀಯ ಮಳಿರ‍್ಹೋಸ್‌” ಕರಿ ಬೋಲ್ಯೊ. (“ಮೆಸ್ಸೀಯ” ಕತೊ ಇಬ್ರಿಯಾಮ “ಕ್ರಿಸ್ತ” ಕರಿ)
JOH 1:42 ಅಜು಼ ಸೀಮೋನ್ನ ಯೇಸುಕನ ಬುಲೈಲಾಯೊ. ಯೇಸುನೆ ಸೀಮೋನ್ನ ದೇಖಿನ್‌, “ತೂ ಯೋಹಾನನೊ ಛಿಯ್ಯೊ ಹುಯಿರ‍್ಹೋತೆ ಸೀಮೋನ್, ಕತೋಬಿ ಹಮ್ಕೆಥು ‘ಕೇಫ’ ಕರಿ ಬೋಲೈಲಿಶ್” ಕರಿ ಬೋಲ್ಯೊ. ‘ಕೇಫ’ ಕತೊ ಪೇತ್ರ ಕರಿ. ಅನಿ ಮತ್‌ಲಬ್ ‘ಚಿಪಾಟ್’.
JOH 1:43 ಇನ ಅಗ್‍ಲ್ಯ ದನ್ನೆ ಯೇಸು ಗಲಿಲಾಯನ ಜಾ಼ವ್ಣುಕರಿ ಥೋತೆ ತದೆ, ಫಿಲಿಪ್ಪನ ದೇಖಿನ್‌, “ಮಾರ ಜೋ಼ಡೆ ಆವ್!” ಕರಿ ಬೋಲ್ಯೊ.
JOH 1:44 ಅಂದ್ರೆಯ ಅಜು಼ ಪೇತ್ರ ಬೆತ್ಸಾಯಿದ ಖ್ಹಯೇರ್‌ವಾಳ, ಫಿಲಿಪ್ಪಬಿ ಯೋಸ್ ಖ್ಹಯೇರ್‌ವಾಳೊ ಹುಯಿರ‍್ಹೋಥೊ.
JOH 1:45 ಫಿಲಿಪ್ಪನೆ ನತಾನಿಯೇಲ್‌ಥಿ ಮಳಿನ್, ಇನ, “ಕಿನಿ ಬಾರೇಮ ಮೋಶೆನೆ ಧರ್ಮಶಾಸ್ತ್ರ ಲೀಖ್ಯೋಕಿ ಅಜು಼ ಪ್ರವಾದಿಖ್ಹಾರು ಲೀಖ್ಯೂಕಿ ಯೋ ಹಮೂನ ಮಳಿರ‍್ಹೋಸ್‌. ಯೋ ಕೋಣ್‌ಕತೊ ಇನು ನಾಮ್ ಯೇಸು ಯೋಸೇಫ್‌ನೊ ಛಿಯ್ಯೊ ಅಜು಼ ನಜ಼ರೇತ್‍ಮ ರ‍್ಹವಾಳೊ.
JOH 1:46 ತದೆ ನತಾನಿಯೇಲನೆ, ‘ನಜ಼ರೇತ್‌ಥು ಶಾತ್‌ತೋಬಿ ಅಛ಼್ಛು ಆವ್‌ಶೆಕಿ ಶು’? ಕರಿ ಫಿಲಿಪ್ಪನ ಪುಛಾ಼ಯೊ. ಇನ ಫಿಲಿಪ್ಪನೆ, “ಐನ್, ದೇಕ್” ಕರಿ ಬೋಲ್ಯೊ.
JOH 1:47 ಯೇಸುನೆ ಇನಾಭಣಿ ವಳ್ಯಾವ್‌ಥೋತೆ ನತಾನಿಯೇಲ್‌ನ ದೇಖಿನ್‌, ಇನಿ ಬಾರೇಮ, “ಹಂದೇಖೊ, ಆ ಖ್ಹಾಚೊ಼ ಇಸ್ರಾಯೇಲ್‌ವಾಳೊ; ಅನಾಮ ಶನೀಶ್ ಗಲತ್‌ ಕೊಯ್ನಿ!” ಕರಿ ಬೋಲ್ಯೊ.
JOH 1:48 ಇನ ನತಾನಿಯೇಲನೆ ತೂ ಮನ ಕಿಮ್ ಮಾಲುಮ್ ಕರ‍್ಯೊ? ಕರಿ ಯೇಸುನ ಬೋಲಖ್ಹತರ್ ಇನೆ ಫಿಲಿಪ್ಪನೆ ತುನ ಬುಲಾವನ ಅಗಾಡಿಸ್ ತು ಯೋ ಅಂಜೀರ್‌ನ ಝಾ಼ಡ್‌ ಹೇಟ್ ಮೇ ದೇಖ್ಯೊ ಕರಿ ಬೋಲ್ಯೊ.
JOH 1:49 ತದೆ ನತಾನಿಯೇಲನೆ ಇನ, “ಗುರು, ತೂ ದೇವ್‌ನೊ ಛಿಯ್ಯೊ! ತೂಸ್ ಇಸ್ರಾಯೇಲ್‌ನೊ ರಾಜ಼!” ಕರಿ ಬೋಲ್ಯೊ.
JOH 1:50 ಯೇಸುನೆ ಇನ, ತೂ ಅಂಜೀರ್‌ನ ಝಾ಼ಡಾನ ಹೇಟ್‌ ಥೊ, ತದೆ ಮೆ ತುನ ದೇಖ್ಯೊ. ಕರಿ ಬೋಲ್ಯೋತೆ ವಾತೆಥಿ ತೂ ನಂಬಾಸ್ಕಿ ಶು? ತೂ ಇನೇಥಿಬಿ ಜಾ಼ಖ್ಹತ್ ಮೋಟು ಕಾಮ್‌ಖ್ಹಾರು ದೇಖಿಶ್‌!” ಕರಿ ಬೋಲ್ಯೊ.
JOH 1:51 ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚ ಬೋಲುಸ್ಕಿ: ಸೊರ್ಗ ನಿಕ್‌ಳೈರ‍್ಹೀಶೆತೆ ಅಜು಼ ಅದ್ಮಿನೊ ಛಿಯ್ಯಾನ ಉಪ್ಪರ್ ಕರಿ ದೇವ್‌ನು ದೂತರ್ ಉತ್ರಿ ಆವಾನು ಅಜು಼ ಜಾ಼ವಾನು ತುಮೆ ದೇಕ್‌ಶು” ಕರಿ ಬೋಲ್ಯೊ.
JOH 2:1 ತೀನ್ನೆ ದನ್ಮ ಗಲಿಲಾಯನು ಕಾನಾಕರಿ ಗಾಮ್ಮ ಏಕ್‌ ವ್ಯಹಾ ಥೂ. ಯೇಸುನಿ ಆಯ ಹಿಜ್ಜಾ಼ ಥಿ.
JOH 2:2 ಯೇಸುನ ಅಜು಼ ಇನ ಶಿಷ್ಯರ್‌ನಾಬಿ ವ್ಯಹಾನ ಬುಲೈರಾಖ್ಯುಥು.
JOH 2:3 ದ್ರಾಕ್ಷಿನು ರಖ್ಹ್‌ ಪುರ‍್ಯೂಕೊಂತೆ ಇನಖ್ಹಾಜೆ, ಯೇಸುನಿ ಆಯಾ ಇನ ದ್ರಾಕ್ಷಿನು ರಖ್ಹ್‌ ಕೊಯ್ನಿ” ಕರಿ ಬೋಲಿ.
JOH 2:4 ಯೇಸುನೆ ಇನ, “ಆಯಾ, ಮನ ಆ ಅಖ್ಖು ಶನ ಬೋಲಸ್? ಮಾರಿ ವಖ್ಹತ್ ಬಿಜೂ಼ಬಿ ಕೋ ಐರ‍್ಹೀನಿ” ಕರಿ ಬೋಲ್ಯೊ.
JOH 2:5 ತದೆ ಯೇಸುನಿ ಆಯಾನೆ ಆಳ್‌ನ ಖ್ಹಾರು, “ಯೋ ತುಮೂನ ಶಾತ್‌ ಬೋಲಸ್ಕಿ, ಯೋ ಕರೊ” ಕರಿ ಬೋಲಿ.
JOH 2:6 ಬಂಡಾಥಿ ಬಣೈಹುಯು ಛೊ಼ ಟೊಟ್ಟಿ ಮ್ಹೇಲಿರಾಖ್ಯುಥು, ಯೆಹೂದ್ಯರ್‌ನಿ ಪದತ್ತಿಮ ಶುದ್ದಿ ಕರಾನಟೇಕೆ, ಅನ ರಾಕ್‍ತುಥು. ಹರೇಕ್ ಟೊಟ್ಟಿಬಿ ಖ್ಹುಮಾರ್ ಚಾರಿಖ್ಹ್ ಥಿ ಏಕ್‌ ಖ್ಹೋ ವೀಖ್ಹ್‌ ಲೀಟರ್ ಪಾಣಿಭರಾವ ಎವ್ಡು ಮೋಟು ಥೂ.
JOH 2:7 ಯೇಸು ಯೋ ಆಳ್‌ ಖ್ಹಾರಾನ, “ಹೈರಾತೆ ಟೊಟ್ಟಿಮ ಪಾಣಿ ಭರೊ” ಕರಿ ಬೋಲ್ಯೊ. ಇಮ್ಮಸ್ ಇವ್ಣೆ ಯೋ ಟೊಟ್ಟಿಮ ಪಾಣಿ ಬಮ್‌ಭರ‍್ಯು.
JOH 2:8 ತದೆ ಯೇಸುನೆ ಇವ್ಣುನ, “ಹಮ್ಕೆ ಅನಾಮಾನು ಥೋಡು ಪಾಣಿನ ಕಾಡಿಲಿಜೈ಼ನ್‌, ಖಾಣು-ಪಾಣಿನಿ ಬಾರೇಮ ದೇಖಿಲೇವ್‌ಕರಾಸ್ತೆ ಮೋಟಾನ ದೆವೊ” ಕರಿ ಬೋಲ್ಯೊ. ಇವ್ಣೆ ಲೀಜೈ಼ನ್ ದಿದು,
JOH 2:9 ತದೆ ಇನೆ ದ್ರಾಕ್ಷಿನು ರಖ್ಹ್‌ ಬಣಿರ‍್ಹುಥೂತೆ ಪಾಣಿನ ಚಾ಼ಖಿ ದೇಖ್ಯೊ. ಯೋ ದ್ರಾಕ್ಷಿನು ರಖ್ಹ್‌ ಕಿಜ್ಗಾ಼ಥು ಆಯು ಕರಿ ಇನ ಮಾಲುಮ್ ಕೋ ಥೂನಿ, ಕತೋಬಿ ಪಾಣಿ ಕಾಡ್ಯುತೆ ಯೋ ಆಳ್‌ ಖ್ಹಾರಾನ ಆ ಮಾಲುಮ್‌ ಥು. ತದೆ ಇನೆ ಯೋ ವ್ಯಹಾನೊ ವ್ಹೆತುಲ್ಡಾನ ಬುಲಾಯು.
JOH 2:10 ಅಖ್ಖುಜ಼ಣು ಅಛ್ಛು಼ ದ್ರಾಕ್ಷಿನು ರಖ್ಹ್‌ನ ಪಹಿಲೆ ದೀನ್ ನಿಷಾಛ಼ಡಿಗತೊ ತದೆ ಮಾಮುಲಿನ ರಖ್ಹ್‌ನ ದೇಸ್. ತೂತೊ ಅಛ಼್ಛ ದ್ರಾಕ್ಷಿನ ರಖ್ಹ್‌ನ ಹಮ್ಕೆಲಗು ದೀರಾಖ್ಯೊಸ್ ಕರಿ ಬೋಲ್ಯೊ.
JOH 2:11 ಯೇಸುನೆ ಆ ಪಹಿಲು ಖ್ಹಣೇದ್ನ ಕಾಮ್ನ ಗಲಿಲಾಯನು ಕಾನಾ ಕರಿ ಗಾಮ್ಮಕರ‍್ಯೊ. ಹಿಜ಼್ಜ ಯೇಸು ಇನ ಮಹಿಮೆನ ವತಾಳ್ಯೊ, ಅಜು಼ ಇನ ಶಿಷ್ಯರ್‌ನೆ ಇನಾಪರ್‌ ವಿಶ್ವಾಸ್‌ ಕರ‍್ಯಾ.
JOH 2:12 ಅನ ಬಾದ್‌ಮ ಯೇಸು, ಇನಿ ಆಯಾ, ಭೈಯೇ ಅಜು಼ ಇನ ಶಿಷ್ಯರ್‌ನಿ ಜೋ಼ಡ್ಮ, ಕಪೆರ್ನೌಮ್ ಕರಿ ಗಾಮ್‌ನ ಜೈ಼ನ್‌, ಥೋಡ ದನ್ ಹಿಜ್ಜಾ಼ ಥಾ.
JOH 2:13 ಯೆಹೂದ್ಯರ್‌ನ ಪಸ್ಕ ಪೂಜಾ಼ನೊ ದನ್ ಖನ್ನೆ ಐಗೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್‌ನ ಉಪ್ಪರ್ ಗಯೊ.
JOH 2:14 ಹಿಜ್ಜಾ಼ ಮಂದಿರ್‌ಮ ಅದ್ಮಿಖ್ಹಾರು ಢಾಂಡು, ಮೇಂಢು, ಅಜು಼ ಪರ‍್ಯಾವ ವೆಚು಼ಕರ್ತುಥೂತೆ ಯೇಸುನೆ ದೇಖ್ಯೊ, ಅಜು಼ ಪೈಶಾ ತೋಡಾವಾನು ಧಂದೊ ಕರಾವಾಳುಬಿ ಇವ್ಣಿ ಇವ್ಣಿ ಮೇಜ್‌ಪರ್‌ ಬೇಶಿನ್, ಧಂದೊ ಕರುಕರ್ತುಥು.
JOH 2:15 ಇನಖ್ಹಾಜೆ ಯೇಸುನೆ ಶಿಂದ್ರಾಥಿ ವಾಟಿನ್ ಏಕ್‌ ಕೊಲ್ಡಾನ ಬಣಾಯೊ, ಇನೇಥಿ ಯೋ ಖ್ಹಾರಸ್ ಜಾನ್ವರ್‌ನ, ಢಾಂಡಾನ ಅಜು಼ ಮೇಂಢಾನ ಮಾರಿನ್, ಮಂದಿರ್‌ಮಾಥು ಭಾರ್‌ ಹಕೇಳ್ಯೊ; ಪೈಶಾ ತೋಡಾವಾಳಾನು ಮೇಜ್‌ನ ರಡ್‌ಕೈನ್‌, ಪೈಶ ರಂಚಿದಿದೊ.
JOH 2:16 ಪರ‍್ಯಾವೊ ವೇಚ಼ವಾಳಾನ, “ಹಜ್ಜಾ಼ಥು ಅನ ಪಳ್ಳಿ ಜಾ಼ವೊ! ಮಾರ ಬಾನಘರ‍್ನ ಬಜಾ಼ರ್‌ನಿ ಝ಼ಗೊ ಕರಾನು ಭೀರಾಖೊ!” ಕರಿ ಬೋಲ್ಯೊ.
JOH 2:17 ತದೆ, “ತಾರಿ ಮಂದಿರ್‌ಪರ್‌ಲಿ ಘಣಿ ಪ್ಯಾರ್, ಮಾರ ಮಹಿ ಆಗ್‌ನಿಮತ್‌ ಬಳಾಸ್‌” ಕರಿ ವಚನ್‌ಮ ಲೀಖೈರ‍್ಹೂತೆ ಯೋ ವಚನ್ ಶಿಷ್ಯರ್‌ನಿ ಯಾದ್ಮ ಆಯು.
JOH 2:18 ಯೆಹೂದ್ಯರ್ ಅದಿಕಾರಿನೆ ಯೇಸುನ ಖನ್ನೆ ಐನ್ ಬೋಲ್ಯು,ತೂ ಹಮೂನ ಖಿವು ಅದ್ಭುತ್ ಖ್ಹಣೇದ್‍ನು ಕಾಮ್ನ ಕರಿನ್ ವತಾಳಿಸ್ಕಿ ಅನೇಥಿ ತೂ ಶಾತ್ ಕರುಕರಾಸ್ಕಿ ಇನಿ ಹಕ್ ತುನ ಛಾ಼ ಕರಿ ಸಾಬಿತ್ ಉಷೆ.
JOH 2:19 ತದೆ ಯೇಸುನೆ, “ಆ ಮಂದಿರ್‌ನ ರಡ್‌ಕೈನಾಖಿದೇವೊ, ಮೇ ತೀನ್ ದನ್ಮ ಅನ ಪಾಛು಼ ಭಾಂದೀಶ್” ಕರಿ ಜವಾಬ್‌ ದಿದೊ.
JOH 2:20 ಯೆಹೂದ್ಯರ್‌ನೆ ಇನ, “ಆ ಮಂದಿರ್‌ನ ಭಾಂದಾನ ಛೊ಼ ಉಪ್ಪರ್ ಚಾ಼ಳಿಖ್ಹ್ ವರಖ್ಹ್‌ ಹುಯು! ತೂ ಅನ ತೀನಸ್ ದನ್ಮ ಭಾಂದಾನ ಓಳೆಜಾಸ್ಕಿ‍ ಶು?” ಕರಿ ಬೋಲ್ಯೊ.
JOH 2:21 ಕತೋಬಿ ಯೇಸು ಖಿವಿ ಮಂದಿರ್‌ನಿ ಬಾರೇಮ ಬೋಲುಕ‍ರ್ತೋಥೊ ಯೋ ಇನು ಶೊಂತ್ ಶರೀರ್ ಹುಯಿರುಥು.
JOH 2:22 ಯೇಸು ಮರೀನ್, ಜಿವ್ತೊಹುಯಿನ್ ಉಠಾನ ಬಾದ್‌ಮ, ಆ ವಾತೆ ಇನ ಶಿಷ್ಯರ್‌ನ ಯಾದ್ಮ ಆಯು, ತದೆ ಇವ್ಣೆ ವಚನ್‌ಮ ಲೀಖೈರ‍್ಹೂತೆ ಅಜು಼ ಯೇಸುನೆ ಬೋಲ್ಯೋತೆ ವಾತೆನ ನಂಬ್ಯು.
JOH 2:23 ಯೇಸು ಪಸ್ಕ ಪೂಜಾ಼ನಿ ವಖ್ಹತ್‌ಮ ಯೆರೂಸಲೇಮ್ಮ ಥೊ, ತದೆ ಇನೆ ಕರ‍್ಯೊತೆ ಅದ್ಭುತ್‌ಖ್ಹಾರು ಘಣ ಅದ್ಮಿನೆ ದೇಖಿನ್‌, ಇನ ನಾಮ್‍ಪರ್ ವಿಶ್ವಾಸ್‌ ಕರ‍್ಯು.
JOH 2:24 ಕತೋಬಿ ಯೇಸುನೆ ಖುದ್ ಇನಾಸ್ ಇವ್ಣಿ ವಿಶ್ವಾಸ್‌ಪರ್ ಮ್ಹೇಲಿದಿದೊಕೊಯ್ನಿ, ಶನಕತೊ ಯೊ ಖ್ಹಾರಸ್ನ ಮಾಲುಮ್‌ ಕರಿರಾಖ್ಯೋಥೊ.
JOH 2:25 ಯೋ ಹರೇಕ್ ಅದ್ಮಿನ ದಿಲ್ನ ಮಾಯ್ನನ ಮಾಲುಮ್ ಕರಿರಾಖ್ಯೊಥೋತೆ ಇನಖ್ಹಾಜೆ ಕೋಣ್‌ಬಿ ಖೆವ ಅದ್ಮಿನಿ ಬಾರೇಮ ಯೇಸುನ ಸಾಕ್ಷಿ ಬೋಲಿವತಾಳಾನು ಜ಼ರೂರತ್ ಕೋಥೂನಿ.
JOH 3:1 ಏಕ್‌ ಜ಼ಣೊ ಯೆಹೂದ್ಯವಾಳೊ ಅದಿಕಾರಿ ಹುಯಿರೋಥೊ, ಇನು ನಾಮ್ ನಿಕೊದೇಮ ಅಜು಼ ಯೊ ಫರಿಸಾಯರ್‌ನಿ ಝೂ಼ಂಡ್‌ವಾಳಮ ಏಕ್‍ಜ಼ಣೊ ಹುಯಿರೋಥೊ.
JOH 3:2 ಯೋ ಏಕ್‌ ರಾತೆ ಯೇಸುಕನ ಐನ್, “ರಬ್ಬಿ, ತು ದೇವ್‍ಥಿ ಆಯೋಹುಯೊ ಫಡಾವವಾಳೊ ಕರಿ ಹಮೂನ ಮಾಲುಮ್‌. ತು ಕರಾತೆ ಖ್ಹಣೇದ್‍ನು ಕಾಮ್ ಕರಾನ, ದೇವ್ನಿ ಮದತ್ ಕೊಯ್ನಿತೆ ಕಿನೇಥೀಬಿ ಕೋ ಹುವಾನಿ” ಕರಿ ಬೋಲ್ಯೊ.
JOH 3:3 ಇಮ್‌ ಬೋಲ್ತಾನ ಯೇಸುನೆ, “ಮೇ ತುನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್‌ತೋಬಿ ಏಕ್‌ ಜ಼ಣು ದೇವ್ನಿ ರಾಜ್ಯಮ ಪಾಛು಼ ಪೈದಾ ನಾ ಹುಯೂತೊ, ದೇವ್‌ನು ರಾಜ಼್‌ನ ದೇಖಾನ ಕೋ ಹುವಾನಿ?” ಕರಿ ಬೋಲ್ಯೊ.
JOH 3:4 ತದೆ ನಿಕೊದೇಮನೆ ಯೇಸುನ, “ಏಕ್‌ ಅದ್ಮಿ ಬುಢು ಹುಯಿಜಾ಼ವಪರ್, ಪಾಛು಼ ಪೈದಾ ಹುವಾನ ಕಿಮ್ ಉಷೆ? ಯೋ ಅದ್ಮಿ ಪಾಛು಼ ಇನಿ ಆಯಾನ ಗರಬ್‌ಮ ಪೇಶಿನ್, ಪೈದಾ ಹುವಾನ ಕೋ ಹುವ್ವಾನಿನಿ! ಕರಿ ಬೋಲ್ಯೊ.
JOH 3:5 ಇಮ್‌ ಬೋಲ್ತಾನ ಯೇಸುನೆ, “ಮೇ ತುನ ಖ್ಹಾಚಮಾಬಿ ಬೋಲುಸ್ಕಿ, ಏಕ್‌ ಅದ್ಮಿ ಪಾಣಿಥೀಬಿ, ಆತ್ಮಥಿ ಪೈದಾ ನಾ ಹುಯೂತೊ, ಯೋ ದೇವ್ನಿ ರಾಜ್ಯಮ ಜಾ಼ಶೇಸ್ ಕೊಯ್ನಿ.
JOH 3:6 ಏಕ್‌ ಜ಼ಣೊ ಶರೀರ್‌ಥಿ ಪೈದಾ ಹುಯಿರೊಸ್. ಕತೋಬಿ ಆತ್ಮೀಕಥಿ ರ‍್ಹವಾಳೊ ಯೊ ಆತ್ಮಥಿ ಪೈದಾ ಹುವ್ವವಾಳು ಹುಯಿರ‍್ಹುಸ್‍.
JOH 3:7 ತುಮೆ ನವೇಥಿ ಪೈದಾ ಹೋಣು ಕರಿ ಬೋಲ್ಯೋತೊ ಇನ ಆಶ್ಚರ್ಯ ನಾಖಾವ್ಣು.
JOH 3:8 ವಹಿರೊ ಇನ ಕಿಮ್ ಹೋಣುಕಿ ತಿಮ್ ವಾಗ್‌ತು ರ‍್ಹೇಸ್‌; ಇನೊ ಅವಾಜ಼್ ತುನ ಖ್ಹಮಜ಼್ ಪಡಾಸ್‌, ಪಣ್ಕಿ ಯೋ ಕಿಜ್ಗಾ಼ಥು ಉಳ್ಯಾವಾಸ್‌ ಅಜು಼ ಕಿಜ್ಗಾ಼ ಉಳ್ಯುಜಾ಼ಸ್‌ ಕರಿ ತುನ ಮಾಲುಮ್‌ ಪಡಾಕೊಯ್ನಿ, ಆತ್ಮಥಿ ಪೈದಾ ಹುವ್ವವಾಳು ಖ್ಹಾರೂಬಿ ಇಮ್ನೀಸ್‌ಘೋಣಿ ಹುಯಿರ‍್ಹೂಸ್” ಕರಿ ಬೋಲ್ಯೊ.
JOH 3:9 ನಿಕೊದೇಮನೆ, “ಆ ಕಿಮ್ ಉಶೆ?’ ಕರಿ ಪುಛಾ಼ಯೊ.
JOH 3:10 ಯೇಸುನೆ, “ತೂ ಇಸ್ರಾಯೇಲ್‌ ಅದ್ಮಿನ ಬೋಲಿ ವತಾಳವಾಳೊ ಗುರು ಹುಯಿರ‍್ಹೋಸ್, ತೋಬಿ ತುನ ಆ ಮಾಲುಮ್‌ ಪಡಾಕೊಯ್ನಿಕಿಶೂ?
JOH 3:11 ಮೇ ತುನ ಖ್ಹಾಚ ಬೋಲುಕರುಸ್: ಹಮೂನ ಮಾಲುಮ್‌ ಛಾ಼ತೆ ಇನಿ ಬಾರೇಮ ಹಮೆ ಬೋಲೆಸ್, ಅಜು಼ ಹಮೆ ದೆಖೇಸ್ತೆ ಇನಿ ಬಾರೇಮ ಸಾಕ್ಷಿ ಬೋಲೆಸ್, ಕತೋಬಿ ತುಮೆ ಹಮೆ ಬೋಲೆಸ್ತೆ ಇನ ಮಾನಕೊಯ್ನಿ.
JOH 3:12 ಮೆ ಜಗತ್ನಿ ವಾತ್ನಿ ಬಾರೇಮ ಬೋಲ್ಯೋತೊ ತುಮೆ ಇನ ಮಾನಕೊಯ್ನಿ, ಅಮ್ ರ‍್ಹವಾಪರ್ ಮೆ ತುಮೂನ ಸೊರ್ಗನಿ ವಾತೆನ ಬೋಲ್ಯೊತೊ, ತುಮೆ ಕಿಮ್ ವಿಶ್ವಾಸ್‌ ಕರ್ಶು?
JOH 3:13 “ಸೊರ್ಗಥೊ ಉತ್ರಿನ್ ಆಯೋತೇಸ್‌ ಕತೊ, ಅದ್ಮಿನೊ ಛಿಯ್ಯೋಸ್ ಪಣ್ಕಿ, ಬಿಜು಼ ಕೋಣ್‌ಬಿ ಸೊರ್ಗಾನ ಚ಼ಢೀನ್‌ ಕೋ ಜೈ಼ರ‍್ಹೂನಿ”.
JOH 3:14 ಮೋಶೆನೆ ಉಜ್ಜಾ಼ಡಿ ಝ಼ಗೋಪರ್‌ ತಾಂಬಾನು ಖ್ಹಾಪ್‍ನ ಊಚ಼ ಖಂಬಾಪರ್‌ ಮ್ಹೇಲ್ಯೋತೆ ಇಮ್ಮಸ್, ಅದ್ಮಿನೊ ಛಿಯ್ಯಾನಾಬಿ ಊಚು಼ ಪಾಡ್ನು.
JOH 3:15 ಅನೇಥಿ ಇನಾಪರ್‌ ವಿಶ್ವಾಸ್‌ ಕರಾವಾಳು ಹರೇಕ್‌ನ ಹಮೇಶಾನಿ ಜಿ಼ಂದ್‌ಗಿ ಮಳ್‌ಶೆ” ಕರಿ ಬೋಲ್ಯೊ.
JOH 3:16 ದೇವ್ನೆ ಆ ಜಗತ್‌ನು ಅದ್ಮಿನ ಕೆತ್ರೇಸ್ಕಿ ಜಾ಼ಖ್ಹತ್ ಪ್ಯಾರ್ ಕರೀನ್, ಇನೊ ಏಕ್‍ನೊ-ಎಕ್ಕಸ್ ಛಿಯ್ಯಾನ ದಿದೊ; ಇನ ನಂಬವಾಳು ಏಕ್‌ಬಿ ಮರ‍್ನುನಾತೆ ಹರೇಕ್ನ ಹಮೇಶಾನಿ ಜಿ಼ಂದ್‌ಗಿ ಮಳ್‌ಣು ಕರಿ ಇನ ದಿದೊ.
JOH 3:17 ದೇವ್ನೆ ಇನ ಛಿಯ್ಯಾನ ಮೋಕ್‌ಲ್ಯೊತೆ ಆ ಜಗತ್ನ ಅದ್ಮಿನ ರಕ್ಷಣೆ ಹೋಣುಕರಿ ಮೋಕ್‌ಲ್ಯೊತೆ ಪಣ್ಕಿ, ತೀರ್ಪ್‌ ಕರಾನಖ್ಹಾಜೆ ಕಾಹೆ.
JOH 3:18 ಇನ ನಂಬವಾಳಾನ ತೀರ್ಪ್‌ ಕೋ ಹೊಯ್ನಿ, ಕತೋಬಿ ನಂಬಕೊಂತೆ ಇನ ತದೇಸ್‌ ತೀರ್ಪ್‌ ಹುಯ್ಗಿ. ಶನಕತೊ ಇನೆ ದೇವ್ನ ಎಕ್ಕಸ್ ಛಿಯ್ಯಾನ ನಾಮ್ನ ಉಪ್ಪರ್ ಭರೋಖ್ಹೊ ಕರ‍್ಯೊಕೊಯ್ನಿ.
JOH 3:19 ಯೋ ತೀರ್ಪ್‌ ಶಾತ್‌ಕತೊ ಉಜಾ಼ಳು ಜಗತ್‌ಮ ಆಯುತೋಬಿ ಅದ್ಮಿವೊನು ಕಾಮ್ ಖರಾಬ್‍ಥೂತೆ ಇನಖ್ಹಾಜೆ ಇವ್ಣೆ ಉಜಾ಼ಳೇಥಿಬಿ ಅಂಧಾರನ ಪ್ಯಾರ್ ಕರ‍್ಯು.
JOH 3:20 ಖರಾಬ್‌ನ ಕರಾವಾಳು ಇವ್ಣು ಖರಾಬ್ ಕಾಮ್‍ಅಖ್ಖು ಭಾರ್‌ ಆವ್‍ತುರ‍್ಹೀಶೆಕರಿ ಉಜಾ಼ಳಮ ಆವಕೊಯ್ನಿ ಅಜು಼ ಉಜಾ಼ಳಾನ ವಹೇರ್‌ಕರಸ್.
JOH 3:21 ಕತೋಬಿ ಖ್ಹಾಚ಼ನ ಲೀನ್ ಚಾ಼ಲವಾಳೊ ಯೋ ದೇವ್‍ಥಿ ಚ಼ಲೈಲ್ಯವಾಳೊ ಹುಯಿರಿನ್ ಇನ ಕಾಮ್ನ ಭಾರ್‌ ಲ್ಯಾವವಾಳೊ ಹುಯಿರೇಸ್.
JOH 3:22 ಅನ ಬಾದ್‌ಮ, ಯೇಸು ಅಜು಼ ಇನ ಶಿಷ್ಯರ್‌ ಯೂದಾಯ ತಬರ್‌ಖಾನ ಗಯ. ಹಿಜ್ಜಾ಼ ಯೊ ಇವ್ಣ ಶಿಷ್ಯರ್‌ನಿ ಜೋ಼ಡೆ ರ‍್ಹೀನ್, ಬ್ಯಾಪ್ತಿಸ್ಮ ದಿದೊ.
JOH 3:23 ಯೋಹಾನಾಬಿ ಸಲೀಮ್‌ ಗಾಮ್‌ನ ಖನ್ನೆ ಥೂತೆ ಐನೋನ್‌ಕನ ಬ್ಯಾಪ್ತಿಸ್ಮ ದೆವ಼್‌ಕರ್ತೋಥೊ. ಶನಕತೊ ಹಿಜ್ಜಾ಼ ಘಣು ಪಾಣಿ ಥೂ; ಅದ್ಮಿಖ್ಹಾರು ಹಿಜ಼್ಜಾಐನ್, ಬ್ಯಾಪ್ತಿಸ್ಮ ಕರೈಲೆವ್‌ ಕರ್ತುಥು.
JOH 3:24 ತಬ್‌ಲಗು ಯೋಹಾನ ಜೇಲ್‌ಮ ಕೊಘರಾಖ್ಯುಥುನಿ ಹೈರುತೆ ಯೋಹಾನ್ನ ಜೇಲ್‌ಮ ಕೋಂಡಿ ಘಾಲಾನ ಪಹಿಲೇಸ್ ಚಾ಼ಲಿರುಥು.
JOH 3:25 ಯೋಹಾನ್ನ ಥೋಡ ಶಿಷ್ಯರ್‌ಮ ಅಜು಼ ಏಕ್‌ ಯೆಹೂದ್ಯವಾಳನಿ ಧಾರ್ಮಿಕ ಪದತ್ತಿನಿ ಘೋಣಿನಿ ಅಶ್ನಾನ್‌ಧಾನ್ನಿ ಬಾರೇಮ ಚರ್ಚೆಹುಯು.
JOH 3:26 ತದೆ ಇವ್ಣೆ ಯೋಹಾನಕನ ಐನ್, “ಗುರು, ಯೊರ್ದನ್‌ ನದ್ದಿನ ಪಾರ್ಲಿಬಾಜು ತಾರಕನ ಥೋತೆ ಏಕ್‍ಜ಼ಣಾನಿ ಬಾರೇಮ ತುನೆ ಸಾಕ್ಷಿ ಬೊಲ್ಯೊನಿ, ಯೋಸ್ ಹಮ್ಕೆ ಅದ್ಮಿಖ್ಹಾರಾನ ಬ್ಯಾಪ್ತಿಸ್ಮ ದೆವ್‌ಕರಾಸ್‌, ಅಜು಼ ಹರೇಕ್ ಜ಼ಣು ಇನಾಕನ ಒಳ್ಯುಜಾ಼ಸ್!” ಕರಿ ಬೋಲ್ಯು.
JOH 3:27 ಯೋಹಾನನೆ ಸೊರ್ಗಥು ತಬ್‍ಲಗು ದೇವ್ ಕೊ ದೇಯ್ನಿಕಿ ತಬ್‍ಲಗು ಖೆವಾಬಿ ಅದ್ಮಿನ ಶಾತ್ಬಿ ಕೊ ಮಳ್‌ಶೇನಿ.
JOH 3:28 ತುಮೆ ಅಖ್ಖು ಸಾಕ್ಷಿಹುಯಿರಾಸ್, ಮೆ ಬೋಲ್ಯೊಥೊ, “ಮೇ ಕ್ರಿಸ್ತ ಕಾಹೆ, ಕತೋಬಿ ಇನೇಥಿ ಅಗಾಡಿ ಮನ ಮೋಕ್ಲಿರಾಖ್ಯೊಸ್”.
JOH 3:29 ವ್ಹೆತುಲ್ಡಾನ ಮಳಾಸ್ತೆ ವ್ಹೆತುಲ್ಡೀಸ್, ಕತೋಬಿ ವ್ಹೆತುಲ್ಡಾನೊ ದೋಸ್ ಇನ ಖನ್ನೆ ಭೀರಿನ್‌, ಇನಿ ಅವಾಜ಼್‌ನ ಖ್ಹಮ್‌ಜಿನ್‌ ಘಣು ಖ್ಹುಶಿಕರಸ್. ಆಸ್ ಮನ ಛಾ಼ತೆ ಖ್ಹುಶಿ, ಯೋ ಪೂರ ಹುಯು.
JOH 3:30 ಯೋ ಉಪ್ಪರ್ ಪಡಾವ್ಣು ಅಜು಼ ಮೇ ಹೇಟೊ ಹೋಣು” ಕರಿ ಬೋಲ್ಯೊ.
JOH 3:31 ಕೋಣ್ ಜ಼ಮೀನ್‌ಪರ್ ಛಾ಼ಕಿ ಯೊ ಜ಼ಮೀನ್ನಿ ವಾತೆನಿ ಬಾರೇಮ ಬೋಲಸ್, ಕತೋಬಿ ಕೋಣ್ ಸೊರ್ಗಥಿ ಆವಾಳೋಕಿ ಯೋ ಖ್ಹಾರೇಥಿ ಮಹಾನ್ ಹುಯಿರ‍್ಹೋಸ್. ಆ ಜಗತ್‌ವಾಳು ಆ ಜಗತ್ನ ಮಳ್ಯೊಹುಯೊ ಹುಯಿರ‍್ಹುಸ್.
JOH 3:32 ಯೋ ಶಾತ್‌ ದೇಖ್ಯೋಕಿ ಅಜು಼ ಖ್ಹಮ್‌ಜೋಕಿ ಇನಿ ಬಾರೇಮ ಸಾಕ್ಷಿ ಬೋಲಾಸ್, ತೋಬಿ ಇನಿ ಸಾಕ್ಷಿನ ಕೋಣ್‌ಬಿ ಮಾನಕೊಯ್ನಿ.
JOH 3:33 ಕತೋಬಿ ಕೋಣ್ ಇನಿ ಸಾಕ್ಷಿನ ಮಾನಿಲೇಸ್ಕಿ, ಯೋ ಅಮ್ ಕರಾಥಿ ದೇವ್ ಖ್ಹಾಚು಼ ಕರಿ ಸಾಬಿತ್ ಕರಸ್.
JOH 3:34 ಶನಕತೊ,ಕಿನದೇವ್‍ನೆ ಮೋಕ್ಲಿ ರಾಖ್ಯೋಸ್ಕಿ, ಯೋ ದೇವ್ನಿ ವಾತೇನ ಬೋಲಾಸ್. ಇನ ದೇವ್ನೆ ಆತ್ಮಥಿ ಭರ್‌ಪೂರ್‌ ಕರಾಸ್.
JOH 3:35 ಅಜು಼ ಬಾ ಇನ ಲಾಡ್ನ ಛಿಯ್ಯಾನ ಇನಿ ಅಖ್ಖಿ ಅದಿಕಾರ್‌ನ ದೀರಾಖ್ಯೊಸ್.
JOH 3:36 ಇನ ಛಿಯ್ಯಾನ ನಂಬವಾಳಾನ ಹಮೇಶಾನಿ ಜಿ಼ಂದ್‌ಗಿ ಛಾ಼; ಕತೋಬಿ ಛಿಯ್ಯಾನಿ ವಾತೆನ ಝಿಟ್ಕಾರಸ್ಕಿ ಇವ್ಣುನ ಯೋ ಜಿ಼ಂದ್‌ಗಿ ಮಳ್‌ಶೆ ಕೊಯ್ನಿ, ಅಜು಼ ದೇವ್‌ನೊ ಇರಾದೊ ಇವ್ಣಾಪರ್ ರ‍್ಹಿಶೆ” ಕರಿ ಬೋಲ್ಯೊ.
JOH 4:1 ಯೇಸು ಯೋಹಾನ್‌ಥೀಬಿ ಜಾ಼ಖ್ಹತ್ ಶಿಷ್ಯರ್‌ನ ಕರುಕರಸ್, ಇವ್ಣುನ ಬ್ಯಾಪ್ತಿಸ್ಮ ದೆವ್‌ಕರಾಸ್ ಕರಿ ಬೋಲಾನಿ ಖಬರ್ ಫರಿಸಾಯರ್‌ವಾಳು ಖ್ಹಮ್‌ಜ್ಯು. ಆ ಯೇಸುನ ಮಾಲುಮ್ ಪಡ್ಯು.
JOH 4:2 ಕತೋಬಿ ಖ್ಹಾಚಮ ಬ್ಯಾಪ್ತಿಸ್ಮ ದೆವ್‌ಕರ್ತೊಥೋತೆ ಯೇಸು ಕಾಹೆ, ಖಲಿ ಇನು ಶಿಷ್ಯರ್‌ ದೆವ್‌ಕರ್‌ತುಥೂತೆ.
JOH 4:3 ಅದ್ಮಿಖ್ಹಾರು ಬೋಲಾನು ಯೇಸುನೆ ಖ್ಹಮ್‍ಜ್ಯೊತೆ ತದೆ ಯೂದಾಯ ತಬರ್‌ಖಾನ ಮ್ಹೆಂದಿನ್, ಪಾಛು಼ ಗಲಿಲಾಯನ ಚ಼ಲೆಗಯೊ.
JOH 4:4 ಯೋ ಜಾ಼ವಾನಿ ವಖ್ಹತ್‌ಮ, ಸಮಾರ್ಯ ತಬರ್‌ಖಾಪರ್ ಕರಿ ಜಾ಼ವ್ಣುಪಡ್ಯು.
JOH 4:5 ಸಮಾರ್ಯನ ಮಳ್ಯುಹುಯು ಸುಖರ್‌ ಕರಿ ಗಾಮ್‌ನ ಆಯೊ, ಯೋ ಗಾಮ್‍ ಯಾಕೋಬ್‍ನೆ ಇನೊ ಛಿಯ್ಯೊ ಯೋಸೇಫನ ದಿದೊತೆ ಝ಼ಗೋನ ಖನ್ನೆ ಥೂ.
JOH 4:6 ಯಾಕೋಬ್‍ನಿ ಬಾವ್ಡಿ ಹಿಜ್ಜಾ಼ ಥಿ, ಯೇಸು ಚಾ಼ಲಿನ್ ಥಕಿರ‍್ಹೋಥೋತೆ, ಇನಖ್ಹಾಜೆ ಯೋ ಬಾವ್ಡಿಕನ ಐನ್ ಬೇಶಿಗಯೊ. ತದೆ ಕಮ್‍ಶಿಕಮ್ ಧೊಪಾರ್‌ ಹುಯಿರ‍್ಹುಥು.
JOH 4:7 ಏಕ್‌ ಸಮಾರ್ಯನಿ ತಯೇಡ ಪಾಣಿ ಭರಾನಟೇಕೆ ಹಿಜ್ಜಾ಼ ಆಯಿ, ತದೆ ಯೇಸುನೆ ಇನ, “ಪಿಯ್ಯಾನ ಥೋಡು ಪಾಣಿ ಮಳ್‍ಶೆ?” ಕರಿ ಬೋಲ್ಯೊ.
JOH 4:8 ತದೆ ಇನ ಶಿಷ್ಯರ್‌ ಖಾಣಾನು ರಾಛು಼ಲ್ಯವಾನಟೇಕೆ ಖ್ಹಯೇರ‍್ನ ಜೈ಼ರ‍್ಹೂಥು.
JOH 4:9 ತದೆ ಯೋ ತಯೇಡಾನೆ, “ತೂ ಯೆಹೂದ್ಯರ್‌ವಾಳೊ, ಅಜು಼ ಮೇ ಸಮಾರ್ಯವಾಳಿ, ಅಮ್ ರ‍್ಹವಾಪರ್ ತೂ ಮಾರಕನ ಪಿಯ್ಯಾನ ಪಾಣಿ ಮಾಂಗೇಜಾ಼ಯ್ಕಿ ಶು?” ಕರಿ ಜಾ಼ವಾಬ್‌ ದಿದಿ. ಯೆಹೂದ್ಯವಾಳು ಸಮಾರ್ಯವಾಳನಿ ಜೋ಼ಡ್ಮ ಖಿವಿ ಸಂಬಂದ್ ರಾಕ್‍ತುಥು ಕೊಯ್ನಿ.
JOH 4:10 ಯೇಸುನೆ ಯೊ ತಯೇಡನ ಬೋಲ್ಯೊಕಿ, “ತುನ ದೇವ್ನಿ ಬಾರೇಮ ಅತ್ರುಖ್ಹು ಮಾಲುಮ್ ರ‍್ಹಿಯುಹೊತ್ತೊ ಯೊ ಕೋಣ್ ಹುಯಿರೊಸ್, ದೇವ್ ಶಾತ್‌ ದೀರಾಖ್ಯೊಸ್ ಕರಿ, ತುನ ಮಾಲುಮ್ ರ‍್ಹಿಯುಹೊತ್.ತಾರಕನ ಪಿಯ್ಯಾನ ಪಾಣಿ ಮಾಂಗ್ಯೋತೆ ಯೋ ಕೋಣ್ ಕರಿ ಮಾಲುಮ್‌ ರ‍್ಹಯುಹೋತ್ತೊ, ತೂ ಇನಾಕನ ಮಾಂಗಿಲಿದಿಹೊತ್, ಅಜು಼ ಯೋ ತುನ ಜಾನ್ನಪಾಣಿನ ದಿದೋಹೊತ್‌” ಕರಿ ಬೋಲ್ಯೊ.
JOH 4:11 ಯೋ ತಯೇಡ ಇನ, “ಪ್ರಭು, ಪಾಣಿ ಶೇಂದಾನ ತಾರಕನ ಶಾತ್ಬಿ ಕೊಯ್ನಿ, ಬಾವ್ಡಿ ಘಣಿ ಗಧಾರ್ ಛಾ಼, ಅಮ್ ರ‍್ಹವಾಪರ್ ಯೋ ಜಾನ್ನು ಪಾಣಿ ತು ಕಿಮ್ ದಿಶ್?
JOH 4:12 ಹಮಾರೊ ಗುರು ಯಾಕೋಬಥೀಬಿ ತೂ ಮೋಟೋಕಿ ಶು? ಇನೇಸ್‌ ಆ ಬಾವ್ಡಿನ ಹಮೂನ ದಿದೋತೆ; ಯೋಬಿ ಇನ ಲಡ್ಕಾಬಿ, ಇನೆ ಪಾಳ್ಯೊತೆ ಖ್ಹಾರುಸ್‌ ಜಾನ್ವರ್‌ ಆ ಬಾವ್ಡಿನು ಪಾಣಿ ಪೀದು” ಕರಿ ಬೋಲಿ.
JOH 4:13 ಯೇಸುನೆ ಅಮ್ ಬೋಲ್ಯೊ, “ಆ ಪಾಣಿನ ಪಿಯ್ಯಾಸ್ತೆ ಹರೇಕ್ನ ಪಾಛು಼ ಠೋಖ್ಹ್‌ ಲಾಗ್‌ಶೆ,
JOH 4:14 ಕತೋಬಿ ಮೇ ದೆವ್‍ಸ್ತೆ ಪಾಣಿನ ಕೋಣ್ ಪಿಯ್ಯಾಸ್‍ಕಿ ಇವ್ಣುನ ಕದೇಬಿ ಠೋಖ್ಹ್‌ ಲಾಗ್‌ಶೆ ಕೊಯ್ನಿ. ಮೇ ಇನ ದೀಶ್‌ತೆ ಪಾಣಿ ಇವ್ಣಾಮ ಭರೈನ್ ಝ಼ರುಕರ್‌ಶೆ. ಯೋ ಇನ ಹಮೇಶಾನಿ ಜಿ಼ಂದ್‌ಗೀನ ದಿಶೆ” ಕರಿ ಬೋಲ್ಯೊ.
JOH 4:15 ಯೋ ತಯೇಡ ಯೇಸುನ, “ಗುರು, ಯೋ ಪಾಣಿನ ಮನ ದೇ! ತದೆ ಮನ ಕದೇಬಿ ಪಾಛು಼ ಠೋಖ್ಹ್‌ ಕೋ ಲಾಗ್‌ಶೇನಿ. ಅಜು಼ ಪಾಣಿ ಶೇಂದಾನ ಹಜ್ಜಾ಼ ಆವಾನಿ ಜ಼ರೂರತ್‌ಬಿ ಕೋ ರ‍್ಹಿಶೇನಿ” ಕರಿ ಬೋಲಿ.
JOH 4:16 ಯೇಸುನೆ ಇನ, “ಜೈ಼ನ್‌, ತಾರ ಬಾವ್ರಿನ ಹಜ್ಜಾ಼ ಬುಲೈಲಿ ಆವ್” ಕರಿ ಬೋಲ್ಯೊ.
JOH 4:17 ಯೋ ತಯೇಡನೆ, “ಮನ ಬಾವ್ರಿ ಕೊಯ್ನಿ” ಕರಿ ಬೋಲಿ. ಯೇಸುನೆ ಇನ, “ತುನ ಬಾವ್ರಿ ಕೊಯ್ನಿ ಕರಿ ಬೋಲಿತೆ ವಾತೆ ಬರಾಬರಸ್‌.
JOH 4:18 ತುನ ಪಾಚ಼್ ಜ಼ಣ ಬಾವ್ರಿ ಥಾ, ಅಜು಼ ತೂ ಹಮ್ಕೆ ಕಿನ ಜೋ಼ಡೆ ಛಾ಼ಕಿ ಯೋಬಿ ತಾರೊ ಬಾವ್ರಿ ಕಾಹೆ. ತುನೆ ಮನ ಖ್ಹಾಚಿಸ್ ಬೋಲಿ” ಕರಿ ಬೋಲ್ಯೊ.
JOH 4:19 ಯೋ ತಯೇಡಾನೆ, “ಪ್ರಭು, ತೂ ಪ್ರವಾದಿ ಕರಿ ಮನ ದೆಖಾವಸ್” ಕರಿ ಬೋಲಿ.
JOH 4:20 ಹಮಾರು ಗುರುಖ್ಹಾರು ಆ ಪಹಾಡ್‌ಪರ್ ಆರಾದನೆ ಕರ‍್ಯು, ಆ ನಾಹುಯಿನ್ ಅದ್ಮಿಖ್ಹಾರು ಆರಾದನೆ ಕರ್ನುಥೂತೆ ಝ಼ಗೊ ಯೆರೂಸಲೇಮ್‌ ಕರಿ ಯೆಹೂದ್ಯರ್ ಹುಯಿರ‍್ಹಾತೆ ತುಮೇಸ್ ಬೋಲಾಸ್.” ಕರಿ ಬೋಲಿ.
JOH 4:21 ಯೇಸುನೆ ಯೊ ತಯೇಡಾನ ಅಮ್ಮ ಮಾರಿ ವಾತ್ನ ನಂಬ್, “ಏಕ್‌ ವಖ್ಹತ್ ಆವ್‌ಶೆ, ಯೋ ವಖ್ಹತ್‌ಮ ತುಮೆ ಬಾನ ಆರಾದನೆ ಕರಾನಖ್ಹಾಜೆ ಆ ಪಹಾಡ್‌ನಾಬಿ ರ‍್ಹವೊ, ಯೆರೂಸಲೇಮ್‌ನಾಬಿ ರ‍್ಹವೊ ಕೋ ಜಾ಼ಶುನಿ.
JOH 4:22 ತುಮೆ ಸಮಾರಿಯವಾಳ ಕತೋಬಿ ಯೆಹೂದ್ಯರ್ ಹುಯಿರ‍್ಹಾತೆ ಹಮೆ ಕಿನ ಆರಾದನೆ ಕರೇಸ್ ಕರಿ ತುಮುನ ಮಾಲುಮ್‌ ಕೊಯ್ನಿ, ಶನಕತೊ ರಕ್ಷಣೆ ಯೆಹೂದ್ಯರ್‌ಥೀಸ್‌ ಆವ್‌ಶೆ.
JOH 4:23 ಖ್ಹಾಚ ಆರಾದನೆ ಕರಾವಾಳು ಬಾನಿ ಆರಾದನೆ ಆತ್ಮಥೀಬಿ, ಖ್ಹಾಚಿಥೀಬಿ ಕರ್ಶೆ, ಯೋ ವಖ್ಹತ್ ಹಂಕೇಸ್‌ ಐಗು. ಬಾ ಇನ ಆರಾದನೆ ಕರಾವಾಳು ಅಮ್ನುಸ್ ರ‍್ಹೇವ್ಣುಕರಿ ಆಖ್ಹ್ ಕರಾಸ್.
JOH 4:24 ದೇವ್ ಆತ್ಮ ಹುಯಿರ‍್ಹೋಸ್, ಇನ ಆರಾದನೆ ಕರಾವಾಳು ಆತ್ಮಥೀಬಿ, ಖ್ಹಾಚಿಥೀಬಿ ಆರಾದನೆ ಕರವಾಳು ಹುಯಿರೇಣು” ಕರಿ ಬೋಲ್ಯೊ.
JOH 4:25 ಯೋ ತಯೇಡಾನೆ ಇನ, “ಮೆಸ್ಸೀಯ ಆವ್‍ಶೆಕರಿ ಮನ ಮಾಲುಮ್‌ ಯೋಸ್ ಕ್ರಿಸ್ತ, ಅಜು಼ ಯೋ ಆವ್‌ಶೇತೆ ತದೆ ಹಮೂನ ಹರೇಕ್ ಬಾರೇಮ ಬೋಲಿವತಾಳ್‌ಶೆ” ಕರಿ ಬೋಲಿ.
JOH 4:26 ತದೆ ಯೇಸುನೆ,ಇನ ಬೋಲ್ಯೊ “ತಾರಿ ಜೋ಼ಡೆ ವಾತೆ ಬೋಲುಕರುತೆ ಮೇಸ್ ಯೋ” ಕರಿ ಬೋಲ್ಯೊ.
JOH 4:27 ಎತ್ರಾಸ್‌ಮ ಯೇಸುನ ಶಿಷ್ಯರ್‌ ಪಾಛು಼ಫರಿ ಆಯಾ, ಅಜು಼ ಯೇಸು ಏಕ್‌ ತಯೇಡಾನ ಜೋ಼ಡೆ ವಾತೆ ಬೋಲುಕರಾತೆ ದೇಖಿನ್‌, ಇವ್ಣೆ ಘಣು ಆಶ್ಚರ್ಯ ಕರ‍್ಯಾ. ಕತೋಬಿ, “ತುನ ಶಾತ್‌ ಹೋಣು?” ಕರಿ ರ‍್ಹವೊ, “ತೂ ಇನಜೋ಼ಡೆ ಶನ ವಾತೆ ಬೋಲುಕರಾಸ್‌?” ಕರಿ ರ‍್ಹವೊ, ಇವ್ಣಾಮ ಏಕ್‌ ಜ಼ಣಾನೇಬಿ ಕೋ ಫುಛಾ಼ಯಾನಿ.
JOH 4:28 ತದೆ ಯೋ ತಯೇಡ ಇನಿ ಕೇಳಿನ ಹಿಜ್ಜಾ಼ಸ್ ಮ್ಹೆಂದಿನ್, ಪಾಛು಼ ಫರೀನ್ ಗಾಮ್‌ನ ಮಹಿ ಜೈ಼ನ್‌,
JOH 4:29 “ಮೇ ಹಂಕೆತೋಡಿ ಕರೀತೆ ಖ್ಹಾರಸ್ನ ಬೋಲ್ಯೊತೆ ಏಕ್‌ ಅದ್ಮಿ ಹಿಜ್ಜಾ಼ ಛಾ಼. ಐನ್ ದೇಖೊ, ಯೋಸ್‌ ಕ್ರಿಸ್ತಕಿ ಹುಯಿರೇಣು ಶುಕಿ?” ಕರಿ ಹಿಜ್ಜಾ಼ನು ಅದ್ಮಿ ಖ್ಹಾರಾನ ಬೋಲಿ.
JOH 4:30 ಇನಖ್ಹಾಜೆ ಅದ್ಮಿಖ್ಹಾರು ಖ್ಹಯೇರ‍್ನ ಮ್ಹೆಂದಿನ್, ಯೇಸುಕನ ಆಯು.
JOH 4:31 ಎತ್ರಾಸ್‌ಮ ಯೇಸುನ ಶಿಷ್ಯರ್‌, “ಗುರು, ಖಾಣು ಖಾ” ಕರಿ ಗಿಂಗಾಯು.
JOH 4:32 ಯೇಸುನೆ ಇವ್ಣುನ, “ಮಾರಕನ ಖಾವಾನ ಖಾಣು ಛಾ಼, ಕತೋಬಿ ತುಮೂನ ಇನಿ ಬಾರೇಮ ಮಾಲುಮ್‌ ಕೊಯ್ನಿ” ಕರಿ ಬೋಲ್ಯೊ.
JOH 4:33 ತದೆ ಶಿಷ್ಯರ್‌, “ಕೋಣ್‌ತೋಬಿ ಇನ ಪಹಿಲೇಸ್ ಖಾಣು ಲೈನ್‌ ದಿದುಕಿ ಶುಕಿ?” ಕರಿ ಇವ್ಣ-ಇವ್ಣಾಸ್‍ಮ ಪುಛಾ಼ವಲಗ್ಯಾ.
JOH 4:34 ಯೇಸು ಇವ್ಣುನ ಬೋಲ್ಯೋಕಿ ಮಾರು ಖಾಣು ಶಾತ್‌ಕತೊ ಕೋಣ್ ಮನ ಮೊಕ್‍ಲ್ಯೊಕೀ ಇವ್ಣಿ ಆಖ್ಹ್‌ನ ಪೂರ ಕರಾನುಸ್ ಹುಯಿರುಸ್. ಅಜು಼ ಮನ ದಿದೂತೆ ಯೊ ಕಾಮ್ನ ಪೂರ ಕರ‍್ನು
JOH 4:35 ‘ಖ್ಹುಗ್ಗೀನು ಹಗಾಮ್‌ ಆವಾನ ಬಿಜು಼ ಚಾರ್ ಮಹಿನ ಛಾ಼’ ಕರಿ ತುಮೆ ಬೋಲೋಸ್‌ನಿ. ಕತೋಬಿ ಮೇ ತುಮೂನ ಬೋಲುಸ್ಕಿ, ತುಮಾರ ಡೋಳಾನ ಪಾಡೀನ್, ಖೇತರ್‌ ಭಣಿ ದೇಖೊ; ಯೋ ವ್ಹಡಾವ್ಣಿನ ತೈಯಾರ್ ಛಾ಼!
JOH 4:36 ವ್ಹಾಡವಾಳನ ಹಮ್ಕೆಸ್‌ ಕೂಲಿ ಮಳ್‌ಶೆ ಅಜು಼ ಯೋ ಹಮೇಶಾನಿ ಜಿ಼ಂದ್‌ಗೀನಖ್ಹಾಜೆ ಅನಾಜ಼್‌ನ ಜ಼ಮ ಕರಾಸ್. ಅಮ್ ಪಿಕಾವವಾಳಾನ ಅಜು಼ ವ್ಹಾಡವಾಳಾನ ಭೇನ ಎಕ್ಕದಮ್‌ ಖ್ಹುಶಿ ಉಷೆ.
JOH 4:37 ‘ಪಿಕಾವವಾಳೊ ಏಕ್‌ ಜ಼ಣೊ, ವ್ಹಾಡವಾಳೊ ಏಕ್‌ ಜ಼ಣೊ’ ಕರಿ ಬೋಲಾಸ್ತೆ ಕಹಾವತ್ ಖ್ಹಾಚಸ್.
JOH 4:38 ತುಮೆ ಮ್ಹಿನತ್ ಕರ‍್ಯಾಕೊಂತೆ ಅನಾಜ಼್‌ನ ವ್ಹಾಡಾನಟೇಕೆ ಮೇ ತುಮೂನ ಮೋಕ್‌ಲ್ಯೊ; ಬಿಜಾ಼ನೆ ಮ್ಹಿನತ್ ಕರ‍್ಯು, ಇವ್ಣಿ ಮ್ಹಿನಥ್ಥಿ ತುಮೂನ ಫಾಯಿದೊ ಮಳ್ಯು” ಕರಿ ಬೋಲ್ಯೊ.
JOH 4:39 ‘ಮೇ ಕರೀತೆ ಖ್ಹಾರಸ್ನ ಇನೆ ಮನ ಬೋಲ್ಯೊ’ ಕರಿ ಸಾಕ್ಷಿಬೋಲಿತೆ ಯೋ ತಯೇಡಾನಿ ವಾತೆನ ಖ್ಹಮ್‌ಜಿನ್‌, ಯೋ ಗಾಮ್‌ನು ಸಮಾರಿಯವಾಳಾಮ ಘಣು ಜ಼ಣು ಯೇಸುನ ನಂಬ್ಯು.”
JOH 4:40 ಸಮಾರಿಯವಾಳು ಯೇಸುಕನ ಐನ್, ಹಮಾರ ಜೋ಼ಡೆ ರ‍್ಹೇ ಕರಿ ಇನ ಗಿಂಗಾಯು, ಇನಖ್ಹಾಜೆ ಯೇಸು ಬೇದನ್ ಹಿಜ್ಜಾ಼ಸ್ ರ‍್ಹಯಿಗೊ ಥೊ.
JOH 4:41 ಇನೆ ಬೋಲ್ಯೋತೆ ವಾತೆನ ಖ್ಹಮ್‌ಜಿನ್‌ ಬಿಜೂ಼ಬಿ ಘಣು ಅದ್ಮಿ ನಂಬ್ಯು.
JOH 4:42 ಇವ್ಣೆ ಯೊ ತಯೇಡಾನ, ಹಮೆ ಇನ ನಂಬ್ಯಾತೆ ಅಜೂ಼ಬಿ ತಾರಿ ವಾತ್ನ ಉಪ್ಪರ್ ಕಾಹೆ. ಹಮೇಸ್ ಕಾನ್‍ಥಿ ಖ್ಹಮ್‌ಜಿನ್‌ ಇನ ಯೋಸ್ ಖ್ಹಾಚೇಥಿ ಜಗತ್ನ ಬಚಾ಼ಡವಾಳೊಕರಿ ಮಾಲುಮ್ ಕರಿರಾಖ್ಯಾಸ್ ಕರಿ ಬೋಲ್ಯು.
JOH 4:43 ಬೇ ದನ್ ಹಿಜ಼್ಜ ರ‍್ಹವಾನ ಬಾದ್‌ಮ ಯೇಸು ಹಿಜ್ಜಾ಼ಥೊ ಗಲಿಲಾಯನ ಗಯೊ.
JOH 4:44 “ಪ್ರವಾದಿನ ಶೊಂತ್‌ ಗಾಮ್ಮ ಮರ್ಯಾದಿ ಕೊಯ್ನಿ” ಕರಿ ಖ್ಹುದ್ ಯೇಸುನೇಸ್‌ ಬೋಲಿರಾಖ್ಯೋಥೊ.
JOH 4:45 ತದೆ ಯೇಸು ಗಲಿಲಾಯ ಜಾ಼ವಾಮ, ಗಲಿಲಾಯನು ಅದ್ಮಿಖ್ಹಾರು ಇನ ಸ್ವಾಗತ್ ಕರ‍್ಯು, ಶನಕತೊ ಯೊ ಯೆರೂಸಲೇಮ್ಮಾ ಪೂಜಾ಼ನ ದನ್ಮ ಕರಿರಾಖ್ಯೋಥೊತೆ, ಇವ್ಣೆಅಖ್ಖೂಸ್ ದೇಖಿರಾಖ್ಯೂಥು.
JOH 4:46 ಯೇಸು ಪಾಛೊ಼ ಗಲಿಲಾಯನು ಕಾನಾ ಗಾಮ್‌ನ ಗಯೊ ಯೊ ಹಿಜ್ಜಾ಼ಸ್ ಇನೆ ಪಾಣಿನ ದ್ರಾಕ್ಷಿನು ರಖ್ಹ್‌ ಬಣಾಯೊಥೊತೆ. ಹಿಜ್ಜಾ಼ ಖ್ಹರ್ಕಾರ್‌ನೊ ಏಕ್‌ ಶೌಕಾರ್ ಅದಿಕಾರಿ ಥೊ. ಇನ ಛಿಯ್ಯಾನ ಕಪೆರ್ನೌಮ್ಮ ಜಾನ್ನ ಅಛ್ಛು಼ ಕೋ ಥೂನಿ.
JOH 4:47 ಯೇಸು ಯೂದಾಯಥು ಗಲಿಲಾಯನ ಆಯೋತೆ ಖಬರ್‌ ಖ್ಹಮ್‍ಜ್ಯೊ ಶನಕತೊ ಇನೊ ಛಿಯ್ಯೊ ಮರಾನಲಾಗ್ಯೊ ಥೊ, ತದೆ ಯೊ ಯೇಸುಕನ ಜೈ಼ನ್, ಇನ ಛಿಯ್ಯಾನ ಅಛ್ಛು಼ ಕರ‍್ನು ಕರಿ ಗಿಂಗಾಯೊ.
JOH 4:48 ಯೇಸುನೆ ಇನ, “ತುಮೆ ಖ್ಹಣೇದ್‍ನು ಕಾಮ್ನ ಅಜು಼ ಅದ್ಭುತ್‌ಕಾಮ್ನ ದೇಖ್ಯುನಾತೊ ನಂಬಾಸಸ್ ಕೊಯ್ನಿ” ಕರಿ ಬೋಲ್ಯೊ.
JOH 4:49 ಯೋ ಅದಿಕಾರಿನೆ, “ಗುರು, ಮಾರೊ ಛಿಯ್ಯೊ ಮರ್‌ವಾನ ಅಗಾಡಿ ತೂ ಮಾರ ಕೇಡೆ ಆವ್” ಕರಿ ಬೋಲಿಲಿದೊ.
JOH 4:50 ಯೇಸುನೆ ಇನ, “ಜಾ಼, ತಾರೊ ಛಿಯ್ಯೊ ಜಿವ್‌ಶೆ” ಕರಿ ಬೋಲ್ಯೊ. ಯೋ ಅದ್ಮಿ ಯೇಸುನೆ ಇನ ಬೋಲ್ಯೊತೆ ವಾತೆನ ನಂಬಿನ್, ಚ಼ಲೆಗಯೊ.
JOH 4:51 ಯೋ ಘರೆ ಜಾ಼ವಾನಿ ವಖ್ಹತ್‌ಮ, ಇನೊ ಆಳ್‌ ಐನ್, “ತಾರೊ ಛಿಯ್ಯೊ ಜಿವ್ತೊ ಹುಯಿಗಯೊ” ಕರಿ ಬೋಲ್ಯೊ.
JOH 4:52 ತದೆ ಇನೆ, “ಕೆತ್ರ ಘಂಟಾನ ಮಾರ ಛಿಯ್ಯಾನ ಅಛ್ಛು಼ ಹುಯೂತೆ?” ಕರಿ ಇನ ಪುಛಾ಼ವಖ್ಹತರ್, ಇವ್ಣೆ, “ಕಾಲೆ ಧೋಪಾರ್‌ನು ಏಕ್‌ ಘಂಟಾನ ಇನು ತಾವ್ ಉತ್ರಿಗು” ಕರಿ ಬೋಲ್ಯು.
JOH 4:53 “ತಾರೊ ಛಿಯ್ಯೊ ಜಿವ್‌ಶೆ” ಕರಿ ಯೇಸುನೆ ಇನ ಬೋಲ್ಯೊತೆ ವಖ್ಹತ್‌ಮಾಸ್‌ ಅಛ಼್ಛುಹುಯು ಕರಿ ಬಾನೆ ಮಾಲುಮ್‌ ಕರಿಲಿದೊ, ಅಜು಼ ಯೋಬಿ, ಇನ ಘರ್‌ವಾಳು ಖ್ಹಾರು ಯೇಸುನ ನಂಬ್ಯು.
JOH 4:54 ಯೇಸು ಯೂದಾಯಥು ಗಲಿಲಾಯ ಆವಾನ ಬಾದ್‌ಮ, ಕರ‍್ಯೊತೆ ಬೇನು ಅದ್ಭುತ್ ಕಾಮ್ ಆ.
JOH 5:1 ಅನ ಬಾದ್‌ಮ, ಯೇಸು ಯೆಹೂದ್ಯರ್‌ನ ಪೂಜಾ಼ ಥೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್‌ನ ಗಯೊ.
JOH 5:2 ಯೆರೂಸಲೇಮ್ಮ ಮೇಂಢಾನು ಬಾಕಲ್ನಖನ್ನೆ ಏಕ್‌ ಕೋಳಮ್‌ ಥು, ಇಬ್ರಿಯ ವಾತೇಮ ಇನ “ಬೇತ್ಸಥಾ” ಕರಿ ನಾಮ್, ಹಿಜ್ಜಾ಼ ಪಾಚ಼್ ಛ಼ತ್ ಥು
JOH 5:3 ಯೋ ಛ಼ತ್‌ಕನ ರೋಗ್‌ರಾಯೊ ರ‍್ಹವಾಳು ಘಣು ಅದ್ಮಿ ಪಡ್ಯುರ‍್ಹೇತೂಥು. ಇವ್ಣಾಮ ಕಾಣು, ಲಂಗ್ಡು, ಅಜು಼ ಲಕ್‍ವೊ ಮಾರ‍್ಯುಹುಯು ಥೂ.ಇವ್ಣೆ ಪಾಣಿ ಕದೆ ಹಲ್‍ಶೇಸ್‍ಕರಿ ಟಿವಯ್ ರ‍್ಹೇತುಥು.
JOH 5:4 ಶನಕತೊ ಹರೇಕ್ ಬಾರ್ ಥೋಡು ವಖ್ಹತ್‌ನ ಬಾದ್‌ಮ ಪ್ರಭುನೊ ದೂತ ಉತ್ರಿ ಐನ್ ಕೋಳಮ್‍ನ ಪಾಣಿನ ಹಲಾವ್‍ತೊಥೊ ರೋಗ್‌ವಾಳು ಕೆಹೂಬಿ ಅದ್ಮಿ ಪಾಣಿ ಹಲಾದಿನ್ ಪಹಿಲೆ ಜಾ಼ತುಥೂಕಿ ಯೊ ಅಛ್ಛು಼ ಹುಯಿಜಾ಼ತುಥು.
JOH 5:5 ಆಟ್‌ಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ಥೊ ರೋಗ್‌ಮ ಪಡ್ಯೊಥೋತೆ ಏಕ್‌ ಅದ್ಮಿ ಹಿಜ್ಜಾ಼ಥೊ.
JOH 5:6 ಯೋ ಹಿಜ್ಜಾ಼ ಪಡ್ಯೋತೆ ಯೇಸುನೆ ದೇಖ್ಯೊ, ಯೋ ಘಣ ವರಖ್ಹ್‌ಥು ರೋಗ್‌ಮ ಥೋತೆ ಯೇಸುನ ಮಾಲುಮ್‌ ಥೂ. ಇನಖ್ಹಾಜೆ ಯೇಸುನೆ ಇನ, “ತುನ ಅಛ್ಛು಼ ಹೋಣು ಕರಿ ದಿಲ್‌ ಛಾ಼ ಕಿಶು?” ಕರಿ ಪುಛಾ಼ಯೊ.
JOH 5:7 ಯೋ ರೋಗಿನೆ, “ಗುರು, ಪಾಣಿ ಹಲಾನಿ ವಖ್ಹತ್‌ಮ ಕೋಳಮ್ಮ ಮನ ಉತ್ರಾವವಾಳು ಕೋಣ್‌ಬಿ ಕೊಯ್ನಿ; ಮೇ ಉತರ‍್ನು ಕರಿ ಜಾ಼ವಾನ ಪಹಿಲೆಸ್, ಮಾರೇಥಿಬಿ ಅಗಾಡಿ ಬಿಜು಼ ಉತ್ರಿಜಾ಼ಸ್‌” ಕರಿ ಬೋಲ್ಯೊ.
JOH 5:8 ಯೇಸು ಇನ, “ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್‌, ಚಾ಼ಲ್” ಕರಿ ಬೋಲ್ಯೊ.
JOH 5:9 ತದ್‌ನು-ತದೇಸ್‌ ಯೋ ಅದ್ಮಿನ ಅಛ್ಛು಼ ಹುಯಿಗಯು; ಇನೆ ಇನಿ ಬಿಛಾ಼ವ್ಣಿನ ಪಳ್ಳಿನ್ ಚಾ಼ಲ್ಯೊ. ತದೆ ಸಬ್ಬತ್‌ ದನ್ ಹುಯಿರುಥು.
JOH 5:10 ಇನಖ್ಹಾಜೆ ಯೆಹೂದ್ಯರ್‌ನ ಅದಿಕಾರಿ ಯೋ ಅಛ್ಛು಼ ಹುಯೂತೆ ಅದ್ಮಿನ, “ಆಜ಼್ ಸಬ್ಬತ್‌ ದನ್, ಹುಯಿರುತೆ ಇನಾಖ್ಹಾಜೆ ಬಿಛಾ಼ವ್ಣಿನ ಪಾಡಾನು ಹಮಾರಿ ಖಾನುಲ್‌ನು ವಿರೋದ್ ಹುಯಿರ‍್ಹುಸ್‍” ಕರಿ ಬೋಲ್ಯೊ.
JOH 5:11 ತದೆ ಇನೆ, “ಮನ ಅಛ್ಛು಼ ಕರ‍್ಯೊತೆ ಇನೇಸ್‌, ‘ತಾರಿ ಬಿಛಾ಼ವ್ಣಿನ ಪಳ್ಳಿನ್‌, ಚಾ಼ಲ್’ ಕರಿ ಬೋಲ್ಯೊ” ಕರಿ ಜ಼ವಾಬ್ ದಿದೊ.
JOH 5:12 ಇವ್ಣೆ ಇನ, “ತಾರಿ ಬಿಛಾ಼ವ್ಣಿನ ಪಳ್ಳಿನ್‌, ಚಾ಼ಲ್ ಕರಿ ತುನ ಬೋಲ್ಯುತೆ ಯೋ ಅದ್ಮಿ ಕೋಣ್?” ಕರಿ ಪುಛಾ಼ಯು.
JOH 5:13 ಕತೋಬಿ ಯೋ ಅಛ್ಛು಼ ಹುಯೂತೆ ಅದ್ಮಿನ ಯೇಸು ಕೋಣ್ ಕರಿ ಮಾಲುಮ್‌ ಕೋ ಥೂನಿ. ಯೋ ಝ಼ಗೋಪರ್‌ ಅದ್ಮಿನಿ ಭೀಡ್ ಥೀತೆ ಇನಖ್ಹಾಜೆ ಯೇಸು ಹಿಜ್ಜಾ಼ಥೊ ಪಿಷ್‌ಲಿ ಚ಼ಲೆಗಯೊ.
JOH 5:14 ಅನ ಬಾದ್‌ಮ ಯೇಸು ಯೋ ಅದ್ಮಿನ ಮಂದಿರ್‌ಮ ದೇಖಿನ್‌, “ದೇಕ್, ಹಮ್ಕೆ ತುನ ಅಛ್ಛು಼ ಹುಯಿರ‍್ಹುಸ್‍ ಇನಖ್ಹಾಜೆ ಪಾಪ್ ಕರಾನು ಮ್ಹೆಂದೆ,ಶನಕತೊ ಅನೇಥಿ ತುನ ಖೆವೂಬಿ ಜಾ಼ಖ್ಹತ್ ಮುಶಿಬತ್ ನಕೊ ಆವಾದೆ.ಕರಿ ಬೋಲ್ಯೊ.
JOH 5:15 ತದೆ ಯೋ ಅದ್ಮಿ ಹಿಜ್ಜಾ಼ಥು ಜೈ಼ನ್‌, ಇನ ಅಛ್ಛು಼ ಕರ‍್ಯೊತೆ ಯೇಸುನೇಸ್‌ ಕರಿ ಯೆಹೂದ್ಯರ್‌ನ ಅದಿಕಾರಿನ ಬೋಲ್ಯು.
JOH 5:16 ಇನಾಖ್ಹಾಜೆ ಯೆಹೂದ್ಯವಾಳು ಯೇಸು ಸಬ್ಬತ್‌ ದನ್ಮ ಕಾಮ್ ಕರ‍್ಯೊತೆ ಇನಖ್ಹಾಜೆ, ಇನ ಖ್ಹತಾಯು.
JOH 5:17 ಕತೋಬಿ ಯೇಸುನೆ ಇವ್ಣುನ, “ಮಾರೊ ಬಾ ಹಂಕೆತೋಡಿ ಕಾಮ್ ಕರುಕರಸ್,ಮೇಬಿ ಕಾಮ್ ಕರುಸ್” ಕರಿ ಬೋಲ್ಯೊ.
JOH 5:18 ಅತ್ರೇಸ್ ಕಾಹೆತೆ ಯೊ ಖಲಿ‍ ಸಬ್ಬತ್‌ ದನ್ನ ನಿಯಮ್ನ ಕೋ ತೋಡ್ಯೊನಿ, ಕತೋಬಿ ಯೊ ದೇವ್ ಇನೊ ಶೊಂತ್ ಬಾಕರಿ ಬೋಲ್ಯೊ ಅಜು಼ ಆಮ್ನಿಘೊಣಿ ಇನುಯೋಸ್ ದೇವ್ನು ಸಮಾನ್ ಕರಿಲಿದೋಥೊ. ಆ ವಾತೇನ ಬೋಲ್ಯೋತೆ ಇನೇಥಿ, ಯೆಹೂದ್ಯರ‍್ನು ಅದಿಕಾರಿ ಇನ ಮಾರ‍್ನುಸ್ ಮಾರ‍್ನು ಕರಿ ಖ್ಹಯಾಲ್‌ಥಿ ನಿರ್ಧಾರ್ ಕರ‍್ಯು.
JOH 5:19 ತದೆ ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಬಾ ಕರಾಸ್ತೆ ಇನ ದೇಖಿನ್‌ ಛಿಯ್ಯೊ ಕರಾಸ್ ಪಣ್ಕಿ, ಇನೇಥಿ ಯೋಸ್‌ ಶಾತ್ಬಿ ಕರಾನ ಕೋ ಹುವಾನಿ. ಬಾ ಕರಾಸ್ತೆ ಇಮ್ಮಸ್ ಛಿಯ್ಯೋಬಿ ಕರಾಸ್.
JOH 5:20 ಶನಕತೊ, ಬಾ ಇನ ಛಿಯ್ಯಾನ ಪ್ಯಾರ್ ಕರಾಸ್ ಅಜು಼ ಯೋ ಕರಾಸ್ತೆ ಖ್ಹಾರಾನ ಇನ ಒತಾಳಸ್. ಅತ್ರೇಸ್ ಕಾಹೆತೆ ಅನೇಥಿಬಿ ಮೋಟು ಕಾಮ್‌ಖ್ಹಾರು ಇನ ವತಾಳ್‌ಶೆ; ಇನ ದೇಖಿನ್‌ ತುಮೆ ಆಶ್ಚರ್ಯ ಕರ್ಶು.
JOH 5:21 ಬಾ ಕಿಮ್ ಮರ‍್ಯಹುಯಾನ ಉಠಾಡಿನ್ ಜಾನ್‌ ದೇಸ್ಕಿ, ಇಮ್ಮಸ್ ಛಿಯ್ಯೋಬಿ ಇನ ಹೋಣುತೆ ಇವ್ಣುನ ಜಾನ್‌ ದೇಸ್.
JOH 5:22 ಅತ್ರೇಸ್ ಕಾಹೆತೆ, ಬಾ ಕಿನಾಬಿ ತೀರ್ಪ್‌ ಕರ್ಶೆ ಕೊಯ್ನಿ. ತೀರ್ಪ್ ಕರಾನಿ ಭರ್‌ಪೂರ್‌ ಅದಿಕಾರ್‌ನ ಛಿಯ್ಯಾನ ದೀರಾಖ್ಯೊಸ್.
JOH 5:23 ಶನಕತೊ, ತಮಾಮ್‌ ಜ಼ಣು ಬಾನ ಮರ್ಯಾದಿ ವತಾಳಸ್ತೆ ಇಮ್ಮಸ್, ಛಿಯ್ಯಾನಾಬಿ ಮರ್ಯಾದಿ ವತಾಳ್ಣು ಕರಿ ಇನೆ ಅಮ್ ಕರ‍್ಯೊತೆ, ಕೋಣ್ ಛಿಯ್ಯಾನ ಮರ್ಯಾದಿ ದೇಯಿಕೊಯ್ನಿಕಿ ಇವ್ಣೆ ಇನ ಮೋಕ್‌ಲ್ಯೊತೆ ಬಾನಾಬಿ ಮರ್ಯಾದಿ ಕೋ ದೇಯ್ನಿ.
JOH 5:24 “ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮಾರಿ ವಾತೇನ ಖ್ಹಮ್‌ಜಿನ್‌, ಮನ ಮೋಕ್‌ಲ್ಯೊತೆ ಇನ ನಂಬವಾಳಾನ ಹಮೇಶಾನಿ ಜಿ಼ಂದ್‌ಗಿ ಮಳಿರ‍್ಹೀಸ್‌. ಇನ ತೀರ್ಪ್ ಕೋ ಉಶೇನಿ; ಯೋ ಮರಣ್ಣ ಉಲಾಂಗಿನ್, ಜಾನ್‌ಮ ಪೇಶಿರ‍್ಹೋಸ್‌.
JOH 5:25 ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮರಿಗಯೂತೆ ಅದ್ಮಿ ದೇವ್ನ ಛಿಯ್ಯಾನಿ ಅವಾಜ಼್ ಖ್ಹಮ್‍ಜಾ಼ನಿ ವಖ್ಹತ್ ಆವ್‌ಶೆ. ಯೋ ವಖ್ಹತ್ ಹಂಕೇಸ್‌ ಐರ‍್ಹೀಸ್, ಖ್ಹಮ್‌ಜಾ಼ವಾಳು ಜಿವ್‌ಶೆ.
JOH 5:26 ಬಾನ ಜಾನ್‌ ದ್ಯವಾನಿ ಶಕತ್ ಛಾ಼ತೆ ಇಮ್ಮಸ್, ಛಿಯ್ಯಾನಾಬಿ ಜಾನ್‌ ದ್ಯವಾನಿ ಶಕತ್ನ ದೀರಾಖ್ಯೊಸ್.
JOH 5:27 ಅಜು಼ ಛಿಯ್ಯೊ, ಅದ್ಮಿನೊ ಛಿಯ್ಯೊ ಹುಯಿರ‍್ಹೋತೆ ಇನಖ್ಹಾಜೆ ತೀರ್ಪ್ ಕರಾನಿ ಹಕ್‌ನ ಬಾನೆ ಇನ ದೀರಾಖ್ಯೊಸ್.
JOH 5:28 ಅನಿ ಬಾರೇಮ ಆಶ್ಚರ್ಯ ನಕೊ ಕರೊ; ಏಕ್‌ ಹಗಾಮ್‌ ಆವ್‌ಶೆ, ತದೆ ಮಖ್ಹಾಣ್ಯಮ ಛಾ಼ತೆ ಅಖ್ಖು ಇನಿ ಅವಾಜ಼್‌ನ ಖ್ಹಮ್‌ಜಿನ್,
JOH 5:29 ಅಜು಼ ಇವ್ಣೆ ಮಖ್ಹಾಣ್ಯಥು ಉಠೀನ್ ಆವ್‌ಶೆ, ಕೋಣ್ ಅಛ್ಛಾ಼ನ ಕರ‍್ಯುಕೀ ಇವ್ಣುನ ಹಮೇಶಾನ ಜಾನ್ನಖ್ಹಾಜೆ ಪಾಛು಼ಜಿವ್ತು ಹುಯಿನ್ ಆವ್‌ಶೆ. ಖರಾಬ್ ಕರವಾಳು ತೀರ್ಪ್‌ನಖ್ಹಾಜೆ ಪಾಛು಼ಜಿವಿನ್ ಉಟ್‌ಶೆ.
JOH 5:30 “ಮಾರು ಮೇಸ್ ಶಾತ್ಬಿ ಕರಾನ ಕೋ ಹುವಾನಿ; ಬಾ ಬೋಲಾತೆ ಇನ ಖ್ಹಮ್‌ಜಿನ್‌, ಮೇ ನ್ಯಾವ್ ಫೇಡಾವುಸ್, ಅನಖ್ಹಾಜೆ ಮಾರು ತೀರ್ಪ್‌ ಖ್ಹಾಚು಼ ಹುಯಿರುಸ್,ಅಜು಼ ಮಾರಿಸ್ ಮರ್ಜಿ ಚಾ಼ಲಾದೆ ಕರಿ ಆಖ್ಹ್ ಕರ‍್ಯೊಕೊಂತೆ, ಮನ ಮೋಕ್‌ಲ್ಯೊತೆ ಇನಿ ಮರ್ಜಿಸ್‌ ಚಾ಼ಲ್ನು ಕರಿ ಮೇ ಆಖ್ಹ್ ಕರುಸ್.
JOH 5:31 ಮಾರಿ ಬಾರೇಮ ಮೇಸ್ ಸಾಕ್ಷಿ ಬೋಲಿಲಿದೋತೊ ಮಾರಿ ಸಾಕ್ಷಿ ಖ್ಹಾಚಿಸ್ ಕಾಹೆ.
JOH 5:32 ಕತೋಬಿ ಮಾರಿ ಬಾರೇಮ ಸಾಕ್ಷಿ ಬೋಲವಾಳೊ ಏಕ್‌ ಜ಼ಣೊ ಛಾ಼, ಯೋ ಮಾರಿ ಬಾರೇಮ ಬೋಲಾಸ್ತೆ ಸಾಕ್ಷಿ ಖ್ಹಾಚು಼ ಕರಿ ಮನ ಮಾಲುಮ್‌.
JOH 5:33 ತುಮೆ ಯೋಹಾನಕನ ಸಂದೇಶ್ ಪುಛೈ಼ಲ್ಯಾವಾಳ ಅದ್ಮಿನ ಮೋಕ್‌ಲ್ಯ, ಇನೆ ತುಮೂನ ಖ್ಹಾಚಿನಿ ಬಾರೇಮ ಸಾಕ್ಷಿ ಬೋಲ್ಯೊ.
JOH 5:34 ಮಾರಿ ಬಾರೇಮ ಅದ್ಮಿನಿ ಸಾಕ್ಷಿ ಮನ ಜ಼ರೂರತ್ ಕೊಯ್ನಿ, ತೋಬಿ ತುಮೂನ ರಕ್ಷಣೆಮಳಾದೆ ಕರಿ ಆವಾತ್ನ ಬೋಲ್ಯೋತೆ.
JOH 5:35 ಯೋಹಾನ ಬಳುಕರಸ್ತೆ ದೀವನಿಮತ್‌ ಥೊ,ಅಜು಼ ಯೊ ಉಜಾ಼ಳು ದಿದೊ. ಕತೋಬಿ ತುಮೆ ಇನ ಉಜಾ಼ಳಾಮ ಥೋಡ ದನ್ ಖ್ಹುಶಿ ಕರ‍್ಯಾ.
JOH 5:36 ಮಾರಿ ಸಾಕ್ಷಿ ಯೋಹಾನ್‌ಥೀಬಿ ಮೋಟಿ ಸಾಕ್ಷಿ ಹುಯಿರಿಶ್. ಶನಕತೊ ಬಾ ಖೆವುಕಾಮ್ ಪೂರ ಕರಾನ ಮನ ದಿದೊತೆ ಯೋ ಕಾಮ್ನ ಕರುಕರೂಸ್.ಕರಿಬೋಲಾನ ಆ ಕಾಮಸ್ ಸಾಕ್ಷಿ.
JOH 5:37 ಅತ್ರೇಸ್ ಕಾಹೆತೆ, ಮನ ಮೋಕ್‌ಲ್ಯೊತೆ ಬಾಸ್, ಮಾರಿ ಬಾರೇಮ ಸಾಕ್ಷಿ ಬೋಲಿರಾಖ್ಯೊಸ್. ಕತೋಬಿ ತುಮೆ ಇನಿ ಅವಾಜ಼್‌ನ ಕದೇಬಿ ಖ್ಹಮ್‌ಜಿರಾಖ್ಯಕೊಯ್ನಿ, ಇನಿ ರೂಪ್ ಕಿಮ್ ಛಾ಼ ಕರಿ ಕದೇಬಿ ಕೋ ದೇಖಿರಾಖ್ಯಾನಿ.
JOH 5:38 ಅಜು಼ ಇನಿ ವಾಕ್ಯಾಬಿ ತುಮಾರಾಮ ಕೊಯ್ನಿ, ಶನಕತೊ ಬಾ ಮೋಕ್‌ಲ್ಯೊತೆ ಇನ ತುಮೆ ನಂಬಾಕೊಯ್ನಿ.
JOH 5:39 ತುಮೆ ಕೆತ್ರುಕ್ಕಿ ಧರ್ಮಶಾಸ್ತ್ರನ ಪಢೋಸ್‌, ಯೋ ತುಮೂನ ಹಮೇಶಾನಿ ಜಿ಼ಂದ್‌ಗಿ ದಿಶೆ ಕರಿ ತುಮೆ ಸೋಚೋ಼ಸ್, ಕತೋಬಿ ಯೋ ಖ್ಹಾರು ದಪ್ತರ್ ಮಾರಿ ಬಾರೇಮಸ್ ಸಾಕ್ಷಿ ದ್ಯವಾನು ಹುಯಿರುಸ್.
JOH 5:40 ತೋಬಿ ತುಮೆ ಮಾರಕನ ಐನ್ ಯೋ ಜಾನ್ನ ಲೀಲ್ಯಾವನ ತುಮೂನ ಮನ್‌ಕೊಯ್ನಿ.
JOH 5:41 “ಮನ ಅದ್ಮಿನಿ ಖ್ಹರಾವ್ಣಿ ಹೋಣು ಕೊಯ್ನಿ.
JOH 5:42 ಕತೋಬಿ ತುಮೆ ಕಿಮ್ನು ಅದ್ಮಿಖ್ಹಾರು ಕರಿ ಮನ ಮಾಲುಮ್, ಅಜು಼ ತುಮಾರ ದಿಲ್ಮ ದೇವ್‌ಪರ್‌ ಪ್ಯಾರ್ ಕೊಯ್ನಿ ಕರೀಬಿ ಮನ ಮಾಲುಮ್.
JOH 5:43 ಮೇ ಮಾರ ಬಾನ ನಾಮ್‍ಥಿ; ಕತೋಬಿ ಮನ ತುಮೆ ಸ್ವೀಕಾರ್ ಕರಕೊಯ್ನಿ, ಕತೋಬಿ ಕೋಣ್‌ತೋಬಿ ಶೊಂತ್ ಅದಿಕಾರ್‌ಥಿ ಆಯೂತೆ ತುಮೆ ಇನ ಸ್ವೀಕಾರ್ ಕರಿಲೆವೊಸ್.
JOH 5:44 ತುಮೆ ಏಕ್‌ಥಿ ಏಕ್‌ ಮಾನ್-ಮರ‍್ಯಾದಿನ ಆಖ್ಹ್ ಕರೋಸ್, ಕತೋಬಿ ಏಕ್‍ನೊ ಎಕ್ಕಸ್ ದೇವ್‍ಥಿ ಆವಸ್ತೆ ಖ್ಹರಾವ್ಣಿನ ತುಮೆ ಹೋಣು ಕರಿ ಆಖ್ಹ್ ಕೋ ಕರೋನಿ. ಅಮ್ ರ‍್ಹವಾಪರ್ ತುಮೆ ಮನ ಕಿಮ್ ನಂಬ್‌ಶು?
JOH 5:45 ಮಾರ ಬಾನ ಖ್ಹಾಮ್ಣೆ ಭೀರಿನ್ ಮೇ, ತುಮುನ ಅಪರಾದಿ ಕರಿ ಭೀರಾಕಿಶ್ ಕರಿ ನಕೊ ಸೋಚೊ ತುಮೆ ಭರೋಖ್ಹೊ ಕರಿರಾಖ್ಯಾತೆ ಮೋಶೆಸ್‌ ತುಮಾರಪರ್ ಅಪರಾದ್ ಲಗಾಡ್‌ಶೆ.
JOH 5:46 ತುಮೆ ಖ್ಹಾಚಮಾಬಿ ಮೋಶೆನಿ ವಾತೆನಪರ್ ವಿಶ್ವಾಸ್ ಕರಾನು ರ‍್ಹಿಯಿತೊ, ಮಾರಪರ್‌ಬಿ ಭರೋಖ್ಹೊ ಕರ‍್ಯಾಹೋತ್‌. ಶನಕತೊ ಇನೆ ಮಾರಿ ಬಾರೇಮ ಲೀಖಿರಾಖ್ಯೊಸ್.
JOH 5:47 ಅಜೂ಼ಬಿ ಮೋಶೆನೆ ಲೀಖ್ಯೋತೆ ವಾತೇನಸ್‌ ತುಮೆ ವಿಶ್ವಾಸ್‌ ನಾ ಕರ‍್ಯಾತೊ, ಮೇ ಬೋಲುಸ್ತೆ ವಾತೆನ ಕಿಮ್ ನಂಬ್ ಶು?” ಕರಿ ಬೋಲ್ಯೊ.
JOH 6:1 ಅನ ಬಾದ್‌ಮ ಯೇಸು ಗಲಿಲಾಯ ದರ‍್ಯಾವ್ನು ಪಾರ್ಲಿ ಬಾಜೂ಼ಮ ಚ಼ಲೆಗಯೊ ಇನ ತಿಬೇರಿಯಾನು ದರ‍್ಯಾವ್ ಕರೀಬಿ ಬೋಲಾಸ್.
JOH 6:2 ಅದ್ಮಿನಿ ಘಣಿ ಮೋಟಿ ಭೀಡ್ ಯೇಸುನ ಪೀಠೆ ಗಯು, ಶನಕತೊ ಇವ್ಣೆ ಖ್ಹಾರು ಯೇಸುನೆ ರೋಗ್‌ಮ ರ‍್ಹವಾಳನ ಅಛ್ಛು಼ ಕರ‍್ಯೊತೆ ಅದ್ಭುತ್‌ನ ಖ್ಹಾರು ದೇಖ್ಯೂಥು.
JOH 6:3 ತದೆ ಯೇಸು ಪಹಾಡ್‌ಪರ್ ಚ಼ಢೀನ್, ಇನ ಶಿಷ್ಯರ್‌ನ ಜೋ಼ಡೆ ಬೇಶಿಗಯೊ.
JOH 6:4 ಯೆಹೂದ್ಯರ್‌ನ ಪಸ್ಕ ಪೂಜಾ಼ನಿ ವಖ್ಹತ್ ಖನ್ನೆ ಐಗೈಥಿ.
JOH 6:5 ಯೇಸುನೆ, ಇನಾಕನ ವಳ್ಯಾವ್‌ತುಥೂತೆ ಅದ್ಮಿನಿ ಮೋಟಿ ಭೀಡ್‌ಣ ದೇಖ್ಯೊ. ಅಜು಼ ಫಿಲಿಪ್ಪನ, “ಆ ಅದ್ಮಿ ಖ್ಹಾರಾನ ಪೂರಯೆತ್ರು ರೋಟಾ ಅಪ್ಣೆ ಕಿಜ್ಗಾ಼ಥು ಲೈಯೆ?” ಕರಿ ಪುಛಾ಼ಯೊ.
JOH 6:6 ಫಿಲಿಪ್ಪನ ಪರ್ಖಾನಖ್ಹಾಜೆ ಯೇಸುನೆ ಅಮ್ ಪುಛಾ಼ಯೋತೆ; ಖ್ಹಾಚಿ ಶಾತ್ ಕತೊ, ಯೋ ಶಾತ್‌ ಕರ‍್ನು ಕರಿ ಇನ ಅಗಾಡಿಸ್ ಮಾಲುಮ್‌ ಥೂ.
JOH 6:7 ತದೆ ಫಿಲಿಪ್ಪನೆ, “ಹಜ಼್ಜ ಛಾ಼ತೆ ಹರೇಕ್ ಅದ್ಮಿನ ಏಕೇಕ್‌ ಟುಕ್‌ಡೊ ರೋಟೊ ದೇಣುಕತೋಬಿ, ಬೇಖ್ಹೊ ರೂಪಾನ ಪಾವ್‍ಲೆಥೀಬಿ ಜಾ಼ಖ್ಹತ್ ಹೋಣು” ಕರಿ ಬೋಲ್ಯೊ.
JOH 6:8 ತದೆ ಯೇಸುನೊ ಬಿಜೇಕ್ ಜ಼ಣೊ ಶಿಷ್ಯ ಹುಯಿರ‍್ಹೊಥೋತೆ, ಸೀಮೋನ್‌ ಪೇತ್ರನೊ ಭೈ ಅಂದ್ರೆಯನೆ,
JOH 6:9 ಯೇಸುನ, “ಹಜ್ಜಾ಼ ಛಾ಼ತೆ ಏಕ್‌ ಛೋ಼ಕ್ರಕನ ಪಾಚ಼್ ಘೌನ ರೋಟಾ ಅಜು಼ ಬೇ ಮಾಛ಼್‌ಲಾ ಛಾ಼, ಕತೋಬಿ ಅತ್ರಾಖ್ಹಾರ ಅದ್ಮಿನ ಯೋ ಪೂರ್‌ಶೆಕೊಯ್ನಿ” ಕರಿ ಬೋಲ್ಯೊ.
JOH 6:10 ಯೇಸುನೆ ಇವ್ಣುನ, “ಅದ್ಮಿನ ಖ್ಹಾರು ಬೇಖ್ಹೊ ಕರಿ ಬೋಲ್” ಕರಿ ಬೋಲ್ಯೊ. ಯೋ ಝ಼ಗೋಪರ್‌ ಘಣು ಘಾಖ್ಹ್‌ ಫುಟಿರ‍್ಹೂಥು. ಅದ್ಮಿಖ್ಹಾರು ಘಾಖ್ಹ್‌ಪರ್‌ ಬೇಶಿಗಯು. ಇವ್ಣಾಮ ಪರ್ಖ್ಹಾ ಅದ್ಮಿಸ್‌ ಕಮ್‌ಶಿಕಮ್ ಪಾಚ಼್ ಹಜಾ಼ರ್‌ಜ಼ಣು ಥೂ.
JOH 6:11 ಯೇಸುನೆ ಯೋ ರೋಟಾನ ಪಾಡೀನ್, ದೇವ್ನ ಧನ್ಯವಾದ್ ಕರೀನ್, ಹಿಜ್ಜಾ಼ ಬೆಠುಥೂತೆ ಅದ್ಮಿನ ವಾಟಪಾಡಿ ದಿದೊ. ಮಾಛ್ಲಾ಼ನಾಬಿ ಇಮ್ಮಸ್ ವಾಟಪಾಡಿ ದಿದೊ, ತಮಾಮ್‌ ಅದ್ಮಿ ಇವ್ಣುನ ಕೆತ್ರು ಹೋಣುಕಿ ಎತ್ರು ಖಾದು.
JOH 6:12 ಇವ್ಣೆ ಖ್ಹಾರು ಖೈನ್, ಪೇಟ್ ಭರೈಜಾ಼ವಾನಿ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ಉಭ್‌ರ‍್ಯುತೆ ಟುಕ್ಡಾವ್‍ನ ಎಕ್ಟು ಕರೊ, ಕೆಹೂಬಿ ಖರಾಬ್ ನಾಹೊಣು” ಕರಿ ಬೋಲ್ಯೊ.
JOH 6:13 ತದೆ ಇವ್ಣೆ ಯೊ ಪಾಚ಼್ ಘೌನ ರೋಟಾನ ಟುಕ್ಡಾವ್‍ನ ಎಕ್ಟು ಕರಾಖ್ಹತರ್, ಭಾರ ಟೋಕ್ರಾ ಭರಾಯು.
JOH 6:14 ಯೇಸುನೆ ಕರ‍್ಯೊತೆ ಆ ಅದ್ಭುತ್ ದೇಖ್ಯೂತೆ ತದೆ ಅದ್ಮಿಖ್ಹಾರು ಅಮ್ ಬೋಲ್ಯು, “ಖ್ಹಾಚ಼ಮಾಬಿ ಜಗತ್‌ಮ ಆವ್ಣುತೆ ಪ್ರವಾದಿ ಆಸ್ ಹುಯಿರೊಸ್” ಕರಿ ಬೋಲ್ಯು.
JOH 6:15 ಅದ್ಮಿಖ್ಹಾರು ಇನ ಧರೀನ್, ಜು಼ಲಮ್‌ಥಿ ರಾಜ಼ಕರಾನ ಸೋಚುಕರಾಸ್ ಕರಿ ಯೇಸುನೆ ಮಾಲುಮ್‌ ಕರಿಲಿದೊ; ಇನಖ್ಹಾಜೆ ಯೋ ಹಿಜ್ಜಾ಼ಥೊ ಎಕ್ಲೋಸ್ ಪಾಛು಼ ಪಹಾಡ್‌ಪರ್ ಚ಼ಲೆಗಯೊ.
JOH 6:16 ಖ್ಹಾಂಜ಼್ ಹುವ್ವಾದೀನ್, ಯೇಸುನ ಶಿಷ್ಯರ್‌ ದರ‍್ಯಾವ್‌ಕನ ಆಯು.
JOH 6:17 ಡೋಣ್‌ ಚ಼ಢೀನ್‌, ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಕಪೆರ್ನೌಮ್ಮ ಗಯು. ತದ್ದೇಸ್ ಅಂಧಾರು ಹುಯಿಗಯುಥು, ಅಜು಼ ಯೇಸು ಇವ್ಣಾಕನ ಬಿಜೂ಼ಬಿ ಕೋ ಐರ‍್ಹೋಥೋನಿ.
JOH 6:18 ತದೆ ಘಣೊ ಮೋಟೊ ವಹಿರೊ ಜೋ಼ರೇಖ್ಹು ವಾಗುಕರ್ತೊಥೋತೆ ಇನಖ್ಹಾಜೆ, ದರ‍್ಯಾವ್‌ಮ ಝೋ಼ಕಾಳೊ ಜಾ಼ಖ್ಹತ್ ಹುವ್ವಾಲಗ್ಯೋಥೊ.
JOH 6:19 ಇವ್ಣೆ ಡೋಣ್ಣಾ ಹುಟ್ ಘಾಲಿನ್ ಚ಼ಲಾವ್ತಹುಯಿನ್, ತೀನ್‌ಕಿ-ಚಾರ್ ಮೈಲ್ ಜೈ಼ನ್‌ ಪೋಚಾ಼ನ ಬಾದ್‌ಮ ಯೇಸು ಪಾಣಿಪರ್‌ ಚಾ಼ಲ್ತೊಹುಯಿನ್‌ ಡೋಣ್ಣಾ ಖನ್ನೆ ವಳ್ಯಾವಾತೆ ದೇಖಿನ್‌, ಇವ್ಣೆ ಡರಿಗಯಾ.
JOH 6:20 ಯೇಸುನೆ ಇವ್ಣುನ, “ಡರೊ ನಕೊ, ಯೊ ಮೇಸ್”! ಕರಿ ಬೋಲ್ಯೊ.
JOH 6:21 ತದೆ ಇವ್ಣೆ ಇನ ಡೋಣ್‌ಮ ಬುಲೈಲ್ಯವಾನ ಕರ‍್ಯಾ, ತದ್‌ನು-ತದ್ದೇಸ್ ಇವ್ಣೆ ಜಾ಼ವ್ಣುಥೂತೆ ಝ಼ಗೋಕನ ಡೋಣ್‌ ಜೈ಼ನ್‌ ಪೋಚಿಗಯ್.
JOH 6:22 ಇನ ಅಗಲ್ಯದನ್ನೆ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಅದ್ಮಿಖ್ಹಾರು ಹಿಜ್ಜಾ಼ ಎಕ್ಕಸ್ ಡೋಣ್‌ ಥೀಕರಿ ಇವ್ಣುನ ಮಾಲುಮ್‌ಥು. ಯೋ ಡೋಣ್‌ಮ ಖಲಿ ಶಿಷ್ಯರಸ್‌ ಗಯ, ಯೇಸು ಶಿಷ್ಯರ‍್ನ ಜೋ಼ಡೆ ಕೋ ಗಯೋನಿ ಕರಿ ಇವ್ಣುನ ಮಾಲುಮ್‌ ಥೂ.
JOH 6:23 ಎತ್ರಾಸ್‌ಮ, ಬಿಜಿ ಡೋಣ್‌ ಖ್ಹಾರು ತಿಬೇರಿಯಾಥು ಐನ್, ಪ್ರಭುನೆ ಧನ್ಯವಾದ್ ಕರೀನ್, ಅದ್ಮಿನ ರೋಟ ಖಡಾಯೋತೆ ಝ಼ಗೋಕನಾಸ್‌ ಆಯು.
JOH 6:24 ಅದ್ಮಿಖ್ಹಾರು, ಯೇಸುಬಿ ಇನ ಶಿಷ್ಯರ್‌ ಹಿಜ್ಜಾ಼ಕೊಂತೆ ದೇಖಿನ್‌, ಯೋ ಡೋಣೇಮ ಚ಼ಢೀನ್‌, ಯೇಸುನ ಢೂಂಡ್‌ತುಹುಯಿನ್, ಕಪೆರ್ನೌಮ್‌ನ ಗಯು.
JOH 6:25 ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಯೇಸು ಮಳಾದಿನ್, ಅದ್ಮಿಖ್ಹಾರು ಇನ, “ಗುರು, ತೂ ಕದೆ ಹಜ್ಜಾ಼ ಆಯೊ?” ಕರಿ ಪುಛಾ಼ಯು.
JOH 6:26 ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಮನ ಢೂಂಡಾಸ್ತೆ ಮಾರು ಖ್ಹಣೇದ್ ಕಾಮ್ನ ಖ್ಹಾರು ದೇಖಿನ್‌ ಕಾಹೆ ಪಣ್ಕಿ, ಯೋ ರೋಟಾವ್ನ ಖೈನ್, ಪೇಟ್ ಭರೈಲಿದಾತೆ ಇನಖ್ಹಾಜೇಸ್.
JOH 6:27 ಖ್ಹಡಿಜಾ಼ಸ್ತೆ ಖಾಣಾನಖ್ಹಾಜೆ ನಕೊ ರಾಬೊ; ತುಮೂನ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನ ಹುವಾಸ್ತೆ ಖಾಣಾನಖ್ಹಾಜೆ ರಾಬೊ, ಅಮ್ನು ಖಾಣನ ಅದ್ಮಿನೊ ಛಿಯ್ಯೊ ತುಮೂನ ದಿಶೆ, ಅನಖ್ಹಾಜೆಸ್ ಬಾ ಹುಯಿರ‍್ಹೋತೆ ದೇವ್ನೆ ಇನ ನೇಮಕ್ ಕರ‍್ಯೊ, ಶಾಸನ್ನೊ ಮುದ್ರೊ ಮಾರಿರಾಖ್ಯೋಸ್‌” ಕರಿ ಬೋಲ್ಯೊ.
JOH 6:28 ತದೆ ಅದ್ಮಿಖ್ಹಾರು ಯೇಸುನ, “ಹಮೆ ಕೆಹು ಕಾಮ್ ಕರ‍್ನು ಕರಿ ದೇವ್ ಆಖ್ಹ್ ಕರಾಸ್?” ಕರಿ ಪುಛಾ಼ಯು.
JOH 6:29 ಯೇಸುನೆ,ಇವ್ಣುನ “ದೇವ್ನೆ ಮೋಕ್‌ಲ್ಯೊತೆ, ತುಮೆ ವಿಶ್ವಾಸ್‌ ಕರ‍್ನು ಕರಿ ಬೋಲಾನುಸ್ ದೇವ್ ತುಮಾರೇಥಿ ಆಖ್ಹ್ ಕರಾಸ್ತೆ ಕಾಮ್” ಕರಿ ಜ಼ವಾಬ್ ದಿದೊ.
JOH 6:30 ಇವ್ಣೆ ಇನ, “ಇಮ್‍ಕತೊ, ತೂ ದೇವ್‍ಥಿ ಆಯೊಹುಯೊ ಕರಿ ಹಮೆ ದೇಖಿನ್‌, ತುನ ವಿಶ್ವಾಸ್‌ ಕರಾನಿಘೋಣಿ ಕೆಹು ಖ್ಹಣೇದ್ ಕರಿ ವತಾಳಸ್‌?” ಕರಿ ಪುಛಾ಼ಯು.
JOH 6:31 “ಹಮಾರ ಗುರುಗುರಬ್‌ಲ್ಯವ್‌ನೆ ಉಜ್ಜಾ಼ಡಿ ಝ಼ಗೋಮ ಮನ್ನಾ ಖಾದು, ಸೊರ್ಗಾಥು ಇವ್ಣುನ ಖಾವಾನಖ್ಹಾಜೆ ಇನೆ ರೋಟೊ ದಿದೊ ಕರಿ ಧರ್ಮಶಾಸ್ತ್ರಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯು.
JOH 6:32 ತದೆ ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಸೊರ್ಗಾಮ ತುಮೂನ ರೋಟೊ ದಿದೋತೆ ಮೋಶೆನೆ ಕಾಹೆ ಪಣ್ಕಿ ಮಾರೊ ಬಾ ಸೊರ್ಗಾಥು ಖ್ಹಾಚೊ಼ ರೋಟಾನ ದಿಶೆ.
JOH 6:33 ದೇವ್ ದೇಸ್ತೆ ಯೋ ರೋಟೊ, ಸೊರ್ಗಾಥು ಉತ್ರಿ ಐರ‍್ಹುಥು, ಅಜು಼ ಜಗತ್ನ ಜಾನ್‌ ದೇಸ್.
JOH 6:34 ತದೆ ಅದ್ಮಿಖ್ಹಾರು, “ಅಲಾ, ಗುರು, ಯೋ ರೋಟಾನ ಹಮೂನ ಹಮೇಶ ದೇ” ಕರಿ ಇನ ಬೋಲ್ಯು.
JOH 6:35 ಯೇಸುನೆ ಇವ್ಣುನ, “ಮೇಸ್ ಜಾನ್ನೊ ರೋಟೊ,‌ ಮಾರಕನ ಆವಾಳಾನ ಕದೇಬಿ ಭುಕ್ ಕೋ ಲಾಗ್‌ಶೇನಿ. ಮಾರಾಮ ವಿಶ್ವಾಸ್‌ ಕರಾವಾಳನ ಕದೇಬಿ ಠೋಖ್ಹ್‌ ಕೋ ಲಾಗ್‌ಶೇನಿ.
JOH 6:36 ಕತೋಬಿ ತುಮೆ ಮನ ದೇಖ್ಯಾತೋಬಿ, ವಿಶ್ವಾಸ್‌ ಕರ‍್ಯಾಕೊಂತೆ ಛಾ಼ ಕರಿ ಮೇ ಅಗಾಡಿಸ್ ಬೋಲ್ಯೋನಿ.
JOH 6:37 ಬಾ ಮನ ದೇಸ್ತೆ ಇವ್ಣೆ ಖ್ಹಾರು ಮಾರಕನ ಆವ್‌ಶೆ, ಅಜು಼ ಮಾರಕನ ಆವಾಳಾನ ಪಾಛು಼ಮೇ ಧಕೇಲಿಶ್‌ ಕೊಯ್ನಿ.
JOH 6:38 ಮೇ ಸೊರ್ಗಾಥು ಉತ್ರಿ ಆಯೋತೆ ಮಾರಿ ಮರ್ಜಿ ಕರಾನ ಕಾಹೆ, ಪಣ್ಕಿ ಮನ ಮೋಕ್‌ಲ್ಯೊತೆ ಇನಿ ಮರ್ಜಿಸ್‌ ಪೂರಕರಾನ.
JOH 6:39 ದೇವ್ನೆ ಮನ ದಿದೋತೆ ಅದ್ಮಿಮ ಏಕ್‌ನಾಬಿ ಮೇ ಗುಮೈನಾಲೇವ್ಣುತೆ, ಅಂತಿಮ್‌ ದನ್ಮ ಮೇ ಇವ್ಣ ಖ್ಹಾರಾನ ಪಾಛು಼ ಜಿವ್ತು ಉಠಾಡ್ನು ಕರಿ ಬೋಲಾನುಸ್ ದೇವ್ನಿ ಮರ್ಜಿ.
JOH 6:40 ಇನಾಟೇಕೆ ಛಿಯ್ಯಾನ ದೇಖಿನ್‌, ಇನಾಮ ವಿಶ್ವಾಸ್‌ ಕರಾವಾಳ ಹರೇಕ್ನ ಹರ್‌ಹಮೇಶಾನಿ ಜಿ಼ಂದ್‌ಗಿ ಮಳ್‌ಣು ಕರಿ ಬೋಲಾನು ಬಾನಿ ಮರ್ಜಿ ಹುಯಿರ‍್ಹುಸ್‍, ಅಜು಼ ಖ್ಹರ್ತಿನ ದನ್ಮ ಮೇ ಇವ್ಣುನ ಪಾಛು಼ ಜಿವ್ತು ಉಠಾಡಿಶ್‌” ಕರಿ ಬೋಲ್ಯೊ.
JOH 6:41 ಯೇಸುನೆ, “ಸೊರ್ಗಾಥು ಉತ್ರಿನ್ ಆಯೋತೆ ರೋಟೊ ಮೇಸ್” ಕರಿ ಬೋಲ್ಯೋತೆ ಇನಖ್ಹಾಜೆ, ಯೆಹೂದ್ಯವಾಳು ಇನಿ ಬಾರೇಮ ಮಶ್ಲಾ ಮಾರ‍್ಯು.
JOH 6:42 ಅಜು಼, “ಆ ಯೋಸೇಫ್‍ನೊ ಛಿಯ್ಯೊ ಯೇಸು ಕಾಹೆಕಿ ಶು? ಅನ ಆಯಾ-ಬಾ ಅಪ್ಣುನ ಮಾಲುಮ್‌ನಿ? ಹಮ್ಕೆ ಆ, ಪರ್‌ಲೋಕ್‌ಥು ಉತ್ರಿನ್ ಆಯೊ ಕರಿ ಬೋಲಾಸ್ತೆ ಕಿಮ್?” ಕರಿ ಬೋಲ್ಯು.
JOH 6:43 ತದೆ ಯೇಸುನೆ ಇವ್ಣುನ, “ತುಮಾರ ತುಮಾರಮ ಭಣ್‍ಕಾನು ಭೀರಾಖೊ.”
JOH 6:44 ಮನ ಮೋಕ್‌ಲ್ಯೊತೆ ಬಾ ಮಾರಕನ ಅದ್ಮಿನ ಮೋಕ್ಲಾಸ್‌; ಅಜು಼ ಮೇ ಇವ್ಣುನ ಖ್ಹರ್ತಿನ ದನ್ಮ ಜಿವ್ತು ಉಠಾಡಿಶ್‌, ಬಾನೆ ಮೋಕ್‌ಲ್ಯೊಕೊಂತೆ ಕೋಣ್‌ಬಿ ಮಾರಕನ ಆವಾನ ಕೋ ಹುವಾನಿ.
JOH 6:45 ಪ್ರವಾದಿಖ್ಹಾರು ಲೀಖಿರಾಖ್ಯುಸ್, ಅಜು಼ ಇವ್ಣೆಖ್ಹಾರು ದೇವ್‍ಥಿ ಶಿಕಿಹುಯು ಹುಯಿರ‍್ಹಿಶೆ, ಕೋಣ್ ಬಾಥಿ ಖ್ಹಮ್‌ಜಿನ್‌ ಶಿಕಾಸ್ಕಿ ಯೊ ಮಾರಕನ ಆವಸ್.
JOH 6:46 ಅನಿ ಮತ್‌ಲಬ್, ಕೋಣ್ ತೋಬಿ ಬಾನ ದೇಖಿರಾಖ್ಯುಸ್‌ ಕರಿ ಕಾಹೆ, ದೇವ್‌ಕಂಥೊ ಆಯೋತೆ ಎಕ್ಕಸ್ ಜ಼ಣಾನೆ ಬಾನ ದೇಖಿರಾಖ್ಯೊಸ್.
JOH 6:47 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್ ವಿಶ್ವಾಸ್‌ ಕರಾಸ್ಕಿ, ಇವ್ಣುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಮಳಿರ‍್ಹಿಶೆ.
JOH 6:48 ಮೇಸ್ ಜಾನ್ನೊ ರೋಟೊ.
JOH 6:49 ತುಮಾರ ಗುರುಗುರಬ್‌ಲ್ಯ ಉಜ್ಜಾ಼ಡಿ ಝ಼ಗೋಮ ಮನ್ನಾ ಖಾದು, ಅಜು಼ ಇವ್ಣೆ ಮರಿಗಯು.
JOH 6:50 ಸೊರ್ಗಾಥು ಉತ್ರಿನ್ ಆಯೋತೆ ರೋಟೊ ಕೋಣ್ ಕೋಣ್‍ಖಾಸ್ಕಿ, ಇವ್ಣೆ ಮರ್‌ಶೆ ಕೊಯ್ನಿ.
JOH 6:51 ಕತೋಬಿ ಸೊರ್ಗಾಥು ಉತ್ರಿ ಆಯೋತೆ ರೋಟೊ ಕೋಣ್ ಖಾಸ್ಕಿ ಯೊ ಮರಕೊಯ್ನಿ. ಹರ್‌ಹಮೇಶ ಜಿವ್ತು ರ‍್ಹಿಶೆ; ಅಜು಼ ಮೇ ದೆವ್‍ಸ್ತೆ ರೋಟೊ ಮಾರಿ ಬೋಟಿಸ್‌, ಆ ಜಗತ್‌ ಜಿವಾದೆ ಕರಿ ಮೇ ಅನ ದೀಶ್‌ತೆ” ಕರಿ ಬೋಲ್ಯೊ.
JOH 6:52 ತದೆ ಯೆಹೂದ್ಯವಾಳು, “ಆ ಅದ್ಮಿ ಇನಿ ಬೋಟಿನ ಅಪ್ಣುನ ಕಿಮ್ ಖವಾನ ದಿಶೆ?” ಕರಿ ಇವ್ಣ-ಇವ್ಣ ಮಹಿಸ್ ಅಬ್ಬಾಜ಼ಬ್ಬಿ ವಾತೆ ಕರಾಲಗ್ಯು.
JOH 6:53 ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಅದ್ಮಿನೊ ಛಿಯ್ಯಾನು ಬೋಟಿನ ನಾ ಖಾದಾತೊ, ಅಜು಼ ಇನು ಲ್ಹೋಯಿನ ನಾ ಪೀದಾತೊ ತುಮಾರ ಮಹಿ ಜಾನ್‌ ಕೊ ರ‍್ಹಿಶೇನಿ.
JOH 6:54 ಕೋಣ್ ಮಾರಿ ಬೋಟಿನ ಖಾಸ್ಕಿ, ಮಾರು ಲ್ಹೋಯಿನ ಪಿಯ್ಯಾಸ್‍ಕಿ ಇವ್ಣುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಛಾ಼, ಅಜು಼ ಮೇ ಇನ ಖ್ಹರ್ತಿನ ದನ್ಮ ಜಿವ್ತು ಉಠಾಡಿಶ್‌.
JOH 6:55 ಮಾರಿ ಬೋಟಿ ಖ್ಹಾಚ ಖಾಣು ಅಜು಼ ಮಾರು ಲ್ಹೋಯಿ ಖ್ಹಾಚ ಪಾನ್ಕ ಹುಯಿರ‍್ಹುಸ್‍.
JOH 6:56 ಮಾರಿ ಬೋಟಿನ ಖೈನ್, ಮಾರೂ ಲ್ಹೋಯಿನ ಪಿಯ್ಯಾವಾಳು ಯೊ ಮಾರಾಮ ರ‍್ಹೇಸ್‌, ಅಜು಼ ಮೇ ಇವ್ಣಾಮ ಜಿವಿರ‍್ಹೀಶ್‌.
JOH 6:57 ಜಿವ್ತೊ ಹುಯಿರ‍್ಹೋತೆ ಬಾನೆ ಮನ ಮೋಕ್ಲಿರಾಖ್ಯೊಸ್, ಅಜು಼ ಮೇ ಇನೇಥಿಸ್ ಜಿವ್‌ಸ್‌. ಇನಖ್ಹಾಜೆ ಕೋಣ್ ಮನ ಖಾಸ್ಕಿ ಯೋ ಮಾರೇಥಿ ಜಿವ್‌ಶೆ.
JOH 6:58 ಹೈರುತೆ ಸೊರ್ಗಾಥು ಉತ್ರಿ ಆಯೋತೆ ರೋಟೊ ಆಸ್. ತುಮಾರ ಗುರುಗುರಬ್‌ಲ್ಯ ಮನ್ನಾ ಖಾದು ಅಜು಼ ಮರಿಗಯು. ಕತೋಬಿ ಕೋಣ್ ಆ ರೋಟಾನ ಖಾಸ್ಕಿ ಯೋ ಕದೇಬಿ ಜಿವ್ತೊ ರ‍್ಹಿಶೆ.”
JOH 6:59 ಯೇಸುನೆ ಕಪೆರ್ನೌಮ್‌ನು ಸಭೆ ಭರಾವನು ಮಂದಿರ್‌ಮ ಆ ಖ್ಹಾರು ಬೋಲಿವತಾಳ್ಯೊ.
JOH 6:60 ಅನ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಘಣು ಜ಼ಣು, “ಆ ಜಾ಼ಖ್ಹತ್ ಕಠಣ್ಣಿ ವಾತ್ ಅನ ಕೋಣ್ ಖ್ಹಮಜ಼್‌ಶೆ” ಕರಿ ಬೋಲ್ಯು.
JOH 6:61 ಇನ ಶಿಷ್ಯರ್‌ ಅನಿ ಬಾರೇಮ ಮಶ್ಲಾ ಮಾರುಕರಸ್ ಕರಿ ಯೇಸುನೆ ಮಾಲುಮ್‌ ಕರಿಲೀನ್, “ಆ ವಾತೇಥಿ ತುಮಾರ ದಿಲ್ನ ಟೋಚಾ಼ಯುಕಿ ಶು?
JOH 6:62 ಏಕ್‌ ಬಾರ್ ತುಮೆ, ಅದ್ಮಿನೊ ಛಿಯ್ಯಾನ ಪಹಿಲೆ ಕಿಜ್ಜಾ಼ಥೋಕಿ ಹಿಜ಼್ಜ ಜಾ಼ಶೇತೆ ಇನ ದೇಖ್ಯಾತೊ ತುಮೆ ಶಾತ್‌ ಕರ್‌ ಶು?
JOH 6:63 ಜಾನ್‌ ದೇಸ್ತೆ ದೇವ್‌ನು ಆತ್ಮ ಹುಯಿರುಸ್ ಅದ್ಮಿನು ಹಿಮ್ಮಥ್ಥಿ ಫಾಯಿದೊ ಕೊಯ್ನಿ; ಮೇ ತುಮೂನ ಖಿವು ವಾತ್ನ ಬೋಲ್ಯೋಕಿ ಯೊ ದೇವ್‌ನೊ ಆತ್ಮ ಹುಯಿರ‍್ಹೂಸ್. ಅಜು಼ ಯೋ ಜಾನ್ನ ದೇಸ್.
JOH 6:64 ತೋಬಿ ತುಮಾರಾಮ ಥೋಡು ಜ಼ಣು ನಂಬಾಕೊಯ್ನಿ” ಕರಿ ಬೋಲ್ಯೊ. ಕೋಣ್ ಇನ ನಂಬುಕರಾಕೊಯ್ನಿ ಅಜು಼ ಕೋಣ್ ಇನ ಧೋಕೇಥಿ ಧರಿದಿಶೇತೆ ಕರಿ ಬೋಲಾನು ಪಹಿಲೇಥುಸ್ ಯೇಸುನ ಮಾಲುಮ್‌ ಥೂ.
JOH 6:65 ಅಜು಼ ಯೇಸುನೆ ಬೋಲ್ತೊ ಹುಯಿನ್, “ಬಾನಿ ಮರ್ಜಿಕೊಂತೆ ಕೋಣ್‌ಬಿ ಮಾರಕನ ಆವಾನ ಕೋ ಹುವಾನಿ ಕರಿ ಮೇ ತುಮೂನ ಬೋಲ್ಯೊತೆ ಅನಾಖ್ಹಾಜೆ” ಕರಿ ಬೋಲ್ಯೊ.
JOH 6:66 ತಪ್‌ಥು ಇನ ಶಿಷ್ಯರ್‌ಮ ಕೈಏಕ್ ಜ಼ಣು ಇನ ಮ್ಹೆಂದಿನ್ ಚ಼ಲಿಗಯು ಅಜು಼ ಯೇಸುನಿ ಜೋ಼ಡ್ಮ ಆವವಾಳು ಘಣುಜ಼ಣು ಇನ ಮ್ಹೆಂದಿನ್ ಪಾಛು಼ ಚ಼ಲಿಗಯು.
JOH 6:67 ತದೆ ಯೇಸುನೆ ಇನ ಭಾರ ಶಿಷ್ಯರ್‌ನ, “ತುಮೇಬಿ ಚ಼ಲಜಾ಼ವ್ಣು ಕರಿ ಛಾ಼ಕಿ ಶು?” ಕರಿ ಪುಛಾ಼ಯೊ.
JOH 6:68 ಸೀಮೋನ್‌ ಪೇತ್ರನೆ ಯೇಸುನ, “ಪ್ರಭು, ತುನ ಮ್ಹೆಂದಿನ್ ಹಮೆ ಕಿಜ್ಗಾ಼ ಜ಼ಯ್ಯೆ? ತಾರಕನ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನಿ ವಾತೆ ಛಾ಼.
JOH 6:69 ಹಮೆ ತಾರಾಮ ವಿಶ್ವಾಸ್‌ ಕರಿಯೇಸ್, ಅಜು಼ ತೂ ದೇವ್‍ಥಿ ಆಯೋತೆ ಪರಿಶುದ್ ಅದ್ಮಿ” ಕರಿ ಬೋಲ್ಯೊ.
JOH 6:70 ತದೆ ಯೇಸುನೆ, “ತುಮುನ ಭಾರ ಜ಼ಣಾನ ಮೇ ಚೂ಼ಣಿನ್ ಕಾಡ್ಯೊಕೊಯ್ನಿಕಿ ಶು? ರ‍್ಹಯುತೋಬಿ ತುಮಾರಾಮ ಏಕ್‌ ಜ಼ಣೊ ಶೈತಾನ್ ಹುಯಿರ‍್ಹೋಸ್” ಕರಿ ಜವಾಬ್‌ ದಿದೊ.
JOH 6:71 ಯೇಸುನೆ ಸೀಮೋನ್ ಇಸ್ಕರಿಯೋತನೊ ಛಿಯ್ಯೊ ಹುಯಿರೋತೆ ಯೂದನಿ ಬಾರೇಮ ಆ ವಾತೆ ಬೋಲ್ಯೋತೆ. ಯೂದ ಭಾರ ಜ಼ಣ ಶಿಷ್ಯರ್‌ಮ ಏಕ್‍ಜ಼ಣೊ ಹುಯಿರೋಥೊ, ಯೇಸುನ ದೋಕೇಥಿ ಧರಿದೆವಾಳೊ ಯೋಸ್.
JOH 7:1 ಆ ಖ್ಹಾರು ಹುವಾನ ಬಾದ್‌ಮ, ಯೇಸು ಗಲಿಲಾಯಮ ಫರುಕರ್ತೊಥೊ; ಯೆಹೂದ್ಯವಾಳು ಇನ ಮಾರಿನಾಖಾನ ಟಿವವ್‍ಕರ್ತೂಥು ಇನಖ್ಹಾಜೆ, ಯೂದಾಯಮ ಫರಾನ ಇನ ಮನ್ ಕೋ ಥೂನಿ.
JOH 7:2 ಯೆಹೂದ್ಯರ್‌ನ ಡೆರಾನ ಘರ್ನಿಪೂಜಾ಼ನಿ ವಖ್ಹತ್ ಖನ್ನೆ ಐಗಿಥಿ.
JOH 7:3 ಇನಖ್ಹಾಜೆ ಯೇಸುನ ಭೈಯೇ ಇನ, “ತೂ ಕರಾನು ಕಾಮ್‌ಖ್ಹಾರು ತಾರು ಶಿಷ್ಯರ್‌ಬಿ ದೇಖಾನ ಖ್ಹಾಜೆ, ಗಲಿಲಾಯ ಮ್ಹೇಲಿನ್ ಯೂದಾಯಾನ ಜಾ಼.ಕರಿ ಬೋಲಾಖ್ಹತರ್
JOH 7:4 ಖಿವು ಏಕ್‍ಜ಼ಣೊ ಅದ್ಮಿಮ ವತಾಳಿಲೇವ್ಣು ಕರಿ ಇಷ್ಟ ಪಡಸ್‍ಕಿ ಯೋ ಇನಕಾಮ್‍ನ ಲಪಾಡಿನ್ ಕರಾಕೊಯ್ನಿ. ಶನಕತೊ ತೂ ಅದ್ಭುತ್ ಕಾಮ್ನ ಕರಾಸ್, ಇನಖ್ಹಾಜೆ, ಆ ಜಗತ್ನ ಖ್ಹಾಮ್ಣೆ ತಾರುತೂಸ್ ವತಾಳಿಲೆ” ಕರಿ ಬೋಲ್ಯು.
JOH 7:5 ಯೇಸುನ ಭೈಯೇಬಿ ಇನ ನಂಬ್‍ತುಥು ಕೊಯ್ನಿ.
JOH 7:6 ಯೇಸುನೆ ಇವ್ಣುನ, “ಮಾರಿ ವಖ್ಹತ್ ಬಿಜೂ಼ಬಿ ಕೋ ಆಯಿನಿ. ಕತೋಬಿ ತುಮಾರಿ ವಖ್ಹತ್ ಕದೇಬಿ ತೈಯಾರ್ ರ‍್ಹೇಸ್.
JOH 7:7 ಆ ಜಗತ್‌ ತುಮೂನ ವಹೇರ್‌ ಕರಾನ ಕೊ ಹೊಯ್ನಿ, ಕತೋಬಿ ಮೇ ಇನಿ ಕಾಮ್ ಅಖ್ಖಾನ ಖರಾಬ್ ಕರಿ ಸಾಕ್ಷಿಬೋಲುಸ್ತೆ ಇನಖ್ಹಾಜೆ ಯೋ ಮನ ವಹೇರ್‌ ಕರಾಸ್.
JOH 7:8 ತುಮೇಸ್ ಪೂಜಾ಼ನ ಜಾ಼ವೊ. ಮನ ಬಿಜೂ಼ಬಿ ಬರಾಬರ್‌ನಿ ವಖ್ಹತ್ ಕೋಆಯಿನ್ತೆ ಇನಖ್ಹಾಜೆ, ಮೇ ಆ ಪೂಜಾ಼ನ ಆವ್‌ಕೊಯ್ನಿ” ಕರಿ ಬೋಲ್ಯೊ.
JOH 7:9 ಆ ಬೋಲಾನ ಬಾದ್‌ಮ, ಯೋ ಗಲಿಲಾಯಮಸ್‌ ರಹಿಗೊ.
JOH 7:10 ಇನ ಭೈಯೇ ಜಾ಼ವಾನ ಬಾದ್‌ಮ, ಯೇಸುಬಿ ಪೂಜಾ಼ನ, ಅದ್ಮಿನ ದೆಖಾವ್ಣುನಾತೆ ತಿಮ್, ಲಪೀನ್ ಗಯೊ.
JOH 7:11 ಪೂಜಾ಼ಮ ಯೆಹೂದ್ಯರ್‌ನ ಅದಿಕಾರಿ, “ಯೇಸು ಕಿಜ್ಗಾ಼ ಛಾ಼?” ಕರಿ ಪುಛಾ಼ವ್ತುಹುಯಿನ್‌, ಇನ ಢೂಂಡುಕರ್ತುಥು.
JOH 7:12 ಅಜು಼ ಅದ್ಮಿನಿ ಝೂ಼ಂಡೇಮ ಯೇಸುನಿ ಬಾರೇಮ ಮಹಿ-ಮಹಿಸ್ ಗುಣ್‍ಗುಣೈನ್ ಬೋಲುಕರ್ತೂಥು. ಥೋಡು ಜ಼ಣು, “ಯೋ ಅಛ್ಛೊ಼” ಕರಿ ಬೋಲ್ಯು. ಅಜು಼ ಥೋಡು ಜ಼ಣು, “ಕೊಯ್ನಿ, ಯೋ ಅದ್ಮಿನ ಮಂಕ್ ಕರುಕರಸ್” ಕರಿ ಬೋಲ್ಯು.
JOH 7:13 ಕತೋಬಿ ಕೋಣ್‌ಬಿ ಇನಿ ಬಾರೇಮ ಭಾಲ್‌ಥಿ ವಾತೆ ಕೋ ಬೋಲ್ಯೂನಿ.ಶನಕತೊ ಯೆಹೂದ್ಯರ್‌ನ ಅದಿಕಾರಿಥಿ ಡರುಕರ್ತುಥು.
JOH 7:14 ಪೂಜಾ಼ ಖನ್ನೆ-ಖನ್ನೆ ಆಧು ಖತಮ್ ಹುವಾನ ಬಾದ್‌ಮ, ಯೇಸು ಮಂದಿರ್‌ಮ ಜೈ಼ನ್‌ ವಚನ್ ಬೋಲಿ ದೆವಾಲಗ್ಯೊ.
JOH 7:15 ತದೆ ಯೆಹೂದ್ಯರ‍್ನು ಅದಿಕಾರಿಖ್ಹಾರು, “ಪಢ್ಯೊ-ಲೀಖ್ಯೊಕೊಂತೆ ಅನ, ಅತ್ರುಖ್ಹಾರು ಮಾಲುಮ್‌ಛಾ಼ತೆ ಕಿಮ್?” ಕರಿ ಬೋಲಿನ್ ಆಶ್ಚರ್ಯ ಕರ‍್ಯು.
JOH 7:16 ಯೇಸುನೆ, “ಮೇ ಶಿಕಾಡುಸ್ತೆ ಮಾರಿ ವಚನ್ ಕಾಹೆ ಪಣ್ಕಿ, ಮನ ಮೋಕ್‌ಲ್ಯೊತೆ ದೇವ್ನಿ ವಚನ್ ಹುಯಿರ‍್ಹುಸ್‍.
JOH 7:17 ದೇವ್ನಿ ಮರ್ಜಿನಿಘೋಣಿ ಚಾ಼ಲಾನ ಕಿನ ಮನ್ ಛಾ಼ಕಿ ಇವ್ಣುನ ಆ ವಚನ್ ದೇವ್‍ಥಿ ಆಯುಕಿ, ನತರ್ ಮೇಸ್ ಬಣೈನ್ ಬೋಲುಕರುಸ್ಕಿ ಕರಿ ಬೋಲಾನು ಮಾಲುಮ್‌ ಪಡಾಸ್‌.
JOH 7:18 ಕೋಣ್ ಇನುಯೋಸ್ ವಾತೆಬೋಲಿಲೇಸ್ಕಿ ಇನಿ ಶೊಂತ್ ಇಜ಼್ಜತ್‌ನ ಢೂಂಡಸ್. ಇನುಯೋಸ್ ಖ್ಹಾಚ಼ನ ಲೀಲಾವನ ಕೋಶಿಶ್ ಕರಾಸ್, ಕತೋಬಿ ಕೋಣ್‌ಇನ ಮೋಕ್‌ಲ್ಯೊತೆ ಇನಿ ಇಜ್ಜತ್‍ನ ಢೂಂಡಾವಾಳೊ ಅದ್ಮಿಸ್‌ ಖ್ಹಾಚೊ಼; ಇನಾಮ ಶನೀಶ್ ಗಲತ್‌ ಕೊ ರ‍್ಹೇಯ್ನಿ.
JOH 7:19 ಮೋಶೆನೆ ತುಮೂನ ಧರ್ಮಶಾಸ್ತ್ರ ದಿದೊ ಕೊಯ್ನಿಕಿಶು? ಕತೋಬಿ ತುಮಾರಮ ಕೋಣ್‌ಬಿ ಯೊ ಹುಕುಮ್ ಪಾಡಿನ್ ಚಾ಼ಲಕೊಯ್ನಿ. ತುಮೆ ಶನ ಮನ ಮರ್‌ನಾಕ್ಣು ಕರಿ ಕೋಶಿಶ್ ಕರಾಸ್?” ಕರಿ ಬೋಲ್ಯೊ.
JOH 7:20 ತದೆ ಯೋ ಅದ್ಮಿಖ್ಹಾರು, “ತುನ ಭೂತ್ ಧರಿರಾಖ್ಯುಸ್ ತುನ ಮರ್‌ನಾಕ್ಣು ಕರಿ ಕೋಣ್ ಢೂಂಡ್‌ಷೆ?” ಕರಿ ಬೋಲ್ಯು.
JOH 7:21 ಯೇಸುನೆ ಇವ್ಣುನ, “ಮೇ ಏಕ್‌ ಅದ್ಭುತ್ ಕಾಮ್ನ ಕರ‍್ಯೊ, ಇನ ದೇಖಿನ್‌ ತುಮೆಖ್ಹಾರು ಆಶ್ಚರ್ಯ ಹುಯಾಥ.
JOH 7:22 ಮೋಶೆನೆ ತುಮೂನ ಖ್ಹತ್ನ ಕರಾವ್ಣು ಕರಿ ಹುಕುಮ್‌ ದಿದೋಥೊ, ಕತೋಬಿ ಯೋ ಮೋಶೆಥಿ ಆಯೂತೆ ಕಾಹೆ, ಇನೇಥಿಬಿ ಅಗಾಡಿ ಥೂತೆ ತುಮಾರ ಗುರುಖ್ಹಾರಾಥೀಸ್ ಯೋ ಆಯೂತೆ. ಅಜು಼ ತುಮೆ ಸಬ್ಬತ್‌ ದನ್‌ಮಾಬಿ ಲಡ್ಕಾವ್ನ ಖ್ಹತ್ನ ಶನಕರೋಸ್‌.
JOH 7:23 ಮೋಶೇನು ಧರ್ಮಶಾಸ್ತ್ರ ತೋಡ್ನು ನಾ ಕರಿ ಏಕ್‍ಜ಼ಣೊ ಸಬ್ಬತ್‌ನ ದನ್ಮ ಖ್ಹತ್ನ ಕರೈಲ್ಯವಾನು ರ‍್ಹಿಯುತೊ, ಮೇ ಸಬ್ಬತ್‌ ದನ್ಮ ಏಕ್‌ ಅದ್ಮಿನ ಗುಣ್ ಕರೀನ್ಅಛ್ಛು಼ ಕರ್ತಾನ, ಮಾರಪರ್ ಶನ ಇರಾದೊ ಕರೋಸ್?
JOH 7:24 ಡೋಳಾಮ ದೆಖಾವಸ್ತೆ ಇನಾಪರ್‌ ತೀರ್ಪ್‌ ನಕೊ ಕರೊ; ಖ್ಹಾಚು಼ ಶಾತ್ಕಿ ಇನಾಪರ್‌ ತೀರ್ಪ್‌ ಕರೊ.
JOH 7:25 ಯೆರೂಸಲೇಮ್‌ನು ಥೋಡುಜ಼ಣು ಅಮ್ ಬೋಲ್ಯು, “ಯೊ ಅದಿಕಾರಿಖ್ಹಾರು ಇವ್ಣೆ ಮಾರಿನಾಕ್ಣು ಕರಿ ಛಾ಼ತೆ ಆಸ್ ಕಾಹೆಕಿಶು?
JOH 7:26 ಕತೋಬಿ ದೇಖೊ, ಆ ಹೈರೋತೆ ಖ್ಹಾರಾನ ಇಚ಼್‌ಮಾಸ್ ವಾತ್‍ಬೋಲ್‍ತೊ ಛಾ಼ಲ್ಯೊಫಂಡಾಸ್ ತೋಬಿ ಯೊ ಅದ್ಮಿ ಇನ ಶಾತ್ಬಿ ಕರುಕರಕೊಯ್ನಿ. ಅಮ್ಮಸ್ ಕಾಹೇಕಿಶು? ಅಮ್ನಿ ಪರಕ್ಮ ಯೆಹೂದ್ಯರ‍್ನು ಅದಿಕಾರಿಖ್ಹಾರು ಆಸ್ ಖ್ಹಾಚ಼ಮಾಬಿ ಕ್ರಿಸ್ತಸ್ ಕರಿ ಮಾಲುಮ್‌ ಕರಿಲಿದು.
JOH 7:27 ಕತೋಬಿ ಆ ಅದ್ಮಿ ಕಿಜ್ಜಾ಼ಥು ಆಯೊಹುಯೊಕರಿ ಹಮೂನ ಮಾಲುಮ್‌, ಕ್ರಿಸ್ತ ಆವಾನಿ ವಖ್ಹತ್‌ಮ ಯೋ ಕಿಜ್ಜಾಥೊ ಆಯೊಹುಯೊ ಕರಿ ಏಕ್‌ನಾಬಿ ಮಾಲುಮ್ ಕೋ ಪಡ್‌ಶೇನಿ” ಕರಿ ವಾತೆ ಬೋಲಿಲೆವ್‌ಕರ್ತುಥು.
JOH 7:28 ಯೇಸು ಮಂದಿರ್‌ಮ ಬೋಲಿ ದೇವ್ ಕರ್ತೊಥೊ. ತದೆ ಯೊ ಊಚಿ ಆವಾಜ಼್‌ಥಿ ಬೋಲ್ಯೊ, “ಯೊ ಕಿಜ್ಜಾಥೊ ಆಯೊಕರಿ ತುಮೂನ ಮಾಲುಮ್‍ಕಿಶು, ಮಾರಿ‍ಶೊಂತ್ ಅದಿಕಾರ್‌ಥಿ ಕೊ ಆಯೋನಿ ಮನ ಮೋಕ್ಲಿರಾಖ್ಯೊತೆ ಖ್ಹಾಚ ಏಕ್‍ಜ಼ಣಾನ ಖ್ಹಣೇದ್ ಕೊ ಧರಾನಿ.”
JOH 7:29 ಕತೊ ಮನ ಯೋ ಮಾಲುಮ್‌, ಶನಕತೊ ಮೇ ಇನಾಕಂಥು ಆಯೊ ಅಜು಼ ಇನೇಸ್‌ ಮನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯೊ.
JOH 7:30 ತದೆ ಇವ್ಣೆ ಇನ ಧರ್‌ನು ಕರಿ ಕರ‍್ಯು, ಕತೋಬಿ ಯೋ ವಖ್ಹತ್ ಬಿಜೂ಼ಬಿ ಕೋಆಯಿಂಥಿತೆ ಇನಖ್ಹಾಜೆ, ಕೋಣ್‌ಬಿ ಇನಾಪರ್‌ ಹಾತ್‌ ಕೋ ನಾಖ್ಯುನಿ.
JOH 7:31 ಕತೋಬಿ ಝೂ಼ಂಡ್‌ಮ ಥೂತೆ ಘಣು ಅದ್ಮಿ ಇನಾಪರ್ ವಿಶ್ವಾಸ್‌ ಕರ‍್ಯು ಅಜು಼, “ಕ್ರಿಸ್ತ ಆಯೋತೊ ತದೆ, ಅನೆ, ಕರ‍್ಯೊತೆ ಅದ್ಭುತ್ ಕಾಮ್‍ಥೀಬಿ ಆಜೂ಼ಬಿ ಜಾ಼ಖ್ಹತ್ ಕಾಮ್ ಕರಾಸ್ಕಿಶುಕೀನಿ?” ಕರಿ ಬೋಲ್ಯು.
JOH 7:32 ಯೊ ಅದ್ಮಿನು ಝೂ಼ಂಡ್‌ ಯೇಸುನಿ ಬಾರೇಮ ಮಹಿ-ಮಹಿಸ್ ಬೋಲಾತೆ ವಾತೇನ ಫರಿಸಾಯರ್‌ವಾಳು ಅಜು಼ ಮಹಾಯಾಜಕರ್‌ ಖ್ಹಮ್‌ಜ್ಯು, ಅಜು಼ ಯೇಸುನ ಧರಾನಖ್ಹಾಜೆ ಮಂದಿರ್‌ನು ಕಾವ್ಲಿ ಕರಾವಾಳನ ಮೋಕ್‍ಲ್ಯು.
JOH 7:33 ತದೆ ಯೇಸು ಇವ್ಣುನ, “ಬಿಜು಼ ಥೋಡ ದನ್ ಮೇ ತುಮಾರ ಜೋ಼ಡೆ ರ‍್ಹೀಶ್, ಇನ ಬಾದ್‌ಮ ಮನ ಮೋಕ್‌ಲ್ಯೊತೆ ಇನಾಕನ ಮೇ ಚ಼ಲ್ಯೊಜೈ಼ಶ್‌.
JOH 7:34 ತುಮೆ ಮನ ಢೂಂಡ್‌ಶು, ಕತೋಬಿ ಮೇ ತುಮೂನ ಕೋ ಮಳಿಶ್‌ನಿ, ಶನಕತೊ ಮೇ ಛೂ಼ತೆ ಹಿಜ್ಜಾ಼ ತುಮೂನ ಕೋ ಆವಾನ ಉಶೇನಿ” ಕರಿ ಬೋಲ್ಯೊ.
JOH 7:35 ತದೆ ಯೆಹೂದ್ಯರ‍್ನು ಅದಿಕಾರಿಖ್ಹಾರು ಇವ್ಣ ಇವ್ಣಮಾಸ್ ವಾತೆ ಕರಿಲಿದು, “ಅಪ್ಣುನ ಮಳ್ಣುನಾತೆ ಆ ಕಿಜ್ಗಾ಼ ಜಾ಼ವ್ಣುಕರಿ ಛಾ಼? ಯೊ ಕಿಜ್ಜಾ಼ತೋಬಿ ಜಾ಼ವ್ಣುಕಿಶುಕಿ? ಕಿಜ಼್ಜ, ಮಾರು ಅದ್ಮಿ ಗ್ರೀಕ್ ಖ್ಹಯೇರ್‌ಮ ಜಿವ್ಣು ಕರುಕರಸ್, ಹೈರುತೆ ಗ್ರೀಕ್‌ವಳಾನ ಶಿಕಾಡ್‍ದಿಶೆಕಿ ಶು?
JOH 7:36 ತುಮೆ ಮನ ಢೂಂಡ್‌ಶು, ಕತೋಬಿ ಮೇ ತುಮೂನ ಕೋ ಮಳಿಶ್‌ನಿ, ಶನಕತೊ ಮೇ ಛೂ಼ತೆ ಹಿಜ್ಜಾ಼ ತುಮೂನ ಕೋ ಆವಾನ ಉಶೇನಿ” ಕರಿ ಇನೆ ಬೋಲ್ಯೋತೆ ವಾತೆನಿ ಮತ್‌ಲಬ್ ಶಾತ್‌?” ಕರಿ ಇವ್ಣ-ಇವ್ಣ ಮಹಿಸ್ ಬೋಲಿಲಿದು.
JOH 7:37 ಪೂಜಾ಼ನೊ ಖ್ಹರ್ತಿನೊ ಅಜು಼ ಮುಖ್ಯದನ್‌ ಹುಯಿರ‍್ಹೋತೆ ತದೆ ಯೇಸು ಭೀರಿನ್‌ ಊಚಿ ಅವಾಜ಼್‌ಥಿ ಬೋಲಾನು ಶುರುಕರ‍್ಯೊ, “ಕಿನ ಠೋಖ್ಹ್‌ ಲಾಗಸ್ಕಿ, ಯೊ ಅವಾದೆ ಅಜು಼ ಪಿಯ್ಯಾದೆ.
JOH 7:38 ಧರ್ಮಶಾಸ್ತ್ರಮ ಬೋಲೈರ‍್ಹುತೆ ಇಮ್ಮಸ್, ‘ಕೋಣ್ ಮಾರಪರ್ ವಿಶ್ವಾಸ್‌ ಕರಾಸ್ಕಿ ಇನ ಮಹಿಥು ಜಾನ್ನಪಾಣಿನು ಝೀಲ್ ಇನಾಮ ವ್ಹವ್‍ಶೆ” ಕರಿ ಚಿಕ್ರಿನ್ ಬೋಲ್ಯೊ.
JOH 7:39 ಕತೋಬಿ ಯೇಸುನೆ ಇನ ನಂಬಾವಾಳು ಲೀಲಿಶೇತೆ ಪವಿತ್ರಾತ್ಮ ವರಾನಿ ಬಾರೇಮ ಬೋಲ್ಯೊ. ಯೇಸು ಬೀಜೂಬಿ ಮಹಿಮೆನ ಲೀರಾಖ್ಯೊಥೊ ಕೊಯ್ನಿ ಶನಕತೊ ಪವಿತ್ರಾತ್ಮ ವರ ಅಜೂ಼ಬಿ ದೆವೈರ‍್ಹುಥು ಕೊಯ್ನಿ.
JOH 7:40 ಅನ ಖ್ಹಮ್‌ಜಿನ್‌, ಭೀಡ್‌ಮ ಥೂತೆ ಥೋಡು ಅದ್ಮಿ, “ಖ್ಹಾಚ಼ಮಾಬಿ ಆ ಅದ್ಮಿ ಪ್ರವಾದಿ ಹುಯಿರ‍್ಹೋಸ್” ಕರಿ ಬೋಲ್ಯು.
JOH 7:41 ಬಿಜು಼ ಥೋಡು ಜ಼ಣು, “ಆಸ್ ಕ್ರಿಸ್ತ” ಕರಿ ಬೋಲ್ಯು, ಕತೋಬಿ ಅಜು಼ ಥೋಡ ಅದ್ಮಿನೆ, “ಕ್ರಿಸ್ತ ಗಲಿಲಾಯಥೊ ಕೋ ಆವ್‌ಶೇನಿ!”
JOH 7:42 ದಾವೀದ್‌ನ ಖಾನ್‌ದಾನ್‌ಥೀಬಿ ಅಜು಼ ದಾವೀದ್‌ ಥೋತೆ ಬೇತ್ಲೆಹೇಮ್ ಕರಿಬೋಲಾನು ಗಾಮ್‌ಥೂಬಿ ಕ್ರಿಸ್ತ ಆವ್‍ಶೆಕರಿ ಧರ್ಮಶಾಸ್ತ್ರಮ ಬೊಲಾವಸ್‍ನಿ” ಕರಿ ಬೋಲ್ಯು.
JOH 7:43 ಅಮ್ ಯೇಸುನಿ ಬಾರೇಮ ಅದ್ಮಿಮ ಭಾಗ್‌ ಪಡಿಗಯು.
JOH 7:44 ಇವ್ಣಾಮ ಥೋಡು ಜ಼ಣು ಯೇಸುನ ಧರ್‌ನು ಕರಿ ಥೂ, ಕತೋಬಿ ಏಕ್‌ ಜ಼ಣುಬಿ ಇನಾಪರ್‌ ಹಾತ್‌ ಕೋ ನಾಖ್ಯುನಿ.
JOH 7:45 ಮಂದಿರ್‌ನು ಕಾವ್ಲಿ ಕರಾವಾಳು ಪಾಛು಼ಫರಿ ಆವಾದಿನ್, ಮಹಾಯಾಜಕರ್‌ ಅಜು಼ ಫರಿಸಾಯರ್‌ವಾಳು ಇವ್ಣುನ, “ತುಮೆ ಶನ ಇನ ಧರ್‌ಲಿ ಕೋ ಆಯಾನೀತೆ?” ಕರಿ ಪುಛಾ಼ಯು.
JOH 7:46 ತದೆ ಕಾವ್ಲಿ ಕರಾವಾಳು, “ಕೋಣ್‌ಬಿ ಹಂಕೆತೋಡಿ ಆ ಅದ್ಮಿನಿಘೋಣಿ ವಾತೆ ಕೋ ಬೋಲ್ಯುನಿ” ಕರಿ ಜವಾಬ್‌ ದಿದು.
JOH 7:47 ಅನ ಖ್ಹಮ್‌ಜಿನ್‌ ಫರಿಸಾಯರ್‌ವಾಳು, “ಇಮ್‍ಕತೊ, ಇನೆ ತುಮೂನಾಬಿ ಠಗೈನಾಖ್ಯೊಕಿ ಶು?” ಕರಿ ಪುಛಾ಼ಯು
JOH 7:48 ಯೆಹುದ್ಯರ್‌ನ ಅದಿಕಾರಿರ‍್ಹವೊ, ಫರಿಸಾಯರ್‌ಮ ರ‍್ಹವೊ ಕೋಣ್‌ತೋಬಿ ಇನಾಪರ್ ವಿಶ್ವಾಸ್‌ ಕರಿರಾಖ್ಯುಸ್ಕಿ ಶು?
JOH 7:49 ಧರ್ಮಶಾಸ್ತ್ರ ಮಾಲುಮ್‌ಕೊಂತೆ ಆ ಝೂ಼ಂಡ್‌ವಾಳು ಶಾಪಲ್ಯವಾಳು ಹುಯಿರುಸ್. ಕರಿ ಬೋಲ್ಯೊ.
JOH 7:50 ಯೋ ಪಹಿಲೆ ಯೇಸುಕನ ಆಯೊಥೋತೆ ನಿಕೊದೇಮ ಇವ್ಣಾಮ ಏಕ್‌ ಜ಼ಣೊ ಹುಯಿರ‍್ಹೊಥೊ. ಯೇಸುನ ಮಳಾನ ಗಯೋಥೋತೆ ಆಸ್.
JOH 7:51 ಇನೆ ಇವ್ಣುನ, “ಮಾರಿ ಧರ್ಮಶಾಸ್ತ್ರನಿ ಪರಕ್ಮ,ಕೋಣ್ ಶಾತ್ಬಿ ಖ್ಹಮ್‌ಜ್ಯುಕೊಂತೆ ಅಜು಼ ಯೊ ಶಾತ್‌ ಕರವಾಳೊಕರಿ ಮಾಲುಮ್‌ ಕರಕೊಂತೆ ಇನಿ ಬಾರೇಮ ತೀರ್ಪ್‌ ಬೋಲಾನ ಕೊಹುವಾನಿ.ಕರಿ ಬೋಲ್ಯು.
JOH 7:52 ಇನ ಇವ್ಣೆ, “ತೂಬಿ ಗಲಿಲಾಯವಾಳೊಕಿ ಶು? ಧರ್ಮಶಾಸ್ತ್ರನ ಅಛ್ಛಿನಿತರ ಪಢೀನ್‌ ಶಿಕಿಲೆ. ಗಲಿಲಾಯಥು ಖೆವೂ ಪ್ರವಾದೀಬಿ ಆವ್‌ಶೆ ಕೊಯ್ನಿ ಕರಿ ತದೆ ತುನ ಮಾಲುಮ್‌ ಪಡ್‌ಶೆ” ಕರಿ ಬೋಲ್ಯು.
JOH 7:53 ಇನಪಾರ್ ಅಖ್ಖುಜ಼ಣು ಇವ್ಣ-ಇವ್ಣ ಶೊಂತ್ ಘರೆ ಚ಼ಲಿಗಯು.
JOH 8:1 ಕತೋಬಿ ಯೇಸು ಆಲಿವ್ ಪಹಡ್‌ನ ಗಯೊ.
JOH 8:2 ಯೋ ಪಾಛೊ಼ಫರಿ ಮಂದಿರ್‌ನ ಆಯೊ. ತದೆ ತಮಾಮ್‌ ಅದ್ಮಿ ಐನ್, ಇನ ಅಶ್‌ಪಿಶ್‍ ಭರಾಯು, ಅಜು಼ ಯೇಸು ಬೇಶಿನ್, ಇವ್ಣುನ ಬೋಲಿ ವತಾಳಲಗ್ಯೊ.
JOH 8:3 ಮೋಶೆನಿ ವಚನ್ ಶಿಕಾಡವಾಳು ಅಜು಼ ಫರಿಸಾಯರ್‌ವಾಳು ವ್ಯಬಿಚಾರ್‌ಮ ಖ್ಹಪ್‌ಡೀತೆ ಏಕ್‌ ತಯೇಡಾನ ಇನಾಕನ ಲೈನ್‌, ಖ್ಹಾರಾನ ಖ್ಹಾಮ್ಣೆ ಭೀರಾಖ್ಯು.
JOH 8:4 ಅಜು಼, “ಗುರು, ಆ ತಯೇಡ ವ್ಯಬಿಚಾರ್‌ ಕರಾನಿ ವಖ್ಹತ್‌ಮಾಸ್‌ ಖ್ಹಪ್‌ಡಿಗೈ.
JOH 8:5 ಅಮ್ನಿ ತಯೇಡಾವ್‍ನ ಬಂಡೊ ಫೇಕಿನ್‌ ಮಾರ‍್ನು ಕರಿ ಮೋಶೆನೆ ಧರ್ಮಶಾಸ್ತ್ರಮ ಹಮೂನ ಹುಕುಮ್‌ ದೀರಾಖ್ಯೊಸ್. ಕತೋಬಿ ಅನಿ ಬಾರೇಮ ತೂ ಶಾತ್‌ ಬೋಲಾಸ್?” ಕರಿ ಇನ ಪುಛಾ಼ಯು.
JOH 8:6 ಯೇಸುನಿ ವಾತೇಮ ಶಾತ್‌ತೋಬಿ ಗಲತ್‌ ಮಳ್ಯುತೊ, ಅಪ್ಣೆ ಇನ ಖ್ಹಪ್‌ಡಾಯೆಜಾ಼ಯಿ ಕರಿ ಇವ್ಣೆ ಯೇಸುನ ಸವಾಲ್‌ಕರ‍್ಯು? ಕತೋಬಿ ಯೇಸು ಮುಡ್‌ಕ್ಯು ಝು಼ಕೈನ್‌, ಇನಿ ಅಂಗ್‌ಳೀಥಿ ಜ಼ಮೀನ್‌ಪರ್ ಲೀಖಾಲಗ್ಯೊ.
JOH 8:7 ಇವ್ಣೆ ಲಗತ್ತರ್‌ ಇನ ಪುಛಾ಼ವ್‌ ಕರ್ತುಥೂತೆ ಇನಖ್ಹಾಜೆ, ಯೇಸುನೆ ಮುಡ್‌ಕ್ಯು ಪಾಡೀನ್, ಇವ್ಣಾಮ ಏಕ್‌, “ತುಮಾರಮ ಕೋಣ್ ಪಾಪ್ ಕರಿರಾಖ್ಯುಕೊಯ್ನಿಕಿ, ಇವ್ಣೆ ಪಹಿಲೆ ಇನಾಪರ್‌ ಬಂಡೊ ಫೇಕಾದೆ” ಕರಿ ಬೋಲ್ಯೊ.
JOH 8:8 ಅನಕೇಡೆಥು ಅಜು಼ಪಾಛು಼ ಮಡ್‌ಕ್ಯು ಝು಼ಕೈನ್‌ ಜ಼ಮೀನ್‌ಪರ್ ಲೀಖಾಲಗ್ಯೊ.
JOH 8:9 ಆ ವಾತೇನ ಖ್ಹಮ್‌ಜಿನ್‌, ಪಹಿಲೆ ಶಾಣು ಅಜು಼ ಬಿಜು಼ಖ್ಹಾರು ಏಕೆಕೇಸ್ ನಿಕ್ಳಿನ್ ಚ಼ಲಿಗಯು. ಯೇಸು ಎಕ್ಕಸ್ ಜ಼ಣೊ ರಹಿಗೊ ಅಜು಼ ಯೋ ತಯೇಡ ಇನಖ್ಹಾಮ್ಣೆ ಭೀಥಿ.
JOH 8:10 ಯೇಸು ಉಠಿ ಭೀರಿನ್, ಯೋ ತಯೇಡಾನ ದೇಖಿನ್‌, “ಅಲಿ ಬಾಯಿ, ಇವ್ಣೆ ಖ್ಹಾರು ಕ್ಯಾ? ತಾರಪರ್ ಗಲತ್‌ ಲಗಾಡನಖ್ಹಾಜೆ ಕೋಣ್‌ಬಿ ಕೋ ಬಚ್ಯೂನಿಕಿ ಶು? ಕರಿ ಬೋಲ್ಯೊ.
JOH 8:11 ಯೋ ತಯೇಡಾನೆ, “ಕೋಣ್‌ಬಿ ಕೋ ಬಚ್ಯೂನಿಲಾ ಪ್ರಭು! ಕರಿ ಬೋಲಿ. ತದೆ ಯೇಸುನೆ ಇನ, “ಇಮ್‍ಕತೊ, ಮೇಬಿ ತಾರಪರ್ ಗಲತ್‌ ಕೋ ಲಗಾಡುನಿ. ಹಮ್ಕೆ ತೂ ಜಾ಼, ಅಜು಼ಪಾಛು಼ ಪಾಪ್ ನಕೊ ಕರೀಶ್” ಕರಿ ಬೋಲ್ಯೊ.
JOH 8:12 ಅನ ಬಾದ್‌ಮ ಯೇಸು ಪಾಛೊ಼ ಅದ್ಮಿಖ್ಹಾರನ ವಾತೆ ಬೋಲ್ತೊಹುಯಿನ್, “ಮೇಸ್ ಜಗತ್ನ ಉಜಾ಼ಳು ಹುಯಿರ‍್ಹೋಸ್, ಮಾರಪೀಠೆ ಆವಾಳು ಅಂಧಾರಮ ಚಾ಼ಲ್‌ಶೆಸ್‌ ಕೊಯ್ನಿ ಅಜು಼ ಯೊ ಜಾನ್ನು ಉಜಾ಼ಳು ಲೀರ‍್ಹಾವಳೊ ಹುಯಿರೊಸ್” ಕರಿ ಬೋಲ್ಯೊ.
JOH 8:13 ಫರಿಸಾಯರ್‌ವಾಳು ಯೇಸುನ, “ತಾರಿ ಬಾರೇಮ ತೂಸ್ ಸಾಕ್ಷಿ ಬೋಲಿಲೆಸ್; ತಾರಿ ಸಾಕ್ಷಿ ಖ್ಹಾಚು಼ ಕಾಹೆ” ಕರಿ ಬೋಲ್ಯು.
JOH 8:14 ತದೆ ಯೇಸುನೆ ಜ಼ವಾಬ್ ದಿದೊ, “ಮೇಸ್ ಮಾರಿ ಬಾರೇಮ ಸಾಕ್ಷಿ ಬೋಲಿಲಿದೊತೊ ಯೋ ಖ್ಹಾಚು಼ ಹುಯಿರುಸ್. ಶನಕತೊ ಮೇ ಕಿಜ್ಜಾಥೊ ಆಯೊ ಅಜು಼ ಕಿಜ್ಗಾ಼ ಜೈ಼ಶ್ ಕರಿ ಬೋಲಾನು ಮನ ಮಾಲುಮ್‌. ಕತೋಬಿ ತುಮುನ ಮೇ ಕಿಜ್ಜಾಥೊ ಆಯೊ ಕಿಜ್ಗಾ಼ ಜೈ಼ಶ್ ಕರಿ ಮಾಲುಮ್‌ ಕೊಯ್ನಿ.
JOH 8:15 ತುಮೆ ಅದ್ಮಿ ತೀರ್ಪ್‌ ಕರಾನಿತರ ಕರೋಸ್; ಕತೋಬಿ ಮೇ ಕಿನಾಬಿ ತೀರ್ಪ್ ಕೋ ಕರೂನಿ.
JOH 8:16 ಕತೋಬಿ ಮೇ ತೀರ್ಪ್‌ ಕರ‍್ಯೊತೋಬಿ ಬರಾಬರಸ್‌ ರ‍್ಹೇಸ್‌, ಶನಕತೊ ಮೇ ಎಕ್ಕಸ್ ಜ಼ಣೊ ಕಾಹೆ; ಮನ ಮೋಕ್‌ಲ್ಯೊತೆ ಬಾಬಿ ಮಾರ ಜೋ಼ಡೆ ರ‍್ಹೇಸ್‌.
JOH 8:17 ಬೇ ಜ಼ಣು ಬೋಲಾಸ್ತೆ ಸಾಕ್ಷಿ ಖ್ಹಾಚಿಕರಿ ತುಮಾರಿ ಧರ್ಮಶಾಸ್ತ್ರಮಾಸ್ ಬೋಲಾಸ್ನಿ.
JOH 8:18 ಮಾರಿ ಬಾರೇಮ ಮೇ ಸಾಕ್ಷಿ ಬೋಲುಸ್ತೆ, ಮೆ ಏಕ್ಜ಼ಣೊ, ಅತ್ರೇಸ್ ಕಾಹೆತೆ ಮನ ಮೋಕ್‌ಲ್ಯೊತೆ ಬಾಬಿ ಬಿಜೇಕ್ ಸಾಕ್ಷಿ ಹುಯಿರೊಸ್” ಕರಿ ಬೋಲ್ಯೊ.
JOH 8:19 ತದೆ ಇವ್ಣೆ, “ತಾರೊ ಬಾ ಕಿಜ್ಗಾ಼ ಛಾ಼?” ಕರಿ ಪುಛಾ಼ಯು. ಯೇಸುನೆ, “ತುಮೂನ ಮೇ ರ‍್ಹವೊ, ಮಾರೊ ಬಾ ರ‍್ಹವೊ ಮಾಲುಮ್‌ ಕೊಯ್ನಿ. ತುಮೆ ಮನ ಮಾಲುಮ್‌ ಕರ‍್ಯಾಹೋತ್ತೊ, ಮಾರ ಬಾನಾಬಿ ಮಾಲುಮ್‌ ಕರಿಲಿದಾಹೋತ್‌” ಕರಿ ಜ಼ವಾಬ್ ದಿದೊ.
JOH 8:20 ಯೇಸುನೆ ಮಂದಿರ್‌ಮ ಅದ್ಮಿ ಕಾಣ್ಕೇನಿ ಹುಂಡಿನಿ ಝ಼ಗೋಕನ ಭೀರಿನ್ ಶಿಕಾಡುಕರಾನಿ ವಖ್ಹತ್‌ಮ ಆ ವಾತ್ನ ಬೋಲ್ಯೊ. ಇನಖ್ಹಾಜೆ ಕೋಣ್‌ಬಿ ಇನ ಕೋ ಧರ‍್ಯುನಿ.ಶನಕತೊ ಇನಿ ವಖ್ಹತ್ ಬಿಜೂ಼ಬಿ ಕೋ ಐರ‍್ಹಿಥೀನಿ,
JOH 8:21 ಯೇಸುನೆ ಪಾಛು಼ ಇವ್ಣುನ, “ಮೇ ಒಳೆಜ಼ವುಸ್ ತುಮೆ ಮನ ಢೂಂಡ್‌ಶು, ಅಜು಼ ತುಮಾರ ಪಾಪ್‌ಮ ತುಮೆ ಮರ್‌ಶು. ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಕೋ ಆವಾನ ಉಶೇನಿ” ಕರಿ ಬೋಲ್ಯೊ.
JOH 8:22 ಆ ಯೆಹೂದ್ಯರ್‌ನ, “ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಆವಾನ ಕೋ ಉಶೇನಿ ಕರಿ ಬೋಲುಕರಾಸ್‌ ಕಿಶು? ಆ ಇನು ಯೋಸ್‌ ಮರಿಜಾ಼ವ್ಣು ಕರಿ ಛಾ಼ಕಿ ಶುಕಿ?” ಕರಿ ಬೋಲಿಲ್ಯವಾನಿತರ ಹುಯಿರೂಥು.
JOH 8:23 ಯೇಸುನೆ, “ತುಮೆ ಹೇಟ್‌ಲ್ಯಾವಾಳ ಹುಯಿರ‍್ಹಾಸ್‌, ಮೆ ಉಪ್ಪರ್‌ವಾಳೊ ಹುಯಿರೊಸ್ ತುಮೆ ಆ ಜಗತ್‌ವಾಳ, ಕತೋಬಿ ಮೇ ಆ ಜಗತ್‌ವಾಳೊ ಕಾಹೆ.
JOH 8:24 ಇನಖ್ಹಾಜೇಸ್ ತುಮೆ ತುಮಾರ ಪಾಪ್‍ಮಾಸ್‌ ಮರ್‌ಶು ಕರಿ ಮೇ ಬೋಲ್ಯೋತೆ. ಮೇ ಕೋಣ್ ಕರಿ ತುಮೆ ವಿಶ್ವಾಸ್‌ ನಾ ಕರ‍್ಯಾತೊ ತುಮಾರ ಪಾಪ್‌ಮ ತುಮೇಸ್ ಮರ್‌ಶು” ಕರಿ ಬೋಲ್ಯೊ.
JOH 8:25 ತದೆ ಇವ್ಣೆ ಇನ, “ತೂ ಕೋಣ್?” ಕರಿ ಪುಛಾ಼ಯು. ಯೇಸುನೆ, “ಮೇ ಕೋಣ್ ಕರಿ ಪಹಿಲೇಥೋಸ್‌ ತುಮೂನ ಬೋಲ್ತೊ ಆಯೊತೇಸ್ ಮೆ.
JOH 8:26 ತುಮಾರಿ ತೀರ್ಪ್‌ನಿ ಬಾರೇಮ ವಾತೆ ಬೋಲಾನು ಮಾರಕನ ಘಣು ಛಾ಼. ಕತೋಬಿ ಮನ ಮೋಕ್‌ಲ್ಯೊತೆ ಯೋ ಖ್ಹಾಚೊ಼ ಹುಯಿರ‍್ಹೋಸ್ ಅಜು಼ ಇನೇಥಿ ಮೇ ಶಾತ್‌ ಖ್ಹಮ್‌ಜ್ಯೋಕಿ ಇನಾಸ್ ಆ ಜಗತ್ನ ಮೇ ಬೋಲುಸ್” ಕರಿ ಬೋಲ್ಯೊ.
JOH 8:27 ಯೇಸು ಬಾನಿ ಬಾರೇಮ ವಾತೆ ಬೋಲುಕರಾಸ್‌ ಕರಿ ಬೋಲಾನು ಇವ್ಣುನ ಮಾಲುಮ್‌ ಕೋ ಪಡ್ಯುನಿ.
JOH 8:28 ಕತೋಬಿ ಇನೆ ಇವ್ಣುನ, “ತುಮೆ ಅದ್ಮಿನ ಛಿಯ್ಯಾನ ಉಪ್ಪರ್ ಪಾಡ್‌ಶುಕಿ, ತದೆ ‘ಮೇಸ್ ಯೋ’ ಕರಿ,ತುಮುನ ಮಾಲುಮ್ ಪಡ್‌ಶೆ. ಮೆ ಕರುಸ್ತೆ ಮಾರಿ ಶೊಂತ್ ಆಖ್ಹ್‌ಥಿ ಕಾಹೆ ಪಣ್ಕಿ, ಮಾರೊ ಬಾ ಬೋಲಾತೆ ಇಮ್ಮಸ್ ಶಿಕಾಡುಕರೂಸ್.
JOH 8:29 “ಮನ ಮೋಕ್‌ಲ್ಯೊತೆ ಯೋ ಮಾರ ಜೋ಼ಡೆ ಛಾ಼; ಮನ ಎಕ್ಲೋಸ್ ಕೋ ಮ್ಹೇಲ್ಯೋನಿ, ಇನಖ್ಹಾಜೇಥಿ ಮೆ ಕೆದೇಬಿ ಇನ ಇಷ್ಟನಿತರಾಸ್ ಕರುಸ್ತೆ” ಕರಿ ಬೋಲ್ಯೊ.
JOH 8:30 ಯೇಸು ಆ ವಾತೆ ಖ್ಹಾರು ಬೋಲಾನಿ ವಖ್ಹತ್‌ಮ ಘಣು ಅದ್ಮಿ ಇನಾಪರ್‌ ವಿಶ್ವಾಸ್‌ ಕರ‍್ಯು.
JOH 8:31 ತದೆ ಯೇಸುನೆ ಇನಾಪರ್ ವಿಶ್ವಾಸ್‌ ಕರ‍್ಯೋತೊ ಯೆಹೂದ್ಯರ್‌ನ, “ತುಮೆ ಮಾರಿ ವಾತೇನಿತರ ಚಾ಼ಲ್ಯಾತೊ,ತುಮೆ ಖ್ಹಾಚ಼ಮಾಬಿ ಮಾರ ಶಿಷ್ಯ ಹುಯಿರ‍್ಹಿಶು.
JOH 8:32 ತುಮೆ ಖ್ಹಾಚ಼ನ ಮಾಲುಮ್‌ ಕರಿಲಿಶು, ಅಜು಼ ಯೋ ಖ್ಹಾಚು಼ ತುಮೂನ ಛೋ಼ಡಾವ್‌ಶೆ” ಕರಿ ಬೋಲ್ಯೊ.
JOH 8:33 ಇನ ಇವ್ಣೆ, “ಹಮೆ ಅಬ್ರಹಾಮ್‌ನಿ ಖಾಂದಾನ್‌ವಾಳ, ಹಮೆ ಕದೇಬಿ ಕಿನಾಬಿ ಗುಲಾಮ್ ಕೋಹೂಯಾನಿ. ಅಮ್ ರ‍್ಹವಾಪರ್, ‘ತುಮೆ ಛು಼ಟ್‌ಶು’ ಕರಿ ತೂ ಬೋಲಾಸ್ತೆ ಕಿಮ್?” ಕರಿ ಜವಾಬ್‌ ದಿದು.
JOH 8:34 ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ: ಪಾಪ್ ಕರಾವಾಳು ಖ್ಹಾರು ಪಾಪ್ನ ಗುಲಾಮ್ ಹುಯಿರ‍್ಹುಸ್‍.
JOH 8:35 ಗುಲಾಮ್ ಘರ್‌ಮ ಹಮೇಶಾನಖ್ಹಾಜೆ ಕೋ ರಿಶೇನಿ, ಕತೋಬಿ ಛಿಯ್ಯೊ ಘರ್‌ಮ ಹಮೇಶಾನಖ್ಹಾಜೆ ರ‍್ಹೇಸ್‌.
JOH 8:36 ಇನಖ್ಹಾಜೆ ಛಿಯ್ಯೊ ತುಮೂನ ಛೋ಼ಡಾಯೋತೊ, ತುಮೆ ಖ್ಹಾಚಮಾಬಿ ಛು಼ಟ್‌ಶು.
JOH 8:37 ತುಮೆ ಅಬ್ರಹಾಮ್‌ನಿ ಪಿಳ್ಗಿವಾಳ ಕರಿ ಮನ ಮಾಲುಮ್‌. ತೋಬಿ ತುಮೆ ಮನ ಮರ್‌ನಾಕ್ಣು ಕರಿ ಕೋಶಿಶ್ ಕರೋಸ್, ಶನಕತೊ ಮಾರಿ ವಾತೇನ ತುಮೆ ಮಾನ ಕೊಯ್ನಿ.
JOH 8:38 ಮಾರ ಬಾನೆ ಮನ ವತಾಳ್ಯೊತೆ ಇನಿ ಬಾರೇಮ ಮೇ ಬೋಲುಸ್, ಕತೋಬಿ ತುಮಾರ ಬಾನೆ ಶಾತ್‌ ಖ್ಹಮ್‍ಜಾ಼ಡ್ಯೋಕಿ ಯೋ ತುಮೆ ಕರೋಸ್” ಕರಿ ಬೋಲ್ಯೊ.
JOH 8:39 ಇವ್ಣೆ ಇನ, “ಹಮಾರೊ ಬಾ ಅಬ್ರಹಾಮ್‌” ಕರಿ ಜವಾಬ್‌ ದಿದು. ಯೇಸುನೆ ಇವ್ಣುನ, “ತುಮೆ ಅಬ್ರಹಾಮ್‌ನ ಲಡ್ಕಾ ಹುಯಿರ‍್ಹಾಹೋತ್ತೊ, ಅಬ್ರಹಾಮ್‌ನೆ ಕರ‍್ಯೊತೆ ಇಮ್ಮಸ್ ಕರ‍್ಯಾಹೋತ್‌.
JOH 8:40 ಮೇ ದೇವ್‍ಥಿ ಖ್ಹಮ್‌ಜೋತೆ ಖ್ಹಾಚಿನ ತುಮುನ ಬೋಲಿವತಾಳ್ಯೋತೆ ಏಕ್ಜ಼ಣೊ ಮೆ ಹುಯಿರೊಸ್, ತೋಬಿ ತುಮೆ ಮನ ಮರ್‌ನಾಕ್ಣು ಕರಿ ದೇಖೊಸ್‍. ಅಬ್ರಹಾಮ್‌ನೆ ಅಮ್ ಶಾತ್ ಕೋ ಕರ‍್ಯೋನಿ!
JOH 8:41 ತುಮೆ ತುಮಾರ ಬಾನ ಕಾಮ್ನ ಅಖ್ಖು ಕರುಕರಸ್ ಕರಿಬೋಲ್ಯೊ. ತದೆ ಇವ್ಣೆ, ಹಮೆ ಪಾಪೇಲ ಕಾಮ್‍ಥಿ ಪೈದಕೊಹುಯಾನಿ. ಹಮೂನ ಎಕ್ಕಸ್ ಜ಼ಣೊ ಬಾ, ಯೋ ದೇವಸ್ ಕರಿ ಬೋಲ್ಯು.
JOH 8:42 ಯೇಸುನೆ ಯೆಹೂದ್ಯರ್‌ನ, “ಖ್ಹಾಚಮಾಬಿ ದೇವಸ್ ತುಮಾರೊ ಬಾ ಹುಯಿರ‍್ಹೊಹೋತ್ತೊ, ತುಮೆ ಮನ ಪ್ಯಾರ್ ಕರ‍್ಯಾಹೋತ್‌, ಶನಕತೊ ಮೇ ದೇವ್‌ಕಂಥೊ ಆಯೊ ಅಜು಼ ಹಮ್ಕೆ ಹಜ್ಜಾ಼ ಛು಼. ಮೇ ಆಯೋತೆ ಮಾರಿ ಶೊಂತ್‌ ಅದಿಕಾರ್‌ಪರ್‌ ಕಾಹೆ, ಪಣ್ಕಿ ದೇವ್ನೇಸ್ ಮನ ಮೋಕ್‌ಲ್ಯೊ.
JOH 8:43 ತುಮೆ ಮಾರಿ ವಾತೇನ ಶನ ಖ್ಹಮ್‌ಜಾ಼ ಕೊಯ್ನಿ? ಶನಕತೊ ತುಮೆ ಮಾರಿ ವಾತೇನ ಕಾನ್‌ ಕೋ ದೆವ್‌ಕರಾನಿತೆ ಇನಖ್ಹಾಜೇಸ್.
JOH 8:44 ಶೈತಾನಸ್ ತುಮಾರೊ ಬಾ, ಇನ ತುಮೆ ಛಿಯ್ಯಾ ಹುಯಿರಾಸ್, ಇನೀನಿಘೋಣಿ ಖರಾಬ್ ಆಖ್ಹ್‌ನ ಕರಾನ ದೇಖೊಸ್‍. ಯೋ ಶುರುವಾತ್‌ಥೋಸ್ ಖೂನಿಹುಯಿರ‍್ಹೊಸ್ ಅಜು಼ ಖ್ಹಾಚಾಮ ಟಿಕ್ಯೊಕೊಯ್ನಿ. ಶನಕತೊ ಇನಾಮ ರತ್ತಿಬಿ ಖ್ಹಾಚಿ ಕೊಯ್ನಿ, ಯೋ ಝೂ಼ಟಿ ಬೋಲಾನಿ ವಖ್ಹತ್‌ಮ ಆದತ್‌ನಿಘೋಣಿ ಬೋಲಾಸ್, ಶನಕತೊ ಯೋ ಝೂ಼ಟಿಸ್ ಬೋಲವಾಳೊ ಅಜು಼ ಹರ್ ಥರಾನು ಝೂ಼ಟಿನ ಬಾ ಹುಯಿರ‍್ಹೋಸ್.
JOH 8:45 ಮೇ ಖ್ಹಾಚಿ ಬೋಲುಸ್ತೆ ಇನಖ್ಹಾಜೆ ತುಮೆ ವಿಶ್ವಾಸ್‌ ಕರಾಕೊಯ್ನಿ.
JOH 8:46 ಮಾರಾಮ ಪಾಪ್ನ ವತಾಳವಾಳೊ ತುಮಾರಮ ಕೋಣ್‌ತೋಬಿ ಛಾ಼? ಮೇ ಖ್ಹಾಚಿ ಬೋಲ್ಯೊತೋಬಿ, ತುಮೆ ಮನ ಶನ ವಿಶ್ವಾಸ್‌ ಕರಾಕೊಯ್ನಿ?
JOH 8:47 ಖಿವು ಏಕ್‍ಜ಼ಣು ದೇವ್‍ಥಿ ಪೈದಾಹುಯುಕಿ ದೇವ್ನಿ ವಾತೆನ ಖ್ಹಮ್‌ಜಾ಼ಸ್‌, ತುಮೆ ದೇವ್ನ ಸಂಬಂದ್ ನಾರ‍್ಹಯಾತೊ, ಇನಖ್ಹಾಜೆ ಇನ ಖ್ಹಮ್‌ಜಾ಼ಕೊಯ್ನಿ” ಕರಿ ಬೋಲ್ಯೊ.
JOH 8:48 ತದೆ ಯೆಹೂದ್ಯರ್‌ನೆ ಯೇಸುನ ಬೋಲ್ಯು,ಹಮೆ ಬೋಲಾನು ಬರಾಬರ್‌ ಕಾಹೆಕಿ ಶು? “ತೂ ಸಮಾರಿಯಾವಾಳೊ ಅಜು಼ ತಾರಾಮ ಭೂತ್‌ ಛಾ಼” ಕರಿ ಬೋಲ್ಯು.
JOH 8:49 ಯೇಸುನೆ, “ಮಾರಾಮ ಭೂತ್‌ ಕೊಯ್ನಿ, ಮೇ ಮಾರ ಬಾನ ಮರ್ಯಾದಿ ದೆವ್‌ಸ್‌, ಕತೋಬಿ ತುಮೆ ಮನ ಮರ‍್ಯಾದಿ ಕೋ ದೇಯ್ನಿ.
JOH 8:50 ಮನ ಮರ್ಯಾದಿ ಮಳಾದೆ ಕರಿ ಮೇ ಆಖ್ಹ್ ಕೋ ಕರೂನಿ, ಕತೋಬಿ ಮನ ಮರ್ಯಾದಿ ಮಳ್‌ಣು ಕರಿ ಆಖ್ಹ್ ಕರಾವಾಳೊ ಏಕ್‌ ಜ಼ಣೊ ಛಾ಼, ಯೋ ಮಾರಭಣಿಥೊ ನ್ಯಾವ್‌ ಫೇಡಾವಾಳೊ.
JOH 8:51 ಮೇ ತುಮೂನ ಖ್ಹಾಚಸ್ ಬೋಲುಸ್, ಮೆ ಶಿಕಾಡನು ಖ್ಹಮ್‌ಜಿನ್‌ ಇನೀನಿಘೋಣಿ ಚಾ಼ಲವಾಳು ಕದೇಬಿ ಮರ್‌ಶೆ ಕೊಯ್ನಿ” ಕರಿ ಬೋಲ್ಯೊ.
JOH 8:52 ಇನ ಯೆಹೂದ್ಯವಾಳನೆ, “ತುನ ಭೂತ್‌ ಧರಿರಾಖ್ಯುಸ್ ಕರಿ ಹಮ್ಕೆ ಹಮೂನ ಮಾಲುಮ್ ಪಡ್ಯು! ಅಬ್ರಹಾಮ್‌ ಮರಿಗಯೊ, ಅಜು಼ ಪ್ರವಾದಿ ಖ್ಹಾರುಬಿ ಮರಿಗಯು, ತೋಬಿ ತೂ ಬೋಲಸ್ಕಿ, ಮೆ ಶಿಕಾಡನಿಘೋಣಿ ಚಾ಼ಲವಾಳು ಕದೇಬಿ ಮರ್‌ಶೆಕೊಯ್ನಿ ಕರಿ.
JOH 8:53 ಹಮಾರೊ ಮೋಟೊ ಹುಯಿರ‍್ಹೋತೆ ಅಬ್ರಹಾಮ್‌ಥೀಬಿ ತೂ ಮೋಟೋಕಿ ಶು? ಅಬ್ರಹಾಮ್‌ಬಿ, ಪ್ರವಾದಿ ಖ್ಹಾರುಬಿ ಮರಿಗಯು. ಅಮ್ ರ‍್ಹವಾಪರ್, ತಾರು ತೂ ಕೋಣ್ ಕರಿ ಸೋಚಾ಼ಸ್‌?” ಕರಿ ಪುಛಾ಼ಯು.
JOH 8:54 ತದೆ ಯೇಸುನೆ, “ಮಾರು ಮೇಸ್ ಖ್ಹರೈಲಿದೋತೊ, ಯೋ ಮರ್ಯಾದಿನ ಶನೀಶ್ ಬೆಲೆಕೊಯ್ನಿ. ಮನ ಮರ್ಯಾದಿ ದ್ಯವಾಳೊ ಮಾರೊ ಬಾ, ತುಮೆ ಇನ ಹಮಾರೊ ದೇವ್ ಕರಿ ಬೋಲೋಸ್‌.
JOH 8:55 ತೋಬಿ ತುಮೆ ಇನ ಪರ್ಖಿರಾಖ್ಯಕೊಯ್ನಿ, ಕತೋಬಿ ಮನ ಯೋ ಮಾಲುಮ್‌. ಯೋ ಮನ ಮಾಲುಮ್‌ಕೊಯ್ನಿ ಕರಿ ಮೇ ಬೋಲ್ಯೊತೊ, ಮೇಬಿ ತುಮಾರಿನಿತರ ಝೂ಼ಟೊ ಹುಯಿಜೈ಼ಶ್‌. ಕತೋಬಿ ಮನ ಯೋ ಮಾಲುಮ್‌, ಅಜು಼ ಮೇ ಇನಿ ವಾತೆನಿಘೋಣಿ ಚಾ಼ಲುಸ್‌.
JOH 8:56 ತುಮಾರೊ ಬಾ ಹುಯಿರ‍್ಹೋತೆ ಅಬ್ರಹಾಮ್‌ನೆ ಮೇ ಆಯಿಶ್‍ತೆ ದನ್ನ ದೇಖಿಶ್‌ ಕರಿ ಘಣು ಶಂತೋಖ್ಹ್‌ ಕರ‍್ಯೊ, ಅಜು಼ ಇನೆ ಯೋ ದನ್ನ ದೇಖಿನ್‌ ಖ್ಹುಶಿ ಕರ‍್ಯೊ” ಕರಿ ಬೋಲ್ಯೊ.
JOH 8:57 ಇನ ಯೆಹೂದ್ಯರ್‌ನೆ, “ತುನ ಬಿಜೂ಼ಬಿ ಅಡೈವಿಖ್ಹ್‌ ವರಖ್ಹ್‌ ಕೋ ಹುಯಿರಾನಿ, ತುನೆ ಅಬ್ರಹಾಮ್‌ನ ದೇಖಿರಾಖ್ಯೋಸ್ಕಿ ಶು?” ಕರಿ ಯೇಸುನ ಬೋಲ್ಯು.
JOH 8:58 ಯೇಸುನೆ, “ಮೇ ಖ್ಹಾಚ ಬೋಲುಸ್ಕಿ, ಅಬ್ರಹಾಮ್‌ ಪೈದಾ ಹುವಾನ ಅಗಾಡಿಸ್, ಮೇ ಥೊ!” ಕರಿ ಬೋಲ್ಯೊ.
JOH 8:59 ಆ ವಾತೆನ ಖ್ಹಮ್‌ಜಿನ್‌, ಇವ್ಣೆ ಇನ ಮಾರಾನಖ್ಹಾಜೆ ಬಂಡಾ ಪಾಡಿಲಿದು, ಕತೋಬಿ ಯೇಸು ಓಠೆಹೋತೊಹುಯಿನ್, ಮಂದಿರ್‌ನ ಮಹಿಕರಿ ಚ಼ಲೆಗಯೊ.
JOH 9:1 ಯೇಸು ಚಾ಼ಲ್ತೊ ಜಾ಼ವಾನಿ ವಖ್ಹತ್‌ಮ, ಪೈದಾಖ್ಹ್‌ಥೂಸ್‌ ಕಾಣು ಥೂತೆ ಏಕ್‌ ಅದ್ಮಿನ ದೇಖ್ಯೊ.
JOH 9:2 ಯೇಸುನ ಶಿಷ್ಯರ್‌ನೆ ಇನ, “ಗುರು, ಆ ಅದ್ಮಿ ಕಾಣುಹುಯಿನ್‌, ಪೈದಾ ಹುಯೂತೆ ಕಿನ ಪಾಪ್‌ಥಿ? ಅನು ಪಾಪ್‌ಥೀಕಿ? ಅನ ಆಯ-ಬಾನ ಪಾಪ್‌ಥಿ?” ಕರಿ ಪುಛಾ಼ಯ.
JOH 9:3 ಯೇಸುನೆ, “ಅನೇಬಿ ಪಾಪ್ ಕೋ ಕರ‍್ಯೋನಿ, ಅನ ಆಯಾ-ಬಾನ ಪಾಪ್ನಟೇಕೆ ಕಾಹೆ. ದೇವ್‌ನು ಕಾಮ್ ಅನಾಮ ಹುವಾನಟೇಕೆಸ್‌ ಅನ ಅಮ್ ಹುಯೂತೆ.
JOH 9:4 ಮನ ಮೋಕ್‌ಲ್ಯೊತೆ ಇನು ಕಾಮ್ನ ಅಪ್ಣೆ ದನ್ನಿ ವಖ್ಹತ್‌ಮಾಸ್‌ ಕರ‍್ನು, ರಾತ್‌ ಆವ್‌ಶೆ ತದೆ ಕಿನೇಥೀಬಿ ಕಾಮ್ ಕರಾನ ಕೋ ಉಶೇನಿ.
JOH 9:5 ಮೇ ಆ ಜಗತ್‌ಮ ರ‍್ಹವಾನಿ ವಖ್ಹತ್‌ಮ, ಮೇಸ್ ಆ ಜಗತ್ನ ಉಜಾ಼ಳು ಹುಯಿರ‍್ಹೋಸ್” ಕರಿ ಬೋಲ್ಯೊ.
JOH 9:6 ಅನ ಬೋಲಾನ ಬಾದ್‌ಮ, ಯೇಸುನೆ ಜ಼ಮೀನ್‌ಪರ್ ಥೂಕಿನ್, ಇನೇಥಿ ಚಿಕ್ಕಡ್‌ ಬಣೈನ್, ಯೋ ಅದ್ಮಿನ ಡೋಳಾನ ಲಗಾಡ್ಯೊ.
JOH 9:7 ಅಜು಼ ಯೋ ಅದ್ಮಿನ ಬೋಲ್ಯೋಕಿ, “ಜೈ಼ನ್‌, ಸಿಲೋವ ಕೋಳಮ್ಮ ಧೊಯಿಲೆ” ಸಿಲೋವ ಕತೊ, ‘ಮೋಕ್‌ಲ್ಯೊಹುಯೊ’ ಕರಿ ಮತ್‌ಲಬ್. ಇಮ್ಮಸ್ ಯೋ ಅದ್ಮಿನೆ ಜೈ಼ನ್, ಧೊಯಿಲಿನ್ ಪಾಛೊ಼ಫರಾನಿ ವಖ್ಹತ್, ಅಜು಼ ಇನ ಡೋಳಾ ದೆಖಾವಲಗ್ಯ.
JOH 9:8 ತದೆ ಇನ ಅಜು಼-ಬಾಜು಼ವಾಳು ಅಜು಼ ಯೋ ಅಗಾಡಿ ಧರಮ್ ಮಾಂಗುಕರ್ತೊಥೋತೆ ಇನ ದೇಖಿಹುಯು ಅದ್ಮಿಖ್ಹಾರು, “ಬೇಶಿನ್, ಧರಮ್ ಮಾಂಗ್‌ತೊಥೋತೆ ಆಸ್ ಕಾಹೆಕಿ ಶು?” ಕರಿ ಪುಛಾ಼ಯು.
JOH 9:9 ಥೋಡು ಜ಼ಣು, “ಆಸ್ ಯೋ” ಕರಿ ಬೋಲ್ಯು, ಕತೋಬಿ ಬಿಜು಼ ಥೋಡು ಜ಼ಣು, “ಆ ಯೋ ಕಾಹೆ, ಇನೀನಿತರಸ್ ದೆಖಾವಸ್” ಕರಿ ಬೋಲ್ಯು, ತದೆ ಯೋ ಅದ್ಮಿನೇಸ್, “ಮೇಸ್ ಯೋ” ಕರಿ ಬೋಲ್ಯೊ.
JOH 9:10 ತದೆ ಇವ್ಣೆ ಇನ, “ತುನ ಡೋಳಾ ಕಿಮ್ ಆಯಾ?” ಕರಿ ಇನ ಪುಛಾ಼ಯು.
JOH 9:11 ಯೋ ಅದ್ಮಿನೆ, “ಯೇಸು ಕರಿ ಏಕ್‌ ಜ಼ಣೊ ಛಾ಼ನಿ, ಇನೆ ಚಿಕ್ಕಡ್‌ ಕರೀನ್, ಮಾರ ಡೋಳಾನ ಲಗಾಡಿನ್, ಸಿಲೋವ ತಲಾವ್ಮ ಜೈ಼ನ್‌, ಧೊಯಿಲೆ ಕರಿ ಬೋಲ್ಯೊ. ಇಮ್ಮಸ್ ಮೇ ಜೈ಼ನ್ ಧೊಯಿಲಿದೊ, ತದೆ ಮನ ಡೋಳಾ ದೆಖಾವಲಗ್ಯ” ಕರಿ ಬೋಲ್ಯೊ.
JOH 9:12 ಯೊ ಅದ್ಮಿಖ್ಹಾರು ಇನ, “ಯೋ ಕಿಜ್ಗಾ಼ ಛಾ಼?” ಕರಿ ಪುಛಾ಼ಯು. ಯೋ ಅದ್ಮಿನೆ, “ಮನ ಮಾಲುಮ್‌ ಕೊಯ್ನಿ” ಕರಿ ಜವಾಬ್‌ ದಿದೊ.
JOH 9:13 ತದೆ ಅದ್ಮಿಖ್ಹಾರು ಅಗಾಡಿ ಕಾಣು ಹುಯಿರ‍್ಹುಥೂತೆ ಯೋ ಅದ್ಮಿನ ಫರಿಸಾಯರ್‌ಕನ ಬುಲೈಲಿ ಗಯು.
JOH 9:14 ಯೇಸುನೆ ಚಿಕ್ಕಡ್‌ ಕರೀನ್, ಇನ ಡೋಳಾನ ಅಛ್ಛು಼ ಕರ‍್ಯೊತೆ ದನ್ ಸಬ್ಬತ್‌ ದನ್ ಹುಯಿರ‍್ಹುಥು.
JOH 9:15 ತದೆ ಫರಿಸಾಯರ್‌ನೆ ಪಾಛು಼ ಯೋ ಅದ್ಮಿನ, “ತುನ ಡೋಳಾ ಕಿಮ್ ದೆಖಾಯ?” ಕರಿ ಪುಛಾ಼ಯು. ಇನೆ ಇವ್ಣುನ, “ಇನೆ ಚಿಕ್ಕಡ್‌ನ ಮಾರ ಡೋಳಾಪರ್‌ ಲಗಾಡ್ಯೊ, ಅಜು಼ ಮೇ ಧೊಯಿಲಿದೊ, ಹಮ್ಕೆ ಮನ ದೆಖವ್‌ಕರಾಸ್‌” ಕರಿ ಜವಾಬ್‌ ದಿದೊ.
JOH 9:16 ಫರಿಸಾಯರ್‌ಮ ಥೋಡಾನೆ, “ಆ ಅದ್ಮಿ ದೇವ್‍ಥಿ ಆಯೊಹುಯೊ ಕಾಹೆ, ಶನಕತೊ ಅನೆ ಸಬ್ಬತ್‌ದನ್ನು ಪಾಲನ್‍ ಕೊ ಕರಾನಿ” ಕರಿ ಬೋಲ್ಯು. ಬಿಜು಼ ಥೋಡಾನೆ, “ಖಿವು ಪಾಪಿ ಅಮ್ನಿ ಅದ್ಭುತ್ ಕಾಮ್‌ಖ್ಹಾರು ಕರಾಸ್?” ಕರಿ ಬೋಲ್ಯು. ಅಮ್ ಇವ್ಣ-ಇವ್ಣಾಸ್‍ಮ ಬೇ ಭಾಗ್‌ ಹುಯಿಗಯು.
JOH 9:17 ಡೋಳ ದೆಖಾವಲಗ್ಯುತೆ ಯೊ ಅದ್ಮಿನ ಫರಿಸಾಯರ್‌ನೆ ಬಿಜೇಕ್‌ಹಲ್ಲ ಪುಛಾ಼ಯು. ತದೆ ಯೋ ಅದ್ಮಿನೆ, “ಯೋ ಏಕ್‌ ಪ್ರವಾದಿ” ಕರಿ ಬೋಲ್ಯು.
JOH 9:18 ತೋಬಿ ಯೋ ಯೆಹೂದ್ಯವಾಳು, ಯೋ ಅದ್ಮಿನ ಆಯ-ಬಾನ ಬುಲಾಯು.ತಬ್‍ಲಗು ಕಾಣು ಥೂ ಕರಿ ಬೋಲಾನಿ ವಾತೇನ ಕೋ ನಂಬ್ಯುನಿ,
JOH 9:19 ಇವ್ಣೆ ಇನ ಆಯ-ಬಾನ, “ಆ ತುಮಾರೊ ಛಿಯ್ಯೋಕಿ ಶು? ಆ ಪೈದಾಖ್ಹ್‌ಥೋಸ್‌ ಕಾಣೊ ಕರಿ ತುಮೆ ಬೋಲಾಸ್ತೆ; ಇಮ್‍ಕತೊ, ಹಮ್ಕೆ ಅನ ಡೋಳಾ ಕಿಮ್ ದೆಖವ್‌ಕರಾಸ್ತೆ?” ಕರಿ ಪುಛಾ಼ಯು.
JOH 9:20 ಇನ ಆಯ-ಬಾನೆ, “ಆ ಹಮಾರೊ ಛಿಯ್ಯೊ ಕರಿ ಹಮೂನ ಮಾಲುಮ್ ಅಜು಼ ಆ ಪೈದಾಖ್ಹ್‌ಥೋಸ್‌ ಕಾಣೊ ಕರೀಬಿ ಹಮೂನ ಮಾಲುಮ್‌.
JOH 9:21 ಕತೋಬಿ ಹಮ್ಕೆ ಅನ ಡೋಳಾ ಕಿಮ್ ದೆಖವ್‌ಕರಾಸ್‌ ಕರಿ ರ‍್ಹವೊ, ಅನ ಅಛ್ಛು಼ ಕರ‍್ಯುತೆ ಕಿನೆ ಕರಿ ರ‍್ಹವೊ ಹಮೂನ ಮಾಲುಮ್‌ ಕೊಯ್ನಿ. ಅನಾಸ್ ಪುಛಾ಼ವೊ, ಆ ಜಾ಼ನ್‌ಜ಼ಮಾನ್ನಿ, ಆಸ್ ಇನಿ ಬಾರೇಮ ಬೋಲ್‌ಶೆ” ಕರಿ ಜವಾಬ್‌ ದಿದು.
JOH 9:22 ಇನ ಆಯ-ಬಾನೆ ಯೆಹೂದ್ಯರ್‌ನ ಅದಿಕಾರಿ ಡರಿನ್, ಅಮ್ನಿ ವಾತೇನ ಬೋಲ್ಯುತೆ, ಶನಕತೊ ಯೇಸುನ ಕ್ರಿಸ್ತ ಕರಿ ಕೋಣ್ ವಿಶ್ವಾಸ್ ಕರಾಸ್ಕಿ, ಇವ್ಣುನ ಯೆಹೂದ್ಯರ‍್ನು ಸಬಾ ಮಂದಿರ್‌ಮಾಥು ಭಾರ್‌ ನಾಕ್‌ಶು ಕರಿ ಇವ್ಣೆ ಬೋಲಿರಾಖ್ಯುಥು.
JOH 9:23 ಇನಖ್ಹಾಜೇಸ್ ಇನ ಆಯ-ಬಾನೆ, “ಯೋ ಜಾ಼ನ್ಜ಼ಮಾನ್ ಹುಯಿರ‍್ಹೋಸ್‌ನಿ, ಇನಾಸ್ ಪುಛಾ಼ವೊ” ಕರಿ ಬೋಲ್ಯೂತೆ.
JOH 9:24 ತದೆ ಯೆಹೂದ್ಯರ್‌ನ ಅದಿಕಾರಿ ಪಾಛು಼ ಭೇನೆಹಲ್ಲ, ಅಗಾಡಿ ಕಾಣೊ ಹುಯಿರ‍್ಹೊಥೋತೆ ಯೋ ಅದ್ಮಿನ ಬುಲೈನ್, “ತೂ ಖ್ಹಾಚಿ ಬೋಲಿನ್ ದೇವ್ನ ಮರ್ಯಾದಿದೆ, ತುನ ಅಛ್ಛು಼ ಕರ‍್ಯೊತೆ ಯೋ ಅದ್ಮಿ ಪಾಪಿಕರಿ ಹಮೂನ ಮಾಲುಮ್‌” ಕರಿಬೋಲ್ಯು.
JOH 9:25 ತದೆ ಯೋ ಅದ್ಮಿನೆ, “ಯೋ ಅದ್ಮಿ ಪಾಪಿಕಿ, ಕೊಯ್ನಿಕಿ ಮನ ಮಾಲುಮ್‌ಕೊಯ್ನಿ, ಕತೋಬಿ ಮೇ ಕಾಣೊ ಥೊ, ಹಮ್ಕೆ ಮನ ದೆಖವ್‌ಕರಾಸ್‌ ಕರಿ ಬೋಲಾನು ಮನ ಮಾಲುಮ್‌” ಕರಿ ಬೋಲ್ಯೊ.
JOH 9:26 ತದೆ ಯೆಹೂದ್ಯರ್‌ನೆ ಇನ, “ಇನೆ ತುನ ಶಾತ್‌ ಕರ‍್ಯೊ? ಇನೆ ತಾರ ಡೋಳಾನ ಕಿಮ್ ಅಛ್ಛು಼ ಕರ‍್ಯೊ?” ಕರಿ ಪುಛಾ಼ಯು.
JOH 9:27 ಯೋ ಅದ್ಮಿನೆ, “ಮೇ ತುಮೂನ ಅಗಾಡಿಸ್ ಬೋಲ್ಯೊನಿ, ತುಮೆ ಖ್ಹಮ್‌ಜ್ಯಾಕೊಯ್ನಿ, ಬಿಜು಼ ಪಾಛು಼ ಶನ ಖ್ಹಮಜ಼್‌ಣು ಕರಿ ಛಾ಼ತೆ? ತುಮೇಬಿ ಇನ ಶಿಷ್ಯರ್‌ ಹೋಣು ಕರಿ ಛಾ಼ಕಿ ಶು? ಕರಿ ಜವಾಬ್‌ ದಿದೊ.
JOH 9:28 ತದೆ ಇವ್ಣೆ ಯೋ ಅದ್ಮಿನ ಖ್ಹರಮ್‌ ಕಾಡಿನ್, “ತೂ ಯೋ ಅದ್ಮಿನೊ ಶಿಷ್ಯ; ಕತೋಬಿ ಹಮೆ ಮೋಶೆನ ಪೀಠೆ ಜಾ಼ವವಾಳ ಹುಯಿರ‍್ಹಾಸ್.
JOH 9:29 ಮೋಶೆನ ಜೋ಼ಡೆ ದೇವ್ನೆ ವಾತೆ ಬೋಲ್ಯೊ ಕರಿ ಹಮೂನ ಮಾಲುಮ್‌; ಕತೋಬಿ ಆ ಅದ್ಮಿ ಕಿಜ್ಜಾ಼ನೊ ಕರೀಬಿ ಹಮೂನ ಮಾಲುಮ್‌ ಕೊಯ್ನಿ!” ಕರಿ ಬೋಲ್ಯೊ.
JOH 9:30 ತದೆ ಯೋ ಅದ್ಮಿನೆ, “ಇನೆ ಮನ ಡೋಳಾ ದಿದೊತೋಬಿ, ಯೋ ಕಿಜ್ಗಾ಼ನೊ ಕರಿ ತುಮೂನ ಬಿಜೂ಼ಬಿ ಮಾಲುಮ್‌ಕೊಂತೆ ಆಶ್ಚರ್ಯ ಕಾಹೆಕಿ ಶು?
JOH 9:31 ಹಮೂನ ಮಾಲುಮ್‌ ಪಾಪಿನು ಪ್ರಾರ್ಥನೇನ ದೇವ್ ಖ್ಹಮ್‌ಜಾ಼ಕೊಯ್ನಿ, ಕತೋಬಿ ಕೋಣ್ ದೇವ್ನಿ ಮರ್ಜಿನಿಘೋಣಿ ಚಾ಼ಲಾಸ್ಕಿ ಇನಿ ಪ್ರಾರ್ಥನೆ ಖ್ಹಮ್‌ಜಾ಼ಸ್‌ ಕರಿ.
JOH 9:32 ಪೈದಾಖ್ಹ್‌ಥೂಸ್‌ ಕಾಣು ಹುಯಿರ‍್ಹೂತೆ ಏಕ್‌ ಅದ್ಮಿನ ಕೋಣ್‌ತೋಬಿ ಅಛ್ಛು಼ ಕರ‍್ಯುತೆ ಬಾರೇಮ ಜಗತ್‌ ಶುರುವಾತ್‌ಥು ಏಕ್‌ನೇಬಿ ಖ್ಹಮ್‌ಜಿರಾಖ್ಯು ಕೊಯ್ನಿ.
JOH 9:33 ಆ ಅದ್ಮಿ ದೇವ್‍ಥಿ ಆಯೊಹುಯೊ ನಾ ರ‍್ಹಯೊಹೋತ್ತೊ, ಅನೇಥಿ ಶಾತ್ಬಿ ಕರಾನ ಕೋ ಹುಯು ಹೋತ್‌ನಿ” ಕರಿ ಬೋಲ್ಯೊ.
JOH 9:34 ಆ ವಾತೆನ ಖ್ಹಮ್‌ಜಿನ್‌ ಇವ್ಣೆ, “ತೂ ಖಲಿ ಪಾಪ್‌ಮ ಪೈದಾ ಹುಯೊತೆ, ಹಮೂನ ಬೋಲಿವತಳಾಸ್ಕಿ ಶು?” ಕರಿಬೋಲಿನ್‌, ಸಬೇನು ಮಂದಿರ್‌ಮಾಥು ಇನ ಧಕೇಲಿ ಭಾರ್‌ ಕಾಡಿನಾಖ್ಯು.
JOH 9:35 ಯೋ ಅದ್ಮಿನ ಭಾರ್‌ನಾಖ್ಯುಕರಿ ಯೇಸುನೆ ಖ್ಹಮ್‌ಜಿನ್‌, ಇನ ಮಳಿನ್, “ತೂ ಅದ್ಮಿನೊ ಛಿಯ್ಯಾನ ನಂಬಾಸ್ಕಿ ಶು? ಕರಿಪುಛಾ಼ಯೊ.
JOH 9:36 ತದೆ ಇನೆ, ಪ್ರಭು ಯೋ ಅದ್ಮಿನೊ ಛಿಯ್ಯೊ ಕೋಣ್? ತೂ ಕಿನ ನಂಬ್‍ಣುಕರಿ ಬೋಲಸ್ಕಿ, ಮನ ಬೋಲ್, ಮೇ ಇನ ನಂಬುಸ್‌” ಕರಿ ಬೋಲ್ಯೊ.
JOH 9:37 ಯೇಸುನೆ ಇನ, “ತೂ ಇನ ಅಗಾಡಿಸ್ ದೇಖಿರಾಕ್ಯೋಸ್‌, ತಾರ ಜೋ಼ಡೆ ವಾತೆ ಬೋಲುಕರಾತೆ ಮೇಸ್ ಯೋ” ಕರಿ ಬೋಲ್ಯೊ.
JOH 9:38 ಯೋ ಅದ್ಮಿನೆ, “ಒಹೊ ನಂಬುಸ್‍ಲಾ ಗುರು!” ಕರಿಬೋಲಿನ್‌, ಯೇಸುನ ಖ್ಹಾಮ್ಣೆ ಢುಕ್‌ಣ್ಯಟೇಕಿನ್ ಖ್ಹಲಾಮ್ ಕರ‍್ಯೊ. ಅಡ್‌ಪಡ್ಯೊ
JOH 9:39 ಯೇಸುನೆ ಬೋಲ್ಯೊ, “ಮೇ ನ್ಯಾಯತೀರ್ಪ್‌ನ ಖ್ಹಾಜೆ ಆ ಜಗತ್‌ಮ ಐರ‍್ಹೋಸ್ತೆ, ಇನಖ್ಹಾಜೆ ಡೋಳಾಕೊಂತೆ ಇವ್ಣೆ ದೇಕ್‌ಶೆ, ಅಜು಼ ಕಿನ ಡೋಳಾ ಛಾ಼ಕಿ ಇವ್ಣೆ ಕಾಣು ಉಶೆ” ಕರಿಬೋಲ್ಯೊ.
JOH 9:40 ಯೇಸುನ ಜೋ಼ಡ್ಮ ಥಾತೆ ಥೋಡ ಫರಿಸಾಯರ್‌ನೆ ಅನ ಖ್ಹಮ್‌ಜಿನ್‌ ಬೋಲ್ಯು, “ಹಮೇಬಿ ಕಾಣಕರಿ ಬೋಲುಕರಾಸ್ಕಿ ಶು?” ಕರಿ ಯೇಸುನ ಪುಛಾ಼ಯು.
JOH 9:41 ಯೇಸುನೆ ಇವ್ಣುನ, “ತುಮೆ ಕಾಣ ಹುಯಿರ‍್ಹಾಹೋತ್ತೊ, ತುಮೂನ ಪಾಪ್ ಕೋ ರ‍್ಹಯುಹೋತ್ನಿ; ಕತೋಬಿ ಹಮೂನ ಡೋಳಾ ದೆಖವ್‌ಕರಾಸ್‌ ಕರಿ ಬೋಲೋಸ್‌ನಿ, ಇನಖ್ಹಾಜೆ ತುಮೆ ಪಾಪಿ ಹುಯಿರಾಸ್” ಕರಿ ಜವಾಬ್‌ ದಿದೊ.
JOH 10:1 ಯೇಸುನೆ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಂಢಾನು ಕೋಠಾನ ಬಾಕಲ್‌ನಿವಾಟೆ ಮ್ಹೆಂದಿನ್, ಬಿಜಿ ಬಾಜು಼ಥು ಚ಼ಢೀನ್‌, ಮಹಿ ಜಾ಼ವಾಳೊ ಚೋ಼ರ್ ಅಜು಼ ಲೂಟಿಲಿಜಾ಼ವವಾಳೊ ಹುಯಿರ‍್ಹೋಸ್.
JOH 10:2 ಕೋಣ್ ಬಾಕಲ್‌ವಾಟೆ ಜಾ಼ವಾಳೊಕಿ ಯೊ ಮೇಂಢಾನ ಚ಼ರಾವವಾಳೊ ಹುಯಿರ‍್ಹೋಸ್.
JOH 10:3 ನಾಮ್ ಧರೀನ್ ಚಿಕ್‌ರ‍್ಯುತೊ ಮೇಂಢ ಇನಿ ಅವಾಜ಼್‌ನ ಕಾನ್‍ದೇಸ್. ವಖ್ಹ್‌ತಿ ಕರಾವಾಳೊ ಯೋ ಮೇಂಢಾನ ಚ಼ಲೈಲಿನ್ ಜಾ಼ಸ್‌.
JOH 10:4 ತದೆ ಯೋ ಕುರುಬ ಮೇಂಢಾನ ಖ್ಹಾರು ಭಾರ್‌ ಮ್ಹೇಲಾನಜಾ಼ಸ್ಕಿ ತದೆ, ಮೇಂಢ ಇನಪೀಠೆ ಜಾ಼ಸ್‌.
JOH 10:5 ಮೇಂಢಖ್ಹಾರು ಇವ್ಣುನ ಮಾಲುಮ್‌ ಕೊಂತೆ ಅಲ್ಹಾವ್ ಅದ್ಮಿನ ಪೀಠೆ ಕೋಜಾ಼ಯ್ನಿ, ಪಣ್ಕಿ ಇಮ್ನ ಅದ್ಮಿಕಂಥು ಮಿಲೈ ಚ಼ಲ್ಯುಜಾ಼ಸ್‌, ಶನಕತೊ ಇವ್ಣುನ ಯೋ ಅದ್ಮಿನು ಗಳು ಮಾಲುಮ್‌ಕೊಯ್ನಿ” ಕರಿ ಬೋಲ್ಯೊ.
JOH 10:6 ಆ ಮತ್ಲಬ್‌ನಿ ಖೇಣಿನ ಯೇಸುನೆ ಇವ್ಣುನ ಬೋಲ್ಯೊ, ಕತೋಬಿ ಇವ್ಣೆ ಇನಿ ವಾತೆನಿ ಮತ್ಲಬ್‌ನ ಮಾಲುಮ್ ಕರ‍್ಯುಕೊಯ್ನಿ.
JOH 10:7 ಇನಖ್ಹಾಜೆ ಯೇಸುನೆ ಪಾಛೊ಼ ಬೋಲ್ಯೊ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಸ್ ಮೇಂಢಾನ ಖ್ಹಾರು ದರ‍್ವಾಜು಼ ಹುಯಿರ‍್ಹೋಸ್.
JOH 10:8 ಮೇ ಆವಾನ ಅಗಾಡಿ ಆಯೂತೆ ಖ್ಹಾರುಸ್‌ ಚೋ಼ರ್ ಅಜು಼ ಲೂಟವಾಳು ಹುಯಿರ‍್ಹುಸ್‍, ಕತೋಬಿ ಮೇಂಢು ಖ್ಹಾರು ಇವ್ಣುನ ಕಾನ್‌ ಕೋ ದಿದೂನಿ.
JOH 10:9 ಮೇಸ್ ಯೋ ದರ‍್ವಾಜು಼, ಮಾರವಾಟೆ ಕೋಣ್-ಕೋಣ್ ಮಹಿ ಜಾ಼ಸ್ಕಿ ಇವ್ಣೆ ಬಚಿಜಾ಼ಶೆ ಅಜು಼ ಇವ್ಣೆ ಮಹಿ ಜಾ಼ಯೆಜಾ಼ಯ್‌, ಭಾರ್‌ಬಿ ಆಯೆಜಾ಼ಯ್‌, ಇವ್ಣುನ ಚ಼ರಣ್ಣು ಘಾಖ್ಹ್‌ ಮಳ್‌ಶೆ.
JOH 10:10 ಚೋ಼ರ್ ಚೋ಼ರಿ ಕರಾನಖ್ಹಾಜೆ, ಮರ್‌ನಾಖಾನಖ್ಹಾಜೆ ಅಜು಼ ಬರ್ಬಾತ್ ಕರಾನಖ್ಹಾಜೆ ಆವಸ್ ಪಣ್ಕಿ, ಬಿಜು಼ ಶನಖ್ಹಾಜೆಬಿ ಕಾಹೆ. ಕತೋಬಿ ಮೇತೊ ಇವ್ಣುನ, ಖಲಿ ಜಾನ್‌ ಕಾಹೆ ಜಿವ್ಣು ದೇವ್ಣುಕರಿ ಐರ‍್ಹೋಸ್ ಯೊ ಜಾ಼ಖ್ಹತ್ ಭರ್‌ಪೂರ್‌ ಜಿವ್ಣು ದೇವ್ಣುಕರಿ ಆಯೊ.
JOH 10:11 ಮೇಸ್ ಅಛ್ಛೊ಼ ಕುರುಬ; ಅಛ್ಛೊ಼ ಕುರುಬ ಇನ ಮೇಂಢ ಖ್ಹಾರಾನಖ್ಹಾಜೆ ಇನು ಜಾನ್ನಾಸ್ ದೇಸ್.
JOH 10:12 ಕತೋಬಿ ಕೂಲಿಆಳ್‌ ಬೋಲಾಸ್ತೆ ಚ಼ರಾವವಾಳೊಬಿ ಕಾಹೆ, ಮೇಂಢ ಖ್ಹಾರಾನ ಯಜಮಾನ್‌ಬಿ ಕಾಹೆ, ಮೇಂಢು ಶೊಂತ್‍ಬಿ ಕಾಹೆ ಇನಖ್ಹಾಜೆ ಜ಼ರಕ್‌ ಆವಾನು ದೇಕ್ತಾಸ್‌ನ, ಮೇಂಢ ಖ್ಹಾರಾನ ಮ್ಹೇಲಿನ್, ಮಿಲೈ ಚ಼ಲ್ಯೊಜಾ಼ಸ್‌. ತದೆ ಜ಼ರಕ್‌ ಮೇಂಢಪರ್ ಪಡೀನ್, ಝೂ಼ಂಡ್‌ನ ಛಿದ್‍ರೈನಾಖಸ್.
JOH 10:13 ಯೋ ಕೂಲಿಆಳ್‌ ಮಿಲೈನ್‌, ಚ಼ಲ್ಯುಜಾ಼ಸ್‌ ಶನಕತೊ ಯೋ ಖಲಿಏಕ್‌ ಕೂಲಿ ಆಳ್‌ ಹುಯಿರ‍್ಹೊಸ್, ಇನಖ್ಹಾಜೇಸ್ ಮೇಂಢ ಖ್ಹಾರಾನಿ ಬಾರೇಮ ಇನ ಫಿಕರ್ ಕೋ ರ‍್ಹೇಯ್ನಿ.
JOH 10:14 ಮೇಸ್ ಅಛ್ಛೊ಼ಕುರುಬ ಹುಯಿರೊಸ್; ಬಾನೆ ಮನ ಅಜು಼ ಮೇ ಬಾನ ಮಾಲುಮ್‌ ಕರಿರಾಖ್ಯೊತೆ ಇಮ್ಮಸ್, ಮೇ ಮಾರ ಮೇಂಢಾವ್ನ ಮಾಲುಮ್ ಕರಿರಾಖ್ಯೋಸ್. ಅಜು಼ ಯೊ ಮೇಂಢಾವ್ನೆ ಮನ ಮಾಲುಮ್ ಕರಿರಾಖ್ಯುಸ್. ಅಜು಼ ಮೇ ಮಾರ ಮೇಂಢಾವ್ನಖ್ಹಾಜೆ ಜಾನ್‌ ದ್ಯವಾನ ತಯಾರ್ ಹುಯಿರಿಶ್.
JOH 10:16 ಅತ್ರೇಸ್ ಕಾಹೆತೆ, ಆ ಮಂಧಾಮ ಮಳ್ಯುಕೊಂತೆ ಬಿಜು಼ ಖ್ಹಾರು ಮೇಂಢಾಬಿ ಮನ ಛಾ಼, ಇನಾಬಿ ಮೇ ಲೀನಸ್ ಆವ್ಣು, ಇವ್ಣೆ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ತದೆ ಎಕ್ಕಸ್ ಝೂ಼ಂಡ್‌ ಉಶೆ ಅಜು಼ ಎಕ್ಕಸ್ ಜ಼ಣೊ ಕುರುಬ ರ‍್ಹಿಶೆ.
JOH 10:17 “ಮಾರೊ ಬಾ ಮನ ಪ್ಯಾರ್ ಕರಾಸ್ ಶನಕತೊ ಮೇ ಮಾರ ಜಾನ್ನ ಪಾಛು಼ ಮಳ್‌ಶೆ ಕರಿ ಇನ ದೆವುಸ್.
JOH 10:18 ಮಾರ ಜಾನ್ನ ಕೋಣ್‌ಬಿ ಮಾರೇಥಿ ಕಾಡಾನ ಕೋ ಹುವಾನಿ. ಮೇ ಮಾರಿ ಖ್ಹುದ್‌ನಿ ಮರ್ಜಿಥಿ ಮಾರ ಜಾನ್ನ ದೆವುಸ್‌ ಮಾರ ಜಾನ್ನ ದ್ಯವಾನ ಅಜು಼ ಪಾಛು಼ ಇನ ಲೀಲ್ಯಾವನ ಮನ ಹಕ್‌ ಛಾ಼. ಆ ಹುಕುಮ್‌ ಮನ ಮಾರ ಬಾಥಿ ಮಳಿರ‍್ಹೀಸ್‌” ಕರಿ ಬೋಲ್ಯೊ.
JOH 10:19 ಯೇಸುನಿ ಆ ವಾತೇಥಿ ಯೆಹೂದ್ಯರ್‌ಮ ಬಿಜು಼ ಪಾಛು಼ ಭಾಗ್‌ ಪಡಿಗಯು.
JOH 10:20 ಇವ್ಣಾಮ ಘಣು ಜ಼ಣು, “ಅನಾಮ ಭೂತ್‌ ಛಾ಼, ಅನ ದಿವಾನು ಲಾಗಿರ‍್ಹೂಸ್, ತುಮೆ ಶನ ಇನಿ ವಾತೇನ ಖ್ಹಮ್‌ಜೋ಼ಸ್ತೆ?” ಕರಿ ಬೋಲ್ಯು.
JOH 10:21 ಬಿಜು಼ ಥೋಡು ಜ಼ಣು, “ಭೂತ್‌ ಧರಿರಾಖ್ಯುತೆ ಅದ್ಮಿ ಅಮ್ನಿ ವಾತೆ ಕೋ ಬೋಲಾನಿ! ಕಿಮ್ ಭೂತ್‌ ಕಾಣಾನ ಡೋಳಾ ದೆಖಾವಾನಿ ಘೋಣಿ ಕರ್‌ಶೇಕಿ ಶು?” ಕರಿ ಬೋಲ್ಯು.
JOH 10:22 ತದೆ ಯೆರೂಸಲೇಮ್ಮ ಮಂದಿರ್‌ನು ಉಜಾ಼ಖ್ಹ್‌ನಿ ಪೂಜಾ಼ ಚಾ಼ಲುಕರ್ತುಥು, ತದೆ ಠಣ್ಣಾ ದನ್ ಹುಯಿರ‍್ಹಾಥ.
JOH 10:23 ಯೇಸು ಮಂದಿರ್‌ನ ಮಹಿ ಸೊಲೊಮೋನ್ನು ಮಂಡಪ್‌ಕನ ಚಾ಼ಲ್ಯೊಫಂಡ್‌ತೋಥೊ.
JOH 10:24 ತದೆ ಯೆಹೂದ್ಯವಾಳು ಇನ ಅಶ್‌ಪಿಶ್ ಐನ್, ಭರಾಯು ಅಜು಼, “ಬಿಜು಼ ಕೆತ್ರ ದನ್ ಹಮಾರೆಥಿ ಖ್ಹಾಚ಼ನ ಮುಶ್ಕಿಲ್‌ಮ ರಾಖಿರಾಖಸ್? ತೂ ಕ್ರಿಸ್ತ ಉಶೇತೊ, ಹಮೂನ ನೇರ್‌ವಳಿಥಿ ಬೋಲ್” ಕರಿ ಬೋಲ್ಯು.
JOH 10:25 ಯೇಸುನೆ, “ಮೇ ಅಗಾಡಿಸ್ ತುಮೂನ ಬೋಲ್ಯೊ, ಕತೋಬಿ ತುಮೆ ಮನ ವಿಶ್ವಾಸ್‌ ಕೋ ಕರ‍್ಯಾನಿ, ಮಾರ ಬಾನ ನಾಮ್‌ಪರ್‌ ಮೇ ಕರುಸ್ತೆ ಅದ್ಭುತ್ ಕಾಮಸ್ ಮನ ಸಾಕ್ಷಿ ಹುಯಿರ‍್ಹುಸ್‍.
JOH 10:26 ಕತೋಬಿ ಮನ ವಿಶ್ವಾಸ್‌ಕರಾಕೊಂತೆ ಇನಖ್ಹಾಜೆ, ತುಮೆ ಮಾರ ಮೇಂಢ ಕೋ ಹುಯಿರಾನಿ
JOH 10:27 ಮಾರ ಮೇಂಢ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ಮನ ಇವ್ಣೆ ಮಾಲುಮ್‌ ಅಜು಼ ಇವ್ಣೆ ಮಾರ ಪೀಠೆ ಆವಸ್.
JOH 10:28 ಮಾರ ಮೇಂಢಖ್ಹಾರಾನ ಮೇ ಹರ್‌ಹಮೇಶಾನಿ ಜಿ಼ಂದ್‌ಗಿ ದೀಶ್, ಅಜು಼ ಇವ್ಣೆ ಕದೇಬಿ ಮರ್‌ಶೆ ಕೊಯ್ನಿ. ಕೋಣ್‌ಬಿ ಇವ್ಣುನ ಮಾರ ಹಾತ್‌ಮಾಥು ಛಿನಾವಾನ ಕೋ ಉಶೇನಿ.
JOH 10:29 ಆ ಅಖ್ಖಾನ ಮನ ದಿದೋತೆ ಮಾರ ಬಾ ಖ್ಹಾರೇಥಿ ಮೋಟೊ, ಅಜು಼ ಬಾನ ಹಾತ್‌ಮಾಥು ಕೋಣ್‌ಬಿ ಇವ್ಣುನ ಛಿನಾವಾನ ಕೋ ಹುವಾನಿ.
JOH 10:30 ಬಾಬಿ, ಮೇ ಎಕ್ಕಸ್ ಹುಯಿರ‍್ಹಾಸ್‌” ಕರಿ ಬೋಲ್ಯೊ.
JOH 10:31 ಪಾಛು಼ ಯೆಹೂದ್ಯರ್ ಯೇಸುನ ಮಾರ‍್ನು ಕರಿ ಬಂಡಾ ಚೂ಼ಣಿಲಿದು.
JOH 10:32 ತದೆ ಯೇಸುನೆ ಇವ್ಣುನ, “ಬಾನೆ ದಿದೋತೆ ಕೈಯೆಕ್ಕಿ ಅಛ್ಛು಼ ಕಾಮ್ನ ಮೇ ತುಮಾರ ಖ್ಹಾಮ್ಣೆ ಕರಿವತಾಳ್ಯೊ; ಯೋ ಖ್ಹಾರು ಕಾಮ್ಮಾಥು ಕೆಹು ಕಾಮ್ನಟೇಕೆ ಮಾರಪರ್ ತುಮೆ ಬಂಡಾ ಫೇಕ್‌ಣು ಕರಿ ಛಾ಼?” ಕರಿ ಪುಛಾ಼ಯೊ.
JOH 10:33 ಯೆಹೂದ್ಯರ್‌ನೆ, “ಹಮೆ ತಾರಪರ್ ಬಂಡಾ ಫೇಕಾನ ಆಯಾತೆ ಅಛ಼್ಛ ಕಾಮ್ನಕರಿ ಕಾಹೆ, ತುನೆ ದೇವ್ನ ಛಿಂಗಾಯೋತೆ ಇನಖ್ಹಾಜೆ, ತೂ ಖಲಿ ಏಕ್‌ ಅದ್ಮಿ ಹುಯಿರ‍್ಹೋಸ್, ಅಜು಼ ತಾರು ತೂಸ್ ದೇವ್ ಕರಿಲ್ಯವಾನ ದೇಖಾಸ್ತೆ ಇನಖ್ಹಾಜೇಸ್ ಬಂಡಾ ಫೇಕಾನ ಆಯಾತೆ!” ಕರಿ ಜವಾಬ್‌ ದಿದು.
JOH 10:34 ತದೆ ಯೇಸುನೆ, “ತುಮೆ ದೇವ್‌ಖ್ಹಾರು ಹುಯಿರ‍್ಹಾಸ್‌’ ಕರಿ ದೇವ್ನೆ ಬೋಲ್ಯೊತೆ ತುಮಾರಿ ಧರ್ಮಶಾಸ್ತ್ರಮ ಲೀಖೈರ‍್ಹುಸ್ ಕೊಯ್ನಿಕಿಶು?” ಕರಿ ಜವಾಬ್‌ ದಿದೊ.
JOH 10:35 ಧರ್ಮಶಾಸ್ತ್ರ ಕದೇಬಿ ಝೂ಼ಟಿ ಕೋ ಹುವಾನಿ; ದೇವ್ನಿವಚನ್ನ ಲೀರಾಖವಾಳನ ದೇವ್‌ಖ್ಹಾರುಕರಿ ಯೋ ಬೋಲಾನು ರ‍್ಹಯುತೊ
JOH 10:36 ಬಾನೇಸ್ ಇನು ಶೊಂತ್‍ಛಿಯ್ಯೊನ ಚೂ಼ಣಿಲೀನ್, ಜಗತ್‌ಮ ಬೋಲಿ ಮೋಕ್‌ಲೈರ‍್ಹೋತೆ ಇನ ತುಮೆ ‘ಮೇ ದೇವ್‌ನೊ ಛಿಯ್ಯೊ ಹುಯಿರ‍್ಹೋಸ್ ಕರಿ ಬೋಲ್ತಾನ, ‘ತೂ ದೇವ್ನಿ ದೂಷಣೆ ಕರಾಸ್’ ಕರಿ ಬೋಲಸ್ತೆ ಶನ?
JOH 10:37 ಮೇ ಮಾರೊ ಬಾ ಬೋಲಾತೆ ಕಾಮ್ನ ನಾ ಕರ‍್ಯೊ ಉಶೇತೊ, ಮಾರಿ ವಾತೇನ ನಕೊ ನಂಬೊ.
JOH 10:38 ಕತೋಬಿ “ಮೇ ಅಮ್ ಕರ‍್ಯೊತೆ ಇನಖ್ಹಾಜೆ ಮನ ತುಮೆ ವಿಶ್ವಾಸ್‌ ಕೊ ಕರಾನಿ, ಆ ಕಾಮ್ನ ದೇಖಿನ್‌ ತೋಬಿ ನಂಬೊ. ತದೆ ಮಾರ ಮಹಿ ಬಾ ಛಾ಼ ಕರೀಬಿ, ಅಜು಼ ಬಾನ ಮಹಿ ಮೇ ಛೂ಼ ಕರೀಬಿ ತುಮೆ ಮಾಲುಮ್‌ ಕರಿಲಿಶು” ಕರಿ ಬೋಲ್ಯೊ.
JOH 10:39 ಇವ್ಣೆ ಬಿಜು಼ ಪಾಛು಼ ಯೇಸುನ ಧರ್‌ನು ಕರಿ ಕರ‍್ಯು, ಕತೋಬಿ ಯೋ ಇವ್ಣೇಥಿ ಛು಼ಕಿನ್ ನಿಕ್ಳಿಗಯೊ.
JOH 10:40 ಅನ ಬಾದ್‌ಮ ಯೇಸು ಯೊರ್ದನ್‌ ನದ್ದಿನು ಪಾರ್ಲಿ ಬಾಜೂ಼ಮ ಯೋಹಾನ ಅಗಾಡಿ ಬ್ಯಾಪ್ತಿಸ್ಮ ದೆವಾಡು ಕರ್ತೊಥೋತೆ, ಯೋ ಝ಼ಗೋಕನ ಪಾಛು಼ ಜೈ಼ನ್‌, ಹಿಜ್ಜಾ಼ಸ್ ಥೊ.
JOH 10:41 ಕೈಯೆಕ್ಕಿ ಅದ್ಮಿಖ್ಹಾರು ಇನಾಕನ ಐನ್, “ಯೋಹಾನನೆ ಕದೇಬಿ ಏಕ್‌ ಖ್ಹಣೇದ್‌ಬಿ ಕರ‍್ಯೊಕೊಯ್ನಿ, ಕತೋಬಿ ಆ ಅದ್ಮಿನಿ ಬಾರೇಮ ಯೋಹಾನನೆ ಬೋಲ್ಯೋತೆ ಹರೇಕ್ ವಾತೇಬಿ ಖ್ಹಾಚಿಸ್” ಕರಿ ವಾತೆ ಬೋಲ್ಯು.
JOH 10:42 ಅಜು಼ ಯೊ ಝ಼ಗೊ ಕೈಯೆಕ್ಕಿ ಅದ್ಮಿ ಯೇಸುಪರ್ ವಿಶ್ವಾಸ್‌ ಕರ‍್ಯು.
JOH 11:1 ಬೇಥಾನ್ಯಮ ಲಾಜ಼ರ್‌ ಕರಿ ಏಕ್‌ ಜ಼ಣೊ ಥೊ, ಇನ ಜಾನ್ನ ಅಛ್ಛು಼ ಕೋ ಥೂನಿ. ಮರಿಯ ಅಜು಼ ಇನಿ ಭೇನ್ ಮಾರ್ಥ ಆಸ್ ಗಾಮ್ಮ ರ‍್ಹೇತಿಥಿ.
JOH 11:2 ಆ ಮರಿಯ ಕೋಣ್‌ಕತೊ, ಯೇಸು ಪ್ರಭು ಗೋಡಾನ ವಾನುತೇಲ್‌ನ ಲಗಾಡಿನ್, ಇನ ಕೇಖ್ಹ್‌ಥಿ ಗೋಡ ನೂಛಿತೆ ಆಸ್. ಜಾನ್ನ ಅಛ್ಛು಼ ಕೋಹುವಾಂತೆ ಲಾಜ಼ರ್‌ ಅನೋಸ್ ಭೈ.
JOH 11:3 ಇನಖ್ಹಾಜೆ, ಇನಿ ಭೇನೇನೆ, “ಪ್ರಭು, ತಾರೊ ಪ್ಯಾರ್‌ನೊ ದೋಸ್ತಿನ ಜಾನ್ನ ಅಛ್ಛು಼ ಕೊಯ್ನಿ” ಕರಿ ಬೋಲಾನಿ ಖಬರ್‌ನ ಯೇಸುಕನ ಮೋಕ್ಲಿಯೆ಼.
JOH 11:4 ಯೇಸುನೆ ಅನ ಖ್ಹಮ್‌ಜಿನ್‌ ಬೋಲ್ಯೊ, “ಲಾಜ಼ರ್‌ನ ರೋಗ್‌ ಐರ‍್ಹೂಸ್ತೆ ಮರಣ್ಣಖ್ಹಾಜೆ ಕಾಹೆ, ಅನೇಥಿ ದೇವ್ನ ಅಜು಼ ದೇವ್‌ನೊ ಛಿಯ್ಯಾನ ಮಹಿಮೆ ಮಳಾದೆ ಕರಿ ಆ ಐರ‍್ಹೂಸ್ತೆ” ಕರಿ ಬೋಲ್ಯೊ.
JOH 11:5 ಯೇಸುನ ಮಾರ್ಥಪರ್, ಇನಿ ಭೇನ್‌ಪರ್ ಅಜು಼ ಲಾಜ಼ರ್‌ಪರ್ ಪ್ಯಾರ್ ಥೂ.
JOH 11:6 ತೋಬಿ ಲಾಜ಼ರ್‌ನ ಜಾನ್ನ ಅಛ್ಛು಼ ಕೊಯ್ನಿ ಕರಿ ಖಬರ್‌ನ ಖ್ಹಮ್‌ಜಿನ್‌ಬಿ, ಯೋ ಥೋತೆ ಹಿಜ್ಜಾ಼ಸ್ ಬಿಜೂ಼ಬಿ ಬೇ ದನ್ ರ‍್ಹಿಯೊ.
JOH 11:7 ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ಅಪ್ಣೆ ಯೂದಾಯಾನ ಪಾಛು಼ ಫರಿ ಜ಼ಯ್ಯೆ಼” ಕರಿ ಬೋಲ್ಯೊ.
JOH 11:8 ತದೆ ಶಿಷ್ಯರ್‌ನೆ, “ಗುರು, ಥೋಡ ದನ್ನ ಅಗಾಡಿಸ್ ಯೆಹೂದ್ಯರ್ ತುನ ಬಂಡಾ ಫೇಕಿನ್‌ ಮಾರ‍್ನು ಕರಿ ಆಯುಥು. ಹಮ್ಕೆ ತೂ ಪಾಛು಼ ಹಿಜ್ಜಾ಼ ಜಾ಼ಸ್ಕಿ ಶು?” ಕರಿ ಬೋಲ್ಯ.
JOH 11:9 ಯೇಸುನೆ, “ದನ್ನು ಭಾರ ಘಂಟಾ ಛಾ಼, ಕಾಹೆಕಿ ಶು? ದನ್ನಿ ವಖ್ಹತ್‌ಮ ಚಾ಼ಲವಾಳು ಠೋಕರ್‌ಖೈನ್‌ ರಡ್ಕಕೊಯ್ನಿ, ಶನಕತೊ ಆ ಜಗತ್‌ನು ಉಜಾ಼ಳು ಇವ್ಣುನ ದೆಖಾವಸ್.
JOH 11:10 ಕತೋಬಿ ರಾತ್ನಿ ವಖ್ಹತ್‌ಮ ಚಾ಼ಲವಾಳು ಠೋಕರ್‌ ಖಾಸ್‌, ಶನಕತೊ ತದೆ ಕೆಹು ಉಜಾ಼ಳುಬಿ ಕೋ ರ‍್ಹೇಯ್ನಿತೆ ಇನಖ್ಹಾಜೆ” ಕರಿ ಬೋಲ್ಯೊ.
JOH 11:11 ಯೇಸುನೆ ಆ ವಾತೇನ ಬೋಲಿನ್, “ಅಪ್ಣೊ ದೋಸ್ತಿ ಲಾಜ಼ರ್‌ ಖ್ಹುತೋಸ್‌, ಇನ ಉಠಾಡಾನಟೇಕೆ ಮೇ ಹಿಜ್ಜಾ಼ ವಳ್ಯೊಜ಼ವುಸ್‌” ಕರಿ ಇವ್ಣುನ ಬೋಲ್ಯೊ.
JOH 11:12 ಶಿಷ್ಯರ್‌ನೆ, “ಪ್ರಭು, ಯೋ ಖ್ಹುತೊ ಉಶೇತೊ, ಇನ ಅಛ್ಛು಼ ಉಶೆ” ಕರಿ ಜ಼ವಾಬ್ ದಿದು.
JOH 11:13 ಯೇಸುನೆ ಲಾಜ಼ರ್‌ ಮರಿಗಯೋತೆ ಬಾರೇಮ ಬೋಲ್ಯೋತೆ, ಕತೋಬಿ ಶಿಷ್ಯರ್‌ನೆ ಲಾಜ಼ರ್‌ ಖ್ಹುಯಿನ್ ಅರಾಮ್‌ ಕರುಕರಸ್ ಕರಿ ಇನೆ ಬೋಲ್ಯೋತೆ ವಾತೆನಿ ಮತ್‌ಲಬ್ ಕರಿ ಸೋಚ್ಯು.
JOH 11:14 ಇನಖ್ಹಾಜೆ ಯೇಸುನೆ ನೇರ್‌ವಳಿಥಿ ಇವ್ಣುನ, “ಲಾಜ಼ರ್‌ ಮರಿಗಯೊ” ಕರಿ.
JOH 11:15 ಮೇ ಹಿಜ್ಜಾ಼ ಕೋ ಥೋನಿತೆ ಇನಖ್ಹಾಜೆ, ತುಮಾರಿ ಬಾರೇಮ ಮೇ ಖ್ಹುಶಿ ಕರುಸ್, ಶನಕತೊ ಅನೇಥಿ ತುಮೆ ಮಾರಪರ್ ವಿಶ್ವಾಸ್‌ ಕರ್ಶು. ಆವೊ ಇನಾಕನ ಜ಼ಯ್ಯೆ಼” ಕರಿ ಬೋಲ್ಯೊ.
JOH 11:16 ತದೆ ದಿದುಮ ಕರಿ ನಾಮ್ನೊ ತೋಮನೆ ಇನ ಜೋ಼ಡ್ನ ಖ್ಹಾರ ಶಿಷ್ಯರ್‌ನ, “ಅಪ್ಣೇಬಿ ಪ್ರಭುನ ಕೇಡೆಸ್ ಜೈ಼ನ್‌, ಮರ‍್ವನಿತರ ಹುಯ್ಯೆ಼” ಕರಿ ಬೋಲ್ಯೊ.
JOH 11:17 ಯೇಸು ಬೇಥಾನ್ಯಮ ಆವಾದಿನ್, ಲಾಜ಼ರ್‌ನ ಮಖ್ಹಾಣ್ಯನಿ ಘವಿಮ ಮ್ಹೇಲಿನ್ ಚಾರ್ ದನ್ ಹುಯಿಗಾ ಕರಿ ಇನ ಮಾಲುಮ್‌ ಪಡ್ಯು.
JOH 11:18 ಬೇಥಾನ್ಯ ಯೆರೂಸಲೇಮ್‌ಥು ಖ್ಹುಮಾರ್ ಬೇ ಮೈಲ್‍ಥಿ ಕಮ್ಮಸ್ ದೂರ್ ಥೂ.
JOH 11:19 ಇನಖ್ಹಾಜೆ ಇವ್ಣೊ ಭೈ ಮರಿಗಯೋತೆ ಬಾರೇಮ ಭಾಲಿ ದ್ಯವಾನ.ಯೆಹೂದ್ಯರ್‌ಮ ಘಣು ಜ಼ಣು ಮಾರ್ಥ ಅಜು಼ ಮರಿಯಕನ ಐರ‍್ಹುಥು.
JOH 11:20 ಯೇಸು ವಳ್ಯಾವಸ್ ಕರಿ ಮಾರ್ಥನೆ ಖ್ಹಮ್‌ಜಿನ್‌, ಇನ ಮಳಾನಖ್ಹಾಜೆ ಗೈ, ಕತೋಬಿ ಮರಿಯ ಘರ್‌ಮಾಸ್ ಥೀ.
JOH 11:21 ಮಾರ್ಥನೆ ಯೇಸುನ, “ಪ್ರಭು, ತೂ ಹಜ಼್ಜ ರ‍್ಹಯೊಹೋತ್ತೊ, ಮಾರೊ ಭೈ ಮರ‍್ಯೊಹೋತ್‌ ಕೊಯ್ನಿ.
JOH 11:22 ಕತೋಬಿ ಹಮ್ಕೇಬಿ, ತೂ ದೇವ್‌ಕನ ಶಾತ್‌ ಮಾಂಗ್ಯೊತೋಬಿ, ದೇವ್ ತುನ ದಿಶೆ ಕರಿ ಮನ ಮಾಲುಮ್‌” ಕರಿ ಬೋಲಿ.
JOH 11:23 ಯೇಸುನೆ ಇನ, “ತಾರೊ ಭೈ ಜಿವ್ತೊಹುಯಿನ್ ಉಠಿಆವ್‌ಶೆ” ಕರಿ ಬೋಲ್ಯೊ.
JOH 11:24 ತದೆ ಮಾರ್ಥನೆ, “ಅಂತಿಮ್‌ ದನ್ಮ ಯೋ ಪಾಛು಼ಜಿವ್ತೊಹುಯಿನ್ ಉಠಿ ಆವ್‍ಶೆಕರಿ ಮನ ಮಾಲುಮ್‌” ಕರಿ ಫರೈನ್ ಬೋಲಿ.
JOH 11:25 ಯೇಸುನೆ ಇನ, “ಮೇಸ್ ಪಾಛು಼ಜಿವ್ತೊ ಹುಯಿರ‍್ಹವಾಳೋಬಿ, ಜಾನ್‌ಬಿ ಹುಯಿರ‍್ಹೋಸ್. ಮನ ನಂಬವಾಳೊ ಮರಿಗಯೊತೋಬಿ ಜಿವ್‌ಶೆ;
JOH 11:26 ಅಜು಼ ಬಚಿರ‍್ಹವಾಳೊ ಹರೇಕ್‌ಜ಼ಣೊ , ಮನ ನಂಬ್ಯೊತೊ ಯೊ ಕದೇಬಿ ಮರ್‌ಶೆಕೊಯ್ನಿ” ಕರಿ ಬೋಲ್ಯೊ.
JOH 11:27 ತದೆ ಇನೆ, “ಓಹೋಲಾ, ಪ್ರಭು! ಆ ಜಗತ್ನ ಆವ್ಣುತೆ ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಕ್ರಿಸ್ತ ತೂಸ್ ಕರಿ ಮೇ ನಂಬಿರಾಖಿಸ್‌” ಕರಿ ಬೋಲಿ.
JOH 11:28 ಆ ಬೋಲಾನ ಬಾದ್‌ಮ ಮಾರ್ಥನೆ ಜೈ಼ನ್‌, ಇನಿ ಭೇನ್ ಮರಿಯನ ಕಿನಾಬಿ ಮಾಲುಮ್‌ಕೊಂತೆ ಇಮ್‌, “ಗುರು ಹಜ್ಜಾ಼ ಛಾ಼, ತುನ ಬುಲಾವ್ ಕರಾಸ್” ಕರಿ ಬೋಲಿ.
JOH 11:29 ಅನ ಖ್ಹಮಜ಼್‌ತಾಸ್‌ನ ಮರಿಯ ಫಟ್‌ಕರಿ ಉಠೀನ್, ಒಗ್ಗಿಸ್‌ಮ ಯೇಸುಕನ ಚ಼ಲಿಗೈ.
JOH 11:30 ಯೇಸು ಬಿಜೂ಼ಬಿ ಗಾಮ್‌ನ ಮಹಿ ಕೋ ಆಯೊಥೋನಿ, ಮಾರ್ಥನೆ ಇನ ಮಳಿತೆ ಝ಼ಗೋಕನಾಸ್‌ ಥೊ.
JOH 11:31 ಮರಿಯನ ಜೋ಼ಡೆ ಘರ್‌ಮ ರ‍್ಹೀನ್, ಇನ ಭಾಲಿ ದೆವ್‌ಕರ್‌ತುಥೂತೆ ಯೆಹೂದ್ಯರ್, ಯೋ ಫಟ್‌ ಕರಿ ಉಠೀನ್ ಭಾರ್ ವಳಿಜಾ಼ಯಿತೆ ದೇಖಿನ್‌, ಆ ರೊವಾನಖ್ಹಾಜೆ ಘವಿಕನ ವಳಿಜಾ಼ಸ್ಕಿ ಶುಕಿ? ಕರಿ ಸೋಚಿನ್, ಇನ ಪೀಠೆ ಗಯು.
JOH 11:32 ಮರಿಯ ಯೇಸು ಥೋತೆ ಹಿಜ್ಜಾ಼ ಐನ್, ಇನ ದೇಕ್ತಾಸ್‌ನ, ಇನ ಗೋಡಾಪರ್ ಪಡೀನ್ “ಪ್ರಭು, ತೂ ಹಜ್ಜಾ಼ ರ‍್ಹಯೊಹೋತ್ತೊ ಮಾರೊ ಭೈ ಮರ‍್ಯೊಹೋತ್‌ ಕೊಯ್ನಿ” ಕರಿ ಬೋಲಿ.
JOH 11:33 ಮರಿಯಬಿ ಇನಜೋ಼ಡೆ ಆಯುಥೂತೆ ಯೆಹೂದ್ಯರ್‌ಖ್ಹಾರು ರೊವ್‌ಕರಾತೆ ಯೇಸುನೆ ದೇಖಿನ್‌, ಇನ ಆತ್ಮಮ ಪಶ್‍ತೈನ್ ಘಣು ದುಖ್‌ಹುಯು.
JOH 11:34 ಯೇಸುನೆ, “ತುಮೆ ಇನ ಕಿಜ್ಗಾ಼ ಮ್ಹೇಲಿರಾಖ್ಯಸ್?” ಕರಿ ಪುಛಾ಼ಯೊ. ತದೆ ಇವ್ಣೆ, “ಐನ್, ದೇಕ್‌ಲಾ ಪ್ರಭು” ಕರಿ ಬೋಲ್ಯು.
JOH 11:35 ಯೇಸು ರೋಯೊ.
JOH 11:36 ಇನ ಯೆಹೂದ್ಯರ್‌ನೆ, “ದೇಖೊ! ಆ ಇನಾಪರ್‌ ಕೆತ್ರೆ ಪ್ಯಾರ್ ರಾಖಿರಾಖ್ಯೋಸ್”! ಕರಿ ಬೋಲ್ಯು.
JOH 11:37 ಕತೋಬಿ ಇವ್ಣಾಮ ಥೋಡು ಜ಼ಣು, “ಅನೆ ಯೋ ಕಾಣಾನ ದೆಖಾವಾನಿ ಘೋಣಿ ಕರ‍್ಯೋನಿ? ಲಾಜ಼ರ್‌ನಾಬಿ ಮರಣ್‌ಥು ಬಚಾ಼ಡೇಜಾ಼ಯ್‍ಥೂನಿ?” ಕರಿ ಬೋಲ್ಯು.
JOH 11:38 ಯೇಸು ಪಾಛೊ಼ ಇನ ದಿಲ್ಮ ಘಣು ದುಖ್ ಕರ್ತೊಹುಯಿನ್, ಮಖ್ಹಾಣ್ಯನಿ ಘವಿಕನ ಗಯೊ, ಯೋ ಘವಿನ ಬಂಡಾನಿ ಚಿಪಾಟ್‌ಥಿ ಮೂಚಿರಾಖ್ಯುಥು.
JOH 11:39 “ಯೋ ಬಂಡಾನ ಕಾಡೊ” ಕರಿ ಯೇಸುನೆ ಹುಕುಮ್‌ ದಿದೊ. ಮರ‍್ಯಾಹುಯಾನಿ ಭೇನ್ ಮಾರ್ಥನೆ, “ಪ್ರಭು, ಯೋ ಮರಿನ್‌ ಚಾರ್ ದನ್ ಹುಯಿಗಾ! ಹಿಜ್ಜಾ಼ ಘಣಿ ವಾಖ್ಹ್‌ ಉಶೆ” ಕರಿ ಬೋಲಿ.
JOH 11:40 ಯೇಸುನೆ ಇನ, “ಮೇ ತುನ ಬೋಲ್ಯೊ ಕೊಯ್ನಿಕಿಶು ತೂ ನಂಬಿತೊ, ದೇವ್ನಿ ಮಹಿಮೆನ ದೇಖಿಶ್‌” ಕರಿಬೋಲ್ಯೊ.
JOH 11:41 ಇವ್ಣೆ ಬಂಡಾನ ಕಾಡಿನಾಖ್ಯು. ತದೆ ಯೇಸುನೆ ಡೋಳಾ ಪಾಡೀನ್, ಉಪ್ಪರ್ ದೇಖಿನ್‌, “ಬಾ, ತೂ ಮಾರಿ ಪ್ರಾರ್ಥನೇನ ಖ್ಹಮ್‌ಜ್ಯೂತೆ ಇನಖ್ಹಾಜೆ ತುನ ಧನ್ಯವಾದ್.
JOH 11:42 ತೂ ಕದೇಬಿ ಮಾರಿ ಪ್ರಾರ್ಥನೆ ಖ್ಹಮ್‌ಜಾ಼ಸ್‌ ಕರಿ ಮನ ಮಾಲುಮ್‌, ತೋಬಿ ತುನೇಸ್ ಮನ ಬೋಲಿಮೋಕ್‌ಲ್ಯೊ ಕರಿ ಬೋಲಾನು, ಅಶ್‌ಪೀಶ್‌ ಭಿಯುತೆ ಅದ್ಮಿಖ್ಹಾರು ವಿಶ್ವಾಸ್‌ ಕರಾದೆ ಕರಿ, ಮೇ ಆ ವಾತೇನ ಬೋಲ್ಯೊ” ಕರಿ ಬೋಲ್ಯೊ.
JOH 11:43 ಆ ಬೋಲಾನ ಬಾದ್‌ಮ, ಯೇಸುನೆ ಜೋ಼ರೆಥಿ ಚಿಕ್ರಿನ್, “ಲಾಜ಼ರ್‌, ಭಾರ್‌ ಉಠೀನ್ ಆವ್!” ಕರಿ ಬೋಲ್ಯೊ.
JOH 11:44 ತದೆ ಮರಿಗಯೊಹುಯೊ ಉಠೀನ್ ಫಾದರ್ ಆಯೊ, ಇನ ಹಾತ್‌-ಗೋಡ, ಮ್ಹೋಡು ಮರ‍್ಯಮುರ್ದಾನ ಲುಂಗ್ಡಾಥಿ ಲಪೆಟೈರ‍್ಹೂಥು. ಯೇಸುನೆ ಇವ್ಣುನ, “ಇನ ಛೋ಼ಡೊ, ಯೋ ಜಾ಼ವಾದೆ” ಕರಿ ಬೋಲ್ಯೊ.
JOH 11:45 ಮರಿಯನ ಮಳಾನ ಆಯುಥೂತೆ ಯೆಹೂದ್ಯರ್, ಯೇಸುನೆ ಕರ‍್ಯೊತೆ ಆ ಕಾಮ್ನ ದೇಖಿನ್‌, ಇವ್ಣಾಮ ಕೈಏಕ್ ಜ಼ಣು ಇನಾಪರ್‌ ವಿಶ್ವಾಸ್‌ ಕರ‍್ಯು.
JOH 11:46 ಕತೋಬಿ ಇವ್ಣಾಮ ಥೋಡಾನೆ ಫರಿಸಾಯರ್‌ಕನ ಜೈ಼ನ್‌, ಯೇಸುನೆ ಕರ‍್ಯೊತೆ ಇನಿ ಬಾರೇಮ ಇವ್ಣುನ ಬೋಲ್ಯು.
JOH 11:47 ತದೆ ಮಹಾಯಾಜಕರ್‌ ಅಜು಼ ಫರಿಸಾಯರ್‌ನೆ ಶಾಣಾವ್‍ನಿ ಸಭೆ ಎಕ್ಟು ಕರೀನ್, “ಆ ಅದ್ಮಿ ಘಣು ಅದ್ಭುತ್ ಕಾಮ್ ಕರಾಸ್ನಿ,ಅಪ್ಣೆ ಶಾತ್‌ ಕರಿಯೆ?
JOH 11:48 ಅಪ್ಣೆ ಅನ ಅಮ್ಮಸ್ ಮ್ಹೆಂದಿದಾತೊ, ಹರೇಕ್ ಅದ್ಮಿ ಅನ ನಂಬಿಜಾ಼ಶೆ. ತದೆ ರೋಮ್‌ವಾಳು ಐನ್, ಅಪ್ಣಿ ಮಂದಿರ್‌ನ ಅಜು಼ ಅಪ್ಣ ದೇಖ್ಹ್‌ನ ಬರ್ಬಾತ್ ಕರಿನಾಕ್‌ಶೆ!” ಕರಿ ಬೋಲ್ಯು.
JOH 11:49 ಇವ್ಣಾಮ ಕಾಯಫ ಕರಿ ಏಕ್‌ ಜ಼ಣೊ ಥೊ. ಯೋ ವರ್‌ಖ್ಹೆ ಯೋ ಮಹಾಯಾಜಕ್ ಹುಯಿರ‍್ಹೋಥೊ, ಇನೆ ಇವ್ಣುನ, “ತುಮುನ ಶಾತ್ಬಿ ಮಾಲುಮ್ ಕೊಯ್ನಿ!
JOH 11:50 ಹಿಡಿ ದೇಖ್ಹ್‌ ಬರ್ಬಾತ್ ಹುವಾಥೀಬಿ, ಏಕ್‌ ಅದ್ಮಿ ತಮಾಮ್‌ ಅದ್ಮಿನಖ್ಹಾಜೆ ಮರ್‌ವಾನುಸ್‌ ಅಛ್ಛು಼ ಕರಿ ತುಮೆ ಶನ ಮಾಲುಮ್‌ ಕರಿಲೆವ್‌ಕರಾಕೊಂತೆ” ಕರಿ ಬೋಲ್ಯೊ.
JOH 11:51 ಆ ವಾತೆ ಕಾಯಫಾನಿ ಶೊಂತ್ ಸೋಚ್ ಕೋ ಹುಯಿರ‍್ಹೀಥೀನಿ. ಯೋ ವರಖ್ಹ್‌ಮ ಯೋ ಗಲ್‌ಢೊಯಾಜಕ್‌ ಹುಯಿರ‍್ಹೊಥೋತೆ ಇನಖ್ಹಾಜೆ, ಯೇಸು ಯೆಹುದ್ಯರ್‌ ಅದ್ಮಿವೊನಖ್ಹಾಜೆ ಮರ್‌ಶೆ ಕರಿ ಪ್ರವಾದ್‌ನೆ ಬೋಲ್ಯೊತೆ.
JOH 11:52 ಖಲಿ ಯೆಹೂದ್ಯರ್‌ನಖ್ಹಾಜೆ ಕಾಹೆ, ಪಣ್ಕಿ ಛಿದ್‍ರೈಗಯುತೆ ದೇವ್‌ನು ಅದ್ಮಿಖ್ಹಾರಾನ ಎಕ್ಟು ಕರಾನಖ್ಹಾಜೆ ಯೇಸು ಮರವಾಳೊ ಥೊ.
JOH 11:53 ಯೋ ದನ್‌ಥು ಯೇಸುನ ಮಾರ‍್ನು ಕರಿ ಇವ್ಣೆ ಸೋಚಾಲಗ್ಯು,ಯೋ ಅಖ್ಖು ಪ್ರವಾದನೆ ಹುಯಿರ‍್ಹುಥು.
JOH 11:54 ಅನಖ್ಹಾಜೆ ಯೇಸು ಯೆಹೂದ್ಯರ್‌ನ ದೆಖಾನಿಘೋಣಿ ಫರಾನು ಮ್ಹೆಂದಿನ್, ಉಜ್ಜಾ಼ಡಿ ಝ಼ಗೋನ ಖನ್ನೆ ಥೂತೆ, ಎಫ್ರಾಯಿಮ್‌ ಕರಿ ಖ್ಹಯೇರ್‌ಮ ಜೈ಼ನ್‌ ಶಿಷ್ಯರ್‌ನ ಜೋ಼ಡ್ಮ ರಹಿಗೊ.
JOH 11:55 ಯೆಹೂದ್ಯರ್‌ನ ಪಸ್ಕ ಪೂಜಾ಼ನಿ ವಖ್ಹತ್ ಖನ್ನೆ ಐಗೈಥಿ, ಇನಖ್ಹಾಜೆ ಅದ್ಮಿಖ್ಹಾರು ಉಪ್ಲಿಬಾಜು಼ ಚ಼ಲಿಗಯುಥು. ಪೂಜಾ಼ಥಿ ಪಹಿಲೆ ಇವ್ಣುನ ಶುದ್ದಿಕರಣ್ ಕರಿಲೇವ್ಣು ಕರಿ ಗಾಮ್‌ಥು ಯೆರೂಸಲೇಮ್‌ ಆಯು.
JOH 11:56 ಇವ್ಣೆ ಯೇಸುನ ಢೂಂಡ್‌ತುಹುಯಿನ್ ದೇವ್ನಿಮಂದಿರ್‌ಮ ಭೀರಿನ್‌, “ತುಮೂನ ಕಿಮ್ ಸೊಚಾವಸ್‌ ಯೋ ಪೂಜಾ಼ನ ಆವ್‌ಶೆಸ್‌ ಕೊಯ್ನಿಕಿ ಶು?” ಕರಿ ಏಕ್‌ಥಿ-ಏಕ್‌ ಬೋಲಿಲಿದು.
JOH 11:57 ಮಹಾಯಾಜಕರ್‌ ಅಜು಼ ಫರಿಸಾಯರ್ ಯೇಸು ಕಿಜ್ಗಾ಼ ಛಾ಼ ಕರಿ ಕಿನಾಬಿ ಮಾಲುಮ್‌ ಪಡ್ಯುತೊ, ಹಮೂನ ಬೋಲ್‌ನು ಕರಿ ಹುಕುಮ್‌ ದಿದು. ಶನಕತೊ ಇವ್ಣೆ ಇನ ಧರ್‌ನು ಕರಿ ಥೂ.
JOH 12:1 ಪಸ್ಕ ಪೂಜಾ಼ನ ಛೊ಼ ದನ್ನ ಪಾಛ಼ಳ್ ಯೇಸು ಬೇಥಾನ್ಯ ಗಾಮ್‌ನ ಗಯೊ, ಯೇಸುನೆ ಮರ‍್ಯಾಹುಯಾಮಾಥು ಜಿವ್ತೊ ಉಠಾಡ್ಯೋತೆ ಲಾಜ಼ರ್‌ಬಿ ಹಿಜ್ಜಾ಼ಸ್ ರ‍್ಹೇತೊಥೊ.
JOH 12:2 ಯೇಸುನಖ್ಹಾಜೆ ಹಿಜ್ಜಾ಼ ಖಾಣು ತೈಯಾರ್ ಕರಿರಾಖ್ಯುಥು, ಮಾರ್ಥ ಖಾಣು ನಾಖಿನ್ ದೇವ್‌ಕರ್ತೀಥಿ, ಯೇಸುನ ಜೋ಼ಡೆ ಖಾಣನ ಬೆಠುಥೂತೆ ಇವ್ಣಾಮ ಲಾಜ಼ರ್‌ಬಿ ಏಕ್‌ ಜ಼ಣೊ.
JOH 12:3 ತದೆ ಮರಿಯನೆ, ಘಣ ಮೋಲ್ನು ಜಟಮಂಸಿ ವಾನು ತೇಲ್ನ ಲೈನ್‌, ಯೇಸುನ ಗೋಡಾಪರ್ ರಂಚಿನ್, ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ಯೇಸುನ ಗೋಡ ನೂಛಿ. ಯೋ ತೇಲ್ನಿ ಮಿಠ್ಠಿ ವಾಖ್ಹ್‌ ಹಿಡಿ ಘರ್ ಅಖ್ಖುಸ್ ಮಹಿಕವ್‍ಕರ‍್ತುಥು.
JOH 12:4 ಇನ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೋತೆ, ಕತೊ (ಇನ ಧೋಕೇಥಿ ಧರಿದ್ಯವಾಳೊ ಇಸ್ಕರಿಯೋತ ಯೂದಾನೆ),
JOH 12:5 “ಆ ತೇಲ್ನ ತೀನ್‌ಖ್ಹೊ ರೂಪಾನು ಪಾವ್ಲನ ವೇಚಿನ್, ಗರೀಬ್‌ನ ಶನ ಕೋದಿದಿನಿ?” ಕರಿ ಬೋಲ್ಯೊ.
JOH 12:6 ಗೋರ್‌-ಗರೀಬ್‌ನಿ ಬಾರೇಮ ಫಿಕರ್ ಕರೀನ್, ಆ ವಾತೇನ ಬೋಲ್ಯೋತೆ ಕಾಹೆ, ಪಣ್ಕಿ ಯೋ ಚೋ಼ರ್ ಹುಯಿರ‍್ಹೊಥೋತೆ ಇನಖ್ಹಾಜೇಸ್ ಅಮ್ ಬೋಲ್ಯೋತೆ.ಅಜು಼ ಪೈಶಾನಿ ಚ಼ಂಚಿ ಇನ ಹಾತ್‌ಮ ರ‍್ಹೇತುಥು, ಯೋ ಚ಼ಂಚಿಮ ನಾಖಸ್ತೆ ಪೈಶಾನ ಯೋ ಕಾಡಿಲೇತೋಥೊ.
JOH 12:7 ಕತೋಬಿ ಯೇಸುನೆ ಇನ, “ಅನ ಮ್ಹೇಲೊ! ಮನ ಮಖ್ಹಾಣ್ಯನ ದನ್ನುಕಾಮ್ ಹಮ್ಕೇಸ್ ಕರಿಲಿದಿ.
JOH 12:8 ಗರೀಬ್ ಖ್ಹಾರು ಹಮೇಶ ತುಮಾರ ಜೋ಼ಡೆ ರ‍್ಹಿಶೆ, ಕತೋಬಿ ಮೇ ಹಮೇಶ ತುಮಾರ ಜೋ಼ಡೆ ಕೋ ರ‍್ಹೀಶ್‌ನಿ” ಕರಿ ಬೋಲ್ಯೊ.
JOH 12:9 ಯೆಹೂದ್ಯರ್ ಅದ್ಮಿನಿ ಮೋಟಿ ಭೀಡ್, ಯೇಸು ಬೆಥಾನ್ಯಾಮ ಛಾ಼ ಕರಿ ಮಾಲುಮ್‌ ಕರಿಲೀನ್, ಖಲಿ ಇನ ದೇಖಾನಖ್ಹಾಜೆ ಕಾಹೆತೆ, ಇನೆ ಮರ‍್ಯಾಹುಯಮಾಥು ಜಿವ್ತು ಉಠಾಡ್ಯೋತೆ ಲಾಜ಼ರ್‌ನಾಬಿ ದೇಕ್ಣು ಕರಿ ಹಿಜ್ಜಾ಼ ಗಯು.
JOH 12:10 ಕತೋಬಿ ಮಹಾಯಾಜಕರ್‌ ಲಾಜ಼ರ್‌ನಾಬಿ ಮರೈನಾಕ್ಣು ಕರಿ ಸೋಚ್ಯು.
JOH 12:11 ಶನಕತೊ ಲಾಜ಼ರ್‌ನಟೇಕೆ ಘಣು ಅದ್ಮಿ ಯೆಹೂದ್ಯರ್ ಖ್ಹಾರು ಇವ್ಣುನ ಮ್ಹೆಂದಿನ್, ಯೇಸುನ ವಿಶ್ವಾಸ್‌ ಕರ‍್ಯು.
JOH 12:12 ತಿನವ್ಹಾಣೆ, ಪಸ್ಕ ಪೂಜಾ಼ನ ಆಯುಥೂತೆ ಅದ್ಮಿನಿ ಭೀಡ್‌ನೆ, ಯೇಸು ಯೆರೂಸಲೇಮ್ಮ ವಳ್ಯಾವಸ್ ಕರಿ ಖ್ಹಮ್‌ಜ್ಯು.
JOH 12:13 ತದೆ ಇವ್ಣೆ ಖಜೂ಼ರ‍್ನಿಡಾಳಿಯೇನ ಪಳ್ಳಿನ್‌, ಯೇಸುನ ಮಳಾನ ಗಯು, ಅಜು಼ ಚಿಕ್ರಿನ್ ಬೋಲ್ಯುಕಿ, “ಹೊಸನ್ನ! ಪ್ರಭುನ ನಾಮ್‌ಪರ್‌ ಆವಾಳ ರಾಜಾ಼ನ ದೇವ್ ಆಶೀರ್ವಾದ್‌ ಕರಾದೆ! ಇಸ್ರಾಯೇಲ್‌ನ ರಾಜಾ಼ನ ದೇವ್ ಆಶೀರ್ವಾದ್‌ ಕರಾದೆ!”
JOH 12:14 ಯೇಸುನೆ ಏಕ್‌ ಗಧೇಡಾನ ದೇಖಿನ್‌, ಇನಾಪರ್‌ ಬೇಶಿಗಯೊ.
JOH 12:15 “ಚೀಯೋನ್ ನಂಗ್ರಿ ಡರ್‌ನಕೊ! ಹಂದೇಕ್, ತಾರೊ ರಾಜ಼, ಗಧೇಡಾನ ಚೆಲ್ಕಪರ್‌ ಬೇಶಿನ್ ವಳ್ಯಾವಸ್ತೆ” ಕರಿ ಧರ್ಮಶಾಸ್ತ್ರಮ ಛಾ಼ತೆ ವಾತೆ ಅಮ್ ಚಾ಼ಲಿಗಿ.
JOH 12:16 ಯೇಸುನ ಶಿಷ್ಯರ್‌ನ ಯೋ ವಖ್ಹತ್‌ಮ ಆ ಮಾಲುಮ್‌ ಕೋ ಪಡ್ಯುನಿ; ಕತೋಬಿ ಯೇಸು ಮಹಿಮೆನು ಪದವಿಮ ಆವಾನ ಬಾದ್‌ಮ, ಆ ಇನಿ ಬಾರೇಮಸ್ ಲೀಖೈರ‍್ಹೂಸ್ತೆ ಕರಿ, ಅಜು಼ ಅಪ್ಣೆ ಆ ಖ್ಹಾರಾನ ಯೇಸುನಖ್ಹಾಜೆ ಕರ‍್ಯಾ ಕರಿ ಇವ್ಣ ಯಾದ್ಮ ಆಯು.
JOH 12:17 ಅತ್ರೇಸ್ ಕಾಹೆತೆ ಲಾಜ಼ರ್‌ನ ಘವಿನ ಮಹಿಥು ಚಿಕ್ರಿನ್‌, ಜಿವ್ತು ಉಠಾಡ್ಯೋತೆ ವಖ್ಹತ್‌ಮ, ಇನಜೋ಼ಡೆ ಥೂತೆ ಇವ್ಣೆ ದೇಖ್ಯುತೆ ಅದ್ಮಿಖ್ಹಾರು ಅನಿ ಬಾರೇಮ ಸಾಕ್ಷಿ ಬೋಲುಕರ್ತೂಥು.
JOH 12:18 ಯೇಸುನೆ ಆ ಅದ್ಭುತ್ ಕಾಮ್ ಕರ‍್ಯೊ ಕರಿ ಖ್ಹಮ್‌ಜ್ಯೂತೆ ಇನಖ್ಹಾಜೆ ಅದ್ಮಿನು ಝೂ಼ಂಡ್‌ ಇನ ಮಳಾನ ಜೈ಼ರ‍್ಹೂಥು.
JOH 12:19 ತದೆ ಫರಿಸಾಯರ್‌ವಾಳು ಏಕ್‌ಥಿ-ಏಕ್‌, “ಹಂದೇಖೊ, ಅಪ್ಣೊ ಹಾತ್‌ ಶಾತ್ಬಿ ಕರಾನ ಕೋ ಹೂಕರಾನಿ! ಆ ಜಗತ್‌ನು ಖ್ಹಾರು ಅದ್ಮಿ ಇನ ಪೀಠೆ ಒಳ್ಯುಜಾ಼ಸ್!” ಕರಿ ಬೋಲಿಲಿದು.
JOH 12:20 ಪಸ್ಕಪೂಜಾ಼ನ ಆರಾದನೆ ಕರ್ನುಕರಿ ಯೆರೂಸಲೇಮ್‍ಥು ಆಯುಥೂತೆ ಇಸ್ರಾಯೇಲ್‍ವಾಳಮ ಥೋಡು ಜ಼ಣು ಗ್ರೀಕ್‌ವಾಳುಬಿ ಥೂ.
JOH 12:21 ಇವ್ಣಾಮ ಯೊ ಗ್ರೀಕ್‍ವಾಳು ಗಲಿಲಾಯಮ ಛಾ಼ತೆ ಬೆತ್ಸಾಯಿದ ಗಾಮ್‌ನೊ ಫಿಲಿಪ್ಪಕನ ಜೈ಼ನ್‌, “ಮಾಲಿಕ್, ಹಮೆ ಯೇಸುನ ದೇಕ್ಣು” ಕರಿ ಇನ ಗಿಂಗಾಯು.
JOH 12:22 ಫಿಲಿಪ್ಪನೆ ಜೈ಼ನ್‌, ಅಂದ್ರೆಯನ ಆ ಬಾರೇಮ ಬೋಲ್ಯೊ, ತದೆ ಫಿಲಿಪ್ಪ ಅಜು಼ ಅಂದ್ರೆಯ ಭೇಜ಼ಣನೆ ಯೇಸುನ ಬೋಲ್ಯ.
JOH 12:23 ಯೇಸುನೆ ಇವ್ಣುನ ಜ಼ವಾಬ್ ದಿದೊ, “ಅದ್ಮಿನ ಛಿಯ್ಯಾನಿ ಮಹಿಮೆ ಮಳಾನಿ ವಖ್ಹತ್ ಐಗೈ.
JOH 12:24 ಮೇ ತುಮೂನ ಖ್ಹಾಚ ಬೋಲು ಕರುಸ್; ಕಬ್ಲಗು ಘವ್‌ನೊ ದಾಣೊ ಜ಼ಮೀನ್‌ಮ ಪಡೀನ್, ಮರ‍ಕೊಯ್ನಿಕಿ, ತಬ್‍ಲಗು ಎಕ್ಕಸ್ ರ‍್ಹಿಶೆ; ಕದೆ ಮರ‍ಸ್ಕಿ ತದೆ, ಘಣು ದಾಣಾನ ದಿಶೆ.
JOH 12:25 ಇನೊ ಶೊಂತ್‌ ಜಾನ್ನ ಪ್ಯಾರ್ ಕರಾವಾಳು ಇನ ಗುಮೈಲಿಶೆ, ಆ ಜಗತ್‌ಮ ಕೋಣ್ ಇನ ಶೊಂತ್ ಜಾನ್ನ ಕಾಡಿಲ್ಯವಾನಬಿ ಪೀಠೆ ಕೋ ಹಟಾನಿಕಿ, ಯೊ ಹರ್‌ಹಮೇಶಾನ ಖ್ಹಾಜೆ ಇನ ಬಚಾ಼ಡಿಲಿಶೆ.
JOH 12:26 ಕೋಣ್ ಮಾರಿ ಸೇವೆ ಕರ್ನುಕರಿ ಛಾ಼ಕಿ ಮಾರ ಪೀಠೆ ಆವ್ಣುಸ್ ಆವ್ಣು, ತದೆ ಮೇ ಕಿಜ್ಜಾ಼ ರ‍್ಹೀಶ್‌ಕಿ ಹಿಜ್ಜಾ಼ಸ್ ಮಾರೊ ಸೇವಕ್‌ಬಿ ರ‍್ಹಿಶೆ. ಕೋಣ್ ಮಾರಿ ಸೇವೆ ಕರಾಸ್ಕಿ, ಇವ್ಣುನ ಮಾರೊ ಬಾ ಸನ್ಮಾನ್‌ ಕರ್ಶೆ.
JOH 12:27 “ಹಮ್ಕೆ ಮಾರೊ ಜಾನ್‌ ಘಬ್ರಾವ್‍ ಕರಾಸ್ ಅಜು಼ ಮೇ ಶಾತ್‌ ಬೋಲು? ಅಮ್‍ ಬೋಲುಕಿಶು ‘ಬಾ, ಆ ಖ್ಹತಾಪ್ಣಿನಿ ವಖ್ಹತ್‌ಮಾಥು ಮನ ಬಚಾ಼ವ್‍ಕರಿ? ಕತೋಬಿ ಅನಖ್ಹಾಜೆಸ್ ಮೇ ಆಯೋತೆ.
JOH 12:28 ಬಾ, ತಾರು ನಾಮ್ ಮಹಿಮ ಕರಿಲೆ!” ಕರಿ ಬೋಲ್ಯೊ. ತದೆ ಸೊರ್ಗಮಾಥು ಆವಾಜ಼್ಆಯು, “ಮಾರು ನಾಮ್ನ ಮಹಿಮೆ ಕರಿಲಿದೊ, ಮೇ ಅಜು಼ ಪಾಛೊ಼ ಅನಿ ಮಹಿಮೆ ಕರೀಶ್” ಕರಿ ಬೋಲ್ಯು.
JOH 12:29 ಹಿಜ್ಜಾ಼ ಭೀಯುಥೂತೆ ಝೂಂಡ್‍ಖ್ಹಾರು ಆ ಅವಾಜ಼್‌ನ ಖ್ಹಮ್‌ಜಿನ್‌, “ಗಲ್ಹಾರ‍್ಯು” ಕರಿ ಬೋಲ್ಯು. ಅಜು಼ ಥೋಡಾನೆ, “ದೇವ್‌ನೊ ದೂತಾನೆ ಯೇಸುನ ಜೋ಼ಡೆ ವಾತೆ ಬೋಲ್ಯೊ” ಕರಿ ಬೋಲ್ಯು.
JOH 12:30 ಕತೋಬಿ ಯೇಸುನೆ ಇವ್ಣುನ, “ಆ ಅವಾಜ಼್ ಹುಯೂತೆ ಮಾರ ಅಛ್ಛಾ಼ನಖ್ಹಾಜೆ ಕಾಹೆ, ಪಣ್ಕಿ ತುಮಾರ ಅಛ್ಛಾ಼ನ ಖ್ಹಾಜೆಸ್.
JOH 12:31 ಆ ಜಗತ್ನ ತೀರ್ಪ್ ಹುವಾನಿ ಘಡಿ ಆಸ್; ಯೊ ಆ ಜಗತ್ನ ರಾಜ಼್‌ಭಾರ್‌ ಚ಼ಲಾಯೊತೆ ಆ ಅದಿಪತಿನ ಭಾರ್‌ ಧಕೇಲ್‌ಶೆ.
JOH 12:32 ಮೇ ಜ಼ಮೀನ್‍ಪರ್ಥೊ ಉಪ್ಪರ್ ಪಡೈಜೈ಼ಶ್‌ತೆ ತದೆ ಹರೇಕ್ನ ಮಾರಕನ ಖೇಚಿಲೀಶ್‌” ಕರಿ ಬೋಲ್ಯೊ.
JOH 12:33 ಯೋ ಮರಾನಿ ತರೀಖಾನ ಯೇಸುನೆ ಆ ವಾತೇಥಿ ವತಾಳಿಲಿದೊ.
JOH 12:34 ತದೆ ಅದ್ಮಿನಿ ಭೀಡ್‌ನೆ, “ಕ್ರಿಸ್ತ ಹರ್‌ಹಮೇಶ ಜಿವ್ತೊ ರ‍್ಹಿಶೆ’ ಕರಿ ಧರ್ಮಶಾಸ್ತ್ರಮ ಬೋಲಾಸ್ನಿ? ಇಮ್‍ಕತೊ, ‘ಅದ್ಮಿನೊ ಛಿಯ್ಯೊ ಉಪ್ಪರ್ ಪಡೈಜಾ಼ಶೆ’ ಕರಿ ತೂ ಬೋಲಾಸ್ತೆ ಕಿಮ್? ಯೋ ಅದ್ಮಿನೊ ಛಿಯ್ಯೊ ಕೋಣ್?” ಕರಿ ಪುಛಾ಼ಯು.
JOH 12:35 ತದೆ ಯೇಸುನೆ ಇವ್ಣುನ ಬೋಲ್ಯೊ, “ಬಿಜು಼ ಥೋಡ ದನ್ನಸ್‌ ಉಜಾ಼ಳು ತುಮಾರಾಮ ರ‍್ಹಿಶೆ, ಅಂಧಾರು ತುಮಾರಪರ್ ಢಪಾವನ ಅಗಾಡಿಸ್ ಉಜಾ಼ಳು ರ‍್ಹವಾನಿವಖ್ಹ್‌ತೆಸ್ ಚಾ಼ಲೊ. ಅಂಧಾರಾಮ ಚಾ಼ಲವಾಳಾನ ಯೋ ಕಿಜ಼್ಜಾ ವಳ್ಯೊಜಾ಼ಸ್ ಕರಿ ಮಾಲುಮ್‌ ಕೋಪಡಾನಿ.
JOH 12:36 ತುಮಾರಕನ ಉಜಾ಼ಳು ರ‍್ಹವಾನಿ ವಖ್ಹತ್‌ಮಾಸ್‌ ಉಜಾ಼ಳಾನ ನಂಬೊ, ನಂಬ್ಯಾತೊ, ತದೆ ತುಮೆ ಉಜಾ಼ಳವಾಳ ಹುಯಿರ‍್ಹೀಶು” ಕರಿ ಬೋಲ್ಯೊ. ಆ ಬೋಲಾನ ಬಾದ್‌ಮ, ಯೇಸುನೆ ಇವ್ಣ ಖ್ಹಾಮೇಥೊ ಓಠೆಚ಼ಲೆಗಯೊ.
JOH 12:37 ಯೇಸುನೆ ಇವ್ಣ ಖ್ಹಾಮ್ಣೆಸ್ ಆ ಖ್ಹಾರು ಅದ್ಭುತ್‌ಕಾಮ್ ಕರ‍್ಯೊತೋಬಿ, ಇವ್ಣೆ ಇನಾಪರ್‌ ವಿಶ್ವಾಸ್ ಕೋ ಕರ‍್ಯುನಿ
JOH 12:38 ಅನೇಥಿ ಪ್ರವಾದಿ ಯೆಶಾಯನೆ ಬೋಲ್ಯೋತೆ ವಾತೆ ಖ್ಹಾಚಿ ಹುಯಿಗು: ಯೋ ಶಾತ್‌ಕತೊ, “ಪ್ರಭು, ಹಮೆ ಬೋಲ್ಯಾತೆ ಖಬರ್‌ನ ಕೋಣ್ ವಿಶ್ವಾಸ್ ಕರ‍್ಯು? ಪ್ರಭುನಿ ಭುಜ಼್‌ನಿ ತಾಖತ್ ಕಿನ ದೆಖಾಯು?” ಕರಿ ಬೋಲಾನುಸ್.
JOH 12:39 ಇವ್ಣೆ ನಂಬ್ಯುಕೊಂತೆ ಇನಖ್ಹಾಜೆ ಯೆಶಾಯನೆ ಬಿಜೇಕ್‌ ವಾತೆ ಬೋಲಿರಾಖ್ಯೊಸ್, ಯೋ ಶಾತ್‌ಕತೊ,
JOH 12:40 ‘ದೇವ್ನೆ ಇವ್ಣ ಡೋಳಾನ ಕಾಣು ಕರಿರಾಖ್ಯೋಸ್, ಅಜು಼ ಇವ್ಣ ದಿಲ್ನ ಕಠಣ್ ಕರಿರಾಖ್ಯೋಸ್, ಶನಕತೊ, ಇವ್ಣೊ ಡೋಳೊ ದೇಕ್ಣು ನಾ ಅಜು಼ ಇವ್ಣೊ ದಿಲ್‌ ಪರಖ್‌ಣು ನಾ’ ಕರಿ ಅಜು಼ ಇವ್ಣೆ ಇನಾಭಣಿ ಫರೀನ್, ಇನಖ್ಹಾಜೆ ಅಛ್ಛು಼ ನಾ ಹೋಣು ಕರಿ” ಬೋಲೈರ‍್ಹುಸ್ತೆ.
JOH 12:41 ಯೆಶಾಯನೆ ಯೇಸುನಿ ಮಹಿಮೆನ ದೇಖ್ಯೋತೆ ಇನಖ್ಹಾಜೇಸ್ ಇನಿ ಬಾರೇಮ ಆ ವಾತೇನ ಬೋಲ್ಯೋತೆ.
JOH 12:42 ತದೇಬಿ ಘಣು ಯೆಹೂದ್ಯರ್‌ನು ಅದಿಕಾರಿನೆ ಯೇಸುಪರ್‌ ವಿಶ್ವಾಸ್‌ ಕರ‍್ಯು, ಕತೋಬಿ ಸಭೆ ಭರಾವನು ಮಂದಿರ್‌ಮಾಥು ಭಾರ್ ನಾಖಿದಿಶೆ ಕರಿ ಫರಿಸಾಯರ್‌ನ ಡರ್‌ಥಿ, ಅದ್ಮಿನ ಖ್ಹಾಮೆ ಬೋಲಿಲಿದುಕೊಯ್ನಿ.
JOH 12:43 ಶನಕತೊ ಇವ್ಣೆ ದೇವ್‍ಥಿ ಆವಸ್ತೆ ಖ್ಹರಾವ್ಣಿಥೀಬಿ, ಅದ್ಮಿಥಿ ಆವಸ್ತೆ ಮರ್ಯಾದಿಪರಸ್‌ ಇವ್ಣುನ ಘಣು ಪ್ಯಾರ್ ಥೂ.
JOH 12:44 ಯೇಸುನೆ ಜೋ಼ರೇಖ್ಹು ಚಿಕ್ರಿನ್, “ಮಾರಪರ್ ವಿಶ್ವಾಸ್‌ ಕರಾವಾಳೊ ಖಲಿ ಮಾರಪರಾಸ್‌ ಕಾಹೆ, ಕತೋಬಿ ಮನ ಮೋಕ್‌ಲ್ಯೊತೆ ಇನಾಪರ್‌ಬಿ ವಿಶ್ವಾಸ್‌ ಕರಾವಾಳೊ ಹುಯಿರ‍್ಹೋಸ್.
JOH 12:45 ಕೋಣ್‍ ಮನ ದೇಖವಾಳೊಕಿ, ಮನ ಮೋಕ್‌ಲ್ಯೊತೆ ಇನಾಬಿ ದೇಖವಾಳೊ ಹುಯಿರ‍್ಹೋಸ್.
JOH 12:46 ಮೇ ಉಜಾ಼ಳು ಹುಯಿನ್ ಆ ಜಗತ್‌ಮ ಐರ‍್ಹೋಸ್ತೆ, ಮನ ನಂಬವಾಳು ಏಕ್‌ಬಿ ಅಂಧಾರಾಮ ನಾ ರ‍್ಹೇವ್ಣುಕರಿಸ್.
JOH 12:47 ಕೋಣ್‌ತೋಬಿ ಮಾರಿ ವಾತೆಅಖ್ಖಾನ ಖ್ಹಮ್‌ಜಿನ್‌ಬಿ, ಇನಲೀನ್ ಚಾ಼ಲ್ಯನಾತೊ, ಇನ ಮೇ ತೀರ್ಪ್‌ ಕರುಕೊಯ್ನಿ. ಜಗತ್ನ ತೀರ್ಪ್ ಕರಾನಖ್ಹಾಜೆ ಮೇ ಆಯೊ ಕೊಯ್ನಿ, ಪಣ್ಕಿ ಆ ಜಗತ್ನ ಬಚಾ಼ಡಾನಖ್ಹಾಜೆ ಆಯೊತೆ.
JOH 12:48 ಕೋಣ್ ಮನ ಝಿಟ್ಕಾರಿನ್, ಮಾರಿ ವಾತೇನ ಮಾನಕೊಂತೆ ಇವ್ಣುನ ತೀರ್ಪ್‌ ಕರಾವಾಳು ಏಕ್‌ ಛಾ಼. ಯೋ ಕೆಹುಕತೊ ಮೇ ಬೋಲ್ಯೋತೆ ಯೋ ವಾತೇಸ್‌, ಖ್ಹರ್ತಿನ ದನ್ಮ ಇವ್ಣುನ ತೀರ್ಪ್ ಕರ್ಶೆ.
JOH 12:49 ಆ ಖ್ಹಾಚು಼, ಶನಕತೊ ಮಾರಿ ಅದಿಕಾರ್‌ಥಿ ಮೇಸ್ ವಾತೆ ಕೋ ಬೋಲ್ಯೋನಿ ಮನ ಮೋಕ್‌ಲ್ಯೊತೆ ಬಾನೇಸ್, ಮೇ ಶಾತ್‌ ಬೋಲ್‌ನು ಅಜು಼ ಖಿವಿವಾತೆ ಬೋಲಿ ವತಾಳ್ಣು ಕರಿ ಮನ ಹುಕುಮ್ ದೀರಾಖ್ಯೊಸ್.
JOH 12:50 ಬಾನಿ ಹುಕುಮ್‌ ಹರ್‌ಹಮೇಶಾನಿ ಜಿ಼ಂದ್‌ಗಿ ದೇಸ್ ಕರಿ ಮನ ಮಾಲುಮ್‌. ಇನಖ್ಹಾಜೆ ಬಾನೆ ಮನ ಬೋಲಿದಿದೋತೆ ಇನಾಸ್ ಮೇ ಬೋಲುಸ್” ಕರಿ ಬೋಲ್ಯೊ.
JOH 13:1 ಪಸ್ಕ ಪುಜಾ಼ನ ಅಗಾಡಿ ಯೇಸು ಆ ಜಗತ್ನ ಮ್ಹೇಲಿನ್, ಬಾಕನ ಜಾ಼ವಾನಿ ವಖ್ಹತ್ ಐಗೈ ಕರಿ ಮಾಲುಮ್ ಕರೀನ್, ಆ ಜಗತ್‌ಮ ಛಾ಼ತೆ ಇನು ಕರಿ ಥೂತೆ ಯೋ ಖ್ಹರಾನ ಹಮೇಶ ಪ್ಯಾರ್ ಕರ‍್ಯೊ ಅಜು಼ ಖರ್ತಿಲಗೂಬಿ ಪ್ಯಾರ್ ಕರ್ತೊಸ್ ಆಯೊ.
JOH 13:2 ಯೇಸು ಅಜು಼ ಇನ ಶಿಷ್ಯರ್‌ ಖಾಣನ ಬೆಠಾಥ. ಯೇಸುನ ದೋಕೇಥಿ ಧರಿದೇಣು ಕರಿ ಬೋಲಾನಿ ಸೋಚ್ನ, ಸೀಮೋನನೊ ಛಿಯ್ಯೊ ಇಸ್ಕರಿಯೋತ ಯೂದಾನ ಮನ್‌ಮ ಶೈತಾನ್ನೆ ಅಗಾಡಿಸ್ ಘಾಲಿದಿದೋಥೊ.
JOH 13:3 ಬಾನೆ ಖ್ಹಾರಿಸ್ ಅದಿಕಾರ್‌ನ ಇನ ಹಾತ್‌ಮ ದೀರಾಖ್ಯೊಸ್ ಕರಿ ಯೇಸುನ ಮಾಲುಮ್‌ ಥೂ; ಅತ್ರೇಸ್ ಕಾಹೆತೆ ಯೇಸುನ ದೇವ್‌ಕಂಥೊ ಐರ‍್ಹೋಸ್ ಅಜು಼ ಪಾಛೊ಼ ದೇವ್‌ಕನ ವಳ್ಯೊಜ಼ವುಸ್‌ ಕರೀಬಿ ಮಾಲುಮ್‌ ಥೂ.
JOH 13:4 ತದೆ ಯೇಸುನೆ ಖಾಣನ ಮ್ಹೆಂದಿನ್, ಉಪ್ಪರ್ ಉಠೀನ್, ಇನು ಉಪ್ಪರ್‌ಲ್ಯು ಝ಼ಗ್ಗಾನ ಕಾಡಿನಾಖಿನ್, ಪಿಛೋ಼ಡಿನ ಪಾಡೀನ್, ಕಂಬರ್‌ನ ಭಾಂದಿಲಿದೊ.
JOH 13:5 ಅಜು಼ ಏಕ್‌ ಕಟೋರಾಮ ಪಾಣಿ ಭರಿನ್, ಶಿಷ್ಯರ್‌ನ ಗೋಡ ಧೊವಾಲಗ್ಯೊ ಅಜು಼ ಇನೆ ಕಂಬರ್‌ನ ಭಾಂದಿರಾಖ್ಯೊಥೋತೆ ಪಿಛೋ಼ಡಿಥಿ ನುಛ್ಛಾ಼ಲಗ್ಯೊ.
JOH 13:6 ಯೊ ಸೀಮೋನ್‌ ಪೇತ್ರಕನ ಆವಾದಿನ್, ಇನೆ, “ಪ್ರಭು, ತೂ ಮಾರ ಗೋಡ ಧೊವಾಸ್ಕಿಶು?” ಕರಿ ಬೋಲ್ಯೊ.
JOH 13:7 ಯೇಸುನೆ ಇನ, “ಮೇ ಶಾತ್‌ ಕರುಕರುಸ್ತೆ ಕರಿ ಹಮ್ಕೆ ತುನ ಮಾಲುಮ್‌ ಕೋ ಪಡ್‌ಶೇನಿ, ಕತೋಬಿ ಬಾದ್‌ಮ ತುನ ಮಾಲುಮ್‌ ಪಡ್‌ಶೆ” ಕರಿ ಬೋಲ್ಯೊ.
JOH 13:8 ತದೆ ಪೇತ್ರನೆ, “ತೂ ಮಾರ ಗೋಡಾನ ಕದೇಸ್‌ ನಾ ಧೋವ್‌ಣು!” ಕರಿ ಬೋಲ್ಯೊ. ಯೇಸುನೆ ಇನ, “ಮೇ ತಾರ ಗೋಡ ನಾ ಧೋಯೋತೊ, ತೂ ಮಾರೊ ಶಿಷ್ಯ ಹುಯಿರ‍್ಹವಾನ ಕೋ ಹುವಾನಿ” ಕರಿ ಬೋಲ್ಯೊ.
JOH 13:9 ತದೆ ಸೀಮೋನ್ ಪೇತ್ರನೆ, “ಪ್ರಭು, ಖಲಿ ಮಾರ ಗೋಡಾಸ್‌ ಕಾಹೆತೆ, ಮಾರ ಹಾತ್‌ನಾಬಿ, ಮುಡ್‌ಕ್ಯನಾಬಿ ಧೊವ್‌!” ಕರಿ ಬೋಲ್ಯೊ.
JOH 13:10 ಯೇಸುನೆ ಇನ, “ಪಾಣಿ ನ್ಹೊಯಿರಾಖವಾಳನು‌ ಆಂಗ್‌ತನ್‌ ಅಖ್ಖುಸ್ ಪಾಕ್‌ ರ‍್ಹೇಸ್, ಖಲಿ ಗೋಡ ಧೋಯೂತೊ ಬಶ್‌. ತುಮೆ ಖ್ಹಾರು ಪಾಕ್‌ ಹುಯಿರ‍್ಹಾಸ್‌, ಕತೋಬಿ ತುಮಾರಾಮ ಹರೇಕ್ ಜ಼ಣೊ ಪಾಕ್‌ ಕಾಹೆ” ಕರಿ ಬೋಲ್ಯೊ.
JOH 13:11 ಯೇಸುನ ಇನ ಧೋಕೇಥಿ ಧರಿ ದಿಶೇತೆ ಕೋಣ್ ಕರಿ ಮಾಲುಮ್‌ ಥೂತೆ ಇನಖ್ಹಾಜೆ, ಇನೆ, “ತುಮಾರಾಮ ಹರೇಕ್ ಜ಼ಣು ಪಾಕ್‌ ಕಾಹೆ” ಕರಿ ಬೋಲ್ಯೋತೆ.
JOH 13:12 ಯೇಸುನೆ ಇವ್ಣ ಗೋಡ ಧೊವಾನ ಬಾದ್‌ಮ, ಇನು ಉಪ್ಪರ್‌ಲ್ಯು ಝ಼ಗ್ಗಾನ ಪೇರ‍್ಹಿಲೀನ್‌, ಪಾಛು಼ ಹಿಜ಼್ಜಾ ಬೇಶಿನ್ ಇನೆ ಬೋಲ್ಯೊಕಿ, “ಮೇ ತುಮೂನ ಕರ‍್ಯೊತೆ ಶಾತ್‌ ಕರಿ ತುಮೂನ ಮಾಲುಮ್‌ ಪಡ್ಯುಕಿಶು?” ಕರಿ ಪುಛಾ಼ಯೊ.
JOH 13:13 “ತುಮೆ ಮನ ಗುರು, ಪ್ರಭು ಕರಿ ಬುಲಾವಸ್‌, ತುಮೆ ಇಮ್‌ ಬುಲಾವಸ್ತೆ ಬರಾಬರಸ್‌, ಶನಕತೊ ಮೇ ಇಮ್‌ನೋಸ್‌.
JOH 13:14 ತುಮಾರೊ ಪ್ರಭು ಅಜು಼ ಗುರು ಹುಯಿರ‍್ಹೋತೆ ಮೇ, ತುಮಾರ ಗೋಡಾನ ಧೋಯೋತೆ ಇಮ್ಮಸ್, ತುಮೇಬಿ ಬಿಜೇಕ್‍ನ ಗೋಡ ಧೋವ್‌ಣು.
JOH 13:15 ಮೇ ತುಮೂನ ಕರ‍್ಯೊತೆ ಇಮ್ಮಸ್ ತುಮೇಬಿ ಕರ‍್ನು, ಕರಿ ಮೇ ತುಮೂನ ಖ್ಹಂಜ಼್‌ಕಾರ್ ವತಾಳಿರಾಖ್ಯೋಸ್‌.
JOH 13:16 ಮೇ ತುಮೂನ ಖ್ಹಾಚ ಬೋಲುಕರುಸ್, ಆಳ್‌ ಯಜಮಾನ್‍ಥಿ ಮೋಟೊ ಕಾಹೆ, ಅಜು಼ ಖಬರ್‌ದ್ಯವಾಳೊ ಇನ ಮೋಕ್‌ಲ್ಯೊತೆ ಇನೇಥಿ ಮೋಟೊ ಕಾಹೆ.
JOH 13:17 ತುಮೆ ಅನ ಮಾಲುಮ್‌ ಕರಿಲೀನ್, ಅನೀನಿಘೋಣಿ ಚಾ಼ಲಿಲಿದಾತೊ ತುಮೆ ಧನ್ಯರ್ ಹುಯಿರ‍್ಹಾಸ್‌!
JOH 13:18 “ಮೇ ತುಮಾರ ಖ್ಹಾರಾನಿ ಬಾರೇಮ ಕೋ ಬೋಲುಕರುನಿ: ಮೇ ಚೂ಼ಣಿರಾಖ್ಯೋಸ್ತೆ ಇವ್ಣಿ ಬಾರೇಮ ಮನ ಮಾಲುಮ್‌, ಕತೋಬಿ ‘ಮಾರ ಜೋ಼ಡೆ ಖಾಣು ಖಾವಳೋಸ್‌ ಮನ ಧೋಕ ದಿದೊ’ ಕರಿ ಧರ್ಮಶಾಸ್ತ್ರಮ ಛಾ಼ತೆ ವಾತೆ ಚಾ಼ಲ್ನು.
JOH 13:19 ಯೋ ಚಾ಼ಲಾನಿ ವಖ್ಹತ್‌ಮ, ಮೇಸ್ ಕ್ರಿಸ್ತ ಕರಿ ತುಮೆ ನಂಬಾನಖ್ಹಾಜೆ, ಯೋ ಚಾ಼ಲಾನ ಬೋಲುಕರುಸ್.
JOH 13:20 ತುಮೂನ ಖ್ಹಾಚ ಬೋಲುಸ್, ಮೇ ಮೋಕ್ಲುಸ್ತೆ ಇವ್ಣುನ ಬುಲೈಲ್ಯವಾಳು, ಮನಾಬಿ ಬುಲೈಲ್ಯವಾಳು ಹುಯಿರ‍್ಹುಸ್‍. ಅಜು಼ ಮನ ಬುಲೈಲ್ಯವಾಳು ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲ್ಯವಾಳು” ಹುಯಿರ‍್ಹುಸ್‍.
JOH 13:21 ಯೇಸು ಆ ಬೋಲಾನ ಬಾದ್‌ಮ, ಯೇಸುನ ಆತ್ಮಮ ಘಣು ದುಖ್ ಹುಯು, ಅಜು಼ ಇನೆ, “ಮೇ ತುಮೂನ ಖ್ಹಾಚ ಬೋಲುಸ್, ತುಮಾರಾಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ” ಕರಿ ಸಾಕ್ಷಿ ಬೋಲ್ಯೊ.
JOH 13:22 ತದೆ ಇನ ಶಿಷ್ಯರ್‌ನೆ ಏಕ್‌ನ ಭಣಿ ಏಕ್‌ ದೇಖಿನ್, ಆ ಕಿನಿ ಬಾರೇಮ ಬೋಲುಕರಾಸ್ತೆ ಕರಿ ಗುಮಾನಿಕರ‍್ಯು.
JOH 13:23 ಶಿಷ್ಯರ್‌ಮ ಯೇಸುನೊ ಪ್ಯಾರ್‌ನೊ ಶಿಷ್ಯ ಏಕ್‌ ಥೊ, ಯೊ ಇನ ಚಿಕೈನ್‌ ಬೆಠೋಥೊ.
JOH 13:24 ತದೆ ಸೀಮೋನ್‌ ಪೇತ್ರನೆ ಯೋ ಶಿಷ್ಯನ, “ಯೋ ಕಿನಿ ಬಾರೇಮ ಬೋಲುಕರಾಸ್ತೆ ಕರಿ ಇನ ಪುಛಾ಼ವ್‌” ಕರಿ ಇಷಾರ್ಕೊ ಕರ‍್ಯೊ.
JOH 13:25 ಇನಖ್ಹಾಜೆ ಯೋ ಶಿಷ್ಯನೆ ಯೇಸು ಭಣಿ ಝು಼ಕಿನ್‌, “ಪ್ರಭು, ಯೋ ಕೋಣ್?” ಕರಿ ಪುಛಾ಼ಯೊ.
JOH 13:26 ಯೇಸುನೆ, “ಮೇ ಆ ರೋಟಾನ ಚೋ಼ಪ್‍ಡಿನ್, ಕಿನ ದೆವ್‍ಸ್ಕಿ, ಯೋಸ್‌ ಯೋ ಅದ್ಮಿ” ಕರಿ ಬೋಲಿನ್, ರೋಟಾನ ಟುಕ್ಡಾನ ಪಾಡೀನ್, ಕಟೋರಿಮ ಚೋ಼ಪ್‍ಡಿನ್, ಸೀಮೋನ್‌ ಇಸ್ಕರಿಯೋತನೊ ಛಿಯ್ಯೊ ಯೂದಾನ ದಿದೊ.
JOH 13:27 ಯೂದಾನೆ ಯೋ ರೋಟಾನ ಲೇತಾಸ್‌ನ, ಶೈತಾನ್ ಇನಾಮಹಿ ಪೇಶಿಗಯೊ. ತದೆ ಯೇಸುನೆ ಇನ, “ತೂ ಕರಾನ ವಳ್ಯೊಜಾ಼ಸ್ತೆ ಕಾಮ್ನ ಒಗ್ಗಿಸ್‌ಮ ಕರ್‌!” ಕರಿ ಬೋಲ್ಯೊ.
JOH 13:28 ಕತೋಬಿ ಯೇಸುನೆ ಇನ ಅಮ್ ಶನಖ್ಹಾಜೆ ಬೋಲ್ಯೊ ಕರಿ ಬೋಲಾನು ಖಾಣನ ಬೆಠುಥೂತೆ ಇವ್ಣಾಮ ಕಿನಾಬಿ ಮಾಲುಮ್‌ ಕೋ ಹುಯೂನಿ.
JOH 13:29 ಇವ್ಣಾಮ ಥೋಡಾನೆ, ಯೂದಾನ ಹಾತ್‌ಮ ಪೈಶಾನಿ ಚ಼ಂಚಿಥೀತೆ ಇನಖ್ಹಾಜೆ ಯೇಸು ಇನ ಪೂಜಾ಼ನ ಅಪ್ಣುನ ಹೋಣುತೆ ಅಖ್ಖು ಲೀಲೆವೊ ಕರೀಕಿ, ನತರ್‌ಕಿ ಗರೀಬ್‌ನ ಶಾತ್‌ತೋಬಿ ದೇ ಕರಿ ಶುಕಿ, ಯೇಸುನೆ ಬೋಲ್ಯೊ ಕರಿ ಲ್ಹಾಯು.
JOH 13:30 ಯೂದಾನೆ ಯೋ ರೋಟಾನ ಲೀನ್‌, ತದ್‌ನು-ತದ್ದೇಸ್ ಭಾರ್ ಚ಼ಲೆಗಯೊ. ತದೆ ರಾತ್ ಹುಯಿರ‍್ಹೀಥಿ.
JOH 13:31 ಯೂದ ಜಾ಼ವಾನ ಬಾದ್‌ಮ, ಯೇಸುನೆ, “ಹಮ್ಕೆ ಅದ್ಮಿನೊ ಛಿಯ್ಯಾನ ಮಹಿಮೆ ಹುಯು; ಅಜು಼ ಇನೇಥಿ ದೇವ್ನ ಮಹಿಮೆ ಪ್ರಕಟ್ ಹುಯು.
JOH 13:32 ಏಕ್‌ ವಖ್ಹತ್, ಅದ್ಮಿನೊ ಛಿಯ್ಯಾಥಿ ದೇವ್ನ ಮಹಿಮೆ ಹುಯು ಉಶೇತೊ, ಖ್ಹುದ್ ದೇವ್‌ಥೀಸ್‌ ಅದ್ಮಿನೊ ಛಿಯ್ಯಾನಾಬಿ ಮಹಿಮೆ ಉಶೆ,ಅಜು಼ ಇನ ಒಗ್ಗಿಸ್ ಮಹಿಮೆ ಕರ್ಶೆ.
JOH 13:33 ಮಾರ ಲಡ್ಕಾ, ಬಿಜು಼ ಥೋಡಿ ವಖ್ಹತ್ ಮೇ ತುಮಾರ ಜೋ಼ಡೆ ರ‍್ಹೀಶ್. “ಮನ ಢೂಂಡ್‌ಶು, ಕತೋಬಿ ಯೆಹೂದ್ಯರ್‌ನ ಬೋಲ್ಯೋತೆ ಇಮ್ಮಸ್, ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಕೋ ಆವಾನ ಉಶೇನಿ” ಕರಿ ಮೇ ಹಮ್ಕೆ ತುಮೂನಾಬಿ ಬೋಲುಸ್.
JOH 13:34 ಹಮ್ಕೆ ಮೇ ತುಮೂನ ಏಕ್‌ ನವಿ ಹುಕುಮ್‌ ದೆವುಸ್ ತುಮೆ ಏಕ್‌ಥಿ-ಏಕ್‌ ಲಾಡ್‌ ಕರೊ. ಮೇ ತುಮೂನ ಲಾಡ್‌ ಕರ‍್ಯೊತೆ ತಿಮ್ಮಸ್, ತುಮೇಬಿ ಏಕ್‌ಥಿ-ಏಕ್‌ ಲಾಡ್‌ ಕರ್ನುಸ್‍ಕರ‍್ನು.
JOH 13:35 ತುಮೆ ಏಕ್‌ಥಿ-ಏಕ್‌ ಪ್ಯಾರ್ ಕರ‍್ಯಾತೊ, ತದೆ ತುಮೆ ಹರೇಕ್ ಜ಼ಣು ಮಾರ ಶಿಷ್ಯರ್‌ ಕರಿ ಮಾಲುಮ್‌ ಉಷೆ” ಕರಿ ಬೋಲ್ಯೊ.
JOH 13:36 ಸೀಮೋನ್‌ ಪೇತ್ರನೆ ಯೇಸುನ, “ಪ್ರಭು, ತೂ ಕಿಜ಼್ಜಾ ವಳ್ಯೊಜಾ಼ಸ್‌?” ಕರಿ ಪುಛಾ಼ಯೊ. ತದೆ ಯೇಸುನೆ, “ಮೇ ವಳ್ಯೊಜ಼ವುಸ್ತೆ ಹಿಜ್ಜಾ಼ ತೂ ಹಮ್ಕೆ ಆವಾನ ಕೋ ಉಶೇನಿ, ಕತೋಬಿ ಬಾದ್‌ಮ ತೂ ಮಾರ ಪೀಠೆ ಐಶ್‌” ಕರಿ ಬೋಲ್ಯೊ.
JOH 13:37 ಪೇತ್ರನೆ ಯೇಸುನ, “ಪ್ರಭು, ಮೇ ಶನ ಹಮ್ಕೆ ತಾರ ಪೀಠೆ ಆವಾನ ಕೋ ಉಶೇನಿ? ಮೇ ತಾರಖ್ಹಾಜೆ ಜಾನ್‌ ದೆವಾನಾಬಿ ತಯಾರ್ ಛು಼!” ಕರಿ ಬೋಲ್ಯೊ.
JOH 13:38 ಯೇಸುನೆ ಇನ ಪುಛಾ಼ಯೊ, “ತೂ ಖ್ಹಾಚಮಾಬಿ ಮಾರಖ್ಹಾಜೆ ಜಾನ್‌ ದ್ಯವಾನ ತಯಾರ್ ಛಾ಼ಕಿ ಶು? ಮೇ ತುನ ಖ್ಹಾಚ ಬೋಲುಸ್, ಮುರ್‌ಗೊ ಬಾಂಗ್‌ ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ ‘ಯೋ ಮನ ಮಾಲುಮ್‌ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊ.
JOH 14:1 ಯೇಸುನೆ ಇವ್ಣುನ, “ತುಮಾರೊ ದಿಲ್‌ ಕಲಾವ್ಣಿ ನಕೊ ಹುವಾದೆ, ದೇವ್‌ಪರ್‌ ವಿಶ್ವಾಸ್‌ ಕರೊ ಅಜು಼ ಮಾರಪರ್‌ಬಿ ವಿಶ್ವಾಸ್‌ ಕರೊ.
JOH 14:2 ಮಾರ ಬಾನ ಘರ್‌ಮ ಘಣ ಕೋಣ ಛಾ಼, ಇಮ್‌ ನಾ ರ‍್ಹಯುಹೋತ್ತೊ, ತುಮಾರಖ್ಹಾಜೆ ಝ಼ಗೊ ತಯಾರ್ ಕರಾನಟೇಕೆ ವಳ್ಯೊಜ಼ವುಸ್‌ನಿ.
JOH 14:3 ಮೇ ಜೈ಼ನ್‌, ತುಮಾರಖ್ಹಾಜೆ ಝ಼ಗೊ ತಯಾರ್ ಕರಾನ ಬಾದ್‌ಮ, ಪಾಛೊ಼ಅಯಿನ್‌, ತುಮೂನ ಮಾರ ಜೋ಼ಡೆ ಬುಲೈಲಿ ಜೈ಼ಶ್. ಅಮ್ಮಸ್ ಮೇ ಛೂ಼ತೆ ಝ಼ಗೋಮಾಸ್‌ ತುಮೇಬಿ ರ‍್ಹಿಶು.
JOH 14:4 ಮೇ ವಳ್ಯೊಜ಼ವುಸ್ತೆ ಝ಼ಗೋನು ಮಾರಗ್ ತುಮೂನ ಮಾಲುಮ್‌ ಛಾ಼” ಕರಿ ಬೋಲ್ಯೊ.
JOH 14:5 ತೋಮನೆ ಯೇಸುನ “ಪ್ರಭು, ತೂ ವಳ್ಯೊಜಾ಼ಸ್ತೆ ಕಿಜ್ಗಾ಼ ಕರಿ ಹಮೂನ ಮಾಲುಮ್‌ ಕೊಯ್ನಿ, ಅಮ್ ರ‍್ಹವಾಪರ್ ಯೋ ಮಾರಗ್ ಹಮೂನ ಕಿಮ್ ಮಾಲುಮ್‌ ಪಡ್‌ಶೆ?” ಕರಿ ಬೋಲ್ಯೊ.
JOH 14:6 ಯೇಸುನೆ ಇನ, “ಮೇಸ್ ಮಾರಗ್‌ಬಿ, ಖ್ಹಾಚಾಬಿ, ಜಾನ್‌ಬಿ ಹುಯಿರ‍್ಹೋಸ್. ಮಾರೇಥಿ ಕೊಂತೆ ಕೋಣ್‌ಬಿ ಬಾಕನ ಆವಾನ ಕೋ ಹುವಾನಿ.
JOH 14:7 ತುಮೆ ಮನ ಖ್ಹಾಚಮಾಬಿ ಮಾಲುಮ್‌ ಕರಿಲಿದಾಹೋತ್ತೊ ಮಾರ ಬಾನಾಬಿ ಅಛ್ಛಿನಿತರ ಮಾಲುಮ್ ಕರಿಲಿದಾಹೋತ್‌, ಕತೋಬಿ ಹಂಕೇಥು ತುಮೆ ಬಾನ ಮಾಲುಮ್‌ ಕರಿರಾಖ್ಯಾಸ್, ಅಜು಼ ಇನ ದೇಖಿರಾಖ್ಯಾಸ್‌” ಕರಿ ಬೋಲ್ಯೊ.
JOH 14:8 ಫಿಲಿಪ್ಪನೆ ಯೇಸುನ, “ಪ್ರಭು, ಹಮೂನ ಬಾನ ವತಾಳ್; ಹಮೂನ ಎತ್ರೇಸ್ ಬಶ್‌” ಕರಿ ಬೋಲ್ಯೊ.
JOH 14:9 ಯೇಸುನೆ ಜ಼ವಾಬ್ ದೇತೊ ಹುಯಿನ್, “ಫಿಲಿಪ್ಪ, ಮೇ ಅತ್ರಾದನ್‌ ತುಮಾರ ಜೋ಼ಡೆ ರ‍್ಹಯೊತೋಬಿ, ತುನೆ ಮನ ಮಾಲುಮ್‌ ಕರಿಲಿದೊಕೊಯ್ನಿಕಿ ಶು? ಕೋಣ್ ಮನ ದೇಖ್ಯುಕಿ, ಇವ್ಣೆ ಬಾನಾಬಿ ದೇಖಿರಾಖ್ಯುಸ್‌. ಅಮ್ ರ‍್ಹವಾಪರ್, ತೂ, “ಹಮೂನ ಬಾನ ವತಾಳ್” ಕರಿ ಪುಛಾ಼ವಸ್ತೆ ಶನ?
JOH 14:10 “ಮೇ ಬಾಮ ಛೂ಼, ಅಜು಼ ಬಾ ಮಾರಾಮ ಛಾ಼ ಕರಿ ತೂ ನಂಬಾಕೊಯ್ನಿಕಿ ಶು? ಮೇ ತುಮೂನ ಬೋಲುಸ್ತೆ ವಾತೆ, ಮಾರೇಥಿ ಮೇಸ್ ಬೋಲ್ಯೋತೆ ಕಾಹೆ; ಬಾ ಮಾರ ಮಹಿ ರ‍್ಹೀನ್, ಜಿವ್ಣುಕರೀನ್ ಇನು ಕಾಮ್ನ ಕರಾಸ್.
JOH 14:11 ಮೇ ಬಾಮ ಛೂ಼, ಅಜು಼ ಬಾ ಮಾರಾಮ ಛಾ಼ ಕರಿ ಮೇ ಬೋಲುಸ್ತೆ ಆ ವಾತೇನ ನಂಬೊ. ನತರ್‌ಕಿ ಮೇ ಕರ‍್ಯೊತೆ ಖ್ಹಾರು ಅದ್ಭುತ್ ಕಾಮ್ನ ದೇಖಿನ್ ತೋಬಿ, ನಂಬೊ.
JOH 14:12 ಮೇ ತುಮೂನ ಖ್ಹಾಚ ಬೋಲುಸ್, ಮನ ನಂಬವಾಳೊ ಮೇ ಕರ‍್ಯೊತೆ ಕಾಮ್ನಖ್ಹಾರು ಯೋಬಿ ಕರ್ಶೆ, ಎತ್ರೇಸ್ ಕಾಹೆತೆ ಇನೇಥಿ ಮಹಾನ್ ಕಾಮ್ನ ಖ್ಹಾರು ಕರ್ಶೆ, ಶನಕತೊ ಮೇ ಬಾಕನ ವಳ್ಯೊಜ಼ವುಸ್‌.
JOH 14:13 ಅಜು಼ ತುಮೆ ಮಾರ ನಾಮ್‌ಪರ್‌ ಶಾತ್‌ ಮಾಂಗಿಲಿದಾತೋ, ಮೇ ತುಮಾರಖ್ಹಾಜೆ ಯೋ ಖ್ಹಾರುಸ್ ಚ಼ಲೈಶ್‌, ಅನಖ್ಹಾಜೆ ಛಿಯ್ಯಾಥಿ ಬಾನ ಮಹಿಮೆ ಉಶೆ.
JOH 14:14 ತುಮೆ ಮಾರ ನಾಮ್‌ಪರ್‌ ಶಾತ್‌ ಮಾಂಗಿಲಿದತೋಬಿ, ಮೇ ಇನ ಪೂರ ಕರಿಶ್.
JOH 14:15 ತುಮೆ ಮನ ಪ್ಯಾರ್‌ಕರವಾಳ ರ‍್ಹಯಾತೊ, ಮಾರಿ ಹುಕುಮ್‌ನ ಪಾಡಿ ಚಾ಼ಲ್‌ಶು.
JOH 14:16 ತದೆ ಮೇ ಬಾಕನ ಬೋಲಿಲೀಶ್‌, ತದೆ ಯೋ ತುಮೂನ ಬಿಜೇಕ್‍ಜ಼ಣೊ ಮದತ್‌ ಕರವಾಳನ ತುಮಾರಿ ಜೋ಼ಡ್ಮ ರ‍್ಹವಾನ ಮೋಕಲ್‌ಶೆ. ಯೋ ಮದತ್ ಕರಾವಾಳೊ ಹರ್‌ಹಮೇಶ ತುಮಾರ ಜೋ಼ಡೆ ರ‍್ಹಿಶೆ.
JOH 14:17 ಯೋ ಮದತ್ ಕರಾವಾಳೊ ಕೋಣ್‌ಕತೊ ಖ್ಹಾಚೊ಼ ಆತ್ಮಾಸ್‌. ಆ ಜಗತ್‌ ಇನ ದೇಖ್ಯುಕೊಯ್ನಿ, ಪರ್‌ಖ್ಯುಬಿ ಕೊಯ್ನಿ.ಇನಖ್ಹಾಜೆ ತುಮೆ ಇನ ಮಾಲುಮ್ ಕರಿಲಿಶು. ಕತೋಬಿ ತುಮಾರಿಜೋ಼ಡ್ಮ ಜಿವ್‌ಶೆ ಅಜು಼ ತುಮಾರ ಮಹಿರಿಶೆ.
JOH 14:18 ಮೇ ತುಮೂನ ಅನಾದ್ರಿನಿತರ ಕೋ ಮ್ಹೇಲೀಶ್‌ನಿ; ಮೇ ತುಮಾರಕನ ಪಾಛೊ಼ ಐಶ್‌.
JOH 14:19 ಬಿಜು಼ ಥೋಡ ದನ್ನ ಬಾದ್‌ಮ ಆ ಜಗತ್‌ ಮನ ದೇಕ್‌ಶೆ ಕೊಯ್ನಿ, ಕತೋಬಿ ತುಮೆ ಮನ ದೇಕ್‌ಶು; ಮೇ ಜಿವ್‌ಸ್ತೆ ಇನಖ್ಹಾಜೆ ತುಮೇಬಿ ಜಿವ್‌ಶು.
JOH 14:20 ಯೋ ದನ್ಮ ಮೇ ಮಾರ ಬಾಮಾಬಿ, ತುಮೆ ಮಾರಮಬಿ, ಇಮ್ಮಸ್ ಮೇ ತುಮಾರಮಬಿ ಛೂ಼ತೆ ಮಾಲುಮ್‌ ಕರಿಲಿಶು.
JOH 14:21 “ಮಾರಿ ಹುಕುಮ್‌ನ ಮಾನಿನ್‌, ಇನೀನಿಘೋಣಿ ಚಾ಼ಲವಾಳೋಸ್‌ ಮನ ಪ್ಯಾರ್ ಕರಾವಾಳೊ ಹುಯಿರ‍್ಹೋಸ್. ಕೋಣ್ ಮನ ಪ್ಯಾರ್ ಕರಾಸ್ಕಿ ಮಾರೊ ಬಾ ಇನ ಪ್ಯಾರ್ ಕರ್ಶೆ; ಮೇಬಿ ಇನ ಪ್ಯಾರ್ ಕರೀಶ್ ಅಜು಼ ಮೇಸ್ ಇನ ದೆಖೈಲೀಶ್‌” ಕರಿ ಬೋಲ್ಯೊ.
JOH 14:22 ತದೆ ಯೂದಾನೆ (ಆ ಇಸ್ಕರಿಯೋತ ಯೂದ ಕಾಹೆ) ಕತೋಬಿ “ಪ್ರಭು, ತೂ ಜಗತ್ನ ದೆಖೈಶ್‌ ಕೊಂತೆ ತೂ ಹಮೂನ ಖಲಿ ದೆಖೈಲ್ಯವಾನ ಕಿಮ್ ಉಶೆ?” ಕರಿ ಪುಛಾ಼ಯೊ.
JOH 14:23 ಯೇಸುನೆ ಇನ, “ಕೋಣ್ ಮನ ಪ್ಯಾರ್ ಕರಾಸ್ಕಿ, ಇವ್ಣೆ ಮಾರಿ ವಾತೇನ ಪಾಡಿ ಚಾ಼ಲ್‌ಷೆ. ಮಾರೊ ಬಾ ಇನ ಪ್ಯಾರ್ ಕರ್ಶೆ, ಅಜು಼ ಮಾರೊ ಬಾಬಿ ಮೇ ಭೇಜ಼ಣ ಇನಾಕನ ಐನ್, ಇನಜೋ಼ಡೆ ಜಿವ್‌ಶು.
JOH 14:24 ಮನ ಪ್ಯಾರ್‌ಕರಾಕೊಂತೆ ಇವ್ಣೆ ಮಾರಿ ವಾತೇನ ಪಾಡಿ ಚಾ಼ಲಾಕೊಯ್ನಿ; ತುಮೆ ಖ್ಹಮ್‌ಜು಼ಕರಾತೆ ಮಾರಿ ವಾತೆ ಕಾಹೆ, ಮನ ಮೋಕ್‌ಲ್ಯೊತೆ ಬಾನಿಸ್‌ ವಾತೆ.
JOH 14:25 ಮೇ ತುಮಾರ ಜೋ಼ಡೆ ರ‍್ಹವಾನಿಸ್ ವಖ್ಹತ್‌ಮ, ಮೇ ಆ ಖ್ಹಾರು ತುಮೂನ ಬೋಲಿರಾಖ್ಯೊಸ್.
JOH 14:26 ಕತೋಬಿ ಯೋ ಮದತ್‌ ಕರವಾಳೊ, ಕತೊ ಮಾರ ನಾಮ್‌ಪರ್‌ ಬಾ ಮೋಕ್‌ಲ್‌ಶೇತೆ ಪವಿತ್ರಾತ್ಮಸ್ ತುಮೂನ ಖ್ಹಾರೂಸ್ ಶಿಕಾಡ್‍ಶೆ ಅಜು಼ ಮೇ ಬೋಲ್ಯೋತೆ ಅಖ್ಖಾಸ್ನ ತುಮಾರಿ ಯಾದ್ಮ ಲ್ಯಾವ್‌ಶೆ.
JOH 14:27 ಮೆ ಶಾಂತಿನ ತುಮಾರಮ ಮ್ಹೇಲಿನ್ ವಳ್ಯೊಜ಼ವುಸ್‌, ಮಾರಾಮ ಛಾ಼ತೆ ಶಾಂತಿನ ತುಮೂನ ದೆವುಸ್‌; ಆ ಜಗತ್‌ ದೇಸ್ತೆ ಇಮ್‌ ಕಾಹೆ, ಮೇ ತುಮೂನ ದೆವ್‍ಸ್ತೆ, ತುಮಾರೊ ದಿಲ್‌ ಕಲಾವಾದೆ ನಕೊ, ಅಜು಼ ತುಮೆ ಡರೊ ನಕೊ.
JOH 14:28 ಮೇ ವಳ್ಯೊಜ಼ವುಸ್‌, ಕತೋಬಿ ಪಾಛೊ಼ಫರಿ ತುಮಾರಕನ ಐಶ್‌, ಕರಿ ಮೇ ಬೋಲ್ಯೋತೆ ವಾತೇನ ತುಮೆ ಖ್ಹಮ್‌ಜಿರಾಖ್ಯಾಸ್‌, ತುಮೆ ಮನ ಪ್ಯಾರ್ ಕರಾವಾಳು ಹುಯಿರ‍್ಹಾಹೊತ್ತೊ, ಮೇ ಬಾಕನ ವಳ್ಯೊಜ಼ವುಸ್ತೆ ಬಾರೇಮ ಖ್ಹುಶಿ ಕರ‍್ಯಾಹೋತ್‌; ಶನಕತೊ ಬಾ ಮಾರೇಥಿಬಿ ಮಹಾನ್ ಹುಯಿರ‍್ಹೋಸ್.
JOH 14:29 ಆ ಖ್ಹಾರು ಚಾ಼ಲಾನ ಅಗಾಡಿಸ್, ಮೇ ತುಮೂನ ಹಂಕೇಸ್‌ ಆ ಖ್ಹಾರು ಬೋಲಿರಾಖ್ಯೊಸ್. ತದೆ ಯೋ ಚಾ಼ಲಾನಿ ವಖ್ಹತ್‌ಮ ತುಮೆ ನಂಬ್‌ಶು.
JOH 14:30 ಬಿಜು಼ ಮೇ ತುಮಾರ ಜೋ಼ಡೆ ಜಾ಼ಖ್ಹತ್ ವಾತೆ ಕೋ ಬೋಲೂನಿ, ಶನಕತೊ ಆ ಜಗತ್ನ ಅದಿಕಾರಿ ವಳ್ಯಾವಸ್. ಇನ ಮಾರಪರ್ ಖೆವಿಸ್ ಹಕ್‌ ಕೊಯ್ನಿ.
JOH 14:31 ತೋಬಿ ಮೇ ಬಾನ ಪ್ಯಾರ್ ಕರುಸ್ ಕರಿ ಅಜು಼ ಆ ಜಗತ್‌ ಶಿಕಿಲೇವ್ಣು ಕರಿ, ಬಾನೆ ಮನ ದಿದೋತೆ ಹುಕುಮ್‌ನಿತರಸ್ ಮೇ ಕರುಸ್. “ಆವೊ, ಅಪ್ಣೆ ಹಜ್ಜಾ಼ಥು ಜ಼ಯ್ಯೆ.”
JOH 15:1 “ಮೇಸ್ ಖ್ಹಾಚೊ಼ ದ್ರಾಕ್ಷಿನೊ ವೇಲೊ, ಮಾರೊ ಬಾ ಬಾಗ್‌ನ ದೇಕ್-ಭಾಲ್‌ ಕರಾವಾಳೊ.
JOH 15:2 ಮಾರಾಮ ರ‍್ಹೀನ್, ಪಂಡು ದೇಯಿಕೊಂತೆ ಹರೇಕ್ ಡಾಳಿನ ಯೋ ಕತ್ರಿನಾಖಸ್‌; ಅಜು಼ ಪಂಡು ದೇಸ್ತೆ ಹರೇಕ್ ಡಾಳಿನ ಬಿಜೂ಼ಬಿ ಜಾ಼ಖ್ಹತ್ ಪಂಡು ದ್ಯವಾನಿಘೋಣಿ ಇನ ಛಾ಼ಟಿನ್ ಪಾಕ್‍ಕರಾಸ್.
JOH 15:3 ಮೇ ತುಮೂನ ಬೋಲ್ಯೊತೆ ವಚನ್‌ಥಿ ತುಮೆ ಅಗಾಡಿಸ್ ಪಾಕ್‌ ಹುಯಿರ‍್ಹಾಸ್‌.
JOH 15:4 ತುಮೆ ಮಾರಾಮ ರ‍್ಹವೊ, ಮೇ ತುಮಾರಾಮ ರ‍್ಹೀಶ್. ಡಾಳಿಯೆ ವೇಲಾನ ಜೋ಼ಡೆ ನಾ ರ‍್ಹಿಯುತೊ, ಇನುಯೋಸ್ ಪಂಡು ದ್ಯವಾನ ಕೋ ಹುವ್ವಾನಿಕಿ, ಇಮ್ಮಸ್ ತುಮೆ ಮಾರಾಮ ನಾ ರ‍್ಹಯಾತೊ, ಫಲ್‍ದ್ಯವಾನ ಕೋ ಉಶೇನಿ.
JOH 15:5 ಮೇ ದ್ರಾಕ್ಷಿನೊ ವೇಲೊ, ಅಜು಼ ತುಮೆ ಡಾಳಿಯೆ. ಏಕ್‌ ಜ಼ಣೊ ಮಾರಾಮ ಅಜು಼ ಮೇ ಇನಾಮ ರ‍್ಹಯೋತೊ, ಯೋಸ್‌ ಜಾ಼ಖ್ಹತ್ ಪಂಡು ದಿಶೆ; ಕತೋಬಿ ತುಮೆ ಮನ ಮ್ಹೆಂದಿನ್ ಶಾತ್ಬಿ ಕರಾನ ಕೋ ಹುವಾನಿ.
JOH 15:6 ಕೋಣ್ ಮಾರಾಮ ಕೋ ರ‍್ಹೇಯ್ನಿಕಿ, ಯೋ ಭಾರ್ ಫೇಕೈಗಯೂತೆ ಡಾಳಿನಿತರ ಛಾ಼, ಯೋ ಡಾಳಿ ಖ್ಹುಕೈಜಾ಼ಸ್; ಯೋ ಡಾಳಿಯೇನ ಅದ್ಮಿ ಎಕ್ಟು ಕರೀನ್, ಆಗ್‌ಮ ಫೇಕಿನಾಖಸ್‌, ಹಿಜ್ಜಾ಼ ಯೋ ಬಳಿಜಾ಼ಸ್‌.
JOH 15:7 ತುಮೆ ಮಾರಾಮಬಿ ಮಾರಿ ವಚನ್ ತುಮಾರಾಮ ರ‍್ಹಯೀತೊ, ಶಾತ್‌ ಮಾಂಗಿಲಿದಾತೋಬಿ ಯೋ ತುಮೂನ ಮಳ್‌ಶೆ.
JOH 15:8 ತುಮೆ ಜಾ಼ಖ್ಹತ್ ಪಂಡು ದಿಶುತೆ ಇನೇಥಿಸ್ ಮಾರ ಬಾನ ಮಹಿಮೆ ಉಶೆ; ಅಜು಼ ಅಮ್ ತುಮೆ ಮಾರ ಶಿಷ್ಯರ್‌ಉಶು.
JOH 15:9 ಬಾನೆ ಮನ ಕಿಮ್ ಪ್ಯಾರ್ ಕರ‍್ಯೋಕಿ ಇಮ್ಮಸ್, ಮೇ ತುಮೂನ ಪ್ಯಾರ್ ಕರುಸ್; ತುಮೆ ಮಾರಿ ಲಾಡ್ಮ ಮಳಿರ‍್ಹವೊ.
JOH 15:10 ಮೇ ಮಾರ ಬಾನಿ ಹುಕುಮ್‌ನ ಪಾಡಿ ಚಾ಼ಲಿನ್, ಇನಿ ಲಾಡ್ಮ ಛೂ಼ತೆ ಇಮ್ಮಸ್, ತುಮೆ ಮಾರಿ ಹುಕುಮ್‌ನ ಪಾಡಿ ಚಾ಼ಲ್ಯಾತೊ, ಮಾರಿ ಲಾಡ್ಮ ಏಕ್‌ ಹುಯಿರ‍್ಹೀಶು.
JOH 15:11 ಮಾರಾಮ ಛಾ಼ತೆ ಖ್ಹುಶಿ ತುಮಾರಮಾಬಿ ರ‍್ಹೇಣು ಕರಿ, ಅಜು಼ ತುಮಾರಿ ಖ್ಹುಶಿ ಭರೈನ್ ಝ಼ಲಕ್‌ಣು ಕರಿ ಮೇ ಆ ಖ್ಹಾರು ತುಮೂನ ಬೋಲಿರಾಖ್ಯೊಸ್.
JOH 15:12 ಮೇ ತುಮೂನ ಪ್ಯಾರ್ ಕರ‍್ಯೊತೆ ಇಮ್ಮಸ್, ತುಮೇಬಿ ಏಕ್‌ಥಿ-ಏಕ್‌ ಪ್ಯಾರ್ ಕರ‍್ನು, ಕರಿ ಬೋಲಾನುಸ್ ಮಾರಿ ಹುಕುಮ್‌.
JOH 15:13 ಇನೊ ಜಾನ್ನಾಸ್ ದೋಸ್ತ್ ಖ್ಹಾರಾನಖ್ಹಾಜೆ ದೇಸ್ತೆ, ಲಾಡ್‌ಥಿ ಮಹಾನ್ ಪ್ಯಾರ್ ಬಿಜು಼ ಕೆಹುಸ್‌ ಕೊಯ್ನಿ.
JOH 15:14 ಮೇ ತುಮೂನ ದಿದೋತೆ ಹುಕುಮ್‌ನಿಘೋಣಿ ತುಮೆ ಚಾ಼ಲ್ಯಾತೊ, ತುಮೆ ಮಾರ ದೋಸ್ತ್.
JOH 15:15 ಬಿಜು಼ ಖ್ಹಾಮ್ಣೆ ಮೇ ತುಮೂನ ಆಳ್‌ ಕರಿ ಬುಲಾವ್ ಕೊಯ್ನಿ, ಶನಕತೊ ಯಜಮಾನ್ ಶಾತ್‌ ಕರುಕರಸ್ ಕರಿ ಇನ ಆಳ್‌ನ ಮಾಲುಮ್‌ ಕೋ ರ‍್ಹೇಯ್ನಿ. ಅನಬದಲ್ ಮೇ ತುಮೂನ ದೋಸ್ತ್ ಕರಿ ಬುಲಾವುಸ್‌, ಶನಕತೊ ಬಾಥಿ ಮೇ ಶಾತ್ ಖ್ಹಮ್‌ಜ್ಯೋಕಿ ಖ್ಹಾರಸ್ನ ತುಮೂನ ಬೋಲಿರಾಖ್ಯೊಸ್.
JOH 15:16 ತುಮೆ ಮನ ಚೂ಼ಣಿನ್ ಕಾಡಿರಾಖ್ಯಕೊಯ್ನಿ; ಮೇ ತುಮೂನ ಚೂ಼ಣಿನ್ ಕಾಡಿರಾಖ್ಯೊಸ್, ತುಮೆ ಜೈ಼ನ್‌, ಪಂಡು ದೇವ್ಣುಕರಿ ಅಜು಼ ಯೋ ಪಂಡು ಕೆದೇಬಿ ದ್ಯವಾನು ಹುಯಿರ‍್ಹೇಣು ಕರಿ, ಮೇ ತುಮೂನ ನೇಮ್‌ಶೈರಾಖ್ಯೋಸ್‌. ಅನಖ್ಹಾಜೆಸ್ ಮಾರ ನಾಮ್‍ಥಿ ತುಮೆ ಶಾತ್‌ ಮಾಂಗಿಲಿದಾತೋಬಿ ಬಾ ತುಮೂನ ಯೋ ದಿಶೆ.
JOH 15:17 ತುಮೆ ಏಕ್‌ಥಿ-ಏಕ್‌ ಪ್ಯಾರ್ ಕರ‍್ನು, ಕರಿ ಬೋಲಾನುಸ್ ಮಾರಿ ಹುಕುಮ್‌.
JOH 15:18 “ಆ ಜಗತ್‌ ತುಮೂನ ವಹೇರ್‌ ಕರ‍್ಯೂತೊ, ಯೋ ಪಹಿಲೆ ಮನ ವಹೇರ್‌ ಕರ‍್ಯು ಕರಿ ತುಮೆ ಯಾದ್ ಕರಿಲೆವೊ.
JOH 15:19 ತುಮೆ ಆ ಜಗತ್‌ವಾಳ ಹುಯಿರ‍್ಹಾಹೋತ್ತೊ, ಆ ಜಗತ್‌ವಾಳು ತುಮೆ ಇವ್ಣ ಭಣಿವಾಳ ಕರಿ ಪ್ಯಾರ್ ಕರ‍್ಯುಹೊತ್. ಕತೋಬಿ ತುಮೆ ಜಗತ್‌ ಭಣಿವಾಳ ಕಾಹೆತೆ ಇನಖ್ಹಾಜೆ, ಅಜು಼ ಮೇ ತುಮೂನ ಜಗತ್‌ಮಾಥು ಚೂ಼ಣಿನ್ ಕಾಡಿರಾಖ್ಯೋಸ್ತೆ ಇನಖ್ಹಾಜೆ, ಆ ಜಗತ್‌ ತುಮಾರಪರ್ ವಹೇರ್‌ ಕರಾಸ್.
JOH 15:20 ಯಾದ್ ಕರಿಲೆವೊ ಆಳ್‌ ಯಜಮಾನ್‍ಥಿ ಮೋಟೊ ಕಾಹೆ’ ಕರಿ ಮೇ ಬೋಲ್ಯೋತೆ ವಾತೆ ಶಾತ್‍ಕತೊ ಇವ್ಣೆ ಮನ ಖ್ಹತಾಯೂತೊ, ತುಮೂನಾಬಿ ಖ್ಹತಾವ್‌ಶೆ; ಇವ್ಣೆ ಮಾರಿ ವಾತೇನ ಪಾಡಿ ಚಾ಼ಲ್ಯುತೊ, ತುಮಾರಿ ವಾತೆನಾಬಿ ಪಾಡಿ ಚಾ಼ಲ್‌ಷೆ.
JOH 15:21 ಕತೋಬಿ ಇವ್ಣೆ ಮನ ಮೋಕ್ಲಿರಾಖ್ಯೊತೆ ಇನ ಮಾಲುಮ್ ಕರ‍್ಯುಕೊಂತೆ ಇನಖ್ಹಾಜೆ ಆ ಖ್ಹಾರುಮಾರ ನಾಮ್‍ಥಿ ತುಮೂನ ಕರ್ಶೆ.
JOH 15:22 ಮೇ ಐನ್ ಆ ಜಗತ್ನಿ ಅದ್ಮಿವೊನಿ ಜೋ಼ಡೆ ವಾತೆ ನಾ ಬೋಲ್ಯೊಹೊತ್ತೊ, ಇವ್ಣುನ ಪಾಪಿ ದೋಷಿಕರಿ ಬೋಲಾಯುಹೊತ್‌ ಕೊಯ್ನಿ. ಕತೋಬಿ ಹಮ್ಕೆ ಮೇ ಐನ್ ವಾತೆ ಬೋಲಿರಾಖ್ಯೊಸ್ ಇನಖ್ಹಾಜೆ ಇವ್ಣ ಪಾಪ್ನ ಖಿವು ಭಾಣುಬಿ ಕೊಯ್ನಿ.
JOH 15:23 ಮಾರಪರ್ ವಹೇರ್‌ ಕರಾವಾಳು ಮಾರ ಬಾಪರ್‌ಬಿ ವಹೇರ್‌ ಕರಾವಾಳು ಹುಯಿರ‍್ಹುಸ್‍.
JOH 15:24 ಏಕ್‍ ವಖ್ಹತ್ ಖ್ಹಾರಕಾಮ್ನ ಮೇ ಇವ್ಣಾಮ ನಾಕರ‍್ಯೊಹೋತ್ತೊ, ಇವ್ಣಾಪರ್ ಪಾಪ್ ಕೋ ರ‍್ಹಯುಹೋತ್ನಿ, ಕತೋಬಿ ಹಮ್ಕೆ ಇವ್ಣೆ ದೇಖಿರಾಖ್ಯೂಸ್‌, ತೋಬಿ ಮಾರಪರ್‌ಬಿ ಮಾರ ಬಾಪರ್‌ಬಿ ವಹೇರ್‌ ಕರಾಸ್.
JOH 15:25 ‘ಇವ್ಣೆ ಮನ ನೀಕೊಯ್ನಿತೇಸ್‌ ವಹೇರ್‌ ಕರ‍್ಯು’ ಕರಿ ಇವ್ಣಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ವಾತೆ ಪೂರಹುವಾನಖ್ಹಾಜೆ ಅಮ್ ಹುಯೂತೆ.
JOH 15:26 “ಬಾ ಕಂಥು ಆವ್‌ಶೇತೆ ಯೋ ಮದತ್‌ ಕರವಾಳೊ ಆತ್ಮ ಹುಯಿರ‍್ಹೋಸ್. ಯೊ ದೇವ್ನು ಖ್ಹಾಚ಼ನ ಬೋಲಸ್, ಯೋ ತುಮುನ ಮಾರಿ ಬಾರೇಮ ಸಾಕ್ಷಿ ಬೋಲ್‌ಶೆ.
JOH 15:27 ತುಮೆ ಶುರುವಾತ್‌ಥೂಸ್ ಮಾರ ಜೋ಼ಡೆ ಥಾತೆ ಇನಖ್ಹಾಜೆ, ತುಮೇಬಿ ಮನ ಸಾಕ್ಷಿ ಹುಯಿರಾಸ್.
JOH 16:1 ಆ ಖ್ಹಾರಿ ವಾತೆ ಮಾರಿ ಬಾರೇಮ ಮೇ ತುಮುನ ಬೋಲ್ಯೊತೆ ಶನಖ್ಹಾಜೆ ಕತೊ ತುಮಾರಿ ವಿಶ್ವಾಸ್‌ ನಾ ಟುಟಿಪಡ್ನುಕರಿ.
JOH 16:2 ಇವ್ಣೆ ತುಮೂನ ಸಬಾಮಂದಿರ್‌ಥು ಭಾರ್‌ ಕಾಡಿನಾಕ್‌ಶೆ; ಯೋ ಕೊಂತೆ ತುಮೂನ ಮಾರಿನಾಖವಾಳೊ ಇನೆ ದೇವ್ನ ಬಲಿದಿದೊಕರಿ ಸೋಚಾನ ಹಗಾಮ್ ಆವ್‌ಶೆ.
JOH 16:3 ಅದ್ಮಿಖ್ಹಾರು ಬಾನ ರ‍್ಹವೊ, ಮನ ರ‍್ಹವೊ ಮಾಲುಮ್‌ ಕರಿರಾಖ್ಯುಕೊಯ್ನಿತೆ ಇನಖ್ಹಾಜೆ, ತುಮೂನ ಅಮ್ ಖ್ಹಾರು ಕರ್ಶೆ.
JOH 16:4 ಕತೋಬಿ ಮೇ ತುಮೂನ ಆ ಖ್ಹಾರು ಅನಖ್ಹಾಜೆ ಬೋಲಿರಾಖ್ಯೊಸ್, ಶನಕತೊ ಆ ಖ್ಹಾರು ಚ಼ಲಾ಼ನಿ ವಖ್ಹತ್‌ಮ, ಮೇ ಪಹಿಲೆ ಬೋಲ್ಯೋತೆ ವಾತೆ ತುಮೆ ಯಾದ್ ಕರಿಲಿಶು. “ಮೇ ತುಮಾರ ಜೋ಼ಡೆ ಥೋತೆ ಇನಖ್ಹಾಜೆ ಅಗಾಡಿಸ್ ಆ ಖ್ಹಾರು ಕೋ ಬೋಲ್ಯೋನಿ.
JOH 16:5 ಕತೋಬಿ ಹಮ್ಕೆ, ಮೇ ಮನ ಮೋಕ್‌ಲ್ಯೊತೆ ಇನಾಕನ ವಳ್ಯೊಜ಼ವುಸ್‌, ತೋಬಿ ತೂ ಕಿಜ್ಗಾ಼ ವಳ್ಯೊಜಾ಼ಸ್‌? ಕರಿ ತುಮಾರಾಮ ಏಕ್‌ನೇಬಿ ಮನ ಪುಛಾ಼ಯಕೊಯ್ನಿ.
JOH 16:6 ಹಮ್ಕೆ ಮೇ ತುಮೂನ ಆ ಖ್ಹಾರಿ ವಾತೆ ಬೋಲ್ಯೋತೆ ಇನಖ್ಹಾಜೆ ತುಮಾರ ದಿಲ್ಮ ದುಖ್ ಭರೈರ‍್ಹೂಸ್.
JOH 16:7 ಕತೋಬಿ ಮೇ ತುಮೂನ ಖ್ಹಾಚ ಬೋಲುಕರುಸ್, ಮೇ ಜಾ಼ವಾನು ತುಮೂನ ಅಛ್ಛು಼ ಹುಯಿರ‍್ಹುಸ್‍, ಶನಕತೊ ಮೇ ನಾ ಗಯೋತೊ, ಯೋ ಮದತ್‌ ಕರವಾಳೊ ತುಮಾರಕನ ಕೋ ಆವ್‌ಶೇನಿ.ಕತೋಬಿ ಮೇ ಗಯೋತೊ, ಇನ ತುಮಾರಕನ ಬೋಲಿ ಮೋಕ್ಲೀಶ್.
JOH 16:8 ಯೋ ಆವ್‌ಶೇತೆ ತದೆ ಪಾಪ್, ನೀತಿ ಅಜು಼ ನ್ಯಾವ್ ತೀರ್ಪ್‌ನ ಬಾರೇಮ ಜಗತ್ನ ಮಾಲುಮ್‌ ಕರಾವ್‌ಶೆ.
JOH 16:9 ಪಾಪ್ನಿ ಬಾರೇಮಾಬಿ ಇವ್ಣೆ ಮನ ವಿಶ್ವಾಸ್‌ ಕರ‍್ಯುಕೊಯ್ನಿ.
JOH 16:10 ಮೇ ಬಾಕನ ಜೈ಼ನ್‌, ನೀತಿನಿ ಬಾರೇಮ ಅದ್ಮಿಖ್ಹಾರನ ಖ್ಹಾಮ್ಣೆ ಸಾಕ್ಷಿದಿಶ್, ಬಿಜು಼ ಅನಪಾರ್ ಮನ ಘಣಿ ವಖ್ಹತ್ ದೇಕ್‌ಶು ಕೊಯ್ನಿ.
JOH 16:11 ನ್ಯಾವ್‌ನಿ ಬಾರೇಮ ಆ ಜಗತ್ನ ಅದಿಪತಿನ ನ್ಯಾವ್‍ನಿ ತೀರ್ಪ್ ಹುಯಿಗಯು.
JOH 16:12 ಮೇ ತುಮೂನ ಬೋಲ್ನುತೆ ವಾತೆ ಬಿಜೂ಼ಬಿ ಘಣಿ ಛಾ಼, ಕತೋಬಿ ಹಮ್ಕೆ ಇನ ಝೇಲಾನ ತುಮೂನ ಕೋ ಉಶೇನಿ.
JOH 16:13 ಕತೋಬಿ ಖ್ಹಾಚೊ಼ ಆತ್ಮ ಆವ್‌ಶೇತೆ ತದೆ, ಯೋ ತುಮೂನ ಖ್ಹಾರಿಸ್ ಬಾರೇಮ ಖ್ಹಾಚಾಮ ಚ಼ಲೈಲಿಜಾಷೆ. ಯೋ ಬೋಲ್‍ಶೇತೆ ಇನಿ ವಾತೆ ಕಾಹೆ, ಯೋ ಶಾತ್‌ ಖ್ಹಮ್‌ಜಾ಼ಸ್ಕಿ ಯೋಸ್‌ ತುಮೂನ ಬೋಲ್‌ಶೆ; ಅಜು಼ ಖ್ಹಾಮ್ಣೆ ಚಾ಼ಲ್‌ಶೇತೆ ಇನಿ ಬಾರೇಮ ತುಮೂನ ಬೋಲ್‌ಶೆ.
JOH 16:14 ಯೋ ಮೇ ಬೋಲುಸ್ತೆ ವಾತೆ ಲೀನ್‌, ತುಮೂನ ಬೋಲಿ ವತಾಳಸ್ತೆ ಇನಖ್ಹಾಜೇಸ್ ಮನಾಸ್ ಮಹಿಮೆ ಕರಸ್.
JOH 16:15 ಬಾಕನ ಛಾ಼ತೆ ಅಖ್ಖೂಸ್ ಮಾರುಸ್‌; ಇನಖ್ಹಾಜೇಸ್ ಪವಿತ್ರಾತ್ಮ ಮೇ ಬೋಲುಸ್ತೆ ಇನಾಸ್ ಲೀನ್‌, ಯೋ ತುಮೂನ ಬೋಲ್‌ಶೆ ಕರಿ ಮೇ ಬೋಲ್ಯೋತೆ.”
JOH 16:16 “ಥೋಡ ದನ್ನ ಬಾದ್‌ಮ ತುಮೆ ಮನ ದೇಕ್‌ಶು ಕೊಯ್ನಿ, ಕತೋಬಿ ಇನ ಬಾದ್‌ಮ ಥೋಡ ದನ್ ಕೇಡೆ ಮನ ದೇಕ್‌ಶು” ಕರಿ ಬೋಲ್ಯೊ.
JOH 16:17 ಅನ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಥೋಡಾನೆ, “ಅನಿ ಮತ್‌ಲಬ್ ಶಾತ್‌? ಥೋಡ ದನ್ನ ಬಾದ್‌ಮ, ತುಮೆ ಮನ ದೇಕ್ಶುಕೊಯ್ನಿ,ಕತೋಬಿ ಅನ ಬಾದ್‌ಮ ಥೋಡ ದನ್‌ಕೇಡೆ ಮನ ದೇಕ್‌ಶು ಕರಿ ಬೋಲಾಸ್ನಿ? ಅಜು಼, ‘ಶನಕತೊ, ಮೇ ಬಾಕನ ವಳ್ಯೊಜ಼ವುಸ್‌ ಕರೀಬಿ ಬೋಲಾಸ್ನಿ?” ಕರಿ ಇವ್ಣ-ಇವ್ಣ ಮಹಿ ವಾತೆ ಬೋಲಿಲಿದು.
JOH 16:18 ಅನೆ ಬೋಲ್ಯೊತೆ ‘ಥೋಡ ದನ್ನ ಬಾದ್‌ಮ’ ಕರಿ ಅನಿ ಮತ್‌ಲಬ್ ಶಾತ್‌? ಶಾತ್‌ ಬೋಲಸ್ಕಿ ಹಮೂನ ಮಾಲುಮ್‌ ಕೊಯ್ನಿ!” ಕರಿ ಬೋಲಿಲಿದು.
JOH 16:19 ಯೇಸುನೆ ಇವ್ಣೆ ಇನ ಪುಛಾ಼ವ್ಣು ಕರಿ ಛಾ಼ ಕರಿ ಮಾಲುಮ್‌ ಕರಿಲೀನ್, ಇವ್ಣುನ, “ಥೋಡ ದನ್ನ ಬಾದ್‌ಮ ತುಮೆ ಮನ ದೇಕ್‌ಶು ಕೊಯ್ನಿ, ಕತೋಬಿ ಅನ ಬಾದ್‌ಮ ಥೋಡ ದನ್ನ ಕೇಡೆ ತುಮೆ ಮನ ದೇಕ್‌ಶು; ಆಸ್ಕಿ ಶು ತುಮೆ ತುಮಾರ-ತುಮಾರ ಮಹಿ ಪುಛಾ಼ವ್‌ ಕರಾಸ್ತೆ?
JOH 16:20 ಮೇ ತುಮೂನ ಖ್ಹಾಚ ಬೋಲುಕರುಸ್, ತುಮೆ ರೊವ್‌ತಾಹುಯಿನ್, ಕುರ್‌ಲ್ಹಾವ್‌ಶು, ಕತೋಬಿ ಜಗತ್‌ವಾಳು ಖ್ಹುಶೀಕರ್‌ಶೆ; ತುಮೂನ ದುಖ್ ಉಶೆ, ಕತೋಬಿ ತುಮಾರು ದುಖ್ ಜೈ಼ನ್‌, ಖ್ಹುಶಿ ಆವ್‌ಶೆ.
JOH 16:21 ಏಕ್‌ ತಯೇಡ ಜ಼ಣಾನಿ ವಖ್ಹತ್‌ಮ, ಇನಿ ಅಜಾ಼ನಿ ವಖ್ಹತ್ ಐಗೈ ಕರಿ ದುಖ್ ಕರಾಸ್, ಕತೋಬಿ ಲಡ್ಕು ಪೈದಾ ಕರಾನ ಬಾದ್‌ಮ, ಜಗತ್‌ಮ ಏಕ್‌ ಲಡ್ಕು ಪೈದಾ ಹುಯಿನ್ ಆಯುತೊ, ಯೋ ಖ್ಹುಶಿಥಿ ಅಜಾ಼ನ ಭೈಕಿಜಾ಼ಸ್‌.
JOH 16:22 ಇಮ್ಮಸ್ ತುಮೂನಾಬಿ ಹಮ್ಕೆ ದುಖ್ ರ‍್ಹಯುತೋಬಿ, ಮೇ ತುಮೂನ ಪಾಛೊ಼ ದೇಖಿಶ್‌, ತದೆ ತುಮಾರು ದಿಲ್‌ ಖ್ಹುಶೀಥಿ ಭರೈಜಾ಼ಶೆ, ಅಜು಼ ಕಿನೇಥೀಬಿ ತುಮಾರಿ ಖ್ಹುಶಿನ ದೂರ್ ಕಾಡಾನ ಕೋ ಉಶೇನಿ.
JOH 16:23 ಯೋ ದನ್ಮ, ತುಮೆ ಮನ ಶಾತ್ಬಿ ಕೋ ಪುಛಾ಼ವ್‌ಶುನಿ. ಮೇ ತುಮೂನ ಖ್ಹಾಚ ಬೋಲುಕರುಸ್, ತುಮೆ ಮಾರ ನಾಮ್‌ಪರ್‌ ಶಾತ್‌ ಮಾಂಗಿಲಿದಾತೋಬಿ ಬಾ ತುಮೂನ ಯೋ ದಿಶೆ.
JOH 16:24 ತುಮೆ ಹಂಕೆತೋಡಿ ಮಾರ ನಾಮ್‌ಪರ್‌ ಶಾತ್ಬಿ ಮಾಂಗಿರಾಖ್ಯಕೊಯ್ನಿ; ಮಾಂಗಿಲೆವೊ ತುಮೂನ ಮಳ್‌ಶೆ, ತದೆ ತುಮಾರಿ ಖ್ಹುಶಿ ಭರೈನ್ ಝ಼ಲಕ್‌ಶೆ” ಕರಿ ಬೋಲ್ಯೊ.
JOH 16:25 ಮೇ ಆ ಖ್ಹಾರು ಮತ್ಲಬ್‌ಥಿ ತುಮೂನ ಬೋಲಿರಾಖ್ಯೊಸ್. ಕತೋಬಿ ಬಿಜು಼ ಖ್ಹಾಮ್ಣೆ ಮತ್ಲಬ್‌ನಿ ಖೇಣಿಥಿ ಕಾಹೆತೆ ಬಾನಿ ಬಾರೇಮ ನೇರ್‌ವಳಿಥಿ ತುಮಾರ ಜೋ಼ಡೆ ವಾತೆ ಬೋಲಾನಿ ವಖ್ಹತ್ ಆವ್‌ಶೆ.
JOH 16:26 ಯೋ ದನ್ಮ, ಮಾರ ನಾಮ್‌ಪರ್‌ ಮಾಂಗಿಲಿಶು; ಮೇ ಬಾಕನ ತುಮಾರಖ್ಹಾಜೆ ಮಾಂಗಿಲೀಶ್‌ ಕರಿ ಮೇ ತುಮೂನ ಬೋಲಿಶ್ ಕೊಯ್ನಿ.
JOH 16:27 ತುಮೆ ಮನ ಪ್ಯಾರ್‌ಕರೀನ್ ಮೇ ಬಾಕಂಥೊ ಆಯೋಕರಿ ವಿಶ್ವಾಸ್‌ ಕರ‍್ಯಾತೆ ಇನಖ್ಹಾಜೆ ಬಾಸ್ ತುಮೂನ ಪ್ಯಾರ್‌ಕರಾಸ್‌.
JOH 16:28 ಮೇ ಬಾಕಂಥೊ ಜಗತ್ನ ಆಯೊ; ಹಮ್ಕೆ ಆ ಜಗತ್ನ ಮ್ಹೆಂದಿನ್, ಬಾಕನ ವಳ್ಯೊಜ಼ವುಸ್‌” ಕರಿ ಬೋಲ್ಯೊ.
JOH 16:29 ತದೆ ಶಿಷ್ಯರ್‌ನೆ ಇನ, “ಹಮ್ಕೆ ತೂ ಮತಲಬ್‌ಥಿ ಕೋ ಬೋಲುಕರಾನೀತೆ ನೇರ್‌ವಳಿಥಿ ಬೋಲುಕರಾಸ್‌.
JOH 16:30 ತುನ ಖ್ಹಾರುಸ್‌ ವಾತೆ ಮಾಲುಮ್‌ ಕರಿ,ಹಮೂನ ಮಾಲುಮ್. ಅಜು಼ ತುನ ಕೋಣ್‌ಬಿ ಪುಛಾ಼ವಾನಿ ಜ಼ರೂರತ್ ಕೊಯ್ನಿ ಅನೇಥಿ ತೂ ದೇವ್‌ಕಂಥೊ ಆಯೊಹುಯೊ ಕರಿ ಹಮೆ ವಿಶ್ವಾಸ್ ಕರಿಯೇಸ್” ಕರಿ ಬೋಲ್ಯ.
JOH 16:31 ತದೆ ಯೇಸುನೆ ಇವ್ಣುನ, “ಹಮ್ಕೆ ವಿಶ್ವಾಸ್‌ ಕರೋಸ್ಕಿಶು?
JOH 16:32 ಹಂದೇಖೊ, ವಖ್ಹತ್ ಐರ‍್ಹೀಸ್ ಹಂಕೇಸ್‌ ಯೋ ವಖ್ಹತ್ ಐರ‍್ಹೀಸ್, ತುಮಾರಾಮ ಏಕೇಕ್‌ ಜ಼ಣು, ಇವ್ಣಿ-ಇವ್ಣಿಝ಼ಗೋಮ ಛಿದ್‍ರೈಜಾ಼ಶು ಮನ ಏಕ್ಲನಾಸ್‌ ಮ್ಹೆಂದಿದ ಕರಿತುಮೆ ನಕೊಸೋಚೊ ಕತೋಬಿ ಮಾರೊ ಬಾ ಮಾರ ಜೋ಼ಡೆ ಛಾ಼.
JOH 16:33 ತುಮೆ ಮಾರಾಮ ರ‍್ಹೀನ್, ತುಮೂನ ಶಾಂತಿ ಮಳ್‌ಣು ಕರಿ ಆ ಖ್ಹಾರು ತುಮೂನ ಬೋಲಿರಾಖ್ಯೊಸ್. ಜಗತ್‌ಮ ತುಮೂನ ಖ್ಹತಾಪ್ಣಿ ಛಾ಼, ಕತೋಬಿ ಘಟ್ ರ‍್ಹವೊ,ಶನಕತೊ ಮೇ ಜಗತ್ನ ಜೂತಿರಾಖ್ಯೋಸ್‌” ಕರಿಬೋಲ್ಯೊ.
JOH 17:1 ಯೇಸುನೆ ಆ ವಾತೆ ಬೋಲಾನ ಬಾದ್‌ಮ, ಆಕಾಶ್‌ಭಣಿ ದೇಖಿನ್‌, “ಬಾ ವಖ್ಹತ್ ಐಗೈ; ತಾರ ಛಿಯ್ಯಾನ ಮಹಿಮೆ ಕರ್‌, ತದೆ ಛಿಯ್ಯೊ ತುನ ಮಹಿಮೆ ಕರಾನ ಉಶೆ.
JOH 17:2 ತುನೆ ಇನಖ್ಹಾರ ಅದ್ಮಿಪರ್ ಅದಿಕಾರ್ ದೀರಾಖ್ಯೊಸ್. ತುನೆ ಇನ ಕಿನಕಿನ ದೀರಾಖ್ಯೊಸ್ಕಿ, ಇವ್ಣ ಖ್ಹಾರಾನ ಯೋ ಹಮೇಶಾನಿ ಜಿ಼ಂದ್‌ಗಿ ದೇವ್ಣುಕರಿ ಹುಯಿರ‍್ಹೀಸ್.
JOH 17:3 ಎಕ್ಕಸ್ ಖ್ಹಾಚೊ಼ ದೇವ್ ಹುಯಿರ‍್ಹೋತೆ ತುನಾಬಿ, ತುನೆ ಮೋಕ್‌ಲ್ಯೊತೆ ಯೇಸು ಕ್ರಿಸ್ತನ ಮಾಲುಮ್‌ ಕರಿ ಲೆವಾನೂಸ್‌ ಹರ್‌ಹಮೇಶಾನಿ ಜಿ಼ಂದ್‌ಗಿ.
JOH 17:4 ಕರ‍್ನು ಕರಿ ತುನೆ ಮನ ದಿದೋತೆ ಕಾಮ್ನ ಪೂರ ಕರೀನ್, ಜ಼ಮೀನ್‌ಪರ್ ತುನ ಮಹಿಮೆ ಕರಿರಾಖ್ಯೋಸ್.
JOH 17:5 ಬಾ! ಹಮ್ಕೆ, ತೂ ತಾರ ಖ್ಹಾಮ್ಣೆ ಮನ ಮಹಿಮೆ ಕರ್‌, ಜಗತ್‌ ಉಬ್ಜಾ಼ನ ಅಗಾಡಿ ತಾರ ಜೋ಼ಡೆ ಮನ ಥೀತೆ ಯೋಸ್‌ ಮಹಿಮೆ ಮನ ದೇ.
JOH 17:6 ಆ ಜಗತ್‌ಮ ಖೆವ ಅದ್ಮಿನ ಮನ ದಿರಾಖ್ಯೋಸ್ಕಿ, ಮೇ ತಾರ ನಾಮ್ನ ಮಾಲುಮ್ ಕರೈರಾಖ್ಯೋಸ್. ಇವ್ಣೆ ಮಾರುಸ್‌ ಹುಯಿರುಥು,ಅಜು಼ ತುನೇಸ್ ಇವ್ಣುನ ಮನ ದಿದೊ. ಇವ್ಣೆ ಮಾರಿ ವಚನ್ನ ಪಾಡಿನ್ ಚಾ಼ಲಿರಾಖ್ಯುಸ್‌.
JOH 17:7 ತುನೆ ಮನ ದಿದೋತೆ ಖ್ಹಾರುಸ್‌ ತಾರೆಥೀಸ್‌ ಆಯೂತೆ ಕರಿ ಹಮ್ಕೆ ಅವ್ಣೆ ಮಾಲುಮ್‌ ಕರಿರಾಖ್ಯುಸ್.
JOH 17:8 ತುನೆ ಮನ ದಿದೋತೆ ವಾತೆನ ಮೇ ಇವ್ಣುನ ದೀರಾಖ್ಯೊಸ್; ಅವ್ಣೆ ಯೋ ವಾತೇನ ಮಾನಿಲಿದು ಅಜು಼ ಖ್ಹಾಚ಼ಮಾಬಿ ಮೇ ತಾರಕಂಥೊ ಐರ‍್ಹೋಸ್ ಕರಿ ಮಾಲುಮ್ ಕರ‍್ಯು ಅಜು಼ ತುನೆ ಮನ ಮೋಕ್‌ಲ್ಯೊ ಕರಿ ವಿಶ್ವಾಸ್‌ ಕರಸ್.
JOH 17:9 ಮೇ ಅವ್ಣಖ್ಹಾಜೆ ಪ್ರಾರ್ಥನೆ ಕರುಸ್; ಜಗತ್‍ವಾಳಾನಖ್ಹಾಜೆ ಕಾಹೆತೆ, ತುನೆ ಮನ ದೀರಾಖವಾಳನಖ್ಹಾಜೆ. ಪ್ರಾರ್ಥನೆ ಕರುಸ್. ಶನಕತೊ, ಅವ್ಣೆ ತಾರು ಅದ್ಮಿ ಹುಯಿರ‍್ಹುಸ್‍.
JOH 17:10 ಮಾರಕನ ಛಾ಼ತೆ ಖ್ಹಾರು ತಾರುಸ್‌, ಅಜು಼ ತಾರಕನ ಛಾ಼ತೆ ಖ್ಹಾರುಸ್ ಮಾರು; ಅನೇಥಿ ಮನ ಮಹಿಮೆಹುಯು.
JOH 17:11 ಅನಪಾರ್ ಮೇ ಜಗತ್‌ಮ ಕೋರ‍್ಹಿಶ್‍ನಿ. ಇವ್ಣೆತೋಬಿ ಜಗತ್‌ಮ ರ‍್ಹಿಶೆ. ಮೇ ತಾರಾಕನ ಆವ್‌ಸ್. ಪರಿಶುದ್ ಹುಯಿರೋತೆ ಬಾ, ಅಪ್ಣೆ ಏಕ್‍ಹುಯಿರಾತೆ ತಿಮ್ ಅವ್ಣೇಬಿ ಏಕ್‍ಹುಯಿರ‍್ಯವಾದೆಕರಿ, ತುನೆ ಮನ ದಿದೊತೆ ತಾರ ನಾಮ್‍ಥಿ ಇವ್ಣುನ ಜ಼ತನ್ ರಾಕ್.
JOH 17:12 ಮೇ ಅವ್ಣ ಜೋ಼ಡೆ ಥೋತೆ ತದೆ ತುನೆ ಮನ ದಿದೋತೆ, ತಾರ ನಾಮ್ನಿ ಶಕಥ್ಥಿ ಅವ್ಣುನ ಜ಼ತನ್ ರಾಖ್ಯೊ. ಧರ್ಮಶಾಸ್ತ್ರನಿ ವಾತೆ ಪೂರಹುವಾನಿಘೊಣಿ, ನಾಶನಖ್ಹಾಜೆಸ್‌ ಕರಿ ಚೂ಼ಣಾಯೋತೆ ಯೋ ಏಕ್‌ ಅದ್ಮಿ ಮ್ಹೆಂದಿನ್, ಅವ್ಣಾಮ ಕೋಣ್‌ಬಿ ನಾಶ ಕೊಹುವಾನಿ.
JOH 17:13 ಅಜು಼ ಹಮ್ಕೆ ಮೇ ತಾರಕನ ವಳ್ಯಾವ್‌ಸ್‌, ಇನಖ್ಹಾಜೆ ಅವ್ಣಾಮ ಮಾರಿ ಖ್ಹುಶಿ ಭರ್‌ಪೂರ್‌ ಹುವಾನಿ ಘೋಣಿ, ಅನ ಜಗತ್‌ ರ‍್ಹವಾನಿ ವಖ್ಹತ್‌ಮಾಸ್‌ ಆ ವಾತೆನ ಖ್ಹಾರು ಬೋಲುಕರುಸ್.
JOH 17:14 ಮೇ ತಾರಿ ಸಂದೇಶ್ ಅವ್ಣುನ ದೀರಾಖ್ಯೊಸ್, ಮೇ ಆ ಜಗತ್ನ ಮಳ್ಯೊಹುಯೊ ಕಾಹೆತೆ ಇಮ್ಮಸ್, ಅವ್ಣೇಬಿ ಆ ಜಗತ್ನ ಮಳ್ಯುಹುಯು ಕಾಹೆ, ಅನಖ್ಹಾಜೆಸ್ ಆ ಜಗತ್‌ ಅವ್ಣುನ ವಹೇರ್‌ ಕರಾಸ್.
JOH 17:15 ಅವ್ಣುನ ಜಗತ್ನ ಹಾತ್‌ಮಾಥು ಕಾಡಿಲಿ ಜಾ಼ ಕರಿ ಮೇ ತುನ ಬೋಲುಕೊಯ್ನಿ, ಕತೋಬಿ ಖರಾಬ್‌ಥಿ ಬಚಾ಼ಡಿನ್, ಜ಼ತನ್ ರಾಕ್ಣು ಕರಿ ಮೇ ತುನ ಬೋಲಿಲೆವ್‌ಸ್
JOH 17:16 ಮೇ ಆ ಜಗತ್ನ ಮಳ್ಯೊಹುಯೊ ಕಾಹೆತೆ ಇಮ್ಮಸ್, ಅವ್ಣೇಬಿ ಆ ಜಗತ್ನ ಮಳ್ಯುಹುಯು ಕಾಹೆ.
JOH 17:17 ತು ಅವ್ಣುನ ಖ್ಹಾಚಾ಼ಥಿ ಸಮರ್ಪಣ್‌ ಕರಿಲೆ ತಾರಿ ವಚನ್ ಖ್ಹಾಚು಼ ಹುಯಿರ‍್ಹೀಸ್‌.
JOH 17:18 ತುನೆ ಮನ ಆ ಜಗತ್‌ಮ ಮೋಕ್‌ಲ್ಯೊತೆ ಇಮ್ಮಸ್, ಮೇಬಿ ಅವ್ಣುನ ಆ ಜಗತ್‌ಮ ಮೋಕ್ಲಿರಾಖ್ಯೊಸ್.
JOH 17:19 ಅವ್ಣಖ್ಹಾಜೆ ಮನಾಸ್ ಒಪ್‌ಶೈಲೇವ಼್ಸ್ ಇಮ್ಮಸ್ ಇವ್ಣೇಬಿ ಖ್ಹಾಚಥೀಸ್ ಮನ ಒಪ್‌ಶಾವದೆ.
JOH 17:20 “ಮೆ ಖಲಿ ಅವ್ಣಖ್ಹಾಜೆಸ್‌ ಕಾಹೆ, ಕೋಣ್ ಅವ್ಣ ಸಂದೇಶ್‍ಥಿ ವಿಶ್ವಾಸ್‌ ಕರಾಸ್ಕಿ ಇವ್ಣಖ್ಹಾಜೆಬಿ ಪ್ರಾರ್ಥನೆ ಕರುಸ್.
JOH 17:21 ಬಾ ತುನೆ ಮನ ಮೋಕ್‌ಲ್ಯೊತೆ ಆ ಜಗತ್‌ ನಂಬಾನಖ್ಹಾಜೆ, ತೂ ಮಾರಾಮ ಅಜು಼ ಮೇ ತಾರಾಮ ಛೂ಼ತೆ ಇಮ್ಮಸ್ ಅವ್ಣೇಬಿ ಅಪ್ಣಾಮ ರ‍್ಹೇವ್ಣುಕರಿ ಇವ್ಣೆಖ್ಹಾರು ಏಕ್‌ ಹುಯಿರ‍್ಹೇಣು ಕರಿ, ಮೇ ಪ್ರಾರ್ಥನೆ ಕರುಸ್.
JOH 17:22 ಅಪ್ಣೆ ಏಕ್‌ ಹುಯಿರ‍್ಹಾತೆ ಇಮ್ಮಸ್, ಅವ್ಣೇಬಿ ಏಕ್‌ ಹುಯಿರ‍್ಹವಾದೆ ಕರಿ ತುನೆ ಮನ ದಿದೋತೆ ಯೋಸ್‌ ಮಹಿಮೆ ಮೇ ಅವ್ಣುನ ದೀರಾಖ್ಯೊಸ್.
JOH 17:23 ಮೇ ಇವ್ಣಾಮ ರ‍್ಹೀಶ್ ಅಜು಼ ತೂ ಮಾರಾಮ ರ‍್ಹೀಶ್ ಅನೇಥಿ ಇವ್ಣೆ ಅಮ್ಮಸ್ ಭರ್‌ಪೂರ್‌ಥಿ ಏಕ್‌ ಹುಯಿರ‍್ಹಿಶೆ, ತದೆ ತುನೇಸ್ ಮನ ಮೋಕ್ಯಲ್ಯೋತೆ ಕರಿ ಅಜು಼ ತುನೆ ಮನ ಪ್ಯಾರ್ ಕರ‍್ಯೊತೆ ಇಮ್ಮಸ್, ಅವ್ಣುನಾಬಿ ಪ್ಯಾರ್ ಕರಿರಾಖ್ಯೋಸ್ ಕರಿ ಆ ಜಗತ್ನ ತದೆ ಮಾಲುಮ್‌ ಪಡ್‌ಶೆ.
JOH 17:24 “ಬಾ! ತುನೆ ಅವ್ಣುನ ಮನ ದಿದೊ, ಅಜು಼ ಮೇ ಕಿಜ್ಗಾ಼ ರ‍್ಹವುಸ್‍ಕಿ ಹಿಜ್ಜಾ಼ಸ್ ಅವ್ಣೇಬಿ ರ‍್ಹೇವ್ಣುಕರಿ ಅಜು಼ ಆ ಜಗತ್ನ ಉಬ್ಜಾ಼ನ ಅಗಾಡಿಸ್, ತುನೆ ಮನ ಪ್ಯಾರ್ ಕರೀನ್, ಮನ ದಿದೋತೆ ಮಹಿಮೆನ ಅವ್ಣೆ ದೇಕ್ಣು ಕರಿ ಮೇ ಆಖ್ಹ್ ಕರುಸ್.
JOH 17:25 ಧರ್ಮಿ ಹುಯಿರ‍್ಹೋತೆ ಬಾ! ಆ ಜಗತ್‌ ತುನ ಮಾಲುಮ್‌ ಕರಿರಾಖ್ಯುಕೊಯ್ನಿ, ಕತೋಬಿ ಮೇ ತುನ ಮಾಲುಮ್‌ ಕರಿರಾಖ್ಯೋಸ್, ಅಜು಼ ತುನೆ ಮನಮೋಕ್ಲಿರಾಖ್ಯೋಸ್‌ ಕರಿ ಅವ್ಣೆ ಮಾಲುಮ್‌ ಕರಿರಾಖೂಸ್.
JOH 17:26 ಮೇ ಅವ್ಣುನ ತಾರ ನಾಮ್ನ ಮಾಲುಮ್ ಕರೈರಾಖ್ಯೋಸ್, ಬಿಜೂ಼ಬಿ ಇನ ಮಾಲುಮ್‌ ಕರವ್‌ಸ್ ಕರೀಶ್, ತುನೆ ಮಾರಪರ್ ಖಿವಿ ಪ್ಯಾರ್ ವತಾಳ್ಯೊಕಿ ಮೇಬಿ ಇವ್ಣಾಮ ರ‍್ಹೇವ್ಣುಕರಿ ಪ್ರಾರ್ಥನೆ ಕರುಸ್” ಕರಿ ಬೋಲ್ಯೊ.
JOH 18:1 ಆ ಪ್ರಾರ್ಥನೆ ಕರಾನ ಬಾದ್‌ಮ, ಯೇಸು ಇನ ಶಿಷ್ಯರ್‌ನ ಜೋ಼ಡೆ ಕೆದ್ರೋನ್‌ ವ್ಹೇಕ್ಳಾನ ಪಾರ್ ಚ಼ಲೆಗಯೊ. ಹಿಜ್ಜಾ಼ ಏಕ್‌ ಭಾಗ್‌ ಥೂ, ಯೇಸುಬಿ ಇನ ಶಿಷ್ಯರ್‌ ಇನಾಮಹಿ ಗಯ.
JOH 18:2 ಯೇಸುನ ಧೋಕೊ ದಿದೋತೆ ಯೂದನಾಬಿ ಯೋ ಝ಼ಗೊ ಮಾಲುಮ್‌ಥು. ಶನಕತೊ ಯೇಸು ಘಣಿ ಹಲ್ಲ ಇನ ಶಿಷ್ಯರ್‌ನ ಹಿಜ್ಜಾ಼ಸ್ ಮಳ್ಯೋಥೊ.
JOH 18:3 ತದೆ ಯೂದನೆ ಶಿಪಾಯ್ನಿ ಏಕ್‌ ಝೂ಼ಂಡ್‌ನ, ಮಹಾಯಾಜಕರ್‌ ಅಜು಼ ಫರಿಸಾಯರ್‌ನೆ ಮೋಕ್‌ಲ್ಯುತೆ ಮಂದಿರ್‌ನು ಥೋಡ ಕಾವ್ಲಿ ಕರಾವಾಳಾನ ಜೋ಼ಡ್ಮ ಬುಲೈಲಿನ್ ಆಗ್ನು ಢಿಟಂಬು ಅಜು಼ ಕಫ್ಫನ್‌ಅಖ್ಖು ಧರಿಲೀನ್, ಬಾಗ್‌ನ ಮಹಿ ಆಯೊ.
JOH 18:4 ಇನಜೋ಼ಡೆ ಚಾ಼ಲ್‌ಶೇತೆ ಖ್ಹಾರುಸ್‌ ಯೇಸುನ ಮಾಲುಮ್‌ ಥೂ, ಇನಖ್ಹಾಜೆ ಯೋ ಖ್ಹಾಮ್ಣೆ ಜೈ಼ನ್‌, “ತುಮೆ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ.
JOH 18:5 ಇವ್ಣೆ, “ನಜ಼ರೇತ್‌ನೊ ಯೇಸುಕಿಶು” ಕರಿ ಬೋಲ್ಯು. ತದೆ ಯೇಸುನೆ, “ಮೇಸ್ ಯೋ” ಕರಿ ಜವಾಬ್‌ ದಿದು. ಯೇಸುನ ಧೋಕೊ ದಿದೋತೆ ಯೂದಬಿ ಇವ್ಣಿ ಜೋ಼ಡೆ ಹಿಜ್ಜಾ಼ಸ್ ಭೀರ‍್ಯೋಥೊ.
JOH 18:6 ಯೇಸುನೆ ಇವ್ಣುನ, “ಮೇಸ್ ಯೋ” ಕರಿ ಬೋಲ್ಯೊ. ತದೆ ಇವ್ಣೆ ಪೀಠೆ ಖ್ಹರ್ಕಿನ್‌, ಜ಼ಮೀನ್‌ಪರ್ ಪಡಿಗಯು.
JOH 18:7 ಪಾಛೊ಼ ಯೇಸುನೆ ಇವ್ಣುನ, “ತುಮೆ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ. ಇವ್ಣೆ, “ನಜ಼ರೇತ್‌ನೊ ಯೇಸುನ” ಕರಿ ಬೋಲ್ಯು.
JOH 18:8 ತದೆ ಯೇಸುನೆ, “ಮೇಸ್ ಯೋ ಕರಿ ಅಗಾಡಿಸ್ ತುಮೂನ ಬೋಲ್ಯೋನಿ. ತುಮೆ ಮನಾಸ್ ಢೂಂಡುಕರ‍್ತಾ ಉಶೇತೊ, ಅವ್ಣುನ ಜಾ಼ವಾನ ಮ್ಹೇಲೊ” ಕರಿ ಬೋಲ್ಯೊ.
JOH 18:9 ಇನಖ್ಹಾಜೆ ಬೋಲ್ಯೊ, “ಬಾ, ತುನೆ ಮನ ದಿದೋತೆ ಇವ್ಣಾಮ ಏಕ್‌ನಾಬಿ ಮೇ ಗುಮೈಲಿದೊಕೊಯ್ನಿ” ಕರಿ ಇನೆ ಬೋಲ್ಯೊಥೋತೆ ವಾತೆ ಅಮ್ ಪೂರಹುಯು.
JOH 18:10 ಸೀಮೋನ್‌ ಪೇತ್ರಕನ ಏಕ್‌ ತಲ್ವಾರ್‌ ಥೀ, ತದೆ ಇನೆ ತಲ್ವಾರ್‌ನ ಕಾಡೀನ್‌, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನು ಖಾವೊ ಕಾನ್ನ ಕತ್ರಿನಾಖ್ಯೊ. ಯೋ ಆಳ್‌ನು ನಾಮ್ ‘ಮಾಲ್ಕ’ ಕರಿ.
JOH 18:11 ತದೆ ಯೇಸುನೆ ಪೇತ್ರನ, “ತಾರಿ ತಲ್ವಾರ್‌ನ ಕಷ್‌ಬಂದ್‌ನಿ ಚ಼ಂಚಿಮ ಪಾಛು಼ ಘಾಲ್‌; ತೂ ಸೋಚಕೊಯ್ನಿಕಿ ಶು? ಮಾರ ಬಾನೆ ಮನ ದಿದೋತೆ ಕಟೋರಿಮ ಮೇ ನಾ ಪೀಣು ಕರಿ” ಬೋಲ್ಯೊ.
JOH 18:12 ಅನಕೇಡೆಥು ರೋಮ್‍ನು ಶಿಪಾಯಿಖ್ಹಾರುಬಿ ಹಜಾ಼ರ್‌ ಶಿಪಾಯಿನೊ ಮೋಟೊಬಿ ಅಜು಼ ಯೆಹೂದ್ಯರ್‌ನ ಕಾವ್ಲಿ ಕರಾವಾಳು ಯೇಸುನ ಧರೀನ್ ಭಾಂದ್ಯು,
JOH 18:13 ಇವ್ಣೆಪಹಿಲೆ ಅನ್ನಕನ ಬುಲೈಲಿಗಯು. ಆ ಅನ್ನ ಯೋ ವರಖ್ಹ್‌ಮ ಗಲ್‌ಢೊಯಾಜಕ್‌ ಹುಯಿರ‍್ಹೊಥೋತೆ ಕಾಯಫಾನೊ ಮಾಮ.
