MAT 1:1 Ri kil pa nang a tu mamikg mamin mansan a tu nira nira ela wrkapm pa. Tu pa angket ale kul angko Sisas Krais. Sisas pa kil palng wli tu a Tepit, wa Tepit pa kil palng wli tu a Apraam.
MAT 1:2 Wa Apraam pa angket Aisak, wa Aisak pa angket Sekop. Wa Sekop pa angket Suta nampikgen tu wusokwail alkilen.
MAT 1:3 Wa Suta pa angket Peres ekg Sera. Man atuwekg pa Tamar. Wa Peres pa angket Esron, wa Esron pa angket Ram.
MAT 1:4 Wa Ram pa angket Aminatap, wa Aminatap pa angket Nason. Wa Nason pa angket Salmon.
MAT 1:5 Wa Salmon pa angket Poas. Man a Poas pa Raap. Wa Poas pa angket Opet. Man a Opet pa Rut. Wa Opet pa angket Sesi.
MAT 1:6 Wa Sesi pa angket Tepit, melnum tukgunakg. Wa Tepit pa angket Solomon. Man a Solomon pa pikekg kin a Uria.
MAT 1:7 Wa Solomon pa angket Reopoam, wa Reopoam pa angket Apiya. Wa Apia pa angket Asa.
MAT 1:8 Wa Asa pa angket Seosapat, wa Seosapat pa angket Seoram. Wa Seoram pa angket Usia.
MAT 1:9 Wa Usia pa angket Sotam, wa Sotam pa angket Aas. Wa Aas pa angket Esekia.
MAT 1:10 Wa Esekia pa angket Manase, wa Manase pa angket Emon. Wa Emon pa angket Sosaia.
MAT 1:11 Wa Sosaia pa angket Seoiakin, nampikgen tu wusokwail alkilen. Ak wang pa, tu Isrel pikekg tu Papilon awiyen aye kai alken wang paipm kai anong kanokg alntuwen atom tu akenten kwap kalpmlel.
MAT 1:12 Tu awiyen aye kai rpma Papilon pa pipa, Seoiakin pa angket Sealtiel. Wa Sealtiel pa angket Serupapel.
MAT 1:13 Wa Serupapel pa angket Apiut, wa Apiut pa angket Eliakim. Wa Eliakim pa angket Asor.
MAT 1:14 Wa Asor pa angket Satok, wa Satok pa angket Akim, wa Akim pa angket Eliut.
MAT 1:15 Wa Eliut pa angket Eleasar. Wa Eleasar pa angket Matan, wa Matan pa angket Sekop.
MAT 1:16 Wa Sekop pa angket Sosep, kipman a Maria. Atom Maria pa man a raku Sisas, Sisas pa Krais.
MAT 1:17 Tu yantin a angko kai Apraam a angket ale kulngkul, kul angko Tepit pa wampwam yikakwom wikgwikg. Wa tu yantin a angket ale angko Tepit ti kulngkul, kul angko wang a tu Papilon awi tu Isrel aye kai alken wang paipm kai anong kanokg alntuwen pa, wampwam yikakwom wikgwikg. Wa tu yantin a angket ale kai angko wang a tu Papilon awiyen aye kai anong kanokg alntuwen ti kul angko Sisas pa am wa palng wampwam yikakwom wikgwikg pa yat pake.
MAT 1:18 Yangkipm a la Sisas Krais kil palng pati la kol kil: Man alkil pa Maria, tu aknamputel la rpmi eng Sosep. Pake tuwekg itna watin watin, ake tuwekg okg kin kipman, pa apa. Atom ak wang pa tu ari Maria kil am arkolng wang kainil ase. Kil itna atnen Maur Wor a Maur Wailen.
MAT 1:19 Pake Sosep, kipman a aknamputel la uwiyel pa, kil melnum ute wor. Wa kil karken a ungkwan kin a tu aknamputel pa itna wulmpa a tu wrongkwail ti mpa alkel numpaipm. Kolpa ti kil akwonalmpen rpma nikg a kil alkil ti la kil a nuurngkel meen kolti.
MAT 1:20 Kil akwonalmpen kolpa itna pa, kil okgwangket ari maur angklin a Maur Wailen palng lanakel la, “Sosep, watnom walpopm a yoampei Tepit, ampur kitn ngkark eng la ake mpa uwi Maria ti iye kolen kin alkitnen pa. Itning, warim ri rpma ipma a Maria a pa pikekg Maur Wor a Maur Wailen ai alkel ai.
MAT 1:21 Kil ikga raku warim kipman pake kitn ukwe nang akilen pa Sisas. Eng ntei, kil ikga ik uwi tu wrong kin a kipman a antokg paipmpaipm pa iye kul kai eng alkilen.”
MAT 1:22 Kweikwei kol a palng ti pa kai kanun yangkipm a pikekg Maur Wailen kil la kai ok a melnum okwripm pa, kil la kolkil la,
MAT 1:23 ”Itning, kin ur a pikekg ake okg kinkipman nampon kipman ur pa, kil ikga itni, atom raku warim kipman. Ikga tu ukwe nang akilen pa Imanuel.” Yiprokgen a nang pa pati, la Maur Wailen antiwo rpma.
MAT 1:24 Atom Sosep kil wrekg kanun okgwangket kol a maur angklin a Maur Wailen kil lanakel pa, atom kil awi kin a tu aknamputel pa aye.
MAT 1:25 Pake ake kil antiwel okg kinkipman pa, kolpa kai angko wang a kil raku warim kipman pa. Atom kil akwe nang a warim pa la Sisas.
MAT 2:1 Sisas pa Maria kil raku kinar anong Petleem, a anong kanokg Sutia, ak wang a Erot kil itna melnum tukgunakg. Kil raku plalng pa tunteng melnum ariwe a takgni no pa tunteng kaino anong wail Serusalem.
MAT 2:2 Atom tunteng asen tu Suta pa la, “Warim weten a ikga palng melnum tukgunakg itni ep a kipm Suta pa rpma kai a i? Men ari kumeim akilen a palng a takgni no ti, atom men kul la kipor kilko ilein a ngkit nang akilen.”
MAT 2:3 Pake Erot, melnum tukgunakg kil atning yangkipm pa, pa kolen ikyom ikningkil ur arkewel, a wa nampon tu wrongkwail kin a kipman a Serusalem ti yat.
MAT 2:4 Atom kil akwe tu tukgunakgen a tu ipma krakgen a ak ak kwap eng al wor uk Maur Wailen pa, nampon tu melnum a aroaro wonel tu yangkipm a Moses pa, atom kil asenten la, “Kipm ariwe Krais pikekg tu nira la ikga man rakuwel rpmi kai a i?”
MAT 2:5 Ari tu akalmpe la, “Ikga rakuwel rpmi kinar anong Petleem a anong kanokg Sutia pa, kol a pikekg melnum okwripm a Maur Wailen kil nira yangkipm pa kolpa la,
MAT 2:6 'Kitn Petleem, anong a ela anong kanokg Sutia pa, kitn ake nang kalpisen pa itna kuin a kipm melnum tukgunakg a anong kanokg Sutia pa. Eng ntei, melnum wailen ur ikga palng kai kitn pa, atom ikga kil itni ep eng ikglen kipm Isrel, kipm wrong kin a kipman akupmen.'”
MAT 2:7 Kolpa atom Erot kil awi tunteng melnum ariwe a takgni no pa kai itna ampen, atom kil asenten eng la uwi riwe riworwor wang na pikekg kumeim pa palng pa.
MAT 2:8 Kil awi ariwe wang pa plalng pa, kil ukwa tunteng pa kinar Petleem, atom kil la kolpa, “Kipm kinar ikor riworwor warim pa plalng pipa, kipm iye yangkipm pa yaper no lanikopm! Eng kupm ti yat, kupm la wa kinar eng kipor kilko ilein ngkit nang a kil pa yat.”
MAT 2:9 Tunteng atning yangkipm a melnum tukgunakg pa la plalng pa tunteng kinar. Kumeim a pikekg tunteng ari ep a palng a takgni no pa ep ep, a tunteng pa kanun kanun kolpa kinar, kumeim pa kinar rpma kwa ute wan a warim pa armpe pa.
MAT 2:10 Tunteng ari pa, ipma a tunteng pa atopen paipm wrisen.
MAT 2:11 Atom tunteng kai kawor wan pa, tunteng ari warim pa nampon man alkil Maria pa rpma. Tunteng kapor kilko alein ngkat nang a warim pa. Atom tunteng nakle kweikwei wor wor alntunteng pa plalng pa, tunteng uk kweikwei wor wor kolen wes maur muinmainet, a kweikwei yaprekget wor a ampor eng aris wor, a u wor a ak anel num pa, uk kai warim pa eng ak atopentel.
MAT 2:12 Pake wa Maur Wailen kil lanaken titnongket kai okgwangket pa la, ake mpa tunteng yaper or ya wrik wrik pa kaino eng Erot pa, kalpis. Tunteng atning kolpa atom tunteng yaper kai or ya manet ur ai kai anong kanokg alntuntengen pa.
MAT 2:13 Tunteng melnum ariwe tunteng kai plalng pa, maur angklin a Maur Wailen kil lanaki Sosep pa kai okgwangket pa la, “Kitn wrekg uwi tuwekg mantwarim pa, atom kipmteng ngkirk kai rpmi kai Isip! Eng ntei, Erot kil la ikor warim ti eng la or imo. Kitn rpmi kai pa rpmi i, wang a kupm lanikeitn pa kitn yaper kul.”
MAT 2:14 Sosep kil atning kolpa, kil wrekg awi tuwekg mantwarim pa, tunteng ngkark ak mining pa kai Isip.
MAT 2:15 Kil ayewen rpma kai Isip pa a a, Erot pa amo plalng pipa, tunteng yaper kul. Kweikwei a palngten pa kai kanun kol a pikekg Maur Wailen kil lanaki melnum okwripm alkilen pa la, “Kupm akwe warim kipman alkupm a rpma kai Isip pa la, kil kul o! Atom kil kul.” Yangkipm kil a pikekg la pa am palng okarke tike.
MAT 2:16 Pake tunteng melnum ariwe a takgni no pa tunteng or ya manet ur pa kai anong alntuwen ase. Atom Erot kil rpma nungkwangen a a, ining. Atom kil ariwe la, tunteng untel ak, atom nikgwalpm a kil pa wleket paipm. Ti kil ukwa melnum tiur la kinar Petleem, wa anong wrongkwail a ela wreren, eng tu or tu warim kipman wrongkwail a angko wring wekg pa aye nar. Atom tu or tu warim a kilmik wris kai or wang a pikekg kil asen tunteng melnum ariwe pa ariworwor, atom tunteng lanakel wang a pikekg kumeim palng pa.
MAT 2:17 Atom kuina ur a pikekg Maur Wailen la palng kai ok a Seremaia, melnum okwripm alkilen la pa, am palng ok arke aklale tike. Pikekg kil la kolkil la,
MAT 2:18 ”Tu atning ok ur a akg kinar anong Rama, kirkar akg arein wail. Resel akgen warim alkil a amo. Ake antiwe mpa tu ntokg ipma akilen pa rpmi wor. Eng ntei, warim alkilen pa am amo plalng ase.”
MAT 2:19 Tunteng rpma kai Isip pa, Erot pa amo plalng pipa, maur angklin a Maur Wailen pa naki Sosep kai okgwangket
MAT 2:20 pa la, “Kitn wrekg uwi tuwekg mantwarim pa, atom kipmteng yaper kai anong kanokg Isrel pawo! Tu melnum pikekg ampen la ilm warim pa imo pa, tu pa am amo plalng ase.”
MAT 2:21 Kolpa atom Sosep kil wrekg awi tuwekg mantwarim pa, tunteng yaper kul anong kanokg Isrel.
MAT 2:22 Pake ak wang a Sosep kil atning la Arkelaus pa kil palng melnum tukgunakg a ikgalen anong kanokg Sutia, awi wrik a yan alkil Erot pa, kil ngkark eng la kai anong pa. Ari wa kai okgwangket pa, Maur Wailen kil lanakel, atom kil kaino rpma kaino anong kanokg Kalili.
MAT 2:23 Kil kaino rpma anong ur a tu namput la Nasaret. Atom yangkipmok kuina ur a pikekg tu melnum okwripm a Maur Wailen la kolkil la, “Ikga tu ukwewel la melnum a Nasaret”, pa am palng ok arke aklale tike.
MAT 3:1 Kil yangkipm a la Son melnum a kaluk tu. Wring aripm ur kai plalng pa Son kil ngkaten kwap a laron yangkipm a Maur Wailen pa rpma kai wrik mpang kalpmel a anong kanokg Sutia.
MAT 3:2 Pa kil la, “Maur Wailen wreren eng a itni wailen ikglen ipma a kipm pake, ti kipm plelng ipma!”
MAT 3:3 Pikekg ep ak ai, Aisaia, melnum okwripm a Maur Wailen pikekg la Son pa kolkil la, “Ok ur okok itna wrik mpang kalpmel pa la kolpa la, 'Nimprampen ya eng Wailen, ukulentel ya pa wunong riworwor!'”
MAT 3:4 Apm a Son nowe pa pikekg antokg walkg a manto meng watin (kamel). Kil ak manto meng watin palk pa ak angket apm pa tatu tom pa. Wa okipma a kil al pa, kil al ka wa u pong mpangen a kumplun.
MAT 3:5 Ak wang pa, tu wrongkwail kai eng atning yangkipm a kil angkli. Tu a anong wail Serusalem, tu a anong kanokg wrongkwail a Sutia, a anong wrongkwail a ela narno u kop Sotan yamping yamping pa, tu kul eng Son.
MAT 3:6 Tu laron paipmpaipm alntuwen pa, atom Son kil kaluken itna u kop Sotan.
MAT 3:7 Pake ak wang a Son kil ari tu melnum a arpmen yangkipm yiprokgen a Moses a tu Satyusi watipmen a kul eng la kol a kil kuluken pa, kil lanaken la, “Kipm ti kolen ul angketepm. Mla lanakepm pa atom kipm akor ya eng la ikga ngkirk tukuleikgen ipma wakget a Maur Wailen a ikga nar ti!
MAT 3:8 Kolpa ti kipm plan atn a rpma akipmen ti kol yo a angko oken wor, eng mpa plan la kipm am plelng ipma ase.
MAT 3:9 Kipm am palng angkai Apraam pa angket alewepm kul pake, pake ake mpa kipm won ngklin la Apraam pa maminwror akipmen, ti ikga ngklinsepm pa. Eng ntei, kupm lanakepm la, Maur Wailen ti antiwe la wes tatu ti wa palng walwalpopm walyaru a Apraam ti.
MAT 3:10 Ti kotwang pa am numprampen rmpa yo yiprokg wrongkwail pa yat ase. Yo a ake ok arke ariwor pa, ikga ware ngkit ngkli elng kai wakg.
MAT 3:11 Kupm kalukepm itna kil pa, kupm kalukepm ak u kalpmel kolti, pa ak plan la kipm am plelng ipma ase. Pake melnum a ikga kul kunukg kupm kil pa, antiwe titnongket wail angen kupm ti. Kupm ti ake melnum wor antiwe mpa kupm iner nepm palk a melnum Wailen a kolpa. Kil pa ikga kulukepm ik Maur Wor alkilen wa ik wakg.
MAT 3:12 Kil aye kaimung pa itna kai wam alkil pa, eng la ik ngkwol wit ok pa ik wripm uwi, atom misen wor wor pa kil ikga ngkiten nimong iye kai rpmi wan wit ok alkilen ai. A kil ikga numpron plepm paipm paipm pa elng itni manet, eng ikga lap kai wakg a ikgake ime pa, kalpis.”
MAT 3:13 Ak wang pa Sisas kil wrekg a anong kanokg Kalili pa nar u kop Sotan eng la Son kulukel.
MAT 3:14 Pake Son la ngkengkel la, “Kupm kil kol am kitn pa kulukopm pake. Ari kitn pa wa kul lala kupm ti wa kulukeitn!”
MAT 3:15 Pake Sisas akalmpe la, “Ntokg kol a kupm la pa pen. Pa wor kol mentekg kunun ntokg kitila nikgwalpm wrongkwail ute wor a Maur Wailen kil la pa.” Son awi wor atom kil kalukel.
MAT 3:16 Kil kalukel plalng pipa, Sisas kil a u pa no pa, ak wang ketn pa, kitnong pa rakol, a kil ari Maur Wor a Maur Wailen pa nar kol wel punum pa narntel.
MAT 3:17 Pipa ok ur la angkaino kitnong pa nar la, “Pa warim kipman wor wris alkupm a kupm plan ipma wor wakrongentel. Kupm ipma wor atopentel.”
MAT 4:1 Son kil kaluk Sisas plalng pa Maur Wor a Maur Wailen kil awi Sisas aye kai wrik kalpmel ur a ake melnum ur arke, eng mpa Maur Paipm kil ningkailel.
MAT 4:2 Sisas kil uk wang rpma ak nikg wang kamel misen wekg miningkranen pa atom nikgalmpel.
MAT 4:3 Pa pipa Maur Paipm a ningkail kamel pa wli palngtel kolti lanakel la, “Kol kitn Warim Kipman a Maur Wailen pa pati, kitn la wes ti palng kolen okipma pa, atom kitn il!”
MAT 4:4 Ari Sisas akalmpe la, “Wrkapm a Maur Wailen pa la kolkil la, 'Melnum ake antiwe a rpma ak okipma kolti pa, kalpis. Pa rpma ak yangkipmok wrongkwail a palng kai ok a Maur Wailen!'”
MAT 4:5 Kil akalmpe kolpa plalng pipa, wa Maur Paipm wa awiyel a pa wa ayewel kai kaino anong wail Serusalem a pikekg Maur Wailen amprin eng kil alkil pa atom ayewel kai kaino itna kaino wan kimpo kwa wai, yalming a Maur Wailen.
MAT 4:6 Atom kil lanakel la, “Kitn ti Warim Kipman a Maur Wailen, ti kitn tipra elng kinar kanokg ai! Nira ela wrkapm a Maur Wailen pa la kolkil la, 'Mpa kil uk yangkipm tu maur angklin alkil ti mpa tu rkuleitn pa.' A wa nira kolpa yat la, 'Mpa tu wamplilngteitn pa, eng ake mpa kitn ngko ngket nepm pa eli wes ur pa.'”
MAT 4:7 Ari Sisas akalmpentel la, “Pake wrkapm a Maur Wailen wa la kolkil yat la, 'Ampur kitn ningkail Wailen, kil Maur Wailen akitnen ti.'”
MAT 4:8 Wa Satan awiyel a pa wa ayewel kaino itna kaino wrik nangen watin ur pa. Kil plantel anong nampon kanokg, a kweikwei wrongkwail a wor wor a antiwe titnongket a itna anong kanokg yela pa.
MAT 4:9 Atom kil lanakel la, “Kol kitn kipor kilko ilein ngkit nang akupmen ti pa, kweikwei wrongkwail ri pa mpa kupm lkeitn.”
MAT 4:10 Pake Sisas akalmpe la, “Satan, kitn kai tukwelkg kupm ti! Eng ntei, nira ela wrkapm a Maur Wailen pa la kolkil la, 'Kitn kipor kilko ilein ngkit nang a Wailen, kil Maur Wailen alkitnen, kitn ikwap a kil wris ita!'”
MAT 4:11 Atom pake, Maur Paipm Satan kil wrekg naurngkel a tu maur angklin tiur a Maur Wailen pa wli angklinsel.
MAT 4:12 Sisas atning la tu arkul Son kil aye kai rpma wan tipmining pa, kil wrekg kaino anong kanokg Kalili.
MAT 4:13 Kil wrekg naurng anong Nasaret pa wa kai kaino rpma anong Kaperneam. Kaperneam pa ela wreren ukupuk wail a Kalili, kai kanokg a tu Sepulun a tu Naptali.
MAT 4:14 Kil kaino akwap rpma kaino Kaperneam pa, yangkipm a Maur Wailen kil la kai melnum ok wripm Aisaia kil la pa, am palng angko oken ase, kil pikekg la kolkil la,
MAT 4:15 ”Kanokg a tu Sepulun, a kanokg a tu Naptali, pa kanokg a ela ya a kai unokg. A kanokg a itna kai u kop Sotan wompel pa, pa kanokg wompel a Kalili, tu melnum tiur a ake Suta pa tu wli antiwen rka anong kanokg pa.
MAT 4:16 Tu melnum a rpma anong kanokg pa tu rka miningket, atom tu ari klalen wail. Tu a rka wrik om miningkon pa, klalen pa palngten.”
MAT 4:17 Angko wang pa atom wa aye or pa kai pa, Sisas kil ngkaten eng laron yangkipm pa la kolkil la, “Maur Wailen wreren eng a itni wailen ikglen nol nikgwalpm a kipm wrong kin kipman ti, ti kipm plelng ipma!”
MAT 4:18 Sisas kil angkom antilawe ukupuk yamping a Kalili pa kinar ari wusok wail wekg, ekg ak apm mumu pa akawi yul pa itna. Saimon, nang wompel pa Pita, wa wusok pa Antru. Pa kol kwap marpm atuwekg.
MAT 4:19 Sisas kil lanaken la, “Kipmekg kul kunun kupm ti, eng mpa kupm kiling plantepm atom ikga kipmekg uwi tu melnum kolen a kipmekg awi yul pa.”
MAT 4:20 Tuwekg atning kolti, tuwekg naurng apm mumu pa rmpa, a tuwekg kai kanun Sisas.
MAT 4:21 Wa tunteng angkom kolpa kai pipa, tunteng ari yantwarim ur pa rpma kai nim ukupuken pa rpma. Semis ekg Son anti yan alntuwekg pa Sepeti, teng noworel angkut karpo apm mumu pa rpma. Ari Sisas akwewen.
MAT 4:22 Atom tuwekg atning kolpa, tuwekg naurng yan pa nampon nim ukupuken pa rpma wai a tuwekg penterng kul kanuntel.
MAT 4:23 Sisas kil akwe Semis ekg Son pa plalng pa kil wa alekgen tuwekg pa angkom or kai yela anong kanokg Kalili ti. Kil kaling planten, a kil laron yangkipm wor ti itna wan a tu atning atning yangkipm a Maur Wailen atnewe pa. Kil laron yangkipm wor a Maur Wailen a kil a itni wailen ikglen ipma a mentepm wrongkwail, a kil antokg tu melnum a awi numpet a wleket auraur pa palng wor.
MAT 4:24 Tu lakati kwap a Sisas kil ak kolpa yela anong kanokg wrongkwail a Siria ti. Atom tu wrongkwail atning kolpa, tu aye tu a awi numpet auraur, tu melnum a maur paipm arpme, a amo titno titno, a amo nepm wam plupmen, atom Sisas kil antokg tu melnum a awi numpet a kolpa tu palng wor.
MAT 4:25 Wrong wailet paipm a anong kanokg Kalili a Tekapolis, a anong wail Serusalem, a anong kanokg Sutia, a kai u kop wompel Sotan pa, tu kanun kil pa. Tu ak wail kunturng kanuntel.
MAT 5:1 Sisas kil ari tu wrongkwailet paipm a wli kanuntel kanuntel, kolpa atom kil kaino itna wrik nangen ur pa, atom kil rpma. A tu watnom alkil a kil aroaro wonel pa, tu kul rpma kapringentel.
MAT 5:2 Atom kil kaling planten, lanaken kolkil la,
MAT 5:3 ”Tu mla ur a ariwe la kil alkil ti ake ute wor itna wulmpa a Maur Wailen pa, tu pa wor pake, tu itopen o! Maur Wailen pa am rpma wail ikgalen ipma a tu pake.
MAT 5:4 Wa tu mla ur a akg arein pa, tu pa wor pake, tu itopen o! Maur Wailen mpa ntokg ipma atuwen pa rpmi itopen.
MAT 5:5 Wa tu mla ur a tu arku tu alntu orngwatneikgen pa, tu pa wor pake, tu itopen o! Ikga tu uwi kanokg yela ti a Maur Wailen kil yapon yangkipm pa.
MAT 5:6 Wa tu mla ur a tu nikgalmpen a uwaketen eng la palng ute wor itni wulmpa a Maur Wailen pa, tu pa wor pake, tu itopen o! Maur Wailen ikga ngklinsen nikgwalpm ute wor wor or pa kai.
MAT 5:7 Wa tu mla ur a tu arein angklin mla ur pa, tu pa wor pake, tu itopen o! Ikga Maur Wailen kil rein ngklin tu pa yat.
MAT 5:8 Wa tu mla ur a nol nikgwalpm a tu pa rka wriwen wor pa, tu pa wor pake, tu itopen o! Ikga tu ri Maur Wailen.
MAT 5:9 Wa tu mla ur a nikgwalpm wor eng kapor angkeng akle or tita pa, tu pa wor pake, tu itopen o! Ikga Maur Wailen kil ukwe tu pa la warim akilen.
MAT 5:10 Wa tu mla ur a tu arki kalkuten atnen a tu palng ute wor itna wulmpa a Maur Wailen pa, tu pa wor pake, tu itopen o! Maur Wailen rpma wail ikgalen ipma a tu pake.
MAT 5:11 Wa kipm mla ur a tu aklewepm ak yangkipm paipm, a akor lawepm kalpmel, a antokgtepm paipmel atnen a kipm kanun kupm ti pa, kipm pa wor pake, kipm itopen o!
MAT 5:12 Kipm itop rimomo! Kweikwei wor wor a ikga kipm uwi ikilmpe kwap a kipm aken pa, pa elngtepm itna kaino anong wor. Kol pikekg tu antokg paipmel tu melnum okwripm a Maur Wailen, wa kol tu antokg paipmel kipm ti yat.”
MAT 5:13 Sisas la kolpa plalng, wa kil wa la kolkil la, “Am kipm ti kolen nokg a tu wrong kin a kipman a kanokg ti. Kol nokg pa kai kupuk pa, mpa wa mentepm ntokg kolai eng wa kil wa kleset pa? Pa ya kalpisen, pa am kai kupuk ase. Ti mpa mentepm ngkiten lung, atom tu rkganti la, pa paipm ase.
MAT 5:14 Wa kipm ti yat, kipm kolen wakg a akalen tu a itna kanokg ti. A wa kolen anong wail ur a itna kaino wrik nangen ti ake antiwe mpa am pa.
MAT 5:15 Mentepm ake mpa la wakg pa atom ik kuntuk mipmapm pa ik aur pa, kalpis. Mpa la atom erki kaino kwa ti eng len wrongkwail a rka wan pa.
MAT 5:16 Kipm am kolen wakg pake, mpa nuruk iklen tu wrongkwail. Eng mpa tu ri kwap wor a kipm ak pa tu ngkit nang a Yan akipmen kaino anong wor.”
MAT 5:17 Sisas kil la kolpa atom wa kil wa lala, “Ampur kipm akwonalmpen la kupm nar eng ungkwan yangkipm titnongket a Moses a yangkipm a tu melnum okwripm a Maur Wailen kaling plan tu pa. Kupm ake nar eng la ungkwan pa, kalpis. Kupm nar eng la kunun ik titnongketel yangkipm wrongkwail pa eng palng kai iklale.
MAT 5:18 Kupm lanakepm aklale wrisen. Kitnong a kanokg ti pa ikga kai plalng. Pake ikgake yangkipm titnongket ketn ur aki krakg ur a ak nira yangkipm a Maur Wailen ti ikga kai am pa, kalpis. Ikgam itna kolpa kai ngko wang a kweikwei wrongkwail a la pa palng.
MAT 5:19 Kol melnum ur kil tulpulng yangkipm waiketn ur a ela kai wrkapm a Maur Wailen kil, a wa kil kiling planten eng tu kunun irir kolen kil pa pipa, ikga kil uwi nang wusok itna kuin a tu a Maur Wailen ikgalen ipma atuwen. Pake mla ur a kil kanun a kaling plan tu eng yangkipm titnongket wrongkwail alkil pa, ikga kil uwi nang wailen itna kuin a tu a Maur Wailen ikgalen ipma atuwen.
MAT 5:20 Kol tu melnum a aroaro wonel tu yangkipm a Moses, a tu melnum a arpmen yangkipm yiprokgen a Moses pa, tu ariwe nikgwalpm ute wor a Maur Wailen, pake ake tu kanun ariworwor. Kupm lanakepm aklale la, kol kipm ti ake kanun nikgwalpm ute wor a Maur Wailen pa angen tu melnum a arpmen yangkipm yiprokgen a Moses pa, kipm ikgake kawor anong wor a Maur Wailen kil ikgalen pa.”
MAT 5:21 Sisas kil la pa plalng wa kil wa la kil, “Kipm atning yangkipm titnongket a pikekg lanaki tu mamikg mamin mansan akipmen ep ak ai la, 'Ampur almpor melnum amo. Wa kol mla ur ilmpor melnum imo pa, mpa tu iyewel kai ntokg yangkipm, atom kil mpa uwi paipm.'
MAT 5:22 Kupm pa lanakepm kolkilke la, mla ur ipma wakget eng wusok aki wailen alkil kolti pa, mpa tu iyewel kai itni ntokg yangkipm, atom kil mpa uwi paipm yat. A mla ur a wa rku wusok aki wailen alkil pa la, kil wor kalpmel, pa ikga tu iyewel kai ntokg yangkipm kaikuten wail itni tu mring man tukgunakgen a itna ep. A wa mla ur a kil la wusok aki wailen alkil pa la, kil melnum titno, pa kil ikga kai anong paipm a wakg atne.
MAT 5:23 Kol kitn la iye kweikwei kawor yalming a Maur Wailen pa eng uk wor kil pa, ari wa kitn wonuwen wusok aki wailen ur alkitn a nikgwalpm paipm eng kitn pa.
MAT 5:24 Kolpa pati, elng kweikwei pa ermpi papen, a kitn kai la ipma wris nimpon kil pa, plalng pipa, kitn yaper kul uk kweikwei pa kai eng ukwor Maur Wailen pa.
MAT 5:25 Wa kol melnum ur la nti kitn ntokg yangkipm pa, ntiwel ntokg itatu! Kipmekg la or ya pa kai eng la ntokg yangkipm itni mring man pa, kitn ntiwel la yangkipm pa kai ipma wris pinterng, eng mpa kipmekg or yangkipm pa kai imo. Kalpis pa pati, mpa kil iyeweitn kai ntokg yangkipm pa itni tu mring man pa atom, mpa wa tu pa elng kitn kai wam a tu nepimpalo, atom tu pa iyeweitn kai rpmi wan tipmining.
MAT 5:26 Kupm lanakeitn aklale la, kitn ikga rpma akampen akalmpe marpm kol a tu la pa kai plalng pipa, tu ungkwanteitn kul or en.”
MAT 5:27 ”Kipm atning yangkipm titnongket a pikekg lanaki tu mamikg mamin mansan akipmen ep ak ai la, 'Ampur angkli arkul tita.'
MAT 5:28 Tu pa lanakepm kolpake, kupm kil lanakepm kolkil, kol melnum ur ri ngkowe kin ur pa pipa, pa kawor nol nikgwalpm akilen pa am kil angkli arkul kin pa yat ase.
MAT 5:29 Kol wulmpa wompel akitnen pa rkolngkeitn iye kai ngko eng ntokg paipmpaipm pa, inen ngkli kai ai. Wor kol a kitn ungkwan kwei ur wris a num akitnen ti kolti. A paipm eng kol a tu ngkli num alkitnen ti kimeket elng kinar anong paipm pa.
MAT 5:30 Wa kolen wam wompel akitn pa rkolngkeitn iye kai ngko eng ntokg paipmpaipm pa, wangket ngkli kai ai. Wor kol a kitn nuurng wam wompel wris pake, a paipm eng kol a kitn uk num alkitnen ti kimeket elng kinar anong paipm pa.”
MAT 5:31 ”Kipm atning yangkipm pikekg la ep pa la, 'Melnum la ungkwan kin alkil pa, mpa kil lkel wrkapm wompel ur a ik ngketen kil ti atom ungkwan kin pa kai.'
MAT 5:32 Tu pa lanakepm kolpake, kupm kil lanakepm kolkil: kol kin alkil kil ikwap numkropis a uk numpaipm kamel pa, pa kil antiwe ungkwantel. Pake kin pa ake kil akwap kolpa pa, pa ampur kil ungkwantel. Kolpa mpa kil antokg kin pa angko eng kil kai angkli arkul kipman ur ai. A wa kol kipman ur wa uwi kin ur a kipman ep ungkwan pa iye pa, pa kil angkli arkul kin pa.”
MAT 5:33 ”Kipm atning yangkipm titnongket a pikekg lanaki tu mamikg mamin mansan akipmen ep ak ai la kolkil la, 'Kol kipm naren kwei ur pa, ampur kipm angketen yangkipm a kipm naren pa. Kipm ntokg kuina ur a pikekg kipm naren pawo, eng ntei, kipm naren nang a Wailen.'
MAT 5:34 Tu pa lanakepm kolpake, kupm kil lanakepm kolkil la, ampur kipm naren kuina ur a kipm antokg pa. Ampur kipm naren atom wam kaino kwa pa, pa wrik a Maur Wailen awi nang wailen arpme eng ikgalento.
MAT 5:35 Aki naren kanokg ti pa, pa wrik a kil elng nepm atne, aki naren anong wail Serusalem pa, pa anong wail a Melnum Tukgunakg Wailen amentepmen.
MAT 5:36 A wa ampur kipm naren wam kaino tukgunakg akipmen ti. Kipm itna tukgunakg waipmun pa kaingkai, kai werk almpepm pa, pa ake kipm ti antokg, pa Maur Wailen alkil antokg.
MAT 5:37 Kolpa ti kitn la la kuina ur pa, kitn la iklale kolti. Kitn la kalpis pa, kitn la kalpis kolti. Kitn naren kwei ur eng ak titnongketel yangkipm pa pati, pa nikgwalpm a Maur Paipm.”
MAT 5:38 ”Kipm atning yangkipm pikekg la ep pa la, 'Kol melnum ur ntokg wulmpa wompel akitnen pa paipm pa, mpa kitn ikilmpe ntokg wulmpa wompel akilen pa paipm yat. Wa melnum ur kil kipor oktelp akitnen pa, mpa wa kitn ikilmpe kipor oktelp akilen pa.'
MAT 5:39 Tu pa lanakepm kolpake, kupm ti lanakepm kolkil: ampur kipm akalmpe melnum a antokgtepm paipm pa. Melnum ur oreitn kai tangkwei wompel pa, wa plelng wompel pa lkel eng kil oreitn.
MAT 5:40 A wa kol melnum ur kil uwi kitn ti iye kai ntokg yangkipm eng la uwi apm a kitn nowe angkaino ti nar pa, iner, lkel o! A wa lkel apm a kitn nowe eng wropuk ti pa wa kai iken pa!
MAT 5:41 Wa kol melnum ur wa erkisen kitn ti la ntiwel iyentel kweikwei ur pa iye kai ketn ti, pa wa ntiwel iye kai ketn ai!
MAT 5:42 Kol melnum ur kil isenteitn la uwi kwei ur pa, pa kitn lkel kolti! A melnum la isenteitn la uwi kwei ur akitnen ti iye kai ik ntokg kwei ur atom wa iyenteitn kul pa, ampur kitn langkin, kitn lkel kolti!”
MAT 5:43 ”Kipm atning yangkipm pikekg la ep pa la, 'Kipm mpa plan ipma wor wakrongen yiprokgen alkipm pake, kipm mpa kirken kamel mis a wrongmanto pa.'
MAT 5:44 Tu pa lanakepm kolpake, kupm kil lanakepm kolkil: kipm mpa plan ipma wor wakrongen tu wrongmanto alkipm pa, a kipm mpa oklala niki Wailen eng mpa kil ngklin tu melnum a antokgtepm paipm pa,
MAT 5:45 eng mpa tu riwepm la kipm pa warim a Yan kaino kitnong. Kipm mpa plan ipma wor wakrongen melnum wor a melnum paipm. Eng ntei, Maur Wailen kil pa antokg takgni el eng akangklin melnum wor a melnum paipm, a wa antokg u awei eng akangklin mentepm plalngen, melnum ute wor a melnum a antokg paipm.
MAT 5:46 Kol kipm plan ipma wor wakrongen tu a plan ipma wor wakrongen kipm pa kolti, pa Maur Wailen ake mpa lkepm kweikwei ur ikilmpe kwap a kipm ak kolpa. Ti tu melnum a awi marpmel kipm pa am wa antokg kolpake.
MAT 5:47 Kol kipm plan ipma wor tu yiprokgen alkipm ti kolti, a ake kipm plan ipma wor tu mlaur kamel misen ai pa, pa ake kipm ak kuina ur manet kolai. Tu a ake ukipma pa am ak kolpa yat pake.
MAT 5:48 Kolpa ti kipm rpmi wriwen wor yek kimeket kolen Yan akipmen a rpma wriwen yek kimeket wor kaino kitnong pa!”
MAT 6:1 ”Kipm lala kunun nikgwalpm ute wor ur a Maur Wailen pa, kipm ik iriwe! Ampur kipm antokg itna wulmpa a tu wrongkwail pa, kipm ik ampen. Kol kipm ik itni wulmpa a tu wrongkwail eng tu ri pa, Yan alkipm kaino kitnong pa ikgake lkepm kweikwei ur eng ikilmpe kwap a kipm ak kolpa.
MAT 6:2 Kolpa ti kol kitn la uk kwei ur melnum ur a rpma tukwok pa, ampur kitn ik kolen tu melnum a kansil plan ak num enen kolti antokg itna wan a atning atning yangkipm a Maur Wailen atnewe, a itna tatu ya eng la tu wrong kin a kipman riwen atom kiporng yangkipm tu pa. Kupm lanakepm aklale wrisen la, kweikwei a tu awi eng akalmpe kwap a tu ak kolpa, am tu awi plalng ampake.
MAT 6:3 Pake kitn ti pa, kitn la ngklin melnum ur a rpma tukwok pa, ik meen ampen kolti eng ampake melnum yek ur a rpma wrerenteitn pa riwe pa.
MAT 6:4 Pa mpa rpmi ampen kai kipmekg ti kolti. Pa pati mpa Yan akitnen kil ari a kitn ak ampen kolpa pipa, ikga kil lkeitn kweikwei ikilmpe kwap a kitn ak kolpa.”
MAT 6:5 ”Kipm la oklala niki Wailen pa, ampur kipm antokg kolen tu melnum a kansil ak num enen kolti. Tu kawor wan a atning atning yangkipm a Maur Wailen atnewe, atning yangkipm a Maur Wailen pa, wakrongen la wrekg itni kwa oklala niki Wailen, a kai itni ya wenting akapm a anong wail pa oklala nakel kolpa, eng mpa tu wrongkwail pa ri pa. Kupm lanakepm aklale la, kweikwei a tu awi eng kwap a tu ak kolpa, am tu awi plalng ampake.
MAT 6:6 Pake kipm ti pa, kipm la oklala niki Yan akipmen a rpma am pa, kipm kawor wan ok wunen ur pa ir wanyun pa atom kipm oklala nikel. Eng mpa Yan akipmen pa kil ri a kipm ak ampen kolpa, mpa kil ikilmpe.
MAT 6:7 Kipm la oklala niki Wailen pa, ampur kipm lanikel oklala a yiprokgen kalpisen a rkolng watin kol tu ipmawekg a la lalongen mring maur pa. A tu akwonalmpen la mring mpa itning oklala atuwen atnen oklala a tu or wrikel lala pa.
MAT 6:8 Ampur kipm antokg kol tu pa, kol Yan akipmen pa kil ariwe ep ase kuina ur kipm la mpa isentel pa.
MAT 6:9 Mpa kipm laniki Maur Wailen pa kolkil: 'Yaiyai amenen kaino kitnong, men lala nang akitnen pa itni klalen wakget.
MAT 6:10 Kitn itni wailen ikglen men wrong kin a kipman nimpon kweikwei wrongkwail pa. Kitn kunun wakrongen alkitn pa ntokg kweikwei itni kanokg ti kol a kitn antokg itna kaino kitnong pa.
MAT 6:11 Kitn lko okipma kol a antiwe am ti.
MAT 6:12 Kitn ungkwan paipmpaipm amenen ti, kol men ungkwan paipmpaipm a tu antokg kul men ti ase.
MAT 6:13 Kitn iyewo ngkom nilokgen Maur Paipm a ningkailo la men ngko kai paipmpaipm.'
MAT 6:14 Kol kipm ungkwan paipmpaipm a tu melnum antokg kai kipm ti pa, Yan akipmen kaino kitnong pa mpa wa kil ungkwan paipmpaipm akipmen pa yat.
MAT 6:15 Pake kol ake kipm ungkwan paipmpaipm a tu melnum antokg kai kipm ti pa, Yan akipmen ake mpa wa ungkwan paipmpaipm akipmen pa kalpis.”
MAT 6:16 ”Kipm la kalpis okipma a al eng uk wang Maur Wailen pa, ampur kipm atn plan tu kolen la kipm nikg almpepm pa, kolen tu melnum a plan ak num enen ti la tu melnum wor pa. Tu atn plan tu kolen la nikg almpen, atom tu ari pa tu la, tu pa kalpis okipma eng uk wang Maur Wailen. Kupm lanakepm aklale wrisen, tu ak kolpa tu awi kweikwei akalmpe kwap a tu ak pa, am tu awi plalng ampake.
MAT 6:17 Pake kitn ti pa, kitn la kalpis okipma eng uk wang Maur Wailen pa, kitn kurkuk, ik u yiwa pa ikinel ikgokg tukgunakg pa, kintirng.
MAT 6:18 Kolpa eng ake mpa tu riwe la kitn kalpis okipma eng uk wang Maur Wailen pa. Pa mpa Yan wris ata alkitnen a rpma ampen pa, kil ari kuina ur a kitn ak ampen kolpa pa, ikga kil ikilmpe pa.”
MAT 6:19 ”Ampur kipm la uwi wrikya wailet wor wor elngkitni lala eng rpmi ntiwe i kanokg ti. Kweikwei pa ikga atok, kitningkin ngket a ikga mingkirpet, a ikga tu melnum ikgwampet tikale wan ik ikgwampel.
MAT 6:20 Kipm uwi wrikya wailet wor wor elngkitni kaino kitnong. Kweikwei kaino kitnong pa ikgake atok, kitningkin ngket, a ikgake mingkirpet, a tu melnum ikgwampet ikgake ik ikgwampel, kalpis.
MAT 6:21 Kweikwei wor wor akitnen a itna a i pa, nikgwalpm wail akitnen am arken pake.”
MAT 6:22 “Wulmpa pa kol wakg a akalen num wrongkwail. Wulmpa akitn pa wor pa, num wrongkwail akitnen pa mpa klalen wor.
MAT 6:23 Pake kol wulmpa akitnen pa paipm pa, num wrongkwail akitnen pa mpa miningket. Kol wakg a akalen num akitnen pa miningket pa, pa mpa miningket paipm wrisen.”
MAT 6:24 “Ake antiwe melnum wris ur kil iken kwap mring wekg pa. Kolpa pa, mpa kil ipma paipm eng ur a plan ipma wor wakrongen ur. Aki mpa kil uwi wor la ur a uwi paipm uk ur. Kolpa ti kitn ake antiwe akwap eng tuwekg yatenen, Maur Wailen a marpm pa.”
MAT 6:25 ”Kolpa ti kupm lanakepm la, ampur kipm nikgwalpm kalkut akwonalmpen watipmen la, mpa kipm il u a okipma a i, aki la mpa kipm nowe apm a i ikaur num akipmen ti. Okipma pa itna ep angen amen wor a melnum pake? Aki apm pa itna ep angen numpalk pake?
MAT 6:26 Kipm ari wel a taur atn or kaino kwa pa aki! Tu pa ake kol mentepm melnum ti a aken kwap okipma angketuwai aye kawor itna wan pa, kalpis. Yan akipmen a rpma kaino kitnong ti kil ikgalenten eng okipma. Ti wel pa itna ep angen kipm melnum pake?
MAT 6:27 Kipm mlaur a akwonalmpen watipmen eng okipma pa, antiwe mpa wa kipm ngkine wang alkipmen a rpma ti wa iye kai ketn pake?
MAT 6:28 Kolpa ti wa kipm wa akwonalmpen watipmen eng apm pa eng ntei? Kipm ri kweikwei rwin a ari wor pa. Tu ake akwap aki antokg apm ur alntu eng nowe pa, kalpis.
MAT 6:29 Pake kupm lanakepm la, pikekg Solomon, melnum tukgunakg a antiwe kweikwei wor wor watipmen pa ak apm ari wor wor ak nowe num pake ake apm ur ari wor kolen kweikwei rwin pa.
MAT 6:30 Ti ri Maur Wailen kil antokg kweikwei rwin pa palng ariwor. Pake kweikwei rwin weti arimo pa, ikg pa wa tu ngket ngkli kai wakg. Ti kil ake antiwe ikgalen kipm melnum eng apm kweikwei pa? Kipm melnum ti pa wa itna ep angen kweikwei pa, ari ake wa kipm ukipma titnongket pa.
MAT 6:31 Kolpa ti ampur kipm nikgwalpm kaikut akwonalmpen watipmen la, mpa kipm il u a i, okipma a i, a nowe apm a i pa.
MAT 6:32 Eng ntei, tu wrong kin kipman a kanokg ti pa nikgwalpm arken la uwi kweikwei a kolpa, pake Yan a kipm a rpma kaino kitnong pa kil ari ase kuina ur a kipm tukwok pa.
MAT 6:33 Kolpa ti kipm nikgwalpm rkekgen eng elng Maur Wailen pa itni wailen ikglen ipma akipmen, a wa kipm nikgwalpm rkekgen eng palng ute wor itni wulmpa alkilen pa pipa, mpa kil lkepm kweikwei wrongkwail pa yat.
MAT 6:34 Ampur kipm akwonalmpen watipmen kalkuten a ikg pa palngtepm pa. Kalkuten a ikg pa, pa a wang alkil ikg ai. Ikwonilmpen kol a am ti kolti.”
MAT 7:1 ”Ampur kipm ari elukgen melnum ur pa la paipm pa eng ake mpa wa Maur Wailen ri elukgen kipm ti la kipm paipm pa.
MAT 7:2 Kipm ri elukgen melnum ur kolai pa, pa ikga wa Maur Wailen kil wa ri elukgen kipm pa kolpa yat pake. Kipm ri ilmpil itne melnum ur pa kolai pa, pa ikga wa Maur Wailen wa ri ilmpil itne kipm pa kolpa yat pake.
MAT 7:3 Antokg kolai atom kitn wa ari ipik wasek ur a ela wulmpa a melnum ur alkitnen, pake ake wa kitn ari yo wail ur a ela wulmpa alkitnen ti!
MAT 7:4 Antokg kolai ti kitn lanaki melnum wor ur alkitn pa la, 'Ti kitn itni eng kupm kiplim ipik wasek ur a ela wulmpa akitnen pa ri.' Ti ake kitn ari yo wail a ela wulmpa alkitnen ti!
MAT 7:5 Pa kitn melnum a kansil plan ak num enen ti la kitn melnum wor. Kola kitn uwi yo wail a ela wulmpa alkitnen ti tukwlekg plalng pa, wulmpa akitnen pa wor pa, kitn ri kiplim ipik wasek a ela wulmpa a melnum wor alkitnen pa.
MAT 7:6 Ampur kipm angkli kweikwei a Maur Wailen amprin eng kil alkil pa uk kai nimpa pa, mpa nimpa plelng nam kamel. Ampur kipm angkli krim kwalo wor wor alkipm pa uk kai manto pa, mpa manto rkganti plelng nam kamel.”
MAT 7:7 ”Kipm isen pa, mpa kipm uwi. Kipm ikor pa, mpa kipm ri. Wa kipm kulkwon pa, wanyun mpa kukwantepm pa.
MAT 7:8 Kol mla ur a kil asen pa, mpa kil uwi. Mla ur a kil akor pa, mpa kil ri. A mla ur a kil kalkwon pa, wanyun mpa kukwantel pa.
MAT 7:9 Mla ur kitn kol warim alkitnen pa isenteitn eng okipma pa, mpa wa kitn uwi wes pa lkel pake?
MAT 7:10 Aki kol kil isenteitn eng yul pa, mpa wa kitn lkel ul tike? Kalpis.
MAT 7:11 Kipm melnum paipm pake, kipm uk uk kweikwei wor wor kai warim alkipmen pa. Ti kipm riwe la, Yan akipmen kaino kitnong pa kil atopen paipm la uk kweikwei wor wor tu mla ur a asentel pa.
MAT 7:12 Kipm wakrongen la mla ur iktepm kolai pa, kipm wa ntokgten irir kol a kipm wakrongen la tu iktepm pa. Yangkipm kil kai kanun yangkipm a Moses, a yangkipm a tu melnum okwripm a Maur Wailen a kaling planto pa.”
MAT 7:13 “Kipm mpa kawor or wanyun wusok, pa ya wa kai kaino anong wor. Wa wanyun wail pa, ya wail wor wunongket a kinar anong paipm, wrongkwail am angkom or ya wail pake.
MAT 7:14 Pake wanyun wasek a ya wusok a kaino anong wor a rpma yongkyong pa kwapet, ti wrong wusoken kolti ansil ya kil ore.”
MAT 7:15 ”Kipm itn riwe tu melnum okwripm kansil pa. Tu wli akipaarepm kolen manto walkg malkgu ak num enen tike, a ipma wunen pa kolen nimpa tilpmingen a aro angkwrer al kamel pa.
MAT 7:16 Mpa kipm uwi riwe tu pa kai ok alkil a angko pa la angko yo ok wor aki yo ok paipm. Melnum antiwe anel yo ok wain ur kai ampei iket paipm ur pa aki? Wa melnum antiwe awi tikga kulok aki tikga tukgun ur pa kai mi rungulet paipm ur pake? Kolpa kalpis.
MAT 7:17 Yo wor pa angko yo ok wor, a yo paipm pa angko yo ok paipm.
MAT 7:18 Yo wor ake mpa ngko yo ok paipm pa, a yo paipm ake mpa ngko yo ok wor pa, kalpis.
MAT 7:19 Yo wrongkwail a ake angko ok wor pa, mpa ware kirkok wangket rkol ngkli elng kai wakg.
MAT 7:20 Am kolpa kipm ri nireinen tu melnum okwripm kansil pa kai kwap a tu ak pa.”
MAT 7:21 ”Ikgake kipm wrongkwail mla ur a akwe nang a kupm ti la, 'Wailen, Wailen', pa ikga kawor anong wor a Yan akupmen kil ikgalen kaino kitnong pa, kalpis. Ikga tu mla ur a kanun nikgwalpm a Yan akupm wris ata pati ikga kawor anong wor pake.
MAT 7:22 Ik wang a kupm nar pa, ikga tu lanikopm la, 'Wailen, Wailen, am pikekg kitn pa ngkat okel men ti atom men laron nikgwalpm akitnen, a am men pikekg naren kitn ti ungkwan maur paipm a antokg kweikwei watipmen a men melnum ake antiwe antokg ak titnongket alpmen pa.'
MAT 7:23 Pake ikga ik wang pa ikga kupm laniken ngko wunong la, 'Kupm akwekgelepm paipm kolti, kipm a antokg paipmpaipm, ti kipm itni kai ai tukwelkgen kupm ti!'”
MAT 7:24 “Kolpa ti wrongkwail mla ur a kil atning yangkipm akupmen kil alupmen atom kanun pa, kil pa kolen melnum wontrakole a kil ale wan ela wulkging.
MAT 7:25 U wail awei, minip kuwokg kop el, a wripm mring mring el pupu yikakatnen paipm kai itna wan pa, pake wan pa ake tapor, kalpis. Pati atnen pikekg kil ale ela wulkging.
MAT 7:26 Pake melnum a kil atning yangkipm akupmen ti atom ake kil kanun pa, kil kolen melnum titnowen a ale wan ela nimilpm.
MAT 7:27 U wail awei, minip kuwokg kop el, a wripm mring mring el pupu yikakatnen paipm kai itna wan pa, wan pa am tapor elng nar prapm paipm kolti.”
MAT 7:28 Sisas kil la yangkipm pa kai plalng pa, wrongkwail kin a kipman pa tu atning yangkipm a kil kaling planten pa ari, pa almpen ipma.
MAT 7:29 Eng ntei, kil ake kaling planten kolen tu melnum atuwen a aroaro wonel tu yangkipm a Moses pa, kalpis. Kil kaling planten nampon titnongket kol kil alkil yangkipm yiprokgen.
MAT 8:1 Sisas kil rpma kaino nang pa kaling planten plalng, atom kil kulnar pa, tu wrong kin a kipman wailet tu kanuntel nar.
MAT 8:2 Atom melnum ur a i paipuk awi pa kil kai kapor kilko alein Sisas pa atom kil la, “Wailen, kupm ariwe la kitn antiwe titnongket pa, kol kitn wakrongen pa kitn antiwe antokg kupm ti palng wor.”
MAT 8:3 Sisas kil elng wam itna melnum pa a kil la, “Kupm wakrongen pa, kitn palng wor o!” Sisas kil la kolpa pa, i paipuk pa kai palng wor penterngen kolti.
MAT 8:4 Atom Sisas kil lanakel la, “Ampur kitn lanaki melnum ur, yaper. Kitn or ya kai plan num akitnen pa kai melnum ipma krakgen a ak ak kwap eng al wor uk Maur Wailen pa eng kil ri kiporng yangkipm atom il wor uk kweikwei wor wor pa kai eng Maur Wailen, kol yangkipm titnongket a Moses kil la pa. Eng mpa tu wrongkwail riweitn la, i akitnen pa am wor ase.”
MAT 8:5 Sisas kil kawor anong Kaperneam pa, melnum ur a tu Rom a itna ep eng tu melnum kamel wampwomis a almpwrong pa, kul lanaki Sisas la ngklinsel.
MAT 8:6 Kil lanakel la, “Wailen, melnum akwapel a kupm ti numpet ti okg rmpa kai wan. Numpwam a kil pa amo plupmplepm a wa wleket paipm wrisen.”
MAT 8:7 Sisas lanakel la, “Mpa kupm kai ungkwan numpet akilen pa.”
MAT 8:8 Pake melnum pa akalmpe Sisas pa la, “Wailen, kupm ake melnum wor eng mpa kitn kai wan akupmen pa. Kitn la ik ok ti kolti eng mpa kil palng wor.
MAT 8:9 Kupm ti yat kupm itna orngwatneikgen melnum wailen a itna ep eng kupm ti. Wa kupm ti tu melnum kamel wampwomis almpwrong wa itna orngwatneikgen kupm ti. Kupm lanaki melnum ur la, 'Kitn kai', pa kil kai, wa ur pa la, 'Kitn kul', pa kil kul. La melnum akwapel pa la, 'Kitn ikwap ti', pa kil ak.”
MAT 8:10 Sisas kil atning a kil la kolpa, kil wrekg paipm, atom kil la kai tu a kanuntel pa la, “Kupm lanakepm aklale wrisen, ake kupm ari melnum ur a kipm Isrel ti kil ukipma kolpa.
MAT 8:11 Kupm lanakepm la, wrong kin a kipman watipmen ikga ingkai takgni no a takgni kinar ikga wli uwi wrik rpmi eng il okipma nimpikgen Apraam, Aisak a Sekop, rpmi kaino anong wor a Maur Wailen kil ikgalen pa.
MAT 8:12 Pake kipm Isrel, kipm pa kol a rpmi kawor anong wor a Maur Wailen kil ikgalen pake, ari kalpis. Tiur ikga Maur Wailen kil ungkwantepm kai kinar anong miningket. Kinar anong pa ikga kipm uwi wleket paipm akg nampok paipm wrisen.”
MAT 8:13 Atom Sisas kil lanaki melnum a itna ep eng tu melnum a almpwrong pa la, “Pati kitn kai o! Mpa kupm ntokg kitila kuina ur wet kitn la pa, kai or ipma alkitn a kitn uk pa.” Atom ak wang ketn pa melnum akwapel a melnum pa palng wor.
MAT 8:14 Sisas kil antokg melnum pa palng wor plalng pa wa kil kai kawor wan wunen a Pita pa, kil ari man yalmpikg a Pita pa numpet num wakget ti okg rmpa wrik pa.
MAT 8:15 Sisas kil elng wam atne wam a man yalmpikg a Pita pa pipa, numpwakget pa kai kupuk, atom kil wrekg antokg okipma pa uk Sisas pa al.
MAT 8:16 Ak nungkurikg ti pa, tu aye melnum watipmen a maur paipm arpme pa, aye wli eng Sisas. Kil la kolti maur paipm pa kai takwlelkgten a kil antokg numpet a tu melnum wrongkwail pa palng wor.
MAT 8:17 Kil ak kolpa ti yangkipm a pikekg palng ep kai ok a Aisaia, melnum okwripm a Maur Wailen pa palng aklale, kil la kolpa, “Kil alkil pa arki numpet a wleket wakget amentepmen pa, atom kil ak titnongket alkil pa ak ungkwan.”
MAT 8:18 Sisas kil ari tu wrongkwailet paipm wli kapringentel pa, atom kil lanaki tu watnom alkil a kil aroaro wonel pa la, “Uwi nim ukupuken ti eng tepm kai ukupuk wompel ai!”
MAT 8:19 Atom melnum ur a aroaro wonel tu yangkipm a Moses pa kul lanakel la, “Melnum a aroaro wonel tu, kupm nimprampen rpma la ntiweitn kai or ai ai. Ya wrik wrongkwail a ikga kitn kai pa, kupm ikga ntiweitn kai.”
MAT 8:20 Ari Sisas wa akalmpentel la, “Nimpa tilpmingen ti pa kanokg tawong a tu a okge pa itna. Wa wel ti pa wel ila alntu a okge pa itna. Warim Kipman a Melnum kil pa wrik kalpisen a okg armpe.”
MAT 8:21 Wa watnom ur a kil aro arowonel pa la, “Wailen, kitn la eng kupm yaper kai rpmi i eng uwen yan alkupm pa pen, plalng pipa, kupm wa kul kununteitn.”
MAT 8:22 Pake Sisas lanakel la, “Yaper, ampur kai. Tu alntu melnum a amo pa uwen tita o, a kitn ti kul kununtopm!”
MAT 8:23 Sisas kil elng kaino nim ukupuken pa, tu watnom alkil a kil aroaro wonel pa wa elng kaino.
MAT 8:24 Tu kai angko ukupuk kuin pa u mringkwripm wail pa el, atom ukupuk pa naimpur la kol a tipurng nim ukupuken pa, pake Sisas pa okg akwekgel rmpa.
MAT 8:25 Atom tu aro ikgyokgel Sisas pa lanakel la, “Wailen, kitn wrekg ngklinso pen! U mringkwripm eng a tipurngto elng kinar ukupuk ti!”
MAT 8:26 Ari Sisas kil lanaken la, “Kipm ngkark eng kuina? Kipm ti ake ukipma itna titnongket!” Pipa kil wrekg angkeng u mringkwripm pa kai plalng.
MAT 8:27 Tu wrekg paipm atom tu la, “Kil pa kil melnum kolai, atom u a mringkwripm pa wa atning ok a kil pa atom tork pa?”
MAT 8:28 Sisas kil kai palng kai ukupuk wompel kai kanokg a tu Katara. Atom melnum wekg a maur paipm arpme pa kul ansilel angko ya. Wrik a tuwekg arpme rpma rpma pa kirkap. Tuwekg am wuten wrekg a pa kul pake. Tuwekg pa wrongen paipm a or kamel, ti tu melnum ake antiwe mpa or ya ri pa.
MAT 8:29 Atom tuwekg kirkar la kolpa, “Warim Kipman a Maur Wailen, kitn la ntokg na men ti? Ti kitn wli la uk wleket men ti ep, a wang alkilen a antokg yangkipm pa apa?”
MAT 8:30 Manto klungen ur al okipma itna wrerenten pa.
MAT 8:31 Tu maur paipm akwe Sisas pa yikakatnen la kolpa, “Kitn la ungkwanto kai kawor en pa, kitn la eng men kai kawor nowe manto klungen wailet pa.”
MAT 8:32 Atom kil lanaken la, “Kipm kai o!” Kolpa atom tu naurng melnum wekg pa, tu kulor kai kawor nowe manto klungen pa. Atom manto klungen pa anel ngkark paipm kai kinar angko tipmining kinar al ukupuk pa amo plalng.
MAT 8:33 Tu melnum a ikgalen manto pa anel ngkark tulntul kai tatu anong wail pa lakati kweikwei wrongkwail wet a palng pa, wa nampon kuina ur a wet palng kai melnum wekg a maur paipm arpme pa.
MAT 8:34 Atom tu melnum wrongkwail a anong pa tu wli ari Sisas. Tu akrarowel la mpa kil wrekg nuurng anong kanokg atuwen pa a kil kai itn kol ur ai.
MAT 9:1 Sisas wrekg elng kaino nim ukupuken pa kolti, kil wangket ukupuk pa kul kai anong alkil ai.
MAT 9:2 Atom tu ngkat melnum ur a numpet nepm wam amo plupmplepm pa aye wli eng Sisas, aye kai ngkaten wrik pa rmpa. Sisas kil ari tu ukipma kil pa, kolpa atom kil lanaki melnum a numpet pa la, “Yek alkupm, ampur kitn ngkark. Paipmpaipm akitnen am Maur Wailen ungkwan ase.”
MAT 9:3 Atom tu melnum tiur a aroaro wonel tu yangkipm a Moses pa, tu la ak ipma alntuwen pa la, “Melnum pa kil la kolpa pa kil ak nokgel Maur Wailen.”
MAT 9:4 Pake Sisas kil ariwe ase nikgwalpm a tu pa kolpa atom kil la, “Wa kipm akwonalmpen nikgwalpm paipm kolpa kai ipma akipmen pa eng ntei?
MAT 9:5 Ai wunongket eng mpa laniki melnum pa eng mpa kipm riwe la, paipmpaipm a kil pa am Maur Wailen ungkwan ase, aki mpa lanikel la, kil wrekg ngkom kai?
MAT 9:6 Pati mpa kupm plantepm eng kipm ri la, kupm Warim Kipman a Melnum antiwe titnongket itna kanokg ti a ak ungkwan paipmpaipm.” Atom wa kil plelng lanaki melnum nepm wam amowe pa la, “Kitn wrekg, uwi wrik alkitn pa atom iye kai wan alkitn pawo!”
MAT 9:7 Melnum pa atning kolti, kil wrekg kai wan alkil ai.
MAT 9:8 Tu wrong kin kipman tu ari pa atom tu ngkark paipm. Atom tu ngkat nang a Maur Wailen eng kil uk titnongket kolpa kai tu melnum.
MAT 9:9 Sisas kil wa antokg melnum nepmwam amo plupmplepm pa palng wor plalng pa, kil wa naurng anong pa angkom kai pa, kil ari melnum ur a awi awi marpmel tu pa rpma wan alkil a ak ak kwap pa. Nang a kil pa Matyu. Sisas kil lanakel la, “Kitn kul kununtopm!” Atom kil atning kolti, kil wrekg kanuntel.
MAT 9:10 Wang wris ur pa Sisas nampon tu watnom alkil a kil aro wonel pa al okipma rka wan a Matyu pa, tu melnum wailet a awi awi marpmel tu, a tu melnum a antokg paipmpaipm, tu wli antiwen al okipma.
MAT 9:11 Tu melnum a arpmen yangkipm yiprokgen a Moses ari a tu al okipma nampon tu kolpa atom tu asen tu watnom a Sisas aroaro wonel pa la, “Antokg kolai ti melnum akipmen a kaling plan tu pa kil anti tu melnum a awi marpmel tu, a tu melnum a antokg paipmpaipm pa al okipma pa?”
MAT 9:12 Sisas atning pa atom kil akalmpe la, “Tu melnum a numpworen pa tu ake kai eng tu melnum a ikgalen i numpet pa, kalpis. Tu melnum a numpet kolti.
MAT 9:13 Kipm kai uwi riwe yangkipm a ela kai wrkapm a Maur Wailen a la kolpa, 'Kupm karken a kipm alwor uk kupm ti pa, kupm wakrongen la kipm plan ipma wor rein tita.'” Sisas kil la oklala a Maur Wailen pa plalng pipa, wa kil la kil alkil ti la, “Kupm ake wli eng kipm melnum ute wor pa, kalpis. Kupm wli eng tu melnum paipm.”
MAT 9:14 Tu watnom a Son a kaluk tu aroaro wonel pa tu kul asen Sisas pa la, “Men ti nampon tu melnum a arpmen yangkipm yiprokgen a Moses pa men anti watipmen kalpis okipma eng uk wang Maur Wailen pake. Antokg kolai atom tu watnom a kitn aroaro wonel ti ake wa tu kalpis okipma eng uk wang Maur Wailen pa?”
MAT 9:15 Sisas kil la kolpa, “Kin kipman ur a awi tita weten, atom tu yiprokgen alntuwekgen pa antokg okipma wail al atopen atnen. Ak wang a kipman pa antiwen rpma pa, tu ake rpma paipm, tu rpma atopen rpma. Pake ikga ik wang a tu uwi kipman pa iye kai tukuleikgten pa, ikga tu ipma kaikut ukwakg nare okipma pa rpmi.”
MAT 9:16 Sisas kil la pa plalng wa kil wa lala, “Mentepm ake wa awi apm umpu maing pa, atom angkut arpme apm nungkwor a rakol pa. Kolpa mpa apm umpu maing pa ik rkolng apm nungkwor pa mpa kai rakol wail.
MAT 9:17 Mentepm ake wa alung u wain weten pa elng kinar rka palk tingklaket a manto walkg tumpulmpis pa. Kolpa pa mpa u wain weten pa la ngki pa, mpa ik tita palk tingklaket pa kitnangku kai paipm, atom u wain pa turus kai paipm. U wain weten pa mentepm alung alung elng kinar rka manto palk weten alkil ai, pati mpa wor yatenen pake.”
MAT 9:18 Sisas kil la yangkipm pa itna pa, melnum wailen ur a tu Suta pa kul kapor kilko alein kil pa la, “Warim kin akupmen wet ketn ti amo, kolpa ti kitn kai la elng wam itne, eng mpa kil wrekg rpmi.”
MAT 9:19 Atom Sisas kil wrekg kanun melnum pa kai, a tu watnom alkil pa wa antiwel kai.
MAT 9:20 Atom kin ur num walmpopm alp akangklei wang pa, itna kolen wring wampwam yikak wekg. Kil kanukg yirokg a Sisas pa akwonalmpen atom kil la kai kil alkil pa la, “Kol kupm ik wam inte apm wulompen a Sisas pa waiketn kolti pa, kupm mpa palng wor.” Atom kil ak katila kol a kil akwonalmpen pa.
MAT 9:22 Sisas kil plelng ariwel kolti lanakel la, “Warim kin yek alkupm, ipma akitnen pa rki meen. Kitn palng wor ase atnen a kitn ukipma kupm ti.” Atom ak wang ketn pa, kin pa kil palng wor.
MAT 9:23 Atom Sisas kil anti melnum wailen pa kai palng kai wan pa, kil ari tu a rka wan pa tiplam wampeng a akg nurkgatne antokg nungkulkg titno wailet paipm.
MAT 9:24 Atom kil lanaken la, “Kipm kul or kai tukwelkg! Warim kin pa ake amo, palpa okg rmpa pa.” Ari tu pa wa ak ino almpel.
MAT 9:25 Tu ungkwan tu wrongkwail pa kul or kai en pa, atom kil kai kawor wamanti wam a warim kin pa pipa, kil wrekg.
MAT 9:26 Tu atning ari pa, atom tu aye yangkipm pa kai yela naki tu wrong kin a kipman tatu anong alntu pa.
MAT 9:27 Sisas kil naurng anong pa angkom kai pipa, melnum wulmpa paipmen wekg pa ekg kanuntel kai, atom ekg akwewel yikakatnen la, “Kitn watnom walpopm a yoampei a Tepit, kitn rein ngklin mentekg ti pen!”
MAT 9:28 Sisas kil kai kawor wan ur pa, ari melnum wulmpa paipmen wekg pa, ekg kai kaworntel. Atom kil asenten la, “Ipma akipmekg pa rka kol lala kupm antiwe titnongket mpa ngklinsepm aki?” Atom tuwekg akalmpe la, “Ei, Wailen, kitn antiwe pa.”
MAT 9:29 Atom kil elng wam pa ela wulmpa atuwekg pa a kil la, “Kil mpa palng kunun kol a kipmekg ukipma pa.”
MAT 9:30 Kolpa atom wulmpa atuwekg pa palng kitnangku wor ari kweikwei. Atom kil alken yangkipm titnongket la, “Ampur kipmekg lanaki tu ur ai, yaper. Rpmi kipmekg alkipmekg ti kolti.”
MAT 9:31 Ari kalpis, tuwekg kai naki tu yela anong kanokg pa kwap a Sisas kil ak itna wulmpa a tuwekg ti.
MAT 9:32 Melnum wekg pa kawor en la kai pipa, wa tu aye melnum ur a okmise a maur paipm arpme pa, aye or eng Sisas.
MAT 9:33 Sisas kil ungkwan maur paipm pa takwelkgen melnum pa, melnum okmise pa oklala. Tu wrongkwail ari pa, tu wrekg paipm atom tu la kolpa, “Pikekg ep pa ake mentepm ari kwei ur a kolpa palng itna Isrel ti!”
MAT 9:34 Pake tu melnum a arpmen yangkipm yiprokgen a Moses pa tu la elukgen kolpa la, “Palpa maur paipm a itna ep pa alkel titnongket, atom kil ak ungkwan tu maur paipm pa.”
MAT 9:35 Atom Sisas kil kai tatu anong wail wail a wusok wusok pa, kil kaling plan tu itna wan a tu atning atning yangkipm a Maur Wailen atnewe pa. A kil laron yangkipm wor a la Maur Wailen kil a itni wailen ikglen nol nikgwalpm amentepm. A kil antokg tu melnum a awi numpet a wleket auraur pa palng wor.
MAT 9:36 Kil ari tu wrong wailet paipm pa, ipma a kil pa areinsen paipm. Eng ntei, kil ari tu rka paipm titnowen num kolen manto walkg malkgu a ake melnum yan ur ikgalen tu pa, kalpis.
MAT 9:37 Atom kil lanaki tu watnom alkil a kil aroaro wonel pa la, “Okipma wailet paipm tukgun kakir itna wring a pa, pake ake melnum akwapel wailet ur angketuwai okipma pa.
MAT 9:38 Kolpa ti kipm isen melnum yan a wring pa, eng mpa kil ukwa tu melnum kai eng ngketuwai okipma akilen pa.”
MAT 10:1 Sisas kil akwe tu watnom wampwam yikak wekg alkilen a kil aroaro wonel pa kaintel, atom kil alken titnongket a ak ungkwan maur paipm kimpilpet a, numpet a wleket wrongkwail a tu melnum pa palng wor.
MAT 10:2 Ri kil pa nang a tu melnum wampwam yikak wekg a kil takweien la ukwawen pa. Melnum ep pa Saimon, nang wompel pa Pita. A Antru paipmen a Pita pa, wa Semis ekg paipmen alkil pa Son, warim kipman wekg a Sepeti pa.
MAT 10:3 Wa Pilip, Partolomyu, Tomas, Matyu melnum a pikekg awi marpmel tu, Semis warim kipman a Alpius, a Taitus.
MAT 10:4 Wa Saimon a tu Selot, a Sutas Iskariot, melnum a ikga uk Sisas kai wam a tu wrongmanto.
MAT 10:5 Sisas kil lala ukwa tu watnom wampwam yikak wekg a kil pa kai laron yangkipm akilen pa, atom naki karkurngken la kolkil, “Ampur kipm kai eng tu melnum a ake Suta pa, a kai rka anong wail ur a tu Samaria pa, yaper!
MAT 10:6 Kipm kai eng tu melnum a Isrel, tu pa kolen manto walkg malkgu a kai atn palpa.
MAT 10:7 Kipm kai laron yangkipm pa laniken la, 'Maur Wailen wreren eng a ikglen ipma a kipm ti.'
MAT 10:8 Kipm kai ntokg tu melnum numpet pa palng wor, melnum a amo wa wrekg, melnum a i paipuk palng wor a ungkwan maur paipm! Kipm awi titnongket pa kalpmlel, kolpa ti kipm ik kalpmel kolti, ampur awi marpm.
MAT 10:9 Ampur kipm aye marpm kweikwei pa alupm kinar apm pa.
MAT 10:10 Ampur kipm aye apmkok pa nakurnum eng alupme apmnung kweikwei pa. Kuina ur wet kipm nowe itna num pa am iye pa kolti. Ampur wa aye apm a nowe, a nepm palk aki yo tuk a ak atnen pa, iyai. Kipm ngkompwam kolti, eng ntei, melnum a aken kwap angklin tu mla ur pa, mpa tu pa ikglentel pake.
MAT 10:11 Kipm kai kawor anong wail aki anong wusok ur pa pipa, kipm ri la melnum ur a wor a kil lkepm wor itopen la kipm ntiwel rpmi pa, kipm ntiwel rpmi kai wang pa plalng pa, kipm nuurng anong pa kipm kai.
MAT 10:12 Kipm kai kawor wan wunen a melnum ur pa pipa, kipm lken wor kolkil, 'Alkepm wor, Maur Wailen antiwepm rpma.'
MAT 10:13 Kol tu melnum a wan pa uwi wor eng ukwor a kipm alken pa, ukwor akipmen pa ntiwen rpmi. Pake kol ake tu awi wor eng ukwor a kipm alken pa, kipm wa uwi iye yaper kai.
MAT 10:14 Kol ake melnum ur awi wor eng awiyepm aye kai wan anong, a wa itning yangkipm a kipm la pa, kipm lo nepm mang pa itni pa, pa planten la kalkuten pa itna kai tu alntu pake, a kipm nuurng anong pa, a kipm kai.
MAT 10:15 Kupm lanakepm aklale wrisen. Ikga ik wang a tu wrong kin a kipman itni yangkipm wail a Maur Wailen pa, ikga Maur Wailen uk wleket waiketn tu Sotom a Komora. Pake ikga kil uk wleket wail manten kai tu anong a uk yirokg kipm, a yangkipm a kipm laron pa.”
MAT 10:16 Sisas kil la kolpa plalng wa kil wa lanaki tu watnom alkilen a kil aroaro wonel pa la, “Kipm itning, kupm ukwawepm kai kol manto walkg malkgu kai kuin a nimpa tilpmingen. Kolpa ti kipm itni wontrakole kol ul pa. Kipm kunun nikgwalpm ute wor kolen wel punum pa.
MAT 10:17 Kipm itn riwe, eng kol tu melnum ikga uwiyepm iye kai ntokg yangkipm itni tu mring man ikgalen anong pa, a ikga wa kai ik ampei ntrawepm itni wan a kipm atning atning yangkipm a Maur Wailen atnewe.
MAT 10:18 Kipm ikga tu iyewepm kai ntokg yangkipm itni tu mring man wail wail a tu melnum tukgunakg, atnen kipm ak kwap a kupm. Kolpa eng mpa kipm laron yangkipm wor a kupm pa laniki tu melnum wail wail kolpa wa nimpon tu a ake Suta pa.
MAT 10:19 Ik wang a tu iyewepm kai eng ntokg yangkipm pa, ampur kipm ipma kaikut akwonalmpen watipmen la, mpa kipm la yangkipm na aki la kolai pa. Ikga ik wang ketn pa, ikga Maur Wailen lkepm yangkipm atom kipm la pa.
MAT 10:20 Yangkipmok ikga kipm la pa, ikgake kipm ti la pa, pa ikga Maur Wor a Yan Wailen alkipmen ti a rpma kawor ipma wunen a kipm ti oklala pa.
MAT 10:21 Ikga wailen wrekg uk wusok alkil kai wam a tu wrong manto eng tu ilmpel imo. Wa wusok wrekg wa ik kolpa yat kai eng wailen alkil. Tu yantin wa ntokg tu warim alntuwen kolpa yat. Wa tu warim wa plelng uk tu mansan alntu kai tu wrong manto eng tu ilmpen imo.
MAT 10:22 Tu wrongkwail ikga nikgwalpm paipm eng kipm, eng ntei kipm pa a kupm. Pake kol melnum a kil itna titnongket kolpa kaingkai angko wang a plalng pa, ikga Maur Wailen kil uwiyel iye kai rpmi wor.
MAT 10:23 Kol tu orepm ungkwantepm i anong ur pa pipa, kipm ngkirk kai anong ur ai. Kupm lanakepm aklale wrisen. Kipm ake antiwe ikwap a kupm ti kai yela tutu anong wrongkwail a Isrel ti plalng pa, kupm Warim Kipman a melnum pa ikga yaper nar.
MAT 10:24 Warim a awi ariwe ti ampake itni ep wailen angen melnum a kaling plantel pa. A melnum a ak kwap kalpmel orngwatneikgen melnum ur pa, ake mpa wa kil itni ep wailen angen melnum yan a kwap pa.
MAT 10:25 Ariwe a warim pa mpa kaino repmrepm melnum a kaling plantel pa kolti, pa am apake. Am wa kolpa yat pake, melnum a ak kwap kalpmel orngwatneikgen yan a kwap pa, mpa ikwap repmrepm yan a kwap pa kolti, pa am apake. Pa planto la, tu aknokgel melnum yan a kin watnom a wan wris pa namput la Pelsepul pa, pa ikga wa tu iknokgel kin watnom akilen pa paipm wrisen angen melnum yan a wan pa!”
MAT 10:26 ”Kolpa ti ampur kipm ngkark eng melnum pa. Kuina ur a pikekg aur pa ikga alken kai rmpi wunong. A kweikwei a itna ampen pa, ikga palng kai ngko wunong.
MAT 10:27 Kuina ur a kupm lanakepm ak mining pa, ikga kipm laron kolpa ik ran. Kuina ur a kupm akoo nakepm kai nungkulkg pa, ikga kipm itni tutu akapm wail pa la ik ok wail.
MAT 10:28 Ampur kipm ngkark eng melnum a alm numpalk amo pa, a ake antiwe mpa ilm amen wor pa imo pa. Pake kol a kipm ngkirk eng melnum a alm yatenen, numpalk a amen wor angkli elng kai anong paipm a awi wleket wakget.
MAT 10:29 Kol melnum ur la iye wel ikrawis wasek paipm wekg la iye kai eng ik uwi marpm pa, ake antiwe mpa uwi marpm wail, pa antiwe mpa uwi ik marpm watet wompel wris pa. Pake pa wail itna wulmpa a Yan Wailen, kil alkil la wel wasek pa la imo pa, antiwe mpa imo. Kalpis pa mpa kalpis.
MAT 10:30 Ti kipm ri, tukgunakg walk wris wris akipmen a itna tukgunakg ti pa kil angkleikg ase. Pa plantepm la Maur Wailen kil ikgalentepm.
MAT 10:31 Kolpa ti ampur kipm ngkark. Kipm melnum pa wa wor angen wel ikrawis waseksek pa.”
MAT 10:32 “Mla ur kil a laron kil alkil itna kuin a tu wrongkwail kin a kipman pa la kil akupmen pa, ikga kupm laron kil pa itni wulmpa a Yan akupmen kaino kitnong la kil pa akupmen.
MAT 10:33 Pake mla ur kil lam nang akupmen pa itna kuin a tu wrongkwail kin a kipman pa, ikga wa kupm lam nang a kil pa itni wulmpa a yan akupmen kaino kitnong.
MAT 10:34 Ampur kipm akwonalmpen la kupm kulnar kanokg ti eng ikga kipm rpmi meen wor pa, kolpa kalpis. Kupm nar eng ak aye rapon pa palng.
MAT 10:35 Kupm nar eng wako aro kipm itna manman. Warim kipman pa mpa nikgwalpm paipm eng yan alkil. Warim kin pa mpa nikgwalpm paipm eng man alkil. Wa warim kin pa mpa nikgwalpm paipm eng yalmpikg mayen alkil.
MAT 10:36 Wrongmanto pa ikga palng itni wan wunen alkitn pake.
MAT 10:37 Melnum a nikgwalpm wail a kil pa arken man a yan alkil pa, a nikgwalpm wusok a kil pa arken kupm ti pa, kil pa ake melnum wor antiwe a kanun kupm ti. Melnum a nikgwalpm wail a kil pa arken warim kipman a warim kin alkil pa, a nikgwalpm wusok a kil pa arken kupm ti pa, kil ake melnum wor antiwe a kanun kupm pa.
MAT 10:38 Melnum a ake arki yo okgmangki alkilen atom kanuntopm pa, pa kil akentiwe a kanun kupm pa.
MAT 10:39 Melnum a kil la ikglen numpalk a kil ti kolti pa, pa amen wor akilen pa ikga kai paipm. Pake melnum a kil uk num alkil ti kolti eng aken kwap kupm pa, pa amen wor akilen pa ikga rpmi wor yongkyong.
MAT 10:40 Melnum a kil awi wor eng kipm pa, pa kil awi wor eng kupm ti, wa nampon melnum a kil ukwa kupm ti nar pa yat.
MAT 10:41 Kol melnum ur kil uk wor melnum okwripm a Maur Wailen eng kil melnum okwripm a Maur Wailen pa, ikga kil uwi kweikwei a akalmpe kwap a kol a melnum okwripm pa awi pa. A melnum a kil uk wor melnum ute wor kai wulmpa a Maur Wailen pa, ikga kil uwi kweikwei a akalmpe kwap a kol a melnum ute wor kai wulmpa a Maur Wailen awi pa.
MAT 10:42 Wa kol melnum ur kil anong u ur uk melnum ur kolti il eng kil watnom alkupm a kupm aroaro wonel pa, kupm lanakepm aklale wrisen la, kil ikgake kalpis eng uwi kweikwei a akalmpe kwap a kil ak pa.”
MAT 11:1 Sisas kil uk yangkipm tu watnom wampwam yikak wekg a kil aroaro wonel pa plalng pa, kil wrekg a pa kai atn tatu anong tiur a Kalili pa eng kaling plan tu, laron yangkipm pa naki tu.
MAT 11:2 Son kil rpma wan tipmning pa, kil atning yangkipm a kwap a Sisas kil ak pa, atom kil ukwa tu watnom tiur a kil aro arowonel pa
MAT 11:3 kai asen Sisas pa la, “Sisas, am kitn ti melnum a pikekg men atning a lala ikga nar pa, am kitn tike, aki melnum ur a wai, mpa men rpmi nungkwangen?”
MAT 11:4 Ari Sisas akalmpe la, “Kipm yaper kai niki Son pawo, la kitila kuina ur a kipm atning a ari ti.
MAT 11:5 Tu a wulmpa tilmpisen pa tu wa ari kweikwei, tu a nepm paipmen pa tu wa wrekg angkom, tu a i paipuk awiyen pa tu wa palng wor, tu a nungkulkg titnowen tu antiwe atning kweikwei, tu melnum a amo tu wrekg rka, a tu melnum a rpma tukwok pa tu wa atning yangkipm wor a la Krais.
MAT 11:6 Mla ur a ari kwap a kupm ak ti atom ake kil uk yirokg kupm ti pa, kil pa wor pake, kil itopen o!”
MAT 11:7 Tu watnom a Son kil aro arowonel pa tu kai plalng pipa, Sisas kil lakati Son pa naki tu wrong kin kipman pa la, “Pikekg kipm kai wrik mpang kalpmel pa la ri kuina? Kipm kai la ri warum a wripm almpen aye kaingkul tike aki,
MAT 11:8 kipm kai la ri kuina? Kipm kai la ri melnum a nowe apm wor wor aki? Tu melnum a nowe apm wor wor a ak noworel num kolpa am rka kai wan a tu melnum tukgunakg pake.
MAT 11:9 Atom ti pikekg kipm kai la ri kuina? Pikekg kipm kai la ri melnum okwripm pake? Kupm lanakepm aklale, Son a kipm pikekg kai ari pa, kil pa wa wailen angen melnum okwripm wrongkwail ai.
MAT 11:10 Son, melnum pikekg wrkapm a Maur Wailen la ampake, la kolkil la, 'Itning! Kupm ikga ukwa melnum angklin ur akupmen a iye yangkipm ep eng kitn, kil ikga ep ukule ya eng kitn.'
MAT 11:11 Pikekg Maur Wailen lanakopm kolpake. Kupm lanakepm aklale wrisen, itna kuin a tu melnum wrongkwail a pikekg man rakuwen itna kanokg a ti pa, ake melnum ur wailen angen Son melnum a kaluk tu pa. Pake melnum a awi nang wasek itna kuin a tu melnum a Maur Wailen kil itna wailen ikgalen nol nikgwalpm atuwen pa, kil pa awi nang wailen angen Son pake.
MAT 11:12 Angkai wang a Son melnum a kaluk tu, kil angkli yangkipm pa kul wli wang ti pa, kwap a Maur Wailen la itni wailen ikglen nol nikgwalpm a kipm wrong kin kipman pa kul nampon titnongket, atom tu melnum kalnten titnongket pa kai antimprak tirpmingen titnongket la Maur Wailen kil itni wailen ikglen kipm wrongkwail.
MAT 11:13 Tu melnum okwripm wrongkwail a Maur Wailen, a yangkipm titnongket a Moses pa, tu kimeket la melnum ur ikga palng kolpa kulngkul wli wang a Son kil palng pa.
