﻿ಪೌಲನೆ ಇಬ್ರಿಯವಾಳಾನ ಲೀಖ್ಯೋತೆ ಚಿಟ್ಟಿ.
1.
ಅಗ್‍ಲ್ಯ ಹಗಾಮ್ಮ ದೇವ್ನೆ ಪ್ರವಾದಿ ಖ್ಹಾರಾಥಿ ಅಪ್ಣ ಗುರುಗುರಬ್‌ಲ್ಯನಿ ಜೋ಼ಡೆ ಕೆತ್ರೇಕ್ಕಿ ಪರಕ್ಮ, ಕೈಏಕ್ ಹಲ್ಲ ವಾತೆಬೋಲಿರಾಖ್ಯೋಸ್. 
ಕತೋಬಿ ಆ ಖ್ಹರ್ತಿನೊ ದನ್ಮ ಯೊ ಇನ ಛಿಯ್ಯಾಥಿ ಅಪ್ಣ ಜೋ಼ಡೆ ವಾತೆ ಬೋಲ್ಯೊ. ದೇವ್ನೆ ಇನ ಛಿಯ್ಯಾಥಿ ಖ್ಹಾರ ಜಗತ್‍ನಾಸ್ ಉಬ್‌ಜೈ಼ನ್ ಹರೇಕ್‌ಪರ್ ಇನಾಸ್ ವಾರಿಸ್ ಕರ‍್ಯೊ. 
ಯೋಸ್ ದೇವ್ನು ಮಹಿಮೆನು ಉಜಾ಼ಖ್ಹ್‌ಬಿ, ದೇವ್ನಿ ಪ್ರತಿರೂಪ್‌ಬಿ, ಇನಿ ವಚನ್ ಶಕಥ್ಥಿ ಅಖ್ಖಾಸ್ನ ಆಧಾರ್ ಹುಯಿನ್ ಯೋಸ್ ಅದಮ್‍ಜ಼ಮಾನನಿ ಪಾಪ್ನ ಶುದ್ದಿಕರಿನ್ ಸೊರ್ಗಾಮ ಮಹಾನ್ ದೇವ್ನು ಖಾವಿಬಾಜು಼ಮ ಬೇಶಿಗಯೊ. 
ಹೈರುತೆ ದೇವ್‌ದೂತರ್‌ಥೀಬಿ ಮಹಾನ್ ಊಚೊ಼ ಹುಯಿನ್; ಇನ ದಿದೋತೆ ನಾಮ್ ದೇವ್‌ದೂತರ್‌ಥೀಬಿ ಮಹಾನ್ ಹುಯಿರ‍್ಹುಸ್. 
ಶನಕತೊ, ದೇವ್ ಇನ ದೇವ್‌ದೂತರ್‌ಮ ಕಿನಾತೋಬಿ, “ತೂ ಮಾರೊ ಛಿಯ್ಯೊ; ಆಜ಼್ ಮೇಸ್ ತಾರೊ ಬಾ ಹುಯಿರ‍್ಹೊಸ್ “ಮೇ ಇನೊ ಬಾ ಹುಯಿರ‍್ಹಿಶ್, ಯೋ ಮಾರೊ ಛಿಯ್ಯೊ ಹುಯಿರ‍್ಹಿಶೆ.” ಕರಿ ಬೋಲಿರಾಖ್ಯೊಕೊಯ್ನಿ. 
“ಆ ಕಾಹೆತೆ ದೇವ್ ಇನ ಫೈಲೋಟ ಛಿಯ್ಯಾನ ಧರ್ತಿಪರ್ ಪಾಛು಼ ಮೋಕ್ಲಾನಿ ವಖ್ಹ್‌ತೆ, ದೇವ್ನ ದೂತರ್‌ಖ್ಹಾರು ಇನ ಆರಾದನೆ ಕರ್ನುಕರಿ ಹುಕುಮ್ ಕರಿರಾಖ್ಯೋಸ್”. 
ಕತೋಬಿ ದೇವ್ನ ದೂತರ್‌ನಿ ಬಾರೇಮ, “ದೇವ್ ಇನ ದೂತರ‍್ನ ವಹಿರಾನಿ ಘೋಣಿಬಿ, ಅಜು಼ ಇನ ಸೇವಕ್‌ಖ್ಹಾರನ ಆಗ್‍ನಿ ಝ಼ಲಪಟ್‌ನಿತರಾಬಿ ಕರೀಶ್‌ಕರಿ ಬೋಲಿರಾಖ್ಯೊಸ್.” 