JOH 18:14 ಆ ಕಾಯಫಾನೇಸ್, ‘ಏಕ್‌ ಅದ್ಮಿ ತಮಾಮ್‌ ಅದ್ಮಿನಖ್ಹಾಜೆ ಮರ್‌ವಾನುಸ್‌ ಅಛ್ಛು಼’ ಕರಿ ಯೆಹೂದ್ಯರ್‌ನ ಬೋಲಿದಿದೋತೆ.
JOH 18:15 ಸೀಮೋನ್‌ ಪೇತ್ರ ಅಜು಼ ಶಿಷ್ಯರ್‌ಮ ಬಿಜೇಕ್‌ ಜ಼ಣೊ ಯೇಸುನ ಪೀಠೆ ಗಯೊ. ಯೋ ಬಿಜ್ಜೇಕ್‌ ಶಿಷ್ಯನ ಗಲ್‌ಢೊ ಯಾಜಕ್‌ ಅಛ್ಛಿಂತರ ಮಾಲುಮ್‌ ಥೂ. ಇನಖ್ಹಾಜೆ ಯೋ ಶಿಷ್ಯನೆ ಯೇಸುನ ಜೋ಼ಡೆ ಮಹಾಯಾಜಕ್‌ನು ಘರ್‌ನ ಖ್ಹಾಮ್ಣೇನಿ ಝ಼ಗೋಮ ಗಯೊ.
JOH 18:16 ಕತೋಬಿ ಪೇತ್ರ ಭಾರ್‌ ಬಾಕಲ್‍ಕನ ಟಿವೈರ‍್ಹೋಥೊ. ಮಹಾಯಾಜಕ್‌ನ ಮಾಲುಮ್‍ಥೋತೆ ಬಿಜ್ಜೇಕ್‌ ಶಿಷ್ಯನೆ ಪಾಛೊ಼ ಭಾರ್‌ಐನ್‌, ಬಾಕಲ್‍ಕನ ಕಾವ್ಲಿ ಕರಾವಾಳಿನ ಜೋ಼ಡೆ ವಾತೆ ಬೋಲಿನ್, ಪೇತ್ರಾನ ಮಹಿ ಬುಲೈಲಿಗಯೊ.
JOH 18:17 ತದೆ ಬಾಕಲ್‌ ಕಾವ್ಲಿ ಕರಾವಾಳಿ ಆಳ್‌ನೆ, “ತೂಬಿ ಯೋ ಅದ್ಮಿನೊ ಶಿಷ್ಯರ್‌ಮ ಏಕ್‌ ಜ಼ಣೊ ಕಾಹೆಕಿ ಶು?” ಕರಿ ಬೋಲಿ. ತದೆ ಪೇತ್ರನೆ, “ಕಾಹೆ ಮೇ ಕಾಹೆ” ಕರಿ ಬೋಲ್ಯೊ.
JOH 18:18 ತದೆ ಠಣ್‌ ಥೀತೆ ಇನಾಖ್ಹಾಜೆ ಆಳ್‌ಖ್ಹಾರು ಅಜು಼ ಕಾವ್ಲಿ ಕರಾವಾಳು ಕೋಲ್‌ಖ್ಹಾಥಿ ಆಗ್ ಕರೀನ್, ಭೀರಿನ್‌ ಶೇಕುಕರ್ತುಥು, ಪೇತ್ರಬಿ ಜೈ಼ನ್‌, ಇವ್ಣಿ ಜೋ಼ಡೆ ಭೀರಿಗಯೊ.
JOH 18:19 ಗಲ್‌ಢಯಾಜಕ್‌ನೆ ಯೇಸುನ ಇನ ಶಿಷ್ಯರ್‌ನಿ ಬಾರೇಮ ಅಜು಼ ಇನೆ ಬೋಲಿವತಾಳ್ಯೋತೆ ಬಾರೇಮ ಫುಛಾ಼ಯೊ.
JOH 18:20 ತದೆ ಯೇಸುನೆ, “ಮೇ ಕದೇಬಿ ಜಗತ್ನ ಖ್ಹಾಮ್ಣೆಸ್ ವಾತೆ ಬೋಲಿರಾಖ್ಯೊಸ್; ಯೆಹೂದ್ಯ ಅದ್ಮಿಖ್ಹಾರು ಎಕ್ಟು ಹುಯಿನ್ ಆವಸ್ತೆ ಸಭೆ ಭರಾವನು ಮಂದಿರ್‌ಮ ಅಜು಼ ಮೋಟಿ ಮಂದಿರ್‌ಮ ಮೇ ಕದೇಬಿ ಬೋಲಿವತಾಳ್‌ತೊ ಆಯೊ, ಮೇ ಲಪೀನ್ ಕದೇಬಿ ಶಾತ್ಬಿ ಕೋ ಬೋಲಿರಾಖ್ಯೊನಿ.
JOH 18:21 ಅಮ್ ರ‍್ಹವಾಪರ್, ಮನ ಶನ ಪುಛಾ಼ವಸ್ತೆ? ಮೇ ಶಶ್ಶಾತ್ ಬೋಲಿರಾಖ್ಯೊಸ್ ಕರಿ ಇನ ಖ್ಹಮ್‌ಜ್ಯೂತೆ ಅದ್ಮಿನ ಪುಛಾ಼ವೊ; ಮೇ ಬೋಲ್ಯೊತೆ ಇವ್ಣುನ ಮಾಲುಮ್‌” ಕರಿ ಬೋಲ್ಯೊ.
JOH 18:22 ಯೇಸುನೆ ಆ ವಾತೆ ಬೋಲ್ಯೋತೆ ತದೆ, ಇನ ಖನ್ನೆ ಭೀರ‍್ಯುಥೂತೆ ಕಾವ್ಲಿ ಕರಾವಾಳಾಮ ಏಕ್‌ಜ಼ಣಾನೆ ಯೇಸುನ ಕಲ್ಲಪರ್ ಮಾರಿನ್, “ಮಹಾಯಾಜಕನ ಜೋ಼ಡೆ ಅಮ್ ವಾತೆ ಬೋಲಸ್ಕಿಶು? ತುನ ಕೆತ್ರೆ ದಮ್‌” ಕರಿ ಬೋಲ್ಯು.
JOH 18:23 ಯೇಸುನೆ ಇನ, “ಮೇ ಶಾತ್‌ತೋಬಿ ಗಲತ್‌ ಬೋಲ್ಯೊ ಉಶೇತೊ, ಯೋ ಗಲತ್‌ನಿ ಬಾರೇಮ ಸಾಕ್ಷಿ ದೇ; ಕತೋಬಿ ಮೇ ಬೋಲ್ಯೋತೆ ಬರಾಬರ್‌ ಉಶೇತೊ, ತೂ ಮನ ಶನ ಮಾರಸ್?” ಕರಿ ಬೋಲ್ಯೊ.
JOH 18:24 ತದೆ ಅನ್ನನೆ ಯೋ ಕಿಮ್ ಭಂದ್ಯೊಥೋಕಿ ಇಮ್ಮಸ್, ಗಲ್‌ಢೊಯಾಜಕ್‌ ಕಾಯಫಕನ ಇನ ಮೋಕ್‌ಲ್ಯೊ.
JOH 18:25 ಸೀಮೋನ್‌ ಪೇತ್ರ ಬಿಜೂ಼ಬಿ ಇಮ್ಮಸ್ ಹಿಜ್ಜಾ಼ ಭೀರಿನ್‌, ಆಗ್ ಶೇಕುಕರ್‌ತೋಥೊ. ತದೆ ಹಿಜ್ಜಾ಼ ಥೂತೆ ಇವ್ಣೆ ಇನ, “ತೂಬಿ ಯೋ ಅದ್ಮಿನೊ ಶಿಷ್ಯರ್‌ಮ ಏಕ್‍ಜ಼ಣೊ ಕಾಹೆಕಿ ಶು?” ಕರಿ ಪುಛಾ಼ಯು. ಕತೋಬಿ ಪೇತ್ರನೆ, “ಕಾಹೆ, ಮೇ ಕಾಹೆ” ಕರಿ ಬೋಲ್ಯೊ.
JOH 18:26 ಗಲ್‌ಢಯಾಜಕ್‌ನೊ ಆಳ್‌ಮ, ಪೇತ್ರನೆ ಕಾನ್‌ ಕತ್ರಿನಾಖ್ಯೊಥೋತೆ ಇನ ಖನ್ನೆವಾಳಮ ಏಕ್ಜ಼ಣಾನೆ, “ಮೇ ತುನ ಬಾಗ್‌ಮ ಇನಜೋ಼ಡೆ ದೇಖ್ಯೋನಿ?” ಕರಿ ಬೋಲ್ಯೊ.
JOH 18:27 ಪಾಛೊ಼ ಪೇತ್ರನೆ, “ಕಾಹೆ” ಕರಿ ಬೋಲ್ಯೊ. ತದ್‌ನು-ತದೇಸ್‌ ಮುರ್‌ಗೊ ಬಾಂಗ್‌ ದಿದೊ.
JOH 18:28 ಅನಕೇಡೆಥು ಇವ್ಣೆ ಯೇಸುನ ಕಾಯಫನ ಘರ್ ಕಂಥು ರಾಜ್ಯಪಾಲ್‌ನು ಮಹೇಲ್‌ನ ಬುಲೈಲಿಗಯು. ಯೆಹೂದ್ಯರ್‌ವಾಳನೆ ಇವ್ಣುನ ಮೈಲಾಪ್‍ ಹುಯಿನ್ ಪಸ್ಕನು ಖಾಣು ಖಾವಾನ ಅಡ್ಡಿಉಶೆಕರಿ ಮಹಾಲ್‌ನ ಮಹಿ ಕೋ ಗಯೂನಿ.
JOH 18:29 ಇನಖ್ಹಾಜೆ ಪಿಲಾತ ಭಾರ್‌ ಇವ್ಣಾಕನ ಜೈ಼ನ್‌, “ಆ ಅದ್ಮಿಪರ್ ತುಮೆ ಶಾತ್‌ ಗಲತ್‌ ಲಾಗಡೋಸ್?” ಕರಿ ಇವ್ಣ ಪುಛಾ಼ಯು.
JOH 18:30 ತದೆ ಇವ್ಣೆಬೊಲ್ಯು, “ಆ ಗಲತ್‌ ನಾಕರ‍್ಯೊಹೋತ್ತೊ, ಹಮೆ ಅನ ತಾರಕನ ಶನ ಲಾಯಹೋತ್‌?” ಕರಿ ಜವಾಬ್‌ ದಿದು.
JOH 18:31 ಪಿಲಾತನೆ ಇವ್ಣುನ, “ಇಮ್‍ಕತೊ, ತುಮೇಸ್ ಅನ ಲೀಜೈ಼ನ್, ತುಮಾರಿ ಧರ್ಮಶಾಸ್ತ್ರನಿಘೊಣಿ ತೀರ್ಪ್‌ ಕರೊ” ಕರಿ ಬೋಲ್ಯೊ. ತದೆ ಯೆಹೂದ್ಯರ್‌ನೆ, “ಕಿನಾಬಿ ಮರಣ್ ದಂಡ್‌ ದ್ಯವಾನಿ ಹಕ್‌ ಹಮೂನ ಕೊಯ್ನಿ” ಕರಿ ಫರೈನ್ ಬೋಲ್ಯು.
JOH 18:32 ಯೇಸುನೆ, ಮೇ ಕಿಮ್ಕಿ ಮೋತ್‌ಮ ಮರಿಶ್‌’ ಕರಿ ಬೋಲ್ಯೊಥೋತೆ ವಾತೆ ಅಮ್ ಪೂರಹುಯಿಗಿ
JOH 18:33 ಅನಕೇಡೆಥು ಪಿಲಾತನೆ ಪಾಛೊ಼ಫರಿ ಮಹೇಲ್‌ಮ ಜೈ಼ನ್‌, ಯೇಸುನ ಬುಲೈನ್, “ತೂ ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಇನ ಪುಛಾ಼ಯೊ.
JOH 18:34 ಯೇಸುನೆ, “ಆ ತಾರೇಥಿ ತೂಸ್ ಪುಛಾ಼ವ್‌ ಕರಾಸ್ಕಿ, ನತರ್‌ಕಿ ಮಾರಿ ಬಾರೇಮ ಬಿಜಾ಼ನೆ ತುನ ಬೋಲ್ಯುತೆ?” ಕರಿ ಬೋಲ್ಯೊ.
JOH 18:35 ತದೆ ಪಿಲಾತನೆ ಬೋಲ್ಯೊ, “ಮೇ ಯೆಹೂದ್ಯ ಕಿಶು? ತಾರು ಶೊಂತ್‌ ಅದ್ಮಿ ಅಜು಼ ಮಹಾಯಾಜಕರ‍್ನೆ ತುನ ಮಾರ ಹಾತ್‌ಮ ದೀರಾಖ್ಯೊಸ್. ತುನೆ ಶಾತ್‌ಕರ‍್ಯೊ?” ಕರಿ ಪುಛಾ಼ಯೊ.
JOH 18:36 ಯೇಸುನೆ ಇನ, “ಮಾರಿ ರಾಜ಼್ ಆ ಜಗತ್‌ನು ಕಾಹೆ; ಮಾರಿ ರಾಜ್ಯ ಆ ಜಗತ್‌ನು ಹುಯಿರ‍್ಹೊಹೋತ್ತೊ, ಮೇ ಯೆಹೂದ್ಯರ್‌ನ ಹಾತ್‌ಮ ಮಳ್ಣುನಾತೆ ಇಮ್‌ ಮಾರು ಸೇವಕ್‌ಖ್ಹಾರು ಖ್ಹಾರು ಲಡ್ಯುಹೋತ್‌, ಕತೋಬಿ ಮಾರಿ ರಾಜ಼್ ಹಜ಼್ಜಾನು ಕಾಹೆ!” ಕರಿ ಜ಼ವಾಬ್‌ದಿದೊ.
JOH 18:37 ತದೆ ಪಿಲಾತನೆ ಇನ ಬೋಲ್ಯೊ, “ಇಮ್‍ಕತೊ, ತೂ ರಾಜಾ಼ ಕಿಶು?” ಕರಿ ಪುಛಾ಼ಯೊ. ಯೇಸುನೆ, “ಮೇ ರಾಜ಼ ಕರಿ ತೂಸ್ ಬೋಲುಕರಾಸ್‌. ಮೇ ಖ್ಹಾಚಿನಿ ಬಾರೇಮ ಸಾಕ್ಷಿ ಬೋಲಾನಖ್ಹಾಜೆ ಪೈದಾಹುಯಿನ್‌, ಆ ಜಗತ್‌ಮ ಐರ‍್ಹೋಸ್. ಖ್ಹಾಚಿ ಭಣಿವಾಳು ಮಾರಿ ವಾತೇನ ಖ್ಹಮ್‌ಜಾ಼ಸ್‌” ಕರಿ ಜವಾಬ್‌ ದಿದೊ.
JOH 18:38 ತದೆ ಪಿಲಾತನೆ, “ಖ್ಹಾಚಿಕತೊ ಶಾತ್‌?” ಕರಿ ಪುಛಾ಼ಯೊ. ಆ ಬೋಲಾನ ಬಾದ್‌ಮ ಪಿಲಾತ ಪಾಛೊ಼ ಯೆಹೂದ್ಯರ್‌ಕನ ಬಹರ್ ಜೈ಼ನ್‌, “ಮನ ಅನಾಮ ಖೆವಿಸ್ ಗಲತ್‌ ದೆಖವ಼್‌ಕರಾಕೊಯ್ನಿ.
JOH 18:39 ಕತೋಬಿ ಪಸ್ಕ ಪೂಜಾ಼ನಿ ವಖ್ಹತ್‌ಮ ಕೋಂಡಿ ಘಾಲಿರಾಖಾತೆ ಇವ್ಣಾಮ ಏಕ್‌ನ, ಮೇ ತುಮಾರಖ್ಹಾಜೆ ಭಾರ್‌ ಮ್ಹೇಲಾನಿ ಆದತ್ ಛಾ಼. ಮೇ ಯೆಹೂದ್ಯರ್‌ನ ರಾಜಾ಼ನ ತುಮಾರಖ್ಹಾಜೆ ಭಾರ್‌ ಮ್ಹೇಲ್ನು ಕರಿ ತುಮಾರಿ ಆಖ್ಹ್‌ಕಿ ಶು?” ಕರಿ ಪುಛಾ಼ಯೊ.
JOH 18:40 ತದೆ ಇವ್ಣೆ, “ಅನ ನಕೊ! ಬರಬ್ಬನಾಸ್ ಮ್ಹೇಲಿದೆ!” ಕರಿ ಚಿಕ್ರಿನ್ ಬೋಲ್ಯು. ಆ ಬರಬ್ಬ ಏಕ್‌ ಢಾಕು ಹುಯಿರ‍್ಹೋಥೊ.
JOH 19:1 ತದೆ ಪಿಲಾತನೆ ಯೇಸುನ ಲೀಜೈ಼ನ್, ಕೊಳ್ಡೇಥಿ ಮರಾಯೊ.
JOH 19:2 ಅಜು಼ ಸಿಪಾಯಿಖ್ಹಾರು ಕಾಟಾನ ಡಾಳೀಥಿ ಏಕ್‌ ಕಿರೀಟ್ ವಣಿನ್‌, ಯೇಸುನ ಮಾಥಪರ್‌ ಘಾಲೀನ್‌, ಲಾಲ್ ಝ಼ಗ್ಗಾನ ಇನ ಫೇರಾಯು.
JOH 19:3 ಅಜು಼ ಇನಾಕನ ಐನ್, “ಯೆಹೂದ್ಯರ್‌ನ ರಾಜಾ಼! ತುನ ಖ್ಹಲಾಮ್” ಕರಿ ಬೋಲಿನ್, ಇನ ಕಲ್ಲಪರ್ ಮಾರ‍್ಯು.
JOH 19:4 ಅನ ಬಾದ್‌ಮ, ಪಿಲಾತನೆ ಪಾಛೊ಼ ಭಾರ್‌ ಜೈ಼ನ್‌, ಇವ್ಣುನ, “ಮನ ಇನಾಮ ಶನೀಶ್ ಗಲತ್‌ ಕೋ ದೆಖಾಯುನಿ ಕರಿ ತುಮೂನ ಮಾಲುಮ್‌ ಪಡಾನಿಘೋಣಿ, ಇನ ತುಮಾರ ಖ್ಹಾಮ್ಣೆ ಬಹರ್ ಲ್ಯಾವುಸ್‌ ದೇಖೊ” ಕರಿ ಬೋಲ್ಯೊ.
JOH 19:5 ತದೆ ಯೇಸು ಬಹರ್ ಆಯೊ, ಇನ ಮಾಥಪರ್‌ ಕಾಟಾನಿ ಕಿರೀಟ್ ಘಲೀಥಿ ಅಜು಼ ಇನ ಲಾಲ್ ಝ಼ಗ್ಗೊ ಫೇರೈರಾಖ್ಯುಥು. ಪಿಲಾತನೆ, “ಹಂದೇಖೊ! ಹಜ್ಜಾ಼ ಹುಯಿರೊ ಯೋ ಅದ್ಮಿ!” ಕರಿ ಬೋಲ್ಯೊ.
JOH 19:6 ಮಹಾಯಾಜಕರ್‌ ಅಜು಼ ಮಂದಿರ್‌ನ ಕಾವ್ಲಿ ಕರಾವಾಳನ ಯೇಸುನ ದೇಖಿನ್‌, “ಇನ ಶಿಲ್‌ಬೆಪರ್ ಠಂಗಾವ್! ಇನ ಶಿಲ್‌ಬೆಪರ್ ಠಂಗಾವ್!” ಕರಿ ಚಿಕ್ರಾಲಗ್ಯು ತದೆ ಪಿಲಾತನೆ ಇವ್ಣುನ, “ಹೋಣುಕತೊ ತುಮೇಸ್ ಅನ ಲೀಜೈ಼ನ್, ಶಿಲ್‌ಬೆಪರ್ ನಾಖೊ. ಮನ ಅನಾಮ ಖೆವಿಸ್ ಗಲತ್‌ ದೆಖಾಯು ಕೊಯ್ನಿ” ಕರಿ ಬೋಲ್ಯೊ.
JOH 19:7 ತದೆ ಯೆಹೂದ್ಯರ್‌ನೆ, “ಹಮೂನ ಏಕ್‌ ಖಾನುಲ್‌ ಛಾ಼, ಯೋ ಕಾನೂಲ್‌ನಿಘೋಣಿ ಅನ ಮರಣ್ ದಂಡ್‌ ಹೋಣುಸಸ್ ಹೋಣು. ಶನಕತೊ ಅನೆ ಇನು ಯೋಸ್‌, ‘ಮೇ ದೇವ್‌ನೊ ಛಿಯ್ಯೊ ಕರಿ ಬೋಲಿಲಿದೊ” ಕರಿ ಜವಾಬ್‌ ದಿದೊ.
JOH 19:8 ಪಿಲಾತನೆ ಆ ವಾತ್ ಖ್ಹಮ್‌ಜಿನ್‌ ಬಿಜೂ಼ಬಿ ಜಾ಼ಖ್ಹತ್ ಡರಿಗಯೊ.
JOH 19:9 ಅಜು಼ ಪಾಛೊ಼ ಮಹೇಲ್‌ಮ ಜೈ಼ನ್‌, ಯೇಸುನ “ತೂ ಕಿಜ್ಜಾಥೊ ಐರ‍್ಹೋಸ್ತೆ?” ಕರಿ ಪುಛಾ಼ಯೊ. ಕತೋಬಿ ಯೇಸುನೆ ಜವಾಬ್‌ ಕೋ ದಿದೋನಿ.
JOH 19:10 ಪಿಲಾತನೆ ಇನ, “ತೂ ಮಾರ ಜೋ಼ಡೆಬಿ ವಾತೆ ಕೋ ಬೋಲಾನಿ ಕಿಶು? ತುನ ಛೋ಼ಡಾವನಾಬಿ, ತುನ ಶಿಲ್‌ಬೆಪರ್ ನಖಾವಾನಾಬಿ ಮನ ಅದಿಕಾರ್ ಛಾ಼ ಕರಿ ತುನ ಮಾಲುಮ್‌ ಕೊಯ್ನಿಕಿ ಶು?” ಕರಿ ಬೋಲ್ಯೊ.
JOH 19:11 ಯೇಸುನೆ ಜ಼ವಾಬ್ ದಿದೊ, “ದೇವ್ ತುನ ಮಾರಪರ್ ಅದಿಕಾರ್ ನಾ ದಿದೊಹೋತ್ತೊ, ತುನ ಮಾರಪರ್ ಕೆವ್ಹೀಸ್‌ ಅದಿಕಾರ್ ಕೋ ರ‍್ಹಯುಹೋತ್ನಿ, ಇನಖ್ಹಾಜೇಸ್ ಮನ ತಾರ ಹಾತ್‌ಮ ದೀರಾಖ್ಯೊಸ್ತೆ ಅದ್ಮಿನ, ತಾರೆಥೀಬಿ ಘಣು ಪಾಪ್ ಛಾ಼” ಕರಿ ಬೋಲ್ಯೊ.
JOH 19:12 ಆ ವಾತೆನ ಖ್ಹಮ್‌ಜಿನ್‌, ಪಿಲಾತ ಯೇಸುನ ಕಿಮ್‍ತೋಬಿ ಛೋ಼ಡಾವ್‍ಣು ಕರಿ ಕರ‍್ಯೊ, ಕತೋಬಿ ಯೆಹೂದ್ಯರ್‌ನೆ, “ತೂ ಅನ ಛೋ಼ಡಾಯೋತೆ, ತೂ ಕೈಸರ್‌ನೊ ದೋಸ್ತಿಕಾಹೆ ಕರಿ ಮತಲಬ್. ಖ್ಹುದ್‌ನ ರಾಜ಼ ಕರಿಲ್ಯವಾಳೊ ಕೈಸರ್‌ನೊ ದುಶ್‌ಮನ್‌ ಹುಯಿರ‍್ಹೋಸ್!” ಕರಿ ಚಿಕ್ರಿನ್ ಬೋಲ್ಯು.
JOH 19:13 ಆ ವಾತೆನ ಖ್ಹಮ್‌ಜಿನ್‌ ಪಿಲಾತನೆ ಯೇಸುನ ಭಾರ್‌ಬುಲೈನ್‌, ಬಂಡಾ ಭಿಛೈ಼ರ‍್ಹೂತೆ ರಚ್ಚೊ಼,ಇಬ್ರಿಯ ವಾತೇಮ ಗಬ್ಬಥಾ ಕರಿ ಬೊಲೈಲೇಸ್ತೆ ನಾಮ್ನು ಝ಼ಗೋಪರ್‌ ಜೈ಼ನ್‌, ನ್ಯಾವ್‍ನಿ ಖುಡ್‍ಶಿಪರ್ ಬೇಶಿಗಯೊ.
JOH 19:14 ತದೆ ಧೊಪಾರ್‌ ಹುಯಿಗಯುಥು ಅಜು಼ ಯೋ ದನ್ ಪಸ್ಕ ಪೂಜಾ಼ನ ಖ್ಹವಾರಾನೊ ದನ್ ಹುಯಿರ‍್ಹೋಥೊ. ಪಿಲಾತನೆ ಯೆಹೂದ್ಯರ್‌ನ, “ಹಂದೇಖೊ, ತುಮಾರೊ ರಾಜಾ಼ನ!” ಕರಿ ಬೋಲ್ಯೊ.
JOH 19:15 ಇವ್ಣೆ, “ಇನ ಮರೈನಾಕ್‌! ಇನ ಮರೈನಾಕ್‌! ಇನ ಶಿಲ್‌ಬೆಪರ್ ಠಂಗಾವ್!” ಕರಿ ಚಿಕ್‌ರ‍್ಯು. ಅಜು಼ ಪಿಲಾತನೆ ಯೆಹೂದ್ಯರ್‌ನ, “ತುಮಾರ ರಾಜಾ಼ನ ಶಿಲ್‌ಬೆಪರ್ ನಖಾವ್ಣು ಕಿಶು?” ಕರಿ ಬೋಲಾನಿ ವಖ್ಹ್‌ತೆ ಮಹಾಯಾಜಕರ‍್ನೆ ಹಮೂನ ಕೈಸರ್ ಮ್ಹೇಲಿನ್ ಬಿಜೊ಼ ರಾಜ಼ ಕೊಯ್ನಿ ಕರಿ ಜ಼ವಾಬ್ ದಿದು.
JOH 19:16 ತದೆ ಪಿಲಾತನೆ ಯೇಸುನ ಶಿಲ್‌ಬೆಪರ್ ಮರಾವನಖ್ಹಾಜೆ ಇವ್ಣ ಹಾತ್‌ಮ ದಿನಾಖ್ಯೊ. ಇವ್ಣೆ ಯೇಸುನ ಲೀಗಯು.
JOH 19:17 ಯೇಸುನೆ ಇನಿ ಶಿಲ್‌ಬೇನ ಪಾಡಿಲೀನ್, “ಖೋಪ್ರಿನಿ ಝ಼ಗೊ” ಕರಿ ಝ಼ಗೋಕನ ಗಯೊ. ಇಬ್ರಿಯ ವಾತೇಮ ಆ ಝ಼ಗೋನಾ, ‘ಗೊಲ್ಗೊಥಾ’ ಕರಿ ಬೋಲಾಸ್.
JOH 19:18 ಹಿಜ್ಜಾ಼ ಯೇಸುನ ಶಿಲ್‌ಬೆಪರ್ ನಾಖ್ಯು. ಇನಜೋ಼ಡೆ ಬಿಜು಼ ಬೇ ಜ಼ಣಾನ ಹೈಕಡ್‌ ಏಕ್‌ಜ಼ಣಾನ, ಹೀಕಡ್‌ ಏಕ್‌ಜ಼ಣಾನ, ಅಜು಼ ಯೇಸುನ ಇವ್ಣ ಇಚ಼್‌ಮ ಶಿಲ್‌ಬೆಪರ್ ನಾಖ್ಯು.
JOH 19:19 ಪಿಲಾತನೆ ಏಕ್‌ ಪಲ್ಗಾಪರ್‌, “ನಜ಼ರೇತ್‌ನೊ ಯೇಸು, ಯೆಹೂದ್ಯರ್‌ನೊ ರಾಜ಼” ಕರಿ ಲೀಖೈನ್, ಶಿಲ್‌ಬೆಪರ್ ಮ್ಹೇಲಾಯೊ.
JOH 19:20 ಯೆಹೂದ್ಯರ್‌ನೆ ಯೇಸುನ ಶಿಲ್‌ಬೆಪರ್ ನಾಖ್ಯುತೆ ಝ಼ಗೊ ಖ್ಹಯೇರ‍್ನ ಖನ್ನೆ ಥೂತೆ ಇನಖ್ಹಾಜೆ ಯೆಹೂದ್ಯರ್‌ಮ ಘಣ ಅದ್ಮಿನೆ ಯೋ ಪಲ್ಗಾಪರ್‌ ಲೀಖೈರ‍್ಹೂತೆ ಇನ ಪಡ್ಯು. ಯೋ ಇಬ್ರಿಯ, ಲ್ಯಾಟಿನ್‌ ಅಜು಼ ಗ್ರೀಕ್‌ವಾತೇಮ ಲೀಖೈರ‍್ಹೂಥು.
JOH 19:21 ತದೆ ಮಹಾಯಾಜಕರ‍್ನೆ ಪಿಲಾತನ ಅಮ್‍ ಬೋಲ್ಯ, “ಯೆಹೂದ್ಯರ್‌ನೊ ರಾಜ಼ ಕರಿ ನಕೊಲೀಖೊ, ಮೇಸ್ ಯೆಹೂದ್ಯರ್‌ನೊ ರಾಜ಼ ಕರಿ ಬೋಲಿಲಿದೊ ಹುಯೊ’ ಕರಿ ಲೀಖಾವ್ಣು” ಕರಿ ಬೋಲ್ಯು.
JOH 19:22 ಕತೋಬಿ ಪಿಲಾತನೆ, “ಮೇ ಲೀಖ್ಯೋತೆ ಲೀಖೈಗಯು” ಕರಿ ಬೋಲ್ಯೊ.
JOH 19:23 ಯೇಸುನ ಶಿಲ್‌ಬೆಪರ್ ನಾಖಾನ ಬಾದ್ಮ, ಸಿಪಾಯಿಖ್ಹಾರು, ಇನ ಲುಂಗ್ಡಾನ ಚಾರ್ ಭಾಗ್‌ ಕರೀನ್, ಶಿಪಾಯಿಪಿಟ್‌ ಏಕೇಕ್‌ ವಾಟಪಾಡಿಲಿದು. ಕಾಹೆತೆ ಯೇಸುನೊ ಮಹಿನು ಝ಼ಗ್ಗಾನಾಬಿ ಕಾಡಿಲಿದು, ಯೋ ಝ಼ಗ್ಗೋನ ಶಿವಣ್‌ ಕೋಥೂನಿ ಅಜು಼ ಯೋ ಉಪ್ಪರ್‌ಥು ಹೇಟ್‌ತೋಡಿ ಲಾಂಬುಸ್‌ ವಣಿರಾಖ್ಯುಥು.
JOH 19:24 ಇನ ದೇಖಿನ್ ಇವ್ಣೆ, “ಅಪ್ಣೆ ಅನ ನಾ ಫಾಡ್‌ಣು; ಚಿಟ್ಟಿ ನಾಖಿನ್, ಆ ಕಿನ ಆವಸ್ಕಿ ದೇಖೆ” ಕರಿ ವಾತೆ ಬೋಲಿಲಿದು.ಇವ್ಣೆ ಅನೇಥಿ ‘ಮಾರ ಲುಂಗ್ಡಾನ ಇವ್ಣಾಮ ವಾಟ ಪಾಡೀಲಿದು, ಮಾರ ಝ಼ಗ್ಗಾನಖ್ಹಾಜೆ ಚೀಟಿ ನಾಖ್ಯು’ ಕರಿ ವಚನ್‌ಮ ಲೀಖೈರ‍್ಹೂತೆ ವಾತೆ ಚಾ಼ಲಿಗಿ. ಶಿಪಾಯಿಯೇನೆಬಿ ಆ ಖ್ಹಾರು ಕರ‍್ಯುತೆ.
JOH 19:25 ಯೇಸುನಿ ಶಿಲ್‌ಬೇನ ಖನ್ನೆ ಇನಿ ಆಯ, ಇನಿ ಆಯಾನಿ ಭೇನ್, ಕ್ಲೋಪಾನಿ ಬಾಯ್ಕೊ ಮರಿಯ, ಮಗ್ದಲನಿ ಮರಿಯ ಖ್ಹಾಮ್ಣೆ ಭೀಯ್ಯೆ಼ಥಿ.
JOH 19:26 ಯೇಸುನೆ ಇನಿ ಆಯನಾಬಿ, ಇನ ಖನ್ನೆ ಭಿಯೊಥೋತೆ ಪ್ಯಾರ್‌ನ ಶಿಷ್ಯನ ದೇಖಿನ್‌, “ಆಯಾ, ಆಸ್ ತಾರೊ ಛಿಯ್ಯೊ” ಕರಿ ಬೋಲ್ಯೊ.
JOH 19:27 ಅನಕೇಡೆಥು ಯೋ ಶಿಷ್ಯನ, “ಆ ತಾರಿ ಆಯ” ಕರಿ ಬೋಲ್ಯೊ. ಯೋ ವಖ್ಹತ್‌ಥೂಸ್‌ ಯೋ ಶಿಷ್ಯನೆ ಮರಿಯನ ಇನ ಘರ್‌ಮಾಸ್ ರಾಖ್ಯೊ.
JOH 19:28 ಆ ಖ್ಹಾರು ಹುವಾನ ಬಾದ್‌ಮ, ಹಮ್ಕೆ ಖ್ಹಾರುಸ್‌ ಖತಮ್ ಹುಯಿಗಯು ಕರಿ ಯೇಸುನೆ ಮಾಲುಮ್‌ ಕರಿಲೀನ್, ವಚನ್‌ಮಾನಿ ವಾತೆ ಚಾ಼ಲಾನಿಘೋಣಿ, “ಮನ ಠೋಖ್ಹ್‌ ಲಾಗುಕರಾಸ್‌” ಕರಿ ಬೋಲ್ಯೊ.
JOH 19:29 ಹಿಜ್ಜಾ಼ ಖ್ಹಖ್ಹ್‌ತು ದ್ರಾಕ್ಷಿನು ರಖ್ಹ್‌ನ ಏಕ್‌ ರಾಛ಼ಮ ಭರಿ ಮ್ಹೇಲಿರಾಖ್ಯುಥು. ತದೆ ಗುಂಜ಼್‌ನ ಯೋ ರಖ್ಹ್‌ಮ ಡುಬೈನ್, ಹಿಸ್ಸೋಪ್‌ ಝಾ಼ಡಾನು ಲಠ್ಠಾಕೇಡೆ ಅಟ್‌ಕೈನ್, ಉಪ್ಪರ್ ಪಾಡೀನ್, ಯೇಸುನ ಮ್ಹೋಡಾನ ಲಗ್ಯಾಡ್ಯು.
JOH 19:30 ಯೇಸುನೆ ಯೋ ರಖ್ಹ್‌ನ ಪೀನ್, “ಖತಮ್ ಹುಯಿಗಯು!” ಕರಿ ಬೋಲಿನ್, ಮುಡ್‌ಕ್ಯು ಝು಼ಕೈನ್‌, ಇನಿ ಆತ್ಮಾನ ದೀನಾಖ್ಯೊ.
JOH 19:31 ಯೋ ದನ್ ಶುಕ್ರವಾರ್‌ನೊ ದನ್ ಹುಯಿರ‍್ಹುಥು. ಇನಖ್ಹಾಜೆ ಯೆಹೂದ್ಯರ್‌ನ ಅದಿಕಾರಿಖ್ಹಾರನೆ ಸಬ್ಬತ್‌ ದನ್ಮ ಮುರ್ದು ಶಿಲ್‌ಬೆಪರ್ ನಾ ರ‍್ಹೇವ್ಣುಕರಿ ಪಿಲಾತಕನ, ಶಿಲ್‌ಬೇಪರ್ ಛಾ಼ತೆ ಇವ್ಣ ಗೋಡ ತೋಡೈನ್‌, ಹೇಟ್‌ ಉತಾರೈನಾಖನ ಹುಕುಮ್ ದೇ ಕರಿ ಬೋಲಿಲಿದು. ಶನಕತೊ ಯೋ ಸಬ್ಬತ್‌ ದನ್ ಘಣು ಪವಿತ್ರ ದನ್ ಹುಯಿರ‍್ಹುಥು.
JOH 19:32 ಇನಖ್ಹಾಜೆ ಸಿಪಾಯಿಖ್ಹಾರು ಐನ್, ಯೇಸುನ ಜೋ಼ಡೆ ಶಿಲ್‌ಬೆಪರ್ ಲಟ್‍ಕೈರ‍್ಹೂಥೂತೆ ಇವ್ಣ ಭೇನು ಗೋಡ ತೋಡಿನಾಖ್ಯು.
JOH 19:33 ಕತೋಬಿ ಯೇಸುಕನ ಆವಾದಿನ್, ಯೋ ತದೇಸ್‌ ಮರಿಗಯೋತೆ ಇವ್ಣೆ ದೇಖಿನ್‌, ಇನಗೋಡ ತೋಡ್ಯುಕೊಯ್ನಿ.
JOH 19:34 ತೋಬಿ ಶಿಪಾಯಿಮ ಏಕ್‌ಜ಼ಣಾನೆ ಇನು ಭಾಲೇಥಿ ಯೇಸುನಿ ಪಾಖ್ಹ್‌ಳಿಮ ಭೋಕ್ಯೊ, ಭೋಕ್‌ತಾಸ್‌ನ ಲ್ಹೋಯಿಬಿ, ಪಾಣಿ ಬಹರ್ ರಂಚಾ಼ಯು.
JOH 19:35 ಅನ ದೇಖ್ಯೋತೆ ಇನೇಸ್‌ ಸಾಕ್ಷಿ ಬೋಲಿರಾಖ್ಯೊಸ್, ಇನಿ ಸಾಕ್ಷಿ ಖ್ಹಾಚ಼ಸ್ ಶನಕತೊ ತುಮೇಬಿ ಅನ ವಿಶ್ವಾಸ್‌ ಕರ‍್ನು ಕರಿ ಇನೆ ಬೋಲಿರಾಖ್ಯೋಸ್ತೆ. ಅಜು಼ ಯೋ ಬೋಲುಕರಾತೆ ಖ್ಹಾಚಸ್ ಕರಿ ಇನ ಮಾಲುಮ್‌ ಛಾ಼.
JOH 19:36 ಶನಕತೊ ‘ಇನ ಹಡ್‌ಕ್ಯಾಮ ಏಕ್‌ಬಿ ಹಡ್‌ಕ್ಯು ತುಟ್‌ಶೆ ಕೊಯ್ನಿ’ ಕರಿ ವಚನ್‌ಮ ಛಾ಼ತೆ ವಾತೆ ಪೂರಹುವಾನಖ್ಹಾಜೆ ಅಮ್‌ಹುಯೂತೆ.
JOH 19:37 ಬಿಜ್ಜೇಕ್‌ ವಚನ್‌ಮ, “ಅದ್ಮಿಖ್ಹಾರು ಇವ್ಣೆ ಭಾಲೇಥಿ ಭೋಕ್ಯುತೆ ಇನ ಠರ್‌ಖೈನ್‌ ದೇಕ್‌ಶೆ” ಕರೀಬಿ ಲಿಖೈರ‍್ಹುಸ್.
JOH 19:38 ಅನ ಬಾದ್‌ಮ, ಯೆಹೂದ್ಯರ್‌ನ ಡರ್‌ಥಿ ಲಪೀನ್ ಯೇಸುನೊ ಶಿಷ್ಯ ಹುಯಿರ‍್ಹೊಥೋತೆ, ಅರಿಮಥಾಯ ಗಾಮ್‌ನೊ ಯೋಸೇಫ್‌ನೆ, ಯೇಸುನ ಶರೀರ್‌ನ ಮನ ದೇಕರಿ ಪಿಲಾತನ ಬೋಲಿಲಿದೊ. ತದೆ ಪಿಲಾತನೆ ಯೇಸುನ ಶರೀರ್‌ನ ಪಳ್ಳಿಜಾ಼ ಕರಿ ಇನ ಹುಕುಮ್‌ ದೇತಾಖ್ಹತರ್‌, ಇನೆ ಯೋ ಶರೀರ್‌ನ ಪಳ್ಳಿನ್‌, ಗಯೊ.
JOH 19:39 ಪಹಿಲೆ ಏಕ್‌ಹಲ್ಲ ರಾತ್ನಿ ವಖ್ಹತ್‌ಮ, ಯೇಸುಕನ ಆಯೊಥೋತೆ ನಿಕೊದೇಮನೆ ಕಮ್‍ಶಿಕಮ್ ಡೋಡಿಖ್ಹ್‌ ಶೇರ್ ರಕ್ತಬೋಳ ಅಜು಼ ವಾನು ಜ಼ಡಿಬೂಠಿ ಮಳಾಯುಹುಯು ಟುಕ್ಡಾವ್‍ನ ಲೀನ್, ಯೋಸೇಫ್‌ನ ಜೋ಼ಡೆ ಗಯೊ.
JOH 19:40 ಅವ್ಣೆ ಭೇ ಜ಼ಣಾನೆ ಯೇಸುನ ಶರೀರ್‌ನ ಪಳ್ಳಿ ಜೈ಼ನ್‌, ಯೆಹೂದ್ಯರ್‌ಮ ಗಾಡಾಸ್ತೆ ಇಮ್ನಿ ತರೀಕಾಮ, ಇನಾಪರ್‌ ಯೋ ವಾನು ಜ಼ಡಿಬೂಠಿನ ನಾಖಿನ್, ಘಣ ಮೋಲ್ನು ಗಾದಿನ ಲುಂಗ್ಡಾಥಿ ಇನ ಲಪೇಟ್ಯು.
JOH 19:41 ಯೇಸುನ ಶಿಲ್‌ಬೆಪರ್ ಲಟ್ಕಾಯುತೆ ಝ಼ಗೋಕನ ಏಕ್‌ ಭಾಗ್‌ ಥೂ, ಯೋ ಬಾಗ್‌ಮ ಏಕ್‌ ನವಿ ಘವಿಥೀ, ಯೋ ಘವಿಮ ತಪ್‌ತೋಡಿ ಕಿನೂಸ್ ಮುರ್ದು ಮ್ಹೇಲ್ಯುಥು ಕೊಯ್ನಿ.
JOH 19:42 ಯೋ ದನ್ ಯೆಹೂದ್ಯರ್‌ನ ಖ್ಹವಾರಾನೊ ದನ್ ಶುಕ್ರವಾರ್ ಹುಯಿರ‍್ಹೊಥೋತೆ ಇನಖ್ಹಾಜೆ, ಯೋ ಘವಿ ಖನ್ನೆಸ್‌ ಥೀತೆ ಇನಾಟೇಕೆ ಯೇಸುನ ಮುರ್ದಾನ ಇನಾಮ ಮ್ಹೇಲ್ಯು.
JOH 20:1 ವಾರಾನ ಪಹಿಲದನ್ನೆ ಅಧಿರ‍್ಹೇಣೆಸ್‌, ಬಿಜೂ಼ಬಿ ಅಂಧಾರು ರ‍್ಹವಾನಿಸ್ ವಖ್ಹತ್‌ಮ, ಮಗ್ದಲನಿ ಮರಿಯ ಘವಿಕನ ಐನ್, ಘವಿನ ಮೂಚಿರಾಖ್ಯುಥೂತೆ ಬಂಡೊ ನಿಕ್‌ಳೈರ‍್ಹೂಥೂತೆ ದೇಖಿ.
JOH 20:2 ತದೆ ಇನೆ ಸೀಮೋನ್‌ ಪೇತ್ರ ಅಜು಼ ಯೇಸುನೊ ಪ್ಯಾರ್‌ನೊ ಬಿಜ್ಜೇಕ್‌ ಶಿಷ್ಯಕನ ಮಿಲೈಜೈ಼ನ್‌, ಇನೆ ಇವ್ಣುನ, “ಪ್ರಭುನ ಮಖ್ಹಾಣ್ಯನಿ ಘವಿನ ಮಹಿಥು ಪಳ್ಳಿಜೈ಼ನ್‌, ಕಿಜ್ಜಾ಼ ಮ್ಹೇಲಿರಾಖ್ಯುಸ್ಕಿ, ಹಮೂನ ಮಾಲುಮ್‌ ಕೊಯ್ನಿ!” ಕರಿ ಬೋಲಿ.
JOH 20:3 ತದೆ ಪೇತ್ರ ಅಜು಼ ಯೋ ಬಿಜ್ಜೇಕ್‌ ಶಿಷ್ಯ ಘವಿಕನ ಗಯ.
JOH 20:4 ಇವ್ಣೆ ಭೇ ಜ಼ಣ ಮಿಲಾಯ, ಕತೋಬಿ ಯೋ ಬಿಜ್ಜೇಕ್‌ ಶಿಷ್ಯ ಪೇತ್ರಥೀಬಿ ಒಗ್ಗಿಸ್ ಮಿಲೈನ್‌, ಘವಿಕನ ಪಹಿಲೆ ಐನ್, ಪೋಚ್ಯೊ.
JOH 20:5 ಇನೆ ಝು಼ಕಿನ್‌, ಲಪೇಟಿಥೂತೆ ಘಣ ಮೋಲ್ನು ಗಾದಿನು ಲುಂಗ್ಡು ಪಡ್ಯುಥೂತೆ ದೇಖ್ಯೊ, ಕತೋಬಿ ಮಹಿ ಕೋಗಯೋನಿ.
JOH 20:6 ಸೀಮೋನ್‌ ಪೇತ್ರನ ಪೀಠೆ ಐನ್, ಘವಿನ ಮಹಿ ಜೈ಼ನ್‌, ಯೋ ಘಣ ಮೋಲ್ನು ಗಾದಿನು ಲುಂಗ್ಡ ಪಡ್ಯುಥು.
JOH 20:7 ಅಜು಼ ಯೇಸುನ ಮುಡ್‌ಕ್ಯಾನ ಭಾಂದ್ಯುಥೂತೆ ಲುಂಗ್ಡು, ಯೋ ಘಣ ಮೋಲ್ನ ಲುಂಗ್ಡಾನ ಜೋ಼ಡೆ ಪಡ್ಯುಥು ಕೊಯ್ನಿತೆ, ಲಪ್‌ಟೈನ್‌ ಏಕಾಡಿ ಅಲಕ್ ಮ್ಹೇಲಿರಾಖ್ಯುಥೂತೆ ದೇಖ್ಯೊ.
JOH 20:8 ಅನಕೇಡೆಥು ಘವಿಕನ ಪಹಿಲೆ ಐನ್, ಪೊಚ್ಯೋತೆ ಯೋ ಬಿಜ್ಜೇಕ್‌ ಶಿಷ್ಯಬಿ ಮಹಿ ಜೈ಼ನ್‌ ದೇಖಿನ್‌, ವಿಶ್ವಾಸ್‌ ಕರ‍್ಯೊ.
JOH 20:9 ಯೇಸು ಮರ್‌ವಾನ ಬಾದ್‌ಮ ಜಿವ್ತೊ ಹುಯಿನ್ ಉಠಿ ಆವ್ಣುಕರಿ ವಚನ್‌ಮ ಲೀಖೈರ‍್ಹೂತೆ ವಾತೆ ಇವ್ಣುನ ಬಿಜೂ಼ಬಿ ಮಾಲುಮ್‌ ಕೋ ಥೂನಿ.
JOH 20:10 ಅನಕೇಡೆಥು ಯೋ ಶಿಷ್ಯರ್‌ ಪಾಛು಼ಫರಿ ಘರೆ ಗಯು.
JOH 20:11 ಕತೋಬಿ ಮರಿಯ ಭಾರ್‌ ಘವಿಕನ ರೊವ್‌ತಿಹುಯಿನ್, ಭೀಯಿಥಿ. ಯೋ ರೊವ್‌ತಿ ಹುಯಿನಸ್‌ ಘವಿನ ಮಹಿ ಝು಼ಕಿನ್‌, ದೇಖಿ.
JOH 20:12 ತದೆ ಯೇಸುನು ಮುರ್ದು ಮ್ಹೇಲ್ಯುಥೂತೆ ಝ಼ಗೋಮ, ಧೋಳು ಲುಂಗ್ಡು ಪೇರ‍್ಹಿರಾಖ್ಯುಥೂತೆ ಬೇ ದೇವ್‌ನು ದೂತರ್‌ನ ದೇಖಿ. ಇನಾಮ ಏಕ್‌ ಜ಼ಣೊ ಮುಡ್‌ಕ್ಯೂ ಥೂತೆ ಭಣಿ, ಅಜು಼ ಏಕ್‌ ಜ಼ಣೊ ಗೋಡಾಭಣಿ ಬೆಠಾಥ.
JOH 20:13 ಯೋ ದೇವ್‌ನು ದೂತರ್ ಮರಿಯನ, “ಅಲಿ ಆಯಾ, ತೂ ಶನ ರೊವ್‌ಕರಾಸ್ತೆ?” ಕರಿ ಪುಛಾ಼ಯ. ತದೆ ಇನೆ, “ಮಾರೊ ಪ್ರಭುನು ಮುರ್ದಾನ ಇವ್ಣೆ ಪಳ್ಳಿಚ಼ಲಿಗಯು, ಅಜು಼ ಇನ ಕಿಜ್ಗಾ಼ ಮ್ಹೇಲಿರಾಖ್ಯುಸ್ ಕರಿ ಮನ ಮಾಲುಮ್‌ ಕೊಯ್ನಿ!” ಕರಿ ಜಾ಼ವಾಬ್‌ ದಿದಿ.
JOH 20:14 ಅಮ್ ಬೋಲಾನ ಬಾದ್‌ಮ, ಪೀಠೆ ಫರೀನ್, ಹಿಜ್ಜಾ಼ ಯೇಸು ಭೀರ‍್ಯೊಥೊತೆ ಇನೆ ದೇಖಿ; ಕತೋಬಿ ಯೋಸ್‌ ಯೇಸು ಕರಿ ಇನ ಮಾಲುಮ್‌ ಕೋ ಹುಯೂನಿ.
JOH 20:15 ಯೇಸುನೆ ಇನ, “ಅಲಿ ಆಯಾ, ತೂ ಶನ ರೊವ್‌ಕರಾಸ್ತೆ? ತೂ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ. ಹೈರೋತೆ ಬಾಗ್‌ನ ದೇಖಿಲ್ಯವಾಳೊಕಿ ಶುಕಿ ಕರಿ ಮರಿಯನೆ ಸೋಚಿನ್, ಇನ, “ಮಾಲಿಕ್, ತೂ ಇನ ಪಾಡಿಲೀನ್ ಜೈ಼ರೊ ಉಶೇತೊ, ಕಿಜ್ಗಾ಼ ಮ್ಹೇಲಿರಾಖ್ಯೋಸ್‌ ಕರಿ ಮನ ಬೋಲ್, ಮೇ ಇನ ಪಳ್ಳಿಜ಼ವ್‌ಸ್‌” ಕರಿ ಬೋಲಿ.
JOH 20:16 ಯೇಸುನೆ ಇನ, “ಮರಿಯ” ಕರಿ ಬೋಲ್ಯೊ. ತದೆ ಇನೆ ಯೇಸು ಭಣಿ ಫರೀನ್, ಇಬ್ರಿಯ ವಾತೇಮ, “ರಬ್ಬೂನಿ!” ಕರಿ ಬೋಲಿ. ರಬ್ಬೂನಿ ಕತೊ, ‘ಗುರು’ ಕರಿ ಮತ್‌ಲಬ್.
JOH 20:17 ಯೇಸುನೆ ಇನ, “ಮನ ಧರ್‌ನಕೊ, ಶನಕತೊ ಮೇ ಬಿಜೂ಼ಬಿ ಬಾಕನ ಕೋ ಜೈ಼ರ‍್ಹೋನಿ. ಕತೋಬಿ ತೂ ಮಾರ ಭೈಯೇಕನ ಜೈ಼ನ್‌, “ಮೇ ಮಾರೊ ಬಾ ಅಜು಼ ಇವ್ಣೊ ಬಾ, ಮಾರೊ ದೇವ್ ಅಜು಼ ಇವ್ಣೊ ದೇವ್ ಹುಯಿರ‍್ಹೋತೆ ಇನಕನ ಪಾಛೊ಼ ವಳ್ಯೊಜ಼ವುಸ್‌ ಕರಿ ಬೋಲ್” ಕರಿ ಬೋಲ್ಯೊ.
JOH 20:18 ತದೆ ಮಗ್ದಲನಿ ಮರಿಯ ಶಿಷ್ಯರ್‌ಕನ ಜೈ಼ನ್‌, ಇನೆ ಪ್ರಭುನ ದೇಖಿತೆ ಅಜು಼ ಯೇಸುನೆ ಇನ ಬೋಲ್ಯೋತೆ ಬಾರೇಮ ಇವ್ಣುನ ಬೋಲಿ.
JOH 20:19 ಯೋಸ್‌ ದನ್ನೆಕತೊ, ವಾರಾನ ಪಹಿಲ ದನ್ನೆ ಖ್ಹಾಂಜೆ, ಶಿಷ್ಯರ್‌ ಯೆಹೂದ್ಯರ್ ಅದಿಕಾರಿನ ಡರ್‌ಥಿ ಇವ್ಣೆ ಥಾತೆ ಘರ್‌ನು ಬಾಕಲ್‌ ಮೂಚಿನ್, ಮಹಿ ಥಾ. ತದೆ ಯೇಸು ಐನ್, ಇವ್ಣ ಇಚ಼್‌ಮ ಭೀರಿನ್‌, “ತುಮೂನ ಸಮಾಧಾನ್ ಹುವಾದೆ” ಕರಿ ಬೋಲ್ಯೊ.
JOH 20:20 ಆ ಬೋಲಾನ ಬಾದ್‌ಮ, ಇನ ಹಾತ್‌ನಾಬಿ, ಪಾಖ್ಹ್‌ಳಿನಾಬಿ ಇವ್ಣುನ ವತಾಳ್ಯೊ. ಪ್ರಭುನ ದೇಖ್ಯುತೆ ಇನಖ್ಹಾಜೆ ಶಿಷ್ಯರ್‌ ಖ್ಹಾರು ಖ್ಹುಶೀಥಿ ಭರೈಗಯು.
JOH 20:21 ಯೇಸುನೆ ಇವ್ಣುನ, “ತುಮೂನ ಸಮಾಧಾನ್ ಹುವಾದೆ. ಬಾನೆ ಮನ ಮೋಕ್‌ಲ್ಯೊತೆ ಇಮ್ಮಸ್, ಮೇಬಿ ತುಮೂನ ಮೋಕ್ಲುಸ್‌” ಕರಿ ಬೋಲ್ಯೊ.
JOH 20:22 ಅಮ್ ಬೋಲಾನ ಬಾದ್‌ಮ, ಯೇಸುನೆ ಇವ್ಣಾಪರ್ ಫೂಕಿನ್‌, “ಅಲ್ಲೇವೊ ಪವಿತ್ರಾತ್ಮನ.
JOH 20:23 ತುಮೆ ಕಿನು ಪಾಪ್ನ ಮಾಪ್‌ ಕರೋಸ್ಕಿ, ಇವ್ಣು ಪಾಪ್ ಮಾಪ್‌ ಉಶೆ; ಅಜು಼ ತುಮೆ ಕಿನು ಪಾಪ್ನ ಮಾಪ್‌ ಕೋ ಕರೋನಿಕಿ, ಇವ್ಣು ಪಾಪ್ ಮಾಪ್‌ ಕೋ ಉಶೇನಿ” ಕರಿ ಬೋಲ್ಯೊ.
JOH 20:24 ಯೇಸು ಆಯೋತೆ ತದೆ, ಭಾರ ಶಿಷ್ಯರ್‌ಮ ಏಕ್‌ ಹುಯಿರ‍್ಹೊಥೋತೆ ದಿದುಮಕರಿ ತೋಮ ಇವ್ಣಿ ಜೋ಼ಡೆ ಕೊಥೋನಿ. ‘ದಿದುಮ’ ಕತೊ ಅವಳಿಜವಳಿ ಕರಿ.
JOH 20:25 ಇನಖ್ಹಾಜೆ ಬಿಜಾ಼ಖ್ಹಾರ ಶಿಷ್ಯರ್‌ನೆ, “ಹಮೆ ಪ್ರಭುನ ದೇಖ್ಯ!” ಕರಿ ಇನ ಬೋಲ್ಯ. ಕತೋಬಿ ತೋಮನೆ, “ಮೇ ಇನ ಹಾತ್‌ಮ ಮೇಕೇಥಿ ಹುಯೂತೆ ಫೋಡಾನ ದೇಖಿನ್‌, ಯೋ ಮೇಕೆ ಮರೈತೆ ಝ಼ಗೋಮ ಮಾರಿ ಅಂಗ್‌ಳಿ ಘಾಲಿನ್, ಇನಿ ಪಾಖ್ಹ್‌ಳಿಮ ಮಾರಹಾತೇಥಿ ಛಿಮಾಶೆ ತುಮಾರಿ ವಾತೇನ ನಂಬುಕೊಯ್ನಿ” ಕರಿ ಬೋಲ್ಯೊ.
JOH 20:26 ಆಟ್ ದನ್ ಬಾದ್‌ಮ, ಇನ ಶಿಷ್ಯರ್‌ ಪಾಛು಼ ಮಹಿ ಥಾತೆ ತದೆ, ತೋಮಾಬಿ ಇವ್ಣಿ ಜೋ಼ಡೆ ಥೊ. ಬಾಕಲ್‌ ಮೂಚೈ಼ರ‍್ಹೂಥು, ತದೆ ಯೇಸು ಐನ್, ಇವ್ಣ ಇಚ಼್‌ಮ ಭೀರಿನ್‌, “ತುಮೂನ ಸಮಾಧಾನ್ ಹುವಾದೆ” ಕರಿ ಬೋಲ್ಯೊ.
JOH 20:27 ಅನಕೇಡೆಥು ಯೇಸುನೆ ತೋಮನ, “ತಾರಿ ಅಂಗ್‌ಳಿನ ಹಜ಼್ಜ ಮ್ಹೇಲಿನ್, ಮಾರ ಹಾತ್ನ ಛೀಮಿನ್‌ ದೇಕ್; ತಾರ ಹಾತ್ನ ಖ್ಹಾಮ್ಣೆ ಕರೀನ್, ಮಾರಿ ಪಾಖ್ಹ್‌ಳಿಮ ಘಾಲ್‌, ವಿಶ್ವಾಸ್‌ಕೊಂತೆ ನಕೊ ರ‍್ಹೇ, ವಿಶ್ವಾಸ್‌ ಕರ್‌!” ಕರಿ ಬೋಲ್ಯೊ.
JOH 20:28 ತೋಮನೆ ಯೇಸುನ, “ಮಾರೊ ಪ್ರಭು, ಮಾರೊ ದೇವ್!” ಕರಿ ಜವಾಬ್‌ ದಿದೊ.
JOH 20:29 ಯೇಸುನೆ ಇನ, “ತೂ ಮನ ದೇಖ್ಯೋತೆ ಇನಖ್ಹಾಜೆ ವಿಶ್ವಾಸ್ ಕರ‍್ಯೊ; ಕತೋಬಿ ಮನ ದೇಖಾಕೊಯ್ನಿತೆ ವಿಶ್ವಾಸ್‌ ಕರಾವಾಳುಸ್‌ ಖ್ಹಾಚಮಾಬಿ ಧನ್ಯರ್” ಕರಿ ಬೋಲ್ಯೊ.
JOH 20:30 ಯೇಸುನೆ ಬಿಜೂ಼ಬಿ ಕೈಯೆಕ್ಕಿ ಅದ್ಭುತ್ ಕಾಮ್ನ ಖ್ಹಾರು ಇನ ಶಿಷ್ಯರ್‌ನ ಖ್ಹಾಮ್ಣೆ ಕರ‍್ಯೊ.ಎತ್ರ ಅಖ್ಖಾಕಾಮ್ನ ಥೋಡುಬಿ ಅದ್ಭುತ್‌ಖ್ಹಾರು ಆ ಪುಸ್ತಕ್‌ಮ ಕೋ ಲೀಖೈರ‍್ಹೂನಿ.
JOH 20:31 ಕತೋಬಿ ಯೇಸುಸ್‌ ಕ್ರಿಸ್ತ ಕರೀಬಿ, ದೇವ್‌ನೊ ಛಿಯ್ಯೊ ಕರೀಬಿ ತುಮೆ ನಂಬಿನ್, ಇನ ನಾಮ್‍ಥಿ ತುಮೂನ ಜಾನ್‌ ಮಳಾದೆ ಕರಿ ಅತ್ರುಖ್ಹಾರು ಲೀಖೈರ‍್ಹುಸ್.
JOH 21:1 ಅನ ಬಾದ್‌ಮ, ಯೇಸು ತಿಬೇರಿಯ ದರ‍್ಯಾವ್‌ಕನ ಇನ ಶಿಷ್ಯರ್‌ನ ದೆಖಾಯೊ. ಯೋ ಅಮ್ ಚಾ಼ಲ್ಯುತೆ.
JOH 21:2 ಸೀಮೋನ್‌ ಪೇತ್ರಬಿ, ದಿದುಮಕರಿ ತೋಮಾಬಿ, ನತಾನಿಯೇಲ್‌ ಆ ಗಲಿಲಾಯನು ಕಾನಾ ಕರಿ ಗಾಮ್‌ವಾಳೊ, ಜೆಬೆದಾಯನ ಛಿಯ್ಯಾ, ಅಜು಼ ಯೇಸುನ ಬಿಜ಼ ಬೇ ಶಿಷ್ಯರ್‌ ಥಾ.
JOH 21:3 ಸೀಮೋನ್‌ ಪೇತ್ರನೆ ಇವ್ಣುನ, “ಮೇ ಮಾಛ಼್‌ಲಾ ಖ್ಹಾವಾನ ವಳ್ಯೊಜ಼ವುಸ್‌” ಕರಿ ಬೋಲ್ಯೊ. ತದೆ ಇವ್ಣೆ, “ಹಮೇಬಿ ತಾರ ಜೋ಼ಡೆ ಐಯೇಸ್‌” ಕರಿ ಇನ ಬೋಲ್ಯ. ಇವ್ಣೆ ಜೈ಼ನ್‌, ಡೋಣ್‌ ಚ಼ಢ್ಯಾ, ಕತೋಬಿ ಯೋ ರಾತ್‌ ಅಖ್ಖು ಏಕ್‌ ಮಾಛ್ಲು಼ಬಿ ಮಳ್ಯುಕೊಯ್ನಿ.
JOH 21:4 ವ್ಹಾಣು ಹುವ್ವಾದೀನ್, ಯೇಸು ಕನಾರೆಕನ ಭಿಯೋಥೊ; ತೋಬಿ ಶಿಷ್ಯರ್‌ನ ಯೋ ಯೇಸು ಕರಿ ಮಾಲುಮ್‌ ಕೋ ಪಡ್ಯುನಿ.
JOH 21:5 ತದೆ ಯೇಸುನೆ ಇವ್ಣುನ, “ದೋಸ್ತಿವೊ ತುಮೂನ ಮಾಛ್ಲು಼ ಮಳ್ಯುಕಿ ಶು?” ಕರಿ ಪುಛಾ಼ಯೊ. ಇವ್ಣೆ, “ಕೊಯ್ನಿ” ಕರಿ ಜವಾಬ್‌ ದಿದಾ.
JOH 21:6 ಯೇಸುನೆ ಇವ್ಣುನ, “ಡೋಣ್‌ನಿ ಖಾವಿ ಬಾಜು಼ಮ ಜಾ಼ಳು ನಾಖ್ಯಾತೊ, ತುಮೂನ ಥೋಡು ಮಾಛ಼್‌ಲಾ ಮಳ್‌ಶೆ” ಕರಿ ಬೋಲ್ಯೊ. ಇವ್ಣೆ ಇಮ್ಮಸ್ ಜಾ಼ಳು ನಾಕ್ತಾನ ಘಣು ಮಾಛ಼್‌ಲಾ ಮಳ್ಯುತೆ ಇನಖ್ಹಾಜೆ, ಜಾ಼ಳಾನ ಪಾಛು಼ ಮಹಿ ಖೇಚಾ಼ನ ಕೋ ಹುಯೂನಿ.
JOH 21:7 ಯೇಸುನೊ ಪ್ಯಾರ್‌ನೊ ಶಿಷ್ಯನೆ ಪೇತ್ರನ, “ಯೋ ಪ್ರಭುಲಾ!” ಕರಿ ಬೋಲ್ಯೊ. ಸೀಮೋನ್ ಪೇತ್ರನೆ ಇನ ಖ್ಹಮ್‌ಜಿನ್‌, ಮಾಛ್ಲು಼ ಖ್ಹಾವಾನಖ್ಹಾಜೆ ಪೇತ್ರನೆ ಝೋ಼ಳ್‍ನಾನ ಕಾಡಿ ಮ್ಹೇಲಿರಾಖ್ಯೊಥೊ ಯೊ ಪಾಛು಼ ಉಪ್ಪರ್‌ಲ್ಯು ಝ಼ಗ್ಗಾನ ಪೇರ‍್ಹಿಲೀನ್‌ ದರ‍್ಯಾವ್‌ಮ ಕೂದಿ ಗಯೊ.
JOH 21:8 ದರ‍್ಯಾವ್‍ನಿ ಕನಾರಿ ದೂರ್ ಶಾತ್ಬಿ ಕೋ ಥೂನಿ, ಖಲಿ ಖ್ಹೋ ಮೀಟರ್ ದೂರ್ ಥೂತೆ ಇನಖ್ಹಾಜೆ, ಬಿಜ಼ ಶಿಷ್ಯರ್‌ ಮಾಛ಼್‌ಲು ಭರೈರ‍್ಹುಥೂತೆ ಯೋ ಜಾ಼ಳಾನ ಖೇಚ಼್‌ತು ಹುಯಿನ್, ಡೋಣ್‌ಮಾಸ್‌ ಆಯು.
JOH 21:9 ಇವ್ಣೆ ಡೋಣ್‌ಮಾಥು ಉತ್ರಿನ್, ಕನಾರೆ ಆವಾದಿನ್, ಕೋಲ್‌ಖ್ಹಾನಿ ಆಗ್ ಅಜು಼ ಇನಾಪರ್‌ ಮ್ಹೇಲಿರಾಖ್ಯುಥೂತೆ ಮಾಛ಼್‌ಲಾ ಅಜು಼ ಥೋಡು ರೋಟಾನಾಬಿ ದೇಖ್ಯು.
JOH 21:10 ಯೇಸುನೆ ಇವ್ಣುನ, “ತುಮೆ ಹಮ್ಕೆ ಧರ‍್ಯಾತೆ ಮಾಛ್ಲಾ಼ವ್‍ಮ ಥೋಡು ಲ್ಯಾವೊ” ಕರಿ ಬೋಲ್ಯು.
JOH 21:11 ಸೀಮೋನ್‌ ಪೇತ್ರನೆ ಡೋಣ್ಣಾ ಮಹಿ ಜೈ಼ನ್‌, ಜಾ಼ಳಾನ ಕನಾರಿಕನ ಖೇಚಿ ಲಾಯೊ. ಯೋ ಏಕ್‌ಖ್ಹೊ ತೀನ್‌ಉಪ್ಪರ್‌ ಅಡೈವಿಖ್ಹ್‌ ಮೋಟಾ ಮಾಛ್ಲಾ಼ಥಿ ಭರೈರ‍್ಹೂಥು, ಎತ್ರುಬಲ್ಲ ಮಾಛ಼್‌ಲು ರ‍್ಹಯುತೋಬಿ ಜಾ಼ಳು ಫಾಟ್ಯುಕೊಯ್ನಿ.
JOH 21:12 ಯೇಸುನೆ ಇವ್ಣುನ “ಐನ್, ಖಾಣು ಖಾವೊ” ಕರಿ ಬೋಲ್ಯೊ. ಯೋ ಪ್ರಭುಸ್ ಶಿಷ್ಯರ್‌ನ ಮಾಲುಮ್‌ ಥೂತೆ ಇನಖ್ಹಾಜೆ, “ತೂ ಕೋಣ್?” ಕರಿ ಇವ್ಣಾಮ ಕಿನೇಬಿ ಪುಛಾ಼ವಾನಿ ಭಾಲ್ ಕೋ ಕರ‍್ಯುನಿ.
JOH 21:13 ಯೇಸುನೆ ಐನ್, ರೋಟಾನ ಪಾಡೀನ್, ಇವ್ಣುನ ದಿದೊ; ಇಮ್ಮಸ್ ಮಾಛ್ಲಾ಼ನಾಬಿ ಪಾಡಿನ್ ದಿದೊ.
JOH 21:14 ಯೇಸು ಮರಿನ್‌, ಜಿವ್ತೊಹುಯಿನ್ ಉಠಾನ ಬಾದ್‌ಮ ಇನ ಶಿಷ್ಯರ್‌ ದೆಖಾಯೊತೆ ಆ ತೀನ್ನೆ ಹಲ್ಲ.
JOH 21:15 ಇವ್ಣೆ ಖಾಣು ಖಾವಾನ ಬಾದ್‌ಮ, ಯೇಸು ಸೀಮೋನ್‌ ಪೇತ್ರನ, “ಯೋಹಾನ್ನ ಛಿಯ್ಯೊ ಸಿಮೋನ್, ತೂ ಅವ್ಣೆಥೀಬಿ ಜಾ಼ಖ್ಹತ್ ಮನ ಪ್ಯಾರ್ ಕರಾಸ್ಕಿಶು?” ಕರಿ ಪುಛಾ಼ಯೊ. ಪೇತ್ರನೆ, “ಓಹೋಲಾ, ಪ್ರಭು, ಮೇ ತುನ ಪ್ಯಾರ್ ಕರುಸ್” ಕರಿ ಬೋಲ್ಯೊ. ತದೆ ಯೇಸುನೆ ಇನ, “ಮಾರು ಮೇಂಢಾನು ಚೆಲ್ಕಾವ್ನ ಚ಼ರಾವ್‌” ಕರಿ ಬೋಲ್ಯೊ.
JOH 21:16 ಬೇನೆ ಹಲ್ಲ ಯೇಸುನೆ ಪೇತ್ರನ, “ಯೋಹಾನ್ನ ಛಿಯ್ಯಾ ಸೀಮೋನ್‌, ತೂ ಮನ ಪ್ಯಾರ್ ಕರಾಸ್ಕಿಶು?” ಕರಿ ಬೋಲ್ಯೊ. ತದೆ ಇನೆ, “ಓಹೋಲಾ, ಪ್ರಭು ಮೇ ತುನ ಪ್ಯಾರ್ ಕರೂಸ್‌ಕರಿ ತುನಾಸ್ ಮಾಲುಮ್‌” ಕರಿ ಬೋಲ್ಯೊ. ಯೇಸುನೆ ಇನ, “ಮಾರ ಮೇಂಢವ್‌ನಿ ಖ್ಹದರ್ ಕರ್‌” ಕರಿ ಬೋಲ್ಯೊ.
JOH 21:17 ತೀನ್ನೆಹಲ್ಲ ಯೇಸುನೆ, “ಯೋಹಾನ್ನ ಛಿಯ್ಯಾ ಸೀಮೋನ್‌, ತೂ ಮನ ಪ್ಯಾರ್ ಕರಾಸ್ಕಿ ಶು?” ಕರಿ ಪುಛಾ಼ಯೊ. ಯೇಸುನೆ ತೀನ್ನೆಹಲ್ಲ ಇನ, “ತೂ ಮನ ಪ್ಯಾರ್ ಕರಾಸ್ಕಿಶು?” ಕರಿ ಪುಛಾ಼ವ್‌ತಾನ, ಪೇತ್ರನ ದುಖ್‍ಹುಯು. ತದೆ ಇನೆ, “ಪ್ರಭು, ತುನ ಖ್ಹಾರುಸ್‌ ಮಾಲುಮ್‌; ಮೇ ತುನ ಪ್ಯಾರ್ ಕರುಸ್ ಕರೀಬಿ ತುನ ಮಾಲುಮ್‌!” ಕರಿ ಬೋಲ್ಯೊ. ಯೇಸುನೆ ಇನ, “ಮಾರ ಮೇಂಢವ್‌ನಿ ಖ್ಹದರ್‌ಕರ್‌” ಕರಿ ಬೋಲ್ಯೊ.
JOH 21:18 ಮೇ ತುನ ಖ್ಹಾಚ ಬೋಲುಕರುಸ್, ತೂ ಜಾ಼ನ್ಜ಼ಮಾನ್ ಥೋತೆ ತದೆ, ತಾರಿ ಕಂಬರ್‌ನ ಭಾಂದಿಲೀನ್, ತುನ ಕಿಜ್ಗಾ಼ ಅಛ್ಛು಼ ಲಾಗಸ್ಕಿ ಹಿಜ್ಜಾ಼ ಜಾ಼ತೋಥೊ; ಕತೋಬಿ ತೂ ಬುಢೋ ಹುಯಿಜೈ಼ಶ್ತೆ ತದೆ ತಾರ ಹಾತ್ನ ಪಖ್ಹಾರೀಶ್‌, ಅಜು಼ ಬಿಜ್ಜೇಕ್‌ ಜ಼ಣೊ ತಾರಿ ಕಂಬರ್‌ನ ಭಾಂದೀನ್‌, ತುನ ಅಛ್ಛು಼ ಲಾಗಕೊಂತೆ ಹೀಕಡ್‌ ತುನ ಲೀಜಾ಼ಶೆ” ಕರಿ ಬೋಲ್ಯೊ.
JOH 21:19 ದೇವ್ನ ಮಹಿಮೆ ಕರಾನಖ್ಹಾಜೆ ಪೇತ್ರ ಕಿಮ್ನು ಮೋತ್ ಮರ್‌ಶೆ ಕರಿ ಆ ವಾತೇಥಿ ಯೇಸುನೆ ಬೋಲ್ಯೊ. ಅಮ್ ಬೋಲಾನ ಬಾದ್‌ಮ, ಯೇಸುನೆ ಇನ, “ಮಾರ ಪೀಠೆ ಆವ್!” ಕರಿ ಬೋಲ್ಯೊ.
JOH 21:20 ಪೇತ್ರ ಪೀಠೆ ಫರಿ ದೇಖಿನ್‌, ಯೇಸುನೊ ಪ್ಯಾರ್‌ನೊ ಶಿಷ್ಯ ಇವ್ಣ ಪೀಠೆ ವಳ್ಯಾವಾತೆ ದೇಖ್ಯೊ.ರಾತ್ಮ ಖಾಣು ಖಾವಾನಿ ವಖ್ಹತ್‌ಮ ಯೇಸುನಿ ಛಾ಼ತಿಕನ ಝು಼ಕಿನ್‌, “ಪ್ರಭು, ತುನ ಧೋಕೇಥಿ ಧರಿದಿಶ್ಶೆತೆ ಕೋಣ್?” ಕರಿ ಪುಛಾ಼ಯೋತೆ ಯೋಸ್‌ ಶಿಷ್ಯ.
JOH 21:21 ಯೋ ಶಿಷ್ಯನ ದೇಖಿನ್‌, ಪೇತ್ರನೆ ಯೇಸುನ, “ಪ್ರಭು ಅನಿ ಬಾರೇಮ ಶಾತ್‌?” ಕರಿ ಪುಛಾ಼ಯೊ.
JOH 21:22 ಯೇಸುನೆ ಇನ, “ಮೇ ಆವಾತೋಡಿ, ಆ ಜಿವ್ತೊ ರ‍್ಹೇವ್ಣುಕರಿ ಮನ ಮನ್ ರ‍್ಹಯೂತೊ, ಇನೇಥಿ ತುನ ಶಾತ್‌? ತೂ ಮಾರ ಪೀಠೆ ಆವ್” ಕರಿ ಜವಾಬ್‌ ದಿದೊ.
JOH 21:23 ಅನೇಥಿ ಯೋ ಶಿಷ್ಯ ಮರ್‌ಶೆಕೊಯ್ನಿ ಕರಿ ಬೋಲಾನಿ ವಾತೆ ಯೇಸುನ ಭೈಯೇವ್‌ಮ ಫೈಲಿಗಯು. ಯೋ ಮರ್‌ಶೆಕೊಯ್ನಿ. ಕತೋಬಿ ಯೇಸುನೆ ಇನ ಬೋಲ್ಯೊಕೊಯ್ನಿ, “ಮೇ ಆವಾತೋಡಿ, ಯೋ ಜಿವ್ತೊ ರ‍್ಹೇವ್ಣುಕರಿ ಮನ ಮನ್ ರ‍್ಹಯೂತೊ, ಇನೇಥಿ ತುನ ಶಾತ್‌?” ಕರೀಶ್ ಯೇಸುನೆ ಬೋಲ್ಯೊತೆ.
JOH 21:24 ಆ ಖ್ಹಾರಿ ಬಾರೇಮ ಲೀಖಿನ್, ಅನಿ ಬಾರೇಮ ಸಾಕ್ಷಿ ಬೋಲವಾಳೊ ಶಿಷ್ಯ ಆಸ್. ಯೋ ಬೋಲ್ಯೋತೆ ಖ್ಹಾಚ಼ಸ್ ಕರಿ ಹಮೂನ ಮಾಲುಮ್‌.
JOH 21:25 ಅತ್ರೇಸ್ ಕಾಹೆತೆ, ಯೇಸುನೆ ಕರ‍್ಯುತೆ ಬಿಜೂ಼ಬಿ ಕೈಯೆಕ್ಕಿ ಛಾ಼. ಯೋ ಖ್ಹಾರಾನ ಏಕೇಕ್‌ ಕರಿ ಲೀಖ್ಯೂತೋ, ಲೀಖಾವ್ಣುತೆ ಪುಸ್ತಕ ಖ್ಹಾರು ಹಿಡಿ ಜಗತ್ತಸ್ ಬಶ್‌ ಕೋ ಉಶೇನಿ ಕರಿ ಮೇ ಸೋಚುಸ್.
ACT 1:1 ಪ್ಯಾರ್‌ನೊ ಥಿಯೊಫಿಲ, ಯೇಸುನೆ ಕರ‍್ಯೊತೆ ಕಾಮ್ನಿ ಬಾರೇಮ ಅಜು಼ ವಚನ್ನಿ ಬಾರೇಮ ಹರೇಕ್‍ನಾಬಿ ಮೆ ಮಾರ ಪಹಿಲ ಪುಸ್ತಕ್‌ಮ ಲೀಖಿರಾಖ್ಯೊಸ್.
ACT 1:2 ಇನೆ ಪರಲೋಕ್‌ನ ಜಾ಼ವಾಲಗು ಇನು ಅಪೊಸ್ತಲರ‍್ನ ಚೂ಼ಣಾಯಹುಯ ಪವಿತ್ರಾತ್ಮನಿ ಶಕಥ್ಥಿ ಶಿಕಾಡ್ಯೊ.
ACT 1:3 ಆ ಹೈರುತೆ ಯೊ ಮರಾನಿ ಬಾದ್‌ಮ ಚಾ಼ಲ್ಯುತೆ, ಇನೆ ಬಚಿನ್ ಆಯೋತೆ ಇನಿ ಬಾರೇಮ ಅಪೊಸ್ತಲರ‍್ನ ವತಾಳಿಲಿದೊ ಇನೆ ಜಿವೀನ್ ಉಠ್ಯೊತೆ ಘಣಿ ವಖ್ಹತ್‌ಲಗೂಬಿ ಕೈಏಕ್ ಜ಼ಣಾನ ದೆಖಾವ್ತೊರ‍್ಹಯೊ ದೇವ್ನಿ ರಾಜ್ಯನಿ ಬಾರೇಮ ಇವ್ಣಮ ಬೋಲ್ತೊರ‍್ಹಿಯೊ.
ACT 1:4 ಅಮ್ ರ‍್ಹವಾನಿ ವಖ್ಹ್‌ತೆ ಏಕ್‌ಬಾರ್ ಶಿಷ್ಯರ್‌ನಿ ಜೋ಼ಡ್ಮ ಖಾಣು ಖಾವನಿವಖ್ಹ್‌ತೆ ಇನೆ ಇವ್ಣುನ “ಮಾರೊ ಬಾ ಏಕ್‌ ಜಿಭಾನ್‌ ದಿರಾಖ್ಯೊಸ್ ಕರಿ ಅನಿ ಬಾರೇಮ ಪಹಿಲೇಸ್ ತುಮೂನ ಮೇ ಬೋಲಿರಾಖ್ಯುತೆ ಇನ ಖ್ಹಮ್‌ಜಿರಾಖ್ಯಥಾತೆ ಇಮ್‌ ಆ ವಾಗ್ದಾನ್ನಿ ವರ್‌ದಾನ್ ಲ್ಯವಾನಖ್ಹಾಜೆ ತುಮೆ ಯೆರೂಸಲೇಮ್ಮ ಟಿವೈರ‍್ಹೇಣುಕರಿ ಬೋಲ್ಯೊ.
ACT 1:5 ಯೋಹಾನನೆ ಅದ್ಮಿವೋನ ಪಾಣಿಥಿ ಬ್ಯಾಪ್ತಿಸ್ಮ ಕರಾಯೊ ಕತೋಬಿ ಬಿಜ಼ ಥೋಡಸ್ ದನ್ಮ ತುಮೂನ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ಉಷೆ” ಕರಿ ಬೋಲ್ಯೊ.
ACT 1:6 ಮಳಿರ‍್ಹುಥೂತೆ ಅಪೊಸ್ತಲರ್ ಖ್ಹಾರು, ಇವ್ಣೆ “ಪ್ರಭು, ತೂ ಇಸ್ರಾಯೇಲ್‌ ಅದ್ಮಿವೋನ ಹಮೇಶ ಪಾಛೊ಼ ಇವ್ಣಿ ರಾಜ್ಯನ ಆಸ್ ದನ್ಮ ದ್ಯವಾನ ಆಯೋಕಿ ಶು? ಕರಿ ಬೋಲ್ಯು.
ACT 1:7 ಯೇಸು ಇವ್ಣುನ ಅಖ್ಖಿ ವಖ್ಹತ್‌ನ ರ‍್ಹವೊ ಹಗಾಮ್ನ ರ‍್ಹವೊ ಮಾಲುಮ್ ಕರಾನಿ ಅದಿಕಾರ್ ಬಾನ ಛಾ಼ ಪಣ್ಕಿ ಇನ ಮಾಲುಮ್ ಕರಾನು ಕಾಮ್ ತುಮಾರು ಕಾಹೆ.
ACT 1:8 ಕತೋಬಿ ಪವಿತ್ರಾತ್ಮ ತುಮಾರಪರ್ ಆಯಿಗೋತೊ, ತುಮೆ ಶಕತ್‍ಲೀನ್ ಯೆರೂಸಲೇಮ್ಮಾಬಿ ಯೂದಾಯಮಬಿ, ಸಮಾರ್ಯ ತಬರ್‌ಖಾಮಾಬಿ ಅಜು಼ ಜಗತ್ನ ಕಡೆಷಿ ಲಗೂಬಿ ಮನ ಸಾಕ್ಷಿಹುಯಿರಿಶು.
ACT 1:9 ಆ ವಾತೆ ಅಪೊಸ್ತಲರ‍್ನ ಬೋಲಿಹುಯಿಗು ತದೆ ಇವ್ಣೆ ದೇಖುಕರ್ತಥಾತೆ ತದೇಸ್‌ ಯೋ ಸೊರ್ಗಮ ಪಡೈಗಯೊ. ವಾದ್‌ಳು ಮೂಚಿನಾಖಿದಿದೂತೆ ಇನಖ್ಹಾಜೆ ಯೇಸುನ ಇವ್ಣೆ ದೆಖಾನ ಕೊಹುಯುನಿ.
ACT 1:10 ಯೇಸು ಜಾ಼ವಾನಿವಖ್ಹ್‌ತೆ ಇನ ಇವ್ಣೆ ಆಬ್‌ನಾಸ್ ಠರ್‌ಕೈನ್ ದೇಖುಕರ್ತುಥು. ತದೆ, ಧೋಳು ಲುಂಗ್ಡು ಫೇರಹುಯ ಬೇಜ಼ಣ ಇನ ಭೀಡೆ ಭೀರಿನ್,
ACT 1:11 ಗಲಿಲಾಯವಾಳ ಅದ್ಮಿವೊ, ತುಮೆ ಶನ ಆಸ್ಮಾನ್ನಾಸ್ ದೇಖುಕರಸ್? ತುಮಾರಕಂಥು ಯೇಸು ಕಿಮ್ ಪರ್‌ಲೋಕ್ನ ಛ಼ಡಿಗಯೊತೆ ತುಮೆ ದೇಖ್ಯಾಕಿ ಇಮ್ನಿ ಪರಕ್ಮಾಸ್ ಪಾಛು಼ ಆವ್‌ಶೆ.
ACT 1:12 ಇನಕೇಡೆಥು ಅಪೊಸ್ತಲರ್ ಖ್ಹಾರು ಆಲಿವ್‌ನ ಟೇಕ್‍ಡಿ ಕಂಥು ಯೆರೂಸಲೇಮ್ನ ಪಾಛು಼ಗಯು. ಯೊ ಟೇಕ್‍ಡಿಥು ಯೋ ಖ್ಹಯೇರ್‌ಥು ಜಾ಼ಖ್ಹತ್ ಕತೊ ಆಧುಮೈಲ್ ದೂರ್ ಥು.
ACT 1:13 ತದೆ ಇವ್ಣೆ ಖ್ಹಯೇರ್‌ಮ ಗಯ ಇವ್ಣೆಥೂತೆ ಘರ್‌ನ ಉಪ್ಲಿಬಾಜುಮ ಗಯ; ಇವ್ಣೆ ಕೋಣ್ ಕೋಣ್‌ಕತೊ, ಪೇತ್ರ, ಯೋಹಾನ. ಯಾಕೋಬ, ಅಂದ್ರೆಯ, ಫಿಲಿಪ್ಪ, ಅಜು಼ ತೋಮ, ಬಾರ್ತೊಲೊಮಾಯ, ಮತ್ತಾಯ, ಅಜು಼ ಅಲ್ಫಾಯನೊ ಛಿಯ್ಯೊ ಯಾಕೋಬ, ಜಾ಼ತ್ನೊಅಭಿಮಾನಿ ಕರಿ ಬೋಲೈಲಿದೋತೆ ಸೀಮೋನ ಅಜು಼ ಯಾಕೋಬನೊ ಛಿಯ್ಯೊ ಯೂದ ಇವ್ಣೆ ಖ್ಹಾರು ಹಿಜ್ಜಾ಼ ಥು.
ACT 1:14 ಇವ್ಣೆ ಅಖ್ಖುಜ಼ಣು ಏಕ್‍ಮನ್‍ಥಿ ಎಕ್ಟುಹುಯಿನ್ ದೇವ್ನಿ ಪ್ರಾರ್ಥನೆಮ ಥು. ಹಿಜ್ಜಾ಼ ಥೋಡಿಜ಼ಣಿ ತಯೇಡಾಬಿ, ಯೇಸುನಿ ಆಯಾ ಮರಿಯಾಬಿ ಇನ ಭೈಯೇಬಿ ಅಪೊಸ್ತಲರ‍್ನಿ ಜೋ಼ಡ್ಮ ಥೂ.
ACT 1:15 ಥೋಡದನ್ ಬಾದ್‌ಮ, ವಿಶ್ವಾಸಿಮ ಖ್ಹುಮಾರ್ ಏಕ್‌ಖ್ಹೊ ವೀಖ್ಹ್‌ ಜ಼ಣು ಸಭೆಮ ಮಳೀನ್‍ ಅಯಿರ‍್ಹವಾಮ, ಪೇತ್ರನೆ ಬೀಚ್ಮ ಉಠಿ ಭೀರಿನ್:
ACT 1:16 “ಭೈಯೇಭೇನೆವೊ, ಯೇಸುನ ಧರಿದ್ಯವಾಳನ ವಾಟ್‌ ವತಾಳ್ಯೊತೆ ಯೂದನಿ ಬಾರೇಮ ಪವಿತ್ರಾತ್ಮನೆ ದಾವೀದ್‍ಥಿ ಪವಿತ್ರ ಪುಸ್ತಕ್‌ಮ ಬೋಲೈರ‍್ಹುತೆ ವಾತೆ ಪೂರಹೋಣುಸ್‌ಪಡ್ಯುಥು,
ACT 1:17 ಯೂದ ಅಪ್ಣುನ ಮಾಲುಮ್‌ರ‍್ಹಾವಳೊ ಹುಯಿರ‍್ಹೋಥೊ ಅಜು಼ ಸೇವೇನ ಚೂ಼ಣೈರ‍್ಹೋ ತೋಬಿ ಯೇಸುನ ಧರಿದ್ಯವಾಳನ ಯೂದನೆ ಮದತ್ ಕರ್ನುಥೂತೆ ಇನ ಪವಿತ್ರಾತ್ಮನೆ ಪಹಿಲೇಸ್ ದಾವಿದ್ನ ಮ್ಹೋಡೇಥಿ ಬೋಲಿರಾಖ್ಯೊಥೊ.”
ACT 1:18 ಯೂದನೆ, “ಇನಿ ನೀಚ್‌ಕಾಮ್‍ಥಿ ಲಿದೋತೆ ಪೈಶಾಮ ಏಕ್‌ ಖೇತರ್‌ನ ಲೀಲಿದೊ ಥೊ. ಇನಮಾಸ್ ಇನ ಜಾನ್ನ ಕಳ್ಳಿದೊ. ಉಪ್ಪರ್ ಥು ಮುಡ್‌ಕ್ಯು ಹೇಟ್ ಹುಯಿನ್ ಪಡೀನ್, ಪೇಟ್ ಫುಟೀನ್, ಅತಲ್ಡಿ ಭಾರ್‌ ಅಯಿಗು.
ACT 1:19 ಅನಿ ಬಾರೇಮ ಯೆರೂಸಲೇಮ್ನ ಖ್ಹಾರ ಅದ್ಮಿನ ಮಾಲುಮ್ ಪಡ್ಯು. ಯೊ ಜ಼ಮೀನ್ನ ಇವ್ಣಿ ಬೋಲಿಮ ‘ಅಕೆಲ್ದಾಮಾ’ ಕರಿ ನಾಮ್‌ಮ್ಹೇಲಾಯು. ‘ಅಕೆಲ್ದಾಮಾ, ಕತೊ ‘ಲ್ಹೋಯಿನು ಖೇತರ್‌’ ಕರಿ ನಾಮ್ ಆಯು.
ACT 1:20 ಯೂದನಿ ಬಾರೇಮ ‘ಇನು ಘರ್‌ ಬರ್ಬಾತ್‌ ಹುವಾದೆ, ಯೋ ಅದ್ಮಿಕೊಂತೆ ಉಜ್ಜಾ಼ಡ್ ಹುವಾದೆ’ ಇನಿ ಅದಿಕಾರ್ ಬಿಜೇಕ್‍ಜ಼ಣಾನ ಜಾ಼ವಾದೆಕರೀಬಿ ಕೀರ್ತನೆ ಪುಸ್ತಕ್‌ಮ ಲೀಖೈರುಸ್.
ACT 1:21 “ಇನಖ್ಹಾಜೆ ಅಲಕ್ ಏಕ್‍ಜ಼ಣೊ ಅಪ್ಣಿಜೋ಼ಡ್ಮ ಮಳಿನ್ ಪ್ರಭು ಯೇಸು ಮರೀನ್ ಜಿವ್‍ಯೊತೆ ಇನ ಸಾಕ್ಷಿಹುಯಿರೇಣು. ಎಥ್ರಾನವಾಳೊ ಯೇಸು ಫರೀನ್ ಸೇವೆಕರಾನಿ ಅಖ್ಖಿವಖ್ಹ್‌ತೆ ಅಪ್ಣ ಟೋಳ್‍ವಾಳಾಮ ರ‍್ಹವವಾಳೊ ಹುಯಿರೇಣು.
ACT 1:22 ಇನಖ್ಹಾಜೆ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಬೋಧನೆ ಕರ‍್ಯೊತೆ ದನ್‌ಥು ಕತೊ ಯೋಹಾನ ಬ್ಯಾಪ್ತಿಸ್ಮ ಕರ‍್ಯೊತೆ ಹಿಜ್ಜಾ಼ಥು ಧರೀನ್ ಯೇಸು ಸೊರ್ಗಮ ಗಯೋತೆ ದನ್‍ಲಗೂಬಿ ಅಪ್ಣ ಜೋ಼ಡ್ಮ ರ‍್ಹವವಾಳೊ ಹುಯಿರೇಣು.” ಶನಕತೊ ಆ ವೇಳ್ಮ ರ‍್ಹವವಾಳೊ ಏಕ್ಜ಼ಣೊ ಯೇಸು ಪಾಛು಼ಜಿವ್ತೊಹುಯಿನ್ ಉಠ್ಯೊತೆ ಇನ ಸಾಕ್ಷಿಹುಯಿರೇಣು.
ACT 1:23 ತದೆ ಬಾರ್ಸಬ ಕರಿ ನಾಮ್‍ವಾಳೊ ಯೋಸೇಫ್‌ನ ಯೂಸ್ತ ಕರೀಬಿ ಬೋಲ್ತುಥು. ಅಜು಼ ಬಿಜೇಕ್ ಜ಼ಣೊ ಮತ್ತೀಯ. ಆ ಬೇ ಜ಼ಣಾನ ಅಪೊಸ್ತಲರ‍್ನ ಸಭೆನ ಖ್ಹಾಮ್ಣೆ ಭೀರಾಖ್ಯು.
ACT 1:24 ತದೆ ಇವ್ಣೆಅಮ್‍ ಪ್ರಾರ್ಥನೆ ಕರ‍್ಯುಕೀ, “ಪ್ರಭು, ತೂ ಅಖ್ಖಾನ ದಿಲ್‌ನೊಮಾಯಿನೊ ಮಾಲುಮ್ ಕರಿರಾಖ್ಯೊಸ್. ಆ ಬೇಜ಼ಣಾಮ ತೂ ಕಿನ ಚೂ಼ಣಿರಾಖ್ಯೊಸ್,
ACT 1:25 ಯೂದನಿ ಝ಼ಗೋಮ ಅಪೊಸ್ತಲಹುಯಿನ್ ಸೇವೆಕರಾನ ಯೋ ಝ಼ಗೋನ ಮ್ಹೇಲಿನ್ ಕಿಜ್ಜಾ಼ ಇನಿ ಝ಼ಗೋಕಿ ಹಿಜ್ಜಾ಼ ಚ಼ಲೆಗಯೊ
ACT 1:26 ತದೆ ಇವ್ಣಖ್ಹಾಜೆ ಚಿಟ್ಟಿನಾಖ್ಯು, ಇನಾಮ ಮತ್ತೀಯನು ನಾಮ್ ಪಡಾಯು.ತದೆ ಘ್ಯಾರಜ಼ಣ ಅಪೊಸ್ತಲರ‍್ನಿ ಜೋ಼ಡ್ಮಯೊ ಮಳಿಗೊ.
ACT 2:1 ಪೆಂತಕೊಸ್ಟ್ ಪೂಜಾ಼ನ ದನ್ನೆ ಇವ್ಣೆ ಅಖ್ಖುಜ಼ಣು ಏಕ್‍ಝ಼ಗೊ ಮಳ್ಯು.
ACT 2:2 ತದೆ ಜೊ಼ರೇಖ್ಹು ತುರಂತ್, ಅಪಟ್‌ಝ಼ಪಟ್‌ನೊ ವಹಿರೊ ವಾಗಾನಿಘೊಣಿ ಏಕ್‌ ಅವಾಜ಼್ ಆಬ್‍ಥು ಖ್ಹಮಜ್‍ಪಡ್ಯು. ಯೊ ಇವ್ಣೆ ಬೆಠಾಥಾತೆ ಘರ್ ಅಖ್ಖೂಸ್ ಭರಾಯು.
ACT 2:3 ಅಜು಼ ಇವ್ಣಿ ಜೀಬ್‍ ಆಗ್‍ನಿ ಝ಼ಲ್‌ಪಟ್‍ನಿತರ ದೆಖಾಯು. ಯೊ ಅಖ್ಖು ಅಲಕ್ ಅಲಕ್‌ಹುಯಿನ್ ಹರೇಕ್ನ ಉಪ್ಪರ್‌ಬಿ ಆಯು.
ACT 2:4 ಇವ್ಣೆಅಖ್ಖು ಪವಿತ್ರಾತ್ಮಥಿ ಭರೈನ್ ಅಲಕ್ ಅಲಕ್ ಬೋಲಿಮ ವಾತೆಬೋಲಲಗ್ಯು. ಪವಿತ್ರಾತ್ಮಸ್ ಇವ್ಣುನ ಆ ಶಕತ್ನ ದಿದೊ,
ACT 2:5 ತದೆ ಜಗತ್ನು ಅಖ್ಖಿ ಬಾಜು಼ಥು ಆಯುಹುಯು ಕೈಏಕ್ ಜ಼ಣು ಭಕ್ತ ಯೆಹೂದ್ಯರ್ ಖ್ಹಾರು, ಯೊ ವೇಳ್ಮ ಯೆರೂಸಲೇಮ್ಮ ಥೂ.
ACT 2:6 ಯೊ ಅವಾಜ಼್‌ನ ಖ್ಹಮ್‍ಜ್ಯುತೆ ಅದ್ಮಿವ್‌ನು ಮೋಟು ಝೂ಼ಂಡ್‌ ಹಿಜ಼್ಜ ಭರೈನ್ ಆಯು. ಅಜು಼ ಇವ್ಣಿ ಇವ್ಣಿ ಶೊಂತ್ ಬೋಲಿಮ ವಾತೆ ಬೋಲಾನು ಖ್ಹಮ್‌ಜಿನ್‌ ಆಶ್ಚರ್ಯಕರ‍್ಯು.
ACT 2:7 ಇವ್ಣೆಅಖ್ಖು ಆಶ್ಚರ್ಯ ಹುಯಿನ್ “ಅಮ್ ವಾತೆ ಬೋಲುಕರಾತೆ ಅವ್ಣೆ ಖ್ಹಾರು ಗಲಿಲಾಯವಾಳು ಕಾಹೆಕಿ ಶು?
ACT 2:8 ಹಮೆ ಅಲಕ್ ಅಲಕ್ ಝ಼ಗೋವಾಳ ಕತೋಬಿ ಅವ್ಣೆ ಅಪ್ಣಿ ಅಪ್ಣಿ ಬೋಲಿಮಾಸ್ ಬೋಲುಕರಾತೆ ಕಿಮ್?
ACT 2:9 ಅಪ್ಣಾಮ ಪಾರ್ದಿವಾಳು, ಮೇದ್ಯವಾಳು, ಎಲಾಮ್ಯವಾಳು, ಮೆಸಪಟೋಮಿಯವಾಳು, ಯೂದಾಯಬಿ ಅಜು಼ ಕಪ್ಪದೋಕ್ಯವಾಳೂಬಿ ಛಾ಼. ಪೊಂತ ಅಜು಼ ಏಷ್ಯಾವಾಳುಬಿ,
ACT 2:10 ಫ್ರಿಜಿಯ ಅಜು಼ ಪಂಫುಲ್ಯವಾಳೂಬಿ ಛಾ಼. ಈಜಿಪ್ಟ್ ಅಜು಼ ಸಿರೇನಿನ ಖನ್ನೆವಾಳು ಅಜು಼ ಲಿಬಿಯನು ತಬರ್‌ಖವಾಳೂಬಿ ಮಳಿರ‍್ಹೂಸ್‌. ಯೊ ಕೊಂತೆ ಅಪ್ಣಾಮ ಥೋಡುಜ಼ಣು ರೋಮ್‍ವಾಳೂಬಿ ಐರ‍್ಹೂಸ್,
ACT 2:11 ಯೆಹೂದ್ಯರ್‌ಬಿನ್ ಯೆಹೂದ್ಯರ್‌ಕಾಹೆತೆ ಧರ್ಮ್‍ನ ಪಾಲನ್‍ಕರಾವಳು ಥೋಡು ಅದ್ಮಿಖ್ಹಾರು, ಕ್ರೇಟ್ ಅಜು಼ ಅರೇಬಿಯವಾಳೂಬಿ ಹಜ಼್ಜ ಛಾ಼. ಅಪ್ಣೆಖ್ಹಾರು ದೇವ್ನಿ ಮಹಾನ್ ಕಾಮ್ನಿ ಬಾರೇಮ ಬೋಲುಕರಸ್ತೆ ಯೊಅಖ್ಖು ಅಪ್ಣಿ ಅಪ್ಣಿ ಬೋಲೀಮ ಖ್ಹಮ್‍ಜು಼ ಕರಿಯೇಸ್‌ನಿ ಕರಿ ಆಶ್ಚರ್ಯ ಕರ‍್ಯು.
ACT 2:12 ಅದ್ಮಿಖ್ಹಾರು ಆಶ್ಚರ್ಯ ಹುಯಿನ್, ಕಲಾವ್ಣಿಹುಯಿನ್ ಆ ಶಾತ್ ರ‍್ಹೇವ್ಣು ಕರಿ ಏಕ್‌ಥಿ ಏಕ್‌ ಬೋಲಲಗ್ಯು.
ACT 2:13 ಥೋಡುಜ಼ಣು ಅಪೊಸ್ತಲರ‍್ನ ದೇಖಿನ್, “ಅವ್ಣೆ ಜಾ಼ಖ್ಹತ್ ಪೀಲಿನ್ ಕಯೇಪ್ ಛ಼ಡೀಗಿ” ಕರಿ ನಕ್ಲೆ ಕಾಡ್ಯು.
ACT 2:14 ತದೆ ಪೇತ್ರನೆ ಜೋ಼ಡ್ಮಥಾತೆ ಗ್ಯಾರ‍್ಹಜ಼ಣ ಅಪೊಸ್ತಲರ‍್ನಿ ಜೋ಼ಡ್ಮ ಉಠಿಭೀರಿನ್, ಅದ್ಮಿನ ಟೋಳ್ನ ಊಚಿ ಆವಾಜ಼್‌ಥಿ ಅಮ್‍ ಬೋಲ್ಯೊಕಿ, “ಯೆಹೂದ್ಯವಾಳವೊ, ಯೆರೂಸಲೇಮ್ನ ಖ್ಹಾರ ಅದ್ಮಿವೊ, ಮಾರಿ ವಾತ್ನ ಖ್ಹಮ್‍ಜೊ, ತುಮೆ ಮಾಲುಮ್ ಕರಿಲೇವ್ಣುತೆ ವಾತೆ ಕಾನ್‌ ಲಗಾಡಿ ಖ್ಹಮಜ಼್‌ಣುಕರಿ ಮೇ ತುಮೂನ ಬೋಲುಸ್.
ACT 2:15 ತುಮೆ ಲಾಝಿರ‍್ಯಾಖ್ಯತೆ ತಿಮ್ ಅವ್ಣೆಖ್ಹಾರು ಕಯೇಪ್ ಛ಼ಡೈಲಿದುಕಾಹೆ” ಹಮ್ಕೆ ಬಿಜೂ಼ಬಿ ವ್ಹಾಣಾನ ನೌ ಘಂಟಾ ಹುಯಿರಾಸ್ ಎತ್ರೇಸ್.
ACT 2:16 ಕತೋಬಿ ಹಮ್ಕೆ ಚಾ಼ಲುಕರಾತೆ ಹಾಲತ್‌ನಿ ಬಾರೇಮ ಪ್ರವಾದಿ ಯೋವೇಲನೆ ಅಮ್‍ ಲೀಖಿರಾಖ್ಯೊಸ್;
ACT 2:17 ದೇವ್ನೆ ಅಮ್‍ ಬೋಲ್ಯೊಕಿ, ‘ಖ್ಹರ್ತಿನ ದನ್ಮ ಖ್ಹಾರ ಅದ್ಮಿಪರ್, ಮಾರಿ ಆತ್ಮಾನ ಖ್ಹಾರ ಅದ್ಮಿವೋನ ಉಪ್ಪರ್ ರಂಚೀಶ್, ತುಮಾರ ತಯೇಡ ಪರ್ಖ್ಹಾ ಪ್ರವಾದ್‌ನೆ ಕರ್ಶೆ; ತುಮಾರ ಜಾ಼ನ್ಜ಼ಮಾನ್ ಖ್ಹಾರು ದರ್ಶನ್ ದೇಕ್‌ಶೆ; ಅಜು಼ ತುಮಾರು ಗಲ್‌ಢಖ್ಹಾರು ಖ್ಹೋಣ್ಯಮ ದೇಕ್‌ಶೆ.
ACT 2:18 ಯೊ ದನ್ಮ ಮಾರ ಆತ್ಮಾನ ಮಾರ ದಾಸದಾಸಿನ ಉಪ್ಪರ್ ರಂಚೈ಼ಶ್. ತದೆ ಇವ್ಣೇಬಿ ಪ್ರವಾದ್‌ನೆ ಕರ್ಶೆ.
ACT 2:19 ಪ್ರಭುನ ಆವಾನೊ ಮೋಟ ದನ್ ಆವಾನ ಅಗಾಡಿ ಆಬ್‌ನ ಉಪ್ಪರ್ ಅದ್ಭುತ್‌ಕಾಮ್ನ ವತಾಳಿಶ್. ಧರ್ತಿನ ಉಪ್ಪರ್ ಖ್ಹಣೇದ್ನಕಾಮ್ನ ಕರಿಶ್. ತದೆ ಲ್ಹೋಯಿ, ಆಗ್ ಅಜು಼ ಬಾಪ್ನಿತರ ಛ಼ಡಾನೊ ಧುವ್ವೊ ರ‍್ಹಿಶೆ.
ACT 2:20 ಚಾ಼ಂದ್ ಅಂಧಾರ್‌ಗಡಪ್ ಬಣ್‍ಶೆ, ಚ಼ಂದರ್‌ಮೊ ಲ್ಹೋಯಿನಿತರ ಲಲೇಲಾಲ್ ಉಷೆ. ತದೆ ಪ್ರಭುನೊ ಮಹಾ ಮಹಿಮೆನೊ ದನ್ ಆವ್‌ಶೆ.
ACT 2:21 ಕತೋಬಿ, ಕೋಣ್‌ ಪ್ರಭುನು ನಾಮ್ನ ಬೋಲಸ್ಕಿ ಯೊ ಹರೇಕ್‍ನಾಬಿ ರಕ್ಷಣೆ ಉಶೆ, ಕರಿ ದೇವ್ ಬೋಲುಕರಸ್.
ACT 2:22 “ಇಸ್ರಾಯೇಲ್ ಅದ್ಮಿವೊ, ಮಾರಿ ವಾತ್ನ ಖ್ಹಮ್‍ಜೊ; ನಜ಼ರೇತ್‌ನೊ ಯೇಸು ಛಾ಼ನಿ ದೇವ್ ತುಮುನಾಬಿ ಮಾಲುಮ್‌ ರ‍್ಹವಾನಿತರ ದೇವ್ನೆಸ್ ಇನೇಥಿ ಚ಼ಲಾಯೊತೆ ಮಹಾ ಕಾಮ್‍ಬಿ, ಅದ್ಭುತ್‌ಕಾಮ್‍ಥಿ ಇನ ಪಸಂದ್ ಹುವಾನಿತರ ತುಮೂನ ವತಾಳಿ ದಿದೊ.
ACT 2:23 ಯೊ ಯೇಸುಸ್ ದೇವ್ನಿ ಘಟ್ ಖ್ಹೂಜ಼್‌ಥೀಬಿ, ಆವ್‌ಶೇತೆ ಹಗಾಮ್ನಿ ಪರಕ್ಮ ದೆವೈಜಾ಼ವದಿನ್, ತುಮೆ ಅಲಕ್ಅದ್ಮಿವೋನ ದೀನ್ ಶಿಲ್‌ಬೇಪರ್ ಮೇಕ್ ಮರೈನ್ ಮಾರಿನಾಖ್ಯ.
ACT 2:24 ಯೇಸುನ ದೇವ್ನೆ ಮರಣ್ಣಿ ಖ್ಹತಾಪ್ಣಿಥಿ ಛೋ಼ಡೈನ್ ಉಠಾಡ್ಯೊ. ಶನಕತೊ ಮರಣ್ ಇನ ಧರಿಲ್ಯವಾನ ಕೊ ಹುಯುನಿ.
ACT 2:25 ಯೇಸುನಿ ಬಾರೇಮ ದಾವೀದನೆ ಅಮ್ ಬೋಲಿರಾಖ್ಯೊಸ್ಕಿ, ‘ಪ್ರಭುತೊ ಕದೇಬಿ ಮಾರ ಖ್ಹಾಮ್ಣೆ ರ‍್ಹವಾನು ಮೆ ದೆಕ್ತೊಥೊ: ಮೇ ಖ್ಹಳಕ್ಣುನಾತೆ ತಿಮ್ ಯೊ ಮಾರ ಖಾವಿ ಬಾಜು಼ಮಾಸ್ ಛಾ಼.
ACT 2:26 ಇನಖ್ಹಾಜೆ ಮಾರೊ ದಿಲ್‌ ಘಣು ಖುಷಿಕರಸ್. ಮಾರಿ ಜೀಬ್ ಖುಷಿನು ವಾತೆಬೋಲಸ್. ಮಾರು ಶರೀರ್‌ಬಿ ಭರೋಖ್ಹಾಥಿ ಟಿವೈರ‍್ಹುಸ್.
ACT 2:27 ಶನಕತೊ ತೂ ಮಾರ ಜಾನ್ನಆತ್ಮನ ಪಾತಾಳ್ಮ ಮ್ಹೇಲಿಶ್ ಕೊಯ್ನಿ. ತಾರ ಪ್ಯಾರ್‌ನ ಅದ್ಮಿನ ಪಾತಾಳ್ಮ ಖ್ಹಡ್ವಾನ ಮ್ಹೇಲಿಶ್‍ಕೊಯ್ನಿ.
ACT 2:28 ತಾರ ಜಾನ್ನೊ ಮಾರಗ್‌ ಮನ ಖ್ಹಮ್‍ಜಾ಼ಡಿರಾಖ್ಯೊಸ್. ತಾರ ಖ್ಹಾಮೆ ಮನ ಭರ್‌ಪೂರ್‌ ಖುಷಿಕರೈಷ್’ ಕರಿ ಬೋಲಿರಾಖ್ಯೊಸ್.
ACT 2:29 ‘ಮಾರಾ ಭೇನೆ ಭೈಯೇವೊ ಅಪ್ಣೊ ಗುರುಗುರಬ್‌ಲ್ಯೊ ದಾವೀದ್‍ನಿ ಬಾರೇಮ ಮೆ ತುಮೂನ ಭಾಲಿಥಿ ಬೋಲೆಜಾ಼ಯ್ ಶಾತ್‌ಕತೊ, ಯೊ ಮರಿನ್‌ ಮಖ್ಹಾಣ್ಯು ಹುಯೊ, ಇನು ಮಖ್ಹಾಣ್ಯು ಹಮ್ಕೆಲಗೂಬಿ ಅಪ್ಣ ಇಚ಼್‌ಮ ಛಾ಼.
ACT 2:30 ದಾವೀದ್ ಏಕ್‌ ಪ್ರವಾದಿಹುಯಿರಿನ್ ತಾರಿ ಪಿಳ್‌ಗೀಮ ಏಕ್‍ಜ಼ಣಾನ ತಾರಿ ಸಿಂಹಾಸನ್‌ಪರ್ ಬೆಖ್ಹಾಡಿಶ್. ಕರಿ ಇನ ದೇವ್ನೆ ಆಣ್‍ಕರಿನ್ ಬೋಲ್ಯೊತೆಯಿನ ಮಾಲುಮ್‌ಕರಿರಾಖ್ಯೊಥೊ
ACT 2:31 ಯೊ ಹುವಾನ ಅಗಾಡಿಸ್ ದಾವೀದನ ಮಾಲುಮ್‌ಥು. ಇನಖ್ಹಾಜೇಸ್ ದಾವೀದನೆ, ಮರೀನ್ ಜಿವ್ತೊಉಷೇತೆ ಕ್ರಿಸ್ತನಿ ಬಾರೇಮ ಅಮ್ ಬೋಲ್ಯೋಕಿ, ‘ಇನ ಪಾತಾಳ್ಮ ಮ್ಹೆಲಾವನ ಕೊ ಹುಯುನಿ, ಇನಿ ಶರೀರ್ ಖ್ಹಡ್ವಾನ ಮ್ಹೇಲಿಶ್‍ಕೊಯ್ನಿ’ ಕರೀಬಿ ಬೋಲಿರಾಖ್ಯೊಸ್.
ACT 2:32 ಇನಖ್ಹಾಜೆ ದೇವ್ನೆ ಮರ‍್ಯಹುಯಾಮ ಜಿವ್ತೊಕರಿನ್ ಮ್ಹೇಲ್ಯೊತೆ ಯೇಸುನಾಸ್, ಇನ ಹಮೆಅಖ್ಖು ಸಾಕ್ಷಿ ಹುಯಿರಾಸ್.
ACT 2:33 ಯೇಸು ಸೊರ್ಗನ ಪಡೈಗೊ. ಹಮ್ಕೆ ಯೇಸು ದೇವ್ನಿ ಜೋ಼ಡ್ಮ ಛಾ಼. ದೇವ್ನಿ ಖಾವಿ ಬಾಜು಼ಮ ಛಾ಼. ಹಮ್ಕೆ ಬಾ ಹುಯಿರೋತೆ ದೇವ್ ಪವಿತ್ರಾತ್ಮನ ಯೇಸುನ ದೀರಾಖ್ಯೊಸ್. ಪವಿತ್ರಾತ್ಮನ ದೇವುಸ್ ಕರಿ ದೇವ್ನೆ ವಾಗ್ದಾನ್ ಕರಿರಾಖ್ಯೊಥೊ. ಇನಖ್ಹಾಜೆ ಯೇಸು ಹಮ್ಕೆ ಯೊ ಪವಿತ್ರಾತ್ಮನ ರಂಚಿರಾಖ್ಯೊಸ್. ತುಮೆ ದೇಖುಕರಾತೆ ಅಜು಼ ಖ್ಹಮ್‌ಜು಼ಕರಾತೆ ಅನಾಸ್.
ACT 2:34 ಸೊರ್ಗಾನ ಪಡೈಗಯೊತೆ ದಾವೀದ್ ಕಾಹೆ, ಯೊ ಯೇಸುಸ್. ದಾವೀದ್ ಇನಿ ಬಾರೇಮ ಅಮ್ ಬೋಲಸ್. ‘ಮೆ ತಾರ ವಹೇರ‍್ಯಾನ ತಾರ ಗೋಡಾನೊ ರಚ್ಚೊ಼ ಬಣಾವಲಗು ಮಾರಿ ಖಾವಿಬಾಜು಼ ಬೆಠೋರೆ’ ಕರಿ ಪ್ರಭುನೆ ಮಾರ ಮಾಲಿಕ್‌ನ ಬೋಲಿರಾಖ್ಯೊಸ್.
ACT 2:36 ಇನಖ್ಹಾಜೆ ತುಮೆ ಶಿಲ್‌ಬೆಪರ್ ಛ಼ಡಾಯತೆ ಆ ಯೇಸುನಾಸ್ ದೇವ್ನೆ ಪ್ರಭುಕರೀಬಿ ಕ್ರಿಸ್ತಕರೀಬಿ ಹುಯಿರೊಸ್ ಕರಿ ಇಸ್ರಾಯೇಲ್‌ನ ಖುಮ್‍ವಾಳ ಅಖ್ಖಾನ ಮಾಲುಮ್ ಹುಯಿರ‍್ಹವಾದೆ ಕರಿ ಬೋಲ್ಯೊ.
ACT 2:37 ಅನ ಖ್ಹಮ್‍ಜ್ಯುತೆ ಇವ್ಣುನ, ದಿಲ್ಮ ಖ್ಹುಯಿ ಟೋಚಾ಼ವನಿಘೊಣಿ ಹುಯು. ಇವ್ಣೆ ಪೇತ್ರನ ಅಜು಼ ಉಭ್‌ರ‍್ಯಾತೆ ಅಪೊಸ್ತಲರ‍್ನ, “ಭೈಯೇವೊ ಹಮ್ಕೆ ಹಮೆ‌ ಶಾತ್‍ಕರ್ನು?” ಕರಿ ಬೋಲ್ಯು.
ACT 2:38 ಪೇತ್ರನೆ ಇವ್ಣುನ ತುಮಾರಮ ಹರೇಕ್‍ಜ಼ಣುಬಿ ತುಮಾರ ಪಾಪ್ನಖ್ಹಾಜೆ ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರಿನ್ ಯೇಸು ಕ್ರಿಸ್ತನ ನಾಮ್‍ಪರ್ ಬ್ಯಾಪ್ತಿಸ್ಮ ಲೇವೊ. ತದೆ ದೇವ್ ತುಮಾರಿ ಪಾಪ್ನ ಅಖ್ಖು ಕ್ಷಮಾ ಕರ್ಶೆ, ತದೆ ತುಮೆ ಪವಿತ್ರಾತ್ಮ ದಾನ್ನ ಲೀಲಿಶು.
ACT 2:39 ಆ ವಾಗ್ದಾನ್ ತುಮೂನಾಬಿ ತುಮಾರ ಲಡ್ಕಾವ್‍ನಾಬಿ ಘಣ ದೂರ‍್ಮಛಾ಼ತೆ ಅದ್ಮಿವೊನಾಬಿ ದೆವೈರ‍್ಹೂಸ್. ಅಪ್ಣೊ ದೇವ್ ಹುಯಿರೋತೆ ಪ್ರಭು ಇನಕನ ಖುಷಿ ಲ್ಯವಾಳ ಹರೇಕ್ ಜ಼ಣಾನಾಬಿ ಆ ವಾಗ್ದಾನ ದೀರಾಖ್ಯೊಸ್ ಕರಿ ಬೋಲ್ಯೊ.
ACT 2:40 ಪೇತ್ರನೆ ಅಜೂ಼ಬಿ ಕೈಏಕ್ ವಾಥ್ಥಿ ಖ್ಹಮ್‌ಜಾ಼ಡ್ತೊ ಹುಯಿನ್, “ಆ ಖರಾಬ್ ಪಿಳ್ಗಿವಾಳಥಿ ತುಮೂನ ಬಚಾ಼ಡಿಲೆವೊ” ಕರಿ ಝೇತಾಯೊ.
ACT 2:41 ಇನೆ ಬೋಲ್ಯೊತೆ ಖ್ಹಮ್‌ಜಿನ್‌ ಬ್ಯಾಪ್ತಿಸ್ಮ ಲೀಲಿದು. ಯೋ ದನ್ ಕಮ್‍ಶಿಕಮ್ ತೀನ್ ಹಜಾ಼ರ್ ಅದ್ಮಿಖ್ಹಾರು ವಿಶ್ವಾಸಿನ ಟೋಳ್ಮ ಮಳೀಗು.
ACT 2:42 ಯೊ ಅದ್ಮಿಖ್ಹಾರು ಅಪೊಸ್ತಲರ‍್ನಿ ಉಪದೇಶ್‍ನ ಖ್ಹಮ್‍ಜಾ಼ಮಾಬಿ, ಭೈಯೇ಼ಮ ಮಳಿನ್ ರ‍್ಹವಾಮಾಬಿ, ಖಾಣು ಖಾವಮಾಬಿ, ಪ್ರಾರ್ಥನೆ ಕರಾಮಾಬಿ ಜೋ಼ಡ್ಮ ಅವ್ಣೆ ಮಳಿನ್ ಕರ್ತುಥು.
ACT 2:43 ಅಪೊಸ್ತಲರ್ ಅಖ್ಖು ಕೈಏಕ್ ಶಕತ್ನುಬಿ ಅಜು಼ ಅದ್ಭುತ್‌ಕಾಮ್ನ ಕರ್ತುಥು. ಅಜು಼ ಹರೇಕ್ ಜ಼ಣಾನಾಬಿ ದೇವ್ನಿ ಡರ್‌ ಭಕ್ತಿ ಆಯು.
ACT 2:44 ವಿಶ್ವಾಸ್‌ ಕರವಾಳು ಖ್ಹಾರು ಒಗ್ಗಟ್‌ಹುಯಿನ್ ಜಿವ್ಣು ಕರ್ತುಥು. ಇವ್ಣಾಮಥೂತೆ ಹರೇಕ್ ಚೀಜ಼್‌ನಾಬಿ ವಾಟಪಾಡಿಲ್ಯಾವಳು ಹುಯಿರುಥು.
ACT 2:45 ಇವ್ಣಿ ಜ಼ಮೀನ್ನ ಅಜು಼ ಇವ್ಣಕನ ಥೂತೆ ಶೊತ್ನ ವೇಚಿನ್ ಮಳಾತೆ ಪೈಶಾನ ಜ಼ರೂರತ್ ರ‍್ಹವಳಾನ ವಾಟಪಾಡಿ ದೇತೂಥು.
ACT 2:46 ಇವ್ಣೆ ಹರೇಕ್ ದನ್ ಏಕ್‍ದಿಲ್‍ಥಿ ದೇವ್ನಿ ಮಂದಿರ್‌ಮ ಮಳಿನ್ ಆವ್ತುಹುಯಿನ್, ಇವ್ಣೆ ಇವ್ಣ ಘರ್‌ಮ ರೋಟೊ ತೋಡಿನ್ ಒಟ್‍ಥಿ ಖಾಣು ಖಾತೂಥು. ಇವ್ಣೊ ದಿಲ್‌ ಖುಷಿಥಿ ಭರೈರ‍್ಹೆತೂಥು.
ACT 2:47 ಇವ್ಣೆ ದೇವ್ನ ಖ್ಹರವ್‌ಕರ್ತೂಥು. ಅಜು಼ ಅದ್ಮಿಖ್ಹಾರಾನು ದಯಾನ ಲಿಲ್ಯಾವವಾಳ ಹುಯಿರ‍್ಹಾಥ. ಹರೇಕ್ ದನ್‍ಬಿ ಘಣು ಘಣು ಅದ್ಮಿಖ್ಹಾರು ರಕ್ಷಣೆ ಲೇವ್‍ಕರ್ತೂಥು. ಪ್ರಭುನೆ ಇವ್ಣುನ ಅಖ್ಖಾನ ವಿಶ್ವಾಸಿನಿ ಸಭೆಮ ಮಳವ಼್ ಕರ್ತೊಥೊ.
ACT 3:1 ಏಕ್‍ದನ್ ಪೇತ್ರಬಿ ಯೋಹಾನ ಧೊಪಾರ‍್ನ ತೀನ್ ಘಂಟಾನ ಚಾ಼ಲ್ತಿಥೀತೆ ಪ್ರಾರ್ಥನೆನಖ್ಹಾಜೆ ದೇವ್ನಿಮಂದಿರ್‌ನ ಗಯ.
ACT 3:2 ಪೈದಾಖ್ಹ್‌ ಥಿ ಲಂಗ್ಡೊ ಥೋತೆ ಏಕ್ಅದ್ಮಿನ ಕೋಣಸ್ಕಿ ಥೋಡುಜ಼ಣು ಢೊಯಿಲಿನ್ ಅಯಿನ್; ದೇವ್ನಿಮಂದಿರ್‌ನ ಮಹಿ ಜಾ಼ವಾಳಕನ ಧರಮ್ ಮಾಂಗಾನಖ್ಹಾಜೆ ಇನ ‘ಶನ್‍ಗಾರ‍್ನು ದರ‍್ವಾಜು಼ ಕರಿ ಬೋಲೈಲೇತೆ‍ ಬಾಕಲ್‍ಕನ ಹರ್‌ದನ್‌ ಬೆಖ್ಹಾಡ್‍ತೂಥು.
ACT 3:3 ಇನೆ ದೇವ್ನಿಮಂದಿರ್‌ನ ಮಹಿ ಒಳೆಜಾ಼ಯ್ತೆ ಪೇತ್ರನ ಅಜು಼ ಯೋಹಾನನ ದೇಖಿನ್ ಧರಮ್ ದ್ಯವಾನ ಗಿಂಗಾಯು.
ACT 3:4 ಪೇತ್ರ ಯೋಹಾನ ಭೇಜ಼ಣ ಠರ್‌ಕೈನ್ ದೇಖ್ಯ. ಪೇತ್ರನೆ ಇನ “ಹಮೂನ ದೇಕ್!” ಕರಿ ಬೋಲ್ಯೊ.
ACT 3:5 ಯೋ ಲಂಗ್ಡೊ ಇವ್ಣೇಥಿ ಶಾತ್‍ತೋಬಿ ಮಳ್‍ಶೆಕಿ ಶುಕಿ ಕರಿ ಖ್ಹಯಾಲ್ ಕರೀನ್ ಇವ್ಣಭಣಿ ದೇಖ್ಯು.
ACT 3:6 ತದೆ ಪೇತ್ರನೆ, ಪೈಶ ಖ್ಹೊನ್ನು ಮಾರಕನ ಕೊಯ್ನಿ, ಕತೋಬಿ ಮಾರಕನ ಛಾ಼ತೆ ಯೊ ತುನ ದೆವುಸ್. ನಜ಼ರೇತ್ನ ಯೇಸುಕ್ರಿಸ್ತನ ನಾಮ್‍ಥೀಸ್ ಉಠೀನ್ ಚಾ಼ಲ್‍ಕರಿ ಬೋಲಿನ್,
ACT 3:7 ಇನೊ ಖಾವೊ ಹಾತ್‍ ಧರೀನ್ ಉಠಾಡ್ಯೊ. ತದ್‌ನು ತದೇಸ್‌ ಇನ ಪಕ್ತೇಳಿಮಾಬಿ, ಪಂಜ಼ವ್‍ಮಾಬಿ,ಏಡಿಮಾಬಿ ಶಕತ್ ಆಯು.
ACT 3:8 ಯೊ ಉಠೀನ್ ಭೀರಿನ್‌ ಗೋಡೆಥಿ ಚಾ಼ಲಾಲಗ್ಯೊ; ಯೊ ಚಾ಼ಲ್ತೊ ಖೇಲ್ತೊ ದೇವ್ನ ಖ್ಹರಾವ್‌ತೊಹುಯಿನ್ ಇವ್ಣಿಜೋ಼ಡ್ಮ ದೇವ್ನಿಮಂದಿರ್‌ನ ಮಹಿ ಗಯೊ.
ACT 3:9 ಯೋ ಚಾ಼ಲ್ತೊಹುಯಿನ್‌ ದೇವ್ನ ಖ್ಹರಾವ್‌ತೊ ವಳ್ಯಾವಾತೆ ಅದ್ಮಿಖ್ಹಾರಾನೆ ದೇಖ್ಯು;
ACT 3:10 ಆ ಹೈರುತೆ ಮಂದಿರ‍್ನ ಶನ್‍ಗಾರ‍್ನು ದರ‍್ವಾಜು಼ ಕರಿ ಬಾಕಲ್‍ಕನ ಬೇಶಿನ್ ಧರಮ್ ಮಾಂಗ್‌ತೊಥೋತೆ ಆಸ್ ಕರಿ ಖ್ಹಣೇದ್ ಕರ‍್ಯು. ಯೋಸ್ ಅದ್ಮಿ ಚಾ಼ಲೀನ್ ದೇವ್ನ ಖ್ಹರಾವನು ದೇಖಿನ್ ಘಣು ಆಶ್ಚರ್ಯ ಕರ‍್ಯು.
ACT 3:11 ಅಛ್ಛು಼ ಹುಯುತೆ ಲಂಗ್‍ಡಾನೆ ಪೇತ್ರ ಬಿಜು಼ ಯೋಹಾನನ ಜೋ಼ಡ್ಮ ಒಳೆಜಾ಼ಯ್ತೆ ತದೆ, ಆಶ್ಚರ್ಯ ಕರುಕರ್ತುಥೂತೆ ಅದ್ಮಿಖ್ಹಾರು ಸೊಲೊಮೋನ್ ಕರಿ ನಾಮ್ನ ಛ಼ತ್‌ಕನ ಎಕ್ಟು ಹುಯಿನ್ ನಾಶಿಆಯು.
ACT 3:12 ಪೇತ್ರ ಅನ ದೇಖಿನ್, ಯೋ ಅದ್ಮಿಖ್ಹಾರಾನ; ಇಸ್ರಾಯೇಲ್‌ವಾಳವೊ, ಅನ ದೇಖಿನ್ ಶನ ಆಶ್ಚರ್ಯ ಹುಯಿರಾಸ್? ತುಮೆ ಹಮೂನ ಶನ ಅಮ್ ದೇಖುಕರಸ್? ಹಮೆ ಹಮಾರಿ ಶೊಂತ್ ಶಕಥ್ಥಿ ರ‍್ಹವೊ, ಹಮಾರಿ ದೇವ್ನಿ ಭಕ್ತಿಥಿ ರ‍್ಹವೊ ಅನ ಚಾ಼ಲ್ವಾನಿತರ ಕರ‍್ಯಕರಿ ನಕೊ ಲಾಝ಼್‌ಶು?
ACT 3:13 ಅಪ್ಣೊ ಗುರುಗುರಬ್‌ಲ್ಯ ಹುಯಿರೋತೆ ಅಬ್ರಹಾಮ್ ಇಸಾಕ್ ಯಾಕೋಬನೊ ದೇವ್‌ ಅಜು಼ ಅಪ್ಣೊ ಗುರುಗುರಬ್‌ಲ್ಯನೊ ದೇವ್ ಇನೊ ದಾಸಹುಯಿರ‍್ಹೊತೆ ಯೇಸುನ ಮಹಿಮೆ ಕರಿರಾಖ್ಯೊಸ್. ಕತೋಬಿ ತುಮೆ ಇನ ಪಿಲಾತನ ಹಾತ್ಮ ಮಾರನ ಧರಿನ್‍ ದಿದಾ; ಬಿಜು಼ ಪಿಲಾತನೆ ಇನ ಛೋ಼ಡಾವ್ಣು ಕರಿ ಖ್ಹೂಜ಼್‌ ಕರಾದಿನ್, ಇನಖ್ಹಾಮ್ಣೆ ತುಮೆ ಯೇಸು ಹೋಣುಕೊಯ್ನಿ ಕರಿ ಬೋಲ್ಯ.
ACT 3:14 ತುಮೆ ಪರಿಶುದ್ಧಬಿ ನೀತಿನೊ ಹುಯಿರೋತೆ ಯೇಸುನ ನಕೊ ಕರಿ ಬೋಲ್ಯ. ಇನಬದಲ್ ಹತ್ಯಾರ ಏಕ್‌ ಚೋ಼ರ್‌ನ ಛೋ಼ಡೈ ದೇವ್ಣು ಕರಿ ಪಿಲಾತನ ಬೋಲಿಲಿದ.
ACT 3:15 ಅಮ್ ತುಮೆ ಜಾನ್‍ದೇವಳಾನಸ್ ಮರೈನಾಖ್ಯ. ಕತೋಬಿ ದೇವ್ನೆ ಇನ ಮರ‍್ಯಾಹುಯಾಮಾಥು ಉಠಾಡ್ಯೊ; ಅನಿ ಬಾರೇಮ ಹಮೇಸ್ ಸಾಕ್ಷಿಖ್ಹಾರು ಹುಯಿರಾಸ್.
ACT 3:16 ತುಮೆ ಶಾತ್‌ ದೇಖ್ಯಕಿ ಅಜು಼ ತುಮೆ ಶಾತ್ ಖ್ಹಮ್‍ಜ್ಯಾಕಿ ಯೋ ಅಖ್ಖು ಇನ ನಾಮ್‍ಥೀಸ್ ಹುಯಿರುಸ್. ಯೊ ಲಂಗ್‍ಡಾನೆ ಯೇಸುನ ಉಪ್ಪರ್ ರಾಖಿರಾಖ್ಯೊತೆ ವಿಶ್ವಾಸ್‌ಥೀಸ್ ಇನ ಅಛ್ಛು಼ ಹುಯುತೆ ಅನಅಖ್ಖು ತುಮೆ ದೇಖಿರಾಖ್ಯಸ್.
ACT 3:17 ಇಸ್ರಾಯೇಲ್‌ವಾಳವೊ, ಯೋ ರ‍್ಹವಾದೆ ತುಮೆ ಮಾಲುಮ್‌ ಕರ‍್ಯಕೊಂತೆ ಯೇಸುನ; ಅಮ್ ಕರ‍್ಯಕರಿ ಮನ ಮಾಲುಮ್ ಛಾ಼, ತುಮಾರ ಅದಿಕಾರಿ ಜಿನುಬಿ ಮಾಲುಮ್ ಕರೀಲಿದಾಕೊಯ್ನಿ.
ACT 3:18 ಕ್ರಿಸ್ತಯೇಸು ಲತಾಡ ಲಿಶೆ ಕರಿ ದೇವ್ನೆ ಪ್ರವಾದಿಖ್ಹಾರಥಿ ಅಗಾಡಿಸ್ ಬೋಲಾಯೋತೆ ವಾತೆ ಅಮ್ನಿ ಪರಕ್ಮ ಚಾ಼ಲಾಯೊ.
ACT 3:19 ಅನಖ್ಹಾಜೇಥಿ ತುಮಾರ ಪಾಪ್ನಖ್ಹಾಜೆ ತುಮೆ ಪ್ರಾಯಶ್ಚಿತ್ ಕರಿಲೀನ್ ದೇವ್‌ಭಣಿ ಫರಿಜಾ಼ವೊ. ತದೆ ಯೋ ತುಮಾರಿ ಪಾಪ್ನ ಕ್ಷಮಾಪಣ್ ಕರಿಲಿಶೆ.
ACT 3:20 ಪ್ರಭು ತುಮೂನ ಆತ್ಮೀಕ ಅರಾಮ್ ದಿಶೆ.ಅಜು಼ ದೇವ್ನೆ ಪಹಿಲೇಸ್ ಕ್ರಿಸ್ತಕರಿ ಚೂ಼ಣಿರಾಖ್ಯೊತೆ ಮೆಸ್ಸಿಯಾನ ತುಮಾರಖ್ಹಾಜೇಸ್ ಮೋಕಲ್‌ಶೆ.
ACT 3:21 “ಕತೋಬಿ ಅಖ್ಖಾಸ್ನ ಬರೋಬರ್ ಕರಾನ ದನ್ ಆವಾಲಗು ಯೊ ಪರಲೋಕ್‌ಮಾಸ್ ರ‍್ಹೇವ್ಣುಕರಿ ದೇವ್ ಘಣಾದನ್ನ ಪಾಛ಼ಳ್ ಇನ ಪವಿತ್ರ ಪ್ರವಾದಿಥಿ ವಾತೆ ಬೋಲಾನಿ ವಖ್ಹತ್‌ಮ; ಆ ದನ್ನಿ ಬಾರೇಮ ಬೋಲ್ಯೊಥೊ.
ACT 3:22 ಮೋಶೆನೆ ಬೋಲ್ಯೊತೆ ಶಾತ್‍ಕತೊ, ದೇವ್‍ಹುಯಿರ‍್ಹೋತೆ ಪ್ರಭು ಮಾರಿನಿತರ ತುಮಾರ ಅದ್ಮಿಮಾಸ್ ಏಕ್‌ ಪ್ರವಾದಿನ ತುಮಾರಖ್ಹಾಜೆ ಉಠಾಡ್‍ಶೆ, ಯೋ ಬೋಲ್‍ಶೇತೆ ಅಖ್ಖಿ ವಾತೆನ ತುಮೆ ಖ್ಹಮಜ಼್‌ಣು.
ACT 3:23 ಯೊ ಪ್ರವಾದಿನಿ ವಾತೆನ ಖ್ಹಮ್‍ಜ಼ಕೊಂತೆ ಹರೇಕ್ ಜ಼ಣೊಬಿ ದೇವ್ನ ಅದ್ಮಿಥಿ ಅಲಕ್‌ಹುಯಿನ್ ನಾಶ್‌ಹುಯಿಜಾ಼ಶೆ.
ACT 3:24 ಸಮುವೇಲ್‍ಥಿ ಧರೀನ್ ಇಂಥಿ ಪಛ಼್‌ಲ್ಯ ಪ್ರವಾದಿಖ್ಹಾರುಬಿ ಹಮ್ಕೇನಿ ಆ ದನ್ನಿ ಬಾರೇಮ ವಾತೆ ಬೋಲ್ಯು.
ACT 3:25 ಯೊ ಪ್ರವಾದಿಖ್ಹಾರು ಬೋಲ್ಯಾತೆ ವಾತೆನ ತುಮೆ ಖ್ಹಮ್‍ಜಿಲಿದ. ದೇವ್ ತುಮಾರ ಗುರುಗುರಬ್‍ಲ್ಯಾನಿ ಜೋ಼ಡ್ಮ ಕರ‍್ಯೊತೆ ಒಪ್ಪಂದಾನನ ತುಮೆ ಸ್ವೀಕಾರ್ ಕರೀಲಿದಾ. ದೇವ್ ತುಮಾರೊ ಗುರು ಹುಯಿರೋತೆ ಅಬ್ರಹಾಮ್‌ನ, ‘ತಾರಿ ಖಾನ್‍ಧಾನ್‍ಥಿ ಜ಼ಮೀನ್‌ಪರ್ ಛಾ಼ತೆ ಅದ್ಮಿಖ್ಹಾರು ವಾರ್‌ಖ್ಹೊ ಲೀಲಿಶೆ ಕರಿ ಬೋಲ್ಯೊ.
ACT 3:26 ದೇವ್ ಪಹಿಲೆ ತುಮಾರಖ್ಹಾಜೇಸ್ ಇನ ಸೇವಕ್‌ನ ಮರಣ್‌ಥು ಉಠಾಡಿನ್ ತುಮಾರಕನ ಮೋಕ್‌ಲ್ಯೊ. ತುಮೂನ ಆಶೀರ್ವಾದ್‌ ಕರಾನಖ್ಹಾಜೆ ದೇವ್ನೆ ಯೇಸುನ ಮೋಕ್‌ಲ್ಯೊ. ಯೋ ತುಮಾರಮ ಹರೇಕ್ ಜ಼ಣಾನಾಬಿ ಇವ್ಣಿ ಇವ್ಣಿ ಖರಾಬ್ ವಾಟ್‍ಥಿ ದೂರ್ ಕರೀನ್ ಆಶೀರ್ವಾದ್‌ ಕರ್ಶೆ.” ಕರಿ ಬೋಲ್ಯೊ.
ACT 4:1 ಪೇತ್ರಬಿ ಯೋಹಾನ ಅದ್ಮಿಖ್ಹಾರಾನಿ ಜೋ಼ಡ್ಮ ವಾತ್ ಬೋಲುಕರಾನಿ ವಖ್ಹತ್‌ಮಾಸ್‌ ಹಿಜ್ಜಾ಼ ಥೋಡು ಯಾಜಕ್ ಖ್ಹಾರು ದೇವ್ನ ಮಂದಿರ‍್ನ ಕಾವ್ಲಿಕರಾವಾಳನೊ ಮೋಟೊಬಿ ಸದ್ದುಕಾಯವಾಳು ಇವ್ಣಕನ ಆಯು.
ACT 4:2 ಆ ಭೇಜ಼ಣ ಅಪೊಸ್ತಲರ‍್ನೆ ಅದ್ಮಿಖ್ಹಾರಾನ ಯೇಸುನಿ ಶಕತ್‍ಥಿ ಮರ‍್ಯಹುಯಾನ ಖ್ಹಾರಾನ ಪಾಛು಼ ಜಿವ್ತುಹುಯಿನ್ ಆವ್‌ಶೆ ಕರಿ ಬೋಧನೆ ಕರುಕರಾತೆ ದೇಖಿನ್ ಇವ್ಣುನ ಚ಼ಂಢಾಳ್ ಛ಼ಡ್ಯೊ.
ACT 4:3 ಯೆಹೂದ್ಯರ್‌ನ ಗಲ್‍ಢಖ್ಹಾರಾನೆ ಪೇತ್ರನಾಬಿ ಯೋಹಾನನಾಬಿ ಧರೀನ್ ಖ್ಹಾರ್ಕೊಟ್‌ಮ ಘಲ್‍ದಿದು. ತದೆ ಅಂಧಾರು ಹುಯಿರ‍್ಹುಥು. ಇನಖ್ಹಾಜೆ ಇವ್ಣ ಭೇಜ಼ಣಾನ ಇನ ಆಗ್‍ಲ್ಯ ದನ್‌ಲಗು ಕೋಂಡಿರಾಖ್ಯುಥು.
ACT 4:4 ಕತೋಬಿ ದೇವ್ನಿ ವಚನ್ ಖ್ಹಮ್‍ಜಾ಼ವಾಳಾಮ ಕೆತ್ರೂಕಿಜ಼ಣು ವಿಶ್ವಾಸ್ ಕರ‍್ಯು; ಪರ್ಖ್ಹಾನಿ ಗಣ್ತೀಸ್ ಖ್ಹುಮಾರ್ ಪಾಚ಼್ ಹಜಾ಼ರ್ಥಿ ಜಾ಼ಖ್ಹತ್ ಹುಯು.
ACT 4:5 ಅಗ್‍ಲ್ಯದನ್ನೆ ಯೆಹೂದ್ಯರ‍್ನು ಅದಿಕಾರಿಬಿ ಗಲ್‌ಢಖ್ಹಾರು, ಬಿಜು಼ ಧರ್ಮ ಬೋಧನೆ ಕರವಾಳು ಯೆರೂಸಲೇಮ್ಮ ಸಭೆ ಮಳೀನ್‍ ಆಯು.
ACT 4:6 ಹಿಜ್ಜಾ಼ ಅನ್ನಕರಿ ಪ್ರಧಾನ ಯಾಜಕ್‍ಬಿ ಕಾಯಫಬಿ ಯೋಹಾನಬಿ, ಬಿಜು಼ ಅಲೆಕ್ಸಾಂಡರ್‌ಬಿ ಥೊ.ಮಹಾಯಾಜಕನ ಪರಿವಾರ್ ವಾಳಾಮ ಮಳ್ಯುಹುಯು ಅಖ್ಖು ಜ಼ಣುಬಿ ಹಿಜ್ಜಾ಼ ಥೂ.
ACT 4:7 ಅವ್ಣೆ ಪೇತ್ರಬಿ ಯೋಹಾ‍ನನ ಬೀಚ್ಮ ಭೀರಾಖಿನ್ ತುಮೆ ಖಿವಿ ಶಕಥ್ಥಿ ಅಜು಼ ಕಿನ ನಾಮ್‍ಥಿ ಆ ಅಖ್ಖು ಕರೋಸ್? ಕರಿ ಬೋಲಖ್ಹತರ್,
ACT 4:8 ತದೆ ಪೇತ್ರನೆ ಪವಿತ್ರಾತ್ಮಥಿ ಭರೈನ್ ಇವ್ಣುನ; ಅದ್ಮಿನ ಅದಿಕಾರಿವೊ ಶಾಣವೊ,
ACT 4:9 ಏಕ್‌ ಲಂಗ್ಡಾನ ಹುಯುತೆ ಮದತ್‍ನಿ ಬಾರೇಮ ಇನ ಆ ಕಿಮ್ ಗುಣ್‌ಹುಯು ಕರಿ ತುಮೆ ಹಮೂನ ಸವಾಲ್‌ ಬೋಲುಕರಸ್.
ACT 4:10 ತುಮೆ ಶಿಲ್‌ಬೇಪರ್ ಛ಼ಡಾಯತೆ ಅಜು಼ ‘ದೇವ್ನೆ ಮರ‍್ಯಹುಯಮಾಥು ಉಠಾಡ್ಯೊತೆ ನಜ಼ರೇತ್‌ನೊ ಯೇಸುಕ್ರಿಸ್ತನ ನಾಮ್‍ಥೀಸ್ ಆ ಲಂಗ್ಡೊಥೋತೆ ಅದ್ಮಿ ಅಛ್ಛೊ಼ ಹುಯು. ಬಿಜು಼ ತುಮಾರ ಖ್ಹಾಮ್ಣೆ ಭಿಯೋಸ್ ಕರಿ ಬೋಲಾನು, ತುಮೂನಾಬಿ ಅಜು಼ ಇಸ್ರಾಯೇಲ್ ಅದ್ಮಿಖ್ಹಾರನ ಆವಾತೆ ಮಾಲುಮ್ ರ‍್ಹವಾದೆ.
ACT 4:11 ‘ಘರ್ ಭಾಂದಾವಾಳ ಹುಯಿರ‍್ಹಾತೆ ತುಮೆ ನಕೊಕರಿ ಮ್ಹೆಂದಿದಾತೆ ಯೊ ಬಂಡೋಸ್ ಯೇಸು. ಯೋಸ್ ಮುಖ್ಯ ಹುಯಿರ‍್ಹುತೆ ಕೋಣಾನೊ ಬಂಡೊ ಹುಯಿಗಯೊ’.
ACT 4:12 ಆವ್ಣುತೆ ರಕ್ಷಣೆ ಬಿಜು಼ ಕಿನಾಮಬಿ ಮಳ್‍ಶೆಕೊಯ್ನಿ; ಇನ ನಾಮ್‍ಥೀಸ್ ಪಣ್ಕಿ ಆಬ್‌ನ ಹೇಟ್ ಅದ್ಮಿನ ದೀರಾಖ್ಯುತೆ ಬಿಜ಼ ಖೆವ ನಾಮ್‌ಥಿಬಿ ಅಪ್ಣುನ ರಕ್ಷಣೆ ಕೋಉಷೇನಿ. ಕರಿ ಬೋಲ್ಯೊ.
ACT 4:13 ಪೇತ್ರ ಬಿಜು಼ ಯೋಹಾನ, ಭಾಲ್‌ಥಿ ವಾತೆ ಬೋಲಾನು ಯೋ ಅದ್ಮಿಖ್ಹಾರು ದೇಖಿನ್ ಇವ್ಣೆ ಶನೀಬಿ ಪಢಂತ್ ಕೊ ಶಿಕಿರಾಖ್ಯಾನಿ ತೋಬಿ ಡರ‍್ಯಕೊಂತೆ ಆ ಕಿಮ್ ಬೋಲಸ್ ಕರಿ ಘಣು ಆಶ್ಚರ್ಯ ಕರ‍್ಯು. ಪೇತ್ರಬಿ ಯೋಹಾನ ಯೇಸುನಿ ಜೋ಼ಡ್ಮಥೋತೆ ಕರಿ ಖ್ಹಣೇದ್ ಧರ‍್ಯು.
ACT 4:14 ಅಜು಼ ಗುಣ್‌ಹುಯುತೆ ಯೊ ಲಂಗ್ಡು ಅದ್ಮಿಬಿ ಇವ್ಣಿ ಜೋ಼ಡ್ಮ ಭೀಯೂತೆ ದೇಖ್ಯು.ಯೆಹೂದ್ಯರ್‌ನೆ ಫರೀನ್ ಶಾತ್ಬಿ ಬೋಲಾನ ಕೋ ಹುಯುನಿ.
ACT 4:15 ತದೆ ಯೆಹೂದ್ಯರ್‌ನ ಘಲ್ಡ ಖ್ಹಾರಾನೆ ಅಪೊಸ್ತಲರ‍್ನ ಭಾರ್‌ ಮೋಕ್ಲಿನ್,
ACT 4:16 ಇವ್ಣೆ “ಆ ಅದ್ಮಿನ ಅಪ್ಣೆ ಶಾ‍ತ್ ಕರಿಯೆ? ಅವ್ಣೆ ಘಣು ಅಪ್‍ರೂಪ್‍ನು ಖ್ಹಣೇದ್‍ನು ಕಾಮ್ ಕರಿರಾಖ್ಯುತೆ ಯೆರೂಸಲೇಮ್‌ನ ಖ್ಹಾರಾಸ್ ಅದ್ಮಿನ ಮಾಲುಮ್‍ಪಡಿರ‍್ಹುಸ್, ಇನ ಝೂ಼ಟಿ ಬೋಲಾನ ಕೊಹೊಯ್ನಿ”.
ACT 4:17 ಕತೋಬಿ ಆ ವಾತೆನ ಅದ್ಮಿಖ್ಹಾರು ಯೇಸುನ ನಾಮ್ನ ಪಾಡೀನ್ ಬಿಜು಼ ಕಿನಿ ಜೋ಼ಡ್ಮಾಬಿ ವಾತೆ ನಾಬೋಲ್ನುಕರಿ ಇವ್ಣುನ ಡರಾವ್ಣು ಕರಿ ಇವ್ಣೆ ವಾತೆ ಬೋಲಿಲಿದು.
ACT 4:18 ತದೆ ಅಪೊಸ್ತಲರ‍್ನ ಮಹಿ ಬುಲೈನ್, ಯೇಸುನು ನಾಮ್‍ಲೀನ್ ಶಾತ್ಬಿ ನಾ ಬೋಲ್‌ನು ಬಿಜು಼ ಶಿಕಾಡ್‍ನುನಾ ಕರಿ ಇವ್ಣುನ ಝೇತಾಯು.
ACT 4:19 ಇನಖ್ಹಾಜೆ ಪೇತ್ರಬಿ ಯೋಹಾನಾನೆ; ಇವ್ಣುನ, ದೇವ್ನಿ ವಾತೆ ಖ್ಹಮ್‍ಜಾ಼ಥೀಬಿ ತುಮಾರಿವಾತೆ ಖ್ಹಮ್‍ಜಾ಼ನು ಬರೋಬರ್‌ಕಿ ಶು? ಯೊ ದೇವ್ನ ಖ್ಹಾಮ್ಣೆ ನ್ಯಾವ್‌ಕಿ ಶು? ಇನ ತುಮೇಸ್ ತೀರ್ಪ್ ಕರಿಲೆವೊ.
ACT 4:20 ಹಮೇತೊ ದೇಖಿನ್ ಖ್ಹಮ್‍ಜಿಹುಯಿ ವಾತೆನ ಬೋಲ್‌ಶು ಕೊಂತೆ ರ‍್ಹಿಶುಕೊಯ್ನಿ. ಕರಿ ಜ಼ವಾಬ್‍ದಿದಾ.
ACT 4:21 ಚಾ಼ಲ್ಯುತೆ ಖ್ಹಣೇದ್ನ ಕಾಮ್ನಖ್ಹಾಜೆ ಅದ್ಮಿಖ್ಹಾರು ದೇವ್ನ ಖ್ಹರವ್‌ಕರ‍್ತುಥು, ಇನಖ್ಹಾಜೆ ಅಪೊಸ್ತಲರ‍್ನ ಖ್ಹತಾವನ ಕಾರಣ್ ಮಳಿಕೊಂತೆ ಇನಖ್ಹಾಜೆ ಇವ್ಣುನ ಅಜೂ಼ಬಿ ಝೇತೈನ್‍ಮ್ಹೇಲಿದಿದು.
ACT 4:22 ಯೊ ಖ್ಹಣೇದ್‍ನು ಕಾಮ್‍ಥಿ ಅಛ್ಛು಼ ಹುಯುತೆ ಲಂಗ್ಡಾನ ಚಾ಼ಳಿಖ್ಹ್ ವರಖ್ಹ್‌ಥೀಬಿ ಜಾ಼ಖ್ಹತ್ ಉಂಬರ್ ಹುಯಿರುಥು.
ACT 4:23 ಪೇತ್ರಬಿ ಯೋಹಾನ ಭೇಜ಼ಣ ಯೆಹೂದ್ಯರ್‌ನ ಗಲ್‌ಢಖ್ಹಾರಾನಿ ಸಬೆಮಾಥು ನಿಕ್ಳಿನ್, ಇವ್ಣ ಝೂ಼ಂಡ್‌ಮ, ಮಹಾಯಾಜಕ್ ಖ್ಹಾರಾನೆ ಬಿಜು಼ ಯೆಹೂದ್ಯರ್‌ನ ಶಾಣಖ್ಹಾರಾನೆ ಇವ್ಣು ಬೋಲ್ಯೊತೆ ವಾತೆಖ್ಹಾರೀಸ್ ಇವ್ಣಿ ಝೂ಼ಂಡ್‌‍ವಾಳಾನ ಖ್ಹಮ್‍ಜಾ಼ಡ್ಯ.
ACT 4:24 ಅನ ಖ್ಹಮ್‍ಜ್ಯುತೆ ಖ್ಹಾರು ವಿಶ್ವಾಸಿ ಏಕ್‍ದಿಲ್‍ಥಿ ದೇವ್ನ ಜೋ಼ರೇಖ್ಹು ಚಿಕ್ರಿನ್ ಅಮ್ ಪ್ರಾರ್ಥನೆ ಕರ‍್ಯು. ಮಹಾಪ್ರಭು, ಆಬ್‌ ಧರ್ತಿನ, ದರ‍್ಯಾವ್‌ನಾಬಿ, ಇನಾಮ ಛಾ಼ತೆ ಖ್ಹಾರೂಸ್ ಉಬ್‍ಜಾ಼ಯೊಹುಯೊ ತೂಸ್,
ACT 4:25 ಹಮಾರೊ ಗುರು ಹುಯಿರೋತೆ ದಾವೀದ್ ತಾರೊ ಸೇವಕ್ ಹುಯಿರೋಥೊ. ಇನೆ ಪವಿತ್ರಾತ್ಮನಿ ಮದಥ್ಥಿ ಆವಾತೆಖ್ಹಾರಿ ಲೀಖ್ಯೊ. ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರು ಇರಾದೊ ಶನ ಕರ್ತುಉಷೆ? ಅಲಕ್ ಜಾ಼ತ್‌ಜ಼ಮಾತ್‌ಖ್ಹಾರು ಶನ ಫಾಯಿದೊಕೊಂತೆ ಸೋಚ್‌ತು ಉಷೆ?
ACT 4:26 ಜಗತ್ನೊ ರಾಜ಼ಖ್ಹಾರು ತಯಾರ್ ಹುಯಿರುಸ್, ಪ್ರಭುನಾಬಿ ಇನೊ ಅಬಿಷೇಕ್ ಕರಿರಾಖ್ಯೊತೆ ಇನಾಬಿ ವಿರೋದ್ ಹುಯಿನ್ ಅದಿಕಾರಿಖ್ಹಾರು ಎಕ್ಟು ಹುಯಿರುಸ್. ಕರಿ ಬೋಲೈರಾಖ್ಯೊಸ್‍ನಿ?
ACT 4:27 ಯೋ ವಾಥ್ಥಿಸ್ ಹೆರೋದಬಿ ಪೊಂತ್ಯ ಪಿಲಾತಬಿ, ತೂ ಅಬಿಷೇಕ್ ಕರ‍್ಯೊತೆ ತಾರೊ ಪವಿತ್ರ ಸೇವಕ್ ಹುಯಿರೋತೆ ಯೇಸುನ ವಿರೋದ್ ಯೆಹೂದ್ಯರ್‌ಕಾಹೆತೆ ಖ್ಹಾರು ಅಜು಼ ಇಸ್ರಾಯೇಲ್‌ನು ಅದ್ಮಿಖ್ಹಾರು ಒಟ್‍ ಹುಯಿನ್ ಭರೈರ‍್ಹೂಥು.
ACT 4:28 ಯೇಸುನ ವಿರೋದ್ ಎಕ್ಟುಹುಯಿನ್ ಆಯುತೆ ಆ ಖ್ಹಾರು ಅದ್ಮಿನ ತಾರಿ ಖ್ಹೂಜ಼್ ಚಾ಼ಲನಿಘೊಣಿ ಕರ‍್ಯು. ತಾರಿ ಶಕಥ್ಥಿ ಅಜು಼ ತಾರಿ ಮರ್ಜಿಥೀಬಿ ಆ ಚಾ಼ಲ್ಯು.
ACT 4:29 ಪ್ರಭು ಹಮ್ಕೆ ಅವ್ಣೆ ಬೋಲುಕರಾತೆ ಖ್ಹಮಜ಼್ ಇವ್ಣೆ ಹಮೂನ ಡರಾವ್‌ಕರಾತೆ ಇನ ತು ಕಾನ್‌ದೆ. ಪ್ರಭು ಹಮೆ ತಾರಿ ಸೇವಕ್ ಹುಯಿರಾತೆ ತಾರಿ ವಚನ್ನ ಭಾಲಿಥಿ ಬೋಲಾನ ತೂಸ್ ಮದತ್‍ಕರ್.
ACT 4:30 ತಾರ ಹಾತ್ನ ಭಡಾಯೋತೊ, ತಾರ ಸೇವಕ್, ತಾರಿ ವಚನ್ನ ಹಿಮ್ಮಥ್ಥಿ ಬೋಲಾನಿತರ ರಕ್ಷಕ್ ಯೇಸುನ ನಾಮ್‍ಥಿ ಪವಿತ್ರ ಕಾಮ್ ಕರಾನ, ರೋಗ್‌ವಾಳನ ಗುಣ್‌ಕರಾನಖ್ಹಾಜೆ,ಅಶ್ಚರ್ಯ ಅದ್ಭುತ್‌ಕಾಮ್‌ ಕರಾನ ತಾರೊಹಾತ್‌ ಫೈಲಾವ್‌”.
ACT 4:31 ಅಮ್ ವಿಶ್ವಾಸಿಖ್ಹಾರು ಪ್ರಾರ್ಥನೆ ಕರಾನಿ ವೇಳ್ಮ ಇವ್ಣೆಥಾತೆ ಝ಼ಗೊ ಕಾಪಿರ‍್ಹಹಿಗು. ತದೆ ಇವ್ಣೆ ಖ್ಹಾರುಸ್ ಪವಿತ್ರಾತ್ಮಥಿ ಭರೈನ್ ದೇವ್ನಿ ವಚನ್ನ ಡರ್‌ ಕೊಯಿನ್ತೆ ಬೋಲ್ಯು.
ACT 4:32 ಅಖ್ಖ ವಿಶ್ವಾಸಿನೊ ದಿಲ್‌ಬಿ ಜಾನ್‌ಬಿ ಎಕ್ಕಸ್ ಹುಯಿರ‍್ಹುಥು. ಇವ್ಣ ಟೋಳ್‍ಮಾನು ಕೋಣ್‌ಬಿ ರ‍್ಹವೊ ಇವ್ಣುನ ಥೂತೆ ಶೊತ್ಮ ಖಿವು ಏಕ್‌ಬಿ ಹಮಾರು ಕರಿ ಬೋಲ್ಯುಥುಕೊಯ್ನಿ. ಇನ ಬದಲ್ ಹರೇಕ್‍ನಾಬಿ ವಾಟಪಾಡಿಲೇತೂಥು.
ACT 4:33 ಪ್ರಭು ಹುಯಿರೋತೆ ಯೇಸು ಪಾಛು಼ಜಿವ್ತೊಹುಯಿನ್ ಉಠೀನ್ ಆಯೊಕರಿ ಅಪೊಸ್ತಲರ್ ಘಣ ಶಕಥ್ಥಿ ಅದ್ಮಿಖ್ಹಾರಾನ ಸಾಕ್ಷಿ ಬೋಲ್ತುರ‍್ಹೇತುಥು. ಅಜು಼ ದೇವ್ನಿ ದಯಾ ಜಾ಼ಖ್ಹತ್ ಕಾಮ್‍ಕರ‍್ಯು.
ACT 4:34 ಇವ್ಣೆ ಜ಼ರೂರತ್ ಪೂರಹೋತುಥು, ಜ಼ಮೀನ್ ಬಿಜು಼ ಘರ್ ರ‍್ಹವಾಳು ಹರೇಕ್‌ಜ಼ಣು ಯೊ ಖ್ಹಾರು ವೇಚಿನ್ ಮಳಾತೆ ಪೈಶಾನ ಲೀನ್ ಆಯು.
ACT 4:35 ಅಜು಼ ಇವ್ಣೆಖ್ಹಾರು ಅಪೊಸ್ತಲರ‍್ನ ಗೋಡಾಕನ ಲಯಿನ್ ಮ್ಹೇಲ್‍ತೂಥು; ಯೊ ಪೈಶಾನ ಜ಼ರೂರತ್ ರ‍್ಹವಳಾನ ವಾಟಪಾಡಿ ದೇತೂಥು.
ACT 4:36 ಅಮ್ನಿಸ್ ಪರಕ್ಮ ಸೈಪ್ರಸ್ ಗಾಮ್ಮ ಪೈದಹುಯೊತೆ ಲೇವಿ ಹುಯಿರೊಥೋತೆ ಯೋಸೇಫಕರಿ ಏಕ್‍ಜ಼ಣೊ ಥೊ. ಇನ ಅಪೊಸ್ತಲ್‌ಖ್ಹಾರು ಬಾರ್ನಬ ಕರಿ ಬೋಲ್ತುಥು. ಇಮ್‍ಕತೊ “ಏಕ್‌ನ ಭಾಲಿ ದ್ಯವವಾಳೊ” ಕರಿ ಅರ್ಥ.
ACT 4:37 ಇನೆ ಇನಥೂತೆ ಜ಼ಮೀನ್ನ ವೇಚಿನ್ ಯೊ ಪೈಶಾನ ಅಪೊಸ್ತಲರ‍್ನ ಲಯಿನ್ ದಿದೊ.
ACT 5:1 ಅನನೀಯಕರಿ ಏಕ್‍ಜ಼ಣೊ ಥೊ. ಇನಿ ಬಾವಣ್ಣು ನಾಮ್ ಸಫೈರ.ಅವ್ಣುನ ಥೂತೆ ಥೋಡಿ ಜ಼ಮೀನ್ನ ವೇಚಿನ್, ಇಂಥಿ ಮಳಾತೆ ಪೈಶಾಮ,
ACT 5:2 ಇನಿ ಬಾವಣ್ಣಿ ವಾತ್ ಖ್ಹಮ್‌ಜಿನ್‌ ಏಕ್‌ ಭಾಗ್‌ ಲಪಾಡಿನ್, ಬಿಜೇಕ್ ಭಾಗ್ನ ಅಪೊಸ್ತಲರ‍್ನ ಗೋಡಾಕನ ಲಯಿನ್ ಮ್ಹೇಲ್ಯೊ.
ACT 5:3 ತದೆ ಪೇತ್ರನೆ; ಅನನೀಯನ, ತೂ ಯೊ ಜ಼ಮೀನ್ ವೇಚ್ಯೊತೆ, ಇನಾಮಾಥು ಥೋಡು ಲಪಾಡಿನ್ ಪವಿತ್ರಾತ್ಮನ ಠಗಾವ್ಣು಼ ಕರಿ ಛಾ಼.ಶೈತಾನ್ನೆ ತಾರ ದಿಲ್ಮ ಭರ್‌ದಿದೊತೆ ಶಾತ್?
ACT 5:4 ವೇಚಾ಼ನ ಅಗಾಡಿ ಯೋ ಜ಼ಮೀನ್ ತಾರೀಸ್ ಹುಯಿರ‍್ಹಯಿಥೀನಿ. ತೂ ವೇಚ್ಯೊತೊಬಿ ಆಯೂತೆ ಪೈಶಾ ತಾರಾಸ್ ಹಕ್‌ಮ ಥು. ಆ ಖರಾಬ್ ಕಾಮ್ನ ತಾರ ದಿಲ್ಮ ಶನ ಸೋಚಿಲಿದೊ? ತೂ ಝೂ಼ಟಿ ಬೋಲ್ಯೊತೆ ದೇವ್ನ ಪಣ್ಕಿ,ಅದ್ಮಿನ ಕಾಹೆ ಕರಿ ಪೇತ್ರನೆ ಬೋಲ್ಯೊ.
ACT 5:5 ಆವಾತೆಖ್ಹಾರಿ ಖ್ಹಮಜ಼್‌ತಾಸ್‌ ಅನನೀಯ ಹೇಟ್ ರಡ್ಕಿನ್ ಮರಿಗಯೊ; ಅನ ಖ್ಹಮ್‍ಜಾ಼ವಾಳ ಅಖ್ಖಾಸ್ನ ಘಣೊ ಡರ್‌ಲಾಗ್ಯು.
ACT 5:6 ತದೆ ಜಾ಼ನ್‍ಜ಼ಮಾನ್‍ಖ್ಹಾರು ಉಠೀನ್ ಇನ ಶರೀರ್‌ನ ಲುಂಗ್ಡಾಮ ಲಪೇಟಿನ್ ಢೋಯಿಲಿಜೈನ್ ಮಖ್ಹಾಣ್ಯು ಕರ‍್ಯು.
ACT 5:7 ಅನವಾರ್‌ ಖ್ಹುಮಾರ್ ತೀನ್ ಘಂಟಾನಿ ವೇಳ್ಮ ಅನನೀಯನಿ ಬಾವಣ್‍ ಇನ ಮಾಲುಮ್‌ಕೊಂತೆ ಹಿಜ್ಜಾ಼ ಆಯಿ.
ACT 5:8 ತದೆ ಪೇತ್ರನೆ ಸಫೈರನ ದೇಖಿನ್-ತುಮೆ ಯೊ ಜ಼ಮೀನ್ ವೇಚ್ಯಾತೆ ಖ್ಹಾಚಮಾಬಿ ಅತ್ರಾಸ್‍ ಪೈಶಾನಕಿಶೂ? ತೂ ಮನ ಬೋಲ್‌ಕರಿ ಬೋಲಾನಿ ವೇಳ್ಮ “ಒಹೊ ಅತ್ರಾಸ್‍ ಪೈಶಾನ” ಕರಿ ಬೋಲಿ.
ACT 5:9 ತದೆ ಪೇತ್ರ ಇನ-ತುಮೆ ಭೇಜ಼ಣ ಮಳಿನ್ ಪ್ರಭುನ ಆತ್ಮಾನ ಶನ ತರೀಪ್ಷಕರ‍್ಯಾ”? ಹಂದೇಕ್, ತಾರ ಬಾವ್ರಿನ ಗಾಡ್ಯಹುಯ, ಬಾಕಲ್‍ಕನ ಆಯಿನ್ ಭೀಯ. ತುನಾಬಿ ಇವ್ಣೆಸ್ ಢೊಯಿಲೀನ್ ಜಾ಼ಶೆ ಕರಿ ಬೋಲ್ಯೊ.
ACT 5:10 ತದೇಸ್‌ ಯೋಬಿ ಪೇತ್ರನ ಗೋಡಾನ ಖ್ಹಾಮ್ಣೆ ಪಡೀನ್ ಮರಿಗೈ. ಯೋ ಜಾ಼ನ್ಜ಼ಮಾನ್ ಖ್ಹಾರಾನೆ ಮಹಿ ಆಯಿನ್ ಯೋ ಮರಿಗೈತೆ ದೇಖಿನ್ ಇನ ಢೊಯಿಲೀಜೈನ್ ಇನ ಬಾವ್ರಿನ ಮಖ್ಹಾಣ್ಯನ ಭೀಡೆ ಗಾಡಿದಿದು.
ACT 5:11 ಆ ವಾತೆನ ಖ್ಹಮ್‍ಜ್ಯುತೆ ಅಖ್ಖಿ ಸಬೆನ ಅಜು಼ ಖ್ಹರಾಸ್ ಅದ್ಮಿವೊನ ಡರ್‌ಲಾಗ್ಯು.
ACT 5:12 ಅಪೊಸ್ತಲರ್ ಖ್ಹಾರು ಕೈಏಕ್ ಖ್ಹಣೇದ್‍ನು ಕಾಮ್‍ಬಿ ಅದ್ಬುತ್‌ಕಾಮ್‌ಬಿ ಕರ‍್ಯು. ಅದ್ಮಿಖ್ಹಾರು ಯೋ ಕಾಮ್ನ ದೇಖ್ಯು. ಅಜು಼ ಅಖ್ಖುಜ಼ಣು ಎಕ್ಟು ಹುಯಿನ್ ಸೊಲೊಮೋನ್ನ ಛ಼ತ್‌ಕನ ಮಳಿನ್ ಆವ್ತುಥು.
ACT 5:13 ಇವ್ಣ ಜೋ಼ಡ್ಮ ರ‍್ಹವಾನ ಬಿಜ಼ ಖೆವ ಏಕ್‌ ಜ಼ಣಾನ ಹಿಮ್ಮತ್ ಕೋಥಿನಿ. ಶನಕತೊ ಅದ್ಮಿಖ್ಹಾರು ಇವ್ಣುನ ಜಾ಼ಖ್ಹತ್ ಖ್ಹರಾವ್‌ತು ಥು.
ACT 5:14 ರ‍್ಹಯುತೋಬಿ ಕೇತ್ರುಕಿಜ಼ಣು; ತಯೇಡ ಪರ್ಖೊಖ್ಹಾರು ಪ್ರಭುನ ನಂಬಾವಾಳು ಹುಯಿನ್ ಇವ್ಣ ಟೋಳ್ಮ ಮಳಿಜಾ಼ತುಥು.
ACT 5:15 ಅಮ್‍ ರ‍್ಹವಾನಿ ವೇಳ್ಮ ಅದ್ಮಿಖ್ಹಾರು ರೋಗ್‌ವಾಳನ ಡೋಲಿಪರ್‌ ಪಾಡಿಲೀನ್ ಪೇತ್ರ ಆವಾನಿ ವಾಟ್‌ಪರ್ ಲಯಿನ್, ರೋಗ್‌ವಾಳನ ಉಪ್ಪರ್ ಇನಿ ಛಾ಼ಳಿಪಡಾದೆ ಕರಿ ವಾಟ್‌ಪರ್ ಮ್ಹೆಲ್ತುಥು. ಪೇತ್ರನಿ ಛಾ಼ಳಿ ಪಡಿತೋಬಷ್ ಕರಿ ಅದ್ಮಿಖ್ಹಾರಾನೆ ಸೋಚಿಲಿದು.
ACT 5:16 ಯೆರೂಸಲೇಮ್ನ ಅಶ್‌ಪಿಶ್‍ ಖ್ಹಾರಗಾಮ್‍ನು ಅದ್ಮಿ ಆವ್ತುಥು. ಇವ್ಣೆ ರೋಗ್‍ವಾಳನಾಬಿ ಭೂತ್‌ ಧರಿರಾಖವಾಳನಾಬಿ ಢೊಯಿಲೀನ್ ಆವ್ತುಥು.ಆ ಅಖ್ಖೂಸ್‌ಜ಼ಣು ಗುಣ್‌ಹೋತುಥು.
ACT 5:17 ಮಹಾಯಾಜಕ್‍ಬಿ ಇನ ಜೋ಼ಡ್‍ವಾಳು ಖ್ಹಾರು, ಸದ್ದುಕಾಯ ಭಣಿವಾಳು ಖ್ಹಾರು ಘಣು ಬಳಾಪೊ ಕರ‍್ಯು.
ACT 5:18 ಇವ್ಣೆ ಅಪೊಸ್ತಲರ‍್ನ ಅಖ್ಖಾನ ಮಾಲುಮ್‌ರ‍್ಹೇಸ್ತೆ ಖ್ಹಾರ್ಕೊಟ್‌ಮ ಕೊಂಡಿನ್‌ ಘಾಲಿದಿದು.
ACT 5:19 ಕತೋಬಿ ರಾತ್ಮ ಪ್ರಭುನೊ ಏಕ್‌ ಧೂತ ಜೇಲ್‌ನು ಬಾಕಲ್‍ಖ್ಹಾರು ಕಾಡಿನಾಖ್ಯೊ. ಯೊ ದೂತನೆ ಅಪೊಸ್ತಲರ‍್ನ ಭಾರ್‌ ಬುಲೈಲಾಯಿನ್‌,
ACT 5:20 “ತುಮೆ ಜೈ಼ನ್ ದೇವ್ನಿಮಂದಿರ್‌ನ ಮಹಿ ಭೀರಿನ್ ಆ ಜಿ಼ಂದ್‌ಗೀನಿ ಬಾರೇಮಾನಿ ಹರೇಕ್ ವಾತೇಬಿ ಅದ್ಮಿಖ್ಹಾರಾನ ಬೋಲೊಕರಿ ಬೋಲ್ಯೊ.
ACT 5:21 ಇನಖ್ಹಾಜೆ ಇವ್ಣೆ ಅಗಲ್ಯದನ್ನೆ ವ್ಹಾಣವೇಳಿಸ್ ದೇವ್ನಿಮಂದಿರ್‌ಮ ಜೈ಼ನ್ ಬೋಧನೆಕರಲಗ್ಯಾ. ಮಹಾಯಾಜಕ್‍ಬಿ ಇನ ಜೋ಼ಡ್‍ವಾಳು ದೇವ್ನಿಮಂದಿರ್‌ನ ಆಯ. ಇವ್ಣೆ ಯೆಹೂದ್ಯರ್‌ನ ಮೋಟಖ್ಹಾರಾನ ಅಜು಼ ಇಸ್ರಾಯೇಲ್‌ವಾಳನ ಘಲ್ಡಾವ್‍ನಿ ನ್ಯಾವ್‍ನಿ ಸಭೆ ಬೇಖ್ಹಾಡಿನ್‌. ಅಪೊಸ್ತಲರ‍್ನ ಇವ್ಣಕನ ಬುಲೈಲಿನ್ ಆವಾನಖ್ಹಾಜೆ ಥೋಡಜ಼ಣಾನ ಜೇಲ್‌ಕನ ಮೋಕ್‌ಲ್ಯೊ.
ACT 5:22 ದೇವ್ನಿಮಂದಿರ್‌ನು ಸೇವೆ ಕರವಾಳು ಜೇಲ್‌ಮ ಜೈ಼ನ್ ದೇಖಾತೊ ಹಿಜ್ಜಾ಼ ಅಪೊಸ್ತಲರ್ ಕೊ ದೆಖಾಯುನಿ. ಇನಖ್ಹಾಜೆ ಪಾಛು಼ಫರಿ ಇವ್ಣೆ ಆಯಿನ್, ನ್ಯಾವ್‌ನಿ ಸಬೆವಾಳನ ಅಮ್ ಬೋಲ್ತೊಹುಯಿನ್;
ACT 5:23 “ಜೇಲ್ ಮೂಚೈ಼ನ್ ಕೀಲಿಲಗ್ಯುಥು. ಕಾವ್ಲಿ ಕರವಾಳು ಬಾಕಲ್‍ಕನ ಭಿಯೂಥು, ಕತೋಬಿ ಹಮೆ ಬಾಕಲ್ ಕಾಡ್ಯತೊ ಮಹಿ ಏಕ್‍ಜ಼ಣೂಬಿ ಕೋ ಥೂನಿ!” ಕರಿ ಬೋಲ್ಯು.
ACT 5:24 ದೇವ್ನಿಮಂದಿರ್‌ನು ದಳಪತಿಬಿ ಬಿಜು಼ ಮಹಾಯಾಜಕ್ ಖ್ಹಾರು ಆ ವಾತೇನ ಖ್ಹಮ್‌ಜಿನ್‌ ಅನೇಥಿ ಶಾತ್‍ಉಷೇಕಿ ಕರಿ ಇವ್ಣುನ ಆಶ್ಚರ್ಯ ಹುಯು.
ACT 5:25 ಅಮ್‌ರ‍್ಹವಾನಿ ವಖ್ಹ್‌ತೆ ಏಕ್‍ಜ಼ಣೊ ಅಯಿನ್ ಇವ್ಣುನ, “ಖ್ಹಮ್‍ಜೊ! ತುಮೆ ಜೇಲ್‌ಮ ಘಾಲ್ಯಥಾತೆ ಅದ್ಮಿಖ್ಹಾರು ಆಯಿನ್ ದೇವ್ನಿಮಂದಿರ್‌ಮ ಭಿರೀನ್ ಶಿಕಾಡುಕರಸ್” ಕರಿ ಬೋಲ್ಯೊ.
ACT 5:26 ತದೆ ಅದಿಕಾರಿ ಟಪಾಲ್‌ನ ಅದ್ಮಿನ ಜೋ಼ಡೆ ಜೈ಼ನ್ ಅಪೊಸ್ತಲರ‍್ನ ಪಾಛು಼ ಬುಲೈಲಾಯೊ. ಕತೋಬಿ ಶಿಪಾಯಿಖ್ಹಾರು ಇವ್ಣುನ ಜು಼ಲಮ್‌ ಕರ‍್ಯುಕೊಯ್ನಿ. ಶನಕತೊ ಅದ್ಮಿಖ್ಹಾರು ಹಮೂನ ಇರಾದೇಥಿ ಬಂಡೊ ಫೇಕಿನ್ ಮಾರಿನಾಕ್‌ಶೆ ಕರಿ ಡರಿಗಯು.
ACT 5:27 ಇವ್ಣೆ ಅಪೊಸ್ತಲರ‍್ನ ಬುಲೈಲಿನ್ ನ್ಯಾವ್‌ನ ಸಭೆನಖ್ಹಾಮ್ಣೆ ಭೀರಾಖ್ಯು. ತದೆ ಮಹಾಯಾಜಕನೆ ಅಪೊಸ್ತಲರ‍್ನ ಸವಾಲ್‌ ಬೋಲ್ಯೊ;
ACT 5:28 “ತುಮೆ ಆ ನಾಮ್‌ಪರ್‌ ಬೋಧನೆ ನಾಸ್‍ಕರ‍್ನು ಕರಿ ತುಮೂನ ಹುಕುಮ್‌ ಕರ‍್ಯಥಾನಿ; ರ‍್ಹಯುತೋಬಿ ತುಮೆ ಕರ‍್ಯಾತೆಶಾತ್? ಯೆರೂಸಲೇಮ್‌ನ ತುಮಾರಿ ಬೋಧನೆಥಿ ಫೈಲೈದಿದ, ಆ ಮರೈರ‍್ಹುಥೆ ಅದ್ಮಿನ ಹಮೇಸ್ ಜಿಮ್ಮೇದಾರಿ ಕರಿ ಕರಾನ ತುಮೆ ಕೋಶಿಶ್ ಕರುಕರಸ್” ಕರಿ ಬೋಲ್ಯು.
ACT 5:29 ತದೆ ಪೇತ್ರ ಅಜು಼ ಥೂತೆ ಅಪೊಸ್ತಲರ್ ಅಮ್ ಬೋಲ್ಯೊಕಿ, “ಹಮೆ ದೇವ್ನ ವಿಧೇಯ ಉಷು ಪಣ್ಕಿ ಅದ್ಮಿನ ಕಾಹೆ.”
ACT 5:30 ತುಮೆ ಶಿಲ್‌ಬೆಪರ್ ಠಂಗೈನ್ ಮಾರ‍್ಯಾತೆ ಯೇಸುನ ಹಮಾರ ಗುರುಗುರಬ್‍ಲ್ಯನ ದೇವ್ನೆ ಮರಣ್‌ಥು ಉಠಾಡ್ಯೊ!
ACT 5:31 ದೇವ್ ಇನಾಸ್ ಇಸ್ರಾಯೇಲ್ ಅದ್ಮಿನ ಮನ್ ಫರಾವನಾಬಿ, ಪಾಪ್ನ ಕ್ಷಮಾ ಕರಾನಖ್ಹಾಜೆಬಿ, ದೇವ್ನೆ ಇನ ಪ್ರಭು ಕರೀಬಿ ರಕ್ಷಕ್ ಕರೀಬಿ ಇನಿ ಖಾವಿ ಬಾಜು಼ಮ ಬೆಖ್ಹಾಡ್ಯೊ.
ACT 5:32 ಆ ಕಾಮ್ನ ಹಮೇಸ್ ಸಾಕ್ಷಿ; ಹಮೇಸ್ ಕಾಹೆತೆ ವಿಧೇಯ ಹುವಾತೆ ಅಖ್ಖಾಸ್ ಅದ್ಮಿನ ದೇವ್ನೆ ದೀರಾಖ್ಯೋತೆ ಪವಿತ್ರಾತ್ಮಸ್ ಸಾಕ್ಷಿ ಹುಯಿರೋಸ್” ಕರಿ ಬೋಲ್ಯೊ.
ACT 5:33 ಯೆಹೂದ್ಯರ್‌ನ ಗಲ್‌ಢೊಖ್ಹಾರು ಆ ವಾತ್ನ ಖ್ಹಮ್‌ಜಿನ್‌ ಘಣು ಚ಼ಂಢಾಳ್ ಛ಼ಡಿನ್ ಅಪೊಸ್ತಲರ‍್ನ ಮಾರಿನಾಕ್ಣು ಕರಿ ಥೂ.
ACT 5:34 ತದೆ ಅಖ್ಖಾ ಅದ್ಮಿನಿ ಮರ್ಯಾದಿಥಿ ನ್ಯಾವ್ನಿಸಬೆನೊ ಘಲ್ಡೊ ಗಮಲಿಯೇಲಕರಿ ಏಕ್‍ಜ಼ಣೊ ಫರಿಸಾಯರ್‌ವಾಳೊ ಘಲ್ಡಿ ಸಭೆಮ ಉಠಿಭೀರಿನ್ ಆ ಅದ್ಮಿಖ್ಹಾರನ ಜ಼ರಘಡಿ ಭಾರ್‌ ಮೋಕ್ಲೊಕರಿ ಹುಕುಮ್‌ ದಿದೊ.
ACT 5:35 ತದೆ ಇನೆ ಸಬೆವಾಳನ; ಇಸ್ರಾಯೇಲ್ ಅದ್ಮಿವೊ, ತುಮೆ ಶಾತ್‌ ಕರ್ನುಕರಿ ಛಾ಼ಕಿ ಇನಿ ಬಾರೇಮ ಹೊಷಾರ್‌ಥಿ ರ‍್ಹವೊ.
ACT 5:36 ಅನೇಥಿ ಅಗಾಡಿ ಥೈದಕರಿ ಏಕ್‌ಜ಼ಣಾನೆ ಮೇ ಮೋಟೊ ಅದ್ಮಿಕರಿ ಬೋಲಿಲೀದೊ. ಇನಿ ಜೋ಼ಡ್ಮ ಖ್ಹುಮಾರ್ ಚಾರ್ ಖ್ಹೋ ಅದ್ಮಿ ಮಳಿರ‍್ಹುಥು. ತ್ಯೋಬಿ ಯೋ ಮರೈಗಯೊ. ಅಜು಼ ಇನ ನಂಬಿಹುಯು ಅಖ್ಖೂಸ್ ಎಕ್ಕೋಸ್ಏಕ್‌ ಮಿಲೈಗು.
ACT 5:37 ಇನಕೇಡೆಥು ಯೂದಕರಿ ಏಕ್‍ಜ಼ಣೊ ಗಲಿಲಾಯಮ ಥೊ, ತದೆ ಅದ್ಮಿನಿ ಗಣ್ತಿನ ಹಗಾಮ್ ಹುಯಿರಾಥ. ಯೂದಬಿ ಇನ ನಂಬಾವಳಾನು ಏಕ್‌ ಝೂ಼ಂಡ್‌ ಭಾಂದ್ಯೊ. ಯೋಬಿ ಮರೈಗಯೊ. ಇನ ನಂಬಿಹುಯು ಖ್ಹಾರೂಬಿ ಎಕ್ಕೋಸ್ಏಕ್‌ ಮಿಲೈಗು.
ACT 5:38 ಇನಖ್ಹಾಜೆ ಮೇ ಹಮ್ಕೆ ತುಮೂನ ಶಾತ್ ಬೋಲಸ್‍ಕತೊ ಆ ಅದ್ಮಿವ್‌ಥಿ ದೂರ್ ರ‍್ಹವೊ ಇವ್ಣುನ ಮ್ಹೇಲಿದೆವೊ; ಶನಕತೊ ಆ ಖ್ಹೂಜ಼್ ನತರ್ ಕಾಮ್ ಅದ್ಮಿಥಿ ಹುಯಿರ‍್ಹು ಉಷೇತೊ ಇನು ಯೋಸ್ ಪಡಿಜಾ಼ಶೆ.
ACT 5:39 ಕತೋಬಿ ಯೋ ದೇವ್‍ಥಿ ಹುಯಿರ‍್ಹವಾನು ಉಷೇತೊ ಇನ ಹರಾವನ ತುಮಾರೇಥಿ ಕೋಉಷೇನಿ; ತುಮೆ ದೇವ್ನವಿರುದ್ ಜಂಗ್‍ಭೀಡಾನಿಮತ್ ದೆಖೈಲಿಶು ಕರಿ ಬೋಲ್ಯೊ.ಇವ್ಣೆ ಗಮಲಿಯೇಲನಿ ಆ ವಾತೆನ ಮಾನಿಲಿದು.
ACT 5:40 ಅಪೊಸ್ತಲರ‍್ನ ಬುಲೈಮಂಗೈನ್‌, ಮಾರ್‌ಖಡೈನ್‌, ಯೇಸುನು ನಾಮ್‍ಲೀನ್ ವಾತೆ ನಕೊಬೋಲ್‍ಶು ಕರಿ ಹುಕುಮ್‌ ದೀನ್ ಇವ್ಣುನ ಮ್ಹೇಲಿದಿದು.
ACT 5:41 ಅಪೊಸ್ತಲರ್ ನ್ಯಾವ್‍ನಿ ಘಲ್ಡಾನಿ ಸಭೆಮಾಥು ನಿಕ್ಳಿನ್ ಚ಼ಲೇಗಯ. ಯೇಸುನ ನಾಮ್ನಖ್ಹಾಜೆ ಖ್ಹರಮ್‌ ಕಡೈಲ್ಯಾವಾನ ಹಮೆಯೋಗ್ಯರ್ ಹುಯಾಕರಿ ಖುಷಿಕರ‍್ಯು.
ACT 5:42 ಇವ್ಣೆ, ಅದ್ಮಿಮ ಬೋಧನೆ ಕರಾನು ಭೀರಾಖ್ಯಕೊಯ್ನಿ. ಯೇಸುಸ್ ಕ್ರಿಸ್ತಕರಿ ಅದ್ಮಿನ ಸುವಾರ್ತೆ ಶಿಕಾಡನ ಶುರುಕರ‍್ಯ. ಇವ್ಣೆ ಹರ್‌ರೋಜ಼್ ದೇವ್ನ ಮಂದಿರ್‌ಮಾಬಿ, ಘರೂಮಾಬಿ ಬೋಧನೆ ಫೈಲಾಯು.
ACT 6:1 ಯೋ ದನ್ಮ ಯೇಸುನ ಶಿಷ್ಯರ್‌ನಿ ಗಣ್ತಿ ಜಾ಼ಖ್ಹತ್ ಹೋತು ಆಯು, ಕತೋಬಿ ಯೊ ವಖ್ಹತ್‌ಮ ಗ್ರೀಕ್ ಬೋಲವಾಳ ಯೆಹೂದಿ ಶಿಷ್ಯರ‍್ನೆ, ಇಬ್ರಿಯ ಬೋಲವಾಳ ಯೆಹೂದಿನಿ ಬಾರೇಮ ಹರೇಕ್ ರೋಜ಼್ ಶಿಷ್ಯರ‍್ನ ದೇವ್ಣುಥೂತೆ ತಿನಮಾಥು ಹಮಾರಿ ಮುಂಡಚ್ಚಿಯೆನ ಮಳ್‌ಣುತೆ ಮದತ್ ಬರೋಬರ್‌ಥಿ ಮಳುಕರಕೊಯ್ನಿ ಕರಿ ಭಣ್‌ಕ್ಯು.
ACT 6:2 ತದೆ ಭಾರಜ಼ಣ ಅಪೊಸ್ತಲರ್ ಖ್ಹಾರು ಅಖ್ಖಾಸ್ ಶಿಷ್ಯರ್‌ನ ಟೋಳ್ನ ಸಭೆ ಬುಲೈನ್ ಇವ್ಣುನ, “ದೇವ್ನಿ ವಚನ್ ಬೋಧನೆ ಕರಾನು ಅಪ್ಣು ಕಾಮ್. ಕತೋಬಿ ಯೊ ಕಾಮ್ ಭೀರಿಜಾ಼ವಾನು ಬರೋಬರ್ ಕೊಯ್ನಿ; ಅಪ್ಣೆ ಅದ್ಮಿಖ್ಹಾರನ ಖಾವಪೀಯಾನಿ ಮದತ್‌ಥೀಬಿ ದೇವ್ನಿ ವಚನ್ನು ಬೋಧನೆನ ಅಗಾಡಿ ಭಡಾವನು ಅಛ್ಛು಼.
ACT 6:3 ಇನಖ್ಹಾಜೆ ಭೈಯೇವೊ ತುಮಾರಮ ಸಾಕ್ಷಿಥಿ ಜಿವವಾಳ ಖ್ಹಾತ್ ಜ಼ಣಾನ ಚೂ಼ಣಿಲೇವೊ. ಇವ್ಣೆ ಅದ್ಮಿಮ ಪವಿತ್ರಾತ್ಮಥಿ ಭರೈರ‍್ಹವಾಳ ಹುಯಿರ‍್ಹೇಣು ಅಜು಼ ಅಕ್ಲಿ ಹುಯಿರ‍್ಹೇಣು,ಇವ್ಣುನ ಹಮೆ ಆ ಕಾಮ್ ದಿಯೇಸ್.
ACT 6:4 ತದೆ ಹಮಾರಿ ಖ್ಹಾರೀಸ್‍ ವೇಳ್ನ ಪ್ರಾರ್ಥನೆ ಕರಾನಬಿ ವಚನ್ನ ಬೋಧನೆ ಕರಾನು ಕಾಮ್ ದಿಶು” ಕರಿ ಬೋಲ್ಯು.
ACT 6:5 ಆ ವಾತೆ ಅಖ್ಖಾಸ್ ಝೂ಼ಂಡ್‌‍ವಾಳಾನೆ ಅಛ್ಛು಼ಕರಿ ಸೋಚ್ಯು. ಇವ್ಣೆ ಪವಿತ್ರಾತ್ಮಥಿ ಭರಾಯೊಹುಯೊ. ಘಣು ವಿಶ್ವಾಸ್‌ವಾಳೊ ಹುಯಿರ‍್ಹೋತೆ. ಸ್ತೆಫನನಾಬಿ, ಫಿಲಿಪ್, ಪ್ರೊಖೋರ, ನಿಕನೋರ, ತಿಮೋನ, ಪರ್ಮೇನ, ಯೆಹೂದ್ಯರ್‌ನಿ ಜಾ಼ತ್‌ಮ ಮಳಿರ‍್ಹೋತೆ, ಅಂತಿಯೋಕ್ಯ ಗಾಮ್‌ವಾಳೊ ನಿಕೊಲಾಯ ಕರಿ ಅವ್ಣುನ ಚೂ಼ಣಿನ್ ಅಪೊಸ್ತಲರ‍್ನ ಖ್ಹಾಮ್ಣೆ ಭಿರಾಖ್ಯು.
ACT 6:6 ಅಪೊಸ್ತಲರ‍್ನೆ ಇವ್ಣಾಪರ್ ಹಾತ್‍ ಮ್ಹೇಲಿನ್ ಪ್ರಾರ್ಥನೆ ಕರೀನ್ ಯೊ ಕಾಮ್ನಖ್ಹಾಜೆ ಇವ್ಣುನ ಖ್ಹಣೇದ್‌ ಕರ‍್ಯು.
ACT 6:7 ದೇವ್ನಿ ವಚನ್ ಘಣು,ಘಣು, ಅದ್ಮಿಖ್ಹಾರಾನ ಪೋಚ್ಯು. ಯೆರೂಸಲೇಮ್ಮ ಶಿಷ್ಯರ್‌ನಿ ಗಣ್ತಿ ಘಣು ಭಡ್ತುಗಯು. ಯಾಜಕವ್‌ಮಾಬಿ ಘಣು ಅದ್ಮಿ ಯೇಸುನ ವಿಶ್ವಾಸ್‌ಮ ಮಳ್ತುಗಯು.
ACT 6:8 ಸ್ತೆಫನ ದೇವ್ನಿ ವಾರ್‌ಖ್ಹಾಥೀಬಿ ಶಕಥ್ಥಿಬಿ ಭರೈರ‍್ಹವಾಳೊಹುಯಿನ್ ಅದ್ಮಿಖ್ಹಾರಾಮ ಘಣು ಅದ್ಭುತ್‌ಕಾಮ್‍ಬಿ, ಖ್ಹಣೇದ್‍ನು ಕಾಮ್‍ಬಿ ಕರ್ತೊಥೊ.
ACT 6:9 ಕತೋಬಿ ‘ಛುಟ್ಕಾರ್‌ ಹುಯಿರಾಸ್‌’ ಕರಿ ಸಬೇನು ಸಬೆವಾಳು ಕುರೇನ್ಯವಾಳು, ಅಜು಼ ಅಲೆಕ್ಸಾಂಡ್ರಿಯವಾಳು, ಯೆಹೂದ್ಯರ್‌ಖ್ಹಾರು ಇವ್ಣೆ ಅಜು಼ ಥೋಡು ಕಿಲಿಕ್ಯ ಅಜು಼ ಏಷ್ಯಾ ತಬರ್‌ಖಾನು ಯೆಹೂದ್ಯರ್ ಉಠೀನ್ ಸ್ತೆಫನನಿ ಜೋ಼ಡ್ಮ ಅಬ್ಬಾಜ಼ಬ್ಬಿ ಬೋಲಲಗ್ಯು.
ACT 6:10 ಕತೋಬಿ ಇನಿ ವಾತ್ಮ ದೆಖಾಯುತೆ ಗ್ಯಾನ್ನಾಬಿ ಪವಿತ್ರಾತ್ಮನಿ ಶಕತ್‍ನಾಬಿ ಅರಾಬರು ಬೋಲಾನ ಇವ್ಣುನ ಕೋಹುಯುನಿ.
ACT 6:11 “ಸ್ತೆಫನನೆ, ಮೋಶೆನಾಬಿ ದೇವ್‍ನಾಬಿ ಖರಾಬ್‌ವಾತೆ ಬೋಲಸ್ ಯೋ ಅಖ್ಖು ಹಮೇಸ್ ಖ್ಹಮ್‍ಜಿರಾಖ್ಯಸ್” ಕರಿ ಅಖ್ಖಾಸ್ನ ಬೋಲ್ನುಕರಿ, ಥೋಡಜ಼ಣಾನ ಇವ್ಣೆ ಪೈಶ ದೀನ್ ಮನ್ ಫರಾಯು.
ACT 6:12 ಅದ್ಮಿವ್‌ನಾಬಿ, ಯೆಹೂದ್ಯರ್‌ನ ಗಲ್‌ಢ ಖ್ಹಾರಮಾಬಿ, ಅಜು಼ ಧರ್ಮಾನು ಬೋಧನೆ ಕರವಾಳನಾಬಿ ಕಲಾವ್ಣಿಕರಾಯು. ಇವ್ಣೆಖ್ಹಾರು ಘಣ ಇರಾದೇಥಿ ಅಯಿನ್ ಸ್ತೆಫನನ ಧರಿಲೀನ್ ಯೆಹೂದ್ಯರ್‌ನ ನ್ಯಾವ್‍ನಿ ಸಭೆಮ ಲೀನ್‌ಗಯು.
ACT 6:13 ತದೆ ಇವ್ಣೆ, ಥೋಡ ಸಾಕ್ಷಿ ಬೋಲವಾಳಾನ ಬುಲೈಲಾಯಿನ್‌ “ಆ ಅದ್ಮಿ ಆ ಪವಿತ್ರ ಝ಼ಗೋನ ವಿರುದ್ಧಹುಯಿನ್, ಮೋಶೆನಿ ಧರ್ಮಶಾಸ್ತ್ರನ ವಿರೋದ್ ಹುಯಿನ್ ಕದೇಬಿ ಝೂ಼ಟಿ ವಾತೆ ಬೋಲಸ್.
ACT 6:14 ನಜ಼ರೇತ್‌ವಾಳೊ ಯೇಸು ಆ ದೇವ್ನಿಮಂದಿರ್‌ನ ರಡ್‌ಕೈನ್‌ ಮೋಶೆನಿ ಪದತ್ತಿನ ಅಖ್ಖಾನ ಬದ್ಲವ್‍ಕರಸ್‍, ಕರಿ ಆ ಬೋಲಸ್ತೆ ಹಮೆ ಖ್ಹಮ್‌ಜ್ಯ” ಕರಿ ಬೋಲ್ಯು.
ACT 6:15 ನ್ಯಾವ್‌ನ ಸಭೆಮ ಬೇಠುಹುಯು ಖ್ಹಾರೂಸ್ ಸ್ತೆಫೆನನ ಮ್ಹೋಡಾನ ಠರ್‌ಕೈನ್ ದೇಖಾತೊ ಇನು ಮ್ಹೋಡು ದೇವ್ನ ದೂತನ ಮ್ಹೋಡಾನಿತರ ದೆಖವ್‌ಕರ್ತುಥು.
ACT 7:1 ತದೆ ಮಹಾಯಾಜಕನೆ ಸ್ತೆಫನನ, “ಆ ಖಬರ್ ಖ್ಹಾಚು಼ಕಿ ಶು? ಕರಿ ಬೋಲ್ಯೊ. ತದೆ ಇನೆ ಅಮ್ ಜ಼ವಾಬ್ ದಿದೊ, ಮಾರ ಬಾ ಭೈಯೇವೊ, ಮಾರಿ ವಾತೇನ ಖ್ಹಮ್‍ಜೊ,
ACT 7:2 ಅಪ್ಣೊ ಗುರುಗುರಬ್‌ಲ್ಯೊ ಹುಯಿರುತೆ ಅಬ್ರಹಾಮ್‌ನ ಅಪ್ಣೊ ಮಹಿಮೆನೊ ದೇವ್ ದೇಖಾಯೊ. ಅಬ್ರಹಾಮ್ ಖಾರಾನ್‍ ಗಮ್ಮ ಜಿವ್ಣುಕರಾನ ಪಹಿಲೆ ಮೆಸಪಟೋಮಿಯಮ ಥೊ.
ACT 7:3 ದೇವ್ನೆ ಇನ ತೂ ‘ತಾರ ದೇಖ್ಹ್‌ನಾಬಿ ಮಾಯಮಾತ್ರನ ಮ್ಹೇಲಿನ್ ಮೇ ವತಾಳುತೆ ದೇಖ್ಹ್‌ನ ನಿಕ್‌ಳಿ ಜಾ಼’ ಕರಿ ಬೋಲ್ಯೊ.
ACT 7:4 ಇನಖ್ಹಾಜೆ ಅಬ್ರಹಾಮ್‌ನೆ ಕಲ್ದಿಯ ದೇಖ್ಹ್‌ನ ಮ್ಹೇಲಿನ್ ಖಾರಾನ್‌ಮ ಜಿವ್ಣುಕರಾನ ಗಯೊ; ಅಬ್ರಹಾಮ್‌ನೊ ಬಾ ಮರಾನ ಬಾದ್ಮ ದೇವ್ನೆ ಇನ ಹಮ್ಕೆ ತುಮೆ ಜಿವ್ಣುಕರುಕರಾಸ್ತೆ ಆ ದೇಖ್ಹ್‌ನಾಸ್ ಬೋಲಿಮೋಕ್‌ಲ್ಯೊ.
ACT 7:5 ಇಮ್ಮಸ್ ಆ ದೇಖ್ಹ್‌ಮ ಇನ ಹತೇಳಿಯೆತ್ರೆ ಝ಼ಗೋಬಿ ಶೊಂತ್‌ಕರಿ ದಿದೊಕೊಂತೆ; ಇನ ಲಡ್ಕಾಕೊಂತೆ ತದೇಸ್‌ ತೂ ಛಾ಼ತೆ ದೇಖ್ಹ್‌ನ ತುನಾಬಿ ತಾರಿ ಆವ್‌ಶೇತೆ ಖ್ಹಾಮ್ಣೇನಿ ಪಿಳ್ಗಿನ ಹಾತ್ಮ ದೇವ್‍ಕರೂಸ್‍ಕರಿ ವಾಗ್ದಾನ್ ಕರ‍್ಯೊ.
ACT 7:6 ಎತ್ರೇಸ್ ಕಾಹೆತೆ ದೇವ್ನೆ ಇನ ಜೋ಼ಡ್ಮ ಬೋಲ್ಯೊತೆ ಶಾತ್‌ಕತೊ ತಾರು ಪಿಳ್ಗಿವಾಳು ಬಿಜೇಕ್ ದೇಖ್ಹ್‌ಮ ಜಿವ್ಣುಕರ್ಶೆ, ಹಿಜ಼್ಜಾನು ಅದ್ಮಿಖ್ಹಾರು ಇವ್ಣುನ ಗುಲಾಮ್‌ಕರೀಲಿನ್ ಚಾರ್‌ಖ್ಹೊ ವರಖ್ಹ್‌ಲಗು ಖ್ಹತಾವ್‌ಶೆ.
ACT 7:7 ಕತೋಬಿ ‘ತಾರು ಖಾನ್‌ದಾನ್‌ವಾಳು ಗುಲಾಮ್‌ಹುಯಿನ್ ಚಾ಼ಕ್ರಿಕರುಕರಾತೆ ಅಲ್ಹಾವ್‌ ಅದ್ಮಿನ ಮೇಸ್ ತೀರ್ಪ್‌ ದೀಶ್‍ಕರಿ ಬೋಲ್ಯೊ. ಅತ್ರೇಸ್ ಕಾಹೆತೆ ದೇವ್ನೆ, ಇನಪಾರ್ ಇವ್ಣೆ ಯೊ ದೇಖ್ಹ್‌ಮಾಥು ಆ ಝ಼ಗೋಮ ಐನ್ ಮನ ಆರಾದನೆ ಕರ್ಶೆಕರಿ ಬೋಲ್ಯೊ.
ACT 7:8 ಇನವಾರ್ ದೇವ್ನೆ ಅಬ್ರಹಾಮ್‍ಥಿ ಒಪ್ಪಂದ ಕರಿಲಿದೊ. ಯೊ ಖ್ಹಣೇದ್ನ ಖ್ಹಾಜೆ ಖ್ಹತ್ನ ಕರಾಯೊ. ಇನೇಥಿಸ್ ಅಬ್ರಹಾಮ್‌ನ ಏಕ್‌ ಛಿಯ್ಯೊ ಹುಯೊ. ಯೊ ಛಿಯ್ಯಾನ ಆಟ್ನ ದನ್ಮ ಖ್ಹತ್ನ ಕರ‍್ಯೊ. ಇನು ನಾಮ್ ಇಸಾಕ್. ಇಮ್ಮಸ್ ಇಸಾಕಬಿ ಇನ ಛಿಯ್ಯೊ ಯಾಕೋಬ್‍ನ ಖ್ಹತ್ನ ಕರ‍್ಯೊ. ಅಜು಼ ಯಾಕೋಬ್‍ನೆ ಇನ ಖ್ಹಾರಾಸ್ ಪರ್ಖ್ಹಾ ಲಡ್ಕಾವ್‍ನ ಖ್ಹತ್ನ ಕರ‍್ಯೊ. ಆ ಪರ್ಖ್ಹಾ ಲಡ್ಕಾಸ್ ಖ್ಹಾಮ್ಣೆ ಭಾರಜ಼ಣ ಗುರುಗುರುಬ್‌ಲ್ಯ ಹುಯು.
ACT 7:9 ಯಾಕೋಬನ ಛಿಯ್ಯಾವ್‌ನೇಸ್ ಯೋಸೇಫನ ಉಪ್ಪರ್ ಬಳಾಪೊ ಕರ‍್ಯು. ಇವ್ಣೆಖ್ಹಾರು ಯೋಸೇಫನ ಧರೀನ್ ಈಜಿಪ್ಟ್‌ನ ಅದ್ಮಿನು ಗುಲಾಮ್ ಬಣೈನ್ ವೇಚಿನಾಖಿದಿದು. ಕತೋಬಿ ದೇವ್ ಯೋಸೇಫನ ಜೋ಼ಡ್ಮಾಸ್ ಥೊ.
ACT 7:10 ಅಜು಼ ಇನ ಆಯೂತೆ ಮುಶ್ಕಿಲ್‌ಥಿ ಛೋ಼ಡೈನ್. ಈಜಿಪ್ಟ್ ದೇಖ್ಹ್‌ನೊ ರಾಜ಼ನ ಖ್ಹಾಮ್ಣೆ ಅಕ್ಕಲ್‌ವಾಳೋಬಿ ದಯಾಕರವಾಳೊಬಿ ಹುವಾನಿತರ ಕರ‍್ಯೊ.ಫರೋಹನೆ ಯೋಸೆಫ್‌ನ ಈಜಿಪ್ಟ್ ದೇಖ್ಹ್‌ನಪರ್‌ಬಿ ಮಹೇಲ್‌ನಪರ್‌ಬಿ ಅಧಿಕಾರಿಕರಿನ್ ನೇಮ್‌ಶಾಯೊ.
ACT 7:11 ತದೆ ಈಜಿಪ್ಟ್ ಅಜು಼ ಕಾನಾನ್ ದೇಖ್ಹ್‌ಮ ಕಾಳ್ದುಕಾಳ್ ಪಡೀನ್ ಜಾ಼ಖ್ಹತ್ ಅದ್ಮಿನ ಖ್ಹತಾಪ್ಣಿ ಹುಯು. ಖಾಣುಕೊಂತೆ ಅಪ್ಣ ಗುರುಖ್ಹಾರಾನ ಘಣು ಮುಶ್ಕಿಲ್‍ಹುಯು.
ACT 7:12 ಕತೋಬಿ ಈಜಿಪ್ಟ್‌ಮ ಅನಾಜ಼್ ಛಾ಼ ಕರಿ ಬೋಲಾನು ಖಬರ್‌ನ ಖ್ಹಮ್‌ಜಿನ್‌ ಯಾಕೋಬನೆ ಪಹಿಲಿಬಾರ್ ಇನ ಛಿಯ್ಯಾವ್‍ನ ಹಿಜ್ಜಾ಼ ಮೋಕ್‌ಲ್ಯೊ.
ACT 7:13 ಅಜು಼ ಇವ್ಣೆ ಬೇನಿವಖ್ಹತ್ ಮಳಾನ ಗಯ. ತದೆ ಯೋಸೇಫನೆ ಇನಿ ಖ್ಹಣೇದ್ ಮಳಾನಿತರ ಕರ‍್ಯೊ. ಅಜು಼ ಯೋಸೇಫನ ಘರ್‌ವಾಳಾನಿ ಬಾರೇಮ ಫರೋಹನ ಮಾಲುಮ್‌ ಪಡ್ಯು.
ACT 7:14 ಇನಪಾರ್ ಯೋಸೇಫ ಇನೊ ಬಾ ಹುಯಿರೋತೆ ಯಾಕೋಬ್‌ನಾಬಿ ಅಜು಼ ಪಾಚ಼್‌ಉಪ್ಪರ್‌ ಖ್ಹಡ್‌ತೀನಿಖ್ಹ್ ಜ಼ಣು ಮಾಯಮಾತ್ರ ಖ್ಹಾರಾನ ಈಜಿಪ್ಟ್ ದೇಖ್ಹ್‌ಮ ಬುಲೈಲಿದೊ.
ACT 7:15 ತದೆ ಯಾಕೋಬಬಿನ್ ಇನ ಛಿಯ್ಯಾ ಇವ್ಣೆ ಮರಾಲಗೂಬಿ ಈಜಿಪ್ಟ್‌ಮಾಸ್ ಥು.
ACT 7:16 ಇನಪಾರ್ ಇನ ಶರೀರ್‌ನ ಶೇಕೆಮ್ಮ ಲೀನ್‌ ಜೈ಼ನ್, ಹಿಜ್ಜಾ಼ ಅಬ್ರಹಾಮ್‌ನೆ ಹಾಮೋರ‍್ನ ಛಿಯ್ಯಾಕನ ರೂಪಾನ ರಪ್ಯಾದೀನ್ ಮೋಲ್ ಲಿದೊಥೋತೆ ಝ಼ಗೋಮ ಮಖ್ಹಾಣ್ಯು ಕರ‍್ಯು.
ACT 7:17 ಕತೋಬಿ ದೇವ್ನೆ ಅಬ್ರಹಾಮ್‍ಥಿ ವಾಗ್ದಾನ ಕರ‍್ಯೊತೆ ವೇಳ್ ಆವಾನಿ ವಖ್ಹತ್ ಈಜಿಪ್ಟ್‌ಮ ಅಪ್ಣು ಯೆಹೂದ್ಯರ್ ಭಡೀನ್ ಜಾ಼ಖ್ಹತ್ ಹುಯು.
ACT 7:18 ತದೆ ಈಜಿಪ್ಟ್‌ಮ ಬಿಜೇಕ್ ರಾಜ಼ ರಾಜ಼್‌ಭಾರ್ ಕರಾನ ಆಯೊ. ಇನ ಯೋಸೇಫನಿ ಬಾರೇಮ ಶಾತ್ಬಿ ಮಾಲುಮ್‍ಕೋಥುನಿ.
ACT 7:19 ಆ ರಾಜ಼ನೆ ಅಪ್ಣ ಗುರುಖ್ಹಾರಪರ್‌ ಬಳಾಪೊ ಕರೀನ್ ಇವ್ಣ ಪೈದಾಖ್ಹ್‌ನ ಲಡ್ಕಾವ್‍ನ ಮರ್‌ನಾಕ್ಣುಕರಿ ಭಾರ್‌ ಕಡೈನಾಖ್ಯೊ.ಅಜು಼ ಅಪ್ಣ ಗುರುಖ್ಹಾರಾನ ಘಣು ಖ್ಹತಾಯು.
ACT 7:20 ಆ ಹಗಾಮ್ಮಾಸ್ ಮೋಶೆ ಪೈದಹುಯೊ. ಯೊ ಘಣು ಶನ್‍ಗಾರ‍್ನೊ ಥೊ ಅಜು಼ ಯೊ ಇನ ಬಾನ ಘರ್‌ಮ ತೀನ್ ಮಹಿನಲಗು ಪಳ್ಯೊ,
ACT 7:21 ತದೆ ಇವ್ಣೆ ಮೋಶೆನ ಭಾರ್‌ ಕಾಡ್‍ನಾಖಮ ಫರೋಹನಿ ಛೋ಼ರಿ ಇನ ಪಾಡಿಲಿಜೈನ್ ಇನೊ ಶೊಂತ್ ಛಿಯ್ಯಾನಿ ಮತ್‍ ಪಾಳಿ.
ACT 7:22 ಈಜಿಪ್ಟ್‌ವಾಳು ಮೋಶೆನ ಇವ್ಣುನ ಮಾಲುಮ್‍ಥೂತೆ ಹರೇಕ್ ಪಢಂತ್‍ನ ಶಿಕಾಡ್ಯು. ಯೋ ಅಕ್ಕಲ್‌ಮ ವಾತೆ ಬೋಲಾಮ ಅಜು಼ ಕಾಮ್ ಕರಾಮಾಬಿ ಜಾ಼ಖ್ಹತ್ ಅಕ್ಲಿಹುಯೊ.
ACT 7:23 ಯೊ ಚಾ಼ಳಿಖ್ಹ್ ವರಖ್ಹ್‌ನೊ ಹುಯೊ ತದೆ ಇನ ಇಸ್ರಾಯೇಲ್ ಭೈಯೇನ ಮಳಾನು ಅಛ್ಛು಼ಥು ಕರಿ ದಿಲ್‌ಮಹುಯು.
ACT 7:24 ತದೆ ಈಜಿಪ್ಟ್‌ವಾಳು ಏಕ್‍ಜ಼ಣು ಇಸ್ರಾಯೇಲ್‌ವಾಳ ಏಕ್‍ ಜ಼ಣಾನ ಗಲತ್‌ಥಿ ಘಣು ಖ್ಹತಾಪ್ಣಿ ದೇವ್‍ಕರ್ತುಥುತೆ ಇನ ಮೋಶೆನೆ ಮಾರಿನ್ ಬದಲ್ ಕಾಡಿಲಿದೊ.
ACT 7:25 ಅಮ್ಮಸ್ ದೇವ್ನೆ ಇನ ಹಾತೇಥಿ ಬಚಾ಼ವ್‍ಶೆ ಕರಿ ಇನ ಭೈಯೇನ ಮಾಲುಮ್‌ಪಡ್‍ಶೆ ಕರಿ ಲ್ಹಾಯೋಥೊ ಕತೋಬಿ ಇವ್ಣೆ ಮಾಲುಮ್ ಕೋ ಕರ‍್ಯಥಾನಿ.
ACT 7:26 ಇನವ್ಹಾಣೆ ಮೋಶೆನೆ ಯೆಹೂದ್ಯರ್‌ನ ಬೇಜ಼ಣ ಮಾರಮಾರಿ ಖಾವಾನು ದೇಖ್ಯೊ. ಇವ್ಣುನ ಖ್ಹಮ್‍ಜಾ಼ಡಾನಟೇಕೆ ‘ದೋಸ್ತಿವೊ ಭೈಯೇ ಭೈಯೇಸ್ ಹುಯಿರಾಸ್! ತುಮೆ ಏಕ್‌ಥಿಏಕ್ ಠಗಾವಾನು ಶನಕರೋಸ್‌? ಕರಿ ಇವ್ಣುನ ಸಮಾಧಾನ್ ಕರಾನ ಆಯೊ.
ACT 7:27 ಬಿಜೇಕ್ ಜ಼ಣೊ ಗಲತ್‌ ಕರಾವಾಳೊ ಏಕ್‍ಜ಼ಣೊ ಮೋಶೆನ ಪೀಠೆ ಧಕೇಲ್‍ತೊ ಹುಯಿನ್, ತುನ ಹಮಾರಪರ್‌ ಅದಿಕಾರಿ ಕರೀನ್‌ಬಿ, ನ್ಯಾವ್ಣೊ ಕರೀನ್‌ಬಿ ಮ್ಹೇಲ್ಯುತೆ ಕೋಣ್‌?
ACT 7:28 ಕಾಲೆ ಯೊ ಈಜಿಪ್ಟ್‌ವಾಳನ ಮಾರ‍್ಯೂತೆ ತಿಮ್ಮಸ್ ಮನಾಬಿ ಮಾರಿನಾಕ್ಣು ಕರಿ ಛಾ಼ಕಿಶು? ಕರಿ ಬೋಲ್ಯೊ.
ACT 7:29 ಅನ ಖ್ಹಮ್‍ಜ್ಯೊತೆ ಮೋಶೆ ಡರಿನ್ ಈಜಿಪ್ಟ್‌ನ ಮ್ಹೇಲಿನ್ ಮಿದ್ಯಾನ್‍ ದೇಖ್ಹ್‌ಮ ಜೈ಼ನ್ ಖ್ಹಣೇದ್‌ಕೊಂತೆ ಅದ್ಮಿನಿತರ ಜಿವ್ಣು ಕರ‍್ಯೊ. ಹಿಜ್ಜಾ಼ ಯೊ ಬೇ ಪರ್ಖ್ಹಾ ಲಡ್ಕಾನೊ ಬಾಹುಯೊ.
ACT 7:30 ಚಾ಼ಳಿಖ್ಹ್ ವರಖ್ಹ್‌ನೊ ಹುಯೊತದೆ ಸೀನಾಯಿ ಪಹಾಡ್ನ ಖನ್ನೆಥೂತೆ ಜ಼ಂಗಳ್‌ನ ಏಕ್‌ ಕಾಟಾನಿ ಡಾಗ್‌ಮ ಆಗ್‍ನಿ ಝ಼ಲ್‌ಪಟ್‌ ಲಾಗುಕರ್ತುಥುತೆ ಇನಾಮ ದೇವ್‌ನೊ ದೂತ ಇನ ದೆಖಾಯೊ.
ACT 7:31 ಮೋಶೆನೆ ಆಶ್ಚರ್ಯಥಿ ದೇಖಾನ ಖನ್ನೆ ಗಯೊ. ತದೆ ಇನೆ ಪ್ರಭುನೊ ಏಕ್‌ ಅವಾಜ಼್ ಖ್ಹಮ್‍ಜ್ಯೊ.
ACT 7:32 ದೇವ್ನೆಯಿನ, ಮೇಸ್ ತಾರೊ ಗುರುಗುರಬ್‌ಲ್ಯ ಹುಯಿರಾತೆ ಅಬ್ರಹಾಮ್ ಇಸಾಕ್ ಯಾಕೋಬನೊ ದೇವ್‌ ಕರಿ ಬೋಲ್ಯೊ. ಮೋಶೆ ಡರ್‌ಥಿ ಕಾಪಲಗ್ಯೊ. ಯೊ ಟಾಪ್‍ಣ್ಯನಾಬಿ ದೇಖಾನ ಭಾಲಿ ಕೋಥೂನಿ.
ACT 7:33 ಪ್ರಭುನೆ ಇನ ತಾರು ಖೋಖ್ಹ್‌ಡು ಕಾಡಿನಾಖಿದೆ ಹಮ್ಕೆ ತು ಭಿಯೋತೆ ಝ಼ಗೊ ಪರಿಶುದ್ ಹುಯಿರುಸ್.
ACT 7:34 ಅದ್ಮಿಖ್ಹಾರು ಈಜಿಪ್ಟ್ ದೇಖ್ಹ್‌ಮ ಜಾ಼ಖ್ಹತ್ ಖರಾಬ್ ಹಾಲತ್ಮ ರ‍್ಹವಾನು ಮೆ ದೇಖಿರಾಖ್ಯೊಸ್. ಮಾರ ಅದ್ಮಿಖ್ಹಾರಾನು ಅಂದ್ರೋಖ್ಹ್‌ನ ಮೆ ಖ್ಹಮ್‍ಜ್ಯೊ. ಮೆ ಇವ್ಣುನ ಬಚಾ಼ಡನಖ್ಹಾಜೆ ಉತ್ರಿರ‍್ಹೋಸ್. ಹಮ್ಕೇಸ್ ಮೆ ತುನ ಈಜಿಪ್ಟ್‌ಮ ಮೋಕ್ಲುಕರುಸ್ ಕರಿ ಬೋಲ್ಯೊ.
ACT 7:35 ಇವ್ಣೆ ಖೆವ ಮೋಶೆನ ನಕೊಕರಿ ಝಿಟ್ಕಾರಿನ್, ‘ತುನ ಅದಿಕಾರಿ ಕರೀನ್‌ಬಿ, ನ್ಯಾವ್ಣೊ ಕರೀನ್‌ಬಿ ಮ್ಹೇಲ್ಯುತೆ ಕೋಣ್‌?’ ಕರಿ ಕಿನೆ ಬೋಲ್ಯುಕಿ, ಇನಾಸ್ ದೇವ್ನೆ ಡಾಗ್‌ಮ ದೆಖೈನ್ ದೂತಾಥಿ ಅದಿಕಾರಿಬಿ, ಛುಟ್ಕಾರ್‌ ಕರಾವಾಳನಬಿ ನೇಮಕ್‌ ಕರ‍್ಯೊ.
ACT 7:36 ಇನಖ್ಹಾಜೆ ಮೋಶೆನೆ ಅದ್ಮಿಖ್ಹಾರನ ಈಜಿಪ್ಟ್ ದೇಖ್ಹ್‌ಮಾಥು ಬುಲೈಲಿ ಆಯೊ. ಯೊ ಖ್ಹಣೇದ್‍ನು ಕಾಮ್‌ಖ್ಹಾರು, ಅದ್ಬುತ್‌ಕಾಮ್‌ಖ್ಹಾರಥಿ ಈಜಿಪ್ಟ್‌ಮಾಬಿ ಅಜು಼ ಲಾಲ್‍ದರ‍್ಯಾವ್‍ಮಾಬಿ ಚಾ಼ಳಿಖ್ಹ್ ವರಖ್ಹ್ ಜ಼ಂಗಳ್‌ಮ ಚ಼ಲೈಲಿನ್ ಆಯೊ.
ACT 7:37 ಯೋ ಮೋಶೆನೇಸ್, ದೇವ್ನೆ ಮನ ಉಠಾಡಾನಿ ತರಸ್ ತುಮಾರ ಅದ್ಮಿಮಾಸ್‌ ಏಕ್‌ ಪ್ರವಾದಿನ ತುಮಾರಮಸ್ ಉಠಾಡ್‌ಶೆ, ಕರಿ ಇಸ್ರಾಯೇಲ್‌ನ ಅದ್ಮಿಖ್ಹಾರಾನ ಬೋಲ್ಯೊ.
ACT 7:38 ಇನೇಸ್ ಸೀನಾಯಿ ಪಹಾಡ್‌ಮ ಇನಿಜೋ಼ಡ್ಮ ವಾತೆಬೋಲ್ಯೊತೆ ದೇವ್ನ ದೂತನಾಬಿ ಅಪ್ಣ ಗುರುಖ್ಹಾರಾನಾಬಿ ಜ಼ಂಗಳ್‌ಮ ಥೂತೆ ಸಬೇಮರ‍್ಹೀನ್ ಜಾನ್ನಿ ವಚನ್ನ ಲೀನ್ ಅಪ್ಣುನ ದ್ಯವಾಳೊ ಹುಯಿರೋಸ್.
ACT 7:39 ಕತೋಬಿ ಅಪ್ಣೊ ಗುರುಖ್ಹಾರು ಇನಿ ವಾತೆನ ಖ್ಹಮ್‌ಜಾ಼ನ ದಿಲ್‌ಕೊಂತೆ ಇನ ಮ್ಹೇಲಿನ್, ಈಜಿಪ್ಟ್‌ಮ ಪಾಛು಼ ಚ಼ಲೆಜಾ಼ವ್ಣು ಕರಿ ದೇಖ್ಯು.
ACT 7:40 ಇವ್ಣೆಖ್ಹಾರು ಆರೋನ್ನ, ‘ಮೋಶೆನೆ ಈಜಿಪ್ಟ್ ದೇಖ್ಹ್‌ ಥು ಬುಲೈಲಾಯೊ. ಕತೋಬಿ ಇನ ಶಾತ್ ಹುಯಿಗಯು ಕರಿ ಹಮೂನ ಮಾಲುಮ್‌ ಕೊಹುಯುನಿ. ಇನಖ್ಹಾಜೆ ಹಮೆ ಖ್ಹಾಮ್ಣೆ ಜಾ಼ವಾನಟೇಕೆ ಅಜು಼ ಹಮುನ ಚ಼ಲಾವನಟೇಕೆ ದೇವ್‌ನು ಮೂರತ್‌ ಕರೀನ್ ದೇ ಕರಿ ಬೋಲ್ಯು’.
ACT 7:41 ತದೆ ಯೊ ದನ್ಮ ಢಾಂಡನಿಘೊಣಿ ಏಕ್‌ ಫುತ್‍ಳು ಬಣೈನ್ ಇನಖ್ಹಾಮ್ಣೆ ಬಲಿದಿದು. ಅಜು಼ ಮಿಝ಼್‌ವಾನ್ಬಿ ಖಡಾಯು ಯೋ ಅದ್ಮಿಖ್ಹಾರು ಮಗನ್‌ ಹುಯು.
ACT 7:42 ಇನಖ್ಹಾಜೆ ದೇವ್ನೆ ಇವ್ಣೇಥಿ ಮ್ಹೋಡು ಫರೈನ್, ಆಬ್‌ನ ಶುಕ್ಕರ್‌ನ ಪೂಜ಼ ಕರಿಲ್ಯವಾದೆಕರಿ ಇವ್ಣುನ ಮ್ಹೇಲಿದಿದೊ. ಅನಿಬಾರೇಮ ಪ್ರವಾದಿನ ಪುಸ್ತಕ್‌ಮ ಅಮ್ ಲೀಖೈರುಸ್; ದೇವ್ ಅಮ್‍ ಬೋಲಾಸ್, ಇಸ್ರಾಯೇಲ್‌ನ ಖಾನ್‌ದಾನ್‌ವಾಳವೊ! ತುಮೆ ಚಾ಼ಳಿಖ್ಹ್ ವರಖ್ಹ್‌ಲಗು ಜ಼ಂಗಳ್‌ಮರ‍್ಹಾವಾನಿ ವಖ್ಹ್‌ತೆ ತುಮೆ ಮನ ಬಲಿ ಚ಼ಢಾಯಾಥಾಕಿ ಶು?
ACT 7:43 ತುಮೆ ತುಮಾರ ಜೋ಼ಡ್ಮ ಮೊಲೋಖ ದೇವ್‌ನು ಡೇರಾನಾಬಿ ಅಜು಼ ರೆಫಾನ್ ದೇವ್ತಿನೊ ಶುಕ್ಕರ್‌ನ ರೂಪ್‍ನು ಫುತ್‍ಳಿನ ಢೊಯಿಲೀನ್ ಆರಾದನೆಕರಾನ ವಳೇಜಾ಼ತಥಾತೆ ಇನಖ್ಹಾಜೆ ಮೆ ತುಮೂನ ಬಾಬಿಲೋನ್ನ ಖ್ಹಾರ್ಕೊಟ್‌ಮ ಮೋಕ್ಲಿದಿಶ್‌ಕರಿ ಲೀಖಿರಾಖ್ಯುಸ್.
ACT 7:44 ದೇವ್ ರ‍್ಹೆತೊಥೋತೆ ಡೇರೊ ಜ಼ಂಗಳ್ಮ ಅಪ್ಣ ಗುರುಖ್ಹಾರಾಕನ ಥು. ಮೋಶೆನಿ ಜೋ಼ಡ್ಮ ವಾತೆ ಬೋಲ್ಯೊತೆ ದೇವ್‌, ತುನೆ ದೆಖ್ಯೋತೆ ಶಕಲ್ನಿ ಪರಕ್ಮಾಸ್ ಇನ ಕರ್ನುಕರಿ ಹುಕುಮ್ ದಿದೊ.
ACT 7:45 ಅಪ್ಣ ಬಾಬ್‍ದಾದ್‍ವ್ನೆ ಇನ ಗುರುಗುರಬ್‍ಲ್ಯಥು ಲಿದು. ಇವ್ಣೆ ಯೆಹೋಶುವನ ಪಾಲನ್‍ ಕರ್ತು ಅಯಿನ್ ದೇವ್ನೆ ಧಕೇಲಿ ದಿದಾಹುಯ ಅಲಕ್ ಅದ್ಮಿನ ದೇಖ್ಹ್‌ನ ಕಬ್‍ಜಾ಼ ಕರಿಲಿದು. ತದೆ ಯೊ ಡೇರಾನ ಘರ್‌ನ ಇವ್ಣ ಜೋ಼ಡ್ಮಾಸ್ ಪಾಡಿಲಿನ್ ಕಾನಾನ್ ದೇಖ್ಹ್‌ಮ ಆಯು. ಅಜು಼ ದಾವೀದನು ಹಗಾಮ್ ಲಗೂಬಿ ಯೊ ಹಿಜ್ಜಾ಼ಸ್ ಥೂ.
ACT 7:46 ದಾವಿದನೆ ದೇವ್ನಿ ಸನ್ನಿಧಿಮ ದಯಾಲೀನ್ ಯಾಕೋಬ್‍ನಿ ಪಿಳ್ಗಿನಖ್ಹಾಜೆ ಪ್ರಾರ್ಥನೇನಿ ಮಂದಿರ್‌ ಭಾಂದನ ಹುಕುಮ್ ದೇವ್ಣುಕರಿ ದೇವ್ನ ಬಿಂತಿ ಕರಿಲಿದೊ.
ACT 7:47 ಕತೋಬಿ ಸೊಲೊಮೋನ್ನೇಸ್ ಪ್ರಾರ್ಥನೇನು ಮಂದಿರ್‌ನ ಭಂದಾಯೊ.
ACT 7:48 ಪ್ರವಾದಿ ಬೋಲಾತೆತಿಮ್ ಪರಮಂಡಲ್‌ನೊ ದೇವ್ ಅದ್ಮಿನ ಭಾಂದಾತೆ ಘರ್‌ಮ ರ‍್ಹವವಾಳೊ ಕಾಹೆ.
ACT 7:49 ಪ್ರಭುನೆ ಅಮ್‌ ಬೋಲ್ಯೊ, ‘ಸೊರ್ಗ ಮಾರು ಸಿಂಹಾಸನ್ ಜ಼ಮೀನ್ ಮಾರೊ ಗೋಡಾನೊ ರಚ್ಚೊ಼ ತುಮೆ ಮನ ಕಿಮ್ನು ಘರ್ ಭಾಂದ್‍ಶು? ಮಾರು ಅರಾಮ್‌ನ ಬರೋಬರ್‌ನಿ ಝ಼ಗೊ ಕಿಜ್ಜಾ಼ ಛಾ಼?
ACT 7:50 ಆ ಅಖ್ಖು ಮಾರ ಹಾತ್ನೆಸ್ ಬಣಾವಟ್ ಕರ‍್ಯುನಿ, ಕರಿ ಪ್ರಭುಸ್ ಬೋಲ್ಯೊ.
ACT 7:51 ಸ್ತೆಫನನೆ ಅಮ್‍ ಬೋಲ್ಯೊಕಿ, “ಮೊಂಡಿಹುಯಿರಾತೆ ತುಮೆ ತುಮಾರ ದಿಲ್ನ ದೇವ್ನ ಕೋ ದಿದಾನಿ ಇನ ಕಾನ್‍ಲಗಾಡ್ಯಾಬಿ ಕೊಯ್ನಿ. ಪವಿತ್ರ ಆತ್ಮಾನ ಕಾಮ್ನ ವಿರುದ್ಧಥಿ ಚಾ಼ಲವಾಳ ಹುಯಿರಾಸ್. ತುಮಾರ ಗುರುಗುರಬ್‍ಲ್ಯ ಕಿಮ್‌ಥಾಕಿ ತುಮೇಬಿ ಇಮ್ಮಸ್ ಹುಯಿರಾಸ್.
ACT 7:52 ಜಿವ್ತಥಾತೆ ಪ್ರವಾದಿಮ ಖ್ಹಾರಜ಼ಣನ ತುಮಾರ ಗುರುಖ್ಹಾರು ಖ್ಹತಾಯು. ನೀತಿವಾಳೊ ಎಕ್ಕಸ್‍ಜ಼ಣೊ ಹುಯಿರೋತೆ ಯೊ ಪಹಿಲೆಸ್ ಆವ್‍ಶೆಕರಿ ಖ್ಹಮ್‍ಜಾ಼ಯುಥು. ಕತೋಬಿ ತುಮಾರು ಗುರುಖ್ಹಾರು ಯೋ ಪ್ರವಾದಿಖ್ಹಾರನ ಮಾರಿನಾಖ್ಯು. ಹಮ್ಕೆ ತುಮೆ ಧರಿದೀನಸ್ ಇನ ಮರೈನಾಖ್ಯ.
ACT 7:53 ತುಮೆ ಸೊರ್ಗ ದೂತರ್‌ಥಿ ನೇಮಕ್ ಹುಯೊತೆ ದೇವ್ನು ಧರ್ಮಶಾಸ್ತ್ರನ ಸ್ವೀಕಾರ್ ಕರ‍್ಯಾತೋಬಿ ಇನಿನಿತರ ಚಾ಼ಲ್ಯಕೊಯ್ನಿ” ಕರಿ ಬೋಲ್ಯೊ.
ACT 7:54 ಆ ವಾತ್ನ ಖ್ಹಮ್‍ಜ್ಯುತೆ ನ್ಯಾವ್ನಿಸಭೆನು ಘಲ್ಡುಖ್ಹಾರು ಘಣು ಖಿಜೈನ್ ಸ್ತೆಫನನ ಉಪ್ಪರ್ ದಾತ್‍ಚಾ಼ಯು.
ACT 7:55 ಕತೋಬಿ ಯೊ ಪವಿತ್ರ ಆತ್ಮಥಿ ಭರೈನ್ ಸೊರ್ಗಭಣಿ ದೇಖಿನ್, ದೇವ್ನಿ ಮಹಿಮೆನಬಿ, ದೇವ್ನ ಖಾವಿಬಾಜು಼ಮ ಭಿಯೋತೆ ಯೇಸುನಾಬಿ ದೇಖ್ಯೊ.
ACT 7:56 ತದೆ ಇನೆ, “ದೇಖೊ ಪರ್‌ಲೋಕ್ ನಿಕ್‍ಳೈರ‍್ಹೂತೆ; ಅದ್ಮಿನೊ ಛಿಯ್ಯೊ ದೇವ್ನ ಖಾವಿಬಾಜು಼ಮ ಭಿಯೋತೆ ಮೆ ದೇಖುಕರುಸ್” ಕರಿ ಬೋಲ್ಯೊ.
ACT 7:57 ತದೆ ಯಹುದ್ಯರ್‌ಖ್ಹಾರು ಜೋ಼ರೇಥಿ ಚಿಕ್ರಿನ್, ಕಾನ್ನ ಮೂಚಿಲೀನ್, ಎಕ್ಟುಹುಯಿನ್ ನಾಶಿಆಯಿನ್,
ACT 7:58 ಇನ ನಂಗರ‍್ನ ಭಾರ್‌ ಧಕೇಲಿಜೈ಼ನ್ ಮಾರಿನಾಖನ ಇನಪರ್ ಬಂಡೊ ಫೇಕ್ಯು. ಇನ ವಿರೋದ್‌ ಸಾಕ್ಷಿ ಬೋಲ್ಯುತೆ ಇವ್ಣೆ ಇವ್ಣ ಝ಼ಗ್ಗಾನ ಕಾಡಿನ್ ಸೌಲಕರಿ ಏಕ್‍ ಜ಼ಣಾನ ಗೋಡಾಕನ ಮ್ಹೇಲ್ಯು.
ACT 7:59 ಸ್ತೆಫನನ ಉಪ್ಪರ್ ಬಂಡೊ ಫೇಕುಕರ್ತುಥೂತೆ ತದೆ ಯೋ ಪ್ರಾರ್ಥನೆ ಕರ್ತೊ ಹುಯಿನ್ “ಯೇಸು ಪ್ರಭು, ಮಾರ ಆತ್ಮಾನ ಸ್ವೀಕಾರ್‌ಕರೀಲೆ” ಕರಿ ಬೋಲ್ಯೊ.
ACT 7:60 ಅಜು಼ ಯೊ ಢುಕ್‍ಣ್ಯ ಮಾಂಡೀನ್ ಪ್ರಭು, ಆ ಪಾಪ್ನ ಅವ್ಣಪರ್ ನಕೊ ಲಗಾಡಿಷ್!” ಕರಿ ಜೋ಼ರೇಖ್ಹು ಚಿಕ್ರಿನ್ ಮರಿಗೊ.
ACT 8:1 ಸ್ತೆಫನನ ಮಾರಿನಾಖನ ಸೌಲನ ಒಪ್ಪಿಕೆಥು. ಯೊ ದನ್ಮ ಯೆರೂಸಲೇಮಥೂತೆ ಸಬೆವಾಳನ ಮೋಟಿ ಖ್ಹತಾಪ್ಣಿ ಪಡ್ಯು. ಅಪೊಸ್ತಲರ್ ನಾಹುಯಿನ್ ಖ್ಹಾರೂಸ್, ಯೂದಾಯ ಸಮಾರ್ಯ ತಬರ್‌ಖಾಮ ಛಿಡ್‍ಕೈಗಯು.
ACT 8:2 ಥೋಡು ಭಕ್ತರ್‌ ಖ್ಹಾರು ಸ್ತೆಫನನ ಮಖ್ಹಾಣ್ಯು ಕರೀನ್ ಇನಖ್ಹಾಜೆ ಘಣು ರದನ್ ಕರ‍್ಯು.
ACT 8:3 ಕತೋಬಿ ಸೌಲ ಘರ್ ಘರ್‌ಮ ಪೇಶಿನ್ ತಯೇಡ ಪರ್ಖ್ಹಾ ಖೇಚಿಲಾಯಿನ್ ಜೇಲ್‌ಮ ಧಕೆಲಿನ್ ಸಬೆನ ಅಖ್ಖು ನಾಶ್‌ಕರ್ತೊಥೊ.
ACT 8:4 ಛಿಡ್‍ಗರ್‌ಪಡಿಗುತೆ ವಿಶ್ವಾಸಿಖ್ಹಾರು ಬಿಜಿಬಿಜಿ ಝ಼ಗೊ ಜೈ಼ನ್ ಸುವಾರ್ತೆನ ಬೋಲ್ತು ನಿಕ್‌ಳ್ಯು.
ACT 8:5 ಫಿಲಿಪ್ ಸಮಾರ್ಯಕರಿ ಮುಖ್ಯ ಖ್ಹಯೇರ‍್ನ ಅದ್ಮಿವೊನ ಜೈ಼ನ್ ಕ್ರಿಸ್ತನಿ ಬಾರೇಮ ಬೋಲಿವತಾಳ್ಯೊ.
ACT 8:6 ಝೂ಼ಂಡ್‌ಥಿ ಭರಾಯಹುಯ ಅದ್ಮಿಖ್ಹಾರು ಫಿಲಿಪ್ಫನಿ ವಾತ್ನ ಏಕ್‍ ಮನ್‌ಥಿ ಖ್ಹಮ್‌ಜ್ಯು. ಅಜು಼ ಇನೆ ಕರ‍್ಯೊತೆ ಖ್ಹಣೇದ್ನ ಅಖ್ಖಾ ಕಾಮ್ನ ದೇಖ್ಯು.
ACT 8:7 ಶನಕತೊ ಕೆತ್ರಾಕಿ ಜ಼ಣಾಮಾಥೊ ಭೂತ್‌ಖ್ಹಾರು ಜೋ಼ರೇಖ್ಹು ಅವಾಜ಼್‌ಕರೀನ್ ಚಿಕರ್ತು ಹುಯಿನ್ ಭಾರ್‌ ಆಯು; ಬಿಜು಼ ಕೆತ್ರೂಕಿ ಲಕ್ವಾಭರ‍್ಯು, ಪಾಂಗ್‍ಳ್ಯು ಗುಣ್‌ಹುಯು.
ACT 8:8 ಇನಖ್ಹಾಜೆ ಯೋ ಖ್ಹಯೇರ್‌ಮ ಜಾ಼ಖ್ಹತ್ ಖ್ಹುಶಿಹುಯು.
ACT 8:9 ಕತೋಬಿ ಥೋಡ ದನ್‍ಥೂ ಯೋ ಖ್ಹಯೇರ್‌ಮ ಸೀಮೋನ್‍ಕರಿ ಏಕ್‍ಜ಼ಣೊ ಥೊ. ಯೋ ಇನ ಜಾ಼ದುಜ಼ಮ್ಕರ್‌ಥಿ ಸಮಾರ್ಯನ ಅದ್ಮಿನ ಆಶ್ಚರ್ಯ ಕರಾಯೊ. ಸಿಮೋನ್ ಇನು ಯೋಸ್ ಮಹಾತ್ಮಕರಿ ಬೋಲಿಲೇತೊಥೊ.
ACT 8:10 ನ್ಹಾನೇಥಿ ಧರೀನ್ ಮೋಟಾಲಗು ಖ್ಹಾರು; ಆ ಹೈರೋತೆ ಮಹಾನ್ ಶಕತ್‍ಕರಿ ಬೋಲೈರ‍್ಹೋತೆ ದೇವ್‌ನೀಸ್ ಶಕತ್‍ಕರಿ ಬೋಲ್ತುಹುಯಿನ್ ಇನಿವಾತ್ನ ಖ್ಹಮಜ್‍ತೂಥು.
ACT 8:11 ಘಣಾದನ್‌ಥೂಬಿ ಸೀಮೋನ್ನಿ ಜಾ಼ದುಜಮ್‍ಕರ್‌ಥಿ ಅದ್ಮಿಖ್ಹಾರು ಆಶ್ಚರ್ಯಥಿ ಇನಿ ವಾತ್ನ ಖ್ಹಮಜ್‍ತೂಥು.
ACT 8:12 ಕತೋಬಿ ಫಿಲಿಪ್ ದೇವ್ನಿ ರಾಜ್ಯನಿ ಬಾರೇಮ ಅಜು಼ ಯೇಸುಕ್ರಿಸ್ತನಿ ನಾಮ್ನಿ ಬಾರೇಮಾಬಿ ಅದ್ಮಿಖ್ಹಾರಾನ ಸುವಾರ್ತೆ ಬೋಲ್ಯೊ. ಪರ್ಖ್ಹೊ ತಯೇಡ ಖ್ಹಾರುಸ್ ಫಿಲಿಪ್ ಬೋಲ್ಯೊತೆ ವಾತೆನ ವಿಶ್ವಾಸ್ ಕರೀನ್ ಬ್ಯಾಪ್ತಿಸ್ಮ ಕರೈಲಿದು.
ACT 8:13 ತದೆ ಸೀಮೋನ್ನೇಬಿ ವಿಶ್ವಾಸ್‍ಕರಿನ್ ಬ್ಯಾಪ್ತಿಸ್ಮ ಕರೈಲೀನ್ ಅಜು಼ ಫಿಲಿಪ್ಫನಿ ಜೋ಼ಡ್ಮ ಕದೇಬಿ ರ‍್ಹೀನ್ ಯೋ ಕರಾತೆ ಅದ್ಭುತ್‌ ಕಾಮ್ನ ಅಜು಼ ಖ್ಹಣೇದ್ನ ಕಾಮ್ನ ದೇಖಿನ್ ಆಶ್ಚರ್ಯ ಹೋತೊಥೊ.
ACT 8:14 ಸಮಾರ್ಯವಾಳು ದೇವ್ನಿ ವಚನ್ನ ಮಾನಿಲಿದೂತೆ ಸಮಚಾರ್‌ನ ಯೆರೂಸಲೇಮ್ಮ ಥೂತೆ ಅಪೊಸ್ತಲರ್ ಖ್ಹಾರು ಖ್ಹಮ್‌ಜಿನ್‌ ಪೇತ್ರ ಯೋಹಾನ ಇವ್ಣಕನ ಮೋಕ್‍ಲ್ಯು.
ACT 8:15 ಅವ್ಣೆ ಹಿಜ್ಜಾ಼ ಆಯಿನ್ ಯೋ ಅದ್ಮಿಖ್ಹಾರಾನ ಪವಿತ್ರಾತ್ಮವರನ ಮಳ್‌ಣುಕರಿ ಇವ್ಣಖ್ಹಾಜೆ ಪ್ರಾರ್ಥನೆ ಕರ‍್ಯು.
ACT 8:16 ಶನಕತೊ ಪವಿತ್ರಾತ್ಮ ಪೇತ್ರ ಯೋಹಾನ ಇವ್ಣ ಏಕ್‍ಜ಼ಣಪರ್‌ಬಿ ಬಿಜೂ಼ಬಿ ಕೋ ಆಯಿರ‍್ಹುಥೂನಿ. ಇವ್ಣೆ ಪ್ರಭು ಹುಯಿರ‍್ಹೋತೆ ಯೇಸುನ ನಾಮ್‍ಪರ್ ಖಲಿ ಬ್ಯಾಪ್ತಿಸ್ಮ ಕರೈರಾಖ್ಯಥ.
ACT 8:17 ಯೋ ಬೇ ಅಪೊಸ್ತಲರ‍್ನೆ ಇವ್ಣಪರ್ ಹಾತ್ ಮ್ಹೇಲಾಖ್ಹತರ್‌ ಇವ್ಣೆ ಪವಿತ್ರಾತ್ಮನ ಲೀಲಿದು.
ACT 8:18 ಅಪೊಸ್ತಲರ್ ಖ್ಹಾರು ಅದ್ಮಿಪರ್ ಇವ್ಣ ಹಾತ್ ಮ್ಹೇಲಾದಿನ್ ಅದ್ಮಿಖ್ಹಾರಾನ ಪವಿತ್ರಾತ್ಮ ಮಳಿರ‍್ಹೂತೆ ಸಿಮೋನ್‍ನೆ ದೇಖ್ಯೊ. ಇನಖ್ಹಾಜೆ ಸೀಮೋನ್ನೆ ಪೈಶಾಲಯಿನ್ ಅಪೊಸ್ತಲರ‍್ನ ಖ್ಹಾಮ್ಣೆ ಮ್ಹೇಲ್ಯೊ.
ACT 8:19 ಅಜು಼ “ಮೆ ಕಿನಾಪರ್ ಹಾತ್ ಮ್ಹೇಲೂಸ್‍ಕಿ ಇವ್ಣೆ ಪವಿತ್ರಾತ್ಮನ ಲೀಲ್ಯಾವಾನಿತರ ಆ ಅದಿಕಾರ್ ಮನಾಬಿ ದೇವೊ” ಕರಿ ಬೋಲ್ಯೊ.
ACT 8:20 ಕತೋಬಿ ಪೇತ್ರನೆ ಇನ “ತಾರ ಪೈಶ ತಾರಿಜೋ಼ಡ್ಮ ನಾಶಹುಯಿಜಾ಼ವಾದೆ. ದೇವ್ನಿ ವರಾನ ಪೈಶಾನ ಲಿಯೆಜಾ಼ಯ್ ಕರಿ ಲಾಝ್ಯೊಕಿ ಶು?” ಕರಿ ಜ಼ವಾಬ್ ದಿದೊ.
ACT 8:21 ಆ ಕಾಮ್ಮ ತುನ ಭಾಗ್‍ಬಿ ಕೊಯ್ನಿ ವಾಟೊಬಿ ಕೊಯ್ನಿ; ತಾರೊ ದಿಲ್‌ ದೇವ್ನ ಖ್ಹಾಮ್ಣೆ ಬರೋಬರ್ ಕೊಯ್ನಿ.
ACT 8:22 ಇನಖ್ಹಾಜೇಥಿ ಆ ತಾರ ಖರಾಬ್ ಕಾಮ್ನ ಮ್ಹೆಂದಿನ್ ದೇವ್‌ಭಣಿ ಫರಿಜೈನ್, ಅಜು಼ ಪ್ರಾರ್ಥನೆ ಕರೀಲೆ. ಪ್ರಭು ತಾರ ದಿಲ್ನಿ ಖ್ಹಯಾಲ್ನ ಮಾಪ್‌ಕರ್ಶೆ.
ACT 8:23 ಶನಕತೊ ತೂ ಜಾ಼ಖ್ಹತ್ ಕಡ್‌ವ್ಹಾಟ್‌ನಿ ಬಳಾಪೆಥಿಬಿ ಭರೈರ‍್ಹಾವಾಳೊ, ಝರೇಲಿ ಅನೀತಿಥಿಬಿ ಭರೈರ‍್ಹೋತೆ ಮೇ ದೇಖುಕರುಸ್ ಕರಿ ಬೋಲ್ಯೊ.
ACT 8:24 ಇನ ಸೀಮೋನ ಅಜು಼ ಪೇತ್ರ ಇವ್ಣ ಬೇಜ಼ಣಾನ, ‘ತುಮೆ ಬೋಲ್ಯಾತೆ ವಾತೆಮ ಖಿವೂಬಿ ಮಾರಪರ್ ನಾ ಆವ್ಣುತೆ ತಿಮ್ ಮಾರಖ್ಹಾಜೆ ಪ್ರಭುಮ ತುಮೆ ಪ್ರಾರ್ಥನೆ ಕರೊ’ ಕರಿ ಬೋಲ್ಯೊ.
ACT 8:25 ಅಮ್‍ ರ‍್ಹವಾಪರ್ ಇವ್ಣೆ ಪ್ರಭುನಿ ಸಂದೇಶ್ನ ಖ್ಹಾಚ ದಿಲ್‌ಥಿ ಬೋಲಿಹುವಾದಿನ್ ಯೆರೂಸಲೇಮ್‌ನ ಜೈ಼ನ್ ಪಾಛು಼ ಫರಿ ಆವಾನಿವಖ್ಹ್‌ತೆ ಸಮಾರ್ಯವಾಳನ ಕೆತ್ರಾಕಿ ಗಾಮ್ಮ ಸುವಾರ್ತೆನ ಖ್ಹಮ್‌ಜಾ಼ಡ್ಯು
ACT 8:26 ಪ್ರಭುನ ದೂತನೆ ಫಿಲಿಪ್ಪನ ತೂ ಉಠೀನ್ ದಕ್ಷಿಣ್ ರುಕ್‍ಮ ಯೆರೂಸಲೇಮ್‍ಥು ಗಾಜ ಗಾಮ್‌ನ ಜಾ಼ವಾನಿ ಜ಼ಂಗಳ್‌ನಿ ವಾಟೆ ಜಾ಼ಕರಿ ಬೋಲ್ಯೊ.
ACT 8:27 ಇಮ್ನಿಪರಕ್ಮಾಸ್ ಫಿಲಿಪ್ ಉಠೀನ್ ಯೆರೂಸಲೇಮ್‌ನ ಪಾಛೊ಼ ಜಾ಼ತೊರ‍್ಹವಾನಿ ವಖ್ಹ್‌ತೆ ಇಥಿಯೋಪ್ಯವಾಳೊ ಏಕ್‌ ಅದ್ಮಿನ ದೇಖ್ಯೊ. ಯೋ ಹೀಜ್‍಼ಡೊ ಹುಯಿರ‍್ಹೊಥೊ. ಇಥಿಯೋಪ್ಯನಿ ರಾಣಿ ಕಂದಾಕೆನ ಹಾತ್‍ ಹೇಟ್‌ಳ್ಯೊ ಮೋಟೊ ಅಧಿಕಾರಿಬಿ ಬಿಜು಼ ಇನಿ ಧನ್‍ ದೌಲತ್ನಿ ಖಜಾನೇನ ದೇಖವಾಳೊ ಹುಯಿರ‍್ಹೋಥೊ. ಯೊ ಅದ್ಮಿ ಆರಾದನೆಕರಾನ ಯೆರೂಸಲೇಮ್‌ನ ಜೈ಼ರೋಥೊ.
ACT 8:28 ಅಜು಼ ಇನ ಘರೆ ಪಾಛೊ಼ ಜಾ಼ವಾನಿವಖ್ಹ್‌ತೆ ಇನಿ ರಥ್‍ಮ ಬೇಶಿನ್ ಯೆಶಾಯನಿ ಪ್ರವಾದನೆನಿ ದಪ್ತರ್‌ನ ಫಡುಕರ್ತೋಥೊ.
ACT 8:29 ಪವಿತ್ರಾತ್ಮನೆ ಫಿಲಿಪ್ಪನ ‘ತೂ ಯೋ ರಥ್‌ನ ಖನ್ನೆ ಜೈ಼ನ್ ಇನಿ ಜೋ಼ಡ್ಮಾಸ್ ಚಾ಼ಲ್’ ಕರಿ ಬೋಲ್ಯೊ.
ACT 8:30 ಫಿಲಿಪ್ಪ ನಾಶಿಜೈ಼ನ್ ಯೋ ಅದ್ಮಿ ಯೆಶಾಯ ಪ್ರವಾದಿನು ದಪ್ತರ್‌ನ ಪಢುಕರಾತೆ ಖ್ಹಮ್‌ಜಿನ್‌, ‘ತೂ ಪಢುಕರಾತೆ ತುನ ಮಾಲುಮ್ ಪಡುಕರಸ್ಕಿ ಶು’? ಕರಿ ಬೋಲ್ಯೊ.
ACT 8:31 ಇನೆ, ಕೋಣ್‌ತೋಬಿ ಮನ ಬರಬರ್ ನಾ ಖ್ಹಮ್‍ಜಾ಼ಡ್ಯುತೊ ಯೋ ಮನ ಕಿಮ್ ಅರ್ಥಪಡ್‍ಶೆ ಕರಿ ಬೋಲಿನ್ ತೂ ರಥ್ ಛ಼ಡಿನ್ ಮಾರಾಕನ ಬೇಶಿಜಾ಼ ಕರಿ ಫಿಲಿಪ್ಪನ ಬೋಲಿಲಿದೊ.
ACT 8:32 ಯೊ ಫಡುಕರ್ತೊ ಥೋತೆ ಪವಿತ್ರ್‌ ದಪ್ತರ್‌ಮ ವಚನ್ನುಭಾಗ್‌ ಖೆವುಕತೊ ‘ಕತ್ರಾನ ಲೀಜಾ಼ಯಿತೆ ಮೇಂಢಾನ ಚೆಲ್ಕನಿತರ ಇನ ಲೀನ್‌ಗಯು; ಅಜು಼ ಮೇಂಢು ರುಯಿ ಕತ್ರಾವಾಳನ ಖ್ಹಾಮ್ಣೆ ಖ್ಹೊಪ್‍ರ‍್ಹವಾನಿತರ ಇನೆ ಮ್ಹೋಡು ಮ್ಹೆಲ್ಯೊಸ್‍ ಕೊಯ್ನಿ.
ACT 8:33 ಇನ ಖ್ಹರಮ್‌ ಕಾಡ್ಯು. ಇನ ನ್ಯಾವ್ ಮಳ್ಯುಕೊಯ್ನಿ. ಇನಿ ಪಿಳ್‍ಗೀನಿ ಬಾರೇಮ ಕೋಣ್ ಬೋಲವಾಳು ಉಷೆ? ಶನಕತೊ ಜ಼ಮೀನ್‍ಪರ್ಥು ಇನ ಜಾನ್ನ ಕಾಡಿನಾಕ್‌ಶೆ ಕರಿ ಬೋಲನುಸ್.
ACT 8:34 ಅದಿಕಾರಿನೆ ಫಿಲಿಪ್ಪನ, ಆ ವಚನ್ನಿ ಬಾರೇಮ ಪ್ರವಾದಿನೆ ಆ ವಾತ್ನ ಕಿನಿ ಬಾರೇಮ ಬೋಲಿರಾಖ್ಯೊಸ್ತೆ? ಮಾರಿ ಬಾರೇಮಾಕಿ? ಬಿಜೇಕ್ ಜ಼ಣಾನಿ ಬಾರೇಮ? ದಯಾಕರೀನ್ ಮನ ಬೋಲ್ನುಕರಿ ಫಿಲಿಪ್ಪನ ಬೋಲ್ಯೊ.
ACT 8:35 ತದೆ ಫಿಲಿಪ್ಪನೆ ಬೋಧನೆ ಕರ್ತೊಹುಯಿನ್ ಯೋಸ್ ವಚನ್ನಿ ಆಧಾರ್ ಕರಿಲಿನ್ ಇನ ಯೇಸುನಿ ಬಾರೇಮಾನಿ ಸುವಾರ್ತೆನ ಖ್ಹಮ್‌ಜಾ಼ಡ್ಯೊ.
ACT 8:36 ಇವ್ಣೆ ವಳ್ಯಜಾ಼ತಥಾತೆ ವಾಟೆ ಪಾಣಿನಿ ಝ಼ಗೋಕನ ಆಯ. ಅಜು಼ ಅದಿಕಾರಿನೆ, ಹಂದೇಕ್ ಪಾಣಿ ಹೈರು ಮೇ ಬ್ಯಾಪ್ತಿಸ್ಮ ಲ್ಯಾವಾನ ಅಡ್ಡಿಶಾತ್‍? ಕರಿ ಬೋಲ್ಯೊ.
ACT 8:37 ತದೆ ಫಿಲಿಪ್ಪನೆ ಇನ “ತೂ ಖ್ಹಾಚ ದಿಲ್‌ಥಿ ವಿಶ್ವಾಸ್ ಕರಾವಾಳೊ ಉಷೇತೊ ಅಡ್ಡಿಕೊಯ್ನಿ” ಕರಿ ಬೋಲ್ಯೊ. ತದೆ ಅದಿಕಾರಿನೆ, “ಯೇಸುಕ್ರಿಸ್ತಾಸ್ ದೇವ್‌ನೊ ಛಿಯ್ಯೊಕರಿ ವಿಶ್ವಾಸ್ ಕರುಸ್” ಕರಿ ಬೋಲ್ಯೊ.
ACT 8:38 ತದೆ ರಥ್‌ನ ಭೀರಾಕ್ ಕರಿ ಹುಕುಮ್ ದಿದೊ. ಯೊ ವಖ್ಹತ್‌ಮ ಇವ್ಣೆ ಭೇಜ಼ಣ ಪಾಣಿಮ ಉತ್‍ರ‍್ಯ. ಫಿಲಿಪ್ಪನೆ ಇನ ಬ್ಯಾಪ್ತಿಸ್ಮ ಕರಾಯೊ.
ACT 8:39 ಇವ್ಣೆ ಪಾಣಿಮಾಥು ಉಪ್ಪರ್ ಆವಾದಿನ್, ಪ್ರಭುನ ಆತ್ಮನೆ ಫಿಲಿಪ್ಪನ ಲೀನ್‍ ಗಯೊ. ಅದಿಕಾರಿನೆ ಫಿಲಿಪ್ಪನ ಬಿಜು಼ ಕದೇಬಿ ದೇಖ್ಯೊಸ್‍ ಕೊಯ್ನಿ. ಯೋ ಘಣು ಖುಷಿಥಿ ಇನಿ ವಾಟ್‍ಧರಿನ್‍ ಚ಼ಲಿಗಯು.
ACT 8:40 ಅನಕೇಡೆಥು ಫಿಲಿಪ್ಪ ಅಜೋತ್‍ಕರಿ ಖ್ಹಯೇರ್‌ಥು ದೆಖೈನ್ ಹಿಜ್ಜಾ಼ಥು ಕೈಸರೈಕರಿ ಖ್ಹಯೇರ್‌ಲಗು ಅಖ್ಖಾಸ್ ಗಾಮ್ಮ ಸುವಾರ್ತೆ ಬೋಲ್ತೊ ಗಯೊ.
ACT 9:1 ‘ಪ್ರಭುನ ಶಿಷ್ಯರ‍್ನ ಡರಾವನ ಅಜು಼ ಮಾರಾನಖ್ಹಾಜೆ ಯೆರೂಸಲೇಮ್ಮ ಸೌಲ ಬಿಜೂ಼ಬಿ ಕೋಶಿಶ್ ಕರುಕರ್ತೊಥೊ. ಇನಖ್ಹಾಜೇಥಿ ಯೊ ಗಲ್‌ಢಯಾಜಕ್‌ಕನ ಜೈ಼ನ್,
ACT 9:2 ದಮಸ್ಕ ಖ್ಹಯೇರ‍್ನಿ ಸಭೆನ ಚಿಟ್ಟಿ ಲೀಖಿನ್ ದಮಸ್ಕಮ ಕ್ರಿಸ್ತಾನ ಮಾರಗ್‍ಮ ಚಾ಼ಲವಾಳು ತಯೇಡ ರ‍್ಹವೊ ಪರ್ಖ್ಹೊ ರ‍್ಹವೊ ಇವ್ಣುನ ಬೇಡಿ ಘಾಲಿನ್ ಖ್ಹತಾವನ ಯೆರೂಸಲೇಮ್ಮ ಖೇಚಿಲಿ ಆವಾನ ಮನ ಹುಕುಮ್ ದೆವೊ ಕರಿ ಬೋಲಿಲಿದೊ.
ACT 9:3 ಯೊ ದಮಸ್ಕನ ಖನ್ನೆ ಚಾ಼ಲ್ತೊಹುಯಿನ್‌. ಖ್ಹಯೇರ‍್ನ ಆವಾನಿ ವಖ್ಹ್‌ತೆ, ಆಕಾಶ್‌ಮಾಥು ಏಕ್‌ ಉಜಾ಼ಳು ಅಪ್‌ಗುಪ್‌ಥೀಸ್ ಐನ್ ಇನ ಅಶ್‌ಪಿಶ್‌ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು.
ACT 9:4 ಯೊ ಜ಼ಮೀನ್‌ಪರ್ ರಡ್ಕಿಗಯೊ ತದೆ, “ಸೌಲ, ಸೌಲ ಮನ ಶನ ಖ್ಹತಾವಸ್?” ಕರಿ ಬೋಲಾನಿ ಆವಾಜ಼್‌ನ ಖ್ಹಮ್‍ಜ್ಯೊ.
ACT 9:5 ಸೌಲನೆ, “ಪ್ರಭು ತೂ ಕೋಣ್?” ಕರಿ ಬೋಲ್ಯೊ. ಪ್ರಭುನೆ, “ತೂ ಖ್ಹತವ್‍ಕರಸ್ತೆ ಯೇಸುಸ್ ಮೇ”
ACT 9:6 ಕತೋಬಿ ತೂ ಉಠೀನ್ ಖ್ಹಯೇರ‍್ನ ಮಹಿ ಜಾ಼, ತೂ ಕರ್ನುತೆ ಅಖ್ಖು ಹಿಜ಼್ಜ ತುಮುನ ಮಾಲುಮ್‌ ಪಡ್‌ಶೆ” ಕರಿ ಬೋಲ್ಯೊ.
ACT 9:7 ಇನ ಜೋ಼ಡೆ ವಳೇಜಾ಼ತಥಾತೆ ಇವ್ಣೆ ಯೋ ಅವಾಜ಼್ ಖ್ಹಮ್‌ಜ್ಯು ಪಣ್ಕಿ ಕಿನಾಬಿ ದೇಖಾನ ಕೋಹುಯುಂತೆ ಮುಕ್ಕಪಡಿಗ.
ACT 9:8 ಸೌಲ ಜ಼ಮೀನ್‍ಪರ್ಥೊ ಉಠೀನ್ ಡೋಳ ಪಾಡಮ ಶಾತ್ಬಿ ಕೋ ದೆಖಾಯುನಿ. ಇನಖ್ಹಾಜೆ ಇವ್ಣೆ ಇನ ಹಾತ್‍ಧರೀನ್ ದಮಸ್ಕಮ ಬುಲೈಲಿನ್ ಗಯ.
ACT 9:9 ಇನ ತೀನ್ ದನ್ ಡೋಳ ಕೋ ದೆಖಾಯುನಿ,ಅಜು಼ ಇನೆ ಶಾತ್ಬಿ ಖಾದೊಪೀದೊ ಕೊಂತೆಥೊ.
ACT 9:10 ತದೆ ದಮಸ್ಕಮ ಅನನೀಯಕರಿ ಏಕ್‍ಜ಼ಣೊ ವಿಶ್ವಾಸಿಥೊ. ಪ್ರಭುನೆ ದರ್ಶನ್‍ಮ, ‘ಅನನೀಯ’ ಕರಿ ಬೋಲಖ್ಹತರ್, ತದೆ ಇನೆ ಮೆ ಹಜ್ಜಾ಼ಸ್ ಛೂ಼ ಕರಿ ಬೋಲ್ಯೊ.
ACT 9:11 ಪ್ರಭುನೆ ಅನನೀಯನ, “ತೂ ಉಠೀನ್ ಖ್ಹತ್ತಡ್‍ ಗಲ್ಲಿಕರಿ ಬೋಲಾನು ನಾಮ್ನಿ ಗಲ್ಲಿಮ ಜಾ಼. ಹಿಜ್ಜಛಾ಼ತೆ ಯೂದನ ಘರ್‌ಮ ದೇಖಿನ್ ತಾರ್ಸಸ್‍ ಖ್ಹಯೇರ‍್ನು ಸೌಲನಿ ಬಾರೇಮ ಪೂಛಾ಼ವ್ ಯೊ ಹಮ್ಕೆ ಪ್ರಾರ್ಥನೆ ಕರುಕರಸ್.
ACT 9:12 ಸೌಲನೆ ಏಕ್‌ ದರ್ಶನ್ ದೇಖ್ಯೊ. ಅನನೀಯಕರಿ ಏಕ್‍ಜ಼ಣೊ ಆವ್‌ಶೆ ಇನ ಪಾಛು಼ ಡೋಳ ದೇಖಾವನಿತರ ಇನ ಉಪ್ಪರ್ ಹಾತ್‍ ಮ್ಹೆಲಾಖ್ಹತರ್ ಇನೆ ದೇಖ್ಯೊ ಕರಿ ಬೋಲ್ಯೊ.
ACT 9:13 ತದೆ ಅನನೀಯನೆ ಪ್ರಭು,ಯೆರೂಸಲೇಮ್‌ನು ತಾರ ದೇವ್ನಅದ್ಮಿ ಖ್ಹಾರಾನ ಕೆತ್ರೇಕ್ಕಿ ಖ್ಹತಾಪ್ಣಿನ ದಿದೂತೆ ಅನಿ ಬಾರೇಮ ಕೈಯೇಕ್‍ಜ಼ಣಾಥಿ ಖ್ಹಮ್‍ಜಿರಾಖ್ಯೊಸ್.
ACT 9:14 ಅಜು಼ ಹಜ್ಜಾ಼ಬಿ ಗಲ್‌ಢಯಾಜಕ್‌ಥಿ ಅದಿಕಾರ್ ಲೀರಾಖ್ಯೊಸ್‍ಕಿ, ತಾರ ನಾಮ್ನ ಬೋಲವಾಳಾನ ಬೇಡಿಘಾಲ್ನುಕರಿ.
ACT 9:15 ಪ್ರಭುನೆ ಅನನೀಯನ “ತೂ ಜಾ಼; ಯೋ ಅದ್ಮಿಖ್ಹಾರ ಯೆಹೂದ್ಯರ್‌ಕಾಹೆತೆ ಅದ್ಮಿವೊನ ರಾಜಾ಼ವ್‌ನ, ಅಜು಼ ಇಸ್ರಾಯೇಲ್ ಅದ್ಮಿವೊನ ಮಾರ ನಾಮ್ನ ಖ್ಹಮ್‍ಜಾ಼ಡನಖ್ಹಾಜೆ ಮೇ ಚೂ಼ಣಿರಾಖ್ಯೊತೆ ಏಕ್‌ ಜಿನಖ್ಹ್‌ ಹುಯಿರೊಸ್.
ACT 9:16 ಯೊ ಮಾರ ನಾಮ್ನಖ್ಹಾಜೆ ಕೆತ್ರು ಲತಾಡ ಲಿಶೆಕರಿ ಮೇಸ್ ಇನ ವತಾಳಿಶ್.” ಕರಿ ಬೋಲ್ಯೊ.
ACT 9:17 ತದೆ ಅನನೀಯ ಚಾ಼ಲ್ತೊ ಯೊ ಘರ್‌ಮ ಜೈ಼ನ್ ಇನಾಪರ್ ಇನೊ ಹಾತ್‍ ಮ್ಹೇಲಿನ್, “ಮಾರೊ ಭೈ ಸೌಲ, ತೂ ಆವಾನಿ ವಾಟ್ಮ ತುನ ದೆಖಾಯೊತೆ ಪ್ರಭು ಯೇಸು ತುನ ಪಾಛು಼ ಡೋಳೊ ದೆಖಾವಾನಿಘೊಣಿಬಿ, ತು ಪವಿತ್ರಾತ್ಮಾಥಿ ಭರಾವ್ಣು ಕರೀಬಿ ಮನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯೊ.
ACT 9:18 ಯೋ ವೇಳ್ಮಾಸ್ ಸೌಲನ ಡೋಳೇಥಿ ಪಡದ್ನಿಘೋಣಿ ಶಾತ್ಕಿ ಹೇಟ್ ನಿಕ್ಳಿ ಪಡೀನ್ ಇನೊ ಡೋಳ ಪಾಛು಼ ದೆಖಾವಲಗ್ಯು. ಯೋ ಉಠೀನ್ ಬ್ಯಾಪ್ತಿಸ್ಮ ಲಿದೊ.
ACT 9:19 ಇನಕೇಡೆಥು ಖಾಣು ಖಾವಖ್ಹತರ್ ಇನ ಶಕತ್ ಆಯು. ಸೌಲ ಥೋಡದನ್‍ಲಗು ದಮಸ್ಕಮ ಸುವಾರ್ತೆನ ಬೋಲ್ಯೊ. ಅಜು಼ ವಿಶ್ವಾಸಿನಿ ಜೋ಼ಡ್ಮ ಥೊ.
ACT 9:20 ಪೌಲ ತದ್ನುತದೇಸ್, “ಯೇಸು ದೇವ್‌ನೊ ಛಿಯ್ಯೊ” ಕರಿ ಸಭೆ ಮಳಾನಿ ಝ಼ಗೋಮ ಬೋಲಾನ ಶುರು ಕರ‍್ಯೊ.
ACT 9:21 ಆ ವಾತೆನ ಖ್ಹಮ್‍ಜ್ಯುತೆ ಖ್ಹಾರು, “ಯೆರೂಸಲೇಮ್ಮ ಆ ಅದ್ಮಿಸ್‌ ಯೇಸುನ ನಾಮ್ನ ವಿಶ್ವಾಸ್ ಕರವಾಳನ ಮಾರಿನಾಖು ಕರ್ತೊಥೋತೆ ಆಸ್ ಕಾಹೆಕಿ ಶು? ಅಜು಼ ಇವ್ಣುನ ಗಲ್‌ಢಯಾಜಕ್‌ಕನ ಧರಿಲೀನ್ ಜಾ಼ವ್ಣುಕರೀಸ್ ಆ ಹಜ಼್ಜ ಐರ‍್ಹೋಸ್ತೆ?” ಕರಿ ಬೋಲಿಲಿದು.
ACT 9:22 ಇನೆ ಅಜೂ಼ಬಿ ಘಣು ವಚನ್ನು ಆಧಾರ್‌ಥಿ ಯೇಸು ಕ್ರಿಸ್ತಾಸ್ ಜಗತ್ನ ಬಚಾ಼ಡವಾಳೊಕರಿ ಬೋಲಾನು ಖ್ಹಾಚಿಸ್ ಕರಿ ಸೌಲನೆ ದಮಸ್ಕಮಥೂತೆ ಯೆಹೂದ್ಯರ್‌ನ ಸಾಬಿತ್ ಕರಾಯೊ.
ACT 9:23 ಕೆತ್ರಾಕಿ ದನ್ನಪಾರ್ ಯೆಹೂದ್ಯವಾಳು ಸೌಲನ ಮಾರಿನಾಕ್ಣುಕರಿ ಖ್ಹೂಜ಼್ ಕರ‍್ಯು.
ACT 9:24 ಯೆಹೂದ್ಯರ್‌ವಾಳು ಸೌಲ ಮಳಾನು ದೇಕ್‍ತುಹುಯಿನ್‍ ನಂಗರ‍್ನ ಖ್ಹಾರ ದರ‍್ವಾಜ಼ವ್‌ಕನ ರಾತ್ ದನ್ ಕಾವ್ಲಿ ಥು. ಕತೋಬಿ ಯೋ ಖ್ಹಾರು ಸೌಲನ ಮಾಲುಮ್‌ ಪಡ್ಯು.
ACT 9:25 ಏಕ್‍ರಾತ್ ಪೌಲನ ಥೋಡ ಶಿಷ್ಯರ‍್ನೆ ಇನ ಖ್ಹಯೇರ‍್ನ ಭಾರ್‌ ಮೋಕ್ಲಾನಟೇಕೆ ಇನ ಏಕ್‌ ಟೋಕ್ರಾಮ ಬೆಖ್ಹಾಡಿನ್‌ ಖ್ಹಯೇರ‍್ನ ಭೀತ್‌ನ ಉಪ್ಪರ್‌ಥು ಹೇಟ್ ಉತಾರಿದಿದು.
ACT 9:26 ಸೌಲ ಯೆರೂಸಲೇಮ್ಮ ಜೈ಼ನ್ ವಿಶ್ವಾಸಿ ಟೋಳ್ಮ ಮಳೀರ‍್ಹೇಣುಕರಿ ಕೋಶಿಶ್ ಕರ‍್ಯೊ. ಕತೋಬಿ ಇವ್ಣೆಖ್ಹಾರು, ಸೌಲನ ಖ್ಹಾಚಮಾಬಿ ಯೇಸುನೊ ಶಿಷ್ಯಕರಿ ನಂಬ್ಯುಕೊಂತೆ ಇನೇಥಿ ಡರಿಗಯು.
ACT 9:27 ಕತೋಬಿ ಬಾರ್ನಬನೆ ಇನ ಮದತ್ ಕರಾನ ಅಪೊಸ್ತಲರ್‌ಕನ ಬುಲೈಲಿನ್ ಆಯೊ. ಸೌಲನೆ ದಮಸ್ಕನ ಮಾರಗ್‍ಮ ಪ್ರಭುನ ದೆಖ್ಯೊತೆ ಪ್ರಭು ಸೌಲಥಿ ವಾತೆ ಬೋಲ್ಯೊತೆ ಅಖ್ಖೂಸ್ ಖ್ಹಮ್‌ಜಾ಼ಡ್ಯೊ. ಕಾಹೆತೆ ದಮಸ್ಕಮ ಡರ್‌ಕೊಂತೆ ಪ್ರಭು ಯೇಸುನ ನಾಮ್‍ಲೀನ್ ಬೋಧನೆ ಕರ‍್ಯೊತೆಯಿನ ಇವ್ಣುನ ಬೋಲಿ ಖ್ಹಮ್‌ಜಾ಼ಡ್ಯೊ.
ACT 9:28 ಇನಬಾದ್ಮ ಸೌಲ ಯೆರೂಸಲೇಮ್ಮ ವಿಶ್ವಾಸಿನಿ ಜೋ಼ಡ್ಮ ಮಳಿನ್ ಶಿಕಾಡ್ತೊಹುಯಿನ್ ಪ್ರಭುನ ನಾಮ್‍ಥಿ ಡರ್‌ಕೊಂತೆ ಬೋಧನೆ ಕರಾಲಗ್ಯೊ.
ACT 9:29 ಗ್ರೀಕ್ ವಾತೆ ಬೋಲ್‍ತುಥೂತೆ ಯೆಹೂದ್ಯರ್‌ನ, ಜೋ಼ಡ್ಮ ಸೌಲ ಕದೇಬಿ ವಾದ ಕರ್ತೊಥೊ. ಇನಖ್ಹಾಜೆ ಇನ ಮಾರಿನಾಕ್ಣುಕರಿ ಕೋಶಿಶ್ ಕರ‍್ಯು.
ACT 9:30 ಅನ ಮಾಲುಮ್ ಕರ‍್ಯುತೆ ವಿಶ್ವಾಸಿಖ್ಹಾರು ಇನ ಕೈಸರೈ ಖ್ಹಯೇರ‍್ನ ಬುಲೈಲಿಜೈ಼ನ್ ಹಿಜ್ಜಾ಼ಥು ತಾರ್ಸಸ್‍ ಖ್ಹಯೇರ‍್ನ ಮೋಕ್ಲಿದಿದು.
ACT 9:31 ಇನಬಾದ್ಮ ಯೂದಾಯ, ಗಲಿಲಾಯ, ಅಜು಼ ಸಮಾರ್ಯನ ತಬರ್‌ಖಾಮ ಥೀತೆ ಖ್ಹಾರಿ ಸಭೆಮ ಸಮಾಧಾನ್‍ ಪಡ್ಯು. ಸಬೆ ಭಡ್ತುಹುಯಿನ್ ಪ್ರಭುನ ಡರ್‌ಮಾಬಿ ಭಕ್ತಿಮಾಬಿ ಜಿವ್ತುಹುಯಿನ್, ಪವಿತ್ರಾತ್ಮಥಿ ಜಾ಼ಖ್ಹತ್ ಹೋತುಹುಯಿನ್ ಭಡ್ಯು.
ACT 9:32 ಯೆರೂಸಲೇಮ್‌ನು ಅಶ್‌ಪಿಶ್‍ಥೂತೆ ಖ್ಹಾರ ಗಾಮ್ಮ ಪೇತ್ರ ಫರ್ತೊಜಾ಼ವಾನಿ ವಖ್ಹ್‌ತೆ ಲುದ್ದಕರಿ ಗಮ್ಮರ‍್ಹವಾಳ ದೇವ್ನ ಅದ್ಮಿಖ್ಹಾರಾನ ಮಳ್ಯೊ.
ACT 9:33 ಹಿಜ್ಜಾ಼ ಲಕ್ವೊಮಾರಿನ್ ಆಟ್ ವರಖ್ಹ್ ಥೊ ಬಿಛಾ಼ವ್ಣಪರ್ ಪಡ್ಯೊಥೋತೆ ಐನೇಯ ಕರಿ ಏಕ್‌ ಜ಼ಣಾನ ದೇಖ್ಯೊ.
ACT 9:34 ಪೇತ್ರನೆ ಯೋ ಅದ್ಮಿನ, “ಐನೇಯ,ಯೇಸು ಕ್ರಿಸ್ತಾಸ್ ತುನ ಅಛ್ಛು಼ ಕರುಕರಸ್. ಉಟ್ ತಾರ ಬಿಛಾ಼ವ್ಣನ ತೂಸ್ ಬಿಚೈ಼ಲೇ” ಕರಿ ಬೋಲ್ಯೊ. ತುರಂತ್ ಯೋ ಉಠಿನಿಕ್‍ಳ್ಯೊ.
ACT 9:35 ಲುದ್ದಮ ಅಜು಼ ಶಾರೋನ್‍ಮ ರ‍್ಹವಾಳು ಅದ್ಮಿಖ್ಹಾರು ಇನ ದೇಖಿನ್ ಪ್ರಭು ಯೇಸುನ ಉಪ್ಪರ್ ವಿಶ್ವಾಸ್ ಕರ‍್ಯು.
ACT 9:36 ಯೊಪ್ಪ ಖ್ಹಯೇರ್‌ಮ ತಬಿಥಾಬಿ ಯೇಸುನಿ ಏಕ್‌ ಶಿಷ್ಯೇ ಥಿ. ಗ್ರೀಕ್‍ನಿ ಬೋಲಿಮ ಇನು ನಾಮ್ ‘ದೊರ್ಕ’ ಇನಿ ಮತ್‌ಲಬ್ ‘ಚೀತಳ್‌ಕರಿ’ ಯೋ ಕದೇಬಿ ಅಛ಼್ಛುಕಾಮ್ ಕರಾವಳಿ ಅಜು಼ ದಾನಧರಮ್‍ ದ್ಯವಾಳಿ ಹುಯಿರ‍್ಹಿಥಿ.
ACT 9:37 ಯೋ ವಖ್ಹತ್‌ಮ ಇನ ರೋಗ್ ಅಯಿನ್ ಮರಿಗಯಿ. ಅಜು಼ ಇನ ಶರೀರ್‌ನ ಧೊಯಿನ್ ಉಪ್‌ಲ್ಯಖನ್ನ ಕೋಣಾಮ ಲಯಿನ್ ಮ್ಹೇಲ್ಯ.
ACT 9:38 ಆ ‘ಲುದ್ದ’ ಯೊಪ್ಪ ಖ್ಹಯೇರ‍್ನ ಖನ್ನೆಸ್‌ ರ‍್ಹವಾಮ ಪೇತ್ರ ಹಿಜ್ಜಾ಼ ರ‍್ಹವಾನು ಶಿಷ್ಯರ‍್ನೆ ಖ್ಹಮ್‌ಜಿನ್‌ “ದಯಾ ಕರೀನ್ ಒಗ್ಗಿಸ್‌ಮ ಹಮಾರ ಗಮ್ಮ ಆವ್ಣು” ಕರಿ ಬೇಜ಼ಣಾನ ಬೋಲಿ ಮೋಕ್‌ಲ್ಯೊ.
ACT 9:39 ಪೇತ್ರ ತಯಾರ್‌ಹುಯಿನ್ ಹಿಜ್ಜಾ಼ ಆಯೊ. ತದೆ ಇನ ಘರ್‌ನ ಉಪ್‌ಲ್ಯಖನ್ನ ಕೋಣಾಮ ಬುಲೈಲಿನ್ ಗಯು. ಹಿಜ಼್ಜಾಥೂತೆ ಮುಂಡಚ್ಚಿಖ್ಹಾರು ಪೇತ್ರನ ಅಶ್‌ಪಿಶ್‍ ರೋವ್‍ತೆಹುಯಿನ್,ಅಜು಼ ದೊರ್ಕ ಜಿವ್ತಿಥೀತೆ ತದೆ ಇವ್ಣಖ್ಹಾಜೇಥಿ ಬಣೈನ್ ದಿದಿಥೀತೆ ಪೇರ್‌ವಾಖ್ಹ್ ಅಜು಼ ಝ಼ಗ್ಗಾನು ಬಣಾವಟ್ನ ವತಾಳ್‍ಯೆ.
ACT 9:40 ಅಜು಼ ಪೇತ್ರನೆ ಅದ್ಮಿಖ್ಹಾರಾನ ಭಾರ್‌ ಮೋಕ್ಲಿನ್ ಢುಕ್‍ಣ್ಯಮೇಟೆ ಹುಯಿನ್ ಪ್ರಾರ್ಥನೆ ಕರೀ ಶರೀರ್‌ಭಣಿ ಫರೀನ್, “ತಬಿಥಾ, ಉಪ್ಪರ್ ಉಟ್” ಕರಿಬೋಲ್ಯೊ. ಯೋ ಡೋಳಪಾಡಿನ್ ಪೇತ್ರನ ದೇಕ್‍ಥೀಸ್ ಉಠಿ ಭೀರಿಗಯಿ.
ACT 9:41 ಇನೆ ಹಾತ್‍ದೀನ್‍ ಉಠಾಡಿ ಭೀರಾಖ್ಯೊ. ತದೆ ವಿಶ್ವಾಸಿಖ್ಹಾರು ಅಜು಼ ಮುಂಡಚ್ಚಿ ತಯೇಡಾವ್‍ನ ಯೊ ಕೋಣಾಮ ಬುಲೈ ಜಿವ್ತುಹುಯಿತೆ ಇನ ಇವ್ಣುನ ವತಾಳ್ಯೊ.
ACT 9:42 ಯೊಪ್ಪಮ ಹರೇಕ್ ಬಾಜು಼ಮ ಥೂತೆ ಅದ್ಮಿವೋನ ಆ ವಾತೆ ಮಾಲುಮ್ ಪಡ್ಯು. ಯೊ ಅದ್ಮಿಖ್ಹಾರಾಮ ಕೆತ್ರೂಕಿ ಜ಼ಣು ಪ್ರಭುನ ವಿಶ್ವಾಸ್ ಕರ‍್ಯು.
ACT 9:43 ಪೇತ್ರನೆ ಯೊಪ್ಪಮ ಚಾ಼ಂಬ್ಡಾನು ಕಾಮ್‍ಕರವಾಳೊ ಸೀಮೋನ್ನ ಘರ್‌ಮ ಘಣ ದನ್‌ಲಗು ರ‍್ಹಿಯೊ.
ACT 10:1 ಕೈಸರೈ ಖ್ಹಯೇರ್‌ಮ ಕೊರ್ನೆಲ್ಯ ಕರಿ ನಾಮ್ನೊ ಏಕ್‌ಜ಼ಣೊ ಥೊ. ಯೋ ಇಟಲಿನು ಫೊಜ಼್‌ನೊ ಖ್ಹೋಶಿಪಾಯಿನೊ ಅದಿಕಾರಿ ಹುಯಿರ‍್ಹೊಥೊ.
ACT 10:2 ಯೊ, ಇನು ಕುಟುಂಬ್‍ವಾಳು ದೇವ್‌ಮ ಡರ್‌ ಭಕ್ತಿಥೀಬಿ ರ‍್ಹೀನ್ ಜಿವ್ಣು ಕರುಕರ್ತುಥು. ಅಜು಼ ಗರೀಬ್‌ನ ಜಾ಼ಖ್ಹತ್ ದಾನಧರಮ್‍ ಕರಾವಾಳೊ, ಕದೇಬಿ ದೇವ್ನ ಪ್ರಾರ್ಥನೆ ಕರಾವಾಳೊ ಹುಯಿರ‍್ಹೋಥೊ.
ACT 10:3 ಏಕ್‍ದನ್ ಧೋಪಾರ‍್ನ ಖ್ಹುಮಾರ್ ತೀನ್ ಘಂಟಾನ ಕೊರ್ನೆಲ್ಯನ ದರ್ಶನ್ ಹುಯು ತದೆ ಏಕ್‌ ದೇವ್‌ನೊ ದೂತ ಇನಾಕನ ಐನ್, “ಕೊರ್ನೆಲ್ಯ” ಕರಿ ಚಿಕ್ರಾನು ನೇರ್‌ಥಿ ದೇಖ್ಯೊ.
ACT 10:4 ಕೊರ್ನೆಲ್ಯ ಡರಿನ್ ದೇವ್ನದೂತನ ಠರ್‌ಕೈನ್ ದೇಕ್ತೊ ಹುಯಿನ್ “ಪ್ರಭು ಆ ಶಾತ್?” ಕರಿ ಬೋಲ್ಯೊ. ತದೆ ದೇವ್‌ನೊ ದೂತನೆ ಇನ, ತಾರಿ ಪ್ರಾರ್ಥನೆಬಿ, ತಾರಿ ದಾನ್ ಧರಮ್ ಅಖ್ಖು ದೇವ್ನಿ ಸನ್ನಿಧಿಮ ಖ್ಹಯಾಲ್‌ಥಿ ಪೊಚಿರ‍್ಹುಸ್;
ACT 10:5 ಹಮ್ಕೆ ತೂ ಥೋಡು ಜ಼ಣಾನ ಯೊಪ್ಪನ ಮೋಕ್ಲಿನ್, ಪೇತ್ರಕರಿ ಬೋಲೈಲ್ಯವಾಳೊ ಸೀಮೋನನ ಬುಲಾವ್ಣು.
ACT 10:6 ಯೋ ಚಾ಼ಂಬ್ಡಾನು ಕಾಮ್‌ಕರಾವಾಳೊ ಸೀಮೋನನ ಘರ್‌ಮ ಛಾ಼. ಇನುಘರ್‌ ದರ‍್ಯಾವ್ನ ಕಿನಾರೆ ಛಾ಼ ಕರಿ ಬೋಲ್ಯೊ.
ACT 10:7 ಕೊರ್ನೆಲ್ಯನೆ ಇನ ಜೋ಼ಡ್ಮ ವಾತೆಬೋಲ್ಯಾತೆ ದೇವ್‌ನೊ ದೂತ ಚ಼ಲೇಗೊತದೆ, ಇನ ಘರ್‌ಮಥಾತೆ ಬೇಜ಼ಣ ಸೇವಕ್‌ನ ಅಜು಼ ಇನಿ ಜೋ಼ಡ್ಮ ರ‍್ಹವಾಳ ಶಿಪಾಯಿಮ ಏಕ್‌ ಜ಼ಣೊ ದೇವ್‌ಮ ಭಕ್ತಿರ‍್ಯಹವಾಳೊ‍ ಶಿಪಾಯಿನ ಬುಲೈನ್,
ACT 10:8 ಇವ್ಣುನ ಕೊರ್ನೆಲ್ಯನೆ, ಆ ಚಾ಼ಲ್ಯುತೆ ಅಖ್ಖೂಸ್ ಇವ್ಣುನ ಬೋಲಿನ್ ಯೊಪ್ಪನ ಮೋಕ್‌ಲ್ಯೊ.
ACT 10:9 ಇನ ಅಗಲ್ಯದನ್ನೆ ಯೊ ಅದ್ಮಿಖ್ಹಾರು ಯೊಪ್ಪನ ಚ಼ಲ್ಯಾವದಿನ್ ತದೆ ದೊಫಾರ್ನಿ ವೇಳ್ಮ ಪೇತ್ರ ಪ್ರಾರ್ಥನೆ ಕರಾನ ಘರ್‌ನ ಉಪ್‌ಲ್ಯ ಛ಼ತ್‍ಪರ್‌ ಗಯೊ.
ACT 10:10 ಪೇತ್ರನ ಘಣು ಭುಕ್‍ಲಾಗಿನ್ ಶಾತ್ತೋಬಿ ಖಾವ್ಣು ಕರಿ ಆಖ್ಹ್‌ಕರ‍್ಯೊ, ಯೋ ಖಾಣು ತಯಾರ್ ಕರುಕರಾಸ್ಮ,ಇನ ಏಕ್‌ ದರ್ಶನ್‍ಹುಯಿ.
ACT 10:11 ತದೆ ಆಕಾಶ್‍ ನಿಕ್ಳಿನ್ ಚಾರ್ ಕೋಣಾನ ಭಂದಾಯುಹುಯು ಮೋಟಿ ಝೋ಼ಳಿನಿತರಾನು ಏಕ್‌ ಜಿನಖ್ಹ್‌ ಜ಼ಮೀನ್‌ಪರ್ ಉತ್ರಿ ಉಳ್ಯಾವ್‌ತುಥೂತೆ ದೇಖ್ಯೊ.
ACT 10:12 ಇನಾಮ ಅಖ್ಖೀಸ್ ಥರಾನು ಜಾನ್ವರ್‌ಖ್ಹಾರು ಜ಼ಮೀನ್‌ಪರ್ ಖ್ಹವಳ್ತು ಚಾ಼ಲಾನು ಕೀಡ್‌ಕಮ್ಟು ಅಜು಼ ಆಬ್‌ಪರ್ ಉಡಂತು ಜಿನಾವರ್ ಖ್ಹಾರು ಹಿಜ಼್ಜಥೂ.
ACT 10:13 ತದೆ, ‘ಪೇತ್ರ, ಉಠಿನ್, ವ್ಹಾಡಿ ಖಾ‘ ಕರಿ ಇನ ಏಕ್‌ ಅವಾಜ಼್ ಖ್ಹಮಜ಼್‌ಪಡ್ಯು.
ACT 10:14 ಕತೋಬಿ ಪೇತ್ರನೆ, ಇಮ್‌ಕರಾನ ಕೊಹುವಾನಿ ಪ್ರಭು, ಕಚಿಂಡ್‌ ರಾಛು಼ ರ‍್ಹವೊ ಅಜು಼ ಅಶುದ್ದ ಹುಯುತೆ ಚೀಜ಼್‌ನ ಮೆ ಕದೇಬಿ ಖಾದೊಹುಯೊ ಕಾಹೆ” ಕರಿ ಬೋಲ್ಯೊ.
ACT 10:15 ಕತೋಬಿ ಯೊ ಅವಾಜ಼್ ಬಿಜೇಕ್ ಹಲ್ಲ ಇನ, “ದೇವ್ನೆ ಪಾಕ್‌ ಕರಿರಾಖ್ಯೊತೆ ಅನಅಖ್ಖು ಮೈಲುಕರಿ ನಾಬೋಲ್ನು ಕರಿ ಪಾಛೊ಼ ಭೇನೆಹಲ್ಲ ಇನ ಠವ್‌ಕೊ ಖ್ಹಮಜ್‍ಪಡ್ಯು.
ACT 10:16 ಅಮ್ಮಸ್ ತೀನ್‌ಹಲ್ಲ ಹುಯು ಇನ ಬಾದ್ಮ ಯೋ ಜಿನಖ್ಹ್‌ ಸೊರ್ಗಾಮ ಪಡೈಲೆವೈಗು.
ACT 10:17 ಪೇತ್ರನೆ, ಇನೆ ದೇಖ್ಯೊತೆ ದರ್ಶನ್ ಶಾತ್‍ರ‍್ಹೇಣು ಕರಿ ಸೋಚಾನಿ ವಖ್ಹತ್‌ಮ ಕೊರ್ನೆಲ್ಯನೆ ಮೋಕ್‌ಲ್ಯೋಥೋತೆ ಅದ್ಮಿಖ್ಹಾರು ಸೀಮೋನ್ನ ಘರ್‌ನ ಪುಛಾ಼ವ್ತುಹುಯಿನ್‌ ಖ್ಹಣೇದ್ ಧರೀನ್ ಅಜು಼ ಯೋ ಘರ್‌ನ ಬಾಕಲ್‌ನ ಖ್ಹಾಮ್ಣೆ ಆಯಿನ್ ಭೀರ‍್ಯು.
ACT 10:18 “ಪೇತ್ರಕರಿ ಬೋಲಸ್ತೆ ಸೀಮೋನ ಹಜ಼್ಜ ಛಾ಼ಕಿ ಶು?” ಕರಿ ಬೋಲ್ಯು.
ACT 10:19 ಪೇತ್ರ ದರ್ಶನ್ನಿ ಬಾರೇಮ ಬಿಜೂ಼ಬಿ ಸೋಚುಕರಾನಿ ವಖ್ಹತ್‌ಮ ಪವಿತ್ರಾತ್ಮನೆ ಇನ, ಸೀಮೋನ ತೀನ್ ಅದ್ಮಿ ತುನ ಢೂಂಡ್‌ತುಹುಯಿನ್ ಐರ‍್ಹೂಸ್.
ACT 10:20 ತೂ ಉಠೀನ್ ಹೇಟ್ ಉತ್ರಿನ್ ಶಾತ್ಬಿ ಗುಮಾನಿ ನಾಕರ‍್ನುತೆ ಇವ್ಣಿ ಜೋ಼ಡ್ಮ ಜಾ಼ ಅಜು಼ ಪಾಛೊ಼ ಧಕೀಶ್ ನಕೊ. ಮೇಸ್ ಇವ್ಣುನ ತಾರಕನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯೊ.
ACT 10:21 ಪೇತ್ರ ತದೆ ಹೇಟ್ ಉತ್ರಿನ್ ಯೋ ಅದ್ಮಿವ್‍ಕನ ಜೈ಼ನ್, “ತುಮೆ ಢೂಂಡುಕರಾಸ್ತೆ ಯೊ ಅದ್ಮಿ ಮೇಸ್, ತುಮೆ ಹಜ಼್ಜ ಶನ ಆಯಾ? ಕರಿ ಪುಛಾಯೊ.
ACT 10:22 ತದೆ ಇವ್ಣೆ, “ಕೊರ್ನೆಲ್ಯಕರಿ ಖ್ಹೋಶಿಪಾಯಿನೊ ಮೋಟೊ ಛಾ಼. ಯೋ ನೀತಿಮ ಚಾ಼ಲವಾಳೊ; ದೇವ್‍ಥಿ ಡರಾವಾಳೊ ಅಜು಼ ಯೆಹೂದ್ಯರ‍್ನು ಅದ್ಮಿ ಖ್ಹಾರು ಇನ ಮರ್ಯಾದಿ ದೇಸ್. ತುನ ಇನ ಘರೆ ಬುಲೈನ್ ತೂ ಬೋಲಾನಿ ವಾತೇನ ಖ್ಹಮಜ಼್‌ಣುಕರಿ ದೇವ್‌ನೊ ದೂತಥಿ ಕೊರ್ನೆಲ್ಯನ ಬೋಲಿರಾಖ್ಯೊಸ್” ಕರಿ ಬೋಲ್ಯು.
ACT 10:23 ಪೇತ್ರನೆ ಇವ್ಣುನ ಮಹಿ ಬುಲೈನ್, ಸತ್ಕಾರ್ ಕರೀನ್ ಯೋ ರಾತ್ ಹಿಜ್ಜಾ಼ಸ್ ರ‍್ಹವಾನಿತರ ಕರ‍್ಯೊ. ಇನವ್ಹಾಣೆ ಪೇತ್ರ ತಯಾರ್‌ಹುಯಿನ್ ಇವ್ಣ ಜೋ಼ಡ್ಮ ಗಯೊ. ಯೊಪ್ಪನು ವಿಶ್ವಾಸಿಮ ಥೋಡುಜ಼ಣು ಇನ ಜೋ಼ಡೆಗಯು.
ACT 10:24 ಇನ ಅಗ್‍ಲ್ಯದನ್ನೆ ಇವ್ಣೆ ಕೈಸರೈ ನಂಗರ‍್ನ ಪೋಚ್ಯು.ತದೆ ಕೊರ್ನೆಲ್ಯನೆ ಇವ್ಣ ಮಾಯಮಾತ್ರಾನಾಬಿ ಅಜು಼ ಸಾಥೀನ ದೋಸ್ತ್‌ನ ಬುಲೈಲಿನ್ ಪೇತ್ರನಖ್ಹಾಜೆ ಟಿವೈರ‍್ಹೋಥೊ.
ACT 10:25 ತದೆ ಪೇತ್ರ ಘರ್‌ಕನ ಆವಖ್ಹತರ್ ಕೊರ್ನೆಲ್ಯನೆ ಗೋಡಾಪರ್ ಪಡೀನ್ ಖ್ಹಲಾಮ್ ಕರ‍್ಯೊ.
ACT 10:26 ಕತೋಬಿ ಪೇತ್ರನೆ, “ಉಠೀನ್ ಭೀರೆ ಮೇಬಿ ತಾರಿನಿತರ ಅದ್ಮಿಸ್‌” ಕರಿಬೋಲ್ಯೊ.
ACT 10:27 ಅಜು಼ ಇನ ಉಠಾಡಿನ್ ವಾತೆ ಬೋಲ್ತೊಹುಯಿನ್ ಮಹಿ ಗಯೊ. ಹಿಜ್ಜಾ಼ ಘಣು ಅದ್ಮಿನಿ ಝೂ಼ಂಡ್‌ ಭರೈರ‍್ಹುತೆ ಇನೆ ದೇಖ್ಯೊ.
ACT 10:28 ಪೇತ್ರನೆ ಇವ್ಣುನ, “ಯೆಹೂದ್ಯವಾಳವೊ ಏಕ್‌ ಜ಼ಣೊ ಅಲಕ್‌ಅದ್ಮಿಥಿ ಮಳೀನ್‍ ರ‍್ಹವಾನುರ‍್ಹೇವೊ, ಇವ್ಣಿಜೋ಼ಡೆ ರ‍್ಹವಾನು ಯೆಹೂದ್ಯರ್‌ನ ಪದತ್ತಿನ ವಿರೋದ್ ಹುಯಿರ‍್ಹುಸ್ ಕರಿ ತುಮೂನ ಮಾಲುಮ್‌ ಛಾ಼. ಕತೋಬಿ ಖಿವಿ ಅದ್ಮಿನಾಬಿ ಕಮ್‍ಶಿಲ್‍ವಾಳೊ, ಅಪವಿತ್ರವಾಳೊ ಕರಿ ನಾ ಬೋಲ್‌ನು ಕರಿ ದೇವ್ನೆ ಮನ ವತಾಳಿರಾಖ್ಯೊಸ್.
ACT 10:29 ಇನಖ್ಹಾಜೆ ತುಮೆ ಮನ ಬುಲಾವ್ಣುಕರಿ ಆವಾನಿ ವಖ್ಹತ್‌ಮ ಏಕ್‌ ವಾತ್‍ಬಿ ಬೋಲ್ಯೊಕೊಂತೆ ಆಯೊ. ಕತೋಬಿ, ತುಮೆ ಶನ ಬುಲಾಯಥಾ ಕರಿ ಹಮ್ಕೆ ತುಮೆ ಬೋಲೊ” ಕರಿ ಬೋಲ್ಯೊ.
ACT 10:30 ತದೆ ಕೊರ್ನೆಲ್ಯನೆ, “ತೀನ್ ಚಾರ್ ದನ್ನ ಅಗ್ಗಳ್ ಮೇ ಮಾರ ಘರ್‌ಮ ಪ್ರಾರ್ಥನೆ ಕರಾನ ಧೋಪಾರ‍್ನ ತೀನ್ ಘಂಟಾನ ಅಪ್‍ಗುಪ್‍ಥೀಸ್ ಉಜಾ಼ಖ್ಹ್‌ನು ಲುಂಗ್ಡು ಫೇರಿರಾಖ್ಯೊಥೋತೆ ಏಕ್‍ಜ಼ಣೊ ಮಾರ ಖ್ಹಾಮ್ಣೆ ಭೀರಿಗೊ.
ACT 10:31 ಇನೆ ಬೋಲ್ಯೊ, ಕೊರ್ನೆಲ್ಯ, ದೇವ್ನೆ ತಾರಿ ಪ್ರಾರ್ಥನೆನ ಖ್ಹಮ್‍ಜಿರಾಖ್ಯೊಸ್. ತೂ ಗರೀಬ್‌ನ ದಾನ್‌ ಧರಮ್‌ ಕರಾನು ದೇಖಿನ್ ತುನ ಪಸಂದ್ ಕರಿರಾಖ್ಯೋಸ್.
ACT 10:32 ಇನಖ್ಹಾಜೆ; ತೂ ಕಿನಾತೋಬಿ ಯೊಪ್ಪನ ಮೋಕ್ಲಿನ್ ಪೇತ್ರಕರಿ ಬೋಲೈಲ್ಯವಾಳೊ ಸೀಮೋನನ ಬುಲಾವ್ಣು. ಯೋ ಚಾ಼ಂಬ್ಡಾನು ಕಾಮ್‌ಕರಾವಾಳೊ ಸಿಮೋನನ ಘರ್‌ಮ ಛಾ಼. ಯೋ ಘರ್‌ ದರ‍್ಯಾವ್ನ ಕಿನಾರೆ ಛಾ಼ ಕರಿ ಬೋಲ್ಯೊ.
ACT 10:33 ಇಮ್ಮಸ್ ಮೇ ಒಗ್ಗಿಸ್‌ಮ ತುನ ಬುಲಾವನ ಮೋಕ್‌ಲ್ಯೊ.ತುಮೆ ಹಜ್ಜಾ಼ ಆಯೋತೆ ಅಛ್ಛು಼ಹುಯು. ಹಮೂನ ಬೋಲಾನು ಕರಿ ಹುಕುಮ್‌ ದೀರಾಖ್ಯೊಸ್ತೆ ಅಖ್ಖೂಸ್ ಹಮೆ ಖ್ಹಮಜ಼್‌ಣು ಕರಿ ಪ್ರಭುನಿ ಝ಼ಗೋಮ ಮಳಿರ‍್ಹಾಸ್.” ಕರಿ ಬೋಲ್ಯೊ.
ACT 10:34 ಪೇತ್ರನೆ ಉಪದೇಶ್ ಬೋಲ್ತೊಹುಯಿನ್ ಅಮ್ ಬೋಲ್ಯೊ, “ದೇವ್‌ಮ ಖ್ಹಾರುಜ಼ಣು ಎಕ್ಕಸ್ ಕರಿ ಬೋಲಾನು ಖ್ಹಾಚಿ ಕರಿ ಮನ ಹಮ್ಕೆ ಸೋಚಾ಼ಯು.
ACT 10:35 ಇನ ಆರಾದನೆ ಕರಾಮ ಖಿವು ಅದ್ಮಿನರ‍್ಹವೊ ನೀತಿಥಿ ಅಜು಼ ಇನಾಮ ಡರಿನ್ ಚಾ಼ಲಸ್ಕಿ ಇವ್ಣುನ ದೇವ್ ಪಸಂದ್ ಕರಾಸ್‌ಕರಿ ಬೋಲಾನು ಮನ ಹಮ್ಕೆ ಗುಮಾನಿಕೊಂತೆ ಮಾಲುಮ್‌ಪಡುಕರಸ್. ಯೊ ಖೆವ ಜಾ಼ತ್ಜ಼ಮಾತ್ ಕರಿ ಬೋಲಾನು ಹಜ್ಜಾ಼ ಖ್ಹಾಯಿಕೊಯ್ನಿ.
ACT 10:36 ದೇವ್ನೆ ಇಸ್ರಾಯೇಲ್‌ನ ಅದ್ಮಿನ ಜೋ಼ಡ್ಮ ಬೋಲ್ಯೊಥೊ ಯೋಸ್ ಖ್ಹಾರಜ಼ಣನ ಪ್ರಭು ಹುಯಿರ‍್ಹೋಸ್.ಯೊ ಯೇಸು ಕ್ರಿಸ್ತಾಥೀಸ್ ಸಮಾಧಾನ್ ಆವ್‍ಶೆಕರಿ ಬೋಲಾನು ಸುವಾರ್ತೆನ ದೇವ್ನೆ ಇವ್ಣುನ ಮೋಕ್‌ಲ್ಯೊ.
ACT 10:37 ಬ್ಯಾಪ್ತಿಸ್ಮ ಕರೈಲೇವ್ಣುಕರಿ ಯೋಹಾನನೆ ಬೋಲಿ ಖ್ಹಮ್‌ಜಾ಼ಡ್ಯೊತೆ ಇನಕೇಡೆಥು ಆ ವಚನ್ ಗಲಿಲಾಯಥು ಧರಿನ್ ಯೂದಾಯ ತಬರ್‌ಖಾಮ ಫೈಲು.
ACT 10:38 ದೇವ್ನ ನಜ಼ರೇತ್‌ನ ಯೇಸುನಿ ಬಾರೇಮ ಮಾಲುಮ್. ಇನ ಪವಿತ್ರಾತ್ಮಥಿಬಿ ಶಕಥ್ಥಿ ಅಬಿಷೇಕ್ ಕರ‍್ಯೊ ಯೊ ಅಖ್ಖೀಸ್ ಬಾಜೂ಼ಮ ಫರ್ತೊಹುಯಿನ್ ಅದ್ಮಿಖ್ಹಾರನ ಅಛ್ಛು಼ ಕರ‍್ಯೊ. ಭೂತ್ ಧರಿರ‍್ಹಾವಳನಬಿ ಗುಣ್‌ಕರ‍್ಯೊ. ಶನಕತೊ ದೇವ್ ಇನಿ ಜೋ಼ಡ್ಮ ಛಾ಼ಕರಿ ಬೋಲಾನು ವತಾಳಿದಿದೊ.
ACT 10:39 ಯೆಹೂದ್ಯವಾಳನ ತಬರ್‌ಖಾಮ ಅಜು಼ ಯೆರೂಸಲೇಮ್ಮ ಯೇಸುನೆ ಕರ‍್ಯೊತೆ ಅಖ್ಖಾಸ್ ಕಾಮ್ನ ಹಮೆ ದೇಖ್ಯ. ಇನ ಹಮೆ ಸಾಕ್ಷಿ ಹುಯಿರ‍್ಹಾಸ್ ಕತೋಬಿ ಯೇಸು ಮರೈಗಯೊ. ಇವ್ಣೆ ಇನ ಶಿಲ್‌ಬೆಪರ್ ಮೇಕೆಮರಾಯು.
ACT 10:40 ಕತೋಬಿ ದೇವ್ನೆ ಇನ ತೀನ್‌ದನ್‌ಮ ಮರಣ್‌ಥು ಜಿವ್ತೊ ಉಠಾಡ್ಯೊ. ನೇರ್ ದೇಖಾನ ಪಾಛೊ಼ದಿದೊ.
ACT 10:41 ಕತೋಬಿ ಯೇಸು ಖ್ಹಾರಸ್ ಅದ್ಮಿನ ದೆಖಾಯೊ ಕೊಯ್ನಿ ದೇವ್‍ಥಿ ಪಹಿಲೇಸ್ ಸಾಕ್ಷಿಹುಯಿ ಚೂ಼ಣೈರ‍್ಹುಥೂತೆ ಇವ್ಣೆಖಲಿ ಇನದೇಖ್ಯು. ಯೇಸು ಮರಣ್‍ಥಿ ಜಿವ್ತೊಹುಯಿನ್ ಉಠೀನ್ ಆವಾನಿ ವಖ್ಹ್‌ತೆ ಅಪ್ಣೆ ಇನಿ ಜೋ಼ಡ್ಮ ಖಾಣು ಖಾದ ಅಜು಼ ಪಾಣಿ ಪೀದ.
ACT 10:42 ಅಜು಼ ಯೋಸ್ ಜಿವ್ತುರ‍್ಹವಾಳನ, ಮರಿರ‍್ಹಾವಳನ ದೇವ್‍ಥಿ ನ್ಯಾವ್‍ನೊ ಅಧಿಪತಿಹುಯಿನ್ ಚೂ಼ಣಾಯೊಹುಯೊ ಕರಿ ವತಾಳನಖ್ಹಾಜೆ ಸಾಕ್ಷಿ ಬೋಲ್‌ನು ಕರಿ ಅಪ್ಣುನ ಹುಕುಮ್‌ ದಿದೊ.
ACT 10:43 ಇನ ನಂಬಾವಾಳನು ಹರೇಕ್‍ಜ಼ಣು ಪಾಪ್ನ ಇನ ನಾಮ್‍ಥಿ ಕ್ಷಮಾಪಣ್ ಮಳ್‌ಶೇತೆ. ಆ ಖ್ಹಾಚಸ್‌ಕರಿ ಪ್ರವಾದಿಖ್ಹಾರು ಸಾಕ್ಷಿ ಬೋಲಿರಾಖ್ಯುಸ್” ಕರಿ ಬೋಲ್ಯೊ.
ACT 10:44 ಪೇತ್ರ ಬಿಜೂ಼ಬಿ ಇಮ್ಮಸ್ ಬೋಲಾತೆ ವಚನ್ ಖ್ಹಮ್‌ಜು಼ಕರಾತೆ ತದೇಸ್‌ ಇನಿ ವಚನ್ ಖ್ಹಮ್‍ಜ್ಯುತೆ ಅಖ್ಖಾನ ಉಪ್ಪರ್ ಪವಿತ್ರಾತ್ಮ ಉತ್ರಿನ್‌ ಆಯು.
ACT 10:45 ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಉಪ್ಪರ್ ಪವಿತ್ರಾತ್ಮನು ವರ ಉತ್ರಿ ಆವಾನು ದೇಖಿನ್ ಪೇತ್ರನಿಜೋ಼ಡ್ಮ ಯೊಪ್ಪಥು ಆಯುತೆ ಯೆಹೂದ್ಯರ್ ವಿಶ್ವಾಸಿಖ್ಹಾರು ಆಶ್ಚರ್ಯಕರ‍್ಯು.
ACT 10:46 ಶನಕತೊ ಇವ್ಣೆ ಅಲಕ್ ಅಲಕ್ ಬೋಲಿನಿ ವಾತೇಮ ದೇವ್ನ ಆರಾದನೆ ಕರಾನು ಯೊ ಯೆಹೂದ್ಯರ‍್ನು ವಿಶ್ವಾಸಿಖ್ಹಾರು ಖ್ಹಮ್‌ಜ್ಯು.
ACT 10:47 ತದೆ ಪೇತ್ರನೆ ವಾತೆ ಬೋಲ್ತೊಹುಯಿನ್, “ಆ ಅದ್ಮಿಬಿ ಪವಿತ್ರಾತ್ಮಥಿ ಭರಾಯು ಅವ್ಣುನ ಪಾಣಿಮ ಬ್ಯಾಪ್ತಿಸ್ಮ ಕರಾವನ ಶನೀಬಿ ಅಡ್ಡಿಕೊಯ್ನಿ?” ಕರಿ ಬೋಲ್ಯೊ.
ACT 10:48 ಅನಖ್ಹಾಜೆ ಇವ್ಣುನ ಕ್ರಿಸ್ತನ ನಾಮ್‍ಥಿ ಬ್ಯಾಪ್ತಿಸ್ಮ ಲೇವ್ಣುಕರಿ ಹುಕುಮ್‌ ದಿದೊ. ತದೆ ಇವ್ಣೆ, ಪೇತ್ರನ ಥೋಡ ದನ್ ಹಮಾರ ಜೋ಼ಡ್ಮ ರ‍್ಹೇವ್ಣುಕರಿ ಬೋಲಿಲಿದು.
ACT 11:1 ಯೆಹೂದ್ಯರ್‌ಕಾಹೆತೆ ವಿಶ್ವಾಸಿಖ್ಹಾರು ದೇವ್ನಿ ವಚನ್ನ ಸ್ವೀಕಾರ್‌ಕರ‍್ಯು ಕರಿ ಅಪೊಸ್ತಲರ್‌ವಾಳನಾಬಿ ಯೂದಾಯಮ ಥೂತೆ ವಿಶ್ವಾಸಿನ ಮಾಲುಮ್‍ಹುಯು.
ACT 11:2 ಪೇತ್ರ ಯೆರೂಸಲೇಮ್ಮ ಆಯೊತೆ ತದೆ ವಿಶ್ವಾಸಿಖ್ಹಾರನ ಜೋ಼ಡ್ಮ ಖ್ಹತ್ನಾನಿ ಬಾರೇಮ ವಾದ ಕರ್ತುಹುಯಿನ್;
ACT 11:3 ತೂ, “ಯೆಹೂದ್ಯರ್ ಕಾಹೆತೆ ಇವ್ಣಕನಾಬಿ ಅಜು಼ ಖ್ಹತ್ನ ಕರಾಯುಕೊಂತೆ ಇವ್ಣ ಘರೇಬಿ ತುನೆ ಇವ್ಣಿಜೋ಼ಡ್ಮ ಜೈ಼ನ್ ಖಾಣುಬಿ ಖಾದೊ ಕರಿ ಬೋಲ್ಯು.
ACT 11:4 ಇನಖ್ಹಾಜೆ ಪೇತ್ರನೆ ಹಿಜ್ಜಾ಼ ಶಾತ್ ಚಾ಼ಲ್ಯುಕಿ ಯೊ ಅಖ್ಖು ಬೋಲ್ತೊಹುಯಿನ್;
ACT 11:5 ಪೇತ್ರನೆ ಇವ್ಣುನ, ಮೆ ಯೊಪ್ಪ ಖ್ಹಯೇರ್‌ಮ ಪ್ರಾರ್ಥನೆ ಕರಾನಿ ವಖ್ಹ್‌ತೆ “ಮನ ಏಕ್‌ ದರ್ಶನ್ ದೆಖಾಯು. ಯೋ ಶಾತ್‌ಕತೊ ಆಕಾಶ್‍ಥು ಚಾರ್ ಕೋಣಾನ ಶಿಂದ್ರೂ ಭಂದೈನ್ ಉತ್ರಿ ವಳ್ಯಾವ್ತು ಥೂತೆ ಝೋ಼ಳಿನಿತರಾನು ಏಕ್‌ ಜಿನಖ್ಹ್‌, ಮಾರಕನಾಸ್ ಉತ್ರಿ ಆಯು.
ACT 11:6 ಮೆ ಇನಾಮಹಿ ದೇಖ್ಯೊ ಇನಾಮ ಧರ್ತಿನು ಜಾನ್ವರ್‌ ಅಜು಼ ಅಖ್ಖು ಛಂಡಾಳಿ ಜಾನ್ವರ್‌, ಖ್ಹವಳ್ತು ಚಾ಼ಲಾನು ಕೀಡ್‌ಕಮ್ಟು ಅಖ್ಖು ಆಬ್‌ಪರ್ ಉಡಂತು ಜಿನಾವರ್ ಖ್ಹಾರು ಹಿಜ಼್ಜಥೂ.
ACT 11:7 ತದೆ ‘ಪೇತ್ರ, ಉಠಿನ್, ವ್ಹಾಡಿ ಖಾ’ ಕರಿ ಬೋಲಾನೊ ಏಕ್‌ ಆವಾಜ಼್ ಮನ ಠವ್‌ಕೊ ಖ್ಹಮ್‍ಜ್ಯೊ.
ACT 11:8 ತದೆ ಮೆ, ‘ಮೆ ಇಮ್‌ಕರಾನ ಕೊಹುವಾನಿ ಪ್ರಭು’ ಕಚಿಂಡ್‌ ರಾಛು಼ ರ‍್ಹವೊ ಅಜು಼ ಅಶುದ್ದ ಹುಯುತೆ ಚೀಜ಼್‌ನ ಮೆ ಕದೇಬಿ ಖಾದೊಕೊಯ್ನಿ” ಕರಿ ಬೋಲ್ಯೊ.
ACT 11:9 ಇನಖ್ಹಾಜೆ, ಆ ಅಖ್ಖಾನ ದೇವ್ನೆ ಪಾಕ್‌ ಕರಿರಾಖ್ಯೊತೆ ಅನಅಖ್ಖು ಮೈಲುಕರಿ ನಾಬೋಲ್ನು ಕರಿ ಬೇನೆಹಲ್ಲಬಿ ಆಬ್‌ಮಾಥು ಠವ್‌ಕೊ ಬೋಲಾಯು.
ACT 11:10 ಅಮ್ಮಸ್ ತೀನ್‌ಹಲ್ಲ ಹುಯು. ಇನಪಾರ್ ಯೊ ಅಖ್ಖು ಜಿನಖ್ಹ್‌ ಸೊರ್ಗಾಮ ಪಡೈಲೆವೈಗು.
ACT 11:11 ಯೋಸ್ ವೇಳ್ಮ ಮೇ ಥೋತೆ ಘರ್‌ನ ಖ್ಹಾಮ್ಣೆ ತೀನ್‍ಜ಼ಣ ಆಯಾ ಯೊ ತೀನ್‍ಜ಼ಣಾನ ಕೈಸರೈ ಖ್ಹಯೇರ್‌ಥು ಮಾರಕನ ಮೋಕ್‍ಲೈರ‍್ಹಾಥ.
ACT 11:12 ಪವಿತ್ರಾತ್ಮನೆ ಮನ ಬೋಲ್ಯೊ ಗುಮಾನಿ ನಾಕರ‍್ನುತೆ ಇವ್ಣಿ ಜೋ಼ಡ್ಮ ಜಾ಼ ಕರಿ ಬೋಲ್ಯೊ. ಆ ಛೋ಼ ಜ಼ಣ ಭೈಯೇ ಮಾರಿಜೋ಼ಡ್ಮ ಆಯಾ ಹಮೆ ಕೊರ್ನೆಲ್ಯನ ಘರೆಗಯ.
ACT 11:13 ತದೆ ಇನೆ ದೇವ್‌ನೊ ದೂತ ಮಾರ ಘರ್‌ಮ ಭಿಯೊಥೋತೆ ಇನ ಬಾರೇಮ ಮನ ಬೋಲ್ಯೊ. ಯೊ ದೇವ್‌ನೊ ದೂತನೆ ಕೊರ್ನೆಲ್ಯನ, ತೂ ಥೋಡ ಜ಼ಣಾನ ಯೊಪ್ಪನ ಮೋಕ್ಲಿನ್ ಪೇತ್ರಕರಿ ಬೋಲೈಲ್ಯವಾಳೊ ಸೀಮೋನನ ಬುಲೈಲೆ.
ACT 11:14 ಯೊ ತುಮಾರಿ ಜೋ಼ಡ್ಮ ಉಪದೇಶ್ ಬೋಲ್‌ಶೆ ಯೊ ಬೋಲ್‍ಶೇತೆ ಬೋಧನೆಥಿ ತುನಾಬಿ ತಾರ ಪರಿವಾರ್ನಾಬಿ ರಕ್ಷಣೆಮಳ್‌ಶೆ ಕರಿ ಬೋಲ್ಯೊ.
ACT 11:15 ‘ಮೇ ಮಾರಿ ಉಪದೇಶ್‍ನ ಶುರುಕರ‍್ಯೊ ತದೆ, ಶುರೂಮ ಪವಿತ್ರಾತ್ಮ ಉತ್ರಿನ್‌ ಆಯು. ಇಮ್ಮಸ್ ಇವ್ಣ ಉಪ್ಪರ್‌ಬಿ ಆಯೊ.
ACT 11:16 ತದೆ ಮೆ ಪ್ರಭುನಿ ವಾತೆನ ಖ್ಹಯಾಲ್‍ಕರಿಲಿದೊ; ಇನೆ ‘ಯೋಹಾನನೆ ಅದ್ಮಿವ್‌ನ ಪಾಣಿಥಿ ಬ್ಯಾಪ್ತಿಸ್ಮ ಕರಾಯೊ ಕತೋಬಿ ತುಮೆ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ಕರೈಲಿಶು’ ಕರಿ ಬೋಲಿರಾಖ್ಯೊಥೊ.
ACT 11:17 ಪ್ರಭು ಯೇಸುಕ್ರಿಸ್ತಮ ವಿಶ್ವಾಸ್‌ರಾಖ್ಯಾತೆ ಆಪ್ಣುನ ದಿದೋತೆ ವರನಾಸ್ ದೇವ್ನೆ ಆ ಅದ್ಮಿವೋನಾಬಿ ದಿದೊ. ಅಮ್‍ರ‍್ಹವಾನಾಪರ್ ಮೆ ದೇವ್ನ ಕಾಮ್ನ ಭೀರಾಖಾನ ಮೇ ಕೋಣ್? ಕರಿ ಬೋಲ್ಯೊ.
ACT 11:18 ಆ ವಾತೆನ ಇವ್ಣೆ ಖ್ಹಮ್‌ಜಿನ್‌ ಝಿಟ್ಕಾರ್‌ ಕರಾನು ಮ್ಹೆಂದಿನ್; ಇಮ್‍ಕತೊ ದೇವ್ ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ಜಾನ್‍ದೇವ್ಣುಕರಿ ಇವ್ಣ ದಿಲ್ನ ಇನಾಭಣಿ ಫರಾಯೊ ಕರಿ ದೇವ್ನ ಖ್ಹರಾಯು.
ACT 11:19 ಸ್ತೆಫನನ ಮರ್‌ನಾಖ್ಯುತೆ ತದೆ ಹಿಜ್ಜಾ಼ ಹುಯಿತೆ ಖ್ಹತಾಪ್ಣಿಥಿ ಥೋಡುಜ಼ಣು ವಿಶ್ವಾಸಿಖ್ಹಾರು ಛಿದ್ರಯ್‍ಗಯು, ಇವ್ಣೆ ಘಣಾದೂರ್‌ನಿ ಝ಼ಗೊಹುಯಿರಿಥೀತೆ ಫೊಯಿನಿಕೆ, ಸೈಪ್ರಸ್ ಅಜು಼ ಅಂತಿಯೋಕ್ಯನ ಗಯು. ವಿಶ್ವಾಸಿಖ್ಹಾರು ಆ ಝ಼ಗೋಮ ಖಲಿ ಯೆಹೂದ್ಯರ್‌ನ ಸುವಾರ್ತೆನ ಬೋಲ್ಯು.
ACT 11:20 ಆ ವಿಶ್ವಾಸಿಮ ಥೋಡಜ಼ಣು ಸೈಪ್ರಸ್ ಅಜು಼ ಸಿರೇನ್ ಝ಼ಗೊವಾಳ ಹುಯಿರಾಥ. ಆ ಅದ್ಮಿಖ್ಹಾರು ಅಂತಿಯೋಕ್ಯನ ಆಯುತೆ ತದೆ ಇವ್ಣೆ ಪ್ರಭು ಹುಯಿರೋತೆ ಯೇಸುನಿ ಬಾರೇಮ ಸುವಾರ್ತೆನ ಹಿಜ್ಜಾ಼ ಥೋಡ ಗ್ರೀಕ್ ಅದ್ಮಿವೋನ ಬೋಲ್ಯು.
ACT 11:21 ಪ್ರಭುನೊ ಹಾತ್ ಇವ್ಣಪರ್ ಥು,ಅಜು಼ ಅದ್ಮಿಖ್ಹಾರು ಕೈಏಕ್ ಜ಼ಣು ಪ್ರಭುಮ ಭರೋಖ್ಹೊ ಕರ‍್ಯು.
ACT 11:22 ಆ ವಾತೆ ಯೆರೂಸಲೇಮ್ಮಥೂತೆ ಸಬೆನ ಪೋಚ್ಯು. ಇನಖ್ಹಾಜೆ ಬಾರ್ನಬನ ಅಂತಿಯೋಕ್ಯನ ಬೋಲಿ ಮೋಕ್‍ಲ್ಯು.
ACT 11:23 ಬಾರ್ನಬ ಅಂತಿಯೋಕ್ಯನ ಪೋಚಾ಼ನಿವಖ್ಹತೆ ದೇವ್ನ ಅದ್ಮಿವೋನ ವಿಶ್ವಾಸ್ ಭಡಾವ್ತೊ ಹುಯಿನ್ ಪ್ರಭುಮ ಹುಮ್ಮಖ್ಹ್‌ ಕರಾಯೊ.
ACT 11:24 ಬಾರ್ನಬ ಯೋ ಏಕ್‌ ಅಛ್ಛೊ಼ಅದ್ಮಿ ಹುಯಿರೋಥೊ. ಯೊ ಪವಿತ್ರಾತ್ಮಥಿ ಭರಾಯೊಹುಯೊ ಪೂರ ವಿಶ್ವಾಸ್ಮ ಥೊ ಅಜು಼ ಘಣ ಅದ್ಮಿನ ಪ್ರಭುಭಣಿ ಬುಲೈಲಾಯೊ.
ACT 11:25 ಇನಕೇಡೆಥು ಬಾರ್ನಬನೆ ಸೌಲಾನ ಢೂಂಡ್ತೊಹುಯಿನ್ ತಾರ್ಸಸ್‍ ಖ್ಹಯೇರ‍್ನ ಗಯೊ.
ACT 11:26 ಬಾರ್ನಬನೆ ಸೌಲಾನ ಹಿಜ್ಜಾ಼ ದೇಖಿನ್ ಇನ ಅಂತಿಯೋಕ್ಯನ ಬುಲೈಲಿನ್ ಆಯೊ. ಸೌಲಾಬಿ ಅಜು಼ ಬಾರ್ನಬನೆ ಅಂತಿಯೋಕ್ಯಮ ಏಕ್‌ ವರಖ್ಹ್‌ಅಖ್ಖು ಸಬೆನ ಜೋ಼ಡ್ಮಾಸ್ ರ‍್ಹೀನ್ ಕೈಏಕ್ ಜ಼ಣಾನ ಶಿಕಾಡ್ಯ. ಆ ವಿಶ್ವಾಸಿನ ಪಹಿಲಿಬಾರ್ “ಕ್ರೈಸ್ತರ್” ಕರಿ ನಾಮ್ ಆಯುತೆ ಅಂತಿಯೋಕ್ಯಮಾಸ್.
ACT 11:27 ಯೋ ಹಗಾಮ್ಮ ಥೋಡುಜ಼ಣು ಪ್ರವಾದಿಖ್ಹಾರು ಯೆರೂಸಲೇಮ್‍ಥು ಅಂತಿಯೋಕ್ಯನ ಗಯು.
ACT 11:28 ಆ ಪ್ರವಾದಿಖ್ಹಾರಾಮ “ಅಗಬ” ಕರಿ ಏಕ್‍ಜ಼ಣೊ ಥೊ. ಅಗಬನೆ ಅಂತಿಯೋಕ್ಯಮ ಪವಿತ್ರಾತ್ಮನಿ ಖ್ಹಯಾಲ್‌ಥಿ, “ಹಿಡಿ ಜಗತ್‍ನಾಸ್ ಕಾಳ್ದುಕಾಳ್ ಆವ್‌ಶೆ” ಕರಿ ಬೋಲ್ಯೊ. ಯೋ ಕಾಳ್ದುಕಾಳ್‍ನ ಹಗಾಮ್ ಕ್ಲೌದಿಯ ರಾಜ಼ನು ಹಗಾಮ್ಮ ಆಯು.
ACT 11:29 ಯೂದಾಯಮ ರ‍್ಹವಾಳು ಭೈಯೇ ಭೇನೆವೊನ ಮದತ್‌ಕರಾನ ಶಿಷ್ಯರ್‌ನೆ ನಿರ್ಧಾರ್ ಕರ‍್ಯು. ವಿಶ್ವಾಸಿಮ ಹರೇಕ್ ಜ಼ಣುಬಿ ಇವ್ಣೇಥಿ ಕೆತ್ರುಹುಯೂಕಿ ಇವ್ಣುನ ಬೋಲಿ ಮೋಕ್ಲಿನ್ ಖ್ಹಯಾಲ್ ಕರ‍್ಯು.
ACT 11:30 ಇವ್ಣೆ ಪೈಶಾನ ಜ಼ಮಕರೀನ್ ಇನ ಬಾರ್ನಬ ಅಜು಼ ಸೌಲನ ಹಾಥ್ಥಿ ಯುದಾಯಮ ಥೂತೆ ಸಭೆನ ಗಲ್‌ಢಾವ್ನ ಲಯಿನ್ ದಿದಾ.
ACT 12:1 ಯೋ ವೇಳ್ಮ ರಾಜ಼ ಹುಯಿರೊಥೋತೆ ಹೆರೋದನೆ ಸಬೆವಾಳಾಮ ಥೋಡಜ಼ಣಾನ ಖ್ಹತಾಪ್ಣಿ ದ್ಯಾವಲಗ್ಯೊ.
ACT 12:2 ಯೋಹಾನನೊ ಭೈಥೋತೆ ಯಾಕೋಬನ ತಲ್ವಾರ್‌ಥಿ ಮರೈನಾಖ್ಯೊ.
ACT 12:3 ಅನೇಥಿ ಯೆಹೂದ್ಯರ್‌ನ ಪಸಂದ್‌ ಹುಯಿರ‍್ಹುಸ್‌ಕರಿ ಜಾ಼ಣಿನ್, ಪೇತ್ರನಾಬಿ ಧರೈನ್ ಖ್ಹಾರ್ಕೊಟ್‌ಮ ಘಲಾಯೊ. ಯೋ ಹಗಾಮ್ಮ ಯೆಹೂದ್ಯರ್‌ನಿ ಪಸ್ಕ ಪೂಜ಼ ಚಾ಼ಲುಕರ್ತೂಥು. ಪಸ್ಕಕತೊ ಖಾಟುಕೊಂತೆ ರೋಟಾನಿ ಪೂಜ಼.
ACT 12:4 ತದೆ ಇನೆ ಪಸ್ಕಪೂಜ಼ ಹುಯಿಗು ತದೆ ಅದ್ಮಿವೋನ ಖ್ಹಾಮ್ಣೆ ಪೇತ್ರನ ಭೀರಾಕ್‍ಣುಕರಿ ಸೋಚ್‌ಕರಿನ್ ಜೇಲ್‌ಮ ಘಲೈನ್ ಇನ ಕಾವ್ಲಿ ಕರಾನ ಚಾರ್‌ಜ಼ಣ ಶಿಪಾಯ್ನು ಚಾರ್ ಟೋಳ್ನ ನೇಮಕ್ ಕರ‍್ಯೊ.
ACT 12:5 ಪೇತ್ರ ಜೇಲ್‌ಮ ಘಾಲ್ಯು ತದೆ ಸಬೇನು ಅದ್ಮಿಖ್ಹಾರು ಇನಖ್ಹಾಜೆ ದೇವ್ನ ದಿಲ್‍ಲಗಾಡಿನ್ ಪ್ರಾರ್ಥನೆ ಕರ‍್ಯು.
ACT 12:6 ಹೆರೋದನೆ ಇನ ಅದ್ಮಿವೋನ ಖ್ಹಾಮ್ಣೆ ಲ್ಯಾವ್ಣುಕರಿ ಕರ‍್ಯೊತೆ ಪಾಛ್ಲಿ಼ರಾತೆ, ಖ್ಹಾರ್ಕೊಟ್‌ಮ ಬೇ ಖ್ಹಂಕ್‌ಳಿಥಿ ಜ಼ಡ್‍ಕೈನ್ ತದೆ ಪೇತ್ರ ಬೇಜ಼ಣ ಶಿಪಾಯಿನ ಬೀಚ್ಮ ಖ್ಹುತೋಥೊ. ಶಿಪಾಯಿಖ್ಹಾರು ಜೇಲ್‌ನ ದರ‍್ವಾಜ಼ನ ಕಾವ್ಲಿ ಕರಿರಾಖ್ಯುಥು.
ACT 12:7 ಅಪ್‌ಗುಪ್‍ಥೂಸ್ ಪ್ರಭುನೊದೂತ ಪೇತ್ರನ ಖ್ಹಾಮ್ಣೆ ಭೀರಿಗೊ. ಉಜಾ಼ಳು ಉಜಾ಼ಖ್ಹ್‌ಥಿ ಕೋಣಾಮ ಅಖ್ಖು ಭರೈಗು. ತದೆ ದೇವ್ನದೂತನೆ ಪೇತ್ರನ ಭುಜ಼್‌ನ ಧಕ್ಕೋದಿನ್ ಇನ ಬೋಲ್ಯೊ, “ಒಗ್ಗಿಉಟ್” ಕರಿ ಬೋಲ್ಯೊ. ತದ್ನುತದೇಸ್ ಇನ ಹಾತ್ನ ಭಂದೈರಿಥೀತೆ ಖ್ಹಂಕ್‌ಳಿಯೇ ಛು಼ಟಿಪಡಿಗಯೇ.
ACT 12:8 ದೇವ್ನದೂತನೆ, “ಲುಂಗ್ಡಾನ ಫೇರಿಲಿನ್ ತಾರ ಕೊಖ್ಹ್‌ಡಾನ ಘಾಲಿಲೆ” ಕರಿ ಬೋಲ್ಯೊ. ಪೇತ್ರನೆ ಇಮ್ಮಸ್ ಕರ‍್ಯೊ. ತದೆ ದೇವ್ನದೂತನೆ, “ತಾರ ಝ಼ಗ್ಗಾನ ಲಪೇಟಿಲೀನ್ ಮಾರಿ ಜೋ಼ಡ್ಮ ಆವ್”. ಕರಿ ಬೋಲ್ಯೊ.
ACT 12:9 ಇನೆ ಭಾರ್‌ ಆಯಿನ್ ದೇವ್ನದೂತನ ಪೀಠೆ ಜಾ಼ತೊಹುಯಿನ್, ದೇವ್ನ ದೂತಾಥಿ ಚಾ಼ಲ್ಯುತೆ ಇನ ಖ್ಹಾಚು಼ ಕರಿ ಮಾಲುಮ್‌ಕೊಂತೆಸ್ ಯೋ ಖ್ಹೋಣ್ಯು ದೇಖುಕರುಸ್ ಕರಿ ಇನೆ ಸೋಚಿರಾಖ್ಯೊಥೊ.
ACT 12:10 ಪೇತ್ರನೆ ಪಹಿಲ ಅಜು಼ ಬೇನ ಕಾವ್ಲಿಕರವಾಳನ ಕಾಡಿಮ್ಹೆಂದೀನ್ ಖ್ಹಯೇರ‍್ನು ಜಾ಼ವಾನು ಲ್ಹೋಡಾನ ಬಾಕಲ್‍ಕನ ಆಯೊತೆ ತದೆ, ಯೊ ಬಾಕಲ್ ಇನೇಥಿ ಯೋಸ್ ನಿಕ್ಳಿಗಯೊ. ಪೇತ್ರಬಿ ದೇವ್ನ ದೂತ ಬಾಕಲ್‍ಮಾಥು ನಿಕ್ಳಿನ್ ಭಾರ್‌ಆಯಿನ್, ಯೋ ಗಲ್ಲೀನ ಮ್ಹೇಲಿನ್ ನಿಕ್‍ಳ್ಯ ತದೆ ಅಪ್‍ಗುಪ್‍ಥೀಸ್ ದೇವ್‌ನೊ ದೂತನೆ ಇನ ಮ್ಹೇಲಿನ್ ಚ಼ಲೇಗೊ.
ACT 12:11 ತದೆ ಪೇತ್ರನೆ ಮಾಲುಮ್‌ಕರ್ಲಿನ್, “ಪ್ರಭುನೆ ಖ್ಹಾಚ಼ಮಾಸ್ ಇನ ದೂತನ ಮೋಕ್‍ಲ್ಯೊತೆ ಮನ ಹಮ್ಕೆ ಮಾಲುಮ್‌ ಪಡ್ಯು. ಯೊ ಮನ ಹೆರೋದನ ಹಾಥ್ಥಿ ಛೋ಼ಡೈನ್‌ಮ್ಹೆಲ್ಯೊ. ಮನ ಕೇಡ್ ಕರ್ನುಕರಿ ಯೆಹೂದ್ಯರ್‌ವಾಳನೆ ಸೋಚಿರಾಖ್ಯುಥು, ಪ್ರಭುನೆ ಆ ಅಖ್ಖಿ ಕೇಡ್‍ಮಾಥು ಮನ ಬಚಾ಼ಡ್ಯೊ” ಕರಿ ಇನೆ ಮಾಲುಮ್‌ಕರ‍್ಲಿದೊ.
ACT 12:12 ಯೋ ಅನ ಮಾಲುಮ್‌ಕರ‍್ಲಿದೊ ತದೆ, ಮಾರ್ಕಕರಿ ಬೋಲೈಲ್ಯಾವಾಳೊ ಯೋಹಾನ್ನಿ ಆಯಾ ಮರಿಯನ ಘರೆ ಆಯೊ. ಹಿಜ್ಜಾ಼ ಘಣುಜ಼ಣು ಮಳಿನ್ ಪ್ರಾರ್ಥನೆ ಕರುಕರ್ತುಥು.
ACT 12:13 ಪೇತ್ರನೆ ಬಾಕಲ್‍ಕನ ಆಯಿನ್ ಖಟ್‍ಖಟಾಯೊ ತದೆ ಯೊ ಕೋಣ್ ಕರಿ ಮಾಲುಮ್‌ ಕರಾನಖ್ಹಾಜೆ ರೋದೆಕರಿ ಸೇವಕಿ ಆಯಿ.
ACT 12:14 ಇನೆ ಪೇತ್ರನಿ ಆವಾಜ಼್‌ನ ಖ್ಹಣೇದ್‌ಕರೀನ್ ಇನ ಘಣು ಖ್ಹುಶಿಹುಯು. ನಾಶಿಜೈ಼ನ್, “ಪೇತ್ರ ಬಾಕಲ್‍ಕನ ಭಿಯೋಸ್!” ಕರಿ ಬೋಲಿ.
ACT 12:15 ಹಿಜ಼್ಜಾಥೂತೆ ಅಖ್ಖುಜ಼ಣು, “ಅನ ದಿವಾನು ಧರಾಖ್ಯುಸ್” ಕರಿ ಬೋಲ್ಯು. ಕತೋಬಿ ಮೆ ಆ ಬೋಲುಕರುತೆ ಖ್ಹಾಚಿಸ್ ಕರಿ ಇನೆ ಪಾಛು಼ ಇವ್ಣುನ ಬೋಲಿ, ಇನಖ್ಹಾಜೆ ಇವ್ಣೆಅಖ್ಖು, “ಯೊ ಪೇತ್ರನೊ ದೂತ ರ‍್ಹೇವ್ಣುಕರಿ ಬೋಲ್ಯು.
ACT 12:16 ಕತೋಬಿ ಪೇತ್ರ ದರ‍್ವಾಜ಼ನ ಖಟ್‍ಖಟಾವ್‍ ಕರ್ತೊಥೊ. ತದೆ ಇವ್ಣೆ ಬಾಕಲ್ ಕಾಡಖ್ಹತರ್, ಪೇತ್ರನ ದೇಖಿನ್ ಆಶ್ಚರ್ಯ ಹುಯು.
ACT 12:17 ಪೇತ್ರನೆ ಇವ್ಣುನ ಶೊಪೊರ‍್ಹೇವೊ ಕರಿ ಹಾತ್‌ನೊ ಇಷಾರ್ಕೊ ಕರೀನ್, ಪ್ರಭುನೆ ಇನ ಜೇಲ್‌ಮಾಥು ಕಿಮ್ ಛೋ಼ಡಾಯೊ ಕರಿ ಯೋ ಬಾರೇಮ ಇವ್ಣುನ ಅಖ್ಖು ಬೋಲಿ ಒತಾಳ್ಯೊ. “ಯಾಕೋಬ್‌ನಾಬಿ ಅಜು಼ ವಿಶ್ವಾಸಿವೊನಾಬಿ ಆ ಸಮಚಾರ್‌ನ ಬೋಲೊ” ಕರಿ ಬೋಲ್ಯೊ. ಇನಕೇಡೆಥು ಪೇತ್ರ ಬಿಜಿ ಝ಼ಗೊ ನಿಕ್ಳಿಗಯೊ.
ACT 12:18 ಇನವ್ಹಾಣೆ ಪೇತ್ರ ಶಾತ್‍ಹುಯೊ ಕರಿ ಶಿಪಾಯಿ ಖ್ಹಾರಾಮ ಮೋಟಿ ಘುಂಜ಼್‌ಳಾವ್ಣಿ ಉಠಿ.
ACT 12:19 ಹೆರೋದನೆ ಇನ ಢೂಂಡ್ವಾಯೊ ಪೇತ್ರನ ದೇಖಾನ ಕೋ ಹುಯುನಿ ಇನಖ್ಹಾಜೆ ಹೆರೋದನೆ ಕಾವ್ಲಿ ಕರವಾಳನ ವಿಚಾರ್‌ಕರಿನ್ ಇವ್ಣುನ ಅಖ್ಖು ಮರಣ್ಣಿ ದಂಡಣೆನ ದಿನಾಖ್ಯೊ. ಹೆರೋದನೆ ಥೋಡ ಹಗಾಮ್ ಯೂದಾಯಥೊ ಜೈ಼ನ್ ಕೈಸರ ಖ್ಹಯೇರ್‌ಮ ರ‍್ಹಿಯೊ.
ACT 12:20 ತೂರ್ ಅಜು಼ ಸಿದೋಮ್ ಖ್ಹಯೇರ‍್ನ ಅದ್ಮಿವೋನ ಉಪ್ಪರ್ ಹೆರೋದನೆ ಜಾ಼ಖ್ಹತ್ ಇರಾದೊ ಕರಿರಾಖ್ಯೊಸ್‍ಕರಿ, ಯೊ ಅದ್ಮಿಖ್ಹಾರು ಹೆರೋದನ ಮಳಾನ ಜಮಹುಯಿನ್ ನಿಕ್‍ಳ್ಯು. ಇವ್ಣೆ ರಾಜ಼ನೊ ಮಹೇಲ್‌ನದೇಖಿಲ್ಯವಾಳೊ ಮೋಟೊ ಅದಿಕಾರಿ ಹುಯಿರೊಥೋತೆ ಬ್ಲಾಸ್ತನನ ಪೊಖ್ಹ್‌ಲೈನ್ ಮದತ್‌ಕರ್‌ ಕರಿ ರಾಜ಼ ಇವ್ಣಿ ಜೋ಼ಡ್ಮ ಶಾಂತಿಹುಯಿನ್ ಮಳಿಜಾ಼ವ್ಣುಕರಿ ಹೆರೋದನ ಬೋಲಿಲಿದು. ಶನಖ್ಹಾಜೆ ಕತೊ ಇವ್ಣ ಮುಲಕ್ನ ಹೆರೋದನ ಮುಲಕ್‍ಥು ಖಾಣಾನು ಜಿನಖ್ಹ್‌ ಮಂಗೈಲೆವ್ಣುಥು.
ACT 12:21 ಇವ್ಣುನ ಮಳಾನಖ್ಹಾಜೆ ಹೆರೋದನೆ ಏಕ್‌ ದನ್ ಗೊತ್‍ಕರೀನ್ ಮ್ಹೇಲ್ಯೊ. ತದೆ ಹೆರೋದಾನೆ ಇನ ರಾಜಾ಼ನು ಪೆರ್ವಾಖ್ಹ್‌ ಫೇರಿಲಿನ್ ಇನೆ ಸಿಂಹಾಸನ್ನ ಉಪ್ಪರ್ ಬೇಶಿನ್ ಅದ್ಮಿವೋನ ಉಪದೇಶ್ ಕರ‍್ಯೊ.
ACT 12:22 ಹಿಜ್ಜಾ಼ ಅದ್ಮಿಖ್ಹಾರು ಆ ಹೈರುತೆ ಅದ್ಮಿನು ಟಹುಕೊ ಕಾಹೆ. ಆ ದೇವ್‌ನೊ ಟಹುಕೊ ಕರಿ ಕೂಘಾಟಿ ಕರ‍್ಯು.
ACT 12:23 ಪ್ರಭುನ ದೂತನೆ ತುರಂತ್ ಹೆರೋದನ ದಂಬೇಡಿ ಹೇಟ್‌ನಾಖ್ಯೊ; ಯೋ ದೇವ್ನ ಮರ್ಯಾದಿ ಕೊದಿದೊಂತೆ ಇನಖ್ಹಾಜೆ ಯೊ ಕೀಡೊ ಪಡೀನ್ ಮರಿಗೊ.
ACT 12:24 ಕತೋಬಿ ದೇವ್ನಿ ವಚನ್ ಭಡ್ಯು ಅಜು಼ ಜಾ಼ಖ್ಹತ್ ಹುಯು.
ACT 12:25 ಬಾರ್ನಬಬಿ ಸೌಲನೆ ಇವ್ಣೆ ಕರ್ನುಥೂತೆ ಸೇವೆನ ಕಾಮ್ನ ಖ್ಹರ್ತಿಕರಿನ್ ಮಾರ್ಕಕರಿ ಬೋಲೈಲಿದೋತೆ ಯೋಹಾನಕನ ಬುಲೈಲಿನ್ ಯೆರೂಸಲೇಮ್‍ಥು ಪಾಛು಼ ಅಂತಿಯೋಕ್ಯನ ಆಯ.
ACT 13:1 ಅಂತಿಯೋಕ್ಯಮ ಥೂತೆ ಸಬೆಮ ಖ್ಹಾರು ಪ್ರವಾದಿಬಿ ಬೋಧಕರ್‌ಬಿ ಥೂ; ಇವ್ಣೆ ಕೋಣ್‌ಕತೊ, ಬಾರ್ನಬ, ನೀಗರ್‌ಕರಿ ಬೋಲೈಲಾವಳೊ ಸಿಮೆಯೋನ್‌, ಕುರೇನ್ಯನೊ ಲೂಕ್ಯ,ಹೆರೋದ ರಾಜ಼ನಿ ಜೋ಼ಡ್ಮ ಪಳ್ಯೊತೆ ಮೆನಹೇನ, ಅಜು಼ ಸೌಲ.
ACT 13:2 ಅವ್ಣೆಖ್ಹಾರು ಪ್ರಭುನಿ ಸೇವೆ ಕರುಕರ್ತುಥು ಅಜು಼ ಉಪವಾಸ್ (ಪಾರ‍್ನೆ) ಕರುಕರ್ತುಥು. ಪವಿತ್ರಾತ್ಮನೆ ಇವ್ಣುನ “ಮೇ ವಿಶೇಷ್ ಕಾಮ್ನಖ್ಹಾಜೆ ಬಾರ್ನಬ ಅಜು಼ ಸೌಲನ ಚೂ಼ಣಿಲಿದೊ ಯೋ ಕಾಮ್ನಖ್ಹಾಜೆ ಇವ್ಣುನ ಅಲಕ್‍ಕಾಡ್ಯೊ.” ಕರಿ ಬೋಲ್ಯೊ.
ACT 13:3 ಇನಖ್ಹಾಜೆ ಸಬೆವಾಳು ಉಪವಾಸ್ ರ‍್ಹೀನ್ ಪ್ರಾರ್ಥನೆ ಕರಿನ್ ಬಾರ್ನಬ ಸೌಲನ ಉಪ್ಪರ್ ಹಾತ್‍ಮ್ಹೇಲಿನ್‍ ಇವ್ಣುನ ಬೋಲಿ ಮೋಕ್‍ಲ್ಯು.
ACT 13:4 ಬಾರ್ನಬ ಬಿಜು಼ ಸೌಲ ಪವಿತ್ರಾತ್ಮನೇಸ್ ಬೋಲಿಮೋಕ್‌ಲ್ಯೊ. ಇವ್ಣೆ ಸೆಲ್ಯೂಕ್ಯ ಖ್ಹಯೇರ‍್ನ ಜೈ಼ನ್, ಹಿಜ್ಜಾ಼ಥ ಸೈಪ್ರಸ್ ಟಾಪನ ಜ಼ಹಾಜ಼್‍ಮ ಗಯ.
ACT 13:5 ಬಾರ್ನಬ ಅಜು಼ ಸೌಲ ಸಲಾಮಿಸ್ ಕರಿ ಖ್ಹಯೇರ‍್ನ ಜಾ಼ವಾದಿನ್, ಯೆಹೂದ್ಯರ‍್ನು ಸಬಾ ಮಂದಿರ್‌ಮ ದೇವ್ನಿ ಭೋದನೆನ ಬೋಲ್ಯ. ಮಾರ್ಕಕರಿ ಬೋಲೈರ‍್ಹೋತೆ ಯೋಹಾನ ಇನ ಸೇವೆ ಕರಾನಖ್ಹಾಜೆ ಇನಿ ಜೋ಼ಡ್ಮ ಥೊ.
ACT 13:6 ಇವ್ಣೆ ಯೋ ಟಾಪಾನಿ ಅಖ್ಖಿಬಾಜು಼ ಜಾ಼ತಹುಯಿನ್ ಪಾಫೋಸ್ ಕರಿ ಗಾಮ್‌ನಗಯ. ಇವ್ಣೆ ಜಾ಼ದುಜ಼ಮ್‌ಕರ್‌ ಕರಾವಾಳ ಏಕ್‌ ಯೆಹೂದ್ಯವಾಳನ ಪಾಫೋಸ್ಮ ದೇಖ್ಯ. ಇನು ನಾಮ್ ‘ಬಾರ್‌ಯೇಸು’ ಯೋ ಏಕ್‌ ಝೂ಼ಟುಪ್ರವಾದಿ ಹುಯಿರ‍್ಹೊಥೊ.
ACT 13:7 ಸೆರ್ಗ್ಯ ಪೌಲಕರಿ ನಾಮ್‍ವಾಳೊ ದೋಸ್ತ್ ಆ ರಾಜ್ಯಪಾಲ್‌ನ ಖನ್ನೆಸ್‌ ಕದೇಬಿ ರ‍್ಹೇತೊಥೊ. ಸೆರ್ಗ್ಯ ಪೌಲ ಅಕ್ಕಲ್‍ವಾಳೊ ಹುಯಿರ‍್ಹೊಥೊ. ಯೋ ದೇವ್ನಿ ವಚನ್ ಖ್ಹಮ್‌ಜಾ಼ನ ಬಾರ್ನಬ, ಸೌಲನ ಬುಲಾಯೊ.
ACT 13:8 ಕತೋಬಿ ಯೊ ಮಂತ್ರವಾದಿ ಹುಯಿರೋತೆ ಎಲುಮ (ಎಲುಮಕರಿ ನಾಮ್ನೊ ಮಂತ್ರವಾದಿ) ವಿರೋದ್ ಹುಯಿರ‍್ಹೋಥೊ. ರಾಜ್ಯಪಾಲ್‌ನೆ ಕ್ರಿಸ್ತಮ ವಿಶ್ವಾಸ್ ನಾ ಕರ್ನುತೆ ತಿಮ್ ಎಲಿಮನೆ ಕೋಶಿಶ್ ಕರ‍್ಯೊ.
ACT 13:9 ತದೆ ಪೌಲಕರಿ ಬೋಲೈಲ್ಯಾವಾಳೊ ಸೌಲ ಪವಿತ್ರಾತ್ಮಥಿ ಭರೈನ್,ಎಲಿಮ ಠರ್‌ಕೈ ದೇಖಿನ್;
ACT 13:10 ಇನೆ “ತೂ ಶೈತಾನ್ನೊ ಛಿಯ್ಯೊ! ಹರ್ ಏಕ್‍ ಅಛ್ಛಾ಼ನಾಬಿ ತೂ ವಹೇರ‍್ಯೊ” ತು ಖರಾಬ್ ಚಾ಼ಲ್‌ಥೀಬಿ ಝೂ಼ಟೆಥೀಬಿ ಭರೈರ‍್ಹೋಸ್. ಅಖ್ಖಿ ನೀತಿನಾಬಿ ವಿರೋದ್ ಕರವಾಳೋಸ್ ತೂ, ಪ್ರಭುನ ಖ್ಹಾಚಾನ, ಝೂ಼ಟಿಕರಿ ಬದ್ಲಾವನ ತೂ ಕದೇಬಿ ಕೋಶಿಶ್ ಕರ್ತೊರ‍್ಹೇಸ್.
ACT 13:11 ಹಂದೇಕ್ ಪ್ರಭು ತಾರಿ ವಿರೋದ್ ಹಾತ್‍ಪಾಡಿರಾಖ್ಯೊಸ್. ತೂ ಕಾಣೊಹುಯಿಶ್ ಥೋಡದನ್ ಶಾತ್ಬಿ ದೇಖಿಶ್‌ ಕೊಯ್ನಿ; ಚಾ಼ಂದ್‌ನು ಉಜಾ಼ಳುಬಿ ದೇಖಿಶ್‍ಕೊಯ್ನಿ.” ಕರಿ ಬೋಲ್ಯೊ. ತದೆ ಎಲಿಮನ ಅಖ್ಖೂಸ್ ಅಂಧಾರುಹುಯಿಗು. ಇನ ಕೋಣ್‌ತೋಬಿ ಹಾತ್‍ಧರಿ ಚ಼ಲಾವಾದೆಕರಿ ಯೋ ಢೂಂಡ್ತೊಹುಯಿನ್ ಫರುಕರ್ತೊಥೊ.
ACT 13:12 ಅನ ದೆಖ್ಯೊತೆ ರಾಜ್ಯಪಾಲ್‌ನೆ ಪ್ರಭುಪರ್ ವಿಶ್ವಾಸ್‍ಕರಿನ್ ಪ್ರಭುನಿಬಾರೆನು ಶಿಕಾಡನು ಖ್ಹಮ್‌ಜಿನ್‌ ಆಶ್ಚರ್ಯ ಕರ‍್ಯೊ.
ACT 13:13 ಪೌಲ ಅಜು಼ ಇನ ಜೋ಼ಡ್‍ವಾಳು ಪಾಫೋಸ್‍ಥು ಜ಼ಹಾಜ಼್‌ಪರ್ ನಿಕ್ಳಿನ್, ಪಂಫುಲ್ಯ ತಬರ್‌ಖಾನು ಪೆರ್ಗೆಕರಿ ಖ್ಹಯೇರ‍್ನ ಇವ್ಣೆ ಆಯು. ಕತೋಬಿ ಯೋಹಾನ ಇವ್ಣುನ ಮ್ಹೇಲಿನ್ ಯೆರೂಸಲೇಮ್‌ನ ಪಾಛೊ಼ ಫರಿಗಯೊ.
ACT 13:14 ಇವ್ಣೆ ಪೆರ್ಗೆ ಗಾಮ್‍ಥ ನಿಕ್ಳಿನ್ ಪಿಸಿದ್ಯ ತಬರ್‌ಖಾನು ಮಳ್ಯುಹುಯು ಅಂತಿಯೋಕ್ಯನ ಆಯ. ಇವ್ಣೆ ಸಬ್ಬತ್‌ ದನ್ಮ ಯೆಹೂದ್ಯರ‍್ನು ಸಬಾಮಂದಿರ್‌ಮ ಜೈ಼ನ್ ಬೇಶಿಗಯ.
ACT 13:15 ಮೋಶೆನ ಧರ್ಮಶಾಸ್ತ್ರಕನ ಅಜು಼ ಪ್ರವಾದಿಖ್ಹಾರನ ದಪ್ತರ್‌ನ ಪಢೈ ಹುಯಿಜಾ಼ವಾದಿನ್ ಸಬಾಮಂದಿರ್‌ನೊ ಗಲ್‍ಢಖ್ಹಾರಾನೆ ಪೌಲ ಬಾರ್ನಬ, “ಭೈಯೇ ಭೇನೆವೊ, ಅದ್ಮಿಖ್ಹಾರಾನ ಮದತ್ ಹುವಾನಿತರ ಶಾತ್ತೋಬಿ ಭಾಲಿನಿವಾತೆ ಬೋಲ್ನುಕರಿ ಉಷೇತೊ ತುಮೆ ಬೋಲೊ” ಕರಿ ಇವ್ಣಕನ ಬೋಲಿ ಮೋಕ್‍ಲ್ಯು.
ACT 13:16 ತದೆ ಪೌಲನೆ ಉಠಿಭೀರಿನ್ ಇನಿವಾತ್ ಖ್ಹಮಜ಼್‌ಣುಕರಿ ಅದ್ಮಿಖ್ಹಾರಾನ ಹಾತ್‌ನೊ ಝಾ಼ಲೊದೀನ್ ಶಾತ್‍ಬೋಲ್ಯೊಕತೊ; ಮಾರ ಯೆಹೂದ್ಯ ಭೈಯೇವೊ, ಖ್ಹಾಚ ದೇವ್ನ ಆರಾದನೆ ಕರಾವಾಳು ಅದ್ಮಿವೊ ಮಾರಿವಾತೆನ ಕಾನ್‍ದೇವೊ!
ACT 13:17 ಅಪ್ಣೊ ಇಸ್ರಾಯೇಲ್‌ನೊ ದೇವ್ ಹಮಾರ ಗುರುಗುರಬ್‌ಲ್ಯನ ಚೂ಼ಣಿಲಿದೊ. ಈಜಿಪ್ಟ್‌ಮ ಜಿವ್ಣುಕರುಕರ್ತುಥೂತೆ ಇನ ಅದ್ಮಿಖ್ಹಾರಾನ ದೇವ್ ಮದತ್‍ಕರಿನ್ ಮೋಟೊ ದೇಖ್ಹ್‌ಕರಿ ಭಡಾಯೊ. ದೇವ್ ಇನಿ ಮೋಟಿಶಕಥ್ಥಿ ಇವ್ಣುನ ಯೊ ದೇಖ್ಹ್‌ಮ ಚ಼ಲಾಯೊ.
ACT 13:18 ಯೊ ಖ್ಹುಮಾರ್ ಚಾ಼ಳಿಖ್ಹ್ ವರಖ್ಹ್ ಲಗು ಜ಼ಂಗಳ್‌ಮ ಇವ್ಣುನ ಖ್ಹಮಾಳಿಲಿದೊ.
ACT 13:19 ಕಾನಾನ್ ದೇಖ್ಹ್‌ಮ ಥೂತೆ ಅಲ್ಹಾವ್‌ ಅದ್ಮಿವೋನು ಖ್ಹಾತ್ ಮುಲಕ್ನ ನಾಶ್‍ಕರಿನ್, ಯೋ ಝ಼ಗೋನ ಇವ್ಣುನ ವಾಗ್ದಾನ್ ಕರಿದಿದೊ.
ACT 13:20 ಆ ಖ್ಹಾರು ಖ್ಹುಮಾರ್ ಚಾರ್ ಖ್ಹೊ ಅಡೈವಿಖ್ಹ್‌ ವರಖ್ಹ್ ಘಟಿಗಯು. ಇನಕೇಡೆಥು ಪ್ರವಾದಿಹುಯಿರೋತೆ ಸಮುವೇಲನ ಹಗಾಮ್‍ಲಗು ದೇವ್ ಅಪ್ಣ ಅದ್ಮಿನ ನ್ಯಾವ್‍ನೊ ಅದಿಪತಿನ ದಿದೊ.
ACT 13:21 ಆ ಹುವಾದಿನ್ ಅದ್ಮಿಖ್ಹಾರು ಇವ್ಣುನ ರಾಜ಼ ಹೋಣುಕರಿ ಬೋಲಿದಿದು. ದೇವ್ ಇವ್ಣುನ ಕೀಷಾನೊ ಛಿಯ್ಯೊ ಸೌಲನ ದಿದೊ. ಸೌಲ ಬೆನ್ಯಾಮೀನ್ ಖೂಮ್‌ವಾಳೊ ಯೋ ಚಾ಼ಳಿಖ್ಹ್ ವರಖ್ಹ್ ರಾಜ಼ ಹುಯಿರೋಥೊ
ACT 13:22 ದೇವ್ ಸೌಲನ ಕಾಡಿನಾಖನಪಾರ್ ದಾವೀದನ ಇವ್ಣೊ ರಾಜ಼ ಬಣಾಯೊ, “ಇಷಯನೊ ಛಿಯ್ಯೊ ದಾವೀದ ಮನ ಮಳ್ಯೊ, ಯೋ ಮಾರಾ ದಿಲ್ನ ಲಾಗ್ಯೊಹುಯೊ, ಯೊ ಮಾರಿ ಆಖ್ಹ್‌ನಿತರಾಸ್ ಕಾಮ್ ಕರಸ್. ಕರಿ ದೇವ್ ದಾವೀದ್‍ನಿ ಬಾರೇಮ ಸಾಕ್ಷಿ ಬೋಲಿರಾಖ್ಯೊಸ್.
ACT 13:23 ದೇವ್ ಇನಿ ವಾಗ್ದಾನಿಘೋಣಿಸ್ ದಾವೀದ್‍ನಿ ಖಾನ್‍ದಾನ್‍ಮಾಥು ಏಕ್‍ಜ಼ಣಾನ ಇಸ್ರಾಯೇಲ್‍ವಾಳನೊ ರಕ್ಷಕ್ ಕರಿ ಮೋಕ್ಲಿರಾಖ್ಯೊಸ್, ಯೋಸ್ ಯೇಸು.
ACT 13:24 ಯೇಸು ಆವಾನ ಅಗಾಡಿ ಯೋಹಾನ ಇಸ್ರಾಯೇಲ್ ಅದ್ಮಿಖ್ಹಾರಾನ, ‘ತುಮಾರಿ ಪಾಪ್ನಖ್ಹಾಜೆ ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರಿಜೈನ್ ಬ್ಯಾಪ್ತಿಸ್ಮ ಕರೈಲೇವೊ’ ಕರಿ ಬೋಧನೆ ಕರ‍್ಯೊ.
ACT 13:25 ಮೇ ಕೋಣ್‌ಕರಿ ತುಮೆ ಸೋಚೊಸ್? ಮೆ ಕ್ರಿಸ್ತಕಾಹೆ, ಯೋ ಮಾರ ಪಾಛ಼ಳ್ ಆವ್‌ಶೆ ಇನಿ ಖೋಖ್ಹ್‌ಡಾನಿ ಡೋರಿನಾಬಿ ಛೋ಼ಡಾನಾಬಿ ಮೇ ಲ್ಹಾಯೇಕ್‍ಕೊಯ್ನಿ’ ಕರಿ ಯೋಹಾನ ಇನು ಕಾಮ್‍ಕರಿನ್ ಖ್ಹರ್ತಿಕರಾನಿ ವೇಳ್ಮ ಬೋಲಿರಾಖ್ಯೊಸ್.
ACT 13:26 ಮಾರ ಭೈಯೇವೊ, ಅಬ್ರಹಾಮ್‌ನಿ ಖಾನ್‍ದಾನ್‍ವಾಳವೋ, ಖ್ಹಾಚ ದೇವ್ನ ಆರಾದನೆ ಕರುಕರಾತೆ ಯೆಹೂದ್ಯರ್‌ಕಾಹೆತೆ ಅದ್ಮಿವೊ, ಖ್ಹಮ್‍ಜೊ! ಆ ರಕ್ಷಣೆನು ವಚನ್ ಮೋಕ್‍ಲೈರ‍್ಹುತೆ ಅಪ್ಣಖ್ಹಾಜೇಸ್.
ACT 13:27 ಯೆರೂಸಲೇಮ್‍ ಜಿವ್ಣು ಕರುಕರ್ತುಥೂತೆ ಅದ್ಮಿಖ್ಹಾರು ಇವ್ಣು ಅದಿಕಾರಿ ಖ್ಹಾರುಬಿ ಯೋ ರಕ್ಷಕ್ ಕರಿ ಖ್ಹಣೇದ್ ಕರಿಲಿದುಕೊಯ್ನಿ. ಪ್ರವಾದಿಖ್ಹಾರು ಯೇಸುನಿ ಬಾರೇಮ ಲೀರಾಖ್ಯುಥೂತೆ ವಾತೆಖ್ಹಾರಿ ಮಾಲುಮ್ ಕೊ ಹುಯುನಿ ಹರೇಕ್ ಸಬ್ಬತ್ ದನ್ಮ ಇವ್ಣೆ ಫಡ್‍ತುಥೂತೆ ವಾತೆ ಪೂರಹುಯು. ಕತೋಬಿ ಇವ್ಣೆ ಮಾಲುಮ್‌ ಕರಿಲಿದುಕೊಯ್ನಿ. ಯೋ ಯೆಹೂದ್ಯರ್ ಖ್ಹಾರು ಯೇಸುನ ಅಪರಾದಿಕರಿ ತೀರ್ಪ್‌ದಿದು. ಅಮ್ ಕರಾಥಿ ಪ್ರವಾದಿಖ್ಹಾರಾನಿ ವಾತೆನ ಚಾ಼ಲಖ್ಹರ್ಕು ಕರ‍್ಯು.”
ACT 13:28 ಯೇಸುನ ಮರಣ್ಣಿ ದಂಡನೆ ದ್ಯವಾನ ಬರೋಬರ್‌ನಿ ಕಾರಣ್ ನಾಮಳ್ಯುತೋಬಿ ಇನ ಮರಾವ್ಣುಕರಿ ಪಿಲಾತನ ಬೋಲಿಲಿದು.
ACT 13:29 ಪವಿತ್ರ ಪುಸ್ತಕ್‌ಮ ಲೀಖೈರುತೆ ಪರಕ್ಮ ಯೇಸುನ ಹುವಾನುಥೂತೆ ಅಖ್ಖೀಸ್ ಖ್ಹತಾಪ್ಣಿನ ಯೆಹೂದ್ಯರ್‌ನೆ ಇನ ದಿದು. ಇನಪಾರ್ ಇವ್ಣೆ ಶಿಲ್‌ಬೆಪರ್‌ಥು ಯೇಸುನ ಹೇಟ್ ಉತಾರಿನ್‌ ಘವಿಮ ಘಾಲ್ಯು.
ACT 13:30 ಕತೋಬಿ ದೇವ್ನೆ ಇನ ಮರ‍್ಯಹುಯಮಾಥು ಜೂತೊ ಕರೀನ್ ಉಠಾಡ್ಯೊ,
ACT 13:31 ಆ ಹುಯಿಗು ತದೆ ಗಲಿಲಾಯಥು ಯೇಸುನಿ ಜೋ಼ಡ್ಮ ಯೆರೂಸಲೇಮ್ಮ ಆಯುಥೂತೆ ಇವ್ಣೆ ಕೈಏಕ್ ದನ್‌ಲಗು ಇನದೇಖ್ಯು. ಹಮ್ಕೆ ಇವ್ಣೇಸ್ ಅಪ್ಣ ಅದ್ಮಿಖ್ಹಾರಾನ ಸಾಕ್ಷಿಹುಯಿರ‍್ಹುಸ್.
ACT 13:32 ದೇವ್ ಹಮಾರ ಗುರುಗುರಬ್‌ಲ್ಯನ ಕರ‍್ಯೊತೆ ವಾಗ್ದಾನ್ನಿ ಬಾರೇಮ ಸುವಾರ್ತೆನ ಹಮೆ ತುಮೂನ ಬೋಲಿಯೇಸ್.
ACT 13:33 ತುಮೆ ಇವ್ಣ ಖಾನ್‍ದಾನ್‍ವಾಳ ಹುಯಿರ‍್ಹಾಸ್. ದೇವ್ ಯೇಸುನ ಮರ‍್ಯಹುಯಮಾಥು ಜೂತೊಕರೀನ್ ಉಠಾಡಾಥಿ ಯೋ ವಾಗ್ದಾನ್ನ ಅಪ್ಣಖ್ಹಾಜೆ ಚ಼ಲೈರಾಖ್ಯೊಸ್. ಅನಿ ಬಾರೇಮ ಬೇನಿ ಕೀರ್ತನೇಮ ಅಮ್ ಲೀಖೈರ‍್ಹುಸ್. ‘ತೂ ಮಾರೊ ಛಿಯ್ಯೊ ಹಮ್ಕೇಸ್ ಮೇ ತುನ ಬಾ ಹುಯಿರ‍್ಹೊಸ್.’
ACT 13:34 ದೇವ್ ಯೇಸುನ ಮರ‍್ಯಹುಯಮಾಥು ಜೂತೊಕರೀನ್ ಉಠಾಡ್ಯೊತೆ ಇನಖ್ಹಾಜೆ, ಯೋ ಬಿಜು಼ ಕದೇಬಿ ಮಖ್ಹಾಣ್ಯಮ ಪೇಶಿನ್ ಖ್ಹಡ್‍ಶೆಕೊಯ್ನಿ ಕರಿ ಬೋಲಾನಿ ಬಾರೇಮ ದೇವ್ನೆ ಅಮ್ ಬೋಲಿರಾಖ್ಯುತೆ ಶಾತ್‌ಕತೊ; ಮೇ ಖ್ಹಚ್ಚೆಂಬಿ ದಾವೀದನ ಕರ‍್ಯೊತೆ ವಾಗ್ದಾನ್ನ ವಾರ್ಖ್ಹಾ ಅಖ್ಖಾನ ತುಮುನಾಬಿ ದೆವುಸ್.” ಯೊ ವಿಶ್ವಾಸ್‌ನುಸ್ ಕರಿ ಬೋಲೆಜಾ಼ಯ್‌.
ACT 13:35 ‘ತೂ ತಾರ ವಿಶ್ವಾಸ್‌ನೊ ಸೇವಕ್‌ನ ಮಖ್ಹಾಣ್ಯನ ಖ್ಹಡ್ವಾನ ಮ್ಹೇಲಿಶ್‍ಕೊಯ್ನಿ’ ಕರಿ ಬೋಲಿರಾಖ್ಯೊಸ್.
ACT 13:36 ದಾವೀದ್‌ನೆ ಜಿವ್ತೊಥೋತೆ ದನ್‌ಖ್ಹಾರು ದೇವ್ನಿ ಚಿತ್ತಾನಿಘೊಣಿ ಜಿವ್ಯೊ. ಇನಪಾರ್ ಯೊ ಮರಿಗಯೊ,ದಾವಿದನ ಇನ ಗುರುಖ್ಹಾರಾನಿ ಜೋ಼ಡ್ಮ ಮಖ್ಹಾಣ್ಯು ಕರ‍್ಯು. ಇನಿ ಶರೀರ್ ಖ್ಹಡಿಗಯು.
ACT 13:37 ಕತೋಬಿ ದೇವ್ ಮರಣ್‌ಥು ಜಿವ್ತೊಹುಯಿನ್ ಉಠ್ಯೊತೆ ಯೇಸುನು ಶರೀರ್ ಮಖ್ಹಾಣ್ಯಮ ಖ್ಹಡೈಗಯುಕೊಯ್ನಿ.
ACT 13:38 ಮೋಶೆನ ಧರ್ಮಶಾಸ್ತ್ರಥೀಸ್ ತುಮೆ ಛುಟ್ಕಾರ್‌ ಹುಯಿನ್ ನೀತಿವಾಳಕೊಯ್ನಿ ಕರಿ ಬೋಲೈರ‍್ಹಾಸ್.ಇನಖ್ಹಾಜೆ ಭೈಯೇವೊ, ಆ ತುಮೂನ ಮಾಲುಮ್ ರ‍್ಹವಾದೆ; ಯೇಸುಥೀಸ್ ತುಮಾರಿ ಪಾಪ್ನ ಕ್ಷಮಾಪಣ್ ಮಳ್‌ಶೆಕರಿ ಬೋಲುಸ್.
ACT 13:39 ಅನಖ್ಹಾಜೆಸ್ ಯೇಸುಮ ವಿಶ್ವಾಸ್ ಕರಾವಾಳ ಹರೇಕ್‍ಜ಼ಣಾನ ಇನೇಥಿಸ್ ಇವ್ಣ ಅಖ್ಖಾಪಾಪ್‍ನ ಕ್ಷಮಾಪಣ್ ಮಳ್‍ಶೆ. ಧರ್ಮಶಾಸ್ತ್ರಥಿ ತುಮಾರಿ ಪಾಪ್ನ ಛೋ಼ಡಾವನ ಹುವಾಕೊಯ್ನಿ.
ACT 13:40 ಇನಖ್ಹಾಜೆ ಪ್ರವಾದಿಖ್ಹಾರನ ದಪ್ತರ್‌ಮ ಬೋಲೈರ‍್ಹುತೆ ತುಮೂನ ನಾಚಾ಼ಲ್ನು ತಿಮ್ ದೇಖಿಲೇವೊ. ಯೋ ಶಾತ್‍ಕತೊ;
ACT 13:41 ‘ಹಂದೇಖೊ ಚಿಂಘಾವವಾಳವೊ, ಆಶ್ಚರ್ಯ ಕರ್ತಹುಯಿನ್ ನಾಶ್‍ಹುಯಿಜಾ಼ವೊ. ತುಮಾರ ಹಗಾಮ್ಮ ಮೇ ಏಕ್‌ ಕಾಮ್ ಕರೀಶ್; ಬಿಜೆಕ್‍ಜ಼ಣೊ ಇನ ಛೋ಼ಡಿವತಾಳ್ಯೊ ತೋಬಿ ಇನ ತುಮೆ ವಿಶ್ವಾಸ್ ಕರ್ಶು ಕೊಯ್ನಿ!’ ಕರಿ ಬೋಲ್ಯೊ.
ACT 13:42 ಪೌಲ,ಬಾರ್ನಬ ಸಬಾಮಂದಿರ್‌ಮಾಥು ಜಾ಼ವಾನಿ ವಖ್ಹ್‌ತೆ ಆ ವಾತೆನಿ ಬಾರೇಮ ಬಿಜೂ಼ಬಿ ಜಾ಼ಖ್ಹತ್ ಹಮೂನ ಬೋಲಿ ದ್ಯವಾನಖ್ಹಾಜೆ ಅಗ್‍ಲ್ಯ ಸಬ್ಬತ್‌ ದನ್‌ಲಗು ಪಾಛ಼ ಆವ್ಣುಕರಿ ಅದ್ಮಿಖ್ಹಾರಾನೆ ಇವ್ಣುನ ಬೋಲಿಲಿದು.
ACT 13:43 ಸಭೆ ಖ್ಹತಮ್ ಹುವಾದಿನ್ ಕೈಏಕ್ ಯೆಹೂದ್ಯರ್ ಖ್ಹಾರು ಹಿಜ಼್ಜಾಥೂತೆ ಬಾರ್ನಬನ ಪೀಠೆಗಯು. ಯೆಹೂದ್ಯನಿ ಜಾ಼ತ್ಮಮಳ್ಯುಹುಯು ಅಜು಼ ಯೆಹೂದ್ಯರ್‌ಕಾಹೆತೆ ಇವ್ಣೆ ಇನಿ ಜೋ಼ಡ್ಮಥು. ಜಾ಼ಥ್ಥಿ ಜಾ಼ತ್‍ ಬದಲ್ಯುಹುಯು ಇವ್ಣೆಜಿನೂಬಿ ಖ್ಹಾಚದೇವ್ನ ಆರಾದನೆ ಕರ್ತುಥು. ಪೌಲ ಬಾರ್ನಬ ಇವ್ಣಿ ಜೋ಼ಡ್ಮ ವಾತ್ ಬೋಲಿನ್, ದೇವ್ನಿ ವಾರ್ಖ್ಹಮಾಸ್ ವಿಶ್ವಾಸ್‌ರಾಖಿನ್ ಅಗಾಡಿ ಭಡ್ನುಕರಿ ಇವ್ಣುನ ಹುಮ್ಮಖ್ಹ್‌ ಕರ‍್ಯಾ.
ACT 13:44 ಅಗಲ್ಯ ಸಬ್ಬತ್ ದನ್ನೆ ಪ್ರಭುನು ವಚನ್ ಖ್ಹಮ್‌ಜಾ಼ನಖ್ಹಾಜೆ ಘಣುಜ಼ಣು ಖ್ಹಯೇರ‍್ನು ಅದ್ಮಿಖ್ಹಾರು ಆಯಿನ್ ಭರಾಯು.
ACT 13:45 ಅನದೆಖ್ಯುತೆ ಯೆಹೂದ್ಯರ್ ಖ್ಹಾರಾನೆ ಘಣು ಬಳಾಪೊಕರಿನ್ ಪೌಲನೆ ಬೋಲ್ಯೊತೆ ವಾತೆನ ವಿರೋದ್ ಹುಯಿನ್ ಅಬ್ಬಾಜ಼ಬ್ಬಿಥಿ ದೂಷಣೆನಿ ವಾತೆಬೋಲ್‍ತು ರ‍್ಹಿಯು.
ACT 13:46 ಕತೋಬಿ ಪೌಲ,ಬಾರ್ನಬನೆ ಜಾ಼ಖ್ಹತ್ ಹಿಮ್ಮಥ್ಥಿ ವಾತೆಬೋಲಿನ್, “ಹಮೆ ದೇವ್ನಿ ವಚನ್ ಯೆಹೂದ್ಯರ್ ಹುಯಿರಾತೆ ತುಮೂನ ಪಹಿಲೆ ಬೊಲ್ನುಸ್‍ ಬೋಲ್ನುಥು. ಕತೋಬಿ ತುಮೆ ಇನ ಧಕೇಲಿದಿನ್ ಹರ್‌ಹಮೇಶಾನಿ ಜಿ಼ಂದ್‌ಗಿ ಕೋ ಮಳ್‍ಶೇನಿಕರಿ ತೀರ್ಪ್‌ ಕರಿಲಿದಾತೆ ಇನಖ್ಹಾಜೆ, ಹಮೆ ಅಲ್ಹಾವ್‌ ಜಾ಼ತ್‍ವಾಳಭಣಿ ಜ಼ಯೇಸ್.
ACT 13:47 ಶನಕತೊ ಪ್ರಭುನೆ ದಿದೋತೆ ಹುಕುಮ್‌ ಅಮ್‍ ಛಾ಼, ‘ಜಗತ್ನೊ ಖ್ಹರ್ತಿಲಗು ಛಾ಼ತೆ ಅದ್ಮಿಖ್ಹಾರಾನ ತೂ ರಕ್ಷಕ್ ಹುಯಿರ‍್ಹೇವ್ಣು ಕರಿ ಮೇ ತುನ ಯೆಹೂದ್ಯರ್‌ಕಾಹೆತೆ ಅದ್ಮಿನ ಉಜಾ಼ಳು ಕರಿ ಬಣೈರಾಖ್ಯೊಸ್.”
ACT 13:48 ಪೌಲನಿ ಆ ವಾತೆನ ಖ್ಹಮ್‍ಜ್ಯುತೆ ಅಲ್ಹಾವ್‌ ಅದ್ಮಿಖ್ಹಾರು ಘಣು ಖುಷಿಕರೀನ್ ಪ್ರಭುನಿ ವಾತೇನಖ್ಹಾಜೆ ಸ್ತುತಿ ಕರ‍್ಯು. ಹಮೇಶಾನಿ ಜಿ಼ಂದ್‌ಗಿ ಲೀಲ್ಯಾವನ ಚೂ಼ಣೈರ‍್ಹುತೆ ಖ್ಹಾರೂಸ್ ವಿಶ್ವಾಸ್ ಕರ‍್ಯು.
ACT 13:49 ಪ್ರಭುನಿ ವಚನ್ನ ಯೋ ಖ್ಹಯೇರ‍್ನಿ ಅಖ್ಖಿಸ್‍ಬಾಜು಼ ಫೈಲಾಯು.
ACT 13:50 ಕತೋಬಿ ಯೆಹೂದ್ಯರ್ ಖ್ಹಾರು ಥೋಡಿ ಇವ್ಣಿ ಜಾ಼ತ್ನಿ ಭಕ್ತೆ ಶೌಕಾರ್ ತಯೇಡಾವ್‍ನ ಅಜು಼ ಖ್ಹಯೇರ‍್ನ ಗಲ್‌ಢಖ್ಹಾರು ದೇವ್ನ ಆರಾದನೆ ಕರುಕರ್ತುಥು. ಇವ್ಣೆ ಖ್ಹಾರು ಮಳಿನ್ ಪೌಲ ಬಾರ್ನಬನ ಉಪ್ಪರ್ ಇರಾದೊ ಕರ್ನುತೆ ತಿಮ್ ಇವ್ಣುನ ವಹೇರ‍್ಯ ಬಣ್ಣುತೆ ತಿಮ್ ಕರೀನ್, ಪೌಲ ಬಾರ್ನಬನ ಯೊ ತಬರ್‌ಖಾಥು ಭಾರ್‌ ನಖ್ಹಾಡಿದಿದು.
ACT 13:51 ಇನಖ್ಹಾಜೆ ಪೌಲ,ಬಾರ್ನಬನೆ ಇವ್ಣುನ ಝೇತೈನ್‌ ಇವ್ಣ ಗೋಡಾನಿ ಧೂಳ್‌ನ ಝ಼ಟ್ಕಿನಾಖಿದೀನ್, ಇಕೋನ್ಯ ಖ್ಹಯೇರ‍್ನ ಗಯ.