MAT 11:14 Kipm la itning yangkipm kil pa, kipm itning: Son pa kil Elaisa. Pikekg ep ai tu melnum okwripm a Maur Wailen tu la melnum ur ikga palng kolen Elaisa pa, ti Son am tike.
MAT 11:15 Melnum a nungkulkg itnawe pa, kil itning o!
MAT 11:16 Mpa kupm la yangkipm kla ur kolai eng tu melnum a ak wang ti? Mpa kupm la kolkil la: tu kolen tu warim a rka akapm, atom tu warim ur ai akwewen la,
MAT 11:17 'Men tiplam wampeng eng kipm ti, pake ake wa kipm atop. Wa men akg ak ok namputen, pake ake wa kipm akg arein.'
MAT 11:18 Am kolpa yat pake, ake pikekg tu atning Son pa. Kil wli palng pa, kil uk wang eng oklala naki Maur Wailen, ake kil al u a okipma pa. Atom tu lawel la kil pa maur paipm arpme.
MAT 11:19 Pa wa warim Kipman a Melnum pa wli palng al u a okipma pa, tu la kil pa yat lala, 'Kipm ri kil pa! Kil al u a okipma watipmen paipm. Kil melnum a atn erkwon anti tu melnum a awi marpmel tu, a tu melnum a antokg paipmpaipm.' Pake nikgwalpm ariwe watin a Maur Wailen pa plan kai kweikwei a kil antokg pa palng ute wor aklale.”
MAT 11:20 Atom Sisas kil la tu anong tiur a ake plelng ipma pa, la pikekg tu ari kweikwei titnongket titnongket wailet a kil antokg a melnum ake antiwe antokg pa, pake ake tu plelng ipma. Atom Sisas aklewen la pa tu antokg paipm.
MAT 11:21 Kil la, “Woi, arein kipmekg anong wekg pa, Korasin a Petsaita, kipmekg ikga uwi paipm! Kupm pikekg antokg kweikwei titnongket titnongket a melnum ake antiwe antokg pa itna kai anong akipmekg pa, ari ake wa kipm plelng ipma la arein. Kol pikekg kupm ntokg kweikwei titnongket titnongket irir kolti itni kai anong Tair a anong Saiton pa, tu kol piketak ai ngkli yipan akg rein paipmpaipm a tu antokg pa atom plelng ipma ase.
MAT 11:22 Kupm lanakepm la, ikga ik wang wail a itni yangkipm pa, kipmekg anong wekg pa ikga uwi wleket angen wleket a anong Tair a anong Saiton ikga uwi pa.
MAT 11:23 Ti kitn anong Kaperneam ti, kitn akwonalmpen la kitn ti wor, ti ikga uwiyetn iye kaino kitnong? Ikga kolpa kalpis. Pa kitn ikga ngkliweitn elng ngko wrik om miningket paipm kolti. Eng ntei, pikekg kupm antokg kweikwei titnongket titnongket a melnum ake antiwe antokg pa itna anong a kitn pa, ari ake wa kitn plelng ipma la arein. Kol pikekg kupm ntokg kweikwei titnongket titnongket irir kolti itni kai Sotom ai pa, tu ai kol am elngen a antokg paipmpaipm ase, ti anong a tu pa pikekg kol ake wakg il, kol a itni ik wang ti pa.
MAT 11:24 Pake kupm lanakepm la, ikga ik wang wail a itni yangkipm pa, ikga kipm uwi wleket paipm angen tu a anong kanokg Sotom pa.”
MAT 11:25 Ak wang pa Sisas kil la, “Yaiyai, kitn Wailen a kitnong a kanokg, kupm alkeitn wor ngkat nang akitnen eng kitn lam ariwe wor a kitn pa eng tu melnum a nikgwalpm arke, a tu melnum a awi ariwe wail pa, a kitn laron naki tu melnum a rpma titnowen kolen warim.
MAT 11:26 Aklale, Yaiyai akupmen, nikgwalpm ariwe wor akitnen pa am kitn ak kolpake.
MAT 11:27 Kweikwei wrongkwail am pikekg Yan akupmen elng kul wam akupmen ti ase. Melnum ur ake ariwe Warim Kipman pa, kalpis, Yan pa ariwe pake. Wa melnum ur ake wa ariwe Yan pa, kalpis, Warim Kipman wris ata pa ariwe pake. Wa tu mla ur a Warim Kipman kil wakrongen la plan Yan alkilen pa kai tu pa, am tu pa ariwe pake.
MAT 11:28 Kipm a aken kwap a arki kaikuten pa, kipm kul eng kupm ti, eng mpa kipm rpmi eng yapm.
MAT 11:29 Kipm uwi wor eng uwi riwe kupm ti a orngwatneikg kunun yangkipm a kupm ti, kolen manto nongko nepm watin a tu angkuten yo wompel ur itna meng pa eng ak arkolng kweikwei pa. Kipm uwi riwe kupm ti, eng kupm melnum a atn a rpma meen a orngwatneikgen mlaur, eng mpa nol nikgwalpm akipmen rpmi wor eng yapm.
MAT 11:30 Ei, yo wompel a kupm alkepm la kipm rki pa kukula antiwe a kipm rki. Wa kaikut a kupm alkepm la kipm rki pa ake kaikut.”
MAT 12:1 Ak wang wail a rpma eng yapm pa, Sisas anti tu watnom alkil a kil aroaro wonel pa anel angkom or wring wit kuin ur pa kai. Tu watnom alkil pa nikg alm, atom anel ipaar wit pa raing al itna wampel kai.
MAT 12:2 Tu melnum a arpmen yangkipm yiprokgen a Moses pa ari kolpa, tu lanaki Sisas pa la, “Kitn ri, tu watnom alkitn pa talpulng yangkipm titnongket a Maur Wailen eng tu ak kwap kolpa ak wang wail a rpma eng yapm pa.”
MAT 12:3 Ari Sisas kil akalmpe kolpa la, “Ake kipm angkleikg oklala a la kuina ur a pikekg Tepit antokg nampon tu melnum alkilen ak wang a pikekg tu nikg almpen pa?
MAT 12:4 Tepit awi tu melnum alkil pikekg kai kawor yalming apm a Maur Wailen ti awi nok tingklak a tu ermpa eng alwor uk Maur Wailen ti al eng nikg ti. Pa krimperken ti kol ake tu yimponen pa il pa, kol a tu melnum ipma krakgen a ak ak kwap eng al wor uk Maur Wailen ai il ai.
MAT 12:5 Ati ake wa kipm angkleikg yangkipm titnongket a Moses a la tu melnum ipma krakgen a rka yalming a Maur Wailen pa. Tu ak ak kwap eng al wor uk Maur Wailen ak wang wail a rpma eng yapm pa yat tu talpulng yangkipm titnongket a ampake ikwap ik wang wail a Maur Wailen a rpma eng yapm pa, pake pa ake tu antokg paipm pa, kalpis.
MAT 12:6 Kupm lanakepm la, melnum a itna ti pati itna ep angen yalming apm a Maur Wailen pa.
MAT 12:7 Nira ela wrkapm a Maur Wailen pa la kolkil la, 'Kupm karken a kipm alwor uk kupm ti pa, kupm wakrongen la kipm plan ipma wor rein tita.' Kol kipm riwe yangkipm yiprokgen kil riworwor pa, kol ake wa kipm elng ok itni tu melnum a ake antokg paipm pa.
MAT 12:8 Eng ntei, Warim Kipman a Melnum pa kil Wailen itna ep ikgalen wang wail a rpma eng yapm.”
MAT 12:9 Sisas kil wrekg a pa wa kil kai kawor wan ur a tu atning atning yangkipm a Maur Wailen atnewe pa.
MAT 12:10 Atom melnum ur a wam wompel amo plupm tupmungkul kalpmlel pa anti tu rpma kawor wan wunen pa. Tu melnum a arpmen yangkipm yiprokgen a Moses a rka pa akor yangkipm la iye Sisas kai ntokg yangkipm, kolpa atom tu asen Sisas pa la, “Antiwe mpa mentepm ntokg tu melnum numpet ti palng wor ik wang wail a rpma eng yapm ti aki kalpis?”
MAT 12:11 Ari Sisas kil lanaken kolpa la, “Kol manto walkg malkgu wris anangket a kipm ur ti ngko lkim ik wang wail a rpma eng yapm pa, mpa kipm rpmi ri wulmpa kolti aki, mpa kipm latok ampei ik rkolng elng no?
MAT 12:12 A melnum pa wa wor wrisen angen manto walkg malkgu pa. Kolpa ti pa wa ntiwe a ntokg kweikwei wor ik wang wail a rpma eng yapm pa.”
MAT 12:13 Atom kil la kai melnum a wam wompel amo plupm tupmungkul kalpmlel pa la, “Ntran wam pawo!” Kil ntran pa, wam pa palng wor kolen wam wompel pa.
MAT 12:14 Tu melnum a arpmen yangkipm yiprokgen a Moses pa ari kolpa, tu kawor en kai or yangkipm eng la ilm Sisas pa imo.
MAT 12:15 Sisas kil ariwe nikgwalpm a tu melnum a arpmen yangkipm yiprokgen a Moses a akor yangkipm la ilmpel imo pa, atom kil naurngten itna anong pa a kil kai. Tu melnum watipmen kanuntel, atom kil antokg numpet wrongkwail a tu pa palng wor.
MAT 12:16 A kil alken yangkipm titnongket la, ampur tu lakati kil pa kai angko wunong naki tu wrong kin a kipman pa.
MAT 12:17 Kil ak kolpa atom oklala a Maur Wailen pikekg Aisaia melnum okwripm a Maur Wailen la pa palng aklale.
MAT 12:18 Kil la kolpa, “Ri kil melnum akwapel a kupm alkupm pikekg takwei, kupm plan ipma wor wakrongentel, kupm ipma wor atopentel. Ikga kupm lkel Maur Wor akupmen ti, atom ikga kil laron nikgwalpm ute wor wor a kupm eng tu wrong kin a kipman itni kanokg pa.
MAT 12:19 Kil ikgake plalplal mainmain ikle kamel pa. Wa tu wrong kin a kipman ikgake itning kil oklala minsiranget tutu ya pa.
MAT 12:20 Wark ur a tapor umuwen pa, ikgake kil kipor eng kil tipor pa. Aki wakg tareing ur a wakg a itna tareing tringil pa waiketn eng a ime pa, ikgake kil mpe. Ikga kil ik kolpa kai, atom kweikwei wrongkwail ikga kitila nikgwalpm ute wor a Maur Wailen pake.
MAT 12:21 Wrong kin a kipman a ake a tu Suta pa ikga ukipma kil pa a rpmi nungkwangen eng kil pa ngklinsen pake.”
MAT 12:22 Tu melnum tiur aye melnum ur a wulmpa tilmpisen a okmise, a maur paipm arpme pa, aye wli eng Sisas. Atom kil antokg ok a melnum pa kil oklala a wulmpa pa palng wor ari kweikwei.
MAT 12:23 Tu wrongkwail pa tu ari pa atom tu wrekg paipm asen tita la, “Melnum pa, mpam watnom walpopm a Tepit a mentepm nungkwangen am tike?”
MAT 12:24 Tu melnum a arpmen yangkipm yiprokgen a Moses pa atning a tu la kolpa atom tu aknokgel la, “Palpa Pelsepul, maur paipm tukgunakg a tu maur paipm pa alkel titnongket, atom kil ak ungkwan maur paipm pa takwelkg melnum pa.”
MAT 12:25 Sisas kil ariwe kuina ur a tu akwonalmpen pa atom kil lanaken la, “Kol tu anong kanokg wail ur wako iro wrong atom tu ilm tita pa, anong kanokg pa ake antiwe titnongket, ti tu mpa kai paipm. Kol om ur aki tu walmpopm wris pa wako iro tu alntu ti or tita pa, ampake ntiwe titnongket, ti tu mpa kai paipm.
MAT 12:26 Kolpa ti kol tu maur paipm ak kwapel tiur a Maur Paipm Satan pa tu ungkwan tu maur paipm ak kwapel tiur akilen pa, tu am wako aro ase. Ti mpa wa kil pa wa itni wailen ikglen tu pa la kolai?
MAT 12:27 Kipm la kupm ti la Pelsepul, melnum tukgunakg a tu maur paipm pa uk titnongket kupm ti atom kupm ak ungkwan maur paipm pa, ti tu alkipmen pa wa mla uk titnongket ti, atom tu ak ungkwan maur paipm pa? Atom tu alkipmen pa plan la yangkipm a kipm la pa kipm kansil.
MAT 12:28 Pake kil kupm ak titnongket a Maur Wor a Maur Wailen ak ungkwan maur paipm pa, ti kolpa plan kolen la Maur Wailen am nar itna wailen la ikgilen nol nikgwalpm a kipm tike.
MAT 12:29 Ake antiwe melnum ur kil tikale wan a melnum titnongket kalnten pa atom kawor ik ikgwampel kweikwei akilen pa. Mpa kil yipo nepm wampel melnum titnongket pa ep pa pati, antiwe mpa kil tikale wan akilen pa kawor uwi kweikwei pa iye kai plalng pake.
MAT 12:30 Melnum a ake akupmen pa, kil pa awi wrongmanto lan eng kupm. A melnum a ake angklinsopm eng awi tu wrong kin kipman pa aye wli itna wris pa, kil pa melnum a ungkwan tu kai.
MAT 12:31 Kolpa ti kupm la lanikepm la, paipmpaipm a yangkipm paipm wrongkwail a melnum kil antokg pa, Maur Wailen kil ungkwan ase, pake kwei ur wris kil pa kalpis. Kol kil la paipmel Maur Wor pa, Maur Wailen ikgake ungkwan paipmpaipm akilen pa, kalpis.
MAT 12:32 Melnum ur la paipmel Warim Kipman a Melnum pa, ikga Maur Wailen kil ungkwan paipmpaipm a kil pa. Pake melnum a kil la paipmel Maur Wor pa, paipmpaipm akilen pa ikgake Maur Wailen ungkwan ik wang ti a wa ik wang kunukg pa kalpis.”
MAT 12:33 ”Kol kipm alkipm ikwonilmpen la yo pa wor pipa, pa mpa ngko ok wor. A kol kipm alkipm ikwonilmpen la yo pa paipm pipa, pa mpa ngko ok paipm. Kol kipm am ari nareinen yo pa kai ok alkil a angko pa la, yo wor a i, yo paipm a i.
MAT 12:34 Kipm pa kol ul angketepm, kipm alupm nikgwalpm paipm paipm kolti, kolpa ti oklala a kipm la pa ake antiwe mpa palng wor. Oklala ur a palng wli ok a melnum pa la pa, pa am plan nol nikgwalpm alkilen pa am kolpake.
MAT 12:35 Melnum a kil alupm nikgwalpm ariwe wailet wor wor pa, oklala a kil pa palng kul or kai wor. Melnum a kil alupm nikgwalpm ariwe paipm paipm wailet pa, oklala a kil pa kul or kai paipm.
MAT 12:36 Kupm lanakepm la, ikga ik wang wail a itni yangkipm pa, kin a kipman wris wris ikga kai itni laron yangkipmok wrongkwail a pikekg kil la kalpmel pa.
MAT 12:37 Ikgam oklala a kitn lakati pa la palng wor pa, ikga Maur Wailen ukweweitn la kitn melnum wor. La oklala alkitn pa palng paipm pa, ikga Maur Wailen ukweweitn la kitn melnum paipm.”
MAT 12:38 Tu melnum tiur a aroaro wonel tu yangkipm a Moses, a tu melnum tiur a arpmen yangkipm yiprokgen a Moses pa anel la, “Melnum a aroaro wonel tu, men la ri kitn elng kla ur itni ik plan titnongket a Maur Wailen pa.”
MAT 12:39 Ari Sisas akalmpe ok a tu pa lala, “Kipm melnum paipm a ak wang ti, kipm a itna watin uk yirokg Maur Wailen kolen kin a angkli arkul kipman ur pa, ti wa kipm wa la ri kla ur la Maur Wailen elng itni ik plan titnongket akilen ai? Pake mpa kalpis. Ikga kipm ri kuina ur pikekg palng ep eng Sona, melnum okwripm a Maur Wailen pa kolti. Pa kol kla a Maur Wailen ikga elng itni ik plantepm titnongket akilen pake.
MAT 12:40 Ikgam palng irir kolen Sona pake. Sona pikekg rpma wang wraur miningkranen kawor nikg wunen a yul wail pa, am wa kol Warim Kipman a Melnum ikga rmpi wang wraur miningkranen kawor kirk wunen ti.
MAT 12:41 Ikga ik wang a Maur Wailen ntokg yangkipm nimpon kipm wrong kin kipman a ak wang ti pa, tu melnum a anong Ninipe pa ikga palng elng wam itni kipm wrong kin kipman a wang ti la kipm paipm. Eng ntei, pikekg tu atning yangkipm a Sona angkli pa, atom yangkipm pa almpen ipma atom tu pikekg plelng ipma ase. Ari melnum a itna ti pa wail angen Sona, ari ake wa kipm plelng ipma.
MAT 12:42 Ikga ik wang a Maur Wailen kil ntokg yangkipm eng tu wrong kin a kipman pa, ikga kin tukgunakg a pikekg itna ep ikgalen anong kanokg wangkokg ti ikga palng elng wam itni kipm wrong kin a kipman a wang ti la kipm paipm. Kin itna ep pa kil pikekg rpma kai kanokg wulompen watin ai a kanokg ti, ari kil pikekg aken kwap kul no la itning nikgwalpm ariwe watin a Solomon. Pake melnum ri kil pa angen Solomon, ari ake wa kipm atning nikgwalpm ariwe watin a kil ti.”
MAT 12:43 “Maur paipm kimpilpet kil kulor takwelkg melnum pa kai en pa, kil atn yela tatu wrik ur a ake melnum ur arpme pa akor wrik ur la la rpmi eng uwi yapm, pake ake kil ari wrik ur, kalpis.
MAT 12:44 Atom kil wa la kolpa la, 'Pati mpa wa kupm yaper kai uwi wan anong alkupm a pikekg arpme ep pa.' Kil wa yaper kai ari wan kalpmel a pikekg kil arpme ep pa, am tu kansim ipikel noworel nakure ariworwor elng itna.
MAT 12:45 Atom wa kil yaper kai, wa ikyakur maur paipm wampwomis wampwompwekg a paipm wrisen angen kil ti, wa aye wli antiwel rpma ipma a melnum a kil arpme ti. Pikekg ep pa melnum pa kil rpma paipm kolpake, wa kanukg ti a tu maur paipm pa wa kawor rpma pa kil pa wa rpma paipm wrisen or kai ai. Ti ikgam wa palng kolpake kai tu melnum paipm ik wang ti.”
MAT 12:46 Ak wang a Sisas kil oklala itna kuin a tu wrong kin a kipman wailet pa, man nampon tunteng wusok wusok alkil pa wli itna en akorel la ntiwel oklala.
MAT 12:47 Atom melnum ur ai lanakel la, “Man alkitn ti nampon tunteng wusok wusok alkitn ti, wli itna kawor en ti akoreitn la ntiweitn oklala.”
MAT 12:48 Ari Sisas akalmpe nakel la, “Mla man akupm, a mla wusok wusok a kupm pa?”
MAT 12:49 Kil wam ntan tu watnom alkilen a kil aroaro wonel pa la, “Kitn ri man a tu wusok wusok akupmen pa am kilke.
MAT 12:50 Kol mla ur a antokg kuina ur kanun nikgwalpm wakrongen a Yan alkupm kaino kitnong pa, tu pa wusok wusok a manmuikg a mantin akupmen pake.”
MAT 13:1 Itna wang pa Sisas kil wrekg a wan pa kawor en, atom kai rpma kai ukupuk yamping.
MAT 13:2 Pa tu wrong kin a kipman wailet paipm wli eng kil kolpa atom, kil tipra elng kaino rpma kaino nim ukupuken pa a, tu wrong kin a kipman pa rka ukupuk yamping pa.
MAT 13:3 Atom kil lanaken yangkipm kla wailet. Kil lanaken la, “Kipm itning yangkipm kla ur kil: melnum ur kai laik wanukg erk kai wring.
MAT 13:4 Kil laik kolpa kai pa, ok tiur pa angko elng nar rmpa ya mlik kai wring wunen pa, atom wel pa wli al.
MAT 13:5 Wanukg erk tiur pa angko elng nar rmpa tatu wrik weset. Ake kanokgen kolpa atom pa anip kulno pinterng.
MAT 13:6 Ari kalpis, takgni kulno el almpen pa, am amo ase. Eng ntei, ake angkli ningnakg pa elng kinar watin.
MAT 13:7 Wa wanukg erk tiur pa, angko elng nar rmpa wrik a ampei iket atne, atom ampei iket pa anip kulno ak ipaarng.
MAT 13:8 Wanukg erk tiur pa angko elng nar kanokg wor, atom anip kaino palng ariwor. Tiur pa angko wailet, tiur pa wailet paipm, a tiur pa wa klangkil.
MAT 13:9 Kitn mlaur a nungkulkg atnewe pa, kitn itning yangkipm kil.”
MAT 13:10 Tu watnom a Sisas kil aroaro wonel pa kul asentel la, “Wa kitn la kla kla lanaken eng ntei?”
MAT 13:11 Sisas kil akalmpe la, “Nikgwalpm ariwe ampen a Maur Wailen kil ikgalen ipma a melnum pa, am kil plan kipm tike, a kai tu pa kalpis.
MAT 13:12 Eng ntei, melnum a kil antiwe pa, mpa Maur Wailen kil wa ngkine lkel wa klangkil. Pake melnum a kil tukwok pa, mpa Maur Wailen kil ungkwan waiketn a kil antiwe pa kai tukuleikgentel.
MAT 13:13 Kolpa ti kupm lanaken ak yangkipm kla pa la kai a tu ari pa, ake tu ari. Wa kai a tu atning ti pa, ake wa tu atning aki wa awi ariwe pa.
MAT 13:14 Kai tu pa, yangkipm a pikekg Aisaia, melnum okwripm la pa palng aklale. Kil la kolpa, 'Ikga kipm itning a itning, pake ikgake kipm riwe. Wa ikga kipm ri a ri, pake ikgake wa kipm ri.
MAT 13:15 Eng ntei, ipma a tu melnum kil pa am kakiren paipm ase. Tu ampri nungkulkg alntu ti a ampri wulmpa alntu ti. Kolpa ti tu ake la itning a ri a uwi riwe pa, eng mpa tu plelng ipma, atom mpa kupm ntokgten palng wor pa.'
MAT 13:16 Kipm pa wor pake, kipm itopen o! Nungkulkg a kipm pa ak atning a wulmpa a kipm pa ak ari kweikwei pake.
MAT 13:17 Kupm lanakepm aklale wrisen la, pikekg ep ak ai tu melnum okwripm watipmen, a tu melnum ute wor a Maur Wailen pa wakrongen paipm la ri kuina ur a kipm ari ti, pake ake antiwe a tu ari. Wa la itning kuina ur a kipm atning ti, ari ake antiwe a tu atning.”
MAT 13:18 Sisas kil la kolpa, “Atom kipm itning yangkipm yiprokgen a yangkipm kla a la wanukg erk a melnum laik kai wring pa.
MAT 13:19 Yangkipm kla a la wanukg erk a laik atom angko rmpa tatu ya mlik kai wring wunen pa, atom wel wli al pa pati la kolkil: kol melnum itning yangkipm a la Maur Wailen kil itna wailen ikgalen nol nikgwalpm a melnum pa, atom ake ariwe la yangkipm pa la kuina pa, maur paipm kil wli ungkwan yangkipm wor wuten a angkli naki melnum pa.
MAT 13:20 Wanukg erk a angko rmpa wrik weset pati pa la tu melnum a atning yangkipm a Maur Wailen pa. Tu atopen eng awi yangkipm pa ak wang lmpiwen kolti.
MAT 13:21 Kai wang tingklaket pa melnum a kolpa ningnakg kalpisen, kil itna waiketn kolti. Tu melnum la paipmel nang a Maur Wailen pa alkel kaikuten a antokgtel paipm, pa kil am angko ase.
MAT 13:22 Wanukg erk tiur a angko rmpa wrik a ampei ik ele pa pati, kol tu melnum a atning yangkipm a Maur Wailen pake wa tu ipma kaikut akwonalmpen watipmen eng kweikwei wrongkwail a kanokg ti, a wa tu aringkowe kweikwei watipmen la rpmi ntiwe. Atom pa akaur yangkipm a Maur Wailen ti atom ake anip kaino palng ariwor.
MAT 13:23 Pake wanukg erk a angko rmpa kanokg wor pa pati, la tu melnum a atning yangkipm a Maur Wailen pa alupmen ariworwor atom kanun pa, tu pa anip kaino palng ariwor. Tiur pa anip kaino wailet, tiur pa anip kaino wailet paipm, a tiur pa anip kaino wailet klangkil.”
MAT 13:24 Sisas kil wa la yangkipm kla ur a la Maur Wailen kil itna wailen ikgalen ipma a melnum pa la kolkil la, “Melnum ur kil kai laik wanukg erk kai wring alkil.
MAT 13:25 Mining wris ur pa, wrongkwail kin a kipman pa anel okg akwekgel rmpa pa, wrongmanto a melnum pa aye mi paipm pa kai laik kai wring pa nampon wanukg pa, atom am wa tital kai ase.
MAT 13:26 Ak wang a wanukg pa anip no eng a palng ariwor pa, wa tu ari mi paipm pa wa anip no nampon.
MAT 13:27 Tu melnum akwapel a melnum yan a wring pa kai asentel la, 'Melnum Wailen, men ti lala kitn pikekg laik wanukg akalkil kolti, ari wa antokg kolai atom mi paipm pa anip nampon wanukg pa itna pa?'
MAT 13:28 Melnum yan a wring pa akalmpe la, 'Pa mpa wrongmanto pa ak kwap pake.' Ari tu ti wa asentel la, 'Ti kitn wakrongen la men kai iser mi paipm ai tukwelkg wanukg ai?'
MAT 13:29 Ari kil akalmpe naken la, 'Kalpis, ampur kipm kai aser, kol kipm kai iser pa, mpa wa kipm nulu wanukg pa nimpon.
MAT 13:30 Elng itni yatenen wanukg a mi paipm kolpa kai ngko wang a wanukg pa inip kaino riwor pa, nulu kul. Ikga kupm laniki tu melnum ak kwapel alkupm ti, atom tu iser mi paipm pa ep elngtitni mapming mapming eng mpa ngkwol ngkli elng kai wakg. A tu iser wanukg pa iye kai ermpi wan okipma akupmen pa.'”
MAT 13:31 Sisas kil wa lanaken yangkipm kla ur kil la, “Maur Wailen kil itna wailen ikgalen nol nikgwalpm a melnum pa pati, kolen trumpwilm ipopm ok a wripm almpen aye kai anip yela tatu palpa.
MAT 13:32 Trumpwilm ipopm ok pa waseksek, pake kil anip kaino watin wail talpuk atnewe atnewe kai pa kai pa kolen yo pa, angen okipma kweikwei a itna wring pa. Atom wel wrongkwail wli ak ila rka tatu talpuk pa.”
MAT 13:33 Sisas kil la yangkipm kla ur kil kolpa, “Maur Wailen kil itna wailen ikgalen nol nikgwalpm a melnum pa kolen mpim ap mringen a ak antokg nok mringen eng angki. Kin ur kil awi mpim ap pa aye kai ak oren nok nimongen pa plalng pa nok pa angki.”
MAT 13:34 Sisas kil la yangkipm wrongkwail a kil angkli kai eng tu wrongkwail kin a kipman pa ak yangkipm kla kolti. A ake kil laron yangkipm ur naken kai angko wunong pa, kalpis.
MAT 13:35 Kil ak kolpa pati pa palng aklale kai kanun ok a melnum okwripm pikekg awi ok a Sisas akla kolkil la, “Kupm mpa ik yangkipm kla ikalkilel ik laron yangkipm. Mpa kupm laron kweikwei auraur a itna am ep ak a antokg kanokg ai kul wli wang ti.”
MAT 13:36 Sisas kil ukwa tu wrongkwail kin a kipman pa kai, a kil kai kawor wan. Tu watnom alkil pa kaintel kai wan pa atom lanakel la, “Kitn laniko yangkipm kla a la mi paipm a itna wring pa ak la kuina?”
MAT 13:37 Sisas kil akalmpe la, “Melnum a laik wanukg erk wor pa pati Warim Kipman a Melnum.
MAT 13:38 Wring pa yangkipm kla a la kanokg ti. Wanukg erk pa pati la tu melnum a Maur Wailen itna wailen ikgalen pa, a mi paipm pa pati la tu melnum a Maur Paipm Satan itna wailen ikgalen pa.
MAT 13:39 Wrongmanto a laik mi paipm pa pati la Maur Paipm Satan pake. Wang a nulu wanukg erk pa pati wang umpuwen a plalng a kanokg ti. Tu melnum ak kwapel a yan a wring pa pati tu maur angklin a Maur Wailen kolti.
MAT 13:40 Mi paipm pa tu melnum ikga iser atom lap kai wakg. Ikgam tu maur angklin a Maur Wailen ik kolpa ik wang umpuwen a plalng a kanokg ti.
MAT 13:41 Warim Kipman a Melnum ikga ukwa tu maur angklin alkil pa eng tu ungkwan kweikwei a ak antokg tu melnum angko, a tu melnum wrongkwail a antokg paipmpaipm kai tukwelkg kweikwei wrongkwail wor wor a Maur Wailen kil ikgalen pa.
MAT 13:42 Atom ngkliwen elng kai wakg wail manten. Kai wakg pa ikga tu kirkar akg nam ok paipm wrisen.
MAT 13:43 Pilpa tu wrong kin a kipman a Maur Wailen pa ikga klalen len kolen takgni a el pa kaino anong wor a Yan alntu ikgalen pa. Kipm melnum a nungkulkg atne pa, kipm itning o!”
MAT 13:44 “Maur Wailen itna wailen ikgalen ipma a melnum pa pati kolen kweikwei titnongket wor wor melnum ur kai ansil kai mpang pa, a melnum ur pikekg lam. Kil ari pa kil atopen paipm kolti. Kil kai uk kweikwei wrongkwail alkil ti ak awi marpm, atom wa aye yaper kai akarmpen kanokg pa, eng mpa kil uwi kweikwei titnongket wor wor pa.”
MAT 13:45 “Am wa kolpa yat pake, Maur Wailen itna wailen ikgalen ipma a melnum pa pati am kolen krim mikam wor a melnum aye marpm ak akor pake.
MAT 13:46 Kil ari krim mikam ur pa ari wor wail manten ak marpm wail, atom kil kai ak kweikwei alkil pa ak awi marpm kolti plalng pa, kil aye kai ak armpen krim mikam ari wor pa.”
MAT 13:47 “Yangkipm kla ur pa la kolpa, Maur Wailen itna wailen ikgalen ipma a melnum pa pati kolen apm mumu a angkli rka ukupuk pa eng ak awi yul auraur pa.
MAT 13:48 Apm mumu pa pik eng yul pa, tu melnum a ak apm mumu awi awi yul pa, arkolng apm mumu pa ngkaten yul pa aye kulno nimilpm ti. Atom tu rpma angklo yul wor wor pa alupm rkwa, pake a paipm paipm pa awi angkli.
MAT 13:49 Ikgam palng kolpake ik wang umpuwen a kanokg ti kai plalng pa. Tu maur angklin a Maur Wailen pa ikga kai ngklo uwi tu melnum paipm pa itna kuin a tu melnum wor pa.
MAT 13:50 Atom ngkliwen elng kai wakg wail, kai wakg pa ikga tu kirkar akg nam ok paipm wrisen kolti.”
MAT 13:51 Sisas asenten la, “Kipm ariwe kweikwei wrongkwail a kupm la pa aki?” Ari tu pa akalmpe la, “Ei, men ariwe pa.”
MAT 13:52 Atom Sisas lanaken kolpa la, “Tu melnum a aroaro wonel tu yangkipm a Moses pa, tu ukipma Maur Wailen atom Maur Wailen itna wailen ikgalen ipma a tu pa pati, tu pa antiwe kaling plan yangkipm a Maur Wailen a ela kai wrkapm tingklaket wa nampon yangkipm weten ti. Tu pa kolen yan a wan wail ur. Tu kai kawor wan okipma ur pa, atom awi kweikwei weten a tingklaket pa nampon tita, atom aye kul or en ai, atom ampreing uk tu.”
MAT 13:53 Sisas lanaken yangkipm kla pa plalng pa, kil wrekg naurng anong pa.
MAT 13:54 A kil yaper kai anong alkil pa. Atom kil kaling plan tu yangkipm a Maur Wailen pa itna wan a tu atning atning yangkipm a Maur Wailen atnewe pa. Tu atning yangkipm pa kolpa atom tu wrekg paipm, atom tu la, “Kil awi nikgwalpm ariwe wail a kolpa kai a i? A wa kil awi titnongket a ak antokg kweikwei titnongket titnongket a melnum ake antiwe antokg pa kai a i?
MAT 13:55 Melnum pa kil ti mpam warim kipman a Sosep, melnum a ale ale wan tike aki? A man alkil pa am nang a namput la Maria pake! Wa tu wusok wusok alkilen pa am Semis, Sosep, Saimon a Sutas pake!
MAT 13:56 Wa tu muikgmayen akil pa am anti mentepm ti rpma tike! Ti melnum pa kil awi nikgwalpm ariwe wail pa kai a i?”
MAT 13:57 Tu la kolpa atom tu ipma paipm eng kil pa. Pake Sisas lanaken la, “Melnum okwripm pa akwap yela tatu anong wrongkwail ai, pa tu la kil nang arke. Pake anong alkilen, a tu a rka wan wris alkilen pa tu elukgentel la kil pa ake nang arke.”
MAT 13:58 Atom ake kil antokg kweikwei watipmen ak plan titnongket a Maur Wailen. Pa atnen tu melnum ti ake ukipma kil pa.
MAT 14:1 Ak wang pa Erot, mring tukgunakg a ikgalen anong kanokg Kalili pa, kil atning yangkipmok kwap a Sisas kil ak pa.
MAT 14:2 Atom kil lanaki tu melnum ak kwapel alkil pa la, “Pa Son melnum a pikekg kaluk tu pa mol? Kil pikekg kupm la tu orel amo, atom kil wa wrekg a kirkap pa kulor rpma, ti kil antiwe titnongket wail a antokg kweikwei kolpake.”
MAT 14:3 Pilip pa paipmen a Erot. Erot kil karpo wampel Erotias, kin paipmen alkil. Pikekg Erot kil or Son a kaluk tu pa eng kil oren lala, ake wor a kil awi kin a paipmen alkil pa aye pa. Kolpa atom Erot kil lanaki tu arkul Son pa angkuten wampel kolti aye kai rpma kai wan tipmining pa.
MAT 14:5 Kil la orel imo pake tu wrong kin a kipman pa lala Son pa melnum okwripm a Maur Wailen, kolpa atom kil ngkark eng tu wrong kin a kipman tike.
MAT 14:6 Ak wang ur pa tu wli rka nampon Erot pa antokg okipma al akwonalmpen wang a pikekg man rakuwel pa. Atom warim kin a Erotias ekg Pilip, a Erot awi wampuk pa, or angkli nepm eng nangnang a tu antokg pa itna kuin a tu wrong a wli rka pa. Atom Erot pa kil atopen paipm.
MAT 14:7 Kolpa atom kil yapon yangkipm wam kaino kwa la, kuina ur a warim kin alkil isen pa, mpa kil lkel pa.
MAT 14:8 Erotias, man a warim kin pa, alkel yangkipm atom kil lanaki Erot pa la, “Kitn la eng tu wangket mengkel Son a pikekg kaluk tu pa atom nimong rmpen tukgunakg pa iye kul lkopm!”
MAT 14:9 Pake Erot melnum tukgunakg kil atning kolpa atom kil ipma kaikuten paipm. Pake kil akwonalmpen yangkipm a wet kil yapon wam kaino kwa itna wulmpa a tu wrongkwail a antiwel al okipma rka pa. Kolpa atom kil awi wor eng la ntokg kol ok a warim kin alkil la pa.
MAT 14:10 Atom kil ukwa tu kai angket mengkel Son kai wan tipmining pa.
MAT 14:11 Plalng pa, wa awi tukgunakg pa kimpang armpen kolti aye kai uk warim kin pa, atom kil awi aye kai uk man alkil pa.
MAT 14:12 Tu watnom a Son pikekg aroaro wonel pa atning kolpa atom tu anel kulngkul ngkat num mutung a kil pa aye kai uwen, atom tu kai lakati naki Sisas pa.
MAT 14:13 Sisas kil atning a tu kul lanakel a tu wangket mengkel Son pa kolpa atom kil tipra kaino awi nim ukupuken pa kai wrik kalpmel ur pa eng mpa kil alkil rpmi pen. Ari kalpis, tu wrong kin a kipman wailet a anong lkgung lkgung pa atning a kil kai kolpa atom tu angkom ak nepm pa kanuntel kai wrik ur a kil kaiye pa.
MAT 14:14 Sisas kil awi nim ukupuken pa kai palng tipra elng nar kolti ari tu wrong kin a kipman wailet am anel wli pilpal tike. Kil ari kolpa, kil areinsen paipm. Atom kil ungkwan numpet wrongkwail a tu pa palng wor.
MAT 14:15 Kil ak kwap kolpa kaingkai nungkurikg pa, tu watnom alkil a kil aroaro wonel pa kai lanakel la, “Wang am plalng tike. Mentepm rpma wrik mpang mis kolti, ti mpa mentepm uwi okipma kai ai il. Ti la eng kai tu kai rmpen okipma il tutu anong tiur ai.”
MAT 14:16 Ari Sisas lanaken la, “Tu ake mpa kaingkai, kipm ti lken okipma ur eng tu il rki tike.”
MAT 14:17 Ari wa tu wa akalmpe lala, “O! Men ti wet ake aye okipma watipmen ur kalpis. Men wet aye nok tingklak wampwomis a yul wekg kolti.”
MAT 14:18 Ari Sisas akalmpe la, “Pati uwi iye kul lkopm.”
MAT 14:19 Atom Sisas lanaki tu wrong kin a kipman pa la, “Kipm ngko rpmi tutu mi ti.” Atom kil awi nok tingklak wampwomis a yul wekg pa aye itna, kil ngkat ikg kaino kitnong pa ukwor Maur Wailen pa plalng pa, kil kapor uk tu watnom alkil pa awi ampreing uk tu wrong kin a kipman pa al.
MAT 14:20 Tu al al nikgwor kolti atom, umpu umpu pa tu watnom pa awi aye kai alupm kai numong pa wampwam yikak wekg.
MAT 14:21 Tu melnum a al okipma pa wailet paipm kamel kamel (5,000), pake ake tu angkleikg tu kin a warim pa.
MAT 14:22 Atom Sisas kil naki tu watnom alkil a kil aroaro wonel pa la, “Kipm tipra kaino nim ukupuken pa atom kipm eptopm kai itni kai ukupuk wompel ai o! A kupm itni ukwa tu ti kaingkai atom kupm am kaintepm pake.”
MAT 14:23 Kil ukwa tu pa kai plalng pa, wrik kalpm ti pa kil kai kaino mining kaino nang ai. Kil alkil wris rpma oklala naki Maur Wailen pa rpma.
MAT 14:24 Pipa tu watnom a kil aroaro wonel a wet awi nim ukupuken kai pa, pa tu am kai angko kai ai wreren ukupuk kuin ase, ari kalpis, wripm wail pa el a won tu pa kul kolti la ik tipurngten, ari tu ak erkise kolpa ampen kai.
MAT 14:25 Wreren eng a ukwe ti pa Sisas angkaino nang pa nar angkom or u kwa pa kanunten kai.
MAT 14:26 Tu ariwel a kil angkom a u kwa pa kul pa tu ngkark kirkar akg paipm la mring maur ur ingkai wli pa.
MAT 14:27 Ari Sisas am la ase, “Ampur kipm ngkark, kipm kirkiti num walmpopm pa rki o! Kil kil kupm tike.”
MAT 14:28 Atom Pita kil lala, “Wailen kol kitn iklale pa, kitn lanikopm eng kupm ngkom or u kwa pa kainteitn.”
MAT 14:29 Ari Sisas la, “Ti kitn kul o.” Atom Pita wrekg naurng nim ukupuken pa kil angkom or u kwa pa kaintel.
MAT 14:30 Pake kil ari wripm pa el titnongket wail paipm atom kil ngkark, kolpa atom nepm wekg kil ti elng kinar kinar u wunen ai. Atom kil kirkar akwe la, “Wailen, kitn ngklinsopm pen.”
MAT 14:31 Ari Sisas kil pinterng kai wamparpmewel elng no a lanakel la, “Ipma wail a kitn ti ake arken kupm ti. Ipma a kitn ti rka wekg wekg eng ntei?”
MAT 14:32 Atom tuwekg tipra elngkaino nim ukupuken pa, a wripm pa kai tork kolti.
MAT 14:33 A tu a rka nim ukupuken pa kapor kilko aleinsel a tu lala, “Aklale wrisen, kitn pa Warim Kipman a Maur Wailen.”
MAT 14:34 Tu rpma nim ukupuken angket ukupuk pa kai palng kai ukupuk yamping a anong Kenesaret.
MAT 14:35 Atom tu wrong kin kipman a anong pa ariwel kolpa tu lala, Sisas ampake. Atom tu ayewen yangkipm pa kai yela tatu anong a ela wreren anong pa, atom tu aye tu melnum numpet numpet pa aye wli eng Sisas pa.
MAT 14:36 Wa tu lanakel la kol a kil la eng tu wampirpme apm umpu waiketn ur akilen ti kolti. Atom tu a wamparpme apm umpu akilen pa tu palng wor.
MAT 15:1 Tu tiur a tu melnum a arpmen yangkipm yiprokgen a Moses, a tu melnum tiur a aroaro wonel tu yangkipm a Moses pa, tu naurng Serusalem pa kul ari Sisas, atom tu asentel la,
MAT 15:2 “Antokg kolai atom wa tu melnum a kanun kitn pa tu angketen yangkipm a tu mamikgmamin mansan yapon pa? Ake tu klak wam alntu pa ep atom tu ak al okipma pa!”
MAT 15:3 Ari Sisas kil akalmpe la, “Kipm pa klak wam pake, antokg kolai atom kipm ti kanun yangkipm titnongket a tu mamikgmamin mansan pa, atom ak angketen yangkipm titnongket a Maur Wailen a la kolkil
MAT 15:4 la, 'Kipm mpa orngwatneikgen man a yan alkipm.' A 'Mlaur a kil la paipmel man a yan pa, pa ikga tu orel imo.'
MAT 15:5 Pake kipm wa la kolkil, 'Melnum ur a kil lanaki man a yan pa la, “Kweikwei kil kupm la ik ngklinsepm pake, pikekg kupm ermpa ak namput la uk Maur Wailen.”
MAT 15:6 Kolpa ti kil ake mpa orngwatneikgen man a yan alkil pa atom lken marpm pa.' Kwap a kipm ak kolpa pa ake kipm orngwatneikgen man a yan alkipm pa, pa kipm kanun ya nilping a mamikgmamin mansan alkipm pa atom kipm ak angketen yangkipm a Maur Wailen pa.
MAT 15:7 Kipm melnum a plan num enen pa manet, a num wunen pa manet pa, kuina ur a pikekg Aisaia melnum okwripm la pa, kai atnen kipm pake, kil la kolkil,
MAT 15:8 'Tu wrong kin a kipman pa ngkat nang akupmen pa ak num enen. Pake ipma wunen a tu pa itna watin eng kupm ti.
MAT 15:9 Tu ngkat nang a kupm ti kalpmel kolti. Eng ntei, yangkipm a tu kaling plan tu pa, pa yangkipm pikekg tu melnum ti yapon kolti, a ake akupmen pa.'”
MAT 15:10 Sisas kil akwe tu wrongkwail pa wli itna atom kil lanaken la, “Kipm itning a riwe kuina ur a kupm la kil!
MAT 15:11 Kweikwei a a en ti kai kawor ok wunen a melnum pa, ake antokg melnum pa kimpilpet, kalpis. Pake kweikwei a rpma kawor ipma wunen a melnum pa atom kulor kai en pa, antokg melnum pa kimpilpet pake.”
MAT 15:12 Tu watnom a Sisas aroaro wonel pa, tu kul ari Sisas pa lanakel la, “Ti kitn ariwe tu melnum a arpmen yangkipm yiprokgen a Moses pa ipma paipm eng yangkipm wuten a kitn la pa aki?”
MAT 15:13 Ari Sisas kil akalmpe la, “Yan akupmen a rpma kaino kitnong pa wring itna. Kweikwei a ake pikekg kil alkil ti alin pa, ikga kil ngkon nulung kulung.
MAT 15:14 Elngen tu pa itni pa, pa tu kolen melnum a wulmpa tilmpisen. Melnum ur a wulmpa tilmpisen pa kil irkwampel melnum wulmpa tilmpisen ur pa iye kai pa, tuwekg yatenen mpa ekg ngko elng kinar wrik tungkuren pa.”
MAT 15:15 Ari Pita kil lala, “Kitn lakiti yiprokgen a yangkipm kla pa eng men ti itning ri!”
MAT 15:16 Ari Sisas lanaken la, “Kipm ti yat, nikgwalpm a kipm ti titno, ake kipm ariwe la,
MAT 15:17 kweikwei wrongkwail a elng kawor ok atom al elng kinar rpma nikg pa, pa am aken pain kai kinar tingkil ase. Kweikwei pa ake antokg melnum kimpilpet pa, kalpis.
MAT 15:18 Pake kweikwei a akwonalmpen rpma kawor nol nikgwalpm pa, atom palng la kai ok ti kulor kai en pa pati, pa antokg melnum pa palng kimpilpet pake.
MAT 15:19 Kweikwei kimpilpet a palng kawor nol nikgwalpm pa pati: nikgwalpm paipm, or melnum amo, angkli arkul tita, akwap numkropis a uk numpaipm kamel, a ak ikgwam, la yangkipm kansil, a la paipmel melnum ur aki Maur Wailen.
MAT 15:20 Kweikwei wrongkwail kolpa pa antokg melnum pa palng kimpilpet. Pake kol ake klak wam atom al okipma pa, pa ake antokg melnum pa kimpilpet, pa kalpis.”
MAT 15:21 Sisas kil naurng anong pa, wa kil kai anong kanokg a Tair a Saiton.
MAT 15:22 Kin wris ur a tu Kenan, kil alkil a rpma anong kanokg a pake. Ake kil kin a tu Isrel pa, kil kai eng Sisas pa atom kil la, “Wailen, kitn walpopm a angket ale a Tepit pa kul, kitn rein kupm ti. Maur paipm rpma kawor warim kin a kupm ti atom antokgtel paipm.”
MAT 15:23 Pake Sisas ake akalmpe ok a kin pa, ake kil la kwei ur. Atom tu watnom alkil pa kaintel atom tu lanakel la, “Kitn ukwa kin ti kai, wet ak ai kanun akwe akwe atn ai.”
MAT 15:24 Ari Sisas kil akalmpe la, “Maur Wailen ake ukwa kupm ti nar eng tu anong manet pa. Kil ukwa kupm ti nar eng tu Isrel ti kolti. Tu a kol manto walkg malkgu a kai am atn palpa.”
MAT 15:25 Ari kalpis, kin pa kil kai kapor kilko aleinsel a lanakel la, “Wailen, kitn ngklinsopm pen.”
MAT 15:26 Ari Sisas kil akalmpe ak yangkipm kla pa la kolpa la, “Ampake kupm uk okipma a tu warim ti kai nimpa pa il, kolpa ake wor.”
MAT 15:27 Pake kin pa akalmpe la, “Wailen, pa aklale wrisen, pake nimpa antiwe al okipma a yan pa kil uk warim pa al, atom ipran angko rmpa kanokg pa.”
MAT 15:28 Atom Sisas akalmpentel la, “Ai, kin, kitn ukipma wail paipm eng kupm ti. Kolpa ti mpa palng ntokg kitila kol a kitn wakrongen pa.” Atom ak wang pa, warim kin a kil pa palng wor.
MAT 15:29 Sisas kil naurng anong pa a kil antila or ukupuk Kalili yamping pa kai kaino rpma kaino wrik nangen ur pa.
MAT 15:30 Kin a kipman wrongkwail aye tu a nepm paipm, wulmpa tilmpisen, yilo tintompen, ok mise, wa nampon tu watipmen tiur ai aye wli yat, rka nepm a kil pa. Atom kil ungkwan numpet a tu pa palng wor.
MAT 15:31 Atom tu wrong kin a kipman tu wrekg paipm or nol alntu, eng tu ari tu melnum okmise pa oklala, yilo tintompen pa angkom ute, nepm paipmen pa angkom ariwor a wulmpa tilmpisen pa ari kweikwei. Kolpa atom tu ngkat nang a Maur Wailen a tu Isrel pa.
MAT 15:32 Sisas kil akwe tu watnom alkil a kil aroaro wonel pa kul atom kil lanaken la, “Kupm arein tu wrong kin a kipman ti, tu antiwopm rpma wang wraur, ti mpa tu il kuina. Kupm karken ukwawen kai anong pa, mpa nikg ilmpen a wulmpa pereten tutu ya pa.”
MAT 15:33 Atom tu watnom alkil pa asentel la, “Mpa mentepm ikor okipma ur kai a i itni wrik mis ti eng ik kiporlei tu wrong wailet paipm ti?”
MAT 15:34 Ari Sisas asenten la, “Nok tingklak aripm rmpa?” Ari tu akalmpe la, “Nok tingklak rmpa wampwomis wampwompwekg nampon yul waseksek pa ake watipmen.”
MAT 15:35 Atom Sisas kil lanaki tu wrong kin a kipman pa la tu rpmi kanokg pa.
MAT 15:36 A kil awi nok tingklak wampwomis wampwompwekg pa nampon yul waseksek pa, atom kil ukwor Maur Wailen pa plalng pa, kil kapor kolpa uk kaingkai tu watnom alkil pa, atom tu pa awi ampreing uk tu melnum pa.
MAT 15:37 Tu al al nikgwor antiwe kolti, a okipma umpu umpu pa rmpa. Atom tu watnom pa awi okipma umpu umpu pa alupm kinar numong pa, numong wampwomis wampwompwekg pa no pik.
MAT 15:38 Tu melnum a al okipma pa, tu melnum wailet paipm kamel kamel (4,000), ake tu angkleikg tu kin a warim pa.
MAT 15:39 Kil ukwa tu wrong kin a kipman wailet pa kai plalng pa, kil elng kaino nim ukupuken pa, atom kil kai anong kanokg a Makatan.
MAT 16:1 Tu melnum a arpmen yangkipm yiprokgen a Moses a tu Satyusi tu kul eng Sisas pa. Atom tu aknukwar akor nikgwalpm a Sisas pa la kil laron kwei ur pa niken. Tu lanakel la, “Kitn elng kla ur itni ik plan titnongket a Maur Wailen pa, eng men ri la Maur Wailen alkeitn titnongket aki.”
MAT 16:2 Ari Sisas akalmpe ok atuwen pa la, “Nungkurikg pa takgni yipuken pa aner watet pa, ikg pa ikga takgni wor.
MAT 16:3 Wa or kong pa takgni pa aro tangkoren a elng nar mining pati plan kolen la u mpa wei. Pa aklale, kipm ariwe kitnong a plan u a takgni pake, kweikwei a palng ak wang ti pa, pa ake kipm ariwe la pa akla kuina.
MAT 16:4 Kipm wrong kin kipman a wang ti pa, kipm paipm a uk yirokg Maur Wailen kolen kin a angkli arkul kipman ur pa. Kipm akor la ri kla ur a ik plantepm titnongket a Maur Wailen pake, mpa kalpis. Ikga kipm ri kuina ur pikekg palng ep eng Sona, a ur manet pa kalpis. Pa kol kla a Maur Wailen ikga elng itni ik plantepm titnongket akilen pake.” Kil la kolpa plalng kil naurngken kai.
MAT 16:5 Sisas anti tu watnom alkil a kil aroaro wonel pa awi nim ukupuken pa angket kai wompel ai. Pa tu watnom alkil pa woniketen nok tingklak wet la mpa uwi iye pa.
MAT 16:6 Ari Sisas lanaken la, “Kipm uk ikg riwe itni watin tukwleikgen nikgwalpm a tu melnum a arpmen yangkipm yiprokgen a Moses a tu Satyusi pa: tu pa kansil plan ak num enen ti kolti, pa kol mpim ap mringen a ak oren kai or arpme nok ti plalng, atom angki wail.”
MAT 16:7 Tu alntu watnom a Sisas pa akor la itna kuin alntuwen pa la, “Ati kil la yangkipm pa eng ake mentepm aye nok tingklak ur aye kul.”
MAT 16:8 Ari Sisas kil ariwe kuina ur a tu la pa atom kil lanaken la, “Ake kipm ukipma kupm ti itna titnongket, atom wa kipm akor la watipmen la nok tingklak pa kalpis pa.
MAT 16:9 Ake wa kipm ariwe? Ake kipm akwonalmpen nok tingklak wampwomis pikekg kipm ampreing uk tu melnum watipmen paipm kamel kamel (5,000) pa, a umpu umpu pikekg kipm alupm nimong watipmen pik pik pa?
MAT 16:10 Kipm ariwe nok tingklak wampwomis wampwompwekg pikekg kupm kapor ampreing uk tu melnum kamel kamel (4,000) pa al aki? Ti nok tingklak umpu umpu pa pikekg kipm alupm nimong aripm?
MAT 16:11 Kipm ti ake ariwe yangkipm yiprokgen na a wet kupm la pa. Kupm ake wet la nok tingklak pa, kupm wet la kipm itn wonrpme eng mpim ap mringen a tu melnum a arpmen yangkipm yiprokgen a Moses a tu Satyusi a ak oren nok tingklak eng angki pa.”
MAT 16:12 Kolpa atom tu ariwe a kil la pa lala, ake kil la mpa tu itn wonrpme eng mpim ap mringen a tu ak oren nok mringen pa eng angki pa, kalpis. Kil la tu itn wonrpme ikglen tu alntu eng yangkipmok a tu melnum a arpmen yangkipm yiprokgen a Moses a kaling plan tu, a wa yangkpmok a tu Satyusi pa.
MAT 16:13 Sisas kil kai anong kanokg a Sisaria Pilipai. Ak wang pa kil asen tu watnom alkil a kil aroaro wonel alkilen pa la, “Kipm atning tu wrong kin a kipman la Warim Kipman a Melnum pa mla?”
MAT 16:14 Atom tu la, “Tu pa la kitn melnum ur a pikekg amo atom wa wrekg. Tu tiur pa tu la, pa kitn Son a pikekg kaluk tu. A tu tiur pa wa la, pa kitn Elaisa. Wa tu tiur pa la, pa kitn melnum okwripm Seremaia, aki kitn melnum okwripm ur ai.”
MAT 16:15 Atom Sisas kil la, “Ti kipm ti la kupm ti kupm mla?”
MAT 16:16 Atom Saimon Pita pa akalmpe la, “Pa kitn Krais, kitn Warim Kipman a Maur Wailen a rpma yongkyong.”
MAT 16:17 Ari Sisas kil akalmpe la, “Saimon, alkeitn wor, kitn warim kipman a Sona. Eng ntei, nikgwalpm ariwe pa ake melnum ur a kanokg ti alkeitn pa, kalpis. Nikgwalpm ariwe pa mpam Yan akupmen kaino kitnong pa alkeitn pake.
MAT 16:18 Pita kitn pa kolen wulkging. Ikga kupm uwi uwi tu wrong kin a kipman iye kul eng kupm ti kolen kupm ale wan akupmen ti eli wulkging pa. Ti wrik om a tu melnum a ake ukipma amo kai arke arke pa ake antiwe titnongket a tikale wan pa.
MAT 16:19 Mpa kupm lkeitn titnongket a ikgalen ampei umpu a wanyun a kweikwei wrongkwail a Maur Wailen kil ikgalen pa. Kitn ngkuten itni kanokg ti pa, Maur Wailen wa ngkuten kaino kitnong ai. Kitn inelkgen itni kanokg ti pa, Maur Wailen wa inelkgen kaino kitnong ai.”
MAT 16:20 Kil lanaki Pita oklala pa plalng pa, kil lanaki tu watnom alkil pa la, “Ampur kipm laron naki tu wrong kin a kipman pa la kupm pa Krais pa, yaper.”
MAT 16:21 Angko wang pa aye kai pa, Sisas kil la alupm alupm naki tu watnom alkil a kil aroaro wonel pa la, “Ikga kupm kai anong wail Serusalem pa ep atom ikga tu melnum wailen, a tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses, ikga tu ntokg kupm ti rki kalkuten wail, a wa oropm imo rmpi wang wraur plalng pa, kupm wa wrekg.”
MAT 16:22 Pita kil atning kolpa, kil epilng Sisas pa aye kai itna laikge atom kil angkengkel la, “Ai Wailen, kupm karken kitn antokg kolpa. Kwei ur kol wet kitn la pa ampur palng eng kitn pa.”
MAT 16:23 Sisas kil wa atning kolpa, kil plelng won la Pita pa lanakel la, “Maur Paipm Satan, kitn itni tukwelkg kupm ti! Kitn pa kol yopmiri ur a ak lawopm nepm eng la kupm ngko. Eng ntei, nikgwalpm pa ake a Maur Wailen pa, pa nikgwalpm a melnum.”
MAT 16:24 Atom Sisas lanaki tu watnom alkil a kil aroaro wonel pa la, “Kol melnum ur la kul kunun kupm ti pa, kil mpa elngen a kanun nikgwalpm alkil pa, a kil mpa rki yo okgmangki alkilen pa, atom kil kul kununtopm.
MAT 16:25 Melnum a kil la ikglen numpalk akil ti kolti pa, pa amen wor akilen pa ikga kai paipm. Pake melnum a kil uk num alkil ti kolti eng aken kwap kupm pa, pa amen wor akilen pa ikga rpmi wor yongkyong.
MAT 16:26 Kol melnum ur kil uwi kweikwei wrongkwail a itna kanokg ti, atom amen wor a kil pa ikga kai paipm. Ti mpa wa kweikwei wrongkwail a kanokg pa mpa wa ik ngklin amen wor a kil pa la kolai? Melnum pa mpa wa kil ik marpm kolai ik rmpen amen wor alkil pa iye kul wor kolai?
MAT 16:27 Kol Warim Kipman a Melnum ikga nar nimpon titnongket a nang wailen a Yan alkil a nimpon tu maur angklin alkilen. Atom ikga kil ikilmpe uk kweikwei kai melnum wris wris kitila kwap a kil ak pa.
MAT 16:28 Kupm lanakepm aklale wrisen, kipm tiur a itna ti pa kipm ikgake imo, kipm ikga rki kolpa rki, atom ikga ri Warim Kipman a Melnum ikga nar kolen melnum tukgunakg a ikgalen kweikwei wrongkwail. Kipm rki ri pa plalng pipa, kipm imo kaingkai.”
MAT 17:1 Wang wampwomis wampwompwris pa kai plalng pa, Sisas kil awi Pita, Semis, a wailen alkil Son pa tunteng kaino wrik nangen watin ur pa, atom tunteng alntunteng pa rka.
MAT 17:2 Tunteng rka pa, tunteng ari numpalk a Sisas pa palng manet. Ikgokg a kil pa palng klalen alenten kolen takgni. A apm a kil nowe pa palng tangkor pupu.
MAT 17:3 Tunteng ari kweikwei a palng kolpa kai eng Sisas pa plalng pa, wa tunteng ari Moses a Elaisa pa wa palng kolti anti Sisas pa oklala.
MAT 17:4 Pita ti wa la yangkipmok ur manet alkil ai naki Sisas pa la, “Wailen, mentepm rka kolkil pa wor. Kitn wakrongen pa, mpa kupm ngkam pilmpal wraur ur ai. Wris ur eng kitn a ur eng Moses a ur eng Elaisa.”
MAT 17:5 Pita kil oklala itna pa, waipmunu klalen ur pa nar akipaarngken. Atom tunteng atning ok ur a la kawor waipmunu wunen pa la, “Pa Warim Kipman a kupm, kupm plan ipma wor wakrongentel a kupm ipma wor atopentel, ti kipm itning yangkipm akilen pawo!”
MAT 17:6 Tunteng watnom alkil atning pa, teng ngkark paipm angko elng kai lam ikgokg kai kanokg pa.
MAT 17:7 Ari Sisas kai ak wam rkawen lanaken la, “Teng wrekg o, ampur kipmteng ngkark.”
MAT 17:8 Atom tunteng plelng ngkat ikg kaino kwa pa ari, ake tunteng ari melnum ur kalpis, tunteng ari Sisas wris ata kolti.
MAT 17:9 Tunteng wrekg angkaino nang pa kai kinar pa, Sisas alken yangkipm pa la, “Ampur kipmteng lanaki tu kuina ur wet kipmteng ari pa. Pa mpa rpmi kai ipma a kipmteng ti kolti, kai ngko wang a Warim Kipman a Melnum pa imo pa wa wrekg pipa, kipmteng laniken kul.”
MAT 17:10 Wa tunteng watnom alkil pa asentel la, “Ti wa antokg kolai atom tu melnum a aroaro wonel tu yangkipm a Moses ti wa lala, Elaisa pa ikga nar ep, a Warim Kipman a Melnum pa kul nar kunukg?”
MAT 17:11 Atom Sisas akalmpe la, “Pa aklale, Elaisa pa ikga nar ep noworel nimprampen kweikwei wrongkwail pa elng itni.
MAT 17:12 Pake kupm lanakepm aklale la, Elaisa am pikekg nar ase. Pake tu wrong kin a kipman pa ake ariwe la pa Elaisa pa. Atom tu antokgtel paipm ak wakrongen alntu, kolen ikga wa tu uk wleket Warim Kipman a Melnum pa.”
MAT 17:13 Atom tunteng watnom alkil pa am ariwe ase la, wet kil la Elaisa, pake pa am kil la Son a pikekg kaluk tu.
MAT 17:14 Tunteng nar palng ari tu wrong kin a kipman pa rka. Atom melnum wris ur pa kul kapor kilko alein Sisas pa
MAT 17:15 a kil la, “Wailen, kitn rein warim kipman akupmen tipen. Kil titno, kil awi numpet rpma paipm wrisen. Almpla titnowel talpul angko angko wakg a u.
MAT 17:16 Wet kupm ayewel kai eng tu watnom a kitn aroaro wonel pa ari, tu ake antiwe antokgtel palng wor.”
MAT 17:17 Atom Sisas lanakel la, “O! Kipm wrong kin kipman ak wang ti, ake kipm ukipma, ipma a kipm ti am kai ar ase. Ikga kupm rpmi ntiwepm or ai kai rki kaikuten akipmen pa? Ti iye warim pa kul o!”
MAT 17:18 Tu aye warim kipman pa kul, atom Sisas kil akle ungkwan maur paipm a rpma warim pa kolti, warim pa palng wor.
MAT 17:19 Atom tu watnom alkil pa awi Sisas pa aye kai itna laikge pa atom asentel la, “Antokg kolai atom men ti ake antiwe titnongket a ungkwan maur paipm takwleikg warim pa?”
MAT 17:20 Atom Sisas pa akalmpenten kolpa la, “Kol kipm ukipma waiketn ur kol marer ok wasek pa, pa antiwe ak antokg kweikwei wail wail, pa antiwe kol a kipm la tipmining wail ti la, 'Kitn kai itni kai wompel ai', ti tipmining mpam kai itni wompel pa. Pa kweikwei wrongkwail kol a ake wonet eng kipm. Ati, ake kipm ukipma itna titnongket, kolpa atom ari ake kipm antiwe ungkwan maur paipm takwleikg warim pa. [
MAT 17:21 Maur paipm kolti pati ake antiwe mpa kipm ungkwan kolti pa. Kipm kalpis okipma eng uk wang Maur Wailen pa, pati antiwe mpa kipm ungkwan pake.]”
MAT 17:22 Ak wang ur a tu kai rka wris rka kai anong kanokg a Kalili pa, Sisas lanaken la, “Ikga tu elng Warim Kipman a Melnum ti kai wam a tu wrong kin kipman eng ilmporel imo, atom ikga wang wraur pa kai plalng pipa, wa kil wrekg.” Tu atning yangkipm a kil la kolpa pa tu ipma kalkuten paipm.
MAT 17:24 Sisas nampon tu watnom alkil a kil aroaro wonel tu kul anong Kaperneam, atom tu melnum awi marpmel tu itna yalming a Maur Wailen pa kul asen Pita pa la, “Melnum alkipm a alkepm ariwe pa kil angkli angkli marpm ur kai yalming a Maur Wailen pa aki kalpis?”
MAT 17:25 Atom Pita akalmpe la, “Ei, kil angkli angkli marpm pa.” Atom kil kai kawor wan pa ari Sisas am asentel ase la, “Saimon, kitn akwonalmpen kolai tu melnum tukgunakg a kanokg ti? Tu awi awi marpm kai tu melnum yiprokg yiprokg alntu nampon aki awi awi kai tu miskalpm ai kolti?”
MAT 17:26 Atom Pita akalmpe la, “Am tu awi awi kai tu miskalpm pa akalkil pake.” Atom Sisas lanakel la, “Ti pa! Tu yiprokg yiprokg alntuwen pa ake tu awi awi marpmel tu pa, kalpis.
MAT 17:27 Kai kwap a yalming a Maur Wailen pa kol am kol pake, ari kolpa kalpis. Pake mentepm kalpis a angkli marpm pa, mpa tu ipma paipm eng mentepm. Kolpa ti kai kitn kai ngklitilo ampei kai ukupuk pa ik rkolngtilo yul pa. Yul a kitn rkolng ep pa, irontokel yul pa, mpa kitn ri marpm a rpma yul ok pa. Kitn nikletilo, yekul kai ngklitilo kai kuin amentekgen pa uk melnum a awi marpmel tu kai yalming pa.”
MAT 18:1 Itna wang pa tu watnom a Sisas aroaro wonel pa kulntel atom asentel la, “Mla itna nang wailen itna kuin a tu a Maur Wailen itna wailen ikgalen ipma atuwen pa?”
MAT 18:2 Ari Sisas akwe warim yek ur pa kul kolti, kil wamparpme aye kaino itna kuin atuwen pa akla la,
MAT 18:3 ”Kil kupm la aklale, ake kipm plelngen nikgwalpm akipmen pa palng kolen tu warim yekyek a kolkil pipa, Maur Wailen ake antiwe a itna wailen ikgalen ipma akipmen.
MAT 18:4 Melnum a kil arku kil alkil palng kolen tu warim yekyek a kolkil pa, pa kil itna nang wailen itna kuin a tu a Maur Wailen itna wailen ikgalen ipma atuwen.
MAT 18:5 Melnum a kil ikgalen tu melnum a arku tulntu palng kolen tu warim yekyek a kolkil pa, pa kil ikgalen kupm.”
MAT 18:6 “Kol melnum ur ningkail warim yekyek wris ur a kolkil a ukipma kupm ti kil ngko pa, pa wor kol a tu yipo wes wail ur rpmi mengkel, atom ngkit ngkliwel kinar unokg ai.
MAT 18:7 Woi, arein kipm wrong kin a kipman! Kweikwei wailet a itna kanokg ti ak ningkailepm, atom kipm angko kai paipmpaipm. Ari kweikwei a ak ningkailepm pa am palng kolpa itna pake, ikgake kalpis pa. Pake woi, arein melnum a ningkail melnum ur iye kai ngko pa.
MAT 18:8 Kol wam aki nepm ur a kitn pa rkolngkeitn la kitn la kai ntokg paipmpaipm pa, pa kitn wangket atom ngkli kai ai tukwelkg. Pa wor eng a kitn pa ngkiten wam wompel wris aki nepm wompel wris pa iye itni kolti eng mpa kitn uwi yaprekg watin a Maur Wailen atom ikga kaino rpmi wor yongkyong. Kitn elng nepm wam pa itni yatenen, atom kai anong paipm a wakg atne yongkyong pa, pa paipm.
MAT 18:9 Am kolpake, kol wulmpa wompel ur a kitn pa ak arkolngkeitn la kitn kai ntokg paipmpaipm pa, pa kitn inen ngkli tukwelkg. Kitn ngkiten wulmpa wompel pa uwi yaprekg watin a Maur Wailen pa kaino rpmi wor yongkyong pa pati wor pake. Kitn elng wulmpa pa itni yatenen, atom kai anong paipm a wakg atne pa, pa paipm.
MAT 18:10 Ti mpa wa kipm ikwonilmpen tu warim a kolpa. Mpa wa kipm lala tu pa warim paipm paipm ur kalpmel kolti, pa kalpis. Eng ntei, kupm lanakepm la, tu maur angklin a Maur Wailen ikgalen tu warim a kolpa pa, tu pa antiwe kai itna wulmpa a Yan akupmen kaino kitnong pake. [
MAT 18:11 Warim Kipman a Melnum wli la ik uwi tu melnum a kai oror ya paipm pa iye yaper kul.]”
MAT 18:12 “Ti kipm wa akwonalmpen kolai? Kol melnum ur a kil ikgalen manto walkg malkgu kamel wampwomis, atom wris ur pa kai am pa, pa ake mpa kil kai ikor wris ur a kai am pa? Pa mpa kil elngen manto walkg malkgu kamel wikgwikg tuwek wampwam yikakwomis yikakwompwikgwikg pa elngkitni nang i pa, a kil mpa wa kai wa ikor wris ur a am ai pen.
MAT 18:13 Kol kil nsil pa, kupm lanakepm aklale, kil mpa wa itopen paipm wrisen eng manto walkg malkgu wris pa wa angen manto walkg malkgu a itna ti.
MAT 18:14 Am kolpake, kol Yan akipmen a rpma kaino kitnong ti ake wakrongen la mpa warim waseksek ur a kolpa kai paipm pa.”
MAT 18:15 Sisas kil wa la kolpa la, “Kol wusok aki wailen ur alkitn, kol kil ntokg nikgwalpm paipm ur kai kitn ti pa, kitn kai riwel. Kipmekg alkipmekg wekg kolti rpmi la kuina ur a kil antokg paipm kai kitn pa. Kol kil itning yangkipm a kitn la pa, am kitn angklinsel awiyel aye yaper kul ase.
MAT 18:16 Pake kol kil ake atning pa, mpa kitn uwi kol melnum wris aki melnum wekg ur ai kai ntiweitn kai itni yirokgel kitn pa, eng ik titnongketel yangkipm pa.
MAT 18:17 Kol kil ake la itning yangkipm a kipmteng pa pipa, wa kitn laniki tu wrong kin a kipman a ukipma Maur Wailen. Pa la ake wa kil atning yangkipm a tu pa yat pipa, mpa kitn la melnum pa la, pa kil kol melnum ipmawekg aki melnum paipm ur a antokg paipmpaipm.
MAT 18:18 Ti kupm lanakepm aklale wrisen, kuina ur a kipm yapo itna kanokg a ti pa, pa wa Maur Wailen yipo kolpa kaino kitnong ai. Wa kuina ur a kipm alken itna kanokg a ti pa, pa kil alken kolpa yat itna kaino kitnong ai.
MAT 18:19 Kupm la wa lanikepm nti ur la, kol kipmekg melnum wekg ur itni kanokg ti ipma wris eng kuina ur a kipmekg asen pa, mpa Yan akupmen a rpma kaino kitnong mpa kil lkepm pa.
MAT 18:20 Ti kol melnum wekg ur aki wraur ur, tunteng kai rki wris ngkit nang akupmen pa, pa kupm antiwen rpma.”
MAT 18:21 Atom Pita kil kul eng Sisas, atom kil asentel la, “Wailen, kol wusok aki wailen ur alkupm pa perper ntokg paipm kul kupm pa ikngklei wang pa, mpa kupm ungkwan paipmpaipm a kil pa nti aripm? Mpa kupm ungkwan kaino elngen wampwomis wampwompwekg aki?”
MAT 18:22 Ari Sisas kil akalmpentel la, “Kupm ake wa lanakeitn la mpa nti wampwomis wampwompwekg pa, kupm lanakeitn la mpa nti kamelwraur tuwek wampwam yikakwomis yikakwompwekg.
MAT 18:23 Ti kitn itning, kupm la yangkipm kla ur kil a ak la arein a Maur Wailen itna wailen ikgalen nol nikgwalpm a mentepm. Pa kolen melnum tukgunakg ur, kil akwen tu melnum akwapel alkilen pa la tu ikilmpentel kweikwei kuloken alkil a rpma kai tu pa.
MAT 18:24 Atom tu aye ker a pikekg akawiye kweikwei kuloken akilen pa aye wli alkel, atom kil awi angkleikg rpma. Kil angkleikg kolpa kai, atom tu aye melnum wris ur pa aye wli. Ker alkilen pa palng watipmen paipm kamel kamel (10 milyen).
MAT 18:25 Akentiwe mpa kil ikilmpe, ker pa watipmen paipm ai. Kolpa atom melnum tukgunakg pa lanaki tu la mpa tu uwi melnum pa nimpon kin a watnom alkil pa, a kweikwei wrongkwail alkilen pa, mpa tu iye kai uk tu melnum ur ai rmpen. Atom mpa tu uwi marpm pa ikilmpe kweikwei kuloken pa.
MAT 18:26 Melnum pa kil atning kolpa, kil elngangko kinar rmpa nepmel melnum tukgunakg pa, a kil kirkar akg la, 'Kitn reinsopm pen, ikga kupm ikilmpenteitn kweikwei wrongkwail palpa.'
MAT 18:27 Melnum tukgunakg alkil pa areinsel kolti a kil la, 'Wor pa, kai kitn kai o! Kuloken akupmen a rpma kai kitn pa am kupm ungkwan ase.'
MAT 18:28 Melnum akwapel pa wrekg kai ari, kil ansil melnum a tuwekg akwap wris a pikekg awi marpm kuloken wasek ur kul kil ti. Atom kil kai arkulel a wamparpmewel meng kolpa, a lanakel la, 'Kitn ikilmpe kuina ur a pikekg kupm alkeitn tiwo!'
MAT 18:29 Ari melnum pa kil elngangko rmpa nepm kil ti, a kil lanakel la, 'Kitn reinsopm pen, ikga kupm ikilmpenteitn pa.'
MAT 18:30 Ari kil ti la, kil karken kolpa. Atom kil la tu awiyel kolti angkliwel kawor rpma wan tipmining pa eng ikga kil rpmi i i. Kil ikilmpentel kuloken pa kai plalng pa, kil kulor en om.
MAT 18:31 Atom tu melnum akwap wris tiur alkil pa tu itna ari kuina ur a palng kolpa atom, tu ipma kalkut. Kolpa a tu kai lanaki melnum tukgunakg alntu pa kweikwei wrongkwail a wuten palng pa.
MAT 18:32 Atom melnum tukgunakg pa akwe melnum akwapel a wuten awi melnum ur alkil pa kawor rpma wan tipmining pa kul aklewel la, 'Kitn ti antokg paipm.
MAT 18:33 Ake wa kitn ipma arein melnum akwap wris alkitn ti, kol a kupm arein kitn ti?'
MAT 18:34 Melnum tukgunakg pa kil ipma wakget. Kolti kil ukwa melnum pa la kai rpmi wan tipmining pa rpmi i i, kil ikilmpe kuina ur kuloken a rpma num a kil pa plalng.
MAT 18:35 Am kolpake, Yan akupmen a rpma kaino kitnong ti pa mpam wa kil ik kolpa kai kipm wris wris pake. Kol ake kipm ungkwan paipmpaipm ur kai wusok aki wailen alkipm pa, kipm ungkwan ik ipma wor iklale pa, Yan akupmen ikgake ungkwan paipmpaipm akipmen pa.”
MAT 19:1 Sisas kil lanaken yangkipm kweikwei wrongkwail pa kai plalng pipa, kil naurng anong kanokg a Kalili pa kil wangket u kop Sotan pa kai wompel ai. Atom kil nar kai wompel ai kai kinar wangket kul anong kanokg a Sutia.
MAT 19:2 Ari kalpis, tu wrong kin kipman wailet am kanuntel kolpa atn pake, atom kil ungkwan numpet atuwen pa itna wrik pa.
MAT 19:3 Ari wa tu melnum tiur a melnum a arpmen yangkipm yiprokgen a Moses pa tu kul alm ipmawel kil pa, asentel la, “Men la itningke kai kitn ti la yangkipm titnongket pa la kipman pa antiwe a ungkwan kin alkil pa ik wakrongen alkil aki, kalpis?”
MAT 19:4 Ari Sisas pa akalmpe la, “Ake wa kipm angkleikg yangkipm wrkapm a Maur Wailen pa, a la, pikekg ep lmpiwen ak a kil antokg kweikwei wrongkwail pa, kil antokg kin, kil antokg kipman.
MAT 19:5 Atom am yiprokgen kolpa atom kil la, 'Warim kipman mpa nuurng mansan alkil, a kai rpmi numpon kin alkil, atom mpa tuwekg palng kol num wris.'
MAT 19:6 Kolpa atom ake wa tuwekg itna kol melnum wekg pa, kalpis, tuwekg am kai wris ase. Eng ntei, kwei ur a pikekg Maur Wailen yapo kai wris pa, pa ake antiwe mpa melnum ur wangketen itni manman pa, kalpis.”
MAT 19:7 Tu melnum a arpmen yangkipm yiprokgen a Moses tu asen Sisas pa la, “Ti antokg kolai atom pikekg Moses kil alko yangkipm la, kipman antiwe a nira wrkapm wompel a ak wangketen kin pa atom ungkwan kin pa kai pa?”
MAT 19:8 Ari Sisas kil akalmpenten la, “Moses pikekg kil anti la kipm ungkwan kin alkipmen atnen a kipm melkget. Pake pikekg ake ya ur kolpa ak ep ilmpiwen ai, kalpis.
MAT 19:9 Kin a kipman ur pa kai ikwap numkropis a uk numpaipm kamel pa, pa kil antiwe ungkwan kin pa. Kol kil ungkwan kin alkil a ake kai akwap num kropis ur pa, atom kil uwi kin ur manet ai iye pa, pa kil angkli arkul kin pa. Wa kipman a awi kin ur a kipman ep ungkwan pa, pa kil wa angkli arkul kin pa.”
MAT 19:10 Tu watnom a Sisas pa tu atning yangkipm a tu la kolpa atom tu lanakel la, “Kolpa pa, pa wor eng ake mpa uwi tita.”
MAT 19:11 Ari Sisas pa akalmpenten la, “Yangkipm a la kin a kipman ake mpa uwi tita pa, wrongkwail ake antiwe ariwe yangkipm pa eng mpa tu kunun. Tu tiur a Maur Wailen alken titnongket kolti pa tu awi ariwe yangkipm pa atom kanun.
MAT 19:12 Pa yiprokgen watipmen eng tu kipman ake la uwi kin pa. Tu tiur pa pikekg awi ipma angko, atom nikgwalpm a tu a rka eng la ntokg kin pa, pa kalpis. A tu tiur pa tu angklo mamrowel, atom nikgwalpm a tu a rka eng la ntokg kin pa, pa kalpis. Tiur pa tu karken la tu ake la uwi kin pa, eng ntei, tu la uk tu alntu ti kai eng ikwap a Maur Wailen. Mlaur a awi ariwe yangkipm kil pa, pa kil kunun.”
MAT 19:13 Ak wang pa tu wrong kin kipman pa tu aye tu warim alntu pa aye kai eng Sisas la kil elng wam pa eliwen a oklala niki Maur Wailen eng ngklinsen. Ari tu watnom alkil pa aklewen.
MAT 19:14 Ari Sisas lanaken la, “Kipm elngen eng tu warim pa kulntopm o! Ampur angkengken. Anong wor a Maur Wailen itna wailen ikgalen pa am a tu melnum a kolen tu warim yekyek tike.”
MAT 19:15 Kil elng wam pa elawen oklala naki Maur Wailen angklinsen plalng, kil naurngten kil kai.
MAT 19:16 Atom melnum ur pa kul eng Sisas atom asentel la, “Melnum a aroaro wonel tu, mpa kupm ntokg kweikwei wor ur kolai eng mpa kupm uwi yaprekg watin eng rpmi wor yongkyong?”
MAT 19:17 Ari Sisas akalmpe la, “Wa kitn asentopm eng kuina a i wor pa eng ntei? Kwei ur wris a wor pa pati Maur Wailen. Kol kitn la uwi yaprekg watin eng kitn pa rpmi wor yongkyong pa pati, mpa kitn kunun yangkipm titnongket a Maur Wailen pa riworwor.”
MAT 19:18 Ari melnum pa asentel la, “Yangkipm titnongket a i mpa wa kupm wa kunun pa?” Ari Sisas akalmpentel la, “Ti yangkipm titnongket mpa kitn kunun ti kil: ake mpa ilm melnum imo, a ake mpa ngkli rkul kin a kipman pa, ake mpa ik ikgwam, a ake mpa kinsil lakiti melnum ur pa,
MAT 19:19 a orngwatneikgen mansan, a plan ipma wor wakrongen mla ur yiprokg watinet alkitn kol a kitn plan ipma wor wakrongen kitn alkitn.”
MAT 19:20 Melnum warimpen pa la, “Yangkipm titnongket a wet la pa kupm kanun pake, ti wa tiur a i eng kupm a wa kunun?”
MAT 19:21 Ari wa Sisas pa akalmpe la, “Kitn la palng melnum wor wrisen pa, kitn kai atom kitn uk kweikwei wrongkwail alkitnen ti kai tu rmpenteitn. Plalng pipa, kitn uwi marpm pa kai uk tu melnum a rpma tukwok pa. Pa ikga kitn rpmi ntiwe kolpa kaino anong wor ai. Atom plalng pa, kitn kul kununtopm!”
MAT 19:22 Melnum warimpen pa kil atning yangkipm pa, kil kai nampon ipma kalkut, eng ntei, kil melnum a antiwe kweikwei wailet.
MAT 19:23 Atom Sisas lanaki tu watnom alkil pa la, “Ti pa, kupm lanakepm aklale. Melnum a antiwe kweikwei watipmen pa, pa wonet eng kil elng Maur Wailen kawor itna wailen ikgalen nol nikgwalpm akilen pa.
MAT 19:24 Ti kupm wa la lanikepm la, kol ling pa la or tawong a ikyom a ak angkut apm pa kawor pa, ake aken kwap kol melnum a antiwe kweikwei watipmen la elng Maur Wailen kawor itni wailen ikglen nol nikgwalpm akilen, pa aken kwap paipm.”
MAT 19:25 Ti tu watnom alkil pa, tu atning yangkipm a kil la pa atom tu wrekg paipm eng yangkipm pa. Atom tu asen tita la, “Woi, ti mla a i antiwe mpa Maur Wailen ik uwiyel iye kul wor pa!”
MAT 19:26 Ari Sisas ariwen kolpa atom kil lanaken la, “Melnum pa ake antiwe, pake Maur Wailen pa antiwe a antokg kweikwei wrongkwail.”
MAT 19:27 Atom Pita akalmpentel la, “Ti kitn ri, men naurng kweikwei wrongkwail alpmenen ase, a men am kul kanun kitn tike. Ti ikga men uwi kuina?”
MAT 19:28 Ari Sisas wa akalmpe la, “Kupm lanakepm aklale. Ikga ik wang a kil ntokg kitnong a kanokg weten pa, ik wang pa Warim Kipman a Melnum ikga kil rpmi wrik wor a awi titnongket a nang wailen. Ti kipm watnom wampwam yikak wekg a kupm pa, pa kipm pa yat ikga kipm rpmi wrik wampwam yikak wekg wor a awi nang wailen eng ikga ikglen tu om wampwam yikak wekg a Isrel.
MAT 19:29 Kolpa ti melnum a kil naurng wan anong alkil aki kil naurng muinwror, muikgmayen, mansan, warim, a wring alkil pa eng kil akwap akupmen pa, ikga kil uwi melnum a kweikwei pa watipmen paipm ai angen a kil naurng itna pa, wa kil uwi yaprekg watin atom ikga kil rpmi wor yongkyong.
MAT 19:30 Pake watipmen a tu a itna ep pa, tu pa ikga kai itni kunukg, a watipmen a tu itna kanukg pa, tu pa ikga kai itni ep.”
MAT 20:1 “Maur Wailen itna wailen ikgalen ipma a melnum pa pati kol melnum a antiwe wring ampei wain ok wail. Atom kil wrekg ak kong miningket paipm ai, eng kil kai akor tu melnum la tu kai iktel kwap kai wring alkil eng mpa kil rmpenten.
MAT 20:2 Kil yapon yangkipm la mpa kil rmpenten marpm a wang wris pa, atom kil ukwawen tu kai ikwap kai wring alkil pa.
MAT 20:3 Wa takgni no rpma kai kitnongkwang ti pipa, wa kil wa yaper kai. Ari wa kil ari tu melnum tiur a tu rpma kalpmel angkai wrik mapming ur a tu kai arke arke pa.
