﻿ಲೂಕ.
22.
ಖಾಟುಕೊಂತೆ ರೋಟಾನಿ ಪೂಜಾ಼, ಕತೊ ಪಸ್ಕ ಪೂಜಾ಼ನೊ ದನ್ ಖನ್ನೆ ಐಗೋಥೊ. 
ಮಹಾಯಾಜಕ, ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಯೇಸುನ ಮರಾವ್ಣು ಕರಿ ಸೋಚಿನ್, ಅದ್ಮಿನ ಡರ್‌ಥಿ ಬರಾಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪಿರ‍್ಹೂಥು. 
ತದೆ ಶೈತಾನ್ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೋತೆ, ಇಸ್ಕರಿಯೋತ ಯೂದಮ ಪೇಶಿಗಯೊ. 
ತದೆ ಯೂದಾನೆ, ಮಹಾಯಾಜಕ ಅಜು಼ ಮಂದಿರ್‌ನ ವಖ್ಹ್‌ತಿ ಕರವಾಳಾವ್‌ಕನ ಜೈ಼ನ್‌, ಯೋ ಯೇಸುನ ಧೋಕೇಥಿ ಧರಿದ್ಯವಾನಿ ಬಾರೇಮ ಇವ್ಣ ಜೋ಼ಡೆ ವಾತೆ ಬೋಲ್ಯೊ. 
ತದೆ ಇವ್ಣೆ ಖ್ಹುಶಿಖೈನ್‌, “ತುನ ಪೈಶಾ ದಿಯ್ಯೆಸ್‌” ಕರಿ ವಾತೆದಿದು. 
ಇನೆ ಮಾನಿಜೈ಼ನ್, ಅದ್ಮಿನಿ ಗಲಾಟ್‌ಕೊಂತೆ ವೇಳ್ಮ, ಯೇಸುನ ಇವ್ಣುನ ಧರಿದೇಣುಕರಿ, ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೀನ್ ದೇಖುಕರ್ತೊಥೊ.‌ 
ಖಾಟುಕೊಂತೆ ರೋಟಾನು ಪೂಜಾ಼ನೊ ದನ್ ಆಯು. ಯೋ ದನ್‌ಮ ಯೆಹೂದ್ಯರ್ ಅದ್ಮಿಖ್ಹಾರು ಪಸ್ಕನ ಖಾಣನಖ್ಹಾಜೆ ಮೇಂಢು ರೇಖ್ಹ್‌ತೂಥು. 
ಯೇಸುನೆ ಪೇತ್ರ ಅಜು಼ ಯೋಹಾನ್ನ, “ತುಮೆ ಜೈ಼ನ್‌, ಅಪ್ಣಖ್ಹಾಜೆ ಪಸ್ಕಾನು ಖಾಣನ ಖ್ಹವಾರೊ” ಕರಿ ಬೋಲ್ಯೊ. 
ಇವ್ಣೆ ಇನ, “ಹಮೆ ಕಿಜ಼್ಜಾ ಜೈ಼ನ್‌, ಖ್ಹವಾರ್‌ನು” ಕರಿ ಪುಛಾ಼ಯ? 
ತದೆ ಯೇಸುನೆ ಇವ್ಣುನ, “ಹಂದೇಖೊ, ತುಮೆ ಖ್ಹಯೇರ‍್ನ ಮಹಿ ಜಾ಼ತಸ್‌ನ, ಏಕ್‌ ಅದ್ಮಿ ಪಾಣಿನೊ ಘಡೊ ಪಳ್ಳಿನ್‌, ತುಮಾರ ಖ್ಹಾಮ್ಣೆ ಆವ್‌ಶೇತೆ ದೇಕ್‌ಶು. ಇನ ಪೀಠೇಸ್ ಜೈ಼ನ್, ಯೋ ಜಾ಼ಶೇತೆ ಘರ್‌ಮ ಜಾ಼ವೊ. 
ಅಜು಼ ಯೋ ಘರ್‌ನ ಯಜಮಾನ್ನ, “ಹಮಾರೊ ಗುರು, ಇನ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖಾವಾನಖ್ಹಾಜೆ, ಕೋಣೊ ಕಿಜ಼್ಜಾ ಛಾ಼, ಕರಿ ತುನ ಫುಛಾ಼ಯೊ ಕರಿ ಬೋಲೊ. 