ACT 13:52 ಅಂತಿಯೋಕ್ಯಮ ಥೂತೆ ವಿಶ್ವಾಸಿಖ್ಹಾರು ಖ್ಹುಶಿಥಿ ಥು. ಬಿಜು಼ ಪವಿತ್ರಾತ್ಮಥಿ ಭರೈರೂಥು.
ACT 14:1 ಪೌಲಬಿ ಬಾರ್ನಬ ಇಕೋನ್ಯ ಖ್ಹಯೇರ‍್ನ ಜೈ಼ನ್, ಹರೇಕ್ ಖ್ಹಯೇರ್‌ಮ ಇವ್ಣೆ ಕರ್ತಥಾತೆ ತಿಮ್ಮಸ್ ಹಜ್ಜಾ಼ಬಿ ಯೆಹೂದ್ಯರ‍್ನು ಸಬಾಮಂದಿರ್‌ಮ ಜೈ಼ನ್ ಅದ್ಮಿಖ್ಹಾರಾನ ಬೋಧನೆ ಕರ‍್ಯಾ. ಪೌಲ, ಬಾರ್ನಬನಿ ಶನ್‍ಗಾರ‍್ನಿ ಬೋಧನೆನ ಖ್ಹಮ್‌ಜಿನ್‌ ಕೈಯೇಕ್ ಯೆಹೂದ್ಯರ್ ಅಜು಼ ಗ್ರೀಕ್‍ವಾಳು ಯೇಸುಕ್ರಿಸ್ತನ ವಿಶ್ವಾಸ್‍ಕರ‍್ಯು.
ACT 14:2 ಕತೋಬಿ ವಿಶ್ವಾಸ್ ಕರ‍್ಯುಕೊಂತೆ ಯೆಹೂದ್ಯರ್‌ನೆ ಅಲ್ಹಾವ್‌ ಅದ್ಮಿಖ್ಹಾರಾನ ವಿಶ್ವಾಸಿ ಭೈಯೇನ ವಿರೋದ್ ಉಠಾಡಿ ಭೀರಾಖ್ಯು.
ACT 14:3 ಅಮ್‍ರ‍್ಹಾವಮ ಇವ್ಣೆ ಘಣಾದನ್ ರ‍್ಹೀನ್ ಪ್ರಭುನಿ ಬಾರೇಮ ಹಿಮ್ಮಥ್ಥಿ ವಾತೆಬೋಲ್ಯು. ಪ್ರಭು ಇವ್ಣಹಾತೆ ಖ್ಹಣೇದ್‍ನು ಕಾಮ್ ಬಿಜು಼ ಅದ್ಭುತ್‌ಕಾಮ್‍ಅಖ್ಖು ಕರೀನ್ ಇನಿ ವಾರ್‌ಖ್ಹಾನಿ ವಚನ್ನ ವತಾಳಿಲಿದೊ.
ACT 14:4 ಇನಖ್ಹಾಜೆ ದೇವ್ನ ಉಪ್ಪರ್ ಭರೋಖ್ಹೊ ರಾಖಿನ್ ಹಿಮ್ಮಥ್ಥಿ ವಾತೆಬೋಲ್ತುಥು. ತದೆ ಯೊ ಖ್ಹಯೇರ‍್ನ ಅದ್ಮಿಮ ಥೋಡು ಯೆಹೂದ್ಯರ್‌ನಿ ವಾತೆನಾಬಿ ಬಿಜು಼ ಥೋಡುಜ಼ಣು ಅಪೊಸ್ತಲ ಭಣಿವಾಳಾನಿ ವಾತೆನಾಬಿ ವಿಶ್ವಾಸ್ ಕರ್ತುಥೂತೆ ಇನಖ್ಹಾಜೆ ಇವ್ಣಮಾಸ್ ಬೇ ಭಾಗ್‍ಹುಯು.
ACT 14:5 ಅಲ್ಹಾವ್‌ ಅದ್ಮಿಬಿ ಯೆಹೂದ್ಯರ್‌ಮಾನು ಥೋಡುಜ಼ಣು ಇವ್ಣ ಅದಿಪತಿ ಖ್ಹಾರನಿ ಜೋ಼ಡ್ಮ ಮಳಿನ್, ಪೌಲಬಿ ಬಾರ್ನಬನ ಬಂಡೊ ಫೇಕಿನ್ ಮಾರ‍್ನುಕರಿ ಥು.
ACT 14:6 ತದೆ ಪೌಲ,ಬಾರ್ನಬನೆ ಅನ ಮಾಲುಮ್ ಕರಿಲಿನ್ ಯೋ ಖ್ಹಯೇರ‍್ನ ಮ್ಹೇಲಿದಿನ್ ಲುಕವೋನ್ಯಮ ಥೂತೆ ಲುಸ್ತ್ರ ಅಜು಼ ದರ್ಬೆಕರಿ ಖ್ಹಯೇರ್‌ನಾಬಿ,
ACT 14:7 ಅಜು಼ ಯೋ ಖ್ಹಯೇರ‍್ನ ಅಶ್‌ಪೀಶ್‍ನು ತಬರ್‌ಖಾನ ಜೈ಼ನ್ ಹಿಜ್ಜಾ಼ ಇವ್ಣೆ ಸುವಾರ್ತೆ ಖ್ಹಮ್‌ಜಾ಼ಡ್ಯು.
ACT 14:8 ಲುಸ್ತ್ರಖ್ಹಯೇರ‍್ಮ ಗೋಡಾವ್‍ಮ ಶಕತ್‌ಕೊಂತೆ, ಪೈದಾಖ್ಹ್‌ಥು ಲಂಗ್ಡೊ ಹುಯಿರೋತೆ ಏಕ್‍ಜ಼ಣೊ ಬೆಠೋಥೊ.
ACT 14:9 ಕದೇಬಿ ಚಾ಼ಲ್ತೋಥೊಕೊಂತೆ ಯೋ ಅದ್ಮಿ ಬೇಠು ಬೇಠು ಪೌಲನಿ ವಾತೆನ ಪೌಲನಿ ವಾತೆನ ಖ್ಹಮ್‌ಜು಼ ಕರ್ತುಥು. ಪೌಲನೆ ಇನ ಠರ್‌ಕೈನ್ ದೇಖಿನ್, ದೇವ್ ಗುಣ್‌ಕರ್ಶೆ ಕರಿ ಬೋಲಾನಿ ವಿಶ್ವಾಸ್ ಇನಾಮಥೂತೆ ಇನ ಮಾಲುಮ್ ಕರಿಲಿನ್,
ACT 14:10 ಯೋ ಲಂಗ್ಡಾನ “ಉಟ್ ಗೋಡಟೇಕಿ ಭೀರೆ!” ಕರಿ ಜೋ಼ರೇಖ್ಹು ಬೋಲ್ಯೊ. ತದೇಸ್‌ ಯೋ ಅದ್ಮಿ ಕೂದಿ ಭೀರಿನ್ ಚಾ಼ಲಲಗ್ಯು.
ACT 14:11 ಪೌಲನೆ ಕರ‍್ಯೊತೆ ಆ ಕಾಮ್ನ ದೇಖಿನ್ ಹಿಜ್ಜಾ಼ನ ಅದ್ಮಿಖ್ಹಾರಾನೆ, “ದೇವ್ ಖ್ಹಾರು ಅದ್ಮಿನು ರೂಪ್‍ಲೀನ್ ಅಪ್ಣಕನ ಉತ್ರಿನ್ ಆಯ” ಕರಿ ಇವ್ಣೆ ಲುಕವೋನ್ಯ ವಾತೆಮ ಚಿಕ್ರಾಣ್ ಮ್ಹೇಲ್ಯು!
ACT 14:12 ಅದ್ಮಿಖ್ಹಾರಾನೆ, ಬಾರ್ನಬನ ‘ದ್ಯೌಸ್’ ದೇವ್‍ಕರಿಬಿ, ಮುಖ್ಯ ಬೋಧನೆ ಕರಾವಾಳೊ ಥೋತೆ ಪೌಲನ ‘ಹೆರ್ಮೆ’ ದೇವ್‍ಕರಿಬಿ ಬೋಲ್ಯು.
ACT 14:13 ದ್ಯೌಸ್‌ಕರಿ ಥೂತೆ ದೇವ್ನಿ ಘುಡೀನಿ ಖ್ಹಾಮ್ಣೆನಿ ಝ಼ಗೋಮ ಪೂಜಾರಿನೆ ಥೋಡ ಢಾಂಡನಾಬಿ, ಫೂಲ್ನ ಹಲ್ಡಾನಾಬಿ ಗಾಮ್ನಬಾಕಲ್‌ಕನ ಲೀನ್ ಖ್ಹಾರಾಅದ್ಮಿನಿ ಜೋ಼ಡೆ ಆಯಿನ್ ಪೌಲ ಬಾರ್ನಬನ ಖ್ಹಾಮ್ಣೆ ಬಲಿ ಛ಼ಡಾವ್‍ಣುಕರಿ ಥು.
ACT 14:14 ಅನ ಖ್ಹಮ್‍ಜ್ಯಾತೆ ಅಪೊಸ್ತಲ ಹುಯಿರಾತೆ ಪೌಲ, ಬಾರ್ನಬನೆ ಇವ್ಣ ಲುಂಗ್ಡಾನ ಫಾಡಿಲೀನ್, ಅದ್ಮಿನಿ ಝೂ಼ಂಡ್‌ಮ ಪೇಶಿನ್, ಅಮ್ ಚಿಕ್ರಿನ್ ಬೋಲ್ಯ;
ACT 14:15 ಲೋಗ್ ತುಮೆ ಅಮ್ ಶನ ಕರುಕರಸ್ತೆ? ಹಮೇಬಿ ತುಮಾರಿನಿ ತರಾಸ್ ಅದ್ಮಿ. ತುಮುನ ಸುವಾರ್ತೆ ಬೋಲಾನ ಆಯಾತೆ, ತುಮೆ ಅಥ್ರಾನು ಫಾಯಿದೊಕೊಂತೆ ಕಾಮ್ನ ಮ್ಹೇಲಿನ್ ಆಬ್‌ ಧರ್ತಿನ, ದರ‍್ಯಾವ್‌ನಾಬಿ, ಇನಾಮ ಛಾ಼ತೆ ಖ್ಹಾರೂಸ್ ಉಬ್‌ಜಾ಼ಯೋತೆ ಜಿವ್ತೊಜಾನ್ ರ‍್ಹವಾಳೊ ದೇವ್ನಿ ಸುವಾರ್ತೆನ ಬೋಲಾನ ಹಮೆ ಆಯಾತೆ.
ACT 14:16 ಖ್ಹತಮ್ ಹುಯಿಗೂತೆ ಹಗಾಮ್ಮ ದೇವ್ನೆ ಖ್ಹಾರ ಅದ್ಮಿವೋನ ಇವ್ಣಿ ಇವ್ಣಿ ಮರ್ಜಿಥಿ ಇವ್ಣುನ ಹೋಣುತೆ ಮಾರಗ್‌ಪರ್ ಚಾ಼ಲಾನ ಮ್ಹೆಲಿದಿದೊ.
ACT 14:17 ಕತೋಬಿ ಇನಿ ಬಾರೇಮ ಸಾಕ್ಷಿದಿದೊಕೊಂತೆ ಕೊಯ್ನಿ; ಮದತ್ ಕರ್ತೊಆಯೋತೆ ಇನೇಸ್‌ ತುಮೂನ ಸೊರ್ಗಥೊ ಪಾಣಿನಾಬಿ ಖ್ಹುಗ್ಗೀನ ದನ್‍ಬಿ ಅನಾಜ಼್ ದೀನ್ ತುಮಾರ ದಿಲ್ನ ಖುಷಿಥಿ ಭರ‍್ಯೊ, ಕರಿ ಬೋಲ್ಯೊ.
ACT 14:18 ಇವ್ಣೆ ಆ ವಾತೆ ಬೋಲ್ಯೊತೋಬಿ ಅದ್ಮಿಖ್ಹಾರು ಇವ್ಣುನಖ್ಹಾರು ಬಲಿ ಚ಼ಢಾವಾನು ವಿರೋದ್ ಹುಯು.
ACT 14:19 ಇನಕೇಡೆಥು ಥೋಡು ಯೆಹೂದ್ಯರ್, ಅಂತಿಯೋಕ್ಯಥೂಬಿ ಅಜು಼ ಇಕೋನ್ಯಥು ಐನ್ ಪೌಲನ ವಿರೋದ್ ಅದ್ಮಿಖ್ಹಾರಾನ ಭೀರಾಖಿನ್, ಪೌಲನಪರ್ ಬಂಡೊಫೇಕಿನ್ ಯೋ ಮರಿಗಯೊಕರಿ ಲಾಝಿನ್ ಖ್ಹಯೇರ್‌ಥಿ ಭಾರ್‌ ಖೇಚಿಲಾಯಿ ನಾಖೀದಿದು.
ACT 14:20 ಕತೋಬಿ ಶಿಷ್ಯರ್‌ ಇನ ಅಶ್‌ಪಿಶ್‍ ಭರೈನ್ ಆಯ. ತದೆ ಯೋ ಉಠೀನ್ ಖ್ಹಯೇರ್‌ಮ ಗಯೊ. ಇನವ್ಹಾಣೆ ಬಾರ್ನಬನಿ ಜೋ಼ಡೆ ದೆರ್ಬೆ ಖ್ಹಯೇರ‍್ನ ಗಯ.
ACT 14:21 ಪೌಲಬಿ ಬಾರ್ನಬನೆ ಯೋ ಖ್ಹಯೇರ್‌ಮ ಸುವಾರ್ತೆ ಬೋಲಿನ್ ಕೈಯೇಕ್ ಜ಼ಣಾನ ಶಿಷ್ಯರ್‌ ಬಣೈನ್ ಹುಯಿಗು ತದೆ, ಪಾಛ಼ ಫರೀನ್ ಲುಸ್ತ್ರನಾಬಿ ಇಕೋನ್ಯನಾಬಿ ಅಂತಿಯೋಕ್ಯ ಖ್ಹಯೇರ‍್ನ ಗಯ.
ACT 14:22 ಹಿಜ಼್ಜಾನ ಶಿಷ್ಯರ‍್ನ ಭಾಲಿದೀನ್ ವಿಶ್ವಾಸ್ಮ ಘಟ್ ಭೀರಾವನ ಹಿಮ್ಮತ್ ದಿದಾ. “ಅಪ್ಣಿ ದೇವ್ನಿ ರಾಜ್ಯನ ಘಣು ಮುಶ್ಕಿಲ್‍ನ ಮಹಿಕರಿ ಜಾ಼ವ್ಣುಪಡಸ್” ಕರಿ ಬೋಲಿಲಿದ.
ACT 14:23 ಪೌಲ,ಬಾರ್ನಬನೆ ಹರೇಕ್ ಸಭೆನ ಇವ್ಣಿ ಹುಕುಮ್‌ಲೀನ್ ಯೋ ಸಬೆನಖ್ಹಾಜೆ ಕರಿ ಶಾಣಖ್ಹಾರಾನ ಚೂ಼ಣ್ಯ. ಇವ್ಣೆ ಉಪವಾಸ್ ರ‍್ಹೀನ್ ಪ್ರಾರ್ಥನೆ ಕರೀನ್ ಇವ್ಣೆ ವಿಶ್ವಾಸ್ ಕರಿರಾಖ್ಯಥಾತೆ ಶಾಣಾಖ್ಹಾರನ ಪ್ರಭುನ ಹಾತ್ಮ ದಿದಾ.
ACT 14:24 ಪೌಲ,ಬಾರ್ನಬ ಪಿಸಿದ್ಯ ತಬರ್‌ಖಾಥು ಪಂಫುಲ್ಯ ತಬರ್‌ಖಾನ ಜೈ಼ನ್,
ACT 14:25 ಇನ ಮಳಿರ‍್ಹೂತೆ ಪೆರ್ಗೆ ಖ್ಹಯೇರ್‌ಮ ಪ್ರಭುನಿ ವಚನ್ ಬೋಲಿನ್ ಹಿಜ್ಜಾ಼ಥು ಅತ್ತಾಲಿಯ ಖ್ಹಯೇರ‍್ನ ಗಯ.
ACT 14:26 ಹಿಜ್ಜಾ಼ಥು ಇವ್ಣೆ ಸಿರಿಯ ಅಂತಿಯೋಕ್ಯನ ದರ‍್ಯಾವ್‍ನ ಮಾರಗ್‍ಥಿ ಗಯ. ಹಜ಼್ಜಾಲಗು ಇವ್ಣೆ ಕರೀನ್ ಖತಮ್‍ ಕರ‍್ಯಾತೆ ಸೇವೆನ ಕಾಮ್ನಖ್ಹಾಜೆ, ಇವ್ಣುನ ದೇವ್ನೆ ವಾರ್‌ಖ್ಹೊಕರೀನ್ ಮೋಕ್‍ಲ್ಯುಥೂತೆ ಕಾಮ್ ಆಸ್ ಖ್ಹಯೇರ್‌ಮ ಪೂರ ಹುಯೂತೆ.
ACT 14:27 ಪೌಲ,ಬಾರ್ನಬ ಅಂತಿಯೋಕ್ಯನ ಆಯಿನ್ ಹಿಜ಼್ಜಾನಿ ಸಬೆವಾಳನ ಎಕ್ಟು ಕರಿನ್, ದೇವ್ನೆ ಇವ್ಣಿಜೋ಼ಡೆ ರ‍್ಹೀನ್ ಕರ‍್ಯೊತೆ ಅಖ್ಖಾಕಾಮ್ನಿ ಬಾರೇಮ ಇವ್ಣುನ ಖ್ಹಮ್‍ಜಾ಼ಡ್ಯ. ಬಿಜು಼ “ಯೆಹೂದ್ಯರ್‌ಕಾಹೆತೆ ಇವ್ಣೇಬಿ ವಿಶ್ವಾಸ್ ಕರಾನಿತರ ದೇವ್ ಬಾಕಲ್ ಉಖ್ಡಿರಾಖ್ಯೋಸ್!” ಕರಿ ಬೋಲಿವತಾಳ್ಯೊ.
ACT 14:28 ಹಿಜ್ಜಾ಼ ಪೌಲ, ಬಾರ್ನಬ ವಿಶ್ವಾಸಿನ ಜೋ಼ಡೆ ಘಣಾದನ್ ರ‍್ಹಯ.
ACT 15:1 ತದೆ ಥೋಡು ಅದ್ಮಿಖ್ಹಾರು ಯೂದಾಯಥು ಅಂತಿಯೋಕ್ಯ ಖ್ಹಯೇರ‍್ನ ಆಯು. ‘ಮೋಶೆನಿ ದಪ್ತರ್‌ಮ ಬೋಲೈರ‍್ಹಯುತೆ ಪರಕ್ಮ ತುಮೆ ಖ್ಹತ್ನ ನಾ ಕರಾಯತೊ ತುಮೂನ ರಕ್ಷಣೆ ಕೊಉಷೇನಿ’ ಕರಿ ಯೆಹೂದ್ಯರ್ ಕಾಹೆತೆ ಭೈಯೇನ ಬೋಲಿ ಒತಾಳು ಕರ್ತುಥು.
ACT 15:2 ಪೌಲ, ಬಾರ್ನಬನೆ ಆ ಉಪದೇಶ್‍ನ ವಿರೋದ್ ಕರಿನ್ ಇವ್ಣಿಜೋ಼ಡೆ ಅಬ್ಬಾಜ಼ಬ್ಬಿ ಬೋಲ್ಯ. ಆ ವಿವಾದ್ನಿ ಬಾರೇಮ ಅಪೊಸ್ತಲರ‍್ನಿ ಜೋ಼ಡೆ ಬಿಜು಼ ಗಲ್‌ಢಾವ್‌ನಿಜೋ಼ಡೆ ವಾತ್‍ಚೀತ್‍ ಕರಾನ ಪೌಲ,ಬಾರ್ನಬ ಬಿಜು಼ ಅಲಕ್‍ ಥೋಡಜ಼ಣಾನ ಯೆರೂಸಲೇಮ್ನ ಮೋಕ್ಲಾನ ಸಬೆವಾಳು ನಿರ್ಧಾರ್ ಕರ‍್ಯು.
ACT 15:3 ಸಬೆವಾಳು ಇವ್ಣುನ ಮೋಕ್ಲಿ ಹುಯಿಜಾ಼ವಾದಿನ್ ಇವ್ಣೆ ಫೊಯಿನಿಕೆ, ಸಮಾರ್ಯ ತಬರ್‌ಖಾನಿ ವಾಟೆ ಜಾ಼ವಾನಿ ವಖ್ಹತ್‌ಮ ಅಲಕ್‌ ಅದ್ಮಿಖ್ಹಾರು ದೇವ್‌ಭಣಿ ಫರ‍್ಯುತೆ ಬಾರೇಮ ಹಿಜ಼್ಜಾಥೂತೆ ಭೈಯೇ ಖ್ಹಾರಾನ ಏಕೇಕ್‌ ವಾತ್ನಬಿ ಛೋ಼ಡಿ ಬೋಲಿವತಾಳಿನ್ ಇವ್ಣಖ್ಹಾರಾನ ಘಣು ಖ್ಹುಶಿಕರಾಯು.
ACT 15:4 ಪೌಲ,ಬಾರ್ನಬ ಯೆರೂಸಲೇಮ್‌ನ ಐನ್ ಸಬೆವಾಳನ ಅಪೊಸ್ತಲರ್ ಖ್ಹಾರಾನ ಸಬೇನು ಗಲ್‌ಢವ್‍ಖ್ಹಾರಾನ ಜೋ಼ಡ್ಮ ಮಳಿಜೈ಼ನ್ ದೇವ್ ಇವ್ಣಜೋ಼ಡೆ ರ‍್ಹಯಿನ್ ಕರ‍್ಯೊತೆ ಕಾಮ್‍ಖ್ಹಾರಾನ ಪೌಲ,ಬಾರ್ನಬನೆ ಇವ್ಣುನ ಬೋಲಿ ವತಾಳ್ಯು.
ACT 15:5 ಹಿಜ್ಜಾ಼ ಥೂತೆ ವಿಶ್ವಾಸಿ ಖ್ಹಾರಾಮ ಥೋಡು ಫರಿಸಾಯರ್‌ನ ಝೂ಼ಂಡ್‌‍ವಾಳುಬಿ ಥೂ. ಇವ್ಣೆ ಉಠಿಭೀರಿನ್ ವಿಶ್ವಾಸಿಕೊಂತೆ ಖ್ಹಾರು ಖ್ಹತ್ನ ಕರೈಲೇವ್ಣು. ಮೋಶೆನ ಧರ್ಮಶಾಸ್ತ್ರಕನ ಖ್ಹಾಮ್ಣೆ ಮುಡ್‌ಕ್ಯು ಝು಼ಕಾವ್ಣುಕರಿ ಅಪ್ಣೆ ಇವ್ಣುನ ಬೋಲ್‌ನು” ಕರಿ ಬೋಲ್ಯು.
ACT 15:6 ತದೆ ಅಪೊಸ್ತಲರ್ ಖ್ಹಾರು ಬಿಜು಼ ಗಲ್‌ಢಖ್ಹಾರು ಆ ವಾತೆನ ಬಾರೇಮ ಸೋಚಾನಖ್ಹಾಜೆ ಎಕ್ಟು ಹುಯು.
ACT 15:7 ಘಣಿ ವಖ್ಹತ್‌ಲಗು ವಾತ್‍ಚೀತ್‍ ಹುವಾನ ಬಾದ್ಮ ಪೇತ್ರ ಉಠಿಭೀರಿನ್ ಇವ್ಣುನ, “ಮಾರ ಭೇನೆ ಭೈಯೇವೊ, ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಸುವಾರ್ತೆ ಬೋಲಾನಖ್ಹಾಜೆ ತುಮಾರ ಬೀಚ್ಮಾಥು ದೇವ್ನೆ ಮನ ಘಣದನ್ನಪಾರಸ್ ಚೂ಼ಣಿರಾಖ್ಯೊಸ್, ಅಜು಼ ಇವ್ಣೆ ಮಾರೇಥಿ ಸುವಾರ್ತೆ ಖ್ಹಮ್‌ಜಿನ್‌ ದೇವ್ನ ವಿಶ್ವಾಸ್ ಕರ‍್ಯು ತುಮುನ ಮಾಲುಮ್‌ಛಾ಼.
ACT 15:8 ಖ್ಹಾರ ಅದ್ಮಿನಿ ಸೋಚ್ನ ಖ್ಹಮಜ್ಯೊಹುಯೊ ದೇವ್ ಕಿಮ್ ಪವಿತ್ರಾತ್ಮನ ವರಾನ ಅಪ್ಣುನ ದೀರಾಖ್ಯೊಕಿ ತಿಮ್ ಇವ್ಣುನಾಬಿ ದೀನ್ ಸಾಕ್ಷಿದಿದೊ.
ACT 15:9 ಅತ್ರೇಸ್ ಕಾಹೆತೆ, ದೇವ್ನೆ ಅಪ್ಣುನಾಬಿ ಇವ್ಣುನಾಬಿ ಶನೂಸ್ ಗುಮಾನಿ ಕರ‍್ಯೊಕೊಂತೆ ಇವ್ಣ ದಿಲ್ನ ವಿಶ್ವಾಸ್‌ಥೀಸ್ ಶುದ್ದಿಕರ‍್ಯೊ.
ACT 15:10 ಅಮ್‍ರ‍್ಹವಾಪರ್, ಅಲ್ಹಾವ್‌ ವಿಶ್ವಾಸಿ ಶನ ಭೈಯೇವ್ನ ಖಾಂದಪರ್ ವಜ಼ನ್ನೊ ಭೋಜೊ ಶನ ಢೊವಾಡೊಸ್? ತುಮೆ ದೇವ್ನ ಇರಾದೊ ಛ಼ಡಾವಾನಿ ಕೋಶಿಶ್ ಕರುಕರಾಸ್ಕಿ ಶು? ಹಮೂನ ರ‍್ಹವೊ ಹಮಾರ ಗುರುಖ್ಹಾರಾನರ‍್ಹೇವೊ ಆ ಭೋಜೊ ಢೊವಾಡಯೆತ್ರೆ ಶಕತ್ ಕೋಥಿನಿ.
ACT 15:11 ಇನಖ್ಹಾಜೆ ಹಮೆರ‍್ಹೇವೊ ಅವ್ಣೆ ರ‍್ಹವೊ ರಕ್ಷಣೆ ಲೀಲ್ಯಾವಾನು, ಪ್ರಭುಹುಯಿರ‍್ಹೋತೆ ಯೇಸುನಿ ಗೋರ್‌ಥೀಸ್ ಕರಿ ಹಮೆ ವಿಶ್ವಾಸ್ ಕರಿಯೇಸ್” ಕರಿ ಬೋಲ್ಯೊ.
ACT 15:12 ತದೆ ಝೂ಼ಂಡ್ ಭರೈರ‍್ಹುಥೂತೆ ಖ್ಹಾರಾಸ್‌ನೆ ಆ ವಾತೆಖ್ಹಾರಿ ಖ್ಹಮ್‌ಜಿನ್‌ ಶೊಪೊ ಪಡೀಗು. ಬಾರ್ನಬ ಅಜು಼ ಪೌಲಥಿ, ದೇವ್ನೆ ಅಲ್ಹಾವ್‌ ಅದ್ಮಿಮ ಕರ‍್ಯೊತೆ ಖ್ಹಾರು ಖ್ಹಣೇದ್‍ನು ಕಾಮ್ನಾಬಿ, ಅದ್ಭುತ್‌ಕಾಮ್‌ನಾಬಿ ಬೋಲ್ಯುತೆ ಇನ ಕಾನ್‍ದೀನ್ ಖ್ಹಮ್‌ಜ್ಯು.
ACT 15:13 ಇವ್ಣೆ ವಾತ್ ಬೋಲಾನು ಭೀರಾಖಾದಿನ್ ಯಾಕೋಬನೆ, “ಮಾರ ಭೇನೆ ಭೈಯೇವೊ ಮಾರಿ ವಾತೆ ಖ್ಹಮ್‍ಜೊ,
ACT 15:14 ಯೆಹೂದ್ಯರ್‌ಕಾಹೆತೆ ಅದ್ಮಿನ ದೇವ್ನೆ ದೇಕ್‌ಭಾಲ್‌ ಕಿಮ್ ಕರ‍್ಯೊಕರಿ ಸಿಮೋನನೆ ಖ್ಹಮ್‍ಜಾ಼ಡಿರಾಖ್ಯೊಸ್. ಪಹಿಲಿಬಾರ್ ಯೆಹೂದ್ಯರ್‌ಕಾಹೆತೆ ಅದ್ಮಿನ ಏಕ್‌ ಜ಼ಣಾನ ದೇವ್ನೆ ಇನಿ ಕೃಪೆಥಿ ಸ್ವೀಕಾರ್ ಕರಿರಾಖ್ಯೊಸ್, ಇವ್ಣುನ ಇನು ಅದ್ಮಿಕರಿ ಕರಿಲಿದೊ.
ACT 15:15 ಪವಿತ್ರ ದಪ್ತರ್‌ಮ ಅಮ್ ಲಿಖೈರ‍್ಹುಸ್ ಪ್ರವಾದಿಖ್ಹಾರಾನಿ ವಾತೇಬಿ ಇನ ಮಾನಿಲೇವ್‍ ಕರಸ್ ಕಿಮ್‌ಕತೊ,
ACT 15:16 ಆ ಹುವಾದಿನ್ ಮೇ ಫರಿನ್ ದಾವೀದನ ರಾಜ್ಯನ ಪಾಛೊ಼ ಭಾಂದುಸ್. ಯೋ ರಡ್ಕಿಗಯೂತೆ ರಾಜ್ಯನ ಟುಕ್ಡಾವ್‍ನ ಮೇ ಪಾಛೊ಼ ಏಕ್ಟುಕರೀನ್ ಘಟ್‍ಥಿ ನವು ಬಣವುಸ್.
ACT 15:17 ತದೆ ಜ಼ಗ್‌ಜಾತ್‌ಮ ಉಭ್‍ರ‍್ಯುತೆ ಅದ್ಮಿಮ ಥೋಡು ಜ಼ಣು ಕತೊ ದೇವ್‌ನು ಅದ್ಮಿಕರಿ ಬೋಲೈರ‍್ಹುತೆ ಖ್ಹಾರೂಸ್ ಜ಼ಗ್‌ಜಾ಼ತ್‌ಬಿ ಪ್ರಭುನ ಢೂಂಡವಾಳು ಹುಯಿರುಸ್, ಯೆಹೂದ್ಯರ್‌ಕಾಹೆತೆ ಅದ್ಮಿನ ಮಾರು ಶೊಂತ್ ಕರೀಶ್.
ACT 15:18 ಶುರುಮಾಥು ಆ ಖ್ಹಾರು ಕಾಮ್ನ ಖ್ಹಮ್‌ಜಾ಼ಡ್ಯೊತೆ ಪ್ರಭು ಬೋಲುಕರಸ್, ಕರಿ ಲೀಖೈರ‍್ಹುಸ್.
ACT 15:19 “ಅಮ್‍ರ‍್ಹವಾಪರ್ ದೇವ್‌ಭಣಿ ಫರಾವಾಳ ಯೆಹೂದ್ಯರ್‌ಕಾಹೆತೆ ಅದ್ಮಿವೋನ ಅಡ್ಡಿ ನಾಕರ‍್ನು ಆ ಮಾರಿ ಖ್ಹೂಜ಼್‌.
ACT 15:20 ಇನ ಬದಲ್‍ಥಿ ಅಪ್ಣೆ ಇವ್ಣುನ ಏಕ್‌ ಚಿಟ್ಟಿ ಲೀಖ್ಯೆ; ಯೊ ಶಾತ್‍ಕತೊ ಮೂರತ್ನ ಝಾ಼ಳ್ ಉತಾರಹುಯನಾಬಿ, ವ್ಯಬಿಚಾರ್‌ಥಿಬಿ, ಬಿಜು಼ ಲ್ಹೋಯಿನಾಬಿ, ನ್ಹೇಟಿ ಭೀಚಿನ್ ಮಾರ‍್ಯಹುಯ ಜಿನಾವರ್‌ನಬಿ ನಾಖಾವ್ಣು ಕರಿ ಅಕ್ಕಲ್ ದೇವ್ಣು.
ACT 15:21 ಶನಕತೊ ಪೂರತ್‍ ಕಾಲಥು ಅಖ್ಖಾ ಖ್ಹಯೇರ್‌ಮ ಮೋಶೆನ ದಪ್ತರ್‌ನ ಬೋಧನೆ ಕರಾವಾಳು ಖ್ಹಾರು ಛಾ಼. ಕೈಏಕ್ ವರಖ್ಹ್ ಥು ಹರ್ ಸಬ್ಬತ್ ದನ್ಮ ಸಬಾಮಂದಿರ್‌ಮ ಮೋಶೆನಿ ವಾತೆಖ್ಹಾರಿ ಫಡವ್‍ಕರಸ್.” ಕರಿ ಬೋಲ್ಯೊ.
ACT 15:22 ತದೆ ಅಪೊಸ್ತಲರ್‌ಬಿ ಸಬೆನ ಗಲ್‌ಢಖ್ಹಾರಾಬಿ ಬಿಜು಼ ಸಬೇನು ಖ್ಹಾರೂಸ್, ಪೌಲ ಬಾರ್ನಬನಿ ಜೋ಼ಡೆ ಇವ್ಣಮಾಥುಸ್ ಥೋಡುಅದ್ಮಿನ ಚೂ಼ಣಿನ್ ಅಂತಿಯೋಕ್ಯ ಖ್ಹಯೇರ‍್ನ ಮೋಕಲ್ನುಕರಿ ತೀರ್ಮಾನ್ ಕರ‍್ಯು. ಇನಖ್ಹಾಜೆ ಬಾರ್ಸಬ ಕರಿ ಬೋಲೈರ‍್ಹೋತೆ ಯೂದನಾಬಿ, ಸೀಲನಾಬಿ ಚೂ಼ಣಿನ್,ಯೋ ಖ್ಹಾರಾನ ಮುಖ್ಯಖ್ಹಾರು ಕರ‍್ಯು.
ACT 15:23 ಇವ್ಣ ಹಾತ್ಮ ಲೀಖಿನ್ ದೀರಾಖ್ಯುಥೂತೆ ಶಾತ್‍ಕತೊ, ಭಯೇಖ್ಹಾರ ಹುಯಿರಾತೆ ಅಪೊಸ್ತಲರ‍್ನೇಬಿ ಗಲ್‌ಢಖ್ಹಾರಾನೇಬಿ ಅಂತಿಯೋಕ್ಯ, ಸಿರಿಯ, ಕಿಲಿಕ್ಯ ತಬರ್‌ಖಾಸ್‍ಮ ಛಾ಼ತೆ ಯೆಹೂದ್ಯರ್‌ಕಾಹೆತೆ ಭೈಯೇ ಭೇನೇನ ಹಮಾರಿ ಖ್ಹಲಾಮ್;
ACT 15:24 ಹಮಾರಕಂಥು ಆಯುತೆ ಥೋಡಜ಼ಣಾನೆ ಹಮಾರೇಥಿ ಖಿವಿ ಹುಕುಮ್‌ನ ಮಾನ್ಯುಕೊಂತೆ ಇವ್ಣಿ ವಾತೆಥಿ ತುಮರಾಮ ಸಮಾಧಾನ್‌ಕೊಂತೆ ಕರಿನಾಖಿನ್‌, ತುಮಾರ ದಿಲ್ನ ಕಲಾವ್ಣಿ ಕರ‍್ಯುಕರಿ ಹಮೂನ ಮಾಲುಮ್‌ ಪಡ್ಯು.
ACT 15:25 ಇನಖ್ಹಾಜೆ ಹಮೆಖ್ಹಾರಾಸ್ ಎಕ್ಟಹುಯಿನ್ ಥೋಡಜ಼ಣಾನ ಚೂ಼ಣಿನ್ ಪ್ಯಾರ್‌ನ ಭೈಯೆ ಪೌಲ, ಬಾರ್ನಬನ ಜೋ಼ಡ್ಮ ತುಮಾರಕನ ಮೋಕ್ಲು ಕರಿಯೇಸ್.
ACT 15:26 ಪೌಲ, ಬಾರ್ನಬನೆ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನ ನಾಮ್‌ಥಿ ಸೇವೆನಖ್ಹಾಜೆ ಇವ್ಣ ಜಿವ್ಣನಾಸ್ ದಿನಾಖ್ಯ.
ACT 15:27 ಇನಖ್ಹಾಜೆ ಹಮೆ ಯೂದನ ಬಿಜು಼ ಸೀಲನ ಇವ್ಣಿ ಜೋ಼ಡೆ ಮೋಕ್ಲಿರಾಖ್ಯೊಸ್. ಆ ಅಖ್ಖು ತುಮೂನ ಮ್ಹೋಡಾನಿ ವಾತೆಥಿ ಖ್ಹಮ್‍ಜಾ಼ಡ್‍ಶೆ.
ACT 15:28 ಆ ಹೋಣುತೆ ಖಾನುಲ್‌ನ ಮ್ಹೇಲಿನ್ ತುಮಾರಪರ್ ಬಿಜು಼ ಖಿವೂಬಿ ಭೋಜ಼್‌ನ ನಾಕ್ಣುನಾತೆ ತಿಮ್ ಪವಿತ್ರಾತ್ಮ ಅಜು಼ ಹಮೆ ಮಾನಿರಾಖ್ಯಸ್.
ACT 15:29 ಯೋ ಅಖ್ಖು ಖಿವುಕತೊ; ಮೂರತ್ನ ಝಾ಼ಳ್ ಉತಾರಹುಯನಾಬಿ, ಲ್ಹೋಯಿನಾಬಿ, ನ್ಹೇಟಿ ಭೀಚಿನ್ ಮಾರ‍್ಯಹುಯ ಜಿನಾವರ್‌ನಬಿ ನಾಖಾವ್ಣು. ಅಜು಼ ವ್ಯಬಿಚಾರ‍್ನು ಪಾಪ್ನಕಾಮ್‌ಥಿ ತುಮುನ ಬಚಾ಼ಡಿಲೆವೊ. ಆ ಅಖ್ಖು ನಾಕರ‍್ನುತೆ ತಿಮ್‌ ಹೊಷಾರ್‌ಥಿ ರ‍್ಹಯಾತೊ ತುಮೆ ಅಛ್ಛು಼ ಕರ್ಶು. ತುಮುನ ಅಛ್ಛು಼ ಹುವಾದೆ.
ACT 15:30 ಅಮ್ ಪೌಲ, ಬಾರ್ನಬ ಬಿಜು಼ ಯೂದ, ಸೀಲ, ಯೆರೂಸಲೇಮ್‍ಥು ಅಂತಿಯೋಕ್ಯ ಖ್ಹಯೇರ‍್ನ ಜೈ಼ನ್ ಹಿಜ಼್ಜ ವಿಶ್ವಾಸಿಯೆವ್ನಿ ಸಭೆನ ಭರೈನ್, ಯೋ ಚಿಟ್ಟಿ ಇವ್ಣುನ ದಿದು.
ACT 15:31 ತದೆ ಇನ ಜೋ಼ರೇಖ್ಹು ಪಢೀನ್‌ ಅಜು಼ ಯೊ ಭಾಲಿನಿ ವಾತೆ ಖ್ಹಮ್‌ಜಿನ್‌ ಇವ್ಣೆ ಘಣು ಖುಷಿಕರ‍್ಯು.
ACT 15:32 ಯೂದ ಬಿಜು಼ ಸೀಲಬಿ ಪ್ರವಾದಿ ಹುಯಿರ‍್ಹಥಾತೆಖ್ಹಾಜೆ ಇವ್ಣಿ ಕೈಯೆಕ್ಕಿ ಥರಾನಿ ವಾತೆ ಖ್ಹಮ್‌ಜಿನ್‌ ಭೇನೆ ಭೈಯೇವ್‌ಖ್ಹಾರಾನ ಹಿಮ್ಮತ್‌ ಆಯು.
ACT 15:33 ಯೂದ ಸೀಲ ಥೋಡದನ್ ಹಿಜ಼್ಜರ‍್ಹೀನ್ ಭಯೇಥಿ ಸಮಾಧಾನ್ನಿ ಆಶೀರ್ವಾದ್‌ ಲೀಲಿದ. ಅನಪಾರ್ ಇವ್ಣೆ ಪಾಛ಼ ಯೆರೂಸಲೇಮ್‌ನ ಇವ್ಣುನ ಮೋಕ್‍ಲ್ಯಥಾತೆ ವಿಶ್ವಾಸಿಕನ ಗಯ.
ACT 15:34 ಕತೋಬಿ ಸೀಲನ ಹಿಜ್ಜಾ಼ಸ್ ರ‍್ಹಯೂತೊ ಅಛ್ಛು಼ಕರಿ ಮಾಲುಮ್‌ಕರ‍್ಯೊ.
ACT 15:35 ಕತೋಬಿ ಪೌಲ, ಬಾರ್ನಬ ಅಂತಿಯೋಕ್ಯಮಾಸ್ ರ‍್ಹೀನ್,ಅಜು಼ ಕೈಯೇಕ್ ಜ಼ಣಾನಿ ಜೋ಼ಡೆ ಮಳಿನ್ ಸುವಾರ್ತೆ ಬೋಲ್ತಹುಯಿನ್ ಬಿಜು಼ ಪ್ರಭುನಿ ವಚನ್ನ ಅದ್ಮಿಖ್ಹಾರಾನ ಶಿಕಾಡ್ಯು.
ACT 15:36 ಥೋಡದನ್ ಹುವಾದಿನ್ ಪೌಲನೆ, “ಬಾರ್ನಬನ ಅಪ್ಣೆ ಕೈಯೇಕ್ ಖ್ಹಯೇರ್‌ಮ ಪ್ರಭುನಿ ವಚನ್ನ ಖ್ಹಮ್‍ಜಾ಼ಡ್ಯ. ಯೋ ಅಖ್ಖಾ ಖ್ಹಯೇರ್‌ಮ ಛಾ಼ತೆ ಅಪ್ಣ ಭೈ ಭೇನೆನ ಮಳಿನ್ ಇವ್ಣೆ ಕಿಮ್ ಛಾ಼ಕಿ ದೇಖಿನ್ ಐಯ್ಯೆ” ಕರಿ ಬೋಲ್ಯೊ.
ACT 15:37 ಬಾರ್ನಬನೆ ಮಾರ್ಕಕರಿ ಬೋಲೈರ‍್ಹೋತೆ ಯೋಹಾನ ಇವ್ಣಿ ಜೋ಼ಡ್ಮ ಬುಲೈಲಿ ಜಾ಼ವ್ಣುಕರಿ ಬೋಲ್ಯೊ.
ACT 15:38 ತದೆ ಪೌಲನೆ, ಅಪ್ಣಿ ಜೋ಼ಡ್ಮ ಸೇವೇನ ಕಾಮ್ನ ಕೋ ಆಯೋನಿತೆ, ಪಂಫುಲ್ಯ ಗಾಮ್ಮ ಅಪ್ಣುನ ಮ್ಹೇಲಿನ್ ಜಾ಼ವಾಳನ ಬುಲೈಲಿನ್ ಜಾ಼ವಾನು ಬರೋಬರ್ ಕೊಯ್ನಿಕರಿ ದಿಲ್ಮ ಕರ‍್ಯೊ.
ACT 15:39 ಇನಿ ಬಾರೇಮ ಪೌಲ, ಬಿಜು಼ ಬಾರ್ನಬಮ ಘಣು ಅಬ್ಬಾಜ಼ಬ್ಬಿ ವಾತೆಹುಯಿನ್ ಇವ್ಣೆ ಬೇಜ಼ಣ ಅಲಕ್‌ಹುಯಿಗ. ಬಾರ್ನಬ ಮಾರ್ಕನ ಬುಲೈಲಿನ್ ದರ‍್ಯಾವ್‍ನ ಮಾರ್ಗೆ ಸೈಪ್ರಸ್ ಟಾಪನ ಗಯೊ.
ACT 15:40 ಪೌಲನೆ ಇನಜೋ಼ಡೆ ಸೀಲನ ಬುಲೈಲಿನ್ ಗಯೊ. ಅಂತಿಯೋಕ್ಯನ ಭಯೇಖ್ಹಾರಾನೆ ಪೌಲನ, ಪ್ರಭುನ ವಾರ್‌ಖ್ಹೇಥಿ ಹಿಜ್ಜಾ಼ಥು,
ACT 15:41 ಇವ್ಣೆ ಸಿರಿಯ ಬಿಜು಼ ಕಿಲಿಕ್ಯ ತಬರ್‌ಖಾವ್‍ಮ ಕರಿ ಪಡ್ತಹುಯಿನ್ ಹಿಜ಼್ಜಾನಿ ಅಖ್ಖಿ ಸಬೆನ ಘಟ್ ಕರ‍್ಯೊ.
ACT 16:1 ಪೌಲನೆ ದೆರ್ಬೆ ಅಜು಼ ಲುಸ್ತ್ರಕರಿ ಖ್ಹಯೇರ್‌ಮ ಗಯೊ.ಹಿಜ್ಜಾ಼ ತಿಮೊಥೆಕರಿ ಏಕ್‍ಜ಼ಣೊ ಕ್ರಿಸ್ತನೊ ವಿಶ್ವಾಸಿ ಥೊ. ತಿಮೊಥೆನಿ ಆಯ ಯೆಹೂದ್ಯವಾಳಿ ಹುಯಿರ‍್ಹೀಥಿ ಅಜು಼ ಬಾ ಗ್ರೀಕ್‍ವಾಳೊ ಹುಯಿರ‍್ಹೋಥೊ.
ACT 16:2 ಲುಸ್ತ್ರ ಅಜು಼ ಇಕೋನ್ಯ ಖ್ಹಯೇರ‍್ನು ವಿಶ್ವಾಸಿಖ್ಹಾರು ತಿಮೊಥೆನ ಮರ್ಯಾದಿ ದೇತುಥು. ಅಜು಼ ಇನಿ ಬಾರೇಮ ಅಛ್ಛೂ಼ಸ್ ಬೋಲ್ತುಥು.
ACT 16:3 ಪೌಲ ತಿಮೊಥೆನ ಇನಕೇಡೆ ಬುಲೈಲಿನ್ ಜಾ಼ವ್ಣುಕರಿ ಇಷ್ಟಕರ‍್ಯೊ. ಯೊ ಝ಼ಗೋಮ ಥೋತೆ ಯೆಹೂದ್ಯರ್‌ನ ತಿಮೊಥೆನೊ ಬಾ ಗ್ರೀಕ್‍ನೊಕರಿ ಮಾಲುಮ್‌ಥೂತೆ ಇನಖ್ಹಾಜೆ ಇನ ಖ್ಹತ್ನ ಕರಾಯೊ.
ACT 16:4 ಇನಕೇಡೆಥು ಪೌಲ ಅಜು಼ ಇನ ಜೋ಼ಡೆ ರ‍್ಹವಾಳುಖ್ಹಾರು ನಂಗರ್‌ಥಿ ನಂಗರ್ ಫರ‍್ಯು. ಯೆರೂಸಲೇಮ್ಮಥೂತೆ ಅಪೊಸ್ತಲರ‍್ನಿ ಅಜು಼ ಗಲ್‌ಢವ್‍ನಿ ಖ್ಹೂಜ಼್‌ನ ಇವ್ಣೆ ವಿಶ್ವಾಸಿಖ್ಹಾರನ ಬೋಲಿನ್ ಇನ ಪಾಡೀನ್ ಚಾ಼ಲ್‌ನುಕರಿ ಬೋಲ್ಯೊ.
ACT 16:5 ಅಮ್ಮಸ್ ಕ್ರಿಸ್ತನು ಸಬೆಖ್ಹಾರು ದನ್‍ಥಿ ದನ್ ವಿಶ್ವಾಸ್ಮ ಭಡಾಲಗ್ಯು. ಸಬೆಖ್ಹಾರು ವಿಶ್ವಾಸ್ಮ ಘಟ್‍ಥಿ ಭೀರಿನ್ ವಿಶ್ವಾಸಿ ದನ್‍ಪರ್ ದನ್ ಜಾ಼ಖ್ಹತ್ ಹುವಾಲಗ್ಯು.
ACT 16:6 ಏಷ್ಯಾ ಮುಲಕ್‌ಮ ಪೌಲ ಇವ್ಣೆಖ್ಹಾರು ಸುವಾರ್ತೆನ ಬೋಲಿನ್ ನಾ ವತಾಳ್ಣುಕರಿ ಪವಿತ್ರಾತ್ಮನೆ ಖ್ಹಮ್‍ಜಾ಼ಡಿರಾಖ್ಯೊಥೊ. ಇನಖ್ಹಾಜೆ ಇವ್ಣೆ ಫ್ರಿಜಿಯ, ಅಜು಼ ಗಲಾತ್ಯ ತಬರ್‌ಖಾನಿ ವಾಟೆ ಗಯ.
ACT 16:7 ಪೌಲ ಅಜು಼ ತಿಮೊಥೆ ಇವ್ಣೆ ಮುಸಿಯ ನಂಗರ‍್ನ ಖನ್ನೆ ಗಯ. ತದೆ ಇವ್ಣೆ ಬಿಥೂನ್ಯ ನಂಗರ್‌ಮ ಜಾ಼ವ್ಣು ಕರಿ ಥಾ. ಕತೋಬಿ ಯೇಸುನ ಆತ್ಮನೆ ಹಿಜ್ಜಾ಼ಬಿ ಜಾ಼ವಾನ ಕೊ ಮ್ಹೆಲ್ಯುನಿ.
ACT 16:8 ಇನಖ್ಹಾಜೆ ಇವ್ಣೆ ಮುಸಿಯ ನಂಗರ್‌ಪರ್ ಕರಿ ನೇರ್ ತ್ರೋವ ಖ್ಹಯೇರ್‌ಮ ಆಯ.
ACT 16:9 ಯೋ ರಾತ್ಮ ಪೌಲನ ಏಕ್‌ ದರ್ಶನ್‌ಹುಯು. ಮೆಕೆದೋನ್ಯನೊ ಏಕ್‍ಜ಼ಣೊ ಹಿಜ್ಜಾ಼ಭೀರಿನ್; ಮೆಕೆದೋನ್ಯಮ ಐನ್ ಹಮೂನ ಮದತ್ ಕರ್‌” ಕರಿ ಗಿಂಗೈಲಿದೊ.
ACT 16:10 ಪೌಲನೆ ಯೋ ದರ್ಶನ್ ದೇಖಿನ್, ತದ್‌ನು ತದೇಸ್‌ ಹಿಜ಼್ಜಾನ ಅದ್ಮಿನ ಸುವಾರ್ತೆನ ಖ್ಹಮ್‍ಜಾ಼ಡಾನಖ್ಹಾಜೆ ದೇವ್ನೆ ಹಮೂನ ಬುಲೈರಾಖ್ಯೊಸ್ ಕರಿ ಮಾಲುಮ್ ಕರಿಲಿನ್ ಮೆಕೆದ್ಯೋನ್ಯನ ಜಾ಼ವಾನ ಇವ್ಣೆ ತಯಾರ್ ಹುಯ.
ACT 16:11 ಹಮೆ ತ್ರೋವಥು ಜ಼ಹಾಜ಼್ ಚ಼ಢೀನ್ ಸಮೊಥ್ರಾ ಐನ್, ಬಿಜೇಕ್ ದನ್ನೆ ನೆಯಾಪೊಲಿ ಖ್ಹಯೇರ‍್ನ ಪೋಚಿನ್ ಹಿಜ್ಜಾ಼ಥ ಫಿಲಿಪ್ಪಿನ ಆಯ.
ACT 16:12 ಫಿಲಪ್ಪಿಕರಿ ಬೋಲಾನು ಮೆಕೆದೋನ್ಯನು ಖ್ಹಯೇರ್ ಹುಯಿರ‍್ಹುಥು. ರೋಮ್‍ವಾಳಾನು ರ‍್ಹವಾನು ಝ಼ಗೋ ಹುಯಿರ‍್ಹೀಥಿ. ಹಜ್ಜಾ಼ ಥೋಡ ದನ್ ರ‍್ಹಯ.
ACT 16:13 ಖ್ಹಯೇರ‍್ನ ಭಾರ್‌ ಥೂತೆ ನದ್ದಿನ ಕನಾರಿನ ಖನ್ನೆ ಯೆಹೂದ್ಯರ‍್ನು ಪ್ರಾರ್ಥನೆನಿ ಝ಼ಗೊರ‍್ಹೆವ್ಣುಕರಿ ಸಬ್ಬತ್‌ ದನ್ಮ ಹಿಜ್ಜಾ಼ಗಯಾಥ. ಹಿಜ್ಜಾ಼ ಥೋಡಿ ತಯೇಡ ಅಯಿರ‍್ಹೀಥಿ. ತದೆ ಹಮೆ ಬೇಶಿನ್ ಇವ್ಣೇಥಿ ವಾತೆ ಬೋಲ್ಯ.
ACT 16:14 ಹಮಾರಿ ಬೋಧನೆ ಖ್ಹಮ್‍ಜ್ಯುತೆ ತಯೇಡಾವ್ಮ ಲಿಡಿಯಾಬಿ ಏಕ್‍ಜ಼ಣಿ. ಆ ಹೈರಿತೆ ಥುವತೈರ ಖ್ಹಯೇರ್‌ವಾಳಿ; ಹೈರಿತೆ ರಾಯಿಜಾ಼ಮಣ್ಣ ರಂಗ್ನು ಲುಂಗ್ಡು ವೇಚಿನ್ ಧಂದೊ ಕರಾವಾಳಿ ಹುಯಿರ‍್ಹೀಥಿ. ಆ ಖ್ಹಾಚ ದೇವ್ನ ಆರಾದನೆ ಕರ್ತೀಥಿ. ಪೌಲನ ಬೋಧನೆನ ಕಾನ್‍ಜೋ಼ಡಿ ಖ್ಹಮ್‍ಜಾ಼ನಿತರ ಪ್ರಭುನೆ ಇನ ದಿಲ್ನ ಛೋ಼ಡಾಯೊ. ಪೌಲನೆ ಬೋಲ್ಯೊತೆ ಖ್ಹಾರು ಇನೆ ವಿಶ್ವಾಸ್‌ಕರಿ.
ACT 16:15 ಲಿಡಿಯ ಅಜು಼ ಇನ ಘರ್‌ಮಥೂತೆ ಖ್ಹಾರುಜ಼ಣು ಬ್ಯಾಪ್ತಿಸ್ಮ ಕರೈಲಿದು. ಇನೆ, “ಪ್ರಭುನಿ ಖ್ಹಾಚ ವಿಶ್ವಾಸಿಕರಿ ತೀರ್ಮಾನ್‌ ಕರ್ತ ಉಷೇತೊ, ಹಮಾರ ಘರ್‌ಮ ಐನ್ ರ‍್ಹವೊ” ಕರಿ ಗಿಂಗೈನ್ ಹಮೂನ ಜು಼ಲಮ್‍ಕರಿ.
ACT 16:16 ಏಕಹಲ್ಲ, ಹಮೆ ಪ್ರಾರ್ಥನೆ ಝ಼ಗೋನ ಜಾ಼ವಾನಿ ವೇಳ್ಮ ಗಾರೋಡಿನಿ ಏಕ್‍ಜ಼ಣಿ ದಾಸಿ ಹಮಾರ ಖ್ಹಾಮ್ಣೆ ಆಯಿ. ಯೋ ಫಾಲ್‌ಬೋಲ್‍ಥೀತೆ ಇನೇಥಿ ಇನೊ ಯಜಮಾನ್ನ ಘಣು ನಫ್ಫೊ ಹೋತುಥು.
ACT 16:17 ಪೌಲಬಿನ್ ಹಮೆ ಜಾ಼ವನಿವಖ್ಹ್‌ತೆ, ಯೊ ಚಿಕ್ರಿ ಬೋಲ್ತಿಹುಯಿನ್, “ಆ ಅದ್ಮಿಖ್ಹಾರು ಘಣೊಊಚೊ಼ ದೇವ್ನು ಸೇವಕ್ ಹುಯಿರ‍್ಹಾಸ್; ತುಮಾರ ಜಾನ್ನ ರಕ್ಷಣೆನು ಮಾರಗ್‌ನ ಅವ್ಣೆ ಬೋಲುಕರಸ್” ಕರಿ ಬೋಲ್ತಿ ರ‍್ಹೇತಿಥಿ.
ACT 16:18 ಕೈಏಕ್ ದನ್‍ಲಗೂಬಿ ಅಮ್ಮಸ್ ಬೋಲುಕರ್ತಿಥಿ. ಇನಖ್ಹಾಜೆ ಪೌಲ ಬೇಜಾರ್ ಹುಯಿನ್, ಯೊ ತಯೇಡಾಮ ಛಾ಼ತೆ ಖರಾಬ್ಆತ್ಮ, ‘ಮ್ಹೆಂದಿನ್ ನಿಕ್ಳಿಜಾ಼’ ಕರಿ ಯೇಸುಕ್ರಿಸ್ತನ ನಾಮ್‍ಥಿ ಹುಕುಮ್ ದೆವುಸ್ ಕರಿ ಬೋಲ್ಯೊ. ಯೋ ವಖ್ಹತ್‌ಮಾಸ್‌ ಯೋ ಖರಾಬ್ಆತ್ಮ ಇನ ಮ್ಹೇಲಿನ್ ಚ಼ಲಿಗಯು.
ACT 16:19 ಯೋ ದೆಖ್ಯೊತೆ ದಾಸಿನೊ ಯಜಮಾನ್ನೆ ರಪ್ಯ ಕಮಾವನು ಉಷೆ ಕೊಯ್ನಿಕರಿ ಮಾಲುಮ್ ಕರಿಲಿನ್, ಪೌಲನಾಬಿ ಸೀಲನ ನಂಗರ‍್ನ ನ್ಯಾವ್ನ ಅದಿಕಾರಿಕನ ಖೇಚಿಲಿಗು.
ACT 16:20 ಹಿಜ್ಜಾ಼ ಪೌಲನಾಬಿ ಸೀಲನ ಅಧಿಕಾರಿನ ಖ್ಹಾಮ್ಣೆ ಇವ್ಣುನ ಬುಲೈಲಿಜೈ಼ನ್ “ಆ ಅದ್ಮಿಖ್ಹಾರು ಯೆಹೂದ್ಯರ್ ಹುಯಿರುಸ್, ಅವ್ಣೆ ಖ್ಹಯೇರ‍್ನ ಕಲಾವ್ಣಿಕರಿನ್ ಗಲಾಟ್ ಉಠಾಡುಕರಸ್.”
ACT 16:21 ರೋಮ್‌ವಾಳ ಹುಯಿರಾತೆ ಅಪ್ಣ ನಿಯಮ್‌ನಿ ವಿರೋದ್‌ನು ಕಾಮ್ ಅವ್ಣೆ ಅದ್ಮಿಖ್ಹಾರಾನ ಬೋಲುಕರಸ್ ಕರಿ ಬೋಲ್ಯು.
ACT 16:22 ತದೆ ಅದ್ಮಿಖ್ಹಾರು ಪೌಲಬಿನ್ ಸೀಲನ ವಿರೋದ್ ಹುಯಿರ‍್ಹುಥು ತದೆ ಅದಿಕಾರಿನೆ ಪೌಲ ಸೀಲನ ಲುಂಗ್ಡಾವ್‍ನ ಫಾಡಿನ್ ಇವ್ಣ ಭೇಜ಼ಣಾನ ಲಠ್ಠೇಥಿ ಜಾ಼ಖ್ಹತ್ ಮಾರ್ ದೇವಾಡ್ಣುಕರಿ ಹುಕುಮ್‌ಕರ‍್ಯೊ.
ACT 16:23 ಇವ್ಣುನ ಘಣೇಥಿ ಮಾರ್‌ಖಡೈನ್‌ ಹುಯಿಗು ತದೆ ಜೇಲ್‌ಮ ಘಲೈನ್ “ಇವ್ಣುನ ಘಣು ಹೊಷಾರ್‌ಥಿ ಜೇಲ್‌ನ ಕಾವ್ಲಿಕರ‍್ನು ಕರಿ ಅಧಿಕಾರಿನ ಹುಕುಮ್‌ ದಿದೊ.
ACT 16:24 ಇನೆ ಯೊ ಹುಕುಮ್‌ನ ಪಾಡಿನ್ ಇವ್ಣುನ ಜೇಲ್‌ನ ಮಹಿನ ಕೋಣಾಮ ಘಾಲಿನ್ ಇವ್ಣ ಗೋಡಾವ್‍ನ ಲಾಕ್ಡಾನ ಫಣಾಶಿನ ಇಚ಼್‌ಮ ಘಾಲಿನ್ ಖ್ಹಂಕಳ್‌ಥಿ ಜ಼ಡ್‍ಕಾಯು.
ACT 16:25 ಅಧಿರಾತ್ಮ ಪೌಲಬಿ ಸೀಲನೆ ಪ್ರಾರ್ಥನೆ ಕರ್ತಹುಯಿನ್ ದೇವ್ನ ಸ್ತುತಿನು ಗೀದ್‌ ಬೋಲುಕರ್ತಾಥ. ಹಿಜ಼್ಜಾಥೂತೆ ಖೈದಿಖ್ಹಾರು ಖ್ಹಮ್‍ಜು಼ಕರ್ತುಥು.
ACT 16:26 ತದೆ ಅಫ್ಪರ್‌ಥೂಸ್ ಮೋಟು ಭೂಕಂಪ್ ಹುಯು; ಖ್ಹಾರ್ಕೊಟ್‌ನು ಹದಿಪಾಯ ಹಲಿರ‍್ಹೀಗು. ಯೋಸ್ ವೇಳ್ಮ ಬಾಕಲ್‍ಅಖ್ಖು ನಿಕ್ಳಿಗಯು, ಅಖ್ಖಾಸ್ ಖೈದಿನು ಖ್ಹಂಕಳ್‌ಖ್ಹಾರು ಛು಼ಟಿ ಪಡಿಗಯು.
ACT 16:27 ಜೇಲ್‌ನೊ ಅದಿಕಾರಿ ನಿಂದರ್‌ಥಿ ಹೊಷಾರಿಹುಯಿನ್, ಬಾಕಲ್ ಅಖ್ಖು ನಿಕ್ಳಿರ‍್ಹುಥೂತೆ ದೇಖಿನ್ ಖೈದಿಖ್ಹಾರು ಮಿಲೈಚ಼ಲಿಗೂ ಕರಿ ಲ್ಹಯಿನ್ ತಲ್ವಾರ್‌ಥಿ ಭೋಕೈನ್ ಮರಿಜಾ಼ವ್ಣು ಕರಿ ಥೊ.
ACT 16:28 ಕತೋಬಿ ಪೌಲನೆ ಊಚಿ ಆವಾಜ಼್‌ಥಿ ಚಿಕ್ರಿನ್ ಇನ; ತೂ ಶಾತ್ಬಿ ಲುಕ್ಷಾನ್‌ ನಕೊ ಕರಿಲಿಶ್‌. ಹಮೆ ಅಖ್ಖಾಸ್‍ಜ಼ಣ ಹಜ್ಜಾ಼ಸ್ ಛಿಯೆ ಕರಿ ಬೋಲ್ಯೊ.
ACT 16:29 ಖ್ಹಾರ್ಕೊಟ್‍ನೊ ಅಧಿಕಾರಿನೆ ಚಿಮ್ನಿನ ಮಂಗಾವ್ತೊಹುಯಿನ್ ಒಗ್ಗಿಸ್‌ಮ ಮಹಿ ಜೈ಼ನ್ ಡರ್‌ಥಿ ಕಾಪ್ತೊಹುಯಿನ್ ಪೌಲ ಅಜು಼ ಸೀಲನ ಗೋಡಾಪರ್ ಆಡ್‍ಪಡ್ಯೊ.
ACT 16:30 ಅಜು಼ ಇವ್ಣುನ ಭಾರ್‌ ಬುಲೈಲಿನ್ ಐನ್, “ಮಾಲಿಕ್ ರಕ್ಷಣೆ ಮಳ್‌ಣುಕತೊ ಮೆ ಶಾತ್‌ ಕರ‍್ನು?” ಕರಿ ಬೋಲ್ಯೊ.
ACT 16:31 ಇವ್ಣೆ ಇನ, “ಪ್ರಭು ಯೇಸುಪರ್ ವಿಶ್ವಾಸ್ ಕರ್‌ ತದೆ ತುನಾಬಿ ತಾರ ಘರ್‌ವಾಳಾನಾಬಿ ರಕ್ಷಣೆ ಮಳ್‌ಶೆ” ಕರಿ ಬೋಲ್ಯೊ.
ACT 16:32 ಯೋ ಅದಿಕಾರಿನಾಬಿ ಇನ ಘರ್‌ವಾಳ ಅಖ್ಖಾಸ್ನ ಪ್ರಭುನಿ ವಚನ್ ಖ್ಹಮ್‍ಜಾ಼ಡ್ಯ.
ACT 16:33 ಇನಕೇಡೆಥು, ಯೋಸ್ ರಾತ್ನಿ ವಖ್ಹತ್‌ಮ ಬುಲೈಲಿಜೈ಼ನ್ ಇವ್ಣ ಘಾವ್ನ ಧೋಯೊ. ತದೇಸ್‌ ಯೋಬಿ ಇನ ಘರ್‌ವಾಳಾನ ಖ್ಹಮೇದ್ ಬ್ಯಾಪ್ತಿಸ್ಮ ಕರೈಲಿದೊ.
ACT 16:34 ಇನಪಾರ್ ಪೌಲ ಅಜು಼ ಸೀಲನ ಇನ ಘರೆ ಬುಲೈಲೀಜೈ಼ನ್ ಖಾಣು ಖಡಾಯೊ. ಯೋ ಇನ ಘರ್‌ವಾಳಾನ ಜೋ಼ಡ್ಮ ದೇವ್ನ ನಂಬಿನ್ ಶಂತೋಖ್ಹ್‌ ಪಡ್ಯೊ.
ACT 16:35 ಇನವ್ಹಾಣೆ ಅಧಿಕಾರಿನ ಮೋಟಾನೆ ರೋಮ್‍ನ ಖ್ಹಾರ್ಕೊಟ್‌ನ ಅಧಿಕಾರಿನ, “ಆ ಅದ್ಮಿಖ್ಹಾರಾನ ಮ್ಹೇಲಿದೆ” ಕರಿ ಥೋಡ ಶಿಪಾಯಿಥಿ ಬೋಲಿಮೋಕ್‌ಲ್ಯೊ.
ACT 16:36 ಖ್ಹಾರ್ಕೊಟ್‍ನೊ ಅಧಿಕಾರಿನೆ ಪೌಲನ, “ಹಮಾರೊ ಮೋಟಾ ಅಧಿಕಾರಿನೆ, ತುಮೂನ ಮ್ಹೆಲಿದ್ಯವಾದೆ ಕರಿ ಬೋಲಿ ಮೋಕ್‍ಲೈರಾಖ್ಯೊಸ್. ಇನಖ್ಹಾಜೆ ತುಮೆ ಸಮಾಧಾನ್‌ಥಿ ಚ಼ಲೆಜಾ಼ವೊ” ಕರಿ ಬೋಲ್ಯೊ.
ACT 16:37 ಪೌಲನೆ ಇನ, “ಹಮೆ ಕರ‍್ಯಾತೆ ಖರಾಬ್ ಕಾಮ್ ಶಾತ್‌ಕರಿ ಬೋಲ್ಯೊಕೊಂತೆ; ಹಮೂನ ಅಖ್ಖಾನ ಖ್ಹಾಮ್ಣೆ ಮಾರಿನ್ ಜೇಲ್‌ಮ ಘಲಾಯು; ಹಮೆ ರೋಮ್‍ನ ಪ್ರಜೇಸ್ ಹಮ್ಕೆ ಹಮೂನ ಲಪಾಡಿನ್ ಭಾರ್‌ ಮೋಕ್ಲಸ್‍ಕೀ ಶು? ಇಮ್‌ ನಾಹೋಣು; ಯೋಸ್ ಐನ್ ಹಮೂನ ಭಾರ್‌ ಬುಲೈಲಿ ಜಾ಼ವ್ಣು.” ಕರಿ ಬೋಲ್ಯೊ.
ACT 16:38 ಶಿಪಾಯಿಖ್ಹಾರನೆ, ಅಧಿಕಾರಿಖ್ಹಾರನ ಬೋಲಖ್ಹತರ್ ಪೌಲನೆ ಹಮೆ ರೋಮ್‍ನ ಪ್ರಜೆಕರಿ ಬೋಲ್ತಾನ ಇನ ಅಧಿಕಾರಿಖ್ಹಾರು ಡರಿಗಯು.
ACT 16:39 ಇನಖ್ಹಾಜೆ ಪೌಲ ಅಜು಼ ಸೀಲನ ಪೊಖ್ಹ್‌ಲೈ ವಾತೆ ಬೋಲ್ತುಹುಯಿನ್ ಇವ್ಣುನ ಭಾರ್‌ ಬುಲೈಲಿಗಯು. ತುಮೆ ಆ ಖ್ಹಯೇರ‍್ನ ಮ್ಹೇಲಿದಿನ್ ಚ಼ಲೆಜಾ಼ವೊ ಕರಿ ಬೋಲಿಲಿದು.
ACT 16:40 ಕತೋಬಿ ಪೌಲಬಿ ಸೀಲನೆ ಜೇಲ್‌ಥು ನಿಕ್ಳಿನ್ ಲಿಡಿಯಾನ ಘರೆಗಯ. ಹಿಜ್ಜಾ಼ ಇವ್ಣೆ ಥೋಡ ವಿಶ್ವಾಸಿನ ದೇಖಿನ್ ಇವ್ಣುನ ಭಾಲಿದೀನ್ ಹಿಜ್ಜಾ಼ಥ ಚ಼ಲೇಗಯ.
ACT 17:1 ಪೌಲ ಅಜು಼ ಸೀಲನೆ ಅಂಫಿಫೊಲಿ ಅಜು಼ ಅಪೊಲೋನ್ಯನಿ ವಾಟೆಕರಿ ಚಾ಼ಲ್ತಹುಯಿನ್ ಥೆಸಲೋನಿಕ ಖ್ಹಯೇರ್‌ಮ ಆಯ. ಹಿಜ್ಜಾ಼ ಯೆಹೂದ್ಯರ್‌ನಿ ಏಕ್‍ ಸಬಾಮಂದಿರ್‌ ಥು.
ACT 17:2 ಪೌಲನೆ ಕದೆ ಕದೇಬಿ ಜಾ಼ತೊಥೋತೆ ಇಮ್ಮಸ್ ಯೆಹೂದ್ಯರ್‌ನ ಮಳಾನಖ್ಹಾಜೆ ಸಭೆಮ ಗಯೊ. ಇನೆ ತೀನ್ ವಾರ ಸಬ್ಬತ್‌ ದನ್ಮ ಯೆಹೂದ್ಯರ್‌ನ ಜೋ಼ಡೆ ದೇವ್ನಿ ವಚನ್ನಿ ಆಧಾರ್‌ಥಿ ಬೋಲಿವತಾಳ್ಯೊ.
ACT 17:3 ಜಗತ್ನ ಉದ್ಧಾರ್ ಕರಾವಾಳೊ, ಖ್ಹತಾಪ್ಣಿನ ಲೇವ್ಣೂಸ್‍ ಪಡ್ಯುಥು. ಅಜು಼ ಮರಿಜೈನ್ ಪಾಛು಼ ಉಟ್ನುಸ್ ಪಡ್ಯುಥು ಕರಿ ಮೇ ಬೋಲುಕರುಸ್ತೆ ಯೋ ಕ್ರಿಸ್ತ” ಕರಿ ಮಾಲುಮ್‌ ಕರಾಯೊ.
ACT 17:4 ಇವ್ಣಾಮ ಥೋಡಜ಼ಣು ದೇವ್ನು ಭಕ್ತರ್‌ ಹುಯಿರುತೆ ಗ್ರೀಕ್‌ನು ಮೋಟು ಝೂ಼ಂಡ್‌ ಅಜು಼ ಮುಖ್ಯ ತಯೇಡಾಮ ಕೈಯೆಕ್‍ಜ಼ಣಿ ಪೌಲ ಅಜು಼ ಸೀಲಾನಿ ಜೋ಼ಡೆ ಮಳಿಗಯು.
ACT 17:5 ಕತೋಬಿ ನಂಬ್ಯುಕೊಂತೆ ಯೆಹೂದ್ಯಖ್ಹಾರು ಬಳಾಪೊ ಕರ‍್ಯು. ಇವ್ಣೆ ಖ್ಹಯೇರ್‌ಮ ಥೂತೆ ಥೋಡ ಖರಾಬ್ ಅದ್ಮಿವೋನ ಪೈಶಾದೀನ್ ಬುಲೈಮಂಗೈನ್‌ ಗಮ್ಮ ಗಲಾಟ್ ಕರೈನ್, ಪೌಲಬಿನ್ ಸೀಲನ ಖ್ಹಯೇರ‍್ನ ಸಭೆನ ಖ್ಹಾಮ್ಣೆ ಲೀನ್‍ ಆವ್ಣುಕರಿ ಯಾಸೋನನ ಘರ್‌ನ ಘೇರ್ತುಹುಯಿನ್ ಆಯು.
ACT 17:6 ಕತೋಬಿ ಇವ್ಣೆ ಹಿಜ್ಜಾ಼ ದೆಖಾಯುಕೊಂತೆ ಇನಖ್ಹಾಜೆ ಇವ್ಣೆ ಯಾಸೋನನಾಬಿ ಥೋಡ ವಿಶ್ವಾಸಿಖ್ಹಾರಾನ ನಂಗರ‍್ನ ಅಧಿಕಾರಿನ ಖ್ಹಾಮ್ಣೆ ಖೇಚಿಲೈನ್‌; ಆ ಅದ್ಮಿಖ್ಹಾರು ಜಗತ್ನಿಅಖ್ಖಿಸ್ ಬಾಜು಼ ಗಲಾಟ್ ಉಠಾಡಿನ್ ಹಮ್ಕೆ ಹಜ್ಜಾ಼ಬಿ ಐರ‍್ಹಾಸ್.
ACT 17:7 ಯಾಸೋನನೆ, ಇನ ಘರ್‌ಮಾಸ್ ಇವ್ಣುನ ರಾಖಿರಾಖ್ಯೋಸ್. ಅಜು಼ ಇವ್ಣೆಖ್ಹಾರು ಯೇಸುಕರಿ ಬಿಜೇಕ್‍ಜ಼ಣೊ ರಾಜ಼ ಛಾ಼ಕರಿ ಬೋಲಿನ್, ಕೈಸರ್‌ನಿ ಹುಕುಮ್‌ನ ವಿರೋಧ್‍ಥಿ ಚಾ಼ಲುಕರಸ್ ಕರಿ ಚಿಕ್‌ರ‍್ಯು.
ACT 17:8 ಆ ವಾತೆ ಖ್ಹಮ್‍ಜ್ಯುತೆ ಖ್ಹಯೇರ್‌ವಾಳು ಅಜು಼ ಖ್ಹಯೇರ‍್ನ ಅಧಿಕಾರಿನ ಘಣು ಕಲಾವ್ಣಿ ಹುಯಿನ್
ACT 17:9 ಯಾಸೋನಥೀಬಿ ಬಿಜ಼ ಥೋಡ ವಿಶ್ವಾಸಿಥೀಬಿ ಜಾ಼ಮೀನ್‍ಲೀನ್ ಇನ ಪಾಛ಼ಳ್ ಇವ್ಣುನ ಮ್ಹೇಲಿದಿದು.
ACT 17:10 ಯೋಸ್ ರಾತ್ಮ ವಿಶ್ವಾಸಿಖ್ಹಾರು ಪೌಲ ಸೀಲನ ಬೆರೋಯ ಕರಿ ಬೋಲಾನು ಬಿಜೇಕ್ ಖ್ಹಯೇರ‍್ನ ಮೋಕ್‍ಲ್ಯು. ಬೆರೋಯಮ ಪೌಲ ಸೀಲನ ಯೆಹೂದ್ಯರ್‌ನ ಸಭೆಮ ಗಯ.
ACT 17:11 ಆ ಯೆಹೂದ್ಯವಾಳು ಥೆಸಲೋನಿಕನ ಯೆಹೂದ್ಯರ್‌ಥಿಬಿ ಪೌಲ ಸೀಲನೆ ಬೋಲ್ಯಾತೆ ಅಛ್ಛಿ ಸಂದೇಶ್ನ ಖುಲ್ಲ ದಿಲ್‌ಥಿ ಘಣು ಶಂತೋಖ್ಹ್‌ ಥಿ ಖ್ಹಮ್‌ಜ್ಯು. ಅಜು಼ ಯೋ ವಾತೆ ಖ್ಹಾಚು಼ಸ್‍ಕರಿ ಬೋಲಾನು ಮಾಲುಮ್ ಕರಿಲ್ಯವಾನಖ್ಹಾಜೆ ಪವಿತ್ರ ಪುಸ್ತಕನ ಹರೇಕ್ನೆ ಬರೋಬರ್ ಫಢ್ಯುತೆ ಇನಖ್ಹಾಜೆ ಥೆಸಲೋನಿಕ ವಾಳೇಥಿಬಿ ಅಛ್ಛಿಗುಣ್‌ವಾಳು ಹುಯಿರ‍್ಹುಥು
ACT 17:12 ಅಮ್‍ರ‍್ಹಾವಮ ಕೈಯೆಕ್ಕಿ ಜ಼ಣು ನಂಬ್ಯು. ಅಜು಼ ಗ್ರೀಕ್‍ನಿತಯೇಡ ಪರ್ಖ್ಹಾ ವಿಶ್ವಾಸ್ ಕರ‍್ಯು.
ACT 17:13 ಕತೋಬಿ ಪೌಲ ಬೆರೋಯಮ ದೇವ್ನು ವಚನ್ನ ಬೋಲುಕರಸ್ ಕರಿ ಬೋಲಾನು ಖ್ಹಮ್‌ಜಿನ್‌ ಥೆಸಲೋನಿಕನು ಯೆಹೂದ್ಯಮಾಬಿ ಬೆರೋಯಮಾಬಿ ಐನ್ ಹಿಜ಼್ಜಾನ ಅದ್ಮಿಖ್ಹಾರಾನ ಕಲಾವ್ಣಿಕರಿನ್ ಗಲಾಟ್ ಉಠಾಡ್ಯು.
ACT 17:14 ಇನಖ್ಹಾಜೆ ವಿಶ್ವಾಸಿಖ್ಹಾರು ತದ್‌ನು ತದೇಸ್‌ ಪೌಲನ ದರ‍್ಯಾವ್ನ ಕನಾರಲಗು ಮೋಕ್ಲಿದಿದು. ಕತೋಬಿ ಸೀಲ ಅಜು಼ ತಿಮೊಥೆ ಇವ್ಣೆ ಬೆರೋಯಮಾಸ್ ರ‍್ಹೀಗ.
ACT 17:15 ಪೌಲನ ಮ್ಹೇಲಿದ್ಯವಾನ ಗಯುಥೂತೆ ಖ್ಹಾರು ಇನ ಜೋ಼ಡ್ಮ ಅಥೇನ್ಸಲಗು ಗಯು. ಸೀಲನಾಬಿ ತಿಮೊಥೆಯನಾಬಿ ಮಳಿಹುಯಿಗುತೊ ತದೇಸ್‌ ಒಗ್ಗಿಸ್ ಇನಕನ ಆವ್ಣುಕರಿ ಪೌಲನಿ ಹುಕುಮ್‍ಥಿ ಪಾಛ಼ ಆಯ.
ACT 17:16 ಪೌಲ ಇವ್ಣಖ್ಹಾಜೆ ಅಥೇನ್ಸ್‌ಮ ಟಿವೈರ‍್ಹವಾನಿ ವೇಳ್ ಯೋ ಖ್ಹಯೇರ್‌ಮ ಕಿಜ್ಜಕಿಜ್ಜಾಬಿ ಮೂರತ್ತಸ್‍ ಅಖ್ಖು ರ‍್ಹವಾನು ದೇಖಿನ್ ಇನೊ ಮನ್ ಉಕ್ಳಿರ‍್ಹೀಗು.
ACT 17:17 ಇನಖ್ಹಾಜೆ ಇನೆ ಸಭೆಮ ಜೈ಼ನ್ ಯೆಹೂದ್ಯರ್ ಅಜು಼ ದೇವ್ನಿ ಭಕ್ತಿರ‍್ಹಾವಳು ಗ್ರೀಕ್‍ವಾಳಾನಿ ಜೋ಼ಡೆ ಅಜು಼ ಖ್ಹಯೇರ್‌ಮ ಬೇಪಾರ್‌ಕರಾನಿ ಝ಼ಗೋಮ ದೇಖವಾಳಾನಿ ಜೋ಼ಡ್ಮ ಹರೇಕ್ ದನ್ ಚರ್ಚೆ ಕರಾಲಗ್ಯು.
ACT 17:18 ಎಫಿಕೂರಿಯವಾಳು ಅಜು಼ ಸ್ತೋಯಿಕ ಕರಿ ನವಿ ಸೋಚ್ನಿ ಬಾರೇಮ ಬೋಲಾವಳು ಥೋಡುಜ಼ಣು, “ಆ ಅದ್ಮಿನ ಯೋ ಶನಿಬಾರೇಮ ವಾತೆ ಬೋಲುಕರಸ್ತೆ ಕರಿ ಬೋಲಾನು ಖ್ಹಾಚಮಾಬಿ ಮಾಲುಮ್ ಕೊಯ್ನಿ. ಯೋ ಶಾತ್ ಬೋಲ್ನುಕರಿ ಛಾ಼? ಕರಿ ಬೋಲ್ಯು. ಯೇಸು ಮರ‍್ಯಮಾಥು ಪಾಛು಼ಜಿವ್ತೊಹುಯಿನ್ ಉಠೀನ್ ಐರ‍್ಹೋಸ್ ಕರಿ ಬೋಲಾನಿ ಸುವಾರ್ತೆನ ಪೌಲ ಬೋಲುಕರ್ತೊಥೊ. ಅಜು಼ ಥೋಡುಜ಼ಣು ‘ಆ ಹುಯಿರುತೆ ಬಹಾರ್‌ಲ್ಯ ದೇವ್ನಿ ಬಾರೇಮ ಬೋಲಾನಿತರ ದೇಖಾವಸ್; ಕರಿ ಬೋಲ್ಯು.
ACT 17:19 ಇವ್ಣೆ ಪೌಲನ ಅರಿಯೊಪಾಗನಿ ನ್ಯಾವ್‍ನಿ ಸಭೆಮ ಬುಲೈಲಿಗಯು. ಅವ್ಣೆ ಇನ “ತೂ ಶಾತ್ ಬೋಲಿ ವತಾಳ್ಣು ಕರಿ ಛಾ಼ಕಿ ಯೊ ನವಿ ಬೋಧನ್ನಿ ನಿಯಮ್ನ ಹಮುನಾಬಿ ವತಾಳ್.
ACT 17:20 ತೂ ಬೋಲುಕರಾತೆ ಅಖ್ಖಿವಾತೆ ಹಮೂನ ನೌಖು ಹುಯಿರ‍್ಹುಸ್.
ACT 17:21 ಅಥೆನ್ಸ್‌ಮ ಅಖ್ಖೂಸ್ ಅದ್ಮಿ ಅಜು಼ ಹಿಜ್ಜಾ಼ ಜಿವ್‍ಕರ್ತುಥೂತೆ ಬಿಜ಼ ದೇಖ್ಹ್‌ವಾಳು ನವ ಸೋಚ್ನಿ ಬಾರೇಮ ಬೋಲನಾಬಿ ಅಜು಼ ಖ್ಹಮ್‍ಜಾ಼ನಾಬಿ ಘಣು ಇಷ್ಟಕರ‍್ಯು.
ACT 17:22 ತದೆ ಪೌಲನೆ ಅರಿಯೊಪಾಗನ ನ್ಯಾವ್‍ನಿ ಸಭೆನ ಖ್ಹಾಮ್ಣೆ ಉಠಿಭೀರಿನ್ ಅಮ್ ಬೋಲ್ಯೊ, “ಅಥೆನ್ಸ್‌ನ ಅದ್ಮಿವೊ ತುಮೆ ಅಖ್ಖೀಸ್ ಥರಮಾಬಿ ದೇವ್ನ ಜಾ಼ಖ್ಹತ್ ಭಕ್ತಿ ಕರಾವಾಳ ಕರಿ ಮನ ದೇಖಾವಸ್.
ACT 17:23 ಮೆ ತುಮಾರ ಖ್ಹಯೇರ್‌ಮ ಚಾ಼ಲಿನ್ ವೇಳ್ಮ ತುಮೆ ಪೂಜ಼ಕರಾತೆ ದೇವ್ತಿನು ಮೂರತ್ನ ದೇಖಾನಿವಖ್ಹ್‌ತೆ ಏಕ್‌ ಚಾ಼ಚ಼ರ್‌ಪರ್ ‘ಮಾಲುಮ್‌ಕೊಂತೆ ದೇವ್ನ ಕರಿ ಲೀಖೈರ‍್ಹೂಥು. ಇನಖ್ಹಾಜೆ ತುಮೆ ಖೆವಾನ ಮಾಲುಮ್‌ಕೊಂತೆ ಪೂಜ಼ಕರಸ್ಕಿ ಇನಾಸ್ ತುಮೂನ ಮಾಲುಮ್‌ ಕರಾವುಸ್ ಖ್ಹಮ್‍ಜೊ಼” ಕರಿ ಬೋಲ್ಯೊ.
ACT 17:24 ಜಗತ್ನಾಬಿ ಇನಾಮಛಾ಼ತೆ ಅಖ್ಖಾನಾಬಿ, ಬಣಾಯೋತೆ ದೇವ್ ಆಬ್ ಧರ್ತಿನ ಯಜಮಾನ್ ಹುಯಿರ‍್ಹೋತೆ ಇನಖ್ಹಾಜೆ ಯೋ ಹಾತೇಖ್ಹು ಭಾಂದಿಹುಯು ದೇವಳ್ಮ ಜಿವ್ಣುಕರಾವಾಳೊ ಕಾಹೆ;
ACT 17:25 ಯೋಸ್ ಹರೇಕ್ನ ಜಾನ್ನೊರಾವೊ಼ ಅಜು಼ ಜಿವಾನಖ್ಹಾಜೆ ಹೋಣುತೆ ಖ್ಹಾರುಸ್‌ದ್ಯವಾಳೊ ಯೋಸ್; ಇಮ್ಮಸ್ ಅದಮ್‍ಜ಼ಮಾನೊ ಇನಖ್ಹಾಜೆ ಮ್ಹಿನತ್‌ಕರಾನು ಕಾಮ್ ಇನ ಶಾತ್ಬಿಕೊಯ್ನಿ.
ACT 17:26 ದೇವ್ನೆ ಏಕ್‌ ಅದ್ಮಿನ ಬಣಾವ್‍ತೊ ಹುಯಿನ್ ಅದಮ್‍ಜ಼ಮಾನಾನು ಝೂ಼ಂಡ್‌ ಶುರುಕರ‍್ಯೊ. ಇನೇಥಿ ಬಿಜು಼ ಅಖ್ಖೂಸ್ ಅದ್ಮಿನ ಜಗತ್‌ನು ಕಿಜ಼್ಜಕಿಜ್ಜಾ಼ಬಿ ಇವ್ಣೆ ಜಿವ್ಣು ಕರಾನಿತರ ಕರ‍್ಯೊ. ಇವ್ಣೆ ಕದೆ ಅಜು಼ ಕಿಜ಼್ಜಕಿಜ್ಜಾ಼ ರ‍್ಹೇವ್ಣುಕರಿ ಬೋಲಾನು ನಿರ್ಧಾರ್ ಕರ‍್ಯೊ.
ACT 17:27 ಏಕ್‌ ವೇಳ್ ಇವ್ಣೆ ಧೀರ್‌ಥಿ ತೋಬಿ ಮಾಲುಮ್ ಕರಿಲಿಶೆಕರಿ ಇನ ಢುಂಡಾನಿತರ ಕರ‍್ಯೊ. ಕತೋಬಿ ದೇವ್ ಅಪ್ಣಾಮ ಕಿನಾಬಿ ಜಾ಼ಖ್ಹತ್ ದೂರ್ ಕೊಯ್ನಿ.
ACT 17:28 ಶನಕತೊ ಇನಾಸ್ಮ ಅಪ್ಣೆ ಜಿವ್‌ಕರಿಯೇಸ್. ಚಾ಼ಲುಕರಿಯೇಸ್ ಅಜು಼ ರ‍್ಹಿಯೇಸ್. ತುಮಾರ ಗೀದ್‌ ಲಿಖವಾಳಮ ಥೋಡುಜ಼ಣು, “ಹಮೆ ಇನ ಸಂತಾನ್‍ವಾಳಸ್” ಕರಿ ಬೋಲಿರಾಖ್ಯುಸ್.
ACT 17:29 ಅಪ್ಣೆ ದೇವ್ನ ಲಡ್ಕ ಹುಯಿರ‍್ಯವಾಪರ್‌, ಅದ್ಮಿಖ್ಹಾರು ಸೋಚಾನಿ ಪರಕ್ಮ ಬಣಾವಟ್ನಿ ಮೂರತ್ನ ಪರಕ್‍ ರ‍್ಹವೊ ದೇವ್‌ ಛಾ಼ಕರಿ ತುಮೆ ಖ್ಹಯಾಲ್ ನಾಕರ‍್ನು. ಯೊ ರೂಪು ಖ್ಹೊನ್ನು ಅಜು಼ ಬಂಡಾನಿ ಶಕಲ್ಮ ಕೊಯ್ನಿ.
ACT 17:30 ಗಯೂತೆ ಹಗಾಮ್ಮ ಅದ್ಮಿಖ್ಹಾರು ದೇವ್ನ ಮಾಲುಮ್ ಕರ‍್ಯುಕೊಯ್ನಿ. ಕತೋಬಿ ದೇವ್ನೆ ಯೊ ಶಾತ್ಬಿ ಕರ‍್ಯೊಕೊಯ್ನಿ. ಹಮ್ಕೆತೋಬಿ ಜಗತ್ನಿ ಅಖ್ಖಿಬಾಜು಼ಮ ರ‍್ಹವಾಳು ಅದ್ಮಿಖ್ಹಾರು ಖರಾಬ್ ಮಾರಗ್‌ನ ಮ್ಹೇಲಿನ್ ಇನಾಭಣಿ ಫರ್‌ನುಕರಿ ಹುಕುಮ್ ದೆವುಕರಸ್.
ACT 17:31 ಜಗತ್ನ ಅದ್ಮಿಖ್ಹಾರಾನು ನ್ಯಾಯನ ಫೆಡಾವನಖ್ಹಾಜೆ ದೇವ್ನೆ ಏಕ್‍ದನ್ನ ಖ್ಹಣೇದ್ ಕರಿರಾಖ್ಯೋಸ್. ತದೆ ನ್ಯಾವ್‌ನ ಫೇಡಾವನಖ್ಹಾಜೆ ಇನೆ ಏಕ್‍ಜ಼ಣಾನ ಕೇತ್ರಾಕಿ ವರಖ್ಹ್‌ನ ಪಾರಸ್ ಚೂ಼ಣಿರಾಖ್ಯೊಸ್. ಅನ ಹರೇಕ್‌ಜ಼ಣಾನ ಮಾಲುಮ್ ಕರಾವನಖ್ಹಾಜೆ ಆ ಏಕ್‍ಜ಼ಣಾನ ಮರ‍್ಯಹುಯಮಾಥು ಜಿವ್ತು ಉಠಾಡಿರಾಖ್ಯೊಸ್.
ACT 17:32 ಯೇಸು ಮರ‍್ಯಹುಯಮಾಥು ಪಾಛು಼ಜಿವ್ತೊಹುಯಿನ್ ಉಠೀನ್ ಐರ‍್ಹೋಸ್‍ಕರಿ ಬೋಲಾನಿ ವಾತೆನ ಖ್ಹಮ್‍ಜ್ಯೊತೆ ಅದ್ಮಿಮ ಥೋಡುಜ಼ಣು ನಕ್ಲೆ ಕರ‍್ಯು. ಅಜು಼ ಥೋಡುಜ಼ಣು “ಆ ವಾತೆನಿ ಬಾರೇಮ ತೂ ಬಿಜೇಕ್‍ಹಲ್ಲ ಬೋಲೆಜಾ಼ಯ್ ತದೆ ಹಮೆ ಖ್ಹಮಜ಼್‌ಶು” ಕರಿ ಬೋಲ್ಯು.
ACT 17:33 ಇನಖ್ಹಾಜೆ ಪೌಲನೆ ಇವ್ಣಕಂಥು ನಿಕ್ಳಿ ಚ಼ಲೆಗಯೊ.
ACT 17:34 ಕತೋಬಿ ಯೋ ಅದ್ಮಿಖ್ಹಾರಾಮ ಥೋಡುಜ಼ಣು ಪೌಲನ ವಿಶ್ವಾಸ್ ಕರಿನ್ ಇನಕೇಡೆ ಎಕ್ಟು ಹುಯು. ನಂಬ್ಯುತೆ ಅದ್ಮಿಖ್ಹಾರಾಮ ಅರಿಯೊಪಾಗ ನ್ಯಾವ್‍ನಿ ಸಭೆವಾಳೊ ದಿಯೊನುಸ್ಯಬಿ, ದಾಮರಿ ಕರಿ ಏಕ್‍ಜ಼ಣಿ ಥಿ, ಇಮ್ಮಸ್ ಅಜೂ಼ಬಿ ಥೋಡುಜ಼ಣು ಥೂ.
ACT 18:1 ಇನಕೇಡೆಥು ಪೌಲನೆ ಅಥೇನ್ಸನ ಮ್ಹೇಲಿನ್ ಕೊರಿಂಥ ಖ್ಹಯೇರ‍್ನ ಗಯೊ.
ACT 18:2 ಪೊಂತಾಮ ಪೈದಾಹುಯಿರೊಥೋತೆ ಆಕ್ವಿಲ ಕರಿ ಏಕ್‍ಜ಼ಣೊ ಯೆಹೂದ್ಯನ ಹಿಜ್ಜಾ಼ ದೇಖ್ಯೊ. ಚಕರ್‌ವರ್ತಿ ಕ್ಲೌದಿಯನೆ ರೋಮ್ ಖ್ಹಯೇರ‍್ನ ಮ್ಹೇಲಿಜಾ಼ವ್ಣುಕರಿ ಹುಕುಮ್‌ ದೀರಾಖ್ಯೋಥೋತೆ ಖ್ಹಾಜೆ ಅಕ್ವಿಲಬಿನ್ ಇನಿ ಬಾವಣ್‍ ಹುಯಿರ‍್ಹಿತೆ ಪ್ರಿಸ್ಕಿಲ್ಲ ಥೋಡದನ್ನ ಅಗ್ಗಳಸ್ ಇಟಲಿ ದೇಖ್ಹ್‌ ಥು ಹಿಜ್ಜಾ಼ ಐರ‍್ಹುಥು. ತದೆ ಪೌಲನೆ ಇವ್ಣುನ ದೇಖಾನ ಗಯೊ.
ACT 18:3 ತದೆ ಇವ್ಣೆ ಪೌಲನಿ ಘೋಣಿಸ್ ಡೇರಾನುಘರ್ ಬಣಾವಾಳು ಹುಯಿರ‍್ಹುಥೂತೆ ಇನಖ್ಹಾಜೆ ಇವ್ಣಕೇಡೆ ರ‍್ಹೀನ್, ಇವ್ಣ ಜೋ಼ಡೆ ಕಾಮ್‍ಕರ್ತೊ ಆಯೊ.
ACT 18:4 ಹರೇಕ್ ಸಬ್ಬತ್ ದನ್ಮ ಯೊ ಸಭೆನಿ ಝ಼ಗೊ ಯೆಹೂದ್ಯರ್‌ನಿ ಜೋ಼ಡೆಬಿ ಗ್ರೀಕ್‍ವಾಳಾನಿ ಜೋ಼ಡೆಬಿ ಚರ್ಚೆಕರೀನ್ ಇವ್ಣುನ ಮಳಾವ್ತೊಥೊ.
ACT 18:5 ಇಮ್ಮಸ್ ಮೆಕೆದೋನ್ಯಮ ಥಾತೆ ಸೀಲ ಅಜು಼ ತಿಮೊಥೆ ಇವ್ಣೆ ಪೌಲಕನ ಆಯ. ಇನಪಾರ್ ಅದ್ಮಿಖ್ಹಾರಾನ ಇವ್ಣಿವಾತೆನ ಬೋಲಿ ಖ್ಹಮ್‌ಜಾ಼ಡಮ ಪೌಲನೆ ಇನಿ ವಖ್ಹತ್‍ಖ್ಹಾರು ಕಾಡಿನಾಖ್ಯೊ. ಯೇಸುಸ್ ಮೆಸ್ಸಿಯಕರಿ ಬೋಲಾನು ಇನೆ ಯೆಹೂದ್ಯರ್‌ನ ದೇಖಾಡಿದಿದೊ.
ACT 18:6 ಕತೋಬಿ ಯೆಹೂದ್ಯರ್ ಪೌಲನಿ ಬೋಧನೆನ ಝಿಟ್ಕಾರಿನ್ ಅಜು಼ ಚಿಂಘಾವ್ಣಿ ಕರ‍್ಯು. ಇನಖ್ಹಾಜೆ ಪೌಲನೆ ಇನ ಲುಂಗ್ಡಾನ ಧೂಳ್ನ ಝ಼ಟ್‍ಕಿನ್ ಇವ್ಣುನ, ತುಮಾರಿ ನಾಶ್‌ನ ತುಮೇಸ್ ಜಿಮ್ಮೆದಾರಿ, ಮೇ ಶುದ್ದ ಹುಯಿರ‍್ಹೊಸ್. ಮೆ ಹಮ್ಕೇಥೊ ಅಲಕ್‌ ಅದ್ಮಿವೋಕನ ಜ಼ವುಸ್‌” ಕರಿ ಬೋಲ್ಯೊ.
ACT 18:7 ತದೆ ಪೌಲನೆ ಸಭೆನಿ ಝ಼ಗೊ ಮ್ಹೇಲಿನ್ ಇನಭೀಡೆಸ್ ಥೂತೆ ತೀತ ಯುಸ್ತ ಕರಿ ಏಕ್‌ ಜ಼ಣಾನ ಘರ್ ಗಯೊ. ಯೊ ಅದ್ಮಿ ಖ್ಹಾಚ ದೇವ್ನು ಆರಾದನೆ ಕರಾವಾಳೊ ಹುಯಿರ‍್ಹೋಥೊ.
ACT 18:8 ಯೊ ಸಬಾಮಂದಿರ್‌ನೊ ಯಜಮಾನ್ ಕ್ರಿಸ್ಪಕರಿ ಏಕ್‌ ಜ಼ಣೊ ಅಜು಼ ಇನ ಘರ್‌ಮ ರ‍್ಹವಾಳು ಖ್ಹಾರುಜ಼ಣು ಪ್ರಭುನ ವಿಶ್ವಾಸ್ ಕರ‍್ಯು. ಕೊರಿಂಥನು ಬಿಜೂ಼ಬಿ ಕೆತ್ರುಕ್ಕಿ ಅದ್ಮಿ ಪೌಲನ ಬೋಧನೆನ ಖ್ಹಮ್‌ಜಿನ್‌ ನಂಬ್ಯು ಅಜು಼ ಬ್ಯಾಪ್ತಿಸ್ಮ ಲಿದು.
ACT 18:9 ಏಕ್‍ದನ್ ರಾತ್ಮ ಪೌಲನ ದರ್ಶನ್ ಹುಯು. ಪ್ರಭುನೆ ಇನ, “ಡರ್‌ನಕೊ ಬೋಲ್ತೋಸ್‍ ರ‍್ಹೆ ಶೊಪ್‌ನಕೊ ರ‍್ಹೀಶ್,
ACT 18:10 ಮೇಸ್ ತಾರಿ ಜೋ಼ಡ್ಮ ಛೂ಼. ಕೋಣ್‌ಬಿ ತುನ ಖರಾಬ್ ಕರಾನ ಕೊಉಷೇನಿ. ಆ ಖ್ಹಯೇರ್‌ಮ ಮಾರಭಣಿಥು ಕೆತ್ರೂಕಿ ಜ಼ಣು ಛಾ಼” ಕರಿ ಬೋಲ್ಯೊ.
ACT 18:11 ಇಮ್ಮಸ್ ಡೋಡ್‌ವರಖ್ಹ್ ಲಗು ಹಿಜ್ಜಾ಼ರ‍್ಹೀನ್ ದೇವ್ನಿ ವಚನ್ನ ಅದ್ಮಿಖ್ಹಾರಾನ ಬೋಧನೆ ಕರ‍್ಯೊ.
ACT 18:12 ಗಲ್ಲಿಯೋಕರಿ ಏಕ್‍ಜ಼ಣೊ ಅಖಾಯ ಮುಲಕ್‌ನೊ ರಾಜ್ಯಪಾಲ್ ಹುಯಿರ‍್ಹವಾನ ಖ್ಹಾಜೆ ಯೆಹೂದ್ಯರ್ ಪೌಲನಿ ವಿರೋದ್ ಎಕ್ಟುಹುಯಿನ್ ಇನ ಧರಿನ್ ನ್ಯಾವ್ನಿಝ಼ಗೊ ಲೀನ್‌ಗಯು.
ACT 18:13 ಅಜು಼ “ದೇವ್ ಅದ್ಮಿಖ್ಹಾರಾನ ಅಪ್ಣ ಧರ್ಮಶಾಸ್ತ್ರಕನ ವಿರೋದ್‌ಥಿ ಆರಾದನೆ ಕರ್ನುಕರಿ ದಿಲ್‌ಬದ್ಲಾವನ ಕೋಶಿಶ್ ಕರುಕರಸ್” ಕರಿ ಬೋಲ್ಯು.
ACT 18:14 ಪೌಲ ಪಾಛೊ಼ ಫರಿನ್ ವಾತೆ ಬೋಲ್ತೊ ರ‍್ಹವಾನಿವಖ್ಹ್‌ತೆ ಗಲ್ಲಿಯೋನನೆ ಯೆಹೂದ್ಯರ್‌ನ, “ಏಕ್‌ ವೇಳ್ಮ ಆ ಮೋಟಿ ಅಪರಾದ್ ಹುಯಿರ‍್ಹುಹೊತ್ತೊ ಅನ ಮೇ ಜಿಮ್ಮೇದಾರ್ ಲೀನ್ ಖ್ಹಮ್‍ಜ್ಯೊಹೊತ್.
ACT 18:15 ಕತೋಬಿ ಆ ಹರೇಕ್ ಥರಾನು ವಿವಾದ್ ಬೋಧನೆನಾಬಿ, ನಾಮ್ನಾಬಿ, ತುಮಾರಿ ಧರ್ಮಶಾಸ್ತ್ರನಿ ಘೋಣಿಸ್ ಛಾ಼. ಇನ ತುಮಾರಿ ಪಸಂದ್‌ನಿತ್ರ ತುಮೇಸ್ ತೀರ್ಪ್ ಕರಿರಾಖ್ಯಸ್, ಅಥ್ರಾನಿ ವಾತೆನ ಮನ ನ್ಯಾವ್ ತೀರ್ಪ್ ಕರಾನ ಕೊಹುವ್ವಾನಿ.ಕರಿ ಬೋಲಿನ್
ACT 18:16 ಇವ್ಣುನ ನ್ಯಾವ್‍ನಿ ಝ಼ಗೊಮಾಥು ಭಾರ್‌ ಮೋಕ್‌ಲ್ಯೊ.
ACT 18:17 ತದೆ ಅದ್ಮಿಖ್ಹಾರು ಸಬಾಮಂದಿರ್‌ನೊ ಅದ್ಯಕ್ಷ ಹುಯಿರ‍್ಹೊಥೋತೆ ಸೋಸ್ಥೆನಾನ ಧರಿಲೀನ್ ನ್ಯಾವ್ನಿಪಂಚ್‍಼ಕೋಟ್ಮಾಸ್ ಮಾರಲಗ್ಯು. ಗಲ್ಲಿಯೋನನೆ ಇನಾಮ ಏಕ್‌ಬಿ ಮಜೂ಼ರ್ ಕೊ ಕರ‍್ಯೋನಿ.
ACT 18:18 ಪೌಲ ಕೈಏಕ್ ದನ್‌ಲಗು ವಿಶ್ವಾಸಿ ಭಯೇನಿ ಜೋ಼ಡ್ಮಾಸ್ ಥೊ. ಅನಕೇಡೆಥು ಪ್ರಿಸ್ಕಿಲ್ಲ ಅಜು಼ ಅಕ್ವಿಲನ ಜೋ಼ಡೆ ಜ಼ಹಾಜ಼್ ಚ಼ಢೀನ್ ಸಿರಿಯಾನ ನಿಕ್‌ಳ್ಯೊ. ಇನ ದೀಕ್ಷೆಥೂತೆ ಇನಖ್ಹಾಜೆ ಕೆಂಖ್ರೆಯ ಖ್ಹಯೇರ್‌ಮ ಮುಡ್‌ಕ್ಯಾನ ಕೇಖ್ಹ್‌ ಕಡಾಯೊ.ಶನಕತೊ ಯೋ ಶಪತ್ ಕರಿರಾಖ್ಯೊಥೊ.
ACT 18:19 ಎಫೆಸಮ ಆವಖ್ಹತರ್ ಇನಿ ಜೋ಼ಡ್ಮ ರ‍್ಹವಾಳಾನ ಹಿಜ್ಜಾ಼ಸ್ ಮ್ಹೆಂದಿನ್ ಪೌಲ ಸಬೆನಿ ಝ಼ಗೊಕನ ಜೈ಼ನ್, ಯೆಹೂದ್ಯರ್‌ಥಿ ವಾದಕರ‍್ಯೊ.
ACT 18:20 ಇವ್ಣೆಖ್ಹಾರು ಇನ ಅಜೂ಼ಬಿ ಥೋಡದನ್ ಇವ್ಣಿ ಜೋ಼ಡ್ಮ ರ‍್ಹೇವ್ಣುಕರಿ ಬೋಲಿಲಿದು. ಕತೋಬಿ ಇನೆ ಮಾನ್ಯೊಕೊಯ್ನಿ.
ACT 18:21 ಅನಬದಲ್ ಇನೆ ಇವ್ಣುನ “ದೇವ್ನಿ ಮರ್ಜಿ ರ‍್ಹಿಯಿತೊ ಮೆ ತುಮಾರಕನ ಪಾಛೊ಼ ಐಶ್‌”. ಕರಿ ಬೋಲ್ತೊಹುಯಿನ್ ಎಫೆಸಥು ಜ಼ಹಾಜ಼್‍ನಿ ಚಾ಼ಲ್ ಕರ‍್ಯೊ.
ACT 18:22 ಯೊ ಕೈಸರೈನ ಆವಾನಿ ವಖ್ಹ್‌ತೆ ಹಿಜ್ಜಾ಼ಥು ಯೆರೂಸಲೇಮ್ಮ ಜೈ಼ನ್ ಸಬೆನ ಮಳಿನ್ ಅಂತಿಯೋಕ್ಯನ ಗಯೊ.
ACT 18:23 ಪೌಲನೆ ಅಂತಿಯೋಕ್ಯಮ ಥೋಡದನ್ ರ‍್ಹೀನ್ ಫಾಚೊ಼ ಹಿಜ್ಜಾ಼ಥು ನಿಕ್ಳಿನ್ ಗಲಾತ್ಯಬಿ ಫ್ರಿಜಿಯ ತಬರ್‌ಖಾಮ ಫರ್ತೊಹುಯಿನ್ ಹಿಜ಼್ಜಾನ ವಿಶ್ವಾಸಿಖ್ಹಾರನ ಘಟ್‍ಥಿ ಭೀರಾಖ್ಯೊ.
ACT 18:24 ಎತ್ರಾಮ ಅಲೆಕ್ಸಾಂಡ್ರಿಯಮ ಪೈದಹುಯೊತೆ ಅಪೊಲ್ಲೋಸ ಕರಿ ಯೆಹೂದ್ಯ ಏಕ್‍ಜ಼ಣೊ ಎಫೆಸಮ ಆಯೊ. ಯೋ ವಾತ್ಮ ಪುರ್‌ಗುಲ್‍ಬಿ ಅಜು಼ ಧರ್ಮಶಾಸ್ತ್ರನ ಅಛ್ಛಿನಿತರ ಮಾಲುಮ್ ಕರಿರಾಖ್ಯೊಥೊ.
ACT 18:25 ಅಜು಼ ಯೊ ಘಣು ಮನ್‍ಲಗಾಡಿನ್ ಪ್ರಭು ಯೇಸುನಿ ಮಾರಗ್‌ನ ಬಾರೇಮ ಅಛ್ಛಿನಿತರ ಬೋಧನೆ ಕರ್ತೊಥೊ, ಅಜು಼ ಶಿಕಾಡುಕರ್ತೊಥೊ. ಕತೋಬಿ ಯೋಹಾನ ಕರಾಯೋತೆ ಬ್ಯಾಪ್ತಿಸ್ಮನಿ ಬಾರೇಮ ಖಲಿಮಾಲುಮ್ ಥು.
ACT 18:26 ಅಪೊಲ್ಲೋಸನೆ ಸಬಾಮಂದಿರ್‌ಮ ಭಾಲಿಥಿ ಬೋಧನೆ ಕರ‍್ಯೊತೆ ಖ್ಹಮ್‍ಜ್ಯಾತೆ ಪ್ರಿಸ್ಕಿಲ್ಲ ಅಜು಼ ಅಕ್ವಿಲನೆ ಇವ್ಣೆ ಇನ ಘರೆ ಬುಲೈಜೈನ್ ಅಜು಼ ದೇವ್ನ ಮಾರಗ್‌ನ ಇನ ಬಿಜೂ಼ಬಿ ಜಾ಼ಖ್ಹತ್ ಅಛ್ಛಿನಿತರ ಬೋಲಿವತಾಳ್ಯು.
ACT 18:27 ಇನಕೇಡೆಥು ಅಖಾಯನ ಜಾ಼ವ್ಣುಕರಿ ಇನ ಮನ್‍ಲಗಾಖ್ಹತರ್ ವಿಶ್ವಾಸಿ ಭಯೇಖ್ಹಾರು ಇನ ಮದತ್‍ಕರಿನ್ ಹಿಜ಼್ಜಾಥೂತೆ ವಿಶ್ವಾಸಿವ್‌ನ ಚಿಟ್ಟಿಲೀಖಿನ್ ಅಪೊಲ್ಲೋಸನ ಮಳೈಲೇವ್ಣು ಕರಿ ಬೋಲಿಲಿದು.ಯೊ ಹಿಜ್ಜಾ಼ ಜಾ಼ವಾನಿ ವಖ್ಹ್‌ತೆ ದೇವ್ನಿ ಕೃಪಾಥಿ ವಿಶ್ವಾಸ್ ಕರವಾಳನ ಏಕ್‌ ಮೋಟು ಮದತ್ ಹುಯೊ.
ACT 18:28 ಶನಕತೊ ಯೊ ಘಣಿ ಶಕ್ಕಥ್ಥಿ ಅಬ್ಬಾಜ಼ಬ್ಬಿ ಕರ್ತೊಹುಯಿನ್ ಆಖ್ಖಾನಖ್ಹಾಮ್ಣೆ ದೇಖಾವನಿತರ ಯೆಹೂದ್ಯರ್‌ನ ಧರ್ಮಶಾಸ್ತ್ರಥಿ ಯೇಸುಸ್ ಕ್ರಿಸ್ತಕರಿ ಸಬೂತ್‍ಕರೀನ್ ಇವ್ಣುನ ಹರಾಯೊ.
ACT 19:1 ಅಪೊಲ್ಲೋಸ ಕೊರಿಂಥಮ ಥೊ ತದೆ ಪೌಲನೆ ಪಹಾಡ್ ಪರ್ಬತ್ಮಕರಿ ಚಾ಼ಲ್ತೊಹುಯಿನ್‌ ಎಫೆಸಮ ಪೋಚ್ಯೊ. ಹಿಜ಼್ಜಥೋಡ ಶಿಷ್ಯರ‍್ನ ದೇಖಿನ್,
ACT 19:2 “ತುಮೆ ವಿಶ್ವಾಸ್‍ಕರ‍್ಯಾತೆ ತದೆ ಪವಿತ್ರಾತ್ಮನ ಲೀಲಿದಾಕಿ ಶು”? ಕರಿ ಇವ್ಣುನ ಬೋಲಖ್ಹತರ್ ಇವ್ಣೆ ಇನ, ಕೊಯ್ನಿ ಪವಿತ್ರಾತ್ಮ ಕರಿ ಬೋಲಾನಿ ಬಾರೇಮ ಖ್ಹಮ್‌ಜಾ಼ಸ್‌ಕೊಯ್ನಿ ಕರಿ ಬೋಲ್ಯು.
ACT 19:3 ಪೌಲನೆ ಇವ್ಣುನ “ತುಮೆ ಖಿವಿ ಥರಾನು ಬಾಪ್ತಿಸ್ಮ ಲೀರಾಖ್ಯಸ್? ಕರಿ ಬೋಲಖ್ಹತರ್, ಇವ್ಣೆ ಯೋಹಾನನು ಬ್ಯಾಪ್ತಿಸ್ಮ ಕರೈಲಿದ” ಕರಿ ಬೋಲ್ಯು.
ACT 19:4 ಇನ ಪೌಲನೆ; ಯೋಹಾನನೆ ಪಶ್ಚಾತ್ತಾಪ್‌ ಕರೀನ್ ದೇವ್‌ಭಣಿ ಫರಿಜೈನ್ ಬ್ಯಾಪ್ತಿಸ್ಮ ಕರೈಲೀನ್. ಇನ ಪಾಛ಼ಳ್ ಆವಾಳಾನ ವಿಶ್ವಾಸ್ ಕರ್ನುಸ್ ಕರ್ನುಕರಿ ಬೋಲ್ಯೊಥೊ, ಯೊ ಯೇಸುಮಾಸ್.
ACT 19:5 ಇನ ಇವ್ಣೆ ಖ್ಹಮ್‌ಜಿನ್‌ ಪ್ರಭುಹುಯಿರ‍್ಹೋತೆ ಯೇಸುನ ನಾಮ್‍ಥಿ ಬ್ಯಾಪ್ತಿಸ್ಮ ಕರೈಲಿದು.
ACT 19:6 ಪೌಲನೆ ಇವ್ಣಪರ್ ಹಾತ್‍ಮ್ಹೇಲಾಮ ಪವಿತ್ರಾತ್ಮ ಇವ್ಣಪರ್ ಉತ್ರಿನ್ ಆಯೊ. ಇವ್ಣೆ ಕೈಏಕ್ ಥರಾನಿ ಬೋಲಿನಬೋಲಲಗ್ಯು, ಪ್ರವಾದ್‌ನೆಬೋಲ್ಯು.
ACT 19:7 ಇವ್ಣೆ ಖ್ಹುಮಾರ್ ಭಾರಜ಼ಣ ಪರ್ಖ್ಹಾಥ.
ACT 19:8 ಯೊ ಖ್ಹಯೇರ್‌ಮ ಪೌಲನೆ ಸಬಾಮಂದಿರ್‌ನ ಮಹಿ ಜೈ಼ನ್ ತೀನ್ ಮಹಿನಲಗು ಹಿಜ್ಜಾ಼ಸ್ ದೇವ್ನಿ ರಾಜ್ಯನಿ ವಾತೆನಿ ಬಾರೇಮ ಫೇಡ್‌ ಬೋಲ್ತೊಹುಯಿನ್ ಅದ್ಮಿಖ್ಹಾರನ ದಿಲ್ನ ಜೀತಾನ ಕೋಶಿಶ್ ಕರ‍್ಯೊ.
ACT 19:9 ಥೋಡುಜ಼ಣು ಇವ್ಣ ಮನ್ನ ಕಠಣ್ ಕರ‍್ಲಿನ್ ಪ್ರಭುನ ಮಾರಗ್‌ನ ಖರಾಬ್ ಕರಿ ಬೋಲ್ಯು.ಇನಖ್ಹಾಜೆ ಪೌಲನೆ ಇವ್ಣುನ ಮ್ಹೇಲಿನ್ ವಿಶ್ವಾಸಿವ್‌ನ ಇನ ಜೋ಼ಡೆ ಬುಲೈಲಿನ್ ಗಯೊ ಅಜು಼ ಇವ್ಣುನ ತುರನ್ನಕರಿ ಬೋಲೈಲ್ಯವಾಳಾನಿ ತರ್ಕಕರಾನಿ ಪಾಠಶಾಲಾಮ ಬುಲೈಲೀಜೈ಼ನ್ ಹರೇಕ್ ದನ್ ಚರ್ಚೆಕರ್ತೋಥೊ.
ACT 19:10 ಅಮ್ಮಸ್ ಬೇ ವರಖ್ಹ್ ನಿಕ್ಳಿಗಯ. ಏಷ್ಯಾಮ ಜಿವ್ಣು ಕರುಕರ್ತುಥೂತೆ ಖ್ಹಾರು ಯೆಹೂದ್ಯರ್‌ಬಿ ಗ್ರೀಕ್‌ವಾಳುಬಿ, ಪ್ರಭುನಿ ಉಪದೇಶ್‍ನ ಖ್ಹಮ್‌ಜ್ಯು.
ACT 19:11 ದೇವ್ನೆ ಪೌಲನ ಹಾತೇಖ್ಹು ಬೋಲಾನುಕೊಂತೆ ಎತ್ರು ಅದ್ಭುತ್‌ಖ್ಹಾರು ಕರಾವ್‍ತೊಥೊ.
ACT 19:12 ಇನಖ್ಹಾಜೆ ಅದ್ಮಿಖ್ಹಾರು, ಇನ ಹಾತ್ಮನು ಚೌ಼ಕೊ ಅಜು಼ ಆಂಗ್‍ಪರ‍್ನು ಪಿಛೋ಼ಡಿಬಿ ಪಳ್ಳಿಜೈ಼ನ್‌ ರೋಗ್‌ವಾಳನ ಉಪ್ಪರ್ ನಾಖ್ಯುತೊ ಇವ್ಣು ರೋಗ್‍ಅಖ್ಖು ಪರಿಹಾರ್‌ಹುಯಿನ್ ಅಜು಼ ಭೂತ್‌ಖ್ಹಾರು ನಾಶಿ ಜ಼ವ್‍ಕರ್ತುಥು.
ACT 19:13 ಭೂತ್ ನಖ್ಹಾಡವಾಳ, ಕರಿ ಬೋಲಿಲಿನ್ ಫರುಕರ್ತುಥೂತೆ ಥೋಡು ಯೆಹೂದ್ಯರ್‌ಬಿ ಪ್ರಭು ಯೇಸುನ ನಾಮ್‍ಥಿ ಭೂತ್ ಛೋ಼ಡಾವನ ಕೋಶಿಶ್ ಕರ‍್ಯು. ಅಜು಼ ಅವ್ಣೆ ಭೂತ್‌ನ, “ಪೌಲ ಬೋಲುಕರಸ್ತೆ ಯೇಸುನ ನಾಮ್‍ಥಿ ಹುಕುಮ್ ದೆವುಕರೇಸ್ ಕರಿ ಬೋಲುಕರ್ತುಥು.
ACT 19:14 ಸ್ಕೇವಕರಿ ಏಕ್‌ ಯೆಹೂದ್ಯ ಗಲ್‌ಢಯಾಜಕ್‌ನ ಲಡ್ಕಾ ಹುಯಿರ‍್ಹಾತೆ ಖ್ಹಾತ್‌ಜ಼ಣ ಭೈಯೇಬಿ ಅಮ್ಮಸ್ ಕರುಕರ್ತಥ.
ACT 19:15 ಕತೋಬಿ ಏಕ್‌ಹಲ್ಲ ಭೂತ್‍ನೆ ಇವ್ಣುನ, ಮನ ಯೇಸುಬಿ ಮಾಲುಮ್ ಪೌಲಬಿ ಮಾಲುಮ್ ಕತೋಬಿ ತುಮೆ ಕೋಣ್‌ಕರಿ ಫರೈನ್ ಬೋಲ್ಯು.
ACT 19:16 ತದೆ ಭೂತ್ ಧರಿರಾಖ್ಯೊಥೋತೆ ಯೊ ಅದ್ಮಿನೆ ಯೆಹೂದ್ಯರ್‌ನ ಘಣು ಚ಼ಂಢಾಳ್‌ಥಿ ಇವ್ಣುನ ಖ್ಹಪ್‌ಡೈಲಿದು. ಯೊ ಯೆಹೂದ್ಯರ್‌ಥಿಬಿ ಘಣೊ ಶಕತ್‌ವಾಳೊ ಹುಯಿರುಥೂತೆ ಇನಖ್ಹಾಜೆ ಇವ್ಣುನ ಮಾರ್ ಪೀಟ್‍ಕರ‍್ಯು. ಇವ್ಣೆ ಘಾವ್ ಹುಯಿನ್ ಉಘಾಡು ಹುಯಿನ್ ಘರ್‌ಮಾಥು ನಾಶಿಚ಼ಲಿಗು.
ACT 19:17 ಎಫೆಸಮ ಥೂತೆ ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೆತೆ ಘಣುಜ಼ಣು ಖ್ಹಮ್‍ಜ್ಯುತೆ ಇವ್ಣೆ ಡರಿನ್ ಗೌರವ್ ದಿದು ಅಜು಼ ಪ್ರಭು ಯೇಸುನ ನಾಮ್ನ ಘಣು ಖ್ಹರಾಯು.
ACT 19:18 ಇನ ವಿಶ್ವಾಸ್ ಕರ‍್ಯುತೆ ಕೈಯೇಕ್‌ಜ಼ಣು ಇವ್ಣೆ ಕರ‍್ಯಾಥಾತೆ ಪಾಪ್ನಕಾಮ್ನ ಬಾರೇಮ ಅದ್ಮಿವ್‌ನ ಖ್ಹಾಮ್ಣೆ ಬೋಲಿಲಿದು.
ACT 19:19 ಯೋಬಿಕೊಂತೆ ಜಾ಼ದು ಮಂತರ್ ಕರವಾಳಾಮ ಕೈಯೇಕ್‌ಜ಼ಣು ಇವ್ಣ ಫಾಲ್ ಪುಸ್ತಕ್ನ ಜ಼ಮ ಕರಿಲೈನ್ ಅಖ್ಖಾನ ಖ್ಹಾಮ್ಣೆ ಬಾಳಿನಾಖ್ಯು. ಯೋ ಅಖ್ಖಾನು ಮೋಲ್ ಗಣ್ತಿ ಕರ‍್ಯುತೊ ಖ್ಹುಮಾರ್ ಅಡೈವಿಖ್ಹ್‌ ರೂಪಾನ ಪೈಶಾಯೆತ್ರು ಹುಯು.
ACT 19:20 ಆ ಪರಕ್ಮ ಪ್ರಭುನಿ ವಚನ್ ಭಡ್ತುಜೈ಼ನ್ ಘಣೇಥಿ ಘಣ ಜ಼ಣಾಮ ಫೈಲಾಯು.ಯೊ ಘಣಿ ಶಕತ್ನು ಹುಯು.
ACT 19:21 ಆ ಹುಯುತೆ ಇನಕೇಡೆಥು ಪೌಲ ಮೆಕೆದೋನ್ಯ ಅಜು಼ ಅಖಾಯ ದೇಖ್ಹ್‌ನಿ ವಾಟೆ ಯೆರೂಸಲೇಮ್ನ ಜಾ಼ವಾನಿ ಮನ್‌ಕರ‍್ಯೊ. ಹಿಜ್ಜಾ಼ ಮೇ ಜಾ಼ವಾನಿ ವಖ್ಹತ್‌ಮ ರೋಮ್ ನಂಗರ್‌ನಾಬಿ ಮಳ್‌ಣು” ಕರಿ ಬೋಲ್ಯೊ.
ACT 19:22 ಕತೋಬಿ ಇನೆ ತಿಮೊಥೆ ಅಜು಼ ಎರಸ್ತ ಕರಿ ಬೇಜ಼ಣು ಪೌಲನ ಮದತ್ ಕರಾವಾಳನ ಪೌಲನೆ ಇವ್ಣುನ ಪಹಿಲೇಸ್ ಮೆಕೆದೋನಿಯನ ಮೋಕ್ಲಿದಿದೊ.ಅಜು಼ ಯೊ ಬಿಜೂ಼ಬಿ ಥೋಡದನ್ ಏಷ್ಯಾಮಾಸ್ ರ‍್ಹೀಗಯೊ.
ACT 19:23 ಯೊ ಹಗಾಮ್ಮ ಎಫೆಸಮ ಕ್ರಿಸ್ತನಿ ಮಾರಗ್‌ನ ಮಾಲುಮ್ ಕರಾನಿ ಬಾರೇಮ ಜಾ಼ಖ್ಹತ್ ಗಲಾಟ್ ಹುಯು.
ACT 19:24 ಯೋ ಕಿಮ್‌ಕತೊ ದೇಮೇತ್ರಿ ಕರಿ ಏಕ್‍ಜ಼ಣೊ ಖ್ಹೊನಾರ್‌ನೆ; ರೂಪಾಥಿ ಅರ್ತೆಮೀ ದೇವ್ತಿನಿ ಘುಢೀನಿ ಶಕಲ್ನಿ ನ್ಹಾನಿ ನ್ಹಾನಿಘುಡಿ ಕರೀನ್ ಯೋ ಕಾಮ್ ಕರಾವಾಳ ಅಖ್ಖಾನ ಘಣು ನಫ್ಫೊಕರಿ ದೆವ್‍ಕರ್ತೊಥೊ.
ACT 19:25 ಇನೆ ಯೋ ಕಾಮ್‌ಕರಾವಾಳ ಅಖ್ಖಾಸ್ನ ಎಕ್ಟು ಕರಿನ್ ಇವ್ಣುನ, “ಅದ್ಮಿವೊ, ಆ ಕಾಮ್‍ಥಿ ಅಪ್ಣುನ ಕೆತ್ರುಕ್ಕಿ ನಫ್ಫೊ ಮಳುಕರಸ್, ಯೊ ತುಮೂನ ಮಾಲುಮ್‌.
ACT 19:26 ಕತೋಬಿ ಹಾತೇಖ್ಹು ಕರಾನು ಮೂರತ್ ದೇವ್ ಕಾಹೆಕರಿ, ಪೌಲನೆ ಎಫೆಸಮ ಕಾಹೆತೆ ಕಮ್‍ಶಿಕಮ್ ಏಷ್ಯಾ ತಬರ್‌ಖಾನು ಘಣ ಅದ್ಮಿನ ಮನ್ನ ಖೇಚಿನ್ ಫರೈನಾಖ್ಯೊ. ಕರಿ ಬೋಲಾನು ತುಮೆ ದೇಖುಕರಸ್ ಖ್ಹಮ್‍ಜೂ಼ಬಿ ಕರಸ್.
ACT 19:27 ಅನೇಥಿ ಅಪ್ಣ ಧಂದಾನ ಅಟ್ಕಣ್ ಉಷೆ ಅಜು಼ ಯೋ ಕೊಂತೆ ಅರ್ತೆಮೀ ಮಹಾದೇವಿನ ಮಂದಿರ್‌ ಮಜೂ಼ರ್ ಕೊಂತೆ ಹುಯಿಜಾಶೆ. ಇಮ್ಮಸ್ ಖ್ಹಾರು ಏಷ್ಯಾಮುಲಕ್‍ಬಿ, ಜಗತ್‍ಖ್ಹಾರು ಪೂಜ಼ಕರಾನ ಆ ದೇವಿನು ವೈಭೋಗ್ ಅಖ್ಖು ಮಟಿಜಾ಼ವನಿತರ ಛಾ಼, ಕರಿ ಬೋಲ್ಯೊ.
ACT 19:28 ಇವ್ಣೆಖ್ಹಾರು ಆ ವಾತೆ ಖ್ಹಮ್‌ಜಿನ್‌ ಅದ್ಮಿವ್‌ನಿ ಝೂ಼ಂಡ್‌ ಖಿಜಾ಼ವ್ತುಹುಯಿನ್ ಎಫೆಸನು ಅರ್ತೆಮೀನಿ ದೇವಿಸ್ ಊಚಿ ಕರಿ ಚಿಕ್ರಾಣ್ ಮ್ಹೇಲ್ಯು.
ACT 19:29 ತದೆ ಖ್ಹಯೇರ್‌ಮ ಕಿಜ಼್ಜ ಕಿಜ್ಜಾ಼ಬಿ ಫೈಲಾಯು.ಅಜು಼ ಪೌಲನಿ ಜೋ಼ಡ್ಮ ಚಾ಼ಲ್ಯಫಂಡ್‍ಥಾತೆ ಮೆಕೆದೋನಿಯನು ಗಾಯೋಸಬಿ ಅರಸ್ತಾರ್ಕಬಿ ಇವ್ಣುನ ಅದ್ಮಿಖ್ಹಾರು ಧರೀನ್ ಅಖ್ಖುಜ಼ಣು ಮಳಾನಿಝ಼ಗೋಮ ಧಕೇಲಿನ್ ಪೇಶಿಗಯು.
ACT 19:30 ಅನ ಮಾಲುಮ್ ಕರ‍್ಯೊತೆ ಪೌಲನೆ ಮಹಿ ಪೇಶಿನ್ ಅದ್ಮಿಖ್ಹಾರಥಿ ವಾತೆ ಬೋಲ್ನುಕರಿ ಕರ‍್ಯೊ. ಕತೋಬಿ ವಿಶ್ವಾಸಿಖ್ಹಾರು ಇನ ಜಾ಼ವಾನ ಕೋ ಮ್ಹೆಲ್ಯುನಿ.
ACT 19:31 ಅತ್ರೇಸ್ ಕಾಹೆತೆ ಏಷ್ಯಾ ಮುಲಕ್ನ ಅಧಿಕಾರಿಮ ಥೋಡುಜ಼ಣು ಪೌಲನ ದೋಸ್ತಿ ಹುಯಿರ‍್ಹುಥೂತೆ ಇನಖ್ಹಾಜೆ ಇನಾಕನ ಅದ್ಮಿನ ಮೋಕ್ಲಿನ್; ತೂ ಯೋ ನಾಟಕ್‌ನಮಾಳ್‌ಮ ನಕೊ ಜಾ಼ಕರಿ ಗಿಂಗೈಲಿದು.
ACT 19:32 ಅದ್ಮಿವೋನ ಟೋಳ್ಮ ಗುಂಝ಼್‌ಲಾವ್ಣಿ ಹುಯು. ಥೋಡುಜ಼ಣು ಏಕ್‍ ಥರಾನಿ ಚಿಕ್ರಾಣ್ ಮ್ಹೇಲ್ಯುತೊ ಅಜು಼ ಥೋಡುಜ಼ಣು ಬಿಜೇಕ್‌ತರ ಚಿಕ್ರುಕರ್ತುಥು. ಹಿಜ಼್ಜಾಥೂತೆ ಘಣಾಜ಼ಣನ ಇವ್ಣೆ ಮಳಿನ್ ಐರ‍್ಹೂತೆ ಶನಖ್ಹಾಜೆ ಕರಿ ಬೋಲಾನು ಮಾಲುಮ್‌ ಕೊ ಥೂನಿ.
ACT 19:33 ಯೆಹೂದ್ಯರ್ ಅಲೆಕ್ಸಾಂಡರ‍್ನ ಖ್ಹಾಮ್ಣೆ ಧಕೇಲಿನ್ ಝೂ಼ಂಡ್‌ಮ ಥೋಡುಜ಼ಣು ಇನ ಇಷಾರ್ಕೊ ಕರ‍್ಯು. ತದೆ ಅಲೆಕ್ಸಾಂಡರ‍್ನೆ ಇನಭಣಿಥು ಹಾತ್‌ನೊ ಝಾ಼ಲೊದೀನ್ ಭರೈರ‍್ಹುತೆ ಅದ್ಮಿಖ್ಹಾರಾನ ಶಾಂತಿಥಿ ರ‍್ಹವಾನ ಬೋಲ್ತೊ ಹುಯಿನ್ ಜ಼ವಾಬ್ ದೇವ್ಣುಕರಿ ಥೊ.
ACT 19:34 ಕತೋಬಿ ಯೋ ಯೆಹೂದ್ಯರ್‌ನೊ ಕರಿ ಮಾಲುಮ್ ಕರಖ್ಹತರ್ ಇವ್ಣೆಖ್ಹಾರು ಎಕ್ಕಸ್ ದಮ್‍ಪರ್; ಎಫೆಸವಾಳಾನಿ ಅರ್ತೆಮೀ ದೇವಿಸ್ ಮಹಾದೇವಿ, ಕರಿ ಕೂಘಾಟಿ ಮ್ಹೇಲ್ಯು.
ACT 19:35 ಖ್ಹರ್ತಿಮ ಖ್ಹಯೇರ‍್ನ ಯಜಮಾನ್ನೆ ಅದ್ಮಿನಝೂ಼ಂಡ್‌ನ ಸಮಾಧಾನ್ ಕರೀನ್ ಇವ್ಣುನ “ಎಫೆಸನು ಅದ್ಮಿವೊ ಆಕಾಶ್‍ಥು ಪಡ್ಯುತೆ ಅರ್ತೆಮೀ ಮಹಾದೇವಿನ ಮಂದಿರ‍್ನ ಅಜು಼ ಇನಿ ಮೂರತ್ನ ಜ಼ತನ್ ಕರುಕರಸ್ತೆ ಎಫೆಸ ನಂಗರಸ್ ಕರಿ ಹಿಡಿ ಜಗತ್‍ನಾಸ್ ಮಾಲುಮ್ ಛಾ಼ನಿ?
ACT 19:36 ಆ ಸಮಾಚಾರ್ ಖ್ಹಾಚು಼ಕರಿ ಕೋಣ್ ಬೋಲಾನ ಕೊ ಹುವಾನಿ ಇನಖ್ಹಾಜೆ ಸಮಾಧಾನ್‌ಥಿ ಶೊಪೊರ‍್ಹೇವೊ ಅಜು಼ ದುಡ್ಕಿನ್ ಶಾತ್ಬಿ ನಾ ಕರ‍್ನು.
ACT 19:37 ತುಮೆ ಧರೀನ್ ಲೈರಾಖ್ಯತೆ ಆ ಅದ್ಮಿಖ್ಹಾರು ದೇವ್ನಿಮಂದಿರ್‌ನ ಚೋ಼ರ್ ಕರವಾಳು ಕಾಹೆ, ಅಪ್ಣ ದೇವಿನ ದೂಷಣೆ ಕರಾವಾಳುಬಿ ಕಾಹೆ.
ACT 19:38 ಇನಖ್ಹಾಜೇಥಿ ದೇಮೇತ್ರಿಯನಾಬಿ ಇನಾಭಣಿ ರ‍್ಹಾವವಾಳಾನ ಕಿನಾಪರ್ತೋಬಿ ಗಲತ್‌ ಲಗಾಡನು ಉಷೇತೊ ನಯ್ಯೊಬಿ ಛಾ಼ ಅಜು಼ ಮೋಟು ನ್ಯಾವ್‍ನಿ ಝ಼ಗೊಬಿ ಛಾ಼ ಹಿಜ್ಜಾ಼ ಫೆಡೈಲ್ಯಾವದೆ.
ACT 19:39 ಶಾತ್ತೋಬಿ ಘಣು ಪೂಚ್‍ತಾಚ಼್ ಕರ್ನುಕತೊ ಯೊ ನ್ಯಾವ್‌ಥಿ ಭರಿಸಬೆಮ ತೀರ್ಮಾನ್ ಹೋಣುಪಡ್ಯು.
ACT 19:40 ಆ ದನ್ನೆ ಚಾ಼ಲ್ಯುತೆ ಸಮಾಚಾರ‍್ನ ಎಕ್ಟುಹುಯಿರ‍್ಹಾತೆ ತುಮೂನ ಮೆ ಶನ ಬೋಲುಕರುಸ್‍ಕತೊ ಹಮ್ಕೇನು ಝ಼ಗ್‍ಡಾನ ದೇಖ್ಯಾತೆ ಥೋಡು ಅದ್ಮಿಖ್ಹಾರು ಹಮೆ ಝ಼ಗ್‍ಡೊ ಉಠಾಡಿರಾಖ್ಯಸ್ ಕರಿ ಗಲತ್‌ ಲಗಾಡನಿತರ ಥೂ. ಆ ಗಲಾಟ್‌ನ ಬಾರೇಮ ಬೋಲ್ಯುತೊ ಹಮೆ ಝ಼ಗ್ಡಾನ ಮಾನಿಲ್ಯವಾನ ಕೋ ಹುವಾನಿ ಕರಿ ಬೋಲ್ಯೊ.
ACT 19:41 ತದೆ ಖ್ಹಯೇರ‍್ನೊ ಅದಿಕಾರಿ ಆ ಖ್ಹಾರಿವಾತೆನಿ ಬೋಧನೆ ಹುಯಿಜಾ಼ವದಿನ್ ಘರೆ ಜಾ಼ವೊಕರಿ ಖ್ಹಮ್‍ಜಾ಼ಡ್ತೊ ಹುಯಿನ್ ಸಬೆನ ಖತಮ್ ಕರ‍್ಯೊ.
ACT 20:1 ಗಲಾಟ್ ಭೀರ‍್ಯಾವನ ಬಾದ್ಮ ಪೌಲನೆ ಯೇಸುನ ವಿಶ್ವಾಸಿವ್‌ನ ಏಕ್‌ ಬಾಜು಼ ಬುಲೈಮಂಗೈನ್‌ ಇವ್ಣುನ ಭಾಲಿದೀನ್ ಜೈ಼ನ್ ಆವುಸ್ ಕರಿ ಹಿಜ್ಜಾ಼ಥೊ ಮೆಕೆದೋನಿಯನ ನಿಕ್ಳಿಗಯೊ.
ACT 20:2 ಯೋ ತಬರ್‌ಖಾಮ ಚಾ಼ಲ್‍ಕುಚ಼್ ಕರ್ತೊಹುಯಿನ್ ಹಿಜ್ಜಾ಼ವಾಳನ ಕೈಏಕ್ ವಾತೇಥಿ ಭಾಲಿ ದೇತೊಹುಯಿನ್ ಗ್ರೀಸ್‌ ದೇಖ್ಹ್‌ನ ಗಯೊ.
ACT 20:3 ಹಿಜ್ಜಾ಼ ತೀನ್ ಮಹಿನ ಕಾಡಾನ ಬಾದ್ಮ ಸಿರಿಯ ದೇಖ್ಹ್‌ನ ದರ‍್ಯಾವ್‍ನ ಮಾರ್ಗೆ ಜಾ಼ವ್ಣುಕರಿ ರ‍್ಹವಾನಿ ವಖ್ಹತ್‌ಮ, ಥೋಡ ಯೆಹೂದ್ಯವಾಳನೆ ಪೌಲನಿ ವಿರೋದ್ ಗಪ್ಲಥ್ಥಿ ಖರಾಬ್ ಕಾಮ್ ಕರ‍್ಯುತೆ ಮಾಲುಮ್‍ಹುಯಿನ್ ಯೋ ಪಾಛೊ಼ ಫರೀನ್ ಮೆಕೆದೋನಿಯಾಥೊ ಸಿರಿಯನ ಜಾ಼ವ್ಣುಕರಿ ಖ್ಹಯಾಲ್ ಕರಿಲಿದೊ.
ACT 20:4 ತದೆ ಇನಿ ಜೋ಼ಡೆ ಬೆರೋಯಖ್ಹಯೇರ‍್ನೊ ಪುರ‍್ರನೊ ಛಿಯ್ಯೊ ಸೋಪತ್ರಾಬಿ, ಥೆಸಲೋನಿಕ ಖ್ಹಯೇರ‍್ನೊ ಅರಿಸ್ತಾರ್ಕ, ಅಜು಼ ಸೆಕುಂದ, ದರ್ಬೆ ಖ್ಹಯೇರ‍್ನೊ ಗಾಯ ಅಜು಼ ತಿಮೊಥೆ, ಯೋ ಕಾಹೆತೆ ಏಷ್ಯಾನ ತಬರ್‌ಖಾಮ ತುಖಿಕಬಿ, ತ್ರೊಫಿಮಾಬಿ, ಏಷ್ಯಾ ತಬರ್‌ಖಲಗೂಬಿ ಇನ ಜೋ಼ಡೆಗಯು.
ACT 20:5 ಇವ್ಣೆ ಹಮಾರೇಥಿ ಅಗಾಡಿಸ್ ಜೈ಼ನ್, ಹಮಾರಖ್ಹಾಜೆ ತ್ರೋವ ಖ್ಹಯೇರ್‌ಮ ಟಿವೈರ‍್ಹಾಥ.
ACT 20:6 ಯೆಹೂದ್ಯರ‍್ನು ಫುಗಕೊಂತೆ ರೋಟಾನಿ ಪೂಜ಼ ಹುವಾದಿನ್ ಹಮೆ ಫಿಲಿಪ್ಪಿ ಖ್ಹಯೇರ‍್ನಿ ಜ಼ಹಾಜ಼್ ಛ಼ಡಿನ್, ಪಾಚ಼್ ರೋಜ್‍಼ಕೇಡೆ ತ್ರೋವಮ ಇವ್ಣುನ ಮಳ್ಯ. ಹಿಜ್ಜಾ಼ ಖ್ಹಾ಼ತ್‍ದನ್‌ಲಗು ಥಾ.
ACT 20:7 ವಾರಾನೊ ಸಬ್ಬತ್‌ನ ದನ್ನೆ ಹಮೆಖ್ಹಾರು ಪ್ರಭುನು ರಾತ್ನುಭೋಜನ್‍ನ ಖ್ಹಾಜೇಥಿ ಎಕ್ಟು ಹುಯಿನ್ ಆಯ. ತದೆ ಸಭೆ ಭರಾಯುತೆ ಅದ್ಮಿಖ್ಹಾರಾನಿ ಜೋ಼ಡೆ ವಾತೆ ಬೋಲಿನ್ ಇನವ್ಹಾಣೆ ಹಿಜ್ಜಾ಼ಥೊ ಜಾ಼ವ್ಣುಕರಿ ಪೌಲ ಖ್ಹಯಾಲ್‍ಕರ‍್ಯೊ. ಇನಖ್ಹಾಜೆ ಅಧಿರಾತ್‍ಲಗೂಬಿ ವಾತ್ ಬೋಲುಸ್ ಕರ್ತೊಥೊ.
ACT 20:8 ಹಮೆಖ್ಹಾರು ಬೇಠಥಾತೆ ಘರ್‌ನ ಉಪ್ಲಿಬಾಜು಼ನ ಕೋಣಾಮ ಕೈಯೇಕ್ ದಿವೋ ಲಾಗುಕರ್ತುಥು.
ACT 20:9 ಯೂತಿಖ ಕರಿ ಏಕ್‍ಜ಼ಣೊ ಜ಼ವಾನಿ ಛೋ಼ಕ್ರು ಕಿಟಕಿಕನ ಬೇಶಿನ್ ಭರ್ ನಿಂದರ್‌ಮ ಝು಼ಕಾರ‍್ಯ ಮಾರುಕರ್ತೊಥೊ. ಪೌಲ ಬಿಜೂ಼ಬಿ ಬೋಧನೆ ಕರುಕರಾನಿ ವಖ್ಹತ್‌ಮ ಯೊ ಜ಼ವಾನಿ ನಿಂದರ್‌ಥಿ ಘಣಿ ಝು಼ಕಾರ‍್ಯ ಮಾರಿನ್ ತೀನ್ನಿ ಮಹಡಿಪರ್ಥೊ ಹೇಟ್ ರಡ್ಕಿಗೊ; ಇನ ಉಠಾಡನ ಗಯುತೆ ತದೆ ಯೋ ಮರಿರ‍್ಹೋಥೊ.
ACT 20:10 ಕತೋಬಿ ಪೌಲನೆ ಉತ್ರಿಜೈ಼ನ್,ಇನ ಪಾಡಿನ್ ಬಥೈನ್; ವೇಚ಼್‌ಣೆ ನಕೊಕರೊ, ಯೋ ಜಿವ್ತೊ ಛಾ಼ಕರಿ ಬೋಲ್ಯೊ.
ACT 20:11 ಪೌಲ ಪಾಛೊ಼ ಉಪ್ಪರ್ ಜೈ಼ನ್ ರೋಟಾನ ತೋಡಿ ಖೈನ್ ಘಣಿ ವಖ್ಹತ್‌ಲಗು ವಾತೆ ಬೋಲ್ಯೊ. ಎತ್ರಾಮ ವ್ಹಾಣುಹುಯು ತದೆ ಪೌಲ ಚ಼ಲೆಗಯೊ.
ACT 20:12 ಇವ್ಣೆ, ಜಿವ್ತೊಹುಯೂತೆ ಯೋ ಜ಼ವಾನಿ ಛೋ಼ಕ್ರಾನ ಬುಲೈಲಿನ್ ಜಾ಼ವನಿವಖ್ಹ್‌ತೆ ಇವ್ಣುನ ಘಣು ಸಮಾಧಾನ್ ಹುಯು.
ACT 20:13 ಹಮೆ ಅಗಾಡಿಸ್ ಜ಼ಹಾಜ಼್‍ಮ ಅಸ್ಸೊಸಿಕರಿ ಖ್ಹಯೇರ‍್ನ ಗಯ. ಹಮೆ ಪೌಲಾನ ಜೋ಼ಡ್ಮ ಜ಼ಹಾಜ಼್‌ಪರ್ ಜಾಶುಕರಿ ಥಾ. ಇನೇಸ್‌ ಗೋಡಾನಿ ವಾಟೇಥಿ ಚಾ಼ಲಿನ್ ಹಿಜ್ಜಾ಼ಥೊ ಒಳೆಜಾ಼ತೊಥೊ.
ACT 20:14 ಇಮ್ಮಸ್ ಹಮೆ ಆವಾನಿ ವಖ್ಹ್‌ತೆ ಪೌಲ ಅಸ್ಸೊಸಿ ಖ್ಹಯೇರ್‌ಮ ಹಮೂನ ಮಳ್ಯೊ. ಹಿಜ್ಜಾ಼ಥೊ ಹಮೆಖ್ಹಾರು ಜ಼ಹಾಜ಼್‌ಪರ್ ಮಳಿನ್ ಮಿತಿಲೇನ ಖ್ಹಯೇರ‍್ನ ಗಯ.
ACT 20:15 ಇನ ಅಗ್‍ಲ್ಯದನ್ನೆ ಹಮೆ ಹಿಜ್ಜಾ಼ಥ ಜ಼ಹಾಜ಼್‌ಪರ್ ಖಿಯೋಸ್ ಟಾಪನ ಖ್ಹಾಮ್ಣೆಥೂತೆ ಏಕ್‌ ಝ಼ಗೊಕನ ಆಯ, ಇನ ಅಗ್‍ಲ್ಯದನ್ನೆ ಸಾಮೋಸ್ ಟಾಪನ ಕಾಡಿನ್ ಇನ ಅಗ್‍ಲ್ಯದನ್ನೆ ಮಿಲೇತ ಖ್ಹಯೇರ‍್ನ ಜೈ಼ನ್ ಪೋಚ್ಯ.
ACT 20:16 ಪೌಲನೆ ಪಂಚಶತ್ತಮ ಪೂಜಾ಼ನ ದನ್ನ ಯೆರೂಸಲೇಮ್ಮ ರ‍್ಹೇವ್ಣುಕರಿ ಉತ್ವಾಳಿ ಕರುಕರ್ತೊಥೋತೆ ಇನಖ್ಹಾಜೆ ಏಷ್ಯಾ ತಬರ್‌ಖಾಮ ದನ್ ಕಾಡನ ಇಷ್ಟಕೊಂತೆ ಎಫೆಸ ಖ್ಹಯೇರ‍್ನ ಮ್ಹೇಲಿನ್‌ ಜಾ಼ವಾನ ಖ್ಹೂಜ಼್‌ಕರ‍್ಯೊ.
ACT 20:17 ಪೌಲನೆ ಮಿಲೇತಥೊ ಎಫೆಸ ಖ್ಹಯೇರ‍್ನ ಸಬೆನ ಗಲ್‌ಢವ್‍ಖ್ಹಾರಾನ ಏಕ್‌ ಸಂದೇಶ್ ಬೋಲಿಮೋಕ್ಲಿನ್ ಇವ್ಣುನ ಬುಲೈಮಂಗಾಯೊ.
ACT 20:18 ಯೋ ಗಲ್‌ಢಖ್ಹಾರಾನ, ಪೌಲನೆ, “ಮೇ ಏಷ್ಯಾ ತಬರ್‌ಖಾಮ ಐನ್ ಗೋಡೊಮ್ಹೇಲ್ಯೊ ತಪ್‌ಥೂಬಿ ತುಮಾರ ಇಚ಼್‌ಮ ಅಖ್ಖಿ ವೇಳ್‌ಮಾಬಿ ಕಿಮ್ ಚಾ಼ಲಿಲಿದೊ ಕರಿ ತುಮುನಾಸ್ ಮಾಲುಮ್.
ACT 20:19 ಯೆಹೂದ್ಯರ್ ಖ್ಹಾರಾನಿ ಮಶ್ಲಥ್ಥಿ ಮೆ ಘಣು ಖ್ಹತಾನು ಪಡ್ಯುಥು. ಕೈಏಕ್ ವಖ್ಹತ್ ಆಂಝು಼ ನಾಕ್ಣುಪಡ್ಯು. ಕತೋಬಿ ಮೇ ಖ್ಹಮಾಳಿನ್ ಕದೇಬಿ ಪ್ರಭುನು ಸೇವೆ ಕರ‍್ಯೊಕರಿ ತುಮೂನ ಮಾಲುಮ್.
ACT 20:20 ಮೇ ತುಮೂನ ಖ್ಹಾರಾನ ಖ್ಹಾಮ್ಣೆಬಿ ಅಜು಼ ತುಮೂನ ಘರೂಮಾಬಿ ಐನ್ ತುಮುನ ಮದತ್ ಹುವಾನು ಶಿಕಾಡನಾಬಿ ಪೀಛೆ ಹಟ್ಯೊಕೊಯ್ನಿ, ಯೊ ತುಮೂನ ಮಾಲುಮಸ್ ಛಾ಼.
ACT 20:21 ಯೆಹೂದ್ಯರ್‌ನ ಅಜು಼ ಗ್ರೀಕ್‍ವಾಳು ಪಾಪ್ನ ಮ್ಹೇಲಿನ್ ದೇವ್‌ಭಣಿ ಫರಿಜಾ಼ವ್ಣು ಅಜು಼ ಪ್ರಭು ಯೇಸುನ ನಾಮ್‌ಪರ್‌ ವಿಶ್ವಾಸ್ ರಾಕ್ಣುಕರಿ ಮೇ ಬೋಲಿರಾಖ್ಯೊಸ್.
ACT 20:22 ಅಜು಼ ಹಮ್ಕೆ ಮೇ ಪವಿತ್ರಾತ್ಮನ ಖ್ಹಾಮ್ಣೆ ಮುಡ್‌ಕ್ಯು ಝು಼ಕೈನ್‌, ಯೆರೂಸಲೇಮ್ನ ವಳೆಜ಼ವುಸ್‌. ಹಿಜ್ಜಾ಼ಮನ ಶಾತ್ ಉಶೇಕಿ ಮಾಲುಮ್‌ಕೊಯ್ನಿ.
ACT 20:23 ತುನ ಬೇಡಿಬಿ ಖ್ಹತಾಪ್ಣಿಖ್ಹಾರು ಮಾರಖ್ಹಾಜೆ ಟಿವೈರ‍್ಹೂಸ್‍ಕರಿ ಪವಿತ್ರಾತ್ಮನೆ ಝೇತೈನ್‌ ಹರೇಕ್ ಖ್ಹಯೇರ್‌ಮಾಬಿ ಮನ ಬೋಲುಕರಸ್ತೆ, ಮಾಲುಮ್ ಪಡುಕರಸ್.
ACT 20:24 ಮೇ ಮಾರ ಶೊಂತ್ ಜಾನ್ನಿ ಬಾರೇಮ ಸೋಚುಕೊಯ್ನಿ. ಪ್ರಭು ಹುಯಿರ‍್ಹೋತೆ ಯೇಸುನೆ ಮನ ದೀರಾಖ್ಯೋತೆ ಕಾಮ್ನ ಪೂರ ಕರಾನುಸ್ ಮನ ಖ್ಹಾರೇಥಿ ಮುಖ್ಯ. ಯೊ ದೇವ್ನು ವಾರ್‌ಖ್ಹಾನಿ ಬಾರೇಮಾನಿ ಸುವಾರ್ತೆನ ಸಾಕ್ಷಿನು ಕಾಮ್ ಹುಯಿರ‍್ಹೂಸ್.
ACT 20:25 ದೇಖೊ ತುಮಾರಿ ಜೋ಼ಡೆಥೂತೆ ಖ್ಹಾರಿ ವಖ್ಹತ್‌ಮ ದೇವ್ನಿ ರಾಜ್ಯನಿ ಬಾರೇಮಾನಿ ಸುವಾರ್ತೆನ ಮೆ ತುಮೂನ ಬೋಲಿ ಖ್ಹಮ್‌ಜಾ಼ಡ್ಯೊ. ಹಮ್ಕೆ ತುಮಾರಮ ಏಕ್‍ಜ಼ಣೂಬಿ ಮಾರ ಮ್ಹೋಡಾನ ಬಿಜು಼ ಕದೇಬಿ ದೇಕ್‌ಶು ಕೊಯ್ನಿಕರಿ ಮನಮಾಲುಮ್‌.
ACT 20:26 ಇನಖ್ಹಾಜೆ ಹಮ್ಕೆ ಮೆ ತುಮೂನ ಖ್ಹಾಚ಼ಮಾಬಿ ಬೋಲಾನಿ ಏಕ್‌ ವಾತೆ ಶಾತ್‍ಕತೊ; ತುಮಾರಮ ಕೋಣ್‌ತೋಬಿ ನಾಶ್‌ಹುಯುತೊ ಇನ ಮೇ ಜಿಮ್ಮೆದಾರಿ ಕಾಹೆ.
ACT 20:27 ಶನಕತೊ ಏಕ್‌ಬಿ ಲಪಾಡ್ಯೊಕೊಂತೆ ದೇವ್ನಿ ಖ್ಹೂಜ಼್‌ನ ತುಮೆ ಖ್ಹಮ್‌ಜಿಲೇವ್ಣುತೆ ಪರಕ್ಮ ಹರೇಕ್ ವಾತೆನಾಬಿ ಮೇ ತುಮೂನ ಖ್ಹಮ್‌ಜಾ಼ಡ್ಯೊ.
ACT 20:28 ಇನಖ್ಹಾಜೆ ತುಮಾರಿ ಬಾರೇಮಾಬಿ ಪವಿತ್ರಾತ್ಮನೆ, ತುಮೂನ ದೆಖಾವಾನ ದೀರಾಖ್ಯೋತೆ ಮೇಂಢಾನಿ ಮಂಧಾನಿ ಬಾರೇಮಾಬಿ ಹೊಷಾರ್‌ಥಿ ರ‍್ಹವೊ. ಅಜು಼ ಸಬೆನ ತುಮೆ ಕುರುಬಹುಯಿರ‍್ಹಾಸ್. ಶನಕತೊ ದೇವ್ ಇನ ಛಿಯ್ಯಾನ ಲ್ಹೋಯಿಥಿ ಮೋಲ್ ಲೀರಾಖ್ಯೊಸ್.
ACT 20:29 ಮೇ ಚ಼ಲ್ಯೊಜಾ಼ವದೀನ್ ಖರಾಬ್ ಜ಼ರಕ್‌ಖ್ಹಾರು ತುಮಾರಕನ ಆವ್‍ಶೆಕರಿ ಮನ ಮಾಲುಮ್. ಯೊ ಮಂಧಾನ ಗೋರ್‌ ಕರ್ಶೆಕೊಯ್ನಿ.
ACT 20:30 ಆ ನಾಹುಯಿನ್ ತುಮಾರಿ ಸಬೆಮಾಸ್ ಥೋಡುಜ಼ಣು ದುರ್ಬೊಧನೆ ಕರವಾಳು ಹುಯಿನ್ ಯೇಸುನ ವಿಶ್ವಾಸಿವ್‌ ಥೋಡಜ಼ಣಾನ ಖ್ಹಾಜೇಥಿ ದೂರ್ ಚ಼ಲಾವ್‌ಷೆ.
ACT 20:31 ಇನಖ್ಹಾಜೆ ಡೋಳಾನು ಆಂಝು಼ ನಾಕ್ತೊ ಹುಯಿನ್ ಮೇ ತೀನ್ ವರಖ್ಹ್ ದನ್ ತುಮಾರಿ ಜೋ಼ಡೆರ‍್ಹೀನ್ ಮೇ ತುಮೂನ ರ‍್ಹೇಣ್‍ದನ್ ಶಿಕಾಡ್ತೊಹುಯಿನ್ ತುಮೂನ ಹೊಷಾರ್ ಕರ‍್ಯೊತೆ ಯಾದ್ಮ ರಾಖೊ.
ACT 20:32 “ಮೇ ಹಮ್ಕೆ ತುಮೂನ ದೇವ್‍ನಾಬಿ ಇನ ವಾರ್‌ಖ್ಹಾನಿ ವಚನ್ನಾಬಿ ದೆವುಕರೂಸ್. ಯೊ ತುಮಾರಮ ಭಕ್ತಿನ ಭಡಾವನಾಬಿ, ಪರಿಶುದ್‌ಥಿ ತುಮೂನ ಹಕ್ನ ದ್ಯವಾನಾಬಿ ಶಕತ್‌ವಾಳೊ ಹುಯಿರೋಸ್.
ACT 20:33 ಮೇ ತುಮಾರಿ ಜೋ಼ಡೆ ರ‍್ಹವಾನಿ ವಖ್ಹತ್, ಖ್ಹೊನ್ನು, ರೂಪು, ಲುಂಗ್ಡಾವ್‍ನ ದೇಖಿ ಹರಖ್ಹ್‌ಯೊ ಕೊಯ್ನಿ.
ACT 20:34 ಮೇ ಮಾರ ಶೊಂತ್ ಹಾತೇಖ್ಹು ಕಮಾವ್‍ತೋಥೊ. ಕದೇಬಿ ಮಾರಖ್ಹಾಜೆ ರ‍್ಹವೊ, ಮಾರಿಜೋ಼ಡೆ ರ‍್ಹವಳಾನಖ್ಹಾಜೆ ಹೋಣುತೆ ಜ಼ರೂರತ್ನ ಪೂರಕರ್ತೋಥೊ.
ACT 20:35 ಅಖ್ಖೀಸ್ ಬಾರೇಮ ಮೇಸ್ ತುಮೂನ ಚಾ಼ಲಿನ್ ವತಾಳಿರಾಖ್ಯೊಸ್. ತುಮೇಬಿ ಇಮ್ಮಸ್ ಮ್ಹಿನತ್‌ಕರಿನ್ ತಾಖತ್‌ಕೊಂತೆ ಇವ್ಣುನ ಮದತ್ ಕರ‍್ನು ಅಜು಼ ಲ್ಯಾವಥೀಬಿ ದೇವಾಮ ಘಣು ವಾರ್‌ಖ್ಹೊ ಛಾ಼ಕರಿ ಪ್ರಭು ಹುಯಿರ‍್ಹೋತೆ ಯೇಸುನಿ ವಾತೆನ ಅಪ್ಣೆ ಖ್ಹಯಾಲ್ಮ ರಾಖೊಕರಿ ಬೋಲ್ಯೊ.
ACT 20:36 ಆವಾತೆಖ್ಹಾರಿ ಯೊ ಬೋಲಿ ಹುಯಿಜಾ಼ವಾದಿನ್ ಇವ್ಣಖ್ಹಾರಾನಿ ಜೋ಼ಡ್ಮ ಢುಕ್‍ಣ್ಯಮೇಟೆ ಹುಯಿನ್ ಪ್ರಾರ್ಥನೆಕರ‍್ಯೊ.
ACT 20:37 ಇನಕೇಡೆಥು ಪೌಲನೆ, ತುಮೆ ಮಾರ ಮ್ಹೋಡಾನ ಅಜು಼ ಕದೇಬಿ ದೇಕ್‌ಶುಕೊಯ್ನಿ ಕರಿ ಬೋಲಖ್ಹತರ್ ಇವ್ಣೆಖ್ಹಾರು ರೊಯಿನ್ ಆಂಝು಼ನಾಖ್ಯು ಅಜು಼ ಇನ ಬಥಾಯು ಅಜು಼ ಬುಚ್ಚಾ಼ದೀನ್ ಜೈ಼ನ್‌ಆಯೇಸ್ ಕರಿ ಬೋಲ್ಯು.
ACT 20:38 ಇನೆ ಮಾರ ಮ್ಹೋಡಾನ ಬಿಜು಼ಪಾಛು಼ ದೇಕ್‌ಶು ಕೊಯ್ನಿಕರಿ ಬೋಲ್ಯೊತೆ ವಾತೆನ ಇವ್ಣೆ ಘಣು ದುಖ್‌ಪಡ್ಯು ಅಜು಼ ಇನ ಜ಼ಹಾಜ಼್‌ಲಗು ಜೈ಼ನ್ ಮ್ಹೇಲಿನ್ ಆಯು.
ACT 21:1 ಹಮೆ ಇವ್ಣುನ ಮೋಕ್ಲಿನ್ ಇನಪಾರ್ ಜ಼ಹಾಜ಼್‌ಪರ್ ಛ಼ಡಿನ್ ಕೋಸ್ ಟಾಪಾಮ ಆಯ. ಪಾಛ಼್‌ಲ್ಯದನ್ನೆ ರೋದ ಟಾಪನ ಜೈ಼ನ್ ಹಿಜ್ಜಾ಼ಥ ಪತರ ಖ್ಹಯೇರ‍್ನ ಆಯ.
ACT 21:2 ಹಿಜ್ಜಾ಼ ಫೊಯಿನಿಕೆ ಜಾ಼ವಾನಿ ಜ಼ಹಾಜ಼್‌ನ ದೇಖಿ ಇನಾಪರ್ ಚ಼ಢೀನ್ ಗಯ.
ACT 21:3 ಖ್ಹಾಮ್ಣೆ ಕುಪ್ರ ಟಾಪು ದೆಖಾಯು. ಇನ ಡಾವಿಬಾಜು಼ ಮ್ಹೆಂದಿನ್ ಸಿರಿಯ ದೇಖ್ಹ್‌ ಭಣಿಕರಿ ಚಾ಼ಲ್ತಹುಯಿನ್ ತೂರ್ ಖ್ಹಯೇರ‍್ನ ಐನ್ ಉತ್‍ರ‍್ಯ. ಶನಕತೊ ಹಿಜ್ಜಾ಼ ಜ಼ಹಾಜ಼್‌ನು ಜಿನಖ್ಹ್‌ ಅಖ್ಖು ಉತಾರ‍್ನು ಥೂ.
ACT 21:4 ಹಿಜ್ಜಾ಼ ವಿಶ್ವಾಸಿಖ್ಹಾರನ ಢೂಂಡಿಕಾಡಿನ್ ಖ್ಹಾತ್‍ದನ್ ರ‍್ಹಿಯ. ಇವ್ಣೆ ಪವಿತ್ರಾತ್ಮನಿ ಖ್ಹಯಾಲ್‌ಥಿ ಪೌಲನ, “ತೂ ಯೆರೂಸಲೇಮ್ಮ ಗೋಡೊ ನಕೊ ಮ್ಹೇಲಿಶ್” ಕರಿ ಬೋಲ್ಯು.
ACT 21:5 ಕತೋಬಿ ಹಮಾರಿ ಭೇಟಿ ಖ್ಹತಮ್ ಕರೀನ್, ಹಿಜ್ಜಾ಼ಥ ನಿಕ್ಳಾನಿ ವಖ್ಹತ್‌ಮ ಯೊ ವಿಶ್ವಾಸಿ ಖ್ಹಾರು ಖ್ಹಯೇರ‍್ನ ಭಾರ್‌ಲಗು ಐನ್ ಇವ್ಣ ಬಾವಣ್‍ ಲಡ್ಕಾವ್‌ನಿ ಜೋ಼ಡ್ಮ ಮ್ಹೇಲಾನ ಆಯು.ಅಜು಼ ಹಮೆಖ್ಹಾರು ದರ‍್ಯಾವ್‍ನಿ ಕನಾರೆ ಢುಕ್‍ಣ್ಯಮೇಟೆ ಹುಯಿನ್ ಪ್ರಾರ್ಥನೆ ಕರೀನ್,
ACT 21:6 ಬಾದ್ಮ ಹಮೆ ಏಕ್‌ಥಿ ಏಕ್‌ ಖ್ಹರ್ತಿನಿ ಖ್ಹಲಾಮ್ ಕರೀನ್ ಜ಼ಹಾಜ಼್ ಚ಼ಢೀನ್ ಇವ್ಣೆ ಪಾಛು಼ಫರಿ ಇವ್ಣ ಘರೆಗಯು.
ACT 21:7 ಹಮೆ ತೂರ್ ಖ್ಹಯೇರ್‌ಥಿ ನಿಕ್ಳಿನ್ ಪ್ತೊಲೆಮಾಯ ಖ್ಹಯೇರ‍್ನ ಜೈ಼ನ್ ದರ‍್ಯಾವ್‍ನಿ ಚಾ಼ಲ್ ಖ್ಹತಮ್ ಕರ‍್ಯಾ. ಹಿಜ಼್ಜಾಥೂತೆ ವಿಶ್ವಾಸಿಖ್ಹಾರನ ಖ್ಹಲಾಮ್ ಕರೀನ್, ಇವ್ಣಿ ಜೋ಼ಡೆ ಏಕ್‍ರೋಜ಼್ ರ‍್ಹೀನ್,
ACT 21:8 ಇನವ್ಹಾಣೆ ನಿಕ್ಳಿ ಕೈಸರೈನು ಖ್ಹಯೇರ‍್ನ ಆಯ. ಹಿಜ್ಜಾ಼ ಹಮೆ ಫಿಲಿಪ್ಪನ ಘರ್‌ಮ ರ‍್ಹಯ. ಸುವಾರ್ತೆ ಖ್ಹಮ್‍ಜಾ಼ಡನೂಸ್ ಫಿಲಿಪ್ಪನು ಕಾಮ್ ಹುಯಿರ‍್ಹುಥು. ಹೈರೋತೆ ಸೆಜರೇಯಮ ಮದತ್ ಕರಾವಾಳ ಖ್ಹಾತ್‍ಜ಼ಣಾಮ ಆಬಿ ಏಕ್‍ಜ಼ಣೊ ಹುಯಿರೋಥೊ.
ACT 21:9 ಇನ ಚಾರ್‌ಜ಼ಣಿ ಕವಾರಿ ಛೋ಼ರಿಯೇಥಿ. ಇವ್ಣೆ ಖ್ಹಾರಿಜ಼ಣಿ ದೇವ್ನ ವಾತೇನ ಪ್ರವಾದ್‌ನೆ ಕರಾವಳಿಯೆ ಹುಯಿರ‍್ಹಿಥಿ.
ACT 21:10 ಹಮೆ ಹಿಜ್ಜಾ಼ ಥೋಡದನ್ ರ‍್ಹವಾನವಾರ್ ಅಗಬ ಕರಿ ಏಕ್‌ ಪ್ರವಾದಿ, ಯೂದಾಯಥೊ ಮಾರಕನ ಆಯೊ.
ACT 21:11 ಯೊ ಹಮಾರಕನ ಐನ್ ಪೌಲನು ಕಂಬರ್‌ನು ಕಷ್‍ಬಂದ್‍ನ ಪಾಡಿನ್ ಇನ ಹಾತ್‌ಗೋಡಕೇಡೆ ಭಾಂಧಿಲೀನ್; ಆ ಕಷ್‌ಬಂದ್‌ ಕಿನೂಕಿ ಇನ ಯೆಹೂದ್ಯರ್‌ನ ಖ್ಹಾರು ಅಮ್ಮಸ್ ಯೆರೂಸಲೇಮ್ಮ ಭಾಂದಿನ್ ಯೆಹೂದ್ಯರ್‌ಕಾಹೆತೆ ಇವ್ಣ ಹಾತ್ಮ ದಿಶೆಕರಿ ಪವಿತ್ರಾತ್ಮ ಬೋಲುಕರಸ್ ಕರಿ ಬೋಲ್ಯೊ.
ACT 21:12 ಕದೆ ಆ ವಾತೆನ ಖ್ಹಮ್‍ಜ್ಯಾಕಿ ಹಮೇಬಿ ಯೋ ಗಾಮ್‍ವಾಳುಬಿ ತೂ ಯೆರೂಸಲೇಮ್‌ನ ನಕೊ ಜಾ಼ಕರಿ ಪೌಲನ ಗಿಂಗೈಲಿದ.
ACT 21:13 ಇನಖ್ಹಾಜೆ ಪೌಲನೆ, “ತುಮೆ ಆಂಝು಼ನಾಖಿನ್ ತುಮೆ ಶನ ಮಾರು ದಿಲ್‌ತೋಡಾವೊಸ್? ಮೆ ಯೇಸುನ ನಾಮ್ನಖ್ಹಾಜೆ ಯೆರೂಸಲೇಮ್ಮ ಭಂದಿಹುವಾನು ಕಾಹೆತೆ ಪ್ರಭುನಖ್ಹಾಜೆ ಮರನಾಬಿ ತಯಾರ್ ಛೂ಼” ಕರಿ ಬೋಲ್ಯೊ.
ACT 21:14 ಯೋ ಖ್ಹಮ್‍ಜ್ಯೊಕೊಂತೆ ದೇಖಿನ್ ಪ್ರಭುನಿ ಮರ್ಜಿ ಕಿಮ್ ಛಾ಼ಕಿ ತಿಮ್ ಚಾ಼ಲಾದೆ ಕರಿ ಹಮೆ ಖ್ಹೊಪ್‌ ರ‍್ಹೀಗಯ.
ACT 21:15 ಆ ಖ್ಹಾರದನ್ ಹುವಾನಪಾರ್ ಹಮೆ ಖ್ಹುದ್ರೀನ್‌ ಯೆರೂಸಲೇಮ್ನ ನಿಕ್‍ಳ್ಯ.
ACT 21:16 ಕೈಸರೈಥು ಥೋಡ ಶಿಷ್ಯರ್‌ ಹಮಾರಿ ಜೋ಼ಡ್ಮ ಐನ್, ಮ್ನಾಸೋನಕರಿ ಏಕ್‍ಜ಼ಣಾನ ಘರ್‌ಮ ಹಮೂನ ರ‍್ಹವಾನಖ್ಹಾಜೆ ಬುಲೈಲಿನ್ ಗಯು. ಯೋ ಕುಪ್ರಥು ಆಯುತೆ ಪಹಿಲ ಶಿಷ್ಯರ್‌ಮ ಏಕ್‍ಜ಼ಣೊ ಥೊ.
ACT 21:17 ಹಮೆ ಯೆರೂಸಲೇಮ್ ಆವಾದಿನ್ ವಿಶ್ವಾಸಿಖ್ಹಾರು ಹಮೂನ ಖುಷಿಥಿ ಬುಲೈಲಿದಾ.
ACT 21:18 ಅಗಲ್ಯದನ್ನೆ ಪೌಲನೆ ಹಮುನಖ್ಹಾರನ ಬುಲೈಲಿನ್ ಯಾಕೋಬನ ಮಳಾನ ಗಯ. ತದೆ ಸಬೇನು ಖ್ಹಾರಾಸ್ ಗಲ್‌ಢಬಿ ಹಿಜ್ಜಾ಼ಸ್ ಥಾ.
ACT 21:19 ಪೌಲನೆ ಇವ್ಣುನ ಖ್ಹಲಾಮ್‍ಕರೀನ್ ಇನಿ ಸೇವೆಥಿ ದೇವ್ನೆ ಕರ‍್ಯೊತೆ ಪೂರ ಕಾಮ್ನ ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಬೀಚ್ಮ ಯೊ ಬೋಲಿವತಾಳ್ಯೊ.
ACT 21:20 ಇವ್ಣೆ ಯೋಖ್ಹಾರು ಖ್ಹಮ್‌ಜಿನ್‌ ದೇವ್ನ ಖ್ಹರಾಯು. ತದೆ ಇವ್ಣೆ ಪೌಲನ, “ಭೈ, ಹಜಾ಼ರೊ ಅದ್ಮಿ ಯೆಹೂದ್ಯರ್‌ಖ್ಹಾರು ವಿಶ್ವಾಸಿ ಹುಯಿರ‍್ಹುತೆ ತೂ ದೇಖಾಸ್ನಿ, ಇವ್ಣೆಖ್ಹಾರು ಧರ್ಮಶಾಸ್ತ್ರನ ದಿಲ್‌ಲಗಾಡವಾಳು ಹುಯಿರ‍್ಹುಸ್.
ACT 21:21 ಯೆಹೂದ್ಯರ್‌ಕಾಹೆತೆ ಅದ್ಮಿನ ಬೀಚ್ಮ ರ‍್ಹವಾಳು ಖ್ಹಾರೂಸ್ ಯೆಹೂದ್ಯರ್‌ನ, “ತುಮೆ ತುಮಾರ ಲಡ್ಕಖ್ಹಾರನ ಖ್ಹತ್ನ ನಾಕರಾವ್ಣು ಇವ್ಣು ಪದತ್ತಿನಿಘೋಣಿ ನಾಚಾ಼ಲಿಲೇವ್ಣು ಕರಿ ಮೋಶೆ ಧರ್ಮಶಾಸ್ತ್ರನಿ ಘೋಣಿ ನಾಚಾ಼ಲ್ನುಕರಿ ಬೋಲಾನು ಶಿಕಾಡುಕರಸ್ ಕರಿ ತಾರಿ ಬಾರೇಮ ಬೋಲುಕರಸ್.
ACT 21:22 ಅಮ್ ರ‍್ಹವಾನಪರ್ ಶಾತ್ ಕರ‍್ನು? ತೂ ಹಜ಼್ಜ ಅಯಿರ‍್ಹೊತೆ ವಾತೆ ಇವ್ಣುನ ಕಿಮ್‍ತೋಬಿ ಮಾಲುಮ್ ಪಡ್‌ಶೆ.
ACT 21:23 ಇನಖ್ಹಾಜೆ ಹಮೆ ತುನ ಬೋಲ್‍ಯೇತೆ ಕಾಮ್ ಕರ್‌, ಹಮಾರಮ ಶಪತ್ ಕರ‍್ಯುಹುಯು ಚಾರ್ ಅದ್ಮಿಛಾ಼.
ACT 21:24 ತೂ ಇವ್ಣುನ ಬುಲೈಲಿ ಜೈ಼ನ್ ಇವ್ಣಿಜೋ಼ಡ್ಮ ತುನಾಬಿ ಶುದ್ದಿಕರಿಲೀನ್, ಇವ್ಣಿ ಇವ್ಣಿ ಮುಡಪ್‍ ಖ್ಹತಮ್ ‍ಕರಾನಖ್ಹಾಜೇಥಿ ತೂ ಪೈಶಾ ಖರ್ಚಿಕರ್, ಅಮ್ ಕರ‍್ಯೊತೊ ಖ್ಹಾರುಜ಼ಣುಬಿ ತಾರಿಬಾರೇಮ ಇವ್ಣೆ ಖ್ಹಮ್‍ಜ್ಯುತೆ ಖಬರ್ ಖ್ಹಾಚು಼ ಕಾಹೆಕರೀಬಿ, ತೂಬಿ ಮೋಶೇನು ಧರ್ಮಶಾಸ್ತ್ರ ಪಾಡಿನ್ ಚಾ಼ಲವಾಳೊಕರಿ ಮಾಲುಮ್ ಕರ್ಶೆ.
ACT 21:25 ಯೆಹೂದ್ಯರ್‌ಕಾಹೆತೆ ಅದ್ಮಿಮ ಯೇಸುನ ವಿಶ್ವಾಸ್ ಕರವಾಳನಿ ಬಾರೇಮಾತೊ, ಮೂರತ್ನ ಝಾ಼ಳ್ ಉತಾರಹುಯನಾಬಿ, ಲ್ಹೋಯಿನಾಬಿ, ನ್ಹೇಟಿ ಭೀಚಿನ್ ಮಾರ‍್ಯಹುಯ ಜಿನಾವರ್‌ನಬಿ ನಾಖಾವ್ಣು ಅಜು಼ ವ್ಯಬಿಚಾರ್‌ಥಿ ದೂರ್ ರ‍್ಹೇವ್ಣುಕರಿ ಹಮೆ ನ್ಯಾವ್‌ ಕರ‍್ಯಾತೆ ಲೀಖ್ಯ” ಕರಿ ಬೋಲ್ಯು.
ACT 21:26 ತದೆ ಪೌಲನೆ ಯೋ ಖ್ಹಾರ ಅದ್ಮಿನ ಅಗ್‍ಲ್ಯದನ್ನೆ ಬುಲೈಲಿನ್ ಇವ್ಣಿಜೋ಼ಡೆ ಇನು ಯೋ ಶುದ್ದಿಕರಿಲೀನ್, ಮುಡಪ್‍ನ ದನ್ ಖ್ಹತಮ್ ಹುಯಿಗುಕರಿ ಖ್ಹಮ್‍ಜಾ಼ಡ್ತೊ ಹುಯಿನ್ ದೇವ್ನಿಮಂದಿರ್‌ಮ ಗಯೊ. ಹರೇಕ್‌ನಖ್ಹಾಜೆ ಕದೆ ಬಲಿದೇವ್ಣುಕರಿ ಹಿಜ್ಜಾ಼ ಮಾಲುಮ್ ಕರಾಯೊ.
ACT 21:27 ಯೊ ಖ್ಹಾತ್‍ದನ್ ಖ್ಹತಮ್ ಹುವಾನಿ ವಖ್ಹತ್‌ಮ ಏಷ್ಯಾ ತಬರ್‌ಖಾಥು ಆಯಿರ‍್ಹುಥೂತೆ ಯೆಹೂದ್ಯರ್‌ನೆ ಪೌಲನ ದೇವ್ನಿಮಂದಿರ್‌ಮ ದೇಖಿನ್, ಝೂ಼ಂಡ್‌ ಭರೈರ‍್ಹುಥೂತೆ ಅದ್ಮಿಖ್ಹಾರಾನ ಎಕ್ಕೋಸ್ಏಕ್‌ ಕರಿನ್ ಇನ ಧರೀನ್,
ACT 21:28 “ಇಸ್ರಾಯೇಲ್‌ನ ಅದ್ಮಿವೊ, ಹಮೂನ ಮದತ್ ಕರೊ, ಅಪ್ಣ ಅದ್ಮಿನಾಬಿ, ಧರ್ಮಶಾಸ್ತ್ರನಾಬಿ ಆ ಝ಼ಗೋನಾಬಿ ವಿರೋದ್ ಹುಯಿನ್ ಖ್ಹಾರಾಸ್ ಅದ್ಮಿನ ಬೋಧನೆ ಕರಾವಾಳೊ ಯೋ ಅದ್ಮಿ ಆಸ್! ಅತ್ರೇಸ್ ಕಾಹೆ, ಆ ಗ್ರೀಕ್‍ವಾಳಾನ ದೇವ್ನಿಮಂದಿರ್‌ಮ ಬುಲೈಲಾಯಿನ್‌ ಹೈರಿತೆ ಪವಿತ್ರಝ಼ಗೋನ ಮೈಲು ಕರಿನಾಖ್ಯೊ.” ಕರಿ ಚಿಕ್‌ರ‍್ಯು.
ACT 21:29 ಇವ್ಣೆ ಪಹಿಲೆ ಖ್ಹಯೇರ್‌ಮ ಎಫೆಸವಾಳೊ ತ್ರೊಫಿಮಕರಿ ಏಕ್‍ಜ಼ಣೊ ಪೌಲನಿ ಜೋ಼ಡ್ಮ ರ‍್ಹವಾನು ದೇಖ್ಯುಥೂತೆ ಇನಖ್ಹಾಜೆ ಪೌಲನೆ ಹಮ್ಕೆ ಇನ ದೇವ್ನಿಮಂದಿರ್‌ಮ ಬುಲೈರಾಖ್ಯೊ ಉಷೆಕರಿ ಲ್ಹಾಜ್ಯೊ಼.
ACT 21:30 ತದೆ ಅಖ್ಖೀಸ್ ಬಾಜು಼ ಕಲಾವ್ಣಿ ಹುಯಿನ್ ಫೈಲೈಗಯು. ಅಜು಼ ಅಖ್ಖಾಸ್ ಖ್ಹಯೇರ್‌ಥು ನಾಶಿ ಐನ್ ಪೌಲನ ಧರಿಲೀನ್ ದೇವ್ನಿಮಂದಿರ್‌ಮಾಥು ಭಾರ್‌ ಖೇಚಿಲಾಯಿನ್ ತದ್ನುತದೇಸ್ ಬಾಕಲ್ ಮೂಚಿನಾಖ್ಯು.
ACT 21:31 ಇವ್ಣೆ ಇನ ಮಾರಿನಾಕ್ಣುಕರಿ ಕೋಶಿಶ್ ಕರುಕರಾನಿ ವಖ್ಹತ್‌ಮ ಯೆರೂಸಲೇಮ್ಮ ಖ್ಹಾರಿಸ್ ಬಾಜು಼ ಗಲಿಬಿಲಿ ಹುಯುಕರಿ ಹಿಜ಼್ಜಾಥೂತೆ ರೋಮ್ನ ಹಜಾ಼ರ್‌ ಶಿಪಾಯಿನ ಮೋಟಾನ ಖಬರ್ ಆಯಿ.
ACT 21:32 ಇನೆ ತದ್ನುತದೇಸ್ ದಂಡುದಳವೈನ ಲೀನ್ ಅದ್ಮಿನ ಝೂ಼ಂಡ್‌‍ಕನ ನಾಶಿಆಯೊ. ಇವ್ಣೆ ಖ್ಹೋಶಿಪಾಯಿನೊ ಮೋಟಾನ ಅಜು಼ ಶಿಪಾಯಿಖ್ಹಾರಾನ ದೇಖಿನ್ ಪೌಲನ ಮಾರಾನು ಭೀರಾಖ್ಯು.
ACT 21:33 ಶಿಪಾಯಿನೊ ಮೋಟೊ ಖನ್ನೆ ಐನ್ ಇನ ಧರೀನ್ ಬೇ ಖ್ಹಂಕ್‌ಳಿಥಿ ಭಾಂದ್‌ಣುಕರಿ ಹುಕುಮ್‌ ದೀನ್; ಇವ್ಣುನ ಬೋಲ್ಯೊ, ಆ ಕೋಣ್, ಅನೆ ಶಾತ್‌ಕರ‍್ಯೊ? ಕರಿ ಪುಛಾಯೊ.
ACT 21:34 ತದೆ ಝೂ಼ಂಡ್‌‍ಮಥೂತೆ ಥೋಡುಜ಼ಣು ಏಕ್‌ಥರ ಬಿಜು಼ ಥೋಡುಜ಼ಣು ಬಿಜೇಕ್‌ತರ ಚಿಕ್ರುಕರ್ತುಥು. ಯೋ ಗಲಾಟ್‌ಥಿ ಖ್ಹಾಚು಼ಶಾತ್‍ ಕರಿ ಹಜಾ಼ರ್‌ ಶಿಪಾಯಿನ ಮೋಟಾನ ಖ್ಹಮ್‌ಜಾ಼ನ ಕೋ ಹುಯುನಿ ಇನಖ್ಹಾಜೆ ಪೌಲನ ಖ್ಹಾರ್ಕೊಟ್‌ಮ ಲೀನ್ ಜಾ಼ವಾನ ಹುಕುಮ್ ದಿದೊ.
ACT 21:35 ಪೌಲ ಪಾಯಿರಿಯೇಕನ ಆವಾದಿನ್ ಅದ್ಮಿಖ್ಹಾರಾನಿ ಧಕ್ಕಾಮುಕ್ಕಿಥಿ ಶಿಪಾಯಿಖ್ಹಾರನೆ ಇನ ಢೊಯಿಲೀನ್ ಜಾ಼ವಾನು ಪಡ್ಯುಥು. ಶನಕತೊ ಹಿಜ಼್ಜಾನು ಅದ್ಮಿನು ಝೂ಼ಂಡ್‌ ಜಾ಼ಖ್ಹತ್ ಚ಼ಂಢಾಳ್‌ವಾಳು ಹುಯಿರ‍್ಹುಥು.
ACT 21:36 ಇನಖ್ಹಾಜೆ ಧಕೇಲ್‍ತು ವಳ್ಯಾವ್‌ತುಥೂತೆ ಅದ್ಮಿನು ಝೂ಼ಂಡ್‌, ಇನ ಮಾರಿನಾಖೊಕರಿ ಚಿಕ್ರುಕರ್ತುಥು.
ACT 21:37 ಶಿಪಾಯಿಖ್ಹಾರು ಪೌಲನ ಖ್ಹಾರ್ಕೊಟ್‌ಮ ಲೀಜಾ಼ವನಿ ವಖ್ಹತ್‌ಮ ಇನ ಶಿಪಾಯಿನೊ ಮೋಟಾನ, “ಮೇ ತಾರಿ ಜೋ಼ಡೆ ದರ್ರಾಶಿ ವಾತೆ ಬೋಲಾನ ಹುಕುಮ್‌ ಮಳ್‍ಶೇಕಿ ಶು?” ಕರಿ ಪುಛಾ಼ವದೀನ್ ಇನೆ ತುನ ಗ್ರೀಕ್‌ವಾತೆ ಆವಸ್ಕಿ ಶು?
ACT 21:38 ಇಮ್‍ಕತೊ ಥೋಡದನ್ನಪಾರ್ ಲಡೈಉಠಾಡಿನ್ ಚಾರ್ ಹಜಾ಼ರ್ ಢಾಕುನ ಜ಼ಂಗಳ್‌ಮ ಬುಲೈಲಿನ್ ಗಯೋತೆ ಈಜಿಪ್ಟ್‌ವಾಳೊ ತೂಸ್ ಕಾಹೆಕಿ ಶು? ಕರಿ ಬೋಲ್ಯೊ.
ACT 21:39 ಇನ ಪೌಲನೆ, “ಮೆ ಏಕ್‌ ಯೆಹೂದ್ಯವಾಳೊ ಅಜು಼ ಕಿಲಿಕ್ಯ ತಬರ್‌ಖಾನು ತಾರ್ಸಕರಿ ಪ್ರಸಿದ್ದಿನು ಹುಯಿರ‍್ಹುತೆ ಖ್ಹಯೇರ್‌ವಾಳೊ, ಗೋರ್‌ಕರೀನ್ ಆ ಅದ್ಮಿನಿ ಜೋ಼ಡೆ ವಾತೆಬೋಲಾನ ಮನ ಹುಕುಮ್‌ ದೆ” ಕರಿ ಬೋಲ್ಯೊ.
ACT 21:40 ಸಿಪಾಯ್ನೊಮೋಟಾನೆ ಹುಕುಮ್‌ ದ್ಯಾವದೀನ್ ಪೌಲನೆ, ಪಾಯಿರಿಪರ್ ಭೀರಿನ್, ಅದ್ಮಿನಝೂ಼ಂಡ್‌ನ ಖ್ಹೊಪೊರ‍್ಹೇವೊಕರಿ ಹಾತ್‌ನೊ ಇಷಾರ್ಕೊ ದಿದೊ. ಇವ್ಣೆ ಜ಼ರ ಖ್ಹೊಪ್‍ಪಡಾದಿನ್ ಇವ್ಣುನ ಇನೆ ಇಬ್ರಿಯ ವಾತೆಮ ಬೋಲಾನ ಶುರುಕರ‍್ಯೊ.
ACT 22:1 “ಮಾರ ಬಾವೊ, ಯಹೂದಿ ದೋಸ್ತಿವೊ, ಮೇ ಹಮ್ಕೆ ತುಮೂನ ದೆವುಸ್ತೆ ಫೇಡ್ನ ಖ್ಹಮ್‍ಜೊ ಕರಿ ಚಿಕ್ರಿ ಬೋಲ್ಯೊ.
ACT 22:2 ಇವ್ಣಿಜೋ಼ಡೆ ಇಬ್ರಿಯ ಬೋಲಿಮ ವಾತೆ ಬೋಲಾನು ಖ್ಹಮ್‌ಜಿನ್‌ ಇವ್ಣೆ ಬಿಜೂ಼ಬಿ ಖ್ಹೊಪೊ ಪಡೀಗು. ತದೆ ಇನೆ ಶಾತ್ ಬೋಲ್ಯೊಕತೊ;
ACT 22:3 ಮೇ ಕಿಲಿಕ್ಯಾನು ತಾರ್ಸ ಖ್ಹಯೇರ್‌ಮ ಪೈದಹುಯೊತೆ ಯೆಹೂದ್ಯವಾಳೊ. ಕತೋಬಿ ಆಸ್ ಖ್ಹಯೇರ್‌ಮ ಪಳ್ಯೊಹುಯೊ.ಯೆರೂಸಲೇಮ್ಮ ಮೇ ಗಮಲಿಯೇಲನೊ ಶಿಷ್ಯಹುಯಿನ್, ಹಮಾರ ಗುರುಗುರಬ್‌ಲ್ಯನು ಧರ್ಮಶಾಸ್ತ್ರನು ಖ್ಹಾರೂಸ್ ಶಿಕಿರಾಖ್ಯೊಸ್; ಹಮ್ಕೆ ತುಮೆಖ್ಹಾರು ಛಾ಼ತೆ ತಿಮ್ಮಸ್ ಮೇಬಿ ದೇವ್‌ನೊ ದಿಲ್‌ಲಾಗ್ಯೊತೆ ಹುಯಿರ‍್ಹೋಥೊ.
ACT 22:4 ಆ ಮಾರಗ್‌ಪರ್‌ ಚಾ಼ಲವಾಳಾನ ಖ್ಹತಾವ್‍ತೊಹುಯಿನ್ ತಯೇಡ ಪರ್ಖ್ಹಾ ಖೇಚಿಲಾಯಿನ್ ಜೇಲ್‌ಮ ಧಕೆಲಿನ್ ಇವ್ಣುನ ಮರ್‌ನಾಖನಾಬಿ ಕಚ಼್ ಖಾದೊಕೊಯ್ನಿ.
ACT 22:5 ಅನಿಬಾರೇಮ ಗಲ್‌ಢಯಾಜಕ್‌ಬಿ ಮೋಟಿಸಭೆವಾಳು ಖ್ಹಾರು ಸಾಕ್ಷಿ ಹುಯಿರ‍್ಹುಸ್. ಇವ್ಣೇಥಿಸ್ ದಮಸ್ಕಮ ಥೂತೆ ಯಹೂದಿ ದೋಸ್ತಿನ ದ್ಯವಾನಖ್ಹಾಜೆ ಅವ್ಣಕನ ಥೂತೆ ಚಿಟ್ಟಿನ ಮಾಂಗಿಲೀನ್ ಇವ್ಣುನ ಬೇಡಿ ಘಾಲಿನ್ ಖ್ಹತಾವನ ಯೆರೂಸಲೇಮ್ಮ ಖೇಚಿಲಿ ಆವಾನ ದಮಸ್ಕಮ ಮೇ ವಳ್ಯೊಜಾ಼ತೋಥೊ.
ACT 22:6 ಖ್ಹುಮಾರ್ ಭಾರಘಂಟಾನಿ ವಖ್ಹತ್‌ಮ ಮೇ ದಮಸ್ಕನ ಖನ್ನೆ ಜೈ಼ರ‍್ಹೂಥು. ತದೆ ಅಪ್‌ಗುಪ್‌ಥೀಸ್ ಆಕಾಶ್‌ಮಾಥು ಏಕ್‌ ಉಜಾ಼ಳು ಮಾರ ಅಶ್‌ಪಿಶ್‌ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು.
ACT 22:7 ಮೇ ಜ಼ಮೀನ್‌ಪರ್ ರಡ್ಕಿಗಯೊ. ತದೆ ‘ಸೌಲ’ ಸೌಲ, ಮನ ಶನ ಖ್ಹತಾವಸ್? ಕರಿ ಮನ ಬೋಲ್ಯುತೆ ಏಕ್‌ ಆವಾಜ಼್‌ನ ಖ್ಹಮ್‍ಜ್ಯೊ.
ACT 22:8 ಇನ ಮೇ, ‘ಪ್ರಭು ತೂ ಕೋಣ್?’ ಕರಿ ಪುಛಾ಼ವದೀನ್, ‘ತೂ ಖ್ಹತವ್‍ಕರಸ್ತೆ ನಜ಼ರೇತ್‌ನೊ ಯೇಸುಸ್ ಮೇ’ ಕರಿ ಇನೆ ಮನ ಬೋಲ್ಯೊ.
ACT 22:9 ಮಾರಿ ಜೋ಼ಡೆ ರ‍್ಹವಾಳು ಉಜಾ಼ಳಾನ ದೇಖ್ಯುಪಣ್ಕಿ ಮಾರಿ ಜೋ಼ಡೆ ವಾತೆಬೋಲ್ಯುತೆ ಯೋ ಅವಾಜ಼್ ಖ್ಹಮ್‍ಜ್ಯುಕೊಯ್ನಿ.
ACT 22:10 ತದೆ ಮೆ ‘ಪ್ರಭು ಮೇ ಶಾತ್‍ಕರ್ನು?’ ಕರಿ ಪುಛಾ಼ಯೊ. ತದೆ ಪ್ರಭುನೆ, ತೂ ಉಠೀನ್‌’ ದಮಸ್ಕಮ ಜಾ಼, ತೂ ಶಾತ್ ಶಾತ್ ಕರ್ನುಕಿ ಯೋ ಖ್ಹಾರು ತುನ ಹಿಜ್ಜಾ಼ ಮಾಲುಮ್‌ ಪಡ್‌ಶೆ; ಕರಿ ಬೋಲ್ಯೊ.
ACT 22:11 ಯೋ ಉಜಾ಼ಳಾನಿ ಮಹಿಮೆಥಿ ಮಾರ ಡೋಳ ಕಾಣಹುಯಿಗಾತೆ ಇನಖ್ಹಾಜೆ ಮಾರಿಜೋ಼ಡೆ ರ‍್ಹವಾಳುಖ್ಹಾರು, ಮಾರೊ ಹಾತ್‍ಧರೀನ್ ದಮಸ್ಕಮ ಬುಲೈಲಿನ್ ಗಯು.
ACT 22:12 ಹಿಜ್ಜಾ಼ ಧರ್ಮಶಾಸ್ತ್ರನಿ ಬಾರೇಮ ಬರೋಬರ್ ಚಾ಼ಲಿಲ್ಯವಾಳೊ ದೇವ್‌ನೊ ಭಕ್ತಾಬಿ ಯೋ ಝ಼ಗೋನು ಯೆಹೂದ್ಯರ್ ಖ್ಹಾರಾಥಿ ಅಛ್ಛೊ಼ಕರಿ ನಾಮ್ ಕಮಾಯೊಹುಯೊ ಅನನೀಯಕರಿ ಏಕ್‍ಜ಼ಣೊ ಮಾರಕನ ಆಯಿ ಭೀರಿನ್,
ACT 22:13 ಇನೆ, ‘ಮಾರೊ ಭೈ ಸೌಲ, ತುನ ಡೋಳ ದೆಖವಾದೆ’ ಕರಿ ಬೋಲ್ಯೊ. ತದ್‌ನು ತದೇಸ್‌ ಮನ ಡೋಳಾನಿ ಜೋ಼ತ್ ಆಯಿನ್ ಮನ ದೇಖವಲಗ್ಯು. ಮೇ ಇನ ದೇಖ್ಯೊ.
ACT 22:14 ತದೆ ಅನನೀಯನೆ, ‘ತುಮಾರೊ ಗುರುಖ್ಹಾರಾನೊ ದೇವ್ ಘಣ ದನ್ನ ಪಾರಸ್ ತುನ ಚೂ಼ಣಿಲಿದೊ. ತೂ ದೇವ್ನಿ ಖ್ಹಯಾಲ್ನ ಮಾಲುಮ್ ಕರಿಲ್ಯವಾನಾಬಿ ನೀತಿವಾಳೊಸೇವಕ್ನ ದೇಕ್ಣುಕರಿಬೀ, ಯೊ ಇನಿ ಶೊಂತ್ ಅವಾಜ಼್‌ನಿ ವಾತೆನ ಖ್ಹಮಜ಼್‌ಣುಕರಿ ದೇವ್ನೆ ತುನ ನೇಮ್‌ಶಾಯೋತೆ.
ACT 22:15 ತೂ ದೇಖಿನ್‍, ಖ್ಹಮ್‍ಜ್ಯೊತೆ ಬಾರೇಮ ಖ್ಹಾರಾಸ್ ಅದ್ಮಿನ ಖ್ಹಾಮ್ಣೆ ಇನಿ ಸಾಕ್ಷಿ ಬೋಲ್‌ನು.
ACT 22:16 ತೂ ಹಮ್ಕೆ ಶನ ಖ್ಹೊಪ್‍ರ‍್ಹೇಸ್ ಉಟ್? ಪ್ರಭುನ ನಾಮ್ನ ಬೋಲವಾಳೊಹುಯಿನ್, ಬ್ಯಾಪ್ತಿಸ್ಮ ಕರೈಲೀನ್ ತಾರ ಪಾಪ್ನ ದ್ಹೋಯಿಲೆ ಅಜು಼ ತು ಇನಖ್ಹಾಜೆ ಪ್ರಾರ್ಥನೆ ಕರ್‌ ಕರಿ ಬೋಲ್ಯೊ.
ACT 22:17 ಮೇ ಯೆರೂಸಲೇಮ್ಮ ಪಾಛೊ಼ ಫರೀನ್ ಐನ್ ದೇವ್ನಿ ಮಂದಿರ್‌ಮ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ ಮೆ ಏಕ್‌ ದರ್ಶನ್ ದೇಖ್ಯೊ.
ACT 22:18 ಮೇ ಪ್ರಭುನ ದೇಖ್ಯೊ. ಇನೆ ಮನ, “ಒಗ್ಗಿ ಯೆರೂಸಲೇಮ್‍ಥು ನಿಕಳ್ ಮಾರಿ ಬಾರೇಮ ತೂ ಬೋಲಾನಿ ಸಾಕ್ಷಿನ ಆ ಖ್ಹಾರು ಅದ್ಮಿ ಮಾನಿಲೇಯಿ ಕೊಯ್ನಿ” ಕರಿ ಬೋಲ್ಯೊ.
ACT 22:19 ಇನ ಮೇ, ‘ಪ್ರಭು, ಮೇ ಅಖ್ಖಾಸ್ ಸಬೆನಿ ಝ಼ಗೋಮ ತಾರಾಮ ವಿಶ್ವಾಸ್ ರಾಖ್ಯಹುಯ ಅದ್ಮಿಖ್ಹಾರಾನ ಮೆ ಜೇಲ್‌ಮ ಧಕೆಲಿನ್ ಮರಾಯೊಹುಯೊ ಮೇಸ್ ಕರಿ,
ACT 22:20 ಅಜು಼ ತಾರಿ ಸಾಕ್ಷಿ ಹುಯಿರೋತೆ ಸ್ತೆಫನನು ಲ್ಹೋಯಿ ರಂಚಾ಼ವನಿ ವಖ್ಹ್‌ತೆ, ಮೇಬಿ ಇನ ಮಾನಿನ್ ಇನ ಮಾರವಾಳಾನು ಝ಼ಗ್ಗಾಕನ ಟಿವೈನ್ ಭೀಯೊಥೋನಿ, ಕರಿ ಇವ್ಣೆ ಮಾಲುಮ್ ಕರಿರಾಖವಳು ಹುಯಿರುಸ್.
ACT 22:21 ತದೆ ಪ್ರಭುನೆ; ಜಾ಼ ಮೇ ತುನ ದೂರ್ ಯೆಹೂದ್ಯರ್‌ಕಾಹೆತೆ ಅದ್ಮಿನ ತಬರ್‌ಖಾಮ ಮೋಕ್ಲುಸ್’ ಕರಿ ಮನ ಬೋಲ್ಯೊ.”
ACT 22:22 ಆ ವಾತ್ ಬೋಲಲಗು ಅದ್ಮಿಖ್ಹಾರು ಪೌಲನಿ ವಾತ್ನ ಕಾನ್‍ಲಾಗಾಡಿ ಖ್ಹಮ್‌ಜ್ಯು; ಅನಪಾರ್ ಇವ್ಣೆ “ಅಥ್ರಾನವಾಳಾನ ಜ಼ಮೀನ್‍ಪರ್ಥು ಕಾಡಿನಾಕ್; ಆ ಬಚಾ಼ವನ ಲ್ಹಾಯೇಕ್‍ ಕೊಯ್ನಿ” ಕರಿ ಚಿಕ್ರಿ ಬೋಲ್ಯು.
ACT 22:23 ಇವ್ಣೆ ಚಿಕ್ರಾಣ್ ಮ್ಹೇಲ್‍ತು, ಇವ್ಣು ಲುಂಗ್ಡಾನ ಫಾಡಿಲೇತು ಹುಯಿನ್, ಮಾಟಿ ಉಡಾವ್ತು ರ‍್ಹಯು.
ACT 22:24 ತದೆ ರೋಮ್‌ನೊ ಸೇನಾಧಿಪತಿನೆ ಪೌಲನ ಕೋಟೆನ ಮ್ಹೇಲಿಜಾ಼ವ್ಣುಕರಿ ಹುಕುಮ್ ದೀನ್, ಅದ್ಮಿಖ್ಹಾರು ಅಮ್ ಪೌಲನಿ ವಿರೋದ್ ಚಿಕ್ರಾಣ್ ಮ್ಹೇಲುಕರಾಸ್ತೆ ಕಾರಣ್ ಶಾತ್ ಕರಿ ಫುಚಾ಼ವ್ಣುಕರಿ ಸೆನಾದಿಪತಿನು ಆಖ್ಹ್ ಹುಯಿರ‍್ಹೀಥಿ.
ACT 22:25 ಇವ್ಣೆ ಪೌಲನ ಡುಗೈನ್ ಭಾಂದಿನ್ ಮಾರಾನಿ ವಖ್ಹ್‌ತೆ ಇನ ಖನ್ನೆ ಭಿಯುಥೂತೆ ಖ್ಹೋಶಿಪಾಯಿನ ಮೋಟಾನ, “ರೋಮ್ ಪ್ರಜೆ ಹುಯಿರ‍್ಹವಾಳ ಅದ್ಮಿನ ಅಪರಾದಿ ಕರಿನ್ ತೀರ್ಪ್ ಹುವಾನ ಅಗಾಡಿಸ್ ಕೋಲ್ಡೆಖ್ಹು ಮಾರ‍್ವಾನು ನ್ಯಾವ್‌ಕಿ ಶು?” ಕರಿ ಪುಛಾ಼ಯೊ.
ACT 22:26 ಯೋ ಖ್ಹೋಶಿಪಾಯಿನ ಮೋಟಾನೆ ಅನ ಖ್ಹಮ್‌ಜಿನ್‌ ತದ್‌ನು ತದೇಸ್‌ ಸೈನಾಧಿಪತಿಕನ ಜೈ಼ನ್ “ತೂ ಶಾತ್‌ ಕರುಕರಸ್ ಕರಿ ತುನ ಮಾಲುಮ್‍ಕಿ ಶು? ಆ ಅದ್ಮಿ ರೋಮ್‌ನೊ ಪ್ರಜೆ!” ಕರಿ ಬೋಲ್ಯೊ.
ACT 22:27 ತದೆ ಸೇನಾಧಿಪತಿ ಪೌಲಕನ ಐನ್, “ಬೋಲ್ ತು ರೋಮ್‌ನೊ ಪ್ರಜೆಕಿಶು?” ಕರಿ ಪುಛಾ಼ವಮ, ಪೌಲನೆ “ಓಹೊ” ಕರಿ ಜ಼ವಾಬ್ ದಿದೊ.
ACT 22:28 ತದೆ ಸೇನಾಧಿಪತಿನೆ, “ಮೇ ರೋಮ್‍ನು ಪ್ರಜೆ ಹುವಾನ ಘಣು ಪೈಶಾದಿದೊ” ಕರಿ ಬೋಲ್ಯೊ. ಕತೋಬಿ ಇನ ಪೌಲನೆ, “ಮೇ ಪೈದಾಖ್ಹ್‌ಥೋಸ್‌ ರೋಮ್‍ನು ಪ್ರಜೆ” ಕರಿ ಬೋಲ್ಯೊ.
ACT 22:29 ಪೌಲನ ಪುಛಾ಼ವ್ಣು ಕರಿ ಆಯುಹುಯು ಖ್ಹಾರುಜ಼ಣು ತದ್‌ನು ತದೇಸ್‌ ಇನಕಂಥು ಚ಼ಲಿಗಯು. ಅತ್ರೇಸ್ ಕಾಹೆತೆ ಸೇನಾಧಿಪತಿನೆ ಪೌಲ ರೋಮ್‍ನು ಪ್ರಜೆಕರಿ ಮಾಲುಮ್ ಕರಿಲೀನ್, ಇನ ಭಂಧೈರಾಖ್ಯೊಥೋತೆ ಇನಖ್ಹಾಜೆ ಡರ‍್ಯೊ.
ACT 22:30 ಪೌಲನ ಉಪ್ಪರ್ ಯೆಹೂದ್ಯರ್ ಖ್ಹಾರು ಶನ ಅಪರಾದ್ ನಾಖುಕರಸ್ ಕರಿ ಮಾಲುಮ್‌ ಕರಿಲ್ಯಾವಾನಖ್ಹಾಜೆ ಸೇನಾಧಿಪತಿನೆ ತೀರ್ಮಾನ್ ಕರೀನ್, ಇನವ್ಹಾಣೆ ಪೌಲನ ಬೇಡಿನ ಛೋ಼ಡಿನ್ ಮಹಾಯಾಜಕಬಿ ನ್ಯಾವ್ನಿಸಬೆವಾಳು ಖ್ಹಾರುಸ್ ಭರಾವ್ಣುಕರಿ ಹುಕುಮ್‌ ದೀನ್, ಪೌಲನ ಬುಲೈಲೀಜೈ಼ನ್ ಇವ್ಣಖ್ಹಾಮೆ ಭೀರಾಖ್ಯೊ.
ACT 23:1 ತದೆ ಪೌಲನೆ ಯೆಹೂದ್ಯರ್‌ನ ನ್ಯಾವ್ನಿಸಭೆನ ಠರ್‌ಕಿ ದೇಖಿನ್, “ಭೈಯೇವೊ, ಮೆ ಹಮ್ಕೆಲಗು ಅಛ್ಛಿ ದಿಲ್ನಿಸಾಕ್ಷಿಥಿ ದೇವ್ನಖ್ಹಾಮ್ಣೆ ಚಾ಼ಲಿರ‍್ಹೋಸ್” ಕರಿ ಬೋಲ್ಯೊ.
ACT 23:2 ಇನಖ್ಹಾಜೆ ಮಹಾಯಾಜಕ ಹುಯಿರೋತೆ ಅನಾನೀಯನೆ; ಪೌಲಕನ ಭಿಯಹುಯಖ್ಹಾರಾನ ಇನ ಮ್ಹೋಡಾಪರ್ ಮಾರೊ ಕರಿ ಬೋಲ್ಯೊ.
ACT 23:3 ತದೆ ಪೌಲನೆ ಇನ ಅಮ್‍ ಬೋಲ್ಯೊ, “ದೇವ್ ತುನಾಬಿ ಮಾರ್‌ಶೆ. ಛು಼ನ್ನೊ ಲಗಾಡಿಹುಯು ಭೀತಸ್ ತು. ಶನಕತೊ ಮೋಶೆನ ಧರ್ಮಶಾಸ್ತ್ರನಿಘೊಣಿ ನ್ಯಾವ್‌ಕರಾನ ಹಿಜ್ಜಾ಼ ಬೇಶಿನ್, ಮನ ಮಾರ್‌ವಾನ ಇವ್ಣುನ ಬೋಲುಕರಸ್ ಕಿಶು? ಆ ಧರ್ಮಶಾಸ್ತ್ರನವಿರುದ್ ಹುಯಿರ‍್ಹುಸ್ನಿ” ಕರಿ ಬೋಲ್ಯೊ.
ACT 23:4 ತದೆ ಪೌಲನ ಖನ್ನೆ ಭಿಯಹುಯಾನೆ, “ದೇವ್ನ ಮಹಾಯಾಜಕನ ಅಮ್ನಿ ಪರಕ್ ವಾತ್ ನಾ ಬೋಲ್‌ನು. ತೂ ಇನ ಖ್ಹರಮ್‌ ಕಾಡುಕರಸ್” ಕರಿ ಬೋಲ್ಯು.
ACT 23:5 ಪೌಲನೆ, “ಭೈಯೇವೊ, ಆ ಅದ್ಮಿ ಮಹಾಯಾಜಕ ಕರಿ ಮನ ಮಾಲುಮ್ ಕೋಥೂನಿ. ಶನಕತೊ ಅದ್ಮಿಖ್ಹಾರಾನೊ ಅದಿಪತಿನಿ ಬಾರೇಮ ಖರಾಬ್ ವಾತ್ ನಾ ಬೋಲ್‌ನು ಕರಿ ಧರ್ಮಶಾಸ್ತ್ರ ಲೀಖೈರುಸ್” ಕರಿ ಬೋಲ್ಯೊ.
ACT 23:6 ಸಭೆಮ ಥೂತೆ ಅದ್ಮಿಮ, ಥೋಡು ಸದ್ದುಕಾಯವಾಳು,ಅಜು಼ ಥೋಡು ಫರಿಸಾಯರ್‌ವಾಳನ ದೇಖಿನ್ ಪೌಲನೆ, “ಮಾರ ಭೈಯೇವೊ, ಮೇ ಫರಿಸಾಯರ್‌ವಾಳೊ ಮಾರೊ ಬಾಬಿ ಪರಿಸಾಯ ಹುಯಿರ‍್ಹೋಥೊ ಮಾರವಾಳು ಪಾಛು಼ಜಿವ್ತು ಉಷೆಕರಿ ಕರಿ ಮೆ ವಿಶ್ವಾಸ್ ಕರೀನ್ ಹಜ಼್ಜ ನ್ಯಾವ್‌ನ ವಿಚಾರಣೆಮ ಪಡ್ಯೊಸ್” ಕರಿ ಚಿಕ್ರಿನ್ ಬೋಲ್ಯೊ.
ACT 23:7 ಪೌಲ ಅಮ್ ಬೋಲಾಮ, ಫರಿಸಾಯರ್‌ಮಾಬಿ, ಸದ್ದುಕಾಯವಾಳಾಮ ಘಣಿ ಅಬ್ಬಾಜ಼ಬ್ಬಿ ವಾತೆ ಹುಯಿನ್ ಇವ್ಣಾಮಸ್ ಲಡೈ ಹುಯಿನ್ ಸಭೆ ಫುಟ್‍ವಾನಿ ಮತ್‍ ಹುಯು.
ACT 23:8 ಶನಕತೊ ಮರ‍್ಯುಹುಯು, ಪಾಛು಼ ಜಿವ್ತುಹುವಾನು ರ‍್ಹವೊ, ದೇವ್ನದೂತ ರ‍್ಹವೊ, ಶರೀರ್‌ಕೊಂತೆ ಆತ್ಮರ‍್ಹೇವೊ ಕೊಯ್ನಿಕರಿ, ಸದ್ದುಕಾಯವಾಳು ಬೋಲಸ್. ಕತೋಬಿ ಆ ಭೇಬಿ ಛಾ಼ಕರಿ ಫರಿಸಾಯರ್ ಮಾನಿಲೇಸ್.
ACT 23:9 ತದೆ ಯೋ ಯೆಹೂದ್ಯರ್‌ಮ ಘಣಿ ಗಲಾಟ್ ಹುಯು ಫರಿಸಾಯರ್‌ನ ಝೂ಼ಂಡ್‌‍ನು ಥೋಡು ಧರ್ಮ ಬೋಧನೆ ಕರವಾಳು ಉಠಿಭೀರಿನ್, “ಆ ಅದ್ಮಿಮ ಶನೀಬಿ ಅಪರಾದ್ ದೇಖವ್‌ಕರಕೊಯ್ನಿ. ದಮಸ್ಕನ ಜಾ಼ವಾನಿ ವಾಟ್‌ಮ ದೇವ್‌ದೂತರ್‌ಕೀ, ಆತ್ಮಾಕಿ, ಇನಜೋ಼ಡೆ ವಾತ್‍ಬೋಲಿರಾಕ್ಣು ಕರಿ ಅಬ್ಬಾಜ಼ಬ್ಬಿ ವಾತೆ ಚಾ಼ಲಿ.
ACT 23:10 ಆ ಹೊಜ್ಜತ್ ಘಣಿ ಹುಯಿನ್, ಅದ್ಮಿನು ಝೂ಼ಂಡ್‌ ಪೌಲನ ಖೇಚ಼ತಾಣಿ ಕರೀನ್ ಫಾಡಿ ಟುಕ್‌ಡ ಟುಕ್‌ಡಾ ಕರಿನಾಕ್ಷೆಕರಿ ಡರ್‌ಥಿ ಸೇನಾಧಿಪತಿನೆ ಶಿಪಾಯಿಖ್ಹಾರಾನ ತುಮೆ ಹೇಟ್ ಉತ್ರಿಜೈ಼ನ್ ಪೌಲನ ಜು಼ಲಮ್‌ಥಿ ಇವ್ಣಕಂಥು ಛೋ಼ಡೈನ್ ಕೋಟೆಮ ಲ್ಯಾವ್ಣುಕರಿ ಹುಕುಮ್ ದಿದೊ.
ACT 23:11 ಯೋ ದನ್ನಿ ರಾತ್ಮ ಪ್ರಭು ಪೌಲಕನ ಭೀರಿನ್, “ಭಾಲಿಥಿ ರ‍್ಹೇ; ತೂ ಯೆರೂಸಲೇಮ್ಮ ಮಾರಿಬಾರೇಮ ಬೋಲ್ಯೊತೆ ಇಮ್ಮಸ್ ರೋಮ್‍ನ ಅದ್ಮಿನಾಬಿ ಸಾಕ್ಷಿ ಬೋಲ್ನುಕರಿ ಬೋಲ್ಯೊ.
ACT 23:12 ಇನವ್ಹಾಣೆ ಥೋಡು ಯೆಹೂದ್ಯರ್‌ಖ್ಹಾರು ಎಕಾಡಿ ಐನ್ ಎಕ್ಟುಹುಯು ಅಜು಼ ಮಹಿ ಮಹಿಸ್ ಮಶ್ಲತ್ ಭಂದೈನ್ ಹಮೆ ಪೌಲನ ಮರಾಲಗು ಖಾಣುಪಾಣಿ ಛಿಮ್‍ಶುಕೊಯ್ನಿ. ಕರಿ ಆಣ್‌ಲಿದು.
ACT 23:13 ಅಮ್ ಕರ‍್ಯಾಹುಯಾಮ ಚಾ಼ಳಿಖ್ಹ್‌ಜ಼ಣೇಥಿ ಜಾ಼ಖ್ಹತ್ ಥು.
ACT 23:14 ಅವ್ಣೆ ಗಲ್‌ಢಯಾಜಕರ್‌ನ ಬಿಜು಼ ಗಲ್‌ಢಖ್ಹಾರಾಕನ ಜೈ಼ನ್, “ಪೌಲನ ಖೂನ್ ಕರಾಲಗು ಹಮೆ ಮ್ಹೋಡಾಮ ಶಾತ್ಬಿ ಘಾಲ್‍ಶುಕೊಯ್ನಿಕರಿ ಕಠಣ್‍ಥಿ ಆಣ್ ಲೀರಾಖ್ಯಸ್ ಕರಿ ಬೋಲ್ಯು.
ACT 23:15 “ಇನಖ್ಹಾಜೆ ಹಮ್ಕೆ ತುಮೆ ಶಾತ್‍ಕರ‍್ನುಕತೊ, ನ್ಯಾವ್‌ನು ಸಭೆವಾಳಾನಿಜೋಡ್ಮ ರೋಮ್ನೊಸಿಪಾಯ್ನೊ ಮೋಟಾಕನ ಜೈ಼ನ್‌, ಪೌಲನಿ ಬಾರೇಮ ಬಿಜೂ಼ಬಿ ಜಾ಼ಖ್ಹತ್ ತರೀಪ್‌ಶ ಕರ್ನುಕರಿ ಭಾಣುಬೋಲಿನ್ ಇನ ಹಮಾರಕನ ಬುಲೈಲಿನ್ ಆವ್ಣುಕರಿ ಸೇನಾಪತಿನ ಖ್ಹಮ್‌ಜಾ಼ಡ್ ತದೆ ಪೌಲ ಹಜ಼್ಜ ಆವ್‍ತೊಸ್‍ ಜಾ಼ವ್ಣು ಹಮೆ ವಾಟ್‌ಪರ್ ಟಿವೈರ‍್ಹೀನ್, ಇನ ಮಾರಿನಾಖೇಸ್” ಕರಿ ಬೋಲ್ಯು.
ACT 23:16 ಕತೋಬಿ ಅವ್ಣಿ ಮಶ್ಲತ್ ಪೌಲನ ಭೇನ್ನಛಿಯ್ಯಾನ ಮಾಲುಮ್ ಪಡ್ಯು. ಇನೆ ಶಿಪಾಯ್ನ ಕೋಟೆನ ಮಹಿಜೈ಼ನ್ ಪೌಲನ ಖ್ಹಮ್‍ಜಾ಼ಡ್ಯೊ.
ACT 23:17 ತದೆ ಪೌಲನೆ ಏಕ್‌ ಖ್ಹೋಶಿಪಾಯಿನ ಮೋಟಾನ ಬುಲೈನ್, “ಆ ಜ಼ವಾನಿ ಛೋ಼ಕ್ರಾನ ಸೇನಾಧಿಪತಿಕನ ಬುಲೈಲಿನ್ ಜಾ಼. ಯೋ ಇನ ಖ್ಹಮ್‍ಜಾ಼ಡಾನಿ ಏಕ್‌ ವಾತ್ ಛಾ಼” ಕರಿ ಬೋಲ್ಯೊ.
ACT 23:18 ಇಮ್ಮಸ್ ಯೋ ಅಧಿಕಾರಿನ ಪೌಲನ ಭಾಣ್‍ಜ್ಯಾನ ಸೇನಾಧಿಪತಿಕನ ಬುಲೈಲಿನ್ ಗಯೊ. ಇನೆ ಸೇನಾಧಿಪತಿನ ಅಮ್‌ಬೋಲ್ಯೊ, “ಯೋ ಕೋಂಡೈರ‍್ಹೋತೆ ಪೌಲನೆ ಮನ ಬುಲೈನ್, ಆ ಛೋ಼ಕ್ರಾನ ಸೇನಾಧಿಪತಿಕನ ಲೀನ್‍ಜಾ಼ತೆ, ಇನ ಏಕ್‌ ವಾತ್‍ಬೋಲ್ನುಕರಿ ಛಾ಼” ಕರಿ ಬೋಲ್ಯೊ.
ACT 23:19 ಸೇನಾಧಿಪತಿನೆ ಯೋ ಜ಼ವಾನಿ ಛೋ಼ಕ್ರಾನ ಹಾತ್‍ಧರೀನ್ ಏಕ್ಲನಾಸ್ ಏಕಾಡಿ ಬುಲೈಲೀಜೈ಼ನ್, “ತೂ ಶಾತ್ ಬೋಲ್ನುಕರಿ ಛಾ಼?” ಕರಿ ಪುಛಾ಼ಯೊ.
ACT 23:20 ತದೆ ಯೋ ಜ಼ವಾನಿ ಛೋ಼ಕ್ರಾನ, “ಪೌಲನಿ ಬಾರೇಮ ಘಣು ಮಾಲುಮ್ ಕರಿಲೇವ್ಣುಕರಿ ಭಾಣುಕರೀನ್, ಕಾಲ್ನ ನ್ಯಾವ್‍ನಿ ಸಭೆಮ ಪೌಲನ ಬುಲೈಲಿನ್ ಆವ್ಣುಕರಿ ತುನ ಯೆಹೂದ್ಯರ್ ಖ್ಹಾರು ಬೋಲಾನ ಕರುಕರಸ್.
ACT 23:21 ಕತೋಬಿ ಇವ್ಣಪರ್ ವಿಶ್ವಾಸ್ ನಕೊ ಕರಿಶ್. ಪೌಲನ ಮಾರಾನಖ್ಹಾಜೆ ಚಾ಼ಳಿಖ್ಹ್‌ಥೀಬಿ ಜಾ಼ಖ್ಹತ್ ಯೆಹೂದ್ಯರ್‌ಖ್ಹಾರು ಲಪೀನ್ ಟಿವೈರ‍್ಹುಸ್ ಇವ್ಣೆ ಇನ ಮಾರ‍್ವಲಗು ಶಾತ್ಬಿ ಖಾಶು ಕೊಯ್ನಿ ಕರಿ ಆಣ್‌ಕರ‍್ಯು ಅಜು಼. ಹಮ್ಕೆ ತಾರಿ ಹುಕುಮ್‌ನಖ್ಹಾಜೆ ಟಿವೈರ‍್ಹೂಸ್” ಕರಿ ಬೋಲ್ಯೊ.
ACT 23:22 ತದೆ ಸೇನಾಪತಿನೆ ಯೋ ಜ಼ವಾನಿ ಛೋ಼ಕ್ರಾನ, “ಇವ್ಣಿ ಮಶ್ಲತ್ನಿ ಬಾರೇಮ ಬೋಲಿರಾಖ್ಯೊಸ್‍ಕರಿ ಕಿನಾಬಿ ನಕೊ ಬೋಲ್” ಕರಿ ಅಜು಼ ಜ಼ವಾನಿ ಛೋ಼ಕ್ರಾನ ಹುಕುಮ್‌ದೀನ್ ಮೋಕ್ಲಿದಿದೊ.
ACT 23:23 ಇನಪಾರ್ ಖ್ಹೋಶಿಪಾಯಿನ ಮೋಟಾನೆ ಬೇಜ಼ಣ ಸೇನಾಧಿಕಾರಿನ ಬುಲೈನ್ ಇವ್ಣುನ, “ಆ ರಾತ್ ನೌಘಂಟಾನ ಕೈಸರೈ ಖ್ಹಯೇರ‍್ನ ಜಾ಼ವಾನ ಬೇಖ್ಹೋ ಶಿಪಾಯಿನಾಬಿ, ಖ್ಹಡ್‌ತೀನಿಖ್ಹ್‌ ಅದ್ಮಿ ಘೋಡಾಚ಼ಲಾವಳನಾಬಿ, ಬೇಖ್ಹೊ ಅದ್ಮಿ ಭಾಲವಳಾನಾಬಿ, ತಯಾರ್‌ಕರೊ.
ACT 23:24 ಅಜು಼ ಘೋಡಾನ ತಯಾರ್‌ಕರ‍್ಲಿನ್, ಪೌಲನ ಬೆಖ್ಹಾಡಿನ್‌, ರಾಜ್ಯಪಾಲ್ ಹುಯಿರೋತೆ ಫೇಲಿಕ್ಸಕನ ಇನ ಜ಼ತನ್‍ಥೀಸ್‌ ಬುಲೈಲೀಜಾವ್ಣು” ಕರಿ ಬೋಲ್ಯೊ.
ACT 23:25 ಅಜು಼ ಸೇನಾಧಿಪತಿನೆ ಆ ನಾಹುಯಿನ್ ಇವ್ಣುನ ಅಮ್ ಏಕ್‌ ಚಿಟ್ಟಿ ಲೀಖಿನ್ ದಿದೊ:
ACT 23:26 “ಮಹಾಪ್ರಭು ಹುಯಿರೋತೆ ರಾಜ್ಯಪಾಲ್ ಫೇಲಿಕ್ಸ್‌ನ ಕ್ಲೌದ್ಯ ಲುಸಿಯಸ್‍ನಿ ಖ್ಹಲಾಮ್.
ACT 23:27 ಆ ಅದ್ಮಿನ ಯೆಹೂದ್ಯರ್‌ಖ್ಹಾರು ಧರೀನ್ ಮಾರಿನಾಕ್ಣುಕರಿ ಥೂ. ಕತೋಬಿ ಆ ರೋಮ್‌ನೊ ಪ್ರಜೆಕರಿ ಮಾಲುಮ್ ಪಡ್ಯು. ಮೇ ಶಿಪಾಯಿಖ್ಹಾರಾನಿ ಜೋ಼ಡೆಜೈ಼ನ್ ಛೋ಼ಡಾಯೊ.
ACT 23:28 ಇವ್ಣೆ ಶನ ಅನಪಾರ್ ಅಪರಾದ್ ನಾಖುಕರಸ್ ಕರಿ ಮಾಲುಮ್‌ ಕರಿಲ್ಯಾವಾನಖ್ಹಾಜೆ ಕರಿ ಅನ ಇವ್ಣೆ ನ್ಯಾವ್‍ನಿ ಸಬೆಮ ಮೇ ಬುಲೈಲಿನ್ ಗಯೊ.
ACT 23:29 ಮನ ಹಿಜ್ಜಾ಼ ಮಾಲುಮ್ ಪಡ್ಯುತೆ ಶಾತ್‍ಕತೊ ಪೌಲ ಖರಾಬ್ ಕಾಮ್ ಕರಿರಾಖ್ಯೊಸ್ ಕರಿ ಯೆಹೂದ್ಯರ್‌ಖ್ಹಾರು ಬೋಲ್ಯುತೋಬಿ, ಇವ್ಣು ಅಪರಾದ್ ಖ್ಹಾರು ಇವ್ಣ ಧರ್ಮಶಾಸ್ತ್ರನಿ ಬಾರೇಮಾನಿ ವಾತೆನ ಪಾಡೀನ್, ಇನಪರ್ ಅಪರಾದ್ ಢೋವಡ್ಯು ಪಣ್ಕಿ ಮರಣ್ ದಂಡನೆ ರ‍್ಹವೊ ಬೇಡಿ ಘಾಲಾನ ರ‍್ಹವೊ ಕರಾಖ್ಹರ‍್ಕಿ ಖೇವಿಬಿ ಅಪರಾದ್ ಕೋಥಿನಿ.
ACT 23:30 ಕತೋಬಿ ಯೆಹೂದ್ಯರ್‌ಮ ಥೋಡುಜ಼ಣು ಪೌಲನ ಮಾರಿನಾಖನ ಮಶ್ಲತ್‌ ಕರುಕರಸ್‍ಕರಿ ಮನ ಮಾಲುಮ್ ಪಡ್ಯು. ಇನಖ್ಹಾಜೆ ಮೇ ಇನ ತುರಂತ್ ತರಾಕನ ಮೋಕ್ಲುಕರುಸ್. ಆಸ್ ಕಾಹೆತೆ, ಪೌಲನಪರ್ ಅಪರಾದ್ ನಾಖವಳಾನಾಬಿ ತಾರಸ್‍ಖ್ಹಾಮ್ಣೆ ಯೋ ಅಪರಾದ್ನಿ ವಾತೆ ಬೋಲಾನ ಹುಕುಮ್ ದೀರಾಖ್ಯೊಸ್”.
ACT 23:31 ಶಿಪಾಯಿಖ್ಹಾರು ಇವ್ಣುನ ಹುಕುಮ್ ಹುಯುತೆ ತಿಮ್ಮಸ್ ಪೌಲನ ಇವ್ಣಿಜೋ಼ಡೆ ರಾತೋರಾತ್ ಬುಲೈಲಿನ್ ಅಂತಿಪತ್ರಿಕರಿ ಗಾಮ್‌ನ ಬುಲೈಲೀಗಯು.
ACT 23:32 ಇನ ಅಗಲ್ಯದನ್ನೆ ಪೌಲನ ಜೋ಼ಡೆ ಅಗಾಡಿ ಜಾ಼ವಾನ ಘೋಡ ಚ಼ಲಾವವಾಳಾನ ಮ್ಹೇಲಿನ್, ಸಿಪಾಯಿಖ್ಹಾರು ಪಾಛು಼ಫರಿನ್ ಕೋಟೆನ ಆಯು.
ACT 23:33 ಇವ್ಣೆ ಕೈಸರೈ ಖ್ಹಯೇರ‍್ನ ಜೈ಼ನ್, ರಾಜ್ಯಪಾಲ್‌ನ ಚಿಟ್ಟಿದಿದೊ. ಇನಪಾರ್ ಪೌಲಾನ ಇನ ಹಾತ್ಮ ದಿದೊ.
ACT 23:34 ರಾಜ್ಯಪಾಲ್‌ನೆ ಚಿಟ್ಟಿ ಫಡೀನ್, ಇನೆ ಪೌಲನ, “ತು ಖೆವ ದೇಖ್ಹ್‌ನೊ?” ಕರಿ ಪುಛಾ಼ವಮ ಕಿಲಿಕ್ಯವಾಳೊ ಕರಿ ಮಾಲುಮ್‌ಪಡ್ಯು.
ACT 23:35 ರಾಜ್ಯಪಾಲ್ನ, “ವಿರೋದ್ ಹುಯಿರ‍್ಹುತೆ ಯೆಹೂದ್ಯರ್‌ಖ್ಹಾರು ಹಜ್ಜಾ಼ ಆವಾದಿನ್, ಮೇ ತಾರ ಅಖ್ಖಾಸ್ ಕಾಮ್ನ ವಿಚಾರ್ ಕರಿಶ್” ಕರಿ ಬೋಲಿನ್ ಪೌಲನ ಹೆರೋದಾನಿ ಮಹೇಲ್‌ಮ ರಾಖಿನ್ ಕಾವ್ಲಿ ಕರ್ನುಕರಿ ಹುಕುಮ್‌ ದಿದೊ.
ACT 24:1 ಪಾಚ಼್ ದನ್‍ಹುವಾದಿನ್ ಗಲ್‌ಢಯಾಜಕ್ ಅನನೀಯನೆ, ಯೆಹೂದ್ಯರ್‌ನ ಥೋಡಘಲ್ಡಾನ ಅಜು಼ ತೆರ್ತುಲ್ಯಕರಿ ಏಕ್‌ ವಕೀಲ್ನ ಬುಲೈಲಾಯಿನ್‌, ರಾಜ್ಯಪಾಲ್‌ನ ಖ್ಹಾಮ್ಣೆ ಪೌಲನ ಉಪ್ಪರ್ ಫಿರಾದ್ ಬೋಲಾನ ಕೈಸರೈ ಖ್ಹಯೇರ‍್ನ ಆಯೊ.
ACT 24:2 ಪೌಲನ ನ್ಯಾವ್‍ಮ ಬುಲೈಮಂಗಾಯು. ತದೆ ತೆರ್ತುಲ್ಯನೆ, ಪೌಲನ ಉಪ್ಪರ್ ಇನಿಅಪರಾದ್ನಿ ವಾತ್ನ ಢೊವಾಡನ ಶುರುಕರ‍್ಯೊ. “ಮಹಾ ಪ್ರಭು ಫಿಲಿಕ್ಸ್‌ ತಾರೆಥೀಸ್ ಹಮಾರು ಅದ್ಮಿಖ್ಹಾರು ಸಮಾಧಾನ್‌ಥಿ ಜಿವ್ಣು ಕರುಕರಸ್. ತಾರಿ ಖ್ಹೂಜ಼್‌ಥೀಸ್ ದೇಖ್ಹ್‌ಮ ಕೆತ್ರಿಕ್ಕಿ ಬಿಗ್‍ಡಿಹುಯಿ ಹಾಲತ್ನ ಖ್ಹುದಾರಿರಾಖ್ಯೊಸ್.
ACT 24:3 ಹರೇಕ್ ಬಾಜೂ಼ಬಿ ಹರೇಕ್ ಪರಕ್‍ಮಾಬಿ ಘಣು ಧನ್ಯವಾದ್ ಕರೀನ್ ಅನ ಹಮೆ ಮಾನಿಲಿಯೇಸ್.”
ACT 24:4 ಕತೋಬಿ ಮೇ ತಾರಿ ವಖ್ಹತ್‌ನ ಬಿಜೂ಼ಬಿ ಜಾ಼ಖ್ಹತ್ ಕೋಲೇವುಂತೆ ಥೋಡಿಸ್ ವಾತೆ ಬೋಲುಸ್. ದಯಾಕರೀನ್ ಖ್ಹಮಜ಼್‌ಣುಕರಿ ತಾರಾಮ ಗಿಂಗೈಲೆವುಸ್.
ACT 24:5 “ಆ ಅದ್ಮಿ ಖರಾಬ್‌ಛಾ಼ ಅಜು಼ ಬರಾಬರ್‌ಕೊಯ್ನಿ ಜಗತ್‌ಮ ಕಿಜ್ಜಾ಼ಬಿ ರ‍್ಹವೊ, ಯೆಹೂದ್ಯರ್‌ಮ ಲಡೈ ಉಠಾಡ್ತೊ ಫಂಡಸ್‌ಕರಿಬಿ, ಆ ನಜ಼ರೇತ್‌ನಿ ಖೂಮ್ನೊ ಮೋಟೊ ಕರಿಬಿ ಹಮೆ ದೇಖ್ಯ.
ACT 24:6 ಆ ನಾಹುಯಿನ್ ಆ ಅದ್ಮಿ ದೇವ್ನಿ ಮಂದಿರ‍್ನ ಮೈಲುಕರಾನ ಕೋಶಿಶ್ ಕರ‍್ಯೊ. ಇನಾಖ್ಹಾಜೆ ಹಮೆ ಇನ ಬಂಧಿಕರ‍್ಯಾ. ಹಮೆ ಹಮಾರ ಶೊಂತ್ ನಿಯಮ್‌ನಿ ಪರಕ್ಮ ತೀರ್ಪ್ ಕರ್ನುಕರಿ ಖ್ಹೂಜ಼್‌ಕರ‍್ಯ.
ACT 24:7 ಕತೋಬಿ ಸೇನಾಧಿಪತಿನ ಮೋಟೊ ಲುಸಿಯಸ್‍ ಆಯೊ.ಅಜು಼ ಖ್ಹತಾವನ ಪರಕ್ಮ ಹಮಾರಕಂಥು ಛೋ಼ಡೈಲೀನ್ ಗಯೊ.
ACT 24:8 ತದೆ ಲೂಸಿಯಸ್ನೆ ಇನ ಗಲತ್‌ ಲಗಾಡವಾಳನ ತಾರ ಖ್ಹಾಮ್ಣೆ ಆವಾನ ಹುಕುಮ್ ದಿದೊ. ತೂ ಅನ ಬೋಲಾಮಸ್, ಹಮೆ ಅನ ವಿರೋದ್‌ ಬೋಲುಕರೇತೆ ವಾತೆಖ್ಹಾರಿ ಖ್ಹಾಚಕರಿ ತುನ ಮಾಲುಮ್ ಪಡ್‌ಶೆ” ಕರಿ ಬೋಲ್ಯೊ.
ACT 24:9 ತದೆ ಯೆಹೂದ್ಯರ್ ಖ್ಹಾರು ಯೋ ವಕೀಲ್ನಿಜೋ಼ಡ್ಮ ಮಳಿನ್ ಆ ಬೋಲುಕರಾತೆ ವಾತೆಖ್ಹಾರಿ ಖ್ಹಾಚಿಸ್‌ಕರಿ ಬೋಲ್ಯು.
ACT 24:10 ರಾಜ್ಯಪಾಲ್‌ನೆ ಪೌಲನ, ತೂ ವಾತೆ ಬೋಲೆಜಾ಼ಯ್‌ ಕರಿ ಖ್ಹಂಜ಼್‌ಕಾರ್‌ ದ್ಯವಾಮ ಇನೆ ಪಾಛೊ಼ ಜ಼ವಾಬ್ ಶಾತ್‍ದಿದೋಕತೊ “ತೂ ಮನ ಕೈಏಕ್ ವರಖ್ಹ್‌ಥು ಆ ದೇಖ್ಹ್‌ನೊ ನ್ಯಾವ್‍ಣೊ ಬಣಿರೋಸ್ ಕರಿ ಮನ ಮಾಲುಮ್‌. ಇನಖ್ಹಾಜೆ ಖುಷಿಥಿ ಫೇಡ್‍ ದೆವುಸ್‌.
ACT 24:11 ಮೇ ದೇವ್ನಿ ಆರಾದನೆ ಕರಾನ ಯೆರೂಸಲೇಮ್ನ ಜೈ಼ನ್, ಭಾರ ರೋಜ಼್ ಖಲಿ ಹುಯಿರಾಥ ಕರಿ ತೂ ಮಾಲುಮ್ ಕರಿಲೀಯೆಜಾ಼ಯ್.
ACT 24:12 ಹಿಜ್ಜಾ಼ ದೇವ್ನಿಮಂದಿರ್‌ಮ ರ‍್ಹವೊ, ಸಬೆನ ಸಬಾಮಂದಿರ್‌ಮ ರ‍್ಹವೊ, ಖ್ಹಯೇರ್‌ಮ ರ‍್ಹವೊ, ಮೇ ಯೆಹೂದ್ಯರ್‌ನ ಜೋ಼ಡ್ಮಾಬಿ ಅಬ್ಬಾಜ಼ಬ್ಬಿ ಬೋಲುಕರಾನು ರ‍್ಹವೊ ನತರ್ ಟೋಳ್‌ ಭಂದಾವನು ರ‍್ಹವೊ ಅವ್ಣೆ ದೇಖ್ಯಕೊಯ್ನಿ.
ACT 24:13 ಹಮ್ಕೆ ಮಾರಪರ್ ಇವ್ಣೆ ಢೋವಾಡುಕರಾತೆ ಗಲತ್‌ನ, ಸಬೂತ್‌ಕರಿ ತಾರಖ್ಹಾಮ್ಣೆ ಓತಾಳನ ಕೋ ಉಶೇನಿ.
ACT 24:14 ಕತೋಬಿ ಏಕ್‌ ಖಲಿ ತಾರ ಖ್ಹಾಮ್ಣೆ ಮಾನಿಲೆವುಸ್‌, ಶಾತ್‌ಕತೊ, ಧರ್ಮವಿರೋದಿಕರಿ ಬೋಲಾನು ಮಾರಗ್‍ಮ ಚಾ಼ಲವಾಳೊ ಮೇ ಮಾರ ಗುರುಗುರಬ್‍ಲ್ಯನ ದೇವ್ನ ಆರಾದನೆ ಕರುಸ್. ಕತೋಬಿ ಮೋಶೇನು ಧರ್ಮಶಾಸ್ತ್ರನು ಪ್ರವಾದನೆ ದಪ್ತರ್‌ಮ ಲೀಖೈರುತೆ ಯೊ ಅಖ್ಖಾಸ್ನ ವಿಶ್ವಾಸ್ ಕರುಸ್.
ACT 24:15 ಆ ನಾಹುಯಿನ್ ನೀತಿವಾಳನಾಬಿ ಅನೀತಿವಾಳನಾಬಿ ಖ್ಹಾರೂಸ್ ಪಾಛು಼ಜಿವ್ತು ಉಷೆಕರಿ ಆ ಯೆಹೂದ್ಯರ್ ದೇವ್‌ಮ ಖಿವಿ ಪರಕ್ಮ ಭರೋಖ್ಹೊ ರಾಖಿರಾಖ್ಯುಸ್ಕಿ ಯೋಸ್ ಪರಕ್ಮ ಮೇಬಿ ಭರೋಖ್ಹೊ ಕರಿರಾಖ್ಯೊಸ್.
ACT 24:16 ಇನಾಖ್ಹಾಜೆ ದೇವ್ ಬಿಜು಼ ಅದ್ಮಿನ ಖ್ಹಾಮ್ಣೆ ಮಾರೇಥಿ ಹುವಾಯೆತ್ರೆ ದಿಲ್ನಿಸಾಕ್ಷಿನ ಕದೇಬಿ ಪಾಕ್‌ ರಾಖಾನ ಕೋಶಿಶ್ ಕರುಸ್.
ACT 24:17 “ಥೋಡ ವರಖ್ಹ್‌ನ ವಾರ್ ಮೆ, ಮಾರ ಶೊಂತ್‌ ದೇಖ್ಹ್‌ವಾಳಾನ ಪೈಶಾ, ಕಾಣ್ಕೆ ಅಜು಼ ಮುಡಪ್‍ ದ್ಯಾವಾನ ಆಯೋಥೊ.
ACT 24:18 ಮೇ ಶುದ್ದಿ ಕರಿಲೀನ್ ಯೋ ಖ್ಹಾರು ದೆವ್‍ಕರಾನಿ ವಖ್ಹತ್‌ಮ ಮನ ಅವ್ಣೆ ದೇವ್ನಿಮಂದಿರ್‌ಮ ದೇಖ್ಯು; ತದೆ ಮಾರಿಜೋ಼ಡ್ಮ ಅದ್ಮಿನು ಝೂ಼ಂಡ್‌ಬಿ ಶಾತ್ ಕೋಥೂನಿ, ಗಲಾಟ್‍ಬಿ ಕೋಥಿನಿ. ಮನ ದೇಖ್ಯುತೆ,
ACT 24:19 ಏಷ್ಯ ತಬರ್‌ಖಾಥು ಆಯುತೆ ಥೋಡು ಯೆಹೂದ್ಯರ್ ಮಾರಾಮ ಶನೂಬಿ ಗಲತ್‌ ಉಷೇತೊ ಇವ್ಣೆ ತಾರಾಖ್ಹಾಮ್ಣೆ ಮಾರಪರ್ ವಿರೋದ್‌ಕರಾನ ಹಜ಼್ಜ ಆವ್ಣುಥು.
ACT 24:20 ನಾಹುಯುತೊ, ಹಜ಼್ಜ ರ‍್ಹವಾಳು ಮೇ ನ್ಯಾವ್‍ನಿ ಸಬೆನಖ್ಹಾಮ್ಣೆ ಭೀರ‍್ಯವಾನಿವಖ್ಹತ್ಮ, ಮಾರಾಮ ಶನು ಅಪರಾದ್ ದೇಖ್ಯುಕರಿ ಬೋಲಾದೆ.
ACT 24:21 ಮೇ ಇವ್ಣ ಖ್ಹಾಮ್ಣೆ ಭಿರೀನ್; ಪಾಛು಼ಜಿವ್ತು ಉಟ್‍ಶೇತೆ ಇನಿ ಬಾರೇಮ ಮೆ ವಿಶ್ವಾಸ್ ಕರ‍್ಯೊತೆ ಖ್ಹಾಜೆ ಹಜ಼್ಜ ನ್ಯಾವ್‌ಮ ಭೀಯೊಸ್ತೆ’ ಕರಿ ಮೆ ಎಕ್ಕಸ್ ವಾತೆನ ಚಿಕ್ರಿ ಬೋಲ್ಯೊ.”
ACT 24:22 ಫೇಲಿಕ್ಸನೆ ಆ ಮಾರಗ್‌ನ ಬಾರೇಮ ಪಹಿಲೇಸ್ ಕೆತ್ರಕ್ಕಿ ಮಾಲುಮ್‌ ಕರಿರಾಖ್ಯೊಥೊ. ಇನಖ್ಹಾಜೆ ನ್ಯಾವ್‍ಕರಾನು ಭೀರಾಖಿನ್, “ಸೇನಾಧಿಪತಿ ಹುಯಿರ‍್ಹೋತೆ ಲುಸಿಯಸ್‍ ಹಜ಼್ಜ ಆವಾದಿನ್ ಆ ವಾತ್ನಿ ಬಾರೇಮ ತೀರ್ಪ್ ಕರಿಶ್” ಕರಿ ಬೋಲ್ಯೊ.
ACT 24:23 ಇನಕೇಡೆಥು ಪೌಲನ ಕಾವ್ಲಿಮ ರಾಖೇಜಾ಼ಯ್‌, ಕತೋಬಿ ಇನ ಶಾತ್ಬಿ ಅಡ್ಡಿ ನಾಕರ‍್ನು, ಇನ ದೇಖಿಲ್ಯವಾಳು ಇನ ಖ್ಹದ್ದರ್‌ಕರೀನ್ ಆಡು ಶಾತ್ಬಿ ನಾಕರ‍್ನುಕರಿ ಖ್ಹೋಶಿಪಾಯಿನ ಮೋಟಾನೆ ಹುಕುಮ್‌ ಕರ‍್ಯೊ.
ACT 24:24 ಥೋಡದನ್ನ ಪಾರ್ ಫೇಲಿಕ್ಸ್‌ ಇನಿ ಬಾವಣ್‍ ಹುಯಿರೀತೆ ದ್ರೂಸಿಲ್ಲಾನಿ ಜೋ಼ಡ್ಮ ಆಯೊ. ಯೋ ಯೆಹೂದ್ಯವಾಳಿ ಹುಯಿರ‍್ಹೀಥಿ. ಫೇಲಿಕ್ಸನೆ ಪೌಲನ ಬುಲೈಮಂಗೈನ್‌, ಯೋ ಕ್ರಿಸ್ತಯೇಸುನ ವಿಶ್ವಾಸ್‍ಕರಾನಿ ಬಾರೇಮ ವಾತೆ ಬೋಲಾನು ಖ್ಹಮ್‍ಜ್ಯೊ.
ACT 24:25 ಕತೋಬಿ ಪೌಲನೆ, ನೀತಿ,ಅಜು಼ ಇನುಯೋ ದಾಬುಕ್ ರ‍್ಹವಾನು, ಅಜು಼ ಖ್ಹಾಮ್ಣೆ ಉಳ್ಯಾವತೆ ನ್ಯಾಯತೀರ್ಪ್‌ನಿ ಬಾರೇಮ ಬೋಲಾಮ ಫೇಲಿಕ್ಸನೆ ಡರಿನ್, “ಹಮ್ಕೆ ತೂ ಜಾ಼ ಮನ ವಖ್ಹತ್ ಮಳಾದಿನ್ ತುನ ಬುಲೈಮಂಗೈಷ್” ಕರಿಬೋಲ್ಯೊ.
ACT 24:26 ಯೋಸ್ ವಖ್ಹತ್‌ಮ ಫೇಲಿಕ್ಸನೆ, ಪೌಲ ಶಾತ್ತೋಬಿ ಪೈಶಾ ದೇಸ್ಕಿಶುಕಿ ಕರಿ ಭರೋಖ್ಹೊ ಕರೀನ್, ಕದೆಕದೇಬಿ ಇನ ಬುಲೈಮಂಗೈನ್‌ ಇನಿಜೋ಼ಡ್ಮ ಪೊಖ್ಹ್‌ಲಾವ್ತೊ ರ‍್ಹೇತೊಥೊ.
ACT 24:27 ಬೇ ವರಖ್ಹ್‌ನ ವಾರ್ ಫೇಲಿಕ್ಸ್‌ನ ಬದಲ್ ಪೋರ್ಕಿಯ ಫೆಸ್ತ ಕರಿ ರಾಜ್ಯಪಾಲ್‌ಹುಯಿನ್ ಆಯೊ. ಫೇಲಿಕ್ಸನೆ ಯೆಹೂದ್ಯರ್‌ನಿ ಪ್ಯಾರ್ ಕಮಾವ್ಣು ಕರಿ ಆಖ್ಹ್‌ಕರೀನ್ ಪೌಲನ ಜೇಲ್‌ಮಾಸ್ ಮ್ಹೆಂದಿನ್ ಗಯೊ.
ACT 25:1 ಫೆಸ್ತನೆ ಅಧಿಕಾರ್‌ಲೀನ್ ತೀನ್‌ದನ್ನ ಬಾದ್ಮ ಕೈಸರೈಯಾಥು ಯೆರೂಸಲೇಮ್ನ ಗಯೊ.
ACT 25:2 ಹಿಜ್ಜಾ಼ ಗಲ್‌ಢಯಾಜಕ್‌ಬಿ ಅಜು಼ ಯೆಹೂದ್ಯರ್‌ನ ಘಲ್ಡಾವ್‌ನ ಪೌಲನಿ ವಿರೋದ್ ಛಾ಼ಡಿ ಬೋಲ್ಯೊ. ಇನ ಯೆರೂಸಲೇಮ್ಮ ಪಾಛು಼ ಮೋಕಲ್ನುಕರಿ ಇವ್ಣೆ ಪೆಸ್ತಾನ ಗಿಂಗೈಲಿದು.
ACT 25:3 ತೂ ದಯಾಕರೀನ್ ಇನ ಯೆರೂಸಲೇಮ್‌ನ ಮೋಕಲ್ನುಕರಿ ಪೌಲನ ಕೇಡ್ನಖ್ಹಾಜೆ‍ ಸೋಚ್ಯು. ಶನಕತೊ ಜಾ಼ವಾನ ಮಾರಗ್‌ಪರ್ ಇನ ಮಾರಿನಾಕ್ಣುಕರಿ ಜ಼ಪಿರ‍್ಹೂಥು.
ACT 25:4 ಫೆಸ್ತನೆ ಅಮ್ ಜ಼ವಾಬ್ ದಿದೊ; ಪೌಲ ಕೈಸರೈನ ಖ್ಹಾರ್ಕೊಟ್‌ಮ ಛಾ಼. ಮೇ ಹಿಜ್ಜಾ಼ ಒಗ್ಗೀಸ್ ಪಾಛೊ಼ ಜಾ಼ವ್ಣುಕರಿ ಛೂ಼.
ACT 25:5 ಇನಖ್ಹಾಜೆ ತುಮಾರಮ ಅಧಿಕಾರ್‌ವಾಳು ಮಾರಕೇಡೆ ಕೈಸರೈಮ ಐನ್ ಯೋ ಅದ್ಮಿಮ ಅಪರಾದ್ ಶನುತೋಬಿ ಉಷೇತೊ ಇನಾಪರ್ ಗಲ್ತಿ ಲಗಾಡೊ ಕರಿ ಬೋಲ್ಯೊ.
ACT 25:6 ಫೆಸ್ತನೆ ಇವ್ಣಜೋ಼ಡ್ಮ ಆಟ್‍ಥಿ ಧರೀನ್ ದಖ್ಹ್‌ರೋಜ್‌ಲಗು ರ‍್ಹೀನ್ ಇನಪಾರ್ ಯೋ ಕೈಸರೈನ ಗಯೊ. ಬಿಜೇಕ್‍ದನ್ನೆ ನ್ಯಾವ್‍ನಿ ಝ಼ಗೋಮ ಜೈ಼ನ್ ಪೌಲನ ಬುಲೈಲಿನ್ ಆವ್ಣುಕರಿ ಶಿಪಾಯಿ ಹುಕುಮ್ ಕರ‍್ಯೊ. ಫೆಸ್ತ ನ್ಯಾವ್‍ನಿ ಝ಼ಗೋಮ ಬೆಠೋಥೊ.
ACT 25:7 ಯೆರೂಸಲೇಮ್‌ಥು ಆಯುಥೂತೆ ಯೆಹೂದ್ಯರ್, ಪೌಲ ಹಿಜ್ಜಾ಼ ಆವಾದಿನ್ ಇನ ಅಶ್‌ಪಿಶ್ ಭೀರಿನ್ ಇನಪರ್ ಘಣು ಗಲತ್‌ ಲಗಾಡ್ಯು. ಇವ್ಣೆ ಶಾತ್ಬಿ ಸಾಬಿತ್ ಕರಾನ ಕೋಹುಯುನಿ.
ACT 25:8 ಕತೋಬಿ ಪೌಲನೆ ಜ಼ವಾಬ್ ದೇತೊಹುಯಿನ್, “ಮೇ ಯೆಹೂದ್ಯರ್‌ನಿ ಧರ್ಮಶಾಸ್ತ್ರನಿ ವಿರೋದ್ ರ‍್ಹವೊ ದೇವ್ನಿಮಂದಿರ್‌ನಿ ವಿರೋದ್ ರ‍್ಹವೊ, ಚಕರ್‌ವರ್ತಿನಿ ಬಾರೇಮ ರ‍್ಹವೊ, ಮೇ ಖಿವು ಗಲ್ತಿಬಿ ಕರ‍್ಯೊಕೊಯ್ನಿ.” ಕರಿ ಬೋಲ್ಯೊ.
ACT 25:9 ಕತೋಬಿ ಫೆಸ್ತನೆ ಯೆಹೂದ್ಯರ್‌ಥಿ ದಯಾನ ಲ್ಯವಾನಖ್ಹಾಜೆ ಪೌಲನ “ತೂ ಯೆರೂಸಲೇಮ್ಮ ಜಾ಼ವನ ಕೋಶಿಶ್ ಕರಾನಿವಖ್ಹ್‌ತೆ, ಹಿಜ್ಜಾ಼ ಮಾರಖ್ಹಾಮ್ಣೆ ಆ ಗಲ್ತಿನಿ ಬಾರೇಮ ತೀರ್ಪ್‌ ಕರಿಲೇವ್ಣುಕರಿ, ತುನ ಖ್ಹಯಾಲ್ ಛಾ಼ಕಿ ಶು? ಕರಿ ಬೋಲ್ಯೊ.
ACT 25:10 ತದೆ ಪೌಲನೆ ಬೋಲ್ಯೊ, “ಮೆ ಹಮ್ಕೆ ಕೈಸರ್‌ನ ನ್ಯಾವ್ನಿಝ಼ಗೊಮಾಸ್ ಭಿಯೋಸ್; ಮನ ತೀರ್ಪ್‌ಕರ‍್ನುತೆ ಹಜ್ಜಾ಼ಸ್. ಯೆಹೂದ್ಯರ್‌ನ ಮೆ ಶನು ಠಗಾಯೊ ಶಾತ್‌ಕೊಯ್ನಿ ಕರಿ ಬೋಲಾನು ತುಮುನಾಬಿ ಅಛ್ಛಿನಿತರ ಮಾಲುಮ್‌ಛೆ.
ACT 25:11 ಮೇ ಅನ್ಯಾಯ್ ಕರವಾಳೊ ಹುಯಿನ್ ಶಾತ್ತೋಬಿ ಕರವಾಳೊ ಹುಯಿನ್ ಧರ್ಮಶಾಸ್ತ್ರನಿ ಪರಕ್ ಮನ ಮರಣ್ ದಂಡಣೆನ ಕಾರಣ್ ಹುಯೋತೊಬಿ ಇನ ಮೆ ಮಾನಿಲೇವ್ಸ್. ಕತೋಬಿ ಅವ್ಣೆ ಪೊಳ್ ಗಲತ್‌ನ ಮಾರಪರ್ ನಾಖನುರ‍್ಹಯೂತೊ, ಮನ ಕೋಣ್‌ಬಿ ಅವ್ಣ ಹಾತ್‌ಮ ದ್ಯವಾನ ಕೋ ಉಶೇನಿ. ಮೆ ಕೈಸರ್‌ನ ಖ್ಹಾಮ್ಣೆ ಬೋಲಿಲೆವುಸ್” ಕರಿ ಬೋಲ್ಯೊ.
ACT 25:12 ತದೆ, ಫೆಸ್ತನೆ ಇವ್ಣಸಭೆವಾಳಾನಿ ಜೋ಼ಡ್ಮ ಚರ್ಚೆಕರೀನ್ ತದೆ ಪೌಲನ, “ತೂ ಕೈಸರನ ಖ್ಹಾಮ್ಣೆ ಬೋಲಿಲೆವುಸ್‌ಕರಿ ಬೋಲ್ಯೊನಿ, ಇನಖ್ಹಾಜೆ ಕೈಸರಕನಾಸ್ ಜಾ಼ವ್ಣುಕರಿ ಬೋಲ್ಯೊ.
ACT 25:13 ಥೋಡದನ್ನ ಬಾದ್ಮ ಅಗ್ರಿಪ್ಪ ರಾಜ಼ಬಿ ಬೆರ್ನಿಕೆನಿ ಜೋ಼ಡ್ಮ ಫೆಸ್ತನ ಮಳಾನಖ್ಹಾಜೆ ಅಜು಼ ಸ್ವಾಗತ್ ಕರಾನ ಕೈಸರೈಮ ಆಯು.
ACT 25:14 ಇವ್ಣೆ ಖ್ಹುಮಾರ್‌ದನ್ ಹಿಜ್ಜಾ಼ಸ್ ರಹಿಗು. ಇನಖ್ಹಾಜೆ ಫೆಸ್ತನೆ ಪೌಲನಿ ಬಾರೇಮ ರಾಜ಼ನ ಖ್ಹಮ್‌ಜಾ಼ಡ್ಯೊ ಶಾತ್‌ಕತೊ, “ಫೇಲಿಕ್ಸನೆ ಖ್ಹಾರ್ಕೊಟ್‌ಮಾಸ್ ಮ್ಹೇಲಿನ್ ಗಯೋತೆ ಏಕ್‍ಜ಼ಣೊ ಛಾ಼.
ACT 25:15 ಮೆ ಯೆರೂಸಲೇಮ್ಮ ರ‍್ಹವಾನಿವಖ್ಹ್‌ತೆ ಯೆಹೂದ್ಯರ್‌ನ ಗಲ್‌ಢಯಾಜಕ್‍ಖ್ಹಾರು ಅಜು಼ ಗಲ್‌ಢಖ್ಹಾರು ಇನಿ ಬಾರೇಮ ಮನ ಆರೋಪ್ ಬೋಲಿನ್ ಇನ ತೀರ್ಪ್‌ಹುವಾದೆ ಕರಿ ಗಿಂಗಾಯು.
ACT 25:16 ಮೆ ಇವ್ಣುನ; ಅಪರಾದಿಬಿನ್ ಅಪರಾದ್ ಲಗಾಡವಾಳು ಆಮಖ್ಹಾಮೆ ಭೀರೆವ್ಣು; ಇನಾಪರ್ ಲಗಾಡಿರಾಖ್ಯುತೆ ಅಪರಾದ್ನ ವಿರೋದ್ ಜ಼ವಾಬ್‍ದ್ಯವಾನ ಅಪರಾದಿನ ಅವಕಾಶ್ ಕರಿದೇವ್ಣು. ಇಮ್‌ ಕರ‍್ಯುಕೊಂತೆ ಹಾತ್ಮ ನೇರ್ ದೀನಾಖನು ರೋಮ್ನಿ ಪದತ್ತಿಕಾಹೆ ಕರಿ ಬೋಲ್ಯೊ.
ACT 25:17 “ಇವ್ಣೆ ಹಜ಼್ಜ ಮಳಿನ್ ಆವಖ್ಹತರ್ ಮೇ ಜ಼ರಾಬಿ ಧೀರ್‌ಕೊಂತೆ ಬಿಜೇಕ್ ದನ್ನೇಸ್ ನ್ಯಾವ್‍ನಿ ಝ಼ಗೋಪರ್ ಬೇಶಿನ್ ಯೋ ಅದ್ಮಿನ ಬುಲಾವ್ಣುಕರಿ ಹುಕುಮ್ ದಿದೊ.
ACT 25:18 ಯೆಹೂದ್ಯರ್ ಉಠಿಭೀರಿನ್ ಇನ ಉಪ್ಪರ್ ಅಪರಾದ್ ಲಗಾಡ್ಯು. ಕತೋಬಿ ಮೇ ಸೋಚಾನಿ ಪರಕ್ಮ ಇವ್ಣೆ ಇನಾಪರ್ ಖಿವು ಖರಾಬ್ ಅಪರಾದ್‍ಬಿ ಕೊ ಲಗಾಡ್ಯನಿ.
ACT 25:19 ಇವ್ಣೆ ಬೋಲ್ಯುತೆ ವಾತೆಖ್ಹಾರು ಇವ್ಣ ಶೊಂತ್ ಧರ್ಮಾನು ಸಂಬಂದ್‌ನಿತರ ಹುಯಿರೂಥು. ಅಜು಼ ಯೇಸುಕರಿ ಏಕ್‍ಜ಼ಣ ಭಣೀಥು ಆ ವಿವಾದ್ ಹುಯಿರ‍್ಹುಥು. ಮರಿಗಯೋತೆ ಯೇಸು ಹಮ್ಕೆ ಜಿವ್ತೊ ಛಾ಼ ಕರಿ ಪೌಲನೆ ಬೋಲ್ಯೊ.
ACT 25:20 ಆ ವಾತೆನಿ ಬಾರೇಮ ಮನ ಜಾ಼ಖ್ಹತ್ ಮಾಲುಮ್ ಕೊಥುನಿ ಇನಾಖ್ಹಾಜೆ ಮೇ ಪುಛಾ಼ವನ ಕೊಗಯೋನಿ ಕತೋಬಿ ಮೇ ಪೌಲನ, ‘ತೂ ಯೆರೂಸಲೇಮ್ಮ ಜೈ಼ನ್ ನ್ಯಾವ್ನ ತೀರ್ಮಾನ್ ದೇವ್ಣುಕರಿ ಮೆ ಬೋಲ್ಯೊ.
ACT 25:21 ಇನಾಖ್ಹಾಜೆ,ಪೌಲನೆ ‘ಚಕರ್‌ವರ್ತಿ ಕೈಸರ್‌ಥೀಸ್ ಮಾರು ಜಾವಾಬ್‍ನ ಪೂಚ್‌ತಾಚ಼್‌ ಹುವಾದೆ ತಬ್‍ಲಗು ಮನ ಬಚಾ಼ಡ್ಣು’ ಕರಿ ಬೋಲಿಲಿದೊ. ಇನಾಖ್ಹಾಜೆ ರೋಮ್‍ನ ಚಕರ್‌ವರ್ತಿಕನ ಮೋಕ್ಲಲಗು ಇನ ಕಾವ್ಲಿಮ ರಾಕ್ಣುಕರಿ ಹುಕುಮ್‌ದಿದೊ”.
ACT 25:22 ಅಗ್ರಿಪ್ಪನೆ ಫೆಸ್ತನ, “ಆ ಅದ್ಮಿ ಬೋಲಾಸ್ತೆ ಖ್ಹಮ್‌ಜಾ಼ನ ಮನಾಬಿ ಪಸಂದ್ ಛಾ಼” ಕರಿ ಬೋಲ್ಯೊ. ಪೆಸ್ತಾನೆ, “ಯೋ ಬೋಲಾನು ತೂ ಕಾಲೆ ಖ್ಹಮ್‍ಜೆಜಾ಼ಯ್” ಕರಿ ಜ಼ವಾಬ್ ದಿದೊ.
ACT 25:23 ಅಗಲ್ಯದನ್ನೆ ಅಗ್ರಿಪ್ಪರಾಜ಼ ಅಜು಼ ಬೆರ್ನಿಕೆರಾಣಿ ಘಣು ರಂಗ್‌ರಾಜ಼್‌ಥಿ ಶಿಪಾಯಿನ ಮೋಟಕನ ಅಜು಼ ಕೈಸರೈನ ಗಲ್‌ಢವ್‍ನಿ ಜೋ಼ಡ್ಮ ಸಭೆನ ಆಸ್ತಾನ್ಮ ಆವಖ್ಹತರ್. ಪೌಲಾನ ಮಹಿ ಬುಲೈಲಿನ್ ಆವ್ಣುಕರಿ ಫೆಸ್ತನೆ ಶಿಪಾಯ್ನ ಹುಕುಮ್‌ ಕರ‍್ಯೊ.
ACT 25:24 ತದೆ ಫೆಸ್ತನೆ, “ರಾಜ಼ ಅಗ್ರಿಪ್ಪ, ಹಮಾರ ಜೋ಼ಡ್ಮ ಮಳಿಐರ‍್ಹಾತೆ ಖ್ಹಾರಾಸ್ ಅದ್ಮಿವೊ; ತುಮೆ ದೇಖುಕರಾತೆ ಆ ಅದ್ಮಿನಪರ್ ಹಜ್ಜಾ಼ಛಾ಼ತೆ ಅಜು಼ ಯೆರೂಸಲೇಮ್ಮ ರ‍್ಹವಾಳು ಖ್ಹಾರುಸ್ ಯೆಹೂದ್ಯರ್ ಮನ ಗಲತ್‌ ಬೋಲಿನ್, ಆ ಜಿವ್ತೊ ನಾರ‍್ಹೇಣು ಕರಿ ಚಿಕ್ರಾಣ್ ಮಾರ‍್ಯು.
ACT 25:25 ಮೇ ಅನ ವಿಚಾರ್ ಕರಾನಿ ವಖ್ಹ್‌ತೆ ಶನು ಝೂ಼ಟುಬಿ ಕೋ ದೇಖ್ಯೋನಿ ಕತೋಬಿ ಕೈಸರ್‌ಥೀಸ್ ನ್ಯಾವ್‌ನು ತೀರ್ಪ್‌ಹುವಾದೆ ಕರಿ ಬೋಲಿಲಿದೊ. ಇನಖ್ಹಾಜೆ ಅನ ರೋಮ್‍ನ ಮೋಕ್ಲಾನ ತೀರ್ಮಾನ್ ಕರಿರಾಖ್ಯೊಸ್.
ACT 25:26 ಕತೋಬಿ ಅನಿ ವಾತೆನಿ ಬಾರೇಮ ಕೈಸರೈನ ಲೀಖಾನ, ಬರಾಬರ್‌ನು ಅಪರಾದ್ ಶಾತ್ಬಿ ಮನ ಕೊದೆಖಾವನಿ, ಇನಖ್ಹಾಜೆ ಮೇ ಅನ ತುಮಾರ ಖ್ಹಾರಾನ ಖ್ಹಾಮ್ಣೇಬಿ ವಿಶೇಷ್‌ಥಿ ಛಾ಼ತೆ ರಾಜ಼ ಅಗ್ರಿಪ್ಪನ ಖ್ಹಾಮ್ಣೆ ಲೈರಾಖ್ಯೊಸ್. ಇನಖ್ಹಾಜೆ ತುಮೆ ಅನ ವಿಚಾರ್‌ಕರೀನ್ ಅನಿ ಬಾರೇಮ ಇನ ಲೀಖಾನ ಶನಿತೋಬಿ ವಾತೆ ದಿಶುಕರಿ ಬೋಲಿನ್ ಟಿವೈರ‍್ಹೋಸ್.
ACT 25:27 ಮೇ ಸೋಚಾನಿತರ ಏಕ್‌ ಖೈದಿನ ವಿರೋದ್ ಛಾ಼ತೆ ಅಪರಾದ್ನ ಮಾಲುಮ್ ನಾ ಕರ‍್ಯುತೊ ಇನ ಸೀಜರ್‌ಕನ ಮೋಕ್ಲಾನು ಬರಬ್ಬರ್‌ ಕೊಯ್ನಿಕರಿ ಬೋಲ್ಯೊ.
ACT 26:1 ಅಗ್ರಿಪ್ಪ ಪೌಲನ, “ಹಮ್ಕೇಥೊ ತಾರ ಭಣೀಥು ವಾತೆ ಬೋಲೆಜಾ಼ಯ್” ಕರಿ ಬೋಲ್ಯೊ. ತದೆ ಪೌಲನೆ ಹಾತ್‍ಪಾಡಿನ್ ಜ಼ವಾಬ್ ದೇತೊಹುಯಿನ್ ಅಮ್ ಬೋಲ್ಯೊ;
ACT 26:2 ರಾಜ಼ ಅಗ್ರಿಪ್ಪ, ಯೆಹೂದ್ಯರ್ ಮಾರಪರ್ ಅಖ್ಖಿ ಅಪರಾದ್ ಕರಸ್ಕಿ ಆಜ಼್ ತಾರ ಖ್ಹಾಮ್ಣೆ ಇನು ಜ಼ವಾಬ್ ದ್ಯವಾನಿ ಅವಕಾಶ್ ಮಳಿರ‍್ಹೂತೆ ಮಾರು ಮೇಸ್ ಧನ್ಯಕರಿ ಬೋಲಿಲೇವುಸ್.
ACT 26:3 ಶನಕತೊ ಯೆಹೂದ್ಯರ್‌ಮ ಛಾ಼ತೆ ಅಖ್ಖುಸ್ ಚಾ಼ಲ್ ಚ಼ಲಣ್‌ಬಿ, ಅಜು಼ ಯೆಹೂದ್ಯರ್ ವಿಚಾರ‍್ನ ವಾದಕರುಕರಾತೆ ಬಾರೇಮ ತುನ ಅಛ್ಛಿನಿತರ ಮಾಲುಮ್ ಛಾ಼. ಇನಖ್ಹಾಜೇಥಿ ಮಾರಿ ವಾತೆನ ಧೀಮೆಥಿ ಖ್ಹಮಜ಼್‌ಣು ಕರಿ ಗಿಂಗೈಲೆವುಸ್.
ACT 26:4 “ಮೆ ಅಡ್ಡಾಣಿಥೋಬಿ ಯೆರೂಸಲೇಮ್ಮ ಮಾರ ಶೊಂತ್ ದೇಖ್ಹ್‌ನ ಅದ್ಮಿವೋನಿಜೋ಼ಡೆ ರ‍್ಹೀನ್ ಜಿವ್ಣುಕರ‍್ಯುತೆ ರೀತಿ ಅಖ್ಖು ಯೆಹೂದ್ಯರ್‌ನ ಮನ ಮಾಲುಮ್‌ ಛಾ಼.
ACT 26:5 ಹಮಾರಿ ಧರ್ಮ್‌ನು ಜಾ಼ಖ್ಹತ್ ಕಠಣ್‍ಥಿ ರ‍್ಹವಾನು ಫರಿಸಾಯರ್‌ನು ಪದತ್ತಿನಿ ಅನುಸಾರ್ ಫರಿಸಾಯ ಹುಯಿನ್ ಚಾ಼ಲಿಲಿದೊಕರಿ ಶುರುವಾತ್‌ಥೂಬಿ ಇವ್ಣುನ ಮಾಲುಮ್‌ ಛಾ಼. ಸಾಕ್ಷಿ ಬೋಲಾನು ದಿಲ್‌ ಉಷೇತೊ ಬೋಲೆಜಾ಼ಯ್.
ACT 26:6 ದೇವ್ನೆ ಹಮ್ಕೇಬಿ ಅಪ್ಣ ಗುರುಗುರಬ್‍ಲ್ಯನ ಕರ‍್ಯೊತೆ ವಾಗ್ದಾನ್ನ ಉಷೆಕರಿ ವಿಶ್ವಾಸ್ನಖ್ಹಾಜೆ ಮೇ ಆಜ಼್ ನ್ಯಾವ್‌ನಿ ವಿಚಾರಣೆಮ ಭಿಯೋಸ್.
ACT 26:7 ಹಮಾರು ಭಾರ ಖೂಮ್‍ವಾಳು ದನ್‍ರಾತ್ ಭರೋಖ್ಹಾಥಿ ದೇವ್ನ ಆರಾದನೆ ಕರ್ತುಹುಯಿನ್, ಯೋ ವಾಗ್ದಾನ್ನುಫಲ್ ಲೀಲ್ಯಾವನಖ್ಹಾಜೆ ಟಿವೈರ‍್ಹೂಸ್. ರಾಜ಼, ಯೋಸ್ ಭರೋಖ್ಹಾನಿ ಬಾರೇಮ ಯೆಹೂದ್ಯರ್‌ಖ್ಹಾರು ಮಾರಿ ವಿರೋದ್ ಅಪರಾದ್ ಲಗಾಡುಕರಸ್.
ACT 26:8 ದೇವ್ನೆ ಮರ‍್ಯಾಹುಯಮಾಥು ಉಠಾಡ್ಯೊತೆ ನಂಬಾನ ಕೊಹುವಾನಿಕರಿ ತುಮೆ ಶನ ಖ್ಹೂಜ಼್‌ ಕರೋಸ್?
ACT 26:9 ಏಕ್‌ ಹಗಾಮ್ಮ ನಜ಼ರೇತ್‌ನು ಯೇಸುನ ನಾಮ್ನ ವಿರೋದ್‌ಥಿ ಕೈಏಕ್ ಕಾಮ್ನ ಮೆ ಚ಼ಲಾವ್ಣುಕರಿ ಸೋಚಿರಾಖ್ಯೋಥೊ.
ACT 26:10 ಯೆರೂಸಲೇಮ್ಮ ಇಮ್ಮಸ್ ವಿಶ್ವಾಸಿನ ವಿರೋದ್‍ಕರೀನ್ ಕೈಯೆಕ್ಕಿ ಕಾಮ್ ಕರ‍್ಯೋಥೊ. ಯೋ ವಿಶ್ವಾಸಿಖ್ಹಾರಾಮ ಕೆತ್ರಾಕಿಜ಼ಣಾನ ಜೇಲ್‌ಮ ಘಾಲಾನ ಮಹಾಯಾಜಕರ‍್ನೆ ಮನ ಅದಿಕಾರ್ ದಿದೊ. ಇವ್ಣುನ ಮರಣ್ಣಿ ತೀರ್ಪ್‍ನಿ ವಖ್ಹ್‌ತೆ ಮೇ ಇನ ಮಾನಿಲಿದೊ.
ACT 26:11 ಅಖ್ಖಾ ಸಬೇನು ಮಂದಿರ್‌ಮಾಬಿ ಮೇ ಕೈಯೇಕ್‌ಹಲ್ಲ ಇನ ಖ್ಹತಾಪ್ಣಿ ದೀನ್ ಇನೇಥಿ ದೇವ್ನ ದೂಷಣೆನಿ ವಾತೆ ಬೋಲಾವಾನಿತರ ಕೋಶಿಶ್‌ಕರ‍್ಯೊ. ಯೋ ವಿಶ್ವಾಸಿಖ್ಹಾರಾಪರ್ ಇರಾದೊ ಕರ್ತೊಹುಯಿನ್ ಇವ್ಣುನ ಢೂಂಡಿನ್ ಲತಾಡ ದ್ಯವಾನಖ್ಹಾಜೆ ಭಾರ್‌ ದೇಖ್ಹ್‌ನ ಖ್ಹಯೇರ್‌ಮಾಬಿ ಗಯೋಥೊ.
ACT 26:12 ಏಕ್‌ ಹಲ್ಲ ದಮಸ್ಕನ ಜಾ಼ವಾನ ಗಲ್‌ಢಯಾಜಕರ್‌ಥಿ ಅದಿಕಾರ್‌ನಾಬಿ ಹಕ್ನ ಲೀನ್‌ ದಮಸ್ಕನ ಜಾ಼ವಾನಿ ವಾಟ್‌ಪರ್ ವಳೇಜಾ಼ತೊಥೊ.
ACT 26:13 ತದೆ ಧೊಪಾರ್‌ ಹುಯಿರ‍್ಹುಥು. ಅಫ್ಪರ್‌ಥೂಸ್ ಸೊರ್ಗಮಾಥು ಚಾ಼ಂದ್‍ಥೀಬಿ ಜಾ಼ಖ್ಹತ್ ಏಕ್‌ ಉಜಾ಼ಳು ಆಯಿನ್ ಮಾರಾ ಅಶ್‌ಪಿಶ್‍ ಅಜು಼ ಮಾರಾಕೇಡೆ ಉಳಿಯಾವ್ತುಥೂತೆ ಇವ್ಣ ಅಶ್‌ಪಿಶ್‌ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು.
ACT 26:14 ಹಮೆ ಅಖ್ಖಾಸ್‍ಜ಼ಣ ಜ಼ಮೀನ್‌ಪರ್ ರಡ್ಕಿಗಯ. ತದೆ ಸೌಲ ಸೌಲ ಮನ ಶನ ಖ್ಹತಾವಸ್? ಕಾಟಾನ ಲಠ್ಠಾನ ಲಾತ್ ಮಾರಾಥಿ ತುನಾಸ್ ದರದ್, ಕರಿ ಇಬ್ರಿಯ ವಾತೆಮ ಬೋಲಾನಿ ಏಕ್‌ ಅವಾಜ಼್‌ನ ಖ್ಹಮ್‍ಜ್ಯೊ.
ACT 26:15 ತದೆ ಮೇ, “ಪ್ರಭು, ತೂ ಕೋಣ್” ಕರಿ ಬೋಲಖ್ಹತರ್ ಪ್ರಭುನೆ, “ತೂ ಖ್ಹತವ್‍ಕರಸ್ತೆ ಯೇಸುಸ್ ಮೇ.
ACT 26:16 ಕತೋಬಿ ತೂ ಉಠೀನ್ ಭೀರೆ; ತುನ ಮಾರೊ ಸೇವಕ್ ಕರೀನ್‍ಬಿ ಸಾಕ್ಷಿಕರೀನ್‍ಬಿ ನೇಮಿಶಾವನಖ್ಹಾಜೆ ಮೇ ತುನ ದೆಖಾಯೊತೆ ವಾತೆನಾಬಿ, ಮೇ ತುನ ದ್ಯವಾನು ದರ್ಶನ್‍ಖ್ಹಾರನಿ ಬಾರೆಮಾಬಿ ತೂ ಅದ್ಮಿಖ್ಹಾರನ ಸಾಕ್ಷಿ ಹುಯಿರ‍್ಹಾಸ್ ಅನಖ್ಹಾಜೆಸ್ ಆವಖ್ಹತ್ ಮೇ ತುನ ದೇಖಾಯೊ.
ACT 26:17 ಮೇ ತುನ ತಾರು ಇಸ್ರಾಯೇಲ್ ಅದ್ಮಿಥೀಬಿ ಯೆಹೂದ್ಯರ್‌ಕಾಹೆತೆ ಅದ್ಮಿಥೀಬಿ ತುನ ಖರಾಬ್ ನಾಹೊಣುತೆತಿಮ್ ಬಚಾ಼ಡಿಶ್‌ ಮೇ ತುನ ಇವ್ಣಕನ ಮೋಕ್ಲುಕರುಸ್.
ACT 26:18 ತೂ ಇವ್ಣ ಖ್ಹಾರಾನ ಖ್ಹಾಚ಼ನ ಖ್ಹಮ್‌ಜಾ಼ಡಿನ್ ಇವ್ಣುನ ಅಂಧಾರಮ ಥೂತೆ ಇವ್ಣಡೋಳನ ಉಜಾ಼ಳಾಮ ಆವಾನಿತರಾಬಿ ಶೈತಾನ್‍ನಿ ಅದಿಕಾರ್‌ಥಿ ದೇವ್‌ಭಣಿ ಫರಾನಿತರಾಬಿ ಕರ‍್ನು. ತದೆ ಇವ್ಣು ಪಾಪ್‌ಖ್ಹಾರು ಮಾಪ್‌ಉಷೆ. ಪರಿಶುದ್ಧರ್‌ನಿ ಜೋ಼ಡ್ಮ ಹುಕುಮ್‌ ಲೀಲಿಶೆ. ಇವ್ಣ ಡೋಳ ಉಖಡ್‌ನುಕರಿ ಇವ್ಣಕನ ಮೇ ತುನ ಮೋಕ್ಲುಸ್‌ ಕರಿ ಬೋಲ್ಯೊ.
ACT 26:19 ಅನಖ್ಹಾಜೆ ಅಗ್ರಿಪ್ಪ ರಾಜ಼, ಪರಲೋಕ್‌ಥು ಮನ ಹುಯೂತೆ ಯೊ ದರ್ಶನಾನ ಮೇ ಖ್ಹರಮ್‌ ಕಾಡುಕೊಯ್ನಿ.
ACT 26:20 ಪಹಿಲೆ ಯೆರೂಸಲೇಮ್ಮ ಛಾ಼ತೆ ದಮಸ್ಕಮಾಬಿ, ಯೂದಾಯನ ಅಖ್ಖಾ ತಭರ್‌ಖಾಮಾಬಿ ಛಾ಼ತೆ ಇವ್ಣುನ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿನಾಬಿ, ತುಮೆ ದೇವ್‌ಭಣಿ ಫರ್‌ನು ಕರೀಬಿ ತುಮಾರು ಪಾಪ್‌ಭರ‍್ಯು ಜಿವ್ಣನ ಮ್ಹೇಲಿನ್ ದೇವ್‌ಭಣಿ ಫರಿಜಾ಼ವ್ಣುಕರಿಬಿ ಆಸ್ ಯೋಗ್ಯಾನು ಅಛ಼಼್ಛಕಾಮ್ನ ಪ್ರಚಾರ್ ಕರ‍್ಯೊ.
ACT 26:21 ಯೊ ಕಾರಣ್ಣಖ್ಹಾಜೆ ಯೆಹೂದ್ಯರ್ ಮನ ದೇವ್ನ ಮಂದಿರ್‌ಮ ಧರೀನ್ ಮಾರಿನಾಕ್ಣುಕರಿ ಕೋಶಿಶ್ ಕರ‍್ಯು.
ACT 26:22 ಕತೋಬಿ ದೇವ್ನೆ ಮನ ಯೋ ದನ್ಮ ಮದತ್ ಕರ‍್ಯೊ. ಯೊ ಹಮ್ಕೆಲಗೂಬಿ ಮನ ಮದತ್ ಕರುಕರಸ್. ಇನಾಖ್ಹಾಜೆಸ್ ಆಜ಼್ ಹಜ್ಜಾ಼ ಭಿಯೋಸ್ ಅಜು಼ ಮೆ ದೇಖ್ಯೋತೆ ಘಟನೇನಿ ಬಾರೇಮ ಅದ್ಮಿಖ್ಹಾರನ ಸಾಕ್ಷಿ ಬೋಲುಕರುಸ್. ಮೋಶೆ ಅಜು಼ ಪ್ರವಾದಿಖ್ಹಾರು ಖ್ಹಾಮೆ ಹುವಾನು ಬಾರೇಮ ಖ್ಹಮ್‌ಜಾ಼ಡ್ಯುತೆ ವಾತೇಸ್‌ ಪಣ್ಕಿ ಖಿವೂಬಿ ನವು ಕೊಬೋಲ್ಯೋನಿ.
ACT 26:23 ಯೇಸುನೆ ಖ್ಹತಾಪ್ಣಿನ ಪಾಡಿನ್ ಅಜು಼ ಮರ‍್ಯಹುಯಮಾಥು ಪಾಛು಼ಜಿವ್ತೊ ಹುಯಿನ್ ಆವಾಮ ಪಹಿಲೊ ಹುಯಿನ್ ಉಠೀನ್ ಯೆಹೂದ್ಯರ್‌ನಾಬಿ ಯೆಹೂದ್ಯರ್‌ಕಾಹೆತೆ ಇವ್ಣನಾಬಿ ರಕ್ಷಣೆನ ಉಜಾ಼ಳನ ವತಾಳವಾಳೊ ಹುಯಿರ‍್ಹೋಸ್.”
ACT 26:24 ಅಮ್ ಪೌಲನೆ ಇನಭಣಿಥು ಜ಼ವಾಬ್ ದ್ಯವಾನಿ ವಖ್ಹ್‌ತೆ; ಫೆಸ್ತನೆ, “ಪೌಲ, ತೂ ದಿವಾನೊ ಹುಯಿಗೊ ಜಾ಼ಖ್ಹತ್ ಪಢಂತ್‌ ತುನ ದಿವಾನನಿತರ ಕರಿನಾಖ್ಯು” ಕರಿ ಚಿಕ್ರಿನ್ ಬೋಲ್ಯೊ.
ACT 26:25 ತದೆ ಪೌಲನೆ, “ಮೋಟೊ ಮಹರಾಜ಼ ಹುಯಿರ‍್ಹೋತೆ ಫೆಸ್ತ ಮೇ ದಿವಾನೊಕಾಹೆ ಮೇ ಅಛ್ಛಿ ದಿಮಾಕ್‍ಥಿ ಗಂಭೀರ್‌ಥಿ ಖ್ಹಾಚು಼ ವಾತೆನಾಸ್ ಬೋಲುಕರುಸ್.
ACT 26:26 ಅಗ್ರಿಪ್ಪ ರಾಜ಼ ಆ ವಾತೆಖ್ಹಾರು ಅಛ್ಛಿನಿತರ ಮಾಲುಮ್ ಕರಾಖ್ಯೊಹುಯೊ; ಶನಕತೊ ಇನಖ್ಹಾಮ್ಣೆ ಬರಬ್ಬರ್‌ಥೀಸ್ ವಾತೆ ಬೋಲುಸ್ ಅನಾಮ ಏಕ್‌ಬಿ ಇನ ಲಪಿಛಪಿಕೊರ‍್ಹೂನಿ ಕರಿ ನಂಬಿರಾಖ್ಯೊಸ್, ಶನಕತೊ ಆ ಏಕ್‌ ಕೋಣಾಮ ಚಾ಼ಲ್ಯುತೆ ವಾತೆ ಕಾಹೆ.
ACT 26:27 ಅಗ್ರಿಪ್ಪ ರಾಜ಼ ತೂ ಪ್ರವಾದಿ ಖ್ಹಾರಾನ ನಂಬಾಸ್ಕಿಶು? ತೂ ವಿಶ್ವಾಸ್ ಕರೀಶ್‌ಕರಿ ಮನ ಮಾಲುಮ್” ಕರಿ ಬೋಲ್ಯೊ;
ACT 26:28 ತದೆ ಅಗ್ರಿಪ್ಪರಾಜ಼ನೆ ಪೌಲನ ಅಮ್ ಬೋಲ್ಯೊಕಿ, “ಘಣು ಶುಲ್ಬಾಥಿ ಮನ ಕ್ರಿಸ್ತಾನ್‍ವಾಳೊ ಕರ್ನುಕರಿ ತೂ ಸೋಚಿರಾಖ್ಯೋಸ್ಕಿ ಶು?” ಕರಿ ಬೋಲ್ಯೊ.
ACT 26:29 ಇನ ಪೌಲನೆ; ನ್ಹಾನಿ ಕೋಶಿಶ್‍ಥಿ ರ‍್ಹವೊ, ಮೋಟಿ ಕೋಶಿಶ್‍ಥಿ ರ‍್ಹವೊ, ಯೊ ಮನ ಮುಖ್ಯ ಕಾಹೆ. ತೂಸ್ ಖಲಿಕಾಹೆ ಆಜ಼್ ಮನ ಖ್ಹಮ್‌ಜು಼ಕರಾತೆ ಹರೇಕ್‌ಜ಼ಣು ಮಾರಿನಿತರ ಹೋಣುಕರಿ ಮೆ ದೇವ್ನ ಪ್ರಾರ್ಥನೆಕರುಸ್ ಕತೋಬಿ ಆ ಖ್ಹಂಕಳ್‌ಮ ಪಣ್ಕಿ ತುಮೆ ನಾಜ಼ಕ್‌ಡಾವ್ಣು ಕರಿಬೋಲ್ಯೊ.
ACT 26:30 ರಾಜ಼ ಅಗ್ರಿಪ್ಪ, ರಾಜ್ಯಪಾಲ್ ಪೆಸ್ತ, ಬೆರ್ನಿಕೆ ಅಜು಼ ಇವ್ಣಜೋ಼ಡೆ ಬೆಠುಥೂತೆ ಅದ್ಮಿಖ್ಹಾರು ಉಠಿಭೀರ‍್ಯು.
ACT 26:31 ಇನಪಾರ್ ಭಾರ್‌ಜೈ಼ನ್‌ ಇವ್ಣೆ, “ಆ ಅದ್ಮಿನ ಮರಣ್ಣಿ ದಂಡನೆ ನತರ್ ಬೇಡಿ ಘಾಲನು ಅನೆ ಶಾತ್ಬಿ ಕೊಕರ‍್ಯೋನಿ ಕರಿ ಇವ್ಣ ಇವ್ಣಾಮಸ್‌ ಬೋಲಾಲಗ್ಯು
ACT 26:32 ತದೆ ಅಗ್ರಿಪ್ಪನೆ ಫೆಸ್ತನ, “ಆ ಅದ್ಮಿ ಕೈಸರನ ಖ್ಹಾಮ್ಣೆ ಬೋಲಿಲೆವುಸ್‌ಕರಿ ನಾಬೋಲ್ಯೊಹೊತ್ತೊ ಅನ ಛುಟ್ಕಾರ್ ಕರೇಜಾ಼ಯಿಥು ಕರಿಬೋಲ್ಯೊ.
ACT 27:1 ಹಮೆ ದರ‍್ಯಾವ್ನ ಮಾರಗ್‍ಥಿ ಇಟಲಿನ ಜಾ಼ವ್ಣುಕರಿ ತೀರ್ಮಾನ್ ಹುಯು. ಪೌಲನಾಬಿ ಬಿಜು಼ ಥೋಡು ಖೈದಿಖ್ಹಾರಾನ ಯೂಲ್ಯ ಕರಿ ಏಕ್‍ಜ಼ಣೊ ಖ್ಹೋಶಿಪಾಯಿನೊ ಮೋಟೊ ಹುಯಿರ‍್ಹೋಥೊ. ಯೋ ರಾಜ಼ನಿ ಡಂಡ್ಮ ಕಾಮ್ ಕರಾವಾಳೊ ಹುಯಿರ‍್ಹೊಥೊ.
ACT 27:2 ತದೆ ಅದ್ರಮಿತ್ತಿಯಥು ಐನ್ ಏಷ್ಯಾನ ಅಲಕ್ ಅಲಕ್ ತಬರ್‌ಖಾನು ಜಾ಼ವಾನ ತಯಾರ್ ಹುಯಿರ‍್ಹಿಥೀತೆ, ಜ಼ಹಾಜ಼್ ಹಮೆ ಚ಼ಢೀನ್ ಚಾ಼ಲ್‌ಕುಚ಼್‌ ಕರ‍್ಯ. ಇನಾಮ ಥೆಸಲೋನಿಕಥೊ ಆಯೋತೆ ಮೆಕೆದೋನ್ಯವಾಳೊ ಅರಿಸ್ತಾರ್ಕ ಹಮಾರಿ ಜೋ಼ಡ್ಮ ಥೊ.
ACT 27:3 ಇನವ್ಹಾಣೆ ಹಮೆ ಸೀದೋನ್‍ಖ್ಹಯೇರ‍್ನ ಜೈ಼ನ್ ಪೋಚ್ಯ. ಯೂಲ್ಯನೆ ಪೌಲನಪರ್ ಗೋರ್‌ ಕರಾವಳೊಹುಯಿನ್, ಇನ ದೋಸ್ತಿಖ್ಹಾರನಕನ ಮದತ್ ಲೀಲ್ಯಾವನಖ್ಹಾಜೆ ಇನ ಹುಕುಮ್ ದಿದೊ.
ACT 27:4 ತದೆ ಹಿಜ್ಜಾ಼ಥ ನಿಕ್ಳಿನ್ ಜ಼ಹಾಜ಼್‍ಮ ಜಾ಼ವಾನಿ ವಖ್ಹತ್‌ಮ ಖ್ಹಾಮ್ಣೆನೊ ವಹಿರೊ ವಾಗುಕರ್ತುಥೂತೆ ಇನಾಖ್ಹಾಜೆ ಹಮೆ ಸೈಪ್ರಸ್ ಟಾಪನ ಖನ್ನೆಕರಿ ಗಯ.
ACT 27:5 ಕಿಲಿಕ್ಯನಾಬಿ ಪಂಫುಲ್ಯನಾಬಿ ಮ್ಹೋರೆ ಹುಯಿರೋತೆ ದರ‍್ಯಾವ್ನ ಉಲಾಂಗಿನ್, ಲುಕೀಯನು ‘ಮುರ’ ಕರಿ ಝ಼ಗೋಕನ ಆಯಿನ್ ಪೋಚ್ಯ.
ACT 27:6 ಹಿಜ್ಜಾ಼ ಇಟಲಿನ ಜಾ಼ವಾನಿ ಅಲೆಕ್ಸಾಂಡ್ರಿಯ ಖ್ಹಯೇರ‍್ನಿ ಜ಼ಹಾಜ಼್‌ನ ಖ್ಹೋಶಿಪಾಯಿನ ಮೋಟಾನೆ ದೇಖಿನ್, ಹಮೂನ ಇನಾಮ ಛ಼ಡಾಯೊ.
ACT 27:7 ಹಮೆ ಹಳ್ಳೂಥಿ ಕೈಏಕ್ ದನ್‌ಲಗು ಜ಼ಹಾಜ಼್‌ನಿಚಾ಼ಲ್‌ ಕರ್ತಹುಯಿನ್ ಘಣು ಮುಶ್ಕಿಲ್‌ಥಿ ಖ್ಹರ್ತಿನ ಸ್ನೀಡ‌ ಖ್ಹಯೇರ‍್ನ ಐನ್ ಪೋಚ್ಯ. ಖ್ಹಾಮ್ಣೆನೊ ವಹಿರೊ ವಾಗುಕರ್ತುಥೂತೆ ಇನಖ್ಹಾಜೆ, ಯೋ ಮಾರಗ್‍ಮ ಅಗಾಡಿ ಜಾ಼ವಾನ ಹಮೂನ ಕೊಹುಯುನಿ. ಇನಖ್ಹಾಜೆ ಹಮೆ ಕ್ರೇಟ್ ಟಾಪಾನ ಕನಾರೆಕರಿ ಸಾಲ್ಮೋನೆನ ಖನ್ನೆ ಐನ್,
ACT 27:8 ಹಮೆ ಮುಶ್ಕಿಲ್‌ಥಿ, ಯೋ ಟಾಪನ ಕನಾರೆ ಅಗಾಡಿ ಜಾ಼ತಹುಯಿನ್ ಶನ್‌ಗಾರ್ನುಕೊಲ್ಲಿ ಕರಿ ಏಕ್‌ ಝ಼ಗೊಕನ ಆಯ. ಯೋ ಲಸಾಯಕರಿ ಖ್ಹಯೇರ‍್ನ ಖನ್ನೆ ಥೂ.
ACT 27:9 ಅಮ್ಮಸ್ ಘಣಾದನ್ ನಿಕ್ಳಿಗಯು. ಯೆಹೂದ್ಯರ್‌ನ ಪಟ್ನಿನೊ ದನ್‍ಬಿ ಖ್ಹತಮ್ ಹುಯಿಗಾಥ. ಇನಖ್ಹಾಜೆ ಪೌಲನೆ ದರ‍್ಯಾವ್‌ಮ ನಿಕ್ಳಾನು ಮುಶ್ಕಿಲ್ ಕರಿ ಬೋಲ್ಯೊ.
ACT 27:10 ತದೆ ಪೌಲನೆ ಇವ್ಣುನ, “ಅದ್ಮಿವೊ ಆ ಚಾ಼ಲ್‌ಥಿ ಜ಼ಹಾಜ಼್‌ನಾಬಿ, ಇನಾಮಛಾ಼ತೆ ರಾಛಾ಼ನಾಬಿ, ಅತ್ರೇಸ್‍ಕಾಹೆತೆ ಅಪ್ಣ ಜಾನ್ನಬಿ, ಘಣು ವದೇಖ್ಹ್‌ಬಿ ಲುಕ್ಷಾನ್‌ಬಿ ಉಷೆಕರಿ ಮನ ದೆಖಾವಸ್” ಕರಿ ಝೇತಾಯೊ.
ACT 27:11 ಕತೋಬಿ ಪೌಲನೆ ಬೋಲ್ಯೊತೆ ವಾತೆಥೀಬಿ, ಜ಼ಹಾಜ಼್‌ನೊ ಯಜಮಾನ್ನಿಬಿ ಚ಼ಲಾವವಾಳನಿ ವಾತ್ನ ಖ್ಹೋಶಿಪಾಯಿನ ಮೋಟಾನೆ ಕಾನ್‍ದಿದೊ.
ACT 27:12 ಯೋ ಬಂದರ್ನೊ ತಬರ್‌ಖೊ ಠಣ್ಣಹಗಾಮ್ ಕಾಡಾನ ಯೋ ಜ಼ಹಾಜ಼್ನ ಅಛ್ಛಿಝ಼ಗೊ ಕೋಥೂನಿ. ಇನಖ್ಹಾಜೆ ಹಿಜ್ಜಾ಼ಥು ನಿಕ್ಳಿನ್, ಜಾ಼ವಾನು ಹುಯುತೊ ಕಿಮ್‍ಬಿ ಫೆನಿಕ್ಸ್‌ ಗಾಮ್ನ ಜೈ಼ನ್ ಹಿಜ್ಜಾ಼ಸ್ ಯೋ ಠಣ್ಣಾ ಹಗಾಮ್‌ ಕಾಡ್ಣುಕರಿ ಘಣು ಅದ್ಮಿ ಖ್ಹೂಜ಼್‌ ಕರ‍್ಯು. ಫೆನಿಕ್ಸ್‌, ಕ್ರೇಟ್ ಟಾಪಾನು ಏಕ್‌ ಬಂದರ್ನೊ ತಬರ್‌ಖೊ, ಯೋ ಈಶಾನ್ಯ ದಿಕ್ನಾಬಿ, ಆಗ್ನೇಯ ದಿಕ್ನಾಬಿ, ಆಮಖ್ಹಾಮೆ ಥು.
ACT 27:13 ತದೆ ದಕ್ಷಿಣ್ ಭಣೀಥು ವಹಿರೊ ಹಳ್ಳೇಖ್ಹು ವಾಗಲಗ್ಯೊ. ಇವ್ಣೆ ಉದ್ದೇಶ್ ಹಕ್ಲಾಲ್ ಹುಯುಕರಿ ಖ್ಹೂಜ಼್ ಕರೀನ್, ಲಂಗಾರ್‌ನ ಛೋ಼ಡಿಲಿನ್, ಕ್ರೇಟ್ ಟಾಪಾನ ಕನಾರೇಸ್‍ಕರಿ ಪಡ್ತಹುಯಿನ್ ಜ಼ಹಾಜ಼್‌ಪರ್ ನಿಕ್‍ಳ್ಯ.
ACT 27:14 ಕತೋಬಿ ಜ಼ರಸ್‍ಘಡೀಮ ಈಶಾನ್ಯ ಮಾರುತ ಕರಿ ಅಪಟ್‌ಝ಼ಪಟ್‌ನೊ ವಹಿರೊ ಟಾಪಾಮ ವಾಗಲಗ್ಯುಥು.
ACT 27:15 ಜ಼ಹಾಜ಼್ ಯೋ ವಹಿರಾಮ ಖ್ಹಪ್‍ಡಿನ್, ಹಮೆ ಕೋಶಿಶ್ ಕರಾನು ಮ್ಹೆಂದಿದ. ಅಜು಼ ಅಗಾಡಿ ಜಾ಼ವಾನ ಕೋ ಹುಯುನ್ತೆ ವಹಿರೊ ಕೀಕಡ್ ವಾಗಸ್ಕಿ ಥೀಕಡ್ ಕರಿಶ್ ಜ಼ಹಾಜ಼್‌ನ ಧಕೆಲಾವ್ತಹುಯಿನ್ ಗಯು.
ACT 27:16 ಹಮೆ ಕ್ಲೌಡ ಕರಿ ಏಕ್‌ ನ್ಹಾನು ಟಾಪನ ಓಠೆಕರಿ ಗಯ. ತದೆ ಹಮೆ ಜ಼ಹಾಜ್‍಼ಮಥೂತೆ‍ ನ್ಹಾನಿದೋಣಿನ ಮಹಿ ಪಾಡಿನ್ ಬರೋಬರ್ ಕರ್ವಾನುಹುಯು.
ACT 27:17 ಇನ ಉಪ್ಪರ್ ಪಾಡಿಹುಯಗು ತದೆ ಶಿಂದ್ರಾನ ಪಾಡಿನ್ ಜ಼ಹಾಜ಼್‌ನ ಹೇಟ್ ಭಾಂದ್ಯು. ಇನಕೇಡೆಥು “ಸುರ್ತಿಸ್” ಕರಿ ರೇತ್ನೊ ಟಿಮ್ಮಾಮ ಜ಼ಹಾಜ಼್ ಪೇಶಿಜಾ಼ಶೆಕರಿ ಡರ್‌ಥಿ, ಜ಼ಹಾಜ಼್‌ನ ಉಪ್ಲಿಬಾಜು಼ನು ಜ಼ಹಾಜ಼್‌ನ ಮಿಲಾವನ ಜಿನಖ್ಹ್‌ನ ಉತಾರಿನ್‌ ವಹಿರೊ ವಾಗುಕರಾತೆ ಬಾಜು಼ಸ್ ಜ಼ಹಾಜ಼್ ತೇಲಾದೆಕರಿ ಮ್ಹೇಲ್ಯು.
ACT 27:18 ಇನವ್ಹಾಣೆ ತೋಫಾನ್ನೊ ವಹಿರೊ ಅಪಟ್ಜ಼ಫಟ್ ವಾಗಲಗ್ಯುತೆ ದೇಖಿನ್, ಅದ್ಮಿಖ್ಹಾರು ಜ಼ಹಾಜ಼್‍ಮ ಥೂತೆ ಥೋಡು ಖ್ಹಾಮನ್‍ಖ್ಹಾರು ಫೇಕಿದಿದು.
ACT 27:19 ಇನ ತೀನ್ ದನ್ಮ ಜ಼ಹಾಜ಼್‌ವಾಳನೇಸ್, ಜ಼ಹಾಜ಼್‌ನು ರಾಛಾ಼ವ್‌ನಾಸ್ ಪಾಡಿನ್ ಫೇಕಿದಿದು.
ACT 27:20 ಕೈಏಕ್ ದನ್‌ಲಗು ಚಾ಼ಂದ್‍ನ ರ‍್ಹವೊ, ಶುಕ್ಕರ್‌ನ ರ‍್ಹವೊ ದೇಖಾನ ಕೊಹುಯುನಿ. ತೋಫಾನ್ ಮೋಟುಸ್ ಹೋತುಆಯು. ಹಮೆ ಬಚಿಜಾಶುಕರಿ ಬೋಲಾನಿ ವಿಶ್ವಾಸ್ ಹಮಾರಮಾಥಿ ನಿಕ್ಳಿಗೈಥಿ.
ACT 27:21 ಯೋ ಅದ್ಮಿಖ್ಹಾರು ಘಣಾದನ್‍ಥು ಖಾಣುಖಾದೂಥು ಕೊಯ್ನಿ. ತದೆ ಏಕ್‍ದನ್ ಪೌಲ ಉಠಿ ಭೀರಿನ್ ಇವ್ಣುನ “ಅಲಾ ಅದ್ಮಿವೊ, ಕ್ರೇಟ್ ಟಾಪಾಥು ನಿಕ್ಳೊನಕೊ ಕರಿ ಮೇ ತುಮೂನ ಬೋಲ್ಯೊ. ತುಮೆ ಮಾರಿವಾತೆ ಖ್ಹಮಜ಼್‌ಣುಥು. ತದೆ ತುಮೂನ ಅತ್ರೆ ವದೇಖ್ಹೊ ಲುಕ್ಷಾನ್‌ ಕೋ ಹುಯುಹೋತ್ನಿ.
ACT 27:22 ಹಮ್ಕೆತೋಬಿ ತುಮೆ ಭಾಲಿಥಿ ರ‍್ಹೇವೊಕರಿ ತುಮೂನ ಬುದ್ದಿಬೋಲುಸ್; ಜ಼ಹಾಜ಼್ ನಾಶ್‍ಉಶೇ ಪಣ್ಕಿ ತುಮಾರಮ ಏಕ್‍ಜ಼ಣುಬಿ ಜಾನ್‌ ಕಾಡಿಲೆಶೆಕೊಯ್ನಿ.
ACT 27:23 ಗೈತೆರಾತ್, ದೇವ್‍ಕಂಥೊ ಏಕ್‍ ದೂತ ಮಾರಕನ ಆಯೋಥೊ. ಯೋಸ್ ದೇವ್ನ ಮೇ ಆರಾದನೆ ಕರುಸ್ತೆ ಮೆ ಇನೋಸ್.
ACT 27:24 ಯೋ ದೇವ್ನದೂತನೆ, ‘ಪೌಲ, ಡರ್‌ನಕೊ ತೂ ಕೈಸರೈನ ಖ್ಹಾಮ್ಣೆ ಭೀರೆವ್ಣು. ತಾರಿ ಜೋ಼ಡೆ ಜ಼ಹಾಜ಼್‍ಮ ಓಳೆಜಾ಼ಸ್‍ತೆ ಖ್ಹಾರಾಸ್ ಅದ್ಮಿನ ಜಾನ್ನ ಬಚಾ಼ಡುಕರುಸ್ತೆ, ತಾರ ಉಪ್ಪರ್‌ಲ್ಯ ದಯಾನಖ್ಹಾಜೆ ಕರಿ ಬೋಲ್ಯೊ.
ACT 27:25 ಇನಖ್ಹಾಜೆ, ಅದ್ಮಿವೊ ಭಾಲ್‍ಥಿ ರ‍್ಹವೊ. ಮನ ಬೋಲೈರ‍್ಹುತೆ, ಪರಕ್ಮಸ್ ಉಷೆಕರಿ ಮೇ ದೇವ್‍ಪರ್ ವಿಶ್ವಾಸ್ ಕರುಸ್.
ACT 27:26 ಕತೋಬಿ ಅಪ್ಣೆ ಕೆಹೂಕಿ ಏಕ್‌ ಟಾಪಾನಿ ಕನಾರಿನ ಫೋಚು಼ಕರಿಯೇಸ್, ಕರಿ ಬೋಲ್ಯೊ.
ACT 27:27 ಚೌ಼ಧಾನಿ ರಾತ್ಮ ಹಮೆ ಆದ್ರಿಯ ದರ‍್ಯಾವ್‌ಮ ಯೊ ಜ಼ಹಾಜ಼್ ವ್ಹವ್‌ತುಹುಯಿನ್, ಜಾ಼ತರ‍್ಹವಾನಿ ವಖ್ಹತ್‌ಮ, ಖ್ಹುಮಾರ್ ಅಧಿರಾತ್ಮ ಇನ ಚ಼ಲಾವವಾಳನೆ ಹಮೆ ಜ಼ಮೀನ್ನ ಖನ್ನೆ ಅಯಿಗ ಕರಿ ಲಾಝ್ಯು.
ACT 27:28 ತದೆ ಅಳ್ತಿನು ಗುಂಡ್ ಮ್ಹೇಲಿನ್ ಪಾಣಿನಿ ಗಧಾರ‍್ನ ತರೀಪ್ಷ ಕರಾಮ, ಯೋ ಖ್ಹುಮಾರ್ ಏಕ್‌ ಖ್ಹೋ ಡೋಡಿಖ್ಹ್‌ ಅಡಿ ಗಧಾರ್ ಛಾ಼ ಕರಿ ಮಾಲುಮ್ ಕರಿಲಿದ. ಇವ್ಣೆ ಬಿಜು಼ ಥೋಡಿ ದೂರ್ ಜೈ಼ನ್, ಪಾಛು಼ ಅಳ್ತಿನು ಗುಂಡ್ ಮ್ಹೇಲಿನ್ ದೇಖಾಮ, ಖ್ಹುಮಾರ್ ಯೋ ಖ್ಹಡ್‌ಚಾರೀಖ್ಹ್ ಅಡಿ ಥು.
ACT 27:29 ಜ಼ಹಾಜ಼್ ಬಂಡಾನ ಟಕ್ಕರ್ ಖಾಶೆಕರಿ ಡರಿನ್ ಜ಼ಹಾಜ಼್‌ನ ಪೀಠೆಥು ಚಾರ್ ಲಂಗಾರ್‌ನ ಪಾಣಿನ ಮಹಿ ಮ್ಹೇಲಿನ್ ಒಗ್ಗಿ ವ್ಹಾಣು ಹುವಾದೆಕರಿ ಪ್ರಾರ್ಥನೆ ಕರ‍್ಯು.
ACT 27:30 ಜ಼ಹಾಜ಼್ ಚ಼ಲವಾಳು ಥೋಡುಜ಼ಣು, ಲಪೀನ್ ದೋಣಿನ ದರ‍್ಯಾವ್‌ಮ ಉತ್‌ರೈನ್ ನಿಕ್ಳಿ ಜಾ಼ವ್ಣುಕರಿ ಜ಼ಹಾಜ಼್‌ನ ಖ್ಹಾಮ್ಣೆಥೂತೆ ಲಂಗಾರ್ ಅಖ್ಖಾನ ಹೇಟ್ ಉತಾರಾನು ಭಾಣು ಕರ‍್ಯು.
ACT 27:31 ತದೆ ಪೌಲನೆ ಖ್ಹೋಶಿಪಾಯಿನ ಮೋಟನಾಬಿ ಶಿಪಾಯಿಖ್ಹಾರಾನ, “ಆ ಜ಼ಹಾಜ಼್ ಚ಼ಲವವಾಳೊ ಜ಼ಹಾಜ಼್‍ಮ ನಾರ‍್ಹಯುತೊ ತುಮಾರೊ ಜಾನ್‌ ಬಚಾ಼ವನ ಉಶೇಸ್‍ ಕೊಯ್ನಿ” ಕರಿ ಬೋಲ್ಯೊ.
ACT 27:32 ಇನಖ್ಹಾಜೆ ಶಿಪಾಯಿಖ್ಹಾರನೆ, ಶಿಂದ್ರಾವ್‍ನ ಕತ್ರೀನ್ ದೋಣಿಯೇನ ಪಾಣಿಮ ಮ್ಹೆಂದಿದ.
ACT 27:33 ವ್ಹಾಣುಹುವಾನ ಮ್ಹಯಿಮಾ ಪೌಲನೆ ಇವ್ಣ ಖ್ಹಾರಾಜ಼ಣನ ಶಾತ್ಬಿ ಖಾವೊಕರಿ ಗಿಂಗೈಲಿದೊ ಅಜು಼ “ತುಮೆ ಗಯೋತೆ ಚೌ಼ಧರೋಜ್‍಼ಥೂಬಿ ಖಾಣುಸ್ ಖಾದಸ್‌ಕೋಯ್ನಿ.
ACT 27:34 ಹಮ್ಕೆ ತುಮೆ ದರ‍್ರಾಖ್ಹುತೊಬಿ ಖಾಣು ಖಾವ್ಣುಕರಿ ತುಮೂನ ಗಿಂಗೈಲೆವುಸ್. ತುಮೆ ಜೂತುರ‍್ಹೀನ್ ಬಚ಼್‌ಣುಕತೊ, ತುಮೂನ ಖಾಣಾನಿ ಜ಼ರೂರತ್ ಛಾ಼. ತುಮಾರಮ ಕೋಣ್‌ಬಿ ತುಮಾರ ಮುಡ್‌ಕ್ಯಾನೊ ಏಕ್‌ ಕೇಖ್ಹ್‌ಬಿ ಗುಮೈಲಿಶುಕೊಯ್ನಿ. ಕರಿ ಬೋಲ್ಯೊ.
ACT 27:35 ಅಮ್ ಬೋಲಿನ್ ಪೌಲನೆ, ರೋಟಾನ ಪಾಡಿ ಖ್ಹಾರಾನ ಖ್ಹಾಮ್ಣೆ ದೇವ್ನ ಧನ್ಯವಾದ್‌ಕರೀನ್‌ ತೋಡಿ ಖಾವಲಗ್ಯೊ.
ACT 27:36 ತದೆ ಇವ್ಣೇಬಿಖ್ಹಾರು ಭಾಲ್‍ಲೀನ್, ಖಾಣುಖಾದು.
ACT 27:37 ಯೋ ಜ಼ಹಾಜ಼್‍ಮ ಹಮೆ ಬೇಖ್ಹೊ ಛೋ಼ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣು ಥಾ.
ACT 27:38 ಹಮೆ ಬಶ್‍ಹುವಾಎತ್ರು ಖೈಹುವಾದೀನ್, ಬಿಜ಼ ಘವ್‌ನ ದರ‍್ಯಾವ್‌ಮ ಫೇಕಿನ್, ಜ಼ಹಾಜ಼್‌ನ ವಜನ್ನ ಕಮ್‍ಕರ‍್ಯ.
ACT 27:39 ವ್ಹಾಣು ಹುವಾದಿನ್ ಜ಼ಹಾಜ಼್ ಚ಼ಲಾವವಾಳು ಜ಼ಮೀನ್ನ ದೇಖ್ಯು. ಕತೋಬಿ ಯೋ ಖೆವಿ ದೇಖ್ಹ್‌ನಿ ಝ಼ಗೊಕರಿ ಮಾಲುಮ್‌ ಪಡ್ಯುಕೊಯ್ನಿ. ಇವ್ಣೆ ದೇಖ್ಯುತೆ ಏಕ್‌ ರೇತ್ನಿ ಖಾರಿ ರ‍್ಹಯೂತೊ ಹಿಜ್ಜಾ಼ ಜ಼ಹಾಜ಼್‍ನ ಲೀಜೈ಼ನ್ ಭೀರಾಕ್ಣುಕರಿ, ಸೋಚ್ಯು.
ACT 27:40 ಇನಖ್ಹಾಜೆ ಹಮೆಖ್ಹಾರು ಅಖ್ಖಾ ಲಂಗಾರ್ನ ಕತ್ರೀನ್ ದರ‍್ಯಾವ್‌ಮ ಮ್ಹೆಂದಿದ. ಅಜು಼ ಚುಕ್ಕಾಣಿನ ಶಿಂದ್ರಾವ್‍ನ ಗಾಟ್ನ ಛೋ಼ಡಿನ್ ಜ಼ಹಾಜ಼್‍ನ ಖ್ಹಾಮ್ಣೆ ಥೂತೆ ಜ಼ಂಡಾನ ವಹಿರಾಮ ಪಾಡಿಭಾಂದಿನ್ ಜ಼ಹಾಜ಼್‌ನ ಕನಾರಿಭಣಿ ಚ಼ಲಾವ್‌ತು ನಿಕ್‍ಳ್ಯ.
ACT 27:41 ಕತೋಬಿ ಜ಼ಹಾಜ಼್ ರೇತ್‍ನ ದಿಬ್ಬನ ಟಕ್‌ರೈನ್, ಇನು ಮ್ಹೋರಾನು ನೋಕ್‍ ರೇತ್ಮ ಗಡೀಗು. ಜ಼ಹಾಜ಼್ ಅಗಾಡಿ ಚಾ಼ಲಾನ ಹುಯುಕೋಯ್ನಿ. ತದೆ ಮೋಟ ಝೋ಼ಕಾಳ್ಯ ಆಯಿನ್ ಜ಼ಹಾಜ಼್‌ನ ಪೀಠೆಥು ಮಾರ್‌ಪಡೀನ್, ಫುಟಿನ್‌ ಟುಕ್‌ಡಾ ಹುಯಿ ಪಡಾಲಗ್ಯುಥು.
ACT 27:42 ತದೆ ಕೈದಿಖ್ಹಾರು ತೀರಾಕ್‌ಮಾರಿನ್ ಲಪಿನಿಕ್‌ಳಿ ಜಾ಼ಶೆಕರಿ ಶಿಪಾಯಿಖ್ಹಾರು ಇವ್ಣುನ ಮರ್‌ನಾಖಿ ದೇವ್ಣುಕರಿ ಸೋಚ್ಯು.
ACT 27:43 ಕತೋಬಿ ಖ್ಹೋಶಿಪಾಯಿನ ಮೋಟಾನೆ ಪೌಲನ ಬಚಾ಼ಡ್ನುಥು. ಇನಖ್ಹಾಜೆ, ಇವ್ಣೆ ಇಮ್‌ ನಾ ಕರ್ನುತೆ ತಿಮ್ ದೇಖಿಲಿದೊ. ಅನಬದಲ್ ತೀರಾಕ್ ಮಾಲುಮ್‌ ರ‍್ಹವಾಳು ಪಾಣಿಮ ಉತ್ರಿನ್ ತೀರಾಕ್‌ಮಾರಿ ಕನಾರಿನ ಜಾ಼ವ್ಣುಕರಿ, ಹುಕುಮ್ ದಿದೊ.
ACT 27:44 ಅಜು಼ ಉಭ್ರಿಹುಯು ಅದ್ಮಿಖ್ಹಾರು ಪಲ್ಗಾನ ಉಪ್ಪರ್ ನತರ್ ಜ಼ಹಾಜ಼್‌ನ ಟುಕ್ಡಾವ್‍ನ ಮದಥ್ಥಿ ಜಾ಼ವ್ಣುಕರಿ ಬೋಲ್ಯು. ಇಮ್ಮಸ್ ಹಮೆ ಖ್ಹಾರುಜ಼ಣು ಕನಾರಿನ ಬಚಿನ್ ಪೋಚಿಗಯ.
ACT 28:1 ಹಮೆ ಜ಼ತನ್‌ಥಿ ಕನಾರಿನ ಬಚಿನ್ ಜಾ಼ವಾದಿನ್ ಯೋ ಮೆಲೀತೆ ಟಾಪು ಕರಿ ಮಾಲುಮ್‍ಹುಯು.
ACT 28:2 ತದೆ ಪಾಣಿ ವರ್ಖ್ಹುಕರ್ತೊಥೊ ಅಜು಼ ಘಣು ಠಣ್‍ಥೂತೆಖ್ಹಾಜೆ ಯೋ ಟಾಪುನು ಅದ್ಮಿಖ್ಹಾರು ಪ್ಯಾರ್‌ಥಿ ಇವ್ಣೆ ಶೇಕಾನಖ್ಹಾಜೆ ಆಗ್ ಲಗಾಡಿನ್ ಹಮೂನ ಖ್ಹಾರಾನ ಬುಲಾಯು.
ACT 28:3 ಪೌಲನೆ ಏಕ್‌ ಭಾರೊ ಲಾಕ್ಡಾನ ಎಕ್ಟುಕರಿನ್ ಲೈನ್‌ ಆಗ್ನಉಪ್ಪರ್ ನಾಖುಕರಾನಿವಖ್ಹ್‌ತೆ ಇನ ಅಂಚ಼್‌ನಮಾರ್ಮ ಖ್ಹಾಪ್‌ ಏಕ್‌ ಭಾರ್‌ಆಯಿನ್ ಪೌಲಾನ ಹಾತ್‍ಕೇಡೆ ಲಪ್‍ಟೈಗಯು.
ACT 28:4 ಪೌಲನ ಹಾತ್ನ ಲಪ್‍ಟೈರ‍್ಹುಥೂತೆ ಯೋ ಖ್ಹಾಪ್‍ನ ದೇಖ್ಯೂತೆ ಟಾಪುವಾಳು, “ಆ ಅದ್ಮಿ ಖ್ಹಾಚ ಖೂನಿಸ್‌ ಹುಯಿರೊಸ್. ಆ ಹೈರೋತೆ ದರ‍್ಯಾವ್‍ಮಾಥೊ ಬಚಿನ್ ಆಯೋತೋಬಿ ನಶೀಬ್‌ ಇನ ಜಿವಾನ ಮ್ಹೇಲ್ಯುಕೊಯ್ನಿ.” ಕರಿ ಇವ್ಣ ಇವ್ಣಾಮ ಬೋಲಿಲಿದು.
ACT 28:5 ಕತೋಬಿ ಪೌಲನೆ ಖ್ಹಾಪ್‍ನ ಆಗ್‌ಮ ಝ಼ಟ್ಕಿನಾಖ್ಯೊ; ಇನ ಶನು ಖತ್ರಾಬಿ ಕೊ ಹುಯುನಿ.
ACT 28:6 ಇವ್ಣೆ ಇನು ಅಂಗ್‍ತನ್ ಫುಲಿಜಾಶೆ ನತರ್ ಆ ಅಫ್ಫರ್‌ಥೊಸ್ ಮರಿನ್ ಲಡಕ್‍ಶೆ ಕರಿ ಟಿವೈರ‍್ಹೂಥು. ಕತೋಬಿ ಕೆವ್ಡಿ ವಖ್ಹತ್ ಟಿವೈನ್ ದೇಖ್ಯುತೋಬಿ ಇನ ಶನು ಲುಕ್ಷಾನ್‌ಬಿ ಕೊಹುಯುನಿ. ಅನ ದೇಖ್ಯೂತೆ ಇವ್ಣೆ ಮನ್‍ಫರೈಲಿನ್ ಆ ಏಕ್‌ ದೇವಸ್‌ಕರಿ ಬೋಲ್ಯು.
ACT 28:7 ಯೋ ಟಾಪುನೊ ಮೋಟೊ ಅಧಿಕಾರಿಮ ಏಕ್‍ಜ಼ಣೊ ಪೋಪ್ಲಿಯಾನು ಖೇತರ್‌ ಗದ್ದೆ ಹಮೆಥಾತೆ ಝ಼ಗೊನ ಖನ್ನೇಸ್‍ಮ ಥೂ. ಯೋ ಹಮೂನ ಸ್ವಾಗತ್ ಕರೀನ್ ತೀನ್ ದನ್‌ಲಗು ಹಮೆ ಇನೇಥಿ ಸತ್ಕಾರ್ ಲಿದ.
ACT 28:8 ಪೋಪ್ಲಿಯಾನೊ ಬಾ ತಾವ್‍ಥೀಬಿ ಲ್ಹೊಯ್ಯವ್‌ಹುಯಿನ್ ಛಾ಼ದ್ರಿ ಧರಿರಾಖ್ಯೊಥೊ.ಪೌಲ ಇನಕನ ಜೈ಼ನ್ ಪ್ರಾರ್ಥನೆ ಕರೀನ್ ಇನ ಮುಡ್‌ಕ್ಯಪರ್ ಹಾತ್‍ಮ್ಹೇಲಿನ್‍ ಅಛ್ಛುಕರ‍್ಯೊ.
ACT 28:9 ಇನಪಾರ್ ಯೋ ಟಾಪನ ಅಜು಼ ಉಭ್‌ರ‍್ಯುತೆ ಖ್ಹಾರುಸ್ ರೋಗಿಬಿ ಪೌಲಕನ ಐನ್ ಗುಣ್‌ಹುಯು.
ACT 28:10 ಇವ್ಣೆ ಹಮೂನ ಜಾ಼ಖ್ಹತ್ ಮರ್ಯಾದಿ ದಿದು. ಹಮೆ ಹಿಜ್ಜಾ಼ಥು ಜಾ಼ವನ ಖ್ಹವಾರನಿ ವಖ್ಹ್‌ತೆ ಹಮೂನ ಜ಼ರೂರತ್‌ಥೂತೆ ಖ್ಹಾರು ಚೀಜ಼್ ಲಯಿನ್ ದಿದು.
ACT 28:11 ತೀನ್ ಮಹಿನಾನ ವಾರ್‌ ಅಲೆಕ್ಸಾಂಡ್ರಿಯಾಥು ಅಯಿನ್ ಯೋ ಟಾಪಾಮ ಠಣ್ಣಾದನ್‍ ಕಾಡಿಮ್ಹೇಲಿಜಾ಼ವನ ಖ್ಹಾಜೆ ಏಕ್‌ ಜ಼ಹಾಜ಼್‌ನ ಚ಼ಢೀನ್ ಗಯ. ಯೋ ಜ಼ಹಾಜ಼್‍ನ ಖ್ಹಾಮ್ಣೆ ಗ್ರೀಕ್ ಅವಳಿಜವಳಿ ದೇವ್ತಿನು ಖ್ಹಣೇದ್ ಥು.
ACT 28:12 ಹಮೆ ಸುರಕೂಸ್ ಖ್ಹಯೇರ‍್ನ ಐನ್ ಹಿಜ್ಜಾ಼ ತೀನ್‍ದನ್‍ ಥಾ.
ACT 28:13 ಹಿಜ್ಜಾ಼ಥ ಚಾ಼ಲ್ತ ಹುಯಿನ್ ರೇಗಿಯ ಖ್ಹಯೇರ್‌ಮ ಪೇಶ್ಯ. ಏಕ್‍ದನ್ನ ಬಾದ್ಮ ದಕ್ಷಿಣ್‍ನೊ ವಹಿರೊ ವಾಗಲಗ್ಯೊಥೊ. ಇನಖ್ಹಾಜೆ ಬೇನದನ್ನೆ ಪೊತಿಯೋಲಕರಿ‍ ಖ್ಹಯೇರ್‌ಮ ಆಯ.
ACT 28:14 ಹಮೆ ಹಿಜ್ಜಾ಼ ಥೋಡು ವಿಶ್ವಾಸಿವ್‌ನ ದೇಖ್ಯ. ಇವ್ಣಜೋ಼ಡ್ಮ ಖ್ಹಾತ್ ದನ್‌ತೋಬಿ ರ‍್ಹೇವ್ಣುಕರಿ ಬೋಲಿಲಿದು. ಇನಖ್ಹಾಜೆ ಹಮೆ ರೋಮ್‍ನ ಆಯ.
ACT 28:15 ಹಮೆ ಹಜ಼್ಜ ರ‍್ಹವಾನು ರೋಮ್ಮ ಥೂತೆ ವಿಶ್ವಾಸಿನ ಮಾಲುಮ್ ಪಡ್ಯು. ಹಮೂನ ಮಳಾನಖ್ಹಾಜೆ ಥೋಡುಜ಼ಣು “ಅಪ್ಪಿಯ ನಂಗರ್‌ಲಗು ಅಜು಼ ತ್ರಿಛತ್ರಕರಿ ಝ಼ಗೋಲಗೂಬಿ ಆಯು. ಪೌಲನೆ ಇವ್ಣುನ ದೇಖಿನ್ ದೇವ್ನ ಧನ್ಯವಾದ್‌ಕರೀನ್‌ ಭಾಲಿಥಿ ಹುಮ್ಮಖ್ಹ್‌ ಹುಯೊ.
ACT 28:16 ಇನಕೇಡೆಥು ಹಮೆ ರೋಮ್‍ನ ಪೋಚಾ಼ನಿವಖ್ಹತೆ, ಪೌಲ ಇನ ದೇಖಿಲ್ಯವಾಳೊ ಏಕ್‍ಶಿಪಾಯಿ ಇನಿ ಜೋ಼ಡ್ಮ ರ‍್ಹಿಯೇಜಾ಼ಯ್ ಕರಿ ಬೋಲಾನು ಹುಕುಮ್‌ ಲಿದೊ.
ACT 28:17 ತೀನ್‍ದನ್‍ ಹುವಾನಪಾರ್ ಪೌಲನೆ ಹಿಜ಼್ಜಾನ ಯೆಹೂದ್ಯರ್‌ನ ಘಲ್ಡಾವ್‌ನ ಏಕ್‌ ಝ಼ಗೊ ಎಕ್ಟು ಬುಲಾಯೊ. ಇವ್ಣೆ ಆವಾಮ ಯೋ ಇವ್ಣುನ, “ಮಾರ ಭೈಯೇವೊ ಮೇ ಅಪ್ಣ ಅದ್ಮಿಥಿ ರ‍್ಹವೊ ಗುರುಗುರಬ್‍ಲ್ಯಥಿ ಆಯೂತೆ ವಿರೋದ್‌ಥಿ ರ‍್ಹವೊ ಶಾತ್‌ ಕರ‍್ಯುಕೊಯ್ನಿ. ಮನ ಯೆರೂಸಲೇಮ್ಮ ಖೈದಿಕರೀನ್ ಧರೀನ್ ರೋಮ್‌ವಾಳಾನ ಹಾತ್ಮ ದ್ಯವಾನಿತರ ಹುಯು.
ACT 28:18 ಇವ್ಣೆ ಮನ ವಿಚಾರ್ ಕರೀನ್, ಮಾರಮ ಮರಣ್ಣಿ ದಂಡನೇನು ಆಪರಾದ್ ಖಿವೂಬಿ ಕೊಂತೆಖ್ಹಾಜೆ ಮನ ಛುಟ್ಕಾರ್ ಕರ್ನುಕರಿ ಥೂ.
ACT 28:19 ಕತೋಬಿ ಯೆಹೂದ್ಯರ್ ವಿರೋದ್ ಕರ‍್ಯುತೆ ಇನಖ್ಹಾಜೆ, ಮೇ ಕೈಸರನ ಖ್ಹಾಮ್ಣೆ ಬೋಲಿಲೇವುಸ್ ಕರಿ ಬೋಲ್ನುಪಡ್ಯುಥು. ಕತೋಬಿ ಮಾರು ಶೊಂತ್‍ ಅದ್ಮಿಪರ್ ಗಲ್ತಿ ನಾಲಗಾಡ್ನುಕರಿ ಬೋಲ್ಯೊಕೊಯ್ನಿ.
ACT 28:20 ಆ ಕಾರ‍ಣ್ಣಾಖ್ಹಾಜೆ ಮೇ ತುಮೂನ ಬೋಲ್ನುಕರಿ ಬುಲೈಮಂಗಯೋತೆ. ಇಸ್ರಾಯೇಲ್ ಅದ್ಮಿನ ವಿಶ್ವಾಸ್ನಖ್ಹಾಜೆ ಆ ಖ್ಹಂಕ್‌ಳಿಥಿ ಭಂದೈರ‍್ಹೋಸ್.” ಕರಿ ಬೋಲ್ಯೊ.
ACT 28:21 ಇವ್ಣೆ ಇನ, “ತಾರಿ ಬಾರೇಮ ಯೂದಾಯಥು ಹಮೂನ ಖಿವು ಚಿಟ್ಟಿಬಿ ಕೋ ಆಯೂನಿ. ನತರ್ ಭೈಯೇವ್‌ಮ ಏಕ್‍ಜ಼ಣೂಬಿ ತಾರಿ ಬಾರೇಮ ಖಿವೂಬಿ ಖರಾಬ್ ವಾತ್ ಖ್ಹಮ್‌ಜಾ಼ಡ್ಯುಬಿ ಕೊಯ್ನಿ ಬೋಲ್ಯುಬಿ ಕೊಯ್ನಿ.
ACT 28:22 ಕತೋಬಿ ತಾರಿ ಸೋಚ್ನ ತಾರ ಮ್ಹೋಡೇಖ್ಹೂಸ್ ಖ್ಹಮ್‌ಜಾ಼ನ ಪಸಂದ್ ಕರ್ಯೆಸ್. ಶನಕತೊ ಅಖ್ಖೂಸ್ ಅದ್ಮಿಖ್ಹಾರು ಆ ಝೂ಼ಂಡ್‌ಮ ಕ್ರಿಸ್ತನು ವಿರೋದ್ ಕರೀನ್ ವಾತೆ ಬೋಲುಕರಸ್‍ಕರಿ ಹಮೂನ ಮಾಲುಮ್‌” ಕರಿ ಬೋಲ್ಯು.
ACT 28:23 ಇನಖ್ಹಾಜೆ ಪೌಲ ಅಜು಼ ಇವ್ಣೆ ಸಭೆ ಮಳಾನ ಏಕ್‍ದನ್ ಖ್ಹಣೇದ್‍ಕರ‍್ಯು, ಯೋ ರೋಜ಼್ಮ ಕೈಯೆಕ್ಕಿ ಜ಼ಣು ಪೌಲನ ಘರ್ಮ ಘಣಿ ಗಣ್ತೀಥಿ ಸಬೆಮಳ್ಯು. ಇನೆ ವ್ಹಾಣೇಥು ಖ್ಹಾಂಜ಼್‌‌ಲಗು ದೇವ್ನ ರಾಜ್ಯನಿ ಬಾರೇಮ ಇನಿ ವಾತೇನ ಇವ್ಣುನ ಸಾಕ್ಷಿನ ಬೋಲ್ತೊಹುಯಿನ್.ಅಜು಼ ಮೋಶೇನು ಧರ್ಮಶಾಸ್ತ್ರ ಪ್ರವಾದಿನು ದಪ್ತರ್‌ನ ಆಧಾರ್ ಲಿದೊ. ಯೇಸುನಿ ಬಾರೇನಿ ವಾತೆಮ ಇವ್ಣುನ ವಿಶ್ವಾಸ್ ರಾಖಾನಿಘೊಣಿ ಕೋಶಿಶ್ ಕರ‍್ಯೊ. ಅನಖ್ಹಾಜೆ ಇನೆ
ACT 28:24 ಪೌಲನೆ ಬೋಲ್ಯೊತೆ ಥೋಡಿ ವಾತೆನ ಥೋಡಜ಼ಣ ಯೆಹೂದ್ಯರ್‌ನೆ ಮಾನಿಲಿದು. ಕತೋಬಿ ಥೋಡಾನೆ ವಿಶ್ವಾಸ್‌ ಕರ‍್ಯುಕೊಯ್ನಿ.
ACT 28:25 ಇವ್ಣಾಮ ವಗ್ಗುಟ್‌ಕೊಂತೆ ವಳಿಜಾ಼ತುಥೂತೆ ದೇಖಿನ್ ಖ್ಹರ್ತಿಮ ಪೌಲನೆ ಇವ್ಣುನ ಪವಿತ್ರಾತ್ಮನೆ ಪ್ರವಾದಿ ಹುಯಿರೋತೆ ಯೆಶಾಯಥಿ ಗುರುಗುರಬ್‍ಲ್ಯನ ಖ್ಹಾರಾನ ಖ್ಹಾಚ಼ನ ಬಾರೇಮ ಬೋಲ್ತೊ ಹುಯಿನ್,
ACT 28:26 ‘ತೂ ಆ ಅದ್ಮಿಕನ ಜೈ಼ನ್ ಇವ್ಣುನ ‘ತುಮೆ ಖನ್ನೆ ರ‍್ಹೀನ್ ಖ್ಹಮ್‍ಜ್ಯುತೋಬಿ ಮಾಲುಮ್‌ ಕರಾಸ್ ಕೊಯ್ನಿ; ಡೋಳ ರ‍್ಹೀನ್ ದೇಖ್ಯತೋಬಿ ಪರ್‌ಖ್ಯಾಕೊಯ್ನಿ.
ACT 28:27 ಶನಕತೊ, ಆ ಅದ್ಮಿನು ದಿಲ್‌ ಬಂಡೊ ಹುಯಿಗಯು; ಇವ್ಣು ಕಾನ್‌ ರ‍್ಹಯುತೋಬಿ ಕಾನ್‌ಖ್ಹಾರು ಮೂಚಿರಾಖ್ಯುಸ್ ಖ್ಹಾಚು಼ ರ‍್ಹಯುತೋಬಿ ದೇಖಾನ ಮನ್ ಕರಾಕೊಯ್ನಿ, ನತರ್ ಅವ್ಣೆ ಡೋಳೇಥಿ ದೇಖ್ಯುಹೋತ್ತ್‌, ಕಾನ್‍ಥಿ ಖ್ಹಮ್‍ಜ್ಯುಹೋತ್, ಮನ್‍ಲಗಾಡಿನ್ ಮಾಲುಮ್‌ ಕರ‍್ಯುಹೊತ್, ಮಾರಭಣಿ ಫರಿಗಯುಹೊತ್; ಮಾರೇಥಿ ಅಛ್ಛು಼ ಹುಯಿಗುಹೊತ್.
ACT 28:28 ತದೆ ಪೌಲನೆ ದೇವ್‌ನು ಆ ರಕ್ಷಣೆನ ಯೆಹೂದ್ಯರ್‌ಕಾಹೆತೆ ಇವ್ಣುನ ಬೋಲಿ ಮೊಕ್‍ಲೈರ‍್ಹುಸ್‍ ಕರಿ ತುಮೂನ ಅಛ್ಛಿನಿತರ ಮಾಲುಮ್‌ ರ‍್ಹವಾದೆ; ಕರಿ ಬೋಲಿನ್ ಇನಿ ವಾತೆನ ಖ್ಹರ್ತಿಕರ‍್ಯೊ.
ACT 28:29 ಇನೆ ಆ ವಾತೆನ ಬೋಲಾನ ಪಾರ್ ಯೆಹೂದ್ಯರ್ ಘಣು ಖರಾಬ್‌ಥಿ ವಿವಾದ್ ಕರ್ತುಹುಯಿನ್ ಚ಼ಲೀಗು.
ACT 28:30 ಇನಕೇಡೆಥು ಯೋಸ್ ಭಾಡು ಲೀರಾಖ್ಯೊಥೊತೆ ಘರ್‌ಮ ಬೇ ವರಖ್ಹ್‌ಲಗು ರ‍್ಹೀನ್, ಇನಕನ ಆವಾಳಾನ ಖ್ಹಾರಸ್ನ ಸ್ವಾಗತ್ ಕರೀನ್ ಬುಲೈಲೇತೊಥೊ.
ACT 28:31 ತದೆ ಇನೆ ಘಣುಭಾಲಿಥಿ ಅಜು಼ ಖಿವಿ ಅಡ್ಡಿಕೊಂತೆ; ದೇವ್ನು ರಾಜ್ಯನಿ ಬಾರೇಮ ಉಪದೇಶ್ ಕರ್ತೊಹುಯಿನ್ ಪ್ರಭು ಯೇಸುಕ್ರಿಸ್ತನಿ ಬಾರೇನಿ ವಾತೇನ ಬೋಧನೆ ಕರ್ತೊರ‍್ಹಿಯೊ.
ROM 1:1 ಯೇಸು ಕ್ರಿಸ್ತನೊ ದಾಸಬಿ ಅಪೊಸ್ತಲ ಹುವಾನಖ್ಹಾಜೆ ಬುಲಾಯೊಹುಯೋಬಿ ದೇವ್ನು ಸುವಾರ್ತೆನ ಬೋಲಾನಖ್ಹಾಜೆ ಚೂ಼ಣಾಯೊಹುಯೊ ಪೌಲ,
ROM 1:2 ದೇವ್ನೆ ಘಣ ಹಗಾಮ್ನಪಾರ್‌ ಪವಿತ್ರ ದಪ್ತರ್‌ಮ ಇನ ಪ್ರವಾದಿಖ್ಹಾರಾಥಿ ವಾಗ್ದಾನ್ ಕರ‍್ಯೊತೆ,
ROM 1:3 ದೇವ್‌ನೊ ಛಿಯ್ಯೊಹುಯಿರೊತೆ ಅಪ್ಣೊ ಪ್ರಭು ಯೇಸುಕ್ರಿಸ್ತನಿ ಬಾರೇಮ ಬೋಲಾನು ಹುಯಿರ‍್ಹುಸ್. ಅದಮ್‍ಜ಼ಮಾನನಿ ರೂಪ್‌ಮ ಯೋ ದಾವೀದನು ಖೂಮ್ಮ ಪೈದಹುಯೊ.
ROM 1:4 ದೇವ್ನೆ ಪಹಿಲೆ ಪವಿತ್ರ ದಪ್ತರ್‌ಮ ಇನ ಪ್ರವಾದಿಥಿ ಬೋಲೈರ‍್ಹೀತೆ ಆ ವಾಗ್ದಾನ್‌ಕರ‍್ಯೊತೆ ಸುವಾರ್ತೆ ಮರ‍್ಯಾಹುಯಾಮಾಥು ಪಾಛು಼ ಜಿವ್ತುಹುಯೋತೆ ಇನಿ ಶಕಥ್ಥಿ ದೇವ್‌ನೊ ಛಿಯ್ಯೊಕರಿ ವತಾಳೈಲಿದೊ. ಯೋಸ್ ಅಪ್ಣೊ ಪ್ರಭು ಯೇಸುಕ್ರಿಸ್ತ ಹುಯಿರೊಸ್.
ROM 1:5 ಇನು ನಾಮ್ನಿ ಮಹಿಮೆನಖ್ಹಾಜೇಸ್ ಅಖ್ಖಾಸ್ ದೇಖ್ಹ್‌ನು ಅದ್ಮಿಖ್ಹಾರು ಅನ ವಿಶ್ವಾಸ್‍ಕರಿನ್, ವಿಧೇಯಹುಯಿನ್ ಚಾ಼ಲನಿತರ ಕರಾನ ಅಪೊಸ್ತಲಹುವಾನಿ ಮೋಕಾನ ಯೇಸುಕ್ರಿಸ್ತಥಿಸ್ ದೇವ್ನೆ ಮನ ದೀರಾಖ್ಯೊಸ್.
ROM 1:6 ರೋಮಾಪುರಮ ರ‍್ಹವಾಳ ತುಮೂನಾಬಿ ಮಳೈಲೀನ್ ಕ್ರಿಸ್ತವಾಳ ಹುವಾನಖ್ಹಾಜೆ ತುಮೂನ ಬುಲಾಯೊ.
ROM 1:7 ಅಜು಼ ಇಮ್ಮಸ್ ದೇವ್ ಪ್ಯಾರ್‌ಕರಾತೆ ಅಜು಼ ಇನು ಶೊಂತ್ ಅದ್ಮಿವೊ ಕರಿ ಹುಯಿರ‍್ಹುತೆ ರೋಮ್‌ವಾಳ ತುಮುನ ಲೀಖುಕರುತೆ‍ ಶಾತ್‌ಕತೊ: ಬಾ ಹುಯಿರ‍್ಹೋತೆ ದೇವ್‍ಥೀಬಿ ಪ್ರಭು ಯೇಸುಕ್ರಿಸ್ತಥೀಬಿ ತುಮೂನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
ROM 1:8 ಖ್ಹಾರೇಥಿ ಪಹಿಲೆ ತುಮಾರಿ ವಿಶ್ವಾಸ್‌ನಿ ಬಾರೇಮ ಜಗತ್ನ ಅಖ್ಖಿಬಾಜು಼ ಪೂಚ್‍ತಾಚ಼್ ಹೂಕರಸ್. ಇನಖ್ಹಾಜೆ ಮೇ ತುಮಾರಭಣೀಥು ಯೇಸುಕ್ರಿಸ್ತನ ನಾಮ್‌ಥಿ ದೇವ್ನ ಧನ್ಯವಾದ್ ಕರುಸ್.
ROM 1:9 ದೇವ್ನ ಛಿಯ್ಯಾನಿ ಸುವಾರ್ತೆನ ಮನ್‍ಲಗಾಡಿನ್ ಬೋಲ್ತೊಹುಯಿನ್ ಇನಾಸ್ ಮಾರ ದಿಲ್‌ಥಿ ಸೇವೆ ಕರಾವಾಳೊಹುಯಿನ್ ಭೈಕೂಸ್ ಕೊಂತೆ, ತುಮಾರಖ್ಹಾಜೆ ಬಿಂತಿ ಕರುಕರಸ್. ಅನ ದೇವಸ್ ಸಾಕ್ಷಿ.
ROM 1:10 ಮೇ ಹರೇಕ್ ಪ್ರಾರ್ಥನೆಮ ದೇವ್, ಇನಿಖ್ಹೂಜ಼್‍ನಿಘೊಣಿ ಹಮ್ಕೆತೋಬಿ ತುಮಾರಕನ ಆವಾನ ಮೋಕ ಮಳಾದೆಕರಿ ದೇವ್‌ಮ ಗಿಂಗೈಲೆವುಸ್.
ROM 1:11 ತುಮೂನ ಮಳಿನ್ ಥೋಡಿ ಆತ್ಮೀಕ ಆಶೀರ್ವಾದ್‌ ತುಮಾರಿ ಜೋ಼ಡ್ಮ ವಾಟಪಾಡಿನ್ ದೀನ್ ತುಮೆ ಅನೇಥಿ ಶಕತ್‍ ಲೇವ್ಣುಕರಿ ಮಾರಿ ಶಂತೋಖ್ಹ್‌ಹುಯಿರ‍್ಹಿಸ್.
ROM 1:12 ಮಾರಿ ವಿಶ್ವಾಸ್‌ಮ ತುಮೇಬಿ ತುಮಾರಿ ವಿಶ್ವಾಸ್‍ಥಿ ಮೇಬಿ ಏಕ್‍ಥಿಏಕ್‍ಜ಼ಣು ಮದತ್ನ ಲೀಲೆವ್ಣುಕರಿ ಮಾರಿ ಆಖ್ಹ್.
ROM 1:13 ಭೈಯೇ ಭೇನೆವೊ, ಪರೈಆದ್ಮಿಯೇವ್‍ಮ ಜುತ್ಯೋತೆತಿಮ್‍ ತುಮಾರಮಬಿ ಜೂತಿಶ್‌ಕರಿ, ಮೇ ಕೈಯೆಕ್‍ಹಲ್ಲ ತುಮುನ ಮಳಾನಖ್ಹಾಜೆ ದಿಲ್‍ಕರ‍್ಯೊತೋಬಿ, ಹಮ್ಕೆಲಗು ಶಾತ್ಕಿ ಏಕ್‍ ಆಡು ಹೂಕರ್ತುಥು ಕರಿ ತುಮೇಬಿ ಮಾಲುಮ್‌ಕರಿರಾಕೊ ಕರಿ ಮಾರಿ ಆಖ್ಹ್‌.
ROM 1:14 ಮೇ ಗ್ರೀಕ್‍ವಾಳನಾಬಿ ಅಜು಼ ಅಲಕ್‌ಅದ್ಮಿವೊನಾಬಿ ಅಕ್ಲಿನಾಬಿ, ಬಿಣ್‌ಖ್ಹೈಲಿನಾಬಿ ಫೇಡ್ನುತೆ ಏಕ್‌ ಕರ್ನಿ ಮಾರಪರ್ ಛಾ಼.
ROM 1:15 ಅಮ್‍ಛಾ಼ತೆ ಇನಾಖ್ಹಾಜೆ ರೋಮ್ ಖ್ಹಯೇರ್‌ಮ ಛಾ಼ತೆ ತುಮೂನಾಬಿ ಸುವಾರ್ತೆ ಬೋಲಾನ ಮೇ ಹುಮ್ಮಖ್ಹ್‌ಥಿ ತಯಾರ್ ಹುಯಿರ‍್ಹೋಸ್.
ROM 1:16 ಮಾರಿ ಸುವಾರ್ತೆನಿ ಬಾರೇಮ ಮನ ಪೂರ ಆತ್ಮ ವಿಶ್ವಾಸ್ ಛಾ಼. ಶನಕತೊ ಯೋ ಪಹಿಲೆ ಯೆಹೂದ್ಯರ್‌ನ ಇನಕೇಡೆಥು ಯೆಹೂದ್ಯಕಾಹೇತೆ ಇವ್ಣುನಾಸ್ ಕಾಹೆತೆ ವಿಶ್ವಾಸ್‌ಕರವಾಳ ಹರೇಕ್‌ನಬಿ ಆ ಸುವಾರ್ತೆ ರಕ್ಷಣೆನ ಉಬ್‍ಜಾ಼ವನಿ ದೇವ್ನಿ ಶಕತ್‍ಹುಯಿರ‍್ಹೀಸ್.
ROM 1:17 ಕಿಮ್‌ಕತೊ ದೇವ್ ಸುವಾರ್ತೆಥಿ ಅದ್ಮಿವೋನ ಇನಭಣಿ ಅಛ಼್ಛುಹುವಾನಿಘೊಣಿ ಕರಸ್. ಅಥ್ರಾನು ಸಂಬಂದ ಶುರುವಾತ್‍ಥು ಖ್ಹರ್ತಿಲಗೂಬಿ ವಿಶ್ವಾಸ್‌ನಪರ್‌ ಭೀರೆಸ್. “ಅಮ್‌ ನೀತಿವಾಳೊ ವಿಶ್ವಾಸ್‌ಥೀಸ್ ಜಿವ್‌ಶೆ” ಕರಿ ಪವಿತ್ರಪುಸ್ತಕ್ಮ ಲಿಖೈರ‍್ಹುಸ್.
ROM 1:18 ಖರಾಬ್ ಚಾ಼ಲ್‌ಥಿ ಖ್ಹಾಚ಼ನ ಲಪಾಡವಾಳು ಹುಯಿರ‍್ಹುತೆ ಅದ್ಮಿವೋನು ಅಖ್ಖಿಥರಾನು ಭಕ್ತಿಕೊಂತೆ ಅಜು಼ ಪಾಪ್ನುಚಾ಼ಲ್ನ ಉಪ್ಪರ್ ದೇವ್ನು ಇರಾದೊ ಪರ್‌ಲೋಕ್‌ಥು ಉತ್ರಿನ್‍ ಆವಸ್.
ROM 1:19 ಶನಖ್ಹಾಜೆಕತೊ ದೇವ್ನಿಬಾರೇಮ ಇವ್ಣುನ ಬರೋಬರ್‌ಥಿ ಮಾಲುಮ್ ಹುಯಿರ‍್ಹುಸ್, ಯೊ ಇವ್ಣುನ ದೇವ್ನೆಸ್ ವತಾಳ್ಯೊ.
ROM 1:20 ಕಿಮ್‌ಕತೊ ಡೋಳಾಮ ದೆಖಾವಕೊಂತೆ ಇನಿ ಚಾ಼ಲ್‍ಚ಼ಲಣ್‍ಅಖ್ಖು ಕತೊ ಇನಿ ಕದೇಬಿ ರ‍್ಹವಾನಿ ಶಕತ್‌ಬಿ, ದೇವ್ನಿಸ್ವಭಾವ್‍ಬಿ, ಜಗತ್‌ ಉಬ್‌ಜಾ಼ಯೋತೆ ಧರೀನ್ ಇನೆ ಕರ‍್ಯೊತೆ ಉಬ್‍ಜಾ಼ವ್ಣಿಥಿ ಯೋ ಮಾಲುಮ್‍ಪಡಸ್. ಅಮ್‍ ರ‍್ಹವಾಪರ್ ಇವ್ಣೆ ಖಿವು ಭಾಣುಬಿ ಬೋಲಾನ ಕೊಉಷೇನಿ.
ROM 1:21 ಶನಕತೊ ಇವ್ಣೆ ದೇವ್ನ ಮಾಲುಮ್ ಕರಿರಾಖ್ಯುತೋಬಿ ಇನ ದೇವ್‌ಕರಿ ಖ್ಹರಾಯುಕೊಯ್ನಿ ಇನಿ ಮದತ್‍ನ ಯಾದ್‌ಕರಿನ್ ಧನ್ಯವಾದ್ ಕರ‍್ಯುಕೊಯ್ನಿ. ಇನ ಬದಲ್ ಇವ್ಣ ಕೊಂತೆಕಾಮ್ಮ ಮಘನ್ ಹುಯಿಗು. ಅಕ್ಕಲ್‌ಕೊಂತೆ ಇವ್ಣೊ ದಿಲ್‌ ಅಂಧಾರೇಥಿ ಭರೈರ‍್ಹುಸ್.
ROM 1:22 ಇವ್ಣೆಸ್ ಗ್ಯಾನಿಕರಿ ಬೋಲಿಲಿನ್ ಇವ್ಣೆ ಬಿಣ್‍ಅಕ್ಲಿನು ಹುಯಿರ‍್ಹುಸ್.
ROM 1:23 ಮಟಾಕೊಂತೆ ದೇವ್ನಿ ಮಹಿಮೆನ ಇವ್ಣೆ ನಾಶ್ ಹುಯಿಜಾ಼ಯಿತೆ ಅದ್ಮಿ, ಜಾನ್ವರ್‌, ಜಿನಾವರ್‌, ಖ್ಹವ್‍ಳಾತೆ ಕೀಡ್‌ಕಮ್ಟಾನ ಮೂರತ್ನ ಪೂಜ಼ಕರಲಗ್ಯು.
ROM 1:24 ಇನಖ್ಹಾಜೆ ಅದ್ಮಿವೋನ ದಿಲ್ನಿ ಲಾಲಚ್‌ನಿಘೊಣಿ ಚಾ಼ಲಿಲಿನ್ ಇವ್ಣ ಇವ್ಣ ಶರೀರ್‌ನ ಇವ್ಣಮಹಿ ಖ್ಹರಮ್‌ ಕಡೈಲ್ಯವಾದೆಕರಿ ದೇವ್ನೆ ಇವ್ಣುನ ಕಚಿಂಡ್‌ ಚಾ಼ಲ್‌ಮ ಮ್ಹೇಲಿದಿದೊ.
ROM 1:25 ಇವ್ಣೆ ದೇವ್ನು ಖ್ಹಾಚ಼ನ ಝೂ಼ಟುಕರಿ ಬದಲೈಲೀನ್, ಉಬ್‌ಜಾ಼ಯೋತೆ ದೇವ್ನ ಆರಾದನೆ ಕರ‍್ಯುಕೊಂತೆ ಉಬ್‍ಜ್ಯುಹುಯ ರಾಛಾ಼ನಸ್ ಆರಾದನೆ ಕರ‍್ಯು. ಅಖ್ಖ ಹಗಾಮ್ಮ ಉಬ್‍ಜಾ಼ಯೊತೆ ದೇವ್ನಾಸ್ ಹಮೇಶ ಸ್ತುತಿ ಹುವಾದೆ, ಆಮೆನ್.
ROM 1:26 ಇವ್ಣೆ ಅಥ್ರಾನು ಕರ‍್ಯುತೆ ಇನಖ್ಹಾಜೆ ದೇವ್ ಇವ್ಣುನ ರ‍್ಹೇವ್ಣುತೆ ಶರೀರ್‌ನು ಪರಕ್ನು ಸುಖಭೋಗ್‍ನ ಮ್ಹೆಂದಿನ್ ನಾಕರ‍್ನುತೆ ಶರೀರ್‌ನು ಪರಕ್ನು ಸುಖಭೋಗ್‍ನ ಕರಾನ ಮ್ಹೇಲ್ಯೊ.
ROM 1:27 ಇಮ್ಮಸ್ ಪರ್ಖ್ಹೊ ಮ್ಹಾಮುಲಿನು ತಯೇಡಾನಿ ಶರೀರಿಕ್‍ ಭೋಗ್‌ನ ಮ್ಹೇಲಿನ್ ಇವ್ಣ ಇವ್ಣಾಮಸ್ ಖ್ಹರಮ್‌ಕೊಂತೆ ಕಾಮ್ ಕರಾಥಿ ಇವ್ಣುನ ಮಳ್‌ಣುತೆ ನಿಶತ್‍ನ ಲೀಲಿದು.
ROM 1:28 ಶನಖ್ಹಾಜೆಕತೊ ಯೊ ಅದ್ಮಿಖ್ಹಾರು ದೇವ್ನಿ ಗ್ಯಾನ್ನ ಝಿಟ್ಕಾರ‍್ಯುತೆ ಇನಖ್ಹಾಜೆ ಇವ್ಣುನ ಪಾಪ್ನುಕಾಮ್‍ ಕರಾನ ಮ್ಹೆಲಿದಿದೊ.
ROM 1:29 ಇವ್ಣೆ ಅಖ್ಖಿಥರಾನು ಖರಾಬ್‍ಫನೈಮ ಭರೈರ‍್ಹವಾಳು ಹುಯಿರ‍್ಹುಸ್, ಶೈತಾನ್ನಿಬುದ್ಧಿ, ಪೈಶಾನಿಲಾಲಚ್, ಪೇಟ್ನೊಬಳಾಪೊ, ಭೋಕಾನು, ಝ಼ಗ್‍ಡೊ, ಠಗಾವನು, ಕೇಡ್‍ಕರಾನು, ಅಜು಼ ಚಾ಼ಡಿಬೋಲವಾಳು,
ROM 1:30 ಏಕ್ನಪರ್‌ ಏಕ್‍ ಖರಾಬ್ ಬೋಲವಾಳು ದೇವ್ನವಹೇರ್ ಕರವಾಳುಬಿ, ಖ್ಹರಮ್‍ಕಡಾವಾಳೂಬಿ ಹಂಕಾರ್‌ವಾಳೂಬಿ, ಗಬ್ಬರ್‌ಕರವಾಳು ಅಜು಼ ಬಡೈಮಾರವಾಳೂಬಿ, ಇವ್ಣೆ ಕದೇಬಿ ಖರಾಬ್ ಕಾಮ್ ಕರಾನಸ್‍ ಸೋಚವಾಳು, ಆಯಾಬಾನಿ ವಾತೆನ ನಾ ಖ್ಹಮ್‍ಜಾ಼ವಾಳೂಬಿ,
ROM 1:31 ಬಿಣ್‍ಸೋಚ್‍ವಾಳೂಬಿ, ವಾತ್ನ ಛು಼ಕಿಜಾ಼ಯಿತೆ, ಇವ್ಣೆ ಬಿಜೇಕ್ನ, ಗೋರ್‌ನಾರ‍್ಹವಾಳುಬಿ ಹುಯು.
ROM 1:32 ಅಥ್ರಾನುಖ್ಹಾರು ಚ಼ಲಾವವಾಳು ಮರಣ್‍ಮ ಭಾಗ್‌ಲ್ಯಾವಾಳು ಕರಿ ಬೋಲಾನು ದೇವ್ನಿ ನಿಯಮ್‌ ಹುಯಿರ‍್ಹಿಶೆಕರಿ ಮಾಲುಮ್ ಥೂ. ಕತೋಬಿ ಖ್ಹಮ್‍ಜೀನ್‍ಬಿ ಇವ್ಣು ಇವ್ಣೇಸ್ ಯೋ ಅಖ್ಖಾ ಕಾಮ್ನ ಕರವಾಳು ನಾ ಹುಯಿನ್, ಇಮ್‌ ಕರವಾಳನ ಭಾಲ್ ದ್ಯವಾಳು ಹುಯಿರ‍್ಹೂಸ್.
ROM 2:1 ಇನಖ್ಹಾಜೆ ‘ಬಿಜ಼ ಅದ್ಮಿನಿ ಬಾರೇಮ ತೀರ್ಪ್‌ ಕರಾವಾಳೊ ಮಾರೊ ದೋಸ್ತಿ, ತೂ ಕೋಣ್‌ರ‍್ಹಿಯೋತೊಬಿ ತುನ ಇನೇಥಿ ಕ್ಷಮಾಕೊಯ್ನಿ. ಶನಕತೊ ಬಿಜೇಕ್‍ಜ಼ಣಾನು ಗಲತ್ನ ಢೂಂಡಾವಾಳೊ ಹುಯಿರೋತೆ ತೂ, ಇವ್ಣೆ ಕರಾತೆ ಇನಾಸ್ ತೂಬಿ ಕರಸ್. ಇನಖ್ಹಾಜೆ ತಾರುತೂಸ್ ಅಪರಾದಿ ಕರಿ ಸಾಬಿತ್ ಕರಿಲೇಸ್.
ROM 2:2 ಅಪರಾದ್ನ ಕರಾವಾಳಾನಿ ಬಾರೇಮ ದೇವ್ ಕರಾನು ತೀರ್ಪ್ ಖ್ಹಾಚನ ಲೀನಸ್ ರ‍್ಹೇಸ್‍ಕರಿ ಅಪ್ಣುನ ಮಾಲುಮ್ ಛಾ಼.
ROM 2:3 ಕತೋಬಿ ಅಲಾ ಮಾರೊ ದೋಸ್ತಿ, ಎಥ್ರಾನುಖ್ಹಾರು ಚ಼ಲಾವವಾಳಾನ ಉಪ್ಪರ್ ನ್ಯಾವ್ನುತೀರ್ಪ್‌ ಕರಾತೆ ತೂ ದೇವ್ನ ತೀರ್ಪ್‌ಥಿ ಬಚಿಗಯೊಕರಿ ಸೋಚಸ್ಕಿ ಶು?
ROM 2:4 ಇನಿ ಘಣಿ ದಯಾಬಿ, ಖ್ಹಮಾಳಿಲ್ಯವಾನು ಅಜು಼ ಹಮೇಶಾನಿ ಶಾಂತಿ ಅನಖ್ಹಾರು ತೂ ಝಿಟ್ಕಾರಸ್ಕಿ ಶು? ದೇವ್ನಿ ಅಛ್ಛಿಗುಣ್‍ ತುನ ದಿಲ್‌ ಫರೈಲ್ಯಾವಭಣಿ ಚ಼ಲಾವ್‍ಶೆಕರಿ ಬೋಲಾನು ತುನ ಮಾಲುಮ್ ಕೊಯ್ನಿಕಿ ಶು?
ROM 2:5 ಕತೋಬಿ ತಾರೊ ದಿಲ್‌ ಮೊಂಡ್‍ಬಿ ಕಠಣ್ ಹುಯಿರುಸ್. ಇನಖ್ಹಾಜೆ ತುಮೆ ದೇವ್ನೊ ಇರಾದೊ ಅಜು಼ ನೀತಿಥಿರ‍್ಹವಾನು ನ್ಯಾವ್ನುತೀರ್ಪ್‌ನ ದನ್ಮ ತುಮೂನ ಉಷೇತೆ ನಿಶತ್ನ ಅಜೂ಼ಬಿ ಜ಼ಮಕರ್ತೊಹುಯಿನ್ ವಳೇಜಾ಼ಸ್.
ROM 2:6 ಶನಕತೊ ದೇವ್ ಹರೇಕ್ ಜ಼ಣಾನಾಬಿ ಇವ್ಣ ಇವ್ಣ ಕಾಮ್ನ ದೇವ್ಣುತೆ ಇನಾಮ್ ದಿಶೆ.
ROM 2:7 ಥೋಡುಜ಼ಣು ಅಛ್ಛಾ಼ನ ಕರ್ತುಹುಯಿನ್. ಮಹಿಮೆ, ಇಜ಼್ಜತ್‌, ಹಮೇಶನಜಾನ್ನ ಜಿವ್ಣನ ಢೂಂಡಸ್. ಇವ್ಣುನ ದೇವ್ ಹರ್‌ಹಮೇಶಾನಿ ಜಿ಼ಂದ್‌ಗಿ ದಿಶೆ.
ROM 2:8 ಕತೋಬಿ ಉಭ್‌ರ‍್ಯುತೆ ಅದ್ಮಿಖ್ಹಾರು ಶೊಂತ್‍ ಅಖ್ಹ್‌ಕರವಾಳು ಖ್ಹಾಚ಼ನಲೀನ್ ಚಾ಼ಲಾನು ಮ್ಹೇಲಿನ್ ಠಗಾವ್ಣಿನ ಲೀನ್ ಚಾ಼ಲಸ್ಕಿ ಇವ್ಣಪರ್ ದೇವ್‌ನೊ ಇರಾದೋಬಿ ಚ಼ಂಢಾಳ್‍ಬಿ ರಂಚ಼್‌ಶೆ.
ROM 2:9 ಪಹಿಲೆ ಯೆಹೂದ್ಯರ್‌ನ ಇನಪಾಛಾ಼ಳ್ ಯೆಹೂದ್ಯಕಾಹೇತೆ ಇವ್ಣುನ ಖರಾಬ್‌ಥಿ ಚಾ಼ಲವಾಳ ಹರೇಕ್‌ಜ಼ಣಾನ ಉಪ್ಪರ್‌ ವದೇಖ್ಹ್‌ಬಿ, ಲತಾಡಾಬಿ ಆವ್‌ಶೆ.
ROM 2:10 ಕತೋಬಿ ಅಛ್ಛಿ ವಾಟ್‌ಪರ್ ಚಾ಼ಲವಾಳ ಅಖ್ಖಾಮ ಪಹಿಲೆ ಯೆಹೂದ್ಯರ್‌ನ ಇನಕೇಡೆಥು ಯೆಹೂದ್ಯಕಾಹೇತೆ ಇವ್ಣುನ ದೇವ್ ಮಹಿಮೆ ಮರ್ಯಾದಿ ಅಜು಼ ಸಮಾಧಾನ್ನ ದಿಶೆ.
ROM 2:11 ಶನಕತೊ ದೇವ್, ಬೇದ್‌ಭಾವ್‌ ಕರಾಕೊಯ್ನಿ. ದೇವ್ ಹರೇಕ್‍ಜ಼ಣಾನ ಎಕ್ಕಸ್ ಆಳ್ತಿಮ ತೀರ್ಪ್ ದೇಸ್.
ROM 2:12 ಯೆಹೂದ್ಯರ್‌ಕಾಹೆತೆ ಇವ್ಣೆ ಮೋಶೇನು ಧರ್ಮಶಾಸ್ತ್ರ ನಾರ‍್ಹೀನ್ ಪಾಪ್‍ಕರ‍್ಯುತೊ ಧರ್ಮಶಾಸ್ತ್ರ ನಾರ‍್ಹೀನಸ್ ನಾಶ್ ಹುಯಿಜಾ಼ಶೆ; ಅಜು಼ ಯೆಹೂದ್ಯರ್‌ನ ಧರ್ಮಶಾಸ್ತ್ರ ಛಾ಼, ಇವ್ಣೆ ಇನ ಮಹಿರ‍್ಹೀನ್ ಪಾಪ್‍ಕರ‍್ಯುತೊ ಧರ್ಮಶಾಸ್ತ್ರಥಿ ತೀರ್ಮಾನ್ ಲಿಶೆ.
ROM 2:13 ಕೋಣ್‌ಬಿ ಖಲಿ ಧರ್ಮಶಾಸ್ತ್ರ ಖ್ಹಮ್‌ಜ್ಯುತೊ ದೇವ್ನಖ್ಹಾಮ್ಣೆ ನೀತಿವಾಳು ಉಶೆಕೊಯ್ನಿ. ಕತೋಬಿ ಧರ್ಮಶಾಸ್ತ್ರ ಬೋಲಾತೆ ಹರೇಕ್ನ ಪಾಡಿಚಾ಼ಲವಾಳುಸ್ ನೀತಿವಾಳುಕರಿ ಚೂ಼ಣೈಜಾ಼ಶೆ.
ROM 2:14 ಯೆಹೂದ್ಯರ್‌ಕಾಹೆತೆ ಇವ್ಣುನ ಧರ್ಮಶಾಸ್ತ್ರ ಕೊಯ್ನಿ ಕತೋಬಿ ಇವ್ಣೆ ಶಾತ್‌ ಕರಸ್ಕಿ ಯೋಅಖ್ಖು ಧರ್ಮಶಾಸ್ತ್ರನಿಮತ್ ರ‍್ಹೇಸ್. ಇವ್ಣುನ ಧರ್ಮಶಾಸ್ತ್ರ ನಾ ರ‍್ಹಯುತೋಬಿ ಇವ್ಣುನ ಇವ್ಣೇಸ್ ಧರ್ಮಶಾಸ್ತ್ರ ಹುಯಿರ‍್ಹೂಸ್.
ROM 2:15 ಇವ್ಣಿ ಚಾ಼ಲ್‍ಚ಼ಲಣಸ್ ಇವ್ಣ ದಿಲ್ಮ ಧರ್ಮಶಾಸ್ತ್ರನಿ ಹುಕಮ್‍ಅಖ್ಖು ಲೀಖೈರ‍್ಹುಸ್‍ಕರಿ ವತಾಳಿದೇಸ್. ಇವ್ಣಿ ದಿಲ್ನಿಸಾಕ್ಷಿಬಿ ಆಹೈರುತೆ ಖ್ಹಾಚು಼ಕರಿ ವತಾಳಿದೇಸ್. ಶನಖ್ಹಾಜೆಕತೊ ಏಕೇಕ್‍ಹಲ್ಲ ಇವ್ಣಿ ಸೋಚ್‍ಅಖ್ಖು ಇವ್ಣೇಸ್ ಗಲ್ತಿವಾಳಕರಿ ವತಾಳಿದೇಸ್. ಅಜು಼ ಏಕೇಕ್‍ಹಲ್ಲ ಇವ್ಣುನ ಬರೋಬರ್‌ಬಿ ಕರಸ್.
ROM 2:16 ಇನಖ್ಹಾಜೆ ಮೇ ಬೋಲುತೆ ಸುವಾರ್ತೆನಿಘೋಣಿ ಯೋ ದನ್ಮ ಅಮ್ಮಸ್ ದೇವ್ ಯೇಸುಕ್ರಿಸ್ತಥಿ ಅಖ್ಖಾಮ ಗಪ್ಲಥ್ಥಿ ರ‍್ಹೇಯ್ತೆ ಸೋಚ್ನ ತೀರ್ಪ್‌ ಕರ್ಶೆ.
ROM 2:17 ಕತೋಬಿ ತೂ ಯೆಹೂದ್ಯಕರಿ ಬೋಲೈಲ್ಯಾವಾಳ ಧರ್ಮಶಾಸ್ತ್ರನಸ್ ಆಧಾರ್ ಕರಿರಾಖ್ಯೊಸ್, ತೂ ದೇವ್ನಿಬಾರೇಮ ಬಡೈಮಾರಿಲೇಸ್.
ROM 2:18 ಧರ್ಮಶಾಸ್ತ್ರಥಿ ಉಪದೇಶ್‌ನ ಲೀನ್‌, ಇನಿ ಖ್ಹೂಜ್‌ನ ಕರಿರಾಖವಾಳೊಬಿ, ಆಹೈರುತೆ ಬರೋಬರ್‌ನು ಯೋ ಬರೋಬರ್‌ನು ಕಾಹೆಕರಿಬಿ ತರೀಪ್‌ಶ ಕರಾವಾಳೊ ಹುಯಿರೊಸ್.
ROM 2:19 ಕಾಣಾನ ತೂ ಏಕ್‍ ಮಾರಗ್ ವತಾಳವಾಳೊ ಹುಯಿರೊಸ್‍ ಅಜು಼ ಅಂಧಾರಮ ರ‍್ಹವಾಳನ ಉಜಾ಼ಳು ಹುಯಿರೊಸ್ ಕರಿ ತುನ ಮಾಲುಮಸ್ ಛಾ಼.
ROM 2:20 ಶಾತ್ಬಿ ಮಾಲುಮ್‍ಕೊಂತೆ ಇವ್ಣುನ ಗುರುಹುಯಿನ್‍ಬಿ, ಧರ್ಮಶಾಸ್ತ್ರನಿ ಬಾರೇಮ ರ‍್ಹೇಸ್ತೆ ಅಖ್ಖಿ ಗ್ಯಾನ್ ಅಜು಼ ಖ್ಹಾಚು಼ ತುನ ಮಾಲುಮ್ ಛಾ಼.
ROM 2:21 ಅಲಕ್‍ ಅದ್ಮಿವೋನ ಉಪದೇಶ್ ಕರಾವಾಳೊ ತೂ, ತಾರುತೂಸ್ ಶನ ಕೊ ಶಿಕಾನಿ? ಚೋ಼ರ್ ನಾಕರ‍್ನುಕರಿ ಬೋಧನೆ ಕರಾವಾಳೊ ತೂಸ್ ಚೋ಼ರ್ ಕರಸ್‍ಕಿಶು?
ROM 2:22 ತೂ ವ್ಯಬಿಚಾರ್ ನಾಕರ‍್ನುಕರಿ ಬೋಲವಾಳೊ ತೂಸ್ ವ್ಯಬಿಚಾರ್ ಕರಸ್‍ಕಿಶು? ಮೂರತ್‍ಅಖ್ಖಾನ ವಿರೋದ್ ಕರಾವಾಳೊ ತೂ ಮಂದಿರ್‌ನಾಸ್ ಲೂಟಿ ಕರಾಸ್ಕಿಶು?
ROM 2:23 ಧರ್ಮಶಾಸ್ತ್ರನಿ ಬಾರೇಮ ಬಡೈಮಾರಿಲ್ಯವಾಳೊ ತೂ ಯೋ ನಿಯಮ್ನ ತೋಡಿನ್ ದೇವ್ನ ಖ್ಹರಮ್‌ ಕಾಡಸ್‍ಕಿಶು?
ROM 2:24 “ಯೆಹೂದ್ಯವಾಳ ತುಮಾರ ಖ್ಹಾಜೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ನ ಬೀಚ್ಮ ದೇವ್ನು ನಾಮ್ ದೂಷಣೆ ಹೂಕರಸ್” ಕರಿ ಪವಿತ್ರದಪ್ತರ್‌ಮ ಲೀಖೈರ‍್ಹುಸ್.
ROM 2:25 ತೂ ಧರ್ಮಶಾಸ್ತ್ರನ ವಿಧೇಯ ಹುಯಿನ್ ಚಾ಼ಲ್ಯೊತೊ ತುನೆ ಕರೈರಾಖ್ಯೊತೆ ಖ್ಹತ್ನನ ಫಾಯಿದೊ ಹುಯಿರ‍್ಹಿಶೆ; ಕತೋಬಿ ತೂ ಧರ್ಮಶಾಸ್ತ್ರ ಮೀರಿನ್ ಚಾ಼ಲವಾಳೊ ರ‍್ಹಯೋತೊ, ತುನ ಖ್ಹತ್ನ ಹುಯಿರ‍್ಹುತೋಬಿ ಹುಯುಕೊಂತೆ ತಿಮ್ ಹುವಾಸ್.
ROM 2:26 ಖ್ಹತ್ನ ನಾಕರೈರಾಖವಾಳೊ ಧರ್ಮಶಾಸ್ತ್ರನಿ ನಿಯಮ್‌ನಿ ಪರಕ್ಮ ಚಾ಼ಲ್ಯೊತೊ ಖ್ಹತ್ನವಾಳೊ ನಾರ‍್ಹಯೊತೋಬಿ, ಖ್ಹತ್ನ ರ‍್ಹಾವಾಳನಿತರ ಗಣ್ತಿಮ ರ‍್ಹೀಶ್‍ಕೊಯ್ನಿಕಿಶು?
ROM 2:27 ತುಮೆ ಖ್ಹತ್ನಕರೈರಾಖ್ಯಸ್; ಲೀಖೈಹುಯು ಧರ್ಮಶಾಸ್ತ್ರನಬಿ ರಾಖಿಮ್ಹೇಲ್ಯಸ್ ತೋಬಿ ಇನ ಮೀರಿನ್ ಚಾ಼ಲಸ್. ಅಮ್‌ರ‍್ಹೀನ್, ಶರೀರ್‌ಥಿ ಖ್ಹತ್ನ ನಾಕರಾಯುತೋಬಿ ಮ್ಹಾಮೂಲಿಥಿ ಧರ್ಮಶಾಸ್ತ್ರನ ಪಾಡಿಚಾ಼ಲವಾಳು ಖ್ಹತ್ನಕರೈರಾಖ್ಯತೆ ತುಮೂನ ತೀರ್ಪ್‌ ದಿಶೆ.
ROM 2:28 ಭಾರ್‌ ಖಲಿ ಯೆಹೂದ್ಯಹುಯಿರ‍್ಹವಾಳೊ ಯೆಹೂದ್ಯಕಾಹೆ; ಅಜು಼ ಭಾರ್‌ ಶರೀರ್‌ಮ ಖಲಿ ಕರಿರಾಖ್ಯುತೆ ಖ್ಹತ್ನ ಖ್ಹಾಚು಼ ಖ್ಹತ್ನಕಾಹೆ.
ROM 2:29 ಕತೋಬಿ ದಿಲ್ನಮಹಿ ಯೆಹೂದ್ಯ ಹುಯಿರ‍್ಹಾವಾಳೋಸ್ ಖ್ಹಾಚೊ಼ ಯೆಹೂದ್ಯ; ಇಮ್ಮಸ್ ದೇವ್ನಆತ್ಮನ ಕಾಮ್‍ಥಿಹುವಾನು ಖ್ಹತ್ನ ದಿಲ್ಮ ಹುವಾಸ್. ಯೋ ಖಲಿ ನಿಯಮ್‌ನಿ ಲೀಖಾಪಟ್ ಹುಯಿರ‍್ಹುಕೊಯ್ನಿ. ದೇವ್‍ಥೀಸ್‍ ಆವಾನು ಹುಯಿರ‍್ಹುಸ್ ಪಣ್ಕಿ ಎಥ್ರಾನವಾಳನ ಖ್ಹರಾವ್ಣಿ, ಅದ್ಮಿಥಿ ಆವಾನು ಕಾಹೆ.
ROM 3:1 ಇಮ್‌ರ‍್ಹಯುತೊ ಯೆಹೂದ್ಯರ್‌ಹುಯಿನ್ ಯೆಹೂದ್ಯರ್‌ಕಾಹೆತೆ ಅವ್ಣೇಥಿ ವಿಶೇಷ್ ಶಾತ್? ನತರ್ ಖ್ಹತ್ನ ಕರೈಲ್ಯವಾಥಿ ಹುಯುತೆ ಫಾಯಿದೊ ಶಾತ್?
ROM 3:2 ಖ್ಹಾರಿ ಬಾರೇಮ ಬೋಲಾನುಬಿ ಘಣು ಫಾಯಿದೊ ಛಾ಼. ಪಹಿಲೆಥು ದೇವ್ನಿ ವಚನ್‍ ಯೆಹೂದ್ಯರ್‌ನ ದೆವೈರ‍್ಹೀಸ್.
ROM 3:3 ಕತೋಬಿ ಇವ್ಣಾಮ ಥೋಡಜ಼ಣಾನೆ ವಿಶ್ವಾಸ್‌ ಕರ‍್ಯುನಾಕರ‍್ಯುತೋಬಿ ಶಾತ್? ದೇವ್ ಬಿಣ್‌ ವಿಶ್ವಾಸ್‌ವಾಳೊಕಿ ಶು?
ROM 3:4 ಕದೇಬಿ ಕೊಯ್ನಿ. ಅದ್ಮಿಖ್ಹಾರು ಝೂ಼ಟು ರ‍್ಹಯುತೋಬಿ, ದೇವ್ ಎಕ್ಕಸ್ ಜ಼ಣೊ ಖ್ಹಾಚೊ಼. ಪವಿತ್ರ ದಪ್ತರ್‌ಮ ಅಮ್‍ ಲೀಖೈರುಸ್ಕಿ, “ತೂ ತಾರಿ ವಾತೇವ್‍ಮಾಸ್ ನೀತಿವಾಳೊಕರಿ ತೀರ್ಮಾನ್‌ ಹೋಣು. ಹೊಜ಼್ಜತ್‌ ಭಿಡಾನಿವಖ್ಹ್‌ತೆ ತೂ ಜೂತ್‌ನು” ಕರಿ ಲೀಖೈರ‍್ಹುಸ್.
ROM 3:5 ಕತೋಬಿ ಅಪ್ಣಿ ಅನೀತಿಥಿ ದೇವ್ನು ಕಾಮ್‍ಅಖ್ಖು ನೀತಿಪರ್ ಭಿಯುಸ್‍ಕರಿ ದೆಖಾವಸ್ ಕರಿ ಬೋಲಿಲಿಯೇಕಿ ಶು? ದೇವ್ ಅಪ್ಣುನ ನಿಶತ್ ದಿದೊತೊ ಇನೆ ಅಪ್ಣುನ ಠಗಾಯೊ ಕರಿ ಬೋಲೆಜಾ಼ಯ್‍ಕಿ ಶು? ಅನ ಮೇ ಅದ್ಮಿನಿ ಪರಕ್ಮ ಬೋಲು ಕರುಸ್ತೆ.
ROM 3:6 ದೇವ್ ನ್ಯಾವ್‍ಕರಾವಾಳೊ ನಾ ರ‍್ಹಯೊಹೋತ್ತೊ ಯೋ ಜಗತ್ನ ತೀರ್ಪ್‌ಕರಾನು ತೋಬಿ ಕಿಮ್‍ ಉಶೆ?
ROM 3:7 ಮಾರಿ ಝೂ಼ಟಿಥಿ ದೇವ್ನು ಖ್ಹಾಚಿನ ಉಪ್ಪರ್ ಪಾಡೀನ್ ಇನಿ ಮಹಿಮೆನ ವತಾಳನು ಉಶೇತೊ ಮನ ಪಾಪಿಕರಿ ಕಿಮ್ ತೀರ್ಪ್‌ಹುಯಿಶ್?
