﻿Markus.
11.
Ye̱so u̱n yan-neke̱-mo̱ u̱n wu̱ ne̱, ye̱ hyoknu̱ru̱ yow yow o-Urusharima ne̱ be-de u̱n Haag-o̱ u̱n 'yo-se o-Ze̱tun. U̱n co hiin to̱ ken bo̱-to̱ u̱t-re̱k-to̱ ro káne̱: o-gaan o-Bapaji, o-gaan o-Betanya. Ka da-de ne̱, Ye̱so to̱mu̱ru̱ yan-neke̱-mo̱ u̱n wu̱ ne̱n yoor. 
Wu̱ ze̱e̱ru̱ ye̱, “Wo̱be̱ no̱ u̱n ka bo̱-de ro̱ o-co à, no̱ tu̱w be-de u̱n ye̱. Da-o̱ no̱ tu̱we̱, no̱ 'wo̱s wà-yo o-janka yo a ce̱te̱ m-da á. Yo ro̱ gego. No̱ ussu̱ndu̱ me̱ yo, no̱ hantu̱ me̱. 
Kowa citu̱ no̱, ‘¿Ya no̱tte̱ m-us u̱n ka janka-yo?’ No̱ zee, ‘Go̱s-wu̱ te̱, wu̱ zee wu̱ co̱no̱g yo. Wu̱a mu̱u̱ntu̱sse̱ yo m-mo̱ka m-mo̱ka.’ ” 
Ka da-de ne̱, ye̱ argu̱ru̱ m-neke̱. Bo̱ ye̱ 'wo̱ste̱ yo à, ye̱ ussu̱nu̱ru̱ yo. 
Da-o̱ ye̱ ro yo m-us à, ka hun-ne̱ ye̱ ro kane̱ ge̱ à, ye̱ citu̱ru̱, “¿Remen ya no̱ usste̱ ka wà-yo o-janka yo?” 
Yan-neke̱-m Ye̱so ru̱ru̱ ye̱ bo̱ Ye̱so zee ye̱ à. Hun-ne̱ ze̱e̱ru̱ ye̱, “To̱, aragbu̱ no̱.” Ye̱ argu̱ru̱. 
Ye̱ hantu̱ru̱ Ye̱so ka janka-yo. Ye̱ ussu̱ru̱ gund-to̱ u̱n ye̱. Ye̱ neksu̱ru̱ n-to̱n o-janka. Ka da-de ne̱, Ye̱so daaru̱. 
Hun-ne̱ de̱e̱n ye̱ neksu̱ru̱ gund-to̱ u̱n ye̱ u̱n co̱w. Ye̱ ken ye̱ ne̱ ye̱ kaaru̱ u̱t-wa n-riib o-co̱w. Ye̱ ze̱e̱ru̱ m-neks u̱n co̱w. 
U̱n ye̱ ro̱ o-co à, u̱n ye̱ ro̱ u̱n jim ne̱ à, kap ye̱ ma'asu̱ru̱ u̱s-guuda zak-o-zak. Ye̱ m-ze̱e̱, “A bo̱mo̱g Shir!” “A bu̱m no̱ ka wu̱ haane̱ u̱n be̱e̱b-u̱r Yawe à. A bu̱m no̱ wu̱!” 
“Shir 'ye o-kwu̱m be-de u̱n haan-mo̱ u̱n gwo̱mo-u̱t Dawuda tat na.” “A bu̱m no̱ Shir n-To̱n!” 
Ye̱so co̱wu̱ru̱ o-Urusharima. Bo̱ wu̱ wo̱o̱nte̱ à, wu̱ co̱wu̱ru̱ u̱n Pyo-o̱ Shir o̱ ro̱ u̱n ka bo̱-o̱ à. Ka da-de ne̱, wu̱ gu̱tru̱ru̱ ko̱ yo ke rii-yo. Wu̱ hyanu̱ru̱ ho̱-u̱r teeste̱, wu̱ ruuru̱ o-Urusharima, wu̱ neku̱ru̱ o-Betanya mo̱sse̱ u̱n yan-neke̱-mo̱ u̱n wu̱ ne̱ o̱p u̱n ne̱n yoor. 
Ish gasu̱ru̱, ye̱ ruuru̱ o-Betanya. Ye̱ ro m-mu̱u̱n o-Urusharima, Ye̱so ho̱gu̱ru̱ me̱r. 