ಯೊ ತುಮುನ ಖ್ಹಾರೂಸ್ ಕುಡ್‌ಶಿ ಪಲಂಗ್‌ಥಿ ಖ್ಹವಾರೈರ‍್ಹಿಶೇತೆ, ಛ಼ತ್‍ನ ಉಪ್ಪರ್‌ಲ್ಯೊ ಮೋಟ ಕೋಣಾನ ವತಾಳ್‌ಶೆ, ಹಿಜ಼್ಜಾ ಖಾಣನ ಖ್ಹವಾರೊ” ಕರಿ ಬೋಲಿನ್ ಮೋಕ್‌ಲ್ಯೊ. 
ಇವ್ಣೆ ಜೈ಼ನ್‌, ಯೇಸುನೆ ಇವ್ಣುನ ಬೋಲ್ಯೊತೆ ಇಮ್ಮಸ್ ಥೂತೆ ದೇಖಿನ್, ಪಸ್ಕಾನ ಖಾಣನ ತೈಯಾರ್ ಕರ‍್ಯು. 
ವಖ್ಹತ್ ಆವಾದಿನ್, ಯೇಸು ಇನ ಭಾರ ಅಪೊಸ್ತಲರ‍್ನ ಜೋ಼ಡೆ ಖಾಣನ ಬೇಶಿಗಯೊ. 
ತದೆ ಯೇಸುನೆ ಇವ್ಣುನ, “ಮೇ ಖ್ಹತಾಪ್ಣಿ ಖಾವಾನ ಅಗಾಡಿ, ತುಮಾರ ಜೋ಼ಡೆ ಆ ಪಸ್ಕಾನು ಖಾಣು ಖಾಣುಕರಿ ಘಣು ಆಖ್ಹ್ ಕರ‍್ಯೋಥೊ. 
ಮೇ ತುಮೂನ ಬೋಲುಸ್ಕಿ, ದೇವ್ನಿ ರಾಜ್ಯಮ ಅನಿ ಖ್ಹಾಚಿ ಮತ್‌ಲಬ್ ಪೂರ ಹುವ್ವಾತೋಡಿ, ಮೇ ಪಸ್ಕಾನು ಖಾಣನ ಪಾಛು಼ ಖೈಶಸ್‌ ಕೊಯ್ನಿ” ಕರಿ ಬೋಲ್ಯೊ. 
ಅನ ಬಾದ್‌ಮ ಯೇಸುನೆ, ದ್ರಾಕ್ಷಿನು ರಖ್ಹ್‌ನಿ ಕಟೋರಿನ ಪಾಡಿನ್, ದೇವ್ನ ಧನ್ಯವಾದ್‌ಕರೀನ್‌, ಅಲ್ಲೇವೊ, ಅನ ತುಮಾರಾಮ ವಾಟ ಪಾಡಿಲೆವೊ. 
ಹಂಕೇಥು ಧರೀನ್ ದೇವ್ನಿ ರಾಜ್ಯ ಆವಾತೋಡಿ, ಮೇ ಫಾಛು಼ ಆ ದ್ರಾಕ್ಷಿನು ರಖ್ಹ್‌ನ ಪೀಶಸ್ ಕೊಯ್ನಿ ಕರಿ ತುಮುನ ಬೋಲುಸ್” ಕರಿ ಬೋಲ್ಯೊ 
ಇನ ಬಾದ್‌ಮ ಯೇಸುನೆ ರೋಟಾನ ಪಾಡೀನ್, ದೇವ್ನ ಧನ್ಯವಾದ್‌ ಕರೀನ್, ಇನ ತೋಡಿನ್, ಇವ್ಣುನ ದೀನ್, “ಆ ತುಮಾರಖ್ಹಾಜೆ ದೆವೈರ‍್ಹೂತೆ ಮಾರಿ ಶರೀರ್, ಮನ ಯಾದ್‌ಕರಾನಖ್ಹಾಜೆ ಅಮ್‌ಕರೊ” ಕರಿ ಬೋಲ್ಯೊ. 