MAT 20:4 Atom kil lanaken la, 'Kipm ti yat, kipm kai iktopm kwap kai wring akupm. Eng mpa kupm rmpentepm kitila kwap a kipm ak pa.'
MAT 20:5 Kolpa atom tu kai akwap. Takgni kaino wreren eng a pirng pa, kil wa yaper kai la ikor tu tiur pen. Wa ak takgni plelng pa am wa kil wa ak kolpake.
MAT 20:6 Wa kwikwai ok angko pa wa kil kai ari, tu tiur am wa itna ase. Atom kil wa asenten la, 'Wa kipm rpma kalpmlel wang wris ti antokg kuina?'
MAT 20:7 Ari tu pa akalmpentel la, 'Ake wa tu melnum ur armpento la men iktel kwap ur, kalpis.' Atom kil lanaken la, 'Ti kipm kul kai ikwap kai wring akupm ai.'
MAT 20:8 Atom nungkurikg ti pipa, melnum yan a wring pa lanaki melnum wantengkwang alkil pa la, 'Kitn ukwe tu melnum wet akwap akupm pa kul lken marpm. Mpa kitn uk tu melnum a kupm awiyen kanukg pa ep, plalng pa, wa uk kolpa kai elngen kai tu melnum a wuten kupm awi ep ai.'
MAT 20:9 Tu wet ketn ti akwap ak nungkurikg ti pa, tu kai itna awi marpm a wang wris pa aknirake tu pa kimeket.
MAT 20:10 Pipa tu melnum a kil awiyen ep ak kong pa wa kul wa itna eng la wa uwi marpm pa. A tu akwonalmpen la tu pa mpa wa uwi marpm wa wail angen tu pa. Ari kalpis, tu kimeket am tu awi repmrepm kol marpm a wang wris kolpa kimeket pake.
MAT 20:11 Tu ari marpm a tu awi kolpa, atom tu la watipmen kai melnum yan a wring pa.
MAT 20:12 Tu la, 'Tu melnum a kitn awiyen kanukg kil pati, tu wuten akwap waiketn kolti ak takgni nungkurikg ti. Ari wa kitn wa armpenten marpm pa wa repmrepm kul kol marpm a wa kitn armpen men ti tuwa. Men ti wuten akwap ak kong ai, takgni alo kul wli nungkurikg tike.'
MAT 20:13 Ari melnum yan a wring pa akalmpe kai melnum wris ur pa la, 'Kupm antokg na paipm eng kitn ti? Kitn alkitn wuten awi wor la kitn ikwap wang wris eng uwi marpm kol a wang wris pake.
MAT 20:14 Kolpa ti kitn uwi marpm pa atom kitn iye kai o! Pa nikgwalpm akupm, atom ari kupm uk marpm pa kai tu melnum a kupm awi ayewli kanukg pa repmrepm kol a kupm uk kitn pake.
MAT 20:15 Pa marpm alkupmen, kupm la ntokg kolai kweikwei alkupmen pa, pa nikgwalpm alkupmen. Ake mpa mlaur la. Ake wor eng kitn ipma paipm eng kupm akwap wor kolpa.'
MAT 20:16 Kolpa ti mla ur a kil itna kanukg pa kil ikga kai itni ep, a mlaur a kil itna ep pa kil ikga kulkai itni kunukg.”
MAT 20:17 Tu angkom kai eng a kaino Serusalem pa, Sisas kil awi tu watnom wampwam yikak wekg alkil pa ayewen kai itna wrik laikge ur pa, atom kil lanaken kolpa itna wampel la,
MAT 20:18 ”Kipm itning, mentepm mpa kai eng ikga kaino anong wail Serusalem. Kaino anong pa ikga tu uk Warim Kipman a Melnum kai wam a tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses. Ikga tu uwiyel iye kai itni yangkipm eng la ikga ilmpel imo.
MAT 20:19 Ikga tu uk kil kai wam a tu melnum a ake Suta eng ikga tu la iknokgelel, a ik ampei iket pa ikntrawel a kurkurngkel rki yo okgmangki, kil imo. Wang wraur pa kai plalng pipa, ikga wa kil wa wrekg i kirkap pa.”
MAT 20:20 Atom man nampon warim kipman wekg a tuwekg Sepeti pa tunteng kai ari Sisas. Atom man pa kapor kilko aleinsel, atom kil la lanikel yangkipmok.
MAT 20:21 Ari kil asentel la, “Kitn la la kuina?” Ari kin pa la, “Kupm la kitn yipon yangkipm eng warim kipman wekg alkupmen kil, eng ikga uwi nang wailen nimpon kitn, ikga ur rpmi wam wi, a ur rpmi wam wangkokg akitn, ik wang a kitn itni wailen ikglen kweikwei wrongkwail.”
MAT 20:22 Ari Sisas kil akalmpe la, “Kipmteng ake ariwe kuina ur a kipmteng la pa. Kipmekg antiwe a ikga il u kai kaimung a ikga kupm il tike?” Tuwekg akalmpe la, “Mentekg antiwe pa.”
MAT 20:23 Ari Sisas lanaken la, “Pa aklale, kipmekg ikga il u kai kaimung akupmen pake. Kupm ti ake melnum ikga tukwei melnum eng la rpmi kai wam wi a kupm aki wam wangkokg a kupm pa, kalpis. Wrik pa pati a tu melnum a Yan akupmen numprampen eng tu pake.”
MAT 20:24 Tu watnom wampwam alkil pa tu atning yangkipm pa ari tu ipma wakget nampon tuwekg wusokwail pa.
MAT 20:25 Atom Sisas kil akwewen kul itna wris atom kil lanaken la, “Kipm ariwe pa. Tu melnum tukgunakg pa tu itna kalnten ikgalen tu wrong kin a kipman pa tirpmingen ak wakrongen alntu. Wa tu melnum wail wail pa tu ikgalen tu wrongkwail ak titnongket kalnten alntuwen.
MAT 20:26 Nikgwalpm akipmen pa ake mpa rki kolpa. Kol mlaur kil la palng melnum wailen itna kuin akipmen pa, pa kil orngwatneikgen ngklin mlaur ai.
MAT 20:27 Wa kol mlaur kil wakrongen la kil a itni ep pa pati, mpa kil palng kolen melnum ur a aken kwap kalpmel orngwatneikgen kipm pa.
MAT 20:28 Kol Warim Kipman a Melnum ti pa am kolpake, pikekg ake kil nar la kipm pa ngklin kil ti pa. Kil nar la ngklin kipm pa, wa uk num alkil ti kai eng la ikirmpen kipm wrongkwail.”
MAT 20:29 Sisas nampon tu watnom a kil aroaro wonel pa naurng anong Seriko pa kai ari tu wrong kin kipman wailet paipm a pa anel kai kanuntel.
MAT 20:30 Ari melnum wulmpa paipmen wekg ur pa ekg rpma ya yamping pa rpma. Tuwekg atning a tu lanaken la Sisas ampake, atom ekg akwe yikakatnen la, “Wailen, kitn watnom walpopm a Tepit, kitn reinso pen!”
MAT 20:31 Tu wrong kin kipman wailet apa anel atning a tuwekg akwe kolpa, a anel kilkampen a lanaken la tuwekg tatar rpmi. Ari wa tuwekg wa akwe yikakatnen paipm ai la, “Wailen, yipetatnong a yoampei Tepit, kitn reinso pen!”
MAT 20:32 Atom Sisas kil kai itna a kil akwewen, atom kil asenten la, “Kipmekg wakrongen kupm ti la kupm ntokgtepm kuina?”
MAT 20:33 Ari tuwekg pa akalmpe la, “Mentekg wakrongen la kitn ntokg wulmpa amentekgen ti palng wor.”
MAT 20:34 Sisas kil ipma areinsen, atom kil elng wam pa kai itna wulmpa a tuwekg pa. Atom penterngen kolti wulmpa a tuwekg pa palng ari kweikwei pa. Atom tuwekg wrekg kolti kai kanuntel.
MAT 21:1 Sisas nampon tu watnom alkilen pa, anel kaino angko Petpake, anong wasek ur a ela krongkwang a nang Olip pa, kaino wreren Serusalem ase.
MAT 21:2 Pipa Sisas lanaki watnom wekg ur alkil pa la, “Kipmekg ep kaino anong ingkaino ai, pa mpa kipmekg ri penterngen kolti nimpa nungkulkg watin ur a tu latok ampeiyel elng itna anong pa nampon war alkil pa. Kipmekg inelkgen atom kipmekg iyentopm nar o!
MAT 21:3 Kol melnum ur isen rapontepm pa, laniken la, 'Wailen kil wakrongen la uwi eng ik ik kwap ur alkil ai atom wa ukwanteitn yaper no pinterng.' Kolpa mpa kil ukwor eng kipmekg iye nar pa.”
MAT 21:4 Kweikwei kolpa palng kai kanun yangkipm a pikekg melnum okwripm a Maur Wailen kil la pa, atom yangkipm pa palng aklale. Pikekg kil la kolkil la,
MAT 21:5 ”Kipm laniki tu wrong kin a kipman a Saion pa la, 'Kipm ri, melnum tukgunakg wailen akipmen arpme nimpa nungkulkg watin wlintepm pa. Kil wli eng antokg nikgwalpm wor. Kil arpme nimpa nungkulkg watin warimpen ti wli pa.'” Yangkipm a pikekg melnum okwripm la pa, am angko okarke tike.
MAT 21:6 Atom tuwekg watnom alkilen pa kaino ak katila kolen a wet Sisas lanaken pa.
MAT 21:7 Tuwekg kai awi nimpa nungkulkg watin mantwarim pa aye kul, atom aner apm a tu nowe eng wropuk ti kai ukulam ela nimpa yilo pa atom Sisas kil kaino arpme ur pa.
MAT 21:8 Atom wrong kin a kipman wailet pa anel awi apm alntu ti ukulam or ya ti kai kaino, a wa tiur pa wa angket yo ipm pa ukulam tatu ya pa.
MAT 21:9 Tiur kai ep a tiur kai kanukg, a Sisas pa rpma kuin. Atom tu atop arkol la kolkil la, “O, men atopen kitn watnom walpopm a yoampei amentepmen Tepit. Maur Wailen ukwor kitn atom kil ukwaweitn nar. Men ngkat nang a Maur Wailen aye kaino kwa aklale wrisen.”
MAT 21:10 Ak wang a Sisas kil kaino kawor anong wail Serusalem pa, wrongkwail kin a kipman a rka anong wail pa anel ari Sisas pa, atom anel akentatu wli asen tita kai pa kai pa la, “Pa melnum mla pa?”
MAT 21:11 Ari tu wrongkwail kin a kipman a wet antiwel kawor pa akalmpe la, “Melnum kil pa Sisas, melnum okwripm a Nasaret kai anong kanokg a Kalili.”
MAT 21:12 Sisas Krais kawor Serusalem kol melnum tukgnakg plalng pa, wa kil kawor yalming a Maur Wailen pa ari, kil ari tu wrong kin a kipman tu ak kweikwei awi marpm, a armpen kweikwei pa. Atom kil ungkwanten takwleikg wan pa. Kil taipurng tipmakg a tu ak marpm one tita atne pa, a wa ungkwa wrik a tu ak wel punum awi marpm arpme pa.
MAT 21:13 Kil la kolpa, “Ela wrkapm a Maur Wailen pa la kolkil la, 'Wan akupmen pa namput la pa wan a oklala naki naki kupm ti.' Wrkapm a Maur Wailen pa la kol pake, pake wa kipm ak kwap kolpa atne, atom wa palng kolen la pa tipmining tawong ur a tu melnum a akikgwam arke.”
MAT 21:14 Sisas kil ungkwan tu pa takwelkg yalming pa plalng pa, kil rpma pa. Tu melnum a wulmpa paipmen a nepm paipmen pa wli kai kaworntel wan pa, atom kil antokgten palng wor.
MAT 21:15 Pake wa tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses pa, anel ari kwap a Sisas kil akwap ak titnongket a Maur Wailen. A wa tu ari tu warim pa anel la yikakatnen rka yalming pa kolkil la, “Mentepm atopen watnom walpopm a yoampei amentepmen Tepit.” Kolpa atom antokg ipma a tu pa paipm eng Sisas pa.
MAT 21:16 Tu asentel la, “Ti kitn atning a tu warim ngkat nang akitnen kolpa wor aki paipm?” Sisas akalmpenten la, “Ei, kupm atning pa. Ake kipm angkleikg wrkapm a Maur Wailen pa a la kolkil la, 'Warim waiketnketn a warim a rka ma pa pikekg kitn arowen won ti tu ngkat nang akitnen pake.'”
MAT 21:17 Atom Sisas nampon tu watnom alkil pa naurng tu pa itna pa, a tu angkawor anong wail pa kulor kai okg mining wris pa kinar anong Petani.
MAT 21:18 Sisas nampon tu watnom alkil pa tu wrekg ak kong miningket pa angkom or ya pa la kaino anong wail pa, ari nikgalmpel.
MAT 21:19 Atom kil ari yo kampuk mringen ur pa itna ya yamping pa. Atom kil angkom kai yo yiprokg ai, ikgen kaino talpuk ai, la kol a ok ur rki pa, kol a kil inel il eng nikg ti, ari kalpis. Kil ari ipm kalpmel kolti, atom kil akle yo pa la, “Kitn ikgake ngko oken, ikga kalpis kolti.” Atom yo kampuk pa nungkwor plulng pinterngen kolti.
MAT 21:20 Tu watnom alkil pa tu ari pa atom tu wrekg paipm, atom tu asentel la, “Antokg kolai atom yo kampuk pa wa plulng pinterngen kolpa?”
MAT 21:21 Ari Sisas kil akalmpe lanaken kolkil la, “Kupm lanakepm aklale wrisen, kol kipm ukipma itni titnongket a nikgwalpm a kipm pa ake rka wekg wekg pa, kipm antiwe antokg kolen yo kampuk wet a kupm antokg pa, wa antokg kweikwei tiur ai yat. Kipm antiwe la wrik nangen a mentepm atnewe ti la, 'Kai o, kai kitn kai kinar am kinar unokg ai!' Pa kol am palng kolpake.
MAT 21:22 Kol kipm ukipma yek kimeket atom kipm isen Maur Wailen eng kuina ur pa, mpa kipm uwi kuina ur a kipm asentel pa.”
MAT 21:23 Sisas wa yaper kaino wa kawor yalming a Maur Wailen pa atom kil kaling plan tu wrong kin a kipman pa itna pa. Tu tukgunakgen a tu ipma krakgen a ak ak kwap eng al wor uk Maur Wailen pa, nampon tu melnum wail wail pa wli palng ariwel asentel la, “Kitn ti, kitn melnum wailen atom kitn ak kwap kolpa? Wa yat wa mla alkeitn titnongket pa?”
MAT 21:24 Ari wa Sisas akalmpenten la, “Ti itni eng kupm ikisentepm akasen wris ur kil la kipm ikilmpe pa, pati mpa kupm lanikepm yiprokgen a titnongket a kupm ak ak kwap pa. Akasen akupmen kolkil la:
MAT 21:25 kwap a Son pikekg kaluk tu pa la, pa kwap a melnum aki pa kwap a Maur Wailen?” Tu akor la itna kuin a tu alntu pa kolkil la, “Mpa mentepm ikilmpe kolai? Kol mentepm la, pa kwap a Maur Wailen, kolpa pa mpa wa kil wa iklewo la, 'Ti karken a kipm ukipma yangkipm a Son la pa?' Kolpa ti ake mpa mentepm la kolpa.
MAT 21:26 Kol mentepm la kolkil la, pa kwap a melnum a kanokg ti, pa mpa mentepm wa ngkirken ok a tu wrong kin kipman pa atnen tu ariwe la Son pa kil melnum okwripm a Maur Wailen. Kolpa ti ake mpa wa mentepm la kolpa.” Tu akwonalmpen kai lawe kolti mpa tu la kolai.
MAT 21:27 Atom tu kaporkla akalmpe kai Sisas pa la, “Ake men ariwe kwap a Son pa la, pa kwap a melnum aki, pa kwap a Maur Wailen.” Ari wa Sisas lanaken kolpa la, “Kupm yat, kupm ake mpa wa nikepm la kupm awi titnongket kai a i atom kupm ak ak kwap kil.”
MAT 21:28 “Kipm akwonalmpen kolai? Melnum yan ur pa warim kipman wekg. Atom yan pa ep kai lanaki warim kipman ep pa la, 'Warim, am ti mpa kitn kai ikwap kai wring ampei wain.'
MAT 21:29 Ari wa warim pa akalmpe la, 'Kupm karken.' Ari wa kanukg ti kil akwonalmpen la kil a kai, kolpa atom kil kai.
MAT 21:30 Atom wa yan pa wa wrekg kai lanaki warim kipman ur pa kolen a wet kil la kai warim kipman ep pa. Warim kipman pa akalmpe la, 'Yayai, kupm mpa kai pa.' Ari kalpis ake wa kil kai.
MAT 21:31 Ti kipm akwonalmpen kolai warim kipman wekg pa, la mla ai atning nungkulkg kanun ok a yan alkil la pa?” Wa tu akalmpe la, “Am warim kipman ep pake.” Ari Sisas wa la kai tu pa la, “Kil kupm lanakepm aklale wrisen la, tu melnum awi marpmel tu, a tu kin a atn ya pa, tu pa ikga ep eng kipm ti kai kawor anong a Maur Wailen kil ikgalen pa.
MAT 21:32 Kol Son pa kil pikekg wli kalukepm a plantepm ya ute wor, ari ake wa kipm ukipma kanun yangkipm a kil la pa. Pake tu melnum awi marpmel tu, a tu kin a atn ya pa, tu pa ukipma kanun pake. Atom kipm ari tu pa, pake ake wa kipm plelng ipma, ukipma kanun ok a Son la pa.”
MAT 21:33 Sisas la yangkipm pa kai plalng pipa wa kil wa la, “Wa kipm wa itning yangkipm kla ur kil. Melnum kanokg yiprokg ur pa kil antokg wring ampei wain alkil pa plalng pa, kil ak yipmingki pa kapringen. Plalng pa, wa kil ak ilkim wail ur pa numprampen elng itna, eng ikga tipon u ampei ok pa kai elng nare. A wa kil wa ale wan kwa ur pa elng itna. Kil antokg kweikwei pa plalng, kil awi melnum tiur ai wli ikgalen akentel wring pa kolpa itna, a kil wrekg kai anong ya watinet ur ai.
MAT 21:34 Ampei ok pa tukgun kakir pa, melnum yan a wring pa kil ukwa melnum akwapel alkil pa kai ari tu melnum a ikgalen wring alkil pa la uwi wain ok alkilen a aknamputel pa iye kai.
MAT 21:35 Pake tu melnum a ikgalen wring pa tu kai arkulen oren tiur, wa tiur pa tu oren amo. Wa tiur pa tu or ak wes.
MAT 21:36 Wa melnum yan a wring pa wa kil ukwa melnum akwapel alkil pa wa wailet ketn ketn, angen a pikekg kil ukwa ep pa wa kai. Ari tu melnum a ikgalen wring pa wa ak kolen a pikekg tu ak ep kai tu tiur a kil ukwawen ep pa.
MAT 21:37 Kil akor ya ari kalpis, atom am kil almpil ukwa warim kipman alkil ti kai tuwa. Eng ntei, kil akwonalmpen la, 'Mpa kupm ukwa warim kipman yiprokgen alkupm a wring kil kai pa, kolpa ti ikgake tu ntokgtel paipm, ikga tu ntokgtel riwor pa.'
MAT 21:38 Ari kalpis, tu ariwel a kil kai palng atom tu lanaki tita la, 'Pa warim kipman a melnum yan a wring ikga uwi num ngklin wring tike. Ti kipm kul eng tepm orel imo tukuleikgen, eng mpa mentepm iye kweikwei akilen ti eng almentepmen.'
MAT 21:39 Atom tu arkul warim kipman alkil pa arkol wampel angkli elng kulor takwleikg wring pa atom orel amo.”
MAT 21:40 Sisas la yangkipm kla pa kai plalng pa kil asen tu a itna pa la, “Kolpa ti ik wang a melnum yan a wring ampei wain pa yaper kai wring alkil pa, pati ikga kil ntokg kolai eng tu melnum a ikgalen wring akilen pa?”
MAT 21:41 Tu akalmpe kolpa la, “Ikga kil or tu melnum paipm a ikgalen wring akilen pa imo plalng. Atom wa elng wring alkil pa elng kai wam a tu melnum manet tiur ai eng ikglentel. Atom ik wang a okipma alkilen pa tukgun kakir pa, ikga tu ngketuwai okipma alkilen pa wako, atom wompel alkilen pa ikgam iyentel kai pake.”
MAT 21:42 Atom Sisas lanaken la, “Ei, ikgam antokg kolpake. Ari ake kipm angkleikg yangkipm yiprokgen pa eng mpa kipm uwi riwe. Yangkipm pa la ela wrkapm a Maur Wailen a la kolkil la, 'Ong a tu melnum a ale wan pa tu ari la la paipm pa, tu ungkwan pa, am ong kimpowen wor wrisen a akale wan am pake. Maur Wailen kil alkil antokg pa, atom mentepm ari la pa wor wrisen atom mentepm atopen.'
MAT 21:43 Kolpa ti kupm lanakepm la, wring a Maur Wailen pa ikga kil uwi kai wam a kipm pa, atom wa uk kai wam a tu a ikgalen wring ariworwor eng angko ok arke pa.
MAT 21:44 Melnum a kil angko ela ong kil pa, mpa kil ngket numpwam alkil pa paipm. Pake melnum a ong kil angko kinar karkurel pa, mpa ningnapis waiketnketn kolti.”
MAT 21:45 Tu tukgunakgen a tu ipma krakgen a ak ak kwap eng al wor uk Maur Wailen, a tu melnum a arpmen yangkipm yiprokgen a Moses tu atning yangkipm kla a Sisas kil la pa, tu ariwe la yangkipm kla pa am kil la eng akla tu alntu tike, la tu paipm.
MAT 21:46 Kolpa atom tu la kol a rkulel eng iye kai, ari tu ngkark eng wrongkwail kin a kipman wailet a itna ti, tu ariwe la pa kil melnum okwripm a Maur Wailen.
MAT 22:1 Sisas kil wa la yangkipm kla ur kil kolkil la,
MAT 22:2 “Maur Wailen kil itna wailen ikgalen ipma a melnum pa, pati kolen melnum tukgunakg ur a itna ep ikgalen anong kanokg wail ur pa, kil la ntokg okipma wail ur il itnen warim kipman alkil la uwi kin iye.
MAT 22:3 Kil ukwa tu melnum akwapel alkil pa kai lanaki tu melnum a pikekg kil akwenten ep, la mpa tu wli eng okipma wail a kil antokg pa, ari tu karken.
MAT 22:4 Atom wa kil wa ukwa tu melnum akwapel tiur alkil pa wa kai anti ur lanaki tu melnum a pikekg kil akwenten pa la, 'Kipm kul eng tepm kai o! Okipma am kil numprampen ase. Kil alm manto nongko nepm watin a wa nampon manto nepm watin warimpen wor tiur pa alm ntampen numprampen elngtitna ase. Ti kipm kul eng tepm kai ntokg okipma pa il itopen, itnen warim kipman akilen la uwi kin iye ai.'
MAT 22:5 Tu melnum akwapel alkil pa kai lanaken pa ari, ake tu atning. Am anel kai rak atn palpa ase. Tiur pa kai akwap kai wring, wa tiur pa kai akwap marpm alntuwen.
MAT 22:6 Wa tiur a rka pa tu arkulen antokgten paipm, atom oren amo.
MAT 22:7 Melnum tukgunakg pa ari kolpa, kil ipma wakget paipm. Atom kil ukwa tu melnum a almpwrong alkilen pa kai alm tu melnum a wet almpor tu melnum akwapel alkil pa, a ak lap wan anong atuwen pa kai plalng.
MAT 22:8 Atom kil lanaki tu melnum akwapel alkil pa la, 'Okipma am kupm numprampen plalng elng itna ase. Pake tu melnum a pikekg kupm akwenten ti pa tu antokg paipm, eng tu talpulng ok a kupm akwenten la wli ntiwopm il okipma ti.
MAT 22:9 Kolpa ti kipm kai tutu ya wail wail, ya wenting wenting pa. Kipm ri tu mlaur pa, kipm laniken la tu kul il okipma akupmen ti.'
MAT 22:10 Tu melnum akwapel alkil pa atning kolpa atom tu kai tatu ya wail wail, a ya wenting wenting pa. Tu ari tu mlaur a wor aki paipm pa tu lanaken kolti. Atom tu kimeket arpme tita kolpa kai wan ok okkapmet wail a al al okipma atnewe pa, kaingkai wan pa pik antiwe wrong a wli pa kolti.
MAT 22:11 Tu kai rka wan okipma pa plalng pa, melnum tukgunakg pa kil kai kawor ari wrong a wli rka wan pa. Atom kil ari melnum wris ur pa ake kil nowe apm wor ur eng aye kai ak ari kin kipman a awi tita pa.
MAT 22:12 Atom melnum wailen pa lanaki melnum ake nowe apm wor pa la, 'Melnum alkupm, ake kitn nowe apm wor a kin kipman awi tita wai aye wli rpma ti?' Melnum pa atning, yangkipm kalpisen tarng rpma kolti.
MAT 22:13 Atom melnum tukgunakg kil lanaki tu melnum akwapel alkil pa la, 'Kipm yipo nepm wampel melnum pa, atom ngkit ngkliwel elng kawor miningket pa. Pa wrik paipm a tu kirkar akg nampok paipm wrisen rkawe.'”
MAT 22:14 Sisas la yangkipm kla pa plalng pa wa kil wa la, “Kol Maur Wailen pa kil akwen wrong wailet, pake kil awi wrong wusoken a kil takwei pa kolti.”
MAT 22:15 Atom tu melnum a arpmen yangkipm yiprokgen a Moses pa tu kai rka yapon yangkipm eng la mpa ilm ipmawel Sisas pa, eng la kil la oklala ur kai paipm pa, mpa tu iyewel kai ntokg yangkipm.
MAT 22:16 Atom tu ukwa tu melnum tiur alntuwen pa nampon tu melnum tiur a Erot pa kai eng Sisas. Atom tu armpwonel aknukwar la, “Melnum a kaling plan tu, men ariwe la kitn pa melnum a la yangkipm a aklale wrisen kolti. Kitn ake ngkark eng nikgwalpm oklala a mlaur pa, kalpis. Kitn laron naken ya a Maur Wailen pa ute wor aklale kolti naki tu wrongkwail a wor a paipm.
MAT 22:17 Kitn laniko nikgwalpm ur a kitn akwonalmpen pa ri? La kol mentepm uk marpm Kaisarus, melnum tukgunakg a tu Rom a awi marpmel mentepm pa la, pa wor aki?”
MAT 22:18 Ari Sisas pa kil ariwe nikgwalpm paipm atuwen pa ase. Atom kil lawen la, “Kipm pa melnum a kansil plan ak num enen ti kolti. Wa kipm wa aknukuar akor kupm ti eng ntei?
MAT 22:19 Ti kipm plantopm marpm a kipm angkli angkli uk melnum tukgunakg a tu Rom ti ri!” Atom tu aye marpm ok ur pa aye kai alkel.
MAT 22:20 Atom kil asenten la, “Ti nang ikgokg a mla ela marpm kil?”
MAT 22:21 Tu akalmpe la, “Nang ikgokg pa a Kaisarus, melnum tukgunakg a Rom pake.” Atom kil lanaken la, “Kolpa ti kipm uk kweikwei a melnum tukgunakg a Rom pa kipm uk kai kil alkil. A kipm uk kweikwei a Maur Wailen pa kai eng Maur Wailen kil alkil.”
MAT 22:22 Tu atning kolpa, tu wrekg paipm kolti. Tu wrekg naurngkel kolti am kaingkai ase.
MAT 22:23 Ak wang wris pa tu Satyusi tu wa kul eng Sisas. Am tu pa pati tu melnum a lala tu melnum a amo kaingkai pa, ikgake wa wrekg wrekg, kalpis. Tu alntu pa ariwe ase, atom tu ak yangkipm kolkil la alm ipmawel Sisas pa la kolpa la,
MAT 22:24 ”Melnum a kaling plan tu, yangkipm a Moses pikekg kil kaling planto pa la kolpa la, 'Kol kipman aye kin, atom warim kalpisen, atom kil imo pa, mpa wa wusok alkil pa uwi kin karpikg pa iye eng ngket warim eng ngklin wailen alkil a pikekg amo pa.'
MAT 22:25 Kol wusok wail wampwomis wampwompwekg pikekg rpma a pa. Wailen pa aye kin, atom warim kalpisen, atom amo naurng kin pa rpma pa eng tu wusok wusok alkil pa.
MAT 22:26 Wailen pa amo pa warim kalpisen kolti. Pa wa wusok pa awi wampuk wa warim kalpisen, wa kil amo. Tunteng wusokwail klungen wampwomis wampwompwekg pa am teng karpo tita aye kin karpikg pa kai, warim kalpisen kolti amo kimeket.
MAT 22:27 Kanukg pa kin pa amo eng plalng pake.
MAT 22:28 Atom kol wang a tu wusokwail wusokwail a pikekg amo kaingkai pa wa wrekg wrekg i kirkap a u mlaminel pa kulor pa, kin a pikekg tu pa kimeket aye pa, kin pa ikga kil kin a mla?”
MAT 22:29 Ari Sisas akalmpe la, “Nikgwalpm akipmen ti kai ar atnen a ake kipm ariwe yangkipm wrkapm a Maur Wailen ti, a titnongket akilen pa.
MAT 22:30 Ikga ik wang a tu kin a kipman a pikekg amo kaingkai pa wa wrekg wrekg pa, tu ikgake iye tita pa, kalpis. Tu ikga rki i kolti kolen tu maur angklin a Maur Wailen a rka kaino anong wor pa.
MAT 22:31 Akasen a kipm asen kai melnum a amo kaingkai pa la tu ikga wrekg wrekg aki kalpis, ti ake kipm angkleikg oklala a Maur Wailen lanakepm ela kai wrkapm alkilen pa. Pa la kolkil la,
MAT 22:32 'Kupm ti kupm Maur Wailen a Apraam, kupm Maur Wailen a Aisak, kupm Maur Wailen a Sekop.' Yangkipm pa planto la, melnum amo kai kalpis kolpa pa, pa mpa Maur Wailen kil ikglenten kolai, kalpis. Melnum a amo pa tu ake kai kalpis pa. Tu kai rka, atom Maur Wailen kil ikgalen tu pake.”
MAT 22:33 Tu wrongkwail kin a kipman atning yangkipm a kil laron naken kolpa atom tu wrekg paipm.
MAT 22:34 Sisas kil la yangkipm pa elng kai eng tu Satyusi pa, tu arkol ok tatar rka. Wa tu melnum a arpmen yangkipm yiprokgen a Moses pa atning pa, tu kai rka wris akorla yapon yangkipm.
MAT 22:35 Tu yapon yangkipm plalng pa, melnum wris ur atuwen a itna yirokgel angklin melnum a antokg yangkipm pa wrekg itna akasen Sisas pa almpel ipma la,
MAT 22:36 “Melnum a aroaro wonel tu, yangkipm titnongket a i itna ep?”
MAT 22:37 Ari Sisas akalmpe lanakel la, “'Kitn mpa plan ipma wor wakrongen Wailen kil Maur Wailen akitnen pa nimpon nol nikgwalpm, amen wor, a lngkep akitnen pa kai kimeket.'
MAT 22:38 Pa yangkipm titnongket wail manten a itna ep ampake.
MAT 22:39 Wa yangkipm titnongket wail manten ur a wa itna kai arkekg pa pati itna kolkil, 'Kitn mpa plan ipma wor wakrongen mlaur kolen kitn plan ipma wor wakrongen kitn alkitn pa.'
MAT 22:40 Yangkipm titnongket wekg pa pati yangkipm yiprokgen a yangkipm titnongket wrongkwail a Moses a tu melnum okwripm a Maur Wailen laron pa, pa am kai alm itna yangkipm manten wekg pake.”
MAT 22:41 Tu melnum a arpmen yangkipm yiprokgen a Moses pa tu rka aken tita rka pa atom Sisas asenten la,
MAT 22:42 ”Kipm akwonalmpen kolai Krais a Maur Wailen ukwa kul nar pa, pa la pa kil palng wli mla?” Ari tu lanakel la, “Kil walpopm ur a angket ale a Tepit ti kul tike.”
MAT 22:43 Sisas kil wa la kolkil lanaken la, “Tepit kil pikekg ep ai la kolkil, 'Maur Wailen kil la kai Krais Wailen pa la kolkil la, “Rpmi kai wam wi akupmen pa rpmi i, kupm or tu wrongmanto akitnen pa yikak rkganti mengkel itni orngwatneikgen kitn pa.”' Antokg kolai atom Maur Wor a Maur Wailen pa uk nikgwalpm Tepit pa, atom wa kil wa akwe kil pa la Krais Wailen pa?
MAT 22:45 Ti kol Tepit pa kil ukwewel la Krais Wailen pa, pati wa antokg kolai atom Krais Wailen pa kil walpopm a Tepit pa?”
MAT 22:46 Akentiwe mpa ur ikilmpe ok akilen pa, kalpis. Atom ak wang pa aye or pa kai pa, tu ngkark om. Atom ake wa tu akasen oklala ur wa kai eng kil pa, kalpis.
MAT 23:1 Atom Sisas lanaki tu wrong kin a kipman wailet pa, a wa lanaki tu watnom alkil pa la kolkil la,
MAT 23:2 “Tu melnum a aroaro wonel tu yangkipm a Moses nampikgen tu melnum a arpmen yangkipm yiprokgen a Moses pa, tu pa awi wrik a Moses kaling plantepm yangkipm titnongket pa kolen pikekg Moses kil kaling plan pa.
MAT 23:3 Kolpa ti kipm itning kunun ntokg kitila kweikwei wrongkwail a tu lanakepm pawo. Pake ampake ntokg kitila kuina ur a tu antokg pa. Pati atnen ake tu antokg katila yangkipm a tu angkli pa, kalpis.
MAT 23:4 Yangkipm titnongket a tu yapon pa kolen kalkuten wail ur a tu alkepm la kipm rki. Pake tu alntu ti pa ake wa wakrongen la ipo wam ngklinsepm ngkit kalkut pa, kalpis.
MAT 23:5 Kweikwei wrongkwail a tu antokg pa, tu antokg la tu melnum ti ri kolti. Mikgni yawet a rpma wuntu, a yalmis a rpma elngkep pa tu ak wail ariworwor manet, atom yangkipm titnongket a Maur Wailen a tu nira pa tu la itna aye atn. A wa tu pa al pimpra watin ari wor wor rka tatu apm wulompwulom a tu nowe pa. Eng mpa tu melnum riwen nirein la tu melnum wor a Maur Wailen.
MAT 23:6 Tu la ntokg okipma wail il pa, tu pa wakrongen la rpmi ep eng uwi okipma. Tu la kaingkai wan a atning atning yangkipm a Maur Wailen atnewe pa, tu pa mpa rki ep.
MAT 23:7 Kol melnum ur nsilen pa, tu wakrongen la, tu lken wor, il wuntuwel, a ukwewen la, tu melnum wailen a kaling plan tu.
MAT 23:8 Pa tu melnum a arpmen yangkipm yiprokgen a Moses pake, kipm pa ake mpa kol tu pa. Ake mpa wa tu wa ukwewepm la kipm melnum wailen a kaling plan tu melnum pa. Eng ntei, melnum a kaling plan kipm pa wris ata. Kipm pa repmrepm kolen kipm wusok wail ase.
MAT 23:9 Kolpa ti ampake wa kipm ukwe melnum ur a itna kanokg a ti la yan pa, iyai. Kol kipm Yan wris ata pa rpma kaino anong wor ai.
MAT 23:10 Ake mpa wa tu wa ukwe kipm pa la kipm melnum wailen pa, kalpis. Melnum wris a wailen pa pati Krais.
MAT 23:11 Melnum wailen a itna ep itna kuin akipmen pa, mpa wa kil palng melnum a akwap angklin kipm.
MAT 23:12 Melnum a kil ngkat nang alkilen aye kaino kwa pa, nang akilen pa ikga kinar kanokg. A melnum a kil arku nang alkilen aye kinar kanokg pa, ikga kil uwi nang wailen.”
MAT 23:13 “Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Atom kipm pa ampri ya a tu melnum la kol a ore kawor anong wor a Maur Wailen. Kipm alkipm ti karken a kawor anong wor pa, wa kipm ampri ya wa tu la ore pa. [
MAT 23:14 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm uk yangkipm armponel tu kin karpikg pa la uwi wan a kweikwei atuwen pa, a wa akwen Maur Wailen itna watin eng akaur paipm a kipm antokg pa. Kolpa ti kipm ikga uwi paipm wrisen eng ikilmpe paipm a kipm antokg pa.]
MAT 23:15 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm angket unokg kai atn tatu anong manet watipmen akor tu melnum la kul kunun ya wa kipm ti ore ti. Kipm awi tu melnum pa kul kaling planten atom tu kul kanuntepm pa, tu palng paipm wrisen angen kipm ti, atom ikga tu kai anong paipm.
MAT 23:16 Woi, areinsepm, kipm melnum wulmpa tilmpisen a plan ya tu melnum pa, kipm ikga uwi paipm. Kipm la kolkil la, 'Tu melnum a naren yalming a Maur Wailen pa eng ak titnongketel yangkipm ur pa, pa mpa wa ntei, kai tu lalowe o! Pake kol mlaur kil naren kweikwei a ak wes muinmainet antokg a rpma yalming a Maur Wailen pa, pa ake antiwe mpa lalowe, kalpis, pa titnongket itna.'
MAT 23:17 Kipm titnowen a kipm wulmpa tilmpisen! Kuina a i wail manten itna ep, wes muinmainet pa aki pa yalming ti antokg wes muinmainet pa klalen wakget?
MAT 23:18 Kipm wa la kolkil la, 'Melnum a kil naren tipmakg a alm itna eng alwor uk Maur Wailen atnewe pa, pa wa ntei, kai kil lalowe o! Pake kol melnum a kil naren okipma a aye kawor rmpa tipmakg pa eng alwor uk kai Maur Wailen pa, pa ake antiwe mpa lalowe pa, kalpis, pa titnongket itna.'
MAT 23:19 Kipm ti wulmpa tilmpisen, ake kipm ariwe la kuina ai wail manten itna ep pa, okipma pa wailen aki, a tipmakg pa a antokg okipma pa klalen wakget?
MAT 23:20 Kol melnum a kil naren tipmakg pa pati, am kil naren kweikwei wrongkwail a tu elng itna kaino tipmakg pa nampon pake.
MAT 23:21 Wa kol melnum a kil naren yalming a Maur Wailen pa pati, pa kil naren Maur Wailen a rpma kawor yalming pa nampon pake.
MAT 23:22 Wa melnum a kil naren kitnong pa, pa kil naren wrik a Maur Wailen arpme pake, kolpa ti pa kil naren melnum kil alkil a rpma wrik pa nampon pake.
MAT 23:23 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm melnum plan ak num enen ti pa la kipm wor pake wunen ai pa paipm. Wanukgnung waiketnketn kai wringkya alkipm pa kipm awi elng itna mpil wampwam pa atom kipm uk mpil wris pa kai Maur Wailen. Kweikwei waiketnketn pa kipm kanun pake, ake wa kipm kanun yangkipm titnongket a lala ri lok melnum eng ntokg nikgwalpm ute wor, a ya a arein a ya a ukipma. Kweikwei waiketnketn pa kipm kanun pake, kol a kipm kunun kweikwei wail wail pa ep pake.
MAT 23:24 Kipm melnum wulmpa tilmpisen ti la plan ya tu melnum tike. Kipm alung u wilmpet, pake manto meng watin (kemel) pa kipm wonmis angklei nampon u pa kolti.
MAT 23:25 Woi, areinsepm, kipm melnum a aroaro wonel tu yangkipm a Moses pa, wa kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm klak kuntuk kaimung ti or en tike, a kawor kuntuk wunen pa kalpis. Kweikwei kol ikgwam a nikgwalpm wakrongen alkipm pa ake kipm klak, kalpis, kipm alupm rpma pa.
MAT 23:26 Kitn melnum a arpmen yangkipm yiprokgen a Moses, pa kitn wulmpa tilmpisen. Ep pa kol a kitn klak or wunen pa ep, atom kawor en pa mpa rukis pa.
MAT 23:27 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm pa kolen kirkap a tu aser miwel, ma kiminim wak kweikwei pa ak nakure ariworwor tatu en tike, kinar wunen pa pik atnen melnum tupmungkul a u mainilng paipm paipm a kimpilpet pa arke.
MAT 23:28 Kipm alkipm ti am kolpake. Tu melnum ariwepm num enen ti pa tu lala kipm melnum ute wor. Pake kawor wunen akipmen pa pik eng nikgwalpm paipm a paipmpaipm a kipm antokg.”
MAT 23:29 “Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses pa, kipm ikga uwi paipm. Kipm plan num enen ti pa la kipm wor pake wunen ai pa paipm. Kipm a alen wanel kirkap a tu melnum okwripm a Maur Wailen. A kipm nakure kirkap a tu melnum ute wor a pikekg amo epep ai.
MAT 23:30 Atom kipm la kolkil la, 'Kol a pikekg men rpmi ik wang a tu mamikg mamin mansan amenen pa, men kolake ntimprak ilm tu melnum okwripm pa imo pa, kalpis.'
MAT 23:31 Yangkipm a kipm la kolpa pa, pa kipm laron kipm alkipm la kipm walwalpopm walyaru a tu melnum a pikekg alm tu melnum okwripm a Maur Wailen pa amo pake.
MAT 23:32 Kolpa ti kai kipm kai ntokg nikgwalpm kol a pikekg tu wapyipmiri a walyipmiri akipmen antokg pa kolpa kai lan o!
MAT 23:33 Kipm pa paipm kolen ul angketepm. Ikga wa kipm ngkom nlokgen anong paipm pa la kolai, kalpis. Kipm ikgam kai ore pake.
MAT 23:34 Kupm lanakepm kolkil la, kupm ukwa tu melnum okwripm, a tu melnum a antiwe ariwe watin a tu melnum a aroaro wonel kipm yangkipm a Moses pa tu kaintepm. Pake ikga kipm ilm tiur imo, a kurkurng tiur rki yo okgmangki a wa or tiur itni wan a atning atning yangkipm a Maur Wailen atnewe, a wa ungkwanten kai anong yela tatu palpa.
MAT 23:35 Kolpa ti ikga kipm uwi paipm nimpon tu a pikekg alm tu melnum ute wor a pikekg rka kanokg ti amo kaingkai pa. Melnum wor wor pikekg tu alm pa, tu alm angko Apel pa aye or pa kulngkul kul plalng angko Sekaraia, warim a Perekia. Sekaraia pa pikekg tu almpel kawor itna kawor yipmingki wunen itna kuin a wan klalen, a tipmakg a alm eng alwor uk Maur Wailen. Pati am pikekg tu a kipm ti antokg paipm tike.
MAT 23:36 Kil kupm lanakepm aklale wrisen. Akalmpe a paipm a pikekg tu pa antokg paipmel tu melnum wor pa, ikgam kipm wrong kin a kipman a rka ti uwi tike.”
MAT 23:37 “Woi, arein kipm anong Serusalem, kipm akangklei almpalm tu melnum okwripm a Maur Wailen pa amo, a wa kipm akwesel tu melnum akwapel a Maur Wailen a kil ukwa kulngkul eng kipm ti. Wang watipmen ai kupm la uwi kipm wrong kin kipman a anong Serusalem pa iye kul itni wris, eng ikglen kolen karek man a ak iplepm ipaarng karek nampi pa, ari kipm karken.
MAT 23:38 Kolpa ti kipm itning, anong akipmen pa ikga Maur Wailen nuurng itni kupuk kalpmel kolti.
MAT 23:39 Kol kupm lanakepm kolkil la, kipm ikgake wa riwopm nti ur, kolpa kai ngko wang a ikga kipm laron kupm ti la, 'Maur Wailen ukwa melnum pa, atom kil nar, ti mentepm lkel wor ngkit nang akilen.'”
MAT 24:1 Sisas kil naurng yalming a Maur Wailen pa kil kai, atom tu watnom alkilen pa tu kul kai eng kil pa la, kil itni pen, eng tu plantel wan anong a yalming wail manten ariwor a Maur Wailen pa pen.
MAT 24:2 Atom kil lanaken la, “Kipm ri kweikwei a itna ti, kupm lanakepm aklale wrisen. Wan wrongkwail a tu ale ak wes a ela tatu ti pa, ikgake kwei ur itni, ikga tu tikale ngkli plalng.”
MAT 24:3 Sisas kil naurng yalming a Maur Wailen pa, kil kaino rpma nang Olip pa. Tu watnom alkil pa tu kanuntel kaino ariwel kaino wrik kalpmlel pa. Atom tu asentel la, “Kitn laniko riworwor ri la, wang a i ikga tu tikale yalming a Maur Wailen pa? Wa kla kuina ikga palng eng iklawen wang umpuwen a ikga kitn nar pa? Wa kla kuina palng iklawen wang wulompen a kanokg ti kai plalng pa?”
MAT 24:4 Ari Sisas akalmpenten la, “Kipm rpmi wonirpme eng ikgake melnum ur kinsilepm.
MAT 24:5 Tu wailet ikga wli numput nang akupmen pa la, 'Kil kupm Krais', a ikga ik rkolng tu wrongkwail kin a kipman wailet iye kai ar.
MAT 24:6 Wa kipm ikga itning milpming a tu almpwrong wli wreren, a kipm ikga itning yangkipm wripm a tu alm tita. Pake kipm itning, ake mpa kipm ngkirk eng pa, kweikwei kolpa pa ikgam palng pake, pake pa ake wang wulompen pa, palpa apa.
MAT 24:7 Tu anong kanokg ur ikga wrekg rapon numpon tu anong kanokg ur. Wa wrong a mring tukgunakg ompur ikga wa wrekg rapon numpon wrong a mring tukgunakg ompur pa. Wa wang nikg ikga palng, a yelm ikga no anong kanokg tiur.
MAT 24:8 Kweikwei wrongkwail kil pa, pa kol kin a awi wleket ep eng raku warim.
MAT 24:9 Ikga ik wang pa pa, ikga tu uwiyepm iye kai lkepm kalkuten a wleket, a ikga ilmpepm imo. A tu wrong kin kipman ikga ipma paipm wrisen eng kipm, eng ntei, kipm a kupm.
MAT 24:10 Wa wrong kin a kipman watipmen a ukipma pa ikga wa ngko yaper kai ik wang pa. Wa ikga tu uk tita tu alntu ti kai wam a wrongmanto, a tu alntu ikga wa plelng wrongmanto eng tita.
MAT 24:11 Wa tu melnum okwripm kansil watipmen ikga palng, atom ik rkolng tu wrong kin a kipman watipmen.
MAT 24:12 Nikgwalpm paipm pa ikga palng wail paipm, kolpa atom wa tu wrong kin kipman watipmen ikga wa nuurng nikgwalpm a plan ipma wor wakrongen tita pa.
MAT 24:13 Pake mlaur a kil itna titnongket kai ngko wang wulompen pa, pa ikga Maur Wailen kil uwiyel.
MAT 24:14 Tu ikga iye yangkipm wor a la Maur Wailen kil la itni wailen ikglen mentepm wrongkwail pa kai yela kanokg ti, laniki tu anong kanokg mapming wrongkwail pa itning plalngen, plalng pipa, wang wulompen pa palng.”
MAT 24:15 Sisas kil la watipmen la, “Kipm ikga ri kweiur paipm wrisen itni kawor wrik a Maur Wailen amprin eng kil alkil pa, kol a pikekg Taniel, melnum okwripm, la pa.” Ti melnum a kil angkleikg yangkipm wrkapm kil a Sisas la pa, kil ikwonilmpen pa riworwor!
MAT 24:16 “Kipm ri kweikwei paipm wrisen pa palng pa, kipm a rka anong kanokg a Sutia pa, kipm ikga ngkirk tukulelkg kaino nang ai.
MAT 24:17 Kol melnum ur ikga rpmi kawor wan male pa, ampake kil wa kai kawor wan wunen pa eng uwi kweikwei tiur alkil pa, mpa kil kai or yawel kolti kai.
MAT 24:18 Wa kol melnum ur ikga ikwap itni wring alkil pa, kil ake antiwe ikga yaper kai uwi apm alkil kai anong pa, kalpis, kil i pa kai pake.
MAT 24:19 Ti arein eng tu mantin a itna, a tu kin a warim rka ma ikga ik wang pa.
MAT 24:20 Kolpa ti kipm laniki Maur Wailen, eng ikgake kalkuten pa palng ik wang a uwei wropuk aki ik wang a wang wail a rpma eng yapm pa, atom kipm ngkirk pa.
MAT 24:21 Ikga ik wang pa, pa ikga kalkuten wail manten paipm. Pikekg ak wang ep a Maur Wailen antokg kanokg ti weten, wa kul elngen ak wang ti pa, kalkuten ur kolpa pikekg ake wa palng ep. Ti kalkuten ur a kolpa pa ikgake wa palng ntiur ik wang kunukg pa, kalpis.
MAT 24:22 Kol ake Maur Wailen angket wang a kalkuten pa kul tukwok pa, pa tu wrong kin kipman pa kol a kai paipm plalng. Ari kil akwonalmpen tu wrong kin kipman alkil a kil takwei ase. Kolpa atom kil ikga ngket wang pa kul tukwok.
MAT 24:23 Ti ikga ik wang pa kol melnum ur lanikepm la, 'Kipm ri, Krais itna ti', aki 'Krais ingkai itna kai ai.' Pa ampur kipm atning pa.
MAT 24:24 Tu melnum tiur kolpa ikga wli kinsilepm la, 'Kil kupm Krais', a 'Kil kupm melnum okwripm a Maur Wailen.' Wa ikga tu elng kla tiur itna ik plan titnongket alntuwen, wa ntokg kweikwei manet manet ur ai a ikga melnum wrekg paipm eng ri pa, eng ik rkolng tu wrong kin kipman, wa nimpon tu a Maur Wailen takweiyen eng alkilen eng la tu ngko.
MAT 24:25 Kweikwei ikga palng pa, am wuten kupm lanakepm ep ase.
MAT 24:26 Kol tu la lanikepm la, 'Kipm kai ri, Krais ingkai itna kai mpang a pa.' Pa ampur kipm kai pa. Aki kol tu la lanikepm la, 'Ti kipm kawor ri, Krais itna kawor wan a pa.' Pa ampur kipm atning pa, yaper.
MAT 24:27 Warim Kipman a Melnum ikga nar pa, ikga tu wrong kin a kipman ri pa kolen milmal a plaing i takgni yiprokgen pa len kulkai plalng kai takgni yipuken ai.
MAT 24:28 A wa kolen kipm ari kirmpa taung ur a o o akam ela pa pati kipm ariwe la pa kil ari wlikgok ur alkil a la mpa il pa am rpma ase.”
MAT 24:29 ”Ti ikga kalkuten wail pa plalng pa, ikga penterngen kolti takgni ti kai miningket. Wa kainil pa ikgake wa len, wa kumeim ikga nurku ingkaino kitnong ti nar. Wa kweikwei titnongket wrongkwail a itna kaino kitnong ti pa ikga palng titu plalng.
MAT 24:30 Atom ikga ik wang pa, pa kla a Warim Kipman a Melnum ikga palng eli kaino kitnong pa. Atom tu wrongkwail om ompen a yela kanokg ti, ikga tu ri Warim Kipman a Melnum ikga itni waipmunu kwa pa ik iyewel ingkaino kitnong pa nar, nimpon titnongket wail a nang wailen pa, atom tu ikga rka nol akg paipm.
MAT 24:31 Atom ikga tu itning nol pa tiplam yikakitnen pa, pa kil ukwa tu maur angklin alkil pa kai yela tungtangkem pa, eng uwi tu wrong kin kipman alkil pikekg kil takwei eng alkilen pa yela kanokg ti.
MAT 24:32 Kolpa ti mpa kipm uwi riwe kai yangkipm kla a la yo kampuk pa: ipm wulkga pa nowen itni wamtalpuk pa, pa kipm ariwe la, pa wreren eng u eng a wei pake.
MAT 24:33 Ti am kolpake, ti ikga kipm ri kweikwei wrongkwail kol a wuten kupm la pa palng pa, pa kipm riwe la wang a Warim Kipman a Melnum la nar pa, am kul wreren itna yamping a tike.
MAT 24:34 Ti kupm lanakepm aklale, kipm wrong kin kipman a rka ti, tiur akipmen pa ikga imo, a tiur akipmen pa ikga rki, kolpa kai nsil kweikwei wrongkwail a ikga palng pa.
MAT 24:35 Ti kitnong a kanokg pa ikga kai plalng, pake yangkipm akupmen kil pa ikgake kai plalng. Ikgam itna kolpa kai pake.”
MAT 24:36 ”Melnum ur ake ariwe wang a ikga kweikwei pa palng pa. Tu maur angklin alkil ti, wa nampon Warim Kipman alkil pa, tu ake wa ariwe wang pa yat. Pa Yan alkil wris pa kil ariwe wang pake.
MAT 24:37 Ikga ik wang wreren Warim Kipman a Melnum ikga nar pa, atn a rpma a tu wrong kin kipman pa ikgam repmrepm kol pikekg palng ak wang a Nowa pake.
MAT 24:38 Ti am kolpake, wreren eng u wail la ilen pa, tu wrong kin kipman pikekg tu al okipma, al u, awi tita, kolpa itna pa, Nowa kil kai kawor wan unokgen pa.
MAT 24:39 Tu ake ariwe kuina ur a ikga palng pa, tu rka wonmis kolpa rka pa, u wail pa wrekg alen. Ti am kolpake, ikgam wa palng kolpa ik wang a Warim Kipman a Melnum ikga kil nar pake.
MAT 24:40 Kipman wekg ikga ekg ikwap itni wring, atom ikga kil uwi ur, a ur pa ikgam kil nuurng itni pa.
MAT 24:41 Kin wekg pa ikgam wa kolpake, ikga tuwekg ntokg okipma pa rpmi, atom ikga kil uwi ur, a ur pa ikga kil nuurng rpmi pa.
MAT 24:42 Kolpa ti kipm rpmi wonirpme, eng ntei kipm ake ariwe wang a i ikga Wailen alkipmen nar pa.
MAT 24:43 Ti wa kipm riwe kil, kol melnum yan a wan pa kil riwe la melnum ikgwampet pa mpa palng ik wang kolai a mining pa, ti kil mpa rpmen wan alkil pa rpmi i, eng ake mpa melnum pa tikale wan alkil pa.
MAT 24:44 Kolpa ti kipm ti yat, kipm mpa rpmi numprampen, eng ntei Warim Kipman a Melnum ikga nar ik wang ur a kipm ake ariwe la kil ikga nar pa.”
MAT 24:45 “Melnum akwapel wor a atning nungkulkg nikgwalpm arke pa melnum akwap kolkil: melnum wailen wris ur, kil la kai itn ya ur alkil, atom kil elng melnum wor wris ur kolpa itna ep ikgalen tu melnum akwapel alkilen. Melnum pa ikgalenten eng kwap, a ampreingten okipma akangklei wang wris wris.
MAT 24:46 Melnum wailen pa kil yaper kul ari kwap a pikekg kil alkel pa, ari kil akwap wor kolpa itna, kil pa wor pake, kil itopen o! Melnum a kil akwap wor kolpa pa kil itopen o!
MAT 24:47 Pa kupm lanakepm aklale wrisen, melnum wailen pa ikga elng melnum akwapel alkil pa itni melnum wailen eng ikglen kweikwei wrongkwail alkilen pa.
MAT 24:48 Pake kol melnum a kil akwap paipm pa, kil mpa ikwonilmpen kolpa la, 'Melnum wailen alkupmen pa kil ikgake wli iktatu.'
MAT 24:49 Kolpa atom kil kai anti tu a al al u titno pa rpma al okipma, a al u titno atom titno titno, a kil or tu melnum alkil a tu akwap wris pa kolpa wonmis rpma.
MAT 24:50 Melnum akwapel alkil pa kil ake ariwe wang a ikga kil yaper wli pa. Kil rpma tutus kolti ari kil am palng tike.
MAT 24:51 Atom ikga melnum wailen alkil pa orel paipm wrisen, a ungkwantel kil kai rpmi nimpon tu melnum a kansil plan ak num enen ti kolti. Wa kai wrik pa, pa ikga tu akg paipm wrisen nam ok alntu pa paipm kolti.”
MAT 25:1 Atom Sisas kil la, “Ikga ik wang a Warim Kipman a Melnum pa la nar pa, pa tu melnum a Maur Wailen ikgalen nol nikgwalpm atuwen pa, tu pa ikga kol tu kin wampwam a aye wakg amprepm alntuwen pa aye kai, la rpmi nungkwangen kipman ur pa la mpa wli uwi kin iye, atom tu ikyewel iyekul wan, eng tuwekg uwi tita.
MAT 25:2 Ari kin wampwomis pa titnowen nikgwalpm kalpisen, wa tunteng kin wampwomis ur pa nikgwalpm arke wontrakole.
MAT 25:3 Atom tunteng kin wampwomis a titnowen nikgwalpm kalpisen pa, tunteng la amprepm mpil wris wris kolti aye, pake ake wa tunteng aye amprepm tiur nar num nakure pa, kalpis.
MAT 25:4 Wa tunteng kin wampwomis ur a nikgwalpm arke wontrakole pa, tunteng aye amprepm mpil tiur pa nakure pake.
MAT 25:5 Ari kipman a la uwi kin pa ake kul atatu, atom tu pa ikgyokg alen paipm wrisen, atom tu am kai okg akwekgel ase.
MAT 25:6 Atom ak mining kuin pa tu atning ok ur a akwe la, 'Oi, kipm wrekg wrekg o! Melnum a la uwi kin iye pa am wli tike! Ti kipm kul eng tepm kai ikyakurel o!'
MAT 25:7 Atom tu kin wampwam a anel okg akwekgel rka pa, anel wrekg kolti a awi wakg amprepm alntu pa la.
MAT 25:8 Wa tunteng kin wampwomis a titnowen nikgwalpm kalpisen pa tunteng wa wrekg ak ok la kin wampwomis a nikgwalpm arke wontrakole pa la, 'Amprepm a minto ti am kai raipmot eng a plalng tike, ti kipmteng pa lko amprepm ur eng minto la iye!'
MAT 25:9 Ari tunteng kin wampwomis a nikgwalpm arke wontrakole pa akalmpenten la, 'Amprepm mpil ti ake mpa ntiwe kipmteng pa nimpon minto alminto ti. Kolpa ti kai kipmteng ikor amprepm ur ukul eng alkipmtengen pawo! Kil pa am antiwe minto alminto kilke.'
MAT 25:10 Atom tunteng kai akor la ukul ur alntuntengen ari kalpis, melnum a la uwi kin pa am palng ase. Atom tunteng kin wampwomis a numprampen pa, tunteng kai akyakur kipman pa antiwel kul kawor wan pa, la ntokg okipma wail il itopen kin a kil la uwi pa. Pa tu ar wanyun pa.
MAT 25:11 Tu ar wanyun pa plalng pa, tunteng kin wampwomis a nikgwalpm titnowen pa wa wli palng, atom tunteng akwe la, 'Woi, woi, kitn pa, aleitn pain nanikg, kitn kukwanto wanyun pa pen!'
MAT 25:12 Ari kil akalmpenten la, 'Kupm lanakepm aklale wrisen. Kupm ake ariwe kipm pa.'”
MAT 25:13 Sisas lanaken yangkipm kla pa kai plalng pipa, kil lanaken la, “Kolpa ti kipm rpmi riwe, eng ntei kipm ake ariwe wang a ikga Wailen nar pa.”
MAT 25:14 Atom Sisas kil wa la, “Ikga ik wang a Warim Kipman a Melnum pa la nar pa, tu melnum a elng Maur Wailen itna wailen ikgalen nol nikgwalpm atuwen pa, tu pa ikga kolkil: melnum ur la kai ya watinet, atom kil akwe tu melnum akwapel alkilen pa wli, atom kil alken kweikwei wrongkwail alkilen pa, la tu ikglentel.
MAT 25:15 Ti kai melnum ur pa kil alkel marpm wail manten wampwomis. Wa kai melnum ur pa wa kil wa alkel marpm wail wekg. Wa kai ur pa kil wa alkel marpm wail wris. Am kil alken katila titnongket a ariwe a melnum pa kolpake. Atom kil am kai ase.
MAT 25:16 Ti melnum a kil awi marpm wail manten wampwomis pa, kil am kai yatnenen kolti elng marpm alkil pa kai ak ak kwap, atom kil wa akawi marpm warim pa wa kaino wampwomis repmrepm kol marpm man a pikekg kil awi pa.
MAT 25:17 Am wa kolpake, melnum a kil awi marpm wail wekg pa, kil wa akawi marpm warim pa wa kaino wekg repmrepm kol marpm man a pikekg kil awi pa.
MAT 25:18 Pake melnum a kil awi marpm wail wris pa, kil kai kolti, kil uwen kanokg lam marpm a melnum wailen alkel pa.
MAT 25:19 Melnum wailen pa kil kai rpma wang watinet, atom kil wa yaper wli rpma, la itningke tu melnum akwapel alkil pikekg kil alken marpm pa, la tu ak ak kwap kolai.
MAT 25:20 Atom melnum a pikekg kil awi marpm wail manten wampwomis pa, kil awi marpm warim pa kai nampon marpm man pa, atom kil aye kai plan melnum wailen pa la, 'Kitn ri, kitn pikekg alkopm marpm wampwomis kil. Ti kupm awi marpm pa ak ak kwap ti wa kupm wa akawi marpm warim pa wa kaino wampwomis repmrepm kol marpm man a pikekg kitn alkopm pa.'
MAT 25:21 Atom melnum wailen alkilen pa akalmpentel la, 'Kitn pa akwap wor wrisen, kitn pa melnum nungkulkg wor akwap wor akupmen pake. Kitn pa pikekg akwap wor ikgalen kwap waiketn a pikekg kupm alkeitn pa, ti mpa kupm ngkiteitn itni ep ikglen kwap wail ur. Ti mpa kitn kul rpmi itopen nimpon kupm melnum wailen alkitn ti.'
MAT 25:22 Wa melnum a pikekg kil awi marpm wail wekg pa, wa aye marpm pa wli wa la, 'Melnum wailen, kitn ri, kitn pikekg alkopm marpm wail wekg pa. Kupm wa ak marpm pa ak ak kwap, atom wa kupm wa akawi marpm warim pa kaino wekg repmrepm kol a pikekg kitn alkopm pa.'
MAT 25:23 Atom melnum wailen alkilen pa akalmpentel la, 'Kitn pa akwap wor wrisen, kitn pa melnum nungkulkg wor akwap wor akupmen pake. Kitn pa pikekg akwap wor ikgalen kwap waiketn a pikekg kupm alkeitn pa, ti mpa kupm ngkiteitn itni ep ikglen kwap wail ur. Ti mpa kitn kul rpmi itopen nimpon kupm melnum wailen alkitn ti.'
MAT 25:24 Pipa wa melnum a pikekg kil awi marpm wail wris pa wa aye wli wa la, 'Melnum wailen, kupm ariwe kitn pa melnum kalnten a yangkipm lan kweikwei, a kitn pa melnum a angketuwai okipma kai wring a ake kitn alkitn aken pa, wa kitn wa angkon okipma kai wring a ake pikekg kitn alkitn alin pa.
MAT 25:25 Kolpa atom ari kupm ngkark, atom kupm kai uwen kanokg lam marpm wail wris alkitn pa. Ti kitn ri, kweikwei alkitnen am kilke.'
MAT 25:26 Ari melnum wailen alkilen pa akalmpentel la, 'Kitn pa melnum lpmaak klang paipm. Kitn ariwe pa la kupm melnum a kai angketuwai okipma ur kai wring a kupm alkupm ti ake aken pa, wa kupm melnum a kai angkon okipma ur kai wring a kupm alkupm ti ake alin pa.
MAT 25:27 Kolpa ti kol a kitn uk marpm alkupm pa kai tu melnum a akwap itna wan marpm, eng mpa ik uwinteitn marpm warim, eng kol a kupm wa yaper kul pipa, kol a kupm uwi marpm warim pa nimpon marpm man alkupmen pa.
MAT 25:28 Kolpa ti kipm uwi marpm wail wris pa kai wam a kil pa, uk kai melnum a kil aye marpm wail wampwam pa.
MAT 25:29 Eng ntei, melnum a antiwe kweikwei pa, mpa wa Maur Wailen kil lkel iken eng kil wailet. Pake melnum a rpma tukwok pa, mpa Maur Wailen kil ungkwan kweikwei waiketn a kil antiwe pa.
MAT 25:30 Kolpa ti kipm ungkwan melnum akwapel paipm a kolpa kawor en ai kai itni kai miningket paipm ai, kai wrik a ikga tu melnum akg tilntul nam ok paipm.'”
MAT 25:31 Sisas kil wa la, “Ik wang a Warim Kipman a Melnum kil nar nimpon titnongket a nang wailen alkil, numpon tu maur angklin alkilen pa, kil ikga rpmi wrik wor alkilen eng rpmi itning yangkipmok.
MAT 25:32 Tu wrong kin kipman wrongkwail ikga tu wli itni wris i wulmpa akilen, atom ikga kil lok mpreingen tu wrong kin kipman pa kai itni mapming wekg. Kol a melnum a ikgalen manto walkg malkgu, atom alok ampreingen manto walkg malkgu kai itna man, a manto walkg tumpulmpis pa kai itna man.
MAT 25:33 Am kolpake, kil ikga lok mpreingen manto walkg malkgu pa kai itni wam wi pa, wa manto walkg tumpulmpis pa kai itni wam wangkokg pa.
MAT 25:34 Atom ikga Melnum Tukgunakg ikga kil la kai tu melnum a rpma wam wi pa la, 'Kulntopm o! Kipm pa wor pake. Yan akupmen pa ipma wor eng kipm pake. Kolpa ti kipm or rpmi uwi numitnen kweikwei wor wor a pikekg Maur Wailen kil numprampentepm ak wang a pikekg kil antokg kanokg pa.
MAT 25:35 Pikekg kupm nikgalmpopm pa, kipm alkopm okipma al. Wa pikekg kupm uwaketopm pa, kipm alkopm u al. Wa kupm melnum a ya watinet ai wli, ari wa kipm ikgalentopm ariworwor.
MAT 25:36 Wa kupm rpma apm kalpisen pa, kipm wa alkopm apm eng kupm nowe. Wa kupm numpet pa, wa kipm ikgalentopm ariworwor. Wa kupm kai rpma wan tipmining pa, kipm kul ariwopm.'
MAT 25:37 Ti tu melnum ute wor a pikekg akwap kolpa, ikga tu ikilmpentel kolpa la, 'Wailen, men pikekg ake ari kitn pa nikgalmpeitn a uwaketeitn, atom men alkeitn u a okipma pa al.
MAT 25:38 Men pikekg ake ari kitn pa a ya watinet ai wli, atom men ikgalenteitn pa. Men pikekg ake ari kitn apm kalpisen pa, atom men alkeitn apm pa kitn nowe pa.
MAT 25:39 Men pikekg ake ari kitn numpet aki kitn rpma kai wan tipmining pa, atom men kai ariweitn pa.'
MAT 25:40 Atom Melnum Tukgunakg pa kil ikga ikilmpe kolpa la, 'Kupm lanakepm aklale, kuina ur a kipm angklin wris ur a tu paipm paipm akupmen a nang kalpisen pa, pa kipm akwap eng angklin kupm tike.'
MAT 25:41 A ikga kil wa lanaki tu melnum a rpma wam wangkokg a kil pa la, 'Kipm melnum a kai paipm pa kipm kai tukwelkgtopm, kai wakg a ikga itna yongkyong, a numprampen eng Maur Paipm itna ep nampon tu maur angklin alkilen.
MAT 25:42 Pikekg kupm nikgalmpopm pa, ake kipm alkopm okipma al. Wa pikekg kupm uwaketopm pa, ake wa kipm alkopm u al.
MAT 25:43 Wa kupm melnum a ya watinet wli pa, ake wa kipm ikgalentopm. A kupm apm kalpisen pa, ake wa kipm alkopm apm ur eng kupm nowe. Wa kupm numpet pa, ake wa kipm kai ikgalentopm, a wa kupm rpma kai wan tipmining pa, ake wa kipm kai ariwopm.'
MAT 25:44 Atom tu ikga ikilmpe kolpa la, 'Wailen, men pikekg ake ari kitn a nikgalmpeitn a uwaketeitn, kitn a ya watinet ai wli, kitn apm kalpisen, kitn numpet, a kitn rpma wan tipmining angkai ai pa, eng mpa men ngklinseitn pa.'
MAT 25:45 Ari kil ikga ikilmpe la, 'Kupm lanakepm aklale wrisen, pikekg ake kipm angklin melnum ur a tu nang kalpisen kil pa, pa ake kipm angklin kupm.'
MAT 25:46 Atom tu pa kai awi wleket a itna yongkyong akalmpe a ake tu arein angklin tu melnum pa. Pake tu melnum a akwap ute wor angklin tu melnum pa, tu pa ikga kai rpmi wor yongkyong.”
MAT 26:1 Sisas kil la oklala pa plalng pa, wa kil wa la kai tu watnom alkil ti la,
MAT 26:2 ”Kipm ariwe pa, a wang wekg kolti eng wang wail a pikekg Maur Wailen ak awi tu amentepmen aye kul takuleikgen tu Isip pa, atom ik wang pa tu ikga elng Warim Kipman a Melnum pa kai eng tu kurkurngkel rki yo okgmangki.”
MAT 26:3 A wang wekg pa, tu tukgunakgen a tu ipma krakgen a ak ak kwap eng al wor uk Maur Wailen, a tu melnum wail wail pa, tu anel kai rka wris kai wan anong a Kaiapas, melnum tukgunakg a tu melnum ipma krakgen.
MAT 26:4 Atom tu akor ya ampen la rkul Sisas eng la orel imo.
MAT 26:5 Ari tu la kolkil la, “Ake mpa mentepm rkulel ik wang wail a antokg okipma pa, pa mpa ntokg tu wrong kin kipman ipma wakget or tita wail, ti kai itni papen.”
MAT 26:6 Atom Sisas kinar anong Petani rpma wan a Saimon, melnum a pikekg i paipuk awi pa.
MAT 26:7 Kin wris ur pa kil aye wes kaingkuren ur pa pik atnen u yaprekget wor a pikekg ak marpm wail paipm awi pa, aye or eng Sisas. Kil ngkaten ak kaluk Sisas pa kai tukgunakg pa ak wang a kil al okipma pa rpma.
MAT 26:8 Tu watnom alkil pa tu ari kolpa, tu karken atom tu la kolpa la, “Wa kil kaken u yaprekget wor pa eng kuina wai?
MAT 26:9 Kol u pa kol a ik uwi marpm wail manten, atom kol a uk tu melnum a rpma tukwok pa.”
MAT 26:10 Sisas kil ariwe kuina ur a tu la pa atom kil lanaken la, “Wa kipm uk kaikuten kai kin pa eng ntei? Pa kil akwap wor wrisen eng kupm ti.
MAT 26:11 Tu melnum a tukwok pa ikgam antiwepm rpma pa rpma pake. Pake kupm ti pa ikgake ntiwepm rpmi pa i pa, kalpis.
MAT 26:12 A kil alung u yaprekget wor kil kai num akupmen kil pati, kil antokg kupm ti nimprampen eng ikga tu uwen kupm ti kai kirk pa.
MAT 26:13 Kupm lanakepm aklale wrisen, ikga tu a laron yangkipm wor yela tungtangkem a kanokg ti pa, ikga kuina ur a wet kin ti antokg pa, ikga wa tu laron kolpa eng ikwonilmpen kil pa iye or pa kai.”
MAT 26:14 Atom Sutas Iskariot, watnom ur a tu melnum wampwam yikak wekg a Sisas aroaro wonel pa, kil aye yangkipm itna ya kai naki tu tukgunakgen a tu ipma krakgen a ak ak kwap eng al wor uk Maur Wailen pa.
MAT 26:15 Kil la kolkil la, “Mpa kipm uk kuina kupm ti, eng mpa kupm elng Sisas ti kai wam akipmen pa?” Atom tu angkleikg marpm a tu Suta pa kamel wris tuwek wampwam pa alkel.
MAT 26:16 Kil awi krimpwayek pa plalng pa, kil akor ya ur eng la uk Sisas pa kai wam a tu pa.
MAT 26:17 Wang wail aripm ur a akangklei wring wris wris men angklon nok tingklak a ak mpim ap mringen ak oren pa am ngkaten ak wang wet tike. Tu watnom a Sisas aroaro wonel pa kai eng Sisas pa atom lanakel la, “Kitn la men nimprampen manto walkg malkgu war kweikwei okipma ti itni kai a i, atom mpa kitn il pa?”
MAT 26:18 Kil lanaken la, “Kipm kai laniki melnum ur kil kai anong wail pa la kolkil la, 'Kupm Melnum a kaling plan tu melnum pa la kolkil la, “Wang akupmen am kul wreren tike, ti kupm nampon tu watnom alkupmen ti, mpa men il manto walkg malkgu kweikwei ti rpmi wan akitnen tike.”'”
MAT 26:19 Atom tu watnom alkil pa akwap katila ok a kil lanaken pa, atom tu numprampen okipma pa.
MAT 26:20 Takgni kinar pelpel ti pa, Sisas nampon tu watnom wampwam yikak wekg alkil pa kai rpma okg arke tita la il okipma pa.
MAT 26:21 Tu rka al okipma pa pipa, Sisas lanaken la, “Kupm lanakepm aklale wrisen la, wris ur akipmen ti mpa uk ya eng uk kupm ti kai wam a tu wrongmanto.”
MAT 26:22 Tu watnom alkil pa anel ipma kaikut paipm, atom ur asen plalng pa wa ur asen kolpa la, “Wailen, mpam kupm ti aki mla?”
MAT 26:23 Ari Sisas akalmpe la, “Melnum a anti kupm angkle okipma kai kaimung wris pa pati am melnum pake.
MAT 26:24 Warim Kipman a Melnum ikga imo kolen wrkapm a Maur Wailen la pake. Pake woi, arein melnum a uk ya eng uk Warim Kipman a Melnum pa kai wam a tu wrongmanto pa, kil ikga uwi paipm. Kola wor kol melnum pa kolake pikekg man raku, kol a kalpis.”
MAT 26:25 Atom Sutas, melnum a uk ya pa, kil wrekg akalmpe kolkil la, “Melnum a kaling plan men, mpam kupm ti ur tike?” Ari Sisas lanakel la, “Am kol a kitn la pa aklale pake.”
MAT 26:26 Tu al okipma pa rka pa, Sisas awi okipma pa aye itna ukwor Maur Wailen pa plalng pipa, kapor alken atom lanaken la, “Kipm uwi ilo, kil num akupmen.”
MAT 26:27 Atom tu al plalng pa, wa kil wa awi u wain pa aye itna ukwor Maur Wailen pa plalng pipa, almten atom kil lanaken la, “Kipm plalngen il o!
MAT 26:28 Pa walmpopm akupmen a ungkwan eng lam kla nampon Maur Wailen, atom kil ungkwan paipmpaipm wrongkwail a kipm melnum antokg pa.
MAT 26:29 Kupm lanakepm la, kupm ikgake il u wain kil nti ur. Kupm ikga itni nungkwangen kolpa kai ngko wang a ikga Yan alkupm kil ikglen kweikwei wrongkwail pa pipa, kupm ntiwepm il u wain weten pa.”
MAT 26:30 Tu awi okipma pa plalng pa, tu ngkat nang ur pa ak plalng pa, tu kai kaino nang Olip.
MAT 26:31 Sisas kil lanaken kolpa, “Ik mining ti pa kipm plalngen mpa ngkirk nuurngtopm plalng. Kol Maur Wailen la ela wrkapm alkilen pa la kolkil la, 'Kupm ilm melnum a ikgalen manto walkg malkgu pa pipa, manto walkg malkgu pa ikga ngkirk kai itn palpa.'
MAT 26:32 Pake wa kol kupm wrekg i kirkap pa kulno pa, ikga kupm eptepm eng kipm kai rpmi kai Kalili.”
MAT 26:33 Pita kil akalmpe kai eng Sisas pa la, “Tu men alpmen ti pa mpa ngkirk pake, kupm pa mpa kalpis.”
MAT 26:34 Ari Sisas kil akalmpe kolpa la, “Kil kupm lanakeitn aklale wrisen la, ik mining ti pa, karek ake la pa, kitn mpa lam nang a kupm ti nti wraur.”
MAT 26:35 Pake Pita kil la kolpa la, “Kol tu ilmpopm imo nimpokgenteitn pa, kupm ake mpa ngkirk eng lam nang akitnen pa, kalpis.” Wa tu watnom alkil pa, tu plalngen am wa la kolpake.
MAT 26:36 Sisas anti tu watnom alkil pa anel kai wrik ur a namput la Ketsemani, atom kil lanaken la, “Kipm rki kil, a kupm kai oklala niki Maur Wailen kai ketn ti.”
MAT 26:37 Kil awi Pita pa nampon warim kipman wekg a Sepeti pa antiwel. Ipma a kil pa kaikut paipm wrisen, kil rpma paipm titnowen num.
MAT 26:38 Atom kil lanaken la, “Ipma a kupm kil kaikut paipm wrisen ai eng a lok ngkliwopm kai imo. Ti kipmteng rpmi wulmpa ore oklala niki Wailen ti nti kupm ti.”
MAT 26:39 Atom kil wa naurngten kai ketn, atom kil elngtangko kinar kanokg ti akg arein oklala naki Maur Wailen pa la kolkil la, “La woi, Yaiyai akupm, kol antiwe pa, mpa kitn ngkit kalkuten a rpma kaimung ti tukulelkgtopm. Ik ik nikgwalpm akitnen pawo, ake mpa kitn ik ik nikgwalpm akupm kil.”
MAT 26:40 Kil oklala naki Maur Wailen plalng pa, kil wa yaper kai ari tu watnom alkil pa ari okg plalngen rka. Atom kil arowen ikgyokg, atom kil lanaki Pita pa la, “Karken a kipm antiwopm rpma waiketn ur?
MAT 26:41 Rpmi wonirpme, a oklala niki Maur Wailen ti, eng ake mpa kalkuten a palngtopm pa ik rkolng kipm pa ngko. Nol nikgwalpm ti pa atopen pake, numpwam ti pa lpmaak.”
MAT 26:42 Wa kil wa yaper kai anti ur eng oklala naki Maur Wailen pa la, “La woi, Yaiyai akupm, kol kitn ake la ngkiten kaimung a kaikuten kil tukuleikgtopm pa, kitn ik ik nikgwalpm alkitnen pa, kupm antiwe mpa il pa.”
MAT 26:43 Kil wa yaper kul ariwen ari ikgyokgalen ti okg rka.
MAT 26:44 Wa kil wa naurngten rka pa, kil wa yaper kai oklala naki Maur Wailen anti ur, kol wet kil oklala nakel anti wekg ai.
MAT 26:45 Kil oklala naki Maur Wailen plalng pa, kil wa yaper kul arowen ikgyokg lanaken la, “Kipm okgen na rka? A pake, wrekg ri! Wang am plalng tike, melnum a uk ya pa am wli tike, mpa uk Warim Kipman a Melnum ti kai wam a tu melnum a antokg paipmpaipm. Wrekg wrekg eng tepm kai o!”
MAT 26:47 Sisas la okyangkipm pa itna pa, Sutas melnum wris ur a tu watnom alkilen pa wli palng. Tu tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa, tu ukwa tu melnum watipmen aye kowri a yomis yomis kweikwei pa anti Sutas pa aye wli.
MAT 26:48 Atom melnum a la mpa uk Sisas kai wam a tu wrongmanto pa, kil pikekg yapon yangkipm nampon tu pa la, “Kipm ri melnum a kupm kai rkul nikron pa pipa, kipm rkul o! Melnum ampake.”
MAT 26:49 Sutas pinterng kai arkul nakrontel akwampor la, “Alketn wor, melnum a kaling planto!”
MAT 26:50 Ari Sisas akalmpe la, “Melnum wor alkupm, kitn wet kul la ntokg kuina, pa kitn ntokg o!” Atom tu kul yipuket Sisas pa wamparpmewel kolti, tu arkulel.
MAT 26:51 Watnom wris ur a Sisas aroaro wonel pa ari kolpa, kil wamnalu kowri alkil ti ak wangket nungkulkg wompel ur a melnum akwapel a melnum tukgunakg a tu ipma krakgen pa kitnangku kolti.
MAT 26:52 Ari Sisas kil lanakel la, “Lupm kowri pa elngkinar timpal alkil pa! Melnum a alm tita ak kowri pa, ikgam wa tu uwi kowri pa ikilmpen pake.
MAT 26:53 Kitn ti akwonalmpen la kupm ti akentiwe akwe Yan akupmen ai, eng mpa kil ukwa tu maur angklin almpwrong akilen a angen mapming wail manten wampwam yikakwompwekg akilen ai nar eng ngklin kupm ti?
MAT 26:54 Yangkipm wrkapm a Maur Wailen la pa mpam palngtopm kolpake. Kol kupm ukwen tu pa nar ngklinsopm pa, yangkipm wrkapm a Maur Wailen la pa, ake mpa palng iklale.”
MAT 26:55 Sisas kil la kai tu melnum a kul la rkulel pa la, “Kipm la kupm ti melnum paipm ur, atom kipm aye kowri a yo kweikwei pa wli la ik rkulopm? Akangklei wang kupm itna wunong kaling plan tu melnum itna yalming a Maur Wailen pa, ake kipm kul arkulopm.
MAT 26:56 Pake kweikwei wrongkwail ri kil pa palng kanun yangkipm a tu melnum okwripm a Maur Wailen pikekg la ela kai wrkapm pa palng aklale.” Atom tu watnom plalngen alkil pa naurngkel itna pa, a tu am ngkark kaingkai ase.
MAT 26:57 Tu melnum wet arkul Sisas pa, anel aye Sisas pa kai wan a Kaiapas, melnum tukgunakg a tu ipma krakgen. Tu melnum a aroaro wonel tu yangkipm a Moses pa nampon tu melnum wail wail, am rka wan pake.
MAT 26:58 Pake Pita pa angklokg wang kanukg kanukg, kolpa kanunten kai kawor wan anong akapm a melnum tukgunakg a pa, kai rpma nampon tu melnum wantengkwang pa rpma, la rkolng nungkulkg itning yangkipm a tu la Sisas pa la, mpa tu ntokg kai kolai.
MAT 26:59 Tu melnum tukgunakgen a tu ipma krakgen a ak ak kwap eng al wor uk Maur Wailen, a tu mringman pa tu akor yangkipm kansil ur, eng la mpa ik ilm Sisas ti imo.
MAT 26:60 Tu wailet pa aye yangkipm kansil wli pake, ake tu ansil yangkipm ur eng mpa ilmpel imo, kolpa kaingkai, melnum wekg ur pa wa wrekg kai itna.
MAT 26:61 Tuwekg la Sisas pa la, “Melnum pa la kolkil la, kil ikga tikale yalming a Maur Wailen pa plalng pipa, kil le wan weten pa ik wang wraur.”
MAT 26:62 Atom melnum tukgunakg a itna ep eng tu ipma krakgen kimeket pa wrekg la kai Sisas pa la, “Kitn ti ok kalpisen a akalmpe kai tuwekg a laweitn pa.”
MAT 26:63 Pake Sisas pa terng itna, ake akalmpe ok ur. Atom melnum tukgunakg a itna ep pa lanakel la, “Kitn naren Maur Wailen a rpma yongkyong pa, kitn laniko iklale la, kitn Krais, Warim Kipman a Maur Wailen aki kalpis?”
MAT 26:64 Sisas akalmpe la, “Ei, aklale, am kol a kitn la pake. Kil kupm lanaki kipm wrongkwail kolkil la, ikga itni waiketn kolti pa, ikga kipm ri Warim Kipman a Melnum ikga rpmi wam wi a Maur Wailen a Antiwe Titnongket Wail Manten. Wa kipm ikga ri kil ikga itni waipmunu pa ikiyewel nar.”
MAT 26:65 Atom melnum tukgunakg a itna ep pa nikgwalpm wakget aro apm alkil pa kil lanakel la, “Kil aknokgel Maur Wailen! Yangkipm ti kai paipm ase, ti ake mpa wa mentepm uwi melnum weten ur wa iyewli eng lawel pa! Ti kipm alkipm wet atning a kil ak nokgel Maur Wailen pa!
MAT 26:66 Ti kipm akwonalmpen kolai melnum pa?” Ari tu akalmpe ok akil pa la, “Pa kil antokg paipm eng kil la kil alkil la kil Krais, ti kai kil imo!”
MAT 26:67 Atom tu ungkwawel wlikg kai ikgokg ti, a tu orel ak wam. Wa tu tiur pa wampor wam ntrawel kai tangkwei pa.