Wu̱ gu̱t, wu̱ 'wo̱s rum-yo ka u̱t-wa ne̱. Wu̱ hessu̱ru̱, wu̱ haaru̱ yo m-gwo̱t ko̱ yo makt à. Bo̱ wu̱ wo̱o̱bu̱te̱ be-de u̱n yo à, wu̱ 'wo̱s rii á, se̱ u̱t-wa remen da-o̱ u̱n mat-de u̱t-rum o̱ u̱n go no̱m á. 
Ye̱so ze̱e̱ru̱ ka rum-yo, “Wo̱a do m-mat u̱t-rum har hun-ne̱ reet to̱ á.” Yan-neke̱-mo̱ u̱n wu̱ ye̱ ho̱gu̱ru̱ bo̱ wu̱ ze̱e̱ yo à. 
Ye̱so wo̱o̱nu̱ru̱ o-Urusharima. Wu̱ wo̱o̱n, wu̱ dooru̱ m-co̱w u̱n Pyo-o̱ Shir. Bo̱ wu̱ tu̱wte̱ u̱n Pyo-o̱ Shir à, wu̱ 'wo̱ssu̱ru̱ ya-u̱t-baab ye̱ ka u̱n ya-m-o̱ ne̱. Wu̱ taknu̱ yanse̱ u̱n ye̱ u̱s-so̱ro̱g u̱s-so̱ro̱g. Wu̱ wagarsu̱ru̱ saw-to̱ u̱t-sak u̱n yan-shas-o̱ u̱n hwo̱r ne̱ u̱n de̱e̱g-to̱ u̱n ya-u̱t-baab to̱ u̱n tantabara ne̱. 
Hun-ne̱ ye̱ ro m-ma'as m-caatu̱ne̱ u̱n Pyo-o̱ Shir u̱s-saw ne̱ à, wu̱ ze̱e̱ru̱ ye̱, “No̱ do m-caatu̱ne̱ á.” 
Ka da-de ne̱, wu̱ yoosu̱ru̱ hun-ne̱, wu̱ ze̱e̱ru̱ ye̱, “A ge̱ne̱g to̱ ka ma-to̱ be-de u̱n Ma-to̱ Shir. Shir ze̱e̱g, “ ‘Hur-o re o̱ warag hur-o̱ u̱s-ko̱n be-de u̱n baag-o̱ u̱n hun-ne̱ kap ye̱ he me̱ u̱s-ko̱n à.’ No̱ muutte̱ o̱ ne̱ hur-o̱ u̱n hyow-ne̱.” 
Gwo̱mo-ne̱ ye̱ u̱n ko̱n-se Shir u̱n yan-Yoos-de u̱n karamsa-o Mosa ne̱, da-o̱ ye̱ ho̱ge̱ kaane̱ à, ye̱ ho̱o̱bu̱ru̱ o-co̱w yo ye̱ hette̱ ho̱ u̱n Ye̱so à. Ye̱ ro hyan u̱n gye̱r-o̱ u̱n wu̱, remen hun-ne̱ hyanag u̱t-hyat u̱n yoos-de u̱n wu̱. 
Bo̱ ho̱-u̱r he̱bu̱te̱ à, Ye̱so ruuru̱ o-Urusharima mo̱sse̱ u̱n yan-neke̱-mo̱ u̱n wu̱ ne̱. 
Ish gasu̱ru̱, ye̱ ro m-argu̱ne̱. Ye̱ hyambu̱ru̱ ka rum-yo. Yo hu̱'u̱ste̱ gaw u̱n geer-se u̱n yo ne̱. 
Ka da-de ne̱, Bitrus baksu̱ru̱ bo̱ Ye̱so ze̱e̱ ka rum-yo à. Wu̱ ze̱e̱ru̱ Ye̱so, “Wa-u̱s-Nap, gwo̱t! Ka rum-yo o hu̱u̱ nu à, ai, yo hu̱'u̱ste̱ gaw, kap u̱s-geer ne̱.” 
Ye̱so shasu̱ru̱ yan-neke̱-mo̱ u̱n wu̱, wu̱ ze̱e̱ru̱, “She̱r no̱ be-de Shir. 