ROM 3:8 ಅಮ್ ರ‍್ಹವಾಪರ್ ಅಛ಼್ಛುಕರಿ ದೆಖಾವನು ರ‍್ಹಿಯುತೊ ಅಪ್ಣೆ ಖರಾಬ್‍ನಾ ಕರೇಜಾ಼ಯ್‍ಕರಿ ಶನ ನಾಬೋಲ್ನು. ಇನಖ್ಹಾಜೆ ಥೋಡುಜ಼ಣು ಮನ ದೂಷಣೆ ಕರೀನ್ ಮಾರಪರ್ ಕೈಏಕ್ ವಾತೆ ಬೋಲ್ತುಹುಯಿನ್ ಝಿಟ್ಕಾರುಕರಾಸ್. ಎಥ್ರಾನವಾಳನ ನಿಶತ್‌ ಹುವಾನು ನ್ಯಾವಸ್‌.
ROM 3:9 ಇಮ್‍ಕತೊ ಶಾತ್? ಅಪ್ಣೆ ಯೆಹೂದ್ಯಕಾಹೇತೆ ಇವ್ಣೆಥಿಬಿ ಊಚಾ಼ಕಿ ಶು? ಕದೇಬಿ ಕೊಯ್ನಿನಿ! ಮೇ ತದೇಸ್‌ ಯೆಹೂದ್ಯರ್‌ರ‍್ಹವೊ ಯೆಹೂದ್ಯಕಾಹೆತೆ ರ‍್ಹವೊ ಖ್ಹಾರೂಸ್ ಪಾಪ್ನ ಮಹಿರ‍್ಹಾವಳು ಕರಿ ಮೇ ಪಹಿಲೇಸ್ ದೆಖಾಡಿರಾಖ್ಯೋಸ್.
ROM 3:10 “ಪವಿತ್ರ ದಪ್ತರ್‌ಮ ಲೀಖೈರ‍್ಹೂತೆ ತಿಮ್; ಕೋಣ್‌ಬಿ ನೀತಿವಾಳು ಕೊಯ್ನಿ, ಏಕ್‍ ಜ಼ಣೂಬಿ ಕೊಯ್ನಿ.
ROM 3:11 ಅಕ್ಲಿ ಏಕ್‍ ಜ಼ಣೂಬಿ ಕೊಯ್ನಿ. ದೇವ್ನ ಢೂಂಡಾವಾಳೊ ಏಕ್‌ಬಿ ಕೊಯ್ನಿ.
ROM 3:12 ಖ್ಹಾರುಸ್ಜ಼ಣು ದೇವ್‍ಥಿ ದೂರ್ ಜೈ಼ರ‍್ಹೂಸ್‍, ಖ್ಹಾರೂಸ್ ಫಾಯಿದೊಕೊಂತೆ ಹುಯಿರ‍್ಹೂಸ್. ಅಛ್ಛು಼ ಕರಾವಾಳೊ ಕೋಣ್‌ಬಿ ಕೊಯ್ನಿ, ಏಕ್‍ ಜ಼ಣೂಬಿ ಕೊಯ್ನಿ,
ROM 3:13 ಇವ್ಣೊ ನ್ಹೇಟೊಸ್ ನಿಕ್‍ಳಿರ‍್ಹುತೆ ಮಖ್ಹಾಣ್ಯು ಹುಯಿರ‍್ಹುಸ್. ಇವ್ಣೆ ಝೂ಼ಟು ಜಿಭಾನ್‌ವಾಳು ಹುಯಿರ‍್ಹುಸ್. ಇವ್ಣ ಹೋಟ್‌ನ ಪೀಠೆ ಖ್ಹಾಪ್‍ನೊ ಝಾರ್‌ ಛಾ಼
ROM 3:14 “ಇವ್ಣ ಮ್ಹೋಡಾಮ ಶಾಪ್ನ ಶಬರ್‌, ಭರೈರ‍್ಹುಸ್.
ROM 3:15 “ಇವ್ಣ ಗೋಡ ಲ್ಹೋಯಿನ ಕಾಡಾನ ಖದ್‍ಬದುಕರಸ್.
ROM 3:16 ಇವ್ಣೆ ಜಾ಼ಸ್ತೆ ಹಿಜ್ಜಾ಼, ಖ್ಹತಾಪ್ಣಿಬಿ ನಾಶ್‍ಬಿ ರ‍್ಹಿಶೆ.
ROM 3:17 ಇವ್ಣೆ ಶಾಂತಿನೊ ಮಾರಗ್‌ನಸ್ ಮಾಲುಮ್ ಕರ‍್ಯುಕೊಯ್ನಿ,
ROM 3:18 ಇವ್ಣ ದಿಲ್‌ಮ ದೇವ್‌ನೊ ಧಡುಕೊಸ್ ಕೊಯ್ನಿ.”
ROM 3:19 ಧರ್ಮಶಾಸ್ತ್ರ ಶಾತಸ್ ಬೋಲ್ಯುತೋಬಿ ಧರ್ಮಶಾಸ್ತ್ರನ ಮಹಿರ‍್ಹಾವಾಳನಸ್ ಸಂಬಂದ್‍ಪಡಸ್‍ಕರಿ ಅಪ್ಣುನ ಮಾಲುಮ್‌ಛಾ಼. ಅಮ್ ಖ್ಹಾರಾಸ್‍ನು ಮ್ಹೋಡು ಖ್ಹೊಪೊ ಹುಯಿಜಾ಼ಶೆ. ಅಜು಼ ಜಗತ್‍ಖ್ಹಾರು ದೇವ್ನ ನ್ಯಾವ್‍ನತೀರ್ಪ್‌ನ ದನ್ಮ ಗಣ್ತಿದೆವ್ಣು ಪಡ್‌ಶೆ.
ROM 3:20 ಶನಕತೊ ಖಿವು ಅದ್ಮಿ ರ‍್ಹಿಯೊತೋಬಿ ದೇವ್ನಿ ನಿಯಮ್ಮ ಧರ್ಮಶಾಸ್ತ್ರನ ಪಾಡಿಚ಼ಲಾಥಿ ನೀತಿವಾಳೊಕರಿ ಹುವಾನ ಕಿನೇಥೀಬಿ ಉಶೆಕೊಯ್ನಿ. ಧರ್ಮಶಾಸ್ತ್ರ ಅಪ್ಣಿ ಪಾಪ್ನಖಲಿ ವತಾಳಸ್‍ ಎತ್ರೇಸ್.
ROM 3:21 ಕತೋಬಿ ಹಮ್ಕೆ ದೇವ್ ಧರ್ಮಶಾಸ್ತ್ರನಿ ಮದತ್‌ಕೊಂತೇಸ್ ಅದ್ಮಿವ್‍ನ ನೀತಿವಾಳೊ ಕರಿಬಣಾವನ ಮಾರಗ್‌ನ ವತಾಳಿರಾಖ್ಯೊಸ್. ಕತೋಬಿ ಆಹೈರುತೆ ಧರ್ಮಶಾಸ್ತ್ರ ಅಜು಼ ಪ್ರವಾದಿ ಖ್ಹಾರು ಆ ನವಮಾರಗ್‍ನಿ ಬಾರೇಮ ಅಪ್ಣುನ ಬೋಲಿರಾಖ್ಯೊಸ್.
ROM 3:22 ಯೇಸುಕ್ರಿಸ್ತಮ ವಿಶ್ವಾಸ್‍ಕರಾವಾಳಥಿಸ್‌ ವಿಶ್ವಾಸಿಖ್ಹಾರವ್ನ ದೇವ್ನಿ ನೀತಿ ಆವ್‌ಶೆ. ಅನಾಮ ಖೆವುಬಿ ಅಶಿಲ್ ಕಮ್‌ಶಿಲ್ ಕೊಯ್ನಿ.
ROM 3:23 ಶನಕತೊ ಖ್ಹಾರುಸ್‌ಜ಼ಣು ಪಾಪ್‍ಕರೀನ್ ದೇವ್ನಿ ಮಹಿಮೆಥಿ ದೂರ್‌ಹುಯಿಗು.
ROM 3:24 ಕತೋಬಿ ದೇವ್ನು ಫುಗಟ್ ವಾರ್‌ಖ್ಹೇಥಿ ಇವ್ಣುನ ಛುಟ್ಕಾರ್ ದ್ಯವಾವಾಳೊ ಯೇಸುಕ್ರಿಸ್ತಥಿ ನೀತಿವಾಳುಕರಿ ತೀರ್ಪ್‍ಹುವಸ್.
ROM 3:25 ಇನೆ ರಂಚ್ಯೊತೆ ಇನ ಲ್ಹೋಯಿಥಿ ಇನ ಉಪ್ಪರ್ ಭರೋಖ್ಹೊ ರಾಖವಾಳ ಹರೇಕ್ನ ಪಾಪ್‌ ಪರಿಹಾರ್ ಹೋಣುಕರಿ ಇನಾಸ್ ಸಮರ್ಪಣ್‌ ಕರಿಲಿದೊ. ಪಾಛ಼್‌ಲ್ಯ ಹಗಾಮ್ಮ ಅದ್ಮಿವೋನೆ ಕರ‍್ಯುತೆ ಪಾಪ್ನ ಬರೋಬರ್‌ನಿ ನಿಶತ್‍ ದಿದೊಕೊಂತೆ ದೇವ್ನೆ ಖ್ಹಮಾಳಿಲಿನ್ ಚಾ಼ಲ್ಯೊ.
ROM 3:26 ಅಮ್ನಿಪರಕ್ಮ ದೇವ್ ಮೇ ನೀತಿವಾಳೊಕರಿ ವತಾಳಿಲೇಸ್.ಅಜು಼ ಯೋ ಯೇಸುನ ವಿಶ್ವಾಸ್‍ಕರಾವಾಳ ಹರೇಕ್ನ ನೀತಿವಾಳಕರಿ ಬಣಾವಸ್.
ROM 3:27 ಅಮ್‌ರ‍್ಹಾವಪರ್‌ ಅಪ್ಣಿ ಬಾರೇಮ ಬಡೈಮಾರಿಲ್ಯವಾನ ಶನುಬಿ ಮೋಕ ಛಾ಼ಕಿಶು? ಕೊಯ್ನಿ. ಅಪ್ಣೆ ಧರ್ಮಶಾಸ್ತ್ರನ ಪಾಡಿ ಚಾ಼ಲಿಯೇಸ್‍ಕಿ ಶು! ಶನ? ಅಪ್ಣೆ ಶನ ವಿಶ್ವಾಸ್‌ ಕರ್‌ಯೇಸ್‌ಕಿ ಯೊ ಅಪ್ಣುನ ಊಚು಼ ಕರಾನಖ್ಹಾಜೆ ಮೋಕ ದೇಸ್.
ROM 3:28 ಧರ್ಮಶಾಸ್ತ್ರ ಬೋಲಾತೆ ಕಾಮ್‍ಥಿ ಕಾಹೆ ಪಣ್ಕಿ, ಖಲಿ ವಿಶ್ವಾಸ್‍ಥಿಸ್ ಖಿವೂಬಿ ಅದ್ಮಿ ನೀತಿವಾಳೊಕರಿ ಗಣ್ತಿಮ ಆವಸ್.
ROM 3:29 ದೇವ್ ಯೆಹೂದ್ಯರ್‌ನ ಖಲಿ ದೇವ್‍ಕಿಶು? ಯೋ ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ದೇವ್‍ಹುಯಿರ‍್ಹೇಸ್‍ ಕೊಯ್ನಿಕಿಶು? ಒಹೊ, ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ದೇವ್ ಹುಯಿರ‍್ಹೋಸ್.
ROM 3:30 ದೇವ್ನೆ ಖ್ಹತ್ನವಾಳಾನ ನೀತಿವಾಳುಕರಿ ತೀರ್ಪ್‌ಕರಾನ ಇವ್ಣಿ ವಿಶ್ವಾಸಸ್ ಆಧಾರ್. ಇಮ್ಮಸ್ ಖ್ಹತ್ನಕೊಂತೆ ಇವ್ಣುನ ತೀರ್ಪ್‌ಕರಾನಾಬಿ ವಿಶ್ವಾಸಸ್ ಕಾರಣ್ ಹುಯಿರುಸ್.
ROM 3:31 ಇಮ್‍ಕತೊ, ಅಪ್ಣೆ ವಿಶ್ವಾಸ್‍ಥಿ ಧರ್ಮಶಾಸ್ತ್ರನ ಬಿಣ್‍ ಮತ್ಲಬ್‌ನು ಬಣೈನಾಖೆಸ್‍ಕಿಶು? ಕದೇಬಿ ಕೊಯ್ನಿ. ಅಪ್ಣೆ ಧರ್ಮಶಾಸ್ತ್ರನ ಖಲಿ ಪಾಡಿಧರಿಯೇಸ್.
ROM 4:1 ಇಮ್‍ಕತೊ ಅಗ್ಲಿ ಪಿಳ್‌ಗಿವಾಳಾನ ಅಪ್ಣುನ ಗುರುಗುರಬ್‌ಲ್ಯೊ ಅಬ್ರಹಾಮ್‌ನೆ ಅನಿ ಬಾರೇಮ ಶಾತ್‍ಲೀಲಿದೊಕರಿ ಅಪ್ಣೆ ಬೋಲಿಯೆ?
ROM 4:2 ಅಬ್ರಹಾಮ್ ಇನ ಅಛ಼್ಛಕಾಮ್‌ಥಿ ನೀತಿವಾಳೊಕರಿ ತೀರ್ಪ್‌ಲ್ಯವಾಳೊ ಹುಯಿರೊಹೊತ್ತೊ ಖ್ಹರಾವ್ಣಿ ಕರೈಲ್ಯಾವಾನ ಇನ ಮೋಕ ರ‍್ಹಿಯುಹೊತ್. ಕತೋಬಿ ದೇವ್ನ ಖ್ಹಾಮ್ಣೆ ಕಾಹೆ,
ROM 4:3 “ಧರ್ಮಶಾಸ್ತ್ರ ಅಮ್‍ಬೋಲಾಸ್, ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್‍ ಕರ‍್ಯೊ; ಯೋ ವಿಶ್ವಾಸ್‌ ಇನಿ ಗಣ್ತಿಮ ನೀತಿಕರಿ ಗಣ್ತಿ ಹುಯೊ”.
ROM 4:4 ಕಾಮ್‍ಕರಾವಾಳನ ಮಳಾತೆ ಮಜ಼್‌ದೂರಿ ಕೃಪೆಥಿ ಕಾಹೆ. ಯೋ ಇನ ಮಳ್ನುಥೂತೇಸ್ ಕರಿ ಗಣ್ತಿ ಹುವಾಸ್.
ROM 4:5 ಕತೋಬಿ ಏಕ್‌ ಜ಼ಣೊ ಇನು ಶೊಂತ್ ಕಾಮ್ನ ಉಪ್ಪರ್ ವಿಶ್ವಾಸ್ ಕರಾನು ಮ್ಹೇಲಿನ್, ಗಲ್ತಿವಾಳಾನ ನೀತಿವಾಳೊಕರಿ ಕರಾವಾಳ ದೇವ್ನ ಉಪ್ಪರ್ ಇನಿ ವಿಶ್ವಾಸ್ ಕರಾನುರ‍್ಹಿಯುತೊ ಆ ಇನೊ ಭರೋಖ್ಹೊ ಇನ ನೀತಿವಾಳೊಕರಿ ಗಣ್ತಿಕರಸ್‍.
ROM 4:6 ದೇವ್ ಕಿನು ಅಛ್ಛು಼ ಕಾಮ್ನ ದೇಖಸ್ ಕೊಯ್ನಿತೆ ನೀತಿವಾಳೊ ಕರಿ ಗಣ್ತಿ ಕರಸ್ಕಿ ಯೋಸ್ ಧನ್ಯಕರಿ, ದಾವೀದಜಿನು ಅಮ್‍ ಬೋಲಸ್. ಕಿಮ್‌ಕತೊ,
ROM 4:7 “ಕಿನು ಗಲತ್‍ಖ್ಹಾರು ಪರಿಹಾರ್ ಹುಯಿರ‍್ಹುಸ್ಕಿ, ಕಿನು ಪಾಪ್‌ಖ್ಹಾರು ಕ್ಷಮಾಪಣ್ ಹುಯಿರ‍್ಹುಸ್ಕಿ ಯೋಸ್ ಧನ್ಯ ಹುಯಿರ‍್ಹೋಸ್.
ROM 4:8 ಪ್ರಭು ಕಿನ ಪಾಪ್‍ನ ಗಣ್ತಿಮ ಲೇಯ್‍ಕೊಯ್ನಿಕಿ ಯೋ ಅದ್ಮಿ ಖ್ಹಾಚ಼ಮಸ್ ಧನ್ಯ!”
ROM 4:9 ಯೋ ಆಶೀರ್ವಾದ್‍ನಿ ವಚನ್‍ ಖಲಿ ಖ್ಹತ್ನ ಹುಯಿರ‍್ಹವಾಳನಕೀ ನತರ್ ಖ್ಹತ್ನ ಕರೈರಾಖಕೊಂತೆ ಇವ್ಣುನಾಬಿ ಛಾ಼ಕಿ ಶು? ಶನಖ್ಹಾಜೆಕತೊ ಪವಿತ್ರ ದಪ್ತರ್‌ಮ ಅಮ್‍ ಬೋಲೈರ‍್ಹುಸ್, “ಅಬ್ರಹಾಮ್‌ ಇನಿ ವಿಶ್ವಾಸ್‌ಥೀಸ್ ನೀತಿವಾಳೊಕರಿ ಗಣ್ತಿ ಹುಯೊ”.
ROM 4:10 ಯೋ ಕದೆ ಹುಯುತೆ? ಇನ ಖ್ಹತ್ನ ಹುಯಿಗುತೆ ತದೇಕಿ ಖ್ಹತ್ನಹುವಾನ ಪಹಿಲೆ? ಯೋ ಖ್ಹತ್ನ ಹುಯುತೆ ತದೆಕಾಹೆ, ಖ್ಹತ್ನಹುವಾನ ಅಗಾಡಿಸ್.
ROM 4:11 ಒಹೊ, ಖ್ಹತ್ನಹುವಾನ ಪಹಿಲೇಸ್ ಇನಥೂತೆ ವಿಶ್ವಾಸ್‍ನು ಖ್ಹಣೇದ್ ಹುಯಿನ್, ನೀತಿನು ಮುದ್ರಾನ ಲೀಲಿದೊ. ಅಮ್‍ರ‍್ಹವಾಪರ್ ಯೊ ವಿಶ್ವಾಸ್‍ಕರವಾಳ ಅಖ್ಖಾನಾಬಿ, ಇವ್ಣುನ ಖ್ಹತ್ನ ನಾ ಹುಯುತೋಬಿ ಅಬ್ರಹಾಮ್ ಅಖ್ಖಾಸ್ನ ಆತ್ಮೀಕ ಬಾಹುಯೊ. ಇನಖ್ಹಾಜೆ ಇವ್ಣೆ ನೀತಿವಾಳಕರಿ ಗಣ್ತಿಮಹುಯು.
ROM 4:12 ಎತ್ರೇಸ್ ಕಾಹೆ ಖ್ಹತ್ನ ಹುಯಿರ‍್ಹವಾಳನಾಬಿ ಯೊ ಬಾ ಹುಯಿರೊಸ್, ಇವ್ಣುನಖಲಿ ಖ್ಹತ್ನ ಹುಯಿರ‍್ಹಿತೆ ಇನಖ್ಹಾಜೆ ಕಾಹೆ ಕತೋಬಿ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರ‍್ಹೋತೆ ಅಬ್ರಹಾಮ್‌ನ ಖ್ಹತ್ನಹುವಾನ ಪಹಿಲೆ ಥೂತೆ ವಿಶ್ವಾಸ್‌ನ ಮಾರಗ್‌ಪರ್ ಇವ್ಣೇಬಿ ಚಾ಼ಲಸ್ ಇನಖ್ಹಾಜೆ ಇವ್ಣುನ ಯೊ ಬಾ ಹುಯಿರೊಸ್.
ROM 4:13 ಜಗತ್‍ನಾಸ್ ಹಕ್‍ದಾರ್ ಉಷೆಕರಿ ಬೋಲಾನು ವಾಗ್ದಾನ್ ಅಬ್ರಹಾಮ್ ಧರ್ಮಶಾಸ್ತ್ರನ ಪಾಡಿ ಚಾ಼ಲುಕರ್ತೊಥೋತೆ ಇನಖ್ಹಾಜೆ ಕಾಹೆ. ವಿಶ್ವಾಸ್‍ಥಿ ಆವಾತೆ ನೀತಿಹುಯಿರ‍್ಹಿಸ್.
ROM 4:14 ಶನಕತೊ ಧರ್ಮಶಾಸ್ತ್ರಥಿ ಜಿವವಾಳೂಸ್ ಹಕ್‌ದಾರ್‌ ರ‍್ಹಯೂತೊ, ವಿಶ್ವಾಸ್‌ನ ಮತ್‌ಲಬ್ ಕೊಂನ್ತೆ ಹುಯಿಜಾ಼ಶೆ. ವಾಗ್ದಾನ್ ಬಿಣ್‌ಫಾಯಿದಾನು ಹುಯಿಗು
ROM 4:15 ಶನಕತೊ ಧರ್ಮಶಾಸ್ತ್ರ ಅದ್ಮಿವೋನ ದೇವ್ನ ಇರಾದಮ ನಾಖಸ್‍, ಕತೋಬಿ ಧರ್ಮಶಾಸ್ತ್ರ ನಾ ರ‍್ಹಿಯುಹೊತ್ತೊ ಇನ ವಿಧೇಯ ದ್ಯವಾನುಬಿ ಕೋ ರ‍್ಹಿಯುಹೊತ್ನಿ.
ROM 4:16 ಇನಖ್ಹಾಜೆ ಯೋ ವಾಗ್ದಾನ ವಾರ್‌ಖ್ಹೇಥಿಸ್ ಮಳಸ್. ಆ ವಾಗ್ದಾನ್ ಧರ್ಮಶಾಸ್ತ್ರನ ಆಧಾರ್ ಹುಯಿರ‍್ಹುತೆ ಇವ್ಣುನಾಸ್ ಕಾಹೆತೆ, ಅಬ್ರಹಾಮ್‌ನಬಿ ಇನಿ ಪಿಳ್ಗಿವಾಳಾನ ಫುಗಟ್‍ಥಿ ಮಳಾಸ್ತೆ ವಾಗ್ದಾನಸ್ ಇನಾಮ್ ಹುಯಿರ‍್ಹುಸ್. ಅಮ್‌ ಅವ್ಣೆ ಅಬ್ರಹಾಮ್‌ನಿ ಘೋಣಿ ಭರೋಖ್ಹೊ ಕರ್ಶೆ ಶನಕತೊ ಯೋ ಅಪ್ಣಖ್ಹಾರಸ್‍ನ ಬಾ ಹುಯಿರ‍್ಹೋಸ್.
ROM 4:17 “ಮೇ ತುನ ಕೈಏಕ್‌ ಜ಼ಗ್‌ಜಾ಼ತ್‌ನ ಅದ್ಮಿವೋನ ಬಾಕರಿ ದೀರಾಖ್ಯೊಸ್!” ಕರಿ ಪವಿತ್ರ ದಪ್ತರ್‌ಮ ಲಿಖೈರ‍್ಹುಸ್. ದೇವ್ ಮರಾವಾಳನ ಜಾನ್‌ ದ್ಯವಾಳೋಬಿ, ಕೋರ‍್ಹೆಂತೆ ಇನ ರ‍್ಹವಾನಿತರ ಕರವಾಳೋಬಿ ಹುಯಿರೋತೆ ದೇವ್‌ಮ ಅಬ್ರಹಾಮ್‌ನೆ ವಿಶ್ವಾಸ್‍ಕರ‍್ಯೊ. ಇನಖ್ಹಾಜೆ ಆ ವಾಗ್ದಾನ್ನ ದೇವ್‍ಥೀಸ್‍ ಇನೆ ಲಿದೊ.
ROM 4:18 ಭರೋಖ್ಹೊ ರಾಖಾನ ಶನು ಆಧಾರ್ ನಾರ‍್ಹುಯುತೋಬಿ ಅಬ್ರಹಾಮನೆ ನಂಬ್ಯೊ ಅಜು಼ ಭರೋಖ್ಹೊ ಕರ‍್ಯೊ ಅಮ್ಮಸ್ ಕೈಯೇಕ್‌ ದೇಖ್ಹ್‌ನ ಆತ್ಮೀಕ ಬಾಹುಯೊ. ಪವಿತ್ರ ದಪ್ತರ್‌ಮ ತಾರಿ ಪಿಳ್ಗಿ ಆಬ್‌ನ ಶುಕ್ಕರ್‌ನಿತರ ರ‍್ಹಿಶೆ. ಕರಿ ಪವಿತ್ರ ದಪ್ತರ್‌ಮ ಬೋಲ್ಯುತೆ ತಿಮ್.
ROM 4:19 ಯೋ ತದೇಸ್‌ ಖ್ಹುಮಾರ್ ಖ್ಹೋ ವರಖ್ಹ್‌ನೊ ಹುಯಿರ‍್ಹಿನ್ ಇನು ಶರೀರ್ ತದೇಸ್‌ ಕಮ್ಲಯಿಗೈಥಿ, ಇನಿ ಬಾವಣ್‍ ಸಾರನ ಲಡ್ಕಹುವಾನ ದನ್ ಖ್ಹತಮ್ ಹುಯಿಗುತೋಬಿ, ಯೋ ವಿಶ್ವಾಸ್‌ಮ ಕಮ್‍ಜೋ಼ರಿ ಹುಯೊಕೊಯ್ನಿ.
ROM 4:20 ಇನೆ ದೇವ್ನಿ ವಾಗ್ದಾನ್ ಕರ‍್ಯೊತೆ ಬಾರೇಮ. ಯೋ ಅವಿಶ್ವಾಸ್‌ಥಿ ಗುಮಾನಿ ಕರ‍್ಯೊಕೊಯ್ನಿ. ಯೋ ಹಿಮ್ಮಥ್ಥಿ ಭರೈನ್. ಇನೆ ದೇವ್ನ ಮಹಿಮೆ ಕರ‍್ಯೊ.
ROM 4:21 ಯೋ ವಾಗ್ದಾನ್ನ ಚ಼ಲಾವನ ದೇವ್ ಶಕತ್‌ವಾಳೊ ಹುಯಿರ‍್ಹೋಸ್‍ಕರಿ ಪೂರ ಘಟ್‍ಥಿ ಭೀರವಾಳೊ ಹುಯೊ.
ROM 4:22 ಇನಖ್ಹಾಜೆ ಅಬ್ರಹಾಮ್ ಇನಿ ವಿಶ್ವಾಸ್‌ಥೀಸ್ “ನೀತಿಕರಿ ಗಣ್ತಿ ಹುಯೊ”.
ROM 4:23 ಯೋ ನೀತಿವಾಳೊ ಗಣ್ತಿಹುಯು, ಕರಿ ಬೋಲಾನಿ ವಾತೆಖಲಿ ಇನ ಏಕ್‍ಜ಼ಣಾನ ಖ್ಹಾಜೆಸ್ ಕಾಹೆ.
ROM 4:24 ಹೈರುತೆ ಅಪ್ಣಖ್ಹಾಜೇಬಿ ಕತೊ, ಅಪ್ಣೊ ಪ್ರಭು ಯೇಸುಕ್ರಿಸ್ತನ ಮರ‍್ಯಹುಯಮಾಥು ಉಠಾಡ್ಯೋತೆ ದೇವ್ನ ವಿಶ್ವಾಸ್ ಕರಾವಾಳು ಅಜು಼ ನೀತಿವಾಳ ಕರಿ ಬೋಲೈರ‍್ಹಾತೆ ಅಪ್ಣುನಾಬಿ ಲಿಖೈರ‍್ಹುಸ್.
ROM 4:25 ದೇವ್ ಯೇಸುನ ಅಪ್ಣ ಪಾಪ್ನಖ್ಹಾಜೆ ಮರಣ್ಣ ದೀನಾಖಿನ್ ಅಜು಼ ಅಪ್ಣುನ ನೀತಿವಾಳ ಕರಿ ತಿರ್ಮಾನ್‌ ಹುವಾನಖ್ಹಾಜೆಸ್‌ ಜಾನ್‌ಥಿ ಉಠಾಡೈಗಯೊ.
ROM 5:1 ಅಮ್‌ರ‍್ಹವಾಪರ್ ವಿಶ್ವಾಸ್‍ಥಿ ನೀತಿವಾಳುಕರಿ ತೀರ್ಪ್ ಲೀಲಿದಾತೆ ಅಪ್ಣುನ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ನಿ ಜೋ಼ಡ್ಮ ಸಮಾಧಾನ್‍ ರ‍್ಹೇಸ್.
ROM 5:2 ಇನೆ ಅಪ್ಣುನ ವಿಶ್ವಾಸ್‍ಥಿ ದೇವ್ನಿ ಕೃಪೆನ ಆಖ್ಹ್‌ರಾಮ ಲಾಯೊ. ಹಮ್ಕೆ ಅಪ್ಣೆ ಇನಮಹಿ ಜಿವುಕರಿಯೇಸ್. ಇನಖ್ಹಾಜೆ ದೇವ್ನಿ ಮಹಿಮೆಮ ಅಪ್ಣೆ ಭಾಗ್‍ಹುಯಿರ‍್ಹಾಸ್‍ಕರಿ ನಂಬಿನ್ ಇನಮಹಿ ಅಪ್ಣೆ ಹುಮ್ಮಖ್ಹ್‌ ಲಿಯೇಸ್.
ROM 5:3 ಎತ್ರೇಸ್ ಖಲಿಕಾಹೆ, ಅಪ್ಣುನ ಆವಸ್ತೆ ಖ್ಹತಾಪ್ಣಿಮಾಬಿ ಖುಷಿಥಿ ಛಿಯೆ. ಕತೋಬಿ ಖ್ಹತಾಪ್ಣಿ ಖ್ಹಮಾಳಿ ರ‍್ಹವಾನ ಶಿಕಾಡಸ್‌ಕರಿ ಅಪ್ಣುನ ಮಾಲುಮ್‌ ಛಾ಼.
ROM 5:4 ಖ್ಹಮಾಳಿಲ್ಯವಾನು ಹುಯಿರ‍್ಹುತೆ ಅಪ್ಣುನ ದೇವ್‌ಮ ಘಟ್‍ಥಿ ರ‍್ಹವಾಖ್ಹರ್‌ಕು ಕರಸ್, ಅಜು಼ ದೇವ್‌ಮ ಘಟ್‍ಥಿ ರ‍್ಹಿಯಾತೊ ಅಪ್ಣಾಮ ಭರೋಖ್ಹಾನ ಉಬ್‌ಜಾ಼ವಸ್.
ROM 5:5 ಆ ಭರೋಖ್ಹೊ ಕದೇಬಿ ನಿರಾಶ್‍ ಕೋಕರ್‌ಶೇನಿ, ಶನಕತೊ ದೇವ್ನಿ ಪ್ಯಾರ್‌ ಅಪ್ಣುನ ಇನಿ ವರಹುಯಿರ‍್ಹಿತೆ ಪವಿತ್ರಾತ್ಮಥಿ ಅಪ್ಣ ದಿಲ್ಮ ರಂಚಿರಾಖ್ಯೊಸ್.
ROM 5:6 ಅಪ್ಣೆ ಪಾಪ್‌ಥಿ ಬಿಣ್‍ ಶಕತ್‌ವಾಳ ಹುಯಿರಾತೆ ತದೇಸ್‌ ದೇವ್ನೆ ಚೂ಼ಣಿಲಿದೊತೆ ವೇಳ್ಮ ಕ್ರಿಸ್ತನೆ ಖರಾಬ್ ಅದ್ಮಿವೋನಖ್ಹಾಜೆ ಮರ‍್ಯೊ.
ROM 5:7 ಏಕ್‍ ನೀತಿವಾಳನಖ್ಹಾಜೆ ಜಾನ್‍ದ್ಯವಾನು ಘಣು ಮುಶ್ಕಿಲ್. ಅಛ಼್ಛೊ ಏಕ್‍ಜ಼ಣಾನಖ್ಹಾಜೆ ಜಾನ್‍ದ್ಯವಾನು ಹಿಮ್ಮತ್‍ ಕರ‍್ಯುತೋಬಿ ಕರೆಜಾ಼ಯ್.
ROM 5:8 ಕತೋಬಿ ಅಪ್ಣೆ ಪಾಪಿ ಹುಯಿರ‍್ಹವಾನಿ ವಖ್ಹ್‌ತೇಸ್ ಕ್ರಿಸ್ತನೆ ಅಪ್ಣಖ್ಹಾಜೆ ಮರೀನ್ ದೇವ್ನೆ ಅಪ್ಣಪರ್ ಇನಛಾ಼ತೆ ಪ್ಯಾರ್‌ನ ವತಾಳಿರಾಖ್ಯೊಸ್.
ROM 5:9 ಕ್ರಿಸ್ತನ ಲ್ಹೋಯಿಥಿ ಅಪ್ಣೆ ಹಮ್ಕೆ ದೇವ್ನಿಜೋ಼ಡ್ಮ ನೀತಿವಾಳಕರಿ ಚೂ಼ಣೈರ‍್ಹಾಸ್. ದೇವ್ನ ಚ಼ಂಢಾಳ್‌ಥಿ ಇನಭಣಿಥು ಅಜೂ಼ಬಿ ಕೆತ್ರೆ ಘಣೇಥಿ ಬಚಿಜಾವಾಳ ಹುಯಿರ‍್ಹಿಶು?
ROM 5:10 ಅಪ್ಣೆ ದೇವ್ನ ವಹೇರ‍್ಯ ಹುಯಿರ‍್ಹವಾನಿ ವಖ್ಹ್‌ತೇಸ್. ಅಪ್ಣುನ ಇನ ಛಿಯ್ಯಾನಿ ಮರಣ್‍ಥಿ ಅಪ್ಣುನ ಇನ ದೋಸ್ತಿಖ್ಹಾರ ಕರಿ ಬಣೈರಾಖ್ಯೊಸ್. ಹಮ್ಕೆ ಅಪ್ಣೆ ದೇವ್ನ ದೋಸ್ತಿಹುಯಿರಾತೆ ಇನಖ್ಹಾಜೆ ದೇವ್ ಇನ ಛಿಯ್ಯಾನ ಜಾನ್‌ಥಿ ಅಪ್ಣುನ ಕೆತ್ರೆ ಜಾ಼ಖ್ಹತ್ ರಕ್ಷಣೆ ನಾಮಳ್‍ನು?
ROM 5:11 ಕತೋಬಿ ಅಪ್ಣುನ ದೇವ್ನ ದೋಸ್ತಿ ಹುವಾಖ್ಹರ್ಕು ಕರ‍್ಯೊತೆ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ ಕರ‍್ಯೊತೆ ಕಾಮ್ನಖ್ಹಾಜೆ ಅಪ್ಣೆ ಖುಷಿ ಕರ್ಯೆಸ್.
ROM 5:12 ಇನಖ್ಹಾಜೆ, ಏಕ್‍ಜ಼ಣೇಥಿ ಜಗತ್‌ಮ ಪಾಪ್‍ಆಯು ಅಜು಼ ಯೋಪಾಪ್ ಇನಿಜೋ಼ಡ್ಮ ಮರಣ್ಣಾಬಿ ಲಾಯು. ಅನಖ್ಹಾಜೇಥಿ ಮರಣ್ ಅಖ್ಖಾ ಅದ್ಮಿವೋನ ಉಪ್ಪರ್ ಫೈಲಾಯು ಶನಖ್ಹಾಜೆಕತೊ ಅಖ್ಖುಜ಼ಣು ಪಾಪ್‍ಕರ‍್ಯು.
ROM 5:13 ಧರ್ಮಶಾಸ್ತ್ರ ದೆವವಾನ ಅಗಾಡಿಸ್ ಪಾಪ್ ಜಗತ್‌ಮಾ ಥು. ಕತೋಬಿ ಧರ್ಮಶಾಸ್ತ್ರ ಕೊಯ್ನಿತೆ ತದೆ ಪಾಪ್ ಗಣ್ತಿಮ ಕೋ ಆಯುಹೋತ್ನಿ.
ROM 5:14 ಕತೋಬಿ ಮರಣ್ ಅದಾಮ್‍ಥಿ ಮೋಶೆಲಗು ರಾಜ಼್ ಚ಼ಲವ್‍಼ಕರ್ತುಥು. ಆದಾಮನೆ ಕರ‍್ಯೊತೆ ಅಪರಾದ್‌ನಖ್ಹಾಜೆ ಪಾಪ್‍ಕೊಕರಾಂತೆ ಇವ್ಣ ಉಪ್ಪರ್‌ಬಿ ಯೋ ರಾಜ಼್ ಚ಼ಲವ್‍಼ಕರ್ತುಥು. ಯೊ ಆದಾಮ್ ಅಗಾಡಿ ಆವಾಳೊಥೋತೆ ಏಕ್‍ಜ಼ಣಾನ ಖ್ಹಣೇದ್ ಹುಯಿರ‍್ಹೋಸ್.
ROM 5:15 ಕತೋಬಿ ಬೇಜ಼ಣಾಮ ಫರಕ್ ಛಾ಼. ಶನಕತೊ ದೇವ್ನಿ ಫುಗಟ್ ಇನಾಮ್ ಆದಾಮ್‍ನಿ ಪಾಪ್‍ನಿಘೊಣಿ ಕಾಹೆ. ಆ ಏಕ್‍ಜ಼ಣಾನಿ ಪಾಪ್ನಖ್ಹಾಜೆ ಕೈಯೇಕ್‌ಜ಼ಣು ಮರ‍್ಯುತೆ ಖ್ಹಾಚಿಸ್, ಕತೋಬಿ ದೇವ್ನಿ ವಾರ್‌ಖ್ಹೇಥಿ ಮಳಾತೆ ವರ ಯೇಸುಕ್ರಿಸ್ತ ಕರಿ ಆ ಏಕ್‌ ಜ಼ಣಾನ ಗೋರ್‌ಥಿ ಕೈಏಕ್ ಜ಼ಣಾನ ಮಳಾನುಬಿ ಖ್ಹಾಚಿಸ್.
ROM 5:16 ದೇವ್ನಿ ಇನಾಮ್ ಅಜು಼ ಏಕ್‍ ಅದ್ಮಿನ ಪಾಪ್‌ಮ ಪರಕ್ ಛಾ಼. ಏಕ್‍ಜ಼ಣಾನ ಪಾಪ್ನ ನ್ಯಾವ್‌ನು ತೀರ್ಪ್‌ಹುಯಿನ್ ನಿಶತ್ ಮಳ್ಯು. ಕತೋಬಿ ಕೈಯೇಕ್ ಜ಼ಣಾನ ಪಾಪ್ನಪೀಠೆ ಗಲ್ತಿವಾಳೊ ಕಾಹೆಕರಿ ಬೋಲಾನು ಊಚು಼ ಇನಾಮ್ ಆಯು.
ROM 5:17 ಏಕ್‍ಅದ್ಮಿನೆ ಕರ‍್ಯುತೆ ಅಪರಾದ್‍ಥಿ ಮರಣ್ ರಾಜ಼್ ಚ಼ಲಾಯುಕರಿ ಬೋಲಾನು ಖ್ಹಾಚು಼ಹುಯು. ಕತೋಬಿ ಕಾಮ್ನು ಪ್ರತಿಫಲ್ ಕೆತ್ರೆ ಮಹಾನ್ ಹುಯಿರ‍್ಹುಸ್ ಯೋಸ್‍ಯೇಸು ಕ್ರಿಸ್ತಹುಯಿರ‍್ಹೊಸ್. ದೇವ್ನಿ ಚೆಹೆಳ್ ವಾರ್‌ಖ್ಹಾನಾಬಿ ನೀತಿನಿ ವರನಾಬಿ ಲೀಲ್ಯಾವಾಳ ಖ್ಹಾರಸ್ ಅಜು಼ ಫುಗಟ್‍ಥಿ ನೀತಿವಾಳಕರಿ ಬೋಲೈಲ್ಯವಾಳುಬಿ ಹುಯಿನ್ ಯೇಸುಕ್ರಿಸ್ತಕರಿ ಆ ಏಕ್‍ಜ಼ಣಾನಿ ಜೋ಼ಡ್ಮ ಜಾನ್‌ಭರೈನ್ ರಾಜ಼್‌ಭಾರ್‌ ಕರಾನು ಹುಯು.
ROM 5:18 ಅಮ್‌ರ‍್ಹವಾಪರ್ ಆದಾಮ್‍ನಿ ಏಕ್‌ ಅಪರಾದ್‍ಥಿ ಖ್ಹಾರಾಸ್ ಅದ್ಮಿಪರ್ ಮರಣ್‌ಕರಿ ಅಪರಾದ್ನಿ ತೀರ್ಪ್ ಕಿಮ್‌ನಾಖ್ಯುಕಿ ಇಮ್ಮಸ್ ಕ್ರಿಸ್ತನಿ ಎಕ್ಕಸ್‌ನೀತಿನ ಕಾಮ್‍ಥಿ ಖ್ಹಾರಾಸ್ ಅದ್ಮಿನ ನೀತಿವಾಳುಕರಿ ಛುಟ್ಕಾರ್‌ಹುಯು ಅಜು಼ ಜಾನ್‌ ದೆವಾಯು.
ROM 5:19 ಕಿಮ್ ಏಕ್‌ ಅದ್ಮಿನಿ ಅವಿಧೇಯತೆಥಿ ಕೈಯೇಕ್‌ಜ಼ಣು ಪಾಪಿಕರಿ ಗಣ್ತಿ ಹುಯುಕಿ ತಿಮ್ಮಸ್, ಏಕ್‌ ಅದ್ಮಿನಿ ವಿಧೇಯಾಥಿ ಕೈಯೇಕ್‌ಜ಼ಣು ನೀತಿವಾಳುಕರಿ ಗಣ್ತಿಉಶೆ.
ROM 5:20 ಗಲತ್‌ ಅಖ್ಖು ಜಾ಼ಖ್ಹತ್ ಹೋತುಆಯು ಕಿಮ್ಕಿ ಧರ್ಮಶಾಸ್ತ್ರಬಿ ಇನಜೋ಼ಡೆಸ್‌ ಆಯು. ಕತೋಬಿ ಪಾಪ್ ಜಾ಼ಖ್ಹತ್ ಕಿಮ್‍ಹುಯುಕಿ, ವಾರ್‌ಖ್ಹೊಬಿ ಬಿಜೂ಼ಬಿ ಜಾ಼ಖ್ಹತ್ ಹುಯು.
ROM 5:21 ಕಿಮ್ ಪಾಪ್ ಮರಣ್‍ಥಿ ರಾಜ಼್ ಚ಼ಲಾಯುಕಿ ಇಮ್ಮಸ್ ದೇವ್ನಿ ವಾರ್‌ಖ್ಹೊ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನ ನೀತಿಥಿ ರಾಜ಼್ ಚ಼ಲಾವಸ್.
ROM 6:1 ಇಮ್‍ಕತೊ ಅಪ್ಣೆಶಾತ್ ಬೋಲ್‍ಯೇ? ದೇವ್ನೊ ವಾರ್‌ಖ್ಹೊ ಜಾ಼ಖ್ಹತ್ ಹುವಾದೆಕರಿ ಅಪ್ಣೆ ಪಾಪ್‍ಮಸ್ ಭಡ್‌ಯೆಕಿ ಶು?
ROM 6:2 ಇಮ್‌ ಕದೇಬಿ ನಾ ಹೋಣು. ಅಪ್ಣೆ ಪಾಪ್ನ ಭಾಗ್ನ ಮರಿಗಯ, ಅಪ್ಣೆ ಬಿಜೂ಼ಬಿ ಪಾಪ್‌ಮ ಬಚಾ಼ನು ಕಿಮ್?
ROM 6:3 ನತರ್ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಭಾಗ್‌ ಲೀರಾಖವಾಳ ಹುಯಿನ್ ಬ್ಯಾಪ್ತಿಸ್ಮ ಕರೈಲಿದಾತೆ ಅಪ್ಣೆ ಇನ ಮರಣ್‍ಮ ಬ್ಯಾಪ್ತಿಸ್ಮ ಕರೈರಾಖ್ಯಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು?
ROM 6:4 ಇನಖ್ಹಾಜೆ ಅಪ್ಣಿ ಬ್ಯಾಪ್ತಿಸ್ಮಥಿ ಅಪ್ಣೆ ಇನಿಮರಣ್‍ಮ ಭಾಗ್‌ಲ್ಯವಾಳಹುಯಿರ‍್ಹೀನ್, ಇನಿ ಜೋ಼ಡ್ಮ ಗಡೈಗಯ.ಅಮ್‍ರ‍್ಹವಾಪರ್ ಬಾನಿ ಮಹಿಮೆನಿ ಶಕಥ್ಥಿ ಕ್ರಿಸ್ತ ಮರ‍ಣ್‍ಮಾಥು ಉಠಾಡೈಗಯೋತೆ ತಿಮ್ಮಸ್ ಅಪ್ಣೇಬಿ ಏಕ್‌ ನವ ಜಾನ್‌ಮ ಜಿವವಾಳ ಹುಯಿರ‍್ಹಾಸ್.
ROM 6:5 ಅಜು಼ ಇನಿಮರಣ್‍ಮ ಭಾಗ್‌ಲ್ಯವಾಳಹುಯಿರ‍್ಹಾಸ್. ಇಮ್ನೀಸ್‍ಪರಕ್‍ಮ ಇನಿಜೋ಼ಡ್ಮ ಏಕ್‍ಹುಯಿನ್‍ ಯೋ ಪಾಛು಼ ಜಿವ್ತುಹುಯಿನ್ ಆಯೋತೆ ಇನಮಾಬಿ ಅಪ್ಣೆ ಭಾಗ್‌ಲ್ಯವಾಳ ಹುಯಿರಾಸ್.
ROM 6:6 ಅಪ್ಣು ಜೂ಼ನು ಚಾ಼ಲ್‍ಚ಼ಲಣ್‍ ನಾಶ್ ಹುಯಿಜೈ಼ನ್‌ ಬಿಜು಼ ಅಗಾಡಿ ಅಪ್ಣೆ ಕದೇಬಿ ಪಾಪ್ನ ಗುಲಾಮ್ ನಾ ಹೋಣುಕರಿ ಅಪ್ಣು ಪಾಪ್‌ಥಿ ಮರಿಹುಯು ಶರೀರ್ ಇನಜೋ಼ಡ್ಮ ಶಿಲ್‌ಬೆಪರ್ ಮರೈಗಯುಕರಿ ಅಪ್ಣುನ ಮಾಲುಮ್ ಛಾ಼.
ROM 6:7 ಶನಕತೊ ಕೋಣ್ ಮರಿರ‍್ಹುಸ್ಕಿ ಇವ್ಣೆ ಪಾಪ್‌ಥಿ ಛುಟ್ಕಾರ್‌ ಹುಯಿರೇಸ್.
ROM 6:8 ಅಪ್ಣೆ ಹಮ್ಕೆ ಕ್ರಿಸ್ತನಿ ಜೋ಼ಡ್ಮ ಮರಿರ‍್ಹಾತೊ, ಇನಿ ಜೋ಼ಡ್ಮ ಜಿವ್‍ಶುಕರಿ ವಿಶ್ವಾಸ್ ಕರ್ಯೆಸ್.
ROM 6:9 ಶನಖ್ಹಾಜೆಕತೊ ಕ್ರಿಸ್ತ ಮರಣ್‍ಥಿ ಉಠಾಡೈಗಯೋತೆ ಇನಖ್ಹಾಜೆ ಯೋ ಬಿಜೊ಼ಪಾಛೊ ಮರ್‌ಶೆಕೊಯ್ನಿಕರಿ ಮಾಲುಮ್ ಕರಿರಾಖ್ಯಸ್. ಅನಪಾರ್ ಇನ ಉಪ್ಪರ್ ಮರಣ್ಣ ಶನೂಬಿ ಹಕ್‍ಕೊಯ್ನಿ.
ROM 6:10 ಯೋ ಪಾಪ್ನ ಭಾಗ್ನ ಮರ‍್ಯೋತೆ ಎಕ್ಕಸ್‍ಹಲ್ಲ. ಕತೋಬಿ ಯೋ ಮರ‍್ಯೋತೆ ಖ್ಹಾರಸ್ನ ಖ್ಹಾಜೆ. ಯೋ ದೇವ್ನಿ ಜೋ಼ಡ್ಮ ಏಕ್‍ ಹುಯಿನ್ ಜಿವ್‌ಕರಸ್.
ROM 6:11 ಯೋಸ್‍ಪರಕ್ಮ ತುಮೂಬಿ ಪಾಪ್ನಭಾಗ್‍ನ ಮರ‍್ಯಹುಯಕರಿಬಿ ಕ್ರಿಸ್ತಯೇಸುಥಿ ದೇವ್ನಖ್ಹಾಜೆ ಬಚಾ಼ವಾಳುಕರಿ ಗಣ್ತಿಕರಿಲೆವೊ.
ROM 6:12 ಇನಖ್ಹಾಜೆ ತುಮೆ ಶರೀರ್‌ನ ಖರಾಬ್ ಆಖ್ಹ್‌ಮ ನಾ ಪಡ್‍ನೂತೆ ತುಮಾರ ಮಟಿಜಾ಼ವಾಳ ಶರೀರ‍್ಮ ಪಾಪ್ ಹುಕುಮ್‌ ಚ಼ಲಾವನ ನಕೊಮ್ಹೇಲಿದೆವೊ.
ROM 6:13 ತುಮಾರ ಶರೀರ್‌ನು ಭಾಗ್ನ ನೀಚ್ ಕಾಮ್ನ ಚ಼ಲಾವವಾಳು ಕಫ್ಫನ್ನಿತರ ಪಾಪ್ನ ದಿನಾಖೊನಕೊ, ಕತೋಬಿ ಇನ ಬದಲ್ ಮರಣ್‌ಥು ಜಿವ್ತುಹುಯಿನ್ ತುಮೂನ ದೇವ್ನ ಸಮರ್ಪಣ್‌ ಕರಿನಾಖೊ. ತುಮಾರ ಶರೀರ್‌ನ ಭಾಗ್ನ ನೀತಿನು ಕಫ್ಫನ್ ಹುಯಿರ‍್ಹವಾನಖ್ಹಾಜೆ ದೇವ್ನ ಸಮರ್ಪಣ್‌ ಕರೊ.
ROM 6:14 ಪಾಪ್ ತುಮಾರಪರ್ ಯಜಮಾನ್ ನಾ ಹುಯಿರ‍್ಹೇಣು, ಶನಕತೊ ತುಮೆ ಧರ್ಮಶಾಸ್ತ್ರನಿ ಅಧೀನ್‍ಮ ಕೊಯ್ನಿ, ದೇವ್ನಿ ವಾರ್‌ಖ್ಹಾನಿ ಅಧೀನ್‍ಮ ಹುಯಿರ‍್ಹಾಸ್.
ROM 6:15 ಇಮ್‍ಕತೊ ಶಾತ್? ಅಪ್ಣೆ ಧರ್ಮಶಾಸ್ತ್ರನಿ ಅಧೀನ್‍ ನಾ ರ‍್ಹೇವ್ಣುತೆ ವಾರ್‌ಖ್ಹಾನಿ ಅಧೀನ್ ಹುಯಿರ‍್ಹಿಯೇಸ್‍ಕರಿ ಪಾಪ್ ಕರೇಜಾ಼ಯ್ಕಿ ಶು? ಕೊಯ್ನಿಕತೊ,
ROM 6:16 ತುಮೆ ತುಮುನಾಸ್ ಗುಲಾಮ್‌ಹುಯಿನ್ ಕಿನಾತೋಬಿ ದೆವೈಜಾ಼ವಾನಿ ವಖ್ಹತ್‌ಮ ತುಮೆ ಯಜಮಾನ್ನ ವಿಧೇಯ ಹುಯಿರ‍್ಹವಾಳ ಸೇವಕ್ ಹುಯಿರ‍್ಹೆಸ್‍ಕರಿ ತುಮೂನ ಮಾಲುಮ್‌ ಛಾ಼. ಪಾಪ್‌ಮ ಪಡ್ಯುತೊ ಮರಣಸ್ ಫಲ್,ದೇವ್ನ ಭರೋಖ್ಹಾನ ದಾಸಹುಯಾತೊ ನೀತಿ ಮಳ್‍ಶೆ.
ROM 6:17 ಕತೋಬಿ ದೇವ್ನ ಧನ್ಯವಾದ್‌ಹುವಾದೆ! ಶನಕತೊ ತುಮೆ ಏಕ್‌ ವಖ್ಹತ್‌ಮ ಪಾಪ್ನ ಗುಲಾಮ್ ಹುಯಿರ‍್ಹತೋಬಿ, ತುಮೆ ಶಿಕಿಲಿದಾತೆ ಖ್ಹಾಚಿ ಬೋಧನೆಮ ಭರ್‌ಪೂರ್‌ ಮನ್‌ಥಿ ವಿಧೇಯ ಹುಯಿರ‍್ಹಾಸ್.
ROM 6:18 ತುಮೆ ಪಾಪ್‌ಥಿ ಛುಟ್ಕಾರ್ ಲ್ಯವಾಳಹುಯಿನ್ ನೀತಿನ ಗುಲಾಮ್‌ ಹುಯಿರ‍್ಹಾಸ್.
ROM 6:19 ತುಮೆ ಶರೀರ‍್ನಿ ಖ್ಹಯಾಲ್ಮ ಕಮ್‍ಜೋ಼ರ್ ಹುಯಿರಾತೆ ಇನಖ್ಹಾಜೆ ಮೇ ದನ್‌ಪರೋಜ಼್‌ನಿ ವಾತ್ನಿತರಸ್‍ ಬೋಲುಕರುಸ್. ತುಮಾರ ಶರೀರ್‌ನು ತನ್‍ಬದನ್ನ ಮೈಲಾನಾಬಿ, ಖರಾಬ್‌ನಾಬಿ ಗುಲಾಮ್‍ಕರೀನ್ ದಿನಾಖಿದಿದಾಥಾಕಿ. ಇಮ್ನಿಸ್ ಪರಕ್ಮ ಹಮ್ಕೆ ತುಮೆ ತುಮಾರ ಶರೀರ್‌ನು ತನ್‍ಬದನ್ನ ಪರಿಶುದ್‌ರ‍್ಹವಾನಿ ನೀತಿನ ಗುಲಾಮ್‌ ಬಣೈನ್ ದಿನಾಖಿದೆವೊ.
ROM 6:20 ತುಮೆ ಪಾಪ್ನ ಗುಲಾಮ್ ಹುಯಿರ‍್ಹಾಥಾತೆ ತದೆ ನೀತಿನ ಅಧೀನ್‍ಮ ಕೋಥಾನಿ.
ROM 6:21 ತುಮೆ ಖರಾಬ್ ಕಾಮ್‍ಕರ‍್ಯ, ಹಮ್ಕೆ ತುಮೆ ಯೋ ಕಾಮ್ನಿಬಾರೇಮ ಖ್ಹರ್‌ಮಾವಸ್ನಿ? ಯೋ ಕಾಮ್‍ಥಿ ತುಮೂನ ಮರಣಸ್ ಹುಯಿರ‍್ಹುಸ್.
ROM 6:22 ಕತೋಬಿ ಹಮ್ಕೆ ತುಮೆ ಪಾಪ್‌ಥಿ ಛುಟ್ಕಾರ್ ಲ್ಯವಾಳಹುಯಿನ್, ದೇವ್ನ ಗುಲಾಮ್‌ ಹುಯಿರಾಸ್. ತುಮೂನ ಮಳಾನು ಫಾಯಿದೊ ಪರಿಶುದ್ ಭಣಿ ಲೀಜಾ಼ಸ್ ಇನು ಫಲ್ ಹಮೇಶಾನಿ ಜಿ಼ಂದ್‌ಗಿ ಹುಯಿರ‍್ಹುಸ್.
ROM 6:23 ಶನಕತೊ ಪಾಪ್ ದೇಯಿತೆ ಮಜ಼್‌ದೂರಿ ಮರಣ್ ಹುಯಿರುಸ್. ಕತೋಬಿ ದೇವ್ನು ಫುಗಟ್ ಇನಾಮ್ ಅಪ್ಣೊ ಪ್ರಭು ಕ್ರಿಸ್ತಯೇಸುನ ಗಳ್‌ಜೋ಼ಡ್ಮ ಅಪ್ಣುನ ದಿಶೇತೆ ಹಮೇಶಾನಿ ಜಿ಼ಂದ್‌ಗೀಸ್.
ROM 7:1 ಭೈಯೇ ಭೇನೇವೊ, ಧರ್ಮಶಾಸ್ತ್ರನ ಮಾಲುಮ್ ಕರಿರಾಖವಾಳನ ಮೇ ಶಾತ್ ಬೋಲಸ್‍ಕತೊ, ಏಕ್‍ಅದ್ಮಿ ಬಚಿರ‍್ಹಾವಲಗು ಖಲಿ ಧರ್ಮಶಾಸ್ತ್ರ ಇನ ಉಪ್ಪರ್ ಅದಿಕಾರ್ ಕರಸ್‍ಕರಿ ತುಮೂನ ಮಾಲುಮ್ ಛಾ಼.
ROM 7:2 ಉದಾಹರಣೆ ಏಕ್‌ ವ್ಹೆತ್ತಿ ತಯೇಡ ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹ್‌ತೆ ಧರ್ಮಶಾಸ್ತ್ರನಿ ಪರಕ್ಮ ಇನ ಜೋ಼ಡ್ಮ ಬಂಧಣ್‍ಮರ‍್ಹೇಸ್. ಕತೋಬಿ ಬಾವ್ರಿ ಮರಿಗೋತೊ ಇನ ಜೋ಼ಡೆ ಭಂದೈರ‍್ಹೀತೆ ಧರ್ಮಶಾಸ್ತ್ರನಿ ಬಂಧಣ್‍ಥಿ ಛುಟ್ಕಾರ್ ಲೀರಾಖವಾಳಿ ಹುಯಿರ‍್ಹೇಸ್.
ROM 7:3 ಅಮ್‍ರ‍್ಹವಾಪರ್, ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹತ್‌ಮ ಯೋ ತಯೇಡ ಬಿಜೇಕ್ ಜ಼ಣಾನಿ ಜೋ಼ಡ್ಮ ಸಂಬಂದ್ ರ‍್ಹಯೂತೊ ವ್ಯಬಿಚಾರಿಣಿಕರಿ ಬೋಲೈಜಾ಼ಸ್. ಕತೋಬಿ ಬಾವ್ರಿ ಮರಿಗಯುತೊ ಯೋ ತಯೇಡ ಯೊ ನಿಯಮ್‌ಥಿ ಛುಟ್ಕಾರ್ ಹುಯಿತೆ ಇನಖ್ಹಾಜೆ, ಯೋ ಬಿಜೇಕ್ ಜ಼ಣಾನಿ ಜೋ಼ಡೆ ವ್ಯಹಾಕರಿ ಲಿದಿತೋಬಿ ವ್ಯಬಿಚಾರಿಣಿಕರಿ ಗಣ್ತಿ ಹುವಾಕೊಯ್ನಿ.
ROM 7:4 ಇನಖ್ಹಾಜೆ ಮಾರ ಭೈಯೇ ಭೇನೇವೊ,ಧರ್ಮಶಾಸ್ತ್ರನಿ ಬಾರೇಮ ಬೋಲ್ನುಕತೊ ತುಮೇಬಿ ಕ್ರಿಸ್ತಾನು ಶರೀರ್‌ಮ ಭಾಗ್‌ ಹುಯಿರ‍್ಹಾಸ್ತೆಖ್ಹಾಜೆ ತುಮೇಬಿ ಮರಿರ‍್ಹಾಸ್ ಅಜು಼ ಹಮ್ಕೆ ಮರ‍್ಯಹುಯಮಾಥು ಜಿವ್ತೊಹುಯಿನ್ ಉಠ್ಯೊತೆ ಇನ ಮಳ್ಯಹುಯ ಹುಯಿರಾಸ್. ಅಮ್ ಅಪ್ಣೆ ದೇವ್ನಿ ಸೇವೆಮ ಫಾಯಿದೊ ಹುಯೆಜಾ಼ಯ್‌.
ROM 7:5 ಅಪ್ಣೆ ಅದ್ಮಿನಿ ಖೂಜ಼್‌ಮ ಜಿವ್‍ಕರ್ತಥಾತೆ ತದೆ, ಪಾಪ್‌ಥಿ ಭರೈಹುಯು ಖರಾಬ್ ಆಖ್ಹ್‌ಖ್ಹಾರು ಅಪ್ಣ ಶರೀರ್‌ಮ ಕಾಮ್ ಕರುಕರ್ತುಥು. ಯೊ ಧರ್ಮಶಾಸ್ತ್ರನ ಖ್ಹೂಜ಼್‌ಥೀಸ್ ಹೋತುಥು. ಇನಖ್ಹಾಜೆ ಅಪ್ಣೆ ಕರಾನು ಫಲ್ ಮರಣ್ ಹುಯಿರ‍್ಹುಸ್.
ROM 7:6 ಹಮ್ಕೆತೋಬಿ ಅಪ್ಣುನ ಬಂಧೈರುಥುತೆ ಧರ್ಮಶಾಸ್ತ್ರನ ಭಾಗ್‌ಮ ಮರ‍್ಯಹುಯ ಹುಯಿನ್, ಯೊ ಧರ್ಮಶಾಸ್ತ್ರಥಿ ಛುಟ್ಕಾರ್ ಲೀರಾಖ್ಯಸ್. ಅಮ್ ಲೀಖೈರ‍್ಹೂತೆ ಫಾಚ಼್‌ಲಿ ನಿಯಮ್‌ನಿ ಪರಕ್ಮ ಅಪ್ಣೆ ದೇವ್ನ ಸೇವೆ ಕರ‍್ಯಕೊಂತೆ, ಪವಿತ್ರಾತ್ಮಥಿ ನವಿ ಪರಕ್ಮ ಚಾ಼ಲವಾಳ ಹುಯಿರ‍್ಹಾಸ್.
ROM 7:7 ಇಮ್‍ಕತೊ ಅಪ್ಣೆಶಾತ್ ಬೋಲಿಯೆ ಪಾಪ್ ಧರ್ಮಶಾಸ್ತ್ರಸ್ ಹುಯಿರ‍್ಹೂಸ್ಕಿಶು? ಕದೇಬಿ ಕೊಯ್ನಿ. ಕತೋಬಿ ಧರ್ಮಶಾಸ್ತ್ರನ ಮ್ಹೇಲಿನ್ ಬಿಜ಼ ಖೆವೆಥೀಬಿ ಪಾಪ್‍ಕತೊ ಶಾತ್‌ಕರಿ ಮನ ಖ್ಹಮ್‍ಜಿಲ್ಯವಾನ ಹುಯುಹೋತ್ ಕೊಯ್ನಿ. “ಬಿಜೇಕ್ ಜ಼ಣಾನ ರಾಛ಼ನ ತುಮೆ ಆಖ್ಹ್‌ನಾಕರ‍್ನು.” ಕರಿ ಧರ್ಮಶಾಸ್ತ್ರ ಬೋಲ್ಯುತೆ ಇನಖ್ಹಾಜೇಸ್ ಯೋ ಮನ ಮಾಲುಮ್‌ಪಡ್ಯು.
ROM 7:8 ಕತೋಬಿ ಪಾಪ್ ಆ ಹುಕುಮ್‍ನಾಸ್‍ ಪಾಡಿಲೀನ್ ಮಾರಾಮ ಖ್ಹಾರಿಸ್ ಥರಾನು ಆಖ್ಹ್‌ನ ಲಾಯು. ಶನಕತೊ ಧರ್ಮಶಾಸ್ತ್ರ ಕೊಂತೆ ಪಾಪ್ ಮರ‍್ಯುಹುಯು ಹುಯಿರ‍್ಹೇಸ್.
ROM 7:9 ಏಕ್‍ ವಖ್ಹತ್ ಮೇ ಧರ್ಮಶಾಸ್ತ್ರ ಕೊಂತೆ ಜಿವ್‌ಕರ್ತೊಥೊ. ಕತೋಬಿ ಕೆದೆ ನಿಯಮ್‌ ಕರಿ ಬೋಲಾನು ಆಯುಕಿತದೆ ಪಾಪ್ ಜೂತುಹುಯು.
ROM 7:10 ಅಜು಼ ಮೇ ಮರಿಗಯೊ. ಜಾನ್‌ಲೀನ್ ಆವಾನ ದೆವೈಗೈತೆ ಹುಕುಮಸ್ ಮಾರಿ ಬಾರೇಮ ಮರಣ್ಣ ಲೀನ್ ಆಯು.
ROM 7:11 ಪಾಪ್ನ ಅವಕಾಶ್ ಮಳ್ಯು ಅಜು಼ ಯೊ ಹುಕುಮ್‌ನ ಪಾಡಿಲೀನ್ ಮನ ಠಗೈನ್, ಅಜು಼ ಮನ ಮರ್‌ನಾಖ್ಯು.
ROM 7:12 ಅಮ್‍ರ‍್ಹವಾಪರ್, ಧರ್ಮಶಾಸ್ತ್ರ ಪರಿಶುದ್ ಹುಯಿರ‍್ಹೂಸ್, ಹುಕುಮ್‌ಬಿ, ಪರಿಶುದ್‌ಬಿ, ನ್ಯಾವ್‍ಬಿ, ಅಛ಼್ಛುಬಿ ಹುಯಿರ‍್ಹೂಸ್.
ROM 7:13 ಇಮ್‍ಕತೊ ಅಛ಼್ಛುಸ್ ಮನ ಮರಣ್‌ಲಾಯುಕಿಶು? ಇಮ್ ನಾರ‍್ಹಯುತೊ! ಪಾಪಸ್ ಯೊ ಕರ‍್ಯು ಅಛ಼್ಛಥೀಸ್ ಮನ ಉಪಯೋಗ್ ಕರೀನ್ ಪಾಪ್ನೆ ಮರಣ್ ಆವಾನಿತರ ಕರ‍್ಯು. ಅನೇಥಿ ಪಾಪ್ ಇನು ಖ್ಹಾಚು಼ ಸ್ವಭಾವ್‌ನ ವತಾಳ್ಯು ಇನಖ್ಹಾಜೆ ಹುಕುಮ್‌ಥಿ ಪಾಪ್ ಯೋ ಕೆತ್ರೆ ಕಠೋರ್‌ಕರಿ ಮಾಲುಮ್‌ ಪಡಾಸ್‌.
ROM 7:14 ಧರ್ಮಶಾಸ್ತ್ರ ಆತ್ಮೀಕ್ ಹುಯಿರ‍್ಹುಸ್‌ಕರಿ ಮಾಲುಮ್ ಛಾ಼. ಕತೋಬಿ ಅದಮ್‍ಜ಼ಮಾನೊ ಹುಯಿರೋತೆ ಮೇ ಪಾಪ್ನ ಗುಲಾಮ್ನಿತರ ವೇಚೈ಼ಜಾ಼ವಾಳೊ ಹುಯಿರ‍್ಹೋಸ್.
ROM 7:15 ಮೇ ಶಾತ್‍ಕರೂಸ್‍ ಕರಿ ಬೋಲಾನು ಮಾಲುಮ್‌ಕೊಂತೆ ಹುಯಿರ‍್ಹೋಸ್. ಶನಕತೊ ಮೇ ಶಾತ್ ಕರ್ನುಕರಿ ಆಖ್ಹ್‌ಕರೂಸ್ಕಿ ಇನ ಕರುಕೊಯ್ನಿ, ಕೆವ್ಹಾನ ವಹೇರ್‌ಕರುಸ್ಕಿ ಇನಾಸ್ ಕರಾವಾಳೊ ಹುಯಿರ‍್ಹೋಸ್.
ROM 7:16 ಮೇ ಕರಾನ ಆಖ್ಹ್ ಕರುಕೊಂತೆ ತಿನ ಕರಾವಾಳೊರ‍್ಹಯೋತೊ, ಧರ್ಮಶಾಸ್ತ್ರ ಅಛ್ಛು಼ಕರಿ ವತಾಳಸ್‍.
ROM 7:17 ಅಮ್‍ರ‍್ಹವಾಪರ್ ಮೇ ಆಖ್ಹ್ ಕರುಕೊಂತೆ ತಿನ ಕರಾವಾಳೊ ಬಿಜು಼ ಮೇಕಾಹೆ, ಮಾರಾಮ ರ‍್ಹೇಸ್ತೆ ಪಾಪಸ್ ಇನ ಕರಸ್.
ROM 7:18 ಮಾರಾಮ, ಕತೊ ಶರೀರ್‌ನ ಅಧೀನ್ ಸ್ವಭಾವ್‍ಥಿ ಅಛ್ಛು಼ಶಾತ್‍ಬಿ ಜಿವ್‍ಕರಾಕೊಯ್ನಿ ಕರಿ ಮಾಲುಮ್‌ಛಾ಼. ಶನಕತೊ ಅಛ಼್ಛು ಕರ್ನುಕರಿ ಬೋಲಾನು ದಿಲ್‍ ಮಾರಾಮ ರ‍್ಹಯುತೋಬಿ ಇನ ಕರಾನ ಮನ ಕೊಹೋಯ್ನಿ.
ROM 7:19 ಶನಕತೊ ಮೇ ಅಛ್ಛು಼ ಕರ್ನುಕರಿ ಆಖ್ಹ್ ಕರುಸ್ತೆ ಇನ ಯೊ ಅಛ್ಛಾ಼ನ ಕರುಕೊಂತೆ ಖರಾಬ್‌ನ ಕರನಾಸ್ ಆಖ್ಹ್ ಕರುಕರೂಸ್.
ROM 7:20 ನಾ ಕರ್ನುಕರಿ ಬೋಲಾತೆ ಕಾಮ್ನ ಮೇ ಕರುಕರುಸ್‍ಕತೊ ಇನ ಕರ‍್ಯೊತೆ ಮೇ ಕಾಹೆ ಮಾರಮ ಜಿವ್‌ಕರಾತೆ ಪಾಪಸ್ ಇನ ಕರುಕರಸ್.
ROM 7:21 ಇನಖ್ಹಾಜೆ ಖಿವು ಅಛ್ಛುಛಾ಼ಕಿ ಇನ ಮೇ ಕರ್ನುಕರಿ ಛೂ಼ ಕತೋಬಿ ಖರಾಬಸ್ ಮಾರಾಮ ಠಿಕಾಣಿ ಹುಯಿರ‍್ಹುಸ್‌ಕರಿ ನಿಯಮ್‌ಥಿ ಮಾಲುಮ್‌ಹುವಸ್.
ROM 7:22 ಶನಕತೊ ಮೇ ಪೂರದಿಲ್‍ಥಿ ದೇವ್ನು ಧರ್ಮಶಾಸ್ತ್ರಮ ಖುಷಿಕರವಾಳೊ ಹುಯಿರ‍್ಹೋಸ್.
ROM 7:23 ಕತೋಬಿ ಮಾರದಿಲ್ಮ ಬಿಜೇಕ್ ನಿಯಮ್ ಮೇ ದೇಖುಕರುಸ್ ಮಾರ ಶರೀರ್‌ಮ ಛಾ಼ತೆ ಪಾಪ್ನ ನಿಯಮ್ಮ ಕೊಂಡೈರ‍್ಹೋಸ್.
ROM 7:24 ಮೇ ಕೆಥ್ರಾನು ಖರಾಬ್ ಹಾಲತ್ನು ಅದ್ಮಿ! ಮನ ಆ ಮರಣ್ಣು ಶರೀರ್‌ಥಿ ಕೋಣ್ ಛೋ಼ಡಾವವಾಳು?
ROM 7:25 ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಮನ ಬಚಾ಼ಡವಾಳ ದೇವ್ನ ಧನ್ಯವಾದ್ ಕರುಸ್. ಅಮ್‌ರ‍್ಹವಾಪರ್ ಮೇ ದೇವ್ನಿ ನಿಯಮ್ನ ಅಕ್ಕಲ್‌ಥಿ ಸೇವೆ ಕರಾವಾಳೊ ಹುಯಿರ‍್ಹೋಸ್, ಕತೋಬಿ ಶರೀರ್‌ನ ಪಾಪ್ನ ನಿಯಮ್‌ಥಿ ಆಳ್‌ ಹುಯಿನ್‌ಬಿ ಚಾ಼ಲುಕರುಸ್.
ROM 8:1 ಇನಖ್ಹಾಜೆ ಹಮ್ಕೆ ಯೇಸುಕ್ರಿಸ್ತಮ ಗಳ್‍ಜೋ಼ಡ್ ರ‍್ಹವವಾಳಾನ ಖಿವಿ ಅಪರಾದ್ನಿ ತೀರ್ಮಾನ್‍ಬಿ ಕೊಯ್ನಿ.
ROM 8:2 ಶನಕತೊ ಕ್ರಿಸ್ತಯೇಸುಮ ಛಿಯ್ಯೇ಼ತೆ ಅಪ್ಣುನ ಜಾನ್ನ ಲ್ಯಾವವಾಳು ಪವಿತ್ರಾತ್ಮನು ನಿಯಮ್ ಮನ ಪಾಪ್ ನಿಯಮ್‌ಥಿಬಿ ಅಜು಼ ಮರಣ್‌ಥಿ ಛುಟ್ಕಾರ್ ಕರಿರಾಖ್ಯುಸ್.
ROM 8:3 ಶನಕತೊ ಧರ್ಮಶಾಸ್ತ್ರ ಅದ್ಮಿನು ಸ್ವಭಾವ್‍ಥಿ ಕಮ್‍ಜೋ಼ರ್ ಹುಯಿನ್ ಖಿವು ಕಾಮ್ ಕರ್ನುನಾಕರಿ ಥೂಕಿ, ಇನ ದೇವ್ನೆಸ್ ಕರ‍್ಯೊ. ಕಿಮ್‌ಕತೊ ಇನೆ ಪಾಪ್ನ ಕಾಡಾನಖ್ಹಾಜೆ ಇನ ಛಿಯ್ಯಾನಸ್ ಪಾಪ್ನ ಕಬ್‌ಜಾ಼ಮಥೂತೆ ಶರೀರ್‌ನ ರೂಪ್‌ಮ ಮೋಕ್ಲಿನ್ ಯೋ ಶರೀರ್‌ಮಾಸ್ ಪಾಪ್ನ ಮಾರಿನಾಖಿದಿದೊ. ಅಮ್‍ರ‍್ಹವಾಪರ್, ಧರ್ಮಶಾಸ್ತ್ರ ಕರಾಕೊಂತೆ ತಿನ ದೇವ್ನೆ ಕರ‍್ಯೊ. ದೇವ್ ಇನ ಶೊಂತ್ ಛಿಯ್ಯಾನಸ್ ಪಾಪ್‌ಮಾನಿ ಅದ್ಮಿನಿ ಖ್ಹಯಾಲ್ಮ ಪಾಪ್ನ ಕಾಡಿನಾಖಾನ ಮೋಕ್‌ಲ್ಯೊ. ಇನಖ್ಹಾಜೆ ದೇವ್ ಪಾಪ್ನ ಮರಣ್ಣಿ ನಿಶತ್‌ ದ್ಯವಾನ ಅದ್ಮಿನಿ ಖ್ಹಯಾಲ್ನಾಸ್ ಲೀಲಿದೊ.
ROM 8:4 ಅಪ್ಣೆ ಅದ್ಮಿನಿ ಸ್ವಭಾವ್‌ವಾಳ ಹುಯಿನ್ ನಾ ಚಾ಼ಲ್ನುತೆ ಪವಿತ್ರಾತ್ಮನಿ ಪರಕ್ಮ ಚಾ಼ಲವಾಳ ಹುಯಿನ್ ಧರ್ಮಶಾಸ್ತ್ರನಿ ನಿಯಮ್‌ನಿ ಘೋಣಿ ಚಾ಼ಲನುಸ್ ಆ ವಾತೆನ ಭರ್‌ಪೂರ್‌ ಹುವಾನಿತರ ಕರ‍್ಯು.
ROM 8:5 ಶರೀರ್‌ನಿ ಖ್ಹಯಾಲ್‍ವಾಳ ಹುಯಿನ್ ಚಾ಼ಲವಾಳು ಶರೀರ್‌ನ ಸಂಬಂದ್ ರ‍್ಹೆಯಿತೆ ವಾತೆವ್ಮ ಮಘನ್‌ ರ‍್ಹೇಸ್. ಕತೋಬಿ ಪವಿತ್ರಾತ್ಮನ ಪೀಛೆ ಚಾ಼ಲಿಲ್ಯಾವಾಳನು ದಿಲ್‌ ಪವಿತ್ರಾತ್ಮನ ಸಂಬಂಧ ಹುವಾತೆ ತಿನಪರ್‌ ರ‍್ಹೇಸ್.
ROM 8:6 ಶರೀರ್‌ನು ಸ್ವಭಾವ್‌ನುದಿಲ್ ಮರಣ್ಣು ಹುಯಿರ‍್ಹುಸ್. ಕತೋಬಿ ಪವಿತ್ರಾತ್ಮನ ಮಹಿರ‍್ಹಿಯೋತೊ ಇನಪರ್ ದಿಲ್‍ರಾಖನು ಜಾನ್‌ಬಿ ಸಮಾಧಾನ್‍ಬಿ ಹುಯಿರ‍್ಹೇಸ್.
ROM 8:7 ಶರೀರ್‌ನಿ ಸ್ವಭಾವ್‌ಪರ್‌ ದಿಲ್‌ರಾಖನು ದೇವ್ನ ವಿರೋದ್‌ ಹುಯಿರ‍್ಹೇಸ್. ‍ಶನಕತೊ ಯೊ ದೇವ್ನಿ ನಿಯಮ್ನ ವಿಧೇಯ ಹುವಾಕೊಯ್ನಿ. ಅಜು಼ ಯೊ ಶಾತ್ಬಿ ಕರಾನ ಕೊಹೊಯ್ನಿ.
ROM 8:8 ಶರೀರ್‌ನ ಖ್ಹಯಾಲ್ನಿ ಸ್ವಭಾವ್‌ಮರ‍್ಹವಾಳು ದೇವ್ನ ಲ್ಹಾಯಕ್ ಕರಾವನಕೊಹೊಯ್ನಿ.
ROM 8:9 ಕತೋಬಿ ದೇವ್ನು ಆತ್ಮ ತುಮಾರಮ ರ‍್ಹವಾನು ಖ್ಹಾಚಸ್ ಉಶೇತೊ ತುಮೆ ಶರೀರ್‌ನ ಖ್ಹಯಾಲ್ನ ಮಹಿ ರ‍್ಹವಾಳಕಾಹೆ, ದೇವ್ನ ಆತ್ಮಾನ ಮಹಿರ‍್ಹೇಸ್. ಕ್ರಿಸ್ತನು ಆತ್ಮ ಕೋರ‍್ಹೆಯಿನಿತೆ ಯೊ ಕ್ರಿಸ್ತಮ ಮಳ್ಯೊಹುಯೊ ಕಾಹೆ.
ROM 8:10 ಕತೋಬಿ ಕ್ರಿಸ್ತ ತಾರಮ ರ‍್ಹವಾಳೊ ಉಶೇತೊ, ಆತ್ಮ ತುಮುನ ಜಾನ್‌ ಹುಯಿರ‍್ಹೊಸ್. ತುಮಾರು ಶರೀರ್ ಪಾಪ್ನಖ್ಹಾಜೆ ಮರಿರ‍್ಹುತೋಬಿ ತುಮೆ ದೇವ್ನಿ ಜೋ಼ಡ್ಮ ನೀತಿವಾಳಕರಿ ಜಿವ್‌ಶು.
ROM 8:11 ಯೇಸುನ ಮರ‍್ಯಹುಯಮಾಥು ಜಿವಾಡವಾಳನು ಆತ್ಮ ತುಮಾರಮ ಜಿವ್‍ಕರ‍್ಯುತೊ, ಕ್ರಿಸ್ತಯೇಸುನ ಮರಣ್‍ಥಿ ಉಠಾಡ್ಯೊಹುಯೊ ದೇವ್ನು ಆತ್ಮ ತುಮಾರಮ ರ‍್ಹಿಯುತೊ ನಾಶಹುವಾಳು ಶರೀರ್‌ನಾಬಿ ತುಮಾರಮ ಜಿವವಾಳ ಆತ್ಮಥೀಸ್ ಜಾನ್ನ ದಿಶೆ.
ROM 8:12 ಇನಖ್ಹಾಜೆ ಭೇನೆ ಭೈಯೇವೊ ಅಪ್ಣೆ ಶರೀರ್‌ನ ಸ್ವಭಾವ್‌ನ ಚ಼ಪ್ಪಣ್‌ಮ ಕೊಯ್ನಿ. ಇನು ಆಖ್ಹ್‌ದಾಖ್ಹ್‌ಮ ಜಿವ್ಣುಕರಾನು ಚ಼ಪ್ಪಣ್‌ಮಬಿ ಕೊಯ್ನಿ.
ROM 8:13 ಶನಕತೊ ತುಮೆ ಶರೀರ್‌ನ ಆಖ್ಹ್‌ನ ಖ್ಹಯಾಲ್‍ವಾಳಹುಯಿನ್ ಜಿವ್ಯಾತೊ ಮರ್‌ಶು. ಕತೋಬಿ ಆತ್ಮಥಿ ಶರೀರ್‌ನ ಪಾಪ್ನಕಾಮ್ನ ಮಾರ‍್ಯುತೊ, ತುಮೆ ಜಿವ್‌ಶು.
ROM 8:14 ಕೋಣ್ ದೇವ್ನ ಆತ್ಮಥಿ ಚ಼ಲೈಲೇಸ್ಕಿ ಇವ್ಣೆ ದೇವ್ನ ಲಡ್ಕಾ ಹುಯಿರ‍್ಹಿಶೆ.
ROM 8:15 ಶನಕತೊ ದೇವ್ನೆ ದೀರಾಖ್ಯೋತೆ ಆತ್ಮ ತುಮೂನ ಗುಲಾಮ್ ಕೊ ಕರ್‌ಶೇನಿ ಅಜು಼ ತುಮಾರ ಡರ್‌ಥಿ ಕೊಹುಯಿರಿಶೇನಿ ಅನಬದಲ್ ಪವಿತ್ರಾತ್ಮ ದೇವ್ನ ಲಡ್ಕಕರೀನ್ ಬಣಾವಸ್ ಅಜು಼ ಯೊ ಆತ್ಮಾನಿ ಶಕಥ್ಥಿ ಭರಾವವಾಳೊ ಹುಯಿನ್ ಅಪ್ಣೆ ದೇವ್ನ “ಬಾ, ಪಿತಾ!” ಕರಿ ಚಿಕ್ರಿಯೆಸ್.
ROM 8:16 ಅಪ್ಣೆ ದೇವ್ನ ಛಿಯ್ಯಾ ಹುಯಿರ‍್ಹಾಸ್, ಕರಿ ಬೋಲಾನ ಪವಿತ್ರಾತ್ಮಸ್ ಅಪ್ಣ ಆತ್ಮನಿಜೋ಼ಡ್ಮ ಸಾಕ್ಷಿ ದೇಸ್.
ROM 8:17 ಹಮ್ಕೆ ಅಪ್ಣೆ ಲಡ್ಕಾ ಹುಯಿರ‍್ಹಾತೊ, ಹಕ್‍ದಾರ್ ಹುಯಿರ‍್ಹಯೇಸ್; ದೇವ್ನ ಹಕ್‍ದಾರ್ ಅಜು಼ ಕ್ರಿಸ್ತನಿ ಜೋ಼ಡ್ಮ ಹಕ್‍ದಾರ್ ಹುಯಿರ‍್ಹಾಸ್. ಅಪ್ಣೆ ಕ್ರಿಸ್ತನು ಖ್ಹತಾಪ್ಣಿಮ ಖ್ಹಾಚಮಾಸ್ ಭಾಗ್‍ಲ್ಯಾವವಾಳ ರ‍್ಹಯಾತೊ, ಇನಿ ಮಹಿಮೆಮಾಬಿ ಭಾಗ್‌ಲ್ಯವಾಳ ಹುಯಿರ‍್ಹಿಶು.
ROM 8:18 ಅಪ್ಣುನ ಖ್ಹಾಮ್ಣೆ ಮಾಲುಮ್ ಪಡ್‌ಶೇತೆ ಮಹಿಮೆನಿ ಜೋ಼ಡ್ಮ ಏಕ್‍ಕರಿ ದೆಖಾನಿವಖ್ಹ್‌ತೆ ಹಮ್ಕೇನಿ ಖ್ಹತಾಪ್ಣಿಖ್ಹಾರು ಯೊ ಶಾತ್ಬಿಕೊಯ್ನಿ.
ROM 8:19 ದೇವ್ನ ಲಡ್ಕಾವ್‌ನಿ ಮಹಿಮೆ ಕದೆ ದೆಖಾವ್‍ಶೇಕರಿ ಉಬ್‍ಜಾ಼ವ್ಣಿ ಘಣು ಜ಼ರೂರ್‌ಥಿ ಖ್ಹಾಮ್ಣೆ ದೇಖುಕರಸ್.
ROM 8:20 ಶನಕತೊ ಉಬ್‍ಜಾ಼ವ್ಣಿ ಇನು ಉದ್ದೇಶ್‌ನ ಗುಮೈಲೀನ್ ಯೊ ಗುರ್‌ಕಾವ್ಣಿಮ ಪಡಿಗಯು, ಯೊ ಇನ ಶೊಂತ್ ಖ್ಹೂಜ಼್‌ಥಿ ಕಾಹೆ ಕತೋಬಿ ದೇವ್ನಿ ಖ್ಹೂಜ಼್‌ಥೀಸ್ ಹುಯು ಯೋ ಅಜೂ಼ಬಿ ಭರೋಖ್ಹಾಮಸ್ ಛಾ಼,
ROM 8:21 ಯೋ ಏಕ್‌ ದನ್ ನಾಶನನು ಗುಲಾಮ್‌ನ ಕಾಮ್‍ಥಿ ಛುಟ್ಕಾರ್ ಉಷೆ ಅಜು಼ ದೇವ್ನ ಲಡ್ಕಾನ ಮಹಿಮೆಥಿ ಭರಿಹುಯು ಛುಟ್ಕಾರ್‌ಮ ಭಾಗ್ಉಷೇಕರಿ ಬೋಲಿನ್.
ROM 8:22 ಜಗತ್ನಿ ಉಬ್‍ಜಾ಼ವ್ಣಿ ಹಮ್ಕೆಲಗು ಜ಼ಣತ್‌ನಿ ಖ್ಹತಾಪ್ಣಿನಿಘೋಣಿನಿ ದರದ್ ಲೆವ್‌ಕರಾಸ್‌ಕರಿ ಅಪ್ಣುನ ಮಾಲುಮ್.
ROM 8:23 ಖಲಿ ಉಬ್‌ಜಾ಼ವ್ಣಿಸ್ ಕಾಹೆತೆ ಪಹಿಲು ಫಲ್‌ಹುಯಿರಾತೆ ಅಜು಼ ಪವಿತ್ರಾತ್ಮನಿ ವರಾನ ಲೀರಾಖ್ಯಾತೆ ಅಪ್ಣೇಬಿ ದೇವ್ನಲಡ್ಕಾನು ಇನಾಮ್‌ನಾಬಿ ಕತೊ ಶರೀರ್‌ನ ಆವ್ಣುತೆ ಛುಟ್ಕಾರ್‌ನ ಆವಾನು ದೇಕ್ತಹುಯಿನ್ ಅಪ್ಣಾಮಸ್‌ ಕುರ್ಲವ್‌ಕರೆಯೇಸ್.
ROM 8:24 ಆ ಭರೋಖ್ಹಾಥಿಸ್ ಅಪ್ಣೆ ರಕ್ಷಣೆ ಲೀರಾಖವಾಳ ಹುಯಿರ‍್ಹಿಯೇಸ್. ಕತೋಬಿ ಡೋಳೆಖ್ಹು ದೆಖಾವತೆ ಭರೋಖ್ಹೊ, ಭರೋಖ್ಹೊಸ್ ಕಾಹೆ, ದೆಖವ್‍ಕರಾತೆ ತಿನ ಕೋಣ್‌ತೋಬಿ ಭರೋಖ್ಹೊ ಕರ್ಶೆಕಿ ಶು?
ROM 8:25 ಕತೋಬಿ ಅಪ್ಣೆ ಬಿಜೂ಼ಬಿ ದೆಖವ್‍ಕರಾಕೊಂತೆ ಇನಖ್ಹಾಜೆ ಭರೋಖ್ಹೊ ರ‍್ಹವಾನು ರ‍್ಹಯೂತೊ ಅಪ್ಣೆ ಇನಖ್ಹಾಜೆ ಖ್ಹಮಾಳಿನ್ ಟಿವೈರ‍್ಹಿಶು.
ROM 8:26 ಇಮ್ಮಸ್‌ ಪವಿತ್ರಾತ್ಮಬಿ ಅಪ್ಣಿ ಕಮ್‍ಜೋ಼ರ‍್ಮ ಅಪ್ಣುನ ಮದತ್‍ಕರಸ್. ಕಿಮ್‌ಕತೊ ಅಪ್ಣೆ ಕದೆ ಶಾತ್‌ ಮಾಂಗಿಲೇವ್ಣುಕರಿ ಅಪ್ಣುನ ಮಾಲುಮ್‌ಕೊಂತೆ ಇನಖ್ಹಾಜೆ ಪವಿತ್ರಾತ್ಮಸ್ ವಾತ್‍ಕೊಂತೆ ಥರ್‌ಪಡೀನ್ ಅಪ್ಣಖ್ಹಾಜೆ ಗಿಂಗೈಲೇಸ್.
ROM 8:27 ಕತೋಬಿ ಖ್ಹಾರದಿಲ್‍ನ ಪರ್ಖಿ ರಾಖವಾಳನ ಪವಿತ್ರಾತ್ಮನು ದಿಲ್ನಿ ಖ್ಹಯಾಲ್ ಶಾತ್‌ಕರಿ ಮಾಲುಮ್ ಛಾ಼; ಯೋ ಆತ್ಮ ದೇವ್ನು ಖ್ಹಯಾಲ್ನಿ ಘೋಣಿಸ್ ದೇವ್‌ಮ ಅದ್ಮಿನಖ್ಹಾಜೆ ಗಿಂಗೈಲೇಸ್.
ROM 8:28 ಕೋಣ್ ಇನ ಪ್ಯಾರ್ ಕರಾಸ್ಕಿ ಅಜು಼ ಕಿನ ದೇವ್ನಿ ಖ್ಹೂಜ಼್‌ನಿ ಪರಕ್‍ಥಿ ಬುಲಾಯಹುಯಾತೆ ಇವ್ಣಾಮ ಖ್ಹಾರಿಬಾರೇಮ ಅಛ್ಛಾ಼ ಕಾಮ್ನಸ್ ಕರಸ್‍ಕರಿ ಅಪ್ಣುನ ಮಾಲುಮ್ ಛಾ಼.
ROM 8:29 ಕಿನ ದೇವ್ನೆ ತದೇಸ್‌ ಚೂ಼ಣಿಲಿದೊಕಿ. ಇನೆ ಇವ್ಣುನ ಇನ ಛಿಯ್ಯಾನಿಘೋಣಿ ಹುವಾನ ಎಕ್ಟು ಕರಿರಾಖ್ಯೋಸ್.ಅಮ್ ಇನೊಛಿಯ್ಯೊ ಕೈಏಕ್ ಭೈಯೇ ಭೇನೆವ್‌ನ ಬೀಚ್ಮ ಫೈಲೊಟೊ ಛಿಯ್ಯೊಕರಿ ಬೋಲಾವನಿತರ ಕರಿರಾಖ್ಯೊಸ್.
ROM 8:30 ಕತೋಬಿ ಯೋ ಪಹಿಲೆ ಕಿನ ಚೂ಼ಣ್ಯೊಕಿ ಇವ್ಣುನ ಬುಲಾಯೊ; ಕಿನ ಬುಲಾಯೋಕಿ ಇವ್ಣುನ ನೀತಿವಾಳಕರಿ ಬಣಾಯೊ; ಕಿನ ನೀತಿವಾಳುಕರಿ ಬಣಾಯೋಕಿ ಇವ್ಣುನ ಮಹಿಮೆಮ ಭಾಗ್‌ ದಿದೊ.
ROM 8:31 ಇಮ್‍ಕತೊ ಅನ ಅಪ್ಣೆ ಕಿಮ್ ಜ಼ವಾಬ್‍ದಿಯೆ, ದೇವ್ ಅಪ್ಣ ಭಣಿರ‍್ಹಯೋತೊ ಕೋಣ್ ಅಪ್ಣುನ ವಿರೋದ್ ಕರ್ಶೆ.
ROM 8:32 ಇನ ಶೊಂತ್ ಛಿಯ್ಯಾನಸ್ ಬಚಾ಼ಯೊಕೊಂತೆ ಅಪ್ಣಖ್ಹಾರಾನಖ್ಹಾಜೆ ಇನ ದಿದೊಹುಯೊ, ಅಮ್‌ರ‍್ಹವಾಪರ್ ಖ್ಹಾರುಸ್‌ಬಿ ಇನಜೋ಼ಡ್ಮ ದಿಶೆಕೊಂತೆ ರ‍್ಹಿಶೇಕಿ ಶು?
ROM 8:33 ದೇವಸ್ ಚೂ಼ಣಿಲಿದ ಹುಯಾನ ಉಪ್ಪರ್ ಕೋಣ್ ಗಲತ್‌ ಬೋಲ್‌ಶೆ? ದೇವಸ್ ಗಲ್ತಿಕರಾವಾಳು ಕಾಹೆಕರಿ ಛುಟ್ಕಾರ್‌ ಕರಾವಾಳೊ ಹುಯಿರ‍್ಹೋಸ್.
ROM 8:34 ಅಪರಾದಿಕರಿ ನಿಶತ್‌ ಕರಾವವಾಳು ಕೋಣ್? ಕ್ರಿಸ್ತಯೇಸು ಮರಣ್‍ಲಿದೊ. ಅಜು಼ ಎತ್ರೇಸ್ ಕಾಹೆತೆ ಮರ‍್ಯಹುಯಮಾಥು ಉಠಿನ್ ದೇವ್ನ ಖಾವಿಬಾಜು಼ಮ ಬೇಶಿನ್. ಯೋಸ್ ಅಪ್ಣಖ್ಹಾಜೆ ಬಿಂತೀನಿವ್ಹಾರ್ ಕರಾವಾಳೊ ಹುಯಿರೋಸ್.
ROM 8:35 ಅಮ್ ರ‍್ಹವಾಪರ್ ಕ್ರಿಸ್ತನಿ ಪ್ಯಾರ್‌ಥಿ ಅಪ್ಣುನ ಅಲಕ್ ಕರವಾಳು ಕೋಣ್? ವದೇಖ್ಹ್‌ಕಿ, ವಾಖ್ಯೋಕಿ, ಖ್ಹತಾಪ್ಣಿಕಿ, ಭುಕ್ಯೋಕಿ, ಪೆರ‍್ಹಾನ ಕೊಯ್ನಿತೇಕಿ, ನಘಾಡೋಮ್‌ಕಿ, ನತರ್ ಮರಣ್‌ಕಿ?
ROM 8:36 ಆ ಖ್ಹಾರು ಪರಿಶುದ್ ದಪ್ತರ್‌ಮ ಲೀಖೈರುತೆ ಇಮ್ಮಸ್ ಛಾ಼, “ತಾರಾಖ್ಹಾಜೆ ಹಮೆ ಅಖ್ಖೋದನ್ ಮರಣ್‍ಮ ಛಿಯ್ಯೆ಼; ರ‍್ಹೇಖ್ಹಾವನ ಆಯೂತೆ ಮೇಂಢವ್‌ನಿ ತರ ಹಮೆ ರ‍್ಹೇಖ್ಹಾವನಿತರಾಬಿ ಹುಯಿರ‍್ಹಿಯೇಸ್.
ROM 8:37 ಕೊಯ್ನಿ ಆ ಖ್ಹಾರಮಾಬಿ ಹಮೆ ಹಮೂನ ಪ್ಯಾರ್ ಕರವಾಳಾಥಿ ಜೈಕಾರ್ ಲೀರಾಖವಾಳಥಿಬಿ ಘಣ ಮೋಟಹುಯಿರಾಸ್.
ROM 8:38 ಶನಕತೊ ಮರಣ್ಣರ‍್ಹವೊ, ಜಾನ್ನರ‍್ಹವೊ, ದೇವ್‌ದೂತರ್‌ ರ‍್ಹವೊ, ದುರಾತ್ಮರ‍್ಹವೊ, ಸೊರ್ಗನೊ ಅದಿಕಾರಿ ಕೊಯಿನ್ತೊ ಶಕಥ್ಥಿರ‍್ಹವೊ. ಹಮ್ಕೇನಿ ಬಾರೇಮರ‍್ಹವೊ, ಖ್ಹಾಮ್ಣೇನಿ ಬಾರೇಮರ‍್ಹವೊ,
ROM 8:39 ಊಚು಼ರ‍್ಹವೊ, ಗಧಾರ್‌ಮರ‍್ಹವೊ, ನತರ್ ಉಬ್‌ಜಾ಼ವ್ಣಿಮ ಛಾ಼ತೆ ಬಿಜು಼ ಖೆವೂಸ್‍ರ‍್ಹವೊ ಅಪ್ಣೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತಯೇಸುಮ ಛಾ಼ತೆ ದೇವ್ನಿ ಪ್ಯಾರ್‌ಥಿ ಅಪ್ಣುನ ಅಲಕ್ ಕರ್ಶೆಕೊಯ್ನಿ.
ROM 9:1 ಮೇ ಕ್ರಿಸ್ತಮ ಖ್ಹಾಚ ಬೋಲುಸ್, ಮೇ ಜ್ಹೂ಼ಟು ಬೋಲುಕರುಕೊಯ್ನಿ. ಮಾರ ದಿಲ್ನಿಸಾಕ್ಷಿ ಅನ ಪವಿತ್ರಾತ್ಮಥಿ ಘಟ್ ಬಣಾವಸ್.
ROM 9:2 ಮಾರ ದಿಲ್ಮ ಪುರ್‌ಶತಸ್ ಕೊಯ್ನಿತೆ ತಲಖ್ಣೀಬಿ ಘಣಿ ದುಖ್‍ಬಿ ಛಾ಼.
ROM 9:3 ಮಾರ ಭೈಯೇನಖ್ಹಾಜೆ ಮಾರಶೊಂತ್ ಅದ್ಮಿವೋನಖ್ಹಾಜೆ ಕ್ರಿಸ್ತಥಿ ದೂರ್‌ಹುಯಿನ್ ಶಾಪ್‌ಮ ಪಡಾಮಬಿ ತಯಾರ್ ಛು಼.
ROM 9:4 ಇಸ್ರಾಯೇಲ್‌ವಾಳು ಹುಯಿರ‍್ಹುತೆ ಇವ್ಣುನ ಇನಿ ಲಡ್ಕಾವ್‌ನಿ ಘೋಣಿಬಿ ಮಹಿಮೆನ ವತಾಳಿರಾಖ್ಯುಸ್, ಒಪ್ಪಂದಾನ ಅಖ್ಖೂಬಿ, ಧರ್ಮಶಾಸ್ತ್ರ ದೇವವಾನುಬಿ, ಮಂದಿರ್‌ನಿ ಸೇವೆಬಿ ಅಜು಼ ವಾಗ್ದಾನ್‌ಬಿ ಲೀರಾಖ್ಯುಸ್.
ROM 9:5 ಗುರುಗುರಬ್‍ಲ್ಯೊಬಿ ಇವ್ಣುನ ಮಳ್ಯಹುಯ. ಕ್ರಿಸ್ತ ಅದ್ಮಿಹುಯಿನ್ ಇವ್ಣಿ ಖೂಮ್ಮ ಪೈದಹುಯೊ. ಆ ಖ್ಹಾರಸ್ನ ಉಪ್ಪರ್ ಛಾ಼ತೆ ದೇವ್ ಕದೆಕದೇಬಿ ಸ್ತುತಿ ಹುವಾದೆ ಆಮೆನ್.
ROM 9:6 ಹೈರೂತೆ ದೇವ್ನಿ ವಾತೆ ಗಲತ್‌ ಹುಯ್ಗುಕರಿ ಅಪ್ಣೆ ನಾ ಲಾಜ಼್‌ಣು. ಶನಕತೊ ಇಸ್ರಾಯೇಲ್‌ನು ಖ್ಹಾರುಸ್ ಅದ್ಮಿಬಿ ಇಸ್ರಾಯೇಲ್ವಾಳು ಕಾಹೆ.
ROM 9:7 ಇಮ್ಮಸ್ ಅಬ್ರಹಾಮ್‌ನು ಪಿಳ್ಗಿವಾಳು ಖ್ಹಾರುಸ್ ಇನ ಲಡ್ಕಕಾಹೆ. ದೇವ್ ಅಬ್ರಹಾಮ್‌ನ ಬೋಲ್ಯೊ, ಮೆ ವಾಗ್ದಾನ್ ಕರುಸ್, “ಇಸಾಕಥಿ ಪೈದಹುವವಾಳುಸ್ ತಾರು ಪಿಳ್ಗಿಕರಿ ಬೋಲೈಲಿಶೆ.”
ROM 9:8 ಅನಿ ಮತಲಬ್, ಶಾತ್‍ಕತೊ ಶರೀರ್‌ನಿ ಸಂಬಂಧ್‌ಥಿ ಪೈದಾಹುವವಾಳು ಖ್ಹಾರುಸ್ ದೇವ್ನ ಲಡ್ಕಕಾಹೆ, ವಾಗ್ದಾನ್ನ ಲಡ್ಕಾಸ್ ಅಬ್ರಹಾಮ್‌ನ ಪಿಳ್ಗಿವಾಳು ಕರಿ ಗಣ್ತಿ ಹುವಾಸ್.
ROM 9:9 ಶನಕತೊ, “ಬರೊಬರ್‌ನ ಹಗಾಮ್ಮ ಮೇ ಐಶ್ತೆ, ತದೆ ಸಾರನ ಏಕ್‍ಛಿಯ್ಯೊ ರ‍್ಹಿಶೆ” ಕರಿ ಬೋಲಾನಿ ವಾಗ್ದಾನ್ ಹುಯಿರ‍್ಹೂಸ್ ಎತ್ರೇಸ್.
ROM 9:10 ಅತ್ರೇಸ್ ಕಾಹೆತೆ ರೆಬೆಕ್ಕಬಿ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರೋತೆ ಇಸಾಕಥಿ ಅವ್‌ಳಿಜವ್‌ಳಿ ಪರ್ಖ್ಹಾ ಲಡ್ಕಾನ ಜ಼ಣಿ.
ROM 9:11 ಅಮ್ ಯೋ ಲಡ್ಕಾ ಪೈದಹುವಾನ ಅಗಾಡಿ, ಅಛ಼್ಛು ನತರ್ ಗಲತ್‌ ಕರಾನ ಅಗಾಡಿಸ್, ಮೋಟೊ ನ್ಹಾನನ ಚಾ಼ಕ್ರಿಕರ್ಶೆ ಕರಿ ರೆಬೆಕ್ಕನ ಬೋಲೈರ‍್ಹೂಥು.ಅನೇಥಿ ದೇವ್ ದಿಲ್‍ರ‍್ಹೇಸ್ತೆ ಇನ ಚೂ಼ಣಿಲೇಸ್‍ಕರಿ ಬೋಲಾನು ಖ್ಹೂಜ಼್ ಘಟ್‍ರ‍್ಹೇಣುಕರಿ ವತಾಳಿಲಿದೊ.
ROM 9:12 ಆ ಕಾಮ್ನ ಉಪ್ಪರ್ ಆಧಾರ್‌ಕಾಹೇತೆ, ಬುಲಾವವಾಳನ ಖ್ಹೂಜ಼್‌ನ ಉಪ್ಪರಸ್ ಆಧಾರ್ ಹುಯಿರ‍್ಹೂಸ್. ಇನಖ್ಹಾಜೇಸ್ ರೆಬೆಕ್ಕನ ಬೋಲಾಯು ಮೋಟೊ ನ್ಹಾನನಿ ಚಾ಼ಕ್ರಿ ಕರ್ಶೆ.
ROM 9:13 ಅನಿನಿತರಸ್, “ಯಾಕೋಬ್‍ನ ಮೇ ಪ್ಯಾರ್‌ಕರ‍್ಯೊ. ಕತೋಬಿ ಏಸಾವನ ವಹೇರ್‌ ಕರ‍್ಯೊಕರಿ ಪವಿತ್ರ ದಪ್ತರ್‌ಮ ಲಿಖೈರ‍್ಹುಸ್.”
ROM 9:14 ಇಮ್‍ಕತೊ ಅಪ್ಣೆ ಶಾತ್ ಬೋಲಿಯೆ? ದೇವ್ ಠಗಾವಾಳೊಕೀ ಶು? ಕದೇಬಿ ಕೊಯ್ನಿ.
ROM 9:15 ದೇವ್ ಮೋಶೆನ, “ಕಿನಾಪರ್ ಮಾರಿ ಗೋರ್‌ಛಾ಼ಕಿ ಇನ ಗೋರ್‌ಕರೀನ್, ಕಿನಾಪರ್ ಮಾರಿ ಆರ್‌ಗೋರ್‌ಛಾ಼ಕಿ ಇನ ದಯಾ ವತಾಳೀಶ್” ಕರಿ ಬೋಲಿರಾಖ್ಯೊಸ್.
ROM 9:16 ಅನಖ್ಹಾಜೆ ಆ ಅದ್ಮಿನ ಆಖ್ಹ್ ಮ್ಹಿನಥ್ಥಿ ಹುಯುಕೊಂತೆ, ದೇವ್ನ ಗೋರ್‌ಥೀಸ್ ಹುಯಿರ‍್ಹೂಸ್.
ROM 9:17 ಶನಕತೊ, “ಮೇ ತಾರಾಮ, ಮಾರಿ ಶಕತ್ನ ವತಾಳಿನ್ ಮಾರ ನಾಮ್ನ ಜ಼ಮೀನ್‌ಪರ್ ಮೋಟು ಭಡಾವ್‍ಣುಕರಿ ಖ್ಹಯಾಲ್‍ಥೀಸ್ ತುನ ಊಚಿ ಝ಼ಗೋಪರ್ ಉಠಾಡಿಭೀರಾಖ್ಯೊ” ಕರಿ ಧರ್ಮಶಾಸ್ತ್ರಮ ದೇವ್ ಫರೋಹನ ಬೋಲಸ್.
ROM 9:18 ಇನಖ್ಹಾಜೆ ದೇವ್ ಕಿನ ಗೋರ್‌ಕರ‍್ನುಕರಿ ಖ್ಹೂಜ಼್‌ಕರಸ್ಕಿ ಇನ ಗೋರೆಲುಕರಸ್. ಕಿನ ಕಠಣ್ ಕರ್ನುಕರಿ ಖ್ಹೂಜ಼್‌ಕರಸ್ಕಿ ಇವ್ಣುನ ಕಠಣ್ ಬಣಾವಸ್.
ROM 9:19 ಇಮ್‍ಕತೊ, “ದೇವ್ ಬಿಜೂ಼ಬಿ ಗಲತ್‌ ಢೂಂಡಸ್ ಶನ? ಇನಿ ಮರ್ಜಿನ ಖ್ಹಾಮ್ಣೆ ಭೀರ‍್ಹವಾಳು ಕೋಣ್?” ಕರಿ ಮನ ಬೋಲಸ್.
ROM 9:20 ಅಲ ಅದ್ಮಿ, ದೇವ್ನ ಆಡ್‌ಫೇಡ್ ವಾತೆ ಬೋಲವಾಳೊ ತು ಕೋಣ್? ಉಬ್ಜಿಹುಯು ಉಬ್‌ಜಾ಼ವವಾಳನ “ಶನ ಮನ ಅಮ್ ಉಬ್ಜಾ಼ಯೊಕರಿ ಬೋಲೆಜಾ಼ಯ್?
ROM 9:21 ಕುಂಭಾರ‍್ನ ಎಕ್ಕಸ್ ಮಾಟಿನ ಮುದ್ದಾಥಿ ಅಛ್ಛು಼ರಾಛು಼ ಕರನಾಬಿ, ಬಿಜೇಕ್ನ ಖರಾಬ್ ಕಾಮ್ನಖ್ಹಾಜೆ ಉಪಯೋಗ್ ಕರಾನ ಮ್ಹಾಮೂಲಿ ರಾಛ಼ನ ಬಣಾವನಾಬಿ ಹಕ್‌ ಕೊಯ್ನಿಕಿ ಶು?
ROM 9:22 ಕತೋಬಿ ದೇವ್ ಇನ ಇರಾದನ ದೆಖಾಡಿನ್ ಇನಿ ಶಕತ್ನ ವತಾಳಿನ್ ಭಡಾವ್‍ಣುಕರಿ ರ‍್ಹಯೊತೋಬಿ, ಇಮ್‌ ಕರ‍್ಯೊಕೊಂತೆ ಇನ ಇರಾದಮ ನಾಶಹುವಾಳನ ಘಣು ಠಂಡೊ ಹುಯಿನ್ ಖ್ಹಮಾಳಿಲ್ಯವಾನ ಆಖ್ಹ್‌ಕರ‍್ಯೊತೊ, ಕೋಣ್ ಶಾತ್‌ ಕರಾನ ಉಶೆ.
ROM 9:23 ಅಜು಼ ಮಹಿಮೆ ಲಿಲ್ಯಾವನಖ್ಹಾಜೆ ಅಗಾಡಿಸ್ ತಯಾರ್‌ಕರೀನ್, ದೇವ್ನೆ ಇನಿ ಗೋರ್‌ ಲೀಲ್ಯಾವಾಳನ ಇನಿ ಮಹಾನ್ ಮಹಿಮೆನ ದೆಖಾಡ್ಯೊ.
ROM 9:24 ಇನಖ್ಹಾಜೇಸ್ ಯೋ ಖಲಿ ಯೆಹೂದ್ಯನ ಬುಲಾಯೊ ಕಾಹೆತೆ, ಯೆಹೂದ್ಯರ್‌ಕಾಹೆತೆ ಇವ್ಣುನ ಜಿನುಬಿ ಬುಲೈರಾಖ್ಯೋಸ್ನಿ?
ROM 9:25 ಹೋಶೇಯನ ಪುಸ್ತಕ್‌ಮ ದೇವ್ನೆ, “ಮಾರು ಅದ್ಮಿಕಾಹೆತೆ ಇವ್ಣುನ ‘ಮಾರು ಅದ್ಮಿ’ ಕರಿ ಬುಲೈಶ್. ಮೇ ಪ್ಯಾರ್‌ಕರಾವಾಳನ ಮಾರು ಪ್ಯಾರ್‌ವಾಳುಕರೀಬಿ ಬೋಲಿಶ್.”
ROM 9:26 “ಖಿವಿ ಝ಼ಗೋಮ ‘ತುಮೆ ಮಾರು ಅದ್ಮಿಕಾಹೆಕರಿ’ ಇವ್ಣುನ ಬೋಲಾಯುಕಿ ಯೋ ಝ಼ಗೋಮಸ್‌, ‘ಇವ್ಣೆ ಜಾನ್ನಸ್ವರೂಪ್ ಹುಯಿರೋತೆ ದೇವ್ನ ಲಡ್ಕಾ ಕರಿ ಬೋಲೈಲಿಶೆ”.
ROM 9:27 ಆ ನಾಹುಯಿನ್ ಯೆಶಾಯ ಇಸ್ರಾಯೇಲವಾಳನ ಬಾರೇಮ ಚಿಕ್ರಿಬೋಲಸ್ ಶಾತ್‍ಕತೊ” ಇಸ್ರಾಯೇಲ್‍ವಾಳನಿ ಗಣ್ತಿ ದರ‍್ಯಾವ್‍ನಿ ರೇತ್ನಿತರ ರ‍್ಹಯುತೋಬಿ ಇವ್ಣಾಮ ಥೋಡುಜ಼ಣು ಬಚಿರ‍್ಹಿಶೆ.
ROM 9:28 ಶನಕತೊ ಪ್ರಭು ಇನಿವಚನ್ನ ಜ಼ಮೀನ್‌ಪರ್ ಖ್ಹರ್ತಿನು ಕರೀನ್‍ಬಿ, ಗಣ್ತೀಥಿ ಒಗ್ಗಿಸ್‌ಮ ಚ಼ಲೈನ್ ಖ್ಹತಮ್ ಕರ್ಶೆ!”
ROM 9:29 ಯೆಶಾಯನೆ ಅನೇಥಿ ಪಾಛ಼ಳ್, “ಪ್ರಭು ಹುಯಿರೋತೆ ದೇವ್ ಹಮೂನ ಪಿಳ್ಗಿ ಬಚೈ಼ನ್ ದಿದೊ ನಾಹೊತ್ತೊ, ಹಮೆ ಸೊದೋಮ್‍ನಿ ಹಾಲತಸ್ ಹಮುನ ಹುಯಿಗಯಹೊತ್‍, ಗೊಮೋರನಿ ಖರಾಬ್‌ ಹಾಲಸ್ ಚಾ಼ಲಿಗುಹೊತ್!” ಕರಿ ಬೋಲಿರಾಖ್ಯೊಸ್.
ROM 9:30 ಯೆಹೂದ್ಯರ್‌ಕಾಹೆತೆ ಇವ್ಣೇಥಿ ಇವ್ಣೆಸ್ ಇವ್ಣ ಶಕಥ್ಥಿ ನಾ ಕರ‍್ಯುತೋಬಿ ದೇವ್ನಿ ವಿಶ್ವಾಸ್‍ಥಿ ಹುಯುತೆ ನೀತಿವಾಳುಕರಿ ಗಣ್ತಿ ಹುಯಿಜಾ಼ಶೆ.
ROM 9:31 ಯೋಸ್ ವಖ್ಹತ್‌ಮ ದೇವ್ನಿ ಜೋ಼ಡ್ಮ ನೀತಿ ಪಾಡಿ ಚಾ಼ಲ್ಯುತೆ ಇಸ್ರಾಯೇಲ್‌ವಾಳು ನಿಯಮ್ನ ಢೂಂಡುಕರ್ತುಥು ಕತೋಬಿ ಲೀಲಿದುಕೊಯ್ನಿ.
ROM 9:32 ಶನಕತೊ, ಇವ್ಣೆ ವಿಶ್ವಾಸ್‌ನ ಪಾಡಿಚಾ಼ಲ್ಯುಕೊಂತೆ ಅಛ್ಛಾ಼ಕಾಮ್‍ನಾಸ್‌ ಅಖ್ಖು ಪಾಡಿ ಚಾ಼ಲ್ಯುತೆ ಇನಖ್ಹಾಜೇಸ್. ಇವ್ಣೆ ಠೋಕರ್‌ಖಾವನ ಬಂಡಾಪರ್ ಠೋಕರ್‌ಖಾದು.
ROM 9:33 ಧರ್ಮಶಾಸ್ತ್ರಮ ಅಮ್‌ಲೀಖೈರುಸ್ಕಿ, “ಹಂದೇಕ್, ಚೀಯೋನ್‌ಮ ಮೇ ಅದ್ಮಿವ್ ಧೊಕ್‌ಡಾವನ ಬಂಡನಾಬಿ ಠೊಕ್ರವಾನ ಬಂಡಾನಾಬಿ ಮ್ಹೇಲುಸ್. ಇನ ವಿಶ್ವಾಸ್‍ಕರವಾಳನ ನಿರಾಶ್‍ ಕೊಉಷೇನಿ”
ROM 10:1 ಭೇನೆ ಭೈಯೇವೊ, ಇಸ್ರಾಯೇಲ್‌ವಾಳು ರಕ್ಷಣೆ ಲೇವ್ಣುಕರಿ ಬೋಲನುಸ್ ಮಾರಿ ದಿಲ್ನಿ ಮೋಟಿಆಖ್ಹ್‌. ಮೇ ದೇವ್ನ ಇನಖ್ಹಾಜೆ ಪ್ರಾರ್ಥನೆಕರುಕರುಸ್.
ROM 10:2 ಇವ್ಣೆ ದೇವ್ನ ಪೀಠೆಜಾ಼ವಾನ ಖ್ಹಾಚಮಾಸ್ ಕೋಶಿಶ್‍ಕರಸ್. ಮೇ ಯೆಹೂದ್ಯರ್‌ನಿ ಬಾರೇಮ ಅಮ್ ಬೋಲುಸ್. ಕತೋಬಿ ಇವ್ಣಿ ಭಕ್ತಿ ಊಚಿಛಾ಼ತೆ ಅಕ್ಕಲ್‍ನ ಉಪ್ಪರ್ ಭಿಯುಕೊಯ್ನಿ.
ROM 10:3 ಇವ್ಣೆ ದೇವ್‌ಥಿ ಮಳಾತೆ ನೀತಿನ ನಾಮಾಲುಮ್‌ ಕರ್ಲಿನ್ ಶೊಂತ್‌ ನೀತಿನಾಸ್ ರಾಖಾನ ಕೋಶಿಶ್‌ ಕರುಕರಾಸ್ತೆಖ್ಹಾಜೆ ದೇವ್ನಿ ನೀತಿನ ಹೇಟುಕೊಹುಯುನಿ.
ROM 10:4 ಇನಾಮ ವಿಶ್ವಾಸ್ ಕರವಾಳು ಹರೇಕ್ ಜ಼ಣು ನೀತಿನು ತೀರ್ಪ್‌ಲೀಲೆವ್ಣುಕರಿ ಕ್ರಿಸ್ತನೆ ಧರ್ಮಶಾಸ್ತ್ರನ ಖ್ಹತಮ್ ಕರ‍್ಯೊ.
ROM 10:5 ಧರ್ಮಶಾಸ್ತ್ರಥಿ ಮಳಾಸ್ತೆ ನೀತಿನ ಬಾರೇಮ, “ಧರ್ಮಶಾಸ್ತ್ರನ ಪಾಡಿಚಾ಼ಲವಾಳೊ ಇನೇಥಿಸ್ ಜಿವ್‌ಶೆ” ಕರಿ ಮೋಶೆನೆ ಲೀಖಿರಾಖ್ಯೊಸ್,
ROM 10:6 ಕತೋಬಿ ವಿಶ್ವಾಸ್‍ಥಿ ಆಧಾರ್ ಹುಯಿರ‍್ಹೇಯ್ತೆ ನೀತಿನು ಪವಿತ್ರ ದಪ್ತರ್ ಶಾತ್ ಬೋಲಸ್‍ಕತೊ, ಕ್ರಿಸ್ತನ ಜ಼ಮೀನ್‌ಪರ್ ಲೀನ್ಆವಾನ “ಪರ್‌ಲೋಕ್ನ ಕೋಣ್ ಉಡೀನ್‍ಜಾ಼ಶೆ?”
ROM 10:7 ನಿತರ್ ಕ್ರಿಸ್ತನ ಮರ‍್ಯಾಹುಯಾಮಾಥು ಉಠಾಡಿಲೀನ್ ಆವಾನ ಕೋಣ್ ಪಾತಾಳ್ಮ ಉತ್ರಿನ್ ಜಾ಼ಶೆ?” ಕರಿ ಬೋಲಿಲ್ಯವಾನು ನಕೊ.
ROM 10:8 ಯೊ ಶಾತ್ ಬೋಲಾಸ್‍ಕತೊ, “ವಚನ್ ತಾರಕನ ಛಾ಼ ಯೋ ತಾರ ಮ್ಹೋಡಮಾಬಿ ದಿಲ್‌ಮಾಬಿ ಛಾ಼” ಯೋಸ್ ಅಪ್ಣೆ ಬೋಲಿವತಾಳಾನು ವಿಶ್ವಾಸ್‍ನು ವಚನ್.
ROM 10:9 ತೂ, “ಯೇಸುಸ್ ಪ್ರಭು” ಕರಿ ಮ್ಹೋಡೇಥಿ ಬೋಲ್‌ನು ದೇವ್ ಯೇಸುನ ಮರ‍್ಯಹುಯಮಾಥು ಉಠಾಡ್ಯೊಕರಿ ದಿಲ್ಮ ವಿಶ್ವಾಸ್‍ಕರ‍್ಯೊತೊ, ತೂ ರಕ್ಷಣೆಲೀಶ್.
ROM 10:10 ಶನಕತೊ ತುಮೆ ತುಮಾರ ದಿಲ್‌ಥಿ ವಿಶ್ವಾಸ್‍ಕರಿನ್ ನೀತಿವಾಳುಕರಿ ಗಣ್ತಿಉಶು. ಅಜು಼ ತಾರ ಮ್ಹೋಡೇಥಿ ಬೊಲಾನಿ ವಖ್ಹ್‌ತೆ ರಕ್ಷಣೆ ಲೀರಾಖ್ಯಾಸ್.
ROM 10:11 ಪವಿತ್ರ ದಪ್ತರ್‌ಮ ಬೋಲೈರ‍್ಹುತೆ ತಿಮ್, “ಇನಪರ್ ವಿಶ್ವಾಸ್ ಕರಾವಾಳೊ ಕದೇಬಿ ಖ್ಹರಮಾವ್‌ಶೆ ಕೊಯ್ನಿ”
ROM 10:12 ಶನಕತೊ ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೇತೆ ಇವ್ಣುನಾಬಿ ಕಮ್ ಜಾ಼ಖ್ಹತ್ ಕರ‍್ಯೊಕೊಯ್ನಿ, ದೇವ್ ಖ್ಹಾರಾನ ಪ್ರಭುಹುಯಿರ‍್ಹೇಸ್. ಇನ ಸ್ವೀಕಾರ್ ಕರವಾಳನ ಖ್ಹಾರಸ್ನ ಪ್ರಭು ಘಣು ಆಶೀರ್ವಾದ್‌ ಕರಸ್.
ROM 10:13 ಶನಕತೊ, ಪವಿತ್ರ ದಪ್ತರ್ ಅಮ್ ಬೋಲಸ್, “ಕೋಣ್‌ ಪ್ರಭುನು ನಾಮ್ನ ಬೋಲಸ್ಕಿ ಯೊ ಹರೇಕ್‍ನಾಬಿ ರಕ್ಷಣೆ ಉಶೆ!”
ROM 10:14 ಕತೋಬಿ ಪ್ರಭುಮ ವಿಶ್ವಾಸ್ ನಾರ‍್ಹಯುತೊ ಇನ ನಾಮ್ನ ಬೋಲಿಲ್ಯವಾನುಬಿ ಕಿಮ್? ಇವ್ಣೆ ಸಂದೇಶ್ ಖ್ಹಮ್‍ಜ್ಯುನಾತೊ ಇನಾಪರ್ ವಿಶ್ವಾಸ್ ಕರಾನುಬಿ ಕಿಮ್? ಬೋಲವಾಳೊ ನಾರ‍್ಹಯೊತೊ ಇವ್ಣೆ ಖ್ಹಮ್‍ಜಾ಼ನು ಕಿಮ್? ಸುವಾರ್ತೆನ ಫೈಲಾವಾಳೊ ನಾಮೋಕ್‌ಲಾಯೊತೊ ಬೋಲಾನುಬಿ ಕಿಮ್?
ROM 10:15 ಬೋಧನೆ ಕರವಾಳನ ಮೋಕ್‍ಲ್ಯೊನಾತೊ ಬೋಲ್‌ಶೆ ಕಿಮ್? ಇನಖ್ಹಾಜೇಸ್, “ಅಛ್ಛಿ ಸುವಾರ್ತೆ ಬೋಲವಾಳನು ಪಗ್ ಕೆತ್ರೇಕ್ಕಿ ಶನ್‌ಗಾರ್” ಕರಿ ಪವಿತ್ರದಪ್ತರ್‌ಮ ಲೀಖೈರ‍್ಹುಸ್.
ROM 10:16 ಕತೋಬಿ ಖ್ಹಾರುಸ್ ಸುವಾರ್ತೆನ ಸ್ವೀಕಾರ್ ಕರ‍್ಯುಕೊಯ್ನಿ. ಆ ಬಾರೇಮ ಯೆಶಾಯ ಪ್ರವಾದಿ “ಪ್ರಭು, ಹಮೆ ಬೋಲ್ಯಾತೆ ಸುವಾರ್ತೆನ ಕೋಣ್ ವಿಶ್ವಾಸ್ ಕರ‍್ಯು”? ಕರಿ ಬೋಲಸ್.
ROM 10:17 ಇನಖ್ಹಾಜೆ, ಬೋಲಾತೆ ಸುವಾರ್ತೆನ ಖ್ಹಮ್‍ಜಾ಼ಥಿ ವಿಶ್ವಾಸ್ ಆವಸ್, ಯೋ ಖಿವುಕತೊ ಕ್ರಿಸ್ತನಿ ಬಾರೇನಿ ವಚನ್‍ ಹುಯಿರ‍್ಹಿಸ್.
ROM 10:18 ಕತೋಬಿ ಇವ್ಣೆ ಕದೇಬಿ ಇನಖ್ಹಮ್‍ಜ್ಯು ಕೊಯ್ನಿಕಿಶು? ಕರಿ ಮೇ ಪುಛಾ಼ವ್‍ಸ್, ಇವ್ಣೆ ಖ್ಹಾಚಮಾಸ್ ಖ್ಹಮ್‍ಜಿರಾಖ್ಯುಸ್. ಪವಿತ್ರದಪ್ತರ್‌ಮ ಅಮ್ ಬೋಲಿರಾಖ್ಯುಸ್‍ಕಿ, “ಬೋಲಾವಾಳಾನಿ ಅವಾಜ಼್ ಜಗತ್ನ ಖ್ಹಾರೀಸ್‍ ಬಾಜು಼ ಜೈ಼ರ‍್ಹೂಸ್‍, ಇವ್ಣಿವಾತೆಖ್ಹಾರಿ ಜಗತ್ನ ಕಡೇಶಿಲಗೂಬಿ ಫೈಲೈರ‍್ಹುಸ್”
ROM 10:19 ಕತೋಬಿ ಇಸ್ರಾಯೇಲ್‌ವಾಳನೆ ಸುವಾರ್ತೆ ಮಾಲುಮ್ ಕರ‍್ಯಕೊಯ್ನಿಕಿ ಶು? ಕರಿ ಮೇ ಪುಛಾ಼ವ್‍ಸ್. ಪಹಿಲೆ ಮೋಶೆನೆ, “ಮೇ ಖೂಮ್‌ವಾಳೊ ಕಾಹೆತೆ ಇವ್ಣೇಥಿ ತುಮೆ ಬಳಾಪೊಕರಾನಿತರ ಕರೀಶ್. ಅಕ್ಕಲ್‌ಕೊಂತೆ ಖೂಮ್‍ವಾಳಥಿ ಮಾರು ಅದ್ಮಿ ಇರಾದೊ ಆವನಿತರ ಕರೀಶ್” ಕರಿ ಬೋಲುಸ್.
ROM 10:20 ಕತೋಬಿ ಯೆಶಾಯನೆ ಘಣು ಧಿಲ್‍ಪಥ್ಥಿ ದೇವ್ನಿ ಆ ವಾತೆನ ಬೋಲ್ಯೊ “ಮನ ಕೊ ಢೂಂಢಾನಿತೆ ಇವ್ಣುನ ಮೇ ಮಳ್ಯೊ. ಮಾರಿ ಬಾರೇಮ ನಾ ಪುಛಾ಼ವವಾಳನ ಖ್ಹಾಮ್ಣೆ ದೇಖಾಯೊ”
ROM 10:21 ಕತೋಬಿ ಯೊ ಇಸ್ರಾಯೇಲ್‍ವಾಳನಿ ಬಾರೇಮ ಮಾರಿ ವಾತ್ನ ನಾಮಾನಿನ್‌ ಆಡ್‌ಫೇಡ್‌ ಬೋಲವಾಳ ಅದ್ಮಿವೋನ ಮೇ ಖ್ಹಾರದನ್‌ಬಿ ಮ್ಹೆಲ್ಯೊಕೊಂತೆ ಹಾತ್‌ ಪಖ್ಹಾರಿ ಬುಲಾಯೊಕರಿ, ಯೋ ಬೋಲಸ್.
ROM 11:1 ಇಮ್‍ಕತೊ, ದೇವ್ ಇನ ಅದ್ಮೆವ್‍ನ ಝಿಟ್ಕಾರ್‌ದಿದೊಕಿ ಶು? ಕರಿ ಮೇ ಬೋಲುಸ್. ಕದೇಬಿ ಕೊಯ್ನಿ, ಮೇ ಏಕ್‌ ಇಸ್ರಾಯೇಲ್‌ವಾಳೊ ಹುಯಿರ‍್ಹೋಸ್. ಅಬ್ರಹಾಮ್‌ನಿ ಖಾನ್‌ದಾನ್‌ವಾಳೊ, ಬೆನ್ಯಾಮೀನ್ನ ಖೂಮ್‍ವಾಳೋಬಿ ಹುಯಿರ‍್ಹೋಸ್.
ROM 11:2 ದೇವ್, ಯೋ ಅಗಾಡಿಸ್ ಮಾಲುಮ್ ಕರಿರಾಖ್ಯೊತೆ ಇಸ್ರಾಯೇಲ್‌ ಅದ್ಮೆವ್‌ನ ಝಿಟ್ಕಾರ್‌ ದಿದೊಕೊಯ್ನಿ. ದೇವ್ನಿ ವಚನ್ ಎಲೀಯನಿ ಬಾರೇಮ ಶಾತ್ ಬೋಲಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿಶು?
ROM 11:3 “ಪ್ರಭು, ಇವ್ಣೆ ತಾರ ಪ್ರವಾದಿಖ್ಹಾರನ ಮಾರಿನಾಖ್ಯು. ಅಜು಼ ತಾರಿ ಚಾ಼ಚ಼ರ್‌ನ ಫೋಡಿನಾಖ್ಯು. ಮೇ ಎಕ್ಕಸ್‍ಜ಼ಣೊ ಬಚಿರ‍್ಹೋಸ್. ಇವ್ಣೆ ಮಾರ ಜಾನ್‌ ಕಾಡಿನಾಖಿದ್ಯವಾನ ಕೋಶಿಶ್ ಕರುಕರಸ್”
ROM 11:4 ದೇವ್ನಿ ಜ಼ವಾಬ್ ಶಾತ್‍ಕತೊ, “ಬಾಳನ ಮೂರತ್ನ ಅಡ್‍ಪಡ್ಯುಕೊಂತೆ ಖ್ಹಾತ್‍ಹಜಾ಼ರ್‌ ಪರ್ಖ್ಹಾನ ಮಾರಖ್ಹಾಜೆ ಬಚಾ಼ಡಿರಾಖ್ಯೊಸ್.
ROM 11:5 ಯೋಸ್ ಪರಕ್ಮ ಆ ಹಗಾಮ್ಮಾಬಿ ವಾರ್‌ಖ್ಹೇಥಿ ಚೂ಼ಣೈರ‍್ಹುತೆ ಇಸ್ರಾಯೇಲ್‍ವಾಳನು ಜಾನ್ನ ದೇವ್ ಬಚಾ಼ಡ್‌ಶೆ.
ROM 11:6 ಯೋ ಚು಼ನಾವ್ಣಿ ಕಾಮ್ನಿ ಅದಾರ್‌ಪರ್ ಕಾಹೆ, ವಾರ್‌ಖ್ಹೇಥಿಸ್ ಹುಯಿರ‍್ಹೇಸ್. ಕಾಮ್‍ಥಿ ಯೋ ಹುಯಿರ‍್ಹಯುತೊ ಅಜು಼ ಕದೇಬಿ ದೇವ್ನಿ ಕೃಪಾವರ ಕೃಪೆ ಹುಯಿರ‍್ಹಿಶೆಕೊಯ್ನಿ.
ROM 11:7 ಇಮ್‍ಕತೊ ಶಾತ್? ಇನಖ್ಹಾಜೆ ಇಸ್ರಾಯೇಲ್‍ನೆ ಢೂಂಡ್ಯಹುಯಾನ ಲೀಲಿದುಕೊಯ್ನಿ. ಕತೋಬಿ ಇವ್ಣಾಮ ಚೂ಼ಣೈಗಯಹುಯಾನೆ ಲೀಲಿದು; ಉಬ್ರಿಹುಯುಖ್ಹಾರು ಕಠಣ್ ದಿಲ್‍ವಾಳುಹುಯು.
ROM 11:8 ಪವಿತ್ರ ದಪ್ತರ್‌ಮ ಲೀಖೈರ‍್ಹಯುತೆ ತಿಮ್ “ದೇವ್ನೆ ಇವ್ಣುನ ಮಂಕ್ ಆತ್ಮಾನ ದೇಖಾಕೊಯ್ನಿತೆ ಡೋಳಾನಬಿ ಅಜು಼ ಖ್ಹಮ್‌ಜಾ಼ಕೊಯ್ನಿತೆ ಕಾನ್ನ ದಿದೊ. ಆ ಹಮ್ಕೆಲಗೂಬಿ ಇಮ್ಮಸ್ ಛಾ಼.”
ROM 11:9 ದಾವೀದನೆ, “ಇವ್ಣು ಮಿಝ಼್‌ವನಸ್ ಇವ್ಣುನ ಫಾಖ್ಹೊಬಿ, ಜಾ಼ಳೂಬಿ, ಇನಾಮ ಖ್ಹಪ್ಡಿ ಪಟ್ಕಿನ್ ನಿಶತ್‌ಲ್ಯವಾದೆ!
ROM 11:10 ಇವ್ಣ ಡೋಳ ಭುಂಬ್‌ಳಹುಯಿನ್ ನಕೊ ದೆಖಾವದೆ, ಅಜು಼ ಕದೆಕದೇಬಿ ಇವ್ಣೆ ಖ್ಹತಾಪ್ಣಿಮ ಪಡಿಜಾ಼ವಾದೆ” ಕರಿ ಬೋಲಸ್.
ROM 11:11 ಇಮ್‍ಕತೊ ಉಟ್ನುನಾತೆ ಪರಕ್ಮ ಯೆಹೂದ್ಯರ್ ಠೋಕರ್‌ಲಾಗಿನ್ ಇವ್ಣೆ ರಡ್ಕಿಗುಕಿಶು? ಕಾಹೆ ಇಮ್‌ ಕಾಹೆ! ಶನಕತೊ ಇವ್ಣಿ ಗಲತ್‌ನಖ್ಹಾಜೆ ಯೆಹೂದ್ಯರ್‌ನ ಪೇಟ್ನ ಬಳಾಪೊ ಹುವಾನಖ್ಹಾಜೆ ರಕ್ಷಣೆ ಯೆಹೂದ್ಯರ್‌ಕಾಹೆತೆ ಅದ್ಮಿಪರ್ ಆಯು.
ROM 11:12 ಕತೋಬಿ ಇವ್ಣಿ ಗಲತ್‌ಥಿ ಜಗತ್ನ ಘಣು ಆಶೀರ್ವಾದ್‌ ಆಯಿನ್, ಇವ್ಣಿ ಹಾರ್‌ಥಿ ಯೆಹೂದ್ಯರ್‌ಕಾಹೆತೆ ಅದ್ಮೆವ್‍ನ ಘಣು ಆಶೀರ್ವಾದ್‌ ಮಳಿರ‍್ಹಯು ಉಷೇತೊ ಯೋಖ್ಹಾರುಸ್ ಯೆಹೂದ್ಯರ್ ಅಯಿನ್ ಎಕ್ಟುಹುಯೂತೊ ಕೆತ್ರೆ ಮಹಾನ್‍ರ‍್ಹಿಶೆ.
ROM 11:13 ಯೆಹೂದ್ಯರ್‌ಕಾಹೆತೆ ತುಮಾರಿಜೋ಼ಡ್ಮ ವಾತೆಬೋಲುಕರುಸ್; ಮೇ ಯೆಹೂದ್ಯ ಕಾಹೆತೆ ಅದ್ಮೆವ್‍ನ ಅಪೊಸ್ತಲ ಹುಯಿರ‍್ಹವಾನಿ ಪರಕ್ಮ ಮಾರಿ ಸೇವೆನಿ ಬಾರೇಮ ಖ್ಹರವ್‌ಕರುಸ್.
ROM 11:14 ಕಿಮ್‌ಕತೊ ಮೆ ಮಾರಶೊಂತ್ ಅದ್ಮಿಯೆವ್‌ಮ ಬಳಾಪನ ಜಾ಼ಖ್ಹತ್ ಕರೀನ್ ಇವ್ಣಮ ಥೋಡಜ಼ಣಾನ ತೋಬಿ ರಕ್ಷಣೆಮ ಲ್ಯಾವ್ಣು.
ROM 11:15 ಶನಕತೊ ಇವ್ಣುನ ಝಿಟ್ಕಾರಾಥಿ ಜಗತ್‌ ದೇವ್ನಿಜೋ಼ಡ್ಮ ಮಳೈದ್ಯಾವ ಖ್ಹರ್ಕು ರ‍್ಹಯುತೊ, ಇವ್ಣು ಸ್ವೀಕಾರ್, ಮರ‍್ಯುಹುಯು ಜಿವ್ತುಹುಯಿನ್ ಉಠೀನ್ ಆವಾನಿತರ ರ‍್ಹಿಶೆಕೊಯ್ನಿಕಿ ಶು?
ROM 11:16 ರೋಟಾನು ಫೈಲ ಟುಕ್ಡಾನ ದೇವ್ನ ದಿದೋತೊ, ಯೊ ಅಖ್ಖೋ ಏಕ್‍ರೋಟೊಸ್ ಇನುಸ್ ಹುಯಿಗು. ಝಾ಼ಡ್‌ನಿ ಜ಼ಡ್‌ ಪವಿತ್ರ ಹುಯಿರ‍್ಹುತೊ ಝಾ಼ಡ್‌ನಿ ಡಾಳಿಯೇಬಿ ಇನೀಸ್‍ ಹುಯು.
ROM 11:17 ಖ್ಹಾಚಮಾಬಿ ಫುಟಿರ‍್ಹುತೆ ಆಲಿವ್ ಝಾ಼ಡ್‌ನಿ ಡಾಳಿಯೆ ಟುಟಿಗಯು, ಅಜು಼ ಝಾ಼ಡಿನು ಆಲಿವ್ ಝಾ಼ಡ್‌ನಿ ಡಾಳೀನಿಘೊಣಿ ಹುಯಿರೋತೆ ತುನ ಇನಿ ಝ಼ಗೋಮ ಖಶಿ ಭಾಂದಿರಾಖಾತೆ ಯೋ ಖ್ಹಾಚ ಆಲಿವ್ ರಖ್ಹ್‌ನಿ ಜ಼ಡ್‌ಮ ಯೋ ಭಾಗ್‌ಲೀರಾಖ್ಯುತೊಬಿ ಯೋ ಡಾಳಿಯೇವ್‌ನ ಮ್ಹೇಲಿನ್ ತುನ ಚಿಕಾವನ ಉಪ್ಪರ್ ತೂ ಡಾಳಿನಿಬಾರೇಮ ಭಡೈಲೆನಕೊ.
ROM 11:18 ಭಡೈಲಿದೋತೊ, ತೂ ಯೋ ಜ಼ಡ್ನ ಆಧಾರ್‌ಕಾಹೆ. ಯೋ ಜ಼ಡ್‌ ತುನ ಆಧಾರ್ ಹುಯಿರ‍್ಹಿಶೆ ಎತ್ರೇಸ್.
ROM 11:19 ಇಮ್‍ಕತೊ ತೂ, “ಖಶಿ ಭಂದಾವನಿತರ ಥೋಡು ಡಾಳಿಯೆ ಟುಟಿಗೈಯೇ.” ಕರಿ ಬೋಲಿಶ್.
ROM 11:20 ಯೊ ಬರೋಬರ್, ಕತೋಬಿ ಇವ್ಣೆ ವಿಶ್ವಾಸ್‌ಕೊಂತೆ ಟುಟಿಗಯು. ತೂತೋಬಿ ವಿಶ್ವಾಸ್‍ಥಿ ಭಿಯೋಸ್. ಹಂಕಾರ್ ನಕೊಕರ್ತೆ ಡರ್‌ರ‍್ಹವಾದೆ.
ROM 11:21 ಶನಕತೊ ದೇವ್ ಪೈದಾಖ್ಹ್‌ನಿ ಡಾಳಿಯೇನಸ್ ಬಚಾ಼ಡ್ಯೊ ಕೊಯ್ನಿಕತೊ ತುನಾಬಿ ಬಚಾ಼ಡ್‌ಶೆ ಕೊಯ್ನಿ.
ROM 11:22 ಇನಖ್ಹಾಜೆ ದೇವ್ನಿ ಗೋರ್‌ನಾಬಿ, ನಿಶತ್ನಾಬಿ ದೇಕ್. ಪಟ್ಕಿಜಾ಼ವಳಾನ ಇನಿ ನಿಶತ್‌ ಮಳ್‍ಶೆ. ತೂ ಇನಿ ಗೋರ್‌ಮ ಭಡವಾಳೊ ಉಷೇತೊ, ತಾರಪರ್ ದೇವ್ನಿ ಗೋರ್‌ ವತಾಳ್‌ಶೆ. ನಾಹುಯುತೊ, ತೂ ಜಿನುಬಿ ಟುಟಿಜೈಶ್.
ROM 11:23 ಇವ್ಣೆಜಿನೂಬಿ ಬಿಜೂ಼ಬಿ ಅವಿಶ್ವಾಸ್‌ಮ ಭಡ್ಯುನಾತೊ ಖಶಿ ಭಂದೈಜಾ಼ಶೆ. ಶನಕತೊ ಇವ್ಣುನ ಬಿಜು಼ಪಾಚು಼ ಖಶಿಭಂದಾವನ ದೇವ್ ತಾಖತ್‌ವಾಳೊ ಹುಯಿರ‍್ಹೋಸ್.
ROM 11:24 ಕಿಮ್ ರ‍್ಹಯುತೋಬಿ ಝಾ಼ಡಿನು ಆಲಿವ್ ಝಾ಼ಡ್‌ಥಿ ಅಛ್ಛು಼ ಝಾ಼ಡ್‌ನು ಡಾಳಿಯೇಹುವಾನು ಮಾಮುಲಿ ಕಾಹೆ. ಕತೋಬಿ ಯೆಹೂದ್ಯ ಕಾಹೆತೆ ತುಮೆ ಝಾ಼ಡಿನು ಆಲಿವ್‌ಝಾಡ್‍ಥಿ ಕತ್‍ರೈಹುಯು ಡಾಳಿಯೇರ‍್ಹೀನ್ ಅಛ್ಛು಼ ಆಲಿವ್ ಝಾ಼ಡ್‌ಣ ಖಶಿ ಭಂದೈರ‍್ಹಾಸ್. ಯೆಹೂದ್ಯರ್‌ತೊಬಿ ಅಛ್ಛು಼ ಆಲಿವ್ ಝಾ಼ಡ್ಮ ಫುಟಿಹುಯಿ ಡಾಳಿಯೆ. ಇನಖ್ಹಾಜೆ ಇವ್ಣೆ ಇವ್ಣ ಶೊಂತ್ ಝೂ಼ಂಡ್‌ನ ಪಾಛು಼ ಮಳಿಜಾ಼ವಾನು ಘಣು ಶುಲ್ಬ ಹುಯಿರ‍್ಹಿಶೆ.
ROM 11:25 ಭೇನೆ ಭೈಯೇವೊ, ಏಕ್‌ ಗಪ್ಲತ್‌ನಿ ವಾತೆ ಖ್ಹಾಚು಼ಛಾ಼ ಇನ ತುಮೇಬಿ ಖ್ಹಮಜ಼್‌ಣುಕರಿ ಆಖ್ಹ್‌ಕರುಸ್. ಶನಕತೊ ತುಮೆ ಕೆತ್ರೆ ಅಕ್ಲಿ ಹುಯಿರಾಸ್‍ಕರಿ ಮಾಲುಮ್ ಹುವಾಸ್. ಯೋ ಶಾತ್‍ಕತೊ, ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ ದೇವ್‌ಕನ ಆವಾಲಗು ಖಲಿ ಇಸ್ರಾಯೇಲ್‌ವಾಳ ಅದ್ಮಿ ಇವ್ಣ ದಿಲ್ನ ಕಠಣ್ ಕರಿರಾಖಸ್.
ROM 11:26 ಅಮ್ ಧರ್ಮಶಾಸ್ತ್ರಮ ಲೀಖೈರ‍್ಹುತೆ ಪರಕ್, ಇಸ್ರಾಯೇಲ್‌ವಾಳು ಖ್ಹಾರು ರಕ್ಷಣೆ ಲಿಶೆ, “ಛುಟ್ಕಾರ್ ದ್ಯವಾಳೊ ಚೀಯೋನ್‍ಥಿ ಆವ್‌ಶೆ, ಯೋ ಯಾಕೋಬವಾಳಾನ ಖೂಮ್‍ಥಿ ದುಷ್ಟಬುದ್ದಿನ ಕಾಡಿನಾಕ್‌ಶೆ.
ROM 11:27 “ಮೇ ಇವ್ಣಿ ಜೋ಼ಡ್ಮ ಕರ‍್ಯೊತೆ ಒಪ್ಪಂದ ಇವ್ಣ ಪಾಪ್ನ ಮೆ ಕಾಡಿನಾಖನಿ ವಖ್ಹ್‌ತೆ ಪೂರಉಷೆ”
ROM 11:28 ಶನಖ್ಹಾಜೆಕತೊ ಇವ್ಣೆ ಸುವಾರ್ತೆನ ಝಿಟ್ಕಾರ‍್ಯು, ಅಜು಼ ಯೆಹೂದ್ಯರ್ ಕೊಂತೆ ಇವ್ಣೆ ತುಮಾರೇಥಿ ದೇವ್ನ ವಿರೋದಿಹುಯು. ಕತೋಬಿ ದೇವ್ನಿ ಚು಼ನಾವ್ಣಿನಿ ಕಾರಣ್‍ಥಿ ಇವ್ಣೆ ಇನ ಪ್ಯಾರ್‌ವಾಳ ಹುಯಿರಾಸ್,ಇನ ಪಿಳ್ಗಿವಾಳು ಕಾರಣ್‍ಹುಯಿರ‍್ಹುಸ್.
ROM 11:29 ಶನಕತೊ ದೇವ್ ವರಾನ ದಿದೋತೆ ಇನಖ್ಹಾಜೇಬಿ, ಅದ್ಮೆವ್‍ನ ಬುಲಾಯೋತೆ ಇನಖ್ಹಾಜೇಬಿ ದಿಲ್‌ಬದ್ಲಾವವಾಳೊ ಕಾಹೆ.
ROM 11:30 ಏಕ್‌ ಹಗಾಮ್ಮ ತುಮೆ ಇನ ವಿಧೇಯ ಕೋಹುಯಿರಾಥಾನಿ. ಇವ್ಣು ಅವಿಧೇಯತೆಥಿ ತುಮೆ ಹಮ್ಕೆ ದೇವ್ನಿ ದಯಾ ಲೀರಾಖ್ಯಾಸ್,
ROM 11:31 ಇಮ್ನಿಸ್ ಪರಕ್ಮ ಇವ್ಣೆ ಹಮ್ಕೆ ಅವಿಧೇಯ ಹುಯುತೋಬಿ ತುಮೂನ ಕಿಮ್ ಗೋರ್‌ ವತಾಳ್ಯೊಕಿ ತಿಮ್ಮಸ್ ಹಮ್ಕೆ ಇವ್ಣುನ ಗೋರ್‌ ವತಾಳವಾಳೊ ಹುಯಿರ‍್ಹೋಸ್.
ROM 11:32 ದೇವ್ ಯೋಖ್ಹಾರಾನ ದಯ ವತಾಳನಖ್ಹಾಜೆ ಖ್ಹಾರಾನ ಅವಿಧೇಯತೆಮ ಭಾಂದಿರಾಖ್ಯೋಸ್.
ROM 11:33 ಆಹಾ! ದೇವ್ನಿ ಗ್ಯಾನ್, ಅಕ್ಕಲ್‌ನು ಧನ್‍ದೌಲತ್ ಕೆತ್ರೆ ಗಧಾರ್‌ನು! ದೇವ್ನು ನ್ಯಾಯತೀರ್ಪ್‌ನ ಕೋಣ್‌ಬಿ ಛೋ಼ಡಿವತಾಳನ ಹುವಾಕೊಯ್ನಿ. ಇನ ಮಾರಗ್‌ನ ಢೂಂಡಿಕಾಡನ ಕಿನೇಥೀಬಿ ಹೋಯಿಕೊಯ್ನಿ!
ROM 11:34 ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಪ್ರಭುನ ದಿಲ್ನ ಮಾಲುಮ್ ಕರಾವಾಳೊ ಕೋಣ್? ನತರ್ ದೇವ್ನ ಅಮ್ಮಸ್ ಕರ್ನುಕರಿ ಬೋಲಿವತಾಳವಾಳು ಕೋಣ್?
ROM 11:35 ದೇವ್‍ಥಿ ಪಾಛು಼ ಮಾಂಗಿಲ್ಯವಾನ ಇನ ದಿರಾಖವಾಳೊ ಕೋಣ್?
ROM 11:36 ಶನಕತೊ ದೇವ್‍ಥಿ ತಮಾಮ್‍ನಾಸ್ ಉಬ್ಜಿರ‍್ಹುಸ್.ಖ್ಹಾರುಸ್ ಇನೇಥಿಸ್ ಇನಖ್ಹಾಜೇಸ್ ರ‍್ಹೇಸ್. ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆಹುವಾದೆ! ಆಮೆನ್.
ROM 12:1 ಇನಖ್ಹಾಜೆ ಭೇನೆ, ಭೈಯೇವೊ, ದೇವ್ನಿ ಗೋರ್‌ಥಿ ಗಿಂಗೈಲ್ಯವಾನು ಶಾತ್‍ಕತೊ, ತುಮಾರು ತುಮೇಸ್ ಶರೀರ್‌ನ ದೇವ್ನ ಪರಿಶುದ್‌ಬಿ ಖ್ಹರಾವ್ಣಿತರಾಬಿ ಹುಯಿರ‍್ಹವಾನು ಜಿವ್‌ತಜಾನ್ನ ಬಲಿದೀನ್ ಸಮರ್ಪಣ್‌ಕರೊ. ಆಸ್‌ತುಮೆ ದೇವ್ನಕರಾನಿ ಖ್ಹಾಚಿ ಆರಾದನೆ,
ROM 12:2 ಆ ಜಗತ್‌ವಾಳು ಚಾ಼ಲ್ ಚ಼ಲಣ್ಣಾ ನಾ ಪಾಡಿಚಾ಼ಲ್ನುತೆ ನವ ದಿಲ್‌ಥಿ ಬದ್ಲಿನ್ ಪರಲೋಕ್‌ನ ಖ್ಹಯಾಲ್‌ವಾಳ ಹುಯಿ‍ರ‍್ಹೆವೊ. ಅಮ್ ರ‍್ಹಿಯಾತೊ ದೇವ್ನ ಪರ್ಖಿನ್‌ ಅಛ್ಛಾ಼ನಾಬಿ, ಇಷ್ಟರ‍್ಹವಾನುಬಿ ಕಳಂಕ್‌ ಕೊಂತೇಬಿ ಖಿವುಕರಿ ಮಾಲುಮ್‌ ಕರ‍್ಲಿಶು.
ROM 12:3 ದೇವ್ನೆ ಮನ ಕೃಪಾಥಿ ದೀರಾಖ್ಯೋತೆ ಸೇವೆನಖ್ಹಾಜೆ ತುಮಾರಮ ಹರೇಕ್ ಜ಼ಣಾನ ಮೇ ಬೋಲಾನು ಶಾತ್‍ಕತೊ, ತುಮಾರಿ ಲ್ಹಾಯೇಕ್‌ನ ಮೀರಿನ್ ತುಮೆ ಸೋಚ್ನುನಾತೆ ದೇವ್ ಏಕೇಕ್‌ ಜ಼ಣಾನ ಕಿಮ್‌ಕಿಮ್‌ನು ವಿಶ್ವಾಸ್‌ನಿ ತಾಖತ್ನ ದೀರಾಖ್ಯೊಸ್ಕಿ ಇವ್ಣಿ ಬಾರೇಮ ಬರೋಬರ್‌ಥಿ ಮಾಲುಮ್‌ಕರಿರಾಖದೆ.
ROM 12:4 ತುಮಾರಮ ಹರೇಕ್ ಜ಼ಣಾನಾಬಿ ಕೈಏಕ್ ಭಾಗ್‍ಥಿ ಏಕ್‌ ಶರೀರ್ ಮಳ್ಯುಹುಯು ಹುಯಿರ‍್ಹಾಸ್. ಅಜು಼ ಕಿಮ್ ಆ ಆಖ್ಖಾ ಭಾಗ್ನಾಬಿ ಎಕ್ಕಸ್‍ಕಾಮ್ ಕೊ ರ‍್ಹೆಯ್ನಿಕಿ,
ROM 12:5 ಯೋಸ್ ಪರಕ್ಮ ಕೈಯೇಕ್‍ಜ಼ಣ ಹುಯಿರಾತೆ ಅಪ್ಣೆ ಕ್ರಿಸ್ತಮ ಎಕ್ಕಸ್ ಶರೀರ್ ಹುಯಿರ‍್ಹಿಯೇಸ್. ಅಜು಼ ಅಪ್ಣೆ ಅಖ್ಖಾ ಎಕ್ಕಸ್ ಶರೀರ್‌ನ ಭಾಗ್‍ಹುಯಿರ‍್ಹೆಯೇಸ್.
ROM 12:6 ದೇವ್ ಅಪ್ಣುನ ಕೃಪೆ ಕರ‍್ಯೊತೆ ಇಮ್‌ ಅಪ್ಣೆ ಅಲಕ್ ಅಲಕ್ ವರಾನ ಲೀರಾಖ್ಯಸ್. ಏಕ್‍ಜ಼ಣಾನ ಪ್ರವಾದನೇನು ಪರಕ್‌ ಹುಯಿರ‍್ಹುತೊ, ಇನ ಇನು ವಿಶ್ವಾಸ್‍ನಿಮತ್‌ ಬೋಲಾದೆ.
ROM 12:7 ಯೊ, ಸೇವೆಕರವಾಳೊ ಉಶೇತೊ, ಸೇವೆ ಕರ‍್ವಾದೆ. ಇನ ಶಿಕಾಡನು ವರ ಉಶೇತೊ ಯೊ ಶಿಕಾಡಿದ್ಯವಾದೆ.
ROM 12:8 ಯೊ ಹುಮ್ಮಖ್ಹ್‌ ದೆವಾಳೊ ಉಷೇತೆ, ಹುಮ್ಮಖ್ಹ್‌ ದ್ಯವಾದೆ. ಧರಮ್ ದ್ಯವಾನು ವರ ಉಷೇತೊ ಯೋ ಛು಼ಟಾದಿಲ್‍ಥಿ ದ್ಯವಾದೆ. ಅದಿಕಾರಿ ಉಶೇತೊ, ಯೋ ನಿಯ್ಯಥ್ಥಿ ಚಾ಼ಲದೆ, ಗೋರ್‌ ವತಾಳವಾಳೊ, ಇನ ಖುಷಿಥಿಬಿ ಕರಾದೆ.
ROM 12:9 ತುಮಾರಿ ಪ್ಯಾರ್ ಪಾಕ್‌ ದಿಲ್‌ಥಿ ರ‍್ಹವಾದೆ. ಖರಾಬ್‍ಕಾಮ್ನ ವಹೇರ್‌ಕರೀನ್, ಅಛ್ಛಾ಼ನ ಧರಿರಾಖೊ.
ROM 12:10 ವಿಶ್ವಾಸಿ ಭೇನ್ ಭೈಯೇನ ಏಕ್‌ಥಿಏಕ್ ಪ್ಯಾರ್ ಕರೊ, ಮರ್ಯಾದಿ ದ್ಯವಾಮ, ಏಕ್‌ಥಿಏಕ್‌ ಖ್ಹಾಮೆರ‍್ಹೇವೊ.
ROM 12:11 ಮ್ಹಿನತ್ ಕರೀನ್ ರಾಬೊ ವಳ್‍ಶಿ ನಕೊಖಾವೊ. ತುಮಾರ ಹುಮ್ಮಖ್ಹ್‌ನ ಮನ್‌ಥಿ ಪ್ರಭುನಿ ಸೇವೆಕರೊ.
ROM 12:12 ಕ್ರಿಸ್ತವಾಳು ಭರೋಖ್ಹಾನಿ ಮಹಾ ಇನಾಮ್ನ ಖ್ಹಯಾಲ್ ಕರೀನ್ ಖುಷಿಥಿರ‍್ಹವಾಳಾಬಿ, ಖ್ಹತಾಪ್ಣಿಮ ಖ್ಹಮಾಳಿಲ್ಯಾವಾಳಾಬಿ, ಅಖ್ಖಿ ವೇಳ್ಮ ಘಟ್‍ದಿಲ್‌ಥಿ ಪ್ರಾರ್ಥನೆ ಕರ್ತರ‍್ಹೇವೊ.
ROM 12:13 ಜ಼ರೂರತ್ ರ‍್ಹವಾಳ ದೇವ್ನ ಅದ್ಮಿನಿ ಜೋ಼ಡ್ಮ ತುಮಾರಕನ ಛಾ಼ತೆ ಇನಾಮ ಮದತ್ ಕರೊ, ಮ್ಹೇಮಾನ್ನ ಘರ್‌ಮ ಬುಲೈನ್ ಉಪಚಾರ್ ಕರೊ,
ROM 12:14 ತುಮೂನ ಖ್ಹತಾವವಾಳನ,ದೇವ್‌ಕನ ಆಶೀರ್ವಾದ್‌ ಕರೊ ಶಾಪ್ ನಕೊದೆವೊ.
ROM 12:15 ಖುಷಿಕರವಾಳನಿ ಜೋ಼ಡ್ಮ ಖುಷಿಕರೊ. ರೋವವಾಳಾನಿ ಜೋ಼ಡ್ಮ ರೋವೊ.
ROM 12:16 ಏಕ್‌ಥಿಏಕ್ ಎಕ್ಕಸ್ ದಿಲ್‌ವಾಳ ಹುಯಿರ‍್ಹೇವೊ. ತುಮೆ ದಿಲ್ಮ ಹಂಕಾರಿ ನಾ ರ‍್ಹೇವ್ಣುತೆ, ಅಖ್ಖಾನಿ ಜೋ಼ಡ್ಮ ಮಳಿನ್ ರ‍್ಹವೊ. ತುಮೇಸ್ ಅಕ್ಲಿಕರಿ ನಕೊಲ್ಹಾವೊ.
ROM 12:17 ಏಕ್‌ ಹಲ್ಲ ಕೋಣ್ ತೋಬಿ ತುಮಾರ ಜೋ಼ಡೆ ಖರಾಬ್ ಚಾ಼ಲ್‌ಥಿ ಚಾ಼ಲಿಲಿದುತೊ ಬದಲ್ ಖರಾಬ್ ನಕೊಕರೊ. ಖ್ಹಾರಾನಿ ನಜ಼ರ್‌ಮಾಬಿ ಮರ್ಯಾದಿಥಿ ಶಾತ್‌ ಛಾ಼ಕಿ ಇನಾಸ್ ಕರೊ.
ROM 12:18 ತುಮೂನ ಹುವಾಯೆತ್ರೆ ಖ್ಹಾರಾಸ್‍ನಿ ಜೋ಼ಡ್ಮ ಸಮಾಧಾನ್‌ಥಿ ರ‍್ಹವೊ.
ROM 12:19 ಮಾರ ಪ್ಯಾರ್‌ನ ದೋಸ್ತಿವೊ, ಬದಲ್‌ನ ಬದಲ್ ನಾಕಾಡ್ನುತೆ, ಇನ ದೇವ್ನ ಇರಾದಕನ ಮ್ಹೇಲಿದೆವೊ. ಶನಕತೊ, “ಫೇಡವಾನು ಮಾರು ಕಾಮ್. ಮೇಸ್ ಪ್ರತಿಫಲ್‌ ದಿಶ್ ಕರಿ ಪ್ರಭು ಬೋಲಿರಾಖ್ಯಸ್‌ಕರಿ ಪವಿತ್ರ ಪುಸ್ತಕ್‌ಮ ಲಿಖೈರ‍್ಹುಸ್.
ROM 12:20 ಕತೋಬಿ,ಪವಿತ್ರ ಪುಸ್ತಕ್ ಅಮ್ ಬೋಲಸ್ಕಿ, “ತುಮಾರು ವಹೇರ‍್ಯು ಭುಕ್ಯು ಆಯೂತೊ ಇನ ಖಾಣುದೆ. ಯೋ ತರಖ್ಹಿಗಯೊ ಉಶೇತೊ ಪಿಯಾನ ದೇ. ಅಮ್‍ಕರಾಥಿ ಇನ ಖ್ಹರಮ್‍ಥಿ ಇಂಗಾಠೊ ಪಡಾಖ್ಹರ್ಕು ಉಷೆ.”
ROM 12:21 ಖರಾಬ್‍ಫನೈಥಿ ನಕೊ ಹರಿಜಾ಼ವೊ. ಖರಾಬ್ ಫನೈನ ಅಛ್ಛಾ಼ಥಿ ಜೂತಿಲೇವೊ.
ROM 13:1 ಹರೇಕ್‍ಜ಼ಣುಬಿ ಇನ ಉಪ್ಪರ್‌ಲ್ಯ ಅಧಿಕಾರಿಯೇನ ಅಧೀನ್ ಹುಯಿರ‍್ಹೇಣು; ಶನಕತೊ ದೇವ್‍ಥಿ ಪಣ್ಕಿ ಏಕ್‍ಜ಼ಣಾನಬಿ ಅದಿಕಾರ್ ರ‍್ಹೇಯಿಕೊಯ್ನಿ; ಛಾ಼ತೆ ಅದಿಕಾರ್ ದೇವ್‍ಥೀಸ್‍ ಆಯಿರ‍್ಹುಸ್.
ROM 13:2 ಇನಖ್ಹಾಜೆ ಅದಿಕಾರ್‌ನ ವಿರೋದ್ ಹುವವಾಳು ಅದ್ಮಿ ಖ್ಹಾಚಮಾಸ್ ದೇವ್ನಿ ನಿಯಮ್ನಾಸ್ ವಿರೋದ್ ಹುಯಿರ‍್ಹುಸ್. ಖ್ಹರ್ಕಾರ್‌ನ ಖ್ಹಾಮ್ಣೆ ಹುವವಾಳು ಇನುಯೋಸ್ ನ್ಯಾಯತೀರ್ಪ್‌ ಲೀಲೇಸ್.
ROM 13:3 ಶನಕತೊ ಖರಾಬ್‌ನ ಕರಾವಾಳನ ಅದಿಕಾರಿಯೇವ್‍ನು ಡರ್‌ರ‍್ಹೇಸ್ ಪಣ್ಕಿ, ಅಛ಼್ಛು ಕರವಾಳನ ಕಾಹೆ. ಅದಿಕಾರಿಯೇಥಿ ತೂ ಡರ್‌ಕೊಂತೆ ರ‍್ಹವಾನು ಆಖ್ಹ್‌ಕರಸ್‍ಕಿ ಶು? ಅಛ಼್ಛನಕರ್. ತದೆ ಇವ್ಣೇಥಿ ತುನ ಖ್ಹರಾವ್ಣಿ ಮಳ್‍ಶೆ.
ROM 13:4 ಶನಕತೊ ಯೋ ತುನ ಅಛ಼್ಛು ಕರಾನಖ್ಹಾಜೆ ಛಾ಼ತೆ ದೇವ್‌ನೊ ಸೇವಕ್ ಹುಯಿರ‍್ಹೋಸ್. ಕತೋಬಿ ತೂ ಖರಾಬ್ನ ಕರಾವಾಳೊ ಹುಯಿರ‍್ಹೋತೆ ಡರಿನ್ ರ‍್ಹೇಣು. ಕತೋಬಿ ಯೋ ಚುಪ್ಕೆ ಅದಿಕಾರ್ ಅದಿಕಾರ್‌ನೊ ಡಂಡೊ ಧರಿರಾಖ್ಯೊಕೊಯ್ನಿ. ಯೋ ದೇವ್‌ನೊ ಸೇವಕ್ ಹುಯಿರ‍್ಹಿನ್ ಖರಾಬ್‌ನ ಕರವಾಳಾನ ದೇವ್ನಿನಿಶತ್‍ ದೇಸ್.
ROM 13:5 ಇನಖ್ಹಾಜೆ ಖಲಿ ದೇವ್ನಿ ನಿಶತ್ನಖ್ಹಾಜೆಕರಿ ಕಾಹೆ, ದಿಲ್ನಿಸಾಕ್ಷಿನಖ್ಹಾಜೇಬಿ ಅಧಿಕಾರಿಯೇನ ಅಧೀನ್‍ ಹುಯಿರ‍್ಹವಾನು ಜ಼ರೂರತ್ ರ‍್ಹೇಸ್,
ROM 13:6 ಅನಖ್ಹಾಜೆಥೀಸ್ ತುಮೆ ಶುಂಕ ದೆವ್‌ಕರಾಸ್. ಶನಕತೊ ಅಧಿಕಾರಿಖ್ಹಾರು ದೇವ್ನ ಸೇವಕ್ ಹುಯಿರ‍್ಹಿನ್ ಯೋ ಕಾಮಸ್‌ ಕರಾವಾಳ ಹುಯಿರೇಸ್.
ROM 13:7 ತುಮೆ ಕಿನಶಾತ್‍ ದೇವ್ಣುಕಿ ಯೋ ದೇವೊ, ಕಿನ ಕಂದಾಯಕಿ ಇನ ಕಂದಾಯ ದೇವೊ, ಕಿನ ಶುಂಕಕಿ ಇವ್ಣುನ ಶುಂಕದೆವೊ. ಅಜು಼ ಕಿನ ಡರ‍್ನುಕಿ ಇನ ಡರೊ, ಕಿನ ಅಧೀನ್‌ಕಿ ಇನ ಅಧೀನ್ ರ‍್ಹವೊ, ಕಿನ ಮರ್ಯಾದಿಕಿ ತಿನ ಮರ್ಯಾದಿ ದೆವೊ.
ROM 13:8 ಏಕ್‌ಥಿಏಕ್ ಪ್ಯಾರ್‌ಕರ‍್ನುಕರಿ ಬೋಲಾನು ಕರಜ಼ಸ್ ಪಣ್ಕಿ ತುಮೂನ ಬಿಜು಼ ಖೆವು ಕರಜ಼್ ನಾರ‍್ಹೇವ್ಣು. ಶನಕತೊ ಬಿಜೇಕ್‍ಜ಼ಣಾನ ಪ್ಯಾರ್ ಕರಾವಾಳೊ ಧರ್ಮಶಾಸ್ತ್ರನಸ್ ಚ಼ಲೈರಾಖ್ಯೊಸ್.
ROM 13:9 ಶನಕತೊ “ವ್ಯಬಿಚಾರ್‌ನಾಕರ‍್ನು, ಖೂನ್‌ನಾಕರ‍್ನು, ಚೋ಼ರ್‌ನಾಕರ‍್ನು, ಬಿಜೇಕ್‌ಜ಼ಣಾನಿ ಶೊತ್ನ ಆಖ್ಹ್‌ನಾಕರ‍್ನು” ಆ ಅಖ್ಖಿ ಹುಕುಮ್ ಅಖ್ಖು, “ತಾರ ಭೀಡೆವಾಳಾನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನಿ ಎಕ್ಕಸ್ ಹುಕುಮ್ಮ ಲಪಿರ‍್ಹೂಸ್.
ROM 13:10 ಪ್ಯಾರ್ ಇನ ಭೀಡೆವಾಳನ ಖಿವು ಕೇಡ್ ಕರಾಕೊಯ್ನಿ. ಇನಖ್ಹಾಜೆ ಪ್ಯಾರ್ ಧರ್ಮಶಾಸ್ತ್ರನ ಭರ್‌ಪೂರ್‌ ಹುಯಿರ‍್ಹುಸ್.
ROM 13:11 ಹಮ್ಕೇನ ಹಗಾಮ್ನ ಖ್ಹಮ್‌ಜಿನ್‌ ಆ ಅಖ್ಖು ಕರ‍್ನು. ತುಮೆ ನಿಂದರ್‌ಥಿ ಹೊಷಾರ್‌ಹುವಾನಿ ಘಡಿಹುಯಿರ‍್ಹೀಸ್. ಶನಕತೊ ಅಪ್ಣಿ ರಕ್ಷಣೆ, ಅಪ್ಣೆ ಪಹಿಲೆ ಕ್ರಿಸ್ತನ ವಿಶ್ವಾಸ್‍ಕರ್‌ಥಾತೆ ಇಂಥೀಬಿ ಹಮ್ಕೆ ಛುಟ್ಕಾರ್‌ನ ಹಗಾಮ್‌ ಖನ್ನೆ ಹುಯಿರ‍್ಹೀಸ್.
ROM 13:12 ಘಣೇಥಿ ರಾತ್ ನಿಕ್ಳಿಜೈ಼ನ್ ವ್ಹಾಣು ಖನ್ನೆ ಅಯಿಗು. ಇನಖ್ಹಾಜೆ ಅಪ್ಣೆ ಅಂಧಾರನು ಖ್ಹಾರು ಕಾಮ್ನ ಫೇಕಿನ್ ಉಜಾ಼ಳಾಮ ಜಂಗ್ ಭೀಡಾನು ಕಫ್ಫನ್ನ ಫೆರ‍್ಹಿಲಿಯೆ.
ROM 13:13 ಫಾಯಿದೊಕೊಂತೆ ಮಿಝ಼್‌ವಾನ್, ಪೀನ್ ನಿಶಾಚ಼ಡೈಲ್ಯವಾನು ಅಪ್ಣ ಶರೀರ್ ಸಂಬದ್‌ಥಿ ಕರಾನು ಪಾಪ್, ಲಡೈಝ಼ಗ್‍ಡೊ, ಪೇಟ್ನೊ ಬಳಾಪೊ ಆ ಖ್ಹಾರೇಥಿ ದೂರ್‌ಹುಯಿನ್ ಉಜಾ಼ಳಮ ರ‍್ಹಾವಾಳನಿತರ ಚಾ಼ಲಿಲಿಯೆ.
ROM 13:14 ಶರೀರ್‌ನ ಆಖ್ಹ್‌ನ ಚ಼ಲಾವನಖ್ಹಾಜೆ ನಕೊಸೋಚೊತೆ. ಪ್ರಭು ಕ್ರಿಸ್ತ ಯೇಸುನ ಕಫ್ಪನ್ನ ಫೆರಿಲೆವೊ.
ROM 14:1 ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಳಾನ ತುಮಾರಿ ಝೂ಼ಂಡ್‌ಮ ಮಳೈಲೇವೊ. ಕತೋಬಿ ಇವ್ಣಿ ಶೊಂತ್‍ ಖ್ಹೂಜ಼್‌ನಿ ಬಾರೇಮ ಅಬ್ಬಾಜ಼ಬ್ಬಿ ನಕೊ ಕರೊ.
ROM 14:2 ಅಜು಼ ಏಕ್‍ಜ಼ಣಾನಿ ವಿಶ್ವಾಸ್ ಖ್ಹಾರುಸ್ ಥರಾನು ಖಾಣುಖಾವಾನಿತರ ಕರಸ್. ಕತೋಬಿ ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಾಳು ಭಾಜಿಪಾಲೊ ಖಾವಾಳೋಸ್ ಹುಯಿರ‍್ಹೇಸ್.
ROM 14:3 ಇನಖ್ಹಾಜೆ ಬೋಟಿ ಖಾವವಾಳೊ ಖಾಯಿಕೊಂತೆ ಇನ ನಕ್ಲೆ ನಕೊ ಕರಾದೆ. ಭಾಜಿಪಾಲೊ ಖಾವಾಳೊ ಬೋಟಿ ಖಾವವಾಳನ ತೀರ್ಪ್‌ನಕೊಕರಾದೆ. ಶನಕತೊ ದೇವ್ ಇವ್ಣ ಭೇಜ಼ಣಾನ ಮಳೈರಾಖ್ಯೊಸ್.
ROM 14:4 ಬಿಜೇಕ್‍ಜ಼ಣ ಸೇವಕ್‌ನ ತೀರ್ಪ್‌ಕರಾನ ತೂ ಕೋಣ್? ಯೋ ಘಟ್‍ಥಿ ಭಿಯೋತೋಬಿ ರಡ್‍ಕ್ಯೊತೋಬಿ ಯೋ ಇನ ಯಜಮಾನ್ನ ಶೇರಾಸ್. ಶನಕತೊ ಇನ ಘಟ್ ಭೀರಾವಾನಿತರ ಕರಾನ ಪ್ರಭು ಶಕತ್‌ವಾಳೊ ಹುಯಿರೋಸ್.
ROM 14:5 ಏಕ್‍ಜ಼ಣೊ ಏಕ್‍ದನ್ನ ಬಿಜೇಕ್ ದನ್‍ಥಿ ವಿಶೇಷ್‍ಕರಿ ಗಣ್ತಿ ಕರಸ್. ಬಿಜೇಕ್‍ಜ಼ಣೊ ಖ್ಹಾರಾಸ್‍ದನ್ನ ಎಕ್ಕಸ್‍ಕರಿ ಖ್ಹೂಜ಼್‌ ಕರಸ್. ಹರೇಕ್ ಜ಼ಣುಬಿ ಇನಶೊಂತ್ ದಿಲ್ಮ ಕಲಾವ್ಣಿನಾ ಕರ್ನುತೆ ತಿಮ್ ರ‍್ಹವಾದೆ.
ROM 14:6 ಏಕ್‍ದನ್ನ ವಿಶೇಷ್‍ಕರಿ ಸೋಚವಾಳು ಯೋ ಪ್ರಭುನ ಮರ್ಯಾದಿನಖ್ಹಾಜೆ ಕರಿ ಲಾಝ಼ದೆ. ಅಖ್ಖೂಸ್ ಖಾವವಾಳೊ ದೇವ್ನ ಧನ್ಯವಾದ್‍ಕರೀನ್ ಪ್ರಭುನ ಮರ್ಯಾದಿನ ಖ್ಹಾಜೆಸ್ ಖಾಸ್‌. ಅಖ್ಖೂಸ್ ನಾ ಖಾವವಾಳೊಬಿ ದೇವ್ನ ಧನ್ಯವಾದ್ ಕರಸ್.
ROM 14:7 ಅಪ್ಣಾಮ ಕೋಣ್‌ಬಿ ಇನಖ್ಹಾಜೆ ಬಚಾ಼ಕೊಯ್ನಿ. ಅಜು಼ ಇನಖ್ಹಾಜೆ ಮರಾಬಿಕೊಯ್ನಿ.
ROM 14:8 ಏಕ್‌ ವೇಳ್ ಬಚಿರ‍್ಹಾತೊ ಪ್ರಭುನಖ್ಹಾಜೆ ಅಪ್ಣೆ ಜಿವಿಯೇಸ್. ಮರ‍್ಯಾತೊ ಪ್ರಭುನಖ್ಹಾಜೆ ಮರ್‌ಯೇಸ್. ಅಮ್ ಅಪ್ಣೆ ಮರ‍್ಯಾತೊಬಿ ಜಿವ್‍ಯತ್ಯೊಬಿ ಪ್ರಭುನ ಮಳ್ಯಹುಯ ಹುಯಿರ‍್ಹಿಯೇಸ್.
ROM 14:9 ಶನಖ್ಹಾಜೆ ಕತೊ, ಜಿವ್ತು ರ‍್ಹವಳಾನಾಬಿ, ಮರಾವಳನಾಬಿ ಪ್ರಭು ಹುಯಿರ‍್ಹೇವ್ಣುಕರಿ ಕ್ರಿಸ್ತ ಮರೀನ್ ಜಿವಿಉಠ್ಯೊ.
ROM 14:10 ಅಮ್‍ರ‍್ಹವಾಪರ್, ನಾಖಾವಳೊ ತೂ ಶನ ತಾರ ಭೈನ ತೀರ್ಪ್‌ಕರಸ್? ಅಖ್ಖಾಸ್ನ ಖಾವಾಳೊ ತು ತಾರ ಜೋ಼ಡ್ಮ ರ‍್ಹವಾಳ ವಿಶ್ವಾಸಿನ ಶನ ಚಾ಼ವ್‌ಣ್ಯ ಕಾಡಸ್‌? ಅಪ್ಣೆ ಖ್ಹಾರುಸ್ ದೇವ್ನು ನ್ಯಾವ್‍ನಿ ಝ಼ಗೋನಖ್ಹಾಮ್ಣೆ ಭೀರಿಶು.
ROM 14:11 ಶನಕತೊ ಪವಿತ್ರ ದಪ್ತರ್‌ಮ ಅಮ್‍ ಬೋಲಾವಸ್, “ಮೇ ಖ್ಹಾಚಮಾಬಿ ಜಿವಿರ‍್ಹೋಸ್ತೆ ದೇವ್ ಹುಯಿರ‍್ಹೋಸ್ ಇನಖ್ಹಾಜೆ ಹರೇಕ್ ಜ಼ಣುಬಿ ಮಾರಖ್ಹಾಮ್ಣೆ ಢುಕ್‍ಣ್ಯಮಾಂಡ್‍ಶೆ. ಅಜು಼ ಹರೇಕ್ ಮ್ಹೋಡು ಮನ ದೇವ್‌ಕರಿ ಸ್ತುತಿಕರಿನ್ ಕಬೂಲ್‍ಶೆ. ಕರಿ ಪ್ರಭು ಬೋಲಸ್”.
ROM 14:12 ಅಮ್‍ರ‍್ಹವಾಪರ್ ಅಪ್ಣಾಮ ಹರೇಕ್ ಜ಼ಣುಬಿ ಇವ್ಣಿ ಬಾರೇಮ ದೇವ್ನ ಗಣ್ತಿ ದೇವ್ಣು ಪಡಸ್.
ROM 14:13 ಇನಖ್ಹಾಜೆ ಅಪ್ಣೆ ಏಕ್‌ನ ಉಪ್ಪರ್ ಏಕ್‌ ತೀರ್ಪ್‌ನಕೊ ಕರಿಯೆ. ಇನ ಬದಲ್ ಬಿಜೇಕ್ ಭೈನ ಖ್ಹಾಮೆ ಅಡ್ಡಿ ಹುವಾನು ಅಜು಼ ಪಾಪ್ನ ಕಾಮ್ಮ ನಾ ರಡ್ಕಾವ್ಣುತೆ ತಿಮ್ ಹುಯಿರಿಯೇ.
ROM 14:14 ಅಜು಼ ಖಿವೂಬಿ ರಾಛು಼ ಇನುಯೋಸ್ ಅಶುದ್ಧ ಕಾಹೆಕರಿ ಪ್ರಭು ಯೇಸುಮ ರ‍್ಹೀನ್ ಖ್ಹಚ್ಚೆಂಬಿ ಬೋಲುಸ್. ಕತೋಬಿ ಕೋಣ್‌ತೋಬಿ ಅಶುದ್ದಕರಿ ದಿಲ್ಮ ಕರ‍್ಯೊತೊ ಯೋ ಇನ ಅಶುದ್ಧ ಹುಯಿರ‍್ಹೂಸ್.
ROM 14:15 ತೂ ಖಾಣೇಥಿ ತಾರ ಭೈ ಭೇನ್ನ ಕಚಿಂಡ್ ಕರಾಯೋತೆ ತೂ ಪ್ಯಾರ್‌ಥಿ ಚಾ಼ಲಿಲೇಶ್‍ಕೊಯ್ನಿ. ತೂ ಖಾವಾಥಿ, ಕ್ರಿಸ್ತ ಕಿನಖ್ಹಾಜೆ ಮರ‍್ಯೋಕಿ ಇನ, ತೂ ಖಾವಾನ ಖಾಣಾನಖ್ಹಾಜೆ ಧೋಕ ನಾದೇವ್ಣು.
ROM 14:16 ಅಮ್ ತಾರ ಅಛ್ಛಾ಼ನಖ್ಹಾಜೆ ಕಾಹೆತೆ ಬಿಜೇಕ್‍ಜ಼ಣಾಥಿ ಖರಾಬ್ ಕರಿ ಬೋಲೈಲಿನ್ ಚಿಂಘಾವ್ಣಿ ನಕೊ ಕಡೈಲಿಶ್.
ROM 14:17 ಶನಕತೊ ಖಾವಪೀಯಾನು ದೇವ್ನು ರಾಜ್ಯ ಕಾಹೆ. ನೀತಿ, ಸಮಾಧಾನ್, ಪವಿತ್ರಾತ್ಮಮ ಛಾ಼ತೆ ಖ್ಹುಶಿಸ್ ಹುಯಿರ‍್ಹಿಸ್.
ROM 14:18 ಶನಕತೊ ಅಮ್ನಿ ಪರಕ್ಮ ಕ್ರಿಸ್ತನ ಸೇವೆಕರವಾಳೊ ದೇವ್‍ಥಿ ಪಸಂದ್‌ ಕರೈಲ್ಯವಾಳೋಬಿ, ಅದ್ಮೆವ್‍ನ ಅಛ್ಛು಼ ಕರವಾಳೊಬಿ ಹುಯಿರ‍್ಹವಾದೆ.
ROM 14:19 ಇನಖ್ಹಾಜೆ ಖೆವು ಅಪ್ಣುನ ಸಮಾಧಾನ್ನಾಬಿ ಏಕ್‌ಥಿಏಕ್ ಭಾಲ್ ದೆವಾಮ ಭಡಾವಮಾಬಿ ಅಗಾಡಿ ಚ಼ಲಾವಸ್ಕಿ ಇನಾಸ್ ಕರಿಯೆ.
ROM 14:20 ಇನಖ್ಹಾಜೆ ಖಾಣಾನಖ್ಹಾಜೆ ದೇವ್ನ ಕಾಮ್ನ ನಾಶ್ ನಕೊಕರೊ. ಖ್ಹಾರು ಜಿನಖ್ಹ್‌ಬಿ ಶುದ್ಧಾಸ್ ಹುಯಿರ‍್ಹೂಸ್. ಕತೋಬಿ ಏಕ್‍ಜ಼ಣೊ ಖೈನ್ ಬಿಜೇಕ್‍ಜ಼ಣಾನ ಪಾಪ್‌ಮ ರಡ್ಕಾವನು ಗಲ್ತಿ.
ROM 14:21 ಬೋಟಿ ಖಾವಾನುರ‍್ಹವೊ, ದ್ರಾಕ್ಷಿನೊ ರಖ್ಹ್‌ನ ಪೀಯಾನು ರ‍್ಹವೊ ನತರ್ ಬಿಜು಼ ಖೆವೂಬಿರ‍್ಹವೊ ತಾರ ಭೈ ಭೇನ್ನ ಪಾಪ್‌ಮ ರಡ್ಕವಾನು ರ‍್ಹಯೂತೊ ಇನ ಮ್ಹೇಲಿದ್ಯವಾನುಸ್ ಅಛ್ಛು಼.
ROM 14:22 ಅನಿಬಾರೇಮ ತುನಛಾ಼ತೆ ವಿಶ್ವಾಸ್‌ ದೇವ್ನಖಲಿ ದೆಖೈನ್, ಯೊ ತಾರಲಗುಸ್ ಮಾಲುಮ್‌ರ‍್ಹವಾದೆ. ಇನು ಯೊ ಮಾನಿಲೇಯ್ತೆ ಇನಿ ಬಾರೇಮ ಗುಮಾನಿ ಕರಾಕೊಂತೆ ಯೋ ಧನ್ಯ.
ROM 14:23 ಕತೋಬಿ ಏಕ್‌ ವಖ್ಹ್‌ತೆ ಗುಮಾನಿ ರ‍್ಹೀನ್ ಖಾವವಾಳೊ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಅಪರಾದಿ ಹುಯಿರ‍್ಹೇಸ್, ಯೋ ವಿಶ್ವಾಸ್‌ಪರ್ ಆಧಾರ್ ಕೊಯ್ನಿ ಇನಖ್ಹಾಜೆ ಯೋ ದೋಷಿ ಹುಯಿರ‍್ಹೇಸ್. ಅಜು಼ ವಿಶ್ವಾಸ್‍ನು ಆಧಾರ್ ನಾರ‍್ಹಯಾತೊ ಯೋ ಪಾಪಸ್.
ROM 15:1 ವಿಶ್ವಾಸ್ಮ ಘಟ್‌ಹುಯಿರ‍್ಹಾತೆ ಅಪ್ಣೆ ಕಮ್‍ಜೋ಼ರಿವಾಳನು ಭೋಜ಼್‌ನ ಖ್ಹಮಾಳಿರ‍್ಹವಾಳ ಹುಯಿರ‍್ಹಿನ್ ಇನಾಮ ಅಪ್ಣು ಅಪ್ಣೆಸ್ ಕಮ್‍ಠೋಕಿಲ್ಯವಾಳ ನಾಹುಯಿರ‍್ಹೇವ್ಣು.
ROM 15:2 ಅಪ್ಣಾಮ ಹರೇಕ್‍ಜ಼ಣು ಇನ ಭೀಡೆವಾಳನು ಭಕ್ತಿನ ಭಡಾವಾನಖ್ಹಾಜೆ, ಆಖ್ಹ್‌ಕರಿನ್ ಅಪ್ಣ ಭೈಯೇ ಭೇನೇನ ಅಛ್ಛಾ಼ನಖ್ಹಾಜೆ ಕಮ್‍ಠೋಕವಾಳ ಹುಯಿರ‍್ಹೇಣು.
ROM 15:3 ಶನಕತೊ ಪವಿತ್ರ ದಪ್ತರ್‌ಮ ಬೋಲಾತೆ ತಿಮ್ ತುನ ಚಿಂಗಾವವಾಳನಿ ಚಿಂಘಾವ್ಣಿ ಮಾರಪರ್ ಆಯು ಕರಿ ಕ್ರಿಸ್ತ ಜಿನುಬಿ ಇನು ಯೊ ಖ್ಹರೈಲಿದೊಕೊಯ್ನಿ.
ROM 15:4 ಪವಿತ್ರದಪ್ತರ್‌ಮ ಅಗಾಡಿಸ್ ಲೀಖೈರ‍್ಹೂತೆ ಅಪ್ಣುನ ಬೋಧನೆ ಕರಾನಖ್ಹಾಜೇಸ್ ಲೀಖೈರ‍್ಹೂಥು. ಅಪ್ಣೆ ಫಡೀನ್ ಘಟ್‌ದಿಲ್‌ಥೀಬಿ ಭಾಲಿಲೀನ್ ಭರೋಖ್ಹಾಥಿ ರ‍್ಹವಾಳ ಹುಯಿರ‍್ಹೇವ್ಣುಕರಿ ದಪ್ತರ್‌ಮ ಲೀಖಾಯು
ROM 15:5 ಖ್ಹಮಾಳಾನು ಅಜು಼ ಭಾಲಿ ದೆವಾಳೊ ದೇವ್, ತುಮೆ ಕ್ರಿಸ್ತಯೇಸುನ ಪೀಛೆಜಾ಼ವಾನೊ ಎಕ್ಕಸ್ ದಿಲ್‌ದ್ಯವಾದೆ.
ROM 15:6 ಅಮ್ ತುಮೆ ಎಕ್ಕಸ್ ದಿಲ್‌ ಅಜು಼ ಎಕ್ಕಸ್ ಗಳೇಥಿ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುಕ್ರಿಸ್ತನೊ ಬಾ ಹುಯಿರೋತೆ ದೇವ್ನ ಖ್ಹರಾವ್‌ಶು.
ROM 15:7 ದೇವ್ನ ಮಹಿಮೆ ಹುವಾನಖ್ಹಾಜೆ, ಕ್ರಿಸ್ತ ತುಮೂನ ಮಳೈಲಿದೊತೆ ತಿಮ್ಮಸ್ ತುಮೇಬಿ ಏಕ್‌ಥಿ ಏಕ್‌ ಮಳೈಲೆವೊ.
ROM 15:8 ಶನಕತೊ ಕ್ರಿಸ್ತಾನು ಸೇವೆನು ಜಿವ್ಣು ಯೆಹೂದ್ಯರ್‌ನ ಸಾಕ್ಷಿ ಹುಯಿರ‍್ಹುಸ್‌ಕರಿ ಮೇ ಬೋಲುಸ್, ಕತೋಬಿ ದೇವ್ನೆ ಗುರುಗುರಬ್‍ಲ್ಯನ ಕರ‍್ಯೊತೆ ವಾಗ್ದಾನ್‍ಖ್ಹಾರು ಖ್ಹಾಚ಼ನ ಒತಾಳನಖ್ಹಾಜೆ ಖ್ಹತ್ನಕರಿ ಪದತ್ತಿನ ಖ್ಹಾಜೇಥಿಬಿ ಕ್ರಿಸ್ತ ಯೆಹೂದ್ಯರ್‌ನೊ ಚಾ಼ಕ್ರಿವಾಳೊ ಬಣ್ಯೊ.
ROM 15:9 ದೇವ್ ಇವ್ಣುನ ವತಾಳನು ಗೋರ್‌ನಖ್ಹಾಜೆ ಯೆಹೂದ್ಯರ್‌ಕಾಹೆತೆ ಇವ್ಣೆ ದೇವ್ನ ಮಹಿಮೆ ಕರಾದೆಕರಿ ಕ್ರಿಸ್ತಾನೆ ಅಮ್‌ಕರ‍್ಯೊ ಕರಿ ಮೆ ಬೋಲುಕರುಸ್. ಆ ಧರ್ಮಶಾಸ್ತ್ರಮ ಅಮ್ ಬೋಲಾಸ್, “ಇನಖ್ಹಾಜೆ ಯೆಹೂದ್ಯರ್ ಕಾಹೆತೆ ಇವ್ಣ ಬೀಚ್ಮ ಮೇ ತುನ ಸ್ತುತಿಕರುಸ್; ಮೇ ತಾರ ನಾಮ್ನ ಸ್ತುತಿನು ಗೀದ್‌ ಬೋಲುಸ್.” ಕರಿ ಬೋಲೈರ‍್ಹುಸ್.
ROM 15:10 ಬಿಜೇಕ್‍ಹಲ್ಲ ಅಮ್‍ಬೋಲಾಸ್, “ಯೆಹೂದ್ಯರ್‌ಕಾಹೆತೆ ಅದ್ಮಿವೊ ದೇವ್ನ ಅದ್ಮಿನ ಜೋ಼ಡ್ಮ ಖುಷಿಥಿ ಏಕ್‌ ಹುವೊ,
ROM 15:11 ಅಜು಼ ಪಾಛು಼ ಯೆಹೂದ್ಯರ್‌ಕಾಹೆತೆ ಅಖ್ಖಾಸ್ ಅದ್ಮಿವೊ ಪ್ರಭುನ ಸ್ತುತಿಕರೊ, ತಮಾಮಸ್ ಅದ್ಮಿಖ್ಹಾರು ಇನ ಧನ್ಯವಾದ್‌ಕರೊ” ಕರೀಬಿ ಲೀಖೈರ‍್ಹುಸ್.
ROM 15:12 ಪಾಛೊ಼ ಯೆಶಾಯ ಶಾತ್ ಬೋಲಸ್‍ಕತೊ, “ಇಷಯನ ಪಿಳ್ಗಿವಾಳೊ ಏಕ್‍ಜ಼ಣೊ ದೆಖೈಲೇಸ್. ಯೊ ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಚ಼ಲಾವನ ಆವ್‌ಶೆ. ಅಜು಼ ಯೊ ಅದ್ಮಿಖ್ಹಾರು ಇನಖ್ಹಾಜೆ ಭರೋಖ್ಹೊ ಕರ್ಶೆ.
ROM 15:13 ಭರೋಖ್ಹಾನ ದ್ಯವಾಳೊ ದೇವ್ ಪವಿತ್ರಾತ್ಮನಿ ಶಕಥ್ಥಿ ಘಣು ಭರೋಖ್ಹಾಥಿ ನಂಬಾವಾಳನ ಖ್ಹುಶಿ ಅಜು಼ ಸಮಾಧಾನ್‌ಥಿ ಭರಾದೆ, ಅನಖ್ಹಾಜೇಥಿ ಶಕಥ್ಥಿ ಆಖ್ಹ್‌ಮ ಭಡ್ತಾ ಜಾ಼ವ್ಣುತೆ ತಿಮ್ ತುಮೂನ ವಿಶ್ವಾಸ್‍ಥಿ ಮಳಾತೆ ಹರೇಕ್ ಖುಷಿ ಸಮಾಧಾನ್ ದ್ಯವಾದೆ.
ROM 15:14 ಮಾರ ಭೇನ್ ಭೈಯೇವೊ, ತುಮೆ ಅಛ್ಛಿ ಗುಣಥೀಬಿ ಹರೇಕ್ ಅಕ್ಕಲ್‍ಥೀಬಿ ಭರೈರ‍್ಹವಾಳ ಹುಯಿರ‍್ಹಿನ್, ಏಕ್‌ಥಿಏಕ್ ಬುದ್ಧಿ ಬೋಲಾನ ಶಕತ್‌ವಾಳ ಹುಯಿರ‍್ಹಾಸ್ ಕರೀಬಿ ತುಮಾರಿ ಬಾರೇಮ ಮನ ಭರೋಖ್ಹೊ ಛಾ಼.
ROM 15:15 ಕತೋಬಿ ಮೇ ತುಮೂನ ಥೋಡಿ ವಾತೆಖ್ಹಾರಿ ಯಾದ್ ಕರಾವನಖ್ಹಾಜೆ ಘಣಿ ವಿಶ್ವಾಸ್‍ಥಿ ಅಮ್ ಲೀಖಿರಾಖ್ಯೊಸ್.
ROM 15:16 ಅಮ್ಮಸ್ ಯೆಹೂದ್ಯರ್‌ಕಾಹೆತೆ ಅದ್ಮಿವೊನಖ್ಹಾಜೆ ಯೇಸುಕ್ರಿಸ್ತನಿ ಸೇವಕ್‌ಹುವಾನಖ್ಹಾಜೆ ಮನ ದೇವ್ನಿ ಆಶೀರ್ವಾದ್‌ ಹುಯು. ಮೇ ದೇವ್ನಿ ಸುವಾರ್ತೆನಿ ಸೇವೆನ ಏಕ್‌ ಯಾಜಕ್‍ನಿತರ ಚ಼ಲೈನ್ ಪವಿತ್ರಾತ್ಮಥಿ ದೇವ್ನ ಸಮರ್ಪಣ್‌ಕರಾನ ಕೋಶಿಷ್ ಕರುಕರೂಸ್.
ROM 15:17 ಇನಖ್ಹಾಜೆ ಕ್ರಿಸ್ತಯೇಸುಮ, ದೇವ್ನ ಕಾಮ್ನಿ ಬಾರೇಮ ಮೇ ಖ್ಹರೈಲಿಯೇಜಾ಼ಯ್.
ROM 15:18 ಕ್ರಿಸ್ತಾನೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ನ ವಿಧೇಯ ಹುವಾನಖ್ಹಾಜೆ ಆಖ್ಹಾರಾನಿ ಬಾರೇಮ ಮೇಖಲಿ ಭಾಲ್‌ಥಿ ಬೋಲೆಜಾ಼ಯ್ ಅತ್ರೇಸ್ ಕಾಹೆತೆ ವಾತ್‍ಮಾಬಿ ಕಾಮ್‍ಥೀಬಿ,
ROM 15:19 ಅಜು಼ ಖ್ಹಣೇದ್ನ ಕಾಮ್‍ಥೀಬಿ, ಅದ್ಭುತ್‌ಕಾಮ್‌ನಿ ತಾಖತ್ತಿ ಅಜು಼ ದೇವ್ನುಆತ್ಮನ ಕಾಮ್‍ಥೀಬಿ ಕರಿರಾಖ್ಯೊಸ್. ಇನಖ್ಹಾಜೆ ಯೆರೂಸಲೇಮ್‍ಥೊ ಧರೀನ್ ಇಲ್ಲುರಿಕ ತಬರ್‌ಖಾಲಗು ಜಾ಼ವಾನಿ ವಖ್ಹ್‌ತೆ ಮೇ ಕ್ರಿಸ್ತನಿ ಸುವಾರ್ತೆನ ಅಖ್ಖಿ ಪೂರಫೈಲಾಯೊ.
ROM 15:20 ಮಾರಿ ಆಖ್ಹ್ ಶಾತ್‌ಕತೊ, ಕಿಜ್ಜಾ಼ ಕ್ರಿಸ್ತನು ನಾಮ್ನ ಖ್ಹಮ್‍ಜಾ಼ಡಿ ಕೊರಾಖ್ಯುನಿತೆ ಯೊ ಝ಼ಗೋಪರ್ ಸುವಾರ್ತೆನ ಬೋಲಾನು ಮಾರಿ ದಿಲ್ನಿ ಆಖ್ಹ್. ಇನಖ್ಹಾಜೆ ಬಿಜೇಕ್‍ಜ಼ಣು ನಾಖಿರಾಖ್ಯುತೆ ಹದಿಪಾಯನ ಉಪ್ಪರ್ ಮೇ ನಾಭಾಂದ್‍ಣು.
ROM 15:21 “ಕೋಣ್ ಇನಿ ಬಾರೇಮ ಮಾಲುಮ್ ಕರ‍್ಯುಕೊಯ್ನಿಕಿ ಇವ್ಣೆಸ್ ಇನ ದೇಕ್‌ಶೆ. ಕೋಣ್ ಇನಿ ಬಾರೇಮ ಖ್ಹಮ್‌ಜಿರಾಖ್ಯಕೊಯ್ನಿಕಿ ಇವ್ಣೆ ಪರ್‌ಖಿಲಿಶೆ. ಕರಿ ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಮಾರ ಕಾಮ್ನ ಚ಼ಲೈರಾಖ್ಯೊಸ್.
ROM 15:22 ಇನಖ್ಹಾಜೇಸ್, ತುಮಾರಕನ ಆವ್ಣುನಾತೆ ತಿಮ್ ಮನ ಕೈಏಕ್ ವಖ್ಹ್‌ತೆ ತಕಲೀಬ್ ಹುಯು.
ROM 15:23 ಕತೋಬಿ ಇನಾಪರ್ ಆ ತಬರ್‌ಖಾವ್‍ಮ ಮಾರು ಸೇವೆಕರಿ ಹುಯಿಗು. ಕೈಏಕ್ ವರಖ್ಹ್‌ಥು ತುಮೂನ ಮಳ್‌ಣುಕರಿ ಬೋಲಾನಿ ಆಖ್ಹ್‌ಥೀಬಿ
ROM 15:24 ಮೇ ಸ್ಪೇನ್ ಜಾ಼ವಾನಿ ವಖ್ಹ್‌ತೆ ತುಮೂನ ಮಳಾನಖ್ಹಾಜೆ ಟಿವೈರ‍್ಹೋಸ್. ದರ್ರಾಖ್ಹ ದನ್ ತುಮಾರಿ ಲಾಡ್‍ಮೋಹಬತ್ನಿ ಖುಷಿಮ ಮೇ ರ‍್ಹೀನ್, ಇನಕೇಡೆಥು ಯೋ ದೇಖ್ಹ್‌ನ ಜಾ಼ವಾನ ಮನ ತುಮಾರಿ ಮದತ್ ಮಳ್‌ಶೆಕರಿ ವಿಶ್ವಾಸ್‍ಕರುಸ್.
ROM 15:25 ಕತೋಬಿ ಹಮ್ಕೆ ಮೇ ದೇವ್ನ ಅದ್ಮಿವೊನ ಚಾ಼ಕ್ರಿಕರಾನಖ್ಹಾಜೆ ಯೆರೂಸಲೇಮ್ನ ವಳೆಜ಼ವುಸ್.
ROM 15:26 ಶನಕತೊ ಮೆಕೆದೋನ್ಯ ಅಜು಼ ಅಖಾಯ ತಬರ್‌ಖಾವಾಳು ವಿಶ್ವಾಸಿ ಯೆರೂಸಲೇಮ್ಮ ದೇವ್ನ ಅದ್ಮಿವೋನ ಮಳಿನ್ ರ‍್ಹವಾಳ ಗರೀಬ್ ವಿಶ್ವಾಸಿನ ಮದತ್ ಕರಾನಖ್ಹಾಜೆ ಖ್ಹಯಾಲ್ ಕರಿರಾಖ್ಯಸ್.
ROM 15:27 ಇವ್ಣೆ ಯೋ ಕರಾನ ಆಖ್ಹ್ ಕರಿರಾಖ್ಯುಸ್ ಏತ್ರೇಸ್ ಕಾಹೆತೆ, ಯೆಹೂದ್ಯರ್‌ಕಾಹೆತೆ ಅದ್ಮಿ ಯೆಹೂದ್ಯರ್‌ನ ಆತ್ಮೀಕ ಆಶೀರ್ವಾದ್‌ಮ ಭಾಗ್‌ ಲೀರಾಖ್ಯುತೆ ಇನಖ್ಹಾಜೆ ಇವ್ಣೆ ಜಗತ್ನ ಸಂಬಂಧನಿ ಕಾಮ್ಮ ಇವ್ಣುನ ಸೇವೆಕರಾನಿ ಫರಜ಼್‌ಮ ಛಾ಼.
ROM 15:28 ಇನಖ್ಹಾಜೆ ಆ ಕಾಮ್ನ ಖ್ಹತಮ್‍ಕರೀನ್ ಆ ಪ್ಯಾರ‍್ನಫಲ್ನ ಹಿಜ್ಜಾ಼ವಾಳನ ದೀನ್ ಭರ್‌ಪೂರ್‌ ಹುವಾನ ಬಾದ್ಮ ತುಮುನ ಮಳಿನ್ ಯೋಸ್ ಮಾರ್ಗೆ ಸ್ಪೇನ್ ದೇಖ್ಹ್‌ನ ಜೈ಼ಶ್.
ROM 15:29 ಆ ನಾಹುಯಿನ್ ತುಮಾರಕನ ಆವಾನಿ ವಖ್ಹ್‌ತೆ ಕ್ರಿಸ್ತಥಿ ಹುವಾನು ಘಣಿ ಆಶೀರ್ವಾದ್‌ನ ಮೇ ತುಮಾರಕನ ಲಾಯಿಶ್, ಕರಿ ಮಾಲುಮ್ ಛಾ಼.
ROM 15:30 ಭೇನ್ ಭೈಯೇವೊ, ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಬಿ, ಪವಿತ್ರಾತ್ಮನಿ ಪ್ಯಾರ್‌ಥೀಬಿ, ಮೇ ಗಿಂಗೈಲ್ಯವಾನು ಶಾತ್‍ಕತೊ, ಮಾರಖ್ಹಾಜೆ ದೇವ್‌ಮ ಪ್ರಾರ್ಥನೆಥಿ ಮಾರಿ ಜೋ಼ಡ್ಮರ‍್ಹವೊ.
ROM 15:31 ಮೇ ಯೂದಾಯಮ ಅವಿಶ್ವಾಸಿನ ಹಾತ್ಮಥು ಛೋ಼ಡಾವ್ಣುಕರೀಬಿ ಮಾರಿ ಸೇವೆ ಯೆರೂಸಲೇಮ್ಮ ಛಾ಼ತೆ ದೇವ್ನ ಅದ್ಮಿಯೇವ್‍ನ ಸ್ವೀಕಾರ್ ಹೋಣುಕರಿ ಪ್ರಾರ್ಥನೆ ಕರೊ.
ROM 15:32 ತದೆ ಯೋ ದೇವ್ನಿ ಮರ್ಜಿಥಿ ತುಮಾರಕನ ಖ್ಹುಶಿಥಿ ಆಯಿನ್ ತುಮಾರಿ ಜೋ಼ಡ್ಮ ರ‍್ಹೀನ್ ಅರಾಮ್ ಕರಾನು ಹುವಾದೆ.
ROM 15:33 ಸಮಾಧಾನ್ನೊ ದೇವ್ ತುಮಾರ ಖ್ಹಾರಾನಿ ಜೋ಼ಡ್ಮ ರ‍್ಹವಾದೆ. ಆಮೆನ್.
ROM 16:1 ಅಪ್ಣಿ ಭೇನ್ ಹುಯಿರ‍್ಹೀತೆ ಕೆಂಖ್ರೆಯ ಖ್ಹಯೇರ‍್ನಿ ಸಬೇನಿ ಸೇವಕೀಬಿ ಹುಯಿರ‍್ಹೀತೆ ಪೊಯಿಬೆನಿ ಬಾರೇಮ ತುಮುನ ಖ್ಹಮ್‍ಜಾ಼ಡುಕರೂಸ್.
ROM 16:2 ಪ್ರಭುಮ ದೇವ್ನ ಅದ್ಮಿವ್‍ನ ಯೋಗ್ಯಹುಯಿರೂತೆ ಪರಕ್ಮ ಯೋ ಹೈರಿತೆ ಇನ ಸ್ವೀಕಾರ್‌ಕರೊ, ಶನಕತೊ ತುಮೂನ ಶನಿ ಜ಼ರೂರತ್ ರ‍್ಹಿತೋಬಿ ಇನ ಹೋಣುತೆತ್ಯೊ ದೇವೊ. ಹೈರಿತೆ ಯೋ ಕೈಏಕ್ ಜ಼ಣನಾಬಿ ಮನಾಬಿ ಘಣು ಮದತ್ ಕರೀರಾಖಿಸ್.
ROM 16:3 ಕ್ರಿಸ್ತಯೇಸುಮ ಮಾರಿ ಜೋ಼ಡ್ಮಕಾಮ್‍ ಕರಾವಾಳು ಹುಯಿರಾತೆ ಪ್ರಿಸ್ಕಿಲ್ಲನಾಬಿ ಅಕ್ವಿಲನಾಬಿ ಮಾರಿ ಖ್ಹಲಾಮ್ ಬೋಲಿದೆವೊ.
ROM 16:4 ಇವ್ಣೆ ಮಾರ ಜಾನ್ನಖ್ಹಾಜೆ ಇವ್ಣ ಜಾನ್ನ ಖತ್ರಾಮ ನಾಖ್ಯು. ಇವ್ಣುನ ಮೇಸ್ ಕಾಹೆತೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‌ನಿ ಸಬೆವಾಳೂಬಿ ಇವ್ಣುನ ಧನ್ಯವಾದ್‍ಕರಸ್.
ROM 16:5 ಅತ್ರೇಸ್‍ಕಾಹೆತೆ ಇವ್ಣ ಘರ್ಮ ಎಕ್ಟುಹುಯಿನ್ ಆವಾತೆ ಸಬೆವಾಳನಾಬಿ ಮಾರಿ ಖ್ಹಲಾಮ್ ಖ್ಹಮ್‍ಜಾ಼ಡೊ. ಏಷ್ಯಾ ತಬರ್‌ಖಾಮ ಕ್ರಿಸ್ತನ ಪೀಛೆಜಾ಼ವಾಳಮ ಫೈಲೆನೊ ಮಾರೊ ಪ್ಯಾರ್‌ನೊ ದೋಸ್ ಎಫೈನೆತನಾಬಿ ಮಾರಿ ಖ್ಹಲಾಮ್ ಖ್ಹಮ್‍ಜಾ಼ಡೊ.
ROM 16:6 ತುಮಾರಖ್ಹಾಜೆ ಘಣು ವಾಖ್ಯೊ ಪಡೀತೆ ಮರಿಯನ ಮಾರಿ ಖ್ಹಲಾಮ್.
ROM 16:7 ಮಾರು ಮಾಯಮಾತ್ರಾಬಿ ಮಾರಿ ಜೋ಼ಡ್ಮ ಜೇಲ್‌ಮಥಾತೆ ಅಂದ್ರೋನಿಕನಾಬಿ ಅಜು಼ ಯೂನ್ಯನ ಮಾರಿ ಖ್ಹಲಾಮ್. ಇವ್ಣೆ ಅಪೊಸ್ತಲರ್‌ಮ ನಾಮ್ ಕಮೈರಾಖ್ಯತೋಬಿ ಮಾರೇಥಿ ಅಗಾಡಿಸ್ ಕ್ರಿಸ್ತನ ವಿಶ್ವಾಸಿ ಹುಯಿರ‍್ಹಾಸ್.
ROM 16:8 ಮನ ಪ್ರಭುಮ ಪ್ಯಾರ್‌ನೊ ಹುಯಿರೋತೆ ದೋಸ್ತಿ ಅಂಪ್ಲಿಯಾನ ಖ್ಹಲಾಮ್.
ROM 16:9 ಕ್ರಿಸ್ತಮ ಮಾರಿ ಜೋಡ್ನಸೇವಕ ಹುಯಿರೋತೆ ಉರ್ಬಾನಾಬಿ ಮನ ಪ್ಯಾರ್‌ನೊ ದೋಸ್ತ್ ಸ್ತಾಖುಯನಾಬಿ ಖ್ಹಲಾಮ್.
ROM 16:10 ಕ್ರಿಸ್ತನಿ ಸೇವೆಮ ತರೀಪ್ಷ ಹುಯಿನ್ ಲ್ಹಾಯಕ್‌ ಹುಯಿನ್ ರ‍್ಹವಾಳೊ ಅಪೆಲ್ಲನ ಮಾರಿ ಖ್ಹಲಾಮ್ ಅರಿಸ್ತೊಬೂಲನ ಘರ್‌ವಾಳಾನ ಖ್ಹಲಾಮ್.
ROM 16:11 ಮಾರಿನಿತರಸ್ ಯಹೂದಿ ಭೈ ಹುಯಿರೋತೆ ಹೆರೋಡಿಯೋನಾನ ಖ್ಹಲಾಮ್. ಪ್ರಭುಮಛಾ಼ತೆ ನಾರ್ಕಿಸ್ಸನ ಕುಟಮ್‌ವಾಳನ ಖ್ಹಲಾಮ್.
ROM 16:12 ಪ್ರಭುನಿ ಸೇವೆಮ ಮ್ಹಿನತ್‍ಕರವಾಳಿಯೇ ಹುಯಿರ‍್ಹಿಯೇತೆ ತ್ರುಫೈನನಾಬಿ, ತ್ರುಫೋಸನಾಬಿ ಮಾರಿ ಖ್ಹಲಾಮ್. ಪ್ರಭುಮ ಘಣು ವದೇಖ್ಹ್‌ಕರೀನ್ ಮ್ಹಿನತ್ ಕರಿರಾಖಿತೆ ಪ್ಯಾರ್‌ನಿ ಪೆರ್ಸೀಸನ ಮಾರಿ ಖ್ಹಲಾಮ್.
ROM 16:13 ಪ್ರಭುಮ ಚೂ಼ಣೈರ‍್ಹೊತೆ ರೂಫನಾಬಿ ಮನಾಬಿ ಅಮ್ಮಾನಿ ಘೋಣಿಥೀತೆ ಇನಿ ಅಮ್ಮನಾಬಿ ಖ್ಹಲಾಮ್.
ROM 16:14 ಅಸುಂಕ್ರಿತ, ಫ್ಲೆಗೋನ, ಹೆರ್ಮೇಯನಾಬಿ, ಪತ್ರೋಬನಾಬಿ ಹೆರ್ಮಾನ ಅಜು಼ ಇನಿಜೋ಼ಡ್ಮ ರ‍್ಹವಾಳ ಉಭ್‌ರ‍್ಯಾತೆ ಮಾರಿ ಭೈಯೇ ಭೇನೇನ ಖ್ಹಲಾಮ್.
ROM 16:15 ಫಿಲೊಲೋಗ, ಯೂಲ್ಯ, ನೇರ್ಯ ಅಜು಼ ಇನಿ ಭೇನ್, ಒಲುಂಪ ಅಜು಼ ಇವ್ಣಿ ಜೋ಼ಡ್ಮ ರ‍್ಹವಾಳ ಖ್ಹಾರಾಸ್ ವಿಶ್ವಾಸಿಯೇವ್ನ ಖ್ಹಲಾಮ್.
ROM 16:16 ಪವಿತ್ರ ಪ್ಯಾರ್‌ಥಿ ಏಕ್‌ಥಿಏಕ್ ಹಾತ್‍ಮಳೈನ್ ಖ್ಹಲಾಮ್ ಕರೊ. ಕ್ರಿಸ್ತನಿ ಖ್ಹಾರೀಸ್‍ ಸಬೆವಾಳು ತುಮೂನ ಖ್ಹಲಾಮ್ ಬೋಲಿ ಮೋಕ್ಲಿರಾಖ್ಯುಸ್.
ROM 16:17 ಭೇನ್ ಭೈಯೇವೊ, ತುಮೆ ಶಿಕಿರಾಖ್ಯಾತೆ ಬೋಧನೆನ ವಿರೋದ್ ಹುವಾಳೂಬಿ ತುಮಾರಿ ಒಗ್ಗಟ್ ಫುಟಾಖ್ಹರ್ಕು ತುಮಾರಮ ಕಚ಼್ಚರ್‌ ಹುವಾನಿತರ ಕರವಾಳನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಎಥ್ರಾನವಾಳಥಿ ದೂರ್ ರ‍್ಹೇವೊಕರಿ ಗಿಂಗೈಲೆವುಸ್.
ROM 16:18 ಎಥ್ರಾನು ಅದ್ಮೆವ್‍ನ ಅಪ್ಣೊ ಪ್ರಭು ಕ್ರಿಸ್ತನಿ ಸೇವೆ ಕರಾನು ಮ್ಹೇಲಿನ್ ಇವ್ಣ ಪೇಟ್ನಿ ಸೇವೆಕರವಾಳ ಹುಯಿರ‍್ಹೇಸ್. ಮಿಠ್ಠಿ ಅಜು಼ ಕವ್ಳಿ ವಾತೇಥಿ ಶೇದೇವ್ ಅದ್ಮಿವ್‌ನ ದಿಲ್ನ ಠಗಾವವಾಳು ಹುಯಿರ‍್ಹುಸ್.
ROM 16:19 ತುಮಾರಿ ವಿಧೇಯತೆ, ಖ್ಹಾರಾಸ್ ಅದ್ಮಿವ್‌ನ ಮಾಲುಮ್ ಹುವಾನಿತರ ಹುಯು. ಇನಖ್ಹಾಜೆ ಮೇ ತುಮಾರಿ ಬಾರೇಮ ಖುಷಿಕರುಸ್. ಕತೋಬಿ ತುಮೆ ಅಛ್ಛಾ಼ನಿ ಬಾರೇಮ ಗ್ಯಾನಿ ಖ್ಹಾರಹುಯಿನ್ ಖಾರಾಬ್‌ನಿ ಬಾರೇಮ ಶನು ಕಳಂಕ್‌ಕೊಂತೆ ರ‍್ಹೇಣು ಕರಿ ಆಖ್ಹ್‌ಕರುಸ್.
ROM 16:20 ಅಜು಼ ಸಮಾಧಾನ್ನೊ ದೇವ್ ವಗ್ಗಿಸ್ ಶೈತಾನ್ನ ತುಮಾರ ಗೋಡ ಹೇಟ್‍ನಾಖಿನ್ ಚ಼ಗ್‌ದಿನಾಕ್‍ಶೆ. ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುನಿ ವಾರ್‌ಖ್ಹೊ ತುಮಾರ ಜೋ಼ಡ್ಮ ರ‍್ಹವಾದೆ.
ROM 16:21 ಮಾರಿ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರೋತೆ ತಿಮೊಥೆಯ ತುಮೂನ ಖ್ಹಲಾಮ್ ಬೋಲುಕರುಸ್. ಇಮ್ಮಸ್ ಲೂಕ್ಯಬಿ, ಯಾಸೋನಬಿ, ಸೋಸಿಪತ್ರಬಿ, ಅಜು಼ ಮಾರಿನಿತರ ಯೆಹೂದ್ಯರ್‌ಖ್ಹಾರು ಹುಯಿರ‍್ಹಾತೆ ಇವ್ಣೆ ತುಮೂನ ಖ್ಹಲಾಮ್ ಬೋಲುಕರಸ್.
ROM 16:22 ಆ ಚಿಟ್ಟಿನ ಲೀಖ್ಯೋತೆ ತೆರ್ತ್ಯಯ ಕರಿ ಮೇ ಪ್ರಭುನ ಅದ್ಮಿಯೇನ ಖ್ಹಲಾಮ್ ಕರುಸ್.
ROM 16:23 ಹಜ಼್ಜ ಮನಾಬಿ, ಹಿಡಿ ಸಬೇನಾಬಿ, ಮೆಹಮಾನ್ನಿ ಸತ್ಕಾರ್ ಕರುಕರಾತೆ ಗಾಯ ಇನಿ ಖ್ಹಲಾಮ್ ಬೋಲಸ್. ಆ ಖ್ಹಯೇರ‍್ನೊ ರಪ್ಯಾನಿ ಗಣ್ತಿ ದೇಖಿಲ್ಯವಾಳೊ ಹುಯಿರೋತೆ ಎರಸ್ತಬಿ ಅಜು಼ ಭೈ ಕ್ವರ್ತಬಿ ತುಮೂನ ಖ್ಹಲಾಮ್ ಬೋಲಸ್.
ROM 16:24 ಅಪ್ಣೊ ಪ್ರಭು ಯೇಸುಕ್ರಿಸ್ತನಿ ಕೃಪೆ ತುಮಾರ ಅಖ್ಖಾನಿ ಜೋ಼ಡ್ಮ ರ‍್ಹವಾದೆ. ಆಮೆನ್.
ROM 16:25 ಅಪ್ಣೆ ದೇವ್ನ ಮಹಿಮೆ ಕರಿಯೆ ಮೆ ಯೇಸು ಕ್ರಿಸ್ತನಿ ಬಾರೇಮ ಬೋಲಿವತಾಳ್ಯೋತೆ ಸುವಾರ್ತೆನಿ ಘೋಣಿ ಅಜು಼ ಜ಼ಗ್‌ಜ಼ಮಾನೇಥಿ ಲಪಿರ‍್ಹೂಥೂತೆ ಹಮ್ಕೆ ದೆಖಾವನು ಗಪ್ಲತ್‌ನ ಖ್ಹಾಚಾ಼ನಿತರ ತುಮಾರಿ ವಿಶ್ವಾಸ್ಮ ತುಮುನ ಘಟ್ ಕರಾನ ಶಕತ್‌ವಾಳೊ ಹುಯಿರ‍್ಹೊಸ್.
ROM 16:26 ಹಮ್ಕೆ ಯೋ ಖ್ಹಾಚು಼ ಪ್ರವಾದ್‍ನೆನು ನಿಯಮ್‌ಥಿ ಹಮ್ಕೆ ಭಡ್‍ಕೈನ್ ಲೈರಾಖ್ಯುಸ್; ಅಜು಼ ಹರ್‌ಹಮೇಶ ರ‍್ಹವಾಳ ದೇವ್ನಿ ಹುಕುಮ್‌ನಿಮತ್ ಅಖ್ಖಾಸ್ ಜ಼ಗ್‌ಜಾ಼ತ್ನ ಅದ್ಮಿವೋನ ಮಾಲುಮ್‍ಪಡಾನಿ ಘೋಣಿ ಕರಿರಾಖ್ಯುಸ್, ಅಮ್ ವಿಧೇಯ ಹೋಣು ಅಜು಼ ವಿಶ್ವಾಸ್‌ ಕರ‍್ನು.
ROM 16:27 ತುಮೂನ ಭೀರಾಖಾನ ಶಕತ್‌ವಾಳೊ ಹುಯಿರೋತೆ, ಅಖ್ಖೂಸ್ ಮಾಲುಮ್ ಕರಿರಾಖ್ಯೊತೆ ಏಕ್‌ನೊಎಕ್ಕಸ್ ದೇವ್ನ ಯೇಸುಕ್ರಿಸ್ತಥಿ ಕದೆಕದೇಬಿ ಮಹಿಮೆ ಹುವಾದೆ! ಆಮೆನ್.
1CO 1:1 ಪೌಲ ಲೀಖುಕರಾತೆ ಚಿಟ್ಟಿ. ಕ್ರಿಸ್ತಯೇಸುನೊ ಅಪೊಸ್ತಲ ಹುವಾನ ಮೇ ದೇವ್ನಿ ಖ್ಹಯಾಲ್‌ಥಿ ಚೂ಼ಣೈಗಯೊ. ಮೇ ಆ ಚಿಟ್ಟಿನ ಕ್ರಿಸ್ತಮ ಮಾರೊ ಭೈಹುಯಿರೋತೆ ಸೋಸ್ಥೆನನಿ ಜೋ಼ಡ್ಮ ಲೀಖುಕರುಸ್.
1CO 1:2 ಕ್ರಿಸ್ತ ಯೇಸುಮ ಪವಿತ್ರ ಕರಿ ಬಣೈರಾಖ್ಯೊತೆ ಕೊರಿಂಥನಿ ದೇವ್ನಿ ಸಬೆವಾಳನ ಆ ಚಿಟ್ಟಿ ಲೀಖುಕರುಸ್. ತುಮೆ ದೇವ್ನು ಪವಿತ್ರ ಅದ್ಮಿಹುವಾನಖ್ಹಾಜೆ ಸ್ವೀಕಾರ್ ಹುಯಿರುತೆ ಇವ್ಣುನ ಪ್ರಭು ಹುಯಿರೋತೆ ಯೇಸುಕ್ರಿಸ್ತನ ನಾಮ್ಮ ವಿಶ್ವಾಸ್ ಕರಸ್ತೆ ಖ್ಹಾರಸ್ ಅದ್ಮಿನಿಜೋ಼ಡ್ಮ ತುಮೆ ಚೂ಼ಣೈರ‍್ಹಾಸ್. ಯೇಸುಕ್ರಿಸ್ತ ಇವ್ಣುನಾಬಿ ಅಪ್ಣುನಾಬಿ ಪ್ರಭು ಹುಯಿರ‍್ಹೊಸ್.
1CO 1:3 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥೀಬಿ ಪ್ರಭು ಯೇಸುಕ್ರಿಸ್ತಥೀಬಿ ತುಮೂನ ವಾರ್‌ಖ್ಹೊಬಿ, ಶಾಂತಿಬಿ ಮಳಾದೆ.
1CO 1:4 ದೇವ್ ಕ್ರಿಸ್ತಯೇಸುಥಿ ತುಮೂನ ದೀರಾಖ್ಯೋತೆ ವಾರ್‌ಖ್ಹಾನಖ್ಹಾಜೆ ಮೇ ತುಮಾರಖ್ಹಾಜೆ ಮಾರ ದೇವ್ನ ಕದೇಬಿ ಧನ್ಯವಾದ್ ಕರುಸ್.
1CO 1:5 ಶನಕತೊ ಯೇಸುಮ ಖ್ಹಾರೀಸ್‍ಥರಾನಿ ಅಖ್ಖಿ ಆಶೀರ್ವಾದ್‌ನ ಲೀರಾಖ್ಯಾತೆ ತುಮೆ ವಾತ್‍ಮಾಬಿ ಅಕ್ಕಲ್‌ಮಾಬಿ ಘಣ ಚಾ಼ತುರ್‌ವಾಳ ಹುಯಿರಾಸ್.
1CO 1:6 ಕ್ರಿಸ್ತನು ಬಾರೇಮಾನಿ ಸಾಕ್ಷಿ ತುಮಾರಮ ಘಟ್ ಛಾ಼.
1CO 1:7 ಅಮ್‍ರ‍್ಹವಾಪರ್, ಅಪ್ಣೊ ಪ್ರಭು ಯೇಸುಕ್ರಿಸ್ತ ಪಾಛೊ಼ ಆವಾನುಸ್ ಟಿವೈ ದೇಖುಕರಾತೆ ತುಮೆ, ದೇವ್‍ಥಿ ಆವಾತೆ ಹರೇಕ್ ವರಾನ ಲೀಲ್ಯಾವಾಳ ಹುಯಿರಾಸ್.
1CO 1:8 ಯೊ ತುಮೂನ ಖ್ಹರ್ತಿಲಗು ಘಟ್‍ರಾಖಿನ್ ಬಚಾ಼ಡ್‍ಷೆ. ಅಮ್ಮಸ್ ಅಪ್ಣೊ ಪ್ರಭು ಯೇಸುಕ್ರಿಸ್ತ ಬಿಜು಼ ಪಾಛೊ಼ ಆವಾನ ವೇಳ್ಮ ತುಮೆ ನಿರ್ದೋಷಿ ಹುಯಿರ‍್ಹಿಶು.
1CO 1:9 ದೇವ್‌ನೊ ಛಿಯ್ಯೋಬಿ ಅಜು಼ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನಿ ಜೋ಼ಡ್ಮ ಮಳಿನ್ ರ‍್ಹವಾನಖ್ಹಾಜೆ ತುಮೂನ ಬುಲಾಯೋತೆ ದೇವ್ ವಿಶ್ವಾಸ್‌ವಾಳೊ ಹುಯಿರ‍್ಹೊಸ್.
1CO 1:10 ಬೇನೆ, ಭೈಯೇವೊ, ಅಪ್ಣೊ ಪ್ರಭು ಯೇಸುಕ್ರಿಸ್ತನ ನಾಮ್‍ಥಿ ಮೇ ತುಮೂನ ಬಿಂತಿ ಕರುಸ್ತೆ ಶಾತ್‍ಕತೊ, ಅಬ್ಬಾಜ಼ಬ್ಬಿ ನಾ ಬೋಲ್ನುತೆ, ಅಷಿಲ್ ಕಮ್‍ಶಿಲ್ ಕರಿ ಬೇಭಾಗ್‌ ನಾ ರ‍್ಹೇವ್ಣು. ಎಕ್ಕಸ್ ದಿಲ್‌ಥಿ ಎಕ್ಕಸ್ ಖ್ಹಯಾಲ್‌ಥೀಬಿ ಎಕ್ಟುರ‍್ಹೀನ್ ಜಿವ್ಣು ಕರೊ,
1CO 1:11 ಶನಕತೊ ಭೇನೆ ಭೈಯೇವೊ ಖ್ಲೋಯೆನ ಘರ್‌ಥು ಆಯುಹುಯು ಥೋಡ ಜ಼ಣಾನೆ ತುಮಾರ ಇಚ಼್‌ಮ ಲಡೈ ಚಾ಼ಲುಕರಸ್‍ಕರಿ ಮನ ಬೋಲ್ಯು.
1CO 1:12 ಕತೊ ತುಮಾರಮ ಏಕ್‍ಜ಼ಣೊ, “ಮೇ ಪೌಲನ ಪೀಠೆ ಜ಼ವುಸ್‌” ಕರಿ ಬೋಲಸ್, ಬಿಜೇಕ್‍ಜ಼ಣೊ “ಮೇ ಅಪೊಲ್ಲೋಸನ ಪೀಠೆ ಜ಼ವುಸ್‌” ಕರಿ ಬೋಲಸ್. ಅಜು಼ ಬಿಜೇಕ್ ಜ಼ಣು, “ಮೇ ಕೇಫನ ಪೇತ್ರನ ಪೀಠೆ ಜವುಸ್‌ ಕರಿ ಬೋಲಸ್. ಅಜೇಕ್‌ಜ಼ಣೊ, “ಮೇ ಕ್ರಿಸ್ತನ ಪೀಠೆ ಜ಼ವುಸ್‌” ಕರಿ ಬೋಲಸ್.
1CO 1:13 ಕ್ರಿಸ್ತ ವಾಟಪಡಿರ‍್ಹೋಸ್‍ ಕಿಶು? ಪೌಲ ತುಮಾರಖ್ಹಾಜೆ ಶಿಲ್‌ಬೇಪರ್ ಮರ‍್ಯೊಕಿಶು? ತುಮೆ ಪೌಲನ ನಾಮ್‍ಥಿ ಬ್ಯಾಪ್ತಿಸ್ಮ ಕರೈಲಿದ ಕಿಶು?
1CO 1:14 ತುಮಾರಮ ಕ್ರಿಸ್ಪನ ಬಿಜು಼ ಗಾಯನ ಮ್ಹೇಲ್ಯುತೊ ಬಿಜು಼ ಕಿನಾಬಿ ಮೇ ಬ್ಯಾಪ್ತಿಸ್ಮ ಕರಾಯೊಕೊಂತೆ ಇನಖ್ಹಾಜೆ ದೇವ್ನ ಧನ್ಯವಾದ್‌ ಕರುಸ್.
1CO 1:15 ಇನೇಥಿ ಮಾರ ನಾಮ್‍ಪರ್ ಬ್ಯಾಪ್ತಿಸ್ಮ ಕರೈರಾಖ್ಯಸ್‍ಕರಿ ಬೋಲಾನ ತುಮಾರಮ ಕಿನೇಥೀಬಿ ಹಮ್ಕೆ ಉಷೆಕೊಯ್ನಿ.
1CO 1:16 ಮೇ ಸ್ತೆಫನನ ಘರ್‌ವಾಳಾನ ಮ್ಹೇಲಿನ್, ಬಿಜು಼ ಕಿನಾಬಿ ಬ್ಯಾಪ್ತಿಸ್ಮ ಕರಾವನಿತರ ಮನ ದೇಖಾವಕೊಯ್ನಿ.
1CO 1:17 ಕ್ರಿಸ್ತನೆ ಮನ ಮೋಕ್‍ಲ್ಯೊತೆ ಬ್ಯಾಪ್ತಿಸ್ಮ ದ್ಯವಾನ ಕಾಹೆ. ಸುವಾರ್ತೆನ ಖ್ಹಮ್‍ಜಾ಼ಡನಖ್ಹಾಜೆ ಎತ್ರೇಸ್. ಕತೋಬಿ ಖಾಲಿ ಅದ್ಮಿನಿ ಅಕ್ಕಲ್‍ಥಿ ಬೋಲಿ ಖ್ಹಮ್‌ಜಾ಼ಡನ ಮನ ಮೋಕ್‌ಲ್ಯೊ ಕೊಯ್ನಿ. ಮೇ ಕಾಯ್‌ತೋಬಿ ಲೋಕ್‌ನಿ ಗ್ಯಾನ್‌ಥಿ ಸುವಾರ್ತೆ ಬೋಲ್ಯೊಹೊತ್ತೊ ಕ್ರಿಸ್ತನಿ ಶಿಲ್‌ಬೇನಿ ಶಕತ್ ಫಾಯಿದೊಕೊಂತೆ ಹುಯುಹೊತ್ತ್.
1CO 1:18 ಶನಕತೊ ನಾಶನ ಮಾರಗ್‍ಮಛಾ಼ತೆ ಅದ್ಮಿಖ್ಹಾರಾನ ಶಿಲ್‌ಬೇನು ಬೋಧನೆ ಪಾಗಲ್‍ಪನ್ ಹುಯಿರ‍್ಹೂಸ್. ಕತೋಬಿ ರಕ್ಷಣೆನ ಮಾರಗ್‍ಮ ಛಾ಼ತೆ ಅಪ್ಣುನತೋ ಯೋ ದೇವ್ನಿ ಶಕತ್ ಹುಯಿರ‍್ಹೀಸ್.
1CO 1:19 ಪವಿತ್ರ ದಪ್ತರ್‌ಮ ಅಮ್ ಲಿಖೈರ‍್ಹುಸ್, ‘ಗ್ಯಾನ್ನಿ ಗ್ಯಾನ್ ನಾಶ್ ಕರೀಸ್. ಬುದ್ದಿವಾಳನಿ ಬುದ್ದಿನ ಫಾಯಿದೊ ನಾ ರ‍್ಹೇವ್ಣುತೆ ತಿಮ್ ಕರೀಶ್’.
1CO 1:20 ಅಮ್‌ರ‍್ಹವಾಪರ್ ಅಕ್ಲಿ ಕಿಜ಼್ಜಛಾ಼? ಪಢಂತಿ ಕಿಜ಼್ಜ ಛಾ಼? ಆ ಹಗಾಮ್‍ನೊ ನವಿ ಗ್ಯಾನ್ನ ಢುಂಡಾವಾಳೊ ಕಿಜ಼್ಜ ಛಾ಼, ದೇವ್ ಜಗತ್ನಿ ಗ್ಯಾನ್ನ ಘೈಲು ಕರಿನಾಖ್ಯೊ!
1CO 1:21 ಹೈರೂತೆ ದೇವ್ನಿ ಗ್ಯಾನ್ನಿ ಖ್ಹೂಜ಼್ ಹುಯಿರ‍್ಹುಥು. ಜಗತ್‌ ಇನಿ ಶೊಂತ್ ಗ್ಯಾನ್‌ಥಿ ದೇವ್ನ ಖ್ಹಮ್‍ಜಿರಾಖ್ಯುಥು ಕೊಯ್ನಿ. ಇನಖ್ಹಾಜೆ ಘೈಲಾನಿತರ ದೆಖಾವತೆ ಬೋಧನ್‍ಥಿ ವಿಶ್ವಾಸ್ ಕರವಾಳನಿ ರಕ್ಷಣೆ ಕರಾನು ದೇವ್ನ ಅಛ್ಛು಼ಕರಿ ದೆಖಾಯು.
1CO 1:22 ಯೆಹೂದ್ಯರ್‌ಖ್ಹಾರು ಸಾಕ್ಷಿನಖ್ಹಾಜೆ ಖ್ಹಣೇದ್‌ನಕಾಮ್ನ ಖ್ಹಮ್‍ಜ಼ಸ್. ಗ್ರೀಕ್‍ವಾಳಾನ ಗ್ಯಾನ್ನ ಢೂಂಡಸ್.
1CO 1:23 ಅಪ್ಣೆತೋಬಿ ಶಿಲ್‌ಬೇಪರ್ ಮರೈಗಯೋತೆ ಕ್ರಿಸ್ತನಿ ಬಾರೇಮ ಬೋಲಿಯೇಸ್. ಆ ಹೈರುತೆ ಯೆಹೂದ್ಯರ್‌ನ ಅಡ್ಡಿ ಹುಯಿರ‍್ಹೂಸ್. ಯೆಹೂದ್ಯರ್‌ಕಾಹೆತೆ ಅದ್ಮಿನ ಘೈಲಾನಿತರ ದೇಖಾವಸ್.
1CO 1:24 ಕತೋಬಿ ದೇವ್‍ಥಿ ಬುಲೈಲಿದಹುಯ ಅದ್ಮಿ ಯೆಹೂದ್ಯರ್ ಹುಯಿರ‍್ಹತೋಬಿ ಯೆಹೂದ್ಯರ್‌ಕಾಹೇತೆ ಹುಯಿರ‍್ಹುತೋಬಿ ಇವ್ಣುನ ಕ್ರಿಸ್ತಾಸ್ ದೇವ್ನಿ ಶಕತ್‍ ಹುಯಿರ‍್ಹೋಸ್. ಅಜು಼ ದೇವ್ನಿ ಅಕ್ಕಲ್ ಹುಯಿರೊಸ್.
1CO 1:25 ಶನಕತೊ ದೇವ್ನಿ ಕಮ್‍ಜೋ಼ರ್ ಅದ್ಮಿನಿ ಅಕ್ಕಲ್‍ಥಿ ಮಹಾನ್ ಹುಯಿರುಸ್. ದೇವ್ನಿ ಕಮ್‍ಜೋ಼ರಿಕತೊ ಅದ್ಮಿನಿ ತಾಖಥಿಬಿ ಘಣು ಶಕತ್ನು ಹುಯಿರುಸ್.
1CO 1:26 ಭೇನೆ, ಭೈಯೇವೊ, ದೇವ್ ತುಮೂನ ಬುಲಾವನಿ ವಖ್ಹತ್‌ಮ ತುಮೆ ಕಿಮ್‍ಥಾಕರಿ, ಯಾದ್ ಕರಿಲೆವೊ. ಜಗತ್ನಿ ಗಣ್ತಿಮ ತುಮಾರಮ ಕೈಏಕ್ ಜ಼ಣು ಅಕ್ಕಲ್‍ವಾಳು ಕೋ ಹುಯಿರ‍್ಹಾಥಾನಿ: ಅದಿಕಾರಿ ಕೋ ಹುಯಿರ‍್ಹಾಥಾನಿ; ಮರ್ಯಾದಿನೊ ಕೋ ಹುಯಿರ‍್ಹಾಥಾನಿ.
1CO 1:27 ಕತೋಬಿ ಆ ಜಗತ್ನ ಅಕ್ಲಿಖ್ಹಾರಾನ ಖ್ಹರಮ್‌ ಕಾಡಾನಖ್ಹಾಜೆ ದೇವ್ನೆ ಕಮ್‍ಜೋ಼ರ್ ಛಾ಼ತೆ ಇವ್ಣುನ ಚೂ಼ಣಿರಾಖ್ಯೊಸ್; ಶಕತ್‍ವಾಳಾನ ಖ್ಹರಮ್‌ ಕಾಡಾನಖ್ಹಾಜೆ ಕಮ್‍ಜೋ಼ರಿ ಶಕತ್‍ವಾಳನ ಚೂ಼ಣಿರಾಖ್ಯೊಸ್.
1CO 1:28 ಜಗತ್‌ ಖೆವಾನ ಮುಖ್ಯಕರಿ ಸೋಚಸ್ಕಿ ಇನ ನಾಶ್‍ಕರಾನ ದೇವ್ನೆ ಲ್ಹಾಯೇಕ್‍ಕೊಯ್ನಿ ಕರಿ ಸೋಚಾತೆ ಇವ್ಣುನ ದೇವ್ನೆ ಚೂ಼ಣಿಲಿದೊ.
1CO 1:29 ಅಮ್‍ರ‍್ಹವಾಪರ್ ದೇವ್ನ ಖ್ಹಾಮ್ಣೆ ಮೋಟೊಕರಿ ಖ್ಹರೈಲ್ಯವಾನ ಕಿನಾಬಿ ಮೋಕಕೊಯ್ನಿ.
1CO 1:30 ತುಮೂನ ಕ್ರಿಸ್ತಯೇಸುಮ ಏಕ್‌ಭಾಗ್ ಕರಿ ಬಣಾಯೋತೆ ದೇವ್ನೇಸ್. ಕ್ರಿಸ್ತ ಅಪ್ಣಖ್ಹಾಜೆ ದೇವ್‌ಕಂಥು ಆಯೋತೆ ಗ್ಯಾನಿ ಹುಯಿರೊಸ್. ಅಪ್ಣೆ ನೀತಿವಾಳ ಹುಯಿರ‍್ಹವಾನ, ಅಪ್ಣೆ ಅಖ್ಖು ಪವಿತ್ರಹುಯಿರ‍್ಹಾಸ್.
1CO 1:31 ಇನಖ್ಹಾಜೆ ಪವಿತ್ರ ದಪ್ತರ್ ಬೋಲಸ್ತೆ ಇಮ್‌ ಭಡವಾಳೊ ಪ್ರಭುಮಾಸ್ ಭಡಾದೆ.
1CO 2:1 ಪ್ಯಾರ್‌ನ ಭೈಯೇ ಭೇನೆವೊ, ಮೇ ದೇವ್ನ ಖ್ಹಾಚ಼ನ ಖ್ಹಮ್‍ಜಾ಼ಡ್‌ತೊಹುಯಿನ್ ತುಮಾರಕನ ಆಯೊ. ಕತೋಬಿ ಮೇ ಚಾ಼ತುರ್ ವಾತೇಥಿ ರ‍್ಹವೊ ಅಕ್ಕಲ್‍ಥಿ ರ‍್ಹವೊ ಕೊ ಆಯೋನಿ.
1CO 2:2 ಶನಕತೊ ಮೇ ಶಿಲ್‌ಬೇಪರ್ ಮರಾಯೋತೆ ಯೇಸು ಕ್ರಿಸ್ತನಾಸ್ ಪಣ್ಕಿ ಬಿಜು಼ ಶನಾಬಿ ತುಮಾರಮ ಮಾಲುಮ್ ಕರಾವವಾಳೊ ಕೊ ಹುಯಿರ‍್ಹಿಶ್‌ನಿ ಕರಿ ತೀರ್ಮಾನ್ ಕರಿರಾಖ್ಯೊಸ್.
1CO 2:3 ಆ ನಾಹುಯಿನ್ ಮೇ ತುಮಾರಕನ ಆಯೋತೆ ತದೆ, ಲಾಚ಼ರ್‌ಥೊ; ಅಜು಼ ಡರ್‌ಥಿ ಕಾಪವಾಳೊ ಹುಯಿರೋಥೊ.
1CO 2:4 ಮಾರು ಉಪದೇಶ್ ಅಜು಼ ವಾತೆಮ ಅದ್ಮಿನಿಖ್ಹಯಾಲ್‍ನ ರ‍್ಹವಾನುಬಿ ಅಜು಼ ಅಛ್ಛಿ ವಾತೇಥಿ ಮಳಿರ‍್ಹುಥು ಕೊಯ್ನಿ. ಕತೋಬಿ ದೇವ್ನುಆತ್ಮ ದಿಲ್‌ಫರಾವನಿ ಸಾಕ್ಷಿಹುಯಿರ‍್ಹುಸ್ತೆ ಶಕಥ್ಥಿ ಮಳಿಹುಯು ಹುಯಿರ‍್ಹುಥು.
1CO 2:5 ತಾರಿ ವಿಶ್ವಾಸ್ ಅದ್ಮಿನಿ ಖ್ಹಯಾಲ್‌ಪರ್‌ ನಾ ಢೊವೈ ರ‍್ಹೇವ್ಣುತೆ ದೇವ್ನಿ ಶಕತ್‌ಪರ್ ಢೊವೈ ರ‍್ಹೇವ್ಣುಕರಿ ಮೇ ಅಮ್ ಕರ‍್ಯೊ.
1CO 2:6 ರ‍್ಹಯುತೋಬಿ ಆತ್ಮೀಕಥಿ ಭಡಿರ‍್ಹವಾಳನ ಅಪ್ಣೆ ಗ್ಯಾನ್ನಿ ಬೋಧನೆ ಕರೇಸ್. ಪಣ್ಕಿಯೊ ಜಗತ್ನಕಾಹೆ; ನತರ್ ಆ ಹಗಾಮ್ಮ ಅದಿಕಾರಿಯೇವ್‌ನಿ ಅದಿಕಾರ್‌ನ ಸಂಬಂದ್ನು ಕಾಹೆ.ಯೊ ಅದಿಕಾರಿಖ್ಹಾರು ಇವ್ಣಿ ಅದಿಕಾರ್‌ನ ಗುಮೈಲೆ಼ವ್‌ಕರಸ್.
1CO 2:7 ಅಪ್ಣೆತೋಬಿ ಹಮ್ಕೆಲಗು ದೇವ್ನಿ ಗಪ್ಲತ್ ಹುಯಿರ‍್ಹವಾನು ಅಕ್ಕಲ್‌ನಾಸ್ ಬೋಲೆಸ್. ಆ ಅಕ್ಕಲ್‍ ಅದ್ಮಿಖ್ಹಾರೇಥಿ ಲಪಾಡೈರ‍್ಹೂಸ್. ದೇವ್ನೆ ಅಪ್ಣ ಮಹಿಮೆನಖ್ಹಾಜೆ ಆ ಅಕ್ಕಲ್‍ನ ಜಗತ್‌ನು ಉಬ್‍ಜಾ಼ವ್ಣಿನ ಶುರುವಾತ್ನ ಅಗಾಡಿಸ್ ಚೂ಼ಣಿರಾಖ್ಯೊಸ್.
1CO 2:8 ಅನ ಆ ಜಗತ್‌ನು ಅದಿಕಾರಿ ಖಿವೂಬಿ ಆ ಅಕ್ಕಲ್‍ನ ಮಾಲುಮ್ ಕರಿರಾಖ್ಯುಥು ಕೊಯ್ನಿ. ಮಾಲುಮ್ ಕರಿರಾಖ್ಯುಹೊತ್ತೊ ಇವ್ಣೆ ಮಹಿಮೆನೊ ಪ್ರಭುನ ಶಿಲ್‌ಬೆಪರ್ ಕೋ ಮರಾಯುಹೊತ್ನಿ.
1CO 2:9 ಇನಖ್ಹಾಜೆ ದೇವ್ನಿ ವಚನ್‍ಮ ಲೀಖಾವನಿತರ, ದೇವ್ನೆ ಇನ ಪ್ಯಾರ್ ಕರವಾಳನಖ್ಹಾಜೆ ಕರಿರಾಖ್ಯೊತೆ ಖ್ಹಾರಸ್ನ ಖಿವು ಡೋಳೊಬಿ ದೇಖ್ಯುಕೊಯ್ನಿ, ಖಿವು ಕಾನ್‌ಬಿ ಖ್ಹಮ್‍ಜ್ಯುಕೊಯ್ನಿ, ಯೊ ಏಕ್‍ಜ಼ಣಾನ ದಿಲ್ನಿ ಖ್ಹಯಾಲ್‌ಮಾಬಿ ಕೊಆಯುನಿ.
1CO 2:10 ಕತೋಬಿ ದೇವ್ನೆ ಇನ ಪವಿತ್ರಾತ್ಮಥಿ ಆ ಗಪ್ಲತ್‌ನ ಬೋಲಿವತಾಳ್ಯೊ. ಯೊ ಪವಿತ್ರಾತ್ಮಸ್ ಆ ಅಖ್ಖು ದೇವ್ನಿ ಗಪ್ಲತ್‌ನಿ ವಿಚಾರ‍್ನ ಗಧಾರ್‌ಥಿ ಢೂಂಢವಾಳೊ ಹುಯಿರ‍್ಹೋಸ್.
1CO 2:11 ಶನಕತೊ ಏಕ್‍ಜ಼ಣಾನಿ ಖ್ಹೂಜ಼್‌ನಿ ಬಾರೇಮ ಇನಾಮ ಛಾ಼ತೆ ಆತ್ಮಾನ ಕಾಹೆತೆ ಕಿನಾಬಿ ಮಾಲುಮ್‌ ಕೊಯ್ನಿ. ಇಮ್ಮಸ್ ದೇವ್ನಿ ಖ್ಹೂಜ಼್‌ನ ದೇವ್‌ನೊ ಆತ್ಮಾಸ್‌ ಮಾಲುಮ್‌ ಕರ‍್ನು ಪಣ್ಕಿ ಬಿಜು಼ ಖೆವಾನಬಿ ಹುವಾನು ಕಾಹೆ.
1CO 2:12 ಅಪ್ಣೆ ಜಗತ್‌ಮಛಾ಼ತೆ ಆತ್ಮಾನ ಲೀರಾಖ್ಯಾಕೊಯ್ನಿ ದೇವ್ ಅಪ್ಣುನ ಫುಗಟ್ನಿ ಗೋರ್‌ಥಿ ದಿದೊತೆ ವರಾನ ಮಾಲುಮ್ ಕರಿಲ್ಯವಾನಖ್ಹಾಜೆ ದೇವ್‍ಥಿ ಆಯಿತೆ ಆತ್ಮನಾಸ್ ಲೀರಾಖ್ಯಸ್.
1CO 2:13 ಅನಖ್ಹಾರು ಬೋಲಾನಿವಖ್ಹ್‌ತೆ ಅದ್ಮಿನಿ ಅಕ್ಕಲ್‍ಥಿ ಶಿಕಿಹುಯಿ ವಾತೆಖ್ಹಾರು ಕೋಬೊಲ್ಯೊಂತೆ ಪವಿತ್ರಾತ್ಮನೆಸ್ ಶಿಕಾಡಿದಿದೋತೆ ವಾತೆನಾಸ್ ಬೋಲಿಲ್ಯವಾಳ ಹುಯಿರಾಸ್. ಅಮ್ ಆತ್ಮೀಕಥಿ ರ‍್ಹೇಸ್ತೆ ಖ್ಹಾಚ಼ನ ಆತ್ಮಾಮ ರ‍್ಹವಾಳನ ರಹಾಥಿ ಬೋಲಿವತಾಳಸ್.
1CO 2:14 ಜಗತ್‌ನು ಹುಯಿರ‍್ಹಾವಳೊ ದೇವ್ನಿ ಆತ್ಮಾನಿ ವಾತೇನ ಸ್ವೀಕಾರ್ ಕೋಕರಾನಿ; ಯೊ ಅಖ್ಖು ಇನ, ಘೈಲಿ ವಾತೆನಿಘೋಣಿ ದೇಖಾವಸ್. ಯೋ ಅದ್ಮಿ ಪವಿತ್ರಾತ್ಮನಿ ವಾತೇನ ಸೋಚಾನ ಕೊ ಹುವಾನಿ; ಶನಕತೊ ಯೊ ವಾತೇವ್ನ ಆತ್ಮೀಕ್‌ ಪರಕ್ಮಾಸ್ ವಿಚಾರ್ ಕರ‍್ನು.
1CO 2:15 ಪವಿತ್ರಾತ್ಮನ ಲೀರಾಖವಾಳೊ ತೀರ್ಪ್ ಕರೆಜಾ಼ಯ್. ಕತೋಬಿ ಇನ ಬಿಜು಼ ಕೋಣ್‌ಬಿ ವಿಚಾರ್ ಕರಾನ ಕೋ ಹುವಾನಿ.
1CO 2:16 ಪವಿತ್ರ ದಪ್ತರ್‌ಮ ಬೋಲಾನಿತರ, “ಪ್ರಭುನ ದಿಲ್ನ ಕೋಣ್‍ ಮಾಲುಮ್‌ ಕರಿರಾಖ್ಯುಸ್? ಇನ ಖ್ಹೂಜ಼್ ಬೋಲಿ ದಿಶೆ ಕೋಣ್?” ಅಪ್ಣೆತೋಬಿ ಕ್ರಿಸ್ತಯೇಸುನೊ ದಿಲ್ನ ಲೀರಾಖವಾಳ ಹುಯಿರ‍್ಹಾಸ್.
1CO 3:1 ಭೈಯೆ. ಭೇನೆವೊ. ಮೇತೊ ಆತ್ಮೀಕಥಿ ರ‍್ಹೆಯಿತೆ ಇವ್ಣಿಜೋ಼ಡೆ ವಾತೆ ಬೋಲುತೆ ತಿಮ್ ತುಮಾರಿಜೋ಼ಡ್ಮ ವಾತೆ ನಾಬೋಲ್ನುಥು. ಕ್ರಿಸ್ತನಿ ವಿಶ್ವಾಸ್‌ಮ ಅಡ್ಡಾಣಿ ಲಡ್ಕನಿತರ ಛಾ಼ತೆ ತುಮಾರೇಥಿ ಆ ಜಗತ್ನ ಬೋಲಾನಿಮತ್ ಮೇ ತುಮಾರೇಥಿ ವಾತೆಬೋಲ್ನು ಪಡ್ಯುಥು.
1CO 3:2 ತುಮುನ ದೂದ್ ಪಿಡಾಯೊ ಖಾಣು ದಿದೋಕೊಯ್ನಿ. ಖಾಣು ಖಾವಾನ ತುಮೆ ಬಿಜೂ಼ಬಿ ತಾಖತ್ತಿ ಕೊಹುಯಿರಾಥಾನಿ. ಹಮ್ಕೆಬಿ ತುಮೆ ತಾಖತ್ತಿಕೊಯ್ನಿ.
1CO 3:3 ಶನಕತೊ ತುಮೆ ಅಜೂ಼ಬಿ ಜಗತ್‌ವಾಳ ಹುಯಿರ‍್ಹಾಸ್, ತುಮಾರಮ ಪೇಟ್ನೊ ಬಳಾಪೊ ಲಡೈಝ಼ಗ್‍ಡೊ ರ‍್ಹವಾನಿಘೋಣಿ, ತುಮೆ ಜಗತ್‌ವಾಳ ಹುಯಿರ‍್ಹಿನ್ ಖಲಿ ಬಿಜಾ಼ಅದ್ಮಿನಿಮತ್ ಚಾ಼ಲಸ್ ಕೊಯ್ನಿಕಿಶು?
1CO 3:4 ತುಮಾರಮ ಏಕ್ಜ಼ಣೊ “ಮೇ ಪೌಲಭಣಿನೊಕರಿ ಅಜು಼ ಬಿಜೇಕ್ಜ಼ಣೊ ಅಪೊಲ್ಲೋಸನ ಭಣಿನೊ ಕರಿ,ತುಮೆ ಮಹಿ ಆಡಫೇಡ್ ಬೋಲಿನ್ ಜಗತ್ನ ಅದ್ಮಿನಿತರಸ್ ಚಾ಼ಲಿಲ್ಯಾವಾಳ ಹುಯಿರ‍್ಹಾಸ್ ಕೊಯ್ನಿಕಿಶು?
1CO 3:5 ಇಮ್‍ಕತೊ ಅಪೊಲ್ಲೋಸ ಕೋಣ್? ಪೌಲ ಕೋಣ್? ಇವ್ಣಿ ಸೇವಾಥಿ ತುಮೆ ಕ್ರಿಸ್ತಾನ ವಿಶ್ವಾಸ್ ಕರಾನಿ ಘೋಣಿಹುಯು. ಪ್ರಭು ಹರೇಕ್‌ಥಿ ಜ಼ಣಾನ ದೆವೈರ‍್ಹೂತೆ ಇನ ಅಪ್ಣೆ ಸೇವೆ ಕರಾವಾಳ ಹುಯಿರ‍್ಹಾಸ್.
1CO 3:6 ಮೇ ಪಂಡುಗಾಡ್ಯೋ. ಅಪೊಲ್ಲೋಸನೆ ಪಾಣಿನಾಖ್ಯೋ. ಕತೋಬಿ ಇನ ಫೋಡಾಯೊತೆ ದೇವ್ನೇಸ್.
1CO 3:7 ಇನ ಖ್ಹಾಜೆ ಗಾಡವಾಳು ಹುಯಿ‍ರ‍್ಹೆವೊ, ಪಾಣಿ ನಾಖಾವಾಳು ಹುಯಿ‍ರ‍್ಹೆವೊ ಮುಖ್ಯಕಾಹೆ.ಮೋಟುಕರಾವಳೊ ದೇವ್ ಎಕ್ಕಸ್‍ಜ಼ಣೊ. ಮುಖ್ಯ ಹುಯಿರ‍್ಹೋಸ್.
1CO 3:8 ಪಂಡಾನ ಗಾಡವಾಳು ಅಜು಼ ಪಾಣಿ ನಾಖಾವಾಳನಿ ಖ್ಹೂಜ಼್ ಎಕ್ಕಸ್ ಹುಯಿರ‍್ಹೀಸ್. ಕತೋಬಿ ಹರೇಕ್ನ ಇವ್ಣಿ ಮ್ಹಿನತ್‌ನಿ ಘೋಣಿ ಇವ್ಣುನ ಪ್ರತಿಫಲ್ ಮಳಸ್.
1CO 3:9 ಶನಕತೊ ಹಮೆ ದೇವ್ನಖ್ಹಾಜೆ ಜೋ಼ಡ್ಮಕಾಮ್‍ ಕರಾವಾಳ. ತುಮೆ ದೇವ್ನು ಖೇತರ್‌ ಹುಯಿರ‍್ಹಾಸ್. ದೇವ್ನು ಪ್ರಾರ್ಥನೇನಿ ಮಂದಿರ್‌ ಹುಯಿರ‍್ಹಾಸ್.
1CO 3:10 ದೇವ್ನೆ ಮನದಿದೋತೆ ವಾರ್‌ಖ್ಹಾನಿ ಪರಕ್ಮ ಘರ್ ಭಾಂದಾವಾಳ ಚಾ಼ತುರ‍್ನಿ ಘೋಣಿ ಯೋ ಘರ್‌ನ ಮೆ ಹದಿಪಾಯ ನಾಖ್ಯೊ. ಬಿಜು಼ಜ಼ಣು ಇನಾಪರ್ ಭಾಂದಸ್. ಕತೋಬಿ ಹರೇಕ್‍ಜ಼ಣು ಯೋ ಕಿಮ್ ಭಾಂದು ಕರೂಸ್‌ಕರಿ ಹೊಶಾರ್ಥಿರ‍್ಹೀನ್ ಭಾಂದ್‌ಣು.
1CO 3:11 ಶನಕತೊ ದೇವ್ ಯೇಸುಕ್ರಿಸ್ತನ ತದೇಸ್‌ ಏಕ್‌ನಿಏಕ್‌ ಹದಿಪಾಯ ಕರಿ ಬಣೈರಾಖ್ಯೊಸ್. ಅಜು಼ ಬಿಜು಼ ಖಿವು ಹದಿಪಾಯನ ನಾಖನ ಕೋಉಷೇನಿ.
1CO 3:12 ಹದಿಪಾಯಪರ್ ಥೋಡುಜ಼ಣು ಖ್ಹೊನ್ನು, ರೂಪು, ಘಣ ಮೋಲ್ನ ಬಂಡಾಥಿ ಭಾಂದಸ್. ಅಜು಼ ಥೋಡುಜ಼ಣು ಲಾಕ್ಡು, ಘಾಖ್ಹ್‌ಥಿ ಭಾಂದ್ಯುತೋಬಿ,
1CO 3:13 ಆ ಅಖ್ಖಾಮ ಶನೇಥಿ ಭಾಂದ್ಯುತೋಬಿ ತದೆ ಹರೇಕ್ ಜ಼ಣಾನುಕಾಮ್ ಅಛ್ಛಿನಿತರ ದೆಖಾವ್‌ಶೆ; ಶನಕತೊ ಕ್ರಿಸ್ತ ಆವಾನೊದನ್ ಆಗ್‌ಥಿ ನಿಕ್ಳಿನ್ ಯೋ ಕಾಮ್ನ ಆಛ್ಛಿಂತರ ದೆಖಾಡ್‌ಶೆ. ಅಜು಼ ಯೋ ಆಗ್ ಪರ್ಖಿನ್ ಇನು ಖ್ಹಾಚು಼ ಮೋಲ್ನ ವತಾಳ್‌ಶೆ.
1CO 3:14 ಏಕ್‌ಜ಼ಣಾನೆ ಯೋ ತಳಹದಿಪರ್‌ ಭಾಂದಿಹುಯು ಬಚಿರ‍್ಹಯುತೊ ಯೋ ಭಾಂದವಾಳನ ಪ್ರತಿಫಲ್ ಮಳ್‌ಶೆ.
1CO 3:15 ಏಕ್‌ಜ಼ಣಾನೆ ಭಾಂದಿಹುಯು ಬಳಿಗಯುತೊ ಇನ ಲುಕ್ಷಾನ್‌ ಉಷೆ. ರ‍್ಹಯುತೋಬಿ ಆಗ್‌ಥಿ ಬಚಿಜಾ಼ವಳನಿತರ ರಕ್ಷಣೆ ಲೀಲಿಶೆ.
1CO 3:16 ತುಮೆ ದೇವ್ನು ಮಂದಿರ್‌ ಹುಯಿರ‍್ಹಾಸ್ ಕರಿ ದೇವ್ನಿ ಆತ್ಮ ತುಮಾರಮ ಜಿವ್ಣುಕರಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿಶು?
1CO 3:17 ಕೋಣ್‌ತೋಬಿ ದೇವ್ನ ಮಂದಿರ್‌ನ ನಾಶಕರ‍್ಯೂತೊ ದೇವ್ ಇನ ನಾಶ್‍ಕರಾವಾಳೊ ಹುಯಿರ‍್ಹೋಸ್. ಶನಕತೊ ದೇವ್ನು ಮಂದಿರ್‌ ಪರಿಶುದ್ ಹುಯಿರ‍್ಹೂಸ್. ಯೊ ಮಂದಿರ್‌ ತುಮೇಸ್ ಹುಯಿರ‍್ಹಾಸ್.
1CO 3:18 ಖೆವೋಬಿ ಏಕ್‍ಜ಼ಣೊ ಇನಾಯೋಸ್ ಧೋಕ ನಕೊ ಕರಿಲ್ಯವಾದೆ ತುಮಾರಮ ಖಿವುತೋಬಿ ಲೋಕ್‌ನಿ ಬಾರೇಮ ಅಕ್ಲಿ ಹುಯಿರ್‍ಹೊಸ್ ಕರಿ ಲ್ಹಾಯತೊ ಯೋ ಅಕ್ಲಿಹುವಾನಖ್ಹಾಜೆ ಪೆದ್ದೊಹುವಾದೆ.
1CO 3:19 ಶನಕತೊ “ಪವಿತ್ರ ದಪ್ತರ್‌ಮ ಲೀಖೈರ‍್ಹಾವನಿತರ ಆ ಲೋಕ್‌ನಿ ಅಕ್ಕಲ್ ದೇವ್ನ ಖ್ಹಾಮ್ಣೆ ಖ್ಹೈಲು ಹುಯಿರ‍್ಹುಸ್. ದೇವ್‌ ಅಕ್ಲಿನ ಇವ್ಣಿ ಹಿಕ್‌ಮತಿಥೀಸ್ ಖ್ಹಪ್‌ಡೈನಾಖಸ್‌”.
1CO 3:20 ಶನಕತೊ, “ಅಕ್ಲಿಖ್ಹಾರಾನು ಖ್ಹೂಜ಼್ ಫಾಯಿದೊಕೊಯ್ನಿ ಕರಿ ಪ್ರಭುನ ಮಾಲುಮ್ ಛಾ಼ ಕರೀಬಿ ಲೀಖೈರುಸ್ನಿ”.
1CO 3:21 ಅನಖ್ಹಾಜೇಥಿ ಖಲಿ ಅದ್ಮಿಯೇವ್‌ನಿ ಬಾರೇಮ ಕೋಣ್‌ಬಿ ಖ್ಹರೈಲೇವ್ಣುನಾ. ಶನಕತೊ ಖ್ಹಾರೂಸ್ ತುಮಾರಖ್ಹಾಜೇಸ್ ಛಾ಼.
1CO 3:22 ಪೌಲರ‍್ಹೆವೊ ಅಪೊಲ್ಲೋಸ ರ‍್ಹವೊ ಕೇಫನರ‍್ಹೇವೊ, ಜಗತ್ನಾರ‍್ಹೇವೊ ಜಾನ್‌ರ‍್ಹೇವೊ, ಮರಣಸ್‍ರ‍್ಹೇವೊ, ಹಮ್ಕೆನಿವಾತೆರ‍್ಹೇವೊ, ಅಗ್ಲಿವಾತ್‍ರ‍್ಹೇವೊ ಆ ಖ್ಹಾರು ತುಮಾರುಸ್.
1CO 3:23 ಅಜು಼ ತುಮೆ ಕ್ರಿಸ್ತವಾಳ ಹುಯಿರ‍್ಹಾಸ್ ಕ್ರಿಸ್ತ ದೇವ್‌ನೊ ಹುಯಿರ‍್ಹೋಸ್.
1CO 4:1 ಅಪ್ಣೊ ಕ್ರಿಸ್ತ ಯೇಸುನೊ ಸೇವಕ್ ಕರೀಬಿ ದೇವ್ನೆ ಇನು ಲಪಿರ‍್ಹವಾನು ಖ್ಹಾಚ಼ನ ಅಪ್ಣುನ ದೇಖಿಲ್ಯವಾಳಾಬಿ ಕರೀಬಿ ಗಣ್ತಿಮಲೆವ್ಣು.
1CO 4:2 ಅಮ್ನ ಸೇವಕ್‌ನ ಇನ ಮಾಲಿಕ್‌ನ ವಿಶ್ವಾಸ್‌ವಾಳ ಹುಯಿನ್ ರ‍್ಹವಾನು ಜ಼ರೂರತ್ ಛಾ಼.
1CO 4:3 ಮಾರಿ ಬಾರೇಮ ಬೋಲಾನಗಯೋತೊ, ತುಮಾರೇಥಿ ರ‍್ಹವೊ ಅದ್ಮಿನು ನಿಯಮ್ನ ನ್ಯಾವ್‌ನ ಮಂದಿರ್‌ಮರ‍್ಹವೊ ಮನ ವಿಚಾರ್ ರ‍್ಹಯುತೋಬಿ ಮೇ ಖ್ಹಯಾಲ್ಮ ಲೆವ್‍ಕೊಯ್ನಿ. ಕಾಹೆತೆ ಮಾರುಮೇಸ್ ನ್ಯಾಯತೀರ್ಪ್‌ ಕೋ ಕರಿಲೇವ್ನಿ.
1CO 4:4 ಮಾರಮ ದೋಷ್‌ ಛಾ಼ಕರಿ ಮಾರ ಮನ್‌ಮ ದೇಖಾವಕೊಯ್ನಿ, ತೋಬಿ ಮೇ ಖ್ಹಾಚ಼ಮಾಬಿ ನಿರ್ದೋಷ್‍ಕರಿ ಸಬೂತ್ ಕರಾನುಕೊಯ್ನಿ. ಮನ ನ್ಯಾವ್‌ ಫೇಡವಾಳೊ ಪ್ರಭುಸ್.
1CO 4:5 ಅನಖ್ಹಾಜೆ ಕಬ್ಲಗು ಪ್ರಭು ಕೊ ಆವಾನಿಕಿ ಯೊ ವಖ್ಹತ್‌ನ ಅಗ್ಗಳಸ್ ಶನುಬಾರೇಮಾಬಿ ನ್ಯಾವ್‌ನು ತೀರ್ಪ್ ನಕೊಕರ್ಷು; ಇನೆ ಅಂಧಾರಮಾನು ಲಪಿಹುಯು ಕಾಮ್‌ಖ್ಹಾರು ಉಜಾ಼ಳಾಮ ಲೀನ್‌ ಆವ್‌ಶೆ. ಅದ್ಮಿನಿ ದಿಲ್ನಿಖ್ಹಾರಿ ಸೋಚ್ನ ಭಾರ್‌ ಕಾಡ್‌ಶೆ. ತದೆ ಹರೇಕ್‍ಜ಼ಣಾನ ಆವ್ಣುತೆ ಖ್ಹರಾವ್ಣಿ ದೇವ್‍ಥೀಸ್‍ ಮಳ್‌ಶೆ.
1CO 4:6 ಭೈಯೇ ಭೇನೆವೊ, ಮೇ ತುಮಾರಖ್ಹಾಜೇಥಿ ಮನಾಬಿ ಅಪೊಲ್ಲೋಸನಾಬಿ ಮತ್ಲಬ್ ಲೀನ್ ಬೋಲಿರಾಖ್ಯೊಸ್ ಅನಖ್ಹಾಜೆ ತುಮೆ “ಲೀಖೈರುತೆ ಖ್ಹಾರು ನಿಯಮ್ನ ಮೀರಿನ್ ಚಾ಼ಲ್‌ನುಕರಿ ಆ ವಚನ್ನಿ ಮತ್ಲಬ್‌ನ ಹಮಾರೇಥಿ ಶಿಕಿಲಿನ್, ತುಮಾರಮ ಕೋಣ್‌ಬಿ ಏಕ್‍ಜ಼ಣಾಭಣಿ ಮಳಿನ್ ಬಿಜೇಕ್‍ಜ಼ಣಾನ ಚಿಂಘಾವ್ಣಿ ನಾಕಾಡ್ನು.
1CO 4:7 ತುನ ಬಿಜ಼ ಖ್ಹಾರಾಥೀಬಿ ಊಚೊ಼ಕರ‍್ಯೊಕೋಣ್? ದೇವ್‍ಥಿ ಲಿದೊಕೊಂತೆ ತಾರಾಮ ಏಕ್‍ತೋಬಿ ಛಾ಼ಕಿಶು? ಅಮ್ ಅಖ್ಖೂಸ್ ದೇವ್‍ಥಿ ಲ್ಯವಾಪರ್ ಲಿದೊಕೊಂತೆ ತಿಮ್ ಖ್ಹರಾವ್ಣಿ ಶನಕಾಡಿಲೇಸ್?
1CO 4:8 ತುಮೂನ ಜ಼ರೂರ್‌ನು ಅಖ್ಖು ಛಾ಼ಕರಿ ತುಮೆ ಲಹಿರಾಖ್ಯಸ್ ತುಮಾರುತುಮೆ ಧನ್‌ದೌಲತ್‌ವಾಳ ರಾಜ಼ವ್ ಕರಿ ಲಹಿರಾಖ್ಯಸ್. ತುಮೆ ಖ್ಹಾಚಮಾಬಿ ಹಮೂನ ಮ್ಹೇಲಿನ್ ರಾಜ಼್‌ಭಾರ್ ಚ಼ಲಾಯಹೊತ್ತೊ ಮನ ಖುಷಿ ಹುಯಿರ‍್ಹುಹೊತ್. ತದೆ ಹಮೆಜಿನು ತುಮಾರ ಜೋ಼ಡೆ ಮಳಿನ್ ರಾಜ಼್‌ಭಾರ್ ಕರ‍್ಯಹೊತ್.
1CO 4:9 ಇಮ್‌ ನಾಹುಯಿನ್ ದೇವ್ನೆ ಅಪೊಸ್ತಲರ್ ಹುಯಿರ‍್ಹಾಸ್ತೆ ಅಪ್ಣುನ ಮರಣ್ಣಿ ತೀರ್ಪ್ ಲೀಲ್ಯಾವಳಾನಿತರ ಕಡ್‌ಶೀನೊ ಟಪ್ಪೊ ದೀರಾಖ್ಯೊಸ್‍ಕರಿ ಮನ ದೇಖಾವಸ್. ಅಪ್ಣೆ ಜಗತ್‌ಮ ದೇವ್ ದೂತರ್‌ನಾಬಿ ಅದ್ಮಿನಾಬಿ ಕತೊ ಜಗತ್‌ವಾಳನ ಖ್ಹಾಮ್ಣೆಸ್ ಚಿಂಘಾವ್ಣಿ ಕಡೈಲಿದ.
1CO 4:10 ಹಮೆ ಕ್ರಿಸ್ತನಖ್ಹಾಜೆ ಖ್ಹೈಲು ಹುಯಿರಾಸ್. ಕತೋಬಿ ಕ್ರಿಸ್ತಮ ತುಮೆ ಜಾ಼ಖ್ಹತ್ ಅಕ್ಲಿಕರಿ ಲಹಿರಾಖ್ಯಸ್. ಹಮೆ ಶಕತ್‌ಕೊಂತೆ ಹುಯಿರಾಸ್. ಕತೋಬಿ ತುಮಾರು ತುಮೇಸ್ ತಾಖತ್ತಿಕರಿ ಲಹಿರಾಖ್ಯಸ್! ಹಮೆ ಚಿಂಘೈಲಿದಹುಯ, ತುಮುನ ಮರ್ಯಾದಿವಾಳ ಹುಯಿರ‍್ಹಾಸ್.
1CO 4:11 ಹಮ್ಕೆಲಗೂಬಿ ಹಮೆ ಭುಕ್ಯಛಿಯ್ಯೆ಼; ಠೋಖ್ಹ್‌ಲಾಗ್ಯಹುಯ ಹುಯಿರ‍್ಹಾಸ್; ಫೆರಾನಖ್ಹಾಜೆ ಹೋಣುತೆ ಎತ್ರು ಲುಂಗ್ಡು ಕೊಯ್ನಿ; ಕದೆಕದೆ ಮಾರ್ ಖಾವವಾಳ; ಹಮುನ ಘರ್‌ಬಿಕೊಯ್ನಿ.
1CO 4:12 ಶೊಂತ್ ಹಾಥ್ಥಿ ಮ್ಹಿನತ್‌ಕರಿನ್ ಜಿವೇಸ್. ಹಮುನ ಶಾಪದಿದೂತೆ ಇವ್ಣುನ ವಾರ್‌ಖ್ಹೊ ದಿಯೇಸ್. ಲೋಗ್‌ ಖ್ಹತಾಪ್ಣಿ ದ್ಯವಾನಿ ವಖ್ಹ್‌ತೆ ಹಮೆ ಖ್ಹಮಾಳಿಲಿಯೆಸ್.
1CO 4:13 ಹಮುನ ಚಾ಼ವ್‌ಣ್ಯಕಾಡನಿ ವಖ್ಹ್‌ತೆ ಗೋರ್‌ಥಿ ಜವಾಬ್‌ ದಿಶು.ಆ ಜಗತ್ನಿ ಝಿಟ್ಕಾರ್‌ಥಿ ಮೋಟ ಶಾತ್ಬಿ ಕಾಹೆ. ಹಮೆ ಹಮ್ಕೆಲಗೂಬಿ ಜಗತ್‌ಮ ಜ಼ಮೀನ್ನ ಕಚ್ರಾ಼ನಿತರಸ್ ಛಿಯ್ಯೆ಼.
1CO 4:14 ತುಮೂನ ಖ್ಹರಮ್‍ ಕಾಡನಖ್ಹಾಜೆ ಲೀಖ್ಯೊಕೊಯ್ನಿ. ಮಾರ ಪ್ಯಾರ್‌ನ ಲಡ್ಕಾನಿಘೊಣಿ ಸೋಚಿನ್ ತುಮೂನ ಅಕ್ಕಲ್ ಬೋಲಾನ ಖ್ಹಾಜೇಸ್ ಆ ವಾತೆಖ್ಹಾರಿ ಲೀಖಿರಾಖ್ಯೊಸ್.
1CO 4:15 ತುಮೂನ ಕ್ರಿಸ್ತಮ ಬೋಧನೆ ಕರಾವಾಳು ದಖ್ಹ್‌ ಹಜಾ಼ರ್‌ ಜ಼ಣು ರ‍್ಹಯುತೋಬಿ ಬಾಕರಿ ಬೋಲೈಲ್ಯಾವಾಳೊ ಎಕ್ಕಸ್ ಜ಼ಣೊ. ಕ್ರಿಸ್ತ ಯೇಸುಮ ಸುವಾರ್ತೆಥಿ ತುಮುನ ಲೀಲಿದೋತೆ ಬಾ ಮೇಸ್ ಹುಯಿರ‍್ಹೋಸ್.
1CO 4:16 ಅನಖ್ಹಾಜೆ ಮಾರಿನಿಘೊಣಿಸ್ ರ‍್ಹೇವ್ಣುಕರಿ ಮೇ ತುಮೂನ ಗಿಂಗೈಲೆವುಸ್.
1CO 4:17 ಆ ಕಾರಣ್‍ಥಿ ಪ್ರಭುಮ ಮಾರ ಪ್ಯಾರ್‌ನೊ ಅಜು಼ ವಿಶ್ವಾಸ್‌ನೊ ಛಿಯ್ಯೊ ಹುಯಿರ‍್ಹವಾಳೊ ತಿಮೊಥೆನ ತುಮಾರಕನ ಮೋಕ್ಲಿರಾಖ್ಯೊಸ್. ಯೊ ತುಮೂನ ಕ್ರಿಸ್ತಯೇಸುಮ ಮಳಿರ‍್ಹವಾಮ ನವ ಜಿವ್ಣಮ ಅಜು಼ ಅಖ್ಖೀಸ್ ಬಾಜೂ಼ಮ ಮೇ ಹರೇಕ್ ಸಬೆಮಾಬಿ ಶಿಕಾಡನು ಚಾ಼ಲ್‍ಚ಼ಲಣ್‍ ಯೋ ತುಮಾರ ಖ್ಹಯಾಲ್ಮ ಲೀನ್‌ ಆವ್‌ಶೆ.
1CO 4:18 ಅಜು಼ ಮೇ ತುಮಾರಕನ ಕೊ ಆಯಿಶ್ನಿಕರಿ ಲಹಿನ್ ಥೋಡುಜ಼ಣು ಹಂಕಾರಿಹುಯಿನ್ ಚಾ಼ಲುಕರಾಸ್‍.
1CO 4:19 ಕತೋಬಿ ಪ್ರಭುನಿ ಮರ್ಜಿಹುಯುತೆ ಮೇ ಒಗ್ಗಿಸ್‌ಮ ಐನ್ ಅಜು಼ ತದೆ ಯೊ ಹಂಕಾರಿಥಿ ಭರೈರ‍್ಹಾವಳನಿ ವಾತೇಸ್‌ ಖಲಿ ಕಾಹೆ ಮೇಸ್ ಇವ್ಣಿ ಶಕತ್‍ನಾಬಿ ಮಾಲುಮ್‍ಕರೀಷ್.
1CO 4:20 ದೇವ್ನಿ ರಾಜ್ಯ ಖಲಿ ವಾತೇಮ ಕಾಹೆ ಶಕತ್‍ಮಾಬಿ ಭರೈರ‍್ಹೂಸ್.
1CO 4:21 ತುಮೆ ಶಾತ್‌ ಪಸಂದ್ ಕರಾಸ್? ಮೇ ಲಾಕ್ಡು ಲೀನ್ ತುಮಾರಕನ ಆವ್ಣುಕಿ? ಪ್ಯಾರ್‌ಥೀಬಿ ಶಾನ್‍ಧಾರ್ನು ಆತ್ಮಥೀಬಿ ಭರೈನ್ ಆವ್ಣುಕಿಶು?
1CO 5:1 ತುಮಾರಮ ವ್ಯಬಿಚಾರ್ ಛಾ಼ಕರಿ ಖಬರ್‌ನ ಮೇ ಖ್ಹಮ್‍ಜ್ಯೊ. ಏಕ್‍ಜ಼ಣೊ ಇನ ಬಾನಿ ಬಾವಣ್ಣಾಸ್ ರಾಖಿಲಿದೋಕಸ್. ಅಥ್ರಾನು ವ್ಯಬಿಚಾರಿ ಅಲಕ್‌ ಅದ್ಮಿಮಾಬಿ ಅಥ್ರಾನು ವ್ಯಬಿಚಾರ್ ಕಾಮ್ ಕೊದೆಖಾವನಿ.
1CO 5:2 ಕತೋಬಿ ತುಮೆ ಊಚ಼ಹುವಾನ ದೇಖುಕರಸ್. ಕಿಮ್ ರ‍್ಹಯುತೋಬಿ ತುಮೆ ದುಖ್ ಕೋ ಕರ‍್ಯಾನಿತೆ, ಆ ಕಾಮ್ ಕರವಾಳನ ತುಮಾರಮಾಥು ಭಾರ್‌ ಕಾಡಾನ ಕೊ ಹೊಯ್ನಿಕಿಶು?
1CO 5:3 ಮೇತೊ ಶರೀರ್‌ನಿ ಪರಕ್ಮ ತುಮಾರೇಥಿ ದೂರ್ ರ‍್ಹಯುತೋಬಿ ಆತ್ಮೀಕ್ ಪರಕ್ಮ ಖನ್ನೆ ಛೂ಼.ಮೇ ತುಮಾರಿ ಜೋ಼ಡ್ಮ ರ‍್ಹವಾನಿ ಪರಕ್ಮಾಸ್ ಆ ಅಥ್ರಾನು ಕಚಿಂಡ್ ಕಾಮ್ ಕರವಾಳನಿ ಬಾರೇಮ ತದೇಸ್‌ ಇನ ಶಾತ್‌ಕರ‍್ನುಕರಿ ತೀರ್ಮಾನ್ ಕರಿರಾಖ್ಯೊಸ್.
1CO 5:4 ತುಮೆ ಎಕ್ಟುಹುಯಿನ್ ಅವಾನಿತರ ಮೇಬಿ ತುಮಾರಿ ಜೋ಼ಡೆ ಮಾರ ಆತ್ಮೀಕ್ ರೂಪ್‌ಮ ಅಪ್ಣೊ ಪ್ರಭು ಯೇಸುನ ನಾಮ್‍ಥಿ ಹಮಾರ ಜೋ಼ಡೆ ರ‍್ಹವಾನಿಘೊಣಿನಿ ತಾಖತ್ತಿ ತುಮಾರಿ ಜೋ಼ಡ್ಮ ಎಕ್ಟು ಹುಯಿರ‍್ಹೊಸ್.
1CO 5:5 ಅಜು಼ ಯೋ ಅದ್ಮಿನು ಶರೀರ‍್ನು ಸ್ವಭಾವ್ ನಾಶ್ ಹುವಾನಖ್ಹಾಜೆ ಇನ ಶೈತಾನ್ನ ಹಾತ್ಮ ಖ್ಹಪ್‍ಡಾವೊ ಶನಕತೊ ಪ್ರಭು ಯೇಸುನ ದನ್ಮ ಇನು ಆತ್ಮ ಬಚಾ಼ವನಖ್ಹಾಜೆ ಅಮ್‍ಕರ‍್ನು.
1CO 5:6 ತುಮಾರು ಹಂಕಾರ್ ಕರಾನು ಅಛ್ಛು಼ಕಾಹೆ; ದರಾಖ್ಹು ಶೋಡ ಘುಂದಾಸ್ತೆ ಆಟಾನ ಫುಲಾವಸ್‌ಕರಿ ಬೋಲಾನು ತುಮೂನ ಮಾಲುಮ್ ಕೊಯ್ನಿಕಿ ಶು?
1CO 5:7 ತುಮೆ ಭರ್‌ಪೂರ್‌ಥಿ ಪಾಕ್‌ ಹುವಾನಖ್ಹಾಜೆ ಪಾಪ್ನು ಜೂ಼ನು ಶೋಡಾನ ಕಾಡಿನಾಕ್ಣು. ತದೆ ತುಮೆ ಖಿವೂಬಿ ಶೋಡ ನಾಖ್ಯಹುಯ ಕೊಂತೆ ನವೊ ಆಟೊ ಹುಯಿರ‍್ಹಿಶು. ಶನಕತೊ ತದೇಸ್‌ ಅಪ್ಣೊ ಪಸ್ಕ ಬಾಳಾನಿಬಲಿ ಹುಯಿರ‍್ಹೊಸ್ ಯೋ ಮೆಂಢಾನು ಚೆಲ್ಕು ಕ್ರಿಸ್ತಸ್ ಶಿಲ್‌ಬೆನಪರ್ ಬಲಿಹುಯೊ.
1CO 5:8 ಇನಖ್ಹಾಜೆ ಅಪ್ಣೆ ಖರಾಬ್ ಫನೈ, ಖರಾಬ್‌ಚಾ಼ಲ್‌ಕರಿ ಬೋಲಾನು ಖಾಟಾಆಟಾನ ಝಿಟ್‌ಕಾರಿದಿಯೆ, ಪರಿಶುದ್ ಅಜು಼ ಖ್ಹಾಚು಼ಕರಿ ಬೋಲಾನು ಖಾಟುಕೊಂತೆ ನವರೋಟಾನ ಖೈನ್ ಪೂಜ಼ ಕರ್‌ಯೇ.
1CO 5:9 ಮೇ ತುಮೂನ ಚಿಟ್ಟಿ ಲೀಖ್ಯೋತೆ ಚಿಟ್ಟೀಮ ವ್ಯಬಿಚಾರಿನೊ ಖ್ಹಂಗ್ ನಾ ಕರ್ನುಕರಿ ಲೀಖಿರಾಖ್ಯೊಸ್.
1CO 5:10 ಕತೋಬಿ ಆ ಜಗತ್‍ಮಾನು ವ್ಯಬಿಚಾರಿ ಆಖ್ಹ್‌ಭರ‍್ಯು ಛಿನೈಲ್ಯವಾಳು, ಮೂರತ್ನ ಪೂಜ಼ಕರವಾಳು ಹುಯಿರಾತೆ ಎಥ್ರಾನವಾಳನ ಖ್ಹಂಗ್ ಮ್ಹೇಲಿದೇವ್ಣುಕರಿ ಕಾಹೆ. ಇಮ್‌ ಮ್ಹೆಲ್‍ನುಕತೊ ತುಮೆ ಆ ಜಗತ್‍ನಾಸ್ ಮ್ಹೆಲಿಜಾ಼ವ್ಣು ಪಡ್‌ಶೆ.
1CO 5:11 ಕತೋಬಿ ಕ್ರಿಸ್ತಮ ವಿಶ್ವಾಸ್ಮ ಭೈ ಭೇನೆಕರಿ ಬೋಲಿಲ್ಯವಳೊ ವ್ಯಬಿಚಾರ್ ಕರಾವಾಳೊ, ಲಾಲಚ್‌, ಮೂರತ್ನ ಪೂಜ಼ಕರವಾಳೊ, ಲಡೈಕರವಾಳೊ, ಗಾಳೆ ದ್ಯವಾಳೊ, ಪೀಯ್ಯವಾಳೊ, ಛಿನೈಲ್ಯವಾಳೊ ಹುಯಿರ‍್ಹವಾನಿ ಪರಕ್ಮ ಇನ ಖ್ಹಂಗ್ ನಾಕರ‍್ನು. ಎಥ್ರಾನ ಜೋ಼ಡ್ಮ ಖಾಣುಬಿ ನಾ ಖಾವ್ಣು.
1CO 5:12 ಸಭೆನ ಭಾರ್‌ ರ‍್ಹವವಾಳಾನ ತೀರ್ಪ್‌ ಕರಾನ ಮನ ಶನಿ ಅಧಿಕಾರ್ ಛಾ಼. ಮಹಿವಾಳನ ತೀರ್ಪ್‌ ಕರವಾಳೋಬಿ ತುಮೇಸ್‍ನಿ?
1CO 5:13 ಭಾರ್‌ ರ‍್ಹವಾಳನ ತೀರ್ಪ್‌ ಕರಾವಾಳೊ ದೇವಸ್. ತುಮಾರ ಬೀಚ್ಮ ರ‍್ಹವಾಳ ಯೋ ಖರಾಬ್ ಅದ್ಮಿನ ಭಾರ್‌ ಕಾಡಿನಾಖೊ.
1CO 6:1 ತುಮಾರಮ ಏಕ್‍ಜ಼ಣಾನ ಬಿಜೇಕ್ ಜ಼ಣಾಪರ್ ಶನುತೋಬಿ ವಿರೋದ್‌ರ‍್ಹಯುತೊ ನ್ಯಾವ್‌ನ ವಿಚಾರ‍್ನ ದೇವ್ನ ಅದ್ಮಿವೋಕನ ಲೀನ್‌ಗಯುಕೊಂತೆ, ದೇವ್ನ ವಿಶ್ವಾಸ್‌ಕೊಂತೆ ಅದ್ಮಿನಖ್ಹಾಮ್ಣೆ ಲೀನ್ ಜಾ಼ವೋಸ್ಕಿ ಶು?
1CO 6:2 ದೇವ್ನು ಅದ್ಮಿಖ್ಹಾರು ಜಗತ್ನ ತೀರ್ಪ್‍ಕರ್‌ಶೆಕರಿ ಬೋಲಾನು ತುಮೂನ ಮಾಲುಮ್ ಕೊಯ್ನಿಕಿಶು? ಜಗತ್ತಸ್ ತುಮಾರೇಥಿ ತೀರ್ಪ್‌ಲ್ಯವಾನು ಹುಯಿರ‍್ಹುತೊ ಅಥ್ರಾನಿ ದರಾಶಿ ವಾತೆನಿ ಬಾರೇಮ ತುಮೆ ತೀರ್ಪ್‌ಕರಾನ ಯೋಗ್ಯ ಕೊಯ್ನಿಕಿ ಶು?
1CO 6:3 ಅಗ್‍ಲ್ಯ ದನ್ಮ ಅಪ್ಣೆ ದೇವ್ನ ದೂತರ್‌ನಾಬಿ ನ್ಯಾವ್‌ ಫೇಡಾವ್‍ಶುಕರಿ ಬೋಲಾನು ತುಮೂನ ಮಾಲುಮ್‌ ಕೊಯ್ನಿಕಿಶು? ಅಮ್‌ರ‍್ಹವಾಪರ್ ಆ ಜಗತ್ನಿ ಜೀವಿತ್‌ನ ಬಾರೇಮಾಬಿ ಕೆತ್ರೇಕ್ಕಿ ಮಹಾನ್ ಕಾಹೆಕಿಶು?
1CO 6:4 ಅಮ್‍ರ‍್ಹವಾಪರ್, ತುಮಾರಮ ಕಚ಼್ಚರ್‌ ರ‍್ಹೀನ್ ಇನ ನ್ಯಾವ್ನಕರಾನು ಜ಼ರೂರತ್ ರ‍್ಹವಾನಿವಖ್ಹ್‌ತೆ ಸಬೆಮ ಖ್ಹಾಯಿಕೊಂತೆ ಅದ್ಮಿಕನ ಆ ಖ್ಹಾರಿವಾತೆನಿ ಲೀನ್ ಶನಜಾ಼ವೋಸ್?
1CO 6:5 ತುಮೂನ ಖ್ಹರಮ್‍ಕಾಡಾನ ಟೇಕೆ ಮೆ ಅಮ್ ಬೋಲುಸ್ಕಿ, ವಿಶ್ವಾಸಿ ಭೈಯೇನ ಇಚ಼್‌ಮ ನ್ಯಾವ್‌ನ ಪರ್ಖಿಲ್ಯವಾಳು ಅಕ್ಲಿ ತುಮಾರಮ ಏಕ್‍ಜ಼ಣೂಬಿ ಛಾ಼ಕಿಶು?
1CO 6:6 ಕತೋಬಿ ಇನ ಬದಲ್‍ಥಿ ಏಕ್‌ ವಿಶ್ವಾಸಿ ಬಿಜೇಕ್ ವಿಶ್ವಾಸಿನ ವಿರೋದ್ ನ್ಯಾವ್‌ನಿ ಕಛೇರಿನ ಜಾ಼ವನು ಕಾಹೆತೆ ಇನ ಬಿಣ್‌ವಿಶ್ವಾಸಿನ ಖ್ಹಾಮ್ಣೆ ಲೀನ್ ಜಾ಼ವಾನು ಬರೋಬರ್‌ಕಿಶುಲಾ!
1CO 6:7 ಖ್ಹಾಚಮಾಬಿ ತುಮಾರಮ ಛಾ಼ತೆ ಖೋಟ್ನು ವಿವಾದ್ ರ‍್ಹಿಯುತೊ ತುಮೆ ಹರಿಗಾಕರಿ ಅಸ್‌ ಖ್ಹಣೇದ್ ಹುಯಿರ‍್ಹುಸ್. ಇನೇಥಿಬಿ ಶನ ಗಲ್ತಿನ ಖ್ಹಮಾಳ್‌ಣು ನಾ? ಠಗಾವಮ ಶನ ಖ್ಹಮಾಳ್‌ಣು ನಾ?
1CO 6:8 ಕತೋಬಿ ತುಮೆ ತುಮಾರ ವಿಶ್ವಾಸಿ ಭೇನೆ ಭೈಯೇವ್ನ ಗಲತ್‌ ಕರಿರಾಖ್ಯಾಸ್ ಅಜು಼ ಠಗೈರಾಖ್ಯಾಸ್‌.
1CO 6:9 ಅನೀತಿಥಿ ಚಾ಼ಲವಾಳು ದೇವ್ನಿ ರಾಜ್ಯನ ಖ್ಹಾಯಿಕೊಯ್ನಿ ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು? ಮಂಕ್ ನಕೊಹುವೊ: ವ್ಯಬಿಚಾರಿಖ್ಹಾರು, ಮೂರತ್ನ ಆರಾದನೆ ಕರವಾಳು, ಪಾಪೇಲು, ಪರ್ಖ್ಹಾನಿಜೋ಼ಡ್ಮ ಭೋಗ್ ಕರಾವಾಳು,
1CO 6:10 ಚೋ಼ರಿಕರಾವಳು, ನಿಕ್‍ಳ್ಯಜಾನ್‍ವಾಳು, ಪಿಯ್ಯಾವಾಳು, ಝೂ಼ಟಿ ಖಬರ್ ಫೈಲಾವವಾಳು, ಬಿಜಾ಼ನು ಖ್ಹೋತಿಲ್ಯವಾಳು, ಅವ್ಣಾಮ ಏಕ್‍ಜ಼ಣೂಬಿ ದೇವ್ನಿ ರಾಜ್ಯನ ಖ್ಹಾಯ್‌ ಕೊಉಷೇನಿ.
1CO 6:11 ತುಮಾರಮ ಕೈಯೇಕ್‌ಜ಼ಣು ಇಮ್ಮಸ್ ಹುಯಿರ‍್ಹುಥು. ಕತೋಬಿ ತುಮೆ ಪ್ರಭು ಹುಯಿರೋತೆ ಯೇಸುಕ್ರಿಸ್ತನ ನಾಮ್‌ಥಿಬಿ ಅಜು಼ ಅಪ್ಣ ದೇವ್ನ ಆತ್ಮಥೀಬಿ ಧೊವೈನ್ ಶುದ್ಧಹುಯಿರ‍್ಹುಸ್. ದೇವ್‍ಥಿ ನೀತಿವಾಳಕರಿ ಚೂ಼ಣೈರ‍್ಹಾಸ್.
1CO 6:12 ತುಮಾರ ಕೋಣ್‌ಬಿ ಬೋಲೆಜಾ಼ಯ್, “ಖ್ಹಾರಕಾಮ್ನ ಕರಾನ ಮನ ಹಕ್‌ ಛಾ಼”. ಕತೋಬಿ ಯೋ ಖ್ಹಾರು ಫಾಯಿದೊಕಾಹೆ. ಕತೋಬಿ ಅಖ್ಖಾನಾಬಿ ಕರಾನ ಮನ ಹುಕುಮ್‍ಛಾ಼ ಕತೋಬಿ ಮೆ ಖೆವಾನಬಿ ಚ಼ಪ್ಪಣ್‌ಮ ಕೊಯ್ನಿ.
1CO 6:13 ಖಾಣು ಅಖ್ಖು ಪೇಟ್ನಖ್ಹಾಜೇಸ್. ಪೇಟ್ ಖಾಣನ ಖ್ಹಾಜೆಸ್ ಛಾ಼.” ಕರಿ ಬೋಲೆಜಾ಼ಯ್ ಯೋ ಖ್ಹಾಚಾಸ್. ಆ ಭೇನ ಪೂರ ಕರಾವಾಳೊ ದೇವಸ್. ಶರೀರ್‌ಛಾ಼ತೆ ವ್ಯಬಿಚಾರ್‌ ಕರಾನಖ್ಹಾಜೆ ಕಾಹೆ ಪ್ರಭುನ ಸೇವೆ ಕರಾನಖ್ಹಾಜೆಸ್. ಪ್ರಭು ಶರೀರ್‌ನಖ್ಹಾಜೆ ಛಾ಼.
1CO 6:14 ದೇವ್ನೆ ಪ್ರಭುನ ಇನ ಶಕಥ್ಥಿ ಮರ‍್ಯಮಾಥು ಜಿವ್ತೊಉಠ್ಯಾಡ್ಯೊ. ಇಮ್ಮಸ್ ಅಪ್ಣುನಾಬಿ ಇನು ತಾಖತ್ತಿ ಉಠಾಡ್‍ಶೆ.
1CO 6:15 ತುಮಾರು ಶರೀರ್ ಕ್ರಿಸ್ತನು ಭಾಗ್‍ಖ್ಹಾರು ಹುಯಿರ‍್ಹುಸ್‌ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು? ಅಮ್‍ರ‍್ಹವಾಪರ್ ಕ್ರಿಸ್ತಾನ ಭಾಗ್‍ಖ್ಹಾರನ ಲೀನ್ ವ್ಯಬಿಚಾರಿಣಿನ ಭಾಗ್‍ನಿಜೋ಼ಡ್ಮ ಮಳಾವನು ಬರಬರ್‌ಕಿ ಶು? ಕದೇಬಿ ನಾ ಕರ‍್ನು.
1CO 6:16 ವ್ಯಬಿಚಾರಿಣಿನ ಮಳೆಹುಯೊ ಇನಿಜೋ಼ಡ್ಮಸ್ ಎಕ್ಕಸ್ ಶರೀರ್ ಹುಯಿರ‍್ಹೋಸ್ ಕರಿ ತುಮೂನ ಮಾಲುಮ್ ಕೊಯ್ನಿ? “ಯೊ ಬೇಜ಼ಣ ಎಕ್ಕಸ್ ಶರೀರ್ ಹುಯಿರ‍್ಹೆಸ್‍ಕರಿ ಪವಿತ್ರ ದಪ್ತರ್ ಬೋಲಸ್ನಿ”.
1CO 6:17 ಕತೋಬಿ ಪ್ರಭುನೆ ಖ್ಹಂಗ್ ರಾಖವಾಳೊ ಆತ್ಮಮ ಪ್ರಭುನ ಜೋ಼ಡೆ ಏಕ್‍ ಹುಯಿರ‍್ಹೇಸ್.
1CO 6:18 ವ್ಯಬಿಚಾರ್‌ನ ಮ್ಹೇಲಿನ್ ದೂರ್ ಮಿಲೈಜಾ಼ವೊ. ಅದ್ಮಿಖ್ಹಾರು ಕರಾನು ಅಖ್ಖೂಸ್ ಪಾಪ್ನು ಕಾಮ್‌ಖ್ಹಾರು ಶರೀರ್‌ನ ಭಾರ್‌ ಹುಯಿರುಸ್. ಕತೋಬಿ ವ್ಯಬಿಚಾರ‍್ನು ಪಾಪ್‌ಕರವಾಳೊ ಏಕ್‍ಜ಼ಣೊ ಇನು ಶೊಂತ್ ಶರೀರ್‌ನು ವಿರೋದ್ ಪಾಪ್ ಕರಾವಾಳೊ ಹುಯಿರ‍್ಹೇಸ್.
1CO 6:19 ತುಮಾರು ಶರೀರ್ ಪವಿತ್ರಾತ್ಮನ ಮಂದಿರ್‌ ಹುಯಿರ‍್ಹುಸ್‌ಕರಿ ಬೋಲಾನು ತುಮೂನ ಮಾಲುಮ್ ಕಿಶು? ಯೋಸ್‌ ಆತ್ಮ ತುಮಾರಮ ಛಾ಼ಕರಿ ಮಾಲುಮ್ ಕೊಯ್ನಿಕಿಶು? ತುಮೆ ದೇವ್‍ಥಿ ಇನ ಲೀಲಿದ. ತುಮೆ ತುಮಾರು ಶೊಂತ್ ಕಾಹೆ.
1CO 6:20 ತುಮೆ ದೇವ್‍ಥಿ ಮೋಲ್ ಲೆವಾಯಹುಯ ಇನಖ್ಹಾಜೆ ತುಮಾರ ಶರೀರ್‌ಖ್ಹಾರಥಿ ದೇವ್ನ ಮಹಿಮೆ ಕರೊ.
1CO 7:1 ತುಮೆ ಲೀಖಿನ್ ಮೋಕ್‍ಲ್ಯೊತೆ ವಾತೆನಿ ಬಾರೇಮ ಮೇ ಬೋಲ್ನುಕತೊ, ತಯೇಡಾನಿ ಶರೀರ್‌ನ ನಾ ಛಿಮಾನುಸ್ ಅದ್ಮಿನ ಅಛ್ಛು಼.
1CO 7:2 ಕತೋಬಿ ವ್ಯಬಿಚಾರ್‌ ಚಾ಼ಲುಕರಾತೆಖ್ಹಾಜೆ ಹರೇಕ್ ಜ಼ಣನಾಬಿ ಶೊಂತ್ ಬಾವಣ್‍ ರ‍್ಹವಾದೆ ಅಜು಼ ಹರೇಕ್‍ಜ಼ಣಿನಾಬಿ ಶೊಂತ್ ಬಾವ್ರಿ ರ‍್ಹವಾದೆ.
1CO 7:3 ಬಾವ್ರಿ ಯೋ ಕರ್ನುತೆ ಕಾಮ್ನ ಕರಾದೆ, ಅಜು಼ ಇಮ್ಮಸ್ ಬಾವಣ್‍ ಯೋ ಕರ್ನುತೆ ಕಾಮ್ನ ಕರಾದೆ. ಭೇಜ಼ಣಾಬಿ ವ್ಹೆತ್ಯು ಜಿವ್ಣಮ ಏಕ್‌ಥಿಏಕ್ ಜ಼ರೂರತ್‌ನ ಪೂರಕರಿನ್ ಥಕ್‌ತೋಡ್ನು.
1CO 7:4 ಬಾವಣ್ಣ ಇನಿ ಶೊಂತ್ ಶರೀರ್‌ಪರ್‌ ಅದಿಕಾರ್ ಕೊಯ್ನಿ, ಯೊ ಬಾವ್ರಿನ ಛಾ಼. ಇಮ್ಮಸ್ ಪರ್ಖ್ಹಾ ಇನ ಶೊಂತ್ ಶರೀರ್‌ಪರ್‌ ಅಧಿಕಾರ್ ಕೊಯ್ನಿ, ಯೊ ಬಾವಣ್ಣ ಛಾ಼.
1CO 7:5 ಪ್ರಾರ್ಥನೇನಿ ವಖ್ಹತ್‌ನಖ್ಹಾಜೆ ತುಮೆ ಏಕ್‌ಥಿಏಕ್ ಒಪ್ಪಂದಾನ್‍ಥಿ ಥೋಡಿ ವಖ್ಹತ್ ಮ್ಹೇಲಿನ್ ರ‍್ಹಯೇಜಾ಼ಯ್ ಪಣ್ಕಿ ಅಮ್ನಿತರ ನಾ ಕರ‍್ನು. ಶೈತಾನ್ ತುಮಾರಿ ಕಮ್‌ಜೋ಼ರಿನ ದೇಖಿನ್ ತುಮೂನ ಖರಾಬ್‌ಖ್ಹಯಾಲ್‌ಮ ನಾ ಖೇಚಾ಼ನಿತರ ಪಾಛು಼ ಎಕ್ಟು ಹುಯಿಜಾ಼ವೊ.
1CO 7:6 ಮೇ ಅಮ್ ಕರೇಜಾ಼ಯ್‍ಕರಿ ಬೋಲುಕರುತೆ ಹುಕುಮ್ ಕಾಹೆ. ಮಾರಿ ಖಲಿ ಖ್ಹೂಜ಼್ ಹುಯಿರ‍್ಹೀಸ್.
1CO 7:7 ಮೇ ರ‍್ಹವಾನಿತರ ಅಖ್ಖೂಸ್ ಅದ್ಮಿಖ್ಹಾರು ರ‍್ಹೇವ್ಣುಕರಿ ಮಾರಿ ಆಖ್ಹ್. ಕತೋಬಿ ದೇವ್ನೆ ಹರೇಕ್‍ನಾಬಿ ವಿಶೇಷ್ ವರ ಮಳಿರ‍್ಹೀಸ್. ಏಕ್‍ಜ಼ಣಾನ ಏಕ್‍ಪರಕ್‍ನಿ ವರ ರ‍್ಹಯೂತೊ ಬಿಜೇಕ್‍ನ ಏಕ್‍ಪರಕ್ನು ವರ ಹುಯಿರ‍್ಹೂಸ್.
1CO 7:8 ಬಿಣ್‍ ವ್ಯಹಾವಾಳು ಅಜು಼ ಮುಂಡಚ್ಚಿಯೇನಿ ಬಾರೇಮ ಮೇ ಬೋಲಾನು ಶಾತ್‍ಕತೊ, ಮೇ ರ‍್ಹವಾನಿಘೋಣಿ ಎಕ್ಲೊ ರ‍್ಹವಾನುಸ್ ಇವ್ಣುನ ಅಛ್ಛು಼.
1CO 7:9 ಇವ್ಣೆ ಖ್ಹಮಾಳಿನ್ ನಾರ‍್ಹಯುತೊ, ವ್ಯಹಾಕರಾದೆ. ಶನಕತೊ ಭೋಗ್ನಿ ಹರಖ್ಹ್‌ಥಿ ಕೊರ್‌ಗಾಥೀಬಿ ವ್ಯಹಾ ಕರಿಲ್ಯಾವನುಸ್ ಬರೋಬರ್.
1CO 7:10 ವ್ಹೆತ್ಯಾವ್ನ ಮೇ ಆ ಹುಕುಮ್ ದೆವುಸ್. ಆ ಹುಕುಮ್ ಮಾರುಕಾಹೆತೆ ಪ್ರಭುನು ಹುಯಿರ‍್ಹೂಸ್. ಬಾವಣ್‍ ಇನ ಬಾವ್ರಿನ ಮ್ಹೇಲ್ನುಸ್ ನಾ.
1CO 7:11 ಬಾವಣ್‍ ಇನ ಬಾವ್ರಿನ ಮ್ಹೇಲಿದಿದಿತೊ ಯೊ ಹುಯಿರೀತೆ ಅಜೇಕ್ ವ್ಯಹಾ ನಾಕರ‍್ನು. ನಾರ‍್ಹಯುತೊ ಬಾವ್ರಿನ ಜೋ಼ಡ್ಮ ಪಾಛು಼ ಮಳಿಜಾ಼ವ್ಣು. ಅಜು಼ ಬಾವ್ರಿ ಇನಿ ಬಾವಣ್ಣ ನಾ ಮ್ಹೇಲ್ನು.
1CO 7:12 ಬಿಜು಼ಖ್ಹಾರು ಅದ್ಮಿಖ್ಹಾರಾನ ಬಾರೇಮ ಮೇ ಬೋಲಾನು ಶಾತ್‍ಕತೊ ಆ ಖ್ಹಾರಿ ವಾತೇನ ಬೋಲುಕರುತೆ ಮೇಸ್ ಪಣ್ಕಿ ಪ್ರಭುಕಾಹೆ. ಕ್ರಿಸ್ತಮ ಭೈನ ಏಕ್‍ಜ಼ಣಿ ಕ್ರಿಸ್ತ ವಿಶ್ವಾಸ್‍ಕೊಂತೆ ಬಾವಣ್‍ ರ‍್ಹಯುತೊ ಅಜು಼ ಯೋ ಇನಿ ಜೋ಼ಡ್ಮ ಸಂಸಾರ್ ಕರೀನ್ ಜಿವ್ಣುಕರಾನ ಮಾನಿಲಿದಿತೊ ಯೋ ಪರ್ಖ್ಹೊ ಇನ ನಾ ಮ್ಹೇಲ್ನು.
1CO 7:13 ಇಮ್ಮಸ್ ಏಕ್‌ ತಯೇಡನ ಕ್ರಿಸ್ತಮ ವಿಶ್ವಾಸ್‌ಕೊಂತೆ ಬಾವ್ರಿರ‍್ಹೀನ್ ಯೋ ಇನಜೋ಼ಡೆ ಸಂಸಾರ್ ಕರಾನ ಮಾನಿಲಿದಿತೊ ಯೊ ತಯೇಡ ಇನ ನಾ ಮ್ಹೇಲ್ನು.
1CO 7:14 ಶನಕತೊ ಕ್ರಿಸ್ತಮ ವಿಶ್ವಾಸ್‌ಕೊಂತೆ ಬಾವ್ರಿ ಇನಿ ಬಾವಣ್ಣಖ್ಹಾಜೇಥಿ ಸಮರ್ಪಣ್‌ ಹುವಾನಿಘೊಣಿ ಹುಯೊ. ಇಮ್ನಿಸ್ ಪರಕ್ಮ ವಿಶ್ವಾಸ್‍ಕೊಂತೆ ಬಾವಣ್‍ ಇನ ಬಾವ್ರಿನಖ್ಹಾಜೇಥಿ ಸಮರ್ಪಣ್‌ ಹುವಾನಿಘೊಣಿ ಹುಯಿ. ಇಮ್‌ ನಾ ರ‍್ಹಿಯುಹೊತ್ತೊ ತುಮಾರ ಲಡ್ಕಖ್ಹಾರು ಅಪವಿತ್ರಸ್ ಹುಯಿರ‍್ಹುಹೊತ್. ಕತೋಬಿ ಇವ್ಣೆ ಪವಿತ್ರ ಹುಯಿರ‍್ಹೂಸ್.
1CO 7:15 ಕತೋಬಿ ಕ್ರಿಸ್ತ ವಿಶ್ವಾಸ್‌ಕೊಂತೆ ಏಕ್‍ಜ಼ಣು ಮ್ಹೇಲಿನ್ ಜಾ಼ವ್ಣುಕರಿ ನಿರ್ಧಾರ್ ಕರ‍್ಯೊತೊ ಯೊ ಪರ್ಖ್ಹೊ ಮ್ಹೇಲಿನ್ ಜ಼ವಾದೆ. ಅಮ್ನಿ ಪರಕ್ ಚಾ಼ಲ್ಯುತೊ ಕ್ರಿಸ್ತಮ ಭೈನ ರ‍್ಹವೊ, ನತರ್ ಭೇನ್ ರ‍್ಹವೊ ಜಿಮ್ಮೆದಾರಿ ಕಾಹೆ. ಸಮಾಧಾನ್‍ಮ ರ‍್ಹೇವ್ಣುಕರಿ ದೇವ್ನೆ ಅಪ್ಣುನ ಬುಲೈರಾಖ್ಯೊಸ್.
1CO 7:16 ಅಲಿ ವಿಶ್ವಾಸಿ ಬಾವಣ್‍ ತೂ ತಾರ ಬಾವ್ರಿನ ಬಚಾ಼ಡಿಲಿಶ್‍ಕರಿ ತುನ ಕಿಮ್ ಮಾಲುಮ್‌? ಅಲ ವಿಶ್ವಾಸಿ ಬಾವ್ರಿ, ತೂ ತಾರಿ ಬಾವಣ್ಣ ಬಚಾ಼ಡಿಲಿಶ್‍ಕರಿ ತುನ ಕಿಮ್ ಮಾಲುಮ್‌?
1CO 7:17 ಕತೋಬಿ ಹರೇಕ್‍ಜ಼ಣಾನ ಪ್ರಭುನೆ ದಿರಾಖ್ಯೊಸ್ತೆ ಜಿಮ್ಮೇದಾರಿನಾಬಿ. ಅಜು಼ ಇನೆ ಇವ್ಣುನ ಶನಖ್ಹಾಜೆ ಬುಲಾಯೋಕಿ ಇನಾಬಿ ಬರೋಬರ್ ಜಿವ್ಣುಕರಾದೆ. ಅಮ್ ನಿಯಮಸ್ ಅಖ್ಖೀಸ್ ಸಬೆಮ ಚಾ಼ಲಿಲೇವ್ಣುಕರಿ ಮೇ ಶಿಕಾಡುಸ್.
1CO 7:18 ದೇವ್ ಬುಲಾಯೋತೆ ದನ್ಮ ಕೋಣ್‌ತೋಬಿ ಖ್ಹತ್ನ ಹುಯಿರ‍್ಹವಾನು ರ‍್ಹಯುತೊ ಇನ ಖ್ಹತ್ನ ಕರಾಯೋತೆ ಇನಖ್ಹಾಜೆ ಸೋಚಾನು ಹೋಣುಕೊಯ್ನಿ. ದೇವ್ ಬುಲಾವನಿ ವಖ್ಹತ್‌ಮ ಕೋಣ್‌ತೋಬಿ ನಾ ಖ್ಹತ್ನ ಕರೈರಾಖ್ಯೊತೊ ಯೋ ಖ್ಹತ್ನಕರಾವನಿ ಜ಼ರೂರತ್ ಕೊಯ್ನಿ.
1CO 7:19 ಖ್ಹತ್ನ ಕರಾವನುಕಿ ನತರ್ ಖ್ಹತ್ನ ಕರಾವ್ಣುಕರಿ ಯೋಸ್ ಮುಖ್ಯ ಕಾಹೆ. ದೇವ್ನು ಹುಕುಮ್‌ನ ಪಾಡಿನ್ ಚಾ಼ಲನೂಸ್ ಮುಖ್ಯ ಹುಯಿರ‍್ಹುಸ್.
1CO 7:20 ದೇವ್ ಬುಲಾವನಿ ವಖ್ಹ್‌ತೆ ಹರೇಕ್‍ಜ಼ಣೊ ಖಿವಿ ಲಖಣ್ ರ‍್ಹೇಸ್ಕಿ ಯೋ ರಹಾಮಸ್ ರ‍್ಹೇಣು.
1CO 7:21 ದೇವ್ ಬುಲಾವನಿ ವಖ್ಹ್‌ತೆ ತೂ ಬಿಜೇಕ್ನ ಗುಲಾಮ್ ಹುಯಿರೊ ಉಷೇತೊ ಸೋಚ್‍ನಕೊ. ಕತೋಬಿ ಛುಟ್ಕಾರ್ ಹುವಾನ ಅವಕಾಶ್ ಮಳಿತೊ ತೂ ಛುಟ್ಕಾರ್ ಹುಯಿಜಾ಼.
1CO 7:22 ಶನಕತೊ ಪ್ರಭುಥಿ ಬುಲಾವನಿ ವಖ್ಹ್‌ತೆ ಗುಲಾಮ್ ರ‍್ಹವಾಳೊ ಪ್ರಭುಮ ಛುಟ್ಕಾರ್ ಹುಯಿರ‍್ಹೊಸ್. ಪ್ರಭು ಬುಲಾವನಿ ವಖ್ಹ್‌ತೆ ಛು಼ಟೊರ‍್ಹವಾಳೊ ಹಮ್ಕೆ ಕ್ರಿಸ್ತನ ಗುಲಾಮ್ ಹುಯಿರ‍್ಹೋಸ್.
1CO 7:23 ತುಮೆ ಮೋಲ್ ಲೆವೈರ‍್ಹಾಸ್. ಇನಖ್ಹಾಜೆ ತುಮೆ ಅದ್ಮಿನ ಗುಲಾಮ್ ನಕೊ ಹುಯಿರ‍್ಹಿಶು.
1CO 7:24 ಭೇನೆ ಭೈಯೇವೊ ಹರೇಕ್‍ಜ಼ಣುಬಿ ದೇವ್‍ಥಿ ಬುಲಾವನಿ ವಖ್ಹ್‌ತೆ ಖಿವಿ ಲಖಣ್‍ಮ ಥಾಕಿ ಯೋಸ್ ಪರಕ್ಮ ದೇವ್ನ ಜೋ಼ಡ್ಮ ರ‍್ಹವೊ.
1CO 7:25 ವ್ಯಹಾಕೊಂತೆ ಕವಾರವ್ನಿ ಬಾರೇಮ ಪ್ರಭುಥಿ ಖಿವಿ ಹುಕುಮ್ ಮನ ಕೋ ಮಳ್ಯುನಿ. ಕತೋಬಿ ವಿಶ್ವಾಸ್‌ನ ಯೋಗ್ಯ ಹುಯಿರ‍್ಹವಾನಖ್ಹಾಜೆ ಪ್ರಭುಥಿ ಮನದೆವೈರ‍್ಹೀತೆ ದಯಾನ ಲೀನ್ ಮಾರಿ ಸೋಚ್ಮ ಬೋಲುಸ್.
1CO 7:26 ಹಮ್ಕೇನು ಕಠಣ್ ದನ್ನಖ್ಹಾಜೆ ಏಕ್‌ ಪರ್ಖ್ಹೊ ಕಿಮ್ ಛಾ಼ಕಿ ಇಮ್ಮಸ್ ರ‍್ಹವಾನು ಅಛ್ಛು಼ಕರಿ ಮೇ ಸೋಚುಸ್.
1CO 7:27 ತುನ ಬಾವಣ್‍ ಛಾ಼ಕತೊ ಇನೇಥಿ ಅಲಕ್ ಹುವಾನ ಕೋಶಿಶ್ ನಕೊಕರ್. ತುನವ್ಯಹಾ ನಾ ಹುಯಿರೊ ಉಷೇತೊ ಬಾವಣ್‍ಕರಾನ ಢೂಂಡ್‍ನಕೊ.
1CO 7:28 ಏಕ್‌ ವಖ್ಹತ್‌ಮ ತೂ ವ್ಯಹಾ ಕರ‍್ಯೊತೋಬಿ ಯೋ ಪಾಪ್‍ಕಾಹೆ. ಕವಾರಿ ವ್ಯಹಾ ಕರಿತೋಬಿ ಪಾಪ್‍ಕಾಹೆ. ಕತೋಬಿ ವ್ಯಹಾಕರಿಲ್ಯವಾಳನ ಕೈಯೆಕ್ಕಿ ದುಖ್ ಆವ್‌ಶೆ ಯೋ ತುಮೂನ ನಾ ಹೋಣುಕರಿ ಬೋಲಾನುಸ್ ಮಾರಿ ಖ್ಹಯಾಲ್ ಹುಯಿರ‍್ಹೀಸ್.
1CO 7:29 ಅಲ ಭೇನೆ ಭೈಯೆ, ಮೇ ಶಾತ್‌ ಬೋಲುಕರುಸ್‍ಕತೊ, ವಖ್ಹತ್ ತೀರ ಕಮ್‍ಛಾ಼ತೆ ಇನಖ್ಹಾಜೆ ಅನ ಅಗ್ಗಳ್ ಬಾವಣ್‍ರ‍್ಹವಾಳ ಇವ್ಣೆ ಅಮ್ ಬಾವಣ್‍ ಕೊಯ್ನಿಕರಿಬಿ ಜಿವ್ಣು.
1CO 7:30 ರೋವವಾಳು ನಾ ರೊವಾನಿತರಾಬಿ, ಶಂತೋಖ್ಹ್‌ ಕರವಾಳು ನಾ ಶಂತೋಖ್ಹ್‌ ಕರಾನಿತ್ರಬಿ, ಮೋಲ್‍ಲ್ಯವಾಳು ಸೋಚೊ, ಹಮಾರಕನ ಶಾತ್ಬಿ ಕೊಯ್ನಿಕರಿ ಮಾರು ಕಾಹೆಕರೀಬಿ,
1CO 7:31 ಜಗತ್‌ನು ಭೋಗ್‌ಮ ರ‍್ಹವವಾಳು ಇನಾಮಾಸ್ ಮಗನ್‌ ನಕೊರ‍್ಹಿಶು. ಶನಕತೊ ಆ ಜಗತ್‌ನು ವೈಭೋಗ್ ಬದ್ಲಿಜಾ಼ಶೆ.
1CO 7:32 ಕತೋಬಿ ತುಮೆ ವೇಚ಼್‌ಣೆ ನಾಕರ‍್ನುಕರಿ ಬೋಲಾನುಸ್ ಮಾರಿ ಹರಖ್ಹ್ ಹುಯಿರ‍್ಹುಸ್. ಬಿಣ್‍ ವ್ಯಹಾವಾಳು ಇನುಯೋ ಪ್ರಭುನ ಕಿಮ್ ಪಸಂದ್‍ಕರಾವ್ಣು ಕರಿ ಪ್ರಭುನು ಖ್ಹಾರಕಾಮ್ನಿ ಬಾರೇಮ ಸೋಚಸ್.
1CO 7:33 ಕತೋಬಿ ವ್ಯಹಾ ಹುಯಿರ‍್ಹವಾಳೊ ಏಕ್‍ಜ಼ಣೊ ಆ ಜಗತ್ನ ಕಾಮ್ಮ ಡುಬಿರ‍್ಹೋಸ್. ಯೋ ಇನಿ ಬಾವಣ್ಣಾ ಪಸಂದ್ ಕರಾವಮಸ್ ಕೋಶಿಶ್ ಕರಾವಾಳೊ ಹುಯಿರ‍್ಹೋಸ್.
1CO 7:34 ಅಜು಼ ಅನಖ್ಹಾಜೆ ವ್ಯಹಾಕೊಂತೆ ಅಜು಼ ವ್ಯಹಾ ಹುಯಿರ‍್ಹೇಯ್ತೆ ಇಮ್‌ ಭೇಬಾಜು಼ ಖೇಚಾ಼ವನಿಘೋಣಿ ಹುಯಿರ‍್ಹೇಸ್. ನತರ್ ಏಕ್‌ ವ್ಯಹಾ ಕೋಹುಯಿರೆನ್ತೆ ಕವಾರಿಯೆ ಇನುಯೋ ಶರೀರ್ ಆತ್ಮಮ ಕಿಮ್ ಪರಿಶುದ್ ರ‍್ಹೇವ್ಣುಕರಿ ಪ್ರಭುನಿ ಕಾಮ್ನ ಬಾರೇಮ ಸೋಚಸ್. ಕತೋಬಿ ವ್ಹೆತ್ತಿ ಜಗತ್ನ ಕಾಮ್ಮ ಡುಬಿರ‍್ಹೇಸ್, ಯೋ ಇನೊ ಬಾವ್ರಿನ ಪಸಂದ್ ಕರಾವ್ಣುಕರಿ ದೇಖಾಸ್.
1CO 7:35 ಆ ವಾತೆ ತುಮಾರ ಠಗಾವನಖ್ಹಾಜೆ ಕಾಹೆ ಫಾಯಿದಾನಖ್ಹಾಜೆಸ್‌. ಕತೋಬಿ ತುಮೆ ಬರೊಬರ್‌ನ ಮಾರಗ್‍ಮ ಜಿವ್ಣುಕರ‍್ನುಕರಿ ಮಾರಿ ಆಖ್ಹ್. ಅಜು಼ ತುಮೆ ತುಮಾರಿ ವಖ್ಹತ್‌ನ ಬಿಜ಼ ಕಾಮ್ನ ನಾದೇವ್ಣುತೆ ಪ್ರಭುನಿ ಸೇವೆಮ ಭರ್‌ಪೂರ್‌ಥಿ ಅರ್ಪಣ್‍ ಕರ‍್ನು.
1CO 7:36 ಏಕ್‌ ವೇಳ್ಮ ಏಕ್‍ಜ಼ಣೊ ಖ್ಹಗೈಹುಯಿರ‍್ಹವಾಳಿ ಕವಾರಿನಿ ಜೋ಼ಡ್ಮ ಖ್ಹಮಾಳನ ಕೊಹೊವಾಂತೆ ಮಳಾನ ಯೊ ಜಾ಼ಖ್ಹತ್ ಹರ್ಖ್ಹವಾಳೊ ಉಷೇತೊ ಅಜು಼ ವ್ಯಹಾಹುಣುಕರಿ ಹರಖ್ಹ್‌ಯುತೊ ಯೋ ವ್ಯಹಾ ಕರಿಲ್ಯವಾದೆ. ಅಮ್‍ಕರಾಥಿ ಯೊ ಪಾಪ್ ಕಾಹೆ.
1CO 7:37 ಕತೋಬಿ ಏಕ್‍ಜ಼ಣೊ ಎಕ್ಕಸ್ ಖ್ಹೂಜ಼್‌ನೊ ರ‍್ಹೀನ್ ಜು಼ಲಮ್‌ ಶಾತ್‍ಕೊಂತೆ ಇನಿ ಮರ್ಜಿನ ಚ಼ಲಾವನಿ ಹಕ್‌ರ‍್ಹಾವಳೋ ರ‍್ಹೀನ್ ಯೋ ಕವಾರಿನ ವ್ಯಹಾ ಕರಿಲ್ಯಾವನು ನಕೋಕರಿ ಇನ ದಿಲ್ಮ ಖ್ಹಯಾಲ್ ಕರಿಲಿದೋತೊ ಯೋ ಇಮ್ಮಸ್ ಕರಾನು ಅಛ್ಛು಼.
1CO 7:38 ಅಮ್‍ರ‍್ಹೀನ್ ಯೊ ಕವಾರಿನ ವ್ಯಹಾಕರಿಲ್ಯವಾನು ಅಛ್ಛು಼ಸ್, ವ್ಯಹಾ ಕರಿಲೇಯಿ ಕೊಂತೆ ರ‍್ಹವಾನುಬಿ ಅಜೂ಼ಬಿ ಅಛ್ಛು಼ಸ್.
1CO 7:39 ಏಕ್‍ಜ಼ಣಿ ತಯೇಡ ಇನೊ ಬಾವ್ರಿ ಬಚಿರ‍್ಹಾವಲಗು ಇನ ಛುಟ್ಕಾರ್‌ವಾಳಿ ಕೊ ಹುಯಿರ‍್ಹಿನಿ. ಬಾವ್ರಿ ಮರಿಗೋತೊ ಯೊ ತಯೇಡ ಹೋಣುತೆ ಇನ ವ್ಯಹಾ ಕರಾನ ಛುಟ್ಕಾರ್ ಹುಯಿರ‍್ಹೇಸ್. ಕತೋಬಿ ಯೋ ಪ್ರಭುನ ವಿಶ್ವಾಸಿ ಹುಯಿರ‍್ಹೇಣು.
1CO 7:40 ರ‍್ಹೀನ್‌ಬಿ ವ್ಯಹಾ ನಾ ಕರೀನ್ ಇಮ್ಮಸ್ ರ‍್ಹವಾನು ಇನ ಕೆತ್ರೇಕ್ಕಿ ಶಂತೋಖ್ಹ್‌ ಹುಯಿರ‍್ಹುಸ್‌ಕರಿ ಮಾರಿ ಖ್ಹಯಾಲ್‍ಕರಿರಾಖ್ಯೊಸ್. ಅಜು಼ ಮನಾಬಿ ದೇವ್ನು ಆತ್ಮ ಛಾ಼ಕರಿ ಖ್ಹಯಾಲ್ ಕರುಸ್.
1CO 8:1 ಮೂರತ್ನಬಲಿ ಕರಿಹುಯು ಖಾವಾನಿ ರಾಛಾ಼ನಿ ಬಾರೇಮ ಅಪ್ಣುನ ಖ್ಹಾರಾನ ಅಕ್ಕಲ್ ಛಾ಼ಕರಿ ಮಾಲುಮ್‌ ಪಡಾಸ್‌, ಅಕ್ಕಲ್ ಫುಗೈನಾಖಸ್, ಕತೋಬಿ ಪ್ಯಾರ್ ಜಾ಼ಖ್ಹತ್ ಕರಸ್.
1CO 8:2 ಏಕ್‍ಜ಼ಣೊ ಇನುಯೋ ಶಾತ್ತೋಬಿ ಮಾಲುಮ್ ಕರಿರಾಖ್ಯೊಸ್‍ಕರಿ ಲಹಿರಾಖ್ಯೊತೊ ಯೋ ಕಿಮ್ಕಿ ಪರಕ್ಮ ಮಾಲುಮ್ ಕರ್ನುಕಿ ಯೊ ಪರಕ್ಮ ಬಿಜೂ಼ಬಿ ಮಾಲುಮ್ ಕೋ ಕರಿರಾಖ್ಯೋನಿ.
1CO 8:3 ಕತೋಬಿ ಕೋಣ್ ದೇವ್ನ ಲಾಡ್‍ಕರಸ್ಕಿ ದೇವ್ನೆ ಇನ ಮಾಲುಮ್ ಕರಿರಾಖ್ಯೋಸ್.
1CO 8:4 ಅಮ್‌ರ‍್ಹವಾಪರ್ ಮೂರತ್ನ ಅರ್ಪಣ್‍ ಕರಿಹುಯು ಖಾಣನ ರಾಛ಼ನ ಖಾವಾನು ಬಾರೇಮ ಜಗತ್‌ಮ ಮೂರತ್ ಶಾತ್ಬಿ ಕಾಹೆಕರಿ ಅಪ್ಣುನ ಮಾಲುಮ್‍ಛಾ಼. ಅಜು಼ ದೇವ್ ಎಕ್ಕಸ್‍ಜ಼ಣೊ ಪಣ್ಕಿ ಬಿಜ಼ ಖಿವೂಬಿ ದೇವ್ ಕೊಯ್ನಿಕರಿ ಮಾಲುಮ್ ಛಾ಼.
1CO 8:5 ಆಬ್‌ಪರ್‌ರ‍್ಹವೊ, ಧರ್ತಿಪರ್‌ರ‍್ಹವೊ ದೇವ್‌ಕರಿ ಬೋಲೈಲ್ಯವಾಳು ಕೈಯೆಕ್ಕಿ ರ‍್ಹಯುತೋಬಿ, ದೇವ್‌ಕರಿ ಪ್ರಭುಕರಿ, ಖ್ಹಮ್‌ಜಾ಼ಡವಾಳು ಜಾ಼ಖ್ಹತ್ ಛಾ಼.
1CO 8:6 ಅಪ್ಣುನತೋಬಿ ಎಕ್ಕಸ್ ದೇವ್ ಛಾ಼. ಯೋ ಬಾಕರಿ ಬೋಲೈಲ್ಯಾವಾಳೊ; ಅಖ್ಖೂಸ್ ಉಬ್‍ಜ್ಯೊತೆ ಇನೇಥಿ ಹಮೆ ಇನಖ್ಹಾಜೆ ಜಿವೇಸ್ ಅಜು಼ ಏಕ್‍ನೊ ಏಕ್ಕಸ್‍ಜ಼ಣೊ ಪ್ರಭು ಛಾ಼. ಯೋಸ್ ಯೇಸು ಕ್ರಿಸ್ತ ಇನೇಥಿಸ್ ಹರೇಕ್ ತಯಾರ್‌ಹುಯು. ಇನೇಥಿಸ್ ಹಮೇಬಿ ಇನೇಥಿಸ್ ಛಿಯ್ಯೆ಼.
1CO 8:7 ರ‍್ಹಯುತೋಬಿ ಆಕ್ಕಲ್‍ ಖ್ಹಾರಮಾಬಿ ಕೊಯ್ನಿ. ರ‍್ಹೀನ್‌ಬಿ ಥೋಡುಜ಼ಣು ಹಮ್ಕೆಲಗು ಮೂರತ್‍ಕನ ಜಾ಼ವನು ಆದತ್ ಛಾ಼. ಅಮ್‍ರ‍್ಹೀನ್ ಖಿವು ಅದ್ಮಿಖ್ಹಾರು ಖಾಣು ಖಾವನಿ ವಖ್ಹ್‌ತೆ ಯೋ ಮೂರತ್ನ ಅರ್ಪಣ್‍ ಕರಿಹುಯು ಕರಿ ಸೋಚಾ಼ಸ್‌. ಕತೋಬಿ ಇವ್ಣೆ ದಿಲ್ನಿಸಾಕ್ಷಿ ಕಮ್‍ಜೋ಼ರ್ ಹುಯಿರ‍್ಹೂತೆ ಇನಖ್ಹಾಜೆ ಯೊ ಖಾಣು ಖಾವಾನು ಮೈಲು ಹುಯಿರ‍್ಹೂಸ್ ಕರಿಲ್ಹಾವಸ್.
1CO 8:8 ಕತೋಬಿ ಅಪ್ಣೆ ಖಾವನು ಖಾಣು ದೇವ್ನ ಖನ್ನೆ ಮ್ಹೇಲಾಕೊಯ್ನಿ. ನಾ ಖಾವಾಥಿ ಲುಕ್ಷಾನ್‌ಬಿ ಕೊಯ್ನಿ. ಖಾದೋತೊ ಫಾಯಿದೊಬಿ ಕೊಯ್ನಿ.
1CO 8:9 ಕತೋಬಿ ಆ ತುಮಾರು ಛುಟ್ಕಾರ್‌ನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ವಿಶ್ವಾಸ್ಮ ಕಮ್‍ಜೋ಼ರ್‌ರ‍್ಹವಾಳ ಅದ್ಮಿನ ತುಮಾರಿ ಹಕ್‌ ಪಾಪ್‌ಮ ರಡ್ಕಾನ ಕಾರಣ್ ಹೋಣುತೆ ಜ಼ತನ್‌ರ‍್ಹೇಣು.
1CO 8:10 ಅಕ್ಲಿ ಹುಯಿರ‍್ಹವಾಳೊ ತೂಸ್ ಮೂರತ್ನ ಮಂದಿರ್‌ಮ ಖಾಣನ ಬೇಠುರ‍್ಹವಾನು ಕಮ್‍ಜೋ಼ರ್ ದಿಲ್‌ವಾಳು ಭೈ ದೇಖ್ಯತೊ, ಯೋಬಿ ಮೂರತ್ನ ಪೂಜ಼ಕರ‍್ಯಹುಯ ಖಾಣನ ರಾಛಾ಼ನ ಖಾವನ ಭಾಲ್ ಉಷೆ ಕೊಯ್ನಿಕಿಶು?
1CO 8:11 ಅಮ್ ಆ ತಾರಿ ಅಕ್ಕಲ್‍ಥಿ ಯೋ ಕಮ್‍ಜೋ಼ರ್ ಭೇನೆ ಭೈಯೆ ನಾಶ್‍ಹುಯಿಜಾ಼ಸ್. ಇನಖ್ಹಾಜೇಬಿ ಕ್ರಿಸ್ತ ಇನ ಜಾನ್ನ ದಿದೋತೆ ಫಾಯಿದೊಕೊಂತೆ ಹುಯಿಜಾ಼ಶೆ.
1CO 8:12 ಅಮ್‍ರ‍್ಹೀನ್ ತುಮೆ ವಿಶ್ವಾಸಿ ಭೇನೆ ಭೈಯೇನಿ ವಿರೋದ್ ಪಾಪ್‍ಕರೀನ್ ಇವ್ಣ ಕಮ್‍ಶಿಲ್ ಮನ್ನಿಸಾಕ್ಷಿನ ದುಖ್ ಕರಾಯತೊ ತುಮೆ ಕ್ರಿಸ್ತನಿ ವಿರೋದ್ ಪಾಪ್‍ಕರವಾಳ ಹುಯಿರಿಶು.
1CO 8:13 ಇನಖ್ಹಾಜೆ ಖಾವಾನು ರಾಛು಼ ಮಾರ ಭೇನೆ ಭೈಯೇನ ಪಾಪ್ ಹುವಾನುರ‍್ಹಿಯೂತೊ ಅಜು಼ ಮೇ ಕದೇಬಿ ಬೋಟಿನ ಕೋ ಖೈಶ್‍ನಿ,ಅಮ್ ಮೇ ಇವ್ಣುನ ಪಾಪ್ ಕರಾನ ಕಾರಣ್ ನಾಹೊಣು.
1CO 9:1 ಮೇ ಛುಟ್ಕಾರ್ ಕಾಹೆಕಿ ಶು? ಮೇ ಅಪೊಸ್ತಲ ಕಾಹೆಕಿ ಶು? ಮಾರೊ ಪ್ರಭು ಯೇಸುನ ದೇಖ್ಯೊಹುಯೊ ಕೊಯ್ನಿಕಿಶು? ಮೇ ಪ್ರಭುಮ ಕರ‍್ಯೊತೆ ಪ್ರಚಾರ್‌ನಿ ಖ್ಹಣೇದ್ ತುಮೇಸ್ ಕಾಹೆಕಿಶು?
1CO 9:2 ಅಲ್ಹಾವ್ ಅದ್ಮಿನ ಮೇ ಅಪೊಸ್ತಲ ನಾ ಹುಯಿರ‍್ಹುತೋಬಿ ತುಮೂನ ತೋಬಿ ಅಪೊಸ್ತಲ ಹುಯಿರ‍್ಹೋಸ್. ಮೇ ಪ್ರಭುನೊ ಅಪೊಸ್ತಲಕರಿ ಬೋಲೈಲ್ಯವಾನ ತುಮುನ ಮಾರು ಮುದ್ರೊ ನಾಖಿರಾಖ್ಯೋಸ್.
1CO 9:3 ಮನ ವಿಚಾರ್‌ ಕರಾವಾಳನ ಮಾರಿ ಆಸ್ ಜ಼ವಾಬ್.
1CO 9:4 ಹಮುನ ಖಾಣುಪಾಣಿ ಖಾವಾನ ಹಕ್‍ಕೊಯ್ನಿಕಿ ಶು?
1CO 9:5 ಕ್ರಿಸ್ತಮ ವ್ಯಹಾ ಹುಯಿರ‍್ಹವಾಳ ವಿಶ್ವಾಸಿ ಭೈನಿ ಬಾವಣ್ಣ ಬುಲೈಲಿನ್ ಚಾ಼ಲ್ವನ ಬಿಜಾ಼ಖ್ಹಾರ ಅಪೊಸ್ತಲನಿತರ ಪ್ರಭುನ ಭೈಯೇನಿತರ ಅಜು಼ ಕೇಫಾನಿಘೊಣಿ ಹಮೂನ ಹಕ್‍ಕೊಯ್ನಿಕಿ ಶು?
1CO 9:6 ನತರ್, ಮ್ಹಿನತ್‌ಕೊಂತೆ ಜಿವ್ಣು ಕರಾನ ಮನಾಬಿ ಬಾರ್ನಬನಾಬಿ ಹಕ್‌ ಕೊಯ್ನಿಕಿ ಶು?
1CO 9:7 ಖಿವು ಶಿಪಾಯಿಬಿ ಇನು ಶೊಂತ್ ಖರ್ಚ್‌ಥಿ ಚಾ಼ಕ್ರಿ ಕರ್ಶೆಕಿ ಶು? ದ್ರಾಕ್ಷಿನಬಾಗ್‌ನ ಪಿಕಾವವಾಳೊ ಇನುಫಲ್ ಖಾಯಿಕೊಂತೆ ರ‍್ಹಿಶೆಕಿಶು? ಇನ ಮಂಧಾನ ಪಾಳವಾಳೊ ಖೇವೊರ‍್ಹೇವೊ ಇನು ದೂದ್ನ ಪಿಯಾಕೊಂತೆ ರ‍್ಹಿಶೆ?
1CO 9:8 ಮೇ ಬೋಲ್ಯೊತೆ ಖಲಿ ಅದ್ಮಿನಿ ವಾತೆಕಿಶು? ಧರ್ಮಶಾಸ್ತ್ರಬಿ ಅನ ಬೋಲಸ್‌ಕೊಯ್ನಿಕಿ ಶು?
1CO 9:9 ಖಳು ಖುಂದ್ಲಾತೆ ಢಾಂಡನ ಮ್ಹೋಡಾನ ಮ್ಹೋರ್ಕಿನಾಘಾಲ್ನುಕರಿ ಮೋಶೆನ ಧರ್ಮಶಾಸ್ತ್ರಮ ಲೀಖೈರುಸ್. ದೇವ್ ಸೋಚಸ್ತೆ ಢಾಂಡವ್‌ನಖ್ಹಾಜೆಕಿಶು?
1CO 9:10 ಖ್ಹಾಚಮಾಬಿ,ಅಪ್ಣಖ್ಹಾಜೇಸ್ ಯೋ ಬೋಲಸ್ ಕೊಯ್ನಿಕಿಶು? ಓಹೊ. ಅಪ್ಣಖ್ಹಾಜೆ ಲೀಖೈರ‍್ಹುಸ್. ನಾಗ್ರವಾಳೊ ಪಿಕಾವ್ಣಿಮ ಇನು ಭಾಗ್‌ ಮಳ್‌ಶೆಕರಿ ಭರೋಖ್ಹಾಥಿ ಕರ‍್ನು. ಅಜು಼ ಖಳುಕರವಾಳೊ ಇನ ಖ್ಹುಗ್ಗಿಮ ಭಾಗ್‌ ಮಳ್‌ಶೆಕರಿ ಆಖ್ಹ್‌ಥಿ ಖಳುಕರ‍್ನು.
1CO 9:11 ಹಮೆ ತುಮಾರಮ ಆತ್ಮೀಕ್ ಹುಯಿರ‍್ಹುತೆ ಪಂಡಾನ ನಾಖ್ಯಾತೊ ಇನ ಬದಲ್ ತುಮಾರೇಥಿ ಜಗತ್ನ ಉಬ್‍ಜಾ಼ವ್ಣಿನ ಜಿನಖ್ಹ್‌ನ ವ್ಹಾಡನು ಮೋಟಿ ವಾತ್‍ಕಿಶು?
1CO 9:12 ಅಲ್ಹಾವ್ನ ತುಮಾರಪರ್ ಅತ್ರೆ ಅಧಿಕಾರ್ ರ‍್ಹಿಯುತೊ ಹಮೂನ ಬಿಜು಼ ಕೆತ್ರೆ ಜಾ಼ಖ್ಹತ್ ರ‍್ಹೇಣುನಿ? ಕತೋಬಿ ಹಮೆ ಯೋ ಅದಿಕಾರ್‌ನ ಚ಼ಲಾಯಕೊಯ್ನಿ. ಕ್ರಿಸ್ತನಿ ಸುವಾರ್ತೆ ನಾ ಆಡುಹೋಣುಕರಿ ಆ ಅಖ್ಖಾನ ಖ್ಹಮಾಳಿಲೀದ.
1CO 9:13 ದೇವ್ನಿ ಮಂದಿರ್‌ಮ ಚಾ಼ಕ್ರಿ ಕರವಾಳು ದೇವ್ನ ಮಂದಿರ್‌ಥು ಇವ್ಣ ಜಿವ್ಣು ಚ಼ಲಾವ್ಣುಕರಿ ಅಜು಼ ಚಾ಼ಚ಼ರ್‌ಕನ ಚಾ಼ಕ್ರಿಕರವಾಳು ಹಿಜ್ಜಾ಼ ಆವಸ್ತೆ ರಾಛ಼ವ್‍ಮ ವಾಟೊ ಹುಯಿರ‍್ಹೇಸ್‍ ಕರಿ ತುಮೂನ ಮಾಲುಮ್ ಕೊಯ್ನಿ?
1CO 9:14 ಆಸ್ ಪರಕ್ಮ ಪ್ರಭುನೇಬಿ ಸುವಾರ್ತೆನ ಬೋಲಿದ್ಯಾವಳು ಯೋ ಸುವಾರ್ತೆಥೀಸ್ ಜಿವ್ಣುಕರಿ ಹುಕುಮ್ ಕರ‍ಖ್ಯೊಸ್.
1CO 9:15 ಮೇತೊ ಅನಾಮ ಏಕ್‌ನಾಬಿ ಪಾಲನ್ ಕರ‍್ಯೊಕೊಯ್ನಿ. ಮನ ಶಾತ್ತೊಬಿ ಮಳ್‌ಣುಕರಿ ಉದ್ದೇಶ್‌ಥಿ ಲೀಖುಕರುಕೊಯ್ನಿ. ಕಿನಾತೋಬಿ ಆ ಖ್ಹರಾವ್ಣಿಥಿ ಫಾಯಿದೊ ನಾಹುಯುತೊ ಮೇ ಮರಿಜಾ಼ವನೂಸ್ ಅಛ್ಛು಼.
1CO 9:16 ಮೇ ಸುವಾರ್ತೆನ ಬೋಲ್ಯೊತೋಬಿ ಖ್ಹರಾವನು ಶಾತ್‌ಕೊಯ್ನಿ; ಯೊ ಬೋಲಾನು ಮಾರಿ ಜಿಮ್ಮೆದಾರಿ. ಮೇ ಸುವಾರ್ತೆನ ನಾ ಬೋಲ್ಯೊತೊ ಮಾರಿ ಹಾಲ್ನ ಶಾತ್‌ಕರಿ ಬೋಲು!
1CO 9:17 ಮೇ ಶೊಂತ್‍ ಮರ್ಜಿಥಿ ಆ ಕಾಮ್‍ಕರ‍್ಯೊಹೊತ್ತೊ ಮನ ಪ್ರತಿಫಲ್ ಮಳ್‍ಶೆ; ಕತೋಬಿ ಮೇ ಕರ್ನುಸ್‌ಕರಿ ಮೇ ಕರ‍್ಯೊ.
1CO 9:18 ಇಮ್‍ಕತೊ ಮನ ಮಳಾತೆ ಇನಾಮ್ ಶಾತ್? ಮೇ ಸುವಾರ್ತೆನ ಬೋಲಾನಿ ವಖ್ಹ್‌ತೆ ಇನೇಥಿ ಮಳಾತೆ ಪ್ರತಿಫಲ್‌ನಿ ಹಕ್‌ನ ಲೇಯಿಕೊಂತೆ ಇನ ಫುಗಟ್ಮ ಬೋಲನುಸ್ ಮನ ಮಳ್ಯುತೆ ಪ್ರತಿಫಲ್ ಹುಯಿರ‍್ಹುಸ್.
1CO 9:19 ಮೇ ಅಖ್ಖಿ ವಿಚಾರ್‌ಮ ಛುಟ್ಕಾರ್ ಹುಯಿರ‍್ಹತೋಬಿ ಘಣುಜ಼ಣಾನ ಮಾರಿ ಕಬ್‌ಜಾ಼ಮ ರಾಕ್ಣುಕರಿ ಮೇ ಅಖ್ಖಾನ ದಾಸಹುಯೊ.
1CO 9:20 ಯೆಹೂದ್ಯವಾಳನ ಕಮೈಕರಾನಖ್ಹಾಜೆ ಯೆಹೂದ್ಯರ್‌ನ ಮೇ ಯೆಹೂದ್ಯವಾಳೊ ಹುಯೊ. ಮೆ ಧರ್ಮಶಾಸ್ತ್ರನ ಅಧೀನ್‍ ನಾ ಹುಯೊತೋಬಿ, ಧರ್ಮಶಾಸ್ತ್ರನ ಕಬ್‌ಜಾ಼ಮ ರ‍್ಹವಳಾನ ಕಮೈಕರಿಲ್ಯವಾನಖ್ಹಾಜೆ ಇವ್ಣಖ್ಹಾಜೆ ಧರ್ಮಶಾಸ್ತ್ರನ ಅಧೀನ್ ಹುವಾಳನಿತರ ಹುಯೊ.
1CO 9:21 ಮೇ ದೇವ್ನಿ ಧರ್ಮಶಾಸ್ತ್ರಮ ನಾ ರ‍್ಹಿಯೊನಾತೋಬಿ ಕ್ರಿಸ್ತನಿ ನಿಯಮ್ಮ ಪಡಿಗಯೊ; ಭಾರ್‌ ರ‍್ಹವಾಳಾನ ಕಮೈ ಕರಾನಖ್ಹಾಜೆ ಧರ್ಮಶಾಸ್ತ್ರನಭಾರ್‌ ರ‍್ಹವಾಳಾನಿಘೊಣಿ ಹುಯೊ. ಅನಿ ಮತ್ಲಬ್‌ ದೇವ್ನಿ ನಿಯಮ್ನ ಅದೀನ್ ಹುಯೊ ಕರಿಕಾಹೆ, ಕ್ರಿಸ್ತನಿ ನಿಯಮ್ನನಾಬಿ ಅಧೀನ್ ಹುಯಿರ‍್ಹೊಸ್.
1CO 9:22 ಕಮ್‌ಜೋ಼ರಿವಾಳಾಮ ಇವ್ಣುನ ಕಮೈಕರಾನಖ್ಹಾಜೆ ಕಮ್‌ಜೋ಼ರಿವಾಳಾನಿ ಬೀಚ್ಮ ಮೇಬಿ ಕಮ್‌ಜೋ಼ರಿವಾಳೊ ಹುಯೊ. ಖಿವಿ ತರೀ‌ಖಾಮತೋಬಿ ಥೋಡಾನ ಬಚಾ಼ಡ್‌ಣುಕರಿ ಖ್ಹಾರನಖ್ಹಾಜೆ ಖ್ಹಾರನಿಘೋಣಿ ಹುಯೊ.
1CO 9:23 ಆ ಅಖ್ಖಾನ ಸುವಾರ್ತೆನಖ್ಹಾಜೇಸ್ ಕರೀನ್. ಮೇ ಬೀಜಾ಼ನಿ ಜೋ಼ಡ್ಮ ಸುವಾರ್ತೆನ ವಾರ್ಖ್ಹಾಮ ಭಾಗ್‍ಲ್ಯವಾನಖ್ಹಾಜೆ ಆ ಅಖ್ಖು ಕರುಕರೂಸ್.
1CO 9:24 ಖೇಲ್ನ ಮೈದಾನ್‌ಮ ಕೈಯೇಕ್‌ಜ಼ಣು ನಖ್ಹಾನ ಖೇಲ್ಮ ಭಾಗಿಹುವಾಸ್, ಕತೋಬಿ ಖಲಿ ಏಕ್‍ಜ಼ಣೊ ಜೂತಸ್ ಕರಿ ತುಮೂನ ಮಾಲುಮ್ ಕೊಯ್ನಿಕಿಶು? ಇವ್ಣಿನಿಘೋಣಿ ತುಮೇಬಿ ಇನಾಮ್ ಜುತಾನ ಖ್ಹಾಜೆಕರಿ ಮಿಲಾವೊ.
1CO 9:25 ಹರೇಕ್‍ಜ಼ಣು ಖೇಲ್‍ ಖೇಲವಾಳು ಯೊ ಅಖ್ಖಿ ಬಾರೆವ್‌ಮ ಶಿಕೆಹುಯೊ ಹುಯಿರ‍್ಹೆಸ್. ಇವ್ಣೆ ಖರಾಬ್ ಹುಯಿಜಾ಼ಸ್ ಕೊಯ್ನಿತೆ ಕಿರೀಟ್ನ ಲ್ಯವಾನಖ್ಹಾಜೆ ಹಿಮ್ಮತ್ ಕರಸ್. ಕತೋಬಿ ಅಪ್ಣೆತೋಬಿ ಕದೇಬಿ ಮಟಿಜಾ಼ಯಿಕೊಂತೆ ಕಿರೀಟ್ನ ಲ್ಯವಾನಖ್ಹಾಜೆ ಹಿಮ್ಮತ್ ಕರಾವಾಳು ಹುಯಿರ‍್ಹಾಸ್.
1CO 9:26 ಇನಖ್ಹಾಜೆ ಮೇಬಿ ಶುಶತ್‍ಕೊಂತೆ ನಾಖ್ಹುಕೊಯ್ನಿ, ವಹಿರಾನಿಜೋ಼ಡೆ ಮಾರ್‌ಪೀಟ್ ಕರಾನಿಘೋಣಿ ಲಡುಕೊಯ್ನಿ.
1CO 9:27 ಬಿಜ಼ಖ್ಹಾರನಿ ಜೋ಼ಡ್ಮ ಬೋಧನೆ ಕರಾನ ಪಾರ್ ತದೆ ಮೇಸ್ ನಾಲಾಯಕ್‌ ನಾ ಹುವಾನಖ್ಹಾಜೆ ಶರೀರ್‌ನ ನಿಶತ್ ದೀನ್ ಮಾರಿ ಚಪ್ಪಣ್‌ಮಾಸ್ ರಾಖುಸ್.
1CO 10:1 ಭೇನೆ ಭೈಯೇವೊ ಮೇ ತುಮುನ ಬೋಲಾನ ಶಾತ್ ಅಖ್ಹ್‌ ಕರುಸ್‌ಕತೊ, ಅಪ್ಣೊ ಗುರುಗುರಬ್‍ಲ್ಯ ಖ್ಹಾರುಬಿ ವಾದ್ಳಾನ ಆಖ್ಹ್‌ರಾಮ ಥಾ, ಇವ್ಣೆಖ್ಹಾರುಬಿ ಜ಼ತನ್‌ಥಿ ದರ‍್ಯಾವ್‍ನ ಉಲಾಂಗಿಗಯು.
1CO 10:2 ಇವ್ಣೆಖ್ಹಾರು ಮೋಶೆನ ಪೀಠೆಜಾ಼ವಾನ ಖ್ಹಾಜೆ ವಾದ್‌ಳಾಮಾಬಿ ದರ‍್ಯಾವ್‍ಮಾಬಿ ಮೋಶೇಥಿ ಬ್ಯಾಪ್ತಿಸ್ಮ ಲೀಲಿದು.
1CO 10:3 ಇವ್ಣೆಖ್ಹಾರು ಎಕ್ಕಸ್ ಆತ್ಮೀಕ ಖಾಣನ ಖಾದು.
1CO 10:4 ಶನಕತೊ ಎಕ್ಕಸ್ ಆತ್ಮೀಕ ಪಾನ್ಕ ಪೀದು. ಇವ್ಣೆ ಇವ್ಣಿಜೋ಼ಡ್ಮ ಆಯುತೆ ಆತ್ಮೀಕ ಬಂಡಾಮಾಥು ವ್ಹಯೂತೆ ಇನ ಪೀದು. ಯೋ ಬಂಡೋಸ್ ಕ್ರಿಸ್ತಹುಯಿರ‍್ಹೋಥೊ.
1CO 10:5 ಕತೋಬಿ ಇವ್ಣಾಮ ಘಣ ಅದ್ಮಿನ ದೇವ್ ಇಷ್ಟ ಕರ‍್ಯೊಕೊಯ್ನಿ. ಇನಖ್ಹಾಜೆ ಇವ್ಣು ಮುರ್ದುಖ್ಹಾರು ಜ಼ಂಗಳ್‌ಮ ಛಿಡ್‍ಕೈಗಯು.
1CO 10:6 ಇವ್ಣೆ ಕರ‍್ಯುತೆ ತಿಮ್ ಅಪ್ಣೇಬಿ ಖರಾಬ್‍ಅಖ್ಖಾನ ಆಖ್ಹ್ ನಾಕರ‍್ನುಕರಿ ಝೇತಾವ್ಣಿ ಹುಯಿನ್ ಆ ಹಮ್ಕೆ ಅಪ್ಣುನ ಸಾಕ್ಷಿ ಹುಯಿರುಸ್.
1CO 10:7 “ಇವ್ಣಾಮ ಥೋಡುಜ಼ಣು ಮೂರತ್ನ ಆರಾದನೆ ಕರಾವಾಳು ಹುಯಿನ್ ಖೈನ್ ಪೀನ್, ನಗರ್‌ನಾಚ಼್‌ತು ನಿಕ್‌ಳ್ಯು.” ಕರಿ ಲೀಖೈರ‍್ಹೂತೆ ತಿಮ್ ತುಮೆ ಮೂರತ್ನ ಆರಾದನೆ ಕರಾವಾಳ ನಕೊಹುವೊ.
1CO 10:8 ಇವ್ಣಾಮ ಥೋಡುಜ಼ಣು ಪಾಪೇಲು ಕಾಮ್ ಕರೀನ್ ಎಕ್ಕಸ್ ರೋಜ಼್‌ಮ ತೀನ್ ಉಪ್ಪರ್‌ವೀಖ್ಹ್‌ ಹಜಾ಼ರ್ ಅದ್ಮಿ ಮರಿಗಯು. ಅಪ್ಣೆ ಪಾಪೇಲುಕಾಮ್ ನಾ ಕರ್ನುತೆ ರ‍್ಹಿಯೆ.
1CO 10:9 ಇವ್ಣಾಮ ಥೋಡುಜ಼ಣು ಪ್ರಭುನ ತರೀಪ್ಷ ಕರೀನ್ ಖ್ಹಾಪ್‍ಥಿ ಮರ‍್ಯುತೆ ತಿಮ್, ಅಪ್ಣೇಬಿ ಇವ್ಣಿನಿತರ ತರೀಪ್ಷ ನಾ ಕರ‍್ನು.
1CO 10:10 ಇವ್ಣಾಮ ಥೋಡುಜ಼ಣು ಗುಣ್‍ಗುಣೈನ್ ನಾಶ್ ಕರಾವಾಳು ದೂತ್‌ನ ಹಾತೇಥಿ ಮರೈಗಯು.ಇನಖ್ಹಾಜೆ ಇವ್ಣಿನಿತರ ಅಪ್ಣೇಬಿ ನಾ ಭಣಕ್ಣು.
1CO 10:11 ಯೋ ಅದ್ಮಿವೋನ ಹುಯೂತೆ ಆ ಖೇಣಿಖ್ಹಾರಿ ಸಾಕ್ಷಿಹುಯಿರ‍್ಹುಸ್. ಹಗಾಮ್ನಿ ಖ್ಹರ್ತಿನ ಆಯಿರ‍್ಹಾತೆ ಅಪ್ಣುನ ಝೇತಾವ್ಣಿ ದ್ಯವಾನ ಆ ಅಖ್ಖು ಲಿಖೈರ‍್ಹುಸ್.
1CO 10:12 ಇನಖ್ಹಾಜೆ ಘಟ್‍ಥಿ ಭೀಯಾಸ್‍ಕರಿ ಖ್ಹಮ್‍ಜಾ಼ವಾಳ ತುಮೆ ರಡ್ಕಿನಾಜಾ಼ವ್ಣುತೆ ತಿಮ್ ದೇಖಿಲೇವೊ.
1CO 10:13 ಅದ್ಮಿವೋನ ಮಾಮುಲಿ ಅವಾತೆ ಖ್ಹತಾಪ್ಣಿ ಮ್ಹೆಲ್ಯುತೊ ಬಿಜು಼ ಖೆವುಕಿ ತುಮೂನ ಆಯುಕೊಯ್ನಿನಿ. ಕತೋಬಿ ದೇವ್ ವಿಶ್ವಾಸ್‌ವಾಳೊ. ತುಮೂನ ಖ್ಹಮಾಳನ ಹೋಯಿಕೊಂತೆ ಶೋದನೆಖ್ಹಾರಾನ ಯೋ ತುಮಾರಪರ್ ಆವಾನಿತರ ಮ್ಹೆಲಕೊಯ್ನಿ. ಕತೋಬಿ ತುಮೂನ ಶೋದನೆ ಆಯುತೊ ಯೊ ಅಖ್ಖಾನ ಖ್ಹಮಾಳನ ಶಕತ್‌ವಾಳ ಹುವಾನಿತರ ಯೋ ಅಖ್ಖೇಥಿ ಛು಼ಕಿಜಾ಼ವಾನೊ ಮಾರಗ್ ಬಣಾವಸ್.
1CO 10:14 ಇನಖ್ಹಾಜೆ ಮಾರ ಪ್ಯಾರ್‌ನ ಭೈಯೇ ಭೇನೆವೊ, ಮೂರತ್ನಿಆರಾಧನೆ ಮ್ಹೇಲಿನ್ ನಿಕ್ಳೊ.
1CO 10:15 ತುಮೆ ಅಕ್ಲಿಕರಿ ಮೇ ತುಮಾರಿಜೋ಼ಡ್ಮ ಅನ ಬೋಲುಸ್. ಮೇ ತೀರ್ಪ್‌ಕರಾನು ಖ್ಹುದ್ ತುಮೇಸ್ ಸೋಚಿದೇಖೊ.
1CO 10:16 ಅಪ್ಣೆ ದ್ರಾಕ್ಷಿನರಖ್ಹ್‌ನು ಕಟೋರಮ ದೇವ್ನ ಧನ್ಯವಾದ್ ಕರೀನ್ ಪಿಯಾನಿವಖ್ಹ್‌ತೆ ಕ್ರಿಸ್ತನ ಲ್ಹೋಯಿಮ ಭಾಗ್‌ಲ್ಯವಾಳ ಹುಯಕೊಯ್ನಿಕಿ ಶು? ಅಪ್ಣೆ ರೋಟಾನ ತೋಡಿನ್ ಖಾವಾನಿ ವಖ್ಹ್‌ತೆ ಕ್ರಿಸ್ತನ ಶರೀರ್‌ಮ ಭಾಗ್‌ಲಿದ ಕೊಯ್ನಿಕಿ ಶು?
1CO 10:17 ರೋಟೊ ಎಕ್ಕಸ್ ಇನಖ್ಹಾಜೆ ಅಪ್ಣಾಮ ಕೈಯೇಕ್‌ಜ಼ಣು ರ‍್ಹಯುತೋಬಿ ಅಪ್ಣೆ ಎಕ್ಕಸ್ ಶರೀರ್‌ನ ಹುಯಿರಾಸ್. ಶನಕತೊ ಅಪ್ಣೆಖ್ಹಾರು ಯೋ ಎಕ್ಕಸ್ ರೋಟಾಮ ಭಾಗ್‌ಲಿಯೆಸ್.
1CO 10:18 ತುಮೆ ಇಸ್ರಾಯೇಲ್ ಅದ್ಮಿಯೇವ್‍ನ ಬಾರೇಮ ಸೋಚೊ. ಬಲಿ ಕರ‍್ಯಾಹುಯಾನ ಖಾವವಾಳು ಬಲಿಪೀಠ್ಮ ಭಾಗ್‌ಲ್ಯಾವಾಳು ಹುಯುಕೊಯ್ನಿಕಿ ಶು?
1CO 10:19 ಇಮ್‍ಕತೊ ಮೇ ಶಾತ್‌ ಬೋಲುಕರುಸ್? ಮೂರತ್ನ ಚ಼ಢಾಯಹುಯ ಖಾಣುನು ಚೀಜ಼್ ಖ್ಹಾಚು಼ ಕರಿ ಬೋಲಾನ ಹುವಾಸ್ಕಿ? ಕೊಯ್ನಿ, ಮೂರತ್ ಖ್ಹಾಚು಼ ದೇವ್‌ಕರಿ ಬೋಲಸ್.
1CO 10:20 ಕತೋಬಿ ಅಲ್ಹಾವ್‌ ಚ಼ಢಾವಾತೆ ಬಲಿ ದೇವ್‍ನಕಾಹೆ. ಭೂತ್‌ನ ಅಖ್ಖಾನಿ ಜೋ಼ಡ್ಮ ವಾಟೊ ನಾ ಹುಯಿರ‍್ಹೇಣು ಮಾರಿ ಆಖ್ಹ್.
1CO 10:21 ತುಮೆ ಪ್ರಭುನ ಕಟೋರಮಾಬಿ ಭೂತ್ ಅಖ್ಖಾನ ಕಟೋರಮಾಬಿ ಪೀಶುಕೊಯ್ನಿ. ತುಮೆ ಪ್ರಭುನಿ ಪಂತಿಮಾಬಿ ಶೈತಾನ್ನ ಅಖ್ಖಾನಿ ಪಂತಿಮಾಬಿ ಖಾಣುಖಾವಾಳ ಹುಯಿರ‍್ಹಿಶುಕೊಯ್ನಿ.
1CO 10:22 ಅಪ್ಣೆ ಪ್ರಭುನ ಇರಾದೊ ಆವನಿತರ ಛೇಡಾವ್ಣು ಕಿಶು? ಅಪ್ಣೆ ಇನೇಥಿಬಿ ತಾಖತ್‍ವಾಳ ಹುಯಿರಾಸ್‍ ಕಿಶು?
1CO 10:23 “ಅಖ್ಖಾಸ್ ಕಾಮ್ನಾಬಿ ಕರಾನ ಛುಟ್ಕಾರ್ ಛಾ಼” ಕತೋಬಿ ಅಪ್ಣೆ ಕರಿಯೇತೆ ಖ್ಹಾರು ಕಾಮ್‍ಬಿ ಅಛ್ಛು಼ಕರಿ ಬೋಲಾನು ಬರೋಬರ್ ಕೊಯ್ನಿ.” ಖ್ಹಾರುಸ್ ಕಾಮ್ ಕರಾನ ಅದಿಕಾರ್‌ಛಾ಼ ಕತೋಬಿ ಅಖ್ಖೂಬಿ ಅದ್ಮಿವೋನ ಫಾಯಿದೊ ಕೊಹುಯಿರ‍್ಹೇಯ್ನಿ.
1CO 10:24 ಹರೇಕ್‍ಜ಼ಣು ಇವ್ಣ ಅಛ್ಛಾ಼ನ ಖಲಿ ನಾ ಸೋಚ್ಣುತೆ ಬಿಜಾ಼ನ ಅಛ್ಛಾ಼ನಾಬಿ ಸೋಚಾದೆ.
1CO 10:25 ಕಖ್ಹಯ್‌ಮ ವೇಚಾ಼ವತೆ ಶಾತ್‍ರ‍್ಹಿಯುತೋಬಿ ದಿಲ್ಮ ಕಚ಼್ ಹುವಾನಿಘೊಣಿ ವಿಚಾರ್ ಕರ್ನುನಾತೆ ಖಾವೊ.
1CO 10:26 ಶನಕತೊ ಜ಼ಮೀನ್‍ಬಿ ಇನಾಮಛಾ಼ತೆ ಖ್ಹಾರುಬಿ ಪ್ರಭುನು ಹುಯಿರ‍್ಹುಸ್ನಿ.
1CO 10:27 ಕ್ರಿಸ್ತ ವಿಶ್ವಾಸಿ ಕಾಹೆತೆ ಕೋಣ್‌ತೋಬಿ ತುಮೂನ ಖಾಣನ ಬುಲಾಯೂತೊ ತುಮೂನ ಶಾತ್ ನಾಖ್ಯುತೋಬಿ ದಿಲ್ನಿಸಾಕ್ಷಿನ ವಿಚಾರ್‌ ಕರ್ನುನಾತೆ ಇನ ಖಾವೊ.
1CO 10:28 ಕತೋಬಿ ಏಕ್‍ಜ಼ಣೊ ತುಮೂನ ಹೈರುತೆ ಮೂರತ್ನ ಬಲಿದಿದುಹುಯು ಕರಿ ಕೋಣ್‌ತೋಬಿ ತುಮೂನ ಬೋಲ್ಯುತೊ, ಆ ವಿಚಾರ‍್ನ ಬೋಲ್ಯೊತೆ ಇನಖ್ಹಾಜೇಬಿ ದಿಲ್ನಿಸಾಕ್ಷಿನಖ್ಹಾಜೇಬಿ ಇನ ಖಾವೊನಕೊ.
1CO 10:29 ಕತೋಬಿ ಆ ತುಮಾರು ದಿಲ್ನಿಸಾಕ್ಷಿ ಕರಿ ಮೇ ಬೋಲುಕರುಕೊಯ್ನಿ. ರ‍್ಹಯುತೋಬಿ ಬಿಜೇಕ್‍ಜ಼ಣು ಇನ ಖಾವಾನು ಬರೋಬರ್ ಕರಿ ಮಾಲುಮ್ ಕರಿರಾಖ್ಯುತೆ ಇನಖ್ಹಾಜೆ ಇನಿ ದಿಲ್ನಿ ಸಾಕ್ಷಿನಖ್ಹಾಜೆ ಇವ್ಣಿ ಛುಟ್ಕಾರ್‌ನ ಶನ ತೀರ್ಪ್‌ ಹೋಣು?
1CO 10:30 ಮೇ ದೇವ್ನ ಧನ್ಯವಾದ್ ಕರೀನ್ ಖಾದೋತೆ ಖಾಣನಖ್ಹಾಜೆ ಮಾರಪರ್ ದೂಷಣೆ ಶನ?
1CO 10:31 ಹಮ್ಕೆ ಮಾರಿ ಜವಾಬ್‌ ಅತ್ರೇಸ್; ತುಮೆ ಖಾಣುಖಾದತೋಬಿ, ಪೀದತೋಬಿ ಶಾತ್‍ಕರ‍್ಯಾತೋಬಿ ದೇವ್ನಿ ಮಹಿಮೆನಖ್ಹಾಜೆ ಯೋ ಕರೊ.
1CO 10:32 ಬಿಜ಼ ಅದ್ಮಿಯೇವ್‍ ಕತೊ, ಯೆಹೂದ್ಯರ್‌ರ‍್ಹೆವೊ, ಯೆಹೂದ್ಯಕಾಹೇತೆ ರ‍್ಹವೊ, ನತರ್ ದೇವ್ನಿ ಸಬೆವಾಳನರ‍್ಹೇವೊ; ಇವ್ಣೆ ಗಲತ್‍ಮ ಪಡಾನಿಘೋಣಿ ಕದೇಬಿ ನಕೊಕರ್ಷು.
1CO 10:33 ಮೇತೊ ಮಾರಿ ಶೊಂತ್‍ ನಫ್ಫಾನಖ್ಹಾಜೆ ಢೂಂಡುಕೊಂತೆ ಖ್ಹಾರುಸ್ಜ಼ಣು ರಕ್ಷಣೆ ಲೇವ್ಣುಕರಿ ಇವ್ಣಿ ನಫ್ಫಾನಖ್ಹಾಜೆ ಅಖ್ಖಜ಼ಣಾಮ ಅಖ್ಖೀಸ್ ವಾತೇಮ ಖ್ಹರೈಲೆವುಸ್.
1CO 11:1 ಮೇ ಕ್ರಿಸ್ತನ ಪೀಛೆ ಕಿಮ್ ಚಾ಼ಲೂಸ್ಕಿ ಇಮ್‌ ಮಾರ ಪೀಛೆ ತುಮೆ ಚಾ಼ಲವಾಳ ಹುಯಿರ‍್ಹೇವೊ.
1CO 11:2 ತುಮೆ ಅಖ್ಖಾಸ್‍ಮಾಬಿ ಮನ ಖ್ಹಯಾಲ್‌ಕರಿನ್ ಮೇ ತುಮೂನ ದೀರಾಖ್ಯೋತೆ ಪದತ್ತಿನ ಘಟ್‍ಥಿ ಧರಿರಾಖ್ಯಸ್‍ಕರಿ ತುಮೂನ ಖ್ಹರವುಸ್.
1CO 11:3 ಹರೇಕ್ ಪರ್ಖ್ಹಾನ ಕ್ರಿಸ್ತ ಮುಡ್‌ಕ್ಯು, ತಯೇಡಾನ ಪರ್ಖ್ಹೊ ಮುಡ್‌ಕ್ಯು ಅಜು಼ ಕ್ರಿಸ್ತನ ದೇವ್ ಮುಡ್‌ಕ್ಯು ಹುಯಿರ‍್ಹೂಸ್ ಕರಿ ಬೋಲಾನು ಯೊ ಮಾಲುಮ್ ರ‍್ಹೇವ್ಣು.
1CO 11:4 ಸಬೇಮ ಇನ ಮುಡ್‌ಕ್ಯಾನ ಮೂಚಿಲೀನ್ ಪ್ರಾರ್ಥನೆ ರ‍್ಹವೊ ಪ್ರವಾದ್‌ನೆ ರ‍್ಹವೊ ಕರಾವಾಳೊ ಪರ್ಖ್ಹೊ, ಯೊ ಇನ ಮುಡ್‌ಕ್ಯಾನ ಖ್ಹರಮ್‌ ಕಾಡಿಲೇಸ್.
1CO 11:5 ಕತೋಬಿ ಮುಡ್‍ಕ್ಯನಪರ್ ಘುಮ್‍ಟೊ ನಾಖಕೊಯಿನ್ತೆ ಪ್ರಾರ್ಥನೆ ಕರಾವಾಳಿ ಪ್ರವಾದ್‌ನೆ ಬೋಲವಾಳಿ ತಯೇಡ ಇನ ಮುಡ್‌ಕ್ಯಾನ ಖ್ಹರಮ್‌ ಕಾಡಾವಾಳಿ ಹುಯಿರ‍್ಹಿಸ್. ಅಮ್‍ ಕರಾವಾಳಿ ತಯೇಡ ಇನು ಮುಡ್‌ಕ್ಯು ನಾ ಮೂಚಿರಾಖನಾಬಿ ಮುಡ್‌ಕ್ಯು ಬೋಳಿಸೈಲ್ಯವಾಳಿನ ಸಮ ಹುಯಿರ‍್ಹೀಸ್.
1CO 11:6 ಕತೋಬಿ ತಯೇಡ ಘುಮ್‍ಟೊ ನಾಖಿನಾತೊ, ಯೊ ಇನು ಮುಡ್‌ಕ್ಯು ಬೋಳಿಸೈಲ್ಯವಾದೆ. ಕೇಖ್ಹ್‌ ಕತ್‍ರೈಲ್ಯಾವಾನು ರ‍್ಹವೊ ಮುಡ್‌ಕ್ಯು ಬೋಳಿಸೈಲ್ಯವಾನು ರ‍್ಹವೊ ತಯೇಡಾನ ಖ್ಹರಮ್ನಿ ವಾತೆ ಹುಯಿರ‍್ಹಿಉಷೇತೊ, ಯೋ ಘುಮ್‍ಟೊ ನಾಖಿಲ್ಯವಾದೆ.
1CO 11:7 ಪರ್ಖ್ಹೊ ದೇವ್ನಿ ರೂಪ್ ಅಜು಼ ಮಹಿಮೆನು ಪ್ರತಿರೂಪ್ ಹುಯಿರೋತೆ ಇನಖ್ಹಾಜೆ ಮುಡ್‌ಕ್ಯಪರ್ ಘುಮ್‍ಟೊ ನಾಕ್ಣುಕೊಯ್ನಿ. ಕತೋಬಿ ತಯೇಡ ಪರ್ಖ್ಹಾನಿ ಇಜ಼್ಜತ್ ಹುಯಿರೀಸ್.
1CO 11:8 ಶನಕತೊ ತಯೇಡಥಿ ಪರ್ಖ್ಹೊಕಾಹೆ, ಕತೋಬಿ ಪರ್ಖ್ಹೇಥಿ ತಯೇಡ ಉಬ್ಜಿರ‍್ಹೀಸ್.
1CO 11:9 ತಯೇಡನಖ್ಹಾಜೆ ಪರ್ಖ್ಹೊ ಉಬ್‍ಜ್ಯೊಕೊಯ್ನಿ. ಕತೋಬಿ ಪರ್ಖ್ಹಾನಖ್ಹಾಜೆ ತಯೇಡ ಉಬ್ಜಿರ‍್ಹೀಸ್.
1CO 11:10 ಅನಖ್ಹಾಜೇಥಿ ಸೊರ್ಗ ದೂತರ‍್ನ ಖ್ಹಾಮ್ಣೆ ಇನು ಬಾವ್ರಿನ ಹಕ್‌ಮ ಛಾ಼ಕರಿ ವತಾಳನಖ್ಹಾಜೆ ಘುಮ್‍ಟೊ ನಾಖಾನು ಜ಼ರೂರತ್ ಹುಯಿರ‍್ಹುಸ್.
1CO 11:11 ಕತೋಬಿ ಪ್ರಭುಮ ಮಳಿರ‍್ಹವಾಮ ಪರ್ಖ್ಹೊಕೊಂತೆ ತಯೇಡಬಿ ತಯೇಡಕೊಂತೆ ಪರ್ಖ್ಹೋಬಿ ಪೂರ ಕೊ ಹುಯಿರ‍್ಹೇಯ್ನಿ.
1CO 11:12 ಶನಕತೊ ತಯೇಡ ಪರ್ಖ್ಹಾಥಿ ಪೈದಹುವಸ್. ಕತೋಬಿ ಖ್ಹಾರುಸ್ ದೇವ್‍ಥಿಸ್ ಹುಯಿರ‍್ಹುಸ್.
1CO 11:13 ತುಮಾರಮ ತುಮೇಸ್ ವಿಚಾರ್‌ ಕರಿನ್‌ ತೀರ್ಮಾನ್‌ ಕರಿಲೆವೊ. ತಯೇಡ ಘುಮ್‍ಟೊಕೊಂತೆ ದೇವ್ನ ಪ್ರಾರ್ಥನೆ ಕರಾನು ಬರೋಬರ್ ಕಿಶು?
1CO 11:14 ಪರ್ಖ್ಹೊ ಕೇಖ್ಹ್‌ ವಧೈಲಿದೋತೊ ಯೊ ಇನ ಖ್ಹರಮ್‌ ಕರಿ ದೆಖಾಡಸ್ನಿ.
1CO 11:15 ತಯೇಡ ಕೇಖ್ಹ್‌ ವಧೈಲಿದಿತೊ ಯೋ ಇನ ಘುಮ್ಟಾನ ಬದಲ್ ದೆವೈರ‍್ಹೀನ್ ಕೇಖ್ಹ್‌ ಇನ ಶನ್‌ಗಾರ್‌ನ ಏಕ್‌ ಭಾಗ್‌ ಹುಯಿರ‍್ಹುಸ್. ಮಾಮೂಲಿಮ ತುಮೂನ ಮಾಲುಮ್‍ಪಡಕೊಯ್ನಿ ಕಿಶು?
1CO 11:16 ಕತೋಬಿ ಅನಿಬಾರೇಮ ಕೋಣ್‍ತೋಬಿ ಅಬ್ಬಾಜ಼ಬ್ಬಿ ಕರಾನು ರ‍್ಹಿಯುತೊ ಇನ ಮೇ ಅತ್ರೇಸ್ ಬೋಲುಸ್; ಅಥ್ರಾನಿ ಪದತ್ತಿ ಹಮಾರಮ ರ‍್ಹವೊ ಅಜು಼ ದೇವ್ನಿ ಸಬೆವ್‌ಮ ರ‍್ಹವೊ ಕೊಯ್ನಿ.
1CO 11:17 ಹಮ್ಕೆ ತುಮೂನ ಬೋಲಾನ ಆಯೋತೆ ವಾತೆಮ ತುಮೂನ ಖ್ಹರವ್‍ಕೊಯ್ನಿ, ಶನಕತೊ ತುಮೆ ಸಬೆ ಹುಯಿನ್ ಮಳಿನ್ ಆವಾನಿ ವಖ್ಹ್‌ತೆ ಅಛ್ಛು಼ ಹುವಾಥೀಬಿ, ಜಾ಼ಖ್ಹತ್ ಲುಕ್ಷಾನ್‌ ಹುವ್‍ಕರಸ್.
1CO 11:18 ಕಿಮ್‌ಕತೊ ಪಹಿಲೆ, ತುಮೆ ಸಬೆಹುಯಿನ್ ಮಳಿನ್ ಆವಾನಿ ವಖ್ಹ್‌ತೆ ತುಮರಾಮ ಕಚ಼್ಚರ್‌ ಹುವಾನು ಖ್ಹಮ್‍ಜು಼ಸ್. ಅನ ಜ಼ರ ವಿಶ್ವಾಸ್‍ಬಿ ಕರುಸ್.
1CO 11:19 ಥೋಡುಜ಼ಣು ದೇವ್‍ಥಿ ಯೋಗ್ಯಕರಿ ಬೋಲೈಲ್ಯವಾಳು ಛಾ಼ಕರಿ ದೆಖಾವನಖ್ಹಾಜೆ ತುಮಾರಮ ಬೇಭಾಗ್‌ ಹುವಾನು ಜ಼ರೂರತ್ ಅನೇಥಿ ಕೋಣ್ ಬರಬ್ಬರ್‌ ಛಾ಼ಕರಿ ಮಾಲುಮ್ ಪಡಾಸ್‌.
1CO 11:20 ಇನಖ್ಹಾಜೆ ತುಮೆ ಸಭೆಹುಯಿನ್ ಮಳಾನಿ ವಖ್ಹ್‌ತೆ ತುಮೆ ಕರಸ್ತೆ ಪ್ರಭುನು ಭೋಜನ್ ಯೊ ಪ್ರಭುನು ಭೋಜನ್ ಕಾಹೆ.
1CO 11:21 ಶನಕತೊ, ಹರೇಕ್‍ಜ಼ಣು ಬಿಜೇಕ್ ಜ಼ಣಾನಖ್ಹಾಜೆ ಟಿವಾವಕೊಂತೆ ಇನು ಭೋಜನ್ನ ಅಗಾಡಿಸ್ ಶುರುಕರಸ್. ಅನೇಥಿ ಏಕ್‍ಜ಼ಣೊ ಭುಕ್ಯೊರ‍್ಹೇಸ್, ಬಿಜೇಕ್ ಜ಼ಣೊ ಪೀರಾಖಸ್.
1CO 11:22 ಖಾವಾನಬಿ, ಪೀಯಾನಾಬಿ ತುಮೂನ ಘರ್ ಕೊಯ್ನಿಕಿ ಶು? ನತರ್ ದೇವ್ನಿ ಸಬೆನ ಝೀಟ್ಕಾರೀನ್ ಶಾತ್ಬಿಕೊಂತೆ ಇವ್ಣುನ ಖ್ಹರಮ್‌ ಕಾಡೋಸ್‍ಕಿ ಶು? ಮೇ ತುಮೂನ ಶಾತ್ ಬೋಲು? ಮೇ ತುಮೂನ ಖ್ಹರಾಯೆಜಾ಼ಯ್? ಆ ಬಾರೇಮ ಖ್ಹಚಂಬಿ ಕೊಯ್ನಿ.
1CO 11:23 ಮೇ ಪ್ರಭುಥಿ ಲೀಲಿದೋತೆ ಯೊ ತುಮೂನ ದಿನಾಖ್ಯೊ; ಪ್ರಭು ಹುಯಿರೋತೆ ಯೇಸು ಯೊ ಧರೈ ದೆವೈಗಯೋತೆ ರಾತ್ಮ ರೋಟಾನ ಪಾಡಿನ್,
1CO 11:24 ಧನ್ಯವಾದ್ ಕರೀನ್, ತೋಡಿನ್ “ಆ ತುಮಾರಖ್ಹಾಜೆ ಹುಯಿರ‍್ಹುತೆ ಮಾರು ಶರೀರ್, ಮನ ಯಾದ್‌ಕರಾನಖ್ಹಾಜೆ ಅನ ಕರೊ” ಕರಿ ಬೋಲ್ಯೊ.