ಇಮ್ಮಸ್ ಖಾಣನ ಬಾದ್‌ಮ, ಯೇಸುನೆ ಕಟೋರಿನ ಪಾಡೀನ್, “ಆ ಕಟೋರಿ ತುಮಾರಖ್ಹಾಜೆ ರಂಚಾ಼ವನು ಮಾರು ಲ್ಹೋಯಿಥಿ ಬಣೈರ‍್ಹುತೆ. ನವಿ ಒಪ್ಪಂದ ಹುಯಿರ‍್ಹೂಸ್, ಅನ ಮಾರ ಲ್ಹೋಯಿಥಿ ಮುದ್ರೊ ಮರೈರ‍್ಹೂಸ್. 
“ತೋಬಿ, ಹಂದೇಖೊ! ಮನ ಧೋಕೇಥಿ ಧರಿದ್ಯವಾಳೊ ಮಾರ ಜೋ಼ಡೆಸ್‌ ಖಾಣು ಖವ್‍ಕರಾಸ್‌. 
ದೇವ್ನೆ ಸೋಚ್ಯೊತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಮರ್‌ಶೆ; ಕತೋಬಿ ಇನ ಧರಿದ್ಯವಾಳ ಅದ್ಮಿನಿ ಹಾಲ್ನ ಶಾತ್‌ ಬೋಲು! 
ಅನ ಖ್ಹಮ್‌ಜಿನ್‌ ಇವ್ಣೆ, “ಇನ ಧೋಕೇಥಿ ಧರಾವಾಳೊ ಅಪ್ಣಾಮ ಕೋಣ್ ಉಶೆ?” ಕರಿ ಇವ್ಣ-ಇವ್ಣಾಸ್‍ಮ ಬೋಲಿಲಿದು. 
ಅತ್ರೇಸ್ ಕಾಹೆತೆ, ಖ್ಹಾರೇಥಿ ಮಹಾನ್ ಕೋಣ್? ಕರಿ ಬೋಲೈಲಿಶೆ, ಕರಿ ಶಿಷ್ಯರ್‌ ಇವ್ಣ-ಇವ್ಣಾಮಸ್‌ ವಾತೆಚೀತೆ ಕರಾಲಗ್ಯು. 
ತದೆ ಯೇಸುನೆ ಇವ್ಣುನ, “ಯೆಹೂದ್ಯರ್‌ಕಾಹೆತೆ ರಾಜ಼ಖ್ಹಾರು, ಇವ್ಣ-ಇವ್ಣ ಅದ್ಮಿಪರ್ ರಾಜ಼್‌ಭಾರ್‌ ಚ಼ಲಾವಸ್, ಅಜು಼ ಇವ್ಣಾಪರ್ ಅದಿಕಾರ್ ಚ಼ಲಾವವಾಳು, ‘ಅದ್ಮಿಯೇವ್‌ನು ದೋಸ್ತ್’ ಕರಿ ಬೊಲೈಲೇಸ್. 
ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಮಹಾನ್ ಕರಿ ರ‍್ಹೇಸ್ತೆ ಇವ್ಣೆ ನ್ಹಾನಾವ್‍ನಿ ಮತ್‍ ರ‍್ಹೇವ್ಣು, ಶಾಣು ಕರಿ ರ‍್ಹವಾಳು ಸೇವಕನಿ ಘೋಣಿ ರ‍್ಹೇವ್ಣು. 
ಕೋಣ್ ಮಹಾನ್? ಖಾಣು ಖಾವನ ಬೆಠೂತೆ ಯೋಕಿ, ಇನಿ ಚಾ಼ಕ್ರಿ ಕರಾವಾಳೊ? ಖಾವನ ಬೆಠೋಸ್ತೆ ಯೋಸ್ ಕಾಹೆಕಿಶು, ಕತೋಬಿ ಮೇ ತುಮಾರಾಮ ಚಾ಼ಕ್ರಿ ಕರಾವಾಳನಿಘೋಣಿ ಛೂ಼. 