MAT 26:68 Tu orel kolpa a angklo ok pa lala, “Kitn Krais pipa, kitn la melnum ur a oreitn pa ri!”
MAT 26:69 Pita pa kil anti tu rpma kawor akapm. Atom kin akwapel ur pa kul ariwel atom lanakel la, “Kitn melnum ur pikekg anti Sisas kai Kalili am tike.”
MAT 26:70 Ari Pita kil la kil kalpis itna wulmpa a tu melnum wrongkwail a rka pa. Atom kil la, “Kupm akwekgel kuina ur a kitn la pa.”
MAT 26:71 Wa kil wa wrekg a pa wa kai itna kai yipmingki yun a kawor en ai, pa wa kin ur wa ariwel, atom wa la kai tu wrongkwail a rka pa la, “Melnum pa pikekg anti Sisas a Nasaret am tike.”
MAT 26:72 Ari kil wa lam nang a Sisas pa anti ur, atom kil akwen la, “Aklale wrisen kaino kwa, kupm akwekgel melnum a kipm la pa!”
MAT 26:73 Wa itna waiketnketn pa, tu melnum tiur a itna pa wa kai lanaki Pita pa la, “Kitn pa am kitn melnum ur a tu pa aklale pake. Men atning ok kromeng akitnen pa atom men ariwe la kitn melnum ur atuwen Kalili ampake.”
MAT 26:74 Ari Pita kil nikgwalpm wakget akwen aklale wrisen la, “Kupm akwekgel melnum pa, kupm kalpis. Kol yangkipm a kupm la kil kupm kansil pa, kupm ikga uwi paipm.” Kil la kolpa plalng pa karek kil la.
MAT 26:75 Pipa Pita kil akwonalmpen yangkipm a pikekg Sisas kil la pa la, “Karek ikgake la pa, kitn ikga lam nang akupmen pa nti wraur.” Pa Pita kil kawor akg paipm kawor en ai.
MAT 27:1 Ak kong miningket ti pa, tu melnum tukgunakgen a tu ipma krakgen a ak ak kwap eng al wor uk Maur Wailen pa nampon tu melnum wail wail a ikgalen tu wrong kin kipman pa, tu akor nikgwalpm la ilm Sisas imo.
MAT 27:2 Tu angkuten wam a Sisas pa plalng, atom tu ayewel kai uk kai wam a Pailat, mringman wailen a tu Rom a ikgalen anong kanokg a Sutia pa.
MAT 27:3 Sutas, melnum a pikekg uk Sisas kai wam a tu wrongmanto pa, kil ari a tu yapon yangkipm la ilm Sisas pa imo kolpa atom, nikgwalpm wor pa palngtel, atom kil arein la, “Pa kupm ak kwap paipm tuwa.” Kil awi lukgwayek kamel wris tuwek wampwam a angkli kul rpma kil pa, aye yaper kai uk tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa.
MAT 27:4 Atom kil la kolkil la, “Kupm antokg paipm ase, eng kupm uk ya la kipm ilm melnum wor wrisen pa imo.” Atom tu akalmpentel la, “Pa ake kwap a men ti, kol am kitn alkitn pa ikwonilmpen ai.”
MAT 27:5 Kolpa atom Sutas angkli lukgwayek pa elng kawor rmpa yalming a pa, a kil kai angko til.
MAT 27:6 Tu melnum tukgunakgen a tu ipma krakgen a ak ak kwap eng al wor uk Maur Wailen pa awi lukgwayek pa atom tu la kolkil la, “Kil lukgwayek la ikilm melnum, ti ake mpa mentepm ermpi nimpon marpm a yalming a Maur Wailen pa.”
MAT 27:7 Kolpa atom tu yapon yangkipm la ik krimpwayek pa ik rmpen kanokg ur a tu angkon eng ak ak kuntuk, a wa elng itni kolen kirkap ur a uwen tu melnum a ya watinet wli pa.
MAT 27:8 Kolpa atom tu akwe wrik nang pa la, Kanokg Walmpopm. Atom wrik nang pa am tu akwe kolpa itna pake.
MAT 27:9 Atom yangkipm ur a pikekg Seremaia melnum okwripm a Maur Wailen la pa palng aklale, pati la kolkil, “Tu Isrel awi marpm kamel wris tuwek wampwam pa kai repmrepm kolen lukgwayek a pikekg tu elng itna la ikga ikirmpen kil pa am kolpake.
MAT 27:10 Atom tu ak marpm pa akarmpen kanokg ur a tu angkon eng ak ak kuntuk. Pa kanun yangkipm a pikekg Wailen kil lanakopm pa.”
MAT 27:11 Atom tu aye Sisas pa kaino itna wulmpa a Pailat mringman wailen pa atom kil asentel la, “Kitn pa melnum tukgunakg a tu Suta am tike?” Atom Sisas kil la kolpa la, “Ei, am kol a kitn la pake.”
MAT 27:12 Tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa tu almpel yangkipmok watipmen, ari ake Sisas akalmpe yangkipm ur, kalpis.
MAT 27:13 Kolpa atom wa Pailat lanakel la, “Ti ake kitn atning yangkipmok watipmen a tu almpeitn ti?”
MAT 27:14 Ake wa Sisas akalmpe ok ur. Kolpa atom mringman wailen a itna ep pa kil akwonalmpen watipmen.
MAT 27:15 Akangklei wring wris wris atom angko wang a tu al akule wan pa, mringman wailen pa ungkwan melnum wris a rpma wan tipmining pa kulor kai en. Wrongkwail kin a kipman pa wakrongen melnum mla ai, atom tu la pa Pailat kil ungkwan melnum pa a wan tipmining pa kulor kai en.
MAT 27:16 Ak wang ti pa melnum ur a rpma wan tipmining a tu ariwewel worwor la kil melnum paipm, nang akilen pa Parapas.
MAT 27:17 Tu wrong kin a kipman kai rka wris pa, Pailat asenten la, “Kipm wakrongen melnum mla lala kupm ungkwan kawor en eng kipm pa? Parapas aki Sisas a namput la Krais?”
MAT 27:18 Pa kil ariwe la wet tu elng Sisas pa kul wam akilen ti pati atnen tu ipma paipm eng kil pake.
MAT 27:19 Pailat kil rpma wrik alkil a rpma rpma eng atning yangkipm pa, kin alkil pa ukwa yangkipm kil kulntel ak angkengkel la kolkil la, “Ake mpa kitn ntokg kwei ur kai melnum ute wor pa eng ake kil antokg paipmpaipm pa, kalpis. Wet ak mining kil pa kupm okgwangket kai melnum pa ari kupm awi kaikuten wail.”
MAT 27:20 Pake tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa tu uk yangkipm tu wrong kin a kipman pa atom tu mpraken la, “Elngen Parapas pa kai o, a kipm ilm Sisas pawo!”
MAT 27:21 Atom mring wailen pa wa asenten la, “Kipm wakrongen mla wris ur a tuwekg la mpa kupm elng kulor kai eng kipm pa?” Ari tu akalmpe la, “Men wakrongen Parapas.”
MAT 27:22 Pailat kil asen tu pa la, “Ti mpa kupm ntokg kolai Sisas a tu namput la Krais ti?” Ari tu akalmpe la, “Kurkurngkel rki yo okgmangki pawo!”
MAT 27:23 Ari Pailat kil asenten la, “Eng kil antokg paipmpaipm kuina wai?” Ari tu mpraken akalmpe yikakatnen paipm la, “Kurkurngkel o!”
MAT 27:24 Tu itna pa itna pa, la plalplal mainmain wreren eng a or tita, kolpa atom Pailat kil titnowen num, yangkipm kalpisen a ak angkeng tu pa. Atom kil ari kolpa, kil awi u pa aklak wam alkilen ti eng mpa tu wrongkwail pa ri, a kil la kolkil la, “Kupm yangkipm kalpisen eng antokg melnum kil amo. Kalkuten pa itna kai kipm alkipm pake, kupm pa kalpis.”
MAT 27:25 Ari tu wrongkwail kin a kipman a pa akalmpe la kolkil la, “Elng kalkuten a amo akilen pa kul men ti nimpon tu warim amenen ti rki!”
MAT 27:26 Atom Pailat pa kil ipma kalkuten, pake kil katila nikgwalpm a tu pa kolti ungkwan Parapas pa a wan tipmining pa kulor kai en eng tu pa. A kil lanaki tu melnum a almpwrong pa awi ampei pa ak ake Sisas pa plalng pa, uk kil elng kai wam atuwen pa la tu iyewel kai kurkurngkel rki yo okgmangki ai.
MAT 27:27 Atom tu melnum a almpwrong a mringman wailen pa tu aye Sisas pa kai kawor wan a mringman wailen pa, atom tu akwe tu melnum wailet a almpwrong pa wli kapringentel.
MAT 27:28 Tu aner apm akilen pa, atom tu nowewel apm watet wail ur pa.
MAT 27:29 Tu kapring ampei iket ur pa kolen wanukgmis pa, atom tu elng rpma tukgunakg akilen pa. Tu alkel wark pa kai wam wi akilen pa. Tu kalingkake kil pa kol kil melnum tukgunakg atom tu kapor kilko aleinsel, a ak nokgelel la, “Melnum tukgunakg a tu Suta, alkeitn wor!”
MAT 27:30 Tu ungkwawel wlikg, plalng pipa, tu awi wark kai wam alkilen ti wa akorel kai tukgunakg ti.
MAT 27:31 Tu ak kolpa kai, plalng pipa, tu aner apm watet wail kai num a kil pa kai takwelkg, a wa nowewel apm alkilen pa. Atom tu ayewel kai eng la kurkurngkel rki yo okgmangki.
MAT 27:32 Tu akawi Sisas pa angkom naurng anong wail pa or ya pa kai la kurkurngkel rki yo okgmangki pipa, tu ansil melnum ur kai anong Sairini, nang akilen pa Saimon. Atom tu tirpmingentel la kil ngkit yo okgmangki a Sisas pa iye. Atom kil ngkat aye kai.
MAT 27:33 Tu kai palng kai wrik ur a tu namput la Kolkota. Yiprokgen a wrik nang pa pati tukgunakg timpal.
MAT 27:34 Tu kai palng wrik pa pipa, tu ngkaten u wain ur a wuten tu ak kweikwei kinipis ak oren pa ngkaten alkel, la mpa kil il eng ik kupuketel num a wleket pa. Atom kil al akwiyen ari ake kil lala il pa, kalpis.
MAT 27:35 Tu karkurngkel rka yo okgmangki pa, plalng pa, tu alm nep pimpos pa la mla ai klangkil pipa, mpa tu mpreing apm a Sisas pa.
MAT 27:36 Tu antokg kolpa rka ikgalen Sisas pa rka.
MAT 27:37 Tu nira yangkipm yiprokgen na a tu alm Sisas pa, atom karkurng itna kaino yo okgmangki tukgunakgen kwa a Sisas pa kolkil la, “Kil Sisas, kil Melnum Tukgunakg a tu Suta.”
MAT 27:38 Tu karkurng melnum paipm wekg pa itna wreren Sisas pa. Ur pa itna wam wi a ur pa itna wam wangkokg.
MAT 27:39 Atom tu wrongkwail kin a kipman pa kaingkul angkli wulmpa pa elng kaino ariwel atom tukgunakg wilwil a ak nokgelel
MAT 27:40 lala, “Kitn pikekg lala kitn antiwe titnongket a tikale yalming a Maur Wailen pa atom wa le weten ik wang wraur ti, pati kitn ngklin kitn alkitn pawo! Aki kitn la kitn Warim Kipman a Maur Wailen pa pati, kitn nuurng yo okgmangki pa nar o!”
MAT 27:41 Tu melnum tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses pa nampon tu melnum wail wail pa am wa tu wa aknokgelel kolpa yat pake.
MAT 27:42 Tu la kolpa la, “Kil pikekg angklin tu wrong kin kipman pake, kil akentiwe angklin kil alkil ti, kalpis. Kil melnum tukgunakg a mentepm Isrel, ti itni eng kil nuurng yo okgmangki pa kulnar pa pati, mpa mentepm ukipma kunun kil pa.
MAT 27:43 Kil pa ukipma kai Maur Wailen, kolpa ti mpa mentepm ri Maur Wailen kil mpa ipma wor eng kil pa atom ngklinsel ur pa. Eng ntei, kil alkil ti la kil Warim Kipman a Maur Wailen.”
MAT 27:44 Am wa kolpa yat pake. Melnum ikgwampet wekg a tu karkurngken itna wreren kil pa, wa ekg wa aknokgelel yat.
MAT 27:45 Takgni no pirng pa, aye mining pa kul kai akipaarng kanokg ti yela, kolpa itna a a, tukoryauk pa angkli om pa, mining pa kai plalng pa wa ran.
MAT 27:46 Mining itna pa Sisas kirkar akg akwe yikakatnen la, “Eli, Eli, lema sapaktani?” Pa la kolkil la, “Maur Wailen akupm, Maur Wailen akupm, wa kitn naurngkopm eng ntei?”
MAT 27:47 Wa tu melnum tiur atning pa atom tu wa lala, “Palpa kil akwe Elaisa.”
MAT 27:48 Atom melnum wris ur pa pinterng kai ak kweikwei ur a akarkolng u pa, angklewe u wain kinipis pa, atom aye kai elng itna wark pa uk kai Sisas pa la kil il.
MAT 27:49 Ari wa tu tiur pa wa lala, “Itni pen, itni eng tepm ri la, mpa Elaisa pa kulnar ngklinsel aki kalpis?”
MAT 27:50 Wa kil wa kirkar akg akwe yikakatnen anti ur plalng pipa, kil amo.
MAT 27:51 Atom ak wang ketn pa pipa, apm kaki wail a tu alekg rka akangketen yalming tiwel a Maur Wailen pa rakol wompwekg, angkaino kwa ai kinar plalng kinar kanokg ti. A yelm ti no a wes wail wail ti rakol.
MAT 27:52 Kirk a tu u mlamin pa rakol wompwekg okore itna atom, tu melnum wailet ute wor itna wulmpa a Maur Wailen pikekg amo kaingkai pa, wa wrekg wrekg rka.
MAT 27:53 Tu wrekg wrekg a kirk pa or rka nungkwangen, tu alil Sisas pa rmpa kawor mlamin pa plalng pa, kil wrekg or rpma pa, tu palng angko wunong kai anong wail a Maur Wailen amprin eng kil alkil pa, eng tu wrongkwail ariwen om.
MAT 27:54 Tu melnum a almpwrong pa nampon melnum tukgunakg alntuwen pa tu ikgalen Sisas pa rka. Pa tu ari yelm pa no, a wa kweikwei wrongkwail a palng pa atom, tu ngkark warwar paipm wrisen, atom tu la, “Pa kil Warim Kipman a Maur Wailen aklale tuwa!”
MAT 27:55 Tu kin wailet a pikekg anti Sisas atn angklinsel angkai Kalili ai kul pa, tu itna kai watin ai ari kuina ur a palng kai Sisas pa.
MAT 27:56 Kin wris ur pa Maria a Maktala, wa ur pa Maria man a Semis ekg Sosep. A wa wris ur pa man a Son ekg Semis, kin a Sepeti.
MAT 27:57 Atom ak nungkurikg ti pa melnum ur a kai anong Arimatea a antiwe kweikwei pa, nang akilen pa Sosep, kil wa melnum ur a ukipma Sisas a aroaro wonel tu pa.
MAT 27:58 Kil kai ari Pailat pa asentel la uwi yipmiri a Sisas pa. Atom Pailat kil awi wor la kil uwi yipmiri a Sisas pa iye kai.
MAT 27:59 Atom Sosep awi yipmiri pa kolti, yapo ak apm tangkoren maing wor ur pa,
MAT 27:60 plalng pipa, ngkat aye kawor alil ermpa kirk weten alkil a pikekg kil u mlamin itna krongkwang pa elngitna eng kil alkil pa. Kil alil yipmiri pa ela kawor mlamin pa plalng pipa, kil talpul wes wail pa aye kai akampri mlamin ok pa plalng pa, kil kai.
MAT 27:61 Maria Maktala wa nangkur alkil pa, ekg rpma won kai kirk pa arpmen rpma.
MAT 27:62 Pa ak wang a tu Suta nimprampen eng wang wail a rpma eng yapm pa, atom wa okg or kong pa, tu melnum tukgunakgen a tu ipma krakgen a ak ak kwap eng al wor uk Maur Wailen, a tu melnum a arpmen yangkipm yiprokgen a Moses pa, tu kai rka wris anti Pailat pa.
MAT 27:63 Atom tu la kolpa la, “Mring Wailen, men wonuwen yangkipm a pikekg melnum yangkipm kansil pa la pa. Pikekg kil rpma pa, kil pikekg la kolkil la, 'Ikga kupm imo rmpi wang wraur kai plalng pa, kupm wa wrekg i kirk pa kulor.'
MAT 27:64 Kolpa ti kitn uk yangkipm titnongket tu melnum a atnen kirk pa, eng mpa tu ikglen riworwor kolpa itni, wang wraur pa kai plalng. Mpa tu watnom alkil pa kai ik ikgwampel yipmiri a kil pa atom, wa laniki tu melnum pa la, kil am wrekg ase. Atom kansil a tu la kanukg ti pa, mpa wa wail manten angen kansil a pikekg kil la ep ai.”
MAT 27:65 Atom Pailat kil lanaken kolpa la, “Wor pa, kipm uwi tu melnum tiur alkupmen a almpwrong ti iye kai itnen kirk pa riworwor, ampur atnen paipmtel pa.”
MAT 27:66 Atom tu kai anel kla ur pa amprin wes a ak ampri mlamin ok pa elngitna ikgompen, a tu elng tu melnum a almpwrong pa itna atnen kirk pa itna.
MAT 28:1 Mining angket wang wail a tu Suta rpma eng yapm pa kai plalng pa, or kong miningket nungkwat tita ak wang itna ep a wang wampwomis wampwompwekg ti pa, Maria a anong Maktala nampon nangkur alkil pa, tuwekg kai ari kirk a Sisas.
MAT 28:2 Yelm wail pa no atnen maur angklin a Wailen pa angkaino kitnong pa kulnar. Kil kulnar talpul wes wail a akampri kirk ok pa aye kai takwelkg, atom kil kaino rpma kaino wes kwa pa.
MAT 28:3 Numpwam ikgokg akilen pa ari kolen mringmalo a plaing pa. Wa apm akilen pa tangkoren pupu kolen wel tangkor pa.
MAT 28:4 Tu melnum a almpwrong a atnen kirk pa itna pa, tu ngkark num lantiwe warwar paipm wrisen, atom tu elng angko kai amo rmpa kanokg ti kol tu melnum a amo ut ase.
MAT 28:5 Pa maur angklin a Maur Wailen pa la kai kin wekg pa la, “Ake mpa kipmekg ngkirk. Kupm ariwe la kipmekg pa kul akor Sisas a pikekg tu karkurngkel rka yo okgmangki pa.
MAT 28:6 Yipmiri a Sisas pa ake rmpa kirk wunen a tu u mlaminel pa, kalpis. Kil am wrekg ase, katila ok kol a pikekg kil alkil la pa. Kipmekg kul ri kirk a pikekg tu alilel armpe kil.
MAT 28:7 Kipmekg kai itatu laniki tu watnom alkil pa la, kil am wrekg ase. Ti kil am ep kaino Kalili pake, mpa kipm kaino riwel kaino pake, kol a kupm lanakepm pa.”
MAT 28:8 Tuwekg atning kolpa, tuwekg ngkark naurng kirk pa aktatu kai, ari nikgwalpm wompel a tuwekg pa atopen paipm. Atom tuwekg aye yangkipm wor pa kai lanaki tu watnom alkilen pa.
MAT 28:9 Tuwekg kai tutusele ari Sisas am itna ya tike, atom kil lanaken la, “Kupm alkepm ipma meen wor.” Atom tuwekg kapor kilko aleinsel arkulel kai nepm pa.
MAT 28:10 Atom kil lanaken la, “Kipmekg kaino kolti, ake mpa kipmekg ngkirk. Kipmekg kaino laniki tu melnum alkupmen a kipm ukipma kupm pa la, tu kaino Kalili pawo! Ikga tu riwopm kaino pake.”
MAT 28:11 Kin wekg pa ekg angkom or ya pa kai pa, tu melnum a atnen kirk pa tu kai kawor anong wail pa, lakati naki tu melnum tukgunakgen a tu ipma krakgen a ak ak kwap eng al wor uk Maur Wailen pa kweikwei wrongkwail a wet palng pa.
MAT 28:12 Tu melnum tukgunakgen a tu melnum ipma krakgen pa, tu atning kolpa atom tu kai rka wris akor nikgwalpm nampon tu melnum wail wail pa, plalng pipa, tu yapon yangkipm la uwi marpm wail uk tu melnum a almpwrong pa.
MAT 28:13 Atom tu lanaken la, “Mpa kipm laniki tu wrong kin kipman pa la, tu watnom alkil pa wli akikgwampel yipmiri a Sisas pa ak mining, ak a kipm okg akwekgel.
MAT 28:14 Ampur kipm ipma kalkut, kol Pailat kil itning yangkipm kil pa, mpa men lok ilmpil yangkipm pa laniki Pailat pa, ti ake mpa kipm uwi kaikuten ur.”
MAT 28:15 Kolpa atom tu melnum a almpwrong pa awi marpm pa, atom tu aye yangkipm kansil a tu la tu watnom a kil alkil Sisas pa akikgwampel yipmiri pa. Tu aye yangkipm pa kai yela, naki tita orarpme tu Suta pa, kolpa kulngkul ak wang ti.
MAT 28:16 Tu watnom wampwam yikakwris a Sisas aroaro wonel pa tu kaino nang kaino Kalili a pikekg kil lanaken la tu kaino pa.
MAT 28:17 Tu ari Sisas pa atom tu kapor kilko alein ngkat nang akilen pa, ari tu tiur a tu pa wa akwonalmpen watipmen.
MAT 28:18 Atom Sisas kul lanaken la, “Maur Wailen kil alkopm titnongket wrongkwail, atom kweikwei wrongkwail a itna kaino kitnong a itna kanokg ti, am elngkul wam a kupm ti ikgalen tike.
MAT 28:19 Kolpa ti kipm kai yela anong wrongkwail a yela tungtangkem. Atom kipm ntokg tu pa palng watnom akupm: kipm naren Yan, a Warim Kipman, a Maur Wor atom kuluken!
MAT 28:20 A wa kipm kiling planten eng tu kunun yangkipm wrongkwail a kol a pikekg kupm lanakepm la kipm kunun pa. Kupm lanakepm aklale, kupm ikgam antiwepm rpma kolpa akangklei wang, kolpa kaingkai kai angko wang a kanokg ti kai plalng.”
MAR 1:1 Wrkapm kil yangkipm wor a la Sisas Krais, Warim Kipman a Maur Wailen.
MAR 1:2 Yangkipm wor kil pekg palng ep naki Aisaia, kil melnum ok wripm a Maur Wailen, atom kil nira yangkipm kolpa, “Itning, mpa kupm ukwa melnum a aye yangkipm itna ya pa kai ep eng numprampen ya akitnen.
MAR 1:3 Angko wrik kalpmilel a ake melnum ur arpme pa, ok a melnum ur pa akwe la, 'Numprampen o! Numprampen ya eng Wailen! Ukulentel ya pa riworwor!'”
MAR 1:4 Yangkipm pekg Aisaia nira pa, am palng ok arke tike. Son, kil melnum a kaluk tu pa am wli itna wrik kalpmilel ake melnum ur arpme tike. Kil angkli yangkipm eng tu wrong kin kipman eng mpa tu plelng ipma, eng mpa kil kuluken, atom mpa Maur Wailen kil ungkwan paipmpaipm atuwen.
MAR 1:5 Tu wrongkwail a Sutia, a anong wail Serusalem tu kai eng Son. Tu laron paipmpaipm alntuwen pa, atom Son kil kaluken kai u kop Sotan.
MAR 1:6 Son kil nowe apm a tu antokg walkg a manto meng watin (kemel), kil ak ampei angket apm alkilen. Kil al ka nampokgen u pong tatu mpang.
MAR 1:7 Kil angkli yangkipm la kolpa, “Melnum ur a kul katnukg kupm ti pa, kil pa melnum wailen nang arke, kupm kil pa warim korpis nang kalpisen a kol kil pa akentiwe mpa iner nepm palk a melnum wailen a kolpa.
MAR 1:8 Kupm ti kalukepm ak u kolti, pake ikga kil alkil kulukepm ik Maur Wor alkilen ai.”
MAR 1:9 Ak wang pa Sisas kil atnurng anong Nasaret a anong kanokg Kalili pa kil nar, atom Son kil kalukel itna u kop Sotan.
MAR 1:10 Kil wrekg penterngen a u ti no kwa kolti, kil ari kitnong a rakol pa, Maur Wor kil narntel kol wel punum pa.
MAR 1:11 Plalng pipa, ok ur akwe angkaino kitnong pa nar la kolpa, “Pa kitn Warim Kipman akupmen, kupm plan ipma wor wasrongenteitn. Ipma akupmen pa wor atopen kitn.”
MAR 1:12 Maur Wor tilp Sisas atatu kai wrik kalpmilel ur a ake melnum ur arpme.
MAR 1:13 Sisas rpma wrik kalpmilel pa kol wang kamel wekg miningkranen, atom Maur Paipm Satan ningkailel la kil ngko. Kil rpma nampokgen ul a kirko wanin kweikwei paipm tilpmingen, pake tu maur akwapel a Maur Wailen pa wli angklinsel.
MAR 1:14 Tu arkul Son kil aye kai rpma wan tipmining pipa, Sisas kil kaino anong kanokg Kalili ngkaten laron yangkipm wor a Maur Wailen.
MAR 1:15 Kil la, “Wang pekg Son lala pa am palng tike. Maur Wailen la itni wailen ikglen nol nikgwalpm a kipm wrong kin kipman pa am wang tike. Kolpa ti kipm plelng ipma, ukipma yangkipm wor a Maur Wailen!”
MAR 1:16 Sisas kil angkom antilawe ukupuk yamping a Kalili pa, atom kil ari Saimon nampokgen wusok alkilen Antru. Tuwekg angkli apm mumu pa elng kinar ukupuk pa eng akawi yul pa itna. Kwap pa pati pa kol kwap marpm alntuwekgen.
MAR 1:17 Atom Sisas kil lanaken la, “Kipmekg kul kutnun kupm ti, eng mpa kupm kiling plantepm, atom ikga kipmekg rkolng tu wrong kin kipman iyekul kolen a kipmekg arkolng yul pa!”
MAR 1:18 Tuwekg atnurng apm mumu pa pinterngen kolti rmpa pa, a tuwekg kai katnun Sisas.
MAR 1:19 Tunteng angkom katila ukupuk yamping pa kai, atom tunteng ari warim kipman warimpen wekg a Sepeti, tuwekg wusok wail, Son a Semis. Tuwekg rpma kawor nim ukupuken pa angkut karpo noworel apm mumu a kitnangku pa.
MAR 1:20 Sisas kil akwewen, atom tuwekg atnurng yan Sepeti nampokgen tu melnum akwapel a Sepeti pa kai nim ukupuken wail pa penterngen kolti, a tuwekg kai katnun Sisas.
MAR 1:21 Sisas nampokgen tunteng melnum a katnuntel pa, tunteng kai anong wail Kaperneam. Ak wang wail a rpma eng yapm pa Sisas kil kawor wan a tu atning atning yangkipm a Maur Wailen atnewe pa. Kil kaling plan tu wrong kin kipman pa yangkipm a Maur Wailen.
MAR 1:22 Ake kil aro wonelen kol tu melnum a aroaro wonel tu yangkipm a Moses pa, kalpis, kil aro wonelen nampon titnongket kol kil alkil yangkipm yiprokgen. Tu atning yangkipm pa, atom tu wrekg paipm.
MAR 1:23 Ak wang pa melnum wris ur a maur paipm kimpilpet arpme pa, kil kawor wan a atning atning yangkipm a Maur Wailen atnewe pa, kil kirkar akwe la kolpa,
MAR 1:24 ”Sisas a Nasaret, kitn kul eng la ntokg na men ti? Aki kitn kul eng la ntokg men ti kai paipm? Kupm ariweitn pa, kitn Melnum Klalen Wakget a Maur Wailen!”
MAR 1:25 Sisas kil akle maur paipm pa la kolpa, “Kitn yipo ok akitnen pa! Kitn or kai tukwleikgen melnum pa kai o!”
MAR 1:26 Maur paipm kimpilpet kil laik melnum pa ngkrang kolti, atom kil kirkar yikakatnen paipm, atom kil or takwlelkgen melnum pa.
MAR 1:27 Tu wrong kin kipman pa ari pa tu wrekg paipm, atom tu naki tita la, “Ei, kipm itning yangkipm pa ri, yangkipm pa titnongket tuwa! Tu maur paipm kimpilpet atning yangkipm a melnum pa ungkwanten pa atom tu ngkark!”
MAR 1:28 Atom penterng kolti tu aye yangkipm pa kai yela anong kanokg a Kalili pa lanaki tu pa.
MAR 1:29 Tunteng atnurng wan a atning atning yangkipm a Maur Wailen atnewe pa, tunteng or en, atom Sisas kil awi Semis ekg Son pa aye kawor wan a Saimon a Antru.
MAR 1:30 Tunteng naki Sisas pa penterngen la yalmpikg mayen a Saimon pa amo num wakget paipm, ti okg rmpa wrik a pa.
MAR 1:31 Atom Sisas kai wrerentel a kil wamparmpewel wam pa aye wrekg pipa, amo num wakget a kil pa am kai plalng ike. Atom kil antokg okipma pa uk tu pa al.
MAR 1:32 Takgni kai kinar wreren eng a mining turkget pa tu aye tu melnum numpet kimeket nampokgen tu a maur paipm arpmewen pa aye kul eng Sisas.
MAR 1:33 Tu wrong kin kipman a anong wail Kaperneam pa tu angkli mapming mapming rka wanyun pa.
MAR 1:34 Sisas kil ungkwan numpet auraur a tu melnum wailet pa. Kil ungkwan maur paipm watipmen. Tu maur paipm pa tu ariwe Sisas, kolpa ti Sisas kil wa angkengken la ampake tu oklala.
MAR 1:35 Ak kong miningket paipm ai Sisas kil kai wrik ur a ake melnum ur arpme pa atom kil oklala naki Maur Wailen.
MAR 1:36 Saimon kil awi tu alkil pa tu katnun akorel kolpa kai,
MAR 1:37 tu ansilel, atom tu lanakel la, “Tu wrongkwail pa asen akoreitn.”
MAR 1:38 Ari Sisas kil la, “Ti tepm kai tutu anong ur a itna wreren tatu ti! Kupm am wa la ngkli yangkipm eng tu pa yat pake, kolpa atom kupm kul.”
MAR 1:39 Sisas kai yela or kai anong kanokg a Kalili. Kil ak kwap angkli yangkipm yela wan a atning atning yangkipm a Maur Wailen atnewe pa. Kil ungkwan maur paipm nampokgen.
MAR 1:40 Melnum ur a i paipuk awiyel pa kil kul eng Sisas. Atom kil kapor kilko aleinsel a akg a oklala nakel la, “Kol kitn wasrongen pipa, kupm ariwe la kitn antiwe mpa ntokg numpet a kupm ti palng wor pa.”
MAR 1:41 Sisas kil areinsel atom kil elng wam elewel, atom kil lanakel la, “Kupm wasrongen pa.”
MAR 1:42 Sisas kil la plalng, penterng kolti numpet i paipuk akilen pa palng wor.
MAR 1:43 Sisas kil tilpel minsrang la kil kai itatu.
MAR 1:44 Kil alkel yangkipm titnongket kolpa la, “Ampake kitn laniki melnum ur tutu ya pa kai pa, yaper! Kitn kai plan nepmwam akitnen pa kai melnum ipma krakgen a ak ak kwap eng al wor uk Maur Wailen pa kolti, il wor uk Maur Wailen pa itnen numpet akitnen a palng wor pa kol yangkipm titnongket a pekg Moses lanakepm pa. Kolpa eng mpa tu wrongkwail riwe la numpet a kitn pa am plalng ike.”
MAR 1:45 Ari melnum pa kil ake wa atning, kil kai yela laron naki tu wrongkwail eng yangkipm yiprokgen a wet Sisas kil antokg numpet a kil palng wor pa. Tu wrongkwail atning yangkipm a kil la pa aklale, atom tu kai akoporel angko ya. Sisas kil akentiwe kai angko wunong kai anong ur pa kalpis. Tu wrongkwail yela takwleikgen tita kul eng ari Sisas.
MAR 2:1 Sisas kil rpma wang aripm ur pa kai plalng pipa, wa kil yaper kai anong alkil Kaperneam ike. Tu wrong kin kipman atning a kil kai rpma anong pa, atom tu la kai riwel.
MAR 2:2 Tu kawor wan a kil pa rka antiwe. Wailet tiur alkil pa angkli rka wanyun enen ti akampri wrik pa rka. Kil angkli yangkipm pa naki tu pa itna,
MAR 2:3 ari tunteng melnum wikgwikg pa ngkat melnum ur a nepmwam amowe pa la iye kai eng Sisas.
MAR 2:4 Mpa tu iye melnum numpet pa iye kawor eng Sisas pa la kolai? Wrong wailet paipm ai. Tunteng akor ya, atom tunteng aye no ya ur a tu antokg pa kaino wan kimpo pa atom tunteng angkut wan kimpo pa tumute Sisas pa. Atom tunteng alekg melnum numpet a rmpa wrik pa elng kinar eng Sisas.
MAR 2:5 Sisas kil ari nikgwalpm atuntengen pa atom kil lanaki melnum pa la, “Yek alkupm, paipmpaipm alkitnen am plalng ike!”
MAR 2:6 Tu melnum a aroaro wonel tu yangkipm a Moses pa anel akwonalmpen kolpa rpma,
MAR 2:7 “Ai, kil pa la yangkipm na kolpa! Pa kil la paipmel Maur Wailen. Ake melnum ur antiwe ungkwan paipmpaipm pa, pa kwap a Maur Wailen wris ata.”
MAR 2:8 Sisas kil ariwe nikgwalpm a tu melnum a aroaro wonel tu yangkipm a Moses pa penterngen kolti, atom kil lanaken lala, “Kipm akwonalmpen nikgwalpm kolpa eng ntei?
MAR 2:9 Yangkipm a i wunongen eng mpa laniki melnum numpet pa la, paipmpaipm akilen am plalng ike, aki nikel, kil wrekg ngkit wrik ti iye kai?
MAR 2:10 Kupm la mpa kipm riwe: Warim Kipman a Melnum pa kil antiwe titnongket a ungkwan paipmpaipm a itna kanokg a ti.” Atom Sisas kil lanaki melnum numpet pa la,
MAR 2:11 “Kupm lanakeitn la kitn wrekg o, ngkit wrik alkitn pa iye kai wan alkitnen pawo!” Sisas kil la yangkipm kolpa eng aktitnongketel yangkipm a wet kil la ep pa.
MAR 2:12 Melnum pa wrekg kolti, awi wrik alkil pa, angkom or wulmpa a tu kin kipman wrongkwail. Tu ari pa, tu wrekg paipm, tu ngkat nang a Maur Wailen, tu la, “Pekg ake mentepm ari kweiur a palng kolpa ep pa, kalpis.”
MAR 2:13 Sisas kil wa yaper kai ukupuk yamping a Kalili. Tu wrongkwail kul eng kil, atom kil angklinten yangkipm a Maur Wailen pa.
MAR 2:14 Sisas kil angkom kai pipa, kil ari Lipai, warim a Alpius, kil rpma wan a tu awi awi marpmel tu atnewe. Sisas kil lanakel la, “Kitn kul kutnuntopm!” Kil atning kolpa, kil wrekg katnuntel.
MAR 2:15 Wang wris ur pa Sisas nampokgen tu watnom alkilen a kil aroaro wonel pa al okipma rpma wan a Lipai. Tu melnum watipmen a awi awi marpmel tu a tu melnum a antokg paipmpaipm pa wa antiwen anel al okipma pa rpma. Eng ntei, melnum watipmen tiur kolpa wa katnun Sisas yat.
MAR 2:16 Tu melnum tiur a tu melnum a arpmen yangkipm yiprokgen a Moses pa wa ak ak kwap a aroaro wonel tu yangkipm a Moses pa, tu ari Sisas a al okipma anti tu melnum paipm paipm, wa anti tu melnum a awi awi marpmel tu, kolpa atom tu asen tunteng watnom alkil pa la, “Wa kil al okipma anti tu melnum a awi awi marpmel tu, nampokgen tu melnum paipm paipm pa eng na?”
MAR 2:17 Sisas kil atning kolpa atom kil naken la, “Melnum a numpworen pa ake mpa kai eng melnum a antokg i numpet pa, kalpis. Tu melnum a numpet akalkilel pa tu kai eng melnum a antokg i numpet pake. Kupm ake kul eng la ukwe tu melnum a akwonalmpen tu alntu la tu ute wor pa, kupm kul eng la ukwe tu melnum a paipm.”
MAR 2:18 Tu watnom a Son aroaro wonel pa a tu melnum a arpmen yangkipm yiprokgen a Moses pa tu kalpis okipma eng uk wang Maur Wailen. Tu ari kolpa atom tu kul asen Sisas pa la, “Tu watnom a Son aroaro wonel pa, a tu watnom a tu melnum a arpmen yangkipm yiprokgen a Moses pa aroaro wonel pa, tu pa kalpis okipma eng uk wang Maur Wailen. Ti tu watnom alkitn a kitn aroaro wonel pa tu ake kalpis okipma pa eng ntei?”
MAR 2:19 Ari Sisas kil akalmpe la, “Kol tu yiprokgen ur a melnum wris ur a la uwi kin iye pa, tu mpa kalpis okipma ik wang a kipman pa antiwen rpma? Pa kalpis. Kipman a la uwi kin pa rpma nampokgenten pa, tu atopen, kolpa ti akentiwe mpa tu kalpis okipma pa.
MAR 2:20 Ikga ik wang a tu ungkwan melnum a la uwi kin pa iye pa kai tukulelkgten pa, tu ikgake uwi okipma, tu ikga ipma kalkut, ti tu ikga kalpis okipma rpmi kolti.
MAR 2:21 Mentepm ake awi awi apm umpu weten pa ak angkut apm nungkwor a rakol pa. Kol mentepm ntokg kolpa pipa, apm umpu weten pa ikga ik iro apm nungkwor pa kai rakol paipm.
MAR 2:22 Mentepm ake yapo nok maing weten pa ak ipm nungkwor nungkwor pa, kalpis. Kol mentepm yipo ik ipm nungkwor pa, pa mpa nok maing pa ngki ti, ipm mpa rakolngen nok ti, nok lmpa mpa elng kinar kanokg ti takote. Nok maing weten pa, pa mpa yipo ik ipm maing misen ai kolti.”
MAR 2:23 Ak wang wail ur a rpma eng yapm pa, Sisas kil angkom or wring wit kuin pa. Tunteng watnom alkilen a kil aroaro wonel pa tunteng angkom katnuntel. Tunteng apur wit ok pa al aye itna wampel.
MAR 2:24 Atom tu melnum a arpmen yangkipm yiprokgen a Moses pa lanaki Sisas pa la, “Ai, kitn itning, tu watnom alkitn tu kapor yangkipm titnongket a la, ampake mentepm ikwap ik wang a Maur Wailen kil amprin eng mentepm rpmi eng yapm pa!”
MAR 2:25 Ari Sisas kil akalmpe ok atuwen pa la, “Ake kipm angkleikg kweikwei a pekg Tepit antokg nampokgen tu melnum alkil ak wang a pekg tu okipma kalpisen a nikgalmpen pa?
MAR 2:26 Ak wang pa Apiatar kil itna tukgunakg eng tu ipma krakgen kimeket. Tepit kil kawor wan yalming a Maur Wailen pa. Kil al nok tingklak a pekg tu alwor uk Maur Wailen a la ake mpa tu melnum a itna kolti il. Mpa tu melnum a ak ak kwap eng al wor uk Maur Wailen pa il pake. Tepit kil angklon pake wa kil al. Kil awi uk tu melnum alkil pa al nampokgentel.
MAR 2:27 Maur Wailen kil ake elng wang wail a rpma eng yapm pa elngitna eng ak angkeng melnum pa. Kil elng wang wail pa itna eng ak angklin melnum.
MAR 2:28 Kolpa atom Warim Kipman a Melnum pa kil wailen itna ep ikgalen wang wail a rpma eng yapm.”
MAR 3:1 Ak wang ur pa, Sisas kil kawor wan a tu Suta atning atning yangkipm a Maur Wailen atnewe pa anti ur. Melnum ur pa aye wam paipm alkil pa rpma, ari kolen walmpopm am tingklak plalng ike.
MAR 3:2 Tu melnum pa rka la mpa ri la Sisas kil ntokg wam a melnum pa palng wor ik wang wail a rpma eng yapm pa aki kalpis. Kol mpa tu ri pa, mpa tu kai or yangkipm nampikgen mring man alntuwen.
MAR 3:3 Atom Sisas lanaki melnum a wam paipmen tupmungkul kalpmlel pa lala, “Kitn wrekg itni wulmpa a tu wrongkwail ti!”
MAR 3:4 Wa kil asenten la, “Mentepm ntokg nikgwalpm wor ik wang wail a mentepm rpma eng yapm pa aki mentepm ntokg nikgwalpm paipm? Mentepm ngklin melnum eng kil rpmi wor aki mpa mentepm or imo?” Ari tu ake wa akalmpe ok a Sisas pa.
MAR 3:5 Kil ikatnen tu wrongkwail pa, atom kil nikgwalpm wakget. Kil ari nikgwalpm a tu pa kakiren paipm, atom kil wa nikgwalpm kalkuten eng pa. Wa kil lanaki melnum pa la, “Tita wam alkitnen pawo!” Atom kil tita wam a kil pa am palng wor ike.
MAR 3:6 Tu melnum a arpmen yangkipm yiprokgen a Moses pa ari pa, tu wrekg aktatu kai, tu kai rka nampokgen tu melnum tiur a melnum tukgunakg Erot. Tu rka wris akor lala tu a ilm Sisas eng kil imo.
MAR 3:7 Sisas anti tu watnom alkil a kil aroaro wonel pa tunteng wrekg kai ukupuk yamping. Tu wrong kin a kipman ak wail katnuntel.
MAR 3:8 Tu anong kanokg Kalili, tu anong kanokg Sutia, tu anong wail Serusalem, tu anong kanokg Itumea nampokgen tu melnum a rka wreren u kop Sotan, kai kop wom ai, tu a rka wompel a anong wail Tair a Saiton. Tu kin kipman wrongkwail tu atning kweikwei a Sisas kil antokg. Tu atning pa, tu kul katnuntel.
MAR 3:9 Sisas kil naki tu watnom alkil pa la, “Rkolngtopm nim ukupuken pa iye kul rpmi ukupuk yamping ti eng mpa kupm kaino rpme, eng ake mpa tu ik tulpul tita kul rkgantiwopm pa!”
MAR 3:10 Eng pekg ep kil antokg tu kin kipman wrongkwail palng wor, kolpa atom tu wrong kin kipman a numpet pa tu ak ampri Sisas. Tu ak talpul tita kai la wampirpme Sisas.
MAR 3:11 Tu melnum a maur paipm kimpilpet arpmewen ariwel kolpa, wa tu kapor kilko aleinsel, tu kirkar paipm, tu la, “Kitn warim a Maur Wailen!”
MAR 3:12 Ari wa Sisas wa la yangkipm titnongket pa naken la, “Ampur kipm laron kupm ti kai angko wunong la kupm mla pa!”
MAR 3:13 Sisas kil kaino wrik nangen pa atom tu melnum a kil alkil wasrongen la kulntel pa, kil akwe tu melnum pa, atom tu kulntel.
MAR 3:14 Atom kil takwei tu melnum wampwam yikakwompwekg, eng la tu ntiwel rpmi. Eng ikga kil ukwawen kai eng tu itn laron yangkipm a Maur Wailen.
MAR 3:15 Kil la lken titnongket eng ikga tu ungkwan tu maur paipm.
MAR 3:16 Kil takwei melnum wampwam yikakwompwekg: Saimon, pa kil alil nangkel Pita.
MAR 3:17 Semis ekg Son, pa warim kipman wekg a Sepeti, kil alil nang wompel atuwekg pa Poanerkes. Yiprokgen a nang pa pati kolpa: warim kipman a milmal.
MAR 3:18 Antru, Pilip, Partolomyu, Matyu, Tomas, Semis warim kipman a Alpius, Taitus, Saimon, kil pa a mapming ur a tu a la ungkwan tu Rom.
MAR 3:19 Wa Sutas Iskariot, kil pa melnum a ikga uk Sisas kai wam a tu wrongmanto pa.
MAR 3:20 Sisas angkaino wrik nangen pa nar kai wan anong alkil ike. Tu wrong wailet paipm tu wa wli rka anti ur. Kolpa atom Sisas nampokgen tu watnom alkil a kil aroaro wonel pa akentiwe mpa tu il okipma pa kalpis.
MAR 3:21 Tu manmuikg alkil pa tu atning a tu la kolpa atom, tu kul eng la ikyakurel. Tu lala kil am titno ike.
MAR 3:22 Tu melnum a aroaro wonel tu yangkipm a Moses a rka Serusalem pa tu tiur atuwen pa nar kul no la, “Pelsepul, maur paipm tukgunakg a itna ep eng tu maur paipm pa arpmewel. Kil ungkwan maur paipm pa ak titnongket a melnum tukgunakg a maur paipm.”
MAR 3:23 Sisas akwewen kul wrerentel, atom kil naken yangkipm kla ur pa eng ik laniken la titnongket a kil pa angen titnongket a maur paipm. Atom kil la, “Maur paipm Satan mpa ungkwan kil alkil pa la kolai?
MAR 3:24 Kol tu anong kanokg wail ur wako iro wrong atom tu or tita pa, anong kanokg wail pa ikgake itni titnongket, kalpis.
MAR 3:25 Kol tu melnum a anong wris tu la iro or tita pa, ikga tu rak kai rki manman.
MAR 3:26 Kol Satan, melnum tukgunakg a tu maur paipm, pa la wrekg uwi wrongmanto lan tu alkilen, atom tu iro itni manman pa, mpa tu itni titnongket kolai, kalpis. Pa tu ikga kai plalng.
MAR 3:27 Melnum ur ake antiwe mpa tikale wan a melnum titnongket kalnten pa kai kawor ik ikgwampel kweikwei wrikya a melnum pa, kalpis. Mpa kil yipo melnum titnongket pa plalng pipa, antiwe mpa kil tikale wan akilen pa kawor ik ikgwampel kweikwei pa iye kai plalng pake.
MAR 3:28 Kupm lanakepm aklale kolpa, mpa paipmpaipm wrongkwail, a yangkipm wrongkwail a tu wrong wailet la paipmel Maur Wailen pa, ikga Maur Wailen ungkwan pa.
MAR 3:29 Ari melnum a la paipmel Maur Wor a kil pa, Maur Wailen ikgake ungkwan paipmpaipm alkilen pa kalpis. Paipmpaipm alkil pa ikga itni ikngklei wang.”
MAR 3:30 Tu melnum tiur wet la kolpa la, “Kil palpa maur paipm kimpilpet arpmewel.” Kolpa atom Sisas kil la yangkipm pa.
MAR 3:31 Ak wang pa man nampokgen tunteng wusok wusok a Sisas pa tunteng kul palng itna kawor en pa, atom tunteng lanaki melnum ur pa laniki Sisas pa eng kil or.
MAR 3:32 Tu wrong wailet tu rka kapringentel, atom tu lanakel la, “Kitn itning, man nampokgen tunteng wusok wusok alkitnen ai rka kawor en ai akoreitn.”
MAR 3:33 Kil akalmpe la, “Mpa kupm lanikepm la mla a i man akupmen, a mla mla a i wusok wusok akupmen.”
MAR 3:34 Kil ikatnen tu wrongkwail kin kipman a rpma kapringentel pa a kil la, “Kipm ri, man a tu wusok wusok akupmen am rpma kapringentopm rpma tike.
MAR 3:35 Melnum a katnun wasrongen a Maur Wailen pa, tu pa wusok wusok a muikgmayen a man akupmen pake.”
MAR 4:1 Ak wang ur pa Sisas kil wa ngkaten kwap pa ak eng kaling plan tu wrong kin kipman a rka ukupuk yamping. Tu wrong wailet paipm tu wli eng kil, kolpa atom kil elng kaino rpma nim ukupuken wris ur. Nim ukupuken pa ela kai u ai. Tu kin kipman wrongkwail pa rka nimilpm wreren ukupuk yamping.
MAR 4:2 Kil ak yangkipm kla pa ak lanaken kweikwei. Kweikwei watipmen pa kil lanaken ak yangkipm kla kolti. Kil kaling planten kolpa la,
MAR 4:3 “Kipm itning! Kol melnum ur kai laik wanukg erk kai wring.
MAR 4:4 Kil laik wanukg erk kolpa, tiur pa angko rmpa tatu ya kawor wring wunen, atom tu wel wli al.
MAR 4:5 Wanukg erk tiur pa angko kai wrik kangirngket. Kanokg waiketn kolti ela kangirng kwa, kolpa atom wanukg pa anip atatu.
MAR 4:6 Atom takgni pa no lampul, wanukg pa am amo plalng ike, kol ningnakg alkil pa ake kinar watin.
MAR 4:7 Wanukg ok tiur pa angko rmpa kawor ampei iket kuin ai. Ampei iket pa anip wrekg kaino ak yapo wanukg pa, kolpa atom wanukg pa ake anip wor.
MAR 4:8 Wanukg erk tiur pa angko elng nar kanokg wor, atom anip kaino ariwor. Tiur pa anip kaino wailet, tiur pa anip kaino wailet paipm, a tiur pa wa klangkil.”
MAR 4:9 Atom Sisas wa angkine lanaken la, “Melnum a nungkulkg atne pa, kil itning yangkipm kil!”
MAR 4:10 Tu wrongkwail rak plalng, a Sisas kil alkil wris rpma. Tu watnom wampwam yikak wekg a kil aroaro wonel pa nampokgen tu melnum tiur pa, tu rka kapringentel ak asentel yiprokgen a yangkipm kla pa.
MAR 4:11 Kil lanaken la, “Nikgwalpm ariwe ampen a Maur Wailen kil ikgalen ipma a melnum pa, am kil laron naki kipm ike, pake tu enen pa kil lanaken ak yangkipm kla akalkilel kolti.
MAR 4:12 Eng akentiwe mpa tu plelng ipma, atom ake Maur Wailen ungkwan paipmpaipm alntuwen pa. Kolpati tu antokg la mpa riri, pake ake tu ari kweiur. Tu ntokg la itning itning yangkipm, pake ake tu ariwe yiprokgen pa kalpis.”
MAR 4:13 Sisas kil lanaken la, “Ake kipm ariwe yangkipm kla a ak la wanukg erk pa pipa, yangkipm kla wrongkwail pa mpa kipm riwe la kolai?
MAR 4:14 Melnum a laik wanukg erk pa, pa kil laik yangkipm a Maur Wailen.
MAR 4:15 Wanukg erk a angko rmpa ya pa kol tu wrong kin kipman a atning yangkipm a Maur Wailen. Ake ampenet, Maur Paipm Satan kil kul kolti, ungkwan yangkipm a Maur Wailen a laik rpma ipma a tu melnum pa.
MAR 4:16 Melnum tiur pa kol wanukg erk a angko rmpa kanokg kangirngket. Tu atning yangkipm pa, tu awi penterngen kolti, tu atopen eng yangkipm pa.
MAR 4:17 Tu pa ningnakg kalpisen. Tu rpma waiketn kolti. Ak wang a kalkuten ur palngten aki tu tiur alken nikgwalpm kalkuten eng la ampake tu itning yangkipm a Maur Wailen pa, atatu kolti tu uk yirokg yangkipm a Maur Wailen pa.
MAR 4:18 Tu wrong kin kipman tiur pa kol wanukg erk a angko rmpa ampei iket kuin. Tu melnum pa atning yangkipm pa ari,
MAR 4:19 tu ipma kalkuten eng kweikwei watipmen a itna kanokg ti, a tu aringkowe marpm watipmen a kweikwei wrongkwail, a tu katnun ipma wasrongen alntu a wrekg la ntokg kuina ur. Kweikwei pa ak yapo yapo yangkipm a Maur Wailen, kolpa atom ake wa anip kaino palng ariwor.
MAR 4:20 Tu wrong kin kipman tiur pa kol wanukg erk a angko rmpa kanokg wor. Tu atning yangkipm pa katnun, atom tu pa anip kaino palng ariwor: tiur pa anip kaino wailet, a tiur pa anip kaino wailet paipm, a tiur pa wa klangkil.”
MAR 4:21 Sisas kil lanaken la, “Wakg pa kipm aye or la ik kuntuk mipmapm pa ik aur aki elng rpmi kawor wrik watneikgen pake? Kolpa kalpis.
MAR 4:22 Am kolpake, kweikwei wrongkwail a itna ampen, kutnukg ikga palng kul kai ngko wunong. Kweikwei wrongkwail a ak aur pa, ikga uwi iye kai rmpi wunong.
MAR 4:23 Melnum a nungkulkg atne pa, kil itning yangkipm pa riworwor.”
MAR 4:24 Wa kil wa lanaken la, “Yangkipm a kipm atning pa, kipm kirpo lupmen riworwor! Kipm a aye kaimung wusok la uwi ntiwe pa, Maur Wailen kil mpa lkepm ntiwe kol kaimung wusok pa. Kipm iye kaimung wail pa, Maur Wailen kil mpa lkepm ntiwe kol kaimung wail pa, wa klangkil.
MAR 4:25 Eng ntei, melnum a awi watipmen pa, mpa Maur Wailen lkel ngko angen. Pake melnum a ake awi kweiur aken kweikwei tiur a pekg kil awi ai pa, pa kweikwei a pekg kil awi pa ikga kai plalng.”
MAR 4:26 Sisas kil la, “Maur Wailen itna wailen ikgalen nol nikgwalpm a melnum pa kol melnum ur a laik kweikwei ok kai wring.
MAR 4:27 Akangklei mining pa melnum pa okg rmpa, ak takgni pa kil wrekg atn. Kweikwei ok a anip wrekg wail pa, melnum pa mpa kil riwe la kolai? Kil ake mpa riwe.
MAR 4:28 Kanokg alkil pa antokg atom kweikwei ok pa wrekg anip, ipm atne, kai kaino wail, ok arke, tukgun.
MAR 4:29 Kweikwei pa tukgun pa, pa wang a angket tuwai tike. Kolpa atom melnum pa la tu awi telpmirik pa kai ak wangket kweikwei pa.”
MAR 4:30 Sisas kil la, “Kuina a i kolen a Maur Wailen itna wailen ikgalen nol nikgwalpm a melnum pa? Aki yangkipm kla a i mpa mentepm ik la a Maur Wailen itna wailen ikgalen nol nikgwalpm a melnum pa?
MAR 4:31 Pa kol trumpwilm ipopm ok a wripm almpen kai tatu palpa. Ok pa pati waiketnketn,
MAR 4:32 pake kil wrekg kaino wail angen yo wrongkwail, alm wamtalpuk atne kai pa kai pa, antiwe tu wel kai ik ila rke.”
MAR 4:33 Sisas kil awi yangkipm kla watipmen kolpa eng ak la yangkipm a Maur Wailen pa naki tu wrongkwail kin kipman, antiwe kol nikgwalpm alntuwen.
MAR 4:34 Yangkipm ok wrongkwail pa kil lanaken ak yangkipm kla kolti. Tu watnom alkilen a kil aroaro wonel pa rpma nampokgentel kai wrik kalpmet pa atom kil laron yiprokgen a yangkipm kla pa naken ariworwor.
MAR 4:35 Ak nungkurikg pa, Sisas kil lanaki tu watnom alkilen a kil aroaro wonel pa la kolpa la, “Mentepm kai ukupuk wompel ai!”
MAR 4:36 Tu atnurng wrong kin kipman wailet pa, tu kaino rpma nim ukupuken a Sisas arpme pa, anel awiye la kai ukupuk wompel ai. Tu tiur awi nim ukupuken pa kai katnunten.
MAR 4:37 Tu awi nim ukupuken pa kai, ari mringkwripm wail pa el. Ukupuk pa tapor elng kawor nim u kopen pa, kolpa atom u eng a kai kawor pik kawor nim ukupuken pa.
MAR 4:38 Sisas kil rpma kinar nim ukupuken kulu pa kil alilng yo timpam pa, kil okg. Tu arowel ikgyokg atom tu la, “Ai, melnum a aroaro wonel men, mentepm a kai paipm ti, ake kitn akwonalmpen?”
MAR 4:39 Sisas kil pirpakg, kil wrekg, kil akle wripm pa, a la u pa, “Apake! Kitn plalng o!” Atom wripm pa tork, ukupuk pa terngkirka.
MAR 4:40 Sisas kil lanaken, “Kipm ngkark kolpa eng ntei? Ati, ake wa kipm ukipma?”
MAR 4:41 Tu wrekg ngkark paipm, atom tu la itna kuin a tu alntu pa la, “Melnum pa ntei, atom u a wripm pa atning ok a kil pa!”
MAR 5:1 Tu arpme nim ukupuken pa kai palng kai ukupuk wompel a tu Kerasa.
MAR 5:2 Sisas kil atnurng nim ukupuken pa, atom melnum ur a maur paipm kimpilpet arpmewel pa kil kul eng Sisas. Melnum pa atn rpma tatu kirkap.
MAR 5:3 Kil okg rmpa tatu kirk a tu u mlaminel a tu alil melnum armpewe pa akalkil. Melnum ur ake antiwe mpa rkul yipo kil pa, kalpis. Tu wa ak ampei mringen kalnten pa ak yapo ari ake wa antiwe.
MAR 5:4 Anti watipmen pekg tu yapo nepmwampel ak ampei mpangen, a ampei mringen pa, ari akentiwe. Ampei mpangen pa kil kangku, a ampei mringen pa kil karkur karkur kaingkai kai kitnangku. Melnum ur ake antiwe mpa rkul ngkeng kil pa kalpis.
MAR 5:5 Akangklei akangklei mining a ran pa kil am rpma tatu wrik nangen, a kirkap a pake. Kil akangklei akangklei kirkar akg raingen numpwam alkil ela wes.
MAR 5:6 Kil ari Sisas kai watin ai, kil pirng kul kapor kilko aleinsel.
MAR 5:7 Atom Sisas kil nakel la, “Maur paipm kimpilpet, kitn or tukulelkg melnum pa kai o!” Melnum pa kil kirkar ak ok wail paipm, atom kil la, “Sisas, kitn warim a Maur Wailen a itna ep eng kweikwei wrongkwail. Kitn la ntokg na kupm ti? Tukulelkgtopm! Kitn la iklale kaino kwa, eng ampur kitn alkopm wleket.”
MAR 5:9 Atom Sisas kil asen maur paipm kimpilpet pa la, “Nang a kitn ti mla?” Kil akalmpe la, “Nang akupmen Wrong Watipmen, eng men pa maur paipm watipmen.”
MAR 5:10 Kil ak asen unsa unsa kai Sisas pa la, ampake kil ungkwanten tukulelkgen anong kanokg pa.
MAR 5:11 Manto wailet al okipma itna kaino wrik nangen wompel ai.
MAR 5:12 Tu maur paipm kirkar akwen Sisas titnongket la, “Kitn la eng men a kawor nowe tu manto ai!”
MAR 5:13 Sisas kil awi wor, atom tu maur paipm atnurng melnum pa, a or kai kawor nowe tu manto ti. Atom tu manto wailet paipm kamel kamel wampwomis (2,000) pa anel raras angkaino krongkwang ai kul nar aren kinar kinar ukupuk ai, al u amo amo plalng ike.
MAR 5:14 Tu melnum a ikgalen manto pa ngkark. Tu aye yangkipm pa kai anong wail, wa kai anong yela tatu palpa. Atom tu wrong kin kipman kai ari kweikwei a wet palng pa.
MAR 5:15 Tu kai palng ari Sisas pa, tu ari melnum a wet maur paipm watipmen arpmewel pa. Kil aning apm, nikgwalpm a kil pa palng wontrakole wor, atom kil rpma meen. Tu wrong kin kipman ari pa, tu ngkark.
MAR 5:16 Tu melnum a wet itna ari pa, tu lakati kweikwei a wet palng kai melnum pa a wet maur paipm arpmewel pa, a wa palng kai tu manto pa yat.
MAR 5:17 Atom tu wrong kin kipman la titnongket eng Sisas, la kil utnurng anong pa kai anong ur ai.
MAR 5:18 Atom Sisas kawor nim ukupuken pa. Wa melnum a wet maur paipm arpmewel pa kil asen Sisas pa la kolpa la, “Antiwe mpa kupm ntiweitn kai?”
MAR 5:19 Pake Sisas ake awi wor la mpa kil ntiwel kai pa. Atom kil la, “Kitn kai rpmi nimpokgen tu alkitnen pa niken ipma arein a Maur Wailen wet angklinseitn, a kweikwei wrongkwail a wet kil akteitn pa!”
MAR 5:20 Atom melnum pa kai anong a tu Tekapolis, laron yangkipm kweikwei a wuten Sisas kil aktel pa. Tu kin kipman wrongkwail tu atning pa, atom tu akwonalmpen watipmen.
MAR 5:21 Atom Sisas kil awi nim ukupuken pa wa yaper kul ukupuk wompel ti. Tu wrong kin kipman wailet paipm tu kul ariwel ak wang a kil wli palng kai itna ukupuk yamping pa.
MAR 5:22 Melnum tukgunakg ur a ikgalen wan a tu Suta atning atning yangkipm a Maur Wailen atnewe pa kil kul. Nang a kil pa Sairus. Kil ari Sisas, atom kil kapor kilko alein wreren nepm a Sisas.
MAR 5:23 Kil la ak ok a ikgakgel lanaki Sisas kolpa, “Warim kin wusok yek akupmen wreren eng a imo. Kitn kul elng wam elewel, eng mpa kil wor rpmi, eng ake mpa kil imo.”
MAR 5:24 Atom Sisas kil antiwel kai. Atom tu kin kipman wrongkwail tu katnuntel. Tu aktalpul tita aye kolpa kai wrerentel.
MAR 5:25 Kin wris ur pa kil anti tu wrongkwail itna, kil akapore perper, am rpma kolpa rpma kol wring wampwam yikak wekg.
MAR 5:26 Tu melnum a antokg i numpet pa alkel wleket watipmen paipm, atom kin pa angkli marpm alkil plalng eng tu pa. Pake numpet alkil pa ake kai wor ur, kalpis, am paipm kolpa itna pake.
MAR 5:27 Kin pa atning yangkipm a tu la Sisas kil antokg numpet a tu melnum palng wor, kolpa atom kil ak angkom angkom tu wrong wailet a yirokg a Sisas kul wamanti apm akilen.
MAR 5:28 Kil akwonalmpen la, “Kol mpa kupm waminti apm a kil pa, mpa kupm palng wor.”
MAR 5:29 Penterngen kolti, num walmpopm a kil pa am plalng ike. Kil almpen almpen numpwam kil pa ari, numpet kil pa am plalng ike.
MAR 5:30 Penterngen kolti Sisas kil ariwe la, titnongket ur am atnurngkel kai ike. Kil plelng ari tu kin kipman wrongkwail ti, atom kil la, “Mla wuten wamanti apm akupmen ti?”
MAR 5:31 Atom wa tu watnom a kil aroaro wonel pa lanakel la, “Ti ake kitn ari tu wrong kin kipman wailet itna kapringenteitn itna ti aki, atom wa kitn wa asen la, mla wamantiweitn ai?”
MAR 5:32 Sisas kil ikgen yela la mla wet wamantiwel pa.
MAR 5:33 Kin pa ariwe kweikwei a wet palngtel pa, atom kil ngkark warwar. Atom kil kul wreren kapor kilko alein Sisas, a kil laron la, “Wuten kupm antokg.”
MAR 5:34 Atom Sisas kil lanakel la, “Warim kin, nikgwalpm wor akitnen a kitn ukipma pa antokgteitn kitn palng wor. Kupm alkeitn wor, kitn kai rpmi meen, numpet a kitn pa am plalng ike.”
MAR 5:35 Sisas kil anti kin pa la okyangkipm pa itna, atom tu melnum tiur angkai wan a Sairus, melnum tukgunakg a ikgalen wan a tu atning atning yangkipm a Maur Wailen atnewe pa, kul la, “Ngkeng Sisas pa, ampur kil kul, warim kin akitn pa am amo ike.”
MAR 5:36 Ari Sisas kil ake atning yangkipm a tu angkengkel pa kalpis. Kil lanaki Sairus la, “Ampur kitn ipma kalkuten, ukipma kolti!”
MAR 5:37 Sisas kil karken la ake mpa wrong ur ntiwel kai. Mpa Pita, Son, wusok alkilen Semis.
MAR 5:38 Ak wang a tu kul wan a Sairus pa, Sisas kil atning tu antokg nungkulkg titno wail paipm, tu akg paipm ak ok namputen.
MAR 5:39 Ak wang a kil kawor wan pa kil lanaken la, “Kipm akg antokg nungkulkg titno paipm eng ntei? Warim ake amo, palpa okg kolti.”
MAR 5:40 Tu akinoalmpel paipm kolti. Ari kil ungkwanten kawor en plalng. Kil awi mansan a warim pa nampokgen tunteng melnum wraur pa antiwel, kai kawor wrik a warim yipmiri armpe pa.
MAR 5:41 Kil wamanti kai wam pa, kil la, “Talita kumi!”, pa pati kil ak ok alkilen la kolpa la, “Warim kin wasek, kupm lala, kitn wrekg o!”
MAR 5:42 Pilpa, warim kin pa wrekg angkom atatu kolti. Warim kin pa kin tangkis, wring alkilen pa wampwam yikakwompwekg. Tu ari pa, tu wrekg paipm.
MAR 5:43 Sisas kil la yangkipm titnongket pa naken la, “Akentiwe mpa kipm laniki mla ur eng kuina ur a kupm antokg kil. Ti kipm uk okipma warim kin pa il o!”
MAR 6:1 Sisas atnurng Kaperneam pa nar kul anong yiprokg alkilen, wa tu watnom a kil aroaro wonel pa kul katnuntel.
MAR 6:2 Ak wang wail a rpma eng yapm pa Sisas kil kawor wan a men Suta atning atning yangkipm a Maur Wailen atnewe pa. Kil kaling plan yangkipm a Maur Wailen pa naki tu wrong kin kipman. Tu wrongkwail rka atning yangkipm akilen pa, tu wrekg paipm la, “Melnum pa kil awi titnongket a ariwe pa kai a i, atom kil ak antokg kweikwei titnongket titnongket a melnum ake antiwe antokg pa?
MAR 6:3 Palpa kil melnum a ale ale wan kolti. Kil warim a Maria, wailen a Semis, Sosep, Sutas, Saimon. Tu muikgmayen alkil pa antiwo rka yat.” Tu la kolpa, tu nikgwalpm paipm eng kil pa.
MAR 6:4 Sisas lanaken la, “Tu anong manet ai tu lala kil nang arke melnum ok wripm a Maur Wailen, pake tu anong yiprokg a tu walmpopm wris a tu wan wris alkil pa tu elukgentel.”
MAR 6:5 Kolpa atom kil ake antiwe mpa ntokg kweikwei ak plan titnongket a Maur Wailen pa itni anong pa. Kil elng wam ele tu melnum numpet tiur kolti, atom tu palng wor.
MAR 6:6 Kil akwonalmpen watipmen eng ake tu ukipma kil pa. Atom kil atnurng anong yiprokg alkil pa a kil atn tatu anong a ela wreren anong a kil pa laron yangkipm a Maur Wailen.
MAR 6:7 Sisas kil akwe tu watnom wampwam yikak wekg a kil aroaro wonel pa kul. Kil ukwawen la tu kai itn wekg wekg. Kil alken titnongket wail la tu ik ungkwan tu maur paipm kimpilpet.
MAR 6:8 Atom kil lanaken la tu ngkompwam kolti. Ampake tu iye apmkok pa eng lupme okipma, marpm, kweikwei pa iye, kalpis. Mpa tu iye yotuk pa ik itnen kolti.
MAR 6:9 Nepm palk pa tu nowe o, apm pa pati ampur tu aye ur nampikgen.
MAR 6:10 Wa kil lanaken la, “Kipm la kawor wan ur pa, kipm rki pa i i, kipm utnurng anong pa kai.
MAR 6:11 Kol anong ur ake tu awi wor eng kipm pa, wa ake tu atning yangkipm a kipm pa, kipm kulkwin yipur pa itni pa, a kipm utnurng anong pa kai. Kol pa eng mpa kipm utnurng kalkuten pa kai rki tu alntu.”
MAR 6:12 Atom tu watnom alkil pa tu kai, atom tu angkli yangkipm naken la, “Kipm plelng ipma!”
MAR 6:13 Tu ungkwan maur paipm watipmen a rpma kawor tu melnum, tu ak uyiwa akanel tu melnum a numpet atom tu palng wor.
MAR 6:14 Atom nang a Sisas am palng wail ike. Melnum tukgunakg Erot kil atning kweikwei wrongkwail a Sisas antokg. Tu tiur pa la kai Sisas pa la, kil Son a kaluk tu. Kil wrekg a kirk, kolpa atom kil antiwe titnongket a kil ak ak kwap pa.
MAR 6:15 Tu tiur pa la, kil Elaisa, melnum ok wripm a Maur Wailen. Tu tiur pa la, kil kol tu melnum ok wripm tiur a pekg ep.
MAR 6:16 Erot kil atning pa, atom kil akwonalmpen la, Sisas pa Son a kaluk tu, atom kil la, “Son pekg kupm la tu angket mengkel pa am wa wrekg ike.”
MAR 6:17 Pekg Erot la tu kai arkul yapo Son aye kawor rpma wan tipmining. Erot kil antokg kolpa eng Erotias, kin a wusok alkilen Pilip a kil karpo atnwampel.
MAR 6:18 Pekg Son lanaki Erot la, “Ake wor eng kitn aye kin a wusok alkitn pa.”
MAR 6:19 Kolpa atom Erotias nikgwalpm wakget paipm eng Son, kil la ilmpel imo. Pake kil ake antiwe mpa ntokg.
MAR 6:20 Eng ntei, Erot kil ngkark eng Son. Kil ariwe la Son pa melnum ute wor a Maur Wailen amprin eng kil alkil, kolpa atom kil ikgalentel. Kil atning yangkipm a Son pa wor, kil wasrongen paipm eng la itning yangkipm akilen, pake nikgwalpm a kil pa wa ngkark.
MAR 6:21 Erotias kil ansil ya wor ur eng la ikilmpe nikgwalpm wakget akil kai eng Son ak wang a Erot kil antokg okipma wail eng al akwonalmpen wang a pekg man rakuwel. Atom kil akwe tu mring man wail wail alkil, nampokgen tu melnum tukgunakg a almpwrong, nampokgen tu melnum wail wail a nang arke a anong kanokg Kalili pa wli eng al okipma.
MAR 6:22 Warim kin a Erotias kil or plelplel. Erot nampokgen tu melnum a antiwel al okipma, tu ari plelplel akil pa ari wor. Atom Herot melnum tukgunakg pa asen kin warimpen pa la, “Kitn a uwi kuina? Kitn wasrongen kuina mpa kupm lkeitn.”
MAR 6:23 Erot kil la aklale wrisen kaino kwa eng aktitnongketel yangkipm alkilen la, “Kitn isentopm kweiur a kitn wasrongen pa, mpa kupm lkeitn. Kol kitn la kupm iro anong kanokg a kupm ikgalen ti, lkeitn wompel, kupm iye wompel, pa kupm antiwe.”
MAR 6:24 Kin warimpen pa am kawor en kai lanaki man alkil pa la, “Mpa kupm la na eng mpa kil lkopm?” Man pa la, “La nikel la kitn uwi tukgunakg a Son a kaluk tu.”
MAR 6:25 Kin warimpen pa atatu kolti kawor naki Erot melnum tukgunakg pa la, “Kupm wasrongen tukgunakg a Son, melnum a kaluk tu, kitn elngkirmpi kai kimpang ti lkopm pinterngen!”
MAR 6:26 Kil la kolpa, ti nikgwalpm a Erot pa kalkut paipm. Pake kil akwonalmpen a wet kil la aklale wrisen kaino kwa ike, itna wulmpa a tu melnum a antiwel rpma al okipma. Kolpa ti akentiwe mpa kil tulpulng ok a kin warimpen pa.
MAR 6:27 Atatu kolti Erot la melnum ur a almpwrong pa la kai ngket mengkel Son pa atom uwi tukgunakg pa iye kul. Melnum a almpwrong pa kai wan tipmining, wangket mengkel Son.
MAR 6:28 Kil elng tukgunakg a Son pa elng rmpa kimpang ur pa aye kul, uk kin warimpen pa. Kin warimpen pa awi aye kai uk man alkil pa.
MAR 6:29 Tu watnom a Son pekg aroaro wonel tu atning yangkipm pa, atom tu kul ngkat yipmiri a Son pa aye kai uwen kai kirkap ai.
MAR 6:30 Tu melnum a pekg Sisas ukwawen kai ak kwap tatu anong pa, tu yaper kul eng Sisas, lakati nakel kwap kweikwei a pekg tu ak pa.
MAR 6:31 Tu wrong watipmen paipm tu kaingkul eng ari Sisas, atom tu wang kalpisen eng al okipma. Kolpa atom kil lanaken la, “Kul eng mentepm almentepm kolti kai rki kai wrik kalpmet ur ai, rki eng yapm pen!”
MAR 6:32 Atom tu alntu kolti kai awi nim ukupuken pa am kai wrik kalpmet ur pa.
MAR 6:33 Ari tu wrongkwail ariwe yat ike, la tu mpa kai wrik pake, kolpa atom tu wrongkwail a anong tatu palpa, tu pirng ep angklin ya arkenten rka.
MAR 6:34 Sisas aye nim ukupuken pa kai rka u yamping, kil ari wrong watipmen paipm ai. Tu pa kol manto walkg malkgu a ake melnum ur ikgalenten, kolpa atom kil areinsen paipm. Kil lanaken yangkipm ok watipmen a Maur Wailen.
MAR 6:35 Takgni kinar plalng, eng a nungkurikg tike. Atom tu melnum a ak kwap nampokgen Sisas, tu kai eng Sisas, lanakel lala, “Mentepm rka wrik mis, takgni am kinar eng a mining tike.
MAR 6:36 Ti laniken tu kai anong wail a anong wusok tutu palpa, ikor rmpen okipma ur alntu pa eng mpa tu il.”
MAR 6:37 Ari Sisas akalmpe la, “Kipm alkipm ti lken okipma eng tu il tike!” Atom tu lanakel la, “Mpa men uwi marpm wail kai a i eng ikirmpen okipma eng uk tu wrong kin kipman wailet pa il?”
MAR 6:38 Sisas asenten la, “Kipm aye nok tingklak ur aki kalpis? Kipm kai ikor ri!” Atom tu asen akor tu alntu pa atom tu ansil, atom tu la, “Nok tingklak wampwomis, yul wekg.”
MAR 6:39 Sisas kil lanaken la, “Kipm niken eng tu rpmi mapming mapming tutu mi pa rki!”
MAR 6:40 Tu tiur pa rpma kol kamel wampwomis a tu tiur pa kamel wekg tuwek wampwam.
MAR 6:41 Kil awi nok tingklak wampwomis a yul wekg pa, kil ikg kaino kitnong pa, a kil uk wor Maur Wailen, plalng pa, kil kapor nok tingklak pa uk tu watnom alkil pa, eng mpa mpreing eng tu wrong kin kipman pa il. Wa yul wekg pa yat kil ampreing uk tu aknirake tu plalngten.
MAR 6:42 Tu al nikgwor.
MAR 6:43 Okipma umpu umpu tiur pa itna. Atom tu watnom a Sisas pa tu awi, ninan, alupm kai nimong pa, wa palng wampwam yikak wekg.
MAR 6:44 Tu wrong a wuten al okipma pa tu wrong wailet paipm kamel kamel (5,000), ake tu angkleikg kin a watnom pa kalpis.
MAR 6:45 Tu al plalng pipa, Sisas almayel tu watnom alkil a kil aroaro wonel pa, aktatu kolti, la tu kaino rpmi nim ukupuken pa eptel kai ukupuk wompel a Petsaita. Eng kil la tu wrong kin kipman wailet pa kai rak.
MAR 6:46 Tu rak kai plalng, kil kaino tipmning, la ok yangkipm nampokgen yan alkilen.
MAR 6:47 Wreren eng a ari kamel wukg wekg ti pa, nim ukupuken pa am kai angko kai ukupuk kuin ike. Sisas alkil wris pa itna kai ai a wai.
MAR 6:48 Atom kil ari wripm titnongket pa el a won a tu pa kul, atom tu aken kwap wail paipm eng angket u pa kai. Wreren eng a ukwe, Sisas kil angkom or u kwa pa kainten, pake kil a ikopor tu pa ep kai.
MAR 6:49 Tu ariwel, atom tu akwonalmpen la, pa mring maur, kolpa atom tu ngkark, tu kirkar paipm.
MAR 6:50 Tu plalngten ariwel, la mring maur atom tu ngkark paipm. Penterngen kolti Sisas lanaken kolpa la, “Kil kupm kilke, ampur kipm ngkark! Kipm rpmi titnongket!”
MAR 6:51 Kil kai kawor nim ukupuken pa antiwen rpma. Atom wripm pa kai tork. Tu wrekg paipm, nikgwalpm a tu pa no ros kolti.
MAR 6:52 Eng ake tu akwonalmpen okipma a wuten Sisas ampreing eng tu wrong kin kipman al pa kalpis. Ipmanikg a tu pa ake umpen.
MAR 6:53 Tu awi nim ukupuken pa angket ukupuk pa kai palng kai wompel a anong kanokg Kenesaret ai, atom tu angkuten nim ukupuken pa rka pa.
MAR 6:54 Tu atnurng nim ukupuken pa, penterng kolti tu am ariwel yat ike, tu la Sisas ampake.
MAR 6:55 Tu pirng aye yangkipm pa kai tatu palpa, atom tu ngkat tu melnum numpet pa aye kai wrik ur a wuten tu atning la Sisas kil arpme pa.
MAR 6:56 Kil kai anong wail wail aki, anong wusok wusok aki, kil kai tatu palpa, tu elng tu melnum numpet elngkirmpa akapm kuin ur. Tu asen lala, “Ti, men elng wam itne apm umpu waiketn ur akitnen ti kolti!” Tu elng wam elng itna apm alkilen pa tu palng wor.
MAR 7:1 Tu melnum a aroaro wonel tu yangkipm a Moses pa nampokgen tu melnum tiur a arpmen yangkipm yiprokgen a Moses pa, tu angkaino anong wail Serusalem pa nar kul no rka nampokgen Sisas.
MAR 7:2 Tu ari tu watnom a Sisas aroaro wonel pa tu ake klak wam pa atom tu al okipma pa. Tu ngkaten wam kimpilpet alntuwen pa ak al okipma pa kolti.
MAR 7:3 Tu melnum a arpmen yangkipm yiprokgen a Moses, a men alpmen Suta pa, ake men klak wam pa, men akentiwe mpa il okipma pa kalpis. Pa angklonake a tu mamikgmamin mansan a men Suta am kolpake.
MAR 7:4 Men katnun angklonake watipmen tiur a pekg men awi kai tu mamikgmamin mansan pa a la men angkai akapm a armpen okipma atnewe pa kul pa, kol ake men angkle wam u pa ak rka tita pa, pa men ake kukula pa. Wa men ake klak kuntuk kaimung kweikwei pa, men ake mpa il okipma pa.
MAR 7:5 Tu melnum a arpmen yangkipm yiprokgen a Moses nampokgen tu melnum a aroaro wonel tu yangkipm a Moses tu asen Sisas, “Antokg kolai atom tu watnom a kitn aroaro wonel pa ake katnun angklonake a tu mamikgmamin mansan ai? Ake tu klak wam kimpilp alntu ti atom tu ak al.”
MAR 7:6 Sisas kil lanaken la, “Aisaia, melnum ok wripm pekg ep ak ai, kil la yangkipm ute aklale. Kil la yangkipm pa kul kunturng kipm ti yat. Kil pekg la kolpa, 'Kipm melnum a kansil, kipm ngkat nang akupmen ak num enen ti kolti. Ipmanikg akipmen pa itna watinet eng kupm.
MAR 7:7 Kipm kaling planten kweikwei angklonake a tu mamikgmamin mansan pa kipm lala, “Kil pa kweikwei a Maur Wailen am pake.” Pa kipm kapor kilko aleinsopm kalpmilel, kipm ale mining kolti.'
MAR 7:8 Aisaia kil pekg la yangkipm pa kul kunturng kipm ti. Kipm talpulng yangkipm a Maur Wailen. Kipm arkul titnongket kweikwei a mamikgmamin mansan plantepm itna kanokg a ti.”
MAR 7:9 Wa Sisas wa lanaken kolpa kai la, “Kipm pa awi ariwe wor pake, atom kipm angkom nalokgen ok a Maur Wailen eng katnun kweikwei a mamikgmamin mansan alkipmen pake!
MAR 7:10 Pekg Moses kil la, 'Kitn orngwatneikgen mansan alkitn!' Wa kil la, 'Melnum ur la paipmel mansan alkilen pa, mpa orel imo.'
MAR 7:11 Ari kol wa kipm melnum a arpmen yangkipm yiprokgen a Moses a kipm melnum a ikgalen wrkapm a Moses, kipm ti wa lala, 'Kol melnum ur a antiwe marpm a kweikwei a angklin mansan alkilen, pake kil lanaken la, “Kupm aknamput Maur Wailen ike. Ti akentiwe mpa kupm lkepm.”'
MAR 7:12 Angklonake alkipmen pa titnongket paipm, la ampake melnum pa uwi kweikwei a wet kil aknamputen Maur Wailen pa ik ngklin mansan alkil pa, kalpis.
MAR 7:13 Nikgwalpm pa, nikgwalpm a kipm pekg awi a tu mamikgmamin mansan, atom kipm uk yirokg yangkipm a Maur Wailen. Kipm antokg kweikwei watipmen kolpa yat.”
MAR 7:14 Sisas kil wa akwen tu wrong wailet pa antiur, atom kil lanaken la, “Kipm wrongkwail, itning yangkipm ok akupmen kil, ikwonilmpen!
MAR 7:15 Kweikwei a en a melnum kai kawor wunen a melnum pa ake antokg melnum pa kimpilpet, kalpis. Kweikwei a wunen a melnum or kai en pa antokg melnum palng kimpilpet.
MAR 7:16 Melnum a nungkulkg atnewe pa kil itning yangkipm pa riworwor!”
MAR 7:17 Sisas kil atnurng tu wrong kin kipman wailet, a kil kai kawor wan. Atom tu watnom a kil aroaro wonel pa asentel eng yangkipm kla a wuten kil ak la pa.
MAR 7:18 Wa kil lanaken la, “Kipm ti ake wa wontrakole? Ti kipm kol a riwe la, kweikwei wrongkwail a itna kawor en a melnum kawor wunen alkilen pa, pa ake antokg melnum palng kimpilpet.
MAR 7:19 Eng ntei, kweikwei a kolpa ake antiwe mpa kawor nikgwalpm a melnum pa, kalpis. Pa kawor rpma ipmanikg a melnum pa kai aken pain kolti.” Yangkipm pa Sisas lanaken eng la okipma wrongkwail pa wor.
MAR 7:20 Kil wa la or pa kai la, “Kweikwei a rpma wunen a melnum kawor en pa, am antokg melnum palng kimpilpet pake.
MAR 7:21 Ipma paipm a kipm la ntokg, kweikwei numkropis a uk numpaipm kamel, ikgwam, a alm melnum amo pa, pa palng a nikgwalpm pake.
MAR 7:22 Aringkowe, kweikwei paipm paipm auraur, kansil yangkipm ok, melkget, nikgwalpm wleket, la paipmel Maur Wailen, ngkat nang a kil alkil pa, a antokg nikgwalpm titno.
MAR 7:23 Am kweikwei wrongkwail paipm pa rpma kawor wunen a melnum or en pa antokg melnum pa palng kimpilpet paipm.”
MAR 7:24 Sisas wrekg atnurng anong pa, a kil kai anong kanokg a anong wail Tair a Saiton. Atom kil kawor wan ur pa la kil a rpme. Kil karken la ake mpa mla ur riwel a kil kawor rpma wan pa. Pake ake antiwe mpa kil rpmi am pa, kalpis.
MAR 7:25 Kin ur pa atning yangkipm a la Sisas kil kul rpma. Kin pa warim kin alkil pa pati maur paipm kimpilpet arpmewel. Kin pa atatu kul kapor kilko alein wreren nepm a Sisas.
MAR 7:26 Kin pa pati kil a ak ok Krik. Pa ok ur alntuwen. A anong yiprokg alkil pa Ponisia a itna kai anong kanokg a Siria. Kil la unsa unsa la Sisas kil ungkwan maur paipm a rpma kai warim kin alkil pa kai tukulelkg.
