﻿ಮಾರ್ಕ.
11.
ಇವ್ಣೆ ಯೆರೂಸಲೇಮ್‌ನ ಖನ್ನೆ-ಖನ್ನೆ ಐನ್, ಆಲಿವ್‌ನ ಪಹಾಡ್‌ಕನ ಛಾ಼ತೆ ಬೆತ್ಫಗೆ ಅಜು಼ ಬೇಥಾನ್ಯ ಕರಿ ಗಾಮ್‌ಕನ ಆಯ. ತದೆ ಯೇಸುನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, 
ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ, ತುಮೆ ಯೋ ಗಾಮ್‌ನ ಮಹಿ ಜಾ಼ತಸ್‌ನ, ಹಿಜ್ಜಾ಼ ಏಕ್‌ ಗಧೇಡಾನು ಚೆಲ್ಕು ಭಂದೈರ‍್ಹೀಶೆತೆ ತುಮೆ ದೇಕ್‌ಶು. ಹಂಕೆತೋಡಿ ಇನಾಪರ್‌ ಕೋಣ್‌ಬಿ ಕೋ ಬೆಠೂನಿ. ಇನ ಛೋ಼ಡಿನ್ ಹಜ್ಜಾ಼ ಲೀನ್‌ ಆವೊ. 
ಅಜು಼ ಕೋಣ್‌ತೋಬಿ ತುಮುನ ಶನ ಅಮ್ ಕರುಕರಸ್ತೆ ಕರಿ ಪುಛಾ಼ಯುತೊ, ಪ್ರಭುನ ಆ ಹೋಣುಕಸ್‌, ಅಜು಼ ಒಗ್ಗಿಸ್‌ಮ ಅನ ಪಾಛು಼ ಬೋಲಿ ಮೋಕಲ್‌ಶೆ ಕರಿ ಬೋಲೊ” ಕರಿ ಬೋಲಿನ್ ಮೋಕ್‌ಲ್ಯೊ. 
ತದೆ ಇವ್ಣೆ ಜೈ಼ನ್‌, ವಾಟ್ನ ಶೇಡೆಥೂತೆ ಘರ್‌ನ ಬಾಕಲ್‍ಕನ ಗಧೇಡಾನು ಚೆಲ್ಕು ಭಂದ್ಯೂತೆ ದೇಖ್ಯು. ಇನ ಛೋ಼ಡುಕರಾನಿ ವಖ್ಹತ್‌ಮ, 
ಹಿಜ್ಜಾ಼ ಭಿಯುಥೂತೆ ಥೋಡು ಜ಼ಣು, “ಆ ಚೆಲ್ಕಾನ ಛೋ಼ಡಿನ್, ಶಾತ್‌ ಕರಾನ ಆಯ?” ಕರಿ ಪುಛಾ಼ಯು. 
ಇವ್ಣೆ ಯೇಸುನೆ ಬೋಲಿ ಮೋಕ್‌ಲ್ಯೊಥೋತೆ ಇಮ್ಮಸ್ ಬೋಲ್ಯು, ತದೆ ಯೋ ಅದ್ಮಿಖ್ಹಾರು ಜಾ಼ವಾನ ಮ್ಹೇಲ್ಯು. 
ಇವ್ಣೆ ಯೋ ಗಧೇಡಾನ ಚೇಲ್ಕಾನ ಯೇಸುಕನ ಲೈನ್‌, ಇವ್ಣ ಲುಂಗ್ಡಾವ್‍ನ ಇನಾಪರ್‌ ನಾಖ್ಯು, ತದೆ ಯೇಸು ಇನಾಪರ್ ಚ಼ಢೀನ್ ಬೇಶಿಗಯೊ. 
ತದೆ ಘಣ ಅದ್ಮಿನೆ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು. ಬಿಜು಼ ಥೋಡು ಜ಼ಣು ಬಾಗ್‌ಮಾಥು ಡಾಳಿಯೇನ ಕತ್ರಿಲೈನ್ ವಾಟ್‌ಪರ್ ಬಿಛಾ಼ಯು. 
ಯೇಸುನ ಖ್ಹಾಮ್ಣೆಬಿ ಪೀಠೆಬಿ ಒಳಿಜಾ಼ತುಥೂತೆ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲ್ತುಹುಯಿನ್, “ಹೊಸನ್ನ! ಪ್ರಭು ದೇವ್ನ ನಾಮ್‌ಪರ್‌ ಆವಾಳಾನ ದೇವ್ ಆಶೀರ್ವಾದ್‌ ಕರಾದೆ! 