ತುಮೆ ಮಾರಿ ಖ್ಹಾರಿ ಖ್ಹತಾಪ್ಣಿಮ, ಮಾರ ಜೋ಼ಡೆ ರ‍್ಹಯಾಹುಯ. 
ಮಾರೊ ಬಾ, ಮನ ರಾಜ್ಯನ ಚ಼ಲಾವಾನ ಹಕ್‌ ದಿದೋತೆ ಇಮ್ಮಸ್, ಮೇಬಿ ತುಮೂನ ಅದಿಕಾರ್ ಚ಼ಲಾವಾನ ಹಕ್‌ ದೆವುಸ್‌. 
ಮಾರಿ ರಾಜ್ಯಮ ತುಮೆ, ಮಾರಿ ಮೇಜ್‌ಪರ್‌ ಖಾಶುಪೀಶು, ಅಜು಼ ಸಿಂಹಾಸನ್‌ಪರ್ ಬೇಶಿನ್, ಇಸ್ರಾಯೇಲ್‌ನ ಭಾರ ಖೂಮ್‍ವಾಳಪರ್ ಅದಿಕಾರ್ ಚ಼ಲಾವ್‌ಶು. 
ಸೀಮೋನ್, ಸಿಮೋನ್! ಹಂದೇಕ್! ಶೈತಾನ್‍ ತುಮೂನ ಘವ್‌ನ ತೂರಾನಿಘೊಣಿ ಹುಕುಮ್‌ನ ಮಾಂಗಿರಾಖ್ಯೊಸ್. 
ಕತೋಬಿ ತಾರಿ ವಿಶ್ವಾಸ್ ಕಮ್ ನಾ ಹೋಣುಕರಿ, ಮೇ ತಾರಿ ಬಾರೇಮ ದೇವ್ನ ಪ್ರಾರ್ಥನೆ ಕರಿರಾಖ್ಯೊಸ್ ಸೀಮೋನ್. ಅಜು಼ ತೂ ಮಾರಭಣಿ ಫರಾನ ಬಾದ್‌ಮ, ತಾರ ಭೈಯೇನ ಭಾಲಿ ದೇವ್ಣು” ಕರಿ ಬೋಲ್ಯೊ. 
ಕತೋಬಿ ಇನೆ ಯೇಸುನ, “ಪ್ರಭು, ಮೇ ತಾರ ಜೋ಼ಡೆ ಜೇಲ್‌ಮ ಜಾ಼ವಾನಾಬಿ ಅಜು಼ ಮರನಾಬಿ ತೈಯಾರ್ ಛೂ಼!” ಕರಿ ಬೋಲ್ಯೊ. 
ತದೆ ಯೇಸುನೆ ಇನ, “ಪೇತ್ರ, ಆ ರಾತೆ, ತೂ ಮಾರಿ ಬಾರೇಮ, ‘ಆ ಮನ ಮಾಲುಮ್ ಕೊಯ್ನಿ’ ಕರಿ ತೀನ್ ಹಲ್ಲ ಬೋಲಾತೋಡಿ, ಮುರ್‌ಗೊ ಬಾಂಗ್‌ ದಿಶೆ ಕೊಯ್ನಿ, ಕರಿ ಮೇ ತುನ ಬೋಲುಸ್” ಕರಿ ಬೋಲ್ಯೊ. 
ಅಜು಼ ಯೇಸುನೆ ಇನ ಶಿಷ್ಯರ್‌ನ, “ಮೇ ತುಮೂನ ಚ಼ಂಚಿ, ಬಟ್‌ವೊ ನತರ್‌ಕಿ ಖೋಖ್ಹ್‌ಡಾ ಕೊಯ್ನಿತೆ ಮೋಕ್‌ಲ್ಯೊಥೋತೆ ತದೆ, ತುಮೂನ ಶಾತ್‌ತೋಬಿ ಕಮ್ ಹುಯುಕಿ ಶು? ಕರಿ ಪುಛಾ಼ವಖ್ಹತರ್, ಇವ್ಣೆ, “ಶಾತ್ಬಿ ಕೊಯ್ನಿ” ಕರಿ ಜವಾಬ್‌ ದಿದು. 