MAR 7:27 Sisas kil akalmpe ak yangkipm kla kolpa, “Mentepm uk okipma tu warim tipen. Pa ake wor eng mentepm awi okipma a tu warim pa uk nimpa pa al.” Warim pa la tu a Suta, nimpa pa la tu a ake a Suta pa.
MAR 7:28 Ari kin pa akalmpe ok a Sisas pa kolpa la, “Wailen, kitn la aklale. Pake ipin ipran a tu warim al angko kinar kanokg pa, mpa tu nimpa pa il pake.”
MAR 7:29 Sisas kil lanakel la, “Yangkipm ok a wuten kitn la pa wor pake, ti kitn yaper kai o! Maur paipm am kai takwlelkgen warim kin a kitn pa ike.”
MAR 7:30 Kil atning pa atom kil yaper kai wan alkilen pa ari warim alkilen a okg rmpa wrik pa rmpa. Maur paipm am atnurngkel ike.
MAR 7:31 Sisas atnurng anong kanokg a anong wail Tair pa, a kai or anong wail Saiton, wa kil or pa kai anong kanokg Tekapolis pa wa kil wa or pa kai palng kai ukupuk Kalili.
MAR 7:32 Tu aye melnum ur a nungkulkg titnowen a ok mise, aye kul eng Sisas. Tu lanaki Sisas la kil elng wam elewel, oklala niki Maur Wailen eng ik ngklin melnum pa.
MAR 7:33 Atom Sisas kil awiyel aye kai itna kai laikge, takwlelkgen wulmpa a tu wrong kin kipman pa. Sisas elng wamipis pa elngkawor nungkulkg a melnum pa. Kil ungkwa wlikg pa, elng wam itna ok milip alkil pa.
MAR 7:34 Sisas kil ikg kaino kitnong pa, kil arein la kolpa, “Epata”, pa ok a Sisas ak lala, “Wor o!”
MAR 7:35 Nungkulkg a melnum pa am palng wor ike. Ok milip a kalkut pa am palng kukula wor ike, kil ak la ok yangkipm ariworwor ike.
MAR 7:36 Atom Sisas angkengken titnongket, eng ake mpa tu niki melnum ur eng kweikwei pa. Kil angkengken titnongket, pake akentiwe. Tu la kolpa aye kai naki tu wrongkwail.
MAR 7:37 Tu wrekg paipm wrisen atom tu la, “Kweikwei wrongkwail a kil antokg pa palng wor kolti. Kil antokg tu nungkulkg titnowen pa palng wor atning yangkipm ok, tu a ok mise pa palng wor la yangkipm ok.”
MAR 8:1 Ak wang pa tu wrong wailet wa anel wli rka anti ur. Tu okipma kalpisen, atom Sisas akwe tu watnom alkil a kil aroaro wonel pa kul, atom kil lanaken la,
MAR 8:2 “Kupm arein tu wrong kin kipman pa, eng tu antiwopm rpma kol wang wraur ike, ti tu okipma kalpisen.
MAR 8:3 Kol tu rpmi ik nikg eng kupm la tu kai wan anong alntu pa, pa titnongket a tu mpa kai plalng ngko ya. Eng tu tiur pa angkai anong ya watinet ai wli.”
MAR 8:4 Tu watnom a kil aroaro wonel pa tu akalmpentel ok pa kolpa la, “Mentepm rka wrik mis, mpa mentepm uwi okipma pa kai a i eng uk tu wrong pa il?”
MAR 8:5 Kil asenten la, “Kipm nok tingklak aripm rmpa?” Tu akalmpe la, “Wampwomis wampwompwekg.”
MAR 8:6 Atom kil lanaki tu wrong kin kipman pa la, “Kipm rpmi kanokg ti!” Kil awi nok tingklak wampwomis wampwompwekg pa, uk wor Maur Wailen. Atom kil kapor uk tu watnom alkil pa, eng la tu mpreing uk tu wrong kin kipman. Atom tu antokg katila ok a Sisas kil la pa.
MAR 8:7 Tu aye yul waseksek tiur pa aye kul elngkirmpa. Atom Sisas kil awi yul pa uk wor Maur Wailen pa plalng, pa kil wa lanaki tu watnom alkil pa tu wa awi ampreing uk tu pa.
MAR 8:8 Tu al nikgwor plalng. Tu narein okipma umpu umpu tiur a itna pa, alupm kai nimong pa, palng kol nimong wampwomis wampwompwekg.
MAR 8:9 Tu wrong kin kipman a wet al nikgwor pa wailet paipm kamel kamel (4,000). Tu al plalng, Sisas kil lanaken la tu kai.
MAR 8:10 Aktatu kolti kil kai kawor rpma nim ukupuken nampokgen tu watnom alkil pa, tu angket ukupuk pa kai anong kanokg a Talmanuta.
MAR 8:11 Tu melnum a arpmen yangkipm yiprokgen a pekg Maur Wailen uk Moses tu kul la nti Sisas ik yangkipm rapon. Tu la kil elng kla ur itni ik plan titnongket a Maur Wailen eng tu ri. Tu alm ipmawel kolti.
MAR 8:12 Sisas kil arkolng la, “Wi, antokg kolai eng kipm wrong kin kipman ak wang ti kipm la kupm elng kla ur elng itni ik plan titnongket a Maur Wailen eng kipm ri? Kupm lanakepm aklale wrisen: ake antiwe mpa kupm elng kla ur itni eng kipm a ak wang ti ri. Kalpis wrisen.”
MAR 8:13 Kil atnurngken, kil yaper kaino nim ukupuken pa anti tu watnom alkil a kil aroaro wonel pa, angket ukupuk pa la kai wompel ai.
MAR 8:14 Tu watnom a Sisas kil aroaro wonel pa tu woniketen, atom ake tu aye nok tingklak watipmen ur nakur num. Tu pa nok tingklak wris ata kolti rmpa nim ukupuken pa.
MAR 8:15 Sisas la yangkipm titnongket karkurng tu kolpa, “Kipm itn riwe ngkirk tukwleikgen nikgwalpm a Erot a nikgwalpm a tu melnum a arpmen yangkipm yiprokgen a Moses: tu pa kansil plan ak num enen ti kolti, pa kol mpim ap mringen a ak oren kai or arpme nok ti plalng, atom angki wail.”
MAR 8:16 Tu asen tu alntu ti la, “Mentepm ti nok tingklak kalpis, atom kil la kolpa, aki?”
MAR 8:17 Sisas kil ariwe, tu asen tita eng nok tingklak pa, atom kil lanaken, “Kipm akor la nok tingklak pa kolpa, eng kipm ti nok tingklak kalpisen? Ai, kipm ti nikgwalpm kalpisen? Ipmanikg a kipm ti ake wontrakole!
MAR 8:18 Nungkulkg a wulmpa itnewepm pati kol a kipm itningkri pa. Ari ake kipm atning ari.
MAR 8:19 Ak wang a kupm kapor nok tingklak wampwomis eng tu wrong kin kipman wailet paipm kamel kamel (5,000) pa. Kipm alupm nok tingklak umpu umpu a angko itna pa kai nimong aripm?” Ari tu akalmpe kolpa la, “Men alupm kinar nimong pa wampwam yikak wekg.”
MAR 8:20 “Wa ak wang a kupm kapor nok tingklak wampwomis wampwompwekg pa eng tu wrong kin kipman wailet paipm kamel kamel (4,000) pa, kipm alupm nok tingklak umpu umpu a angko itna pa kai nimong aripm?” Ari tu akalmpe la, “Wampwomis wampwompwekg.”
MAR 8:21 Atom kil asenten la, “Nikgwalpm a kipm ti titnowen apa?”
MAR 8:22 Tu palng kai anong Petsaita pa. Tu aye melnum wulmpa tilmpisen ur pa aye kul eng Sisas. Atom tu lanaki Sisas eng la kil elng wam ele melnum pa.
MAR 8:23 Atom Sisas wamparpme wam a melnum a wulmpa tilmpisen pa. Kil ayewel kai laikge takwlelkgen anong pa. Kil ungkwa wlikg elng kai wulmpa a kil pa, kil elng wam elewel, a kil asentel la, “Kitn ak ari kweikwei ur aki kalpis?”
MAR 8:24 Melnum pa kil ikatnen atom kil la, “Kupm ari melnum tiur pake ake kupm ari klalen pa kalpis, tu ari kolen yo a angkom pa.”
MAR 8:25 Atom wa Sisas wa elng wam ele wulmpa a kil pa antiur. Melnum pa ikatnen titnongket, atom wulmpa a kil pa wor om, atom kil ari kweikwei wrongkwail pa palng klalen om.
MAR 8:26 Sisas lanaki melnum pa la, kil kai kawor rpmi wan alkilen. Ampur kil kai angko wunong kai anong pa.
MAR 8:27 Sisas wrekg nampokgen tu watnom alkil a kil aroaro wonel pa, tu kai tatu anong a anong kanokg Sisaria Pilipai. Kai angko ya pa kil asen tu watnom pa la kolpa la, “Tu wrong kin kipman ti mpa numput kupm ti la mla?”
MAR 8:28 Atom tu lanakel la, “Tu tiur pa la kitn Son a kaluk tu. Tu tiur pa la kitn Elaisa. A tu tiur pa la kitn melnum ok wripm a Maur Wailen pa ur ai.”
MAR 8:29 Sisas kil asenten la, “Kipm alkipm ti mpa kipm la kupm ti la kupm mla?” Pita akalmpe ok a kil pa kolpa la, “Kitn Krais, Maur Wailen kil ukwaweitn nar eng la ikirmpen men wrong kin kipman a itna kanokg a ti.”
MAR 8:30 Sisas angkengken la ampake tu laron yiprokgen a nang alkil pa niki melnum ur pa kalpis.
MAR 8:31 Sisas kil kaling plan tu watnom alkil kolpa, “Warim Kipman a Melnum ikga rki wleket. Tu melnum wailen wailen a tu tukgunakgen a tu ipma krakgen a ak ak kwap eng al wor uk Maur Wailen a tu melnum a aroaro wonel tu yangkipm a Moses pa ikga tu uk yirokg kil pa, a tu ilmpel imo. Wang wraur pa kai plalng pa kil wrekg.”
MAR 8:32 Yangkipm ok pa Sisas kil laron kai palng klalen ariworwor eng tu. Atom Pita kil awi Sisas aye kai laikge eng aklewel eng yangkipm a kil alkil la kil ikga imo.
MAR 8:33 Ari Sisas kil plelng ari tu watnom a kil aroaro wonel pa, kil akle Pita pa kolpa la, “Satan, kitn kul kai yirokg akupmen! Kitn ake katnun nikgwalpm a Maur Wailen, kalpis. Kitn katnun nikgwalpm a melnum kolti.”
MAR 8:34 Atom Sisas kil lanaki tu wrong pa kul antiwel rpma, nampokgen tu watnom a kil aroaro wonel pa, atom kil lanaken, “Kol melnum ur la kul kutnun kupm ti pa, kil mpa elngen a katnun nikgwalpm a kil alkil pa, a kil mpa rki yo okgmangki alkilen pa, atom kil kul kutnuntopm.
MAR 8:35 Kol melnum ur la ikglen num alkil ti pa, pa kil takote amen wor alkil pa ikga kai rpmi paipm yongkyong. Kol melnum ur wampor ngkli kil alkil ti itnen kupm ti a yangkipm wor akupmen pa, pa kil awi yaprekg watin eng rpmi wor ikngklei.
MAR 8:36 Kol melnum ur uwi kweikwei wrongkwail a itna kanokg ti, atom amen wor a kil pa ikga kai paipm. Melnum pa mpa wa kil ik marpm kolai ik rmpen amen wor alkil pa iye kul eng wor kolai?
MAR 8:37 Melnum pa awi kweikwei wrongkwail a itna kanokg ti, akentiwe mpa kweikwei alkilen pa ikirmpen amen wor alkilen pa kalpis.
MAR 8:38 Ak wang ti a tu angkli arkul tita, a antokg paipmpaipm wailet pa, kol kipm num paipm eng laron kupm ti a yangkipm akupmen pa, pa ikga Warim Kipman a Melnum, kil ikga wa num paipm eng laron kipm pa, ikga ik wang a kil nar ik titnongket a nang wailen a Yan alkilen, a wa nimpokgen tu maur akwapel klalen alkilen pa.”
MAR 9:1 Sisas kil lanaken la, “Kupm lanakepm aklale wrisen: kipm tiur a itna ti pa, kipm ikga rki kolpa rki, kipm ri a Maur Wailen ikga itni wailen ikglen kweikwei wrongkwail nimpokgen titnongket. Kipm rki ri pa plalng pipa, kipm imo kaingkai.”
MAR 9:2 Wang wampwomis wampwompwris pa kai plalng pa, Sisas kil awi Pita, Semis a Son pa antiwel kaino rpma kaino wrik nangen ur pa. Atom tunteng rka ak tunteng alntunteng pa. Ak wang pa tunteng ari Sisas pa, numpalk a kil pa palng manet.
MAR 9:3 Apm a kil pa palng tangkoren pupup muinmainet paipm ai, tu melnum alkil a klak klak apm itna kanokg ti pa ake antiwe mpa klak apm tangkoren ur palng rukis tangkoren pupup kolpa.
MAR 9:4 Atom tunteng watnom a Sisas aroaro wonel pa, tunteng ari Elaisa a Moses palng la ok yangkipm nampokgen Sisas.
MAR 9:5 Atom Pita lanaki Sisas, “Melnum a aroaro wonel men, mentepm rka ti pa wor! Mpa minto ngkam pilmpal pa wraur, ur eng kitn ur eng Moses, ur eng Elaisa.”
MAR 9:6 Tunteng ngkark paipm, atom ari Pita kil akwekgel yangkipm ok a wuten kil la pa.
MAR 9:7 Waipmunu kul ak auren ak mrangkum alkilen. Ok a la angkaino waipmunu pa nar la, “Kil pa Warim Kipman akupmen, kupm plan ipma wor wasrongentel. Yangkipm a kil la pa kipm itning!”
MAR 9:8 Penterngen kolti tunteng ikgen yela, ari ake tunteng ari melnum ur kalpis. Sisas wris ata kolti itna.
MAR 9:9 Tunteng atnurng tipmning pa nar pa, Sisas kil alken yangkipm pa la, “Ampur kipmteng lanaki melnum ur eng kweikwei a wuten kipmteng ari pa. Rpmi nikgwalpm alkipmtengen pa i i, Warim Kipman a Melnum pa kil wrekg i kirk a tu u mlaminel pa or plalng pipa, kipmteng laron.”
MAR 9:10 Yangkipm pa rpma tunteng altunteng ti kolti. Tunteng asen tita akor lala, “Kil wrekg i kirk pa no pa kil la kolai?”
MAR 9:11 Atom tunteng asen Sisas eng yangkipm pa, “Antokg kolai eng tu melnum a aroaro wonel tu yangkipm a Moses pa la Elaisa ikga ep nar pa? Wa melnum a Maur Wailen ukwa pa ikga nar kutnukg?”
MAR 9:12 Sisas kil akalmpe kolpa, “Pa aklale, Elaisa ikga nar ep eng ntokg kweikwei a paipm ikga palng wor. Pake kipm ikwonilmpen yangkipm ok a ela wrkapm a Maur Wailen pa. Kil la Warim Kipman a Melnum ikga rki kalkuten watipmen, ikga tu la paipmel kil pa.
MAR 9:13 Ari kil kupm lanakepm aklale: Elaisa am palng ike. Ti tu antokgtel paipm ak wasrongen alntu kolti, kolen wrkapm a Maur Wailen kil la.”
MAR 9:14 Sisas nampokgen watnom wraur a kil aroaro wonel pa atnurng wrik nangen pa nar pa, tunteng ari tu wrong wailet kapringen tu watnom wampwomis wampwompwikgwikg a Sisas aroaro wonel pa itna. Wa tu melnum a aroaro wonel tu yangkipm a Moses, tu anti tu ak yangkipm rapon alilakel tita itna.
MAR 9:15 Tu wrong kin kipman ari Sisas palng, atom tu wrekg paipm. Tu pirng aktatu kaintel, tu alkel wor.
MAR 9:16 Sisas kil asenten la, “Kipm wet ak yangkipm rapon tita eng la kuina?”
MAR 9:17 Melnum ur a itna kuin a tu pa akalmpe ok a Sisas pa la kolpa, “Kitn melnum a kaling plan men, warim kipman akupmen kil maur paipm ur ampri okel, ti kupm aye kul eng kitn.
MAR 9:18 Ak wang a maur paipm wrekg arpmewel pa, kil ngkrangkel elng kinar kanokg. Ipopm merk pilpil wli okel, pa ok itna tita, num pa titnongket itna tita plalng. Ti kupm la tu watnom a kitn aroaro wonel pa ungkwan maur paipm pa tukulelkgtel, ari tu ake antiwe.”
MAR 9:19 Sisas kil lanaken la, “Antokg kolai kipm wrong kin kipman ak wang ti, ake kipm ukipma! Wang na tukwok pekg kupm antiwepm rpma ti rpma? Mining paipmtopm eng kipm pake. Kipm iyentopm warim kipman pa kul ri!”
MAR 9:20 Tu aye warim kipman pa kul eng Sisas. Maur paipm am ari Sisas ike. Atom laik ngkrang warim kipman pa paipm. Atom kil angko kinar kanokg pa tilntul raing raing kapring kapring, ipopm merk pa pilpil wli okel rmpa.
MAR 9:21 Sisas kil asen yan pa la kolpa la, “Ak wang na kil palng kolpa?” Ari kil akalmpe la, “Pekg ak a paipmen ai.
MAR 9:22 Maur paipm am antokgtel kolngkolpake. Angkliwel elng kai wakg, a elng kinar u, la orel imo. Kol kitn ntiwe pipa, mpa kitn reinso a ngklinso!”
MAR 9:23 Sisas kil lanakel la, “Ampur kitn la kupm akentiwe pa! Kol kitn ukipma pa Maur Wailen antiwe angklinseitn kweikwei wrongkwail pa.”
MAR 9:24 Ari yan a warim pa kirkar akwe la kolpa, “Kupm ukipma pake, kupm akentiwe. Mpa kitn ngklinsopm kol a wai!”
MAR 9:25 Sisas kil ari tu wrong tiur wa atatu wli wli tipen, kolpa atom kil akle maur paipm kimpilpet pa la kolpa la, “Kitn maur paipm a ok mise a nungkulkg titnowen, kupm lanakeitn la, kitn kai tukulelkg warim pa! Ikgake kitn kawor rpmewel nti ur!”
MAR 9:26 Maur paipm pa kirkar paipm, angkli warim kipman pa elng kinar nepm ai, plalng pipa, kil or ngkark kai. Ti warim pa num lpmaake rmpa, ari katiwen melnum yipmiri rmpa pa. Atom tu wrongkwail lala kil am amo ike.
MAR 9:27 Sisas kil wamparpme wam a warim kipman pa ayewel wrekg itna kwa pa.
MAR 9:28 Sisas kil kawor wan pa atom, tu watnom a kil aroaro wonel pa asentel ampen la, “Antokg kolai, atom ake antiwe men ti ungkwan maur paipm pa kai takwlelkg?”
MAR 9:29 Sisas kil akalmpe la, “Kweikwei wrongkwail pa ake antiwe. Akwen Maur Wailen wris ata pa antiwe mpa ungkwan maur paipm pa kai tukulelkg.”
MAR 9:30 Sisas nampokgen tu watnom a kil aroaro wonel pa atnurng anong kanokg pa angkom kolpa yaper kul nar anong kanokg Kalili. Kil karken la ake mpa mla ur riwe wrik a kil kaiye pa.
MAR 9:31 Eng ntei, kil a iro wonel tu watnom alkil eng yangkipm a Maur Wailen. Kil lanaken kolpa, “Warim Kipman a Melnum ikga elng kai wam a tu melnum, ikga ilmpel imo. Ikga wang wraur pa kai plalng pipa, kil wa wrekg.”
MAR 9:32 Ari ake tu atning kuina ur a kil la pa la kil la kolai. Tu wa ngkark la, mpa mla isen pa.
MAR 9:33 Tu angkom kolpa kul nar palng anong Kaperneam. Atom tu kai rka wan ur pa. Sisas kil asen tu melnum alkilen pa la, “Kipm wet alilakel tita kuina tatu ya pa?”
MAR 9:34 Mpa wa tu uwi yangkipm kai a i eng ikilmpe ok a Sisas pa. Eng ntei, tatu ya pa wuten tu anel alilakel tita la, mla a i mpa itni wailen.
MAR 9:35 Sisas angko rpma, atom kil lanaken la tu kul rki wris eng kil laniken yangkipm. Kil la, “Melnum mla ur kil a itni ep pa kil mpa kai itni kutnukg eng ngklin tu wrongkwail.”
MAR 9:36 Atom kil awi warim ur pa aye kai elngkitna kuin a tu pa. Atom kil ngkat warim pa aye itna, atom kil lanaken la,
MAR 9:37 ”Mla ur kil itopen uwi warim ur kolkil ikyakur iye kai wan atnen a kil ukipma kupm pa, pa kil atopen awi kupm ti akyakuropm aye kai wan. Wa mla ur itopen awi kupm ti pa, pa ake wa atopen awi kupm alkupm wris ti pa, pa wa kil atopen awi melnum a ukwawopm nar pa atom akyakurel aye kai wan.”
MAR 9:38 Son kil lanaki Sisas kolpa, “Melnum a aroaro wonel men, men ari melnum ur naren kitn ti atom ak ungkwan maur paipm. Atom men angkengkel la kil elngen kwap pa, eng kil pa ake ak kwap nampokgen mentepm ti.”
MAR 9:39 Sisas kil lanaken la, “Ampur kipm angkengkel. Kol melnum ur naren kupm ti atom ntokg kweikwei ik plan titnongket a Maur Wailen pa, pa kil ikgake wa la paipmel kupm ti penterngen pa.
MAR 9:40 Melnum a ake awi wrongmanto lan mentepm pa, pa kil melnum wor a mentepmen.
MAR 9:41 Kol melnum ur naren kupm Krais ti atom lkepm u il pa eng kipm pa akupmen pa, kupm lanakepm aklale la, ikga Maur Wailen kil ikilmpe nikgwalpm wor a melnum pa antokg eng kipm pa kutnukg.”
MAR 9:42 “Kol melnum ur ningkail warim ur a ukipma kupm pa kil ngko pa, kol a tu yipo wes wail ur ai rpmi mengkel melnum pa tulpul ngkli elng kinar unokg kuin ai pa pati wor pake.
MAR 9:43 Kol wam wompel alkitnen pa rkolngkeitn iye kai ngko eng ntokg paipmpaipm pa, wangket ngkli kai ai. Kitn ngkiten wam wompel wris pa iye itni kolti eng mpa kitn uwi yaprekg watin a Maur Wailen atom ikga kaino rpmi wor yongkyong kaino anong wor, pa kol a wor. Kol kitn iye wam wekgenen pa itni pa, ikga iyeweitn kinar anong paipm a wakg naruk itna yongkyong. [
MAR 9:44 Wilm a al melnum pa ikgake imo, a wakg pa ikgake ime, ikga itni ikngklei wang.]
MAR 9:45 Kol nepm wompel alkitnen pa rkolngkeitn iye kai la kitn ntokg paipmpaipm pa, utnurng ya wor akupmen pa, pa wor eng kol a kitn wangket nepm wompel pa ngkli. Kitn ngkiten nepm wompel wris pa iye itni eng mpa kitn uwi yaprekg watin a Maur Wailen atom ikga kaino rpmi wor ikngklei wang kaino anong wor. Kol kitn iye nepm wekgenen pa itni pa, mpa tu ngkliweitn elng kai anong paipm. [
MAR 9:46 Wilm a al melnum pa ikga ake imo, a wakg pa ikga ake imo, ikga itni ikngklei wang.]
MAR 9:47 Kol wulmpa wompel akitnen pa rkolngkeitn iye kai ngko eng ntokg paipmpaipm pa, pa kol a wor eng inen wulmpa wompel ur pa ngkli. Kitn iye wulmpa wompel wris ita pa itni eng mpa kitn elng Maur Wailen itni wailen ikglen nol nikgwalpm akitnen atom ikga kitn kaino anong wor alkilen. Kol wulmpa wekg akitnen pa itni pa, ikga tu ngkliweitn elng kinar anong paipm pa.
MAR 9:48 Wilm a al melnum pa ikga ake imo, a wakg pa ikga ake imo, ikga itni ikngklei wang.
MAR 9:49 Kalkuten a palng kai kipm wris wris pa, kol wakg alepm eng kipm ikga palng kleset wor kol nokg.
MAR 9:50 Nokg pa wor pake, kol kleset a nokg pa kai kupuk pa, mpa kipm ntokg kolai eng nokg pa palng kleset nti ur pa? Nokg a itna num a kipm pa ampur kai plalng! Kolpa ti kipm rpmi riworwor, uk ipma wor eng tita!”
MAR 10:1 Sisas wrekg atnurng anong kanokg pa nar anong kanokg a Sutia, atom angket u kop Sotan pa kai wompel ai. Tu wrong wailet wa anel wli wli kapringentel antiur. Kil lanaken yangkipm a Maur Wailen kol a kil lala pa.
MAR 10:2 Tu tiur a tu melnum a arpmen yangkipm yiprokgen a Moses tu kul eng Sisas, tu la ilmpel nikgwalpm. Atom tu asentel la, “Kitn laniko, yangkipm titnongket amentepmen pa la kolai la mentepm ungkwan kin aki kalpis?”
MAR 10:3 Sisas kil akalmpe ok a tu pa kolpa la, “Yangkipm pekg Moses kil lanakepm kolai eng la kipm kutnun?”
MAR 10:4 Tu akalmpe kolpa la, “Moses awi wor eng tu la tu nira wrkapm wompel eng ik ngketen kin pa a ungkwan kin pa kai.”
MAR 10:5 Sisas lanaken la, “Pekg tu antokg melkget kol pa atom Moses kil anti a kil nira wrkapm wompel pa eng ik ngketen kin pa.
MAR 10:6 Pekg ep pa Maur Wailen kil ake awi wor eng pa. Pekg ak wang ep pa Maur Wailen kil antokg kweikwei wrongkwail, kil antokg melnum kolen kin a kipman.
MAR 10:7 Kolpa atom kipman pa mpa utnurng mansan alkil pa kai rpmi wris nimpokgen kin alkilen pa,
MAR 10:8 mpa tuwekg palng kol num wris. Tuwekg ake wa itna kol melnum wekg, kalpis om. Tuwekg am palng kol num wris ike.
MAR 10:9 Kolpa ti ake antiwe mpa kipm ngketen kweikwei ur a Maur Wailen aye kai itna wris pa, kalpis om.”
MAR 10:10 Tu oklala plalng pa, Sisas a tu watnom a kil aroaro wonel pa yaper kawor rpma wan pa, tu watnom pa asen Sisas eng oklala wet kil la pa.
MAR 10:11 Kil akalmpe la kolkil, “Kol melnum ur ungkwan kin alkil pa atom uwi kin ur manet ai pa, kipman pa kil antokg paipm kai kin alkil eng angketen rpma alntuwekgen pa.
MAR 10:12 Am kol pake, kol kin ur pa utnuurng kipman alkil atom uwi kipman manet ur ai pa, kin pa antokg paipm kai kipman alkil eng angketen rpma alntuwekgen pa.”
MAR 10:13 Tu aye warim tiur pa aye kul eng Sisas la kil elng wam elewen a oklala niki Maur Wailen eng ngklin tu pa, ari tu watnom a alkil pa aklewen.
MAR 10:14 Sisas ari pa, kil nikgwalpm wakget eng tu watnom alkil pa, atom kil la kolpa la, “Elng tu pa kul eng kupm, ampur angkengken. Maur Wailen am ikgalen nol nikgwalpm a tu melnum a kolen tu warim yekyek tike.
MAR 10:15 Kupm lanakepm aklale, mla ur ake elng Maur Wailen pa itni wailen ikglen nol nikgwalpm akilen pa kol tu warim antokg pa, pa akentiwe mpa kil kawor yipmingki wunen a Maur Wailen pa, kalpis wrisen.”
MAR 10:16 Atom Sisas kil ak wam ti aloken aye kul rpma kimang alkilen ti, a kil elng wam pa kai ele tu pa oklala naki Maur Wailen pa la kil plan ipma wor ngklin tu warim pa.
MAR 10:17 Sisas wrekg angkom kai pa, melnum ur pa pirng kai akoporel kai kapor kilko aleinsel a asentel la, “Melnum wor a aroaro wonelo, mpa kupm ntokg kolai eng uwi yaprekg watin atom ikga kupm rpmi wor ikngklei wang pa?”
MAR 10:18 Sisas kil akalmpewel la, “Kitn la kupm ti melnum wor kolai? Ake melnum ur wor kol Maur Wailen kil alkil ai.
MAR 10:19 Yangkipm titnongket kil pekg Maur Wailen alkepm la kipm kutnun pa, kitn am ariwe ike, la: ampur alm melnum amo, ampur angkli arkul tita, ampur ak ikgwam, ampur kansil lakati melnum ur, ampur kansil yangkipm eng awi kweikwei a melnum ur kalpmilel, orngwatneikgen mansan.”
MAR 10:20 Ari melnum pa la, “Melnum a kaling planto, pekg ak a kupm warimpen ai kulngkul kul wang ti pa, kupm atning katnun yangkipm titnongket a kitn la pa.”
MAR 10:21 Sisas kil ariwel kolpa, kil plan ipma wor wasrongentel, kil la, “Kitn tukwok eng kweiur wris ur a pa. Kitn kai la eng tu rmpenteitn apm nung kweikwei alkitn pa plalng pipa, mpreing uk tu melnum a rpma tukwok pa. Atom kitn kul kutnuntopm! Ikga kitn ntiwe kweikwei watipmen kaino kitnong ai.”
MAR 10:22 Melnum pa atning yangkipm pa kolti, kil mining paipmen num, ipma a kil pa kalkut paipm kolti, am kai ike. Eng ntei, kil antiwe kweikwei watipmen.
MAR 10:23 Sisas kil ari tu watnom alkil pa la, “Melnum a antiwe kweikwei watipmen pa wonet paipm eng kil elng Maur Wailen kawor itna wailen ikgalen nol nikgwalpm akilen pa.”
MAR 10:24 Tu watnom alkil pa tu wrekg paipm eng yangkipm a kil la pa. Atom Sisas kil wa lanaken la, “Kipm warim alkupmen. Melnum la elng Maur Wailen kawor itni wailen ikglen nol nikgwalpm akilen pa wonet paipm.
MAR 10:25 Kol ling pa la or tawong a ikyom a ak angkut apm pa kawor pa, ake aken kwap kol melnum a antiwe kweikwei watipmen la elng Maur Wailen kawor itni wailen ikglen nol nikgwalpm akilen, pa aken kwap paipm.”
MAR 10:26 Tu watnom alkilen pa tu wrekg paipm arkolng anel asen tita la, “Woi, ti mla a i antiwe mpa uwi yaprekg watin atom ikga kil rpmi ikngklei wang pa!”
MAR 10:27 Sisas ariwen kolpa atom kil lanaken la, “Melnum pa ake antiwe, Maur Wailen pa kil antiwe pake. Maur Wailen pa kil antiwe antokg kweikwei wrongkwail.”
MAR 10:28 Pita lanakel la, “Ti antokg kolai men ti, men pekg atnurng kweikwei wrongkwail ike, men am katnunteitn itna tike?”
MAR 10:29 Sisas akalmpe ok a tu pa la, “Kupm lanakepm aklale wrisen la, melnum a atnurng wan anong alkilen, a tu wail wail wusok wusok, a muikgmayen, mansan, warim, wringkya alkilen eng la ikwap akupmen ngkli yangkipm wor a Maur Wailen pa,
MAR 10:30 ikga ik wang a kil rpmi ti i pa, Maur Wailen kil lkel wail wail, wusok wusok, muikgmayen, mansan, warim, wan anong, wringkya kweikwei watipmen. Pa ikga Maur Wailen kil ikilmpentel ngko angen. Ikga wa kil uwi kalkuten nampokgen kweikwei wor pa, kol tu melnum tiur ikga or ungkwan ntokg paipmel kil. Wa kil uwi yaprekg watin atom ikga ik wang kutnukg pa kil ikga rpmi wor lantlan kaino anong wor.
MAR 10:31 Pake tu watipmen a itna ep pa, tu ikga kai itni kutnukg. Tu a itna katnukg pa, tu ikga kai itni ep.”
MAR 10:32 Tu angkom tatu ya pa kai eng la kaino anong wail Serusalem. Sisas kil epten, a tu watnom a kil aroaro wonel pa tu katnuntel, tu akwonalmpen watipmen. Tu wrong tiur a katnunten pa, tu ngkark paipm. Sisas awi tu watnom wampwam yikakwompwekg alkil pa aloken aye kai or kai ya yamping, kil lanaken kweikwei ikga palngtel pa.
MAR 10:33 Kil lanaken la, “Kipm itning, mentepm mpa kinar atom kai kaino anong wail Serusalem. Warim Kipman a Melnum ikga elng kai wam a tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses pa. Ikga tu ntokg yangkipm eng ilmpel imo, plalng pa, tu elng kil kai wam a tu a ake Suta pa.
MAR 10:34 Ikga tu iknokgelel paipm, ungkwawel wlikg, orel ilmpel imo, pake ikga wang wraur pa kai plalng pipa, wa kil wa wrekg.”
MAR 10:35 Atom Semis ekg Son, warim wekg a Sepeti, tuwekg kul wreren Sisas atom asentel la, “Melnum a kaling plan men, mentekg la kitn ntokgto kweiur a mentekg wasrongen kil aki?”
MAR 10:36 Sisas kil asenten la, “Kipmekg wasrongen kuina, la kupm ntokgtepm?”
MAR 10:37 Tuwekg akalmpe la, “Kitn elng mentekg ti ur rpmi wam wi, ur rpmi wam wangkokg nti kitn rpmi ik wang a titnongket a nang wailen akitnen palng ngko wunong.”
MAR 10:38 Sisas akalmpe la, “Kipmekg titnowen! Ake kipmekg akwonalmpen yangkipm a kipmekg la pa. Ti antiwe mpa kipmekg il u kai kaimung kol mpa kupm il aki, mpa kipmekg kurkuk ik u kol mpa tu kulukopm ti?”
MAR 10:39 Tuwekg akalmpe la, “Mentekg antiwe.” Sisas lanaken la, “Kipmekg il u ngko kaimung kol mpa kupm ile pa, wa kipmekg kurkuk ik u kol mpa tu ik kulukopm pa.
MAR 10:40 Pake pa ake kweikwei akupmen ti eng mpa kupm la mla ur ikga rpmi wam wi a wam wangkokg akupmen ti. Pa kweikwei a Maur Wailen alkil ai ikga la pa.”
MAR 10:41 Tu watnom wampwam pa atning yangkipm a tuwekg Semis ekg Son la pa, tu nikgwalpm wakget eng tuwekg pa.
MAR 10:42 Sisas akwewen la tu kul wrerentel eng kil la laniken yangkipm ok ur, “Kipm ariwe, tu melnum a itna kol melnum tukgunakg a ikgalen tu wrong kin kipman, tu ngkat tulntu itna ep, tu arku tu wrongkwail. Tu melnum wail wail pa tu ikgalen tu wrongkwail ak titnongket kalnten alntuwen.
MAR 10:43 Pake nikgwalpm kolpa ampake rpmi kipm pa. Kitn mla ur kitn a itni wailen eng kipm pa, mpa kitn iken kwap kipm kimeket.
MAR 10:44 Kitn mla ur kitn la itni ep eng kipm pa, mpa kitn iken kwap orngwatneikgen kipm kimeket.
MAR 10:45 Eng ntei, Warim Kipman a Melnum pa yat pekg ake nar eng la kipm pa ngklin kil ti pa kalpis. Kil pekg nar eng kil la ngklin kipm pa. Wa kil la uk num alkil ti kai imo eng la ikirmpen kipm wrongkwail.”
MAR 10:46 Sisas nampokgen tu watnom a kil aroaro wonel pa nar palng anong Seriko. Sisas anti tu watnom alkilen pa la utnurng anong pa atom tu wrong kin kipman wailet wa katnunten. Tu atnurng Seriko pa tu kul angko ya pa, melnum ur a wulmpa tilmpisen pa rpma ya yamping pa. Melnum pa Partimaios, warim a Timias. Kil rpma asen asen tu wrongkwail la tu lkel lkel kweikwei.
MAR 10:47 Kil atning tu la Sisas a Nasaret wli pake, atom kil akwe ak ok wail la, “Sisas, kitn yipetatnong a Tepit, kitn reinsopm!”
MAR 10:48 Tu wrong wailet kilkampen kolpa la, “Kitn yipo ok pa!” Pake ake kil atning a tu angkengkel pa, kalpis. Kil akwe ak ok wail yikakatnen, “Yipetatnong a Tepit, kitn reinsopm!”
MAR 10:49 Sisas kil atning ok a akwe pa, atom kil itna la, “Kipm lanikel eng kil kul!” Atom tu akwe melnum wulmpa tilmpisen pa la, “Ampur kitn ipma kalkuten! Kitn wrekg o! Kil akweweitn pake!”
MAR 10:50 Atom kil angkli apm alkil a wropuk pa elng kai kanokg ai, kil wrekg kolti kai eng Sisas.
MAR 10:51 Sisas asentel la, “Kitn wasrongen kuina la kupm ntokgteitn?” Melnum a wulmpa maur amo pa la, “Ntokgtopm wulmpa a kupm a tilmpis ti palng wor, eng kupm a ik ri kweikwei!”
MAR 10:52 Sisas lanakel la, “Kitn kai o! Nol nikgwalpm akitnen pa rka eng kupm pa atom antokg kitn palng wor.” Penterngen kolti wulmpa a melnum pa am wor ike. Atom kil anti tu katnun Sisas.
MAR 11:1 Tu kul no wreren anong wail Serusalem pa no angko Petpake a Petani, anong wasek wekg a ela wreren wrik nangen Olip. Sisas ukwa watnom wekg a kil aroaro wonel pa kai ep.
MAR 11:2 Kil lanaken la, “Kipmekg kaino anong a kipmekg ari wreren pawo! Kipmekg kaino anong pa, mpa kipmekg ri nimpa nepm kuinen warimpen a ake melnum ur arpme arpme pa, tu angkuten itna yo wang a pa. Inelkgentopm nimpa nepm kuinen pa, atom iye nar eng kupm rpme!
MAR 11:3 Mla ur la isentepm la, 'Kipmekg anelkgen nimpa nepm kuinen pa la ik ntokg kuina?' pipa, kipmekg lanikel kolpa, 'Melnum Wailen ai kil la uwi nimpa nepm kuinen eng ik ik kwap ur alkil ai, plalng pipa, wa kil penterng ukwanteitn no pa!'”
MAR 11:4 Tuwekg kawor ari nimpa nepm kuinen warimpen pa a tu angkuten itna yo wang a wanyun enen pa, atom tuwekg anelkgentel.
MAR 11:5 Tu melnum tiur a rka anong pa asenten kolpa la, “Kipmekg anelkgen nimpa nepm kuinen pa eng ntei?”
MAR 11:6 Tuwekg lanaken yangkipm ok a wuten Sisas kil lanaken pa. Tu atning atom tu awi wor alken.
MAR 11:7 Kolpa atom tuwekg aye nimpa nepm kuinen warimpen pa aye nar eng Sisas. Atom tuwekg angkli apm pa elng kaino nimpa nepm kuinen pa ukulam, atom Sisas kaino arpme.
MAR 11:8 Tu melnum watipmen anel elng apm alntu pa elngkirmpa ya pa, tu tiur angket yo ipm itna ya yamping pa elngkirmpa ya pa eng Sisas kil arpme nimpa nepm kuinen aye ore.
MAR 11:9 Tu wrong tiur a ep pa, a tu wrong tiur a katnukg pa, tu anel ngkat ok la yikakatnen atopen Sisas pa la, “Osana, Maur Wailen, men atopenteitn! Kitn plan ipma wor ik ngklin melnum ti. Kitn alkel nang Wailen atom kil wli ti.
MAR 11:10 Kitn plan ipma wor ik ngklin melnum tukgunakg a wli ti, kil la wrekg itni wailen ikglen men ti, kol pekg yipetatnong amentepmen Tepit itna wailen ikgalen tu amenen pa. Maur Wailen, men atopenteitn, kitn melnum a rpma kaino kwa ai!”
MAR 11:11 Sisas kil no palng no anong wail Serusalem atom kil kawor yipmingki wunen a yalming a Maur Wailen. Kil ari yela kweikwei wrongkwail pa plalng, ari takgni am kinar nungkurikg plalng tike. Kolpa atom am wa kil nampokgen tu melnum wampwam yikakwompwekg alkil pa yaper kinar anong wasek Petani pa.
MAR 11:12 Tu okg or kong ti pa, tu wrekg atnurng anong Petani ti pa Sisas pa nikgalmpel.
MAR 11:13 Kil ikg kai ari yo kampuk ur a ipm atnen pa itna kai ai. Kil la kai ri la tikga kulok aki tikga tukgun ur rka aki kalpis. Kil kai palng kai yo kampuk yiprokg, pake ake kil ari ok ur rka, ipm kalpmilel kolti, eng ntei, ake wang alkil a ok arke pa.
MAR 11:14 Atom Sisas lanaki yo pa la, “Ikgake mla ur il ok kai kitn pa nti ur!” Tu watnom alkil pa tu atning yangkipm a kil lanaki yo pa.
MAR 11:15 Tu no palng no Serusalem pa, Sisas kil kawor yipmingki wunen a yalming a Maur Wailen. Kil ngkaten eng ungkwan tu a akwap marpm a ak kweikwei awi marpm itna kawor yipmingki wunen pa. Kil taipurng tipmakg a elng marpm elngarmpe eng ak awiye awiye marpm, nampokgen wrik tipmakg a tu melnum a aye wel punum kai armpe eng tu armpenten pa.
MAR 11:16 Kil angkengken la, ake mpa mla ur iye kweikwei ur ngkom or kawor yipmingki wunen a kapringen yalming a Maur Wailen pa.
MAR 11:17 Kil aro wonelen la, “Wrkapm a Maur Wailen pa la kolkil, 'Wan akupmen ti wan a tu wrong a awen wli eng oklala naki naki kupm ti.' Wrkapm a Maur Wailen pa la kol pake, ari kipm antokg wan kil palng paipm kol wrik ampen a tu melnum ikgwampet ak ikgwampel kweikwei wli lam armpe.”
MAR 11:18 Tu tukgunakgen a tu ipma krakgen a ak ak kwap eng al wor uk Maur Wailen nampokgen tu melnum a aroaro wonel tu yangkipm a Moses tu atning pa, atom tu akor ya la ilmpel imo. Pake tu ngkark eng yangkipm a Sisas kil kaling plan pa alm ipma a tu wrongkwail.
MAR 11:19 Ak nungkurikg pa Sisas nampokgen tu watnom alkil pa tu atnurng Serusalem pa kinar.
MAR 11:20 Ak kong Sisas nampokgen tu watnom a kil aroaro wonel pa kai akanele yo kampuk pa, tu ari, yo pa am nungkwor nungen ike kinar yapoko alkil ai.
MAR 11:21 Pita kil won uwen pa atom kil lanaki Sisas pa la, “Melnum a kaling planto, kitn ri! Yo kampuk a pekgkil kitn akle pa am nungkwor nungen ike!”
MAR 11:22 Sisas akalmpenten kolpa la, “Kipm rkul ipma a kipm ukipma Maur Wailen pa itni tongtong!
MAR 11:23 Kupm lanakepm aklale wrisen la, kol melnum ur a ukipma Maur Wailen pa kil laniki tipmining a itna ti la, 'Tipmining, kitn tipor ngko elng kinar unokg pawo!' Kol melnum pa ake nikgwalpm wekg wekg, kil nikgwalpm wris kolti la, 'Yangkipm akupmen kil pa mpa palng iklale', kol kil la kolpa pa, pa mpa palng iklale kol a melnum kil la pa.
MAR 11:24 Kupm lanakepm la, kol kipm oklala niki Maur Wailen atom ukwentel la kil ngklinsepm pa. Kol kipm ukipma la, kipm am awi ike, kil mpa ngklinsepm kitila kol a kipm ukipma pake.
MAR 11:25 Ik wang a kipm itni oklala niki Maur Wailen pa, kipm utnurng paipm a mla ur antokgtepm pa ep, plalng pipa, mpa Yan akipmen kaino kitnong pa mpa wa kil ungkwan paipmpaipm a kipm antokg pa.
MAR 11:26 Kol ake kipm utnurng paipm a mla ur antokgtepm pa, Yan akipmen kaino kitnong pa ampake wa ungkwan paipmpaipm a kipm antokg pa.”
MAR 11:27 Tu yaper kaino Serusalem antiur. Atom Sisas kawor yipmingki wunen a kapringen yalming a Maur Wailen. Tu tukgunakgen a tu ipma krakgen a ak ak kwap eng al wor uk Maur Wailen, tu melnum a aroaro wonel tu yangkipm a Moses nampokgen tu melnum wail wail tu kul eng kil.
MAR 11:28 Tu asentel la, “Pekg kitn asen mla awi wor atom kitn antokg kweikwei pa? Mla alkeitn titnongket atom kitn antokg kweikwei pa?”
MAR 11:29 Ari wa Sisas kil akalmpenten la, “Ti itni eng kupm ik isentepm akasen wris ur kil. Kol kipm ikilmpe akasen akupmen kil pipa, mpa kupm lanikepm titnongket a kupm ak ak kwap pa.
MAR 11:30 Son kil kaluk tu, pekg mla la atom kil kaluk tu pa? Maur Wailen aki melnum? Kipm lanikopm ri!”
MAR 11:31 Atom tu rpma akor la, “Kol mpa mentepm la kolpa, 'Maur Wailen, kil la atom kil kaluk tu', pa mpa kil iklewo la, 'Ti ake kipm ukipma kil?'
MAR 11:32 Aki mentepm la, 'Son pa kil kaluk tu ak nikgwalpm alkilen kolti?'” Pake tu wrong kin kipman a rka pa ukipma la Son pa kil melnum ok wripm a Maur Wailen aklale, kolpa atom tu ngkark,
MAR 11:33 atom tu kansil akalmpe kai Sisas pa la, “Men akwekgel.” Atom wa Sisas lanaken la, “Kupm yat, kupm ake mpa wa lanikepm la mla a i alkopm titnongket atom kupm ak ak kwap kil.”
MAR 12:1 Sisas kil la yangkipm kla ur kolkil naken, “Melnum ur antokg wring ampei wain. Kil ak yipmingki kapringen. Plalng pa, kil aro lkim wail ur pa numprampen elngitna, eng ikga tu rkganti tipon u ampei ok pa kai elng nare. A wa kil wa ale wan kwa ur pa elngitna eng ikga rpmen wring pa rpmewe. Kil antokg kweikwei pa plalng, kil awi melnum tiur ai wli ikgalen akentel wring pa kolpa itna, a kil wrekg kai anong ya watinet ur ai.
MAR 12:2 Wain ok pa tukgun pipa, kil ukwa melnum akwapel ur akilen pa la kil kai ri tu melnum a ikgalentel wring ampei wain pa la uwi wain ok alkilen a aknamputel pa iyentel kai.
MAR 12:3 Ari kalpis, tu arkul melnum a kul awi wain ok pa orel paipm, ungkwantel la kil ngkompwam yaper kai.
MAR 12:4 Wa kil wa la melnum manet ur wa kainten, ari kalpis, tu or melnum pa kai tukgunakg a kil pa paipm, tu ak nokgelel ari paipm.
MAR 12:5 Kil la melnum ur wa kai pa, wa tu orel amo. Wa kil la wrong tiur wa kai pa, wa tu or tiur pa paipm, a tiur pa tu or amo.
MAR 12:6 Kil warim kipman wris ata kolti, ti kil plan ipma wor wasrongentel. Kil la warim kipman alkil pa kai eng plalng pake. Kil la, 'Mpa tu numpaipm eng warim kipman akupmen kil ur pa.'
MAR 12:7 Pake tu melnum a ikgalen wring wain pa naki tita la, 'Melnum pa ikga kil uwi num ngklin kweikwei wrongkwail a yan alkil. Ti kipm kul eng tepm ilmpel imo wo, eng mpa mentepm iye kweikwei akilen ti eng almentepm!'
MAR 12:8 Kolpa atom tu arkulel aye kai wring arkikg ai, tu almpel amo, angkli kawor en takuleikgen yipmingki pa ike.”
MAR 12:9 Sisas la yangkipm kla pa kai plalng pa, kil asen tu a atning rka pa la, “Ti melnum yan a wring ampei wain pa mpa ntokg kolai? Mpa kil kul ilm tu melnum a ak kwap itna wring pa tukuleikg, plalng pa, mpa kil uk wring ampei wain pa kai tu melnum ur manet tiur ai.
MAR 12:10 Kipm ti, ake kipm angkleikg yangkipm wompel a Maur Wailen a nira ela wrkapm pa, pa la kolpa, 'Ong a tu melnum a ale wan pa tu ari la la paipm pa, tu ungkwan, am ong kimpowen wor wrisen a akale wan am pake.
MAR 12:11 Maur Wailen kil alkil antokg pa, atom mentepm ari la pa wor wrisen atom mentepm atopen.'”
MAR 12:12 Tu melnum wail wail a tu Suta pa tu ariwe la Sisas ak yangkipm kla ak la tu pake. Kolpa atom tu la rkulel eng la ntokgtel paipm. Ari tu ngkark eng tu wrong watipmen a itna pa, atom tu atnurngkel kai.
MAR 12:13 Tu ukwa tu melnum tiur a tu melnum a arpmen yangkipm yiprokgen a Moses nimpokgen tu melnum tiur a Erot, tu kai alm ipmawel Sisas eng la kil la oklala ur kai paipm pa, mpa tu iyewel kai ntokg yangkipm.
MAR 12:14 Tu kai eng Sisas pa, tu alkel wor la, “Melnum a kaling plan tu, men ariwe, kitn melnum ute wor a la yangkipm ok aklale. Kitn ari men wrongkwail la men kimeket irir. A kitn ake ngkat nang a melnum wail pa kaino kwa, a kitn ake arku melnum paipm pa kinar kanokg, pa kalpis. Kitn kaling planto ya a Maur Wailen pa ute kolti. Kitn akwonalmpen kolai? Pa wor eng mentepm uk marpm Kaisarus, melnum tukgunakg a Rom a awi marpmel mentepm ti, aki kalpis? Mentepm uk aki ampur mentepm uk?”
MAR 12:15 Pake Sisas kil ariwe la palpa nikgwalpm ampen a tu almpel ipma, atom kil lanaken la, “Kipm almpopm ipma pa kolpa eng ntei? Uwi marpm ur pa iye kul eng kupm ri!”
MAR 12:16 Tu aye marpm ok pa aye kul, atom kil asenten la, “Tukgunakg a nang a mla ela marpm kil?” Tu akalmpe la, “A Kaisarus, melnum tukgunakg a Rom pa.”
MAR 12:17 Atom Sisas lanaken la, “Kweikwei a Kaisarus mpa kipm uk Kaisarus. Kweikwei a Maur Wailen mpa kipm uk Maur Wailen.” Tu atning kolpa, tu akwonalmpen watipmen.
MAR 12:18 Tu melnum Satyusi tiur tu kul eng Sisas. Tu Satyusi pa lala, tu melnum a amo kaingkai pa ikgake wa wrekg wrekg. Tu asen Sisas pa la,
MAR 12:19 ”Melnum a kaling plan yangkipm a Maur Wailen, Moses kil niranto yangkipm ok ur kolkil la: kol melnum nangkworen la imo utnurng kin alkil pa, pa kil warim kalpisen. Meten alkil pa mpam uwi kin karpikg alkil pa eng ngket warim eng ngklin nangkworen alkil pa.
MAR 12:20 Wusokwail wusokwail kulungen tunteng karpo tita kin wris a wailen alntuntengen pa aye. Ep pa nangkworen pa awi kin pa aye ari wa kil amo atnurng kin pa, warim kalpisen itna pa.
MAR 12:21 Pipa wa meten pa wa awi karpikg pa wa aye, am wa kol pake. Kipman pa amo atnurng kin pa, warim kalpisen itna pa. Wangen pa am wa kolpake.
MAR 12:22 Aklale wrisen, ake wris a tu wampwomis wampwompwekg pa angket warim ur eng angklinsen, kalpis. Kolpa kai, kin pa wa amo kai katnunten.
MAR 12:23 Ikga ik wang kutnukg a tu melnum a amo kaingkai pa wa wrekg wrekg, ikga ik wang pa kin pa ikga rpmi eng mla? Pekg tu melnum wampwomis wampwompwekg pa aye pa?”
MAR 12:24 Ari Sisas kil akalmpe la, “Kipm ake ariwe yangkipm ela wrkapm a Maur Wailen la pa. Kipm ake ariwe titnongket a Maur Wailen pa. Kolpa atom kipm la yangkipm ok pa atn palpa.
MAR 12:25 Ikga ik wang a tu melnum a amo kaingkai pa wa wrekg wrekg i kirk pa, pa tu wrong kin kipman ikgake uwi tita, kalpis. Ikga tu rpmi muikgmuin kolti kol tu maur akwapel a Maur Wailen.
MAR 12:26 Yangkipm a la tu melnum a amo kaingkai ikga wa wrekg wrekg pa ake kipm angkleikg wrkapm a Moses, a la wakg al yo wasek pa? Yangkipm pa la Maur Wailen kil lanaki Moses la, 'Kupm Maur Wailen a tunteng Apraam, Aisak, Sekop.' Tunteng ake amo, tunteng kai rpma.
MAR 12:27 Kil Maur Wailen a tu melnum a amo kaingkai rka wai, kil Maur Wailen a mentepm melnum a rka ti. Palpa kipm la yangkipm raimpe tuwa.”
MAR 12:28 Melnum ur a aroaro wonel tu yangkipm a Moses kil kul atning a tu alilakel tita yangkipm ok pa itna. Kil atning Sisas kil akalmpenten yangkipm ok wor wor kolti. Atom wa kil asen Sisas pa la, “Yangkipm titnongket a i a i wail itna ep a la men kutnun pa, a yangkipm titnongket wrongkwail pa kai arkekg?”
MAR 12:29 Sisas kil akalmpe la kolpa la, “Yangkipm titnongket wail a itna ep a la kipm kutnun pa kilke: Kipm Isrel pa, kipm itning! Wailen kil Maur Wailen a mentepmen. Kil wris ata, kil wail itna ep.
MAR 12:30 Kitn mpa plan ipma wor wasrongen Wailen, Maur Wailen alkitnen pa nimpon nol nikgwalpm alkitn, a amen wor alkitn, a ariwe alkitn, a titnongket alkitn ti kimeket.
MAR 12:31 Yangkipm titnongket a kai arkekg yangkipm pa, pa la kolkil: Kitn mpa plan ipma wor wasrongen mla ur ai kol a kitn plan ipma wor wasrongen kitn alkitn pa! Ake yangkipm titnongket ur a la kipm kutnun pa angen yangkipm titnongket wail wekg kil.”
MAR 12:32 Melnum a aroaro wonel tu yangkipm a Moses pa kil lanaki Sisas pa kolpa la, “Melnum a kaling planto yangkipm a Maur Wailen, kitn la aklale. Maur Wailen kil wris ata kil itna ep, ake kuina ur itna ep eng kil pa kalpis.
MAR 12:33 Kol mentepm plan ipma wor wasrongen Maur Wailen nampon nikgwalpm, ariwe, titnongket almentepmen ti. Wa kol mentepm plan ipma wor wasrongen mla ur kol a mentepm plan ipma wor wasrongen mentepm almentepm ti. Kol mentepm ntokg kolpa pa, pa wail itna ep eng kweikwei a mentepm lap alwor uk Maur Wailen, aki yawor a mentepm alm alwor uk Maur Wailen.”
MAR 12:34 Sisas kil atning a melnum pa akalmpe pa ute wor, atom kil lanakel la, “Kitn itna wreren eng kitn a kawor yipmingki wunen a Maur Wailen ikgalen pa.” Ak wang pa tu ngkark, atom ake wa tu asen Sisas pa anti ur.
MAR 12:35 Sisas kil rpma yipmingki wunen a yalming a Maur Wailen pa, kil lanaki tu wrong kin kipman yangkipm a Maur Wailen. Kil asenten la, “Antokg kolai, ti tu melnum a aroaro wonel tu yangkipm a Moses pa tu la Krais, melnum a Maur Wailen ukwa nar pa kil walpopm ur a angket ale a Tepit ti kul tike?
MAR 12:36 Pekg Maur Wor uk nikgwalpm Tepit, atom Tepit kil alkil la kolpa la, 'Wailen kil lanaki Wailen alkupm pa kolpa la, “Kitn rpmi wam wi akupmen pa rpmi i, kupm or tu wrongmanto akitnen pa yikak rkganti mengkel itni orngwatneikgen kitn pa.”'
MAR 12:37 Tepit kil akwe Krais, melnum a Maur Wailen la ukwa nar, la kil Wailen akilen. Ti antokg kolai atom wa kil walpopm a Tepit pa?” Tu wrongkwail tu atopen eng atning yangkipm a Sisas la pa.
MAR 12:38 Sisas kil wa ak yangkipm ok a Maur Wailen pa ak angklinsen anti ur, kil la kolpa la, “Kipm itn riwe eng tu melnum a aroaro wonel tu yangkipm a Moses. Eng ntei, tu wasrongen paipm eng la ining apm watin wail wail eng la ye itn. Tu wasrongen paipm eng la tu yangkipmenten kai akapm wail a tu armpen armpen okipma kweikwei atnewe pa.
MAR 12:39 Tu wasrongen eng la tu a kai rpmi wrik a ela ep kawor wan a tu atning atning yangkipm a Maur Wailen atnewe pa. Wa ak wang a tu antokg okipma pa tu akwonalmpen la tu ti melnum wailen ti kol a tu ik wam rku okipma wailet eng tu pake.
MAR 12:40 Tu ak palk upaar armpwonel tu kin karpikg pa la tu a uwi kweikwei atuwen pa iye kaingkai plalng, wan kalpmilel kolti. Tu akwen Maur Wailen pa arkolng itna watin eng mpa tu ri la tu ti melnum wor. Tu melnum kuin wentingen kolpa ikga tu uwi wleket wail ikilmpe nikgwalpm paipm a tu antokg pa.”
MAR 12:41 Sisas kil rpma wreren yotimpal a tu alupme marpm eng uk Maur Wailen rpma wanyun a wan yalming a Maur Wailen. Kil ikatnen tu aye aye marpm a tu uk Maur Wailen pa aye wli alupm kinar yo timpal pa. Tu melnum watipmen a antiwe marpm pa tu angkli marpm wail wail.
MAR 12:42 Pake kin karpikg ur a rpma tukwok pa kul angkli marpm watet yek wekg pa kolti.
MAR 12:43 Sisas lanaki tu watnom a kil aroaro wonel pa la tu kai wrerentel, atom kil lanaken la, “Kupm lanakepm aklale wrisen, kil kin karpikg a rpma tukwok, pake kil angkli marpm wail elng kinar yotimpal pa angen marpm a tu wrong kin kipman wris wris angkli pa.
MAR 12:44 Tu melnum wrongkwailet pa tu antiwe marpm wailet rmpa, tu angkli tiur kolti elng kinar yotimpal. Pake kin karpikg pa kil tukwok wrisen, pake kil angkli marpm alkil pa plalngten, ake yek ur rmpa eng mpa ikirmpen kuina ur a kil tukwok pa kalpis.”
MAR 13:1 Sisas itna yipmingki wunen a yalming a Maur Wailen pa eng a kul or en pa, watnom ur a kil aroaro wonel pa lanakel la, “Woi, melnum a aroaro wonel men ti, kitn ri yalming wor ti, tu ak wes wail manten manten ak ale!”
MAR 13:2 Sisas akalmpentel kolpa la, “Ei, wan wail wor pa, pake ikgake wes ur itni, kalpis. Ikga tu tikale ngkli plalng.”
MAR 13:3 Sisas kil rpma wrik nangen Olip ikg kai ari yalming a Maur Wailen a ela kai wompel ai. Pita, Semis, Son, Antru, tunteng pa kolti antiwel rpma atom tunteng asentel la,
MAR 13:4 “Kitn laniko la, wang a i ikga yalming a Maur Wailen pa topor pa? Kla kuina ikga palngto ep, atom mpa men riwe la, wang am kul wreren tike?”
MAR 13:5 Atom Sisas kil lanaken yangkipm pa la, “Kipm itn riwe! Melnum ur ikga kinsilepm.
MAR 13:6 Melnum watipmen ikga kul uwi nang akupmen ik la la, 'Kupm ti, kupm Sisas.' Ikga tu kinsil kipm wrongkwailet iye kai ar.
MAR 13:7 Ikga kipm itning yangkipm a tu la tu alm tita, a ikga kipm itning milpming a tu almpwrong la kul wreren pa, ampur kipm ngkark! Eng ntei, kweikwei a kolpa ikgam palng pake, wang a kweikwei wrongkwail ti kai plalng pa a pa.
MAR 13:8 Tu anong ur ai ikga wrekg ilm tu anong ur ai. Tu wrong a mring tukgunakg ompur ai ikga wrekg ilm wrong a mring tukgunakg ompur ai. Yelm ikga no, wang nikg wail paipm ikga palng tutu anong kanokg tiur. Kweikwei pa ikga wleket kol wleket a palng ep kai kin a la raku warim pa.
MAR 13:9 Kipm pa, kipm rpmi riwe! Ikga tu iyewepm kai itni tu mring man alkipm a ikgalen anong pa. Pa tu orepm tutu wan a kipm atning atning yangkipm a Maur Wailen atnewe pa. Pa tu ikwonilmpen la rku nang akupmen. Wa ikga kipm itn ikwap akupmen ti, atom ikga tu iyewepm kai itni wulmpa a tu mring man wail wail, a tu melnum tukgunakg a itna ep. Pa ikga palng kol ya ur eng kipm laron yangkipm wor a la kupm ti niken eng tu itning.
MAR 13:10 Ep pa kipm ngkli yangkipm wor a la kupm ti kai niki tu yela kanokg ti plalng pa, wang a kweikwei wrongkwail ti kai plalng pake.
MAR 13:11 Ik wang a tu uwiyepm iye kai eng ntokg yangkipm pa, ampur kipm nikgwalpm kaikuten la, kipm ikga la kolai pa. Maur Wor a Maur Wailen ikga ngklin nikgwalpm wrongkwail eng kipm ik la yangkipm pa. Eng ntei, ikgake kipm ti laron pa, kalpis. Ikga Maur Wor alkil ai laron ai.
MAR 13:12 Ikg a tu wusok wusok uk wailen alntu kai wam a tu wrongmanto, eng tu ilmpel imo. Tu yantin ikgam ntokg kolpa eng tu warim alntu pake. Tu warim ikgam ilmpor tu mansan alntu pa kolpa yat pake.
MAR 13:13 Kol kipm ukipma kupm pa, ikga tu wrongkwail nikgwalpm wakget eng kipm pa. Pake mlaur a kil itna titnongket kai ngko wang wulompen pa, pa ikga Maur Wailen kil uwiyel.”
MAR 13:14 ”Ikg a kipm ri kweiur paipm wrisen a numkropise kamel pa itni kawor wrik a Maur Wailen amprin eng kil alkil pa. Ti melnum a kil angkleikg yangkipm wrkapm kil a Sisas la pa, kil ikwonilmpen pa riworwor! Kipm ri palng pa, la ampake. Kipm wrong kin kipman a rka anong kanokg a Sutia pa kipm ngkirk kaino nang ai!
MAR 13:15 Kol melnum ur ikga rpmi kawor wan male pa, ampake kil wa kawor wan wunen pa eng uwi uwi kweikwei tiur alkil pa, mpa kil kai or yawel kolti kai!
MAR 13:16 Wa kol melnum ur ikga kai ikwap itni wring alkil pa, ampur kil wa yaper kul uwi apm nung alkil kul anong pa, kalpis, kil i pa kai pake!
MAR 13:17 Arein eng tu kin a itna, a tu mantin a warim rka ma ikga ik wang pa!
MAR 13:18 Kipm laniki Maur Wailen eng kweikwei pa ikgake palng ik wang a u awei pa!
MAR 13:19 Ikg a ik wang pa kipm ikga rki kalkuten wail paipm. Pekg ep Maur Wailen antokg kitnong a kanokg pa, pekg ake kalkuten ur kolpa palng ep kulngkul wang ti, kalpis, a pa, a kutnukg pa ikgake wa kalkuten ur kolpa wa palng.
MAR 13:20 Kol Maur Wailen pa ikgake rukge wang a kalkuten pa kai tukwok pa, tu wrong kin kipman pa ikga kai paipm plalng. Pake kil arein tu wrong kin kipman alkil pa, kolpa atom kil ikga rukge wang pa kul tukwok.
MAR 13:21 Ik wang pa melnum ur la lanikepm la, 'Kipm ri, Krais, melnum a Maur Wailen ukwa nar pa, rpma ti', aki 'Kipm ri, Krais, melnum a Maur Wailen ukwa nar pa, rpma kai ai.' Ampur kipm atning yangkipm a tu la kolpa.
MAR 13:22 Melnum tiur pa ikga kinsil la kolpa, 'Kupm Krais, melnum a Maur Wailen ukwa nar. Kupm melnum ok wripm a Maur Wailen.' Ikga tu elng kla tiur itna ik plan titnongket alntuwen, wa ntokg kweikwei manet manet ur ai a ikga melnum wrekg paipm eng ri pa. Aklale wrisen, tu ntokg la lok rku tu wrong kin kipman a Maur Wailen eng la tu ngko.
MAR 13:23 Kolpa ti kipm itn riwe! Kweikwei wrongkwail pa am pekg kupm lanakepm ike.”
MAR 13:24 ”Wang a kalkuten wail pa kai plalng pa, ikga ik wang pa takgni pa ikga kai miningket a kainil pa ikgake len.
MAR 13:25 Kormeim ikga nurku ngko, a kweikwei wrongkwail kaino kitnong pa ikga titu plalng.
MAR 13:26 Ik wang pa ikga tu ri Warim Kipman a Melnum ikga ingkaino kitnong pa nar nimpokgen waipmunu, a nimpokgen nang wailen a titnongket wail.
MAR 13:27 Ik wang pa kil ikga ukwa tu maur akwapel alkil pa nar, eng tukwem uwi tu wrong kin kipman a pekg kil takweiyen eng kil alkil pa. Ikga kil uwiyen yela kai tutu kanokg yiprokgen a kitnong yiprokgen ai.”
MAR 13:28 “Kol kipm riwe yangkipm kla a la yo kampuk: wam alkil pa u rke a yo ipm pa inip no wulkga pa, pa kipm riwe la takgni eng a wor pake.
MAR 13:29 Am kolpake, ikga kipm ri kweikwei kalkuten pa palng pa, kipm riwe la, wang am kul wreren itna yamping a tike.
MAR 13:30 Kupm lanakepm aklale wrisen: kipm wrong kin kipman a rka ti, tiur akipmen pa ikga imo, a tiur akipmen pa ikga rki kolpa kai, kweikwei wrongkwail pa palng.
MAR 13:31 Kitnong a kanokg ti ikga kai plalng, pake yangkipm akupmen pa ikgake kai plalng, ikgam itna kolpa kai pake.”
MAR 13:32 “Melnum ur ake ariwe wang a ikga kweikwei pa palng pa. Tu maur akwapel a Maur Wailen kaino kitnong pa, tu ake wa ariwe wang pa. Warim Kipman pa kil ake wa ariwe wang pa yat. Yan kil alkil wris ata kil ariwe wang pa.
MAR 13:33 Kipm rpmen rpmi, wonrpme nungkulkg lan! Kipm akwekgel wang a i ikga kweikwei pa palng.
MAR 13:34 Pa ikga kol melnum ur a atnurng wan anong alkilen kai atn or kol ur ai. Kil uk wan anong kweikwei tu melnum akwapel alkilen la tu ikglentel, a kil ampreing kwap pa ak nirake tu melnum wris wris. Wa kil wa lanaki melnum a arpmen yipmingki yun pa la kil rpmi nungkwangentel rpmi!
MAR 13:35 Kolpa ti kipm rpmen riworwor! Kipm akwekgel wang a i mpa melnum yan a wan pa wli. Mpa kil wli ik nungkurikg aki, mining kuin aki, ik karek lala aki, ik kong wor wor aki, kipm ake ariwe.
MAR 13:36 Kol mpa kil wli penterngen ari kipm okg rmpa pa paipm. Kolpa ti kipm rpmi nungkwangen!
MAR 13:37 Yangkipm a kupm lanakepm ti pa, pa yangkipm a ak angklin wrongkwail: kipm rpmi wonrpme nungkulkg lan!”
MAR 14:1 A wang wekg eng ikga wang wail a mentepm akwonalmpen a pekg Maur Wailen ak awi tu amentepmen aye takuleikgen tu Isip pa kul, a wang wail a tu ake al al nok tingklak a tu ak mpim ap mringen ak oren pa. Pa tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses, tu anel akor ya ampen la rkul Sisas eng la ilmpel imo.
MAR 14:2 Tu la kolpa, “Ampur mentepm antokgtel ak wang wail pa, mpa tu wrong kin kipman wrekg or tita.”
MAR 14:3 Sisas kil rpma anong Petani a wan a Saimon, melnum a pekg i paipuk awiyel ep pake kil am palng wor ise. Tu al okipma pa rka pa, kin ur pa or nampokgen wes kaingkuren ur a alupme u yaprekget wor. U pa ak marpm wail paipm akarmpen. Kil kapor okel u wes kaingkuren pa, atom kil alung u yaprekget wor pa ak anel tukgunakg a Sisas pa.
MAR 14:4 Tu melnum tiur a rka ari pa, tu nikgwalpm paipm. Tu anel rka akor la kolpa, “Kil kaken u yaprekget wor pa kai kil pa eng ntei?
MAR 14:5 Kol uk u yaprekget ti eng tu rmpen ik marpm wail, eng marpm pa uk tu melnum a rpma tukwok.” Tu akle kin pa kolpa.
MAR 14:6 Ari Sisas kil la kolpa, “Elngen nikgwalpm pa! Kipm uk nikgwalpm kalkuten kin pa kolpa eng ntei? Kil ak kwap wor eng kupm ti.
MAR 14:7 Tu melnum a rpma tukwok pa ikga rpmi pa i pake. Kipm la ngklinsen pa, wang ur kipm ngklinsen kul! Kupm ti ikgake ntiwepm rpmi ti i.
MAR 14:8 Kin pa ak kwap ak nikgwalpm ariwe alkil. Kil ak u yaprekget wor ak anel num akupmen, numprampentopm ep, eng ikga tu uwentopm.
MAR 14:9 Kupm lanakepm aklale wrisen, ikga tu ngkli yangkipm yela tatu kanokg ti, kuina ur wet kin pa antokg, pa ikga wa tu laron yat, eng ikga tu ikwonilmpen kin pa iye or pa kai.”
MAR 14:10 Atom Sutas Iskariot, watnom wris ur a tu watnom wampwam yikak wekg a Sisas aroaro wonel pa kai eng tu tukgunakgen a tu ipma krakgen a ak ak kwap eng al wor uk Maur Wailen, eng la elng Sisas kai wam atuwen.
MAR 14:11 Tu atopen eng atning yangkipm pa, atom tu yapon yangkipm eng la uk marpm ur Sutas pa. Kolpa atom Sutas akor ya ur eng la elng Sisas kai wam atuwen pa.
MAR 14:12 Wang wail aripm ur a akangklei wring wris wris men angklon nok tingklak a ak mpim ap mringen ak oren pa am ngkaten ak wang wet tike. Atom ti wang a men alm manto walkg malkgu war ur eng rki ntokg il wor uk Maur Wailen eng ikwonilmpen a pekg Maur Wailen ak awi tu amenen aye kul takuleikgen tu Isip pa. Atom tu watnom a Sisas kil aroaro wonel pa asentel la, “Kitn wasrongen wrik kai a i, la mpa men kai numprampen manto walkg malkgu kweikwei okipma pa, eng mpa kitn il pa?”
MAR 14:13 Atom kil ukwa watnom wekg alkil pa kai, kil lanaken la, “Kipmekg kawor anong wail pa. Melnum ur iye u kuntuken pa kul nsilepm ngko ya pa pipa, kipmekg kutnuntel kai o!
MAR 14:14 Kil kai kawor wan ur pa pipa, kipmekg laniki yan a wan pa la kolpa la, 'Melnum a kaling planto yangkipm a Maur Wailen la kolpa, “Wan ok akupmen ti a i, eng mpa kupm rpmi il manto walkg malkgu war kweikwei, nimpokgen tu watnom alkupmen ti?”'
MAR 14:15 Mpa kil plantepm wan ok okkapmet ur a itna kaino walop ur ai. Kweikwei wrik a arpme pa am numprampen itna ike. Kipmekg numprampentilo okipma pa kaino wan ok kwa pawo!”
MAR 14:16 Atom tuwekg am ekg kai, kai kawor anong wail pa, ansil kweikwei kol wuten Sisas lanaken pa. Atom tuwekg numprampen okipma pa.
MAR 14:17 Takgni kinar pelpel ti pa Sisas nampokgen tu watnom wampwam yikak wekg pa or palng.
MAR 14:18 Tu rka al okipma pa rka. Sisas lanaken kolpa la, “Kupm lanakepm aklale wrisen: melnum ur a rpma kuin amentepmen ti, mpa kil elng kupm ti elngkai wam a tu wrongmanto. Melnum pa am antiwo al okipma rpma tike.”
MAR 14:19 Tu ipma kalkuten eng atning yangkipm a Sisas la pa, atom anel asentel wris wris la, “Kupm ti kalpis ur aki?”
MAR 14:20 Kil akalmpe la, “Am melnum ur a rpma kuin a kipm wampwam yikakwekg pake. Melnum ur a anti kupm angkle nok tingklak kinar unokg pa, pa am melnum pake.
MAR 14:21 Aklale, Warim Kipman a Melnum ikga imo kol wrkapm a Maur Wailen la pa. Pake woi, arein melnum a elng Warim Kipman a Melnum elngkai wam a tu wrongmanto pa, pa kil ikga uwi paipm! Pekg wa man raku kil pa eng ntei? Pekg kol a kil kalpis pa pati, kol a wor.”
MAR 14:22 Tu al okipma pa rka pa, Sisas kil awi okipma pa, uk wor Maur Wailen pa, atom kil kapor uk tu watnom alkil pa la tu il. Kil lanaken la, “Kil num alkupmen. Kipm uwi il o!”
MAR 14:23 Kil awi u wain kaimungen pa, uk wor Maur Wailen pa, atom kil uk tu watnom alkil pa la tu il.
MAR 14:24 Atom kil lanaken la, “Walmpopm akupmen kil mpa ungkwan ik rmpen kipm wrong kin kipman pa, kol kla weten a Maur Wailen lam nampokgen kipm pa.
MAR 14:25 Kupm lanakepm aklale la, kupm ikgake il u wain ur ik wang ti kai, ngko wang a ikga Maur Wailen kil ikglen kweikwei wrongkwail pa pipa, ikga kupm il u wain weten pa.”
MAR 14:26 Tu ak nang wris pa plalng pipa, tu kaino wrik nangen Olip.
MAR 14:27 Sisas kil lanaken kolpa, “Kipm plalngten ikga utnurngkopm, kol a wrkapm a Maur Wailen la pa la, 'Maur Wailen ikga kil ilm melnum a atnen manto walkg malkgu pa, atom manto walkg malkgu pa ikga ngkirk kai tutu palpa.'
MAR 14:28 Ikg a kupm wrekg i kirk pa or eptepm kai kaino rpmi kaino Kalili.”
MAR 14:29 Pita akalmpe ok a kil pa kolpa la, “Tu wrongkwail pa ikga utnurngkeitn pake, kupm ti pa ikga kalpis.”
MAR 14:30 Sisas akalmpe ok a Pita pa kolpa, “Pita, kupm lanakeitn aklale wrisen, mpa ik mining ti karek la nti ur plalng pa wa itni i i wa la nti ur pipa, mpa kitn lam nang akupmen pa nti wraur.”
MAR 14:31 Ari Pita akalmpe ok a Sisas pa titnongket la, “Kupm ikga ake lam nang akitnen pa, kalpis. Kupm ikga imo nimpokgenteitn!” Tu watnom pa kimeket am wa anel la katila ok kol a Pita la pa.
MAR 14:32 Tu kai wrik ur a tu namput la Ketsemani, atom Sisas lanaken la, “Kipm rpmi pa, a kupm mpa kai oklala niki Yan alkupmen.”
MAR 14:33 Atom Sisas kil awi Pita, Semis, Son nampokgentel, tunteng kai. Nikgwalpm a kil pa no ros kalkuten paipm wrisen.
MAR 14:34 Atom kil lanaken la, “Ipma a kupm kil kalkut paipm wrisen ai kolen la kupm a imo, ti kipmteng mongklan kolpa rpmi ti!”
MAR 14:35 Kil kai watinet waiketnketn, atom kil angko rpma kanokg pa oklala naki Yan alkilen pa la, “Kol ya ur itni pipa, kol a kitn ungkwan wang paipm ti kai tukuleikgentopm!”
MAR 14:36 Wa kil la, “Yaiyai, kweikwei wrongkwail antiwe a kitn antokg, ti kitn ungkwan kalkuten kil kai tukulelkgtopm! Kupm ti la tuwa, ake kwei ur a kupm ti, kupm kutnun wasrongen alkitnen pake.”
MAR 14:37 Atom kil yaper kul ari tunteng watnom alkilen pa, ari tunteng okg rmpa a pa. Atom kil lanaki Pita pa la, “Saimon, kitn okg eng na? Akentiwe mpa kitn rpmi kwa ti watinet ketnketn ur?
MAR 14:38 Wrekg rpmi mongklan oklala niki Maur Wailen, eng ake mpa kipm ngko kai kalkuten eng kuina ur mpa ningkailepm eng kipm ngko pa. Nikgwalpm a melnum pa arkekgen la itni titnongket tulpulng kalkuten pake, numpwam ti ake antiwe titnongket a talpulng pa.”
MAR 14:39 Wa kil wa kai anti ur oklala naki Maur Wailen pa katila ok kol a wet kil oklala ep pa.
MAR 14:40 Atom kil yaper kul ari watnom alkilen pa, ari tunteng pa okg rmpa a pa. Wulmpa a tunteng pa kalkut paipm la tunteng la okg rmpi pen, ti tunteng ake ariwe mpa tunteng ikilmpe kuina ur a Sisas la pa.
MAR 14:41 Atom kil wa atnuurngken wa yaper kai oklala naki Maur Wailen pa wa anti ur ti pa anti wraur tike, plalng pipa, kil wa yaper kul atom kil aro ikgyokgel tu watnom pa kimeket, atom asen la, “Wa kipm okg rmpa wrisen eng na? A pake, wang am kul wreren tike! Kipm ri, Warim Kipman a Melnum pa am elng kai wam a tu melnum paipm tike.
MAR 14:42 Kipmteng wrekg eng tepm kai om! Melnum a uk kupm ti kai wam a tu wrong manto pa am kul wrerento tike.”
MAR 14:43 Sisas kil la yangkipm ok pa itna, ari Sutas melnum wris ur a tu watnom wampwam yikakwekg alkilen pa kil kul kolti, a tu wrong wailet tu aye yo, aye wri a aye sakal wri pa tu kunturng kul katnuntel. Tu ipma krakgen tukgunakgen a Maur Wailen, a tu melnum a aroaro wonel tu yangkipm a Moses, a tu mring man wailen wailen, tu ukwawen eng la tu kul.
MAR 14:44 Melnum a la mpa uk Sisas kai wam a tu wrong manto pa mpa kil elng kla ur elngitni eng mpa tu riwe la melnum ampake. Kil lanaken kolpa la, “Kipm ri melnum a mpa kupm rkul nikron pa pati, melnum ampake. Kipm wampirpmewel ikglen riworwor iye kai o!”
MAR 14:45 Tu kai palng pa, Sutas kil kai nakron Sisas atom lanakel la, “Melnum a kaling plan men.”
MAR 14:46 Tu ari melnum a kil nakrontel pa atom tu kul arkulel angkli wampel titnongket.
MAR 14:47 Atom melnum ur a itna wrerentel pa kil nalu sakal wri kai apm alkil ti no kolti, laik ak wangket nungkulkg wompel a melnum ur a aken kwap orngwatneikgen melnum tukgunakg a itna ep eng tu ipma krakgen kimeket pa.
MAR 14:48 Atom Sisas kil lanaken kolpa la, “Kipm awi sakal wri a yomis pa aye kul eng kipm la ik ilm melnum ikgwampet ur alkipm a itna kol ti?
MAR 14:49 Pekg kipm karken arkulopm ak wang a kupm kaingkai antiwepm itna angkli yangkipm a Maur Wailen itna kawor yipmingki wunen a yalming a Maur Wailen pa? Kupm la tuwa, yangkipm a Maur Wailen a nira ela wrkapm am palng aklale tike.”
MAR 14:50 Sisas la kolpa plalng pipa, tu watnom alkilen a kil aroaro wonel pa atnuurngkel itna pa, a tu am anel ngkark kaingkai ike.
MAR 14:51 Melnum warimpen ur pa kil aning apm ute tangkoren kolti, ake kil nowe apm ur pa, kil wa katnun Sisas kai atom tu antokg la rkulel.
MAR 14:52 Ari kil atnurng apm ute alkil pa akukewen itna pa a kil am ngkark numpalpen kai ike.
MAR 14:53 Tu awi Sisas aye kai eng melnum tukgunakg a itna ep eng tu ipma krakgen kimeket. Atom tu ipma krakgen a Maur Wailen a pekg itna tukgunakgen, a tu melnum wailen wailen, nampokgen tu melnum a aroaro wonel tu yangkipm a Moses pa tu wa wli rka wris.
MAR 14:54 Pita kil angklokg wang katnukg katnukg katnun Sisas pa kai kawor yipmingki wunen a wan a melnum tukgunakg a itna ep eng tu ipma krakgen kimeket pa. Kil rpma arkgin wakg pa nampokgen tu melnum wantengkwang.
MAR 14:55 Tu melnum ipma krakgen tukgunakgen a Maur Wailen nampokgen tu melnum a aye tamtimpal tu akor yangkipm yiprokgen ur a Sisas antokg pa eng tu la ilmpel imo. Ari ake tu ansil yangkipm yiprokgen ur a kil antokg pa kalpis.
MAR 14:56 Tu wailet tiur arkiwel yangkipm kalpmilel, pake ake tu la kai or wris aklale.
MAR 14:57 Atom tu tiur pa wrekg itna la yangkipm kansil kai arki Sisas pa kolpa la,
MAR 14:58 ”Men atning kil la kolpa, 'Ikga kupm tikale yalming a Maur Wailen kil a pekg tu melnum ale pa, pake pa ikga kupm le yalming weten ur pa ik wang wraur kolti, pa ikgake ik titnongket a melnum a kanokg ti le pa.'”
MAR 14:59 Ari yangkipm ok a tu la pa ake wa yangkipm ok ur la kai or wris.
MAR 14:60 Atom melnum tukgunakg a itna ep eng tu ipma krakgen kimeket a Maur Wailen pa kil wrekg itna kuin a tu pa asen Sisas pa la, “Karken a kitn akalmpe yangkipm ok ur a tu arkiweitn pa?”
MAR 14:61 Sisas kil tarng itna kolti, ake kil akalmpe yangkipm ur. Melnum tukgunakg a itna ep kil asentel anti ur la, “Kitn Krais, Warim Kipman a Maur Wailen a mentepm kapor kilko aleinsel aki?”
MAR 14:62 Sisas kil akalmpe kolpa, “Am kupm tike. Ikga kipm ri Warim Kipman a Melnum ikga kaino rpmi wam wi a Maur Wailen a antiwe titnongket pa ikglen kweikwei wrongkwail. Ikga kipm ri kil ingkaino kitnong pa nar nimpokgen waipmunu.”
MAR 14:63 Melnum tukgunakg a itna ep kil atning yangkipm a Sisas la kolpa, atom kil aro apm alkilen pa la, “Men akentiwe mpa itning yangkipm ok ur. Yangkipm pa am kai itna kolpake.
MAR 14:64 Kipm atning ike, wuten kil la paipmel Maur Wailen. Ti kipm akwonalmpen kolai?” Tu plalngten la kolpa la, “Kil antokg paipm, kolpa ti ilmpel imo wo!”
MAR 14:65 Atom tu tiur ungkwa wlikgel Sisas. Tu yapowel wulmpa pa, a tu orel, a tu asentel la, “Atom kitn la ri, wuten mla oreitn?” Atom tu melnum wantengkwang pa tu awiyel aye kai orel.