1CO 11:25 ಯೋಸ್ ಪರಕ್ಮ ಖಾಣು ಹುವಾದಿನ್ ಇನೆ ಕಟೋರಿನ ಪಾಡೀನ್ ಬೋಲ್ತೊಹುಯಿನ್, “ಆ ಕಟೋರಿ ಮಾರ ಲ್ಹೋಯಿಥಿ ಮುದ್ರೊ ನಖೈರ‍್ಹೂತೆ ನವು ಒಪ್ಪಂದ ಹುಯಿರುಸ್. ತುಮೆ ಅನಾಮ ಪೀಯಾನಿ ಖ್ಹಾರಿ ವಖ್ಹ್‌ತೆ ಮನ ಯಾದ್ ಕರಿಲ್ಯಾವಾನಖ್ಹಾಜೆ ಪೀಯೊ” ಕರಿ ಬೋಲ್ಯೊ.
1CO 11:26 ಶನಕತೊ ಕದೆಕದೇಬಿ ತುಮೆ ಆ ರೋಟಾನ ಖಾಸ್ಕಿ,ಅಜು಼ ಆ ಕಟೋರಿಮ ಪೀಯಾಸ್ಕಿ ತದೆ ಯೊ ಆವಾನಿ ವಖ್ಹ್‌ತೆ ಪ್ರಭುನಿ ಮರಣ್ಣ ಊಚು಼ ಪಾಡ್ತು ರ‍್ಹಿಶು.
1CO 11:27 ಅಮ್‍ಛಾ಼ತೆ ಇನಖ್ಹಾಜೆ ಕೋಣ್‌ತೋಬಿ ನಾಲಾಯಕ್‌ ಹುಯಿನ್ ಪ್ರಭುನ ರೋಟಾನ ಖಾದುತೊ ಕೊಯಿಂತೊ, ಇನ ಕಟೋರಿಮ ಪೀದುತೊ ಯೋ ಪ್ರಭುನ ಶರೀರ್‌ನಾಬಿ ಲ್ಹೋಯಿನಾಬಿ ಧೋಕ ಕರಾವಾಳೊ ಹುಯಿರ‍್ಹಿಶೆ.
1CO 11:28 ಕತೋಬಿ ಹರೇಕ್ ಅದ್ಮಿ ಇನು ಯೊ ತರೀಪ್‌ಶ ಕರಿಲ್ಯವಾಳೊ ಹುಯಿನ್ ಯೊ ರೋಟಾಮ ಪಾಡಿಲೀನ್ ಖಾವಾದೆ, ಯೋ ಕಟೋರಿಮ ಪೀಯಾದೆ.
1CO 11:29 ಶನಕತೊ ಪ್ರಭುನು ಶರೀರ್‌ಕರಿ ಪರ್ಖಿಲೇಯಿಕೊಂತೆ ಖೈನ್ ಪೀಯವಾಳು ಇಮ್‌ ಖೈನ್ ಪೀಯಾಥಿ ಇವ್ಣಪರ್ ನ್ಯಾವ್‍ನಿ ತೀರ್ಪ್‌ನ ಲೀಲಾವಳು ಹುಯಿರ‍್ಹುಸ್.
1CO 11:30 ಅನೇಥಿ ತುಮಾರಮ ಘಣು ಅದ್ಮಿ ಕಮ್‌ಜೋ಼ರಿಬಿ, ರೋಗ್‍ವಾಳುಬಿ ಹುಯಿರ‍್ಹಿಶೆ. ಅಜು಼ ಕೈಏಕ್ ಜ಼ಣು ಮರಿರ‍್ಹೂಸ್.
1CO 11:31 ಅಪ್ಣುನ ಅಪ್ಣೆಸ್ ಪರ್ಖಿಲಿದಾತೊ ನ್ಯಾವ್‌ನಿ ಝ಼ಗೋಮ ಭೀರಿಶುಕೊಯ್ನಿ.
1CO 11:32 ಕತೋಬಿ ಪ್ರಭು ಅಪ್ಣುನ ನ್ಯಾವ್‌ನಿ ಝ಼ಗೋಮ ಭೀರಾಖನಿ ವಖ್ಹ್‌ತೆ, ಅಪ್ಣೆ ಜಗತ್‍ವಾಳಾನಿ ಜೋ಼ಡ್ಮ ಖ್ಹತಾಪ್ಣಿಮ ಖ್ಹಪಡ್ನು ನಾ ಕರಿ ಯೋ ಅಪ್ಣುನ ನಿಶತ್‌ ದೇಸ್.
1CO 11:33 ಅಮ್ ಛಾ಼ತೆಖ್ಹಾಜೆ ಮಾರ ಭೇನೆ ಭೈಯೇವೊ, ತುಮೆ ಭೋಜನ್ನಖ್ಹಾಜೆ ಮಳಿನ್ ಆವಾನಿ ವಖ್ಹ್‌ತೆ ಏಕ್‌ಥಿ ಏಕ್‍ಜ಼ಣಾನ ಖ್ಹಾಜೆ ಜ಼ಪಿರ‍್ಹವೊ.
1CO 11:34 ಕೋಣ್‍ತೋಬಿ ಭುಕ್ಯೊರ‍್ಹಿಯೋತೊ ಯೊ ಘರ್‌ಮಾಸ್ ಖಾವಾದೆ. ಅನೇಥಿ ತುಮೆ ದೇವ್ನಿ ತೀರ್ಪ್‌ಮ ಮಳಿನ್ ಆವ್ಣು ನಾ. ಬಿಜು಼ ಉಬ್ರಿಹುಯಿ ವಾತೆಖ್ಹಾರಿ ಮೇ ಐನ್‌ ಖ್ಹಮ್‍ಜಾ಼ಡಿಶ್.
1CO 12:1 ಭೇನೆ ಭೈಯೇವೊ, ಹಮ್ಕೆ ಪವಿತ್ರಾತ್ಮಥಿ ಮಳಾತೆ ವರಾನಿಬಾರೇಮ ತುಮೆ ಬಿಣ್‍ಖ್ಹೈಲಿ ನಾ ಹುಯಿರ‍್ಹೇಣು. ಕರಿ ಆಖ್ಹ್ ಕರುಸ್.
1CO 12:2 ತುಮೆ ಅಲ್ಹಾವ್‌ ಅದ್ಮಿ ರ‍್ಹವಾನಿ ವಖ್ಹ್‌ತೆ ವಾಟ್‌ ಭೈಕಿನ್ ಕಿಮ್ ಮುಕ್ಕ ಮೂರತ್‍ಭಣಿ ಫರಿರಾಥ ಕರಿ ತುಮೆ ಮಾಲುಮ್ ಕರಿರಾಖ್ಯಸ್.
1CO 12:3 ಅಮ್‍ಛಾ಼ತೆ ಇನಖ್ಹಾಜೆ ಮೇ ತುಮೂನ ಖ್ಹಮ್‌ಜಾ಼ಡ್ಯುತೆ ಯೊ ಖ್ಹಮ್‍ಜೊ಼. ದೇವ್ನ ಆತ್ಮಥಿ ವಾತ್ ಬೋಲವಾಳೊ ಕೋಣ್‌ಬಿ, “ಯೇಸು ಶಾಪವಾಳೊ” ಕರಿ ಬೋಲಕೊಯ್ನಿ. ಪವಿತ್ರಾತ್ಮನಿ ಖ್ಹೂಜ಼್‌ಥೀಸ್ ಪಣ್ಕಿ ಕೋಣ್‌ಬಿ “ಯೇಸುಸ್ ಪ್ರಭು” ಕರಿ ಬೋಲಾನ ಹೋಯಿಕೊಯ್ನಿ.
1CO 12:4 ಅಖ್ಖಆತ್ಮಾನು ವರಾಮ ಅಲಕ್ ಅಲಕ್ ತರ ಛಾ಼. ಕತೋಬಿ ಇನ ದ್ಯವಾಳೊ ಪವಿತ್ರಾತ್ಮ ಎಕ್ಕಸ್‍ಜ಼ಣೊ.
1CO 12:5 ಅಖ್ಖಿ ಸೇವೆಮ ಕೈಯೇಕ್ ತರ ಛಾ಼. ಕತೋಬಿ ಎಕ್ಕಸ್ ಜ಼ಣೊ ಪ್ರಭುನ ಸೇವೆ ಕರಿಯೇಸ್.
1CO 12:6 ಅಖ್ಖಕಾಮ್ನಿ ಪರಕ್ಮ ಅಲಕ್ ಅಲಕ್ ತರ ಛಾ಼ ಖ್ಹಾರಾಸ್‌ಮ ಅಖ್ಖಾಸ್ ಕಾಮ್ನ ಕರಾನ ಶಕತ್ ದ್ಯವಾಳೊ ದೇವ್ ಎಕ್ಕಸ್‍ಜ಼ಣೊ.
1CO 12:7 ಹರೇಕ್ ಜ಼ಣಾನ ನಫ್ಫಾನಖ್ಹಾಜೆ ಪವಿತ್ರಾತ್ಮನು ದರ್ಶನ ಹರೇಕ್ ಜ಼ಣಾನ ದೆವೈರ‍್ಹೂಸ್.
1CO 12:8 ಕಿಮ್‌ಕತೊ,ಪವಿತ್ರಾತ್ಮ ಏಕ್‍ಜ಼ಣಾನ ಗ್ಯಾನ್‌ಥಿ ಭರೈರ‍್ಹಾವನಿ ಸಂದೇಶ್‌ಬಿ ಬಿಜೇಕ್ ಜ಼ಣಾನ ಅಕ್ಕಲ್‍ಥಿ ಭರೈರ‍್ಹಾವನಿ ಸಂದೇಶ್‌ಬಿ ದೇಸ್.
1CO 12:9 ಏಕ್‍ಜ಼ಣಾನ ವಿಶ್ವಾಸ್‍ಥಿ ಯೋಸ್ ಆತ್ಮಾನು ವರ ಹುಯಿರ‍್ಹುಸ್, ಬಿಜೇಕ್‍ಜ಼ಣಾನ ರೋಗ್‌ ಅಛ್ಛು಼ ಕರಾನು ಯೋಸ್ ಆತ್ಮಾಥಿ ದೆವೈರ‍್ಹೂಸ್.
1CO 12:10 ಏಕ್‍ಜ಼ಣಾನ ಅದ್ಭುತ್ ಕಾಮ್‌ಕರಾನಿ ಶಕತ್‍ನಾಬಿ ಅಜೇಕ್ ಜ಼ಣಾನ ಪ್ರವಾದನೆನಾಬಿ, ಏಕ್‍ಜ಼ಣಾನ ಆತ್ಮಾನ ಸೋಚ್‌ಸಮಜ್‌ಕರಾನಿ ವರಾಬಿ, ಬಿಜೇಕ್‍ಜ಼ಣಾನ ಹರೇಕ್ ತರೀಖಾನಿ ಬೋಲಿ ಬೋಲಾನಿ ವರಾಬಿ, ಏಕ್‌ಜ಼ಣಾನ ಬೋಲಿನಿ ಮತಲಬ್‌ನ ಛೋ಼ಡಿನ್ ಬೋಲಾನಿ ವರಾಬಿ ದೇವಾವ್‌ಶೆ.
1CO 12:11 ಕತೋಬಿ ಆ ಖ್ಹಾರೀಸ್‍ ವರಾನ ಎಕ್ಕಸ್‍ಜ಼ಣೊ ಆತ್ಮ ಇನಿಖ್ಹೂಜ಼್‍ನಿಘೊಣಿ ಅಲಕ್ ಅಲಕ್ ಜ಼ಣಾನ ಭಾಗ್‌ ಪಾಡಿದೇಸ್.
1CO 12:12 ಕ್ರಿಸ್ತ ಕೈಯೇಕ್ ಭಾಗ್‌ ಬಣ್ಯೊಹುಯೊ ಎಕ್ಕಸ್ ಶರೀರ್ ಹುಯಿರ‍್ಹೋಸ್. ಇಮ್ಮಸ್ ಶರೀರ್‌ನು ಬಾಗ್‍ಅಖ್ಖು ಕೈಏಕ್ ರ‍್ಹೀನ್ ಎಕ್ಕಸ್ ಶರೀರ್ ಹುಯಿರ‍್ಹುಸ್ತೆ ಇಮ್ಮಸ್ ಕ್ರಿಸ್ತಬಿ ಹುಯಿರೋಸ್.
1CO 12:13 ಅಮ್ಮಸ್ ಯೆಹೂದ್ಯರ್ ರ‍್ಹವೊ,ಯೆಹೂದ್ಯಕಾಹೇತೆ ರ‍್ಹವೊ ಗುಲಾಮ್ ರ‍್ಹವೊ ಛುಟ್ಕಾರ್ ರ‍್ಹವಾಳು ರ‍್ಹವೊ ಅಪ್ಣೆಖ್ಹಾರು ಎಕ್ಕಸ್‍ಜ಼ಣೊ ಆತ್ಮಥಿ ಎಕ್ಕಸ್ ಶರೀರ್‌ನ ಮಹಿ ಬ್ಯಾಪ್ತಿಸ್ಮ ಲೀಲಿದ. ಅಪ್ಣಖ್ಹಾರಾನ ಎಕ್ಕಸ್‍ಜ಼ಣೊ ಪವಿತ್ರಾತ್ಮನ ಪಿಯಾನ ದೆವಾಯು.
1CO 12:14 ಏಕ್‍ ಶರೀರ್ ಎಕ್ಕಸ್ ಭಾಗ್‌ವಾಳು ಕಾಹೆ, ಕೈಏಕ್ ಭಾಗ್‌ವಾಳು ಹುಯಿರ‍್ಹೇಸ್.
1CO 12:15 ಗೋಡೊ” ಮೇ ಹಾತ್‍ಕೊಂತೆ ಟೇಕೆ ಶರೀರ್‌ನ ಮಳ್ಯುಕೊಯ್ನಿಕರಿ ಬೋಲೆಜಾ಼ಯ್, ಕತೋಬಿ ಅಮ್ ಖಲಿ ಬೋಲ್ಯುತೆ ಗೋಡೊ ಶರೀರ್‌ಥಿ ಅಲಕ್ ಹುಯಿಗುಕೊಯ್ನಿ.
1CO 12:16 ಅಜು಼ ಕಾನ್‌, “ಮೇ ಡೋಳೊ ಕಾಹೆ ಇನಖ್ಹಾಜೆ ಶರೀರ್‌ಮ ಮಳ್ಯೊಕೊಯ್ನಿ” ಕರಿ ಬೋಲ್ಯುತೋಬಿ ಯೋ ಶರೀರ್‌ಮ ಮಳ್‍ಶೆಕೊಂತೆ ರ‍್ಹಿಶೆಕಿಶು?
1CO 12:17 ಶರೀರ್ ಅಖ್ಖು ಡೋಳೊಹುಯಿಗುತೊ ಅಪ್ಣೆ ಖ್ಹಮ್‍ಜಾ಼ನು ಕಿಮ್? ನತರ್ ಯೋ ಅಖ್ಖು ಕಾನ್‌ ಹುಯಿಗುತೊ ಖ್ಹುಂಗಾನು ಕಿಮ್?
1CO 12:18 ಇನಖ್ಹಾಜೆ ಶರೀರ್‌ನ ಅಖ್ಖಭಾಗ್‍ನ ದೇವ್ ಯೋ ಇನು ಮರ್ಜಿನಿ ಪರಕ್ಮ ಹರೇಕ್‍ಜಿನು ಬರೋಬರ್‌ಥಿ ಬಣೈರಾಖ್ಯೊಸ್.
1CO 12:19 ಯೋ ಖ್ಹಾರೂಸ್ ಎಕ್ಕಸ್ ಭಾಗ್‌ ಹುಯಿರ‍್ಹುತೊ ಶರೀರ್ ಕಿಜ್ಜಾ಼ ರ‍್ಹಿಶೆ?
1CO 12:20 ಕತೋಬಿ ಹಮ್ಕೆ ಭಾಗ್‌ ಕೈಏಕ್ ರ‍್ಹಯುತೋಬಿ ಶರೀರ್ ಖಲಿ ಎಕ್ಕಸ್.
1CO 12:21 ಡೋಳೊ ಹಾತ್ನ, “ತೂ ಮನ ಜ಼ರೂರತ್ ಕೊಯ್ನಿ” ಕರಿ ರ‍್ಹವೊ ಬೋಲಾನ ಹೋಯಿಕೊಯ್ನಿ. ಮುಡ್‌ಕ್ಯು ಪಂಜಾ಼ನ ಜ಼ರೂರತ್ ಕೊಯ್ನಿಕರಿ ಬೋಲಾನ ಕೊಹೊಯ್ನಿ.
1CO 12:22 ಕತೋಬಿ ಶರೀರ್‌ಮ ಕಮ್‍ಜೋ಼ರಿನು ಕರಿ ದೆಖಾವತೆ ಭಾಗ್‌ ಅಖ್ಖು ಕೆತ್ರೂಕಿ ಜಾ಼ಖ್ಹತ್ ಜ಼ರೂರತ್ ಛಾ಼.
1CO 12:23 ಕಮ್ ಮರ್ಯಾದಿ ಕರಾವಾಳು ಕರಿ ಸೋಚಿಯೇಸ್‍ತೆ ಖ್ಹಾರನ ವಿಶೇಷ್ ಮರ್ಯಾದಿಥಿ ದೇಖೆಸ್. ಖೆವ ಶರೀರ್‌ನ ಭಾಗ್ನ ಅಖ್ಖಾನ ಕಡ್‌ತೇಲ್‌ಕಿ ಯೊ ಭಾಗ್ನ ದೇವ್ ವಿಶೇಷ್ ಮರ್ಯಾದಿ ದೇಸ್.
1CO 12:24 ಘಣು ಶನ್‌ಗಾರ್ ರ‍್ಹವಾನ ಶರೀರ್‌ನ ಭಾಗ್ನ ಅಮ್ನು ವಿಶೇಷ್ ಖ್ಹದರ್‌ಕರಾನಿ ಜ಼ರೂರತ್ ಕೊಯ್ನಿ. ಕತೋಬಿ ಖಿವು ಭಾಗ್‌ ಕೀಳ್‌ ಥೂಕಿ ವಿಶೇಷ್ ಮರ್ಯಾದಿ ದೇವ್ನೆ ದಿದೊ.
1CO 12:25 ಶರೀರ್‌ಮ ಅಲಕ್ ಕರಿ ಕಚ಼್‌ಕೊಂತೆ ಅಖ್ಖು ಏಕ್‌ಥಿ ಏಕ್‌ ಮಳಿನ್ ಜಾ಼ವಾನಿತರ ಕರಿರಾಖ್ಯೊಸ್.
1CO 12:26 ಶರೀರ್‌ನು ಏಕ್‌ ಭಾಗ್ನ ಅಜ಼ಹುಯಿತೊ ಅಖ್ಖಾಸ್ ಭಾಗ್ನಾಬಿ ಅಜ಼ ಹುವಾಸ್; ಏಕ್‌ ಭಾಗ್ನ ಖ್ಹರಾವ್ಣಿ ಮಳ್ಯುತೊ ಅಖ್ಖಾಸ್ ಭಾಗ್ನಾಬಿ ಖುಷಿ ಹುವಾಸ್.
1CO 12:27 ಹಮ್ಕೆ ತುಮೆ ಕ್ರಿಸ್ತನು ಶರೀರ್ ಹುಯಿರಾಸ್. ತುಮಾರಮ ಹರೇಕ್ ಜ಼ಣುಬಿ ಯೋ ಶರೀರ್‌ನು ಭಾಗ್‍ಅಖ್ಖು ಹುಯಿರಾಸ್.
1CO 12:28 ದೇವ್ ಇನಿ ಸಬೆಮ ಪಹಿಲೆ ಅಪೊಸ್ತಲರ‍್ನ, ಬೇನು ಪ್ರವಾದಿಖ್ಹಾರನ, ತೀನ್ನು ಸಂದೇಶ್ ಶಿಕಾಡವಳನ ಮಿಛಾ಼ಣ್ಯೋಸ್. ಪಾಛ಼ಳ್‍ಥು ಅದ್ಭುತ್‌ ಕಾಮ್ನ ಕರಾವಾಳನ, ರೋಗ್ ಅಖ್ಖು ಅಛ್ಛು಼ ಕರವಾಳನ, ಅಲಕ್‌ನ ಮದತ್ ಕರವಾಳನ,ವಾಟ್‌ವತಾಳವಾಳನ, ಥರಥರಾನಿ ಬೋಲಿ ಬೋಲಾನಿ ವರಾನ ದೀರಾಖ್ಯೊಸ್.
1CO 12:29 ಅಖ್ಖೂಸ್‌ಜ಼ಣು ಅಪೊಸ್ತಲರ್‌ಕಿ ಶು? ಅಖ್ಖೂಸ್ ಪ್ರವಾದಿಕಿ ಶು? ಅಖ್ಖೂಸ್ ಅದ್ಭುತ್‌ಕಾಮ್‌ ಕರಾವಾಳುಕಿ ಶು?
1CO 12:30 ರೋಗ್ನ ಅಛ಼್ಛುಕರಾನಿ ವರ ಅಖ್ಖಾನಾಬಿ ಛಾ಼ಕಿಶು? ಥರಥರಾನಿ ಬೋಲಿ ಬೋಲವಾಳುಕಿ ಶು? ನತರ್ ವಾತೆನಿ ಮತಲಬ್‍ನ ಛೋ಼ಡಿ ಬೋಲವಾಳುಕಿ ಶು?
1CO 12:31 ಕತೋಬಿ ತುಮೆ ಮಹಾನ್ ವರಾನ ಆಖ್ಹ್‌ಕರೊ. ಮೇ ತುಮೂನ ಬಿಜೂ಼ಬಿ ಅಖ್ಖಾಸ್ ಊಚೊ಼ ಮಾರಗ್‌ನ ವತಾಳುಸ್‌.
1CO 13:1 ಮೇ ಅದ್ಮಿವೋನಿ ವಾತೆಖ್ಹಾರಿಬಿ ದೇವ್ನ ದೂತರ್‌ನಿ ವಾತೆ ಬೋಲವಾಳೊ ರ‍್ಹಿಯೊತೋಬಿ ಮನ ಪ್ಯಾರ್ ನಾರ‍್ಹಯುತೊ ವಾಜ಼್ ದ್ಯವಾಳೊ ಘಾಟೊಬಿ, ಘಣಘಣ ಕರಾನು ಕಖ್ಹಾಳಿಬಿ ಹುಯಿರುಸ್.
1CO 13:2 ಮನ ಪ್ರವಾದನೆ ವರ ರ‍್ಹಯುತೋಬಿ, ಮೇ ಖ್ಹಾರುಸ್ ಗಪ್ಲಥ್ಥಿ ರ‍್ಹೆಯಿತೇಬಿ ಅಖ್ಖಿಥರಾನು ಪಢಂತ್‍ನ ಮಾಲುಮ್ ಕರಿರಾಖ್ಯೊತೋಬಿ, ಪಹಾಡ್ನ ಖ್ಹರ್ಕಾವಯೆತ್ರೆ ವಿಶ್ವಾಸ್ ರ‍್ಹೀತೊಬಿ ಮನ ಪ್ಯಾರ್ ನಾರ‍್ಹಯುತೊ, ಶಾತ್ಬಿ ನಾ ರ‍್ಹವಾಳೊ ಹುಯಿರೋಸ್.
1CO 13:3 ಮೇ ಮಾರಿ ಖ್ಹಾರಿಶೊತ್ತ್‌ನ ಧರಮ್ ದೀನಾಖ್ಯೊತೋಬಿ, ಮಾರ ಶರೀರ್‌ನ ಬಾಳಿನಾಖನ ದೀನಾಖ್ಯೊತೋಬಿ, ಪ್ಯಾರ್ ಮನ ನಾರ‍್ಹಯುತೊ ಮನ ಶನೊ ಫಾಯಿದೊಬಿ ಕೊಯ್ನಿ.
1CO 13:4 ಪ್ಯಾರ್ ಘಣು ಖ್ಹಮಾಳಿಲ್ಯವಾಳು, ಪ್ಯಾರ್ ಗೋರ್‌ಕರಾವಾಳುಬಿ, ಪ್ಯಾರ್ ಪೇಟ್ನೊ ಬಳಾಪೊ ಕೊಕರಾನಿ, ಪ್ಯಾರ್ ಖ್ಹರೈಲೇಯಿಕೊಯ್ನಿ.ಅಜು಼ ಯೊ ಹಂಕಾರ್ ಕರಾಕೊಯ್ನಿ.
1CO 13:5 ಯೊ ಬಿಜೇಕ್‌ಜ಼ಣಾನಿ ಖ್ಹರಮ್‌ ಕಾಡಕೊಯ್ನಿ, ಇನ ಅಛ್ಛಾ಼ನಾಸ್ ಢೂಂಡಕೊಯ್ನಿ, ಒಗ್ಗೀಮ ಇರಾದೊಕರಾಕೊಯ್ನಿ, ಗಲತ್‌ನ ಗಣ್ತಿಮ ಘಾಲಕೊಯ್ನಿ.
1CO 13:6 ಖರಾಬ್ಮ ಖುಷಿಕರಾಕೊಯ್ನಿ, ಖ್ಹಾಚ಼ನಿಜೋಡ್ಮ ಖ್ಹುಶಿಕರಸ್.
1CO 13:7 ಅಖ್ಖಾನಸ್ ಲಪಾಡಸ್, ಅಖ್ಖಾಸ್ನ ವಿಶ್ವಾಸ್‍ಕರಸ್, ಅಖ್ಖಾಸ್ನ ಭರೋಖ್ಹೊ ಕರಸ್, ಅಖ್ಖಾಸ್ನ ಖ್ಹಮಾಳಿಲೇಸ್.
1CO 13:8 ಪ್ಯಾರ್ ಕದೇಬಿ ಮಟಿಜಾ಼ಯಿಕೊಯ್ನಿ, ಪ್ರವಾದನೆ ಖ್ಹಾರುತೋಬಿ ಅಖ್ಖು ಮಟಿಜಾ಼ಶೆ, ಅಲ್ಹಾವ್ ಬೋಲಿ ಅಖ್ಖು ಭೀರಿಜಾಶೆ, ಪಢಂತ್‍ತೊ ಮಟಿಜಾ಼ಶೆ.
1CO 13:9 ಅಪ್ಣೆ ಆಧು ಖ್ಹಮ್‌ಜಿನ್‌ ಆಧು ಪ್ರವಾದ್‌ನೆ ಕರೇಸ್.
1CO 13:10 ಕತೋಬಿ ಪೂರಛಾ಼ತೆ ಆಯುತೊ ಪೂರಹುವಾಕೊಂತೆ ಯೋ ಮಟಿಜಾ಼ಶೆ.
1CO 13:11 ಮೇ ಅಡ್ಡಾಣಿ ರ‍್ಹವಾನಿ ವಖ್ಹ್‌ತೆ, ಅಡ್ಡಾಣಿನಿ ವಾತೆಖ್ಹಾರಿ ಬೋಲ್ಯೊ. ಅಡ್ಡಾಣಿನಿತರ ಖ್ಹಯಾಲ್‍ಕರ‍್ಯೊ. ಅಡ್ಡಾಣಿನಿತರಸ್ ಸೋಚ್ಯೊ. ಶಾಣೊ ಹುವಾದಿನ್ ಅಡ್ಡಾಣಿನುಖ್ಹಾರು ಮ್ಹೇಲಿದಿದೊ.
1CO 13:12 ಹಮ್ಕೆ ಅಪ್ಣೆ ಐನಾಮ ದೆಖಾತೆ ತಿಮ್ಮಸ್ ಭುಂಬ್‌ಳ್ಯು ದೇಖೆಸ್. ತದೆ ಆಮಖ್ಹಾಮೆ ದೇಕ್‌ಶು. ಹಮ್ಕೆ ಮನ ಖಲಿ ಜ಼ರ ಮಾಲುಮ್‌ ಛಾ಼. ತದೆ ಮೆ ಪೂರ ಖ್ಹಮ್‍ಜಾ಼ಡ್‍ಶೇತೆ ತಿಮ್ ಪೂರ ಖ್ಹಮ್‍ಜಿಲೀಶ್.
1CO 13:13 ಅನಖ್ಹಾಜೆ ಹಮ್ಕೆ ವಿಶ್ವಾಸ್, ಟಿವೈರ‍್ಹವಾನು, ಪ್ಯಾರ್ ಆ ತೀನಸ್ ಬಚಿರ‍್ಹೇಸ್. ಆ ಅಖ್ಖಾಮ ಮೋಟು ಪ್ಯಾರಸ್.
1CO 14:1 ಪ್ಯಾರ್‌ನ ಮಾರಗ್‌ಪರ್ ಚಾ಼ಲೊ. ನಾಹುಯಿನ್ ಪವಿತ್ರಾತ್ಮನ ವರಖ್ಹಾರು ಲೀಲ್ಯಾವಾನ ವಿಶೇಷ್‌ಥಿ ಪ್ರವಾದ್‌ನೇನು ವರಾನ ಘಣು ಆಖ್ಹ್ ಕರೊ.
1CO 14:2 ಅಲ್ಹಾವ್‌ಬೋಲಿ ಬೋಲವಾಳೊ, ಅದ್ಮಿನಿ ಜೋ಼ಡ್ಮ ಕಾಹೆ ದೇವ್ನಿಜೋ಼ಡ್ಮ ವಾತೆಬೋಲಸ್. ಶನಕತೊ ಯೋ ಪವಿತ್ರಾತ್ಮಥಿ ಗಪ್ಲತ್‌ನಿ ವಾತೆಖ್ಹಾರಿ ಬೋಲವಾಳೊ ಹುಯಿರ‍್ಹೇಸ್ ಇನಖ್ಹಾಜೆ ಕೋಣ್‌ಬಿ ಮಾಲುಮ್ ಕರಾನ ಕೋಹೊಯ್ನಿ.
1CO 14:3 ಕತೋಬಿ ಪ್ರವಾದ್‌ನೆ ಕರವಾಳೊತೊ ಅದ್ಮಿವೊನಿ ಜೋ಼ಡ್ಮ ವಾತೆ ಬೋಲಸ್. ಇವ್ಣಿ ಭಕ್ತಿ ಜಾ಼ಖ್ಹತ್‍ಕರಾನ, ಭಾಲಿದ್ಯವಾನ, ಸಮಾಧಾನ್ ಕರಾನಖ್ಹಾಜೆಕರಾಸ್.
1CO 14:4 ವಾಣಿ ಬೋಲವಾಳೊ ಇನಿ ಭಕ್ತಿನ ಜಾ಼ಖ್ಹತ್ ಕರಸ್. ಕತೋಬಿ ಪ್ರವಾದ್‌ನೆ ಕರಾವಾಳೊ ಸಬೆನ ಭಕ್ತಿಥಿ ಭಡಾವಸ್.
1CO 14:5 ತುಮೆಖ್ಹಾರುಬಿ ವಾಣಿಖ್ಹಾರು ಬೋಲ್ನುಕರಿ ಮೇ ಹಮ್ಕೆ ಹರಖ್ಹ್ಯೊತೋಬಿ, ಇನೇಥಿ ಜಾ಼ಖ್ಹತ್ ತುಮೆ ಪ್ರವಾದ್‌ನೆ ಕರ್ನುಕರಿ ಹರ್‌ಖ್ಹುಸ್. ವಾಣಿಖ್ಹಾರು ಬೋಲವಾಳು ಸಬೇನಿ ಭಕ್ತಿ ಜಾ಼ಖ್ಹತ್ ಕರಸ್. ಇನೇಥಿಬಿ ಪ್ರವಾದ್‌ನೆ ಕರಾವಾಳೊ ಮೋಟೊ ಹುಯಿರ‍್ಹೋಸ್.
1CO 14:6 ಅಮ್‍ರ‍್ಹವಾಪರ್ ಭೇನೆ ಭೈಯೇವೊ, ಮೇ ತುಮಾರಕನ ಐನ್ ಪಢಂತ್‍ಥಿರ‍್ಹೇವೊ, ಪ್ರವಾದನೆಥಿರ‍್ಹೇವೊ, ವಾಟ್‌ ವತಾಳನುರ‍್ಹೇವೊ ಬೋಲವಾಳ ನಾಹುಯಿರಿನ್ ಅಲ್ಹಾವ್‌ಬೋಲಿಥಿ ಬೋಲವಾಳ ಹುಯಿರ‍್ಹಾತೊ ಮಾರೇಥಿ ತುಮೂನ ಶನು ಫಾಯಿದೊ?
1CO 14:7 ವಾಖ್ಹ್‌ಳಿ ಖ್ಹಾರಂಗೊ ಬಿಜು಼ ಕೆತ್ರುಕ್ಕಿ ಜಾನ್‌ ಕೊಂತೆ ವಾಜ಼ವಜ಼ಂತ್ರಿನು ಲ್ಹೂರ್‌ಮ ಶನುಪರಕ್‍ಬಿ ನಾ ದೆಖಾಯುತೊ, ವಜಾ಼ಡ್ಯುತೆ ಕೆಹು ಕರಿ ಕಿಮ್ ಮಾಲುಮ್‌ಪಡ್‍ಶೆ?
1CO 14:8 ತುತ್ತೂರಿನ ಬರೋಬರ್‌ಥಿ ಫೂಕ್ಯುನಾತೊ ಕೋಣ್‌ತೋಬಿ ಜಂಗ್‌ನ ತಯಾರ್ ಉಷೆ ಕಿಶು?
1CO 14:9 ಇಮ್ಮಸ್ ತುಮೆ ಬರೋಬರ್‌ನಿ ಬೋಲಿಮ ನಾ ಬೋಲ್ಯಾತೊ,ವಾತೆಬೋಲ್ಯುತೆ ಶಾತ್‌ಕರಿ ಖ್ಹಮ್‍ಜಾ಼ನು ಕಿಮ್? ತುಮಾರಿ ವಾತೆ ವಹಿರಾಮ ಉಡಿಜಾ಼ಶೆ ಎತ್ರೇಸ್:
1CO 14:10 ಜಗತ್ಮ ಕೆತ್ರಿಥರಾನು ಬೋಲಿರ‍್ಹಿತೋಬಿ ಯೋ ಅಖ್ಖಾಮ ಏಕ್‍ತೋಬಿ ಮತ್ಲಬ್‍ಕೊಂತೆ ಕೊ ರ‍್ಹೇಯಿನಿ.
1CO 14:11 ಬೋಲಿನಿ ಮತಲಬ್ ಮನ ಮಾಲುಮ್‌ ನಾ ಪಡ್ಯುತೊ ಯೋ ವಾತ್ ಬೋಲವಾಳಾನ ಮೇ ಪರ್‌ದೇಖ್ಹ್‌ವಾಳನಿತ್ರ ರ‍್ಹೀಶ್ ಯೋ ಮನ ಪರದೇಖ್ಹ್‌ವಾಳನಿತ್ರ ರ‍್ಹಿಶೆ.
1CO 14:12 ಇಮ್ಮಸ್ ತುಮೇಬಿ ಪವಿತ್ರಾತ್ಮನಿ ವರಾನ ಘಣುಆಖ್ಹ್‌ ಕರೋಸ್ತೆ ಇನಖ್ಹಾಜೆ ಸಬೇನಿ ಭಕ್ತಿ ಭಡ್ತುಜಾ಼ವಾನಿತರ ಮದತ್ ಹುವಾನಿ ವರಾನ ಲೀಲ್ಯಾವನಖ್ಹಾಜೆ ಘಣು ಆಖ್ಹ್ ಕರೊ.
1CO 14:13 ಇನಖ್ಹಾಜೆ ಅಲಕ್ ಬೋಲಿ ಬೋಲವಾಳೊ ಇನಿ ಮತಲಬ್‍ನ ಬೋಲಾನ ದೇವ್‌ಕನ ಪ್ರಾರ್ಥನೆ ಕರಾದೆ.
1CO 14:14 ಶನಕತೊ ಮೇ ಅಲಕ್ ಬೋಲಿಮ ಪ್ರಾರ್ಥನೆ ಕರ‍್ಯೋತೊ ಮಾರು ಆತ್ಮ ಪ್ರಾರ್ಥನೆ ಕರ್ಶೆ, ಕತೋಬಿ ಮಾರು ದಿಲ್‌ ಶನು ಫಲ್ ಕೋದಿಶೇನಿ.
1CO 14:15 ಇಮ್‍ಕತೊ ಮೇ ಶಾತ್‌ಕರು? ಮೇ ಆತ್ಮಾಥೀಬಿ ಅಕ್ಕಲ್‍ಥೀಬಿ ಪ್ರಾರ್ಥನೆ ಕರೀಶ್ ಅಜು಼ ಆತ್ಮಾಥೀಬಿ ಗೀದ್‌ ಬೋಲಿಶ್ ಅಕ್ಕಲ್‍ಥೀಬಿ ಗೀದ್‌ ಬೋಲಿಶ್.
1CO 14:16 ತೂ ಖಲಿ ಆತ್ಮಮ ಧನ್ಯವಾದ್ ಕರ‍್ಯೋತೊ ಮಾಲುಮ್ ಕೊಯಿನ್ತೆ ಬೇಠೊರ‍್ಹವಾಳೊ ತಾರಿ ದನ್ಯವಾದ್ನಿ ಸ್ತುತಿನ ಆಮೆನ್ ಕರಿ ಬೋಲ್‌ಶೆ ಕಿಮ್? ತೂ ವಾತ್ ಬೋಲಿಶ್‌ತೆ ಇನ ಮಾಲುಮ್ ಪಡ್‌ಶೆ ಕೊಯ್ನಿನಿ?
1CO 14:17 ತೂ ಅಛ್ಛಿನಿತರ ಧನ್ಯವಾದ್ ಕರೀಶ್ ಖ್ಹಾಚಿಸ್, ಕತೋಬಿ ಬಿಜೇಕ್‍ಜ಼ಣಾನ ಶನು ಫಾಯಿದೊ.
1CO 14:18 ಮೇ ತುಮಾರ ಖ್ಹಾರೇಥಿಸ್ ಜಾ಼ಖ್ಹತ್ ಅಲಕ್ ಬೋಲಿ ಬೋಲುಸ್ ದೇವ್ನ ಧನ್ಯವಾದ್ ಕರುಸ್.
1CO 14:19 ಕತೋಬಿ ಅಖ್ಖಿ ಸಬೆಮ ಮಾಲುಮ್ ಪಢಕೊಯಿನ್ತೆ ಅಲಕ್ ಬೋಲಿಮ ದಖ್ಹ್‌ ಹಜಾ಼ರ್‌ ವಾತೆ ಬೋಲಥೀಬಿ ಬಿಜೇಕ್ ಜ಼ಣಾನ ವಾಟ್‌ ಒತಾಳನು ಪಾಚ಼್‌ವಾತೆ ಬೋಲಾನು ಅಛ್ಛು಼.
1CO 14:20 ಭೇನೆ ಭೈಯೇವೊ ಲಡ್ಕವ್ನಿತರ ಸೋಚಾನು ಮ್ಹೇಲಿದೆವೊ. ಖರಾಬ್‌ನಿ ಬಾರೇಮ ಅಡ್ಡಾಣಿನಿತರ ರ‍್ಹಿಯತೋಬಿ, ತುಮಾರಿ ಖ್ಹೂಜ಼್‌ಮ ಸಮಜ್‌ಧಾರ್‌ ಹುಯಿರ‍್ಹೇವೊ.
1CO 14:21 “ಅಲಕ್ ಬೋಲಿವಾಳಥೀಬಿ, ಅಲಕ್‍ ದೇಖ್ಹ್‌ವಾಳಾನ ಮ್ಹೋಡಾನಿ ಬೋಲಿಮ ಮೇ ಆ ಅದ್ಮಿಯೇವ್‌ನಿ ಜೋ಼ಡ್ಮ ವಾತೆ ಬೋಲುಸ್, ಕತೋಬಿ ಇವ್ಣೆ ಮನ ಕಾನ್‍ದೇಯಿಕೊಯ್ನಿ ಕರಿ ಪ್ರಭು ಬೋಲಸ್” ಕರಿ ಧರ್ಮಶಾಸ್ತ್ರಮ ಲೀಖೈರುಸ್.
1CO 14:22 ಇನಖ್ಹಾಜೆ ಅಲಕ್‌ಬೋಲಿ ಬೋಲಾನು ವಿಶ್ವಾಸ್ ಕರವಾಳನ ಖಲಿ ಹುಯಿರ‍್ಹುಸ್, ವಿಶ್ವಾಸ್‌ಕೊಂತೆ ಇವ್ಣುನ ವತಾಳನಿ ಖ್ಹಣೇದ್ ಹುಯಿರುಸ್. ಕತೋಬಿ ಪ್ರವಾದನೆ ಭರೋಖ್ಹೊ ಕರವಾಳನಾಸ್,
1CO 14:23 ಇನಖ್ಹಾಜೆ ಸಬೆ ಅಖ್ಖುಸ್ ಮಳಿ ಆವಾದಿನ್ ಖ್ಹಾರೂಸ್ ಅಲಕ್ ಬೋಲಿ ಬೋಲ್ಯುತೊ, ಮಾಲುಮ್ ನಾರ‍್ಹವಾಳು ನತರ್ ವಿಶ್ವಾಸ್‌ಕೊಂತೆ ರ‍್ಹವಾಳು ಮಹಿ ಐನ್ ತುಮೆ ದೀವಾನು ಲಾಗಿಗುಕರಿ ಬೋಲ್‌ಶೆ ಕೊಯ್ನಿಕಿ ಶು?
1CO 14:24 ಕತೋಬಿ ತುಮೆಖ್ಹಾರು ಪ್ರವಾದ್‌ನೆ ಬೋಲಾನಿ ವಖ್ಹ್‌ತೆ ವಿಶ್ವಾಸ್ ನಾರ‍್ಹವಾಳು ರ‍್ಹವೊ, ಮಾಲುಮ್‌ ನಾರ‍್ಹವಾಳು ರ‍್ಹವೊ, ಮಹಿ ಆಯಿನ್ ಖ್ಹಮ್‌ಜ್ಯುತೊ ಮೇ ಪಾಪಿಕರಿ ದಿಲ್ಮ ಮಾಲುಮ್ ಕರಿಲೇಸ್. ಖ್ಹಮ್‍ಜ್ಯಾತೆ ಪ್ರವಾದ್‌ನೆಥೀಸ್‍ ಇನ ತೀರ್ಪ್ ಹುವಾಸ್.
1CO 14:25 ಯೋ ಅದ್ಮಿನಿ ದಿಲ್‌ಮಾನಿ ಗಪ್ಲತ್‌ನಿ ವಾತೆಖ್ಹಾರಿ ಭಾರ್‌ ಆವಸ್. ಯೋ ಅಡ್‍ಪಡೀನ್ ದೇವ್ನ ಆರಾದನೆ ಕರೀನ್ “ದೇವ್ ಖ್ಹಾಚಮಾಸ್ ತುಮಾರ ಇಚ಼್‌ಮ ಛಾ಼.” ಕರಿ ಬೋಲಸ್.
1CO 14:26 ಇನಖ್ಹಾಜೇಥಿ ಭೈಯೇ ಭೇನೆವೊ ಅಪ್ಣೆ ಶಾತ್‌ ಬೋಲೆಜಾ಼ಯ್‍? ತುಮೆ ಸಬೆಮಳಾದೀನ್, ಹರೇಕ್‌ಜ಼ಣಾನ ಕೀರ್ತನೆ ರ‍್ಹವೊ, ಉಪದೇಶ್ ಕರಾನುರ‍್ಹೇವೊ ದೇವ್‍ಥಿ ನವು ಖ್ಹಾಚ಼ನ ಖ್ಹಮ್‍ಜಾ಼ಡಾನ ರ‍್ಹವೊ, ಅಲಕ್ ಬೋಲಿಮ ಬೋಲಾನು ರ‍್ಹವೊ, ಇನಿ ಮತಲಬ್‍ನ ಬೋಲಾನು ರ‍್ಹವೊ, ಆ ಖ್ಹಾರೂಸ್ ಸಬೆನ ಭಾಂದಾನು ರ‍್ಹವೊ ಆತ್ಮಮ ಭಡಾವಾನಖ್ಹಾಜೆ ಹುವಾದೆ.
1CO 14:27 ಕೋಣ್‌ತೋಬಿ ಅಲಕ್ ಬೋಲಿ ಬೋಲವಾಳು ಉಷೇತೊ ಬೇಜ಼ಣು ನತರ್ ಜಾ಼ಖ್ಹತ್‍ಕತೊ ತೀನ್‍ಜ಼ಣು ಏಕೇಕ್‍ಜ಼ಣು ವಾತೆಬೋಲ್ನು. ನತರ್ ಬಿಜೇಕ್‍ಜ಼ಣು ಕೋಣ್‌ತೋಬಿ ಮತಲಬ್‍ನ ಬೋಲಿ ವತಾಳ್‍ನು.
1CO 14:28 ಮತಲಬ್‍ನ ಬೋಲವಾಳು ನಾಉಷೇತೊ ಅಲಕ್‍ ಬೋಲಿ ಬೋಲವಾಳು ಸಬೆಮ ಖ್ಹೊಪ್‍ರ‍್ಹವಾದೆ. ಯೋ ಇನುಯೋಸ್‍ಬಿ, ದೇವ್‍ನಾಬಿ ವಾತ್‍ಬೋಲಿಲ್ಯವಾದೆ.
1CO 14:29 ಪ್ರವಾದಿಖ್ಹಾರು, ಭೇಜ಼ಣು ರ‍್ಹವೊ, ತೀನ್‍ಜ಼ಣುರ‍್ಹೇವೊ ವಾತ್ ಬೋಲಾದೆ, ಬಿಜು಼ಜ಼ಣು ಪರ್ಖಿನ್ ಖ್ಹಮ್‌ಜಾ಼ದೆ.
1CO 14:30 ಬೆಠೂತೆ ಬಿಜೇಕ್‍ಜ಼ಣಾನ ದೇವ್‍ಥಿ ಶನುತೋಬಿ ನವು ಖ್ಹಾಚು಼ಮಳ್ಯುತೊ ಪಹಿಲೆನೊ ಖ್ಹೊಪೊರ‍್ಹವಾದೆ.
1CO 14:31 ಶನಕತೊ ತುಮೆಖ್ಹಾರು ಎಕೇಕ್‍ಜ಼ಣು ಪ್ರವಾದ್‌ನೆ ಕರಾವಾಳು ಹುಯಿರ‍್ಹಾತೊ ಅಖ್ಖುಜ಼ಣು ಶಿಕಿಲಿಶೆ, ಅಖ್ಖೂಬಿ ಹುಮ್ಮಖ್ಹ್‌ ಲೀಲಿಶೆ.
1CO 14:32 ಪ್ರವಾದಿಖ್ಹಾರಾನು ಆತ್ಮಖ್ಹಾರು ಪ್ರವಾದಿಯೇವ್‍ನು ಅಧೀನ್‍ಮ ಛಾ಼.
1CO 14:33 ದೇವ್ ಖ್ಹಾರಿ ಸಬೆನ ಸಮಾಧಾನ್ನೊ ದೇವ್ ಹುಯಿರ‍್ಹೋಸ್ ಪಣ್ಕಿ ಕಲಾವ್ಣಿನ ಕಾರಣ್ ಕಾಹೆ.
1CO 14:34 ದೇವ್ನಿ ಸಭೆಮ ತಯೇಡಾಖ್ಹಾರಿ ಸಬೇನಿ ಟೋಳ್ಮ ಖ್ಹೊಪೊರ‍್ಹವಾದೆ. ಶನಕತೊ ವಾತೆಬೋಲಾನ ಇವ್ಣುನ ಶನಿ ಹುಕುಮ್ ಕೊಯ್ನಿ. ಧರ್ಮಶಾಸ್ತ್ರ ಬೋಲಿರಾಖ್ಯುತೆ ತಿಮ್ ಇವ್ಣೆ ಅಧೀನ್‍ಮ ರ‍್ಹೇಣು.
1CO 14:35 ಇವ್ಣೆ ಶನಿತೋಬಿ ಬಾರೇಮ ಮಾಲುಮ್‍ಕರಿಲ್ಯವಾನು ರ‍್ಹಿಯುತೊ, ಘರ್‌ಮ ಬಾವ್ರಿಯೇವ್‍ನಿ ಪೂಛ಼ವಾದೆ. ತಯೇಡಖ್ಹಾರು ಸಬೆಮ ವಾತೆಬೋಲಾನು ಖ್ಹರಮ್‍ಲಾಗಾನು ಹುಯಿರ‍್ಹೂಸ್.
1CO 14:36 ನತರ್ ದೇವ್ನಿವಚನ್ ತುಮಾರೇಥಿ ನಿಕಳ್‍ಶೇಕಿ? ಕೊಯ್ನಿ, ಯೋ ತುಮಾರಕನ ಖಲಿ ಆಯೂಕಿ?
1CO 14:37 ಕೋಣ್‌ತೋಬಿ ಇನುಯೋ ಪ್ರವಾದಿ ಕರಿರ‍್ಹೆವೊ, ದೇವ್ನಿ ಆತ್ಮಥಿ ಭರೈರ‍್ಹವಾಳೊ ಕರಿರ‍್ಹೆವೊ ಖ್ಹಮ್‍ಜಿಲ್ಯವಾಳೊ ರ‍್ಹಿಯೋತೊ ಮೇ ತುಮೂನ ಲೀಖಿರಾಖ್ಯೊತೆ ವಾತೆಖ್ಹಾರಿ ಪ್ರಭುನಿ ಹುಕುಮ್‍ಕರಿ ಅಛ್ಛಿನಿತರ ಮಾಲುಮ್ ಕರಿಲ್ಯವಾದೆ.
1CO 14:38 ಕೋಣ್‌ತೋಬಿ ಆ ಹೈರುತೆ ಮಾಲುಮ್‌ ಕೊಯ್ನಿಕರಿ ಬೋಲ್ಯೊತೊ ಯೊ ಖ್ಹಣೇದ್ ಕೊಂತೆ ತಿಮ್‌ರ‍್ಹವಾದೆ.
1CO 14:39 ಇನಖ್ಹಾಜೆ ಮಾರ ಭೇನೆ ಭೈಯೇವೊ, ಪ್ರವಾದ್‌ನೆಕರಾನ ಘಣು ಆಖ್ಹ್‌ಕರೊ. ಅಲಕ್ ಬೋಲಿಬೋಲಾನ ಆಡು ನಕೊಹುವೊ.
1CO 14:40 ಕತೋಬಿ ಅಖ್ಖೂಸ್ ಬರೋಬರ್‌ಥಿ ಅಜು಼ ರ‍್ಹವಾನಿ ಪರಕ್ಮ ಬರೋಬರ್‌ಥಿ ರ‍್ಹವಾದೆ.
1CO 15:1 ಭೈಯೇ ಭೇನೆವೊ, ಮೇ ತುಮೂನ ಬೋಲ್ಯೊತೆ ಸುವಾರ್ತೆನ ಹಮ್ಕೆ ತುಮಾರಿ ಯಾದ್ಮ ಲ್ಯವೂಸ್, ಖ್ಹಮ್‌ಜಾ಼ಡುಸ್. ತುಮೆ ಇನ ಮಾನಿಲಿದ. ಇನಾಮ ಭಿಯಾಸ್‌.
1CO 15:2 ಮೇ ಬೋಲ್ಯೊತೆ ಆ ಸುವಾರ್ತೆನ ತುಮೆ ಘಟ್‍ಥಿ ಧರಿಲಿದಾತೊ ತುಮೂನ ರಕ್ಷಣೆ ಉಷೆ. ನತರ್‌ತೊ ತುಮಾರಿ ವಿಶ್ವಾಸ್ ಬೇಕಾರ್ ಹುಯಿಜಾ಼ಶೆ.
1CO 15:3 ಶನಕತೊ ಮೇಬಿ ಜಿನು ಶಿಕ್ಯೋತೆ ಪಹಿಲಿ ವಾತೆಮಾಥು ಮುಖ್ಯ ವಾತ್ನಸ್ ತುಮೂನ ಖ್ಹಮ್‌ಜಾ಼ಡ್ ರಾಖ್ಯೋಸ್. ಯೋ ಶಾತ್‍ಕತೊ ಧರ್ಮಶಾಸ್ತ್ರಮ ಖ್ಹಮ್‍ಜಾ಼ಡಿರಾಖ್ಯೊತೆ ತಿಮ್ ಕ್ರಿಸ್ತ ಅಪ್ಣ ಪಾಪ್ನಖ್ಹಾಜೆ ಮರ‍್ಯೊ.
1CO 15:4 ಯೋ ಗಡೈಗಯೊ, ಪವಿತ್ರ ದಪ್ತರ್‌ನಿ ಪರಕ್ಮಾಸ್ ತೀನ್ನೆ ರೋಜ಼್‌ಮ ಉಠಿನ್ ಆಯೊ.
1CO 15:5 ಪೇತ್ರನಬಿ ಇನಪಾರ್ ಭಾರ ಜ಼ಣ ಅಪೊಸ್ತಲರ್‌ನಾಬಿ ದೇಖಾಯೊ.ಧರ್ಮಶಾಸ್ತ್ರ
1CO 15:6 ಅನಕೇಡೆಥು ಎಕ್ಕಸ್ ವಖ್ಹತ್‌ಮ ಪಾಚ಼್ ಖ್ಹೋಥಿಬಿ ಜಾ಼ಖ್ಹತ್ ಜ಼ಣ ಭೈಯೇ ಭೇನೆವ್‌ನ ದೇಖಾಯೊ. ಇವ್ಣಾಮ ಘಣುಅದ್ಮಿ ಹಮ್ಕೇಬಿ ಬಚಿರ‍್ಹೂಸ್. ಥೋಡುಜ಼ಣು ಮರಿಗಯು.
1CO 15:7 ಇನಕೇಡೆಥು ಯೋ ಯಾಕೋಬ್‌ನಾಬಿ ಇನಪಾರ್ ಬಿಜೇಕ್ ವಖ್ಹತ್ ಖ್ಹಾರಸ್ ಅಪೊಸ್ತಲರ್‌ನಾಬಿ ದೆಖಾಯೊ.
1CO 15:8 ಖ್ಹರ್ತಿಖ್ಹುಗ್ಗಿಮ ದನ್ ಭರಾಯುಕೊಂತೆ ಪೈದಹುವಾಳಾನಿತರ ಛೂ಼ತೆ ಮನಾಬಿ ದೆಖಾಯೊ.
1CO 15:9 ಮೇತೊ ಅಪೊಸ್ತಲರ್‌ಮ ನ್ಹಾನೊ, ಅಪೊಸ್ತಲಕರಿ ಬೋಲೈಲ್ಯವಾನ ಮೇ ಯೋಗ್ಯಕಾಹೆ. ಶನಕತೊ ಮೇ ದೇವ್ನಿ ಸಬೇನಾಸ್ ಖ್ಹತಾಯೊ.
1CO 15:10 ಕತೋಬಿ ಮೇ ಕೆಥ್ರಾನವಾಳೊ ಹುಯಿರ‍್ಹೋಥೊಕಿ ಯೊ ದೇವ್‌ನೊ ವಾರ್‌ಖ್ಹೊಸ್ ಹುಯಿರುಸ್. ಮನಹುಯುತೆ ಇನೊ ವಾರ್‌ಖ್ಹೊ ಬಿಣ್‌ಫಾಯಿದೊ ಹುಯುಕೋಯ್ನಿ. ಮೇ ಇವ್ಣ ಅಖ್ಖೇಥೀಸ್ ಕೆತ್ರೇಕ್ಕಿ ಜಾ಼ಖ್ಹತ್ ವಾಖ್ಯೊಕರ‍್ಯೊ. ಕತೋಬಿ ಮ್ಹಿನತ್ ಕರ‍್ಯೊತೆ ಮೇಸ್ ಕಾಹೆ ದೇವ್ನಿ ವಾರ್‌ಖ್ಹೇಥಿಸ್ ಹುಯು.
1CO 15:11 ಇನಖ್ಹಾಜೆ ಮೇ ರ‍್ಹಿಯೋತೊ ಶಾತ್, ಇವ್ಣೆ ರ‍್ಹಯೊತೊ ಶಾತ್ ಇನಾಸ್ ಹಮೆ ಬೋಲ್‍ಯೇಸ್ತೆ ಸುವಾರ್ತೆನ ಬೋಲಿರಾಖ್ಯಾಸ್. ತುಮೆ ವಿಶ್ವಾಸ್ ಕರಿರಾಖ್ಯಾಸ್.
1CO 15:12 ಕತೋಬಿ ಕ್ರಿಸ್ತ ಮರ‍್ಯಾಹುಯಾಮಾಥು ಉಠೀನ್ ಆಯೋಕರಿ ಬೋಲುಕರಾನಿ ವಖ್ಹತ್‌ಮ ತುಮಾರಮ ಥೋಡುಜ಼ಣು ಮರ‍್ಯಾಹುಯಾನ ಪಾಛು಼ ಜಿವ್ತುಹುವಾನು ಕೊಯ್ನಿಕರಿ ಬೋಲಾನು ಕಿಮ್?
1CO 15:13 ಮರ‍್ಯಾಹುಯಾನ ಪಾಛು಼ಜಿವ್ತು ಹುವಾನು ಕೊಯ್ನಿಕತೊ, ಕ್ರಿಸ್ತಬಿ ಮರ‍್ಯಾಹುಯಾಮಾಥು ಉಠಿನ್ ಆಯೊ ಕೊಯ್ನಿಕರಿ.
1CO 15:14 ಕ್ರಿಸ್ತ ಉಠಿನ್ ಆಯೊಕೊಯ್ನಿಕತೊ ಹಮಾರಿ ಉಪದೇಶ್‍ಬಿ, ತುಮಾರಿ ವಿಶ್ವಾಸ್‍ಬಿ ಫಾಯಿದೊಕೊಂತೆ ಹುಯಿರ‍್ಹುಸ್.
1CO 15:15 ಆನಾಹುಯಿನ್ ಮರ‍್ಯುಹುಯು ಉಠೀನ್ ಆಯುಕರಿ ದೇವ್ ಕ್ರಿಸ್ತಾನ ಉಠಾಡ್ಯೊಸ್ ಕೊಯ್ನಿ; ಉಠಾಡ್ಯೊಕರಿ ಸಾಕ್ಷಿ ದಿದಾತೆ ಅಪ್ಣೆ ದೇವ್ನಿ ಬಾರೇಮ ಝೂ಼ಟಿ ಬೋಲವಾಳ ಹುಯ ದೆಖೈಯೆಸ್
1CO 15:16 ಮರ‍್ಯುಹುಯು ಉಠಿಆವಕೊಯ್ನಿಕತೊ ಕ್ರಿಸ್ತಬಿ ಜಿವ್ತೊಹುಯಿನ್ ಉಠೀನ್ ಆಯೊಕೊಯ್ನಿ.
1CO 15:17 ಕ್ರಿಸ್ತ ಉಠಿನ್ ಆಯೊಕೊಯ್ನಿಕತೊ, ತುಮಾರಿ ವಿಶ್ವಾಸ್ ಬಿಣ್‌ಫಾಯಿದಾನು ಹುಯಿರ‍್ಹೂಸ್. ತುಮೆ ಆಜೂ಼ಬಿ ತುಮಾರಿ ಪಾಪ್‍ಮಾಸ್‌ ಛಾ಼.
1CO 15:18 ಆ ನಾಹುಯಿನ್ ಕ್ರಿಸ್ತಮ ರ‍್ಹೀನ್ ಮರ‍್ಯುಹುಯುಖ್ಹಾರು ನಾಶ ಹುಯಿರ‍್ಹುಸ್ ಕರಿ ಇನಿ ಮತಲಬ್.
1CO 15:19 ಅಪ್ಣೆ ಆ ಜಿ಼ಂದ್‌ಗೀಮ ಖಲಿ ಕ್ರಿಸ್ತಮ ಭರೋಖ್ಹಾವಾಳ ಹುಯಿರ‍್ಹಾತೊ, ಜಗತ್ನ ಅದ್ಮಿಥೀಬಿ ಕಡತೇಲ್‍ ಹುಯಿರ‍್ಹಿಯೇಸ್.
1CO 15:20 ಕತೋಬಿ ಖ್ಹಾಚು಼ ಶಾತ್‍ಕತೊ ಹಮ್ಕೆ ಕ್ರಿಸ್ತ ಮರ‍್ಯಹುಯಮಾಥು ಉಠೀನ್ ಆಯಿರ‍್ಹೋಸ್. ಮರ‍್ಯಹುಯ ಖ್ಹಾರಾಸ್‌ಮ ಮರೀನ್ ಉಠಾನು ಛಾ಼ಕರಿ ವಿಶ್ವಾಸಿಮ ಜ಼ಮೀನ್ ಹುಯಿರ‍್ಹೂಸ್.
1CO 15:21 ಶನಕತೊ ಏಕ್‌ ಅದ್ಮಿಥಿ ಮರಣ್ ಆಯುತೆ ತಿಮ್ಮಸ್ ಏಕ್‌ ಅದ್ಮಿಥಿ ಮರ‍್ಯಾಹುಯಾನ ಪಾಛು಼ಜಿವ್ತು ಹುವಾನು ಆವಸ್.
1CO 15:22 ಶನಕತೊ ಆದಾಮ್ಮ ಖ್ಹಾರೂಸ್ ಮರಾನಿ ತರಸ್, ಕ್ರಿಸ್ತಮ ಖ್ಹಾರೂಸ್ ಜಿವ್ತು ಉಶೆ.
1CO 15:23 ಕತೋಬಿ ಕ್ರಿಸ್ತ ಖ್ಹಾರೇಥಿ ಪಹಿಲೆ ಇನಪಾರ್ ಕ್ರಿಸ್ತ ಆವಾನಿ ವಖ್ಹ್‌ತೆ ಇನು ಅದ್ಮಿಖ್ಹಾರು ಏಕ್‌ನ ಕೇಡೆಥು ಏಕ್‌ ಬರೋಬರ್‌ನಿ ಪರಕ್ಮ ಉಠೀನ್ ಆವ್‌ಶೆ.
1CO 15:24 ಅನಕೇಡೆಥು ಯೋ ಖ್ಹಾರೂಸ್ ದರ್‌ಬಾರ್‌ನಾಬಿ ಖ್ಹಾರೂಸ್ ಅದಿಕಾರ್‌ನಾಬಿ, ಖ್ಹಾರೂಸ್ ಶಕತ್‍ನಾಬಿ ನಾಶ್ ಕರೀನ್ ಬಾ ದೇವ್ನ ಹಾತ್ಮ ರಾಜ್ಯ ದಿನಾಖಿದ್ಯವಾನಿ ವಖ್ಹ್‌ತೆ ಖ್ಹತಮ್ ಹುಯಿಜಾ಼ಶೆ.
1CO 15:25 ಶನಕತೊ ದೇವ್ ಅಖ್ಖಾಸ್ ವಹೇರ‍್ಯಾವ್ನ ಹರೈನ್ ಇನ ಪಗ್‍ಪರ್ ನಾಖೀಲ್ಯವಾಲಗು ರಾಜ಼್ ಚ಼ಲಾವಾನು ಜ಼ರೂರತ್ ಛಾ಼.
1CO 15:26 ಖ್ಹರ್ತಿನ ನಾಶ್‍ಹುವಾಳೊ ವಹೇರ‍್ಯೊ ಮರಣಸ್.
1CO 15:27 ಶನಕತೊ “ದೇವ್ ತಮಾಮ್‍ನಾಸ್ ಇನ ಗೋಡಾನ ಹೇಟ್ ನಾಖಿನ್ ಇನ ಅಧೀನ್ ಕರ‍್ಯೊ” ಕರಿ ಬೋಲಾನಿ ವಖ್ಹ್‌ತೆ ಖ್ಹಾರಸ್ನ ಅಧೀನ್ ಕರ‍್ಯೊಹುಯೊ ಇನಾಮ ಮಳ್ಯೊಕೊಯ್ನಿಕರಿ ದೆಖಾವಸ್.
1CO 15:28 ತಮಾಮ್‍ಬಿ ಇನ ಹಾತ್ಮ ದೀರಾಖನಪರ್ ಛಿಯ್ಯೊ ತಮಾಮ್‍ನಾಬಿ ದೀರಾಖವಾಳನ ಇನಹಾತ್‍ ಹೇಟ್ ರ‍್ಹವಾಳೊ ಹುಯಿರ‍್ಹೊಸ್; ಅಮ್‍ ದೇವ್ ತಮಾಮ್ಮಾಬಿ ತಮಾಮ್‌ ಹುಯಿರ‍್ಹೊಸ್.
1CO 15:29 ಮರ‍್ಯಹುಯಾನ ಪಾಛು಼ ಜಿವ್ತುಹುವಾನು ನಾರ‍್ಹಯುತೊ, ಮರ‍್ಯಾಹುಯಾನಖ್ಹಾಜೆ ಬ್ಯಾಪ್ತಿಸ್ಮ ಕರೈಲ್ಯಾವಾಳು ಶಾತ್‍ಕರ್‌ಶೆ? ಮರ‍್ಯುಹುಯು ಖ್ಹಾಚಮಾಸ್ ಉಠಿಆವಾಳು ನಾ ಉಶೇತೊ, ಉಠಿಆವಾಳ ಇವ್ಣಖ್ಹಾಜೆ ಅದ್ಮಿಖ್ಹಾರು ಬ್ಯಾಪ್ತಿಸ್ಮ ಶನಕರೈಲೇವ್ಣು?
1CO 15:30 ಕ್ರಿಸ್ತಮ ತುಮೆ ಮಾರಿ ಜೋ಼ಡೆ ಛಾ಼ತೆ ಇನಖ್ಹಾಜೆ ಅಪ್ಣೆ ಜಿನು ಹರ್‌ಘಡೀಮಾಬಿ ಖತ್ರಾಮ ಶನಛಿ಼ಯೇ?
1CO 15:31 ಭೈಯೇ ಭೇನೆವೊ, ಅಪ್ಣೊ ಪ್ರಭು ಹುಯಿರೋತೆ ಕ್ರಿಸ್ತಯೇಸುಮ ತುಮಾರಿ ಬಾರೇಮ ಮನಛಾ಼ತೆ ಪ್ಯಾರ‍್ನಖ್ಹಾಜೆ ಮೇ ಹರ್‌ರೋಜ಼್‍ಬಿ ಮರಣ್ಣ ಮ್ಹೋರೆ ಛೂ಼ಕರಿ ಬೋಲುಸ್.
1CO 15:32 ಮೇ ಅದ್ಮಿವೋನಖ್ಹಾಜೆ ಎಫೆಸಮ ಜಾನ್ವರ್‌ನ ಜೋ಼ಡ್ಮ ಜಂಗ್ ಭೀಡ್ಯೊತೊ, ಮನ ನಫ್ಫೊತೋಬಿ ಶಾತ್‌? ಮರಿಜಾ಼ವಳು ಉಠಿಆವಾನು ನಾರ‍್ಹಯುತೊ, ‘ಖೈನ್ ಪೀನ್ ಮರಿಜೈ಼ಯೆ?
1CO 15:33 “ಖರಾಬ್ ವಾಟ್ಮ ಖೇಚೈಜಾ಼ಶುನಕೊ, ಖರಾಬ್‍ನೊ ಖ್ಹಂಗ್ ಅಛ್ಛಿಚಾ಼ಲ್‍ನ ಖರಾಬ್ ಕರ್ಶೆ”.
1CO 15:34 ನೀತಿನಖ್ಹಾಜೆ ಹೊಷಾರಿ ಹುವೊ, ಪಾಪ್ನ ನಕೊಕರೊ. ಥೋಡಜ಼ಣಾನ ದೇವ್ನಿ ಬಾರೇಮ ಮಾಲುಮ್ಮಸ್‍ಕೊಯ್ನಿ. ತುಮೂನ ಖ್ಹರಮ್‌ ಲಾಗಾದೆಕರಿ ಮೇ ಆ ವಾತ್ ಬೋಲುಕರುಸ್.
1CO 15:35 “ಮರ‍್ಯುಹುಯು ಕಿಮ್ ಉಠಿಆವ್‌ಶೆ, ಕಿಮ್ನ ಶರೀರ್‌ಥಿ ಆವ್‍ಶೆಕರಿ ಕೋಣ್‌ತೋಬಿ ಪುಛಾ಼ವ್‍ಶೆ.
1CO 15:36 ಬಿಣ್‍ ಖ್ಹಯಾಲ್ನ ಅದ್ಮಿ, ತೂ ಬಿತ್‍ ಕರಾತೆ ದಾಣೊ ಮರ‍್ಯುನಾತೊ ಯೋ ಜಾನ್‌ ಲೀಶೆಕಿಶು ಕೊಯ್ನಿ.
1CO 15:37 ತೂ ಏಕ್‍ಘಡಿ ಘವ್‌ನ ರ‍್ಹವೊ ಜಿಜು಼ ಕೆಹೂಬಿ ದಾಣಾನ ರ‍್ಹವೊ ಬಿತ್‍ ಕರಾನಿ ವಖ್ಹ್‌ತೆ ಖಲಿ ಎಕ್ಕಸ್ ದಾಣನಾಸ್ ಪಣ್ಕಿ ಅಗಾಡಿ ಮೋಟು ಹುವಾನು ಶೋಶಿನ ಗಾಡಕೊಯ್ನಿ.
1CO 15:38 ಕತೋಬಿ ಅಖ್ಖಾ ದಾಣನಾಬಿ ಇನ ಹೋಣುತೆ ಶರೀರ್‌ನ ದೇಸ್, ದೇವ್ ಇನಿ ಖ್ಹೂಜ಼್‌ನಿ ಘೋಣಿಸ್ ಇನ ಶರೀರ್‌ನ ದೇಸ್.
1CO 15:39 ಅಖ್ಖೂಸ್ ಶರೀರ್ ಎಕ್ಕಸ್ ತರ ರ‍್ಹೇಯಿಕೊಯ್ನಿ. ಅದ್ಮಿನು ಶರೀರ್ ಏಕ್‌ಥರ, ಜಾನ್ವರ್‌ನು ಶರೀರ್ ಏಕ್‌ಥರ, ಜಿನಾವರ್‌ನು ಶರೀರ್ ಏಕ್‌ಥರ, ಮಾಛ಼್‌ಲಾನುಸ್ ಬಿಜೇಕ್‌ತರ,
1CO 15:40 ಆ ನಾಹುಯಿನ್ ಸೊರ್ಗಾನು ಶರೀರ್‌ಖ್ಹಾರು ಛಾ಼; ಧರ್ತಿನು ಶರೀರ್‌ಖ್ಹಾರು ಛಾ಼, ಕತೋಬಿ ಪರಲೋಕಮ ಅಖ್ಖಾಶರೀರ್‌ನು ಶನ್‌ಗಾರ್‌ನ ಅಲಕ್, ಧರ್ತಿನು ಶರೀರ‍್ನು ಶನ್‌ಗಾರ್ ಅಲಕ್.
1CO 15:41 ಚಾ಼ಂದ್‌ನು ಶನ್‌ಗಾರ್ ಅಲಕ್, ಚ಼ಂದರ್‌ಮಾನು ಉಜಾ಼ಖ್ಹ್‌ ಬಿಜೇಕ್ ಪರಕ್. ಶನಕತೊ ಶುಕ್ಕರ್ ಶುಕ್ಕರ್‌ನುಸ್ ಶನ್‍ಗಾರ್‌ಮ ಪರಕ್‍ ರ‍್ಹೇಸ್.
1CO 15:42 ಮರ‍್ಯಹುಯಾನ ಉಷೇತೆ ಪಾಛು಼ ಜಿವ್ತುಹುವಾನಾಬಿ ಇಮ್ಮಸ್ ರ‍್ಹಿಶೆ. ಶರೀರ್ ನೂಛೈಜಾ಼ವಾನಿ ಹಾಲತ್ಮ ಗಡೈಜಾ಼ಸ್. ಅಜು಼ ಮರೀನ್ ಉಠೀನ್ ಆವಾತೆ ನಾಶ ಹುವಾಕೊಂತೆ ರ‍್ಹಿಶೆ.
1CO 15:43 ಗಡೈಜಾ಼ವಾನಿ ವಖ್ಹ್‌ತೆ ಖರಾಬ್ ಹಾಲತ್ಮಾಬಿ ಬಿತ್‍ಹುವಸ್, ಕತೋಬಿ ಮಹಿಮೆನಿ ಜೋ಼ಡ್ಮ ಉಠಿನ್ ಆವಸ್. ಕಮ್‍ಜೋ಼ರಿಮ ಗಡೈಜಾ಼ಸ್, ಶಕಥ್ಥಿ ಉಠೀನ್ ಆವಸ್.
1CO 15:44 ಗಡಾಯುಹುಯು ಮಾಮೂಲಿ ಶರೀರ್‌ಹುಯಿನ್ ಗಡಾವಸ್, ಆತ್ಮೀಕ ಶರೀರ್‌ಹುಯಿನ್ ಉಠಿನ್ ಆವಸ್. ಅಫ್ಫರ್‌ಥು ಉಬ್‌ಜ್ಯುಹುಯು ಶರೀರ್ ಛಾ಼ಕತೊ ಆತ್ಮೀಕ ಶರೀರ್‌ಬಿ ಛಾ಼.
1CO 15:45 ಪಹಿಲೊ ಅದ್ಮಿಹುಯಿರೋತೆ ಆದಾಮ್ ಜಾನ್‌ ಲಿದೋತೆ ಏಕ್ಜ಼ಣೊಹುಯೊ. ಖ್ಹರ್ತಿನೊ ಅದಾಮ್‌ತೋಬಿ ಜಾನ್ನದ್ಯವಾಳೊ ಆತ್ಮಹುಯೊ” ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹುಸ್.
1CO 15:46 ಆತ್ಮೀಕ ಹುವಾಳು ಪಹಿಲೆ ಆಯುಕೊಯ್ನಿ ಮ್ಹಾಮುಲಿಸ್ ಪಹಿಲು ಹುಯಿರ‍್ಹೂಸ್. ಇನಕೇಡೆಥು ಆತ್ಮೀಕ ಹುವಾಳು ಐರ‍್ಹೂಸ್.
1CO 15:47 ಪಹಿಲೊ ಅದ್ಮಿ ಜ಼ಮೀನ್ನು ಮಾಟಿವಾಳೊ ಹುಯಿರ‍್ಹೋಥೊ. ಬೇನೊ ಅದ್ಮಿ ಪರಲೋಕ್‌ಥೊ ಆಯೊ ಹುಯೊ.
1CO 15:48 ಮಾಟಿನೊ ಅದ್ಮಿ ಕೆಥ್ರಾನೋಕಿ, ಮಾಟಿನ ಸಂಬಂದ್ ರ‍್ಹವಾಳುಬಿ ಎಥ್ರಾನಸ್‍ವಾಳು, ಪರ್‌ಲೋಕ್‌ನೊ ಅದ್ಮಿ ಕೆಥ್ರಾನವಾಳೋಕಿ ಪರ್‌ಲೋಕ್ನ ಸಂಬಂಧ್‍ರ‍್ಹಾವಾಳುಬಿ ಎಥ್ರಾನಸ್‍ವಾಳು ಹುಯಿರ‍್ಹಿಶೆ.
1CO 15:49 ಅಪ್ಣೆ ಮಾಟಿನ ಅದ್ಮಿನು ರೂಪ್ ಫೇರಿರಾಖ್ಯಾತೇಸ್ ಪರಕ್, ಪರ್‌ಲೋಕ್‌ನು ಅದ್ಮಿನ ರೂಪ್‍ನಾಬಿ ಪೇರ‍್ಹಿಲಿಶೂ಼.
1CO 15:50 ಭೇನೆ ಭೈಯೇವೊ, ಮೇ ಶಾತ್ ಬೋಲಸ್‍ಕತೊ, ಲ್ಹೋಯಿ ಬೋಟಿ ದೇವ್ನ ರಾಜ್ಯಮ ಭಾಗ್‌ ಲಿಶೆಕೊಯ್ನಿ. ನೂಛೈಜಾ಼ಯ್‌ ಕೊಯ್ನಿತೆ, ಇನಾಮ ಭಾಗ್‍ಲ್ಯಾವಾನ ಉಶೆಕೊಯ್ನಿ.
1CO 15:51 ಮೇ ಗಪ್ಲತ್ ಹುಯಿರ‍್ಹೀಥೀತೆ ವಾತೆನ ತುಮುನ ಬೋಲುಸ್ ಖ್ಹಮ್‍ಜೊ ಅಪ್ಣೆಖ್ಹಾರು ಮರಿಜಾಶು ಕೊಯ್ನಿ. ಅಪ್ಣೆಖ್ಹಾರು ಬದ್ಲಿಜಾಶು.
1CO 15:52 ಕತೋಬಿ ಎಕ್ಕಸ್ ಘಡೀಮ, ಪಾಪಣ್ ಮಾರಾನ ಮಹಿಮ ಖ್ಹರ್ತಿನಿ ತುತ್ತೂರಿ ವಜಾ಼ಡನಿ ವಖ್ಹ್‌ತೆ ಮರಿಹುಯು ನಾಶ್‌ಕೊಹುವಾನಿತೆ ಹಾಲತ್ಮ ಉಟ್‌ಶೆ. ತದೆ ಅಪ್ಣೆ ಬದ್ಲಿಜಾಶು. ತುತ್ತೂರಿನುವಾಜ಼ನಿ ವಖ್ಹ್‌ತೆ ಮರ‍್ಯುಹುಯು ಕದೇಬಿಜಿವಾನ, ಉಠಾಡೈಜಾ಼ಶೆ. ಅಪ್ಣೆ ಬದ್ಲಿಜಾಶು.
1CO 15:53 ಕತೋಬಿ ನೂಛೈ಼ಜಾ಼ವಾನು ಶರೀರ್ ನೂಛಾ಼ವಕೊಂತೆ ಇಮ್‌ ಬದ್ಲಿಜಾ಼ಶೆ. ಮರವಾಳು ಮರಾಕೊಂತೆ ಹುಯಿಜಾಶೆ.
1CO 15:54 ಅಮ್‌ರ‍್ಹವಾಪರ್ ನೂಛೈ಼ಜಾ಼ವಾಳು ಶರೀರ್ ನೂಛೈ಼ಜಾ಼ವನುಕೊಂತೆ ಬದಲ್ ಹುವಾನಿವಖ್ಹ್‌ತೆ ಪವಿತ್ರ ದಪ್ತರ್‌ಮ “ಜೀತ್ ಮರಣ್ಣ ಗಳಿಲಿದು” ಕರಿ ಲೀಖಾಯುತೆ ವಾತ್ ಚಾ಼ಲಸ್.
1CO 15:55 ಮರಣ್, ತಾರಿ ಜೀತ್ ಕ್ಯಾ? ಮರಣ್ ತಾರು ಝಾರ್‌ ಕಣ್ಣಿ ಕಿಜ್ಜಾ಼ ಛಾ಼.
1CO 15:56 ಮರಣ್ ಪಾಪ್‌ಥಿ ಅಜ಼ ದ್ಯವಾನು ತಾಖತ್ನ ಲೇಸ್ ಅಜು಼ ಪಾಪ್ ಧರ್ಮಶಾಸ್ತ್ರಥಿ ಶಕತ್ ಲೀಲೆಸ್.
1CO 15:57 ಕತೋಬಿ ಅಪ್ಣೊ ಪ್ರಭು ಹುಯಿರೋತೆ ಯೇಸು ಕ್ರಿಸ್ತಥಿಸ್ ಅಪ್ಣುನ ಜೀತ್‍ದ್ಯಾವಾಳ ದೇವ್ನ ಧನ್ಯವಾದ್.
1CO 15:58 ಇನಾಖ್ಹಾಜೆ ಮಾರ ಪ್ಯಾರ್‌ನ ಭೇನೆ ಭೈಯೇವೊ, ಘಟ್‍ಥಿ ಭೀರ‍್ಹೆವೊ. ಕೆಹೂಬಿ ತುಮುನ ಹಲಾವದೆ ನಕೊ. ಪ್ರಭುಮ ತುಮಾರೊ ವಾಖ್ಯೊ ಬಿಣ್‌ಫಾಯಿದೊ ಉಶೆಕೊಯ್ನಿ ಕರಿ ಖ್ಹಮ್‌ಜಿನ್‌, ಪ್ರಭುನ ಕಾಮ್ನಖ್ಹಾಜೆ ಕದೇಬಿ ತುಮಾರು ತುಮೆ ಪೂರ ಅರ್ಪಣ್‍ ಕರಿಲೆವೊ.
1CO 16:1 ದೇವ್ನ ಅದ್ಮಿನಖ್ಹಾಜೆ ಪೈಶ ಜ಼ಮ ಕರಾನಿ ಬಾರೇಮ ಮೇ ಗಲಾತ್ಯನಿ ಅಖ್ಖಿ ಸಬೆನ ಬೋಲ್ಯೊತೆ ಇಮ್ಮಸ್ ತುಮೇಬಿ ಕರೊ.
1CO 16:2 ಮೇ ಆವಾದಿನ್ ಪೈಶಜ಼ಮಕರಾನು ನಾ ರ‍್ಹೇವ್ಣುತೆ ತುಮಾರಮ ಹರೇಕ್‍ಜ಼ಣು ಇನು ಕಮೈ ಕಿಮ್ಕಿ ತಿಮ್ ವಾರಾನ ಫೈಲದನ್ನೆ ಜ಼ಮಕರಿರಾಖದೆ. ಮೇ ಆವಾದಿನ್ ತುಮೆ ರಪ್ಯ ಜ಼ಮಾವಾನಿ ಜ಼ರೂರತ್ ಕೊರ‍್ಹಿಶೇನಿ.
1CO 16:3 ಮೇ ತುಮಾರಕನ ಆವಾದಿನ್ ತುಮೆ ಕಿನ ಪರ್ಖಿನ್ ನಿಯತ್‌ವಾಳೊ ವತಾಳಸ್ಕಿ ಇವ್ಣುನ ಚಿಟ್ಟಿದೀನ್ ತುಮಾರು ಇನಾಮ್ನ ಲೀನ್ ಯೆರೂಸಲೇಮ್ನ ಜಾ಼ವ್ಣುಕರಿ ಮೋಕ್ಲುಸ್‌.
1CO 16:4 ಮೇಬಿ ಜಾ಼ವಾನು ಅಛ್ಛು಼ಕರಿ ಬೋಲಾಯುತೊ ಇವ್ಣೆ ಮಾರಿ ಜೋ಼ಡ್ಮ ಆವಾದೆ.
1CO 16:5 ಮೇ ಮೆಕೆದೋನ್ಯಥೊ ಜಾ಼ವ್ಣುಕರಿ ಛೂ಼. ಇನಖ್ಹಾಜೆ ಮೆಕೆದೋನಿಯನ ಜೈ಼ನ್ ತುಮಾರಕನ ಆಯಿಶ್.
1CO 16:6 ಥೋಡಿ ವಖ್ಹತ್, ನತರ್ ಠಣ್ಣಾ ಹಗಾಮ್ ತುಮಾರಿಜೋ಼ಡ್ಮ ಕಾಡ್ಣುಕರಿ ಹರ್‌ಖ್ಹುಸ್. ಅಮ್ನಿಪರಕ್ಮ ಮೇ ಜಾ಼ವ್ಣುತೆ ಝ಼ಗೋನ ಜಾ಼ವಾನಖ್ಹಾಜೆ ತುಮೆಮನ ಮದತ್ ಕರೆಜಾ಼ಯ್.
1CO 16:7 ಮೇ ಆ ವಖ್ಹತ್‌ಮ ಜಾ಼ತೊಜಾ಼ತೊ ತುಮೂನ ದೇಕ್ತೊ ಜಾ಼ವಾನ ಆಖ್ಹ್‌ಕೊಯ್ನಿ; ಪ್ರಭುನಿ ಹುಕುಮ್ ಹುಯೂತೊ ತುಮಾರಕನ ಥೋಡದನ್ ರ‍್ಹೀಶ್‍ಕರಿ ಖ್ಹಯಾಲ್ ಕರಿರಾಖ್ಯೊಸ್.
1CO 16:8 ಕತೋಬಿ ಯೆಹೂದ್ಯರ್‌ನಿ ಅಡೈವಿಖ್ಹ್‌ದನ್ನಿ ಪಂಚಶತ್ತಮ ಪೂಜ಼ನ ದನ್‌ಲಗು ಎಫೆಸಮ ರ‍್ಹೆವುಸ್.
1CO 16:9 ಶನಕತೊ ಕೆತ್ರಿಕ್ಕಿ ವಿರೋದಿಖ್ಹಾರು ರ‍್ಹಯುತೋಬಿ ಏಕ್‌ ಊಚು಼ ಅಜು಼ ನಫ್ಫಾನು ಕಾಮ್ ಕರಾನ ಖ್ಹಾಚಮಾಬಿ ವೇಳ್‌ಮಳಿ ಐರ‍್ಹೀಸ್.
1CO 16:10 ಮಾರಿನಿತರ ತಿಮೊಥೆಬಿ ಪ್ರಭುನಿಸೇವೆ ಕರುಕರಸ್. ಯೋ ತುಮಾರಕನ ಆಯೋತೊ ಶನೂಬಿ ಡರಕೊಂತೆ ರ‍್ಹಾವನಿತರ ದೇಖಿಲೇವೊ.
1CO 16:11 ಕೋಣ್‌ಬಿ ಇನ ಕಡತೇಲ್‍ ನಾಕರ‍್ನು. ಕತೋಬಿ ಯೋ ಮಾರಕನ ಆವಾನಿತರ ಇನ ಸಮಾಧಾನ್‌ಥಿ ಮೋಕಲ್‌ನು ಯೋ ಭೇನೆ ಭೈಯೇವ್ನಿ ಜೋ಼ಡ್ಮ ಆವಾನು ಮೇ ಮ್ಹೋರೆ ದೇಖುಕರುಸ್.
1CO 16:12 ಹಮ್ಕೆ ಭೈ ಹುಯಿರೋತೆ ಅಪೊಲ್ಲೋಸನಿ ಬಾರೇಮ ಶಾತ್‍ಕತೊ, ಯೋ ವಿಶ್ವಾಸಿಯೆವ್ನಿ ಜೋ಼ಡ್ಮ ತುಮಾರಕನ ಜಾ಼ವ್ಣುಕರಿ ಇನಘಣು ಬೋಲ್ಯೊ. ಯೊ ಹಮ್ಕೆ ಜಾ಼ವನ ಜ಼ರ ದಿಲ್‌ ಕರ‍್ಯೊಕೊಯ್ನಿ. ಯೋ ಇನ ವಖ್ಹತ್ ಮಳಾದಿನ್ ಆವ್‌ಶೆ.
1CO 16:13 ಜ಼ತನ್‍ರ‍್ಹೇವೊ, ವಿಶ್ವಾಸ್‌ಮ ಘಟ್‍ಭೀರ‍್ಹೆವೊ ದಿಲ್‍ಪಥಿ ರ‍್ಹವೊ, ಅಜು಼ ತಾಖತ್‍ವಾಳ ಹುವೊ.
1CO 16:14 ತುಮಾರ ಹರೇಕ್ ಕಾಮ್ನ ಪ್ಯಾರ್‌ಥಿ ಕರೊ.
1CO 16:15 ಸ್ತೆಫನನ ಘರ್‌ವಾಳು ಅಖಾಯಮ ವಿಶ್ವಾಸ್ಮ ಪಹಿಲು, ದೇವ್ನ ಅದ್ಮಿಯೇವ್‍ನ ಚಾ಼ಕ್ರಿ ಕರಾನಖ್ಹಾಜೆ ಇವ್ಣುನಸ್ ದೀಲಿದುಹುಯು ಕರಿ ಬೋಲಾನು ತುಮೂನ ಮಾಲುಮ್ ಛಾ಼. ಭೈಯೆ ಭೇನೆವೊ ಮೇ ತುಮುನ ಬಿಂತಿಕರೂಸ್,
1CO 16:16 ತುಮೆ ಅಥ್ರನವಾಳನಾಬಿ ಚಾ಼ಕ್ರಿಕರಾವಾಳ ಹರೇಕ್‍ನಾಬಿ, ಪೀಠೆಜಾ಼ವ್ಣುಕರಿ ತುಮೂನ ಗಿಂಗೈಲೆವುಸ್.
1CO 16:17 ಸ್ತೆಫನನಾಬಿ, ಪೊರ್ತುನಾತೊಸಬಿ, ಅಖಾಯಿಕ ಕರಿ ಆಯೂತೆ ಮನ ಶಂತೋಖ್ಹ್‌ ಹುಯು. ಶನಕತೊ ತುಮೆ ನಾ ರ‍್ಹವಾನಿ ವಖ್ಹ್‌ತೆ ಮನಹುಯುತೆ ಕಮೀನ ಇವ್ಣೆ ಕಾಡಿನಾಖ್ಯ.
1CO 16:18 ಇವ್ಣೆ ಮಾರ ಆತ್ಮನಾಬಿ ತುಮಾರ ಆತ್ಮ ಅಖ್ಖಾನಾಬಿ ಛು಼ಟುಕರ‍್ಯ. ಅಥ್ರಾನ ಅದ್ಮಿನ ತುಮೆ ಖ್ಹಣೇದ್ ರಾಖೊ.
1CO 16:19 ಏಷ್ಯಾನಿ ತಬರ್‌ಖಾನಿ ಸಬೆವಾಳು ತುಮೂನ ಖ್ಹಲಾಮ್ ಕರಿ ಬೋಲಿರಾಖ್ಯುಸ್. ಅಕ್ವಿಲ ಅಜು಼ ಪ್ರಿಸ್ಕಿಲ್ಲನು ಘರ್‌ನು ಸಬೇಥು ಪ್ರಭುನ ನಾಮ್‍ಥಿ ತುಮೂನ ಘಣು ಖ್ಹಲಾಮ್ ಕರಸ್.
1CO 16:20 ಅಖ್ಖೂಸ್ ಭೇನೆ ಭೈಯೇಖ್ಹಾರು ತುಮೂನ ಖ್ಹಲಾಮ್‍ಕರಸ್. ತುಮೆ ಪವಿತ್ರಥಿ ಹಾತ್‍ಮಳೈನ್ ಖ್ಹಲಾಮ್ ಕರೊ.
1CO 16:21 ಪೌಲಕರಿ ಮೇ ಮಾರ ಶೊಂತ್‍ ಹಾಥ್ಥಿ ಆ ಖ್ಹಲಾಮ್ನ ಲೀಖಿರಾಖ್ಯೊಸ್.
1CO 16:22 ಕೋಣ್‌ತೋಬಿ ಪ್ರಭುನ ಪ್ಯಾರ್ ಕರಾಕೊಂತೆ ರ‍್ಹೇಸ್ಕಿ ಯೊ ಶಾಪ್‌ವಾಳೊ ಹುವಾದೆ! ಮಾರೊ ‘ಪ್ರಭು ತೂ ಆವ್’!
1CO 16:23 ಪ್ರಭುಹುಯಿರ‍್ಹೋತೆ ಯೇಸುನೊ ವಾರ್‌ಖ್ಹೊ ತುಮಾರಿ ಜೋ಼ಡ್ಮ ರ‍್ಹವಾದೆ.
1CO 16:24 ಕ್ರಿಸ್ತ ಯೇಸುಮ ಮಾರಿ ಪ್ಯಾರ್ ತುಮಾರ ಖ್ಹಾರಾಸ್‌ನಿಜೋ಼ಡ್ಮ ರ‍್ಹವಾದೆ. ಆಮೆನ್.
2CO 1:1 ದೇವ್ನಿ ಮರ್ಜಿಥಿ ಕ್ರಿಸ್ತ ಯೇಸುನೊ ಏಕ್‍ಜ಼ಣೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ ಅಜು಼ ಇನೊ ವಿಶ್ವಾಸಿ ಭೈ ಹುಯಿರೋತೆ ತಿಮೊಥೆಯ ಕೊರಿಂಥಮ ಛಾ಼ತೆ ದೇವ್ನಿ ಸಬೇನಾಬಿ, ಅಖಾಯ ತಬರ್‌ಖಾಮ ಛಾ಼ತೆ ದೇವ್ನಿ ಅದ್ಮಿಯೇವ್‍ನ ಲೀಖಾನು‌ ಶಾತ್‌ಕತೊ:
2CO 1:2 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥೀಬಿ, ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
2CO 1:3 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೊ ಬಾಬಿ, ದೇವ್‌ಬಿ ಹುಯಿರ‍್ಹೋತೆ ಇನ ಧನ್ಯವಾದ್. ಯೋ ಗೋರ್‌ಥಿ ಭರೈರ‍್ಹಾವಾಳೊ ಬಾಬಿ. ಅಖ್ಖಿ ತರಾಥಿ ಭಾಲಿ ದ್ಯವಾಳೊ ದೇವ್ ಹುಯಿರೋಸ್.
2CO 1:4 ಅಪ್ಣುನ ಖ್ಹತಾಪ್ಣಿ ಹುವಾನಿ ವಖ್ಹತ್‌ಮ ಯೋ ಅಪ್ಣುನ ಸಮಾಧಾನ್‍ ಕರಸ್; ಖ್ಹತಾಪ್ಣಿಮ ರ‍್ಹೇಯ್ತೆ ಬಿಜ಼ ಅದ್ಮಿನ ಸಮಾಧಾನ್ ಕರಾನ ಅನೇಥಿ ಅಪ್ಣೆ ಜಿನುಬಿ ಶಕತ್‌ವಾಳ ಹುಯೆಸ್. ದೇವ್ ಅಪ್ಣುನ ಸಮಾಧಾನ್‍ ಕರಾತೆ ತಿಮ್ಮಸ್ ಅಪ್ಣೆ ಜಿನುಬಿ ಇವ್ಣುನ ಸಮಾಧಾನ್ ಕರಾವಾಳ ಹುಯಿರ‍್ಹಿಯೇಸ್.
2CO 1:5 ಅಪ್ಣೆ ಕ್ರಿಸ್ತನಿ ಕೈಯೇಕ್ ದರದ್ಮ ಭಾಗ್‌ಲ್ಯವಾಳ ಹುಯಿರ‍್ಹಿಯೇಸ್. ಅಮ್ನಿಸ್ ಪರಕ್ಮ ಕ್ರಿಸ್ತಥಿ ಜಾ಼ಖ್ಹತ್ ಭಾಲಿಮಾಬಿ ಅಪ್ಣೆ ಭಾಗ್‌ ಹುಯಿರ‍್ಹಿಯೆಸ್.
2CO 1:6 ಅಪ್ಣೆ ಖ್ಹತಾಪ್ಣಿ ಲಿಯೇಸ್ತೆ ಇನಖ್ಹಾಜೆ ತುಮುನ ಸಮಾಧಾನ್‍ಬಿ ರಕ್ಷಣೆಬಿ ಮಳ್‍ಶೆ, ಅಪ್ಣೆ ಸಮಾಧಾನ್‌ಥಿ ರ‍್ಹವಾಳ ಹುಯಿರ‍್ಹಾತೊ ಯೊ ತುಮೂನ ಸಮಾಧಾನ್ನಖ್ಹಾಜೆ ಹುಯಿರ‍್ಹುಸ್. ಮೇ ಲೀರಾಖ್ಯೊತೆ ದರದ್ಮ ತುಮೆ ಶಾಂತಿಥಿ ಖ್ಹಮಾಳಿಲ್ಯವಾನಿಘೊಣಿ ಯೊ ತುಮೂನ ಭಾಲಿದೇಸ್.
2CO 1:7 ತುಮಾರಿ ಬಾರೇಮ ಹಮೂನ ಛಾ಼ತೆ ಭರೋಖ್ಹೊ ಘಟ್‍ಛಾ಼ ಶನಕತೊ ತುಮೆ ಹಮಾರಿ ಭಾಲಿಮಾಬಿ ಭಾಗ್‌ಲ್ಯವಾಳ ಹುಯಿರಾಸ್ತೆ ತಿಮ್ಮಸ್ ಮದತ್‌ಲ್ಯಾವಮಾಬಿ ಭಾಗ್‌ಲ್ಯವಾಳ ಹುಯಿರಾಸ್‍ಕರಿ ಹಮೂನ ಖ್ಹಮಜ಼್‌ಮ ಆಯಿರ‍್ಹುಸ್.
2CO 1:8 ಭೇನೆ ಭೈಯೇವೊ, ಹಮೆ ಏಷ್ಯಾ ತಬರ್‌ಖಾಮ ಖ್ಹಮಾಳ್ಯಾತೆ ಖ್ಹತಾಪ್ಣಿನಿ ಬಾರೇಮ ತುಮೂನ ಮಾಲುಮ್‌ಪಡಾದೆ ಕರಿ ಹಮಾರಿ ಖ್ಹಯಾಲ್ ಹುಯಿರಿಸ್, ಹಿಜ್ಜಾ಼ ಹಮೂನ ಕೈಏಕ್ ಮೋಟಿ ಖ್ಹೂಜ಼್‍ಥಿ. ಯೋ ಖ್ಹೂಜ಼್‌ಖ್ಹಾರಿ ಹಮಾರಿ ಶೊಂತ್ ಶಕಥ್ಥಿಬಿ ಘಣುಥು. ಜಾನ್‍ಖ್ಹಮೇದ್ ಬಚಾ಼ನಿ ವಿಶ್ವಾಸ್‌ ಹಮೆ ಮ್ಹೆಲಿದಿದ.
2CO 1:9 ಅಪ್ಣೆ ಮರಿಜಾ಼ಶುಕರಿ ಅಪ್ಣೆ ಮಾಲುಮ್ ಕರಿರಾಖ್ಯಥ. ಅಪ್ಣೆ ಅಪ್ಣಪರ್ ಭರೋಖ್ಹೊ ನಾ ರಾಕ್ಣುತೆ ಮರ‍್ಯಾಹುಯಾನ ಉಠಾಡವಾಳೊ ದೇವ್ನ ಉಪ್ಪರಸ್ ಭರೋಖ್ಹೊ ರಾಕ್ಣುಕರಿ ಆ ಅಖ್ಖು ಹುಯುತೆ.
2CO 1:10 ಮರಣ್ಣಿ ಆ ಘಣ ಖತ್ರೇಥಿ ದೇವ್ನೆ ಹಮೂನ ರಕ್ಷಣೆ ಕರ‍್ಯೊ. ಅಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ. ಹಮೆ ಇನಾಮ ಭರೋಖ್ಹೊ ರಾಖಿರಾಖ್ಯಾಸ್. ಯೋ ಹಮೂನ ಬಿಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ
2CO 1:11 ಆ ನಾಹುಯಿನ್ ತುಮೆ ತುಮಾರಿ ಪ್ರಾರ್ಥನೆಥಿ ಹಮೂನ ಮದತ್ ಕರುಕರಸ್. ತದೆ ತುಮಾರಿ ಪ್ರಾರ್ಥನೆಥಿ ದೇವ್ ಹಮೂನ ಆಶೀರ್ವಾದ್‌ ಕರಿರಾಖ್ಯೋತೆ ದೇಖಿನ್ ಕೈಏಕ್ ಜ಼ಣು ಹಮಾರ ಭಣೀಥು ದೇವ್ನ ಧನ್ಯವಾದ್‍ನಿ ಸ್ತುತಿ ಕರ್ಶೆ.
2CO 1:12 ಹಮೆ ಆ ವಾತ್ನಿ ಬಾರೇಮ ಕಂಡಿ ಛ಼ಡೈಲಿಯೇಸ್ಕಿ, ಹಮೆ ಖಲಿ ಅದ್ಮಿವೋನಿ ಅಕ್ಕಲ್‍ನ ಲಿದಾಕೊಂತೆ ದೇವ್ನ ವಾರ್‌ಖ್ಹಾನ ಆಖ್ಹ್‌ರಾಮ ಪರಿಶುದ್ಧಬಿ ನಿಯತ್‍ವಾಳಾಬಿ ಹುಯಿನ್ ಆ ಜಗತ್ಮ ತುಮಾರಿ ಬಾರೇಮ ಚಾ಼ಲಿಲಿದಾಕರಿ ಹಮಾರು ದಿಲ್‌ ಹಮೂನ ಸಾಕ್ಷಿ ಬೋಲಸ್.
2CO 1:13 ತುಮೆ ಫಡ್ನು ಅಜು಼ ಪೂರ ಪರಕ್ಮ ಮಾಲುಮ್ ಕರಿಲೇವ್ಣುಕರಿ ಪಣ್ಕಿ ಮನ ಮಾಲುಮ್‌ ಛಾ಼. ಶನಖ್ಹಾಜೆಬಿ ಕಾಹೆ. ಖ್ಹರ್ತಿಲಗು ತುಮೂನ ಅರ್ಥ ಉಷೆಕರಿ ಭರೋಖ್ಹೊ ಕರೀನ್ ಮೇ ಮಾಲುಮ್ ಕರಿಲೇವುಸ್.
2CO 1:14 ತುಮೆ ಪಹಿಲೇಸ್ ಹಮೂನ ಮಾಲುಮ್ ಕರಿರಾಖ್ಯಸ್. ಹಮೆ ಪ್ರಭು ಯೇಸುಮ ಕಂಡಿಚ಼ಡೈಲ್ಯವಾನ ಕಾರಣ್ ಹುಯಿರ‍್ಹಿಯೇಸ್. ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತ ಪಾಛೊ಼ ಆವಾನ ದನ್ಮ ತುಮೆ ಹಮಾರಿ ಭರೋಖ್ಹಾಮ ಛಾ಼ತೆ ತಿಮ್ ಹಮೆ ತುಮಾರಿ ಭರೋಖ್ಹಾಮ ರ‍್ಹಿಶುಕರಿ ತುಮೆ ಮಾನಿಲೇವೊಸ್.
2CO 1:15 ಮೇ ಆ ಅಖ್ಖೀಸ್ ವಾತೆನ ಘಣು ವಿಶ್ವಾಸ್ ಕರಿ ರಾಖ್ಯೋಥೊ. ಇನಾಖ್ಹಾಜೆ ತುಮೂನ ಪಹಿಲೆ ಮಳಾನ ಮೇ ಅಖ್ಖಿ ಖ್ಹೂಜ಼್ ಕರಿರಾಖ್ಯೋಥೊ. ತದೆ ತುಮೂನ ಬೇಪಟ್ ಆಶೀರ್ವಾದ್‌ ಹುವಾನುಥು.
2CO 1:16 ಮೇ ಮೆಕೆದೋನಿಯನ ಜಾ಼ವಾನಿ ವಖ್ಹತ್‍ಬಿ ಬಿಜು಼ ಹಿಜ್ಜಾ಼ಥೊ ಪಾಛೊ಼ ಫರಿ ಆವಾನಿ ವಖ್ಹತ್‍ಮಾಬಿ ತುಮಾರಕನ ಆವ್ಣುಕರಿ ಥೊ. ಬಿಜು಼ ಯೂದಾಯ ತಬರ್‌ಖಾಮ ಜಾ಼ವಾನ ತುಮಾರೇಥಿ ಮದತ್ ಮಾಂಗ್‍ಣು ಕರಿ ಥೊ.
2CO 1:17 ಅಮ್‍ ಸೋಚ್ಯೊತೆ ಇನಖ್ಹಾಜೆ ಮೇ ಘುಂಜ್‍ಳಾವ್ಣಿನೊ ಖ್ಹಯಾಲ್ನೊ ಥೋಕಿಶು? ಇವ್ಣೆತೊ ಜಗತ್ನಿ ಖ್ಹೂಜ಼್‌ಮ ಸೋಚಾನಿ ವಖ್ಹತ್‌ಮ “ಓಹೊ, ಓಹೊ” ಕರಿಬಿ ಯೋಸ್ ವಖ್ಹತ್‌ಮ “ಕೊಯ್ನಿ, ಕೊಯ್ನಿ” ಕರಿಬಿ ಬೋಲಸ್ ಕೊಯ್ನಿಕಿ ಶು?
2CO 1:18 ತುಮೆ ದೇವ್ನ ವಿಶ್ವಾಸ್ ಕರಾವಾಳ ರ‍್ಹಯಾತೊ, ಹಮೆ ತುಮುನ ಎಕ್ಕಸ್ ವಖ್ಹತ್‌ಮ “ಓಹೊ” ಬಿಜು಼ “ಕೊಯ್ನಿ” ಕರಿ ಬೋಲ್ಯ ಕೊಯ್ನಿಕರಿ ತುಮೆ ವಿಶ್ವಾಸ್ ಕರ್ಶು.
2CO 1:19 ಶನಕತೊ ಸಿಲ್ವಾನಾಬಿ, ತಿಮೊಥೆಬಿ ಬಿಜು಼ ಮೇ ತುಮುನ ಬೋಧನೆ ಕರ‍್ಯೊತೆ ದೇವ್‌ನೊ ಛಿಯ್ಯೊಹುಯಿರ‍್ಹೊತೊ ಯೇಸುಕ್ರಿಸ್ತ ಓಹೊ ಕರಿಬಿ ಕೊಯ್ನಿಕರಿಬಿ ಬೇ ತರ ಕೋಥೂನಿ. ಕ್ರಿಸ್ತಮ ಕದೇಬಿ ರ‍್ಹೇಸ್ತೆ “ಓಹೊ” ಕರೀಸ್.
2CO 1:20 ಶನಕತೊ ದೇವ್ನೆ ಕರ‍್ಯೊತೆ ವಾಗ್ದಾನ್ ಅಖ್ಖು “ಓಹೊ” ಕರಿ ಜ಼ವಾಬ್ ಹುಯಿರ‍್ಹುಸ್. ಇನಖ್ಹಾಜೇಸ್ ಕ್ರಿಸ್ತಥಿ ದೇವ್ನ ಮಹಿಮೆನಖ್ಹಾಜೆ ಅಪ್ಣೆ “ಆಮೆನ್” ಕರಿ ಬೋಲಿಯೇಸ್.
2CO 1:21 ದೇವ್ ತುಮುನಾಬಿ ಹಮೂನ ಏಕ್‍ಕರಿ ಮಳೈರಾಖ್ಯೊಸ್. ಅಜು಼ ಅಪ್ಣುನ ಅಬಿಷೇಕ್ ಕರೀನ್ ಕ್ರಿಸ್ತನಿ ಗಳ್‌ಜೋ಼ಡ್ಮ ಏಕ್‌ ಹುಯಿರಾಸ್. ಅನ ಖುದ್ ದೇವಸ್ ಕರಿರಾಖ್ಯೊಸ್.
2CO 1:22 ಹಮೆ ಇನವಾಳಕರಿ ವತಾಳನಖ್ಹಾಜೆ ಇನೆ ಹಮಾರಪರ್ ಮುದ್ರೊ ನಾಖಿರಾಖ್ಯೋಸ್. ಯೋ ಹಮೂನ ಕರ‍್ಯೊತೆ ವಾಗ್ದಾನ್ನ ಚ಼ಲಾವ್‌ಷೆ ಕರಿ ಬೋಲಾನ ಪವಿತ್ರಾತ್ಮನಾಸ್ ಅಪ್ಣ ದಿಲ್ಮ ದೀರಾಖ್ಯೊಸ್.
2CO 1:23 ತುಮಾರಕನ ಕೊರಿಂಥಮ ಆಯೊಕೊಯ್ನಿ. ಇನಖ್ಹಾಜೆ ಮೇ ದಿಲ್‌ ಭರೈನ್ ಬೋಲುಕರುಸ್, ಅನ ದೇವಸ್ ಸಾಕ್ಷಿ ಹುಯಿರ‍್ಹೊಸ್.
2CO 1:24 ತುಮಾರಿ ವಿಶ್ವಾಸ್‌ನ ಕಬ್‌ಜಾ಼ಮ ರಾಖಾನ ಹಮೆ ಕೋಶಿಶ್ ಕರುಕರೇಸ್ ಕರಿ ಮೇ ಬೋಲುಕರುಕೊಯ್ನಿ. ತುಮೆ ವಿಶ್ವಾಸ್‌ಮ ಘಟ್‍ಛಾ಼ ಕತೋಬಿ ಹಮೆ ತುಮಾರಿ ಖ್ಹುಶಿನಖ್ಹಾಜೆ ತುಮಾರಿ ಜೋ಼ಡ್ಮಕಾಮ್‍ ಕರಾವಾಳ ಹುಯಿರ‍್ಹಾಸ್.
2CO 2:1 ಕತೋಬಿ ಮೇ ಪಾಛೊ಼ಫರಿ ತುಮಾರಕನ ದುಖ್‌ಥಿ ಆಯಿಶ್‌ಕೊಯ್ನಿ ಕರಿ ಮಾರಮ ಖ್ಹೂಜ಼್‌ ಕರೀಲಿದೊ.
2CO 2:2 ಮೇ ತುಮುನ ದುಖ್ ಕರಾಯೋತೊ, ಮನ ಖುಷಿ ಕರಾವವಾಳುಕೋಣ್‍? ಮಾರೇಥಿ ದುಖ್ ಪಡ್ಯಾತೆ ತುಮೆಖಾಯೆ ಶು.
2CO 2:3 ಅನೇಥಿ ಮೇ ಆ ಚಿಟ್ಟಿನ ಲಿಖ್ಯೋತೆ ಮನ ಖ್ಹುಶಿ ಕರಾವಾಳಸ್ ಮನ ದುಖ್‍ಮ ನಾ ನಾಖಿಲೇವ್ಣು ಕರಿ ಲಾಝು಼ಸ್. ಮಾರಿ ಖ್ಹುಶಿಸ್‍ ತುಮಾರಿ ಖ್ಹುಶೀಕರಿ ತುಮೆ ಲಾಝ಼ಸ್‍ ಕರಿ ಮೇ ವಿಶ್ವಾಸ್ ಕರುಸ್.
2CO 2:4 ಮೇ ಅಗಾಡಿ ಏಕ್‍ವಖ್ಹತ್‍ ತುಮುನ ಲೀಖಾನಿ ವಖ್ಹ್‌ತೆ, ಮಾರೊ ದಿಲ್‌ ಘಣು ಕಲಾವ್ಣಿ ಹುಯಿರ‍್ಹುಥು, ಬಿಜು಼ ದುಖ್‍ಥಿಥು. ಮೇ ಆಂಝು಼ನಾಕ್‍ತೊ ಹುಯಿನ್ ತುಮುನ ಲೀಖ್ಯೋತೆ, ತುಮುನ ದುಖ್ ಕರಾವ್ಣು ಕರಿ ಕಾಹೆ, ತುಮುನ ಕೆತ್ರೆ ಪ್ಯಾರ್‌ಕರೂಸ್ ಕರಿ ತುಮೆ ಮಾಲುಮ್ ಕರೀಲೆವ್ಣು ಕರಿ ಎತ್ರೇಸ್.
2CO 2:5 ತುಮಾರಿ ಸಬೇನೊ ಏಕ್‍ಜ಼ಣೊ ದುಖ್ ದಿದೋತೆ, ಮನ ಏಕ್‍ ಜ಼ಣನ ಕಾಹೆ ಏಕ್‌ ಕೊಂತೆ ಏಕ್‌ ಪರಕ್ಮ ಇನೆ ಘಣ ಅದ್ಮಿನ ದುಖ್ ದೀರಾಖ್ಯೊಸ್. ಯೋ ದುಖ್ ಖ್ಹಾರಾಸ್‌ಮ ಹುಯುಕರಿ ಮೇ ಬೋಲುಕೊಯ್ನಿ.
2CO 2:6 ತುಮೆ ಖ್ಹಾರು ಮಳೀನ್‍ ದಿದಾತೆ ನಿಶತಸ್‍ ಬಶ್‌.
2CO 2:7 ಹಮ್ಕೆ ತುಮೆ ಇನ ಮಾಪ್ ಕರಿನ್ ಭಾಲಿದೆವ್ಣು. ಕೊಯ್ನಿಕತೊ ಯೋ ಘಣ ದುಖ್‍ಮ ಡುಬಿಜಾ಼ಶೆ.
2CO 2:8 ಇನಾಖ್ಹಾಜೆ, ತುಮೆ ಇನ ಪ್ಯಾರ್ ಕರೋಸ್ ಕರಿ ಇನ ವತಾಳ್ಣು ಕರಿ ಮೇ ತುಮುನ ಬೋಲಿಲೆವುಸ್.
2CO 2:9 ಖ್ಹಾರೀಸ್‍ ವಾತ್ನಿ ಬಾರೇಮ ತುಮೆ ಮುಡ್‌ಕ್ಯು ಝು಼ಕಾವವಾಳ ಹುಯಿರ‍್ಹಾಸ್ಕಿ ಕೊಯ್ನಿ. ಕಾಯಿತೋಬಿ ತುಮುನ ತರೀಪ್ಷ ಕರಿನ್ ಮಾಲುಮ್ ಕರಿಲ್ಯಾವಾನ ಮೇ ತುಮುನ ಆ ಚಿಟ್ಟಿನ ಲಿಖ್ಯೋತೆ.
2CO 2:10 ತುಮೆ ಕಿನ ಮಾಪ್ ಕರೋಸ್ಕಿ ಮೇಬಿ ಇವ್ಣುನ ಕ್ಷಮಾಪಣ್ ಕರುಸ್. ತುಮಾರ ಖ್ಹಾಜೆಸ್ ಇನ ಕ್ರಿಸ್ತನ ಖ್ಹಾಮ್ಣೆ ಕ್ಷಮಾಪಣ್ ಕರುಸ್.
2CO 2:11 ಅಮ್‍ ಶೈತಾನ್‍ ಅಪ್ಣುನ ಠಗಾವ್ಣುನಾಕರಿ ಅಮ್‌ಕರ‍್ಯೊ. ಶನಕತೊ ಇನಿ ಖರಾಬ್‌ಖ್ಹೂಜ಼್‌ ಅಪ್ಣುನ ಮಾಲುಮ್ ಛಾ಼.
2CO 2:12 ಮೇ ಕ್ರಿಸ್ತನಿ ಸುವಾರ್ತೆನ ಬೋಲಾನ ತ್ರೋವ ಖ್ಹಯೇರ‍್ನ ಜಾ಼ವಾನಖ್ಹಾಜೆ ಪ್ರಭುನೆ ಗೋರ್‌ಥಿ ಮನ ಬಾಕಲ್‌ಕಾಡಿನ್ ಅಛ್ಛು಼ ಮಾರಗ್ ವತಾಳ್ಯೊ,
2CO 2:13 ಕತೋಬಿ ಮಾರೊ ಭೈ ಹುಯಿರೋತೆ ತೀತನ ಮೇ ಹಿಜ್ಜಾ಼ ದೇಖ್ಯೊಕೊಂತೆ ಮಾರ ದಿಲ್ನ ಸಮಾಧಾನ್ ಕೋಥೂನಿ. ಇನಖ್ಹಾಜೆ ಮೇ ಇವ್ಣುನ ಧನ್ಯವಾದ್‌ ಬೋಲಿನ್ ಹಿಜ಼್ಜಾಥೊ ಮೆಕೆದೋನಿಯನ ನಿಕ್‍ಳ್ಯೊ.
2CO 2:14 ಕತೋಬಿ ಮೇ ದೇವ್ನ ಧನ್ಯವಾದ್ ಕರುಸ್. ಯೋ ಹಮೂನ ಕ್ರಿಸ್ತನಿ ಗಳ್‌ಜೋ಼ಡ್ಮ ಕದೇಬಿ ಜೀತ್‍ನಿ ಜಯಭಣಿ ಚ಼ಲಾವ್ತೊ ಹುಯಿನ್ ಅಜು಼ ಇನಿ ಗ್ಯಾನ್ನಿ ಅಛ್ಛಿ ವಾಖ್ಹ್‌ನ ಅಖ್ಖಿಬಾಜು಼ ಹಮಾರೇಥಿ ಫೈಲಾವವಾಳ ದೇವ್ನ.
2CO 2:15 ರಕ್ಷಣೆನ ಮಾರಗ್‍ಮ ರ‍್ಹವಾಳಮಾಬಿ ಬಿಜು಼ ನಾಶನನ ಮಾರಗ್‍ಮ ರ‍್ಹವಾಳಮಾಬಿ ಹಮೆ ದೇವ್ನ ಖ್ಹಾಮ್ಣೆ ಕ್ರಿಸ್ತಮ ಮಹಿಕವ್‌ ಕರಿಯೇಸ್.
2CO 2:16 ನಾಶನನ ಮಾರಗ್‍ಮ ರ‍್ಹವಾಳ ಅದ್ಮಿವೋನ ಮರಣ್ಣು ವಾಖ್ಹ್‌ಹುಯಿರಾಸ್, ರಕ್ಷಣೆನ ಮಾರಗ್‍ಮ ರ‍್ಹವಾಳ ಅದ್ಮಿನ ಜಿವ್ತುಜಾನ್ನೊ ಮಾರಗ್ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ಆ ಕಾಮ್‍ಕರ‍್ವಾನ ಕೋಣ್ ಯೋಗ್ಯ ಹುಯಿರುಸ್?
2CO 2:17 ಕೈಏಕ್ ಜ಼ಣು ದೇವ್ನಿವಚನ್ನ ಮಿಲಾವಟ್ ಕರಿ ಬೇಪಾರ್ ಕರಾಸ್. ಹಮೆತೋಬಿ ಇಮ್‌ಕಾಹೆ ದೇವ್‌ಮ ರ‍್ಹೀನ್, ದೇವ್ನಖ್ಹಾಮ್ಣೆ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಬರೋಬರ್ ಖೀವೂಕಿ ತೀನಸ್ ಹಮೆ ಬೋಧನೆ ಕರೇಸ್.
2CO 3:1 ಹಮೆ ಹಮಾರಿ ಬಾರೇಮ ಬಿಜು಼ಪಾಛ಼ ಖ್ಹರೈಲ್ಯಾವಾನ ಶುರು ಕರ‍್ಯಾಕಿಶು? ಕೊಯ್ನಿ, ಥೋಡ ಜ಼ಣನ ಹೋಣುತೆ ತಿಮ್ ತುಮಾರಕನ ಆವಾನ ಮನ ಯೋಗ್ಯತೆನು ಚಿಟ್ಟಿ ಮಾಂಗಿಲೆವ್ಣು ಕಿಶು? ಕೊಯ್ನಿ, ಬಿಜಿ ಆಡಿ ಜಾ಼ವಾನಿ ವಖ್ಹತ್‌ಮ ತುಮಾರೇಥಿ ಯೋಗ್ಯತೆನಿ ಚಿಟ್ಟಿ ಮಾಂಗಿಲೆವ್ಣುಕಿಶು?
2CO 3:2 ಶೊಂತ್ ತುಮೇಸ್ ಹಮೂನ ಯೋಗ್ಯತೆನಿ ಚಿಟ್ಟಿ ಹುಯಿರ‍್ಹಾಸ್. ಯೋ ಚಿಟ್ಟಿಖ್ಹಾರಿ ಹಮಾರ ದಿಲ್ಮ ಲಿಖೈರ‍್ಹುಸ್. ಯೋ ಚಿಟ್ಟಿ ಖ್ಹಾರಸ್ನ ಮಾಲುಮ್, ಖ್ಹಾರುಸ್ ಪಢಾಸ್.
2CO 3:3 ತುಮೆ ಹಮಾರಿ ಸೇವೆನ ಫಲ್‌ಥಿ, ಕ್ರಿಸ್ತನೆ ಹಮಾರ ಹಾತೇಥಿ ಲೀಖೈನ್ ದಿದೊತೆ ಚಿಟ್ಟಿಕರಿ ಮಾಲುಮ್‌ಕರಾಯ ಆ ಚಿಟ್ಟಿ ಲೀಖೈರ‍್ಹೂತೆ ಇಂಕ್‍ಥಿ ಕಾಹೆ,ಜಿವ್ತೊಜಾನ್ನೊ ದೇವ್ನ ಆತ್ಮಥಿ ಅನ ಬಂಡಾನ ಪಲ್ಗಾಪರ್‌ ಕಾಹೆ, ಅದ್ಮಿನ ದಿಲ್ನ ಪಲ್ಗಾಪರ್‌ ಲೀಖೈರಾಖ್ಯೊಸ್.
2CO 3:4 ಆಥ್ರಾನು ಭರೋಖ್ಹೊ ಕ್ರಿಸ್ತಮಥೂಸ್ ದೇವ್ನ ಖ್ಹಾಮ್ಣೆ ಹಮೂನ ಛಾ಼.
2CO 3:5 ಹಮಾರಿ ಶೊಂತ್ ಶಕತ್‌ಥೀಸ್‌ ಹಮೆ ಕೆಹುತೋಬಿ ಅಛ್ಛು಼ಕರ್‌ಶು ಕರಿ ಮೇ ಬೋಲುಕೊಯ್ನಿ. ಅಥ್ರಾನಿ ಶಕತ್‍ ಅಪ್ಣುನ ದೇವ್‍ಥೀಸ್‍ ಅಯಿರ‍್ಹೂಸ್.
2CO 3:6 ದೇವ್ ನವಿ ಒಪ್ಪಂದಾನನ ಸೇವೆಕರಾವಾಳ ಹುಯಿರಾವಾನಿ ತಾಖತ್ನ ದೇವ್ನೆಸ್ ಹಮೂನ ದಿದೊ. ಆ ನವಿ ಒಪ್ಪಂದಾನ ಲೀಖಾವನಿ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಕಾಹೆ. ಆ ಹುಯಿರ‍್ಹುತೆ ಪವಿತ್ರಾತ್ಮ ಹುಯಿರುಸ್. ಲಿಖಾವಟ್‌ನ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಮರಣ್ಣ ಲ್ಯಾವ್‌ಶೆ, ಕತೋಬಿ ಪವಿತ್ರಾತ್ಮ ಜಾನ್‌ ದ್ಯಾವಾಳೊ ಹುಯಿರೋಸ್.
2CO 3:7 ಮರಣ್‍ದ್ಯವಾನು ನಿಯಮ್‌ನು ಸೇವೆ ಬಂಡಾನು ಪಲ್ಗಾನ ಉಪ್ಪರ್ ಲೀಖ್ಯಮ ಲೀಖೈರ‍್ಹೂಥು. ಯೋ ದೇವ್‌ನು ಮಹಿಮೆನ ಜೋ಼ಡ್ಮ ಆಯುಥು. ಮೋಶೇನು ಮ್ಹೋಡು ಉಜಾ಼ಖ್ಹ್‌ಥಿ ಚ಼ಮ್‍ಕುಕರ‍್ತೂಥುತೆ ಇನಾಖ್ಹಾಜೆ ಇಸ್ರಾಯೇಲ್‌ವಾಳು ಇನ ಮ್ಹೋಡಾನ ದೇಖಾನ ಹುಯುಕೋಯ್ನಿ. ಇನಪಾರ್ ಯೋ ಮಹಿಮೆ ಕಮ್ ಹುಯಿಗು.
2CO 3:8 ಅನಾಖ್ಹಾಜೆ ಪವಿತ್ರಾತ್ಮ ಸಂಬಂದನಿ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್.
2CO 3:9 ಅನಿ ಅರ್ಥ ಶಾತ್‍ಕತೊ; ಯೋ ಸೇವೆ ಅದ್ಮಿನ ಅಪರಾದಿಕರಿ ತೀರ್ಪ್‍ದಿದು, ಕತೋಬಿ ಯೋ ಮಹಿಮೆನ ಲೀರಾಖ್ಯುಥು. ಅನಖ್ಹಾಜೆ, ನೀತಿನ ಕಫ್ಫನ್ ಹುಯಿರ‍್ಹುತೆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಉಬ್‍ಜಾ಼ವಾನು ಕೆತ್ರೇಕ್ಕಿ ಖ್ಹಾಚಹುಯಿರೂಸ್.
2CO 3:10 ಯೋ ಜೂ಼ನಿ ಸೇವೆ ಮಹಿಮೆನ ಲೀರಾಖ್ಯುಥು. ಕತೋಬಿ ನವಿ ಸೇವೆನ ಖ್ಹಾಮ್ಣೆ ಯೋ ಮಹಿಮೆಕೊಂತೆ ಹುಯಿಗಯು.
2CO 3:11 ನೂಛೈ಼ಗಿತೆ ಯೋ ಸೇವೆ, ಮಹಿಮೆನಿ ಜೋ಼ಡ್ಮ ಐರ‍್ಹುಉಶೇತೊ, ಕದೆಕದೇಬಿ ಭಡ್ತಿ ಜಾ಼ವಾನಿ ಆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್.
2CO 3:12 ಶನಕತೊ ಹಮೂನ ಆ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಘಣು ಹಿಮ್ಮಥಿಛಿಯೆ.
2CO 3:13 ಕಂಬ್‍ಲೈಜಾ಼ಶೆತೆ ಮಹಿಮೆ ಉಜೈ಼ಜಾಯಿತೆ ಇನ ಇಸ್ರಾಯೇಲ್‌ವಾಳು ನಾ ದೇಕ್ಣುತೆ ತಿಮ್ ಮೋಶೆ ಇನ ಮ್ಹೋಡಾನಪರ್ ಘುಮ್‍ಟೊ ನಾಖಿಲೇತೋಥೊ. ಹಮೆ ಮೋಶೆನಿಘೊಣಿ ಕಾಹೆ.
2CO 3:14 ಕತೋಬಿ ಇವ್ಣಿ ಬುದ್ಧಿ ಮಂಕ್ ಹುಯಿರ‍್ಹಿಥೀತೆ ಇನಾಖ್ಹಾಜೆ ಇವ್ಣೆ ಮಾಲುಮ್ ಕರೀಲಿದುಕೊಯ್ನಿ. ಇವ್ಣೆ ಜೂ಼ನು ಒಪ್ಪಂದಾನನ ಪಢಾನಿ ವಖ್ಹ್‌ತೆ ಯೋಸ್ ಘುಮ್‍ಟೊ ಇವ್ಣ ದಿಲ್‌ಪರ್‌ ಢಪೈಜಾ಼ಸ್. ಶನಕತೊ ಖಲಿ ಕ್ರಿಸ್ತಥಿಸ್ ಯೋ ನಿಕ್‍ಳೈಜಾ಼ಶೆತೆ.
2CO 3:15 ಕತೋಬಿ ಹಮ್ಕೆಲಗೂಬಿ ಮೋಶೇನು ಧರ್ಮಶಾಸ್ತ್ರ ಪಢಾನಿ ವಖ್ಹ್‌ತೆ, ಇವ್ಣ ದಿಲ್‌ಪರ್‌ ಘುಮ್‍ಟೊ ನಖೈರ‍್ಹೇಸ್.
2CO 3:16 ಇನಾಖ್ಹಾಜೆ ಏಕ್‌ ಅದ್ಮಿ ಪ್ರಭುನ ಭಣಿ ಫರೀನ್, ಇನ ಪೀಠೆ ಚಾ಼ಲಾನಿ ವಖ್ಹತ್‌ಮ ಯೋ ಘುಮ್‍ಟೊ ನಿಕ್‍ಳೈಜಾ಼ಶೆ.
2CO 3:17 ಯೋ ಪ್ರಭುಸ್ ದೇವ್ನುಆತ್ಮ, ಪ್ರಭುನು ಆತ್ಮ ರ‍್ಹೇಸ್ತೆ ಹಿಜ್ಜಾ಼ ಛುಟ್ಕಾರ್ ರ‍್ಹೇಸ್.
2CO 3:18 ಕತೋಬಿ ಅಪ್ಣೆಖ್ಹಾರು ಮುಚೈರ‍್ಹೇಯ್‌ಕೊಂತೆ ಮ್ಹೋಡೇಥಿ ಪ್ರಭುನಿ ಮಹಿಮೆನ ಐನಾಮ ದೆಖಾವನಿತರ ಇನ ದೆಕ್ತಹುಯಿನ್ ಅಪ್ಣೆಖ್ಹಾರು ಪ್ರಭುನಿ ಆತ್ಮನಿ ಮಹಿಮೆಥಿ ಜಾ಼ಖ್ಹತ್‌ಹುಯಿನ್ ಯೊ ಮಹಿಮೆನ ರೂಪ್ ಲ್ಯವಾಳ ಹುಯೆಸ್. ಆ ಆತ್ಮ ಹುಯಿರ‍್ಹೋತೆ ಪ್ರಭುನು ಕಾಮಸ್.
2CO 4:1 ದೇವ್ನೆ ಇನಿ ಗೋರ್‌ಥಿ ಆ ಸೇವೆನ ಹಮೂನ ದಿದೋತೆ, ಇನಾಖ್ಹಾಜೆ ಹಮೆ ಹಿಮ್ಮತ್ ಮ್ಹೆಂದಿನ್‍ ಪಾಛ಼ ಫರೀಯೆ ಕೊಯ್ನಿ.
2CO 4:2 ಗಪ್ಲತ್‍ನು ಬಿಜು಼ ಖ್ಹರಮ್‌ ಕಡೈಲ್ಯಾವಾನ ಖ್ಹಾರ ಮಾರಗ್‍ಥಿ ಹಮೆ ದೂರ್ ಹುಯಿರಾಸ್‍. ಬಿಜು಼ ಹಮೆ ಮಶ್ಲತ್ ಭಂದೈಯೇ಼ ಕೊಯ್ನಿ. ದೇವ್ನಿ ವಚನ್‍ಮ ಮಿಲಾವಟ್ ಕರಿಯೆಕೊಯ್ನಿ. ಹಮೆ ಖ್ಹಾಚ಼ನ ಛೋ಼ಡಿನ್ ಬೋಲ್ಯೆಸ್‍. ಹಮೆ ನೀತಿವಾಳಕರಿ ಹರೇಕ್ ಅದ್ಮಿನಿ ದಿಲ್ನಿಸಾಕ್ಷಿ ದೇವ್ನ ಖ್ಹಾಮ್ಣೆ ಮಾನಿಲ್ಯವಾನಿ ಪರಕ್ಮ ಚಾ಼ಲೆಯೇಸ್.
2CO 4:3 ಹಮೆ ಬೋಲೇತೆ ಸುವಾರ್ತೆ ಥೋಡಜ಼ಣಾನ ಲಪಿರ‍್ಹೂಉಷೆತೊ ನಾಶನನ ಮಾರಗ್‍ಮ ರ‍್ಹವಾಳನ ಖಲಿ ಯೋ ಲಪಿರ‍್ಹೂಸ್.
2CO 4:4 ದೇವ್‌ನೊ ರೂಪ್ ಹುಯಿರೋತೆ ಕ್ರಿಸ್ತನಿ ಉಜಾ಼ಖ್ಹ್‌ನ ವತಾಳನು ಮಹಿಮೆನಿ ಸುವಾರ್ತೆ ಅವ್ಣಾಮ ಉಜಾ಼ಖ್ಹ್‌ ನಾಹೊಣುಕರಿ, ಆ ಜಗತ್‌ನು ದೇವ್‌ ವಿಶ್ವಾಸ್‌ಕೊಂತೆ ಇವ್ಣ ದಿಲ್ನ ಕಾಣು ಕರಿನಾಖ್ಯು.
2CO 4:5 ಅಪ್ಣುನ ಅಪ್ಣೆಸ್ ಪ್ರಚಾರ್ ನಾಕರ‍್ನುತೆ ಅಪ್ಣುನ ಯೇಸುನ ಖ್ಹಾಜೆ ತುಮಾರ ದಾಸಕರಿ ಬೋಲಿನ್ ಕ್ರಿಸ್ತ ಯೇಸುನಾಸ್ ಪ್ರಭುಕರಿ ಬೋಲೆಸ್.
2CO 4:6 “ಉಜಾ಼ಳು ಅಂಧಾರನ ಮಹಿಥು ಉಜಾ಼ಖ್ಹ್‌ ಮ್ಹೇಲಾದೆ” ಕರಿ ದೇವ್ನೆ ಏಕ್‌ ವಖ್ಹತ್ ಬೋಲಿರಾಖ್ಯೊಸ್. ಯೋ ದೇವಸ್ ಹಮಾರಿ ದಿಲ್ನ ಇನ ಉಜಾ಼ಳೇಥಿ ಉಜಾ಼ಖ್ಹ್‌ ಕರಿರಾಖ್ಯೋಸ್. ಕ್ರಿಸ್ತನ ಮ್ಹೋಡಪರ್ ಛಾ಼ತೆ ದೇವ್ನಿ ಮಹಿಮೆನ ಹಮೂನ ಖ್ಹಮ್‍ಜಾ಼ಡಾಥಿ ಇನೆ ಹಮೂನ ಉಜಾ಼ಳು ದೀರಾಖ್ಯೊಸ್.
2CO 4:7 ಮಾಟಿನ ಮಟ್ಕಾನಿ ತರ ಛಿಯೇತೆ ಅಪ್ಣಾಮ ಆ ನಿಧಿ ಮ್ಹೆಲಿರಾಖ್ಯುತೆ ಇನಖ್ಹಾಜೆ ಅಥ್ರಾನಿ ಮಹಾನ್ ಶಕತ್ ದೇವ್‍ನೀಸ್ ಪಣ್ಕಿ ಅಪ್ಣಾಮಾಥು ಆಯುಕೊಂತೆ ಖ್ಹಾಚಿಸ್.
2CO 4:8 ಅಖ್ಖಿಬಾಜು಼ ಅಪ್ಣುನ ಕಲಾವ್ಣಿ ರ‍್ಹಯುತೋಬಿ ದಿಲ್‍ದುಖೈಲಿಯೇ ಕೊಯ್ನಿ. ಅಪ್ಣುನ ರುಕ್‍ ನಾದೇಖಾಯುತೋಬಿ ಅಪ್ಣೆ ದುಖ್ ಕರಿಯೇಕೊಯ್ನಿ.
2CO 4:9 ಹಿಜ್ಜಾ಼ ಕೈಏಕ್ ವಹೇರ‍್ಯುರ‍್ಹಯುತೋಬಿ ಹಾತ್‌ ಮ್ಹೆಲೈಗಯ ಕೊಯ್ನಿ. ಕತೋಬಿ ಹೇಟ್‍ ಪಡಿಗಯಾತೋಬಿ ನಾಶ್‍ಹುವಾಳ ಕಾಹೆ.
2CO 4:10 ಹಮಾರ ಶರೀರ್‌ಮ ಯೇಸುನೊ ಜಾನ್‌ ಅಪ್ಣಾಮ ಛಾ಼ಕರಿ ವತಾಳನಖ್ಹಾಜೆ ಇನಿ ಮರಣ್ಣಿ ಖ್ಹತಾಪ್ಣಿನ ಅನುಭವ್‍ ಕರಿಯೇಸ್.
2CO 4:11 ಯೇಸುನೊ ಜಾನ್ನ ಅಪ್ಣೆ ಮರ‍್ಯಹುಯ ಶರೀರ್‌ಮ ಛಾ಼ಕರಿ ವತಾಳನಖ್ಹಾಜೆ ಜಿವ್ತಛಿಯೇತೆ ಅಪ್ಣೆ ಯೇಸುನಖ್ಹಾಜೆ ಕದೇಬಿ ಮರಣ್ಣ ದೇತಾ ಛಿಯೆ.
2CO 4:12 ಇನಾಖ್ಹಾಜೆ ಮರಣ್ ಹಮಾರಮ ಕಾಮ್ ಕರುಕರಸ್, ಕತೋಬಿ ತುಮಾರಮ ಜಾನ್‌ ಕಮ್ ಕರುಕರಸ್.
2CO 4:13 “ಮೇ ವಿಶ್ವಾಸ್ ಕರ‍್ಯೊತೆ ಇನಖ್ಹಾಜೇಸ್ ವಾತ್‍ಬೋಲ್ಯೊತೆ.” ಕರಿ ಪವಿತ್ರದಪ್ತರ್‌ಮ ಲಿಖೈರ‍್ಹುಸ್. ವಿಶ್ವಾಸ್‍ನು ಯೋಸ್ ಆತ್ಮ ಅಪ್ಣಾಮ ಛಾ಼ತೆ ಇನಖ್ಹಾಜೆ ಅಪ್ಣೆ ನಂಬವಾಳಹುಯಿನ್ ವಾತೆ ಬೋಲಿಯೇಸ್.
2CO 4:14 ಪ್ರಭು ಹುಯಿರೋತೆ ಯೇಸುನ ಮರ‍್ಯಾಹುಯಾಮಾಥು ಉಠಾಡ್ಯೋತೆ ದೇವ್ ಹಮುನಾಬಿ ಕ್ರಿಸ್ತನಿ ಜೋ಼ಡ್ಮ ಉಠಾಡ್‍ಶೆ ಕರಿ ಬೋಲಾನು ಹಮೂನ ಮಾಲುಮ್‌ಛಾ಼. ದೇವ್ ಹಮೂನ ತುಮಾರಿ ಜೋ಼ಡ್ಮ ಇನಖ್ಹಾಮ್ಣೆ ಭೀರಾಕ್‌ಶೆ.
2CO 4:15 ಆ ಖ್ಹಾರು ತುಮಾರು ನಫ್ಪಾನ ಖ್ಹಾಜೆಸ್. ಅಮ್ ದೇವ್ನಿ ವಾರ್‌ಖ್ಹೊ ಜಾ಼ಖ್ಹತ್, ಜಾ಼ಖ್ಹತ್ ಅದ್ಮಿನ ದೆವಾವ್‌ಶೆ ಇನಾಖ್ಹಾಜೆಥಿ, ಘಣು ಘಣು ಅದ್ಮಿ ದೇವ್ನಿ ಮಹಿಮೆನಖ್ಹಾಜೆ ಧನ್ಯವಾದ್‍ನಿ ಸ್ತುತಿ ಕರ್ಶೆ.
2CO 4:16 ಅನಖ್ಹಾಜೆಥೀಸ್ ಹಮೆ ಕದೇಬಿ ಡರ್‌ಶುಕೊಯ್ನಿ. ಅಪ್ಣು ತನ್ ನಾಶ ಹುಯಿಗುತೋಬಿ ಅಪ್ಣು ದಿಲ್‌ ದನ್‍ಪರ್ ದನ್ ನವು ಹೋತುಆವ್‍ಶೇ.
2CO 4:17 ಥೋಡ ದನ್‌ಲಗು ಹಮೂನ ನ್ಹಾನಿಮೋಟಿ ಖ್ಹತಾಪ್ಣಿ ರ‍್ಹಿಶೆ. ಕತೋಬಿ ಹರ್‌ಹಮೇಶಾನಿ ಮಹಿಮೆನ ಲೀಲ್ಯಾವಾನ ಯೋ, ಅಪ್ಣುನ ಮದತ್ಉಶೇ. ಯೊ ಮಹಿಮೆ ಹಮ್ಕೇನಿ ಖ್ಹತಾಪ್ಣಿಥೀಬಿ ಮಹಾನ್ ಹುಯಿರ‍್ಹಿಶೆ.
2CO 4:18 ಅಪ್ಣೆ ದೆಖಾವತೆ ಇನಅಖ್ಖು ದೆಖ್ಯೆಕೊಂತೆ ಛಾ಼ತೆ ಇನ ದೇಖವಾಳ ಹುಯಿರಾಸ್. ಶನಕತೊ ದೆಖಾವತೆ ಅಖ್ಖು ಥೋಡಿ ವಖ್ಹತ್‌ಖಲಿ ರ‍್ಹೇಸ್. ದೆಖಾವಕೊಂತೆ ಯೋ ಹರ್‌ಹಮೇಶ ರ‍್ಹೇಸ್.
2CO 5:1 ಧರ್ತಿಪರ್ ಅಪ್ಣೆ ಜಿವಿರ‍್ಹಾತೆ ಆ ಡೇರೊ ಕತೊ ಆ ಶರೀರ್ ನಾಶ ಉಷೆಕರಿ ಅಪ್ಣುನ ಮಾಲುಮ್‌ಛಾ಼. ಅಪ್ಣೆ ಜಿವಿರ‍್ಹಾವಾನ ಖ್ಹಾಜೆ ದೇವ್ ಅಪ್ಣುನ ಏಕ್‌ ಘರ್‌ದಿಶೆ. ಯೋ ಅದ್ಮಿನ ಹಾತೇಖ್ಹು ಕರ‍್ಯುಹುಯು ಘರ್‌ಕಾಹೆ. ಯೋ ಪರ್‌ಲೋಕ್‌ಮ ದೇವ್‍ಥಿ ಬಣಾಯುಹುಯು ಹರ್‌ಹಮೇಶ ರ‍್ಹವಾನು ಘರ್ ಹುಯಿರುಸ್.
2CO 5:2 ಅಪ್ಣೆ ಆ ಶರೀರ್‌ಮ ರ‍್ಹವಾಲಗೂಬಿ ಕುರ್ಲಾವ್‍ತಾ ಹುಯಿನ್ ರ‍್ಹಿಶು. ಪರ್‌ಲೋಕ್ಮ ಮಳ್‌ಶೇತೆ ಅಪ್ಣ ಘರ್‌ನ ಅಪ್ಣೆ ಕದೆ ಲೀಲಿಶುಕರಿ ಉತ್ವಾಳಿ ಕರಿಯೇಸ್.
2CO 5:3 ಅಪ್ಣೆ ಇನ ಫೇರಿಲಿದತೊ ಉಘಾಡ ಹುಯಿರ‍್ಹಿಶು ಕೊಯ್ನಿ.
2CO 5:4 ಆ ಧರ್ತಿನ ಡೇರಾಮ ರ‍್ಹಾವಾಲಗು ಅಪ್ಣುನ ವಜ಼ನ್ನೊ ಭೋಜೊ ಪಾಡಿಲೀನ್ ಥರ್‌ಪಡೇಸ್; ಆ ಶರೀರ್ ಉಘಾಡು ಹುಯಿರ‍್ಹೇವ್ಣುಕರಿ ಕಾಹೆ; ಇನ ಬದಲ್ ಅಪ್ಣೆ ಪರ್‌ಲೋಕ್‌ನು ಘರ್‌ನ ಫೇರಿಲ್ಯಾವಾನ ಆಖ್ಹ್‌ಕರಿಯೇಸ್. ಮರಿಜಾ಼ವಾನು ನೂಛೈ಼ಜಿನ್ ಹರ್‌ಹಮೇಶ ಜಿವ್ತು ರ‍್ಹವಾನಾಸ್ ಆಖ್ಹ್ ಕರಿಯೇಸ್.
2CO 5:5 ಅನಾಖ್ಹಾಜೆಥೀಸ್ ದೇವ್ ಅಪ್ಣುನ ಬದಲಾವ್‍ ಹುವಾನಖ್ಹಾಜೆ ತಯಾರ್ ಕರಿರಾಖ್ಯೋಸ್ ಬಿಜು಼ ಅನ ಸಾಬಿತ್ ಕರಾನ ಪವಿತ್ರಾತ್ಮನಾಸ್ ಅಪ್ಣುನ ದಿರಾಖ್ಯೊಸ್.
2CO 5:6 ಇನಾಖ್ಹಾಜೆ ಹಮೆ ಕದೇಬಿ ಭಾಲಿಥಿ ಛಿಯೆ ಬಿಜು಼ ಆ ಶರೀರ್‌ಮ ಜಿವ್ಣುಕರ‍್ವಾಲಗೂ ಪ್ರಭುಥಿ ದೂರ್ ಹುಯಿರ‍್ಹಿಶು ಕರಿ ಭರೋಖ್ಹೊ ಲೀರಾಖವಾಳ ಹುಯಿರ‍್ಹಾಸ್.
2CO 5:7 ಶನಕತೊ ಹಮೆ ಕಿನ ದೇಖು ಕರಿಯೇಸ್‍ಕಿ ಇನೇಥಿ ಜಿವ್‍ಕರಿಯೇಕೊಯ್ನಿ. ಕತೋಬಿ ಕೆವ್ಹಾನ ವಿಶ್ವಾಸ್ ಕರಿರಾಖ್ಯಾಸ್‌ಕಿ ಇನೇಥಿ ಜಿವ್‌ಕರಿಯೇಸ್
2CO 5:8 ಇನಾಖ್ಹಾಜೆ ಹಮೆ ಭಾಲಿವಾಳ ಹುಯಿರ‍್ಹಿನ್ ಶರೀರ್‌ನ ಮ್ಹೇಲಿನ್ ಪ್ರಭುನಿ ಜೋ಼ಡ್ಮ ಜಾ಼ವಾನೂಸ್ ಅಛ್ಛು಼ಕರಿ ಆಖ್ಹ್ ಕರಿಯೇಸ್.
2CO 5:9 ದೇವ್ನ ಪಸಂದ್ ಕರಾವಾನೂಸ್ ಹಮೂನ ಛಾ಼ತೆ ಖ್ಹಯಾಲ್, ಹಮೆ ಹಮಾರ ಶರೀರ್‌ಮ ಹಜ್ಜಾ಼ ಜಿವಿರ‍್ಹಾವಾನಿ ವಖ್ಹತ್‍ಬಿ ಪ್ರಭುನಿ ಜೋ಼ಡ್ಮ ಹಿಜ್ಜಾ಼ ಜಿವಿರ‍್ಹಾವಾನಿ ವಖ್ಹತ್‍ಮಾಬಿ ದೇವ್ನ ಪಸಂದ್ ಕರಾವಾನೂಸ್ ಹಮಾರಿ ಹರಖ್ಹ್ ಹುಯಿರ‍್ಹೀಸ್.
2CO 5:10 ಅಪ್ಣೆಖ್ಹಾರು ನ್ಯಾವ್ನಖ್ಹಾಜೆ ಕ್ರಿಸ್ತನ ನ್ಯಾವ್ನಿಝಗೊನ ಖ್ಹಾಮ್ಣೆ ಭಿರೇವ್ಣುಸ್‍ ಭೀರೇವ್ಣು. ಹರೇಕ್ ಜ಼ಣು ಆಲೋಕ್‍ನ ಶರೀರ್‌ಮ ಜಿವಿರ‍್ಹಾವಾನಿ ವಖ್ಹತ್‌ಮ ಕರಿರಾಖ್ಯೊತೆ ಅಛ್ಛಾ಼ನಖ್ಹಾಜೆ ರ‍್ಹವೊ ಖರಾಬ್‍ನಖ್ಹಾಜೆ ರ‍್ಹವೊ ಹೋಣುತೆ ಪ್ರತಿಫಲ್ ಲಿಶೆ.
2CO 5:11 ಪ್ರಭುನೊ ಡರ್‌ಕತೊ ಶಾತ್‌ಕರಿ ಹಮೂನ ಮಾಲುಮ್‌ಛಾ಼. ಇನಾಖ್ಹಾಜೆ ಅದ್ಮಿವೋನ ಮಾಲುಮ್ ಕರಿಯೇಸ್. ಕತೋಬಿ ಅಪ್ಣೆ ದೇವ್ನ ಮಾಲುಮ್‌ ಹುಯಿರುಸ್. ಯೊ ತುಮಾರಿ ದಿಲ್ನಿಸಾಕ್ಷಿನಾಬಿ ಮಾಲುಮ್ ಹುಯಿರ‍್ಹುಸ್‌ಕರಿ ಮೆ ವಿಶ್ವಾಸ್ ಕರಾವಾಳೊ ಹುಯಿರೊಸ್.
2CO 5:12 ಹಮಾರು ಹಮೇಸ್ ಪಾಛು಼, ಪಾಛು಼ ತುಮಾರ ಖ್ಹಾಮ್ಣೆ ಖ್ಹರೈಲಿಯೇ ಕೊಯ್ನಿ; ದಿಲ್ನ ಮಹಿನು ಮಾಲುಮ್ ಕರ‍್ಯುಕೊಂತೆ ಇನ ಭಾರ್‌ಲಿ ಶನ್‌ಗಾರ‍್ನ ದೇಖಿನ್ ಖುಷಿಕರವಾಳನಾಸ್ ಬರೋಬರ್‌ನಿ ಫೇಡ್‍ ದ್ಯವಾನ ತುಮೂನ ಉಷೆ.
2CO 5:13 ಶನಕತೊ ಹಮೆ ದಿವಾನ ಹುಯಿರ‍್ಹಉಶೇತೊ ಯೊ ದೇವ್ನ ಮಹಿಮೆನ ಖ್ಹಾಜೆಸ್. ಹಮೂನ ಅಛ್ಛಿ ಬುದ್ಧಿ ಉಶೇತೊ ಯೊ ತುಮಾರ ಫಾಯಿದಾನ ಖ್ಹಾಜೆಥೀಸ್.
2CO 5:14 ಕ್ರಿಸ್ತನಿ ಪ್ಯಾರ್‌ ಅಪ್ಣುನ ಖ್ಹೂಜ಼್‌ ಕರಾವಸ್, ಶನಕತೊ ಅಖ್ಖಾ ಅದ್ಮಿನಖ್ಹಾಜೆ ಏಕ್‌ ಅದ್ಮಿ ಮರ‍್ನುಕರಿ ಹಮೂನ ಮಾಲುಮ್‌ಛಾ಼. ಇನಾಖ್ಹಾಜೆ ಅಪ್ಣೆ ಅಖ್ಖುಜ಼ಣು ಮರಿಗಯಹುಯಾಮ ಭಾಗ್‌ ಹುಯಿರ‍್ಹಾಸ್.
2CO 5:15 ಜಿವಾವಾಳು ಅನಾಪರ್ ಇವ್ಣಖ್ಹಾಜೆ ನಾ ಜಿವ್ಣುಕರಿ ಕ್ರಿಸ್ತನೆ ಅಖ್ಖಾಸ್ ಅದ್ಮಿನಖ್ಹಾಜೆ ಮರ‍್ಯೊ. ಯೋ ಅದ್ಮಿಖ್ಹಾರು ಇನಖ್ಹಾಜೆ ಜಿವ್ಣುಕರಿ ಯೋ ಇವ್ಣಖ್ಹಾಜೆ ಮರ‍್ಯೊ. ಬಿಜು಼ ಮರ‍್ಯಾಹುಯಾಮಾಥು ಜಿವಿನ್ ಉಠಿ ಆಯೋ.
2CO 5:16 ಅಮ್‍ರ‍್ಹವಾಪರ್ ಲೋಕ್ ಅದ್ಮಿನಿ ಬಾರೇಮ ಸೋಚಾನಿತರ ಹಮ್ಕೆಥು ಹಮೆ ಕಿನಿ ಬಾರೇಮಾಬಿ ಸೋಚಿಯೆಕೊಯ್ನಿ. ಲೋಕ್ ಸೋಚಾನಿತರ ಅಗ್‍ಲ್ಯ ಹಗಾಮ್ಮ ಹಮೆ ಕ್ರಿಸ್ತನಿ ಬಾರೇಮ ಸೋಚಿಲಿದಾಥ. ಕತೋಬಿ ಹಮ್ಕೆಥು ಕಿನಾಬಿ ಯೋ ಪರಕ್ಮ ಸೋಚಿಯೆಕೊಯ್ನಿ.
2CO 5:17 ಇನಖ್ಹಾಜೆ ಕೋಣ್‌ತೋಬಿ ಕ್ರಿಸ್ತಮ ರ‍್ಹಯುತೊ, ಯೊ ನವೇಥಿ ಉಬ್ಜಿರ‍್ಹೋಸ್. ಹಂದೇಖೊ, ಜೂ಼ನು ಚಾ಼ಲ್ಯೂತೆ ಅಖ್ಖೂಸ್ ನೂಛೈ಼ಗಯು; ನವೇಥಿ ಜ಼ಲಮ್‍ಲಿದು.
2CO 5:18 ಆ ಅಖ್ಖು ದೇವ್‍ಥೀಸ್‍ ಹುಯೂತೆ. ದೇವ್ ಕ್ರಿಸ್ತಥಿಸ್ ಅಪ್ಣುನ ಹೇಳ್‌ಮೇಳ್ ಕರೈಲೀನ್, ಎಕ್ಟುಕರಾನಿ ಸೇವೆನ ಅಪ್ಣುನ ದೀರಾಖ್ಯೊಸ್.
2CO 5:19 ಕಿಮ್‌ಕತೊ ದೇವ್ ಕ್ರಿಸ್ತಮ ಹಿಡಿ ಜಗತ್‍ನಾಸ್ ಇನಿಜೋ಼ಡ್ಮ ಒಪ್ಪಂದ ಕರಿಲೆತೋಥೊ. ದೇವ್ ಕ್ರಿಸ್ತಮ ಅದ್ಮಿನ ಅಪರಾದ್‌ನ ಗಣ್ತಿಕರಾಕೊಯ್ನಿ. ಆ ಒಪ್ಪಂದಾನಿ ಸಂದೇಶ್ನ ಅದ್ಮಿನ ಖ್ಹಮ್‍ಜಾ಼ಡಾನು ಜಿಮ್ಮೆದಾರಿನ ದೇವ್ ಹಮೂನ ದೀರಾಖ್ಯೊಸ್.
2CO 5:20 ದೇವಸ್ ಹಮಾರೇಥಿ ತುಮೂನಾಬಿ ಗಿಂಗೈಲ್ಯವಾನಿಮತ್ ಹಮೆ ಹಮ್ಕೆ ಕ್ರಿಸ್ತ ಭಣೀಥು ವಾತೆ ಬೋಲವಾಳ ಹುಯಿರ‍್ಹಾಸ್ ದೇವ್ನಿಜೋ಼ಡೆ ಹಮೆ ರ‍್ಹೇವ್ಣುಕರಿ ಕ್ರಿಸ್ತನ ಬದಲ್ ಹಮೆ ತುಮೂನ ಗಿಂಗೈಲಿಯೇಸ್.
2CO 5:21 ಕ್ರಿಸ್ತಮ ಪಾಪಸ್ ಕೋಥೂನಿ. ಕತೋಬಿ ಹಮೆ ದೇವ್ನ ಸಮರ್ಪಣೆನಿ ಪರಕ್ಮ ನೀತಿಸ್ವರೂಪಿ ಹುಯಿರ‍್ಹಾವನಿತರ ದೇವ್ ಇನ ಪಾಪ ಸ್ವರೂಪಿಕರಿ ಬಣಾಯೊ.
2CO 6:1 ಹಮೆ ದೇವ್ನಿ ಜೋ಼ಡ್ಮ ಕಾಮ್ ಕರಾವಾಳ ಹುಯಿರ‍್ಹಾಸ್.ಇನಾಖ್ಹಾಜೆ ತುಮೂನ ಶಾತ್ ಬೋಲಿಲಿಯೇಸ್ ಕತೊ,ತುಮೆ ದೇವ್‍ಥಿ ಲೀರಾಖ್ಯಾತೆ ವಾರ್‌ಖ್ಹಾನ ಗುಮೈನಕೊಲಿಶು ಕರಿ ಗಿಂಗೈಲಿಯೇಸ್
2CO 6:2 ಪ್ರಸನ್ನತೆನ ಹಗಾಮ್ಮ ಮೇ ತುನ ಕಾನ್‍ದಿದೊ, ರಕ್ಷಣೆನ ದನ್ಮ ಮೆ ತುನ ಮದತ್ ಕರ‍್ಯೊ ಕರಿ ಬೋಲ್ತೊಹುಯಿನ್ ಹಂದೇಕ್ ಹಮ್ಕೇಸ್ ಯೋ ಸ್ವೀಕಾರ‍್ನೊ ದನ್, ಹಂದೇಕ್ ಯೋ ರಕ್ಷಣೆನಿ ವೇಳ್.
2CO 6:3 ಹಮಾರಿ ಚಾ಼ಕ್ರಿ ಕಿನ ಖ್ಹಾಮ್ಣೇಬಿ ಚಿಂಘಾವ್ಣಿಮ ನಾಪಡ್ನುತೆ, ಹಮೆ ಕಿನಾಬಿ ಖ್ಹತಾಯಕೊಯ್ನಿ
2CO 6:4 ಕತೋಬಿ ಹರೇಕ್ ಚಾ಼ಲ್‍ಮಾಬಿ ಹಮೆ ದೇವ್ನ ಸೇವೆಕರಾವಾಳ ಕರಿ ವತಾಳಿಲಿಯೆಸ್, ಹಮೆ ಖ್ಹತಾಪ್ಣಿಮಾಬಿ, ಶಾತ್‍ಕೊಂತೆ ತದೆಬಿ, ಝಂಝಟ್‍ಮಾಬಿ, ಮಾರೊಮಾರ್‌ಮಾಬಿ,
2CO 6:5 ಜೇಲ್‌ಮಾಬಿ, ಲಡೈಮಾಬಿ, ಖ್ಹತಾಪ್ಣಿನ ರಬೇಡ್‍ಮಾಬಿ, ನಿಂದರ್‌ ಖರಾಬ್ ಹುಯ್ಗಿತೋಬಿ, ಪಟ್ನಿರ‍್ಹಯೊತೋಬಿ, ಘಣಿ ಸಮಾಧಾನ್ನ ವತಾಳಿಲಿದ.
2CO 6:6 ಹಮೆ ದೇವ್ನ ಸೇವೆ ಕರಾವಾಳಕರಿ ಹಮಾರಿ‍‍ ಶುದ್ಧಮನ್‌ಥೀಬಿ, ಗ್ಯಾನ್‍ಥಿಬಿ, ಖ್ಹಮಾಳಿನ್‌ಚಾ಼ಲಥೀಬಿ, ಗೋರ್‌ಥೀಬಿ, ಬಿಜು಼ ಪರಿಶುದ್ ಜೀವಿತ್‍ಥಿಬಿ ವತಾಳಿಲಿದ. ಹಮೆ ಅನ ಪವಿತ್ರಾತ್ಮಥಿಬಿ, ಖ್ಹಾಚಿ ಪ್ಯಾರ್‌ಥೀಬಿ,
2CO 6:7 ಖ್ಹಾಚಿ ವಚನ್, ದೇವ್‍ಥಿ ನಿಕ್ಳಾತೆ ಶಕತ್ ಆ ಅಖ್ಖಾನ ಲೀಲಿನ್‌, ಖಾವಿಡಾವಿ ಬಾಜು಼ಮ ನೀತಿಕರಿ ಕಫ್ಫನ್ನ ಲೀರಾಖ್ಯಸ್.
2CO 6:8 ಥೋಡು ಜ಼ಣು ಹಮೂನ ಸನ್ಮಾನ್‍ಕರಸ್, ಬಿಜು಼ ಥೋಡು ಜ಼ಣು ಹಮೂನ ಖ್ಹರಮ್‍ಕಾಡಸ್, ಥೋಡುಜ಼ಣು ಖ್ಹರಾವ್ಣಿಕಾಡಸ್ ಬಿಜು಼ಥೋಡು ಜ಼ಣು ಹಮಾರಿ ಬಾರೇಮ ಖರಾಬ್ ವಾತೆ ಬೋಲಾಸ್, ಥೋಡುಜ಼ಣು ಹಮೂನ ಝೂ಼ಟ ಕರಿ ಬೋಲಸ್, ಕತೋಬಿ ಹಮೆ ಖ್ಹಾಚಿಸ್ ಬೊಲಿಯೇಸ್.
2CO 6:9 ಮಾಲುಮ್‌ ರ‍್ಹವಾಳು ಮರವಾಳುಹುಯಿನ್ ದೇಖಾಯುತೋಬಿ ಹಂದೇಖೊ ಹಮೆ ಬಚಿರ‍್ಹಿಶು. ಮಾರ್‌ಪೀಟ್ಮ ಪಡ್ಯತೋಬಿ ಮರಿಜಾ಼ಶುಕೊಂತೆ ರ‍್ಹಿಶು.
2CO 6:10 ದುಖ್‌ಲ್ಯವಾಳ ರ‍್ಹಿಯಾತೋಬಿ ಸೇವೆಮ ಕದೇಬಿ ಹಾಶಿಖ್ಹುಶಾಲಿಥಿ ರ‍್ಹವಾಳ ಹುಯಿರ‍್ಹಾಸ್, ಗರೀಬ್‍ರ‍್ಹಿಯತೋಬಿ ಕೈಏಕ್ ಜ಼ಣನ ವಿಶ್ವಾಸ್‌ಮ ಧನ್‍ದೌಲತ್‌ವಾಳ ಕರೀನ್ ಬಣೈರಾಖ್ಯಾಸ್; ಶಾತ್‍ಬಿಕೊಂತೆ ರ‍್ಹಿಯತೋಬಿ ಅಖ್ಖಾನ ಲೀರಾಖವಾಳ ಹುಯಿರ‍್ಹಾಸ್.
2CO 6:11 ಕೊರಿಂಥವಾಳಾವೊ, ತುಮಾರಿಜೋ಼ಡ್ಮ ಛು಼ಟ ಮನ್‌ಥೀಬಿ ಛು಼ಟ ದಿಲ್‌ಥೀಬಿ ವಾತೆ ಬೋಲಿರಾಖ್ಯಾಸ್.
2CO 6:12 ತುಮಾರಪರ್ ಹಮೂನ ಛಾತೆಪ್ಯಾರ್ ಭೀರಿಗೈಕೊಯ್ನಿ. ಕತೋಬಿ ಹಮಾರಪರ್‌ ತುಮೂನಛಾ಼ತೆ ಪ್ಯಾರ್ ಭೀರಿಗೈ.
2CO 6:13 ತುಮೆ ಮಾರ ಲಡ್ಕಾನಿ ಪರಕ್ಮ ಮೇ ತುಮಾರಿ ಜೋ಼ಡ್ಮ ವಾತೆ ಬೋಲುಕರುಸ್. ಹಮಾರಿನಿತರಸ್ ತುಮೇಬಿ ಹಮೂನ ಪೂರ ದಿಲ್‌ಥಿ ಪ್ಯಾರ್‌ಕರೊ.
2CO 6:14 ಕ್ರಿಸ್ತನಿ ವಿಶ್ವಾಸ್‌ಕೊಂತೆ ಅದ್ಮಿಮಾಬಿ ತುಮಾರಮಾಬಿ ಪರಕ್‍ಛಾ಼. ಇನಖ್ಹಾಜೆ ತುಮೆ ಇವ್ಣಿ ಜೋ಼ಡ್ಮ ಭಾಗಿ ನಕೊಹುವೊ. ಅಛ್ಛು಼ ಬಿಜು಼ ಖರಾಬ್ ಎಕ್ಟುಹುವಾನ ಉಶೇಕಿ ಶು? ಉಜಾ಼ಳು ಅಂಧಾರನಿ ಜೋ಼ಡ್ಮ ಲಾಡ್‍ಥಿರ‍್ಹಾವಾನ ಉಶೇಕಿ ಶು?
2CO 6:15 ಕ್ರಿಸ್ತಬಿ, ಶೈತಾನ್‍ಬಿ ಲಾಡ್‍ಥಿರ‍್ಹಾವಾನ ಉಶೇಕಿ ಶು? ವಿಶ್ವಾಸಿಮಾಬಿ ಅವಿಶ್ವಾಸಿಮಾಬಿ ಭಾಗ್‌ ಶನುಛಾ಼?
2CO 6:16 ದೇವ್ನ ಮಂದಿರ್‌ನಾಬಿ ಮೂರತ್‌ನಾಬಿ ಏಕ್‍ಕರಾನ ಉಶೇಕಿ ಶು? ಅಪ್ಣೆ ದೇವಸ್ ಬೋಲಿರಾಖ್ಯುತೆ ತಿಮ್ ಜಿವ್ತಜಾನ್ನೊ ಮಂದಿರ್‌ ಹುಯಿರಾಸ್ನಿ. ಮಾರ ಅದ್ಮಿವೋಮ ಮೇಸ್ ಘರ್ ಕರೀಶ್, ಇವ್ಣಾಮ ಮೇಸ್ ಜಿವ್ಣು ಕರ್ತೊಹುಯಿನ್ ಇವ್ಣಿಜೋ಼ಡೆ ಫರ್ತೊರ‍್ಹಿಶ್, ಮೇಸ್ ಇವ್ಣೊ ದೇವ್ ಹುಯಿರ‍್ಹಿಶ್. ಇವ್ಣೆ ಮನ ಪ್ರಜೆಹುಯಿರ‍್ಹಿಶೆ ಕರಿ ಬೋಲ್ಯೊ.
2CO 6:17 “ಇನಾಖ್ಹಾಜೆ ಅಲ್ಹಾವ್‌ ಅದ್ಮಿವೋನಿ ಬೀಚ್ಮಾಥ ತುಮೆ ಭಾರ್‌ ಆಯಿನ್ ತನಿಯ ಜಿವ್ಣುಕರೊ, ಕಚಿಂಡ್‌ ರ‍್ಹೆಯಿತೆ ಇನ ಛೀಮ್‍ಶುನಕೊ ಕರಿ ಪ್ರಭು ಬೋಲಸ್, ತದೆ ತುಮೂನ ಮಳೈಲಿಶ್.
2CO 6:18 ಮೇ ತುಮಾರೊ ಬಾ ಹುಯಿರೊಸ್; ಅಜು಼ ತುಮೆ ಮಾರ ಛಿಯ್ಯಾ, ಛೋ಼ರಿಯೇ ಹುಯಿರಾಸ್ ಕರಿ ಬೋಲಸ್ ಸರ್ವಶಕತ್‍ವಾಳೊ ಹುಯಿರೋತೆ ಪ್ರಭು.”
2CO 7:1 ಪ್ಯಾರ್‌ನ ದೋಸ್ತಿವೊ ಅಪ್ಣೆ ದೇವ್‍ಥಿ ವಾಗ್ದಾನ್ ಲೀರಾಖ್ಯಾತೆ ಇನಾಖ್ಹಾಜೆ ಶರೀರ್ ಆತ್ಮಮಾಥು ಗಲೀಜ಼್‌ನ ಕಾಡಿನಾಖಿನ್ ಅಪ್ಣುನ ಶುದ್ದ ಕರಿಲಿನ್ ಬಿಜು಼ ದೇವ್‍ಮಾ ಡರ್‌ಥಿ ರ‍್ಹೀನ್ ಪರಿಶುದ್ದ ಜಿವ್ಣು ಚ಼ಲಾವಾನ ಕೋಶಿಶ್ ಕರೀಯೆ.
2CO 7:2 ತುಮಾರ ದಿಲ್ಮ ಹಮೂನ ಝ಼ಗೊದೆವೋ; ಹಮೆ ತುಮಾರಮ ಕಿನಾಬಿ ಅನ್ಯಾಯ್‌ ಕರ‍್ಯಾಕೊಯ್ನಿ, ಕಿನಾಬಿ ಕೇಡ್ ಕರ‍್ಯಾಕೊಯ್ನಿ, ಕಿನಾಬಿ ಠಗಾಯಕೊಯ್ನಿ.
2CO 7:3 ತುಮಾರಪರ್ ಗಲ್ತಿನಾಕ್‍ನು ಕರಿ ಮೇ ಅನ ಬೋಲುಕರು ಕೊಯ್ನಿ ಶನಕತೊ ತುಮಾರಿ ಜೋ಼ಡ್ಮ ಮರಾನಬಿ ಜಿವಾನಬಿ ತುಮೆ ಮಾರ ದಿಲ್ಮಛಾ಼ ಕರಿ ಮೇ ಪಹಿಲೇಸ್ ಬೋಲ್ಯೊಥೋನಿ.
2CO 7:4 ತುಮಾರಿ ಜೋ಼ಡ್ಮ ವಾತ್‍ಬೋಲನ ಘಣು ಧಿಲ್‍ಪತ್‍ಬಿ ತುಮಾರಿ ಬಾರೇಮ ಮನ ಘಣು ಭರೋಖ್ಹೊ ಛಾ಼; ಮೇ ಧಿಲ್‌ಪತ್‌ಥಿ ಭರೈನ್ ಅಪ್ಣುನ ಉಶೆತೆ ಖ್ಹಾರೀಸ್‍ ಖ್ಹತಾಪ್ಣಿಮ ಘಣೇಥಿ ಘಣು ಖ್ಹುಶಿಮ ಛೂ಼.
2CO 7:5 ಹಮೆ ಮೆಕೆದೋನ್ಯನ ಆಯಾತೆ ತದೇಬಿ ಅಪ್ಣ ಶರೀರ್‌ನ ಅರಾಮಸ್‍ ಕೋಥೂನಿ. ಕತೋಬಿ ಖ್ಹಾರೀಸ್‍ ಬಾಜು಼ಮ ಹಮೂನ ಖ್ಹತಾಪ್ಣಿಥು. ಭಾರ್‌ಲಡೈ, ಮಹಿಡರ್ ಥು;
2CO 7:6 ಕತೋಬಿ ಕಮ್‍ಜೋ಼ರಿ ರ‍್ಹಾವಾಳನ ಸಮಾಧಾನ್‍ ದ್ಯವಾಳೂ ದೇವ್ ತೀತನ ಆವಾಖ್ಹರ್ಕು ಕರೀನ್ ಹಮೂನ ಸಮಾಧಾನ್‍ ಕರ‍್ಯೊ.
2CO 7:7 ಇನ ಬುಲಾವ್‍ಣೆಥಿ ಖಲಿಕಾಹೆತೆ, ತುಮಾರೇಥಿ ಯೋ ಜಾ಼ಖ್ಹತ್ ಸಮಾಧಾನ್‍ ಹುಯೋಕರೀಬಿ, ತುಮಾರಿ ಮಹಾನ್ ಪ್ಯಾರ್, ತುಮಾರಿ ದುಖ್, ಮಾರಪರ್ ಛಾ಼ತೆ ತುಮಾರಿ ಆಖ್ಹ್ ಆ ಅಖ್ಖು ಹಮುನ ಬೋಲಾಖ್ಹತರ್ ಮೇ ಬಿಜೂ಼ಬಿ ಜಾ಼ಖ್ಹತ್ ಖ್ಹುಶಿಕರ‍್ಯೊ.
2CO 7:8 ಮೇ ಲೀಖ್ಯೋತೆ ಚಿಟ್ಟಿ ತುಮುನ ದುಖ್‍ಕಾರಯು ಉಶೇತೋಬಿ ಮನ ವೇಚ಼್‌ಣೆ ಕೊಯ್ನಿ ಯೋ ಚಿಟ್ಟಿ ತುಮುನ ಏಕ್‌ ಘಡಿ ದುಖ್ ಕರಾಯು ಕರಿ ಉಶೇತೋಬಿ ಮೇ ಪಹಿಲೆ ಪಶ್‌ತಾಯೊತೋಬಿ, ಹಮ್ಕೆ ಮೇ ಖುಷಿಕರುಸ್.
2CO 7:9 ತುಮುನ ದುಖ್ ಕರಾಯೋತೆ ಇನಾಖ್ಹಾಜೆ, ಮೇ ಖುಷಿ ಕರ‍್ಯೊಕೊಯ್ನಿ, ತುಮೆ ದುಖ್ ಕರೀನ್ ದಿಲ್ನ ಫರಿಜ಼ವಾನ ಕರಿರಾಖ್ಯತೆ ಇನಾಖ್ಹಾಜೆ ಖ್ಹುಶಿಕರೂಸ್. ದೇವ್ನಿ ‘ಖ್ಹೂಜ಼್‌ನಿ’ ಘೋಣಿ ತುಮೆ ದುಖಿಹುಯ ಇನಾಖ್ಹಾಜೆ ಹಮಾರೇಥಿ ತುಮುನ ಕೆವ್ಹಿ ಪರಕ್‍ಮಾಬಿ ನಷ್ಟ್ ಹುಯುಕೋಯ್ನಿ.
2CO 7:10 ದೇವ್ನಿ ಖ್ಹೂಜ಼್‌ನಿತರ ಹುಯಿರುತೆ ದುಖ್ ದಿಲ್‌ನಾಬಿ, ಜೀವಿತ್‍ನಾಬಿ ಬದ್ಲಾವಸ್ ಆ ಬದ್‍ಲಾವ್ಣಿ ರಕ್ಷಣೆ ಭಣಿ ಚ಼ಲಾವಸ್. ಆ ಮನ್ ಫರಿಜಾ಼ವಾನಿ ಬಾರೇಮ ಅಪ್ಣೆ ಡರ‍್ವಾನು ಶಾತ್ಬಿ ಕೊಯ್ನಿ. ಕತೋಬಿ ಲೋಕ್‍ಥಿ ಆವಾತೆ ದುಖ್ ಮರಣ್ಣ ಬುಲಾವಸ್‌.
2CO 7:11 ತುಮೆ ದೇವ್ನಿ ಮನ್ನಿ ಅನುಸಾರ್ ಲಿದಾತೆ ದುಖ್ ತುಮಾರಮ ಕೆತ್ರುಕ್ಕಿ ಹುಮ್ಮಖ್ಹ್‌ನು ಹುಯಿರುಸ್. ಯೋ ದುಖ್ ತುಮಾರಮ ಘಣು ಮನ್‌ಲಗಾಡವಾಳ ಹುಯಿರ‍್ಹವಾನಿತರ ಕರಿರಾಖ್ಯುಸ್; ತುಮೆ ಗ್ರಿಸ್ತಿಥಿ ಚಾ಼ಲಾನ ಕೆತ್ರೇಕ್ಕಿ ಕೋಶಿಶ್‌ಕರ‍್ಯ, ಕೆತ್ರೇಕ್ಕಿ ಖ್ಹತಾಪ್ಣಿ ಪಡ್ಯ, ಕೆಥ್ರಾ಼ನುಕಿ ಡರ್‌ವತಾಳ್ಯ, ಮಾರಿ ಬಾರೇಮ ವೇಚ಼್‌ಣೆ ಕರಾಖ್ಹರ್ಕು ಕರ‍್ಯು; ಅಪರಾದಿಖ್ಹಾರನ ಖ್ಹತಾವ್ಣುಕರಿ ಆಖ್ಹ್ ಆವಾಖ್ಹರ್ಕು ಕರ‍್ಯು. ಯೊ ತಕ್ಲಿಬ್‍ನಿ ಕೆವ್ಹಿ ಬಾರೆಮಾಬಿ ತುಮೆ ಅಪರಾದಿ ಕೋ ಹುಯಿರ‍್ಹಾಥಾನಿ ಕರಿ ವತಾಳಿಲಿದ.
2CO 7:12 ಮೇ ಯೋ ಚಿಟ್ಟಿ ಲೀಖ್ಯೋತೆ ಗಲತ್‌ ಕರಿರಾಖವಾಳನಖ್ಹಾಜೆ ಕಾಹೆ, ಆ ಗಲತ್‌ಥಿ ದುಖ್‍ಮ ಪಡವಾಳನ ಖ್ಹಾಜೇಬಿ ಕಾಹೆ. ಕತೋಬಿ ಹಮಾರಿ ಬಾರೇಮ ತುಮುನ ಛಾ಼ತೆ ಮೋಟಿ ವೇಚ಼್‌ಣೆನ ತುಮೆ ದೇವ್ನ ಖ್ಹಾಮ್‌ಣೆದೇಖಾನಿತರ ಹೋಣುಕರಿ ಯೋ ಚಿಟ್ಟಿನ ಲೀಖ್ಯೋತೆ.
2CO 7:13 ಇನಖ್ಹಾಜೇಸ್ ಹಮೂನ ಭಾಲಿಮಳೀತೆ, ತುಮೆಅಖ್ಖು ತೀತನ ಮನ್ನ ಜಾ಼ಖ್ಹತ್ ಶಂತೋಖ್ಹ್‌ ಕರ‍್ಯಾತೆದೇಖಿನ್ ಹಮೂನ ಬಿಜೂ಼ಬಿ ಖ್ಹುಶಿಹುಯು,
2CO 7:14 ತೀತನ ಖ್ಹಾಮ್ಣೆ ಮೇ ತುಮುನ ಖ್ಹರಾಯೊ. ಯೋ ಖ್ಹಾಚಕರಿ ತುಮೆ ವತಾಳ್ಯ. ಹಮೆ ತುಮುನ ಬೋಲ್ಯಾತೆ ಹರೇಕ್ ಖ್ಹಾಚ ಹುಯಿರ‍್ಹುಥು. ಹಮೆ ತೀತನ ಖ್ಹಾಮ್ಣೆ ತುಮಾರಿ ಬಾರೇಮ ಬೋಲ್ಯಾತೆ ಖ್ಹರಾವ್ಣಿನಿವಾತೆ ಖ್ಹಾರಿ ಖ್ಹಾಚ ಕರಿ ದೆಖಾಯು.
2CO 7:15 ತುಮೆ ದಿಲ್ಮ ಡರಿನ್ ಕಾಪವಾಳ ಹುಯಿನ್ ಇನಿ ಜೋ಼ಡ್ಮ ಮಳಿಗಾತೆ ಇನಾಮ ತುಮಾರಿ ವಿಧೇಯತೆ ದೆಖಾಯು, ಯೊ ಇನ ಖ್ಹಯಾಲ್ ಕರಿಲ್ಯಾವಾನಿ ವಖ್ಹ್‌ತೆ ತುಮಾರಪರ್ ತೀತನಿ ಪ್ಯಾರ್ ಜಾ಼ಖ್ಹತ್ ಹುಯಿರ‍್ಹೀಸ್.
2CO 7:16 ಖ್ಹಾರೀಸ್‍ ವಾತ್ನಿ ಬಾರೇಮ ತುಮಾರಾಪರ್ ಮನ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಖ್ಹುಶಿಕರೂಸ್.
2CO 8:1 ಭೈಯೇ ಭೇನೆವೊ ಮೆಕೆದೋನಿಯನಿ ಅಖ್ಖಿ ಸಬೆಮ ದೇವ್ನೆ ವತಾಳ್ಯೊತೆ ವಾರ್‌ಖ್ಹಾನಿ ಬಾರೇಮ ತುಮುನ ಖ್ಹಮ್‌ಜಾ಼ಡುಸ್.
2CO 8:2 ಯೋ ಸಬೆವಾಳು ಜಾ಼ಖ್ಹತ್ ಲತಾಡ ಖ್ಹಮಾಳವಾಳು ರ‍್ಹಯುತೋಬಿ ಬಿಜು಼ ಘಣು ಗರೀಬ್ ರ‍್ಹಯುತೋಬಿ ಘಣು ಖ್ಹುಶಿಥಿ ಭರೈರ‍್ಹೀನ್ ಛುಟಾದಿಲ್‍ಥಿ ದಿದು.
2CO 8:3 ಇವ್ಣೆ ಇವ್ಣ ತಾಖತ್‌ಯೆತ್ರೆ ಖಲಿ ದಿದುಕೊಂತೆ, ಇವ್ಣಿ ಇವ್ಣಿ ಶಕತ್ ಮೀರಿನ್ ದೀರಾಖ್ಯುಸ್‌. ಇವ್ಣು ಇವ್ಣೇಸ್ ದಿದು, ದೇವ್ಣುಕರಿ ಇವ್ಣುನ ಕಿನೇಬಿ ಬೋಲ್ಯುಕೊಯ್ನಿ.
2CO 8:4 ಯೆಹೂದಿ ಹುಯಿರ‍್ಹುತೆ ದೇವ್ನು ಅದ್ಮಿಖ್ಹಾರನ ಅಛ್ಛು಼ ಕಾಮ್ ಕರಾನಿ ಬಾರೇಮ ಹಮೂನ ಭಾಗಿಹುವಾನ ಏಕ್‌ ಮೋಕ ಹೋಣು ಕರಿ ಗಿಂಗೈಲಿದು.
2CO 8:5 ಹಮೆ ಸೋಚಾತೆ ಪರಕ್ಮ ದಿದೊಕೊಂತೆ. ಪಹಿಲೆ ಇನುಯೋಸ್ ಪ್ರಭುನಾಬಿ ಅಪ್ಣುನಾಬಿ ದಿನಾಖಿದಿದು. ದೇವ್ ಆಖ್ಹ್‌ ಕರಸ್ತೆ ಅನಾಸ್.
2CO 8:6 ಇನಾಖ್ಹಾಜೆ, ವಿಶೇಷ್‍ನು ಆ ದಯಾನಕಾಮ್‍ನ ಪೂರ ಕರಾನ ತುಮುನ ಮದತ್ ಕರ‍್ನು ಕರಿ ಹಮೆ ತೀತನ ಬೋಲಿಲಿದ. ಆ ಕಾಮ್ನ ಶುರು ಕರ‍್ಯೊತೆ ತೀತನೇಸ್.
2CO 8:7 ತುಮೆ ಹರೇಕ್‌ಮಾಬಿ ಕತೊ, ವಿಶ್ವಾಸ್ಮ ವಾತ್ ಬೋಲಾಮ, ಗ್ಯಾನ್‌ಮ, ಮದತ್‍ಕರ‍್ನು ಕರಿ ದಿಲ್‍ಲಗಾಡಮ, ಬಿಜು಼ ಹಮಾರಿ ಹುಮ್ಮಖ್ಹ್‌ಥಿ ತುಮಾರಮ ಆಯಿತೆ ಪ್ಯಾರ್‌ಮ ಶೌಕಾರ್ ಹುಯಿರ‍್ಹಾಸ್, ಇನಖ್ಹಾಜೆ ಆ ಕೃಪೆಮಾಬಿ ತುಮೆ ಶೌಕಾರ್ ಹುಯಿರ‍್ಹೇವ್ಣು ಕರಿ ಹಮೆ ಆಖ್ಹ್ ಕರಿಯೇಸ್.
2CO 8:8 ತುಮೆ ದೇವ್ಣುಕರಿ ಮೇ ಹುಕುಮ್‌ ಕರೂಕರು ಕೊಯ್ನಿ. ಕತೋಬಿ ತುಮಾರಿ ಪ್ಯಾರ್ ಕೆತ್ರಿ ಖ್ಹಾಚ಼ಪ್ಯಾರ್‌ಕರಿ ದಿಲ್‌ಛೋ಼ಡಿನ್ ತರೀಪ್‌ಶ ಕರಿಲೇವ್ಣುಕರಿ ಬೋಲುಸ್.
2CO 8:9 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ವಾರ್‌ಖ್ಹಾನ ತುಮೆ ಮಾಲುಮ್ ಕರಿರಾಖ್ಯಸ್. ಕಿಮ್‌ಕತೊ ಯೋ ಧನ್‍ ದೌಲತ್‌ವಾಳೊ ರ‍್ಹಯೊತೋಬಿ ಯೋ ಗರೀಬ್ ಹುವಾಥೀಸ್ ತುಮೆ ಧನ್‌ ದೌಲತ್‌ವಾಳ ಬಣನಿತರ ಯೋ ತುಮಾರಖ್ಹಾಜೆ ಗರೀಬ್‍ಹುಯೊ.
2CO 8:10 ಆ ಕಾಮ್ನಿ ಬಾರೇಮ ಮಾರಿ ಖ್ಹೂಜ಼್‌ನ ತುಮುನ ಖ್ಹಮ್‌ಜಾ಼ಡುಸ್, ಆ ಕಾಮ್ನ ಏಕ್‌ ವರಖ್ಹ್‌ನ ಪಾಛ಼ಳ್ ಚ಼ಲಾವನಖ್ಹಾಜೆ ಶುರು ಕರಾಥಿಸ್ ಇನ ಚ಼ಲಾವ್ಣು ಕರಿ ಕರಮಾಬಿ ತುಮೆ ಖ್ಹಾಮೆ ಹುಯಿರ‍್ಹಾತೆ ಇನಖ್ಹಾಜೆ ಯೋ ತುಮುನ ಅಛ್ಛು಼ಹುಯಿರ‍್ಹುಸ್‍.
2CO 8:11 ಇನಾಖ್ಹಾಜೆ ತುಮೆ ಶುರುಕರ‍್ಯಾತೆ ಕಾಮ್ನ ಹಮ್ಕೆ ಪೂರಕರೊ, ತದೆ ತುಮಾರು ಕಾಮ್ ಬಿಜು಼ ತುಮಾರೊ ತಯಾರ್‌ನೊ ದಿಲ್‌ ಬರೋಬರ್ ಸಮಾನ್ ರ‍್ಹಿಶೆ. ತುಮಾರಿ ತುಮಾರಿ ಶಕತ್ನಿ ಘೋಣಿನಿತರ ಚ಼ಲಾವೊ.
2CO 8:12 ಏಕ್‍ಜ಼ಣೊ ದ್ಯವಾನೊ ದಿಲ್‍ರ‍್ಹಿನ್ ಯೋ ಇನ ದಿಲ್ನಿ ಅನುಸಾರ್ ದಿದೊತೊ ತುಮಾರು ದಾನ್ ಸ್ವೀಕಾರ್ ಹುಯಿರ‍್ಹಿಶೆ; ಇನ ದೇವ್‍ಥಿ ಲ್ಹಾಯೇಕ್ ಮಳ್‍ಶೆ.
2CO 8:13 ಅಲಕ್ ಅದ್ಮಿ ಶಂತೋಖ್ಹ್‌ಥಿ ರ‍್ಹಾವಾನಿ ವಖ್ಹತ್‌ಮ ತುಮೆ ದುಖ್‌ಮ ರ‍್ಹವಾನು ಹಮೂನ ಇಷ್ಟಕೊಯ್ನಿ. ಹರೇಕ್‍ಮಾಬಿ ಬರೋಬರ್ ರ‍್ಹವಾನು ಹಮಾರಿ ಆಖ್ಹ್. ಇವ್ಣೆ ಸಬೇನು ಸೇವಕರ್‌ಬಿ ಅಜು಼ ಕ್ರಿಸ್ತನು ಮಹಿಮೆಬಿ ಹುಯಿರ‍್ಹಾಸ್.
2CO 8:14 ಹಮ್ಕೆ ತುಮಾರಕನ ಹೋಣುತೆ ಎತ್ರು ಛಾ಼ ತುಮಾರಿ ಆ ಚೆಹೆಳ್ ಅಲಕ್ ಅದ್ಮಿನು ಕಮೀನ ಕಾಡಿನಾಕ್‌ಶೆ; ಅಮ್ ಅಖ್ಖೂಸ್‌ಜ಼ಣು ಸಮಾನ್ ರ‍್ಹಿಶೆ.
2CO 8:15 ಘಣು ಜ಼ಮ ಕರ‍್ಯಾಹುಯಾನ ಶಾತ್ಬಿ ಜಾ಼ಖ್ಹತ್ ಕೊಹುಯುನಿ, ಥೋಡು ಜ಼ಮಾಕರ‍್ಯಾ ಹುಯಾನ ಶಾತ್ಬಿ ಕಮ್‍ಕೋಹುಯುನಿ ಕರಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಪರಕ್‍ ಹುಯಿರ‍್ಹಿಶೆ.
2CO 8:16 ತುಮಾರಪರ್ ಹಮೂನ ಛಾ಼ತೆ ಅಛ್ಛಿಸೋಚ್‌ನ ತೀತನ ದಿಲ್‌ಮಾಬಿ ದೀರಾಖ್ಯೋತೆ ಇನಖ್ಹಾಜೆ ದೇವ್ನ ಧನ್ಯವಾದ್ ಕರುಸ್.
2CO 8:17 ಹಮೆ ಬೋಲಿಲಿದಾತೆ ಕಾಮ್‍ಅಖ್ಖು ಕರಾನ ತೀತ ಮಾನಿಲಿದೊ. ಆ ಇನಿ ಶೊಂತ್ ತೀರ್ಮಾನ್‌ಥಿಸ್ ತುಮಾರಕನ ಆವಾನುಕರಿ ಯೋ ಘಣು ಹುಮ್ಮಖ್ಹ್‌ಥಿ ಥೊ.
2CO 8:18 ಅಖ್ಖೀಸ್ ಸಬೆವಾಳು ಖ್ಹರಾವಸ್‍ತೆ ಏಕ್‌ ಭೈನ ತೀತನಿ ಜೋ಼ಡ್ಮ ಹಮೆ ಮೋಕ್ಲು ಕರಿಯೇಸ್; ಆ ಭೈ ಸುವಾರ್ತೆನಿ ಬಾರೇಮ ಕೀರ್ತಿ ಲೀರಾಖ್ಯೋಸ್.
2CO 8:19 ಆ ನಾಹುಯಿನ್ ಪ್ರಭುನಿ ಮಹಿಮೆನಖ್ಹಾಜೆ ಅಜು಼ ಅಪ್ಣ ಅಛ್ಛು಼ ದಿಲ್ನ ವತಳಾನಖ್ಹಾಜೆ ಮದತ್‍ನ ರಪ್ಯಾನ ಲೀಜಾ಼ವನಿ ವಖ್ಹತ್‌ಮ ಹಮಾರಿ ಜೋ಼ಡ್ಮರ‍್ಹಾವಾನ ಆ ಭೈನ ಸಬೇಥು ಚೂ಼ಣಿರಾಖ್ಯುಸ್. ದೇವ್ನಿ ಮಹಿಮೆನ ಖ್ಹಾಜೇಬಿ ಬಿಜು಼ ಮದತ್ ಕರಾನ ಖ್ಹಾಚಾಮಸ್ ಆಖ್ಹ್‌ಕರಿಯೇಸ್ ಕರಿ ವತಾಳಿಲ್ಯಾವನಬಿ ಆ ಸೇವೆನುಕಾಮ್ನ ಕರುಕರಿಯೇಸ್.
2CO 8:20 ಆ ಘಣು ಮದತ್‍ನ ರಪ್ಯಾನ ಹಮೆ ದೇಖಿಲ್ಯಾವಾನಿ ಬಾರೇಮ ಕೋಣ್‌ಬಿ ಹಮಾರಪರ್ ಗಲತ್‌ ನಾನಾಕ್ಣು, ಕರಿ ಹೊಷಾರ್‌ಥಿ ಛಿಯೆ.
2CO 8:21 ಶನಕತೊ ಪ್ರಭುನಿ ನಜ಼ರ‍್ಮ ಖಲಿಖಾಯೆತೆ ಅದ್ಮಿನ ಖ್ಹಾರನಿ ನಜ಼ರ್‌ಮಾಬಿ ಮರ್ಯಾದೆ ರ‍್ಹವಾನು ಖಿವು ಬರೋಬರ್ ಕರಿ ಸ್ವಿಕಾರ್‌ಕರ‍ಸ್‍ಕಿ ಅಜು಼ ಅದ್ಮಿನಿ ಬಾರೇಮಾಬಿ ದೇವ್ನಿ ಬಾರೇಮಾಬಿ ಕೆಹು ಬರೋಬರ್ ಕರಿ ಖ್ಹಯಾಲ್ ಕರಸ್ಕಿ ಯೋಸ್ ಖ್ಹಾರಾನ ಹಮೆ ಕೋಶಿಶ್ ಕರುಕರಿಯೇಸ್.
2CO 8:22 ಅನಾಹುಯಿನ್ ಮದತ್ ಕರಾನ ಕದೇಬಿ ತಯಾರ್ ಹುಯಿರ‍್ಹವಾಳ ಅಪ್ಣ ಭೈನ ಇವ್ಣಿಜೋ಼ಡ್ಮ ಮೋಕ್ಲುಕರಿಯೇಸ್, ಯೋ ಕೈಯೇಕ್ ತರಾಮ ಇನುಯೋಸ್ ವತಾಳಿರಾಖ್ಯೊಸ್. ಹಮ್ಕೆ ಇನ ತುಮಾರಪರ್ ಘಣು ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಬಿಜೂ಼ಬಿ ಮದತ್ ಕರಾನ ಆಖ್ಹ್‌ಕರಸ್.
2CO 8:23 ಮೇ ತೀತನಿಬಾರೇಮ ಬೋಲಾನು ಶಾತ್‍ಕತೊ, ಯೋ ಮಾರಿ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರ‍್ಹೊಸ್, ತುಮುನ ಮದತ್ ಕರಾನ ಯೋ ಮಾರಿ ಜೋ಼ಡ್ಮಕಾಮ್‍ ಕರುಕರಸ್. ಅಲಕ್ ಭೈಯೇವ್ನಿ ಬಾರೇಮ ಮೇ ಶಾತ್‍ಬೋಲುಸ್‍ಕತೊ, ಇವ್ಣೆ ಸಬೆಮಾಥು ಮೋಕ್ಲಾಯಹುಯ ಹುಯಿರ‍್ಹಾಸ್. ಬಿಜು಼ ಕ್ರಿಸ್ತನ ಮಹಿಮೆ ಕರಾವಾಳ ಹುಯಿರ‍್ಹಾಸ್.
2CO 8:24 ಇನಖ್ಹಾಜೆ ತುಮಾರಾಮ ಖ್ಹಾಚಮಾಸ್ ಪ್ಯಾರ್‌ಛಾ಼ ಕರಿ ಆ ಅದ್ಮಿಖ್ಹಾರಾನ ವತಾಳೊ. ಹಮೆ ತುಮಾರಿ ಬಾರೇಮ ಶನ ಖ್ಹರೈಯೇಸ್‍ಕರಿ ಬೋಲಾನು ಅವ್ಣುನ ವತಾಳಿದೆವೊ. ತದೆ ಖ್ಹಾರಿ ಸಬೆವಾಳು ಇನ ದೆಖಾಖ್ಹರ್ಕು ಉಶೆ.
2CO 9:1 ಯೂದಾಯಮ ಛಾ಼ತೆ ದೇವ್ನ ಅದ್ಮಿಯೇವ್‌ನು ಮದತ್ ಕರಾನಿ ಬಾರೇಮ ಮೇ ತುಮುನ ಚಿಟ್ಟಿಲೀಖಾನು ಜ಼ರೂರತ್ ಕೊಯ್ನಿ.
2CO 9:2 ಅಖಾಯಮ ಛಾ಼ತೆ ತುಮೆ ಗಯೋತೆ ಏಕ್‌ ವರಖ್ಹ್‌ಥು ಮೋಟ ದಿಲ್‌ಥಿ ದಾನ್ ಕರಾನ ತಯಾರ್ ಹುಯಿರ‍್ಹಾಸ್ ಕರಿ ಬೋಲನಿ ವಾತ್ನ ಮೇ ಮೆಕೆದೋನ್ಯನ ಭೈಯೇ ಭೇನೆವೊನ ಖ್ಹಾಮ್ಣೆ ಬೋಲಿನ್ ತುಮುನ ಖ್ಹರೈರಾಖ್ಯೋಸ್. ಇವ್ಣಮ ಕೆತ್ರೂಕಿಜ಼ಣು ಅನ ಖ್ಹಮ್‌ಜಿನ್‌ ದಾನ್ ದ್ಯಾವಾನ ದಿಲ್‍ಕರ‍್ಯು.
2CO 9:3 ಕತೋಬಿ ಹಮಾರಿ ಖ್ಹರಾವ್ಣಿ ಝೂ಼ಟಿ ನಾಹೊಣುಕರಿ ಆ ಭೈಯೆ ಭೇನೆವೊನ ತುಮಾರಕನ ಮೋಕ್ಲುಕರುಸ್. ತುಮೆ ಅನಾಖ್ಹಾಜೆ ತಯಾರ್ ಹುಯಿರ‍್ಹಾಸ್‍ಕರಿ ಮೇ ಖ್ಹಮ್‍ಜೂ಼ಸ್.
2CO 9:4 ಶನಕತೊ ಮೆಕೆದೋನಿಯವಾಳು ಕೋಣ್‌ತೋಬಿ ಹಮಾರಿ ಜೋ಼ಡ್ಮ ಆಯುತೊ. ತುಮೆ ತಯಾರ್ ಹುಯಕೊಯ್ನಿಕರಿ ದೇಖಿನ್ ಹಮೆ ತುಮಾರಪರ್ ಅಮ್ನು ಭರೋಖ್ಹೊ ರಾಖ್ಯಾತೆ ಇನ ಹಮೆ ಖ್ಹರ್‌ಮಿಂದ್ಯ ಹುವಾನುಪಡ್ಯು; ತುಮೂನಾಬಿ ಖ್ಹರಮ್‌ ಉಷೆಕರಿ ಮೆ ಅಮ್ ಬೋಲುಕರುಸ್.
2CO 9:5 ಇನಖ್ಹಾಜೇಥಿ ಭೈಯೆ ಭೇನೆವೊಖ್ಹಾರು ಫೈಲೇಸ್ ತುಮಾರಕನ ಆಯಿನ್ ತುಮೆ ಪಹಿಲೇಸ್ ವಾಗ್ದಾನ್ ಕರ‍್ಯೊತೆ ಮದತ್‍ನ ರಪ್ಯ ಜ಼ಮಕರಾನ ತುಮೂನ ಮದತ್‌ಕರಾನಖ್ಹಾಜೆ ಅವ್ಣುನ ಗಿಂಗೈಲ್ಯವಾನು ಅಛ್ಛು಼ಕರಿ ಮನ ಮಾಲುಮ್‍ಹುಯು. ಅಮ್‍ ಆ ದಾನ್ ಜು಼ಲಮ್‌ಥಿ ಕಾಹೆ ಛು಼ಟ ದಿಲ್‌ಥಿ ದೆವಾಯುಹುಯು ದಾನ್ ಹುಯಿರ‍್ಹುಸ್.
2CO 9:6 ಕಮ್ ಬಿತ್ನೆ ಕರಾವಾಳು ಕಮ್ಮಸ್ ವ್ಹಾಡ್‍ಶೆ. ಜಾ಼ಖ್ಹತ್ ಬಿತ್ನೆಕರಾವಾಳು ಜಾ಼ಖ್ಹತ್ ವ್ಹಾಡ್‍ಶೆ ಕರಿ ಬೋಲಾನಿ ವಾತೆ ಖ್ಹಯಾಲ್ಮ ರಾಖೊ.
2CO 9:7 ಹರೇಕ್ ಜ಼ಣೋಬಿ ಇವ್ಣ ದಿಲ್ಮ ನಿರ್ಧಾರ್‌ಕರಾತೆ ಪರಕ್ಮ ದ್ಯವಾದೆ. ಕೋಣ್‌ಬಿ ದುಖ್‌ಥಿ ರ‍್ಹವೊ, ಜು಼ಲಮ್‌ಥಿ ರ‍್ಹವೊ ನಾದೇವ್ಣು ಎಥ್ರಾನವಾಳನ ದೇವ್ ಪ್ಯಾರ್‌ಕರಸ್.
2CO 9:8 ದೇವ್ ಹರೇಕ್ ಥರಾನು ವಾರ್‌ಖ್ಹೊ ತುಮುನ ಚೆಹಳ್‌ಥಿ ದ್ಯಾವಾನ ಶಕತ್‌ವಾಳೊ ಹುಯಿರ‍್ಹೋತೆ ಇನಾಖ್ಹಾಜೆ ತುಮೆ ಕದೇಬಿ ಖ್ಹಾರೀಸ್‍ವಾತೆಮ ಭರ್‌ಪೂರ್‌ರ‍್ಹಿಶು. ಬಿಜು಼ ಹರೇಕ್ ಥರಾನು ಅಛ್ಛಾ಼ ಕಾಮ್‍ನ ಹೋಣುತೆತ್ರು ಕರಾವಾಳ ಹುಯಿರ‍್ಹೇಣು.
2CO 9:9 ಪವಿತ್ರ ದಪ್ತರ್‌ಮ ಬೋಲೈರ‍್ಹುತೆ ಪರಕ್ಮ “ಯೋ ಗರೀಬ್ ಖ್ಹಾರಾನ ಚೆಹೆಳ್‌ಥಿ ದಿಶೆ; ಇನಿ ನೀತಿ ಕದೇಬಿ ರ‍್ಹಿಶೆ.”
2CO 9:10 ಬಿತ್ನೆ ಕರಾವಾಳನ ದಾಣನಾಬಿ ಖಾವಾಳನ ಖಾಣು. ದ್ಯಾವಾಳೊ ದೇವ್ ತುಮುನಾಬಿ ಬಿತ್‌ಕರವಾಳನ ದಾಣೊದೀನ್ ಘಣುಕರೀನ್ ತುಮಾರು ನೀತಿನ ಫಲ್ನ ಘಣು ಕರ್ಶೆ.
2CO 9:11 ಅಮ್‍ ತುಮೆ ಅಖ್ಖಕಾಮ್ಮಬಿ ಶೌಕಾರಿ ರ‍್ಹೀನ್ ದಿಲ್‍ಛೋ಼ಡಿ ದ್ಯಾವಾನ ಶಕತ್‌ವಾಳ ಹುಯಿರ‍್ಹಿಶು. ತುಮಾರಿ ದಾನಅಖ್ಖು ಹಮಾರ ಹಾತೇಥಿ ಬಿಜೇಕ್‍ಜ಼ಣಾನ ಮಳ್ಯುತೊ ಯೊ ದೇವ್ನ ಧನ್ಯವಾದ್ನಿ ಸ್ತುತಿಹುವಸ್.
2CO 9:12 ಆ ತುಮಾರಿ ಚಾ಼ಕ್ರಿ ಖಲಿ ದೇವ್ನ ಅದ್ಮಿಖ್ಹಾರಾನಿ ಖ್ಹತಾಪ್ಣಿ ಕಾಡ್‍ಶೆಕೊಂತೆ, ಕೈಏಕ್ ಜ಼ಣಾಮ ದೇವ್ನ ಧನ್ಯವಾದ್‍ನಿ ಖ್ಹಲಾಮ್ ಕರಾನೊ ದಿಲ್‌ ಆವ್‌ಶೆ.
2CO 9:13 ಕ್ರಿಸ್ತನಿ ಸುವಾರ್ತೆನಿ ಸ್ವಿಕಾರ್‌ಥಿ, ತುಮೆ ಕೆತ್ರೆ ನಿಯ್ಯತ್‍ನ ಸೇವೆ ಕರಾವಾಳ ಹುಯಿರ‍್ಹಾಸ್, ಅಜು಼ ತುಮುನಾಬಿ ಬಿಜಾ಼ನಾಬಿ ಕೆತ್ರೆ ದಿಲ್‌ ಛೋ಼ಡಿದ್ಯಾವಾಳ ಹುಯಿರ‍್ಹಾಸ್ ಕರಿ ಬೋಲಾನು ಖ್ಹಮ್‌ಜಿನ್‌ ಕೈಏಕ್‍ಜ಼ಣು ದೇವ್ನ ಖ್ಹರಾವ್‌ಶೆ.
2CO 9:14 ಘಣು ಪ್ಯಾರ್‌ಥಿ ಇವ್ಣೆ ತುಮಾರಖ್ಹಾಜೆ ಪ್ರಾರ್ಥನೆ ಕರ್ಶೆ. ಆ ಕೊಂತೆ ತುಮಾರಮ ಛಾ಼ತೆ ದೇವ್ನಿ ಕೆತ್ರಿಕ್ಕಿ ವಾರ್‌ಖ್ಹಾನಖ್ಹಾಜೆ ತುಮಾರಖ್ಹಾಜೆ ತರ್ಖ್ಹುಕರಸ್.
2CO 9:15 ಖ್ಹರಾವಾನ ಹೋಯಿಕೊಂತೆ ಎತ್ರು ದೇವ್ನ ವಾರ್ಖ್ಹಾನಿ ವರನಖ್ಹಾಜೆ ಇನ ಧನ್ಯವಾದ್ ಹುವಾದೆ.
2CO 10:1 ಪೌಲ ಅಪ್ಣಕನ ರ‍್ಹಾವಾನಿ ವಖ್ಹತ್‌ಮ ಶೇದೆವ್‌ನಿತರ ಚಾ಼ಲಿಲ್ಯವಾಳೊಬಿ, ತುಮಾರೇಥಿ ದೂರ್‌ರ‍್ಹಾವಾನಿ ವಖ್ಹತ್‌ಮ ಕಠಣ್‌ಥಿಬಿ ಚಾ಼ಲಿಲ್ಯವಾಳೊ ಹುಯಿರ್‍ಹೊಸ್ ಕರಿ ಬೋಲೈಲ್ಯಾವಳೊ ಯೋ ಪೌಲ ಕರಿ ಮೇ ಕ್ರಿಸ್ತನಿ ಶಾಂತಿನದಿಲ್‍ನಾಬಿ ಗೋರ್‌ನಾಬಿ ಯಾದ್‍ಕರ‍್ಲಿನ್,
2CO 10:2 ತುಮುನ ಗಿಂಗೈಲ್ಯವಾನು ಶಾತ್‍ಕತೊ; ಮೇ ತುಮಾರಕನ ಆವಾನಿ ವಖ್ಹತ್‌ಮ ಕಠಣ್‍ಥಿ ಚಾ಼ಲಿಲ್ಯಾವನ ಮನ ವಖ್ಹತ್ ನಕೊದೆವೊ. ಹಮೆ ಜಗತ್‌ವಾಳನಿ ತರ ಜಿವಿಯೇಸ್‍ಕರಿ ಥೋಡು ಜ಼ಣು ಖ್ಹಮ್‍ಜ಼ಸ್ ಇವ್ಣ ಜೋ಼ಡೆ ಹಿಮ್ಮಥ್ಥಿ ರ‍್ಹೇವ್ಣುಕರಿ ಛೂ಼.
2CO 10:3 ಹಮೆ ಲೋಕ್ಮ ಜಿವವಾಳ ರ‍್ಹಯತೋಬಿ ಹಮಾರಿ ಲಡೈ, ಜಗತ್‌ವಾಳನಿ ಜಂಗ್‍ಭೀಡಾವಾಳ ಕಾಹೆ.
2CO 10:4 ಹಮೆ ಜಂಗ್ ಭಿಡಾನಿ ವಖ್ಹ್‌ತೆ ಉಪಯೋಗ್ ಕರ‍್ಯೇತೆ ಕಫ್ಫನ್‌ಖ್ಹಾರು ಆ ಲೋಕ್‍ನು ಕಾಹೆ. ಯೋ ದೇವ್ನಿ ಗಣ್ತಿಮ ತಾಖತ್‍ವಾಳು ಹುಯಿರ‍್ಹಿನ್, ಕೋಟೆವ್ನ ರಡ್‍ಕೈನಾಖವಾಳು ಹುಯಿರ‍್ಹೂಸ್.
2CO 10:5 ಅಪ್ಣಿ ದೇವ್ನಿ ಗ್ಯಾನ್ನ ವಿರೋದ್ ಉಠಾತೆ ಅಹಂಕಾರ್‌ನ ಅಪ್ಣೆ ನಾಶ್‍ಕರಿನ್, ಹರೇಕ್ ಖ್ಹೂಜ್‍ನಾಬಿ ಕ್ರಿಸ್ತನ ಸಮರ್ಪಣ್‌ ಹುವಾನಿತರ ಯೋ ಅಖ್ಖಾನ ಕೊಂಡಿಲಿಯೇ.
2CO 10:6 ತುಮಾರಿ ಹುಕುಮ್ನ ಮಾನಾನು ಪೂರಹುವಾನಿ ಬಾದ್ಮ ಅಖ್ಖುಸ್ ಹುಕುಮ್ನ ನಾ ಮಾನಾನು ದಾವ್‌ ಕಾಡನ ತಯಾರ್ ಹುಯಿರ‍್ಹಾಸ್.
2CO 10:7 ತುಮೆ ಖಲಿ ಭಾರ್‌ ದೆಖಾವನು ದೇಖೊಸ್‍, ಕೋಣ್ ತೋಬಿ ಇನ ಕ್ರಿಸ್ತವಾಳೋಕಿ ಇಮ್ಮಸ್ ಹಮೇಬಿ ಕ್ರಿಸ್ತವಾಳಕರಿ ಮಾಲುಮ್‌ ಕರಿಲ್ಯಾವಾದೆ.
2CO 10:8 ಹಮೂನ ಛಾ಼ತೆ ಅದಿಕಾರ್‌ನಿ ಬಾರೇಮ ಹಮೆ ಏಕ್‌ ಘಡಿ ಜಾ಼ಖ್ಹತ್ ಖ್ಹರೈಲಿದಾತೋಬಿ ಇಮ್‌ ಖ್ಹರೈಲ್ಯಾವಾಮ ಮೇ ಖ್ಹರ್‌ಮವ್‌ಕೊಯ್ನಿ. ಕತೋಬಿ ಯೋ, ತುಮುನ ರಡ್‍ಕೈನಾಕ್ಣುಕರಿ ಕಾಹೆ. ಭಾಂದ್‍ಣುಕರಿ ಪ್ರಭು ಆ ಅಧಿಕಾರ‍್ನ ಮನ ದೀರಾಖ್ಯೊಸ್.
2CO 10:9 ಮೇ ಚಿಟ್ಟಿಲೀಖಿನ್ ತುಮುನ ಡರವ್‌ಕರುಸ್ ಕರಿ ನಕೊ ಲಾಜ಼್‌ಶು.
2CO 10:10 “ಇನೇಥಿ ಆಯುತೆ ಚಿಟ್ಟಿ ಖ್ಹಾರು ಕಠಣ್‍ನುಬಿ ತಾಖತ್‍ವಾಳುಬಿ ಹುಯಿರ‍್ಹೂಸ್. ಕತೋಬಿ ಶರೀರ್‌ಥಿ ಯೊ ಕಮ್‌ಜೋ಼ರಿಹುಯಿನ್ ಇನಿ ವಾತೆ ಖ್ಹಾರಿ ಕಾಮ್ನಕೊಯ್ನಿತೇಬಿ ಹುಯಿರ‍್ಹಿಶೆ” ಕರಿ ಥೋಡು ಜ಼ಣು ಬೋಲಸ್.
2CO 10:11 ಅಥ್ರಾನವಾಳು, ಹಮೆ ದೂರ್ ರ‍್ಹಾವಾನಿ ವಖ್ಹತ್‌ಮ, ಚಿಟ್ಟಿಯೇಮ ಲೀಖೈರ‍್ಹಿತೆ ವಾತ್ಮ ಕಿಮ್ ಛಿಯೇಕಿ ಖನ್ನೆ ರ‍್ಹವಾನಿವಖ್ಹ್‌ತೆ, ಕಾಮ್ಮಾಬಿ ಎಥ್ರಾನಸ್‍ವಾಳಕರಿ ಮಾಲುಮ್‌ ಕರಿಲ್ಯಾವಾದೆ.
2CO 10:12 ಇವ್ಣು ಇವ್ಣೇಸ್ ಖ್ಹರೈಲ್ಯಾವಾಳನಿ ಜೋ಼ಡ್ಮ ಹಮೆ ಸಮಾನ್ ಕರಿಲ್ಯಾವಾನ ಕೋಶಿಶ್ ಕರುಕೊಯ್ನಿ. ಇವ್ಣಾಸ್‍ಮ ಇವ್ಣೆ ಆಳ್ತಿ ಕರೀನ್, ಇವ್ಣುನ ಇವ್ಣೇಸ್ ಸಮಾನ್ ಕರಿಲೇಸ್, ಇವ್ಣುನ ಶಾತ್ಬಿ ಮಾಲುಮ್ ಕೊಯ್ನಿಕರಿ, ಆಸ್ ಅಖ್ಖು ಓತಾಳಸ್‍.
2CO 10:13 ಹಮೇ ತೋಬಿ ಹಮಾರಿ ಯೋಗ್ಯತೆನ ಮ್ಹೇಲಿನ್, ಖ್ಹರೈ ಲಿಯೇಕೊಂತೆ ದೇವ್ ಹಮೂನ ದೀರಾಖ್ಯೋತೆ ಹುಕುಮ್ಮ ರ‍್ಹೀನ್ ಖ್ಹರೈಲಿಯೇಸ್. ಆ ಹುಕುಮ್ಮ ರ‍್ಹೀನ್ ತುಮಾರಲಗು ಐರ‍್ಹಾಸ್.
2CO 10:14 ಹಮೆ ಕ್ರಿಸ್ತನಿ ಸುವಾರ್ತೆನ ಬೊಲ್ತಹುಯಿನ್‍ ಅಖ್ಖೇಥಿ ಅಗಾಡಿ ತುಮಾರಕನ ಆಯಾತೆ ಇನಖ್ಹಾಜೆ ತುಮಾರಪರ್ ಅಧಿಕಾರ್‌ಕೊಂತೆ ತಿಮ್, ಹುಕುಮ್‌ನ ಮ್ಹೇಲಿನ್ ವಳ್ಯಾಜ಼ಯೇ ಕೊಯ್ನಿ. ಕ್ರಿಸ್ತನಿ ಸುವಾರ್ತೆನ ಬೋಲ್ತಾಹುಯಿನ್ ಹಮೆ ತುಮಾರಾಕನ ಐರ‍್ಹಾಸ್‍ನಿ.
2CO 10:15 ಹಮೆ ಮಿತ್‌ಮೀರಿನ್ ಬಿಜೇಕ್‍ಜ಼ಣಾನ ಮಿನ್ಹತ್‍ನ ಫಲ್ನ ಲೀಲಿನ್‌ ಆ ಹಮಾರು ಕರಿ ಬೋಲಿಲ್ಯಾವಾಳ ಕಾಹೆ. ಕತೋಬಿ ಹಮಾರಿ ವಿಶ್ವಾಸ್ ಜಾ಼ಖ್ಹತ್ ಹುವಾತೆ ತಿಮ್ ತುಮಾರೇಥಿ ಹಮಾರು ಕಾಮ್ ಬಿಜೂ಼ಬಿ ಭಡ್ತುಜಾ಼ಶೆ.
2CO 10:16 ಶನಕತೊ ತುಮಾರ ಖ್ಹಯೇರ್‌ಥಿ ದೂರ್ ರ‍್ಹೇಯ್ತೆ ತಬರ್‌ಖಾಮಾಬಿ ಸುವಾರ್ತೆನ ಖ್ಹಮ್‍ಜಾ಼ಡ್ನು ಕರಿ ಆಖ್ಹ್ ಹಮೂನ ಛಾ಼. ಕತೋಬಿ ಬಿಜು಼ ಜ಼ಣು ಕಾಮ್‍ಕರ‍್ಯಾಹುಯ ತಬರ್‌ಖಾಮ ಹಮೆ ಕಾಮ್‍ಕರಿನ್ ಮೋಟಕರಿ ಬೋಲಿಲ್ಯಾವಾನ ಹಮೂನ ಆಖ್ಹ್‌ಕೊಯ್ನಿ.
2CO 10:17 ಕತೋಬಿ ಭಡವಾಳೊ ಪ್ರಭುಮಾಸ್ ಭಡಾದೆ.
2CO 10:18 ತಿನುತ್ಯೋಸ್ ಖ್ಹರೈಲ್ಯಾವಾಳೊ ಯೋಗ್ಯಕಾಹೆ. ಪ್ರಭು ಕಿನ ಖ್ಹರಾವಸ್ಕಿ ಯೋಸ್ ಖ್ಹಾಚಾಮ ಯೋಗ್ಯ.
2CO 11:1 ಮೇ ಪಗ್‍ಲ್ಯೊ ಹುಯಿರ‍್ಹವಾನಿ ವಖ್ಹತ್‍ಮಾಬಿ ತುಮೆ ದಯಕರಿನ್ ಜ಼ರ ಖ್ಹಮಾಳಿಲೆವ್ಣು ಕರಿ ಆಖ್ಹ್‌ಕರುಸ್. ಕತೋಬಿ ಇಂಥಿ ಅಗಾಡಿ ತುಮೆ ಇಮ್‌ ಕರಿರಾಕ್‍ಶು.
2CO 11:2 ಶನಕತೊ ದೇವ್‌ಮ ಛಾ಼ತೆ ಬಳಾಪಥೀಸ್ ಮೇ ತುಮಾರಿ ಬಾರೇಮ ವೆಚ಼್‌ಣೆಕರೂಸ್. ತುಮುನ ಕ್ರಿಸ್ತ ಕರಿ ಬೋಲೈರ‍್ಹೋತೆ ಎಕ್ಕಸ್ ಪರ್ಖ್ಹಾನ ಶುದ್ಧಕವಾರಿ ಬಣೈನ್ ತುಮುನ ಇನ ಹಾತ್ಮ ದೇವ್ಣುಕರಿ ತೀರ್ಮಾನ್ ಕರಿರಾಖ್ಯೊಸ್ನಿ.
2CO 11:3 ಕತೋಬಿ ಹವ್ವ ಖ್ಹಾಪ್‍ನ ಲಬುಜ಼್‌ನಿ ವಾತ್ಮ ಮೈಕಮ್‍ಹುಯಿನ್ ಧೋಕಹುಯಿತೆ ತಿಮ್ ತುಮಾರು ದಿಲ್‌ ಕ್ರಿಸ್ತನಿ ಬಾರೇಮ ರ‍್ಹೇವ್ಣುಥೂತೆ ಶುದ್ಧಮನ್‌ಥೀಬಿ ಪರಿಶುದ್ ಭಕ್ತಿನಾಬಿ ಮ್ಹೇಲಿನ್ ಖರಾಬ್ ಹುಯಿಜಾ಼ಶೆಕರಿ ಡರ್‌ ಮಾರಾಮ ಛಾ಼.
2CO 11:4 ಶನಕತೊ ಹಮೆ ಬೋಲು ಕರ್ತಥಾತೆ ಬಿಜೇಕ್‍ಜ಼ಣೊ ಯೇಸು ತುಮಾರಕನ ಆಯಿನ್ ತುಮುನ ಬೋಧನೆ ಕರಾನಿ ವಖ್ಹ್‌ತೆಬಿ. ತುಮೆ ಲೀರಾಖ್ಯಕೊಂತೆ ಬಿಜೇಕ್ ಆತ್ಮಾನ ಲಿಲ್ಯಾವನಿ ವಖ್ಹ್‌ತೆಬಿ ಸ್ವೀಕಾರ್ ಕರಕೊಂತೆ ಬಿಜೇಕ್ ಸುವಾರ್ತೆನ ಸ್ವಿಕಾರ್‌ಕರಿಲ್ಯಾವನಿ ವಖ್ಹ್‌ತೆ ತುಮೆ ಅಛ್ಛಿನಿತರ ಖ್ಹಮಾಳಿಲೆವೊಸ್.
2CO 11:5 ಮೋಟ ಅಪೊಸ್ತಲರ್‌ಕರಿ ಬೋಲೈಲ್ಯಾವಾಳ ಏಕ್‍ಥೀಬಿ, ಮೇ ಕಮ್ ಕಾಹೆ ಕರಿ ಲಾಝು಼ಸ್.
2CO 11:6 ಮೇ ವಾತ್ಮ ಚಾ಼ತುರ್‌ನಾರ‍್ಹಯೊ ತೋಬಿ ಗ್ಯಾನ್‌ಮ ಕಮ್ ಕಾಹೆ. ಅನ ಮೇ ಹರೇಕ್ ಹಾಲತ್ಮಾಬಿ ಛೋ಼ಡಿವತಾಳಿ ರಾಖುಸ್.
2CO 11:7 ತುಮುನ ಊಚ಼ ಪಡಾವ್ಣು ಕರಿ ಮಾರು ಮೇ ಹೇಟುಕರಿಲೀನ್ ದೇವ್ನಿ ಸುವಾರ್ತೆನ ಮೇ ಫುಗಟ್ ಬೋಲ್ಯೋತೆ ಮಾರಿ ಪಾಪ್‍ಕಿಶು?
2CO 11:8 ತುಮಾರಿ ಸೇವೆಕರಾನ ಖ್ಹಾಜೆ ಮೇ ಅಲಕ್ ಸಬೆಥೊ ಮದತ್‍ಲೀನ್ ಇವ್ಣುನ ಗುರ್‌ಕಾವ್‌ತೊ ಹುಯಿನ್ ಇವ್ಣ ಪೈಶಾನ ವಶೂಲ್ ಕರ್ತೊಥೊ.
2CO 11:9 ಮೇ ತುಮಾರಕನ ರ‍್ಹಾವಾನಿ ವಖ್ಹತ್‌ಮ ಮಾರಿ ಖೆವಿ ಜ಼ರೂರತ್‍ನಾಬಿ,ಮೇ ಖಿವಿ ಪರಕ್ಮ ತುಮಾರಾಪರ್ ವಜ಼ನ್ ಹುಯಿರ‍್ಹೊ ಕೊಯ್ನಿಕಿ ಖ್ಹಾಮ್ಣೆ ಮೆ ಭೋಜ಼್‌ ಕೊಹುಯಿಶ್ನಿ. ಶನಕತೊ ಮೆಕೆದೋನ್ಯಥಿ ಆಯಾತೆ ಭೇನೆ ಭೈಯೇನೆ ಮಾರಿ ಜ಼ರೂರತ್ ಪೂರಕರ‍್ಯಾ.
2CO 11:10 ಆ ಮಾರಿ ಖ್ಹರಾವ್ಣಿನ ಅಖಾಯ ತಬರ್‌ಖಾನು ಕೋಣ್‌ಬಿ ಆ ಮಾರಿ ಖ್ಹರಾವ್ಣಿನ ಕಮ್‌ಠೋಕಖ್ಹರ್ಕು ಕೊಯ್ನಿ ಕರಿ ಕ್ರಿಸ್ತ ಯೇಸುನ ಖ್ಹಾಮ್ಣೆ ಖ್ಹಾಚಾಮ ಬೋಲುಸ್.
2CO 11:11 ಮೆ ಬೋಲ್ನುಕತೊ ತುಮುನ ಪ್ಯಾರ್‌ಕರುಕೊಯ್ನಿ? ಶನಖ್ಹಾಜೆಕತೊ ಯೋ ದೇವ್ನಾಸ್ ಮಾಲುಮ್ ಛಾ಼.
2CO 11:12 ಥೋಡುಜ಼ಣು ಇವ್ಣೆ ಕರುಕರಾತೆ ಕಾಮ್, ಹಮೇ ಅಪೊಸ್ತಲರ್ ಹುಯಿನ್ ಕರುಕರೆತೆ ಕಾಮ್ನ ಬರೋಬರ್ ಕರಿ ಅಡ್‍ಫೇಡ್‍ಬೋಲಾನ ವಖ್ಹತ್ ಢೂಂಡುಕರಾಸ್. ಇವ್ಣುನ ಖಿವು ಭಾಣು ನಾಮಳ್‍ನುತೆ ಮೇ ಹಮ್ಕೆ ಕರುಕರುಸ್ತೆ ಇನಾಸ್ ಕರ್ತೊಜ಼ಯಿಶ್‍.
2CO 11:13 ಎಥ್ರಾನು ಅದ್ಮಿಖ್ಹಾರು ಝೂ಼ಟುಅಪೊಸ್ತಲರ್, ಧೋಕಕರವವಾಳು, ಕ್ರಿಸ್ತನು ಅಪೊಸ್ತಲರ್‌ಕರಿ ವೇಷಬದ್ಲವವಾಳು ಹುಯಿರ‍್ಹೂಸ್.
2CO 11:14 ಅನಾಮ ಆಶ್ಚರ್ಯ ಶಾತ್‌ಕೊಯ್ನಿ, ಶೈತಾನ್‍ಬಿ ಉಜಾ಼ಳನೊ ದೂತನಿತರ ದೆಖೈಲೇಸ್.
2CO 11:15 ಇನಾಖ್ಹಾಜೆ ಇನ ಸೇವಕರ್‌ಬಿ ನೀತಿನ ಸೇವಕರ‍್ನಿತರ ದೆಖೈಲ್ಯಾವಾನ ಇವ್ಣುನ ಬದ್‍ಲೈಲ್ಯಾವಾನು ಆಶ್ಚರ್ಯ ಶಾತ್‍ಬಿಕೊಯ್ನಿ. ಇವ್ಣ ಕಾಮ್ನ ತಕ್ಕಾದ್‍ನ ಇವ್ಣು ಖ್ಹರ್ತಿಬಿ ರ‍್ಹಿಶೆ.
2CO 11:16 ಮೇ ಪಗ್‍ಲ್ಯೊ ಕರಿ ಕೋಣ್‌ಬಿ ಮನ ನಾಲಾಝ಼್‌ಣುಕರಿ ಪಾಛೊ಼ಬೋಲುಸ್, ಇಮ್‌ ಲಾಝ್ಯಾತೋಬಿ ಮನ ಪಗ್‍ಲ್ಯೊಕರಿ ತೋಬಿ ಮಳೈಲೆವೊ; ಶನಕತೊ ಮೇಬಿ ಥೋಡುಭೋತ್ ಖ್ಹರೈಲೇವ್ಣು ಕರಿ ಛು಼.
2CO 11:17 ಮೇ ಆಖ್ಹಾರಿವಾತೆನ ಪ್ರಭುನಿ ವಾತೆನಿತರ ಬೋಲುಕೊಂತೆ ಶೊಂತ್ ಭರೋಖ್ಹಾಥಿ ಬಡೈ ಮಾರಿಲ್ಯಾವಾಳ ಪಗ್‍ಲ್ಯಾನಿತರ ಬೋಲುಸ್.
2CO 11:18 ಕತೋಬಿ ಕೈಏಕ್ ಜ಼ಣು ಜಗತ್ನಿ ಸಂಬಂದ್‌ನಿ ಬಾರೇಮ ಇವ್ಣೆ ಖ್ಹರೈಲೇಯಿತೆತಿಮ್ ಮೇಬಿ ಖ್ಹರೈಲೆವುಸ್.
2CO 11:19 ಅಕ್ಲಿ ಹುಯಿರಾತೆ ತುಮೆ ಪಗ್‍ಲ್ಯಾವ್‍ನ ಖುಷಿಥಿ ಖ್ಹಮಾಳಿಲೆವೊ.
2CO 11:20 ಖ್ಹಾಚ಼ಮ ಬೋಲ್ನುಕತೊ ಕೋಣ್‌ತೋಬಿ ತುಮುನ ಕಬ್‌ಜಾ಼ಮ ಕರ‍್ಯುತೋಬಿ, ತುಮುನ ಕಡ್‌ತೆಲ್ ದೇಖಸ್ ಇವ್ಣು ಫಾಯಿದೊ ಕರಿಲೇಸ್ ತೋಬಿ ತುಮಾರ ಕಲ್ಲಪರ್ ಮಾರ‍್ಯುತೋಬಿ ತುಮೆ ಖ್ಹಮಾಳಿ ಲೆವೋಸ್‍ನಿ.
2CO 11:21 ಅಮ್ ಅಖ್ಖುಕರಾನ ಮಾರೇಥಿ ಕಮ್‌ಜೋ಼ರಿಕರಿ ಮಾನಿಲ್ಯಾವಾನ ಮನ ಖ್ಹರಮ್‌ಲಾಗಸ್. ಖಿವು ಬಿಜು಼ ಜ಼ಣು ಖ್ಹರೈಲ್ಯಾವಾನ ಧಿಲ್‌ಪತ್‌ ಕರಸ್ಕಿ ಇನ ಮೇ ಪಗ್‍ಲ್ಯಾನಿತರ ಖ್ಹರೈಲ್ಯಾವಾನ ಹುಮ್ಮಖ್ಹ್‌ ಕರುಸ್.
2CO 11:22 ಇವ್ಣೆ ಹಿಬ್ರುವಾಳಕಿ ಶು? ಮೇಬಿ ಇವ್ಣಿನಿತರ ಹುಯಿರೋಸ್, ಇವ್ಣೆ ಇಸ್ರಾಯೇಲ್‌ವಾಳ? ಮೇಬಿ ಇವ್ಣಿನಿತರಸ್ ಹುಯಿರ‍್ಹೆವುಸ್‌; ಇವ್ಣೆ ಅಬ್ರಹಾಮ್‌ನಿ ಖೂಮ್‍ವಾಳ? ಮೇಬಿ ಇನಿ ಖೂಮ್‌ವಾಳೊ.
2CO 11:23 ಇವ್ಣೆ ಕ್ರಿಸ್ತನ ಸೇವಕರ್‌ಕಿಶು? ಇವ್ಣೇಥಿ ಜಾ಼ಖ್ಹತ್ ಮೇ ಸೇವೆ ಕರಾವಾಳೊ ಹುಯಿರೋಸ್. ಮೇ ಪಗ್‍ಲ್ಯಾನಿತರ ವಾತೆಬೋಲುಕರುಸ್, ಮೇ ಘಣು ಖ್ಹತಿರ‍್ಹೋಸ್ ಘಡಿಕೇಡೆ ಜೇಲ್‌ಮ ಘಲೈಲಿಧೋಥೊ. ಕಠಣ್ಣಿ ಪರಕ್ಮ ಮಾರ್‌ಖೈರಾಖ್ಯೋಸ್. ಕೈಯೇಕ್ ವಖ್ಹತ್ ಮರಣ್‍ಮ ಖ್ಹಪ್‍ಡಿಗಯೋಥೊ.
2CO 11:24 ಯೆಹೂದ್ಯರ್ ಹಾತೇಥಿ ಪಾಚ಼್ ವಖ್ಹತ್ ನೌ ಉಪ್ಪರ್ ಡೋಡಿಖ್ಹ್‌ ಕೊಲ್ಡಾನ ಮಾರ್ ಖೈರಾಖ್ಯೋಸ್.
2CO 11:25 ತೀನ್‍ಹಲ್ಲ ಕೊಲ್ಡಾನಿ ಮೂಟ್‍ಥಿ ಕೂಟೈಲಿಧೊ. ಏಕ್‌ ವಖ್ಹತ್ ಮನ ಮಾರಿನಾಖಾನ ಬಂಡೊಫೇಕ್ಯು. ತೀನ್‍ವಖ್ಹತ್ ಮೇ ವಳ್ಯೊಜಾ಼ತೊಥೋತೆ ಜ಼ಹಾಜ಼್ ಫುಟೀಗಿ. ಏಕ್‌ ರಾತ್ ಏಕ್‍ದನ್ ಮೇ ದರ‍್ಯಾವ್‌ಪರ್ ತೇಲ್‍ತೊಫಂಡ್ಯೊ.
2CO 11:26 ಗಾಮ್‌ಥಿ ಗಾಮ್‍ ಚಾ಼ಲ್ತೋಸ್ ರ‍್ಹಯೊ. ನದ್ದಿಯೇಥಿ ಖತ್ರ, ವಾಟ್‌ಪರ್ ಚೋ಼ರ್‌ಥಿ ಖತ್ರ, ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿಥಿ ಖತ್ರ, ಖ್ಹಯೇರ್‌ಮ ಖತ್ರ, ಭಾರ್‌ಲ್ಯ ತಬರ್‌ಖಾವ್‍ಮ ಖತ್ರ, ದರ‍್ಯಾವ್‌ಮ ಖತ್ರ, ಅಜು಼ ಝೂ಼ಟ ಭಯೇಥಿ ಖತ್ರ ಅಖ್ಖಾಸ್‍ಮ ಮೇ ಖ್ಹಾಮೆ ಹುಯೊ.
2CO 11:27 ಮೇ ಖ್ಹತೀನ್ ರಾಬ್ಯೊ. ಕೆತ್ರಿಕ್ಕಿ ವಖ್ಹತ್ ನಿಂದರ್‌ಕೋಲಿದೋನಿ. ಭುಕ್ ಠೋಖ್ಹ್‌ ಶಾತ್‌ಕರಿ ಮಾಲುಮ್ ಕರಿಲಿದೊ. ಖಾಣುಕೊಂತೆ ಕೆತ್ರಿಕ್ಕಿ ವಖ್ಹತ್ ಪಟ್ನಿ ಪಡ್ಯೊರ‍್ಹಯೊ. ಬರೋಬರ್‌ನು ಲುಂಗ್ಡುಕೊಂತೆ ಠಣ್‍ಮ ಕಾಪ್ತೊ ರ‍್ಹಿಯೊ.
2CO 11:28 ಎತ್ರೇಸ್ ಕಾಹೆ, ಖ್ಹಾರೀಸ್‍ ಸಬೆಪರ್‌ನು ವೇಚ಼್‌ಣೆ ಮನ ದನ್‌ಪರ್‌ರೋಜ಼್ ಖ್ಹತವ್‍ಕರಸ್.
2CO 11:29 ಏಕ್‌ ಜ಼ಣೊ ಕಮ್‍ಜೋ಼ರಿ ಹುಯಿರೊತೊ, ಇನ ಜೋ಼ಡ್ಮ ಮೇಬಿ ಕಮ್‍ಜೋ಼ರಿನೋಸ್. ಏಕ್‌ ಜ಼ಣೊ ಪಾಪ್ನ ಬಲಿಹುಯೊತೊ ಮೇ ಪಶ್‍ತೈಶ್ ಕೊಯಿನ್ತೆ ರ‍್ಹಿಶ್‍ಕೊಯ್ನಿ.
2CO 11:30 ಮನ ಖ್ಹರೈಲ್ಯಾವಾನು ರ‍್ಹಯುತೊ ಮಾರಿ ಕಮ್‍ಜೋ಼ರಿನಿ ಬಾರೇಮಸ್ ಖ್ಹರೈಲೆವ್‍ಸ್.
2CO 11:31 ಕದೆ ಕದೇಬಿ ಸ್ತುತಿಹುವಾಳೊ ಪ್ರಭು ಯೇಸುನೊ ಬಾಬಿ, ದೇವ್‌ಬಿ ಹುಯಿರಾವಳೊ ಮೇ ಝೂ಼ಟಿ ಕೋಬೋಲುನಿ ಕರಿ ಮಾಲುಮ್ ಕರಿರಾಖ್ಯೋಸ್.
2CO 11:32 ದಮಸ್ಕಮ ರಾಜ಼ ಹುಯಿರೋತೆ ಅರೇತನಿ ಹುಕುಮ್‌ನಿತರ ಹಿಜ಼್ಜಾನೊ ರಾಜ್ಯಪಾಲ್ ಮನ ಧರೀನ್ ಕೊಂಡಿನಾಕ್ಣು ಕರಿ ದಮಸ್ಕ ಖ್ಹಯೇರ‍್ನ ಶಿಪಾಯಿಥಿ ಕಾವ್ಲಿ ಕರಾಯೊ.
2CO 11:33 ಕತೋಬಿ ಖ್ಹಯೇರ‍್ನ ಭೀತ್‌ನ ಕಿಟಕಿನ ಮಹಿಥು ಮನ ಏಕ್‌ ಟೋಕ್ರಾಮ ಬೆಖ್ಹಾಡಿನ್‌ ಹೇಟ್ ಉತ್ರಾಯು ಅಜು಼ ಇವ್ಣ ಹಾತ್ಮಥೊ ಮೇ ಛು಼ಕಿನ್ ನಾಶಿಗಯೊ.
2CO 12:1 ಮೇ ಖ್ಹರೈಲ್ಯಾವಾನು ಅಛ್ಛು಼ ಕಾಹೆ, ಕತೋಬಿ ಖ್ಹರೈಲ್ಯಾವಾನು ಮನ ಜ಼ರೂರತ್ ಛಾ಼. ಇನಖ್ಹಾಜೆ ಪ್ರಭುನೆ ಮನ ದಿದೋತೆ ದರ್ಶನನಾಬಿ ಅಜು಼ ಮಾಲುಮ್‌ಕರಾಯೊತೆ ಪ್ರಕಟಣೆನಿ ಬಾರೇಮ ಬೋಲುಸ್.
2CO 12:2 ಕ್ರಿಸ್ತಮ ಛಾ಼ತೆ ಏಕ್‍ಜ಼ಣೊ ಮನ ಮಾಲುಮ್ ಚೌ಼ಧ ವರಖ್ಹ್‌ನ ಪೀಠೆ ಯೊ ತೀನ್ನೊ ಆಕಾಶ್‌ಪರ್ ಪಡೈಗಯೊ. ಯೋ ಶರೀರ್ ಖ್ಹಮ್‍ದೆ ಗಯೋಕಿ, ಶರೀರ್ ಕೊಯ್ನಿತೇಸ್ ಗಯೋಕಿ ಮನ ಮಾಲುಮ್‌ಕೊಯ್ನಿ ದೇವ್ನಾಸ್‍ಮಾಲುಮ್‌.
2CO 12:3 ಯೋ ಅದ್ಮಿ ಸೊರ್ಗಮ ಪಡೈಗಯೊ. ಶರೀರ್ ಖ್ಹಮ್‍ದೇಕಿ, ಶರೀರ್ ಕೊಯ್ನಿತೇಸ್ ಗಯೋಕಿ, ಯೋ ಮನ ಮಾಲುಮ್‌ ಕೊಯ್ನಿ. ಯೋ ಖಲಿ ದೇವ್ನ ಮಾಲುಮ್‌.
2CO 12:4 ಯೋ ಸೊರ್ಗಲಗು ಉಡಿಜೈ಼ನ್ ಅದ್ಮಿವೋಥಿ ಬೋಲ್ನುನಾತೆ ವಾತೆನ ಖ್ಹಮ್‌ಜ್ಯೊಕರಿ ಮಾಲುಮ್. ಯೋ ವೇಳ್ಮ ಇನೆ ಶರೀರ್‌ನ ಲೀರಾಖ್ಯೊಥೋಕಿ ಕೊಯ್ನಿ ಶರೀರ್ ಕೋಲಿರಾಖ್ಯೊಥೋನಿಕಿ ಮನ ಮಾಲುಮ್‌ಕೊಯ್ನಿ. ದೇವ್ನಾಸ್ ಮಾಲುಮ್‌.
2CO 12:5 ಯೋ ಅದ್ಮಿನಿ ಬಾರೇಮ ಮೇ ಖ್ಹರವುಸ್. ಕತೋಬಿ ಮಾರಿ ಬಾರೇಮ ಖ್ಹರವ್‍ಕೊಯ್ನಿ, ಮಾರಿ ಕಮ್‍ಜೋ಼ರಿನಿ ಬಾರೇಮ ಖ್ಹರೈಲೆವುಸ್.
2CO 12:6 ಏಕ್‌ ವಖ್ಹತ್ ಮೇ ಖ್ಹರೈಲ್ಯಾವಾನು ದಿಲ್‍ರ್ಹಯುತೋಬಿ ಇಮ್‌ ಖ್ಹರೈಲ್ಯಾವಾಮ ಮೇ ಬಿಣ್‍ ಅಕ್ಲಿ ಹುಯಿಶ್ ಕೊಯ್ನಿ, ಶನಕತೊ ಮೇ ಖ್ಹಾಚು಼ಸ್ ಬೋಲಿಶ್. ಕತೋಬಿ ಕೋಣ್‌ತೋಬಿ ಮಾರಾಮ ದೆಖಾವಾಥೀಬಿ ನತರ್ ಮಾರೇಥಿ ಖ್ಹಮ್‍ಜಾ಼ಥೀಬಿ ಜಾ಼ಖ್ಹತ್ ಮನ ಪರಖ್ಣುನಾ.
2CO 12:7 ಕತೋಬಿ ಮೇ ಅದ್ಮಿರ‍್ಹೀನ್ ಖ್ಹರೈನಾಲೇವ್ಣುಕರಿ ಮನ ಭಾಲೇಥಿ ಟೋಚ಼ನಖ್ಹಾಜೆ ಶೈತಾನ್ನ ದೂತನಿತರ ಮನ ಘುಖ್ಹ್‌ತೊ ಮಾರ‍್ಯೊ ಶನಕತೊ ಮೇ ಫುಲಿ ನಾಜಾ಼ವ್ಣು ಕರಿ ಅಮ್ ಹುಯುತೆ.
2CO 12:8 ಆ ಅಜ಼ ಮನ ಮ್ಹೇಲಿ ನಿಕ್ಳಿಜಾ಼ವ್ಣು ಕರಿ ಪ್ರಭುನ ತೀನ್ ವಖ್ಹತ್ ಗಿಂಗೈಲಿದೊ.
2CO 12:9 ಇನಖ್ಹಾಜೆ ಯೋ ಮನ, “ಮಾರಿ ವಾರ್‌ಖ್ಹೊ ತುನ ಬಶ್‌” ತಾರಿ ಕಮ್‍ಜೋ಼ರಿಮಾಸ್ ಮಾರಿ ಶಕತ್ ತಾರಾಮ ಪೂರ ಹುಯಿರ‍್ಹಿಶೆ ಕರಿ ಮನ ಬೋಲ್ಯೊ. ಇನಖ್ಹಾಜೇಥಿ ಕ್ರಿಸ್ತನಿ ತಾಖತ್ ಮಾರಪರ್ ಢಪೈರ‍್ಹೇವ್ಣುಕರಿ ಮನಹುಯಿತೆ ಕಮ್‍ಜೋ಼ರಿನಿ ಬಾರೇಮಸ್ ಜಾ಼ಖ್ಹತ್ ಖುಷಿಕರುಸ್.
2CO 12:10 ಇನಖ್ಹಾಜೇಥಿ ಕ್ರಿಸ್ತನಖ್ಹಾಜೆ ಮನ ಕಮ್‍ಜೋ಼ರಿಬಿ, ಝಿಟ್ಕಾರ್‌ನಬಿ, ಶಾತ್‍ಕೊಂತೇಬಿ, ಖ್ಹತಾಪ್ಣಿಬಿ, ವದೇಖ್ಹ್‌ಬಿ ಆಯೂತೆ ಖ್ಹುಶಿಕರೂಸ್. ಮೇ ಕೆದೆ ಕಮ್‍ಜೋ಼ರಿ ರ‍್ಹೆವುಸ್‍ಕಿ ತದೇಸ್‌ ತಾಖತ್‌ವಾಳೊ ಹುಯಿರ‍್ಹೇವುಸ್.
2CO 12:11 ಮೇ ಅಮ್‍ ಖ್ಹರಾವ್ಣಿ ಕಾಡಿಲ್ಯವಾಮ ದೀವಾನೊ ಹುಯಿರೋಸ್, ಇನ ತುಮೇಸ್ ಮನ ಜು಼ಲಮ್‌ ಕರ‍್ಯಾ. ತುಮಾರೇಥಿ ಮನ ಖ್ಹರಾವ್ಣಿ ಹೋಣುಪಡ್ಯುಥು. ಶನಕತೊ ಮೆ ಶಾತ್ಬಿ ರ‍್ಹಿಯೊನಾತೋಬಿ ಘಣೊ ಮಹಾನ್ ಹುಯಿರೋತೆ ಅಪೊಸ್ತಲರ್‌ಮಾಬಿ ಶನಾಮಬಿ ಮೇ ಕಮ್‍ಕೊಯ್ನಿ.
2CO 12:12 ಮೇ ಖ್ಹಾರಸ್ನ ಖ್ಹಮಾಳಿಲ್ಯವಾಮಾಬಿ, ಖ್ಹಣೇದ್‍ನು ಕಾಮ್ನಾಬಿ ಅದ್ಬುತ್‌ಕಾಮ್‌ನಾಬಿ, ಮಹಾನ್ ಕಾಮ್ನ, ಚ಼ಲಾವಮಾಬಿ, ಅಪೊಸ್ತಲನ ರ‍್ಹೇವ್ಣುತೆಲಖಣ್‌ ತುಮಾರ ಇಚ಼್‌ಮ ವತಾಳ್ಯೊ.
2CO 12:13 ಮನ ಜ಼ತನ್‍ಕರಾನ ವಜನ್ನ ಮೇ ತುಮಾರಪರ್ ನಾಖ್ಯೊಕೊಯ್ನಿಕರಿ ಎಕ್ಕಸ್‍ನಿ ಬಾರೇಮ ಪಣ್ಕಿ ಬಿಜು಼ ಖೆವಾನಿ ಬಾರೆಮಾಬಿ ತುಮುನ ಬಿಜಿ ಸಬೆವಾಳಾಥಿ ಕಮ್ ಕರ‍್ಯೊಕೊಯ್ನಿನಿ? ಆ ಮಾರಿ ಗಲತ್‌ನ ಮಾಪ್ ಕರೊ.
2CO 12:14 ಹಮ್ಕೆ ತುಮುನ ತೀನ್ನೆ ಹಲ್ಲಾ ಮಳಾನ ತಯಾರ್ ಹುಯಿರ‍್ಹೋಸ್ ಕತೋಬಿ ಮೇ ತುಮುನ ಭೋಜ಼್‌ ಕೊಹುಯಿರಿಷ್ನಿ. ತುಮಾರಿ ಶೊತ್‍ಮ ಖಿವೂಬಿ ಮನ ಹೋಣುಕೊಯ್ನಿ. ಮನ ಹೋಣುತೆ ತುಮೇಸ್. ಲಡ್ಕಾ ಆಯ ಬಾನ ಖ್ಹಾಜೆ ಪೈಶ ಜ಼ಮಾಕರೀನ್ ದೆವ್ಣು ಕೊಯ್ನಿ. ಆಯ ಬಾ ಲಡ್ಕನಖ್ಹಾಜೆ ಪೈಶ ಜ಼ಮಕರಿ ಮ್ಹೇಲಸ್.
2CO 12:15 ಇನಖ್ಹಾಜೆ ಮಾರಾಕನ ರ‍್ಹೇಸ್ತೆ ಅಖ್ಖು ತುಮುನ ದ್ಯವಾನು ಖುಷಿಕರುಸ್. ಮನಾಸ್ ತುಮುನ ದಿನಾಖುಸ್. ಮೇ ತುಮುನ ಘಣು ಪ್ಯಾರ್ ಕರ‍್ಯೋತೊ, ತುಮೆ ಮನ ಕಮ್ ಪ್ಯಾರ್ ಕರ್ಶುಕಿಶು?
2CO 12:16 ಕತೋಬಿ ಅಮ್‌ರ‍್ಹವಾಪರ್ ಮೇ ತುಮುನ ವಜ಼ನ್ ಕೊಹುಯಿರ‍್ಹೋನಿ ಕತೋಬಿ ಝೂ಼ಟಿ ಬೋಲಿನ್ ತುಮುನ ಜಾ಼ಳಾಮ ಫಖ್ಹಾಯೊಕರಿ ಬೋಲೊ.
2CO 12:17 ಮೇ ತುಮಾರಕನ ಮೋಕ್‍ಲ್ಯಹುಯಾಮ ಕಿನೇಥಿ ತೋಬಿ ತುಮುನ ಠಗೈನ್ ಶಾತ್‍ತೋಬಿ ಮಾಂಗಿಲಿದೊಕಿ ಶು?
2CO 12:18 ತುಮಾರಕನ ಜಾ಼ವ್ಣುಕರಿ ಮೇ ತೀತನ ಗಿಂಗೈನ್ ಇನಿ ಜೋ಼ಡ್ಮ ಹಮಾರ ಭೈನ ಮೋಕ್‌ಲ್ಯೊತೆ ಎತ್ರೇಸ್: ಇನೆ ತುಮುನ ಶಾತ್‍ತೋಬಿ ಠಗಾಯೋಕಿ ಶು? ಕೊಯ್ನಿನಿ, ಹಮೇ ಬೇಜ಼ಣ ಎಕ್ಕಸ್ ಆತ್ಮಥಿ ಭರೈನ್ ಎಕ್ಕಸ್ ಪರಕ್ಮ ಚಾ಼ಲಿಲಿದಥಾನಿ.
2CO 12:19 ಹಮೆ ಅವ್ಡಿ ವಖ್ಹತ್ ತುಮಾರ ಖ್ಹಾಮ್ಣೆ ಆಡ್‌ಫೇಡ್ ಬೋಲುಕರಿಯೇಸ್‍ಕರಿ ಲಾಝ್ಯಾಕಿ ಶು? ದೇವ್ನ ಖ್ಹಾಮ್ಣೇಸ್ ಹಮೆ ಕ್ರಿಸ್ತಮರ‍್ಹೀನ್, ವಾತ್ ಬೋಲಾವಾಳ ಹುಯಿರ‍್ಹಾಸ್. ಪ್ಯಾರ್‌ನ ದೋಸ್ತಿವೊ, ಹಮೆ ಕರಾನು ಅಖ್ಖೂಬಿ ತುಮಾರಿ ಭಕ್ತಿನ ಜಾ಼ಖ್ಹತ್ ಕರಾನಸ್‍ ಹುಯಿರ‍್ಹೂಸ್.
2CO 12:20 ಶನಕತೊ ಮೇ ಆವಾದಿನ್, ಏಕ್‌ ಘಡಿ ತುಮೆ ಮಾರಿ ಆಖ್ಹ್‌ನಿ ತರಸ್ ತುಮೆ ರ‍್ಹೇಸ್ಕಿ ಕೊಯ್ನಿಕಿ ಕರಿ ಮನ ಡರ್‌ ಛಾ಼. ಮೇ ತುಮಾರಿ ಆಖ್ಹ್‌ನಿ ಪರಕ್ ದೆಖಾವ್ಣುನಾತೆ ರ‍್ಹವೊ ತೋಬಿ, ಏಕ್‌ ಘಡಿ ತುಮಾರಾಮ, ಲಡೈ ಪೇಟ್ನೊ ಬಳಾಪೊ, ಇರಾದೊ, ಅಲ್ಹಾವ್‍ನಿತರ ಛಾ಼ಡ್ ಬೋಲಾನು ಮಶ್ಲ ಮಾರಾನು ಮೋಟೊಕರಿ ಬೋಲಿಲ್ಯಾವಾನು, ಲಡೈ ನಖಾವನು, ಆಖ್ಹಾರು ದೆಖಾವ್‍ಶೆಕಿ ಶುಕಿ ಕರಿ ಡರ್‌ ಮನ ಛಾ಼.
2CO 12:21 ಮೇ ತುಮಾರಕನ ಪಾಛೊ಼ ಫರಿ ಆವಾದಿನ್ ಮಾರು ದೇವ್ ಮನ ತುಮಾರ ಖ್ಹಾಮ್ಣೆ ಮನ ಝು಼ಕೈನಾಕ್‌ಶೆ ಕರಿ ಸೋಚುಸ್. ಅಗಾಡಿ ತುಮಾರಾಮ ಮೈಲು ಕಾಮ್, ಪಾಪೇಲುಕಾಮ್, ಪೋಕ್ರಿ ಕಾಮ್‍ಅಖ್ಖು ಚ಼ಲೈನ್ ಪಶ್ಚಾತ್ತಾಪ್‌ ಕರ‍್ಯುಕೊಂತೆ ಕೈಏಕ್ ಜ಼ಣಾನಿ ಬಾರೇಮ ಮೇ ದುಖ್ ಕರಾನು ಪಡ್‌ಶೆ ಕರಿ ಮನ ಡರ್‌ ಛಾ಼.
2CO 13:1 ಮೇ ತುಮಾರಕನ ಖ್ಹಲಾಮ್ ಕರಾನ ವಳ್ಯಾವ್‌ಸ್ತೆ ಆ ತೀನ್ನಿ ವಖ್ಹತ್. ಬೇ ತೀನ್ ಜ಼ಣ ಸಾಕ್ಷಿನ ಮ್ಹೋಡೆಥಿ ಹರೇಕ್ ವಾತ್‍ಬಿ ಬೋಲಾವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ.
2CO 13:2 ಮೇ ಬೇನಿ ವಖ್ಹತ್ ತುಮಾರಕನ ಆಯೋತದೆ, ಪಾಛೊ಼ಫರಿನ್ ಆಯೋತೊ ತುಮುನ ಖ್ಹತೈಶ್‍ಕೊಂತೆ ಮ್ಹೇಲಿಶ್‍ಕೊಯ್ನಿ ಕರಿ ಕಿಮ್ ಬೋಲ್ಯೊಕಿ ಇಮ್ಮಸ್ ಗಯೋತೆ ದನ್‌ಮಾನು ಪಾಪ್ನಕಾಮ್ನ ಚ಼ಲಾವವಾಳಾನಬಿ ಅಜು಼ ಖ್ಹಾರಾನಾಬಿ ಮೇ ಬೋಲುಸ್.
2CO 13:3 ಕ್ರಿಸ್ತ ಮಾರಾಮ ರ‍್ಹೀನ್ ವಾತ್‍ಬೋಲಸ್‍ಕರಿ, ತುಮುನ ಹೋಣುತೆ ಸಾಕ್ಷಿನ ಢೂಂಢಾಥಿ ಯೋ ತುಮಾರಿ ಬಾರೇಮ ಕಮ್‍ಜೋ಼ರಿ ರ‍್ಹಯೋತೊಬಿ ತುಮಾರಮ ಶಕತ್‌ವಾಳೊ ಹುಯಿರ‍್ಹೊಸ್.
2CO 13:4 ಕ್ರಿಸ್ತ ಕಮ್‍ಜೋ಼ರಿಮ ಶಿಲ್‌ಬೇಪರ್ ಟಂಗೈಘೊ ಖ್ಹಾಚಿಸ್. ಕತೋಬಿ ಯೋ ದೇವ್ನಿ ತಾಖಥೀಸ್ ಬಚಾ಼ವಾಳೊ ಹುಯಿರ‍್ಹೊಸ್. ಹಮೇಬಿ ಇನೀನಿತರಸ್ ಕಮ್‌ಜೋ಼ರಿವಾಳ ಹುಯಿರ‍್ಹಾಸ್. ಕತೋಬಿ ಇನಿಜೋ಼ಡ್ಮ ದೇವ್ನಿ ಶಕಥ್ಥಿ ಜಿವವಾಳ ಹುಯಿನ್ ತುಮಾರಿ ಶಕಥ್ಥಿ ಜಿವಿಯೇಸ್.
2CO 13:5 ತುಮೆ ವಿಶ್ವಾಸ್‌ಮ ಛಾ಼ಕಿ ಕೊಯ್ನಿಕಿ ಕರಿ ತುಮಾರು ತುಮೇಸ್ ತರೀಪ್‌ಶ ಕರಿಲೆವೊ. ಕ್ರಿಸ್ತ ಯೇಸು ತುಮಾರಮ ಛಾ಼ಕರಿ ತುಮುನ ಮಾಲುಮ್‌ಛಾ಼: ಯೋ ತುಮಾರಮ ನಾರ‍್ಹಯೋತೊ ತುಮೆ ನಾಲಾಯಕ್‌ ಹುಯಿರ‍್ಹಾಸ್.
2CO 13:6 ಕತೋಬಿ ಹಮೆ ನಾಲಾಯಕ್‌ ಕಾಹೆ ಕರಿ ತುಮುನ ಮಾಲುಮ್‌ಪಡ್‍ಶೇಸ್ ಪಡ್‌ಶೆ ಕರಿ ಹಮೂನ ಭರೋಖ್ಹೊ ಛಾ಼.
2CO 13:7 ತುಮೆ ಖಿವೂಬಿ ಖರಾಬ್ ನಾಕರ‍್ನು ಕರಿ ಹಮೆ ದೇವ್ನ ಪ್ರಾರ್ಥನೆ ಕರಿಯೇಸ್. ಅನಾಮ ಹಮೇಸ್ ಯೋಗ್ಯ ಕರಿ ದೆಖಾವ್ಣು ಕರಿ ಹಮಾರಿ ಖ್ಹಯಾಲ್ ಕಾಹೆ. ಹಮೆ ನಾಲಾಯಕ್‌ ಹುಯಿನ್ ದೆಖಾಯಾತೋಬಿ ತುಮೆ ಅಛ್ಛು಼ಸ್ ಕರ್ನುಕರಿ ಹಮಾರಿ ಖ್ಹಯಾಲ್.
2CO 13:8 ಖ್ಹಾಚ಼ನ ವಿರೋದ್‌ ಹಮೆ ಶಾತ್ಬಿ ಕರಾನ ಕೊಹೊಯ್ನಿ. ಖ್ಹಾಚಾ಼ಭಣಿಥೂಸ್ ಅಖ್ಖು ಕರ್ಶು.
2CO 13:9 ಹಮೆ ಕಮ್‍ಜೋ಼ರಿ ರ‍್ಹಯಾತೋಬಿ ತುಮೆ ತಾಖತ್‌ವಾಳ ಹುಯಿರ‍್ಹಾತೊ ಹಮೆ ಖ್ಹುಶಿಕರ್‌ಶು. ಆ ನಾಹುಯಿನ್ ತುಮೆ ಪೂರಪರಕ್‍ಥಿ ಬರೋಬರ್ ರ‍್ಹೇವ್ಣುಕರಿ ಪ್ರಾರ್ಥನೆ ಕರಿಯೇಸ್.
2CO 13:10 ಅನಾಖ್ಹಾಜೇಸ್ ಮೇ ತುಮಾರಕನಕೊಂತೆ ವಖ್ಹತ್ ಆ ವಾತೆಖ್ಹಾರಿ ಲೀಖುಕರುಸ್. ತುಮುನ ರಡ್‍ಕೈನಾಖಾನ ಕಾಹೆ. ಭಾಂದಾನಖ್ಹಾಜೆ ಪ್ರಭು ಮನ ದೀರಾಖ್ಯೋತೆ ಅದಿಕಾರ್‌ಥಿ ತುಮೆ ಕಠಣ್‍ನ ವತಾಳನ ವಖ್ಹತ್‌ನ ರ‍್ಹೇವ್ಣುಕರಿ ಆಖ್ಹ್‌ಕರುಸ್.
2CO 13:11 ಖ್ಹರ್ತಿನಿ ವಾತೆ ಶಾತ್‍ಕತೊ ಭೈಯೇ ಭೇನೆವೊ ಖ್ಹುಶಿಕರೊ, ತುಮುನ ಬರೋಬರ್ ಕರಿಲೆವೊ; ಭಾಲಿವಾಳ ಹುಯಿ‍ರ‍್ಹೆವೊ, ಎಕ್ಕಸ್ ದಿಲ್‌ವಾಳ ಹುಯಿರ‍್ಹೇವೊ, ಸಮಾಧಾನ್‌ಥಿ ರ‍್ಹವೊ; ಪ್ಯಾರ್‌ನಾಬಿ ಶಾಂತಿಬಿ ದ್ಯವಾಳೊ ದೇವ್ ತುಮಾರಿ ಜೋ಼ಡ್ಮ ರ‍್ಹಿಶೆ.
2CO 13:12 ಪವಿತ್ರಥಿ ಏಕ್‌ಥಿಏಕ್ ಹಾತ್‍ಮಳೈನ್ ಖ್ಹಲಾಮ್ ಕರೊ.
2CO 13:13 ಪ್ರಭು ಯೇಸುಕ್ರಿಸ್ತನಿ ವಾರ್‌ಖ್ಹೇಥಿಬಿ, ದೇವ್ನ ಪ್ಯಾರ್‌ಬಿ ಅಜು಼ ದೇವ್ನುಆತ್ಮಥಿ ಮಳಿನ್ ರ‍್ಹವಾಳಖ್ಹಾರು ತುಮುನ ಖ್ಹಲಾಮ್ ಬೋಲ್‌ಶೆ.
2CO 13:14 ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನಿ ಕೃಪೆಬಿ ದೇವ್ನಿ ಪ್ಯಾರ್‌ಬಿ, ಪವಿತ್ರಾತ್ಮನಿ ಲಾಡ್‌ಬಿ ತುಮಾರ ಖ್ಹಾರಾಸ್‍ನಿ ಜೋ಼ಡ್ಮ ರ‍್ಹವಾದೆ.
GAL 1:1 ಅದ್ಮಿಖ್ಹಾರಥಿ ರ‍್ಹವೊ ಅದ್ಮಿವ್‌ನ ಅದಿಕಾರ್‌ಥಿ ರ‍್ಹವೊ ಮೋಕ್ಲಾಯೊಕೊಂತೆ ಯೇಸು ಕ್ರಿಸ್ತಥಿಬಿ ಅಜು಼ ಇನ ಮರ‍್ಯಮಾಥು ಉಠಾಡ್ಯೊತೆ ಬಾ ದೇವ್‌ಥಿಬಿ ಅಪೊಸ್ತಲರ್‌ನಕರಿ ಬೋಲೈರ‍್ಹೋತೆ ಪೌಲಕರಿ ಮೇಬಿ,
GAL 1:2 ಅಜು಼ ಮಾರ ಜೋ಼ಡ್ಮ ಛಾ಼ತೆ ಅಖ್ಖಾಸ್ ವಿಶ್ವಾಸಿಯೇಬಿ ಗಲಾತ್ಯಮ ರ‍್ಹವಾನಿ ಸಬೇವ್‌ನ ಲಿಖಾನು ಶಾತ್‌ಕತೊ:
GAL 1:3 ಬಾ ದೇವ್‌ಥಿಬಿ ಅಪ್ಣೊ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿ ಮಳಾದೆ.
GAL 1:4 ಯೊ ಅಪ್ಣುನ ಹಮ್ಕೇನ ಖರಾಬ್ ಹಗಾಮ್‌ಥು ಛೋ಼ಡಾವ್ಣುಕರಿ ಅಪ್ಣೊ ಬಾ ಅಜು಼ ದೇವ್ನಿ ಖ್ಹೂಜ಼್‌ನಿ ಘೋಣಿ ಅಪ್ಣ ಪಾಪ್ನಖ್ಹಾಜೆ ಇನುಯೋಸ್ ಮರಣ್ಣ ದಿನಾಖ್ಯೊ.
GAL 1:5 ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆಹುವಾದೆ. ಆಮೆನ್.
GAL 1:6 ಕ್ರಿಸ್ತನಿ ವಾರ್‌ಖ್ಹೇಥಿ ತುಮುನ ಬುಲಾಯ ಹುಯಾನ ಮ್ಹೇಲಿನ್ ಅತ್ರೆ ವಗ್ಗಿಸ್‌ಮ ಬಿಜೇಕ್ ಸುವಾರ್ತೆನ ತುಮೆ ಸ್ವಿಕಾರ್‌ಕರಾನು ದೇಖಿನ್ ಮನ ಆಶ್ಚರ್ಯ ಹುವಾಸ್.
GAL 1:7 ಬೋಲ್ನುಕತೊ ಸುವಾರ್ತೆ ಬಿಜು಼ ಕೊಯ್ನಿ ಕತೋಬಿ ಥೋಡುಜ಼ಣು ತುಮಾರಮ ಘುಂಜ್ಲಾ಼ವ್ಣಿಕರೀನ್ ಕ್ರಿಸ್ತನಿ ಸುವಾರ್ತೆನ ಬದ್ಲಾವನ ಕೋಶಿಶ್ ಕರುಕರಸ್.
GAL 1:8 ಕತೋಬಿ ಹಮೆ ತುಮುನ ಸುವಾರ್ತೆನ ಖ್ಹಮ್‍ಜಾ಼ಡ್ಯ. ಇನಖ್ಹಾಜೆ ಹಮೇಸ್ ರ‍್ಹವೊ, ಸೊರ್ಗಥೊ ಆಯೋತೆ ದೇವ್‌ನೊ ದೂತಾಸ್ ರ‍್ಹವೊ, ಬಿಜೇಕ್ ಸುವಾರ್ತೆನ ಬೋಲಿ ವತಾಳ್ಯುತೊ ಯೊ ಶಾಪ್‌ವಾಳೊ ಹುವಾದೆ.
GAL 1:9 ಮೆ ಪಹಿಲೆಸ್ ಬೋಲ್ಯೊತೆ ತಿಮ್ಮಸ್ ಹಮ್ಕೆಬಿ ಮೆ ಪಾಛು಼ ಬೋಲುಕರುಸ್. ತುಮೆ ಸ್ವೀಕಾರ್ ಕರ‍್ಯಾತೆ ಸುವಾರ್ತೆನ ವಿರೋದ್‌ಥಿ ಕೋಣ್‌ತೋಬಿ ಬೋಲಿವತಾಳ್ಯುತೊ ಯೊ ಶಾಪ್ ಲೀರಾಖವಾಳೊ ಹುಯಿರೊಸ್.
GAL 1:10 ಮೆ ಹಮ್ಕೆ ಖ್ಹಮ್‌ಜಾ಼ಡಿನ್ ಕಿನೊ ದಿಲ್‌ ಜೂತಾನ ಕೋಶಿಶ್ ಕರುಸ್? ಅದ್ಮಿನೋಕಿ? ದೇವ್ನೊಕಿ? ಮೆ ಅದ್ಮಿವ್‌ನ ಪಸಂದ್ ಕರಾವನ ಕೋಶಿಶ್ ಕರುಕರುಸ್ಕಿ? ಮೆ ಬಿಜೂ಼ಬಿ ಅದ್ಮಿವ್‌ನ ಪಸಂದ್ ಕರಾವನ ಕೋಶಿಶ್ ಕರ‍್ಯೊತೊ ಮೇ ಕ್ರಿಸ್ತನೊ ಸೇವಕ್ ಕಾಹೆ.
GAL 1:11 ಮೇ ಶಾತ್‌ ಬೋಲುಸ್‌ಕತೊ ಭೈಯೇ ಭೇನೆವೊ ಮೇ ಬೋಲಿವತಾಳ್ಯೋತೆ ಸುವಾರ್ತೆ ಖಲಿ ಅದ್ಮಿಥಿ ಆಯೂತೆ ಕಾಹೆಕರಿ ತುಮೆ ಮಾಲುಮ್‌ಕರಿಲೇವ್ಣು ಕರಿ ಮೇ ಆಖ್ಹ್‌ ಕರುಸ್.
GAL 1:12 ಮೇ ಇನ ಅದ್ಮಿಥಿ ಲಿದೊಕೊಯ್ನಿ, ಮನ ಕೋಣ್ ಭೋಧನ್‌ಬಿ ಕರ‍್ಯುಕೊಯ್ನಿ ಬದಲ್‍ಥಿ ಯೇಸು ಕ್ರಿಸ್ತಾಥೀಸ್ ಯೊ ಮನ ಬೋಲಿವತಾಳಯು.
GAL 1:13 ಅಗ್ಗಳ್ ಮೆ ಯೆಹೂದ್ಯರ್‌ಮ ಮಳಿರ‍್ಹೋಥೋತೆ ತದೆ ಮಾರಿ ಚಾ಼ಲ್ ಕಿಮ್ ಥೀ ಕರಿ ತುಮೆ ಖ್ಹಮ್‌ಜಿರಾಖ್ಯಾಥ. ಮೇ ದೇವ್ನಿ ಸಬೆನ ಗೋರ್‌ಕೊಂತೆ ನಾಶ್‌ಕರ್ತೊಥೊ.
GAL 1:14 ಆನಾಹುಯಿನ್ ಮಾರ ಗುರುಗುರಬ್‌ಲ್ಯನಿ ಪದತ್ತಿಮ ಖ್ಹಾರೇಥಿಬಿ ಮೇಸ್ ಜಾ಼ಖ್ಹತ್ ದಿಲ್‌ಲಗಾಡವಾಳೊ ಹುಯಿರ‍್ಹೋಥೊ. ಅಜು಼ ಮಾರಿ ಜೋ಼ಡ್ನ ಯೆಹೂದ್ಯರ್ ಉಂಬರ್‌ವಾಳಾಥಿಬಿ ಮೇಸ್ ಖ್ಹಾಮ್ಣೆ ರ‍್ಹೇತೊಥೊ.
GAL 1:15 ಕತೋಬಿ ದೇವ್ ಮೇ ಆಯಾನಿ ಪೇಟ್‌ಮ ರ‍್ಹವಾನಿವಖ್ಹ್‌ತೆಸ್ ಮಾರಿ ಬಾರೇಮ ವಿಶೇಷ್ ವಾರ್‌ಖ್ಹೇಥಿ ಚೂ಼ಣಿನ್, ಇನ ಛಿಯ್ಯಾನಸ್ ಪಸಂದ್ ಕರ‍್ಯೊ.
GAL 1:16 ಅಮ್ ಮೇ ಯೆಹೂದ್ಯರ್‌ಕಾಹೆತೆ ಅದ್ಮಿವ್‌ನ ಇನಿ ಛಿಯ್ಯಾನಿ ಬಾರೇಮ ಸುವಾರ್ತೆನ ಖ್ಹಮ್‌ಜಾ಼ಡ್ನುಕರಿ ದೇವ್ನಿ ಮರ್ಜಿ ಹುಯಿರ‍್ಹೀಥಿ. ಇನಖ್ಹಾಜೆ ದೇವ್ನೆ ಇನ ಛಿಯ್ಯಾನ ಮನ ವತಾಳ್ಯೊ. ಯೊ ಮನ ಬುಲಾವಖ್ಹತರ್ ಮೆ ಅದ್ಮಿಯೇವ್‌ನಿ ಖ್ಹೂಜ಼್‌ನ ಫುಛಾ಼ಯೊ ಕೊಯ್ನಿ.
GAL 1:17 ಯೆರೂಸಲೇಮ್ಮ ಮಾರೇಥಿಬಿ ಪಹಿಲೆ ಅಪೊಸ್ತಲರ್ ಹುಯಿರ‍್ಹುಥೂತೆ ಇವ್ಣಕನಾಬಿ ಕೊಗಯೊಂತೆ ಅರಬ್ ದೇಖ್ಹ್‌ನ ಜೈ಼ನ್ ಪಾಛು಼ ದಮಸ್ಕ ಖ್ಹಯೇರ್‌ಮ ಮೆ ಆಯೊ.
GAL 1:18 ತೀನ್ ವರಖ್ಹ್‌ನ ವಾರ್ ಕೇಫಥಿ ಮಳ್‌ಣುಕರಿ ಯೆರೂಸಲೇಮ್‌ ಗಯೊ. ಇನ ಜೋ಼ಡ್ಮ ಪಂಧ್ರ ದನ್‌ಲಗು ಥೊ.
GAL 1:19 ಕತೋಬಿ ಪ್ರಭುನೊ ಭೈಹುಯಿರ‍್ಹಾವಳೊ ಯಾಕೋಬ್ ಕಾಹೆತೆ ಅಪೊಸ್ತಲರ್‌ಮ ಬಿಜು಼ ಕಿನಾಬಿ ಕೊ ದೇಖ್ಯೋನಿ.
GAL 1:20 ಮೇ ತುಮುನ ಲೀಖುಕರುತೆ‍ ವಾತೆಅಖ್ಖು ಝೂ಼ಟು ಕಾಹೆಕರಿ ದೇವ್ನಾಸ್ ಮಾಲುಮ್.
GAL 1:21 ಇನಕೇಡೆಥು ಸಿರಿಯ ಅಜು಼ ಕಿಲಿಕ್ಯ ದೇಖ್ಹ್‌ನ ತಬರ್‌ಖಾಮ ಗಯೊ.
GAL 1:22 ಕತೋಬಿ ಕ್ರಿಸ್ತಮಾನು ಯೂದಾಯನು ಸಬೆವಾಳು ಮನ ಬಿಜು಼ ಅಗ್ಗಳ್ ಕೆದೇಬಿ ಮಳಿರ‍್ಹುಥು ಕೊಯ್ನಿ.
GAL 1:23 ಕತೋಬಿ “ಇವ್ಣೆ ಪಹಿಲೇಸ್ ಏಕ್‌ಹಲ್ಲ ಖ್ಹತಾಪ್ಣಿ ದಿದೊಥೋತೆ ಕತೋಬಿ ಯೊ ನಾಶ್‌ ಕರ್ತೊಥೋತೆ ವಿಶ್ವಾಸ್‌ನಿ ಬಾರೇಮಸ್ ಹಮ್ಕೆ ಅದ್ಮಿಖ್ಹಾರನ ಬೋಲಿವತಾಳುಕರಾಸ್‌” ಕರಿ ಸಮಾಚಾರ‍್ನ ಇವ್ಣೆ ಖ್ಹಮ್‌ಜ್ಯು.
GAL 1:24 ಅಜು಼ ಮಾರಖ್ಹಾಜೆ ದೇವ್ನ ಮಹಿಮೆ ಕರ‍್ಯು.
GAL 2:1 ಚೌ಼ಧ ವರಖ್ಹ್‌ನ ವಾರ್ ಮೆ ಬಾರ್ನಬನಿ ಜೋ಼ಡ್ಮ ತೀತನಬಿ ಬುಲೈಲಿನ್, ಬಿಜೇಕ್ ಹಲ್ಲ ಯೆರೂಸಲೇಮ್ನ ಗಯೊ.
GAL 2:2 ದೇವ್ನಿ ಖ್ಹೂಜ಼್‌ನಿತರ ಜಾ಼ವ್ಣುಥೂತೆ ಇನಖ್ಹಾಜೆ ಯೆಹೂದ್ಯರ್‌ಕಾಹೆತೆ ಅದ್ಮಿಮ ಮೆ ಬೋಲಿವತಾಳನು ಸುವಾರ್ತೆ ಶಾತ್‌ಕರಿ ಹಿಜ಼್ಜಾಥೂತೆ ಗಲ್‌ಢಾವ್‌ನಾಸ್ ಖ್ಹಮ್‌ಜಾ಼ಡ್ಯೊ. ಶನಕತೊ ಮೆ ಸುವಾರ್ತೆನಖ್ಹಾಜೆ ಪಡ್ಯೋತೆ ಕಾಮ್‍ರ‍್ಹೆವೊ, ಮೇ ಹಮ್ಕೆ ಕರುಕರುಸ್ತೆ ಕಾಮ್‌ಖ್ಹಾರು ಬಿಣ್‌ಫಾಯಿದಾನು ನಾಹೊಣುಕರಿ ಮಾರಿ ಆಖ್ಹ್.
GAL 2:3 ಮಾರ ಜೋ಼ಡ್ಮಥೋತೆ ತೀತ ಗ್ರೀಕ್‌ನೊ ಹುಯಿರೊತೋಬಿ ಇನ ಖ್ಹತ್ನಕರಾವ್ಣುಕರಿ ಕೋಣ್‌ಬಿ ಜು಼ಲಮ್‌ ಕೊಕರ‍್ಯುನಿ.
GAL 2:4 ಕತೋಬಿ ಭಾಣೇಥಿ ಪೇಠುಥೂತೆ ವಿಶ್ವಾಸಿಖ್ಹಾರು ಗಪ್ಲಥ್ಥಿ ಹಮುನ ಧರ್ಮಶಾಸ್ತ್ರನಿ ಕಬ್‌ಜಾ಼ಮ ಖ್ಹಪ್‌ಡಾವ್ಣುಕರಿ, ಕ್ರಿಸ್ತ ಯೇಸುಮ ಛಾ಼ತೆ ಅಪ್ಣಿ ಛುಟ್ಕಾರ್‌ನ ಮಾಲುಮ್‌ಕೊಂತೆ ತಿಮ್ ಪುಛಾ಼ವನ ಐರ‍್ಹುಥು.
GAL 2:5 ಸುವಾರ್ತೆನು ಖ್ಹಾಚು಼ ತುಮಾರಮ ಘಟ್ ರ‍್ಹೇವ್ಣುಕರಿ ಹಮೆ ಇವ್ಣಿ ಅಧೀನ್‌ಮ ಏಕ್‌ ಘಡೀಬಿ ಕೊದಿದಾನಿ.
GAL 2:6 ಕತೋಬಿ ಕೋಣ್ ಗಲ್‌ಢಕರಿ ದೆಖಾವಸ್ಕಿ ಮೇ ಬೋಲುಸ್ ಆ ಮಾರಮ ಅಜು಼ ಇವ್ಣಾಮ ಅನು ಫರಕ್ ಕೊಯ್ನಿ; ದೇವ್ ಅಖ್ಖಾ ಅದ್ಮಿವ್‌ನ ಎಕ್ಕಸ್ ತರ ದೇಖಸ್. ಯೊ ಗ‌ಲ್‌ಢಾವ್‌ಥಿ ಮನ ಶಾತ್ಬಿ ಮಳ್ಯು ಕೊಯ್ನಿ.
GAL 2:7 ಕತೋಬಿ ಖ್ಹತ್ನಕರೈಲ್ಯವಾಳಾನ ಸುವಾರ್ತೆನ ಬೋಲಿ ವತಾಳನು ಕಾಮ್ ಪೇತ್ರಾನ ಕಿಮ್ ದೆವಾಯುಕಿ, ಇಮ್ಮಸ್ ಯೆಹೂದ್ಯರ್‌ಕಾಹೆತೆ ಅದ್ಮಿನ ಯೊ ಬೋಲಿ ವತಾಳನು ಕಾಮ್ ಮನ ದೆವಾಯು.
GAL 2:8 ಶನಕತೊ ಯೆಹೂದ್ಯರ್‌ಮ ಅಪೊಸ್ತಲಹುಯಿನ್ ಕಾಮ್ ಕರಾನ ಪೇತ್ರಾನ ದಿದೋತೆ ದೇವ್, ಯೆಹೂದ್ಯರ್‌ಕಾಹೆತೆ ಇವ್ಣಾಮ ಅನ ಚ಼ಲಾವನಖ್ಹಾಜೆ ಮನ ದಿರಾಖ್ಯೊಥೊ.
GAL 2:9 ಸಬೇನು ಖಂಬುಕರಿ ಬೋಲೈಲಿದಹುಯ ಯಾಕೋಬ್, ಪೇತ್ರ, ಯೋಹಾನ ಇವ್ಣೆ ದೇವ್ನೆ ಮನ ದಿರಾಖ್ಯೋತೆ ವಾರ್‌ಖ್ಹಾನ ಮಾಲುಮ್ ಕರಿಲಿನ್ ಗಳ್‍ಜೋ಼ಡ್‍ಥಿ ರ‍್ಹವಾನು ವತಾಳನಖ್ಹಾಜೆ ಮನಾಬಿ ಬಾರ್ನಬನಾಬಿ ಹಾತ್ ಮಳಾಯೊ. ಅಜು಼ ತುಮೆ ಯೆಹೂದ್ಯರ್‌ಕಾಹೆತೆ ಅದ್ಮಿಕನ ಜಾ಼ವೊ, ಹಮೆ ಯೆಹೂದ್ಯರ್‌ಕನ ಜೈ಼ಯೇಸ್‌ಕರಿ ಮಾನಿಲಿದ.
GAL 2:10 ಕತೋಬಿ ತುಮೆ ಹಮಾರಮ ಛಾ಼ತೆ ದಿಕ್‌ದೆಶಾರ್‌ ಕೊಂತೆ ಇವ್ಣುನ ಖ್ಹಯಾಲ್ಮ ರಾಕ್ಣು ಕರಿ ಎಕ್ಕಸ್ ವಾತೆ ಮನ ಬೋಲ್ಯು. ಇಮ್‌ ಕರಾಮ ಮೇಬಿ ದಿಲ್‌ಲಗಾಡವಾಳೊ ಹುಯಿರ‍್ಹೊಥೊ.
GAL 2:11 ಪೇತ್ರನೆ ಅಂತಿಯೋಕ್ಯನ ಆವಾನಿ ವಖ್ಹ್‌ತೆ ಇನಾಮ ಗಲ್ತಿದೆಖಾಯುತೆ ಇನಖ್ಹಾಜೆ ಮೇ ಇನ ಖ್ಹಾರನ ಖ್ಹಾಮೇಸ್ ವಿರೋದ್ ಕರ‍್ಯೊ.
GAL 2:12 ಅಗ್ಗಳ್ ಯೊ ಅಂತಿಯೋಕ್ಯನ ಆವಾನಿ ವಖ್ಹ್‌ತೆ ಯೆಹೂದ್ಯರ್‌ಕಾಹೆತೆ ಇವ್ಣ ಜೋ಼ಡ್ಮ ಖಾಣು ಖಾತೋಥೊ. ಇನಪಾರ್ ಯಾಕೋಬ್ ಭಣೀಥು ಥೋಡುಜ಼ಣು ಆಯು. ತದೆ ಪೇತ್ರನೆ ಯೆಹೂದ್ಯರ್‌ಕಾಹೆತೆ ಇವ್ಣಿ ಜೋ಼ಡ್ಮ ಖಾಣುಖಾವನು ಭಿರಾಖಿದಿದೊ. ಯೆಹೂದ್ಯರ್ ಅದ್ಮಿಥಿ ಡರಿನ್, ಯೊ ಇನುಯೋಸ್ ಯೆಹೂದ್ಯರ್‌ಕಾಹೆತೆ ಅದ್ಮಿಥಿ ಅಲಕ್ ಹುಯೊ.
GAL 2:13 ಅತ್ರೇಸ್ ಕಾಹೆತೆ ಥೂತೆ ಯೆಹೂದ್ಯರ್‌ಬಿ ಇನಜೋ಼ಡೆ ಮಳಿನ್ ಇಮ್ಮಸ್ ಢಂಗ್ ಕರ‍್ಯು. ತದೆ ಬಾರ್ನಬಬಿ ಇವ್ಣಿ ಢಂಗ್ಮ ಪಡಿಗೊ.
GAL 2:14 ಇವ್ಣೆ ಸುವಾರ್ತೆನಿ ಖ್ಹಾಚಿ ತರೀಖಾಮ ಬರೋಬರ್‌ಥಿ ಚಾ಼ಲುಕರ ಕೊಯ್ನಿಕರಿ ಬೋಲಾನು ಮನ ದೆಖಾವಮ ಅಖ್ಖಾನ ಖ್ಹಾಮ್ಣೆ ಪೇತ್ರನ ಶಾತ್‌ ಬೋಲ್ಯೊಕತೊ; ತು ಏಕ್‌ ಯೆಹೂದ್ಯವಾಳೊ‍ರ‍್ಹೀನ್ ಯೆಹೂದ್ಯರ್‌ಕಾಹೆನಿತರ ಬಚಿನ್, ಯೆಹೂದ್ಯರ್‌ಕಾಹೆತೆ ಇವ್ಣುನ ಯೆಹೂದ್ಯರ್‌ನಿಘೋಣಿ ಚಾ಼ಲ್‌ನುಕರಿ ಜು಼ಲಮ್‍ಕರಿ ಬೋಲಾನುಬಿ ಶಾತ್?
GAL 2:15 ಹಮೆತೋಬಿ ಪೈದಾಖ್ಹ್‌ಥು ಯೆಹೂದ್ಯರ್, ಪಾಪಿಕರಿ ಬೋಲೈಲಿದೂತೆ ಯೆಹೂದ್ಯರ್‌ಕಾಹೆತೆ ಅದ್ಮಿಕಾಹೆ.
GAL 2:16 ಖಿವೊತೋಬಿ ಖಲಿ ಧರ್ಮಶಾಸ್ತ್ರನ ಪಾಡಿಚಾ಼ಲಾಥಿ ನೀತಿವಾಳೊಕರಿ ಬಣಾನ ಕೊಹುವ್ವಾನಿ ಕರಿ ಮನ ಮಾಲುಮ್. ಯೇಸು ಕ್ರಿಸ್ತಮ ವಿಶ್ವಾಸ್ ರಾಖಾಥೀಸ್ ನೀತಿವಾಳೊ ಬಣಾನ ಹುವಾಸ್. ಇನಖ್ಹಾಜೆ ಹಮೆ ನೀತಿವಾಳ ಹುವಾನಖ್ಹಾಜೆ ಯೇಸು ಕ್ರಿಸ್ತಾಮಸ್ ವಿಶ್ವಾಸ್ ರಾಖ್ಯ. ಅಮ್‌ರ‍್ಹಾವಪರ್ ಹಮೆ ನೀತಿವಾಳ ಹುಯಾತೆ ಕ್ರಿಸ್ತಮ ವಿಶ್ವಾಸ್ ರಾಖಿನಸ್ ಪಣ್ಕಿ ಧರ್ಮಶಾಸ್ತ್ರನಿಘೊಣಿ ಚಾ಼ಲಾಥಿ ಕಾಹೆ.
GAL 2:17 ಕತೋಬಿ ಅಪ್ಣೆ ಯೇಸು ಕ್ರಿಸ್ತಥಿ ನೀತಿವಾಳ ಕರಿ ತೀರ್ಮಾನ್ ಹುವಾನಿ ಕೋಶಿಶ್ಮ ಅಪ್ಣೆ ಪಾಪಿಕರಿ ದೆಖಾಯತೊ ಕ್ರಿಸ್ತ ಪಾಪ್ನ ಮದತ್‌ಕರಾವಾಳೊ ಕಿಶು? ಕೆದೇಬಿ ಕೊಯ್ನಿ.
GAL 2:18 ಮೇ ರಡ್ಕಾಯ ಹುಯಾನಸ್ ಪಾಛು಼ ಭಾಂದ್ಯೊತೊ ಮಾರುಮೇಸ್ ಅಪರಾದಿಕರಿ ದೆಖೈಜಿಷ್ನಿ.
GAL 2:19 ಮೇತೋಬಿ ದೇವ್ನಖ್ಹಾಜೆ ಬಚಿರ‍್ಹಾವನಖ್ಹಾಜೆ ಧರ್ಮಶಾಸ್ತ್ರಮಾಥೊ ಧರ್ಮಶಾಸ್ತ್ರನ ಭಾಗ್ನ ಮರ‍್ಯೊಹುಯೊ ಹುಯಿರೊಸ್. ಇನಖ್ಹಾಜೆ ಮೇ ಜಿನು ಕ್ರಿಸ್ತಾನಿಜೋ಼ಡ್ಮ ಶಿಲ್‌ಬೆಪರ್ ಘಲೈಗಯೊ ಹುಯೊ ಹುಯಿರೊಸ್.
GAL 2:20 ಅಜು಼ ಜಿವ್‌ಕರೂಸ್ತೆ ಮೇಕಾಹೆ, ಕತೋಬಿ ಕ್ರಿಸ್ತ ಮಾರಮಹಿ ಜಿವವಾಳೊ ಹುಯಿರೊಸ್. ಹಮ್ಕೆ ಮೆ ಶರೀರ್‌ಮ ಜಿವ್ಣುಕರಾನು ಕಿಮ್ ಕತೊ ದೇವ್ನ ಛಿಯ್ಯಾಪರ‍್ಲಿ ವಿಶ್ವಾಸ್‌ಥೀಸ್. ಯೋ ಮನ ಪ್ಯಾರ್ ಕರೀನ್ ಮಾರ ಖ್ಹಾಜೇಥಿ ಇನಾಸ್ ದಿನಾಖಿದಿದೊ.
GAL 2:21 ಮೇ ದೇವ್ನ ವಾರ್‌ಖ್ಹೊನ ಝಿಟ್ಕಾರುಕೊಯ್ನಿ. ಕತೋಬಿ ಧರ್ಮಶಾಸ್ತ್ರಥಿ ನೀತಿವಾಳ ಹುಯೆಜಾ಼ಯ್‌ ಕತೊ ಕ್ರಿಸ್ತನು ಮರಾನು, ಫಾಯಿದೊಸ್ ಕೊಯ್ನಿಕರಿ ಬೋಲೆಜಾ಼ಯ್.
GAL 3:1 ಅಲ ಅಕ್ಕಲ್‌ಕೊಂತೆ ಗಲಾತ್ಯವಾಳ, ತುಮುನ ಮಂಕ್ ‌ಕೋಣ್‌ಕರ‍್ಯು? ಯೇಸು ಕ್ರಿಸ್ತ ಶಿಲ್‌ಬೇಪರ್ ಜಾನ್‌ಮ್ಹೆಲ್ಯೊತೆ ಯೊ ತುಮಾರ ಡೋಳಾನ ಖ್ಹಾಮ್ಣೆ ಛೋ಼ಡಿವತಾಳ್ಯುನಿ!
GAL 3:2 ಏಕ್‌ ಬಾರೇಮ ಖಲಿ ತುಮಾರೇಥಿ ಮಾಲುಮ್ ಕರ್ನುಕರಿ ಛು಼. ತುಮೆ ಪವಿತ್ರಾತ್ಮನ ಲಿದಾತೆ ಧರ್ಮಶಾಸ್ತ್ರನ ಪಾಡಿನ್ ಚಾ಼ಲಾಥಿಕಿ ನತರ್ ವಿಶ್ವಾಸ್‌ನಿ ಸುವಾರ್ತೆನ ಖ್ಹಮ್‌ಜಾ಼ಥಿಕಿ ಶು?
GAL 3:3 ತುಮುನ ಅತ್ರೇಬಿ ಅಕ್ಕಲ್ ಕೊಯ್ನಿಕಿಶು? ದೇವ್ನಿ ಆತ್ಮಾನಿ ಪರಕ್ಮ ಶುರುಕರೀನ್ ಹಮ್ಕೆ ಶರೀರ್‌ನಿ ಬಾರೇಮ ಖತಮ್ ಕರಾನ ಆಯಕಿಶು?
GAL 3:4 ತುಮೆ ಅತ್ರೆಖ್ಹಾರು ಶಿಕ್ಯಾತೆ ಅಖ್ಖು ಕಾಯಿಸ್‌ಕೊಯ್ನಿಕರಿ ಬೋಲಿಯೆಕಿಶು?
GAL 3:5 ಅಮ್‌ರ‍್ಹಯುತೊ ದೇವ್ನೆ ಇನ ಆತ್ಮಾನ ತುಮುನ ಜಾ಼ಖ್ಹಥ್ಥಿ ದೀನ್ ತುಮಾರಮ ಮಹಾನ್‌ಕಾಮ್ ಚ಼ಲಾವ್ತೊ ಆಯೋತೆ; ತುಮೆ ಧರ್ಮಶಾಸ್ತ್ರನ ಪಾಡಿನ್ ಚಾ಼ಲಾಥಿಕಿ ನತರ್ ಸುವಾರ್ತೆನ ಖ್ಹಮ್‌ಜಿನ್‌ ವಿಶ್ವಾಸ್ ಕರಾಥಿ?
GAL 3:6 “ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್ ಕರ‍್ಯೊ, ಇನಿ ವಿಶ್ವಾಸ್‌ಥೀಸ್ ಯೋ ವಿಶ್ವಾಸ್‌ ನೀತಿಕರಿ ಚೂ಼ಣೈಗು ಕರಿ ಧರ್ಮಶಾಸ್ತ್ರಮ ಬೋಲಸ್ನಿ.”
GAL 3:7 ಇನಖ್ಹಾಜೆ ವಿಶ್ವಾಸ್‌ಕರವಾಳ ಅಬ್ರಹಾಮ್‌ನ ಪಿಳ್ಗಿಕರಿ ಮಾಲುಮ್ ಕರಿಲೆವೊ.
GAL 3:8 ದೇವ್ನೆ ಯೆಹೂದ್ಯರ್‌ಕಾಹೆತೆ ಅದ್ಮಿನ ವಿಶ್ವಾಸ್‌ನ ಖ್ಹಾಜೇಥಿಸ್ ನೀತಿವಾಳಕರಿ ಸಾಬಿತ್‌ಕರಾನು ದೇವ್ನಿ ವಚನ್ನ ಪಹಿಲೇಸ್ ದೇಖಿನ್ ಅಬ್ರಹಾಮ್‌ನ, “ತಾರೇಥಿ ಜ಼ಗ್‌ಜಾ಼ತ್‌ನಾಬಿ ಆಶೀರ್ವಾದ್‌ ಉಷೆ” ಕರಿ ಸುವಾರ್ತೆನ ಅಗ್ಗಳ್‌ಥೂಸ್ ಬೋಲಾಯು.
GAL 3:9 ಅಮ್‌ರ‍್ಹವಾಪರ್ ಕೋಣ್ ಕ್ರಿಸ್ತಾನ ನಂಬಾಸ್ಕಿ, ಇವ್ಣೆ ವಿಶ್ವಾಸ್‌ ರಾಖಿಮ್ಹೇಲ್ಯೊತೆ ಅಬ್ರಹಾಮ್‌ನ ಜೋ಼ಡೆ ಆಶೀರ್ವಾದ್‌ ಲಿಶೆ.
GAL 3:10 ಮೋಶೆನಿ ರೀತಿರಿವಾಜ್‌ಥಿ ಚಾ಼ಲವಾಳು ಶಾಪ್ ಲೀರಾಖವಾಳು ಹುಯಿರ‍್ಹುಸ್. ಕಿಮ್‌ಕತೊ ಧರ್ಮಶಾಸ್ತ್ರನ ನಿಯಮ್ಮ “ಲೀಖೈರ‍್ಹೂಸ್ತೆ ಅಖ್ಖಾಸ್ನ ಪಾಡಿನ್ ದನ್‌ಪರ್‌ರೋಜ಼್ ಕೋಚಾ಼ಲನಿತೆ ಹರೇಕ್ ಜ಼ಣು ಶಾಪ್‌ವಾಳೊ ಹುಯಿರ‍್ಹೊಸ್” ಕರಿ ಪವಿತ್ರ ಪುಸ್ತಕ್‌ಮ ಲಿಖೈರ‍್ಹುಸ್.
GAL 3:11 ಅತ್ರೇಸ್‍ಕಾಹೆತೆ ಧರ್ಮಶಾಸ್ತ್ರಥಿ ಕೋಣ್‌ಬಿ ದೇವ್ನಿ ಝ಼ಗೋಮ ನೀತಿವಾಳೊ ಕೊ ಉಷೇನಿಕರಿ ದೆಖಾವಸ್, ಶನಕತೊ ನೀತಿವಾಳೊ ವಿಶ್ವಾಸ್‌ಥೀಸ್ ಜಿವ್‌ಶೆ ಕರಿ ಬೋಲೈರ‍್ಹುಸ್.
GAL 3:12 ಕತೋಬಿ ಧರ್ಮಶಾಸ್ತ್ರ ವಿಶ್ವಾಸ್‌ಪರ್ ಆಧಾರ್‌ಕೊಯ್ನಿ, ಇನ ಬದಲ್, “ಧರ್ಮಶಾಸ್ತ್ರನ ಪಾಡಿಚಾ಼ಲವಾಳೊ ಯೋ ಇನೇಥಿಸ್ ಜಿವ್‌ಶೆ” ಕರಿ ಲೀಖೈರ‍್ಹುಸ್.
GAL 3:13 ಯೇಸು ಕ್ರಿಸ್ತ ಅಪ್ಣುನ ಶಾಪ್‌ಥು ಛೋ಼ಡಾವನ ಇನುಯೋಸ್ ಶಾಪ್‌ವಾಳೊ ಹುಯಿಗೊ. ಶನಕತೊ ಮೋಶೇನು ಧರ್ಮಶಾಸ್ತ್ರಮ ಬೋಲಸ್ತೆ ಪರಕ್ಮ “ಖಂಬಾಪರ್‌ ಠಂಗಾಯುಹುಯು ಹರೇಕ್‍ಜ಼ಣು ಶಾಪ್‌ವಾಳು ಹುಯಿರ‍್ಹುಸ್” ಕರಿ ಲೀಖೈರ‍್ಹುಸ್.
GAL 3:14 ಅನೇಥಿ ಅಬ್ರಹಾಮ್‌ನ ಹುಯೂತೆ ಆಶೀರ್ವಾದ್‌ ಯೇಸುಥಿ ಯೆಹೂದ್ಯರ್‌ಕಾಹೆತೆ ಅದ್ಮಿವ್‌ನ ಮಳಾನಿಘೊಣಿ ಹೋಣುಕರಿ ಅಮ್ ವಿಶ್ವಾಸ್‌ನಿ ಬಾರೇಥಿ ದೇವ್‍ಥಿ ವಾಗ್ದಾನ್ ಹುಯೂತೆ ಪವಿತ್ರಾತ್ಮ ಅಪ್ಣುನ ಮಳಾನಿತರ ಹುಯು.
GAL 3:15 ಭೈಯೇ ಭೇನೆವೊ, ದನ್‌ರೋಜ಼್‌ನ ಜಿವ್ಣಾಥು ಏಕ್‌ ಮತ್ಲಬ್ ತುಮುನ ಬೋಲುಸ್, ಏಕ್‍ಜ಼ಣೊ ಬಿಜೇಕ್‌ ಜ಼ಣಾಥಿ ಒಪ್ಪಂದ ಕರಿರಾಖಸ್. ಇನ ಬರೊಬ್ಬರ್‌ಥಿ ಕರೀನ್ ಖತಮ್ ಕರಾಪರ್ ಇನ ಕೋಣ್‌ಬಿ ಕಾಡಖ್ಹರ್ಕು ಕೊಯ್ನಿ, ಮಳಾವಖ್ಹರ್ಕೂಬಿ ಕೊಯ್ನಿ.
GAL 3:16 ಇಮ್ಮಸ್ ದೇವ್ನೆ ಅಬ್ರಹಾಮ್‌ನಾಬಿ ಇನಿ ಪಿಳ್ಗಿನಾಬಿ ವಾಗ್ದಾನ್‌ ಕರ‍್ಯೊ. ಕತೋಬಿ ಯೋ ಖೂಮ್ಮ ರ‍್ಹವಾಳ ಅಖ್ಖಾಸ್ನ ಬೋಲ್ಯೊಕೊಂತೆ ಅಬ್ರಹಾಮ್‌ನು ಪಿಳ್ಗಿನ ಛಾ಼ತೆ ಎಕ್ಕಸ್ ಜ಼ಣಾನ ವತಾಳಸ್‍. ಯೋ ಏಕ್‌ ಜ಼ಣೋಸ್ ಯೇಸು ಕ್ರಿಸ್ತ.
GAL 3:17 ಮೇ ಶಾತ್‌ ಬೋಲಾನ ಆಖ್ಹ್‌ಕರುಸ್ ಕತೊ ದೇವ್ನೆ ಅಬ್ರಹಾಮ್‌ನ ಜೋ಼ಡ್ಮ ಪಹಿಲೆ ಕರೀನ್ ಖತಮ್ ಕರ‍್ಯೊಥೋತೆ ಒಪ್ಪಂದಾನ ಚಾರ್‌ಖ್ಹೊ ಡೋಡಿಖ್ಹ್‌ ವರಖ್ಹ್‌ನ ವಾರ್ ಆಯೋತೆ ಮೋಶೆನಿ ಧರ್ಮಶಾಸ್ತ್ರನ ತೋಡಿನ್ ಯೋ ವಾಗ್ದಾನ್ನ ನಾ ರ‍್ಹೇವ್ಣುತೆ ತಿಮ್ ಕರಾನ ಕೋ ಉಶೇನಿ.
GAL 3:18 ಶನಕತೊ ಏಕ್‌ಬಾರ್ ದೇವ್ನು ಇನಾಮ್ ಧರ್ಮಶಾಸ್ತ್ರಥಿ ಮಳಾನು ರ‍್ಹಯೂತೊ, ಯೊ ದೇವ್ನಿ ವಾಗ್ದಾನ್‌ಥಿ ಮಳ್‌ಶೆ ಕೊಯ್ನಿಕರಿ ಹುಯಿಗು. ಕತೋಬಿ ದೇವ್ನೆ ಅಬ್ರಹಾಮ್‌ನ ದಿದೊತೆ ಇನ ವಾಗ್ದಾನ್‌ಖ್ಹಾಜೆಥಿ ಯೊ ಇನಾಮ್ನ ದಿರಾಖ್ಯೊಥೊ.
GAL 3:19 ಇಮ್‍ಕತೊ ಮೋಶೇನು ನಿಯಮ್‌ ಶನಖ್ಹಾಜೆ? ವಾಗ್ದಾನ್‌ಮ ವತಾಳಿರಾಖ್ಯೊತೆ ಯೊ ಆವಲಗು ದೇವ್ ಅಥ್ರಅಥ್ರಾನು ಅಪರಾದ್‌ಕರಿ ದೆಖಾಡನ ಖ್ಹಾಜೇಥಿ ಇನ ವಾಗ್ದಾನ್ ಹುಯುತದೆ ದೇವ್‌ದೂತರ್‌ಥಿ ಏಕ್‌ ಇಚ಼್‌ಮ ರ‍್ಹವಾಳನ ಹಾತ್ಮ ದಿದೊ.
GAL 3:20 ಕತೋಬಿ ಎಕ್ಕಸ್‍ಜ಼ಣೊ ರ‍್ಹಯೂತೊ ಬೀಚ಼್‌ವಾಳೊ ಶಾತ್ಬಿ ಜಾ಼ವಾನು ಹೋಣುಕೊಯ್ನಿ. ದೇವ್‌ತೊ ಎಕ್ಕಸ್ ಜ಼ಣೊ.
GAL 3:21 ಇಮ್‍ಕತೊ ಮೋಶೇನು ಧರ್ಮಶಾಸ್ತ್ರ ದೇವ್ನ ವಾಗ್ದಾನ್ನ ವಿರೋದ್ ಕಿಶು? ಕಾಹೆಸ್ ಕಾಹೆ! ಬಚಾ಼ಡಾನಿ ಶಕತ್ನ ಧರ್ಮಶಾಸ್ತ್ರಥಿ ನೀತಿ ಮಳ್‌ಶೇಸ್ ಮಳ್‌ಶೆ.
GAL 3:22 ಹಿಡಿ ಜಗತ್‌ ಪಾಪ್ನ ಅಧೀನ್ ಹುಯ್ಗಕರಿ ಪವಿತ್ರ ದಪ್ತರ್‌ ಬರೋಬರ್‌ಥಿ ವತಾಳಸ್‍. ಅಮ್‌ರ‍್ಹವಾಪರ್ ವಾಗ್ದಾನ್ನ ಫಲ್ನ ಯೇಸುಮ ನಂಬಾವಳನ ಇವ್ಣ ವಿಶ್ವಾಸ್ ಆಧಾರ್‌ಪರ್ ದೆವಾವಸ್.
GAL 3:23 ಕತೋಬಿ ಕ್ರಿಸ್ತನು ವಿಶ್ವಾಸ್‍ನು ಹಗಾಮ್ ಆವಾನ ಪಹಿಲೆ ಅಪ್ಣೆ ಧರ್ಮಶಾಸ್ತ್ರನ ಮಹಿ ಬಂದನ್ಮ ರ‍್ಹಿಯೇಸ್. ಆ ವಿಶ್ವಾಸ್ ಮಾಲುಮ್‌ಪಡಾಲಗು ಆಸ್ ರ‍್ಹಾ ಹುಯಿರ‍್ಹುಥು.
GAL 3:24 ಅಜು಼ ಅಪ್ಣೆ ವಿಶ್ವಾಸ್‍ಥಿ ಕ್ರಿಸ್ತಮ ನೀತಿವಾಳ ಕರಿ ತೀರ್ಪ್‌ಮಳಾನ ಹಗಾಮ್ ಆವಲಗು, ಧರ್ಮಶಾಸ್ತ್ರ ಅಪ್ಣುನ ಚ಼ಲಾವಮ ಪಾಲನ್‍ ಕರವಾಳು ಹುಯಿರ‍್ಹುಥು.
GAL 3:25 ಕತೋಬಿ ಹಮ್ಕೆ ವಿಶ್ವಾಸ್ ಐರ‍್ಹೂತೆ ಇನಖ್ಹಾಜೆ ಅಪ್ಣೆ ಚ಼ಲವ್‌ಕರೇಸ್ತೆ ಧರ್ಮಶಾಸ್ತ್ರನ ಕಬ್‌ಜಾ಼ಮ ಕೊಯ್ನಿ.
GAL 3:26 ಶನಕತೊ ಕ್ರಿಸ್ತ ಯೇಸುಮ ತುಮೆಖ್ಹಾರು ವಿಶ್ವಾಸ್‍ಥಿ ದೇವ್ನ ಲಡ್ಕಹುಯಿರ‍್ಹಾಸ್.
GAL 3:27 ಕಿಮ್‌ಕತೊ ಕ್ರಿಸ್ತಮ ಮಳಾನ ಬ್ಯಾಪ್ತಿಸ್ಮ ಕರೈರಾಖ್ಯಾತೆ ತುಮೆ ಅಖ್ಖಾಸ್‍ಜ಼ಣ ಕ್ರಿಸ್ತನಿಘೋಣಿ ಹುಯಿರ‍್ಹಾಸ್.
GAL 3:28 ತುಮೆ ಅಖ್ಖುಜ಼ಣು ಕ್ರಿಸ್ತ ಯೇಸುಮ ಎಕ್ಕಸ್ ಹುಯಿರ‍್ಹಾಸ್ತೆಖ್ಹಾಜೆ ಮೆ ಯೆಹೂದ್ಯರ್‌ವಾಳೊ ನತರ್ ಯೆಹೂದ್ಯಕಾಹೇತೆ ಕರಿ ರ‍್ಹವೊ, ಛುಟ್ಕಾರ್‌ವಾಳ ನತರ್ ದಾಸರ್‌ ಕರಿ ರ‍್ಹವೊ, ಪರ್ಖ್ಹೊ ಅಜು಼ ತಯೇಡ ಕರಿ ರ‍್ಹವೊ ಫರಕ್ ಕೊಯ್ನಿ.
GAL 3:29 ತುಮೆ ಕ್ರಿಸ್ತವಾಳ ಉಷೇತೊ ಅಬ್ರಹಾಮ್‌ನ ಖೂಮ್‌ವಾಳ ಹುಯಿನ್ ಅಜು಼ ದೇವ್ನು ವಾಗ್ದಾನ್ನ ಲೀರಾಖವಾಳ ಹುಯಿರ‍್ಹಾಸ್.
GAL 4:1 ಕತೋಬಿ ಮೇ ಶಾತ್‌ಬೋಲುಸ್ ಕತೊ ಹಕ್‍ದಾರ್ ರ‍್ಹವಾಳೊ ಯೋ ಇನು ಧನ್‌ದೌಲತ್ನ ಯಜಮಾನ್ ಹುಯಿರ‍್ಹೊತೋಬಿ ಅಡ್ಡಾಣಿ ರ‍್ಹಾವಾಲಗು ಇನು ರ‍್ಹಯುತೋಬಿ ಯೊ ಆಳ್‌ನಿತ್ರಾಸ್ ರ‍್ಹೇಸ್.
GAL 4:2 ಬಾನೆ ಖ್ಹಣೇದ್ ಕರ‍್ಯೊತೆ ವಖ್ಹತ್‌ಲಗು ಪಾಲನ್‌ಕರಾವಳನಿ ಅಜು಼ ಚ಼ಲಾವವಾಳಾನಿ ಚ಼ಪ್ಪಣ್‌ಮ ರ‍್ಹೇಣು.
GAL 4:3 ಇಮ್ಮಸ್ ಅಪ್ಣೇಬಿ ಅಡ್ಡಾನಿ ರ‍್ಹವಾನಿ ವಖ್ಹ್‌ತೆ ಆ ಜಗತ್ನಿ ನಿಯಮ್‌ಥಿ ಚ಼ಲಾವತೆ ಸೇವೆನ ಅಧೀನ್ ಹುಯಿರ‍್ಹಾಥ.
GAL 4:4 ಕತೋಬಿ ಬರಬರ‍್ನಿ ವಖ್ಹತ್ ಆವಖ್ಹತರ್ ದೇವ್ನೆ ಇನ ಛಿಯ್ಯಾನ ಮೋಕ್‌ಲ್ಯೊ.ಯೊ ಏಕ್‌ ತಯೇಡಾಮ ಪೈದಹುಯಿನ್ ಧರ್ಮಶಾಸ್ತ್ರನಿ ಅಧೀನ್‍ಮ ಆಯೊ.
GAL 4:5 ಅನೇಥಿ ಯೊ ಧರ್ಮಶಾಸ್ತ್ರನಿ ಚ಼ಪ್ಪಣ್‌ಮ ರ‍್ಹವಾಳನ ಛೋ಼ಡಾವ್ಣುಕರಿ ಆಯೊ. ಅನಖ್ಹಾಜೇಥಿ ಅಪ್ಣೆ ದೇವ್ನ ಲಡ್ಕಾ ಹುಯ.
GAL 4:6 ತುಮೆ ಛಿಯ್ಯಾಹುಯಿರ‍್ಹಾತೆ ಖ್ಹಾಜೆ ದೇವ್ನೆ, “ಬಾ! ಬಾ!” ಕರಿ ಚಿಕ್ರಾಸ್ತೆ ಇನ ಛಿಯ್ಯಾನ ಆತ್ಮಾನ ಅಪ್ಣ ದಿಲ್ಮ ಮೋಕ್‌ಲ್ಯೊ.
GAL 4:7 ಅಮ್‌ರ‍್ಹವಾಪರ್ ಅಜು಼ ಸೇವಕ್ ಕಾಹೆ, ಛಿಯ್ಯೊ ಹುಯಿರ‍್ಹೋಸ್. ಛಿಯ್ಯೊ ಕರಿ ಬೋಲಾಪರ್ ದೇವ್‌ನೊ ವಾರಿಸ್‌ವಾಳೊಬಿ ಹುಯಿರ‍್ಹೋಸ್.
GAL 4:8 ಅಗ್ಗಳ್ ತುಮೆ ದೇವ್ನ ಮಾಲುಮ್‌ ಕರ‍್ಯಾಕೊಂತೆ, ದೇವಸ್ ಕಾಹೆತೆ ಇವ್ಣುನ ಗುಲಾಮ್ ಹುಯಿರ‍್ಹಾಥ.
GAL 4:9 ಹಮ್ಕೆತೋಬಿ ತುಮೆ ದೇವ್ನ ಮಾಲುಮ್‌ ಕರಿರಾಖ್ಯಾಸ್. ವಿಶೇಷ್‌ಥಿ ದೇವ್ನೆ ತುಮುನ ಮಾಲುಮ್ ಕರಿರಾಖ್ಯೋಸ್. ಅಮ್‌ರ‍್ಹವಾಪರ್ ತುಮೆ ಕಾಮ್ನ ಕೊಯ್ನಿತೆ, ಫಾಯಿದೊ ಕೊಯ್ನಿತೆ, ಜಗತ್ನಿ ನಿಯಮ್‌ಭಣಿ ತುಮೆ ಶನ ಫರೋಸ್? ಪಾಛು಼ ಇನ ಗುಲಾಮ್ ಹೋಣುಕರಿ ಛಾ಼ ಕಿಶು?
GAL 4:10 ತುಮೆ ಯೋಯೊ ದನ್ನಾಬಿ, ಮಹಿನನಬಿ, ವೇಳ್ನಾಬಿ, ಅಜು಼ ಹಗಾಮ್ನ ಬಾರೇಮ ಇನಾಸ್ ತುಮೆ ಚ಼ಲಾವವಾಳ ಹುಯಿರ‍್ಹಾಥ.
GAL 4:11 ಮೇ ತುಮಾರಖ್ಹಾಜೆ ಮ್ಹಿನತ್ ಕರ‍್ಯೊತೆ ಫಲ್‌ಕೊಂತೆ ಹುಯ್ಗುಕಿಶುಕಿ ಕರಿ ತುಮಾರಿ ಬಾರೇಮ ಡರ್‌ ಹುವಾಸ್.
GAL 4:12 ಭೈಯೇ ಭೇನೆವೊ, ಮೆ ತುಮಾರಿನಿ ಘೋಣಿ ಹುಯೋತೆ ಇಮ್ಮಸ್ ತುಮೇಬಿ ಮಾರಿನಿತರಸ್ ಹೋಣುಕರಿ ತುಮುನ ಗಿಂಗೈಲೆವುಸ್. ತುಮೆ ಮನ ಶಾತ್ಬಿ ಠಗಾಯ ಕೊಯ್ನಿ.
GAL 4:13 ಮನ ಶರೀರ್‌ಮ ಅಛ್ಛು಼ ಕೋಥುಂತೆ ಇನಖ್ಹಾಜೆ ತುಮಾರಮ ರ‍್ಹೀನ್ ಪಹಿಲಿ ಬಾರ್‌ಮ ತುಮುನ ಸುವಾರ್ತೆ ಬೋಲಿ ವತಾಳ್ಯೊಥೋತೆ ತುಮುನ ಮಾಲುಮ್‌ ಛಾ಼.
GAL 4:14 ಮಾರಿ ಶರೀರ್‌ನಿ ರ‍್ಹಾಥಿ ತುಮುನ ಬೇಜಾರ್ ಹುವಾನು ರ‍್ಹಯುತೋಬಿ ಧಚ಼್‌ಕಾಯ ಕೊಯ್ನಿ, ಝಿಟ್ಕಾರ‍್ಯ ಕೊಯ್ನಿ, ಮನ ದೇವ್ನ ದೂತನಿತರ ಕ್ರಿಸ್ತಯೇಸುನಿ ಘೋಣಿಸ್ ಉಪಚಾರ್ ಕರ‍್ಯಾ.
GAL 4:15 ಯೋ ವಖ್ಹತ್‌ಮ ಯೋ ಏಕ್‌ ಖುಶಿಕರಿ ಲಹಿರಾಖ್ಯಾಥಾನಿ, ಹಮ್ಕೆ ಯೊ ಖ್ಹಯಾಲ್ ಕಿಜ್ಜಾ಼ ಛಾ಼? ತದೆ ಹೋಣುಕತೊ ತುಮಾರ ಡೋಳಾನಸ್ ಉಖ್ಡೀನ್ ಮನ ದಿದಾಹೋತ್ತ್ ಕರಿ ಮೇ ಸಾಕ್ಷಿ ಬೋಲುಸ್.
GAL 4:16 ಅಮ್‌ರ‍್ಹವಾಪರ್ ಮೆ ಖ್ಹಾಚಿಬೋಲಾಥಿ ತುಮುನ ವಹೇರ‍್ಯೊ ಹುಯೊ ಕಿಶು?
GAL 4:17 ಯೋ ಮಾರು ವಿರೋದಿ ಖ್ಹಾರು ತುಮುನ ದೋಸ್ತ್ ಕರಾವ್ಣುಕರಿ ದಿಲ್‌ ಲಗಾಡು ಕರಾಸ್ ಕತೋಬಿ ಅಛ್ಛಾ಼ನಖ್ಹಾಜೆ ಕಾಹೆ. ತುಮೆ ಇವ್ಣುನ ಕಿಮ್ ಮನ್‌ಲಗಾಡ್ಣುಕರಿ ಕರಸ್ಕಿ ಇಮ್ಮಸ್ ಇವ್ಣೇಬಿ ತುಮುನ ಮಾರೇಥಿ ಅಲಕ್ ಕರ್ನುಕರಿ ಕೋಶಿಶ್ ಕರುಕರಸ್.
GAL 4:18 ತುಮಾರಿ ಜೋ಼ಡೆ ರ‍್ಹವಾನಿವಖ್ಹ್‌ತೆ ಖಲಿಕಾಹೆ ಕೆದೇಬಿ ಅಛ್ಛು಼ ವಾತೇವ್ನ ಖ್ಹಾಜೆ ತುಮೆ ಮನ್ ಲಗಾಡನು ಅಛ್ಛೂ಼ಸ್.
GAL 4:19 ಮಾರ ಪ್ಯಾರ್‌ನ ಲಡ್ಕಾವ್‍ನಿಘೋಣಿ ಛಾ಼ತೆ ಗಲಾತ್ಯವಾಳವೊ, ಆಯ ಇನ ಲಡ್ಕಾನಖ್ಹಾಜೆ ಜ಼ಣತ್‌ನಿ ಅಜ಼ ಪಡಾನಿಘೋಣಿ, ಕ್ರಿಸ್ತ ಯೇಸುನು ಚಾ಼ವ್‌ಭಾವ್ ತುಮಾರಮ ಆವಲಗು ತುಮಾರ ಖ್ಹಾಜೆ ಮೆ ಎಥ್ರಾನಿಸ್ ಅಜ಼ ಪಡುಕರುಸ್.
GAL 4:20 ತುಮಾರಿ ಬಾರೇಮ ಶಾತ್‌ಕರ‍್ನುಕರಿ ಮನ ಸೋಚಾನ ಕೊಹುಂಕರಾನಿ. ಬೋಲ್ನುಕತೊ, ತುಮಾರ ಬೀಚ್ಮಾಸ್ ರ‍್ಹೀನ್ ಮಾರ ವಾತೆನಿ ಲಬೂಜ಼್‌ನ ಬದ್ಲಾಯೊಹೊತ್ತೊ ಅಛ್ಛು಼ ರ‍್ಹಿಯುಹೊತ್ ಕಿಶುಕಿ!
GAL 4:21 ಧರ್ಮಶಾಸ್ತ್ರನ ಹೇಟಹುಯಿನ್ ಚಾ಼ಲಾನ ಹರ್ಖ್ಹವಾಳ, ಧರ್ಮಶಾಸ್ತ್ರ ಶಾತ್‌ ಬೋಲುಕರಸ್ ಕರಿ ತುಮೆ ಖ್ಹಮ್‌ಜ್ಯ ಕೊಯ್ನಿಕಿಶು? ಮನ ಜ಼ವಾಬ್ ದೇವೊ.
GAL 4:22 ಇನಾಮ ಲಿಖೈರ‍್ಹುಸ್ ಶಾತ್‌ಕತೊ ಅಬ್ರಹಾಮ್‌ನ ಬೇ ಪರ್ಖ್ಹಾ ಲಡ್ಕಾಥ. ಏಕ್‌ ಜ಼ಣೊ ದಾಸಿನ ಪೈದಹುಯೊತೆ, ಬಿಜೇಕ್ ಜ಼ಣೊ ಛುಟ್ಕಾರ್‌ಥಿ ರ‍್ಹವಾಳಿನ ಪೈದಹುಯುತೆ.
GAL 4:23 ದಾಸಿನೊ ಛಿಯ್ಯೊ ಶರೀರ್‌ನ ಸಂಬಂಧ್‌ಥಿ ಪೈದಹುಯುತೆ, ಛುಟ್ಕಾರ್‌ಥಿ ರ‍್ಹವಾಳಿನೊ ಛಿಯ್ಯೊ ವಾಗ್ದಾನ್‌ಥೀಸ್ ಹುಯೋತೆ.
GAL 4:24 ಆ ವಾತೆಖ್ಹಾರು ಮಾಲುಮ್ ಕರಾನು ಹುಯಿರ‍್ಹುಸ್. ಕಿಮ್‌ಕತೊ ಯೋ ಭೇ ತಯೇಡ ಬೇ ಒಪ್ಪಂದ ಹುಯಿರ‍್ಹುಸ್. ಏಕ್‌ ಒಪ್ಪಂದ ಸೀನಾಯಿ ಪರ್ಭತ್ ಉಬ್ಜಿನ್ ಗುಲಾಮ್ ಹುಯಿನ್ ರ‍್ಹವಾನ ಲಡ್ಕಾನ ಪೈದಕರಸ್ತೆ; ಯೋಸ್ ಹಾಗರ್.
GAL 4:25 ಹಾಗರ್ ಕತೊ ಅರಬ್‌ಮ ಛಾ಼ತೆ ಸೀನಾಯಿ ಪರ್ಭತ್‌ನ ವತಾಳಸ್‍. ಹಮ್ಕೇನು ಯೆರೂಸಲೇಮ್ ಖ್ಹಯೇರ‍್ನಿಮತ್ ಹುಯಿರ‍್ಹೀಸ್. ಶನಕತೊ ಯೊ ಹೈರಿತೆ ಇನ ಅದ್ಮಿಯೇನ ಜೋ಼ಡ್ಮ ಹಮ್ಕೆ ಸೇವೆಕರವಾಳಿ ಹುಯಿರ‍್ಹೀಸ್.
GAL 4:26 ಕತೋಬಿ ಸೊರ್ಗಾನು ಯೆರೂಸಲೇಮ್ ಕರಿ ಬೋಲವಾಳಿ ಛುಟ್ಕಾರ್‌ವಾಳಿ ಹುಯಿರ‍್ಹೀಸ್. ಆಸ್ ಅಪ್ಣಿ ಆಯ.
GAL 4:27 ಜ಼ಣಿಕೊಂತೆ ವಾಂಝಿ ತಯೇಡ ಶಂತೋಖ್ಹ್‌ಕರ್ ಜ಼ಣತ್‌ನಿ ಅಜ಼ ಮಾಲುಮ್‌ಕೊಂತೆ ರ‍್ಹವಾಳಿ, ಖುಷಿಥಿ ಊಚು಼ ಅವಾಜ಼್‌ಥಿ ಚಿಕರ್, ಬಾವ್ರಿ ರ‍್ಹಾವವಾಳಿಥೀಬಿ ಬಾವ್ರಿ ಮ್ಹೇಲಿಹುಯಿನ ಲಡ್ಕಾ ಜಾ಼ಖ್ಹತ್‌ಕರಿ ಲೀಖೈರ‍್ಹೂಸ್‌ನಿ.
GAL 4:28 ಭೇನೆ ಭೈಯೇವೊ, ಅಪ್ಣೆ ಇಸಾಕನಿ ಘೋಣಿ ವಾಗ್ದಾನ್ನ ಫಲ್ನ ಲಡ್ಕಹುಯಿರ‍್ಹಾಸ್.
GAL 4:29 ಕತೋಬಿ ಪಹಿಲೆ ಶರೀರ್‌ನ ಸಂಬಂಧ್‌ಥಿ ಪೈದ ಹುಯಿರ‍್ಹಾವಳೊ ದೇವ್ನ ಆತ್ಮಾನಿ ಶಕಥ್ಥಿ ಪೈದಹುಯಿರ‍್ಹಾವಳನ ಖ್ಹತಾಪ್ಣಿ ದ್ಯವನಿತರಸ್ ಹಮ್ಕೇಬಿ ಹೂಕರಸ್.
GAL 4:30 ಕತೋಬಿ ಪವಿತ್ರ ದಪ್ತರ್‌ಮ ಶಾತ್‌ಬೋಲಾಸ್? “ದಾಸಿನಾಬಿ ಇನ ಛಿಯ್ಯಾನಾಬಿ ಭಾರ್‌ಕಾಡ್‌. ದಾಸಿನೊ ಛಿಯ್ಯೊ ಛುಟ್ಕಾರ್‌ಥಿ ರ‍್ಹವಾಳಿನ ಛಿಯ್ಯಾನ ಜೋ಼ಡೆ ಭಾಗ್‌ ಲ್ಯವಾಳೊ ನಾಹುಯಿರ‍್ಹೇವ್ಣು” ಕರಿ ಬೋಲಾಸ್.
GAL 4:31 ಇಮ್ಮಸ್ ಭೈಯೇ ಭೇನೆವೊ, ಅಪ್ಣೆ ದಾಸಿನ ಲಡ್ಕಾಕಾಹೆ, ಕತೋಬಿ ಛುಟ್ಕಾರ್‌ವಾಳಿನ ಲಡ್ಕಾ ಹುಯಿರ‍್ಹಾಸ್.
GAL 5:1 ಕ್ರಿಸ್ತನೆ ಅಪ್ಣುನ ಕಬ್‌ಜಾ಼ಮ ನಾರ‍್ಹೇವ್ಣುಕರಿ ಅಪ್ಣುನ ಛುಟ್ಕಾರ್ ಕರೀನ್ ಮ್ಹೇಲ್ಯೊ. ಇನಾಮ ಘಟ್‍ಥಿ ಭೀರೆವೊ. ಅಜು಼ ಪಾಛು಼ ದಿಲ್‌ ಫರೈನ್ ಗುಲಾಮ್‌ಗಿರಿನ ನೊಗಾಮ ಪಾಛಾ಼ ನಕೊ ಖ್ಹಪ್‌ಡಿಜಾಶು.
GAL 5:2 ದೇಖೊ, ಪೌಲಕರಿ ಮೇ ತುಮುನ ಬೋಲುಕರುಸ್, ತುಮೆ ಖ್ಹತ್ನ ಕರಾವನ ತುಮಾರು ತುಮೇಸ್ ಮಾನಿಲಿದಾತೊ ಕ್ರಿಸ್ತಥಿ ತುಮುನ ಶನೂಬಿ ಫಾಯಿದೊ ಕೊಯ್ನಿ.
GAL 5:3 ಖ್ಹತ್ನ ಕರೈಲಾವಳ ಹರೇಕ್ ಜ಼ಣಾನ, ತೂ ಧರ್ಮಶಾಸ್ತ್ರಮ ಬೋಲಿರಾಖ್ಯುಸ್ತೆ ಕರ್ನಿನ ಚ಼ಲಾವವಾಳೊ ಹುಯಿರ‍್ಹೊಸ್ ಕರಿ ಪಾಛು಼ ಮೆ ಖ್ಹಾಚ಼ಮಾಬಿ ಬೋಲುಸ್.
GAL 5:4 ತುಮಾರಮ ಕೋಣ್‌ಕೋಣ್ ಧರ್ಮಶಾಸ್ತ್ರಥಿ ನೀತಿವಾಳ ಹೋಣುಕರಿ ಆಖ್ಹ್‌ಕರಾಸ್ಕಿ ಇವ್ಣೆ ಕ್ರಿಸ್ತಥಿ ಬಿಚ಼ಡಿಜಾ಼ವಳ ಹುಯಿರಾಸ್ ವಾರ್‌ಖ್ಹಾನ ಆಖ್ಹ್‌ರೇಥಿ ರಡ್ಕಾಹುಯ ಹುಯಿರ‍್ಹಾಸ್.
GAL 5:5 ಹಮೆತೋಬಿ ದೇವ್ನ ಆತ್ಮಾಥಿ ವಿಶ್ವಾಸ್‍ಥಿ ನೀತಿವಾಳಹುಯೇಸ್ ಕರಿ ಟಿವೈರ‍್ಹವಾನು ಚಾ಼ಲ್‌ಶೆಕರಿ ದಿಲ್‌ ಲಗಾಡಿನ್ ಮ್ಹೋರೆ ದೇಖವಾಳ ಹುಯಿರ‍್ಹಾಸ್.
GAL 5:6 ಕ್ರಿಸ್ತ ಯೇಸುಮ ರ‍್ಹವಾಳನ ಖ್ಹತ್ನ ಹುಯುತೋಬಿ ನಾಹುಯುತೋಬಿ ಫಾಯಿದೊ ಕೊಯ್ನಿ. ಕತೋಬಿ ಪ್ಯಾರ್‌ಥಿ ರ‍್ಹೇಸ್ತೆ ವಿಶ್ವಾಸಸ್ ಫಾಯಿದಾನು ಹುಯಿರ‍್ಹುಸ್.
GAL 5:7 ತುಮೆ ಅಛ್ಛಿನಿತರ ಮಿಲವ್‌ ಕರಸ್ ಕತೋಬಿ ಖ್ಹಾಚ಼ನ ನಾ ಪಾಡಿಚಾ಼ಲ್ನುಕರಿ ತುಮುನ ಠೆರಾಯುತೆ ಕೋಣ್?
GAL 5:8 ಅಮ್ ಅಡ್ಡಿ ಕರಾನು ತುಮುನ ದೇವ್‍ಥಿ ಆಯು ಹುಯು ಕಾಹೆ.
GAL 5:9 ದರಾಖ್ಹು ಶೋಡ ಬಶ್‌ ಪೂರ ಘೂಂದಹುಯ ಆಟನಸ್ ಫುಲೈನಾಖಸ್.
GAL 5:10 ಕತೋಬಿ ತುಮಾರಮ ಬಿಜಿ ಸೋಚ್ ಕೊರ‍್ಹಿಶೇನಿ ಕರಿ ಪ್ರಭುಮ ತುಮಾರಿ ಬಾರೇಮ ಮನ ಭರೋಖ್ಹೊ ಛಾ಼. ತುಮಾರಮ ಗುಂಝ಼್‌ಲಾವ್ಣಿ ಕರಾವಾಳೊ ಕೋಣ್‌ಬಿ ರ‍್ಹವೊ ದೇವ್ನಿ ನಿಶತ್‌ ಲಿಶೆ.
GAL 5:11 ಭೈಯೇ ಭೇನೆವೊ, ಅದ್ಮಿ ಖ್ಹತ್ನ ಕರಾವ್ಣು ಕರಿ ಮೇ ಬೋಧನೆ ಕರುಕೊಯ್ನಿ. ಖ್ಹತ್ನನು ಜ಼ರೂರತ್ ಛಾ಼ಕರಿ ಮೇ ಬೋಧನೆ ಕರಾವಾಳೊ ಹುಯೋತೊ ಮೇ ಬಿಜೂ಼ಬಿ ಖ್ಹತಾಪ್ಣಿನ ಮಹಿ ಶನ ಛೂ಼? ಅದ್ಮಿ ಖ್ಹತ್ನ ಕರಾವ್ಣುಕರಿ ಮೇ ಹಮ್ಕೆ ಬೋಧನೆ ಕರಾವಾಳೊ ರ‍್ಹಯೋತೊ ಶಿಲ್‌ಬೇನಿ ಬಾರೇನಿ ಮಾರಿ ಬೋಧನೆಥಿ ಶನೂಸ್ ಕಚ಼್ಚರ್‌ ಕೊರ‍್ಹಿಶೇನಿ.
GAL 5:12 ತುಮುನ ಕಲಾವ್ಣಿ ಕರವಾಳು ಇವ್ಣು ಇವ್ಣೇಸ್ ಖ್ಹಂದೊ ವ್ಹಾಡಿಲಿದುತೊಬಿ ಅಛ್ಛೂ಼ಸ್.
GAL 5:13 ಭೈಯೇ ಭೇನೆವೊ, ತುಮೆ ಛುಟ್ಕಾರ್‌ಥಿ ರ‍್ಹೇವ್ಣುಸ್‌ಕರಿ ದೇವ್ನೆ ತುಮುನ ಬುಲಾಯೊ. ಕತೋಬಿ ತುಮುನ ಛಾ಼ತೆ ಛುಟ್ಕಾರ್‌ನ ಶರೀರ್‌ನ ಇಛ್ಛಾನಿ ಪರಕ್ಮ ಉಪಯೋಗ್‌ ನಾಕರ‍್ನುತೆ, ಪ್ಯಾರ್‌ಥಿ ಏಕ್‌ಥಿ ಏಕ್‌ ಸೇವೆಕರೊ.
GAL 5:14 ತಾರ ಭೀಡೆವಾಳನ ತಾರಿನಿತರಾಸ್ ಪ್ಯಾರ್ ಕರ್ನುಕರಿ ಎಕ್ಕಸ್ ಹುಕುಮ್ಮ ಧರ್ಮಶಾಸ್ತ್ರಸ್ ಲಪಿರ‍್ಹುಸ್.
GAL 5:15 ಕತೋಬಿ ತುಮೆ ಏಕ್‌ ಥಿ ಏಕ್‌ ಜ಼ಂಗ್‌ಳಿ ಜಾನ್ವರ್‌ನಿ ಘೋಣಿ ಕಲ್ಡ್‌ತಾಹುಯಿನ್, ಫಾಡಿತೋಡಿ ಖಾವವಾಳ ಹುಯಿರ‍್ಹಾತೊ ಏಕ್‌ ಥಿ ಏಕ್‌ ಜ಼ಣು ನಾಶ್ ಹುಯಿಜಾ಼ಶು, ಹೊಷಾರ್.
GAL 5:16 ಮೇ ಬೋಲಾನು ಶಾತ್‌ಕತೊ ಪವಿತ್ರಾತ್ಮನಿ ತರೀಖಾಮ ಚಾ಼ಲೊ ತದೆ ತುಮೆ ಶರೀರ್‌ನ ಲಾಲಚ್‌ನಿ ಖೆವಿ ಪರಕ್ಮಬಿ ಕೋಕರ್‌ಶುನಿ.
GAL 5:17 ಶನಕತೊ ಶರೀರ್‌ನು ಸ್ವಭಾವ್‌ ಆತ್ಮಾನ ವಿರೋದ್ ಹುಯಿರ‍್ಹುಸ್. ಆತ್ಮನು ಸ್ವಭಾವ್ ಶರೀರ್‌ನ ವಿರೋದ್ ಹುಯಿರ‍್ಹುಸ್. ತುಮೆ ಕರ್ನುತೆಯಿನ ನಾಕರ‍್ನುತೆ ಏಕ್‌ಥಿಏಕ್ ಹೊಜ಼್ಜತ್ ಭೀಡಾಸ್.
GAL 5:18 ಕತೋಬಿ ತುಮೆ ಆತ್ಮಾಥಿ ಚ಼ಲೈಲಾವಳ ರ‍್ಹಯಾತೊ ಧರ್ಮಶಾಸ್ತ್ರನಿ ಚ಼ಪ್ಪಣ್‌ಮ ಕೊಯ್ನಿ.
GAL 5:19 ಶರೀರ್‌ನು ಗುಣ್‌ಖ್ಹಾರು ದೆಖವ್‌ಕರಸ್ ಯೊ ಖಿವುಕತೊ; ವ್ಯಬಿಚಾರ್,ಕಚಿಂಡ್ ರ‍್ಹವಾನು, ಪಾಪೇಲು ರ‍್ಹವಾನು,
GAL 5:20 ಮೂರತ್ನಿಪೂಜ಼, ಜಾ಼ದು ಜ಼ರ್ಮರ್, ಏಕ್‌ಥಿಏಕ್ ದಾವೊ,ಲಡೈ, ಪೇಟ್ನೊ ಬಳಾಪೊ, ಇರಾದೊ, ಅಲ್ಹಾವ್‍ನಿತರ ದೇಖಾನು, ಟೋಳ್ನ ಫೋಡಿನಾಖನು,
GAL 5:21 ವಹೇರ್‌ ರಾಖಾನು, ಪಿಯಾನು, ಗಲಾಟ್, ಮೋಜ್‌ಮಸ್ತಿ, ಆ ಅಖ್ಖು. ಅಮ್ನು ಕಾಮ್ ಚ಼ಲಾವವಾಳು ದೇವ್ನಿ ರಾಜ್ಯನು ಹಕ್‌ವಾಳು ಕೊಉಷೆನಿಕರಿ ಮೇ ಆ ಅಗ್ಗಳ್ ಬೋಲ್ಯೊತೆ ತಿಮ್ಮಸ್ ಹಮ್ಕೇಬಿ ತುಮುನ ಝೇತಾವ್‌ಸ್‌.
GAL 5:22 ಕತೋಬಿ ದೇವ್ನ ಆತ್ಮಾಥಿ ಉಬ್‌ಜಾ಼ನು ಫಲ್ ಶಾತ್‌ಕತೊ, ಪ್ಯಾರ್, ಶಂತೋಖ್ಹ್‌, ಸಮಾಧಾನ್, ಖ್ಹಮಾಳಿ ರ‍್ಹವಾನು, ದಯಾ, ಬಿಜೇಕ್ನ ಮದತ್‌ಕರಾನು, ವಿಶ್ವಾಸ್, ಆಸ್‌ಹುಯಿರ‍್ಹುಸ್.
GAL 5:23 ಶೇದೇವ್, ದೋಭೇಡು ಅಥ್ರಾನುಸ್. ಆ ಅಖ್ಖಾನ ವಿರೋದ್‌ಥಿ ಖಿವು ಧರ್ಮಶಾಸ್ತ್ರಬಿ ಕೊಯ್ನಿ.
GAL 5:24 ಕ್ರಿಸ್ತ ಯೇಸುಮ ರ‍್ಹವವಾಳು ಇವ್ಣ ಶರೀರ್‌ನು ಆಖ್ಹ್‌ದಾಖ್ಹ್‌ ಅಜು಼ ಖರಾಬ್ ಆಖ್ಹ್‌ನ ಖ್ಹಮೇದ್ ಶಿಲ್‌ಬೇಪರ್ ನಾಖವಾಳ ಹುಯಿರ‍್ಹುಸ್.
GAL 5:25 ಅಪ್ಣೆ ಆತ್ಮಾಥಿ ಜಿವ್‌ಕರಸ್ತೆ ಇನಖ್ಹಾಜೆ ಆತ್ಮಾನ ಪಾಲನ್‍ ಕರಿ ಚಾ಼ಲ್ಯೆ.
GAL 5:26 ಹಂಕಾರಿ, ಏಕ್‌ನಏಕ್ ನಾ ಛೇಡಾವ್ಣುನಾತೆ, ಏಕ್‌ ಜ಼ಣಾನ ಉಪ್ಪರ್ ಬಿಜೇಕ್ ಜ಼ಣು ಬಳಾಪೊ ನಾಕರ‍್ನುತೆ ತಿಮ್ ರ‍್ಹಿಯೆ.
GAL 6:1 ಭೈಯೇ ಭೇನೆವೊ ತುಮಾರಮ ಕೋಣ್‌ತೋಬಿ ಖಿವುತೋಬಿ ಪಾಪ್‌ಮ ಖ್ಹಪ್ಡಿ ರ‍್ಹಯೂತೊ ಎಥ್ರಾನವಾಳನ ಆತ್ಮಥಿ ಭರೈರ‍್ಹಾವಳ ತುಮೆ ಧೀಮೆಥಿ ಬೋಲಿನ್ ಬರೋಬರ್ ಕರೊ. ತುಮೆತೋಬಿ ಶೋದನೆಮ ನಾಪಡ್ನುತೆ ಇಮ್‌ ತುಮಾರಿ ಬಾರೇಮ ಜ಼ತನ್ ರ‍್ಹವೊ.
GAL 6:2 ಏಕ್ಜ಼ಣೊ ಬಿಜೇಕ್ ಜ಼ಣಾನಿ ಭೋಜ಼್‌ನ ಝೇಲಾದೆ, ಅಮ್ ಕ್ರಿಸ್ತನು ನಿಯಮ್ನ ಪೂರಕರೊ.
GAL 6:3 ಶನಕತೊ ಮೆ ಶಾತ್ ನಾ ರ‍್ಹಿಯೋತೋಬಿ, ಇನು ಯೊ ಮೋಟೊಕರಿ ಲ್ಹಾಯೊತೊ ಯೊ ಧೋಕೊ ಖಾವಳೊ ಹುಯಿರ‍್ಹೊಸ್.
GAL 6:4 ಹರೇಕ್ ಜ಼ಣೊ ಯೋ ಕರಾತೆ ಕಾಮ್ನ ತರೀಪ್‌ಶ ಕರಿಲ್ಯಾವಾದೆ. ತದೆ ಯೊ ಇನಖ್ಹಾಜೇಥಿ ಊಚೊ಼ ಹುಯೆಜಾ಼ಯ್‌ ಪಣ್ಕಿ ಬಿಜೇಕ್ ಜ಼ಣಾನಿತರಾಸ್‌ ಮೇ ಬರೊಬರ್‌ ಬೋಲಿಲಾವನು ಹೋಣುಕೊಯ್ನಿ.
GAL 6:5 ಶನಕತೊ ಹರೇಕ್ ಜ಼ಣೊ ಇನೊ ಶೊಂತ್ ಭೋಜ಼್‌ನ ಯೋಸ್ ಪಾಡವಾಳೊ ಹುಯಿರ‍್ಹೇಣು.
GAL 6:6 ಕ್ರಿಸ್ತನು ಬೋಧನೆನ ಶಿಕವಾಳೊ ಇನ ಶಿಕಾಡವಾಳಮ ಛಾ಼ತೆ ಅಖ್ಖಾಸ್ ಅಛ್ಛಾ಼ಮಾಥು ವಾಟಪಾಡಿಲ್ಯವಾದೆ.
GAL 6:7 ತುಮಾರು ತುಮೆ ಧೋಕ ನಕೊಖಾವೊ, ದೇವ್ನ ನಕ್ಲೆನಿತರ ಲ್ಹಾವನ ಕೊಹುವ್ವಾನಿ. ಅದ್ಮಿ ಯೋ ಶಾತ್ ಬಿತ್‌ಕರಸ್ಕಿ ಇನಾಸ್ ವ್ಹಾಡ್ಣು.
GAL 6:8 ಇನು ಶರೀರ್‌ನು ಲಾಲಚ್‌ನಿ ತರಾನು ಬಿತ್ತವಾಳೊ ಯೋ ಯೊ ಖ್ಹಯಾಲ್‍ಥೀಸ್ ನಾಶನನ ವ್ಹಾಡವಾಳೊ ಹುಯಿರ‍್ಹೋಸ್. ಪವಿತ್ರಾತ್ಮನಿ ಬಾರೇಮ ಬಿತ್ತವಾಳೊ ಪವಿತ್ರಾತ್ಮಥಿ ಹಮೇಶಾನು ಜಾನ್ನ ಫಲ್ನ ವ್ಹಾಡ್‌ಶೆ.
GAL 6:9 ಅಛ್ಛಾ಼ನ ಕರಾಮ ವಳ್‍ಶಿ ನಕೊಕರಿಯೆ, ದಿಲ್ಮ ಢೀಲ ನಾಪಡ್ನುತೆ ರ‍್ಹಿಯೆ, ತದೆ ಬರೊಬ್ಬರ್‌ನಿ ವಖ್ಹತ್‌ಮ ಅನಾಜ಼್ ವ್ಹಾಡ್‌ಶು.
GAL 6:10 ಇನಖ್ಹಾಜೆ ವಖ್ಹತ್ ರ‍್ಹವಾನಿಸ್ ವಖ್ಹ್‌ತೆ ಅಖ್ಖಾನ ಅಛ಼್ಛು ಕರಿಯೆ. ವಿಶೇಷ್‌ಥಿ ಎಕ್ಕಸ್ ಘರ್‌ವಾಳನಿತರ ವಿಶ್ವಾಸಿ ಭೈಯೇನ ಕರಿಯೆ.
GAL 6:11 ದೇಖೊ ಆ ಮೋಟ, ಮೋಟ ಲೀಖ್ಯಾನ ಮಾರ ಹಾತೇಖ್ಹುಸ್ ತುಮುನ ಲೀಖುಕರುಸ್!
GAL 6:12 ಕಂಡಿ ಛ಼ಡೈಲ್ಯವಾಳು ಶರೀರ್‌ಮ ಖ್ಹತ್ನ ಕರಾವೊಕರಿ ತುಮುನ ಜು಼ಲಮ್‌ ಕರಾಸ್, ಶನಕತೊ ಕ್ರಿಸ್ತನಿ ಶಿಲ್‌ಬೇನಖ್ಹಾಜೆ ಇವ್ಣುನ ಖ್ಹತಾಪ್ಣಿ ನಾಹೊಣುಕರಿ ಬೋಲಾನುಸ್ ಇವ್ಣು ಉದ್ದೇಶ್.
GAL 6:13 ಖ್ಹತ್ನ ಕರಾಯುಹುಯೂಸ್ ಧರ್ಮಶಾಸ್ತ್ರನ ಪಾಡಿನ್ ಚಾ಼ಲುಕರ ಕೊಯ್ನೀನಿ. ಇವ್ಣೆ ತುಮಾರಿ ಶರೀರ್‌ನಿ ಬಾರೇಮ ಊಚ಼ ಹುವಾನಖ್ಹಾಜೆ ಖ್ಹತ್ನ ಹೋಣುಕರಿ ಆಖ್ಹ್‌ಕರಾಸ್‌.
GAL 6:14 ಮನತೋಬಿ ಮಾರೊ ಪ್ರಭು ಯೇಸು ಕ್ರಿಸ್ತನಿ ಶಿಲ್‌ಬೇನಿ ಬಾರೇಮಸ್ ಪಣ್ಕಿ ಬಿಜು಼ ಖೆವಾಥೀಬಿ ಊಚು಼ ಹೋಣುಕೊಯ್ನಿ. ಇನೇಥಿ ಮೇ ಜಗತ್ನಖ್ಹಾಜೆ ಮರಿಗೊ; ಜಗತ್‌ ಮಾರಖ್ಹಾಜೆಬಿ ಶಿಲ್‌ಬೇಪರ್ ಮರಿಗಯುಥು.
GAL 6:15 ಶನಕತೊ ಖ್ಹತ್ನ ಹುಯುತೋಬಿ ನತರ್ ನಾಹುಯುತೋಬಿ ಯೋ ಮುಖ್ಯ ಕಾಹೆ. ಕತೋಬಿ ನವೇಥಿ ಪೈದಾಹುವಾನುಸ್ ಮುಖ್ಯ ಹುಯಿರ‍್ಹುಸ್.
GAL 6:16 ಆ ನಿಯಮ್ ಅಖ್ಖಾನ ಬರೊಬರ್‌ಥಿ ಚಾ಼ಲವಾಳ ಅಖ್ಖಾಸ್ನ ಅಜು಼ ಇಸ್ರಾಯೇಲ್‌ವಾಳ ದೇವ್ನ ಅದ್ಮಿವ್‌ನ ಸಮಾಧಾನ್‍ಬಿ ಗೋರ್‌ಬಿ ಮಳಾದೆ!
GAL 6:17 ಅನೇಥಿ ಪಾರ್ ಮನ ಕೋಣ್‌ಬಿ ಖ್ಹತಾವ್ಣುನಾ. ಮಾರ ಶರೀರ್‌ಮ ಯೇಸು ಕ್ರಿಸ್ತನು ಖ್ಹಣೇದ್ನ ನಖೈರಾಖ್ಯೊಸ್.
GAL 6:18 ಭೈಯೇ ಭೇನೆವೊ, ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ವಾರ್‌ಖ್ಹೊ ತುಮಾರ ಆತ್ಮನಿ ಜೋ಼ಡ್ಮ ರ‍್ಹವಾದೆ. ಆಮೆನ್.
EPH 1:1 ದೇವ್ನಿ ಗಳ್‌ಜೋ಼ಡ್ಮ ಕ್ರಿಸ್ತ ಯೇಸುಮ ಅಪೊಸ್ತಲ ಹುಯಿರ‍್ಹೋಸ್ತೆ ಪೌಲ, ಎಫೆಸಮ ಛೇತೆ ದೇವ್ನ ಅದ್ಮಿನಾಬಿ, ವಿಶ್ವಾಸ್‌ವಾಳನಾಬಿ ಲಿಖಾನು ಶಾತ್‍ಕತೊ,
EPH 1:2 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಥಿಬಿ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
EPH 1:3 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ದೇವ್‌ಬಿ ಅಜು಼ ಬಾ ಹುಯಿರ‍್ಹೋತೆ ಇನ ಧನ್ಯವಾದ್ ಹುವಾದೆ, ಕ್ರಿಸ್ತನಿ ಗಳ್‌ಜೋ಼ಡ್ಮ ಇನೆ ಪರಲೋಕ್‍ಮ ಛಾ಼ತೆ ಹರೇಕ್ ಆತ್ಮೀಕ್ ಆಶೀರ್ವಾದ್‌ಖ್ಹಾರು ಅಪ್ಣುನ ದಿರಾಖ್ಯೊಸ್.
EPH 1:4 ಜಗತ್‌ ಉಬ್‌ಜಾ಼ತಿ ಪಹಿಲೇಸ್ ಅಪ್ಣೆ ಇನಖ್ಹಾಮ್ಣೆ ಪರಿಶುದ್ಧಬಿ ದೋಷ್‌ಕೊಂತೇಬಿ ಹುಯಿರ‍್ಹೇಣು ಕರಿ ದೇವ್ನೆ ಕ್ರಿಸ್ತನಿ ಗಳ್‌ಜೋ಼ಡ್ಮ ಅಪ್ಣುನ ಚೂ಼ಣಿಲಿದೊ. ಶನಕತೊ ಆ ಇನಿ ಪ್ಯಾರ್ ಹುಯಿರ‍್ಹಿಸ್.
EPH 1:5 ದೇವ್ ಫೈಲೆಥೊಸ್ ಯೇಸು ಕ್ರಿಸ್ತಥಿಸ್ ಅಪ್ಣುನ ಇನ ಲಡ್ಕಕರಿ ಬಣೈನ್ ಸ್ವೀಕಾರ್ ಕರಾನಖ್ಹಾಜೆ ಚೂ಼ಣಿಲಿದೊ. ಯೊ ಇನಿ ಖ್ಹೂಜ಼್ ಹುಯಿರ‍್ಹಿಥಿ ಇನಿ ಖ್ಹಯಾಲ್‍ಬಿ ಹುಯಿರ‍್ಹಿಥಿ.
EPH 1:6 ಅಜು಼ ಅಪ್ಣೆ ದೇವ್ನಿ ಮಹಿಮೆನಿ ವಾರ್‌ಖ್ಹಾನಖ್ಹಾಜೆ ಧನ್ಯವಾದ್ ಕರಿಯೆ. ಶನಕತೊ ಯೋ ಇನೊ ಪ್ಯಾರ‍್ನೊ ಛಿಯ್ಯಾನಖ್ಹಾಜೆ ಅಪ್ಣುನ ಫುಗಟ್ ವರದಾನ್ ದಿರಾಖ್ಯೊಸ್.
EPH 1:7 ಯೇಸು ಕ್ರಿಸ್ತನೆ ಅಪ್ಣಖ್ಹಾಜೆ ರಂಚ್ಯೊತೆ ಲ್ಹೋಯಿಥೀಸ್‍ ಛುಟ್ಕಾರ್‌ಹುಯು, ಕತೊ ದೇವ್ನಿ ಮಹಾ ವಾರ್‌ಖ್ಹೇಥಿಸ್ ಅಪ್ಣು ಪಾಪ್‌ಖ್ಹಾರು ಮಾಪಿ ಹುಯಿಗು.
EPH 1:8 ದೇವ್ನೆ ಇನಿ ಹರೇಕ್ ಗ್ಯಾನ್ ಅಜು಼ ಅಕ್ಕಲ್‍ಥಿ ಅಪ್ಣುನ ಯೊ ವಾರ್‌ಖ್ಹಾನ ಚೆಹೆಳ್‌ಥಿ ದಿರಾಖ್ಯೊಸ್.
EPH 1:9 ದೇವ್ ಇನೆ ಖ್ಹೂಜ಼್ ಕರ‍್ಯೊತೆ ಇನ ಕರ‍್ಯೊ, ಅಜು಼ ಕ್ರಿಸ್ತನ ಖ್ಹಾಜೇಥಿ ತದೇಸ್‌ ಪೂರಹುವನ ಖ್ಹಾಜೆ ತೀರ್ಮಾನ್ ಕರಿರಾಖ್ಯೊತೆ ಇನಿ ಗಪ್ಲತ್‌ನಿ ಖ್ಹೂಜ಼್‌ನ ಅಪ್ಣುನ ಮಾಲುಮ್‌ ಕರಾಯೊ.
EPH 1:10 ಆ ಖ್ಹೂಜ಼್‌ನ ಬರೊಬರ‍್ನಿ ವಖ್ಹತ್‌ಮ ಪೂರಕರಸ್‍. ಖ್ಹಾರಿ ಉಬ್‍ಜಾ಼ವ್ಣಿ ಧರ್ತಿಬಿ ಪರಲೋಕ್‌ಮ ಕ್ರಿಸ್ತನ ಮುಡ್‌ಕ್ಯು ಕರಿ ಬಣೈನ್ ಎಕ್ಟು ಕರ್ಶೆ.
EPH 1:11 ಖ್ಹಾರು ಕಾಮ್ ದೇವ್ನಿ ಮನ್ನಿ ತರಿಖಾಥಿ ಬಣೈಗಯು ಅಜು಼ ದೇವ್ ಅಪ್ಣುನ ಇನಿ ಶೊಂತ್ ಖ್ಹೂಜ಼್‌ನಿತರ ಪಹಿಲೇಸ್ ನೇಮಕ್‌ಹುಯಿರ‍್ಹಾತೆ ಅಪ್ಣುನ ಕ್ರಿಸ್ತನಿ ಘಳ್‍ಜೋಡ್ಮ ಇನ ಆದ್ಮಿ ಹುವಾನಖ್ಹಾಜೆ ಚೂ಼ಣಿಲಿದೊ.
EPH 1:12 ಅಮ್‌ರ‍್ಹವಾಪರ್ ಕ್ರಿಸ್ತನಖ್ಹಾಜೆ ಪಹಿಲೆ ವಿಶ್ವಾಸ್‌ನ ಹುಯಿರ‍್ಹಾತೆ ಅಪ್ಣೆ ಇನಿ ಮಹಿಮೆಮ ಧನ್ಯವಾದ್‌ ಕರಾವಾಳ ಹುಯಿರ‍್ಹೇವ್ಣು ಕರಿ ಅಮ್ ಕರ‍್ಯೊ!
EPH 1:13 ಸುವಾರ್ತೆನಿ ಖ್ಹಾಚಿ ಸಂದೇಶ್ನ ಖ್ಹಮ್‍ಜಾ಼ನಿ ವಖ್ಹ್‌ತೆ, ತುಮೇಬಿ ಜಿನು ದೇವ್ನ ಅದ್ಮಿ ಹುಯಿರ‍್ಹಾಥ. ಸುವಾರ್ತೆ ತುಮುನ ಛುಟ್ಕಾರ್ ದಿದು. ತುಮೆ ಕ್ರಿಸ್ತಮ ವಿಶ್ವಾಸ್ ಕರಿರಾಖ್ಯಾಸ್ ಅಜು಼ ದೇವ್ ಯೋ ವಾಗ್ದಾನ್ ಕರ‍್ಯೊತೆ ಪವಿತ್ರಾತ್ಮನ ತುಮುನ ದ್ಯಾವಥಿ ಇನೊ ಮುದ್ರೊನಾಖಿನ್ ಖ್ಹಣೇದ್ ಕರಿರಾಖ್ಯೋಸ್.
EPH 1:14 ದೇವ್ನೆ ಇನ ಶೊಂತ್ ಅದ್ಮಿನ ಛುಟ್ಕಾರ್ ಉಷೆಕರಿ ಬೋಲಾನ ಪವಿತ್ರಾತ್ಮಸ್ ಅಪ್ಣುನ ಖ್ಹಂಜ಼್‌ಕಾರ್‌ ಹುಯಿರ‍್ಹೊಸ್, ಅನಖ್ಹಾಜೆ ದೇವ್ನ ಮಹಿಮೆ ಕರಿಯೆ.
EPH 1:15 ಅನಾಖ್ಹಾಜೆಥಿ ಕೆದೆ ಮೇ ಪ್ರಭು ಯೇಸುಮ ತುಮೆ ರಾಖಿರಾಖ್ಯತೆ ವಿಶ್ವಾಸ್ ಅಜು಼ ಖ್ಹಾರಸ್ ದೇವ್ನ ಅದ್ಮಿವ್‌ಪರ್ ತುಮೆ ದೆಖಾಡನಿ ಪ್ಯಾರ್‌ನಿ ಬಾರೇಮ ಖ್ಹಮ್‌ಜಿನ್‌,
EPH 1:16 ಮೆ ತುಮಾರಖ್ಹಾಜೆ ಮಾರಿ ಪ್ರಾರ್ಥನೆಮ ಬಿಂತಿಕರಾನಿ ವಖ್ಹ್‌ತೆ ದೇವ್ನ ಲಗತ್ತರ್ ಧನ್ಯವಾದ್ ಕರುಸ್.
EPH 1:17 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ದೇವ್‌ಬಿ ಮಹಿಮೆನೊ ಬಾಬಿ ಇನಿ ಇನಿ ಬಾರೇಮ ಪೂರ ಅಕ್ಕಲ್‍ನ ತುಮುನ ದೀನ್ ದರ್ಶನಾನು ಆತ್ಮನ ದ್ಯವಾದೆಕರಿ ಪ್ರಾರ್ಥನೆ ಕರುಸ್.
EPH 1:18 ಮೇ ಬೋಲಿಲಾವನು ಶಾತ್‌ಕತೊ ತುಮಾರ ದಿಲ್ನ ಡೋಳಾನ ಉಜಾ಼ಖ್ಹ್‌ ಕರೀನ್, ಇನಿ ಬುಲಾವ್ಣಿನ ಭರೋಖ್ಹೊ ಕೆಥ್ರಾನು ಕರೀಬಿ ಅಜು಼ ದೇವ್ನ ಅದ್ಮಿವೋಮ ಛಾ಼ತೆ ಶೊತ್ನಿ ಮಹಿಮೆ ಕೆಥ್ರಾನು ಛಾ಼ ಕರಿ
EPH 1:19 ಅಜು಼ ವಿಶ್ವಾಸ್‌ಕರವಾಳ ಅಪ್ಣುನ ಇನಿ ತಾಖತ್ ಕೆತ್ರೆ ಊಚು಼ ಹುಯಿರ‍್ಹುಸ್, ಯೋ ಅಪ್ಣಾಮ ಕಾಮ್ ಕರಸ್. ಆ ಶಕತ್ ಅಪ್ಣಾಮ ಮೋಟಿ ಶಕತ್ನುಬಿ, ಕಾಮ್ ಕರಾನುಬಿ ಹುಯಿರ‍್ಹುಸ್.
EPH 1:20 ಇನಿ ಮಹಿಮೇನಿ ಶಕಥ್ಥಿಸ್ ಕ್ರಿಸ್ತನ ಮರಣ್‌ಥು ಉಠಾಡಿನ್, ಹರೇಕ್ ರಾಜ್ಯ, ಅಧಿಕಾರ್, ರಾಜ಼್‌ಭಾರ್ ಚ಼ಲಾವವಾಳನ ಸೊರ್ಗಾಮ ಇನ ಖ್ಹಾವಿಬಾಜು಼ಮ ಬೆಖ್ಹಾಡಿಲಿದೊ.
EPH 1:21 ಕ್ರಿಸ್ತನಿ ಅದಿಕಾರ್‌, ಶಕತ್ ಆ ಜಗತ್‌ಮಾಸ್ ಕಾಹೆತೆಸ್ ಅಗಾಡಿ ಆವ್‌ಶೇತೆ ಜಗತ್‌ಮ ಛಾ಼ತೆ ಖ್ಹಾರ ಜ಼ಣನ ಉಪ್ಪರ್‌ಬಿ ಅಖ್ಖನಾಮ್ನ ಉಪ್ಪರ್‌ಬಿ ಪರಲೋಕ್‍ಮ ಇನ ಇನು ಖಾವಿಬಾಜು಼ಮ ಬೆಖ್ಹಾಡಿಲಿದೊ.
EPH 1:22 ಅತ್ರೇಸ್ ಕಾಹೆತೆ ದೇವ್ನೆ ಅಖ್ಖಾಸ್ನ ಯೇಸು ಕ್ರಿಸ್ತನ ಗೋಡಾನ ಹೇಟ್‌ನಾಖ್ಯೊ, ಅಜು಼ ಸಬೆನ ಖ್ಹಾಜೆ ಯೋ ಅಖ್ಖಾನಪರ್ ಇನ ಮುಡ್‌ಕ್ಯು ಕರಿ ಬಣಾಯೊ.
EPH 1:23 ಸಬೆ ಕ್ರಿಸ್ತನು ಶರೀರ್ ಹುಯಿರ‍್ಹುಸ್, ಅಖ್ಖಾಸ್ನ ಅಖ್ಖಿ ತರಿಕಾಮಾಬಿ ದ್ಯವಾಳಥಿ ಯೊ ಭರ್‌ಪೂರ್‌ ಹುಯಿರ‍್ಹುಸ್.
EPH 2:1 ತುಮೆ ತುಮಾರು ಅವಿಧೇಯ ಬಿಜು಼ ಪಾಪ್ನಖ್ಹಾಜೇಥಿ ಆತ್ಮೀಕ್ ಪರಕ್ಮ ಮರಿಗಯಥ.
EPH 2:2 ಅಗ್ಗಳ್ ತುಮೆ ಆ ಜಗತ್ನಿ ರೀತಿಥೀಬಿ, ವಹಿರಾನ ಗೋಳಾಮ ಅದಿಕಾರ್ ಚ಼ಲಾವತೆ ಅದಿಪತಿನ ಕತೊ ವಿಧೇಯ ಕೊಹುವಾಂತೆ ಲಡ್ಕಾವ್‌ಮ ಹಮ್ಕೆ ಚ಼ಲಾವತೆ ಆತ್ಮನಿಘೊಣಿ ಜಿವ್ಣು ಚಾ಼ಲಾಯ.
EPH 2:3 ಪಹಿಲೆ ಅಪ್ಣೇಬಿ ಇವ್ಣಿನಿತರಸ್ ಥಾ, ಶರೀರ್‌ನು ಆಖ್ಹ್‌ದಾಖ್ಹ್‌ನ ಪೂರ ಕರಾನಟೇಕೆ ಅಪ್ಣೆ ಕೊಶೀಷ್ ಕರುಕರ್ತಥ. ಶರೀರ್‌ನ ಆಖ್ಹ್‌ಮ ಪಡೀನ್, ಶರೀರ್ ಅಜು಼ ದಿಲ್ನಿ ಆಖ್ಹ್‌ನ ಅಪ್ಣೆ ಕರ‍್ಯಾ. ಇವ್ಣಿ ಛ಼ಂದ್‌ನಿತರ ಅಪ್ಣೇಬಿ ಜಿನು ಅಲಕ್‌ನಿಘೋಣಿ ದೇವ್ನ ಇರಾದಮ ಪಡ್ಯ.
EPH 2:4 ಕತೋಬಿ ದೇವ್ನಿ ಗೋರ್‌ ಘಣಿಮೋಟಿ ಅಪ್ಣಖ್ಹಾಜೆ ಜಾ಼ಖ್ಹತ್ ಪ್ಯಾರ್ ವತಾಳಿರಾಖ್ಯೊಸ್.
EPH 2:5 ಖರಾಬ್ ಕಾಮ್ನ ಖ್ಹಾಜೇಥಿ ಆತ್ಮೀಕ್ ಪರಕ್ಮ ಮರಿಗಯಥಾತೆ ಅಪ್ಣುನ ಕ್ರಿಸ್ತನ ಜೋ಼ಡೆ ಜಿವಾಡ್ಯೊ.ಆ ರಕ್ಷಣೆ ತುಮೆ ಲೀರಾಖ್ಯಾಸ್ತೆ ದೇವ್ನಿ ವಾರ್‌ಖ್ಹೇಥಿಸ್.
EPH 2:6 ಕ್ರಿಸ್ತ ಯೇಸುನ ಗಳ್‌ಜೋ಼ಡ್ಮ ಅಪ್ಣುನ ಜಿವ್ತು ಉಠಾಡಿನ್ ಪರಲೋಕ್‍ಮ ಬೆಖ್ಹಾಡ್ಯೊ.
EPH 2:7 ಇನೆ ಅಪ್ಣುನ ಕ್ರಿಸ್ತ ಯೇಸುಮ ಆ ಹಗಾಮ್ಮಾಬಿ ಅಜು಼ ಆವ್‌ಶೇತೆ ಅಖ್ಖಾ ಹಗಾಮ್ಮಾಬಿ ಬೋಲಾನ ಕೊಹೋಯ್ನಿತೆ ಎತ್ರೆ ಇನಿ ಮೋಟಿ ವಾರ್‌ಖ್ಹೊಬಿ ಲಾಡ್‌ಬಿ ದ್ಯವಾನಖ್ಹಾಜೆ ಇನೆ ಅಮ್ ಕರ‍್ಯೊ.
EPH 2:8 ವಿಶ್ವಾಸ್‌ನಿ ಕೃಪೆಥಿಸ್ ತುಮೆ ರಕ್ಷಣೆ ಲೀರಾಖವಾಳ ಹುಯಿರ‍್ಹಾಸ್. ಆ ಬಚಾ಼ವ್ಣಿ ಅಪ್ಣಕಾಮ್ನು ಫಲ್‌ಕಾಹೆ, ಯೊ ದೇವ್‌ನು ಧರಮಸ್.
EPH 2:9 ಆ ರಕ್ಷಣೆ ಕೆಹೂಬಿ ಅಛ್ಛು಼ ಕಾಮ್‍ಥಿ ಹುಯುತೆ ಕಾಹೆ, ಇನಖ್ಹಾಜೆ ಇವ್ಣು ಇವ್ಣೆಸ್ ಖ್ಹರೈಲ್ಯಾವಾನು ಜ಼ರೂರತ್ ಕೊಯ್ನಿ.
EPH 2:10 ಅಪ್ಣೇತೊ ದೇವ್ನೆ ಕರ‍್ಯೊತೆ ಬಣಾವಟ್‌ಅಖ್ಖು. ಕ್ರಿಸ್ತ ಯೇಸುಮ ಅಛ಼್ಛು ಕಾಮ್ನಖ್ಹಾರು ಕರ್ತಹುಯಿನ್ ಜಿವ್ಣುಕರಿ ಇನೆ ಪಹಿಲೆ ಖ್ಹೂಜ಼್‌ಕರ‍್ಯೊತೆ ಇಮ್ಮಸ್ ದೇವ್ನೆ ಅಪ್ಣುನ ಉಬ್‌ಜೈ಼ರಾಖ್ಯೋಸ್.
EPH 2:11 ಪೈದಾಖ್ಹ್‌ ಥು ಯೆಹೂದ್ಯರ್‌ಕಾಹೆತೆ ತುಮೆ ಯೆಹೂದ್ಯರ್‌ಥಿ ಖ್ಹತ್ನ ಕರೈಲಿದ ಕೊಯ್ನಿತೆ ಹಮಾರು ಹಮೇಸ್‌ ಖ್ಹತ್ನ ಕರೈಲಿದಹುಯ ಕರಿ ಬೋಲಿಲೆವೊಸ್. ಅಗ್ಗಳ್ ತುಮೆ ಶಾತ್‌ ಹುಯಿರ‍್ಹಾಥಕರಿ ಯಾದ್‍ಕರಿಲಾವನ ಖ್ಹಾಜೆ ಪರ್ಖ್ಹಾ ಅದ್ಮಿ ಇವ್ಣ ಶರೀರ‍್ಮ ಹುಯಿರ‍್ಹಾವನು ಆ ಏಕ್‌ ಕಾಮ್ ಹುಯಿರ‍್ಹುಸ್.
EPH 2:12 ತ್ಯೊ ಹಗಾಮ್ಮ ತುಮೆ ಕ್ರಿಸ್ತಥಿ ಅಲಕ್ ಹುಯಿರ‍್ಹಾಥ, ಇಸ್ರಾಯೇಲ್‌ವಾಳಾನಿ ಹಕ್‌ಮ ಕೊಹುಯಿರ‍್ಹಾಥಾನಿ. ದೇವ್ ಇನ ಅದ್ಮಿನ ಜೋ಼ಡೆ ವಾಗ್ದಾನ್ ಕರಿರಾಖ್ಯೊತೆ ಒಪ್ಪಂದಾಮ ತುಮೆ ವಾಟೊ ಹುಯಿರ‍್ಹಾಥ ಕೊಯ್ನಿ ಅಜು಼ ತುಮೆ ಆ ಜಗತ್ನ ಭರೋಖ್ಹಾಮ ಥಾ. ಅಜು಼ ತುಮೆ ದೇವ್ನ ಮಾಲುಮ್‌ ಕರಿರಾಖ್ಯಥಕೊಯ್ನಿ.
EPH 2:13 ಹಮ್ಕೆ ತುಮೆ ಏಕ್‌ ಘಡಿ,ದೇವ್‍ಥಿ ದೂರ್ ಹುಯಿರ‍್ಹಾಥ. ಕ್ರಿಸ್ತ ಯೇಸುನ ಲ್ಹೋಯಿಥೀಸ್‍ ಇನ ಗಳ್‍ಜೋ಼ಡ್ ಹುಯಿಗಾತೆ ಇನಖ್ಹಾಜೆ ದೇವ್ನ ಖನ್ನೆ ಅಪ್ಣುನ ಲೈರಾಖ್ಯಸ್.
EPH 2:14 ಯೆಹೂದ್ಯರ್‌ಬಿ ಯೆಹೂದ್ಯರ್ ಕೊಯ್ನಿತೆ ಇವ್ಣುನಏಕ್‌ಪರ್‌ ಏಕ್‌ ಕರೀನ್ ಯೋಸ್ ಅಪ್ಣುನ ಶಾಂತಿ ದ್ಯವಾಳೊ ಹುಯಿರೋಸ್. ಕಿಮ್ ಕತೊ ಇವ್ಣ ಬೀಚ್ಮ ಏಕ್‌ ಭೀತ್‌ನಿತರ ಥು. ಕತೋಬಿ ಕ್ರಿಸ್ತ ಇನು ಶೊಂತ್ ಶರೀರ್‌ನು ಬಲಿದಾನ್‌ ದೇತೊಹುಯಿನ್ ಯೊ ವಹೇರ‍್ನು ಭೀತ್‌ನ ರಡ್ಕಾಯೊ.
EPH 2:15 ಇನೆ ಧರ್ಮಶಾಸ್ತ್ರ ಅಜು಼ ನಿಯಮ್‌ನಿ ಜೋ಼ಡ್ಮ ಯೊ ಭೀತ್ ರಡ್ಕಾಯೊ.ಅಮ್ ಇನ ಗಳ್‌ಜೋ಼ಡ್ಮ ಭೇ ಖೂಮ್ನ ಇನಜೋ಼ಡೆ ಏಕ್‌ ನವಿ ಖೂಮ್‌ಕರಿ ಮ್ಹೇಲಾನಖ್ಹಾಜೆ ಅಮ್ ಸಮಾಧಾನ್ ಕರ‍್ಯೊ.
EPH 2:16 ಇನ ಮರಣ್‌ಥೀಸ್, ಕ್ರಿಸ್ತ ಶಿಲ್‌ಬೆಪರ್ ಭೇ ಖೂಮ್ನ ಎಕ್ಕಸ್ ಶರೀರ್ ಕರಿನ್ ಇವ್ಣುನ ದೇವ್ನ ಜೋ಼ಡೆ ರಾಜಿ ಕರ‍್ಯೊ.
EPH 2:17 ಆಬಿ ಕಾಹೆತೆ ಯೊ ಅಯಿನ್ ದೂರ್ ಹುಯಿರ‍್ಹಥಾತೆ ತುಮೂನಾಬಿ ಅಜು಼ ಖನ್ನೆ ಹುಯಿರ‍್ಹುಥೂತೆ ಯೆಹೂದ್ಯರ್‌ನಾಬಿ ಸಮಾಧಾನ್ನಿ ಸುವಾರ್ತೆನ ಬೋಲ್ಯೊ.
EPH 2:18 ಇನಾಖ್ಹಾಜೆ ಕ್ರಿಸ್ತಥಿ ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿ ಹಮೆಬಿ ತುಮೆ ಎಕ್ಕಸ್ ಆತ್ಮಥಿ ಬಾಕನ ಆವಾನ ವಾಟ್‍ಹುಯು.
EPH 2:19 ಅಮ್‌ರ‍್ಹವಾಪರ್ ತುಮೆ ಹಮ್ಕೆ ಬಿಜ಼ ದೇಖ್ಹ್‌ವಾಳ ರ‍್ಹವೊ ಯೆಹೂದ್ಯರ್ ಕಾಹೆತೆ ರ‍್ಹವೊ ನಾ ಹುಯಿರ‍್ಹೇಣುತೆ ದೇವ್ನ ಅದ್ಮಿಯೇನ ಜೋ಼ಡೆ ಎಕ್ಕಸ್ಜ಼ಗೊವಾಳಬಿ ದೇವ್ನ ಘರ್‌ವಾಳಬಿ ಹುಯಿರ‍್ಹಾಸ್.
EPH 2:20 ಅಪೊಸ್ತಲಬಿ ಅಜು಼ ಪ್ರವಾದಿಖ್ಹಾರುಬಿ ಕರಿ ಬೋಲಾನು ಹದಿಪಾಯಪರ್ ತುಮೆ ಘರ್‌ನಿಘೋಣಿ ಭಂದೈರ‍್ಹಾಸ್. ಕ್ರಿಸ್ತ ಯೇಸುಸ್ ಮುಖ್ಯ ಹುಯಿರ‍್ಹೊಸ್ತೆ ಕೋಣಾನೊಬಂಡೊ ಹುಯಿರ‍್ಹೊಸ್.
EPH 2:21 ಇನಾಮ ಘರ್‌ನು ಅಖ್ಖೂಸ್ ಭಾಗ್‍ಖ್ಹಾರು ಏಕ್‌ಥಿ ಏಕ್‌ ಮಳಿನ್, ಘರ್ ಭಡೀನ್ ಪ್ರಭುಮ ಪರಿಶುದ್ ಮಂದಿರ್‌ ಹುವಾಸ್.
EPH 2:22 ಕ್ರಿಸ್ತಮ ತುಮೇಬಿ ಪವಿತ್ರಾತ್ಮಥಿ ದೇವ್ನ ರ‍್ಹವಾನು ಮಂದಿರ್‌ ಹುವಾನಖ್ಹಾಜೇಥಿ ಹಮಾರ ಜೋ಼ಡೆ ಭಂದೌಕರಾಸ್.
EPH 3:1 ಅಮ್‍ರ‍್ಹವಾಪರ್ ಪೌಲ ಹುಯಿರ‍್ಹೋತೆ ಮೆ ಯೆಹೂದ್ಯರ್‌ಕಾಹೆತೆ ತುಮಾರ ಖ್ಹಾಜೇಥಿ ಕ್ರಿಸ್ತ ಯೇಸುನಖ್ಹಾಜೆ ಖ್ಹಾರ್ಕೊಟ್‌ಮ ರ‍್ಹವಾಳೊ ಹುಯಿರ‍್ಹೋಸ್.
EPH 3:2 ತುಮಾರ ಅಛ್ಛು಼ಕಾಮ್ನ ಖ್ಹಾಜೇಥಿ ಛೇತೆ ಜಿಮ್ಮೆದಾರಿನ ದೇವ್ನೆ ಇನಿ ವಾರ್‌ಖ್ಹೇಥಿಸ್ ಮನ ದೀರಾಖ್ಯೊಸ್‍ಕರಿ ತುಮೆ ಖ್ಹಮ್‌ಜಿರಾಖ್ಯಾಸ್‌,
EPH 3:3 ದೇವ್ನೆ ಇನ ದಿಲ್ನ ಮಾಯ್ನನ ಬೋಲಿದಿದೊ. ಅನಿಬಾರೇಮ ಮೆ ಪಹಿಲೆಸ್ ತುಮುನ ಥೋಡಿ ವಾತೆಥಿ ಲೀಖಿನ್ ಮೋಕ್ಲಿರಾಖ್ಯೊಸ್.
EPH 3:4 ಅಜು಼ ಮೆ ಲೀಖಿರಾಖ್ಯೊಸ್ತೆ ಇನ ತುಮೆ ಬರಾಬರ್‌ಥಿ ಫಡೀನ್ ದೇಖ್ಯಾತೊ ಮಾರಮ ಕ್ರಿಸ್ತನಿ ಬಾರೇನು ಮಾಯ್ನನ ತುಮೇಬಿ ಮಾಲುಮ್ ಕರ‍್ಲಿಶು.
EPH 3:5 ಗಯೋತೆ ಹಗಾಮ್ಮ ಅದ್ಮಿವೊನ ಆ ಮಾಯ್ನೊ ಕೊಬೋಲಾಯುನಿ ಕತೋಬಿ ದೇವ್ನೆ ಇನ ಪವಿತ್ರಾತ್ಮಥಿ ಅಪೊಸ್ತಲರ‍್ನ ಅಜು಼ ಪ್ರವಾದಿಖ್ಹಾರನ ಮಾಲುಮ್ ಕರೈರಾಖ್ಯೋಸ್.
EPH 3:6 ಯೊ ಮಾಯ್ನೊ ಖಿವುಕತೊ,ಯೆಹೂದ್ಯರ್‌ಕಾಹೆತೆ ಅದ್ಮಿ ಜಿನು ಸುವಾರ್ತೆಥಿ ಕ್ರಿಸ್ತಯೇಸುಮ ದೇವ್ನ ಅದ್ಮಿನಜೋ಼ಡೆ ವಾಗ್ದಾನ್‌ಮ ವಾಟೊಲ್ಯಾವಳ ಹುಯಿರ‍್ಹಾಸ್.
EPH 3:7 ದೇವ್ನೆ ಇನಿ ಕಾಮ್ ಕರಾನಿ ಶಕಥ್ಥಿ ಮನ ದೆವಾಯುತೆ ಇನಿ ದಾನ್ನಿ ವಾರ್‌ಖ್ಹೇಥಿ ಮೆ ಆ ಸುವಾರ್ತೆನ ಬೋಲವಾಳೊ ಸೇವಕ್ ಹುಯೊ.
EPH 3:8 ಅಖ್ಖಾಸ್ ದೇವ್ನ ಅದ್ಮಿಮ ಕಮ್‍ಶಿಲ್ ರ‍್ಹಿಯೊತೋಬಿ ದೇವ್ನೆ ಕ್ರಿಸ್ತನು ವಾರ್‌ಖ್ಹಾನಿ ಸುವಾರ್ತೆನ ಯೆಹೂದ್ಯರ್‌ಕಾಹೆತೆ ಅದ್ಮಿನ ಬೋಲಿ ವತಾಳನಖ್ಹಾಜೆ ವಖ್ಹತ್‌ನ ಮನ ದೀರಾಖ್ಯೊಸ್.
EPH 3:9 ಬಿಜು಼ ದೇವ್ನ ಅದ್ಮಿನ ದೇವ್ನಿ ಗಪ್ಲತ್‌ನಿ ಖ್ಹೂಜ಼್‌ನ ಖಿವುಕರಿ ಅಜು಼ ಯೊ ಪ್ರಭಾವ್‌ ಹುವಾನಿತರಾನು ದೇಖಾನಖ್ಹಾಜೆ ಕರ‍್ಯೊ. ಅಖ್ಖಾಸ್ನ ಉಬ್‌ಜಾ಼ಯೊತೆ ದೇವ್ ಪಾಛ಼್‌ಲ್ಯಾಹಗಾಮ್ಮ ಇನು ಗಪ್ಲತ್‌ನ ಲಪಾಡಿರಾಖ್ಯೊಥೊ.
EPH 3:10 ಇನಖ್ಹಾಜೆ ಆ ಹಗಾಮ್ಮ ಸಬೇಥಿ ದೇವ್ನದೂತರ‍್ನು ಚ಼ಲಾವವಾಳು ಅಜು಼ ಪರಲೋಕ್‌ ರಾಜ್ಯನು, ಅದಿಕಾರಿಖ್ಹಾರು ಇನು ಗ್ಯಾನ್ ಬಿಜಿ ಪರಕ್ಮ ಶಿಕಾಡನಿಘೋಣಿ ಹೋಣುಕರಿ ಬೋಲಾನು ಇನಿ ಆಖ್ಹ್ ಹುಯಿರ‍್ಹೀಥಿ
EPH 3:11 ದೇವ್ನೆ ಅಪ್ಣೊ ಪ್ರಭು ಕ್ರಿಸ್ತಯೇಸುಥಿ ಭರ್‌ಪೂರ್‌ ಕರ‍್ಯೊತೆ ಇನಿ ಹರ್‌ಹಮೇಶಾನಿ ಖ್ಹೂಜ಼್‌ನಿ ಪರಕ್ಮ ಆ ಅಖ್ಖು ಕರ‍್ಯೊ.
EPH 3:12 ಕ್ರಿಸ್ತನ ಗಳ್‍ಜೋ಼ಡ್ಮಾಬಿ ಅಜು಼ ಇನಾಪರ್ ರಾಖಿರಾಖ್ಯತೆ ಅಪ್ಣಿ ವಿಶ್ವಾಸ್‍ಥಿ ಅಪ್ಣೆ ದೇವ್ನ ಖ್ಹಾಮ್ಣೆ ಭಾಲಿಥಿ ಅಜು಼ ಆತ್ಮ ವಿಶ್ವಾಸ್‍ಥಿ ಜಾ಼ವನಿತರ ಹುಯು.
EPH 3:13 ಇನಾಖ್ಹಾಜೆ ತುಮಾರಖ್ಹಾಜೆ ಮನಹುಯುತೆ ಖ್ಹತಾಪ್ಣಿನ ದೇಖಿನ್ ತುಮೆ ಹಿಮ್ಮತ್‌ ನಾ ಹರ‍್ನುಕರಿ ತುಮುನ ಗಿಂಗೈಲೆವುಸ್. ಆ ವದೆಖ್ಹೊಖ್ಹಾರು ತುಮುನ ಮರ್ಯಾದಿನು ಹುಯಿರ‍್ಹುಸ್.
EPH 3:14 ಅನಖ್ಹಾಜೆ ಬಾನ ಖ್ಹಾಮ್ಣೆ ಮೆ ಗುಡ್‍ಘ್ಯ ಟೇಕ್ಯೊ.
EPH 3:15 ಆ ಜ಼ಮೀನ್‌ಪರ್ ಅಜು಼ ಸೊರ್ಗಾಮ ಛಾ಼ತೆ ಹರೇಕ್ ಕುಟಮ್‌ ಅನೇಥಿ ಖ್ಹಾಚ ನಾಮ್ನ ಲೀಲೆಸ್.