ತದೆ ಯೇಸುನೆ ಇವ್ಣುನ, “ಕತೋಬಿ ಹಮ್ಕೆ, ಕಿನ-ಕಿನಾಕನ ಚ಼ಂಚಿ ನತರ್‌ಕಿ ಬಟ್‌ವೊ ಛಾ಼ಕಿ ಇನ ಪಾಡಿಲೆವೊ; ಅಜು಼ ಕಿನಾಕನ ತಲ್ವಾರ್‌ ಕೊಯ್ನಿಕಿ ಇವ್ಣೆ, ಇವ್ಣು ಹೋಡ್‍ಣಿನ ವೇಚಿನ್, ಏಕ್‌ ತಲ್ವಾರ್‌ನ ಲೀಲೆವ್ಣು. 
ಶನಕತೊ, ಪ್ರವಾದಿಖ್ಹಾರು ಮಾರಿ ಬಾರೇಮ ಲೀಖೈರ‍್ಹೂತೆ ಇಮ್‌, ಅಪರಾದಿಮ ಏಕ್‌ ಜ಼ಣಾನಿಮತ್ ಮನ ಸೋಚ್ಯು, ಕರಿ ಬೋಲಾನು ಚಾ಼ಲ್ನುತೆ, ಇನಖ್ಹಾಜೆ ಯೋ ಪೂರ ಹುವಾನ ಆಯು.‌ 
ಶಿಷ್ಯರ್‌ನೆ ಇನ, “ಪ್ರಭು, ಹಂದೇಕ್‌! ಹಜ್ಜಾ಼ ಬೇ ತಲ್ವಾರ್‌ ಛಾ಼” ಕರಿ ಬೋಲ್ಯು, ತದೆ ಯೇಸುನೆ, “ಎತ್ರು ಬಶ್‌” ಕರಿ ಬೋಲ್ಯೊ. 
ಯೇಸು ಯೆರೂಸಲೇಮ್‌ನ ಮ್ಹೇಲಿನ್, ಯೋ ಜಾ಼ತೊಥೋತೆ ಇಮ್ಮಸ್, ಆಲಿವ್ ಪಹಾಡ್‌ನ ಗಯೊ, ಶಿಷ್ಯರ್‌ಬಿ ಇನ ಕೇಡೆ ಗಯ. 
ಯೋ ಝ಼ಗೋಪರ್‌ ಆವಾದಿನ್, ಯೇಸುನೆ ಇವ್ಣುನ, “ತುಮೆ ಶೋದನೆಮ ಪಡ್ನುನಾತೆ ಇಮ್‌, ಪ್ರಾರ್ಥನೆ ಕರೊ” ಕರಿ ಬೋಲ್ಯೊ. 
ಅನ ಬಾದ್‌ಮ ಯೇಸು ಇವ್ಣುನ ಮ್ಹೆಂದಿನ್, ಬಂಡೊ ಫೇಕಎವ್ಡಿ ದೂರ್ ಜೈ಼ನ್, ಗುಡ್‍ಘ್ಯ ಟೇಕಿನ್ ಪ್ರಾರ್ಥನೆ ಕರ‍್ಯೊ, 
“ಬಾ, ತಾರಿ ಮರ್ಜಿ ಉಶೇತೊ, ಆ ಖ್ಹತಾಪ್ಣಿನಿ ಕಟೋರಿನ, ಮಾರೇಥಿ ದೂರ್ ಹಟಾವ್‌; ತೋಬಿ, ಮಾರಿ ಮರ್ಜಿ ಕಾಹೆ, ತಾರಿ ಮರ್ಜಿಸ್‌ ಹುವಾದೆ” ಕರಿ ಬೋಲಿನ್ ಪ್ರಾರ್ಥನೆ ಕರ‍್ಯೊ. 
ತದೆ ಪರಲೋಕ್‌ಥೊ ಏಕ್‌ ಧೂತ ಐನ್, ಯೇಸುನ ದೆಖೈನ್, ಇನ ಭಾಲಿ ದಿದೊ. 
ಯೋ ಘಣಿ ದುಖ್‌ಥಿ ಬಿಜೂ಼ಬಿ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನು ಪಶುನೊ ಲ್ಹೋಯಿನು ಬೂಂದಾವ್‍ನಿಮತ್‌ ಜ಼ಮೀನ್‌ಪರ್ ಪಡ್ಯು. 