ಅಪ್ಣೊ ಬಾ ಹುಯಿರ‍್ಹೋತೆ ದಾವೀದ್‌ನಿ ರಾಜ್ಯ ಆವ್‌ಶೆ, ದೇವ್ ಇನ ಆಶೀರ್ವಾದ್‌ ಕರಾದೆ. ಉಪ್ಪರ್‌ಲ್ಯ ಲೋಕಾಮ ಛಾ಼ತೆ ದೇವ್ನ ಧನ್ಯವಾದ್ ಹುವಾದೆ!” ಕರಿ ಬೋಲ್ಯು. 
ಬಾದ್‌ಮ ಯೇಸು ಯೆರೂಸಲೇಮ್‌ನ ಗಯೊ, ಹಿಜ್ಜಾ಼ ಮಂದಿರ್‌ಮ ಜೈ಼ನ್, ಚಾರ‍್ಹೆ ಬಾಜು಼ ಥೂತೆ ಖ್ಹಾರೂಸ್ ದೇಖ್ಯೊ. ಎತ್ರಾಸ್‌ಮ ಖ್ಹಾಂಜ಼್ ಹುಯಿಗಯುಥು, ಇನಾಖ್ಹಾಜೆ ಇನ ಭಾರ ಜ಼ಣ ಶಿಷ್ಯರ್‌ನ ಕೇಡೆ ಬೇಥಾನ್ಯನ ಚ಼ಲೆಗಯೊ. 
ತಿನವ್ಹಾಣೆ ಇವ್ಣೆ ಬೇಥಾನ್ಯಥು ಪಾಛು಼ ಆವಾನಿ ವಖ್ಹತ್‌ಮ, ಯೇಸುನ ಭುಕ್‌ಲಾಗ್ಯು. 
ತದೆ ಪಾಂದ್‌ಡು ಮ್ಹೇಲೈರ‍್ಹುಥೂತೆ ಏಕ್‌ ಅಂಜೀರ್‌ನ ಝಾ಼ಡಾನ ಯೇಸುನೆ ದೂರ್‌ಥೊ ದೇಖಿನ್‌, ಇನಾಮ ಎಖಾದು ಪಂಡು ಮಳ್‌ಶೆ ಕರಿ ಹಿಜ್ಜಾ಼ ಗಯೊ. ಕತೋಬಿ ಹಿಜ್ಜಾ಼ ಜಾ಼ವಾದಿನ್ ಖಲಿ ಪಾಂದ್‍ಡುಸ್ ಪಣ್ಕಿ, ಬಿಜು಼ ಶಾತ್ಬಿ ಕೋ ಥೂನಿ, ಶನಕತೊ ಯೋ ಅಂಜೀರ್‌ನ ಪಂಡಾ ಮ್ಹೇಲಾನ ದನ್‌ಕಾಹೆ. 
ತದೆ ಯೇಸುನೆ ಯೋ ಝಾ಼ಡಾನ, “ಹಂಕೇಥು ಕೋಣ್‌ಬಿ ತಾರಾಮ ಕದೇಬಿ ಪಂಡು ನಾ ಖಾಣುತೆ ಇಮ್‌ ಹುವಾದೆ!” ಕರಿ ಬೋಲ್ಯೊ. ಅಜು಼ ಇನ ಶಿಷ್ಯರ್‌ನೆ ಆ ವಾತೆನ ಖ್ಹಮ್‌ಜ್ಯು. 
ಇವ್ಣೆ ಯೆರೂಸಲೇಮ್‌ನ ಅವಾದಿನ್, ಯೇಸು ಮೋಟಿ ಮಂದಿರ್‌ಮ ಜೈ಼ನ್, ಹಿಜ್ಜಾ಼ ವೇಚ಼ವಾಳಾನ ಲ್ಯವಾಳಾನ ಭಾರ್ ನಖ್ಹಾಡಲಗ್ಯೊ. ಅಜು಼ ಇನೆ ಪೈಶಾ ತೋಡಾವಾನು ಧಂದೊ ಕರಾವಾಳಾನ ಖುಡ್‌ಶಿನಾಬಿ, ಪರ‍್ಯಾವೊ ವೇಚ಼ವಾಳಾನು ಮೇಜ್‌ನ ರಡ್‌ಕೈನಾಖಿದಿದೊ. 
ಏಕ್‌ ಜ಼ಣಾನಾಬಿ ಮಂದಿರ್‌ನ ಮಹಿಕರಿ ಶಾತ್ಬಿ ಪಳ್ಳಿನ್‌ ಜಾ಼ವಾದಿದೊಕೊಯ್ನಿ. 