EPH 3:16 ಮೆ ದೇವ್ನ ಧನ್‌ದೌಲಥ್ಥಿ ರ‍್ಹವಾನು ಮಹಿಮೆಥಿ ಪ್ರಾರ್ಥನೆ ಕರುಕರೂಸ್. ಯೊ ಪವಿತ್ರಾತ್ಮಥಿ ದಿಲ್ನ ಮಹಿ ತಾಖತ್ ಹುವಾನ ವಿಶೇಷ್ ಶಕತ್‍ದ್ಯವಾದೆ,
EPH 3:17 ಕ್ರಿಸ್ತ ತುಮಾರ ವಿಶ್ವಾಸ್‍ಥಿ ತುಮಾರ ದಿಲ್ಮ ಜಿವಾದೆಕರಿಬಿ, ಯೊ ಇನಿ ಮಹಿಮೆನಿ ಶಕತ್ ದ್ಯವಾದೆ.
EPH 3:18 ತುಮೆ ಪ್ಯಾರ್‌ಮ ತಳ್‌ಗಾಠಿ ಭೀರೇವ್ಣು. ದೇವ್ನ ಅದ್ಮಿನ ಜೋ಼ಡೆ ಕ್ರಿಸ್ತನು ಪ್ಯಾರ್ ಕೆತ್ರೆ ಚೌ಼ಡು, ಲಾಂಬು, ಊಚು಼ ಗಧಾರ್, ಛಾ಼ಕರಿ ಮಾಲುಮ್ ಕರಾನಿ ಶಕತ್ ತುಮಾರಮ ರ‍್ಹವಾದೆ.
EPH 3:19 ಖ್ಹಯಾಲ್‌ಥೀಬಿ ಘಣು ಜಾ಼ಖ್ಹತ್ ಕ್ರಿಸ್ತನಿ ಪ್ಯಾರ್ ಮಾಲುಮ್ ಹುವಾದೆ, ದೇವ್ನಿ ಭರ್‌ಪೂರ್‌ ಸ್ವಭಾವ್‍ಥಿ ಪೂರಹುವಾದೆ.
EPH 3:20 ಅಪ್ಣಾಮ ಕಾಮ್ ಕರಾಸ್ತೆ ಇನು ಶಕತ್ನಿ ಪರಕ್ಮ ಅಪ್ಣೆ ಮಾಂಗಥಿಬಿ ಸೋಚಾಥಿಬಿ ಕೆತ್ರೆಸ್ಕಿ ಜಾ಼ಖ್ಹತ್ ಕರಾನ ಶಕತ್‌ವಾಳೊ ಹುಯಿರ‍್ಹೊಸ್ತೆ ದೇವ್ನ,
EPH 3:21 ಸಬೆಮಾಬಿ ಕ್ರಿಸ್ತ ಯೇಸುಮಾಬಿ ಜ಼ಗ್‌ಜ಼ಮಾನಮಾಬಿ ಪಿಢಿನ್‌ ಪಿಢಿಮಾಬಿ ಮಹಿಮೆ ಹುವಾದೆ.ಆಮೆನ್.
EPH 4:1 ಇನಖ್ಹಾಜೆ ಪ್ರಭುನ ಸೇವೆನಖ್ಹಾಜೆ ಖೈದಿ ಹುಯಿರ‍್ಹೊಸ್ತೆ ಮೆ ತುಮೂನ ಬೋಲಿಲೆವ್‌ಸ್ ಶಾತ್‌ಕತೊ ದೇವ್ ತುಮುನ ಬುಲಾವನಿವಖ್ಹ್‌ತೆ ತುಮೆ ದೇವ್‍ಥಿ ಬುಲೈರಾಸ್ತೆಖ್ಹಾಜೆ ಯೊ ಬುಲಾವ್ಣಿನ ಲ್ಹಾಯೇಕ್ ಹುಯಿನ್ ಜಿವ್ಣು ಕರೊ.
EPH 4:2 ತುಮೆ ದೇವ್‌ಮ ಬುಲಾಯತೆ ಇನಖ್ಹಾಜೆ ಹೇಟು ಹುಯಿರ‍್ಹವಾನು, ಶೇದೇವ್‌ಥಿ ರ‍್ಹವಾನು, ಖ್ಹಮಾಳಿರ‍್ಹವಾಳ ಹುಯಿನ್ ಪ್ಯಾರ್‌ಥಿ ಏಕ್‌ಥಿ ಏಕ್ ಖ್ಹಮಾಳಿರ‍್ಹವೊ.
EPH 4:3 ಸಮಾಧಾನ್ನಿ ಬಂಧನ್ಮ ಭಂದೈರ‍್ಹವಾಳ ಹುಯಿನ್ ಪವಿತ್ರಾತ್ಮಥಿ ಹುವಾಸ್ತೆ ಒಗ್ಗಟ್‌ನ ಬಚಾ಼ಡಾನಖ್ಹಾಜೆ ಮನ್‌ಲಗಾಡೊ.
EPH 4:4 ತುಮೆ ದೇವ್‌ಮ ಬುಲಾವನಿವಖ್ಹ್‌ತೆ ಖ್ಹಾರು ಎಕ್ಕಸ್ ಶರೀರ್‌ಮ ಮಳಿರ‍್ಹವಾಳಬಿ, ಎಕ್ಕಸ್ ಪವಿತ್ರಾತ್ಮಥಿ ರ‍್ಹವಾಳಬಿ, ಎಕ್ಕಸ್ ಭರೋಖ್ಹಾನಟೇಕೆ ಬುಲೈರ‍್ಹಾಸ್.
EPH 4:5 ತುಮುನ ಯೋ ಎಕ್ಕಸ್ ಪ್ರಭು, ಎಕ್ಕಸ್ ವಿಶ್ವಾಸ್, ಎಕ್ಕಸ್ ಬ್ಯಾಪ್ತಿಸ್ಮ,
EPH 4:6 ಬಾ ಹುಯಿರ‍್ಹೊಸ್ತೆ ಎಕ್ಕಸ್ ದೇವ್‌ಬಿ, ಅಖ್ಖಾನ ಪ್ರಭು ಹುಯಿರ‍್ಹವಾಳೊ, ಖ್ಹಾರೇಥಿಸ್ ಕಾಮ್ ಕರಾವವಾಳೊಬಿ, ಖ್ಹಾರಮಸ್ ಜಿವ್ಣುಕರವಾಳೊ ಹುಯಿರ‍್ಹೋಸ್.
EPH 4:7 ಕತೋಬಿ ಕ್ರಿಸ್ತನಿ ವರಾನಿ ಆಳ್ತಿನಿ ಪರಕ್ಮಾಸ್ ಹರೇಕ್ ಜ಼ಣಾನ ವಾರ್‌ಖ್ಹಾನಿ ವರ ದೆವೈರ‍್ಹೂಸ್.
EPH 4:8 ಇನಾಖ್ಹಾಜೆ ಪವಿತ್ರ ದಪ್ತರ್‌ಮ ಅಮ್ ಬೋಲೈರ‍್ಹೂಸ್‍, “ಯೊ ಊಚಿ ಸ್ಥಾನ್‌ಪರ್ ಛ಼ಡಿಜಾ಼ವನಿ ವಖ್ಹ್‌ತೆ, ಯೊ ಖೈದಿಖ್ಹಾರಾನ ಬಂಧಿ ಕರ‍್ಲಿ ಜೈ಼ನ್ ಅದ್ಮಿಖ್ಹಾರಾನ ಇನಾಮ್ ದಿದೊ”.
EPH 4:9 “ಛ಼ಡಿಗಯೊ” ಕರಿ ಬೊಲಾನಿ ಮತ್ಲಬ್ ಶಾತ್‌ಕತೊ? ಯೊ ಜ಼ಮೀನ್ನ ಗಧಾರ್‌ಮ ಉತ್‌ರ‍್ಯೊಕರಿ ಬೋಲಾನಿತರ ಹುವಾಸ್.
EPH 4:10 ಉತ್ರಿನ್ ಆಯೊಹುಯೊ, ಖ್ಹಾರುಸ್ ಭರಾನಖ್ಹಾಜೆ ಅಖ್ಖಾ ಜಗತ್‌ಥೀಬಿ ಊಚಾ಼ಮ ಛ಼ಢಿಗಯೊಹುಯೊ ಹುಯಿರ‍್ಹೋಸ್.
EPH 4:11 ಯೊ ಹೈರೋತೆ ಇನಾಮ್ನ ದ್ಯವಾಳೊಬಿ ಹುಯಿರ‍್ಹೊಸ್ ಕತೊ ಯೊ ಥೋಡಜ಼ಣಾನ ಅಪೊಸ್ತಲರ್ ಕರಿಬಿ, ಥೋಡಾನ ಪ್ರವಾದಿಕರಿಬಿ, ಥೋಡಜ಼ಣಾನ ಸುವಾರ್ತೆ ಬೋಲವಾಳುಕರಿಬಿ, ಥೋಡಜ಼ಣಾನ ಸಬಾಪಾಲಕರ್ ಕರಿಬಿ, ಶಿಕಾಡವಾಳೊ ಕರಿಬಿ ನೆಮಿಸಾಯೊ.
EPH 4:12 ಯೋ ಕ್ರಿಸ್ತನ ಶರೀರ್‌ಮ ಎಕ್ಟುಹುವಾನಖ್ಹಾಜೆ ಅಖ್ಖಾ ದೇವ್ನ ಅದ್ಮಿವ್‌ನ ಕ್ರಿಸ್ತನ ಸೇವೆನ ಕಾಮ್ನಖ್ಹಾಜೆ ತಯಾರ್ ಕರಾನ ಟೇಕೆ ಯೋ ಅಮ್ ಕರ‍್ಯೊ.
EPH 4:13 ಇನಖ್ಹಾಜೆ ದೇವ್ನ ಅದ್ಮಿನ ಅಕ್ಲಿಕರೀನ್ ದೇವ್ನ ಛಿಯ್ಯಾನ ಕಾಮ್ ಕರಾನಖ್ಹಾಜೆ ತಯಾರ್ ಕರ್ನುಕರಿಬಿ ಅಜು಼ ಯೇಸುಕ್ರಿಸ್ತನು ಶರೀರ್ ಹುಯಿರ‍್ಹುಸ್ತೆ ಸಬೆ ಭಡಾದೆಕರಿ ಇನೆ ಅವ್ಣುನ ನೇಮ್‌ಶಾಯೊ.
EPH 4:14 ಇನಾಖ್ಹಾಜೆ ಬೋಲಿಲಾವನು ಶಾತ್‌ಕತೊ ಅಪ್ಣೆ ಹಂಕೇಥು ಅಡ್ಡಾಣಿ ನಾ ಹುಯಿರ‍್ಹೇವ್ಣುತೆ, ಖರಾಬ್ ಅದ್ಮಿನ ಠಗಾವ್ಣಿಮಾಬಿ, ಗಲ್ತಿಸೋಚ್‌ಮ ಪಡೀನ್, ಅಲಕ್ ಅಲಕ್ ಭೋದನ್‌ಥಿ ಧೋಕಹುಯಿನ್ ವಹಿರೊ ಕೀಕಡ್‌ಕಿ ತೀಕಡ್‌ ನಾಜಾ಼ವಾಳ ಹುಯಿರ‍್ಹೇಣು.
EPH 4:15 ಕತೋಬಿ ಪ್ಯಾರ್‌ಮ ಖ್ಹಾಚು಼ಬೋಲ್ತಹುಯಿನ್ ಹರೇಕ್ ವಾತೆವ್‌ಮಾಬಿ ಮುಡ್‌ಕ್ಯು ಹುಯಿರ‍್ಹೋಸ್ತೆ ಕ್ರಿಸ್ತಮ ಭಡವಾಳ ಹುಯಿರ‍್ಹಿಯೆ.
EPH 4:16 ಶರೀರ್‌ಅಖ್ಖು ಕ್ರಿಸ್ತಥಿ ಹರ್ ಕೀಲ್‌ಥಿ ಘಟ್ ಮಳಿರ‍್ಹೀನ್, ಹರೇಕ್ ಖ್ಹಂದೊಬಿ ಇನು, ಇನು ಕಾಮ್ ಕರಾಸ್ತೆಖ್ಹಾಜೆ ಶರೀರ್ ಪ್ಯಾರ್‌ಮ ಅಛ್ಛಿನಿತರ ಭಡಾಸ್.
EPH 4:17 ಇನಾಖ್ಹಾಜೆ ಮೆ ಪ್ರಭುಮ ತುಮುನ ಶಾತ್‌ ಬೋಲುಸ್‌ಕತೊ ಅಲಕ್‌ ಅದ್ಮಿಖ್ಹಾರು ಚಾ಼ಲಾನಿಘೋಣಿ ಅನ ಅಗ್ಗಳ್ ನಾಚಾ಼ಲ್ನು. ಇವ್ಣೆ ಕಾಯ್‌ ಫಾಯಿದೊಕೊಂತೆ ಅಕ್ಕಲ್‌ವಾಳನಿತ್ರ ಚಾ಼ಲಿಲೆಸ್.
EPH 4:18 ಇವ್ಣ ದಿಲ್‌ ಅಂಧಾರಥಿ ಢಪೈರ‍್ಹೂಸ್, ಇವ್ಣೆ ಇವ್ಣಿ ಕಠೋರ್ ದಿಲ್‌ಥೀಬಿ ಅಜು಼ ಇವ್ಣಾಮ ಅಕ್ಕಲ್‌ಕೊಂತೆ ಖ್ಹಾಜೇಥಿಬಿ ದೇವ್ ದೇಸ್ತೆ ಜಾನ್‌ಥಿ ದೂರ್ ಹುಯಿರ‍್ಹೂಸ್.
EPH 4:19 ಇವ್ಣೆ ಖ್ಹರಮ್‌ ಮ್ಹೆಂದಿನ್ ಇವ್ಣುಇವ್ಣುನ ಖರಾಬ್ ಆಖ್ಹ್‌ನ ದಿನಾಖಿನ್, ಹರೇಕ್ ಥರಾನು ಕಚಿಂಡ್‌ ಕಾಮ್‍ಅಖ್ಖಾನ ನಿಕ್ಳಜಾನ್‌ಥಿ ಚ಼ಲಾವಸ್.
EPH 4:20 ತುಮೆತೋಬಿ ಕ್ರಿಸ್ತನಿ ಬಾರೇಮ ಇಮ್ನು ಶಾತ್ಬಿ ಶಿಕ್ಯಾಕೊಯ್ನಿ.
EPH 4:21 ಶನಕತೊ ಖ್ಹಾಚಮಾಬಿ ಇನಾಮಸ್ ಖ್ಹಮ್‌ಜಿರಾಖ್ಯಾಸ್‌ ಅಜು಼ ಇನ ಪೀಠೆ ಜಾ಼ವಳ ತುಮುನ ಯೇಸುಮ ಛಾ಼ತೆ ಖ್ಹಾಚ಼ನಿಘೋಣಿಸ್ ಶಿಕಾಡಿರಾಖ್ಯಸ್.
EPH 4:22 ಇನಖ್ಹಾಜೆ ತುಮುನ ಶಿಕಾಡ್ಯುತೆ ಭೋದನ್ ಶಾತ್‌ಕತೊ ತುಮೆ ತುಮಾರಿ ಅಗ್ಲಿ ಚಾ಼ಲ್‌ನಿತರಾನು ಜೂ಼ನಿ ಆದತ್‌ನ ಕಾಡಿನಾಖೊ; ಯೊ ಧೋಕ ಖೈರಾಖ್ಯಾಸ್ತೆ ಖರಾಬ್ ಆಖ್ಹ್‌ಥಿ ಭರೈರ‍್ಹುಸ್‌. ಯೊ ನಾಶ್‌ ಹುಯಿಜಾ಼ವನು ಹುಯಿರುಸ್.
EPH 4:23 ಅಜು಼ ತುಮೆ ತುಮಾರು ದಿಲ್‌ ಮನ್ನ ನವು ಕರಿಲೆವೊ.
EPH 4:24 ಅಜು಼ ತುಮಾರು ತುಮೆ ನವಿ ಆದತ್‌ನ ಫೇರಿಲೆವೊ ದೇವ್ನಿಸ್ ಪರಕ್ಮ ಅಜು಼ ಖ್ಹಾಚಿಥೀಬಿ ನೀತಿನೂಬಿ, ಪರಿಶುದ್ ಹುಯಿನ್‍ಬಿ ಉಬ್ಜಿರ‍್ಹುಸ್.
EPH 4:25 ಇನಾಖ್ಹಾಜೆ ಝೂ಼ಟಿ ಬೋಲಾನು ಮ್ಹೇಲಿನ್ ಹರೇಕ್ ಜ಼ಣು ಇನ ಭೀಡೆವಾಳನ ಜೋ಼ಡೆ ಖ್ಹಾಚಿಸ್ ಬೋಲೊ. ಶನಕತೊ ಅಪ್ಣೆಖ್ಹಾರು ಎಕ್ಕಸ್ ಶರೀರ‍್ನು ಭಾಗ್‌ ಹುಯಿರ‍್ಹಾಸ್ನಿ.
EPH 4:26 ಇರಾದೊ ಕರ‍್ಯತೋಬಿ ಪಾಪ್ ನಕೊಕರ್ಶು, ದನ್ ಡುಬಾಥಿ ಪಹಿಲೆಸ್ ತುಮಾರೊ ಇರಾದೊ ಖ್ಹರ್ತಿ ಹುಯಿಜಾ಼ವದೆ.
EPH 4:27 ಶೈತಾನ್ನ ಮೋಕ ನಕೊದಿಶು.
EPH 4:28 ಚೋ಼ರಿ ಕರಾವಾಳೊ ಚೋ಼ರ್ ಕರಾನು ಮ್ಹೆಂದಿನ್ ರಾಬಿನ್ ಮಿನಥ್ಥಿ ಅಛ಼್ಛು ಕಮೈಕರೀನ್ ಜಿವ್ಣು ಕರಾದೆ, ತದೆ ಗರೀಬ್ ಅದ್ಮಿನ ದ್ಯಾವಾನ ಇನ ಹಾತೆ ಉಶೆ.
EPH 4:29 ತುಮಾರ ಮ್ಹೋಡೆಥಿ ಖಿವು ಖರಾಬ್ ವಾತೆ ನಾ ಆವ್ಣು. ಕತೋಬಿ ಭಕ್ತಿನ ಭಡಾವಾನಿ ಯೋವೇಳ್ಮ ಬೋಲ್ನುತೆ ವಾತೆ ಹುಯಿರ‍್ಹೇಣು. ತುಮೆ ವಾತೆ ಬೊಲ್ಯಾತೊ ಖ್ಹಮ್‌ಜಾ಼ವಾಳನಾಬಿ ಅಛ಼್ಛು ದೆಖಾವ್‌ಶೆ.
EPH 4:30 ದೇವ್ನ ಪವಿತ್ರಾತ್ಮನ ದುಖ್ ನಕೊ ಕರೊ. ಇನಾಮಸ್ ಛುಟ್ಕಾರ್‌ನ ದನ್ನಖ್ಹಾಜೆ ಮುದ್ರೊ ಲೀರಾಖ್ಯಾಸ್ನಿ.
EPH 4:31 ಖ್ಹಾರು ವಹೇರ್‌, ಇರಾದೊ, ಖೀಜ಼್, ಝ಼ಗ್‍ಡೊ, ಚಾ಼ವ್‌ಣ್ಯ ಅನಖ್ಹಾರನಬಿ ಹರೇಕ್ ಥರಾನು ಖರಾಬ್ ಕಾಮ್ನ ತುಮಾರೇಥಿ ಕಾಡಿನಾಖೊ.
EPH 4:32 ಇನ ಬದಲ್ ಏಕ್‌ಥಿಏಕ್ ದಯಕರವಾಳಬಿ, ಗೋರ್‌ ಕರವಾಳಬಿ ಹುಯಿ‍ರ‍್ಹೆವೊ. ದೇವ್ನೆ ತುಮುನ ಕ್ರಿಸ್ತಮ ಮಾಪ್ ಕರ‍್ಯೊತೆ ಇಮ್ಮಸ್ ತುಮೇಬಿ ಏಕ್‌ಥಿಏಕ್ ಮಾಪ್ ಕರೊ.
EPH 5:1 ದೇವ್ನ ಪ್ಯಾರ್‌ನ ಲಡ್ಕಹುಯಿರ‍್ಹಾಸ್ ಇನಖ್ಹಾಜೆ ಇನಿ ವಾಟ್‌ಪರ್ ಚಾ಼ಲವಾಳ ಹುಯಿ‍ರ‍್ಹೆವೊ.
EPH 5:2 ಕ್ರಿಸ್ತನೆ ಅಪ್ಣುನ ಪ್ಯಾರ್‌ಕರೀನ್ ಅಪ್ಣಖ್ಹಾಜೆ ಇನುಯೋಸ್ ದೇವ್ನ ಢಪ್ಕಾರಬಿ ಕಾಣ್‌ಕೆ ಹುಯಿನ್, ಬಲಿ ಸಮರ್ಪಣ್‌ ಹುಯೋತೆ ಪರಕ್ಮಸ್ ತುಮೇಬಿ ಪ್ಯಾರ್‌ಥಿ ಜಿವೊ.
EPH 5:3 ತುಮೆ ದೇವ್ನ ಲಡ್ಕ ಹುಯಿರ‍್ಹಾಸ್ತೆ ಇನಖ್ಹಾಜೆ ಪಾಪೇಲು ಕಾಮ್ ಅಜು಼ ಖಿವಿ ಥರಾನು ಮೈಲು ನತರ್ ಪೈಶಾನಿ ಆಖ್ಹ್‌ರ‍್ಹವೊ ಅಮ್ನಿ ಖಬರ್ ತುಮಾರಮ ನಾರ‍್ಹೇವ್ಣು, ಅಮ್ನ ಖ್ಹಾರೇಥಿ ದೂರ್ ರ‍್ಹವಾನುಸ್ ತುಮುನ ಅಛ್ಛು಼.
EPH 5:4 ಗಲೀಜ಼್ ವಾತೆ, ಬೇಕಾರ‍್ನಿ ವಾತೆ, ನಕ್ಲೆಕಾಡಿ ಹಾಖ್ಹಾನು ಆಖ್ಹಾರು ನಕೊ. ಆ ಅಖ್ಖು ಖ್ಹಾಜ಼ಕೊಂತೆ ಹುಯಿರ‍್ಹುಸ್. ಅನಬದಲ್, ತುಮೆ ದೇವ್ನ ಧನ್ಯವಾದ್ ಕರೊ.
EPH 5:5 ಪಾಪೇಲ ಕಾಮ್ಮ ಜಾ಼ವಳೊ , ಖರಾಬ್ ಕಾಮ್ ಕರವಾಳು, ಮೂರತ್ನ ಪೂಜ಼ ಕರವಾಳನಿ ಘೋಣಿನೊ ನಿಕ್‍ಳ್ಯ ಜಾನ್ನೊ ರ‍್ಹವೊ ಇವ್ಣುನ ಕ್ರಿಸ್ತನಿ ಅಜು಼ ದೇವ್ನ ರಾಜ್ಯಮ ವಾಟೊ ಕೊಯ್ನಿಕರಿ ತುಮಾರ ದಿಲ್ಮ ಘಟೈರ‍್ಹವಾದೆ.
EPH 5:6 ಫಾಯಿದೊಕೊಂತೆ ವಾತೆಥಿ ಕೋಣ್‌ಬಿ ತುಮುನ ನಕೊ ಠಗಾವದೆ, ಅಮ್ನು ಕಾಮ್ ಅಖ್ಖಾನಖ್ಹಾಜೆ ದೇವ್‌ನೊ ಇರಾದೊ ಇನಿ ವಾತೆನ ಮೀರಿನ್ ಚಾ಼ಲಸ್ತೆ ಇವ್ಣ ಉಪ್ಪರ್ ಆವಸ್.
EPH 5:7 ಇನಾಖ್ಹಾಜೆ ತುಮೆ ಇವ್ಣ ಜೋ಼ಡ್ಮ ಖ್ಹಂಗ್ ನಕೊ ಕರೊ.
EPH 5:8 ಶನಕತೊ ತುಮೆ ಯೋಹಗಾಮ್ಮ ಅಂಧಾರಮ ಥಾ, ಕತೋಬಿ ಹಮ್ಕೆ ತುಮೆ ಪ್ರಭುನ ಅದ್ಮಿ ಹುಯಿರ‍್ಹಿನ್ ಉಜಾ಼ಳವಾಳ ಹುಯಿರ‍್ಹಾಸ್. ಉಜಾ಼ಳವಾಳನಿತರ ಚಾ಼ಲಿಲೆವೊ.
EPH 5:9 ಉಜಾ಼ಳನು ಫಲ್ ಅಛ್ಛಾ಼ಮಾಬಿ ನೀತಿಮಾಬಿ ಅಜು಼ ಖ್ಹಾಚಿಮ ದೆಖಾವಸ್.
EPH 5:10 ಪ್ರಭುನ ಲ್ಹಾಯಕ್ ಶಾತ್‌ಕರಿ ಬೋಲಾನು ತರೀಪ್‌ಶ ಕರೀನ್‌ ಮಾಲುಮ್ ಕರಿಲೆವೊ.
EPH 5:11 ಕಾಯ್‌ಕೊಂತೆ ಅಂಧಾರನ ಕಾಮ್ಮ ವಾಟೊವಾಳ ನಾ ಹುಯಿರ‍್ಹೇಣುತೆ ಅನಬದಲ್ ಉಜಾ಼ಳಮ ದೆಖಾವನಿ ಘೋಣಿ ಕರೊ.
EPH 5:12 ಯೊ ಅದ್ಮಿಖ್ಹಾರು ಗಪ್ಲಥ್ಥಿ ಕರಾಸ್ತೆ ಕಾಮ್ನ ಅನಿಬಾರೇಮ ಬೋಲಾನು ಖ್ಹಾಚಮಾಬಿ ಖ್ಹರಮ್‍ಲಾಗಾನು ಹುಯಿರ‍್ಹುಸ್.
EPH 5:13 ಉಜಾ಼ಳಥಿ ಖ್ಹಾರು ಕಾಮ್ನು ಖ್ಹಾಚು಼ಗುಣ್‌ ದೆಖಾವಸ್.
EPH 5:14 ಶನಕತೊ ಖಿವು ಅಛ್ಛಿನಿತರ ದೆಖಾವಸ್ಕಿ ಯೋಸ್ ದೆಖಾವಸ್, ಇನಖ್ಹಾಜೇಥಿ ಬೋಲೈರ‍್ಹುಸ್. “ಖ್ಹುತೊರ‍್ಹವಾಳ ಉಠಿಆವ್‌, ಮರಿರ‍್ಹವಾಳೆಥಿ ಮ್ಹೇಲಿನ್ ಉಠೊ, ತದೆ ಕ್ರಿಸ್ತ ತುಮಾರಮ ಉಜಾ಼ಖ್ಹ್‌ ಹುಯಿರ‍್ಹಿಶೆಕರಿ ಇನಖ್ಹಾಜೆ ಬೋಲೈರ‍್ಹುಸ್.
EPH 5:15 ಇನಖ್ಹಾಜೆ ತುಮೆ ಚಾ಼ಲ್ ಚ಼ಲಣ್ಣಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಬಿಣ್‍ಅಕ್ಲಿ ನಾ ಹುಯಿರ‍್ಹೇಣುತೆ ಅಕ್ಲಿ ಹುಯಿನ್ ಜಿವೊ.
EPH 5:16 ಆ ಮೋಕಾನ ಉಪಯೋಗ್ ಕರಿಲೆವೊ. ಶನಕತೊ ಆ ದನ್ ಖ್ಹಾರು ಖರಾಬ್‌ಥಿ ಭರಾಯುಹುಯು ಹುಯಿರ‍್ಹುಸ್.
EPH 5:17 ಅಜು಼ ಅಕ್ಕಲ್‌ಕೊಂತೆ ಇವ್ಣಿನಿತರ ನಾಚಾ಼ಲ್ನುತೆ ಪ್ರಭುನಿ ಮರ್ಜಿನ ಶಾತ್‌ಕರಿ ಮಾಲುಮ್ ಕರಿಲೆವೊ.
EPH 5:18 ದ್ರಾಕ್ಷಿನೊರಖ್ಹ್ ಪೀನ್ ಕಯೇಪ್ ನಕೊ ಛ಼ಡೈಲೆವೊ. ಇನೇಥಿ ಪಾಪ್ ಕರಾನ ಝ಼ಗೊ ಮಳಾಸ್, ಕತೋಬಿ ಪವಿತ್ರಾತ್ಮಥಿ ಭರೈನ್,
EPH 5:19 ಗೀದ್‍ಥೀಬಿ, ಸ್ತುತಿ ವಚನ್‌ಥಿಬಿ, ಆತ್ಮೀಕ್ ಲ್ಹೂರ್‌ನು ಗೀದ್‍ಥಿಬಿ ಏಕ್‌ಥಿಏಕ್ ವಾತೆ ಬೋಲ್ತಹುಯಿನ್ ತುಮಾರ ದಿಲ್ಮ ಪ್ರಭುನ ಸ್ತುತಿನು ಗೀದ್‌ ಬೋಲೊ.
EPH 5:20 ಕೆದೇಬಿ ಖ್ಹಾರ ಕಾಮ್ನಖ್ಹಾಜೆ ಅಪ್ಣೊ ಪ್ರಭು ಯೇಸು ಕ್ರಿಸ್ತನ ನಾಮ್ಮ ಬಾ ಹುಯಿರ‍್ಹೋತೆ ದೇವ್ನ ಧನ್ಯವಾದ್ ಕರೊ.
EPH 5:21 ಕ್ರಿಸ್ತನ ಡರ್‌ಭಕ್ತಿವಾಳ ಹುಯಿರ‍್ಹಿನ್, ಏಕ್‌ಥಿಏಕ್ ಸಮರ್ಪಣ್‌ಥಿ ಚಾ಼ಲಿಲೆವೊ.
EPH 5:22 ತಯೆಡಾವೊ, ತುಮೆ ಪ್ರಭುಮ ಕಿಮ್ಕಿ ಇಮ್ಮಸ್ ತುಮಾರ ಬಾವ್ರಿಯೇನಿ ದಾಬುಕ್ಮ ರ‍್ಹವೊ.
EPH 5:23 ಶನಕತೊ ಕ್ರಿಸ್ತ ಸಬೆನ ಮುಡ್‌ಕ್ಯು ಹುಯಿರ‍್ಹೋಸ್ತೆ ಇಮ್ಮಸ್ ಬಾವ್ರಿ ಬಾವಣ್ಣ ಮುಡ್‌ಕ್ಯು ಹುಯಿರ‍್ಹೊಸ್. ಕ್ರಿಸ್ತಸ್ ಯೊ ಸಬೆಕರಿ ಶರೀರ್‌ನ ರಕ್ಷಕ್ ಹುಯಿರ‍್ಹೋಸ್.
EPH 5:24 ಸಬೆ ಕ್ರಿಸ್ತನಿ ದಾಬುಕ್ಮ ಕಿಮ್ ರ‍್ಹೇಸ್ಕಿ ಇಮ್ಮಸ್ ತಯೇಡಖ್ಹಾರು ಇವ್ಣ ಬಾವ್ರಿಯೇನ ಖ್ಹಾರಿಸ್ ವಿಚಾರ್‌ಮ ದಾಬುಕ್ಮ ರ‍್ಹೇವ್ಣು.
EPH 5:25 ಬಾವ್ರಿಯೆ, ಕ್ರಿಸ್ತ ಸಬೆನ ಪ್ಯಾರ್ ಕರಿನ್ ಜಾನ್‌ ದಿದೋತೆ ಇಮ್ಮಸ್ ತುಮಾರಿ ಬಾವ್ಣೆನ ಪ್ಯಾರ್‌ಕರೊ.
EPH 5:26 ದೇವ್ನೆ ಇನ ಶುದ್ದ ಕರಾನಖ್ಹಾಜೆ ಇನುಯೋಸ್ ಸಮರ್ಪಣ್‌ ಕರೈಲಿದೊ.
EPH 5:27 ಇನಖ್ಹಾಜೆ ಕಳಂಕ್‌ನಿ ದಾಗ್ ನಾ ರ‍್ಹೇವ್ಣುತೆ ಪರಿಶುದ್ಧಬಿ, ದೋಷ್‌ಕೊಂತೇಬಿ, ಮಹಿಮೆಥಿ ರ‍್ಹವಾನಿ ಸಬೆಕರೀನ್ ಇನಖ್ಹಾಮ್ಣೆ ಭೀರಖಡ್ನುಕರಿ ಭೋದನೆನ ಜೋ಼ಡೆಸ್ ಪಾಣಿಥಿ ನೊಹಾಡಿನ್ ಶುದ್ದಕರ‍್ಯೊ.
EPH 5:28 ಇಮ್ಮಸ್ ಬಾವ್ರಿಯೇಬಿ ಇವ್ಣ ಶೊಂತ್ ಶರೀರ್‌ನ ಪ್ಯಾರ್ ಕರಾಸ್ತೆ ಇಮ್ಮಸ್ ಇವ್ಣಿ ಬಾವ್ಣೆನ ಪ್ಯಾರ್ ಕರಾವಾಳ ಹುಯಿರೇವ್ಣು. ಇನಿ ಬಾವಣ್ಣ ಪ್ಯಾರ್ ಕರಾವಾಳೊ ಇನಾಸ್ ಪ್ಯಾರ್ ಕರಾವಾಳೊ ಹುಯಿರ‍್ಹೋಸ್.
EPH 5:29 ಕೋಣ್‌ಬಿ ಕದೇಬಿ ಶೊಂತ್‌ ಶರೀರ್‌ನ ವಹೇರ್‌ ಕೊಕರಾನಿ, ಇನ ಬದಲ್ ಅಖ್ಖೂಜ಼ಣು ಇವ್ಣ ಶರೀರ್‌ನ ಖ್ಹದ್ದರ್‌ಥಿ ಪಾಳಸ್. ಕ್ರಿಸ್ತ ಇಮ್ಮಸ್ ಪಾಳಿನ್ ಖ್ಹದ್ದರ್‌ ಕರ್ತೊ ಆಯೊ. ಇಮ್ಮಸ್ ಸಬೇನಾಬಿ ಕರ‍್ನು.
EPH 5:30 ಇನಖ್ಹಾಜೆ ಸಬೆಕರಿ ಶರೀರ್‌ನ ಅಪ್ಣೆ ಖ್ಹಂದೊಅಖ್ಖು ಹುಯಿರ‍್ಹಾಸ್.
EPH 5:31 ಪವಿತ್ರ ದಪ್ತರ್‌ಮ ಅಮ್ ಲಿಖೈರ‍್ಹುಸ್ ಅನಖ್ಹಾಜೆಸ್ ಪರ್ಖ್ಹೊ ಆಯ-ಬಾನ ಮ್ಹೇಲಿನ್ ಇನಿ ಬಾವಣ್‍ಥಿ ಮಳಾಸ್, ಇವ್ಣೆ ಎಕ್ಕಸ್ ಶರೀರ್ ಹುಯಿರಾಸ್‍ಕರಿ ಬೋಲಸ್. ಅಜು಼ ಇವ್ಣೆ ಬೇಜ಼ಣ ಎಕ್ಕಸ್ ಹುಯಿರಾಸ್.
EPH 5:32 ಮೆ ಕ್ರಿಸ್ತನಾಬಿ ಸಬೇನಾಬಿ ಛಾ಼ತೆ ಸಂಬಂದನಿ ಬಾರೇಮ ಬೋಲುಕರುಸ್, ಹಮ್ಕೆತೋಡಿ ಗಧಾರ್‌ಥಿ ಲಪಿರ‍್ಹುತೆ ಖ್ಹಾಚು಼ ಹುಯಿರ‍್ಹುಸ್.
EPH 5:33 ಯೊ ತುಮುನಾಬಿ ಹುವಾಸ್, ತುಮಾರಮ ಹರೇಕ್ ಬಾವ್ರಿ ಇನುಯೋ ಪ್ಯಾರ್ ಕರಾನಿತರಸ್ ಇವ್ಣಿ ಬಾವ್ಣೆನ ಪ್ಯಾರ್ ಕರ‍್ನು. ಅಖ್ಖಿ ಬಾವಣ್‍ ಇವ್ಣ ಬಾವ್ರಿಯೇನ ಇಜ಼್ಜಥ್ಥಿ ಚಾ಼ಲಿಲೇವ್ಣು.
EPH 6:1 ಲಡ್ಕಾವೊ, ತುಮೆ ಪ್ರಭುಮ ರ‍್ಹಾವವಾಳನಿತರಸ್ ತುಮಾರ ಆಯಬಾನ ಹೇಟು ಹುಯಿ‍ರ‍್ಹೆವೊ. ಆ ನ್ಯಾವ್‌ನು ಹುಯಿರ‍್ಹುಸ್.
EPH 6:2 ವಾಗ್ದಾನ್‌ಮ ಛಾ಼ತೆ ಪಹಿಲಿ ಹುಕುಮ್‌ನ ಖ್ಹಮ್‌ಜೊ಼, “ತುಮಾರ ಆಯ ಬಾನ ಮರ್ಯಾದಿ ದೇವ್ಣು”.
EPH 6:3 “ಅನ ಚ಼ಲಾಯತೊ ತುಮುನ ಅಛ್ಛು಼ ಉಷೆ, ಅಜು಼ ತುಮೆ ಜ಼ಮೀನ್‌ಪರ್ ಘಣ ವರಖ್ಹ್ ಜಿವ್‌ಶು”.
EPH 6:4 ಆಯ ಬಾವೊ, ತುಮಾರ ಲಡ್ಕಾನ ಛೇಡಾವ್ಣುನಾತೆ, ಪ್ರಭುನ ಲ್ಹಾಯಕ್‌ ಹುವಾನಿ ಪರಕ್ಮ ಇವ್ಣುನ ದಾಬುಕ್ಮ ಚಾ಼ಲನು ಶಿಕಾಡಿನ್ ಪಾಳಿ ಪರ್ವೆಶಿಕರೊ.
EPH 6:5 ಆಳ್‍ಖ್ಹಾರ, ಆ ಜಗತ್ನ ಯಜಮಾನ್ ಹುಯಿರ‍್ಹವವಾಳನ ಕ್ರಿಸ್ತನಿ ದಾಬುಕ್ಮ ಕಿಮ್ ರ‍್ಹೇಸ್ಕಿ ಇಮ್ಮಸ್ ದಿಲ್ಮ ಡರ್‌ಥಿ ಕಾಪವಾಳಹುಯಿರ‍್ಹೀನ್ ಛು಼ಟ ದಿಲ್‌ವಾಳಹುಯಿನ್ ದಾಬುಕ್ಮ ರ‍್ಹವೊ.
EPH 6:6 ಅದ್ಮಿಖ್ಹಾರು ಪಸಂದ್ ಕರಾನಿತರ ಛಾ಼ರ್ವಣಿನಖ್ಹಾಜೆ ಯಜಮಾನ್ ದೇಖುಕರಾನಿ ವಖ್ಹ್‌ತೆ ಖಲಿ ಕಾಮ್ ನಾಕರ‍್ನುತೆ, ಕ್ರಿಸ್ತನಿ ಆಳ್‌ನಿಘೋಣಿ ದೇವ್ನಿ ಮರ್ಜಿನ ಪೂರ ಮನ್‌ಥಿ ಚಾ಼ಲಿಲೆವೊ.
EPH 6:7 ತುಮೆ ಕರಾನು ಸೇವೆ ಅದ್ಮಿನಾಸ್ ಕಾಹೆತೆ, ಪ್ರಭುನ ಖ್ಹಾಜೇಥಿ ಕಾಮ್ ಕರುಕರೆಸ್ ಕರಿ ಪೂರ ಮನ್‌ಥಿ ಸೇವೆಕರೊ.
EPH 6:8 ಶನಕತೊ ಏಕ್‍ಜ಼ಣೊ ಆಳ್‌ ಹುಯಿ‍ರ‍್ಹೆವೊ ಛು಼ಟ್ಕಾರ್‌ವಾಳು ಹುಯಿ‍ರ‍್ಹೆವೊ ಇವ್ಣೆ ಶಾತ್ ಅಛ಼್ಛುಕಾಮ್ ಕರಾಸ್ಕಿ ಇನು ಇನಾಮ್ ಪ್ರಭುಥಿ ಲೀಲಿಶ್ ಕರಿ ತುಮುನ ಮಾಲುಮ್ ಛಾ಼.
EPH 6:9 ಯಜಮಾನವೊ, ತುಮಾರ ಆಳ್ನಿ ಬಾರೇಮ ಇಮ್ನಿ ಪರಕ್ಮಸ್ ಚಾ಼ಲಿಲೆವೊ. ತುಮಾರ ಆಳ್‌ನ ಡರಾವನು ಭೀರಾಕಿ ದೆವೊ. ಪರ್‌ಲೋಕ್‌ಮ ತುಮುನಬಿ ಇವ್ಣುನಾಬಿ ಯಜಮಾನ್ ಹುಯಿರ‍್ಹೋಸ್ತೆ ದೇವ್‌ಬಿ ಇನಾಮ ಬೇದ್‌ಭಾವ್‌ ಕೊಯ್ನಿಕರಿಬಿ ಮಾಲುಮ್ ಕರಿಲೆವೊ.
EPH 6:10 ಖ್ಹರ್ತಿಮ, ತುಮೆ ಪ್ರಭುಮಾಬಿ ಇನಿ ಘಣಿ ಮೋಟಿ ಶಕತ್‍ಮಾಬಿ ತಾಖತ್‍ವಾಳ ಹುವೊ.
EPH 6:11 ಶೈತಾನ್ನಿ ಲಝ಼ಣ್‌ನ ತುಮೆ ವಿರೋದ್‌ಕರಿನ್ ಭಿರಾವನಖ್ಹಾಜೆ ದೇವ್ ದೇಸ್ತೆ ಖ್ಹಾರ ಕಫ್ಪನ್ನ ಫೆರಿಲೆವೊ.
EPH 6:12 ಶನಕತೊ ಅಪ್ಣೆ ಲಡಾನು ಖಲಿ ಅದ್ಮಿನ ಜೋ಼ಡೆ ಕಾಹೆ. ಕತೋಬಿ ಅಪ್ಣಿ ಖ್ಹೂಜ಼್‌ ರಾಜ಼್‌ನ ಉಪ್ಪರ್‌ಬಿ, ಅದಿಕಾರಿನ ಉಪ್ಪರ್‌ಬಿ, ಆ ಅಂಧಾರನಿ ಜಗತ್ನಿ ಅದಿಪತಿನ ಉಪ್ಪರ್‌ಬಿ, ಆಸ್ಮಾನ್ನ ಗೋಳಾಮ ಛಾ಼ತೆ ನಾಶ್ ಕರಾನಿ ಆತ್ಮಾನಿ ದಂಡ್ ಉಪ್ಪರ್‌ಬಿ, ಅಪ್ಣೆ ಲಡವಾಳ ಹುಯಿರ‍್ಹಾಸ್.
EPH 6:13 ಇನಾಖ್ಹಾಜೆ ಯೊ ಖರಾಬ್ ದನ್ಮ ವಹೇರ‍್ಯಖ್ಹಾರಾನ ಭಿಡಾನಖ್ಹಾಜೇಬಿ ಕರ್ನುತೆ ಖ್ಹಾರಕಾಮ್ನ ಕರೀನ್ ಘಟ್‍ಥಿ ಭಿರ‍್ಯಾವನ ಖ್ಹಾಜೆ ಅಜು಼ ಇನಪಾರ್ ಶಕತ್‌ವಾಳ ಹುವಾನಿತರ ದೇವ್ ದೇಸ್ತೆ ಅಖ್ಖಿ ಕಫ್ಪನ್ನ ಧರಿಲೆವೊ.
EPH 6:14 ಇನಖ್ಹಾಜೆ ಖ್ಹಾಚಿನಸ್ ಕಂಬರ್‌ನು ಕಷ್‌ಬಂದ್‌ ಕರಿ ಭಾಂದಿಲೀನ್, ನೀತಿನಸ್ ಛಾ಼ತಿನ ಕವಚ್ ಕರಿ ಫೆರೀನ್,
EPH 6:15 ಸಮಾಧಾನ್ನಿ ಸುರ್ವಾತೆನ ಬೋಲಿ ವತಾಳನಖ್ಹಾಜೆ ತಯಾರ‍್ನೊ ದಿಲ್‌ಕರಿ ಬೋಲಾನು ಚಪ್ಲೇನ ಘಾಲಿನ್ ಭೀರೆವೊ.
EPH 6:16 ಅಖ್ಖೇಥಿ ಜಾ಼ಖ್ಹತ್ ವಿಶ್ವಾಸ್‌ ಕರಿ ಢಾಲ್ನ ಧರಿಲೆವೊ. ಇನೇಥಿ ತುಮೆ ವಹೇರ‍್ಯಾನಿ ಆಗ್‍ನಿ ತೀರ‍್ನ ಆಡುಕರಾನ ಶಕತ್‌ವಾಳ ಹುಯಿರ‍್ಹಿಶು.
EPH 6:17 ಆಬಿ ಕಾಹೆತೆ ರಕ್ಷಣೆಕರಿ ಮುಡ್‌ಕ್ಯಾನು ಕವಚ್‌ನ ಘಾಲಿಲೀನ್‌ ಪವಿತ್ರಾತ್ಮ ದೇಸ್ತೆ ದೇವ್ನಿ ವಚನ್ ಕರಿಬೋಲಾನು ತಲ್ವಾರ್‌ನ ಧರಿಲೆವೊ.
EPH 6:18 ತುಮೆ ಪವಿತ್ರಾತ್ಮಥಿ ಭರೈನ್ ಖ್ಹಾರಿ ವಖ್ಹತ್‌ಮ ಹರೇಕ್ ತರಿಕಾನಿ ಪ್ರಾರ್ಥನೆಥಿಬಿ ಬಿಂತೀನಿವ್ಹಾರ್ಥೀಬಿ ದೇವ್ನ ಪ್ರಾರ್ಥನೆ ಕರೊ. ಅನಾಮ ಏಕ್‌ ಖ್ಹಯಾಲ್‌ವಾಳು ಹುಯಿನ್ ದೇವ್ನ ಅದ್ಮಿ ಖ್ಹಾರಾನಿ ಬಾರೇಮ ಬಿಂತಿಕರ‍್ತಹುಯಿನ್ ಜ಼ತನ್‌ಥಿ ರ‍್ಹವೊ. ಅಖ್ಖಾಸ್ ಅದ್ಮಿನಖ್ಹಾಜೆ ಹಮೇಶ ಪ್ರಾರ್ಥನೆ ಕರಾನು ನಕೊ ಮ್ಹೇಲೊ.
EPH 6:19 ಮಾರಖ್ಹಾಜೆಬಿ ಪ್ರಾರ್ಥನೆ ಕರೊ ಮೆ ವಾತೆ ಬೋಲಾನ ಮ್ಹೋಡು ಛೋ಼ಡಾನಿ ವಖ್ಹ್‌ತೆ ಅಗ್‍ಲ್ಯ ಹಗಾಮ್ಮ ಲಪಿಥಿತೆ ಸುವಾರ್ತೆನಿ ಖ್ಹಾಚಿನ ಡರ್‌ಕೊಂತೆ ಬೋಲಾನಖ್ಹಾಜೆ ಹೋಣುತೆ ವಾತೆನ ದೇವ್ ಮನ ದ್ಯವಾದೆ.
EPH 6:20 ಯೊ ಅಛ್ಛಿ ಸಂದೇಶ್ನ ಲೀಜಾ಼ವಳೊ ಹುಯಿರ‍್ಹೋತೆ ಮೆ ಜೇಲ್‌ಮ ಖ್ಹಂಕಳ್‌ಥಿ ಬಂಧಿಹುಯಿನ್ ಪಡ್ಯೊಸ್. ಇನಿ ಬಾರೇಮ ಮೆ ಬೋಲ್ನುತೆ ಇಮ್ಮಸ್ ಭಾಲಿಥಿ ಮೆ ಬೋಲಾನಿತರ ಮಾರ ಖ್ಹಾಜೆ ಬಿಂತಿಕರೊ.
EPH 6:21 ಮಾರಿ ಬಾರೇಮ ಮಾರು ಕಾಮ್ ಖ್ಹಾರು ತುಮುನ ಮಾಲುಮ್ ಹೋಣುಕರಿ ಪ್ಯಾರ್‌ನೊ ಭೈಬಿ ಪ್ರಭುಮ ವಿಶ್ವಾಸ್‌ವಾಳೊ ಸೇವೆಮ ಛಾ಼ತೆ ತುಖಿಕ ತುಮುನ ಅಖ್ಖು ಬೋಲಿದಿಶೆ.
EPH 6:22 ತುಮೆ ಹಮಾರಿ ಬಾರೇಮ ಮಾಲುಮ್‌ಕರಿಲೇವ್ಣು ಕರಿಬಿ, ಯೊ ತುಮಾರ ದಿಲ್ನಖ್ಹಾರು ಭಾಲಿ ದೇವ್ಣುಕರೀಬಿ ಇನ ತುಮಾರಕನ ಮೋಕ್ಲಿರಾಖ್ಯೊಸ್.
EPH 6:23 ಬಾ ದೇವ್‌ಥಿಬಿ ಪ್ರಭು ಯೇಸು ಕ್ರಿಸ್ತಥಿಬಿ ಶಾಂತಿಬಿ, ವಿಶ್ವಾಸ್‍ಥಿ ರ‍್ಹವಾನಿ ಪ್ಯಾರ್ ಅಖ್ಖಾಸ್ ವಿಶ್ವಾಸಿ ಭೈಯೇ ಭೇನೆನ ಮಾಲುಮ್ ಹುವಾದೆ.
EPH 6:24 ಅಪ್ಣೊ ಪ್ರಭು ಯೇಸು ಕ್ರಿಸ್ತನ ಹಮೇಶಾಬಿ ಪ್ಯಾರ್ ಕರಾವಾಳ ಅಖ್ಖಾಸ್‌ಪರ್ ದೇವ್ನಿ ವಾರ್‌ಖ್ಹೊ ರ‍್ಹವಾದೆ.
PHI 1:1 ಕ್ರಿಸ್ತ ಯೇಸುನ ದಾಸ ಹುಯಿರಾತೆ ಪೌಲಬಿ ತಿಮೊಥೆ, ಫಿಲಿಪ್ಪಿ ಖ್ಹಯೇರ‍್ನ ವಿಶ್ವಾಸಿಖ್ಹಾರಾನ ಅಜು಼ ಇವ್ಣ ಜೋ಼ಡೆ ರ‍್ಹವಾಳನ ಸಬೇನ ಮೋಟಾನ ಅಜು಼ ಮದತ್ ಕರವಾಳನ ಲೀಖಾನು ಶಾತ್‌ಕತೊ,
PHI 1:2 ಬಾ ದೇವ್‌ಥಿಬಿ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
PHI 1:3 ತುಮುನ ಯಾದ್ ಕರಾನಿ ಖ್ಹಾರಿ ವಖ್ಹತ್‌ಮ ಮೆ ದೇವ್ನ ಧನ್ಯವಾದ್ ಕರುಸ್,
PHI 1:4 ಮೇ ತುಮಾರಖ್ಹಾಜೆ ಪ್ರಾರ್ಥನೆ ಕರಾನಿ ಅಖ್ಖೀಸ್ ವಖ್ಹತ್‍ಮಾಬಿ ಶಂತೋಖ್ಹ್‌ಥೀಸ್ ಪ್ರಾರ್ಥನೆ ಕರಾವಾಳೊ ಹುಯಿರ‍್ಹೋಸ್.
PHI 1:5 ಶನಕತೊ ತುಮೆ ಪಹಿಲೆಥ ಹಮ್ಕೆಲಗುಬಿ ಸುವಾರ್ತೆನು ಬೋಧನೆಮ ಭಾಗ್‌ರ‍್ಹವಾಳ ಹುಯಿರ‍್ಹಾಸ್.
PHI 1:6 ಆ ಅಛ಼್ಛುಕಾಮ್ನ ತುಮಾರಮ ಶುರುಕರ‍್ಯೊತೆ ದೇವ್ನೆ ಇನ ಚ಼ಲಾವ್ತೊಹುಯಿನ್ ಯೇಸು ಕ್ರಿಸ್ತ ಆವಾನಮಹಿ ಪೂರ ಕರ್ಶೆಕರಿ ಮನ ಭರೋಖ್ಹೊ ಛಾ಼.
PHI 1:7 ತುಮಾರಿ ಬಾರೇಮ ಮನ ಅಮ್ ಬೋಲಾವಸ್ತೆ ಖ್ಹಾಚು಼ಸ್. ಶನಕತೊ ಮೆ ಬಂದಿ ಹುಯಿರ‍್ಹವಾನಿ ವಖ್ಹ್‌ತೆಬಿ, ಸುವಾರ್ತೆನಿ ಬಾರೇನು ಆಡ್‌ಫೇಡ್‌ಮಾಬಿ ತುಮೆಖ್ಹಾರು ಮಾರಜೋ಼ಡೆ ದೇವ್ನಿ ವಾರ್‌ಖ್ಹಾಮ ಭಾಗ್‌ವಾಳ ಹುಯಿರ‍್ಹಾಸ್ ಕರಿ ತುಮುನ ಮಾರ ದಿಲ್ಮ ರಾಖಿಮ್ಹೇಲ್ಯೋಸ್.
PHI 1:8 ಕ್ರಿಸ್ತ ಯೇಸುನ ಛಾ಼ತೆ ಗೋರ್‌ಥೀಸ್ ತುಮಾರ ಹರೇಕ್ನ ಖ್ಹಾಜೆ ಕೆತ್ರೇಕ್ಕಿ ತರ್ಖ್ಹುಕರುಸ್. ಅನ ದೇವಸ್ ಸಾಕ್ಷಿ.
PHI 1:9 ಅಜು಼ ತುಮಾರಿ ಪ್ಯಾರ್ ಅಜೂ಼ಬಿ ಜಾ಼ಖ್ಹತ್ ಭಡಿನ್ ಪೂರ ಅಕ್ಕಲ್‍ಥೀಬಿ ಖ್ಹಯಾಲ್‌ಥಿ ಮಳಿರ‍್ಹವಾಳ ಹುಯಿರ‍್ಹೇವ್ಣುಕರಿ ಮೆ ತುಮಾರಖ್ಹಾಜೆ ಪ್ರಾರ್ಥನೆ ಕರುಸ್.
PHI 1:10 ಅಮ್ ಮಹಾನ್ ಕಾಮ್‌ಖ್ಹಾರು ಖಿವುಕರಿ ಬೋಲಾನು ತುಮೆ ಪರ್ಖಾವಾಳ ಹುಯಿರ‍್ಹೇಣು ಕರೀಬಿ ಬಿಜು಼ ಕ್ರಿಸ್ತ ಆವಾನ ದನ್ಮ ತುಮೆ ಪರಿಶುದ್‌ಥೀಬಿ ದೋಷ್‌ಕೊಂತೇಬಿ ರ‍್ಹಿಶು.
PHI 1:11 ಯೇಸು ಕ್ರಿಸ್ತಮ ಛಾ಼ತೆ ಅಛ್ಛು಼ಗುಣ್‌ನ ಭರೈರ‍್ಹವಾಳ ಹುಯಿನ್ ರ‍್ಹೇವ್ಣುಕರಿ ದೇವ್ನ ಮಹಿಮೆ ಅಜು಼ ದನ್ಯವಾದ್‌ನ ದೇವ್ಣುಕರಿ ಬಿಂತಿಕರಿಲೇವುಸ್.
PHI 1:12 ಭೈಯೇ ಭೇನೆವೊ, ಮನ ಹುಯೂತೆ ಅಖ್ಖೂಬಿ ಸುವಾರ್ತೆನ ಭಡಾವನ ಮದತ್ ಹುಯಿಕರಿ ತುಮೆ ಮಾಲುಮ್ ಕರಿಲೇವ್ಣುಕರಿ ಮೆ ಹರ್‌ಖ್ಹುಸ್.
PHI 1:13 ಕಿಮ್‌ಕತೊ ಮೆ ಜೇಲ್‌ಮ ರ‍್ಹವಾನು ಕ್ರಿಸ್ತನ ಖ್ಹಾಜೆಸ್ ಕರಿ ಮಹೇಲ್‌ನ ಕಾವ್ಲಿ ಕರಾವಾಳ ಖ್ಹಾರನಾಬಿ ಬಿಜು಼ಖ್ಹಾರನಾಬಿ ಮಾಲುಮ್‌ಪಡ್ಯು.
PHI 1:14 ಆ ನಾಹುಯಿನ್ ಭೈಯೇ ಭೇನೇಮ ಜಾ಼ಖ್ಹತ್ ಅದ್ಮಿ ಮಾರಿ ಭಂದಣ್‌ಥೀಸ್ ಪ್ರಭುಮ ಭರೋಖ್ಹಾಥಿ ದೇವ್ನಿ ವಚನ್ನ ಡರ್‌ಕೊಂತೆ ಬೋಲಾನ ಅಜೂ಼ಬಿ ಘಣು ಭಾಲಿ ಲೀರಾಖ್ಯುಸ್.
PHI 1:15 ಥೋಡುಜ಼ಣು ಪೇಟ್ನೊ ಬಳಾಪೊಕರಿನ್ ದಿಲ್ಮ ಕಚ಼್ಚರ್ ರಾಖವಾಳ ಹುಯಿರ‍್ಹೇಸ್. ಕತೋಬಿ ಅಲಕ್ ಥೋಡುಜ಼ಣು ಅಛ್ಛಿ ಉದ್ದೇಶ್‌ಥಿ ಕ್ರಿಸ್ತನಿ ಸುವಾರ್ತೆನ ಬೋಲಿವತಾಳಸ್.
PHI 1:16 ಅವ್ಣೇತೊ ಮೆ ಸುವಾರ್ತೆನಿ ಬಾರೇಮ ಜ಼ವಾಬ್ ಬೋಲಾನಖ್ಹಾಜೆ ಹಜ್ಜಾ಼ ಮೆ ಘಲೈರ‍್ಹೋಸ್ ಕರಿ ಮಾಲುಮ್ ಕರಿನ್ ಪ್ಯಾರ್‌ಥಿ ಪ್ರಚಾರ್ ಕರುಕರಸ್.
PHI 1:17 ಥೋಡುಜ಼ಣು ಇಮಾಂಧಾರಿನಖ್ಹಾಜೆ ಕಾಹೆ, ಶೊಂತ್‌ ಆಖ್ಹ್‌ನ ಖ್ಹಾಜೆಸ್ ಕ್ರಿಸ್ತನ ಪ್ರಚಾರ್ ಕರಾಸ್. ಕತೋಬಿ ಥೋಡುಜ಼ಣು ಮೆ ಬೇಡಿ ಘಲೈನ್ ಕೋಂಡೈರ‍್ಹವಾನಿ ವಖ್ಹ್‌ತೆ ಮನ ಖ್ಹತಾಪ್ಣಿ ಜಾ಼ಖ್ಹತ್ ಕರ್ನುಕರಿ ಸೋಚ್ಯು.
PHI 1:18 ಇವ್ಣಿ ಉದ್ದೇಶ್ ಶಾತಸ್ ಹುಯಿರ‍್ಹವಾದೆ, ಠಗಾವಾಥಿ ರ‍್ಹವೊ ನತರ್ ಖ್ಹಾಚೇಥಿ ರ‍್ಹವೊ ಯೋ ಮನ ಮುಖ್ಯಕಾಹೆ. ಕ್ರಿಸ್ತಯೇಸುನ ಬಾರೇಮ ಬೋಲಿವತಾಳು ಕರುಕರಾತೆಸ್ ಮನ ಖುಷಿ. ಅಜು಼ ಅಗ್ಗಳ್‌ಬಿ ಖುಷಿ ಕರುಸ್.
PHI 1:19 ಶನಕತೊ ತುಮಾರಿ ಬಿಂತಿಥಿಬಿ ಅಜು಼ ಯೇಸು ಕ್ರಿಸ್ತನು ಆತ್ಮನಿ ಮದತ್‌ಥೀಬಿ ಆ ಹೈರುತೆ ಮಾರು ಛುಟ್ಕಾರ್‌ನ ಶುಲ್ಬ ಉಷೆಕರಿ ಮಾಲುಮ್ ಛಾ಼.
PHI 1:20 ಕಿಮ್‌ಕತೊ ಮೆ ಖಿವಿ ವಿಚಾರ್‌ಮಾಬಿ ಖ್ಹರ್ಮಾಯೊಕೊಂತೆ ಕೆದೇಬಿ ರ‍್ಹವಾನಿತರಸ್ ಹಮ್ಕೇಬಿ ಜಿನು ಘಣು ಭಾಲಿಥಿ ಛೂ಼ತೆ ಇನಖ್ಹಾಜೆ ಜಿವ್ತೊ ರ‍್ಹಿಯೊತೋಬಿ ಬರೋಬರಸ್ ನತರ್ ಮರ‍್ಯೊತೋಬಿ ಬರೋಬರಸ್ ಮಾರಿ ಶರೀರ್‌ಥಿ ಕ್ರಿಸ್ತನ ಮಹಿಮೆ ಹುವಾದೆಕರಿ ಮಾರಿ ಮೋಟಿ ಹರಖ್ಹ್ ಹುಯಿರ‍್ಹೀಸ್, ಇಮ್ಮಸ್ ಉಷೆಕರಿ ಭರೋಖ್ಹೊ ಛಾ಼.
PHI 1:21 ಮನತೊ ಬಚಾ಼ನುಕತೊ ಕ್ರಿಸ್ತಸ್, ಮರಾನು ನಫ್ಫೋಸ್.
PHI 1:22 ಅಮ್ ಶರೀರ್‌ಮ ಬಚಾ಼ನುಸ್ ಫಲ್ ದ್ಯವಾನು ರ‍್ಹಯೂತೊ, ಅನಾಮಾಥು ಖಿವು ಚೂ಼ಣಿಲೇವ್ಣುಕರಿ ಮನ ಮಾಲುಮ್‌ ಕೊಪಡುಕರಾನಿ.
PHI 1:23 ಆ ಭೇನ ಇಚ಼್‌ಮ ಖ್ಹಪ್‌ಡಿರ‍್ಹೋಸ್, ಹಜ್ಜಾ಼ಥು ನಿಕ್ಳಿನ್ ಕ್ರಿಸ್ತ ಯೇಸುನಿ ಜೋ಼ಡ್ಮ ರ‍್ಹೇವ್ಣುಕರಿ ಬೋಲಾನುಸ್ ಮಾರಿ ಆಖ್ಹ್ ಹುಯಿರ‍್ಹೀಸ್, ಯೊ ಘಣು ಅಛ್ಛು಼ಸ್ ಹುಯಿರ‍್ಹುಸ್.
PHI 1:24 ಕತೋಬಿ ಮೇ ಬಿಜೂ಼ಬಿ ಶರೀರ್‌ಮ ಜಿವ್‌ಕರಾನು ತುಮಾರಖ್ಹಾಜೇಥಿ ಘಣು ಜ಼ರೂರತ್ ಛಾ಼.
PHI 1:25 ಇನಖ್ಹಾಜೆ ತುಮುನ ವಿಶ್ವಾಸ್ಮ ಭಡೀನ್ ಶಂತೋಖ್ಹ್‌ಥಿ ರ‍್ಹವಾನಖ್ಹಾಜೆ ಮೇ ಬಚಿರ‍್ಹೀನ್ ತುಮಾರ ಅಖ್ಖಾಸ್ನಿ ಜೋ಼ಡ್ಮರ‍್ಹೀಷ್ ಕರಿ ಘಟ್ ವಿಶ್ವಾಸ್ ಛಾ಼.
PHI 1:26 ಅಮ್ ಮೆ ಫಾಛೊ಼ಫರಿ ಆವಾಥಿ ತುಮೆ ಕ್ರಿಸ್ತ ಯೇಸುನ ಗಳ್‌ಜೋ಼ಡ್ಮ ಖುಷಿ ಕರಾನ ಮಾರೇಥಿ ಘಣಿ ಹುಮ್ಮಖ್ಹ್‌ ರ‍್ಹಿಶೆ.
PHI 1:27 ಕಿಮ್‌ಬಿ ಕ್ರಿಸ್ತನಿ ಸುವಾರ್ತೆನ ಲ್ಹಾಯೇಕ್‌ಹುಯಿನ್ ಚಾ಼ಲಿಲೆವೊ. ತದೆ ಮೆ ಐನ್ ತುಮುನ ದೇಖ್ಯೊತೋಬಿ ಚಾ಼ಲಸ್, ದೂರ್ ರ‍್ಹೀನ್ ತುಮಾರಿ ಖಬರ್‌ನ ಖ್ಹಮ್‌ಜೊ ಚಾ಼ಲಸ್, ತುಮೆ ತುಮಾರ ವಿರೋದಿನ ಖಿವಿ ವಿಚಾರ್‌ಮಾಬಿ ನಾಡರ‍್ನುತೆ ಏಕ್‌ ದಿಲ್‌ಥಿ ಘಟ್‍ಥಿ ಭೀರಿನ್ ಸುವಾರ್ತೆಮ ರಾಖ್ಯತೆ ವಿಶ್ವಾಸ್ನಖ್ಹಾಜೆ ಏಕ್‌ ಮನ್‌ಥಿ ಲಡವಾಳ ಹುಯಿರ‍್ಹಾಸ್‍ಕರಿ ಮೆ ಲ್ಹಾವ್ಸ್.
PHI 1:28 ತುಮೆ ತುಮಾರ ವಹೇರ‍್ಯಾಥಿ ನಕೊ ಡರೊ ಕೆದೇಬಿ ಭಾಲ್‌ಥಿ ರ‍್ಹವೊ, ಅಜು಼ ಅನ ಸಬೂತ್ ಕರೂಸ್ಕಿ ವಿರೋದಿನ ನಾಶ್‌ ಅಜು಼ ತುಮುನ ರಕ್ಷಣೆ. ಶನಕತೊ ಆ ದೇವ್‍ಥಿಸ್ ಹುಯಿರ‍್ಹುಸ್.
PHI 1:29 ಕ್ರಿಸ್ತನವಾಳಾನ ಹಾತ್‌ ಫೈಲೈನ್ ದ್ಯವಾಳ ಹುಯಿರೇವೊ. ಕ್ರಿಸ್ತಪರ್ ವಿಶ್ವಾಸ್‌ರಾಖಾನು ಖಲಿ ಕಾಹೆ ಇನಖ್ಹಾಜೆ ವದೇಖ್ಹ್‌ಪಡಾನುಬಿ ಅಛ್ಛು಼ ವರ ಮಳಿರ‍್ಹೂಸ್‌.
PHI 1:30 ಅಮ್ ತುಮೆ ಮಾರಮ ದೇಖ್ಯಾತೆ ಯೋಸ್ ಲಡ್ವಾನು ತುಮುನಾಬಿ ಛಾ಼.
PHI 2:1 ಕ್ರಿಸ್ತಮ ಪವಿತ್ರಾತ್ಮಥಿ ಮಳಿನ್ ರ‍್ಹವಾನು, ಪ್ಯಾರ್‌ನ ಸಮಾಧಾನ್, ಅಜು಼ ಗೋರ್‌ನಿ ದಯಾಥಿ ಏಕ್‌ಥಿಏಕ್ ಹುಮ್ಮಖ್ಹ್‌ವಾಳ ಹುಯಿ‍ರ‍್ಹೆವೊ.
PHI 2:2 ತುಮೆ ಅಖ್ಖು ಎಕ್ಕಸ್ ದಿಲ್‌ವಾಳ ಹುಯಿನ್, ಎಕ್ಕಸ್ ಪ್ಯಾರ್‌ವಾಳ ಹುಯಿನ್, ಏಕ್‌ಥಿಏಕ್ ಮಳಿನ್ ರ‍್ಹಾವವಾಳ ಹುಯಿನ್ ಅಜು಼ ಎಕ್ಕಸ್ ಶುಶತ್ ರಾಖವಾಳ ಹುಯಿರಿನ್ ಮಾರಿ ಶಂತೋಖ್ಹ್‌ನ ಪೂರ ಕರೊ.
PHI 2:3 ಇನುಯೋ ಭಡಾನಖ್ಹಾಜೆ ರ‍್ಹವೊ, ಶಿಕ್ಕೊ ಲ್ಯವಾನಖ್ಹಾಜೆ ಶಾತ್ಬಿ ನಾಕರ‍್ನುತೆ, ಹರೇಕ್ ಜ಼ಣುಬಿ ಹೇಟು ಹುವಾಳಹುಯಿನ್ ಬಿಜೇಕ್ ಜ಼ಣಾನ ಇನೇಥಿಬಿ ಊಚೊ಼ಕರಿ ದೇಖಾದೆ.
PHI 2:4 ತುಮಾರಮ ಹರೇಕ್‌ಜ಼ಣೊ ಖಲಿ ಇವ್ಣ ಅಛ಼್ಛಾಸ್ನ ನಾ ದೇಕ್ಣುತೆ ಬಿಜಾ಼ನು ಅಛ಼್ಛು ಹುವಾನುಬಿ ದೇಖಾದೆ.
PHI 2:5 ಕ್ರಿಸ್ತ ಯೇಸುಮ ಥೋತೆ ದಿಲ್‌ ತುಮಾರಮಾಬಿ ರ‍್ಹವಾದೆ.
PHI 2:6 ಯೋ ದೇವ್‌ನೊ ರೂಪ್‌ವಾಳೊ ಹುಯೊ, ಕತೋಬಿ ದೇವ್ನಿ ಸ್ವರೂಪ್ನ ಬರೋಬರ್ ರ‍್ಹಯುತೋಬಿ ಮಹಾನ್ ಪದವಿನ ಮ್ಹೇಲುಕೊಯ್ನಿಕರಿ ಬೋಲಿನ್,
PHI 2:7 ಇನುಯೋಸ್ ಖಾಲಿ ಕರಿಲೀನ್ ದಾಸನು ರೂಪ್‍ನ ಫೇರಿಲಿನ್ ಅದ್ಮಿನಿಘೋಣಿ ದೆಖೈಲಿದೊ.
PHI 2:8 ಇನೆ ಇನುಯೋಸ್ ಹೇಟು ಹುಯಿನ್ ಮರಣ್ಣಖ್ಹಾಜೆ ಕತೊ ಶಿಲ್‌ಬೇನಿ ಮರಣ್ಣಾಬಿ ಛೀಮಯೆತ್ರೆ ಹೇಟೊ ಹುಯೊ.
PHI 2:9 ಅನಖ್ಹಾಜೆಸ್ ದೇವ್ನೆ ಇನ ಘಣು ಊಚೊ಼ ಪಾಡ್ಯೊ ಅಜು಼ ಅಖ್ಖಾ ನಾಮ್‌ಥಿಬಿ ಊಚು಼ ಹುಯಿರ‍್ಹುತೆ ನಾಮ್ನ ಇನ ದಯ ಕರಿರಾಖ್ಯೊಸ್.
PHI 2:10 ಇನಖ್ಹಾಜೆ ಸೊರ್ಗ ಮರಣ್ ಪಾತಾಳ್ಮ ರ‍್ಹವವಾಳು ಖ್ಹಾರುಸ್ ಯೇಸುನ ನಾಮ್ಮ ಗುಡ್‌ಘ್ಯಮೇಟೆಹುಯಿನ್ ಆಡ್‍ಪಡಿನ್,
PHI 2:11 ಬಾ ಹುಯಿರ‍್ಹೋತೆ ದೇವ್ನಿ ಮಹಿಮೆನ ಖ್ಹಾಜೆ ಯೇಸು ಕ್ರಿಸ್ತನ ಪ್ರಭುಕರಿ ಹರೇಕ್ ಅದ್ಮಿ ಕಬೂಲ್‍ ಕರ್ಶೆ.
PHI 2:12 ಅಮ್ ರ‍್ಹವಾಪರ್ ಮಾರ ಪ್ಯಾರ್‌ನ ದೋಸ್ತಿವೊ, ತುಮೆ ಮಾರಿ ವಾತೇನ ಕೆದೇಬಿ ಪಾಡಿಚಾ಼ಲ್ಯತೆ ತಿಮ್ ಹಮ್ಕೇಬಿ ಪಾಡಿಚಾ಼ಲೊ. ಮೆ ತುಮಾರಮ ರ‍್ಹವಾನಿವಖ್ಹ್‌ತೆಸ್ ಖಲಿಕಾಹೆತೆ, ಮೇ ನಾ ರ‍್ಹವಾಮಾಬಿ ಘಣು ಜಾ಼ಖ್ಹತ್ ದಿಲ್ಮ ಡರ್‌ಥಿ ಕಾಪವಾಳ ಹುಯಿನ್ ತುಮಾರಿ, ತುಮಾರಿ ರಕ್ಷಣೆನ ಲೀಲೆವೊ.
PHI 2:13 ಶನಕತೊ ದೇವಸ್ ಇನಿಮರ್ಜಿನ ಚ಼ಲಾವ್ಣುಕರಿ ತುಮಾರಮ ಉದ್ದೇಶ್‌ನಾಬಿ ಅಜು಼ ಕೋಶಿಶ್‌ನ ಬಣಾವವಾಳೊ ಹುಯಿರೋಸ್.
PHI 2:14 ಭಣಕ್ಣುನಾತೇಬಿ, ಆಡಫೇಡ್ ನಾ ಬೋಲ್ನುತೆ ಖ್ಹಾರು ಕರೊ.
PHI 2:15 ಅಮ್ ತುಮೆ ದೋಷ್‌ನಾರ‍್ಹವಾಳಬಿ ಅಜು಼ ದೇವ್ನ ಧೋಬೆಡಾದಿಲ್ನ ಲಡ್ಕಹುಯಿನ್ ಮೋಂಡ್‍ಖ್ಹಯಾಲ್‍ನ ಅಜು಼ ಪಾಪ್‌ಮ ರ‍್ಹವಾಳ ಜಗತ್ನ ಅದ್ಮಿವೊನ ಬೀಚ್ಮ ಮೈಲುಕೊಂತೆ ದೇವ್ನ ಲಡ್ಕ ಹುಯಿರ‍್ಹಿಶು.
PHI 2:16 ಅವ್ಣ ಮಹಿ ತುಮೆ ಹರೇಕ್‌ನಾಬಿ ಜಾನ್‌ರ‍್ಹವಾನು ವಚನ್ನ ವತಾಳವಾಳ ಹುಯಿರ‍್ಹಿನ್, ಜಗತ್‌ಮ ಝ಼ಮ್ಕಾನ ಶುಕ್ಕರ್‌ನಿಮತ್ ದೆಖಾವ್‌ಶು. ತುಮೆ ಅಮ್‍ಚಾ಼ಲ್ಯಾತೊ ಮಾರಿ ಸೇವೆ ಬಿಣ್‌ಫಾಯಿದಾನು ಕಾಹೆ, ಮೇ ವದೇಖ್ಹ್‌ ಪಡ್ಯೋತೆ ಫಾಯಿದೊಸ್‌ಕರಿ ಬೋಲಾನಿ ಖ್ಹರಾವ್ಣಿ ಕ್ರಿಸ್ತಾನ ದನ್ಮ ಮನಮಳ್‌ಷೆ.
PHI 2:17 ತುಮಾರಿ ವಿಶ್ವಾಸ್ ಕರಿ ಬಲೀನ ಕಾಣ್ಕೆಮ ದೇವ್ನ ಮೇ ಅರ್ಪಣ್‌ಕರಾಮ ಮಾರ ಲೋಹಿನ ವವ್ಹಾಡನಿತರ ಹುಯುತೋಬಿ ಮನ ಖುಷಿ, ತುಮಾರ ಜೋ಼ಡೇಬಿ ಶಂತೋಖ್ಹ್‌ ಪಡುಸ್.
PHI 2:18 ಇಮ್ಮಸ್ ತುಮೇಬಿ ಶಂತೋಖ್ಹ್‌ ಪಡೊ, ಅಜು಼ ತುಮೆ ಮಾರ ಜೋ಼ಡೆಬಿ ಶಂತೋಖ್ಹ್‌ ಕರೊ.
PHI 2:19 ಕತೋಬಿ ಪ್ರಭು ಯೇಸುನಿ ಮರ್ಜಿ ಹುಯೂತೊ ಮೆ ತಿಮೊಥೆನ ಜ಼ಲ್ದೀಥಿ ತುಮಾರಕನ ಮೋಕಲ್ನುಕರಿ ಭರೋಖ್ಹೊ ಛಾ಼. ಇನೇಥಿ ತುಮಾರಿ ಬಾರೇನಿ ಸಮಾಚಾರ‍್ನ ಖ್ಹಮ್‌ಜಿನ್‌ ಮೆ ಭಾಲ್‌ ಹುಯಿಶ್.
PHI 2:20 ಇನಿನಿತರ ತುಮಾರು ಅಛ್ಛು಼ರ‍್ಹವಾನಿ ಬಾರೇಮ ಘಣು ಛು಼ಟಾದಿಲ್‌ಥಿ ವೇಚ಼್‌ಣೆ ಕರಾಸ್ತೆ ತಿಮ್ ಮಾರ ಜೋ಼ಡ್ಮ ಬಿಜು಼ ಖಿವೂಬಿ ಕೊಯ್ನಿ.
PHI 2:21 ಅಖ್ಖುಜ಼ಣು ಇವ್ಣ ಕಾಮ್‌ಪರ್ ಮಗನ್‌ ರ‍್ಹೇಸ್ ಪಣ್ಕಿ ಯೇಸು ಕ್ರಿಸ್ತನ ಕಾಮ್‌ಪರ್ ಮನ್‌ಲಗಾಡಕೊಯ್ನಿ.
PHI 2:22 ಕತೋಬಿ ತಿಮೊಥೆನ ಯೋಗ್ಯತೆನ ತುಮೆ ಮಾಲುಮ್ ಕರಿರಾಖ್ಯಸ್. ಛಿಯ್ಯೊ ಬಾನಿ ಜೋ಼ಡ್ಮ ಕಿಮ್ಕಿ ತಿಮ್ಮಸ್ ಇನೆ ಮಾರ ಜೋ಼ಡ್ಮ ಸುವಾರ್ತೆನ ಫೈಲಾವನಖ್ಹಾಜೆ ಸೇವೆ ಕರಿರಾಖ್ಯೋಸ್ ಕರಿ ಬೋಲಾನು ತುಮುನ ಮಾಲುಮ್‌ಛಾ಼.
PHI 2:23 ಇನಖ್ಹಾಜೆ ಮಾರಿ ಬಾರೇಮ ಚಾ಼ಲುಕರಾತೆ ಕಿಮ್‌ಹುವಾಸ್ಕಿ ಇನ ಖ್ಹಮ್‌ಜೊತೊ ತದೇಸ್‌ ತಿಮೊಥೆನ ತುಮಾರಕನ ಮೋಕ್ಲಾನ ಆಖ್ಹ್‌ ಕರುಸ್.
PHI 2:24 ಆನಾಹುಯಿನ್ ಮೇ ಜಿನು ಒಗ್ಗೀಮಾಸ್ ಐಶ್‌ಕರಿ ಪ್ರಭುಮ ಘಟ್‍ಥಿ ವಿಶ್ವಾಸ್ ಕರಿರಾಖ್ಯೊಸ್.
PHI 2:25 ಮಾರಿ ಜ಼ರೂರತ್ನ ಕಾಡಾನಖ್ಹಾಜೆ ತುಮೆ ಮೋಕ್‍ಲ್ಯಥಾತೆ, ಮಾರೊ ಭೈ, ಜೋ಼ಡ್ನೊ ಸೇವಕ್‌ಬಿ, ಜೋ಼ಡ್‌ನೊ ಶಿಪಾಯಿಬಿ ಹುಯಿರ‍್ಹೋಸ್ತೆ ಎಪಫ್ರೊದೀತ್‌ನ ತುಮಾರಕನ ಮೋಕ್ಲಾನು ಜ಼ರೂರತ್ ಕರಿ ಲ್ಯಾಹುಸ್.
PHI 2:26 ಇನೆ ತುಮಾರಿ ಬಾರೇಮ ತರ್ಖ್ಹುಕರ್ತೊಥೊ ಅಜು಼ ಯೊ ಜಾನ್ನ ಅಛ್ಛು಼ಕೊಂತೆ ಖಬರ್‌ನ ತುಮೆ ಖ್ಹಮ್‍ಜ್ಯಾತೆ ಇನಖ್ಹಾಜೆ ಯೊ ದುಖ್ ಕರಿಲಿದೊ.
PHI 2:27 ಯೋ ರೋಗ್ಮಪಡೀನ್ ಮರನಿತರ ಥೋತೆ ಖ್ಹಾಚಾಸ್, ಕತೋಬಿ ದೇವ್ನೆಯಿನ ಗೋರ್‌ಕರ‍್ಯೊ. ಇನಾಸ್ ಖಲಿ ಕಾಹೆತೆ ಮನ ದುಖ್‌ನಪರ್ ದುಖ್ ನಾ ಆವ್ಣುತೆ ತಿಮ್ ಮನಾಬಿ ದಯಾಕರ‍್ಯೊ.
PHI 2:28 ಇನಖ್ಹಾಜೆ ತುಮೆ ಇನ ದೇಖಿನ್ ಪಾಛು಼ ಶಂತೋಖ್ಹ್‌ ಕರ್ನುಕರಿಬಿ ಮಾರಿ ದುಖ್ ಕಮ್ ಹೋಣುಕರೀಬಿ ಮೇ ಇನ ಘಣು ತರಖ್ಹ್‌ಥಿ ಮೋಕ್ಲುಕರುಸ್.
PHI 2:29 ಇನಖ್ಹಾಜೆ ಪ್ರಭುಮ ಭೈನಿ ಘೋಣಿ ಶಂತೋಖ್ಹ್‌ಥಿ ಸ್ವೀಕಾರ್ ಕರಿಲೆವೊ. ಎಥ್ರಾನವಾಳನ ಅದ್ಮಿವ್‌ನ ಸ್ವಾಗತ್ ಕರೊ.
PHI 2:30 ಅಮ್ ತುಮೇಸ್ ಮನ ಕರ್ನುತೆ ಮ್ಹೆಮಾನ್ಮ ಜ಼ರೂರತ್‌ನ ಭರಾನಖ್ಹಾಜೆ ಇನ ಜಾನ್‌ಪರ‍್ಲಿ ಆಖ್ಹ್‌ನ ಮ್ಹೆಂದಿನ್ ಕ್ರಿಸ್ತ ಯೇಸುನಿ ಸೇವೆಮ ಮರಿಗೊ.
PHI 3:1 ಖ್ಹರ್ತಿಮ ಮಾರ ಭೇನೆ ಭೈಯೇವೊ, ಪ್ರಭುಮ ಖುಷಿಕರೊ. ಪಹಿಲೆ ಖ್ಹಮ್‌ಜಾ಼ಡ್ಯೊಥೋತೆ ಯೋಸ್ ವಾತೇವ್ನ ಪಾಛು಼ ತುಮುನ ಲೀಖಾನ ಮನ ಶಾತ್ಬಿ ಬೇಜಾರ್‌ಕೊಯ್ನಿ. ಆ ತುಮುನ ಘಟ್‌ಕರಸ್.
PHI 3:2 ಖರಾಬ್‌ ಕಾಮ್‌ಕರಾವಾಳೇಥಿ ಜತನ್‌ ರ‍್ಹವೊ, ಖ್ಹತ್ನಕರಿ ಬೋಲಿನ್ ಶರೀರ್‌ಮ ಖ್ಹಂದೊ ವ್ಹಾಡವಾಳೇಥಿ ಹೊಷಾರಿ ರ‍್ಹವೊ, ಇವ್ಣೆ ಕುತ್‌ರ‍್ಯಾನ ಸಮಾನ್ ಹುಯಿರ‍್ಹುಸ್.
PHI 3:3 ಖ್ಹಾಚಿ ಖ್ಹತ್ನ ರ‍್ಹವಾಳು ಕೋಣ್‌ಕತೊ, ದೇವ್ನಿ ಆತ್ಮನಿ ಖ್ಹೂಜ಼್‍ಥಿ ಆರಾದನೆ ಕರವಾಳು ಅಜು಼ ಕ್ರಿಸ್ತ ಯೇಸುಮ ಖುಷಿ ಕರವಾಳುಬಿ, ಶರೀರ್‌ನಿ ಆಖ್ಹ್‌ನಿ ಬಾರೇಮ ಭರೋಖ್ಹೊ ಕೊಂತೇಬಿ ಹುಯಿರ‍್ಹಾಸ್ತೆ ಅಪ್ಣೆಸ್.
PHI 3:4 ಮೆತೋಬಿ ಶರೀರ್‌ನಿ ಬಾರೇಮ ಭರೋಖ್ಹೊ ಕರಾನಬಿ ಮೋಕ ಛಾ಼. ಬಿಜು಼ ಖಿವೊತೋಬಿ ಶರೀರ‍್ನಿ ಆಖ್ಹ್‌ನಿ ಬಾರೇಮ ಭರೋಖ್ಹೊ ಕರೆಜಾ಼ಯ್ ಕರಿ ಸೋಚ್ಯೊತೊ ಮೆ ಇನೇಥಿಬಿ ಜಾ಼ಖ್ಹತ್ ಇಮ್ಮಸ್ ಸೋಚೆಜಾ಼ಯ್.
PHI 3:5 ಪೈದಹುಯಿನ್ ಆಟ್ನ ದನ್ಮ ಮನ ಖ್ಹತ್ನಹುಯು, ಮೆ ಇಸ್ರಾಯೇಲ್‌ನು ಖಾನ್‌ದಾನ್‌ವಾಳೊ, ಬೆನ್ಯಾಮೀನ್ನು ಖೂಮ್‌ವಾಳೊ, ಅಫೂಟ್ ಇಬ್ರಿಯವಾಳೊ, ಧರ್ಮಶಾಸ್ತ್ರನಿ ನಿಘ್ಯಾಥಿ ದೇಖ್ಯೂತೆ, ಮೆ ಫರಿಸಾಯವಾಳೊ,
PHI 3:6 ಜಾ಼ತ್ನೊ ಅಭಿಮಾನ್ ದೇಖ್ಯೊತೊ ಮೆ ಕ್ರಿಸ್ತ ಸಬೆನ ಖ್ಹತಾವವಾಳೊ, ಧರ್ಮಶಾಸ್ತ್ರನಿ ನೀತಿನ ದೇಖ್ಯುತೊ ಮೆ ನಿರ್ದೋಷಿ.
PHI 3:7 ಕತೋಬಿ, ಮನ ನಫ್ಫೊಹುಯಿರ‍್ಹಾವನು ಅಖ್ಖೂಸ್ ಕ್ರಿಸ್ತನಖ್ಹಾಜೆ ಲುಕ್ಷಾನ್‌ಕರಿಸ್ ಲ್ಹಾವ್ಸ್.
PHI 3:8 ಅತ್ರೇಸ್ ಕಾಹೆತೆ, ಮಾರೊ ಪ್ರಭು ಕ್ರಿಸ್ತಯೇಸುನ ಮಾಲುಮ್ ಕರಿಲಾವನು ಬಾರೇಮ ಘಣು ಮಹಾನ್‌ಕರಿ ಸೋಚಿನ್ ಮೆ ಅಖ್ಖಾನ ಲುಕ್ಷಾನ್‌ಕರಿಸ್ ಲ್ಹಾವ್ಸ್. ಆಹೈರೋತೆ ಇನಖ್ಹಾಜೆ ಮೆ ಖ್ಹಾರುಸ್ ಗುಮೈಲಿದೋತೆಬಿ ಯೊ ಅಖ್ಖಾನ ಕಚ್ರೊ಼ಸ್ ಕರಿ ಲ್ಹಾವ್ಸ್.
PHI 3:9 ಅನಾಮ ಮಾರಿ ಖ್ಹೂಜ಼್ ಶಾತ್‌ಕತೊ, ಮೆ ಕ್ರಿಸ್ತಾನ ಕಮೈಕರೀನ್, ಧರ್ಮಶಾಸ್ತ್ರನು ಫಲ್ ಹುಯಿರ‍್ಹುತೆ ಶೊಂತ್ ನೀತಿಕಾಹೆ, ಕ್ರಿಸ್ತಮ ವಿಶ್ವಾಸ್‌ಕರಾಥಿ ಮಳಾತೆ ಕತೊ ಕ್ರಿಸ್ತಪರ್‌ನಿ ವಿಶ್ವಾಸ್‌ನಿ ಆಧಾರ್‌ಥಿ ದೇವ್ ದೇಸ್ತೆ ನೀತಿನಾಸ್ ಲೀನ್ ಕ್ರಿಸ್ತಮ ರ‍್ಹೇವ್ಣುಕರಿ ಬೋಲಾನುಸ್.
PHI 3:10 ಇನಾಬಿ ಇನು ಪಾಛು಼ ಜಿವ್ತುಹುವಾಮ ಛಾ಼ತೆ ಶಕತ್‍ನಾಬಿ, ಇನಿ ಖ್ಹತಾಪ್ಣಿಮ ಭಾಗ್‌ಲ್ಯವಾನಿ ಪದವಿನ ಮಾಲುಮ್ ಕರಿಲಿನ್ ಇನಿ ಮರಣ್ಣಿ ಬಾರೇಮ ಇನೀನಿತರಸ್ ಹೋಣುಕರಿ ಬೋಲನುಸ್ ಮಾರಿ ಹರಖ್ಹ್ ಹುಯಿರ‍್ಹೀಸ್.
PHI 3:11 ಅಮ್ ಮೇಬಿ ಜಿನು ಮರಿನ್‌ ಜಿವಿಶ್‌ಕರಿ ಮಾರಿ ಭರೋಖ್ಹೊ.
PHI 3:12 ಅತ್ರಾಸ್‌ಮ ಮೆ ಆ ಅಖ್ಖಾನ ಲೀಲಿನ್‌ ಪೂರ ಹುಯಿಗೊಕರಿ ಕೊಬೋಲೂನಿ. ಕತೋಬಿ ಮೆ ಶನ ಲೇವ್ಣುಕರಿ ಕ್ರಿಸ್ತ ಯೇಸು ಮನ ಧರಿಲಿದೋಕಿ ಯೋ ಲೀಲ್ಯಾವನ ಖ್ಹಾಜೆ ಕೋಶಿಶ್ ಕರುಸ್.
PHI 3:13 ಭೇನೆ ಭೈಯೇವೊ, ಮೇತೊ ಯೋ ಶುಶತ್ನ ಪೋಚಿರ‍್ಹೋಸ್‌ಕರಿ ಹಮ್ಕೆಲಗುಬಿ ಕೊ ಬೋಲಿರಾಖ್ಯೋನಿ. ಕತೋಬಿ ಆ ಹೈರುತೆ ಖ್ಹಾಚು಼. ಪಾಛ಼್‌ಲಿ ಬಾರೇಮ ಭೈಕಿಜೈ಼ನ್, ಮಾರೇಥಿ ಹುವಾಯೆತ್ರೆ ಖ್ಹಾಮೆ ಹುವಾಸ್ತೆ ಇನ ಧರಿಲ್ಯವಾನ ಖ್ಹಾಜೆ ಮಿಲವ್‌ಕರುಸ್.
PHI 3:14 ಕ್ರಿಸ್ತ ಯೇಸುಮ ದೇವ್ನ ಮಹಾನ್ ಬುಲಾವ್ಣಿಖ್ಹಾಜೆ ಇನಾಮ್ನ ಲೇವ್ಣುಕರಿ ಶುಶತ್ ಭಾಂದಿನ್ ನಾಖ್ಹುಕರೂಸ್.
PHI 3:15 ಅಪ್ಣಾಮ ಪುರ್ಗುಲ್ ಹುಯಿರ‍್ಹವಾಳ ಖ್ಹಾರಸ್ ಜ಼ಣ ಆ ಬಾರೇಮ ಪೂರ ಹುಯಿರ‍್ಹೇವ್ಣು. ಅಜು಼ ಖಿವುತೋಬಿ ಏಕ್‌ ವಾತೆವ್ಮ ತುಮೆ ಅಲಕ್ ಸೋಚ್‌ವಾಳ ಹುಯಿರ‍್ಹಾತೊ ಇನ ದೇವ್ ತುಮುನ ವತಾಳಿ ದಿಶೆ.
PHI 3:16 ರ‍್ಹೀನ್‌ಬಿ, ಅಪ್ಣೆ ಖಿವಿ ರೀತಿಮ ಚಾ಼ಲಿನ್ ಅತ್ರೆಲಗು ಐರ‍್ಹಾಸ್ಕಿ ಇಮ್ಮಸ್ ಚಾ಼ಲಿಯೇ.
PHI 3:17 ಭೇನೆ ಭೈಯೇವೊ, ತುಮೆ ಅಖ್ಖು ಮಾರಿ ಜೋ಼ಡೆ ಮಳಿನ್ ಮಾರಿಜೋ಼ಡೇಥಿ ಚಾ಼ಲವಾಳ ಹುಯಿ‍ರ‍್ಹೆವೊ ಅಜು಼ ಕೋಣ್ ಬರೊಬರ‍್ನಿ ಪರಕ್ಮ ಚಾ಼ಲಸ್ಕಿ ಇನ ಖ್ಹಯಾಲ್ಮ ಲೀಲೆವೊ.
PHI 3:18 ಶನಕತೊ ಕೈಯೆಕ್ಕಿ ಜ಼ಣು ಕ್ರಿಸ್ತನಿ ಶಿಲ್‌ಬೇನ ವಿರೋದಿ ಹುಯಿನ್ ಚಾ಼ಲಸ್. ಇವ್ಣಿ ಬಾರೇಮ ತುಮುನ ಕೆತ್ರಿಕ್ಕಿಹಲ್ಲ ಬೋಲ್ಯೊ, ಹಮ್ಕೇಬಿ ರೊಯಿನ್ ಬೋಲುಕರುಸ್.
PHI 3:19 ಪೇಟಸ್ ಇವ್ಣು ದೇವ್, ಖ್ಹರಮ್‌ಕಾಡಾನು ಕಾಮಸ್ ಇವ್ಣುನ ಮರ್ಯಾದಿನು. ಇವ್ಣೆ ಜಗತ್ನಿ ಬಾರೇಮಸ್ ಸೋಚವಾಳು, ಅನಖ್ಹಾಜೆ ವಿನಾಶಥೀಸ್ ಇವ್ಣೆ ಖ್ಹರ್ತಿಉಷೆ.
PHI 3:20 ಅಪ್ಣೆತೋಬಿ ಸೊರ್ಗಾನ ಪ್ರಜೆ ಹುಯಿರಾಸ್, ಅಪ್ಣೊ ಬಚಾ಼ಡವಾಳೊ ಪ್ರಭು ಯೇಸು ಕ್ರಿಸ್ತಸ್ ಹಿಜ಼್ಜಾಥೊ ಆವಾನು ಮ್ಹೋರೆ ದೇಖುಕರೆಸ್.
PHI 3:21 ಯೊ ಅಖ್ಖಾಸ್ನ ಇನ ಅಧೀನ್‌ಮ ಲೀನ್ ತಾಖತ್‌ವಾಳೊ ಹುಯಿನ್ ಅಪ್ಣ ಕಮ್‌ಜೋ಼ರ್ ಶರೀರ್‌ನ ಇನಿ ಮಹಿಮೆಥಿ ಭರೈರ‍್ಹಾವನು ಶರೀರ‍್ನಿತರ ಬದ್ಲಾವ್‌ಷೆ.
PHI 4:1 ಅಮ್‌ರ‍್ಹವಾಪರ್, ಮಾರ ಪ್ಯಾರ್‌ನ ಭೇನೆ ಭೈಯೇವೊ ಅಜು಼ ಸಾಥಿವೊ, ಮನ ಶಂತೋಖ್ಹ್‌ಬಿ ಕಿರೀಟ್‌ಬಿ ಹುಯಿರ‍್ಹವವಾಳವೊ, ಮೇ ಬೋಲಾನಿತರ ಪ್ರಭುಮ ಘಟ್‍ಥಿ ಭೀರ‍್ಹೆವೊ.
PHI 4:2 ಪ್ರಭುಮ ಏಕ್‌ ದಿಲ್‌ವಾಳ ಹುಯಿರ‍್ಹೇವೊಕರಿ ಯುವೊದ್ಯನಾಬಿ ಸಂತುಕೆನ ಗಿಂಗೈಲೆವುಸ್.
PHI 4:3 ಮಾರೊ ಖ್ಹಾಚೊ಼ ಸಾಥಿನೊ ಸೇವಕ್, ಯೊ ತಯೇಡಾವ್ನ ಮದತ್ ಹುಯಿರ‍್ಹೇವ್ಣುಕರಿ ತುನ ಬೋಲಿಲೆವುಸ್. ಇವ್ಣೆ ಜಿನು ಕ್ಲೇಮೆನ್ಸ್ ಅಜು಼ ಥೋಡ ಜೋ಼ಡ್ಮಕಾಮ್‍ ಕರವಾಳನ ಖ್ಹಮೇದ್ ಮಾರ ಜೋ಼ಡೆ ಸುವಾರ್ತೆನಖ್ಹಾಜೆ ಖ್ಹತ್ಯು. ಅವ್ಣು ನಾಮ್‌ಅಖ್ಖು ಜಾನ್ನ ಹಕ್‌ವಾಳಾನಿ ಪಟ್ಟಿಮ ಛಾ಼.
PHI 4:4 ಕೆದೇಬಿ ಪ್ರಭುಮ ಖುಷಿಕರೊ, ಖುಷಿಲೀಲೆವೊಕರಿ ಪಾಛೊ಼ ಬೋಲುಸ್.
PHI 4:5 ತುಮಾರು ಖ್ಹಮಾಳಿರ‍್ಹವಾನುಬಿ, ಗೋರ್‌ಬಿ ಹರೇಕ್ ಅದ್ಮಿನಾಬಿ ಮಾಲುಮ್‌ಪಡಾದೆ, ಪ್ರಭು ಪಾಛು಼ ಆವಾನು ಲಗಾಬಗು ಹುಯಿಗು.
PHI 4:6 ಖಿವಿ ಬಾರೇಮಾಬಿ ವೇಚ಼್‌ಣೆ ನಾಕರ‍್ನುತೆ ಅಖ್ಖೀಸ್ ವಿಚಾರ್‌ಮ ದೇವ್ನ ಖ್ಹಾಮ್ಣೆ ಧನ್ಯವಾದ್ನು ಪ್ರಾರ್ಥನೆಬಿ ಬಿಂತಿ ಕರ್ತಹುಯಿನ್ ತುಮುನ ಹೋಣುತೆಯಿನ ಪ್ರಭುನ ಖ್ಹಮ್‍ಜಾ಼ಡೊ.
PHI 4:7 ಅಜು಼ ತದೆ ಅದ್ಮಿನ ಖ್ಹಯಾಲ್‌ಥೀಬಿ ಭಡಿರ‍್ಹವಾನು ದೇವ್ನಿ ಶಾಂತಿ ತುಮಾರ ದಿಲ್‌ನಾಬಿ ಸೋಚ್‌ನಾಬಿ ಕ್ರಿಸ್ತ ಯೇಸುಮ ಬಚಾ಼ಡ್‌ಶೆ.
PHI 4:8 ಕಡೇಶಿಮ ಮಾರ ಭೇನೆ ಭೈಯೇವೊ, ಖಿವು ಖ್ಹಾಚು಼ಕಿ, ನ್ಯಾವ್‌ನೂಕಿ, ಗಣ್ತಿನುಕಿ, ಪಾಕ್‌ನೂಕಿ, ಲಾಡ್ನೂಬಿ, ಖ್ಹಾಜ಼್‌ನುಬಿ ಹುಯಿರ‍್ಹುಸ್ಕಿ, ಖಿವು ಅಛ್ಛಿ ಚಾ಼ಲ್‌ಚ಼ಲಣ್‌ಬಿ, ಕೀರತ್ನ ಲ್ಹಾಯೇಕ್ಕಿ, ಯೊ ಅಖ್ಖಾನಿ ಬಾರೇಮ ಸೋಚಾವಳ ಹುಯಿ‍ರ‍್ಹೆವೊ.
PHI 4:9 ತುಮೆ ಖಿವು ಮಾರೇಥಿ ಶಿಕಿ ಲೀರಾಖ್ಯಾಸ್ಕಿ, ಅಜು಼ ಖಿವು ಮಾರಾಮ ಖ್ಹಮ್‌ಜಿ ದೇಖಿರಾಖ್ಯಸ್ಕಿ ಇನಾಸ್ ಕರ್ತಆವೊ. ಅಮ್ ಕರ‍್ಯಾತೊ ಸಮಾಧಾನ್ನೊ ದೇವ್ ತುಮಾರ ಜೋ಼ಡೆರ‍್ಹಿಷೆ.
PHI 4:10 ಮಾರಿ ಬಾರೇಮ ತುಮುನ ಛಾ಼ತೆ ಖ್ಹದ್ದರ್‌ ಅತ್ರದನ್ನ ಪಾರ್ ಚಿಗುರ್‌ ಮ್ಹೇಲ್ಯುತೆ ಇನಖ್ಹಾಜೆ ಮೇ ಪ್ರಭುಮ ಖುಷಿಕರುಸ್. ಅಥ್ರಾನಿ ಸೋಚ್ ತುಮಾರಮ ಆ ಪಹಿಲೆ ರ‍್ಹಿಯುಹೊತ್ತೊಬಿ, ಮದತ್ ಕರಾನ ಬರೊಬರ‍್ನಿ ವೇಳ್ ಕೊಆಯಿರ‍್ಹಿಥೀನಿ.
PHI 4:11 ಮನ ಹೋಣುತೆ ಇನಿ ಬಾರೇಥಿ ಮೇ ಅನ ಕೋ ಬೋಲುಕರುನಿ, ಮೆ ಬೋಲ್ನುಕತೊ ಛಾ಼ತೆ ಪರಕ್ಮ ಹಕ್ಲಾಲ್‌ಥಿ ರ‍್ಹವಾನು ಶಿಕಿರಾಖ್ಯೊಸ್.
PHI 4:12 ಗರೀಬ್ ಹುಯಿರ‍್ಹವಾನಬಿ ಮಾಲುಮ್ ಚೆಹಳ್‌ಥಿರ‍್ಹವಾನು ಮಾಲುಮ್. ಮೆ ಹಕ್ಲಾಲ್‌ಥಿ ರ‍್ಹಯೊತೋಬಿ, ಭುಕ್ಯೊ ರ‍್ಹಯೊತೋಬಿ, ಬರ್ಗತ್‌ವಾಳೊ ಹುಯುತೋಬಿ, ಕಾಯಸ್‌ಕೊಂತೆ ಹುಯೋತೊಬಿ, ಖಿವಿ ರ‍್ಹಾಮರ‍್ಹವಾಳೊ ರ‍್ಹಿಯೊತೋಬಿ ಇನು ಗಪ್ಲತ್ ಮನ ಮಾಲುಮ್.
PHI 4:13 ಮನ ತಾಖತ್ ದ್ಯವಾಳೊ ಕ್ರಿಸ್ತಥಿ ಮೆ ಅಖ್ಖಾಸ್ನ ಕರಾನ ಶಕತ್‌ವಾಳೊ ಹುಯಿರೋಸ್.
PHI 4:14 ಅಮ್ ರ‍್ಹಯುತೋಬಿ ತುಮೆ ಮಾರಿ ಖ್ಹತಾಪ್ಣಿ ಖ್ಹಂಗ್‌ಮಥಾತೆ ಅಛ಼್ಛುಹುಯು.
PHI 4:15 ಅಜು಼ ಫಿಲಿಪ್ಪಿವಾಳೊ, ಮೇ ಶುರುವಾತ್ನ ತುಮಾರಮ ಸುವಾರ್ತೆನ ಪ್ರಚಾರ್ ಕರೀನ್, ಮೆಕೆದೋನ್ಯನ ಗಯೋತೆ ತದೆ ದ್ಯವಾನು, ಲ್ಯಾವಾನಿ ಬಾರೇಮ ತುಮುನ ಮ್ಹೇಲ್ಯೂತೊ ಬಿಜು಼ ಖಿವು ಸಬೇಬಿ ಮನ ಮದತ್ ಕೊದಿದೂನಿಕರಿ ತುಮುನಾಬಿ ಮಾಲುಮ್ ಛಾ಼.
PHI 4:16 ಮೇ ಥೆಸಲೋನಿಕಮ ಥೋತೆ ತದೇಬಿ ತುಮೆ ಏಕ್‌ ಬೇಹಲ್ಲ ಮಾರಿ ಜ಼ರೂರತ್ನಖ್ಹಾಜೆ ಮದತ್ ದಿಮೋಕ್‌ಲ್ಯಥಾನಿ.
PHI 4:17 ಖ್ಹಾಚಮಾಬಿ ಮೆ ತುಮಾರೇಥಿ ಇನಾಮ್ ಲೇವ್ಣು ಕರಿಕಾಹೆ, ಕತೋಬಿ ಅನೇಥಿ ತುಮೆ ಚೆಹೆಳ್ ಅಜು಼ ಬರ್ಗತ್ ಹುವಾದೇಸ್ ಕರಿ ಮಾರಿ ಆಖ್ಹ್.
PHI 4:18 ಹೋಣುತೆ ಅಖ್ಖೂಸ್ ಮನ ಛಾ಼, ಚೆಹೆಳ್ ಹುಯಿರ‍್ಹೋಸ್. ಎಪಫ್ರೊದೀತ್‌ನ ತುಮೆ ದೀನ್ ಮೋಕ್‌ಲ್ಯಾತೆ ಇನಾಮ್ ಮನ ಪೋಚಾ಼ನಿ ವಖ್ಹ್‌ತೆ ಮೆ ಭರೈನ್ ಚೆಹಳ್‌ವಾಳೊ ಹುಯಿರ‍್ಹೋಸ್. ಯೊ ತುಮಾರು ಕಾಣ್‌ಕೆ ದೇವ್ನ ಢಪ್ಕಾರ‍್ನು ವಾ ಹುಯಿರ‍್ಹುಸ್, ಯೊ ದೇವ್ನ ಲ್ಹಾಯಕ್‌ನು ಬಲಿ ಹುಯಿರ‍್ಹುಸ್.
PHI 4:19 ಮಾರೊ ದೇವ್ ಕ್ರಿಸ್ತ ಯೇಸುಥಿ ಇನಿ ಮೋಟಿ ಮಹಿಮೆನ ಧನ್‌ದೌಲಥ್ಥಿ ತುಮುನ ಛಾ಼ತೆ ಹರೇಕ್ ಜ಼ರೂರತ್‌ನ ಪೂರ ಕರ್ಶೆ.
PHI 4:20 ಅಪ್ಣ ಬಾ ಹುಯಿರ‍್ಹೋತೆ ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಹುವಾದೆ! ಆಮೆನ್.
PHI 4:21 ಕ್ರಿಸ್ತ ಯೇಸುಮ ಛಾ಼ತೆ ಹರೇಕ್ ವಿಶ್ವಾಸಿನಬಿ ಮಾರಿ ಖ್ಹಲಾಮ್ ಬೋಲೊ. ಮಾರ ಜೋ಼ಡ್ಮ ಛಾ಼ತೆ ಭೈಯೇ ಭೇನೆಬಿ ತುಮುನ ಖ್ಹಲಾಮ್ ಕರುಕರಸ್.
PHI 4:22 ಹಜ್ಜಾ಼ ಛಾ಼ತೆ ದೇವ್ನು ವಿಶ್ವಾಸಿ ಖ್ಹಾರು ತುಮುನ ಖ್ಹಲಾಮ್ ಕರುಕರಸ್. ವಿಶೇಷ್‌ಥಿ ಕೈಸರ್‌ನು ಮಹೇಲ್‌ಮ ರ‍್ಹವಾಳುಬಿ ತುಮುನ ಖ್ಹಲಾಮ್ ಬೋಲಿರಾಖ್ಯುಸ್.
PHI 4:23 ಪ್ರಭು ಯೇಸು ಕ್ರಿಸ್ತನು ವಾರ್‌ಖ್ಹೊ ತುಮಾರ ಆತ್ಮನಿ ಜೋ಼ಡೆ ರ‍್ಹವಾದೆ.
COL 1:1 ದೇವ್ನಿ ಖ್ಹೂಜ಼್‌ನಿ ಘೋಣಿ ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೌಲಬಿ ಭೈಹುಯಿರ‍್ಹೊತೆ ತಿಮೊಥೆ
COL 1:2 ಕೊಲೊಸ್ಸೆಮ ಕ್ರಿಸ್ತಮಛಾ಼ತೆ ಪರಿಶುದ್ಧರ್‌ನ ಅಜು಼ ವಿಶ್ವಾಸ್‌ವಾಳ ಹುಯಿರ‍್ಹಾತೆ ಭೈಯೇವ್ನ ಅಪ್ಣೊ ಬಾ ದೇವ್‍ಥಿಬಿ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
COL 1:3 ಹಮೆ ತುಮಾರಖ್ಹಾಜೆ ಪ್ರಾರ್ಥನೆಕರಾನಿ ಖ್ಹಾರಿ ವಖ್ಹತ್‌ಮ ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ಬಾ ದೇವ್ನ ಧನ್ಯವಾದ್‍ ಕರಿಯೇಸ್.
COL 1:4 ಶನಕತೊ ಕ್ರಿಸ್ತ ಯೇಸುಮ ತುಮೆ ರಾಖಿರಾಖ್ಯತೆ ವಿಶ್ವಾಸ್ ಅಜು಼ ದೇವ್ನ ಅದ್ಮಿವ್‌ಪರ್ ಛಾ಼ತೆ ತುಮಾರಿ ಲಾಡ್ನ ಬಾರೇಮ ಹಮೆ ಖ್ಹಮ್‌ಜಿರಾಖ್ಯಾಸ್‌.
COL 1:5 ಪರ್‌ಲೋಕ್‌ಮ ತುಮಾರಖ್ಹಾಜೆ ಭರೋಖ್ಹಾನಿ ಬಾರೇಮ ಸುವಾರ್ತೆ ಖ್ಹಾಚಿ ವಚನ್‍ಥಿ ತುಮೆ ಪಹಿಲೇಸ್ ಖ್ಹಮ್‌ಜಿರಾಖ್ಯಾಸ್‌.
COL 1:6 ತುಮೆ ಖ್ಹಾಚಾಮ ದೇವ್ನಿ ವಾರ್‌ಖ್ಹಾನ ಖ್ಹಮ್‌ಜಿನ್‌ ಮಾಲುಮ್ ಕರಿರಾಖ್ಯಾತೆ ದನ್‌ಥು ತುಮಾರಕನ ಆಯುತೆ ಯೋ ಸುವಾರ್ತೆನ ಜಗತ್‌ಮಖ್ಹಾರು ಫಲ್‍ದಿದೂತೆ ತಿಮ್ಮಸ್ ತುಮಾರಮಾಬಿ ಫಲ್‍ದೀನ್‍ ಭಢುಕರಸ್.
COL 1:7 ಅನ ತುಮೆ ಹಮಾರ ಜೋ಼ಡ್ಮ ಪ್ಯಾರ್‌ನೊ ಸೇವಕ್ ಹುಯಿರ‍್ಹೋತೆ ಎಪಫ್ರಥಿ ಶಿಕಿಲಿದ. ಯೋ ತುಮಾರ ಖ್ಹಾಜೆ ಕ್ರಿಸ್ತನೊ ವಿಶ್ವಾಸ್‌ವಾಳೊ ಸೇವಕ್ ಹುಯಿರ‍್ಹೋಸ್.
COL 1:8 ಪವಿತ್ರಾತ್ಮಮ ಛಾ಼ತೆ ತುಮಾರಿ ಪ್ಯಾರ್ ಮನ ಖ್ಹಮ್‌ಜಾ಼ಡ್ಯೊತೆ ಇನೇಸ್‌.
COL 1:9 ಇನಖ್ಹಾಜೆ ಹಮೇಬಿ ತುಮಾರಿ ಬಾರೇಮ ಖ್ಹಮ್‍ಜ್ಯಾತೆ ದನ್‌ಥು ತುಮಾರಖ್ಹಾಜೆ ಪ್ರಾರ್ಥನೆಕರಾನು ಭೀರಾಖ್ಯಕೊಂತೆ ತುಮೆ ಹರೇಕ್ ಆತ್ಮೀಕ ಖ್ಹಯಾಲ್‌ಥೀಬಿ ಅಕ್ಕಲ್‍ಥಿ ಭರೈಜಾ಼ವ್ಣು ಕರಿ ದೇವ್ನ ಗಿಂಗೈಲೆವ್‌ ಕರಿಯೇಸ್.
COL 1:10 ಪ್ರಭುನ ಪಸಂದ್ ಹುವಾನಿ ಪರಕ್ಮ ಖ್ಹಾರಿಸ್ ತರಾಮ ತುಮೆ ಲ್ಹಾಯೇಕ್ ಹುಯಿನ್ ಜಿವ್ಣುಕರ‍್ನು ಕರೀಬಿ ಹರೇಕ್‍ಥರಾನು ಅಛ಼್ಛುಕಾಮ್ನ ಕರ್ತುಹುಯಿನ್ ದೇವ್ನಿ ಅಕ್ಕಲ್‌ಮ ಭಡ್ತುಜಾ಼ವ್ಣು ಕರಿ,
COL 1:11 ಇನಿ ಮಹಿಮೆನಿ ಶಕತ್ನಿ ಪರಕ್ಮ ಖ್ಹಾರೀಸ್‍ ತಾಖತ್ನಿ ಶಕತ್‍ ಲೀನ್, ಖ್ಹಾರೀಸ್‍ ತರಾಮ ಖ್ಹಮಾಳಥೀಬಿ ಅಜು಼ ಘಣಿ ಖ್ಹುಶಿಥಿಬಿ ರ‍್ಹಾವವಾಳ ಕರೀಬಿ,
COL 1:12 ದೇವ್ನ ವಿಶ್ವಾಸಿಯೇವ್ನ ಉಜಾ಼ಳಮ ಛಾ಼ತೆ ಖ್ಹಾರಸ್‍ಮ ಭಾಗ್‍ಲ್ಯಾವಾನ ಖ್ಹಾಜೆ ಅಪ್ಣುನ ಲ್ಹಾಯೇಕ್ ಕರಿರಾಖ್ಯೋತೆ ಬಾ ದೇವ್ನ ಶಂತೋಖ್ಹ್‌ ಥಿ ಧನ್ಯವಾದ್ ಕರಿಯೇಸ್.
COL 1:13 ದೇವ್ನೆ ಅಪ್ಣುನ ಅಂಧಕಾರ‍್ನಿ ಅದಿಕಾರ್‌ಮಾಥು ಛೋ಼ಡೈನ್ ಇನ ಪ್ಯಾರ್‌ನ ಛಿಯ್ಯಾನಿ ರಾಜ್ಯಮ ಮಳೈಲಿದೊ.
COL 1:14 ಆ ಛಿಯ್ಯಾಥಿ ಅಪ್ಣ ಪಾಪ್ನ ಮಾಪಿ ಮಳ್ಯು. ಛುಟ್ಕಾರ್‌ಹುಯು.
COL 1:15 ಕ್ರಿಸ್ತ ದೇಖಾವಕೊಂತೆ ದೇವ್‌ನೊ ರೂಪ್, ಖ್ಹಾರೀಸ್‍ ಉಬ್‍ಜಾ಼ವ್ಣಿಮ ಫೈಲೋಟೋ ಛಿಯ್ಯೋಬಿ ಹುಯಿರ‍್ಹೋಸ್.
COL 1:16 ಶನಕತೊ ಜ಼ಮೀನ್ಮ ಛಾ಼ತೆ ಪರ್‌ಲೋಕ್ಮ ಛಾ಼ತೆ, ದೆಖಾವತೆ ಬಿಣ್‍ದೆಖಾವಾತೆ ಖ್ಹಾರೂಸ್, ಸಿಂಹಾಸನ್ ರ‍್ಹವೊ, ದೇಖ್ಹ್‌ಮ ರ‍್ಹವಾನಿ ಕಾನೂಲ್‌ ರ‍್ಹವೊ, ಅದಿಕಾರಿಖ್ಹಾರು ರ‍್ಹವೊ, ಇನೇಥಿ ಉಬ್‍ಜು. ಖ್ಹಾರೂಸ್‍ಬಿ ಇನೇಥಿಸ್, ಇನಖ್ಹಾಜೇಸ್ ಉಬ್‍ಜೈ಼ಗಯು.
COL 1:17 ಯೋ ಖ್ಹಾರೇಥಿಸ್ ಪಹಿಲೆ ಥೋತೆ, ಇನಾಮ ತಮಾಮಸ್ ಛಾ಼.
COL 1:18 ಸಬೆಕರಿ ಶರೀರ್‌ನ ಯೋ ಮುಡ್‌ಕ್ಯು ಹುಯಿರ‍್ಹೋಸ್. ಯೋಸ್ ಪಹಿಲೊ ಹುಯಿರ‍್ಹಿನ್ ಖ್ಹಾರಮಸ್ ಪಹಿಲೆ ರ‍್ಹವಾಳೊ ಹುಯಿನ್ ಯೋ ಮರ‍್ಯಾಹುಯಾಮಾಥು ಆಯೋತೆ ಫೈಲೋಟೊಬಿ ಹುಯಿರ‍್ಹೊಸ್.
COL 1:19 ಶನಕತೊ ಇನಾಮಸ್ ಅಖ್ಖು ರ‍್ಹೇವ್ಣುಕರಿ,
COL 1:20 ಅಜು಼ ಯೋ ಶಿಲ್‌ಬೇಪರ್ ರಂಚ್ಯೊತೆ ಲ್ಹೊಯಿಥಿ ಯೋ ಸಮಾಧಾನ್ನಬಣೈನ್‍ ಧರ್ತಿಬಿ ಪರಲೋಕ್‌ಮ ಅಖ್ಖಾಸ್ನ ಛಿಯ್ಯಾಥಿಸ್ ಇನಿ ಜೋ಼ಡ್ಮ ರಾಜಿಕರಾನು ಬಾ ದೇವ್ನಿ ಖ್ಹೂಜ಼್‌ ಹುಯಿರ‍್ಹೀಥಿ.
COL 1:21 ಆನಾಹುಯಿನ್ ಏಕ್‌ಹಗಾಮ್ಮ ಯೆಹೂದ್ಯರ್ ಕಾಹೇತೇಬಿ ತುಮೆ ಖರಾಬ್ ಸೋಚ್‌ವಾಳಾಬಿ ವಹೇರ್‌ನೊ ದಿಲ್‌ವಾಳಹುಯಿನ್ ದೇವ್‍ಥಿ ವಿರೋದಿಹುಯಿನ್ ದೂರ್ ಹುಯಿರ‍್ಹಾಸ್.
COL 1:22 ಕತೋಬಿ ಇನ ಶರೀರ್‌ನು ಮರಣ್‍ಥಿ ಹಮ್ಕೆ ಯೋ ತುಮುನ ರಾಜಿ ಕರಿರಾಖ್ಯೋಸ್. ದೇವ್ ಇನಖ್ಹಾಮ್ಣೆ ತುಮುನ ಪರಿಶುದ್ಧಬಿ, ದೋಷ್‌ಕೊಂತೇಬಿ, ಅಪರಾದ್‌ಕೊಂತೆ, ಭೀರಾಕ್ಣುಕರಿ ಅಮ್ ಕರಿರಾಖ್ಯೊಸ್.
COL 1:23 ಆಕಾಶ್‍ನ ಹೇಟ್‍ಛಾ಼ತೆ ತಮಾಮ್‌ ಉಬ್‍ಜಾ಼ವ್ಣಿನ ಅಜು಼ ತುಮೆ ಬೋಲಿರಾಖ್ಯಥಾತೆ ಸುವಾರ್ತೆನಿ ಆಖ್ಹ್‌ಥಿ ಧಕೇಲೈ ನಾಜಾ಼ವ್ಣುತೆ ಘಟ್‍ಥಿ ವಿಶ್ವಾಸ್ಮ ಭೀರ‍್ಯಾವಾಳ ಹುಯಿರ‍್ಹಾತೊ, ತುಮೆ ಹದಿಪಾಯ ಅಜು಼ ಘಟ್‍ಥಿ ಭೀರಿಶು. ಆಸ್ ಸುವಾರ್ತೆನ ಪೌಲಕರಿ ಮೆ ಸೇವಕ್ ಹುಯಿರ‍್ಹೋಸ್.
COL 1:24 ಹಮ್ಕೆ ಮೇ ತುಮಾರಖ್ಹಾಜೆ ಪಡುಕರೂತೆ ಖ್ಹತಾಪ್ಣಿಮ ಮನ ಖುಷಿ ಛಾ಼. ಕ್ರಿಸ್ತನು ವದೇಖ್ಹ್‌ಮ ಜ಼ರೂರತ್ ಛಾತೆ ಇನ ಸಬೆಕರಿ ಬೋಲಾನ ಶರೀರ್‌ನಖ್ಹಾಜೆ ಮೆ ಮಾರ ಶರೀರ್‌ಮ ಖ್ಹರ್ತಿಕರೂಸ್.
COL 1:25 ದೇವ್ನಿ ಖ್ಹೂಜ಼್‌ನಿತರ ತುಮಾರ ಫಾಯಿದಾನಖ್ಹಾಜೆ ಮನ ದೆವಾಯುತೆ ದೇವ್ನ ಕಾಮ್ನು ಜಿಮ್ಮೆದಾರಿ ಕಿಮ್ಕಿತಿಮ್ ದೇವ್ನು ವಚನ್ನ ತುಮುನ ಬೋಲಾನ ಮೇ ಸಬೇನ ಸೇವಕ್ ಹುಯೊ.
COL 1:26 ಯೋ ಪಾಛ಼್‌ಲ್ಯಾ ಹಗಾಮ್‌ಥೀಬಿ, ಜ಼ಗ್‍ಜ಼ಮಾನೇಥೀಬಿ, ಓಠೆಹುಯಿನ್ ಮ್ಹೇಲೈರ‍್ಹೂತೆ ಗಪ್ಲತ್‌ನಿ ವಾತೆಖ್ಹಾರು ಕತೋಬಿ ಹಮ್ಕೆ ದೇವ್ನ ಅದ್ಮಿವ್‌ನ ಬೋಲೈರ‍್ಹೂಸ್.
COL 1:27 ಯೆಹೂದ್ಯರ್‌ಕಾಹೆತೆ ಅದ್ಮೆವ್‍ಮ ಆ ಮಾಯ್ನನು ಮಹಿಮೆನಿ ಶಕತ್ ಕೆತ್ರೆಕರಿ ದೇವ್ನೆ ಇನ ಅದ್ಮಿವ್‌ನ ಭಡ್ಕಾವನ ಖ್ಹೂಜ಼್ ಕರ‍್ಯೊ. ಆ ಮಾಯ್ನೊ ಶಾತ್‍ಕತೊ ಮಹಿಮೆನು ಭರೋಖ್ಹಾನ ಆಧಾರ್ ಹುಯಿರೊಸ್ತೆ ಕ್ರಿಸ್ತಸ್ ತುಮಾರಮ ಛಾ಼.
COL 1:28 ಕ್ರಿಸ್ತ ಯೇಸುಮ ಹರೇಕ್‌ಜ಼ಣಾನಬಿ ಝೇತಾವ್‌ತಹುಯಿನ್ ಖ್ಹಾರೀಸ್‍ ಅಕ್ಕಲ್‌ಮ ಹರೇಕ್‌ಜ಼ಣಾನಬಿ ಬೋಧನೆ ಕರ್ತೊಹುಯಿನ್ ಪೂರ ಗ್ಯಾನ್ ದೀನ್ ದೇವ್ನ ಖ್ಹಾಮ್ಣೆ ಚಾ಼ತುರ್ ಕರೀನ್ ಭೀರಾಖನಖ್ಹಾಜೆ ಕೋಶಿಶ್ ಕರುಕರೆಸ್.
COL 1:29 ಮಾರಾಮ ಕಾಮ್‍ ಕರಾನಿ ದೇವ್ನಿ ಶಕಥ್ಥಿ ಅನಖ್ಹಾಜೆಸ್ ಮ್ಹಿನತ್ ಕರೀನ್ ಲಡೂಸ್.
COL 2:1 ತುಮಾರ ಖ್ಹಾಜೇಬಿ, ಲವೊದಿಕೀಯವಾಳನ ಖ್ಹಾಜೇಬಿ ಶೊಂತ್‍ಥೀಬಿ ಮಳಾಕೊಂತೆ ಇವ್ಣಖ್ಹಾಜೆಥೀಬಿ ಮೇ ಕೆತ್ರೆ ಲಡುಕರೂಸ್ ಕರಿ ಬೋಲಾನು ತುಮೆ ಮಾಲುಮ್ ಕರಿರಾಕ್ಣು ಕರಿ ಮೇ ಆಖ್ಹ್‌ಕರುಸ್.
COL 2:2 ಕಿಮ್‌ಕತೊ ಇವ್ಣ ದಿಲ್ನ ಪ್ಯಾರ್‌ಥಿ ಲೀರಾಖಿನ್ ಹುಮ್ಮಖ್ಹ್‌ಹುಯಿನ್ ಮಳ್‌ಣುಕರಿ ಛಾ಼ತೆ ಪೂರ ಅಕ್ಕಲ್‍ಥಿ ಬಾ ದೇವ್ನ ಮಾಯ್ನನ ಕತೊ ಕ್ರಿಸ್ತನ ಮಾಲುಮ್‌ ಕರಿಲ್ಯವಾಥಿಸ್ ಹುಯಿರ‍್ಹುಸ್.
COL 2:3 ಕ್ರಿಸ್ತಸ್ ಕೀಲಿ ಹುಯಿರ‍್ಹೊಸ್ ಗ್ಯಾನ್, ಅಕ್ಕಲ್ ಅಜು಼ ಖ್ಹಾರು ಧನ್‌ದೌಲತ್‌ ಇನಾಮಸ್ ಲಪ್ಯುಸ್.
COL 2:4 ಕೋಣ್‌ಬಿ ತುಮುನ ಇವ್ಣ ಪೊಖ್ಹ್‌ಲಾವನಿ ವಾತೆಥೀಬಿ ಝೂ಼ಟಿ ವಾತೆಥಿ ಠಗಾವ್ಣುನಾ ಕರಿ ಆ ವಾತೆಖ್ಹಾರಿ ತುಮುನ ಬೋಲಿರಾಖ್ಯೊಸ್.
COL 2:5 ಮೇ ಶರೀರ್‌ಮ ತುಮಾರಕನ ನಾರ‍್ಹಯೊತೋಬಿ ಮಾರೊ ಆತ್ಮಥಿ ತುಮಾರಿ ಜೋ಼ಡ್ಮ ರ‍್ಹೀನ್. ತುಮೆ ಬರೋಬರ್‌ಥಿ ಚಾ಼ಲಿಲ್ಯಾವನುಬಿ ಅಜು಼ ಕ್ರಿಸ್ತಮ ತುಮಾರಿ ವಿಶ್ವಾಸ್ ಘಟ್‍ಛಾ಼ ಕರಿ ದೇಖಿನ್ ಮನ ಖುಷಿಹುವಸ್.
COL 2:6 ಇನಾಖ್ಹಾಜೆ ತುಮೆ ಕ್ರಿಸ್ತಯೇಸುನ ಪ್ರಭುಕರಿ ಸ್ವೀಕಾರ್ ಕರಿಲಿದಾತೆ ತಿಮ್ಮಸ್ ಇನಾಮ ರ‍್ಹೀನ್ ಜಿವ್ಣು ಕರೊ.
COL 2:7 ಇನಾಮಸ್ ಘಣು ಜ಼ಡ್‌ಗಾಠಿನ್, ಇನಾಮ ಭಂದೈಜೈ಼ನ್ ಅಜು಼ ತುಮುನ ಬೊಲಾಯುತೆ ಭೋದನ್ನಿ ಪರಕ್ಮಸ್ ಕ್ರಿಸ್ತನಿ ವಿಶ್ವಾಸ್ಮ ಘಟ್‌ಭೀರಿನ್ ಘಣೇಥಿ ಧನ್ಯವಾದ್ ಕರಾವಾಳ ಹುಯಿ‍ರ‍್ಹೆವೊ.
COL 2:8 ಗಲ್ತಿನು ಅಜು಼ ಫಾಯಿದೊಕೊಂತೆ ಬೋಧನೆತು ಕೋಣ್‌ಬಿ ತುಮೂನ ಕಬ್‌ಜಾ಼ಮ ನಾಕರಿಲೇವ್ಣುತೆ ಹೊಷಾರ್‌ಥಿ ರ‍್ಹವೊ. ಆ ಅಖ್ಖು ಅದ್ಮಿವೋನ ಪದತ್ತಿನ ಅಜು಼ ಲೋಕ್‌ನಹೋಣುತೆ ಬೋಧನೆಮಾಸ್ ಛಾ಼ ಪಣ್ಕಿ ಕ್ರಿಸ್ತಾನಕಾಹೆ.
COL 2:9 ಶನಕತೊ ದೇವ್ನು ಹರೇಕ್ ಭರ್‌ಪೂರ್‌ನು ಜಿವ್ಣು ಕ್ರಿಸ್ತನ ಶರೀರ್‌ಮ ಜಿವಿರ‍್ಹೂಸ್,
COL 2:10 ಯೋಸ್ ಅಖ್ಖಾಸ್ ರಾಜ಼್‌ನಾಬಿ, ಅದಿಕಾರ್‌ನಾಬಿ ಮುಡ್‌ಕ್ಯು ಹುಯಿರ‍್ಹೋಸ್ತೆ ಖ್ಹಾಜೆ. ತುಮೆ ಇನಾಮ ರ‍್ಹೀನಸ್ ಅಖ್ಖಾಸ್ನ ಲೀಲ್ಯಾವವಾಳ ಹುಯಿರ‍್ಹಾಸ್.
COL 2:11 ದೇವ್ನೆ ಇನಾಮ ತುಮುನ ಅದ್ಮಿನ ಹಾತೇಥಿ ಕರಾನ ಕೊಹುವಾನಿತೆ ಖ್ಹತ್ನಾನ ಕರಿರಾಖ್ಯೊಸ್. ಕ್ರಿಸ್ತನು ಖ್ಹತ್ನ ಶರೀರ್‌ನು ಪಾಪ್ನ ಸ್ವಭಾವ್‌ನ ಕಾಡಿನಾಖಸ್‌.
COL 2:12 ತುಮೆ ಬ್ಯಾಪ್ತಿಸ್ಮಥಿ ಕ್ರಿಸ್ತನಿ ಜೋ಼ಡ್ಮ ಗಡೈಗಯ, ಅಜು಼ ಇನ ಮರ‍್ಯಾಹುಯಾಮಾಥು ಉಠಾಡ್ಯೋತೆ ದೇವ್ನಿ ಶಕತ್ಮ ವಿಶ್ವಾಸ್ ಕರ‍್ಯಾತೆ ಇನಖ್ಹಾಜೆ ತುಮೆ ಇನಿ ಜೋ಼ಡ್ಮ ಉಠೀನ್ ಆಯ.
COL 2:13 ತುಮೆ ತುಮಾರ ಪಾಪ್‌ಥಿಬಿ ಅಜು಼ ಶರೀರ್‌ನ ಆಖ್ಹ್‌ಥಿ ಛುಟ್ಕಾರ್ ಕೊಹುಯಾನಿತೆ ಇನಖ್ಹಾಜೆ ಆತ್ಮೀಕ್ ಪರಕ್ಮ ಮರಿರ‍್ಹಾವಳ ಹುಯಿರ‍್ಹಾಸ್ ಕತೋಬಿ ದೇವ್ ಕ್ರಿಸ್ತಥಿ ತುಮುನ ಜೂತುಕರ‍್ಯೊ.ಅಜು಼ ಅಪ್ಣಿ ಖ್ಹಾರೀಸ್‍ ಪಾಪ್ನ ಮಾಪ್ ಕರ‍್ಯೊ.
COL 2:14 ಅಪ್ಣಪರ್ ಗಲತ್‌ನಾಖ್ಯೂತೆ ಹುಕುಮ್‌ನಿ ರೂಪ್ಮಥೂತೆ ಲೀಖಾಪಟ್ನ ದೇವ್ನೆ ನೂಛಿನಾಖಿನ್ ಇನ ಶಿಲ್‌ಬೆಪರ್ ಠೋಕೈನ್ ಕೊಂತೆ ತಿಮ್ ಕರ‍್ಯೊ.
COL 2:15 ದೇವ್ ಇನ ವಿರೋದ್ ಹುಯಿರ‍್ಹುಥೂತೆ ರಾಜ್‍಼ನಾಬಿ, ಅದಿಕಾರ್‌ನಾಬಿ, ಯೋ ಅಖ್ಖಾನ ಬಿಣ್‍ ಖಪ್ಫನ್‌ವಾಳ ಬಣೈನ್ ಶಿಲ್‌ಬೇನು ಜೀತ್ಮ ಯೋ ಅಖ್ಖಾನ ಹಿಡಿ ಜಗತ್ನ ಖ್ಹಾಮ್ಣೆ ವತಾಳ್ಯೊ.
COL 2:16 ಅಮ್‍ರ‍್ಹವಾಪರ್ ಖಾಣಪಾಣಿನಿ ಬಾರೇಮಾಬಿ ಪೂಜ಼, ಅಮಾಖ್ಹ್, ಸಬ್ಬತ್ ಕರಿ ಅನಿಬಾರೇಮ ಕೋಣ್‌ಬಿ ತುಮುನ ಗಲ್ತಿವಾಳಕರಿ ತೀರ್ಪ್‌ ನಾಕರ‍್ನು.
COL 2:17 ಆ ಅಖ್ಖು ಅಗಾಡಿ ಅವ್ಣುಥೂತೆ ಕಾಮ್ನಿ ಛಾ಼ಯ ಹುಯಿರುಸ್, ಕತೋಬಿ ಯೋ ಅಖ್ಖಾನು ಖ್ಹಾಚು಼ರೂಪ್ ಕ್ರಿಸ್ತಸ್.
COL 2:18 ಥೋಡುಜ಼ಣು ದೇವ್ನದೂತರ‍್ನ ಆರಾಧನೆಮಾಬಿ ದಿಲ್‍ಲಗಾಡಿರ‍್ಹವಾಳ ಹುಯಿನ್, ಹಮುನ ದರ್ಶನಹುಯುಕರಿ ಬಡೈಮಾರಿಲೀನ್, ಜಗತ್‌ನು ಅಕ್ಕಲ್‌ಥಿ ಕಾಯಿಸ್‌ಕೊಂತೆ ಫುಲಿರ‍್ಹವಾಳನ ತುಮಾರು ಮಳಿರ‍್ಹೂತೆ ಇನಾಮ್ನ ಛಿನೈಲಾವನಿತರ ನಕೊ ಕರ್ಶು.
COL 2:19 ಶನಕತೊ ಅಥ್ರಾನವಾಳು ಕ್ರಿಸ್ತಕರಿ ಬೋಲಾನು ಮುಡ್‌ಕ್ಯಾನ ಜೋ಼ಡ್ಮ ಸಂಬಂದ್ ಕಾಡಿಲ್ಯಾವಾಳು ಹುಯಿರ‍್ಹೇಸ್. ಯೋ ಮುಡ್‍ಕೇಥಿಸ್ ಶರೀರ್ ಖ್ಹಾರೂಸ್ ಕೀಲ್, ನ್ಹಾರ್‌ನ ಹೋಣುತೆ ಶಕತ್ನದೀನ್ ಅಜು಼ ಎಕ್ಟುಹುಯಿನ್ ಶರೀರ್ ಬಣ್ಯು. ಯೋ ದೇವ್ ದೇಸ್ತೆ ಬರ್ಗಥ್ಥಿ ಭಡ್ತುಹುಯಿನ್ ಆವಸ್.
COL 2:20 ಏಕ್‌ಬಾರ್ ತುಮೆ ಕ್ರಿಸ್ತನಿ ಜೋ಼ಡ್ಮ ಜಗತ್ನ ಆತ್ಮಮ ಮರ‍್ಹೀರ ಉಶೇತೊ, ಅಜೂ಼ಬಿ ಜಗತ್‍ವಾಳನಿತರಸ್ ಬಚಿನ್ ತುಮೆ ಶನ ಜಿವ್ಣುಕರುಕರಸ್? ಅಮ್ನಿ ಹುಕುಮ್‌ನಲೀನ್ ಶನ ಚಾ಼ಲವಾಳ ಹುಯಿರ‍್ಹಾಸ್?
COL 2:21 “ಆ ನಕೊ ಛೀಮ್! ಯೋ ನಕೊ ಲಜ಼ತ್‍ದೇಕ್! ಇನ ನಕೊಧರ್! ಕರಿ ಬೋಲಾನು ಶನ? ಅಮ್ನಿ ನಿಯಮ್ನ ಚ಼ಲವಾನು ಶನ?
COL 2:22 ಜಗತ್ನ ಬಾರೇನು ಆ ನಿಯಮ್‌ಖ್ಹಾರು, ಶಿಕಾನುಖ್ಹಾರು ಉಪಯೋಗ್ ಕರೀನ್ ಭಿರ್ಕಾಯೇತೆ ರಾಛ಼ನಿ ಪರಕ್ಮ ಛಾ಼. ಯೋ ಖ್ಹಾರು ಅದ್ಮೆವ್‌ನು ಹುಕುಮ್ ಅಜು಼ ಬೋಧನ್ನಸ್ ಪಣ್ಕಿ ದೇವ್ನು ಕಾಹೆ.
COL 2:23 ಅಮ್ನು ಶಿಕಾನುಖ್ಹಾರು ಅದ್ಮಿನು ಸೋಚ್‌ನಿತರ ದೆಖೈಲಾವಥಿಬಿ, ಶಾಂಧಾರ್‌ನಿತರಬಿ ಅಜು಼ ಇವ್ಣ ಶರೀರ್‌ನ ನಿಶತ್ ಕರಿಲ್ಯಾವನು ಅಕ್ಕಲ್‌ನುಕರಿ ದೆಖಾವಸ್. ಕತೋಬಿ ಯೋ ಶರೀರ್‌ನು ಆಖ್ಹ್‌ನ ಖ್ಹಮಾಳಿಲ್ಯಾವಥಿ ಶನೂಬಿ ಫಾಯಿದೊ ಕೊಹುವಾನಿ.
COL 3:1 ತುಮೆ ಕ್ರಿಸ್ತನಿ ಜೋ಼ಡ್ಮ ಜಿವ್ತುಹುಯಿನ್ ಉಠೀನ್ ಆವಾನು ರ‍್ಹಯೂತೊ ಸೊರ್ಗಮ ರ‍್ಹೇಯ್ತೆ ಇನಾಸ್ ಢೂಂಡೊ, ಹಿಜ್ಜಾ಼ ಕ್ರಿಸ್ತ ದೇವ್ನು ಖಾವಿಬಾಜು಼ಮ ಬೆಠೋಸ್.
COL 3:2 ಪರಲೋಕ್ನು ಛಾ಼ತೆ ಇನಿ ಬಾರೇಮ ಸೋಚೊ, ಜಗತ್‌ಮ ಛಾ಼ತೆ ಇನಿ ಬಾರೇಮ ಕಾಹೆ.
COL 3:3 ಶನಕತೊ ತುಮೆ ಮರಿರ‍್ಹಾಸ್ನಿ ತುಮಾರೊ ಜಾನ್‌ ಕ್ರಿಸ್ತನಿ ಜೋ಼ಡ್ಮ ದೇವ್‌ಮ ಓಠೆ ಹುಯಿರ‍್ಹುಸ್.‌
COL 3:4 ತುಮುನ ಜಾನ್‌ ಹುಯಿರ‍್ಹೋತೆ ಕ್ರಿಸ್ತ ದೆಖಾವನಿ ವಖ್ಹ್‌ತೆ ತುಮೇಬಿ ಇನಿ ಜೋ಼ಡ್ಮ ಮಹಿಮೆಮ ದೆಖಾವ್‌ಶು.
COL 3:5 ಇನಖ್ಹಾಜೆ ತುಮಾರಮ ಛಾ಼ತೆ ಜಗತ್ನಿ ಆಖ್ಹ್‌ಅಖ್ಖು ಕತೊ; ವ್ಯಬಿಚಾರ್‌, ಮೈಲುಹುವಾನು, ಭೋಗ್ನಿ ಆಖ್ಹ್, ಅಜು಼ ಖರಾಬ್ ಆಖ್ಹ್, ಮೂರತ್ನ ಆರಾಧನೆನಿ ಘೋಣಿ ಹುಯಿರ‍್ಹುತೆ ನಿಕ್‌ಳ್ಯೊ ಜಾನ್‌, ಅಥ್ರಾನು ಅಖ್ಖು ಮಾರಿ ನಾಖೊ.
COL 3:6 ಆ ಅಖ್ಖಾನ ಕಾಮ್ನ ಅವಿಧೇಯ ರ‍್ಹೇಸ್ತೆ ಇವ್ಣಪರ್ ದೇವ್‌ನೊ ಇರಾದೊ ಛ಼ಡಾಸ್.
COL 3:7 ಏಕ್‌ ಹಗಾಮ್ಮ ತುಮೇಬಿ ಎಥ್ರಾನ ಖ್ಹಾರಾಮ ಜಿವ್ತರ‍್ಹೀನ್ ಯೋ ಅಖ್ಖಾನ ಚ಼ಲಾವ್‌ತಾಥ.
COL 3:8 ಹಮ್ಕೆತೋಬಿ ಇರಾದೊ, ದಾವೊ, ಬಳಾಪೊ, ಚಾ಼ವ್‌ಣ್ಯ, ತುಮಾರ ಮ್ಹೋಡೆಥಿ ನಿಕ್ಳಾತೆ ಖರಾಬ್‌ವಾತೆ ಯೋಅಖ್ಖಾನ ಮ್ಹೇಲಿದೆವೊ.
COL 3:9 ಏಕ್‌ಥಿಏಕ್ ಝೂ಼ಟಿ ಬೋಲ್ತ ನಕೊರ‍್ಹೆವೊ, ಶನಕತೊ ತುಮೆ ಜೂ಼ನಿ ಆದತ್‌ನ ಇನ ಕಾಮ್ನಿ ಜೋ಼ಡ್ಮ ಕಾಡಿನಾಖಿದಿದ.
COL 3:10 ಅಜು಼ ನವಿ ಚಾ಼ವ್‌ಭಾವ್ನ ಉಬ್‌ಜಾ಼ಯೋತೆ ಇನಿ ರೂಪ್‌ಮ ಗ್ಯಾನ್ನಿತರಸ್ ಯೊ ನವು ಹೋತು ಆವಸ್.
COL 3:11 ಆ ನವ ಜಿವ್ಣಮ ಯೆಹೂದ್ಯಕಾಹೇತೆ ಅಜು಼ ಯೆಹೂದ್ಯವಾಳೊ ಕರಿ ಫರಕ್ ಕೊಯ್ನಿ, ಖ್ಹತ್ನ ಕರೈರಾಖವಾಳು, ಕರೈರಾಖಕೊಂತೆ ಕರಿ ಫರಕ್‌ಕೊಯ್ನಿ, ಮಾಲುಮ್‌ರ‍್ಹವಾಳು ನಾಮಾಲುಮ್‌ ರ‍್ಹವಾಳುಕರಿ ಫರಕ್ ಕೊಯ್ನಿ. ಆಳ್‌, ಯಜಮಾನ್‍ಕರಿ ಫರಕ್ ಕೊಯ್ನಿ. ಕತೋಬಿ ಕ್ರಿಸ್ತಸ್ ತಮಾಮ್‍ಬಿ ಹರೇಕ್‌ಮ ರ‍್ಹವಾಳೊ ಹುಯಿರ‍್ಹೋಸ್.
COL 3:12 ಇನಖ್ಹಾಜೆ ದೇವ್‍ಥಿ ಚೂ಼ಣೈಗಯು ಹುಯುಬಿ, ಪರಿಶುದ್ಧರ್‌ಬಿ ಪ್ಯಾರ್‌ನ ಹುಯಿರ‍್ಹಾತೆ ತುಮೆ ಗೋರ್‌, ದಯಾ, ಹೇಟು ಹುವಾನು, ಶೇದೇವ್‌ಥಿ, ಖ್ಹಮಾಳಾನು ಕರಿ ಆಖ್ಹಾರು ಅಛ್ಛಿಗುಣ್‍ನ ಭರ‍್ಹಿಲೆವೊ.
COL 3:13 ಏಕ್‌ಥಿ ಏಕ್ ಖ್ಹಮಾಳಿರ‍್ಹವೊ. ಕಿನಾಖ್ಹಾಜೆಬಿ ಫಿರಾದ್‌ ಮಾಂಡಾನು ಉಶೇತೋಬಿ, ಪ್ರಭು ತುಮುನ ಮಾಪ್ ಕರ‍್ಯೊತೆ ತಿಮ್ಮಸ್ ತುಮೇಬಿ ಮಾಪ್ ಕರೊ.
COL 3:14 ಅಜು಼ ಭರ್‌ಪೂರ್‌ಮ ಅಖ್ಖುಜ಼ಣು ಒಗ್ಗಟ್‍ಥಿ ಭಂದೈರ‍್ಹೀನ್ ಪ್ಯಾರ್‌ಮ ಭರೈರ‍್ಹೆವೊ.
COL 3:15 ಕ್ರಿಸ್ತನಿ ಸಮಾಧಾನ್ ತುಮಾರ ದಿಲ್ಮ ಚ಼ಲಾವನ ಮ್ಹೇಲೊ. ಇನಖ್ಹಾಜೇಸ್ ತುಮೇಬಿ ಎಕ್ಕಸ್ ಶರೀರ್ ಹುಯಿರ‍್ಹಾವನಿತರ ಬುಲೈರ‍್ಹಿಶು ಆ ನಾಹುಯಿನ್ ಧನ್ಯವಾದ್ ಕರಾವಾಳ ಹುಯಿ‍ರ‍್ಹೆವೊ.
COL 3:16 ಕ್ರಿಸ್ತನು ವಚನ್ ತುಮಾರಮ ಭಡ್ತುಹುಯಿನ್ ಜಿವಾದೆ. ಹರೇಕ್ ಅಕ್ಕಲ್‌ಮ ಏಕ್‌ಥಿ ಏಕ್‌ ಶಿಕ್ತಹುಯಿನ್ ಉಪದೇಶ್ ಕರತಾಹುಯಿನ್, ಅಕ್ಕಲ್ ಬೋಲ್ತಹುಯಿನ್ ಕೀರ್ತನೆಥೀಬಿ, ಸ್ತುತಿನು ಗೀದ್‍ಥೀಬಿ ಆತ್ಮೀಕ್ ಗೀದ್‍ಥೀಬಿ ಅಜು಼ ತುಮಾರ ದಿಲ್ಮ ದೇವ್ನ ಧನ್ಯವಾದ್ನು ಗೀದ್‌ ಬೋಲೊ.
COL 3:17 ತುಮೆ ವಾತೇಥಿರ‍್ಹೆವೊ ಕಾಮ್‍ಥಿರ‍್ಹೆವೊ ಶಾತ್‌ ಕರ‍್ಯುತೋಬಿ ಯೋಖ್ಹಾರು ಪ್ರಭು ಯೇಸುನ ನಾಮ್‍ಥಿ ಕರೊ, ಇನೇಥಿಸ್ ಬಾ ದೇವ್ನ ಧನ್ಯವಾದ್ ಕರೊ.
COL 3:18 ತಯೆಡಾವೊ, ಪ್ರಭುನ ಲ್ಹಾಯೇಕ್‌ನಿ ಪರಕ್ಮ ತುಮಾರ ಬಾವ್ರಿಯೇನಿ ದಾಬುಕ್ಮ ರ‍್ಹವೊ.
COL 3:19 ಬಾವ್ರಿಯೆ, ತುಮಾರಿ ಬಾವ್ಣೆನ ಪ್ಯಾರ್‌ಕರೊ, ಇವ್ಣಿ ಜೋ಼ಡ್ಮ ಕಠಣ್‍ಥಿ ನಕೊ ಚಾ಼ಲಿಲೆವೊ.
COL 3:20 ಲಡ್ಕಾವೊ, ಖ್ಹಾರೀಸ್‍ ಬಾರೇಮ ತುಮಾರ ಆಯಬಾನ ಹೇಟು ಹುಯಿ‍ರ‍್ಹೆವೊ. ಶನಕತೊ ಆ ಪ್ರಭುನ ನಜ಼ರ‍್ಮ ಪಸಂದ್ ಹುಯಿರ‍್ಹುಸ್.
COL 3:21 ಬಾವೊ ತುಮಾರ ಲಡ್ಕಾವ್ನ ಛೇಡೈನ್ ಇವ್ಣುನ ಮ್ಹೋದಿಲ್ ನಕೊಕರೊ.
COL 3:22 ಚಾ಼ಕ್ರಿ ಕರಾವಾಳವೊ ತುಮಾರೊ ಜಗತ್‌ನು ಯಜಮಾನ್ ಯೋ ದೇಖುಕರಾನಿ ವಖ್ಹತ್ ಖಲಿ ವಿಧೇಯ ಹುಯಿನ್ ಚಾ಼ಕ್ರಿ ಕರಾವಾಳ ನಾರ‍್ಹೇವ್ಣುತೆ ಪ್ರಭುನ ಡರ್‌ಭಕ್ತಿನ ದಿಲ್‌ವಾಳ ಹುಯಿನ್ ಕಾಮ್‍ಕರೊ.
COL 3:23 ತುಮೆ ಶಾತ್‍ಕರ‍್ಯಾತೋಬಿ ಯೋ ಅದ್ಮಿನಖ್ಹಾಜೆ ಕರಿ ನಾಕರ‍್ನುತೆ ಪ್ರಭುನಖ್ಹಾಜೆಸ್ ಕರಿ ಪೂರದಿಲ್‍ಥಿ ಕರೊ.
COL 3:24 ಪ್ರಭುಥಿ ಸೇವೆನು ಪ್ರತಿಫಲ್ ಮಳ್‍ಶೇಕರಿ ಖ್ಹಯಾಲ್ಮ ರಾಖಿರಾಖೊ. ಪ್ರಭು ಕ್ರಿಸ್ತ ಅದ್ಮೆವ್‍ನ ಕರ‍್ಯೊತೆ ವಾಗ್ದಾನ್ ತುಮಾರ ಯಾದ್ಮ ರ‍್ಹವಾದೆ.
COL 3:25 ಠಗಾವವಾಳೊ ಬರೋಬರ್‌ನು ನಿಶತ್‍ ಲೀಲಿಶೆ. ಇನಾಮ ಬೇದ್‌ಭಾವ್‌ ಕೊಯ್ನಿ.
COL 4:1 ಯಜಮಾನವೊ, ತುಮಾರ ಚಾ಼ಕ್ರಿ ಕರವಾಳನ ನ್ಯಾವ್‌ಥಿರ‍್ಹವಾನು ಅಜು಼ ಬರೊಬರ್‌ ರ‍್ಹವಾನೂಬಿ ಕರೊ. ಶನಕತೊ ಪರ್‌ಲೋಕ್‌ಮ ತುಮುನಾಬಿ ಯಜಮಾನ್ ಛಾ಼ಕರಿ ಮಾಲುಮ್‌ ಛಾ಼.
COL 4:2 ಹೊಷಾರ್‌ಥಿ ರ‍್ಹೀನ್ ಧನ್ಯವಾದ್‍ಕರಾವಾಳ ಹುಯಿರ‍್ಹಿನ್ ಕದೇಬಿ ಪ್ರಾರ್ಥನೆ ಕರ್ತರ‍್ಹೇವೊ.
COL 4:3 ಯೋಸ್ ವೇಳ್ಮ ಹಮೆ ಕ್ರಿಸ್ತನಿ ಮಾಯ್ನನಿ ವಾತೆ ಬೋಲಾನ ದೇವ್ ಹಮಾರಖ್ಹಾಜೆ ಬಾಕಲ್ ಉಖ್ಡಾನಿತರ ಪ್ರಾರ್ಥನೆಕರೊ. ಅನಖ್ಹಾಜೆಸ್ ಮೇ ಜೇಲ್‌ಮ ಛೂ಼ತೆ.
COL 4:4 ಅಮ್ ಆ ಖ್ಹಾಚ಼ನ ಮೇ ಅದ್ಮೆವ್‍ನ ಬರೋಬರ್‌ಥಿ ಬೋಲಿ ವತಳಾನಿತರ ಹುವಾದೆ.
COL 4:5 ತುಮುನ ಮಳಾನಿ ಮೋಕಾನ ಬರೋಬರ್‌ಥಿ ಉಪಯೋಗ್ ಕರಿಲಿನ್, ವಿಶ್ವಾಸ್ಮ ನಾರ‍್ಹವಾಳನಿ ಜೋ಼ಡ್ಮ ಅಕ್ಲಿನಿತರ ಚಾ಼ಲಿಲೇವೊ.
COL 4:6 ತುಮೆ ವಾತೆಬೋಲಾನಿ ವಖ್ಹತ್‌ಮ ಕದೇಬಿ ವಾರ್‌ಖ್ಹಾನಿ ತರಾಬಿ ಅಜು಼ ರುಚ಼್‌ನಿತರ ರ‍್ಹವಾದೆ. ಅಮ್ನಿಪರಕ್ ತುಮೆ ಹರೇಕ್ ಜ಼ಣನಾಬಿ ಕಿಮ್ ಜ಼ವಾಬ್‍ದೇವ್ಣು ಕರಿಬೋಲಾನು ಮಾಲುಮ್ ಕರಿಲಿಶು.
COL 4:7 ಪ್ಯಾರ್‌ನೊ ಭೈಬಿ ವಿಶ್ವಾಸ್‌ನೊ ಸೇವಕ್‌ಬಿ ಅಜು಼ ಪ್ರಭುನಿ ಸೇವೆಮ ಛಾ಼ತೆ ತುಖಿಕ ಮಾರಿ ಬಾರೇನಿ ವಾತೆಖ್ಹಾರಿ ತುಮುನ ಖ್ಹಮ್‍ಜಾ಼ಡ್‍ಶೆ.
COL 4:8 ತುಮೆ ಹಮಾರಿ ಬಾರೇಮ ಮಾಲುಮ್‌ಕರಿಲೇವ್ಣು ಕರಿ ಅಜು಼ ತುಮಾರ ದಿಲ್ನ ಹುಮ್ಮಖ್ಹ್‌ ಕರಾವನಕರಿ ಇನ ತುಮಾರಕನ ಮೋಕ್ಲಿರಾಖ್ಯೊಸ್.
COL 4:9 ತುಮಾರಮ ವಿಶ್ವಾಸ್‌ವಾಳೊ ಅಜು಼ ಲಾಡ್‌ನೊ ಭೈ ಓನೇಸಿಮನಿ ಜೋ಼ಡ್ಮ ಇನ ಮೇ ಮೋಕ್ಲಿರಾಖ್ಯೊಸ್. ಇವ್ಣೆ ಹಜ಼್ಜ ಚಾ಼ಲುಕರಾತೆ ವಾತೆಖ್ಹಾರಿ ಖ್ಹಮ್‍ಜಾ಼ಡ್‍ಶೆ.
COL 4:10 ಮಾರಿ ಜೋ಼ಡ್ಮ ಜೇಲ್‌ಮಛಾ಼ತೆ ಅರಿಸ್ತಾರ್ಕಬಿ ಅಜು಼, ಬಾರ್ನಬನೊ ಸಂಬಂದ್‌ವಾಳೊ ಮಾರ್ಕ ತುಮುನ ಖ್ಹಲಾಮ್ ಬೋಲಾಸ್, ಮಾರ್ಕನಿ ಬಾರೇಮ ತುಮೆ ಹುಕುಮ್‌ ಲೀರಾಖ್ಯಾಸ್ನಿ ಯೋ ಏಕ್‌ ವೇಳ್ಮ ತುಮಾರಕನ ಆಯೋತೊ ಇನ ಮಳೈಲೆವೊ.
COL 4:11 ಯೂಸ್ತಕರಿ ಬೋಲೈಲಿದೋತೆ ಯೇಸುಬಿ ತುಮುನ ಖ್ಹಲಾಮ್‍ಕರಸ್. ದೇವ್ನ ರಾಜ್ಯನಖ್ಹಾಜೆ ಮಾರಿಜೋ಼ಡೆ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರೊಸ್. ಯೆಹೂದ್ಯರ್‌ಹುಯಿರ‍್ಹುತೆ ಅವ್ಣೆಥೀಸ್ ಕಾಮ್‌ಕರಾಮ ಮನ ಭಾಲಿ ಹುಯು.
COL 4:12 ತುಮಾರಮ ಕ್ರಿಸ್ತ ಯೇಸುನೊ ದಾಸ ಹುಯಿರ‍್ಹೋತೆ ಎಪಫ್ರಬಿ ತುಮುನ ಖ್ಹಲಾಮ್ ಬೋಲಸ್, ತುಮೆ ಪುರ್ಗುಲ್ ಹುಯಿರ‍್ಹೇಣು ಕರೀಬಿ ಖ್ಹಾರಾಸ್ ಕಾಮ್ಮ ದೇವ್ನಿ ಅಖ್ಖಿ ಖ್ಹೂಜ಼್‌ನಿ ಬಾರೇಮ ಪೂರ ಮಾಲುಮ್‌ ಕರಿರಾಖವಾಳ ಹುಯಿರ‍್ಹೇವ್ಣುಕರಿ ಹೈರೋತೆ ತುಮಾರಖ್ಹಾಜೆ ಮನ್‍ಲಗಾಡಿನ್ ಕದೇಬಿ ಪ್ರಾರ್ಥನೆಮ ಹುಮ್ಮಖ್ಹ್‌ ಲೀರಾಖವಾಳೊ ಹುಯಿರ‍್ಹೋಸ್.
COL 4:13 ಹೈರೋತೆ ತುಮಾರಖ್ಹಾಜೇಬಿ ಲವೊದಿಕೀಯ ಅಜು಼ ಹಿರಿಯಪೋಲಿಯನ ಅದ್ಮೆವ್‍ನ ಖ್ಹಾಜೇಬಿ ಯೋಘಣು ವಾಖ್ಯೊ ಪಡುಕರಸ್ಕರಿ ಇನಿ ಬಾರೇಮ ಮೇ ಸಾಕ್ಷಿ ಹುಯಿರ‍್ಹೊಸ್.
COL 4:14 ಪ್ಯಾರ್‌ನೊ ಪೊಂಡಿತ್ ಹುಯಿರ‍್ಹೋತೆ ಲೂಕ ಅಜು಼ ದೇಮ ತುಮುನ ಖ್ಹಲಾಮ್ ಬೋಲಸ್.
COL 4:15 ಲವೊದಿಕೀಯಮ ಛಾ಼ತೆ ಭೈಯೇ ಭೇನೆನಾಬಿ ಅಜು಼ ನುಂಫಕರಿ ಬೋಲೈಲ್ಯವಾಳಿ ಅಜು಼ ಇನಘರ್‌ಮ ಮಳೀನ್‍ ಅವಾತೆ ಸಬೇನಾಬಿ ಬೋಲ್ಯೊ ಕರಿ ಬೊಲ್ದೆ.
COL 4:16 ಆ ಚಿಟ್ಟಿನ ತುಮೆ ಪಢಾನ ಬಾದ್ಮ ಲವೊದಿಕೀಯವಾಳನಿ ಸಬೆಮಾಬಿ ಪಢಾವೊ. ಇಮ್ಮಸ್ ಲವೊದಿಕೀಯಾಥು ಆಯುತೆ ಚಿಟ್ಟಿನ ಮಂಗೈನ್ ತುಮೇಬಿ ಪಢೊ.
COL 4:17 ಅರ್ಖಿಪ್ಪನ, “ತೂ ಪ್ರಭುಥಿ ಲೀಲಿದೋತೆ ಸೇವೆನ ಚ಼ಲಾವನ ಹುಷಾರ್‌ಥಿ ರ‍್ಹೀನ್ ಪೂರಹೊಣು” ಕರಿ ಬೋಲೊ.
COL 4:18 ಪೌಲಕರಿ ಮೇ ಮಾರ ಹಾತೇಥಿಸ್ ಲೀಖ್ಯೋತೆ ಖ್ಹಲಾಮ್ ಹುಯಿರೀಸ್. ಮೇ ಜೇಲ್‌ಮ ಥೋಕರಿ ಬೋಲಾನು ಯಾದ್ ಕರಿಲೆವೊ. ದೇವ್‌ನೊ ವಾರ್‌ಖ್ಹೊ ತುಮಾರಿ ಜೋ಼ಡ್ಮ ರ‍್ಹವಾದೆ.
1TH 1:1 ಬಾ ದೇವ್‍ಮಾಬಿ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮಾಬಿ ಛಾ಼ತೆ ಥೆಸಲೋನಿಕ ಸಬೆನ ಅದ್ಮಿವೋನ ಪೌಲ, ಸಿಲ್ವಾನಾಬಿ ಅಜು಼ ತಿಮೊಥೆ ಹುಯಿರ‍್ಹಾತೆ ಹಮೆ,ಲೀಖಾನು ಶಾತ್‍ಕತೊ ತುಮೂನ ವಾರ್‌ಖ್ಹೊಬಿ ಅಜು಼ ಶಾಂತಿ ಮಳಾದೆ.
1TH 1:2 ಹಮೆ ಕದೇಬಿ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತುಮೂನ ಯಾದ್‌ಕರಿನ್, ತುಮಾರಖ್ಹಾಜೆ ದೇವ್ನ ಧನ್ಯವಾದ್ ಕರಿಯೇಸ್.
1TH 1:3 ಅಜು಼ ವಿಶ್ವಾಸ್‍ಥಿ ತುಮೆ ಕರ‍್ಯಾತೆ ಕಠಣ್ ಕಾಮ್ನಾಬಿ, ಪ್ಯಾರ್‌ಥಿ ತುಮೆ ಕರ‍್ಯಾತೆ ಮ್ಹಿನತ್‌ನಾಬಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಪರ್‌ನಿ ತುಮಾರಿ ಭರೋಖ್ಹಾನಖ್ಹಾಜೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಹಮೆ ಹಮೇಶ ಯಾದ್ ಕರಿಯೇಸ್.
1TH 1:4 ಹಮಾರ ಭೈ ಭೇನೊ, ದೇವ್ ತುಮೂನ ಪ್ಯಾರ್ ಕರಾಸ್ ಅಜು಼ ಇನು ಶೊಂತ್ ಅದ್ಮಿಹುಯಿನ್ ರ‍್ಹವಾನಟೇಕೆ ಇನೆ ತುಮೂನ ಚೂ಼ಣಿರಾಖ್ಯೊಸ್ ಕರಿ ಬೋಲಾನು ತುಮೂನ ಮಾಲುಮ್ ಛಾ಼.
1TH 1:5 ಶನಕತೊ, ಹಮೆ ಸುವಾರ್ತೆನ ಖಲಿ ವಾತೇಥಿಸ್ ಕಾಹೆ ಪಣ್ಕಿ, ಶಕತ್‌ಥೀಬಿ, ಪವಿತ್ರಾತ್ಮಥಿಬಿ ಅಜು಼ ಯೋ ಖ್ಹಾಚಸ್ ಕರಿ ಹಮೆ ಪರ್ಖಿನ್ ತುಮಾರಕನ ಲೈರಾಖ್ಯಸ್. ಹಮೆ ತುಮಾರ ಜೋ಼ಡೆ ಥಾತೆ ತದೆ, ತುಮಾರ ನಫ್ಫಾನಖ್ಹಾಜೆ ಕಿಮ್ ಜಿವ್ಣುಕರುಕರ್ತಥ.
1TH 1:6 ಪ್ರಭುನೆ ಅಜು಼ ಹಮೆ ಚಾ಼ಲಿಲಿದಾತೆ ಇಮ್ಮಸ್, ತುಮೇಬಿ ಚಾ಼ಲ್ಯಾ; ಎತ್ರೆಸ್ ಕಾಹೆತೆ ತುಮೆ ಘಣು ಲತಾಡ ಖ್ಹಮಾಳ್ಯಾತೋಬಿ, ಹಮೆ ಬೋಲ್ಯಾತೆ ಉಪದೇಶ್‍ನ ಪವಿತ್ರಾತ್ಮಥಿ ಪೈದಾಹುವಾಸ್ತೆ ಖ್ಹುಶಿಥಿ ಮಾನಿನ್ ಹಮಾರಿ ಸುವಾರ್ತೆನ ಖ್ಹಮ್‍ಜಿಲಿದ.
1TH 1:7 ಅನೇಥಿ ಮೆಕೆದೋನ್ಯಮ ಅಜು಼ ಅಖಾಯಮ ಕ್ರಿಸ್ತನ ವಿಶ್ವಾಸ್‌ ಕರಾವಾಳು ಖ್ಹಾರು ತುಮೂನ ದೇಖಿನ್ ಶಿಕಾನಿಘೋಣಿ ಹುಯು.
1TH 1:8 ಪ್ರಭುನಿ ವಚನ್ ತುಮಾರೇಥೀಸ್ ಮೆಕೆದೋನ್ಯ ಅಜು಼ ಅಖಾಯಮಾಬಿ ಫೈಲಿಗಯು. ಅತ್ರೇಸ್ ಕಾಹೆತೆ ತುಮೆ ದೇವ್‌ಪರ್‌ ರಾಖಿಮ್ಹೇಲ್ಯಾತೆ ವಿಶ್ವಾಸ್‌ ಖ್ಹಾರಿಸ್ ಬಾಜೂ಼ಮಬಿ ಫೈಲಿಗಯು. ಅನೇಥಿ ತುಮಾರಿ ವಿಶ್ವಾಸ್‌ನಿ ಬಾರೇಮ ಬಿಜು಼ ಶಾತ್ಬಿ ಬೋಲಾನಿ ಜ಼ರೂರತ್ ಕೊಯ್ನಿ.
1TH 1:9 ತದೆ ಹಮೆ ತುಮಾರಕನ ಆಯಾತೆ ತದೆ ತುಮೆ ಹಮೂನ ಖಿವಿ ತರಿಕಾಥಿ ಬುಲೈಲಿದಾಕರಿ ಆ ಅದ್ಮಿಖ್ಹಾರು ಬೋಲುಕರಸ್. ಅಜು಼ ತುಮೆ ಮೂರತ್ನ ಪೂಜಾ಼ಥು ದೇವ್‌ಭಣಿ ಕಿಮ್‌ಫರ‍್ಯ ಅಜು಼ ಜಿವ್‌ತಜಾನ್ನ ದೇವ್ನ ಕಿಮ್ ಸೇವೆ ಕರ‍್ಯಾ, ಕರಿ ಬೋಲಸ್.
1TH 1:10 ದೇವ್ನೆ ಮರ‍್ಯಾಹುಯಾಮಾಥು ಉಠಾಡ್ಯೋತೆ ಅಜು಼ ಸೊರ್ಗಮಾಥೊ ಆವ್‌ಶೇತೆ ಇನ ಛಿಯ್ಯಾನಖ್ಹಾಜೆ ತುಮೆ ಟಿವವ್‍ಕರಸ್ ಕರೀಬಿ ಆ ಅದ್ಮಿಸ್ ಬೋಲಾಸ್. ಆ ಯೇಸು ಖ್ಹಾಮ್ಣೆ ಉಳ್ಯಾವತೆ ದೇವ್ನ ಇರಾದಾಥಿ ಅಪ್ಣುನ ಬಚಾ಼ಡವಾಳೊ ಹುಯಿರೋಸ್.
1TH 2:1 ಹಮಾರ ಭೈ ಭೇನೊ, ಹಮೆ ತುಮಾರಕನ ಆಯತೆ ತುಮೂನ ಫಾಯಿದೊಕೊಂತೆ ಕೊಹುಯುನಿ ಕರಿ ಮಾಲುಮ್‌ ಛಾ಼.
1TH 2:2 ಹಮೆ ತುಮಾರಕನ ಥೆಸಲೋನಿಕಮ ಆವಾನ ಅಗಾಡಿಸ್, ಫಿಲಿಪ್ಪಿ ಖ್ಹಯೇರ್‌ಮ ಹಮೂನ ಕೆತ್ರೆ ಖ್ಹತಾಯು ಅಜು಼ ಖ್ಹರಮ್‌ ಕಾಡ್ಯು ಕರಿ ತುಮೂನ ಮಾಲುಮ್ ಛಾ಼. ಹಿಜ್ಜಾ಼ ಎತ್ರೆ ವಿರೋದ್ ಕರ‍್ಯುತೋಬಿ ತುಮೂನ ಸುವಾರ್ತೆನ ಬೋಲಾನಟೇಕೆ ಅಪ್ಣೊ ದೇವ್ನೆ ಹಮೂನ ಭಾಲಿದಿದೊ.
1TH 2:3 ಹಮಾರಿ ಸಮಾಚಾರ್ ಹುಮ್ಮಖ್ಹ್‌ನು ಹುಯಿರ‍್ಹುಸ್. ಮೈಲುಬಿ ಕಾಹೆ, ಅಜು಼ ತುಮೂನ ಠಗಾವ಼್ಣು ಕರಿ ಕಾಹೆ.
1TH 2:4 ಅನಬದಲ್ ದೇವ್ ಕದೇಬಿ ಶನ ಲ್ಹಾಯಕ್ ಕರಸ್ಕಿ ಇನಾಸ್ ಅಪ್ಣೆ ಬೋಲಿಯೇಸ್. ಶನಕತೊ ಯೋ ಅಪ್ಣುನ ತರೀಪ್‌ಶ ಕರೀನ್ ಹಮೆ ಯೋಗ್ಯಹುಯಿರಾತೆ ಅದ್ಮಿಕರಿ ಇನಿ ಅಛ್ಛಿ ಸಂದೇಶ್ನ ಇನೆ ಅಪ್ಣುನ ದೀರಾಖ್ಯೊಸ್. ಹಮೆ,ದಿಲ್ನ ತರೀಪ್ಷ ಕರಾವಾಳ ದೇವ್ನ ಖ್ಹಾಜ಼ನುಸ್ ಕರಿಯೇಸ್.
1TH 2:5 ತುಮೂನ ಮಾಲುಮ್‌ಛಾ಼ತೆ ತಿಮ್ ಹಮೆ ಕದೇಬಿ ಕಿನ ಖ್ಹರಾಯಬಿ ಕೊಯ್ನಿ ಅಜು಼ ಲಾಲಚ್‌ನ ಲಪಾಡನಖ್ಹಾಜೆ ವೇಷ ಫೇರ‍್ಯಕೊಯ್ನಿ. ಇನ ದೇವಸ್ ಸಾಕ್ಷಿ.
1TH 2:6 ಎತ್ರೆಸ್ ಕಾಹೆತೆ ಹಮೆ ಕ್ರಿಸ್ತನು ಅಪೊಸ್ತಲರ್ ಹುಯಿರ‍್ಹಾತೆ ಇನಖ್ಹಾಜೆ, ಹಮೂನ ಮಾನ್-ಮರ್ಯಾದಿನ ವತಾಳ್ಣು ಕರಿ ಬೋಲೆಜಾ಼ಯಿಥು. ತೋಬಿ ಹಮೆ ಅದ್ಮಿಥಿ ಮಳಾಸ್ತೆ ಮಾನ್-ಮರ‍್ಯಾದಿನ ತುಮಾರೇಥಿ ರ‍್ಹವೊ, ಬಿಜಾ಼ಥಿ ರ‍್ಹವೊ ಮಳಾದೆಕರಿ ಆಖ್ಹ್ ಕರ‍್ಯಾಕೊಯ್ನಿ.
1TH 2:7 ಕತೋಬಿ ಕ್ರಿಸ್ತಮ ಅಪೊಸ್ತಲಹುಯಿನ್ ಆಯ ಇನ ಲಡ್ಕಾನ ಖ್ಹದರ್ ಕರಾತೆ ಇಮ್‌ ತುಮಾರಿ ಜೋ಼ಡ್ಮ ರ‍್ಹೇತ ಲಾಡ್‌ಥಿ ಚಾ಼ಲಿಲಿದಾ.
1TH 2:8 ಶನಕತೊ ಹಮೆ ತುಮೂನ ಜಾ಼ಖ್ಹತ್ ಪ್ಯಾರ್ ಕರ‍್ಯಾತೆ ಇನಖ್ಹಾಜೆ ದೇವ್ನಿ ಅಛ್ಛಿ ಸಂದೇಶ್ ಖಲಿ ಬೋಲಾನಟೇಕೆ ಕಾಹೆತೆ ತುಮಾರಖ್ಹಾಜೆ ಜಾನ್ನ ದ್ಯವಾನಾಬಿ ಹಮೆ ತಯಾರ್ ಹುಯಿರಾಸ್.
1TH 2:9 ಭೈ ಭೇನೊ ಹಮೆ ತುಮಾರಾಮ ಕಿನಾಪರ್‌ಬಿ ಭಾರೊ ನಾ ನಾಕ್ಣು ಕರಿ ರಾತ್-ದನ್ ಕಾಮ್ ಕರೀನ್, ಜಿವ್ಣು ಚ಼ಲಾವ್ತಹುಯಿನ್, ದೇವ್ನಿ ಸುವಾರ್ತೆನ ತುಮೂನ ಬೋಲಿವತಾಳ್ಯ, ಯೋ ಹಮಾರಿ ಲತಾಡಬಿ ಮ್ಹಿನತ್ ಖ್ಹಾರು ತುಮಾರಿ ಯಾದ್ಮ ರ‍್ಹವಾದೆ.
1TH 2:10 ನಂಬವಾಳ ಹುಯಿರ‍್ಹಾತೆ ತುಮಾರ ಜೋ಼ಡೆ ಹಮಾರಿ ಚಾ಼ಲ್‍ಚ಼ಲಣ್‍ಮ ಖ್ಹಾಚಿಥಿಬಿ ಪರಿಶುದ್ಧಬಿ, ನೀತಿವಾಳಬಿ ಅಜು಼ ನಿರ್ದೋಷಿ ಥಾ, ಕರಿ ಬೋಲಾನ ತುಮೇಬಿ ಸಾಕ್ಷಿ ಅಜು಼ ದೇವ್‌ಬಿ ಸಾಕ್ಷಿ ಹುಯಿರ‍್ಹಾಸ್.
1TH 2:11 ಬಾ ಇನ ಶೊಂತ್ ಲಡ್ಕಾನ ಜೋ಼ಡೆ ಕಿಮ್ ಚಾ಼ಲಿಲೇಸ್ಕಿ ಇಮ್ಮಸ್, ಹಮೆ ತುಮಾರ ಜೋ಼ಡೆ ಚಾ಼ಲಿಲಿದಾ.
1TH 2:12 ಇನಿ ರಾಜ್ಯ ಅಜು಼ ಮಹಿಮೆಮ ವಾಟೊಲ್ಯವಾನಖ್ಹಾಜೆ ಬುಲೈರಾಖ್ಯೊಸ್ತೆ ದೇವ್ನಖ್ಹಾಮ್ಣೆ ಬರೋಬರ್‌ಥಿ ಜಿವ್ಣು ಕರ‍್ನುಕರಿ ಬೋಲಿದಿದಾ. ಆ ಅಖ್ಖು ತುಮುನ ಮಾಲುಮ್.
1TH 2:13 ಅಜು಼ ತುಮೆ ಹಮಾರೇಥಿ ದೇವ್ನಿ ವಚನ್ನ ಖ್ಹಮ್‍ಜ್ಯಾತೆ ತದೆ, ಅದ್ಮಿನಿ ವಚನ್ ಕರಿ ಸೋಚ್ನುನಾತೆ, ದೇವ್‍ನೀಸ್ ಕರಿ ಮಾನೀನ್ ಇನಖ್ಹಾಜೇಬಿ ಹಮೆ ಲಗತ್ತರ್ ದೇವ್ನ ಧನ್ಯವಾದ್ ಕರಿಯೇಸ್. ಯೋ ಖ್ಹಾಚ಼ಮಾಬಿ ದೇವ್‍ನೀಸ್ ವಚನ್. ಯೊ ವಚನ್ ನಂಬವಾಳ ತುಮಾರಾಮ ಶಕಥ್ಥಿ ಕಾಮ್ ಚ಼ಲಾವಸ್.
1TH 2:14 ಹಮಾರ ಭೈಯೇ ಭೇನೆವೊ, ತುಮೆ ಯೂದಾಯಮ ಕ್ರಿಸ್ತ ಯೇಸುಮ ಛಾ಼ತೆ ದೇವ್ನಿ ಖ್ಹಾಚಿ ಸಬೇನಿಮತ್‌ ಚಾ಼ಲಿರಾಖ್ಯಾಸ್‌. ಇವ್ಣೆ ಯೆಹೂದ್ಯರ್‌ಥಿ ಖ್ಹಮಾಳ್ಯುತೆ ಖ್ಹತಾಪ್ಣಿನ, ತುಮೆ ತುಮಾರ ಶೊಂತ್‌ ಅದ್ಮಿಥಿ ಖ್ಹಮಾಳಿರಾಖ್ಯಾಸ್‌.
1TH 2:15 ಇವ್ಣೆ ಪ್ರಭು ಹುಯಿರ‍್ಹೋತೆ ಯೇಸುನಾಬಿ, ಖ್ಹಾರ ಪ್ರವಾದಿನಾಬಿ ಮರೈನಾಖ್ಯು ಅಜು಼ ಹಮುನಾಬಿ ನಖ್ಹಾಡಿದಿದು. ಇವ್ಣೆ ದೇವ್ನ ಖ್ಹಾಜಾ಼ತೆ ಇಮ್‌ ಕರಾವಾಳು ಕಾಹೆ! ಅಜು಼ ಇವ್ಣೆ ತಮಾಮ್‌ ಅದ್ಮಿನ ಖೂಮ್ನ ದುಶ್‌ಮನ್‌ ಹುಯಿರ‍್ಹಾಸ್!
1TH 2:16 ಯೆಹೂದ್ಯರ್‌ಕಾಹೆತೆ ಅದ್ಮಿನ ರಕ್ಷಣೆ ಮಳಾದೆ ಕರಿ ಸುವಾರ್ತೆನ ಬೋಲ್‍ಯೇಸ್ತೆ ಹಮುನಾಬಿ ಭೀರಾಕ್‌ಣು ಕರಿ ಕರ‍್ಯು. ಅಮ್ ಕರಾಥಿ ಇವ್ಣು ಪಾಪ್ನು ಕಾಮ್‌ಖ್ಹಾರು ಭರೈನ್ ಉಛ಼್‌ಳಾಯು. ಕತೋಬಿ ದೇವ್‌ನೊ ಇರಾದೊ ಇವ್ಣಾಪರ್ ಪೂರ ಹೋತುಹುಯಿನ್ ಆಯೊ!
1TH 2:17 ಮಾರ ಭೈಯೇ ಭೇನೆವೊ, ಹಮೆ ಥೋಡದನ್ ತುಮಾರೇಥಿ ದೂರ್ ರ‍್ಹಿಯತೋಬಿ ಮನ್‌ಮ ದೂರ್ ಕರ‍್ಯಕೊಂತೆ ತುಮೂನ ಆಮಖ್ಹಾಮೆ ದೇಕ್ಣು ಕರಿ ಹರ್‌ಖ್ಹೀನ್ ಘಣು ಕೋಶಿಶ್ ಕರ‍್ಯಾ.
1TH 2:18 ಶನಕತೊ ಆವಾನ ಹಮೂನ ಮನ್ ಥೂ, ಪೌಲ ಹುಯಿರ‍್ಹೋತೆ ಮೇಸ್ ಕೆತ್ರೇಕಿಹಲ್ಲ ಪಾಛು಼ ತುಮಾರಕನ ಆವ್ಣುಕರಿ ಕರ‍್ಯೊ, ಕತೋಬಿ ಶೈತಾನ್ನೆ ಆವಾನ ಮ್ಹೇಲ್ಯೊಕೊಯ್ನಿ.
1TH 2:19 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಆವಾನಿ ವಖ್ಹತ್‌ಮ, ಇನಖ್ಹಾಮ್ಣೆ ಹಮಾರಿ ಭರೋಖ್ಹೊ, ಲ್ಹಾಯಕ್, ಖ್ಹುಶಿ, ಅಜು಼ ಹಮೆ ಖ್ಹರಾವನಿ ಕಿರೀಟ್‌ಬಿ ಕೋಣ್? ತುಮೇಸ್ ಕಾಹೆಕಿ ಶು.
1TH 2:20 ಖ್ಹಾಚಮಾಬಿ ತುಮೇಸ್ ಹಮಾರಿ ಇಜ಼್ಜತ್‌ಬಿ, ಖ್ಹುಶಿಬಿ ಹುಯಿರ‍್ಹಾಸ್‌.
1TH 3:1 ಕಡೇಶಿಮ ಹಮೆ ಬಿಜು಼ ಜಾ಼ಖ್ಹತ್ ದನ್ ಟಿವಾವನ ಕೋಹೂಕರಾನಿ ಕರಿ, ಇನಖ್ಹಾಜೆ ಮೇ ಎಕ್ಲೋಸ್ ಅಥೇನ್ಸ್‌ಮ ರ‍್ಹವಾನು ಅಛ್ಛು಼ಕರಿ ಸೋಚ್ಯೊ.
1TH 3:2 ಹಮೆ ಹಮಾರ ವಿಶ್ವಾಸ್‌ಮ ಅಜು಼ ದೇವ್ನಖ್ಹಾಜೆ ಕ್ರಿಸ್ತನಿ ಸುವಾರ್ತೆನ ಬೋಧನೆಮ ಮಾರ ಜೋ಼ಡ್ಮ ರ‍್ಹವಾಳೊ ತಿಮೊಥೆನ, ತುಮೂನ ಹುಮ್ಮಖ್ಹ್ ದ್ಯವಾನ ಅಜು಼ ವಿಶ್ವಾಸ್ಮ ಹುಮ್ಮಖ್ಹ್‌ ಕರಾನಖ್ಹಾಜೆ ತುಮಾರಕನ ಮೋಕ್‍ಲ್ಯಾಥ.
1TH 3:3 ತುಮೂನ ಮಾಲುಮ್‌ ಛಾ಼ಕಿ, ದೇವ್ನ ನಾಮ್ಹೆಲ್ನುತೆ ತಿಮ್ ಖ್ಹತಾಪ್ಣಿ ಖ್ಹಮಾಳಿಲ್ಯವಾನು, ಐರ‍್ಹೂತೆ ದೇವ್ನಿ ಮರ್ಜಿ ಹುಯಿರ‍್ಹೀಸ್.
1TH 3:4 ಶನಕತೊ ತುಮಾರಕನ ಥಾತೆ ತದೆ, ಖ್ಹತಾಪ್ಣಿನ ಖ್ಹಮಾಳ್‌ನುಸ್‌ಪಡ್ಯು ಕರಿ ಪಹಿಲೇಸ್ ಬೋಲ್ಯಾಥಾನಿ. ಇಮ್ಮಸ್‌ಹುಯು ಕರಿ ತುಮೂನ ಅಛ್ಛಿನಿತರ ಮಾಲುಮ್‌ ಪಡಿರ‍್ಹುಸ್.
1TH 3:5 ತಿಮೊಥೆನ ತುಮಾರಿ ವಿಶ್ವಾಸ್‌ನಿ ಬಾರೇಮ ಮಾಲುಮ್ ಕರಿಲ್ಯವಾನಖ್ಹಾಜೆ ಮೇ ತುಮಾರಕನ ಮೋಕ್‌ಲ್ಯೊತೆ. ಬಿಜು಼ ಜಾ಼ಖ್ಹತ್ ಥಾಮಾನ ಕೋ ಉಶೇನಿ ಕರಿ ಸೋಚಿನ್, ಮೇ ಇನ ಮೋಕ್‌ಲ್ಯೊತೆ. ಶನಕತೊ ಶೈತಾನ್ನೆ ತುಮೂನ ಶೋದನೆ ಕರ‍್ಯೊತೆ ಇನೇಥಿ ಹಮಾರಿ ಮ್ಹಿನತ್ ಬಿಣ್‌ಫಾಯಿದಾನು ಹುಯಿಜಾ಼ಶೆ ಕರಿ ಮನ ಧಡೂಕೊ ಥೊ.
1TH 3:6 ಕತೋಬಿ ತಿಮೊಥೆ ಹಮ್ಕೇಸ್ ತುಮಾರಕಂಥು ಹಮಾರಕನ ಆಯೊ. ಅಜು಼ ತುಮಾರಿ ವಿಶ್ವಾಸ್‍ಬಿ ಪ್ಯಾರ್‌ನಿ ಬಾರೇಮ ಅಛ್ಛಿ ಖಬರ್‌ನ ಇನೆ ಹಮೂನ ಬೋಲಿನ್, ಕದೆಕದೇಬಿ ಲಾಡ್‌ಥಿ ಖ್ಹಯಾಲ್ ಕರಿನ್ ಹಮೆ ಕಿಮ್ಕಿ ತಿಮ್ಮಸ್ ತುಮೇಬಿ ಹಮೂನ ದೇಖಾನ ಹರ್‌ಖ್ಹುಕರ್ತಥ ಕರಿ ಬೋಲಿರಾಖ್ಯೊಸ್.
1TH 3:7 ಹಮಾರ ಭೈಯೆ ಭೇನೆವೊ, ಹಮಾರಿ ಅಖ್ಖಿ ಅಜಾ಼ಮಾಬಿ, ಖ್ಹತಾಪ್ಣಿಮಾಬಿ ತುಮಾರಿ ವಿಶ್ವಾಸ್‍ಥಿ ಹಮೂನ ಭಾಲಿಹುಯು.
1TH 3:8 ತುಮೆ ಪ್ರಭುಮ ಘಟ್‍ಥಿ ಜಿವ್‌ಕರಾಸ್ತೆ ಹಮೆ ಖ್ಹಮ್‍ಜ್ಯಾಕಿ ಹಮೆ ಪಾಛು಼ ಹುಮ್ಮಖ್ಹ್‌ಹುಯ.
1TH 3:9 ತುಮಾರ ದೇಶೆಥಿ ಹಮುನ ಮಳಿರ‍್ಹುಸ್ತೆ ಶಂತೋಖ್ಹ್‌ನಖ್ಹಾಜೆ ಕೆತ್ರು ದೇವ್ನ ಧನ್ಯವಾದ್ ಕರ‍್ಯುತೋಬಿ ಬಶ್‌ ಕೋಹುವಾನಿ.
1TH 3:10 ತಮುನ ಡೋಳೊಖ್ಹು ದೇಖಿನ್ ತುಮಾರಿ ವಿಶ್ವಾಸ್‌ನ ಜ಼ರೂರತ್‌ನ ಪೂರಕರ‍್ನುಕರಿ ಹಮೆ ರಾತ್-ದನ್ ಇನಾಮಸ್ ದೇವ್ನ ಪ್ರಾರ್ಥನೆ ಕರುಕರೆಸ್.
1TH 3:11 ಅಪ್ಣೊ ಬಾ ದೇವ್ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಹಮೂನ ತುಮಾರಕನ ಆವಾನಟೇಕೆ ಮಾರಗ್‌ನ ಖ್ಹೂದು ಕರಾದೆ.
1TH 3:12 ತುಮಾರಪರ್ ಹಮಾರಿ ಪ್ಯಾರ್ ಕಿಮ್ಕಿ ಇಮ್ಮಸ್ ತುಮಾರಿ ಪ್ಯಾರ್ ಬಿಜಾ಼ಪರ್‌ಬಿ ಭಢ್ವಾದೆ ಇಮ್ಮಸ್ ತುಮಾರಟೇಕೆ ಹಮಾರಿ ಪ್ಯಾರ್‌ಬಿ ಜಾ಼ಖ್ಹತ್ ಹುಯಿರ‍್ಹವಾನಿಘೊಣಿ ಪ್ರಭು ಆಶೀರ್ವಾದ್‌ ಕರ‍್ವಾದೆ.
1TH 3:13 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಇನು ಪರಿಶುದ್ದ ಪರಿವಾರ್‌ನಿ ಖ್ಹಮೇದ್ ಆವಾನಿ ವಖ್ಹತ್‌ಮ, ಬಾ ದೇವ್ನ ಖ್ಹಾಮ್ಣೆ ತುಮೆ ಪವಿತ್ರಥಿ ಅಜು಼ ಗಲ್ತಿಕೊಂತೆ ಇಮ್‌ ರ‍್ಹವಾನಿಮತ್ ತುಮಾರ ದಿಲ್ನ ಖ್ಹಾರು ಘಟ್ ಕರಾದೆ.
1TH 4:1 ಖ್ಹರ್ತಿನಿ ವಾತ್ ಶಾತ್‌ಕತೊ, ಹಮಾರ ಭೈಯೇ ಭೇನೆವೊ ಯೇಸು ಪ್ರಭುನ ಅದಿಕಾರ್‌ಥಿ ತುಮೂನ ಶಾತ್ ಹುಕುಮ್ ದಿದಾಥ ಕರಿ ತುಮೂನ ಮಾಲುಮ್ ಛಾ಼. ತುಮೂನ ಬಿಜು಼ ಥೋಡಿ ವಾತೆ ಬೋಲಾನು ಛಾ಼.
1TH 4:2 ಇನಖ್ಹಾಜೆ ದೇವ್ನ ಖ್ಹಾಜಾ಼ನಟೇಕೆ ಕಿಮ್ ಜಿವ್ಣು ಕರಿ ಹಮಾರೆಥಿ ಶಿಕಿನ್ ಯೋಸ್ ತರಿಕಾಥಿ ಜಿವ್‌ಕರಾಸ್. ತುಮೆ ಬಿಜೂ಼ಬಿ ಜಾ಼ಖ್ಹತ್ ಚಾ಼ಲ್ನುಕರಿ ಪ್ರಭು ಯೇಸುಮ ಬಿಂತಿ ಕರಿಯೇಸ್.
1TH 4:3 ದೇವ್ನಿ ಮರ್ಜಿ ಶಾತ್‌ಕತೊ ತುಮೆ ಪವಿತ್ರ ರ‍್ಹೇಣುಸ್ ಕರಿ. ಇನಖ್ಹಾಜೆ ವ್ಯಬಿಚಾರ್‌ಥಿ ದೂರ್ ರ‍್ಹವೊ.
1TH 4:4 ದೇವ್ನ ಮಾಲುಮ್‌ಕರ‍್ಯುಕೊಂತೆ ಅಲಕ್‌ ಅದ್ಮಿವೋನಿಘೊಣಿ ಶರೀರ್‌ನಿ ಭೋಗ್‌ಮ ನಾಪಡ್ನುತೆ ತುಮಾರಮ ಹರೇಕ್ ಜ಼ಣು ಪವಿತ್ರ ದಿಲ್‌ಥೀಬಿ ಮರ‍್ಯಾದಿಥೀಬಿ ಬಾವಣ್ಣಿಜೋ಼ಡ್ಮ ಕಿಮ್ ಜಿವ್ಣು ಕರ್ನುಕರಿ ಶಿಕಿಲೇವ್ಣು.
1TH 4:6 ಅಜು಼ ಆ ಬಾರೇಮ ಜಿನುಕು ಕೋಣ್‌ಬಿ ಕ್ರಿಸ್ತನ ಮಹಿ ಇವ್ಣ ಭೈಯೇ ಹುಯಿರ‍್ಹಾತೆ ಅದ್ಮಿನ ಠಗಾವ್ಣುಕರಿ ಝೇತೈನ್‌, ಖರಾಬ್ ನಾ ಕರ‍್ನು. ಆ ಖ್ಹಾರಿ ಬಾರೇಮ ಪ್ರಭು ನಿಶತ್ ದಿಶೆಕರಿ ಹಮೆ ತುಮುನ ಬೋಲಿರಾಖ್ಯಾಸ್.
1TH 4:7 ದೇವ್ನೆ ಅಪ್ಣುನ ಮೈಲುಹುವಾನಖ್ಹಾಜೆ ಬುಲಾಯೊಕೊಯ್ನಿ, ಪರಿಶುದ್ ಜಿವ್ಣುಕರಾನಖ್ಹಾಜೆ ಬುಲಾಯೋತೆ.
1TH 4:8 ಅನಖ್ಹಾಜೆಸ್ ಆ ವಾತೇನ ಝಿಟ್ಕಾರವಾಳು ಅದ್ಮಿನಾಸ್ ಕಾಹೆತೆ ಪವಿತ್ರಾತ್ಮನ ದಿದೋತೆ ದೇವ್‍ನಾಬಿ ಝಿಟ್ಕಾರವಾಳು ಹುಯಿರ‍್ಹೂಸ್.
1TH 4:9 ಕ್ರಿಸ್ತನ ಮಹಿ ಭಯ್ಯೆ ಅಜು಼ ಭೇನೇನ ಕಿಮ್ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮೂನ ಲೀಖಾನಿ ಜ಼ರೂರತ್ ಕೊಯ್ನಿ. ಏಕ್‌ಥಿಏಕ್‌ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮಾರು ತುಮೇಸ್ ದೇವ್‌ಥಿಶಿಕಿರಾಖ್ಯಸ್.
1TH 4:10 ಅಜು಼ ಇಮ್ಮಸ್ ಮೆಕೆದೋನ್ಯಮ ಛಾ಼ತೆ ತಮಾಮ್‌ ಭೈಯೆ ಭೇನೇನ ಜೋ಼ಡೆ ಪ್ಯಾರ್‌ಥಿ ಚಾ಼ಲಿರಾಖ್ಯಾಸ್‌. ಕತೋಬಿ ಹಮಾರ ಭೈಯೆ ಭೇನೇವೊ ತುಮೆ ಪ್ಯಾರ್ ಕರಾಮ ಬಿಜೂ಼ಬಿ ಭಡ್ನುಕರಿ ಬೋಲಿಲಿಯೆಸ್.
1TH 4:11 ಹಮೆ ಬೋಲ್ಯಾತೆ ತಿಮ್ ತು ಬಿಜೇಕ್‌ಜ಼ಣಾನ ಬಾರೇಮ ಮುಡ್‌ಕ್ಯು ನಕೊಘಾಲ್‌ತೆ ತುಮಾರು ಕಾಮ್ ತುಮೆ ದೇಖಿಲಿನ್ ಖ್ಹೊಪೇಥಿ ಜಿವ್ಣು ಕರೊಕರಿ ಅಗಾಡಿಸ್ ಬೋಲಿರಾಖ್ಯೊಸ್.
1TH 4:12 ಅಮ್ ಕರ‍್ಯಾತೊ ತುಮೂನ ವಿಶ್ವಾಸ್‌ಮಕೊಂತೆ ಅದ್ಮಿಥಿ ಮರ್ಯಾದಿ ಮಳ್‌ಶೆ ಕಾಹೆತೆ ತುಮೆ ಕಿನಾಪರ್‌ಬಿ ವಜ಼ನ್ ಕೊ ರ‍್ಹಿಶುನಿ.
1TH 4:13 ಹಮಾರ ಭೈಯೇ ಭೇನೇವೊ, ಮರಿಗಯೂತೆ ಅದ್ಮಿನಿ ಬಾರೇಮಾನಿ ಖ್ಹಾಚಿನ ತುಮೆ ಮಾಲುಮ್ ಕರಿರಾಕ್ಣುಕರಿ ಹಮಾರಿ ಆಖ್ಹ್. ಅನೇಥಿ ಕೋಣ್‌ಬಿ ಭರೋಖ್ಹಾಮಕೊಂತೆ ಅಲಕ್‌ನಿಘೋಣಿ ತುಮೆ ದುಖ್‌ಮ ನಾರ‍್ಹೇವ್ಣು.
1TH 4:14 ಯೇಸು ಮರೀನ್ ಜಿವ್ತೊ ಹುಯೊ ಕರಿ ಅಪ್ಣೆ ಮಾನೇಸ್, ಇಮ್ಮಸ್ ಯೇಸುಪರ್ ವಿಶ್ವಾಸ್ ಕರೀನ್ ಮರಿಗಯೂತೆ ಇವ್ಣುನ ದೇವ್ ಯೇಸುನ ಜೋ಼ಡೆ ಉಠಾಡ್‍ಶೆ ಕರಿ ವಿಶ್ವಾಸ್ ಕರ‍್ನು.
1TH 4:15 ಹಮ್ಕೆ ಹಮೆ ಶಿಕಾಡುಕರೇತೆ ಆ ವಾತೆ ಪ್ರಭೂನೀಸ್ ಉಪದೇಶ್ ಹುಯಿರ‍್ಹೀಸ್. ಪ್ರಭು ಪಾಛೊ಼ ಆವ್‌ಶೇತೆ ವಖ್ಹತ್‌ಮ, ಜಿವ್ತಾ ಛಿಯ್ಯೇತೆ ಅಪ್ಣೆ ಮರಿಗಯೂತೆ ಇವ್ಣೇಥಿ ಪಹಿಲೆ ಕೋ ಜಾ಼ಶುನಿ.
1TH 4:16 ಶನಕತೊ ಪ್ರಭು ಇನುಯೋಸ್ ಹುಕುಮ್‌ನಿ ಆವಾಜ಼್‌ಥೀಬಿ, ಗಲ್‌ಢೊ ದೂತಾನೊ ಆವಾಜ಼್‌ಥೀಬಿ, ಅಜು಼ ದೇವ್ನಿ ತುತ್ತೂರಿನ ಆವಾಜ಼್‌ಥೀಬಿ ಪರ್‌ಲೋಕ್‌ಥು ಉತ್ರಿನ್ ಆವ್‌ಶೆ. ತದೆ ಯೇಸು ಕ್ರಿಸ್ತನಿ ವಿಶ್ವಾಸ್ಮ, ಮರಿಗಯೂತೆ ಇವ್ಣೆ ಪಹಿಲೆ ಉಠಿ ಆವ್‌ಶೆ.
1TH 4:17 ಅನ ಬಾದ್‌ಮ ಜಿವ್ತಾ ಛಿಯೇತೆ ಅಪ್ಣೆ ಪ್ರಭುನ ವಾದ್‍ಳಾನ ವಹಿರಾಮ ಮಳಾನಖ್ಹಾಜೆ ಇವ್ಣಿ ಜೋ಼ಡೆಸ್ ಏಕ್‌ದಮ್ ವಾದ್‍ಳಾಮ ಪಡೈಜಾ಼ಶು. ಅಮ್ ಹುಯಿನ್ ಅಪ್ಣೆ ಹಮೇಶಾನಖ್ಹಾಜೆ ಪ್ರಭುನ ಜೋ಼ಡೆ ರ‍್ಹಿಶು.
1TH 4:18 ಇನಖ್ಹಾಜೆ ಆ ಖ್ಹಾರಿ ವಾತೆಥಿ ಏಕ್‌ನ ಏಕ್‌ ಭಾಲಿ ದೆವೊ.
1TH 5:1 ಹಮಾರ ಭೈಯೇ ಭೇನೇವೊ, ಆ ಖ್ಹಾರು ಚಾ಼ಲ್‌ಶೇತೆ ದನ್ ಅಜು಼ ವಖ್ಹತ್‌ನಿ ಬಾರೇಮ ಹಮೆ ತುಮೂನ ಲೀಖಾನಿ ಜ಼ರೂರತ್ ಕೊಯ್ನಿ.
1TH 5:2 ಶನಕತೊ ರಾತ್ನಿ ವಖ್ಹತ್‌ಮ ಚೋ಼ರ್ ಕಿಮ್ ಆವಸ್ಕಿ, ಇಮ್ಮಸ್ ಪ್ರಭುನೊ ದನ್ ಆವ್‍ಶೆಕರಿ ತುಮುನಾಸ್ ಅಛ್ಛಿನಿತರ ಮಾಲುಮ್ ಛಾ಼.
1TH 5:3 ಹಮೆ ಶಾಂತಿಥಿ ಛಿಯ್ಯೆ, ಜ಼ತನ್‌ಥಿ ಛಿಯ್ಯೆ ಕರಿ ಅದ್ಮಿಖ್ಹಾರು ಬೋಲುಕರಾನಿ ವಖ್ಹತ್‌ಮಾಸ್‌, ಬೇಜೂನಿನ ಏಕ್‌ದಮ್ ಪೈದಾಹುವ್ವಾನಿ ಅಜ಼ ಆವಾಸ್ತೆ ಇಮ್ಮಸ್, ಇವ್ಣಾಪರ್ ನಾಶ್ ಆವ್‌ಶೆ. ಅಜು಼ ಇವ್ಣೆ ಇನ ಮಹಿಥು ಛು಼ಕಿಜಾ಼ವನ ಕೋ ಉಶೇನಿ.
1TH 5:4 ಕತೋಬಿ ಹಮಾರ ಭೈಯೇ, ಯೋ ದನ್ ಚೋ಼ರ್ ಆವಾನಿಘೋಣಿ ತುಮಾರಪರ್ ಕೋ ಆವ್‌ಶೇನಿ, ಶನಕತೊ ತುಮೆ ಅಂಧಾರಾಮ ಕೋ ಜಿವ್‌ಕರಾನಿ.
1TH 5:5 ತುಮೆಖ್ಹಾರು ಉಜಾ಼ಳ ಭಣಿವಾಳ ಅಜು಼ ದನ್ ಭಣಿವಾಳ ಹುಯಿರ‍್ಹಾಸ್. ಅಪ್ಣೆ ರಾತ್ ಭಣಿವಾಳ ಕಾಹೆ, ಅಂಧಾರ ಭಣಿವಾಳಬಿ ಕಾಹೆ.
1TH 5:6 ಇನಖ್ಹಾಜೆ ಅಪ್ಣೆ ಬಿಜಾ಼ನಿಮತ್ ನಿಂದರ್‌ ನಾಲೇವ್ಣುತೆ, ಹೊಷಾರಿ ರ‍್ಹಿಯೆ ಅಜು಼ ಅಪ್ಣು ಅಪ್ಣೆ ದಾಬುಕ್ಮ ರ‍್ಹಿಯೆ.
1TH 5:7 ಖ್ಹುವ್ವಾಳು ಖ್ಹಾರು ರಾತ್ಮ ಖ್ಹುವ್ವಾಸ್. ಕಯೇಪ್ ಚ಼ಢೈಲೆವಾಳು ಖ್ಹಾರು ರಾತ್ಮ, ಕಯೇಪ್ ಚ಼ಢೈಲೇಸ್.
1TH 5:8 ಕತೋಬಿ ಅಪ್ಣೇತೊ ದನ್ ಭಣಿವಾಳ ಹುಯಿರ‍್ಹಾಸ್. ಇನಖ್ಹಾಜೆ ಅಪ್ಣು ಅಪ್ಣೆ ದಾಬುಕ್ಮ ರ‍್ಹಿಯೆ. ಅಪ್ಣೆ ಪ್ಯಾರ್ ಅಜು಼ ವಿಶ್ವಾಸ್‌ನಿ ಕವಚ್‌ನ ಛಾ಼ತಿಪರ್ ಪೇರ‍್ಹಿಲೇವ್ಣು ಅಜು಼ ರಕ್ಷಣೆನಿ ವಿಶ್ವಾಸ್‌ಕರಿ ರ‍್ಹವಾನು ಮುಡ್‌ಕ್ಯಾನ ಕವಚ್‌ನ ಫೇರಿಲೇವೊ,
1TH 5:9 ಶನಕತೊ ದೇವ್ನೆ ಅಪ್ಣುನ ಚೂ಼ಣ್ಯೋತೆ ಇನ ಇರಾದಮ ಖ್ಹಪಡ್ನುಕರಿ ಕಾಹೆ ಪಣ್ಕಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಥಿ ಮಳ್ಯುತೆ ರಕ್ಷಣೆನ ಲೀಲೆವ್ಣು ಕರಿ ಚೂ಼ಣ್ಯೋತೆ.
1TH 5:10 ಅಪ್ಣೆ ಜಿವ್ತ ರ‍್ಹಯಾತೋಬಿ ನತರ್ ಮರಿಗಯಾತೋಬಿ ಇನ ಜೋ಼ಡೆಸ್ ಜಿವ್ಣು ಕರಿ ಬೋಲಿನ್, ಯೇಸುನೆ ಅಪ್ಣಖ್ಹಾಜೆ ಇನ ಜಾನ್ನ ದಿದೊ.
1TH 5:11 ಇನಖ್ಹಾಜೆ ತುಮೆ ಹಮ್ಕೆ ಕರುಕರಸ್ತೆ ಇಮ್ಮಸ್, ಏಕ್‌ನ ಏಕ್‌ ಭಾಲಿ ದೇವೊ. ಅಜು಼ ಹುಮ್ಮಖ್ಹ್‌ ದೇತಹುಯಿನ್ ಏಕ್‌ನ ಭಕ್ತಿನ ಬಿಜೇಕ್‌ ಜ಼ಣು ಭಡಾವ್ತರ‍್ಹೆವೊ.
1TH 5:12 ಮಾರ ಭೈಯೆ ಭೇನೇವೊ ಕ್ರಿಸ್ತಮ ಮೆ ತುಮುನ ಬಿಂತಿ ಕರುಸ್, ಖಿವು ಅದ್ಮಿ ಪ್ರಭುನ ಕಾಮ್ಮ ತುಮಾರಖ್ಹಾಜೆ ಮ್ಹಿನತ್ ಕರವಾಳು ಹುಯಿನ್ ತುಮೂನ ಅಕ್ಕಲ್ ಬೋಲಸ್ಕಿ,
1TH 5:13 ಇವ್ಣುನ ಪರ್ಖಿನ್ ಇವ್ಣ ಕಾಮ್ನಖ್ಹಾಜೆ ಘಣು ಮರ್ಯಾದಿ ಅಜು಼ ಪ್ಯಾರ್ ವತಾಳ್ಣು ಕರಿ ತುಮೂನ ಗಿಂಗೈಲಿಯೇಸ್. ತುಮಾರ ತುಮಾರಸ್‍ಮ ಸಮಾಧಾನ್‌ಥಿ ರ‍್ಹವೊ.
1TH 5:14 ಹಮಾರ ಭೈಯೆ ಭೇನೇವೊ, ಶೊಂಬೇರಿನ ಝೇತಾವೊ, ದಿಲ್ಮ ಹೇಬತ್ ರ‍್ಹವಾಳನ ಭಾಲಿದೇವೊ, ಕಮ್‌ಜೋ಼ರಿ ರ‍್ಹವಾಳನ ಆಧಾರ್ ರ‍್ಹವೊ, ಖ್ಹಾರಾನ ಜೋ಼ಡೆ ಘಣಿ ಸಮಾಧಾನ್‌ಥಿ ರ‍್ಹವೊ ಕರಿ ತುಮುನ ಉಪದೇಶ್ ಕರುಸ್.
1TH 5:15 ಕೋಣ್‌ಬಿ ಖರಾಬ್‌ನ ಬದಲ್ ಖರಾಬ್ ನಾ ಕರ್ನುತೆ ಇಮ್‌ ದೇಖಿಲೆವೊ. ಕತೋಬಿ ತುಮೆ ಏಕ್‌ಥಿಏಕ್ ಅಜು಼ ಹರೇಕ್ ಅದ್ಮಿನಾಬಿ ಅಛ಼್ಛುಕರೊ.
1TH 5:16 ಹಮೇಶ ಖ್ಹುಶೀಥಿ ರ‍್ಹವೊ,
1TH 5:17 ಹರ್‌ ವಖ್ಹತ್‌ಮ ಪ್ರಾರ್ಥನೆ ಕರೊ,
1TH 5:18 ಹರ್‌ಹಾಲ್‌ಮ ದೇವ್ನ ಧನ್ಯವಾದ್ ಕರೊ. ಆಸ್ ತುಮಾರಿ ಬಾರೇಮ ಕ್ರಿಸ್ತ ಯೇಸುಮ ದೇವ್‌ಮ ಹೋಣುತೆ ಮರ್ಜಿ ಹುಯಿರ‍್ಹುಸ್.
1TH 5:19 ಪವಿತ್ರಾತ್ಮನ ಕಾಮ್ನ ಉಝಾ಼ವೊ ನಕೊ,
1TH 5:20 ಪ್ರವಾದ್‌ನೇನ ಝಿಟ್ಕಾರೊ ನಕೊ.
1TH 5:21 ಅಖ್ಖಾಸ್ನ ತರೀಪ್‌ಶ ಕರಿನ್, ಅಛ್ಛಾ಼ನ ಘಟ್ ಧರಿಲೆವೊ.
1TH 5:22 ಖ್ಹಾರಿಸ್ ತರ‍್ಹಾನು ಖರಾಬ್‌ಥಿ ದೂರ್ ರ‍್ಹವೊ.
1TH 5:23 ಶಾಂತಿ ದೆವಾಳೊ ದೇವಸ್ ತುಮೂನ ಪೂರಿ ತರಿಕಾಥಿ ಪವಿತ್ರ ಕರಾದೆ. ತುಮಾರು ಆತ್ಮ, ಜಾನ್‌ ಅಜು಼ ಶರೀರ್ ಖ್ಹಾರು ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ದೆಖಾವಾನಿ ವಖ್ಹತ್‌ಲಗು ಪೂರ ದೋಷ್‌ಕೊಂತೆ ರಾಖಿಮ್ಹೇಲೊ.
1TH 5:24 ಯೋ ಇನ ಕಾಮ್ನ ಪೂರ ಕರ್ಶೆ. ಶನಕತೊ ತುಮೂನ ಬುಲಾಯೋತೆ ಯೋ ವಿಶ್ವಾಸ್‌ವಾಳೊ ಹುಯಿರ‍್ಹೋಸ್.
1TH 5:25 ಭೇನೆ ಭೈಯೇವೊ, ಹಮಾರಖ್ಹಾಜೆ ಪ್ರಾರ್ಥನೆ ಕರೊ.
1TH 5:26 ಭೇನೆ ಭೈಯೇನ ಮಳಾನಿ ವಖ್ಹತ್‌ಮ ಪವಿತ್ರಥಿ ಹಾತ್‍ಮಳೈನ್ ಖ್ಹಲಾಮ್ ಕರೊ.
1TH 5:27 ಆ ಚಿಟ್ಟಿನ ಭೈಯೆಖ್ಹಾರನ ಪಢೀನ್‌ ಬೋಲ್ನುಕರಿ ಪ್ರಭುಮ ಬಿಂತಿಕರಿನ್ ತುಮೂನ ಬೋಲುಕರುಸ್.
1TH 5:28 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ವಾರ್‌ಖ್ಹೊ ತುಮಾರ ಜೋ಼ಡೆ ರ‍್ಹವಾದೆ.
2TH 1:1 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಮ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮ ಛಾ಼ತೆ ಥೆಸಲೋನಿಕ ಸಬೆನ, ಪೌಲ, ಸಿಲ್ವಾನ ಅಜು಼ ತಿಮೊಥೆ ಕರಿ ಹಮೆ ಲೀಖುಕರೇಸ್ತೆ ಶಾತ್‌ಕತೊ,
2TH 1:2 ಅಪ್ಣೊ ಬಾ ದೇವ್‍ಥಿಬಿ ಅಜು಼ ಪ್ರಭು ಯೇಸು ಕ್ರಿಸ್ತಥಿ ತುಮೂನ ವಾರ್‌ಖ್ಹೊ ಅಜು಼ ಶಾಂತಿ ಮಳಾದೆ.
2TH 1:3 ಹಮಾರ ಭೈಯೆ ಭೇನೊ, ತುಮಾರಿ ಬಾರೇಮ ಹಮೆ ಹಮೇಶ ದೇವ್ನ ಧನ್ಯವಾದ್ ಕರಿಯೇಸ್. ಅಮ್ ಕರಾನು ಹಮೂನ ಬರೊಬರಸ್‌ ದೆಖಾಯು, ಶನಕತೊ ತುಮಾರಿ ವಿಶ್ವಾಸ್ ಘಣು ಭಡುಕರಾಸ್ ಅಜು಼ ಏಕ್‌ಥಿಏಕ್‌ ತುಮಾರಿ ಪ್ಯಾರ್ ದನ್‌ಪರ್-ದನ್ ಭಡ್ತು ಜಾ಼ವಾದೆ.
2TH 1:4 ಶನಕತೊ ತುಮೆ ಖ್ಹಮಾಳಮಾಬಿ ಖ್ಹತಾಪ್ಣಿಮಾಬಿ ತುಮಾರಮ ದೆಖಾಯುತೆ ವಿಶ್ವಾಸ್ನಖ್ಹಾಜೆಥಿ ದೇವ್ನಿ ಅದ್ಮಿನಿ ಸಬೇಮ ಕಮ್‌ಠೋಕಿ ವಾತೆ ಬೋಲಿಯೇಸ್.
2TH 1:5 ದೇವ್ನಿ ನೀತಿನಿ ತೀರ್ಪ್‌ನ ಖ್ಹಾಚು಼ ಖಿವುಕತೊ, ತುಮೆ ಲತಾಡಪಡುಕರಾತೆ ದೇವ್ನಿ ರಾಜ್ಯನ ತುಮೆ ಲ್ಹಾಯಕ್ ಹುಯಿರ‍್ಹವಾನು.
2TH 1:6 ನ್ಯಾವ್ನು ಕೋಣ್ ಕರಸ್ಕಿ ಇವ್ಣುನ ದೇವ್ ಅಛ್ಛು಼ಸ್ ಕರಸ್. ತುಮೂನ ಕೋಣ್ ಖ್ಹತಾವಸ್ಕಿ ಇವ್ಣುನ ದೇವ್ ಖ್ಹತಾವಸ್,
2TH 1:7 ಅಜು಼ ವಾಖ್ಯೊ ಛಾ಼ತೆ ತುಮುನಾಬಿ ಹಮೂನ ಪರಿಹಾರ್ ಕರ್ಶೆ. ಪ್ರಭು ಹುಯಿರ‍್ಹೋತೆ ಯೇಸು ಮಹಾ ಶಕತ್‌ವಾಳೊ ದೇವ್‌ದೂತರ್‌ನ ಜೋ಼ಡೆ ಸೊರ್ಗಥೊ ದೆಖಾವಾನಿ ವಖ್ಹತ್‌ಮ, ಇನ ಸಮಾಧಾನ್ ದಿಶೆ.
2TH 1:8 ಯೊ ಆಗ್‍ನಿ ಝ಼ಲ್‌ಪಟ್‌ ಜೋ಼ಡ್ಮ ಕೋಣ್ ದೇವ್ನ ಠೊಕ್ರಾವಸ್ಕಿ ಅಜು಼ ಯೇಸು ಪ್ರಭುನಿ ಬಾರೇನಿ ಸುವಾರ್ತೆನ ಮಾನ್ಯುಕೊಯ್ನಿಕಿ ಇವ್ಣುನ ನಿಶತ್‌ ದ್ಯವಾನ ಆವ್‌ಶೆ.
2TH 1:9 ಪ್ರಭು ಇವ್ಣುನ ಇನಿ ಮಹಿಮೆನಿ ಶಕತ್ನ ಖ್ಹಾಮ್ಣೇಥು ಹಟೈನಾಖಿದಿನ್ ಇವ್ಣುನ ಹರ್‌ಹಮೇಶಾನು ನಿಶತ್‌ ದಿಶೆ.
2TH 1:10 ಇನೆ ಯೋ ದನ್ಮ ಇನ ಪರಿಶುದ್ ಅದ್ಮಿವ್‌ಥಿ ಮಹಿಮೆಬಿ ಅಜು಼ ವಿಶ್ವಾಸ್‌ಮ ರ‍್ಹೇಯ್ತೆ ಇವ್ಣೇಥಿ ಮರ‍್ಯಾದಿಲೀನ್ ಆವಾಸ್ಕಿ ಯೊ ಅದ್ಮಿನಿ ಬೀಚ್ಮ ತುಮೇಬಿ ರ‍್ಹಿಶು. ಶನಕತೊ ಹಮೆ ತುಮುನ ಬೋಲ್ಯಾತೆ ಸಾಕ್ಷಿನ ತುಮೆ ನಂಬಿರಾಖ್ಯಾಸ್.
2TH 1:11 ಅನಖ್ಹಾಜೆಸ್ ಹಮೆ ಕದೇಬಿ ತುಮಾರಖ್ಹಾಜೆ ಪ್ರಾರ್ಥನೆ ಕರಿಯೇಸ್. ಅಪ್ಣೊ ದೇವ್ ತುಮೂನ ಬುಲಾಯೋತೆ ಇನಖ್ಹಾಜೆ ಯೋಸ್ ತುಮುನ ಲ್ಹಾಯೇಕ್‌ನಿ ಗಣ್ತಿ ಕರಿರಾಖ್ಯೊಸ್. ತುಮಾರಿ ಶಕತ್ ವಿಶ್ವಾಸ್‍ಥೀಬಿ ತುಮಾರಿ ಆಖ್ಹ್‌ನ ಅಜು಼ ಅಛ್ಛಾ಼ನ ಪೂರ ಕರಾದೆಕರಿ ಬಿಂತಿ ಕರ್ಯೆಸ್.
2TH 1:12 ಅಮ್ಮಸ್ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನು ನಾಮ್ ತುಮಾರೇಥಿ ಮಹಿಮೆ ಉಶೆ, ಅಜು಼ ಇಮ್ಮಸ್ ತುಮೇಬಿ ಇನಾಮ ಮಹಿಮೆ ಲಿಶು. ಯೋ ಮಹಿಮೆ ಅಪ್ಣೊ ದೇವ್ ಅಜು಼ ಪ್ರಭು ಹುಯಿರ‍್ಹವಾಳ ಯೇಸು ಕ್ರಿಸ್ತನಿ ವಾರ್‌ಖ್ಹೇಥಿ ಚಾ಼ಲಾದೆ.
2TH 2:1 ಭೈಯೆ ಭೇನೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಆವಾನಿ ಬಾರೇಮ ಅಜು಼ ಅಪ್ಣೆ ಖ್ಹಾರು ಎಕ್ಟು ಹುಯಿನ್ ಇನ ಮಳಾನಿ ಬಾರೇಮ ತುಮೂನ ಬೋಲಿಲಿಯೇಸ್.
2TH 2:2 ಪ್ರಭುನೊ ದನ್ ಐರ‍್ಹೋಸ್ ಕರಿ ತುಮೆ ಆತ್ಮಥಿರ‍್ಹಿಲೇವೊ ವಾತೆಮರ‍್ಹಿಲೇವೊ ಹಮಾರಿ ಚಿಟ್ಟಿರ‍್ಹಿಲೇವೊ ತುಮೆ ವಗ್ಗಿಸ್‌ಮ ಕಲಾವ್ಣಿ ನಕೊಹುವೊ.
2TH 2:3 ಕೋಣ್‌ಬಿ ಕೆವ್ಹಿ ತರಿಖಾಮಾಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ. ಶನಕತೊ ಪಹಿಲೆ ವಿಶ್ವಾಸ್‌ನ ಕಾಡಿನಾಖಿನ್ ನಾಶಕರವಾಳೊ, ವಿರೋದಿ ಭಡ್ಕಲಗುಬಿ ಯೊ ದನ್ ಆವ್‌ಶೆ ಕೊಯ್ನಿ.
2TH 2:4 ಖಿವು ದೇವ್‌ನು ಹುಯಿರ‍್ಹುಸ್ ನತರ್ ಆರಾದನೆನ ಯೋಗ್ಯಹುಯಿರ‍್ಹಾವನು ಹುಯಿರ‍್ಹುಸ್ಕಿ, ಯೋ ಖ್ಹಾರಾನ ನಾಶ್ ಕರ್ಷೆ. ಇನು ಯೋಸ್ ಖ್ಹಾರೇಥಿಬಿ ಭಡೈಲೀನ್, ದೇವ್ನಿ ಮಂದಿರ್‌ಮ ಬೇಶಿನ್‌ ಯೋಸ್ ದೇವ್‌ಕರಿ ಬೋಲಿಲಿಶೆ.
2TH 2:5 ಮೇ ತುಮಾರಿ ಜೋ಼ಡ್ಮ ಥೋತೆ ತದೆ, ಆ ಖ್ಹಾರಿ ಬಾರೇಮ ಬೋಲ್ಯೊತೆ ತುಮೂನ ಯಾದ್ ಕೊಯ್ನಿಕಿ ಶು?
2TH 2:6 ಯೋ ಬರೋಬರ್‌ನಿ ವಖ್ಹತ್‌ಮ ದೆಖಾವ್ಣುನಾತೆ ಇಮ್ ಅನಿ ಬಾರೇಮ ಶಾತ್ ಅಡ್ಡಿ ಹುಯಿರ‍್ಹುಸ್‌ಕರಿ ತುಮೂನ ಮಾಲುಮ್ ಛಾ಼.
2TH 2:7 ಠಗಾವ್ಣು ಅಜೂ಼ಬಿ ಗಪ್ಲಥ್ಥಿ ಕಾಮ್ ಕರುಕರಸ್. ಕತೋಬಿ ಅನ ಠೇರೈರಾಖವಾಳೊ ವಾಟ್‌ ಮ್ಹೇಲಾಲಗುಬಿ ಯೋ ಗಪ್ಲಥ್ಥೀಸ್ ರ‍್ಹಿಶೆ.
2TH 2:8 ಯೋ ಅಧರ್ಮಿ ದೆಖಾವ್‌ಶೆ. ಪ್ರಭು ಯೇಸು ಇನ ಮ್ಹೋಡಾನು ದಮ್‌ಥೀಸ್ ಇನ ಮಾರಿನಾಕ್‌ಶೆ. ಅಜು಼ ಯೋ ಹಿಜ಼್ಜಾ ರ‍್ಹಿಶೇತೆ ಇನಖ್ಹಾಜೇಸ್ ಇನ ನಾಶ್ ಕರಿನಾಕ್‌ಶೆ.
2TH 2:9 ಯೋ ಅಧರ್ಮಿ ಶೈತಾನ್ನಿ ಶಕಥ್ಥಿ ಭರೈನ್ ಆವ್‌ಶೆ ಅಜು಼ ಕೈಯೆಕ್ಕಿಥರಾನು ಠಗಾವನು ಮೋಟುಕಾಮ್, ಅದ್ಭುತ್‌ಕಾಮ್, ಚಮತ್ಕಾಕರ್‌ನ ಕರ್ಶೆ.
2TH 2:10 ಇವ್ಣೆ ಖ್ಹಾಚಿನ ಪ್ಯಾರ್ ನಾಕರೀನ್‌, ರಕ್ಷಣೆ ಕೋಲೆಯಿಂತೆ ಝಿಟ್ಕಾರಿನ್ ನಾಶನ್ನ ಮಾರಗ್‍ಮ ರ‍್ಹವಾಳನ ಅಖ್ಖೀಸ್ ಥರಾನಿ ಖರಾಬ್‌ ದಿಮಾಕ್‌ಥಿ ಯೋ ಠಗಾವ್‌ಶೆ.
2TH 2:11 ಇನಖ್ಹಾಜೇಸ್ ದೇವ್ ಇವ್ಣುನ ಘಣಿ ಮೈಕಮ್ಮ ನಾಖಿನ್ ಇವ್ಣೆ ಯೋ ಝೂ಼ಟಿನ ನಂಬಾನಿಘೋಣಿ ಕರ್ಷೆ .
2TH 2:12 ಅನೇಥಿ ಖ್ಹಾಚಿನ ವಿಶ್ವಾಸ್‌ಕರ‍್ಯುಕೊಂತೆ, ಪಾಪ್ನು ಕಾಮ್ಮ ಖ್ಹುಶಿಕರಾವಾಳ ಹರೇಕ್ನ ತೀರ್ಪ್‌ ಉಶೆ.
2TH 2:13 ಪ್ರಭು ಪ್ಯಾರ್ ಕರಾಸ್ತೆ ಭೈಯೆ ಭೇನೆವೊ, ಹಮೆ ತುಮಾರಿ ಬಾರೇಮ ಹಮೇಶ ದೇವ್ನ ಧನ್ಯವಾದ್ ಕರಾವಳ ಹುಯಿರ‍್ಹಾಸ್. ಶನಕತೊ ತುಮೆ ಪವಿತ್ರಾತ್ಮಾಥಿ ಪಾಕ್‌ ಹುಯಿನ್, ಖ್ಹಾಚಿಪರ್ ವಿಶ್ವಾಸ್‌ರಾಖಿನ್ ರಕ್ಷಣೆನ ಲೀಲ್ಯಾವದೆಕರಿ ದೇವ್ನೆ ತುಮೂನ ಶುರುವಾತ್‌ಮಾಸ್ ಚೂ಼ಣಿರಾಖ್ಯೊಸ್.
2TH 2:14 ತುಮೆ ಅಮ್ ರಕ್ಷಣೆಮ ಐನ್, ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ಮಹಿಮೆಮ ಪೇಖ್ಹ್‌ಣುಕರಿ, ಹಮೆ ಬೋಲ್ಯಾತೆ ಸುವಾರ್ತೆಥಿ ದೇವ್ನೆ ತುಮೂನ ಬುಲಾಯೊ.
2TH 2:15 ಇನಖ್ಹಾಜೇಸ್ ಹಮಾರ ಭೈಯೆ-ಭೇನೆವೊ, ಘಟ್ ಭೀರ‍್ಹೆವೊ, ಹಮೆ ವಾತೇಥಿರ‍್ಹವೊ ಅಜು಼ ಹಮೆ ಲೀಖ್ಯಾತೆ ಕಾಗತ್‌ಥ್ಥಿರ‍್ಹವೊ ತುಮೂನ ಮಾಲುಮ್ ಕರಾಯಾತೆ ಪದತ್ತಿನ ತುಮೆ ಘಟ್ ಧರಿಲೆವೊ.
2TH 2:16 ಅಪ್ಣುನ ಪ್ಯಾರ್ ಕರೀನ್, ಕೆದೇಬಿ ರ‍್ಹವಾನು ಹುಮ್ಮಖ್ಹ್‌ನಬಿ, ಅಛ಼್ಛು ಭರೋಖ್ಹಾನಬಿ ಇನಿ ವಾರ್‌ಖ್ಹೇಥಿ ದಿದೋತೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಬಿ ಅಪ್ಣೊ ಪ್ರಭು ಯೇಸು ಕ್ರಿಸ್ತ ಯೋಸ್ ತುಮಾರ ದಿಲ್‌ಮನ್ನ ಧಿಲ್‌ಪತ್‌ ದ್ಯವಾದೆ.
2TH 2:17 ಖ್ಹಾರಿಸ್ ತರ‍್ಹಾನು ಅಛ಼್ಛಕಾಮ್ಮಬಿ ಅಛ಼್ಛು ವಚನ್‌ಮಾಬಿ ತುಮುನ ಭಾಲಿದ್ಯವಾದೆ.
2TH 3:1 ಹಮಾರ ಭೈಯೆ ಭೇನೆವೊ, ಹಮಾರಖ್ಹಾಜೆ ಪ್ರಾರ್ಥನೆ ಕರೊ, ಪ್ರಭುನಿ ವಚನ್ ತುಮಾರಾಮ ಫೈಲೀತೆ ಇಮ್ಮಸ್, ಬಿಜಿಖ್ಹಾರಿ ಬಾಜು಼ಮಾಬಿ ವಗ್ಗಿಸ್ ಫೈಲೈನ್ ಮಹಿಮೆ ಹುವಾದೆ.
2TH 3:2 ಅಜು಼ ದೇವ್ ಹಮೂನ ಮೂರ್ಖ್‌ ಹುಯಿರ‍್ಹೂತೆ ಖರಾಬ್ ಅದ್ಮಿನ ಹಾತೇಥಿ ಬಚಾ಼ಡನಿ ಘೋಣಿಬಿ ಪ್ರಾರ್ಥನೆ ಕರೋಕಿ, ಕ್ರಿಸ್ತನು ವಿಶ್ವಾಸ್ ಅಖ್ಖಾಸ್‍ಮ ರ‍್ಹೆಯಿಕೊಯ್ನಿನಿ.
2TH 3:3 ಕತೋಬಿ ಪ್ರಭು ವಿಶ್ವಾಸ್‌ವಾಳೊ, ಯೋ ತುಮೂನ ಶಕತ್ ದೀನ್, ಖರಾಬ್‌ನ ಹಾತ್‌ಮ ಖ್ಹಪಡ್ನುನಾತೆ ಇಮ್‌ ಬಚಾ಼ಡ್‌ಶೆ.
2TH 3:4 ಹಮೆ ಬೋಲ್ಯಾತೆ ಇಮ್‌ ತುಮೆ ಕರುಕರಸ್ ಅಜು಼ ಖ್ಹಾಮ್ಣೇಬಿ ತುಮೆ ಕರ್ಷುಕರಿಬಿ ಪ್ರಭುನೆ ಹಮೂನ ಭರೋಖ್ಹೊ ದೀರಾಖ್ಯೊಸ್.
2TH 3:5 ತುಮೆ ದೇವ್ನಿ ಲಾಡ್‌ಮಾಬಿ ಕ್ರಿಸ್ತನು ಖ್ಹಮಾಳಿಲ್ಯಾವಾಮಾಬಿ ಮಳಾನಿಘೊಣಿ ಪ್ರಭುಸ್ ತುಮೂನ ಚಲಾವದೆ.
2TH 3:6 ಹಮಾರ ಭೈಯೆ ಭೇನೆವೊ, ಕಾಮ್ ಕರಾಕೊಂತೆ ಅಜು಼ ಹಮೆ ಬೋಲ್ಯಾತೆ ಪದತ್ತಿನ ಪಾಡಿನ್ ಚಾ಼ಲಕೊಂತೆ ವಿಶ್ವಾಸಿ ಖ್ಹಾರೇಥಿ ತುಮೆ ದೂರ್ ರ‍್ಹೇಣು. ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನ ನಾಮ್‌ಪರ್‌ ತುಮೂನ ಹುಕುಮ್ ದಿಯೇಸ್.
2TH 3:7 ಹಮೆ ಜಿವ್ಯಾತೆ ಇಮ್ಮಸ್ ತುಮೇಬಿ ಜಿವ್ಣುಕರಿ ತುಮೂನ ಅಛ್ಛಿನಿತರ ಮಾಲುಮ್ ಛಾ಼. ಹಮೆ ತುಮಾರಕನ ಥಾತೆ ತದೆ ಶೋಂಬೇರಿ ಕೋಥಾನಿ.
2TH 3:8 ಫುಗಟ್‌ಥಿ ಹಮೆ ಕಿನಕನಾಬಿ ಖಾಣು ಖಾದಕೊಯ್ನಿ. ತುಮಾರಮ ಕಿನಾಪರ್‌ಬಿ ಹಮೆ ಭಾರೊ ನಾ ನಾಕ್ಣುಕರಿ ಹಮೆ ರಾತ್-ದನ್ ಕಾಮ್ ಅಜು಼ ಮ್ಹಿನತ್ ಕರೀನ್ ಜಿವ್ಣು ಚ಼ಲಾಯ.
2TH 3:9 ತುಮಾರೇಥಿ ದೇಕ್‌ಬಾಲ್ ಕರೈಲ್ಯವಾನ ಹಮೂನ ಹಕ್‍ಕೊಯ್ನಿಕರಿ ಕಾಹೆ, ತುಮೆ ಹಮಾರಿನಿತರ ಚಾ಼ಲಾದೆಕರಿಸ್ ತುಮೂನ ಇಮ್ ದೆಖೈಲಿದಾತೆ.
2TH 3:10 ಇನಖ್ಹಾಜೇಸ್ ಹಮೆ ತುಮಾರ ಜೋ಼ಡೆ ಥಾತೆ ತದೆ, “ಕಾಮ್ ಕರಾಕೊಂತೆ ಯೊ ಖಾಣು ನಾಖಾವ್ಣು” ಕರಿ ಹುಕುಮ್ ದಿದಾಥಾತೆ.
2TH 3:11 ಕತೋಬಿ ತುಮಾರಾಮ ಥೋಡುಜ಼ಣು ಖೆವು ಕಾಮ್‌ಬಿ ಕರುಕರಾಕೊಂತೆ, ಬಿಜಾ಼ನ ಕಾಮ್ಮ ಗೋಡೊ ಘಾಲ್ತುಹುಯಿನ್, ವಳ್‌ಶಿನು ಜಿವ್ಣು ಜಿವ್‌ಕರಾಸ್ ಕರಿ ಹಮೂನ ಖಬರ್‌ಪಡ್ಯು.
2TH 3:12 ಅಥ್ರಾನ ಅದ್ಮಿವ್‌ನ ಹಮೆ ಇವ್ಣು ಕಾಮ್ ಇವ್ಣೇಸ್ ಕರ್ತುಹುಯಿನ್, ಇವ್ಣ ಖಾಣಾನಖ್ಹಾಜೆ ಇವ್ಣೆಸ್ ಕಮಾವ್ಣುಕರಿ, ಹಮೆ ಪ್ರಭು ಯೇಸು ಕ್ರಿಸ್ತನ ನಾಮ್ಮ ಹುಕುಮ್ ದೀನ್ ಅಜು಼ ಬೋಲಿಲಿಯೆಸ್.
2TH 3:13 ಕತೋಬಿ ಹಮಾರ ಭೈಯೆ-ಭೇನೆವೊ, ತುಮೇತೊ, ಅಛ್ಛು಼ ಕರಾಮ ಕದೇಬಿ ಬೇಜಾರ್ ಕರ್ಶು ನಕೊ.
2TH 3:14 ಆ ಚಿಟ್ಟೀಮ ಹಮೆ ತುಮೂನ ಬೋಲುಕರೇತೆ ಕೋಣ್ ಇನ ಮಾನಕೊಯ್ನಿಕಿ, ಇಮ್‌ನಾನಿ ಖ್ಹಣೇದ್ ಕರೀನ್, ಇನ ಖ್ಹರಮ್‌ ಲಾಗಾನಿಘೋಣಿ ಕೋಣ್‌ಬಿ ಇನಿ ಖ್ಹಂಗ್ ನಕೊ ಕರೊ.
2TH 3:15 ಕತೋಬಿ ಇನ ದುಶ್‌ಮನ್ನಿಘೋಣಿ ನಕೊ ಸೋಚೊತೆ ಅನಬದಲ್ ಇನ ವಿಶ್ವಾಸಿ ಭೈ ಕರಿ ಸೋಚಿನ್ ಅಕ್ಕಲ್ ಬೋಲ್.
2TH 3:16 ಶಾಂತಿವಾಳೊ ಪ್ರಭು ಖ್ಹುದ್ ತುಮೂನ ಖ್ಹಾರಿಸ್ ವಖ್ಹತ್‌ಮ ಅಜು಼ ಖ್ಹಾರಿಸ್ ತರ‍್ಹಾಮ ಶಾಂತಿ ದ್ಯವಾದೆ. ಪ್ರಭು ತುಮಾರ ಖ್ಹಾರಸ್ನ ಜೋ಼ಡೆ ರ‍್ಹವಾದೆ.
2TH 3:17 ಪೌಲಕರಿ ಮೇ ಮಾರ ಹಾತೇಥಿಸ್ ತುಮುನ ಖ್ಹಲಾಮ್ನ ಲೀಖುಕರುಸ್. ಮೇ ಆಸ್ ಪರಕ್ ಚಿಟ್ಟೀಮ ಅಮ್ಮಸ್ ರುಜು ಕರುಸ್. ಮೇ ಲೀಖಾನು ತರೀಕ ಆಸ್‌ಹುಯಿರ‍್ಹುಸ್.
2TH 3:18 ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ವಾರ್‌ಖ್ಹೊ ತುಮಾರ ಅಖ್ಖಾಸ್ನಿ ಜೋ಼ಡ್ಮ ರ‍್ಹವಾದೆ.
1TI 1:1 ಕ್ರಿಸ್ತ ಯೇಸುನೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ, ತಿಮೊಥೆನ ಲೀಖ್ಯೋತೆ, ಅಪ್ಣ ಬಚಾ಼ಡವಾಳೊ ದೇವ್‌ಬಿ ಅಪ್ಣಿ ಭರೋಖ್ಹಾನ ಆಧಾರ್ ಹುಯಿರ‍್ಹೋತೆ ಕ್ರಿಸ್ತ ಯೇಸುನಿ ಹುಕುಮ್ನಿಮತ್ ಮೇ ಅಪೊಸ್ತಲ ಹುಯೊ.
1TI 1:2 ವಿಶ್ವಾಸ್‌ಮ ಮಾರೊ ಖ್ಹಾಚೊ಼ ಛಿಯ್ಯಾನಿಘೋಣಿ ಹುಯಿರ‍್ಹೋತೆ ತಿಮೊಥೆನ, ಬಾ ದೇವ್‍ಥಿ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ, ವಾರ್‌ಖ್ಹೊ ಗೋರ್‌ ಅಜು಼ ಶಾಂತಿಬಿ ಮಳಾದೆ.
1TI 1:3 ಮೇ ಮೆಕೆದೋನ್ಯನ ಜಾ಼ವಾನಿ ವಖ್ಹತ್‌ಮ, ತೂ ಎಫೆಸಮಸ್ ರ‍್ಹೆಕರಿ ಗಿಂಗೈಲಿದೊ, ಹಿಜ಼್ಜಾ ಥೋಡು ಜ಼ಣು ಝೂ಼ಟಿ ಭೋತಿ ಬೋಲಿದೆವ್‌ಕರ್ತುಥೂತೆ ಇವ್ಣುನ ಹುಕುಮ್‌ ದೀನ್ ಭೀರಾಕ್‌ಣು ಕರೀಬಿ,
1TI 1:4 ಕೊಂತೆ ಖೇಣಿನಾಬಿ, ಅಜು಼ ಆಗೆಪೀಛೆಕೊಂತೆ ಖಾನ್‌ದಾನೇನಿ ಬಾರೇಮಬಿ ಬೋಲಾನು ಮ್ಹೆಲಿದೇವೊ. ಯೋ ಹುವಾನುಕೊಂತೆ ವಾದ ವಿವಾದ್ನ ಉಠಾಡುಕರಸ್‌ ಪಣ್ಕಿ ಅಪ್ಣೆ ದೇವ್ನಿ ಖ್ಹೂಜ಼್‌ನಿತರ ಕರುಕರ‍್ಯೆಕೊಯ್ನಿ. ಯೋ ವಿಶ್ವಾಸ್‍ಥಿ ಖಲಿ ಹುವಾನು ಹುಯಿರ‍್ಹುಸ್.
1TI 1:5 ಪಾಕ್‌ ದಿಲ್‌, ಅಛ್ಛಿ ಖ್ಹಯಾಲ್, ಶುದ್ಧಮನ್‌ಥೀಬಿ ವಿಶ್ವಾಸ್‍ಥಿ ಪೈದಹುಯುತೆ ಪ್ಯಾರ್ ದೇವ್ನಿ ಹುಕುಮ್‌ನಿ ಶುಶತ್ ಹುಯಿರ‍್ಹಿಸ್.
1TI 1:6 ಥೋಡು ಜ಼ಣು ಆ ಮಾರಗ್‌ನ ಮ್ಹೆಂದಿನ್ ಕಾಮ್ನಕೊಂತೆ ಬುದ್ದಿನ ವಿವಾದ್ಮ ಖ್ಹಪ್ಡಿ ಪಡಿರ‍್ಹುಸ್.
1TI 1:7 ಇವ್ಣೆ ದೇವ್ನಿ ನಿಯಮ್ಮ ಶಿಕಾಡವಾಳು ಹುಯಿರ‍್ಹೇಣು ಕರಿ ಆಖ್ಹ್ ಕರಾಸ್. ಕತೋಬಿ, ಇವ್ಣೆ ಇವ್ಣಿ ಶೊಂತ್ ವಾತೇನ ಪರ್ಖಿಲೇಯಿಕೊಯ್ನಿ. ನತರ್ ಖೆವಿ ಬಾರೇಮಾಬಿ ಇವ್ಣೆ ಆತ್ಮ ವಿಶ್ವಾಸ್‍ಥಿ ಬೋಲಸ್ಕಿ ಇನ ಇವ್ಣೆ ವಿಶ್ವಾಸ್ ಕರಾಕೊಯ್ನಿ.
1TI 1:8 ನಿಯಮ್ನ ಉಪಯೋಗ್ ಕರ್ನುತೆ ತರೀಖಾಮ ಚಾ಼ಲಿಲಿದೋತೊ, ಯೋ ಅಛ್ಛಾ಼ನ ಖ್ಹಾಜೆಸ್ ಕರ‍್ನು.
1TI 1:9 ಆ ಖ್ಹಯಾಲ್ಮ ರಾಕ್ಣು ಕದೆಕದೇಬಿ ನಿಯಮ್ ನೀತಿವಾಳನಖ್ಹಾಜೆ ಬಣಿರ‍್ಹುಕೊಯ್ನಿ. ಕತೋಬಿ ನಿಯಮ್ನ ಪಾಲನ್‌ಕರಕೊಂತೆ ರ‍್ಹವಾಳು, ಅಪರಾದಿ ಹುಯಿರ‍್ಹವಾಳು, ಭಕ್ತಿಕೊಂತೆ ಇವ್ಣೆ, ಪಾಪಿಖ್ಹಾರಾನ, ಅಜು಼ ಪರಿಶುದ್‌ಕೊಂತೆಬಿ, ಆತ್ಮೀಕಕೊಂತೆ ರ‍್ಹವಾಳನ, ಇವ್ಣ ಆಯ ಬಾನ ಮಾರಿನಾಖಸ್ತೆ ಇವ್ಣುನ, ಅಜು಼ ಖೂನಿನ,
1TI 1:10 ಅನೀತಿವಾಳು, ಸಲಿಂಗ್‍ ವ್ಯಬಿಚಾರ್ ಕರವಾಳು, ಚೋ಼ರ್‌ಚ಼ಖಾಟ್ ಕರಾವಾಳು, ಝೂ಼ಟಿಸಾಕ್ಷಿ ಬೋಲವಾಳು, ಕೋಣ್ ಅಛ್ಛಿ ಉಪದೇಶ್‍ನ ವಿರೋದ್ ಹುಯಿರ‍್ಹುಸ್ಕಿ ಇವ್ಣಖ್ಹಾಜೆ ಹುಯಿರುಸ್.
1TI 1:11 ಆ ಸುವಾರ್ತೆ ಯೋಗ್ಯಹುಯಿರೊತೆ ದೇವ್ನಿ ಮಹಿಮೆನ ದೆಖಾವನಿ ಸುವಾರ್ತೆನಿಮತ್ ಛಾ಼. ಆ ಸುವಾರ್ತೆನಿ ಸೇವೆ ಮನ ದೇವೈರ‍್ಹುಸ್.
1TI 1:12 ಮೆ ಮಾರೊ ಪ್ರಭು ಕ್ರಿಸ್ತಯೇಸುನ ಧನ್ಯವಾದ್ ಕರುಸ್. ಯೋ ಮಾರ ಅಖ್ಖಾಸ್ ಕಾಮ್ನ ಶಕತ್ ದೀಮ್ಹೇಲ್ಯೊಸ್ ಇನ ಮೇ ಧನ್ಯವಾದ್ ಕರುಸ್. ಶನಖ್ಹಾಜೆ ಕತೊ ಯೊ ಮನ ವಿಶ್ವಾಸ್‌ವಾಳೊ ಕರಿ ಮಾಲುಮ್‌ ಕರಿಲಿನ್, ಇನ ಸೇವೆನಖ್ಹಾಜೆ ಚೂ಼ಣಿರಾಖ್ಯೊಸ್.
1TI 1:13 ಅಗಾಡಿ ಮೇ ಕ್ರಿಸ್ತನಿ ವಿರೋದ್ ವಾತೆ ಬೋಲಿನ್, ಇನ ಖ್ಹತೈರಾಖ್ಯೋಸ್ ಅಜು಼ ಇನಿ ಖ್ಹರಮ್‌ಬಿ ಕಾಡಿರಾಖ್ಯೊಸ್. ಶನಕತೊ, ಮೇ ತದೆ ಅವಿಶ್ವಾಸ್‌ಮ ಥೊ, ಇನಖ್ಹಾಜೆ ಮೇ ಶಾತ್‌ ಕರುಕರೂಸ್ ಕರಿ ಮನ ಮಾಲುಮ್ ಕೋ ಥೂನಿ. ತೋಬಿ ದೇವ್ನೆ ಮಾರಪರ್ ಗೋರ್‌ ಕರಿರಾಖ್ಯೋಸ್.
1TI 1:14 ಪ್ರಭುನೆ ಇನಿ ಕೃಪೆನ ಕೆತ್ರೇಕ್ಕಿ ಜಾ಼ಖ್ಹತ್ ಮಾರಪರ್ ರಂಚ್ಯೊ. ಇನಿ ವಿಶ್ವಾಸ್ ಅಜು಼ ಪ್ಯಾರ್‌ನ ದಿದೊ. ಯೋ ಅಪ್ಣೊ ಯೇಸುಕ್ರಿಸ್ತನ ಮಳಿರ‍್ಹವಾಮ ಛಾ಼.
1TI 1:15 ಕ್ರಿಸ್ತ ಯೇಸು ಪಾಪಿ ಖ್ಹಾರಾನ ಬಚಾ಼ಡನಖ್ಹಾಜೆ ಆ ಜಗತ್‌ಮ ಆಯೊ ಕರಿ ಬೋಲಾನಿ ವಾತೆ ಖ್ಹಾಚಿ ಹುಯಿರ‍್ಹಿಸ್, ಆ ವಿಶ್ವಾಸ್‌ ಕರಾಖ್ಹರ್ಕುಬಿ ಸ್ವಿಕಾರ್‌ಕರಾನ ಲ್ಹಾಯೇಕ್ನುಬಿ ಹುಯಿರ‍್ಹುಸ್. ಶನಕತೊ ಇಮ್ನ ಪಾಪಿಮ ಮೇಸ್ ಪಹಿಲೊ.
1TI 1:16 ಕತೋಬಿ ಅನ ಅಗ್ಗಳ್ ಹರ್‌ಹಮೇಶಾನಿ ಜಿ಼ಂದ್‌ಗಿನಖ್ಹಾಜೆ ಇನಪರ್ ವಿಶ್ವಾಸ್‌ಕರವಾಳನ ಮಾಲುಮ್‌ಪಡಾದೆಕರಿ ಕ್ರಿಸ್ತ ಯೇಸು ಪಾಪಿಮ ಮುಖ್ಯಥೋತೆ ಮನ ಗೋರ್‌ಕರಿನ್, ಇನಿ ಪೂರ ಸಮಾಧಾನ್‌ಥಿ ದೇಖಿಲಿದೊ.
1TI 1:17 ಅಖ್ಖ ಜ಼ಮಾನಾನೊ ರಾಜ಼ಬಿ, ಕದೇಬಿ ರ‍್ಹವಾಳೊಬಿ ದೆಖಾವಕೊಂತೆ ಹುಯಿರೋತೆ ಎಕ್ಕಸ್ ದೇವ್ನ ಇಜ಼್ಜತ್‌ಬಿ ಮಹಿಮೆಬಿ ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ. ಆಮೆನ್.
1TI 1:18 ತಿಮೊಥೆ, ಮಾರ ಛಿಯ್ಯಾ, ಮೇ ತುನ ಹುಕುಮ್‌ ದೆವ್‍ಕರೂಸ್ ವಚನ್ನಿಘೋಣಿ ಪಹಿಲೇಥುಸ್ ತಾರಿ ಬಾರೇಮ ಪ್ರವಾದನೆ ಹುಯಿರುಸ್. ಯೋ ಅವಾಜ಼್‌ನ ತಾರಿ ಕಫ್ಫನ್ ಬಣೈಲೆ, ಅನೇಥಿ ತೂ ಮೋಟಿ ಜಂಗ್ ಭೀಡಾನಿತರ ಹುವಾದೆ.
1TI 1:19 ತಾರಿ ವಿಶ್ವಾಸ್‌ನಾಬಿ ಅಛ್ಛಿ ದಿಲ್ನಿ ಸಾಕ್ಷಿನಾಬಿ ಘಟ್‍ಥಿ ಧರಿರಾಕ್. ಥೋಡುಜ಼ಣು ಇವ್ಣಿ ಮನ್ನಿ ಅಛ್ಛಿಸಾಕ್ಷಿನಿ ವಿಶ್ವಾಸ್ ನಾಶ್‌ಕರಿನಾಖ್ಯು.
1TI 1:20 ಹುಮೆನಾಯಬಿ ಅಲೆಕ್ಸಾಂಡರ‍್ನೆ ಅಮ್ಮಸ್ ಕರ‍್ಯಾಥ. ಅವ್ಣೆ ದೇವ್ನ ವಿರೋದ್ ನಾ ಬೋಲ್ನುತೆ ಬರೋಬರ್‌ನಿ ಅಕ್ಕಲ್ ಶಿಕಾದೆಕರಿ ಮೇ ಇವ್ಣುನ ಶೈತಾನ್ನ ಹಾತ್‌ಮ ಒಪ್‌ಶೈದಿದೊ.
1TI 2:1 ಖ್ಹಾರೇಥಿ ಪಹಿಲೆ, ತಮಾಮ್‌ ಅದ್ಮಿನಖ್ಹಾಜೆ ಬಿಂತಿ ಅಜು಼ ಪ್ರಾರ್ಥನೆ ಕರೊ. ಅಖ್ಖಾ ಅದ್ಮಿವ್‌ನಖ್ಹಾಜೆ ದೇವ್‌ಕನ ಅವಾಗ್‌ಮಾಂಡೊ ಅಜು಼ ದೇವ್ನ ಧನ್ಯವಾದ್ ಕರೊಕರಿ ತುಮೂನ ಬೋಲಿಲೆವುಸ್.
1TI 2:2 ರಾಜಾ಼ವ್‌ನಟೇಕೆ, ಖ್ಹಾರ ಅದಿಕಾರಿನಟೇಕೆ ಧನ್ಯವಾದ್. ಅನೇಥಿ ಅಪ್ಣೆ ಸಮಾಧಾನ್ ಶಾಂತಿನ ದೇವ್ನ ಭರ್‌ಪೂರ್‌ ಮರ್ಯಾದಿ ದೇತಹುಯಿನ್ ಅಛ್ಛಿಜೀವನ್ ಚ಼ಲಾವನಖ್ಹಾಜೆ,
1TI 2:3 ಆ ಹೈರುತೆ ಅಛ್ಛು಼ ಅಜು಼ ಅಪ್ಣೊ ರಕ್ಷಕ್ ಹುಯಿರೋತೆ ದೇವ್ನ ಪಸಂದ್‍ನು ಹುಯಿರುಸ್.
1TI 2:4 ಯೊ ತಮಾಮ್‌ ಅದ್ಮಿ ರಕ್ಷಣೆಲೀನ್ ಅಜು಼ ಖ್ಹಾಚಿನ ಪರಖ್‌ಣು ಕರಿ ಬೋಲಾನುಸ್ ಇನಿ ಆಖ್ಹ್.
1TI 2:5 ಶನಕತೊ ಎಕ್ಕಸ್ ದೇವ್ ಅಜು಼ ದೇವ್‌ನಬಿ ಅದ್ಮಿನ ಮಳಾವವಾಳೊ ಎಕ್ಕಸ್ ಜ಼ಣೊ, ಯೋ ಕೋಣ್‌ಕತೊ ಅದ್ಮಿ ಹುಯಿರ‍್ಹೋತೆ ಕ್ರಿಸ್ತ ಯೇಸುಸ್.
1TI 2:6 ಇನೆ ಹರೇಕ್ ಜ಼ಗ್‌ಜಾ಼ತ್ನ ಅದ್ಮಿನ ಬಚಾ಼ಡಾನಖ್ಹಾಜೆ ಛೋ಼ಡಾವನಟೇಕೆ ಇನ ಯೋಸ್ ಒಪ್‌ಶೈದಿದೊ. ಯೋ ಹರೇಕ್ ಅದ್ಮಿನ ಬಚಾ಼ಡನ ಹರ್ಖ್ಹಾಸ್. ಆಸ್ ಬರೋಬರ್‌ನಿ ವಖ್ಹತ್‌ಮ ಬೋಲ್ನುತೆ ಸಬೂತ್ ಹುಯಿರುಸ್.
1TI 2:7 ಅಜು಼ ಅನಖ್ಹಾಜೆಸ್ ಮನ ಶಿಕಾಡವಾಳೊ ಅಜು಼ ಅಪೊಸ್ತಲ ಕರೀನ್, ವಿಶ್ವಾಸ್‌ಥಿಬಿ ಖ್ಹಾಚಿಥಿಬಿ ಯೆಹೂದ್ಯರ್‌ಕಾಹೆತೆ ಅದ್ಮಿನ ಭೋದನೆಕರಾನ ಮನ ನೇಮಕ್ ಕರ‍್ಯು. ಮೇ ಝೂ಼ಟಿ ಕೊಬೋಲುಕರುನಿ ಖ್ಹಾಚಸ್ ಬೋಲುಕರುಸ್.
1TI 2:8 ಅನಖ್ಹಾಜೆ ಅಖ್ಖಿ ಝ಼ಗೋಮ ಪರ್ಖ್ಹೊ ಖ್ಹಾರು ಇರಾದೊಕೊಂತೆ, ಆಡ್‌ಫೇಡ್ ಬೋಲ್ನುನಾತೆ, ಹಾತ್ನ ಪಾಡಿನ್ ದೇವ್‍ಥಿ ಸಮರ್ಪಣ್‌ ಹುಯಿನ್ ಪ್ರಾರ್ಥನೆ ಕರ‍್ನುಕರಿಸ್ ಮಾರಿ ಆಖ್ಹ್ ಹುಯಿರ‍್ಹಿಸ್.
1TI 2:9 ಅಮ್ಮಸ್ ತಯೇಡಾಬಿ ಮರ್ಯಾದಿಥಿಬಿ ಅಜು಼ ಗ್ರಿಸ್ತಿಥಿರ‍್ಹೀನ್ ಇಜ಼್ಜತ್‌ನ ಮಾನಿಜಾ಼ವನು ಲುಂಗ್ಡಾನ ಫೇರ‍್ನುಕರಿ ಆಖ್ಹ್‌ ಕರುಸ್. ಇವ್ಣೆ ಘಣಿಥರಾಥಿ ಕೇಖ್ಹ್‌ನು ಶನ್‌ಗಾರ್, ಖ್ಹೊನ್ನುಖ್ಹರಪ್‌ಥಿ ಶನ್‌ಗಾರ್, ಲುಂಗ್ಡಚಿತ್ರಾಥಿಸ್ ಶನ್‌ಗಾರ್ ನಾಕರಿಲೇವ್ಣುತೆ,
1TI 2:10 ದೇವ್ನಿವಿಶ್ವಾಸಿ ತಯೇಡಾನ ರ‍್ಹೇವ್ಣುತೆ ಚಾ಼ಲ್‌ಚ಼ಲಣ್ಣ ಅಛ್ಛಾ಼ಕಾಮ್‌ಥಿ ಶನ್‌ಗಾರ್ ಕರಿಲೇವ್ಣು.
1TI 2:11 ಅಜು಼ ತಯೇಡ ಶಪೋಥಿಬಿ ಅಚಾ಼ನ್‌ಥಿಬಿ ಭೊದನೇನ ಶಿಕಾವಳಿ ಹುಯಿರ‍್ಹೇಣು.
1TI 2:12 ಮೇ ಪರ್ಖ್ಹಾವ್‌ನ ಬೋಲಿದ್ಯವಾನು ರ‍್ಹವೊ, ಇವ್ಣಪರ್ ಹಕ್‌ಚ಼ಲಾವನು ರ‍್ಹವೊ ತಯೇಡಾನ ಮ್ಹೇಲುಕೊಯ್ನಿ. ಇವ್ಣೆ ಖ್ಹೊಪೇಥಿ ರ‍್ಹೇಣು.
1TI 2:13 ಪಹಿಲೆ ಬಣ್ಯೋತೆ ಆದಾಮ್, ಇನಪಾರ್ ಹವ್ವ ಬಣೀತೆ.
1TI 2:14 ಅಜು಼ ಧೋಕ ಹುಯುತೆ ಆದಾಮ್ ಕಾಹೆ; ತಯೇಡ ಧೋಕ ಹುಯಿ, ಅಜು಼ ಯೋ ದೇವ್ನಿ ನಿಯಮ್ನ ತೋಡಿನ್ ಪಾಪಿ ಹುಯಿ.
1TI 2:15 ತೋಬಿ ತಯೇಡ ವಿಶ್ವಾಸ್‌ಮ, ಪ್ಯಾರ್‌ಮ, ಪವಿತ್ರಾಥಿ ರ‍್ಹವಾಮ ಅಜು಼ ಧೋಬೆಡಿ ರ‍್ಹಯೀತೊ, ಲಡ್ಕಾ ಪೈದಹುವಾನಿ ವಖ್ಹತ್‌ಮ ಬಚಿಜಾಶೆ.
1TI 3:1 ಆ ಬೋಲಾನು ವಿಶ್ವಾಸ್‍ನು ಹುಯಿರುಸ್. ಏಕ್‌ ವಖ್ಹತ್ ಅದ್ಮಿನ ಅಛ್ಛೊ಼ ಘಲ್ಡೊಹೊಣುಕತೊ ಯೋ ಅಛ್ಛು಼ ಕಾಮ್ ಕರಾನ ಹರಖ್ಹ್ ಕರಾಸ್.
1TI 3:2 ಸಬೆನ ಚ಼ಲಾವವಾಳೊ ಗಲ್ತಿ ನಾಕರಾವಾಳೊ ಹುಯಿರ‍್ಹೇಣು. ಇನು ಯೋ ದಾಬುಕ್ಮ ರ‍್ಹವಾಳೊ ಹುಯಿರ‍್ಹೇಣು, ಆತ್ಮಾನ ಖ್ಹಮಾಳಿಲ್ಯವಾಳೊ, ಅಛ್ಛಿ ಚಾ಼ಲ್ ಚ಼ಲಣ್‍ಥಿ ರ‍್ಹವಾಳೊ, ಆವವಾಳಾನ ಸ್ವಾಗತ್‌ಕರವಾಳೊ, ಅಜು಼ ವಚನ್ ಶಿಕಾಡಾಮ ಚಾ಼ತುರ್ ಹುಯಿರ‍್ಹೇಣು.
1TI 3:3 ಯೋ ಪೀನ್ ಲಡೈ ಕರಾವಾಳೊ ನಾ ಹುಯಿರ‍್ಹೇಣು, ನತರ್‌ಕಿ ಮಾರ್‌ತೋಡ್ ಕರಾವಾಳೊಸ್ಕಿ ನಾ ಹುಯಿರ‍್ಹೇಣು, ಕತೋಬಿ ಯೋ ಶೇದೇವ್‌ನಿಘೋಣಿ ಅಜು಼ ಸಮಾಧಾನ್‌ಥಿ ರ‍್ಹೇಣು; ಇನ ಪೈಶಾನಿ ಲಾಲಚ್‌ ನಾ ರ‍್ಹೇಣು.
1TI 3:4 ಯೋ ಇನ ಘರ್‌ವಾಳಾನ ಬರೊಬರ್‌ಥಿ ಚ಼ಲಾವವಾಳೊ ಅಜು಼ ಇನ ಲಡ್ಕಾ ಇನಿ ವಾತೇನ ಖ್ಹಮ್‌ಜಿನ್‌, ಮರ್ಯಾದಿ ದ್ಯವಾನಿಘೊಣಿ ದೇಖಿಲೆವ್ಣು.
1TI 3:5 ಶೊಂತ್ ಘರ್‌ವಾಳಾನಸ್ ಚ಼ಲಾವಾನ ಇನ ನಾ ಹುಯೂತೊ, ದೇವ್ನಿ ಸಬೆನ ಯೋ ಕಿಮ್ ಚ಼ಲಾವ್‌ಷೆ?
1TI 3:6 ಯೋ ನವೇಥಿ ದೇವ್ನ ನಂಬ್ಯೂತೆ ಅದ್ಮಿ ನಾ ಹುಯಿರ‍್ಹೇಣು, ನವೇಥಿ ನಂಬವಾಳಾನ ಸಬೆ ಚ಼ಲಾವಾನು ಕಾಮ್ ದಿದಾತೊ, ಇನಾಮ ಹಂಕಾರ್ ಐನ್, ಶೈತಾನ್ನ ಹುಯೂತೆ ಇಮ್ನಿ ದಂಡನೆ ಇನಾಬಿ ಹುಯಿಜಾ಼ಶೆ.
1TI 3:7 ಎತ್ರೇಸ್ ಕಾಹೆತೆ, ಯೋ ಭಾರ್‌ಲ್ಯ ಅದ್ಮಿಥಿ ಆಛ್ಛೊ಼ ಕರಿ ಬೊಲೈಲ್ಯವಾಳೊ ಹುಯಿರ‍್ಹೇಣು, ಇಮ್‌ ನಾ ರ‍್ಹಯೋತೊ ಅದ್ಮಿಖ್ಹಾರು ಇನಾಪರ್ ಗಲತ್‌ ಲಗಾಡಿ ದಿಶೆ ಅಜು಼ ಯೋ ಶೈತಾನ್ನ ಚ಼ಪ್ಪಣ್‌ಮ ಖ್ಹಪ್‌ಡಿಜಾ಼ಶೆ.
1TI 3:8 ಇಮ್ಮಸ್ ಸಬೇಮ ಸೇವಕ್‌ರಾವಾಳೂಬಿ ಮರ್ಯಾದಿ ಲೀಲ್ಯಾವನ ಯೋಗ್ಯ ಹುಯಿರ‍್ಹೇಣು. ಅಜು಼ ಇವ್ಣೆ ಬೇಜೀಬ್‌ವಾಳು. ಇವ್ಣೆ ಪಿಯಾವಾಳುಸ್ಕಿ ಅಜು಼ ಪೈಶಾನಿ ಲಾಲಚ್‌ಮ ನಾ ರ‍್ಹೇಣು.
1TI 3:9 ವಿಶ್ವಾಸ್‌ನಿ ಗಧಾರ‍್ನ ಖ್ಹಾಚಿನ ಅಛ್ಛಿ ದಿಲ್ನಿಸಾಕ್ಷಿನ ಧರಿರಾಖವಾಳ ಹುಯಿರ‍್ಹೇಣು.
1TI 3:10 ಪಹಿಲೆ ಇವ್ಣುನ ತರೀಪ್‌ಶ ಕರಿಲೇವ್ಣು, ಕೋಣ್‌ಬಿ ಇವ್ಣಾಪರ್ ಗಲತ್‌ ನಾಲಗಾಡ್ಯೂತೊ, ಇವ್ಣೆ ಸಬೇಮ ಸೇವಕ್ ಹುಯಿನ್ ಕಾಮ್ ಕರೆಜಾ಼ಯ್.
1TI 3:11 ಇಮ್ಮಸ್ ಇವ್ಣಿ ಬಾವಣ್‌ಬಿ ಚಾ಼ಲ್‌ಚ಼ಲಣ್‍ಮ ಅಛ್ಛಿ ರ‍್ಹಹವಾಳಿಯೆ ಹುಯಿರ‍್ಹೇಣು ಅಜು಼ ಚ಼ಹಾಡ್ ಬೋಲವಾಳಿಯೆ ನಾ ಹುಯಿರ‍್ಹೇಣು; ಅಛ್ಛೇಥಿ ಚಾ಼ಲ್‌ವಾಳಿ ಹುಯಿರ‍್ಹೇಣು ಅಜು಼ ಇವ್ಣೆ ಹರೇಕ್‌ಮ ವಿಶ್ವಾಸ್‌ವಾಳಿಬಿ ಹುಯಿರ‍್ಹೇಣು.
1TI 3:12 ಸಬೇಮ ಸೇವೆ ಕರಾವಾಳೊ ಏಕ್‌ ಬಾವಣ್‌ವಾಳೊ ಹುಯಿರ‍್ಹೇಣು, ಇನ ಲಡ್ಕಾನ ಅಜು಼ ಘರ್‌ವಾಳಾನ ಬರೊಬರ್‌ಥಿ ಚ಼ಲಾವವಾಳೊ ಹುಯಿರ‍್ಹೇಣು.
1TI 3:13 ಸಬೇಮ ಅಛ್ಛಿನಿತರ ಸೇವೆ ಕರಾವಾಳು ಸೇವಕರ್‌ನ ಘಣು ಮರ‍್ಯಾದಿ ಮಳಾಸ್, ಅನೇಥಿ ಇವ್ಣೆ ಕ್ರಿಸ್ತ ಯೇಸುಪರ್ ರಾಖಿಮ್ಹೆಲಾನು ವಿಶ್ವಾಸ್‌ನ ಘಣು ಭಾಲಿಥಿ ಬೋಲವಾಳು ಹುಯಿರ‍್ಹೇಸ್.
1TI 3:14 ಮೇ ಭರೋಖ್ಹಾಥಿ ಆ ಚಿಟ್ಟಿ ಲೀಖುಕರುಸ್ ಒಗ್ಗಿಸ್‌ಮ ತಾರಕನ ಆವಾಳೊ ಛು಼.
1TI 3:15 ಕತೋಬಿ ಏಕ್‌ಬಾರ್ ಮನ ಆವಾನ ಧೇರ್ ಹುಯುತೋಬಿ, ಆ ಚಿಟ್ಟಿ ಮನ ಖ್ಹಮ್‍ಜಾ಼ಡಸ್ತೆ ತಿಮ್ ದೇವ್ನ ಘರ್‌ಮ ಯೊ ಜಿವ್ತೊ ದೇವ್ನಿ ಸಬೆಮ ಚಾ಼ಲಿಲೇವ್ಣುತೆ ಪರಕ್ ಕಿಮ್‌ರ‍್ಹೇಣು, ಯೋ ಸಬೆ ಖ್ಹಾಚಿನು ಹದಿಪಾಯ ಅಜು಼ ಆಧಾರ್‌ನು ಖಂಬು ಹುಯಿರ‍್ಹೂಸ್.
1TI 3:16 ಅಪ್ಣ ದೇವ್‌ಮ ಭಕ್ತಿನು ಜಿವ್ಣನು ಖ್ಹಾಚಿ ಗಪ್ಲತ್ ಗುಮಾನಿಕೊಂತೆ ಘಣಿ ಮೋಟಿ ಹುಯಿರ‍್ಹೀಸ್, ಕ್ರಿಸ್ತನೆ ಅದ್ಮಿನಿ ರೂಪ್‌ಮ ಅಪ್ಣುನ ದೆಖಾಯೊ, ಯೋಸ್ ಪವಿತ್ರಾತ್ಮನ ವತಾಳ್ಯೊ, ಸೊರ್ಗಾನ ದೂತರ್‌ಥಿ ದೆಖೈಗು. ಅಲ್ಹಾವ್‌ಅದ್ಮಿವೋನಿ ಬೀಚ್ಮ ಯೊ ಬೋಲಿವತಾಳೈಗೊ, ಜಗತ್‌ ಇನಾಪರ್ ವಿಶ್ವಾಸ್ ಕರ‍್ಯು, ಅಜು಼ ಇನ ಮಹಿಮೆಥಿ ಸೊರ್ಗಾಮ ಪಡೈಗೊ.
1TI 4:1 ಕತೋಬಿ ಪವಿತ್ರಾತ್ಮ ಅಛ್ಛಿಂತರ ಬೋಲಾಸ್. ವಳ್ಯಾವಸ್ತೆ ದನೂಮ, ಥೋಡು ಅದ್ಮಿ ವಿಶ್ವಾಸ್‌ನ ಮ್ಹೆಂದಿಶೆ. ಅವ್ಣೆ ಠಗಾರುಆತ್ಮನಿ ಹುಕುಮ್‌ನ ಪಾಲನ್‍ ಕರ್ಶೆ. ಅಜು಼ ಶೈತಾನ್ ಶಿಕಾಡಿದೇಸ್ತೆ ಪರಕ್ಮ ಇವ್ಣೆ ಚಾ಼ಲ್‌ಷೆ.
1TI 4:2 ಝೂ಼ಟಿ ಭೋದನೆ ಶಿಕಾಡವಳು, ಇವ್ಣಿ ದಿಲ್ನಿಸಾಕ್ಷಿಪರ್‌ ದಾಗ್‌ನಾಖಿಲಿನ್.
1TI 4:3 ಇವ್ಣೆ ವ್ಯಹಾ ಕರಾನು ಗಲತ್‌ ಕರೀಬಿ, ಖ್ಹಣೇದ್ ಕರ‍್ಯುಹುಯು ರಾಛ಼ನ ನಾ ಖಾವ್ಣುಕರಿ ಇವ್ಣೆ ಶಿಕಾಡಸ್. ಕತೋಬಿ ವಿಶ್ವಾಸ್‌ಮ ರ‍್ಹೀನ್, ಖ್ಹಾಚಿನ ಪರ್ಖಿರಾಖ್ಯೂತೆ ಇವ್ಣೆ ಧನ್ಯವಾದ್ ಕರೀನ್, ಯೋ ಖಾಣನ ಖಾವದೆ, ಶನಕತೊ ದೇವ್ನೆ ಖಾವಾನಟೇಕೆಸ್‌ ಯೋ ಖ್ಹಾರು ಬಣೈರಾಖ್ಯೋಸ್ತೆ.
1TI 4:4 ಶನಕತೊ ದೇವ್ನೆ ಬಣೈರಾಖ್ಯೋಸ್ತೆ ಖ್ಹಾರು ಅಛ್ಛೂ಼ಸ್ ಹುಯಿರ‍್ಹೂಸ್; ಕೆಹು ಖಿವು ಖಾದುತೋಬಿ, ದೇವ್ನ ಧನ್ಯವಾದ್ ಕರೀನ್ ಲೇವ್ಣು.
1TI 4:5 ಶನಕತೊ ದೇವ್ನಿ ವಚನ್ ಬೋಲಿನ್, ಪ್ರಾರ್ಥನೆಕರಾಥಿ ಯೋ ಖಾಣು ಪಾಕ್‌ ಹುಯಿಜಾ಼ಸ್.
1TI 4:6 ಏಕ್‌ ವೇಳ್ಮ ಹಿಜ಼್ಜಾನು ವಿಶ್ವಾಸಿ ಭೇನೆಭೈಯೇವ್‌ನ ಬೋಲಿದೆವ್ಣುಕತೊ ತೂ ಕ್ರಿಸ್ತಯೇಸುನೊ ಅಛ್ಛೊ಼ ಸೇವಕ್ ಹುಯಿರ‍್ಹೀಶ್. ಇನ ಪಾಳಿ ಪರ್ವೇಶಿ ಕರಾನು ವಿಶ್ವಾಸ್‍ಥಿ ಖ್ಹಾಚಿ ಬೋಧನೆಥಿ ಹುವಾಸ್. ಇನ ತೂ ಲೀರಾಖ್ಯೊಸ್.
1TI 4:7 ಕತೋಬಿ ಅಜ್ಜ ಅಜ್ಜಿ ಬೋಲಾತೆ ಲೋಕ್‌ನಿ ಖೇಣಿಯೇಥಿ ತೂ ದೂರ್‌ರ‍್ಹೇ. ಭಕ್ತಿಥಿ ರ‍್ಹವಾನ ಜಿವ್ಣನ ಚ಼ಲಾವನಖ್ಹಾಜೆ ತಾರು ತೂಸ್ ಶಿಕಿಲೆ.
1TI 4:8 ಶರೀರ್‌ನಿ ವ್ಯಾಯಮ್‍ಥಿ ತುನ ಥೋಡು ಫಾಯಿದೊ ಛಾ಼, ಕತೋಬಿ ಭಕ್ತಿನು ಜಿವ್ಣು ಹರೇಕ್ ಪರಕ್‍ಮಾಬಿ ತುನ ಫಾಯಿದೊ ಹುಯಿರುಸ್. ಶನಕತೊ, ಅನಾಮ ಹಮ್ಕೇನು ಹಗಾಮ್ ಅಜು಼ ಖ್ಹಾಮ್ಣೆ ಆವಾನ ಜಿ಼ಂದ್‌ಗೀನಖ್ಹಾಜೆ ದೆವೈರ‍್ಹೂತೆ ವಾಗ್ದಾನ್ ಅನಾಮ ಮಳೀರ‍್ಹುಸ್.
1TI 4:9 ಆ ಬೋಲ್ಯೊತೆ ಖ್ಹಾಚು಼ ಹುಯಿರುಸ್ ಅಜು಼ ಆ ವಾತೆ ಭರ್‌ಪೂರ್‌ಥಿ ಸ್ವೀಕಾರ್ ಕರಾನ ಅಜು಼ ವಿಶ್ವಾಸ್ ಕರಾನ ಯೋಗ್ಯ ಹುಯಿರುಸ್.
1TI 4:10 ಅಜು಼ ಹಮೆ ಕಠಣ್‍ಥಿ ಖ್ಹಮಾಳಿನ್ ವಾಖ್ಯೊ ಪಡುಕರ‍್ಯೇಸ್. ಹಮೆ ಹಮಾರ ಭರೋಖ್ಹಾನ ಜಿವ್ತ ದೇವ್ನ ಉಪ್ಪರ್ ರಾಖಿಮ್ಹೇಲ್ಯಸ್. ಯೋ ಅಖ್ಖಾನ ಬಚಾ಼ಡವಾಳೊ ಅಜು಼ ಜಾ಼ಖ್ಹತ್ ವಿಶ್ವಾಸ್ ಕರವಾಳನ ರಕ್ಷಕ್ ಹುಯಿರೋಸ್.
1TI 4:11 ಆ ಖ್ಹಾರಿ ಬಾರೇಮ ಇವ್ಣುನ ಹುಕುಮ್ ಕರ್‌ ಅಜು಼ ಶಿಕಾಡ್.
1TI 4:12 ತೂ ಜಾ಼ನ್ಜ಼ಮಾನ್ ಹುಯಿರೋಸ್ ಇನಖ್ಹಾಜೆ ತುನ ಕೀಳ್‍ಥಿ ನಕೊ ದೇಖಾದೆ. ಕತೋಬಿ ವಿಶ್ವಾಸಿಖ್ಹಾರನ ವಾತೆಚೀತೇಮ, ಚಾ಼ಲ್ ಚ಼ಲಣ್‌ಮ, ಪ್ಯಾರ್ ಅಜು಼ ವಿಶ್ವಾಸ್‌ನ ಪರಿಶುದ್ ಜೀವನ್‍ಥಿ ಮತಲಬ್ ಹುಯಿರ‍್ಹೆ.
1TI 4:13 ಮೇ ಆವಾತೋಡಿ, ತೂ ಅಖ್ಖಾನ ಖ್ಹಾಮ್ಣೆ ವಚನ್‌ ಪಢಾಮ, ಬೋಲಿದ್ಯವಾಮ ಅಜು಼ ಶಿಕಾಡಾಮ ಹುಮ್ಮಖ್ಹ್‌ಥಿ ರ‍್ಹೇ.
1TI 4:14 ತುನ ಮಳಿರ‍್ಹೀತೆ ಕೃಪೆನ ಝಿಟ್ಕಾರ್‌ ನಕೊ, ಯೋ ವರ ಸಬೇನು ಘಲ್ಡುಖ್ಹಾರು ಪ್ರವಾದನೇನಿ ಜೋಡ್ಮ ತಾರಪರ್ ಹಾತ್ ಮ್ಹೇಲಾಥಿ ಯೋ ತುನ ಮಳಿರ‍್ಹೂಸ್‌.
1TI 4:15 ಆ ವಾತೆವ್ಮ ತೂ ಮಳೀರ‍್ಹೆ ಅನೇಥಿ ಭಡಾನು ಅಖ್ಖಾ ಅದ್ಮಿವ್‍ನ ಖ್ಹಾಮ್ಣೆ ದೆಖಾವ್‌ಶೆ.
1TI 4:16 ತಾರಿ ಜಿವ್ಣು ಅಜು಼ ಬೋಧನೆಪರ್ ವಿಶೇಷ್‌ಥಿ ಖ್ಹಯಾಲ್ ರಾಕ್. ಆ ಅಖ್ಖಾನ ಕರ್ತೊಸ್ ರ‍್ಹೇ, ಶನಕತೊ ತೂ ಕರ್ತೊ ರ‍್ಹಿಯೋತೊ ಅನೇಥಿ ತೂ ತುನಾಸ್ ಅಜು಼ ಕೋಣ್ ಆ ವಾತ್ನ ಖ್ಹಮ್‌ಜಾ಼ಸ್ಕಿ ಇವ್ಣುನಾಬಿ ಬಚಾ಼ಡಿಶ್.
1TI 5:1 ಬುಢಾ ಅದ್ಮಿನ ಗುರ್‌ಕಾವ್‍ನಕೋತೆ, ಇವ್ಣುನ ತಾರ ಬಾನಿಮತ್ ಕರಿ ಸೋಚೊ, ಜಾ಼ನ್ಜ಼ಮಾನ್ ಪರ್ಖ್ಹಾವ್‌ನ ಭೈಯೇನಿಘೋಣಿ ಇವ್ಣುನ ಅಕ್ಕಲ್ ಬೋಲಿಒತಾಳ್‌.
1TI 5:2 ಬುಢಿಯಾ ಬಾಯ್ಕಾವ್‌ನ ಆಯಾನಿಮತ್ ಅಜು಼ ಜಾ಼ನ್ಜ಼ಮಾನ್ ತಯೇಡಾವ್‌ನ ಪಾಕ್‌ಮನ್‌ಥಿ ನ್ಹಾನಿ ಭೇನ್ ಮೋಟಿಭೇನೆವ್ನಿ ಮತ್ ದೇಕ್ಣು, ಇವ್ಣ ಜೋ಼ಡೆ ಪಾಕ್‌ಮನ್‌ಥಿ ಚಾ಼ಲಿಲೇವ್ಣು.
1TI 5:3 ದಿಕ್‌ದೆಶಾರ್‌ಕೊಂತೆ ಮುಂಡಚ್ಚಿ ತಯೇಡಾವ್‌ನ ಖ್ಹದ್ದರ್‌ ಕರೊ, ಶನಕತೊ ಇವ್ಣುನ ಖ್ಹಾಚಮಾಬಿ ಇನು ಜ಼ರೂರತ್ ಛಾ಼.
1TI 5:4 ಕತೋಬಿ ಏಕ್‌ ಮುಂಡಚ್ಚಿನ ಲಡ್ಕಾ ನತರ್ ನಾತಿಪೋತಿ ರ‍್ಹಯೂತೊ, ಇವ್ಣೆಸ್ ಪಹಿಲೆ ಭಕ್ತಿನ ಜಿವ್ಣಮ ಚಾ಼ಲಿಲಿನ್, ಇನ ಘರ್‌ವಾಳಾನ ದೇಖಿಲ್ಯವಾನು ಶಿಕಿಲೇವ್ಣು. ಇವ್ಣುನ ಹೋಣುತೆ ಆಯ-ಬಾನ ಅಜು಼ ಇನ ಅಜ್ಜ ಅಜ್ಜಿನ ಚಾ಼ಕ್ರಿ ಕರಾವಾಳ ಹುಯಿರ‍್ಹೇಣು ಆ ದೇವ್ನ ಪಸಂದ್‍ನು ಹುಯಿರುಸ್.
1TI 5:5 ಖ್ಹಾಚಮಾಬಿ ದಿಕ್‌ದೆಶಾರ್‌ ಕೊಂತೆ ಏಕ್‌ ಮುಂಡಚ್ಚಿ ರ‍್ಹಯೀತೊ, ಯೋ ದೇವ್‌ಪರ್‌ ಇನೊ ಭರೋಖ್ಹೊ ನಾಖಿನ್, ಇನಿ ಮದತ್ನಖ್ಹಾಜೆ ದನ್-ರಾತ್ ದೇವ್ನ ಪ್ರಾರ್ಥನೆ ಕರಾವಾಳಿ ಹುಯಿರ‍್ಹೇಣು.
1TI 5:6 ಕತೋಬಿ ಏಕ್‌ ಮುಂಡಚ್ಚಿ ಬಿಜ಼ ಪರ್ಖ್ಹಾನ ಜೋ಼ಡ್ಮ ಇನಿ ಆಖ್ಹ್‌ನ ಪೂರ ಕರಾನ ಇನಿ ಜಿ಼ಂದ್‌ಗೀನ ದಿನಾಖಿದಿದೀತೊ, ಯೋ ಬಚಿರ‍್ಹಯೀತೋಬಿ ಮರ್‌ವಾದಾಖ್ಹಲಸ್.
1TI 5:7 ಇನಖ್ಹಾಜೆ ವಿಶ್ವಾಸಿವೋನ ಹುಕುಮ್ ದೇ ಅನೇಥಿ ಕೋಣ್‌ಬಿ ಇವ್ಣಾಪರ್ ಗಲತ್‌ ನಾ ಲಗಾಡ್‌ಣು.
1TI 5:8 ಕೋಣ್‌ತೋಬಿ ಇವ್ಣ ಮಾಯ-ಮಾತ್ರಾನ, ಇವ್ಣ ಘರ್‌ವಾಳಾವ್ನ ಖ್ಹದರ್ ನಾ ಕರ‍್ಯೂತೊ, ಯೋ ಕ್ರಿಸ್ತಮಾನಿ ಇನು ವಿಶ್ವಾಸ್‌ನ ದಿದೊಹುಯೊ ಅಜು಼ ಯೊ ವಿಶ್ವಾಸ್‌ಕೊಂತೆ ಇವ್ಣೆಥಿಬಿ ಕಡ್‌ತೆಲ್ ಹುಯಿರ‍್ಹೋಸ್.
1TI 5:9 ತೀನಿಖ್ಹ್‌ ವರಖ್ಹ್‌ಥಿ ಕಮ್ ಉಂಬರ‍್ನಿ ಮುಂಡಚ್ಚಿಯೇನ, ಮುಂಡಚ್ಚಿಯೇನಿ ಪಟ್ಟಿಮ ನಕೊ ಮಳಾವ್. ಕತೋಬಿ ಯೋ ಖಲಿ ಏಕ್‌ ಬಾವ್ರಿನ ಬಾವಣ್‍ ಹುಯಿರ‍್ಹಾವಳಿ,
1TI 5:10 ಅಜು಼ ಇನು ಗುಣ್ ಅಛ್ಛು಼ ಕಾಮ್ ಕರಾಮಸ್ ರ‍್ಹೇಣು. ಅಜು಼ ಇನ ಲಡ್ಕಾವ್ನ ಅಛ್ಛಿನಿತರ ಪಾಳಿರಾಕ್ಣು, ಘರ್‌ಕನ ಆವವಾಳಾನ ಸ್ವಾಗತ್ ಕರಾವಾಳಿ ಹುಯಿರ‍್ಹೇಣು. ಬಿಜು಼ ರ‍್ಹೇಸ್ತೆ ವಿಶ್ವಾಸಿನಿ ಜೋ಼ಡ್ಮ ಧೋಬೆಡಿನಿತ್ರ ಚಾ಼ಲಿಲೇವ್ಣು. ಖ್ಹತಾಪ್ಣಿಮ ರ‍್ಹೇಸ್ತೆ ಅದ್ಮಿವ್‌ನ ಮದತ್ ಕರಾವಾಳಿ ಹುಯಿರ‍್ಹೇಣು. ಅಜು಼ ಅಛ್ಛು಼ಕಾಮ್ನ ಸಮರ್ಪಣ್‌ ಕರಿರಾಖವಾಳಿ ಹುಯಿರ‍್ಹೇಣು.
1TI 5:11 ಕತೋಬಿ ಜಾ಼ನ್ಜ಼ಮಾನ್ ಮಂಡಚ್ಚಿಯೇನ ಆ ಪಟ್ಟಿಮ ನಕೊ ಮಳೈಶ್; ಶನಕತೊ ಇವ್ಣುನ ಪಾಛು಼ ವ್ಯಹಾ ಕರ‍್ನು ಕರಿ ಆಖ್ಹ್ ಐಗಿತೊ, ಕ್ರಿಸ್ತಮ ರ‍್ಹೇಸ್ತೆ ಭಕ್ತಿಥಿ ಮ್ಹೇಲಿದೇಸ್.
1TI 5:12 ಎಥ್ರಾನವಾಳೊ ಇವ್ಣೆ ಪಹಿಲೆ ಕರ‍್ಯೊತೆ ವಾಗ್ದಾನ್ನ ಮ್ಹೇಲಿದಿನ್ ನ್ಯಾಯತೀರ್ಪ್‌ಮ ಪಡಿಜಾ಼ಸ್‌.
1TI 5:13 ಎತ್ರೇಸ್ ಕಾಹೆತೆ ಇವ್ಣೆ ಘರ್-ಘರ್ ಫರ್ತಿಹುಯಿನ್ ಇನಿ ವಖ್ಹತ್‌ನ ಬರ್ಬಾತ್‌ಕರಾಸ್,ಅನೇಥಿಬಿ ಜಾ಼ಖ್ಹತ್ ಮಶ್ಲ ಮಾರಾನು ಅಜು಼ ಬಿಜಾ಼ನ ಕಾಮ್ಮ ಗೋಡೊಘಾಲಾನು ಕರಸ್.
1TI 5:14 ಇನಖ್ಹಾಜೇಸ್ ಮೇ ಬೋಲುಸ್ಕಿ, ಜಾ಼ನ್ಜ಼ಮಾನ್ ಮುಂಡಚ್ಚಿಯೆ ವ್ಯಹಾ ಕರಿಲೀನ್, ಲಡ್ಕಾ ಜ಼ಣಾದೆ ಅಜು಼ ಇವ್ಣ ಘರ್‌ನ ದೇಕ್-ಭಾಲ್ ಕರಾದೆ, ಅನೇಥಿ ಅಪ್ಣ ದುಶ್‌ಮನ್ನ ಅಪ್ಣಪರ್ ಗಲತ್‌ ಬೋಲಾನ ವಾಟ್‌ ಕೋ ರ‍್ಹಿಶೇನಿ.
1TI 5:15 ಕತೋಬಿ ಥೋಡಿ ಮುಂಡಚ್ಚಿಯೆ ತಯೇಡ ತದ್ದೇಸ್ ಇವ್ಣಿ ವಾಟ್ನ ಮ್ಹೆಂದಿನ್, ಶೈತಾನ್ನ ಪೀಠೆ ಚ಼ಲಿಗೈಯೆ.
1TI 5:16 ಕತೋಬಿ ಏಕ್‌ ವಖ್ಹತ್ ವಿಶ್ವಾಸಿ ತಯೇಡಾವ್‍ನ ಘರ್‌ಮ ಮುಂಡಚ್ಚಿಯೆ ರ‍್ಹಯೀತೊ, ಇವ್ಣೇಸ್ ಇನಿ ಖ್ಹದರ್ ಕರ‍್ನು, ಅಜು಼ ಯೊ ವಜ಼ನ್ನ ಸಬೇಪರ್ ನಾ ನಾಕ್ಣು. ತದೆ ದಿಕ್-ದೆಶಾರ್ ಕೊಂತೆ ಇವ್ಣುನ ಸಬೆ ದೇಕ್‌ಭಾಲ್ ಕರೆಜಾ಼ಯ್.
1TI 5:17 ಸಬೇಮ ಅಛ್ಛಿನಿತರ ಕಾಮ್ ಕರಾಸ್ತೆ ಶಾಣ ಅದ್ಮಿನ ಬೇ ಪಟ್ ಮರ್ಯಾದಿ ದೇವ್ಣು. ತದೆ ವಚನ್ ಬೋಲಿದ್ಯವಾಮ ಅಜು಼ ಶಿಕಾಡಾಮ ಯೊ ಮ್ಹಿನತ್ ಕರಾಸ್.
1TI 5:18 ಧರ್ಮಶಾಸ್ತ್ರ ಬೋಲಾಸ್ಕಿ “ಖಳು ಖುಂದ್ಲಾತೆ ಢಾಂಡನ ಮ್ಹೋಡಾನ ಮ್ಹೋರ್ಕಿ ನಾಘಾಲ್ನು” ಕರೀಬಿ “ಅಜು಼ ಕಾಮ್ ಕರಾವಾಳ ಆಳ್‌ನ ಬರೋಬರ್‌ನಿ ಕೂಲಿ ದೇವ್ಣು” ಕರೀಬಿ ವಚನ್‌ಮ ಬೋಲಾಸ್.
1TI 5:19 ಸಭೆನ ಶಾಣಾವ್‌ಪರ್ ಕೋಣ್‌ತೋಬಿ ಗಲತ್‌ ಬೋಲ್ಯೂತೊ, ಬೇ ನತರ್‌ಕಿ ತೀನ್ ಅದ್ಮಿನ ಮ್ಹೋಡೇಥಿ ಸಾಕ್ಷಿ ನಾಬೋಲ್ಯುತೊ, ಇನ ನಂಬಿಶ್ ನಕೊ.
1TI 5:20 ಪಾಪ್ ಕರಾವಾಳನ ಖ್ಹಾರಾನ ಖ್ಹಾಮ್ಣೇಸ್ ಗುರ್‌ಕಾವ್, ಅನೇಥಿ ಬಿಜು಼ ಅದ್ಮಿ ಖ್ಹಾರುಬಿ ಡರ್‌ಶೆ.
1TI 5:21 ತೂ ಬೋಲಿ ಖ್ಹಮ್‌ಜಾ಼ನ ಅಗಾಡಿಸ್ ಗಲತ್‌ ನಾಲಗಾಡ್ನುತೇಬಿ, ಏಕ್‌ಬಾಜು಼ಸ್ ಶಾತ್ಬಿ ನಾಕರ‍್ನುತೇಬಿ, ಮೇ ಬೋಲ್ಯೊತೆ ತಿಮ್ ಚಾ಼ಲ್ನುಕರಿ ದೇವ್ನ ಖ್ಹಾಮ್ಣೆಬಿ ಅಜು಼ ಕ್ರಿಸ್ತಯೇಸು ಖ್ಹಾಮ್ಣೆಬಿ, ಚೂ಼ಣೈರ‍್ಹುತೆ ಪರಿಶುದ್ ದೂತರ್‌ನ ಖ್ಹಾಮ್ಣೆಬಿ ಮೇ ತುನ ಖ್ಹಾಚಾಥಿ ಬೋಲುಕರುಸ್. ಖಿವೂಬಿ ಅಜು಼ ಖ್ಹಾಚಿ ಪರ್ಖಾನ ಅಗಾಡಿ ಕಿನಭಣಿಥೂಬಿ ನಾ ರ‍್ಹೇವ್ಣುತೆ ಆ ಖ್ಹಾರು ಕಾಮ್ ಕರ‍್ನು.
1TI 5:22 ಉತ್ವಾಳಿಥಿ ಕಿನ ಮಾಥಪರ್‌ಬಿ ಹಾತ್‌ ಮ್ಹೇಲಿನ್, ಪ್ರಭುನಿ ಸೇವೇನ ನೇಮಕ್ ನಕೊ ಕರೀಶ್. ಇಮ್‌ ನೇಮಕ್ ಕರ‍್ಯೊತೊ ಇವ್ಣ ಪಾಪ್‌ಮ ತೂಬಿ ಭಾಗ್‌ವಾಳೊ ಹುಯಿಜೈ಼ಶ್. ತಾರು ತೂ ಪಾಕ್‌ಥಿ ರ‍್ಹವಾನಿಘೋಣಿ ದೇಖಿಲೆ.
1TI 5:23 ಪಾಣಿಸ್ ಖಾಲಿ ಪೀನಕೊ, ತುನ ಅಛ್ಛಿನಿತರ ಹಜ಼ಮ್ ಹುವಾನಖ್ಹಾಜೆ, ಥೋಡು ಥೋಡು ದ್ರಾಕ್ಷಿನು ರಖ್ಹ್‌ಬಿ ಪೀ. ಶನಕತೊ ಅಜು಼ ತೂ ಘಡಿ-ಘಡಿ ರೋಗ್‌ಮ ಪಡೀಜಾ಼ಸ್.
1TI 5:24 ಥೋಡ ಅದ್ಮಿನು ಪಾಪ್‌ಖ್ಹಾರು ಅಛ್ಛಿನಿತರ ದೆಖಾವಸ್ ಅಜು಼ ಯೋ ಪಾಪ್ ಇವ್ಣುನ ನ್ಯಾವ್‍ನಿ ತೀರ್ಮಾನ್‌ಕನ ಲೀಜಾ಼ಸ್; ಕತೋಬಿ ಅಜು಼ ಥೋಡು ಅದ್ಮಿನು ಪಾಪ್ ಖ್ಹಾರು ಲಪೈರ‍್ಹೀನ್ ಅಜು಼ ದೆಖಾವಾನ ಧೇರ್ ಲಾಗಸ್.
1TI 5:25 ಇಮ್ಮಸ್ ಅಛ್ಛು಼ ಕಾಮ್‌ಖ್ಹಾರುಬಿ ಅಛ್ಛಿನಿತರ ದೆಖಾವಸ್, ಕತೋಬಿ ಖಿವು ದೆಖಾವಕೊಯ್ನಿ ಇನಾಬಿ ಲಪಾಡಿರಾಖನ ಕೊಹುವ್ವಾನಿ.
1TI 6:1 ಗುಲಾಮ್‌ನ ನೊಗಾಮ ಖ್ಹಪ್‌ಡಿರ‍್ಹವಾಳು ಇವ್ಣ ಯಜಮಾನ್ನ ಬರಾಬರ್‌ಥಿ ಮರ್ಯಾದಿ ದೇವ್ಣು, ಅನೇಥಿ ದೇವ್‌ನು ನಾಮ್ ಅಜು಼ ಅಪ್ಣೆ ಬೋಲಿದಿಯೇತೆ ವಚನ್ನಿ ವಿರೋದ್ ಕೋಣ್‌ಬಿ ಗಲತ್‌ ಬೋಲಾನ ಕೋ ಉಶೇನಿ.
1TI 6:2 ಅಜು಼ ಅಮ್ನ ಸೇವಕ್‌ನ ಇನೊ ಯಜಮಾನ್ ವಿಶ್ವಾಸಿ ಹುಯಿರೋಸ್. ಇವ್ಣಿಬಾರೇಮ ಕಮ್ ಮರ್ಯಾದಿಥಿ ನಾ ದೇಕ್ಣು ಇವ್ಣೆ ವಿಶ್ವಾಸ್ಮ ಭೈಯೇ ಹುಯಿರಾಸ್. ಇವ್ಣೆ ಇವ್ಣ ಯಜಮಾನ್ನಿ ಬಾರೇಮ ಬಿಜೂ಼ಬಿ ಜಾ಼ಖ್ಹತ್ ಸೇವೆ. ಶನಕತೊ ಅನೊ ನಫ್ಫೊ ಕಿನ ಮಳಸ್ಕಿ ಇವ್ಣೆ ವಿಶ್ವಾಸಿ ಹುಯಿರುಸ್. ಅನೇಥಿ ಇವ್ಣೆ ಪ್ಯಾರ್ ಕರ್ಶೆ, ಆ ಖ್ಹಾರಿವಾತೆನ ಶಿಕಾಡೀನ್ ಬೋಲಿವತಾಳ್‌.
1TI 6:3 ಏಕ್‍ ವೇಳ್ಮ ಕೋಣ್‌ತೋಬಿ ಬಿಜಿಥರಾನು ಉಪದೇಶ್‍ನ ಶಿಕಾಡಸ್ಕಿ ಅಜು಼ ಅಪ್ಣೊ ಪ್ರಭು ಯೇಸುಕ್ರಿಸ್ತನಿ ಖ್ಹಾಚಿ ವಚನ್ ಅಖ್ಖಾನ ಅಜು಼ ಭಕ್ತಿಥಿ ರ‍್ಹವಾನು ಭರ್‌ಪೂರ್‌ ಬೋಧನೆನ ಕೋಣ್ ಸ್ವೀಕಾರ್ ಕೋ ಕರಿಲೇಯ್ನಿಕಿ,
1TI 6:4 ಯೋ ಹಂಕಾರ್‌ಥಿ ಭರೈರ‍್ಹಾವಾಳೊ ಹುಯಿರೋಸ್. ಅಜು಼ ಇನ ಶಾತ್ಬಿ ಮಾಲುಮ್‌ ಕೊ ರ‍್ಹೇಯ್ನಿ. ಇನುಕೊಂತೆ ಆಖ್ಹ್‌ನಿ ಕಾರಣ್‍ಥಿ, ಅಬ್ಬಾಜ಼ಬ್ಬಿ ಕರಾಸ್ ಅಜು಼ ಇನಿ ಖರಾಬ್ ವಾತೆಥಿ ಲಡೈಕರಸ್ ಅನೇಥಿ ಬಳಾಪೊ ಅಲಕ್ ಅಲಕ್‌ಹುಯಿನ್ ಲಡೈ-ಝ಼ಗ್‍ಡೊ, ಚಾ಼ವ್‌ಣ್ಯ ಅಜು಼ ಖರಾಬ್ ಗಾಳೆ ಶುರುಕರಿಲೇಸ್.
1TI 6:5 ಅತ್ರೇಸ್ ಕಾಹೆತೆ ಇಮ್ನ ಖ್ಹಾರ ಅದ್ಮಿಥಿ ಕದೇಬಿ ಖತಮ್ ಹುವ್ವಾಕೊಂತೆ ವಾದ್‌ವಿವಾದ್ ಪೈದಾ ಹುವಾಸ್. ಯೋ ಅದ್ಮಿಖ್ಹಾರು ಖ್ಹಾಚಿನ ಧಕೇಲಿದಿದುಹುಯು ಹುಯಿರ‍್ಹೂಸ್. ದೇವ್ನಿ ಸೇವೆ ಕತೊ ಧನ್‌-ದೌಲತ್ ಕಮಾವಾನೊ ಮಾರಗ್ ಕರಿ ಇವ್ಣೆ ಸೋಚಸ್.
1TI 6:6 ದೇವ್ನಿ ಸೇವೆ ಕರಾವಾಳೊ ಇನಾಕನ ಛಾ಼ತೆ ಇನಾಮ ಲ್ಹಾಯಕ್‌ರ‍್ಹಯೋತೊ, ಯೋ ಮೋಟೊ ಶೌಕಾರಸ್.
1TI 6:7 ಅಪ್ಣೆ ಜಗತ್‌ಮ ಆವಾನಿವಖ್ಹ್‌ತೆ ಶಾತ್ಬಿ ಪಾಡಿಲಿನ್ ಕೋಆಯಾನಿ ಅಪ್ಣೆ ಜಗತ್‌ ಮ್ಹೇಲಿಜಾ಼ವಾನಿ ವಖ್ಹತ್‌ಮ ಶಾತ್ಬಿ ಲೀಜಾ಼ಶು ಕೊಯ್ನಿ.
1TI 6:8 ಇನಖ್ಹಾಜೇಸ್ ಅಪ್ಣುನ ಖಾಣು ಅಜು಼ ಲುಂಗ್ಡ ರ‍್ಹಯೂತೊ ಬಶ್‌.
1TI 6:9 ಕತೋಬಿ ಶೌಕಾರ್ ಹೋಣುಕರಿ ಆಖ್ಹ್ ಕರಾವಾಳು ಇವ್ಣು ಇವ್ಣೇಸ್ ಶೋದನೆಮ ಪಡಾಸ್‌ ಅಜು಼ ಕೈಯೆಕ್ಕಿ ಖರಾಬ್ ಅಜು಼ ಖತರ್‌ನಾಕ್ ಆಖ್ಹ್‌ನ ಫಾಖ್ಹಾಮ ಖ್ಹಪ್‌ಡಿಜಾ಼ಸ್, ಅನೇಥಿ ಇವ್ಣೆ ಬಿಗ್‌ಡಿಜಾ಼ಸ್ ಅಜು಼ ಬರ್ಬಾತ್ ಹುಯಿಜಾ಼ಸ್.
1TI 6:10 ಪೈಶಾನಿಪ್ಯಾರ್ ಖ್ಹಾರಿಸ್ ತರ‍್ಹಾನು ಖರಾಬ್‌ ಫನೈನು ಜ಼ಡ್‌ನ ಶುರುವಾತ್ ಹುಯಿರ‍್ಹೂಸ್. ಥೋಡುಜ಼ಣು ಅನ ಕಮಾವಾನಿ ಆಖ್ಹ್‌ಥಿ ಕ್ರಿಸ್ತಮಾನಿ ವಿಶ್ವಾಸ್‌ನ ಮ್ಹೇಲಿನ್, ಕೈಯೆಕ್ಕಿ ಖ್ಹತಾಪ್ಣಿಥಿ ಇವ್ಣ ದಿಲ್ನ ಭೋಕಿಲೇಸ್.
1TI 6:11 ಕತೋಬಿ ದೇವ್‌ನು ಅದ್ಮಿ ಹುಯಿರ‍್ಹೋತೆ ತೂತೊ, ಆ ಖ್ಹಾರೇಥಿ ದೂರ್ ರ‍್ಹೇ. ನೀತಿಮ, ಭಕ್ತಿಮ, ವಿಶ್ವಾಸ್‌ಮ, ಪ್ಯಾರ್‌ಮ, ಖ್ಹಮಾಳಾಮ ಅಜು಼ ಚಾ಼ಲ್ಚ಼ಲಣ್‌ಮ ಅಛ್ಛೊ಼ ರ‍್ಹವಾನಟೇಕೆ ಅಖ್ಖಾ ಮನ್‌ಥಿ ಕೋಶಿಶ್ ಕರ್‌.
1TI 6:12 ವಿಶ್ವಾಸ್‌ನಿ ಹರ್‌ಜಿತ್‌ಮ ತುನ ಹುವಾಯೆತ್ರೆ ಅಛ್ಛಿನಿತರ ಮಿಲೈನ್‌, ತಾರಖ್ಹಾಜೆ ಹಮೇಶಾನಿ ಜಿ಼ಂದ್‌ಗೀನ ಜೂತಿಲೆ. ತುನ ಅನಖ್ಹಾಜೆಸ್ ದೇವ್ನೆ ಬುಲಾಯೋತೆ, ಅಜು಼ ಕೈಯೆಕ್ಕಿ ಸಾಕ್ಷಿನ ಖ್ಹಾಮೆ ತುನೆ ಶಪತ್ ಲೀರಾಖ್ಯೋಸ್.
1TI 6:13 ದೇವ್ನ ಖ್ಹಾಮೆ ತಮಾಮ್‌ನ ಜಾನ್‌ಹುಯಿನ್ ರ‍್ಹವಾಳೊ ಹುಯಿರ‍್ಹೋಸ್ ಅಜು಼ ಕ್ರಿಸ್ತ ಯೇಸುನ ಖ್ಹಾಮ್ಣೆ, ಮೇ ತುನ ಹುಕುಮ್ ದೆವುಸ್. ಪೊಂತ್ಯ ಪಿಲಾತನ ಖ್ಹಾಮೆ ಭಾಲ್‌ಥಿ ಸಾಕ್ಷಿ ದಿದೋತೆ ಯೋ ಶಾತ್‌ಕತೊ,
1TI 6:14 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ದೆಖಾವತೋಡಿ, ತೂ ಯೋ ಹುಕುಮ್‌ನ ಮೈಲಾಪ್‌ ಕೊಯ್ನಿತೇಬಿ ಚಿಂಘಾವ್ಣಿ ಕೊಯ್ನಿತೇಬಿ ಜ಼ತನ್ ಕರಿಲೇವ್ಣು.
1TI 6:15 ದೇವ್‍ಥಿ ಇನಿ ಬರಾಬರ್‌ನಿ ವಖ್ಹತ್‌ಮ ಇನ ದೇಖಾವನಿತ್ರ ಕರ್ಶೆ. ಯೋ ಧನ್ಯ ಅಜು಼ ಎಕ್ಕಸ್‍ಜ಼ಣೊ ಹಕ್ ಚ಼ಲಾವವಾಳೊ, ರಾಜಾ಼ನೊ ರಾಜಾ಼ಬಿ, ಪ್ರಭುನೊ ಪ್ರಭುಬಿ ಹುಯಿರ‍್ಹೋಸ್.
1TI 6:16 ಇನ ಎಕ್ಕಸ್ ಜ಼ಣಾನ ಮರಣ್‌ಕೊಂತೆ. ಕೋಣ್‌ಬಿ ಖನ್ನೆ ಜಾ಼ವಾನ ಕೋ ಹುವ್ವಾನಿತೆ ಉಜಾ಼ಳಾಮ ರ‍್ಹವಾಳೊ ಹುಯಿರ‍್ಹೋಸ್; ಹಂಕೆತೋಡಿ ಕೋಣ್‌ಬಿ ಇನ ದೇಖಿರಾಖ್ಯುಕೊಯ್ನಿ; ದೇಖಾನ ಉಶೇಬಿ ಕೊಯ್ನಿ.ಇನು ಇಜ಼್ಜತ್ ಅಜು಼ ಮಟಾನುಕೊಂತೆ ಶಕತ್ ಕೆದೇಬಿ ಇನಾಸ್ ರ‍್ಹವಾದೆ! ಆಮೆನ್.
1TI 6:17 ಆ ಜಗತ್‌ಮ ಶೌಕಾರ್ ಹುಯಿರ‍್ಹವಾಳನ ಹುಕುಮ್‌ ದೇಕಿ, ಇವ್ಣೆ ಹಂಕಾರ್ ನಾ ಕರ‍್ನು ಕರಿ, ಅಜು಼ ಇವ್ಣಿ ಧನ್‌-ದೌಲತ್‌ಪರ್ ಭರೋಖ್ಹೊ ನಾರಾಕ್ಣುತೆ, ದೇವ್‌ಪರ್‌ ಭರೋಖ್ಹೊ ನಾಖಾದೆ ಕರಿ, ಯೋ ಅಪ್ಣೆ ಹಕ್ಲಾಲ್‌ಥಿ ರ‍್ಹವಾನಟೇಕೆ ಖ್ಹಾರುಸ್ ದ್ಯವಾಳೊ ಹುಯಿರ‍್ಹೋಸ್.
1TI 6:18 ಇವ್ಣುನ ಹುಕುಮ್ ದೇಕಿ; ಇವ್ಣೆ ಅಛ್ಛು಼ ಕಾಮ್ ಕರ‍್ನು. ಅಜು಼ ಅಛ್ಛು಼ ಕಾಮ್ ಕರಾಮ ಇವ್ಣೆ ಶೌಕಾರಿ ಹುಯಿರ‍್ಹೇಣು, ಧರ್ಮಿ, ಅಜು಼ ಇವ್ಣಾಕನ ಛಾ಼ತೆ ಜಿನಖ್ಹ್‌ನ ವಾಟಪಾಡಿಲ್ಯವಾದೆ.
1TI 6:19 ಅನೇಥಿ ಇವ್ಣೆ ಜಿವ್ಣು ಧರಿರಾಕ್‍ಶೆ ಯೋ ಖ್ಹಾಚ಼ನು ಜಿವ್ಣು ಹುಯಿರುಸ್. ಅಮ್ ಕರ‍್ಯೂತೊ, ಇವ್ಣೆ ಇವ್ಣಖ್ಹಾಜೆ ಏಕ್‌ ಟಜ್ರೀನ ಜ಼ಮ ಕರಾದಾಖ್ಹಲ್, ಯೋ ಇವ್ಣಿ ಖ್ಹಾಮ್ಣೇನಿ ಜಿ಼ಂದ್‌ಗೀನಖ್ಹಾಜೆ ಏಕ್‌ ಘಟ್ ಹದಿಪಾಯ ಹುಯಿರ‍್ಹಿಶೆ.
1TI 6:20 ತಿಮೊಥೆ, ತುನ ಶಾತ್ ದೀರಾಖ್ಯೋಸ್ತೆ ಇನ ಜ಼ತನ್‌ಥಿ ರಾಕ್‌, ಅಜು಼ ಹೋಣುಕೊಂತೆ ವಾತೇಥಿ ಥೋಡುಜ಼ಣು ಗಲತ್‌ಥಿ ಅಕ್ಕಲ್ ಬೋಲಾಸ್ತೆ ಫಾಲ್ತು ವಾತೇಥಿ ದೂರ್ ರ‍್ಹೇ.
1TI 6:21 ಥೋಡು ಅದ್ಮಿ ಯೋ ಝೂ಼ಟಿ ಗ್ಯಾನ್ನ ನಂಬಿನ್,ಇವ್ಣೆ ವಿಶ್ವಾಸ್‌ನ ಮ್ಹೆಂದಿದು. ದೇವ್ನಿ ವಾರ್‌ಖ್ಹೊ ತುಮಾರ ಖ್ಹಾರಸ್ನ ಜೋ಼ಡ್ಮ ರ‍್ಹವಾದೆ.
2TI 1:1 ಅಪೊಸ್ತಲ ಹುಯಿರೋತೆ ಪೌಲನೆ, ಇನೊ ಪ್ಯಾರ್‌ನೊ ಛಿಯ್ಯೊ ತಿಮೊಥೆನ ಲೀಖ್ಯೋತೆ ಶಾತ್‌ಕತೊ, ಪೌಲಾಥಿ ಯೋ ದೇವ್ನಿ ಮರ್ಜಿನಿತರ ಕ್ರಿಸ್ತ ಯೇಸುಮ ಛಾ಼ತೆ ಜಾನ್ನಿ ವಾಗ್ದಾನ್ನ ಬೋಲಾನಖ್ಹಾಜೆ ಕ್ರಿಸ್ತ ಯೇಸುನೊ ಅಪೊಸ್ತಲ ಹುಯಿರೋಸ್.
2TI 1:2 ಮಾರೊ ಪ್ಯಾರ್‌ನೊ ಛಿಯ್ಯೊ ತಿಮೊಥೆಯನ ಲೀಖಾನು ಶಾತ್‍ಕತೊ, ಬಾ ಹುಯಿರ‍್ಹೋತೆ ದೇವ್‍ಥಿ ಅಜು಼ ಪ್ರಭು ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ ತುನ ವಾರ್‌ಖ್ಹೊ, ಗೋರ್‌ ಅಜು಼ ಶಾಂತಿ ಮಳಾದೆ.
2TI 1:3 ಮೇ ಕೆದೇಬಿ ರಾತ್-ದನ್ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತಾರಿ ಬಾರೇಮ ಯಾದ್‌ಕರಿನ್, ದೇವ್ನ ಖ್ಹಲಾಮ್ ಕರುಸ್. ಅಜು಼ ಇನು ಸೇವೆನ ಮಾರ ಬಾಬ್‌ದಾದವ್‍ನಿತರ ಶುದ್‍ ದಿಲ್‌ಥಿ ಕರುಸ್
2TI 1:4 ತಾರ ಆಂಝಾ಼ನ ಮೇ ಯಾದ್ಮ ಲಯಿನ್ ತುನ ಘಣಿ ಶಂತೋಖ್ಹ್‌ಮ ಭರಾವ್ಣು ಕರಿ ಮೆ ಮನ್‌ಕರುಸ್.
2TI 1:5 ತಾರಿ ಶುದ್ಧಮನ್‌ಥಿ ಛಾ಼ತೆ ವಿಶ್ವಾಸ್‌ ಮಾರಿ ಯಾದ್ಮ ಛಾ಼, ಇಮ್ನಿ ವಿಶ್ವಾಸ್‌ ತಾರಿ ನಾನಿ ಲೋವಿಮಾಬಿ ಅಜು಼ ತಾರಿ ಆಯ ಯೂನಿಕೇಮಾಬಿ ಥಿ. ಯೋಸ್ ವಿಶ್ವಾಸ್‌ ತಾರಮಾಬಿ ಛಾ಼ಕರಿ ಮನ ಅಛ್ಛಿನಿತರ ಮಾಲುಮ್.
2TI 1:6 ಅನಖ್ಹಾಜೆಸ್ ದೇವ್ನೆ ತುನ ದಿದೋತೆ ಯೋ ವರದಾನ್ ದೀವಾನಿತರ ಖ್ಹಲಗ್‌ತು ರ‍್ಹವಾದೆ ಅಜು಼ ಮೇ ತಾರಪರ್ ಹಾತ್ ಮ್ಹೇಲ್ಯೊಥೋತೆ ತದೆ ಯೋ ತುನ ಮಳ್ಯು.
2TI 1:7 ದೇವ್ನೆ ಅಪ್ಣುನ ದೀರಾಖ್ಯೋತೆ ಆತ್ಮ ಡರ್‌ಪೋಕ್‌ ಬಣಾವವಾಳು ಆತ್ಮ ಕಾಹೆ; ಇನು ಆತ್ಮ ಅಪ್ಣುನ ಶಕತ್, ಪ್ಯಾರ್ ಅಜು಼ ಗ್ರಿಸ್ತಿಥಿ ಭರಿದೇಸ್.
2TI 1:8 ಅನಖ್ಹಾಜೆ ಅಪ್ಣೊ ಪ್ರಭುನಿ ಬಾರೇಮ ಸಾಕ್ಷಿ ಬೋಲಾನ, ಕ್ರಿಸ್ತನಖ್ಹಾಜೆ ಜೇಲ್‌ಮ ಛೂ಼ತೆ ಮಾರಿಬಾರೇಮ ಖ್ಹರ್‌ಮೈಶ್ ನಕೊ.ತುನ ಹೋಣುತೆ ಶಕತ್ನ ದೇವಸ್ ದಿಶೆ. ಇನ ಬದಲ್ ದೇವ್ನಿ ಅಛ್ಛಿ ಖಬರ್‌ನಖ್ಹಾಜೆ ಮಾರ ಜೋ಼ಡೆ ಲತಾಡ ಪಡ್.
2TI 1:9 ಇನೆ ಅಪ್ಣಾಮ ಛಾ಼ತೆ ಅಛ಼್ಛಕಾಮ್‌ನ ದೇಖ್ಯೊತೆ ಇನಖ್ಹಾಜೆ ಕಾಹೆ. ಇನಿ ಖ್ಹೂಜ಼್‍ಥಿ ಅಜು಼ ವಾರ್‌ಖ್ಹೇಥಿ ಅಪ್ಣುನ ಬಚಾ಼ಡಿನ್ ಪರಿಶುದ್ ಹುವಾನ ಬುಲಾಯೊ, ಇನೆ ಜ಼ಗ್‌ಜ಼ಮಾನೇಥಿ ಯೊ ವಾರ್‌ಖ್ಹೊ ಯೇಸು ಕ್ರಿಸ್ತಥಿ ಅಪ್ಣುನ ಮಳ್ಯು.
2TI 1:10 ಕತೋಬಿ ಹಮ್ಕೆ ಅಪ್ಣೊ ಬಚಾ಼ಡವಾಳೊ ಹುಯಿರ‍್ಹೋತೆ ಕ್ರಿಸ್ತ ಯೇಸು ದೆಖಾವಾನಿ ಜೋ಼ಡ್ಮ ಅಪ್ಣುನ ಪ್ರಕಟ್‌ಹುಯು. ಇನೆ ಮರಣ್ಣ ನಾಶ್ ಕರ‍್ಯೊ ಅಜು಼ ಜಾನ್ನಬಿ ಮರಾನುಕೊಂತೆ ಸುವಾರ್ತೆ ವತಾಳಿರಾಖ್ಯೊಸ್.
2TI 1:11 ದೇವ್ನೆ ಮನ ಅಪೊಸ್ತಲ ಅಜು಼ ಶಿಕಾಡವಾಳೊ ಹುಯಿನ್, ಆ ಅಛ್ಛಿ ಖಬರ್‌ನ ಬೋಲಿದ್ಯವಾನಖ್ಹಾಜೆ ಮ್ಹೇಲಿರಾಖ್ಯೋಸ್‌.
2TI 1:12 ಅನಖ್ಹಾಜೆಸ್ ಮೇ ಆ ಖ್ಹಾರು ಖ್ಹಮಾಳುಕರುಸ್ತೆ. ತೋಬಿ ಮೇ ಖ್ಹರ್‌ಮಾವ್‍ಕೊಯ್ನಿ. ಶನಕತೊ ಮೇ ಕಿನಾಪರ್ ಭರೋಖ್ಹೊ ಕರಿರಾಖ್ಯೋಸ್‌ಕಿ ಯೊ ಮನ ಮಾಲುಮ್‌ ಕರಿರಾಖ್ಯೋಸ್. ಅಜು಼ ಮನ ಅಛ್ಛಿನಿತರ ಮಾಲುಮ್‍ಕಿ ಯೋ ಮಾರ ಹಾತ್ಮ ಶಾತ್ ದೀರಾಖ್ಯೋಸ್ತೆ ಇನ, ಪ್ರಭು ಆವಾನು ಯೊ ದನ್ ಆವಾತೋಡಿ ಬಚಾ಼ಡನ ಶಕತ್‌ವಾಳೊ ಹುಯಿರ‍್ಹೋಸ್.
2TI 1:13 ತೂ ಮಾರೇಥಿ ಶನಿಬಾರೇಮ ಶಿಕಿರ‍್ಹೋಸ್ಕಿ ಇನ ವಿಶ್ವಾಸ್‌ಥಿಬಿ ಅಜು಼ ಕ್ರಿಸ್ತ ಯೇಸುನಿ ಪ್ಯಾರ್‌ಮ ಖ್ಹಾಚಿವಾತೆ ಬೋಲಿದ್ಯವಾನ ಘಟ್ ಧರಿರಾಕ್.
2TI 1:14 ತಾರ ಹಾತ್‌ಮ ದೆವೈರ‍್ಹೀತೆ ಅಛ್ಛಿ ಖಬರ್‌ನ, ಅಪ್ಣ ಮಹಿ ಛಾ಼ತೆ ಪವಿತ್ರಾತ್ಮಾನಿ ಶಕಥ್ಥಿ ಜ಼ತನ್‌ಥಿ ರಾಕ್.
2TI 1:15 ಏಷ್ಯಾ ತಬರ್‌ಖಾನು ತಮಾಮ್‌ ಅದ್ಮಿ, ಮನ ಹಾತ್ ಮ್ಹೆಂದಿದು ಕರಿ ಬೋಲಾನು ತುನ ಮಾಲುಮ್‌. ಇವ್ಣಾಮ ಫುಗೇಲಬಿ ಅಜು಼ ಹೇರ್ಮೋಗೇನ್‌ ಮಳಿರ‍್ಹಾಸ್.
2TI 1:16 ಒನೇಸಿಪೊರನ ಘರ್‌ವಾಳಾನ ಪ್ರಭು ಗೋರ್‌ ವತಾಳದೆ, ಇನೆ ಘಣಿ ಹಲ್ಲ ಮನ ಖುಷಿ ಕರಾಯೊ. ಮೇ ಜೇಲ್‌ಮ ರ‍್ಹೀನ್ ಖ್ಹಂಕ್‌ಳಿನ ಖ್ಹರ್‌ಮಾಯೊ ಕೊಂತೆ,
2TI 1:17 ರೋಮ್ ಖ್ಹಯೇರ್‌ಮ ಆವ್‌ತಾಸ್ನ ಮೇ ಮಳಾಲಗೂಬಿ ಯೊ ಢೂಂಡೂಕರ್ತೊಥೊ.
2TI 1:18 ಪ್ರಭು ಇವ್ಣುನ ಯೋ ದನ್ಮ ಇನಿ ಗೋರ್‌ ಮಳಾದೆ. ಯೊ ಎಫೆಸಮ ಇನೆ ಖಿವಿಖಿವಿ ಪರಕ್ಮ ಸೇವೆ ಕರ‍್ಯೋಥೋಕಿ ಯೊ ತುನ ಅಛ್ಛಿನಿತರ ಮಾಲುಮ್ ಛಾ಼.
2TI 2:1 ತಾರಿ ಬಾರೇಮ ಬೋಲ್ನುಕತೊ; ಮಾರ ಛಿಯ್ಯಾ, ತೂ ಅಪ್ಣ ಕ್ರಿಸ್ತ ಯೇಸುಮ ಛಾ಼ತೆ ಹಮಾರ ಖ್ಹಂಗ್‌ಮ ಮಳಾನಿ ವಾರ್‌ಖ್ಹೇಥಿ ಘಟ್ ಹೂ.
2TI 2:2 ಕೈಯೆಕ್ಕಿ ಸಾಕ್ಷಿನ ಖ್ಹಾಮ್ಣೆ ತೂ ಮಾರೇಥಿ ಖ್ಹಮ್‌ಜ್ಯೋಥೊ ಯೊ ಖ್ಹಾಚಿ ಪಢಂತ್‌ನ ತೂ ಲೀಲೆ. ಇನಾಸ್ ಯೋಗ್ಯ ಹುಯಿರ‍್ಹಾವವಾಳನ ಪೋಚಾ಼ವ್. ಯೊ ಪಢಂತ್‌ನ ಬಿಜಾ಼ನ ಶಿಕಾಡನ ನಿಯತ್‌ವಾಳೊ ಹುಯಿರ‍್ಹಿಶೆ.
2TI 2:3 ಲತಾಡ ಖ್ಹಮಾಳಾಮ ಕ್ರಿಸ್ತ ಯೇಸುನೊ ಖ್ಹಾಚೊ಼ ಶಿಪಾಯಿನಿಮತ್ ಮಾರ ಖ್ಹಂಗ್‌ಮ ಭಾಗಿ ರ‍್ಹೇ.
2TI 2:4 ಏಕ್‌ ಜಂಗ್‌ನೊ ಶಿಪಾಯಿ ಇನ ಅದಿಕಾರಿನ ಪಸಂದ್‌ಕರಾವನ ಆಖ್ಹ್ ಕರಾಸ್. ಇನಖ್ಹಾಜೇಸ್ ಯೋ ಶಿಪಾಯಿ ಖ್ಹಾರು ಆ ಲೋಕಾನು ವ್ಯವಹಾರ್‌ಮ ಖ್ಹಪಡ್ನುನಾತೆ ಇಮ್‌ ಜ಼ತನ್‌ಥಿ ರ‍್ಹೇಸ್.
2TI 2:5 ಕೋಣ್‌ತೋಬಿ ಏಕ್‌ ಜ಼ಣು ಮಿಲಾವಾನಿ ಹರ್‌ಜಿತ್‌ಮ ಇನಾಮ್ ಲೇವ್ಣುಕತೊ, ಮಿಲಾವವಾಳೊ ಖ್ಹಾರುಸ್ ನಿಯಮ್‌ನಿಘೋಣಿ ಯೋ ನಾಖ್ಹ್‌ಣು.
2TI 2:6 ಪಿಕಾವಸ್ತೆ ಅನಾಜ಼್‌ಮ ಪಹಿಲು ಭಾಗ್‌ ಮ್ಹಿನತ್ ಕೋಣ್ ಕರಾಸ್ಕಿ ಇವ್ಣುನಸ್ ಜಾ಼ವ್ಣು.
2TI 2:7 ಮೇ ಬೋಲುಕರುಸ್ತೆ ಬಾರೇಮ ಸೋಚಿ ದೇಕ್. ಪ್ರಭು ತುನ ಆ ಖ್ಹಾರಮಾಬಿ ತೂ ಮಾಲುಮ್‌ ಕರಿಲ್ಯವಾನಿ ಖ್ಹಯಾಲ್ ದಿಶೆ.
2TI 2:8 ದೇವ್ನೆ ಮರ‍್ಯಾಹುಯಮಾಥು ಪಾಛು಼ ಜಿವ್ತು ಉಠಾಡ್ಯೋತೆ ಅಜು಼ ದಾವೀದ್‌ನಿ ಖಾಂದಾನ್‌ವಾಳೊ ಹುಯಿರ‍್ಹೋತೆ ಯೇಸು ಕ್ರಿಸ್ತನ ಯಾದ್ ಕರ್ತೊರ‍್ಹೇ. ಆಸ್ ಮೇ ಬೋಲುಸ್ತೆ ಅಛ್ಛಿ ಖಬರ್.
2TI 2:9 ಶನಕತೊ ಮೇ ಅಛ್ಛಿ ಖಬರ್‌ನ ಬೋಲುಸ್ತೆ ಇನಖ್ಹಾಜೇಸ್, ಮೇ ಖ್ಹತುಕರೂಸ್ತೆ ಅಜು಼ ಮನ ಖೈದಿನಿಘೋಣಿ ಖ್ಹಂಕಳ್‌ಥೀಬಿ ಭಾಂದಿರಾಖ್ಯುಸ್. ಕತೋಬಿ ದೇವ್ನಿ ವಚನ್ ಭಂದೈರ‍್ಹಿ ಕೊಯ್ನಿ.
2TI 2:10 ಅನಖ್ಹಾಜೆಸ್ ದೇವ್ನೆ ಚೂ಼ಣಿರಾಖ್ಯೊತೆ ಅದ್ಮಿನಾಬಿ ಮಾರ ಜೋ಼ಡೆ ಇವ್ಣಖ್ಹಾಜೇಸ್ ಮೇ ಖ್ಹಾರುಸ್ ಖ್ಹಮಾಳಿಲೆವ್‌ಕರೂಸ್. ಕ್ರಿಸ್ತ ಯೇಸುಮ ಛಾ಼ತೆ ರಕ್ಷಣೆನ, ಇನಿ ಹಮೇಶಾನಿ ಮಹಿಮೆನ ಜೋ಼ಡೆ ಲೀಲೆಣು.
2TI 2:11 ಆ ವಾತೆ ವಿಶ್ವಾಸ್‍ನು ಹುಯಿರ‍್ಹಿಸ್, “ಅಪ್ಣೆ ಇನಜೋ಼ಡೆ ಮರ‍್ಯಾತೊ, ಇನ ಜೋ಼ಡೆಸ್ ಜಿವ್‌ಶು;
2TI 2:12 ಅಪ್ಣೆ ಕೆದೆಕೆದೇಬಿ ಖ್ಹಮಾಳಿಲಿದಾತೊ, ಇನ ಜೋ಼ಡೆಸ್ ಅದಿಕಾರ್‌ಬಿ ಚ಼ಲಾವ್‌ಶು, ಅಪ್ಣೆ ಇನ ಭಣಿವಾಳ ಕಾಹೆ ಕರಿ ಬೋಲ್ಯಾತೊ, ಯೋಬಿ ಅಪ್ಣೆ ಇನಾಭಣಿವಾಳ ಕಾಹೆ ಕರಿ ಬೋಲ್‌ಶೆ.
2TI 2:13 ಅಪ್ಣೆ ವಿಶ್ವಾಸ್‌ವಾಳ ನಾ ರ‍್ಹಯಾತೋಬಿ, ಯೋ ವಿಶ್ವಾಸ್‌ರ‍್ಹವಾಳೊ ಹುಯಿರ‍್ಹೋಸ್. ಶನಕತೊ ಯೋ ಇನಿ ಸ್ವಭಾವ್‌ನ ವಿರೋದ್ ಶಾತ್ಬಿ ಕರಾಕೊಯ್ನಿ.
2TI 2:14 ಸಬೇನು ಅದ್ಮಿನ ಆ ಬಾರೇಮ ಯಾದ್ಮ ರಾಕ್ಣು. ಅಬ್ಬಾಜ಼ಬ್ಬಿನಿ ಬಾರೇಮ ಲಗಾತ್‌ ನಾಕರ‍್ನು ಕರಿ ದೇವ್ನ ಖ್ಹಾಮ್ಣೆ ಇವ್ಣುನ ಝೇತಾವ್. ಲಗಾತ್‌ ಕರಾಥಿ ಶನೂಸ್ ಫಾಯಿದೊ ಕೋ ಹುವಾನಿ, ಕತೋಬಿ ಖ್ಹಮ್‌ಜಾ಼ವಾಳು ಅದ್ಮಿ ಬಿಗ್‌ಡಿಜಾ಼ಸ್.
2TI 2:15 ದೇವ್ನ ಡೋಳಾಮ ಲ್ಹಾಯಕ್‌ನು ಅದ್ಮಿಹುಯಿನ್ ದೆಖೈಲ್ಯವಾನಟೇಕೆ ತಾರಿ ಅಖ್ಖಿ ಶಕಥ್ಥಿ ಕೋಶಿಶ್ ಕರ್‌, ಅನೇಥಿ ವಾತೇಮಾಬಿ ರ‍್ಹವೊ ಇವ್ಣ ಕಾಮ್ ಖ್ಹಾರಾನಾಬಿ ರ‍್ಹವೊ ಖ್ಹರಮ್‌ ಕಾಡಾನಿಘೋಣಿ ನಾರ‍್ಹೇವ್ಣು ಅಜು಼ ದೇವ್ನಿ ಖ್ಹಾಚಿ ವಚನ್ ಬರಾಬರ್‌ಥಿ ಬೋಲಿದ್ಯವಾಳೊ ಹುಯಿರ‍್ಹೆ.
2TI 2:16 ಜಗತ್ನು ಹುಯಿರ‍್ಹುತೆ ಫಾಲ್ತು ವಿವಾದ್‌ಥಿ ಅಜು಼ ಭಕ್ತಿಕೊಂತೆ ವಿಚಾರ್‌ಥಿ ದೂರ್ ರ‍್ಹೇ.ಶನಕತೊ ಯೊ ವಿಚಾರ್ ಅದ್ಮಿವ್‌ನ ದೇವ್‍ಥಿ ದೂರ್ ಕರಿನಾಖಸ್.
2TI 2:17 ಇವ್ಣಿ ವಾತೆ ಖ್ಹಡ್ಯಾ ಫೋಡಾನಿಮತ್ ಫೈಲಿಜಾ಼ಸ್. ಹುಮೆನಾಯಿನ್ ಅಜು಼ ಪಿಲೇತಾಬಿ ಇಮ್‌ನಾಸ್ ಹುಯಿರ‍್ಹಾಸ್.
2TI 2:18 ಇವ್ಣೆ ಖ್ಹಾಚೊ಼ ಮಾರಗ್‌ನ ಮ್ಹೆಂದಿನ್, ಪಾಛು಼ ಜಿವ್ತುಹುಯಿನ್ ಹುಯಿಗು ಕರಿ ಬೋಲ್ತುಹುಯಿನ್,ಅಮ್ ಥೋಡ ಅದ್ಮಿನಿ ವಿಶ್ವಾಸ್‌ನ ಬರ್ಬಾತ್ ಕರುಕರಸ್.
2TI 2:19 ಶಾತ್ಬಿ ರ‍್ಹವೊ ದೇವ್ನೆ ನಾಖ್ಯೋತೆ ಹದಿಪಾಯ ಯೊ ಘಟ್ ಭೀಯೂಸ್. ಇನಾಪರ್ ಲಿಖೈರ‍್ಹುಸ್ “ಯೋ ಹದಿಪಾಯಪರ್, “ಪ್ರಭು ಇನ ಅದ್ಮಿನ ಮಾಲುಮ್ ಕರಿರಾಖ್ಯೋಸ್”. ಅಜು಼ ಯೋ ಹರೇಕ್ ಜ಼ಣಾನ ಬೋಲಾಸ್ ಹೈರೋತೆ ಪ್ರಭುವಾಳೊ ಹುಯಿರ‍್ಹೋಸ್‍ಕರಿ ಯೊ ಖರಾಬ್ ಕಾಮ್‍ಥಿ ಬಚಾ಼ಡಸ್ ಅಜು಼ ಪ್ರಭುವಾಳೊಕರಿ ಬೋಲಿಲೇಸ್ ಯೊ ಖರಾಬಿಥಿ ಬಚಾ಼ಡಿಲೇವ್ಣು.
2TI 2:20 ಏಕ್‌ ಮೋಟ ಘರ್‌ಮ ಖ್ಹಾರಿಸ್ ತರ‍್ಹಾನು ಹಂಡ್‌ಕು ಠಿಕ್ರು ರ‍್ಹೇಸ್. ಇನಾಮ ಥೋಡು ಖ್ಹೊನ್ನಾನು, ಥೋಡು ರೂಪಾನು, ಥೋಡು ಲಾಕ್ಡಾನು ಅಜು಼ ಥೋಡು ಮಾಟಿನು ರ‍್ಹೇಸ್. ಇನಾಮಾನು ಥೋಡು ರಾಛಾ಼ನ ಅಛ಼್ಛ ಕಾಮ್ಮ ಉಪಯೋಗ್‌ಕರಸ್, ಅಜು಼ ಥೋಡು ರಾಛಾ಼ನ ಮ್ಹಾಮೂಲಿ ಕಾಮ್ಮ ಉಪಯೋಗ್‌ಕರಸ್.
2TI 2:21 ಕೋಣ್‌ಬಿ ಏಕ್‌ ಜ಼ಣು ಖ್ಹಾರುಸ್ ಖರಾಬ್‌ಕಾಮ್ ಮ್ಹೆಂದಿನ್, ಇನು ಯೋ ಪಾಕ್‌ ಹುಯಿಜಾ಼ಸ್ಕಿ ಇನ ವಿಶೇಷ್ ಕಾಮ್ಮ ಉಪಯೋಗ್ ಕರ್ಶೆ. ಶನಕತೊ ಇವ್ಣೆ ದೇವ್ನಿ ಸೇವೆ ಕರಾನ ಒಪ್‌ಶೈದೀನ್, ಪ್ರಭುನ ಉಪಯೋಗ್ ಹುವಾನಖ್ಹಾಜೆ, ಖ್ಹಾರುಸ್ ಅಛ಼್ಛುಕಾಮ್ ಕರಾನ ತೈಯಾರ್ ಹುಯಿರ‍್ಹಿಶೆ.
2TI 2:22 ಜ಼ವಾನೀನಿ ಖರಾಬ್ ಲಾಲಚ್‌ಥಿ ದೂರ್ ರ‍್ಹೇ. ನೀತಿಥಿ, ವಿಶ್ವಾಸ್‍ಥಿ, ಪ್ಯಾರ್ ಅಜು಼ ಸಮಾಧಾನ್‌ಥಿ ಜಿವಾನಖ್ಹಾಜೆ, ಪಾಕ್‌ ಮನ್‌ಥಿ ಪ್ರಭುನ ಪುಕಾರವಾಳಾನ ಜೋ಼ಡೆ ರ‍್ಹಾವನ ಕೋಶಿಶ್ ಕರ್‌.
2TI 2:23 ಫಾಯಿದೊಕೊಂತೆ ಅಜು಼ ಬೇಕಾರ್ ವಿವಾದ್‌ಥಿ ದೂರ್ ರ‍್ಹೇ; ಇಮ್ನಿ ವಿವಾದ್ ಖ್ಹಾರಿ ಲಗಾತ್‌ ಉಷೆ.
2TI 2:24 ಪ್ರಭುನೊ ಸೇವಕ್ ಲಗಾತ್‌ ನಾಸ್ ಕರ‍್ನು. ಯೋ ಹರೇಕ್‌ನ ಗೋರ್‌ ಕರಾವಾಳೊ ಹುಯಿರ‍್ಹೇಣು, ವಚನ್ ಬೋಲಿದ್ಯವಾಮ ಚಾ಼ತುರ್ ಹುಯಿರ‍್ಹೇಣು ಅಜು಼ ಖ್ಹಮಾಳಿಲ್ಯವಾಳೊ ಹುಯಿರ‍್ಹೇಣು.
2TI 2:25 ಇನ ವಿರೋದ್ ಕರಾವಾಳಾನಾಬಿ ಅನ ಖ್ಹಯಾಲ್ಮ ರಾಖಿನ್ ಶಾಂಧಾರಿಥಿ ಬೋಲಿದಾವಳೊ ಹುಯಿರ‍್ಹೇಣು. ದೇವ್ ಇವ್ಣುನ ಜಿನುಕು ದಿಲ್‌ ಫರಾವನಿತರ ಶಕತ್ ದಿಶೆ.ಅನೇಥಿ ಖ್ಹಾಚಿ ಅಕ್ಕಲ್ ಇವ್ಣುನ ಮಳ್‌ಶೆ.
2TI 2:26 ತದೆ ಇವ್ಣೆ ದೇವ್ನಿ ಮರ್ಜಿನ ಪರ್ಖಿಲಿನ್, ಇವ್ಣುನ ಧರಿನ್, ಇವ್ಣೆ ಇನಿ ವಾತೆ ಖ್ಹಮ್‌ಜಾ಼ನಿಮತ್ ಕರಿರಾಖ್ಯೊಸ್ತೆ ಶೈತಾನ್ನ ಫಾಖ್ಹಾಮಾಥು ಭಾರ್‌ಆಯಿನ್, ಬಚಿಜಾ಼ಶೆ.
2TI 3:1 ಯಾದ್ ರಾಖಿಲೆ ಖ್ಹರ್ತಿನ ದನೂಮ ಖರಾಬ್ ವಖ್ಹತ್ ಆವ್‌ಶೆ.
2TI 3:2 ಅದ್ಮಿಖ್ಹಾರು ಖಲಿ ಇನಿಬಾರೇಮ ಯೊ ಸೋಚವಾಳು, ಪೈಶಾನಿಲಾಲಚ಼್‌ವಾಳು, ಬಡೈಮಾರಿಲೆವಾಳು, ಹಂಕಾರ್‌ಭರ್‍ಯು, ಮಶ್ಲ ಮಾರವಾಳು ಹುಯಿರ‍್ಹಿಶೆ. ಅಜು಼ ಆಯ-ಬಾನ ಚಾ಼ವ್‌ಣ್ಯ ಕಾಡವಾಳೊ ಅಪವಿತ್ರ ಹುಯಿರ‍್ಹೋಸ್. ದೇವ್‌ನೊ ಡರ್‌ಕೊಂತೆ,
2TI 3:3 ಪ್ಯಾರ್‌ಕೊಂತೆ, ಆರ್‌ಗೋರ್‌ ಕರಾಕೊಂತೆ ಅಜು಼ ಚ಼ಹಾಡ್ ಬೋಲವಾಳು, ಇನುಯೋ ದಾಬುಕ್‌ಕೊಂತೆ, ರಣ್‌ಖಂದ್ಲಿಬಿ ಅಜು಼ ಅಛ್ಛಾ಼ನ ವಹೇರ್‌ ಕರಾವಾಳು ಹುಯಿರ‍್ಹಿಶೆ.
2TI 3:4 ಧೋಕೊ ದ್ಯವವಾಳು, ದುಡ್ಕಿನ್ ವಾತೆ ಬೋಲವಾಳು, ಹಂಕಾರಿಅಖ್ಖು, ದೇವ್ನ ಪ್ಯಾರ್‌ಕರಾಥೀಬಿ ಹೋಶ್‌ನಿ ಭೋಗ್‌ಮಾಸ್ ಖುಷಿಕರವಾಳು ಹುಯಿರ‍್ಹೂಸ್.
2TI 3:5 ಯೊ ಅದ್ಮಿಖ್ಹಾರು ಅಪ್ಣ ಪದತ್ತಿ ಕಾಮ್ನಾಸ್ ಧರಿರಾಖಾಸ್ ಕತೋಬಿ ಇನ ಮಹಿನು ಖ್ಹಾಚಿನಿ ಶಕತ್ನ ಮ್ಹೇಲಿದೇಸ್ ಅಥ್ರಾನವಾಳೇಥಿ ದೂರ್ ರ‍್ಹೆ.
2TI 3:6 ಅವ್ಣಾಮ ಥೋಡು ಜ಼ಣು ಅದ್ಮಿನ ಘರ್‌ಮ ಪೇಶಿನ್, ಪಾಪ್‌ಥಿ ಭರೈರ‍್ಹೀತೆ ಅಜು಼ ಬಿಜಿ ಖ್ಹಾರಿ ಆಖ್ಹ್‌ಮ ಡುಬಿರ‍್ಹೇಸ್ತೆ ಬುದ್ಧಿಕೊಂತೆ ತಯೇಡಾವ್‌ನ ಕಬ್‍ಜಾ಼ ಕರಿಲೇಸ್.
2TI 3:7 ಕತೋಬಿ, ಯೋ ತಯೇಡವ್‌ ಹಮೇಶ ಉಪದೇಶ್‌ ಖ್ಹಮ್‌ಜು಼ಕರಿನ್‌ಬಿ ಖ್ಹಾಚಿ ಶಾತ್‌ಕರಿ ಪರ್ಖಿ ರಾಖಿಯೆಕೊಂತೆ ಹುಯಿರ‍್ಹಿಯೇಸ್.
2TI 3:8 ಯನ್ನ ಅಜು಼ ಯಂಬ್ರ ಮೋಶೆನಿ ವಿರೋದ್ ಕರ‍್ಯುಕೀ ಇಮ್ಮಸ್, ಆ ಅದ್ಮಿವ್‌ ಜಿನುಕು ಖ್ಹಾಚಿನ ವಿರೋದ್ ಕರಾಸ್. ಅವ್ಣು ದಿಮಾಕ್ ಬರಬರ್‌ಕೊಯ್ನಿ ಅಜು಼ ವಿಶ್ವಾಸ್‌ನ ಮ್ಹೆಂದಿದುಹುಯು ಹುಯಿರ‍್ಹೂಸ್.
2TI 3:9 ಕತೋಬಿ ಬಿಜು಼ಖ್ಹಾಮೆ ಇವ್ಣೆ ಭಡಾನ ಕೋ ಉಶೇನಿ. ಶನಕತೊ ಕಿಮ್ ಯನ್ನ ಅಜು಼ ಯಂಬ್ರಾನ ದಿಮಾಕ್‌ಕೊಯ್ನಿ ಕರಿ ಅದ್ಮಿಖ್ಹಾರಾನ ಮಾಲುಮ್‌ ಪಡ್ಯೂಕಿ ಇಮ್ಮಸ್, ಅವ್ಣುನಾಬಿ ದಿಮಾಕ್‌ಕೊಯ್ನಿ ಕರಿ ಖ್ಹಾರಸ್ನ ಮಾಲುಮ್ ಪಡ್‌ಶೆ.
2TI 3:10 ಕತೋಬಿ ತೂ, ಮಾರಿ ಜೀವನ್ನಿ ತರೀಕ,ಮಾರಿ ಜೀವನ್ನಿ ಉದ್ದೇಶ್,ಮಾರು ವಿಶ್ವಾಸ್ ಅಜು಼ ಮೆ ಖ್ಹಮಾಳಿಲ್ಯವಾನು,ಮಾರಿ ಪ್ಯಾರ್, ಮಾರಿ ಭಾಲಿ ಆ ಅಖ್ಖು ತುನೆ ಚ಼ಲೈರಾಖ್ಯೊಸ್.
2TI 3:11 ಮನ ಹುಯೂತೆ ವದೇಖ್ಹೊ ಅಜು಼ ಖ್ಹತಾಪ್ಣಿನಿ ಬಾರೇಮಾಬಿ ತುನ ಮಾಲುಮ್‌ ಛಾ಼. ಅಂತಿಯೋಕ್ಯ, ಇಕೋನ್ಯ ಅಜು಼ ಲುಸ್ತ್ರಾಮ ಮೇ ಕೆತ್ರೆ ಮೋಟಿ ವದೇಖ್ಹೊ ದಿದೂಥು ಇನ ಮೆ ಖ್ಹಮಾಳ್ಯೊ, ಕತೋಬಿ ಪ್ರಭುನೆ ಯೋ ಅಖ್ಖಾಮಾಥು ಬಚಾ಼ಡ್ಯೊ.
2TI 3:12 ಕ್ರಿಸ್ತ ಯೇಸುಮ ದೇವ್ನಿ ಮರ್ಜಿನಿಘೋಣಿ ಜಿ಼ಂದ್‌ಗಿ ಜಿವ್ಣುಕರಾನ ಆಖ್ಹ್ ಕರಾಸ್ತೆ ಹರೇಕ್ ಜ಼ಣು ಲತಾಡ ಪಡ್ಣುಸ್ ಪಡಾಸ್‌.
2TI 3:13 ಕತೋಬಿ ಖರಾಬ್ ಅಜು಼ ಠಗಾರ‍್ಯು ಅದ್ಮಿ ಬಿಜಾ಼ವ್‌ನಾಬಿ ಠಗೈನ್ ಅಜು಼ ಇವ್ಣೇಬಿ ಗಲತ್‌ಪರ್ ಚಾ಼ಲ್ತುಹುಯಿನ್, ದನ್‌ಪರ್-ದನ್ ತೀರ್‌ಚಾಸ್ ಖರಾಬ್ ಹುಯಿಜಾ಼ಸ್.
2TI 3:14 ಕತೋಬಿ ತಾರಿ ಬಾರೇಮ ಬೋಲ್ನುಕತೊ ಯೊ ಖ್ಹಾಚಾಮ ಘಟ್‌ರ‍್ಹೆ. ಆ ತುನ ಶಿಕಡೈರ‍್ಹೂಸ್ ಅಜು಼ ವಿಶ್ವಾಸ್ ಧರಿಲೆ. ಅನಿಬಾರೇಮ ತುನ ಕಿನೆ ಶಿಕಾಡ್ಯೂಕರಿ ತುನ ಮಾಲುಮ್ ಛಾ಼ನಿ.
2TI 3:15 ಅಡ್ಡಾಣಿಪರ್‌ಥೂಸ್ ತುನ ಪರಿಶುದ್ದ ದಪ್ತರ್‌ಮ ಲೀಖೈರ‍್ಹುತೆ ಮಾಲುಮ್‌ ಛಾ಼ನಿ, ಯೋ ದಪ್ತರ್‌ಖ್ಹಾರು ಕ್ರಿಸ್ತಯೇಸುಮ ಛಾ಼ತೆ ಭರೋಖ್ಹಾಥಿ ರಕ್ಷಣೆಲ್ಯವಾನಿ ಗ್ಯಾನ್ನ ತುನ ದ್ಯವಾನ ತಾಖತ್ನು ಹುಯಿರ‍್ಹುಸ್.
2TI 3:16 ಆ ಖ್ಹಾರಿಸ್ ನಿಯಮ್ ದೇವ್ನಿಖೂಜ್‍಼ಥಿ ಬಣಿರ‍್ಹೂಸ್. ಅಜು಼ ಅದ್ಮಿವ್‌ನ ಖ್ಹಾಚಿ ಪಢಂತ್‍ನ ಶಿಕಾಡನ, ಗಲತ್‌ ಕರವಾಳನ ಬರಾಬರ್‌ ಕರಾನ ಅಜು಼ ಇನಿ ಗಲತ್‌ನಖ್ಹಾಜೆ ಗುರ್‌ಕಾವಾನ, ಅಜು಼ ನೀತಿನ ಶಿಕಾನಾಬಿ ಫಾಯಿದೊ ಹುಯಿರ‍್ಹೂಸ್.
2TI 3:17 ಅನಖ್ಹಾಜೆ ದೇವ್ನು ಅದ್ಮಿ ಧರ್ಮಶಾಸ್ತ್ರಥಿ ಚಾ಼ತುರ್‌ಹುಯಿನ್, ಅಮ್ನಿ ಪರಕ್ಮ ಅಖ್ಖೀಸ್ ತರ‍್ಹಾನು ಅಛ಼್ಛುಕಾಮ್ ಕರಾನ ಶಿಕಾಸ್.
2TI 4:1 ದೇವ್ನ ಖ್ಹಾಮ್ಣೆ ಸಾಕ್ಷಿ ಹುಯಿರಿನ್ ಅಜು಼ ಕ್ರಿಸ್ತಯೇಸುನ ಸಾಕ್ಷಿಕರೀನ್ ಯೋ ಜಿವ್ತುರ‍್ಹವಾಳನ ಅಜು಼ ಮರ‍್ಯಹುಯಾನ ನ್ಯಾವ್‌ನ ತೀರ್ಪ್ ಕರಾವಾಳೊ. ಶನಕತೊ ಯೊ ದೆಖಾವ್‌ಶೆ ಅಜು಼ ಇನಿ ರಾಜ್ಯ ಖನ್ನೆ ಛಾ಼. ಮೆ ತುನ ಕೋಲ್‌ನಾಮ್ ಕರೀನ್ ಹುಕುಮ್ ದೆವುಸ್.
2TI 4:2 ದೇವ್ನಿ ಸುವಾರ್ತೆ ಅದ್ಮಿವೋನ ಅಛ್ಛಿ ವಖ್ಹತ್‌ಮ ಖಬರ್ ವಖ್ಹತ್‌ಮ ಬೋಲಿದೆ. ಅದ್ಮಿಖ್ಹಾರು ಕರ್ನುತೆ ಇನ ಇವ್ಣುನ ಬೋಲಿದೆ. ಇವ್ಣೆ ಗಲತ್‌ ಕರಾನಿ ವಖ್ಹ್‌ತೆ ಯೋ ಇನ ಒತಾಳ್, ಇವ್ಣುನ ಗುರ್‌ಕಾವ್, ಹುಮ್ಮಖ್ಹ್‌ರ‍್ಹಿನ್ ಘಣು ಖ್ಹಮಾಳಿರ‍್ಹೀನ್‌ ಅಜು಼ ಹೊಷಾರ್‌ಥಿ ಕರ್‌.
2TI 4:3 ಅದ್ಮಿಖ್ಹಾರು ಖ್ಹಾಚಿ ವಚನ್ನ ಮಾನಕೊಂತೆ ದನ್ ಆವ್‌ಶೆ. ಯೊ ದನೂಮ, ಇವ್ಣೊ ಕಾನ್‌ ಆಖ್ಹ್ ಕರಾತೆ ಇಮ್‌ ಅಜು಼ ಇವ್ಣ ಖ್ಹಾಜಾ಼ತೆ ಇಮ್‌ ವಚನ್ ಬೋಲವಾಳಾನ ಎಕ್ಟು ಕರಿಲಿಶೆ.
2TI 4:4 ಇವ್ಣೆ ಖ್ಹಾಚಿ ವಚನ್ ಖ್ಹಮ್‌ಜಾ಼ನ ಮ್ಹೆಂದಿನ್, ಕೊಂತೆಖೇಣಿನ ಖ್ಹಮ್‌ಜಾ಼ವಾಳು ಹುಯಿರ‍್ಹಿಶೆ.
2TI 4:5 ಕತೋಬಿ ತೂ ಅಖ್ಖಿ ಹಾಲ್‌ಮ ತಾರು ತೂ ದಾಬುಕ್‌ಥಿ ರ‍್ಹೇ; ಖ್ಹತಾಪ್ಣಿ ಆಯುತೊ ಖ್ಹಮಾಳಿಲೇ, ಅಛ್ಛಿ ಸಮಚಾರ್‌ನ ಬೋಲವಾಳೊ ಹುಯಿರ‍್ಹೆ, ಅಜು಼ ತುನ ದೆವೈರ‍್ಹೀತೆ ಸಬೇನು ಕಾಮ್ನ ಬರಾಬರ್‌ಥಿ ಕರ್‌. ಮಾರಿ ಬಾರೇಮ ಬೋಲ್‌ನು ಕತೊ ಮಾರಿ ವೇಳ್ ಐರ‍್ಹೀಸ್ ಮೇ ಬಲಿ ಹುವಾನು ವಖ್ಹತ್ ಆವ್‌ತುರ‍್ಹು.
2TI 4:6 ಶನಕತೊ ಮೇತೊ ಹಮ್ಕೇಸ್ ಬಲಿಹುಯಿನ್ ಅರ್ಪಣ್‌ ಹುಯೆಜವುಸ್. ಮೇ ಜಾ಼ವಾನಿ ವೇಳ್ ಖನ್ನೆ ಅಯಿಗು.
2TI 4:7 ಮೇ ಮಹಾನ್ ಹರ್‌ಜಿತ್‌ ಕರಿರಾಖ್ಯೊಸ್, ಮಾರಿ ದೌಡ್ನ ನಾಶೀನ್ ಖ್ಹರ್ತಿ ಕರಿರಾಖ್ಯೊಸ್, ಅಜು಼ ಮೇ ಕ್ರಿಸ್ತನಿ ವಿಶ್ವಾಸ್ ಬಚಾ಼ಡಿರಾಖ್ಯೊಸ್.
2TI 4:8 ದೇವ್ನ ಖ್ಹಾಜಾ಼ನಿಮತ್ ಜಿವವಾಳಾನ ಮಳಾಸ್ತೆ ಜಯಾನಿ ಹಾರ್ ಹಮ್ಕೆ ಮಾರಖ್ಹಾಜೆ ತೈಯಾರ್ ಛಾ಼. ಯೋ ನೀತಿವಾಳೊ ನ್ಯಾವ್‍ನೊ ಅದಿಪತಿ ಹುಯಿರ‍್ಹೋತೆ ಪ್ರಭು, ಯೋ ದನ್ಮ ಮನ ದಿಶೆ, ಮನಾಸ್ ಕಾಹೆತೆ, ಯೋ ಆವ್‌ಶೇತೆ ದೇಕ್ಣು ಕರಿ ಪ್ಯಾರ್‌ಥಿ ಜ಼ಪಿರ‍್ಹೂತೆ ಇವ್ಣುನಾಬಿ ದಿಶೆ.
2TI 4:9 ತುನ ಹುವಾಯೆತ್ರೆ ವಗ್ಗಿಸ್ ಮಾರಕನ ಆವಾನ ಕೋಶಿಶ್ ಕರ್‌.
2TI 4:10 ದೇಮಾನೆ ಆ ಜಗತ್ನ ಪ್ಯಾರ್ ಕರ‍್ಯೊ. ಅಜು಼ ಮನ ಮ್ಹೆಂದಿನ್ ಥೆಸಲೋನಿಕನ ಚ಼ಲೆಗಯೊ. ಕ್ರೆಸ್ಕ ಗಲಾತ್ಯನ ಅಜು಼ ತೀತನೆ ದಲ್ಮಾತ್ಯನ ಚ಼ಲೇಗಯ.
2TI 4:11 ಖಲಿ ಲೂಕ ಮಾರ ಜೋ಼ಡೆ ಛಾ಼. ತೂ ಆವಾನಿ ವಖ್ಹತ್‌ಮ ಮಾರ್ಕಾನ ತಾರ ಕೇಡೆ ಬುಲೈಲಿ ಆವ್, ಶನಕತೊ ಮಾರ ಕಾಮ್ಮ ಮದತ್ ಕರ್ಶೆ.
2TI 4:12 ಹಮ್ಕೆ ಮೇ ತುಖಿಕನ ಅಖ್ಖಿ ಅದಿಕಾರ್‌ಥಿ ಎಫೆಸ ಖ್ಹಯೇರ‍್ನ ಮೋಕ್ಲಿರಾಖ್ಯೊಸ್.
2TI 4:13 ತೂ ಆವಾನಿ ವಖ್ಹತ್‌ಮ ತ್ರೋವ ಗಾಮ್‌ನ ಕರ್ಪಕನ ಇನ ಮೇ ಮ್ಹೆಂದಿನ್ ಆಯೋತೆ ಮಾರೊ ಝ಼ಗ್ಗೊ ಅಜು಼ ಪುಸ್ತಕಅಖ್ಖು, ಎತ್ರೇಸ್ ಕಾಹೆತೆ ಚಾ಼ಂಬ್‌ಡೇಥಿ ಬಣೈಹುಯು ಪುಂಗ್‌ಳಿನ ಪಾಡಿಲೀನ್ ಆವ್‌ಜೊ.
2TI 4:14 ಕಂಚ಼್‌ನು ಕಾಮ್ ಕರಾವಾಳೊ ಅಲೆಕ್ಸಾಂಡರ‍್ನೆ ಮನ ಘಣು ಖ್ಹತಾಯೊ, ಇನೆ ಕರ‍್ಯೊತೆ ಕಾಮ್ನಟೇಕೆ ಪ್ರಭು ಇನ ಬರಾಬರ್‌ನಿ ಪ್ರತಿಫಲ್ ದಿಶೆ.
2TI 4:15 ತೂಬಿ ಇನಿ ಬಾರೇಮ ಜ಼ತನ್ ರ‍್ಹೇ. ಶನಕತೊ ಇನೆ ಹಮೆ ಬೋಲೆಸ್ತೆ ವಚನ್ನ ಘಣು ವಿರೋದ್ ಕರ‍್ಯೊ.
2TI 4:16 ಮೇ ಪಹಿಲಿ ಜ಼ವಾಬ್ ದಿದೋತೆ ತದೆ ಕೋಣ್‌ಬಿ ಮಾರಿಜೋ಼ಡೆ ಕೋಥೂನಿ, ಅಖ್ಖುಜ಼ಣು ಮನ ಹಾತ್ ಮ್ಹೆಂದಿದು. ಹೈರುತೆ ಇವ್ಣುನ ದೋಷ್‍ಹುಯಿನ್ ಗಣ್ತಿಮ ನಕೊ ರ‍್ಹವಾದೆ.
2TI 4:17 ಕತೋಬಿ ಪ್ರಭುನೆ ಮಾರ ಜೋ಼ಡೆಸ್ ರ‍್ಹೀನ್, ಮನ ಭಾಲಿದಿದೊ. ಅಜು಼ ಮೇ ಪರೈಜಾ಼ತ್‌ವಾಳು ಖ್ಹಾರು ಪೂರಿ ತರಿಕಾಥಿ ಖ್ಹಮ್‌ಜಾ಼ನಿಮತ್ ದೇವ್ನಿ ಸುವಾರ್ತೆನ ಬೋಲಾನಿಘೋಣಿ ಕರ‍್ಯೊ. ಎತ್ರೇಸ್ ಕಾಹೆತೆ ಇನೆ ಮನ ಶುಂಭಾನ ಮ್ಹೋಡಮಾಥು ಛೋ಼ಡಾಯೊ.
2TI 4:18 ಅಜು಼ ಪ್ರಭು ಮನ ಖ್ಹಾರ ಖರಾಬ್‌ಥಿ ಬಚಾ಼ಡಿನ್, ಇನಿ ಸೊರ್ಗ ರಾಜ್ಯಮ ಲೀಜಾ಼ಶೆ. ಜ಼ಗ್‌ಜ಼ಮಾನಮಾಬಿ ಇನ ಮಹಿಮೆ ಹುವಾದೆ! ಆಮೆನ್.
2TI 4:19 ಪ್ರಿಸ್ಕಿಲ್ಲ ಅಜು಼ ಅಕ್ವಿಲನ, ಅಜು಼ ಒನೇಸಿಪೊರನ ಘರ್‌ವಾಳಾನ ತೋಬ ಕರಿ ಬೋಲ್‍ಜೊ.
2TI 4:20 ಎರಸ್ತ ಕೊರಿಂಥಾಮ ರ‍್ಹೀಗೊ. ತದೆ ತ್ರೊಫಿಮನ್ನ ಜಾನ್ನ ಅಛ್ಛು಼ಕೊಂತೆ ದೇಖಿನ್, ಮೇ ಇನ ಮಿಲೇತ್‌ಮಾಸ್ ಮ್ಹೆಂದಿದೊ.
2TI 4:21 ಠಣ್ಣಾ ದನ್ನ ಆವಾನ ಅಗಾಡಿಸ್ ಮಾರಕನ ಆವಾನ ಕೋಶಿಶ್ ಕರ್‌. ಯುಬೂಲ, ಪೊದೆಯಾಬಿ, ಲೀನ, ಕ್ಲೌದ್ಯ ಅಜು಼ ಬಿಜು಼ ಖ್ಹಾರು ಭೇನೆ ಭೈಯೇ ತುನ ತೋಬ ಕರುಕರಸ್.
2TI 4:22 ಪ್ರಭು ತಾರ ಆತ್ಮನಿ ಜೋ಼ಡೆ ರ‍್ಹವಾದೆ. ಇನಿ ವಾರ್‌ಖ್ಹೊ ತುಮಾರ ಖ್ಹಾರಸ್‌ಪರ್ ರ‍್ಹವಾದೆ.
TIT 1:1 ದೇವ್‌ನೊ ಸೇವಕ್‌ಬಿ ಅಜು಼ ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ ಲೀಖ್ಯೋತೆ. ದೇವ್ನೆ ಚೂ಼ಣ್ಯೋತೆ ಅದ್ಮಿ ಖ್ಹಾರಾನಿ ಖ್ಹಾಚಾಮ ಚ಼ಲಾವನಟೇಕೆ ವಿಶ್ವಾಸ್‌ನ ಭಡಾವಾನಖ್ಹಾಜೆ ಅಜು಼ ಯೊ ಇವ್ಣುನ ಭಕ್ತಿನಿ ಜಿವ್ಣಮ ಚ಼ಲಾವಸ್.
TIT 1:2 ಆಹೈರುತೆ ಖ್ಹಾಚ ಜಿ಼ಂದ್‌ಗೀನ ಭರೋಖ್ಹಾಪರ್ ಆಧಾರ್ ಹುಯಿರ‍್ಹೂಸ್. ದೇವ್ ಕೆದೇಬಿ ಝೂ಼ಟಿ ಬೋಲಾಕೊಯ್ನಿ. ಯೋ ಜಿವ್ಣಾನಿ ಬಾರೇಮ ಅಪ್ಣುನ ದಿಶೆ ಕರಿ ಹಗಾಮ್ನ ಪಹಿಲೆಥೂಸ್ ವಾಗ್ದಾನ್‌ ಕರಿರಾಖ್ಯೋಸ್.
TIT 1:3 ಅಜು಼ ಬರಾಬರ್‌ನಿ ವಖ್ಹತ್‌ಮ, ದೇವ್ನೆ ಇನಿ ಉಪದೇಶ್‍ನ ಪ್ರಕಟ್‌ಕರ‍್ಯೊ. ಅಜು಼ ಯೊ ಮನ ದೆವೈರ‍್ಹೂಥು. ಅಜು಼ ರಕ್ಷಣೆ ದ್ಯವಾನಿ ದೇವ್ನಿ ಹುಕುಮ್‌ನಿಮತ್ ಮೇ ಬೋಲಿರಖ್ಯೋಸ್.
TIT 1:4 ವಿಶ್ವಾಸ್‌ಮ ಮಾರ ಖ್ಹಾಚ ಛಿಯ್ಯಾನಿಮತ್ ಛಾ಼ತೆ ತೀತನ ಮೇ ಆ ಲೀಖುಕರುಸ್ತೆ. ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥಿ ಅಜು಼ ಅಪ್ಣೊ ರಕ್ಷಕ್ ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ ತುನ ವಾರ್‌ಖ್ಹೊ ಅಜು಼ ಶಾಂತಿ ಮಳಾದೆ.
TIT 1:5 ತೂ ಕ್ರೇಟ್‌ಮ ಬಿಜೂ಼ಬಿ ಬರಾಬರ್‌ ಹುಯುಕೊಂತೆ ಕಾಮ್ನ ಖ್ಹಾರು ಬರಾಬರ್‌ ಕರಾನಖ್ಹಾಜೆಬಿ, ಅಜು಼ ಹರೇಕ್ ಖ್ಹಯೇರ್‌ಮ ಸಬೇನು ಶಾಣಾವ್ನ ನೇಮಕ್ ಕರ್ನುಕರಿ ಮೇ ತುನ ಹಿಜ಼್ಜಾಸ್ ಹುಕುಮ್ ದೀನ್ ಮ್ಹೆಂದಿನ್ ಆಯೊ.
TIT 1:6 ಸಬೇನೊ ಮೋಟೊ ರ‍್ಹವಾಳೊ ನಿರ್ದೋಷಿ ಹುಯಿರ‍್ಹೇಣು, ಇನ ಎಕ್ಕಸ್ ಬಾವಣ್‍ ರ‍್ಹೇವ್ಣು, ಇನ ಲಡ್ಕಾ ವಿಶ್ವಾಸಿ ಹುಯಿರ‍್ಹೇಣು,ಅಜು಼ ಇವ್ಣೆ ಖರಾಬ್ ರ‍್ಹವೊ, ಲಗಾತಿರ‍್ಹೇವೊ ನಾ ಹುಯಿರ‍್ಹೇಣು.
TIT 1:7 ಶನಕತೊ ಸಬೇನೊ ಗಲ್‌ಢೊ ದೇವ್ನಕಾಮ್‌ನು ಇಶಾಬ್‌ದ್ಯವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ, ಯೋ ಗಲ್ತಿಕೊಂತೆ ಅದ್ಮಿ ಹುಯಿರ‍್ಹೇಣು, ಛೇಡಾವವಾಳೋಬಿ, ವಗ್ಗಿಸ್‌ಮ ಖೀಜ಼್ ಕರವಾಳೊ ರ‍್ಹವೊ, ಪಿಯವಾಳೊರ‍್ಹವೊ, ಪೈಶಾನಿ ಲಾಲಚ್‌ರ‍್ಹವಾಳೊ, ಲಡಂತು ರ‍್ಹವೊ ನಾ ಹುಯಿರ‍್ಹೇಣು.
TIT 1:8 ಯೋ ಘರ್‌ಮ ವಿಶ್ವಾಸ್‌ವಾಳನ ಬುಲೈನ್ ಸ್ವಾಗತ್ ಕರವಾಳೊ ಹುಯಿರ‍್ಹೇಣು, ಅಛ್ಛಾ಼ನಪ್ಯಾರ್ ಕರವಾಳೊಬಿ, ಅಕ್ಲೀಬಿ, ನೀತಿಥಿರ‍್ಹವಾಳೊಬಿ, ಪರಿಶುದ್ ಹುಯಿರ‍್ಹೇಣು.
TIT 1:9 ಯೊ ಇನಿ ಭರೋಖ್ಹಾನಿ ಸಂದೇಶ್ನ ಘಟ್ ಧರಿಲ್ಯವಾಳೊ ಹುಯಿರ‍್ಹೇಣು, ಅನಿ ಬಾರೇಮ ಇನ ಬೋಲೈರ‍್ಹುಸ್. ಇನಖ್ಹಾಜೇಥಿ ಯೊ ಅದ್ಮಿ ಖ್ಹಾಚಿ ಬೋಲಿದೇತೊಹುಯಿನ್ ಭಾಲಿ ದ್ಯವಾಳೊ ಹುಯಿರ‍್ಹೇಣು. ಹಮೆ ಬೋಲೇತೆ ಖ್ಹಾಚಾ಼ನ ವಿಶ್ವಾಸ್‍ಥಿ ಪಾಲನ್‍ ಕರ‍್ನು. ಯೊ ಖ್ಹಾಚಾಥಿಬಿ ಲ್ಹಾಯೇಕ್‌ನಿ ಉಪದೇಶ್‌ಥಿ ಯೊ ಅದ್ಮಿನ ಮದತ್ ಕರಾವಾಳೊ ಹುಯಿರ‍್ಹೇಣು.
TIT 1:10 ಕೈಯೆಕ್ಕಿ ಜ಼ಣು ಖಾಲಿವಾತೆವಾಳು, ಠಗಾವವಾಳು ಅಜು಼ ಗಲಾಟ್ ನಾಖವಾಳು ಹುಯಿರ‍್ಹೂಸ್. ಅಮ್ ವಿಶ್ವಾಸ್‌ ಕರಾವಾಳಾಮ ಘಣು ಅದ್ಮಿ ಯೆಹೂದ್ಯರ್‌ವಾಳುಸ್ ಹುಯಿರ‍್ಹೂಸ್.
TIT 1:11 ಇವ್ಣ ಫಾಯಿದಾನಖ್ಹಾಜೆ ಬೋಲ್ನುನಾತೆ ವಚನ್ನ ಬೋಲಿದೀನ್‌, ಹಿಡಿ ಕುಟುಂಬ್‌ನಾಸ್ ನಾಶ್ ಕರುಕರಸ್. ಅನಖ್ಹಾಜೆಸ್ ಇವ್ಣು ಮ್ಹೋಡು ಮೂಚಿರ‍್ಹೇಣು.
TIT 1:12 ಅಜು಼ “ಕ್ರೇಟ್ ಟಾಪವಾಳಮನೊ ಏಕ್‌ ಪ್ರವಾದಿ ಹಮೇಶ ಝೂ಼ಟಿ ಬೋಲವಾಳೊ, ಜಾನ್ವರ್‌ನಿತರಾನೊ, ಅಜು಼ ಶೋಂಬೇರಿ ಹುಯಿರ‍್ಹೂಸ್” ಕರಿ ಕ್ರೇಟ್‌ವಾಳೊಸ್ ಏಕ್‌ ಪ್ರವಾದೀನೆ ಬೋಲಿರಾಖ್ಯೋಸ್‌ನಿ.
TIT 1:13 ಪ್ರವಾದಿನೆ ಬೋಲ್ಯೋತೆ ಸಾಕ್ಷಿ ಖ್ಹಾಚಿಸ್ ಹುಯಿರ‍್ಹೀಸ್. ತೂ ಇವ್ಣುನ ಬರಾಬರ್‌ಥಿ ಗುರ್‌ಕಾವ್ಣು, ಅನೇಥಿ ಇವ್ಣೆ ಅಛ್ಛಿ ವಿಶ್ವಾಸ್‌ಮ ರ‍್ಹಿಶೆ.
TIT 1:14 ಅಜು಼ ಯೆಹೂದ್ಯರ್‌ನ ಕೊಂತೆಖೇಣೀಥಿ, ಅಜು಼ ಖ್ಹಾಚಿನ ಮಾನಿಲೆಯಿಕೊಂತೆ ಅದ್ಮಿ ಖ್ಹಾರಾನಿ ಹುಕುಮ್‌ ಭಣಿ ಧ್ಯಾನ್ ನಕೊ ದೀಶ್.
TIT 1:15 ಶುದ್‍ ರ‍್ಹೇಸ್ತೆ ಅದ್ಮಿನ ಖ್ಹಾರೂಸ್ ಶುದ್ದಸ್ ಹುಯಿರ‍್ಹೂಸ್. ಕತೋಬಿ ಖರಾಬ್ ಅಜು಼ ವಿಶ್ವಾಸ್‌ಕೊಂತೆ ಅದ್ಮಿಯೇವ್ನ ಕೆಹೂಬಿ ಮೈಲುಕಾಹೆ. ಶನಕತೊ ಇವ್ಣಿ ಖ್ಹಯಾಲ್ ಅಜು಼ ಮನ್ನಿಸಾಕ್ಷಿ ಭೇಬಿ ಅಪವಿತ್ರ ಹುಯಿರ‍್ಹೂಸ್.
TIT 1:16 ಇವ್ಣೆ ದೇವ್ನಿ ಬಾರೇಮ ಪರ್ಖಿರಾಖ್ಯಸ್ ಕರಿ ಬೋಲಿಲೆಸ್. ಕತೋಬಿ ಇವ್ಣೆ ಹುಕುಮ್ನ ನಾಮಾನವಾಳು ಹುಯಿನ್ ಗಂಧು ಕಾಮ್ ಕರಾವಾಳು, ದೇವ್ನ ಅಜು಼ ಖಿವು ಅಛ಼್ಛುಕಾಮ್ ಕರಾನಬಿ ಲ್ಹಾಯಕ್ ಕೊಯ್ನಿ.
TIT 2:1 ಕತೋಬಿ ತೂ ಇನಾಸ್ ಶಿಕಾಡ್ ಖ್ಹಾಚಿ ಉಪದೇಶ್‍ನ ಕಿಮ್ ಛಾ಼ಕಿ ಇಮ್ಮಸ್ ಬೋಲಿದೆ.
TIT 2:2 ಬುಢಾಖ್ಹಾರು ಪಿಯಾವಾಳು ನಾ ರ‍್ಹೇವ್ಣುತೇಬಿ, ಮರ್ಯಾದಿಥಿ ರ‍್ಹಹವಾಳೂಬಿ, ಇವ್ಣು ಇವ್ಣೆಸ್ ದಾಬುಕ್ಮ ರ‍್ಹವಾಳುಬಿ ಹುಯಿರ‍್ಹೇಣು, ಪ್ಯಾರ್, ಖ್ಹಮಾಳಿಲ್ಯವಾನು, ಅಜು಼ ವಿಶ್ವಾಸ್‌ಮ ರ‍್ಹವಾಳು ಹುಯಿರ‍್ಹೇಣು ಕರಿ ಶಿಕಾಡ್‌.
TIT 2:3 ಇಮ್ಮಸ್ ಬುಢಿಯಖ್ಹಾರು ಛಾ಼ಡಿ ಬೋಲವಾಳಿಯೆ ನಾ ಹುಯಿರ‍್ಹೇಣು, ಅಜು಼ ಪಿಯಾವಾಳಿಯೆ ನಾ ಹುಯಿರ‍್ಹೇಣುತೆ ದೇವ್‌ಮ ಭಕ್ತೆಹುಯಿನ್‌ ಜಿಮ್ಮೆದಾರಿವಾಳಿ ಹುಯಿರ‍್ಹೇಣು.
TIT 2:4 ಇಮ್ಮಸ್‌ ಬುಢಿಯಬಾಯ್ಕ ವ್ಹೆತ್ತಿ ಬಾಯ್ಕಾವ್‌ನ, ಇವ್ಣೆ “ಇವ್ಣ ಇವ್ಣ ಬಾವ್ರಿನ ಅಜು಼ ಲಡ್ಕಾವ್ನ ಪ್ಯಾರ್‌ಕರಾದೆಕರಿ ಅಕ್ಕಲ್‌ ಬೋಲಿದ್ಯವಾದೆ.
TIT 2:5 ಇವ್ಣೆ ಶೊಂತ್‌ ಘರ್ನಖ್ಹಾಜೆ ಅಛ಼್ಛುಕಾಮ್ ಕರಾವಾಳಿಯೇಬಿ, ಗ್ರಿಸ್ತಿಥಿ, ಇವ್ಣ ಇವ್ಣ ಬಾವ್ರಿನ ದಾಬುಕ್ಮ ರ‍್ಹೀನ್ ಜಿವ್ಣುಕರಾನ ಬುಢಿಯ ಬಾಯ್ಕೆಥಿ ಶಿಕಿಲ್ಯವಾದೆ. ಇಮ್ಮಸ್ ದೇವ್ನಿ ವಚನ್ನ ಕೋಣ್‌ಬಿ ಚಿಂಘಾವ್ಣಿ ನಾ ಕಾಡ್ನುತೆ ತಿಮ್ ಚಾ಼ಲಿಲ್ಯವಾದೆ.
TIT 2:6 ಇಮ್ಮಸ್ ಜಾ಼ನ್ಜ಼ಮಾನ್ ಛೋ಼ಕ್ರಾವ್‌ನ ಇವ್ಣು ಇವ್ಣೆ ಕಿಮ್ ದಾಬುಕ್ಮ ರ‍್ಹೇವ್ಣುಕರಿ ಬೋಲಿಒತಾಳ್‌,
TIT 2:7 ತುಮಾರ ಭೋದನ್ ಕಾಮ್ ಖ್ಹಾರಾಮ, ತೂ ಕಿಮ್ ರ‍್ಹೇಸ್ಕಿ ತಿಮ್ ಬಿಜೇಕ್ ಜ಼ಣಾನ ಬರಾಬರ್‌ಥಿ ವತಾಳಿಲೆ. ತೂ ಶಿಕಾನ ಹಗಾಮ್ಮ ಇಮಾನ್‌ದಾರ್ ಅಜು಼ ಗ್ರಿಸ್ತಿಥಿ ರ‍್ಹೇ.
TIT 2:8 ಶಿಕಾಡನಿ ವಖ್ಹ್‌ತೆ ಅಛ್ಛಿವಾತೆ ಶಾತ್ಕಿ ಯೋಸ್ ಬೋಲಿದೆ.ಅಮ್ ರ‍್ಹವಾನಿವಖ್ಹ್‌ತೆ ತಾರಪರ್ ವಿರೋದ್ ರ‍್ಹವಾಳನ, ತಾರಿ ವಿರುದ್ಧವಾತೆಬೋಲಾನ ಶಾತ್‍ಬಿಕೊಂತೆ ಇವ್ಣು ಇವ್ಣೇಸ್ ಖ್ಹರ್‌ಮಾವನಿಘೋಣಿ ಹುಯಿಜಾ಼ಶೆ.
TIT 2:9 ಗುಲಾಮ್ ಖ್ಹಾರು ಇವ್ಣೆ ಇವ್ಣೊ ಯಜಮಾನ್ನಿ ವಾತೇನ ಖ್ಹಮ್‌ಜಿನ್‌ ಚಾ಼ಲ್ನು ಅಜು಼ ಖ್ಹಾರಾಸ್ ಕಾಮ್ಮ ಇವ್ಣೆ ಖ್ಹಾಜಾ಼ನಿಘೋಣಿ ಕೋಶಿಶ್ ಕರ‍್ನು.ರ‍್ಹೇಣು.
TIT 2:10 ಇವ್ಣ ಯಜಮಾನ್ನ ಫರೈವಾತೆ ನಾಬೋಲ್ನುತೆ, ಶಾತ್ಬಿ ಚೋ಼ರಿ ನಾ ಕರ್ನುತೆ, ಇವ್ಣೆ ಅಛ್ಛಿ ವಿಶ್ವಾಸ್ನಕರಿ ವತಾಳ್ಣು. ಅನೇಥಿ ಅಪ್ಣೊ ರಕ್ಷಕ್ ಹುಯಿರ‍್ಹೋತೆ ದೇವ್ನಿ ಬೋಧನೆನ ಅಖ್ಖೀಸ್ ಪರಕ್ಮ ಗೌರವ್ ಮಳಾನಿಘೊಣಿ ಚಾ಼ಲಿಲೇವ್ಣು ಕರಿ ಇವ್ಣುನ ಬೋಲ್.
TIT 2:11 ದೇವ್ನೆ ತಮಾಮ್‌ ಅದ್ಮಿನ ರಕ್ಷಣೆ ದ್ಯವಾನಿ ಇನಿ ವಾರ್‌ಖ್ಹಾನ ದೆಖಾಡಿರಾಖ್ಯೋಸ್.
TIT 2:12 ಅಜು಼ ಅಪ್ಣು ಭಕ್ತಿಕೊಂತೆ ಜಿವ್ಣನ ಅಜು಼ ಜಗತ್ನಿ ಹರಖ್ಹ್‌ನ ಮ್ಹೇಲಿದೇಣು, ಅಜು಼ ಅಮ್ನು ಜಿವ್ಣು ಕರ್ನುಕಿ ಅನೇಥಿ ಖ್ಹಾಚಿ ಭಕ್ತಿಥಿ ರ‍್ಹವಾನು ಅಜು಼ ಇನುಯೋ ದಾಬುಕ್‌ಥಿ ರ‍್ಹವಾನ ಪರಕ್‍ಥಿ ಆ ಜಗತ್‌ಮ ಬಚಿರ‍್ಹೇಣು.
TIT 2:13 ಕತೊ ಕಿಮ್ ಭರೋಖ್ಹೊ ಕರೀನ್ ಜ಼ಪುಕರೇ಼ತೆ ಖ್ಹುಶಿನೊ ದನ್ನಖ್ಹಾಜೆ, ಅಪ್ಣೆ ಅಮ್ಮಸ್ ಜಿವ್ಣು. ತದೆ ಯೋ ದನ್ಮ ಅಪ್ಣೊ ಮಹಾನ್ ದೇವ್ ಅಜು಼ ರಕ್ಷಕ್ ಹುಯಿರ‍್ಹೋತೆ ಯೇಸುಕ್ರಿಸ್ತನಿ ಮಹಿಮೆ ದೆಖಾವ್‌ಶೆ.
TIT 2:14 ಯೊ ಅಪ್ಣಖ್ಹಾಜೆ ಇನುಯೋ ದೆವೈಗಯೊ. ಇನಖ್ಹಾಜೆ ಯೊ ಅಪ್ಣುನ ಅಖ್ಖೀಥರಾನು ಖರಾಬ್ ಚಾ಼ಲ್‌ಥಿ ಛೋ಼ಡಾವನ ಟೇಕೆ, ಅಜು಼ ಅಪ್ಣುನ ಶುದ್ದ ಅದ್ಮಿ ಕರಾನಖ್ಹಾಜೆ ಯೊ ಶೊಂತ್‌ವಾಳೊ ಹುಯಿರ‍್ಹೋಸ್ ಅಜು಼ ಅಛ್ಛಾ಼ನ ಕರಾನ ದಿಲ್‌ಲಾಗವಾಳೊ ಹುಯಿರ‍್ಹೋಸ್.