ಪ್ರಾರ್ಥನೆಮಾಥು ಯೇಸು ಉಠೀನ್, ಪಾಛು಼ಫರಿ ಇನ ಶಿಷ್ಯರ್‌ಕನ ಆಯಿನ್, ದುಖ್‌ಥಿ ಭರೈನ್, ಇವ್ಣೆ ಖ್ಹುತೂಥೂತೆ ದೇಖಿನ್‌, 
ಯೇಸುನೆ ಇವ್ಣುನ, “ತುಮೆ ಶನ ಖ್ಹುತಾಸ್? ಉಪ್ಪರ್ ಉಠೊ, ಅಜು಼ ತುಮೆ ಶೋದನೆಮ ಪಡ್ನುನಾತೆ ಇಮ್‌ ಪ್ರಾರ್ಥನೆ ಕರೊ” ಕರಿ ಬೋಲ್ಯೊ. 
ಯೇಸು ವಾತೆ ಬೋಲುಕರಾನಿ ವಖ್ಹತ್‌ಮಾಸ್‌, ಅದ್ಮಿನಿ ಏಕ್‌ ಭೀಡ್ ಹಿಜ್ಜಾ಼ ಆಯಿ. ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ, ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲ್ತೊ ಉಳ್ಯಾವ್ತೋಥೊ. ಯೋ ಯೇಸುನ ಬುಚ್ಚಾ಼ ದ್ಯವಾನಖ್ಹಾಜೆ ಖನ್ನೆ ಆಯೊ. 
ತದೆ ಯೇಸುನೆ ಇನ, “ಯೂದ, ಬುಚ್ಚಾ಼ದೀನ್‌, ಧೋಕೇಥಿ ಅದ್ಮಿನೊ ಛಿಯ್ಯಾನ ಧರಿದ್ಯವಾನ ಆಯೋಕಿ ಶು?” ಕರಿ ಬೋಲ್ಯೊ. 
ಯೇಸುನ ಜೋ಼ಡ್ಮ ಥಾತೆ ಶಿಷ್ಯರ್‌ಖ್ಹಾರು ಚಾ಼ಲ್‌ಶೆತೆ ಇನ ದೇಖಿನ್‌, ಯೇಸುನ, “ಪ್ರಭು, ಹಮೆ ಹಮಾರು ತಲ್ವಾರ್‌ಥಿ ಮಾರಿಯೇಕಿ ಶು?” ಕರಿ ಪುಛಾ಼ಯು. 
ಅವ್ಣಾಮ ಏಕ್‌ ಜ಼ಣೊ, ತಲ್ವಾರ್‌ಥಿ ಮಾರಿನ್, ಗಲ್‌ಢಯಾಜಕ್‌ನ ಆಳ್‌ನ ಖಾವಿ ಬಾಜು಼ನ ಕಾನ್ನ ಕತ್ರಿನಾಖ್ಯೊ. 
ಕತೋಬಿ ಯೇಸುನೆ ಇನ, “ಅತ್ರೇಸ್ ಬಶ್‌!” ಕರಿ ಬೋಲಿನ್, ಯೋ ಆಳ್‌ನು ಕಾನ್ನ ಛೀಮಿನ್‌, ಇನ ಅಛ್ಛು಼ ಕರ‍್ಯೊ. 
ಬಾದ್‌ಮ ಯೇಸುನೆ ಇನ ಧರಾನ ಆಯೂತೆ, ಮಹಾಯಾಜಕನ, ಮಂದಿರ್‌ನ ಕಾವ್ಲಿ ಕರಾವಾಳ ದಂಡ್‌ ದಳ್‌ವಾಯಿನ ಅಜು಼ ಸಭೆನ ಶಾಣಾವ್‍ನಾಬಿ, “ಚೋ಼ರ್‌ನ ಧರಾನಿಘೋಣಿ,ತಲ್ವಾರೆ, ಲಠ್ಠ ಪಳ್ಳಿನ್‌ ಮನ ಧರಾನ ಆಯಾಕಿ ಶು? 