ಕತೋಬಿ ಛಿಯ್ಯಾನಿ ಬಾರೇಮ ಅಮ್ ಬೋಲ್ಯೊ: “ದೇವ್ ತಾರು ಸಿಂಹಾಸನ್ ಜ಼ಗ್‌ಜ಼ಮಾನಮಾಬಿ ರ‍್ಹಿಶೆ. ನೀತಿನು ಡಂಡೊಸ್‌ ತಾರು ರಾಜ಼ನು ಡಂಡೊ ಹುಯಿರ‍್ಹುಸ್. 
ತೂ ಬರೋಬರ್‌ನ ಪ್ಯಾರ್‌ಕರ‍್ಯೊ ಅಜು಼ ಗಲತ್‌ನ ಝಿಟ್ಕಾರ‍್ಯೊ. ಇನಖ್ಹಾಜೇಥಿ ದೇವ್ ತಾರೊ ದೇವಸ್. ತುನ ತಾರ ಜೋ಼ಡೆ ರ‍್ಹವಾಳಥಿಬಿ ಶಂತೋಖ್ಹ್‌ನ ಜಾ಼ಖ್ಹತ್ ತೇಲ್‌ಥಿ ಅಬಿಷೇಕ್ ಕರಿರಾಖ್ಯೊಸ್ 
ಇನೆ ಅಮ್‍ಬಿ ಬೋಲ್ಯೊ; “ಪ್ರಭು ತೂ ಶುರುವಾತ್ಮ ಜ಼ಮೀನ್ನ ಹದಿಪಾಯ ನಾಖ್ಯೊ. ಅಜು಼ ತಾರ ಹಾತೇಖ್ಹು ಆಬ್‌ನ ತುನೆ ಬಣಾಯೊ, 
ಯೋಖ್ಹಾರು ದೆಖಾವ ಕೊಂತೆ ಹುಯಿಜಾ಼ಶೆ ಕತೋಬಿ ತು ಕೆದೇಬಿ ರ‍್ಹೀಶ್. ಯೊ ಜಿನಖ್ಹ್‌ಅಖ್ಖು ಲುಂಗ್ಡನಿತರ ಗಳಿಜಾಶೆ. 
ತು ಯೊ ಅಖ್ಖಾನ ಝ಼ಗ್ಗಾನಿತರ ಬಿಡ್ಕಿಕರಿಷ್, ಅಜು಼ ಯೊ ಪೇರ್ವಾಖ್ಹ್‌ನಿತರ ಬದ್ಲಿಜಾ಼ಶೆ. ಕತೋಬಿ ಕದೆಕದೇಬಿ ಬದಲಿಶ್ ಕೊಯ್ನಿ. ಅಜು಼ ತಾರ ಉಂಬರ‍್ನ ಖ್ಹರ್ತೀಸ್ ಕೊಯ್ನಿ ಕರಿ ಬೋಲಾಸ್. 
ಕತೋಬಿ ಖೆವ ದೇವ್‌ದೂತರ್‌ನತೋಬಿ ದೇವ್ನೆ, ಮೇ ತಾರ ದುಶ್‌ಮನ್ನ ತಾರ ಗೋಡಾನ ರಚ್ಚಾ಼ಕನ ನಾಖತೋಡಿ ತು ಮಾರಿ ಖಾವಿ ಬಾಜೂ಼ಮ ಬೆಠೋರೆ ಕರಿ ಕದೆತೋಬಿ ಬೋಲ್ಯೊಥೋಕಿ ಶು? 
ಆ ಅಖ್ಖು ದೇವ್ನದೂತರ್ ರಕ್ಷಣೆನು ಹಕ್ನ ಲೀರಾಕ್ಣುತೆ ಇವ್ಣಅಖ್ಖಾನು ಸೇವೆನಖ್ಹಾಜೆ ಮೋಕ್ಲಾಯುತೆ ಸೇವೆನು ಆತ್ಮ ಕಾಹೇಕಿಶು. 
