﻿ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಪಹಿಲಿ ಚಿಟ್ಟಿ.
1.
ಬಾ ದೇವ್‍ಮಾಬಿ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮಾಬಿ ಛಾ಼ತೆ ಥೆಸಲೋನಿಕ ಸಬೆನ ಅದ್ಮಿವೋನ ಪೌಲ, ಸಿಲ್ವಾನಾಬಿ ಅಜು಼ ತಿಮೊಥೆ ಹುಯಿರ‍್ಹಾತೆ ಹಮೆ,ಲೀಖಾನು ಶಾತ್‍ಕತೊ ತುಮೂನ ವಾರ್‌ಖ್ಹೊಬಿ ಅಜು಼ ಶಾಂತಿ ಮಳಾದೆ. 
ಹಮೆ ಕದೇಬಿ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತುಮೂನ ಯಾದ್‌ಕರಿನ್, ತುಮಾರಖ್ಹಾಜೆ ದೇವ್ನ ಧನ್ಯವಾದ್ ಕರಿಯೇಸ್. 
ಅಜು಼ ವಿಶ್ವಾಸ್‍ಥಿ ತುಮೆ ಕರ‍್ಯಾತೆ ಕಠಣ್ ಕಾಮ್ನಾಬಿ, ಪ್ಯಾರ್‌ಥಿ ತುಮೆ ಕರ‍್ಯಾತೆ ಮ್ಹಿನತ್‌ನಾಬಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಪರ್‌ನಿ ತುಮಾರಿ ಭರೋಖ್ಹಾನಖ್ಹಾಜೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಹಮೆ ಹಮೇಶ ಯಾದ್ ಕರಿಯೇಸ್. 
ಹಮಾರ ಭೈ ಭೇನೊ, ದೇವ್ ತುಮೂನ ಪ್ಯಾರ್ ಕರಾಸ್ ಅಜು಼ ಇನು ಶೊಂತ್ ಅದ್ಮಿಹುಯಿನ್ ರ‍್ಹವಾನಟೇಕೆ ಇನೆ ತುಮೂನ ಚೂ಼ಣಿರಾಖ್ಯೊಸ್ ಕರಿ ಬೋಲಾನು ತುಮೂನ ಮಾಲುಮ್ ಛಾ಼. 
ಶನಕತೊ, ಹಮೆ ಸುವಾರ್ತೆನ ಖಲಿ ವಾತೇಥಿಸ್ ಕಾಹೆ ಪಣ್ಕಿ, ಶಕತ್‌ಥೀಬಿ, ಪವಿತ್ರಾತ್ಮಥಿಬಿ ಅಜು಼ ಯೋ ಖ್ಹಾಚಸ್ ಕರಿ ಹಮೆ ಪರ್ಖಿನ್ ತುಮಾರಕನ ಲೈರಾಖ್ಯಸ್. ಹಮೆ ತುಮಾರ ಜೋ಼ಡೆ ಥಾತೆ ತದೆ, ತುಮಾರ ನಫ್ಫಾನಖ್ಹಾಜೆ ಕಿಮ್ ಜಿವ್ಣುಕರುಕರ್ತಥ. 
ಪ್ರಭುನೆ ಅಜು಼ ಹಮೆ ಚಾ಼ಲಿಲಿದಾತೆ ಇಮ್ಮಸ್, ತುಮೇಬಿ ಚಾ಼ಲ್ಯಾ; ಎತ್ರೆಸ್ ಕಾಹೆತೆ ತುಮೆ ಘಣು ಲತಾಡ ಖ್ಹಮಾಳ್ಯಾತೋಬಿ, ಹಮೆ ಬೋಲ್ಯಾತೆ ಉಪದೇಶ್‍ನ ಪವಿತ್ರಾತ್ಮಥಿ ಪೈದಾಹುವಾಸ್ತೆ ಖ್ಹುಶಿಥಿ ಮಾನಿನ್ ಹಮಾರಿ ಸುವಾರ್ತೆನ ಖ್ಹಮ್‍ಜಿಲಿದ. 
ಅನೇಥಿ ಮೆಕೆದೋನ್ಯಮ ಅಜು಼ ಅಖಾಯಮ ಕ್ರಿಸ್ತನ ವಿಶ್ವಾಸ್‌ ಕರಾವಾಳು ಖ್ಹಾರು ತುಮೂನ ದೇಖಿನ್ ಶಿಕಾನಿಘೋಣಿ ಹುಯು. 
ಪ್ರಭುನಿ ವಚನ್ ತುಮಾರೇಥೀಸ್ ಮೆಕೆದೋನ್ಯ ಅಜು಼ ಅಖಾಯಮಾಬಿ ಫೈಲಿಗಯು. ಅತ್ರೇಸ್ ಕಾಹೆತೆ ತುಮೆ ದೇವ್‌ಪರ್‌ ರಾಖಿಮ್ಹೇಲ್ಯಾತೆ ವಿಶ್ವಾಸ್‌ ಖ್ಹಾರಿಸ್ ಬಾಜೂ಼ಮಬಿ ಫೈಲಿಗಯು. ಅನೇಥಿ ತುಮಾರಿ ವಿಶ್ವಾಸ್‌ನಿ ಬಾರೇಮ ಬಿಜು಼ ಶಾತ್ಬಿ ಬೋಲಾನಿ ಜ಼ರೂರತ್ ಕೊಯ್ನಿ. 
ತದೆ ಹಮೆ ತುಮಾರಕನ ಆಯಾತೆ ತದೆ ತುಮೆ ಹಮೂನ ಖಿವಿ ತರಿಕಾಥಿ ಬುಲೈಲಿದಾಕರಿ ಆ ಅದ್ಮಿಖ್ಹಾರು ಬೋಲುಕರಸ್. ಅಜು಼ ತುಮೆ ಮೂರತ್ನ ಪೂಜಾ಼ಥು ದೇವ್‌ಭಣಿ ಕಿಮ್‌ಫರ‍್ಯ ಅಜು಼ ಜಿವ್‌ತಜಾನ್ನ ದೇವ್ನ ಕಿಮ್ ಸೇವೆ ಕರ‍್ಯಾ, ಕರಿ ಬೋಲಸ್. 
ದೇವ್ನೆ ಮರ‍್ಯಾಹುಯಾಮಾಥು ಉಠಾಡ್ಯೋತೆ ಅಜು಼ ಸೊರ್ಗಮಾಥೊ ಆವ್‌ಶೇತೆ ಇನ ಛಿಯ್ಯಾನಖ್ಹಾಜೆ ತುಮೆ ಟಿವವ್‍ಕರಸ್ ಕರೀಬಿ ಆ ಅದ್ಮಿಸ್ ಬೋಲಾಸ್. ಆ ಯೇಸು ಖ್ಹಾಮ್ಣೆ ಉಳ್ಯಾವತೆ ದೇವ್ನ ಇರಾದಾಥಿ ಅಪ್ಣುನ ಬಚಾ಼ಡವಾಳೊ ಹುಯಿರೋಸ್. 