MAR 14:66 Pita kil rpma kinar akapm a yipmingki wunenen pa, kin wris ur a aken kwap orngwatneikgen melnum tukgunakg a itna ep ikgalen tu ipma krakgen a Maur Wailen pa, kil kul.
MAR 14:67 Atom kil ari Pita pa arkgin wakg pa rpma. Kin pa ikatnentel titnongket a kil la, “Kitn ti yat, kitn pekg rpma nampokgen Sisas a Nasaret.”
MAR 14:68 Ari Pita kil la, “Kalpis, kupm akwekgel yangkipm a kitn la pa.” Kolpa atom kil wrekg kai or wanyun pa kai eng a kawor en pa pipa, karek pa la.
MAR 14:69 Am kin pa wa kil ari Pita pa anti ur, atom wa kil lanaki tu melnum wailet a itna pa la, “Ti melnum ur atuwen am tike!”
MAR 14:70 Ari wa Pita pa lala, “Kupm ti kalpis.” Itna waikenketn pipa, tu melnum a itna wrerentel pa lawel antiur, “Aklale, kitn melnum ur atuwen am tike! Men atning ok kromeng akitnen pa kol a tu Kalili.”
MAR 14:71 Ari Pita aner ok paipm la, “Kupm naren Wailen la kupm la yangkipm aklale, kupm akwekgel melnum ur a kipm la pa.”
MAR 14:72 Atom wa karek pa wa la anti ur, atom Pita kil akwonalmpen yangkipm a pekgkil Sisas lanakel pa la, “Mpa karek la nti ur plalng wa itni i i, wa la wa la nti ur pipa, mpa kitn lam nang akupmen pa nti wraur.” Atom Pita kil akg arein wail.
MAR 15:1 Ak kong miningket ai tu ipma krakgen tukgunakgen a Maur Wailen, tu melnum wailen wailen, nampokgen tu melnum a aroaro wonel tu yangkipm a Moses, a tu melnum wailen wailen kimeket mapming a ikgalen tu Suta pa, tu la yangkipm pa kai itna wris, plalng pipa, tu ak ampei pa yapo Sisas pa ayewel kai wam a Pailat, mringman a Rom kil kul rpma ikgalen tu Suta.
MAR 15:2 Pailat kil asentel la, “Kitn pa melnum tukgunakg a kipm Suta aki?” Sisas kil akalmpe la, “Kolpa ok a kitn pa la pake.”
MAR 15:3 Tu ipma krakgen tukgunakgen pa tu ak akorel kalpmilel.
MAR 15:4 Pailat kil asentel anti ur la, “Ake kitn akalmpe yangkipm ok ur a tu ti asenteitn ti? Ake kitn atning a tu la almpetn yangkipm watipmen ti!”
MAR 15:5 Ari Sisas ake akalmpe yangkipm ok ur, kolpa atom Pailat kil akwonalmpen watipmen.
MAR 15:6 Akangklei wring wris wris ak wang wail a men akwonalmpen a pekg Maur Wailen ak awi tu amenen aye kul takuleikgen tu Isip pa, Pailat kil elngen melnum ur a rpma wan tipmining pa kul or en. Tu wrong kin kipman tu la nang a melnum wris ur pa atom Pailat kil elngen melnum pa kul or en.
MAR 15:7 Ak wang pa melnum ur pa, nang akilen pa Parapas, nampokgen tu melnum tiur pa, tu rka wan tipmining. Pekg tu wrekg la ungkwan tu Rom pa atom tu or tita, atom tu tiur am pekg tu alm amo ike.
MAR 15:8 Atom tu wrong kin kipman pa tu wli eng Pailat eng la kil elngen melnum wris ur pa kul or en, kol a kil antokg akangklei wring wris wris pa.
MAR 15:9 Pailat kil akalmpe ok a tu pa kolpa, “Kipm wasrongen la kupm elngen melnum tukgunakg akipmen Suta ti eng kil kai?”
MAR 15:10 Pailat kil ariwe la, tu ipma krakgen tukgunakgen a Maur Wailen tu nikgwalpm paipm eng Sisas pa, kolpa atom tu elng Sisas kai wam akilen.
MAR 15:11 Tu ipma krakgen tukgunakgen a Maur Wailen tu tirpmingen tu wrong kin kipman eng la tu elng ok itni wris laniki Pailat pa la kil elngen Parapas pa kul or en.
MAR 15:12 Pailat kil lanaken anti ur kolpa, “Ti mpa kupm ntokg kolai melnum ti a kipm akwewel la kil melnum tukgunakg a la ikglen kipm Suta pa?”
MAR 15:13 Tu elng ok itna wris la yikakatnen la, “Kurkurngkel rki yo okgmangki!”
MAR 15:14 Atom Pailat kil akasenten la, “Kil antokg kuina paipm?” Ari tu la titnongket paipm la, “Kurkurngkel rki yo okgmangki!”
MAR 15:15 Pailat kil la armponel tu wrong kin kipman, kolpa atom kil elngen Parapas pa kai. Sisas pa kil elngen kai wam a tu melnum a almpwrong pa eng ak ampei iket ntrawel, plalng pipa, tu ayewel kai eng la kurkurngkel rki yo okgmangki.
MAR 15:16 Tu anti Sisas antokg yangkipm pa plalng pa, tu awiyel a wan pa kulor itna yipmingki wunen a tu melnum a almpwrong atne pa. Atom tu akwe tu wrongkwail a almpwrong pa tu kul itna.
MAR 15:17 Tu nowewel apm watet wail ur pa kol tu melnum wail wail nowe pa, atom tu wale ampei iket pa elngtirmpa tukgunakg a kil pa.
MAR 15:18 Tu kai itna atom tu la akinowel Sisas pa la, “Men alkeitn wor, kitn melnum tukgunakg a ikgalen kipm Suta itni wang watin!”
MAR 15:19 Tu orel ak yo kai tukgunakg a kil pa, atom tu ungkwa wlikgel. Tu kapor kilko alein a akinoalmpel.
MAR 15:20 Tu la paipmel kil plalng pipa, tu aner apm watet kai num a kil pa atom tu awi apm alkil pa nowewel kai num kil pa. Atom tu awiyel aye kai eng la kurkurngkel rki yo okgmangki.
MAR 15:21 Saimon, melnum ur a Sairini, yan a Aleksanter ekg Rupus, kil angkai wring pa kul la kil a kai anong. Atom tu melnum a almpwrong tu ansilel angko ya pa, atom tu la titnongket la kil ngkit yo okgmangki a Sisas pa iye.
MAR 15:22 Tu awi Sisas aye kai wrik ur a tu namput la Kolkota. Yiprokgen a wrik nang pa pati kolpa: tukgunakg timpal.
MAR 15:23 Tu la uk Sisas u wain tiur a arongke nampokgen kweikwei kupuk kupuk pa ari ake kil al.
MAR 15:24 Tu karkurngkel rka yo okgmangki. Atom tu awi apm akilen pa elngkirmpa. Tu nalu yo ipik eng mpa ri la mpa mla a i uwi apm kuina kuina pa.
MAR 15:25 Takgni al num wleket pa, tu karkurngkel rka yo okgmangki.
MAR 15:26 Ela kaino yo okgmangki kwa pa tu nira yangkipm yiprokgen a pekg kil antokg pa. Tu nira kolpa: Melnum tukgunakg a ikgalen tu Suta.
MAR 15:27 Melnum wekg a antokg paipm pa tu karkurngken nampokgen Sisas, ur rka kai wam wi, a ur rka kai wam wangkokg.
MAR 15:28 Kol yangkipm ur a ela kai wrkapm tingklaket a Maur Wailen pa am palng ok arke tike. Yangkipm pa kolpa: “Tu namputel nang nampokgen tu melnum paipm.”
MAR 15:29 Tu wrong kin kipman kaingkul angkli wulmpa pa elng kaino ariwel atom tukgunakg wilwil a ak nokgel Sisas pa la, “A, kitn melnum a pekg la tikale yalming a Maur Wailen, plalng pa, wa le ik wang wraur,
MAR 15:30 kolpa ti kitn ngklin kitn alkitn ti utnurng yo okgmangki ti nar kanokg ti ri!”
MAR 15:31 Tu ipma krakgen tukgunakgen a Maur Wailen nampokgen tu melnum a aroaro wonel tu yangkipm a Moses pa, tu yat tu la paipmel Sisas pa naki tita kolpa, “Kil pekg angklin tu wrong kin kipman tiur ai, pake kil akentiwe mpa ngklin kil alkil ti.
MAR 15:32 Krais melnum tukgunakg a ikgalen men wrong kin kipman a Isrel ti kil nar kanokg ti ri, eng mpa mentepm ri, ukipma kil pa!” Melnum wekg a tu karkurng nampokgen Sisas pa tuwekg wa la paipmel kil pa yat.
MAR 15:33 Takgni no pirng pa, mining pa kul kai ak upaarng kanokg ti yela, itna a a, kai nungkurikg.
MAR 15:34 Nungkurikg ti pipa, Sisas kil akwe yikakatnen la kolpa, “Eloi, Eloi, lama sapaktani.” Pa la kolpa: “Maur Wailen akupmen, Maur Wailen akupmen, kitn atnurng kupm ti eng ntei?”
MAR 15:35 Tu melnum tiur a itna wreren kil pa, tu atning ok a kil akwe pa, atom tu la, “Kipm itning, kil akwe Elaisa aki?”
MAR 15:36 Melnum ur pa pirng kai elng kweikwei ur kolen nok ing pa angklewe u wain kinipis pa elntitna wark pa aye kaino uk Sisas eng la kil rkolng il. Melnum pa la, “Itni pen, eng mentepm ri la mpa Elaisa uwiyel iye nar kanokg ti aki kalpis.”
MAR 15:37 Sisas kirkar yikakatnen kolti, kil nol angkon.
MAR 15:38 Apm kaki wail a tu alekg rka ak angketen yalming tiwel a Maur Wailen pa rakol wompwekg angkaino kwa wai elngen kinar kanokg ti.
MAR 15:39 Melnum tukgunakg a ikgalen tu melnum kamel wampwomis a almpwrong pa kil itna wreren ari Sisas amo kolpa, atom kil la, “Aklale wrisen, melnum pa Warim Kipman a Maur Wailen.”
MAR 15:40 Tu kin tiur pa itna kai watinet ai ikatnen itna. Kin ur a anti tu pa itna pa, nang alkilen pa Maria a Maktala. Wa ur pa Maria, man a Semis, wusok a Sosep. Wa ur pa Salome.
MAR 15:41 Tu kin pa katnun Sisas angklinsel okipma kweikwei ak wang a kil rpma Kalili. Tu kin watipmen tiur pa rka. Pekg tu kul Serusalem nampokgen Sisas.
MAR 15:42 Ikgkil pa wang wail a rpma eng yapm. Wang weti pa wang a numprampen kweikwei pake.
MAR 15:43 Ak nungkurikg pa Sosep a Arimatea kil kai ari Pailat. Kil ake ngkark, kalpis. Kil asentel la kil a uwi yipmiri a Sisas. Sosep kil melnum a aye tamtimpal a anti tu mring man wail wail rpma atning atning yangkipm, atom tu wrong kin kipman kaporng yangkipm la kil melnum wor. Kil yat kil rpma nungkwangen la Maur Wailen kil ikglen nol nikgwalpm akilen.
MAR 15:44 Sosep kil asentel kolpa atom Pailat kil akwonalmpen watipmen la, “Sisas kil amo aki kil rka?” Atom kil akwe melnum tukgunakg a ikgalen tu melnum kamel wampwomis a almpwrong pa kul asentel la, “Sisas amo aki kalpis?”
MAR 15:45 Atom melnum tukgunakg a ikgalen tu melnum kamel wampwomis a almpwrong pa lanaki Pailat pa la, “Sisas amo ike.” Atom kil awi wor la Sosep kil uwi palk a Sisas pa iye kai.
MAR 15:46 Sosep kil armpen apm tangkoren watinet ur pa aye kai elngtirmpa. Kil ngkat palk a Sisas pa aye nar kanokg ti atom ak apm pa ak yapowel. Plalng pipa, kil ngkat aye kawor rmpa kirk ur a pekg kil u mlamin kai wrik krongen pa eng kil alkil pa. Atom kil talpul wes pa kai ak tikrawin lkim ok a u mlamin pa.
MAR 15:47 Maria a Maktala nampokgen Maria, man a Sosep, tuwekg itna ari wrik a kil aye Sisas kawor armpe pa.
MAR 16:1 Wang wail a mentepm rpma eng yapm pa kai plalng pa, okg or kong, wang a itna ep a wang wampwomis wampwompwekg. Salome, Maria a Maktala, a Maria, man a Semis, tunteng armpen kweikwei yaprekget la ik inel palk a Sisas.
MAR 16:2 Atom am tunteng aye ak kong miningket ai kai kirkap ike.
MAR 16:3 Tu akor la tatu ya pa kai la, “Wes pa wail paipm ai. Mla mpa ntiwo eng tulpul wes pa tukulelkg mlamin ok pa?”
MAR 16:4 Tunteng ikg kai ari, wes pa am wet melnum ur talpul takwlelkg mlamin ok pa ike.
MAR 16:5 Atom tunteng kai kawor kirk wunen a tu u mlaminel ai ari melnum ur a nowe apm tangkoren pupup watinet ur pa rpma wam wi pa, atom tunteng tutusraing.
MAR 16:6 Atom melnum pa lanaken la, “Ampur kipm ngkark. Kupm ariwe kipm la ikor Sisas kai Nasaret, melnum a pekg tu karkurngkel rka yo okgmangki. Ake kil rmpa ti, kil am wrekg ike. Ti kipm ri wrik kalpmilel a pekg tu elngkel rmpa ti.
MAR 16:7 Ti kipm kai niki tu watnom alkilen a kil aroaro wonel pa nimpikgen Pita pa yat la, kil am ep kaino anong kanokg a Kalili ike. Ti kipm kai o, mpa kipm riwel kaino anong kanokg pake, kol pekg kil lanakepm ep pa.”
MAR 16:8 Tunteng atning yangkipm a kil la pa plalng, tunteng atnurng kirk pa kul or en am ngkark kai ike. Tunteng ngkark warwar paipm wrisen, kolpa ti akentiwe mpa tunteng laniki melnum ur.
MAR 16:9 Mining angket wang wail a tu Suta rpma eng yapm pa kai plalng pa, or kong miningket ti pa, Sisas kil wrekg a kirk a tu u mlamin pa or. Kil palng atom Maria a anong Maktala pa ariwel ep; kin pa pekg maur paipm wampwomis wampwompwekg pa arpmewel, atom pekg Sisas ungkwan takwlelkgtel.
MAR 16:10 Tu melnum alkilen a pekg antiwel atn pa tu nikgwalpm kaikuten akg rka. Atom Maria aye yangkipm pa kai naken, la kolpa,
MAR 16:11 “Kupm ari Sisas am wrekg ike.” Tu atning yangkipm a kil la pa, ari ake tu ukipma.
MAR 16:12 Melnum wekg wet atning yangkipm a Maria lanaken pa, tuwekg atnurng anong wail pa kinar angko ya, atom Sisas palng tuwekg ariwel ari palng manet.
MAR 16:13 Tuwekg aye yangkipm pa yaper no naki tu melnum a pekg anti Sisas atn pa ari ake tu atning yangkipm a tuwekg la pa.
MAR 16:14 Katnukg pa Sisas wa palng ari tu watnom wampwam yikak wris alkilen a kil aroaro wonel a al okipma rka pa. Atom kil aklewen la, “Ake kipm ukipma. Ipma akipmen ti kakiren paipm ai, ti ake kipm atning yangkipm a tu pekg ariwopm la kupm am wrekg ike.”
MAR 16:15 Atom wa kil wa la, “Kipm kai ngkli yangkipm wor a Maur Wailen ti niki tu wrong kin kipman yela kanokg pa!
MAR 16:16 Kol melnum ur kil ukipma atom kipm kulukel pa, mpa Maur Wailen kil ikuwiyel pa. Kol melnum ur ake ukipma pa, kil angkom or ya a kai anong paipm kolpa kai.
MAR 16:17 Melnum a ukipma pa, mpa Maur Wailen lkel kla alkil pa eng kil ik ntokg kweikwei ik plan titnongket a Maur Wailen pa. Ikga kil lken kla kolkil: ikga tu naren kupm ti atom ik ungkwan maur paipm, wa tu ikga oklala ik ok manet manet a tu ake awi ariwe pa a palng la wli ok a tu ti.
MAR 16:18 Kol tu rkul ul paipm aki tu il kweikwei paipm paipm a alm melnum amo pa, akentiwe mpa tu imo, kalpis. Kol tu elng wam ele tu melnum a numpet pa, ikga tu palng wor.”
MAR 16:19 Wailen Sisas kil la yangkipm pa naki tu watnom alkilen a kil aroaro wonel pa plalng atom Maur Wailen kil awiyel aye kaino kitnong. Atom tuwekg rpma ikgalen kweikwei wrongkwail pa.
MAR 16:20 Tu watnom alkil a kil aroaro wonel pa tu kai angkli yangkipm yela tatu palpa. Wailen kil ak kwap nampokgenten, elng kla a ak plan titnongket a Maur Wailen pa eng ak titnongketel yangkipm a tu angkli pa.
LUK 1:1 Melnum Wailen Tiopilus! Kupm ari tu melnum watipmen asen atning ariworwor, atom tu nira kweikwei kwap wrongkwail a pikekg palng ep, a men ariwe la pa aklale, atom men ukipma.
LUK 1:2 Kuina ur a tu nira pa, tu atning kai ok a tu melnum a pikekg ari kweikwei a pikekg palng ep ai, atom tu lakati nako, pa am tu melnum akwapel a laron yangkipm a Maur Wailen am pake.
LUK 1:3 Kupm alkupm kil wa akor asen atning yangkipm pa yek kimeket kai itna yiprokgen ai. Atom kupm akwonalmpen ari pa wor eng kupm, la mpa kupm nira wrkapm kil kitila yangkipm pa kimeket riworwor eng kitn, Melnum Wailen Tiopilus.
LUK 1:4 Kupm ak kolpa eng mpa kitn uwi riwe worwor yangkipm a kweikwei a pikekg tu lakati a kaling planteitn pa, la pa aklale.
LUK 1:5 Ak wang a pikekg Erot itna melnum tukgunakg ikgalen anong kanokg a Sutia pa, melnum ipma krakgen ur a ak ak kwap eng al wor uk Maur Wailen, nang akilen pa Sekaraia, kil melnum ipma krakgen ur a akwap itna mapming a Apia. Sekaraia nampokgen kin alkil Elisapet pa tuwekg yatenen palng a om a melnum ipma krakgen Aron pa.
LUK 1:6 Tuwekg pa, ipma a tuwekg pa ute wor itna wulmpa a Maur Wailen, wa tuwekg katnun yangkipm titnongket wrongkwail a Wailen, a tuwekg ake wa plan paipm ur pa kalpis.
LUK 1:7 Elisapet pa kimpong, atom tuwekg ake wa angket warim ur, kaingkai, tuwekg am wror mayen ise.
LUK 1:8 Wang wris ur pa Sekaraia kil ak kwap alkil a melnum ipma krakgen pa itna yalming a Maur Wailen. Pa wang a mapming a Apia a akwap itna yalming pa.
LUK 1:9 Atom tu klasinen wes pa awi awi ari eng la mla a i a i mpa ikwap na na pa katila ya a tu ak eng ampreingen kwap pa. Atom Sekaraia pa awi a lap kweikwei yaprekget wor wor itna kawor wan yalming ok klalen pa.
LUK 1:10 Kil kawor lap kweikwei yaprekget wor pa itna pa, tu wrong wailet a wli rka wris kawor en pa, tu kapor kilko alein, a oklala naki Maur Wailen pa rka.
LUK 1:11 Ak wang ketn pa maur akwapel ur a Maur Wailen, kil palngtel itna wam wi yamping a tipmakg a kil lap kweikwei yaprekget wor atnewe pa.
LUK 1:12 Sekaraia kil ariwel kolpa kil wrekg paipm ngkark warwar kolti.
LUK 1:13 Ari maur akwapel a Maur Wailen pa lanaki Sekaraia pa la, “Sekaraia, ampur kitn ngkark, oklala a kitn naki naki Maur Wailen pa, kil atning ise. Elisapet, kin alkitnen pa, kil ikga raku warim kipman ur eng kitn, atom ikga kitn lil nang akilen pa Son.
LUK 1:14 Ti kitn ikga itopen paipm, wa tu wrongkwailet tiur ai tu ikga wa itopen wail, ik wang a man rakuwel pa.
LUK 1:15 Wa kil ikga palng melnum wailen itni wulmpa a Maur Wailen. Kil ikgake il u wain pa, aki a il u titno titnongket titnongket pa. Eng ntei, ikga warim pa rpmi kawor ipma a man pa, kil am awi Maur Wor antiwe rpma ise.
LUK 1:16 Kil ikga lok kipm wrong kin kipman wailet a Isrel pa iye yaper kul eng Wailen, Maur Wailen akipmen pa.
LUK 1:17 A kil ikga kai ep eng Wailen, kil ikga ntiwe Maur Wor, a ntiwe titnongket kolen Elaisa melnum ok wripm a Maur Wailen pikekg ep. Kil ikga lok nikgwalpm a tu yantin pa kai or wris kol nikgwalpm a tu warim alntuwen pa. Kil ikga rku ngkeng lok tu melnum a talpulng yangkipm pa uwi riwe nikgwalpm a tu melnum ute wor. Wa kil ikga numprampen tu wrong kin a kipman pa rpmi nungkwangen Wailen.”
LUK 1:18 Atom Sekaraia kil akalmpe yangkipm a maur akwapel a Maur Wailen pa la la, “Kolpa kalpis. Kupm ti wror, wa kin akupm pa am wa mayen kolpa yat pake. Ti pa mpa kuina a i plantopm la yangkipm pa aklale pa?”
LUK 1:19 Ari maur akwapel a Maur Wailen pa akalmpe la, “Kil kupm Kepriel, kupm maur akwapel a itna wreren Maur Wailen. Kil alkil ukwawopm nar la lanikeitn yangkipm wor kil.
LUK 1:20 Ari ake wa kitn ukipma yangkipm wor a kupm la kil. Ti kitn itning, kitn mpa ok mise kolpa kai ngko wang alkilen a yangkipm pa kai ok rke ai.”
LUK 1:21 Atom ak wang pa tu wrong ak wail pa arkentel rka yipmingki wunen a yalming pa nungkwangen Sekaraia pa akwonalmpen watipmen la, antokg kolai atom kil ti rpma wang watinet kawor wan yalming ok a Maur Wailen ti.
LUK 1:22 Kil angkawor yalming wunen pa or pa, kil ake antiwe a oklala anti tu pa. Pake tu pa am ariwe ise, la kil wet ari kweikwei wet Maur Wailen plantel itna kawor wan yalming ok pa. Atom kil ak wam ti lanaken kolti, a kil am ok mise kolpa rpma pake.
LUK 1:23 Sekaraia kil akwap itna yalming a Maur Wailen pa itna, kai angko wang a tu alm pa kai plalng pa, kil wa yaper kai wan anong alkilen pa.
LUK 1:24 Wang aripm ur kai plalng pipa, Elisapet kil am itna ise. Atom kol kainil wampwomis pa kil ake or angko en pa, kalpis. Kil atopen la la,
LUK 1:25 “Wailen kil arein kupm ti, atom kupm awi warim ti rpma ipma ti, kolpa atom kil ungkwan numpaipm akupmen ti itna wulmpa a tu wrong kin a kipman pa.”
LUK 1:26 Elisapet kil itna kainil wampwomis wampwompwris, atom ak kainil pa Maur Wailen kil ukwa maur akwapel alkil Kepriel pa kil nar kai Nasaret, anong ur a anong kanokg Kalili.
LUK 1:27 Kil aye yangkipm ur kai la laniki kin warimpen ur a ake atn nampokgen kipman ur. Kin pa pati pikekg tu ak namputen kipman ur a tu namput la Sosep, kil om wris a Tepit. Nang a kin warimpen pa Maria.
LUK 1:28 Maur akwapel a Maur Wailen pa kil palng eng kin pa atom kil la, “Maria, alkeitn wor! Kitn pa Maur Wailen planteitn ipma wor ak angklinseitn wail manten, Wailen antiweitn rpma.”
LUK 1:29 Maria kil wrekg titnowen num eng atning yangkipm a maur akwapel a Maur Wailen pa lanakel pa, atom kil akwonalmpen watipmen la, yiprokgen a oklala a kil la ukwor kolpa pa kil la eng itna kolai?
LUK 1:30 Ari maur akwapel a Maur Wailen pa lanakel la, “Maria, ampur kitn ngkark, eng ntei, Maur Wailen kil plan ipma wor alkil ak angklin kitn.
LUK 1:31 Ti kitn itning, kitn mpa itni atom ikga raku warim kipman ur. Atom ikga kitn lil nang akilen pa la Sisas.
LUK 1:32 Kil ikga palng melnum wailen a ikga Maur Wailen a itna ep angen kweikwei wrongkwail pa numputel la kil Warim Kipman alkilen. A Wailen, Maur Wailen pa, ikga ntokg kil melnum wailen itni tukgunakg ikglen kweikwei wrongkwail, a kil ikga wa itni klangkil yoampei alkil Tepit pa.
LUK 1:33 Atom kil ikga itni melnum tukgunakg ikglen kipm walwalpopm walyaru a Sekop ikngklei wang iye or pa kai. Kil ikgam itni tukgunakg ikglen kweikwei wrongkwail kolpa kai pake, a ikgake kai plalng.”
LUK 1:34 Maria kil atning a maur akwapel a Maur Wailen la kolpa, atom kil akalmpentel la, “Kupm ti ake atn anti kipman ur pa, ti mpa wa kupm palng kol a i kol a kitn la pa?”
LUK 1:35 Ari maur akwapel a Maur Wailen pa akalmpentel la, “Maur Wor a Maur Wailen mpa nar kawor ipma akitnen, a titnongket a Maur Wailen a itna ep angen kweikwei wrongkwail pa mpa ik aureitn. Kolpa ti warim a ikga kitn raku pa, Maur Wailen amprin elngkitna manet, atom ikga tu numputel la Warim Kipman a Maur Wailen.
LUK 1:36 Ti kitn itning, kin om wris alkitnen Elisapet pa, kil am mayen ise. Tu pikekg lawel la kil kimpong ari kil am itna kainil wampwomis wampwompwris tike, atom kil ikga raku warim kipman ur.
LUK 1:37 Eng ntei, ake kwei ur wonet eng Maur Wailen ti.”
LUK 1:38 Atom Maria pa akalmpentel la, “Am ntei, kupm kin akwapel a Wailen, ti kuina ur a wuten kitn la la mpa palng kul kupm ti pa, kupm awi wor kolti.” Atom maur akwapel a Maur Wailen pa atnuurngkel kai.
LUK 1:39 Wang aripm ur kai plalng pa, Maria kil numprampen kolti, kil wrekg atatu kinar kai kaino anong kanokg nangen Sutia, atom kil kai anong a Sekaraia a Elisapet arpme pa.
LUK 1:40 Atom kil kai kawor wan a Sekaraia pa, atom kil kai arkul nakron Elisapet pa, a kil alkel wor.
LUK 1:41 Ak wang a Elisapet kil atning a Maria kil alkel wor pa, warim pa alm num kawor ipma wunen a kil pa, wa Maur Wor pa akwap titnongket kai Elisapet pa,
LUK 1:42 atom kil la yikakatnen la, “Kitn pa Maur Wailen planteitn ipma wor angklinseitn angen tu kin tiur ai, wa kil wa plan ipma wor angklin warim ipmawen a rpma ipma a kitn pa yat.
LUK 1:43 Antokg kolai atom mpa wa kitn man a ikga raku Melnum Wailen a kupm ti wa kul ari kupm kin a kol ti!
LUK 1:44 Ti kitn ri, ak wang a kupm atning ok a kitn alkopm wor nakrontopm pa, warim a rpma kawor ipma akupmen pa kil alm num atopen wail.
LUK 1:45 Kitn pikekg ukipma yangkipm a Wailen la pa la, pa ikga palng ok rke iklale, kolpa ti kitn pa wor pake, kitn itopen o!”
LUK 1:46 Elisapet kil ngkat nang a Maur Wailen kolpa kai plalng pipa, wa Maria kil wa la kolpa la, “Ipma akupmen pa ngkat nang a Wailen.
LUK 1:47 Maur wor akupmen pa atopen Maur Wailen, melnum akupmen a akawiyopm.
LUK 1:48 Eng ntei, kil pikekg akwonalmpentopm, kupm kin ur a nang kalpisen a akwap orngwatneikgen kil. Atom ik wang ti iye or pa kai pa, tu wrong kin kipman ikga uwi wor lawopm la, kupm pa wor pake, eng ntei, Maur Wailen uk ipma wor kupm ti.
LUK 1:49 Eng ntei, kil antiwe titnongket wail, atom kil antokg kweikwei wail manten eng kupm ti. Nang a kil pa klalen wakget.
LUK 1:50 Kil plan ipma wor a kil pa arein tu melnum a ngkark eng kil. A ikgam wa itna kolpa kai eng tu watnom walpopm walyaru pa aye or pa kai pake, pikekg, ak wang ti, a wa ikga ik wang kutnukg.
LUK 1:51 A kil plan titnongket wail akilen eng tu wrong kin kipman ari, a kil ungkwan tu melnum a akwonalmpen la tu ti melnum wailen pa ngkark pumprarng kai tatu palpa.
LUK 1:52 Kil wam kai arkolng nalu tam timpal a tu melnum wailen wailen a itna tukgunakg pa aye kai takuleikgen atom tu itna nang kalpisen. A kil ngkat nang a tu melnum a nang kalpisen pa, aye kaino kwa.
LUK 1:53 Kil uk kweikwei wor wor tu melnum a nikgalmpen pa, a kil ukwa tu melnum a antiwe kweikwei pa, tu angkompwam kaingkai.
LUK 1:54 Yangkipm a kil pikekg yapon nampokgen tu walyipmiri wapyipmiri amentepmen pa kil ake woniketen, kil alupm rpma pa. Kolpa atom kil plan ipma wor alkil pa arein mentepm Isrel, mentepm wrong kin kipman akwapel akilen.
LUK 1:55 Am kol a pikekg kil yapon yangkipm naki tu walyipmiri wapyipmiri amentepmen pake, Apraam pa nampokgen walwalpopm walyaru alkil kolpa aye kul pa, la kil ikga planten ipma wor alkil pa reinsen ikngklei wang or pa kai.”
LUK 1:56 Oklala a Maria pa am kai kol pake. Atom kil anti Elisapet pa rpma pa a a, kainil wraur pa kai plalng, atom kil wa yaper nar kul no anong alkil.
LUK 1:57 Elisapet kil itna kolpa kai angko wang alkil a kil raku pa, kil raku warim kipman pa.
LUK 1:58 Atom tu melnum tiur alkil a rpma wrerentel pa, a tu om wris alkil pa, tu atning a Wailen kil plan ipma arein wail manten kolpa kai eng Elisapet pa, atom tu atopen paipm nampokgentel.
LUK 1:59 Kil aye warim pa aye rpma kol wang wampwomis wampwompwekg pa kai plalng pa, wang wampwomis wampwompwraur ti pipa, tu wli la wangket numpalk a warim pa, wa tu la kol a lil nang a yan alkilen Sekaraia.
LUK 1:60 Ari man alkil pa lala, “Mpa kalpis, mpa lil nang akilen pa la Son.”
LUK 1:61 Ari wa tu akalmpentel la, “Ake tu ur kai om akitnen pa alil nang kolpa, kalpis.”
LUK 1:62 Atom tu ak wam ti ak asen yan alkil pa la, kil wasrongen la mpa lil nang mla kai warim pa.
LUK 1:63 Ari Sekaraia kil ak wam pa lanaken la tu lkel tangkurong wompel wasek ur a nira kweikwei angkowe pa, atom kil nira nang a warim pa la Son. Tu wrongkwail tu ari pa, tu wrekg paipm.
LUK 1:64 Ak wang ketn pa Sekaraia a pikekg ok mise pa wa kil oklala, atom kil wa ngkat nang a Maur Wailen.
LUK 1:65 Tu a rka anong pa tu atning a ari pa atom tu ngkark. Atom tu aye yangkipm a kweikwei a palng pa kai yela anong a ela wrik nangen a anong kanokg a Sutia ise.
LUK 1:66 Atom tu wrongkwail atning yangkipm pa, tu alupm yangkipm pa rpma ipma alntu pa rpma. Tu ariwe la titnongket a Wailen pa ikgalen warim pa rpma, atom tu asen tita la, “Warim pa ikga palng melnum kolai?”
LUK 1:67 Yangkipm a la Son pa am ok arke ise, atom Maur Wor pa akwap titnongket kawor ipma a Sekaraia, yan a Son pa, atom kil laron kuina ur a Maur Wor ngkatel ok la kil la pa,
LUK 1:68 ”Ngkit nang a Wailen Maur Wailen a Isrel! Eng ntei, kil narnto la ikirmpen mentepm wrong kin kipman alkilen.
LUK 1:69 A kil ngkat melnum a antiwe titnongket a ikga ikuwiyo, melnum pa kai om a Tepit, melnum akwapel alkilen.
LUK 1:70 Kolen a pikekg kil la palng kai ok a tu melnum okwripm a pikekg kil amprin eng alkilen ep ak ai, la ikga kil ukwa melnum pa nar,
LUK 1:71 eng ikga kil ikuwiyo kai wam a tu wrongmanto, wa kai wam a tu melnum a ipma paipm eng mentepm.
LUK 1:72 Kil plan ipma wor akilen pa atom kil arein mentepm ti. Wa a pikekg kil alkil lam kla klalen wakget nampokgen tu walyipmiri a wapyipmiri a yoampei amentepmen pa, pa kil alupmen rpma pa.
LUK 1:73 Kil naren kil alkil ti atom kil naki Apraam, yoampei amentepmen pa la
LUK 1:74 kil ikga ikuwi mentepm ti tukulelkgen kai wam a tu wrongmanto amentepmen, eng mentepm ikgake ngkirk, mentepm ikga wirng no kukula wor ikwap akilen pa.
LUK 1:75 A mentepm ikga kil mprinso eng alkilen elngkitni manet, wa mentepm ikga itn a rpmi a ikwap ute wor itni wulmpa akilen ikngklei wang a mentepm rpmi kanokg ti.”
LUK 1:76 Sekaraia ngkat nang a Maur Wailen kolpa kai plalng pa, wa kil wa la warim kipman alkil Son ti la, “Oi, kitn warim wasek yek alkupm, kitn ti ikga tu numputeitn la kitn melnum okwripm a Maur Wailen a itna ep angen kweikwei wrongkwail pa. Kitn ikga kai ep ukule ya pa numprampen eng Wailen.
LUK 1:77 A ikga kitn laron laniki tu wrong kin kipman alkil pa, eng tu riwe la Maur Wailen ikga ikuwiyen a ungkwan paipmpaipm atuwen.
LUK 1:78 Eng ntei, ipma arein a Maur Wailen amentepmen pa wail manten paipm. Atom ikga kolen takgni a aro pa ingkaino kitnong pa nar lento,
LUK 1:79 eng uk klalen tu melnum a rka miningket, a ngkark eng amo, a loko nepm pa eng ikga mentepm ngkom or ya wor a rpma meen wor pa.” Nangnang a Sekaraia ak pa am kai plalng kolpake.
LUK 1:80 Atom warim pa kil wrekg wail, a wontrakole nikgwalpm arke pipa, kil kai rpma wrik kalpmlel a ake melnum ur arpme pa, a a, kil wrekg a pa kil kai angko wunong tu wrong kin kipman a Isrel ariwel.
LUK 2:1 Ak wang pa Okastus, melnum tukgunakg a tu Rom pa, kil ukwa yangkipm kai la tu uwi nangkel tu wrongkwail a rka yela anong kanokg a kil alkil ikgalen pa.
LUK 2:2 Pa pikekg ake tu awi awi nangkel tu kolpa, itna itna, tu la uwi nangkel tu wrong kin kipman ti pen. Ak wang pa Kwirinius kil itna melnum wailen a anong kanokg a Siria.
LUK 2:3 Atom tu wrongkwail tu wrekg kai yela anong yiprokg wris wris alntuwen pa eng tu awiyen nang.
LUK 2:4 Kolpa atom Sosep yat kil wrekg a Nasaret, anong ur a anong kanokg a Kalili, wa kil la kinar Petleem, anong yiprokg a Tepit a ela anong kanokg a Sutia pa, eng ntei, kil am kulung ur kai om wris a Tepit pake.
LUK 2:5 Atom kil awi kin alkil Maria pa, tuwekg kai kinar la tu uwiyen nang. Maria pa pikekg tu ak namputel la ikga rpmi eng kil pa, kin pa am itna warim kakir eng a raku tike.
LUK 2:6 Atom ak wang a tuwekg rpma Petleem pa, pa wang alkilen eng kil la raku warim.
LUK 2:7 Atom kil raku warim kipman payen wris alkil pa, atom kil yapowel ak apm pa, alupm elng kinar yo timpal a manto nepm watin ale ale okipma armpewe pa. Eng ntei, wan a tu wli okg arke arke pa, am lawe ise.
LUK 2:8 Tu melnum tiur a ikgalen manto walkg malkgu a rka wrik laikge a ela wreren anong Petleem pa, tu atnen manto walkg malkgu pa ak mining pa itna.
LUK 2:9 Atom maur akwapel a Wailen kil palng itna kuin a tu pa, a klalen a titnongket a Wailen pa nar ak alenten, atom tu wrekg paipm ngkark.
LUK 2:10 Ari maur akwapel a Maur Wailen pa lanaken la, “Kipm itning, ampur kipm ngkark, kupm aye yangkipm wor nar lanikepm. Yangkipm wor pa ikga ntokg tu wrongkwail tu itopen wail paipm.
LUK 2:11 Melnum a ikga ikuwiyepm pa weti man ur raku kai anong a Tepit pa. Kil pa kil Wailen, a kil Krais. Melnum a Maur Wailen kil takwei atom ukwa kul nar eng la imo ikrmpen kipm wrong kin a kipman.
LUK 2:12 Mpa kipm kai ri warim a tu ak apm yapo alupm kinar yo timpal a manto nepm watin ale ale okipma armpewe pa. Mpa kipm riwe la, pa warim am pake.”
LUK 2:13 Tu maur akwapel a Maur Wailen a rka kaino anong wor pa, wailet paipm ai kolen tu melnum a almpwrong pa tu anel palng penterngen kolti nar itna nampokgen maur akwapel a Maur Wailen pa, a tu ngkat nang a Maur Wailen pa ak nangnang pa kolpa la,
LUK 2:14 ”Ngkit nang a Maur Wailen a rpma kaino kwa, eng kil plan ipma wor wasrongen kipm wrong kin kipman a rpma kanokg ti, atom kipm rpma meen wor.”
LUK 2:15 Tu maur akwapel a Maur Wailen tu ak nang pa plalng, tu atnuurngken yaper kaino anong wor ai pipa, tu melnum a ikgalen manto walkg malkgu pa anel lanaki tita la, “Ti mentepm kai Petleem ai, eng ri kuina ur a wuten palng ti, a wuten Wailen kil lanako pa!”
LUK 2:16 Atom tu wrekg atatu kolti, kai ansil Maria ekg Sosep nampokgen warim pa, a okg rmpa yo timpal a manto nepm watin ale ale okipma armpewe pa.
LUK 2:17 Tu ari warim pa, tu lakati kuina ur a wuten maur akwapel a Maur Wailen lanaken kai warim pa, naki tu a rka pa.
LUK 2:18 Atom tu atning yangkipm pa, tu wrekg paipm akwonalmpen watipmen kuina ur a tu melnum a ikgalen manto walkg malkgu pa lanaken pa.
LUK 2:19 Pake Maria pa kil alupmen yangkipm wrongkwail pa atom kil akwonalmpen yangkipm pa rpma.
LUK 2:20 Tu melnum a ikgalen manto walkg malkgu pa tu wa yaper kai, a tu ak nangnang pa itna wampel ak ngkat nang a Maur Wailen eng kuina ur a tu atning a ari, kol a wuten tu maur akwapel a Maur Wailen lanaken pa.
LUK 2:21 Maria raku Sisas rpma a a, wang wampwomis wampwompwraur pa, pa tu angket numpalk a kil pa. A tu alil nang a kil pa Sisas. Nang pa pati, pikekg maur akwapel a Maur Wailen kil alilel ep ak ai, ak wang a kil pikekg ake palng rpma ipma a man alkil pa.
LUK 2:22 Maria karkuk ak u wor eng palng kukula wor itna wulmpa a Maur Wailen pa, katila yangkipm titnongket a Moses la pa plalng pipa, tuwekg mansan pa aye Sisas pa kinar kai kaino anong wail Serusalem eng uk kil kai wam a Yan Wailen eng elngkitna manet eng alkilen.
LUK 2:23 Kol yangkipm titnongket a Wailen a nira la, “Warim Kipman payen wrongkwail pa, tu mpa iye kai uk Wailen la pa alkilen pake.”
LUK 2:24 A tuwekg la lap il wor uk kitila yangkipm titnongket a Wailen la pa la, iye punum wekg aki, a kilmpin plampiwen wekg.
LUK 2:25 Ak wang ti melnum ur a rpma Serusalem pa, nang a melnum pa namput la Simeon. Kil melnum ute wor a alupm aye Maur Wailen. Kil rpma nungkwangen la Maur Wailen kil ngklin tu Isrel a ungkwan kalkuten atuwen. Melnum pa kil antiwe Maur Wor.
LUK 2:26 A kil pikekg Maur Wor lanakel la, kil ikgake imo, kil ikga rpmi i i, kil ri Krais, melnum a Maur Wailen kil yapon yangkipm la ikga nar eng ikrmpen mentepm wrong kin kipman pa plalng pa, kil imo.
LUK 2:27 Maur Wor pa kil akwap kai Simeon pa, kolpa atom kil kai kawor yipmingki wunen a yalming a Maur Wailen, ak wang a mansan tuwekg aye warim Sisas pa aye kawor yalming a Maur Wailen, la ikwap kol yangkipm titnongket a Moses la pa.
LUK 2:28 Atom Simeon ari warim pa, kil kai ngkatel kolti, a kil uk wor Maur Wailen la kolpa la,
LUK 2:29 “Wailen, kupm melnum akwapel alkitnen, kitn pikekg lala kupm ikgake imo, kupm rpmi ri Krais pa plalng pipa kupm imo. Ti warim ti am kupm ari tike. Ti kitn la uwiyopm pa, kitn uwiyopm o!
LUK 2:30 Kupm ari ak wulmpa alkupmen ise. Warim alkitnen kil ikga ikuwi tu wrong kin kipman wrongkwail iye yaper kai eng kitn,
LUK 2:31 a pikekg kitn numprampen la mpa tu wrong kin a kipman wrongkwail ri.
LUK 2:32 Pa warim klalen a ikga iklen tu a ake Suta, a ikga uk nang wailen tu wrong kin kipman alkitnen a Isrel.”
LUK 2:33 Ti tuwekg mansan a warim pa, tuwekg wrekg paipm eng atning kuina ur a Simeon la kai warim pa.
LUK 2:34 Atom Simeon kil oklala naki Maur Wailen la kil ngklinsen, wa la kai Maria, man a warim pa la, “Kipmekg itning, warim kil pa, Maur Wailen kil takwei eng ikga ntokg tu wailet tiur a Isrel ikga wutat ngko, a wa wailet tiur pa ikga wa wrekg itni. Maur Wailen takwei kil itna kol kla ur a ikga tu la paipmel.
LUK 2:35 Kolpa ti nikgwalpm ampen wor a paipm a tu wrongkwail pa ikga palng ngko wunong. Ti wa Maria kitn ti yat, kalkuten wail ur a ikga palngteitn pa, pa ikga kungkuweitn nol.” Yangkipm a Simeon la pa am kai kol pake.
LUK 2:36 Ti kin okwripm ur pa, nang alkilen pa Ana, kil warim kin a Panuel, a om ur a Aser. Kil pa kin mayen, wa wring alkilen pa kamel wikgwikg tuwek wikgwikg. Pikekg awi kipman rpma wring wampwomis wampwompwekg. Kipman pa amo, a kil rpma kin karpikg kolti rpma. Wa kil ake wa atnuurng yipmingki wunen a yalming a Maur Wailen pa, mining ranen kolpa, kil am kalpis okipma uk wang kapor kilko alein oklala naki naki Maur Wailen pa kolngkol pa rpma pake.
LUK 2:38 Simeon la okyangkipm naki Maria pa itna pa, Ana wa kul no itna uk wor Maur Wailen, a kil lanaki tu wrongkwail a nungkwangen melnum a ikga ikirmpen tu wrong kin kipman a Serusalem pa la la, ti warim pa am kilke.
LUK 2:39 Sosep ekg Maria tuwekg akwap wrongkwail pa katila yangkipm titnongket a Wailen kil la pa plalng pipa, tuwekg wa yaper kinar kai kaino anong alntuwekgen Nasaret a anong kanokg Kalili.
LUK 2:40 Tunteng kaino rpma a, warim pa kil wrekg wail a awi titnongket, a kil nikgwalpm arke wontrakole. Wa Maur Wailen plan ipma wor alkil ak atopentel.
LUK 2:41 Akangklei wring wris wris pa, mansan a Sisas pa, tuwekg kinar kai kaino Serusalem eng antokg okipma wail al ak wang a tu Suta rpma akwonalmpen Maur Wailen pikekg ak awiyen angkai Isip kul.
LUK 2:42 Sisas pa kil wrekg wail om, wring wampwam yikak wekg pa, atom kil anti mansan alkilen pa kinar kai kaino eng antokg okipma wail al katila ya a rpma alntuwen pa.
LUK 2:43 Tu antokg okipma wail pa al plalng pipa, mansan a Sisas pa am ekg wa atnuurng Serusalem pa yaper kinar kai la kaino anong Nasaret pa. Pake warim kipman Sisas pa kil rpma a no Serusalem ti rpma. Ti tuwekg mansan pa tuwekg ake wa ariwe.
LUK 2:44 Tuwekg akwonalmpen la, kil am tu kimeket kinar kai la kaino pake. Tu angkom or ya pa kaino, miningten angko ya pa, tuwekg akorel itna kuin a tu yiprokgen a walmpopm wris alntuwekgen pa.
LUK 2:45 Ari ake wa tuwekg ariwel, atom wa tuwekg yaper nar kul akorel no Serusalem.
LUK 2:46 Tuwekg akorel kolpa kai, mining wraur pa kai plalng pa, tuwekg ansilel rpma kai yalming a Maur Wailen. Kil rpma nampokgen tu melnum a rpma rpma aro wonel tu yangkipm a Moses, kil rpma atning yangkipm ok tiur a tu la pa ak asenten kolpa rpma.
LUK 2:47 Kolpa atom tu wrongkwail a atning yangkipm a kil pa, tu wrekg paipm eng nikgwalpm ariwe a kil akalmpe yangkipm a tu la pa.
LUK 2:48 Tuwekg mansan alkil pa ariwel pa, tuwekg wrekg paipm wrisen. Atom man pa la kai warim kipman alkil pa la, “Wa kitn wa antokgto kolkil eng ntei? Yan alkitn pa nampokgen kupm ti, mentekg pikekg ipma kalkut paipm eng mentekg akoreitn.”
LUK 2:49 Ari warim kipman alkil pa akalmpe la, “Wa kipmekg akoropm eng na? Kipmekg kol a riwe la kupm am rpma wan a yan alkupmen tike!”
LUK 2:50 Ari tuwekg ake wa ariwe kuina ur a kil la pa.
LUK 2:51 Atom kil wrekg antiwen kinar kai kaino Nasaret, a wa kil akangklei atning nungkulkg yangkipmok a tuwekg. Pake man pa alupmen yangkipm wrongkwail a warim kipman pa rpma kawor nol nikgwalpm alkil pa.
LUK 2:52 Sisas kil wrekg wail nampokgen nikgwalpm ariwe wor, a Maur Wailen nampokgen tu wrong kin kipman pa tu plan ipma wor alntuwen ak atopentel.
LUK 3:1 Taiperius kil itna Kaisarus, melnum tukgunakg a ikgalen anong kanokg wail a Rom. A Pontius Pailat pa, kil itna mringman ikgalen anong kanokg a Sutia. Wa Erot kil ikgalen anong kanokg a Kalili, wa wusoken alkilen Pilip pa kil ikgalen anong kanokg a Ituria a Trakonitis. A Lisanias pa kil ikgalen anong kanokg a Apilene. Wa Anas a Kaiapas tuwekg itna melnum tukgunakg a itna ep eng tu melnum ipma krakgen kimeket a Maur Wailen. Taiperius kil itna kolen wring wampwam yikakwomis pa. Atom Taiperius kil itna melnum tukgunakg pa itna kol wring wikgwikg pa kai plalng, wa wring wris ti wa kai aken wikgwikg ai kai wampwomis pipa, ok a Maur Wailen kil akwe Son warim kipman a Sekaraia pa, itna kai wrik kalpmlel a ake melnum ur arke pa.
LUK 3:3 Atom Son kil wrekg kai yela tatu anong kanokg wrongkwail a ela wreren u kop Sotan pa, a kil laron yangkipm pa la tu plelng ipma, eng mpa kil kuluken, eng mpa Maur Wailen kil ungkwan paipmpaipm atuwen.
LUK 3:4 Kol a pikekg nira ela kai wrkapm a melnum okwripm Aisaia la pa la, “Ok a melnum ur akwe kai wrik kalpmlel pa la, 'Numprampen ya pa eng Wailen, a ukulentel ya pa riworwor!
LUK 3:5 A ipil ngkle wrik a nare pa kulno irir, a ngkon wrik nangen a wrik tipminingen pa iye nar irir. A wa ukule ya wa raimpe pa kai ute riwor, a ipil ngkle ya wa wilpik walpoket nung nangen pa palng wor!
LUK 3:6 Wa wrongkwail kin a kipman yela ikga ri kwap a Maur Wailen kil ikga ik, eng ikuwi mentepm wrongkwail.'” Yangkipm a pikekg melnum okwripm Aisaia pa am pikekg la Son pake.
LUK 3:7 Atom Son lanaki tu wrongkwail kin a kipman wailet a anel wli wli la kil kuluken pa la, “Kipm ti kolen ul angketepm! Mla lanakepm pa atom kipm akor ya eng la ikga ngkirk tukuleikgen ipma wakget a Maur Wailen a ikga nar ti!
LUK 3:8 Kolpa ti kipm plan atn a rpma akipmen ti kol yo a angko oken wor, eng mpa plan la kipm am plelng ipma ise. Kipm am palng angkai Apraam pa angket alewepm kul pake, pake ake mpa kipm won ngklin la Apraam pa mamin wror akipmen, ti ikga ngklinsepm pa. Eng ntei, kupm lanakepm la, Maur Wailen ti antiwe la wes tatu ti wa palng walwalpopm a walyaru a Apraam ti.
LUK 3:9 Ti kotwang pa am numprampen rmpa yo yiprokg wrongkwail pa ise. Yo a ake angko oken wor pa, ikga ware ngket rkol ngkli elng kai wakg.”
LUK 3:10 Atom wrongkwail kin a kipman pa wa asentel la, “Ti mpa wa men ntokg kolai eng men ngko ok wor pa?”
LUK 3:11 Ari Son akalmpenten la, “Melnum a kil antiwe apm wekg a nowe angkaino ti nar pa, kil uk ur kai melnum ur a kalpis pa. Wa melnum ur a antiwe okipma pa, am wa kil ik kol pake.”
LUK 3:12 Wa tu melnum tiur a awi marpmel tu pa, tu wa wli la kil kuluken yat. Atom anel asentel la, “Melnum a kaling plan tu, mpa men ntokg kuina?”
LUK 3:13 Ari kil lanaken la, “Ake mpa kipm uwi marpmel tu pa klangkil marpm mrangkum a pikekg tu yapon pa.”
LUK 3:14 Wa tu melnum tiur a almpwrong pa wli asentel la, “Ti men ti, men ti mpa ntokg kuina?” Ari kil akalmpenten la, “Ake mpa kipm kinsil a tirpmingen tu mla ur eng uwi kweikwei alntuwen pa. Kipm mpa uwi wor eng marpm a kipm awi awi eng kwap a kipm ak pa, pa am a pake.”
LUK 3:15 Tu wrong kin a kipman pa tu atning a Son kil la kolpa atom tu rpma nungkwangen la ri, wa tu akwonalmpen watipmen kawor nol nikgwalpm atuwen ti lala, kol Son pa mpam kil Krais pa ur pake.
LUK 3:16 Atom Son kil akalmpe kai tu wrongkwail pa la, “Kupm ti pa, kupm kalukepm ak u ti kolti. Pake melnum ur a antiwe titnongket wail manten angen kupm ti pa ikga wli. Ti kupm kil melnum paipm a nang kalpisen a kolkil pa, kol a kupm ikwap paipm ur kol a iner nepm palk kai melnum wailen kol pake, ari kupm ake wa antiwe akwap kolpa yat. Kil pa ikga kulukepm ik Maur Wor, wa ik wakg.
LUK 3:17 Kil aye kaimung pa itna kai wam alkil pa, eng la ik ngkwol wit ok pa ik wripm uwi, atom misen wor wor pa kil ikga ngkiten nimong iye kai rpmi wan wit ok alkilen ai. A kil ikga numpron plepm paipm paipm pa elng itni manet, eng ikga lap kai wakg a ikgake ime pa, kalpis.”
LUK 3:18 Son kil alken nikgwalpm watipmen auraur kolpa ak alm ipmawel tu pa, wa laron yangkipm wor a Maur Wailen pa lanaken.
LUK 3:19 Pake kil akle Erot, melnum wailen a ikgalen Kalili pa, ok atnen a kil karpo Erotias atn wampel Pilip, wailen alkilen Erot, a wa kil antokg paipmpaipm wrongkwail tiur yat.
LUK 3:20 Kolpa atom Erot kil awi Son ti aye kawor rpma wan tipmining ti, pa wa kil antokg paipm angkine paipmpaipm tiur a kil antokg ai.
LUK 3:21 Ak wang a Son ake Erot awi aye kai rpma wan tipmining pa, kil kaluk tu wrong kin a kipman wailet. Plalng wa kil wa kaluk Sisas pa. Sisas wrekg itna oklala naki Maur Wailen pa, kitnong pa okore kolti,
LUK 3:22 pa Maur Wor pa nar kol wel punum pa rpma tukgunakg a kil pa. A ok ur pa akwe angkaino kitnong pa nar la, “Kitn pa Warim Kipman akupmen, kupm plan ipma wor wasrongenteitn, a kupm ipma wor atopenteitn.”
LUK 3:23 Sisas kil warimpen ise, wring kamel wris tuwek wampwam pipa, kil ngkaten kwap pa ak. A kil pa warim kipman a tu akwonalmpen la kil warim a Sosep. Wa Sosep pa warim kipman a Eli,
LUK 3:24 wa Eli pa warim kipman a Matat. Wa Matat pa warim kipman a Lipai. Wa Lipai pa warim kipman a Melki. Wa Melki pa warim kipman a Saina. Wa Saina pa warim kipman a Sosep.
LUK 3:25 Wa Sosep pa warim kipman a Matatias. Wa Matatias pa warim kipman a Amos. Wa Amos pa warim kipman a Naum. Wa Naum pa warim kipman a Esli. Wa Esli pa warim kipman a Nakai.
LUK 3:26 Wa Nakai pa warim kipman a Mat. Wa Mat pa warim kipman a Matatias. Wa Matatias pa warim kipman a Semen. Wa Semen pa warim kipman a Sosek. Wa Sosek pa warim kipman a Sota.
LUK 3:27 Wa Sota pa warim kipman a Soanan. Wa Soanan pa warim kipman a Resa. Wa Resa pa warim kipman a Serupapel. Wa Serupapel pa warim kipman a Sealtiel. Wa Sealtiel pa warim kipman a Neri.
LUK 3:28 Wa Neri pa warim kipman a Melki. Wa Melki pa warim kipman a Ati. Wa Ati pa warim kipman a Kosam. Wa Kosam pa warim kipman a Elmatam. Wa Elmatam pa warim kipman a Er.
LUK 3:29 Wa Er pa warim kipman a Sosua. Wa Sosua pa warim kipman a Elieser. Wa Elieser pa warim kipman a Sorim. Wa Sorim pa warim kipman a Matat. Wa Matat pa warim kipman a Lipai.
LUK 3:30 Wa Lipai pa warim kipman a Simeon. Wa Simeon pa warim kipman a Suta. Wa Suta pa warim kipman a Sosep. Wa Sosep pa warim kipman a Sonam. Wa Sonam pa warim kipman a Eliakim.
LUK 3:31 Wa Eliakim pa warim kipman a Melea. Wa Melea pa warim kipman a Mena. Wa Mena pa warim kipman a Matata. Wa Matata pa warim kipman a Natan. Wa Natan pa warim kipman a Tepit.
LUK 3:32 Wa Tepit pa warim kipman a Sesi. Wa Sesi pa warim kipman a Opet. Wa Opet pa warim kipman a Poas. Wa Poas pa warim kipman a Salmon. Wa Salmon pa warim kipman a Nason.
LUK 3:33 Wa Nason pa warim kipman a Aminatap. Wa Aminatap pa warim kipman a Atmin. Wa Atmin pa warim kipman a Arni. Wa Arni pa warim kipman a Esron. Wa Esron pa warim kipman a Peres. Wa Peres pa warim kipman a Suta.
LUK 3:34 Wa Suta pa warim kipman a Sekop. Wa Sekop pa warim kipman a Aisak. Wa Aisak pa warim kipman a Apraam. Wa Apraam pa warim kipman a Tera. Wa Tera pa warim kipman a Naor.
LUK 3:35 Wa Naor pa warim kipman a Seruk. Wa Seruk pa warim kipman a Reu. Wa Reu pa warim kipman a Pelek. Wa Pelek pa warim kipman a Eper. Wa Eper pa warim kipman a Sela.
LUK 3:36 Wa Sela pa warim kipman a Kainan. Wa Kainan pa warim kipman a Arpaksat. Wa Arpaksat pa warim kipman a Sem. Wa Sem pa warim kipman a Nowa. Wa Nowa pa warim kipman a Lamek.
LUK 3:37 Wa Lamek pa warim kipman a Metusela. Wa Metusela pa warim kipman a Enok. Wa Enok pa warim kipman a Saret. Wa Saret pa warim kipman a Maalalel. Wa Maalalel pa warim kipman a Kainan.
LUK 3:38 Wa Kenan pa warim kipman a Enos. Wa Enos pa warim kipman a Set. Wa Set pa warim kipman a Atam. Wa Atam pa warim kipman a Maur Wailen.
LUK 4:1 Sisas kil atnuurng u kop Sotan pa, kil antiwe Maur Wor, atom Maur Wor pa ak awiyel aye kai wrik kalpmlel ur a ake melnum ur arke.
LUK 4:2 Kai wrik pa kil rpma kol wang kamel wekg miningkranen, wa Maur Paipm kil ningkailel la kil ngko. Ake kil al okipma ur, kolpa kaingkai wang pa kai eng a plalng pa, nikgalmpel.
LUK 4:3 Kolpa atom Maur Paipm pa lanakel la, “Kitn ti Warim Kipman a Maur Wailen, ti kitn la wes ti palng kol okipma pa eng kitn il!”
LUK 4:4 Ari Sisas akalmpe la, “Wrkapm a Maur Wailen pa la kolkil la, 'Melnum ake antiwe a rpma ak okipma kolti pa.'”
LUK 4:5 Wa Satan wa ak awiyel a pa wa kai kaino itna wrik nangen ur pa, atom penterngen kolti palng plantel wrik kanokg, a anong kweikwei wrongkwail a itna kanokg ti.
LUK 4:6 Atom kil lanakel la, “Kupm mpam uk nang wailen a titnongket kitn tike eng kitn ikglen kweikwei wor wor wrongkwail a itna kanokg ti. Kweikwei wrongkwail ti am pikekg elng kul wam akupmen ti ise. Ti kupm la uk kai mla ur a kupm la uk pa, mpa kupm uk kolti.
LUK 4:7 Ti kol kitn kipor kilko ilein ngkit nang akupmen ti pa, kweikwei wrongkwail pa mpa alkitnen plalngten.”
LUK 4:8 Ari Sisas akalmpentel la, “Nira ela wrkapm a Maur Wailen pa la kolkil la, 'Kitn kipor kilko ilein ngkit nang a Wailen, kil Maur Wailen alkitnen, a kitn ikwap a kil wris ita.'”
LUK 4:9 Ake wa kil wa angko, kolpa atom wa Maur Paipm wa ak awiyel a pa wa kai kaino anong wail Serusalem pa, atom awiyel aye kaino itna kaino wan kimpo kwa a yalming a Maur Wailen pa. Atom kil lanakel la, “Kitn ti Warim Kipman a Maur Wailen, ti kitn tipra itni ti elng kinar kanokg ai!
LUK 4:10 Nira ela Wrkapm a Maur Wailen pa la kolkil la, 'Mpa kil uk yangkipm tu maur akwapel alkilen ti mpa tu itnenteitn riworwor pa.'
LUK 4:11 A wa nira kolpa yat la, 'Mpa tu wamplilngteitn pa, eng ake mpa kitn ngko ngket nepm pa eli wes ur pa.'”
LUK 4:12 Ari Sisas akalmpentel la, “A wa kil wa la kolkil yat la, 'Ake mpa kitn ningkail Wailen, kil Maur Wailen akitnen ti.'”
LUK 4:13 Maur Paipm Satan kil ningkailel kai kweikwei wrongkwail pa plalng pa, wa kil wa atnuurngkel kai pen.
LUK 4:14 Atom Sisas wa yaper kaino anong kanokg Kalili nampokgen titnongket a Maur Wor. Wa yangkipm a la kil pa am kai yela anong kanokg yamping tiur pa ise.
LUK 4:15 Kil kaling plan tu wrongkwail kin a kipman pa itna wan alntuwen a tu atning atning yangkipm a Maur Wailen atnewe pa, wa tu wrongkwail pa tu ngkat nang akilen pa.
LUK 4:16 Wa Sisas kil kai Nasaret, anong a pikekg kil wrekg wor wail atnewe pa. Ak wang wail a men Suta rka eng yapm pa, kil kai kawor wan a tu atning atning yangkipm a Maur Wailen atnewe pa. Kil akangklei ak kolngkolpake. Atom kil wrekg itna la ngkleikg wrkapm a Maur Wailen pa.
LUK 4:17 Atom tu awi wrkapm a melnum okwripm Aisaia pa alkel, atom kil ari atom kil awi wrkapm pa kil nampreingen akor yangkipm ur a nira la,
LUK 4:18 ”Maur Wor a Wailen rpma kupm, eng ntei, kil alkil takweiyopm la kupm laron yangkipm wor a la Krais niki tu melnum a rpma tukwok. A kil ukwawopm la kupm laron yangkipm pa eng ikuwi tu melnum a rka wan tipmining pa iye kulor en. A wa laniki tu mla ur a wulmpa tilmpisen mpa wa tu wulmpa ore ri kweikwei. A kupm nar la ungkwan kalkuten a tu arkuwen a wleket a tu alken pa eng mpa tu rpmi kukula wor.
LUK 4:19 Wa laron niki tu wrong kin kipman pa la wring ti pa, wring a Wailen la rein ngklinsen.”
LUK 4:20 Kil angkleikg plalng pipa wa kil wale wrkapm pa uk yaper kai melnum alkil a ikgalen wrkapm pa, a kil angko rpma. Ari tu wrong kin kipman a rpma kawor wan pa, tu ikatnentel titnongket.
LUK 4:21 Atom kil wa lanaken la, “Yangkipm wrkapm a Maur Wailen wet kipm atning a kupm angkleikg kil pa, am palng ok arke tike, am kupm tike.”
LUK 4:22 Tu kaporng yangkipm la kil pa wor, wa tu wrekg paipm eng atning yangkipm a plan ipma wor a palng kai ok akilen pa. Wa tu lanaki tita la, “Palpa kil pa warim kipman a Sosep ti kolti!”
LUK 4:23 Ari Sisas lanaken la, “Kupm ariwe la kipm ti ake ukipma kupm ti kolen wrkapm a Aisaia la pa. Nikgwalpm akipmen pa kipm aklawopm ak yangkipm kla lala kupm melnum a antokg i numpet pa, kol a kupm ntokg kupm alkupm ti palng wor pen. Kipm wasrongen la la kupm ntokg kuina ur itni anong yiprokg alkupmen ti, kol a pikekg kipm atning a kupm antokg itna kai kaino Kaperneam ai.”
LUK 4:24 Wa kil wa la kolpa kai la, “Kupm lanakepm aklale wrisen, tu melnum ake antiwe a atning katnun yangkipm a melnum okwripm ur angkli itna anong yiprokg alkil pa.
LUK 4:25 Kolen pikekg ep ak wang a Elaisa kil rpma, ak wang pa u ake awei itna kol wring wraur misen wompel, atom wa wang nikg wail palngten yela anong kanokg a Isrel ti. Atom ak wang pa tu kin karpikg wailet rka Isrel ti. Pake kupm lanakepm aklale wrisen,
LUK 4:26 la Elaisa ake pikekg ukwa kai eng la ngklin tu kin karpikg a rpma Isrel, anong yiprokg alkil ti, kalpis. Kil pikekg ukwa kaino eng kin karpikg wris ur kaino Sarepat kaino anong kanokg manet ur a Saiton ai.
LUK 4:27 Wa kolen tu melnum watipmen a Isrel ti tu awi numpet a i paipuk ak wang a Elaisa kil itna melnum okwripm, ti ake wris ur atuwen a rpma anong yiprokg akil ti palng wor pa, kalpis. Naman, melnum wris ur a kaino anong manet ur a Siria wai pa kolti palng wor.”
LUK 4:28 Tu wrongkwail a rka kawor wan a tu atning yangkipm a Maur Wailen atne atne pa tu atning yangkipm a Sisas la kolpa atom, tu ipma wakget paipm wrisen.
LUK 4:29 Atom tu wrekg kolti arkol wampel Sisas pa aye kulor en a anong pa. Anong pa tu ngkat ela wrik krongen ur, a tu arkol wampel talpul angkli kol pa ayewel kinar tipmining. Tu ayewel kinar la kol a ngkliwel elng kinar tipmining watin ai, ari kalpis,
LUK 4:30 kil atnuurngken kolti, kil angkom or kuin a tu wrongkwail pa am kai ise.
LUK 4:31 Atom Sisas kai kaino Kaperneam, anong a anong kanokg a Kalili. Ak wang wail a rpma eng yapm pa kil ngkaten kwap a kaling plan tu.
LUK 4:32 Tu wrekg paipm atnen yangkipm a kil kaling planten pa, eng ntei, yangkipm a kil kaling planten pa kil kaling planten nampokgen titnongket.
LUK 4:33 Melnum ur a maur paipm kimpilpet arpmewel pa kil rpma kawor wan a tu atning atning yangkipm a Maur Wailen atnewe pa. Atom kil kirkar yikakatnen
LUK 4:34 la, “Ei, Sisas a Nasaret! Kitn la ntokg na kul men ti? Kitn kul la ntokg men ti kai paipm aki? Kupm ariweweitn pa, kitn pa Melnum Klalen Wakget a Maur Wailen.”
LUK 4:35 Ari Sisas kil akle maur paipm pa la, “Mpri ok akitn pa, or kai tukuleikgen melnum pa kai o!” Atom maur paipm laik melnum pa ngkrang kolti elng kai angko rmpa kai kuin a tu ai, a wrekg or kai takwleikgentel, a melnum pa ake wa kil awi paipm ur.
LUK 4:36 Tu wrongkwail pa tu ari pa tu wrekg paipm lanaki tita la, “Kil pa la yangkipm na kolpa? Kil pa kil melnum a nang arke antiwe titnongket a la tu maur paipm kimpilpet pa kulor kai takwleikg pake!”
LUK 4:37 Atom tu aye yangkipm a la kweikwei wrongkwail a kil antokg pa aye kai yela anong wrongkwail a ela wreren pa.
LUK 4:38 Sisas kil atnuurng wan a tu atning atning yangkipm a Maur Wailen atnewe pa, a kil kai wan a Saimon. Wa yalmpikg mayen a Saimon pa kil amo numpwakget wail paipm, atom Saimon lanakel la kil ngklinsel.
LUK 4:39 Atom kil kai itna wreren wrik a man pa, atom kil la titnongket ungkwan numpet pa takwleikgentel, atom numpet pa kai plalng. Wa kil wrekg pirpiren antokg okipma kweikwei pa uk tu pa al.
LUK 4:40 Takgni kai kinar timpal ti pipa, tu wrong kin kipman tu aye tu a awi numpet wrongkwail pa aye wli eng Sisas. Atom kil elng wam pa ele tu melnum numpet pa wris wris, a antokg numpet a tu pa palng wor.
LUK 4:41 Wa maur paipm wailet tu or kai takwleikgen tu wrong kin kipman watipmen pa, a tu kirkar la, “Kitn pa Warim Kipman a Maur Wailen!” Ari Sisas aklewen a angkengken la ake mpa tu oklala. Eng ntei, tu ariwe la kil pa Krais.
LUK 4:42 Takgni pa no pus pa, Sisas kil wrekg atnuurng anong pa, a kil kai wrik laikge ur pa. Tu wailet a pa anel akorel yela, kolpa kai ansilel kai wrik a kil kai arpme pa. Atom tu la mpa ngkengkel, eng ake mpa kil utnuurngten.
LUK 4:43 Ari kil lanaken la, “Kupm mpa kai tutu anong wail tiur ai yat laron yangkipm wor a la kweikwei wrongkwail a Maur Wailen ikgalen pa. Eng ntei, Maur Wailen am ukwawopm nar la ikwap kol pake.”
LUK 4:44 Kil lanaken kolpa plalng, kil laron yangkipm a Maur Wailen pa kolpa kai itna wan a tu atning atning yangkipm a Maur Wailen atnewe, yela anong kanokg Kalili ai.
LUK 5:1 Ak wang wris ur pa, Sisas kil itna ukupuk yamping a Kenesaret pa, a tu wrongkwailet paipm anel wli kulkai kapringentel la itning yangkipm a Maur Wailen.
LUK 5:2 Kil ari nim ukupuken wekg ur pa rka kai ukupuk yamping pa. A tu melnum a ak apm mumu awi yul pa atnuurng nim ukupuken pa rka, tu kinar klak apm mumu pa itna.
LUK 5:3 Atom Sisas kil kaino rpma nim ukupuken ur pa, pa nim ukupuken a Saimon, a kil lanaki Saimon pa la, “Kitn uwi nim ukupuken ti ik uwiyopm iye kai waiketnketn!” Atom Saimon kil ak katila kol a kil lanakel pa. Atom kil rpma nim ukupuken a pa, a kil kaling plan tu wrong kin kipman wailet a wli itna ukupuk yamping pa.
LUK 5:4 Kil kaling planten plalng pa, kil lanaki Saimon pa la, “Kitn uwi tu alkitn pa kipm uwi nim ukupuken ti kai rki kai ukupuk kapmen ai, atom kipm ngkli apm mumu pa elng kinar ukupuk pa eng ik uwi yul pa.”
LUK 5:5 Ari Saimon pa akalmpe la, “Melnum Wailen, men am wuten aken kwap pa ak mining ai kulngkul am kong tike, ake wa men awi yul ur. Ari kitn pa la kolpa ti, mpa kupm ngkli apm mumu pa.”
LUK 5:6 Tu alekg apm mumu pa elng kinar, ari tu ak awi yul wailet paipm, wreren eng apm mumu pa eng a kitnangku.
LUK 5:7 Kolpa atom tu ak wam pa akwe tu tiur alntu a rka kai nim ukupuken ur pa la tu kul ngklinsen. Tu kul kolti, tu kimeket awi yul pa alupm kai nim ukupuken wekg pa no pik waiwai, ak kaikutel ak arku nim ukupuken wekg ti eng a elng kinar u kanokg tike.
LUK 5:8 Saimon Pita kil ari pa, kil kapor kilko alein Sisas pa, a kil la, “Wailen, kitn kai tukuleikg kupm ti, kupm ti melnum a antokg paipmpaipm.”
LUK 5:9 Kil la kolpa atnen a kil pa nampokgen tu tiur alkilen pa, tu wrekg paipm eng ari yul wailet paipm a wuten tu awi pa.
LUK 5:10 Wa Semis ekg Son, warim kipman wekg a Sepeti, tuwekg akwap wris nampokgen Saimon pa, tuwekg wa wrekg paipm eng pa yat. Ari Sisas lanaki Saimon pa la, “Ampur kitn ngkark. Ak wang ti kai pa kitn ikga uwi tu melnum kol a kitn awi yul pa.”
LUK 5:11 Atom tu awi nim ukupuken pa aye kai itna kai nimilpm ai, nampokgen kweikwei wrongkwail pa elngkitna pa plalng pa, tu kai katnun Sisas.
LUK 5:12 Ak wang a Sisas rpma anong wris ur pa, melnum ur a i paipuk al num a kil ti plalng pa kil wli eng Sisas. Kil ari Sisas pa, kil elngtangko wontaipur rmpa won a Sisas pa, a kil lanakel la, “Melnum Wailen, kitn wasrongen pipa, kupm ariwe la kitn antiwe mpa ntokg numpet akupmen kil palng wor!”
LUK 5:13 Ari Sisas pa akalmpe kai melnum pa la, “Kupm wasrongen pa.” Atom kil elng wam pa kai itna melnum pa, a kil la, “Kitn palng wor o!” Kil la kolpa, i paipuk pa kai takwleikgen melnum pa penterngen kolti.
LUK 5:14 Atom Sisas uk yangkipm titnongket kai melnum pa la, “Ampur kitn lanaki mla ur. Kitn kai o, plan num alkitn pa kai melnum ipma krakgen a Maur Wailen pa ri, eng mpa kil il wor uk Maur Wailen pa, kol yangkipm titnongket a Moses la pa. Eng mpa plan tu wrongkwail eng tu riwe la, kitn am palng wor ise.”
LUK 5:15 Ari kalpis, yangkipm a la Sisas pa am kai umpen yela tu wrongkwail atning ise. Atom tu wrong kin kipman wailet paipm anel wli la itning yangkipm a kil pa, a tu la kil ungkwan numpet atuwen pa yat.
LUK 5:16 Pake wang tiur pa Sisas kai wrik kalpmlel ur a ake melnum ur arpme, eng kil oklala naki Maur Wailen.
LUK 5:17 Ak wang wris ur a Sisas kaling plan tu wrong kin kipman pa, tu melnum a arpmen yangkipm yiprokgen a Moses, a tu melnum a aroaro wonel tu yangkipm a Moses pa, tu rka yat. Tu wli a pa a pa, a anong wail Serusalem, a anong wrongkwail a Kalili, a Sutia pa. Maur Wailen alkel titnongket, atom kil antokg tu melnum numpet pa palng wor. Kil ak kwap kolpa itna pa,
LUK 5:18 melnum tiur yapo melnum ur a nepm wam plupmen pa aye wli, atom tunteng akor ya la iyewel kawor wan eng Sisas pa.
LUK 5:19 Ari tu wrongkwailet paipm ak ampri ya pa atom tunteng ake antiwe aye melnum pa aye kawor wan pa. Kolpa atom tunteng ngkat melnum pa aye kaino wan kimpo kwa pa. Atom tunteng angketen wutneik tiur pa plalng, alekg melnum pa elngkinar rmpa tumute won a Sisas pa rmpa kuin a tu wrongkwail.
LUK 5:20 Sisas ari a tunteng ukipma kolpa, atom kil la, “Melnum wor alkupm, paipmpaipm akitnen am kupm ungkwan ise.”
LUK 5:21 Atom tu melnum a aroaro wonel tu yangkipm a Moses, a tu melnum a arpmen yangkipm yiprokgen a Moses pa, tu atning yangkipm pa, tu akwonalmpen watipmen la, “Kil pa melnum kolai, atom kil aknokgel Maur Wailen pa? Melnum ur akentiwe a ungkwan paipmpaipm pa. Maur Wailen wris ata pa kil antiwe pake.”
LUK 5:22 Ari Sisas pa kil am ariwe nikgwalpm kuina ur a tu akwonalmpen pa ise, atom kil asenten la, “Wa kipm akwonalmpen nikgwalpm kolpa eng ntei?
LUK 5:23 Yangkipm a i wunongket antiwe mpa laniki melnum numpet ti la, paipmpaipm akilen am kupm ungkwan ise, aki mpa lanikel la, kil wrekg ngkom kai? Yangkipm wekg pa ake antiwe mpa melnum ur la atom palng katila pa.
LUK 5:24 Pake mpa kupm plantepm eng kipm riwe la, Warim Kipman a Melnum pa, kil antiwe titnongket itna kanokg a ti eng ungkwan paipmpaipm.” Sisas lanaki tu pa kolpa plalng pa, kil lanaki melnum a nepm wam plupmen pa la, “Kupm lanakeitn la kitn wrekg ngkit wrik alkitn ti iye kai wan anong alkitn ai!”
LUK 5:25 Atom penterngen kolti kil wrekg itna wulmpa a tu wrongkwail pa, a kil ngkat wrik alkil pa. A kil ngkat nang a Maur Wailen pa itna wampel kolti kai anong.
LUK 5:26 Tu wrongkwail tu wrekg paipm, a ngkat nang a Maur Wailen. Wa tu ngkark paipm wrisen, atom tu la, “Weti mentepm ari kweikwei titnongket manet a pikekg ake mentepm ari ep pa.”
LUK 5:27 Itna kolpa kai pa Sisas kil angkom kai pa, kil ari melnum ur a awi awi marpmel tu pa, nang akilen pa Lipai. Kil rpma wan alkil a awi awi marpmel tu pa. Atom Sisas akwewel la, “Kitn kul kutnuntopm!”
LUK 5:28 Atom kil wrekg atnuurng kweikwei wrongkwail alkil pa itna pa, a kil kai katnuntel.
LUK 5:29 Atom Lipai kil antokg okipma wail eng Sisas itna wan alkil pa, atom tu wrongkwailet paipm a awi awi marpmel tu pa, a tu tiur ai, anel wli antiwen al okipma pa.
LUK 5:30 Tu melnum a arpmen yangkipm yiprokgen a Moses, a tu melnum a aroaro wonel tu yangkipm a Moses pa, tiur atuwen pa am tu alntu melnum a arpmen yangkipm yiprokgen a Moses pake. Tu la watipmen kai tu watnom a Sisas pa la, “Wa kipm al u a okipma pa anti tu melnum a awi marpmel tu pa, wa nampokgen tu melnum a antokg paipmpaipm tiur ai pa eng ntei?”
LUK 5:31 Ari Sisas akalmpenten kolpa la, “Melnum a numpworen pa, kil ake la kai eng melnum a antokg i numpet pa, pa mpa tu melnum a numpet kolti.
LUK 5:32 Pake kupm ake wli la ukwe tu melnum ute wor wor pa, kupm wli la ukwe tu melnum a antokg paipmpaipm pake, la tu plelng ipma.”
LUK 5:33 Atom tu la kai Sisas pa la, “Tu watnom a Son aroaro wonel pa, anti watipmen tu kalpis okipma eng uk wang Maur Wailen, a tu oklala naki naki Maur Wailen, wa tu watnom a melnum a arpmen yangkipm yiprokgen a Moses pa yat. Pake tu akitnen pa wa al u a okipma kolpa kai.”
LUK 5:34 Ari Sisas akalmpenten la, “Kipm ti antiwe a kalpis okipma ik wang a melnum la uwi kin iye pa ik wang a kil antiwepm rpma pake?
LUK 5:35 Wangkur ikga wa tu uwiyel iye kai tukuleikgten pa, pa ikga tu ipma kaikut ukwakg nare okipma pa rki pake.”
LUK 5:36 Wa kil wa lanaken yangkipm kla kil kolpa la, “Mentepm ur ake mpa ngketen apm maing a nowe pa, atom wa kai ngkut rpme apm nungkwor a rakol pa. Kol mentepm ntokg kolpa pa, mpa ak aro apm maing pa. Apm umpu maing pa mpa wa ri nirak apm nungkwor pa.
LUK 5:37 Am wa kol pake, mentepm ur ake mpa wa inen nok maing a wa lupm elngkinar tikaiyo tingklaket pa. Kol mentepm ntokg kolpa pa, nok maing pa mpa arolanti tikaiyo tingklaket pa ungkwan lolos, atom tikaiyo pa mpa kai rakol paipm.
LUK 5:38 Kalpis, nok maing a ak pa mpa lupm elngkinar tikaiyo maing wor.
LUK 5:39 Melnum a al al nok ruk nungkworen pa, pa kil la pa al wor pake, a nok walmpopmet pa al paipm.”
LUK 6:1 Ak wang wail wris ur a tu rpma eng yapm pa, Sisas anti tu watnom alkilen pa angkom or wring wit kuin pa. A tu upaar wit ok pa raing al itna wampel kai.
LUK 6:2 Atom tu tiur a tu melnum a arpmen yangkipm yiprokgen a Moses tu ari pa, atom tu asenten la, “Wa kipm kapor yangkipm titnongket a la, akentiwe mpa mentepm ikwap ik wang wail a rpma eng yapm pa?”
LUK 6:3 Ari Sisas akalmpenten la, “Kuina ur a pikekg Tepit anti tu alkil pa antokg ak wang a tu nikgalmpen pa?
LUK 6:4 Kil kai kawor wan yalming a Maur Wailen pa, atom kil awi nok tingklak a pikekg tu alwor uk Maur Wailen pa, atom kil al, a kil uk tiur kai tu melnum alkil pa al. Ti yangkipm titnongket la kolpa la, mpa tu melnum ipma krakgen kolti il nok tingklak a alwor uk Maur Wailen pake.”
LUK 6:5 Wa Sisas wa lanaken la, “Warim Kipman a Melnum pa, kil wailen itna ep ikgalen wang wail a rpma eng yapm pa.”
LUK 6:6 Wang ur ak wang wail a rpma eng yapm pa, Sisas kil kawor wan a tu atning atning yangkipm a Maur Wailen atnewe pa, atom kil kaling plan tu wrong kin kipman yangkipm a Maur Wailen. A melnum ur a wam wi amo tupmungkul kalpmilel pa kil wa rpma kawor wan pa atning yangkipm pa rpma.
LUK 6:7 Pake tu melnum a aroaro wonel tu yangkipm a Moses a tu melnum a arpmen yangkipm yiprokgen a Moses pa, tu akor ya la, mpa tu uwi Sisas pa or kol ya a i, eng mpa tu uwiyel iye kai itni yangkipm pa. Kolpatom tu wulmparpmewel yek kimeket la mpa tu ri kil ntokg melnum numpet ur palng wor ik wang wail a rpma eng yapm pa, aki kalpis.
LUK 6:8 Pake, Sisas pa am ariwe nikgwalpm kuina ur a tu akwonalmpen pa ise, atom kil lanaki melnum a wam amo tupmungkul kalpmilel pa la, “Kitn wrekg itni wulmpa a tu wrongkwail ti!” Atom kil wrekg itna kwa pa.
LUK 6:9 Atom Sisas lanaken la, “Kupm la ik isentepm la, ti yangkipm titnongket amentepmen ti lanako la, mpa mentepm kutnun kolai ik wang wail a rpma eng yapm pa? Mpa mentepm ntokg nikgwalpm wor aki, nikgwalpm paipm? La ngklin melnum eng kil rpmi wor, aki ntokg melnum eng kil rpmi paipm?”
LUK 6:10 Kil itna ari tu wrongkwail pa yela plalng, a kil lanaki melnum pa la, “Ntran wam alkitn pa!” Kil atning kolpa, kil ntran wam alkil pa, atom wam kil a amo pa am palng wor ise.
LUK 6:11 Pake nikgwalpm a tu pa wakget paipm ai, atom anel akor la itna kuin a tu alntu pa la, mpa tu ntokg kuina ur kai Sisas pa.
LUK 6:12 Ak wang wris ur pa, Sisas kaino oklala naki Maur Wailen kaino wrik nangen ur pa, atom ak mining wris pa, kil oklala naki Maur Wailen kolpa rpma a,
LUK 6:13 or kong pa, kil akwe tu melnum a katnuntel pa wli. Atom kil takwei melnum wampwam yikak wekg la tu watnom alkilen a kil la iroro wonel pa, a wa kil namput tu pa la tu melnum wokgen alkilen:
LUK 6:14 Saimon, kil alil nangkel la Pita, wusok alkil Antru, Semis, Son, Pilip, Partolomyu,
LUK 6:15 Matyu, Tomas, Semis, warim kipman a Alpius, nampokgen Saimon, melnum ur a tu Selot.
LUK 6:16 Sutas, warim kipman a Semis, a Sutas Iskariot, melnum a ikga elng Sisas kai wam a tu wrongmanto.