Nip-o̱ me̱ no̱ m-ru̱re̱, ne̱t-wu̱ de̱ke̱ Ma-to̱ Shir hur-u̱r gaan à wu̱a zee ka haag-o̱ ‘Wuksu̱nde o he̱'e̱be̱ n-me̱ m-sa.’ No̱a hyenes ma-to̱ u̱n wu̱ to̱a bu̱p o-nip to̱ wu̱ ze̱e̱ à. Amba wu̱ she̱re̱ u̱r-hur á, yatt-yo he m-nome̱ á. 
Remen kaane̱, me̱ no̱ m-ru̱re̱, ko̱yan no̱ ko̱ne̱ be-de Shir, de̱k no̱ u̱nze no̱ regu̱su̱te̱ no̱ go̱ksu̱ssu̱te̱ yo. Ka da-de ne̱, no̱a hyen a ya'aste̱ no̱ ka rii-yo no̱ ko̱ne̱ à. 
Da-o̱ no̱ ro u̱n ko̱n-se Shir, u̱rege̱ wu̱ ken ro̱ ko̱n wu̱ no̱ m-hyan ryaab-se u̱n wu̱ à, no̱ soksu̱ wu̱ ba'as-to̱ u̱n wu̱, remen Tato no̱ wu̱ ro̱ n-To̱n shir à, wu̱ soksu̱tú̱ no̱ ba'as-u̱t no̱.” 
Ye̱ mu̱u̱nu̱ru̱ o-Urusharima komo, Ye̱so ma'asu̱ru̱ u̱t-tu̱w n-me̱ u̱n Pyo-o̱ Shir. Ye̱ ken ye̱ haanu̱ru̱ be-de u̱n wu̱. Gwo̱mo-ne̱ ye̱ u̱n ko̱n-se Shir ye̱ ro̱ ko̱n be-de u̱n ye̱ u̱n yan-Yoos-de u̱n karamsa-o Mosa ne̱ u̱n se̱k-ye̱ ye̱ u̱n Yahuda-ne̱. 
Ye̱ citu̱ru̱ wu̱, ye̱ ze̱e̱ru̱, “¿Wan wu̱ ne̱ ya'e̱ wo̱ 'wo̱ns-mo̱ wo̱tte̱ u̱n no̱m u̱n go̱n ka rem-se?” 
Ye̱so waksu̱ru̱ ye̱, wu̱ ze̱e̱ru̱, “Me̱ eb re, yage̱ u̱m m-cit no̱ o-cot. Shas no̱ me̱. No̱ shesu̱ me̱, man ru̱ru̱ no̱ wu̱ ya'e̱ me̱ 'wo̱ns-mo̱ u̱n no̱m u̱n ka rem-se à. 
¿Wan wu̱ ne̱ ya'e̱ Yohana u̱t-gwo̱mo to̱ u̱n yo'os u̱n hun-ne̱ m-ho̱: Shir ko̱ hun-ne̱?” 
Bo̱ ye̱ ho̱gu̱te̱ cot-o̱ u̱n wu̱ à, ma-u̱t su̱nu̱ru̱ ye̱ u̱n hi u̱n de u̱n ye̱. Ye̱ ze̱e̱ru̱, “A zee ‘Shir, wu̱ u̱n n-To̱n shir to̱mne̱ Yohana,’ wu̱a zee na, ‘¿Ya hante̱ no̱ de̱kte̱ ma-u̱t Yohana á?’ 
¿Amba a hoks m-ze̱e̱, ‘Hun-ne̱ ye̱ to̱mne̱ Yohana’? A hoks m-ze̱e̱ kaane̱ á.” Ye̱ u̱n ho̱ge̱ u̱n gye̱r-o̱ u̱n hun-ne̱, remen ye̱ nepste̱ Yohanawan-Rwo̱r u̱n Ma-to̱ Shir wu̱. 
Remen kaane̱, ye̱ waksu̱ru̱ Ye̱so, ye̱ ze̱e̱ru̱, “Te̱ nap á.” Ye̱so ne̱ wu̱ ze̱e̱ru̱ ye̱, “To̱, cin da no̱ nepte̱ wu̱ to̱mne̱ Yohana á, me̱ eb re, man ru̱ru̱ no̱ wu̱ ya'e̱ me̱ 'wo̱ns-mo̱ u̱m nomte̱ ka rem-se á.” 