ಮೇ ದನ್‍ರೋಜ಼್ ದೇವ್ನಿ ಮಂದಿರ್‌ಮ ತುಮಾರ ಜೋ಼ಡೆ ಥೋತೆ ತದೆ, ತುಮೆ ಮನ ಧರ‍್ಯಾಕೊಯ್ನಿ. ಕತೋಬಿ ಆ ತುಮಾರಿ ವಖ್ಹತ್, ಅಂಧಾರನಿ ಶಕತ್ನ ಅದಿಕಾರ್ ಕರಾನಿ ವಖ್ಹತ್” ಕರಿ ಬೋಲ್ಯೊ. 
ಇವ್ಣೆ ಯೇಸುನ ಧರೀನ್, ಗಲ್‌ಢಯಾಜಕ್‌ನ ಘರ್‌ನ ಮಹಿ ಲೀಗಯು. ಅಜು಼ ಪೇತ್ರ ದೂರ್‌ಥೊ ಇವ್ಣ ಪೀಠೆ-ಪೀಠೆ ಗಯೊ. 
ಖ್ಹಾಮ್ಣೆನಿಝ಼ಗೋನ, ಇಚ಼್‌ಮ ಆಗ್ ಲಗಾಡಿನ್, ಇನ ಅಶ್‌ಪಿಶ್‌ ಬೆಠುಥೂತೆ, ಅದ್ಮಿನ ಜೋ಼ಡೆ ಪೇತ್ರಬಿ ಬೇಶಿಗಯೊ. 
ಪೇತ್ರ ಹಿಜ್ಜಾ಼ ಉಜಾ಼ಳಾಮ ಬೆಠಿತೆ, ಏಕ್‌ ಜ಼ಣಿ ಆಳ್‌ನೆ ಠರ್‌ಖೈ ದೇಖಿನ್‌, “ಆಬಿ ಯೇಸುನ ಜೋ಼ಡೆ ಥೊ!” ಕರಿ ಬೋಲಿ. 
ಕತೋಬಿ ಪೇತ್ರನೆ, “ಮನ ಯೋ ಮಾಲುಮಸ್ ಕೊಯ್ನಿಲಿ, ಬಾಯಿ!” ಕರಿ ಬೋಲ್ಯೊ. 
ಜ಼ರ ಘಡಿನ ಬಾದ್‌ಮ, ಏಕ್‌ ಜ಼ಣಾನೆ ಪೇತ್ರನ ದೇಖಿನ್‌, “ತೂಬಿ ಇವ್ಣಾಮ ಏಕ್‌ ಜ಼ಣೊ ಹುಯಿರ‍್ಹೋಸ್” ಕರಿ ಬೋಲ್ಯು. ಕತೋಬಿ ಪೇತ್ರನೆ “ಮೇ ಕಾಹೇಲ ಬಾಬ!” ಕರಿ ಜವಾಬ್‌ ದಿದೊ. 
ಅಜು಼ ಏಕ್‌ ಘಂಟಾನ ವಖ್ಹತ್‌ಮ, ಅಜೇಕ್‌ ಜ಼ಣಾನೆ, “ಖ್ಹಾಚಮಾಬಿ ಆಬಿ ಯೇಸುನ ಜೋ಼ಡೆ ರ‍್ಹಯೊಹುಯೊ, ಶನಕತೊ ಆಬಿ ಗಲಿಲಾಯವಾಳೊಸ್‌ನಿ!” 
ಕತೋಬಿ ಪೇತ್ರನೆ, “ತೂ ಶಾತ್‌ ಬೋಲುಕರಾಸ್ತೆಕಿ ಮನ ಮಾಲುಮ್‌ ಕೊಯ್ನಿ?” ಕರಿ ಜ಼ವಾಬ್‌ದಿದೊ. ಯೋ ಬೋಲುಕರಾತೆ ವಖ್ಹತ್‌ಮಾಸ್‌, ಮುರ್‌ಗೊ ಬಾಂಗ್‌ ದಿದು. 