LUK 6:17 Sisas anti tu watnom alkil a kil aroaro wonel pa anel angkaino nang pa nar itna wrik ipmawen pa, a tu wrongkwailet paipm alkilen a katnuntel pa tu am rka ise, a wa nampokgen tu wrong kin a kipman wailet a anong wail Serusalem, a yela anong kanokg Sutia, a nampokgen anong kanokg a ela unokg yamping wreren anong Tair a anong Saiton.
LUK 6:18 Tu wli la itning yangkipm akilen pa, a la kil ntokg numpet a tu pa eng tu palng wor. Tu melnum tiur a maur paipm kimpilpet arpmewen pa, Sisas ungkwan takwleikgten, atom tu palng wor.
LUK 6:19 A tu wrong kin a kipman pa ampen la ik wam intewel, eng ntei, titnongket a kil pa antiwe a antokg tu wrongkwail pa palng wor.
LUK 6:20 Sisas awi tu melnum a katnuntel atn pa atom kil ikatnenten a kil la, “Kipm melnum a rka tukwok pa, kipm pa wor pake, kipm itopen o! Maur Wailen am itna wailen ikgalen ipma a kipm pake.
LUK 6:21 Kipm melnum a nikgalmpepm ak wang ti pa, kipm pa wor pake, kipm itopen o! Kipm ikga rpmi ntiwe. Wa kipm melnum a akg ak wang ti pa, kipm pa wor pake, kipm itopen o! Kipm ikga itopen paipm.
LUK 6:22 Tu la rpmentepm paipm pa, pa kipm rpmi itopen kolti. Kipm melnum a tu arpmen paipmelepm, ungkwantepm, aklewepm ak yangkipm paipm, a alkepm nang paipm, eng ntei, kipm melnum a katnun Warim Kipman a Melnum pa, kipm pa wor pake, ti kipm itopen o!
LUK 6:23 Kipm itopen ik wang pa, a tipra tipra itopen paipm kolti, eng ntei, kweikwei wailet wor wor pa Maur Wailen kil elngtepm itna kai anong wor alkil ai. Tu mamikg mamin mansan atuwen, am pikekg antokg paipmel tu melnum okwripm a Maur Wailen pa kolpa yat pake.
LUK 6:24 Pake arein, kipm melnum a rpma antiwe ak wang ti pa kipm ikga uwi paipm. Eng ntei, kweikwei wor wor a kipm la ikga uwi pa, am kipm awi antiwe kolpake.
LUK 6:25 Arein kipm melnum a rka wor al nikgwor ak wang ti, pa kipm ikga nikgilmpepm. Wa arein kipm melnum a rpma atopen inyo katnong ak wang ti, pa kipm ikga akg rein paipm.
LUK 6:26 Arein kipm melnum a tu ngkat nang akipmen pa, pa kipm ikga uwi paipm, eng ntei, tu yantin mamin wror wror akipmen pa, am pikekg ngkat nang a tu melnum okwripm kansil kolpa yat pake.”
LUK 6:27 Wa Sisas kil wa la kolkil la, “Pake kupm laniki kipm melnum a atning yangkipm a kupm la pa, kipm mpa plan ipma wor wasrongen tu wrongmanto alkipm pa. Kipm mpa plan nikgwalpm wor kai eng tu a ipma paipm eng kipm pa.
LUK 6:28 Kipm mpa oklala niki Maur Wailen eng kil uk wor ngklin tu melnum a la lalongentepm pa. A wa laniki Maur Wailen la kil ngklin tu a arpmen paipmelepm pa.
LUK 6:29 Kol melnum ur oreitn kai tangkwei wompel pa, wa kitn wa plelng tangkwei wompel pa wa kil oreitn. Aki kol melnum ur iner apm wakget a kitn nowe eng wropuk pa, wa kitn wa iner apm ur a kitn nowe ti wa lkel, ampur wa kitn wa langkinen pa.
LUK 6:30 Kol mla ur kil ik ok la, la kitn lkel kweikwei ur pa, kitn lkel kolti. A mlaur awi kweikwei akitn ti aye kai pa, ampur wa kai la eng wa awi aye yaper kul pa.
LUK 6:31 Kipm wasrongen la tu mla ur iktepm kolai pa, mpa kipm ti ikten kolpake.
LUK 6:32 Kol kipm plan ipma wor wasrongen tu mla ur a plan ipma wor wasrongen kipm pa kolti pa, mpa Maur Wailen kiporngtepm yangkipm la kolai? Ti tu melnum a antokg paipmpaipm pa am wa plan ipma wor wasrongen tu melnum a plan ipma wor wasrongenten kolpa yat pake.
LUK 6:33 A kol kipm antokg wor eng mla ur a antokg wor eng kipm pa, mpa Maur Wailen kiporngtepm yangkipm la kolai? Ti tu a antokg paipmpaipm pa, am wa ak kolpa yat pake.
LUK 6:34 Wa kol kipm uk kweikwei akipmen pa kai mla ur a kipm akwonalmpen la ikga tu ikilmpentepm pa, mpa Maur Wailen kiporngtepm yangkipm la kolai? Ti tu melnum a antokg paipmpaipm pa am wa ak kolpa yat pake. Tu uk kuloken mla ur a tu ariwe la ikga tu ikilmpenten kiti kiti kolpake.
LUK 6:35 Pake kipm mpa plan ipma wor wasrongen tu wrongmanto alkipm pa, a ntokgten riworwor, a lken kweikwei pa kolti, ampur wa kipm akwen. Eng ikga kipm uwi kweikwei wailet wor wor, wa kipm plan kipm alkipm kol a kipm warim a Maur Wailen a itna ep angen kweikwei wrongkwail. Eng ntei, kil pa melnum a plan ipma wor tu melnum a ake alkel wor, a tu a antokg paipmpaipm.
LUK 6:36 Kipm rein tu wrongkwail, kol a Maur Wailen, Yan alkipmen, arein kipm wrongkwail pa.”
LUK 6:37 Wa Sisas kil wa la kolkil la, “Ampur ari elukgen melnum ur pa la paipm pa, pa ikga wa Maur Wailen kil ri elukgen kipm ti la kipm paipm. Ampur elng wam itna melnum ur la kil ikga uwi paipm pa, pa ikga wa Maur Wailen wa elng wam itni kipm ti yat la kipm ikga uwi paipm. A kipm mpa ungkwan paipmpaipm a mla ur eng ikga wa Maur Wailen wa ungkwan paipmpaipm akipmen ti yat.
LUK 6:38 Kipm uk kweikwei mla ur pa, pa ikga wa Maur Wailen wa lkepm kol pake. Atom ikga kipm uwi nimong wail, watnompen ngklin no pik waiwai ampei iken. Kipm lupm nimong kolai uk mla pa, ikga wa Maur Wailen ikilmpentepm nimong kolpake.”
LUK 6:39 Wa Sisas kil wa la yangkipm kla ur kil wa la, “Antiwe mpa melnum wulmpa tilmpisen ur plan ya melnum wulmpa tilmpisen ur pake? Pa akentiwe, mpa tuwekg yatenen ngko elng kinar wrik tungkuren pa.
LUK 6:40 Melnum a awi ariwe pa ake itna angen melnum alkil a kaling plantel pa. Kil uwi ariwe pa plalng pipa, kil ikga palng kolen melnum alkil a kaling plantel pake.
LUK 6:41 Antokg kolai atom kitn wa ari ipik waiketn a ela wulmpa a melnum ur alkitn pa, pake ake wa kitn ari yo wompel wail a ela wulmpa alkitnen ti!
LUK 6:42 Antokg kolai atom kitn lanaki kil pa la, 'Melnum wor alkupmen, itni eng kupm kiplim ipik ur pa tukuleikgteitn wulmpa pa ri.' Pake ake kitn ari yo wompel wail a ela wulmpa alkitnen ti? Kitn melnum a kansil plan ak num enen ti kolti. Kitn uwi yo wompel wail a ela wulmpa alkitnen pa ep, atom mpa wulmpa a kitn pa wor, eng mpa kitn ik ri ipik a ela wulmpa a melnum wor alkitnen pa kiplim tukuleikgentel.”
LUK 6:43 Wa Sisas kil wa la kolkil la, “Yo wor pa ake mpa ngko ok paipm pa, a yo paipm pa ake mpa ngko ok wor pa.
LUK 6:44 Yo wris wris pa am ari kai yo ok alkil a angko pake. Mentepm ake anel tikga kulok aki tikga tukgun pa kai ampei iket paipm pa, aki anel ampei ok wain pa kai mi rungulet pa.
LUK 6:45 Am kolpake, melnum a kil alupm nikgwalpm ariwe wor wor wailet pa, oklala a kil pa palng kul or kai wor. A melnum a kil alupm nikgwalpm ariwe paipm paipm wailet pa, oklala a kil pa palng kul or kai paipm. Oklala ur a palng wli ok a melnum pa la pa, pa am plan nol nikgwalpm akilen pa am kolpake.”
LUK 6:46 Wa Sisas kil wa la kolkil la, “Antokg kolai atom, kipm akwe nang a kupm ti la, 'Wailen, Wailen', pake ake kipm antokg katila kuina ur a kupm lanakepm pa?
LUK 6:47 Mpa kupm plantepm melnum a kul eng kupm ti, atom atning katnun katila yangkipm akupmen pa, la kil melnum kolai.
LUK 6:48 Kil pa kol melnum a ale wan. Kil ak lkim pa watin, atom uwen ong pa itna wrik kangirngket. Kop pa u nar ak anel wan pa, ari ake wa or, eng ntei, wan pa pikekg kil ale ariworwor.
LUK 6:49 Pake melnum a kil atning yangkipm akupmen pa, ari ake wa kil katnun katila pa, kil pa kol melnum a ale wan, atom ak lkim tukwok, uwen ong pirpar paipm. Kop u nar ak anel wan pa, am tapor or kai prapm paipm ise.”
LUK 7:1 Sisas la yangkipm ok kweikwei pa naki tu wrong kin kipman pa plalng pipa, kil kai Kaperneam.
LUK 7:2 Kai anong pa, melnum mring tukgunakg ur a tu Rom a ikgalen tu melnum kamel wampwomis a almpwrong pa rpma, pake melnum akwapel ur alkil pa numpet paipm rmpa, wreren eng a imo tike. Melnum pa, mring tukgunakg alkil pa wasrongentel paipm.
LUK 7:3 Kil atning a Sisas akwap itna Kaperneam ti, atom kil ukwa tu melnum wailen tiur a Suta pa la, tu kai isentel la, kil kul eng ungkwan numpet a melnum akwapel alkilen pa.
LUK 7:4 Tu kai eng Sisas pa, atom tilpel titnongket la, “Melnum pa melnum wor amenen, kol a kitn kai ngklinsel eng ntokg melnum akwapel akilen pa palng wor pen.
LUK 7:5 Eng ntei, kil plan ipma wor wasrongen mentepm Suta ti, a kil pikekg angklinso alento wan a men atning atning yangkipm a Maur Wailen atne pa.”
LUK 7:6 Sisas awi wor, atom kil wrekg antiwen kai. Kil kai wreren wan pa, ari mring tukgunakg pa ukwa tu yiprokgen alkil pa kai angkeng Sisas pa la, “Wailen, alkeitn kwap wail, kupm ti ake melnum wor, eng mpa kitn kul wan akupmen ti.
LUK 7:7 Kupm ari kupm alkupm ti la, ake mpa wor eng kupm alkupm ti kai riweitn. Kolpa atom ari kupm ukwa melnum akwapel alkupm pa kai ariweitn. Ti kitn itni ti o, la ik ok ti kolti, eng mpa melnum akwapel akupmen ti palng wor.
LUK 7:8 Kupm ti wa itna orngwatneikgen tu melnum tiur a itna ep, wa kupm ti wa itna ep ikgalen tu melnum a almpwrong. Atom kupm la melnum ur la kil kai pa, kil mpa kai, kupm la melnum ur la kil kul pa, kil mpa kul, kupm la melnum akwapel alkupmen pa la, kil ntokg kweikwei pa, kil mpa ntokg.”
LUK 7:9 Sisas atning yangkipm a kil la pa, kil wrekg paipm. Kil plelng wa lanaki tu wrong kin kipman wailet a katnuntel pa la, “Ake kupm atning ari melnum ur a kipm Isrel pa ukipma titnongket kol mring tukgunakg kil pa.”
LUK 7:10 Atom tu melnum a wuten mring tukgunakg alntuwen ukwawen kul pa, anel yaper kawor wan pa, atom tu ari melnum akwapel a mring tukgunakg pa am palng wor ise.
LUK 7:11 Itna waiketn pa, Sisas wa wrekg a pa wa kai anong wail a namput la Nain, nampokgen tu melnum alkil a katnuntel pa, a tu melnum wrong kin a kipman wailet pa tu wa antiwel kai.
LUK 7:12 Tu kai kolpa kaingkai, angko wreren yipmingki yayun a anong Nain pa, tu ari melnum yipmiri ur pa a tu ngkat aye or. Melnum a amo pa pati, warim kipman wrisen a kin karpikg yek ur. A tu wrong kin a kipman wailet a anong pa akupewel aye melnum yipmiri pa or.
LUK 7:13 Ak wang a Wailen kil ari kin karpikg yek pa kolpa, ipma akil pa ak areinsel paipm. Atom kil lanakel la, “Ampur kitn yek akg.”
LUK 7:14 A kil kai wamanti wrik a tu ngkatel pa, a tu a ngkatel pa wa anel itna. A Sisas lanaki melnum yipmiri a rmpa pa la, “Melnum warimpen kupm lanakeitn la, kitn wrekg o!”
LUK 7:15 Melnum yipmiri pa wrekg rpma, a kil oklala, atom Sisas lanakel la kil kai eng man yek alkil pa.
LUK 7:16 Tu wrongkwail tu ari kolpa, tu wrekg ngkark paipm wrisen, a tu ngkat nang a Maur Wailen. Tu lala, “Melnum okwripm a Wailen am palng itna kuin amentepmen tike. Maur Wailen am nar ise, la ngklin mentepm wrong kin a kipman alkilen.”
LUK 7:17 Atom tu aye yangkipm a Sisas antokg melnum yipmiri pa wrekg kai naki tu yela anong kanokg Sutia, a anong kanokg a ela wreren Sutia pa.
LUK 7:18 Tu watnom a Son kil aro arowonel pa, tu lakati nakel kweikwei a Sisas antokg, atom Son akwe melnum wekg pa kulntel,
LUK 7:19 atom kil ukwawen kai asen Sisas pa ri la, “Kitn melnum pikekg Maur Wailen la ukwa nar eng la ikga ik rmpento ampake, aki ikga men rpmi nungkwangen melnum ur a wai?”
LUK 7:20 Tuwekg kai palng eng Sisas pa, tuwekg lala, “Son, melnum a kaluk tu pa, ukwawo kul la mentekg isenteitn la, 'Kitn melnum pikekg Maur Wailen lala ukwaweitn nar am tike, aki ikga men rpmi nungkwangen melnum ur a wai?'”
LUK 7:21 Ak wang pa Sisas antokg tu melnum numpet auraur, melnum a maur paipm arpme, a tu melnum watipmen a wulmpa tilmpisen pa palng wor kolpa itna.
LUK 7:22 Atom kil akalmpe yangkipm a melnum wekg pa la, “Yaper kai lakiti niki Son pa kweikwei a kipmekg atning ari ti, la melnum a wulmpa tilmpisen ti palng wulmpa ore ari kweikwei, nepm paipmen wa tu angkom wor, melnum a i paipuk awi pa tu palng wor, nungkulkg titnowen pa tu atning kweikwei, tu melnum a amo ut pa tu wa wrekg rka, wa yangkipm wor a la Krais ti, angkli eng tu melnum a rka tukwok.
LUK 7:23 Melnum ur a ake uk yirokg elukgen kupm ti pa, kil pa wor pake, kil itopen o!”
LUK 7:24 Melnum wekg a aye yangkipm a Son pa kul la pa, atning yangkipm a Sisas la pa plalng pa, tuwekg wa yaper kai pipa, Sisas kil lakati Son pa lanaki tu wrongkwail kin a kipman pa la, “Pikekg Son kil angkli yangkipm itna wrik kalpmlel ur pa, kipm pikekg kai la ri kuina? Kipm kai la ri warum a wripm almpen pake?
LUK 7:25 Kipm pikekg kai la ri kuina? Melnum a nowe apm wor wor aki? Tu melnum a nowe apm wor wor kolpa pati, tu mpa kipm ri kai wan wail a tu melnum tukgunakg a antiwe kweikwei wor wor ai.
LUK 7:26 Aki kipm kai la ri na? Kipm kai la ri melnum okwripm a Maur Wailen? Ei aklale, kupm lanakepm la, Son pa wa wailen angen melnum okwripm wrongkwail ai.
LUK 7:27 Son pa melnum a pikekg Maur Wailen la kolpa, 'Kitn itning, kupm ikga ukwa melnum a aye yangkipm pa iye ep eng kitn. Melnum pa kil ikga ep numprampen ya eng kitn.'
LUK 7:28 Kupm lanakepm la, itna kuin a tu melnum wrongkwail a pikekg man raku pa, ake melnum ur wailen angen Son pa. Pake melnum a awi nang wasek itna kuin a tu melnum a Maur Wailen itna wailen ikgalen nol nikgwalpm atuwen pa, kil pa awi nang wailen angen Son pake.”
LUK 7:29 Tu plalngten, kin a kipman nampokgen tu melnum a awi marpmel tu pa, anel atning yangkipm a Sisas la pa, atom tu ariwe la, ya a Maur Wailen pa ute wor pake. Tu melnum pa pati, tu pikekg awi wor atom Son kil kaluken.
LUK 7:30 Pake tu melnum a arpmen yangkipm yiprokgen a Moses a tu melnum a aroaro wonel tu yangkipm a Moses pa, anel uk yirokg ya wor a Maur Wailen akten pa. Tu melnum pa pati, tu pikekg karken atom ake pikekg Son kaluken.
LUK 7:31 Atom Sisas lanaken la, “Mpa kupm la kipm melnum ak wang ti la kipm melnum kolai?
LUK 7:32 Kipm kol tu warim pa, anel rka anong akapm pa. Kipm warim tiur pa lanaki tu warim tiur pa la, 'Men tiplam wampeng ti, pake ake wa kipm wa plel plel, men ak ok namputen, pake ake wa kipm akg arein.'
LUK 7:33 Am wa kolpa yat pake, Son, melnum a kaluk tu pa, pikekg kul, kil uk wang Maur Wailen, ake kil al u wain a okipma wor pa, pake kipm lawel la maur paipm rpmawel.
LUK 7:34 Warim Kipman a Melnum pa nar pa, kil al u wain a okipma wor pa, pake wa kipm wa la, 'Kipm ri melnum kil! Kil al u a okipma pa wailet, kil melnum yiprokg ur a tu melnum a awi marpmel mentepm ti, a tu melnum paipm tiur ai.'
LUK 7:35 Kipm am kolpake, kipm elukgen Son, wa kipm elukgen Warim Kipman a Melnum ti. Pake nikgwalpm ariwe wor wor a Maur Wailen pa plan aklale kai tu melnum a atning katnun pake.”
LUK 7:36 Melnum a arpmen yangkipm yiprokgen a Moses ur pa, nang akilen pa Saimon, kil akwen Sisas la kai ntiwel il okipma, atom Sisas kai wan a melnum a arpmen yangkipm yiprokgen a Moses pa antiwel al okipma pa rpma.
LUK 7:37 Kai anong pa, kin wris ur a antokg paipmpaipm pa rpma. Kil atning la Sisas anti melnum a arpmen yangkipm yiprokgen a Moses pa al okipma rpma wan akilen pake. Atom kil aye wes kaingkuren ari wor ur a u yaprekget wor arkewe pa aye kai kawor.
LUK 7:38 Atom kil kul itna wreren nepm a Sisas pa akg, a ikgakg pa ungkwan kul nar kaluk nepm a Sisas. Atom kil alo ikgakg pa ak tukgunakg walk alkilen pa, wa nakron nepm a Sisas pa. Plalng pa, kil alung u yaprekget wor pa ak kaluk nepm akilen pa.
LUK 7:39 Melnum a arpmen yangkipm yiprokgen a Moses a wuten akwentel kai al okipma pa ari kolpa, kil la kai kil alkil pa la, “Kol melnum ti kil melnum okwripm a Maur Wailen pa, kol a kil riwe kin a wamparpmewel pa la, kil kin kolai, kol a kil riwe la, kil kin a antokg paipmpaipm am pake.”
LUK 7:40 Ari Sisas kil ari nikgwalpm a Saimon pa ise, atom kil lanakel la, “Saimon, kupm la lanikeitn yangkipm ur kil.” Ari wa kil wa kapor won lanakel la, “Melnum a kaling plan tu, wor pa, lanikopm o!”
LUK 7:41 Atom Sisas lanakel yangkipm kla ur kil la, “Melnum wekg ur pikekg tuwekg awi kuloken kai melnum ur. Ur awi marpm wail wrkapm kamel wekg tuwek wampwam, a ur awi marpm wusok wrkapm wampwomis.
LUK 7:42 Tuwekg angkli pa kai plalng pa tuwekg rpma tukwok, tuwekg ur ake antiwe mpa ikilmpe marpm pa, atom melnum a alken marpm pa areinsen, atom lanaken la, kai itni pa, ampur tuwekg akalmpe kuloken pa! Ti mla a i a tuwekg pa mpa plan ipma wor wasrongentel pa?”
LUK 7:43 Ari wa Saimon akalmpe la, “Kupm akwonalmpen ari mpam melnum a kil ungkwan kuloken wail a kil awi pake.” Atom Sisas la, “A kitn akalmpe pa ute pake.”
LUK 7:44 Atom kil plelng kai kin pa, a la kai Saimon pa la, “Kitn ari kin ti. Kupm or wan akitnen ti, ake kitn ak u ur klakopm nepm ti. Pake kin ti kil klakopm ak ikgakg ti, atom wa alowopm ak tukgunakg walk alkilen ti.
LUK 7:45 Kupm or wan akitnen ti, ake wa kitn ti alkopm wor nakrontopm, pake kin ti am nakron nepm akupmen ti kolpa rpma tike.
LUK 7:46 Ake kitn numprampen uyiwa wor eng alung ak anel tukgunakg akupmen ti, pake kin ti alung u yaprekget wor a kil ti ak anel nepm akupmen ti.
LUK 7:47 Kolpa ti kupm lanakeitn la, kitn ri kin ti, kil pa plan ipma wor wasrongentopm worwor ai, pa plan la paipmpaipm wailet akilen pa am wet Maur Wailen ungkwan plalng ise. Mla ur a ake antokg paipmpaipm wailet atom Maur Wailen kil ungkwan pa, kil pa ake plan ipma wor wasrongentopm.”
LUK 7:48 Atom Sisas lanaki kin pa la, “Paipmpaipm akitnen pa am kupm ungkwan ise.”
LUK 7:49 Ari tu melnum tiur a antiwel al okipma rka pa la kai tu alntu pa la, “Melnum kolai ti, atom kil ak ok aloken kil alkil ti la kil antiwe titnongket a ungkwan paipmpaipm ti?”
LUK 7:50 Pake Sisas lanaki kin pa la, “Kitn ukipma, atom Maur Wailen akawiyeitn takuleikgen paipmpaipm akitnen, ti kitn kai wor o, kitn kai nimpokgen ipma meen wor!”
LUK 8:1 Wang aripm ur kai plalng pa, Sisas kil wrekg atn kai anong wail wail a anong wusok wusok, angkli yangkipm wor lanaki tu wrong kin kipman pa la tu elng Maur Wailen pa itni wailen ikglen nol nikgwalpm atuwen. Tu watnom wampwam yikakwekg alkilen pa antiwel atn,
LUK 8:2 a wa nampokgen tu kin tiur a pikekg kil ungkwan maur paipm a pikekg arpmewen pa a tiur a numpet pa wa palng wor pa, tu pa wa antiwel yat. Nang atuwen pa, Maria a kai anong Maktala, a pikekg Sisas ungkwan maur paipm wampwomis wampwompwekg takwleikgtel pa.
LUK 8:3 Soana, Susana a tu kin watipmen tiur ai. Soana pa kin a Kusa, melnum wailen ur a ikgalen wan a melnum tukgunakg Erot. Tu kin pa tu uk kweikwei alntuwen ti kai eng ak angklin Sisas nampokgen tu watnom alkilen pa kolpa atn pake.
LUK 8:4 Tu wrong wailet paipm anel a pa a pa wli, atom Sisas la yangkipm kla ur pa la,
LUK 8:5 “Melnum ur pa kai laik wanukg erk kai wring alkilen. Kil laik yela wring pa, atom tiur pa angko nar rmpa ya milik pa, atom tu rkganti tiur, a wel al tiur.
LUK 8:6 Tiur pa angko nar rmpa wrik weset, atom anip kaino, ari kanokg ti tingklak kalnten atom amo, eng ntei, ake kanokg apen rurusen wor pa.
LUK 8:7 Wanukg erk tiur pa angko elng nar rmpa mi iket pa, anip nampokgen tita, atom mi iket pa akaparng.
LUK 8:8 A tiur pa angko elngnar rmpa wring wunong kanokg wor, atom anip kaino wailet paipm klangkil ise.” Sisas la yangkipm kla pa kai plalng pa, kil wa la yikakatnen la, “Kipm melnum a nungkulkg atnewe pa, kipm itning o!”
LUK 8:9 Tu watnom a Sisas kil aroaro wonel pa asentel la, “Yiprokgen a yangkipm kla ti pa la kolai?”
LUK 8:10 Sisas akalmpe la, “Nikgwalpm ariwe ampen a Maur Wailen kil ikgalen ipma a melnum pa, kil plan kipm ti kolti. Pake tu wailet tiur ai pa kupm laron naken ak yangkipm kla ti kolti, eng mpa tu ikitnen, pake ake antiwe mpa tu ri pa, a mpa tu itning, pake ake antiwe mpa tu uwi riwe worwor.”
LUK 8:11 Atom Sisas laron yiprokgen a yangkipm kla a wanukg erk ti naken la, “Ti kipm itning yiprokgen a yangkipm kla kil pati la kolkil la: wanukg erk pa ti, pa la yangkipm a Maur Wailen.
LUK 8:12 Wanukg erk a angko nar rmpa ya milik pati, pa la tu a atning yangkipm wor a Maur Wailen, pake Maur Paipm awi yangkipm pa takwleikgten, eng ampake tu ukipma Maur Wailen pa, eng mpa kil ikuwiyen eng alkilen.
LUK 8:13 Wanukg erk a angko nar rmpa kanokg weset pa ake angkli ningnakg pa elng kinar kanokg pa pati, la tu melnum a atning a awi yangkipm a Maur Wailen pa atopen. Pake ake tu awi alupmen pa, tu ukipma itna waiketn kolti. Kweiur a ak arkolngken eng tu angko pa, tu am wa angko yaper kai ise.
LUK 8:14 Wanukg erk a angko nar rmpa mi iket wunen pati, pa la tu melnum a atning yangkipm a Maur Wailen, itna kolpa kai waiketnketn, ari kalpis, marpm, a kweikwei wor wor a ak atopen numpalk nampokgen kalkuten a itna kanokg ti alok yapowen, atom tu anip kaino arpongket paipm.
LUK 8:15 A wanukg erk a angko nar rmpa wring wunong kanokg wor anip kaino palng ari wor pati, pa la tu melnum nikgwalpm ute wor a atning alupmen yangkipm a Maur Wailen itna titnongket, kolpa atom tu anip kaino wailet paipm.”
LUK 8:16 ”Ake melnum ur la la wakg pa, atom ak kuntuk mipmapm pa ak aur pa, aki elng elngtirpma kinar wrik watneikgen ti. Kil la atom elng rka kaino kwa ti, eng mpa tu wrong la wli pa, mpa tu ri wakg pa.
LUK 8:17 Kuina ur a itna am pa, ikga iye kul kai ngko wunong. A kuina ur a aur pa, ikga ri uwi iye kai ngko wunong.
LUK 8:18 Kolpa ti kipm itning riworwor yangkipm a la pa. Eng ntei, melnum a kil antiwe pa, mpa Maur Wailen kil wa lkel ur wa iklanti. A wa melnum a kil ake antiwe pa, kuina ur a kil akwonalmpen la kil antiwe pa, mpa Maur Wailen kil ungkwan kai tukuleikg.”
LUK 8:19 Man nampokgen tunteng wusok wusok a Sisas pa kul la riwel, pake ake antiwe mpa tu riwel, eng ntei, tu wrong watipmen paipm.
LUK 8:20 Kolpa atom melnum ur ai kawor naki Sisas pa la, “Man a tunteng wusok wusok alkitn itna kawor en a ti la riweitn.”
LUK 8:21 Ari Sisas akalmpe tu pa la, “Wor pake, tu wusok wusok a tu mantin akupmen pa pati, tu a atning katnun yangkipm wor a Maur Wailen.”
LUK 8:22 Wang ur ti pa Sisas nampokgen tu watnom a kil aroaro wonel pa anel awi nim ukupuken, pa atom Sisas naken la, “Mpa mentepm ngket elng or ti kai ukupuk wompel ai.” Atom tu anel angket kai.
LUK 8:23 Tu angket kai pa, Sisas pa am okg ise. Ari wripm mring mring wail pa el ak tiklas u pa elng kawor nim ukupuken, wreren eng a tipurngenten tu il u imo tike.
LUK 8:24 Tu watnom a Sisas pa kai aro ikgyokgel Sisas pa lala, “Melnum Wailen, Melnum Wailen, mentepm eng a kai paipm tike!” Atom Sisas pirpakg wrekg angkeng wripm mring mring a el pa, a u a naimpur tiklas pa, atom pa kai plalng kalpis kolti, a u ti terng rka om.
LUK 8:25 Atom kil lanaki tu watnom alkilen pa la, “Kipm ti ukipma aki kalpis?” Pake tu wrekg paipm a ngkark, a tu lanaki tita la, “Kil ti melnum kolai, atom wa kil la wripm mring mring, a u a naimpur ti wa kai plalng ti!”
LUK 8:26 Tu rpma nim ukupuken pa angket or pa kul anong kanokg a Kerasa, a wet atnurng anong kanokg Kalili pa ela kai wompel ai.
LUK 8:27 Sisas tipra a nim ukupuken pa nar kanokg, ari melnum ur a maur paipm arpme a pa ariwel. Wang watin kil atn numpalpen kolti, ake kil rpma kanokgel kai anong pa, kil rpma tatu wrik krongen a u mlamin eng alil melnum armpe armpe ti kolti. Melnum pa am rpma a a pake.
LUK 8:28 Kil ari Sisas pa, kil kirkar akg wail paipm angko rmpa nepm a kil ti a lanakel la, “Sisas, kitn Warim Kipman a Maur Wailen a Itna Ep angen kweikwei wrongkwail! Kitn la mpa ntokg na kupm ti? Ampur antokg paipm kupm ti.”
LUK 8:29 Kil la kolpa atnen wuten Sisas la maur paipm kimpilpet la kil or kai tukuleikgentel. Akangklei wang maur paipm pa almpla titnowel, atom tu angkuten nepm wampel ak ampei mpangen, a ampei mringen pa. Pake maur paipm kangku ampei pa, alok melnum pa titno titno aye kai takwleikgen wrik a tu melnum arpme pa.
LUK 8:30 Sisas asentel la, “Nang a kitn ti mla?” Kil akalmpe la, “Nang a kupm pa Wrong Watipmen.” Yiprokgen a kil la kolpa pati maur paipm watipmen pa arpmewel a pa.
LUK 8:31 Tu maur paipm pa kirkar la kai Sisas pa la, “Ampur ungkwanto elng kinar lkim watin kinar tak ai a plalng kalpisen pa.”
LUK 8:32 Manto wailet pa anel atniir al tuwol itna kaino krongkwang pa. Atom tu maur paipm lanaki Sisas pa la, “La men ti kai kawor nowe manto pawo!” Atom Sisas la tu maur paipm pa kai kawor nowe manto pa.
LUK 8:33 Tu maur paipm ngkark angkawor melnum ti or kai elng kawor nowe manto ti. Atom manto pa anel ngkark raras angkaino krongkwang ti kulnar angko kimeket elngkinar ukupuk ai, al u amo plalng.
LUK 8:34 Tu melnum a ikgalen manto pa ari kolpa, atom tu ngkark pirng atatu aye yangkipm pa kai naki tu melnum kai anong wail ai, a anong wusok wusok a ela wreren tatu pa.
LUK 8:35 Tu wrong kin a kipman pa anel kai ari kweikwei a wet palng pa. Pa tu ari melnum a wet maur paipm ngkark takwleikgtel pa rpma kai nepm a Sisas ai, nowe apm pa ti rpma. Kil am palng wor wontrakole ise, atom tu ngkark.
LUK 8:36 Tu melnum tiur a wet itna ari pa tu wa lakati naki tu tiur a wli pa, la maur paipm pa wuten wrekg or kai takwleikgen melnum pa kolai.
LUK 8:37 Atom tu wrong kin a kipman a anong kanokg a Kerasa pa ari kolpa, tu ngkark, atom tu ungkwan Sisas la kil yaper kai. Atom Sisas wa tipra elng kaino nim ukupuken ai, kil la yaper kai tike.
LUK 8:38 Ari melnum a wet Sisas ungkwan maur paipm takwleikg pa lanaki Sisas pa la, “Kupm a ntiweitn kai.” Ari Sisas akrarowel la,
LUK 8:39 “Yaper kai anong pa laniki tu kweikwei a Maur Wailen antokg eng kitn pa.” Melnum pa atning kolpa, kil kai lanaki tu wrong kin a kipman a rka anong pa yela kuina ur a wet Sisas antokg kai kil ti.
LUK 8:40 Tu wrong kin kipman kul ukupuk wompel pa rka nungkwangen Sisas pa rka. Atom Sisas yaper kul palng pa, tu atopen paipm eng kil kulnten pa.
LUK 8:41 Ari tu ari melnum ur a itna tukgunakg eng ikgalen wan a tu atning atning yangkipm a Maur Wailen atnewe pa, nang akilen pa Sairus, kil wli kolti elng angko rmpa wreren nepm a Sisas ti, a lanakel la tuwekg kai wan anong akilen.
LUK 8:42 Eng ntei, warim kin tangkis wris nangket akilen pa am ikganti nol tike. Sisas angkom kai pa tu wrong watipmen paipm a pa kul kai antiwel ak num anel tita angkom antiwel kolpa kai.
LUK 8:43 Kin ur a num walmpopm alp wring wampwam yikak wekg pa anti tu pa kai. [Kil angkli marpm alkil ti kai plalng la kol a tu melnum a antokg i numpet pa ntokg numpet a kil pa palng wor.] Ari ake wa melnum ur antiwe a angklinsel, eng mpa kil palng wor.
LUK 8:44 Kil ak aroro wrong kuin ti a yirokg pa kai kaino wamanti apm a Sisas pa, atom num walmpopm a kil a alp pa kai plalng.
LUK 8:45 Atom Sisas asen tu pa la, “Mla wamantiwopm pa?” Ari tu wrong kin a kipman pa la, “Ake tu mlaur wamantiweitn.” Atom Pita la, “Wailen, ake kitn ari tu wrong kin a kipman ti ak talpul tita ak num aneleitn ti.”
LUK 8:46 Pake Sisas lala, “Melnum ur wuten wamantiwopm pa. Ti kupm ariwe la titnongket akupmen wuten angklin melnum pa ise.”
LUK 8:47 Kin pa am ariwe la tu am ariwel ise, atom kil warwar kolti kai kaino itna ikgokg a Sisas ai, kapor kilko aleinsel. Kai wulmpa a tu wrongkwail pa kil la yiprokgen a kil wamanti Sisas pa, a numpet a kil pa palng wor ak wang ketn pa.
LUK 8:48 Sisas lanakel la, “Kin yek alkupm, kitn ukipma kupm ti atom kitn palng wor pake. Kitn kai o! Ampur kitn ipma kaikuten.”
LUK 8:49 Sisas la pa itna, ari melnum ur angkai wan a melnum itna tukgunakg a ikgalen wan a atning atning yangkipm a Maur Wailen atnewe pa, aye yangkipm pa kul lanaki yan a warim pa lala, “Kai ngkeng Melnum Wailen pa kil rpmi pawo! Warim kin kitn am amo ise.”
LUK 8:50 Pake Sisas atning pa atom kil la kai Sairus, “Ampur kitn ipma kaikuten, ukipma kolti, kil mpa palng wor pa.”
LUK 8:51 Kil kai palng wan pa, kil angkeng tu wrongkwail pa itna en pa, kil la mpa Pita, Semis, Son nimpokgen mansan a warim kin pa kolti ntiwel kawor.
LUK 8:52 Tu wrong tiur a rka kawor wan pa akg ak ok namputen warim kin pa rka. Sisas kil lala, “Ampur kipm akg! Warim ti ake amo, palpa kil okg rmpa pa.”
LUK 8:53 Tu atning kolpa, tu wa anel akinyo alm Sisas pa, eng ntei, warim pa am wuten amo ise.
LUK 8:54 Pake Sisas kai wamanti wam a warim kin ti akwewel la, “Warim kin, kitn wrekg o!”
LUK 8:55 Atom maur wor pa yaper kul nakurng yipmiri alkil ti kolti, kil wrekg. Atom Sisas lanaken la ikor okipma ur ai iye kul lkel il.
LUK 8:56 Tu mansan akilen pa wrekg paipm, pake Sisas lanaken la, “Ampur kipmekg lanaki tu tiur kweikwei a wuten palng ti.”
LUK 9:1 Sisas akwe tu watnom wampwam yikakwekg a kil aroaro wonel pa anel kul itna wris, atom kil alken titnongket a alken ong talpen la mpa tu ntiwe a ungkwan maur paipm a i numpet a tu melnum pa palng wor.
LUK 9:2 Atom kil ukwawen la tu kai ngkli yangkipm niki tu yangkipm wor a la Maur Wailen la itni wailen ikglen nol nikgwalpm atuwen, wa ntokg numpet a tu melnum a awi numpet pa palng wor.
LUK 9:3 Kil lanaken la, “Ampur kipm aye yotuk a ak atnen pa, a apm kok, marpm a okipma kweikwei pa aye nakur num pa. A apm pa kipm iye a kipm nowe itna num ti iye kai kolti. Kipm wampwampwris kolti.
LUK 9:4 Tu uwi wor eng wan ur la kipm rke pa, kipm rki wris i pake. Wang ur a kipm la kai anong ur ai pipa, kipm wrekg i pa kai.
LUK 9:5 Tu melnum a anong ur la ungkwantepm kai pa, pa kipm kilkwin nepm yipur ti itni pa, eng mpa tu ri. Pa kol yangkipm ur a ak lawen am pake, la tu a antokg paipm.”
LUK 9:6 Tu watnom wampwam yikakwekg a Sisas pa tu atning yangkipm a kil la karkurngken plalng pa, tu wrekg atnuurng anong pa, anel atn kai yela anong wrongkwail pa, angkli yangkipm wor a la Krais pa, wa ak ungkwan numpet a tu pa palng wor.
LUK 9:7 Erot, melnum tukgunakg a ikgalen anong kanokg Kalili, kil atning kweikwei watipmen a Sisas akwap kolpa atom, kil akwonalmpen watipmen titnowen num rpma kolti. Eng ntei, tu melnum tiur pa wa la, Son a pikekg kaluk tu, kil a pikekg amo, am wa wrekg rpma akwap pake.
LUK 9:8 Wa tu tiur pa la, “Pa kalpis, pa mpa Elaisa pa palng akwap pa mol.” Wa tu tiur pa la, “Palpa melnum okwripm manet ur a pikekg amo ak ai, ti wa wrekg a kirk pa or pa.”
LUK 9:9 Atom Erot lala, “Son am pikekg kupm angket mengkel amo ise, pake wa mla wa rpma wai, ti antokg kweikwei ai?” Erot kil angkweingen la kil a ri Sisas.
LUK 9:10 Tu watnom a pikekg Sisas ukwa kai akwap pa yaper wli lanakel kwap wrongkwail a tu atn ak pa. Atom Sisas awiyen a pa am wa anel kai wrik ur a wreren anong ur a namput la Petsaita pa, takwleikgen tu pa la tu a kai rki ik tu alntu kolti.
LUK 9:11 Pake tu wrong kin a kipman maur alkil pa atning kolpa anel kai wa katnunten. Kol a Sisas ngkengken, ari kalpis, kil wa alken wor kolti, a kil wa lanaken yangkipm wor a la Maur Wailen pa itna wailen ikgalen nol nikgwalpm atuwen. A tu tiur a numpet pa kil antokg numpet a tu pa wor.
LUK 9:12 Wreren eng a takgni pa kinar pelpel eng a ngkon pa, tu watnom wampwam yikak wekg pa kai lanakel la, “Ukwa tu ti kai o, eng mpa tu kai anong ai, a kai tutu palpa, eng mpa tu ikor okipma ai il okg! Eng ntei, ti wrik kalpmlel.”
LUK 9:13 Ari wa Sisas lanaken la, “Kipm alkipm ti ikor okipma ur eng tu il tike!” Tu watnom alkil pa akalmpe la, “Ti kitn la la mpa men kai rmpen okipma ur ai eng tu wrong wailet pake? Men aye ti pa nok tingklak wampwomis a yul wekg kolti.”
LUK 9:14 Tu melnum pa wailet paipm ai, kamel kamel (5,000). Ari Sisas lanaki tu watnom alkilen pa la, “Wako tu melnum pa rki kamel wekg tuwek wampwam, kamel wekg tuwek wampwam!”
LUK 9:15 Tu watnom alkilen antokg kol a Sisas la pa, atom lanaken la tu rki kanokg.
LUK 9:16 Tu rka pa, Sisas awi nok tingklak wampwomis pa a yul wekg pa, ikg kaino kitnong pa a, ukwor Maur Wailen eng pa, atom kil kapor uk tu watnom alkil pa, la tu mpreing uk wrong kin a kipman pa.
LUK 9:17 Tu al al ining, tu nikgwor paipm, atom okipma umpu umpu pa tu awi aye wli alupm rkwa wail wampwam yikakwekg pa rpma.
LUK 9:18 Wang wris ur pa Sisas alkil wris kai oklala naki Maur Wailen, atom tu watnom alkilen pa wa kai katnuntel. Atom Sisas asenten la, “Kipm atning tu wrong kin a kipman ai tu akor la kupm ti la kupm mla?”
LUK 9:19 Tu akalmpe la, “Tu tiur pa la kitn Son, melnum a pikekg kaluk tu. A tiur pa la la kitn Elaisa, a wa tu tiur pa la kitn melnum okwripm ur a pikekg amo ep ai, atom wa kitn wa wrekg.”
LUK 9:20 Wa kil wa asenten la la, “Ti kipm ti? Kipm akwonalmpen la kupm ti mla?” Ari Pita akalmpentel la, “Kitn melnum a Maur Wailen takweiyeitn, atom ukwaweitn nar la ikirmpen men wrong kin a kipman.”
LUK 9:21 Atom Sisas naken titnongket la ampake tu laron kil ti niki tu mla ur ai.
LUK 9:22 Atom wa kil wa la, “Warim Kipman a Melnum ikga rki kalkuten wailet, a kil ikga tu melnum wailen wailen, a tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses ikga tu tulpulng ungkwantel. Kil ikga tu ilmpel imo lilel rmpi wang wraur, atom wa wrekg.”
LUK 9:23 Atom Sisas la kai tu wrongkwail pa la, “Kol melnum ur la kul kutnun kupm ti pa, kil mpa elngen a katnun nikgwalpm a kil alkil pa, a kil mpa rki yo okgmangki alkilen pa ikngklei wang, atom kul kutnuntopm.
LUK 9:24 Kol melnum ur la ikglen numpalk a kil ti kolti pipa, pa amen wor akilen pa ikga kai paipm. A kol melnum ur kil uk numpwam akilen pa eng ik ik kwap akupmen ti pa, pa kil mpa rkolng yaprekg watin eng rpmi wor yongkyong.
LUK 9:25 Kol melnum ur uwi kweikwei wrongkwail a itna kanokg ti, atom ik ntokg kil melnum ti ikga kai paipm kai anong paipm pa, ikga kweikwei pa wa ngklinsel la kolai?
LUK 9:26 Kol melnum ur kil numpaipm eng laron kil alkil, la kil ukipma kupm ti, a yangkipm a kupm angkli pa, pa Warim Kipman a Melnum ikga wa kil numpaipm eng laron melnum pa la kil akilen, ik wang a kil nar nimpokgen nang wailen a titnongket klalen alkilen, a nang wailen a titnongket klalen a Yan nimpokgen tu maur akwapel a tuwekg amprin eng tuwekg alntuwekg.
LUK 9:27 Kupm lanakepm aklale wrisen, kipm tiur a itna ti pa, ikgake imo. Kipm ikga ri a Maur Wailen itna wailen ikgalen kweikwei wrongkwail. Kipm rki ri pa plalng pa, kipm imo kaingkai.”
LUK 9:28 Sisas laron yangkipm pa kai plalng pipa, wa kil wa rpma a, wang wampwomis wampwompwraur pa kai plalng pa, kil awi Pita, Semis a Son, tunteng kaino oklala naki Maur Wailen kaino wrik nangen ur.
LUK 9:29 Kil oklala naki Maur Wailen pa rpma pa, ikgokg numpwam a kil pa palng manet, a apm a kil ti pa tangkor pupu muinmainet kolti.
LUK 9:30 Ari tunteng ari melnum wekg pa palng kolti antiwel oklala, melnum wekg pa Moses a Elaisa.
LUK 9:31 Tuwekg palng nampokgen klalen anti Sisas pa oklala kweikwei a ikga palng eng Sisas pa, kitila nikgwalpm yiprokgen a Maur Wailen yapon pa la ikga kil imo kai Serusalem pa.
LUK 9:32 Pita anti tuwekg pa teng okg rmpa. Ari teng wa pirpakg ikg kaino ari Sisas pa palng klalen paipm ai. Tunteng ikg kaino ariri melnum wekg ur anti Sisas pa itna.
LUK 9:33 Melnum wekg pa wreren eng a kai ti pa, Pita lanaki Sisas pa la, “Wailen, kol a minto rki tike, minto rpma ari am wor ise. Kol a minto ngkam pilmpal wraur, ur eng kitn, ur eng Moses, a ur eng Elaisa.” Pita pa ake akwonalmpen oklala na ur a kil la pa, ti kil la kolti.
LUK 9:34 Pita la yangkipmok pa itna, ari waipmunu pa elngkul nar ak ipaarngten. Pita, Son a Semis pa teng ngkark eng waipmunu pa elngkul nar ak ipaarngten pa.
LUK 9:35 Ok ur angklo la a waipmunu wunen pa kulor la kolpa la, “Kil warim yek akupmen a pikekg kupm takwei, ti kipm itning ok yangkipm a kil la pawo!”
LUK 9:36 Oklala pa kai plalng pa, tunteng ari Sisas alkil wris ata kolti itna. Tunteng ake apo ok lanaki tu tiur ai kweikwei wuten a palngten pa, teng tatar rka pa pen.
LUK 9:37 Okg or kong ti Sisas nampokgen tunteng watnom a kil aroaro wonel pa anel yaper angkaino nang pa nar, ari tu wrong wailet paipm pa anel rka.
LUK 9:38 Melnum ur pa ari Sisas angkaino krongkwang pa nar, atom akwewel ak okwail ak arongke tu wrongkwail a rka pa la, “Wailen, kitn kul ri warim kipman akupmen ti! Kupm warim kipman wris nangket kolti.
LUK 9:39 Ari maur paipm kawor rpma warim kipman akupm ti, atom antokgtel kil kirkar tilntul, nepmal wampal, ipopm werk ti pilpil wli ok ti. Maur paipm pa ake kai takwleikgentel anti watipmen, kalpis, kil am alkel wleket kol pake.
LUK 9:40 Kupm la nampokgen ipma arein lanaki tu watnom akitnen pa la ungkwan maur paipm pa, ari tu ake antiwe.”
LUK 9:41 Ari Sisas aklewen la, “Antokg kolai kipm wrong kin kipman ak wang ti, kipm ake ukipma Maur Wailen, a kipm melnum a antokg paipm! Kupm rpma antiwepm rpma wang watin paipm ai. Kupm num lpmaakopm paipm eng kipm pake!” Atom kil la kai melnum pa la, “Iye warim kipman ti no!”
LUK 9:42 Warim kipman pa kaino eng Sisas pa, ari maur paipm pa laik ngkrangkel elngkai kanokg ti warwar nepmal wampal rmpa. Pa Sisas akle a ungkwan maur paipm kimpilpet pa takwleikgentel, kil palng wor atom kil lanaki yan alkil pa la, “Atom kul uwiyel iye kai o!”
LUK 9:43 Tu wrong kin a kipman pa wrekg paipm eng tu ari titnongket wail a Maur Wailen. Tu wrong kin a kipman pa wrekg paipm eng kweikwei a kil antokg pa itna kolti, kil la kai eng tu watnom alkilen pa la,
LUK 9:44 ”Ampur kipm woniketen yangkipm a kupm la lanikepm kil. Warim Kipman a Melnum pa mpa uk kai wam a tu melnum a kanokg a ti.”
LUK 9:45 Pake ake tu watnom alkilen pa ariwe yangkipm a kil la pa la kil la kolai. Yangkipm yiprokgen pa itna ampen, eng ake mpa tu riwe, kolpa atom tu wa ngkark la, mpa mla isen pa.
LUK 9:46 Tu watnom a Sisas pa alilakel tita la, mla ur a tu pa mpa itni wailen.
LUK 9:47 Ari Sisas ariwen kawor nol wunen a tu pa ari tu akwonalmpen kolpa, atom kil awi warim ur pa aye kul itna
LUK 9:48 akla la, “Mla ur a ukipma kupm atom uk wor angklin warim ur kol kil pa, pa wa kil uk wor kupm ti yat. Wa melnum a ukwor kupm ti pa, pa am wa kil uk wor melnum a ukwawopm nar ti. Eng ntei, melnum ur a kipm ti orngwatneikgen angklin mla ur pa, kil pa itna ep pake.”
LUK 9:49 Son watnom ur a Sisas wa angklo ok pa la, “Wailen, men ari melnum manet ur naren kitn ti atom ak ungkwan maur paipm. Atom men nakel la kil elngen, eng ntei, kil melnum a ake anti mentepm ti.”
LUK 9:50 Ari Sisas akalmpe la, “Ampur wa kipm angkengkel, eng ntei, melnum a ake awi wrongmanto lan mentepm pa, pa kil melnum wor a mentepmen.”
LUK 9:51 Wang wreren eng a Maur Wailen uwi Sisas iye kaino kitnong, ti nikgwalpm akilen pa rka wris la kil ikgam kinar kai kaino Serusalem pake.
LUK 9:52 Kil ukwa tu aye yangkipm pa ep kinar anong ur a tu Samaria, la tu numprampen kweikwei wan anong pa eng kil ikga kinar.
LUK 9:53 Pake tu melnum a anong pa ake awi wor eng Sisas pa, eng ntei, kil pa la kil a kinar kai kaino Serusalem.
LUK 9:54 Semis ekg Son, watnom a Sisas, ari pa, atom tuwekg la, “Wailen, kitn awi wor la men la wakg kaino kitnong ai nar lap anong pa, [kol a pikekg Elaisa la, atom wakg nar al tu tiur ai]?”
LUK 9:55 Ari Sisas plelng aklewen [kolpa la, “Kipm ti titno, kipm melnum a Maur Wailen pake kipm ake ariwe nikgwalpm a Maur Wailen pa ake rka kolpa.” Sisas kil aklewen kolpa] plalng pa,
LUK 9:56 kil wa awiyen anel kinar anong manet ur ai.
LUK 9:57 Tu or ya pa kai pa melnum wris ur pa lanaki Sisas pa la la, “Kitn la ikga kai i kai i pa, kupm ikgam kutnunteitn itn kolpa itn pake.”
LUK 9:58 Ari Sisas wa akalmpentel la, “Nimpa tilpmingen ti pa kanokg tawong a tu a okge pa itna. Wa wel ti pa tingkil alntu a okge pa itna. Warim Kipman a Melnum ti pa wrik kalpisen a okg armpe.”
LUK 9:59 Wa melnum ur pa Sisas lanakel la, “Kul kutnuntopm!” Ari melnum pa la la, “Wailen, itni eng kupm kai rpmi eng yan alkupmen ti imo, kupm uwen plalng pipa, wa kupm wa kul kutnunteitn.”
LUK 9:60 Ari Sisas akalmpe la, “Kai tu melnum a amo pa uwen tita o! Kitn ti pa kai itn laron niki tu la Maur Wailen la itni wailen ikglen nol nikgwalpm akipm wrongkwail.”
LUK 9:61 Wa melnum ur pa la la, “Wailen, kupm mpa kutnunteitn pake, itni waiketn eng kupm kai ukwor tu alkupmen kil pen.”
LUK 9:62 Ari Sisas lanakel la, “Melnum a kil ak tuk eng u wayu pa, ake mpa kil ikg plelng, mpa kwap a kil ak pa kai paipm. Melnum a kolpa pa kil akentiwe elng Maur Wailen pa itna ep ikgalen nol nikgwalpm akilen pa.”
LUK 10:1 Atom Sisas wa takwei tu melnum kamel wraur tuwek wampwam yikak wekg pa kai mapming a tu a katnuntel pa, atom la ukwawen wekg wekg rak kai yela anong wail wail a wusok wusok a lala kil ikga kai pa.
LUK 10:2 Kil ak yangkipm kla kil lanaken la, “Kweikwei wailet am tukgun kakir itna pake, pake melnum a angketuwai ti yek wraur kolti. Kolpa ti kipm isen melnum Yan a wring pa, eng mpa kil ukwa melnum akwapel watipmen kai ngketuwai kweikwei akilen pa!
LUK 10:3 Kipm kai o! Kil kupm ukwawepm kol manto walkg malkgu kai kuin a tu nimpa tilpmingen.
LUK 10:4 Ampur kipm aye apm kok, kweikwei a alupme marpm, a nepm palk alkipmen pa nukur num. Ake mpa kipm kai oklala itni yaya, kipm or yawel itn kolti.
LUK 10:5 Kipm la kai kawor wan anong ur pa, ep pa kipm yangkipmen tu a rka wan pa la, 'Maur Wailen mpa plan ipma wor alkil ngklinsepm!'
LUK 10:6 Kol melnum ur rki wan pa kil itopen uwi ipma meen wor pa, pa mpa Maur Wailen kil plan ipma wor alkil ngklinsel. La kalpis pa, Maur Wailen ake mpa plantel ipma wor alkil pa ngklinsel, kalpis, kil mpa ngklin kipm tike.
LUK 10:7 Kipm rki wan wris ur kolti a tu awi wor la kipm rki pa. Ampur kipm kai wan ur wan ur. Kipm rki pa il u okipma a tu alkepm pa. Pa tu ikgalentepm ariworwor eng kwap a kipm ak pake.
LUK 10:8 Kipm kai anong ur pa, tu itopen ikyakurepm iyewepm kai wan anong atuwen pa numprampentepm okipma pa, kipm uwi il kolti.
LUK 10:9 Wa kipm ungkwan numpet a tu melnum numpet a anong pa, a laron niken la, 'Maur Wailen pa nar itna wailen la ikglen nol nikgwalpm akipmen.'
LUK 10:10 Pake kipm kai kawor anong ur pa, ari tu ake atopen alkepm wor akyakurepm ayewepm kai wan anong alntuwen pa, pa kipm itn tutu ya wail wail itna anong pa laniken la,
LUK 10:11 'Yipur a itna anong akipmen wet karponte nepm a men ti pa, am wa men kalkwintepm elngtitna tike, kipm ikga yangkipm kalpisen eng ikilmpe yangkipm pa. Pake kipm wonirpme riwe yangkipm kil: Maur Wailen la itni wailen ikglen nol nikgwalpm akipmen.'”
LUK 10:12 Sisas la karkurng tu kamel wraur tuwek wampwam yikak wekg a kil la ukwa kai ikwap pa plalng pipa, wa kil wa la, “Kupm lanakepm la ikga ik wang wail a Maur Wailen ntokg yangkipm numpokgen kipm wrong kin kipman pa, kalkuten a tu pa ikga wa angen a tu anong Sotom pa.”
LUK 10:13 Sisas arein anong a tu ake ukipma pa la, “Woi, arein kipm anong Korasin a kipm anong Petsaita, kipm ikga uwi paipm! Kupm pikekg antokg kweikwei titnongket titnongket a melnum ake antiwe antokg pa itna kai anong wekg a kipmekg pa, ari ake wa kipm plelng ipma la arein. Kol pikekg kupm ntokg kweikwei titnongket titnongket kolti kai anong Tair a anong Saiton pa, tu kol pikekg tak ai ngko yipan akg rein paipmpaipm a tu antokg pa atom plelng ipma ise.
LUK 10:14 Ikga ik wang wail a Maur Wailen ntokg yangkipm pa, kalkuten a ikga palng kai kipm ti pa, ikga wa angen a anong Tair a Saiton pa
LUK 10:15 Ti kitn anong Kaperneam ti. Kitn akwonalmpen la kitn ti wor, ti ikga uwiyeitn iye kaino anong wor pake? Ikga kolpa kalpis. Kipm ikga ngkliwepm elng ngko wrik om miningket paipm kolti.”
LUK 10:16 Sisas arein tu anong pa plalng pipa, kil lanaki tu melnum a kil la ukwa kai eng ikwap pa la, “Melnum ur a atning yangkipm akipmen pa, pa kil atning yangkipm akupmen ti. A melnum ur a talpulng yangkipm akipmen pa, pa kil talpulng yangkipm akupmen tike. A wa kil a talpulng yangkipm akupmen ti pa, pa kil talpulng yangkipm a Yan a pikekg ukwawopm nar kanokg ti.”
LUK 10:17 Tu melnum kamel wraur tuwek wampwam yikak wekg a pikekg Sisas ukwawen la tu kai ikwap pa tu wa anel yaper wli nampokgen atopen wail manten. Tu lala, “Wailen, men naren kitn ti atom men ungkwan tu maur paipm pa tu atning katnun ok a men ungkwanten!”
LUK 10:18 Ari Sisas akalmpe la, “Aklale, kolpa atom kupm ariri maur paipm Satan angko angkaino kitnong ai nar kol milmal a plaing pa.
LUK 10:19 Kipm itning, kupm pikekg alkepm titnongket, ti ake kwei ur antokgtepm paipm, ti kipm atn rkganti ul a kirko, a wa kipm angen titnongket a wrongmanto akipmen.
LUK 10:20 Pake ampur kipm atopen lala tu maur paipm pa atning katnun ok akipmen pa. Kipm mpa itopen eng nang akipmen pa am nira ela kai wrkapm a Maur Wailen ise.”
LUK 10:21 Ak wang ketn pa Maur Wor pa ak kwap titnongket kawor ipma a Sisas pa, atom kil lala, “Yaiyai, kitn Wailen a kitnong a kanokg. Kupm alkeitn wor ngkat nang akitnen, eng ntei, kitn plan ariwe wor a kitn ti tu melnum ti a rpma titnowen kolen warim pa, a kitn lam eng tu melnum ariwe wail wail a nikgwalpm watin pa. Aklale, Yaiyai akupmen, pa kitn ak katnun nikgwalpm wasrongen a ariwe wor alkitnen pake.”
LUK 10:22 Sisas ngkat nang a Yan alkil pa kolpa plalng pa, wa kil wa lanaki tu a rka pa la, “Kweikwei wrongkwail am pikekg Yan akupmen elng kul wam akupmen ti ise. Ake melnum ur ariwe la Warim Kipman pa mla, Yan akupmen kolti pa kil ariwe pake. A melnum ur ake wa ariwe Yan pa yat, Warim Kipman ti nampokgen tu melnum a kil wasrongen la plan Yan pa, tu melnum pa ariwe pake.”
LUK 10:23 Ak wang a Sisas nampokgen tu watnom alkilen pa rka ak tu alntu pa, kil lanaken la, “Kipm ti pa wor pake, kipm itopen o, eng kipm ari kweikwei a kipm ari ti.
LUK 10:24 Kupm lanakepm la tu melnum okwripm a Maur Wailen nampokgen tu melnum tukgunakg pa pikekg anel antokg la mpa tu ri kuina ur a kipm ari ti, ari ake antiwe a tu ari. Tu la mpa itning kuina ur a kipm atning ti, ari ake antiwe a tu atning.”
LUK 10:25 Wang wris ur pa melnum ur a aroaro wonel tu yangkipm a Moses pa kai kaino la ilm ipmawel Sisas pa la, “Melnum a aroaro wonel tu, mpa kupm ntokg kolai eng mpa kupm uwi yaprekg watin eng rpmi wor yongkyong pa?”
LUK 10:26 Sisas akalmpentel la, “Ti wrkapm a Maur Wailen a kitn angkleikg pa, pa lanakeitn kolai?”
LUK 10:27 Melnum pa akalmpe naki Sisas pa la, “Kitn mpa plan ipma wor wasrongen Wailen, Maur Wailen akitnen pa itna ep pake. Kitn mpa uk amen wor, a nol nikgwalpm, a titnongket, a ariwe akitnen ti plalng kai eng kil. Wa kai arkekg pa, kitn mpa plan ipma wor wasrongen tu mla ur ai pa kol a kitn plan ipma wor wasrongen kitn alkitn pa.”
LUK 10:28 Sisas akalmpe la, “Pa kitn la pa aklale, ti kitn ik kitila kolpa pa, kitn ikgam uwi yaprekg watin eng rpmi wor yongkyong pake.”
LUK 10:29 Ari melnum a aroaro wonel tu yangkipm a Moses pa akor yangkipm ur ai la ik aure kil alkil ti, atom wa kil wa asen Sisas pa la, “Ti tu melnum mla a i mpa kupm plan ipma wor wasrongen pa?”
LUK 10:30 Ari Sisas akalmpe lala, “Kol melnum ur pikekg a Serusalem ti kinar kai Seriko pa. Ari tu melnum paipm ur arkulel angko ya pa, aner apm, a awi kweikwei wrongkwail a kil ti plalng, a orel paipm, wreren eng kil a imo. Atom tu atnuurngkel rmpa pa, a tu am ngkark kaingkai ise.
LUK 10:31 Atom melnum ipma krakgen ur a ak ak kwap eng al wor uk Maur Wailen pa kil nar ya pa kinar. Angkli wulmpa yampingen ti ikg kai ari melnum a rmpa pa kolti, angkom nalokgen or kai ya yamping pa kai ise.
LUK 10:32 Wa melnum Lipai ur pa am wa kolpake. Kil nar ya pa kinar, kil ari melnum pa, kil angkom takwleikgen or kai ya yamping ai kai ise.
LUK 10:33 Ari melnum Samaria ur pa am katila ya pa nar pa nar pake, kil ari melnum pa, ipma wunen a kil pa akg arein paipm eng melnum pa.
LUK 10:34 Kil kai kinar wreren kolti, kil alung uyiwa pa nampokgen u wain pa ak raro i kweikwei pa yapowel. Plalng pipa, kil ngkat elng kaino nimpa nepm kuinen nungkulkg watin alkil ti kolti, a ayewel kinar wan ur a tu a a ya watinet ai wli okg arke pa. Atom kil alkil ikgalentel.
LUK 10:35 Kil kai okg, kong ti, kil nakle marpm ur pa aye kai uk melnum a ikgalen wan pa, lanakel la, 'Ikglentel kolpa kaingkai, marpm ur a kitn wa uk klangkil marpm a kupm alkeitn kil pa, ik wang ur a kupm yaper kul pa, ikga kupm ikilmpenteitn pa.'”
LUK 10:36 Sisas la yangkipm pa plalng pa, wa kil wa asen melnum a aroaro wonel tu yangkipm a Moses pa lala, “Ti kitn akwonalmpen kolai melnum wraur kil, la mla a i kil melnum a alupmen melnum a tu melnum paipm orel rmpa ya pa?”
LUK 10:37 Melnum a aroaro wonel tu yangkipm a Moses pa akalmpe la, “Melnum a kinar arein angklin melnum pa, pa am kil pake.” Sisas lanakel la, “Am kolpake. Kitn kai atom kitn ik kolpake!”
LUK 10:38 Sisas nampokgen tu watnom alkilen pa or ya pa kai kaino pa, tu kaino palng kaino anong ur. Kin wris ur a rpma anong pa, nang alkilen pa Marta, kil alkel wor eng la kil ntiwel rpmi wan anong akilen pake.
LUK 10:39 Maria pa wusoken a Marta. Sisas kil angkli yangkipm pa rpma pa, Maria pa kil rpma wreren nepm a Sisas pa atning yangkipm pa rpma.
LUK 10:40 Kil akuke Marta pa ampurkg ampenen antokg wakgkuntuk kweikwei pa rpma, atom ipma a kil pa paipm eng Maria pa, atom kil kai naki Sisas pa la, “Wailen, ake kitn ari la kupm alkupm wris numprampen okipma kweikwei ti! Ti antiwe mpa kitn laniki Maria pa eng kil or ngklinsopm pen?”
LUK 10:41 Ari Wailen akalmpentel la, “Marta, Marta, kitn nikgwalpm kalkut akwonalmpen kweikwei watipmen.
LUK 10:42 Pake kwei ur wor wris kil pa kitn a uwi tipen. Maria pa am awi ise, pa kweikwei wor wrisen, ikgake melnum ur ungkwan tukuleikgentel pa.”
LUK 11:1 Wang wris ur pa Sisas kai oklala naki Maur Wailen kai wrik ketn ur pa. Kil oklala naki Maur Wailen pa plalng pa, watnom wris ur alkilen pa lanakel la, “Wailen, kol a kitn kiling planto ya a oklala naki Maur Wailen pa pen, kol pikekg Son melnum a kaluk tu kil kaling plan tu watnom akilen pa.”
LUK 11:2 Sisas lanaken la, “Kipm la oklala niki Maur Wailen pipa, kipm oklala nikel kolkil, 'Yaiyai, nang a kitn pa mpa itni klalen wakget. Kitn mpa itni wailen ikglen men wrong kin a kipman nimpon kweikwei wrongkwail.
LUK 11:3 Kitn lko okipma pa ntiwe ikngklei wang wris wris.
LUK 11:4 Kitn ungkwan paipmpaipm a men ti, eng ntei, men wa ungkwan paipmpaipm a tu wris wris a antokg kul men ti. Kitn ikglento eng ake mpa kweiur ik rkolngko kai ngko pa.'”
LUK 11:5 Atom wa kil wa lanaken yangkipm kla kil eng mpa tu oklala niki Maur Wailen kolpa itni, ake mpa tu elngen, atom kil la kolkil la, “Ti wris ur a kipm ti kai wan a melnum ur a kipmekg atn or wris pa ik mining kuin pa, atom kil isentel la, 'Kitn antiwe mpa kitn lkopm nok ipm wris ur, atom ikga kupm ikilmpenteitn kul.
LUK 11:6 Melnum wor ur alkupmen wuten a ya watinet ai wli wan akupmen ti, ti wan a kupm ti timpal okipma kalpisen a alkel al.'
LUK 11:7 Ari kol melnum pa lanikeitn angkawor wan pa or lala, 'Wanyun kweikwei am men ar ise. Kupm nampokgen tu kin watnom alkupmen ti men am okg tike. Ti kitn wet wa rpma kai a i? Ti akentiwe mpa kupm wrekg lkeitn kwei ur.'”
LUK 11:8 Wa Sisas wa lala, “Kupm lanakepm la, yan a wan pa kol ake wrekg uk kweikwei pa kai melnum wor alkil pa, pa kol a kalpis. Kil wrekg alkel pati atnen a kil itna asen erkisen. Atom kil wrekg awi kweikwei pa wailet alkel katila kuina ur a kil asen pa.
LUK 11:9 Kolpa atom kupm lanakepm kolkil la, kipm isen pa, mpa kipm uwi; kipm ikor pa, mpa kipm nsil; a kipm kulkwon pa, wanyun pa mpa kukwantepm.
LUK 11:10 Eng ntei, mla ur a kil asen pa, mpa kil uwi, a mla ur a kil akor pa, mpa kil nsil, a mla ur a kil kalkwon pa, wanyun mpa kukwantel pa.
LUK 11:11 Ti kipm yantin mla ur pa, kol warim alkipm pa isentepm eng yul pa, mpa wa kipm lkel ul pake? Kalpis.
LUK 11:12 Aki kol kil isen karek lmpa pa, mpa kipm lkel kirko pake?
LUK 11:13 Ti kol kipm yantin a antokg paipm pa, wa kipm wa uk kweikwei wor wor tu warim alkipmen pa. Kolpa ti wa kipm riwe la Yan alkipm a rpma kaino kitnong pa, wa wor wrisen angen kipm yantin a kanokg ti. Kipm la isentel la kil lkepm Maur Wor alkil pa, kil mpa itopen eng lkepm pa.”
LUK 11:14 Sisas kil ungkwan maur paipm a antokg melnum ur okmise pa kai takwleikgentel, atom kil wa oklala. Tu wrongkwail ari pa, atom tu wrekg paipm.
LUK 11:15 Ari wa tu tiur pa la la, “Palpa kil akwap nampokgen Pelsepul, melnum tukgunakg a tu maur paipm pa alkel titnongket, atom kil ungkwan maur paipm pa.”
LUK 11:16 A tu tiur pa la alm ipmawel Sisas, atom tu lanakel la, kol a kil elng kla ur itni ik plan titnongket a Maur Wailen pa.
LUK 11:17 Pake Sisas pa kil ariwe kuina ur a tu akwonalmpen pa, atom kil lanaken la, “Kol kupm ik titnongket a maur paipm ikwap pa, pa kolen tu anong kanokg wail ur wako iro wrong atom ilm tita pa, ikga anong kanokg pa kai paipm. Wa kol melnum ur kil wrekg nti kinwatnom alkil or tita pa, rpma wor a tu rpma wris pa mpa kai paipm.
LUK 11:18 Ti kipm la Pelsepul, maur paipm a itna tukgunakg a ikgalen tu maur paipm pa, alkopm titnongket pa, atom kupm ungkwan tu maur paipm pa. Ti kol maur paipm Satan nti tu alntu pa or tita pa, mpa wa kil itni titnongket ikglen tu alntu pa kolai?
LUK 11:19 Pake kol Pelsepul pa lkopm titnongket atom kupm ungkwan tu maur paipm pa, ti tu alkipmen pa mpa wa uwi titnongket kai mla, atom ik ungkwan tu maur paipm pa? Am tu pa planto la yangkipm a kipm la pa ake aklale.
LUK 11:20 Pake kol Maur Wailen pa kil lkopm titnongket atom kupm ungkwan maur paipm pa, pa plan kolen la, Maur Wailen am nar itna wailen la ikgilen nol nikgwalpm a kipm tike.
LUK 11:21 Melnum titnongket pa kil numprampen ikwri alkil pa, atom kil arpmen wan alkil pa, kweikwei alkil pa rmpa wor.
LUK 11:22 Pake kol melnum ur ai a antiwe titnongket wail angen titnongket a kil pa, kil wa wli orel lok ngkliwel, atom uwi ikwri a pikekg ak titnongketel kil pa iye kai tukuleikgentel kolpa pipa, kil kawor uwi kweikwei wrongkwail a itna kawor wan a kil pa, uwiye kai mpreing uk tu tiur ai.”
LUK 11:23 Sisas la yangkipm kla kolpa plalng pipa, kil la, “Melnum a ake akupmen pa, kil awi wrongmanto lan eng kupm. A melnum a ake angklinsopm eng awi tu wrong kin kipman pa aye wli itna wris pa, kil pa melnum a ungkwan tu kai.”
LUK 11:24 Sisas wa kil wa la, “Kol maur paipm kimpilpet kil kul or tukuleikg melnum pa kai en pa, kil kai atn yela tatu wrik ur a ake melnum ur arpme, ikor wrik lala rpmi eng uwi yapm. Kol ake kil ansil ur pa, mpa kil la kolpa la, 'Pati mpa wa kupm yaper kai rpmi wan alkupm a pikekg kupm arpme ep pa.'
LUK 11:25 Atom kil kai ari wan pa kansim ipikel noworel nakure ariworwor elng itna.
LUK 11:26 Atom, mpa wa kil yaper kai, wa ikyakur maur paipm wampwomis wampwompwekg a paipm wrisen angen kil ti, wa aye wli antiwel rpma ipma a melnum a kil arpme ti. Pikekg ep pa melnum pa kil rpma paipm kolpake, wa kanukg ti a tu maur paipm pa wa kawor rpma pa kil pa wa rpma paipm wrisen or kai ai.”
LUK 11:27 Sisas kil la pa itna pa, kin ur a itna kuin a tu wrongkwail pa la ak ok wail kolkil la, “Kin a pikekg rakuweitn atom ikgalenteitn alkeitn ma al pa, kil pa wor pake, kil itopen o!”
LUK 11:28 Ari wa Sisas akalmpe la, “Pa wor, pake wor a kol a mentepm la kolkil la, melnum a kil atning yangkipm a Maur Wailen pa atom kil katnun pa, kil pa wor pake, kil itopen o!”
LUK 11:29 Tu wrongkwail pa kapringen Sisas kolpa itna pa, wa tiur wa anel wli wli kolpa, pa kil la kolpa la, “Kipm wrong kin kipman ak wang ti pa, kipm wrong kin kipman paipm. Kipm akor la ri kla ur a ik plan titnongket a Maur Wailen eng kipm ri, pake mpa kalpis. Ikga kipm ri kuina ur a pikekg palng ep eng Sona pa kolti. Pa kol kla a Maur Wailen ikga elng itni ik plantepm titnongket akilen pake.
LUK 11:30 Ti am wa kolpake, kol Sona pa kla a pikekg Maur Wailen kil elngitna ak plan titnongket akilen tu wrong kin kipman a anong wail Ninipe pikekg ari pa. Ti Warim Kipman a Melnum pa am wa kla a Maur Wailen ikga elng itni ik plan titnongket akilen kipm wrong kin kipman a rpma ak wang ti pa ikga ri.
LUK 11:31 Ti ikga ik wang wail a mentepm wrong kin kipman itni yangkipm wail pa, kin a pikekg itna tukgunakg ikgalen anong kanokg a yamping kinar pa, ikga kil wrekg itni elng wam itni kipm wrong kin kipman a ak wang ti la kipm antokg paipm. Kin pa kil pikekg rpma kinar kanokg yiprokgen watin ai ari kil pikekg aken kwap kulno atning nikgwalpm ariwe watin a Solomon pa. Pake melnum kil ti pa angen Solomon, ari ake wa kipm atning nikgwalpm ariwe watin a kil ti.
LUK 11:32 Ti wa ikga ik wang wail a itni yangkipm pa, tu wrong kin kipman a Ninipe pa ikga wa tu wrekg itni elng wam itni kipm wrong kin kipman a ak wang ti la kipm antokg paipm. Eng ntei, pikekg tu atning yangkipm a Sona angkli pa, atom yangkipm pa almpen ipma atom tu pikekg plelng ipma ise. Pake melnum a itna ti pa wail angen Sona pa, pake ake wa kipm plelng ipma.”
LUK 11:33 ”Ti melnum ur akentiwe mpa kil la wakg pa, atom kil lam aki a kil ik kuntuk mipmapm pa ik ipaarng pa, kalpis. Mpa kil la atom elng rki kaino kwa ti, eng tu wrong la wli pa, mpa tu ri wakg pa.
LUK 11:34 Ti wulmpa akitnen pa kol wakg a ak alen numpwam pa. Wulmpa akitn pa wor pa, numpwam wrongkwail akitnen pa mpa klalen wor. Pake kol wulmpa akitn pa paipm pa, numpwam wrongkwail akitnen ti mpa miningket plalng.
LUK 11:35 Ti kitn rpmi riwe, eng klalen a rpma kawor kitn pa ake mpa kai miningket.
LUK 11:36 Ti kol numpwam wrongkwail akitnen ti wakg len yela pa, num wompel ur akitnen ti pa ampake itni miningket pa, mpa klalen plalng, kolen klalen a wakg yilpo a alenteitn pa.”
LUK 11:37 Sisas kil oklala plalng pa, melnum ur a tu melnum a arpmen yangkipm yiprokgen a Moses pa lanakel la tuwekg kai il okipma kai wan akilen. Atom kil antiwel kai kawor kolti, kil ngkaten okipma pa aye kul, tuwekg al.
LUK 11:38 Melnum a arpmen yangkipm yiprokgen a Moses pa, kil wrekg paipm eng ari Sisas ake klak wam pa ep atom ak al okipma pa.
LUK 11:39 Atom Wailen kil lanakel la, “Ti kipm melnum a arpmen yangkipm yiprokgen a Moses pa, kipm klak kuntuk kaimung pa or en tike, a kawor wunen akipmen pa pik atnen ikgwam a paipmpaipm tiur a kipm antokg.
LUK 11:40 Ti kipm titnowen! Ti Maur Wailen kil pikekg antokg en ti kolti, a ake pikekg kil antokg kawor wunen ai?
LUK 11:41 Kol a kipm uk kweikwei a rpma kuntuk kaimung ti kai ngklin tu a rpma tukwok pati, kweikwei wrongkwail pa mpa palng rukis wor eng kipm pa.
LUK 11:42 Woi, arein kipm melnum a arpmen yangkipm yiprokgen a Moses ti, kipm ikga uwi paipm! Kipm uk tiwel wampwam akipmen kolen kweikwei wrongkwail a itna wring kai nampokgen wanukg wakg kweikwei waiketnketn pa plalngten kai Maur Wailen pake, ake wa kipm antokg tu mla ur ai ute wor, wa ake wa kipm katnun nikgwalpm a plan ipma wor wasrongen Maur Wailen ti. Kipm uk tiwel wampwam pa wor pake, wor kol a wa kipm kutnun nikgwalpm wor wor tiur ai.
LUK 11:43 Woi, arein kipm melnum a arpmen yangkipm yiprokgen a Moses ti! Kipm wasrongen la rpmi wrik wor wor kawor wan a atning atning yangkipm a Maur Wailen atnewe pa, wa kipm wasrongen la tu lkepm wor itni tutu akapm itni wulmpa a tu wrongkwail, ti kipm ikga uwi paipm.
LUK 11:44 Woi, arein kipm ti! Kipm pa kolen kirkap mampis paipm a ake tu ima kiminim a wak atne pa, atom ake tu ariwe, atom tu wonmis angkom elewepm kai. Ti kipm ikga uwi paipm.”
LUK 11:45 Atom melnum wris ur a aroaro wonel tu yangkipm a Moses pa la, “Melnum a kaling plan tu, kitn wa la tu melnum a arpmen yangkipm yiprokgen a Moses kolpa ti, wa kitn wa uk ipma kaikuten men ti yat.”
LUK 11:46 Ari wa Sisas lanakel la, “Woi, arein kipm melnum a aroaro wonel tu yangkipm a Moses ti yat! Kipm uk kalkut wail tu wrong kin kipman pa ti akentiwe mpa tu rki. Pake ake kipm alkipm ti apo wam ti angklinsen ngkat kalkut pa. Kalpis, kipm rka ari wulmpa kolti. Ti kipm ikga uwi paipm.
LUK 11:47 Woi, areinsepm, kipm wa awiyen ikgalen kirkap a tu melnum okwripm a pikekg tu mamikg mamin akipmen or amo ep ep pa.
LUK 11:48 Pa kipm plan kolen la kipm ti awi wor eng kwap a pikekg tu mamikg mamin akipmen ak pa. Eng ntei, tu mamikg mamin pa pikekg alm tu melnum okwripm a Maur Wailen pake, a kipm ti pa awiyen ikgalen kirkap a tu pa. Ti kipm ikga uwi paipm.
LUK 11:49 Am kolpa atom, nikgwalpm ariwe wor a Maur Wailen pa la kolkil la, 'Ikg a kupm ukwa tu melnum okwripm, a tu melnum a kupm takweiyen atom ukwawen pa kainten, atom ikga tu ntokg paipm tiur, a oren tiur imo.'
LUK 11:50 Tu or tu melnum okwripm amo ak ai angkai a antokg kitnong a kanokg ai, kulngkul angko wang ti pa, kalkuten a amo a tu pa, pa am kipm wrong kin kipman a rka ak wang ti arki tike.
LUK 11:51 Kol pikekg tu or Apel pa, wa tu tiur a pa kulngkul angko Sekaraia ti. Sekaraia pa tu orel itna kawor yipmingki wunen a yalming a Maur Wailen, itna kuin a tipmakg a tu alwor uk Maur Wailen atnewe pa, a yalming pa. Kupm lanakepm aklale, la kalkuten pa am kipm ti arki tike.
LUK 11:52 Arein kipm melnum a aroaro wonel tu yangkipm a Moses ti! Wa kipm ak tilel wanyun a awi nikgwalpm ariwe wor wor ti. Kipm alkipm ti ake kipm ore wanyun pa, kolpa ti wa kipm ak tilel wanyun a tu tiur ai la kol a ore pa. Kolpa ti kipm ikga uwi paipm.”
LUK 11:53 Sisas la yangkipm pa plalng pa kil la utnuurng kai pa, tu melnum a aroaro wonel tu yangkipm a Moses pa, wa tu melnum a arpmen yangkipm yiprokgen a Moses pa ipma wakget, la tirpmingen watipmen aknukwarel,
LUK 11:54 nungkwangen la kol a kil la yangkipm ur kai ar pa, pa mpa tu uwiyel iye kai itni yangkipm.
LUK 12:1 Tu wrongkwailet paipm ai anel wli rka amprilawe tita paipm ai, mpa tu ngkom kolai. Tu angkom ari rkganti tita kolti, atom Sisas kil la ep naki tu watnom alkil pa la, “Kipm uk ikg riwe nikgwalpm a tu melnum a arpmen yangkipm yiprokgen a Moses pa: tu kansil plan ak num enen ti kolti, pa kol mpim ap mringen a ak arongke kai or arpme nok ti plalng, atom angki wail.
LUK 12:2 Ti kol kuina ur a itna ampen pa, ikga palng kai ngko wunong, a kuina ur a aur pa, ikga uwiye kai ngko wunong.
LUK 12:3 Pa am wa kolpake, kuina ur a kipm la ak mining pa, ikga tu itning ik ran, wa kuina ur a kipm la akoo ampen naki tita kai nungkulkg rpma kawor wan wunen pa, ikga tu kul or la ik ok wail kai en ai.”
LUK 12:4 “Ti kipm melnum wor wor alkupm, kupm lanakepm la ampur kipm ngkarken melnum a almpepm amo pa. Pa tu almpepm numpalk ti kolti tuwa, tu ake antiwe antokg kuina ur kolai.
LUK 12:5 Pake mpa kupm iyewepm ngkirken melnum ur kil. Kil pa antiwe titnongket a antokg kamel amo plalng pa, angkli kamel elngkai anong paipm. Ti kipm ngkirken melnum pa!
LUK 12:6 Ti kipm ariwe pa, wel waseksek wampwomis pa mentepm am ak marpm watet wompel wekg kolti pa ak armpen armpen pake. Pake, Maur Wailen pa ake wonmisen kweikwei waseksek kol wel ti, kil ikgalen pa.
LUK 12:7 Ti am wa kolpake, tukgunakg walk wris wris akipmen ti pa, am kil am wa angkleikg kimeket ise, ti ampur kipm ngkark, eng ntei, kipm ti pa wa wail manten itna ep angen wel waseksek watipmen pa.”
LUK 12:8 “Pake kupm lanakepm la, mla ur a kil laron nang a kupm ti itna tu wrongkwail pa la kil alkil la kil akupmen ti pa, ikga wa Warim Kipman a Melnum pa kil laron nang a kil pa itni wulmpa a tu maur akwapel a Maur Wailen pa la kil akilen.
LUK 12:9 Pake mla ur a lam nang akupmen ti itna wulmpa a tu wrongkwail pa, ikga Warim Kipman a Melnum wa lam nang akilen pa itni wulmpa a tu maur akwapel a Maur Wailen.
LUK 12:10 Ti mla ur a kil la paipmel Warim Kipman a Melnum pa, ikga Maur Wailen ungkwan paipmpaipm akilen pake. A melnum a kil la paipmel Maur Wor a Maur Wailen pa, paipmpaipm akilen pa ikgake kil ungkwan.
LUK 12:11 Ti kol tu uwiyepm iye kawor wan a atning atning yangkipm a Maur Wailen atnewe pa eng ntokg yangkipm, aki iye kai itni tu mringman a tu melnum wailen pa, ampur kipm ngkark, la mpa kipm ikilmpe aki kipm la kolai pa.
LUK 12:12 Maur Wor a Maur Wailen pa mpa lanikepm ik wang ketn pa kuina ur la mpa kipm la pa.”
LUK 12:13 Atom melnum wris ur itna kuin a tu wrong kin kipman pa lanaki Sisas pa la, “Melnum a kaling plan tu, kupm wasrongen la kitn laniki wailen alkupm ti eng mentekg wako kweikwei a yan elngnto itna ti.”
LUK 12:14 Ari Sisas lanakel la, “Kipmekg! Mla la mpa kupm rpmi itning yangkipm a kipmekg ti mpreingtepm kweikwei ti?”