TIT 2:15 ಆ ಖ್ಹಾರಿ ವಾತೆ ಶಿಕಾಡ್. ತಾರಿ ಅಖ್ಖೀಸ್ ಅದಿಕಾರ್‌ಥಿ ಇವ್ಣುನ ಭಾಲಿಬೋಲ್ ಅಜು಼ ಗುರ್‌ಕಾವ್ ಶನಕತೊ ಕೋಣ್‌ಬಿ ತುನ ‍ತಿರಸ್ಕಾರ್ ನಾ ಕರ್ನುತೆ ಇಮ್‌ ದೇಖಿಲೆ.
TIT 3:1 ಖಾನೂಲ್‌ ಚ಼ಲಾವವಾಳಾನಿ ಅಜು಼ ಅದಿಕಾರಿ ಖ್ಹಾರಾನಿ ವಾತೇನ ಖ್ಹಮಜ಼್‌ಣು ಕರಿ ಅಜು಼ ಖ್ಹಾರೂಸ್ ಅಛ಼್ಛುಕಾಮ್ ಕರಾನ ತೈಯಾರ್ ರ‍್ಹೇಣು ಕರಿ ತಾರ ಅದ್ಮಿ ಖ್ಹಾರಾನ ಯಾದ್ ದೆವಾಡ್.
TIT 3:2 ಇವ್ಣುನ ಬೋಲ್, ಇವ್ಣೆ ಕಿನಿ ಬಾರೇಮಾಬಿ ದೂಷಣೆ ನಾ ಬೋಲ್‌ನು, ಕತೋಬಿ ಕಿನ ಜೋ಼ಡೇಬಿ ಸಮಾಧಾನ್‌ಥಿ, ದೋಸ್ತಿಥಿ ಅಜು಼ ತಮಾಮ್‌ನ ಜೋ಼ಡೆ ಶೇದೇವ್‌ನಿ ಮತ್‌ರ‍್ಹೇಣು.
TIT 3:3 ಶನಕತೊ ಏಕ್‌ ಹಗಾಮ್‌ಥು ತದೆ ಅಪ್ಣೇಬಿ ಅಗಾಡಿ ಖ್ಹಯಾಲ್‌ಭರ‍್ಯಾ ಹುಯಿರ‍್ಹಾಥ, ಹುಕುಮ್‌ನ ತೋಡಾವಾಳ ಹುಯಿರ‍್ಹಾಥ ಅಜು಼ ಘುಂಜ್‌ಳಾವ್ಣಿಮ ಥಾ. ಖ್ಹಾರಿಸ್ ತರ‍್ಹಾನಿ ಲಾಲಚ್‌ಬಿ ಅಜು಼ ಭೋಗ್‌ನ ಗುಲಾಮ್ ಥಾ. ಅಪ್ಣ ಖರಾಬ್ ಖ್ಹಯಾಲ್ ಅಜು಼ ಗಲ್ತಿಕರಾಸ್ಮ ಅದ್ಮಿಖ್ಹಾರು ಅಪ್ಣುನ ದಾವೊ ಕರ್ತುಥು.ಅಪ್ಣೇಬಿ ಏಕ್‌ಥಿಏಕ್ ದಾವೊ ಕರ‍್ಯಾ.
TIT 3:4 ಕತೋಬಿ ಅಪ್ಣೊ ರಕ್ಷಕ್ ಹುಯಿರ‍್ಹೋತೆ ದೇವ್ನಿ ಗೋರ್‌ ಅಜು಼ ಪ್ಯಾರ್ ದೆಖೈತದೆ.
TIT 3:5 ಇನೆ ಅಪ್ಣುನ ಬಚಾ಼ಡ್ಯೊತೆ, ಅಪ್ಣೆ ಕರ‍್ಯಾತೆ ಅಛ್ಛು಼ ಕಾಮ್‍ಥಿ ಕಾಹೆ ಪಣ್ಕಿ ಇನಿ ಗೋರ್‌ಥೀಸ್. ಅಜು಼ ಪವಿತ್ರಾತ್ಮಾಥಿ ನವಿ ಜಿ಼ಂದ್‌ಗಿ ದಿದೊ. ಅಜು಼ ಇನೆ ಅಪ್ಣುನ ಧೊಯಿನ್ ನವೊ ಜಾನ್ನದಿದೊ.
TIT 3:6 ದೇವ್ನೆ ಅಪ್ಣೊ ರಕ್ಷಕ್ ಯೇಸು ಕ್ರಿಸ್ತಥಿ ಪವಿತ್ರಾತ್ಮನ ಅಪ್ಣಪರ್ ಭರ್‌ಪೂರ್‌ ರಂಚ್ಯೊ.
TIT 3:7 ಅನಖ್ಹಾಜೆ ದೇವ್ನೆ ಅಪ್ಣುನ ಇನಿ ವಾರ್‌ಖ್ಹೇಥಿ ಇಮಾನ್‌ದಾರ್ ಬಣೈರಾಖ್ಯೊಸ್. ಅನೇಥಿ ಅಪ್ಣೆ ಭರೋಖ್ಹೊ ಕರಿರಾಖ್ಯಾತೆ ಯೊ ಹಮೇಶಾನಿ ಜಿ಼ಂದ್‌ಗಿ ಮಳಾದೆ ಕರಿ ಆ ಖ್ಹಾಚಿವಾತೆ ಬೋಲೈರ‍್ಹೀಸ್.
TIT 3:8 ಮೇ ಹರ್‌ಖ್ಹುಸ್ಕಿ ತು ಆ ವಾತೆನಪರ್ ಜಾ಼ಖ್ಹತ್ ಧ್ಯಾನ್ ರಾಕ್ಣು. ಅನೇಥಿ ದೇವ್‌ಮ ವಿಶ್ವಾಸ್ ಕರಾಸ್ಕಿ ಇವ್ಣೆ ಅಛ್ಛು಼ ಕಾಮ್ ಕರಾಮ ಯೊ ವಾತೆ ಹರೇಕ್‌ನ ಅಛ್ಛು಼ ಅಜು಼ ಫಾಯಿದಾನು ಹುಯಿರ‍್ಹೂಸ್.
TIT 3:9 ಖಾನ್‌ದಾನ್ನಿ ಬಾರೇಮ ವಿವಾದ್ ಕರಾನು ಶಾತ್ ಛಾ಼. ಮೋಶೇನ ನಿಯಮ್‌ನಿ ಬಾರೇಮ ಲಡೈ, ಅಬ್ಬಾಜ಼ಬ್ಬಿನಿ ವಾತೆ ಅಜು಼ ಮೂರ್ಖ್‌ ಬುದ್ದೀನಿ ಬಾರೇಮ ದೂರ್ ರ‍್ಹೇ. ಶನಕತೊ ಅನೇಥಿ‍ ಶನು ಫಾಯಿದೊಕೊಯ್ನಿ ಯೋ ಜ್ಹೂ಼ಟು ಹುಯಿರ‍್ಹುಸ್.
TIT 3:10 ಖಿವು ಏಕ್‍ಜ಼ಣೊ ಸಬೇನು ಅದ್ಮಿಮ ಭೇ ಭಾಗ್‌ ಕರ‍್ನು ಕರಿ ದೇಖಾಸ್ಕಿ ಇನ ಏಕ್‌ಹಲ್ಲ ನತರ್ ಬೇಹಲ್ಲ ಝೇತಾವ್, ಖ್ಹಮ್‌ಜೊನಾತೊ ಇನೇಥಿ ದೂರ್ ರ‍್ಹೇ.
TIT 3:11 ಇಮ್ನು ಅದ್ಮಿಖ್ಹಾರು ವಾಟ್‌ ಛು಼ಕಿಜಾ಼ವಳು ಹುಯಿರ‍್ಹುಸ್ ಅಜು಼ ಇವ್ಣು ಪಾಪಸ್ ಇವ್ಣುನ ಗಲತ್‌ ವತಾಳಸ್.
TIT 3:12 ಠಣ್ಣಾ ದನ್ಮ ಮೇ ನಿಕೋಪೊಲಿಮ ಠಣ್ಣಾ ಹಗಾಮ್ನ ಕಾಡ್ನುಕರಿ ಖ್ಹೂಜ಼್‌ಕರಿ ರಾಖ್ಯೋತೆ ಇನಖ್ಹಾಜೆ, ಅರ್ತೆಮನ್ನ ರ‍್ಹವೊ ತುಖಿಕನ ರ‍್ಹವೊ ತಾರಕನ ಮೋಕಲ್‌ತಾಸ್‌ ತೂ ಮಾರಕನ ಆವಾನ ದೇಕ್‌ಜೊ.
TIT 3:13 ವಕಿಲ್ ಹುಯಿರ‍್ಹೋತೆ ಜೆನಸ್ ಅಜು಼ ಅಪೊಲ್ಲೋಸನ ಜ಼ತನ್‌ಥಿ ಮೋಕಲ್. ಇವ್ಣುನ ಶಾತ್ಬಿ ಕಮ್ ನಾಹೊಣುತೆ ಇಮ್‌ ದೇಖಿಲೆ.
TIT 3:14 ಅಪ್ಣು ಅದ್ಮಿಖ್ಹಾರು ಚು಼ಪ್‌ಕೆಸ್ ನಾರ‍್ಹೇವ್ಣುತೆ, ಅಛ್ಛು಼ ಕಾಮ್ ಕರಾನ ಶಿಕಿನ್, ಇವ್ಣ ಜ಼ರೂರತ್‌ನ ಪರ್ಖಿನ್ ದ್ಯವವಾಳು ಹುಯಿರ‍್ಹಾವದೆ.
TIT 3:15 ಹಜ್ಜಾ಼ ಮಾರ ಜೋ಼ಡ್ಮ ರ‍್ಹವವಾಳು ಖ್ಹಾರೂಸ್ ತುನ ತೋಬ ಕರುಕರಸ್. ಕ್ರಿಸ್ತಮ ವಿಶ್ವಾಸ್‌ ಮ್ಹೇಲಿರಾಖ್ಯಾತೆ ಹಮೂನ ಪ್ಯಾರ್‌ ಕರಾವಾಳ ಖ್ಹಾರಾನ, ಹಮೆ ತೋಬಕರಿ ಬೋಲ್ಯ ಕರಿ ಬೋಲ್. ದೇವ್ನಿ ಕೃಪೆ ತುಮಾರ ಖ್ಹಾರಾನ ಜೋ಼ಡೆ ರ‍್ಹವಾದೆ.
PHM 1:1 ಯೇಸು ಕ್ರಿಸ್ತನಖ್ಹಾಜೆ ಜೇಲ್‌ಮ ಛಾ಼ತೆ ಪೌಲಬಿ ಭೈಹುಯಿರ‍್ಹೊತೆ ತಿಮೊಥೆಯಬಿ ಅಪ್ಣುನ ಪ್ಯಾರ್‌ನೊಬಿ ಜೋ಼ಡ್ಮಕಾಮ್‍ ಕರಾವಾಳೋಬಿ ಹುಯಿರ‍್ಹೋತೆ ಫಿಲೆಮೋನನಾಬಿ,
PHM 1:2 ಭೇನ್ ಹುಯಿರ‍್ಹೀತೆ ಅಪ್ಫಿಯನಾಬಿ ಅಪ್ಣೊ ಜೋ಼ಡ್‌ನೊ ಶಿಪಾಯಿ ಹುಯಿರ‍್ಹೋತೆ ಅರ್ಖಿಪ್ಪನಾಬಿ ತುಮಾರ ಘರ್‌ಮ ಭರಾವಸ್ತೆ ಸಬೆವಾಳನಾಬಿ ಲೀಖೂಸ್ತೆ ಶಾತ್‍ಕತೊ;
PHM 1:3 ಅಪ್ಣೊ ಬಾ ಹುಯಿರ‍್ಹೂತೆ ದೇವ್‍ಥೀಬಿ ಪ್ರಭು ಹುಯಿರ‍್ಹೋತೆ ಕ್ರಿಸ್ತ ಯೇಸುಥೀಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಹುವಾದೆ.
PHM 1:4 ಮಾರಿ ಪ್ರಾರ್ಥನೆಮ ಕದೇಬಿ ತುನ ಯಾದ್‍ಕರ‍್ಲಿನ್ ಮಾರ ದೇವ್ನ ಧನ್ಯವಾದ್ ಕರುಸ್.
PHM 1:5 ಶನಕತೊ ದೇವ್ನ ಅದ್ಮಿವೋನಖ್ಹಾಜೆ ಛಾ಼ತೆ ತಾರಿ ಪ್ಯಾರ್ ಅಜು಼ ಪ್ರಭು ಯೇಸುಮ ಛಾ಼ತೆ ವಿಶ್ವಾಸ್‌ನಿ ಬಾರೇಮ ಖ್ಹಮ್‍ಜಿರಾಖ್ಯೊಸ್.
PHM 1:6 ಕ್ರಿಸ್ತಯೇಸುಮ ಅಪ್ಣುನ ಮಳಿರ‍್ಹುಸ್ತೆ ಅಖ್ಖೀಸ್ ಅಛ್ಛಿವರಾನಿ ಬಾರೇಮ ತೂ ಮಾಲುಮ್‌ ಕರಿಲೆವ್‌ಕರಾಸ್‌ ಕ್ರಿಸ್ತನಿ ವಿಶ್ವಾಸ್ಮಛಾ಼ತೆ ತಾರಿ ಗಳ್‍ಜೋ಼ಡ್ಮಾಬಿ ಕ್ರಿಸ್ತನ ಜಾ಼ಖ್ಹತ್ ಮಹಿಮೆನ ತಯಾರ್ ಕರ್ನುಕರಿ ಪ್ರಾರ್ಥನೆ ಕರುಸ್.
PHM 1:7 ಪ್ಯಾರ‍್ನೊ ಭೈ, ತಾರೇಥಿ ದೇವ್ನ ಅದ್ಮೆವ್‍ನ ದಿಲ್ನ ಖ್ಹುಶಿಬಿ ಹುಮ್ಮಖ್ಹ್‌ ಹುಯೂತೆಖ್ಹಾಜೆ ಇವ್ಣಿ ಬಾರೇಮ ಛಾ಼ತೆ ಪ್ಯಾರ್‌ಥಿ ಮನ ಘಣು ಖ್ಹುಶಿಬಿ ಸಮಾಧಾನ್‍ಬಿ ಹುಯು.
PHM 1:8 ಇನಖ್ಹಾಜೆ ತೂ ಕರ್ನುತೆ ಏಕ್‍ ಕಾಮ್ ಛಾ಼ ಇನ ತೂ ಬರಬರ್‌ಥಿ ಕರ್ನುಕರಿ ಹುಕುಮ್‌ ದ್ಯವಾನಖ್ಹಾಜೆ ಮನ ಕ್ರಿಸ್ತಮ ಪೂರ ಅಧಿಕಾರ್‌ ಛಾ಼.
PHM 1:9 ಕತೋಬಿ ಪ್ಯಾರ್‌ನಿ ಆಧಾರ್‌ಪರ್ ಮೇ ತುಮೂನ ಗಿಂಗೈಲೆವುಸ್, ಏಕ್‌ ಬುಢೊ ಹುಯಿರೋತೆ ಪೌಲಹುಯಿರೋತೆ ಅಜು಼ ಕ್ರಿಸ್ತನಖ್ಹಾಜೆ ಜೇಲ್‌ಮ ಘಲೈರೋತೆ ಮೇ ಅನ ಕರುಕರೂಸ್.
PHM 1:10 ಮೇ ಜೇಲ್‌ಮ ಕೋಂಡೈರ‍್ಹವಾನಿ ವಖ್ಹ್‌ತೆ ಮಾರ ಛಿಯ್ಯಾನಿತರ ಆಯೋತೆ ಓನೇಸಿಮನಿ ಬಾರೇಮ ತುನ ಗಿಂಗೈಲೆವುಸ್.
PHM 1:11 ಯೋ ಪಹಿಲೆ ತುನ ಬಿಣ್‍ಫಾಯ್ದನೊ ಹುಯಿರ‍್ಹೋಥೊ. ಕತೋಬಿ ಹಮ್ಕೆ ತುನಾಬಿ ಮನಾಬಿ ಫಾಯಿದಾವಾಳು ಹುಯಿರ‍್ಹೋಸ್.
PHM 1:12 ಮಾರ ಜಾನ್ನ ಪ್ಯಾರ್‌ನೊ ಇನ ತಾರಾಕನ ಪಾಛೊ಼ ಮೋಕ್ಲುಕರುಸ್.
PHM 1:13 ಸುವಾರ್ತೆನಖ್ಹಾಜೆ ಜೇಲ್‌ಮ ಥೋತೆ ತದೆ ಮನ ದೇಕ್‌ಭಾಲ್‍ ಕರಾನಖ್ಹಾಜೆ ತಾರಬದಲ್ ಇನ ಮಾರಕನಸ್ ರಾಖಿಲೆವ್ಣುಕರಿ ಸೋಚ್ಯೊಥೊ.
PHM 1:14 ಕತೋಬಿ ತಾರಿ ವಾತ್‍ಕೊಂತೆ ಶಾತ್ ಕರಾನಬಿ ಮನ ಆಖ್ಹ್‌ಕೊಯ್ನಿ. ‍ಶನಕತೊ ತಾರು ಅಛ಼್ಛುಕಾಮ್ ಶೊಂತ್ ಖ್ಹೂಜ಼್‍ಥಿ ಕರ್ನುಪಣ್ಕಿ ಜು಼ಲಮ್‌ಥಿ ಕರಾನು ನಾ ಹುಯಿರ‍್ಹೇಣು.
PHM 1:15 ಯೋ ಥೋಡದನ್ ತಾರೇಥಿ ಅಲಕ್ ಹುಯೋತೆ, ಬೋಲ್ನುಕತೊ ತೂ ಇನ ಹರ್‌ಹಮೇಶ ಮಳೈಲ್ಯಾವಾನ ಖ್ಹಾಜೆಸ್ ರ‍್ಹೇವ್ಣು.
PHM 1:16 ಅನಪಾರ್ ಯೋ ಗುಲಾಮ್ ನಾಹುಯಿರ‍್ಹೇವ್ಣುತೆ, ಕತೋಬಿ ಯೊ ಗುಲಾಮ್‌ಥೀಬಿ ಘಣೊ ಊಚೊ಼ ಛಾ಼. ಯೋ ವಿಶೇಷ್‍ಪರಕ್ಮ ಮನ ಘಣೊ ಪ್ಯಾರ್‌ನೊ ಭೈ ಹುಯಿರೋಸ್ ಅಮ್‍ ರ‍್ಹವಾಪರ್ ಏಕ್‌ ಜಗತ್‌ನೊ ಭೈಹುಯಿನ್ ಪ್ರಭುನ ಸಂಬಂದಾಮ ಬಿಜೂ಼ಬಿ ಕೆತ್ರೇಕ್ಕಿ ಮನಾಬಿ ತುನ ಪ್ಯಾರ‍್ನೊ ಹುಯಿರ‍್ಹಿಶೆ ಕೊಯ್ನಿಕಿ ಶು?
PHM 1:17 ಇನಖ್ಹಾಜೆ ತೂ ಮನ ಜೋ಼ಡ್‍ವಾಳೊ ಕರಿ ಗಣ್ತಿಕರ‍್ತೊ ಉಶೇತೊ ಮನ ಸ್ವಾಗತ್ ಕರಾನಿ ಪರಕ್ಮಾಸ್‍ ಇನ ಸ್ವಾಗತ್‍ಕರ‍್ಲೆ.
PHM 1:18 ಏಕ್‍ ವಖ್ಹತ್ ಯೋ ತುನ ಕಾಯಿತೋಬಿ ಲುಕ್ಷಾನ್‌ ಕರ‍್ಯೊ ಉಶೇತೊ ನತರ್ ಯೋ ಕಾಯಿತೋಬಿ ದೇವ್ಣುಉಶೇತೊ ಇನ ಮಾರಿ ಗಣ್ತಿಮ ನಾಖಿದೆ.
PHM 1:19 ಪೌಲಕರಿ ಮೇ ಶೊಂತ್ ಹಾತೇಥಿ ಲೀಖಿರಾಖ್ಯೊಸ್, ಮೇಸ್ ಇನ ಫೇಡಿಶ್, ತಾರಿ ಶೊಂತ್ನಿ ಬಾರೇಮ ಮನಛಾ಼ತೆ ಕರ್ನಿನಿ ಬಾರೇಮ ಮೇ ಶಾತ್ಬಿ ಬೋಲುಕೊಯ್ನಿ.
PHM 1:20 ಒಹೋಲ ಭೈ, ಪ್ರಭುಮ ತಾರೇಥಿ ಮನ ಫಾಯಿದೊ ಹುವಾದೆ. ಪ್ರಭು ಕ್ರಿಸ್ತಮ ಮಾರ ದಿಲ್ನ ತಾಜು಼ಕರ್‌.
PHM 1:21 ತಾರಿ ವಿಧೇಯತೆಮ ಭರೋಖ್ಹೊಕರೀನ್ ಮೇ ತುನ ಲೀಖಿರಾಖ್ಯೊಸ್. ಮೇ ಬೋಲ್ಯೋತೆ ಇಂಥಿ ಜಾ಼ಖ್ಹತಸ್‍ ತೂ ಕರೀಶ್‌ಕರಿ ಮನ ಮಾಲುಮ್‌ ಛಾ಼.
PHM 1:22 ಆ ನಾಹುಯಿನ್, ತುಮಾರಿ ಪ್ರಾರ್ಥನೆನ ಖ್ಹಮ್‌ಜಿನ್‌ ಮೇ ತುಮಾರಕನ ಆವಾನ ದಯಕರ್‌ಶೆ ಕರಿ ಮನ ವಿಶ್ವಾಸ್ ಛಾ಼. ಇನಾಖ್ಹಾಜೆ ಮನ ಏಕ್‌ ರ‍್ಹವಾನ ಕೋಣಾನ ತಯಾರ್‌ಕರ್‌.
PHM 1:23 ಕ್ರಿಸ್ತ ಯೇಸುನಖ್ಹಾಜೆ ಜೇಲ್‌ಮ ಮಾರಿ ಜೋ಼ಡ್ಮ ಛಾ಼ತೆ ಎಪಫ್ರಬಿ ತುನ ಖ್ಹಲಾಮ್ ಬೋಲಸ್.
PHM 1:24 ಮಾರ ಜೋ಼ಡ್ಮಕಾಮ್‍ ಕರಾವಾಳ ಹುಯಿರ‍್ಹಾತೆ ಮಾರ್ಕ, ಅರಿಸ್ತಾರ್ಕ, ದೇಮ ಅಜು಼ ಲೂಕ ಅವ್ಣೇಬಿ ತುನ ಖ್ಹಲಾಮ್ ಕರಸ್.
PHM 1:25 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೊ ವಾರ್‌ಖ್ಹೊ ತುಮಾರ ಆತ್ಮನಿ ಜೋ಼ಡ್ಮ ರ‍್ಹವಾದೆ. ಆಮೆನ್.
HEB 1:1 ಅಗ್‍ಲ್ಯ ಹಗಾಮ್ಮ ದೇವ್ನೆ ಪ್ರವಾದಿ ಖ್ಹಾರಾಥಿ ಅಪ್ಣ ಗುರುಗುರಬ್‌ಲ್ಯನಿ ಜೋ಼ಡೆ ಕೆತ್ರೇಕ್ಕಿ ಪರಕ್ಮ, ಕೈಏಕ್ ಹಲ್ಲ ವಾತೆಬೋಲಿರಾಖ್ಯೋಸ್.
HEB 1:2 ಕತೋಬಿ ಆ ಖ್ಹರ್ತಿನೊ ದನ್ಮ ಯೊ ಇನ ಛಿಯ್ಯಾಥಿ ಅಪ್ಣ ಜೋ಼ಡೆ ವಾತೆ ಬೋಲ್ಯೊ. ದೇವ್ನೆ ಇನ ಛಿಯ್ಯಾಥಿ ಖ್ಹಾರ ಜಗತ್‍ನಾಸ್ ಉಬ್‌ಜೈ಼ನ್ ಹರೇಕ್‌ಪರ್ ಇನಾಸ್ ವಾರಿಸ್ ಕರ‍್ಯೊ.
HEB 1:3 ಯೋಸ್ ದೇವ್ನು ಮಹಿಮೆನು ಉಜಾ಼ಖ್ಹ್‌ಬಿ, ದೇವ್ನಿ ಪ್ರತಿರೂಪ್‌ಬಿ, ಇನಿ ವಚನ್ ಶಕಥ್ಥಿ ಅಖ್ಖಾಸ್ನ ಆಧಾರ್ ಹುಯಿನ್ ಯೋಸ್ ಅದಮ್‍ಜ಼ಮಾನನಿ ಪಾಪ್ನ ಶುದ್ದಿಕರಿನ್ ಸೊರ್ಗಾಮ ಮಹಾನ್ ದೇವ್ನು ಖಾವಿಬಾಜು಼ಮ ಬೇಶಿಗಯೊ.
HEB 1:4 ಹೈರುತೆ ದೇವ್‌ದೂತರ್‌ಥೀಬಿ ಮಹಾನ್ ಊಚೊ಼ ಹುಯಿನ್; ಇನ ದಿದೋತೆ ನಾಮ್ ದೇವ್‌ದೂತರ್‌ಥೀಬಿ ಮಹಾನ್ ಹುಯಿರ‍್ಹುಸ್.
HEB 1:5 ಶನಕತೊ, ದೇವ್ ಇನ ದೇವ್‌ದೂತರ್‌ಮ ಕಿನಾತೋಬಿ, “ತೂ ಮಾರೊ ಛಿಯ್ಯೊ; ಆಜ಼್ ಮೇಸ್ ತಾರೊ ಬಾ ಹುಯಿರ‍್ಹೊಸ್ “ಮೇ ಇನೊ ಬಾ ಹುಯಿರ‍್ಹಿಶ್, ಯೋ ಮಾರೊ ಛಿಯ್ಯೊ ಹುಯಿರ‍್ಹಿಶೆ.” ಕರಿ ಬೋಲಿರಾಖ್ಯೊಕೊಯ್ನಿ.
HEB 1:6 “ಆ ಕಾಹೆತೆ ದೇವ್ ಇನ ಫೈಲೋಟ ಛಿಯ್ಯಾನ ಧರ್ತಿಪರ್ ಪಾಛು಼ ಮೋಕ್ಲಾನಿ ವಖ್ಹ್‌ತೆ, ದೇವ್ನ ದೂತರ್‌ಖ್ಹಾರು ಇನ ಆರಾದನೆ ಕರ್ನುಕರಿ ಹುಕುಮ್ ಕರಿರಾಖ್ಯೋಸ್”.
HEB 1:7 ಕತೋಬಿ ದೇವ್ನ ದೂತರ್‌ನಿ ಬಾರೇಮ, “ದೇವ್ ಇನ ದೂತರ‍್ನ ವಹಿರಾನಿ ಘೋಣಿಬಿ, ಅಜು಼ ಇನ ಸೇವಕ್‌ಖ್ಹಾರನ ಆಗ್‍ನಿ ಝ಼ಲಪಟ್‌ನಿತರಾಬಿ ಕರೀಶ್‌ಕರಿ ಬೋಲಿರಾಖ್ಯೊಸ್.”
HEB 1:8 ಕತೋಬಿ ಛಿಯ್ಯಾನಿ ಬಾರೇಮ ಅಮ್ ಬೋಲ್ಯೊ: “ದೇವ್ ತಾರು ಸಿಂಹಾಸನ್ ಜ಼ಗ್‌ಜ಼ಮಾನಮಾಬಿ ರ‍್ಹಿಶೆ. ನೀತಿನು ಡಂಡೊಸ್‌ ತಾರು ರಾಜ಼ನು ಡಂಡೊ ಹುಯಿರ‍್ಹುಸ್.
HEB 1:9 ತೂ ಬರೋಬರ್‌ನ ಪ್ಯಾರ್‌ಕರ‍್ಯೊ ಅಜು಼ ಗಲತ್‌ನ ಝಿಟ್ಕಾರ‍್ಯೊ. ಇನಖ್ಹಾಜೇಥಿ ದೇವ್ ತಾರೊ ದೇವಸ್. ತುನ ತಾರ ಜೋ಼ಡೆ ರ‍್ಹವಾಳಥಿಬಿ ಶಂತೋಖ್ಹ್‌ನ ಜಾ಼ಖ್ಹತ್ ತೇಲ್‌ಥಿ ಅಬಿಷೇಕ್ ಕರಿರಾಖ್ಯೊಸ್
HEB 1:10 ಇನೆ ಅಮ್‍ಬಿ ಬೋಲ್ಯೊ; “ಪ್ರಭು ತೂ ಶುರುವಾತ್ಮ ಜ಼ಮೀನ್ನ ಹದಿಪಾಯ ನಾಖ್ಯೊ. ಅಜು಼ ತಾರ ಹಾತೇಖ್ಹು ಆಬ್‌ನ ತುನೆ ಬಣಾಯೊ,
HEB 1:11 ಯೋಖ್ಹಾರು ದೆಖಾವ ಕೊಂತೆ ಹುಯಿಜಾ಼ಶೆ ಕತೋಬಿ ತು ಕೆದೇಬಿ ರ‍್ಹೀಶ್. ಯೊ ಜಿನಖ್ಹ್‌ಅಖ್ಖು ಲುಂಗ್ಡನಿತರ ಗಳಿಜಾಶೆ.
HEB 1:12 ತು ಯೊ ಅಖ್ಖಾನ ಝ಼ಗ್ಗಾನಿತರ ಬಿಡ್ಕಿಕರಿಷ್, ಅಜು಼ ಯೊ ಪೇರ್ವಾಖ್ಹ್‌ನಿತರ ಬದ್ಲಿಜಾ಼ಶೆ. ಕತೋಬಿ ಕದೆಕದೇಬಿ ಬದಲಿಶ್ ಕೊಯ್ನಿ. ಅಜು಼ ತಾರ ಉಂಬರ‍್ನ ಖ್ಹರ್ತೀಸ್ ಕೊಯ್ನಿ ಕರಿ ಬೋಲಾಸ್.
HEB 1:13 ಕತೋಬಿ ಖೆವ ದೇವ್‌ದೂತರ್‌ನತೋಬಿ ದೇವ್ನೆ, ಮೇ ತಾರ ದುಶ್‌ಮನ್ನ ತಾರ ಗೋಡಾನ ರಚ್ಚಾ಼ಕನ ನಾಖತೋಡಿ ತು ಮಾರಿ ಖಾವಿ ಬಾಜೂ಼ಮ ಬೆಠೋರೆ ಕರಿ ಕದೆತೋಬಿ ಬೋಲ್ಯೊಥೋಕಿ ಶು?
HEB 1:14 ಆ ಅಖ್ಖು ದೇವ್ನದೂತರ್ ರಕ್ಷಣೆನು ಹಕ್ನ ಲೀರಾಕ್ಣುತೆ ಇವ್ಣಅಖ್ಖಾನು ಸೇವೆನಖ್ಹಾಜೆ ಮೋಕ್ಲಾಯುತೆ ಸೇವೆನು ಆತ್ಮ ಕಾಹೇಕಿಶು.
HEB 2:1 ಇನಖ್ಹಾಜೆ ಅಪ್ಣೆ ಖ್ಹಮ್‍ಜ್ಯಾತೆ ಬಾರೇನು ನಾ ಛು಼ಕಿಜಾ಼ವ್ಣುತೆ ಯೊ ಅಖ್ಖಾನ ಜಾ಼ಖ್ಹತ್ ಧ್ಯಾನ್ ದ್ಯಾವಾಳ ಹುಯಿರ‍್ಹೇಣು.
HEB 2:2 ಶನಕತೊ ದೇವ್‌ದೂತರ್‌ಥಿ ಅಪ್ಣ ಗುರುಗುರಬ್‍ಲ್ಯನ ದೆವೈರ‍್ಹೂಸ್ತೆ ಸಂದೇಶ್ ಖ್ಹಾಚು಼ಥು, ಇನಾಬಿ ಭಡಿನ್ ಕರಾನು ಹರೇಕ್ ಗಲ್ತಿ ಅಜು಼ ಕೋಣ್ ವಿಧೇಯ ಕೊಹುಯುನಿಕಿ ನತರ್ ವಿಧೇಯ ಹುಯಿನ್ ಬರಬರ‍್ನಿ ನಿಶತ್ ಲಿದು.
HEB 2:3 ಅಪ್ಣ ಖ್ಹಾಮ್ಣೆ ಮ್ಹೇಲಿರಾಖ್ಯೊತೆ ಅಥ್ರಾನಿ ಮಹಾನ್ ರಕ್ಷಣೆನ ಅಪ್ಣೆ ಕರ‍್ಹಯ್ಯಕಾಡ್ಯುತೊ, ಛು಼ಕಿಜಾ಼ವನುತೋಬಿ ಕಿಮ್? ಆ ಹೈರುತೆ ಪ್ರಭುಥಿ ಪಹಿಲೆ ಬೋಲಾಯು ಅಜು಼ ಇನೇಥಿ ಖ್ಹಮ್‌ಜ್ಯಥಾತೆ ಅನ ಹಮೂನ ಘಟ್‌ಕರಾಯು.
HEB 2:4 ಖ್ಹಣೇದ್‍ನು ಕಾಮ್‍ಥೀಬಿ, ಅದ್ಭುತ್‌ಕಾಮ್ ಖ್ಹಾರಥಿಬಿ, ಕೈಯೇಕ್ ಥರಾನು ಮಹಾನ್ ಕಾಮ್‍ಥೀಬಿ ಅಜು಼ ಇನಿ ಸೋಚ್‌ನಿತರ ಪವಿತ್ರಾತ್ಮನು ವರಾನ ವಾಟಪಾಡಿ ದ್ಯವಾಥಿ ದೇವ್ನೇಸ್ ಇನ ವತಾಳಿಲಿದೊ.
HEB 2:5 ಅಪ್ಣೆ ಬೋಲುಕರೇಸ್ತೆ ಖ್ಹಾಮ್ಣೆ ಆವ್‌ಶೇತೆ ನವುಜಗತ್ನ ಚ಼ಲಾವನ ದೇವ್ನೆ ಇನ ದೂತರ‍್ನ ಕಬ್‌ಜಾ಼ಮ ದಿದೊ ಕೊಯ್ನಿ.
HEB 2:6 ಕತೋಬಿ ಪವಿತ್ರ ದಪ್ತರ್‌ಮ ಕಿಜ್ಜಾ಼ಕಿ ಏಕ್‌ ಝ಼ಗೊ ಅಮ್ ಬೋಲಿರಾಖ್ಯುಸ್, ಅದ್ಮಿ ಕೆವ್ಡೋಖ್ಹೊ, ಇನ ತೂ ಶನ ಯಾದ್ ಕರಾಸ್? ಅದ್ಮಿ ಕೆಥ್ರಾನೊವಾಳೊ, ಇನಾಮ ಶನ ನಿಘ್ಯ ರಾಕ್ಣು?
HEB 2:7 ತೂ ಅದ್ಮಿನ ದೇವ್‌ದೂತರ್‌ಥಿ ಜ಼ರಸ್ ಕಮ್‌ಕರೀನ್ ಬಣೈರಾಖ್ಯೊಸ್ನಿ. ಮಹಿಮೆಬಿ ಮರ‍್ಯಾದಿನ ಇನ ಕಿರೀಟ್ ಕರೀನ್ ದೀರಾಖ್ಯೊಸ್.
HEB 2:8 ಅಜು಼ ಅಖ್ಖಾಸ್ನ ಇನ ಗೋಡಾನ ಹೇಟ್ ನಾಖಿನ್ ಇನ ಕಬ್‌ಜಾ಼ಮ ಕರಿರಾಖ್ಯೊಸ್ನಿ. “ಇನೆ ಅಖ್ಖಾಸ್ನ ಅದಮ್ಜ಼ಮಾನನ ಹೇಟ್‌ ಕರಿರಾಖ್ಯೋಸ್‌ಕರಿ” ಬೋಲಾಮ ಇನ ಏಕ್‍ತೋಬಿ ಹೇಟುಕೊಂತೆ ಮ್ಹೇಲ್ಯೊಕೊಯ್ನಿಕರಿ ಬೋಲಾನಿತರಹುಯು. ಕತೋಬಿ ಅಖ್ಖೂಬಿ ಇನ ಹೇಟ್‌ ಛಾ಼ಕರಿ ಅಪ್ಣೆ ಬಿಜೂ಼ಬಿ ಕೊದೇಖ್ಯಾನಿ.
HEB 2:9 ಕತೋಬಿ ದೇವ್‌ದೂತರ್‌ಥಿ ಜ಼ರಸ್ ಕಮ್ ಬಣೈರ‍್ಹೋಸ್ತೆ ಯೇಸು ಖ್ಹತಾಪ್ಣಿನಲೀನ್ ಮರ‍್ಯೊತೆ ಇನಖ್ಹಾಜೆ ಮಹಿಮೆನಾಬಿ ಮರ್ಯಾದಿನ ಕಿರೀಟ್ ಕರೀನ್ ಘಾಲಿರಾಖನು ಅಪ್ಣೆ ದೇಖೆಸ್. ಇನಖ್ಹಾಜೇಸ್ ದೇವ್ನ ವಾರ್‌ಖ್ಹೇಥಿ ಯೇಸುನೆ ಹರೇಕ್‌ನಖ್ಹಾಜೆ ಮರಣ್ಣಿ ಖ್ಹತಾಪ್ಣಿನ ಲಿದೊ.
HEB 2:10 ಹರೇಕ್‌ಬಿ ಕಿನಖ್ಹಾಜೆ ಕಿನೇಥಿ ಬಣ್ಯುಕಿ. ಯೊ ಘಣು ಜ಼ಣು ಛಿಯ್ಯಾವ್‍ನ ಮಹಿಮೆನ ಮಳಾವನಖ್ಹಾಜೆ; ಇವ್ಣ ಬಚಾ಼ಡವಾಳ ಮೋಟಾನ ಖ್ಹತಾವಥಿ ರಕ್ಷಣೆಲ್ಯವಾನು ಬರಬರಸ್.
HEB 2:11 ಶನಕತೊ ಪರಿಶುದ್ಧ ಕರಾವಳನಾಬಿ ಪರಿಶುಧ್ ರ‍್ಹವಾಳನಾಬಿ ಯೋಸ್ ಬಾ. ಅನಖ್ಹಾಜೆಸ್ ಇವ್ಣುನ ಪರಿಶುಧ್ ಕರಾವಾಳೊ ಇವ್ಣುನ ಭೈಯೇ ಭೇನೆಕರಿ ಬೋಲಾನ ಖ್ಹರ್‌ಮಾಯೊ ಕೊಯ್ನಿ.
HEB 2:12 ಯೊ ಬೋಲಸ್ ತಾರು ನಾಮ್ನ ಮಹಿಮೆನ ಮೆ ಮಾರ ಭೈಯೇ ಭೇನೆವ್‌ನ ಬೋಲಿದೆವುಸ್‌. ಸಬೆನ ಇಚ಼್‌ಮ ತುನ ಸ್ತುತಿನು ಗೀದ್‌ ಬೋಲಿಶ್ ಕರೀಬಿ,
HEB 2:13 ಮೇ ಪಾಛೊ಼ ಫರಿನ್ ದೇವ್‌ಪರ್‌ ಭರೋಖ್ಹೊ ಕರಿರಾಖವಾಳೊಕರಿಬಿ, ಹಂದೇಖೊ ಮೇಬಿ ಅಜು಼ ದೇವ್ನೆ ಮನ ದಿರಾಖ್ಯೊಸ್ತೆ ಲಡ್ಕಾವ್‍ಬಿ ಛಿಯ್ಯೆಕರಿಬಿ ಬೋಲಾಸ್.
HEB 2:14 ಅತ್ರೇಸ್ ಕಾಹೆತೆ ಲಡ್ಕಾವ್‌ಖ್ಹಾರು ಲ್ಹೊಯಿಥಿಬಿ ಬೋಟಿಥಿ ಹುಯಿರುತೆ ಇಮ್ಮಸ್ ಯೇಸು ಜಿನು ಇವ್ಣಿನಿತರಸ್ ಲ್ಹೋಯಿಬಿ ಬೋಟಿಥಿಹುಯೊ. ಇನಿ ಮರಣ್‌ಥೀಸ್ ಮರಣ್ಣಿ ಅಧಿಕಾರ್‌ ಲೀರಾಖವಾಳ ಶೈತಾನ್ನ ಮಟಾಯೊ.
HEB 2:15 ಅಜು಼ ಮರಣ್ಣ ಡರ್‌ಥಿ ಇವ್ಣು ಬಚಿರ‍್ಹವಾನು ಹಗಾಮ್ ಅಖ್ಖು ಗುಲಾಮ್ ರ‍್ಹವಾಳನ ಛೋ಼ಡಾಯೊ.
HEB 2:16 ಖ್ಹಾಚಮಾಬಿ ಯೋ ದೇವ್ನದೂತರ‍್ನ ಮದತ್ ಕರಾನಖ್ಹಾಜೆ ಕಾಹೆ ಅಬ್ರಹಾಮ್‌ನಿ ಪಿಳ್ಗಿನ ಮದತ್‌ಕರಾನಖ್ಹಾಜೆ ಆಯೊ.
HEB 2:17 ಇನಖ್ಹಾಜೆ ಯೊ ಹರೇಕ್ ವಿಚಾರ್‌ಮಾಬಿ ಇನ ಭೈಯೇ ಭೇನೆನ ತಕ್ಕೆರ‍್ಹವಾನು ಜ಼ರೂರತ್ ಥು. ಅಮ್ ಇನೆ ಅದ್ಮಿಯೇವ್‌ನು ಪಾಪ್ ಅಖ್ಖು ಕ್ಷಮಾಪಣ್ ಕರಾನಖ್ಹಾಜೆ ದೇವ್ನ ಕಾಮ್ಮ ಗೋರ್‌ಬಿ ವಿಶ್ವಾಸ್‍ಬಿ ಹುಯಿರ‍್ಹಾವಳೊ ಮಹಾಯಾಜಕ್ ಹುಯೊ.
HEB 2:18 ಯೊ ಹಮ್ಕೆ ಶೋದನೆ ಪಡವಾಳನ ಮದತ್ ಕರೆಜಾ಼ಯ್.ಶನಕತೊ ಯೋಸ್ ಶೋದನೆಮ ಪಡಿರ‍್ಹೇಸ್, ಅಜು಼ ಖ್ಹತಾಪ್ಣಿ ಲೀಲ್ಯಾವಾಳೊ ಹುಯಿರ‍್ಹೋಸ್.
HEB 3:1 ಇನಖ್ಹಾಜೆ ಕ್ರಿಸ್ತಮ ಪರಿಶುದ್ಧರ‍್ಹವಾಳ ಭೈಯೇ ಭೇನೆವೊ ಸೊರ್ಗನು ಬುಲಾವ್ಣಿಮ ಭಾಗ್‌ ಲೀರಾಖವಾಳವೊ, ಅಪ್ಣೆ ಮಾನಿರಾಖ್ಯತೆ ಅಪೊಸ್ತಲಬಿ ಅಜು಼ ಮಹಾಯಾಜಕ್‍ಬಿ ಹುಯಿರ‍್ಹೋತೆ ಯೇಸುನಿ ಬಾರೇಮ ಧ್ಯಾನ್ ಲಗಾಡಿನ್ ಸೋಚೊ.
HEB 3:2 ಮೋಶೆ ದೇವ್ನ ಘರ್‌ಮ ವಿಶ್ವಾಸ್‌ವಾಳೊ ಹುಯಿರ‍್ಹೊಥೋತೆ ತಿಮ್ಮಸ್, ಯೊ ಚೂ಼ಣಿರಾಖವಾಳನ ವಿಶ್ವಾಸ್‌ವಾಳೊ ಹುಯಿರ‍್ಹೋಥೊ.
HEB 3:3 ಘರ್‌ಥೀಬಿ ಘರ್‌ಭಾಂದ್ಯೋತೆ ಇನ ಜಾ಼ಖ್ಹತ್ ಮರ್ಯಾದಿ ರ‍್ಹೇಸ್ತೆ ಖ್ಹಾಜೆ ಮೋಶೆಥೀಬಿ ಯೇಸುಸ್ ಜಾ಼ಖ್ಹತ್ ಮರ್ಯಾದಿನ ಯೋಗ್ಯಕರಿ ಚೂ಼ಣೈರ‍್ಹೋಸ್.
HEB 3:4 ಅಖ್ಖಾಸ್ ಘರ್‌ನ ಕೋಣಸ್ಕಿ ಏಕ್ಜ಼ಣೊ ಉಬ್‌ಜೈ಼ರಾಖ್ಯೋಸ್. ಕತೋಬಿ ಹರೇಕ್ನ ಉಬ್‌ಜೈ಼ರಾಖ್ಯೊತೆ ದೇವಸ್.
HEB 3:5 ಮೋಶೆ ದೇವ್ನ ಘರ್‌ಮ ವಿಶ್ವಾಸ್‌ನೊ ಸೇವಕ್ ಹುಯಿರ‍್ಹೊಥೊ. ಇನೆ ಖ್ಹಾಮ್ಣೆ ಬೋಲಾವನಿ ಬಾರೇಮ ಸಾಕ್ಷಿ ಹುಯಿರ‍್ಹೊಥೊ.
HEB 3:6 ಕತೋಬಿ ಕ್ರಿಸ್ತತೋಬಿ ಛಿಯ್ಯೊಹುಯಿನ್ ದೇವ್ನ ಘರ್‌ಪರ್ ಹಕ್‌ವಾಳೊ ಹುಯಿರ‍್ಹೋಸ್. ಅಪ್ಣೆ ಹಿಮ್ಮತ್‍ಬಿನ್ ಭರೋಖ್ಹಾಥಿಬಿ ಖ್ಹರ್ತಿಲಗು ಘಟ್‍ಥಿ ಧರಿರಾಖವಾಳ ಹುಯಾತೊ ಅಪ್ಣೆಸ್ ದೇವ್ನ ಘರ್ ಹುಯಿರ‍್ಹಿಷು.
HEB 3:7 ಇಮ್ಮಸ್ ಪವಿತ್ರಾತ್ಮ ಬೋಲಾನಿ ಪರಕ್ಮ ತುಮೆ ಆ ದನ್ ದೇವ್ನ ಗಳಾನ ಕಾನ್‌ ಲಗಾಡವಾಳ ರ‍್ಹಯಾತೊ,
HEB 3:8 ತುಮಾರ ಗುರುಗುರಬ್‌ಲ್ಯ ಜ಼ಂಗಳ್‌ಮ ದೇವ್ನ ತರೀಪ್ಷ ಕರ‍್ಯೊತೆ ವಖ್ಹತ್‌ಮ ಇವ್ಣೆ ವಿರೋದ್ ಕರ‍್ಯು. ಇವ್ಣಿಂತ್ರ ಕಠಣ್ ದಿಲ್‌ವಾಳ ನಕೊ ಹುವೊ.
HEB 3:9 ತುಮಾರು ಶಾಣುಖ್ಹಾರು ಗಭ್ಭರ್‌ಥಿ ಮನ ತರೀಪ್ಷ ಕರೀನ್ ಚಾ಼ಳಿಖ್ಹ್ ವರಖ್ಹ್‌ ಮಾರ ಕಾಮ್ನಖ್ಹಾರು ದೇಖ್ಯು.
HEB 3:10 ಇನಖ್ಹಾಜೆ ‘ಮೆ ಆ ಪಿಳ್ಗಿವಾಳಪರ್ ಘಣು ಖೀಜ಼್ ಖೈನ್ ಇವ್ಣೆ ಕೆದೇಬಿ ದಿಲ್‌ ಬದ್‌ಲೈಲ್ಯವಾಳುಬಿ ಇವ್ಣೆ ಮಾರು ಮಾರಗ್‌ನ ಕೊ ಪರಖ್‌ಷೇನಿ’ ಕರಿ ಮೇ ಬೋಲ್ಯೊ.
HEB 3:11 ಅಮ್ ರ‍್ಹವಾಪರ್ ಇವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ” ಕರಿ ಖಿಜೈನ್ ಆಣ್‌ಕರ‍್ಯೊ.
HEB 3:12 ಮಾರ ಭೈಯೇ ಭೇನೇವೊ ತುಮಾರಮ ಖರಾಬ್ ರ‍್ಹವೊ ಜಿವ್ತೊ ಜಾನ್ನೊ ದೇವ್ನ ಮ್ಹೇಲಾನು ಅವಿಶ್ವಾಸ್‌ನೊ ದಿಲ್‌ ಕಿನಾಮಬಿ ನಾರ‍್ಹೇವ್ಣುತೆ ಹೊಷಾರ್‌ಥಿ ದೇಖಿಲೆವೊ.
HEB 3:13 ತುಮಾರಮ ಏಕ್‍ಜ಼ಣೂಬಿ ಪಾಪ್‌ಮ ಖ್ಹಪ್‍ಡಿನ್ ಠಗೈ ನಾಜಾ಼ವ್ಣುತೆ, ಹಮ್ಕೇಬಿ ಕದೇಬಿ ಬುಲೈಲೆಯಿತೆ ವೇಳ್ ಛಾ಼ತೆ ತದೇಸ್‌, ಹರೇಕ್‌ದನ್‌ಬಿ ಏಕ್‌ಥಿ ಏಕ್‍ಜ಼ಣು ಹುಮ್ಮಖ್ಹ್‌ ದೆವೊ.
HEB 3:14 ಶನಕತೊ ಪಹಿಲೆಥೂ ಖ್ಹರ್ತಿಲಗೂಬಿ ಭರೋಖ್ಹಾನ ಘಟ್‌ರಾಖ್ಯಾತೊ ಅಪ್ಣೆ ಕ್ರಿಸ್ತನ ಗಳ್‌ಜೋ಼ಡ್ಮ ಭಾಗ್‌ಲ್ಯವಾಳ ಹುಯಿರ‍್ಹಿಷು.
HEB 3:15 ಪವಿತ್ರ ದಪ್ತರ್‌ಮ ಅಮ್ ಬೋಲಸ್, “ತುಮೆ ಆ ವೇಳ್ಮ ದೇವ್ನ ಗಳಾನ ಖ್ಹಮಜ಼್‌ತಾ ಉಷೇತೊ ತುಮಾರ ಗುರುಗುರುಬ್‌ಲ್ಯ ಇವ್ಣೆ ಘಬ್ಬರ್‌ ಕರಾನಿಘೋಣಿ ತುಮಾರ ದಿಲ್‌ನಾಬಿ ಕಠಣ್ ನಕೊ ಕರಿಲೆವೊ.
HEB 3:16 ದೇವ್ನ ಅವಾಜ಼್ನ ಖ್ಹಮ್‌ಜಿನ್‌ ವಿರೋದ್ ಕರ‍್ಯುತೆ ಕೋಣ್? ಮೋಶೇಥಿ ಈಜಿಫ್ಟ್‌ಥು ಬುಲೈರ‍್ಹಯಹುಯ ಕಾಹೆಕಿಶು?
HEB 3:17 ಅಜು಼ ದೇವ್ನೆ ಚಾ಼ಳಿಖ್ಹ್ ವರಖ್ಹ್‌ ಕಿನಾಪರ್ ಜಾ಼ಖ್ಹತ್ ಖಿಜಾ಼ಯೊ? ಪಾಪ್ ಕರಾಪರ್ ಇವ್ಣು ಮುರ್ದುಖ್ಹಾರು ಜ಼ಂಗಳ್‌ಮಾಸ್ ಪಡಿಗಯು ಕೊಯ್ನಿಕಿಶು?
HEB 3:18 “ಮಾರು ಆರಾಮ್ಮ ತುಮೆ ಮಳ್‍ಶೂಸ್ ಕೊಯ್ನಿಕರಿ ಕಿನಿ ಬಾರೇಮ ಇನೆ ಆಣ್ ಕರ‍್ಯೊತೆ? ಯೊ ಗಭ್ಭರ್‌ಕರ‍್ಯುತೆ ಇನಖ್ಹಾಜೇಸ್ ಕಾಹೆಕಿಶು?
HEB 3:19 ಅನಖ್ಹಾಜೆಸ್ ಇವ್ಣೆ ಅರಾಮ್ಮ ಮಳಾನ ಕೊಹುಯುನಿತೆ ಗಯೂತೆ ಇವ್ಣಿ ಅವಿಶ್ವಾಸ್‌ಥೀಸ್ ಕರಿ ಅಪ್ಣೆ ದೇಖೆಸ್.
HEB 4:1 ಅಮ್‌ರ‍್ಹವಾಪರ್, ದೇವ್ನಿ ಆರಾಮ್ಮ ಮಳೆಜಾ಼ಯ್ ಕರಿ ಛಾ಼ತೆ ವಾಗ್ದಾನ್ ಬಿಜೂ಼ಬಿ ಇನಖ್ಹಾಜೆ ತುಮಾರಮ ಕೋಣ್‌ಬಿ ಇನಾಮ ಛು಼ಕಿನಾಜಾ಼ವ್ಣುತೆ ಅಪ್ಣೆ ಡರ್‌ ಭಕ್ತಿಥಿ ರ‍್ಹಿಯೆ.
HEB 4:2 ಇಸ್ರಯೇಲ್‌ವಾಳಾನ ಸುವಾರ್ತೆ ಬೋಲಾಯುತೆ ತಿಮ್‌ ಹಮುನಾಬಿ ಬೋಲಾಯು. ಕತೋಬಿ ಯೊ ಹಗಾಮ್ಮ ಇವ್ಣೆ ಭರೋಖ್ಹಾಥಿ ಖ್ಹಮ್‌ಜ್ಯುಕೊಂತೆ ಇನಖ್ಹಾಜೆ ಇವ್ಣುನ ಫಾಯಿದೊ ಕೊಹುಯುನಿ.
HEB 4:3 ಹಮ್ಕೆ ವಿಶ್ವಾಸ್ ಕರಾವಾಳ ಅಪ್ಣೆಸ್ ಯೊ ಅರಾಮ್‌ನಿ ಝ಼ಗೋಮ ಮಳಾವಾಳ ಹುಯಿರ‍್ಹಾಸ್. ಶನಕತೊ ಜಗತ್ನ ಪಹಿಲೇಥು ಇನು ಉಬ್‍ಜಾ಼ವ್ಣಿನ ಕಾಮ್‌ಖ್ಹಾರು ಖತಮ್ ಹುಯ್ಗುತೋಬಿ ‘ಇವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ ಕರಿ ಮೆ ಇರಾದೇಥಿ ಆಣ್‌ಲಿದೊ’ ಕರಿ ಬೋಲಿರಾಖ್ಯೊಸ್ನಿ.
HEB 4:4 ಕಿಜ್ಜಾ಼ಕಿ ಏಕ್‌ ಬಾಜು಼ ಉಬ್‍ಜಾ಼ವ್ಣಿನ ಖ್ಹಾತ್ನೆ ದನ್ನಬಾರೇಮ, ದೇವ್ನೆ ಇನು ಕಾಮ್‌ಖ್ಹಾರು ಖತಮ್ ಕರಿನ್, ಖ್ಹಾತ್ನ ದನ್ಮ ಅರಾಮ್‌ ಕರ‍್ಯೊಕರಿ ಲಿಖೈರ‍್ಹುಸ್.
HEB 4:5 “ಅವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ” ಕರಿ ಏಕ್‍ಭಾಗ್‍ಮ ಯೊ ಬಿಜು಼ಪಾಚು಼ ಬೋಲಿರಾಖ್ಯೊಸ್.
HEB 4:6 ಪಹಿಲೆ ಸುವಾರ್ತೆ ಖ್ಹಮ್‍ಜ್ಯೂಕಿ ಇವ್ಣೆ ಆ ಅರಾಮ್‌ ಕೋಲಿದುನಿ ಶನಕತೊ ಇವ್ಣೆ ಇನ ಅವಿಧೇಯ ಹುಯಿರ‍್ಹುಥು. ಇನಖ್ಹಾಜೆ ದೇವ್ನ ಆರಾಮ್ನ ಲೀಲ್ಯಾವನ ಬಿಜಾ಼ನ ಹುಕುಮ್‌ ದಿದೊ.
HEB 4:7 ಬಿಜು಼ಪಾಛೊ಼ ಘಣಾವರಖ್ಹ್‌ನ ಬಾದ್ಮ ಯೋ ದಾವೀದ್‍ಥಿ ‘ಆಜ಼್‌ನೊ ದನ್’ ಕರಿ ಬಿಜೋ಼ದನ್ನ ಬೋಲಿದಿದೊ, ಕಿಮ್‌ಕತೊ ತುಮೆ ಆ ವಖ್ಹತ್ ದೇವ್ನ ಗಳಾನ ಕಾನ್‌ ಲಗಾಡವಾಳ ರ‍್ಹಯಾತೊ ತುಮಾರ ದಿಲ್ನ ಕಠಣ್ ನಕೊ ಕರಿಲೆವೊ! ಕರಿ ಬೋಲಸ್.
HEB 4:8 ಯೆಹೋಶುವನೆ ಯೋ ಅದ್ಮಿವೋನ ಯೋ ಅರಾಮ್‌ನ ಮಹಿ ಲೀಗಯೊಹೊತ್ತೊ, ದೇವ್‍ಬಿಜೇಕ್‍ ದನ್ನಿಬಾರೇಮ ಪಾಛ಼ ಬೋಲ್ಯೊಹೊತ್ತ್‌ಕೊಯ್ನಿನಿ.
HEB 4:9 ಇನಖ್ಹಾಜೆ ದೇವ್ನ ಅದ್ಮಿನ ಸಬ್ಬತ್‌ ಕರಿ ಅರಾಮ್‍ನದನ್ ಬಿಜೂ಼ಬಿ ಛೆ.
HEB 4:10 ದೇವ್ ಇನ ಕಾಮ್ನ ಖ್ಹತಮ್‍ಕರೀನ್ ಕಿಮ್ ಆರಾಮ್‍ ಕರ‍್ಯೋಕಿ ಇಮ್ಮಸ್ ಇನ ಆರಾಮ್ಮ ಆವಾಳೂಬಿ ಇವ್ಣ ಕಾಮ್ನ ಖ್ಹತಮ್‍ಕರೀನ್ ಅರಾಮ್ ಕರ್ಶೆ.
HEB 4:11 ಇನಖ್ಹಾಜೆ ಅಪ್ಣೆ ಆ ಅರಾಮ್ ಲ್ಯವಾನಟೇಕೆ ಅಪ್ಣೆ ಕೋಶಿಶ್ ಕರಿಯೆ. ಅಪ್ಣಾಮ ಏಕ್‍ಜ಼ಣತೋಬಿ ಇವ್ಣಿನಿಘೋಣಿ ಅವಿಧೇಯ ಹುಯಿನ್ ಮಟಿನಾಜಾ಼ವ್ಣುತೆ ಇಮ್‌ ರ‍್ಹಿಯೆ.
HEB 4:12 ದೇವ್ನಿ ವಚನ್ ಜಿವ್ತಜಾನ್ನು, ಕಾಮ್ ಕರ್ತುರ‍್ಯವಾನುಬಿ ಅಜು಼ ಖಿವಿ ಬೇಮ್ಹೋಡಾನಿ ತಲ್ವಾರ್‌ಥೀಬಿ ಚಾ಼ಲ್ತು ರ‍್ಹೀನ್, ಜಾನ್ನಬಿ ಆತ್ಮಾನ, ಕೀಲ್ ಬಿಶ್ಶಾನಾಬಿ ಅಲಕ್‍ ಕರಾಯೆತ್ರೆ ಪರಕ್ಮ ಪೇಶಿ ನಿಕ್‌ಳ ಎತ್ರೆಬಿ, ದಿಲ್ನಿಖ್ಹೂಜ್‍ನಾಬಿ ಸೋಚ್ ಸಮಜ್‌ನಾಬಿ ಪರ್ಖಾನು ಹುಯಿರ‍್ಹುಸ್.
HEB 4:13 ಇನಿ ನಜ಼ರ‍್ಮ ಓಠೆ ಹುಯಿರ‍್ಹುತೆ ಖಿವಿ ಉಬ್‍ಜಾ಼ವ್ಣಿಬಿ ಕೊಯ್ನಿ. ಇನ ಡೋಳೇಥಿ ಲಪಿಹುಯು ಖಿವೂಬಿ ಕೊಯ್ನಿ. ಇನ ಡೋಳಾಮ ಅಖ್ಖೂಬಿ ಖುಲಮ್‌ಖುಲ್ಲ ಛಾ಼. ಅಜು಼ ಎಥ್ರಾನವಾಳನ ಅಪ್ಣೆ ಗಣ್ತಿ ದೇವ್ಣುಪಡಾಸ್.
HEB 4:14 ಆಬ್‌ಮಾಕರಿ ಗಯೋತೆ ದೇವ್‌ನೊ ಛಿಯ್ಯೊಹುಯಿರೊತೆ ಯೇಸುಸ್ ಅಪ್ಣುನ ಏಕ್‌ ಮಹಾಯಾಜಕ್ ಹುಯಿರ‍್ಹೊಸ್. ಇನಖ್ಹಾಜೆ ಅಪ್ಣೆ ಛಾ಼ತೆ ವಿಶ್ವಾಸ್ ಘಟ್ ಧರಿಲಿಯೆ.
HEB 4:15 ಶನಕತೊ ಅಪ್ಣುನ ಛಾ಼ತೆ ಮಹಾಯಾಜಕ್ ಅಪ್ಣಿ ಕಮ್‍ಜೋ಼ರಿಮ ಅಪ್ಣುನ ಗೋರ್‌ ವತಳಾಕೊಂತೆ ರ‍್ಹೆಯಿಕೊಯ್ನಿ. ಯೊ ಹರೇಕ್ ವಾತೆನಿ ಬಾರೇಮ ಅಪ್ಣಿನಿತರಸ್ ಶೋದನೆ ಪಡ್ಯೊಹುಯೊ. ಕತೋಬಿ ಇನೆ ಪಾಪ್ ಕರ‍್ಯೊಸ್ ಕೊಯ್ನಿ.
HEB 4:16 ಇನಖ್ಹಾಜೆ ಅಪ್ಣೆ ಬರಾಬರ್‌ನಿ ವೇಳ್ಮ ಗೋರ್‌ನ ಲಿಲ್ಯಾವನಖ್ಹಾಜೆ ಇನಿ ವಾರ್‌ಖ್ಹೇಥಿ ಅಪ್ಣುನ ಬರಾಬರ್‌ನಿ ವೇಳ್ಮ ಮದತ್ನಖ್ಹಾಜೆ ಹಿಮ್ಮಥ್ಥಿ ಇನಿ ಕೃಪಾಸನ್ನ ಖ್ಹಾಮ್ಣೆ ಅಯ್ಯೆ.
HEB 5:1 ಅದಮ್ಜ಼ಮಾನ ಮಾಥು ಹರೇಕ್‍ಜ಼ಣೊ ಮಹಾಯಾಜಕ್ ಚೂ಼ಣೈನ್ ಅದ್ಮಿವೋನಖ್ಹಾಜೆ ದೇವ್ನು ಕಾಮ್‌ಕರಾನ ನೇಮಕ್‌ಹುಯೊ, ಯೋ ಪಾಪ್ನ ಪರಿಹಾರ‍್ನಖ್ಹಾಜೆ ಕಾಣ್ಕೆಬಿ ಅಜು಼ ಬಲಿ ದೆವ್ಣು.
HEB 5:2 ಯೋಬಿಜಿನು ತಾಖತ್‌ಕೊಂತೆ ಇನಖ್ಹಾಜೆ ಯೋ ಖ್ಹಯಿಲನಾಬಿ, ಅಜು಼ ವಾಟ್‌ ಛು಼ಕವಾಳನಾಬಿ ದಯಾ ಕರಾನ ಶಕತ್‌ವಾಳೊ ಹುಯಿರ‍್ಹೊಸ್.
HEB 5:3 ಆ ಕಮ್‌ಜೋ಼ರಿನ ಖ್ಹಾಜೇಥಿ ಯೋ ಅದ್ಮಿನಖ್ಹಾಜೆ ಕಿಮ್ಕಿ ತಿಮ್ಮಸ್ ಇವ್ಣ ಇವ್ಣ ಪಾಪ್ನಖ್ಹಾಜೆ ಬಲಿ ದೆವ್ಣು.
HEB 5:4 ಕೋಣ್‌ಬಿ ಇನೇಥಿ ಯೋಸ್ ಆ ಇಜ಼್ಜತ್‌ನಿ ಪದವಿನ ಲೀಲ್ಯಾವನ ಕೊಹುವ್ವಾನಿ, ಕತೊ ಆರೋನನಿ ಘೋಣಿಸ್ ದೇವ್‍ಥಿ ಬುಲಾವವಾಳೊ ಹುಯಿನ್ ಇನಾಭಣಿ ಕರಿರಾಖ್ಯೋಸ್.
HEB 5:5 ಇಮ್ನಿಸ್ ಪರಕ್ಮ ಕ್ರಿಸ್ತಬಿ, ಮಹಾಯಾಜಕ ಕರಿ ಇನುಯೋಸ್ ಮಹಿಮೆ ಕರೀನ್ ಪಸಂದ್ ಕರ‍್ಯೊಕೊಯ್ನಿ. ಕತೋಬಿ “ತೂ ಮಾರೊ ಛಿಯ್ಯೊ, ಆವಖ್ಹತ್ ಮೇ ತುನ ಬಾ ಹುಯಿರ‍್ಹೊಸ್.
HEB 5:6 ಇನೆ ಬಿಜೇಕ್ ಬಾಜೂ಼ಮ, “ತೂ ಹರ್‌ಹಗಾಮ್‍ಬಿ, ಮೆಲ್ಕಿಜೆದೇಕ್‌ನೊ ಘೋಣಿನೊ ಯಾಜಕ” ಕರಿ ಬೋಲಿರಾಖ್ಯೊಸ್.
HEB 5:7 ಕ್ರಿಸ್ತ ಯೋಸ್ ಜಗತ್‌ಮ ಅದ್ಮಿಹುಯಿನ್ ಜಿವ್ಣು ಕರ‍್ಯೊತೆ ಹಗಾಮ್ಮ ಮರಣ್‍ಥಿ ಛು಼ಕೈನ್ ಬಚಾ಼ಡನು ಶಕತ್‍ವಾಳನ ಘಟ್‍ಥಿ ಪ್ರಾರ್ಥನೆ ಕರ್ತೊಹುಯಿನ್ ಡೋಳಾನ ಆಂಝೇ಼ಥಿ ಪ್ರಾಥರ್ನೆನಿ ಬಿಂತಿ ಕರ‍್ಯೊ. ಇನಖ್ಹಾಜೆ ದೇವ್ನ ಉಪ್ಪರ್‌ಥೀತೆ ಡರ್‌-ಭಕ್ತಿನಖ್ಹಾಜೆ ಇನಿ ಪ್ರಾರ್ಥನೆನ ದೇವ್ನೆ ಖ್ಹಮ್‍ಜ್ಯೊ.
HEB 5:8 ಕತೋಬಿ ಯೋ ಛಿಯ್ಯೊ ಹುಯಿರ‍್ಹೊತೋಬಿ ಇನೆ ಲಿದೋತೆ ವದೇಖ್ಹ್‌ಥೀಸ್ ಹೇಟು ಹುವಾನು ಶಿಕಿಗಯೊ.
HEB 5:9 ಆ ನಾಹುಯಿನ್ ಇನೆ ಭರ್‌ಪೂರ್‌ ಕರೀನ್, ಇನ ವಿಧೇಯಹುವಾಳ ಅಖ್ಖನಾಬಿ ಹಮೇಶ ರಕ್ಷಣೆನಖ್ಹಾಜೆ ಬಣ್ಯೊ.
HEB 5:10 ಕಾಹೆತೆ ಯೊ “ಮೆಲ್ಕಿಜೆದೇಕ್‌ನೊ ಘೋಣಿನೊ” ಮಹಾಯಾಜಕ್ ಹುಯಿನ್ ದೇವ್‍ಥಿ ನೇಮಕ್‌ ಹುಯೊ.
HEB 5:11 ಆ ಬಾರೇಮ ಹಮೆ ಬೋಲಾನು ಕೆತ್ರೇಕ್ಕಿ ಛಾ಼. ಕತೋಬಿ ತುಮೆ ಖ್ಹಮ್‍ಜಾ಼ಮ ಮಂದ್‌ ಛಾ಼ತೆ ಖ್ಹಾಜೇಥಿ ತುಮುನ ಬೋಲಿ ವತಾಳನು ಮುಶ್ಕಿಲ್ ಹುಯಿರ‍್ಹುಸ್.
HEB 5:12 ಅತ್ರಸ್ಮ ತುಮೆ ಶಿಕಾಡವಾಳು ಹುಯಿರ‍್ಹೇಣುಥು ತೋಬಿ, ದೇವ್ನು ವಚನ್ನು ಪಹಿಲೆ ಛಾತೆಪಾಠಅಖ್ಖು ಅಜೇಕ್ ಜ಼ಣು ತುಮುನ ಪಾಛು಼ ಶಿಕಾಡ್ನುಪಡ್ಯು. ತುಮುನ ಹಮ್ಕೆ ದೂದ್ನು ಜ಼ರೂರತ್ ಛಾ಼ ಪಣ್ಕಿ ಘಟ್ ಖಾಣುಕಾಹೆ.
HEB 5:13 ದೂದ್ ಪಿಯಾವಳು ಅಡ್ಡಾಣಿನಿಘೋಣಿ ರ‍್ಹೀನ್ ಅಛ್ಛು಼ ಅಜು಼ ಖರಾಬ್‌ನಿ ಬಾರೇಮ ಖ್ಹಯಾಲ್ ಕೊಯ್ನಿ.
HEB 5:14 ಘಟ್ ಖಾಣು ಜಾ಼ನ್‌ಜ಼ಮಾನ್ನಖ್ಹಾಜೆ, ಕತೊ ಗಲತ್‌ ಅಜು಼ ಬರಬರ್ಥಿರ‍್ಹೇಸ್ತೆ ಇನ ಖ್ಹಣೇದ್ ಕರಾನ, ಆದಥ್ಥಿ ಪುರ್ಗುಲ್‌ ಹುಯಿರ‍್ಹವಾಳನಖ್ಹಾಜೆ ಹುಯಿರ‍್ಹುಸ್.
HEB 6:1 ಇನಖ್ಹಾಜೆ ಕ್ರಿಸ್ತನಿ ಬಾರೇನು ಶುರುವಾತ್ನು ಶಿಕಾಡಾನು ಮ್ಹೇಲಿನ್, ಜಾನ್‌ಕೊಂತೆ ಕಾಮ್‍ಥಿ ಮನ್ ಫರಿಜಾ಼ವಾನುಬಿ, ದೇವ್‌ಮ ಭರೋಖ್ಹೊ ರಾಖಿನ್, ದೇವ್‌ಮ ವಿಶ್ವಾಸ್ ರಾಖೊ,
HEB 6:2 ಬ್ಯಾಪ್ತಿಸ್ಮನಿ ಬಾರೇಮ ಬೋಲ್ನುಕತೊ, ಹಾತ್‍ಮ್ಹೇಲಾನುಬಿ, ಪಾಛು಼ಜಿವ್ತು ಹುವಾನುಬಿ ಅಜು಼ ಹರ್‌ಹಮೇಶಾನು ನ್ಯಾಯತೀರ್ಪ್‌ನ ಬಾರೇಮ ತುಮುನ ಖ್ಹಮ್‌ಜಾ಼ಡೈರ‍್ಹುಸ್.
HEB 6:3 ತು ದೇವ್ನ ಸ್ವೀಕಾರ್ ಕರಿಲ್ಯಾವನು ಉಷೇತೊ ಅಪ್ಣೆ ಶಾತ್‌ಕರಾನ ಹುವಾನು.
HEB 6:4 ಶನಕತೊ ಏಕ್‌ಹಲ್ಲ ಉಜಾ಼ಳನ ಲೀರಾಖ್ಯುಸ್‌ಕಿ ಅಜು಼ ಕೋಣ್ ಪರಲೋಕ್‌ನ ವಾರ್ಖ್ಹಾನಿ ಲಜ಼ತ್‌ ದೇಖಿರಾಖ್ಯುಸ್ಕಿ ಅಜು಼ ಪವಿತ್ರಾತ್ಮಮ ವಾಟೊ ಲೀರಾಖ್ಯುಸ್ಕಿ,
HEB 6:5 ಅಜು಼ ದೇವ್ನ ವಚನ್ನಿ ಅಛ್ಛಿಫಣೈನು ಲಜ಼ತ್‌ ದೇಖಿರಾಖ್ಯುಸ್ಕಿ ಅಜು಼ ಅಗ್ಗಳ್ ಆವ್‌ಶೇತೆ ಜಗತ್ನಿ ಶಕತ್ನ ಲೀಲ್ಯಾವಾಳು ಹುಯಿರ‍್ಹುಸ್.
HEB 6:6 ಅಜು಼ ಇವ್ಣೆ ಇವ್ಣ ವಿಶ್ವಾಸ್ಮ ರಡ್ಕಿ ಜಾ಼ವಾಳ ರ‍್ಹಯಾತೊ ಇವ್ಣುನ ಪಾಛು಼ ಮನ್ ಫರಾವ್ಣುಕತೊ ಇವ್ಣೆ ಇವ್ಣ ನಫ್ಫೊಕೊಂತೆ ಖ್ಹಾಜೆ ದೇವ್ನ ಛಿಯ್ಯಾನ ಪಾಛು಼ ಶಿಲ್‌ಬೆಪರ್ ನಾಕ್‌ಶೆ.ಅಜು಼ ಇವ್ಣೆ ಅಖ್ಖಾನ ಖ್ಹಾಮ್ಣೆ ಇನ ಖ್ಹರಮ್‌ ಕಾಡ್‌ಶೆ.
HEB 6:7 ಜ಼ಮೀನ್ ಇನಪರ್ ಕೆತ್ರಿಕ್ಕಿ ಹಲ್ಲ ವರ್ಖ್ಹಾತ್ನ ಪಾಣಿನ ಖ್ಹೋಶಿಲಿನ್ ಅಜು಼ ಯೊ ಕಿನ ಖ್ಹಾಜೇಥಿ ಪಿಕಾವ್ಣಿ ಕರಾವಸ್ಕಿ, ಇವ್ಣುನ ಫಾಯಿದಾನು ಅನಾಜ಼್‌ನ ದೇಸ್, ಯೋ ದೇವ್ನ ವಾರ್ಖ್ಹಾನ ಲೀಲೇಸ್.
HEB 6:8 ಕತೋಬಿ ಯೋ ಕಾಟಾನ ಟಾಪ್‍ಣ್ಯನಾಬಿ ಶತ್ತೆನಾಬಿ ಫೋಡಾಯೊತೊ ಯೊ ಫಾಯಿದೊಕೊಂತೆ ಖ್ಹಾಜೆ ಶಾಪ್ನ ಶುಶತ್ ಹುವಾಸ್. ಖ್ಹರ್ತಿಮ ಯೋ ಬಳೈಜಾ಼ಸ್.
HEB 6:9 ಕತೋಬಿ ಪ್ಯಾರ್‌ನ ದೋಸ್ತಿವೊ ಅಮ್ನಿ ಪರಕ್‍ಥಿ ಹಮೆ ವಾತೆಬೋಲ್ಯತೋಬಿ ತುಮಾರಿ ವಿಚಾರ್‌ಮ ರಕ್ಷಣೆನ ಹೋಣುತೆ ಯೋ ಖ್ಹಾರಾಮ ತುಮೆ ಛಾ಼ಕರಿ, ಹಮೇ ಖ್ಹಾಚಾಮ ವಿಶ್ವಾಸ್ ಕರಿಯೇಸ್;
HEB 6:10 ತುಮೆ ದೇವ್ನ ಅದ್ಮಿವೋನ ಮದತ್ ಕರಿರಾಖ್ಯಸ್, ಉಜೂಬಿ ಕರುಕರಸ್ ಆ ಕಾಮ್ನ ಅಜು಼ ತುಮೆ ಇನ ನಾಮ್ನ ವತಾಳ್ಯತೆ ಪ್ಯಾರ‍್ನ ಯೊ ಭೈಕಕೊಯ್ನಿ ಶನಕತೊ ದೇವ್‌ ಅನೀತಿವಾಳೊ ಕಾಹೆ.
HEB 6:11 ವಿಶ್ವಾಸ್‌ನಿ ಪೂರ ಬರೋಬರ್‌ಥಿ ಲೀಲ್ಯಾವನಖ್ಹಾಜೆ ತುಮಾರಮ ಹರೇಕ್ ಜ಼ಣು ಖ್ಹರ್ತಿಲಗೂಬಿ ತುಮೆ ಯೋಸ್ ಕೋಶಿಶ್ ಕರ್ತುರ‍್ಹೇವ್ಣುಕರಿ ಮೇ ಘಣು ಹರ್‌ಖ್ಹುಸ್.
HEB 6:12 ತುಮೆ ವಳ್‌ಶಿಕರಾವಳ ಹುಯಿರ‍್ಹೇಣು ಕರಿ ಇಷ್ಟಕರುಕೊಯ್ನಿ. ಇನ ಬದಲ್ ವಿಶ್ವಾಸ್‍ಥೀಬಿ ಖ್ಹಮಾಳಿರ‍್ಹವಾಥೀಬಿ ವಾಗ್ದಾನ್ನ ಹಕ್‌ ಲೀರಾಖವಾಳನ ದೇಖಿನ್ ಚಾ಼ಲವಾಳ ಹುಯಿರ‍್ಹೇವೊ.
HEB 6:13 ದೇವ್ನೆ ಅಬ್ರಹಾಮ್‌ನ ವಾಗ್ದಾನ್ ಕರಾಖ್ಹತರ್ ಇನೇಥಿಬಿ ಊಚು಼ ಕೋಣ್‌ಬಿಕೊಂತೆ ಇನಖ್ಹಾಜೆ ಇನ ನಾಮ್‌ಪರ್‌ ಯೋಸ್ ಆ‌ಣ್‌ ಲೀನ್,
HEB 6:14 “ಮೇ ತುನ ವಾಗ್ದಾನ್ ಕರುಸ್ ಮೇ ತುನ ವಾರ್‌ಖ್ಹೊ ದೀನ್ ತಾರು ಪಿಳ್ಗಿನ ಭಡೈಷ್‌” ಕರಿ ಖಲಿ ಬೋಲ್ಯೊ.
HEB 6:15 ಅಮ್ ಅಬ್ರಹಾಮ್‌ನೆ ಖ್ಹಮಾಳವಾಳೊ ಹುಯಿನ್ ಟಿವೈರ‍್ಹೀನ್ ವಾಗ್ದಾನ್ನ ಲೀಲಿದೊ.
HEB 6:16 ಅದ್ಮಿಖ್ಹಾರು ಇವ್ಣೆಥಿಬಿ ಊಚಾ಼ವ್‌ನ ಉಪ್ಪರ್ ಆಣ್‌ಲೇಸ್, ಅಮ್ ಆಣ್‍ಲೀನ್ ಪ್ರಮಾಣ್‌ ಕರೀನ್, ಇನೇಥಿ ಆಡ್‌ಫೇಡ್ ಖತಮ್ ಹುವಾಸ್.
HEB 6:17 ಇಮ್ಮಸ್ ದೇವ್ ಇನಿ ಖ್ಹೂಜ಼್ ನಾ ಬದಲ್ನುಕರಿ ವಾಗ್ದಾನ್ನ ಆಣ್‍ಕರಿನ್ ಘಟ್‌ಕರ‍್ಯೊ.
HEB 6:18 ದೇವ್ನಿ ವಾಗ್ದಾನ್ ಅಜು಼ ಆಣ್. ಆ ಭೇಬಿ ಕೆದೆಕೆದೇಬಿ ರ‍್ಹವಾನಿ ಆಧಾರ್ ಖ್ಹಾರು. ಶನಕತೊ ಅನಿಬಾರೇಮ ದೇವ್ ಅಪ್ಣುನ ಠಗಾವವಾಳೋಸ್ ಕಾಹೆ. ಇನಖ್ಹಾಜೆ ಆಖ್ಹ್‌ರೊ ಲೀಲೆವ್ಣುಕರಿ ನಾಶಿ ಆಯಿನ್ ಅಪ್ಣ ಖ್ಹಾಮ್ಣೆ ಮ್ಹೆಲಿರಾಖ್ಯೋತೆ ಭರೋಖ್ಹಾನ ಧರಿರಾಖ್ಯತೆ ಅಪ್ಣುನ ಘಣು ಹುಮ್ಮಖ್ಹ್‌ ಮಳನಿತರಹುಯು.
HEB 6:19 ಅಪ್ಣುನ ಯೋ ಭರೋಖ್ಹೊ ಅಪ್ಣ ಜಾನ್ನ ನಂಬಾಖ್ಹರ್ಕು ಅಪ್ಣಿ ಜೀವನ್ನು ದೋಣಿನ ಘಟ್‍ಥಿ ಭಿರಾಖನು ಲಂಗಾರ್ ಹುಯಿರ‍್ಹುಸ್. ಯೋ ಜಾ಼ಖ್ಹತ್ ಪರಿಶುದ್ ಝ಼ಗೋನು ಪಡ್ದಾನ ಮಹಿ ಪೇಖ್ಹಾವಳು ಹುಯಿರ‍್ಹೇಸ್.
HEB 6:20 ಹಿಜ್ಜಾ಼ ಯೇಸು ಹರ್‌ಹಗಾಮ್‌ಬಿ ಮೆಲ್ಕಿಜೆದೇಕ್‌ನಿ ಘೋಣಿನೊ ಮಹಾಯಾಜಕ್ ಹುಯಿನ್, ಅಪ್ಣಖ್ಹಾಜೆ ಪಹಿಲೆಥೂಸ್ ನಿಕ್ಳಿನ್ ಯೋ ಸನ್ನಿಧಿಮ ಜೈ಼ರ‍್ಹೋಸ್.
HEB 7:1 ಆ ಮೆಲ್ಕಿಜೆದೇಕ್ ಸಾಲೇಮ್‌ನೊ ರಾಜ಼ ಅಜು಼ ಘಣೊಊಚೊ಼ ಹುಯಿರ‍್ಹವವಾಳೊ ದೇವ್‌ನೊ ಯಾಜಕಬಿ ಹುಯಿರ‍್ಹೊಥೊ. ಅನೆ ರಾಜ಼ವ್ನ ಸಂಹಾರ್ ಕರೀನ್ ಪಾಛೊ಼ ವಳ್ಯವ್ತೊಥೊತೆ ಅಬ್ರಹಾಮ್‌ನ ಮ್ಹೋರೆಹುಯಿನ್ ಇನ ಆಶೀರ್ವಾದ್‌ ಕರ‍್ಯೊ.
HEB 7:2 ಇನ ಅಬ್ರಹಾಮ್‌ನೆ ಯೋ ಜ್ಯುತಿಲೀನ್ ಆಯೊಥೋತೆ ಅಖ್ಖೂಸ್ ಜಿನಖ್ಹ್‌ಮ ದಖ್ಹ್‌ಮ ಏಕ್‌ ಭಾಗ್ನ ದಿದೊ. “ಮೆಲ್ಕಿಜೆದೇಕ್ ಕರಿ ನಾಮ್ನ ನೀತಿನೊ ರಾಜ಼ ಕರೀಬಿ ಅನಕೇಡೆಥು ಸಾಲೇಮ್‌ನೊ ರಾಜ಼ಕತೊ ಸಮಾಧಾನ್ನೊ ರಾಜ಼” ಕರೀಬಿ ಮತ್ಲಬ್.
HEB 7:3 ಇನ ಆಯಕೊಯ್ನಿ ಬಾಕೊಯ್ನಿ, ಖಾನ್‍ದಾನ್‍ಬಿ ಕೊಯ್ನಿ, ಪೈದಾಖ್ಹ್‌ಬಿ ಕೊಯ್ನಿ, ಮರಣ್‌ಬಿ ಕೊಯ್ನಿ, ಯೋ ದೇವ್ನ ಛಿಯ್ಯಾನಿತರ ರ‍್ಹೀನ್, ಹಮೇಶಾನೊ ಯಾಜಕ್‍ಹುಯಿರ‍್ಹೊಸ್.
HEB 7:4 ಆ ಹೈರೋತೆ ಕೆತ್ರೆ ಮಹಾನ್ ಹುಯಿರ‍್ಹೊಸ್ ಕರಿ ದೇಖೊ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರ‍್ಹೂತೆ ಅಬ್ರಹಾಮ್‌ನೆ ಜಂಗ್ ಜೂತಿನ್ ಲಾಯೊತೆ ಜಿನಖ್ಹ್‌ಮ ದಖ್ಹ್‌ಮ ಏಕ್‌ ಭಾಗ್‌ ಇನ ದಿದೋನಿ.
HEB 7:5 ಖ್ಹಾಚಮಾಬಿ ಲೇವಿನ ಖೂಮ್ಮ ಯಾಜಕ್ನು ಕಾಮ್ ಲೀರಾಖವಾಳು, ಅದ್ಮಿಥಿ ಕತೊ ಅಬ್ರಹಾಮ್‌ನು ಖಾಂದಾನ್‍ವಾಳಥಿ ದಖ್ಹ್‌ಮ ಏಕ್‌ ಭಾಗ್‍ಖ್ಹಾರು ಲ್ಯಾವಾನ ಧರ್ಮಶಾಸ್ತ್ರಮ ಹುಕುಮ್ ಛಾ಼.
HEB 7:6 ಕತೋಬಿ ಮೆಲ್ಕಿಜೆದೇಕ್ ಲೇವಿನು ಖಾನ್‍ದಾನ್‍ವಾಳನ ಮಳ್ಯೊಹುಯೊ ಕಾಹೆ, ರ‍್ಹಯುತೋಬಿ ಆಬ್ರಹಾಮ್ ಥಿ ದಖ್ಹ್‌ನು ಏಕ್‍ಭಾಗ್ನಲಿದೊತೆ ಕಾಹೆತೆ ದೇವ್‍ಥಿ ವಾಗ್ದಾನ್ ಲೀರಾಖವಾಳೊ ಅಬ್ರಹಾಮ್‌ನ ವಾರ್‌ಖ್ಹೊದಿದೊ.
HEB 7:7 ಆಶೀರ್ವಾದ್‌ ಲ್ಯವಾಳಾಥೀಬಿ, ಆಶೀರ್ವಾದ್‌ ಕರವಾಳೋಸ್ ಊಚೊ಼ ಕರಿ ಬೋಲಾಮ ಶನು ಶಕ್ ಕೊಯ್ನಿ.
HEB 7:8 ದಖ್ಹ್‌ಮ ಭಾಗ್ನ ಲ್ಯವಾಳ ಯಾಜಕ್‌ಖ್ಹಾರು ಏಕ್‌ಕೊಂತೆ ಏಕ್‍ದನ್ ಮರಾಸ್. ಕತೋಬಿ ಆಬ್ರಹಾಮ್‍ಥಿ ದಖ್ಹ್‌ಮ ಭಾಗ್ನ ಲೀರಾಖವಾಳೊ ಮೆಲ್ಕಿಜೆದೇಕ್ ಕೆದೇಬಿ ಜಿವ್ತೊರ‍್ಹಿಶೆ ಕರಿ ಧರ್ಮಶಾಸ್ತ್ರಮ ಬೋಲೈರ‍್ಹುಸ್.
HEB 7:9 ಅಜು಼ ದಖ್ಹ್‌ಮ ಭಾಗ್‍ಅಖ್ಖು ಲೇಸ್ತೆ ಲೇವಿಬಿ ಜಿನು, ಅಬ್ರಹಾಮ್‍ಥಿ ದಖ್ಹ್‌ಮ ಭಾಗ್‍ಅಖ್ಖು ದ್ಯಾವನಿತರಹುಯು.
HEB 7:10 ಕಿಮ್ ಕತೊ, ಮೆಲ್ಕಿಜೆದೇಕ್ ಅಬ್ರಹಾಮ್‌ನ ಮ್ಹೋರೆಹುವಾನಿ ವಖ್ಹ್‌ತೆ, ಲೇವಿ ಬಿಜೂ಼ಬಿ ನಾ ಪೈದಹುಯಿರ‍್ಹೊತೋಬಿ ಅಬ್ರಹಾಮ್‌ನ ಶರೀರ‍್ಮ ಮಳಿರ‍್ಹೋಥೊ.
HEB 7:11 ಇಸ್ರಾಯೇಲ್‌ವಾಳನ ದೆವಾಯುತೆ ಧರ್ಮಶಾಸ್ತ್ರ ಲೇವಿವಾಳನು ಯಾಜಕ್‌ನು ನಿಯಮ್‌ಪರ್ ಆಧಾರ್ ಹುಯಿರ‍್ಹುಸ್. ಲೇವಿವಾಳನು ಅಮ್ನ ನಿಯಮ್‌ಥೀಸ್ ಪೂರಹುವಾನು ರ‍್ಹಯೂತೊ. ಆರೋನ್ನ ಖಾನ್‌ದಾನ್ನ ಕೊಮಳನಿತೆ, ಮೆಲ್ಕಿಜೆದೇಕ್‌ನಿ ಖಾನ್‌ದಾನ್‌ಮ ಮಳ್ಯೊಹುಯೊ ಬಿಜೇಕ್‍ಜ಼ಣೊ ಯಾಜಕ ಆವಾನಿ ಜ಼ರೂರತ್ ಶಾತ್‌ಥಿ?
HEB 7:12 ಯಾಜಕ್ನು ಪದವಿ ಬದ್ಲಾನು ರ‍್ಹಯೂತೊ. ಧರ್ಮಶಾಸ್ತ್ರ ಜಿನು ಬದ್ಲಾನು ಜ಼ರೂರತ್ ಛಾ಼.
HEB 7:13 ಕತೋಬಿ ಆಹೈರುತೆ ಕಿನಿ ಬಾರೇಮ ಬೋಲೈರ‍್ಹೂಸ್ಕಿ ಯೋ ಹೈರುತೆ ಬಿಜೇಕ್ ಖಾನ್‌ಖೋಜ಼್‌ನ ಮಳ್ಯೊಹುಯೊ. ಯೋ ಖಾನ್‌ಖೋಜ಼್‌ನ ಏಕ್‍ಜ಼ಣೋಬಿ ಚಾ಼ಚ಼ರ್‌ಕನ ಸೇವೆ ಕರ‍್ಯೊಕೊಯ್ನಿ.
HEB 7:14 ಅಪ್ಣೊ ಪ್ರಭು ಯೆಹೂದ ಖಾನ್‍ಖೋಜ಼್‌ಮ ಪೈದಾ ಹುಯಿನ್ ಆಯೊಹುಯೊಕರಿ ಅಛ್ಛಿನಿತರ ಮಾಲುಮ್‍ಪಡಸ್; ಆ ಖಾನ್‌ಖೋಜ಼್‌ನ ಯಾಜಕವ್ನಿ ಬಾರೇಮ ಮೋಶೆನೆ ಶಾತ್ಬಿ ಬೋಲ್ಯೊ ಕೊಯ್ನಿ.
HEB 7:15 ಮೆಲ್ಕಿಜೆದೇಕ್‍ನಿತರ ಬಿಜೇಕ್ ಯಾಜಕ್ ಆವ್‍ಶೆಕರಿ ಬೋಲಾನು ರ‍್ಹಯೂತೊ ಯೋ ಬಿಜೂ಼ಬಿ ಘಣು ಆಛ್ಛಿಂತರ ಮಾಲುಮ್‌ ಪಡಸ್ನಿ.
HEB 7:16 ಆ ಯಾಜಕ್ ಶರೀರ್ ಸಂಬಂದ್ ಪಡಾಸ್ತೆ ನಿಯಮ್‌ನಿ ಪರಕ್‍ ಕೊಹುಯುನಿತೆ, ಜಾನ್ನ ಶಕತ್ನ ಆಧಾರ್‌ಥಿ ಮಟಾಕೊಂತೆ ರ‍್ಹಿಶೆ.
HEB 7:17 ಇನಿ ಬಾರೇಮ ತೂ ಅಖ್ಖಾ ಜ಼ಗ್‌ಜ಼ಮಾನಮಾಬಿ, ಮೆಲ್ಕಿಜೆದೇಕ್‌ನಿ ಘೋಣಿನೊ ಯಾಜಕಾಸ್‌ಕರಿ ಧರ್ಮಶಾಸ್ತ್ರ ಬೋಲಸ್.
HEB 7:18 ಶನಕತೊ ಪಹಿಲೆಥೂತೆ ಹುಕುಮ್‌ ಕಮ್‌ಜೋ಼ರಿಬಿ ಫಾಯಿದೊಕೊಂತೆಬಿ ಹುಯಿರ‍್ಹುತೆಖ್ಹಾಜೆ ಯೊ ಭೀರಿಗು.
HEB 7:19 ಧರ್ಮಶಾಸ್ತ್ರ ಶನಾಬಿ ಪೂರ ಕೊಕರಾನಿ. ಅಜು಼ ಇನ ಬದಲ್ ದೇವ್‌ಕನ ಜೈ಼ನ್ ಲೀಲಾವನುಸ್ ಭರೋಖ್ಹೊ ಹುಯಿರ‍್ಹೊಸ್.
HEB 7:20 ಆ ಬಿಜೂ಼ಬಿ ಬೋಲ್ನುಕತೊ ಆಣ್‌ಕೊಂತೆ ಕಾಹೆ. ಅನಾಹುಯಿನ್ ಲೇವಿವಾಳು ಆಣ್‌ ಕೊಂತೆ ಯಾಜಕ್‍ಬಣ್ಯು.
HEB 7:21 ಯೋತೋಬಿ ಆಣ್‌ಥಿ ಯಾಜಕಹುಯೊ. ಕತೋಬಿ ದೇವ್ ಇನ ಅಮ್ ಬೋಲ್ಯೊ, “ತು ಹರ್‌ಹಗಾಮ್‌ಬಿ ಯಾಜಕ್ ಹುಯಿರ‍್ಹೋಸ್; ಅಜು಼ ಪ್ರಭು ಹುಯಿರೋತೆ ಮೇ ಕೋಲ್‌ನಾಮ್ ಕರಿನ್ ಬೋಲಿರಾಖ್ಯೊಸ್. ಅಜು಼ ಮಾರೊದಿಲ್ನ ಕೊಬದ್‌ಲೈಶ್‌ನಿ ‘ತು ಕದೇಬಿ ಯಾಜಕ ಹುಯಿರ‍್ಹಿಶ್.”
HEB 7:22 ಅನಿ ಫರಕ್ ಶಾತ್‌ಕತೊ ಯೇಸು ಆಣ್‌ನಿ ಜೊ಼ಡ್ಮಾಸ್ ಮಹಾನ್ ಒಪ್ಪಂದಾನ ಆಧಾರ್ ಹುಯೊ.
HEB 7:23 ಬಿಜೇಕ್ ಫರಕ್ ಶಾತ್‌ಕತೊ: ಕೈಏಕ್ ಜ಼ಣು ಯಾಜಕ್ ಹೋಣು ಪಡ್ಯುಥು. ಶನಕತೊ ಲೇವಿವಾಳು ಮರುಕರ್ತುಥುತೆ ಇನಖ್ಹಾಜೆ ಯೊ ಕಾಮ್ ಚ಼ಲಾವನ ಕೊಹುಯುನಿ.
HEB 7:24 ಕತೋಬಿ ಯೇಸುತೋಬಿ ಕದೇಬಿ ಜಿವ್‌ಶೇತೆ ಇನಖ್ಹಾಜೆ ಇನು ಯಾಜಕ್ ಧರಮ್ ಕೋಣ್‌ಬಿ ಕರಾನ ಕೊಹುವಾನಿ.
HEB 7:25 ಇನಖ್ಹಾಜೆ ಯೋ ಇನೇಥಿ ದೇವ್‌ಕನ ಆವಾಳಾನ ಪೂರ ಬಚಾ಼ಡನ ಶಕತ್‌ವಾಳೊ ಹುಯಿರ‍್ಹೊಸ್. ಶನಕತೊ ಇವ್ಣಖ್ಹಾಜೆ; ದೇವ್‌ಕನ ಬಿಂತೀಕರಾನ ಕೆದೇಬಿ ಜಿವಿರ‍್ಹವಾಳೊ ಹುಯಿರ‍್ಹೊಸ್.
HEB 7:26 ಇನಖ್ಹಾಜೆ ಅಪ್ಣುನ ಹೋಣುತೆ ಇನ ಪೂರಕರಾವಳೊ ಮಹಾಯಾಜಕ ಹುಯಿರ‍್ಹೊಸ್ ಪರಿಶುದ್‌ಬಿ ದೋಷ್‍ಕೊಯ್ನಿತೇಬಿ, ಮೈಲಾಪ್‍ಕೊಯ್ನಿತೆಬಿ, ಪಾಪಿಮ ಮಳಾಕೊಂತೆ ನಿರ‍್ವಾಳೊಬಿ ಹುಯಿರ‍್ಹವಾಳೊಬಿ ಆಕಾಶ್ ಮಂಡಲ್‍ಥೀಬಿ ಊಚಾ಼ಮ ರ‍್ಹವಾಳೊ.
HEB 7:27 ಪಹಿಲೆ ಇವ್ಣ ಪಾಪ್ನ ಪರಿಹಾರ‍್ನ ಖ್ಹಾಜೆ ಇನಪಾರ್ ಅದ್ಮಿವ್‌ನ ಪಾಪ್ನ ಪರಿಹಾರ‍್ನಖ್ಹಾಜೆ; ಬಲಿ ಸಮರ್ಪಣ್‌ ಕರಾಸ್ತೆ ಲೇವಿನ ಮಹಾಯಾಜಕರ್‌ನಿತರ ಆ ಹೈರುತೆ ಹರೇಕ್ ದನ್‌ಬಿ ಬಲಿಖ್ಹಾರು ಅರ್ಪಣ್ ಕರಾನು ಜ಼ರೂರತ್ ಕೊಯ್ನಿ. ಶನಕತೊ ಆ ಹೈರುತೆ ಇನ ಯೋಸ್ ಅರ್ಪಣ್ ಕರಾನಿವಖ್ಹ್‌ತೆ ಅಖ್ಖಾನಿ ಪಾಪ್ನಖ್ಹಾಜೆ ಎಕ್ಕಸ್ ಹಲ್ಲ ಬಲಿ ಅರ್ಪಣ್ ಕರ‍್ಯೊ.
HEB 7:28 ಧರ್ಮಶಾಸ್ತ್ರ ಕಮ್‍ಜೋ಼ರಿ ಆದ್ಮಿವ್ನ ಮಹಾಯಾಜಕರ್‌ ಕರೀನ್ ನೇಮಕ್ ಕರಾಸ್. ಕತೋಬಿ ಧರ್ಮಶಾಸ್ತ್ರನ ವಾರ್ ಆಣ್‌ನಿ ಜೋ಼ಡ್ಮ ಆಯೂತೆ ವಚನ್ ಕದೆಕದೇಬಿ ಅಖ್ಖೂಸ್ ಪೂರ ಹುಯಿರೋಸ್ತೆ ಛಿಯ್ಯಾನಸ್ ಯಾಜಕ ಕರಿನ್ ನೇಮಕ್ ಕರಿರಾಖ್ಯುಸ್.
HEB 8:1 ಹಮ್ಕೆ ಹಮೆ ಬೋಲಾನಿ ವಾತೆಖ್ಹಾರಿ ಜ಼ರೂರ‍್ನಿವಾತೆ ಶಾತ್‍ಕತೊ, ಪರ್‌ಲೋಕ್‌ಮ ಊಚಿ ಸಿಂಹಾಸನ್ನ ಖಾವಿಬಾಜು಼ಮ ಬೇಠೊರ‍್ಹವಾಳೊ ಮಹಾಯಾಜಕ್ ಅಪ್ಣುನ ಛಾ಼.
HEB 8:2 ಯೋ ಪವಿತ್ರ ಝ಼ಗೋಮ ಅದ್ಮಿಥಿಕಾಹೆತೆ, ಪ್ರಭುನೇಸ್ ಬಣಾಯೋತೆ ದೇವ್ನು ದರ್ಶನಾನ ಡೇರಾಮ ಯಾಜಕ್ನು ಕಾಮ್‍ಕರಾವಾಳೊ ಹುಯಿರ‍್ಹೊಸ್.
HEB 8:3 ಹರೇಕ್ ಮಹಾಯಾಜಕ್‍ಬಿ ದೇವ್ನ ಕಾಣ್ಕೆಬಿ ಬಲಿ ಸಮರ್ಪಣ್‌ ದೇವ್ಣು. ಇನಾಖ್ಹಾಜೆ ಅಪ್ಣೊ ಮಹಾಯಾಜಕ್‍ಬಿ ದೇವ್ನ ಶಾತ್ತೋಬಿ ದ್ಯವಾನು ಜ಼ರೂರತ್ ಛಾ಼.
HEB 8:4 ಯೋ ಜ಼ಮೀನ್‌ಪರ್ ರ‍್ಹಯೋಹೊತ್ತೊ ಯಾಜಕ್ ಬಣ್ಯೊಹೋತ್‍ ಕೊಯ್ನಿ. ಶನಕತೊ ಧರ್ಮಶಾಸ್ತ್ರನಿ ಪರಕ್ಮ ಕಾಣ್ಕೆ ದ್ಯವಾಳು ಅಗಾಡಿಥೂಸ್ ಛಾ಼.
HEB 8:5 ಮೋಶೆ ದೇವ್‍ದರ್ಶನ ಡೇರೊ ಭಾಂದ್‌ಣುಕರಿ ರ‍್ಹವಾನಿ ವಖ್ಹ್‌ತೆ ಮೇ ಪರ್ಭತ್‌ಮ ತುನ ವತಾಳ್ಯೊತೆ ಛಾ಼ಯನಿ ಪರಕ್ಮಾಸ್ ಅಖ್ಖು ಕರ್ನುಕರಿ ದೇವ್ನಿ ಝೇತಾವ್ಣಿ ಹುಯೂತೆ ಇಮ್ಮಸ್ ಪರಲೋಕ್‍ಮ ಛಾ಼ತೆಅಖ್ಖು ಛಾ಼ಳಿಬಿ, ಛಾ಼ಯಬಿ ಹುಯಿರ‍್ಹೂಸ್ತೆ ಮಂದಿರ್‌ಮ ಇವ್ಣೆ ಚಾ಼ಕ್ರಿ ಕರುಕರಸ್.
HEB 8:6 ಕತೋಬಿ ಯೇಸು ಇನೇಥಿಬಿ ಮಹಾನ್ ಯೊ ಯಾಜಕವ್ನ ಕಾಮ್‍ಥೀಬಿ ಘಣು ಮಹಾನ್ ಯಾಜಕ್‌ನಿ ಸೇವೆ ಲೀರಾಖ್ಯೊಸ್. ಅಮ್ನಿ ಪರಕ್ಮ ಯೇಸು ಇನ ಆದ್ಮೆವ್ನಖ್ಹಾಜೆ ದೇವ್‍ಥಿ ಲಾಯೊತೆ ಒಪ್ಪಂದ ಜೂ಼ನೇಥೀಬಿ ಮಹಾನ್ ಹುಯಿರ‍್ಹುಸ್. ಶನಕತೊ ಯೊ ಅಛ್ಛಿ ವಾಗ್ದಾನ್‌ಥಿ ಅಜು಼ ಅಛ್ಛಿ ಒಪ್ಪಂದನ ಮಳಾವವಾಳೊ ಹುಯಿರೋಸ್.
HEB 8:7 ಯೋ ಪಹಿಲು ಒಪ್ಪಂದ ಶನೂಬಿ ಗಲ್ತಿ ನಾರ‍್ಹಯೂಹೊತ್ತೊ, ಬೇನು ಒಪ್ಪಂದನಿ ಜ಼ರೂರತ್ ಕೋಥಿನಿ.
HEB 8:8 ಕತೋಬಿ ದೇವ್ನೆ ಯೋ ಅದ್ಮಿವ್‌ಪರ್ ಗಲತ್‌ ಲಗಾಡಿನ್ ಗಲತ್‌ ದೆಖಾವದಿನ್ ಅಮ್‍ ಬೋಲ್ಯೊ, ‘ಹಂದೇಖೊ, ಮೇ ಇಸ್ರಾಯೇಲ್ ಖಾನ್‌ದಾನ್‌ಥಿಬಿ ಯೆಹೂದ ಖಾನ್‌ದಾನ್‌ಥಿಬಿ ನವೇಥಿ ಏಕ್‌ ಒಪ್ಪಂದ ಕರಾವನು ದನ್‌ಖ್ಹಾರು ಆವ್‌ಶೆ’ ಕರಿ ಪ್ರಭು ಬೋಲಸ್.
HEB 8:9 ಆ ಒಪ್ಪಂದ ಮೇ ಅವ್ಣ ಗುರುಗುರುಬ್‌ಲ್ಯನ ಹಾತ್ ಧರಿನ್ ಈಜಿಪ್ಟ್ ದೇಖ್ಹ್‌ಮಾಥೊ ಹಾತ್‌ಧರಿನ್‌ ಬುಲೈಲಿನ್ ಆಯೋತೆ ದನೂಮ ಇವ್ಣಿ ಜೋ಼ಡ್ಮ ಕರೀಲಿದೊತೆ ಒಪ್ಪಂದನಿತರ ಕಾಹೆ. ಶನಕತೊ ಇವ್ಣೆ ಮಾರಿ ಒಪ್ಪಂದಮ ಘಟ್‍ಥಿ ಭಿಯುಕೊಂತೆ ಇನಾಖ್ಹಾಜೆ ಮೇ ಇವ್ಣುನ ಫಿಕರ್ ಕೊಕರ‍್ಯೋನಿ’ ಕರಿ ಪ್ರಭು ಬೋಲಾಸ್.
HEB 8:10 ಯೋ ಅಖ್ಖದನ್ನ ವಾರ್ ಮೇ ಇಸ್ರಾಯೇಲ್ ಖೂಮ್‌ವಾಳನಿ ಜೋ಼ಡ್ಮ ಕರಿಲೀಶ್‍ತೆ ಒಪ್ಪಂದ ಅಮ್‍ರ‍್ಹಿಶೆ, ಮೇ ಮಾರ ಹುಕುಮ್‌ನ ಇವ್ಣ ದಿಮಾಕ್ಮ ಮ್ಹೇಲಿಶ್. ಮೆ ಇವ್ಣ ದಿಲ್ಮ ಇನ ಲೀಖಿಶ್. ಮೇ ಇವ್ಣುನ ದೇವ್‌ ಹುಯಿರ‍್ಹೀಶ್. ಇವ್ಣೆ ಮಾರು ಅದ್ಮಿ ಹುಯಿರ‍್ಹಿಶೆ.
HEB 8:11 ಆನಾಹುಯಿನ್ ಹರೇಕ್‍ಜ಼ಣು ಇನ ಭೀಡೆವಾಳನಬಿ ಇನ ಭೈನಾಬಿ, ‘ಪ್ರಭುನ ಮಾಲುಮ್ ಕರ‍್ಲೆವೊಕರಿ ಬೋಧನೆ ಕರ್ನುಕೊಯ್ನಿ. ಶನಕತೊ ಕೀಳ್‌ಥಿಬಿ ಧರೀನ್ ಊಚ಼ ಹುಯಿರ‍್ಹವಾಳು ಖ್ಹಾರೂಸ್ ಮನ ಮಾಲುಮ್‌ಕರ‍್ಲಿಶೆ.
HEB 8:12 “ಮೇ ಇವ್ಣ ಖರಾಬ್ ಕಾಮ್ನ ಗೋರ್‌ಥಿ ಕ್ಷಮಾಪಣ್ ಕರೀಶ್. ಅಜು಼ ಇವ್ಣ ಪಾಪ್ನ ಕದೇಬಿ ಯಾದ್ಮ ಕೋಲೈಶ್‌ನಿ; ಕರಿ ಪ್ರಭು ಬೋಲಸ್”.
HEB 8:13 ದೇವ್ ಅನ ನವು ಒಪ್ಪಂದ ಕರಿ ಬೋಲ್ಯೊ ಇನಾಖ್ಹಾಜೆ ಪಹಿಲಿ ಒಪ್ಪಂದನ ದೇವ್ನೆ ಜೂ಼ನುಕರಿ ಬಣಾಯೊ.ಅಜು಼ ಖಿವು ಜೂ಼ನುಥೂಕಿ ಯೋ ಮಟಿಜಾ಼ವನ ಖನ್ನೆ ಆವ್‌ಶೆ.
HEB 9:1 ಪಹಿಲ ಒಪ್ಪಂದಾಮ ಆರಾದನೇನು ರೀತಿರಿವಾಜ್‌ ಅಖ್ಖುಥು ಅಜು಼ ಯೊ ಝ಼ಗೋ ಅಛ್ಛು಼ಥು.
HEB 9:2 ಏಕ್‌ ದೇವ್‌ನೊ ದರ್ಶನನೊ ಡೇರೊ ಭಾರ್‌ ಠೋಕೈರ‍್ಹಿನ್, ಇನ ಪಹಿಲ ಭಾಗ್‌ಮ, ಇನ ಪವಿತ್ರಝ಼ಗೊಕರಿ ಬೋಲ್ತುಥು. ಇನಾಮ ದೀವೊ, ಮೇಜ್ ಅಜು಼ ದೇವ್ನ ಸಮರ್ಪಣ್‌ಕರ‍್ಯೊ ಹುಯೊ ರೋಟೊ ಹಿಜ್ಜಾ಼ ರ‍್ಹೇತುಥು.
HEB 9:3 ಅಜು಼ ಬೇನು ಪಡ್ದಾನ ಪೀಠೆ ರ‍್ಹೇಸ್ತೆ ಕೋಣಾನ, ಘಣು ಪವಿತ್ರಝ಼ಗೊಕರಿ ಬೋಲ್ತುಥು.
HEB 9:4 ಇನಾಮ ಖ್ಹೊನ್ನಾನಿ ಖ್ಹಾಲರ‍್ಯಾನು ಢಾಕ್ಣಿಬಿ ಅಜು಼ ಖ್ಹೊನ್ನಾನು ತಗ್ಡು ಲಗಾಡ್ಯುಹುಯು ಒಪ್ಪಂದಾನು ಪಿಟಾರೊ ಥು. ಯೋ ಪಿಟಾರಾಮ ಮನ್ನ ನಖೈರ‍್ಹಯುಹುಯು ಖ್ಹೊನ್ನಾನಿ ಕಟೋರೊಬಿ, ಆರೋನನು ಚಿಗುರ್ ಮ್ಹೇಲ್ಯೊಹುಯೊ ಲಠ್ಠೊ ಅಜು಼ ದಖ್ಹ್‌ ಹುಕುಮ್‌ ಲಿಖಾಯುಹುಯು ಒಪ್ಪಂದಾನು ಬೇ ಬಂಡಾನು ಪಲ್ಗು ಥು.
HEB 9:5 ಯೊ ಪಿಟಾರನಪರ್ ದೇವ್ನು ಮಹಿಮೆನು ವತಾಳನು ಕೆರೂಬಿಕರಿ ಬೇ ಪರಿಯೇ ಫಾಕ್ಡಿ ಪಖ್ಹಾರಿನ್ ಯೊ ಝ಼ಗೊ ಅಖ್ಖು ಮೂಚಿರಾಖ್ಯುಥು. ಇನ ಹಮ್ಕೆ ಏಕೇಕ್‌ ಛೋ಼ಡಿಬೋಲಾನ ಕೊಹೊಯ್ನಿ.
HEB 9:6 ಅಮ್ ಆ ಅಖ್ಖು ತಯಾರ್ ಹುಯಿರ‍್ಹಿನ್ ಯಾಜಕಅಖ್ಖು ಯೊ ಡೇರಾನ ಪಹಿಲ ಭಾಗ್ನ ಜೈ಼ನ್, ಹರೇಕ್ ದನ್ ಹಿಜ್ಜಾ಼ ದೇವ್ನು ಸೇವೆನು ಕಾಮ್ ಕರ್ತುಥು.
HEB 9:7 ಕತೋಬಿ ಬೇನ ಕೋಣಾಮ ಮಹಾಯಾಜಕ್ ಎಕ್ಕಸ್ ಜ಼ಣೊ ವರಖ್ಹ್‌ನ ಏಕ್‌ ವಖ್ಹತ್ ಜಾ಼ತೊಥೊ. ಅಜು಼ ಇನಿ ಜೋ಼ಡ್ಮ ಬಲಿನು ಲ್ಹೋಯಿನ ಲೀನ್‌ ಜಾ಼ತೊಥೊ. ಯೊ ಲ್ಹೊಯಿನ ಇನಖ್ಹಾಜೇಬಿ ಅಜು಼ ಇನ ಅದ್ಮಿವ್‍ನು ಅಜ್ಞಾನ್‌ಥಿ ಕರ‍್ಯುಹುಯು ಪಾಪ್ನಖ್ಹಾಜೆಬಿ ಸಮರ್ಪಣ್‌ ಕರ್ನುಪಡ್ಯುಥು.
HEB 9:8 ಆ ಡೇರಾನು ಪಹಿಲು ಭಾಗ್‌ ಅಜೂ಼ಬಿ ರ‍್ಹಾವಾಲಗು ಘಣು ಪರಿಶುಧ್ ಝ಼ಗೊನ ಜಾ಼ವನು ಮಾರಗ್ ಹಮ್ಕೆಲಗು ದೆಖಾಯುಕೊಯ್ನಿ. ಕರಿಬೋಲಾನು ಪವಿತ್ರಾತ್ಮ ಬೋಲಿವತಾಳಸ್.
HEB 9:9 ಆ ಹಮ್ಕೇನ ಹಗಾಮ್ನ ವತಾಳನು ಹುಯಿರ‍್ಹುಸ್. ಯೋ ಶಾತ್‍ಕತೊ ಕಾಣ್ಕೆಬಿ ಅಜು಼ ಬಲಿದ್ಯವಾಥಿ ಆರಾದನೆ ಕರಾವಾಳು ಇವ್ಣ ಮನ್ನಿಸಾಕ್ಷಿ ಪೂರ ಕರಾನ ಕೊಹುವಾನಿ.
HEB 9:10 ಹಮ್ಕೆಲಗು ಇವ್ಣೆಖ್ಹಾರು ಖಲಿ ಖಾಣಪಾಣಿಬಿ ಅಶ್ನಾನ್‌ಧಾನ್ನಿ ಪದತ್ತಿ ಹುಯಿರ‍್ಹುತೆಖ್ಹಾಜೆ ಆಖಲಿ ಭಾರ್‌ಲ್ಯು ಕಾಮ್. ದೇವ್ ಇನ ನವ ನಿಯಮ್‌ನು ಹಗಾಮ್ ಆವಲಗುಬಿ ಇಮ್ಮಸ್ ರ‍್ಹಿಶೆ.
HEB 9:11 ಕತೋಬಿ ಕ್ರಿಸ್ತ ಯೇಸು ತದೇಸ್‌ ಮಹಾಯಾಜಕ್ ಹುಯಿನ್ ಐರ‍್ಹೋಸ್. ಯೋ ದ್ಯವಾನು ಅಛ಼್ಛು ಫಲ್ ಖ್ಹಾರು ತದ್‌ನು ತದೇಸ್‌ ಅಪ್ಣುನ ಛ಼. ಯೊ ಸೇವೆ ಕರುಕರಸ್ತೆ ಡೇರಾನ ಘರ್‌ಮ ಅಗ್ಗಳ್‌ಥಿಬಿ ಜಾ಼ಖ್ಹತ್ ಮಹಾನ್ ಅಜು಼ ಭರ್‌ಪೂರ್‌ ಹುಯಿರ‍್ಹುಸ್. ಆ ಅದ್ಮಿನ ಹಾತೇಥಿ ಭಾಂದಿಹುಯು ಕಾಹೆ. ಆ ಲೋಕ್‌ನು ಉಬ್‍ಜಾ಼ವ್ಣಿನ ಕಾಹೆ.
HEB 9:12 ಖ್ಹಾರಸ್‌ನಖ್ಹಾಜೆ ಮಹಾ ಪರಿಶುದ್ ಝ಼ಗೋಮ ಪ್ರವೇಶ್‌ ಕರ‍್ಯೊಕೊಯ್ನಿ. ಕೆಲ್ಡೊ ಬೋಕ್‌ಡಾನ ಲ್ಹೊಯಿಥಿ ಕಾಹೆ ಅಪ್ಣುನ ಕ್ರಿಸ್ತನೆ ಎಕ್ಕಸ್ ಬಾರ್ ಇನ ಶೊಂತ್ ಲ್ಹೋಯಿಥಿ ಹಮೇಶಾನಿ ರಕ್ಷಣೆಮ ಗಯೊ.
HEB 9:13 ಬೋಕ್‌ಡ ಅಜು಼ ಢಾಂಡಾನ ಲ್ಹೋಯಿಬಿ ಬಲಿನು ಜಾನ್ವರ್‌ನು ರಾಕ್‌ನಾಬಿ ಮೈಲುರ‍್ಹಾವಾಳಪರ್ ಛಿಡ್‍ಕಾಥಿ ಶರೀರ್‌ನ ಮೈಲಾನ ಪಾಕ್‌ ಕರೆಜಾ಼ಯ್.
HEB 9:14 ಅಜು಼ ಆ ಖ್ಹಾಚು಼ಕರಿ ಬೋಲಾನು ರ‍್ಹಯೂತೊ ಹಮೇಶಾನ ಆತ್ಮಥಿ ಇನುಯೋಸ್ ದೇವ್ನ ಕಳಂಕ್‌ಕೊಂತೆ ಬಲಿಹುಯಿನ್ ಸಮರ್ಪಣ್‌ ಕರಿಲಿದೊತೆ ಕ್ರಿಸ್ತನು ಲ್ಹೋಯಿ ಕೆತ್ರೇಕ್ಕಿ ಅಪ್ಣುನ ಜಾನ್‍ಕೊಂತೆ ಕಾಮ್‍ಥಿ ಛೋ಼ಡೈನ್, ಅಪ್ಣೆ ಜಿವ್ತೊಜಾನ್ನೊ ದೇವ್ನ ಆರಾದನೆ ಕರ್‌ಯೇತೆ ತಿಮ್ ಅಪ್ಣೆ ಮನ್ನಿಸಾಕ್ಷಿನ ಪಾಕ್‌ ಕರ‍್ಯಕೊಯ್ನಿಕಿಶು?
HEB 9:15 ಅನಖ್ಹಾಜೇಥಿ ದೇವ್‍ಥಿ ಬುಲಾಯೂತೆ ಅದ್ಮಿ ದೇವ್ನಿ ವಾಗ್ದಾನ್ ಹುಯಿರ‍್ಹುತೆ ಹಮೇಶಾನು ವಾರ್‌ಖ್ಹೊ ಲೀಲೆವ್ಣುಕರಿ ಕ್ರಿಸ್ತನೆ ಆ ನವ ಒಪ್ಪಂದನ ಮಳಾವವಾಳೊ ಹುಯಿರ‍್ಹೊಸ್. ಶನಕತೊ ಪಹಿಲಿ ಒಪ್ಪಂದನ ಹಗಾಮ್ಮ ಕರ‍್ಯುತೆ ಗಲ್ತಿನಖ್ಹಾಜೆ ಇವ್ಣುನ ಛುಟ್ಕಾರ್ ಕರಾನಖ್ಹಾಜೆ ಕ್ರಿಸ್ತ ಮರಣ್ ಲಿದೊ.
HEB 9:16 ಏಕ್‌ ಮರಣ್ಣಿ ಚಿಟ್ಟಿ ಲೀಖಿರಾಖನು ರ‍್ಹಯೂತೊ ಯೊ ಮರಿರ‍್ಹೋಸ್ ಸಾಬಿತ್‌ಕರಾನು ಜ಼ರೂರತ್ ಛಾ಼.
HEB 9:17 ಅನಿ ಮತ್ಲಬ್‌ ಶಾತ್‌ಕತೊ, ಯೊ ಮರ‍್ಯೊತೆ ತದೇಸ್‌ ಯೊ ನಿಯಮ್‌ ಕಾಮ್ನ ಆವಸ್ ಪಣ್ಕಿ ಲೀಖ್ಯೊಹುಯೊ ಜಿವ್ತೊ ರ‍್ಹವಲಗೂಬಿ ಯೋ ಕಾಮ್ನ ಕೋಆವಾನಿ.
HEB 9:18 ಅಮ್ ರ‍್ಹಾವಪರ್ ಪಹಿಲು ಒಪ್ಪಂದ ಜಿನುಬಿ ಲ್ಹೋಯಿಕೊಂತೆ ಘಟ್ ಭೀರ‍್ಯುಕೊಯ್ನಿ.
HEB 9:19 ಮೋಶೆ ಧರ್ಮಶಾಸ್ತ್ರನಿ ಹುಕುಮ್‌ನ ಖ್ಹಾರ ಅದ್ಮಿವ್‌ನ ಖ್ಹಮ್‍ಜಾ಼ಡ್ತೊ ಹುಯಿನ್ ತದೆ ಇನೆ ಢಾಂಡನಕೆಲ್ಡಾನ ಬೋಕ್‌ಡಾನ ಲ್ಹೋಯಿನ ಪಾಣಿಮ ಮಳೈನ್‌ ಅಜು಼ ಇನ ಧರ್ಮಶಾಸ್ತ್ರ ಲೀಖಿಹುಯು ಪುಂಗ್‌ಳಿನ ಉಪ್ಪರ್‌ಬಿ ಅಖ್ಖಾ ಅದ್ಮೆವ್‍ಪರ್‌ಬಿ ಹಿಸ್ಸೋಪ್‍ನ ಡೀರೆಥೇಬಿ ಲಾಲ್‌ರು಼ಯಿಥೀಬಿ ಛಿಡ್‌ಕ್ಯೊ.
HEB 9:20 ಆ ದೇವ್ನೆ ತುಮಾರಖ್ಹಾಜೆ ಹುಕುಮ್ ಕರಿರಾಖ್ಯೊತೆ ಒಪ್ಪಂದಾನು ಲ್ಹೋಯಿ ಆ ಹುಯಿರ‍್ಹುಸ್ ಕರಿಬೋಲ್ಯೊ.
HEB 9:21 ಇಮ್ಮಸ್ ಡೇರಾಪರ್‌ಬಿ ದೇವ್ನ ಸೇವೆನ ಹೋಣುತೆ ಅಖ್ಖಾಸ್ ಜಿನಖ್ಹ್‌ಪರ್‌ಬಿ ಅಮ್ನಿಸ್ ಪರಕ್ಮ ಲ್ಹೋಯಿನ ಛಿಡ್‌ಕ್ಯೊ.
HEB 9:22 ಇಮ್ಮಸ್ ಧರ್ಮಶಾಸ್ತ್ರನಿ ಪರಕ್ಮ ಬೋಲ್ನುಕತೊ ಖ್ಹಾರೂಸ್ ರಾಛು಼ ಲ್ಹೋಯಿಥೀಸ್‍ ಶುದ್ದಿಹೋತುಥು. ಅಜು಼ ಲ್ಹೋಯಿ ರಂಚಾ಼ವಥಿ ಕಾಹೆತೆ ಪಾಪ್ ಕ್ಷಮಾಪಣ್ ಕೊಹೊಯ್ನಿ.
HEB 9:23 ಇನಾಖ್ಹಾಜೆ ಸೊರ್ಗಾನು ಜಿನಖ್ಹ್‌ನ ಛಾ಼ಳಿನಿಘೊಣಿನು ಜಿನಖ್ಹ್‌ನ ಶುದ್ದಿಕರಣನಖ್ಹಾಜೆ ಅಥ್ರಾನು ಬಲಿಖ್ಹಾರು ಹೋಣುಕತೊ, ಖ್ಹಾಚಮಾಬಿ ಸೊರ್ಗಮ ಶುದ್ದಿಕರಾನ ಮಹಾನ್ ಬಲಿನು ಜ಼ರೂರತ್ ಛ಼.
HEB 9:24 ಶನಕತೊ ಕ್ರಿಸ್ತ ಖ್ಹಾಚ ಮಂದಿರ್‌ ಘೋಣಿನಿತರಾನು ಹಾತೇಖ್ಹು ಭಾಂದ್ಯುಹುಯಿ ಪವಿತ್ರ ಝ಼ಗೋಮ ರ‍್ಹಿಯೊಕೊಂತೆ ಅಪ್ಣಭಣಿಥು ದೇವ್ನಖ್ಹಾಮ್ಣೆ ಹಮ್ಕೆ ದೆಖೈಲ್ಯವಾನಖ್ಹಾಜೆ ಸೊರ್ಗಾಮ ಪ್ರವೇಶ್‌ ಕರ‍್ಯೊ.
HEB 9:25 ಆನಾಹುಯಿನ್ ಮಹಾಯಾಜಕ್ ವರಖ್ಹ್‌ ವರಖ್ಹ್‌ನಾಬಿ ಜಾನ್ವರ್‌ನ ಲ್ಹೋಯಿನ ಲೀನ್ ಘಣು ಪರಿಶುದ್ ಝ಼ಗೋಮ ಜಾ಼ತೋಥೊ. ಕತೋಬಿ ಕ್ರಿಸ್ತ ಇನುಯೋಸ್ ಕೈಯೇಕ್ ವಖ್ಹತ್ ಸಮರ್ಪಣ್‌ಕರಾನ ಪರಲೋಕ್‍ಮ ಗಯೊಕೊಯ್ನಿ.
HEB 9:26 ಇಮ್‌ ಸಮರ್ಪಣ್‌ ಕರಾನು ರ‍್ಹಯು ಹೋತ್ತೊ, ಜಗತ್‌ ಉಬ್‍ಜಾ಼ವ್ಣಿಥುಬಿ ಕೈಯೇಕ್ ವಖ್ಹತ್ ಖ್ಹತಾಪ್ಣಿಲೇವ್ಣು ಪಡ್ಯುಥು. ಕತೋಬಿ ಖ್ಹಾರನಖ್ಹಾಜೆ ಎಕ್ಕಸ್ ಹಲ್ಲ ಜ಼ಗ್‍ಜ಼ಮಾನನಿ ಖ್ಹರ್ತಿಲಗೂಬಿ, ಯೋ ಪಾಪ್ನ ಕಾಡಿನಾಖನಿ ಉದ್ದೇಶ್‌ಥಿ ಇನುಯೋಸ್ ಬಲಿದಾನ್‌ ಹುವಾನ ದೆಖೈಲಿದೊ.
HEB 9:27 ಎಕ್ಕಸ್ ವಖ್ಹತ್ ಮರಾನುಬಿ ಅಜು಼ ಇನಕೇಡೆಥು ದೇವ್‍ಥಿ ತೀರ್ಪ್ ಲೀಲ್ಯಾವಾನು ಹುಯಿರ‍್ಹುಸ್.
HEB 9:28 ಇಮ್ಮಸ್ ಕ್ರಿಸ್ತ ಜಿನುಬಿ ಕೈಯೆಕ್ಕಿ ಅದ್ಮಿನು ಪಾಪ್ ಕಾಡಾನಖ್ಹಾಜೆ ಎಕ್ಕಸ್ ವಖ್ಹತ್ ಸಮರ್ಪಣ್‌ ಹುಯೊ. ಯೋ ಬೇನೆ ಹಲ್ಲ ದೆಖಾವ್‌ಶೆತೆ ಪಾಪ್ನ ಕಾಡನ ಕಾಹೆಕತೊ ಕೋಣ್ ಟಿವೈರ‍್ಹುಸ್ಕಿ ಇನ ಬಚಾ಼ನಖ್ಹಾಜೆ ಆವ್‌ಶೇತೆ.
HEB 10:1 ಧರ್ಮಶಾಸ್ತ್ರ ಅಗಾಡಿ ಆವ್ಣುತೆ ಅಛ್ಛಿ ವಾತ್ನಿ ಛಾ಼ಯ ಪಣ್ಕಿ ಯೋ ಇನು ಖ್ಹಾಚು಼ ರೂಪ್‍ಕಾಹೆ. ಇನಖ್ಹಾಜೆ ಯೋ ಧರ್ಮಶಾಸ್ತ್ರ ಹರೇಕ್ ವರಖ್ಹ್‌ ಕದೇಬಿ ಎಕ್ಕಸ್ ಥರಾನು ಬಲಿನ ಛ಼ಡೈನ್ ದೇವ್‌ಕನ ಆವಾಳಾನ ಕದೇಬಿ ಭರ್‌ಪೂರ್‌ ಕರ್ಶೆ ಕೊಯ್ನಿ.
HEB 10:2 ಅದ್ಮಿಖ್ಹಾರು ಇವ್ಣು ಆರಾದನೆ ಕರಾಥಿ ಶುದ್ದಿಕರಣ್ ಹುಯುಹೊತ್ತೊ, ಇವ್ಣಮ ಪಾಪ್ನಿ ಗಲ್ತಿನಿ ಖ್ಹಯಾಲಸ್ ರ‍್ಹಿಯುಹೊತ್‍ಕೊಯ್ನಿ ಅಜು಼ ಅಖ್ಖು ಬಲಿದಾನ್‌ ದ್ಯವಾನು ಭೀರಿಗಯುಹೊತ್.
HEB 10:3 ಹಮ್ಕೆತೋಬಿ ಯೋ ಬಲೀಥಿ ಹರೇಕ್ ವರಖ್ಹ್‌ಬಿ ಪಾಪ್ನುಯಾದ್‍ ಹುವಾಸ್.
HEB 10:4 ಶನಕತೊ ಢಾಂಡಾವ್‌ನು ಅಜು಼ ಬೋಕ್‌ಡಾವ್‌ನು ಲ್ಹೋಯಿಥಿ ಪಾಪ್ನ ಪರಿಹಾರ್ ಕರಾನ ಕೊಹೊಯ್ನಿ.
HEB 10:5 ಇನಖ್ಹಾಜೆ ಕ್ರಿಸ್ತ ಜಗತ್ಮ ಆವಾನಿವಖ್ಹ್‌ತೆ ಇನೆ ಅಮ್ ಬೋಲ್ಯೊಕಿ, “ದೇವ್ ತುನ ಬಲಿ ಛ಼ಡಾವನು ಅಜು಼ ಕಾಣ್ಕೆ ದ್ಯವಾನು ಪಸಂದ್ ಕೋಥೂನಿ, ಕತೋಬಿ ಮನ ಏಕ್‍ ಶರೀರ್‌ನ ತಯಾರ್ ಕರೀನ್ ದೀರಾಖ್ಯೊಸ್.
HEB 10:6 ಜಾನ್ವರ್‌ನ ಬಾಳಥಿಬಿ, ಪಾಪ್ನ ಪರಿಹಾರ‍್ನ ಪೂರ ಶರೀರ್‌ನು ಬಲಿಥೀಬಿ ತುನ ಖುಷಿ ಹುವಾಕೊಯ್ನಿ.
HEB 10:7 ತದೆ ಮೆ ಹಂದೇಕ್‍ಲ ದೇವ್, ದಪ್ತರ್‌ನಿ ಪುಂಗ್‍ಳಿಮ ಮಾರಿ ಬಾರೇನು ಲೀಖೈರುತೆ ಪರಕ್ಮ ತಾರಿ ಖ್ಹೂಜ಼್‌ನ ಚ಼ಲಾವನಖ್ಹಾಜೆ ಐರ‍್ಹೋಸ್” ಕರಿ ಮೇ ಬೋಲ್ಯೊ.
HEB 10:8 ಪಹಿಲೆ ಇನೆ ಬೋಲ್ಯೊತೆ ಧರ್ಮಶಾಸ್ತ್ರನಿ ಪರಕ್ಮ ಅರ್ಪಣ್‍ ಹುಯುತೆ ಬಲಿಥೀಬಿ ಜಾನ್ವರ್‌ನ ಬಾಳಥಿಬಿ ಅಜು಼ ಪಾಪ್ ಪರಿಹಾರ‍್ನು ಬಲಿಥೀಬಿ ತುನ ಪಸಂದ್ ಕೋಥೂನಿ. ತು ಯೋ ಅಖ್ಖಾಮ ಖುಷಿ ಕರಾಕೊಯ್ನಿ.
HEB 10:9 ಅನವಾರ್, “ಹಂದೇಕ್‍ಲ ದೇವ್ ತಾರಿ ಖ್ಹೂಜ಼್‌ನ ಚ಼ಲಾವನ ಮೇ ಐರ‍್ಹೋಸ್!” ಕರಿ ಬೋಲಿರಾಖ್ಯೊಸ್. ಅಮ್‍ ದೇವ್ನೆ ಜೂ಼ನು ಬಲಿದಾನ್‌ ಕಾಡಿನಾಖನಖ್ಹಾಜೆ ಕ್ರಿಸ್ತನು ಬಲಿದಾನ್‌ ಯೊ ಝ಼ಗೋಮ ಮ್ಹೇಲ್ಯೊ.
HEB 10:10 ಶನಕತೊ ಕ್ರಿಸ್ತಯೇಸು ಎಕ್ಕಸ್ ಬಾರ್ ಅಖ್ಖಾನಖ್ಹಾಜೆ ಇನ ಶರೀರ್‌ನ ಸಮರ್ಪಣ್‌ ಕರಿನ್ ದೇವ್ನಿಖ್ಹೂಜ್‍಼ನ ಚ಼ಲಾಯೊತೆ ಇನಖ್ಹಾಜೆ ಅಪ್ಣೆ ಅಖ್ಖಾ ಪಾಪ್‌ಥಿ ಪಾಕ್‌ಹುಯಿಗ.
HEB 10:11 ಹರೇಕ್ ಯಾಜಕ್‍ಬಿ ದನ್‍ಪರೋಜ಼್ ಚಾ಼ಚ಼ರ್‌ನು ಸೇವೆಕರ್ತೊಥೊ. ಇಮ್ಮಸ್ ಕೈಯೆಕ್‌ಹಲ್ಲ ಬಲಿದಾನ್‌ ಕರ್ತೊಥೊ ಕತೋಬಿ ಅನೇಥಿ ಪಾಪ್ನ ಕಾಡಿನಾಖನ ಕೊಹುಯುನಿ.
HEB 10:12 ಕತೋಬಿ ಕ್ರಿಸ್ತ ಪಾಪ್ನಖ್ಹಾಜೆ ಅಖ್ಖಾ ಹಗಾಮ್ಮ ಎಕ್ಕಸ್‍ಬಲಿನ ಸಮರ್ಪಣ್‍ಕರೀನ್, ದೇವ್ನ ಖಾವಿಬಾಜು಼ ಬೇಶಿಗಯೊ.
HEB 10:13 ತಪ್‌ಥೊ ಇನ ವಹೇರ‍್ಯಾನ ಇನ ಗೋಡಾನಿ ರಚ್ಚೊ಼ ಬಣಾವಲಗೂಬಿ ಯೋ ಟಿವೈರ‍್ಹೋಸ್.
HEB 10:14 ಇನಿ ಎಕ್ಕಸ್ ಬಲಿಥಿ ಪಾಪ್ನ ಪಾಕ್‌ಕರಿನ್ ಪೂರಕರಿರಾಖ್ಯೊಸ್.
HEB 10:15 ಪವಿತ್ರಾತ್ಮ ಜಿನುಬಿ ಅಪ್ಣುನ ಸಾಕ್ಷಿ ದ್ಯವಾಳೊಹುಯಿನ್, ಪಹಿಲೇಥು ಯೊ ಅಮ್ ಬೋಲಸ್.
HEB 10:16 “ಯೋ ದನ್ ಅವಾದಿನ್ ಮೇ ಇವ್ಣಜೋ಼ಡ್ಮ ಕರಿಲ್ಯಾವನು ಒಪ್ಪಂದ ಅಮ್‍ರ‍್ಹಿಶೆ, ಮಾರಿ ನಿಯಮ್ನ ಇವ್ಣ ದಿಲ್ಮ ಮ್ಹೇಲಿಶ್ ಇವ್ಣ ದಿಮಾಕ್ಮ ಯೋ ಅಖ್ಖು ಲೀಖಿಶ್”. ಕರಿ ಪ್ರಭು ಬೋಲಸ್.
HEB 10:17 ಅಜು಼ ಯೋ ಅಮ್‍ ಬೋಲಸ್, “ಇವ್ಣ ಪಾಪ್ ಅಖ್ಖಾನಾಬಿ ಅಜು಼ ಇವ್ಣ ಖರಾಬ್ ಕಾಮ್ನಾಬಿ ಬಿಜು಼ ಕದೇಬಿ ಮೇ ಯಾದ್ಮ ಕೋಲೈಶ್‌ನಿ”.
HEB 10:18 ಹಮ್ಕೆ ಪಾಪ್‌ಖ್ಹಾರು ಮಾಪ್‌ ಹುವಾನಬಾದ್ಮ ಪಾಪ್‍ಪರಿಹಾರ‍್ನು ಬಲಿದ್ಯವಾನು ಜ಼ರೂರತ್ ಕೊಯ್ನಿ.
HEB 10:19 ಇನಖ್ಹಾಜೆ ಭೇನೆ ಭೈಯೇವೊ, ಯೇಸುನ ಲ್ಹೋಯಿಥಿ ಘಣಿ ಪವಿತ್ರಝ಼ಗೋಮ ಜಾ಼ವಾನ ಅಖ್ಖಿ ಛುಟ್ಕಾರ್ ಛಾ಼.
HEB 10:20 ಅಪ್ಣಖ್ಹಾಜೆ ಇನಿ ಶರೀರ್‌ಕರಿ ಬೋಲಾನು ಯೊ ಪಡ್ದಾನ ಮಹಿತೊ ಜಾ಼ವನ ನವ ಜಾನ್ನೊ ಮಾರಗ್‌ನ ಕಾಡಿರಾಖ್ಯೊಸ್.
HEB 10:21 ಅಜು಼ ದೇವ್ನ ಘರ್‌ಪರ್ ಅಧಿಕಾರ್‌ ರ‍್ಹವಾಳೊ ಮಹಾನ್ ಯಾಜಕ್ ಅಪ್ಣುನ ಛಾ಼.
HEB 10:22 ಇನಖ್ಹಾಜೆ ಖರಾಬ್ ದಿಲ್ನಿಸಾಕ್ಷಿನ ಮ್ಹೆಲ್ಯಹುಯ ದಿಲ್‌ಥೀಬಿ ನೀರ್ಛೊ಼ಳ್‍ ಪಾಣಿಥಿ ಪಾಕ್‌ಹುಯ ಶರೀರ್‌ಥೀಬಿ ಖ್ಹಾಚಆತ್ಮಥಿ ಪೂರ ವಿಶ್ವಾಸ್‍ಥಿ ದೇವ್‌ಕನ ಅಯ್ಯೆ.
HEB 10:23 ದಿದೋತೆ ವಾಗ್ದಾನ್ನ ಚ಼ಲಾವವಾಳೊ ದೇವ್. ಇನಖ್ಹಾಜೆ ಅಪ್ಣೆ ವಿಶ್ವಾಸ್‌ನಿ ಬಾರೇಮ ಘಟ್‍ಥಿ ಧರಿರಾಖೆ.
HEB 10:24 ಅಪ್ಣೆ ಏಕ್‌ಥಿ ಏಕ್‌ ಪ್ಯಾರ್‌ವತಾಳನ ಖ್ಹಾಜೇಬಿ ಅಛ್ಛು಼ಕಾಮ್ ಕರಾನ ಖ್ಹಾಜೇಬಿ ಹುಮ್ಮಖ್ಹ್‌ ದೇವ್ಣುಕರಿ ಮಾಲುಮ್ ಕರಿಲಿಯೆ.
HEB 10:25 ಸಬೆ ಮಳಾನು ಆದತ್‌ನ ಥೋಡುಜ಼ಣು ಮ್ಹೆಲಿದಿದೂತೆ ತಿಮ್ ಅಪ್ಣೆ ಮ್ಹೇಲಿನಾದೆವ್ಣುತೆ, ಅಪ್ಣುನ ಮಾಲುಮ್‌ ಛಾ಼ತೆ ಪರಕ್ಮ ಪ್ರಭು ಆವಾನದನ್‍ ಖನ್ನೆ ಐಗಾತೆ ಇನಖ್ಹಾಜೆ ಬಿಜೂ಼ಬಿ ಘಣು ಏಕ್‌ಥಿಏಕ್ ಹುಮ್ಮಖ್ಹ್‌ ದಿಯೇ.
HEB 10:26 ಅಪ್ಣೆ ಖ್ಹಾಚ಼ನ ಅಕ್ಕಲ್‌ನಿ ಬಾದ್ಮಬಿ ಪಾಪ್ ಕರ‍್ತಸ್ ರ‍್ಹಯಾತೊ ಪಾಪ್ ಪರಿಹಾರ‍್ನಖ್ಹಾಜೆ ಬಿಜು಼ ಖಿವೂಬಿ ಬಲಿದ್ಯವಾನು ಕೋಉಷೇನಿ.
HEB 10:27 ಇನಬದಲ್, ಅಖ್ಖೇಥಿ ಡರ್‌ಥಿ ಭರೈರ‍್ಹುತೆ ನ್ಯಾವ್‌ನು ತೀರ್ಪ್‌ನಖ್ಹಾಜೆ ಟಿವೈರ‍್ಹವಾನು ಅಜು಼ ದೇವ್ನ ವಹೇರ‍್ಯಾವ್ನ ಬಳಾನಿ ಇರಾದನಿ ಝ಼ಲ್‌ಪಟ್‌ ಖಲಿ ರ‍್ಹಿಶೆ.
HEB 10:28 ಮೋಶೇನು ಧರ್ಮಶಾಸ್ತ್ರನ ಝಿಟ್ಕಾರ‍್ಯ ಹುಯಾನ ಬೇಜ಼ಣು ನತರ್ ತೀನ್ ಜ಼ಣಾನಿ ಸಾಕ್ಷಿನಿ ಆಧಾರ್‌ಪರ್ ಗೋರ್‌ಕೊಂತೆ ಮರಣ್ಣಿ ದಂಡನೆ ದೇತೂಥು.
HEB 10:29 ಅಮ್‍ರ‍್ಹವಾಪರ್ ದೇವ್ನ ಛಿಯ್ಯಾನ ಖುಂದ್ಲೀನ್, ಇನ ಪಾಕ್‌ಕರಿಲಿದೂತೆ ಒಪ್ಪಂದಾನು ಲ್ಹೋಯಿನ ಅಶುದ್ದಕರಿ ಜಾ಼ಣಿಲೀನ್ ದೇವ್ನಿ ವಾರ್‌ಖ್ಹಾನಿ ವರಾನ ಆತ್ಮಾನ ಝಿಟ್ಕಾರವಾಳೊ ಉಶೆ, ಬಿಜು಼ ಕೆಥ್ರಾನು ಕಠೋರ್ ನಿಶತ್ನ ಯೋ ಖ್ಹಣೇದ್ ಹುಯೆಜಾ಼ಯ್‍ಕರಿ ತುಮೇಸ್ ಸೋಚಿದೇಖೊ.
HEB 10:30 ಬದಲ್‌ನ ಬದಲ್ ಕಾಡಾನು ಮಾರುಕಾಮ್; ಮೇಸ್ ದೀಶ್‍ಕರಿ ಬೋಲ್ಯೊಹುಯೊ ಅಪ್ಣುನ ಮಾಲುಮ್‌ ಛ಼. ಶನಕತೊ ಬಿಜೇಕ್‌ ಹಲ್ಲ ಪ್ರಭು ಇನ ಅದ್ಮಿನ ನ್ಯಾವ್‌ನು ತೀರ್ಪ್ ಕರ್ಶೆ.
HEB 10:31 ಜಿವ್ತಜಾನ್‌ವಾಳೊ ದೇವ್ನಹಾತ್ಮ ಖ್ಹಪ್‍ಡಾನು ಘಣು ಭಯಂಕರ್ ಹುಯಿರ‍್ಹುಸ್.
HEB 10:32 ಅಮ್ ರ‍್ಹವಾಪರ್ ತುಮೆ ಗ್ಯಾನ್ನು ಉಜಾ಼ಖ್ಹ್‌ ಲೀರಾಖಪರ್‌ ತದೆ ದೇವ್ನಿ ಉಜಾ಼ಖ್ಹ್‌ ತುಮಾರಪರ್ ಥು. ರ‍್ಹಯುತೋಬಿ ತುಮೆ ಕೈಯೇಕ್ ವದೆಖ್ಹ್‌ಮ ತುಮೆ ಖ್ಹಮಾಳ್ಯಾತೆ ದನ್ನ ಯಾದ್ ಕರಿಲೆವೊ;
HEB 10:33 ಥೋಡಿ ವಖ್ಹತ್ ತುಮೆ ಚಿ಼ಂಗಾವ್ಣಿನಾಬಿ,ಅಜು಼ ಥೋಡಿ ವಖ್ಹತ್ ಖ್ಹತಾಪ್ಣಿನಾಬಿ ಖ್ಹಮಾಳಿನ್ ಚಾ಼ವ್‌ಣ್ಯ ಕಡೈಲಿದ. ಅಜು಼ ಥೋಡಿ ವಖ್ಹತ್ ವದೇಖ್ಹ್‌ ಪಡಾವಾಳನಿ ಜೋ಼ಡ್ಮ ಮಳಿನ್ ಖ್ಹಮಾಳಿಲಿದ.
HEB 10:34 ತುಮೆ ಜೇಲ್‌ಮ ರ‍್ಹವಾಳನ ಆರ್‌ಗೋರ್‌ ಒತಾಳ್ಯ. ಅನೇಥಿ ಊಚು಼ ಹುಯಿರ‍್ಹುತೆ ಹಮೇಶಾನಿ ಆಸ್ತಿ ಛಾ಼ಕರಿ ಮಾಲುಮ್ ಕರಿಲಿದ ತುಮಾರಿ ಶೊತ್ನ ಛಿನೈಲ್ಯವಾಳಾನ ಶಂತೋಖ್ಹ್‌ಥಿ ಮ್ಹೇಲಿರಾಖ್ಯಸ್.
HEB 10:35 ಇನಖ್ಹಾಜೆ ತುಮಾರಿ ಕಿಮ್ಮತ್ನ ನಕೊ ಮ್ಹೇಲಿದೆವೊ. ಇನ ಘಣಿ ಮೋಟಿ ಪ್ರತಿಫಲ್ ಛಾ಼.
HEB 10:36 ತುಮೆ ದೇವ್ನಿ ಮರ್ಜಿನ ಚ಼ಲೈಹುಯಿಗುತೆ ತದೆ ವಾಗ್ದಾನ್ನ ಲೀಲೇವ್ಣುಕತೊ ತುಮೆ ಖ್ಹಮಾಳಿನ್ ರ‍್ಹೇವ್ಣು.
HEB 10:37 ಶನಕತೊ ಪವಿತ್ರಶಾಸ್ತ್ರ ಬೋಲಸ್, “ಆವಾಳೊ ಬಿಜು಼ ಥೋಡ ದನ್ಮಾಸ್ ಆವ್‌ಶೆ ಯೊ ದೇರ್‌ ಕರ್ಶೆಕೊಯ್ನಿ.
HEB 10:38 ಇನಖ್ಹಾಜೆ ಮಾರು ನೀತಿವಾಳೊ ವಿಶ್ವಾಸ್‌ಥೀಸ್ ಜಿವ್‌ಶೆ, ಕತೋಬಿ ಇನೇಥಿ ಕೋಣ್‌ತೋಬಿ ಪೀಠೆ ಧಕ್ಯೋತೊ ಯೊ ಮನ ಪಸಂದ್ ಕೊರ‍್ಹಿಶೇನಿ.
HEB 10:39 ಅಪ್ಣೆತೋಬಿ ಪೀಠೆ ಹಟವಾಳಹುಯಿನ್ ನಾಶ್‍ಹುವಾಳ ಅದ್ಮಿಕಾಹೆ. ಅನಬದಲ್ ವಿಶ್ವಾಸ್‌ ಕರಾವಳಹುಯಿನ್ ರಕ್ಷಣೆ ಲೀಲಾವಳ ಹುಯಿರ‍್ಹಾಸ್.
HEB 11:1 ವಿಶ್ವಾಸ್‌ಕತೊ ಅಪ್ಣೆ ಸೋಚಿನ್ ಜ಼ಪಿರ‍್ಹೇಸ್ತೆ ಖ್ಹಾರು ಭರೋಖ್ಹೊಬಿ, ಅಜೂ಼ಬಿ ದೆಖಾವಕೊಂತೆ ಜಿನಖ್ಹ್‌ಪರ್ ಆಧಾರ್ ಹುಯಿರ‍್ಹೇಸ್.
HEB 11:2 ಅಪ್ಣ ಗಲ್‌ಢಖ್ಹಾರು ಇವ್ಣಿ ವಿಶ್ವಾಸ್‌ಥೀಸ್ ದೇವ್ನಿ ಒಪ್ಪಿಕೆ ಲೀಲಿದು.
HEB 11:3 ಜಗತ್‌ ದೇವ್ನಿ ವಾತೆಥೀಸ್‌ ಉಬ್‌ಜು ಕರಿ ಬೋಲಾನು ವಿಶ್ವಾಸ್‌ಥೀಸ್ ಮಾಲುಮ್ ಕರಿರಾಖ್ಯಾಸ್. ಆ ಜಿನಖ್ಹ್‌ ದೆಖಾವಸ್ತೆ ಆ ಜಗತ್‌ ದೆಖಾವಾಥಿ ರ‍್ಹವೊ ನಾ ದೆಖಾವಾಥಿ ರ‍್ಹವೊ ಉಬ್‌ಜ್ಯುಕರಿ ಬೋಲಾನು ವಿಶ್ವಾಸ್‌ಥೀಸ್ ಪರ್ಖೇಸ್.
HEB 11:4 ವಿಶ್ವಾಸ್‌ಥೀಸ್ ಹೇಬೆಲನೆ ಕಾಯಿನಾನು ಬಲಿಥೀಬಿ ಮಹಾನ್ ಬಲೀನ ದೇವ್ನ ಸಮರ್ಪಣ್‌ ಕರ‍್ಯೊ. ಯೋ ಪರಕ್‍ಥಿ ಯೋ ನ್ಯಾವ್‌ವಾಳೊ ಕರಿ ಸಾಕ್ಷಿಹುಯಿಗೊ. ದೇವ್ನೆ ಇನಿ ಕಾಣ್ಕೆನ ಸ್ವೀಕಾರ್ ಕರ‍್ಯೊ. ಯೋ ಮರಿಗಯೊ ತೋಬಿ ಇನಿ ವಿಶ್ವಾಸ್‌ನಿ ಪರಕ್‍ಥಿ ಬಿಜೂ಼ಬಿ ವಾತೆ ಬೋಲವಾಳೊ ಹುಯಿರ‍್ಹೋಸ್.
HEB 11:5 ವಿಶ್ವಾಸ್‌ಥೀಸ್ ಹನೋಕಾನೆ ಮರಣ್ ಲಿದೊ ಕೊಯ್ನಿತೇಸ್ ಪಡೈಗಯೊ. ಶನಕತೊ ದೇವ್ನೆ ಇನ ಬುಲೈಲಿನ್ ಗಯೋತೆಖ್ಹಾಜೆ ಯೋ ಕಿನಾಬಿ ದೇಖಾಯೊಕೊಯ್ನಿ. ಯೊ ಪಡಾವನ ಪಹಿಲೆ ದೇವ್ನ ಲ್ಹಾಯಕ್ ಕರಾವವಾಳೊ ಕರಿ ಪಹಿಲೇಸ್ ಸಾಕ್ಷಿ ಲೀರಾಖ್ಯೊಸ್.
HEB 11:6 ಕತೋಬಿ ವಿಶ್ವಾಸ್‍ಕೊಂತೆ ದೇವ್ನ ಲ್ಹಾಯಕ್ ಕರಾವನ ಕೊಹುವಾನಿ. ಶನಕತೊ ದೇವ್‌ಕನ ಆವಾಳೊ ದೇವ್ ಛಾ಼ ಅಜು಼ ಇನ ಢೂಂಡವಾಳನ ಪ್ರತಿಫಲ್ ದೇಸ್‌ಕರಿ ವಿಶ್ವಾಸ್‌ಕರ‍್ನು.
HEB 11:7 ವಿಶ್ವಾಸ್‌ಥೀಸ್ ನೋಹಾನೆ ಬಿಜೂ಼ಬಿ ದೆಖಾವ ಕೊಯ್ನಿತೆ ಇನಿ ಬಾರೇಮ ದೇವ್ನಿ ವಾತೆನ ಲೀನ್ ಡರ್‌ಥೀಬಿ, ಭಕ್ತಿಥಿ ಭರಾವವಾಳೊ ಹುಯಿನ್ ಇನ ಘರ್‌ವಾಳಾನ ಬಚೈ಼ಲಾವನಖ್ಹಾಜೆ ಜ಼ಹಾಜ಼್‌ನ ಭಾಂಧಿನ್ ತಯಾರ್ ಕರ‍್ಯೊ. ವಿಶ್ವಾಸ್‌ಥೀಸ್‌ ಇನೆ ಜಗತ್‌ವಾಳು ನಿಶತ್‌ನ ಲ್ಯವಾಳುಕರಿ ತೀರ್ಮಾನ್ ಕರಿಲಿದೊ. ಇನಖ್ಹಾಜೆ ವಿಶ್ವಾಸ್‍ನು ಫಲ್ ಹುಯಿರ‍್ಹೂತೆ ನೀತಿನ ಹಕ್‍ದಾರ್ ಹುಯೊ.
HEB 11:8 ವಿಶ್ವಾಸ್‌ಥೀಸ್ ದೇವ್ನೆ ವಾಗ್ದಾನ್ ಕರ‍್ಯೊತೆ ದೇಖ್ಹ್‌ನ ಇನೆ ಲೀಲೇವ್ಣುಕರಿ ಅಬ್ರಹಾಮ್‌ನೆ ವಿಧೇಯ ಹುವಾಳೊ ಹುಯಿನ್ ಯೋ ಹಕ್‌ಥಿ ಲೇವ್ಣುಥೂತೆ ದೇಖ್ಹ್‌ನ ನಿಕ್ಳಿಗಯೊ. ಇನೆ ಕಿಜ್ಜಾ಼ ಜಾ಼ವ್ಣುಕರಿ ಸೋಚ್ಯೊ ಕೊಯ್ನಿತೇಬಿ ಚ಼ಲೆಗಯೊ.
HEB 11:9 ವಿಶ್ವಾಸ್‌ಥೀಸ್ ಇನೆ ವಾಗ್ದಾನ್ನ ದೇಖ್ಹ್‌ನ ಆವಾಖ್ಹ್‌ತರ್, ಹಿಜ಼್ಜಾ ಬಿಜ಼ ದೇಖ್ಹ್‌ವಾಳನಿತರ ಡೇರಾಮ ರ‍್ಹೀನ್ ಜಿವ್ಣು ಕರ‍್ಯೊ. ಕಿಮ್ ಇಸಾಕ್ ಅಜು಼ ಯಾಕೋಬ್ ಇವ್ಣೆ ಲೀಲಿದಾಕಿ ಯೋಸ್ ವಾಗ್ದಾನ್ನ ಲೀಲಿದೊ.
HEB 11:10 ಶನಕತೊ ಇನೆ ಹಮೇಶ ಹದಿಪಾಯ ರ‍್ಹವಾನು ನಂಗರ‍್ನ ಕತೊ ದೇವ್ನೆ ಖ್ಹೂಜ಼್‌ಕರೀನ್ ತಯಾರ್ ಕರಿರಾಖ್ಯೊಸ್ತೆ ನಂಗರ‍್ನ ಅಬ್ರಹಾಮ್ ಮ್ಹೋರೆ ದೇಖುಕರ್ತೊಥೊ.
HEB 11:11 ಅಬ್ರಹಾಮ್ ಭುಡೊ ಹುಯಿರ‍್ಹೊಥೊ ಆನಾಹುಯಿನ್ ಸಾರ ವಾಗ್ದಾನ್ ಕರ‍್ಯೊತೆ ನಂಬ್‍ಣುಕರಿ ಇನಿ ಉಂಬರ್ ಹುಯಿಗುತೋಬಿ ವಿಶ್ವಾಸ್‌ಥೀಸ್ ಬೇಜೂನಿ ಹುವಾನ ಶಕತ್‌ಲಿದಿ.
HEB 11:12 ಇನಖ್ಹಾಜೆ ಮರಾನಿ ಉಂಬರ್‌ಮ ಥೋತೆ ಅಬ್ರಹಾಮ್‍ಥಿ ಆಕಾಶ್‌ನು ಶುಕ್ಕರ್‌ನಿತರಬಿ ದರ‍್ಯಾವ್‍ನಿ ರೇತಿನಿಘೋಣಿಬಿ ಗಣ್ತಿಕೊಂತೆ ಲಡ್ಕಾ ಹುಯು.
HEB 11:13 ಅವ್ಣೆಖ್ಹಾರು ವಿಶ್ವಾಸ್‌ರ‍್ಹವಾಳು ಹುಯಿನಸ್‌ ಮರಿಗಯು. ದೇವ್ನ ವಾಗ್ದಾನ್ನ ನಾಲಿದೂತೋಬಿ ಯೋ ಅಖ್ಖಾನ ದೂರ್‌ಥೀಸ್ ದೇಖಿನ್ ಸ್ವಾಗತ್‍ಕರೀನ್ ಖುಷಿಪಡ್ಯು; ಇವ್ಣೆ ಜ಼ಮೀನ್‌ಪರ್ ಅಲ್ಹಾವ್ ದೇಖ್ಹ್‌ವಾಳಬಿ, ತಮಾಖ್ಹೊ ದೇಖಾನ ಆಯುಹುಯು ಕರಿ ಮಾನಿಲಿದು.
HEB 11:14 ಅಥ್ರಾನಿ ವಾತೆಖ್ಹಾರು ಬೋಲಾವಳು ಇವ್ಣೆ ಶೊಂತ್‌ ದೇಖ್ಹ್‌ನ ಢೂಂಡವಾಳು ಹುಯಿರುಸ್ ಕರಿ ಬೋಲಾನು ಮಾಲುಮ್ ಪಡಾಸ್‌.
HEB 11:15 ಇವ್ಣೆ ಮ್ಹೇಲಿನ್ ಆಯತೆ ದೇಖ್ಹ್‌ಪರ್ ದಿಲ್‌ರಾಖವಳ ರ‍್ಹಿಯಹೊತ್ತೊ ಹಿಜ್ಜಾ಼ ಪಾಛು಼ಫರಿ ಜಾ಼ವಾನಿಬಿ ಮೋಕಖ್ಹಾರು ಇವ್ಣುನ ಥು.
HEB 11:16 ಕತೋಬಿ ಇವ್ಣೆ ಸೊರ್ಗಕರಿ ಬೋಲಾನ ಮಹಾನ್ ದೇಖ್ಹ್‌ನ ಹರಖ್ಹ್‌ಯು. ಇನಖ್ಹಾಜೇಥಿ ದೇವ್ನೆ ಇವ್ಣೊ ದೇವ್‌ಕರಿ ಬೋಲೈಲ್ಯವಾನ ಖ್ಹರ್ಮಾಯೊಕೊಂತೆ; ಇವ್ಣಖ್ಹಾಜೆ ನಂಗರ‍್ನ ತಯಾರ್ ಕರಿರಾಖ್ಯೊಸ್.
HEB 11:17 ದೇವ್‌ಥಿ ಅಬ್ರಹಾಮ್ ತರೀಪ್ಷ ಹುವಾನಿ ವಖ್ಹ್‌ತೆ ಇಸಾಕನ ವಿಶ್ವಾಸ್‌ಥೀಸ್ ಅರ್ಪಣ್ ಕರ‍್ಯೊ. ಯೋ ವಾಗ್ದಾನ್‍ಖ್ಹಾರು ಲಿದೋತೆ ಇನೆ ಇಸಾಕಥಿ ಪೈದಹುವವಾಳುಸ್ ತಾರು ಪಿಳ್ಗಿಕರಿ ಬೋಲೈಲಿಷೆಕರಿ ದೇವ್ನೆ ಇನ ಬೋಲಿರಾಖ್ಯೊತೋಬಿ ಇನ ಎಕ್ಕಸ್ ಛಿಯ್ಯಾನ ಅರ್ಪಣ್ ಕರ‍್ಯೊ.
HEB 11:19 ಅಬ್ರಹಾಮ್‌ನೆ ಮಾರೊ ಛಿಯ್ಯೊ ಮರ‍್ಯೊತೋಬಿ ದೇವ್ ಇನ ಬಚಾ಼ಡನ ತಾಖತ್‌ವಾಳೊ ಹುಯಿರ‍್ಹೋಸ್ ಕರಿ ಮಾಲುಮ್ ಕರಿರಾಖ್ಯೊಥೊ. ಅಜು಼ ಇಮ್ಮಸ್ ಇಸಾಕ್‌ನ ಮರಣ್‌ಥು ಜಿವ್ತೊಹುಯಿನ್ ಆಯೋತೆ ತಿಮ್ ಪಾಛು಼ ಲೀಲಿದೊ.
HEB 11:20 ವಿಶ್ವಾಸ್‌ಥೀಸ್ ಇಸಾಕನೆ ಯಾಕೋಬ್‌ನಾಬಿ ಏಸಾವನ ಆಶೀರ್ವಾದ್‌ ಕರಾನಿವಖ್ಹ್‌ತೆ ಖ್ಹಾಮ್ಣೆ ಚಾ಼ಲ್ನುತೆ ಬಾರೇನಿ ವಾಗ್ದಾನ್ನ ಬೋಲಿವತಾಳ್ಯೊ.
HEB 11:21 ಯಾಕೋಬನೆ ಯೊ ಮರಾನಿ ವಖ್ಹತ್‌ಮ ವಿಶ್ವಾಸ್‌ಥೀಸ್ ಯೋಸೇಫಾನ ಭೇ ಲಡ್ಕಾವ್‍ನ ಆಶೀರ್ವಾದ್‌ ಕರ‍್ಯೊ. ಹಾತ್ಮ ಲಠ್ಠಾನು ಆಧಾರ್‌ಲೀನ್ ದೇವ್ನ ಆರಾದನೆ ಕರ‍್ಯೊ.
HEB 11:22 ಯೋಸೇಫ ಇನಿ ಮರಣ್ಣಿ ವಖ್ಹತ್‌ಮ ಇಸ್ರಾಯೇಲ್‌ವಾಳು ಈಜಿಪ್ಟ್ ದೇಖ್ಹ್‌ಥು ಭಾರ್‌ನಿಕ್ಳಾನು ಬೋಲಿವತಾಳ್ಯೋತೆ ವಿಶ್ವಾಸ್‌ಥೀಸ್. ಕಾಹೆತೆ ಇನು ಪಿಂಜ಼ರ‍್ನ ಪಾಡಿಲೀನ್ ಜಾ಼ವಾನಿ ಬಾರೇಮ ಹುಕುಮ್‌ ದಿದೊ.
HEB 11:23 ಮೋಶೆ ಪೈದ ಹುವಾಖ್ಹತರ್ ಹೈರೋತೆನ ಆಯಬಾನೆ ಲಡ್ಕು ಶನ್‍ಗಾರ‍್ನು ಛಾ಼ ಕರಿ ದೇಖಿನ್ ರಾಜಾ಼ನ ಹುಕುಮ್‌ನ ಡರಿನ್ ವಿಶ್ವಾಸ್‌ಥೀಸ್ ಇನ ತೀನ್ ಮಹಿನ ಲಪಾಡಿ ರಾಖ್ಯು.
HEB 11:24 ವಿಶ್ವಾಸ್‌ಥೀಸ್ ಮೋಶೆ ಶಾಣು ಹುವಾನಪಾರ್ ಫರೋಹನಿ ಛೋ಼ರಿನೊ ಛಿಯ್ಯೊಕರಿ ನಾ ಬೋಲೈಲೇವ್ಣುಕರಿ ಖ್ಹಯಾಲ್ ಕರ‍್ಯೊ.
HEB 11:25 ಥೋಡಿ ವಖ್ಹತ್ ಪಾಪ್‌ಭೋಗ್‌ ಖ್ಹಾರಥಿಬಿ ದೇವ್ನ ಅದ್ಮಿನ ಜೋ಼ಡ್ಮ ವದೇಖ್ಹ್‌ ಲ್ಯವಾನುಸ್ ಕೆತ್ರೇಕ್ಕಿ ಅಛ್ಛು಼ಕರಿ ತೀರ್ಮಾನ್ ಕರಿಲಿದೊ.
HEB 11:26 ಈಜಿಪ್ಟ್‌ನು ಅಖ್ಖಿ ಧನ್‌ದೌಲತ್‌ಥೀಬಿ ಕ್ರಿಸ್ತನಖ್ಹಾಜೆ ಹುವಾಸ್ತೆ ಚಿಂಘಾವ್ಣೀಸ್ ಮೋಟಿ ಭಾಗ್ಯಕರಿ ಮಾನಿಲಿದೊ. ಶನಕತೊ ಖ್ಹಾಮ್ಣೆಆವಾನಿ ಪ್ರತಿಫಲ್‌ಪರ್ ಡೋಳೊ ರಾಖಿಮ್ಹೆಲ್ಯೊಥೊ.
HEB 11:27 ವಿಶ್ವಾಸ್‌ಥೀಸ್ ಇನೆ ರಾಜಾ಼ನ ಇರಾದನ ಡರ‍್ಯೊಕೊಂತೆ ಈಜಿಪ್ಟ್ ದೇಖ್ಹ್‌ನ ಮ್ಹೇಲಿನ್ ಗಯೊ. ಶನಕತೊ ಇನೆ ದೇಖವಾಳೊ ಕಾಹೆತೆಯಿನ ದೇಖಾನಿಘೋಣಿ ಘಟ್ ದಿಲ್‌ವಾಳೊ ಹುಯೊ.
HEB 11:28 ಫೈಲೋಟ ಲಡ್ಕಾವ್‍ನ ಸಂಹಾರ್ ಕರಾವಾಳೊ ಧೂತ, ಇಸ್ರಾಯೇಲ್‌ವಾಳನ ಫೈಲೋಟ ಲಡ್ಕಾವ್‍ನ ನಾ ಛೀಮ್ಣುತೆ ಲ್ಹೋಯಿ ಛೀಚ಼ಕರೀನ್ ಪಸ್ಕ ಚ಼ಲಾವನಿತರ ಇನೆ ಕರ‍್ಯೊತೆ ವಿಶ್ವಾಸ್‌ಥೀಸ್.
HEB 11:29 ವಿಶ್ವಾಸ್‌ಥೀಸ್ ಇಸ್ರಾಯೇಲ್‌ವಾಳು ಲಾಲ್ ದರ‍್ಯಾವ್ನ ಖ್ಹುಕ್ಕಿ ಜ಼ಮೀನ್‌ಪರ್ ಚಾ಼ಲನಿತರ ಉಲಾಂಗ್ಯು. ಈಜಿಪ್ಟ್‌ವಾಳು ಇನ ಉಲಾಂಗನ ಕೋಶಿಶ್ ಕರಿನ್ ಡುಬಿಗಯು.
HEB 11:30 ವಿಶ್ವಾಸ್‌ಥೀಸ್ ಇವ್ಣೆ ಖ್ಹಾತ್ ದನ್‌ಲಗು ಯೆರಿಕೋ ಖ್ಹಯೇರ‍್ನ ಭೀತ್‌ನ ಫರಾಪರ್ ಯೋ ರಡ್ಕಿಗು.
HEB 11:31 ವಿಶ್ವಾಸ್‌ಥೂತೆ ಖ್ಹಾಜೆಸ್ ರಾಹಾಬ ಕರಿ ಶೂಳೆನೆ ಚೋ಼ರೇಖ್ಹು ಖಬರ್‌ದ್ಯವಾಳೊ ಸಮಾಧಾನ್‌ಥಿ ಮದತ್‌ಕರಿ ರಾಖಿನ್ ಅವಿಶ್ವಾಸಿನ ಜೋ಼ಡ್ಮ ನಾಶ್ ಕೊಹುಯಿನಿತೆ ಬಚಿಗಯ್.
HEB 11:32 ಬಿಜೂ಼ಬಿ ಜಾ಼ಖ್ಹತ್ ಶಾತ್ ಬೋಲ್‌ನು? ಗಿದ್ಯೊನ್, ಬಾರಾಕ, ಸಂಸೋನ್, ಯೆಪ್ತಾಹ, ದಾವೀದ, ಸಮುವೇಲ, ಅಜು಼ ಪ್ರವಾದಿಖ್ಹಾರನಿ ಬಾರೇಮ ಬೋಲ್ನುಕತೊ ಮನ ವಖ್ಹತ್ ಕೊಪುರಾನಿ.
HEB 11:33 ವಿಶ್ವಾಸ್‌ಥೀಸ್ ಇವ್ಣೆ ರಾಜ್ಯಖ್ಹಾರೂಬಿ ಜುತ್ಯು, ನ್ಯಾಯನೀತಿಥಿ ಚ಼ಲಾಯು, ವಾಗ್ದಾನ್ ಖ್ಹಾರೂಬಿ ಲೀಲಿದು, ಶುಂಭಾವ್‌ನ ಮ್ಹೋಡಾನ ಭಾಂಧ್ಯು,
HEB 11:34 ಆಗ್‍ನಿ ಝ಼ಲ್‌ಪಟೇನ ಉಜಾ಼ಯು; ತಲ್ವಾರ್‌ನ ಮ್ಹೋಡೇಖ್ಹು ಛು಼ಕಿಗಯು; ಲಾಚ಼ರ್ ರ‍್ಹಯುತೋಬಿ,ವಿಶ್ವಾಸ್‌ಥೀಸ್ ಇವ್ಣೆ ತಾಖತ್‌ವಾಳು ಹುಯು, ಜಂಗ್‌ಮ ಮಹಾ ಶಕತ್‌ವಾಳು ಹುಯು, ಅಲಕ್ ದೇಖ್ಹ್‌ನು ದಂಡುದಳವೈನ ನಖ್ಹಾಡಿದಿದು.
HEB 11:35 ತಯೇಡಖ್ಹಾರಿನೆ ಮರಿಗಯುಥೂತೆ ಇವ್ಣವಾಳನ ಪಾಛು಼ ಜಿವ್‌ತೇಥಿ ಲೀಲಿದಿಯೆ. ಥೋಡ ಜ಼ಣಾನೆ ಖ್ಹತಾಪ್ಣಿ ಪಡಾನಿ ವಖ್ಹ್‌ತೆ ಮಹಾನ್ ಮರಣ್‍ಥಿ ಪಾಛು಼ಜಿವ್ತು ಹುವಾನಿ ಖೂಜ಼್‌ಥಿ ಛುಟ್ಕಾರ್‌ನ ಝಿಟ್ಕಾರ‍್ಯು.
HEB 11:36 ಬಿಜು಼ ಥೋಡುಜ಼ಣು ಚಿಂಘಾವ್ಣಿ, ಕೊಲ್ಡೇಖ್ಹು, ಬೇಡಿ ಘಲೈನ್ ಜೇಲ್‌ಮ ರ‍್ಹಯು.
HEB 11:37 ಬಿಜು಼ ಥೋಡಜ಼ಣಾನ ಅದ್ಮಿಖ್ಹಾರು ಬಂಡೊ ಫೇಖಿನ್ ಮಾರ‍್ಯು, ಥೋಡಜ಼ಣಾನ ಚ಼ರಕ್‌ಥಿ ವ್ಹಾಡಿನ್ ಬೇಭಾಗ್‌ ಕರಿನ್‌ ಮಾರ‍್ಯು, ಥೋಡಜ಼ಣಾನ ತಲ್ವಾರ್‌ಥಿ ಮಾರ‍್ಯು, ಥೋಡುಜ಼ಣು, ಖ್ಹತಾಪ್ಣಿ, ಅಜ಼ ಆ ಖ್ಹಾರು ಲ್ಯವಾಳುಹುಯಿನ್, ಬೋಕ್ಡು, ಮೇಂಢಾನ ಚಾ಼ಂಬ್‌ಡಾವ್ನ ಫೇರವಾಳು ಹುಯಿನ್ ವದೇಖ್ಹ್‌ ಕಾಟ್ಯು.
HEB 11:38 ಅಥ್ರಾನವಾಳಾನ ಆ ಜಗತ್‌ ಬರಬರ‍್ನಿ ಝ಼ಗೊ ಕೊಹುಯಿರ‍್ಹುಥೂನಿ. ಇವ್ಣೆ ಇವ್ಣ ದೇಖ್ಹ್‌ನ ಜ಼ಂಗಳ್‌ಮ, ಪಹಾಡ್, ಘವಿ, ಖಾಡ್‌ಗುಂಟಾಮ ಡುಂಡ್ವಾಳವಾಳು ಹುಯಿರ‍್ಹುಥು.
HEB 11:39 ಅವ್ಣೆಖ್ಹಾರು ಇವ್ಣಿ ವಿಶ್ವಾಸ್‍ಥಿ ಅಛ್ಛಿ ಸಾಕ್ಷಿನಲ್ಯಾವಳು ಹುಯಿರ‍್ಹುತೋಬಿ ವಾಗ್ದಾನ್ನ ಫಲ್ನ ಲಿದುಕೊಯ್ನಿ.
HEB 11:40 ಶನಕತೊ ದೇವ್ನೆ ಅಪ್ಣಖ್ಹಾಜೆ ಮಹಾನ್ ಖ್ಹಾಜ್‌ಥಿ ತಯಾರ್ ಕರೀನ್, ಅಪ್ಣಿ ಜೋ಼ಡ್ಮ ತಬ್ನು ವಿಶ್ವಾಸಿಖ್ಹಾರು ಭರ್‌ಪೂರ್‌ ಹೋಣುಕರಿ ನಿರ್ಧಾರ್ ಕರ‍್ಯೊ.
HEB 12:1 ಆ ಕಾರಣ್‍ಥಿ ಅತ್ರು ಸಾಕ್ಷಿಯೆವ್ನು ಮೋಟು ಝೂ಼ಂಡ್‌ ವಾದ್‌ಳಾನಿ ಘೋಣಿ ಅಪ್ಣ ಅಶ್‌ಪಿಶ್ ಕೋಂಡಿರಾಖಪರ್ ಅಪ್ಣುನ ಅಟ್‌ಖಟ್ ಕರಾಸ್ತೆ ಅಖ್ಖಾಸ್ ಭೋಜ಼್‌ನಾಬಿ, ಶುಲ್ಬಾಥಿ ವಿಲ್‌ಟೈಜಾ಼ವಾನು ಪಾಪ್ ಜಿನು ಕಾಡಿನಾಖಿ, ವಿಶ್ವಾಸ್ ಪೈದಕರಾವಳೊಬಿ, ಇನ ಪೂರ ಕರಾವಳೊಬಿ ಹುಯಿರ‍್ಹೋತೆ ಯೇಸುಪರ್ ನಜ಼ರ್ ರಾಖಿನ್ ಅಪ್ಣುನ ನೇಮಕ್ ಹುಯಿರ‍್ಹುತೆ ದವಡ್ನ ಖ್ಹಮಾಳಿ ಮಿಲೈಯೇ಼.
HEB 12:2 ಯೇಸು ಇನಖ್ಹಾಮ್ಣೆ ಮ್ಹೇಲಿರಾಖ್ಯೊತೆ ಖ್ಹುಶಿನಖ್ಹಾಜೆ ಖ್ಹರಮ್‌ನಾಬಿ ಖ್ಹಾಯ್‌ ಕರ‍್ಯೊಕೊಂತೆ ಶಿಲ್‌ಬೇನಿ ಮರಣ್ಣ ಖ್ಹಮಾಳಿನ್, ದೇವ್ನು ಸಿಂಹಾಸನ್ನ ಖಾವಿಬಾಜು಼ಮ ಬೆಠೋಸ್.
HEB 12:3 ತುಮೆ ದಿಲ್‌ಹೇಟು ನಾ ಕರಾವಾಳ ಹುಯಿನ್ ಬೇಜಾರ್ ನಾಖಾವ್ಣುತೆ ಯೇಸುನಿ ಬಾರೇಮ ಸೋಚಿದೇಖೊ. ಯೊ ಪಾಪಿಯೇವ್ ಖ್ಹಾರಾಥಿ ಕೆತ್ರೇಕ್ಕಿ ವಿರೋದ್ನ ಖ್ಹಮಾಳಿಲಿದೊ.
HEB 12:4 ತುಮೆ ಪಾಪ್ನ ವಿರೋದ್ನ ಲಡಾಮ ಲ್ಹೋಯಿನ ರಂಚಾ಼ಯೆತ್ರೆ ಲಡ್ಯಾಕೊಯ್ನಿನಿ.
HEB 12:5 ಲಡ್ಕಾವ್‍ನ ಬೋಲಾನಿತರ ತುಮುನ ಬೋಲಿನ್ ಹುಮ್ಮಖ್ಹ್‌ನಿ ವಾತೆವ್‌ನ ಭೈಕಿಗಯಕಿಶು? ಯೊ ಶಾತ್‌ಕತೊ ಮಾರ ಛಿಯ್ಯಾ ಪ್ರಭುನಿ ನಿಶತ್ ಝಿಟ್ಕಾರ್‌ ನಕೊ. ಯೊ ತುನ ಗುರ್‌ಕಾವನಿ ವಖ್ಹ್‌ತೆ ಬೇಜಾರ್ ನಕೊಕರ್.
HEB 12:6 ಶನಕತೊ ಪ್ರಭು ಕಿನಕಿನ ಪ್ಯಾರ್ ಕರಾಸ್ಕಿ ಇವ್ಣುನ ನಿಶತ್‌ ದೇಸ್. ಇನೊ ಛಿಯ್ಯಾನಿಘೋಣಿ ಸ್ವೀಕಾರ್ ಕರಸ್ತೆ ಹರೇಕ್‌ನಾಬಿ ದಾಬುಕ್ ದೇಸ್‌ಕರಿ ಛಾ಼.
HEB 12:7 ತುಮೆ ಅಛ್ಛಿನಿತರ ರ‍್ಹವಾನ ಖ್ಹಾಜೆಸ್ ನಿಶತ್ನ ಖ್ಹಮಾಳಿ ರ‍್ಹವೊ. ದೇವ್ ತುಮುನ ಲಡ್ಕಾಕರಿ ಚ಼ಲಾವಸ್. ಶನಕತೊ ಬಾಥಿ ಮಾರ್ ಕೊಖಾಯ್ನಿತೆ ಛಿಯ್ಯೊ ಕಿಜ್ಜಾ಼ ಛಾ಼?
HEB 12:8 ಅಖ್ಖಾಸ್‌ಜ಼ಣನ ಹೋಣುತೆ ನಿಶತ್‌ಮ ಭಾಗ್‌ಲ್ಯವಾಳ ನಾಹುಯುತೊ ತುಮೆ ವ್ಯಬಿಚಾರ್‌ಥಿ ಪೈದಾಹುಯ ಪಣ್ಕಿ ಇನ ಲಡ್ಕಕಾಹೆ.
HEB 12:9 ಆಸ್ ಕಾಹೆತೆ ಅಪ್ಣುನ ದಾಬುಕ್ ದಿದಾತೆ ಲೋಕಾನ ಆಯಬಾನ ಅಪ್ಣೆ ಮರ್ಯಾದಿ ದಿಯೇಸ್ನಿ. ಇಮ್ಮಸ್ ಅಪ್ಣ ಆತ್ಮವ್‌ನ ಬಾ ಹುಯಿರ‍್ಹವಾಳನ ಅಪ್ಣೆ ಬಿಜೂ಼ಬಿ ಜಾ಼ಖ್ಹತ್ ಅಧೀನ್‌ಹುಯಿನ್ ಬಚಿನಾರ‍್ಹೇವ್ಣು ಕಿಶು?
HEB 12:10 ಅಪ್ಣ ಲೋಕಾನು ಬಾಯಿವ್ಣೆ ಇವ್ಣ ದಿಲ್ಮ ಬರಬರ್ ದೆಖಾವಸ್ತೆ ಇಮ್‌ ಥೋಡ ದನ್ ಅಪ್ಣುನ ದಾಬುಕ್ ದಿದು. ಕತೋಬಿ ದೇವ್ನೆ ಇನಿ ಪರಿಶುದ್‌ಮ ಅಪ್ಣೆ ಭಾಗ್‌ವಾಳ ಹುಯಿರ‍್ಹೇವ್ಣುಕರಿ ಅಪ್ಣ ಅಛ್ಛಾ಼ನ ಖ್ಹಾಜೆಸ್ ದಾಬುಕ್ ದೇಸ್.
HEB 12:11 ಖಿವು ನಿಶತ್‌ಬಿ ಯೊ ವಖ್ಹತ್‌ಮ ಖ್ಹುಶಿಥಿ ದೆಖಾವಕೊಂತೆ ದುಖ್‌ನಿಘೋಣಿಸ್ ದೆಖಾವಸ್. ಕತೋಬಿ ಅಛ್ಛಿನಿತರ ರ‍್ಹವಾನ ರುಡಿರಾಖವಳು, ಖ್ಹಾಮ್ಣೆ ಸಮಾಧಾನ್ ರ‍್ಹವಾನು ನ್ಯಾಯನು ಫಲ್ನ ಲೇಸ್.
HEB 12:12 ಇನಖ್ಹಾಜೆ ಝೂ಼ಟ ಪಡಿಜಾ಼ವನ ಹಾತ್ನ ಕಾಪಾಸ್ತೆ ಗುಡ್‌ಘ್ಯವ್‌ನ ತಾಖತ್ ಕರ್ಲೆವೊ.
HEB 12:13 ತುಮೆ ಚಾ಼ಲಾನಿ ವಾಟ್ನ ಖ್ಹತ್ತಡ್‍ ಕರಿಲೆವೊ. ತದೆ ಲಂಗ್ಡಾವ್ನೊ ಗೋಡೊ ಮಚ಼ಕ್ಷೆಕೊಂತೆ ಅಛ್ಛುಉಷೆ.
HEB 12:14 ಅಖ್ಖಾನಿ ಜೋ಼ಡ್ಮ ಸಮಾಧಾನ್‌ಥೀಬಿ ಜಿವ್ಣುಕರಾನ ಅಜು಼ ಸಮಾಧಾನ್‌ಥಿ ರ‍್ಹವಾನ ಕೋಶಿಶ್ ಕರೊ. ಪರಿಶುದ್ಧಕೊಂತೆ ಕೋಣ್‌ಬಿ ಪ್ರಭುನ ದೇಖಾನ ಕೊಹೊಯ್ನಿ.
HEB 12:15 ತುಮಾರಮ ಕೋಣ್‌ಬಿ ದೇವ್ನಿ ವಾರ್‌ಖ್ಹೇಥಿ ಛು಼ಕಿನ್ ನಾಜಾ಼ವ್ಣುತೇಬಿ, ಖಿವು ಕಡಿಹುಯಿರೀತೆ ಜ಼ಡ್‌ ಕುಡಿಪಾಡಿನ್ ಅಸಮಧಾನ್‌ ಕರೀನ್ ಕೈಏಕ್ ಜ಼ಣಾನ ಮೈಲು ನಾಕರ‍್ನುತೆ ದೇಖಿಲೆವೊ.
HEB 12:16 ಖಿವು ಪಾಪೇಲು ರ‍್ಹವೊ, ಕೋಣ್‌ಬಿ ಏಸಾವನಿತರಾನೊ ಲೋಕ್‍ವಾಳನಿತರ ರ‍್ಹವೊ ಧರಮ್‌ಮೀರಿನ್ ಚಾ಼ಲವಾಳು ತುಮಾರಮ ನಾರ‍್ಹೇವ್ಣುತೆ ಜ಼ತನ್‌ಥಿ ರ‍್ಹವೊ. ಯೊ ಏಸಾವನೆ ಏಕ್‌ ವಖ್ಹತ್‌ನ ಖಾಣಾನಖ್ಹಾಜೆ ಇನಿ ಪೈಲ್ಹೊಟಾನಿ ಹಕ್ನ ವೇಚಿನಾಖ್ಯೊ.
HEB 12:17 ಯೊ ಹುವಾದಿನ್ ಇನಿ ಬಾನಿ ಆಶೀರ್ವಾದ್‌ ಲೇವ್ಣುಕರಿ ಡೋಳಾನು ಆಂಝು಼ ನಾಕ್ತೊಹುಯಿನ್ ಬಿಂತಿಕರ‍್ಯೊತೊಬಿ, ಇನೆ ಕರ‍್ಯೊತೆ ಇನ ಬದ್ಲಾವನ ಇನ ಕೊಹುಯುನಿ.
HEB 12:18 ತುಮೆ ಇಸ್ರಾಯೇಲ್‌ವಾಳನಿತರ ಆಯಾತೆ ತಿಮ್ ಹಿಜ್ಜಾ಼ ಆಗ್ ಲಾಗುಕರ್ತುಥು. ವಾದ್‍ಳಾನ ಮಬ್‌ಥಿ ಅಂಧಾರಥಿಬಿ ಮಹಿಚೂ಼ಪಿ ರಾಥ್ಥಿ ಕೋಂಡೈರ‍್ಹೂಥು. ಮೂಚಿರಾಖ್ಯುಥು ಅಪಟ್‌ಝ಼ಪಟ್‌ನೊ ವಹಿರೊಛಾ಼ತೆ ಪಹಾಡ್‌ಕನ ಆಯುಕೊಯ್ನಿ.
HEB 12:19 ತುತ್ತೂರಿನು ಅವಾಜ಼್ ವಾತೆನಿ ಅವಾಜ಼್‌ಕನ ಕರಿ ಕಾಹೆ ಆಯಿರ‍್ಹಾತೆ. ಯೋ ಅವಾಜ಼್ ಇವ್ಣಿಜೋ಼ಡ್ಮ ಬೋಲನುಸ್ ನಕೊಕರಿ ಗಿಂಗೈಲಿದು.
HEB 12:20 ಶನಕತೊ ಆ ಪಹಾಡ್‌ನ ಛೀಮಾವಾಳು ಕೋಣ್ಬಿರ‍್ಹವೊ ಖಿವು “ಜಾನ್ವರ್‌ಬಿ ರ‍್ಹವೊ ಇನ ಬಂಡೊ ಫೇಕಿನ್ ಮಾರಿನಾಕ್ಣು” ಕರಿ ನಿಯಮ್ನ ಇವ್ಣೆ ಖ್ಹಮಾಳ್ಯು ಕೊಯ್ನಿ.
HEB 12:21 ಅತ್ರೇಸ್ ಕಾಹೆತೆ ಅನ ದೇಖಾನು ಜಾ಼ಖ್ಹತ್ ಭಯಂಕರ್‌ಥೂತೆ ಖ್ಹಾಜೆ ಮೋಶೇನೆ ಮೇ ಡರಿನ್ ಕಾಪುಕರೂಸ್ ಕರಿ ಬೋಲ್ಯೊ.
HEB 12:22 ಕತೋಬಿ ತುಮೆ ಚೀಯೋನ್ ಪರ್ಭತ್‌ಕನ ಅಜು಼ ಜಿವ್ತಜಾನ್ನ ದೇವ್ನ ನಂಗರ್ ಹುಯಿರುತೆ ಸೊರ್ಗಾನ ಯೆರೂಸಲೇಮ್‌ನ, ಜ಼ತ್ರಾಮ ಭರೈರುತೆ ಲಾಖೋಲಾಕ್ ದೇವ್ನ ದೂತರ್‌ಕನಾಬಿ,
HEB 12:23 ಪರ್‌ಲೋಕ್‌ಮ ನಾಮ್ ಲೀಖೈರಾಖ್ಯಹುಯ ಪಹಿಲೋಟ ಲಡ್ಕಾನಿ ಸಬೇನಾಬಿ, ಅಖ್ಖಾನ ನ್ಯಾವ್‍ಣೊ ಹುಯಿರೋತೆ ದೇವ್‌ಕನಾಬಿ ಪೂರ ಹುಯಿರೋತೆ ನೀತಿವಾಳಾನ ಆತ್ಮಕನಾಬಿ ಐರ‍್ಹಾಸ್.
HEB 12:24 ನವ ಒಪ್ಪಂದಾನ ಇಚ಼್‌ಮ ರ‍್ಹವಾಳೊ ಯೇಸುಕನಬಿ ಹೇಬೆಲನ ಲ್ಹೋಯಿಥೀಬಿ ಮಹಾನ್ ವಾತೆ ಬೋಲಾಸ್ತೆ ಛಿಡ್‌ಕಾಯುತೆ ಲ್ಹೋಯಿಕನಾಬಿ ಐರ‍್ಹಾಸ್.
HEB 12:25 ವಾತೆ ಬೋಲುಕರಾತೆಯಿನ ಝಿಟ್ಕಾರ‍್ನುನಾತೆ ತಿಮ್ ದೇಖಿಲೆವೊ ಶನಕತೊ ಜ಼ಮೀನ್‌ಪರ್ ದೇವ್ನಿ ವಚನ್ ಬೋಲ್ಯಹುಯಾನ ಝಿಟ್ಕಾರವಾಳು ನಿಶತ್ನ ಛುಕಿಜಾ಼ವನ ನಾಹುಯುಕತೊ, ಸೊರ್ಗಾಥು ವಾತೆ ಬೋಲಾವಳನ ಮ್ಹೇಲಿನ್ ಅಪ್ಣೆ ದೂರ್ ಗಯಾತೊ ನಿಶಥ್ಥಿ ಕಿಮ್ ಛು಼ಕ್‍ಶು?
HEB 12:26 ಇನು ಅವಾಜ಼್ ತದೆ ಜ಼ಮೀನ್ನ ಹಲಾಯು. ಹಮ್ಕೆ ತೋಬಿ ಯೊ ಬಿಜು಼ ಎಕ್ಕಸ್ ಹಲ್ಲ ಮೇ ಖಲಿ ಜ಼ಮೀನ್ನ ಕಾಹೆತೆ ಆಬ್‌ಮಾಬಿ ಕಪಾಡುಸ್‌ಕರಿ ವಾಗ್ದಾನ್ ಬೋಲಿರಾಖ್ಯೊಸ್.
HEB 12:27 ಬಿಜು಼ ಎಕ್ಕಸ್‍ಹಲ್ಲ ಕರಿ ಆ ವಾತ್ನ ಸೋಚ್ಯುತೊ ಬಚಾ಼ಡಾನು ಜಿನಖ್ಹ್‌ಖ್ಹಾರು ಉಬ್‌ಜೈರ‍್ಹೂಸ್ತೆ ಖ್ಹಾಜೇಥಿ ಕಡೈನಖೈಜಾಶೆಕರಿ ಬೋಲಾನು ದೆಖಾವಸ್. ತದೆ ಬಚಾ಼ಡಕೊಂತೆ ಛಾ಼ತೆ ಜಿನಖ್ಹ್‌ಖ್ಹಾರು ಘಟ್‍ಥಿ ಭೀರ‍್ಹಿಷೆ.
HEB 12:28 ಇನಖ್ಹಾಜೆ ಕೋಣ್ ಖ್ಹರ್ಕಾವನ ಕೊಹುವಾನಿತೆ ರಾಜ್ಯನ ಲೀಲಾವವಾಳ ಹುಯಿರ‍್ಹಾತೆ ಅಪ್ಣೆ ಧನ್ಯವಾದ್ ಕರಾವಾಳ ಹುಯಿನ್ ದೇವ್ನ ಬರಬರ‍್ನಿ ಆರಾದನೆಬಿ ಭಕ್ತಿಥೀಬಿ ಅಜು಼ ಡರ್‌ಥೀಬಿ ಕರಿಯೆ.
HEB 12:29 ಶನಕತೊ “ಅಪ್ಣೊ ದೇವ್ ಭುಂಜಾ಼ವತೆ ಆಗ್ ಹುಯಿರ‍್ಹೋಸ್”.
HEB 13:1 ಕೆದೇಬಿ ವಿಶ್ವಾಸಿ ಭೈಯೇ ಭೇನೆವ್‌ನ ಪ್ಯಾರ್ ವತಾಳೊ.
HEB 13:2 ಮ್ಹೇಮಾನ್ನ ಉಪ್‌ಚಾರ್‌ ಕರಾಮ ಝಿಟ್ಕಾರೊ ನಕೊ. ಶನಕತೊ ಯೊ ಕರಾಮ ಥೋಡುಜ಼ಣು ಮಾಲುಮ್‌ಕೊಂತೆ ದೇವ್ನ ದೂತರ್‌ನಾಬಿ ಉಪ್‌ಚಾರ್‌ ಕರುಕರಸ್.
HEB 13:3 ಜೇಲ್‌ಮ ರ‍್ಹವಾಳನ ಜೋ಼ಡ್ಮ ತುಮೇಬಿ ಜೇಲ್ ಜೋಡ್ಮರ‍್ಯವಾಳ ಕರಿ ಮಾಲುಮ್‌ ಕರೀನ್ ಇವ್ಣ ಶರೀರ್‌ನ ಹುಯೂತೆ ಖ್ಹತಾಪ್ಣಿ ತುಮುನಾಬಿ ಹುಯುಕರಿ ಲಹಿನ್ ಇವ್ಣುನ ಖ್ಹಯಾಲ್ ಕರಿಲೆವೊ.
HEB 13:4 ಅಖ್ಖುಜ಼ಣು ವ್ಯಹಾನ ಮರ್ಯಾದಿನುಕರಿ ಗಣ್ತಿಕರ‍್ನು ಅಜು಼ ಬಾವಣ್‍ ಬಾವ್ರಿ ಏಕ್‌ಥಿಏಕ್ ವಿಶ್ವಾಸ್ಮ ರ‍್ಹೇವ್ಣು. ಶನಕತೊ ಪಾಪೇಲವ್ನಬಿ ಅಜು಼ ವ್ಯಬಿಚಾರಿಯೇವ್ನಾಬಿ ದೇವ್ ನ್ಯಾವ್‌ಫೇಡಾವ್‌ಷೆ.
HEB 13:5 ಪೈಶಾನಿಪ್ಯಾರ್‌ಥಿ ದೂರ್ ರ‍್ಹವೊ ತುಮುನ ಛಾ಼ತೆ ಇನಾಮ ಹಕ್ಲಾಲ್‌ ಕರೊ. “ಮೆ ತುಮುನ ಕೆದೇಬಿ ಹಾತ್ ಕೊಮ್ಹೇಲಿಶ್‌ನಿ. ಕೆದೇಬಿ ದೂರ್ ಕರೀಶ್ ಕೊಯ್ನಿ” ಕರಿ ದೇವ್ನೆಸ್ ಬೋಲಿರಾಖ್ಯೊಸ್.
HEB 13:6 ಇನಖ್ಹಾಜೆ ಪ್ರಭು ಮನ ಮದತ್ ಕರಾವಾಳೊ ಮೇ ಡರಿಶ್ ಕೊಯ್ನಿ. ಅದ್ಮಿ ಮನ ಶಾತ್‌ ಕರಾನ ಉಷೆ? ಕರಿ ಹಮೆ ಭಾಲಿಥಿ ಬೋಲಿಲಿಶು.
HEB 13:7 ತುನ ಕೋಣ್ ದೇವ್ನಿ ವಚನ್ನ ಭೋದನ್ ಕರಸ್ಕಿ ಯೊ ತುಮಾರ ಸಬೆನ ಮೋಟಾವ್ನ ಖ್ಹಯಾಲ್ ಕರಿಲೆವೊ. ಅಜು಼ ಜಿವ್ಣನ ಖ್ಹರ್ತಿಲಗು ಖಿವಿ ಪರಕ್ಮ ಚಾ಼ಲಿಲಿದುಕರಿ ಖ್ಹಯಾಲ್ ಕರೀನ್ ಇವ್ಣ ವಿಶ್ವಾಸ್ ಪಾಡಿಚಾ಼ಲೊ.
HEB 13:8 ಕ್ರಿಸ್ತ ಯೇಸು ಗಯೋತೆ ದನ್ನೆ ಕಿಮ್‌ಥೋಕಿ ಹಮ್ಕೆಬಿ, ಕದೆಕದೇಬಿ, ಎಕ್ಕಸ್‌ಥರ ರ‍್ಹವಾಳೊ.
HEB 13:9 ಹರೇಕ್ ಥರಾನು ಅಲಕ್ ಅಲಕ್ ಜ಼ಣಾನಿ ವಾತ್ಮ ಖ್ಹಪ್‌ಡಿನಾಜಾ಼ವ್ಣುತೆ ಬರಬರ‍್ನಿ ವಾಟ್ಮಚಾ಼ಲೊ. ಶನಕತೊ ದೇವ್ನಿ ವಾರ್‌ಖ್ಹೇಥಿ ದಿಲ್ನ ಘಟ್ ಕರಿಲ್ಯಾವನು ಅಛ್ಛು಼. ಖಾಣಾನಿ ಜಿನಖ್ಹ್‌ನಿ ಬಾರೇನು ನಿಯಮ್‌ಖ್ಹಾರು ಪಾಡಿ ಚಾ಼ಲವಾಳಥಿ ಶನು ಫಾಯಿದೊಬಿ ಕೊಹುವಾನಿ.
HEB 13:10 ಯಹೂದಿ ಯಾಜಕ್ ಸೇವೆ ಕರಾನ ಡೇರಾಮ ಚಾ಼ಕ್ರಿ ಕರವಾಳನ ಚಾ಼ಚ಼ರ್‌ನ ಜಿನಖ್ಹ್‌ನ ಖಾವಾನು ಹಕ್‌ ಕೊಯ್ನಿ.
HEB 13:11 ಮಹಾಯಾಜಕ್ ದೋಷ್‌ ಪರಿಹಾರ್ ಕರಾಸ್ತೆ ಬಲೀನ ಜಾನ್ವರ್‌ನ ಲ್ಹೋಯಿನ ಪಾಡಿಲಿನ್ ಪವಿತ್ರಝ಼ಗೋನ ಮಹಿ ಜಾ಼ಸ್‌. ಕತೋಬಿ ಯೋ ಜಾನ್ವರ್‌ನು ಶರೀರ್‌ಖ್ಹಾರು ಟಾಂಡಾನ ಭಾರ್‌ ಬಾಳಿನಾಖಸ್ನಿ.
HEB 13:12 ಇನಖ್ಹಾಜೆ ಯೇಸುಬಿ ಜಿನು ಶೊಂತ್‌ ಲ್ಹೋಯಿಥಿ ಇನ ಅದ್ಮಿಯೇವ್‍ನ ಪಾಕ್‌ ಕರಾನಖ್ಹಾಜೆ ಖ್ಹಯೇರ‍್ನ ಭಾರ್‌ ಮರ‍್ಯೊ.
HEB 13:13 ಇಮ್ಮಸ್ ಟಾಂಡಾನ ಭಾರ್‌ ಕಾಡಿನ್, ಖ್ಹರಮ್‌ ಕಾಡ್ಯುತೆ ಇನಾಮ ಅಪ್ಣೇಬಿ ಭಾಗ್‌ಲ್ಯವಾಳ ಹುಯಿರ‍್ಹಿಯೆ.
HEB 13:14 ಶನಕತೊ ಆ ಜಗತ್‌ಮ ಹರ್‌ಹಮೇಶಾನು ಖ್ಹಯೇರ್ ಅಪ್ಣುನ ಕೊಯ್ನಿ. ಆವ್‌ಶೇತೆ ನಂಗರ‍್ನ ಮ್ಹೋರೆ ದೇಕ್ತ ಟಿವೈರ‍್ಹಾಸ್.
HEB 13:15 ಇನಖ್ಹಾಜೆ ಯೇಸುಥೀಸ್ ಧನ್ಯವಾದ್‍ನಿ ಬಲೀನ ದೇವ್ನ ಲಗತ್ತರಸ್‌ ಸಮರ್ಪಣ್‌ ಕರಿಯೆ. ಇನ ಅಪ್ಣೆ ಪ್ರಭುಕರಿ ನಾಮ್ನ ನಂಬಿನ್ ಮ್ಹೋಡೇಖ್ಹು ಹರ್‌ಕೆ ಕರಿಯೆತೆಸ್ ಅಪ್ಣೆ ಅರ್ಪಣ್ ಕರಾನು ಬಲಿಹುಯಿರ‍್ಹುಸ್.
HEB 13:16 ಆ ನಾಹುಯಿನ್ ಬಿಜೇಕ್‌ನ ಮಳಿನ್ ಅಛ್ಛುಕರಾನ ನಾ ಬೈಕ್‌ಣುತೆ ಮದತ್ ಕರೊ, ಆ ಅಖ್ಖು ದೇವ್ನ ಲ್ಹಾಯಕ್ ಹುವಾನು ಬಲಿಖ್ಹಾರು.
HEB 13:17 ತುಮಾರು ಸಬೆನ ಮೋಟಾವ್ನಿ ವಾತೆನ ಖ್ಹಮ್‌ಜೊ಼, ಇವ್ಣ ದಾಬುಕ್ಮ ರ‍್ಹವೊ. ಇವ್ಣೆ ಗಣ್ತಿ ದೇವ್ಣುತೆ ಖ್ಹಾಜೇಥಿ ತುಮಾರ ಆತ್ಮವ್‌ನ ಕಾವ್ಲಿ ಕರಾವಾಳ ಹುಯಿರ‍್ಹಾಸ್. ಇವ್ಣೆ ದುಖ್ ನಾಕರ‍್ನುತೆ ಖ್ಹುಶಿಥಿ ಅನ ಕರಾನಿಘೋಣಿ ಚಾ಼ಲಿಲೆವೊ. ಶನಕತೊ ಇವ್ಣೆ ದಿಲ್‌ ದುಖ್‌ಕರೀನ್ ಕರಾನಿ ಸೇವೇಥಿ ತುಮುನ ಫಾಯಿದೊ ಹುವಾನುಕಾಹೆ.
HEB 13:18 ಹಮಾರ ಖ್ಹಾಜೆ ಪ್ರಾರ್ಥನೆ ಕರೊ. ಅಪ್ಣೆ ಹರೇಕ್ ವಿಚಾರ್‌ಮ ಅಛ಼್ಛ ಹುಯಿನ್ ಚಾ಼ಲಿಲೇವ್ಣುಕರಿ ಸೋಚಿಯೆ. ಶನಕತೊ ಹಮೆ ಅಖ್ಖಿವೇಳ್ಮ ದಿಲ್ನಿಸಾಕ್ಷಿನ ಲೀರಾಖ್ಯಸ್‌ಕರಿ ಮಾನಿರಾಖ್ಯಸ್.
HEB 13:19 ಅಜು಼ ಮೇ ಘಣಿ ಜ಼ಲ್ದೀಮ ತುಮಾರಕನ ಪಾಛು಼ ಆವಾನಿತರ ತುಮೆ ಪ್ರಾರ್ಥನೆ ಕರ್ನುಕರಿ ಮೇ ತುಮುನ ಜಾ಼ಖ್ಹತ್ ಗಿಂಗೈಲೆವುಸ್.
HEB 13:20 ಸಮಾಧಾನ್ನೊ ದೇವ್, ಅಪ್ಣೊ ಪ್ರಭು ಯೇಸುನ ಹಮೇಶಾನ ಒಪ್ಪಂದಾನ ಲ್ಹೋಯಿಥಿ ಮರ‍್ಯಹುಯಮಾಥು ಉಠಾಡ್ಯೊ, ಯೊ ಮೇಂಢಾನ ಮಂಧಾನ ಚ಼ಲಾವವಾಳೊ ಮಹಾ ಪಾಳಂಧಾರ್‌ ಹುಯಿರ‍್ಹೊಸ್.
HEB 13:21 ತುಮೆ ಇನಿ ಮರ್ಜಿನ ಚ಼ಲಾವನಿತರ ಹರೇಕ್ ಅಛ್ಛಿ ಫಣೈಮಾಬಿ ಭರ್‌ಪೂರ್‌ ಕರಾದೆ, ಯೊ ಅಪ್ಣ ಬೀಚ್ಮ ಯೇಸು ಕ್ರಿಸ್ತಥಿ ಇನ ನಜ಼ರ‍್ಮ ಪಸಂದ್ ಹುವಾನಿತರ ಕಾಮ್ ಕರಸ್ ಇನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಹುವಾದೆ! ಇಮ್ಮಸ್ ಹುವಾದೆ. ಆಮೆನ್.
HEB 13:22 ಭೈಯೇ ಭೇನೇವೊ ಆ ಅಕ್ಕಲ್‌ನಿ ವಾತೇನ ಖ್ಹಮಾಳಿ ರ‍್ಹೇವ್ಣುಕರಿ ಹುಮ್ಮಖ್ಹ್‌ ದ್ಯವಾನ ತುಮುನ ಗಿಂಗೈಲೆವುಕರುಸ್. ಶನಕತೊ ತುಮುನ ಲೀಖಾಯುತೆ ಆ ಚಿಟ್ಟಿ ಘಣು ಕೊಯ್ನಿ.
HEB 13:23 ಅಪ್ಣೊ ಭೈಹುಯಿರ‍್ಹೊತೆ ತಿಮೊಥೆನಾಬಿ ಜೇಲ್‌ಮಾಥು ಛುಟ್ಕಾರ್ ಹುಯುಕರಿ ತುಮುನ ಮಾಲುಮ್ ರ‍್ಹವಾದೆ. ಯೋ ಒಗ್ಗಿಮ ಆಯೋತೊ ಮೇ ಇನಜೋ಼ಡೆ ಐನ್ ತುಮುನ ದೇಖಿಶ್‌.
HEB 13:24 ತುಮಾರ ಅಖ್ಖಾಸ್ ಸಬೇನಿ ಮೋಟಾವ್ನ ಅಜು಼ ಪವಿತ್ರ ದೇವ್ನ ಅದ್ಮಿವ್‌ನಾಬಿ ಖ್ಹಲಾಮ್ ಬೋಲೊ. ಇಟಲಿ ದೇಖ್ಹ್‌ನು ಬೇನೆ ಭೈಯೇಬಿ ಇವ್ಣೇಬಿ ತುಮುನ ಖ್ಹಲಾಮ್ ಬೋಲಸ್.
HEB 13:25 ದೇವ್ನು ವಾರ್‌ಖ್ಹೊ ತುಮಾರ ಅಖ್ಖಾನಿ ಜೋ಼ಡ್ಮ ರ‍್ಹವಾದೆ.ಆಮೆನ್.
JAM 1:1 ದೇವ್‍ನಾಬಿ ಪ್ರಭುಹುಯಿರೋತೆ ಯೇಸು ಕ್ರಿಸ್ತನಾಬಿ ದಾಸ ಹುಯಿರೋತೆ ಯಾಕೋಬ ಅಲಕ್‍ ದೇಖ್ಹ್‌ಮ ಛಿಡ್‍ಕೈರ‍್ಹುತೆ ಭಾರ ಖೂಮ್‍ವಾಳನ ಲಿಖಾನು ಶಾತ್‍ಕತೊ, ತುಮೂನ ಅಛ್ಛು಼ ಹುವಾದೆ.
JAM 1:2 ಮಾರ ಭೈಯೇ ಭೇನೆವೊ, ತುಮೆ ಥರಥರಾನು ವದೇಖ್ಹ್‌ ಝೇಲಾನಿ ವಖ್ಹ್‌ತೆ ಇನ ತುಮೆ ಹೈರುತೆ ಖಲಿ ಖ್ಹುಶಿಕರಿ ಬೋಲಿನ್ ಖ್ಹಮಾಳಿಲೇವೊ.
JAM 1:3 ಶನಖ್ಹಾಜೆಕತೊ ಯೊ ಖ್ಹತಾಪ್ಣಿ ತುಮಾರಿ ವಿಶ್ವಾಸ್‌ನ ತರೀಪ್‌ಶ ಕರಾನಖ್ಹಾಜೆ ಐರ‍್ಹೂಸ್. ಯೊ ತುಮುನ ಸಮಾಧಾನ್ ಮಳಾನಿತರ ಕರ್ಶೆ.
JAM 1:4 ಯೋ ಖ್ಹಮಾಳಾನು ತುಮಾರಮ ಭರ್‌ಪೂರ್‌ ಹುವಾದೆ. ತದೆತುಮೆ ಮೈಲಾ ಕಾಹೆತೇಬಿ, ಖ್ಹಾರಿ ಅಛ್ಛಿಗುಣ್‍ಮ ಪೂರಾಬಿ, ಅಜು಼ ಶನಾಮಬಿ ಕಮ್ ನಾರ‍್ಹವಾಳು ಹುಯಿರ‍್ಹಿಶು.
JAM 1:5 ಕತೋಬಿ ತುಮಾರಮ ಕಿನಾತೋಬಿ ಗ್ಯಾನ್‍ಕಮ್ ರ‍್ಹಯೂತೊ ಯೋ ದೇವ್ನ ಗಿಂಗೈಲ್ಯವಾದೆ, ದೇವ್ ಚಿಂಘಾವ್‍ಶೆಕೊಂತೆ ಖ್ಹಾರಸ್ನ ದಿಲ್‌ ಛೋ಼ಡಿನ್ ದಿಶೆ.
JAM 1:6 ಕತೋಬಿ ದೇವ್‌ಕನ ಬೋಲಿಲ್ಯಾವಾಳೊ ಜ಼ರಾಬಿ ಗುಮಾನಿ ನಾ ಕರ್ನುತೆ ವಿಶ್ವಾಸ್‍ಥಿ ಬೋಲಿಲ್ಯಾವಾದೆ. ಶನಕತೊ ಶಕ್ ಕರಾವಾಳು ವಹಿರಾಮ ಮಾರ್‌ಖೈಜಾಯಿತೆ ದರ‍್ಯಾವ್‍ನ ಝೋ಼ಕಾಳ್ಯಾನಿತರ ವನ್‍ವನ್‍ತೊಫಂಡ್‍ಶೆ.
JAM 1:7 ಎಥ್ರಾನವಾಳೊ ಯೋ ಪ್ರಭುಥಿ ಗಿಂಗೈಲಿದೋತೆ ಖ್ಹಾರುಸ್ ಲೀಲಿಶ್ಕರಿ ನಕೊಲಾಝಾ಼ದೆ.
JAM 1:8 ಶನಕತೊ ಯೋ ಬೇ ದಿಲ್‌ವಾಳೊ, ಇನ ಚಾ಼ಲ್‌ಮ ಚ಼ಲ್‍ಪ್ಲಾಟಿನೊ ಹುಯಿರ‍್ಹೊಸ್.
JAM 1:9 ಕ್ರಿಸ್ತಮ ಖರಾಬ್ ಹಾಲತ್ಮರ‍್ಹವಾಳೊ ಭೈಯೇ,ಭೇನೆವೊ ಯೋ ಅಛ್ಛಿಹಾಲತ್‍ಮ ಆಯೋಕರಿ ಖುಷಿಕರಾದೆ.
JAM 1:10 ಕ್ರಿಸ್ತಮ ಶೌಕಾರ್ ಹುಯಿರೋತೆ ಭೈಯೇ,ಭೇನೆವೊ ಯೋ ಗರೀಬ್‍ಹಾಲತ್‍ಮ ಆಯೋಕರಿ ಖ್ಹುಶಿಕರಾದೆ. ಕತೋಬಿ ಶೌಕಾರ್ ಘಾಖ್ಹ್‌ನಿ ಫೂಲ್‍ನಿತರ ಮಟಿಜಾ಼ಶೆ.
JAM 1:11 ಶನಕತೊ ಚಾ಼ಂದ್ ನಿಕ್‍ಳ್ಯುತೆ ತದೆ ಇನ ಅಂಚ಼್‌ಥಿ ಘಾಖ್ಹ್‌ ಕರ್‌ಮರೈನ್ ಯೋ ಘಾಖ್ಹ್‌ನು ಫೂಲ್ ಲಡ್ಕಿಪಡೀನ್, ಇನು ಶನ್‌ಗಾರ್ ನಾಶ್ ಹುಯಿಜಾ಼ಸ್‍. ಇಮ್ಮಸ್ ಶೌಕಾರ್ ಇನಿ ಕೋಶಿಶ್‍ಥಿ ಹೇಟ್ ಪಡಿಜಾ಼ಸ್‌.
JAM 1:12 ಕೋಣ್ ತರೀಪ್ಷನ ಖ್ಹಮಾಳಿಲೇಸ್ಕಿ ಯೋ ಧನ್ಯ. ಯೋ ಇನಿ ಶೋದನೆನ ಜುತಿಲಿದೊತೊ ಪ್ರಭು ಇನ ಪ್ಯಾರ್‌ಕರಾವಾಳನ ವಾಗ್ದಾನ್ ಕರ‍್ಯೊತೆ, ಜಾನ್ನು ಕಿರೀಟ್‍ನ ಲೀಲಿಶೆ.
JAM 1:13 ಕೋಣ್‌ತೋಬಿ ಶೋದನೆಮ ಪಡಾನಿ ಖ್ಹಯಾಲ್‍ಹುಯುತೊ ಆ ಖ್ಹಯಾಲ್ ಮನ ದೇವ್‍ಥಿ ಆಯುಕರಿ ನಾ ಬೋಲ್‌ನು. ಶನಕತೊ ದೇವ್ ಖರಾಬ್‍ಕರಾನ ಹುಮ್ಮಖ್ಹ್ ಕೊದೇಯ್ನಿ. ಯೋ ಕಿನಾಬಿ ಶೋದನೆ ಕರಾಬಿಕೊಯ್ನಿ.
JAM 1:14 ಕತೋಬಿ ಹರೇಕ್‍ಜ಼ಣುಬಿ ಇನಿ ಶೊಂತ್ ನಿಕ್‍ಳ್ಯಜಾನ್‍ಮ ಪಡೀನ್ ಶೋದನೆ ಲೀಲೆಸ್.
JAM 1:15 ಇನಪಾರ್ ನಿಕ್‍ಳ್ಯಜಾನ್ ಬೇಜೂನುಹುಯಿನ್ ಪಾಪ್ನ ಜ಼ಣಸ್. ಪಾಪ್ ಪೂರಹುಯಿನ್ ಭಡೀನ್ ಇನಪಾರ್ ಮರಣ್‍ಲ್ಯವಾಸ್.
JAM 1:16 ಮಾರ ಪ್ಯಾರ್‌ನ ಭೈಯೇ ಬೇನೆವೋ, ಆ ವಿಚಾರ‍್ನಿ ಬಾರೇಮ ಧೋಕ ನಕೊ ಖಾವೊ.
JAM 1:17 ಖ್ಹಾರೂಸ್ ಅಛ಼್ಛು ತೋಫಬಿ, ಪೂರಹುಯುತೆ ಖ್ಹಾರೂಸ್ ವರಾಬಿ ಉಪ್ಪರ್‌ಥು ಆಯು ಹುಯುಸ್, ಯೋಖ್ಹಾರು ಪರಲೋಕನೊ ಉಜಾ಼ಳನೊ ಬಾಥೀಸ್ ಉತ್ರಿಆವಸ್. ದೇವ್ ಛಾ಼ಳನಿತರ ಬದ್ಲಿಜಾವಾಳೊಬಿ ಕಾಹೆ, ಚ಼ಲ್‍ಪ್ಲಾಟಿನೊ ಖ್ಹಾಯಲ್‍ನೋಬಿ ಕಾಹೆ.
JAM 1:18 ದೇವ್ ಇನಿ ಅಛ್ಛಿ ಖ್ಹೂಜ಼್‌ನಿ ಪರಕ್ಮ ಖ್ಹಾಚಿವಚನ್‍ಥಿ ಅಪ್ಣುನ ಜಾನ್‍ದೀರಾಖ್ಯೊತೆ ಇನಖ್ಹಾಜೆ ಅಪ್ಣೆ ಇನಿ ಖ್ಹಾರಿಸ್ ಉಬ್‌ಜಾ಼ವ್ಣಿಮ ಫಹಿಲಫಲ್‍ ಹುಯಿರ‍್ಹಾಸ್.
JAM 1:19 ಮಾರ ಪ್ಯಾರ್‌ನ ಭೈಯೇ ಭೇನೆವೊ ತುಮೆ ಅನ ಅಛ್ಛಿನಿತರ ಮಾಲುಮ್ ಕರ‍್ಲೆವೊ, ಹರೇಕ್‍ಜ಼ಣುಬಿ ಖ್ಹಮ್‍ಜಾ಼ಮ ಚಾ಼ತುರ್‌ರ‍್ಹೀನ್, ವಾತ್‍ಬೋಲಾಮ ಅಜು಼ ಇರಾದೊ ಕರಾಮ ಖ್ಹಮಾಳಿರ‍್ಹೆವೊ.
JAM 1:20 ಶನಕತೊ ಅದ್ಮಿನೊ ಇರಾದೊ ದೇವ್ ಆಖ್ಹ್‌ಕರಸ್ತೆ ನೀತಿನು ಕಾಮ್‌ಖ್ಹಾರು ಕರಾನ ಹೋಯಿಕೊಯ್ನಿ.
JAM 1:21 ಇನಾಖ್ಹಾಜೆ ಖ್ಹಾರೂಸ್ ಗಲೀಜ್‍಼ಕಾಮ್‍ನಾಬಿ ಅಖ್ಖು ಖರಾಬ್ ಫನೈನಾಬಿ ಕಾಡಿನಾಖಿನ್ ತುಮಾರಮ ಜ಼ಡ್‍ಗಾಠಿರಾಖ್ಯುತೆ ವಚನ್ನ ಮುಡ್‌ಕ್ಯು ಝು಼ಕೈನ್‌ ಸ್ವಿಕಾರ್‌ಕರೊ. ಯೋ ತುಮಾರ ಆತ್ಮನ ರಕ್ಷಣೆಕರಾನ ಶಕತ್‌ವಾಳು ಹುಯಿರ‍್ಹಿಶೆ.
JAM 1:22 ತುಮೆ ವಚನ್ನಿ ಪರಕ್‍ ಚಾ಼ಲಿಲ್ಯಾವಾಳ ಹುಯಿ‍ರ‍್ಹೆವೊ. ಇನ ಖಲಿ ಖ್ಹಮ್‍ಜಾ಼ವಾಳ ಹುಯಿರ‍್ಹಿನ್ ತುಮಾರು ತುಮೇಸ್ ಧೋಕ ಕರಿಲೇವೊನಕೊ.
JAM 1:23 ಶನಕತೊ ಕೋಣ್‌ತೋಬಿ ವಚನ್‍ ಖ್ಹಮ್‌ಜಾ಼ವಾಳು ಹುಯಿರ‍್ಹಿನ್ ಇನಿಪರಕ್ ಚಾ಼ಲ್ಯುನಾತೊ ಯೋ ಐನಾಮ ಇನು ಪೈದಾಖ್ಹ್‌ನು ಮ್ಹೋಡು ದೇಖಾವಾಳ ಅದ್ಮಿನಿತರ ಹುಯಿರ‍್ಹಿಶೆ.
JAM 1:24 ಶನಕತೊ ಆ, ಇನ ದೇಖಿಲಿನ್ ಜೈ಼ನ್ ಮೇ ಅಮ್ ಛೂ಼ಕರಿ ಬೋಲಾನು ಯೋಸ್‍ ಘಡೀಮ ಬೈಕಿಜಾ಼ಸ್.
JAM 1:25 ಕತೋಬಿ ಛುಟ್ಕಾರ್ ದ್ಯಾವಾಳು ಅಖ್ಖುಪೂರ ಹುಯಿರ‍್ಹುತೆ, ಧರ್ಮಶಾಸ್ತ್ರನ ದಿಮಾಕ್‍ಲಗಾಡಿ ಫಡೀನ್ ಬಿಜೂ಼ಬಿ ಖ್ಹಯಾಲ್ ಕರಿನ್ ಇನಿನಿತರ ಚಾ಼ಲವಾಳೊ ವಚನ್ನ ಖ್ಹಮ್‌ಜಿನ್‌ ಭೈಕಿ ನಾ ಜಾ಼ವ್ಣುತೆ ಯೋ ಪರಕ್ಮ ಇನ ಕಾಮ್‍ಥಿ ಧನ್ಯಹುಯಿರ‍್ಹಿಶೆ.
JAM 1:26 ತುಮಾರಮ ಮೆ ಅಛ್ಛೊ಼ಭಕ್ತಕರಿ ಬೋಲಿಲ್ಯಾವಾಳೊ ಕೋಣ್‌ತೋಬಿ ಇನಿ ಜೀಬ್‌ನ ಲಗಾಮ್‌ ನಾ ಘಾಲಿನ್ ಇನ ದಿಲ್ನ ಧೋಕ ಕರವಾಳೊರ‍್ಹಿಯೋತೊ ಇನಿ ಭಕ್ತಿ ಬಿಣ್‌ಫಾಯಿದಾನು ಹುಯಿರ್‍ಹೊಸ್.
JAM 1:27 ವದೇಖ್ಹ್‌ಮ ಪಡ್ಯುರ‍್ಹಿನ್ ದಿಕ್‍ಕೊಂತೆ ಇವ್ಣುನಾಬಿ ಮುಂಡಚ್ಚಿಯೇನಾಬಿ ಬಚಾ಼ಡಿನ್ ಇನ ಜಗತ್‌ನು ದೋಷ್‍ ನಾಲಗ್ನುತೆ ಇನುಯೋಸ್ ಬಚಾ಼ಡಿಲ್ಯಾವನುಸ್ ಬಾ ಹುಯಿರೋತೆ ದೇವ್‌ಕನ ಶುದ್ಧಬಿ ಪಾಕ್‍ಬಿ ಹುಯಿರ‍್ಹವಾನಿ ಭಕ್ತಿ.
JAM 2:1 ಮಾರ ಭೇನೆ ಭೈಯೇವೊ ಮಹಿಮೆಮ ರ‍್ಹವಾಳೊ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಮ ವಿಶ್ವಾಸಿ ಹುಯಿರಾತೆ ತುಮಾರಮ ಬೇದ್‌ಭಾವ್‌ ನಾರ‍್ಹೇವ್ಣು.
JAM 2:2 ಏಕ್‌ ವೇಳ್ಮ ಶೌಕಾರ್ ಅದ್ಮಿ ಖ್ಹೊನ್ನಾನಿ ಅಂಗುಠಿನಾಬಿ ಶನ್‍ಗಾರ‍್ನು ಲುಂಗ್ಡು ಫೇರಿಲಿನ್ ತುಮಾರಿ ಸಬೆಮ ಆಯುತೊ ಅಜು಼ ಏಕ್‍ಗರೀಬ್ ಅದ್ಮಿ ಫಾಟು ಲುಂಗ್ಡು ಪೇರ‍್ಹಿಲಿನ್ ಆಯೂತೆ,
JAM 2:3 ತುಮೆ ಅಛ಼್ಛ ಲುಂಗ್ಡು ಪೇರ‍್ಹಿರಾಖವಾಳನ ಮರ್ಯಾದಿ ಕರೀನ್ ಇನ “ತೂ ಹಿಜ್ಜಾ಼ನಿ ಆ ಅಛ್ಛಿ ಝ಼ಗೋಪರ್ ಬೇಖ್ಹ್‌” ಕರೀಬಿ, ಯೋ ಗರೀಬ್‌ನ, “ತು ಹಿಜ಼್ಜ ಭೀರೆ ನತರ್ ಹಜ಼್ಜ ಮಾರ ಗೋಡ ಮ್ಹೇಲಾನ ರಚ್ಚಾ಼ಕನ ಬೇಖ್ಹ್‌” ಕರೀಬಿ ಬೋಲ್ಯುತೊ,
JAM 2:4 ತುಮೆ ತುಮಾರಮಸ್ ಗುಮಾನಿ ಕರೋಸ್ ಆ ನಾಹುಯಿನ್ ತುಮೆ ಕರಸ್ತೆ ನ್ಯಾವ್‍ನಿ ತೀರ್ಪ್ ಗಲತ್‌ ಖ್ಹಯಾಲ್ನು ಹುಯಿರ‍್ಹುಸ್.
JAM 2:5 ಮಾರ ಪ್ಯಾರ್‌ನ ಭೈಯೇ ಭೇನೆವೊ ಖ್ಹಮ್‍ಜೊ ದೇವ್ ಆ ಜಗತ್‌ನು ಗರೀಬ್‌ನ ವಿಶ್ವಾಸ್‌ಮ ಶೌಕಾರ್ ಬಣೈನ್‍ಬಿ ಇನ ಪ್ಯಾರ್ ಕರಾವಾಳನ ದೇವ್ನೆ ವಾಗ್ದಾನ್ ಕರ‍್ಯೊತೆ ರಾಜ್ಯನ ಭಾದ್ಯ ಬಣೈನ್‍ಬಿ ರ‍್ಹೇವ್ಣುಕರಿ ಚೂ಼ಣಿಲಿದೊ ಕೊಯ್ನಿಕಿಶು?
JAM 2:6 ಕತೋಬಿ ತುಮೆತೋ ಗರೀಬ್‌ನ ಖ್ಹರಮ್‌ ಕಾಡಿನಾಖಿದಿದ. ತುಮುನ ಖ್ಹತೈನ್ ನ್ಯಾವ್‍ನಿ ಝ಼ಗೋನ ಖ್ಹಾಮ್ಣೆ ಖೇಚಿಲೀಜಾ಼ವಾಳ ಶೌಕಾರ್ ಕಾಹೆಕಿಶು?
JAM 2:7 ತುಮೆ ಬೋಲಸ್ತೆ, ಯೋ ಮಹಾನ್ ನಾಮ್ನ ದೂಷಣೆ ಕರಾವಾಳು ಇವ್ಣೆಸ್ ಕಾಹೇಕಿಶು?
JAM 2:8 ಕತೋಬಿ ಧರ್ಮಶಾಸ್ತ್ರಮ ಛಾ಼ತೆ, “ತಾರ ಭೀಡೆವಾಳನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನು ರಾಜ಼ನಿ ಹುಕುಮ್‌ನ ಚ಼ಲಾವವಾಳ ಹುಯಿರ‍್ಹಾತೊ ತುಮೆ ಅಛ಼್ಛು ಕರಾವಾಳ ಹುಯಿರ‍್ಹಿಶು.
JAM 2:9 ತುಮೆ ಅಶಿಲ್‌ಕಮ್‌ಶಿಲ್‌ಕರಿ ಬೋಲವಾಳ ಹುಯಿರ‍್ಹಾತೊ ಪಾಪ್ ಕರಾವಾಳ ಹುಯಿರ‍್ಹಿನ್ ಅಪರಾದಿಕರಿ ಧರ್ಮಶಾಸ್ತ್ರನಿ ಪರಕ್ಮ ಫೇಡ್‍ ಲೀಲಿಶು.
JAM 2:10 ಶನಕತೊ ಕೋಣ್‍ತೋಬಿ ಧರ್ಮಶಾಸ್ತ್ರನಸ್ ಪಾಡಿಚಾ಼ಲಿನ್ ಏಕ್‍ನು ಎಕ್ಕಸ್ ವಾತ್ಮ ಗಲತ್‌ ಹುಯಿಗಯುತೊ ಅಥ್ರಾನವಾಳು ಅಖ್ಖೀಸ್ ಬಾರೆಮಾಬಿ ಅಪರಾದಿ ಹುಯಿರ‍್ಹೆಸ್.
JAM 2:11 ಶನಕತೊ ವ್ಯಬಿಚಾರ್ ನಕೊಕರ್ ಕರಿ ಬೋಲ್ಯೊ ಹುಯೊ ದೇವಸ್ ಅದ್ಮಿನ ಖೂನಿ ನಕೊಹು ಕರೀಬಿ ಬೋಲ್ಯೊ. ಇನಖ್ಹಾಜೆ ತೂ ವ್ಯಬಿಚಾರ್ ನಾ ಕರ‍್ಯೊತೋಬಿ ಖೂನ್ ಕರಿನಾಖ್ಯೊತೊ ಧರ್ಮಶಾಸ್ತ್ರನ ಮೀರಿನ್ ಚಾ಼ಲವಾಳೊ ಹುಯೊ.
JAM 2:12 ಛುಟ್ಕಾರ್ ದ್ಯಾವಾಳು ಧರ್ಮಶಾಸ್ತ್ರನಿ ಪರಕ್ಮ ತುಮೆ ತೀರ್ಪ್‌ ಲೀಲ್ಯಾವಾಳನ ಬರೊಬರ್‌ಥಿ ವಾತ್‍ಬೋಲೊ ಅಜು಼ ವಿಧೇಯ ಹುವೊ
JAM 2:13 ಶನಕತೊ ಗೋರ್‌ಕರಾಕೊಂತೆ ರ‍್ಹವಾಳಾನ ನ್ಯಾವ್‍ನಿ ತೀರ್ಪ್‌ಮ ಗೋರ್‌ ವತಾಳ್‌ಶೆ ಕೊಯ್ನಿ. ಗೋರ್‌ ನ್ಯಾವ್‍ನಿ ತೀರ್ಪ್‌ನಾಸ್‌ ಜಿತಿಲಿಶೆ.
JAM 2:14 ಮಾರ ಭೈಯೇ ಭೇನೆವೊ. ಏಕ್‍ಜ಼ಣೊ ಮನ ವಿಶ್ವಾಸ್‍ಛಾ಼ ಕರಿ ಬೋಲಿನ್ ಕಾಮ್ಮ ನಾರ‍್ಹಯೊತೊ ಶನೊ ಫಾಯಿದೊ? ಎಥ್ರಾನಿ ವಿಶ್ವಾಸ್ ಇನ ಬಚಾ಼ಡ್‌ಶೆ ಕಿಶು?
JAM 2:15 ಏಕ್‌ ವೇಳ್ ತುಮಾರೊ ಏಕ್‍ ಭೈ ನತರ್ ಏಕ್‍ ಭೇನ್ನ ಫೇರಾನ ಲುಂಗ್ಡು ಅಜು಼ ಯೋ ದನ್ನು ಖಾಣುಬಿ ನಾರ‍್ಹವಾಪರ್;
JAM 2:16 ತುಮಾರಮ ಎಕ್‍ಜ಼ಣೊ ಇವ್ಣುನ ಶರೀರ್‌ನ ಹೋಣುತೆ ಯೋ ನಾದೀನ್‍, “ಸಮಾಧಾನ್‌ಥಿ ಜಾ಼ವೊ, ಆಗ್ ಶೇಕಿಲೆವೊ, ಪೇಟ್‍ಭರಿಖಾವೊ” ಕರಿ ಬೋಲ್ಯುತೊ ಶನೊ ಫಾಯಿದೊ?
JAM 2:17 ಇಮ್ಮಸ್ ಕಾಮ್ಮಕೊಂತೆ ವಿಶ್ವಾಸ್ ಜಾನ್‌ ಕೊಂತೆ ಹುಯಿರ‍್ಹುಸ್.
JAM 2:18 ಕತೋಬಿ ಥೋಡು ಜ಼ಣು, “ತುನ ವಿಶ್ವಾಸ್ ಛಾ಼, ಅಜು಼ ಮಾರಮ ಕಾಮ್ ಛಾ಼ ತೂ ಕಾಮ್ಮ ಕೊಂತೆ ತಾರಿ ವಿಶ್ವಾಸ್‌ನ ಮನ ವತಾಳ್. ಮೇ ಮಾರ ಕಾಮ್‍ಥಿ ಮಾರ ವಿಶ್ವಾಸ್‌ನ ವತಾಳುಸ್‌!” ಕರಿ ಬೋಲೆಜಾ಼ಯ್ನಿ.
JAM 2:19 ದೇವ್ ಎಕ್ಕಸ್‍ಜ಼ಣೊ ಕರಿ ಯೋ ವಿಶ್ವಾಸ್ ಕರಸ್, ಯೋ ಅಛ್ಛು಼ಸ್‍. ಕತೋಬಿ ಶೈತಾನ್‍ಬಿ ಇಮ್ಮಸ್ ವಿಶ್ವಾಸ್ ಕರೀನ್ ಡರ್‌ಥಿ ಕಾಪಸ್.
JAM 2:20 ಅಲಾ ಬಿಣ್‍ಅಕ್ಲಿ! ಕಾಮ್‍ಕೊಂತೆ ವಿಶ್ವಾಸ್ ಫಾಯಿದೊಕೊಂತೆ ಕರಿ ತುನ ವತಾಳ್‍ನುಕಿ ಶು?
JAM 2:21 ಅಪ್ಣೊ ಗುರುಗುರುಬ್‍ಲ್ಯೊ ಹುಯಿರೋತೆ ಅಬ್ರಹಾಮ್‌ನೊ ಛೀಯ್ಯೊ ಇಸಾಕನ ಬಲಿಪೀಠ್‌ನ ಉಪ್ಪರ್ ಛ಼ಡಾವಾನಿ ವಖ್ಹ್‌ತೆ ನೀತಿನು ತೀರ್ಪ್‌ನ ಲೀಲಿದೋತೆ ವಿಶ್ವಾಸ್‌ನ ಕಾಮ್‌ಥೀಸ್‌ ಕಾಹೆಕಿ ಶು?
JAM 2:22 ಇನಿ ವಿಶ್ವಾಸ್ ಕಾಮ್ನಿಜೋ಼ಡ್ಮ ಚಾ಼ಲ್ಯು ಅಜು಼ ಯೋ ಕಾಮ್‌ಥಿಸ್ ಇನಿ ವಿಶ್ವಾಸ್‌ನಿ ಖ್ಹಯಾಲ್ ಚಾ಼ಲಿಗಿ ಕರಿ ದೇಖೆಸ್‍ನಿ?
JAM 2:23 ಇನಖ್ಹಾಜೇಸ್ ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್ ಕರ‍್ಯೊ ಅಜು಼ ಯೋ ವಿಶ್ವಾಸ್ ಇನಿ ಗಣ್ತಿಮ ನೀತಿಕರಿ ಚೂ಼ಣೈಗು ಕರಿ ಬೋಲನಿ ಧರ್ಮಶಾಸ್ತ್ರನಿ ವಾತ್ ಅಮ್‍ ಪೂರಹುಯು ಇನಖ್ಹಾಜೆ ಅಬ್ರಹಾಮ್ ದೇವ್‌ನೊ ದೋಸ್ತಿಕರಿ ಬೋಲೈಲಿದೊ.
JAM 2:24 ಅಮ್‍ ಅದ್ಮಿ ಚಾ಼ಲ್‌ಥಿ, ಕಾಮ್‍ಥಿ ನೀತಿವಾಳೊಕರಿ ಖ್ಹಣೇದ್‍ಮ ಆವಸ್ ಪಣ್ಕಿ ಖಲಿ ವಿಶ್ವಾಸ್‍ಥಿ ಕಾಹೆ ಕರಿ ದೇಖೊಸ್‍.
JAM 2:25 ಇಮ್ನಿಸ್ ಪರಕ್ಮ ವ್ಯಬಿಚಾರಿಣಿ ರಾಹಾಬ ಜಿನು ಇನ ಘರ್‌ಮ ಹಾಲಿಹುಮಾಲಿಯೆವ್ನ ಮಳೈಲೀನ್‍ ಅಲಕ್‍ ವಾಟ್‍ಥಿ ಇವ್ಣುನ ಮೋಕ್ಲಿತೆ ಕಾಮ್‌ಥೀಸ್‌ ನೀತಿವಾಳಿ ಕರಿ ತೀರ್ಮಾನ್ ಲೀಲಿದಿ ಕೊಯ್ನಿಕಿಶು?
JAM 2:26 ಆತ್ಮಕೊಂತೆ ಶರೀರ್ ಮರಿಹುಯು ಹುಯಿರ‍್ಹವಾನಿ ಪರಕ್ಮಸ್ ಕಾಮ್‍ಕೊಂತೆ ವಿಶ್ವಾಸ್‍ಬಿ ಮರ‍್ಯುಹುಯುಸ್‌.
JAM 3:1 ಮಾರ ಭೈಯೇ ಭೇನೆವೊ. ಖ್ಹಾರುಸ್ಜ಼ಣು ಶಿಕಾಡನ ಉತ್ವಾಳಿ ನಕೊಕರೊ, ಶಿಕಾಡವಾಳ ಹುಯಿರ‍್ಹಾತೆ ಅಪ್ಣೆ ಅಲಕ್‍ ಜ಼ಣೆಥೀಬಿ ಘಣಿ ನ್ಯಾಯತೀರ್ಪ್‌ನ ಶುಶತ್ಉಶು.
JAM 3:2 ಶನಕತೊ ಕೈಯೇಕ್ ವಾತೇಮ ಅಪ್ಣೆ ಖ್ಹಾರೂಸ್ ಗಲತ್‌ಹುಯಿ ಜೈ಼ಯೇಸ್‍. ಏಕ್‍ಜ಼ಣೊ ವಾತ್ಮ ಗಲತ್‌ ನಾಹುಯೋತೊ ಯೊ ಇನ ಪೂರ ಶರೀರ್‌ಮ ಚ಼ಪ್ಪಣ್‌ಮ ರಾಖನ ಯೊ ಶಕತ್‌ವಾಳೊ ಹುಯಿರ್‍ಹೊಸ್.
JAM 3:3 ಹಂದೇಖೊ ಘೋಡೊಖ್ಹಾರು ಅಪ್ಣಿ ಚ಼ಪ್ಪಣ್‌ಮ ಚಾ಼ಲನಿತರ ಯೋ ಅಖ್ಖಾನ ಮ್ಹೋಡಾನ ಲಗಾಮ್‌ ಘಾಲಿಯೆಸ್, ತದೆ ಇನ ಅಖ್ಖಯೇಕ್‌ ಶರೀರ್‌ನಾಸ್‍ ಅಪ್ಣುನ ಹೋಣುತೆ ಬಾಜು಼ ಫರಾಯೆಜಾ಼ಯ್.
JAM 3:4 ಜ಼ಹಾಜ಼್‌ನ ಜಿನು ದೇಖೊ. ಯೋಖ್ಹಾರು ಘಣು ಮೋಟು ರ‍್ಹಯುತೋಬಿ ತೋಫಾನ್ ವ್ಹಯಿರೆಥಿ ರುಕ್‍ ಬದ್ಲಿಜಾ಼ಸ್. ಕತೋಬಿ ಚ಼ಲಾವವಾಳೊ ಘಣು ನ್ಹಾನು ಚುಕ್ಕಾಣಿಥಿ ಯೋಖ್ಹಾರಾನ ಯೋ ಜಾ಼ವ್ಣುತೆ ಬಾಜು಼ ಫರೈಲೇಸ್.
JAM 3:5 ಇಮ್ಮಸ್ ಜೀಬ್‍ ಜಿನುಬಿ ನ್ಹಾನು ಖ್ಹಂದೊ ರ‍್ಹಯುತೋಬಿ ಮೋಟ ಕಾಮ್ನು ಬಡೈಮಾರಿನ್‍ ಕಂಡಿ ಚ಼ಢೈಲೇಸ್‍. ಆಗ್‍ನಿ ನ್ಹಾನಿ ಚಿನ್‍ಗಾರಿ ಮೋಟಿ ಝಾ಼ಡಿನಸ್ ಬಾಳಿನಾಖಸ್.
JAM 3:6 ಜೀಬ್‍ಬಿ, ಆಗ್‍ನಿ ಚಿನ್‍ಗಾರಿನಿತರಾಸ್‌. ಯೋ ಖರಾಬ್ ಜಗತ್‌ನು ಖ್ಹಣೇದ್ ಹುಯಿನ್ ಅಪ್ಣ ಖ್ಹಂದಾವ್‌ನ ಇಚ಼್‌ಮ ರ‍್ಹೀನ್ ಅಖ್ಖಾಏಕ್ ಶರೀರ್‌ನ‍ ಮೈಲು ಕರಸ್. ಇನು ಯೋಸ್ ನರಕನಿ ಆಗ್ನಲಗಾಡಿಲಿನ್ ಯೋ ಅಖ್ಖಿ ಜಿ಼ಂದಗೀನಸ್ ಆಗ್‍ಲಗಾಡಸ್.
JAM 3:7 ಹರೇಕ್ ಜಾ಼ತ್ನು ಜೀನ್ ಜಿನಾವರ್‌ನಾಬಿ ವ್ಹವವಾಳು ಕೀಡ್‌ಕಮ್ಟನಾಬಿ, ಪಾಣಿನುಜಾನ್ವಾರ್‌ನಾಬಿ ಅದ್ಮಿ ಚ಼ಪ್ಪಣೆಮ ಲಾಯೆಜಾ಼ಯಿ ಅಜು಼ ಲೈರಾಖ್ಯೂಸ್‍ಬಿ.
JAM 3:8 ಕತೋಬಿ ಜೀಬ್‌ನ ಕೆಹೊ ಅದಮ್‍ಜ಼ಮಾನೋಬಿ ಚ಼ಪ್ಪಣೆಮ ಲ್ಯಾವಕೊಯ್ನಿ. ಯೋ ಚ಼ಪ್ಪಣ್‌ಮ ಆವಾಕೊಂತೆ ಕೇಡ್‍ಹುಯಿರ‍್ಹೂಸ್‍ ಮರಣ್ಣ ಝಾರ್‌ಥಿ ಭರೈರ‍್ಹೂಸ್.
JAM 3:9 ಯೋಸ್ ಜೀಬ್‍ಥಿ ಪ್ರಭು ಬಾಹುಯಿರೋತೆ ದೇವ್ನ ಧನ್ಯವಾದ್ ಕರಿಯೇಸ್, ಇನೀನಿಘೋಣಿನಿತರಸ್‍ ಉಬ್ಜಿಗಯುತೆ ಅದ್ಮೆವ್‍ನ ಅಪ್ಣೆ ಶಾಪ್‍ದಿಯೇಸ್.
JAM 3:10 ಯೋಸ್‍ ಮ್ಹೋಡೇಥಿ ಧನ್ಯವಾದ್ ಅಜು಼ ಗಾಳೆ ಭೇಬಿ ಆವಸ್. ಮಾರ ಭೈಯೇ ಭೇನೆವೊ, ಅಮ್‍ ನಾರ‍್ಹೇವ್ಣು.
JAM 3:11 ಎಕ್ಕಸ್ ಚೇಜ಼್‌ಭಾರೇಥಿ ಮಿಠ್ಠು ಪಾಣಿ ಅಜು಼ ಕಡುಪಾಣಿ ಭೇಬಿ ನಿಕಳ್‍ಶೆಕಿ ಶು?
JAM 3:12 ಮಾರ ಭೈಯೇ ಭೇನೆವೊ, ಅಂಜೀರ್‌ನು ಝಾ಼ಡು ಓಲಿವ್ ಝಾ಼ಡಾನು ಪಂಡು ಮ್ಹೇಲ್‌ಶೇಕಿ ಶು? ದ್ರಾಕ್ಷಿನ ವೇಲಮ ಅಂಜೀರ್‌ ಮಳ್‍ಶೆಕಿ ಶು? ಇಮ್ಮಸ್ ಕೆಹೊ ಚೇಜ಼್‌ಭಾರೋಬಿ ಖಾರುಪಾಣಿನಾಬಿ ಮಿಠ್ಠು ಪಾಣಿನಾಬಿ ಕೋದಿಶೇನಿ.
JAM 3:13 ತುಮಾರಮ ಗ್ಯಾನೀಬಿ ಅಕ್ಲೀಬಿ ಕೋಣ್? ಅಥ್ರಾನವಾಳು ಅಛ್ಛಿ ಚಾ಼ಲ್‌ಥಿ ಸಮಾಧನ್ನಾ ಕಾಮ್‍ಥಿ ಜಿವಿನ್ ವತಾಳದೆ.
JAM 3:14 ಕತೋಬಿ ತುಮಾರ ದಿಲ್ಮ ಬಳಾಪೊ, ಕಡ್‍ವೈ ಅಜು಼ ನಿಕ್‍ಳ್ಯೊಜಾನ್ ರಾಖಿನ್ ಅಕ್ಲಿಕರಿ ಖ್ಹಾಚ಼ನ ವಿರೋದ್‌ ಝೂ಼ಟಿ ಬೋಲಿನ್ ಕಂಡಿಛ಼ಡಾವೊ ನಕೊ.
JAM 3:15 ಯೋ ಉಪ್ಪರ್‌ಥು ಆಯಾತೆ ಗ್ಯಾನ್‍ಕಾಹೆ. ಯೋ ಜ಼ಮೀನ್‍ನಸಂಬಂದ್‍ ಪಡ್ಯುಹುಯು, ಲೋಕ್ನಿಖ್ಹಯೆಲ್ನು ಅಜು಼ ಭೂತ್‌ನ ಸಂಬಂದ್ ಪಡ್ಯುಹುಯು.
JAM 3:16 ಶನಕತೊ ಪೇಟ್ನೊ ಬಳಾಪೊಬಿ ವಹೇರ್‌ಬಿ ರ‍್ಹೆಯಿತೆ ಬಾಜು಼ ಕಲಾವ್ಣಿಬಿ ಖ್ಹಾರೀಸ್‍ ಥರಾನು ಖರಾಬ್ ಕಾಮ್‍ಬಿ ರ‍್ಹೇಸ್.
JAM 3:17 ಕತೋಬಿ ದೇವ್‍ಥಿ ಆವಾನಿ ಗ್ಯಾನ್ ಪಹಿಲೆ ಪರಿಶುದ್ ಹುಯಿರ‍್ಹವಾಳು ಇನಪಾರ್ ಸಮಾಧಾನ್‍ವಾಳು, ಶೇದೇವ್‌ ಹುಯಿರ‍್ಹವಾಳು, ವಿಧೇಯ ರ‍್ಹವಾಳುಬಿ, ಗೋರ್‌ಥೀಬಿ ಅಜು಼ ಅಛ್ಛಿ಼ಫಲ್‍ಥೀಬಿ ಭರೈರ‍್ಹವಾಳು, ಶುದ್ಧಮನ್‌ಥಿ ಬೋಲವಾಳು, ಖ್ಹಾಚು಼ ಬೋಲವಾಳುಕರಿ ಖುಷಿಥಿ ಮಾನಿಲ್ಯಾವನು ಹುಯಿರ‍್ಹುಸ್.
JAM 3:18 ಸಮಾಧಾನ್‍ ಕರಾವಾಳು ಸಮಾಧಾನ್‍ಕರಿ ಬೋಲಾನು ದಾಣಾನ ಗಾಡಿನ್ ನೀತಿಕರಿ ಬೋಲಾನು ಫಲ್ನ ವ್ಹಾಡಸ್.
JAM 4:1 ತುಮಾರಮ ಲಡೈ ಝ಼ಗ್‌ಡೊಖ್ಹಾರು ಕಿಜ್ಜಾ಼ಥು ಆವಸ್? ತುಮಾರ ದಿಲ್‌ದಿಮಾಕ್‍ಮ ಲಡಾತೆ ಲಾಲ್‍ಛಿಥೀಸ್‍ ಕಾಹೇಕಿಶು?
JAM 4:2 ತುಮೆ ಹರಖ್ಹ್‌ಯತೋಬಿ ಲೀದಾಕೊಯ್ನಿತೇಸ್ ಛಾ಼. ತುಮೆ ಖೂನಿ ಕರ‍್ಯತೋಬಿ. ಪೇಟ್ನ ಬಳಾಪೊ ಕರ‍್ಯತೋಬಿ ಅಖ್ಹ್‌ಕರ‍್ಯಹುಯನ ಕಮೈಲೆಯಿಕೊಯ್ನಿ; ತುಮೆ ಲಡೈ ಪಡೋಸ್‍, ಜಂಗ್ ಭಿಡೋಸ್‍. ಕತೋಬಿ ತುಮೆ ದೇವ್ನ ಬಿಂತಿ ಕರೆಲೇಯಿಕೊಂತೆ ಇನಟೇಕೆ ತುಮುನ ಶಾತ್ಬಿ ಮಳಕೊಯ್ನಿ.
JAM 4:3 ಬಿಂತಿ ಕರಿಲಿದತೋಬಿ ಯೋ ತುಮುನ ಮಳಕೊಯ್ನಿ. ಶನಕತೊ ತುಮಾರಿ ಬಿಂತಿ ಖರಾಬ್ ಖ್ಹೂಜ್‍ನು ಹುಯಿರ‍್ಹೆಸ್. ಭೋಗ್ನಿ ಆಖ್ಹ್‌ನ ಚ಼ಲೈಲ್ಯಾವನು ತುಮಾರಿ ಶುಶತ್ ಹುಯಿರ‍್ಹೆಸ್.
JAM 4:4 ವಿಶ್ವಾಸ್‌ಕೊಂತೆ ಅದ್ಮಿವೊ, ಜಗತ್ನಿ ಜೋ಼ಡ್ಮ ದೋಸ್ತಿಕರಾನು ದೇವ್ನ ವಹೇರ್‌ ಕರಾನು ಕರಿ ತುಮುನ ಮಾಲುಮ್ ಕೊಯ್ನಿಕಿ ಶು? ಇನಖ್ಹಾಜೆ ಜಗತ್ನ ದೋಸ್ತಿಹುಯಿರ‍್ಹೆವುಸ್‌ ಕರಿ ಬೋಲಿಲ್ಯಾವಾಳೊ ಇನುಯೋಸ್ ದೇವ್ನ ವಿರೋದಿ ಬಣೈಲೆಸ್.
JAM 4:5 ಆನಾಹುಯಿನ್ ಹಮಾರಮ ಜಿವ್‌ಕರಾಸ್ತೆ ಆತ್ಮನ “ಘಣಿ ಆಖ್ಹ್‌ಥಿ ಹೋಣುಕರಿ ಹರ್‌ಖ್ಹುಕರುಸ್ ಕರಿ ಬೋಲಾನು ವಚನ್ನಿ ಖಾಲಿ ವಾತ್‍ಕರಿ ಲಾಝೊ಼ಸ್‍ಕಿ ಶು?
JAM 4:6 ಯೋ ಅಪ್ಣುನ ಘಣೇಥಿ ವಾರ್ಖ್ಹಾನ ದೇಸ್. ಇನಖ್ಹಾಜೇಥಿ, ದೇವ್ ಹಂಕಾರಿಯೆವ್‍ನ ವಹೇರ್‌ಕರಸ್. ಗೋರ್‌ ಗರಿಬ್‍ನತೋಬಿ ವಾರ್‌ಖ್ಹೊ ದೇಸ್‌ಕರಿ ಪವಿತ್ರ ದಪ್ತರ್‌ಮ ಬೋಲಸ್.
JAM 4:7 ಅಮ್‌ರ‍್ಹವಾಪರ್ ದೇವ್ನ ಅಧೀನ್‌ಹುಯಿನ್ ಶೈತಾನ್ನ ಡರಾವೊ ತದೆ ಯೋ ತುಮುನ ಮ್ಹೇಲಿನ್ ಮಿಲೈನ್‌ ಜಾ಼ಶೆ.
JAM 4:8 ದೇವ್ನ ಖನ್ನೆಆವೊ, ತದೆ ಯೋ ತುಮಾರ ಖನ್ನೆ ಆವ್‌ಶೆ. ಪಾಪಿವೊ, ತುಮಾರ ಹಾತ್ನ ಧೊಯ್‍ಲೆವೊ ಬೇ ದಿಲ್‌ವಾಳವೊ ತುಮಾರ ದಿಲ್ನ ಪಾಕ್‌ಕರ‍್ಲೆವೊ
JAM 4:9 ದುಖ್‌ಕರೊ ರದ್‍ನ್ಯಕರೊ ಆಂಝು಼ ನಾಖೊ. ಹಾಖ್ಹಾನು ಮ್ಹೇಲಿನ್ ಅಂದ್ರೋಖ್ಹ್‌ ಕರೊ; ಖ್ಹುಶಿನ ಮ್ಹೇಲಿನ್ ದಿಲ್‌ ದುಖೈಲ್ಯವಾಳ ಹುಯಿ‍ರ‍್ಹೆವೊ.
JAM 4:10 ಪ್ರಭುನ ಖ್ಹಾಮ್ಣೆ ತುಮುನ ಝು಼ಕೈಲೆವೊ ತದೆ ಯೋ ತುಮುನ ಉಪ್ಪರ್ ಪಾಡ್‍ಶೆ.
JAM 4:11 ಮಾರ ಭೈಯೇ ಭೇನೆವೊ ಏಕ್‌ನ ಏಕ್‌ ದುಖ್‍ನಕೊ ದೆವೊ. ಕೋಣ್‌ತೋಬಿ ಇನ ಭೈನ ಚಿಂಘಾಯತೊ ನತರ್ ಇನಿ ಭೇಜ಼ಣಾನಿ ಬಾರೇಮ ತೀರ್ಪ್‍ಕರ‍್ಯಾತೊ ಯೋ ಧರ್ಮಶಾಸ್ತ್ರನ ಚಿಂಘೈನ್‍ ಧರ್ಮಶಾಸ್ತ್ರನಿ ಬಾರೇಮ ತೀರ್ಪ್‌ಕರಾನಿತರ ಉಶೆ. ಕತೋಬಿ ತೂ ಧರ್ಮಶಾಸ್ತ್ರನಿ ಬಾರೇಮ ತೀರ್ಪ್ ಕರ‍್ಯೊತೊ ತೂ ನ್ಯಾಯಾಧಿಪತಿ ಕರಿ ಬೋಲೈಲಿಶ್ ಪಣ್ಕಿ ಇನ ಪಾಡಿಚಾ಼ಲವಾಳೊ ಕಾಹೆ.
JAM 4:12 ಧರ್ಮಶಾಸ್ತ್ರನ ದಿದೊಹುಯೊ ನ್ಯಾಯಾಧಿಪತಿ ದೇವ್ ಎಕ್ಕಸ್ ಜ಼ಣೊ; ಯೋಸ್‍ ಬಚಾ಼ಡನಾಬಿ ನಾಶಕರನಾಬಿ ಶಕತ್‌ವಾಳೊ ಹುಯಿರ‍್ಹೊಸ್. ಅಮ್‍ರ‍್ಯವಾಪರ್‌ ತಾರ ಭೀಡೆವಾಳಾನಿ ಬಾರೇಮ ತೀರ್ಪ್‌ಕರವಾಳೊ ತೂ ಕೋಣ್?
JAM 4:13 “ಆಜ಼್‌ನೊ ದನ್ ನತರ್ ಕಾಲ್ ಅಪ್ಣೆ ಅಥ್ರಾನ ಖ್ಹಯೇರ‍್ನ ಜೈ಼ನ್ ಹಿಜ್ಜಾ಼ ಏಕ್‍ವರಖ್ಹ್‌ರ‍್ಹೀನ್ ಬೇಪಾರ್‌ಕರೀನ್ ನಫ್ಫೊ ಕಮೈಲಿಯೇಸ್” ಕರಿ ಬೋಲವಾಳ ಖ್ಹಮ್‍ಜೊ.
JAM 4:14 ಕಾಲ್‍ಶಾತ್‍ ಉಶೇಕಿ ತುಮೂನ ಮಾಲುಮ್‌ ಕೊಯ್ನಿ, ತುಮಾರು ಜಿ಼ಂದ್‌ಗಿ ಕಿಮ್ಕಿ? ಯೋ ಥೋಡಿಘಡಿ ದೆಖೈನ್ ಇನಪಾರ್ ದೆಖಾವಕೊಂತೆ ಧುವರ್‌ನಿತರ ತುಮೆ ಛಾ಼.
JAM 4:15 ಇನಖ್ಹಾಜೆ ತುಮೆ ಅಥ್ರಾನಿ ವಾತ್ನ ಮ್ಹೆಂದಿನ್ “ಪ್ರಭುನಿ ಖ್ಹೂಜ಼಼್ ಉಷೇತೊ ಅಪ್ಣೆ ಬಚಿರ‍್ಹಿಶು ಅಜು಼ ಆ ಕಾಮ್‍ರ‍್ಹೆವೊ ಯೋ ಕಾಮ್‍ರ‍್ಹೆವೊ ಕರ್ಶು” ಕರಿ ಬೋಲ್‌ಶು ಕರಿ ತುಮೆ ಬೋಲಿಲೇವ್ಣು.
JAM 4:16 ಕತೋಬಿ ತುಮೆ ತುಮಾರಿ ಅಹಂಕಾರ್‌ಥಿ ತುಮಾರಿ ಬಾರೇಮ ಬಡೈಮಾರಿಲೇವೋಸ್. ಎಥ್ರಾನಿ ಖ್ಹರಾವ್ಣಿ ದೇವ್ನಖ್ಹಾಮ್ಣೆ ಗಲ್ತೀಸ್.
JAM 4:17 ಅಮ್‍ರ‍್ಯವಾಪರ್‌ ಅಛ್ಛಾ಼ನ ಕರ್ನುಕರಿ ಮಾಲುಮ್ ರ‍್ಹೀನ್‌ಬಿ ಕೋ ಕರಾಂತೆ ಯೊ ಪಾಪ್ ಕರಾವಾಳೊ ಹುಯಿರ‍್ಹೊಸ್.
JAM 5:1 ಶೌಕಾರ್‌ವಾಳೊ, ತುಮೂನ ಆವ್‌ಶೇತೆ ಖ್ಹತಾಪ್ಣಿನಖ್ಹಾಜೆ ಆಂಝು಼ನಾಖೊ, ರದನ್ ಕರೊ.
JAM 5:2 ತುಮಾರಿ ಧನ್‍ ದೌಲತ್‍ ನಾಶ್‍ಹುಯಿಗು. ತುಮಾರ ಲುಂಗ್ಡಾನ ಕಂದ್‌ ಧರಿಲಿದು.
JAM 5:3 ತುಮಾರು ಖ್ಹೊನ್ನು, ರೂಪು ಕಿಲಪ್‍ ಧರಿನ್‍ ಮಾಟಿನ ಬರೋಬರ್ ಹುಯಿರ‍್ಹುಸ್‍. ಯೋ ಖ್ಹಾರಾನು ಕಿಲಪ್‍ ತುಮೂನ ವಿರೋದ್. ಸಾಕ್ಷಿ ಹುಯಿರ‍್ಹಿನ್ ಆಗ್‍ನಿತರ ತುಮಾರಿ ಬೋಟಿನ ಭುಂಜಿನಾಕ್‍ಶೆ. ಖ್ಹರ್ತಿನ ದನ್ಮ ಆಯಿಗುತೋಬಿ ದೌಲತ್ ಜ಼ಮಾಕರೀನ್ ತುಮೆ ಮ್ಹೇಲಿರಾಖ್ಯಸ್.
JAM 5:4 ದೇಖೊ ತುಮಾರ ಖೇತರ್‌ಮಾನು ಅನಾಜ಼್ ವ್ಹಾಡ್ಯಹುಯಾನಿ ಕೂಲಿ ದಿದಾಕೊಂತೆ ತುಮೆ ಠಗೈಲಿದಾ. ಯೋ ಕೂಲಿವಾಳನಿ ಕೂಘಾಟಿ ಅಜು಼ ವ್ಹಾಡವಾಳಾನಿ ಚಿಕ್ರಾಣ್ ಆ ಅಖ್ಖಾನ ಕರಾವಾಳೊ ಸೊರ್ಗನು ಡಂಡ್ನೊ ಸರ್ವಶಕ್ತ ದೇವ್ ಪ್ರಭುನ ಕಾನ್ಮ ಟಹುಕೊ ಪಡಿರ‍್ಹುಸ್,
JAM 5:5 ಧರ್ತಿಪರ್ ತುಮೆ ಸುಕ್‍ಭೋಗ್‍ವಾಳ ಹುಯಿನ್ ತುಮಾರಿ ಆಖ್ಹ್‌ನ ಪೂರಕರೈಲ್ಯವಾಳ ಹುಯಿನ್ ಜಿವಿರ‍್ಹಾಸ್‍. ಬಲಿನ ದನ್ನ ಖ್ಹಾಜೆಕಿಶುಕಿ ಕರಿ ತುಮಾರು ದಿಲ್ನ ಫುಲೈಲಿದಾತೆ.
JAM 5:6 ತುಮೆ ನೀತಿವಾಳಾನ ಗಾಳೆದೀನ್ ಖೂನ್‌ಕರಿನಾಖ್ಯ, ಯೊತೋಬಿ ತುಮುನ ವಿರೋದ್ ಕರುಕರಕೊಯ್ನಿ.
JAM 5:7 ಭೇನೆ ಭೈಯೇವೊ, ಪ್ರಭು ಆವಾಲಗು ಖ್ಹಮಾಳಿರ‍್ಹವೊ. ಪಿಕಾವವಾಳಾನ ದೇಖೊ, ಯೋ ಜ಼ಮೀನ್ನು ಮೋಲ್ನ ಜಾ಼ವಾನು ಫಲ್ನಖ್ಹಾಜೆ ಟಿವೈರ‍್ಹೀನ್ ಮುಂಗಾರ‍್ನೊ. ಹಿಂಗಾರ‍್ನೊ ಪಾಣಿಅಖ್ಖು ಆವಾಲಗು ಖ್ಹಮಾಳಿನ್ ರ‍್ಹೇಸ್.
JAM 5:8 ತುಮೇಬಿ ಖ್ಹಮಾಳಿರ‍್ಹವೊ, ತುಮಾರ ದಿಲ್ನ ಘಟ್‍ಕರಿಲೆವೊ. ಶನಕತೊ ಪ್ರಭು ಆವಾನದನ್‍ ಖನ್ನೆ ಹುಯಿಗು.
JAM 5:9 ಭೈಯೇ ಭೇನೆವೊ, ತುಮೆ ಏಕ್‌ನ ಉಪ್ಪರ್ ಏಕ್‍ ಗಲತ್‌ ನಕೊಬೋಲೊ; ಅನೇಥಿ ನ್ಯಾವ್‌ನಿ ತೀರ್ಪ್‌ಮ ಪಡಿಜಾ಼ಶು. ಹಂದೇಖೊ ನ್ಯಾವ್‍ನೊ ಅದಿಪತಿ ಬಾಕಲ್‌ನ ಖ್ಹಾಮ್ಣೇಸ್ ಭೀಯೊಸ್‍.
JAM 5:10 ಭೈಯೇ ಭೇನೆವೊ, ವದೇಖ್ಹಾನ ಖ್ಹಮಾಳಿಲ್ಯಾವಾನಿ ಬಾರೇಮ ಪ್ರಭುನ ನಾಮ್‍ಥಿ ವಾತ್ ಬೋಲ್ಯಾತೆ ಪ್ರವಾದಿ ಖ್ಹಾರನಾಸ್ ಯಾದ್ ಕರಿಲೆವೊ.
JAM 5:11 ಹಂದೇಖೊ, ಖ್ಹಮಾಳಿಲ್ಯಾವಾಳನ ಧನ್ಯಕರಿ ಅಪ್ಣೆ ಗಣ್ತಿ ಕರಿಯೇಸ್ ಕೊಯ್ನಿಕಿಶು, ತುಮೆ ಯೋಬಮ ಥೂತೆ ಖ್ಹಮಾಳಿಲ್ಯವಾನಿ ಬಾರೇಮ ಖ್ಹಮ್‍ಜೊ, ಪ್ರಭು ಇನ ಖ್ಹರ್ತಿಮ ಕರ‍್ಯೊತೆ ದೇಖೊ. ಪ್ರಭು ಗೋರ್‌ವಾಳೋಬಿ ಅಜು಼ ದಯಾಕರವಾಳೊಬಿ ಹುಯಿರ್‍ಹೊಸ್ ಕರಿ ಖ್ಹಮ್‌ಜಿರಾಖ್ಯಾಸ್‌.
JAM 5:12 ಮುಖ್ಯಥಿ ಮಾರೆ ಭೈಯೇ ಭೇನೆವೊ, ಆಣ್ ಕರೋಸ್ ನಕೊ ಆಬ್‌ಪರ್‌ ರ‍್ಹವೊ. ಧರ್ತಿಪರ್ ರ‍್ಹವೊ. ಬಿಜ಼಼ ಶನಾಪರ್‌ಬಿ ರ‍್ಹವೊ ಆಣ್ ಕರೋನಕೊ ಒಹೊ ಕರಿ ಬೋಲಾನು ರ‍್ಹಯಾತೊ ಒಹೊಕರಿ ಬೋಲೊ; ಕೊಯ್ನಿಕರಿ ಬೋಲಾನು ರ‍್ಹಯಾತೊ ಕೊಯ್ನಿಕರಿ ಬೋಲೊ; ಅಮ್‍ರ‍್ಹಯಾತೊ ತುಮೆ ನ್ಯಾವ್‍ನಿ ಖ್ಹಣೇದ್ ಉಶುಕೊಯ್ನಿ.
JAM 5:13 ತುಮಾರಮ ಕೋಣ್‌ತೋಬಿ ಖ್ಹತಾವಾಳ ಛಾ಼ಕಿ? ಯೋ ದೇವ್ನ ವಿಶ್ವಾಸ್‍ಥಿ ಪ್ರಾರ್ಥನೆ ಕರಾದೆ. ತುಮಾರಮ ಕೋಣ್‌ತೋಬಿ ಖ್ಹುಶಿ ಕರಾವಾಳೊ ಛಾ಼ಕಿ? ಇವ್ಣೆ ದೇವ್ನ ಸ್ತುತಿನು ಗೀದ್‌ ಬೋಲಾದೆ.
JAM 5:14 ತುಮಾರಮ ಕೋಣ್‌ತೋಬಿ ಜಾನ್ನ ಅಛ್ಛು಼ ನಾ ರ‍್ಹವಾಳು ಛಾ಼ಕಿ? ಯೋ ಸಬೇನು ಶಾಣವ್ನ ಬುಲೈನ್ ಪ್ರಾರ್ಥನೆ ಕರಾನ ಬಿಂತಿ ಕರಾದೆ. ಇವ್ಣೆ ಪ್ರಭುನ ನಾಮ್‍ಥಿ ಇನ ತೇಲ್ ಲಗಾಡಿನ್ ಇನದೇಶೆ ದೇವ್ನ ಪ್ರಾರ್ಥನೆ ಕರಾದೆ.
JAM 5:15 ವಿಶ್ವಾಸ್‍ಥಿ ಕರಾತೆ ಪ್ರಾರ್ಥನೆ ರೋಗ್‌ವಾಳನ ಗುಣ್‌ಕರಸ್‌. ಅಜು಼ ಪ್ರಭು ಇನ ಉಠಾಡಸ್, ಯೋ ಪಾಪ್ ಕರಿರಾಖವಾಳೊ ಉಷೇತೊ, ದೇವ್ ಯೋ ಪಾಪ್ ಅಖ್ಖಾನ ಕ್ಷಮಾಕರ್‌ಶೆ.
JAM 5:16 ಅಮ್‍ರ‍್ಹವಾಪರ್ ತುಮೆ ಗುಣ್ ಹೋಣುಕತೊ ತುಮಾರಿ ಪಾಪ್ನಅಖ್ಖಾನ ಏಕ್‌ಥಿಏಕ್ ಹರ್‌ಕೆ ಕರಿನ್ ಏಕ್‍ ಜ಼ಣಾನಖ್ಹಾಜೆ ಏಕ್‍ಜ಼ಣು ಪ್ರಾರ್ಥನೆಕರೊ. ನೀತಿವಂತಾನು ಪ್ರಾರ್ಥನೆ ಘಣು ಶಕತ್ನು ಹುಯಿರ‍್ಹುಸ್.
JAM 5:17 ಎಲೀಯ ಅಪ್ಣಿ ಥರಾನಿ ಖ್ಹಯಾಲ್‍ವಾಳೊ ಹುಯಿರ‍್ಹೋಥೊ. ಯೋ ಪಾಣಿ ನಾ ವರಖ್ಹ್‌ಣುಕರಿ ಭಕ್ತಿಥಿ ಪ್ರಾರ್ಥನೆ ಕರಾದಿನ್‍ ತೀನ್ ವರಖ್ಹ್‌ ಛೋ಼ ಮಹಿನಲಗೂಬಿ ಧರ್ತಿಪರ್ ಪಾಣಿ ವರ್‌ಶ್ಯೊಕೊಯ್ನಿ
JAM 5:18 ಪಾಛೊ಼ ಯೊ ಪ್ರಾರ್ಥನೆ ಕರಾದಿನ್ ಆಕಾಶ್ ಪಾಣಿವರ್‌ಖ್ಹಾಯು. ಜ಼ಮೀನ್ ಫಲ್‍ದಿದು.
JAM 5:19 ಮಾರ ಭೈಯೇಭೇನೆವೊ, ತುಮಾರಮ ಕೋಣ್‌ತೋಬಿ ಖ್ಹಾಚ ಮಾರಗ್‌ನ ಮ್ಹೆಂದಿನ್ ಗಲ್ತಿಥಿ ಚಾ಼ಲುಕರ್ತು ಉಷೇತೊ ಬಿಜೇಕ್ ಜ಼ಣು ಇನ ಅಛ್ಛಮಾರಗ್‍ಪರ್ ಲಾಯುತೊ;
JAM 5:20 ಏಕ್‌ ಪಾಪಿನ ಗಲತ್‌ ಮಾರಗ್‍ಪರ್‌ಥು ಛು಼ಕೈನ್, ಬದ್‍ಲೈನ್ ಇನ ಆತ್ಮಾನ ಮರಣ್‌ಥು ಬಚಾ಼ಡೀನ್ ಘಣ ಪಾಪ್ನ ಯೋ ಕ್ಷಮಾ ದ್ಯವಾಡವಾಳೊಕರಿ ಮಾಲುಮ್‌ ಕರಿಲ್ಯಾವಾದೆ.
1PE 1:1 ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೇತ್ರನೆ ಪೊಂತ, ಗಲಾತ್ಯ, ಕಪ್ಪದೋಕ್ಯ ಏಷ್ಯಾ ಬಿಥೂನ್ಯ ಕರಿ ತಬರ್‌ಖಾಮ ಛಿಡ್‍ಕೈಗಾತೆ ಪರೈದೇಖ್ಹ್‌ಮ ಜಿವ್‌ಕರಾತೆ ದೇವ್ನ ಅದ್ಮಿವ್‍ನ ಕತೊ,
1PE 1:2 ಪವಿತ್ರಾತ್ಮಥಿ ಅಭಿಷೇಕ್ ಕರೈಲಿದಹುಯಿನ್ ವಿಧೇಯ ಹುವಾನಖ್ಹಾಜೆ, ಯೇಸು ಕ್ರಿಸ್ತನ ಲ್ಹೋಯಿಥಿ ಛಿಡ್‍ಕೈನ್, ಬಾ ಹುಯಿರ‍್ಹೋತೆ ದೇವ್ನಿ ಭವಿಶ್ಯನಿ ಗ್ಯಾನ್‌ಥಿ ಚೂ಼ಣೈಗಯಹುಯಾನ ಲೀಖಾನು ಶಾತ್‍ಕತೊ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಘಣು ಮಳಾದೆ.
1PE 1:3 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ಬಾಬಿ ದೇವ್‌ಬಿ ಹುಯಿರ‍್ಹವಾಳನ ಧನ್ಯವಾದ್ ಹುವಾದೆ! ಶನಕತೊ ಯೋ ಯೇಸು ಕ್ರಿಸ್ತನ ಮರ‍್ಯಾಹುಯಾಮಾಥು ಜಿವ್ತೊಕರಿನ್, ಇನಿ ಮೋಟಿ ಗೋರ್‌ಥೀಸ್ ಅಪ್ಣುನ ನವೊ ಜ಼ಲಮ್ ಅಜು಼ ಜಾನ್ನ ಭರೋಖ್ಹಾನ ದಿರಾಖ್ಯೊಸ್.
1PE 1:4 ಇಮ್ಮಸ್ ಅಪ್ಣುನ ಮಟಿಜಾ಼ಯಿಕೊಂತೆ ಧನ್‌ದೌಲತ್‌ನ ದ್ಯವಾನಖ್ಹಾಜೆ ಪರಲೋಕ್‌ಮ ಅಪ್ಣಖ್ಹಾಜೆ ಮ್ಹೇಲೈರ‍್ಹೂಸ್. ಯೋ ಕಂದ್‍ ಧರಾಕೊಯ್ನಿ ಅಜು಼ ನಾಶ್ ಹುಯಿಜಾ಼ಯ್‌ ಕೊಯ್ನಿ.
1PE 1:5 ಕಡ್‍ಶೀನ ದನ್ಮ ಮಾಲುಮ್‌ ಹುವಾನ ತಯ್ಯಾರ್‌ಹುಯಿರ‍್ಹುತೆ ರಕ್ಷಣೆ ವಿಶ್ವಾಸ್ ಕರಾವಾಳ ತುಮುನ ಮಳ್‌ಣುಕರಿ ದೇವ್ ತುಮುನ ಇನಿ ಶಕಥ್ಥಿ ಬಚಾ಼ಡಸ್.
1PE 1:6 ಇನಾಖ್ಹಾಜೆ ತುಮೆ ತಬ್‍ತೋಡಿ ಥೋಡದನ್ ಹೋಣು ಉಷೇತೊ ಕೈಯೇಕ್‌ ಥರಾನಿ ವದೇಖ್ಹ್‌ಮ ದುಖಿ ಹುವಾಳರ‍್ಹಯಾತೋಬಿ, ಖ್ಹುಶಿಕರಾವಾಳ ಹುಯಿರ‍್ಹಾಸ್.
1PE 1:7 ನಾಶಹುಯಿಜಾ಼ವಾನುಬಿ, ಆಗ್‌ಥಿ ಛ಼ಣೈನ್ ಹುಯಿರ‍್ಹುತೆ ಖ್ಹೋನ್ನೇಥಿಬಿ ಘಣು ಮೋಲ್ನು ಹುಯಿರ‍್ಹುತೆ ತುಮಾರಿ ವಿಶ್ವಾಸ್ ಆ ವದೇಖ್ಹ್‌ಥಿ ತರೀಪ್‌ಶ ಹುಯಿನ್ ಯೇಸುಕ್ರಿಸ್ತ ಆವಾನಿ ವಖ್ಹತ್ ತುಮುನ ಕೀರ್ತಿ, ಮಾನ್, ಮಹಿಮೆ ಅಖ್ಖು ಉಬ್ಜಿ ಆವಾನಿತರಾನು ಹುಯಿರ‍್ಹುಸ್.
1PE 1:8 ತುಮೆ ದೇವ್ನ ಡೋಳೇಥಿ ನಾ ದೇಖ್ಯಾತೋಬಿ ಇನ ಪ್ಯಾರ್ ಕರೋಸ್. ತುಮೆ ಹಮ್ಕೆ ಇನ ನಾದೇಖ್ಯಾತೊಬಿ ಇನಾಮ ವಿಶ್ವಾಸ್‍ಥಿ ಖ್ಹುಶಿ ಕರ್ಶು. ಶನಕತೊ ತುಮಾರು ವಿಶ್ವಾಸ್‍ನು ಫಲ್‍ಹುಯಿರ‍್ಹುತೆ ಆತ್ಮನು ರಕ್ಷಣೇನ ಲಿಲ್ಯಾವವಾಳ ಹುಯಿನ್ ಮಹಿಮೆನಿ ಖ್ಹುಶಿಕರ್‌ಶು.
1PE 1:10 ದೇವ್ನೆ ತುಮುನ ವತಾಳ್ಯೊತೆ ವಾರ್‌ಖ್ಹಾನಿ ಬಾರೇಮ ಪಹಿಲೇಸ್ ಖ್ಹಮ್‌ಜಾ಼ಡ್ಯೂತೆ ಪ್ರವಾದಿಖ್ಹಾರು ಆ ರಕ್ಷಣೆನಿ ಬಾರೇಮ ಬರೋಬರ್‌ಥಿ ಪುಛೈ಼ನ್ ಪರ್ಖಿನ್ ದೇಖ್ಯು.
1PE 1:11 ಇವ್ಣಾಮಥೂತೆ ಕ್ರಿಸ್ತನು ಆತ್ಮ ಕ್ರಿಸ್ತನ ಆವ್ಣುತೆ ವದೇಖ್ಹ್‌ ಅಖ್ಖಾನಾಬಿ, ಯೋ ಅಖ್ಖಾನವಾರ್ ಉಷೇತೆ ಮಹಿಮೆನಾಬಿ, ಪಹಿಲೇಸ್ ಖ್ಹಮ್‌ಜಾ಼ಡಾದೀನ್ ದೇವ್ ಖೆವ ಹಗಾಮ್ನ ನತರ್ ಕೆಥ್ರಾನ ಹಗಾಮ್ನ ವತಾಳ್‌ಶೇಕರಿ ಬೋಲಾನು ಇವ್ಣೆ ಪರ್ಖಿನ್ ದೇಖ್ಯು.
1PE 1:12 ಪರ್‌ಲೋಕ್‌ಥು ಮೋಕ್‍ಲೈರ‍್ಹುತೆ ಪರಿಶುದ್ದಆತ್ಮಥಿ ತುಮುನ ಸುವಾರ್ತೆನ ಬೋಲವಾಳು ಹಮ್ಕೆ ತುಮುನ ಖ್ಹಮ್‍ಜಾ಼ಡನಿತರ ಅಜು಼ ದೂತರ್ ಡೋಳಲಗಾಡಿನ್ ದೇಕ್ಣು ಕರಿ ಅಖ್ಹ್‌ಕರ‍್ಯುತೆತಿಮ್‍ ಅಖ್ಖಕಾಮ್ಮ ಇವ್ಣಖ್ಹಾಜೆ ಕಾಹೆ ಅಪ್ಣ ಖ್ಹಾಜೆಸ್ ಸೇವೆ ಕರಿರಾಖ್ಯುಸ್‌ಕರಿ ಇವ್ಣುನ ದೆಖಾಯು.
1PE 1:13 ಇನಾಖ್ಹಾಜೆ ತುಮೆ ತುಮಾರ ದಿಲ್ನ ಘಟ್‍ಕರಿಲೀನ್, ಅಛ್ಛಿ ಸೋಚ್‌ವಾಳ ಹುಯಿರ‍್ಹಿನ್, ಯೇಸು ಕ್ರಿಸ್ತ ಆವಾನಿ ವಖ್ಹ್‌ತೆ ತುಮುನ ಮಳ್‌ಶೇತೆ ವಾರ್‌ಖ್ಹಾನ ಉಪ್ಪರ್ ತುಮಾರಿ ಪೂರ ಭರೋಖ್ಹೊ ರ‍್ಹವಾದೆ.
1PE 1:14 ವಾತೆ ಖ್ಹಮ್‌ಜಾ಼ತೆ ಲಡ್ಕವ್ನಿತರ ಚಾ಼ಲೊ, ತುಮೆ ಅಗಾಡಿ ಬಿಣ್‍ಖ್ಹೈಲಿರ‍್ಹಾವಾನಿ ವಖ್ಹ್‌ತೆ ತುಮುನ ಥೂತೆ ನಿಕ್‌ಳ್ಯೊಜಾನ್ನಿ ತರಸ್ ಅಜೂ಼ಬಿ ಚಾ಼ಲಿಲ್ಯಾವಾಳ ನಾಹುಯಿರ‍್ಹೆವ್ಣುತೆ,
1PE 1:15 ತುಮುನ ಬುಲಾಯೋಹುಯೊ ಪರಿಶುದ್‌ಹುಯಿರ‍್ಹೋತೆ ಪರಕ್ಮಾಸ್ ತುಮೇಬಿ ವಿಧೇಯಹುಯಿ ರ‍್ಹೀನ್ ತುಮಾರಿ ಖ್ಹಾರಿ ಚಾ಼ಲ್‌ಮ ಇನಖ್ಹಾಜೆ ಪರಿಶುದ್ ಹುಯಿ‍ರ‍್ಹೆವೊ.
1PE 1:16 ಶನಕತೊ ಮೇ ಪರಿಶುದ್ ಹುಯಿರ‍್ಹೋತೆ ತಿಮ್ ತುಮೇಬಿ ಪರಿಶುದ್ ಹುಯಿರ‍್ಹೇವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ.
1PE 1:17 ಹರೇಕ್ ಜ಼ಣಾನಿ ಚಾ಼ಲ್‌ನ ದೇಖಿನ್ ಯೋ ಬೇದ್‌ಬಾವ್‌ಕೊಂತೆ ತೀರ್ಪ್‌ಕರಾವಾಳನ ತುಮೆ ಬಾಕರಿ ಪುಕಾರವಾಳ ಹುಯಿರ‍್ಹಾತೆ ಇನಾಖ್ಹಾಜೆ ಆ ಲೋಕ್ಮ ತುಮಾರು ಅರಾಮ್‌ನು ಜಿವ್ಣನ ದನ್ನ ಡರ್‌ಭಕ್ತಿಥಿ ಕಾಡೊ.
1PE 1:18 ತುಮಾರ ಗುರುಗುರಬ್‍ಲ್ಯಥಿ ಆಯೂತೆ ಕಾಮ್‌ಕೊಂತೆ ರೀತಿರಿವಾಜ್‍ಮ ಚಾ಼ಲ್‌ಚ಼ಲಣ್‌ಥಿ ತುಮುನ ಛುಟ್ಕಾರ್‌ ಕರ‍್ಯುತೆ, ರೂಪು, ಖ್ಹೊನ್ನನಿತರಾನು ಮಟಿಜಾ಼ವಾನು ರಾಛ಼ವ್‌ಥಿಕಾಹೆ.
1PE 1:19 ಯೇಸು ಕ್ರಿಸ್ತಕರಿ ಬೋಲಾನು ಶನು ದೋಷ್‍ಕೊಂತೆ, ಶುದ್ದ ಹುಯಿರ‍್ಹುತೆ ಮೇಂಢಾನ ಚೆಲ್ಕಾನು ಕಿಮ್ಮತ್ನ ಲ್ಹೋಯಿಥೀಸ್‍ಕರಿ ತುಮುನ ಮಾಲುಮ್‍ಛಾ಼ನಿ.
1PE 1:20 ಯೊ ಜಗತ್‌ ಉಬ್‌ಜಾ಼ನ ಅಗಾಡಿಸ್ ದೆವೈಜಾ಼ವಾಳೂ ಹುಯಿರ‍್ಹಿನ್, ಆ ಖ್ಹರ್ತಿನ ಹಗಾಮ್ಮ ತುಮಾರಖ್ಹಾಜೆ ದೆಖಾಯೊ.
1PE 1:21 ಇನ ಮರ‍್ಯಾಹುಯಾಮಾಥು ಉಠಾಡಿನ್ ಇನ ಮಹಿಮೆ ದಿದಾಹುಯಾ ದೇವ್‌ಮ ತುಮೆ ಇನೇಥಿ ವಿಶ್ವಾಸ್ ಕರಾವಾಳ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ತುಮಾರಿ ವಿಶ್ವಾಸ್‍ಬಿ ಟಿವಾವ್ಣಿಬಿ ದೇವ್‍ಮಾಸ್‍ ಭೀಯುಸ್.
1PE 1:22 ತುಮೆ ಖ್ಹಾಚ ಉಪದೇಶ್‍ನ ವಿಧೇಯ ಹುಯಿರ‍್ಹಿನ್ ತುಮಾರ ಆತ್ಮಾನ ಪಾಕ್‍ ಕರಿಲಿದಾತೆ ಇನಾಖ್ಹಾಜೆ ಪಾಕ್‌ಮನ್‌ಥಿ ಭೈಯೆಭೇನೆನಿ ಪ್ಯಾರ್‌ವಾಳ ಹುಯಿರ‍್ಹೇವ್ಣು. ಅಮ್‍ರ‍್ಹವಾಪರ್, ಏಕ್‌ಥಿಏಕ್ ಪಾಕ್‍ದಿಲ್‍ಥೀಬಿ, ಛು಼ಟ ದಿಲ್‌ಥಿ ಪ್ಯಾರ್‌ಕರೊ.
1PE 1:23 ಶನಕತೊ ತುಮೆ ನವೇಥಿ ಪೈದಾ ಹುಯಿರ‍್ಹಾಸ್ತೆ ನಾಶ್ ಹುಯಿಜಾ಼ವಾನ ವಚನ್‍ಥಿಕಾಹೆ, ಕತೋಬಿ ನಾಶಹುವಾಕೊಂತೆ ವಚನ್‌ಥೀಸ್. ಯೋ ಕೆದೇಬಿ ಜಿವ್ತಜಾನ್‍ರ‍್ಹವಾಳ ದೇವ್ನಿ ವಚನ್‌ಥೀಸ್ ಉಬ್‌ಜ್ಯುತೆ.
1PE 1:24 ಶನಕತೊ ಪವಿತ್ರ ದಪ್ತರ್‌ಮ ಲೀಖೈರ‍್ಹುತಿಮ್; ಅದ್ಮಿ ಖ್ಹಾರೂಸ್ ಘಾಖ್ಹ್‌ನಿತರ ಛಾ಼. ಇನಿ ಮಹಿಮೆಖ್ಹಾರು ಘಾಖ್ಹ್‌ನು ಫೂಲ್ನಿತರ ಛಾ಼. ಘಾಖ್ಹ್‌ ಖ್ಹುಕೈಜಾ಼ಶೆ. ಇನು ಫೂಲ್ ಝ಼ಟ್‌ಕೈಜಾ಼ಶೆ.
1PE 1:25 ಕತೋಬಿ ಪ್ರಭುನಿ ವಾತ್‍ತೋಬಿ ಹಮೇಶಾಬಿ ರ‍್ಹಿಶೆ. ಯೋ ವಾತೆ ಖಿವಿಕತೊ ತುಮುನ ಬೋಲೈರ‍್ಹೀತೆ ಸುವಾರ್ತೆನಿ ವಚನಸ್.
1PE 2:1 ಇನಾಖ್ಹಾಜೆ ಖ್ಹಾರು ಖರಾಬ್ ಫನೈಬಿ ಖ್ಹಾರು, ಠಗಾವನುಬಿ, ಚೋ಼ರ್ ಫನೈಬಿ. ಪೇಟ್ನೊ ಬಳಾಪೊಬಿ, ಖ್ಹಾರುಸ್ ಗಾಳೆದ್ಯವಾನುಬಿ ತುಮಾರಮಾಥು ಕಾಡಿನಾಖೊ.
1PE 2:2 ನವೇಥಿ ಪೈದಾಹುವಾತೆ ಲಡ್ಕನಿತರ ಛಾ಼ತೆತುಮೆ ಮೋಟ ಹುವಾನಿತರ ವಚನ್‍ಕರಿ ಆತ್ಮೀಕ್‌ದೂದ್ನ ತರ್ಖ್ಹೊ. ಯೊ ಪಿದಾತೊ ರಕ್ಷಣೆ ಲಿಶು.
1PE 2:3 ಶನಕತೊ ಪ್ರಭು ಅಛ್ಛೊ಼ಕರಿ ತುಮೆ ಲಜ಼ತ್‌ ದೇಖ್ಯಾನಿ ಕರಿ ಪವಿತ್ರ ದಪ್ತರ್‌ಮ ಬೋಲಸ್ನಿ.
1PE 2:4 ತುಮೆ ಜಿವ್ತುರ‍್ಹವಾನ ಬಂಡೊ ಹುಯಿರ‍್ಹಾವಾಳಕನ ಐರ‍್ಹಾಸ್. ಯೋ ಬಂಡೊ ಅದ್ಮೆವ್‍ಥಿ ಝಿಟ್ಕಾರ‍್ಯುತೋಬಿ ದೇವ್‍ಥಿ ಚೂ಼ಣೈಗಯಹುಯುಬಿ ಘಣ ಮೋಲ್‍ನೂಬಿ ಹುಯು.
1PE 2:5 ತುಮೆ ಜಿವ್ತುಜಾನ್‍ವಾಳೊ ಬಂಡೊಹುಯಿನ್ ಆತ್ಮನು ಸಂಬಂದ್‍ವಾಳು ಮಂದಿರ್‌ ಹುವಾನಖ್ಹಾಜೆ ಬಣಾವಟ್ ಹುವ್‍ಕರಸ್, ಯೇಸು ಕ್ರಿಸ್ತಥಿ ದೇವ್ನ ಸ್ವೀಕಾರ್ ಹುವಾನಿತರಾನು ಆತ್ಮೀಕ್ ಬಲಿನ ದ್ಯವಾನ ಪರಿಶುದ್ ಯಾಜಕ್‌ನ ಖೂಮ್‌ವಾಳ ಹುಯಿರ‍್ಹಾಸ್.
1PE 2:6 ಪವಿತ್ರ ದಪ್ತರ್‌ಮ ಶಾತ್‌ ಬೋಲಸ್‍ಕತೊ “ಹಂದೇಕ್, ಚೀಯೋನ್‌ಮ ಕೋಣಾನೊಬಂಡೊ ಮ್ಹೇಲುಸ್, ಯೊ ಚೂ಼ಣೈಗಯುಹುಯು, ಘಣ ಮೋಲ್ನು ಹುಯಿರುಸ್ ಇನಾಪರ್ ವಿಶ್ವಾಸ್ ರಾಖವಾಳೊ ಕದೇಬಿ ಆಖ್ಹ್ ತೋಡಿಲಿಶೆಕೊಯ್ನಿ”
1PE 2:7 ಹಮ್ಕೆ ವಿಶ್ವಾಸ್ ಕರವಾಳ ತುಮೂನ ಯೋ ಘಣ ಮೋಲ್ನೊ ಹುಯಿರ‍್ಹೊಸ್ ಕತೋಬಿ ವಿಶ್ವಾಸ್‌ಕರ‍್ಯುಕೊಂತೆ ಇವ್ಣುನ, “ಘರ್ ಭಾಂದಾವಾಳು ಝಿಟ್ಕಾರ‍್ಯೊಹುಯೊ ಬಂಡೊಸ್ ಘಣು ಮುಖ್ಯ ಕೋಣಾನೊ ಬಂಡೊ ಹುಯೊ”.
1PE 2:8 ಅಜು಼ ಪವಿತ್ರ ದಪ್ತರ್‌ಮ ಅಜೇ಼ಕ್ಆಡಿ ಶಾತ್‌ ಲಿಖಾಸ್‌ಕತೊ “ಅದ್ಮಿ ಧೊಕ್‌ಡೈನ್ ಇವ್ಣೆ ರಡ್ಕಾನೊ ಬಂಡೊ ಹುಯಿರೋಸ್” ಇವ್ಣೆ ದೇವ್ನಿ ವಚನ್ನ ಅವಿಧೇಯ ಹುವಾತೆ ಇನಖ್ಹಾಜೆ ಯೊ ಬಂಡಾನ ಠೋಕರ್ ಲಾಗಿನ್‍ಪಟ್ಕಸ್. ಇನಖ್ಹಾಜೇಸ್ ಇವ್ಣೆ ಚೂ಼ಣೈಗಯೂತೆ.
1PE 2:9 ಕತೋಬಿ ಅಂಧಾರಮ ಛಾ಼ತೆ ತುಮುನ ಬುಲೈನ್ ಇನ ಆಶ್ಚರ್ಯನ ಉಜಾ಼ಳಮ ಮಳೈಲಿದ ಹುಯಾನ ಅದ್ಭುತ್ ಕಾಮ್ನ ಕರಾವಳ ಹೋಣುಕರಿ ತುಮೆ ಚೂ಼ಣೈಗಯುಹುಯು ಜ಼ಗ್‌ಜಾ಼ತ್‌ಬಿ, ರಾಜಾ಼ನ ಖಾನ್‌ದಾನ್ನ ಯಾಜಕ್‍ಬಿ, ಪರಿಶುಧ್ ಅದ್ಮಿಬಿ, ದೇವ್ನ ಶೊಂತ್‌ ಅದ್ಮಿಬಿ ಹುಯಿರ‍್ಹಾಸ್.
1PE 2:10 ಏಕ್‌ ಹಲ್ಲ ತುಮೆ, ದೇವ್ನ ಅದ್ಮೆವ್‍ ಕೋಥಾನಿ. ಕತೋಬಿ ತುಮೆ ಹಮ್ಕೆ ದೇವ್ನ ಅದ್ಮಿಹುಯಿರಾಸ್; ಏಕ್‌ಹಲ್ಲ ದೇವ್ನ ಗೋರ್‌ನ ಮಾಲುಮ್ ಕರಿರಾಖ್ಯಥ ಕೊಯ್ನಿ. ಕತೋಬಿ ಹಮ್ಕೆ ದೇವ್ನ ಗೋರ್‌ನ ಲೀರಾಖವಾಳ ಹುಯಿರ‍್ಹಾಸ್.
1PE 2:11 ಪ್ಯಾರ್‌ನ ದೋಸ್ತಿವೊ ಆ ಜಗತ್ಮ ಪರದೇಖ್ಹ್‌ವಾಳಬಿ ತಮಾಖ್ಹೊ ದೆಖಾವಾಳುಬಿ ಹುಯಿರಾತೆ ತುಮೆ ತುಮಾರ ಆತ್ಮಾನ ವಿರೋದ್ ಹುಯಿನ್ ಜಂಗ್ ಭೀಡಾತೆ ಶರೀರ್‌ನು ನಿಕಳ್ಯ ಜಾನ್‌ಥಿ ದೂರ್ ರ‍್ಹೇವ್ಣುಕರಿ ಮೇ ತುಮುನ ಗಿಂಗೈಲೆವುಸ್.
1PE 2:12 ತುಮಾರಿ ಚಾ಼ಲ್‍ಚ಼ಲಣ್‍ ಅಲ್ಹಾವ್‌ ಅದ್ಮಿವ್‌ನ ಇಚ಼್‌ಮ ಯೋಗ್ಯಹುಯಿರ‍್ಹವಾದೆ, ತದೆ ಇವ್ಣೆ ಖೆವಿಸ್ ವಾತ್ನಿ ಬಾರೇಮ ತುಮುನ ಖರಾಬ್‍ಕರಿ ಚಾ಼ವ್‌ಣ್ಯ ಕರಾಸ್ಕಿ ಯೋಸ್ ತುಮಾರಿ ವಾತೆಮ ತುಮಾರಿ ಅಛ್ಛಿ ಚಾ಼ಲ್‍ಚ಼ಲಣ್ಣಾ ಡೋಳೆಖ್ಹು ದೇಖಿನ್, ದೇವ್ ಆವನ ದನೂಮ ಅಪ್ಣುನ ಇವ್ಣೆ ಖ್ಹರಾವ್‌ಶೆ.
1PE 2:13 ಆ ಜಗತ್‌ನು ಅದಿಕಾರಿ ನೇಮಕ್ ಕರ‍್ಯುತೆ ಹರೇಕ್ ಒಪ್ಪಂದನಾಬಿ ಪ್ರಭುನಖ್ಹಾಜೆ ತುಮೆ ಅಧೀನ್‍ಹುವೊ. ಅಖ್ಖಾಸ್‌ಪರ್ ಅದಿಕಾರಿ ಹುಯಿರೋತೆ ರಾಜ಼ನಾಬಿ ಅಧೀನ್‌ರ‍್ಹವೊ,
1PE 2:14 ಅಜು಼ ರಾಜ಼ ಮೋಕ್‌ಲಸ್ತೆ ಅಧಿಕಾರಿಯೇನ ಗಲತ್‌ ಕರಾವಾಳನ ನಿಶತ್‌ದ್ಯವಾನಬಿ ಅಛ್ಛು಼ಕರಾವಾಳನ ಹುಮ್ಮಖ್ಹ್ ದ್ಯವಾನ ಇವ್ಣೆ ಮೋಕ್‌ಲೈರಾಸ್ ಕರಿ ಖ್ಹಮ್‌ಜಿನ್‌ ಇವ್ಣುನ ಅಧೀನ್‍ಹುವೊ.
1PE 2:15 ತುಮೆ ಅಛ್ಛು಼ಕರಾನಿ ವಖ್ಹ್‌ತೆ ತುಮಾರಿ ಬಾರೇಮ ಖರಾಬ್ ವಾತೆಬೋಲಾನು ಬಿಣ್‍ಅಕ್ಲಿ ಅದ್ಮಿವ್‌ನ ಮ್ಹೋಡು ಮುಚಾ಼ನಿತರ ಕರಾನುಸ್ ದೇವ್ನಿ ಖ್ಹೂಜ಼್ ಹುಯಿರ‍್ಹಿಸ್.
1PE 2:16 ಛುಟ್ಕಾರ್ ಲೀಲೆವೊ, ಕತೋಬಿ ಖರಾಬ್ ಫನೈನ ಲಪಾಡನಖ್ಹಾಜೆ ತುಮಾರಿ ಛುಟ್ಕಾರ್‌ನ ನಕೊ ಉಪಯೋಗ್‍ಕರೊ. ಕತೋಬಿ ತುಮೆ ದೇವ್ನ ಸೇವಕ್‌ನಿತರ ಚಾ಼ಲಿಲೆವೊ.
1PE 2:17 ಖ್ಹಾರಸ್ನ ಮರ್ಯಾದಿ ಕರೊ ವಿಶ್ವಾಸಿ ಭೇನೆ ಭೈಯೇವೊನ ಪ್ಯಾರ್‌ಕರೊ. ದೇವ್ನ ಡರೊ. ಅಜು಼ ರಾಜಾ಼ನಬಿ ಮರ್ಯಾದಿ ದೆವೊ.
1PE 2:18 ಸೇವಕ್ ಹುಯಿರ‍್ಹಾತೆ, ತುಮೆ ತುಮಾರ ಯಜಮಾನ್ನ ಪೂರ ಮರ್ಯಾದಿಥಿ ಅಧೀನ್ ಹುಯಿರ‍್ಹೇವೊ. ಶೇದೇವ್ ರ‍್ಹವಾಳಾಬಿ ಅಛ್ಛಿ಼ಸೋಚ್‌ರ‍್ಹವಾಳನ ಖಲಿ ಕಾಹೆತೆ ಮೊಂಡಿ ಬುದ್ದಿವಾಳನಾಬಿ ವಿಧೇಯ ಹುಯಿರೇವೊ.
1PE 2:19 ಎಕ್‍ಜ಼ಣೊ ಅನ್ಯಾಮ್‍ಥಿ ಖ್ಹತಾವಾಳೊ ಹುಯಿರ‍್ಹಿನ್ ದೇವ್ ದೇಕ್‌ಶೆಕರಿ ಇನ ಖ್ಹಮಾಳಿಲಿದೋತೊ, ಯೋ ಖ್ಹರಾವ್ಣಿನ ಲ್ಹಾಯಕ್ ಹುಯಿರ‍್ಹೊಸ್.
1PE 2:20 ಗಲತ್‍ಕರೀನ್ ಘುಖ್ಹ್‌ತ ಖಾವಾಮ ತುಮೆ ಖ್ಹಮಾಳಿಲಿದಾತೊ ಇಂಥಿ ಶನಿ ಕೀರತ್ ಮಳ್ಯು? ಕತೋಬಿ ಅಛ್ಛು಼ಕರಿನ್ ಖ್ಹತ್‍ವಾಮ ತುಮೆ ಖ್ಹಮಾಳಿಲಿದಾತೊ ಆ, ದೇವ್ನ ಖುಷಿ ಕರಾವಸ್. ದೇವ್ ತುಮುನ ಪಸಂದ್‌ ಕರ್ಶೆ.
1PE 2:21 ಅನಖ್ಹಾಜೆಸ್ ತುಮೆ ಬುಲೈರ‍್ಹಾಸ್ತೆ.ಕ್ರಿಸ್ತ ಜಿನುಬಿ ತುಮಾರಖ್ಹಾಜೆ ಖ್ಹತಾಪ್ಣಿಪಡಿನ್, ತುಮೆ ಇನ ಖೋಜ಼್‌ನಿ ಖ್ಹಣೇದ್‍ಮ ಚಾ಼ಲ್‌ನುಕರಿ ತುಮುನ ಏಕ್‌ ಸಾಕ್ಷಿನ ವತಾಳಿನ್ ಜೈರ‍್ಹೊಸ್.
1PE 2:22 ಯೋ ಶನು ಪಾಪ್‌ಬಿ ಕರ‍್ಯೊಕೊಯ್ನಿ, ಇನ ಮ್ಹೋಡಾಮಾಥಿ ಖೆವಿ ಠಗಾವಾನಿ ವಾತ್‍ಬಿ ಮಳಿಕೊಯ್ನಿ.
1PE 2:23 ಗಾಳೆ ದ್ಯವಾಳನ ಪಾಛೊ಼ ಗಾಳೆದಿದೊಕೊಯ್ನಿ. ಯೊ ಖ್ಹತಾಪ್ಣಿ ಕರಾನಿ ವಖ್ಹ್‌ತೆ ಕಿನಾಬಿ ಡರಾಯೊಕೊಂತೆ, ನ್ಯಾವ್‌ಥಿ ತೀರ್ಪ್ ಕರಾವಾಳನ ಇನ ಕಾಮ್ನ ದಿನಾಖಿದಿದೊ.
1PE 2:24 ಅಪ್ಣೆ ಅಪ್ಣ ಪಾಪ್ನ ಭಾಗ್ನ ಮರೀನ್ ನೀತಿವಾಳ ಹುಯಿನ್ ಬಚಾ಼ನಿತರ ಅಪ್ಣ ಪಾಪ್ನ ಯೋಸ್ ಇನ ಶರೀರ್‌ಪರ್‌ ಢೊಯ್ಲಿನ್ ಶಿಲ್‌ಬೆಪರ್ ಮರಿಗೊ. ಇನ ಘಾವ್‍ಥಿ ತುಮುನ ಅಛ್ಛು಼ಹುಯು.
1PE 2:25 ಶನಕತೊ ತುಮೆ ವಾಟ್‌ ಭೈಕಿಗಾತೆ ಮೇಂಢಾನಿತರ ಹುಯಿರ‍್ಹಾಸ್ ಕತೋಬಿ ಹಮ್ಕೆ ತುಮೆ ಪಾಛ಼ ಫರೀನ್ ತುಮಾರ ಆತ್ಮಾನ ಪಾಳವಾಳಕನಾಬಿ ಕುರುಬ ಹುಯಿರ‍್ಹಾವಾಳಕನ ಆಯಿರ‍್ಹಾಸ್.
1PE 3:1 ಇಮ್ನಿಸ್ ಪರಕ್ಮ ಬಾವ್ಣೆವೊ, ತುಮಾರ ಬಾವ್ರಿನಿ ದಾಬುಕ್ಮ ರ‍್ಹವೊ. ಇವ್ಣಾಮ ಥೋಡುಜ಼ಣು ದೇವ್ನಿ ವಚನ್ನ ಅವಿಧೇಯ ಹುಯಿರೂತೋಬಿ, ತುಮಾರ ಅಛ಼್ಛ ಕಾಮ್ನ ದೇಖಾಥೀಸ್ ಇವ್ಣೆ ವಿಶ್ವಾಸ್‌ಮ ಆವಾನಿತರ ಉಶೆ. ಇನಾಖ್ಹಾಜೆ ತುಮೆ ಏಕ್‌ ವಾತ್‍ಬಿ ಬೋಲ್ನುನಾತೆ ರ‍್ಹವಾನು ಜ಼ರೂರತ್ ಛಾ಼.
1PE 3:2 ಶನಕತೊ ಇವ್ಣೆ ತುಮಾರಿ ಪರಿಶುದ್ ಅಜು಼ ಇಜ಼್ಜತ್‌ನಿ ಚಾ಼ಲ್‌ಥೀಸ್ ಅಛ್ಛಿವಾಟ್‍ಪರ್ ಆವ್‌ಶೆ.
1PE 3:3 ಚೋ಼ಟಿ ಗೂಥಿಲ್ಯಾವಾನೂಬಿ ಖ್ಹೊನ್ನುಖ್ಹರಪ್‍ಬಿ ಅಜು಼ ಅಛ಼್ಛು ಲುಂಗ್‌ಡು ಫೇರಾನುಬಿ ಆ ಅಖ್ಖು ಭಾರ್‌ಲ್ಯು ಶನ್‍ಗಾರ್‌ಸ್ ಯೋ ತುಮಾರು ಪೇರ್‌ವಾಖ್ಹ್ ನಾ ಹುಯಿರ‍್ಹೇಣು ಎತ್ರೇಸ್.
1PE 3:4 ಕತೋಬಿ ಅನಬದಲ್ ದೇವ್ನ ಡೋಳಾಮ ಘಣ ಮೋಲ್ನುಬಿ ಅಜು಼ ಕದೇಬಿ ರ‍್ಹವಾನುಬಿ ಹುಯಿರ‍್ಹುತೆ ಶೇದೇವ್‍ಬಿ ಶಾಂತಿನೊ ಮನ್ ತುಮಾರ ಮಹಿನ ದಿಲ್‌ನು ಶನ್‌ಗಾರ್ ಹುಯಿರ‍್ಹವಾದೆ.
1PE 3:5 ಫಾಚ಼್‌ಲ್ಯಾ ಹಗಾಮ್ಮ ದೇವ್‌ಪರ್‌ ಭರೋಖ್ಹೊ ರಾಖಿಮ್ಹೆಲ್ಯುಥುತೆ ಭಕ್ತೆ ಹುಯಿರ‍್ಹಿಥಿತೆ ತಯೇಡಖ್ಹಾರು ಜಿನು ಅಮ್ಮಸ್ ಇವ್ಣು ಇವ್ಣೇಸ್ ಬಾವ್ರಿಯೇವ್‍ನಿ ದಾಬುಕ್ಮ ರ‍್ಹೀನ್ ಶನ್‌ಗಾರ್ ಕರಿಲಿದಿಯೆಥಿ.
1PE 3:6 ಸಾರ ಅಬ್ರಹಾಮ್‌ನ ವಿಧೇಯ ಹುಯಿರ‍್ಹಿನ್ ಇನ ಯಜಮಾನ್‍ಕರಿ ಬೋಲಿ. ತುಮೆ ಅಛ್ಛು಼ಕರಾವಾಳಿ ಹುಯಿರ‍್ಹಿನ್ ಶನಿ ಡರ್‌ ಝ಼ಪಕ್ಣಿಮ ನಾಪಡವಳಿ ರ‍್ಹೀಯೆತೊ ತುಮೆ ಸಾರನಿ ಛೋ಼ರಿಯೇ ಹುಯಿರ‍್ಹಿಶು,
1PE 3:7 ಅಮ್ನಿಸ್ ಪರಕ್ಮ ಬಾವ್ರಿವೊ, ತಯೇಡ ತುಮಾರೇಥೀಬಿ ಕಮ್‌ಜೋ಼ರಿಕರಿ ಮಾಲುಮ್‌ಕರಿನ್, ತುಮೆ ತುಮಾರಿ ಬಾವ್ಣೆನ ಜೋ಼ಡ್ಮ ಅಛ್ಛು಼ ಅಕ್ಕಲ್‍ಥಿ ಚಾ಼ಲಿಲೇವೊ, ಇವ್ಣೆ ಹಮೇಶಾನಿ ಜಿ಼ಂದ್‌ಗೀನಿ ವರಾನ ತುಮಾರಿ ಜೋ಼ಡ್ಮಾಸ್ ಲಿಶೆಕರಿ ಮಾಲುಮ್‌ ಕರಿಲೀನ್ ಇವ್ಣುನ ಮರ್ಯಾದಿಕರೊ. ಅಮ್ ಕರ‍್ಯತೊ ತುಮಾರಿ ಪ್ರಾರ್ಥನೆನ ಅಡ್ಡಿ ಉಶೆಕೊಯ್ನಿ.
1PE 3:8 ಇನಖ್ಹಾಜೆ ತುಮೆಖ್ಹಾರು ಏಕ್‌ ದಿಲ್‌ವಾಳ ಹುಯಿರ‍್ಹಿನ್ ಆರ್‌ಗೋರ್‌ ಕರಾವಾಳ ಹುಯಿನ್ ಜಿವೊ; ಏಕ್‌ಥಿ ಏಕ್‌ ಮಾಲುಮ್ ಕರಿಲ್ಯಾವಾನ ಕೊಶೀಷ್ ಕರೊ. ಏಕ್‌ಥಿ ಏಕ್‌ ಭೈಯೆ ಭೇನೆನಿತರ ಪ್ಯಾರ್‌ಕರೊ. ಅಜು಼ ಗೋರ್‌ ಕರವಾಳು ಶೇದೇವ್‍ಬಿ ಹುಯಿರ‍್ಹೇವೊ.
1PE 3:9 ಖರಾಬ್‌ನ ಖರಾಬ್, ಚಾ಼ವ್‍ಣ್ಯನ ಚಾ಼ವ್‌ಣ್ಯ ನಾಕರ‍್ನುತೆ ಆಶೀರ್ವಾದ್‌ ಕರೊ ಅನಖ್ಹಾಜೆಸ್ ದೇವ್ನೆ ತುಮುನ ಬುಲೈರಾಖ್ಯೋಸ್ನಿ. ಅಮ್ ಕರಾವಾಳ ಹುಯಿರ‍್ಹಾತೊ ತುಮೆ ಆಶೀರ್ವಾದ್‌ನ ಹಕ್‌ಥಿ ಲೀಲಿಶು.
1PE 3:10 ಶನಕತೊ ಪವಿತ್ರ ದಪ್ತರ್ ಶಾತ್ ಬೊಲಸ್‍ಕತೊ, “ಆ ಜಾನ್ನ ಪ್ಯಾರ್ ಕರ್ತೊಹುಯಿನ್ ಅಛ್ಛದನ್ನ ದೇಖಾನ ಆಖ್ಹ್ ಕರಾವಾಳೊ ಖರಾಬ್ ವಾತ್ ನಕೊ ಬೋಲಾದೆ ಝೂ಼ಟಿ ನಕೊ ಬೋಲಾದೆ.
1PE 3:11 ಇವ್ಣೆ ಯೊ ಖರಾಬ್‌ನ ಮ್ಹೇಲಿನ್ ಅಛ್ಛಾ಼ನ ಕರಾದೆ ಸಮಾಧಾನ್ನ ಢೂಂಡಿನ್ ಇನಾಖ್ಹಾಜೆ ಕೋಶಿಶ್ ಕರಾದೆ.
1PE 3:12 ಶನಕತೊ ನೀತಿವಾಳಪರ್ ಪ್ರಭುನಿ ನಿಘ್ಯ ಛಾ಼. ಅಜು಼ ಯೊ ಇವ್ಣಿ ಬಿಂತಿನ ಕಾನ್‍ದೇಸ್. ಕತೋಬಿ ಖರಾಬ್ ಕರವಾಳನ ಪ್ರಭು ಮ್ಹೋಡು ಫರೈಲೇಸ್.
1PE 3:13 ತುಮೆ ಕದೇಬಿ ಅಛ಼್ಛುಕರಾನ ದಿಲ್‌ಲಗಾಡವಾಳು ಹುಯಿರ‍್ಹಾತೊ ತುಮುನ ಕೇಡ್ ಕರಾವಾಳು ಕೋಣ್‍ರ‍್ಹಿಶೆ?
1PE 3:14 ಏಕ್‌ ವಖ್ಹತ್ ತುಮೆ ನೀತಿನ ಖ್ಹಾಜೆಸ್ ಖ್ಹತಾಪ್ಣಿ ಪಡ್ಯಾತೊ ತುಮೆ ಧನ್ಯ ಹುಯಿರ‍್ಹಾಸ್. ಖಿವಿ ಧಮ್ಕಿನ ತುಮೆ ಡರೊನಕೊ, ಅಜು಼ ವೇಚ಼್‌ಣೆ ನಕೊಕರೊ.
1PE 3:15 ಕತೋಬಿ ಕ್ರಿಸ್ತನ ಪ್ರಭುಕರಿ ತುಮಾರ ದಿಲ್ಮ ಜ಼ತನ್‌ಕರೊ. ತುಮಾರಮ ಛಾ಼ತೆ ಭರೋಖ್ಹಾನ ಆಧಾರಶಾತ್‍ಕರಿ ತುಮುನ ಪುಛಾ಼ವವಾಳ ಹರೇಕ್ ಜ಼ಣಾನ ಜ಼ವಾಬ್‍ದ್ಯವಾನ ಕದೇಬಿ ತಯಾರ್ ರ‍್ಹವೊ. ಕತೋಬಿ ಅನ ಶೇದೇವ್ ಹುಯಿರ‍್ಹಿನ್ ಮರ್ಯಾದಿಥಿ ಬೋಲೊ.
1PE 3:16 ಅಜು಼ ಅಛ಼್ಛು ದಿಲ್‌ನಿಸಾಕ್ಷಿವಾಳ ಹುಯಿ‍ರ‍್ಹೆವೊ. ತದೆ ತುಮೆ ಖರಾಬ್‌ನ ಕರಾವಾಳಕರಿ ತುಮಾರಿ ಬಾರೇಮ ಖರಾಬ್ ವಾತೆ ಬೋಲಿನ್ ಕ್ರಿಸ್ತಮಛಾ಼ತೆ ತುಮಾರಿ ಅಛ್ಛಿ಼ಚಾ಼ಲ್‍ನಿ ಬಾರೇಮ ಖರಾಬ್‍ವಾತ್‍ ಬೋಲಾವಾಳು ತುಮುನ ಚಾ಼ವ್‍ಣ್ಯ ಕಾಡಾನ ಖ್ಹರ್‌ಮೈಜಾ಼ಶೆ.
1PE 3:17 ಖರಾಬ್ ಕಾಮ್ ಕರಾಥೀಬಿ ದೇವ್ನಿ ಮರ್ಜಿನಿ ಘೋಣಿ ಅಛ಼್ಛಚಾ಼ಲ್ ಚಾ಼ಲವಾಳ ಹುಯಿರ‍್ಹಿನ್, ಖ್ಹತಾಪ್ಣಿ ಪಡಾನುಸ್ ಅಛ್ಛು಼.
1PE 3:18 ಕ್ರಿಸ್ತಬಿ ನೀತಿವಾಳೊ ಹುಯಿರ‍್ಹಿನ್, ಅನೀತಿವಾಳಾನ ಖ್ಹಾಜೆ ಜಾನ್‍ದೀನ್ ಅಪ್ಣುನ ದೇವ್‌ಕನ ಮಳಾವನಖ್ಹಾಜೆ ಎಕ್ಕಸ್ ವಖ್ಹತ್ ಪಾಪ್ನ ಮಟಾವನಖ್ಹಾಜೆ ಖ್ಹತಾಪ್ಣಿ ಪಡೀನ್ ಶರೀರ್‌ಮರ‍್ಹೀನ್ ಆತ್ಮಮ ಜಿವವಾಳೊ ಹುಯೊ.
1PE 3:19 ಆನಾಹುಯಿನ್ ಯೋ ಆತ್ಮನೊ ರೂಪ್‍ಲೀನ್ ಜೇಲ್‌ಮಥೂತೆ ಅಖ್ಖಾಆತ್ಮಕನ ಜೈ಼ನ್ ಸುವಾರ್ತೆನ ಬೋಲಿ ಖ್ಹಮ್‌ಜಾ಼ಡ್ಯೊ.
1PE 3:20 ಕತೊ ಅಗ್‍ಲ್ಯ ಹಗಾಮ್ಮ ನೋಹ ಜ಼ಹಾಜ಼್‌ ಭಾಂದಾನಿ ವಖ್ಹತ್‌ಮ ದೇವ್ ದೀರ್ಘಶಾಂತಿಥಿ ಟಿವೈರ‍್ಹವಾನಿ ವಖ್ಹತ್‌ಮ ಇವ್ಣೆ ಇನ ಅವಿಧೇಯ ಹುಯಿರ‍್ಹುಥು. ಯೋ ಜ಼ಹಾಜ಼್‍ಮ ಥೂತೆ ಆಟ್ ಅದ್ಮಿ ಖಲಿ ಪಾಣಿಮಾಥು ಬಚ್ಯು.
1PE 3:21 ಯೋ ಹಮ್ಕೆ ತುಮುನ ಬಚಾ಼ಡನು ಬ್ಯಾಪ್ತಿಸ್ಮನು ಏಕ್‌ ರೂಪ್ ಹುಯಿರ‍್ಹುಸ್. ಆ ಖಲಿ ಶರೀರ್‌ನು ಮೇಲೊ ಧೊವಾಕೊಯ್ನಿ. ಕತೋಬಿ ಆ ಅಛ಼್ಛು ದಿಲ್ನಿಸಾಕ್ಷಿಥಿ ದೇವ್ನಿ ಜೋ಼ಡ್ಮಕರಾನಿ ವಾಗ್ದಾನ್‌ ಹುಯಿರ‍್ಹೀಸ್. ಅಜು಼ ಯೇಸುಕ್ರಿಸ್ತ ಪಾಛು಼ಜಿವ್ತು ಉಠಾಥಿಸ್ ಹಮ್ಕೆ ಆ ಅಪ್ಣುನ ರಕ್ಷಣೆದಿಶೆ.
1PE 3:22 ಹಮ್ಕೆ ಯೇಸು ಪರ್‌ಲೋಕ್ನ ಜೈ಼ನ್ ದೇವ್ನ ಖಾವಿಬಾಜು಼ಮ ಬೇಠೋಸ್. ಖ್ಹಾರುಸ್ ದೇವ್‌ದೂತರ್‌ಬಿ ಪರಲೋಕ್ನು ಅದಿಕಾರಿಖ್ಹಾರು ಅಜು಼ ಶಕತ್‍ಖ್ಹಾರನ ಉಪ್ಪರ್ ಯೊ ರಾಜ಼್‌ಭಾರ್ ಚ಼ಲವ್‍ಕರಸ್.
1PE 4:1 ಕ್ರಿಸ್ತನೆ ಅಪ್ಣಖ್ಹಾಜೆ ಇನ ಶರೀರ್‌ಮ ಲತಾಡ ಪಡ್ಯುತೆಖ್ಹಾಜೆ ತುಮೇಬಿ ಜಿನು ಯೋ ದಿಲ್‌ವಾಳ ಹುಯಿನ್ ಖ್ಹತಾಪ್ಣಿಲ್ಯವಾನ ತಯಾರ್‌ಹುವೋ. ಶನಕತೊ ಶರೀರ್‌ಮ ಖ್ಹತಾಪ್ಣಿ ಪಡ್ಯೊಹುಯೊ, ಪಾಪ್ ಕರಾನು ಭಿರಾಖವಾಳೊ ಹುಯಿರ‍್ಹೊಸ್.
1PE 4:2 ಇನಖ್ಹಾಜೆ ಛಾ಼ತೆ ಇನ ಜಿವ್ಣನ ಹಗಾಮ್ಮ ಬಿಜೂ಼ಬಿ ಅದ್ಮಿಯೇವ್‌ನಿ ತರಖ್ಹ್‌ನಿ ಪರಕ್ಮ ಜಿವ್ಣುನಾತೆ ದೇವ್ನಿ ಮರ್ಜಿನಿ ಪರಕ್ಮ ಜಿವ್ಣುಕರ‍್ನು.
1PE 4:3 ತುಮೆ ಖ್ಹರಮ್‌ಕೊಂತೆ ರ‍್ಹವಾನು, ನಿಕ್ಳಜಾನ್, ಪಿಯಾನು, ಜಾ಼ಖ್ಹತ್‍ಖರ್ಚ್, ಕಯೆಪ್‍ಛ಼ಡಾವನು, ಕಚಿಂಡ್‍ನಿತರನು ಮೂರತ್ನಿಫೂಜ಼. ಆಸ್ ಖ್ಹಾರು ಚ಼ಲಾವಮಾಬಿ ಯೆಹೂದ್ಯರ್‌ಕಾಹೆತೆ ಅದ್ಮಿನ ಲ್ಹಾಯಕ್‍ರ‍್ಹವಾನು ಖರಾಬ್‌ಕಾಮ್‍ಖ್ಹಾರು ಕರಮಾಬಿ, ವಖ್ಹತ್ ಕಾಡ್ಯತೆ ಬಶ್‌.
1PE 4:4 ಇವ್ಣೆ ಕರಾಸ್ತೆ ಹೋಯಿಕೊಂತೆಯೆತ್ರೆ ಜಿವ್ಣಮ ತುಮೆ ಮಳಕೊಂತೆ ಇನಖ್ಹಾಜೆ ಇವ್ಣೆ ಆಶ್ಚರ್ಯಪಡಿನ್ ತುಮುನ ಚಿಂಘಾವ್ಣಿ ಕಾಡಸ್‌.
1PE 4:5 ಇವ್ಣೆ ಬಚಿರ‍್ಹಾವಳನಬಿ ಮರ‍್ಯಹುಯಾನಬಿ ನ್ಯಾವ್‌ ಫೇಡಾನ ತಯಾರ್‌ರ‍್ಹಾವಳ ದೇವ್ನ ಜ಼ವಾಬ್ ದೇವ್ಣು.
1PE 4:6 ಮರಿರ‍್ಹಾವಳು ಅದ್ಮಿನಿಜಾತ್ಮ ಆವಾನು ಮರಣ್‌ಕರಿ ತೀರ್ಪ್‌ನ ಶರೀರ್‌ಮರ‍್ಹವಾನಿ ವಖ್ಹ್‌ತೆ ಲೀರಾಖ್ಯುಸ್. ಇವ್ಣೆ ಆತ್ಮಾನಿ ಸಂಬಂದನಿ ಪರಕ್ಮ ದೇವ್ನಿತರ ಜಿವ್ಣುಕರಿ ಇವ್ಣುನಾಬಿ ಸುವಾರ್ತೆ ಬೋಲಾಯು.
1PE 4:7 ಖ್ಹಾರಸ್‌ನು ಖ್ಹರ್ತಿನು ಹಗಾಮ್ ಖನ್ನೆ ಹುಯಿರ‍್ಹುಸ್. ಅನಖ್ಹಾಜೇಥಿ ತುಮಾರು ತುಮೆ ದಾಬುಕ್ಮ ರ‍್ಹವಾಳ ಹುಯಿನ್ ಪ್ರಾರ್ಥನೆ ಕರಾನ ತಾಖತ್‍ವಾಳ ಹುಯಿ‍ರ‍್ಹೆವೊ.
1PE 4:8 ಖ್ಹಾರೇಥಿ ಪಹಿಲೆ ತುಮಾರ ತುಮಾರಮ ಖ್ಹಾಚಿನಿತರಾನಿ ಪ್ಯಾರ್‌ರ‍್ಹವಾದೆ. ಪ್ಯಾರ್ ಘಣು ಪಾಪ್‌ಖ್ಹಾರು ಮೂಚಾ಼ಸ್.
1PE 4:9 ಏಕ್‌ಥಿ ಏಕ್‌ ಭಣಕ್ಣುನಾತೆ ಮ್ಹೇಮಾನ್ನ ಉಪಚಾರ್ ಕರೊ.
1PE 4:10 ತುಮೆ ಅಖ್ಖು ದೇವ್ನಿ ಅಲಕ್ ಅಲಕ್ ವರಾನಿ ಬಾರೇಮ ಅಛ್ಛೊ಼ ಸೇವಕ್‌ಹುಯಿನ್ ಹರೇಕ್‍ಜ಼ಣು ಇವ್ಣೆ ಲಿದಾತೆ ವಾರ್‌ಖ್ಹಾನಿ ವರಾನ ಅಖ್ಖಾಸ್ನಿ ಸೇವೆನಖ್ಹಾಜೆ ಉಪಯೋಗ್ ಕರಿಲ್ಯವಾದೆ.
1PE 4:11 ಏಕ್ಜ಼ಣೊ ಬೋಧನೆಕರಾವಳೊ ರ‍್ಹಯೊತೊ ದೇವ್ನಿ ವಚನ್ನ ಪಾಡಿಬೋಲವಾಳೊ ಹುಯಿನ್ ಬೋಧನೆ ಕರಾದೆ. ಏಕ್‍ಜ಼ಣೊ ಸೇವೆ ಕರಾವಾಳೊ ರ‍್ಹಯೋತೊ ದೇವ್ ದೇಸ್ತೆ ಶಕತ್ನಿಪರಕ್ಮ ಕರಾದೆ. ಆ ಅಖ್ಖೇಥಿಬಿ ಕ್ರಿಸ್ತಯೇಸುಥಿ ದೇವ್ನ ಧನ್ಯವಾದ್ ಹುವಾಸ್. ಕ್ರಿಸ್ತ ಯೇಸುನ ರಾಜ಼್‌ಭಾರ್‌ಬಿ ಮಹಿಮೆಬಿ, ಶಕತ್‌ಬಿ ಜ಼ಗ್‌ಜ಼ಮಾನಮಾಬಿ ಇನಾಸ್ ರ‍್ಹವಾದೆ ಆಮೆನ್.
1PE 4:12 ಮಾರ ಪ್ಯಾರ್‌ನ ದೋಸ್ತಿವೊ, ತುಮುನ ಛಾ಼ಣನಖ್ಹಾಜೆ ಆವ್‌ಶೇತೆ ದುಖ್‌ನು ತರೀಪ್ಷ ದೇಖಿನ್ ತುಮೆ ಆಶ್ಚರ್ಯ ನಕೊ ಖಾವೊ. ಮಾಲುಮಸ್‍ಕೊಂತೆ ಶಾತ್ಕಿ ಚಾ಼ಲ್ಯು ಕರಿ ಸೋಚೊನಕೊ.
1PE 4:13 ಕತೋಬಿ ತುಮೆ ಕೆತ್ರೆಪರಕ್ಮ ಕ್ರಿಸ್ತನಿ ಖ್ಹತಾಪ್ಣಿವ್‌ಮ ಭಾಗ್‌ವಾಳ ಹುಯಿರಾಸ್ಕಿ ಎತ್ರಸ್‍ಪರಕ್ಮ ಖುಷಿ ಪಡೊ. ಇನಖ್ಹಾಜೆ ಯೋ ಮಹಿಮೆಥಿ ಆವಾದಿನ್ ತುಮೆ ದೇಖಿನ್ ಘಣಿ ಖುಷಿಥಿ ಭರೈಜಾಶು.
1PE 4:14 ತುಮೆ ಕ್ರಿಸ್ತನಿ ನಾಮ್ನಖ್ಹಾಜೆ ಚಿಂಘಾವ್ಣಿನ ಶುಶತ್ ಹುಯೂತೊ ಧನ್ಯ. ಮಹಿಮೆನು ಆತ್ಮ ಹುಯಿರ‍್ಹೋತೆ ದೇವ್ನು ಆತ್ಮ ತುಮಾರಮ ತಳ್‍ಗಾಠಿ ಛಾ಼ನಿ.
1PE 4:15 ತುಮಾರಮ ಕೋಣ್‌ತೋಬಿ ಖೂನಿ, ಚೋ಼ರ್, ಖರಾಬ್, ಬಿಜಾ಼ನ ಕಾಮ್ಮ ಮುಡ್‌ಕ್ಯು ಘಾಲವಾಳೊ ಹುಯಿನ್ ನಿಶತ್‍ಖಾವಳೊ ನಾಹುಯಿರ‍್ಹೇವ್ಣು.
1PE 4:16 ಕತೋಬಿ ಕ್ರಿಸ್ತವಾಳೊಹುಯಿನ್ ಖ್ಹತಾಪ್ಣಿ ಪಡ್ಯೊತೊ ಖ್ಹರಮ್‌ ನಾಖಾವ್ಣುತೆ ಯೋ ಕ್ರಿಸ್ತನ ನಾಮ್‍ಥೀಸ್ ದೇವ್ನ ಖ್ಹರಾವಾದೆ.
1PE 4:17 ಶನಕತೊ ನ್ಯಾವ್‍ನಿ ತೀರ್ಪ್‌ನಿ ವಖ್ಹತ್ ಐರ‍್ಹೀಸ್. ಅಜು಼ ಯೋ ಫೇಡ್‌ ದೇವ್‌ಮ ಘರ್‌ಮಾಸ್ ಶುರು ಹುಯಿರ‍್ಹುಸ್. ಶುರುಹುಯುತೊ, ದೇವ್ನಿ ಸುವಾರ್ತೆನ ನಂಬಾಕೊಂತೆ ಇನಿ ಜೋ಼ಡ್ಮ ಕಿಮ್ ಖ್ಹರ್ತಿಉಷೆ?
1PE 4:18 ನೀತಿನ ಅದ್ಮಿವೊ ರಕ್ಷಣೆ ಲ್ಯವಾನು ಲತಾಡ ಹುಯೂತೊ ಭಕ್ತಿಕೊಂತೆ ಇನಾಬಿ ಅಜು಼ ಪಾಪಿನ ರಕ್ಷಣೆ ಲ್ಯಾವಾನು ಕಿಮ್? ಕರಿ ವಚನ್‌ಮ ಲೀಖೈರ‍್ಹುಸ್.
1PE 4:19 ಅಮ್‍ರ‍್ಹವಾಪರ್ ದೇವ್ನಿ ಮರ್ಜಿನಿ ಘೋಣಿ ಖ್ಹತಾವಾಳು ಅಛ್ಛಾ಼ನ ಕರಾವಳುಹುಯಿನ್, ಇವ್ಣು ಇವ್ಣೇಸ್ ಆತ್ಮಾವ್‌ಮ ವಿಶ್ವಾಸ್ ಉಬ್‌ಜಾ಼ವವಾಳೊ ಪ್ರಭುನ ದಿನಾಖದೆ.
1PE 5:1 ಸಭೆನ ಶಾಣವೊ, ಜೋಡ್ಮಶಾಣೊ ಹುಯಿರ‍್ಹೋತೆ ಮೇ ಕ್ರಿಸ್ತನು ಖ್ಹತಾಪ್ಣಿ ಡೋಳೇಥಿ ದೇಖೆಹುಯೊ. ಅಜು಼ ಆವ್‌ಶೇತೆ ಮಹಿಮೆಮ ಭಾಗ್‌ವಾಳೊ ಹುಯಿನ್ ತುಮುನ ಹುಮ್ಮಖ್ಹ್‌ದೀನ್ ಶಾತ್‌ ಬೋಲಿಲೆವುಸ್‌ಕತೊ,
1PE 5:2 ತುಮುನ ದೆವೈರ‍್ಹೂಸ್ತೆ ದೇವ್ನ ಮಂಧಾನ ಕಾವ್ಲಿಕರೊ. ಜು಼ಲಮ್‌ಥಿ ಕಾಹೆ ದೇವ್ನಿ ಮರ್ಜಿನಿತರ ಪಸಂದ್‍ನಿ ಘೋಣಿ, ರಪ್ಯಾನಿ ಖರಾಬ್ ಆಖ್ಹ್‌ಥಿ ಕಾಹೆ ಖ್ಹಾಚ ದಿಲ್‌ಥಿ ಕಾವ್ಲಿಕರೊ.
1PE 5:3 ತುಮಾರಿ ಚ಼ಪ್ಪಣ್‌ಮ ದೆವೈರ‍್ಹೂಸ್ತೆ ಇವ್ಣಪರ್ ರಾಜ಼್‌ಭಾರ್ ನಾಚ಼ಲಾವ್ಣುತೆ ಮಂಧಾನ ಜೋ಼ಡೆ ಉದಾಹರಣೆ ಹುಯಿನ್ ಚಾ಼ಲಿಲೆವೊ.
1PE 5:4 ಮೋಟೊ ಕುರುಬ ದೆಖಾವನಿ ವಖ್ಹ್‌ತೆ ತುಮೆ ಕದೇಬಿ ಮಹಿಮೆನಿ ಕಿರೀಟ್ನ ಲೀಲಿಶು.
1PE 5:5 ಇಮ್ಮಸ್ ಜಾ಼ನ್ಜ಼ಮಾನ್ ಅದ್ಮಿವೊ, ತುಮೆ ಶಾಣಾಥಿ ಹೇಟುಹುಯಿನ್ ಚಾ಼ಲಿಲೆವೊ ತುಮೆ ಅಖ್ಖೂಬಿ ಶೇದೇವ್ ದಿಲ್ನ ಲೀಲ್ಯಾವಾಳ ಹುಯಿನ್ ಏಕ್‌ಥಿಏಕ್ ಚಾ಼ಕ್ರಿಕರೊ. ಶನಕತೊ ದೇವ್ “ಹಂಕಾರಿನ ವಿರೋದ್‌ಕರಾಸ್. ಗೋರ್‌ ಗರಿಬ್‍ನತೋಬಿ ವಾರ್‌ಖ್ಹೊ ದ್ಯವಾಳೊ ಹುಯಿರ‍್ಹೊಸ್”.
1PE 5:6 ಅಮ್ ರ‍್ಹವಾಪರ್ ದೇವ್ನ ತಾಖತ್ನ ಹಾತ್‍ಹೇಟ್ ತುಮುನ ಝು಼ಕೈಲೆವೊ. ಯೋ ಬರೋಬರ‍್ನಿ ವಖ್ಹತ್‌ಮ ತುಮುನ ಉಪ್ಪರ್ ಪಾಡ್‍ಶೆ.
1PE 5:7 ತುಮಾರಿ ವೇಚ಼್‌ಣೆ ವಿಚಾರ‍್ನ ಇನಾಪರ್ ನಾಖೊ. ಯೋ ತುಮೂನ ಜ಼ತನ್ ಕರ್ಶೆ.
1PE 5:8 ಅಛ್ಛಿಖ್ಹೂಜ಼್‌ವಾಳನ ಹುಯಿ‍ರ‍್ಹೆವೊ ಅಜು಼ ಜ಼ತನ್‌ಥಿ ರ‍್ಹವೊ. ತುಮಾರೊ ವಿರೋದಿ ಹುಯಿರ‍್ಹೋತೆ ಶೈತಾನ್, ಘಲಾರತೆ ಶುಂಭಾನಿತರ ಕಿನ ಚೀರಿಖಾವ್ಣು ಕರಿ ಢೂಂಡ್ತೊ ಚಾ಼ಲ್ಯೊಫಂಡಾಸ್.
1PE 5:9 ತುಮೆ ವಿಶ್ವಾಸ್‌ಮ ಘಟ್‍ರ‍್ಹೀನ್ ಶೈತಾನ್ನ ಡರಾವೊ. ಜಗತ್‌ಮ ಛಾ಼ತೆ ತುಮಾರ ವಿಶ್ವಾಸಿಖ್ಹಾರು ಇಮ್ನು ಖ್ಹತಾಪ್ಣಿ ಪಡುಕರಸ್ಕರಿ ತುಮುನ ಮಾಲುಮ್ ಛಾ಼.
1PE 5:10 ಕ್ರಿಸ್ತ ಯೇಸುಮ ತುಮುನ ಹಮೇಶಾನಿ ಮಹಿಮೆನ ಬುಲಾಯೋತೆ ಭರ್‌ಪೂರ್‌ ವಾರ್‌ಖ್ಹಾನೊ ದೇವಸ್, ತುಮೆ ಥೋಡುವಖ್ಹತ್ ಖ್ಹತಾನ ಬಾದ್ಮ ತುಮುನ ಅಛ್ಛಿರ‍್ಹಾಮ ಲೀಅಯಿನ್ ತಳ್‌ಗಠೈನ್‌ ತಾಖತ್‍ದಿಷೆ.
1PE 5:11 ಯೋ ರಾಜ಼್‌ಭಾರ್ ಚ಼ಲಾವನು ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ. ಆಮೆನ್.
1PE 5:12 ಮೇ ತುಮೂನ ಹುಮ್ಮಖ್ಹ್ ದೆವಾನಾಬಿ ಅಜು಼ ದೇವ್ನಿ ಖ್ಹಾಚಿಕೃಪೆ ಕರಿ ಸಾಕ್ಷಿ ಬೋಲಾನಾಬಿ ಮೇ ನ್ಹಾನೇಥಿ ಚಿಟ್ಟಿ ಲೀಖಿನ್, ವಿಶ್ವಾಸ್‌ನೊ ಭೈಕರಿ ಗಣ್ತಿಕರಿರಾಖ್ಯೊತೆ ಸಿಲ್ವಾನನ ಹಾತ್‌ಮ ಮೋಕ್ಲಿರಾಖ್ಯೊಸ್. ಆ ಖ್ಹಾಚಿ ಕೃಪೆಥಿ ಭೀರೆವೊ.
1PE 5:13 ದೇವ್ ತುಮಾರ ಜೋ಼ಡೆ ಚೂ಼ಣೈರ‍್ಹೊಥೋತೆ ಬ್ಯಾಬಿಲೋನ್ಮ ಛಾ಼ತೆ ಸಬೆವಾಳು ತುಮುನ ಖ್ಹಲಾಮ್‍ಕರಸ್. ಅಜು಼ ಮಾರ ಛಿಯ್ಯಾನಿಘೋಣಿ ಹುಯಿರ‍್ಹೋತೆ ಮಾರ್ಕಬಿ ತುಮುನ ಖ್ಹಲಾಮ್ ಬೋಲಾಸ್.
1PE 5:14 ಪ್ಯಾರ್‌ಥಿ ಏಕ್‌ಥಿ ಏಕ್‌ ಹಾತ್‍ದೀನ್‍ ಖ್ಹಲಾಮ್‍ಬೋಲೊ. ಕ್ರಿಸ್ತಮ ಛಾ಼ತೆ ತುಮುನ ಖ್ಹಾರಸ್ನ ಸಮಾಧಾನ್ ಹುವಾದೆ.
2PE 1:1 ಯೇಸು ಕ್ರಿಸ್ತನೊ ಸೇವಕ್ ಅಜು಼ ಅಪೊಸ್ತಲ ಹುಯಿರ‍್ಹೋತೆ ಸೀಮೋನ್ ಪೇತ್ರ, ಅಪ್ಣೊ ದೇವ್ ಅಜು಼ ರಕ್ಷಕ್ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ನೀತಿಥಿ ಹಮಾರಿನಿತರಸ್ ಅಛ್ಛಿ ವಿಶ್ವಾಸ್ ಮಳಿರ‍್ಹೀಸ್ತೆ ಇವ್ಣುನ ಶಾತ್ ಲೀಖುಸ್‌ಕತೊ,
2PE 1:2 ದೇವ್ ತುಮುನ ಪರಿಶುದ್ ಕರಾನಖ್ಹಾಜೆ ಘಣಾದನ್ನ ಅಗ್ಗಳಸ್ ವಿಚಾರ್‌ ಕರಿರಾಖ್ಯೊಸ್. ದೇವ್ನಿ ಬಾರೇಮಾಬಿ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುನಿ ಬಾರೇಮಾನಿ ಛಾ಼ತೆ ಗ್ಯಾನ್‌ಥಿ, ತುಮೂನ ವಾರ್‌ಖ್ಹೊ ಅಜು಼ ಶಾಂತಿ ಘಣೇಥಿ ಘಣು ಮಳಾದೆ.
2PE 1:3 ಇನಿ ಮಹಿಮೆಮ ಅಜು಼ ಅಛ್ಛಿಪಣೈಮ ಭಾಗ್‍ಹುವಾನ ಬುಲೈರಾಖ್ಯೊತೆ ಇನೇಥಿ ದೇವ್ ಅಪ್ಣುನ ಜಿ಼ಂದ್‌ಗಿ ಚ಼ಲಾವನಬಿ ಅಜು಼ ಭಕ್ತಿಥಿ ರ‍್ಹವಾನ ಹೋಣುತೆ ಖ್ಹಾರೂಸ್ ದೇವ್ನೆ ಇನಿ ಶಕಥ್ಥಿ ತಾಖತ್ನ ದೀರಾಖ್ಯೊಸ್.
2PE 1:4 ತುಮೆ ಲೋಕ್‌ನಿ ಲಾಲಚ್‌ಥಿ ಆವಸ್ತೆ ಖರಾಬ್‌ಥಿ ಛು಼ಕಿನ್, ದೇವ್ನಿ ಚಾ಼ಲ್‌ಮ ಭಾಗ್‌ಲ್ಯವಾಳ ಹೋಣುಕರಿ ಬೋಲಿನಸ್ ದೇವ್ನೆ ಇನಿ ಮಹಾನ್ ಅಜು಼ ಅಮೂಲ್ಯ ಹುಯಿರ‍್ಹೀತೆ ವಾತೇನ ಅಪ್ಣುನ ದಿದೊ.
2PE 1:5 ಅನಖ್ಹಾಜೆಸ್ ತುಮೆ ತುಮಾರಿ ಪೂರ ಮನ್‌ಥಿ ವಿಶ್ವಾಸ್‌ನ ಜೋ಼ಡೆ ಅಛ್ಛಿ ಗುಣಾನ, ಅಛ್ಛಿ ಗುಣಾನ ಜೋ಼ಡೆ ಅಛ್ಛಿಗ್ಯಾನ್ನ ಮಳಾವೊ.
2PE 1:6 ಅಛ್ಛಿ ಗ್ಯಾನ್ನ ಜೋ಼ಡೆ ಖ್ಹುದ್‌ನ ಖ್ಹಮಾಳಿಲ್ಯವಾಮ, ಖ್ಹಮಾಳನ ಜೋ಼ಡೆ, ಭಾಲ್ನ, ಭಾಲ್ನ ಜೋ಼ಡೆ ಅಛ್ಛಿ ಭಕ್ತಿನ, ಮಳಾವೊ.
2PE 1:7 ಭಕ್ತಿನ ಜೋ಼ಡೆ ಭೈಯೆ-ಭೇನೇನ ಗಳ್‌ಜೋ಼ಡ್ಮ, ಭೈಯೆ-ಭೇನೇನ ಗಳ್‌ಜೋ಼ಡೆ ಪ್ಯಾರ್‌ನ ಮಳೈಲೆವೊ.
2PE 1:8 ಆ ಖ್ಹಾರು ತುಮಾರಾಮ ರ‍್ಹೀನ್, ಭಡ್ತು ಆಯುತೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಗ್ಯಾನ್‌ಮ, ತುಮೆ ಚಾ಼ತುರ್ ಹುವಾನಿ ಬಾರೇಮ ಕಾಮ್ನ ಕೊಯ್ನಿತೇಬಿ, ಫಾಯಿದೊಕೊಂತೆ ತಿಮ್ ನಾಹುಯಿರ‍್ಹವಾನಿ ಘೋಣಿ ಕರಸ್.
2PE 1:9 ಕತೋಬಿ ಆ ಖ್ಹಾರಿ ಗುಣ್‌ಕೊಂತೆ ಅದ್ಮಿ ಅಂಧು ಹುಯಿರ‍್ಹುಸ್‍, ಅಜು಼ ಇನ ದೂರ್‌ಲಿ ಜೋ಼ತ್‌ಕೊಂತೆ, ಇನು ಅಗ್‌ಲ್ಯು ಪಾಪ್‌ಖ್ಹಾರು ಮಾಪ್‌ ಹುಯಿಜೈ಼ನ್‌, ಯೋ ಶುದ್ದಿ ಹುಯಿಗಯು ಕರಿ ಯೋ ಭೈಕಿಗಯೊ.
2PE 1:10 ಇನಖ್ಹಾಜೇಸ್ ಮಾರ ಭೈಯೆ, ಭೇನೆವೊ ದೇವ್ನೆ ತುಮೂನ ಬುಲಾಯೋತೆ ಅಜು಼ ಚೂ಼ಣಿಲಿದೊತೊ ಖ್ಹಾಚ ಕರಿ ವತಾಳನಖ್ಹಾಜೆ ಬಿಜೂ಼ಬಿ ಜಾ಼ಖ್ಹತ್ ಮ್ಹಿನತ್‌ಕರೊ, ತುಮೆ ಅಮ್‌ಕರ‍್ಯಾತೊ, ಕದೇಬಿ ಠೋಕರ್‌ಖೈನ್‌ ರಡಕ್‌ಶು ಕೊಯ್ನಿ.
2PE 1:11 ಅನೇಥಿ ಅಪ್ಣೊ ಪ್ರಭು ಅಜು಼ ರಕ್ಷಕ್ ಹುಯಿರ‍್ಹೋತೆ, ಯೇಸು ಕ್ರಿಸ್ತನಿ ಹಮೇಶಾನ ರಾಜ್ಯಮ ಜಾ಼ವಾನಿಮತ್‌, ತುಮುನ ಅರಾಮ್‌ಥಿ ಜಾ಼ವಖ್ಹರ್ಕು ಉಷೆ.
2PE 1:12 ಇನಖ್ಹಾಜೇಸ್, ತುಮೆ ಆ ಖ್ಹಾರಿ ಬಾರೇಮ ಮಾಲುಮ್‌ ಕರಿಲೀನ್, ತುಮೂನ ಮಳಿರ‍್ಹೀತೆ ಖ್ಹಾಚಿಮ ಘಟ್ ರ‍್ಹಯಾತೋಬಿ, ಮೇ ಯೋ ಖ್ಹಾರಾನ ತುಮೂನ ಹಮೇಶ ಕದೇಬಿ ಯಾದ್ ದೆವಾಡ್ತೊ ರ‍್ಹೀಶ್.
2PE 1:13 ಮೇ ಮಾರ ಶರೀರ್‌ಕರಿ ಘರ್‌ಮ ರ‍್ಹವಲಗೂಬಿ ತುಮುನ ಯಾದ್‌ದ್ಯವಾಡಿನ್ ಹುಮ್ಮಖ್ಹ್‌ ಕರಾವನು ನ್ಯಾವ್ನು ಕಾಮ್‌ಕರಿ ಮೇ ಸೋಚಿರಾಖ್ಯೊಸ್.
2PE 1:14 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೆ ಮನ ಬೋಲ್ಯೋತೆ ಇಮ್ಮಸ್, ಮೇ ಆ ಘರ್‌ನ ಮ್ಹೇಲಿಜಾ಼ವಾನು ಹಗಾಮ್‌ ಖನ್ನೆಸ್‌ ಛಾ಼ಕರಿ ಮನ ಮಾಲುಮ್‌.
2PE 1:15 ಮೇ ಮರಾನ ಬಾದ್ಮ ತುಮೆ ಆ ಖ್ಹಾರಾನ ಕದೇಬಿ ಯಾದ್ ಕರಿಲ್ಯವಾನಖ್ಹಾಜೆ ಮಾರೊ ಹಾತ್‌ ಹುವ್ವಾಯೆತ್ರೆ ಮೇ ಕೋಶಿಶ್‌ಕರುಸ್.
2PE 1:16 ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ಶಕತ್ನಿ ಬಾರೇಮ ಅಜು಼ ಯೋ ಆವ್‌ಶೇತೆ ಬಾರೇಮ ತುಮೂನ ಬೋಲಿವತಾಳಿ ರಾಖ್ಯಸ್‌. ಯೋ ಅದ್ಮಿಥಿ ಬೋಲೈಹುಯಿ ಖೇಣಿಯೇನಿ ಆಧಾರ್‌ಪರ್ ಬೋಲಿವತಾಳ್ಯಾತೆ ಕಾಹೆ ಯೋ ಕೆತ್ರ ಮಹಾನ್ ಕರಿ ಹಮೆ ಖ್ಹುದ್ ಹಮಾರ ಡೋಳೆಖ್ಹು ದೇಖಿರಾಖ್ಯಸ್.
2PE 1:17 “ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನ ಮೆ ಪಸಂದ್ ಕರಿರಾಖ್ಯೊಸ್” ಕರಿ ಅವಾಜ಼್ ಮೋಟಿ ಮಹಿಮೇಥಿ ಇನ ಆಯೂತೆ ತದೆ, ಬಾ ದೇವ್‍ಥಿ ಇನ ಇಜ಼್ಜತ್ ಅಜು಼ ಮಹಿಮೆ ಮಳಿಗೈ.
2PE 1:18 ಹಮೆ ಪವಿತ್ರ್‌ ಪಹಾಡ್‌ಪರ್ ಇನ ಜೋ಼ಡೆಥಾತೆ ತದೆ, ಪರಲೋಕ್‌ಥು ಆಯೂತೆ ಯೋ ಅವಾಜ಼್‌ನ ಹಮೆ ಖ್ಹಮ್‌ಜ್ಯ.
2PE 1:19 ಅತ್ರೇಸ್ ಕಾಹೆತೆ, ಪ್ರವಾದ್‌ನೆನಿ ವಚನ್ ಬೋಲಿರಾಖ್ಯತೆ ವಾತೆ ಅಪ್ಣುನಖ್ಹಾರು ಖ್ಹಾಚ ಕರಿ ಬಿಜೂ಼ಬಿ ಘಟ್‍ಥಿ ಮಳಿರ‍್ಹೂಸ್‌. ಶನಕತೊ ಇವ್ಣೆ ಬೋಲಿರಾಖ್ಯುತೆ ವಾತೆ ಅಂಧಾರಾಮ ಉಜಾ಼ಖ್ಹ್‌ ದ್ಯವಾನು ದೀವೊ ಹುಯಿರ‍್ಹುಸ್‍ ತುಮಾರ ದಿಲ್ಮ ಖ್ಹಾರು ವ್ಹಾಣು ಹುವ್ವಾತೋಡಿ ಅಜು಼ ವ್ಹಾಣೆ ವೇಳಿನೊ ಶುಕ್ಕರ್ ನಿಕ್ಳಾತೋಡಿ ಯೋ ಉಜಾ಼ಳು ಝ಼ಮ್‌ಕವಾಳು ಹುಯಿರ‍್ಹುಸ್‍.
2PE 1:20 ಖಿವು ಪ್ರವಾದನೆನು ವಚನ್‍ಬಿ ಖಲಿ ಶೊಂತ್‍ ಅದ್ಮಿನಿ ಬುದ್ದಿಥಿ ಬೋಲಿವತಾಳಖ್ಹರ್ಕು ಕಾಹೆ ಕರಿ ಬೋಲಾನು ಮುಖ್ಯಾಥಿ ಪಹಿಲೆ ಮಾಲುಮ್‌ಕರಿಲೆವೊ.
2PE 1:21 ಶನಕತೊ ಖೆವಿ ಪ್ರವಾದ್‌ನೇಬಿ ಕದೇಬಿ ಅದ್ಮಿನಿ ಮರ್ಜಿಥಿ ಆಯೂತೆ ಕಾಹೆ, ಕತೋಬಿ ಅದ್ಮಿಖ್ಹಾರು ಪವಿತ್ರಾತ್ಮಥಿ ಭರೈನ್, ದೇವ್‍ಥಿ ಲೀಲಿದೂತೆ ವಾತೇನಸ್‌ ಬೋಲ್ಯು.
2PE 2:1 ಕತೋಬಿ ಇಸ್ರಾಯೇಲ್ ಅದ್ಮಿಯೇವ್‍ನ ಜೋ಼ಡ್ಮ ಝೂ಼ಟು ಪ್ರವಾದಿಜಿನು ಥೂ. ಇಮ್ನಿಸ್ ಪರಕ್ಮ ತುಮಾರಮಾಬಿ ಝೂ಼ಟು ಬೋಧಕರ್ ಖ್ಹಾರು ರ‍್ಹಿಶೆ. ಇವ್ಣೆ ಖತರ್‌ನಾಕ್ ಖರಾಬ್ ಬೋಧನೆಖ್ಹಾರು ಗಪ್ಲಥ್ಥಿ ಮಹಿಲೀನ್‍ ಆವವಾಳುಬಿ ಅಜು಼ ಇವ್ಣುನ ಮೋಲ್ ಲಿದೋತೆ ಯಜಮಾನ್ನ ಜಿನು ಝಿಟ್ಕಾರವಾಳು ಹುಯಿರಿನ್ ಒಗ್ಗಿಸ್‌ಮ ಇವ್ಣಪರ್ ನಾಶನನ ಬುಲೈಲೆಸ್.
2PE 2:2 ಇವ್ಣ ಖರಾಬ್ ಕಾಮ್ನ ಮಾರಗ್‌ಪರ್ ಕೈಏಕ್ ಜ಼ಣು ಚಾ಼ಲವಾಳು ಹುಯಿರ‍್ಹಿಶೆ. ಇವ್ಣೆ ಖ್ಹಾಚ ಮಾರಗ್‌ನ ದೂಷಣೆ ಬೋಲವಾಳು ಹುಯಿರ‍್ಹಿಶೆ.
2PE 2:3 ಇವ್ಣೆ ಪೈಶಾನಿ ಲಾಲ್‍ಛಿವಾಳು ಹುಯಿರ‍್ಹಿನ್, ಬಣೈಹುಯ್ ಖೇಣಿನ ಬೋಲ್ತುಹುಯಿನ್‌, ತುಮಾರೇಥಿ ನಫ್ಫೊ ಕರಿಲ್ಯಾವಾಳು ಹುಯಿರ‍್ಹಿಶೆ.ಇನಖ್ಹಾಜೆ ಘಣಾದನ್‍ಥು ಇವ್ಣುನ ಛಾ಼ತೆ ನಿಶತ್ನು ತೀರ್ಪ್ ಇವ್ಣುನ ಟಿವೈರ‍್ಹುಸ್. ಇವ್ಣುನ ಆವನಿ ನಾಶನ ಇವ್ಣೇಥಿ ಛು಼ಕಿಜಾ಼ಶೇಸ್ ಕೊಯ್ನಿ.
2PE 2:4 ಕಿಮ್‌ಕತೊ ದೇವ್‌ನು ದೂತಖ್ಹಾರು ಪಾಪ್ ಕರ್ತಾನ ದೇವ್ನೆ ಇವ್ಣುನ ಖ್ಹೊಪೊ ಮ್ಹೇಲ್ಯೊಕೊಂತೆ, ನರಕ್ಮ ಧಕೆಲೀನ್ ನ್ಯಾವ್ನತೀರ್ಪ್‌ನ ಲಿಲ್ಯಾವನಖ್ಹಾಜೆ ಖ್ಹಂಕಳ್‍ಥಿ ಭಂದೈನ್‌ ಅಂಧಾರಿನ ಪಾಳ್ಯಮ ದಿನಾಖಿದಿದೊ.
2PE 2:5 ಜೂ಼ನ ಜ಼ಮಾನಾನು ಅದ್ಮಿ ಜಿನು ದೇವ್ನೆ ನಿಶತ್ ದಿದೊಕೊಂತೆ ಮ್ಹೆಲ್ಯೊಕೊಯ್ನಿ, ನೀತಿನ ಮಾರಗ್‌ನ ಬೋಲಿವತಾಳ್ಯೋತೆ ನೋಹಾನ ಅಜು಼ ಇನಿ ಜೋ಼ಡ್ಮಥುತೆ ಬಿಜ಼ ಖ್ಹಾತ್ ಜ಼ಣಾನ ಖಲಿಬಚಾ಼ಡಿನ್, ಖರಾಬ್ ಅದ್ಮಿಥಿ ಭರೈರ‍್ಹುತೆ ಜಗತ್ನ ಉಪ್ಪರ್ ತೋಫಾನ್ ಲಾಯೊ.
2PE 2:6 ದೇವ್ನೆ ಸೊದೋಮ್ ಅಜು಼ ಗೊಮೋರ್ ಖ್ಹಯೇರ‍್ನ ಬಾಳಿನ್ ರಾಕ್‍ಕರಿನ್ ಅನಪಾರ್ ಭಕ್ತಿಕೊಂತೆ ಬಚಾ಼ವಾಳನ ಆವ್‍ಶೆತೆ ಖರಾಬ್ ಹಾಲತ್ನ ವತಾಳನ ಖ್ಹಾಜೆ ಯೋ ಅಖ್ಖಾ ಖ್ಹಯೇರ‍್ನ ನಿಶತ್‌ ದೀನ್‌ ಸಾಕ್ಷಿಬಣಾಯೊ.
2PE 2:7 ಕತೋಬಿ ದೇವ್ನೆ ಯೋ ಖರಾಬ್ ಅದ್ಮಿನ ಖರಾಬ್‌ಚಾ಼ಲ್‌ಥಿ ದಿಲ್‍ದುಖೈರ‍್ಹೊತೆ ನೀತಿವಾಳೊ ಲೋಟನ ಬಚಾ಼ಡ್ಯೊ,
2PE 2:8 ಕತೋಬಿ ಯೋ ನೀತಿವಾಳೊ ಯೋ ಖರಾಬ್ ಅದ್ಮಿನ ಇಚ಼್‌ಮರ‍್ಹಿನ್, ಇವ್ಣೆ ಕರಾತೆ ಖರಾಬ್‍ಕಾಮ್ನ ದೇಕ್ತೊ ಖ್ಹಮಜ಼್‌ತೊ ಹುಯಿನ್ ಯೋ ಅಖ್ಖಾನಖ್ಹಾಜೆ ದನ್‌ಪರ್-ದನ್ ಇನು ನೀತಿನ ಆತ್ಮಮ ಘಣು ದುಖಿಹುಯೊ.
2PE 2:9 ಪ್ರಭು ಭಕ್ತಿವಾಳಾನ ಮುಶ್ಕಿಲ್‌ಮಾಥು ಬಚಾ಼ಡನಾಬಿ ಅನೀತಿವಾಳಾನ ನಿಶತ್ ದ್ಯವಾನಖ್ಹಾಜೆ ನ್ಯಾವ್ನ ದನ್ ಆವಾಲಗು ರಾಖನಬಿ ಮಾಲುಮ್‌ ಕರಿರಾಖ್ಯೊಸ್.
2PE 2:10 ಮುಖ್ಯಥಿ ಇವ್ಣಿ ಶರೀರ್‌ನಿ ಖರಾಬ್ಆಖ್ಹ್‌ನ ಬಲಿ ಹುಯಿರ‍್ಹವಾಳನ ಅಜು಼ ದೇವ್ನಿ ಅದಿಕಾರ್‌ನ ದೂಷಣೆ ಕರವಾಳನ ನಿಶತ್ ದಿಶೆಕೊಂತೆ ಮ್ಹೆಲ್‍ಶೆಕೊಯ್ನಿ.
2PE 2:11 ದೇವ್‌ದೂತಖ್ಹಾರು, ಶಕತ್‍ಮಾಬಿ ತಾಖತ್‍ಮಾಬಿ ಊಚ಼ರ‍್ಹಯತೋಬಿ ಪ್ರಭುನ ಖ್ಹಾಮ್ಣೆ ಇವ್ಣುನ ವಿರೋದ್‌ಥಿ ಗಾಳೇಬಿ, ಚಾ಼ವ್‌ಣ್ಯಬಿ ನಾಬೋಲ್ಯುತೊ, ಯೋ ಘಬ್ರಿಖ್ಹಾರು ಮಹಿಮೆನಾಬಿ ಗಾಳೆದ್ಯವಾನ ಪೀಛೆ ಹಟ್‌ಶೆಕೊಯ್ನಿ.
2PE 2:12 ಮ್ಹಾಮುಲಿಥಿ ಕಬ್‌ಜಾ಼ಮ ಧರೈಜೈನ್ ನಾಶ ಹುವಾನಖ್ಹಾಜೆ ಪೈದಹುಯಿರ‍್ಹುತೆ ಬಿಣ್‍ ಅಕ್ಕಲ್‌ನು ಜಾನ್ವರ್‌ನಿತರ ಛಾ಼ತೆ ಆ ಖರಾಬ್ ಬೋಧನೆ ಕರವಾಳು ಖ್ಹಾರು ಇವ್ಣುನ ಮಾಲುಮ್‌ಕೊಂತೆ ಬಾರೇಮ ದೂಷಣೆ ಕರವಾಳು ಹುಯಿರ‍್ಹುಸ್‍. ಅವ್ಣೆ ಖ್ಹಾರು ಇವ್ಣಿ ಖರಾಬ್ ಫಣೈಥಿ ಇವ್ಣೆಸ್ ಪೂರನಾಶ ಹುಯಿಜಾಶೆ.
2PE 2:13 ಇವ್ಣಿ ಖರಾಬ್‌ನೀತಿಥೀಸ್‌ ಬರೋಬರ್ ನಿಶತ್ ಲೀಲಿಶೆ. ಜಾ಼ಖ್ಹತ್ ಖರ್ಚ್‌ಕರಾಮಾಸ್ ದನ್‍ಕಾಡನುಸ್ ಖುಷಿಕರಿ ಗಣ್ತಿ ಕರಸ್. ಅವ್ಣೆ ತುಮಾರಿ ಜೋ಼ಡ್ಮ ಮಿಝ಼್‌ವಾನ್ ಕರಾನಿವಖ್ಹ್‌ತೆ ಠಗಾವವಾಳು ಹುಯಿರ‍್ಹಿನ್ ಖಯ್‍ಪೀನ್‍ ಕಳಂಕ್‍ನಾಬಿ ಖ್ಹರಮ್‌ಬಿ ಕಡೈಲ್ಯಾವಾಳು ಹುಯಿರ‍್ಹುಸ್‍.
2PE 2:14 ಅವ್ಣೆ ವ್ಯಭಿಚಾರಿಣಿನ ದೇಖಿನ್ ಖ್ಹುಶಿಕರವಾಳುಬಿ ಅವ್ಣೆ ಕದೇಬಿ ತರಖ್ಹ್‌ ತುಟಕೊಂತೆ ಪಾಪ್ನಕರವಾಳು ಹುಯಿರ‍್ಹುಸ್. ಬಿಣ್‍ತಾಖತ್‍ವಾಳನ ಠಗೈನ್; ಅಜು಼ ಇವ್ಣು ದಿಲ್‌ ಪೈಶಾನಿ ಆಖ್ಹ್‌ಕರಾನಿತರ ಕರಸ್ ಅಜು಼ ಇವ್ಣೆ ದೇವ್ನಿ ಶಾಪಮ ರ‍್ಹೇಸ್.
2PE 2:15 ಅವ್ಣೆ ಅಛ಼್ಛ ಮಾರಗ್‌ನ ಮ್ಹೇಲಿನ್, ವಾಟ್‌ ಭೈಕಿಹುಯು ಅಜು಼ ಬೆಯೋರಾನೊ ಛಿಯ್ಯೊ ಬಿಳಾಮಾನೊ ಮಾರಗ್‌ನ ಧರೀಹುಯು ಹುಯಿರ‍್ಹುಸ್, ಆ ಬಿಳಾಮ ಖರಾಬ್ ಕಾಮ್‍ಥಿ ಮಳಾತೆ ಶಂಬ್‍ಳನ ಪ್ಯಾರ್‌ಕರ‍್ಯೊ.
2PE 2:16 ಕತೋಬಿ ಇನ ಖರಾಬ್ ಕಾಮ್ನ ಗುರ್‌ಕಾವ್ಣಿಮಳ್ಯು. ಮುಕ್ಕುಜಾನ್ವರ್ ಹುಯಿರ‍್ಹುತೆ ಗಧೇಡೊ ಅದ್ಮಿನಿತರ ವಾತೆಬೋಲಿನ್, ಯೋ ಪ್ರವಾದಿನು ಪಾಗಲ್‍ಪನ್ನ ಆಡುಹುಯಿನ್‌ ಭೀರಾಖ್ಯು.
2PE 2:17 ಅವ್ಣೆ ಪಾಣಿಕೊಂತೆ ತಲಾವ್‌ನಿಮತ್‌, ತೋಫಾನ್ನ ವ್ಹಯಿರಾಮ ಉಡಿಜಾ಼ಸ್ತೆ ವಾದ್ಳಾನಿತರಾಬಿ ಹುಯಿರ‍್ಹುಸ್. ಅಥ್ರಾನ ವಾಳನಖ್ಹಾಜೆ ಅಂಧಾರಿನಪಾಳ್‌ನ ತಯಾರ್ ಕರಿನ್ ಮ್ಹೆಲೈರ‍್ಹುಸ್‍.
2PE 2:18 ಗಲತ್‌ ವಾಟ್‌ಪರ್ ಚಾ಼ಲವಾಳನಿ ಖ್ಹಂಗ್‌ಥಿ ಛು಼ಕಿಜಾ಼ವಳ ನವ ಅದ್ಮಿನಿ ಜೋ಼ಡ್ಮ ಅವ್ಣೆ ಫಾಯಿದೊಕೊಂತೆ ಪೋಲಿ ವಾತೆನ ಬೋಲಿನ್, ಶರೀರ್‌ನಿ ಖರಾಬ್ ಆಖ್ಹ್‌ಮ ನಾಖಿನ್ ಘಣಿ ಢೊಂಗಿನಿ ಬುದ್ಧಿಥಿ ಇವ್ಣುನ ಮಂಕ್‍ಕರ‍್ನಖಾಸ್.
2PE 2:19 ಅಥ್ರಾನವಾಳು ಛುಟ್ಕಾರ್ ದಿಯೇಸ್ ಕರಿ ಇವ್ಣುನ ವಾಗ್ದಾನ್ ಕರಸ್. ಕತೋಬಿ ಇವ್ಣೆಸ್ ಖರಾಬ್ ಫನೈನ ಗುಲಾಮ್ ಹುಯಿರ‍್ಹೋಸ್. ಶನಕತೊ ಖೆವು ಏಕ್‌ನ ಖ್ಹಾಮ್ಣೆ ಹರಸ್ಕಿ ಇನ ಯೋ ಗುಲಾಮ್‌ ಹುಯಿರ‍್ಹೋಸ್.
2PE 2:20 ಪ್ರಭುಬಿ ರಕ್ಷಕ್‍ಬಿ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಬಾರೇಮಾನಿ ಗ್ಯಾನ್‌ಥಿ ಲೋಕ್‌ನು ಕಚಿಂಡ್‍ಮಾಥು ಛು಼ಕೈಗಯುಹುಯು ಫಾಚು಼ಪರಿನ್ ಯೋ ಅಖ್ಖಾಮ ಖ್ಹಪ್‍ಡಿನ್ ಹರಿಗಯೂತೊ, ಇನಿ ಖ್ಹರ್ತಿನಿ ಹಾಲತ್ ಪಹಿಲೆಥೀಬಿ ಖರಾಬ್ ಹುಯಿಜಾಶೆ.
2PE 2:21 ಇವ್ಣೆ ನಿಯತ್‌ನೊ ಮಾರಗ್‌ನ ಪರ್ಖಿಲಿನ್‌, ಇವ್ಣುನ ದೆವೈತೆ ಪವಿತ್ರ ಹುಕುಮ್‌ನ ಝಿಟ್ಕಾರಥಿಬಿ, ಯೋ ಮಾರಗ್‌ನ ಪರ್‌ಖ್ಯ ನಾಹೋತ್ತೋಸ್‌ ಅಛ್ಛು಼ ರ‍್ಹಯುಹೋತ್‌.
2PE 2:22 “ಕುತ್‌ರ‍್ಯು ಯೋ ಓಕ್‌ರ‍್ಯ ಹುಯಾನಸ್ ಚಾ಼ಟಾನ ಪಾಛು಼ ಫರಿಗಯು”. ಅಜು಼ “ನ್ಹೊವ್ಹಾಡ್ಯುಹುಯು ಡೂಕರ್‌ ಚಿಕ್ಕ್‌ಡ್‌ಮ ಕಲಾವಾನ ಗಯು”. ಕರಿ ಬೋಲಾನು ಮಶ್ಲೋ ಅವ್ಣುನ ಖ್ಹಾಚ಼ಸ್ ಹುವಾಸ್.
2PE 3:1 ಮಾರ ಪ್ಯಾರ್‌ನ ದೋಸ್ತಿವೊ, ಮೇ ಹಮ್ಕೆ ತುಮೂನ ಲೀಖುಕರುಸ್ತೆ ಬೇನಿ ಚಿಟ್ಟಿ. ಆ ಬೇ ಚಿಟ್ಟಿಮಾಬಿ ಆ ಅಖ್ಖಿಬಾರೇಮ ತುಮುನ ಖ್ಹಯಾಲ್ ಲ್ಯಾವಾನ ತುಮಾರ ದಿಲ್ಮ ಪರಿಶುದ್ದ ಸೋಚ್ ಆವಾನಿತರ ಕರಾವನ ಕೋಶಿಶ್ ಕರಿರಾಖ್ಯೊಸ್.
2PE 3:2 ಪಛ಼್‌ಲ್ಯ ಹಗಾಮ್ಮ ಪರಿಶುದ್ ಪ್ರವಾದಿಯೇನೆ ಬೋಲ್ಯುತೆ ವಾತೆಖ್ಹಾರು ಅಜು಼ ತುಮಾರ ಅಪೊಸ್ತಲರ‍್ನ ಪ್ರಭು ಅಜು಼ ರಕ್ಷಕ್‌ನೆ ದೀರಾಖ್ಯೋತೆ ಹುಕುಮ್‌ನ ತುಮಾರಿ ಯಾದ್ಮ ಲ್ಯಾವಾನ ಆಖ್ಹ್‌ಕರುಸ್.
2PE 3:3 ಅಖ್ಖೇಥಿ ಪಹಿಲೆಸ್ ತುಮೆ ಅನ ಯಾದ್ಮರಾಖಿರಾಕ್ಣು; ಥೋಡುಜ಼ಣು ಇವ್ಣಿ ಖರಾಬ್ ಆಖ್ಹ್‌ನಿ ಅಧೀನ್‍ಮ ಜಿವ್ಣುಕರಾತೆ ದೇಖವಸ್. ಇವ್ಣೆ ಚಿಂಘಾವ್ಣಿ ಕರ್ತುಹುಯಿನ್,
2PE 3:4 “ಯೋ ಫಾಚೊ಼ಫರಿನ್ ಆವ್‌ಶೆ ಕರಿ ಬೋಲಾನು ವಾಗ್ದಾನ್ ಶಾತ್‍ಹುಯು? ಅಪ್ಣೊ ಗುರುಗುರುಬ್‍ಲ್ಯೊ ಖ್ಹಾರು ಮರಿಗಯು; ಖ್ಹಾರುಸ್ ಜಗತ್‌ ಉಬ್‍ಜ್ಯುಥಪ್‍ತುಬಿ ಕಿಮ್‍ಥೂಕಿ ತಿಮ್ಮಸ್ ಛಾ಼ನಿ” ಕರಿ ಬೋಲಸ್.
2PE 3:5 ಕತೋಬಿ ಅಗಾಡಿ ದೇವ್ನೆ ಇನಿ ವಾತೆಥಿ ಆಬ್‍ ಧರ್ತಿನ ಅಖ್ಖಾನ ಬಣಾಯೊ ಅಜು಼ ಪಾಣಿಥಿ ಧರ್ತಿನ ಬಣಾಯೊ ಕರಿ ಬೋಲಾನಿ ವಾತೆನ ಹೋಣುಸ್‍ಕರಿ ಭೈಕಿಜಾ಼ಸ್‌.
2PE 3:6 ಯೋ ಪಾಣಿಥೀಸ್‍ ಜೂ಼ನು ಜಗತ್‌ ತೋಫಾನ್‍ಮ ನಾಶ್ ಬಣೈಗಯು.
2PE 3:7 ಹಮ್ಕೆ ಛಾ಼ತೆ ಆಬ್-ಧರ್ತಿಖ್ಹಾರನ ಯೋಸ್‌ ವಚನ್ನಿ ತಾಖತ್ತಿ ಆಗ್‌ಥಿ ನಾಶಕರಾನಟೇಕೆ ಟಿವಾಡಿರಾಖ್ಯುಸ್. ಖರಾಬ್ ಅದ್ಮಿಖ್ಹಾರು ವಿನಾಶ್‌ಹುವಾನು ನ್ಯಾವ್ನತೀರ್ಪ್‌ನ ದನ್‍ಲಗುಬಿ ಆ ಅಖ್ಖಾನ ಮ್ಹೇಲಿರಾಖ್ಯುಸ್.
2PE 3:8 ಪ್ಯಾರ್‌ನ ದೋಸ್ತಿವೊ ಪ್ರಭುನ ಗಣ್ತಿಮ ಏಕ್‌ ದನ್ ಹಜಾ಼ರ್‌ ವರಖ್ಹ್‌ನಿ ಘೋಣಿಬಿ ಅಜು಼ ಹಜಾ಼ರ್‌ ವರಖ್ಹ್‌ ಏಕ್‌ ದನ್ನಿ ಘೋಣಿಬಿ ಖಾಲಿ ಛಾ಼ ಕರಿ ಬೋಲಾನು ಭೈಕೊನಕೊ.
2PE 3:9 ಪ್ರಭು ಇನಿ ವಾಗ್ದಾನ್ನ ಪೂರ ಕರಾನಖ್ಹಾಜೆ ದೇರ್‌ಕರ್‌ಶೆ ಕರಿ ಬೋಲಾನು ಥೋಡುಜ಼ಣು ಖ್ಹಮ್‍ಜಿರಾಖ್ಯುಸ್ನಿ. ಇಮ್ನಿ ಪರಕ್ಮ ಯೋ ದೇರ್‌ಕರವಾಳೊ ಕಾಹೆ. ಅನಬದಲ್ ತುಮಾರಿ ಜೋ಼ಡ್ಮ ಘಣೇಥಿ ಖ್ಹಮಾಳಿರಾಖ್ಯೊಸ್. ತುಮಾರಮ ಏಕ್‍ಜ಼ಣೂಬಿ ನಾಶ್ ನಾಹೊಣುತೆ ಅಖ್ಖುಜ಼ಣು ಪಾಪ್ನ ಮ್ಹೆಂದಿನ್ ಪಾಛು಼ ಫರಿಜಾ಼ವ್ಣುಕರಿ ಯೋ ಆಖ್ಹ್‌ಕರಸ್.
2PE 3:10 ಪ್ರಭುನೊ ದನ್ ಚೋ಼ರ್ ಆವಾನಿತರ ಆವ್‌ಶೆ. ಯೋ ದನ್ಮ ಆಬ್‍ಅಖ್ಖು ಘಲಾರಕೊಂತೆ ಹುಯಿಜಾ಼ಶೆ ಚಾ಼ಂದ್, ಚ಼ಂದರ್‌ಮೊ, ತಾರೊ, ಗ್ರಹಖ್ಹಾರು ಬಳಿನ್ ನೂಚೈಜಾ಼ಶೆ. ಜ಼ಮೀನ್ ಇನಾಮ ಛಾ಼ತೆಖ್ಹಾರುಸ್‍ಬಿ ಭುಂಜ಼ಯಿನ್ ರಾಕ್ ಹುಯಿಜಾ಼ಶೆ.
2PE 3:11 ಆಖ್ಹಾರು ಅಮ್ ಬರ್ಬಾತ್ ಹುಯಿಜಾ಼ಶೆಕತೊ ಇನಾಮ ತುಮೆ ಕೆಥ್ರಾನವಾಳ ಹುಯಿರ‍್ಹಿನ್ ಜಿವ್ಣುಕರ‍್ನು? ತುಮೆ ಪರಿಶುದ್ ಹುಯಿನ್‍ಬಿ ಅಜು಼ ದೇವ್ನ ಅದ್ಮಿಖ್ಹಾರು ಹುಯಿನ್ ಜಿವ್ಣುಕರ‍್ನು.
2PE 3:12 ದೇವ್ನ ಯೋ ದನ್ನ ಮ್ಹೋರೆ ದೇಕ್‍ತುಹುಯಿನ್‍ ಯೋ ಒಗ್ಗಿಸ್ ಆವಾದೆ ಕರಿ ಆಖ್ಹ್ ಕರ್ತರ‍್ಹೇವೊ. ಯೋ ದನ್ಮ ಆಕಾಶ್‌ನೊ ಗೋಳೊ ಆಗ್‌ಥಿ ನಾಶ್‌ಹುಯಿಜಾ಼ಶೆ; ಚಾ಼ಂದ್, ಚ಼ಂದರ್‌ಮೊ, ತಾರೊ, ಅಜು಼ ಗ್ರಹಖ್ಹಾರು ಘಣ ಅಂಚ಼್‌ಥಿ ಪಿಗ್‌ಳಿಜಾ಼ಶೆ.
2PE 3:13 ಕತೋಬಿ ಅಪ್ಣೆ ದೇವ್ನಿ ವಾಗ್ದಾನ್ನಿ ಪರಕ್ ನವು ಆಬ್‍ಅಖ್ಖು ಅಜು಼ ನವಿ ಧರ್ತಿನಾಬಿ ಮ್ಹೋರೆ ದೇಖುಕರೆಸ್ ಯೋ ಅಖ್ಖಾಮ ನೀತಿ ಜಿವಿರ‍್ಹಿಶೆ.
2PE 3:14 ಅನಖ್ಹಾಜೆಸ್ ಪ್ಯಾರ್‌ನ ದೋಸ್ತಿವೊ ತುಮೆ ಆಖ್ಹಾರನ ಮ್ಹೋರೆ ದೇಖವಾಳ ಹುಯಿರ‍್ಹಾಸ್ತೆ ಇನಖ್ಹಾಜೆ ತುಮೆ ದೇವ್‌ಮ ಸಮಾಧಾನ್‌ಥಿಬಿ, ಪರಿಶುದ್ದಬಿ ನಿರ್ದೋಷಿಬಿ ಹುಯಿನ್ ದೆಖಾವನ ಕೋಶಿಶ್ ಕರೊ.
2PE 3:15 ಅಪ್ಣೊ ಪ್ರಭುನಿ ದೀರ್ಘಶಾಂತಿ ಅಪ್ಣ ಬಚಾ಼ಡನ ಖ್ಹಾಜೆಸ್‌ಕರಿ ಮಾಲುಮ್‌ಕರಿಲೆವೊ. ಅಪ್ಣೊ ಪ್ಯಾರ್‌ನೊ ಭೈ ಹುಯಿರ‍್ಹೋತೆ ಪೌಲಜಿನು ದೇವ್ನೆ ದಿದೊತೆ ಗ್ಯಾನ್ನಿ ಪರಕ್ಮ ತುಮೂನ ಲೀಖಿರಾಖ್ಯೊಸ್.
2PE 3:16 ಪೌಲ ಇನಿ ಖ್ಹಾರಿಸ್ ಚಿಟ್ಟಿಮಾಬಿ ಆ ವಾತೆನಿ ಬಾರೇಮ ಬೋಲಿರಾಖ್ಯೊಸ್. ಆ ಚಿಟ್ಟೀಮ ಛಾ಼ತೆ ಥೋಡಿವಾತೆಖ್ಹಾರು ತುಮುನ ಮಾಲುಮ್‌ ಕರ್‌ಲ್ಯಾವನ ಕಠಣ್ ಹುಯಿರ‍್ಹುಸ್. ಬಿಣ್‍ ಅಕ್ಲೀಬಿ ಅಜು಼ ವಿಶ್ವಾಸ್‌ಮ ಕಮ್‌ಜೋ಼ರ್‌ ಹುಯಿರ‍್ಹವಾಳು ಬಿಜ಼ ಧರ್ಮಶಾಸ್ತ್ರನಿ ಘೋಣಿಸ್ ಅನಾಬಿ ಗಲತ್‌ ಮತ್ಲಬ್‍ದೀನ್ ಇವ್ಣಿ ನಾಶ್‍ನ ಇವ್ಣೆಸ್ ಲೀಲೆಸ್.
2PE 3:17 ಇನಖ್ಹಾಜೇಸ್ ಪ್ಯಾರ್‌ನ ದೋಸ್ತಿವೊ, ಆ ಖ್ಹಾರಿ ವಾತೆನ ಪಹಿಲೆಸ್ ಮಾಲುಮ್‌ಕರ್‌ಲಿದತೆ ಇನಾಖ್ಹಾಜೆ ತುಮೆ ಜ಼ತನ್‌ಥಿ ರ‍್ಹವೊ. ಖರಾಬ್ ಅದ್ಮಿನಿ ಖರಾಬ್ ಬೋದನೆಮ ಮಂಕ್‍ನಕೊ ಹುಯಿಜಾ಼ವೊ. ತುಮಾರಿ ಘಟ್ ವಿಶ್ವಾಸ್‌ಮಾಥು ಪಡ್ಣುನಾತೆ ಹೊಷಾರ್‌ರ‍್ಹವೊ.
2PE 3:18 ಅಪ್ಣೊ ಪ್ರಭುಬಿ ರಕ್ಷಕಬಿ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಬಾರೇಮಾನು ವಾರ್‌ಖ್ಹಾಮಾಬಿ ಗ್ಯಾನ್‌ಮಾಬಿ ತುಮೆ ಭಡ್ತಾಜಾ಼ವೊ, ಇನ ಹಮ್ಕೇಬಿ ಜ಼ಗ್‌ಜ಼ಮಾನಲಗೂಬಿ ಮಹಿಮೆ ಹುವಾದೆ! ಆಮೆನ್.