ಅಜು಼ ಯೇಸುನೆ ದೇವ್ನಿ ವಚನ್ನ ಬೋಲಿ ದೇತೊಹುಯಿನ್, “ದೇವ್ನೆ ಬೋಲ್ಯೊತೆ ಇಮ್‌, ‘ಮಾರಿ ಮಂದಿರ್‌ ಖ್ಹಾರ ಜಾ಼ತ್‌ವಾಳ ಅದ್ಮಿನ ಪ್ರಾರ್ಥನೆನು ಘರ್ ಕರಿ ಬೋಲೈಲೀಶೆ’ ಕರಿ ಲೀಖೈರ‍್ಹೂಸ್‌ನಿ? ಕತೋಬಿ ತುಮೆ ಅನ ಚೋ಼ರ್‌ನಿ ಘವಿ ಬಣೈರಾಖ್ಯಾಸ್!” ಕರಿ ಬೋಲ್ಯೊ. 
ಅನ ಖ್ಹಮ್‌ಜಿನ್‌ ಗಲ್‌ಢಯಾಜಕರ್‌ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ಼ ಯೇಸುನ ಕೆವ್ಹಿ ಭಾಮ್‌ಥಿ ಮಾರೇಜಾ಼ಯ್‌ ಕರಿ ಸೋಚಾಲಗ್ಯು. ಕತೋಬಿ ಅದ್ಮಿಖ್ಹಾರು ಯೇಸುನಿ ವಾತೆನ ಖ್ಹಮ್‌ಜಿನ್‌ ಘಣು ಅಶ್ಚರ್ಯ ಹುಯುತೆ ಇನಾಖ್ಹಾಜೆ, ಇವ್ಣೆ ಯೇಸುನ ದೇಖಿನ್‌ ಡರಿನ್ ಥು. 
ಖ್ಹಾಂಜ಼್ ಹುವ್ವಾದೀನ್ ಯೇಸುಬಿ ಇನು ಶಿಷ್ಯರ್‌ ಖ್ಹಯೇರ‍್ನ ಮ್ಹೇಲಿ ಗಯ. 
ತಿನವ್ಹಾಣೆ ಇವ್ಣೆ ಮಾರಗ್ ಧರಿನ್ ಆವಾನಿ ವಖ್ಹತ್‌ಮ, ಯೋ ಅಂಜೀರ್‌ನು ಝಾ಼ಡ್‌ಣ ಇವ್ಣೆ ದೇಖ್ಯ. ಯೋ ಜ಼ಡ್‌ ಖ್ಹಮೇದ್‌ಥೂಸ್‌ ಖ್ಹುಕೈಗಯೂಥು. 
ತದೆ ಪೇತ್ರನೆ ಗಯೋತೆ ದನ್ನೆ ಚಾ಼ಲ್ಯುಥೂತೆ ಇನ ಯಾದ್‌ಕರಿನ್ ಯೇಸುನ, “ಗುರು ಹಂದೇಕ್‌, ತುನೆ ಶಾಪ ದಿದೊಥೋತೆ ಅಂಜೀರ್‌ನು ಝಾ಼ಡ್ ಖ್ಹುಕೈಗಯು!” ಕರಿ ಬೋಲ್ಯೊ, 
ತದೆ ಯೇಸುನೆ ಇವ್ಣುನ ಫರೈನ್ ಬೋಲ್ಯೋಕಿ, “ದೇವ್‌ಪರ್‌ ವಿಶ್ವಾಸ್‌ ರ‍್ಹವಾದೆ. 
ಮೇ ತುಮುನ ಖ್ಹಾಚ ಬೋಲುಸ್, ಕೋಣ್‌ತೋಬಿ ಆ ಪಹಾಡ್‌ನ, ‘ತೂ ಉಖ್‌ಡೈ ಜೈ಼ನ್, ದರ‍್ಯಾವ್‌ಮ ಪಡ್’ ಕರಿ ಬೋಲಿನ್ ಇನ ದಿಲ್ಮ ಗುಮಾನಿ ಕರ‍್ಯೊಕೊಂತೆ, ಯೋ ಬೋಲ್ಯೊತೆ ಇಮ್ಮಸ್ ಉಷೆಕರಿ ನಂಬ್ಯೋತೊ, ಯೋ ಬೋಲ್ಯೊತೆ ಇಮ್ಮಸ್ ಇನ ಉಶೆ. 
ಇನಾಖ್ಹಾಜೆಸ್ ಮೇ ತುಮೂನ ಬೋಲುಸ್ಕಿ: ತುಮೆ ಪ್ರಾರ್ಥನೆ ಕರಿನ್‌ ಶಾತ್ ಮಾಂಗೋಸ್‌ಕಿ ಯೋ ತುಮೂನ ಮಳೀರ‍್ಹುಸ್ ಕರಿ ನಂಬೊ, ತದೆ ತುಮೆ ಶಶ್ಶಾತ್ ಮಾಂಗಿಲಿದಾಕಿ ಯೋ ತುಮುನ ಮಳ್‌ಶೆ. 