ಪ್ರಭುನೆ ಪೀಠೆ ಫರಿನ್, ಪೇತ್ರನಸ್‌ ಠರ್‌ಕಿ ದೇಖ್ಯೊ, ತದೆ ಪೇತ್ರನೆ ಇನ, ಪ್ರಭು “ಮುರ್‌ಗೊ ಬಾಂಗ್‌ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ, ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊಥೋತೆ ವಾತೆನ ಯಾದ್ ಕರಿಲಿನ್, 
ಭಾರ್‌ಜೈ಼ನ್‌, ಖ್ಹಡ್‌ಕ್ಯಾ ಭರಿನ್ ರೋಯೊ. 
ಯೇಸುನ ಕಾವ್ಲಿ ಕರುಕರ್ತುಥೂತೆ ಇವ್ಣೆ, ಇನಿ ನಕ್ಲೆ ಕಾಡ್ಯು ಅಜು಼ ಇನ ಮಾರ‍್ಯು. 
ಇನ ಮ್ಹೋಡಾಪರ್ ಲುಂಗ್ಡು ನಾಖಿನ್, “ತುನ ಮಾರ‍್ಯೂತೆ ಕೋಣ್? ಕರಿ ಹಮೂನ ಪ್ರವಾದ್‌ನೆ ಬೋಲ್” ಕರಿ ಬೋಲ್ಯು. 
ಅಜು಼ ಇನಿಬಾರೇಮ ಕೈಏಕ್ ದೂಷಣೆ ಬೋಲಿನ್, ಖ್ಹರಮ್‌ ಕಾಡ್ಯು. 
ವ್ಹಾಣು ಹುವ್ವಾದೀನ್, ಶಾಣುಖ್ಹಾರು ಅಜು಼ ಮಹಾಯಾಜಕ, ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಖ್ಹಾರು ಎಕ್ಟುಹುಯಿನ್, ಯೇಸುನ ನ್ಯಾವ್ ಫೇಡಾನಿಝ಼ಗೊಕನ ಲೀಗಯು. 
“ತೂ ಕ್ರಿಸ್ತ ಉಶೇತೊ, ಹಮೂನ ಬೋಲ್?” ಕರಿ ಬೋಲ್ಯು. ತದೆ ಯೇಸುನೆ ಇವ್ಣುನ, “ಮೇ ಬೋಲ್ಯೋತೊ, ತುಮೆ ನಂಬಾಕೊಯ್ನಿ” ಕರಿ ಜವಾಬ್‌ ದಿದೊ. 
ಅಜು಼, “ಮೇ ತುಮೂನ ಶಾತ್‌ತೋಬಿ ಬೋಲಿಲಿದೋತೊ ತುಮೆ ಜವಾಬ್‌ ಕೋ ದಿಶುನಿ. 
ಹಂಕೇಥು, ಕತೋಬಿ ಅದ್ಮಿನೊ ಛಿಯ್ಯೊ, ಮಹಾನ್ ಶಕತ್‌ವಾಳೊ ದೇವ್ನ ಖಾವಿಬಾಜು಼ಮ ಬೆಠೊರ‍್ಹೀಶೆ” ಕರಿ ಬೋಲ್ಯೊ. 
ಇವ್ಣೆ ಖ್ಹಾರೂಸ್, “ಇಮ್‍ಕತೊ, ತೂ ದೇವ್‌ನೊ ಛಿಯ್ಯೊಕಿ ಶು?” ಕರಿ ಪುಛಾ಼ಯು. ತದೆ ಯೇಸುನೆ ಇವ್ಣುನ, “ಮೇ ಯೋಸ್ ಕರಿ ತುಮೇಸ್ ಬೋಲ್ಯಾನಿ” ಕರಿ ಜವಾಬ್‌ ದಿದೊ. 
ಅನ ಖ್ಹಮ್‌ಜಿನ್‌ ಇವ್ಣೆ, “ಅಪ್ಣ ಬಿಜಿ ಖೆವಿ ಸಾಕ್ಷಿನಿ ಜ಼ರೂರತ್ ಕೊಯ್ನಿ! ಅಪ್ಣೆ ಖ್ಹುದ್ ಅನೆ ಬೋಲ್ಯೋತೆ ಇನ ಖ್ಹಮ್‌ಜ್ಯಾನಿ!” ಕರಿ ಬೋಲ್ಯು. 