1JO 1:1 ತುಮೆ ಖ್ಹಮ್‌ಜು಼ಕರಸ್ತೆ ಜಾನ್ನಿ ವಚನ್ ಶುರುವಾಥೂಸ್ ಛಾ಼ತೆ. ಇನ ಕಾನ್‍ಥಿ ಖ್ಹಮ್‍ಜಿರಾಖ್ಯಸ್; ಡೋಳೆಖ್ಹು ದೇಖಿರಾಖ್ಯಸ್, ದಿಲ್‌ಥಿ ಮಾನಿರಾಖ್ಯಸ್, ಅಜು಼ ಹಾತೇಥಿ ಛಿಮಿರಾಖ್ಯಸ್.
1JO 1:2 ಯೋ ಜಾನ್‌ ಹಮೂನ ದೆಖಾಯು. ಹಮೆ ಇನ ದೇಖ್ಯಾತೆ ಇನಖ್ಹಾಜೇಸ್ ಇನಿ ಬಾರೇಮ ಸಾಕ್ಷಿ ಬೋಲಾನಿತರ ಹುಯು. ಯೋ ಬಾ ಜೋ಼ಡ್ಮ ರ‍್ಹೀನ್ ಹಮುನ ದೆಖಾಯುತೆ ಹರ್‌ಹಮೇಶಾನೊ ಜಾನ್‌ ತುಮುನ ಬೋಲಿವತಾಳೆಸ್‍.
1JO 1:3 ಬಾ ಹುಯಿರೋತೆ ದೇವ್ನ ಅಜು಼ ಇನೊ ಛಿಯ್ಯೊ ಹುಯಿರೋತೆ ಯೇಸುಕ್ರಿಸ್ತನಿ ಜೋಡ್ಮರ‍್ಹವಾನುಬಿ ಹಮುನ ಛಾ಼ತೆ ಗಳ್‌ಜೋ಼ಡ್ಮ ತುಮೆಜಿನು ಭಾಗ್‌ಲೀಲ್ಯವಾಳ ಹುಯಿರ‍್ಹೇವ್ಣುಕರಿ ಹಮೆ ದೇಖಿರಾಖ್ಯತೆ, ಖ್ಹಮ್‍ಜಿರಾಖ್ಯತೆ ತುಮೂನ ಬೋಲಿವತಾಳೆಸ್‍.
1JO 1:4 ಅಪ್ಣಿ ಶಂತೋಖ್ಹ್‌ ಪೂರ ಹುವಾದೆಕರಿ ಹಮೆ ಅನಿ ಬಾರೇಮ ಲೀಖುಕರಿಯೇಸ್.
1JO 1:5 ಹಮೆ ದೇವ್ನ ಛಿಯ್ಯಾಥಿ ಖ್ಹಮ್‌ಜಿನ್‌ ತುಮುನ ಖ್ಹಮ್‍ಜಾ಼ಡಾನಿ ವಾತೆ ಶಾತ್‌ಕತೊ ದೇವ್ ಉಜಾ಼ಳು ಹುಯಿರ‍್ಹೋಸ್, ಇನಾಮ ಥೋಡುಬಿ ಅಂಧಾರುಕೊಯ್ನಿ.
1JO 1:6 ಇನಖ್ಹಾಜೇಥಿ ಅಪ್ಣೆ ಅಂಧಾರಮ ಜಿವ್ಣು ಕರ್ತಹುಯಿನ್‍ ದೇವ್ನಿ ಜೋ಼ಡ್ಮ ಗಳ್‍ಜೋ಼ಡ್‍ಥಿ ಛೀಯೆಕರಿ ಬೋಲ್ಯಾತೊ ಅಪ್ಣೆ ಝೂ಼ಟ ಹುಯಿರ‍್ಹಾಸ್ ನಿಯತ್ನು ಜಿವ್ಣು ಜಿವವಾಳ ಕಾಹೆ.
1JO 1:7 ಕತೋಬಿ ದೇವ್ ಉಜಾ಼ಳಮ ರ‍್ಹಾವನಿತರಸ್‍ ಅಪ್ಣೇಬಿ ಉಜಾ಼ಳಮ ಚಾ಼ಲ್ಯಾತೊ ಅಪ್ಣೆ ಏಕ್‌ಥಿಏಕ್ ಗಳ್‍ಜೋ಼ಡ್‍ಥಿ ರ‍್ಹಯೇಜಾ಼ಯ್ ತದೆ ಇನೊ ಎಕ್ಕಸ್ ದೇವ್‌ನೊ ಛಿಯ್ಯೊ ಯೇಸುನು ಲ್ಹೋಯಿ ಅಪ್ಣುನ ಅಖ್ಖಾ ಪಾಪ್‌ಥಿ ಛೋ಼ಡೈನ್ ಪಾಕ್‍ಕರಾಸ್.
1JO 1:8 ಅಪ್ಣಾಮ ಪಾಪ್‍ಕೊಯ್ನಿಕರಿ ಅಪ್ಣೆ ಬೋಲ್ಯಾತೊ ಅಪ್ಣುನ ಅಪ್ಣೆಸ್ ಠಗೈಲ್ಯವಾಳ ಹುಯಿರಾಸ್‍ ಅಜು಼ ಖ್ಹಾಚಿ ಕರಿ ಬೋಲಾನು ಅಪ್ಣಾಮ ಕೊಯ್ನಿ.
1JO 1:9 ಕತೋಬಿ ಅಪ್ಣೆ ಅಪ್ಣ ಪಾಪ್ನ ಮಾನೀನ್ ಬೋಲಿಲಿದತೊ ತದೆ ವಿಶ್ವಾಸ್‍ವಾಳೊಬಿ ನೀತಿವಾಳೊಬಿ ಹುಯಿರ‍್ಹೋತೆ ದೇವ್ ಅಪ್ಣಪಾಪ್ನ ಕ್ಷಮಾಪಣ್ ಕರಿನ್ ಅಖ್ಖಿ ನೀಚ್‌ಕಾಮ್‍ಥಿ ಅಪ್ಣುನ ಪಾಕ್‍ಕರಶೆ.
1JO 1:10 ಅಪ್ಣೆ ಪಾಪ್ ಕರ‍್ಯಾಕೊಯ್ನಿಕರಿ ಬೊಲ್ಯಾತೊ ದೇವ್ನ ಝೂ಼ಟೊ ಕರಾನಿತರ ಉಶೆ. ಅಜು಼ ಇನಿವಚನ್ ಅಪ್ಣಾಮ ಜ಼ಡ್‍ಗಾಠಿ ರ‍್ಹಿಶೆಕೊಯ್ನಿ.
1JO 2:1 ಮಾರ ಪ್ಯಾರ್‌ನ ಲಡ್ಕಾವೊ, ತುಮೆ ಪಾಪ್ ನಾಕರ‍್ನುತೆ ರ‍್ಹೇವ್ಣು ಮೇ ಆ ಅಖ್ಖು ತುಮೂನ ಲೀಖುಕರುಸ್. ಏಕ್‍ ವೇಳ್ಮ ಕೋಣ್‌ತೋಬಿ ಪಾಪ್ ಕರ‍್ಯುಸ್‍ಉಶೇತೊ ಅಪ್ಣ ಭಣೀಥು ಬಾಕನ ಬೋಲಿಲ್ಯವಾನ ಏಕ್‍ಜ಼ಣೊ ಛಾ಼. ಯೋಸ್ ನೀತಿವಾಳೊ ಯೇಸುಕ್ರಿಸ್ತ ಮದತ್‌ಕರಾವಾಳು ಹುಯಿರೋಸ್.
1JO 2:2 ಯೋ ಅಪ್ಣ ಪಾಪ್ನ ಕ್ಷಮಾಪಣ್‍ನಖ್ಹಾಜೆ ಪರಿಹಾರ‍್ನೊ ಬಲಿಹುಯಿರ‍್ಹೊಸ್. ಅಪ್ಣ ಪಾಪ್ನಕರಿ ಖಲಿಕಾಹೆ ಅಖ್ಖಾ ಜಗತ್ನ ಖ್ಹಾರ ಅದ್ಮಿನ ಪಾಪ್ನಖ್ಹಾಜೆಬಿ ಪರಿಹಾರ್ ಹುಯಿರ‍್ಹೊಸ್.
1JO 2:3 ಅಪ್ಣೆ ಇನಿ ಹುಕುಮ್‌ನ ವಿಧೇಯ ಹುಯಿನ್ ಚಾ಼ಲಿಲ್ಯವಾನುಸ್ ಅಪ್ಣೆ ಇನ ಮಾಲುಮ್ ಕರಿಲಿದಾಕರಿ ಖ್ಹಮ್‍ಜಿಲಿಯೇಸ್.
1JO 2:4 ಏಕ್‍ಜ಼ಣೊ, ಮನ ಯೊ ಮಾಲುಮ್ ಕರಿ ಬೋಲಿನ್ ಇನ ಹುಕುಮ್‍ನಿತರ ನಾ ಚಾ಼ಲಿಲೀದೊತೊ ಯೋ ಝೂ಼ಟೊ ಹುಯಿರ‍್ಹೊಸ್. ಖ್ಹಾಚು಼ಕರಿ ಬೋಲಾನು ಇನಾಮ ಕೊಯ್ನಿ.
1JO 2:5 ಕೋಣ್‍ತೋಬಿ ಇನಿ ವಚನ್ನ ಲೀನ್ ಚಾ಼ಲ್ಯೋತೊ ಇನಾಮ ಖ್ಹಚ಼ಂಬಿ ದೇವ್‌ಪರ್‌ನ ಪ್ಯಾರ್ ಭರ್‌ಪೂರ್‌ ಹುಯಿರ‍್ಹುಸ್. ಅಥ್ರಾನ ಕಾಮ್‍ಥಿ ಅಪ್ಣೆ ಇನಾಮ ಛಿಯೆಕರಿ ಮಾಲುಮ್ ಕರಿಲಿಯೇಸ್.
1JO 2:6 ದೇವ್‌ಮ ತಳ್‍ಗಾಠಿನ್ ಛೂ಼ಕರಿ ಬೋಲವಾಳೊ ಯೇಸು ಚಾ಼ಲಿಲಿದೋತೆ ತಿಮ್ಮಸ್ ಯೋಬಿ ಜಿವ್ಣು ಕರ‍್ನು.
1JO 2:7 ಮಾರ ಪ್ಯಾರ್‌ನ ಭೈಯೇ ಭೇನೆವೊ, ಮೇ ತುಮೂನ ಲೀಖುಕರುತೆ‍ ನವಿ ಹುಕುಮ್ ಕಾಹೆ, ಹೈರಿತೆ ಜೂ಼ನಿ ಹುಕುಮ್ ಹುಯಿರ‍್ಹಿಸ್. ಆ ಜೂ಼ನಿ ಹುಕುಮ್ ತುಮೆ ಖ್ಹಮ್‍ಜ್ಯಾತೆ ವಚನಸ್.
1JO 2:8 ಕತೋಬಿ ಮೇ ತುಮೂನ ಲೀಖುಕರುತೆ‍ ನವಿ ಹುಕುಮ್‍ನಿತರಾಸ್ ಛಾ಼. ಹೈರುತೆ ಇನಾಮಾಬಿ ತುಮಾರಮಾಬಿ ಖ್ಹಾಚು಼ಹುಯಿರ‍್ಹುಸ್. ಶನಕತೊ ಅಂಧಾರು ಚ಼ಲ್ಯುಜೈನ್‌, ಖ್ಹಾಚು಼ ಉಜಾ಼ಳು ಹಮ್ಕೆ ಉಜಾ಼ಖ್ಹ್‌ ಹೂಕರಸ್.
1JO 2:9 ಮೇ ಉಜಾ಼ಳಾಮ ಛೂ಼ ಕರಿ ಬೋಲಿಲೀನ್ ಇನ ಭೈಯೇ ಭೇನೇನ ವಹೇರ್‌ಕರವಾಳೊ ಹಮ್ಕೆಲಗೂಬಿ ಅಂಧಾರಮ ಛಾ಼.
1JO 2:10 ಇನ ಭೈಯೇ ಭೇನೆನ ಪ್ಯಾರ್ ಕರಾವಾಳೊ ಉಜಾ಼ಳಾಮ ಜಿವ್ಣುಕರವಾಳೊ ಹುಯಿರ‍್ಹೊಸ್ ಅಜು಼ ಪಾಪ್‌ಮ ಧೊಕ್‌ಡೈನ್ ಪಡಾನು ಶಾತ್ಬಿ ಇನಾಮ ಕೊಯ್ನಿ.
1JO 2:11 ಕತೋಬಿ ಇನ ಭೈಯೇ ಕೊಯಿನ್ತೊ ಭೇನೇನ ವಹೇರ್‌ಕರವಾಳೊ ಅಂಧಾರಮ ಛಾ಼ ಅಜು಼ ಅಂಧಾರಮ ಚಾ಼ಲವಾಳೊ ಹುಯಿರ‍್ಹೊಸ್. ಅಂಧಾರು ಇನ ಡೋಳಾನ ಕಾಣುಕರಿನಾಖಿದಿದುತೆ ಇನಖ್ಹಾಜೆ ಯೊ ಕಿಜ್ಜಾ಼ ವಳೆಜ಼ವುಸ್ ಕರಿ ಇನ ಮಾಲುಮ್‌ ಕೊಯ್ನಿ.
1JO 2:12 ಪ್ಯಾರ್‌ನ ಲಡ್ಕಾವೊ ಕ್ರಿಸ್ತನ ನಾಮ್‍ಪರ್ ತುಮಾರಿ ಪಾಪ್‍ಅಖ್ಖು ಕ್ಷಮಾಪಣ್ ಹುಯಿರ‍್ಹುಸ್ತೆ ಇನಖ್ಹಾಜೆ ಮೇ ತುಮೂನ ಲೀಖುಕರುಸ್.
1JO 2:13 ಬಾಖ್ಹಾರ ತುಮೆ ಶುರುವಾಥೂಸ್ ರ‍್ಹಾವಾಳನ ತುಮೆ ಮಾಲುಮ್‌ ಕರಿರಾಖ್ಯತೆ ಇನಖ್ಹಾಜೆ ಮೆ ತುಮೂನ ಲೀಖುಕರುಸ್. ಜಾ಼ನ್ಜ಼ಮಾನ್ ಹುಯಿರಾತೆ ತುಮೆ ವಹೇರ‍್ಯಾನ ಜೂತಿರಾಖ್ಯಸ್ ಇನಖ್ಹಾಜೆ ತುಮೂನ ಲೀಖುಕರುಸ್.
1JO 2:14 ಲಡ್ಕಾವೊ, ತುಮೆ ಬಾನ ಮಾಲುಮ್‌ ಕರಿರಾಖ್ಯತೆ ಇನಖ್ಹಾಜೆ ತುಮೂನ ಲೀಖುಕರುಸ್. ತುಮೆ ಶಕತ್‌ವಾಳ ಹುಯಿರಾತೆ ಇನಖ್ಹಾಜೇಬಿ ದೇವ್ನಿ ವಚನ್‍ ತುಮಾರಮ ಜಿವಿರ‍್ಹುಸ್ತೆ ಇನಖ್ಹಾಜೇಬಿ ಕೇಡ್‌ ಕರವಾಳನ ಹರೈರಾಖ್ಯಾತೆ ತುಮೂನ ಮೇ ಲೀಖುಕರುಸ್.
1JO 2:15 ಜಗತ್ನರ‍್ಹೇವೊ ಜಗತ್‌ಮರ‍್ಹೆಯಿತೆ ಇನರ‍್ಹವೊ ಪ್ಯಾರ್‌ನಕೊ ಕರೊ. ಕೋಣ್‌ತೋಬಿ ಜಗತ್ನ ಪ್ಯಾರ್‌ಕರ‍್ಯುತೊ ಬಾನ ಉಪ್ಪರ್‌ಛಾ಼ತೆ ಪ್ಯಾರ್ ಇನಾಮ ಕೊಯ್ನಿ.
1JO 2:16 ಜಗತ್‌ಮಛಾ಼ತೆ ಶರೀರ್‌ನಿ ಆಖ್ಹ್, ಡೋಳಾನಿಆಖ್ಹ್‌, ಜಿವ್ಣಮ ಚಾ಼ಲಾತೆ ಗಭ್ಭರ್, ಹೈರುತೆ ಬಾನ ಸಂಬಂದ್‌ನು ಕಾಹೆ. ಜಗತ್‌ನು ಹುಯಿರ‍್ಹುಸ್.
1JO 2:17 ಜಗತ್‍ಬಿ ಇನು ಹರಖ್ಹ್‌ಬಿ ಮಟಿಜಾ಼ಶೆ. ಕತೋಬಿ ದೇವ್ನು ಮರ್ಜಿನ ಚಾ಼ಲವವಾಳೊ ಕದೆಕದೇಬಿ ಜಿವಿರ‍್ಹಿಶೆ.
1JO 2:18 ಪ್ಯಾರ್‌ನ ಲಡ್ಕಾವೊ, ಹೈರುತೆ ಖ್ಹರ್ತಿನು ಹಗಾಮ್ ಹುಯಿರ‍್ಹುಸ್. ಕ್ರಿಸ್ತ ವಿರೋದಿ ಆವ್‍ಶೆಕರಿ ತುಮೆ ಖ್ಹಮ್‌ಜಿರಾಖ್ಯಾಸ್‌. ಹಮ್ಕೇಸ್ ಕೆತ್ರೂಕಿ ಕ್ರಿಸ್ತವಿರೋದಿ ಛಾ಼. ಇನಖ್ಹಾಜೆ ಹಮ್ಕೆ ಖ್ಹರ್ತಿನ ಹಗಾಮ್ ಹುಯಿರ‍್ಹುಸ್‌ಕರಿ ಅಪ್ಣುನ ಮಾಲುಮ್ ಛಾ಼.
1JO 2:19 ಇವ್ಣೆಅಖ್ಖು ಅಪ್ಣ ಖನ್ನೆಥಿ ನಿಕ್ಳಿ ಚ಼ಲೀಗು. ಶನಕತೊ ಇವ್ಣೆ ಖ್ಹಾಚಮಾಬಿ ಅಪ್ಣವಾಳು ಕಾಹೆ. ಇವ್ಣೆ ಅಪ್ಣವಾಳು ರ‍್ಹಿಯುಹೊತ್ತೊ, ಅಪ್ಣಿಜೋಡ್ಮಾಸ್ ರ‍್ಹಿಯುಹೊತ್. ಕತೋಬಿ ಇವ್ಣೆ ಅಪ್ಣೇಥಿ ನಿಕ್ಳಿಗಯುತೆ ಇನಖ್ಹಾಜೆ ಇವ್ಣೆಅಖ್ಖು ಅಪ್ಣವಾಳು ಕಾಹೆಕರಿ ಖ್ಹಾಚೇಥಿ ಮಾಲುಮ್‍ಪಡಸ್.
1JO 2:20 ಕತೋಬಿ ತುಮೆ ಪವಿತ್ರ ಹುಯಿರೋತೆ ಇನೇಥಿ ಪವಿತ್ರಾತ್ಮನ ಅಭಿಷೇಕ್‌ನ ತುಮಾರಪರ್ ಲೀರಾಖವಾಳ ಹುಯಿರ‍್ಹಾಸ್, ಇನಖ್ಹಾಜೆ ತುಮೆಖ್ಹಾರು ಖ್ಹಾಚಿನ ಮಾಲುಮ್ ಕರಿರಾಖ್ಯಸ್.
1JO 2:21 ತುಮೆ ಖ್ಹಾಚಿ ಮಾಲುಮ್ ಕರಿರಾಖ್ಯಸ್, ಕತೋಬಿ ಕೊಯ್ನಿ ಕರಿ ಲಾಝಿನ್ ಮೆ ಅನ ಕೊಲೀಖುಕರುನಿ. ಕತೋಬಿ ಖ್ಹಾಚಿನ ಖ್ಹಮ್‍ಜಿರಾಖವಾಳ; ಖ್ಹಾಚೇಥಿ ಝೂ಼ಟಿ ಉಬ್‍ಜಾ಼ಕೊಯ್ನಿ ಕರಿ ಮಾಲುಮ್ ಕರಿರಾಖವಾಳ. ಅನಖ್ಹಾಜೇಥಿ ಮೇ ತುಮೂನ ಲೀಖಿರಾಖ್ಯೊಸ್.
1JO 2:22 ಝೂ಼ಟಿಖೋರ್ ಕೋಣ್? ಯೇಸುನ ಪ್ರಭು ಕಾಹೆಕರಿ ಕೋಣ್ ಝಿಟ್ಕಾರಸ್ಕಿ ಯೋಸ್‍ ಝೂ಼ಟಿಖೋರ್ ಹುಯಿರಾಸ್‍, ಯೋ ಕ್ರಿಸ್ತವಿರೋದಿ, ಯೊ ಬಾನಾಬಿ ಅಜು಼ ಛಿಯ್ಯಾನಾಬಿ ಝಿಟ್ಕಾರವಾಳೊ ಹುಯಿರ‍್ಹೊಸ್.
1JO 2:23 ಕೋಣ್ ದೇವ್ನ ಛಿಯ್ಯಾನ ಝಿಟ್ಕಾರವಾಳೊಕಿ ಯೋ ದೇವ್ನ ಮಳ್ಯೊಹುಯೊ ಕಾಹೆ. ಕೋಣ್ ಛಿಯ್ಯಾನ ಮಾನಿಲೇಸ್ಕಿ ಯೋ ಬಾಹುಯಿರೋತೆ ದೇವ್ನ ಮಳ್ಯೊಹುಯೊ ಹುಯಿರ‍್ಹೊಸ್.
1JO 2:24 ಪಹಿಲೆಥೂಬಿ ತುಮೆ ಖಿವಿ ಸುವಾರ್ತೆನ ಖ್ಹಮ್‍ಜ್ಯಾಕಿ ಯೊ ತುಮಾರಮ ರ‍್ಹಿಶೆ. ಇನಖ್ಹಾಜೆ ತುಮೇಬಿ ಪಹಿಲೆಥೀಬಿ ಖ್ಹಮ್‍ಜ್ಯಾತೆ ಅಛ್ಛಿ ಸಮಾಚಾರ್ ತುಮಾರಮ ರ‍್ಹಯುತೊ ಛಿಯ್ಯಾಮಾಬಿ ಬಾಹುಯಿರೋತೆ ದೇವ್‍ಮಾಬಿ ತುಮೆ ಘಟ್‍ಥಿ ರ‍್ಹಿಶು.
1JO 2:25 ಯೋ ಅಪ್ಣುನ ವಾಗ್ದಾನ್ ಕರಿರಾಖ್ಯೊಸ್ತೆ ಶಾತ್‍ಕತೊ ಹಮೇಶಾನು ಜಾನ್‌.
1JO 2:26 ತುಮುನ ಅಛ್ಛಿ ವಾಟ್‍ಮಾಥು ಛು಼ಕೈನ್ ಖರಾಬ್ ವಾಟ್‌ಪರ್ ಖೇಚಾ಼ವಾಳಾನಿ ಬಾರೇಮ ಮೇ ತುಮೂನ ಲೀಖಿರಾಖ್ಯೊಸ್.
1JO 2:27 ತುಮೆ ಪ್ರಭು ಯೇಸುಥಿ ಪವಿತ್ರಾತ್ಮನಿ ಅಭಿಷೇಕ್ ಲೀರಾಖವಾಳ ಹುಯಿರಾಸ್‍. ಯೊ ಪವಿತ್ರಾತ್ಮ ತುಮಾರಮ ಛೆ. ಅನಖ್ಹಾಜೇಥಿ ಕೋಣ್‌ಬಿ ತುಮುನ ಬೋಧನೆ ಕರಾನಿ ಜ಼ರೂರತ್ ಕೊಯ್ನಿ. ಇನೆ ತುಮುನ ಕರ‍್ಯೊತೆ ಪವಿತ್ರಾತ್ಮಸ್ ತುಮೂನ ಅಖ್ಖಿ ಸಮಚಾರ್‌ಮ ಬೋಧನೆ ಕರಾನು ಹುಯಿರುಸ್. ಯೋ ಝೂ಼ಟಿಕಾಹೆ ಖ್ಹಾಚಿ ಹುಯಿರ‍್ಹುಸ್‍. ಯೊ ತುಮೂನ ಬೋಧನೆ ಕರ‍್ಯುತೆ ಪರಕ್ಮಾಸ್ ಇನಾಮ ಘಟ್ ರ‍್ಹಿಶು.
1JO 2:28 ಪ್ಯಾರ್‌ನ ಲಡ್ಕಾವೊ, ಯೋ ದೆಖಾವನಿ ವಖ್ಹ್‌ತೆ. ಅಪ್ಣೆ ಇನಖ್ಹಾಮ್ಣೆ ಭಿರಾವನ ಖ್ಹರ್‌ಮಾವ್ಣುನಾತೆ ಭಾಲಿಥಿ ರ‍್ಹಾವನಿಘೋಣಿ ಇನಾಮ ತಳ್‍ಗಾಠಿನ್ ರ‍್ಹಿಯೆ.
1JO 2:29 ಕ್ರಿಸ್ತ ಯೇಸು ನೀತಿವಾಳೊ ಹುಯಿರ್‍ಹೊಸ್ ಕರಿ ತುಮೂನ ಮಾಲುಮ್‌ ರ‍್ಹಿಯುತೊ ನೀತಿನ ಮಾರಗ್‌ಪರ್ ಚಾ಼ಲವಾಳು ಹರೇಕ್‍ಜ಼ಣುಬಿ ಇನೇಥಿ ಪೈದಹುಯಿರ‍್ಹುಸ್‍ ಕರಿ ತುಮೆ ಮಾಲುಮ್‌ ಕರಿರಾಖವಾಳ ಹುಯಿರ‍್ಹಾಸ್.
1JO 3:1 ಅಪ್ಣೆ ದೇವ್ನ ಲಡ್ಕಾ ಕರಿ ಬೋಲೈಲೇವ್ಣುಕತೊ ಬಾ ಅಪ್ಣುನ ಕೆಥ್ರಾನಿ ಪ್ಯಾರ್ ಕರಿರಾಖ್ಯೊಸ್ ದೇಖೊ; ಖ್ಹಚಂಬಿ ಅಪ್ಣೆ ದೇವ್ನ ಲಡ್ಕಾ ಹುಯಿರಾಸ್. ಆ ಜಗತ್‌ ಇನ ಮಾಲುಮ್‌ಕರ‍್ಲಿದುಕೊಂತೆ ಇನಾಖ್ಹಾಜೆ ಅಪ್ಣುನಾಬಿ ಮಾಲುಮ್‌ ಕರ‍್ಲೆಯ್‍ಕೊಯ್ನಿ.
1JO 3:2 ಪ್ಯಾರ್‌ನ ದೋಸ್ತಿವೊ ಅಪ್ಣೆ ಹಮ್ಕೆ ದೇವ್ನ ಲಡ್ಕಾ. ಅಜು಼ ಆಗಾಡಿ ಅಪ್ಣೆ ಶಾತ್‌ ಲಿಶುಕರಿ ಕೆಥ್ರಾನವಾಳ ಹುಯಿರ‍್ಹಿಯೆಸ್ ಕರಿ ಬಿಜೂ಼ಬಿ ಖ್ಹಮ್‍ಜ್ಯಕೊಯ್ನಿ. ಕತೋಬಿ ಕ್ರಿಸ್ತಯೇಸು ಆವನಿ ವಖ್ಹ್‌ತೆ ಅಪ್ಣೇಬಿ ಇನಿನಿತರಾಸ್ ರಿಶು ಕರಿ ಮಾಲುಮ್ ಕರಿರಾಖ್ಯಸ್. ಶನಕತೊ ಯೋ ರ‍್ಹಿಶೇತೆ ರೂಪ್‍ಮಸ್ ದೇಕ್‌ಶು.
1JO 3:3 ಕ್ರಿಸ್ತಯೇಸುಪರ್ ರಾಖಿಮ್ಹೆಲ್ಯಾತೆ ಆ ಭರೋಖ್ಹಾನ ಹರೇಕ್ ಜ಼ಣುಬಿ ಯೋ ಪವಿತ್ರ ಹುಯಿರಾವಾನಿ ಘೋಣಿಸ್ ಇನು ಯೋಸ್‍ ಪರಿಶುದ್ ಕರಿಲೇಸ್.
1JO 3:4 ಪಾಪ್ ಕರಾವಾಳೊ ಹರೇಕ್ ಜ಼ಣೋಬಿ ದೇವ್ನಿ ಹುಕುಮ್ಮ ಕೋರ‍್ಹೆಯ್ನಿ. ದೇವ್ನಿ ಹುಕುಮ್‌ನ ಮ್ಹೇಲ್‍ವಾನುಸ್‍ ಪಾಪ್.
1JO 3:5 ಪಾಪ್ ಖ್ಹಾರುಸ್ ಕಾಡ್ಣುಕರಿ ಕ್ರಿಸ್ತ ಆಯೊಕರಿ ಬೋಲಾನುಬಿ, ಅಜು಼ ಇನಾಮ ಪಾಪಸ್ ಕೊಯ್ನಿಕರಿಬಿ ತುಮೂನ ಮಾಲುಮ್ ಛಾ಼.
1JO 3:6 ಇನಾಮ ತಳ್‍ಗಾಠಿನ್ ರ‍್ಹೇವವಾಳೊ ಪಾಪ್ನಕರಕೊಯ್ನಿ; ಪಾಪ್‍ಕರವಾಳೊ ಇನ ದೇಖಿರಾಖ್ಯುಬಿ ಕೊಯ್ನಿ. ಮಾಲುಮ್ ಕರ‍್ಯುಬಿ ಕೊಯ್ನಿ;
1JO 3:7 ಪ್ಯಾರ್‌ನ ಲಡ್ಕಾವೊ, ಕೋಣ್‌ಬಿ ತುಮುನ ಠಗಾವ್ಣುನಾತೆ ತಿಮ್ ರ‍್ಹವೊ. ಕ್ರಿಸ್ತ ಕಿಮ್ ನೀತಿವಾಳೊ ಹುಯಿರೋಸ್ಕಿ ತಿಮ್‍ ನೀತಿಥಿ ಚಲಾವಾಳೊ ಹರೇಕ್‍ಜ಼ಣೋಬಿ ನೀತಿವಾಳೊ ಹುಯಿರ‍್ಹೋಸ್.
1JO 3:8 ಪಾಪ್ ಕರಾವಾಳೊ ಶೈತಾನ್‍ನಿ ಪಿಳ್ಗಿವಾಳೊ. ಶೈತಾನ್‍ ಜ಼ಮಾನೇಥುಬಿ ಪಾಪ್ ಕರವಾಳೋಸ್. ಇನಖ್ಹಾಜೆ ಇನು ಖರಾಬ್ ಕಾಮ್‍ಖ್ಹಾರಾನ ನಾಶ್ ಕರ್ನುಸ್ ಕರಿ, ದೇವ್‌ನೊ ಛಿಯ್ಯೊ ಆಯೋತೆ.
1JO 3:9 ದೇವ್‍ಥಿ ಪೈದ ಹುಯಿರ‍್ಹವವಾಳೊ ಕೋಣ್‌ಬಿ ಪಾಪ್ ಕರ್ಶೆ ಕೊಯ್ನಿ. ಶನಕತೊ ದೇವ್ನಿ ಸ್ವಭಾವ್ ಇನಾಮ ಛಾ಼. ಯೋ ದೇವ್‍ಥಿ ಪೈದ ಹುಯಿರ‍್ಹೊಸ್ತೆ ಇನಖ್ಹಾಜೆ ಪಾಪ್ ಕರಾನ ಕೋ ಉಶೇನಿ.
1JO 3:10 ಅಜು಼ ನೀತಿನ ವಾಟ್‌ಮ ನಾಚಾ಼ಲವಾಳೊ, ಇವ್ಣ ಭೈಯೇ ಅಜು಼ ಭೇನೇನ ಲಾಡ್‌ ನಾಕರವಾಳೊ ದೇವ್‍ಥಿ ಪೈದಹುಯೊ ಕೊಯ್ನಿ. ಅಮ್ ದೇವ್ನ ಲಡ್ಕಾ ಕೋಣ್ ಅಜು಼ ಶೈತಾನ್ನ ಲಡ್ಕಾ ಕೋಣ್‌ಕರಿ ಮಾಲುಮ್ ಕರಿಲೆಯೆಜಾ಼ಯ್‍.
1JO 3:11 ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನು ಸಂದೇಶ್‌ನಾಸ್‍ ತುಮೆ ಪಹಿಲೆಥು ಖ್ಹಮ್‍ಜಿರಾಖ್ಯಸ್ತೆ.
1JO 3:12 ಕೇಡ್‍ಕರವಾಳೊ ಹುಯಿರಿನ್ ಇನ ಭೈನಾಸ್‍ ಭೋಕಿ ಮಾರ‍್ಯೋತೆ ಕಾಯಿನನಿಘೋಣಿ ಅಪ್ಣೆ ನಾರ‍್ಹೇವ್ಣು. ಯೋ ಶನ ನ್ಹಾನಭೈನ ಮಾರಿನಾಖಿದಿದೊತೆ? ಇನು ಕಾಮ್‌ಖ್ಹಾರು ಖರಾಬ್ ಅಜು಼ ಇನ ಭೈನು ಕಾಮ್ ನೀತಿನು ಹುಯಿರ‍್ಹುಥೂತೆ ಇನಖ್ಹಾಜೇಸ್.
1JO 3:13 ಭೈಯೇ ಭೇನೆವೊ, ಜಗತ್‌ ತುಮೂನ ವಹೇರ್‌ ಕರ‍್ಯುತೊ ಆಶ್ಚರ್ಯ ನಕೊಕರೊ.
1JO 3:14 ಅಪ್ಣೆ ಅಪ್ಣ ಭೈಯೇ ಭೇನೆವೊನ ಪ್ಯಾರ್ ಕರಾಥಿ ಮರಣ್‍ಥಿ ನಿಕ್ಳಿನ್ ಕದೇಬಿ ರ‍್ಹವಾನ ಜಾನ್‌ಮ ಛಿಯೆ ಕರಿ ಅಪ್ಣುನ ಮಾಲುಮ್ ಛಾ಼. ಕೋಣ್ ಇವ್ಣ ಭೈಯೇ ಭೇನೇನ ಪ್ಯಾರ್ ಕರಾಕೊಯ್ನಿಕಿ ಇವ್ಣೆ ಮರಣ್‍ಮಾಸ್‍ ಛಾ಼.
1JO 3:15 ಕೋಣ್‌ಬಿ ಇವ್ಣ ಭೈಯೇ ಭೇನೇನ ವಹೇರ್‌ ಕರಾವಾಳೊ ಖೂನಿಹುಯಿರ‍್ಹೊಸ್. ಅಜು಼ ಖೆವ ಖೂನಿಮಾಬಿ ಕೆದೇಬಿ ರ‍್ಹವಾನು ಜಾನ್‌ ಕೋರ‍್ಹಿಶೇನಿ ಕರಿ ತುಮೂನ ಮಾಲುಮ್.
1JO 3:16 ಪ್ರಭು ಯೇಸು ಅಪ್ಣಖ್ಹಾಜೆ ಇನ ಜಾನ್ನಾಸ್ ಮ್ಹೇಲ್ಯೊ. ಅನೇಥಿ ಲಾಡ್‌ ಕೆಥ್ರಾನು ಕರಿ ಅಪ್ಣೆ ಖ್ಹಮ್‍ಜಿಲಿದ ಕಿಮ್‌ಕತೊ. ಅಪ್ಣೇಬಿ ಭೈಯೇ ಭೇನೇನಖ್ಹಾಜೆ ಜಾನ್‌ ದೇವವಾಳ ಹುಯಿರಾಸ್‍.
1JO 3:17 ಅಜು಼ ಆ ಲೋಕ್‌ನು ಧನ್‌ದೌಲತ್‌ ರ‍್ಹವಾಳೊ ಕೋಣ್‌ತೋಬಿ ವದೆಖ್ಹ್‌ಮರ‍್ಹಾವಳ ಇನ ಭೈನ ದೇಖಿನ್‍ ಗೋರ್‌ನ ಕರ‍್ಯತೊ ದೇವ್ನಿ ಪ್ಯಾರ್ ಇನಾಮ ರ‍್ಹಾವನ ಉಶೇಕಿ ಶು?
1JO 3:18 ಮಾರ ಲಾಡ್ನ ಲಡ್ಕಾವೊ, ತುಮೆಖಾಲಿ ವಾತೆಥೀಬಿ ರ‍್ಹವೊ, ಅಛ್ಛಿವಾತ್‍ ಬೋಲಾಥೀಬಿ ಪ್ಯಾರ್‌ಕರವಾಳ ನಾಹುಯಿರೇವ್ಣುತೆ ಕರ್ನಿಥಿಬಿ ಅಜು಼ ಖ್ಹಾಚಿ ಮೊಹೊಬಥ್ಥಿ ಪ್ಯಾರ್ ಕರಾವಾಳ ಹುಯಿರ‍್ಹೇಣು.
1JO 3:19 ಅಮ್‍ ಅಪ್ಣೆ ಖ್ಹಾಚಿಮ ಮಳಿರ‍್ಹವಾಳ ಕರಿ ಅನೇಥಿಸ್‍ ಅಪ್ಣುನ ಮಾಲುಮ್ ಹುವಾಸ್, ತದೆ ಅಪ್ಣು ದಿಲ್‌ ದೇವ್ನ ಖ್ಹಾಮ್ಣೆ ಛುಟಾದಿಲ್‍ನೊ ಹುಯಿರ‍್ಹೇಸ್‍.
1JO 3:20 ಖಿವಿ ಬಾರೇಮತೋಬಿ ಅಪ್ಣೊ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುತೋಬಿ, ಅಖ್ಖುಸ್ ಮಾಲುಮ್ ರ‍್ಹವಾಳೊ ದೇವ್ ಅಪ್ಣ ದಿಲ್ನಿ ಸಾಕ್ಷಿಥೀಬಿ ಮೋಟೊಕರಿ ಅಪ್ಣುನ ಮಾಲುಮ್ ಛಾ಼.
1JO 3:21 ಪ್ಯಾರ್‌ನ ಭೈಯೇ ಭೇನೆವೊ ಅಪ್ಣ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುನಾತೊ, ಅಪ್ಣೆ ದೇವ್ನ ಖ್ಹಾಮ್ಣೆ ಹಿಮ್ಮಥಿರ‍್ಹವಾನ ಉಶೆ.
1JO 3:22 ಅಪ್ಣೆ ದೇವ್ನಿ ಹುಕುಮ್‌ನ ಅಖ್ಖುಲೀನ್ ಚಾ಼ಲ್ಯಾತೊ ಇನು ಪಸಂದ್‌ನು ಕಾಮ್‍ಕರವಾಳ ಹುಯಿರ‍್ಹಾತೊ ಅಪ್ಣೆ ಶಾತ್ಬಿ ಮಾಂಗಿ ಲಿಯೆಜಾ಼ಯ್‍.
1JO 3:23 ದೇವ್ನಿ ಹುಕುಮ್ ಶಾತ್‍ಕತೊ ಅಪ್ಣೆ ದೇವ್‌ನೊ ಛಿಯ್ಯೊ ಪ್ರಭು ಯೇಸುನ ನಾಮ್‍ಪರ್ ವಿಶ್ವಾಸ್‍ಕರೀನ್‍ ಇನೆ ಹುಕುಮ್ ಕರಿರಾಖ್ಯೊತೆ ಇಮ್ಮಸ್ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನುಸ್.
1JO 3:24 ದೇವ್ನಿ ಹುಕುಮ್‌ನ ಪಾಡಿಚಾ಼ಲವಾಳೊ ಇನಾಮ ತಳ್‍ಗಾಠಿನ್ ರ‍್ಹೇಸ್. ದೇವ್ ಇವ್ಣಾಮ ತಳ್‌ಗಾಠಿ ರ‍್ಹೇಸ್‍. ದೇವ್ ಅಪ್ಣಾಮ ತಳ್‍ಗಾಠಿ ಛಾ಼ಕರಿ ಯೋ ಅಪ್ಣುನ ಕೃಪೆಥಿ ದೀರಾಖ್ಯೋತೆ ಪವಿತ್ರಾತ್ಮಥೀಸ್ ಮಾಲುಮ್ ಕರಿಲಿಯೇಸ್.
1JO 4:1 ಪ್ಯಾರ್‌ನ ಅದ್ಮಿವೊ “ಅಪ್ಣಾಮ ಪವಿತ್ರಾತ್ಮ ಛಾ಼” ಕರಿ ಬೋಲಿಲ್ಯಾವಾಳ ಅಖ್ಖಾಸ್ನ ವಿಶ್ವಾಸ್ ನಾಕರ‍್ನು. ಯೊ ಹುಮ್ಮಖ್ಹ್‌ ದೇವ್‍ಥಿ ಆಯು ಕಿಶು ಕರಿ ತರೀಪ್‌ಶ ಕರಿನ್ ದೇಖೊ. ಶನಕತೊ ಜಗತ್‌ಮ ಕೆತ್ರುಕ್ಕಿ ಝೂ಼ಟು ದೇವ್ನಿ ಸಮಾಚಾರ್ ಬೋಲವಾಳು ಕಿಜ಼್ಜ ಕಿಜ್ಜಾ಼ಬಿ ಫೈಲೈಗು.
1JO 4:2 ದೇವ್ನ ಆತ್ಮಥು ಆಯುತೆ ಹುಮ್ಮಖ್ಹ್‌ನ ತುಮೆ ಕಿಮ್ ಖ್ಹಣೇದ್ ಕರೇಜಾ಼ಯ್‍ಕತೊ; ಅದ್ಮಿಹುಯಿನ್ ಆಯೊತೆ ಯೇಸುಕ್ರಿಸ್ತನ ಮಾನಿಲ್ಯವಾನು ಆತ್ಮ ದೇವ್‍ಥೀಸ್‍ ಆವಸ್ತೆ.
1JO 4:3 ಯೇಸುನ ಮಾನಿಲೇಯಿಕೊಂತೆ ಆತ್ಮ ದೇವ್‍ಥಿ ಆಯುತೆಕಾಹೆ. ಯೋ ಕ್ರಿಸ್ತವಿರೋದಿ ಆತ್ಮ ಹುಯಿರ‍್ಹುಸ್. ಯೋ ಆವ್‍ಶೆಕರಿ ತುಮೆ ಖ್ಹಮ್‍ಜಿರಾಖ್ಯಸ್‍ನಿ; ಹಮ್ಕೆ ತದೇಸ್‌ ಯೋ ಜಗತ್‌ಮ ಅಯಿಗು.
1JO 4:4 ಪ್ಯಾರ್‌ನ ಲಡ್ಕಾವೊ, ತುಮೆತೋಬಿ ದೇವ್‌ಮ ಮಳಿರ‍್ಹವಾಳ. ಅಜು಼ ಇನ ತುಮೆ ಜೂತಿರ‍್ಹವಾಳ ಹುಯಿರ‍್ಹಾಸ್ ಇವ್ಣೆ ಜಗತ್‌ಮ ಛಾ಼ತೆ ದುರಾತ್ಮಥೀಬಿ ತುಮಾರಮ ಛಾ಼ತೆ ಆತ್ಮ ಮಹಾನ್ ಹುಯಿರ‍್ಹೂಸ್ ಇನಖ್ಹಾಜೇಥಿಸ್ ಯೋ ಝೂ಼ಟ ಪ್ರವಾದಿಯೇವ್‍ನ ಆತ್ಮನ ಜೂತಿಗಯ.
1JO 4:5 ಇವ್ಣೆ ಜಗತ್‌ಮ ಮಳಾವಾಳು. ಅನಖ್ಹಾಜೇಥಿ ಇವ್ಣೆಖ್ಹಾರು ಆ ಜಗತ್ನಿ ವಾತೆನಾಸ್ ಬೋಲಾಸ್. ಇನಖ್ಹಾಜೆ ಆ ಜಗತ್‍ಬಿ ಇವ್ಣಿ ವಾತ್‍ಖ್ಹಮ್‍ಜ಼ಸ್‍.
1JO 4:6 ಅಪ್ಣೆತೋಬಿ ದೇವ್‌ಮ ಮಳ್ಯಹುಯ. ದೇವ್ನ ಮಾಲುಮ್‌ ಕರಿರಾಖವಾಳೊ ಅಪ್ಣಭಣಿ ಕಾನ್‍ದೇಸ್. ದೇವ್‌ಮ ಮಳಿರ‍್ಹೆಯಿಕೊಂತೆ ಅಪ್ಣುನ ಕಾನ್‍ದೇಯ್‍ ಕೊಯ್ನಿ. ಅನಖ್ಹಾಜೆಥೀಸ್ ಖ್ಹಾಚ಼ನ ಬೋಲಾನು ಆತ್ಮಖಿವು ಅಜು಼ ಝೂ಼ಟು ಬೋಲಾತೆ ಆತ್ಮ ಖಿವುಕರಿ ಅಪ್ಣುನ ಮಾಲುಮ್‌ ಹುವ್ವಾಸ್‌.
1JO 4:7 ಪ್ಯಾರ್‌ನ ದೋಸ್ತಿವೊ ಅಪ್ಣೆ ಏಕ್‌ಥಿಏಕ್ ಪ್ಯಾರ್ ಕರಿಯೆ ಶನಕತೊ ಪ್ಯಾರ್ ದೇವ್‍ಥಿ ಆಯುಹುಯು ಹುಯಿರ‍್ಹೂಸ್ ಅಜು಼ ಪ್ಯಾರ್ ಕರಾವಾಳೊ ಹರೇಕ್‍ಬಿ ದೇವ್‍ಥಿ ಪೈದ ಹುವವಾಳೊ ಹುಯಿರ‍್ಹೋಸ್ ಯೋ ದೇವ್ನ ಮಾಲುಮ್ ಕರಾಖವಾಳೊ ಹುಯಿರ‍್ಹೋಸ್.
1JO 4:8 ಪ್ಯಾರ್ ನಾಕರವಾಳೊ ದೇವ್ನ ಮಾಲುಮ್ ಕರಿರಾಖ್ಯಕೊಂತೆ ಹುಯಿರ‍್ಹೊಸ್. ಶನಕತೊ ದೇವ್ ಪ್ಯಾರ್‌ವಾಳೊ ಹುಯಿರ‍್ಹೊಸ್.
1JO 4:9 ಅಪ್ಣೆ ಇನೇಥಿ ಬಚಾ಼ನಖ್ಹಾಜೆ ಇನ ಎಕ್ಕಸ್ ಛಿಯ್ಯಾನ ಜಗತ್‌ಮ ಮೋಕ್ಲಮಸ್‍ ದೇವ್ನಿ ಪ್ಯಾರ್ ಅಪ್ಣಾಮ ಅಯಿರ‍್ಹೀಸ್‍.
1JO 4:10 ಅಪ್ಣೆ ದೇವ್ನ ಪ್ಯಾರ್ ಕರ‍್ಯಕೊಯ್ನಿ, ಕತೋಬಿ ಯೋ ಅಪ್ಣುನ ಪ್ಯಾರ್ ಕರೀನ್ ಅಜು಼ ಅಪ್ಣ ಪಾಪ್ನ ಪರಿಹಾರ‍್ನಖ್ಹಾಜೆ ಇನ ಛಿಯ್ಯಾನ ಮೋಕ್‍ಲ್ಯೊತೆ ಇನಾಮಸ್ ಪ್ಯಾರ್‌ನಿ ಖ್ಹಾಚಿಗುಣ್‍ ದೆಖೈಜಾ಼ಸ್.
1JO 4:11 ಪ್ಯಾರ್‌ನ ದೋಸ್ತಿವೊ, ದೇವ್ ಅಪ್ಣುನ ಅಮ್ ಪ್ಯಾರ್ ಕರಾಪರ್ ಅಪ್ಣೇಬಿ ಏಕ್‌ಥಿಏಕ್ ಪ್ಯಾರ್‌ಕರ‍್ನುಸ್‍ ಕರ‍್ನು.
1JO 4:12 ದೇವ್ನ ಕೋಣ್‌ಬಿ ಕದೇಬಿ ದೇಖ್ಯುಕೊಯ್ನಿ. ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರ‍್ಯತೊ ದೇವ್ ಅಪ್ಣಾಮ ರ‍್ಹೇಸ್, ಅಜು಼ ಇನಿ ಪ್ಯಾರ್ ಅಪ್ಣಾಮ ಭರ್‌ಪೂರ್‌ಥಿ ರ‍್ಹೇಸ್.
1JO 4:13 ದೇವ್ ಇನಿ ಆತ್ಮಾನ ಅಪ್ಣಾಮ ದೀರಾಖ್ಯೋತೆ ಇನಖ್ಹಾಜೇಸ್ ಅಪ್ಣೆ ಇನಾಮ ಛಿಯೆಕರಿ ಮಾಲುಮ್ ಕರಿಲಿಯೇಸ್.
1JO 4:14 ಬಾನೆ ಇನ ಛಿಯ್ಯಾನ ಜಗತ್ನೊ ರಕ್ಷಕ್ ಕರೀನ್ ಮೋಕ್ಲಿರಾಖ್ಯೊತೆ ಅಪ್ಣೆ ದೇಖಿರಾಖ್ಯಸ್. ಅಜು಼ ಇನಿ ಬಾರೇಮ ಅಪ್ಣೆ ಸಾಕ್ಷಿ ಬೋಲಿಯೇಸ್.
1JO 4:15 ಯೇಸುಕ್ರಿಸ್ತ ದೇವ್‌ನೊ ಛಿಯ್ಯೊಕರಿ ಕೋಣ್ ಮಾನಿಲೇಸ್ಕಿ ಇವ್ಣಾಮ ದೇವ್ ರ‍್ಹೇಸ್, ಅಜು಼ ಇವ್ಣೆ ದೇವ್‌ಮ ರ‍್ಹವಾಳ ಹುಯಿರಾಸ್.
1JO 4:16 ಅಮ್ಮಸ್ ದೇವ್ ಅಪ್ಣಾಮ ರಾಖಿರಾಖ್ಯೊತೆ ಪ್ಯಾರ್‌ನ ಅಪ್ಣೆ ಮಾಲುಮ್ ಕರಿರಾಖ್ಯಸ್. ಇನ ಅಪ್ಣೆ ವಿಶ್ವಾಸ್ ಕರಿಯೇಸ್. ದೇವ್ ಪ್ಯಾರ್‌ವಾಳೊ ಹುಯಿರ‍್ಹೊಸ್. ಪ್ಯಾರ್‌ಮ ರ‍್ಹವವಾಳೊ ದೇವ್‌ಮ ರ‍್ಹವಾಳೊ ಹುಯಿರೇಸ್‌. ದೇವ್ ಇವ್ಣಾಮ ರ‍್ಹವಾಳೊ ಹುಯಿರ‍್ಹೊಸ್ ದೇವ್ ಪ್ಯಾರ್ ಹುಯಿರ‍್ಹೊಸ್.
1JO 4:17 ನ್ಯಾವ್‌ತೀರ್ಪ್‌ನ ದನ್ಮ ಅಪ್ಣೆ ಹಿಮ್ಮಥ್ಥಿ ರ‍್ಹವಾನಖ್ಹಾಜೆ ಇನಿ ಪ್ಯಾರ್ ಅಪ್ಣಾಮ ಛಾ಼. ಆ ಜಗತ್‌ಮ ಅಪ್ಣು ಜಿವ್ಣು ಕ್ರಿಸ್ತಯೇಸುನ ಜಿವ್ಣನಿಘೊಣಿ ರ‍್ಹೇಸ್ತೆ ಇನಖ್ಹಾಜೇಸ್ ಆ ಭರೋಖ್ಹೊ ಅಪ್ಣಾಮ ಭರ್‌ಪೂರ್‌ಥಿ ರ‍್ಹೇಸ್ತೆ.
1JO 4:18 ಪ್ಯಾರ್ ರ‍್ಹೇಸ್ತೆ ಹಿಜ್ಜಾ಼ ಡರ್‌ಕೊರ‍್ಹೇಯಿನಿ. ಡರ್‌ರ‍್ಹೇಸ್ತೆ ಹಿಜ್ಜಾ಼ ನಿಶತ್‌ ರ‍್ಹೇಸ್. ಕತೋಬಿ ಭರ್‌ಪೂರ್‌ ಪ್ಯಾರ್ ಡರ‍್ನ ಮಾರಿನಖ್ಹಾಡಿದೇಸ್. ಡರವಾಳೊ ಪ್ಯಾರ್‌ಮ ಪೂರ ಹುಯಿರ‍್ಹವಾಳೊ ಕಾಹೆ.
1JO 4:19 ದೇವ್ ಅಪ್ಣುನ ಪಹಿಲೆ ಪ್ಯಾರ್ ಕರ‍್ಯೊತೆ ಇನಖ್ಹಾಜೆ ಅಪ್ಣೆ ಇನ ಪ್ಯಾರ್ ಕರಿಯೇಸ್.
1JO 4:20 ಏಕ್‍ಜ಼ಣೊ ಮೇ ದೇವ್ನ ಪ್ಯಾರ್‌ಕರುಸ್‍ಕರಿ ಬೋಲಿನ್ ಇನ ಭೈನ ವಹೇರ್‌ಕರ‍್ಯೊತೊ ಯೋ ಝೂ಼ಟೊ ಹುಯಿರ‍್ಹೊಸ್.‌ ಶನಕತೊ ಇನ ಜೋ಼ಡ್ಮ ರ‍್ಹವಾಳ ಭೈಯೆ ಭೇನೇನ ಪ್ಯಾರ್ ನಾಕರ‍್ಯೊತೊ ಯೋ ದೇಖಕೊಂತೆ ದೇವ್ನ ಕಿಮ್ ಪ್ಯಾರ್ ಕರ್ಶೆ?
1JO 4:21 ದೇವ್ನ ಪ್ಯಾರ್‌ಕರವಾಳೊ ಇನ ಭೈ ಭೇನೇನ ಪ್ಯಾರ್‌ಕರ‍್ನು ಕರಿ ಕ್ರಿಸ್ತಯೇಸು ಅಪ್ಣುನ ಹುಕುಮ್ ಕರ‍್ಯೊ.
1JO 5:1 ಯೇಸುಸ್ ಪ್ರಭು ಕರಿ ನಂಬವಾಳ ಹರೇಕ್ ಜ಼ಣಾಬಿ ದೇವ್ನ ಲಡ್ಕಾ ಹುಯಿರ‍್ಹಾಸ್. ಕೋಣ್ ಇನ ಪೈದಕರ‍್ಯೊತೆ ಬಾನ ಪ್ಯಾರ್ ಕರಸ್ಕಿ ಅಥ್ರಾನವಾಳು ಹರೇಕ್ ಜ಼ಣು ಇನ ಛಿಯ್ಯಾನ ಜಿನುಕು ಪ್ಯಾರ್‌ಕರಸ್‍.
1JO 5:2 ಅಪ್ಣೆ ದೇವ್ನ ಪ್ಯಾರ್‌ಕರೀನ್ ಇನಿ ಹುಕುಮ್‌ನ ಪಾಡಿಚಾ಼ಲಥೀಸ್‍ ದೇವ್ನ ಲಡ್ಕಾನ ಪ್ಯಾರ್‌ಕರ್‌ಶು ಕರಿ ಮಾಲುಮ್ ಕರಿಲಿಯೇಸ್.
1JO 5:3 ದೇವ್ನ ಪ್ಯಾರ್‌ಕರ‍್ವಾನು ಕರಿ ಬೋಲ್ಯುತೊ ಇನೆ ದಿದೊತೆ ಹುಕುಮ್‌ನ ಲೀನ್‍ ಚಾ಼ಲ್‍ವಾನುಸ್‍ ಹುಯಿರುಸ್. ಇನು ಹುಕುಮ್‍ಖ್ಹಾರು ಅಪ್ಣುನ ಕಠಣ್ ಶಾತ್ಬಿ ಕಾಹೆ.
1JO 5:4 ಶನಕತೊ ದೇವ್‍ಥಿ ಪೈದ ಹುಯೋತೆ ಹರೇಕ್ ಜ಼ಣುಬಿ ಜಗತ್ನ ಜುತಿಲೇಸ್. ಜಗತ್ನಜುತಾನು ಅಪ್ಣಿ ವಿಶ್ವಾಸ್‌ಥೀಸ್.
1JO 5:5 ಯೇಸುಸ್ ದೇವ್‌ನೊ ಛಿಯ್ಯೊ ಕರಿ ವಿಶ್ವಾಸ್ ಕರವಾಳೋಸ್ ಜಗತ್ನ ಜುತಾನ ಉಶೆಪಣ್ಕಿ ಜಗತ್ನ ಜುತಾನ ಅಜು಼ ಕಿನೇಥಿ ಉಶೆ?
1JO 5:6 ಪ್ರಭು ಯೇಸುಸ್ ಪಾಣಿಥಿ ಅಜು಼ ಲ್ಹೋಯಿಥಿ ಆಯಿರ‍್ಹೋಸ್. ಖಾಲಿ ಪಾಣಿಥೀಸ್‍ ಕಾಹೆ, ಕತೋಬಿ ಪಾಣಿಥೀಬಿ ಲ್ಹೋಯಿಥಿಸ್‍ ಆಯಿರ‍್ಹೊಸ್ತೆ. ಅನ ಪವಿತ್ರಾತ್ಮಸ್ ಸಾಕ್ಷಿ. ಶನಕತೊ ಪವಿತ್ರಾತ್ಮಸ್ ಖ್ಹಾಚೊ಼ ಹುಯಿರೋಸ್.
1JO 5:7 ಶನಕತೊ ತೀನ್ ಸಾಕ್ಷಿ ಛಾ಼:
1JO 5:8 ಅಮ್‍ ಪವಿತ್ರಾತ್ಮ, ಪಾಣಿ ಅಜು಼ ಲ್ಹೋಯಿಕರಿ ತೀನ್ ಸಾಕ್ಷಿಖ್ಹಾರು ಛಾ಼. ಆ ತೀನ್ಹೇಬಿ ಎಕ್ಕಸ್ ಸಾಕ್ಷಿ ದೇಸ್.
1JO 5:9 ಅಪ್ಣೆ ಅದ್ಮೇವ್‌ನಿ ಸಾಕ್ಷಿನ ಮಾನಿಲಿಯೇಸ್‍ನಿ ಇಮ್ಮಸ್ ದೇವ್ನಿ ಸಾಕ್ಷಿ ಇನೇಥಿಬಿ ಘಣು ಮಹಾನ್ ಹುಯಿರ‍್ಹುಸ್‍. ಶನಕತೊ ದೇವ್ನೆ ದೀರಾಖ್ಯೋತೆ ಸಾಕ್ಷಿ ಇನ ಛಿಯ್ಯಾನಿ ಬಾರೇಮ ಹುಯಿರ‍್ಹುಸ್‍.
1JO 5:10 ದೇವ್ನ ಛಿಯ್ಯಾಮ ವಿಶ್ವಾಸ್ ಕರಾವಾಳೊ ಆ ಸಾಕ್ಷಿನ ಇನಾಮ ಲೀರಾಖಸ್. ದೇವ್ನ ನಂಬಕೊಂತೆ ಯೋ ಇನ ಝು಼ಟೊಕರಿ ಬಣೈರಾಖ್ಯೊಸ್. ಕಿಮ್‌ಕತೊ ದೇವ್ ಇನ ಛಿಯ್ಯಾನಿ ಬಾರೇಮ ದಿದೋತೆ ಸಾಕ್ಷಿಮ ಇನೆ ವಿಶ್ವಾಸ್ ಕರ‍್ಯೊಕೊಯ್ನಿ.
1JO 5:11 ಯೋ ಸಾಕ್ಷಿ ಖಿವಿಕತೊ ದೇವ್ ಅಪ್ಣುನ ಕೆದೇಬಿ ರ‍್ಹವಾನು ಜಾನ್ನ ದಿರಾಖ್ಯೊಸ್. ಯೊ ಜಾನ್‌ ಇನ ಛಿಯ್ಯಾಮ ಛಾ಼.
1JO 5:12 ಕಿನಾಮ ದೇವ್‌ನೊ ಛಿಯ್ಯೊ ಛಾ಼ಕಿ ಇನಾಮ ಜಾನ್‌ ರ‍್ಹೇಸ್. ಕಿನಾಮ ದೇವ್‌ನೊ ಛಿಯ್ಯೊ ಕೊ ರ‍್ಹೇಯ್ನಿಕಿ ಇನಾಮ ಜಾನ್‌ ಕೊರ‍್ಹೇಯಿನಿ.
1JO 5:13 ದೇವ್ನ ಛಿಯ್ಯಾನ ನಾಮ್‍ಪರ್ ವಿಶ್ವಾಸ್ ರಾಖವಾಳ ತುಮೆ ಕೆದೇಬಿ ರ‍್ಹವಾನ ಜಾನ್ನ ಲೀರಾಖವಾಳ ಕರಿ ಬೋಲವನಾಸ್‍ ಮೇ ತುಮೂನ ಆಖ್ಹಾರು ಲೀಖಿರಾಖ್ಯೊಸ್.
1JO 5:14 ಅಜು಼ ದೇವ್ನ ಖ್ಹೂಜ಼್‍ಥಿ ಶಾತ್ತೋಬಿ ಮಾಂಗಿಲಿದಾತೊ ಯೋ ಅಪ್ಣಿ ಬಿಂತಿನ ಖ್ಹಮಜ಼್‌ಶೆ ಕರಿ ಅಪ್ಣುನ ಭರೋಖ್ಹೊ ಛಾ಼.
1JO 5:15 ಅಪ್ಣೆ ಶಾತ್‍ ಬೋಲಿಲಿದಾತೋಬಿ ಅಪ್ಣಿ ಬಿಂತೀನಿವ್ಹಾರ್‌ನ ದೇವ್ ಖ್ಹಮ್‍ಜಾ಼ಸ್‍ಕರಿ ಅಪ್ಣುನ ಮಾಲುಮ್ ರ‍್ಹಯುತೋ ಅಪ್ಣೆ ಬಿಂತಿಕರ‍್ಯುಹುಯು ಇನೇಥಿ ಅಪ್ಣುನ ಮಳ್‌ಶೆಕರಿ ಅಪ್ಣಿ ಭರೋಖ್ಹಾಥಿ ಮಾಲುಮ್‌ಪಡಸ್‍.
1JO 5:16 ಕೋಣ್‌ತೋಬಿ ಇನೊ ಭೈ ಅಜು಼ ಭೇನ್ ಮರಣ್‍ಕೊಂತೆ ಪಾಪ್‍ಕರಾನು ದೇಖಾಯುತೊ ಯೊ ದೇವ್‌ಮ ಬಿಂತಿ ಕರಿಲ್ಯವಾದೆ. ತದೆ ದೇವ್ ಮರಣ್‍ಕೊಂತೆ ಪಾಪ್‍ಕರವಾಳಾನ ಜಾನ್ನ ದಿಶೆ. ಮರಣ್‍ಲ್ಯವಾನಿ ಪಾಪ್ ಛಾ಼. ಆ ಪಾಪ್ನಿಬಾರೇಮ ಯೋ ಬಿಂತಿ ಕರಿಲ್ಯವಾದೆಕರಿ ಮೇ ಬೋಲುಕೊಯ್ನಿ.
1JO 5:17 ಖರಾಬ್ ಕರಾನು ಅಖ್ಖೂಬಿ ಪಾಪ್‍ಹುಯಿರುಸ್‍, ತ್ಯೋಬಿ ಬಿಗರ್ ಮರಣ್ಣಿ ಪಾಪ್‌ಬಿ ಛಾ಼.
1JO 5:18 ದೇವ್‍ಥಿ ಉಬ್‍ಜಾ಼ವಾಳೊ ಪಾಪ್‍ಕರವಾಳೊ ಕಾಹೆ ಕರಿ ಅಪ್ಣುನ ಮಾಲುಮ್ ಛೆ. ದೇವ್‍ಥಿ ಪೈದಹುವವಾಳೊ ಇನುಯೋಸ್ ಬಚಾ಼ಡಿಲಿಶೆ. ಕೇಡ್‌ ಕರಾವಾಳೊ ಇನ ಛೀಮ್‍ಶೆ ಕೊಯ್ನಿ.
1JO 5:19 ಹಿಡಿ ಜಗತ್ತಸ್ ಕೇಡ್‌ ಕರವಾಳನ ಕಬ್‌ಜಾ಼ಮ ರ‍್ಹಯುತೋಬಿ ಅಪ್ಣೆ ದೇವ್ನ ಮಳಿರ‍್ಹವಾಳ ಕರಿ ಅಪ್ಣುನ ಮಾಲುಮ್ ಛಾ಼.
1JO 5:20 ದೇವ್‌ನೊ ಛಿಯ್ಯೊ ಆ ಜಗತ್‌ಮ ಅಯಿನ್ ಅಪ್ಣೆ ಖ್ಹಾಚೊ಼ ಹುಯಿರೋಸ್ತೆ ದೇವ್ನ ಮಾಲುಮ್‌ ಕರಿಲ್ಯವಾನಿಘೊಣಿ ಅಪ್ಣುನ ಖ್ಹಯಾಲ್ ದೀರಾಖ್ಯೊಸ್‍ಕರಿ ಅಪ್ಣುನ ಮಾಲುಮ್‌ಛಾ಼. ಅಪ್ಣೆ ದೇವ್‌ನೊ ಛಿಯ್ಯೊ ಹುಯಿರೋತೆ ಕ್ರಿಸ್ತಮ ರ‍್ಹಾವಾನ ಖ್ಹಾಚ ದೇವ್‌ಮ ರ‍್ಹಾವವಾಳ ಹುಯಿರ‍್ಹಾಸ್. ಯೋ ಕ್ರಿಸ್ತಸ್ ಕದೇಬಿ ರ‍್ಹವಾನು ಹರ್‌ಹಮೇಶಾನೊ ಜಾನ್‌ಬಿ ಹುಯಿರ‍್ಹೊಸ್.
1JO 5:21 ಪ್ಯಾರ್‌ನ ಲಡ್ಕಾವೊ ಮೂರತ್ ದೂರ್ ರ‍್ಹೀನ್ ತುಮುನ ಬಚಾ಼ಡಿಲೇವೊ.
2JO 1:1 ಸಬೇನೊ ಶಾಣಾವ್‍ಮಾಥೊ ಏಕ್‍ಜ಼ಣೊ ಹುಯಿರ‍್ಹೋತೆ ಮೆ ದೇವ್ನೆ ಚೂ಼ಣಿರಾಖ್ಯುತೆ ಖ್ಹಾಚ ಪ್ಯಾರ್‌ನಿ ಭೇನೆನಾಬಿ ಇನ ಲಡ್ಕಾನಾಬಿ ಲೀಖುಕರುಸ್ತೆ ಶಾತ್‍ಕತೊ;
2JO 1:2 ಅಪ್ಣಾಮ ಜ಼ಡ್‍ಗಾಠಿಛಾ಼ತೆ ಅಜು಼ ಕದೇಬಿ ಅಪ್ಣ ಜೋ಼ಡೆ ಛೇತೆ ಖ್ಹಾಚ಼ನಖ್ಹಾಜೆ, ಮೆ ತುಮುನ ಖ್ಹಾಚಮಾಬಿ ಪ್ಯಾರ್‌ಕರೂಸ್. ಮೇಸ್ ಕಾಹೆತೆ ಖ್ಹಾಚಿನ ಪ್ಯಾರ್‌ಕರವಾಳು ಖ್ಹಾರುಸ್ ತುಮುನ ಪ್ಯಾರ್‌ಕರಾಸ್‌.
2JO 1:3 ಬಾ ಹುಯಿರ‍್ಹೋತೆ ದೇವ್‌ಥಿಬಿ, ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಯೇಸು ಕ್ರಿಸ್ತಥಿ, ವಾರ್‌ಖ್ಹೊಬಿ, ಗೋರ್‌ಬಿ, ಶಾಂತಿಬಿ, ಖ್ಹಾಚಿಬಿ, ಪ್ಯಾರ್‌ಬಿ ಅಪ್ಣ ಜೋ಼ಡೆ ಹರ್‌ಹಮೇಶ ರ‍್ಹವಾದೆ.
2JO 1:4 ಬಾಥಿ ಅಪ್ಣೆ ಲೀಲಿದಾತೆ ಹುಕುಮ್‍ನಿತರ ತುಮಾರ ಲಡ್ಕಾಮ ಥೋಡುಜ಼ಣು ಖ್ಹಾಚಿ ವಾಟ್‌ಪರ್ ಚಾ಼ಲುಕರಸ್ತೆ ದೇಖಿನ್ ಮನ ಘಣು ಖ್ಹುಶಿ ಹುಯು.
2JO 1:5 ಆಯಾವೊ, ಮೆ ನವಿ ಹುಕುಮ್‌ನ ಲೀಖುಕರುಕೊಂತೆ ಪಹಿಲೆಥೀಸ್‍ ಛಾ಼ತೆ ಹುಕುಮ್‍ನಾಸ್‍ ಲಿಖಾವಾಳೊ ಹುಯಿರೋಸ್. ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರವಾಳ ಹುಯಿರ‍್ಹಿಯೆಕರಿ ತುಮಾರಮ ಬೋಲಿಲೇವುಸ್.
2JO 1:6 ದೇವ್ನಿ ಹುಕುಮ್ ಲೀನ್ ವಿಧೇಯ ಹುಯಿನ್ ಚಾ಼ಲಾನುಸ್ ಪ್ಯಾರ್ ಹುಯಿರುಸ್. ಪ್ಯಾರ್‌ಮ ಚಾ಼ಲ್ನುಸ್‍ಕರಿ, ತುಮೆ ಪಹಿಲೆಥುಬಿ ಖ್ಹಮ್‍ಜ್ಯಾತೆ ಹುಕುಮ್‌ ಹುಯಿರಿಸ್. ತುಮೆ ಖ್ಹಾರು ಪ್ಯಾರ್‌ಮಾಸ್ ಜಿವವಾಳ ಹುಯಿರ‍್ಹೇಣು.
2JO 1:7 ಶನಕತೊ, ಯೇಸುಕ್ರಿಸ್ತ ಅದ್ಮಿಹುಯಿನ್ ಆಯೊ ಕರಿ ಮಾನಿಲೆಯಿಕೊಂತೆ ಕೆತ್ರುಕ್ಕಿ ಠಗಾರುಖ್ಹಾರು ಜಗತ್‌ಮ ಅಯಿಗು ಅಥ್ರಾನವಾಳುಸ್ ಯೇಸುನ ಮಾನಿಲೆಯಿಕೊಂತೆ ಠಗಾರುಖ್ಹಾರು, ಕ್ರಿಸ್ತವಿರೋದಿ ಖ್ಹಾರು ಹುಯಿರುಸ್.
2JO 1:8 ತುಮೆ ಖ್ಹತಾಪ್ಣಿಥಿ ಕಮೈರಾಖ್ಯಸ್ತೆ ನಾ ಗುಮೈಲೆವ್ಣುತೆ ಪೂರ ಫಾಯಿದಾನ ಲೀಲ್ಯಾವನಟೇಕೆ ಹೊಷಾರ್‌ ಹುವೊ.
2JO 1:9 ಕ್ರಿಸ್ತನಿ ಉಪದೇಶ್‍ಮ ನಾರ‍್ಹೀನ್ ಇನ ಮಿತ್‌ಮೀರಿನ್ ಜಾವಾಳಮ ದೇವ್ ಕೊರ‍್ಹೇಯಿನಿ. ಯೊ ಉಪದೇಶ್‍ಮ ಜ಼ಡ್‍ಗಾಠಿನ್ ರ‍್ಹಾವವಾಳಮ ಬಾನಿಬಿ ಛಿಯ್ಯಾನಿಬಿ ಜೋ಼ಡೆ ಗಳ್‍ಜೋ಼ಡ್ ರ‍್ಹಿಶೆ.
2JO 1:10 ಆ ಬೋಧನೆನ ಝಿಟ್ಕಾರವಾಳು ಕೋಣ್‌ಬಿ ತುಮಾರಕನ ಆಯುತೊ ಇವ್ಣುನ ತುಮಾರ ಘರ್‌ಮ ಬುಲಾವೊನಕೊ. ಇವ್ಣುನ ಅಛ್ಛು಼ ಹುವಾದೆ ಕರಿಬಿ ನಕೊ ಬೋಲೊ.
2JO 1:11 ಶನಕತೊ, ಇವ್ಣುನ ಅಛ್ಛು಼ ಹುವಾದೆ ಕರಿ ಬೋಲವಾಳೊ ಇವ್ಣ ಖರಾಬ್ ಕಾಮ್ಮ ಭಾಗ್‌ಲ್ಯಾವಾಳು ಹುಯಿರ‍್ಹಿಶೆ.
2JO 1:12 ಮೇ ತುಮುನ ಬೋಲಾನು ಘಣುಛೆ. ಮೇ ಇಂಕ್‍ಥಿ ಕಾಗತ್‌ಪರ್ ಲೀಖಿನ್ ಖ್ಹಮ್‌ಜಾ಼ಡನ ಇಷ್ಟಕೊಯ್ನಿ. ಕತೋಬಿ ಮೇಸ್ ತುಮಾರಕನ ಐನ್, ತುಮಾರಿಜೋ಼ಡೆ ಆಮಖ್ಹಾಮೆ ವಾತೆ ಬೋಲಾನ ಆಖ್ಹ್‌ ಕರುಸ್. ತದೆ ತುಮಾರಿ ಖ್ಹುಶಿ ಭರ್‌ಪೂರ್‌ ಉಷೆ.
2JO 1:13 ದೇವ್ನೆ ಚೂ಼ಣ್ಯೋತೆ ತುಮಾರಿ ಪ್ಯಾರ್‌ನಿ ಭೇನೆನ ಲಡ್ಕಾ ತುಮುನ ಧನ್ಯವಾದ್ ಬೋಲುಕರಸ್.
3JO 1:1 ಸಬೇನೊ ಶಾಣಾವ್‌ಮ ಏಕ್‍ಜ಼ಣೊ ಹುಯಿರೋತೆ ಮೆ, ಖ್ಹಾಚಮಾಬಿ ಪ್ಯಾರ್ ಕರುಸ್ತೆ ಮಾರೊ ಪ್ಯಾರ‍್ನೊ ಗಾಯನ ಲೀಖುಕರುಸ್ತೆ ಶಾತ್‌ಕತೊ,
3JO 1:2 ಮಾರೊ ಪ್ಯಾರ್‌ನೊ ದೋಸ್ತ್ ತೂ ತಾರಿ ಆತ್ಮನಿ ಬಾರೇಮ ಭಡಿರೋಸ್ತೆ ಪರಕ್ಮಾಸ್ ಖ್ಹಾರಿಸ್ ವಾತೆಮಾಬಿ ಭಡ್ತೊಹುಯಿನ್‌ ಅಛ್ಛಿಪಣೈಥಿ ರ‍್ಹೇವ್ಣುಕರಿ ಮೇ ಪ್ರಾರ್ಥನೆ ಕರುಸ್.
3JO 1:3 ಭೈಯೇಖ್ಹಾರು ಕದೆಕದೇಬಿ ಮಾರಕನ ಐನ್ ತಾರಮಛಾ಼ತೆ ಖ್ಹಾಚ಼ನಿ ಬಾರೇಮ ತೂ ಖ್ಹಾಚೊ಼ಹುಯಿನ್‌ ಜಿವವಾಳೊ ಕರಿ ಬೋಲಾನು ಖ್ಹಮ್‍ಜಾ಼ನಿ ವಖ್ಹ್‌ತೆ, ಮೇ ಘಣು ಖುಷಿಕರ‍್ಯೊ.
3JO 1:4 ಮಾರ ಲಡ್ಕಾ ಖ್ಹಾಚಿನ ಲೀನ್ ಜಿವವಾಳ ಹುಯಿರ‍್ಹಾಸ್ ಕರಿ ಬೋಲಾನು ಖ್ಹಮ್‍ಜಾ಼ಯೆತ್ರೆ ಘಣಿ ಖ್ಹುಶಿ ಬಿಜ಼ ಶನಾಮಬಿ ಕೊಯ್ನಿ.
3JO 1:5 ಮಾರೊ ಪ್ಯಾರ್‌ನೊ ದೋಸ್ತ್ ತು ಭೈಯೇ ಭೇನೆವ್‌ನ ಇನೇಥಿಬಿ ಜಾ಼ಖ್ಹತ್ ಮಾಲುಮ್‌ ನಾರ‍್ಹಯುತೋಬಿ ಘಣಿ ವಿಶ್ವಾಸ್‍ಥಿ ಕಾಮ್‍ಕರುಕರಸ್‍.
3JO 1:6 ಇವ್ಣೆ ಸಬೆನ ಖ್ಹಾಮ್ಣೆ ತುನೆ ದೆಖಾಡ್ಯೊತೆ ಪ್ಯಾರ್‌ನಿ ಬಾರೇಮ ಸಾಕ್ಷಿ ಬೋಲ್ಯು. ಇವ್ಣೆ ಇವ್ಣಿ ಚಾ಼ಲ್‌ನ ಬಿಜೂ಼ಬಿ ಆಗಾಡಿ ಚ಼ಲಾವ್‌ತು ಜಾ಼ವಖ್ಹರ್ಕು ದೇವ್ನ ಪಸಂದ್ ಹುವಾನಿ ವಾಟ್‌ಪರ್ ಇವ್ಣೆ ಚಾ಼ಲಖ್ಹರ್ಕು ತು ಇವ್ಣುನ ಮದತ್ ಕರ‍್ನು.
3JO 1:7 ಶನಕತೊ ಇವ್ಣೆ ಕ್ರಿಸ್ತನು ನಾಮ್ನ ಫೈಲಾವನ ಟೇಕೆಥಿ ನಿಕ್ಳಿರ‍್ಹುಸ್. ಅಲಕ್ಅದ್ಮಿವೊ ಕಂಥು ಶಾತ್ಬಿ ಮದತ್ ಲ್ಯವಾನಖ್ಹಾಜೆ ಕಾಹೆ.
3JO 1:8 ಇನಾಖ್ಹಾಜೆ, ವಿಶ್ವಾಸಿ ಹುಯಿರಾತೆ ಅಪ್ಣೆ ಅಥ್ರಾನವಾಳಾನ ಮದತ್‌ಕರ‍್ನು. ಅಮ್‍ ಇವ್ಣೆ ಖ್ಹಾಚ಼ನಖ್ಹಾಜೆ ಕರಾತೆ ಕಾಮ್ಮ ಅಪ್ಣೇಬಿ ಭಾಗ್‌ ಹುವಾನಿತರ ಉಶೆ.
3JO 1:9 ಸಬೆನ ಮೇ ಏಕ್‌ ನ್ಹಾನಿ ಚಿಟ್ಟಿ ಲೀಖ್ಯೋಥೊ; ಕತೋಬಿ ದಿಯೊತ್ರೇಫಸ್ ಹಿಜ಼್ಜಾನಿ ಸಬೆನ ಘಲ್ಡೊ ಹೋಣುಕರಿ ಆಖ್ಹ್‌ಕರಸ್ ಇನಖ್ಹಾಜೆ ಹಮೆ ಬೋಲಿಯೇತೆ ವಾತೆನ ಖ್ಹಮ್‌ಜ಼ಕೊಯ್ನಿ.
3JO 1:10 ಇನಖ್ಹಾಜೇಥಿ,ಮೆ ಹಿಜ್ಜಾ಼ ಆವಾದಿನ್ ಯೊ ಕರಾತೆ ಕಾಮ್ನಿ ಬಾರೇಮ ಖ್ಹಾರನ ಬೋಲ್‌ಶೆ. ಯೋ ಬಡೈ ಮಾರವಾಳೊ ಹುಯಿನ್, ಅಪ್ಣಿಬಾರೇಮ ಝೂ಼ಟಿ ಫೈಲವ್‍ಕರಸ್. ಅಜು಼ ಖೆವ ಭೈಯೇವೋನಾಬಿ ಮಳೈಲೆಯಿಕೊಯ್ನಿ ಅಜು಼ ಮೆ ಮಳಾವ್ಣುಕರಿ ಕರುಸ್ತೆ ಇವ್ಣುನಾಬಿ ಆಡೊ ಆಯಿನ್ ಸಬೇಥಿ ಕಾಡಿನಾಖಸ್‌.
3JO 1:11 ಮಾರ ಪ್ಯಾರ್‌ನೊ ಭೈ ತು ಖರಾಬ್ ಚಾ಼ಲ್ ನಾ ಚಾ಼ಲ್ನುತೆ, ಅಛ್ಛಿ ಚಾ಼ಲ್‍ಚ಼ಲಣ್‍ ಚಾ಼ಲವಾಳೊ ಹುಯಿರ‍್ಹೆ; ಅಛ್ಛಾ಼ನ ಕರಾವಾಳೊ ದೇವ್‌ಭಣಿವಾಳೊ ಹುಯಿರೋಸ್. ಖರಾಬ್‌ನ ಕರಾವಾಳೊ ಕದೇಬಿ ದೇವ್ನ ದೇಖ್ಯೊಕೊಯ್ನಿ.
3JO 1:12 ದೆಮೇತ್ರಿಯನಿ ಬಾರೇಮ ಅಖ್ಖುಜ಼ಣು ಅಛ್ಛೊ಼ಸ್‌ಕರಿ ಬೋಲಸ್. ಸಾಕ್ಷಿಬಿ ಲೀರಾಖ್ಯೊಸ್. ಎತ್ರೇಸ್‌ಕೊಂತೆ ಹಮೆ ಇನಿ ಬಾರೇಮ ಸಾಕ್ಷಿ ಬೋಲ್‍ಯೇಸ್; ಹಮಾರಿ ಸಾಕ್ಷಿ ಖ್ಹಾಚು಼ಕರಿ ತುನ ಮಾಲುಮ್ ಛಾ಼.
3JO 1:13 ಮೆ ತುನ ಲೀಖಾನು ಜಾ಼ಖ್ಹತ್ ಛೆ. ಕತೋಬಿ ಲೀಖ್‍ಣಿಥಿಬಿ ಇಂಕ್‍ಥಿ ಕಾಗತ್‌ಪರ್ ಲೀಖಾನ ಮನ ಪಸಂದ್ ಕೊಯ್ನಿ.
3JO 1:14 ಮೆ ಜ಼ಲ್‌ದಿ ಆಯಿನ್ ತುನ ದೆಖಿಶ್‍ಕರಿ ಭರೋಖ್ಹೊ ಕರುಸ್. ತದೆ ಅಪ್ಣೆ ಆಮೆಖ್ಹಾಮೆಥಿ ವಾತೆ ಬೊಲಿಯೆ.
3JO 1:15 ತುನ ಶಾಂತಿ ಹುವಾದೆ. ದೋಸ್ತಿಖ್ಹಾರು ತುನ ಖ್ಹಲಾಮ್ ಕರಸ್. ಹಿಜ್ಜಛಾ಼ತೆ ಹರೇಕ್ ದೋಸ್ತ್ ಖ್ಹಾರಾನ ನಾಮ್‍ಧರೀನ್ ಖ್ಹಲಾಮ್‍ಬೋಲ್‍.
JUD 1:1 ಯೇಸು ಕ್ರಿಸ್ತನೊ ಸೇವಕ್‌ಬಿ, ಯಾಕೋಬನೊ ಭೈಬಿ ಹುಯಿರೋತೆ ಯೂದ ಬುಲೈ ರ‍್ಹವಾಳಾನ, ಬಾ ಹುಯಿರೋತೆ ದೇವ್‌ಮ ಪ್ಯಾರ್‌ನ ಹುಯಿರಾತೆ ಅಜು಼ ಯೇಸು ಕ್ರಿಸ್ತನಖ್ಹಾಜೆ ಬಚಿರ‍್ಹಾತೆ ಇವ್ಣುನ ಶಾತ್ ಲೀಖುಸ್‌ಕತೊ,
JUD 1:2 ತುಮೂನ ಗೋರ್‌ಬಿ, ಶಾಂತಿ, ಪ್ಯಾರ್ ಘಣೇಥಿ ಮಳಾದೆ.
JUD 1:3 ಮಾರ ಪ್ಯಾರ್‌ವಾಳ, ಅಪ್ಣೆ ಲೀರಾಖ್ಯಾತೆ ರಕ್ಷಣೇನಿ ಬಾರೇಮ ತುಮೂನ ಲಿಖಾನ ಪೂರ ಆಖ್ಹ್‌ಥಿ ಕೋಶಿಶ್ ಕರಾನಿ ವೇಳ್ಮ, ದೇವ್ನ ಅದ್ಮಿವೋನ ಹರ್‌ಹಮೇಶ ರ‍್ಹವಾನಿಘೋಣಿ ಎಕ್ಕಸ್‍ಹಲ್ಲ ದೆವೈರ‍್ಹೀತೆ ಭರೋಖ್ಹಾನ ಬಚಾ಼ಡಿಲ್ಯವಾನಖ್ಹಾಜೆ, ತುಮೆ ಕರ್ತರ‍್ಹೇಣುಕರಿ ಝೇತೈನ್ ಲೀಖಾನು ಅಛ್ಛು಼ಕರಿ ಮನ ಬೋಲಾಯು.
JUD 1:4 ಶನಕತೊ ಭಕ್ತಿಕೊಂತೆ, ಅಪ್ಣ ದೇವ್ನ ವಾರ್‌ಖ್ಹಾನ ಭಾಣುಕರಿಲೀನ್‍ ಖ್ಹರಮ್‌ಕೊಂತೆ ಕಾಮ್ನ ಕರವಾಳುಬಿ, ಅಪ್ಣೊ ಎಕ್ಕಸ್ ಯಜಮಾನ್‌ಬಿ ಪ್ರಭು ಯೇಸುಕ್ರಿಸ್ತನ ಝಿಟ್ಕಾರವಾಳು ಥೋಡುಜ಼ಣು ಗಪ್ಲಥ್ಥಿ ಸಬೆಮ ಮಹಿ ಪೇಶಿರ‍್ಹುಸ್. ಅವ್ಣೆ ಅಗಾಡಿಥೂಸ್ ನಿಶತ್‌ನ ನೇಮಕ್‍ಹುಯಿರ‍್ಹುಸ್‍ ಕರಿ ಪವಿತ್ರ ವಚನ್‌ಮ ಲೀಖೈರುಸ್.
JUD 1:5 ತುಮೆ ಹರೇಕ್‍ನಾಬಿ ಪಹಿಲೇಸ್ ಮಾಲುಮ್ ಕರಿರಾಖ್ಯತೋಬಿ, ಮೆ ಆವ್‌ಶೇತೆ ವಿಚಾರ‍್ನಿ ಬಾರೇಮ ತುಮಾರಿ ಖ್ಹಯಾಲ್ಮ ಲ್ಯಾವ್ಣುಕರಿ ಆಖ್ಹ್‌ಕರುಸ್. ಯೋ ಖಿವುಕತೊ, ಪ್ರಭುನೆ ಇನ ಪ್ರಜೆಖ್ಹಾರಾನ ಈಜಿಪ್ಟ್ ದೇಖ್ಹ್‌ಮಾಥು ಬಚಾ಼ಡ್ಯೊತೋಬಿ, ಇನಕೇಡೆಥು ಕೋಣ್ ನಂಬ್ಯುಕೊಯ್ನಿಕಿ ಇವ್ಣುನ ನಾಶ್ ಕರ‍್ಯೊ.
JUD 1:6 ಇವ್ಣಿ ಅಧಿಕಾರ‍್ನಿ ಝ಼ಗೋನ ಮ್ಹೇಲಿದಿನ್, ಇನ ಶೊಂತ್ ಝ಼ಗೋನ ಮ್ಹೆಂದಿದಾತೆ ದೇವ್‌ದೂತರ್‌ನ ದೇವ್ನೆ ಕದೇಬಿ ರ‍್ಹವಾನಿ ಖ್ಹಂಕಳ್‌ನ ಜ಼ಡ್‍ಕಿನ್ ಮಹಾದನ್ಮ ಉಷೇತೆ ತೀರ್ಪ್‌ನಖ್ಹಾಜೆ ಇವ್ಣುನ ಅಂಧಾರಿನ ಪಾಳ್ಯಮ ಟಿವಾಡಿರಾಖ್ಯೊಸ್.
JUD 1:7 ಇಮ್ಮಸ್ ಸೊದೋಮ್ ಅಜು಼ ಗೊಮೋರ್ ಖ್ಹಯೇರ್‌ವಾಳೂಬಿ, ಇನ ಅಶ್‌ಪೀಶ್‌ನ ಖ್ಹಯೇರ್‌ವಾಳೂಬಿ ಯೋ ದೂತರ್‌ನಿಘೊಣಿ ಚಾ಼ಲಿಲಿನ್ ಇವ್ಣುನ ಇವ್ಣೆಸ್ ಪಾಪೇಲ ಕಾಮ್ನ ದೀನಾಖಿದಿನ್, ನಾಕರ‍್ನುತೆ ಕಾಮ್ನ ಪಾಲನ್‍ ಕರ‍್ಯುತೆ ಇನಖ್ಹಾಜೆ ಇವ್ಣೆ ಕೆದೇಬಿ ರ‍್ಹವಾನ ಆಗ್‌ಮ ಖ್ಹತಾಪ್ಣಿ ಲೇತುಹುಯಿನ್‌, ಖರಾಬ್ ಮಾರಗ್‌ಪರ್ ಚಾ಼ಲವಾಳಾನ ಖರಾಬ್‍ಚಾ಼ಲ್ಮ ಉದಾಹರಣೆಕರಿ ಮ್ಹೇಲಿರಾಖ್ಯುಸ್.
JUD 1:8 ತುಮಾರಿ ಸಬೆಮ ಆವಾಳ ಅದ್ಮಿವ್‌ನಾಬಿ ಅಮ್ನಿಸ್ ಪರಕ್ ಉಶೆ. ಇವ್ಣೆ ಖ್ಹೋಣ್ಯಮ ರ‍್ಹೇಯಿತೆತಿಮ್ ಇವ್ಣೆ ಪಾಪ್‍ಥೀಸ್ ಶರೀರ್‌ನ ಮೈಲು ಕರಿಲೇಸ್. ಅಜು಼ ದೇವ್ನಿ ಅದಿಕಾರ್‌ನ ಝಿಟ್ಕಾರಸ್. ಸೊರ್ಗಾಮ ರ‍್ಹವಳಾನಿ ವಿರೋದ್ ಖರಾಬ್ ವಾತ್ ಬೋಲಸ್.
JUD 1:9 ಕತೋಬಿ ಪಹಿಲೊ ದೇವ್ನೊದೂತಥೋತೆ ಮೀಕಾಯೇಲನೆ ಮೋಶೇನು ಶರೀರ್‌ನಿ ಬಾರೇಮ ಮೀಕಾಯೇಲ ಶೈತಾನ್‍ನಿ ಜೋ಼ಡ್ಮ ವಾದ ಕರ‍್ಯೊತದೆ, ಯೋ ಶೈತಾನ್ನಿ ವಿರುದ್ದ ಏಕ್‌ಬಿ ದೂಷಣೆ ಕರಾನ ಹಿಮ್ಮತ್ ಲಿದೊಕೊಂತೆ, ಪ್ರಭು ತುನ ಡರಾವದೆಕರಿ ಕರಿಬೋಲ್ಯೊ.
JUD 1:10 ಕತೋಬಿ ಆ ಅದ್ಮಿಖ್ಹಾರು ಇವ್ಣುನ ಮಾಲುಮ್‌ಕೊಂತೆ ತಿನಿಬಾರೇಮ ದೂಷಣೆ ಕರಸ್. ಅಜು಼ ಇವ್ಣೆ ಅಕ್ಕಲ್‌ಕೊಂತೆ ಜಾನ್ವರ್‌ನಿತರ ಮಾಲುಮ್‌ ಕರಿಲೇಸ್. ಅಜು಼ ಇನೇಥಿ ಇವ್ಣು ಇವ್ಣೇಸ್ ನಾಶ್ ಕರಿಲೇಸ್.
JUD 1:11 “ಇವ್ಣಿ ಹಾಲ್ನ ಮೇ ಶಾತ್‌ಬೋಲು! ಶನಕತೊ ಅವ್ಣೆ ಕಾಯಿನನು ಮಾರಗ್‍ಧರೀನ್ ಚಾ಼ಲಾವಾಳೂಬಿ, ಧನ್‌ ದೌಲತ್ನ ಕಮಾವನಖ್ಹಾಜೆ ಬಿಳಾಮಾನೊ ಗಲತ್‌ ಮಾರಗ್‌ಪರ್ ಚಾ಼ಲಾವಾಳೂಬಿ, ಕೋರಹನಿತರ ವಿರೋದ್‌ ಆಡ್‌ಫೇಡ್ ಬೋಲಿನ್ ನಾಶಹುವವಾಳು ಹುಯಿರ‍್ಹುಸ್”.
JUD 1:12 ತುಮಾರ ಪ್ಯಾರ್‌ನ ಮಿಝ಼್ವಾನ್‌ಮ ಡರ್‌ಕೊಂತೇಸ್ ಖೈನ್, ಇವ್ಣು ಇವ್ಣೇಸ್ ಪೇಟ್ ಪಾಳವಾಳು ಹುಯಿರ‍್ಹುಸ್, ಇವ್ಣೆ ವರ್ಖ್ಹಾತ್‍ಕೊಂತೆ ಮೋಡ್‍ನಿತರ ರ‍್ಹೀನ್, ವಹಿರೊ ವಾಗಥೀಸ್ ಉಡಿಜಾ಼ವಳನಿತರ ರ‍್ಹೇಸ್ ಅಜು಼ ಇವ್ಣೆ ಬರೋಬರ್ ಹಗಾಮ್ನ ಪಂಡು ಮ್ಹೇಲಾಕೊಂತೆ ಅಜು಼ ಜ಼ಡ್‍ಖ್ಹಮೇದ್ ಉಖ್‌ಡೈ ರಡ್ಕಿಜಾ಼ಸ್‍ತೆ ಝಾ಼ಡನಿತರ ರ‍್ಹೇಸ್.
JUD 1:13 ಅವ್ಣೆ ದರ‍್ಯಾವ್‌ಮಾನು ಮೋಟ ಝೋ಼ಕಾಳ್ಯಾನಿತರ ರ‍್ಹೇಸ್. ಯೋ ಝೋ಼ಕಾಳ್ಯಮಾಥು ಫೇಖ್ಹಟ್‌ನ ಝ಼ಂಡಾ ಉಡಾತೆತಿಮ್‌ ಅವ್ಣೆ ಖ್ಹರಮ್‌ಕೊಂತೆ ಕಾಮ್‍ಕರಸ್, ಆ ಅದ್ಮೆವ್ ಆಕಾಶ್‌ಮ ವ್ಹವ್ತುಫಂಡಾತೆ ಶುಕ್ಕರ್‌ನಿತರ ಛಾ಼. ಅವ್ಣಖ್ಹಾಜೆ ಹಮೇಶಾನು ಅಂಧಾರಿನಪಾಳ್‍ನ ಖಾಯಮ್ ಕರಿರಾಖ್ಯೊಸ್.
JUD 1:14 ಆದಾಮನೊ ಖ್ಹಾತ್‍ನಿ ಫಿಡಿವಾಳೊ ಹುಯಿರ‍್ಹೋತೆ ಹನೋಕ ಆ ಅದ್ಮಿವ್‌ನ ಬಾರೇಮ ಪ್ರವಾದ್‌ನೆ ಕರೀನ್ ಅಮ್ ಬೋಲಿರಾಖ್ಯೊಸ್, “ಹಂದೇಖೊ, ಪ್ರಭು ಇನು ಹಜಾ಼ರೊ ಪರಿಶುದ್ ದೂತರ್‌ನಿ ಜೋ಼ಡ್ಮ ವಳ್ಯಾವಸ್”.
JUD 1:15 ಪ್ರಭು ಹರೇಕ್‌ಜ಼ಣಾನ ನ್ಯಾವ್‌ಫೇಡವನಾಬಿ, ಇವ್ಣಾಮ ಬಿಣ್‍ಭಕ್ತಿವಾಳು ವಿರೋದ್‌ಕರ‍್ಯೂತೆ ಖ್ಹಾರುಸ್ ಖರಾಬ್‍ಕಾಮ್ನ ಅಜು಼ ಪಾಪಿಖ್ಹಾರು ಇನ ವಿರೋದ್‌ಹುಯಿನ್ ಬೋಲ್ಯುತೆ ವಾತೆನಿ ಬಾರೇಮ ಖ್ಹಾರಸ್ನ ದೋಷಿಕರಾನ ಒಳ್ಯೊಆವಸ್‌ಕರಿ ಪ್ರವಾದನೆ ಕರ‍್ಯೊ,
JUD 1:16 ಆ ಖರಾಬ್ ಬೋಧನೆ ಕರಾವಾಳು, ಭಣ್‍ಕಾವಾಳುಬಿ ಗಲತ್‌ ಢೂಂಡಾವಾಳೂಬಿ ನಿಕ್‍ಳ್ಯೊಜಾನ್ ವಾಳೂಬಿ, ಬಡೈಮಾರವಾಳೂಬಿ ಶೊಂತ್‍ ಫಾಯಿದನಖ್ಹಾಜೆ ಖ್ಹರಾವ್ಣಿ ಕರಾವಾಳುಬಿ ಹುಯಿರ‍್ಹುಸ್.
JUD 1:17 ಕತೋಬಿ ಪ್ಯಾರ್‌ನ ದೋಸ್ತಿವೊ, ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನು ಅಪೊಸ್ತಲರ್‌ಖ್ಹಾರು ಪಹಿಲೆ ಶಾತ್ ಬೋಲ್ಯುಥು ಕರಿ ಯಾದ್‍ಕರಿಲೇವೊ.
JUD 1:18 ಅಪೊಸ್ತಲರ‍್ನೆ ತುಮುನ, “ಖ್ಹರ್ತಿನ ಹಗಾಮ್ಮ ದೇವ್ನಿ ಬಾರೇಮ ತುಮೂನ ನಕ್ಲೆ ಕರವಾಳು ಅದ್ಮಿಖ್ಹಾರು ರ‍್ಹಿಶೆ, ಅಜು಼ ಭಕ್ತಿಕೊಂತೆ ಆಖ್ಹ್‌ನ ಅಖ್ಖುಲೀನ್ ಚಾ಼ಲವಾಳು ಹುಯಿರ‍್ಹಿಶೆಕರಿ ಇವ್ಣೆ ತುಮೂನ ಬೋಲ್ಯುಥು.
JUD 1:19 ಆ ಅದ್ಮಿವ್‍ಖ್ಹಾರು ಇವ್ಣು ಇವ್ಣೇಸ್ ತನಿಯ ಬಣಿಜಾವವಾಳೂಬಿ, ಮ್ಹಾಮುಲಿ ಆಖ್ಹ್‌ಮಾಬಿ, ದೇವ್ನುಆತ್ಮ ಲೀರಾಖ್ಯುಕೊಂತೆಬಿ ಹುಯಿರ‍್ಹುಸ್.
JUD 1:20 ಕತೋಬಿ ಪ್ಯಾರ್‌ನ ದೋಸ್ತಿವೊ, ತುಮೆ ತುಮಾರು ಘಣು ಪರಿಶುದ್ ಕ್ರಿಸ್ತ ವಿಶ್ವಾಸ್ ಆಧಾರ್ ಕರ‍್ಲಿನ್ ಘಟ್‍ಭೀರ‍್ಹೆವೊ ಅಜು಼ ಪವಿತ್ರಾತ್ಮಥಿ ಭರೈನ್ ಪ್ರಾರ್ಥನೆಕರೊ.
JUD 1:21 ದೇವ್ನಿ ಪ್ಯಾರ್‌ಮ ಭೀರ‍್ಹೆವೊ. ಹಮೇಶಾನು ಜಾನ್ನ ಲೀಲ್ಯಾವನಖ್ಹಾಜೆ ಪ್ರಭುಹುಯಿರ‍್ಹೋತೆ ಯೇಸು ಕ್ರಿಸ್ತನು ಗೋರ್‌ನಾಸ್ ಟಿವೈನ್ ದೇಖೊ.
JUD 1:22 ಗುಮಾನಿ ರ‍್ಹವಾಳ ಅದ್ಮಿವ್‌ನ ಗೋರ್‌ಕರೊ.
JUD 1:23 ಥೋಡಜ಼ಣ ಅದ್ಮಿವ್‌ನ ಬಚಾ಼ಡೊ ಯೋ ಅದ್ಮಿವ್‌ನ ಆಗ್‌ಥಿ ಭಾರ್‌ಲ್ಯಾವೊ, ತುಮೆ ಥೋಡಜ಼ಣಾನ ಡರ್‌ತ ಹುಯಿನ್ ಗೋರ್‌ಕರೊ. ಪಾಪ್ನ ಮೈಲಾನ ಕಾಹೆತೆ ಇವ್ಣ ಲುಂಗ್ಡವ್‍ನಾಬಿ ವಹೇರ್‌ಕರೊ.
JUD 1:24 ದೇವ್ ತಾಖತ್‌ವಾಳೊ ಹುಯಿರ‍್ಹೋಸ್. ತುಮೆ ಠೋಕರ್ ನಾ ಖಾವ್ಣುತೆತಿಮ್ ಮದತ್ ಕರಾವಾಳೊ ಹುಯಿರ‍್ಹೊಸ್. ಯೋ ತುಮಾರಮ ಶನೂ ಕಳಂಕ್‌ಕೊಂತೆ ತಿಮ್‍ಕರೀನ್ ಇನು ಮಹಿಮೆ ಝ಼ಗೋಕನ ಲ್ಯಾವಾನಾಬಿ ತುಮುನ ಮಹಾಖ್ಹುಷಿನ ದ್ಯವಾನಾಬಿ ಶಕತ್‌ವಾಳೊ ಹುಯಿರ‍್ಹೊಸ್.
JUD 1:25 ಅಪ್ಣುನ ರಕ್ಷಣೆ ಕರಾವಾಳೊಬಿ ಎಕ್ಕಸ್ ದೇವ್ನ, ಅಖ್ಖಾ ವಖ್ಹತ್‌ಮಥೂತೆ ತಿಮ್ಮಸ್ ಹಮ್ಕೇಬಿ ಕದೇಬಿ ಅಪ್ಣೊ ಪ್ರಭುಹುಯಿರ‍್ಹೋತೆ ಯೇಸು ಕ್ರಿಸ್ತಥಿ ಇನ ಮಹಿಮೆ, ತಾಖತ್ ಅಜು಼ ಅದಿಕಾರ್‌ಖ್ಹಾರು ರ‍್ಹವಾದೆ. ಆಮೆನ್.
REV 1:1 ಯೇಸು ಕ್ರಿಸ್ತನಿ ಪ್ರಕಾಶಿತ್ ವಚನ್ ಒಗ್ಗಿಸ್‌ಮ ಚಾ಼ಲ್ನುತೆ ಬಾರೇಮ ಯೋ ಇನ ದಾಸಖ್ಹಾರನ ವತಾಳನಖ್ಹಾಜೆ ಆ ಖ್ಹಾರು ದೇವ್‍ಥಿ ದೆವಾಯುತೆ. ಯೇಸು ಇನ ದೂತನ ಮೋಕ್ಲಿನ್ ಇನೇಥಿ ಆ ಖ್ಹಾರಿವಾತ್ನ ಯೋಹಾನ ಮಾಲುಮ್‌ ಕರಾಯೊ.
REV 1:2 ಯೋಹಾನನೆ ದೇವ್ನಿ ವಚನ್ನಿ ಬಾರೆಮಾಬಿ, ಯೇಸು ಕ್ರಿಸ್ತನೆ ಬೋಲ್ಯೊತೆ ಸಾಕ್ಷಿನಿ ಬಾರೆಮಾಬಿ,ಇನೆ ದೇಖ್ಯೋತೆ ಖ್ಹಾರು ಖ್ಹಮ್‌ಜಾಡವಾಳೊಹುಯಿನ್‌ ಸಾಕ್ಷಿ ಬೋಲ್ಯೊ.
REV 1:3 ಆ ಪ್ರವಾದ್‌ನೆನಿ ವಚನ್‌ಖ್ಹಾರು ಫಡವಾಳೂಬಿ ಖ್ಹಮ್‌ಜವಾಳೂಬಿ ಅಜು಼ ಅನಾಮ ಲೀಖೈರುತೆ ಇನಲೀನ್ ಚಾ಼ಲವಾಳು ಕೆತ್ರೇಕ್ಕಿ ಧನ್ಯರ್ ಹುಯಿರ‍್ಹುಸ್‍, ಶನಕತೊ ಆ ಖ್ಹಾರು ಚಾ಼ಲನೊದನ್ ಖನ್ನೆ ಐಗು.
REV 1:4 ಯೋಹಾನನೆ ಏಷ್ಯಾ ತಬರ್‌ಖಾಮ ರ‍್ಹವಾಳಿ ಖ್ಹಾತ್ ಸಬೆನ ಶಾತ್‌ ಲೀಖುಕರಾಸ್‌ಕತೊ, ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ, ಖ್ಹಾಮ್ಣೆ ಆವವಾಳೊ, ಇನೇಥಿ ಅಜು಼ ಇನು ಸಿಂಹಾಸನ್ನ ಖ್ಹಾಮ್ಣೆಛಾ಼ತೆ ಖ್ಹಾತ್ ಆತ್ಮಥಿ ಅಜು಼ ಯೇಸು ಕ್ರಿಸ್ತಥಿ ವಾರ್‌ಖ್ಹೊಬಿ ಸಮಾಧಾನ್‍ಬಿ ಮಳಾದೆ.
REV 1:5 ಯೇಸು ವಿಶ್ವಾಸ್‌ನಿ ಸಾಕ್ಷಿ ಹುಯಿರ್‍ಹೊಸ್, ಮರ‍್ಯಹುಯಾಮಥು ಪಹಿಲೆ ಉಠ್ಯೊತೆ ಧರ್ತಿನ ರಾಜಾ಼ವ್ನೊ ಮಾಲಿಕ್ ಹುಯಿರ‍್ಹವವಾಳೊ ಯೇಸು ಕ್ರಿಸ್ತಥಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ. ಅಪ್ಣುನ ಪ್ಯಾರ್‌ಕರವಾಳೊ ಇನು ಪವಿತ್ರ ಲ್ಹೋಯಿಥಿ ಅಪ್ಣುನ ಪಾಪ್‌ಥಿ ಛೋ಼ಡಾಯೊ.
REV 1:6 ಅಪ್ಣೆ ದೇವ್ನ ರಾಜ್ಯವಾಳಹುಯಿನ್‌ ಇನೊ ಬಾ ಹುಯಿರ‍್ಹೋತೆ, ದೇವ್ನಖ್ಹಾಜೆ ಯಾಜಕರ್‌ ಬಣಾಯೊತೆಯಿನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಶಕತ್ ರ‍್ಹವಾದೆ ಆಮೆನ್.
REV 1:7 “ದೇಖೊ ಯೋ ವಾದ್‍ಳಾನ ಜೋ಼ಡೆ ಆವಾಳೊ ಹುಯಿರೊಸ್, ಹರೇಕ್ನೊ ಡೋಳೊ ಇನ ದೇಕ್‍ಷೆ ಇನ ಭೋಕ್ಯುಹುಯುಬಿ ಇನ ದೇಕ್‍ಷೆ” ಆ ಜಗತ್‌ನು ಅಖ್ಖು ಖೂಮ್‌ವಾಳು ಅಂದ್ರೋಖ್ಹ್‌ ಕರ್ಶೆ. ಒಹೊ ಇಮ್ಮಸ್ ಉಷೆ ಆಮೆನ್.
REV 1:8 “ಮೇಸ್ ಪಹಿಲೋಬಿ, ಖ್ಹರ್ತಿಬಿ” ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ ಖ್ಹಾಮ್ಣೆ ಆವವಾಳೊ, ಮಹಾನ್ ಶಕತ್‌ವಾಳೊ ಕರಿ ದೇವ್ ಹುಯಿರ‍್ಹೋತೆ ಪ್ರಭು ಬೋಲಾಸ್.
REV 1:9 ಯೋಹಾನಕರಿ ಮೆ ಕ್ರಿಸ್ತಮ ತುಮಾರೊ ಭೈ ಹುಯಿರೋಸ್. ಅಪ್ಣೆ ಹಿಡಿಕ್ ಯೇಸುನಖ್ಹಾಜೆ ಖ್ಹತಾಪ್ಣಿಮಾಬಿ,ರಾಜ್ಯಮಾಬಿ, ಖ್ಹಮಾಳಮಾಬಿ ವಾಟೊಲೀರಾಖ್ಯಸ್, ಮೆ ದೇವ್ನಿ ಸಮಾಚಾರ್‌ನಾಬಿ ಯೇಸುನಿ ಬಾರೇಮ ಸಾಕ್ಷಿ ದ್ಯವಾನಖ್ಹಾಜೆ ಪತ್ಮೋಸ್ ಟಾಪಾಮ ಥೊ.
REV 1:10 ಮೇ ಪ್ರಭುನ ದನ್ಮ ಪವಿತ್ರಾತ್ಮಥಿ ಭರೈನ್ ಮಾರ ಪೀಟ್ ಪಾಛ಼ಳ್ ಮೋಟಿ ಅವಾಜ಼್ ಏಕ್‌ ಖ್ಹಮಜ಼್ ಪಡ್ಯು,ಯೋ ತುತ್ತೂರಿನಿ ಆವಾಜ಼್‌ನಿಮತ್ ಥೂ.
REV 1:11 ಯೋ ಅವಾಜ಼್‌ನೆ, ತೂ ದೇಖಾನು ಏಕ್‌ ಪುಸ್ತಕ್‌ಮ ಲೀಖಿನ್ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲಿಡೇಲ್ಫಯ, ಲವೊದಿಕೀಯ, ಕರಿ ಖ್ಹಾತ್ ಸಬೆವ್‍ನ ಮೋಕಲ್ನುಕರಿ ಬೋಲ್ಯು.
REV 1:12 ಮಾರ ಜೋ಼ಡೆ ವಾತೆ ಬೋಲುಕರ್ತುಥೂತೆ ಅವಾಜ಼್ ಕಿನುಕರಿ ದೇಖಾನ ಮೇ ಪೀಠೆ ಫರ‍್ಯೊ. ಫರಾನಿ ವಖ್ಹತ್‌ಮ ಖ್ಹಾತ್ ಖ್ಹೊನ್ನಾನು ದೀವೊ ಮ್ಹೇಲಾನುಖಮ್‌ ದೇಖ್ಯೊ.
REV 1:13 ಯೋ ದಿವಳ್ಗಿನ ಇಚ಼್‌ಮ ಅದ್ಮಿನ ಛಿಯ್ಯಾನಿತರ ರ‍್ಹವಾಳನ ದೇಖ್ಯೊ ಇನೆ ಝ಼ಗ್ಗೊ ಫೆರಾಖಿನ್‍ ಖ್ಹೊನ್ನಾನ ಪಟಾನ ಛಾ಼ತಿಪರ್ ಭಾಂದಿರಾಖ್ಯೊಥೊ.
REV 1:14 ಇನ ಮಾಥಾನು ಕೇಖ್ಹ್‌ ಧೋಳು ಖ್ಹುತ್ತರ್‌ನಿ ಘೋಣಿಬಿ ಬರಪ್‍ನಿ ಘೋಣಿಬಿ ಧೋಳುಫಟ್ ಥೂ.ಇನೊ ಡೋಳೊ ಆಗ್‍ನಿ ಝ಼ಲ್‌ಪಟ್‍ನಿತರ ಥೂ.
REV 1:15 ಇನ ಭೇ ಪಂಜ಼ ಕೋಲ್‌ಮಿಮ ಬಳಿಹುಯು ತಾಂಬಾನಿ ಘೋಣಿಬಿ ಇನು ಅವಾಜ಼್ ರಂಚಾ಼ವತೆ ಪಾಣಿನ ಘೂಂಜ಼್‌ನಿ ಅವಾಜ಼್‌ನಿತರಬಿ ಥು.
REV 1:16 ಇನ ಖಾವಹಾತ್ಮ ಖ್ಹಾತ್ ತಾರೊ ಧರೈರೂಥು. ಇನ ಬಾಕಮಾಥು ಬೇಮ್ಹೋಡಾನಿ ತಲ್ವಾರೆ ನಿಕ್ಳುಕರ್ತಿಥಿ ಇನು ಮ್ಹೋಡು ಧೊಪಾರ್‌ಮ ಶಕಥ್ಥಿ ಉಜಾ಼ಖ್ಹ್‌ ದೇಸ್ತೆ ಚಾ಼ಂದ್‍ನಿಘೋಣಿ ಥು.
REV 1:17 ಮೇ ಇನ ದೇಖಾನಿವಖ್ಹ್‌ತೆ ಮರ‍್ಯಹುಯಾನಿಘೋಣಿ ಇನ ಗೋಡಾನ ಖ್ಹಾಮ್ಣೆ ಪಡ್ಯೊ.ಯೋ ಇನ ಖಾವಹಾತ್ನ ಮಾರಪರ್ ಮ್ಹೇಲಿನ್, ಡರ್‌ನಕೊ ಮೇಸ್ ಪಹಿಲೆನೊ ಖ್ಹರ್ತಿನೊಬಿ.
REV 1:18 ಕೆದೇಬಿ ಜಿವ್ತುರ‍್ಹವಾಳೊ ಹುಯಿರೊಸ್,ಮರ‍್ಯೊಹುಯೊಥೊ.ಕತೋಬಿ ದೇಕ್ ಜ಼ಗ್‌ಜ಼ಮಾನಮಾಬಿ ಜಿವ್ತು ರ‍್ಹವಾಳೊ ಹುಯಿರೊಸ್. ಮರಣ್ ಅಜು಼ ಪಾತಾಳ್ನ ಬೀಗಾನು ಕೀಲಿ ಮಾರಕನ ಛಾ಼.
REV 1:19 ಇನಖ್ಹಾಜೆ ತೂ ದೆಖಾವನು ಖ್ಹಾರುಸ್,ಹಮ್ಕೆ ಚಾ಼ಲುಕರಾತೆ ಖ್ಹಾರುಸ್ ಅಗ್ಗಳ್ ಚಾ಼ಲಾನು ಅಖ್ಖಾಸ್ನ ಲೀಖ್.
REV 1:20 ಮಾರ ಖಾವಹಾತ್ಮ ತುನೆ ದೇಖ್ಯೊತೆ ಖ್ಹಾತ್ ತಾರವ್ನ ಅಜು಼ ಖ್ಹಾತ್ ಖ್ಹೊನ್ನಾನು ದಿವಳ್ಗಿನು ಖಂಬಾನು ಮತ್ಲಬ್ ಬೋಲಿವತಾಳುಸ್, ಯೋ ಖ್ಹಾತ್ ತಾರೊ ಕತೊ ಖ್ಹಾತ್ ಸಬೇನು ದೂತರ್, ಯೋ ಖ್ಹಾತ್ ದಿವಳ್ಗಿನು ಖಂಬಖ್ಹಾರು ಕತೊ ಯೋ ಖ್ಹಾತ್ ಸಬೆಖ್ಹಾರಿ ಹುಯಿರ‍್ಹೀಸ್.
REV 2:1 ಎಫೆಸಮ ಛಾ಼ತೆ ಸಬೆನ ದೂತಾನ ಅಮ್‍ಲೀಕ್, ಖ್ಹಾತ್ ತಾರವ್ನ ಇನ ಖಾವಹಾತ್ಮ ಧರಿಲೀನ್ ಖ್ಹಾತ್ ಖ್ಹೊನ್ನಾನು ದಿವಳ್ಗಿನ ಖಂಬಾನ ಇಚ಼್‌ಮ ಚಾ಼ಲುಕರಾವಾಳೊ ಶಾತ್ ಬೋಲುಕರಾಸ್‌ ಕತೊ,
REV 2:2 ತಾರು ಕಾಮ್‌ಖ್ಹಾರು ಅಜು಼ ಮಿನ್ಹತ್‌ಬಿ ಖ್ಹಮಾಳನುಬಿ ಮೇ ಮಾಲುಮ್ ಕರಿರಾಖ್ಯೋಸ್. ತೂ ಖರಾಬ್ ಅದ್ಮಿನ ಖ್ಹಮಾಳಿಷ್ ಕೊಯ್ನಿ. ಅಪೊಸ್ತಲರ್ ಕಾಹೆತೆಬಿ ಇವ್ಣುನ ಅಪೊಸ್ತಲರ್‌ಕರಿ ಬೋಲೈಲ್ಯವಾಳು ತೂ ಪರ್ಖಿನ್ ಇವ್ಣುನ ಝೂ಼ಟುಕರಿ ಮಾಲುಮ್‌ಕರಿಲಿದೊ.
REV 2:3 ತೂ ಧೀರ್‌ವಾಳೊ ಹುಯಿನ್ ಮಾರ ನಾಮ್ನಖ್ಹಾಜೆ ಖ್ಹತಾಪ್ಣಿನ ಖ್ಹಮಾಳಿನ್ ಲಡ್‌ಕ್ಯೊಕೊಂತೆ ಥೋತೆ ಮನಮಾಲುಮ್‌.
REV 2:4 ಕತೋಬಿ ತಾರಪರ್ ಅಪ್‌ರಾದ್‌ ಬೋಲಾನು ಛಾ಼ ಅಗ್ಗಳ್ ಮಾರಪರ್ ಥೀತೆ ಪ್ಯಾರ್ ಹಮ್ಕೆ ಕೊಯ್ನಿ.
REV 2:5 ಇನಖ್ಹಾಜೆ ತೂ ಕಿಜ್ಜಾ಼ಥು ಲಡ್ಕಿರ‍್ಹೋಸ್‌ಕಿ, ಇನ ತಾರಿ ಖ್ಹಯಾಲ್ಮಲ್ಯಾವ್. ದೇವ್‌ಭಣಿ ಮನ್‌ಫರೈನ್ ತೂ ಅಗ್ಗಳ್ ಕರುಕರ್ತೊಥೋತೆ ಕಾಮ್‌ಖ್ಹಾರುಸ್‌ ಕರ್‌, ತೂ ನಾ ಮನ್ ಫರಾಯೊತೊ ಮೆ ಅಯಿನ್ ತಾರು ದಿವಳ್ಗಿನ ಖಂಬಾನ ಇನು ಝ಼ಗೊಕಂಥು ಕಾಡಿನಾಖಿಷ್.
REV 2:6 ಕತೋಬಿ ಅಛ್ಛು಼ ಏಕ್‌ ತಾರಾಮ ಛಾ಼. ಯೋ ಶಾತ್‍ಕತೊ ಮೇ ವಹೇರ್‌ಕರಾನು ನಿಕೋಲಾಯನ ಕಾಮ್ನ ತೂಬಿ ಜಿನುಕು ವಹೇರ್‌ ಕರುಕರಸ್.
REV 2:7 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಕೋಣ್ ಜೂತಾಸ್ಕಿ ಇನ ದೇವ್ನ ಸೊರ್ಗಾಮ ಛಾ಼ತೆ ಜಾನ್ನ ಝಾ಼ಡ್‌ಣ ಪಂಡಾನ ಖಾವಾನ ಹುಕುಮ್‌ ದಿಶ್.
REV 2:8 ಸ್ಮುರ್ನಮ ಛಾ಼ತೆ ಸಬೆನ ದೂತಾನ ಅಮ್‍ಲೀಕ್, ಶುರುವಾತ್‍ಬಿ ಖ್ಹರ್ತಿಬಿ ಹುಯಿರ‍್ಹಾವಳೊ, ಮರಿಜೈನ್ ಪಾಛೊ಼ ಜಿವ್ತೊ ಉಠೀನ್ ಆಯೊಹುಯೊ ಬೋಲಾಸ್ ಶಾತ್‌ಕತೊ
REV 2:9 ಮೇ ತಾರು ಖ್ಹತಾಪ್ಣಿ ಅಜು಼ ಗರೀಬ್‍ರ‍್ಹವಾನುಬಿ ಮಾಲುಮ್ ಕರಿರಾಖ್ಯೊಸ್, ಕತೋಬಿ ತೂ ಶೌಕಾರಸ್ ಹುಯಿರ‍್ಹೋಸ್. ಅತ್ರೇಸ್‍ಕಾಹೆತೆ ಯೆಹೂದ್ಯರ್ ಕರಿ ಬೋಲೈಲ್ಯವಾಳು ಇವ್ಣೆಸ್ ತಾರಿ ಬಾರೇಮ ದೂಷಣೆ ಬೋಲಾನು ಮಾಲುಮ್. ಇವ್ಣೆ ಯೆಹೂದ್ಯರ್ ಕಾಹೆ, ಶೈತಾನ್ನ ಸಬೆನಾ ಮಂದಿರ್‌ವಾಳು ಹುಯಿರ‍್ಹೂಸ್
REV 2:10 ತುನ ಹುವಾನು ಖ್ಹತಾಪ್ಣಿನಖ್ಹಾಜೆ ನಕೊ ಡರಿಶ್. ಹಂದೇಕ್ ತುಮುನ ತರೀಪ್ಷಕರಾನ ಶೈತಾನ್ನ ತುಮಾರಮ ಥೋಡಾನ ಜೇಲ್‌ಮ ಘಾಲ್ನು ಕರಿ ಛಾ಼ ಅಜು಼ ದಖ್ಹ್‌ ದನ್‌ಲಗು ತುಮುನ ಖ್ಹತಾಪ್ಣಿರಿಷೆ. ತು ಮರಾಲಗು ವಿಶ್ವಾಸ್‌ನ ಯೋಗ್ಯಹುಯಿರೆ, ಮೇ ತುನ ಜಾನ್ನು ಕಿರೀಟ್‍ನ ದೆವಾಳೊ ಛೂ಼.
REV 2:11 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಜೂತವಾಳನ ಬೇನಿ ಮರಣ್‌ಥು ಶನು ಗಲತ್‌ ಕೋಉಷೇನಿ.
REV 2:12 ಪೆರ್ಗಮಾನು ಸಬೆನ ದೂತನ ಅಮ್‍ಲೀಕ್; ಬೇ ಮ್ಹೋಡಾನು ಚಾ಼ಲ್ತಿ ತಲ್ವಾರ್‌ನ ಧರಿರಾಖವಾಳೊ ಶಾತ್‌ ಬೋಲಾಸ್‍ಕತೊ,
REV 2:13 ತೂ ಜಿವ್ಣುಕರುಕರಾತೆ ಝ಼ಗೊ ಮಾಲುಮ್ ಕರಿರಾಖ್ಯೊಸ್, ಯೋ ಶೈತಾನ್ನು ಸಿಂಹಾಸನ್ನು ಝ಼ಗೊ ಹುಯಿರ‍್ಹುಸ್. ತೂ ಮಾರ ನಾಮ್ನ ಘಟ್‍ಥಿ ಧರಿರಾಖ್ಯೊಸ್. ಶೈತಾನ್ನು ಘರ್ ಹುಯಿರ‍್ಹೂತೆ ತಾರ ಖ್ಹಯೇರ್‌ಮ ಮನ ವಿಶ್ವಾಸ್‌ವಾಳೊ ಸಾಕ್ಷಿ ಹುಯಿರೊಥೋತೆ ಅಂತಿಪ ಮರೈಜಾ಼ವನಿ ವಖ್ಹ್‌ತೆಬಿ ಮಾರಾಮ ಮಿಛಾ಼ಣ್ಯೊಥೊತೆ ವಿಶ್ವಾಸ್ ಧಖೆಲ್ಯೊಕೊಯ್ನಿ.
REV 2:14 ಥೋಡಿ ವಾತೆನಿ ಬಾರೇಮ ತಾರ ಭಣೀಥು ಮಾರಕನ ಅಪ್‌ರಾದ್‌ ಛಾ಼. ಮೂರತ್ನ ಬಲಿಕರಾತೆ ರಾಛಾ಼ನ ಖಾವಮಾಬಿ ವ್ಯಬಿಚಾರ್‌ಮಾಬಿ ಇಸ್ರಾಯೇಲ್‌ವಾಳು ಧೊಕ್‌ಡೈನ್ ಪಟ್ಕಾವ್‍ಣು ಕರಿ ಬಿಳಾಮನೆ ಬಾಲಾಕನ ಶಿಕಾಡ್ಯೊತೆ ಖರಾಬ್ ಬೋಧನೆನ ಧರಿಲ್ಯಾವಳು ತಾರಾಮ ಛಾ಼.
REV 2:15 ಇಮ್ಮಸ್ ನಿಕೋಲಾಯನ ಶಿಕಾಡನಿಘೋಣಿ ಚಾ಼ಲವಾಳುಬಿ ತುಮಾರಮ ಛಾ಼.
REV 2:16 ಇನಖ್ಹಾಜೆ ತೂ ಮನ್ ನಾ ಫರಾಯೊತೊ ಮೇ ಒಗ್ಗಿಸ್‌ಮ ತಾರಕನ ಐನ್‌ ಮಾರ ಮ್ಹೋಡಮಾಥು ಆವಾಳಿ ತಲ್ವಾರ್‌ಥಿ ಇವ್ಣಪರ್ ಜಂಗ್ ಭೀಡಿಷ್‌.
REV 2:17 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಕೋಣ್ ಜೂತಾಸ್ಕಿ ಇನ ಲಪಾಡಿರಾಖ್ಯೊಸ್ತೆ ಮನ್ನ ಕರಿ ಖಾಣನ ದಿಶ್. ಅತ್ರೇಸ್ ಕಾಹೆತೆ ಮೆ ಇನ ಏಕ್‌ ಧೋಳ ಬಂಡಾನ ದಿಶ್, ಯೋ ಬಂಡಾಪರ್ ನವು ನಾಮ್ನ ಟಕೈನ್‌ಲೀಖೈಷ್‍ ಯೋ ನಾಮ್ ಲೀರಾಖವಾಳನ ಮಾಲುಮ್ ಪಡ್‌ಶೆ, ಪಣ್ಕಿ ಯೋ ಬಿಜು಼ ಕಿನಾಬಿ ಮಾಲುಮ್‍ ಕೋಪಡ್ಷೇನಿ.
REV 2:18 ಥುವತೈರಾಮ ಛಾ಼ತೆ ಸಬೇನು ದೂತಾನ ಅಮ್‍ಲೀಕ್, ಆಗ್‍ನಿ ಝ಼ಲ್‌ಪಟ್‌ನಿತರನ ಡೋಳಾ, ಝ಼ಮ್ಕಾಸ್‌ತೆ ತಾಂಬಾನಿತರನೊ ಪಂಜ಼ ರ‍್ಹವಾಳೊ ದೇವ್‌ನೊ ಛಿಯ್ಯೊ ಶಾತ್‌ ಬೋಲಾಸ್‍ಕತೊ,
REV 2:19 ತಾರ ಕಾಮ್ ಅಖ್ಖಾನಾಬಿ, ತಾರಿ ಪ್ಯಾರ್‌ನಾಬಿ, ವಿಶ್ವಾಸ್‍ನಾಬಿ, ಚಾ಼ಕ್ರಿನಾಬಿ ಅಜು಼ ಖ್ಹಮಾಳನುಬಿ ಮೇ ಮಾಲುಮ್ ಕರಿರಾಖ್ಯೋಸ್. ಅತ್ರೇಸ್ ಕಾಹೆತೆ ತಾರು ಹಮ್ಕೆನು ಕಾಮ್‌ಖ್ಹಾರು ತಾರ ಅಗ್‍ಲ್ಯ ಕಾಮ್ ಖ್ಹಾರಥಿಬಿ ಊಚು಼ ಹುಯಿರ‍್ಹುಸ್‌ಕರಿ ಮಾಲುಮ್.
REV 2:20 ತಾರ ಭಣೀಥು ಮಾರಕನ ಅಪ್‌ರಾದ್‌ ಏಕ್‌ ಛಾ಼. ಯೆಜೆಬೇಲ್ ಕರಿ ಆ ತಯೇಡ ಇನುಯೋಸ್ ಪ್ರವಾದಿನಿಕರಿ ಬೋಲಿಲಿನ್, ವ್ಯಬಿಚಾರ್‌ ಕರೇಜಾ಼ಯ್‍ಕರೀಬಿ ಮೂರತ್ನ ಅರ್ಪಣ್ ಕರಾನ ರಾಛ಼ನ ಖಾಯೆಜಾ಼ಯ್ ಕರೀಬಿ ಮಾರ ದಾಸರ‍್ನ ಬೋಧನೆ ಕರೀನ್ ಯೋ ಇವ್ಣುನ ಝೂ಼ಟ ಮಾರಗ್‍ಮ ಚ಼ಲವ್‍ಕರಿತೋಬಿ ತೂ ಇನ ಭಿರಾಖ್ಯೊಕೊಂತೆ ಹುಕುಮ್ ದ್ಯವಾಳೊ ಹುಯಿರ‍್ಹೊಸ್.
REV 2:21 ಯೊ ಹೈರಿತೆನ ವ್ಯಬಿಚಾರ್‌ನ ಮ್ಹೇಲಿನ್ ಮನ್‌ಫರೈನ್ ದೇವ್‌ಭಣಿ ಫರಾನ ಮೇ ಯೋ ತಯೇಡಾನ ಗಡುದಿದೊ ತೋಬಿ ದೇವ್‌ಭಣಿ ಫರಾನ ಇನ ಮನ್ ಕೊಆಯುನಿ.
REV 2:22 ಹಂದೇಕ್ ಯೋ ಹುಯಿರ‍್ಹೀತೆ ಬಿಛಾ಼ವ್ಣಪರ್ ಪಡಿರ‍್ಹಾವನಿ ಘೋಣಿ ಕರೀಶ್, ಅಜು಼ ಇನಿ ಜೋ಼ಡ್ಮ ವ್ಯಬಿಚಾರ್ ಕರವಾಳು ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರಿನ್ ಮ್ಹೇಲ್ಯುನಾತೊ ಇವ್ಣುನ ಘಣು ಖ್ಹತಾಪ್ಣಿಮ ಪಡಾನಿಘೋಣಿ ಕರಿಶ್.
REV 2:23 ಯೋ ಹುಯಿರೀತೆ ಇನ ಲಡ್ಕಾವ್‍ನ ಮಾರಿನಾಖಿಶ್‌. ತದೆ ಮೆ ಅದ್ಮಿ ಖ್ಹಾರನ ದಿಲ್ನ ಮಹಿ ತರೀಪ್ಷ ಕರಾವಾಳೊ ಕರಿ ಖ್ಹಾರಿ ಸಬೇವ್‌ನ ಮಾಲುಮ್‌ ಪಡ್‌ಶೆ. ತುಮಾರಮ ಹರೇಕ್‌ನಾಬಿ ಇವ್ಣ ಇವ್ಣ ಕಾಮ್ ಕಿಮ್ಕಿ ತಿಮ್ಮಸ್ ಪ್ರತಿಫಲ್ ದಿಶ್.
REV 2:24 ಕತೋಬಿ ಥುವತೈರಾಮ ರ‍್ಹವಾಳ, ಬಿಜ಼ಖ್ಹಾರನ ಮೇ ಬೋಲಾನು ಶಾತ್‍ಕತೊ, ತುಮೆ ಇನು ಶಿಕಾಡನಿತರ ಚಾ಼ಲ್ಯಕೊಯ್ನಿ ಶೈತಾನ್ನು ಖ್ಹರ್ತಿನು ಗಪ್ಲತ್‍ಖ್ಹಾರು ಕೋಣ್ ಕೋಣ್ ಮಾಲುಮ್‌ ಕೋಕರ‍್ಯಾನಿತೆ ರ‍್ಹೇಸ್ಕಿ ಇವ್ಣುನ ಬೋಲಾನು ಶಾತ್‍ಕತೊ ಮೇ ಬಿಜೇಕ್ ವಜ಼ನ್ ತುಮಾರಪರ್ ಕೋನಾಖಿಷ್‌ನಿ.
REV 2:25 ಕತೋಬಿ ತುಮೆ ಲೀರಾಖ್ಯಾಸ್ತೆ ಇನಾಸ್ ಮೇ ಆವಲಗು ಘಟ್‍ಥಿ ಧರಿರಾಖೊ.
REV 2:26 ಕೋಣ್ ಜೂತಿನ್ ಆವಾಸ್ಕಿ ಅಜು಼ ಮನ ಪಸಂದ್‍ನು ಕಾಮ್‌ಖ್ಹಾರು ಖ್ಹರ್ತಿಲಗು ಚ಼ಲಾವಸ್ಕಿ, ಇನ ಮೇ ಮಾರ ಬಾಥಿ ಲಿದೋತೆ ಅದಿಕಾರ್‌ನಿ ಘೋಣಿಸ್ ಅದ್ಮಿಪರ್ ಅದಿಕಾರ್‌ನ ದಿಶೆ.
REV 2:27 ಯೋ ಲ್ಹೋಡಾನ ಲಠ್ಠೇಥಿ ಇವ್ಣುನ ಚ಼ಲಾವ್‌ಷೆ, ಮಾಟಿನು ಮಟ್ಕಿ ಫುಟಿಜಾ಼ವಾನಿಮತ್ ಇವ್ಣು ತಾಖತ್ ಟುಟಿಜಾಷೆ.
REV 2:28 ಮೆ ಇನ ಉಜಾ಼ಳು ದೆಖಾಡನ ಶುಕ್ಕರ‍್ನ ದಿಶ್.
REV 2:29 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ.
REV 3:1 ಸಾರ್ದಿಸ್‌ಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ದೇವ್ನು ಖ್ಹಾತ್ ಆತ್ಮಾನ ಅಜು಼ ಖ್ಹಾತ್ ಶುಕ್ಕರ್‌ನ ಲೀರಾಖವಾಳು ಯೋ ಬೋಲಸ್ ಶಾತ್‌ಕತೊ, ತಾರು ಕಾಮ್‌ಖ್ಹಾರು ಮನ ಮಾಲುಮ್ ಛಾ಼. ಜಿವ್ತೊಕರಿ ನಾಮ್ ತುನ ರ‍್ಹಯುತೋಬಿ, ತೂ ಮರ‍್ಯೊಹುಯೊ ಹುಯಿರೊಸ್.
REV 3:2 ಹೊಷಾರ್ ಹೂ ಮರಾನಿ ಹಾಲತ್ಮ ಛಾ಼ತೆಯಿನ ಧಿಲ್‌ಪತ್‌ ದೇ. ಶನಕತೊ ಮಾರ ದೇವ್ನಖ್ಹಾಮ್ಣೆ ತಾರ ಕಾಮ್‍ಖ್ಹಾರಾವ್ಮ ಏಕ್‍ತೋಬಿ, ಪೂರಹುಯುಕರಿ ಮನ ದೆಖಾಯುಕೊಯ್ನಿ.
REV 3:3 ಇನಖ್ಹಾಜೆ ತೂ ಲೀರಾಖ್ಯೊಸ್ತೆ ಬೋಧನೆನ ಯೋ ಖ್ಹಮ್‍ಜ್ಯೊತೆ ಪರಕ್ನ ಖ್ಹಯಾಲ್ಮ ಲೈನ್‌ ಇನ ಬಚಾ಼ಡಿಲೆ, ಮನ್ ಫರಾವೊ, ದೇವ್‌ಭಣಿ ಫರಿಜಾ಼, ತೂ ಹೊಷಾರ್ ನಾಹುಯೋತೊ, ಚೋ಼ರ್ ಆವಾನಿಘೋಣಿ ಆಯಿಶ್. ಮೇ ಖಿವಿ ವಖ್ಹತ್‌ಮ ತಾರಕನ ಐಶ್‌ಕರಿ ಬೋಲಾನು ತುನ ಮಾಲುಮ್‌ಪಡ್‌ಶೇಸ್ ಕೊಯ್ನಿ.
REV 3:4 “ತುಮಾರು ಸಬೆನ ಮಳಿರ‍್ಹುಸ್ತೆ ಥೋಡ ಜ಼ಣ ಸಾರ್ದಿಸ್‍ನು ಬೀಜೂಬಿ ಪವಿತ್ರ ಛಾ಼. ಅವ್ಣೆ ಇವ್ಣ ಲುಂಗ್ಡಾನ ಗಂಧು ಕೋಕರಿರಾಖ್ಯುನಿ. ಅವ್ಣೆ ಯೋಗ್ಯರ್ ಹುಯಿರ‍್ಹಿಷೇತೆ ಇನಖ್ಹಾಜೆ ಧೋಳು ಲುಂಗ್ಡಾನ ಫೇರಿನ್ ಮಾರ ಜೋ಼ಡ್ಮ ಚಾ಼ಲ್‍ಷೆ.
REV 3:5 ಜೀತ್ ಲ್ಯವಾಳೊ ಧೋಳ ಲುಂಗ್ಡಾನ ಫೇರ್‌ಶೆ. ಜಾನ್ನ ಹಕ್‌ವಾಳಾನಿ ಪುಸ್ತಕಮಾಥು ಇನ ನಾಮ್ನ ಮೇ ನೂಛಿಶ್‍ಕೊಂತೆ ಯೋ ಮಾರೊ ಕರಿ ಮಾರ ಬಾನ ಖ್ಹಾಮ್ಣೇಬಿ ಇನ ದೂತವ್ನ ಖ್ಹಾಮ್ಣೆಬಿ ಮಾನವಾಳೊ ಹುಯಿರ‍್ಹೀಶ್,
REV 3:6 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ.
REV 3:7 ಫಿಲಿಡೇಲ್ಫಿಯಾಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ಪರಿಶುದ್ಧಬಿ, ಖ್ಹಾಚೊ಼ಹುಯಿರ‍್ಯವಾಳೊಬಿ, ದಾವೀದನು ಬೀಗಾನು ಕೀಲಿ ಲೀರಾಖವಾಳೋಬಿ, ಕಿನೇಥೀಬಿ ನಾ ಮೂಚ಼ನಹೋಣುತೆ ಇಮ್‌ ಕಾಡವಾಳೊ, ಖೆವಾಥೀಬಿ ಉಖ್ಡಾನ ನಾ ಹೋಣುತೆ ಇಮ್‌ ಮೂಚಾ಼ವಾಳೊ ಹುಯಿರೋತೆ ಶಾತ್‌ ಬೋಲಾಸ್‍ಕತೊ,
REV 3:8 ತಾರು ಕಾಮ್‌ಖ್ಹಾರು ಮನ ಮಾಲುಮ್ ತುನ ಛಾ಼ತೆ ಶಕತ್ ಥೋಡು ರ‍್ಹಯುತೋಬಿ ತುನೆ ಮಾರ ನಾಮ್ನ ಧಕೇಲ್ಯೊಕೊಂತೆ ಮಾರಿ ವಚನ್ನ ಬಚಾ಼ಡ್ಯೊತೆ ಇನಖ್ಹಾಜೆ ಹಂದೇಕ್ ತಾರಖ್ಹಾಮ್ಣೆ ಏಕ್‌ ಬಾಕಲ್ನ ಉಖ್ಡಿರಾಖ್ಯೊಸ್. ಕೋಣ್‌ಬಿ ಇನ ಮೂಚ್‍ಷೆ ಕೊಯ್ನಿ.
REV 3:9 ಖ್ಹಮಜ಼್! ಯೆಹೂದ್ಯರ್‌ಕರಿ ಝೂ಼ಟೊ ಬಡೈಮಾರಿನ್‍ ಥೋಡುಜ಼ಣು ಶೈತಾನ್ನ ಸಬೆನಾ ಮಂದಿರ್‌ಮ ರ‍್ಹವಾಳು ಹುಯಿರ‍್ಹುಸ್. ಯೋ ಅದ್ಮಿಖ್ಹಾರು ತಾರಖ್ಹಾಮ್ಣೆ ಆಯಿನ್ ತಾರ ಗೋಡಾಪರ್ ಆಡ್‍ಪಡಿನ್ ಖ್ಹಲಾಮ್ ಕರಾನಿಘೋಣಿ ಕರೀಶ್. ಮೇ ಪ್ಯಾರ್ ಕರ‍್ಯೊತೆ ಅದ್ಮಿ ತುಮೇಸ್‍ಕರಿ ಬೋಲಾನು ತದೆ ಇವ್ಣೆ ಮಾಲುಮ್ ಕರಿಲಿಶೆ.
REV 3:10 ಮಾರಿ ವಚನ್ನ ತುನೆ ಚ಼ಲಾಯೊತೆ ಇನಖ್ಹಾಜೆ ಧರ್ತಿಮ ಜಿವ್ಣುಕರವಾಳ ಖ್ಹಾರಸ್ನ ತರೀಪ್ಷ ಕರಾನಖ್ಹಾಜೆ ಅಖ್ಖಾ ಜಗತ್ನಪರ್ ಆವಾನಯುತೆ ಕಠಣ್ ಶೋದನೆನ ದನ್ಮ ಮೇ ತುನ ಆಖ್ಹ್‌ರೊ ಕರಾವಾಳೊ ಹುಯಿನ್ ಬಚಾ಼ಡಿಶ್.
REV 3:11 ಮೇ ಒಗ್ಗಿಸ್‌ಮ ವಳ್ಯಾವುಸ್. ತಾರಿ ಕಿರೀಟ್ನ ಕೋಣ್‌ಬಿ ನಾ ಛಿನಾವ್ಣುತೆ ಇಮ್‌ ತುನೆ ಲೀರಾಖ್ಯೊಸ್ತೆ ಇನ ಘಟ್ ಧರಿರಾಕ್.
REV 3:12 ಖಿವೊ ಜೂತಾಸ್ಕಿ ಇನ ಮಾರ ದೇವ್ನ ಮಂದಿರ್‌ಮ ಆಧಾರ್‌ನು ಖಂಬುಕರಿನ್ ಭೀರಾಖಿಷ್. ಯೋ ಕದೇಬಿ ಹಿಜ್ಜಾ಼ಥು ಧಕ್‍ಷೇಸ್‍ ಕೊಯ್ನಿ. ಅತ್ರೇಸ್ ಕಾಹೆತೆ ಮಾರ ದೇವ್ನ ನಾಮ್ನ ಅಜು಼ ಮಾರ ದೇವ್ನ ಖ್ಹಯೇರ‍್ನು ನಾಮ್ ಇನಾಪರ್ ಲೀಖಿಶ್. ನವು ಯೆರೂಸಲೇಮಸ್ ಯೊ ನಂಗರ್. ಯೋ ಖ್ಹಯೇರ್ ಮಾರ ದೇವ್‌ಕಂಥು ಸೊರ್ಗಮಾಥು ಉತ್ರಿ ಆವ್‌ಶೆ. ಮಾರು ನವುನಾಮ್ ಇನಾಪರ್ ಲೀಖಿಶ್.
REV 3:13 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ.
REV 3:14 ಲವೊದಿಕೀಯಮ ಛಾ಼ತೆ ಸಬೆನ ದೂತನ ಲೀಕ್, ವಿಶ್ವಾಸ್ ಯೋಗ್ಯಬಿ, ಖ್ಹಾಚಿ ಸಾಕ್ಷಿಬಿ, ದೇವ್ನಿ ಬಣಾವಟ್ನ ರಾಜ಼ ಹುಯಿರೋತೆ ‘ಆಮೆನ್’ ಕರಿ ರ‍್ಹವಾಳೊ ಶಾತ್‌ ಬೋಲಸ್‍ಕತೊ,
REV 3:15 ತು ಕರ‍್ಯೊತೆ ಕಾಮ್‌ಖ್ಹಾರು ಮನ ಮಾಲುಮ್ ಛಾ಼. ಮೇ ಶಾತ್‌ ಆಖ್ಹ್ ಕರುಸ್ ಕತೊ, ತೂ ಠಂಡು ಕಾಹೆ ನತರ್ ಗರಮ್‌ ಕಾಹೆ ತು ಠಂಡು ನತರ್ ಗರಮ್‌ ರ‍್ಹಯೋಹೊತ್ತೊ ಅಛ್ಛು಼ ಥು.
REV 3:16 ಕತೋಬಿ ತೂ ಗರಂಬಿ ಕಾಹೆತೆ ಠಂಡೂಬಿ ಕಾಹೆತೆ ಅಂಡಚೇತು ರ‍್ಹಯೂತೊ ತುನ ಮಾರ ಬಾಕಮಾಥು ಥೂಕಿದಿಶ್.
REV 3:17 ತೂ ತಾರಿ ಬಾರೇಮ ಮೇ ಶೌಕಾರ್ ಧನ್‍ದೌಲತ್ನೊ, ಶನಾಮಬಿ ಟುಸ್‌ಟಿನಾರ‍್ಹವಾಳೊ ಕರಿ ಬೋಲಿಲೇಸ್. ಕತೋಬಿ ತೂ ಖಲಿ ಖರಾಬ್ ಹಾಲತ್ಮ ಪಡಿರ‍್ಹವಾಳೊ. ಖರಾಬ್ ನಶೀಬ್‍ನೊ ಅನಾದಿ, ಅಂಧೊ ಉಘಾಡೊ ಹುಯಿರೋಸ್ ತು ಕರಿ ಮಾಲುಮ್‌ ಕೋಕರ‍್ಯೊಂತೆ ಛಾ಼.
REV 3:18 ತೂ ಶೌಕಾರ್ ಹುವಾನ ಆಗ್‌ಮ ನಾಖಸ್ತೆ ಖ್ಹೊನ್ನಾನಾಬಿ ಖ್ಹರಮ್‌ನ ಕಾರಣ್ ಹುಯಿರ‍್ಹೂತೆ ತಾರು ಉಘಾಡಾನ ದೆಖಾವ್ಣುನಾತೆ ಫೆರಾನಖ್ಹಾಜೆ ಧೋಳ ಲುಂಗ್ಡಾವ್‍ನಾಬಿ ಡೋಳೊದೆಖಾವನಖ್ಹಾಜೆ ತುಮಾರ ಡೋಳಾವ್‌ನ ಲಗಾಡನಖ್ಹಾಜೆ ಅಂಜ಼ಣ್‍ನಾಬಿ ಮಾರೇಥಿ ಲೀಲೇವ್ಣುಕರಿ ಮೇ ತುಮೂನ ಅಕ್ಕಲ್ ಬೋಲುಕರುಸ್.
REV 3:19 ಮೇ ಕಿನಕಿನ ಪ್ಯಾರ್ ಕರೂಸ್ಕಿ ಇವ್ಣುನ ಗುರ್‌ಕವುಸ್ ಅಜು಼ ನಿಶತ್‌ ದೆವುಸ್. ಇನಖ್ಹಾಜೆ ತೂ ಹೊಷಾರ್‌ಥಿ ರ‍್ಹೇ. ಮನ್ ಫರೈನ್ ದೇವ್‌ಭಣಿ ಫರಿಜಾ಼.
REV 3:20 ಹಂದೇಕ್ ಖ್ಹಾಮ್ಣೆ ಭೀರಿನ್ ಬಾಕಲ್ ಖಟ್‍ಕಟಾವ್‌ ಕರುಸ್, ಕೋಣ್‌ತೋಬಿ ಮಾರಿ ಆವಾಜ಼್‌ನ ಖ್ಹಮ್‌ಜಿನ್‌ ದರ‍್ವಾಜು಼ ಕಾಡ್ಯತೊ, ಮೇ ಮಹಿ ಐನ್ ಇನ ಜೋ಼ಡೆ ಖಾಣು ಖೈಶ್‌. ಯೊ ಮಾರಿ ಜೋ಼ಡ್ಮ ಖಾಣು ಖಾಶೆ.
REV 3:21 ಮೇ ಜೂತಿನ್ ಮಾರ ಬಾನಿ ಜೋ಼ಡ್ಮ ಸಿಂಹಾಸನ್‌ಮ ಬೆಠೂತೆ ತಿಮ್ಮಸ್ ಜೂತಹುಯಾನ ಮಾರ ಜೋ಼ಡೆ ಸಿಂಹಾಸನ್‌ಮ ಬೇಖ್ಹಾನಿ ಅಧಿಕಾರ‍್ನ ಮೇ ದಿಶ್.
REV 3:22 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ.
REV 4:1 ಇನಪಾರ್ ಮೆ ದೇಖಾನಿವಖ್ಹ್‌ತೆ ಸೊರ್ಗಾಮ ನಿಕ್ಳಿರ‍್ಹೂತೆ ಏಕ್‌ ದರ‍್ವಾಜು಼ ದೆಖಾಯು. ಪಹಿಲೆ ವಾತೆ ಬೋಲ್ಯುಥೂತೆ ಅವಾಜ಼್ ಪಾಛು಼ ತುತ್ತೂರಿನಿತರ ಬೋಲಾನಿತರ ಮನ ಖ್ಹಮಜ್‍ಪಡ್ಯು. ಯೋ ಅವಾಜ಼್ “ಹಜ್ಜಾ಼ ಛ಼ಡಿಆವ್ ಅಗ್ಗಳ್ ಚಾ಼ಲ್‌ಶೇತೆ ಖ್ಹಾರು ತುನ ವತಾಳಿದೆವುಸ್‌” ಕರಿ ಬೋಲ್ಯು.
REV 4:2 ತುರಂಥಿಸ್ ಮೇ ಆತ್ಮಾನ ಕಬ್‌ಜ಼ಮಾಥೊ, ತದೆ ಹಿಜ್ಜಾ಼ ಪರ್‌ಲೋಕ್‌ಮ ಏಕ್‌ ಸಿಂಹಾಸನ್ ಥೀ.ಯೋ ಸಿಂಹಾಸನ್‌ಪರ್ ಏಕ್‍ಜ಼ಣೊ ಬೆಠೋಥೊ.
REV 4:3 ಬೆಠೊಹುಯೊ ಡೋಳಾವ್‌ಮ ಚಾ಼ಂದ್‌ನು ಉಜಾ಼ಖ್ಹ್‌ ಪದ್ಮರಾಗಮಣ್ಕನಿತರ ದೆಖವ್‍ಕರ್ತೋಥೊ.ಸಿಂಹಾಸನ್ನ ಅಶ್‌ಪಿಶ್ ಹರ‍್ಯಾನಿಮತ್ ದೆಖವ್‌ಕರ್ತುಥೂತೆ ಆಕಾಶ್ ಧೂಣ್‌ಥಿ.
REV 4:4 ಅತ್ರೇಸ್ ಕಾಹೆತೆ ಸಿಂಹಾಸನ್ನ ಅಶ್‌ಪಿಶ್ ಚಾರ್‌ಉಪ್ಪರ್ ವೀಖ್ಹ್‌ ಸಿಂಹಾಸನ್‌ಖ್ಹಾರಿಥಿ. ಯೋ ಸಿಂಹಾಸನ್‌ಪರ್ ಧೋಳು ಪೆರ್ವಾಖ್ಹ್‌ ಫೇರುಹುಯು ಚಾರ್ ಉಪ್ಪರ್ ವೀಖ್ಹ್‌ಜ಼ಣು ಶಾಣು ಬೇಠೂಥು. ಇವ್ಣ ಮಾಥಪರ್‌ ಖ್ಹೊನ್ನಾನಿ ಕಿರೀಟ್ ಘಲೈರ‍್ಹೀಥಿ.
REV 4:5 ಸಿಂಹಾಸನ್‌ಥು ವಿಜ಼್‌ಳಿ ಖಡ್ಕಾನು ಘಲಾರನು ಅವಾಜ಼್‌ ಭಾರ್‌ ಅವ್‌ಕರ್ತುಥು. ಯೋ ಸಿಂಹಾಸನ್ನ ಖ್ಹಾಮ್ಣೆ ಖ್ಹಾತ್ ದಿವಳ್ಗಿ ಲಾಗುಕರ್ತಿಥಿ, ಯೋ ದಿವಳ್ಗಿಖ್ಹಾರು ದೇವ್ನು ಖ್ಹಾತ್ ಆತ್ಮವ್ ಹುಯಿರುಥು.
REV 4:6 ಅತ್ರೇಸ್ ಕಾಹೆತೆ ಸಿಂಹಾಸನ್ನ ಖ್ಹಾಮ್ಣೆ ಫಟಕ್ಡಿನಿತರ ದೆಖಾವನು ಶಿಖ್ಹಾನು ದರ‍್ಯಾವ್ ರ‍್ಹವಾನಿಘೋಣಿ ದೆಖಾಯು. ಸಿಂಹಾಸನ್ನ ಚಾರ್ ಬಾಜು಼ಮಾಬಿ ಚಾರ್ ಜೀವಿ ಥೂ. ಇನಖ್ಹಾಮ್ಣೆ ಪೀಠೆ ಕೈಯೆಕ್ಕಿ ಡೋಳಾಥ.
REV 4:7 ಪಹಿಲು ಜೀವಿ ಶುಂಭಾನಿತರ ಥು, ಬೇನು ಜೀವಿ ಘುಳಿನಿತರ ಥೂ. ತೀನ್ನ ಜೀವಿನು ಮ್ಹೋಡು ಅದ್ಮಿನಿತರ ಥು, ಚಾರ‍್ನು ಜೀವಿ ಉಡಂತು ಗರದ್‌ನಿಘೋಣಿ ಥು.
REV 4:8 ಯೋ ಚಾರ್ ಜೀವಿ ಎಕೇಕೆನ ಛೊ಼ಛೋ಼ ಫಾಕ್ಡಿ ಥು. ಅಶ್‌ಪಿಶ್‌ಬಿ ಮಹಿಬಿ ಘಣು ಡೋಳಖ್ಹಾರುಥು, ಆ ಜಿನಾವರ್‌ ಖ್ಹಾರು ರಾತ್‌ದನ್ ಆರಾಮ್‌ಕೊಂತೆ ದೇವ್ ಹುಯಿರ‍್ಹಾವಳೊ ಪ್ರಭು ಪರಿಶುದ್ಧ್, ಪರಿಶುದ್ಧ್, ಪರಿಶುದ್ಧ್, ಯೋ ಸರ್ವಶಕತ್‌ನೊ ಅಗ್ಗಳ್ ಥೋತೆ, ಹಮ್ಕೆ ಛಾ಼ತೆ, ಆವಾಳೊಛಾ಼ತೆ ಕರಿ ಬೋಲುಕರ್ತುಥು.
REV 4:9 ಜ಼ಗ್‌ಜ಼ಮಾನಮಾಬಿ ಜಿವ್ತೊರ‍್ಹೀನ್ ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಯೋ ಜೀವಿ ಮಹಿಮ, ಮರ್ಯಾದಿ ಧನ್ಯವಾದ್ ಕರುಕರ್ತುಥು.
REV 4:10 ಯೋ ಚಾರ್ ಉಪ್ಪರ್ ವೀಖ್ಹ್‌ ಜ಼ಣು ಶಾಣುಖ್ಹಾರು ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಗೋಡಾಪರ್ ಆಡ್‍ಪಡಿನ್, ಇವ್ಣ ಕಿರೀಟ್ನ ಸಿಂಹಾಸನ್ನ ಖ್ಹಾಮ್ಣೆ ನಾಖಿನ್, ಜಾನ್ನದೇವ್‌ನ ಕದೇಬಿ ಆರಾದನೆ ಕರ್ತುಹುಯಿನ್
REV 4:11 ಹಮಾರೊ ಪ್ರಭು ಹುಯಿರ‍್ಹೋತೆ ದೇವ್, ತೂ ಮಹಿಮೆನಾಬಿ ಮಾನ್ ಮರ‍್ಯಾದಿನಾಬಿ ಶಕತ್ನ ಲೀಲಾವನ ಯೋಗ್ಯಹುಯಿರೋಸ್, ಶನಕತೊ ಹರೇಕ್ನ ಉಬ್‌ಜಾ಼ಯೋತೆ ತೂಸ್, ಅಖ್ಖೂಬಿ ತಾರೀಸ್ ಖ್ಹೂಜ಼್‌ಥಿಥು.ಅಜು಼ ತಾರೀಸ್ ಖ್ಹಯಾಲ್‌ಥಿ ಬಣಾವಟ್ ಹುಯು ಕರಿ ಬೋಲ್ತುಹುಯಿನ್ ಆರಾದನೆ ಕರುಕರ್ತುಥು.
REV 5:1 ಮೇ ಸಿಂಹಾಸನ್‌ಪರ್ ಬೆಠಹುಯಾನ ಖಾವಹಾತ್ಮ ಏಕ್‌ ಪುಂಗ್‌ಳಿನ ದೇಖ್ಯೊ. ಇನ ಮಹಿನಿ ಬಾಜೂ಼ಮ ಅಜು಼ ಫಾದರ‍್ಲಿ ಬಾಜೂ಼ಮ ಲೀಖೈರೂಥು, ಯೋ ಖ್ಹಾತ್ ಮುದ್ರಾಥಿ ಮುದ್ರೊ ಮರೈರ‍್ಹೂಥು.
REV 5:2 ಅತ್ರೇಸ್ ಕಾಹೆತೆ ಏಕ್‌ ಶಕತ್ನೊ ದೇವ್ನದೂತನೆ ಊಚಿ ಅವಾಜ಼್‌ಥಿ ಚಿಕ್ರಿನ್ “ಆ ಮುದ್ರಾವ್ನ ಫೋಡಿನ್, ಪುಂಗ್‌ಳಿನ ಛೋ಼ಡಾನ ಕೋಣ್ ಯೋಗ್ಯ?” ಕರಿ ಬೋಲಾವ್‌ಕರ್ತೊಥೊ.
REV 5:3 ಕತೋಬಿ ಯೊ ಪುಂಗ್‌ಳಿನ ಛೋ಼ಡಾನರ‍್ಹವೊ ಇನಾಮ ದೇಖಾನರ‍್ಹವೊ ಪರ್‌ಲೋಕ್‌ಮ ರ‍್ಹವೊ ಧರ್ತಿಪರ್‌ರ‍್ಹವೊ ಪಾತಾಳ್ಮರ‍್ಹವೊ ಕಿನೇಥೀಬಿ ಕೊಹುಯುನಿ
REV 5:4 ಪುಂಗ್‌ಳಿನ ಕಾಡನರ‍್ಹವೊ ದೇಖಾನರ‍್ಹವೊ ಯೋಗ್ಯ ಹುಯಿರ‍್ಹಾವಳೊ ಏಕ್‌ ಜ಼ಣುಬಿ ಕೊಮಳ್ಯುನಿಕರಿ ಮೇ ಘಣು ಕುಢಾಪಕರೀನ್‌ ರೋವ್‍ಕರ್ತೊಥೊ.
REV 5:5 ಶಾಣಾವ್‌ಮ ಏಕ್‌ ಜ಼ಣಾನೆ ಮನ, “ರೊವ್‌ನಕೊ ಯೂದಖೂಮ್ಮ ಪೈದಹುಯೊತೆ ಶುಂಭಾ ದಾವೀದನೊ ಖಾನ್‌ದಾನ್‌ವಾಳೊ ಹುಯಿರೋತೆ ಏಕ್‌ ಜ಼ಣೊ ಜೂತಿರ‍್ಹಾವಾಳೊ ಛಾ಼. ಯೊ ಖ್ಹಾತ್ ಮುದ್ರಾವ್ನ ಫೋಡಿನ್ ಆ ಪುಂಗ್‌ಳಿನ ಛೋ಼ಡ್‌ಶೆ” ಕರಿ ಬೋಲ್ಯು.
REV 5:6 ಸಿಂಹಾಸನ್‌ಬಿ ಚಾರ್ ಜೀವಿಬಿ ಥೂತೆ ಝಗೋಕನಾಬಿ ಅಜು಼ ಶಾಣುಖ್ಹಾರು ಥೂತೆ ಝ಼ಗೋನ ಇಚ಼್‌ಮ ಏಕ್‌ ಮೇಂಢಾನ ಭಿಯುರ‍್ಹವಾನು ದೇಖ್ಯೊ. ಯೋ ಹಮ್ಕೆ ತದೇಸ್‌ ಬಲೀನಖ್ಹಾಜೆ ರ‍್ಹೇಖ್ಹಯ್‌ ರ‍್ಹಾವನಿತರ ದೆಖವ್‌ಕರ್ತುಥು. ಯೋ ಮೆಂಢಾನ ಚೆಲ್ಕಾನ ಖ್ಹಾತ್ ಶಿಂಗ್ಡು ಖ್ಹಾತ್ ಡೋಳಾವ್‌ಥು. ಆಖ್ಹಾರು ಧರ್ತಿಪರ್ ಮೋಕ್‌ಲೈರ‍್ಹುಥೂತೆ ದೇವ್ನು ಖ್ಹಾತ್ ಆತ್ಮ ಹುಯಿರುಥು.
REV 5:7 ಯೋ ಮೇಂಢಾನು ಚೆಲ್ಕುಅಯಿನ್ ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಖಾವಹಾತ್ಮಥು ಯೊ ಪುಂಗ್‌ಳಿನ ಮಾಂಗಿಲಿದೊ.
REV 5:8 ಪುಂಗ್‌ಳಿನ ಮಾಂಗಿಲ್ಯವಾನಿ ವಖ್ಹ್‌ತೆ ಯೋ ಚಾರ್ ಜೀವಿ 24 ಜ಼ಣು ಶಾಣುಖ್ಹಾರು ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಪಗ್‍ಪರ್ ಆಡ್‌ಪಡ್ಯು. ಹರೇಕ್‌ಜ಼ಣಕನ ಹಾತ್ಮ ಖ್ಹಾರಂಗೊಬಿ ಖ್ಹಾಲರ‍್ಯಾನು ಢಪ್ಕಾರ್‌ಥಿ ಭರೈರ‍್ಹುಥೂತೆ ಖ್ಹೊನ್ನಾನಿ ಢಾಕ್ಣಿಬಿ ಥು. ಯೊ ದೇವ್ನು ಅದ್ಮಿನು ಪ್ರಾರ್ಥನೆ ಹುಯಿರ‍್ಹುಥು
REV 5:9 ಇವ್ಣೆ ನವುಗೀದ್ ಬೋಲ್ತುಹುಯಿನ್ ಪುಂಗ್‌ಳಿನ ಮಾಂಗಾನ, ಇನ ಮುದ್ರಾನ ಫೋಡಾನ ತೂ ಯೋಗ್ಯ ಹುಯಿರೊಸ್ ತೂ ರ‍್ಹೇಖ್ಹಯ್‌ಜೈನ್ ಬಲಿದಾನ್‌ಹುಯಿನ್ ತಾರ ಲ್ಹೋಯಿಥಿ ಹರೇಕ್ ಖೂಮ್‌, ಬೋಲಿ, ದೇಖ್ಹ್‌ವಾಳಾನ,ಅಖ್ಖಾಸ್ ಜಾ಼ತ್ನ ಅದ್ಮಿಖ್ಹಾರಾನ ದೇವ್ನಖ್ಹಾಜೆ ಮೋಲ್‌ಲೀರಾಖ್ಯೋಸ್.
REV 5:10 ಇವ್ಣುನ ಅಪ್ಣ ದೇವ್ನಖ್ಹಾಜೆ ರಾಜ್ಯಕರಿನ್ ಯಾಜಕರ್‌ ಕರಿನ್ ಬಣಾಯೊ, ಇವ್ಣೆ ಜ಼ಮೀನ್‌ಪರ್ ರಾಜ಼್ ಚ಼ಲಾವ್‌ಷೆ”.
REV 5:11 ಇನಪಾರ್ ಇನು ಸಿಂಹಾಸನ್ನು ಚಾರ್ ಜೀವಿ ಅಜು಼ ಸಬೆನ ಶಾಣಾವ್ನ ಅಶ್‌ಪಿಶ್ ಭಿಯುಥೂತೆ, ಕೈಯೆಕ್ಕಿ ಜ಼ಣು ದೇವ್‌ದೂತರ‍್ನ ಅವಾಜ಼್‌ನ ಖ್ಹಮ್‌ಜೊ. ಇವ್ಣು ಗಣ್ತಿ ಲಾಖೋಲಾಕ್‌ಬಿ ಕರೋಡೊ ಕರೊಡೋಬಿ ಥು.ಬಿಜು಼ಪಾಛು಼ ದೇಖಾನಿ ವಖ್ಹ್‌ತೆ ದೇವ್ನ ದೂತರ್ ಭಿಯೂಥು.
REV 5:12 ಆ ದೇವ್ನದೂತರ್‌ನೆ ಜೋ಼ರಾನಿ ಅವಾಜ಼್‌ಥಿ, “ಖೂನಿ ಹುಯಿಗೋತೆ ಮೇಂಢಾನು ಚೆಲ್ಕು ಅದಿಕಾರ್‌ನಾಬಿ, ಧನ್‌ದೌಲತ್ನಾಬಿ, ಅಕ್ಕಲ್‌ನಾಬಿ, ಶಕತ್‍ನಾಬಿ, ಮರ್ಯಾದಿನಾಬಿ, ಮಹಿಮೆನಾಬಿ, ಧನ್ಯವಾದ್‌ನ ಲ್ಯಾವಾನ ಯೋಗ್ಯ ಹುಯಿರೊಸ್” ಕರಿ ಗೀದ್‌ ಬೋಲ್ಯು.
REV 5:13 ಅತ್ರೇಸ್ ಕಾಹೆತೆ ಆಬ್‌ಮಾಬಿ ಜಮೀನ್‌ಮಾಬಿ ಧರ್ತಿನ ಹೇಟ್‌ಬಿ ದಲ್‌ದರ‍್ಯಾವ್‌ಮಾಬಿ ಉಬ್‍ಜೂತೆ ಅಖ್ಖು ಅಮ್ ಬೋಲ್ಯುಕಿ, “ಸಿಂಹಾಸನ್‌ಪರ್ ಬೆಠೊರ‍್ಹಾವಳನಾಬಿ ಮೇಂಢಾನು ಚೆಲ್ಕು ಹುಯಿರ‍್ಹಾವಳನಬಿ, ಧನ್ಯವಾದ್, ಮರ್ಯಾದಿ, ಮಹಿಮೆ, ಖ್ಹಾರಿಅದಿಕಾರ್, ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ.” ಕರಿ ಬೋಲಾನು ಮೆ ಖ್ಹಮ್‌ಜೊ.
REV 5:14 ಯೋ ಚಾರ್ ಜೀವಿ “ಆಮೆನ್” ಕರಿ ಬೋಲ್ಯು. ಶಾಣುಖ್ಹಾರು, ಆಡ್‍ಪಡಿನ್ ಆರಾದನೆ ಕರ‍್ಯು.
REV 6:1 ಮೇಂಢಾನು ಚೆಲ್ಕು ಹುಯಿರಾವಳೊ ಯೋ ಖ್ಹಾತ್ ಮುದ್ರಾನ ಫೋಡಾನಿವಖ್ಹ್‌ತೆ ಮೇ ದೇಖ್ಯೊ ಅಜು಼ ಯೋ ಚಾರ್ ಜೀವಿಮ ಏಕ್‌ ಜೀವಿ ಘಲಾರನಿತರಾನೊ ಗಳೇಥಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ.
REV 6:2 ಮೇ ಹಿಜ್ಜಾ಼ ದೆಖಾನಿವಖ್ಹ್‌ತೆ ಏಕ್‌ ಧೋಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊಹುಯೊ ಹಾತ್ಮ ಏಕ್‌ ಧೂಣ್ ಧರಾಖ್ಯೊಥೊ.ಇನ ಏಕ್‌ ಕಿರೀಟ್‌ಬಿ ದೆವೈರ‍್ಹೂಥು. ಯೋ ವಹೇರ‍್ಯಾನ ಹರಾವವಾಳೊ ಹುಯಿನ್ ಜೂತಾನಖ್ಹಾಜೆ ನಿಕ್‌ಳ್ಯೊ.
REV 6:3 ಮೇಂಢಾನು ಚೆಲ್ಕು ಹುಯಿರ‍್ಹಾವಳನೆ ಬೇನು ಮುದ್ರಾನ ಫೋಡಾಖ್ಹತರ್ ಬೇನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ.
REV 6:4 ತದೆ ಲಾಲ್‌ರಂಗ್‌ನೊ ಬಿಜೇಕ್ ಘೋಡೊ ನಿಕ್ಳಿ ಆಯೊ. ಇನಾಪರ್ ಸವಾರಿ ಕರವಾಳನ ಜ಼ಮೀನ್‍ಪರ್ಥು ಸಮಾಧಾನ್ನ ಕಾಡಿನಾಖನ ಅದಿಕಾರ್ ದೆವಾಯು. ಅನೇಥಿ ಅದ್ಮಿ ಏಕ್‌ಥಿಏಕ್ ಖೂನಿಕರಾವಳು ಹುಯು. ಅಜು಼ ಯೋ ಸವಾರಿನ ಮೋಟಿಖ್ಹಿ ಏಕ್‌ ತಲ್ವಾರ್‌ಬಿ ದೆವಾಯು.
REV 6:5 ಮೇಂಢಾನು ಚೆಲ್ಕು ಹುಯಿರ‍್ಹವವಾಳೊ ತೀನ್ನ ಮುದ್ರಾನ ಫೋಡಾಖ್ಹತರ್, ತೀನ್ನು ಜೀವಿ ಆವ್‌ಕರಿ ಬೋಲಾನು ಖ್ಹಮ್‌ಜೊ. ತದೆ ಮೇ ದೇಖಾಖ್ಹತರ್ ಹಿಜ್ಜಾ಼ ಮನ ಕಾಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊರ‍್ಹವಾಳಾನ ಹಾತ್ಮ ತರಾಜ಼್ ಥು.
REV 6:6 ಇನಪಾರ್ ಚಾರ್ ಜೀವಿನ ಇಚ್ಮಾ಼ಥು ಏಕ್‌ ಜ಼ಣಾನಿ ಅವಾಜ಼್ ನಿಕ್ಳಾನಿಘೋಣಿ ಖ್ಹಮ್‌ಜೊ. ಏಕ್‌ ಪೈಶಾನ ಏಕ್‌ ಶೇರ್ ಘವ್‌, ಅಜು಼ ಏಕ್‌ ದನ್ನಿ ಕೂಲಿ ತೀನ್ ಶೇರ್ ಬಾಜ಼್ರೊ, ಕತೋಬಿ ತೇಲ್ನ ಅಜು಼ ದ್ರಾಕ್ಷಿನ ರಖ್ಹ್‌ನ ಖರಾಬ್‌ನಕೋಕರ್” ಕರಿ ಬೋಲ್ಯು.
REV 6:7 ಮೇಂಢಾನು ಚೆಲ್ಕುಹುಯಿರ‍್ಹವಾಳನೆ ಚಾರ‍್ನ ಮುದ್ರಾನ ಫೋಡಾನಿವಖ್ಹ್‌ತೆ; ಚಾರ‍್ನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ.
REV 6:8 ತದೆ ಮೇ ದೇಖಾನಿವಖ್ಹ್‌ತೆ ಹಿಜ್ಜಾ಼ ಬೂದ ರಂಗ್‌ನೊ ಘೋಡೊ ರ‍್ಹವಾನು ದೇಖ್ಯೊ. ಯೋ ಘೋಡಾಪರ್‌ ಬೆಠೊರ‍್ಹಾವಳೊ ಸವಾರಿನು ನಾಮ್ ಮರಣ್. ಇನ ಪೀಠೆ ಪಾತಾಳ್‌ಕರಿ ಬೋಲವಾಳೊ ಆಯೊ. ಇವ್ಣುನ ಜ಼ಮೀನ್ನು ಚಾರ‍್ನು ಏಕ್‌ ಭಾಗ್‌ಪರ್‌ ಅದಿಕಾರ್ ದೆವಾಯು. ಜಂಗ್‌ಥಿಬಿ, ಕಾಳ್ದುಕಾಳ್ ದನ್‌ಥಿಬಿ, ರೋಗ್‌ಥಿ ಅಜು಼ ಜಗತ್‌ಪರ್‌ ಛಾ಼ತೆ ಝಾ಼ಡಿನ ಜಾನ್ವರ್‌ಥೀಬಿ ಅದ್ಮಿವ್‌ನ ಮಾರಾನ ಅದಿಕಾರ್ ದೆವಾಯು.
REV 6:9 ಇನೆ ಪಾಚ಼್‌ನ ಮುದ್ರಾನ ಫೋಡಾನಿವಖ್ಹ್‌ತೆ; ದೇವ್ನ ವಚನ್ನಖ್ಹಾಜೇಥಿಬಿ, ಇವ್ಣುನ ರ‍್ಹವಾನು ಬರೋಬರ್‌ನಿ ಸಾಕ್ಷಿನ ಖ್ಹಾಜೇಥಿಬಿ, ಮರಾವಳನು ಆತ್ಮಖ್ಹಾರು, ಬಲಿಪೀಠ್‌ನ ಹೇಟ್ ರ‍್ಹವಾನು ದೇಖ್ಯೊ.
REV 6:10 ಇವ್ಣೆ ತೂಸ್ ಪ್ರಭು, ಪರಿಶುದ್‌ಬಿ ಖ್ಹಾಚೋ಼ಬಿ ಹುಯಿರ‍್ಹವಾಳೊ. ಹಮಾರ ಲ್ಹೋಯಿನ ರಂಚ್ಯೂತೆ ಧರ್ತಿನು ಅದ್ಮಿಖ್ಹಾರಾನ ಬಿಜು಼ ಕಬ್ಲಗು ನ್ಯಾವ್‌ಫೇಡಾವ ಕೊಯ್ನಿತೇಬಿ, ನ್ಯಾವ್‌ನು ತೀರ್ಪ್ ಕರಾಕೊಂತೇಬಿ ನಿಶತ್‌ ದೇಸ್ ಕೊಂತೆ ರ‍್ಹೇಸ್? ಕರಿ ಮೋಟಿ ಅವಾಜ಼್‌ಥಿ ಚಿಕ್‌ರ‍್ಯು.
REV 6:11 ತದೆ ಇವ್ಣಾಮ ಅಖ್ಖಾಸ್ ಜ಼ಣಾನ ಏಕೇಕ್‌ ಧೋಳೊ ಝ಼ಗ್ಗೊ ದೆವಾಯು. ಅಜು಼ ಥೋಡಿ ವಖ್ಹತ್ ಟಿವೈರ‍್ಹೇಣುಕರಿ ಯೋ ಆತ್ಮವ್‌ನ ಖ್ಹಮ್‌ಜಾ಼ಡ್ಯು. ತುಮಾರಿನಿತರ ಖೂನಿ ಹೋಣುತೆ ಭೈಯೇಮ ಥೋಡುಜ಼ಣು ಅಜು಼ ಜೋ಼ಡ್ನ ಚಾ಼ಕ್ರಿ ಕರಾವಳನಿ ಗಣ್ತಿ ಪೂರ ಹುವಾಲಗು ಅರಾಮ್‌ಥಿ ರ‍್ಹೇವ್ಣುಕರಿ ಇವ್ಣುನ ಬೋಲಾಯು.
REV 6:12 ಯೋ ಮೇಂಢಾನು ಚೆಲ್ಕು ಛೋ಼ನು ಮುದ್ರಾನ ಫೋಡಾನು ಮೇ ದೇಖ್ಯೊ. ತದೆ ಮೋಟು ಭೂಕಂಪ್ ಹುಯು. ಚಾ಼ಂದ್ ಕಾಳು ಘುಂಗ್‌ಡಿನಿಮತ್ ಕಾಳೊಹುಯಿಗೊ. ಅಜು಼ ಅಖ್ಖೊಯೇಕ್ ಚ಼ಂದರ್‌ಮೊ ಲ್ಹೋಯಿನಿತರ ಲಾಲ್ ಹುಯಿಗೊ.
REV 6:13 ಅಂಜೀರ್‌ನ ಝಾ಼ಡಾನ ತುಫಾನ್ನೊ ವ್ಹಾಯಿರಾನು ಮಾರ್ ಪಡಿನ್ ಇನು ಪಕಾವಕೊಂತೆ ಪಂಡುಖ್ಹಾರು ಝ಼ಟ್‌ಕಾವನಿ ಘೋಣಿ ಆಬ್‍ಥು ಶುಕ್ಕರ್‌ಖ್ಹಾರು ಜ಼ಮೀನ್‌ಪರ್ ಝ಼ಟ್‌ಕೈನ್ ಪಡ್ಯು.
REV 6:14 ಆಕಾಶ್ ಪುಂಗ್‌ಳಿನಿತರ ಲಪ್‌ಟೈನ್‌ ಡೋಳೇಥಿ ಲಪಿಗಯು. ಹರೇಕ್ ಪಹಾಡ್ ಅಜು಼ ಟಾಪುಖ್ಹಾರು, ಇನಿ ಇನಿ ಝ಼ಗೋಥು ಖ್ಹರ್ಕಿಗಯು.
REV 6:15 ತದೆ ಜ಼ಮೀನ್ನು ರಾಜ಼ವ್‌ಖ್ಹಾರು, ಅಖ್ಖೂಸ್ ಅದಿಕಾರಿ, ಡಂಡ್‌ನೊ ಘಲ್ಡೊಖ್ಹಾರು, ಶೌಕಾರ್‌ಖ್ಹಾರು, ಘಣು ಶಕತ್‌ವಾಳುಖ್ಹಾರು, ಬಿಜು಼ಖ್ಹಾರು ಅದ್ಮಿ ಗುಲಾಮ್‌ಖ್ಹಾರು, ಛುಟ್ಕಾರ್‌ನು ಅದ್ಮಿಖ್ಹಾರು ಪಹಾಡ್ನಿ ಘವಿಮಾಬಿ, ಬಂಡಾನಿ ಚಿಪಾಟ್ನಿಖೀಂಡಿಮ ಲಪಿಗಯು.
REV 6:16 ಇವ್ಣೆ ಅಮ್ ಬೋಲ್ಯುಕಿ, ಪಹಾಡ್ನಾಬಿ ಬಂಡಾನಿ ಚಿಪಾಟ್‌ಬಿ ಹಮಾರಪರ್ ಲಡ್ಕಿಜಾವೊ, ಸಿಂಹಾಸನ್ನ ಉಪ್ಪರ್ ಬೆಠೊರ‍್ಹವಾಳಾನ ಮೇಂಢಾನಚೆಲ್ಕನ ಖೀಜ಼್‌ಮಾಥು ಹಮುನ ಛು಼ಕಾವ್‌!
REV 6:17 ಶನಕತೊ ಇನೊ ಭಯಂಕರ್ ಇರಾದೊ ಐಗು. ಇನಖ್ಹಾಮ್ಣೆ ಭಿರಾವನ ಕಿನ ಹಾತ್ ಉಷೆ? ಕರಿ ಬೋಲ್ಯು.
REV 7:1 ಆ ಹುಯಿಜಾ಼ವದಿನ್ ಚಾರ್‌ಜ಼ಣ ದೇವ್ನು ದೂತರ್ ಜ಼ಮೀನ್ನು ಚಾರ್ ರುಕ್‍ಮ ಭೀರಿನ್ ಜ಼ಮೀನ್‌ಪರ್‌ರ‍್ಹವೊ, ದರ‍್ಯಾವ್‌ಪರ್‌ರ‍್ಹವೊ, ನತರ್ ಖೆವ ಝಾ಼ಡಪರ್‌ರ‍್ಹವೊ ವ್ಹಯಿರೊ ನಾವಾಗ್ಣುತೆ ತಿಮ್ ಜ಼ಮೀನ್ನು ಚಾರ್‌ದಿಕ್ನು ವ್ಹಾಯಿರಾನ ಭೀರಾಖಿರಾಖನು ದೇಖ್ಯೊ.
REV 7:2 ಅತ್ರೇಸ್ ಕಾಹೆತೆ ಬಿಜೇಕ್ ದೇವ್‌ದೂತನೆ ಜಿವ್ತೊ ಜಾನ್ನೊ ಯೋ ದೇವ್ನ ಮುದ್ರಾನ ಧರಿಲೀನ್ ದನ್‌ನಿಕ್‌ಳಾ ಭಣೀಥು ಆವಾನು ದೇಖ್ಯೊ. ಅನೆ ಯೋ ಜ಼ಮೀನ್ನಾಬಿ ದರ‍್ಯಾವ್‌ನಾಬಿ ಖರಾಬ್ ಕರಾನಿ ಹುಕುಮ್‌ ಲೀರಾಖ್ಯಾತೆ ಯೋ ಚಾರ್‌ಜ಼ಣ ದೂತರ‍್ನ ಬುಲಾವ್ತೊ ಹುಯಿನ್ ಅಮ್ ಬೋಲ್ಯೊಕಿ;
REV 7:3 “ಹಮೆ ಹಮಾರ ದೇವ್ನ ದಾಸರ‍್ನ ತಾಳ್ವಪರ್ ಮುದ್ರೊ ಮಾರ‍್ವಲಗೂಬಿ ಜ಼ಮೀನ್ನರ‍್ಹವೊ, ದರ‍್ಯಾವ್ನರ‍್ಹವೊ, ಝಾ಼ಡಾವ್ನರ‍್ಹವೊ, ನಾಶ್‌ ನಾಕರ‍್ನು ಕರಿಬೋಲ್ಯೊ.
REV 7:4 ಮುದ್ರೊ ಮರೈಲಿದುತೆ ಇವ್ಣಿ ಗಣ್ತಿ ಮನ ಖ್ಹಮಜ಼್‌ಮ ಆಯುಕಿ ಏಕ್‌ಲಾಕ್ ಚಾರ್‌ಉಪ್ಪರ್ ಚಾ಼ಳೀಖ್ಹ್‌ಹಜಾ಼ರ್‌ ಇಸ್ರಾಯೇಲರ‍್ನು ಹರೇಕ್ ಖೂಮ್ನ ಮಳಿಹುಯು ಹುಯಿರ‍್ಹುಥು.
REV 7:5 ಯೂದನಿ ಖೂಮ್ಮ ಮುದ್ರೊ ಮರೈರ‍್ಹವಾಳು ಭಾರಹಜಾ಼ರ್, ರೂಬೆನ್ನಾ ಖೂಮ್‌ವಾಳಮ ಭಾರಹಜಾ಼ರ್, ಗಾದ್‌ ಖೂಮ್‌ವಾಳಮ ಭಾರಹಜಾ಼ರ್,
REV 7:6 ಅಸೇರನ ಖೂಮ್‌ಥು ಭಾರಹಜಾ಼ರ್, ನಫ್ತಾಲಿನ ಖೂಮ್‌ಥು ಭಾರಹಜಾ಼ರ್, ಮನಸ್ಸೆನ ಖೂಮ್‌ಥು ಭಾರಹಜಾ಼ರ್,
REV 7:7 ಸಿಮೆಯೋನ್ನ ಖೂಮ್‌ಥು ಭಾರಹಜಾ಼ರ್,ಲೇವಿನ ಖೂಮ್‌ಥು ಭಾರಹಜಾ಼ರ್, ಇಸ್ಸಾಕಾರ‍್ನ ಖೂಮ್‌ಥು ಭಾರಹಜಾ಼ರ್,
REV 7:8 ಜೆಬುಲೋನ್ನ ಖೂಮ್‌ಥು ಭಾರಹಜಾ಼ರ್, ಯೋಸೇಫ್‌ನ ಖೂಮ್‌ಥು ಭಾರಹಜಾ಼ರ್, ಬೆನ್ಯಾಮೀನ್ನ ಖೂಮ್ಮಥು ಮುದ್ರೊ ಮರಾಯುಹುಯು ಭಾರಹಜಾ಼ರ್‌ ಜ಼ಣುಥು.
REV 7:9 ಆ ಹುವಾನ ವಾರ್, ಹಂದೇಕ್ ಕಿನೇಥೀಬಿ ಗಣ್ತಿಕರಾನ ಕೊಹುವಾನಿತೆ ಎತ್ರೆ ಅದ್ಮಿಯೇವ್‌ನು ಭೀಡ್ ಸಿಂಹಾಸನ್ನ ಖ್ಹಾಮ್ಣೆ ಅಜು಼ ಮೇಂಢಾನ ಖ್ಹಾಮ್ಣೆಬಿ ಭಿಯುರ‍್ಹವಾನು ದೇಖ್ಯೊ. ಇವ್ಣೆಖ್ಹಾರು ಹರೇಕ್ ಜ಼ಗ್‌ಜಾ಼ತ್‌ನುಬಿ,ಖೂಮ್‌, ಬೋಲಿ ಬೋಲಾವಳು ಹುಯಿರ‍್ಹುಥು. ಇವ್ಣೆ ಧೋಳ ಝ಼ಗ್ಗೊ ಫೇರಿಲಿನ್ ಇವ್ಣ ಹಾತ್ಮ ಖಜೂ಼ರ‍್ನಿ ಡಾಳಿ ಧರಿರಾಖ್ಯೂಥು.
REV 7:10 “ಇವ್ಣೆ ರಕ್ಷಣೆ ಕರಿ ಬೋಲಾನು ಸಿಂಹಾಸನ್‌ಪರ್ ಬೆಠೊರ‍್ಹಾವಳೊ ಅಪ್ಣೊ ಪ್ರಭುನ ಅಜು಼ ಮೇಂಢಾನುಚೆಲ್ಕು ಹುಯಿರ‍್ಹವಾಳನ ಮಳಿಹುಯು ಕರಿ ಊಚಿ ಅವಾಜ಼್‌ಥಿ ಚಿಕ್‌ರ‍್ಯು.
REV 7:11 ಇವ್ಣೆಖ್ಹಾರು ಸಿಂಹಾಸನ್ನ ಅಶ್‌ಪಿಶ್ ಭಿಯೂಥು. ಶಾಣುಖ್ಹಾರು ಅಜು಼ ಚಾರ್ ಜೀವಿಬಿ ಹಿಜ್ಜಾ಼ಥು. ದೇವ್ನು ದೂತರ್ ಸಿಂಹಾಸನ್ನ ಖ್ಹಾಮ್ಣೆ ಘುಡ್‌ಗ್ಯಾಟೇಕಿನ್‌ ಆರಾದನೆ ಕರ್ತುಹುಯಿನ್,
REV 7:12 ಆಮೆನ್, ಧನ್ಯವಾದ್, ಮಹಿಮೆಬಿ, ಅಕ್ಕಲ್‌ಬಿ, ಗೌರವ್, ಮರ್ಯಾದಿ, ಶಕತ್ ಅಜು಼ ತಾಖತ್‌ಬಿ ಅಪ್ಣ ದೇವ್ನ ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ, ಆಮೆನ್‌ಕರಿ ಬೋಲ್ಯು.
REV 7:13 ತದೆ ಶಾಣಾವ್‌ಮ ಏಕ್‍ಜ಼ಣೊ, “ಧೋಳು ಝ಼ಗ್ಗೊಖ್ಹಾರು ಫೇರಿರಾಖ್ಯುತೆ ಆದ್ಮಿಖ್ಹಾರು ಕೋಣ್! ಅವ್ಣೆ ಕಿಜ್ಜಾ಼ಥು ಆಯುಕರಿ ಪುಛಾ಼ಯು. ತದೆ ಗುರೂಜಿ ಇವ್ಣೆ ಕೋಣ್‌ಕರಿ ತುನಾಸ್ ಮಾಲುಮ್‌ಕರಿ ಬೋಲ್ಯೊ.
REV 7:14 ತದೆ ಏಕ್‌ ಪ್ರಭುನೆ, “ಆ ಅದ್ಮಿಖ್ಹಾರು ಘಣು ಮೋಟಿ ಖ್ಹತಾಪ್ಣಿ ಲೀನ್ ಆಯುಹುಯು.ಇವ್ಣೆ ಮೇಂಢಾನ ಚೆಲ್ಕಾನ ಲ್ಹೋಯಿಥಿ, ಇವ್ಣ ಝ಼ಗ್ಗಾನ ಧೊಯಿನ್ ಕೋರು ಹುಯಿರುಸ್.
REV 7:15 ಇನಖ್ಹಾಜೆ ಇವ್ಣೆ ಹಮ್ಕೆ ದೇವ್ನ ಸಿಂಹಾಸನ್ನ ಖ್ಹಾಮ್ಣೆರ‍್ಹೀನ್, ಇನ ಮಂದಿರ್‌ಮ ರಾತ್‌ದನ್ ಆರಾದನೆ ಕರುಕರಸ್, ಸಿಂಹಾಸನ್‌ಪರ್ ಬೆಠೊರ‍್ಹವಾಳೋಸ್ ಇವ್ಣುನ ಆಖ್ಹ್‌ರೊ ಹುಯಿರ‍್ಹೊಸ್.
REV 7:16 ಬಿಜು಼ ಕೆದೇಬಿ ಇವ್ಣುನ ಭುಕ್‌ರ‍್ಹವೊ, ಠೋಖ್ಹ್‌ರ‍್ಹವೊ ಕೋಉಷೇನಿ,
REV 7:17 ಶನಕತೊ ಸಿಂಹಾಸನ್ನ ಇಚ಼್‌ಮ ಛಾ಼ತೆ ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹವಾಳೊ ಇವ್ಣುನ ಕುರುಬನಿತರ ರ‍್ಹೀನ್ ಜಾನ್ನು ಪಾಣಿನು ಚೆಜ಼್‌ಭಾರಕನ ಚ಼ಲೈಲಿಜಾಷೆ ಅಜು಼ ದೇವ್ ಇವ್ಣ ಡೋಳಾನು ಆಂಝು಼ಖ್ಹಾರು ನೂಛಿನಾಕ್ಷೆ ಕರಿ ಬೋಲ್ಯು.
REV 8:1 ಮೇಂಢಾನುಚೆಲ್ಕು ಹುಯಿರ‍್ಹಾವಳನೆ ಖ್ಹಾತ್‌ನೊ ಮುದ್ರಾನ ಫೋಡಾನಿವಖ್ಹ್‌ತೆ; ಖ್ಹುಮಾರ್ ಆಧ ಘಂಟಾಲಗು ಸೊರ್ಗಾಮ ಶೊಪೊಹುಯ್ಗು.
REV 8:2 ತದೆ ದೇವ್ನ ಖ್ಹಾಮ್ಣೆ ಭಿಯುತೆ ಖ್ಹಾತ್ ದೇವ್‌ದೂತರ್‌ನ ಮೇ ದೇಖ್ಯೊ. ಇವ್ಣುನ ಖ್ಹಾತ್ ತುತ್ತೂರಿಯೆ ದೆವಾಯು.
REV 8:3 ಇನಪಾರ್ ಬಿಜೇಕ್ ದೇವ್‌ನೊ ದೂತ ಆಯೊ ಯೋ ಖ್ಹೊನ್ನಾನಿ ಖ್ಹಾಲರ‍್ಯಾನಿ ಢಾಕ್ಣಿ ಧರಿಲೀನ್ ಚಾ಼ಚ಼ರ್‌ಕನ ಆಯಿನ್ ಭೀಯೊ ಸಿಂಹಾಸನ್ನು ಮುದ್ರಾನು ಖ್ಹೊನ್ನಾನ ಚಾ಼ಚ಼ರ್‌ನ ಉಪ್ಪರ್ ಅದ್ಮಿಖ್ಹಾರು ಪ್ರಾರ್ಥನೆಥಿ ಸಮರ್ಪಣ್‌ ಕರಾನಖ್ಹಾಜೆ ಇನ ಘಣು ಢಪ್ಕಾರ್‌ ದೆವಾಯು.
REV 8:4 ತದೆ ಖ್ಹಾಲರ‍್ಯಾನು ಧುವೊ ದೇವ್ನದೂತರ‍್ನ ಹಾತ್ಮಥು ನಿಕ್ಳಿನ್, ದೇವ್ನ ಅದ್ಮಿವ್‌ನು ಪ್ರಾರ್ಥನೆನಿ ಜೋ಼ಡ್ಮ ಮಳಿನ್ ದೇವ್‌ಕನ ಉಡಿಗಯು.
REV 8:5 ಆ ನಾಹುಯಿನ್ ಯೋ ದೇವ್‌ನೊ ದೂತ ಢಾಕ್ಣಿನ ಲೀನ್ ಚಾ಼ಚ಼ರ್‌ನಿ ಆಗ್‍ಥಿಯಿನ ಭರಿನ್ ಜ಼ಮೀನ್ನ ಉಪ್ಪರ್ ಫೇಕ್ಯೊ. ತದೆ ಘಲಾರಿನ್ ಘೂಂಜಿನ್, ಮೋಟಿಅವಾಜ್‌, ವಿಜ಼್‌ಳಿ ಖಡ್‌ಕಿ, ಭೂಕಂಪ್ ಹುಯು.
REV 8:6 ಖ್ಹಾತ್ ತುತ್ತೂರಿಯೇವ್ನ ಧರಿರಾಖ್ಯುತೆ ಖ್ಹಾತ್ಜ಼ಣು ದೇವ್‌ನೊ ದೂತರ್ ಫೂಕಾನ ತಯಾರ್‌ಹುಯು.
REV 8:7 ಪಹಿಲೊ ದೇವ್ನು ದೂತಾನೆ ಇನು ತುತ್ತೂರಿನ ಫೂಕಾನಿವಖ್ಹ್‌ತೆ ಲ್ಹೋಯಿ ಮಳಿಹುಯು ಗಾರಾನೊ ಪಾಣಿಬಿ, ಆಗ್‌ಬಿ,ಜ಼ಮೀನ್‌ಪರ್ ರಂಚಾ಼ಯು. ಜ಼ಮೀನ್ನು ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಝಾ಼ಡವ್‌ಮ ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಹರ‍್ಯು ಘಾಖ್ಹ್‌ಅಖ್ಖು ಬಳಿಗಯು.
REV 8:8 ಬೇನೊ ದೇವ್ನದೂತನೆ ಇನು ತುತ್ತೂರಿನ ಫೂಕ್ಯೊ. ತದೆ ಆಗ್‌ಥಿಲಾಗುಕರಾತೆ ಮೋಟೊ ಪಹಾಡ್‌ನಿತರನು ಏಕ್‌ ರಾಛು಼ ದರ‍್ಯಾವ್‌ಮ ಫೇಕೈಗಯು.ತದೆ ದರ‍್ಯಾವ್‌ಮ ತೀನ್‌ಮಾನು ಏಕ್‌ಭಾಗ್ ಲ್ಹೋಯಿ ಹುಯಿಗು.
REV 8:9 ದರ‍್ಯಾವ್‌ಮಾನು ಜೀವಿಮ ತೀನ್‌ಮಾನು ಏಕ್‌ಭಾಗ್ ಮರಿಗಯು ಬಿಜು಼ ಜ಼ಹಾಜ಼್‌ಮಾನು ತೀನ್‌ಮಾನು ಏಕ್‌ಭಾಗ್ ನಾಶ್‌ಹುಯಿಗಯು.
REV 8:10 ತೀನ್ನೊ ದೇವ್ನ ದೂತನೆ ಇನಿ ತುತ್ತೂರಿನ ಫೂಕ್ಯೊ; ತದೆ ಢಿಟಂಬನಿತರ ಬಳುಕರಾನು ಏಕ್‌ ಮೋಟೊ ಶುಕ್ಕರ್ ಆಬ್‌ಪರ್ ಅಜು಼ ನದ್ದಿನು ಅಜು಼ ಪಾಣಿನು ಝೀಲ್‌ನು ತೀನ್‌ಮಾನು ಏಕ್‌ಭಾಗ್ ಪರ್ ಪಡ್ಯು.
REV 8:11 ಆ ಶುಕ್ಕರ್‌ನು ನಾಮ್ ಝಾ಼ರೇಲಿ. ತದೆ ಪಾಣಿನು ತೀನ್‌ಮಾನು ಏಕ್‌ಭಾಗ್ ಝಾರ್‌ಹುಯಿಗು. ಬಿಜು಼ ಯೊ ಪಾಣಿ ಪೀದೂತೆ ಕೈಏಕ್ ಜ಼ಣು ಮರಿಗಯು, ಶನಕತೊ ಯೊ ಝಾರ್‌ ಹುಯಿರುಥು.
REV 8:12 ಚಾರ‍್ನೊ ದೇವ್‌ನೊ ದೂತನೆ ತುತ್ತೂರಿನ ಫೂಕ್ಯೊ, ತದೆ ಚಾ಼ಂದ್‌ನು ತೀನ್‌ಮ ಏಕ್‌ಭಾಗ್, ಇಮ್ಮಸ್ ಚ಼ಂದರ್‌ಮಾನು ಅಜು಼ ಶುಕ್ಕರ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖರಾಬ್‌ಹುಯಿನ್‌ ಅಂಧಾರು ಹುಯಿಗು. ಇನಖ್ಹಾಜೆ ದನ್ಮ ತೀನ್‌ಮಾನು ಎಕ್‌ಭಾಗ್ ಉಜಾ಼ಳುಕೊಂತೆ ಅಂಧಾರು ಹುಯಿನ್, ರಾತ್ನಿ ಘೋಣಿಸ್ ಹುಯಿಗು.
REV 8:13 ಇನಪಾರ್ ಮೆ ದೇಖ್ಯೊತೊ ಏಕ್‌ ಗರದ್ ಆಸ್ಮಾನ್ನ ಇಚ಼್‌ಮ ಉಡ್ತುಫಂಡ್‌ತೂಥು. ಯೊ ಅವಾಜ಼್ ಮನ ಖ್ಹಮಜ್‍ಪಡ್ಯು. ಅಜೂ಼ಬಿ ಥೂತೆ ತೀನ್‍ಜ಼ಣು ದೇವ್‌ದೂತರ್‌ ತುತ್ತೂರಿನ ಫೂಕಾಖ್ಹತರ್‌ ಜ಼ಮೀನ್‌ಪರ್ ಜಿವ್ಣುಕರವಾಳ ಅಖ್ಖಾನ ಖರಾಬ್, ಖರಾಬ್, ಖರಾಬ್‌ಕರಿ ಊಚಿ ಅವಾಜ಼್‌ಥಿ ಚಿಕ್ರಾನು ಖ್ಹಮ್‌ಜ್ಯೊ.
REV 9:1 ಪಾಚ್ನೊ಼ ದೇವ್ನ ದೂತನೆ ತುತ್ತೂರಿನ ಫೂಕಾನಿವಖ್ಹ್‌ತೆ; ಆಬ್‍ಥು ಜ಼ಮೀನ್‌ಪರ್ ಪಡ್ಯೂತೆ ಏಕ್‌ ಶುಕ್ಕರ‍್ನ ದೇಖ್ಯೊ. ಇನ ಪಾತಾಳ್ನು ಬಾವ್ಡಿನು ಬೀಗಾನು ಕೀಲಿ ದೆವಾಯು.
REV 9:2 ಇನೆ ನರಕ್‌ನಿ ಬಾವ್ಡಿನ ಕಾಡಾದಿನ್ ಬಾವ್ಡಿಮಾಥು ಆಯುತೆ ಧುವೊ ಮೋಟಿ ಕೋಲ್‌ಮಿನು ಧುವಾನಿತರ ಉಪ್ಪರ್ ಆಯು. ಬಾವ್ಡಿನ ಧುವ್ವಾಥಿ ಚಾ಼ಂದ್‌ಬಿ, ಆಸ್‌ಮಾನ್‌ಬಿ, ಕಾಳುರೈಟ್‌ ಹುಯಿಗು.
REV 9:3 ಧುವ್ವಾಮಾಥು ಚಿಡ್ಡೊಖ್ಹಾರು ಜ಼ಮೀನ್‌ಪರ್ ನಿಕ್ಳಿಆಯು. ಜ಼ಮೀನ್‌ಪರ್ ಛಾ಼ತೆ ವಿಛ್ಛಿಯೇನಿ ಪರಕ್ ಇನ ತಾಖತ್ ದೆವಾಯು.
REV 9:4 ಜ಼ಮೀನ್‌ಪರ್ ಛಾ಼ತೆ ಘಾಖ್ಹ್‌ನ ರ‍್ಹವೊ ಪಂಡು ಫಲ್ನ ರ‍್ಹವೊ, ಝಾ಼ಡನ ರ‍್ಹವೊ, ನಾಶ್‌ನಾಕರ‍್ನುತೆ, ತಾಳ್ವಪರ್ ದೇವ್‌ನೊ ಮುದ್ರೊಕೊಂತೆ ಅದ್ಮಿವ್‌ನಖಲಿ ನಾಶ್‌ಕರ್ನುಕರಿ ಯೊ ಚಿಡ್ಡಾವ್ನ ಹುಕುಮ್‌ಹುಯು.
REV 9:5 ಇವ್ಣುನ ನಾ ಮಾರ‍್ನುತೆ ಪಾಚ಼್ ಮಹಿನ ಲಗೂಬಿ ಖ್ಹತಾವ್ಣುಕರಿ ಅದಿಕಾರ್ ಮಳ್ಯು. ಯೋ ಅದ್ಮಿಖ್ಹಾರನ ಹುಯೂತೆ ಅಜ಼ ವಿಛ್ಛಿ ಅದ್ಮಿನ ಕಲ್ಡಾನಿತರಾಸ್ ಥು.
REV 9:6 ಯೊ ಪಾಚ಼್ ಮಹಿನಾಮ ಅದ್ಮಿಖ್ಹಾರು ಮರ್‌ವಾನ ಹರಖ್ಹ್‌ಷೆ ಕತೋಬಿ ಯೋ ಪೂರ ಕೊಉಷೇನಿ.ಅದ್ಮಿ ಮರಾನಿ ವಾಟ್‌ ಢೂಂಡ್‌ಷೆ, ಕತೋಬಿ ಮರಣ್ ಇವ್ಣೇಥಿ ಲಪಿಜಾ಼ಷೆ.
REV 9:7 ಯೋ ಚಿಡ್ಡಾವ್ನು ರೂಪ್ ಜಂಗ್‌ನ ತಯಾರ್ ಕರಾಖನು ಘೋಡಾವ್‌ನು ರೂಪ್‌ನಿತರ ಥು.ಇವ್ಣ ಮುಡ್‌ಕ್ಯಾವ್‌ಪರ್ ಖ್ಹೊನ್ನಾನಿ ಕಿರೀಟ್‌ನಿತರಾಬಿ, ಇನು ಮ್ಹೋಡುಖ್ಹಾರು ಅದ್ಮಿವ್‌ನ ಮ್ಹೊಡಾನಿತರಾಬಿ ಥು.
REV 9:8 ಇನು ಕೇಖ್ಹ್‌ ತಯೇಡಾನ ಕೇಖ್ಹ್‌ನಿತರಾಬಿ ದಾತ್‌ ಶುಂಭಾನ ದಾತ್‌ನಿತರಾಬಿ ಥು.
REV 9:9 ಯೋ ಅಖ್ಖಾನಿ ಶರೀರ್‌ನ ಖ್ಹಾರ್ನು ಕವಚ್‌ಥು.ಇವ್ಣು ಫಾಕ್ಡಿಯೇನು ಅವಾಜ಼್ ಜಂಗ್‌ನ ನಾಖ್ಹಾತೆ ರಥ್‌ನ ಘೋಡಾನ ಅವಾಜ಼್‌ನಿತರ ಥು.
REV 9:10 ವಿಛ್ಛಿಯೇನ ರ‍್ಹೇಸ್ತೆತಿಮ್ ಇವ್ಣುನ ಡೊಂಡೋಬಿ, ಕಾಟೋಬಿ ಥು. ಅದ್ಮಿವ್‌ನ ಪಾಚ಼್ ಮಹಿನಲಗೂಬಿ ಖರಾಬ್ ತಾಖತ್ ಇವ್ಣ ಡೋಂಡವ್‌ಮಸ್ ರ‍್ಹಿಶೆ.
REV 9:11 ಪಾತಾಳ್‌ನೊ ಮುಖ್ಯ ಹುಯಿರ‍್ಹೋತೆ ದೂತಾಸ್ ಯೋ ಚಿಡ್ಡಾವ್ನ ರಾಜ಼ ಹುಯಿರೋಥೊ. ಇನ ಹಿಬ್ರು ವಾತೇಮ ಅಬದ್ದೋನ್‌ ಕರೀಬಿ, ಗ್ರೀಕ್ ಬೋಲಿಮ ಅಪೊಲ್ಲುವೋನ ಕರೀಬಿ ನಾಮ್‌ಥು.
REV 9:12 ಪಹಿಲು ಖತ್ರ ಖತಮ್‌ಹುಯಿಗು. ದೇಕ್ ಬಿಜೂ಼ ಬೇನು ವದೇಖ್ಹ್‌ಖ್ಹಾರು ಇನ ಪೀಠೇಸ್ ಆಯು.
REV 9:13 ಛೋ಼ನೆ ದೇವ್‌ನೊ ದೂತನೆ ತುತ್ತೂರಿನ ವಜಾ಼ಡನಿ ವಖ್ಹ್‌ತೆ ದೇವ್‌ಕನ ಥೂತೆ ಖ್ಹೊನ್ನಾನು ಚಾ಼ಚ಼ರ್‌ನ ಶಿಂಗ್ಡಾವ್‌ಥು ನಿಕ್‌ಳ್ಯೂತೆ ಏಕ್‌ ಅವಾಜ಼್‌ನ ಖ್ಹಮ್‌ಜೊ.
REV 9:14 ಛೋ಼ನೆ ದೇವದೂತ ಯೊ ತುತ್ತೂರಿನ ಧರಿರಾಖ್ಯುಥೂತೆ ದೇವ್ನ ದೂತಾನ, “ಯೂಫ್ರಟಿಸ್ ಕರಿ ಮೋಟಿ ನದ್ದಿಕನ ಭಾಂದಿರಾಖ್ಯೋತೆ ಚಾರ್‌ಜ಼ಣ ದೇವ್ನ ದೂತರ‍್ನ ಛೋ಼ಡಿನಾಕ್‌” ಕರಿ ಬೋಲ್ಯು.
REV 9:15 ತದೆ ಅದಮ್‌ಜ಼ಮಾನಮ ತೀನ್‌ಮಾನು ಏಕ್‌ಭಾಗ್ ಅದ್ಮಿನ ಸಂಹಾರ್ ಕರಾನಖ್ಹಾಜೆ ಯೋಸ್‌ ವರಖ್ಹ್, ಯೋಸ್ ಮಹಿನೊ, ಯೋಸ್ ದನ್, ಯೋ ವಖ್ಹತ್‌ನಖ್ಹಾಜೆ ತಯಾರ್‌ಥಾತೆ ಯೊ ಚಾರ್‌ಜ಼ಣ ದೇವ್ನ ದೂತರ‍್ನ ಛುಟ್ಕಾರ್ ಕರಾಯು.
REV 9:16 ಇನು ಘೋಡಾನು ಶಿಪಾಯ್ನಿ ಗಣ್ತಿ ವೀಖ್ಹ್‌ ಕರೋಡ್‌ಕರಿ ಮನ ಖ್ಹಮಜ್‍ಪಡ್ಯು.
REV 9:17 ಮೇ ದರ್ಶನ್‍ಮ ದೇಖ್ಯೊತೆ ಘೋಡಾವ್‌ಬಿ ಅಜು಼ ಇನಪರ್‌ಲ್ಯ ಸವಾರಿನ ಬಾರೇಮ ಬೋಲಾನು ಕಿಮ್‌ಥು ಕತೊ, ಸವಾರಿವ್‌ನು ಕವಚ್‌ನು ರಂಗ್ ಆಗ್‍ನಿತರ ಲಾಲ್, ಧುವ್ವನಿತರಾನು ನೀಲು, ರಂಜ಼ಕ್‌ನಿತರ ಪೀಳು ಥು. ಘೋಡಾವ್‌ನು ಮುಡ್‌ಕ್ಯು ಖ್ಹಾರು ಶುಂಭಾವ್‌ನ ಮುಡ್‌ಕ್ಯಾನಿ ಘೋಣಿ ಥು. ಅಜು಼ ಇನ ಮ್ಹೋಡೇಖ್ಹು ಆಗ್ ರಂಜ಼ಕ್‌ ಧುವ್ವೊ ನಿಕ್‌ಳ್ಯು.
REV 9:18 ಯೋ ಅಖ್ಖಾನ ಮ್ಹೊಡಾಮಾಥು ನಿಕ್‌ಳ್ಯೂತೆ ಯೊ ಆಗ್, ಧುವ್ವೊ, ರಂಜ಼ಕ್‌, ಕರಿ ಬೋಲಾನು ತೀನ್ ಖ್ಹತಾಪ್ಣಿಥಿ ಜ಼ಮೀನ್‌ಪರ್‌ನು ಅದ್ಮಿನು ತೀನ್‌ಮಾನು ಏಕ್‌ಭಾಗ್ ಮರೈಗಯು.
REV 9:19 ಯೊ ಅಖ್ಖಾ ಘೋಡಾನಿ ತಾಖತ್ ಯೋಅಖ್ಖಾನ ಮ್ಹೊಡಾಮಾಬಿ, ಡೋಂಡಾಮಾಬಿ ಥು. ಇನು ಡೋಂಡೊಅಖ್ಖು ಮುಡ್‌ಕ್ಯು ರ‍್ಹವಾಳು ಹುಯಿನ್ ಖ್ಹಾಪ್‌ನಿತರ ಥು. ಇನೇಥಿಸ್ ಖರಾಬ್ ಉಷೆ.
REV 9:20 ಆ ಖ್ಹತಾಪ್ಣಿಥಿ ಮರ‍್ಯುಕೊಂತೆ ಬಚಿರ‍್ಹಾವಳು ಅದ್ಮಿಖ್ಹಾರು ಇವ್ಣೇಸ್ ಕರಿಲಿದುಥೂತೆ ಮೂರತ್‌ಅಖ್ಖಾನ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ. ಇವ್ಣೆ ಭೂತ್ ಪಿಶಾಚಿಖ್ಹಾರಾನು ಆರಾದನೆನಾಬಿ ಬಿಜು಼ ಖ್ಹೊನ್ನು, ರೂಪು, ತಾಂಬು, ಬಂಡೊ, ಝಾ಼ಡ್‌ ಆಸ್ ಅಖ್ಖಾಥಿ ಬಣಾವಟ್ ಹುಯಿನ್ ದೇಖಕೊಂತೆ, ಖ್ಹಮ್‌ಜಾ಼ಕೊಂತೆ, ಚಾ಼ಲಕೊಂತೆ ರ‍್ಹವಾನ ಮೂರತ್‌ನ ಪೂಜಾ಼ನ ಕೊಮ್ಹೆಲ್ಯೂನಿ.
REV 9:21 ಆನಾಹುಯಿನ್ ಇವ್ಣೆ ಚ಼ಲಾವ್ತುಥೂತೆ ರ‍್ಹೇ಼ಖ್ಹಾನು, ಜಾ಼ದುಜ಼ಮ್‌ಕರ್‌, ಪಾಪೇಲು ಕಾಮ್, ವ್ಯಬಿಚಾರ್‌ನ, ಚೋ಼ರ್‌ಚ಼ಖಾಟ್ ಆ ಅಖ್ಖಮಾಥು ಏಕ್‌ಬಿ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ.
REV 10:1 ಅನಪಾರ್ ತಾಖತ್‌ವಾಳೊ ಹುಯಿರೋತೆ ಬಿಜೇಕ್‌ ದೇವ್‌ನೊ ದೂತ ಸೊರ್ಗಾಥು ಉತ್ರಿನ್ ಆವಾನು ಮೇ ದೇಖ್ಯೊ.ಇನೆ ವಾದ್‍ಳಾನ ಫೇರಿರಾಖ್ಯೊಥೊ. ಇನ ಮುಡ್‌ಕ್ಯಾನ ಉಪ್ಪರ್ ವಾದ್‌ಳಾನಿಧೂಣ್‌ ಥು. ಇನು ಮ್ಹೋಡು ಚಾ಼ಂದ್‌ನಿತರ ಇನ ಗೋಡ ಆಗ್ನ ಖಮ್‌ನಿತರ ಥಾ.
REV 10:2 ಅಜು಼ ಇನ ಹಾತ್ಮ ಉಧ್‌ಢಿಹುಯಿ ಏಕ್‌ ಪುಂಗ್‌ಳಿಥಿ. ಇನೆ ಖಾವಗೋಡಾನ ದರ‍್ಯಾವ್ನ ಉಪ್ಪರ್‌ಬಿ ಡಾವಗೋಡಾನ ಜ಼ಮೀನ್‌ಪರ್‌ಬಿ ಮ್ಹೇಲಿನ್,
REV 10:3 ಶುಂಭಾ ಘಲಾರಸ್ತೆ ತಿಮ್ ಮೋಟಿ ಆವಾಜ಼್‌ಥಿ ಚಿಕ್‌ರ‍್ಯೊ. ಚಿಕ್ರಾನಿ ವಖ್ಹ್‌ತೆ ಖ್ಹಾತ್ ಘಲಾರ್‌ಬಿ ಏಕ್‌ಏಕ್‌ಥರ ಅವಾಜ಼್ ದಿದು.
REV 10:4 ಯೋ ಘಲಾರ್‌ಖ್ಹಾರು ಬೋಲಾನು ಮೆ ಲೀಖ್ಣುಕರಿ ಥೊ. ಕತೋಬಿ, “ಯೋ ಖ್ಹಾತ್ ಘಲಾರ್‌ಖ್ಹಾರು ಬೋಲ್ಯುತೆಯಿನ ತೂ ನಾಲೀಖ್ಣುತೆ ಗಪ್ಲತ್‌ ರಾಕ್‌ಕರಿ ಬೋಲಾನು ಸೊರ್ಗಾನ ಟಹು಼ಕಾನ ಖ್ಹಮ್‌ಜೊ”.
REV 10:5 ಇನಪಾರ್ ಜ಼ಮೀನ್‌ಪರ್‌ಬಿ, ದರ‍್ಯಾವ್‍ನ ಉಪ್ಪರ್‌ಬಿ ಭಿಯಹುಯನಿತರ ಮನ ದೆಖಾಯೊತೆ ದೇವ್ನದೂತನೆ ಇನೊ ಖಾವಹಾತ್ನ ಸೊರ್ಗಭಣಿ ಪಾಡಿನ್,
REV 10:6 ಸೊರ್ಗನಾಬಿ ಇನಾಮಛಾ಼ತೆ ಖ್ಹಾರಸ್ನ, ಜ಼ಮೀನ್ನಾಬಿ ಇನಾಮಛಾ಼ತೆ ಖ್ಹಾರಸ್ನ ದರ‍್ಯಾವ್‍ನಬಿ ಇನಾಮಛಾ಼ತೆ ಖ್ಹಾರಸ್ನ ಉಬ್‍ಜೈ಼ನ್‍ ಜ಼ಗ್‌ಜ಼ಮಾನಲಗು ಜಿವ್ತೊರ‍್ಹವಳಾನ ಉಪ್ಪರ್ ಆಣ್ ಕರೀನ್ “ಬಿಜೂ಼ಬಿ ಟಿವವಾನಿ ಜ಼ರೂರತ್ ಕೊಯ್ನಿ.
REV 10:7 ಖ್ಹಾತ್‌ನೊ ದೇವ್ನದೂತನೆ ಇನಿ ತುತ್ತೂರಿನ ವಜಾ಼ಡನ ತಯಾರ್‌ಹುವಾನ ದನೂಮ ದೇವ್ನಿ ಗಪ್ಲಥ್ಥಿ ಛಾ಼ತೆ ಖ್ಹೂಜ಼್‌ನ ಚ಼ಲಾವ್‌ಷೆ. ದೇವ್ ಇನು ದಾಸ ಹುಯಿರ‍್ಹುತೆ ಪ್ರವಾದಿ ಖ್ಹಾರನ ಸುವಾರ್ತೆ ಖ್ಹಮ್‍ಜಾ಼ಡಿರಾಖ್ಯೊಥೊತೆ ಪರಕ್ಮ ಚ಼ಲೈಶ್‌” ಕರಿ ಬೋಲ್ಯೊ.
REV 10:8 ತದೆ ಪರಲೋಕ್‌ಥು ಫಾಛು಼ ಯೋಸ್ ಅವಾಜ಼್ ಮೆ ಖ್ಹಮ್‌ಜ್ಯೊ. ಯೋ ಗಳು ಮನ, “ತೂ ಜಾ಼ ದರ‍್ಯಾವ್‌ನಪರ್‌ಬಿ ಜ಼ಮೀನ್‌ಪರ್‌ಬಿ ಭಿಯೋತೆ ದೇವ್‌ದೂತರ್‌ನ ಹಾತ್ಮನಿ ಉಧ್‌ಢಿರ‍್ಹೀತೆ ಪುಂಗ್‌ಳಿನ ಲೀಲೆ” ಕರಿ ಬೋಲ್ಯು.
REV 10:9 ಮೆ ಯೊ ದೂತಕನ ಜೈ಼ನ್, ನ್ಹಾನಿ ಪುಂಗ್‌ಳಿನ ದೇ ಕರಿ ಬೋಲಾಖ್ಹತರ್ ಇನೆ ಮನ, ತೂ ಪುಂಗ್‌ಳಿನ ಲೀನ್‌ ಖೈಲೆ, ಯೊ ತಾರ ಪೇಟ್‌ಮ ಕಡೂ ಉಷೆ, ಕತೋಬಿ ತಾರ ಮ್ಹೋಡಾಮ ಯೋ ಶೇತ್‌ನಿತರ ಮಿಠ್ಠು ಹುಯಿರ‍್ಹಿಶೆ” ಕರಿ ಬೋಲ್ಯೊ.
REV 10:10 ತದೆ ಮೆ ಯೊ ನ್ಹಾನಿ ಪುಂಗ್‌ಳಿನ ದೂತನ ಹಾತ್ಮಥು ಲೀನ್ ಖೈಲಿದೊ. ಯೊ ಮಾರ ಮ್ಹೋಡಾಮ ಶೇತ್‌ನಿತರ ಮಿಠ್ಠುಥು,ಇನ ಖೈಲಾವದಿನ್ ಮಾರು ಪೇಟ್ ಕಡುಹುಯ್ಗು.
REV 10:11 ಇನಪಾರ್ ಯೊ ದೂತನೆ ಮನ, “ತೂ ಬಿಜೂ಼ಬಿ ಕೈಯೆಕ್‌ ಅದ್ಮಿವೋನ, ಬೋಲಿನ ಅಜು಼ ಖಾನ್‌ದಾನ್‌ ರಾಜಾ಼ವ್‌ನಿ ಬಾರೇಮ ಪ್ರವಾದ್‌ನೆ ಬೋಲ್‌ನು” ಕರಿ ಹುಕುಮ್‌ ಕರ‍್ಯೊ.
REV 11:1 ಇನಪಾರ್ ಆಳ್ತಿ ಕರಾನಿಘೋಣಿನೊ ಏಕ್‌ ಲಠ್ಠಾನ ದೀನ್ ಅಮ್ ಖ್ಹಮ್‌ಜಾ಼ಡ್ಯು, “ತೂ ಉಠೀನ್ ದೇವ್ನ ಮಂದಿರ್‌ನಾಬಿ ಚಾ಼ಚ಼ರ್‌ನ ಆಳ್ತಿ ಕರ್‌ ಅಜು಼ ಹಿಜ಼್ಜಾ ಆರಾದನೆ ಕರಾವಾಳಾನಾಬಿ ಗಣ್ತಿಕರ್.
REV 11:2 ಕತೋಬಿ ಮಂದಿರ್‌ನ ಭಾರ್‌ಛಾ಼ತೆ ಝ಼ಗೋನ ಆಳ್ತಿ ನಾಕರ‍್ನುತೆ ಮ್ಹೇಲಿದೆ, ಯೊ ಪರೈ ಅದ್ಮಿನಖ್ಹಾಜೆ ದೆವೈರ‍್ಹೂಸ್. ಇವ್ಣೆ ಪರಿಶುದ್ ಖ್ಹಯೇರ‍್ನ ಬೇಉಪ್ಪರ್‌ ಚಾ಼ಳಿಖ್ಹ್ ಮಹಿನಲಗು ಖುಂದಲ್ತುಫಂಡ್‌ಷೆ.
REV 11:3 ಅತ್ರೇಸ್ ಕಾಹೆತೆ ಮಾರ ಬೇ ಸಾಕ್ಷಿವಾಳ ಛೈ಼ನಕೋಥ್‌ಳಾನ ಹೋಡಿಲಿನ್ ಏಕ್‌ ಹಜಾ಼ರ್ ಬೇಖ್ಹೊ ತೀನಿಖ್ಹ್‌ ದನ್‌ಲಗು ಪ್ರವಾದ್‌ನೆ ಕರಾನಿತರ ಇವ್ಣುನ ಅದಿಕಾರ್ ದಿಶ್.
REV 11:4 ಧರ್ತಿನ ಪ್ರಭುನ ಖ್ಹಾಮ್ಣೆ ಭಿಯುತೆ ಬೇ ತೇಲ್ನಝಾ಼ಡಾವ್‌ಬಿ ಅಜು಼ ಬೇ ದಿವಳ್ಗಿಬಿ ಅವ್ಣೇಸ್.
REV 11:5 ಅವ್ಣುನ ಕೋಣ್‌ತೋಬಿ ಖರಾಬ್ ಕರ್ನುಕರಿ ಉಷೇತೊ ಇವ್ಣ ಮ್ಹೋಡಾಮಾಥಿ ಆಗ್‌ನಿಕ್ಳಿನ್ ಇನ ವಹೇರ‍್ಯಾನ ಬಾಳಿನಾಕ್‌ಷೆ. ಅವ್ಣುನ ಖರಾಬ್ ಕರ್ನುಕರಿ ಹರ್ಖ್ಹಾವಳು ಅಮ್ನಿಸ್ ಪರಕ್ಮ ಮರ‍್ನು.
REV 11:6 ಇವ್ಣೆ ಪ್ರವಾದನೆ ಕರಾನ ದನ್ಮ ವರ್ಖ್ಹಾತ್‌ ನಾಪಡ್ನುತೆ ಆಬ್‌ನ ಮೂಚಾ಼ನಿ ಅದಿಕಾರ್ ಇವ್ಣುನ ಥು. ಅಜು಼ ಪಾಣಿನ ಲ್ಹೋಯಿ ಕರಾನಿತರಾಬಿ,ಖ್ಹಾರಿ ಥರಾನು ಖ್ಹತಾಪ್ಣಿಥಿ ಜ಼ಮೀನ್ನ ಖ್ಹತಾವನ ಅದಿಕಾರ್‌ಛಾ಼.
REV 11:7 ಕತೋಬಿ ಆ ಬೇಜ಼ಣ ಇವ್ಣಿ ಸಾಕ್ಷಿಯೆವ್‌ನ ಬೋಲಿ ಖತಮ್ ಕರಾದಿನ್,ಪಾತಾಳ್‌ಥೊ ಆವ್‌ಶೇತೆ ಜಾನ್ವರ್‌ ಅವ್ಣುನ ಜಂಗ್‌ಮ ಹರೈನ್ ಮಾರಿನಾಕ್‌ಶೆ.
REV 11:8 ಆ ಸಾಕ್ಷಿನು ಬೇ ಮಖ್ಹಾಣ್ಯು ಮಹಾ ನಂಗರ‍್ನ ಗಲ್ಲೀಮ ಪಡ್ಯುರ‍್ಹಿಶೆ. ಆ ಖ್ಹಯೇರ‍್ನ ಖ್ಹಣೇದ್‌ಹುಯಿನ್ ಸೊದೋಮ್ ಕರಿಬಿ, ಈಜಿಪ್ಟ್ ಕರಿಬಿ ನಾಮ್ ಛಾ಼. ಇವ್ಣೊ ಪ್ರಭು ಜಿನುಕು ಹಿಜ್ಜಾ಼ಸ್ ಶಿಲ್‌ಬೇಪರ್ ಮಾರಾಯೊಥೊ.
REV 11:9 ಅಖ್ಖೂಸ್ ಅದ್ಮಿ, ಖೂಮ್‌, ಬೋಲಿ, ಜ಼ಗ್‌ಜಾತ್‌ಮ ಮಳಿಹುಯು ಆ ಭೇಜ಼ಣ ಸಾಕ್ಷಿನ ಮುರ್ದಾವ್ನ ಖ್ಹಡ್‌ತೀನ್ ದನ್‍ಲಗೂಬಿ ದೇಕ್‍ಷೆ ಅಜು಼ ಇವ್ಣ ಮುರ್ದಾವ್ನ ಮಖ್ಹಾಣ್ಯು ಕರಾನ ಕೊ ಮ್ಹೇಲ್‌ಶೇನಿ.
REV 11:10 ಆ ಭೇಜ಼ಣ ಪ್ರವಾದಿವ್ನೆ ಧರ್ತಿನ ಲೋಗ್ನ ಖ್ಹತಾಪ್ಣಿ ಕರ‍್ಯುಥೂತೆಖ್ಹಾಜೆ ಅವ್ಣೆ ಮರ‍್ಯುತೆ ದೇಖಿನ್ ಜ಼ಮೀನ್‌ಪರ್‌ನು ಅದ್ಮಿ ಖುಷಿಕರ್ಷೆ ಅಜು಼ ಹಾಶಿಖುಶಾಲಿ ಕರಿನ್ ಏಕ್‌ಥಿಏಕ್‌ ಇನಾಮ್‌ ಮೋಕಲ್‌ಶೆ.
REV 11:11 ಕತೋಬಿ ಖ್ಹಡ್‌ತೀನ್ ದನ್ನಪಾರ್ ದೇವ್‍ಥಿ ಜಾನ್ನೊ ವಹಿರೊ ಯೊ ಮುರ್ದಾಮ ಪೇಶ್ಯೂತೊ, ಇವ್ಣೆ ಗೋಡಟೇಕಿ ಭೀರಿಜಾಶೆ. ಇವ್ಣುನ ದೇಖ್ಯುಹುಯು ಖ್ಹಾರು ಡರ್‌ಥಿ ಕಾಪ್‌ಶೆ.
REV 11:12 ಇನಪಾರ್ ಇವ್ಣುನ, “ಹಜ್ಜಾ಼ ಉಪ್ಪರ್ ಛ಼ಡಿನ್ ಆವೊ” ಕರಿ ಆಬ್‍ಥು ಮೋಟ ಅವಾಜ಼್‌ನೆ ಬೋಲ್ಯು. ಇನ ಖ್ಹಮ್‌ಜುತೆ ಇವ್ಣೆ ವಾದ್ಳಮಾಕರಿ ಸೊರ್ಗನ ಛ಼ಡೀಗು. ಇವ್ಣೆ ಜಾ಼ವನು ಇವ್ಣ ವಹೇರ‍್ಯಖ್ಹಾರು ದೇಖುಸ್‌ಕರ್ತಥು.
REV 11:13 ಯೋಸ್ ವೇಳ್ಮ ಮೋಟು ಭೂಕಂಪ್ ಹುಯಿನ್ ಯೊ ಖ್ಹಯೇರ‍್ನು ದಖ್ಹ್‌ಮ ಏಕ್‌ಭಾಗ್ ನಾಶ್‌ಹುಯಿಗು. ಆ ಭೂಕಂಪ್‌ಥಿ ಖ್ಹಾತ್‍ಹಜಾ಼ರ್‌ ಜ಼ಣು ಮರಿಗು. ಇನಾಮ ಬಚ್ಯೂತೆ ಅದ್ಮಿಖ್ಹಾರು ಘಣು ಡರಿನ್ ಸೊರ್ಗಾನ ದೇವ್ನ ಮಹಿಮೆ ಕರ‍್ಯು.
REV 11:14 ಬೇನು ಖತ್ರ ನಿಕ್ಳಿಗಯು.ಹಂದೇಕ್, ತೀನ್ನು ವದೇಖ್ಹ್‌ ಒಗ್ಗಿಸ್‌ ವಳ್ಯುಆವಸ್.
REV 11:15 ಖ್ಹಾತ್‌ನೊ ದೇವ್ನದೂತನೆ ಇನಿ ತುತ್ತೂರಿನ ವಜಾ಼ಡ್ಯೊ. ತದೆ ಪರ್‌ಲೋಕ್‌ಮ ಮೋಟು ಅವಾಜ಼್ ಹುಯಿನ್, “ಆ ಜಗತ್ನ ರಾಜ್ಯನಿ ಅದಿಕಾರ್ ಅಪ್ಣೊ ಪ್ರಭುನಾಬಿ ಇನ ಕ್ರಿಸ್ತನಾಬಿ ಐರ‍್ಹೂಸ್.ಯೊ ಜ಼ಗ್‌ಜ಼ಮಾನಲಗೂಬಿ ಇನ ರಾಜ಼್‌ನ ಚ಼ಲಾವ್‌ಷೆ.” ಕರಿ ಬೋಲ್ಯು.
REV 11:16 ಅನವಾರ್ ದೇವ್ನ ಜೋ಼ಡ್ಮ ಇವ್ಣ ಇವ್ಣ ಸಿಂಹಾಸನ್‌ಪರ್ ಬೇಠುಥೂತೆ ಚಾರ್‌ಉಪ್ಪರ್‌ವೀಖ್ಹ್‌ ಜ಼ಣು ಶಾಣು ಇನ ಆಡ್‍ಪಡಿನ್ ಆರಾದನೆ ಕರ‍್ಯು ಅಜು಼,
REV 11:17 “ಪ್ರಭು, ಸರ್ವಶಕ್ತನೊ ದೇವ್, ರ‍್ಹವಾಳೊ ತೂ ತಾರಿ ಮೋಟಿ ಅದಿಕಾರ್‌ನ ಲೀಲಿನ್‌ ಚ಼ಲಾಯೊತೆ ಇನಖ್ಹಾಜೆ ತುನ ಧನ್ಯವಾದ್ ಕರ್ಯೆಸ್.
REV 11:18 ಜಗತ್‌ನು ಅದ್ಮಿಖ್ಹಾರು ಇರಾದೊ ಕರ‍್ಯು. ತಾರಿ ಖೀಜ಼್ ಪ್ರಕಟ್‌ಹುಯಿ. ಮರ‍್ಯಹುಯಾನ ತೀರ್ಪ್‌ ಮಳಾನಿ ವಖ್ಹತ್ಆಯಿ. ತೂ ತಾರ ದಾಸ ಹುಯಿರ‍್ಹೋತೆ ಪ್ರವಾದಿವ್‌ನಾಬಿ, ದೇವ್ನ ಅದ್ಮಿನಾಬಿ, ತಾರ ನಾಮ್ನ ಡರಾವಾಳ ಶಾಣವ್‌ನಾಬಿ, ಅಡ್ಡಾಣಿನಾಬಿ ಪ್ರತಿಫಲ್ ದ್ಯವಾನಿ ವಖ್ಹತ್ ಆ ಜಗತ್ನ ನಾಶ್‌ಕರಾವಳನ ವಿನಾಶ್‌ಕರಾನಿ ವಖ್ಹತ್ ಐಗು”. ಕರಿ ಬೋಲಿನ್ ಇನ ಆರಾದನೆ ಕರ‍್ಯು.
REV 11:19 ತದೆ ಸೊರ್ಗಾಮ ಥೂತೆ ಮಂದಿರ್‌ ನಿಕ್‌ಳ್ಯು. ದೇವ್ನ ಮಂದಿರ್‌ಮ ಇನು ಒಪ್ಪಂದನೊ ಡಾಬೊದೆಖಾಯು. ಆಸ್‌ಕಾಹೆತೆ, ಘಲಾರನು, ಘೂಂಜಾ಼ನು, ವಿಜ಼್‌ಳಿ ಖಡ್ಕಿನ್‌ ಭೂಕಂಪ್‌ಹುಯು. ಅಜು಼ ಮೋಟ ಗಾರಾನೊ ವರ್ಖ್ಹಾತ್ ಹುಯು.
REV 12:1 ಸೊರ್ಗಾಮ ಏಕ್‌ ಮೋಟು ಅದ್ಭುತ್ ದೆಖಾಯು. ತಯೇಡ ಏಕ್ಜ಼ಣಿ ಚಾ಼ಂದ್ ಫೇರಿರಾಖಿಥಿ. ಹೈರೀತೆನ ಗೋಡಾನ ಚ಼ಂದರ್‌ಮೊ ಥೊ.ಇನ ಮುಡ್‌ಕ್ಯಪರ್ ಭಾರ ತಾರವ್ನಿ ಕಿರೀಟ್ ಥು.
REV 12:2 ಯೊ ಬೇಜೂನಿ ಹುಯಿರ‍್ಹಿನ್ ಯೋ ಜ಼ಣತ್ನ ದರದ್‌ಥಿ ಖ್ಹತೀನ್ ರೊವ್‍ಕರ್ತೀಥಿ.
REV 12:3 ತದೆ ಆಕಾಶ್‌ಮ ಬಿಜೇಕ್ ಅದ್ಭುತ್ ದೆಖಾಯು; ಹಿಜ್ಜಾ಼ ಏಕ್‌ ಅರ್ಝ಼ ಥು. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡಾ ಥು. ಇನ ಮುಡ್‌ಕ್ಯಾವ್‌ಪರ್ ಖ್ಹಾತ್ ಕಿರೀಟ್‌ಖ್ಹಾರು ಥು.
REV 12:4 ಇನ ಡೋಂಡೇಥಿ ಆಬ್‌ನ ತಾರವ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖೇಚಿನ್ ಜ಼ಮೀನ್‌ಪರ್ ಫೇಖ್ಯು. ಜ಼ಣುಕರಾತೆ ಯೊ ತಯೇಡ ಜ಼ಣ್‌ತಾಸ್ನ ಇನ ಲಡ್ಕಾನ ಗಳಿಲೇವ್ಣುಕರಿ ಯೊ ಅರ್ಝ಼ ಇನ ಖ್ಹಾಮ್ಣೆಸ್ ಟಿವೈರ‍್ಹೂಥು.
REV 12:5 ಇನೆ ಜ಼ಗ್‌ಜಾ಼ತ್ನ ಲ್ಹೋಡಾನ ಲಠ್ಠೇಥಿ ಚ಼ಲಾವ್‌ಣೂತೆ ಏಕ್‌ ಪರ್ಖ್ಹಾ ಲಡ್ಕಾನ ಜ಼ಣಿ. ಯೋ ಲಡ್ಕು ತದೇಸ್‌ ದೇವ್‌ಕನಾಬಿ ಇನ ಸಿಂಹಾಸನ್‌ಕನಬಿ ಪಡೈಗಯು.
REV 12:6 ಅಜು಼ ಯೊ ತಯೇಡ ಜ಼ಂಗಳ್‌ಮ ನಾಶಿಚ಼ಲಿಗೈ. ಹಿಜ್ಜಾ಼ ಇನ ಏಕ್‌ ಹಜಾ಼ರ್ ಬೇಖ್ಹೊ ತೀನಿಖ್ಹ್‌ ದನ್‌ಲಗು ಪಳಾನಖ್ಹಾಜೆ ದೇವ್ನೆ ತಯಾರ್ ಕರಿರಾಖ್ಯೋಥೊತೆ ಝ಼ಗೋನ ಇನೆ ದೇಖಿ.
REV 12:7 ಸೊರ್ಗಾಮ ಜಂಗ್ ಹುಯು. ಮೀಕಾಯೇಲಾಬಿ ಇನು ದೂತರ್‌ಬಿ ಅರ್ಝ಼ನ ವಿರೋದ್ ಜಂಗ್‌ಭೀಡ್ಯು. ಇಮ್ಮಸ್ ಅರ್ಝ಼ಬಿ ದೂತರ್‌ಬಿ ಜಂಗ್ ಭೀಡಾಲಗ್ಯು.
REV 12:8 ಕತೋಬಿ ಯೊ ಅರ್ಝ಼ನ ತಾಖತ್‌ಕೊಂತೆ ಹರಿಗಯು. ಅಮ್ ಸೊರ್ಗಾಮ ಇವ್ಣುನಾಬಿ ಝ಼ಗೊ ಮಳ್ಯುಕೊಯ್ನಿ.
REV 12:9 ಯೋ ಅರ್ಝ಼ ಕತೊ ಪಿಶಾಚಿಕರಿಬಿ ಶೈತಾನ್ ಕರೀಬಿ ನಾಮ್‌ರ‍್ಹವಾಳ ಯೊ ಜೂ಼ನೊ ಖ್ಹಾಪ್ ಧರ್ತಿಪರ್ ಧಕೆಲಾಯೊ ಇನೊ ದೂತಬಿ ಇನ ಜೋ಼ಡ್ಮ ಜ಼ಮೀನ್‌ಪರ್ ಫೇಕೈಗಯು.
REV 12:10 ತದೆ ಮೆ ಸೊರ್ಗಾಮ ಏಕ್‌ ಮೋಟೊ ಅವಾಜ಼್ ಖ್ಹಮ್‌ಜ್ಯೊ; ಯೊ “ಜೀತ್‌ಬಿ, ಶಕತ್‌ಬಿ, ರಾಜ್ಯಬಿ ಹಮಾರ ದೇವ್ನು ಹುಯು, ಯೊ ಅಬಿಷೇಕ್ ಕರ‍್ಯೊತೆ ಕ್ರಿಸ್ತನು ಅದಿಕಾರ್ ಹಮ್ಕೆ ಶುರುಹುಯಿರ‍್ಹೂಸ್. ರಾತ್‌ದನ್ ಹಮಾರ ಭೇನೆ ಭೈಯೇವ್ನಿ ಬಾರೇಮ ದೇವ್ನ ಖ್ಹಾಮ್ಣೆ ಕೆದೇಬಿ ಛಾ಼ಡಿ ಬೋಲುಕರ್ತೊಥೋತೆ ಛಾ಼ಡಿಖೋರ್ ಸೊರ್ಗಥು ಧಕೆಲೈಗಯೊ.
REV 12:11 ಇವ್ಣೆ ಮರಣ್‌ಲಗೂಬಿ ಭೈಯೇ ಭೇನೆನ ಇವ್ಣ ಜಾನ್ನ ಪ್ಯಾರ್ ಕರ‍್ಯಕೊಂತೆ, ಮೇಂಢಾನ ಚೆಲ್ಕುಹುಯಿರ‍್ಹವಾಳನ ಲ್ಹೋಯಿಥಿಬಿ ಇನು ಸಾಕ್ಷಿನು ಅಜು಼ ಬೋಲಾಯುತೆ ವಚನ್‌ಥಿಬಿ ಇನ ಜೂತಿಲಿದು.
REV 12:12 ಇನಖ್ಹಾಜೆ ಸೊರ್ಗ, ಇನಾಮ ಜಿವ್ಣುಕರವಾಳಾವೊ಼, ಖುಷಿಕರೊ. ಕತೋಬಿ ಜ಼ಮೀನ್ ದರ‍್ಯಾವ್ ತುಮಾರಿ ಖರಾಬ್ ಹಾಲ್ನ ಶಾತ್‌ಕರಿ ಬೋಲು ಶನಕತೊ ಶೈತಾನ್ ಇನಛಾ಼ತೆ ವಖ್ಹತ್ ಕಮ್‌ಕರಿ ಮಾಲುಮ್‌ ಕರಿಲಿನ್ ಘಣು ಚ಼ಂಢಾಳ್‌ವಾಳೊ ಹುಯಿನ್ ತುಮಾರಭಣಿ ಉತ್ರಿನ್ ಐರ‍್ಹೋಸ್” ಕರಿ ಬೋಲ್ಯು.
REV 12:13 ಅರ್ಝ಼ ಇನುಯೋ ಜ಼ಮೀನ್‌ಪರ್ ಧಕೈಲೈನ್‌ ಪಡಿರ‍್ಹಾವನು ಪರ್ಖಿಲಿನ್, ಪರ್ಖ್ಹೊ ಲಡ್ಕು ಜ಼ಣೀತೆ ತಯೇಡನ ಖ್ಹತಾವನಖ್ಹಾಜೆ ರಪೇಟಿನ್‌ ಗಯು.
REV 12:14 ಕತೋಬಿ ಯೊ ತಯೇಡ ಜ಼ಂಗಳ್‌ಮ ಥೂತೆ ಇನಿ ಝ಼ಗೋನ ಉಡಿಜಾ಼ವನಖ್ಹಾಜೆ ಇನ ಮೋಟಿಖ್ಹಿ ಗರದ್ನಿ ಬೇ ಫಾಕ್ಡಿಖ್ಹಾರು ದೆವಾಯು. ಹಿಜ್ಜಾ಼ ಯೊ ಖ್ಹಡ್‌ತೀನ್ ವರಖ್ಹ್ ದನ್ ಅರ್ಝ಼ನ ಖ್ಹಪಡ್ನುನಾತೆ ತಿಮ್ ಪಳಿ.
REV 12:15 ಅರ್ಝ಼ ಯೊ ತಯೇಡಾನ ವ್ಹವಾಡಿಲಿನ್ ಜಾ಼ವ್ಣುಕರಿ ಇನ ಪೀಠೆ ನದ್ದಿನಿತರ ಬಾಕಾಮಾಥು ಪಾಣಿನ ಉಡಾಯು.
REV 12:16 ಕತೋಬಿ ಜ಼ಮೀನ್ನೆ ಯೊ ತಯೇಡಾನ ಮದತ್ ಕರ‍್ಯು. ಯೋ ಇನ ಬಾಕಾನ ಪಖ್ಹಾರಿನ್ ಅರ್ಝ಼ನ ಇನ ಬಾಕೇಥಿ ಮ್ಹೇಲ್ಯೋತೆ ನದ್ದೀನ ಗಳಿಲಿದು.
REV 12:17 ತದೆ ಅರ್ಝ಼ನ ಯೊ ತಯೇಡಾಪರ್ ಘಣು ಖಿಜೈ಼ನ್, ಇನಿ ಪಿಳ್ಗಿಮ ಥೂತೆ ಇವ್ಣಾಪರ್ ಕತೊ, ದೇವ್ನಿ ಹುಕುಮ್‌ನ ಪಾಡಿ ಚಾ಼ಲಿನ್ ಯೇಸುನಿ ಬಾರೇನಿ ಸಾಕ್ಷಿ ಹುಯಿರ‍್ಹವಾಳನಪರ್ ಜಂಗ್ ಭೀಡಿನ್,
REV 12:18 ದರ‍್ಯಾವ್ನ ಕನಾರಿನ ರೇತ್‌ಪರ್ ಭೀರಿಗಯೊ.
REV 13:1 ತದೆ ದರ‍್ಯಾವ್‌ಮಾಥು ಏಕ್‌ ಜಾನ್ವರ್‌ ನಿಕಳ್ತು ಆವನು ಮೆ ದೇಖ್ಯೊ. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡ ಥು. ಯೊ ಶಿಂಗ್ಡಾವ್‌ಪರ್ ದಖ್ಹ್‌ ಕಿರೀಟ್‌ಬಿ, ತಾಳ್ವಪರ್ ದೇವ್ನ ಗಾಳೆದ್ಯವಾನು ನಾಮ್‌ಅಖ್ಖು ಲೀಖೈರ‍್ಹೂಥು.
REV 13:2 ಮೇ ದೇಖ್ಯೋತೆ ಜಾನ್ವರ್‌ ಅದೋಗಾನಿತರಾಬಿ ಇನ ಗೋಡ ರೀಚ಼್‌ನ ಗೋಡಾನಿಘೋಣಿಬಿ ಥು. ಇನು ಬಾಕು ಶುಂಭಾನ ಡಾಚ಼ನಿತರಾಬಿ ಥು. ಅರ್ಝ಼ನ ಇನ ಶಕತ್‌ಬಿ, ಸಿಂಹಾಸನ್‌ಬಿ, ಮೋಟಿ ಅದಿಕಾರ್‌ನ ದಿದು.
REV 13:3 ಜಾನ್ವರ್‌ನ ಏಕ್‌ ಮುಡ್‌ಕ್ಯು ಘಾವ್‌ಹುಯಿನ್ ಮರ‍್ವನಿತರ ದೆಖವ್‌ಕರ್ತುಥು. ಯೊ ಮರಣ್ಣೊ ಘಾವ್ ಅಛ್ಛು಼ ಹುಯಿಗು, ಧರ್ತಿನ ಜಗತ್‌ನು ಅದ್ಮಿಖ್ಹಾರು ಯೊ ಜಾನ್ವರ್‌ನ ದೇಖಿನ್ ಆಶ್ಚರ್ಯ ಕರ‍್ಯು.
REV 13:4 ಅರ್ಝ಼ನ ಯೊ ಜಾನ್ವರ್‌ನ ಅದಿಕಾರ್ ದಿರಾಖ್ಯೊತೆಖ್ಹಾಜೆ ಇವ್ಣೆ ಯೊ ಅರ್ಝ಼ನ ಆರಾದನೆಕರ‍್ಯು. ಅಜು಼ ಇವ್ಣೆ “ಯೋ ಜಾನ್ವರ್‌ನಾಬಿ ಅರಾದನೆ ಕರೀನ್, ಆ ಜಾನ್ವರ್‌ನ ಬರೋಬರಿ ಕೋಣ್ ಛಾ಼? ಅನ ವಿರೋದ್ ಜಂಗ್ ಭಿಡಾನ ಕೋಣ್ ಶಕತ್‌ವಾಳು? ಕರಿ ಬೋಲ್ಯು.
REV 13:5 ಯೊ ಜಾನ್ವರ್‌ನೆ ಬಡೈನಿ ವಾತೆಥೀಬಿ ಗಾಳೆಥೀಬಿ ಬೋಲಾನ ಮ್ಹೋಡು ದೆವೈರ‍್ಹುಥು. ಅಜು಼ ಬೇಉಪ್ಪರ್ ಚಾ಼ಳಿಖ್ಹ್ ಮಹಿನಲಗು ಇನು ಕಾಮ್‌ಖ್ಹಾರು ಚ಼ಲಾವನಿ ಅದಿಕಾರ್‌ಬಿ ಇನ ದೆವೈರ‍್ಹುಥು.
REV 13:6 ತದೆ ಯೊ ಜಾನ್ವರ್‌ನೆ ದೇವ್ನ ಗಾಳೆದಿದು ಕಾಹೆತೆ ಇನ ನಾಮ್ನಾಬಿ, ಯೊ ರ‍್ಹವಾನ ಮಂದಿರ್‌ನಾಬಿ, ಸೊರ್ಗಾಮ ರ‍್ಹವಾಳಖ್ಹಾರಾನ ಗಾಳೆದಿದು.
REV 13:7 ಆ ನಾಹುಯಿನ್ ದೇವ್ನ ಪರಿಶುದ್ಧ ಅದ್ಮಿವ್‌ಪರ್ ಜಂಗ್ ಭೀಡಿನ್ ಇವ್ಣುನ ಹರಾವನಿ ಅದಿಕಾರ್ ದೆವಾಯು ಅಜು಼ ಅಖ್ಖೀಸ್ ಖೂಮ್‌, ಬೋಲಿ, ಲೋಗ್, ಜ಼ಗ್‌ಜಾ಼ತ್‌ಪರ್ ಇನ ಅದಿಕಾರ್ ದೆವಾಯು.
REV 13:8 ಜಗತ್‌ ಉಬ್‌ಜಾ಼ನ ಪಹಿಲೆಸ್ ರ‍್ಹೇಖ್ಹಾಯೊತೆ ಮೇಂಢಾನ ಚೆಲ್ಕು ಹುಯಿರ‍್ಹವಾಳನ ಛಾ಼ತೆ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುಕಿನು ನಾಮ್‌ಖ್ಹಾರು ಲೀಖೈರ‍್ಹುಕೊಯ್ನಿಕಿ ಜ಼ಮೀನ್ನು ಯೊ ಅದ್ಮಿಖ್ಹಾರೂಸ್ ಯೊ ಭಯಂಕರ್ ಜಾನ್ವರ್‌ನ ಆರಾದನೆ ಕರ್ಶೆ.
REV 13:9 ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ;
REV 13:10 ಕೋಂಡಿಘಾಲವಳೊ, ಇನುಯೋಸ್ ಜೇಲ್‌ಮ ಜಾ಼ಶೆ, ತಲ್ವಾರ್‌ಥಿ ಮಾರವಳು ತಲ್ವಾರ್‌ಥೀಸ್ ಮರ್ಶೆ. ಅನಾಮ ದೇವ್ನು ಅದ್ಮಿಖ್ಹಾರು ಖ್ಹಮಾಳಿನ್ ವಿಶ್ವಾಸ್‌ಥಿ ರ‍್ಹೇವ್ಣು.
REV 13:11 ಅಜೇಕ್ ಜಾನ್ವರ್‌ ಜ಼ಮೀನ್‌ಮಾಥು ಆವನು ದೇಖ್ಯೊ. ಅನ ಮೇಂಢಾನಿತರ ಬೇ ಶಿಂಗ್ಡು ಥು, ಯೊ ಅರ್ಝ಼ನಿತರ ವಾತೆ ಬೋಲ್ಯು.
REV 13:12 ಆ ಜಾನ್ವರ್‌ ಪಹಿಲ ಜಾನ್ವರ್‌ನ ಖ್ಹಾಮ್ಣೆ ಇನಿ ಅಖ್ಖೀಸ್ ಅದಿಕಾರ್‌ನ ಚ಼ಲೈನ್, ಮರಣ್ಣೊಘಾವ್ ಗುಣ್‌ಹುಯುತೆ ಪಹಿಲ ಜಾನ್ವರ್‌ನ ಜ಼ಮೀನ್‌ಪರ್ ರ‍್ಹವಾಳು ಇನ ಆರಾದನೆ ಕರಾನಿಘೋಣಿ ಕರ‍್ಯು.
REV 13:13 ಹೈರುತೆ ಅದ್ಮಿನ ಖ್ಹಾಮ್ಣೆ ಆಬ್‍ಥು ಆಗ್ ಜ಼ಮೀನ್‌ಪರ್ ರಂಚಾ಼ವನಿತರನು ಅದ್ಭುತ್‌ಖ್ಹಾರು ಕರ್ತುಹುಯಿನ್,
REV 13:14 ಯೊ ಪಹಿಲ ಜಾನ್ವರ್‌ನ ಖ್ಹಾಮ್ಣೆ ಅದ್ಭುತ್‌ಖ್ಹಾರು ಕರಾನು ಅದಿಕಾರ್ ಛಾ಼ತೆ ಇನಖ್ಹಾಜೆ ಧರ್ತಿನ ಅದ್ಮಿಖ್ಹಾರನ ಖ್ಹೈಲು ಕರ‍್ಯು. ಇವ್ಣುನ ತಲ್ವಾರ್‌ಥಿ ಘಾವ್‌ಹುಯಿನ್ ಮರ‍್ಯುಕೊಂತೆ ಬಚಿರ‍್ಹುತೆ ಜಾನ್ವರ್‌ನ ಮರ್ಯಾದಿ ದ್ಯವಾನಖ್ಹಾಜೆ ಮೂರತ್ ಬಣಾವ್ಣುಕರಿ ಹುಕುಮ್ ಕರ‍್ಯು.
REV 13:15 ಆ ನಾಹುಯಿನ್ ಆ ಬೇನು ಜಾನ್ವರ್‌ನ ಮೂರತ್ನ ಜಾನ್‌ ದ್ಯವಾನಿ ತಾಖತ್‌ಬಿ ಮಳ್ಯು. ಇನ ಖ್ಹಲಾಮ್ ಕರಾಕೊಂತೆ ಖ್ಹಾರಸ್ನ ಮರ್‌ನಾಖನಿ ಶಕತ್ ಇನಥು.
REV 13:16 ಆ ಬೇನು ಜಾನ್ವರ್‌ಬಿ, ಶಾಣು, ಅಡ್ಡಾಣಿ, ಶೌಕಾರ್, ಗರೀಬ್, ಛುಟ್ಕಾರ್‌ರ‍್ಹವಾಳು, ಗುಲಾಮ್‌ಖ್ಹಾರು ಅಖ್ಖೂಬಿ ಇವ್ಣ ಇವ್ಣ ಖಾವಹಾತ್ಪರ್ ರ‍್ಹವೊ, ತಾಳ್ವಪರ್ ರ‍್ಹವೊ ಖ್ಹಣೇದ್ ನಖಾವ್ಣು ಕರಿ ಜು಼ಲಮ್‌ ಕರ‍್ಯು.
REV 13:17 ಯೊ ಖ್ಹಣೇದ್ ಕಿನ ಕೊಯ್ನಿಕಿ ಇವ್ಣೆ ಲ್ಯಾವಾನ ಕೊಹುಯುನಿ ಅಜು಼ ವೇಚಾ಼ನಬಿ ಹುಯುಸ್ ಕೊಯ್ನಿ. ಯೊ ಖ್ಹಣೇದ್ ಖಿವುಕತೊ ಪಹಿಲ ಜಾನ್ವರ್‌ನು ನಾಮ್ ನತರ್ ಇನ ನಾಮ್ನ ವತಾಳನು ಗಣ್ತೀನು ಲೀಖ್ಯು.
REV 13:18 ಅನ ಮಾಲುಮ್ ಕರಿಲ್ಯಾವಾನ ಗ್ಯಾನ್‌ಬಿ ಜ಼ರೂರತ್ ಛಾ಼. ಅಕ್ಲಿ ಯೊ ಜಾನ್ವರ್‌ನ ಗಣ್ತಿನ ಲೀಖ್ಯಾನ ಗಣಾದೆ, ಯೊ ಏಕ್‌ ಅದ್ಮಿನ ವತಾಳನು ಗಣ್ತೀನು ಲೀಖ್ಯು ಹುಯಿರ‍್ಹೂಸ್. ಇನು ಗಣ್ತೀನು ಲೀಖ್ಯು ಛೊ಼ಖ್ಹೊ ಛೋ಼ಪರ್ ತೀನಿಖ್ಹ್‌.
REV 14:1 ಅನಪಾರ್ ಮೆ ದೇಖಾಮ ಬಲಿ ಮೇಂಢಾನ ಚೆಲ್ಕುಹುಯಿರ‍್ಹವಾಳೊ ಚೀಯೋನ್ ಪರ್ಭತ್‌ಪರ್‌ ಭಿಯುರ‍್ಹವಾನು ದೇಖ್ಯೊ. ಇನ ಜೋ಼ಡ್ಮ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್‌ಜ಼ಣು ಥು. ಇವ್ಣ ತಾಳ್ವಪರ್ ಇನು ನಾಮ್‌ಬಿ ಇನ ಬಾನು ನಾಮ್‌ಬಿ ಲೀಖೈರ‍್ಹೂಥು.
REV 14:2 ಆನಾಹುಯಿನ್ ಪರಲೋಕ್‌ಥು ಪಾಣಿನ ತೋಫಾನ್ನಿತರಾಬಿ, ಘಲಾರನ ಅವಾಜ಼್‌ನಿತರಾನೊ ಏಕ್‌ ಮೋಟ ಅವಾಜ಼್‌ನ ಖ್ಹಮ್‌ಜೊ. ಮೆ ಖ್ಹಮ್‌ಜೋತೆ ಯೊ ಅವಾಜ಼್ ಖ್ಹಾರಂಗೊ ವಜಾ಼ಡಿನ್ ಗೀದ್‌ ಬೋಲಾವಾಳಾವ್ನು ಅವಾಜ಼್‌ನಿತರಥು.
REV 14:3 ಇವ್ಣೆ ಸಿಂಹಾಸನ್ನ ಖ್ಹಾಮ್ಣೆಬಿ ಯೊ ಚಾರ್ ಜೀವಿನ ಅಜು಼ ಶಾಣವ್ನ ಖ್ಹಾಮ್ಣೇಬಿ ನವು ಗೀದ್‌ ಬೋಲ್ಯು. ಆ ಧರ್ತಿಥು ಮೋಲ್ ಲೀರಾಖ್ಯುಥೂತೆ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿನ ಪಣ್ಕಿ ಬಿಜು಼ ಕೋಣ್‌ಬಿ ಯೊ ಗೀದ್‌ನ ಶಿಕಾನ ಕೊಉಷೇನಿ.
REV 14:4 ಇಮ್ಮಸ್ ತಯೇಡಾನಿ ಶವಾಶಿಥಿ ಮೈಲು ಹುಯುಕೊಂತೆ ಕವಾರಿನಿತರ ಥೂತೆ ಅವ್ಣೇಸ್. ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹಾವಳೊ ಕಿಜ್ಜಾ಼ ಗಯೊತೋಬಿ ಇವ್ಣೆ ಅನ ಪೀಠೆ ಜಾ಼ಸ್. ಅವ್ಣೆ ಅದ್ಮಿವ್‌ಮಾಥು ಶೊಂತ್ ಅದ್ಮಿಹುಯಿನ್ ಮೋಲ್ ಲೆವೈಜೈ಼ನ್ ದೇವ್‍ನಾಬಿ ಮೇಂಢೊ ಹುಯಿರ‍್ಹಾವಳನಬಿ ಪಹಿಲ ಫಲ್ನಿತರಹುಯ.
REV 14:5 ಅವ್ಣ ಮ್ಹೋಡಾಮ ಝೂ಼ಟಿ ಕೋಸ್‌ಥೂನಿ. ಅವ್ಣೆ ನಿರ್ದೋಷ್ ಹುಯಿರ‍್ಹಾಸ್.
REV 14:6 ಬಿಜೇಕ್ ದೇವ್‌ನೊ ದೂತ ಆಬ್‌ನ ಇಚ಼್‌ಮ ಉಡುಕರಾನು ದೇಖ್ಯೊ. ಜ಼ಮೀನ್‌ಪರ್ ಜಿವ್‌ಕರಾತೆ ಹರೇಕ್ ಜ಼ಗ್‌ಜಾ಼ತ್‌, ಖೂಮ್‌, ಬೋಲಿ, ಅದ್ಮಿಖ್ಹಾರನ ಬೋಲಿವತಾಳಾನ ಖ್ಹಾಜೆ ಹರ್‌ಹಮೇಶಾನು ಅಛ್ಛಿ ಸಂದೇಶ್ ಇನಾಕನ ಥು.
REV 14:7 ಯೊ ದೇವ್ನದೂತನೆ ಜೋ಼ರೇಥಿ, “ದೇವ್‍ಥಿ ಡರೊ ಇನ ಮಹಿಮೆಕರೊ. ಶನಕತೊ ಯೊ ಅದ್ಮಿಖ್ಹಾರನ ತೀರ್ಪ್ ದ್ಯವಾನಿ ವಖ್ಹತ್ ಐಗಿ. ಇನ ಆರಾದನೆ ಕರೊ ಸೊರ್ಗನಾಬಿ, ಜ಼ಮೀನ್ನಾಬಿ, ದರ‍್ಯಾವ್ನಾಬಿ, ಪಾಣಿನ ಚೇಜ಼್‌ಭಾರನಾಬಿ ಬಣಾವವಾಳನ ಆರಾದನೆ ಕರೊಕರಿ ಬೋಲ್ಯೊ.
REV 14:8 ಇನ ಪೀಠೆ ಬೇನೊ ದೇವ್ನದೂತನೆ ಐನ್, “ರಡ್ಕಿಗೈ, ರಡ್ಕಿಗೈ, ಬಾಬೆಲ್‌ಕರಿ ಹುಯಿರಿತೆ ಮೋಟಿ ನಂಗ್ರಿ ರಡ್ಕಿಗೈ! ಹೈರಿತೆ ಹರೇಕ್ ಜ಼ಗ್‌ಜಾ಼ತ್‌ವಾಳಾನ ವ್ಯಬಿಚಾರ್‌ಕರಿ ಬೋಲಾನ ದ್ರಾಕ್ಷಿನ ರಖ್ಹ್‌ನ ಪಿಡೈದಿದಿ” ಕರಿ ಬೋಲ್ಯೊ.
REV 14:9 ಇನ ಪೀಠೆ ತೀನ್ನೊ ದೇವ್ನದೂತನೆ ಅಯಿನ್, “ಕೋಣ್‌ತೋಬಿ ಖೆವತೋಬಿ ಜಾನ್ವರ್‌ನಾಬಿ ಇನು ಮೂರತ್‌ನಾಬಿ ಆರಾದನೆಕರಿನ್‌ ಇವ್ಣ ತಾಳ್ವಪರ್‌ರ‍್ಹವೊ ಹಾತ್‌ಪರ್‌ರ‍್ಹವೊ ಇನು ಖ್ಹಣೇದ್ನ ನಖೈರಾಖ್ಯೂತೊ,
REV 14:10 ಯೋಬಿ ಜಿನುಕು ದೇವ್‌ನೊ ಇರಾದೊಕರಿ ಬೋಲಾನ ಕಟೋರಮ ಶಾತ್ಬಿ ಮಳಾಯುಕೊಂತೆ ನಾಖಿಹುಯು ದೇವ್ನು ಇರಾದೊಕರಿ ದ್ರಾಕ್ಷಿನ ರಖ್ಹ್‌ನ ಪೀಶೆ. ಪರಿಶುದ್ ದೇವ್ನ ದೂತರ‍್ನ ಖ್ಹಾಮ್ಣೇಬಿ, ಬಲೀನ ಮೇಂಢಾನ ಚೆಲ್ಕಾನ ಖ್ಹಾಮ್ಣೆ ಅಗ್‌ಥೀಬಿ, ರಂಜ಼ಕ್‌ಥಿ, ಖ್ಹತಾಪ್ಣಿ ಪಡ್‌ಶೆ.
REV 14:11 ಎಥ್ರಾನವಾಳನೆ ಖ್ಹತಾಪ್ಣಿನೊ ಧುವೊ ಜ಼ಗ್‌ಜ಼ಮಾನಮಾಬಿ ಛ಼ಡುಕರ್ಷೆ, ಜಾನ್ವರ್‌ನ ಅಜು಼ ಇನ ಮೂರತ್ನ ಖ್ಹಲಾಮ್ ಕರವಾಳು ರ‍್ಹವೊ, ಇನ ನಾಮ್ನ ಖ್ಹಣೇದ್ನ ನಖೈರಾಖವಳೊ ರ‍್ಹವೊ ರಾತ್‌ಬಿ ದನ್ ಅರಾಮ್‌ಕೊಂತೆ ರ‍್ಹಿಶೆ ಕರಿ ಮೋಟಿ ಅವಾಜ಼್‌ಥಿ ಬೋಲ್ಯೊ.
REV 14:12 ಅನಾಮ ದೇವ್ನಿ ಹುಕುಮ್‌ನಾಬಿ, ಯೇಸುನಿ ಬಾರೇನಿ ವಿಶ್ವಾಸ್‌ನ ಪಾಡಿನ್ ಚಾ಼ಲುಕರಾವಳ ದೇವ್ನ ಅದ್ಮಿಖ್ಹಾರನ ಖ್ಹಮಾಳಿರ‍್ಹವಾನು ಹಜ್ಜಾ಼ ವತಾಳ್ಣು ಪಡಾಸ್‌.
REV 14:13 ಪರಲೋಕ್‌ಥು ಏಕ್‌ ಅವಾಜ಼್ ಮನ ಖ್ಹಮಜ್‍ಪಡ್ಯು. ಇನೆ ಹಂಕೇಥು ಪ್ರಭುನ ಭಕ್ತರ್‌ಹುಯಿನ್ ಮರಾವಳು ಧನ್ಯಕರಿ ಲೀಖ್‌ಕರಿ ಮನ ಬೋಲ್ಯು. ಇನ ಆತ್ಮನೆ, ಒಹೊ ಇವ್ಣೆ ಧನ್ಯರಸ್. ಇವ್ಣೆ ಇವ್ಣ ಮ್ಹಿನತ್‌ನ ಖತಮ್‌ಕರಿನ್ ಅರಾಮ್ ಕರ್ಶೆ ಅಜು಼ ಇವ್ಣು ಅಛ್ಛು಼ ಕಾಮ್‌ಖ್ಹಾರು ಇವ್ಣ ಜೋ಼ಡ್ಮ ಚಾ಼ಲ್‌ಷೆ ಕರಿ ಬೋಲ್ಯೊ.
REV 14:14 ತದೆ ಮೇ ದೇಖಾದಿನ್ ಮಾರಖ್ಹಾಮ್ಣೆ ಅದ್ಮಿನೊ ಛಿಯ್ಯಾನಿತರ ದೆಖವ್‍ಕರಾತೆ ಏಕ್ಜ಼ಣೊ ಧೋಳ ವಾದ್‍ಳಾನ ಉಪ್ಪರ್ ಬೆಠೋಥೊ. ಇನ ಮುಡ್‌ಕ್ಯಪರ್ ಖ್ಹೊನ್ನಾನಿ ಕಿರೀಟ್‌ಥಿ. ಅಜು಼ ಇನ ಹಾತ್ಮ ಚಾ಼ಲ್ತಿ ದರಾತಿಥಿ.
REV 14:15 ತದೆ ಬಿಜೇಕ್ ದೂತನೆ ಮಂದಿರ್‌ಮಾಥು ಭಾರ್‌ ಆಯಿನ್ ವಾದ್ಳಪರ್ ಬೆಠೂತೆ ಇನ, “ಜ಼ಮೀನ್‌ಮಾನು ಅನಾಜ಼್ ಪಕೈಗಯು, ವಢಾವ್ಣಿನ ದನ್ ಅಯಿಗ. ತಾರಿ ದರಾತಿನ ಪಾಡಿನ್ ಅನಾಜ಼್‌ನ ವ್ಹಾಡ್‌” ಕರಿ ಜೋ಼ರೇಖ್ಹು ಬೋಲ್ಯೊ.
REV 14:16 ಇಮ್ಮಸ್ ವಾದ್ಳಪರ್ ಬೆಠೋಥೋತೆ ಯೊ ಇನಿ ಚಾ಼ಲ್ತಿ ದರಾತಿನ ಜ಼ಮೀನ್‌ಪರ್ ನಾಖ್ಯೊ. ತದೆ ಜ಼ಮೀನ್‌ಪರ್‌ನು ಅನಾಜ಼್ ವ್ಹಡೈಗು.
REV 14:17 ಇನಪಾರ್ ಬಿಜೇಕ್ ದೇವ್‌ನೊ ದೂತ ಪರ್‌ಲೋಕ್‌ನು ಮಂದಿರ್‌ಮಾಥೊ ಭಾರ್‌ಆಯೊ. ಇನಕನಾಬಿ ಏಕ್‌ ಚಾ಼ಲ್ತಿ ದರಾತಿ ಥಿ.
REV 14:18 ಅನವಾರ್ ಬಿಜೇಕ್ ದೇವ್‌ನೊ ದೂತ ಚಾ಼ಚ಼ರ್‌ಕನಥೊ ಆಯೊ. ಇನ ಆಗ್ನ ಉಪ್ಪರ್ ಅದಿಕಾರ್ ಥು. ಯೊ ಚಾ಼ಲ್ತಿ ದರಾತಿವಾಳನ, “ತಾರಿ ಚಾ಼ಲ್ತಿ ದರಾತಿನ ಪಾಡಿಲೀನ್, ಜ಼ಮೀನ್‌ಪರ್‌ನು ಬಾಗ್‌ನು ದ್ರಾಕ್ಷಿನ ಗುಚ್ಚಾ಼ವ್ನ ವ್ಹಾಡ್‌. ಇನು ಪಂಡುಖ್ಹಾರು ಅಖ್ಖೂಸ್ ಪಕೈಗಯು ಕರಿ ಊಚ಼ ಅವಾಜ಼್‌ಥಿ ಚಿಕ್‌ರ‍್ಯೊ.
REV 14:19 ತದೆ ಯೋ ದೇವ್‌ನೊ ದೂತನೆ ಇನಿ ದರಾತಿ ಥಿ. ಜ಼ಮೀನ್‌ಪರ್‌ಲ್ಯು ದ್ರಾಕ್ಷಿನ ವೇಲಮಾನು ದ್ರಾಕ್ಷಿನ ಪಂಡಾನ ವ್ಹಾಡಿಎಕ್ಟುಕರಿನ್, ದೇವ್‌ನೊ ಇರಾದೊಕರಿ ಬೋಲಾನು ಮೋಟಿ ಬಾನೇಮ ಫೇಕ್ಯೊ.
REV 14:20 ತದೆ ಯೊ ದ್ರಾಕ್ಷಿನ, ಬಾನೇನ ಖ್ಹಯೇರ‍್ನ ಭಾರ್‌ ಲೀಜೈ಼ನ್ ಖುಂದ್‌ಲ್ಯು. ಯೊ ಬಾನೆಮಾಥು ಲ್ಹೋಯಿ ನಿಕ್ಳಿನ್ ಘೋಡಾವ್‌ನು ಲಗಾಮೇನ ಛಿಮಾವಯೆತ್ರೆ ಊಚು಼ ಛ಼ಡಿನ್ ಬೇಖ್ಹೊ ಮೈಲ್ಎತ್ರೆ ದೂರ್ ಪಾಚ಼್ ಅಡಿ ಗಧಾರ್ ವ್ಹಯು.
REV 15:1 ಪರ್‌ಲೋಕ್‌ಮ ಮೇ ಘಣು ಆಶ್ಚರ್ಯ ಹುಯಿರ‍್ಹಾವನು ಬಿಜೇಕ್ ಅದ್ಭುತ್‌ನ ದೇಖ್ಯೊ. ತದೆ ಖ್ಹಾತ್‌ಜ಼ಣ ದೇವ್‌ದೂತರ್‌ನ ಹಾತ್ಮ ಖ್ಹಾತ್ ಖ್ಹತಾಪ್ಣಿ ಥು, ಆ ಖ್ಹರ್ತಿನಿ ಖ್ಹತಾಪ್ಣಿಖ್ಹಾರಿ. ಆ ಅಖ್ಖಾನ ಜೋ಼ಡೆ ದೇವ್‌ನೊ ಇರಾದೊ ಪೂರ ಉಷೆ.
REV 15:2 ಮೇ ದೇಖಾನಿವಖ್ಹ್‌ತೆ ಆಗ್ ಮಳಿರ‍್ಹೂತೆ ಶಿಖ್ಹಾನ ದರ‍್ಯಾವ್‍ನಿ ಘೋಣಿ ಶಾತ್ಕಿ ಏಕ್‌ ಮನ ದೆಖಾಯು. ತದೆ ಜಾನ್ವರ್‌ಬಿ ಅಜು಼ ಇನ ಮೂರತ್ನ ಖ್ಹಲಾಮ್ ನಾಕರ‍್ನುತೇಬಿ ಇನ ನಾಮ್ನ ಖ್ಹಣೇದ್‍ನು ಲೀಖ್ಯಾನು ಮುದ್ರೊ ನಾನಖಾವ್ಣುತೇಬಿ ಜೈಕಾರ್ ಲೀರಾಖವಾಳು, ದೇವ್‍ಥಿ ದೆವಾಯುತೆ ಖ್ಹಾರಂಗಾವ್ನ ಇವ್ಣ ಹಾತ್ಮ ಧರಿಲೀನ್ ಶಿಖ್ಹಾನ ದರ‍್ಯಾವ್‌ಕನ ಭಿಯಾಥ.
REV 15:3 ಇವ್ಣೆ ದೇವ್‌ನೊ ಸೇವಕ್ ಹುಯಿರೋತೆ ಮೋಶೆನ ಗೀದ್‌ನ ಮೇಂಢಾನು ಚೆಲ್ಕಾನು ಗೀದ್‌ನ ಬೋಲ್ತೊಹುಯಿನ್, ಪ್ರಭು ಹುಯಿರೋತೆ ದೇವ್ ತೂ ಸರ್ವಶಕತ್‌ನೊ, ತಾರು ಕಾಮ್‌ಖ್ಹಾರು ಮಹಿಮೆನಾಬಿ, ಆಶ್ಚರ್ಯನೂಬಿ ಹುಯಿರುಸ್.ಅಖ್ಖೀಸ್ ಜ಼ಗ್‌ಜಾ಼ತ್‌ನೊ ರಾಜ಼. ತಾರೊ ಮಾರಗ್‌ಖ್ಹಾರು ನ್ಯಾವ್ನುಬಿ ಖ್ಹಾಚೂ಼ಬಿ ಹುಯಿರುಸ್ ಕರಿ ಮಾಲುಮ್ ಕರಾವಸ್.
REV 15:4 ಪ್ರಭು, ತುನ ಡರಾಕೊಂತೆ ಅಜು಼ ಅದ್ಮಿಖ್ಹಾರು ತಾರ ನಾಮ್ನ ಮಹಿಮೆ ಕರಾಕೊಂತೆ ಕೋಣ್‌ತೋಬಿ ಛಾ಼ಕಿಶು? ತೂ ಎಕ್ಕಸ್ ಜ಼ಣೊ ಪರಿಶುದ್. ತಾರು ನೀತಿನು ನ್ಯಾವ್‌ನು ತೀರ್ಪ್ ಉಜಾ಼ಳಮ ಆಯೂತೆ ಖ್ಹಾಜೆ ಹರೇಕ್ ಜ಼ಗ್‌ಜಾ಼ತ್‌ಖ್ಹಾರು ತಾರ ಖ್ಹಾಮ್ಣೆ ಅಯಿನ್ ತುನ ಆರಾದನೆ ಕರ್ಶೆ.
REV 15:5 ಆಹುವಾದೀನ್ ಮೆ ದೇಖಖ್ಹತರ್ ಪರಲೋಕ್‌ಮಾಥು ದೇವ್ನ ದರ್ಶನ್ನು ಡೇರಾನು ಪವಿತ್ರಝ಼ಗೊ ನಿಕ್ಳಿರ‍್ಹೂಥು.
REV 15:6 ಯೋ ಮಂದಿರ್‌ಮಾಥು ಖ್ಹಾತ್ ಖ್ಹತಾಪ್ಣಿನ ಧರಿರಾಖವಾಳ ಯೊ ಖ್ಹಾತ್‌ಜ಼ಣ ದೇವ್‌ದೂತರ್‌ ಆಯು. ಇವ್ಣೆ ಶುದ್ದಥೀಬಿ, ಉಜಾ಼ಖ್ಹ್‌ನುಬಿ, ಕೋರುಲುಂಗ್ಡಾನ ಫೇರಿರಾಖ್ಯುಥು. ಅಜು಼ ಇವ್ಣ ಛಾ಼ತಿಪರ್ ಖ್ಹೊನ್ನಾನ ಪಟಾನ ಭಾಂದಿರಾಖ್ಯುಥು.
REV 15:7 ಯೊ ಚಾರ್ ಜೀವಿಮ ಏಕ್‌ನೆ ಯೊ ಖ್ಹಾತ್‌ಜ಼ಣ ದೇವ್‌ದೂತವ್ನ ಖ್ಹಾತ್ ಖ್ಹೊನ್ನಾನ ಕಟೋರಾವ್ನ ದಿದು. ಯೊ ಕಟೋರಮ ಜ಼ಗ್‌ಜ಼ಮಾನಥೂಬಿ ಜಿವ್ತೊರ‍್ಹವಾಳೊ ದೇವ್ನು ಚ಼ಂಢಾಳ್ ಭರೈರ‍್ಹೂಥು.
REV 15:8 ದೇವ್ನ ಮಹಿಮೆಥೀಬಿ, ಇನಿ ಶಕಥ್ಥಿಬಿ ಹುಯೂತೆ ಧುವ್ವಾಥಿ ಯೊ ಮಂದಿರ್‌ ಭರೈರ‍್ಹೂಥು. ಯೊ ಖ್ಹಾತ್‌ಜ಼ಣ ದೇವ್‌ದೂತರ‍್ನ ಹಾತ್ಮಥೂತೆ ಖ್ಹತಾಪ್ಣಿಖ್ಹಾರು ಖತಮ್ ಹುವಾಲಗೂಬಿ ಯೊ ಮಂದಿರ‍್ನ ಮಹಿ ಜಾ಼ವನ ಕಿನೇಥೀಬಿ ಕೊಹುಯುನಿ.
REV 16:1 ತದೆ ಮಂದಿರ್‌ಮಾಥು ಆಯೂತೆ ಮೋಟ ಅವಾಜ಼್‌ನ ಖ್ಹಮ್‌ಜ್ಯೊ. ಯೊ ಅವಾಜ಼್‌ನೆ ಯೊ ಖ್ಹಾತ್‌ಜ಼ಣ ದೇವ್‌ದೂತರ‍್ನ ತುಮೆ ಜೈ಼ನ್ ಯೊ ಕಟೋರಮಾಬಿ ದೇವ್ನ ಇರಾದನ ಧರ್ತಿಪರ್ ರಂಚೋ಼ಕರಿ ಬೋಲ್ಯು.
REV 16:2 ತದೆ ಫೈಲೊ ದೇವ್‌ದೂತನೆ ಜೈ಼ನ್ ಯೊ ಇನ ಕಟೋರಮಥೂತೆ ಇನ ಜ಼ಮೀನ್‌ಪರ್ ರಂಚಾ಼ಖ್ಹತರ್ ಜಾನ್ವರ್‌ನ ಖ್ಹಣೇದ್ನ ನಖೈರಾಖವಳು, ಇನ ಮೂರತ್ನ ಖ್ಹಲಾಮ್‌ಕರಾಸ್ತೆ ಅಖ್ಖಾಸ್ನ ಉಪ್ಪರ್ ಗಲೀಜ಼್‌ಥಿ ರ‍್ಹವಾನು ಘಣು ದರದ್ನ ಫೋಡ ಉಠ್ಯ.
REV 16:3 ಬೇನೊ ದೇವ್ನದೂತನೆ ಇನ ಕಟೋರಮ ಥೂತೆ ಇನ ದರ‍್ಯಾವ್‌ಪರ್ ರಂಚ್ಯೊ. ತದೆ ದರ‍್ಯಾವ್ನು ಪಾಣಿ ಮರ‍್ಯಹುಯಾನ ಲ್ಹೋಯಿನಿತರ ಹುಯಿಗು. ಅಜು಼ ದರ‍್ಯಾವ್‌ಮಾನು ಹರೇಕ್ ಜಿವ್ತು ಜೀವಿಬಿ ಮರಿಗು.
REV 16:4 ತೀನ್ನ ದೇವ್ನದೂತಾನೆ ಇನ ಕಟೋರಮ ಥೂತೆ ಇನ ನದ್ದೀವ್‌ಪರ್‌ಬಿ ಪಾಣಿನ ಚೆಜ಼್‌ಭಾರ ಪರ್ಬಿ ರಂಚ್ಯೊ. ತದೆ ಯೊ ಅಖ್ಖು ಪಾಣಿ ಲ್ಹೋಯಿ ಹುಯಿಗು.
REV 16:5 ಇನಪಾರ್ ಪಾಣಿನ ಅಧಿಕಾರ‍್ನ ದೂತನೆ ಅಮ್ ಬೋಲ್ಯೋಕಿ, “ತೂಸ್ ಕೆದೇಬಿ ರ‍್ಹವವಾಳೊಬಿ, ಥೋತೆ ಪರಿಶುದ್ ದೇವ್. ಶನಕತೊ ತೂ ದೆವ್‌ಕರಾಸ್ತೆ ತೀರ್ಪ್ ಅಖ್ಖು ನ್ಯಾವ್‌ನು ಹುಯಿರ‍್ಹುಸ್.
REV 16:6 ಯೊ ಅದ್ಮಿಖ್ಹಾರು ದೇವ್ನು ಅದ್ಮಿವ್‌ನು ಅಜು಼ ಪ್ರವಾದಿ ಖ್ಹಾರಾನು ಲ್ಹೋಯಿನ ರಂಚ್ಯೂತೆಖ್ಹಾಜೆ ತುನೆ ಇವ್ಣುನ ಯೋ ಲ್ಹೋಯಿನ ಪಿಯಾನ ದಿದೊ. ಇವ್ಣುನ ಯೋಸ್ ಬರೊಬರ‍್ನು ಕಿಮ್ಮತ್ ಕರಿ ಬೋಲಾನು ಮೆ ಖ್ಹಮ್‌ಜ್ಯೊ.
REV 16:7 ಅನಪಾರ್‌ ಚಾ಼ಚ಼ರ್‌ಥಿ ಆವಾತ್ ಖ್ಹಮಜ್‍ಪಡ್ಯು, ‘ದೇವ್ ಹುಯಿರ‍್ಹೋತೆ ಪ್ರಭು ತು ಸರ್ವಶಕತ್‌ನೊ, ತಾರು ನ್ಯಾವ್‌ನು ತೀರ್ಪ್ ಅಖ್ಖು ಖ್ಹಾಚೂ಼ಬಿ ನ್ಯಾವ್‍ನೂಬಿ ಹುಯಿರ‍್ಹುಸ್’ ಕರಿ ಬೋಲ್ಯು.
REV 16:8 ಅನಕೇಡೆಥು ಚಾರ‍್ನ ದೇವ್ನದೂತನೆ ಇನ ಕಟೋರಮಥೂತೆ ಇನ ಚಾ಼ಂದ್‌ಪರ್ ರಂಚ್ಯೊ. ತದೆ ಚಾ಼ಂದ್‍ನ, ಆಗ್‍ನಿತರನು ತಡ್ಕೇಥಿ ಅದ್ಮಿನ ಭುಂಜಾ಼ನು ಹುಕುಮ್ ದೆವಾಯು.
REV 16:9 ಅದ್ಮಿಖ್ಹಾರು ಜಾ಼ಖ್ಹತ್ ತಡ್ಕೇಥಿ ಬಳ್ಯುತೋಬಿ ಇವ್ಣೆ ಯೊ‍ ಖ್ಹತಾಪ್ಣಿ ಅಖ್ಖಾಪರ್ ಅದಿಕಾರ್ ಲೀರಾಖ್ಯೋಥೋತೆ ದೇವ್ನ ನಾಮ್ನ ಗಾಳೆದಿದು ಕಾಹೆತೆ, ಇವ್ಣೆ ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರ‍್ಯುಕೊಯ್ನಿ ಇನ ಮಹಿಮೆ ಕೋಕರ‍್ಯುನಿ.
REV 16:10 ಪಾಚ಼್ನೊ ದೇವ್ನ ದೂತಾನೆ ಇನ ಕಟೋರಮ ಥೂತೆಯಿನ ಜಾನ್ವರ್‌ನಿ ಸಿಂಹಾಸನ್‌ಪರ್ ರಂಚಾ಼ಖ್ಹತರ್ ಇನು ರಾಜ್ಯ ಅಖ್ಖು ಅಂಧಾರುಹುಯು. ಅದ್ಮಿಖ್ಹಾರು ಅಜಾ಼ಥಿ ದಾತ್ಮ ಜೀಬ್ ಧರಿಲೀನ್,
REV 16:11 ಇವ್ಣ ಅಜಾ಼ನ ಖ್ಹಾಜೇಬಿ ಫೋಡಾನ ಖ್ಹಾಜೇಥಿಬಿ ಸೊರ್ಗಾನ ದೇವ್ನ ಗಾಳೆದ್ಯವಾನು ಕಾಹೆತೆ ಇವ್ಣೆ ಇವ್ಣು ಕರ‍್ಯುತೆ ಖರಾಬ್ ಕಾಮ್‍ಥಿ ದೇವ್‌ಭಣಿ ಫರ‍್ಯುಕೊಯ್ನಿ.
REV 16:12 ಛೋ಼ನ ದೇವ್ನದೂತಾನೆ ಇನ ಕಟೋರಮ ಥೂತೆಯಿನ ಯೂಫ್ರಟಿಸ್ ಕರಿ ಮೋಟಿ ನದ್ದೀಮ ರಂಚಾ಼ಖ್ಹತರ್ ಯೋ ಪಾಣಿ ಖ್ಹರೀನ್ ಪೂರಬ್ನು ಬಾಜು಼ಥು ಆವಾಳ ರಾಜಾ಼ವ್‌ನ ಮಾರಗ್ ತೈಯಾರ್‌ಹುಯು.
REV 16:13 ತದೆ ಅರ್ಝ಼ನ ಮ್ಹೋಡಾಮಾಥುಬಿ ಜಾನ್ವರ್‌ನ ಮ್ಹೋಡಾಮಾಥು ಅಜು಼ ಝೂ಼ಟುಪ್ರವಾದಿನ ಮ್ಹೋಡಾಮಾಥು ಮೇಂಡುಕ್‌ನಿತರನು ತೀನ್ ಗಲೀಜ಼್ ಆತ್ಮಖ್ಹಾರು ಆವನು ದೇಖ್ಯೊ.
REV 16:14 ಆ ಖ್ಹಣೇದ್‌ನುಕಾಮ್‌ ಕರವಾಳು ಭೂತ್‌ನು ಆತ್ಮ ಹುಯಿರ‍್ಹಿನ್ ಧರ್ತಿಪರ್‌ಲ್ಯ ಅಖ್ಖಾಸ್ ರಾಜ಼ವ್‌ಕನ ಜೈ಼ನ್ ಸರ್ವಶಕತ್‌ನೊ ದೇವ್ನ ಮಹಿಮೆನ ದನ್ನ ಜಂಗ್‌ನಖ್ಹಾಜೆ ಇವ್ಣುನ ಎಕ್ಟು ಕರುಕರ್ತುಥು.
REV 16:15 “ಹಂದೇಕ್ ಚೋ಼ರ್ ಆವಾನಿಘೋಣಿ ವಳ್ಯಾವುಸ್. ಇನುಯೋ ಉಘಾಡೊ ಹುಯಿನ್ ಅದ್ಮಿಥಿ ಖ್ಹರಮ್‌ ನಾಕಡೈಲೇವ್ಣುತೆ ಹೊಷಾರ್‌ಥಿ ರ‍್ಹೀನ್ ಇನ ಲುಂಗ್ಡಾನ ಜ಼ತನ್‌ಥಿ ಬಚಾ಼ಡೈಲ್ಯವಾಳೊ ಧನ್ಯ ಹುಯಿರೋಸ್.”
REV 16:16 ತದೆ ಯೊ ಜ಼ಮೀನ್ನ ರಾಜಾ಼ವ್‌ನ ಇಬ್ರಿಯ ಬೋಲಿಮ ಅರ್ಮಗೆದ್ದೋನ್ ಕರಿ ಬೋಲಾನ ಝ಼ಗೋಕನ ಮಳಾಯು.
REV 16:17 ಖ್ಹಾತ್ನ ದೇವ್ನದೂತನೆ ಇನ ಕಟೋರಮ ಥೂತೆಯಿನ ವಹಿರಾನ ಗೋಳಪರ್ ನಾಖ್ಯೊ. ತದೆ ಮಂದಿರ್‌ನು ಸಿಂಹಾಸನ್‌ಥು ಮೋಟು ಅವಾಜ಼್ ಹುಯಿನ್, “ಖತಮ್ ಹುಯಿಗು” ಕರಿ ಬೋಲ್ಯು.
REV 16:18 ತದೆ ವಿಜ಼್‌ಳಿಬಿ, ಘಲಾರನೂಬಿ ಹುಯು ಅತ್ರೇಸ್ ಕಾಹೆತೆ ಮೋಟು ಭೂಕಂಪ್ ಹುಯು. ಅದ್ಮಿಖ್ಹಾರು ಜ಼ಮೀನ್‌ಪರ್ ಥೂತೆ ತಪ್‌ಥೂಬಿ ಇಮ್ನು ಮೋಟು ಭೂಕಂಪ್ ಕೊಹುಯಿರ‍್ಹುಥೂನಿ.
REV 16:19 ಮೋಟು ನಂಗರ್ ತೀನ್ ಭಾಗ್‌ ಹುಯಿನ್ ಚೀರೈಗು ಅಜು಼ ಜ಼ಗ್‌ಜಾ಼ತ್‌ನು ನಂಗ್ರಿಖ್ಹಾರು ಪಡೀಗು. ತದೆ ದೇವ್ನೆ ಬಾಬೆಲ್‌ನ ಖ್ಹಯಾಲ್ ಕರೀನ್ ಇನು ಘಣು ಇರಾದೊ ಕರಿ ಬೋಲಾನು ದ್ರಾಕ್ಷಿನ ರಖ್ಹ್‌ಥಿ ಭರಾಯುಹುಯು ಕಟೋರಾನ ಯೊ ನಂಗರ‍್ನ ದಿದೊ.
REV 16:20 ತದೆ ಹರೇಕ್ ಟಾಪು ನಾಖ್ಹಿಜೈ಼ನ್ ಛ಼ಪಿಗು ಪಹಾಡ್‌ಖ್ಹಾರು ಡೋಳೇಥಿ ಲಪಿಗಯು.
REV 16:21 ಅಜು಼ ಆಬ್‍ಥು ಗಾರಾನೊ ಬಂಡಾನೊ ಪಾಣಿ ರಂಚಾ಼ಯೊ. ಏಕೇಕ್‌ ಗಾರಾನೊ ಬಂಡೊ ಅಡೈವಿಖ್ಹ್‌ ಕಿಲೊಯೆತ್ರೆ ವಜ಼ನ್ ಥು. ಯೊ ಗಾರಾನ ಬಂಡಾನ ವರ್ಖ್ಹಾತ್ನಿ ಖ್ಹತಾಪ್ಣಿ ಜಾ಼ಖ್ಹತ್ ಹುಯೂತೆಖ್ಹಾಜೆ ಯೊ ವರ್ಖ್ಹಾತ್‌ಮ ಖ್ಹಪ್‌ಡ್ಯೂತೆ ಅದ್ಮಿಖ್ಹಾರು ದೇವ್ನ ಗಾಳೆದಿದು.
REV 17:1 ಖ್ಹಾತ್ ಕಟೋರಾವ್ನ ಧರಿರಾಖ್ಯುಥೂತೆ ಖ್ಹಾತ್‌ಜ಼ಣ ದೇವ್‌ದೂತರ್‌ಮ ಏಕ್ಜ಼ಣೊ ಐನ್ ಮನ ಬೋಲ್ಯೊ, “ಹಜ್ಜಾ಼ ಆವ್, ಘಣ ಪಾಣಿಪರ್‌ ಬೆಠೀತೆ ಮೋಟಿ ವ್ಯಭಿಚಾರಿಣಿನ ಹುವಾನು ನ್ಯಾವ್‌ನ ತೀರ್ಪ್‌ನ ತುನ ವತಾಳುಸ್‌.
REV 17:2 ಪಾಪೇಲು ಸಂಬಂದ್ ಕತೊ ಧರ್ತಿನ ರಾಜ಼ವ್‌ಬಿ ಇನಿ ಜೋ಼ಡ್ಮ ವ್ಯಬಿಚಾರ್ ಕರ‍್ಯು ಅಜು಼ ಜಗತ್‌ನು ಅದ್ಮಿಖ್ಹಾರು ಇನ ವ್ಯಬಿಚಾರ್‌ಕರಿ ದ್ರಾಕ್ಷಿನೊರಖ್ಹ್‌ನ ಪೀನ್ ಮೈಕಮ್‌ ಹುಯಿಗು” ಕರಿ ಬೋಲ್ಯೊ.
REV 17:3 ತದೆ ಇನೆ ದೇವ್ನಿ ಆತ್ಮಾಥಿ ಭರೈರ‍್ಹೊಥೋತೆ ಮನ ಪಾಡಿಲೀನ್ ಜ಼ಂಗಳ್‌ಮ ಗಯೊ. ಹಿಜ್ಜಾ಼ ಮೆ ಲಲೇಲಾಲ್ ರಂಗ್‌ನ ಜಾನ್ವರ್‌ಪರ್ ಬೆಠಿಥೀತೆ ಏಕ್‌ ತಯೇಡಾನ ದೇಖ್ಯೊ. ಯೋ ಜಾನ್ವರ್‌ನು ಆಂಗ್‌ತನ್‌ ಅಖ್ಖು ಗಾಳೆ ದ್ಯವಾನು ನಾಮ್‌ಅಖ್ಖು ಭರೈರ‍್ಹೂಥು. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡಾಬಿ ಥು.
REV 17:4 ಯೊ ತಯೇಡ ರಾಯ್‌ಜಾ಼ಮಣ್ಣ ರಂಗ್‌ನ ಪೇರ್ವಾಖ್ಹ್‌ನಾಬಿ ಲಾಲ್‌ಲುಂಗ್ಡಾನ ಫೇರಿರಾಖಿಥಿ; ಖ್ಹೊನ್ನುಖ್ಹರಪ್, ಹಿರಾವ್‌ಥಿ, ಶನ್‌ಗಾರ್ ಹುಯಿರ‍್ಹಿಥಿ. ಅಜು಼ ಯೊ ಇನು ವ್ಯಬಿಚಾರ‍್ನು ಕಚಿಂಡ್‌ಥೀಬಿ ಭರೈರ‍್ಹಾವನು ಖ್ಹೊನ್ನಾನು ಕಟೋರೊ ಧರಿರಾಖಿಥಿ.
REV 17:5 ಇನ ತಾಳ್ವಪರ್, “ಬಾಬೆಲ್‌ಕರಿ ಜ಼ಮೀನ್‌ಪರ್ ಛಾ಼ತೆ ವ್ಯಬಿಚಾರಿಣಿವ್ನಿ ಗಲೀಜ಼್ ಕಾಮ್‌ಕರಾವಾಳಿ ಆಯ” ಕರಿ ನಾಮ್ ಲೀಖೈರ‍್ಹೂಥು.
REV 17:6 ಯೋ ತಯೇಡ ನೀತಿವಾಳನ ಲ್ಹೋಯಿನ ಅಜು಼ ಯೇಸುನ ಖ್ಹಾಜೆ ಸಾಕ್ಷಿದೀನ್ ಮರ‍್ಯಹುಯಾನ ಲ್ಹೋಯಿನ ಪೀನ್ ಕಯೇಪ್ ಹುಯಿರ‍್ಹವಾಳಿನ ದೇಖ್ಯೊ. ಮೇ ಇನ ದೇಖಿನ್ ಘಣು ಆಶ್ಚರ್ಯ ಹುಯೊ.
REV 17:7 ಕತೋಬಿ ಯೋ ದೇವ್‌ದೂತನೆ ಮಾರಿ ಬಾರೇಮ ಬೋಲ್ಯೊ ಶಾತ್‌ಕತೊ ತು ಶನ ಆಶ್ಚರ್ಯ ಕರುಕರಸ್? ಯೋ ತಯೇಡಾನಿ ಬಾರೇಮಾಬಿ, ಇನು ಸವಾರಿ ಕರಾನು ಜಾನ್ವರ್‌ನಿ ಬಾರೇಮಾಬಿ, ಖ್ಹಾತ್ ಮುಡ್‌ಕ್ಯಾ ದಖ್ಹ್‌ ಶಿಂಗ್ಡ ರ‍್ಹವಾನು ಜಾನ್ವರ್‌ನ ಛಾ಼ತೆ ಗಪ್ಲತ್‌ನಿ ವಾತೇನ ಬೋಲಿ ವತಾಳುಸ್‌.
REV 17:8 ಯೋ ಜಾನ್ವರ್‌ ಪಹಿಲಿ ಹಲ್ಲ ಜಿವ್ತುಥು. ಕತೋಬಿ ಹಮ್ಕೆ ಘಣು ವಖ್ಹತ್ ಜಿವ್ತು ಕೊರ‍್ಹಿಶೇನಿ, ಯೊ ಪಾತಾಳ್ನಿ ಗಧಾರ್‌ಮಾಥು ಛ಼ಡಿ ಅಯಿನ್ ನಾಶ್‌ಭಣಿ ಒಳ್ಯುಜಾ಼ಸ್. ಅಜು಼ ಆ ಜಗತ್‌ ಉಬ್‌ಜ್ಯುತೆ ತಪ್‌ಥೂಬಿ ಕಿನು ನಾಮ್ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಲೀಖೈರ‍್ಹುಕೊಯ್ನೀಕಿ, ಇವ್ಣೆ ಯೊ ಜಾನ್ವರ್‌ನ ದೇಖಿನ್ ಆ ಪಹಿಲೆ ಥು, ಹಮ್ಕೆ ಕೊಯ್ನಿ, ಕತೋಬಿ ಅಜು಼ ಖ್ಹಾಮ್ಣೆ ಆವಳು ಛಾ಼ಕ್ರಿ ಆಶ್ಚರ್ಯಕರ‍್ಯು. ಅಜು಼ ಎಕ್ಕಸ್ ಹಲ್ಲ ಜಿವ್ತು ಉಷೆ. ಹಮ್ಕೆ ಯೋ ಜಾ಼ಖ್ಹತ್ ವಖ್ಹತ್ ಜಿವ್ತು ಕೊರ‍್ಹಿಶೇನಿ, ಕತೋಬಿ ಬಿಜೂ಼ಬಿ ಖ್ಹಾಮ್ಣೆ ವಳ್ಯುಆವಸ್.
REV 17:9 ಅನ ಮಾಲುಮ್‌ ಕರಿಲ್ಯಾವಾನ ಗ್ಯಾನ್‌ಬಿ, ಅಕ್ಕಲ್‌ಬಿ ಹೋಣು. ಯೋ ಖ್ಹಾತ್ ಮುಡ್‌ಕ್ಯಾ ಯೊ ತಯೇಡ ಬೆಠೀತೆ ಖ್ಹಾತ್ ಪಹಾಡ್ ಹುಯಿರ‍್ಹೂಸ್. ಯೊ ಖ್ಹಾತ್ ರಾಜ಼ಖ್ಹಾರು ಹುಯಿರ‍್ಹಾಸ್.
REV 17:10 ಅತ್ರೇಸ್ ಕಾಹೆತೆ ಇವ್ಣಾಮ ಪಾಚ಼್ ರಾಜ಼ ಪಡಿಗಯ. ಏಕ್‌ ರಾಜ಼ ಹಮ್ಕೆ ಚ಼ಲವ್‍ಕರಸ್. ಅಜೇಕ್‌ಜ಼ಣೊ ಬಿಜೂ಼ಬಿ ಆಯೊಕೊಯ್ನಿ. ಯೊ ಆಯೋತೊ ಥೋಡ ಹಗಾಮ್ ಖಲಿ ರಾಜ಼್ ಚ಼ಲಾವ್‌ಷೆ.
REV 17:11 ಆನಾಹುಯಿನ್ ಪಹಿಲೆ ರ‍್ಹೀನ್ ಹಮ್ಕೆ ಕೊಂತೆ ಯೊ ಜಾನ್ವರ್‌ ಯೋಸ್ ಆಟ್ನೊ ರಾಜ಼. ಕತೋಬಿ ಯೊ ಹುಯಿರ‍್ಹೋತೆ ಯೋ ಖ್ಹಾತ್ ರಾಜಾ಼ವ್ಮ ಏಕ್ಜ಼ಣೊ ಹುಯಿರ‍್ಹೋಸ್, ಯೊ ನಾಶ್‌ಭಣಿ ಜಾ಼ಶೆ.
REV 17:12 ತುಮೆ ದೇಖ್ಯಾತೆ ಯೋ ದಖ್ಹ್‌ ಶಿಂಗ್ಡಾಖ್ಹಾರು ಬಿಜೂ಼ಬಿ ರಾಜ಼್ ಲೀರಾಖ್ಯುಕೊಂತೆ ದಖ್ಹ್‌ ರಾಜ಼ವ್‌ಖ್ಹಾರು ಹುಯಿರಾಸ್. ಕತೋಬಿ ಯೋ ಖ್ಹಾರು ಜಾನ್ವರ್‌ನಿ ಜೋ಼ಡ್ಮ ಏಕ್‌ ಘಂಟಾಲಗು ರಾಜ್ಯ ಚ಼ಲಾವನ ಇವ್ಣೆ ಅದಿಕಾರ್ ಲಿಶೆ.
REV 17:13 ಇವ್ಣೆ ಎಕ್ಕಸ್ ದಿಲ್‌ವಾಳ ಹುಯಿನ್ ಇವ್ಣಿ ತಾಖತ್ನಾಬಿ ಅದಿಕಾರ್‌ನ ಜಾನ್ವರ್‌ನ ದಿಶೆ.
REV 17:14 ಇವ್ಣೆ ಮೇಂಢಾನು ಚೆಲ್ಕುಹುಯಿರ‍್ಹವಾಳನ ವಿರೋದ್‌ಥಿ ಜಂಗ್ ಭೀಡ್‌ಷೆ. ಕತೋಬಿ ಯೋ ಪ್ರಭುನೊ ಪ್ರಭು ರಾಜಾ಼ನೊ ರಾಜಾ಼ಬಿ ಹುಯಿರ‍್ಹಿಷೇತೆ ಇನಖ್ಹಾಜೆ ಮೇಂಢಾನು ಚೆಲ್ಕು ಇವ್ಣೇಥಿ ಜೈಕಾರ್ ಉಷೆ ಅಜು಼ ದೇವ್ನೆ ಬುಲೈರಾಖವಳುಬಿ ದೇವ್ನೆ ಚೂ಼ಣಿರಾಖ್ಯೋತೆಬಿ, ಅಜು಼ ವಿಶ್ವಾಸ್‌ವಾಳ ಹುಯಿರ‍್ಹೂತೆ ಇನವಾಳು ಮೇಂಢಾನ ಚೆಲ್ಕಾನ ಜೋ಼ಡ್ಮ ವಾಟೊವಾಳು ಹುಯಿರ‍್ಹಿಷೆ.
REV 17:15 ಬಿಜೂ಼ಬಿ ಯೊ ದೇವ್ನದೂತನೆ ಮನ ಶಾತ್ ಬೋಲ್ಯೊಕತೊ,ಯೋ ವ್ಯಬಿಚಾರಿಣಿ ಬೆಠಿಥೀತೆ ಪಾಣಿನ ತುನೆ ದೆಖ್ಯೋನಿ, ಯೊ ಅಖ್ಖು ಜ಼ಗ್‌ಜಾ಼ತ್ನ, ಅದ್ಮಿವ್‌ನ ಟೋಳ್ನ, ದೇಖ್ಹ್‌ನ, ಬೋಲಿಯೇವ್ನ ವತಾಳಸ್‍.
REV 17:16 ಆ ನಾಹುಯಿನ್ ತುನೆ ದೇಖ್ಯೋತೆ ದಖ್ಹ್‌ ಶಿಂಗ್ಡಾಖ್ಹಾರು ಅಜು಼ ಜಾನ್ವರ್‌ನ ದೇಖ್ಯೋನಿ? ಯೋ ಖ್ಹಾರುಸ್ ವ್ಯಭಿಚಾರಿಣಿನ ವಹೇರ್‌ ಕರೀನ್, ಇನ ಖ್ಹದ್ದರ್‌ಕೊಂತೆ ರ‍್ಹವಾಳಿನಿ ಘೋಣಿಬಿ ಲುಂಗ್ಡು ನಾರ‍್ಹವಾಳಿನಿ ಘೋಣಿಬಿ ಕರೀನ್ ಇನಿ ಬೋಟಿನ ಖೈನ್, ಹೈರಿತೆನ ಆಗ್‌ಮ ಬಾಳಿನಾಕ್‌ಷೆ.
REV 17:17 ಶನಕತೊ ದೇವ್ನೆ ಇನಿ ವಚನ್ನ ಚ಼ಲಾವ್ಣು ಕರೀಬಿ, ಇನಿ ಮರ್ಜಿನ ಇವ್ಣೆ ಚ಼ಲಾವನಿ ಘೋಣಿಬಿ ಎಕ್ಕಸ್ ದಿಲ್‌ವಾಳಹುಯಿನ್ ಇವ್ಣಿ ಅದಿಕಾರ್‌ನ ಜಾನ್ವರ್‌ನ ದ್ಯವಾನಾಬಿ ಯೋ ಅಖ್ಖಾನ ಮನ್‌ಮ ಮಿಛಾ಼ಣ್ಯೊಥೊ.
REV 17:18 “ಅಜು಼ ತುನೆ ಯೊ ತಯೇಡಾನಿ ಘೋಣಿ ದೇಖ್ಯೋತೆ ಆ ಮೋಟಿ ನಂಗ್ರಿ ಹುಯಿರ‍್ಹೀಸ್ ಯೊ ಜ಼ಮೀನ್ನ ರಾಜಾ಼ವ್‌ನ ಚ಼ಲಾವನ ಅದಿಕಾರ್‌ ಲೀರಾಖಿಸ್”.
REV 18:1 ಆ ಅಖ್ಖುಹುವಾನ ವಾರ್ ವಿಶೇಷ್ ಅದಿಕಾರ್‌ನೊ ಬಿಜೇಕ್ ದೇವ್‌ನೊ ದೂತ ಸೊರ್ಗಾಥು ಉತ್ರಿನ್‌ ಆವಾನು ಮೇ ದೇಖ್ಯೊ. ಇನಿ ಉಜಾ಼ಖ್ಹ್‌ನಿ ಶಕಥ್ಥಿ ಜ಼ಮೀನ್ನ ಉಜಾ಼ಳು ಮಳ್ಯು.
REV 18:2 ಇನೆ ಜೋ಼ರಾನಿ ಅವಾಜ಼್‌ಥಿ ಚಿಕರ್ತೊಹುಯಿನ್, “ರಡ್ಕಿಗೈ, ರಡ್ಕಿಗೈ, ಬಾಬೆಲ್‌ಕರಿ ಮೋಟಿ ನಂಗ್ರಿ ರಡ್ಕಿಗೈ! ಯೊ ಹುಯಿರ‍್ಹೀತೆ ಭೂತ್‌ನ ರ‍್ಹವಾನಿ ಝ಼ಗೋಬಿ, ಖರಾಬ್ ಆತ್ಮಾವ್‌ನಾಬಿ, ಮೈಲು ಅಜು಼ ಹರೇಕ್ ಥರಾನು ಗಲೀಜ಼್ ಜಿನಾವರ್‌ನಾಬಿ ಮ್ಹಾಳೊ ಹುಯಿರ‍್ಹೀಥಿ.
REV 18:3 ಅಖ್ಖಾಸ್ ದೇಖ್ಹ್‌ನು ತಾಖತ್ತಿ ಇನು ವ್ಯಬಿಚಾರ್ ಕರಿ ಬೋಲಾನು ಖಾರಕ್ನು ದ್ರಾಕ್ಷಿನ ರಖ್ಹ್‌ನ ಪೀದು. ಜ಼ಮೀನ್ನ ರಾಜ಼ವ್‌ಖ್ಹಾರು ಇನಿಜೋ಼ಡೆ ವ್ಯಬಿಚಾರ್‌ ಕರ‍್ಯು. ಇನು ಭೋಗ್‌ನು ಖುಷಿಥಿ ಜ಼ಮೀನ್ನು ಬೇಪಾರಿ ಖ್ಹಾರು ಶೌಕಾರ್ ಹುಯಿಗು ಕರಿ ಬೋಲ್ಯೊ.
REV 18:4 ಸೊರ್ಗಾಥು ಬೋಲಾನು ಅಜೇಕ್ ಅವಾಜ಼್‌ನ ಮೆ ಖ್ಹಮ್‌ಜ್ಯೊ, ಮಾರ ಅದ್ಮಿವೊ ಯೊ ನಂಗ್ರಿನ ಮ್ಹೇಲಿನ್ ಫಾದರ್ ಆವೊ, ಶನಕತೊ ಇನ ಪಾಪ್‌ಮ ವಾಟೊ ಕೊಉಷೂನಿ. ಇನ ಹುವಾನು ನಿಶತ್‌ ತುಮುನ ಕೊಉಷೇನಿ.
REV 18:5 ಇನು ಪಾಪ್‌ಖ್ಹಾರು ಏಕ್‌ಥಿಏಕ್ ಮಳಿನ್ ಆಕಾಶ್ ಛೀಮಯೆತ್ರೆ ಊಚು಼ ಹುಯಿರ‍್ಹುಸ್. ದೇವ್ನೆ ಇನು ಖರಾಬ್‌ಕಾಮ್‌ ಖ್ಹಾರನ ಖ್ಹಯಾಲ್ ಕರಿರಾಖ್ಯೋಸ್.
REV 18:6 ಯೋ ನಂಗ್ರಿ ಬಿಜಾ಼ವ್ನ ದಿದೀತೆ ತಿಮ್ಮಸ್ ತುಮೇಬಿ ಇನ ಪಾಛು಼ ದೆವೊ. ಇನ ಕಾಮ್‍ಖ್ಹಾರಾನ ಬರಬ್ಬರ್‌ಥಿ ಇನ ಬೇಪಟ್ ದೆವೊ. ಇನೆ ಕಲೈದಿದೀತೆ ರಾಛಾ಼ಮ ಇನ ಬೇಪಟ್ ಕಲೈನ್ ದೆವೊ.
REV 18:7 ಯೋ ಇನುಯೋಸ್ ಖ್ಹರೈಲಿನ್ ಭೋಗ್‌ನು ಜಿವ್ಣು ಕರೀಕಿ ಎತ್ರೇಸ್ ತುಮೆ ಇನ ಖ್ಹತಾಪ್ಣಿನ ದುಖ್‌ನ ಇನಾಪರ್ ಲ್ಯಾವೊ. ಕತೋಬಿ ಇನ ದಿಲ್ಮ ಕರಿಲಿದಿಕಿ ಮೇ ರಾಣಿ ಹುಯಿನ್ ಬೇಠಿಸ್, ಮೇ ಮುಂಡಚ್ಚಿ ಕಾಹೆ, ದುಖ್‌ನ ಕದೇಬಿ ಮೆ ದೇಖಿಷಸ್ ಕೊಯ್ನಿಕರಿ ಇನುಯೋಸ್ ಬೋಲಿಲಿದಿ.
REV 18:8 ಇನಖ್ಹಾಜೆ ಖ್ಹತಾಪ್ಣಿ, ಮರಣ್, ಮೋಟೊ ರೋಗ್, ಎಕ್ಕಸ್ ದನ್ಮ ಆವ್‌ಶೆ. ಇನ ತೀರ್ಪ್‌ ದ್ಯವಾಳೊ ಪ್ರಭು ದೇವ್ ಶಕತ್‌ವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ ಯೊ ಹೈರ‍್ಹಿತೆ ಆಗ್‌ಥಿ ನಾಶ್‌ ಹುಯಿಜಾ಼ಶೆ
REV 18:9 ಇನಿ ಜೋ಼ಡೆ ವ್ಯಬಿಚಾರ‍್ನು ಪಾಪ್ ಕರೀನ್ ಇನ ವೈಭೋಗ್‌ಮ ವಾಟೊ ಹುಯಿರ‍್ಹಾತೆ ಜ಼ಮೀನ್ನ ರಾಜ಼ವ್‌ಖ್ಹಾರು ಯೊ ಬಳಾನು ಶೇಜ಼್‌ಥಿ ಉಪ್ಪರ್ ಛ಼ಡಾನ ಧುವ್ವಾನ ದೇಕ್‍ಷೆ. ಯೊ ಮರಾನು ದೇಖಿನ್ ರದನ್ ರ‍್ಹೋಜ಼್‌ನ್ಯಾಬಿ ದುಖ್ ಕರ್ಶೆ.
REV 18:10 ಯೋ ಹಾಲ್ನ ದೇಖಿನ್ ರಾಜ಼ವ್‌ಖ್ಹಾರು ಡರಿನ್ ದೂರ್ ಭೀರಿನ್ “ಅಲಿ ಮೋಟಿ ನಂಗ್ರಿ ಬಾಬೆಲ್ ಖ್ಹಯೇರ್ ತುನ ದೆವಾಯುತೆ ತೀರ್ಪ್ ಎಕ್ಕಸ್ ಘಡೀಮ ಅಯಿಗೂನಿ” ಕರಿ ಪಸ್ತಾವ್‌ಷೆ.
REV 18:11 ಆ ನಾಹುಯಿನ್ ಧರ್ತಿನ ಬೆಪಾರಿಖ್ಹಾರ ಬಾಬೆಲ್‌ನಖ್ಹಾಜೆ ದುಖ್‌ಥಿ ರದನ್ ಕರೀನ್,
REV 18:12 ಅವ್ಣೆ ಖ್ಹೊನ್ನು, ರೂಪು, ಹೀರೊ, ಮುತ್ತ್‌, ಕೋರು ಲುಂಗ್ಡು, ರಾಯಿಜಾ಼ಮಣ್ಣ ರಂಗ್ನು ಲುಂಗ್ಡು, ರೇಖ್ಹಮ್‌ನುಲುಂಗ್ಡು ಅಜು಼ ಲಲೇಲಾಲ್ ಪೇರ್ವಾಖ್ಹ್‌ನಾಬಿ ಅಖ್ಖೀಸ್ ಥರಾನು ಲಾಕ್ಡಾನು ರಾಛು಼, ಅಜು಼ ಹತ್ತಿನದಾತ್ನು ಜಿನಖ್ಹ್‌, ಘಣ ಮೋಲ್ನುಝಾ಼ಡ್, ತಾಂಬು, ಲ್ಹೋಡು, ಅಮೃತಶಿಲೆ ವೇಚು಼ಕರ್ತುಥು.
REV 18:13 ಅಜು಼ ಲೋಂಗ್‌ಪಟು, ಮಖ್ಹಾಲೊ, ಖ್ಹಾಲರ‍್ಯೊ, ರಕ್ತಬೋಳ, ವಾನುತೇಲ್, ದ್ರಾಕ್ಷಿನೊ ರಖ್ಹ್‌, ತೇಲ್, ಕವ್‌ಳೊ ಆಟೊ, ಘವ್‌, ಢಾಂಡು, ಮೇಂಢು, ಘೋಡೊ, ರಥ್, ಗುಲಾಮ್, ಅದ್ಮಿ ಜಾನ್‌ ಅಖ್ಖು, ಆ ಖ್ಹಾರು ಅಪ್ಣ ಜಿನಖ್ಹ್‌ನಲ್ಯಾವಳು ಕೊಯ್ನಿಕರಿ ಬೋಲ್ತುಹುಯಿನ್ ದುಖ್ ಕರ್ಶೆ.
REV 18:14 “ತುನೆ ತರ್‌ಖ್ಹ್ಯೊತೆ ಫಲ್‌ಖ್ಹಾರು ತುನ ಮ್ಹೇಲಿನ್ ಚ಼ಲಿಗಯು. ತಾರು ಅಖ್ಖೂಸ್ ವೈಭೋಗ್‌ಖ್ಹಾರು ಬಿಜು಼ ಖುಷೀನ ಜಿವ್ಣಾನಿ ಶನ್‌ಗಾರ್ ಖ್ಹಾರು ತಾರೇಥಿ ನಾಶ್‌ಹುಯಿಗು. ಯೋ ತುನ ಪಾಛು಼ ಕೆದೇಬಿ ಮಳ್‌ಶೇಸ್ ಕೊಯ್ನಿ”.
REV 18:15 ಯೋ ಖ್ಹಾರು ಜಿನಖ್ಹ್‌ ವೇಚಿನ್ ಇನೇಥಿ ಶೌಕಾರ್ ಹುಯೂಥೂತೆ ಬೇಪಾರಿ ಖ್ಹಾರು ದೂರ್‌ಮ ಭೀರಿನ್ ಯೊ ಹುಯಿರಿತೆನ ಅಜಾ಼ನಿ ಕುರ್‌ಲ್ಹಾಟಿನ ಖ್ಹಾಜೆ ಡರಿನ್ ದುಖ್‌ಥಿ ರದನ್ಯ ಕರ್ತೊಹುಯಿನ್;
REV 18:16 ‘ಹಾಯ್! ಹಾಯ್! ಮೋಟಿ ನಂಗ್ರಿ ತುನ ಕೆಥ್ರಾನಿ ಖರಾಬ್ ಹಾಲತ್! ರಾಯ್‌ಜಾ಼ಮಣ್ಣ ರಂಗ್ನು ಅಜು಼ ಲಲೇಲಾಲ್ ರಂಗ್ನು ಪೆರ್ವಾಖ್ಹ್‌ನ ಫೇರಿಲಿನ್, ಖ್ಹೊನ್ನು, ಹೀರೊ, ಮುತ್ತ್, ಆ ಅಖ್ಖಾಥಿ ಶನ್‌ಗಾರ್ ಹುಯಿರ‍್ಹಿಥೀತೆ ಇನ ಕಿಮ್ಕಿ ಖರಾಬ್ ಹಾಲ್‌ ಚಾ಼ಲಿಗಿ.
REV 18:17 ಎತ್ರು ಧನ್‌ದೌಲತ್‌ಬಿ ಎಕ್ಕಸ್ ಘಡೀಮ ನಾಶ್ ಹುಯಿಗೀನಿ ಕರಿ ಪಶ್ತಾವ್‌ಷೆ. ಅತ್ರೇಸ್ ಕಾಹೆತೆ ಜ಼ಹಾಜ಼್‌ನೊ ಮಾಲಿಕ್ ಖ್ಹಾರು ಅಜು಼ ಇನಾಮ ಜಾ಼ವಾಳೂಬಿ, ಚ಼ಲಾವಾಳುಬಿ, ದರ‍್ಯಾವ್‌ಮ ರಾಬಿನ್ ಜಿವ್ಣು ಕರವಾಳು ಖ್ಹಾರುಸ್ ದೂರ್ ಭೀರಿನ್,
REV 18:18 ಯೊ ಹುಯಿರ‍್ಹೀತೆ ಭುಂಜಾ಼ವನು ಧುವ್ವಾನ ದೇಖಿನ್ ಆ ಮೋಟಿ ನಂಗ್ರಿನ ಸಮಾನ್ ಖಿವು? ಕರಿ ಅವಾಗ್‌ಮಾಂಡ್‌ಷೆ.
REV 18:19 ತದೆ ಇವ್ಣೆ ಮಾಥಪರ್‌ ಮಾಟಿನ ರಂಚಿಲಿನ್ ಚಿಕರ್ತುಹುಯಿನ್, ಹಾಯ್, ಹಾಯ್, ದರ‍್ಯಾವ್‌ಪರ್ ಜಾ಼ವಾಳು ಜ಼ಹಾಜ಼್‌ವಾಳು ಅಖ್ಖೂಬಿ ಇನ ಮೋಲ್ನು ಧನ್‌ ದೌಲತ್‌ಥೀಸ್ ಶೌಕಾರ್ ಹುಯುಥೂನಿ, ಆ ಹೈರ‍್ಹಿತೆ ಎಕ್ಕಸ್ ಘಡೀಮ ನಾಶ್‌ ಹುಯ್ಗೀನಿ’ ಕರಿ ದುಖ್‌ಥಿ ರದನ್‌ಕರ‍್ಯು.
REV 18:20 ಸೊರ್ಗಾಮ ರ‍್ಹವಾಳ ಅದ್ಮಿವೊ, ಅಪೊಸ್ತಲ ಖ್ಹಾರಾವೊ಼, ಪ್ರವಾದಿಖ್ಹಾರವೊ಼, ಯೊ ಹುಯಿರ‍್ಹೀತೆನ ಇನಖ್ಹಾಜೆ ಖುಷಿ ಕರೊ. ಶನಕತೊ ಆ ಹೈರಿತೆ ತುಮುನ ಠಗಾಯ್ತೆ ಇನಖ್ಹಾಜೆ ದೇವ್ನೆ ಇನ ಬರೋಬರ್‌ಥೀಸ್‌ ತೀರ್ಪ್‌ ಕರ‍್ಯೊ.
REV 18:21 ತದೆ ಘಣಿ ಶಕತ್ನ ಏಕ್‌ ದೇವ್‌ದೂತನೆ ದಳಾನಿ ಘಟ್ಟಿನಿತರಾನು ಏಕ್‌ ಮೋಟ ಬಂಡಾನ ಪಾಡಿಲೀನ್ ದರ‍್ಯಾವ್‌ಮ ಫೇಕಿನ್ ಅಮ್‌ಬೋಲ್ಯೊ; ಮೋಟಿ ನಂಗ್ರೀನು ಬಾಬೆಲ್ ಆ ವದೇಖ್ಹ್‌ಥಿ ಫೇಕ್ಶೇಕಿ ಬಿಜು಼ ಕೆದೇಬಿ ದೆಖಾವ್‌ಶೇಸ್‌ ಕೊಯ್ನಿ.
REV 18:22 ಬಾಬೆಲ್ ತಾರಾಮ ಖ್ಹಾರಂಗ ವಾಳುಬಿ, ವಾಜ಼ವಜ಼ಂತ್ರಿ ವಾಳೂಬಿ, ವಾಖ್ಹ್‌ಳಿ ವಜಾ಼ಡವಾಳುಬಿ, ತುತ್ತೂರಿವಾಳು ಆ ಅಖ್ಖಾನು ಅವಾಜ಼್ ಬಿಜು಼ ಕೆದೇಬಿ ಖ್ಹಮಜ಼್‌ಪಡ್‌ಶೆ ಕೊಯ್ನಿ. ಖೆವೀಬಿ ಥರಾನು ಬೇಪಾರಿಬಿ ತಾರಮ ಬಿಜು಼ ಕೆದೇಬಿ ದೆಖಾವ್‌ಶೆ ಕೊಯ್ನಿ. ದಳಾನಿ ಘಟ್ಟೀನು ಅವಾಜ಼್ ತಾರಮ ಅಜು಼ ಕೆದೇಬಿ ಕೊ ಖ್ಹಮಜ಼್‌ಪಡ್‌ಶೇನಿ.
REV 18:23 ದೀವಾನು ಉಜಾ಼ಳು ತಾರಮ ಅಜು಼ ಕೆದೇಬಿ ಉಜಾ಼ಖ್ಹ್‌ ದಿಶೆಕೊಯ್ನಿ. ವ್ಯತುಲ್ಡೊ ವ್ಯತುಲ್ಡೀನು ಗಳು ತಾರಮ ಅಜು಼ ಕೆದೇಬಿ ಖ್ಹಮಜ಼್‌ಮ ಕೊಆವ್‌ಶೇನಿ. ತಾರು ಬೇಪಾರಿ ಖ್ಹಾರು ಜ಼ಮೀನ್‌ಪರ್ ದೌಲತ್‌ವಾಳು ಹುಯಿರ‍್ಹುಥೂನಿ. ತಾರಿ ಜಾ಼ದೂನಿ ಶಕಥ್ಥಿ ಅಖ್ಖಾಸ್ ದೇಖ್ಹ್‌ವಾಳು ಠೈಗೈಗಯು.
REV 18:24 ಪ್ರವಾದಿಖ್ಹಾರಾನು, ದೇವ್ನ ಅದ್ಮಿವ್‌ನು ಲ್ಹೋಯಿ ಅಜು಼ ಜ಼ಮೀನ್‌ಪರ್ ಮರೈಗಯ ಹುಯಾನು ಲ್ಹೋಯಿಬಿ ಇನಮಾಸ್ ಮಳ್ಯುನಿ ಕರಿ ಬೋಲ್ಯೊ.
REV 19:1 ಆ ಹುಯಿಜಾ಼ವನ ಪರ್ ಸೊರ್ಗಾಮ ಮೋಟಿಭೀಡ್‌ಣು ಟ್ಹೌಕಾನಿತರ ಏಕ್‌ ಮೋಟಿ ಅವಾಜ಼್ ಖ್ಹಮ್‌ಜೊ. ಇವ್ಣೆ “ಹಲ್ಲೆಲೂಯ! ಆಖ್ಹ್‌ರೋಬಿ, ಮಹಿಮೆಬಿ, ಶಕತ್‌ಬಿ ಹಮಾರ ದೇವ್‌ಮ ಛಾ಼.
REV 19:2 ಇನು ನ್ಯಾವ್‌ನು ತೀರ್ಪ್‌ಖ್ಹಾರು ಖ್ಹಾಚು಼ಬಿ ನ್ಯಾವ್ನುಬಿ ಹುಯಿರುಸ್.ಅಪ್ಣ ದೇವ್ನೆ ವ್ಯಬಿಚಾರ‍್ನಿ ತಯೇಡಾನ ದಂಡನೆದಿದೊ, ಯೋ ಮೋಟಿ ವ್ಯಬಿಚಾರ‍್ನಿ,ಇನ ಪಾಪೇಲ ಕಾಮ್‍ಥಿ ಧರ್ತಿನ ಗಂಧು ಕರುಕರ್ತಿಥಿ. ಆ ಹೈರಿತೆ ಇನ ಸೇವಕರ್‌ನ ಮರೈನಾಖಿ ದಿದೀತೆ ಇನಖ್ಹಾಜೆ ದೇವ್ನೆಯಿನ ಬದಲ್ ತೀರ್ಪ್‌ದಿದೊ”. ಕರಿ ಬೋಲ್ತೊಹುಯಿನ್,
REV 19:3 ಭೇನೆಹಲ್ಲ, ಹಲ್ಲೆಲೂಯ ಕರಿ ಘಣು ಚಿಕ್ರಿನ್ ಯೋ ಬಳುಕರಸ್ತೆ ಧುವೊ ಜ಼ಗ್‌ಜ಼ಮಾನಮಾಬಿ ಉಪ್ಪರ್ ಅವುಸ್‌ಕರ್‌ಷೆ ಕರಿ ಬೋಲ್ಯು.
REV 19:4 ತದೆ ಸಿಂಹಾಸನ್‌ಪರ್ ಬೆಠೂತೆ ದೇವ್ನ ಚಾರ್‌ ಉಪ್ಪರ್‌ವೀಖ್ಹ್‌ ಜ಼ಣು ಶಾಣೂಬಿ, ಯೋ ಚಾರ್ ಜೀವಿಬಿ ಆಡ್‍ಪಡಿನ್ ಆರಾದನೆ ಕರ್ತುಹುಯಿನ್, ಆಮೆನ್, ಹಲ್ಲೇಲೂಯಕರಿ ಬೋಲ್ಯು.
REV 19:5 ಇನಪಾರ್ ಸಿಂಹಾಸನ್ ಭಣೀಥು ಏಕ್‌ ಟಹುಕೊ ಆಯು. ಯೋ ಅವಾಜ಼್‌ನೆ, “ಅಪ್ಣ ದೇವ್ನು ಚಾ಼ಕ್ರಿಕರಾವಾಳ ಅದ್ಮಿವೊ ದೇವ್ನ ಧನ್ಯವಾದ್ ಕರ‍್ಯು. ಇನೇಥಿ ಡರಾವಾಳ ನ್ಹಾನ, ಮೋಟಾವೊ ಇನ ಧನ್ಯವಾದ್ ಕರೊ”. ಕರಿ ಬೋಲ್ಯು.
REV 19:6 ಇನಾವಾರ್‌ ಮನ ಬಿಜೇಕ್ ಅವಾಜ಼್ ಖ್ಹಮಜ್‍ಪಡ್ಯು ಯೋ ಘಣುಮೋಟು ಅದ್ಮಿನ ಭೀಡ್‌ಣು ಅವಾಜ಼್ ಮೋಟ ಪಾಣಿನು ಕಹಾರ್‌ನಿ ತರಾಬಿ ಜಾ಼ಖ್ಹತ್ ಘಲಾರನ ಅವಾಜ಼್‌ನಿತರ ಥೂತೆ ಏಕ್‍ ಅವಾಜ಼್‌ನ ಖ್ಹಮ್‌ಜೊ ಯೋ, ಹಲ್ಲೆಲೂಯ, ಮಹಾನ್ ಶಕತ್‌ವಾಳೊ ದೇವ್ ಹುಯಿರೋತೆ ಅಪ್ಣೊ ಪ್ರಭು ಆಳ್‌ಷೆ.
REV 19:7 ಮೇಂಢಾನು ಚೆಲ್ಕು ಹುಯಿರ‍್ಹವಾಳನು ವ್ಯಹಾನಿ ವಖ್ಹತ್ ಐಗಿಕರಿ ಶಂತೋಖ್ಹ್‌ ಕರಿಯೆ; ಖುಷಿ ಕರಿಯೆ ಇನ ಮಹಿಮೆಕರಿಯೆ, ಶನಕತೊ ಇನ ವ್ಯಹಾ ಕರಾವಳಿ ಕವಾರಿ ಇನುಯೋಸ್ ಖ್ಹವಾರಿರಾಖಿಸ್‌ಕರಿ ಬೋಲ್ಯು.
REV 19:8 ಉಜಾ಼ಖ್ಹ್‌ನುಬಿ ಶುದ್ದಬಿ ಕವ್‌ಳು ಕೋರುಲುಂಗ್ಡು ಫೇರಾನಯಿನ ವಾರ್‌ಖ್ಹೊ ಮಳ್ಯು. ಯೋ ಕೋರುಲುಂಗ್ಡು ಕತೊ ದೇವ್ನು ಅದ್ಮಿವ್‌ನು ನ್ಯಾವ್‌ನು ಕಾಮ್‌ಖ್ಹಾರುಸ್‌ ಹುಯಿರುಸ್.
REV 19:9 ಅತ್ರೇಸ್ ಕಾಹೆತೆ ಇನೆ ಮಾರೇಥಿ ವಾತೆ ಬೋಲ್ತೊಹುಯಿನ್ ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ವ್ಯಹಾನ ಮಿಝ಼್‌ವಾನ್‌ಮ ಬುಲೈರ‍್ಹಾವಳು ಧನ್ಯರ್ ಕರಿ ಬೋಲಾನು ಲೀಖ್‌ಕರಿ ಬೋಲಿನ್, “ಆ ಖ್ಹಾರಿವಾತೆ ದೇವ್ನು ಖ್ಹಾಚು಼ ವಚನ್ ಹುಯಿರುಸ್.” ಕರಿ ಬೋಲ್ಯೊ.
REV 19:10 ತದೆ ಮೇ ಇನ ಆರಾದನೆ ಕರ್ನುಕರಿ ಇನ ಪಗ್‍ಪರ್ ಅಡ್‌ಪಡ್ಯೊ. ಕತೋಬಿ ದೇವ್ನ ದೂತಾನೆ, ಮನ ಅಮ್ ಆರಾದನೆ ನಕೊಕರ್. ಯೇಸುನ ಖ್ಹಾಚ಼ನ ಲೀರಾಖ್ಯಾಸ್ತೆ ತಾರಿನಿತರಾಬಿ ತಾರ ಭೈಯೇನಿತರಬಿ ಮೇಬಿ ಏಕ್‌ ಚಾ಼ಕ್ರಿವಾಳೊ. ಇನಖ್ಹಾಜೆ ದೇವ್ನ ಆರಾದನೆಕರ್, ಯೇಸುನಿ ಸಾಕ್ಷಿಸ್‌ ಪ್ರವಾದನೆನು ಆತ್ಮಕರಿ ಬೋಲ್ಯೊ.
REV 19:11 ಇನಪಾರ್ ಪರ್‌ಲೋಕ್ ನಿಕ್ಳಿರ‍್ಹಾವನು ಮೇ ದೇಖ್ಯೊ. ತದೆ ದೇಕ್, ಧೋಳೊ ಘೋಡೊ ಮನ ದೆಖಾಯು. ಇನಾಪರ್‌ ಬೆಠೊರ‍್ಹವಾಳಾನ ವಿಶ್ವಾಸ್‌ವಾಳೊ, ಖ್ಹಾಚೊ಼ಕರಿ ನಾಮ್. ಯೊ ನೀತಿಥಿ ನ್ಯಾವ್‌ನ ಫೇಡವಾಳೊ, ನೀತಿಥಿ ಜಂಗ್‌ಭೀಡವಾಳೊ ಹುಯಿರೊಸ್.
REV 19:12 ಇನ ಭೇ ಡೋಳ ಆಗ್‍ನಿ ಝ಼ಲ್‌ಪಟ್‍ನಿತರ ಛಾ಼. ಇನ ಮಾಥಾಪರ್ ಕೈಯೆಕ್ಕಿ ಕಿರೀಟ್‌ಖ್ಹಾರು ಛಾ಼, ಇನ ಏಕ್‌ ನಾಮ್ ಲೀಖೈದೆವೈರ‍್ಹೂಸ್, ಯೊ ಇನ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ ಕೊರಿಷೇನಿ.
REV 19:13 ಯೋ ಲ್ಹೋಯಿಮ ಭಿಗೈರ‍್ಹವಾನು ಲುಂಗ್ಡಾನ ಫೇರಿರಾಖ್ಯೊಥೊ. ಇನು ನಾಮ್ ದೇವ್ನು ವಚನ್‍ಕರಿ.
REV 19:14 ಸೊರ್ಗಾನು ಸಿಪಾಯಿಖ್ಹಾರು ಧೋಳ ಘೋಡಾಪರ್ ಬೇಶಿನ್ ಇನ ಪೀಠೆ ವಳ್ಯಾವ್ತುಥು. ಇವ್ಣೆ ಶುದ್ದ ಪೇರ್‌ವಾಖ್ಹ್‌ಬಿ, ಖ್ಹಾಜ಼್‌ನುಥೂತೆ ಕವ್‌ಳು ಕೋರುಲುಂಗ್ಡು ಫೇರಿರಾಖ್ಯುಥು.
REV 19:15 ಜ಼ಗ್‌ಜಾ಼ತ್ನ ಕತ್ರಾನಖ್ಹಾಜೆ ಇನ ಮ್ಹೋಡೇಖ್ಹು ಚಾ಼ಲ್ತಿ ತಲ್ವಾರ್‌ ನಿಕ್ಳಿಆವಾಸ್. ಯೊ ಇವ್ಣುನ ಲ್ಹೋಡಾನ ಡಂಡೇಥಿ ಆಳ್‌ಷೆ. ಸರ್ವಶಕತ್‌ನೊ ಹುಯಿರೋತೆ ದೇವ್ನಿ ಘಣಿ ಮೋಟಿ ಖೀಜ಼್‌ಕರಿ ಬೋಲಾನ ದ್ರಾಕ್ಷಿನ ಬಾನೇಮ ರ‍್ಹವಾಳನ ಖುಂದ್ಲಿನಾಕ್ಷೆ.
REV 19:16 ಇನ ಲುಂಗ್ಡಾಪರ್‌ಬಿ, ಟಾಂಗ್‌ಪರ್ಬಿ, “ರಾಜಾ಼ನೊ ರಾಜಾ಼ಬಿ ಪ್ರಭುನೊ ಪ್ರಭು” ಕರಿ ನಾಮ್ ಲಿಖೈರ‍್ಹುಸ್.
REV 19:17 ಇನಪಾರ್ ಏಕ್‌ ದೇವ್‌ದೂತನೆ ಚಾ಼ಂದ್‌ಪರ್ ಭಿಯುರ‍್ಹವಾನು ದೇಖ್ಯೊ. ಯೊ ಊಚ಼ ಗಳೇಥಿ ಚಿಕ್ರಿನ್ ಆಕಾಶ್‌ಮ ಉಡಾವಳ ಅಖ್ಖಾಸ್ ಜಿನಾವರ್‌ನ, ಆವೊ, “ದೇವ್ ಕರವ್‌ಕರಾಸ್ತೆ ಮೋಟಿ ಮಿಝ಼್‌ವಾನ್ನ ಖಾಣನ ಮಳಿನ್ ಖಾವೊಕರಿ ಬೋಲುಕರ್ತೊಥೊ.
REV 19:18 ರಾಜ಼ವ್ನಿ ಬೋಟಿನಾಬಿ, ಶಿಪಾಯ್ನ ಮೋಟಾನಿ ಬೋಟಿನಾಬಿ, ಅಜು಼ ಶಿಪಾಯ್ನ ಬೋಟೀನ, ಘೋಡಾವ್ನಿ ಬೋಟೀನ, ಘೋಡಾನು ಸವಾರಿವ್ನ ಬೋಟೀನ, ಛುಟ್ಕಾರ್ ಹುಯಿರ‍್ಹವಾಳನು, ಗುಲಾಮ್‌ಖ್ಹಾರನು, ನ್ಹಾನಾವ್ನು ಅಜು಼ ಮೋಟಾವ್ನು ಬೋಟೀನ ಖಾವನ ಆವೊ” ಕರಿ ಬೋಲ್ಯೊ.
REV 19:19 ತದೆ ಯೊ ಜಾನ್ವರ್‌ಬಿ, ಜ಼ಮೀನ್ನ ರಾಜ಼ವ್‌ಬಿ, ಇವ್ಣ ಶಿಪಾಯಿಖ್ಹಾರೂಬಿ ಯೊ ಘೋಡಾಪರ್ ಬೆಠೊರ‍್ಹವಾಳನಪರ್ ಅಜು಼ ಇನ ಶಿಪಾಯ್ನ ಉಪ್ಪರ್‌ಬಿ ಜಂಗ್ ಭೀಡಾನಖ್ಹಾಜೆ ಮಳಿನ್ ಐರ‍್ಹಾವನು ದೇಖ್ಯೊ.
REV 19:20 ತದೆ ಯೊ ಜಾನ್ವರ್‌ನು ಧರಿಲಿದು. ಅತ್ರೇಸ್ ಕಾಹೆತೆ ಜಾನ್ವರ್‌ ಭಣೀಥು ಅದ್ಭುತ್ ಕಾಮ್‌ಖ್ಹಾರು ಕರೀನ್, ಜಾನ್ವರ್‌ನು ಖ್ಹಣೇದ್ ನಖಾಯಹುಯನ, ಅಜು಼ ಇನ ಮೂರತ್ನ ಆರಾದನೆ ಕರವಾಳನ ಪೊಖ್ಹ್‌ಲೈರಾಖ್ಯೊಥೊತೆ ಯೊ ಝೂ಼ಟುಪ್ರವಾದಿಬಿ ಇನ ಜೋ಼ಡೆ ಧರೈಗಯೊ. ಯೋ ಭೇಜ಼ಣಾನ ಜಾನ್ನಖ್ಹಮೇದ್‌ ರಂಜ಼ಕ್‌ಥಿ ಬಳಾನು ಆಗ್ನ ತಲಾವ್ಮ ಫೇಕ್ಯು.
REV 19:21 ಇವ್ಣು ಶಿಪಾಯಿಖ್ಹಾರನ, ಘೋಡಾಪರ್ ಬೆಠೊರ‍್ಹವಾಳಾನ ಬಾಕೇಥಿ ಆಯೂತೆ ಬೇಮ್ಹೋಡಾನಿ ತಲ್ವಾರ್‌ಥಿ ಮರೈಗಯು, ಅಜು಼ ಜಿನಾವರ್‌ಖ್ಹಾರು ಇವ್ಣು ಬೋಟಿನ ಪೇಟ್‌ಭರಿನ್ ಖಾದು.
REV 20:1 ತದೆ ದೇವ್‌ದೂತನೆ ಪಾತಾಳ್ನ ಬೀಗಾನು ಕೀಲಿನ ಅಜು಼ ಮೋಟಿಖ್ಹಿ ಖ್ಹಂಕಳ್‌ನ ಹಾತ್ಮ ಧರಿಲೀನ್ ಸೊರ್ಗಾಥು ಉತ್ರಿನ್ ಆವಾನು ದೇಖ್ಯೊ.
REV 20:2 ಯೋ ದೇವ್ನ ದೂತಾನೆ ಕುಟ್‌ಣ್ಯೊಬಿ ಶೈತಾನ್‍ಬಿ, ಹುಯಿರೋತೆ ಜೂ಼ನೊ ಖ್ಹಾಪ್ ಕತೊ ಅರ್ಝ಼ನ ಧರೀನ್ ಹಜಾ಼ರ್ ವರಖ್ಹ್‌ಲಗು ಕೋಂಡಿರಾಖ್ಯೋಥೊ.
REV 20:3 ಯೋ ಹಜಾ಼ರ್ ವರಖ್ಹ್ ಖತಮ್ ಹುವಾಲಗು ಬಿಜೂ಼ಬಿ ಅದ್ಮಿವ್‌ನ ಠಗಾವ್ಣುನಾತೆಯಿಮ್ ದೇವ್ನ ದೂತಾನೆ ಇನ ಪಾತಾಳ್ಮ ಧಕೇಲಿನ್ ದರ‍್ವಾಜು಼ ಲಗಾಡಿನ್ ಇನ ಮುದ್ರೊಮಾರ‍್ಯೊ ಯೋ ಹಜಾ಼ರ್ ವರಖ್ಹ್ ನಿಕ್ಳಾದಿನ್, ಥೋಡ ಹಗಾಮ್‌ ಇನಛುಟ್ಕಾರ್ ಮಳ್‌ಶೆ.
REV 20:4 ಇನಪಾರ್ ಸಿಂಹಾಸನ್‌ಖ್ಹಾರು ದೇಖ್ಯೊ. ಯೋ ಖ್ಹಾರಪರ್ ಬೆಠೊರ‍್ಹವಾಳಾನ ತೀರ್ಪ್‌ಕರಾನಿ ಅದಿಕಾರ್ ದೆವಾಯು. ಅತ್ರೇಸ್ ಕಾಹೆತೆ ಯೇಸುನಿ ಸಾಕ್ಷಿನ ಖ್ಹಾಜೇಥಿಬಿ,ದೇವ್ನ ವಚನ್ನಖ್ಹಾಜೇಥಿಬಿ ಮುಂಡ್ ರ‍್ಹೇಖ್ಹಾವವಳಾನು ಆತ್ಮವ್‌ನಾಬಿ, ಜಾನ್ವರ್‌ಬಿ, ಇನ ಮೂರತ್ನ ಆರಾದನೆ ಕೋಕರ‍್ಯುಂತೆ ಇವ್ಣ ತಾಳ್ವಪರ್ ಅಜು಼ ಹಾತ್‌ಪರ್ ಇನು ಖ್ಹಣೇದ್ ನಖಾಯುಕೊಂತೆ ಇವ್ಣುನ ದೇಖ್ಯೊ.ಇವ್ಣೆ ಪಾಛು಼ ಜಿವ್ತು ಉಠೀನ್ ಹಜಾ಼ರ್ ವರಖ್ಹ್ ಕ್ರಿಸ್ತನ ಜೋ಼ಡ್ಮ ಆಳ್‌ಷೆ.
REV 20:5 ಮರ‍್ಯುಥೂತೆ ಬಿಜು಼ಖ್ಹಾರು ಯೋ ಹಜಾ಼ರ್ ವರಖ್ಹ್ ಖತಮ್ ಹುವಾಲಗು ಜಿವ್ತು ಕೋಹುಯೂನಿ ಆಸ್ ಪಹಿಲು ಪಾಛು಼ ಜಿವ್ತುಹುವಾನು.
REV 20:6 ಪಹಿಲ ಪಾಛು಼ ಜಿವ್ತುಹುಯಿನ್ ಉಠಾಮ ಮಳಿಹುಯು ಧನ್ಯರ್‌ಬಿ ಅಜು಼ ಘಣು ಆಶೀರ್ವಾದ್‌ಬಿ ಹುಯಿರ‍್ಹೂಸ್. ಅಥ್ರಾನವಾಳಪರ್ ಬೇನಿ ಮರಣ್ಣ ಅದಿಕಾರ್ ಕೊಯ್ನಿ. ಕತೋಬಿ ಇವ್ಣೆ ದೇವ್‍ನಾಬಿ ಕ್ರಿಸ್ತನಾಬಿ,ಯಾಜಕವ್‌ಹುಯಿನ್,ಕ್ರಿಸ್ತನಿ ಜೋ಼ಡ್ಮ ಯೋ ಹಜಾ಼ರ್ ವರಖ್ಹ್ ಆಳ್‌ಷೆ.
REV 20:7 ಯೋ ಹಜಾ಼ರ್‌ ವರಖ್ಹ್ ಖತಮ್ ಹುಯಿಜಾ಼ವದಿನ್ ಶೈತಾನ್ನ ಜೇಲ್‌ಮಾಥು ಛುಟ್ಕಾರ್‌ವುಶೆ.
REV 20:8 ಯೋ ಭಾರ್‌ ಐನ್ ಜ಼ಮೀನ್ನ ಚಾರ‍್ಹೆ ಆಡಿಮ ಛಾ಼ತೆ ಅಖ್ಖಾಸ್ ದೇಖ್ಹ್‌ನ ಠಗೈನ್ ಗೋಗ್ ಅಜು಼ ಮಾಗೋಗ್ ಕರಿ ಅದ್ಮಿನ ಝೂ಼ಂಡ್‌ನ ಪೊಖ್ಹ್‌ಲೈಲೀನ್ ಜಂಗ್‌ನ ಮಳಾವ್‌ಷೆ. ಇವ್ಣು ಗಣ್ತಿ ದರ‍್ಯಾವ್ನು ರೇತ್ನಿತರ ರಿಶೆ.
REV 20:9 ಇವ್ಣೆ ಜ಼ಮೀನ್‌ಖ್ಹಾರು ಫೈಲೈಜೈ಼ನ್ ದೇವ್ನು ಅದ್ಮಿನ ಟಾಂಡಾನಾಬಿ ಪ್ಯಾರ್‌ನ ನಂಗರ್‌ನಾಬಿ ಕೋಂಡಿಲಿಷೆ. ಕತೋಬಿ ಸೊರ್ಗಾಥು ಆಗ್ ಉತ್ರಿಅಯಿನ್ ಇವ್ಣುನ ಬಾಳಿನಾಕ್‌ಷೆ.
REV 20:10 ಅತ್ರೇಸ್ ಕಾಹೆತೆ ಇವ್ಣುನ ಠಗಾಯೊತೆ ಶೈತಾನ್ ಆಗ್ ರಂಜ಼ಕ್‌ಖ್ಹಾರು ಲಾಗುಕರಾನ ತಲಾವ್ಮ ನಾಖಿದಿದು ಹಿಜ್ಜಾ಼ ಜಾನ್ವರ್‌ಬಿ ಝೂ಼ಟುಪ್ರವಾದಿ ಖ್ಹಾರೂಬಿ ಹಿಜ್ಜಾ಼ ಥು. ಇವ್ಣೆ ರಾತ್‌ದನ್ ಜ಼ಗ್‌ಜ಼ಮಾನಮಾಬಿ ಖ್ಹತಾಪ್ಣಿ ಪಡುಕರ್ಷೆ.
REV 20:11 ಇನಪಾರ್ ಧೋಳುಫಟ್ ಥೂತೆ ಮೋಟಿ ಸಿಂಹಾಸನ್‌ಬಿ ಇನಪರ್ ಬೆಠೊರ‍್ಹಾವಳನಾಬಿ ದೇಖ್ಯೊ.ಇನಖ್ಹಾಮ್ಣೇಥು ಸೊರ್ಗ ಧರ್ತಿ ನಾಶಿಗಯು. ಕತೋಬಿ ಇವ್ಣುನ ಜಾ಼ವನ ಝಗೋಕೋಥೂನಿ.
REV 20:12 ಅತ್ರೇಸ್ ಕಾಹೆತೆ ಮರ‍್ಯುಹುಯು ನ್ಹಾನು ಮೋಟು ಖ್ಹಾರುಸ್ ಸಿಂಹಾಸನ್ನ ಖ್ಹಾಮ್ಣೆ ಬೆಠುರಾವನು ದೇಖ್ಯೊ. ತದೆ ಪುಸ್ತಕ್ ಅಖ್ಖೂಸ್ ಛೋ಼ಡಾಯು. ಜಾನ್ನ ಹಕ್‌ವಾಳಾನಿ ಪಟ್ಟಿ ಕರಿ ಅಜೇಕ್ ಪುಸ್ತಕ್‍ಬಿ ಛೋ಼ಡಾಯು.ಆ ಪುಸ್ತಕ್‌ಮ ಲೀಖೈರ‍್ಹೂಸ್ತೆ ಪರಕ್ಮ ಯೋ ಮರ‍್ಯುಹುಯು ಖ್ಹಾರನ ಇವ್ಣು ಇವ್ಣು ಕಾಮ್ ಕಿಮ್ಕಿ ತಿಮ್ಮಸ್ ತೀರ್ಪ್‌ಹುಯು.
REV 20:13 ದರ‍್ಯಾವ್ ಇನಾಮ ಮರ‍್ಯುಥೂತೆ ಅದ್ಮಿನ ದಿದು. ಮರಣ್‌ಬಿ ಪಾತಾಳ್‌ನೆ ಇನಾಮ ಮರ‍್ಯುಥೂತೆ ಅದ್ಮಿಖ್ಹಾರನ ದಿದು. ಹರೇಕ್ ಜ಼ಣಾನಾಬಿ ಇವ್ಣು ಕಾಮ್ನಿ ಪರಕ್ಮಾಸ್ ತೀರ್ಪ್‌ಹುಯು.
REV 20:14 ಇನಪಾರ್ ಮರಣ್‌ಬಿ ಪಾತಾಳ್‌ನಾಬಿ ಆಗ್ನ ತಲಾವ್ಮ ಭಿರ್ಕಾಯು. ಯೊ ಆಗ್ನು ತಲಾವಸ್ ಬೇನಿ ಮರಣ್.
REV 20:15 ಯೋ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುನಾಮ್‍ ಲೀಖೈರ‍್ಹಾವನು ದೆಖಾಯು ಕೊಯ್ನಿಕಿ ಇನ ಆಗ್ನ ತಲಾವ್ಮ ಭಿರ್ಕಾಯು.
REV 21:1 ಇನ ಪಾಛ಼ಳ್ ಮೆ ನವು ಸೊರ್ಗ ಅಜು಼ ಜ಼ಮೀನ್ನ ದೇಖ್ಯೊ. ಪಹಿಲೇನು ಆಕಾಶ್ ಅಜು಼ ಪಹಿಲೇನು ಜ಼ಮೀನ್‌ಕೊಂತೆ ಹುಯಿಗಯು. ಹಿಜ್ಜಾ಼ ದರ‍್ಯಾವ್‍ಬಿ ಕೋಥೂನಿ.
REV 21:2 ಅತ್ರೇಸ್ ಕಾಹೆತೆ ಸೊರ್ಗಾಥು ಪರಿಶುದ್ ನಂಗರ್ ಯೆರೂಸಲೇಮ್ ದೇವ್‌ಕಂಥು ಉತ್ರಿ ಆವನು ಮೇ ದೇಖ್ಯೊ. ಯೋ ಇನ ಬಾವ್ರಿನಖ್ಹಾಜೆ ತಯಾರ್ ಹುಯಿರ‍್ಹವಾಳಿ ವ್ಯತುಲ್ಡಿನಿ ಘೋಣಿ ಶನ್‌ಗಾರ್ ಹುಯಿರ‍್ಹುಥು.
REV 21:3 ಆ ನಾಹುಯಿನ್ ಸಿಂಹಾಸನ್‌ಥು ಏಕ್‌ ಮೋಟು ಅವಾಜ಼್ ಮೆ ಖ್ಹಮ್‌ಜೊ. ಯೊ ಅವಾಜ಼್ ದೇಖೊ, ದೇವ್ನು ಘರ್‌ ಅದ್ಮಿನಿ ಜೋ಼ಡ್ಮ ಛಾ಼. ಯೊ ಇವ್ಣಿ ಜೋ಼ಡ್‌ಮರ‍್ಹಿಷೆ. ಇವ್ಣೆ ಇನವಾಳ ಹುಯಿರ‍್ಹಿಷೆ ಅಜು಼ ಯೊ ಇವ್ಣೊ ದೇವ್ ಹುಯಿರ‍್ಹಿಷೆ.
REV 21:4 ಯೊ ಇವ್ಣ ಆಂಝಾ಼ನ ನೂಛಿನಾಕ್ಷೆ. ಹಿಜ್ಜಾ಼ ಪಾಛು಼ ಮರಣ್ ರ‍್ಹಿಶೆಕೊಯ್ನಿ, ಪಾಛು಼ ದುಖ್ ರ‍್ಹಿಶೆಕೊಯ್ನಿ, ಖ್ಹರಪ್‌ಗೋಳ್‌ ಕೊರ‍್ಹಿಶೇನಿ, ಅಜು಼ ವದೇಖ್ಹೊ ಕೊರ‍್ಹಿಶೇನಿ ಜೂ಼ನೊ ಮಾರಗ್‌ಖ್ಹಾರು ಚ಼ಲಿಗಯು” ಕರಿ ಬೋಲ್ಯು.
REV 21:5 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ದೇಖ್ ಮೇ ಖ್ಹಾರುಸ್ ನವೇಥಿ ಉಬ್‌ಜಾ಼ವುಸ್‌” ಕರಿ ಬೋಲ್ಯೊ. ಅಜು಼ ಏಕ್‌ ಜ಼ಣಾನೆ ಮನ, ತೂ ಅನ ಲೀಕ್. ಶನಕತೊ ಆ ವಚನ್‌ಖ್ಹಾರು ಖ್ಹಾಚು಼ಬಿ ವಿಶ್ವಾಸ್‌ ಕರಖ್ಹರ್ಕೂಬಿ ಹುಯಿರ‍್ಹುಸ್” ಕರಿ ಬೋಲ್ಯೊ.
REV 21:6 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ಅಖ್ಖೂಸ್ ಕರಿಹುಯ್ಗು; ಮೇಸ್ ಪಹಿಲೋಬಿ, ಖ್ಹರ್ತಿಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೋಸ್. ತರ್ಖ್ಹವಾಳನ ಜಾನ್ನು ಪಾಣಿನೊ ಚೇಜ಼್‌ಭಾರನ ಮೋಲ್‌ಕೊಂತೆ ಫುಗಟ್‍ಥಿ ಪಿಯಾನ ದಿಶ್.
REV 21:7 ಜೂತವಾಳನ ಆ ಖ್ಹಾರುಸ್ ಮಳ್‌ಶೆ. ಮೇ ಇನ ದೇವ್ ಹುಯಿರ‍್ಹಿಶ್. ಯೊ ಮನ ಛಿಯ್ಯೊ ಹುಯಿರ‍್ಹಿಶೆ.
REV 21:8 ಕತೋಬಿ ಡರ್‌ಪೋಕ್‌ಖ್ಹಾರು, ವಿಶ್ವಾಸ್‌ಕೊಂತೆ ಖ್ಹಾರು, ಗಲೀಜ಼್ ಕಾಮ್ ಕರವಾಳು, ಖೂನಿಖ್ಹಾರು, ವ್ಯಬಿಚಾರ್ ಕರವಾಳು, ಜಾ಼ದುಕರಾವಳು, ಮೂರತ್ನ ಆರಾದನೆ ಕರವಾಳು, ಅಖ್ಖೂಸ್ ಜ್ಹೂ಼ಟು ಬೋಲವಾಳು ಅವ್ಣುನ ಮಳ್‌ಶೇತೆ ವಾಟೊ ಆಗ್ ರಂಜ಼ಕ್‌ಥಿ ಬಳ್ವಾನು ತಲಾವಸ್; ಯೋ ಬೇನು ಮರಣ್” ಕರಿ ಮನ ಬೋಲ್ಯೊ.
REV 21:9 ಖ್ಹರ್ತಿನು ಖ್ಹಾತ್ ಖ್ಹತಾಪ್ಣಿಥಿ ಭರೈರುತೆ ಖ್ಹಾತ್ ಕಟೋರವ್ನ ಧರಿರಾಖ್ಯುತೆ ಖ್ಹಾತ್‌ಜ಼ಣ ದೇವ್‌ದೂತರ್‌ಮ ಏಕ್‍ಜ಼ಣೊ ಐನ್ ವಾತೆ ಬೋಲ್ತೊಹುಯಿನ್, “ಮಾರಿ ಜೋ಼ಡ್ಮ ಆವ್, ಮೇಂಢಾನ ಚೆಲ್ಕಾನ ಬಾವಣ್‍ ಹುವಾಳಿ ವ್ಯತುಲ್ಡಿನ ತುನ ವತಾಳುಸ್‌” ಕರಿ ಬೋಲ್ಯೊ.
REV 21:10 ಯೊ ದೇವ್ನದೂತನೆ ಪವಿತ್ರಾತ್ಮಾಥಿ ದಾಬುಕ್ಮ ಥೋತೆ ಮನ, ಘಣೊಮೋಟೊ ಅಜು಼ ಊಚೊ಼ ಪಹಡ್‌ಕನ ಲೀಜೈ಼ನ್, ಪರಿಶುದ್ ಖ್ಹಯೇರ್ ಯೆರೂಸಲೇಮ್, ಸೊರ್ಗಮಾಥು ದೇವ್‌ಕಂಥು ಉತ್ರಿ ಉಳ್ಯಾವತೆ ಯೊ ಮನ ವತಾಳ್ಯೊ.
REV 21:11 ಯೋ ಖ್ಹಯೇರ್ ದೇವ್ನಿ ಶಕಥ್ಥಿ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಅಜು಼ ಝ಼ಗೇಗುಕರಾತೆ ವಜ್ರನಿತರ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಘಣ ಮೋಲ್ನ ಐರಾನಿತರ ಜ಼ಮ್ಕು ಕರ್ತುಥು.
REV 21:12 ಯೋ ಖ್ಹಯೇರ‍್ನ ಊಚು಼ ಭೀತ್ ತು. ಯೋ ಅಖ್ಖಾ ಬಾಕಲ್‍ಕನ ದೇವ್‌ದೂತರ್‌ ಥಾ. ಅಖ್ಖಾನ ಬಾಕಲ್‌ನ ಉಪ್ಪರ್ ಇಸ್ರಾಯೇಲ್‌ನು ಭಾರ ಖೂಮ್ನು ನಾಮ್ ಲೀಖೈರ‍್ಹೂಥು.
REV 21:13 ಪೂರಬ್ ದಿಕ್ಮ ತೀನ್ ಬಾಕಲ್, ಉತ್ತರ್ ದಿಕ್ಮ ತೀನ್ ಬಾಕಲ್, ದಕ್ಷಿಣ್ ದಿಕ್ಮ ತೀನ್ ಬಾಕಲ್, ಪಶ್ಚಿಮ್ ದಿಕ್ಮ ತೀನ್ ಬಾಕಲ್‌ಥು.
REV 21:14 ಯೋ ಖ್ಹಯೇರ‍್ನು ಭೀತ್‌ನ ಭಾರ ಹದಿಪಾಯನುಬಂಡೊ ಥು. ಇನಪರ್ ಮೇಂಢಾನು ಚೆಲ್ಕಾನು ಭಾರಜ಼ಣ ಅಪೊಸ್ತಲರ‍್ನು ನಾಮ್ ಥು.
REV 21:15 ಮಾರೇಥಿ ವಾತೆ ಬೋಲು ಕರ್ತೊಥೋತೆ ದೂತನೆ ಯೊ ಖ್ಹಯೇರ್‌ನಾಬಿ ಇನ ಬಾಕಲ್ನಾಬಿ ಅಜು಼ ಇನು ಭೀತ್‌ನ ಆಳ್ತಿಕರಾನಖ್ಹಾಜೆ ಇನ ಹಾತ್ಮ ಖ್ಹೊನ್ನಾನೊ ಆಳ್ತಿನೊಲಠ್ಠೊ ಧರಿರಾಖ್ಯೋಥೊ.
REV 21:16 ಯೋ ಖ್ಹಯೇರ್ ಚಾರ್‌ಕೂಠಿ ಥು. ಯೊ ಕೆವ್ಡು ಲಾಂಬುಕಿ ಎತ್ರೇಸ್ ಚೌ಼ಡುಥು. ದೇವ್ನದೂತನೆ ಖ್ಹಯೇರ‍್ನ ಇನ ಆಳ್ತಿನಲಠ್ಠೇಥಿ ಗಣ್ಯೊ. ಯೊ ಖ್ಹಯೇರ್ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಲಾಂಬು, ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಚೌ಼ಡು, ಬಿಜು಼ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಊಚು಼ಥು.
REV 21:17 ದೇವ್‌ದೂತನೆ ಯೋ ಭೀತ್‌ನ ಆಳ್ತಿಕರ‍್ಯೊ, ಯೊ ಬೇಖ್ಹೊ ಖ್ಹೋಳ ಅಡಿಯೆತ್ರೆ ಆಳ್ತಿ ಥು. ಆ ಗಣ್ತಿಮ ಅದ್ಮಿನು ಹಾತ್‌ಯೆತ್ರೆ ಕತೊ ದೇವ್ನದೂತಾನ ಹಾತ್‌ಯೆತ್ರೇಸ್.
REV 21:18 ಯೋ ಭೀತ್ ವಜ್ರಾನಬಂಡೇಥಿ ಭಂದೈರ‍್ಹುಥು ಯೊ ನಂಗರ್ ಐರಾನಿತರನು ಅಶ್ಲಿ ಖ್ಹೊನ್ನು ಹುಯಿರ‍್ಹುಥು.
REV 21:19 ಖ್ಹಯೇರ‍್ನ ಭೀತ್‌ನು ಹದಿಪಾಯನ ಕೈಯೇಕ್ ಥರಾನು ಮುತ್ನೊ ಕಾಕ್ರೊಖ್ಹಾರೊಥೊ, ಫೈಲೊ ಕೋಣಾನೊ ಬಂಡೊ ವಜ್ರಾಥಿ, ಬೇನೊಬಂಡೊ ವೈಡೂರ‍್ಯ, ತೀನ್ನೊ ಪಚ್ಚೆ. ಚಾರ‍್ನು ಪದ್ಮರಾಗ್,
REV 21:20 ಪಾಚ಼್‌ನು ಗೋಮೇಧಿಕ, ಛೋ಼ನು ಮಾಣಿಕ್ಯ, ಖ್ಹಾತ್ನು ಪೀತರತ್ನ, ಆಟ್ನು ಬೆರುಲ್ಲ, ನೌನು ಪುಷ್ಯರಾಗ್, ದಖ್ಹ್‌ನೊ ಗರುಡಪಚ್ಚೆ, ಘ್ಯಾರಾನೊ ಇಂದ್ರನೀಲ, ಬಿಜು಼ ಭಾರಾನೊ ಬಂಡೊ ನೀಲಸ್ಪಟಿಕ.
REV 21:21 ಭಾರ ಬಾಕಲ್‍ಖ್ಹಾರು ಭಾರ ಮುತ್ತ್ ಹುಯಿರ‍್ಹುಥು. ಹರೇಕ್ ಬಾಕಲ್ನಾಬಿ ಏಕೇಕ್‌ ಮುತ್ತ್‌ಥಿ ಬಣೈರಾಖ್ಯುಥು. ನಂಗರ‍್ನು ಗಲ್ಲಿ ಪಾಕ್‌ಥಿ ರ‍್ಹವಾನ ಶಿಖ್ಹಾನಿತರನು ಅಶ್ಲಿ ಖ್ಹೊನ್ನೇಥಿ ಬಣೈರ‍್ಹೂಥು.
REV 21:22 ಮೆ ಖ್ಹಯೇರ್‌ಮ ಮಂದಿರ್‌ಬಿ ದೇಖ್ಯೊ ಕೊಯ್ನಿ. ಶನಕತೊ ಸರ್ವಶಕತ್‌ನೊ ದೇವ್‌ಹುಯಿರ‍್ಹೋತೆ ಪ್ರಭು ಅಜು಼ ಮೇಂಢಾನು ಚೆಲ್ಕುಹುಯಿರ‍್ಹವಾಳೊ ಯೊ ಇನು ಮಂದಿರ್‌ ಹುಯಿರ‍್ಹೂಸ್.
REV 21:23 ಖ್ಹಯೇರ‍್ನ ಉಜಾ಼ಳು ದ್ಯವಾನ ಚಾ಼ಂದ್‌ರ‍್ಹವೊ ಚ಼ಂದರ್‌ಮೊರ‍್ಹವೊ ಹೋಣುಥುಕೊಯ್ನಿ ಶನಕತೊ ದೇವ್ನಿ ಮಹಿಮೆಸ್ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಮೇಂಢಾನು ಚೆಲ್ಕುಸ್ ನಂಗರ‍್ನ ದೀವೊ ಹುಯಿರ‍್ಹೋಥೊ.
REV 21:24 ಇನ ಉಜಾ಼ಖ್ಹ್‌ಮಾಸ್ ಹರೇಕ್ ಜ಼ಗ್‌ಜಾ಼ತ್‌ ಚಾ಼ಲ್‌ಷೆ. ಜ಼ಮೀನ್ನ ರಾಜ಼ವ್‌ಖ್ಹಾರು ಇವ್ಣ ಧನ್‌ದೌಲತ್ನ ಖ್ಹಯೇರ್‌ಕನ ಲೀನ್ ಆವ್‌ಶೆ.
REV 21:25 ಖ್ಹಯೇರ‍್ನು ದರ‍್ವಾಜು಼ಖ್ಹಾರು ದನ್ಮ ಮುಚಾ಼ವ್‌ಶೇಸ್ ಕೊಯ್ನಿ. ಹಿಜ್ಜಾ಼ ರಾತ್‌ಕತೊ ಕೊಯ್ನಿಸಸ್ ಕೊಯ್ನಿ.
REV 21:26 ಜ಼ಗ್‌ಜಾ಼ತ್‌ನು ಧನ್‌ದೌಲತ್‌ಬಿ ಮರ್ಯಾದೀಬಿ ಹಿಜ್ಜಾ಼ ಲೀನ್‌ಆವ್‌ಶೆ.
REV 21:27 ಕತೋಬಿ ಅಶುದ್ದ ರ‍್ಹವಾನು ಖಿವು ಏಕ್‌ಬಿ ಕೊಪೇಖ್ಹ್‌ಶೇನಿ. ಇಮ್ಮಸ್ ಕಚಿಂಡ್‌ಕಾಮ್‌ ಕರಾವಳೊಬಿ ಠಗಾವವಾಳೋಬಿ ಇನಾಮ ಪೇಖ್ಹ್‌ಶೆ ಕೊಯ್ನಿ. ಕತೋಬಿ ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುಕಿನು ನಾಮ್‌ಖ್ಹಾರು ಲೀಖೈರ‍್ಹೇಸ್ಕಿ ಇವ್ಣೆಖಲಿ ಯೊ ಖ್ಹಯೇರ್‌ಮ ಪೇಖ್ಹ್‌ಶೆ.
REV 22:1 ಅನಕೇಡೆಥು ದೇವ್ನದೂತನೆ ಫಟಕ್‌ಡಿನಿಘೋಣಿ ಉಜಾ಼ಖ್ಹ್‌ ದ್ಯವಾನು ಜಾನ್ನು ಪಾಣಿನ ನದ್ದೀನ ಮನ ವತಾಳ್ಯೊ. ಯೊ ನದ್ದಿ ದೇವ್ ಬಿಜು಼ ಮೇಂಢಾನ ಚೆಲ್ಕಾನು ಸಿಂಹಾಸನ್‌ಕಂಥು ಉಬ್ಜಿನ್,
REV 22:2 ಖ್ಹಯೇರ‍್ನಿ ಮೋಟಿ ಗಲ್ಲೀನ ಇಚ಼್‌ಮ ವ್ಹವ್‌ಕರ‍್ತುಥು. ಯೊ ನದ್ದೀನು ಭೇ ಕನಾರಿಪರ್ ಜಾನ್ನು ಝಾ಼ಡುಖ್ಹಾರು ಥು. ಯೊ ವರಖ್ಹ್‌ನ ಭಾರ ಮಹಿನಾಬಿ ಫಲ್ ದೇತುಹುಯಿನ್ ಭಾರ ಮಹಿನಾಬಿ ಭಾರ ಥರಾನು ಪಂಡುಖ್ಹಾರು ದೇಸ್. ಯೊ ಝಾ಼ಡನ ಪಾಂದ್ಡಾನ ದವೈಥಿ ಖ್ಹಾರ ಜ಼ಗ್‌ಜಾ಼ತ್‌ವಾಳಾನ ಖ್ಹುದ್ರಾವಸ್.
REV 22:3 ದೇವ್‍ಥಿ ಶಾಪ್ ಲಿದುಹುಯು ಖಿವೂಬಿ ಯೊ ಖ್ಹಯೇರ್‌ಮ ಕೊರ‍್ಹಿಶೇನಿ. ಹಿಜ್ಜಾ಼ ದೇವ್ನು ಅಜು಼ ಬಲೀನ ಮೇಂಢಾನ ಚೆಲ್ಕಾನು ಸಿಂಹಾಸನ್ ರ‍್ಹಿಶೆ.ಇನ ಸೇವಕರ್‌ಯಿನ ಆರಾದನೆ ಕರ್ಶೆ.
REV 22:4 ಇವ್ಣೆ ಇನು ಮ್ಹೋಡು ದೇಕ್‌ಶೆ ಇವ್ಣ ಮುಡ್‌ಕ್ಯಪರ್ ಇನು ನಾಮ್ ಲೀಖೈರ‍್ಹಿಶೆ.
REV 22:5 ಅಜು಼ ರಾತ್ ಬೋಲಾನುಸ್ ಕೊರ‍್ಹಿಶೇನಿ. ಇವ್ಣುನ ದೀವೊನು ಉಜಾ಼ಳುಬಿ ಚಾ಼ಂದ್‌ನು ಉಜಾ಼ಳುಬಿ ಹೋಣುಕೊಯ್ನಿ. ಪ್ರಭುಹುಯಿರ‍್ಹೋತೆ ದೇವಸ್ ಇವ್ಣುನ ಉಜಾ಼ಳು ಹುಯಿರ‍್ಹಿಶೆ.ಇವ್ಣೆ ಜ಼ಗ್‌ಜ಼ಮಾನಮಾಬಿ ಜಿವಿರ‍್ಹಿಶೆ.
REV 22:6 ಇನಪರ್ ದೇವ್ನದೂತನೆ ಮನ, ಆ ವಾತೆಖ್ಹಾರು ವಿಶ್ವಾಸ್ ಕರಖ್ಹರ್ಕೂಬಿ ಖ್ಹಾಚೂ಼ಬಿ ಹುಯಿರ‍್ಹುಸ್. ಪ್ರವಾದಿ ಖ್ಹಾರನ ಆತ್ಮಾನ ಪ್ರಭುಸ್ ದೇವ್ ಹುಯಿರೊಸ್. ಒಗ್ಗಿಸ್‌ಮ ಚಾ಼ಲನಯೂತೆ ವಾತೆಖ್ಹಾರಿ ಇನ ಸೇವಕರ್‌ನ ವತಾಳನ ದೇವ್ನೆಯಿನ ದೂತನ ಮೋಕ್ಲಿರಾಖ್ಯೊಸ್.
REV 22:7 ಖ್ಹಮ್‌ಜೊ಼, ಮೆ ಘಣು ಜ಼ಲ್‌ದಿ ಆವುಸ್! ಆ ಪುಸ್ತಕ್‌ಮ ಲೀಖೈರ‍್ಹೂತೆ ಖ್ಹಾರಿ ವಚನ್ನ ಪಾಡಿಚಾ಼ಲವಾಳೊ ಧನ್ಯ ಹುಯಿರ‍್ಹೊಸ್ ಕರಿ ಬೋಲ್ಯೊ.
REV 22:8 ಯೋಹಾನಕರಿ ಮೇಸ್ ಆ ಅಖ್ಖಿ ವಾತೆನ ಖ್ಹಮ್‌ಜೊಹುಯೊಬಿ ದೇಖ್ಯೊಹುಯೋಬಿ ಹುಯಿರ‍್ಹೋಸ್. ಮೆ ಅಖ್ಖೀಸ್ ವಾತೆವ್‌ನ ಖ್ಹಮ್‌ಜಿನ್‌ ದೇಖಾಮ, ಆ ಬಾರೆವ್‌ಮ ಮನ ವತಾಳ್ಯೊತೆ ದೇವ್‌ದೂತನ ಖ್ಹಲಾಮ್ ಕರ್ನುಕರಿ ಇನ ಪಗ್‍ಪರ್ ಪಡ್ಯೊ.
REV 22:9 ಕತೋಬಿ ಯೋ ದೇವ್ನದೂತನೆ, “ಮನ ಖ್ಹಲಾಮ್ ನಕೊಕರ್. ಮೇಬಿ ತಾರಿನಿತರಾಸ್ ಆ ಪುಸ್ತಕ್‌ಮ ಛಾ಼ತೆ ಅಖ್ಖಿ ವಚನ್ನ ಪಾಡಿ ಚಾ಼ಲ್ಯಹುಯ ಅದ್ಮಿನಿತರಸ್. ಅಜು಼ ತಾರ ಭೈಯೇ ಹುಯಿರ‍್ಹಾತೆ ಪ್ರವಾದಿನಿ ಘೋಣಿ ಮೇಬಿ ಖಲಿ ಏಕ್‌ ಸೇವಕ್ ಹುಯಿರ‍್ಹೊಸ್. ತೂ ದೇವ್ನ ಖ್ಹಲಾಮ್ ಕರ್‌” ಕರಿ ಬೋಲ್ಯೊ.
REV 22:10 ಆನಾಹುಯಿನ್ ದೇವ್ನದೂತನೆ ಮನ, “ಆ ಪುಸ್ತಕ್‌ಮ ಛಾ಼ತೆ ದೇವ್‍ಥಿ ಆವಾನು ವಚನ್ ಅಖ್ಖಾನ ಗಪ್ಲತ್ ನಕೊಕರ್. ಶನಕತೊ ಆ ಅಖ್ಖು ಚಾ಼ಲಾನ ದನ್ ಖನ್ನೆ ಐಗು.
REV 22:11 ಠಗಾವವಾಳೊ ಅಜೂ಼ಬಿ ಠಗಾವ್ತೊಸ್ ರ‍್ಹವಾದೆ. ಮೈಲು ರ‍್ಹವಾಳೊ ಇನ ಬಿಜೂ಼ಬಿ ಮೈಲು ಕರಿಲಾವದೆ, ನೀತಿವಾಳೊ ಬಿಜೂ಼ಬಿ ನೀತಿವಾಳೊ ಹುವಾದೆ ಅಜು಼ ಪರಿಶುದ್ ಹುಯಿರ‍್ಹಾವಳೊ ಇನ ಅಜೂ಼ಬಿ ಪರಿಶುದ್ ಕರಿಲ್ಯವಾದೆ.
REV 22:12 ‘ದೇಖ್ ಮೇ ಜ಼ಲ್ದೀಸ್ ವಳ್ಯಾವ್‌ಸ್. ಮೆ ಹರೇಕ್ ಜ಼ಣಾನ ಇವ್ಣ ಇವ್ಣ ಚಾ಼ಲ್‌ನಿತರಸ್ ದ್ಯವಾನಿತರಾನು ಪ್ರತಿಫಲ್ ಮಾರಕನ ಛಾ಼.
REV 22:13 ಮೇಸ್ ಪಹಿಲೋಬಿ ಖ್ಹರ್ತಿಬಿ, ಪಹಿಲೋಬಿ ಕಡ್‌ಶಿನೋಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೊಸ್.
REV 22:14 ಇವ್ಣ ಝ಼ಗ್ಗಾವ್‍ನ ದೊಹಿಲಿನ್ ಶುದ್‍ ಹುಯಿರ‍್ಹವಾಳು ಧನ್ಯರ್. ಇವ್ಣೆ ಜಾನ್ನ ಝಾ಼ಡ್‌ನು ಪಂಡು ಖಾವನ ಹಕ್‍ದಾರ್ ಹುಯಿರ‍್ಹಿಶೆ. ಇವ್ಣೆ ಬಾಕಲ್ನ ವಾಟೆಕರಿ ಯೋ ಖ್ಹಯೇರ‍್ನ ಮಹಿ ಜಾ಼ವಳು ಹುಯಿರ‍್ಹಿಶೆ.
REV 22:15 ಕತೋಬಿ ಕುತ್‌ರ‍್ಯಾವ್‌ನಿತರ ರ‍್ಹವಾಳುಬಿ, ಜಾ಼ದು ಕರವಾಳುಬಿ, ವ್ಯಬಿಚಾರ್ ಕರವಾಳುಬಿ, ಖೂನಿಖ್ಹಾರುಬಿ, ಮೂರತ್ನ ಖ್ಹಲಾಮ್ ಕರಾವಳುಬಿ, ಝೂ಼ಟಾನ ಪ್ಯಾರ್‌ಕರೀನ್ ಚಾ಼ಲವಾಳು ಅಜು಼ ಬೋಲವಾಳು ಯೊ ಖ್ಹಯೇರ‍್ನ ಭಾರ್‌ ರ‍್ಹಿಶೆಕರಿ ಬೋಲ್ಯೊ.
REV 22:16 “ಯೇಸು ಕರಿ ಮೇಸ್ ಮಾರು ಖ್ಹಾರ ಸಬೇವ್ನಿ ಬಾರೇಮ ತುಮುನ ಸಾಕ್ಷಿ ಬೋಲಾನಖ್ಹಾಜೆ ಮಾರ ದೂತನ ಮೋಕ್ಲಿರಾಖ್ಯೊಸ್. ಮೇ ದಾವೀದನು ಖೂಮ್‌ ಕರಿ ಬೋಲಾನು ಬಡ್ಡೇಥು ನಿಕ್‌ಳ್ಯುತೆ ಚಿಗುರ್‌ಬಿ, ಇನಿ ಸಂತಾನ್‌ಬಿ ಉಜಾ಼ಖ್ಹ್‌ಥಿ ನಿಕ್ಳಾನೊ ಶುಕ್ಕರ್‌ಬಿ ಹುಯಿರೊಸ್.
REV 22:17 ಆತ್ಮ ಅಜು಼ ವ್ಯತುಲ್ಡೀಬಿ, ಆವ್ಣುಕರಿ ಬೋಲ್‌ಶೆ. ಖ್ಹಮ್‌ಜಾ಼ವಾಳೊ, ಆವ್‌ಕರಿ ಬೋಲಾದೆ. ಠೋಖ್ಹ್‌ ರ‍್ಹವಾಳೊ ಆವಾದೆ, ಆಖ್ಹ್ ರ‍್ಹವಾಳೊ ಜಾನ್ನಪಾಣಿನ ಮೋಲ್‌ಕೊಂತೆ ಫುಗಟ್‍ಥಿ ಲಿಲ್ಯಾವದೆ.
REV 22:18 ಆ ಪುಸ್ತಕ್‌ಮ ಲೀಖೈರ‍್ಹೂತೆ ಪ್ರವಾದನೆನು ವಚನ್‌ಖ್ಹಾರು ಖ್ಹಮ್‌ಜಾ಼ತೆ ಹರೇಕ್ ಜ಼ಣಾನಾಬಿ ಮೇ ಬೋಲಾನಿ ಸಾಕ್ಷಿ ಶಾತ್‌ಕತೊ, “ಕೋಣ್‌ತೋಬಿ ಅನಾಮ ಶಾತ್ತೋಬಿ ಮಳಾಯೊತೊ, ದೇವ್ ಇವ್ಣಪರ್ ಆ ಪುಸ್ತಕ್‌ಮ ಲೀಖೈರ‍್ಹುತೆ ಖ್ಹತಾಪ್ಣಿಖ್ಹಾರು ಆವಾನಿತರ ಕರ್ಶೆ.
REV 22:19 ಖಿವೊತೋಬಿ ಆ ಪ್ರವಾದನೆನು ವಚನ್‌ಮ ಏಕ್ನತೋಬಿ ಕಾಡಿನಾಖ್ಯೊತೊ, ಆ ಪುಸ್ತಕ್‌ಮ ಬೋಲೈರ‍್ಹುಸ್ತೆ ಜಾನ್ನ ಝಾ಼ಡಮಾಬಿ ಪರಿಶುದ್ಧ ಖ್ಹಯೇರ್‌ಮಾಬಿ ಇನಛಾ಼ತೆ ವಾಟಾನ ದೇವ್ ಕಾಡಿನಾಕ್‌ಶೆ.
REV 22:20 ಆ ಬಾರೇಮ ಸಾಕ್ಷಿ ಬೋಲವಾಳೊ, “ಒಹೊ, ಮೇ ಖ್ಹಾಚಮಾಸ್ ವಗ್ಗಿಸ್ ಆವುಸ್” ಕರಿ ಬೋಲಾಸ್. ಆಮೆನ್. ಪ್ರಭು ಹುಯಿರ‍್ಹೋತೆ ಯೇಸು, ಆವ್.
REV 22:21 ಪ್ರಭು ಹುಯಿರ‍್ಹೋತೆ ಯೇಸುನಿ ವಾರ್‌ಖ್ಹೊ ಅಖ್ಖಾಸ್ನಿ ಜೋ಼ಡ್ಮ ರ‍್ಹವಾದೆ. ಆಮೆನ್!