ಎತ್ರೇಸ್ ಕಾಹೆತೆ ತುಮೆ ಭೀರಿನ್‌ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತುಮೂನ ಕಿನಾಪರ್‌ಬಿ ಶಾತ್‌ತೋಬಿ ದಾವೊ ರ‍್ಹಯೂತೊ ಇನ ಮಾಪ್‌ ಕರೊ, ತದೆ ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮೆ ಕರ‍್ಯಾತೆ ಗಲ್ತಿನ ಮಾಪ್‌ ಕರಿನಾಕ್‌ಶೆ” ಕರಿ ಬೋಲ್ಯೊ. 
ಕತೋಬಿ ತುಮೆ ಮಾಪ್‌ ನಾಕರ‍್ಯಾತೊ ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮಾರಿ ಗಲತ್ನ ಮಾಪ್‌ ಕೊಕರ್‌ಶೇನಿ. 
ಇವ್ಣೆ ಪಾಛು಼ ಫರೀನ್ ಯೆರೂಸಲೇಮ್‌ನ ಆಯ. ಹಿಜ್ಜಾ಼ ಯೇಸು ಮಂದಿರ್‌ನ ಮಹಿ ಜೈ಼ನ್‌ ಫರುಕರಾತೆ ವಖ್ಹತ್‌ಮ, ಗಲ್‌ಢಯಾಜಕರ್‌ನ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಯೇಸುಕನ ಐನ್, 
“ತೂ ಖೆವಿ ಹಕ್‌ಥಿ ಆ ಖ್ಹಾರು ಕರಾಸ್ತೆ? ಅಮ್ನಿ ಹಕ್ ತುನ ಕೋಣ್ ದಿದು?” ಕರಿ ಇನ ಪುಛಾ಼ಯು. 
ಯೇಸುನೆ ಇವ್ಣುನ, “ಮೇಬಿ ತುಮೂನ ಏಕ್‌ ಸವಾಲ್‌ ಫುಛಾ಼ವುಸ್‌, ಮನ ಜವಾಬ್‌ ದಿದಾತೊ, ಬಾದ್‌ಮ ಮೇ ಕೆವ್ಹಿ ಹಕ್‌ಥಿ ಆ ಖ್ಹಾರು ಕರುಸ್ ಕರಿ ತುಮುನ ಬೋಲುಸ್” ಕರಿ ಬೋಲಿನ್ 
ಬ್ಯಾಪ್ತಿಸ್ಮ ದ್ಯವಾನಿ ಹಕ್‌ ಯೋಹಾನ್ನ ಪರಲೋಕ್‌ಥಿ ಆಯುಕಿ: ಕೊಯ್ನಿ ಅದ್ಮಿಥಿ ಆಯು? ಜವಾಬ್‌ ದೆವೊ” ಕರಿ ಬೋಲ್ಯೊ. 
ತದೆ ಇವ್ಣೆ ಇವ್ಣ-ಇವ್ಣ ಮಹಿಸ್ ವಾತೆಚೀತೆ ಕರ್ತುಹುಯಿನ್, “ಅಪ್ಣೆ ಶಾತ್ ಬೋಲಿಯೆ? ‘ಪರಲೋಕ್‌ಥಿ ಆಯು’ ಕರಿ ಅಪ್ಣೆ ಬೋಲ್ಯಾತೊ, ‘ಇಮ್‍ಕತೊ ತುಮೆ ಶನ ಯೋಹಾನ್ನ ನಂಬ್ಯಾಕೊಯ್ನಿ?’ ಕರಿ ಬೋಲ್‌ಶೆ, 
‘ಅದ್ಮಿಥಿ ಆಯು’ ಕರಿ ಬೋಲ್ಯಾತೊ ಶಾತ್‌ ಹುವ್ವಾಸ್‌ಕಿ” ಕರಿ ಬೋಲಾಲಗ್ಯು. ಶನಕತೊ ಯೋಹಾನ ಏಕ್‌ ಪ್ರವಾದಿ ಕರಿ ತಮಾಮ್‌ ಅದ್ಮಿ ಗುಮಾನಿಕೊಂತೆ ನಂಬಿರಾಖ್ಯುಥು. ಇನಾಖ್ಹಾಜೆ ಇವ್ಣುನ ಅದ್ಮಿನೊ ಡರ್‌ ಥೊ. 
ಅನಖ್ಹಾಜೆ ಇವ್ಣೆ, “ಹಮೂನ ಮಾಲುಮ್‌ ಕೊಯ್ನಿ” ಕರಿ ಯೇಸುನ ಜ಼ಬಾಬ್‌ದಿದು. ತದೆ ಯೇಸುನೆ ಇವ್ಣುನ, “ಮೇಬಿ ಖೆವಿ ಹಕ್‌ಥಿ ಆ ಖ್ಹಾರು ಕರೂಸ್ಕಿ, ಯೋ ತುಮುನ ಕೋ ಬೋಲೂನಿ” ಕರಿ ಬೋಲ್ಯೊ. 