LUK 12:15 Atom wa kil lanaki tu wrong kin kipman pa la, “Kipm wonirpme ikglen kipm alkipm ti riworwor, eng ake mpa kipm ringkowe la uwi kweikwei watipmen pa, eng ntei, kweikwei watipmen a kolpa ake antiwe angklin melnum eng rpma wor wa awi rpma wor a rpma yongkyong pa.”
LUK 12:16 Atom Sisas lanaken yangkipm kla ur pa la, “Melnum ur a antiwe kweikwei wailet pa, kil antokg wringkya kweikwei pa, kweikwei a kil antokg pa nurkgatne wailet wor.
LUK 12:17 Ari wa kil akwonalmpen la, 'Kweikwei a kupm antokg ti wailet paipm kolpa ti mpa kupm iye kai elngkitni wan a i?'
LUK 12:18 Atom wa kil akwonalmpen la, 'Wan waseksek a kupm elng kweikwei ti armpe ari ros lawe, ti mpa kupm le wan wail wail tiur ai eng elng okipma a kweikwei wor wor alkupmen ti elng itnewe.
LUK 12:19 Atom mpa kupm la kupm alkupm pa la, wor wrisen. Kweikwei wor wor a kupm aye pa, ikga itni wring watipmen. Ti kupm mpa ntokg okipma pa il rpmi itopen ikngklei wang.'
LUK 12:20 Ari Maur Wailen lanakel la, 'Kitn titnowen! Kitn mpa imo ik mining ti, atom ti kweikwei a kitn numprampen rmpa ti ikga mla uwi?'”
LUK 12:21 Yangkipm kla a Sisas la pa kai kolpa. Atom wa kil la kolkil la, “Melnum ur a kil takwem kweikwei wor wor elngkitna eng la ik ngklin kil alkil pa eng rpmi wor, pake itna wulmpa a Maur Wailen pa kil rpma tukwok paipm wrisen.”
LUK 12:22 Atom Sisas kil lanaki tu watnom alkil pa la, “Ampur kipm akwonalmpen watipmen kweikwei a numpalk ti la mpa kipm il okipma a i aki la mpa kipm nowe apm a i.
LUK 12:23 Eng ntei, amen wor a melnum ti pa wail itna ep angen okipma ti, wa numpalk ti pa, wa wail itna ep angen apm pa.
LUK 12:24 Ti kipm ikwonilmpen wel pa, tu ake alin okipma pa, aki angket tuwai okipma pa aye wli itna wan, pake Maur Wailen ti ikgalenten eng okipma. Atom ti kipm pa wa kweiur wail manten itna ep angen wel pa.
LUK 12:25 Kipm ipma kalkut kolpa mpa pa ik rukge wang akipmen a rpma kanokg ti wa iye kai ketn?
LUK 12:26 Kol la kipm akentiwe a antokg kweikwei waiketnketn akolpa pa, antokg kolai atom wa kipm akwonalmpen watipmen eng kweikwei tiur ai?
LUK 12:27 Ti wa kipm ri kweikwei rwin pa, tu ake akwap aki antokg apm alntu eng nowe pa. Pake kupm lanakepm la, pikekg Solomon, melnum tukgunakg a antiwe kweikwei wor wor watipmen pa ak apm ari wor wor ak nowe num pake ake apm ur a ari wor kolen kweikwei rwin pa.
LUK 12:28 Ti ri Maur Wailen kil antokg kweikwei rwin pa palng ariwor. Pake kweikwei rwin weti arimo pa, ikg pa tu wangket ngkli kai wakg. Kipm melnum ti pa wail manten, ti kil ikga ngklinsepm apm kweikwei pa. Ti ake wa kipm ukipma titnongket.
LUK 12:29 Atom ampur kipm ipma kalkuten a akwonalmpen watipmen la mpa kipm il u a okipma a i pa. Ake mpa kipm ikwonilmpen watipmen kweikwei a kolpa.
LUK 12:30 Eng ntei, tu wrong kin kipman a kanokg ti pa, am nikgwalpm arken la uwi kweikwei a kol pake. Pake Yan alkipmen pa ariwe kuina ur a kipm tukwok pa.
LUK 12:31 Kolpa ti kipm nikgwalpm rkekgen eng elng Maur Wailen pa itni wailen ikgilen nol nikgwalpm akipmen pa ep, mpa wa kil lkepm kweikwei wrongkwail pa yat.”
LUK 12:32 “Ti kipm manto walkg malkgu yekyek alkupm pa, ampur kipm ngkark, eng ntei, Yan alkipm pa atopen la ikga lkepm nang wailen eng kipm ntiwel ikglen kweikwei wrongkwail.
LUK 12:33 Ti kipm uk kweikwei alkipmen a kipm antiwe ti ik uwi marpm pa atom uk kai tu melnum a rpma tukwok pa. Kol kipm ntokg kolpa pa, pa kolen kipm numprampen apmkok weten ur ai kaino anong wor ai, eng mpa tukwem lupme kweikwei wor wor, a kweikwei a ikgake plalng aki tinginin atok ngket, aki melnum ikgwampet ik ikgwampel pa.
LUK 12:34 Kipm takwem kweikwei wor wor akipmen pa itna a i pa, nol nikgwalpm wail akipmen pa am rken pake.”
LUK 12:35 ”Ti kipm kipor apm pa ining tukwok atom ik ampei pa ik ngket, a la wakg pa, atom kipm numprampen rpmi nungkwangen.
LUK 12:36 Kolen tu melnum akwapel a rpma numprampen nungkwangen yan a kwap alntu kai eng okipma wail ur a antokg al atnen kin a kipman ur a awi tita, atom yaper wli pa. Kil wli itna wanyun pa akwe pa, tu am atning atatu wli kukwa wanyun ise.
LUK 12:37 Atom kol yan a kwap pa kil ri tu melnum akwapel alkil pa tu numprampen, atom rpmi nungkwangentel pa, tu pa wor pake, tu itopen o! Kupm lanakepm la, yan a kwap alntu pa mpa kil kipor apm pa ining tukwok ik ampei pa ngket plalng pa, kil laniken la tu rpmi kai wrik ai, atom kil ngkiten okipma pa iye kai lken il.
LUK 12:38 Ti wa kol kil wli ik mining kuin ti aki, kil wli ik ikwe ti ur pa, kil ri tu numprampen rpmi pa, mpa kil uwi wor lawen la tu pa ak wor pake, tu itopen o!
LUK 12:39 Ti wa kipm riwe kil: kol melnum yan a wan pa kil riwe la melnum ikgwampet mpa kul ik wang kolai pa, kil mpam arpmen wan alkil pa rpma a eng ampake melnum pa tikale wan alkil pa.
LUK 12:40 Atom wa kipm ti yat, kipm mpa rpmi numprampen, eng ntei Warim Kipman a Melnum ikga nar ik wang ur a kipm ake ariwe la kil ikga nar pa.”
LUK 12:41 Atom Pita kil asen Sisas pa la, “Wailen, yangkipm kla pa kitn la kul eng men ti kolti aki, kitn la eng tu wrongkwail ai nampokgen?”
LUK 12:42 Ari Wailen kil akalmpe la, “Ti mla melnum akwapel a i nungkulkg wor nikgwalpm arke? Pati ikgam yan a kwap alkil pa elng kil pa itni wailen eng ikglen tu alntu akwapel pa eng mpreingten okipma pa ik wang alkil a tu awi awi okipma pake. Atom kil kai ise.
LUK 12:43 Atom kol melnum wailen pa kil yaper kul ri kwap a pikekg kil alkel pa, ari kil akwap wor kolpa itna pa, kil pa wor pake, kil itopen o!
LUK 12:44 Ti kupm lanakepm aklale wrisen, yan a kwap pa ikga elng melnum akwapel alkil pa itni melnum wailen ikgilen kweikwei wrongkwail alkilen pa.
LUK 12:45 Pake, kol melnum akwapel pa kil ikwonilmpen la, 'Melnum wailen alkupmen pa kil ikgake wli itatu', kolpa atom ari kil rpma antokg okipma al, a al u titno, atom kil titno titno or tu wrong kin kipman a tu akwap wris kol kil pa kolpa wonmis rpma.
LUK 12:46 Ari kalpis, melnum wailen pa wli palng tike. Kil wli palng ak wang a kil ake ariwe a kil ake akwonalmpen la mpa kil wli pa, atom kil orel paipm wrisen a ungkwantel kai rpmi nampokgen tu melnum a ake ukipma pa.
LUK 12:47 A melnum akwapel a kil ariwe kuina ur a yan a kwap alkil lanakel pake, ake kil numprampen rpma katila nikgwalpm a kil la pa, pa kil pa ikga kil orel ri paipm.
LUK 12:48 Pake, melnum akwapel a ake kil ariwe kuina ur a yan a kwap alkil pa la pa, atom ake kil ak katila nikgwalpm a kol a kil la pa, kil pa ikga kil orel waiketn kolti. Melnum a pikekg kil awi wail pa, mpa Maur Wailen ikwen wail, angen melnum a pikekg kil awi waiketn pa. Melnum a pikekg kil awi kuloken wail pa, ikga wa tu ukwentel eng kil ikilmpe wail, wa angen pa.”
LUK 12:49 “Kupm am nar la lile wakg itni kanokg tike, ti kupm wasrongen la mpa kirpowe nuruk il itatu.
LUK 12:50 Kupm ikga rki kalkuten wail manten kutnukg, ti kupm ipma kalkuten paipm kolpa kai ngko wang a kalkuten pa kai plalng.
LUK 12:51 Ti kipm ti la kupm ti nar kanokg ti la ntokg kipm ti rpmi meen wor? Kolpa kalpis, pa kupm nar la wako irowepm.
LUK 12:52 Atom ak wang ti or pa kai pa, melnum wampwomis a rka wan wris pa ikga iro, atom melnum wraur pa ikga itni paipm eng melnum wekg pa, wa melnum wekg pa am wa kolpake, tuwekg ikga itni paipm eng melnum wraur pa.
LUK 12:53 Tu yantin ikga itni paipm eng tu warim kipman alntu, wa tu warim kipman ikga itni paipm eng tu yantin alntu. Wa tu mantin ikga itni paipm eng tu warim kin alntu, wa tu warim kin ikga itni paipm eng tu mantin alntu. Wa tu yalmpikg mayen ikga itni paipm eng tu yalmpikg anei alntu, wa tu yalmpikg anei ikga itni paipm eng tu yalmpikg mayen alntu.”
LUK 12:54 Wa Sisas kil lanaki tu wrong kin kipman pa la, “Kipm ri waipmunu wrekg ingkinar takgni kinar pa kulno pa, kipm am ariwe ise, la u mpa wei. Pa u mpa uwei pake.
LUK 12:55 Wa kipm ri wripm a el a kanokg yamping kinar ti no pa, kipm am ariwe ise, la mpa takgni wor pake. Pa takgni mpa wor pake.
LUK 12:56 Ti kipm melnum a kansil plan ak num enen ti kolti. Kweikwei a ela kaino kitnong ai, a itna kanokg ti akayewen kweikwei a palng, pa kipm ariwe wor pake, ari ake wa kipm ariwe kuina ur a palng eng akayewen wang ti?”
LUK 12:57 “Karken a kipm alkipm ti ri la pa ute wor pake, atom kipm kutnun?
LUK 12:58 Kol melnum ur la uwiyeitn iye kai itni yangkipm pa, kipmekg ngkom or ya pa kai pa, kitn mpa mpen eng kipmekg or yangkipm pa kai imo. Kalpis pa, mpa kil uwiyeitn iye kai itni yangkipm itni wulmpa a mring man, wa mringman pa iyeweitn iye kai wam a tu mring nepimpalo, atom tu nepimpalo pa wa uwiyeitn iye kai rpmi wan tipmining.
LUK 12:59 Kupm lanakeitn la, kitn akentiwe mpa or en pa, kitn mpa rpmi i i, kitn ikilmpen marpm kaingkai kai plalng pipa, tu ungkwanteitn kul or en.”
LUK 13:1 Atom ak wang pa, tu tiur wli lakati naki Sisas tu melnum tiur a Kalili a pikekg Pailat la atom tu almpen amo, atom walmpopm a tu pa ungkwan akoren walmpopm a wlikgok kweikwei a tu itna lap alwor uk Maur Wailen.
LUK 13:2 Ari Sisas akalmpenten la, “Eng ntei, tu melnum a Kalili a amo kolpa atom, kipm pa akwonalmpen la tu pa tu melnum paipm wrisen a angen tu Kalili a antokg paipmpaipm ai?
LUK 13:3 Kalpis. Ti kupm lanakepm la, kol ake kipm plelng ipma alkipm pa utnuurng paipmpaipm pa, kipm ikgam imo kolen tu pake.
LUK 13:4 Ti wa tu melnum wampwam yikakwomis yikakwom wraur a pikekg wan watin tapor or angkai anong Siloam pa, pa kipm pa akwonalmpen la tu pa melnum paipm wrisen a antokg paipm angen tu melnum a rka Serusalem pake?
LUK 13:5 Kalpis. Kupm lanakepm, kol ake kipm plelng ipma utnuurng paipmpaipm alkipm pa, kipm ikgam uwi paipm kolen tu pake.”
LUK 13:6 Atom Sisas la yangkipm kla ur pa lanaki tu wrong kin kipman pa kolpa la, “Melnum ur pa yo kampuk ur alkil pikekg alin itna wring ampei wain pa, atom kil kai ari ake angko, kalpis.
LUK 13:7 Atom kil lanaki melnum a ikgalen yo kampuk akilen pa la, 'Ti kipm ri, wring wraur misen kupm kul ari yo kampuk pa ari ake wa angko. Ti kitn ware yo pawo! Eng itna ti arkolng kanokg wor pa kalpmlel.'
LUK 13:8 Ari melnum pa la, 'Melnum, elngtilo itni ukwiyen kol wring wris pa pen, eng kupm kurkurng up ngklin pen.
LUK 13:9 Wring kutnukg pa, ri la kil ngko pa, pa elng itni. Kol ake kil ngko pa, kitn ware kul.'”
LUK 13:10 Ak wang wail ur a rpma eng yapm pa, Sisas kil angkli yangkipm itna kawor wan ur a atning atning yangkipm a Maur Wailen atnewe pa.
LUK 13:11 Kin wris ur a numpet pa wa rpma kawor wan pa ak wang pa yat. Kin pa maur paipm ur rpmawel, atom antokg yirokg akilen pa tompoket, atom akentiwe mpa kil ngkom itn ute, kolpa itna a wring wampwam yikakwomis yikakwompwraur ise.
LUK 13:12 Atom Sisas kil ariwel pa, kil lanakel la, “Kitn pa, kul o! Numpet akitnen pa am kupm ungkwan ise.”
LUK 13:13 Atom kil elng wam pa elewel kolti, kil wrekg itna ute wor kolti, kil ukwor Maur Wailen.
LUK 13:14 Atom melnum tukgunakg a ikgalen wan a atning atning yangkipm a Maur Wailen atnewe pa ipma wakget eng Sisas antokg numpet a kin pa wor ak wang wail pa, atom kil lanaki tu wrong kin kipman pa la, “Kola kipm wli ik wang wampwomis wampwompwris pa, wang a akwap pa eng ntokgtepm numpet pa wor ik wang pake, wa ampur kipm wli ak wang wail a rpma eng yapm pa.”
LUK 13:15 Ari Wailen kil akalmpe kolkil la, “Kipm melnum a kansil plan ak num enen ti kolti. Ak wang wail a kol a rpmi eng yapm pa, kipm yat, kipm anelkgen manto nepm watin aki nimpa nungkulkg watin alkipm pa aye kai eng uk uk u al ti.
LUK 13:16 Ti kin ti, yaru marpmeng a Apraam pikekg Maur Paipm Satan yapowel rpma kolen wring wampwam yikakwomis yikakwompwraur, kolpa atom kupm wuten anelkgen ampei a ak yapowel ti ak wang wail a mentepm rpma eng yapm ti. Ti kipm ti lala kupm ti akwap paipm kolai?”
LUK 13:17 Kil akalmpe kolpa atom antokg tu a arpmen paipmel kil pa numpaipm. Pake tu wrongkwail pa atopen paipm eng kweikwei weten wor wor a kil antokg pa.
LUK 13:18 Sisas lanaki tu wrong kin kipman pa la, “Mpa kupm ik kuina a i ik la a kai irir kolen Maur Wailen itna wailen ikgalen nol nikgwalpm a kipm wrong kin kipman pa?
LUK 13:19 Pa am kolen trumpwilm ipopm ok a wripm almpen aye kai anip yela tatu palpa. Atom anip kaino kol yo pa, alm talpuk atnewe kai pa kai pa. Atom wel pa wli ak ila rka tatu talpuk pa.”
LUK 13:20 Atom wa Sisas asenten la, “Mpa wa kupm ik kuina a i ik la a kai irir kolen Maur Wailen itna wailen ikgalen nol nikgwalpm a kipm wrong kin kipman pa?
LUK 13:21 Am kol mpim ap mringen pake. Kin pa awi waiketn kolti alung ak oren nok mringen kinar kuntuk mangkei wail pa, kolti nok pa angki kai wail.”
LUK 13:22 Sisas kil angkom kai anong lkgungkur lkgungkur kaling plan yangkipm a Maur Wailen, kolpa kai, la kaino Serusalem.
LUK 13:23 Ari melnum ur pa asentel la, “Wailen, ti ikga Maur Wailen ik uwi melnum yek wraur ur kolti iye kai eng alkilen?” Ari wa Sisas akalmpentel la,
LUK 13:24 “Kitn nikgwalpm rkekgen eng kai or wanyun wasek pa. Eng ntei, kupm lanakepm la tu wailet ikga mpen la kai or wanyun wasek pa, pake ikgake ntiwe.
LUK 13:25 Melnum yan a wan pa ikga wrekg kolti ir wanyun pa, atom ikga kipm itni kawor en pa kulkwon la, 'Wailen, kukwanto wanyun ti!' Pa ikga kil ikilmpentepm la, 'Kupm akwekgel kipm pa la kipm pa angkai a i wli?'
LUK 13:26 Wa ikga kipm ikilmpentel la, 'Men pikekg al okipma rka wris nampokgen kitn, wa kitn pikekg kaling planto yangkipm a Maur Wailen tatu anong amenen ti.'
LUK 13:27 Wa ikga kil ikilmpentepm la, 'Kupm akwekgel kipm pa. Ti kipm melnum a antokg paipmpaipm pa, kipm kai tukuleikgentopm.'
LUK 13:28 Ti kipm ti ikga tu tulpulepm itni en, atom ikga ik wang a kipm ri Apraam, Aisak, Sekop numpokgen tu melnum okwripm a rpma kawor anong wor a Maur Wailen pa, kipm ikga akg paipm nampok.
LUK 13:29 Tu wrongkwail ikga ingkai takgni no, takgni kinar, i yamping yamping pa wli uwi wrik nti Maur Wailen il okipma kaino anong wor.
LUK 13:30 Kipm itning, melnum tiur a katnukg pa tu ikga wa kai ep, a melnum tiur a ep pa tu ikga wa kai kutnukg.”
LUK 13:31 Atom ak wang pa, tu melnum a arpmen yangkipm yiprokgen a Moses tiur, tu kul lanaki Sisas pa la, “Ti kitn kai itn kol ur ai tukuleikgen anong ti! Eng ntei, Erot la ikga wangketeitn meng.”
LUK 13:32 Ari wa Sisas lanaken la, “Ti kipm kai laniki nimpa tilpmingen pa la kil itni, kupm ikwap ungkwan maur paipm, a ntokg tu melnum numpet palng wor amti ikgkil, atom kwaikg ai pa kwap a kupm ak kil pa ikgam kai plalng ngko pake.
LUK 13:33 Kolpa ti, amti, ikgkil, kwaikg pa, kupm mpa ngkom kai kolpa, eng ntei, ake wor mpa tu ilm melnum okwripm ur a Maur Wailen pa imo rmpi wrik ur manet pa, kalpis, ikga tu ilmpel imo rmpi Serusalem ai kolti.
LUK 13:34 Woi, arein kitn anong Serusalem, Serusalem! Kitn akangklei almpalm tu melnum okwripm, kitn akwesel tu melnum yangkipm kuin a Maur Wailen ukwanteitn kulngkul pa. Wang watipmen ai kupm la lok tu warim alkitnen pa kul rki wris ikglen kol karek man a ak iplepm aur nampi alkil pa, ari wa kipm karken.
LUK 13:35 Kolpa ti Serusalem, kitn itning, wan yalming a kitn pa ikga Maur Wailen utnuurng itni kupuk kalpmlel kolti. Pake kupm lanakeitn kolkil: ti wa kitn ikgake wa riwopm nti ur, kolpa kai ngko wang a ikga kitn laron kupm ti la, 'Maur Wailen ukwa melnum pa atom kil nar, ti mentepm lkel wor ngkit nang akilen!'”
LUK 14:1 Ak wang wail ur a rpma eng yapm pa, Sisas kil kai al okipma kai wan anong a melnum wailen ur a tu melnum a arpmen yangkipm yiprokgen a Moses pa, ari tu wrongkwail tu wulmparpmewel.
LUK 14:2 Ari melnum ur a awi numpet a numpwam oren pa, kil rpma wreren Sisas pa.
LUK 14:3 Atom Sisas asen tu melnum a aroaro wonel tu yangkipm a Moses pa, wa nampokgen tu melnum a arpmen yangkipm yiprokgen a Moses pa la, “Ti yangkipm titnongket amentepmen pa la antiwe mpa ntokg tu melnum numpet pa palng wor ik wang wail ti aki, kalpis?”
LUK 14:4 Ari tu pa ake la kwei ur, atom kil wamparpme melnum pa ungkwan numpet akil pa takwleikgentel kolti, a ukwawel kai.
LUK 14:5 Atom kil lanaken kolpa la, “Ti kol warim kipman ur aki a manto nepm watin ningko ur a kipm pa ngko elng kinar u pa ik wang wail ur a rpma eng yapm pa, akentiwe mpa kipm rkolngkel iye no tukuleikg u pa ik wang wail pa?”
LUK 14:6 Ari tu akentiwe mpa tu ikilmpe yangkipm pa.
LUK 14:7 Atom Sisas kil ari tu melnum tiur a tu akwenten wli la tu il okipma pa, tu awi wrik wor wor pa arpme, atom kil lanaken yangkipm kla ur pa la,
LUK 14:8 ”Melnum ur ukwentepm eng okipma wail ur a ntokg il itnen kin kipman a awi tita pa, ampur kitn kai arpme wrik wor pa ep. Kol a kitn elng wrik pa elngkitni eng kol a uk melnum wailen ur a angen kitn ti a pikekg kil akwen pa mpa wli rpme.
LUK 14:9 Pake kol kitn ti rpme pa, melnum a akwentepm yatenen pa mpa kai lanikeitn la, 'Ai, kitn elng wrik ti elngitni eng melnum wailen ti.' Kolpa kitn mpa wa numpaipm eng kil lanakeitn la kitn wrekg tukuleikgen wrik ti kinar rpmi kinar kanokg ai.
LUK 14:10 Kolpa ti wang a tu akwenteitn pa, kitn kai rpmi kanokg pa ep pen, atom kol melnum a akwenteitn pa riweitn pa, mpa kil lanikeitn la, 'Yek alkupm, wrekg kaino rpmi wrik wor ai.' Kolpa kitn mpa uwi nang wailen itna wulmpa a tu mla ur a kipm al okipma rka wan pa.
LUK 14:11 Eng kol melnum a antokg kil alkil palng nang wailen pa, ikga itni nang wusok. A melnum a arku kil alkil pa, ikga itni nang wailen.”
LUK 14:12 Atom Sisas kil lanaki melnum a akwentel pa la, “Kol kitn ntokg okipma wail ur pa, ampur kitn akwen tu melnum wor alkitn, aki wusok wail alkitn, aki yiprokg ur alkitn, aki tu alkitn a kipm rka wris a rpma antiwe pa. Eng ntei, wang ur a ikga tu wa ntokg okipma wail pa, ikga wa tu wa ukwenteitn ikilmpe a pikekg kitn akwenten pa.
LUK 14:13 Kitn la ntokg okipma wail ur pa, kitn ukwen tu melnum a rpma tukwok, tu a numpwam paipmen, a tu melnum nepm paipmen, a wulmpa tilmpisen.
LUK 14:14 Kitn angklin tu a kolpa pa, kitn akwap wor pake, kitn itopen o! Eng tu pa akentiwe ikga ikilmpenteitn. Ikga Maur Wailen kil alkil ikilmpenteitn ik wang a tu melnum ute wor pa wrekg wrekg i kirkap ai.”
LUK 14:15 Wa melnum wris ur a antiwen al okipma rpma pa, atning yangkipm a Sisas la pa, atom kil lanakel la, “Mla ur a ikga il okipma wail kaino anong wor a Maur Wailen pa, kil pa wor pake, kil itopen o!”
LUK 14:16 Ari wa Sisas kil akalmpentel la, “Melnum wris ur pikekg kil la ntokg okipma wail, atom kil ukwa yangkipm kai lanaki tu wrong watipmen pa la, ikga tu wli eng ntiwel rpmi il okipma pa.
LUK 14:17 Kil numprampen okipma pa plalng pa, wang a il okipma pa, kil ukwa tu melnum akwapel alkil pa kai ri tu a pikekg kil akwenten la ikyakuren atom wa laniken la, 'Kipm kul o, kweikwei wrongkwail am numprampen yat ise!'
LUK 14:18 Tu kai la ikyakuren, ari tu kimeket la la tu arkewe kweikwei tiur ai, ti tu ake mpa kai. Atom melnum ur pa lanakel la, 'Wai, areinseitn eng kupm arkewe. Kanokg ur a kupm armpen kil, ti kupm mpam kai ri kilke. Ti kupm ake mpa kai.'
LUK 14:19 Wa ur pa lanakel la, 'Wai, areinseitn, eng kupm arkewe manto nepm watin wampwam kupm armpen ti, ti kupm la kai uwiyen eng ik ik kwap ukwiyen pen, kolpa ti akentiwe mpa kupm kai.'
LUK 14:20 Wa ur pa la, 'Kupm wuten awi kin ti pen, ti akentiwe mpa kupm utnurngkel kai.'
LUK 14:21 Atom melnum akwapel pa yaper kul naki melnum yan a numprampen okipma pa la tu arkewe, ti tu ake mpa wli. Kil atning a tu la kolpa atom kil ipma wakget paipm, atom kil lanaki melnum akwapel alkil pa la, 'Kolpa ti kitn penterng kai tutu ya wenting wenting akapm wail wail a anong wail ti ikor ik yakur tu melnum a rpma tukwok, tu a numpwam paipmen, tu a nepm paipmen, a wulmpa tilmpisen ai tu kul!'
LUK 14:22 Atom melnum akwapel alkil pa am kai ak katila kol a kil la pa, atom wa kil wa yaper kul la, 'Wailen, oklala a kitn pa kupm katnun, pake wrik wailet wa itna ai.'
LUK 14:23 Ari wa melnum yan a numprampen okipma pa lanakel la, 'Ti wa kitn wa utnuurng ti wa kai tutu ya wail wail a ya waiketnketn a kai tatu wringkya kweikwei pa, ukwe ikor laniken erkisen ikyakuren iye wli kawor wan a kupm ti ninin, kil ntiwe.
LUK 14:24 Ti kupm lanakepm la, tu melnum a kupm akwenten ep pa, akentiwe ikga ur il okipma wail akupmen pa!'”
LUK 14:25 Ak wang wris ur pa, tu wrong wailet paipm anti Sisas pa angkom kai, atom kil plelng lanaken la,
LUK 14:26 ”Kitn mla ur a kul eng kupm pa, pake ake wa kitn uk yirokg mansan, kinwatnom, muinwror muikgmayen, a wa kitn alkitn ti yat, kitn akentiwe a palng watnom akupmen a kupm aroaro wonel pa.
LUK 14:27 Wa melnum a ake arki yo okgmangki alkilen atom katnuntopm pa, kil ake antiwe mpa palng watnom akupmen a kupm aroaro wonel pa.
LUK 14:28 Kol kipm ur akwonalmpen la le wan wail watin ur pa, kitn rpmi ikwonilmpen pen, la ikga kitn ntiwe a le wan pa plalng pipa, kitn le.
LUK 14:29 Pake kol kitn uwen ong lil mpangkil pa kolti, ari ake kitn antiwe antokg wan pa plalng pa, tu riweitn pa, ikga tu ik nokgeleitn.
LUK 14:30 Ikga tu wa la, 'Melnum ti ngkaten kwap ti, ari ake wa kil antiwe a kil ak pa kai plalng!'
LUK 14:31 Wa kol melnum tukgunakg ur kil uwi wrong wusoken kamel kamel (10,000) a kil pa iye kai eng rapon numpokgen wrong wailet kamel kamel (20,000) a melnum tukgunakg ur ai pa, kil mpa rpmi eng ikwonilmpen la, wrong wusoken kolpa tu antiwe mpa lok ngkli tu wrong wailet pa aki, kalpis.
LUK 14:32 Kol la kil akentiwe pipa, mpa kil ukwa melnum yangkipm kuin pa kai ri melnum tukgunakg ur pa ngko ya ur ai pa la ipma wris ngkeng tita, eng ake mpa tuwekg rapon pa.
LUK 14:33 Kolpa ti kupm lanakepm la, kol melnum ur ake kil uk yirokg kweikwei alkilen pa, kil akentiwe a palng watnom akupmen.”
LUK 14:34 “Nokgnok pa kleset pake, kol kil kupuk pa, akentiwe mpa wa mentepm ntokg eng wa kil palng kleset.
LUK 14:35 Ti nokgnok kupuk paipm a kolpa, pa mpa ngkiten kai lung ngklin nep a namung kweikwei pa kolti, pake ake wa antokg nep a namung pa wor kolai. Ti kol kipm melnum a nungkulkg atnewe pa, kipm itning o!”
LUK 15:1 Wang wris ur pa, tu melnum a awi marpmel tu, a tu melnum tiur a antokg paipmpaipm pa, wli la itning yangkipm a Sisas angkli pa.
LUK 15:2 Ari tu melnum a arpmen yangkipm yiprokgen a Moses, wa nampokgen tu melnum a aroaro wonel tu yangkipm a Moses pa, anel ipma paipm eng pa, atom anel la, “Melnum pa wa kai atn orwris wa al okipma anti tu melnum a antokg paipmpaipm pa eng ntei?”
LUK 15:3 Atom Sisas lanaken yangkipm kla ur la,
LUK 15:4 ”Ti kol kipm ur ikglen manto walkg malkgu kamel wampwomis, atom wris ur pa kai am pa, mpa kitn ntokg kolai? Kitn mpa utnuurng kamel wikgwikg tuwek wampwam yikakwomis yikakwompwikgwikg pa itni wrik laikge wor pa, a kai ikor wris pa, kaingkai, kitn nsil.
LUK 15:5 Kitn nsil pa, mpa kitn ngkit ngkli kaino maleng ai, atom itopen paipm kolti am aye kai anong ise.
LUK 15:6 Atom mpa kitn ukwen tu yiprokgen a tu anongwris alkitn pa kolti wli, atom kitn laniken la, 'Kupm atopen paipm eng kupm ansil manto walkg malkgu wris ur alkupm a pikekg am. Ti tepm ntokg okipma il itnen!'
LUK 15:7 Ti am wa kolpake, kupm lanakepm la, pa tu a rpma kaino anong wor ai pa, tu atopen tu melnum ute wor kamel wikgwikg tuwek wampwam yikakwomis yikakwompwikgwikg a pikekg plelng ipma ise. Pake melnum paipm wris ur a kil plelng ipma pa, mpa tu itopen wail paipm angen pa.”
LUK 15:8 “Aki kol kin ur pa kil aye marpm wampwam, ari wris ur pa angko am pa, mpa kil ntokg kolai? Mpa kil la wakg ti ik ikor kai la kalpis pa, kil kinsim ipikel wan ti irongen ikor ikgen yela kolpa kaingkai, kil nsil.
LUK 15:9 Kil nsil pa, mpa kil ukwen tu yiprokg a anong wris alkil pa wli kolti, wa kil laniken la, 'Kupm ti atopen paipm, eng marpm a am pa am kupm ansil ise. Ti tepm ntokg okipma il itnen!'
LUK 15:10 Ti am wa kolpake, kupm lanakepm la, wang a melnum paipm wris ur kil plelng ipma pa, tu maur akwapel a Maur Wailen pa atopen paipm.”
LUK 15:11 Atom Sisas kil wa la, “Yan ur pa, warim kipman wekg.
LUK 15:12 Atom warim kipman paipmen pa lanaki yan alkil pa la, 'Kitn iro kweikwei wompel akupmen ti lkopm!' Atom yan pa wrekg kolti, a ampreing kweikwei pa uk warim kipman wekg alkil pa.
LUK 15:13 Plalng pa, warim kipman paipmen pa rpma wang aripm ur kolti, awi kweikwei alkil ti ak awi marpm, plalng pa, kil wrekg kolti kai rpma kol anong watin ur ai. Kil rpma anong pa, kil angkli marpm alkil pa kai eng kweikwei paipm paipm kolti.
LUK 15:14 Kil angkli marpm alkil pa kolpa kaingkai kai plalng pa, wangnikg wail palng kai anong pa, atom ak antokg kil pa rpma tukwok paipm wrisen kolti.
LUK 15:15 Atom kil kai ari melnum ur a anong kanokg pa, atom kil lanakel la, kil la ikwap ur. Atom kil alkel kwap a ikgalen manto itna kai wrik a elng manto atnewe atnewe pa.
LUK 15:16 Ari ake melnum ur alkel okipma ur, atom kil akwonalmpen la, kil a nti manto pa il yampis palk a tu aye kai alung uk manto pa al pa.
LUK 15:17 Ari nikgwalpm wor pa palngtel, atom kil akwonalmpen kai kil alkil pa la, 'Tu melnum a akwap eng yan alkupm pa, tu antiwe okipma watipmen eng al, pake kupm am amo eng nikg rpma tike!
LUK 15:18 Ti mpa kupm wrekg yaper kai eng yan alkupm pa, atom mpa kupm lanikel kolkil la, “Yaiyai, arein, kupm antokg paipm kai kitn a wa kai Maur Wailen ai.
LUK 15:19 Ti kupm ti ake wor eng mpa kitn ukwewopm la warim kipman akitnen pa. Ntokg kupm ti kol melnum akwapel akitnen!”'
LUK 15:20 Kil akwonalmpen kolpa, kil wrekg kolti kai eng yan alkil. Yan alkil pa ikg kai ariwel kai watin ai, a kil arein paipm, atom kil pirng kai kolti arkulel, nakrontel.
LUK 15:21 Atom kil lanaki yan alkil pa la, 'Yaiyai, kupm arein eng kupm pikekg antokg paipm kai kitn ti a wa Maur Wailen ai. Kolpa ti kupm ti ake wor antiwe mpa kitn ukwewopm la warim akitnen pa.'
LUK 15:22 Ari yan alkil pa akwe tu melnum akwapel alkil pa la, 'Kipm itatu wli! Kipm iye apm watinet wor ur pa iye wli nowewel, a uwi mikgni pa rpmewel kai wam kil pa, wa uwi nepm palk pa nowel kai nepm kil pa!
LUK 15:23 Kai ilm manto nepm watin war ur a numpu arke pa eng mpa mentepm ntokg okipma il itnentel.
LUK 15:24 Eng ntei, warim kipman akupmen kil, kol am pikekg amo ur ise, ari wa wrekg wa rpma. Wa kil am pikekg atnuurngko kai wrisen ise, ari wa kil wa yaper wlinto tike.' Tu melnum akwapel atning a kil la kolpa atom tu numprampen antokg okipma wail pa al atnentel.
LUK 15:25 Atom ak wang pa, warim kipman wailen pa kil angkai wring pa kul wreren wan anong ti pa, kil atning tu atopen a antokg nangnang pa,
LUK 15:26 atom kil akwe melnum akwapel ur a yan alkil pa wli atom kil asentel la, 'Tu antokg nangnang atnen kuina wai?'
LUK 15:27 Ari wa melnum akwapel a yan alkil pa akalmpe la, 'Wusok alkitnen pa am wa wli ise, atom yan alkipmekgen pa alm manto nepm watin war wris ur a numpu arke pa, atopentel eng kil ake kai paipm, aki amo ur pa kalpis, kil rpma, atom am wa yaper wlintel ise.'
LUK 15:28 Wailen pa nikgwalpm paipm la kil ampake kawor wan pa, ari yan alkil pa or armponel la tuwekg kawor wan pa.
LUK 15:29 Ari kil ti la kai yan alkil pa la, 'Kitn itning, wring watipmen paipm kupm aken kwap kitn ti kolen melnum akwapel akitnen pake. A ake wa kupm nungkulkget wang ti ur. Ake pikekg kitn alkopm kweiur? Ti ake wa kitn alkopm manto walkg malkgu war ur ti eng mpa kupm ntokg okipma ur il itopen numpokgen tu yiprokg alkupmen ti!
LUK 15:30 Warim kipman alkitnen ti pa, kil pikekg angkli kweikwei wor wor akitnen pa itna tu kin a angkli arkul tu kipman pa plalng, wa kil wa yaper wli pa, wa kitn wa alm manto nepm watin war a numpu arke pa, atom wa antokg okipma al atnen kil pa eng ntei?'
LUK 15:31 Ari wa yan pa akalmpentel la, 'Kitn ti pa am mentepm rpma rpma tike, ti kweikwei wrongkwail akupmen ti pa am akitnen pake.
LUK 15:32 Pake mentepm mpa ntokg okipma il a itopen, itnen wusok alkitn ti pikekg kol am kai imo ur ise, ari wa kil rpma. Wa kil am pikekg atnuurngko kai wrisen ise, ari wa kil wa akwonalmpento, atom kil am wa yaper wlinto tike.'”
LUK 16:1 Atom wa Sisas lanaki tu watnom alkil pa la, “Melnum ur pa kil antiwe kweikwei watipmen, atom wang ur pa tu tiur wli lanakel la, 'Melnum akwapel akitnen ti ake akwap a kitn ti ariworwor. Kil kaken kweikwei akitnen ti kai eng a kai plalng ti.'
LUK 16:2 Atom kil akwe melnum akwapel pa kul kolti, a kil lanakel la, 'Kupm atning yangkipm a tu la kitn ti akwap paipm. Ti kitn kai ik ker uwiye kweikwei wrongkwail akupmen a kitn ikgalen pa kimeket atom nirantopm iye wli, atom mpa kitn plalng kwap akupmen ti.'
LUK 16:3 Atom melnum pa akwonalmpen la, 'Ai, ikga wa kil ungkwantopm tukwleikgen kwap alkupm kil tuwa. Ti mpa kupm ntokg kolai? Ti kupm ti ake antiwe titnongket a akwap wringkya kweikwei pa, wa kupm numpaipm eng ak okla kweikwei atu.
LUK 16:4 Pake kupm ariwe ya ur kil: mpa kupm ngklin tu mlaur ai, eng ikga kol kil ungkwantopm eng kwap a kupm ak ti pa, ikga kupm won ngklin kweikwei a pikekg kupm uk tu pa.'
LUK 16:5 Atom kil akwen tu a pikekg awi kuloken kai melnum a kil aken kwap pa wli. Atom kil asen tu pa wris wris la, 'Kitn pikekg awi kweikwei aripm kai melnum a kupm aken kwap ti?' Ari wa ur pa akalmpe la,
LUK 16:6 'Kupm awi nep numong kamel wampwomis.' Atom wa kil lanakel la, 'Ti kitn uwi wrkapm kil rpmi ingkai wrik ai, pirpiren lo kamel wampwomis pa wa nira kamel wekg tuwek wampwam ti kolti penterngen!'
LUK 16:7 Wa kil wa asen ur pa, wa kil wa la, 'Kupm awi okipma numong wail kamel wampwomis.' Atom wa kil lanakel la, 'Ti kitn uwi wrkapm kil lo kamel wampwomis pa wa nira kamel wikgwikg ti kolti!'
LUK 16:8 Atom melnum a antiwe kweikwei watipmen pa kaporng yangkipm lanaki melnum akwapel alkil a aklampe kweikwei alkilen pa la, 'Ya tiur a kitn ak pa kitn ak wontrakole wor eng ak angklin kitn alkitn.' Eng ntei, tu melnum a katnun kuina ur a itna kanokg ti pa tu akwap wontrakole itna kuin a tu alntu ti angen tu melnum a awi klalen a Maur Wailen pa.”
LUK 16:9 Sisas la yangkipm kla pa kai plalng pa, wa kil wa la, “Ti kupm lanakepm la, kipm ik kweikwei a kipm antiwe itna kanokg paipm ti ik ngklin tu mlaur pa eng mpa ntokg tu palng melnum wor akipmen pa, eng ikga wang a kweikwei pa kai plalng pa, ikga tu uwiyepm iye kai wan anong wor a rpma yongkyong won ngklin kweikwei a pikekg kipm uk tu pa.
LUK 16:10 Ti kol mlaur a nungkulkg wor eng ikglen kweikwei waseksek pa, kil pa wa nungkulkg wor antiwe eng ikgalen kweikwei wail wail ai yat. Wa am kolpake, melnum a ikgalen paipmel kweikwei waseksek pa, pa kil ikgam wa ikglen paipmel kweikwei wail wail ai kolpa yat pake.
LUK 16:11 Ti kol ake kipm nungkulkg wor ikglen kweikwei a itna kanokg paipm a ti riworwor pa, ti ikga wa mla lkepm kweikwei wor wor a itna yongkyong pa eng kipm ikglen?
LUK 16:12 Ti kol ake kipm nungkulkg wor ikglen kweikwei a melnum manet pa riworwor pa, ti ikga mla wa lkepm kweikwei alkipmen a aknamputepm pa?
LUK 16:13 Ti melnum ur akentiwe mpa kil iken kwap mring wekg pa, pa mpa kil ipma paipm eng ur, wa plan ipma wor wasrongen ur, aki mpa kil uwi wor la ur pa, wa kil uwi paipm la ur pa. Ti akentiwe mpa kipm orngwatneikgen kweikwei wekg pa ngkompwris, Maur Wailen a marpm kweikwei pa.”
LUK 16:14 Pake tu melnum a arpmen yangkipm yiprokgen a Moses pa tu melnum a aringkowe marpm atom ak wang a tu atning yangkipm a Sisas kil la kolpa pa, tu la paipmelel.
LUK 16:15 Atom Sisas lanaken la, “Kipm ti la plan kipm alkipm ti la tu wrong kin kipman riwepm la kipm ti melnum ute wor, pake Maur Wailen pa ariwe kawor nol wunen akipmen ai. Kuina ur a kipm melnum ti ari la wor pa, Maur Wailen pa kil ari la pa uk numkropis kamel.”
LUK 16:16 Sisas wa kil wa la kolkil la, “Kol yangkipm titnongket a pikekg Maur Wailen uk Moses, wa yangkipm a pikekg tu melnum okwripm a Maur Wailen nira pa, pikekg alkepm ariwe, kolpa kul angko wang a Son kil kaluko ti. Atom Son pa pikekg kil ngkaten eng laron yangkipm wor a la Maur Wailen itna wailen la ikglen nol nikgwalpm a kipm wrongkwail kin a kipman kolpa kai yela. Atom tu wrong wailet tu nikgwalpm arkekgen aken kwap akoporen tita la kawor yipmingki wunen a Maur Wailen itna wailen ikgalen kweikwei wrongkwail pa.
LUK 16:17 Pake pa ake la la yangkipm titnongket a pikekg Maur Wailen alko ep ti pa kai kalpis pa, kolpa kalpis. Kitnong a kanokg pa ikga kai plalng, pake yangkipm titnongket a Maur Wailen ti pa, ikgam itna kati kati kolpa kimeket pake. Ikgake yangkipm ketn ur kai am, pa kalpis.”
LUK 16:18 Sisas la kolpa plalng pa, wa kil wa la kolkil la, “Ti kol melnum ur ungkwan kin alkil, wa uwi kin weten pa, pa kil angkli arkul kin pa. Wa melnum a awi kin ur a kipman ur manet ungkwan pa, pa wa kil angkli arkul kin pa.”
LUK 16:19 Sisas la melnum wekg ur pa kolkil la, “Melnum ur pa kil antiwe kweikwei watipmen. Kil nowe apm tangkoren wor wor nakure ariworwor a, antokg okipma wor wor wail wail al akangklei wang.
LUK 16:20 Wa melnum ur a tu namput la Lasarus pa, kil rpma tukwok eng kweikwei wrongkwail. Wa kil pa i al numpwam a kil ti plalng. Kil am rpma rpma wanyun a melnum a rpma antiwe pake.
LUK 16:21 Kil la kol a il okipma ipran a angko rmpa tatu wrik a melnum a antiwe kweikwei rpma al okipma pa. Wa nimpa pa akangklei wli nipla al i akilen pa itna.
LUK 16:22 Kolpa kaingkai, Lasarus kil amo, atom tu maur akwapel a Maur Wailen awi maur amen wor akilen pa aye kaino rpma wor nampokgen Apraam ise. Wa melnum a antiwe kweikwei watipmen pa wa kil amo atom tu uwentel.
LUK 16:23 Amen wor akilen pa kai rpma wrik om a tu melnum amo kai arke arke pa, kil awi wleket paipm, atom kil ikg kaino ari Lasarus pa nampokgen Apraam pa rpma kaino watin ai.
LUK 16:24 Atom kil akwe la, 'Yayai Apraam, kitn reinsopm pen! Kitn ukwa Lasarus pa kil ipo wam pa ngkle u ur pa, atom ungkwan polng elngkul nar ik itnewopm kromeng kil pen! Numpwam kupm ti wakg atne waiwai wleket paipm kolti.'
LUK 16:25 Ari wa Apraam lanakel la, 'Warim, kupm ake antiwe mpa ik kolpa. Ti kitn ikwonilmpen wang a pikekg kitn rpma kinar kanokg pa, kitn pikekg rpma antiwe kweikwei wor wor watipmen, pake Lasarus kil pikekg rpma tukwok. Ti ak wang ti am wa kolpake, kil awi wang wor atopen rpma wor kilke, a kitn pa awi wleket rpma paipm pake.
LUK 16:26 Wa yat, watu wail manten pikekg angklo itna kuin ak aro mentepm ti, la akentiwe mpa men ti kai riwepm aki, kipm pa kul riwo pa, kalpis.'
LUK 16:27 Ari melnum a antiwe kweikwei watipmen pa lanaki Apraam la, 'Kolpa ti, yayai, kitn laniki Lasarus pa la kil kinar wan a yan alkupmen pa,
LUK 16:28 atom laniki tu paipm paipm wampwomis alkupm pa titnongket, la tu ngkom nulokgen ya wakget wleket paipm a kupm ore kil!'
LUK 16:29 Ari wa Apraam akalmpe la, 'Yangkipm wrkapm a pikekg Moses nampokgen tu melnum okwripm a Maur Wailen nira pa am rmpa pake. Tu itning kutnun yangkipm pawo!'
LUK 16:30 Ari wa melnum pa la, 'Yaiyai Apraam, kolpa kalpis, pa akentiwe. Kol melnum ur a pikekg amo ti wrekg i kirkap ti kinar laniken pa pati, mpa tu plelng ipma pake.'
LUK 16:31 Ari Apraam kil la kolpa, 'Kol ake tu atning katnun yangkipm a Moses pa nampokgen tu melnum okwripm a Maur Wailen pa, pa ikgake wa ntiwe a tu itning yangkipm a melnum a pikekg amo ti wrekg a kirkap ti.'”
LUK 17:1 Atom Sisas lanaki tu watnom alkil a kil aroaro wonel pa la, “Kweikwei a ak ningkailo la mentepm ngko pa am palng kolpa itna pake, ikgake kalpis pa. Pake woi, arein eng melnum a kil ningkail melnum ur iye kai ngko pa!
LUK 17:2 Kol kil ningkail kipm melnum ur a ake ukipma kupm ti itna titnongket pa kil ngko pa, kol a tu yipo wes wail ur pa rpmi mengkel kil pa atom ngkliwel elng kinar unokg ai, pa kol a wor. Pa kil ikga uwi paipm wrisen angen a tu yapo wes rpma mengkel angkliwel elng kinar unokg pa.
LUK 17:3 Ti kipm rpmi riwe kipm alkipm ti! Kol melnum ur alkitn a kipmekg ukipma kupm ti pa ntokgteitn paipm pa, kitn ngkengkel titnongket eng ake mpa kil ntokg pa. Pake kol kil la rein pipa, kitn utnuurng paipmpaipm a kil antokg pa.
LUK 17:4 Wa kol kil ntokgteitn paipm nti watipmen ik wang wris pa atom wa kil wli la rein nti watipmen pa, kitn mpa itopen kolti eng utnuurng paipmpaipm a kil antokgteitn pa.”
LUK 17:5 Atom tu melnum wokgen a Sisas pa lanaki Sisas pa la, “Men wasrongen la kitn ngklinso eng mpa men ukipma itni titnongket.”
LUK 17:6 Ari Wailen kil akalmpenten la, “Wor pa, kol kipm ukipma waiketn kol marer ok wasek pa, kol a kipm laniki yo ti la, 'Ti kitn nulu kitn alkitn ti ngkiten kulung kinar inip itni kinar unokg ai', ti yo ti mpam itning yangkipm kol a kipm la pake.”
LUK 17:7 “Ti kol kipm ur melnum akwapel ur akitnen ikwap kai wring akitnen a ikglen manto walkg malkgu akitnen pa, ampake wa kitn ti wa lanikel la, 'Kitn wli itatu il okipma ti!'
LUK 17:8 Kolpa kalpis. Kitn mpa la, 'Kitn numprampen kitn alkitn ti rpmi ntokgtopm wakgkuntuk ti or yawel iye kul mpreingtopm eng kupm il plalng pa, wa kitn wa kai ntokg alkitnen pa wa il kul!'
LUK 17:9 Ake melnum pa kaporng yangkipm la melnum akwapel alkil pa, kwap a melnum akwapel pa am kil ak kolpake. Ti mpa wa melnum pa kiporngtel yangkipm la eng ntei?
LUK 17:10 Ti kipm ti am wa kolpake, kol kipm ntokg kuina ur a pikekg Maur Wailen la kipm ntokg pa, plalng pipa, kipm la kolkil, 'Ampur kipm uk wor ngkat nang amenen ti, palpa men ak kwap almenen.'”
LUK 17:11 Sisas kil angkom or ya pa kinar kolpa la kinar anong wail Serusalem pa, kil kinar angko Samaria a kirng kowak a anong kanokg Kalili a uk tita pa.
LUK 17:12 Atom kil kai palng kai anong ur pa, kil ikg kai ari tu melnum numpet wampwam a i paipuk awi pa tu kul itna kai watinet ai,
LUK 17:13 atom anel akwewel la, “Melnum Wailen Sisas, kitn reinso pen!”
LUK 17:14 Ari Sisas lanaken la, “Ti kipm kai plan numpwam akipmen ti kai tu melnum ipma krakgen a ak ak kwap eng al wor uk Maur Wailen pa riwepm pen!” Tu atning kolpa kai angko ya pa ari numpet a tu pa am palng wor ise.
LUK 17:15 Atom wris ur atuwen a palng wor pa kil ari kolpa atom, kil plelng kolti tipra ngkat nang a Maur Wailen pa yikakatnen kolpa yaper a ya pa kul eng Sisas pa.
LUK 17:16 Atom kil elng angko wontaipur rmpa nepm a Sisas ti alkel wor. Melnum pa kil melnum a anong kanokg Samaria.
LUK 17:17 Wa Sisas asen la, “Melnum wampwam wuten palng wor ti, ti wampwomis wampwompwikgwikg pa a i?
LUK 17:18 Antokg kolai atom wa melnum wris ur a anong manet ur ai ti kolti wa yaper wli ngkat nang a Maur Wailen ti?”
LUK 17:19 Atom Sisas lanaki melnum pa la, “Kitn wrekg kai o! A kitn ukipma titnongket kolpa atom, numpet alkitnen am palng wor ise.”
LUK 17:20 Atom tu melnum a arpmen yangkipm yiprokgen a Moses tiur pa asen Sisas la, “Wang a i ikga Maur Wailen nar itni wailen ikglen kweikwei wrongkwail pa?” Ari wa kil akalmpe kolpa la, “Maur Wailen am nar ise eng la itni wailen ikgilen nol nikgwalpm akipmen tike, pake ake mpa kipm ri wunongen ik wulmpa pa.
LUK 17:21 Ti ake antiwe mpa ur wa la, 'Ti itna ti' aki, 'Ti itna kai ai', eng ntei, Maur Wailen pa am antiwepm itna wailen ikgalen nol nikgwalpm akipmen tike.”
LUK 17:22 Atom kil lanaki tu watnom alkil pa la, “Wang kalkuten ur ikga palngtepm. Atom ikga ik wang pa kipm ikga wasrongen paipm la kol a ri wang wris ur a Warim Kipman a Melnum la nar itni wailen ikglen kweikwei wrongkwail pen. Pake kipm ikgake ri itatu ik wang pa, a pa.
LUK 17:23 Tu tiur ikga wa lanikepm la, 'Ti kil itna kai ai.' Wa tu tiur pa ikga wa lanikepm la, 'Ti kil itna ti.' Pake ampur kipm pirng katnunten akor kai pa kai pa.
LUK 17:24 Ik wang a Warim Kipman a Melnum pa nar pa, ikga palng kipm ri yela kolen milmal a plaing kaino kitnong pa.
LUK 17:25 Pake ep pa kil ikga rki kalkuten a tu melnum a ak wang ti pa ikga lkel yirokg papen.
LUK 17:26 Ikga ik wang wreren Warim Kipman a Melnum ikga nar pa, atn a rpma a tu wrong kin kipman pa ikgam palng repmrepm kol a tu pikekg palng ak wang a Nowa pa.
LUK 17:27 Tu wrongkwail pikekg awi tita, antokg okipma al rka, kolpa kai angko wang ketn a Nowa kil kai kawor wan unokgen pa, u wail awei nar akalen.
LUK 17:28 Ti ikga wa palng kolen pikekg ak wang a Lot pa. Wrongkwail pikekg antokg okipma al, armpen kweikwei, ak kweikwei awi marpm, antokg wring, ale wan kolpa kaingkai,
LUK 17:29 kai angko wang a Lot kil atnuurng Sotom pa, wakg wail manten nampokgen wes wakget kolen karin a tu lap ti angkaino kitnong ti nar ake u a awei pa, kolti lapen kimeket kolti.
LUK 17:30 Ti wang a Warim Kipman a Melnum pa palng ngko wunong pa, ikgam kolpake.
LUK 17:31 Kol melnum ur ikga ik wang pa rpmi kawor wan male pa, ampur wa kil kawor wan wunen pa eng uwi kweikwei tiur alkil pa. Wa kol melnum ur ikga ikwap itni kai wring alkil pa, ampur kil wa yaper kul anong pa, kalpis, kil i pa kai pake!
LUK 17:32 Ti kipm ikwonilmpen kin a Lot pa!
LUK 17:33 Atom melnum a kil ikgalen num alkil a aye num alkil ngkark pa, amen wor alkil pa ikga kai paipm. Pake mla ur a kil angkli num alkil pa, amen wor a kil pa ikga kai wor.
LUK 17:34 Kupm lanakepm la, ikga ik mining pa, melnum wekg a okg rmpa wris pa, wris ur pa ikga kil uwi, wa wris ur pa ikga kil utnuurng okg rmpi pa.
LUK 17:35 Wa kol ikga wa kin wekg ur ntokg wakg kuntuk rpmi wris pa, wris ur pa ikga kil uwi a wris ur pa kil ikga utnuurng rpmi pa. [
LUK 17:36 Wa melnum wekg a ak kwap itna wring pa, wris ur pa ikga kil uwi, a wris ur pa ikga kil utnuurng itni pa.]”
LUK 17:37 Atom tu watnom alkil pa asentel la, “Wailen, ti kweikwei pa ikga palng itni kai a i?” Ari wa Sisas akalmpe la, “Kipm ikga ri kirmpa taung ur a o o akam ela pa pati, kipm ariwe la, kil ari wlikgok ur alkil a la mpa il pa am rmpa pake.”
LUK 18:1 Atom Sisas lanaken yangkipm kla ur pa eng mpa tu uwi riwe atom mpa tu oklala niki Wailen pa ikngklei wang, a ake mpa tu kai lpmaaken pa.
LUK 18:2 Yangkipm kla pa kil la kolkil, “Kai anong wail ur pa, melnum ur a rpma eng atning atning yangkipm pa rpma, kil ake ngkarken Maur Wailen pa, aki akwonalmpen melnum ti, kalpis.
LUK 18:3 Wa kin karpikg ur pa, am wa rpma anong wail pa yat pake. Atom akangklei wang kil wli erkisen lanakel la, 'Kitn ngklinsopm eng kaikuten a pikekg melnum ti antokgtopm ti.'
LUK 18:4 Kil kul perper lanakel pake ake kil atning kaikuten a kil lanakel pa. Kolpa kaingkai, wang wris ur pa, kil akwonalmpen la, 'Kupm ti ake ngkarken Maur Wailen pa, aki akwonalmpen tu melnum ti.
LUK 18:5 Pake kil perper kul lanakopm atom antokg kupm ti numpatningkewopm paipm ai, ti kai kupm ngklinsel pen.'”
LUK 18:6 Wailen la yangkipm kla pa plalng pipa, wa kil wa la, “Ti wet kipm atning kuina ur a melnum paipm a rpma eng atning yangkipm pa la pa.
LUK 18:7 Ti Maur Wailen ake antiwe mpa itning tu melnum a kil takweiyen a tu akg lanakel miningkranen la kil ngklinsen. Ti kil mpa nungkulkg lantok rpmi wang watin? Kalpis.
LUK 18:8 Kupm lanakepm la, kil mpa itning kalkuten a tu pa ngklinsen itatu pa. Pake Warim Kipman a Melnum ikga nar kanokg ti pa ikga kil nsil tu melnum tiur a ukipma kil pa aki, kalpis?”
LUK 18:9 Atom Sisas kil la yangkipm kla kil kai eng tu melnum a akwonalmpen la tu alntu pa ute wor pake, arku tu tiur ai la paipm pa.
LUK 18:10 “Atom melnum wekg pa kaino la oklala naki Maur Wailen kaino yalming a Maur Wailen pa. Melnum ur pa melnum a arpmen yangkipm yiprokgen a Moses, a ur pa melnum a atn eng awi marpmel tu.
LUK 18:11 Melnum a arpmen yangkipm yiprokgen a Moses pa kai itna atom, kil oklala naki Maur Wailen ak nikgwalpm pa la, 'Maur Wailen, kupm alkeitn wor, eng ntei, kupm ake melnum a ak ikgwam kweikwei, a antokg kweikwei a paipm, a angkli arkul kolen tu tiur pa. Wa kupm alkeitn wor eng kupm ti ake wa melnum kolen melnum a awi marpmel tu ingkai itna pa.
LUK 18:12 Akangklei wang wekg a wang wampwomis wampwompwekg pa kupm kalpis okipma eng uk wang kitn, a kweikwei wrongkwail a kupm awi pa, kupm uk tiwel wampwam kai kitn.'
LUK 18:13 Pake melnum a awi marpmel tu pa, kil itna watinet ketnketn omtompok ikgkinar kanokg pa, atom kil wam karkur nol alkil pa a kil la, 'Woi, Maur Wailen, kupm ti melnum a antokg paipmpaipm, ti kitn reinsopm pen!'
LUK 18:14 Tuwekg rak yaper kai wan anong alntuwekgen pa. Kupm lanakepm la, melnum a awi marpmel tu pa kil pa palng ute wor itna wulmpa a Maur Wailen pake, a melnum a arpmen yangkipm yiprokgen a Moses pa kalpis. Eng ntei, melnum a ngkat nang a kil alkil pa, ikga Maur Wailen kil rku nang a kil pa kinar kanokg. A melnum a kil arku nang a kil alkil pa, ikga Maur Wailen kil ngkit nang a kil pa iye kaino kwa.”
LUK 18:15 Atom tu tiur pa tu aye warim waseksek alntu pa kai la mpa Sisas kil elng wam pa elewen. Tu watnom alkil pa tu ari pa, atom tu aklewen.
LUK 18:16 Ari Sisas akwe tu warim pa kulntel atom kil la, “Kipm elng tu warim pa kulntopm o! Ampur kipm angkengken. Maur Wailen am itna wailen ikgalen nol nikgwalpm a tu melnum a kolen tu warim yekyek tike.
LUK 18:17 Ti kipm itning! Mla ur a ake elng Maur Wailen pa itna wailen ikgalen nol nikgwalpm akilen pa kol tu warim pa, kil ake melnum wor a Maur Wailen pa.”
LUK 18:18 Melnum wailen ur pa asen Sisas pa la, “Melnum wor a aroaro wonel tu, mpa kupm ntokg kolai eng mpa kupm uwi yaprekg watin eng rpmi wor yongkyong pa?”
LUK 18:19 Ari wa Sisas lanakel la, “Kitn la kupm ti melnum wor kolai? Ake melnum ur wor kol Maur Wailen kil alkil ai.
LUK 18:20 Ti kitn ariwe yangkipm titnongket a Maur Wailen pa la kolkil la, 'Kitn mpa orngwatneikgen mansan, ampur kitn angkli arkul kin ur, ampur kitn alm melnum amo, ampur kitn ak ikgwam, ampur kitn kansil lakati melnum ur.'”
LUK 18:21 Ari wa melnum pa wa akalmpe la, “Ti yangkipm titnongket pa kupm am pikekg katnun ak wang a kupm a warimpen ai kul pake.”
LUK 18:22 Sisas kil atning pa atom kil la, “Kolpa kupm atning kitn ak wor pake, wa a kol kweiur wris kil: kitn ik kweikwei wrongkwail a kitn pa ik uwi marpm atom mpreing uk tu melnum a rpma tukwok pa, eng ikga kitn wa rpmi ntiwe kaino anong wor ai, a wa kitn kul kutnuntopm!”
LUK 18:23 Kil atning kolpa pa, kil ipma kalkut paipm, eng ntei, kil pa antiwe kweikwei watipmen paipm ai.
LUK 18:24 Sisas kil ari pa atom kil la, “Melnum a antiwe kweikwei watipmen pa, wonet eng kil elng Maur Wailen kawor itna wailen ikgalen nol nikgwalpm akilen pa.
LUK 18:25 Kol ling pa la or tawong a ikyom a ak angkut apm pa kawor pa, ake aken kwap kol melnum a antiwe kweikwei watipmen la elng Maur Wailen pa kawor itni wailen ikglen nol nikgwalpm akilen pa, pa aken kwap paipm.”
LUK 18:26 Tu a atning a kil la kolpa pa, tu asentel la, “Woi, ti mla a i antiwe mpa Maur Wailen ik uwiyel iye kai wor pa?”
LUK 18:27 Ari wa Sisas akalmpenten la, “Kuina ur melnum ake antiwe antokg pa, Maur Wailen antiwe antokg.”
LUK 18:28 Ari Pita akalmpentel la, “Ti men ti ntei? Men atnuurng wan anong kweikwei almenen itna wai, a men am kul katnun kitn tike.”
LUK 18:29 Atom wa Sisas lanaken la, “Kupm lanakepm aklale wrisen la kol melnum ur kil elng Maur Wailen itni wailen ikglen nol nikgwalpm akilen atom kil utnuurng watnom alkil aki mansan a wusok wusok a wail wail alkil a wan anong alkil pa ti,
LUK 18:30 ikga Maur Wailen kil lkel melnum a kweikwei pa wailet paipm ikilmpentel ngko angen, ik wang ti, wa ikga ik wang kutnukg pa kil ikga rpmi wor yongkyong kaino anong wor.”
LUK 18:31 Atom Sisas kil awi tu watnom wampwam yikakwekg alkil a kil aroaro wonel pa aye kai itna kai laikge ur pa atom kil lanaken la, “Atom kipm itning! Mentepm kai eng ikga kaino Serusalem pake. Kuina ur a pikekg tu melnum okwripm nira la Warim Kipman a Melnum pa, pa ikga palng iklale.
LUK 18:32 Ikg a tu uk kil kai wam a tu melnum a ake Suta, atom ikga tu ik nokgelel inelel melkg, a ungkwa wlikgelel.
LUK 18:33 Wa ikga tu ik ampei ntrawel a orel imo rmpi wang wraur pa kai plalng pa, wa kil wa wrekg.”
LUK 18:34 Ari tu watnom alkil pa tu ake wa ariwe yangkipm pa. Yangkipm yiprokgen pa itna ampen eng ake mpa tu riwe kuina ur a kil la pa.
LUK 18:35 Sisas nar wreren Seriko pa, kil ari melnum wulmpa tilmpisen ur pa rpma ya yamping pa akwen tu eng marpm pa rpma.
LUK 18:36 Kil atning wrong a oklala nurkgatne wli kul kai, atom kil asen la, “Kuina ti?”
LUK 18:37 Ari wa tu lanakel la, “Men katnun Sisas, melnum a Nasaret pake. Ti tatu ti!”
LUK 18:38 Atom kil kirkar akwe la, “Sisas! Yipetatnong a Tepit! Kitn reinsopm pen!”
LUK 18:39 Ari tu melnum a ep pa kilkampel a aklewel la kil tatar rpmi. Ari wa kil akwe yikakatnen paipm ai la, “Yipetatnong a Tepit! Kitn reinsopm pen!”
LUK 18:40 Atom Sisas kil kai itna a lanaki tu la wampirpmewel iye kul. Atom tu wamparpmewel aye kul wrerentel atom Sisas asentel la,
LUK 18:41 “Kitn la kupm ntokgteitn na?” Ari wa kil akalmpe la, “Wailen, kupm la kitn ntokg wulmpa a kupm a tilmpis ti wor ri kweikwei.”
LUK 18:42 Atom Sisas lanakel la, “Wulmpa kitn pa kitnangku ri kweikwei o! Kitn ukipma titnongket kolpa atom, wulmpa kitn am palng wor ise.”
LUK 18:43 Kil la kolpa, wulmpa kil pa wor penterng kolti, kil wa ari kweikwei pa, atom kil ngkat nang a Maur Wailen pa katnun Sisas pa kolpa kai. Tu wrongkwail tu ari pa, tu ngkat nang a Maur Wailen.
LUK 19:1 Sisas kil kai palng kai anong Seriko pa kil angkom or anong pa kai.
LUK 19:2 Melnum ur a itna ep eng tu melnum a awi marpmel tu pa rpma kai anong pa, nang a kil pa Sakius, kil pa antiwe kweikwei watipmen.
LUK 19:3 Kil pa melnum tukwok kolpa atom, kil ntan ampen nalulng akor kai pa kai pa la mpa kil ri Sisas pa ari kalpis, tu wrongkwailet paipm ak ampri kolpa atom kil ake antiwe a ariwel.
LUK 19:4 Atom kil pirng ep kai nowen yo kampuk mingen ur a itna ya yamping pa la mpa eli iri Sisas a angkom a ya pa kul pa.
LUK 19:5 Atom Sisas angkom or ya pa kul pa, kil ikg kaino ari Sakius a ela kaino yo kwa pa, atom kil akwe la, “Sakius, itatu nar o! Kupm mpa ntiweitn rpmi kai wan akitnen ik wang am tike.”
LUK 19:6 Kil atning kolpa, a kil pa atopen paipm kolti, kil raras atatu nar kanokg ti awi Sisas pa am aye kai wan alkil ise.
LUK 19:7 Tu wrongkwailet pa tu ari pa, atom tu ipma paipm atom tu la, “Melnum pa wa kil kai kawor wan a melnum a antokg paipm a kolpa eng ntei!”
LUK 19:8 Tu kawor rka wan pa Sakius kil wrekg lanaki Wailen pa la, “Wailen, kitn itning! Mpa kupm wako kweikwei wrongkwail akupmen ti, atom mpreing wompel pa uk tu melnum a rpma tukwok. A kol pikekg kupm kansil awi marpmel tu pa klangkil marpm a tu la mpa kupm uwi pa, pa mpa kupm ikilmpenten nti wikgwikg.”
LUK 19:9 Atom Sisas lanakel la, “Tu a rka wan ti pa, Maur Wailen am weti awiyen eng alkilen ise. Ti melnum ti pa, am yaru marpmeng a Apraam pa yat pake.
LUK 19:10 Ti Warim Kipman a Melnum am nar eng akor melnum a am pake, atom awiyen eng alkilen.”
LUK 19:11 Tu atning yangkipm a Sisas la itna pa, atom tu akwonalmpen watipmen la kil mpa kai kaino palng Serusalem pa pipa, Maur Wailen kil mpa palng ngko wunong itni wailen ikgilen kweikwei wrongkwail kai pa ur pake. Eng ntei, tu anti Sisas pa am kai wreren Serusalem pa ise. Kolpa atom kil wa lanaken yangkipm kla ur pa la ik lok nol nikgwalpm a tu akwonalmpen watipmen pa kai wris.
LUK 19:12 Atom kil la kolpa la, “Melnum wailen ur pa kil la kai anong kanokg ur a ela kai watin ai eng la melnum tukgunakg a itna ep pa ngkitel kolen melnum tukgunakg, plalng pa, ikga wa kil wa yaper wli atom ikglen anong kanokg alkilen ti.
LUK 19:13 Atom kil akwe tu melnum wampwam akwapel alkil pa wli, atom kil alken marpm wail wampwam aknirake tu pa atom kil lanaken la, 'Kipm ik ik kwap ur eng ik uwi marpm warim pa, kolpa kaingkai wa kupm wa yaper wli.' Kil lanaken kolpa plalng pa, kil am wrekg kai ise.
LUK 19:14 Ari tu anong wris alkil pa tu karkentel, atom tu ukwa melnum yangkipm kuin ur pa kai katnuntel eng mpa laniki tu la, 'Men ti ake wasrongen la mpa kil pa itni tukgunakg eng men pa.'
LUK 19:15 Melnum wailen pa palng melnum tukgunakg plalng pa, wa kil yaper wli anong. Kolti kil akwen tu melnum akwapel alkil a pikekg kil alken marpm la tu ik ik kwap pa, la tu iye marpm a pikekg tu ak ak kwap pa atom ak awi marpm warim pa iye wli.
LUK 19:16 Atom melnum ur pa ep kul la, 'Wailen, marpm wail wris a pikekg kitn alkopm pa, kupm ak ak kwap, atom wa kupm akawi marpm wail wampwam aken.'
LUK 19:17 Atom wa kil la, 'Wor wrisen, kitn pa melnum akwapel wor! Kol pikekg kitn nungkulkg wor ikgalen kweikwei waseksek pa ariworwor, ti mpa kupm elng kitn itni wailen ikglen anong wampwam.'
LUK 19:18 Wa melnum ur wa wli wa la, 'Wailen, marpm wail wekg a pikekg kitn alkopm pa, kupm ak ak kwap atom kupm akawi marpm wekg aken.'
LUK 19:19 Ari wa kil lanakel la, 'Ikga kupm elng kitn itni wailen ikglen anong wampwomis.'
LUK 19:20 Wa ur pa kul lanakel la, 'Wailen, kitn ri, marpm kitn ti! Pikekg kupm aye kai ak apm yaponteitn lamteitn ariworwor rmpa.
LUK 19:21 Kol kitn pa melnum kalnten a awi num angklin kweikwei a melnum manet ai, a kai akor kweikwei kai wring a melnum manet, kolpa atom kupm ngkark.'
LUK 19:22 Ari kil lanakel la, 'Kitn pa melnum akwapel lpmaaken paipm! Ti mpa kupm ikilmpe kwap paipm a pikekg kitn ak kolpa kitila ok a kitn alkitn la ti la kitn pikekg akwap paipm pa. Kol kitn riwe la kupm ti melnum paipm a awi num angklin kweikwei a melnum manet ai, a kupm melnum a wa kai akor kweikwei kai wring a kupm alkupm ti ake alin pa.
LUK 19:23 Kol a kitn elng marpm pa rpmi wan marpm pa, eng mpa ik uwintopm marpm warim pa, eng mpa kupm kul pa, mpa kupm uwi numpokgen marpm man pa.'
LUK 19:24 Atom kil lanaki tu wrong a itna pa la, 'Kipm uwi marpm pa tukwleikgentel atom, kipm iye kai uk melnum a pikekg kil awi marpm wail wampwam pa.'
LUK 19:25 Ari wa tu la, 'Wailen, kil am pikekg awi marpm wail wampwam ise!'
LUK 19:26 Ari wa kil akalmpenten la, 'Melnum a kil antiwe kweikwei pa, mpa wa Maur Wailen kil wa lkel ngko angen. Pake melnum ur kil rpma tukwok pa, mpa Maur Wailen kil ungkwan kweiur waiketn a kil antiwe pa kai tukwleikgentel.
LUK 19:27 Wa tu melnum a pikekg awi wrongmanto lantopm la ampake kupm ti itni wailen ikglenten pa, uwiyen iye wli, atom ilmpen imo itni wulmpa akupmen ti!'”
LUK 19:28 Sisas kil la kolpa plalng pa, kil angkom kai kaino la kawor anong wail Serusalem.
LUK 19:29 Kil kaino wreren anong Petpake a anong Petani, a ela krong a tu namput la Olip pa, a kai kaino wreren Serusalem pa. Kil ukwa watnom wekg alkil pa ep.
LUK 19:30 Atom kil lanaken la, “Kol kipmekg ep kaino anong ingkaino ela kaino ai pa, mpa kipmekg ri nimpa war nepm kuinen warimpen ur a ake pikekg ur arpme ep pa, tu angkuten itna. Pipa, kipmekg inelkgen atom iye nar.
LUK 19:31 Kol melnum ur isentepm la, 'Kipmekg la inelkgen eng ik ntokg na?' Pipa kipmekg lanikel la, 'Melnum Wailen kil la ik ik kwap ur alkil.'”
LUK 19:32 Atom tuwekg kaino ari kweikwei pa am itna katila ok a wet Sisas la pake.
LUK 19:33 Atom tuwekg anelkgen ari, melnum yan a nimpa nepm kuinen plampiwen pa asenten la, “Kipmekg la inelkgen eng ik ntokg na?”
LUK 19:34 Ari tuwekg akalmpe la, “Melnum Wailen kil la ik ik kwap ur alkil.”
LUK 19:35 Kolti, tuwekg aye nar eng Sisas. Atom tuwekg awi apm alntuwekgen ti ukwulampen plalng pipa, tuwekg angklin Sisas pa kaino arpme.
LUK 19:36 Atom Sisas kil arpme nimpa nepm kuinen plampiwen pa kaino pa, tu wrong kin kipman wailet apa, anel awi apm alntu pa ukwulampen ya pa.
LUK 19:37 Atom wang a kil ep ep kolpa kaino palng ya a angkaino wrik nangen Olip pa kulnar kinar eng kaino Serusalem pa, tu wrongkwail a katnuntel pa anel atop arkol ngkat nang a Maur Wailen yikakatnen eng kweikwei titnongket wail wail a pikekg tu ari a kil antokg pa.
LUK 19:38 Tu atop arkol la kolkil la, “Maur Wailen kil ukwa melnum tukgunakg ti nar, ti mentepm itopentel. Kil alko ipma wor pa itna eng mentepm, ti mentepm ngkit nang a Maur Wailen a itna wailen ikgalen kweikwei wrongkwail. Maur Wailen, kitn plan ipma wor ngklin melnum kil, kil melnum tukgunakg a kitn ukwa nar ti. Ti mentepm ngkit nang a Maur Wailen a rpma kaino kwa wai, kil ipma kukula wor eng mentepm melnum ti.”
LUK 19:39 Ari tu melnum a arpmen yangkipm yiprokgen a Moses tiur pa lanaki Sisas pa la, “Melnum a kaling plan tu, kol a kitn laniki tu watnom alkitn ti eng tu tatar itni.”
LUK 19:40 Ari wa Sisas lanaken la, “Kol tu pa tatar itni pa, kol tu wes a rpma tatu ti pa mpa wa ngkit nang a Maur Wailen kol tu a atop itna tike.”
LUK 19:41 Sisas kil kaino wreren ari anong wail Serusalem pa, kil akg arein paipm,
LUK 19:42 a ak ok namputen la, “Arein kitn Serusalem, ak wang ti kitn am kol am riwe la kuina ur a ntokg kitn uwi ipma kupuket a rpma meen wor pa ise, ari wa kitn wa uk yirokg, kolpa ti am kai lamteitn ise.
LUK 19:43 Wang paipm ur ikga palngteitn pa, tu wrongmanto ikga wli kipringenteitn, iken yipmingki, a mprinteitn ya yela.
LUK 19:44 A ikga tu tikale yipmingki pa kawor tikale wan anong pa ilm oren tu wrong kin kipman pa kai plalng. Ikgake wes ur a kipm ak ale wan pa ur lile tita itni pa, kalpis, ikga tu tikale ngkli plalng. Eng ntei, wang wor akitnen pikekg Maur Wailen nar la ngklinseitn pa, kitn karken uk yirokg.”
LUK 19:45 Atom Sisas kil kai kawor yipmingki wunen a kapringen yalming a Maur Wailen pa, atom kil ungkwan tu melnum a elng kweikwei alntu rpma eng ak awi marpm pa.
LUK 19:46 Atom kil lanaken la, “Ela wrkapm a Maur Wailen pa la kolkil, 'Wan akupmen pa itna eng kipm kawor oklala naki naki kupm.' Maur Wailen pa am la kolpake, ari wa kipm elng wan pa itna la tu melnum ikgwampet pa or am arke tike.”
LUK 19:47 Atom am Sisas kil kawor yipmingki wunen a yalming pa kaling plan tu akangklei wang kolpa kai pake. Ari tu melnum tukgunakgen a tu ipma krakgen a ak ak kwap eng al wor uk Maur Wailen pa, wa tu melnum a aroaro wonel tu yangkipm a Moses pa, wa tu melnum wailen wailen a ikgalen men wrong kin kipman pa tu akor la ilmpel imo.
LUK 19:48 Pake tu wrong kin kipman pa wasrongen paipm, la tu am a rki pa rki pake, itning yangkipm a kil la pake, kolpa atom tu la mpa ikor ya or kolai, eng mpa tu ilm kil pa imo pa.
LUK 20:1 Wang wris ur pa, Sisas kil angkli yangkipm wor a Maur Wailen, a kaling plan tu itna kawor yipmingki wunen a yalming a Maur Wailen pa itna, ari tu melnum tukgunakgen a tu ipma krakgen a ak ak kwap eng al wor uk Maur Wailen a tu melnum a aroaro wonel tu yangkipm a Moses, a tu melnum wail wail pa anel wli itna.
LUK 20:2 Atom tu lanakel la, “Kitn pa kitn melnum titnongket pake! Ti kitn laniko ri la mla alkeitn ong talpen pa, atom kitn ak ak kwap pa?”
LUK 20:3 Ari wa Sisas akalmpenten la, “Ti itni eng kupm isentepm akasen ur kil: ti wa kipm lanikopm ri la,
LUK 20:4 ti ong talpen pikekg Son a kaluk tu pa, kil awi kai Maur Wailen pa aki, kai tu melnum ti?”
LUK 20:5 Tu atning a kil asen kolpa, atom tu takwem rka ak tu alntu pa, atom tu akor la la, “Mpa mentepm la kolai? Ti kol mentepm la, pa am Maur Wailen pa ak ong pa atnewel pake, ti mpa wa kil wa la kolkil la, 'Kolpa ti pikekg kol a kipm itning kutnun yangkipm a pikekg kil la pa.'
LUK 20:6 Wa kol wa mentepm lala kolkil la, 'Pa am tu melnum ti ak ong atnewel pake', ti mpa wa tu wrongkwail ti ik wes ti oro imo, eng ntei, tu pa ukipma titnongket la, Son pa kil melnum okwripm a Maur Wailen.”
LUK 20:7 Tu akor la kai ari mpa wa tu ikilmpentel ik yangkipm a i, eng ntei, ya wrongkwail am kil ampri plalng ise. Atom tu kai kansilel kolti la, “Men akwekgel la mla a i ak ong atnewel.”
LUK 20:8 Atom wa Sisas lanaken la, “Am kolpa yat pake, kupm ake mpa wa lanikepm la, mla a i ak ong atnewopm, atom kupm ak ak kwap kil.”
LUK 20:9 Atom Sisas la yangkipm kla ur pa naki tu wrong kin kipman pa la, “Melnum ur pa, kil antokg wring ampei wain ur, atom kil awi melnum tiur ai wli ikgalen akentel wring pa kolpa itna, a kil wrekg kai anong ya watinet ur ai rpma wang watinet.
LUK 20:10 Kil rpma a a, ampei ok kil pa am angko ise. Atom kil ukwa tu melnum akwapel ur alkil pa kai, la mpa tu lkel wain ok alkilen a aknamputel pa iyentel kai. Ari tu melnum a ikgalen wring pa orel kolti, ungkwantel kil angkompwam kolti yaper kai.
LUK 20:11 Kolpa atom wa melnum yan a wring pa, wa ukwa melnum akwapel ur pa wa kai, ari am wa tu orel, antokgtel paipm kolti alkel numpaipm kolti, wa ukwawel wampwampwris wa yaper kai.
LUK 20:12 Kolpa atom wa kil ukwa ur pa wa kai, ari am wa tu orel yongwalmpopm paipm kolti, ngkatel angkli kawor en ai.
LUK 20:13 Atom melnum yan yiprokg a wring pa la, 'Mpa kupm ntokg kolai? Ti pati mpa kupm ukwa warim kipman wris nangket alkupm a kupm plan ipma wor wasrongen ti kai pati, mpa tu itningkel ur pake.' Kil akwonalmpen kolpa plalng pa, kil ukwa warim kipman alkil pa kai.
LUK 20:14 Ari tu melnum a ikgalen wring pa tu itna ari a kil kul pa, atom anel naki tita la, 'Pa warim kipman ikga uwi num ngklin kweikwei a yan alkil am pake. Ti tepm ilmpel imo wo, eng ikga tepm uwi kweikwei wrongkwail akilen pa!'
LUK 20:15 Atom tu kai arkulel ngkat angkliwel kawor wring en ai kolti, tu orel amo.” Sisas la yangkipm kla pa kai plalng pa kil asen tu a atning rka pa la, “Atom melnum yan a wring pa mpa ntokg kolai eng tu melnum a ikgalen wring pa?
LUK 20:16 Ikga kil wli ilm tu melnum pa imo, a uk wring ampei wain pa kai tu ur ai.” Tu wrongkwail atning pa tu la, “Kolpa ikga kalpis.”
LUK 20:17 Atom Sisas ikatnenten a kil la, “Ti antokg kolai yangkipm kil a ela kai wrkapm a Maur Wailen pa wa la kolkil la, 'Ong ur a tu melnum a ale wan pa tu ari la la paipm pa, tu ungkwan pa, am ong kimpowen wor wrisen a akale wan am pake?'
LUK 20:18 Atom melnum ur a wutat angko ela ong kimpowen wor kil pa, pa mpa ngket numpwam alkil pa kai paipm. Ari kol ong pa or kai or melnum ur pa, kil pa mpa kai ningnapis waiketnketn kolti.”
LUK 20:19 Atom tu melnum a aroaro wonel tu yangkipm a Moses, a tu melnum tukgunakgen a tu ipma krakgen a ak ak kwap eng al wor uk Maur Wailen pa tu atning yangkipm kla a wuten Sisas la kolpa ari, almpen ipma la yangkipm pa am akla tu pake, kolpa atom tu la rkul yipowel ik wang ketn pa, pake tu ari tu wrong wailet a itna pa, atom tu ngkark eng arkulel.
LUK 20:20 Atom tu melnum a aroaro wonel tu yangkipm a Moses, a tu melnum tukgunakgen a tu ipma krakgen pa tu ukwa melnum tiur pa kai ikgla Sisas pa a antiwel atn akipaarel. A tu la alm ipmawel Sisas pa la mpa kil la yangkipm ur kai ar pipa, mpa tu kai laniki tu melnum mringman pa, atom tu uwiyel yekai itni yangkipm kai tu melnum tukgunakg a tu Rom pa?
LUK 20:21 Atom tu aknukwar Sisas pa la, “Melnum a kaling plan tu, men ariwe la kuina ur a kitn pa kaling plan pa ute pake. Men ariwe la, kitn ake ari melnum wor aki paipm pa, kitn laron yangkipm aklale a Maur Wailen ti ak lanaken kolti.
LUK 20:22 Ti mentepm uk marpm Kaisarus, melnum tukgunakg a Rom a awi marpmel mentepm pa, ti kitn ikwonilmpen ri la pa wor aki pa paipm?”
LUK 20:23 Pake Sisas pa ariwe nikgwalpm ampen paipm a tu ak kol pa, atom kil lanaken la,
LUK 20:24 “Ti kipm plantopm marpm pa ri, la ikgokg a nang a ela marpm pa a mla?” Ari tu akalmpentel la, “Am a Kaisarus, melnum tukgunakg a Rom pake.”
LUK 20:25 Atom Sisas akalmpe la, “Kol melnum tukgunakg a Rom kil awi marpmel mentepm ti pa, pa marpm alkilen, mpa mentepm uk kai kil pake. La kweikwei a Maur Wailen pa, kipm mpa uk kai Maur Wailen pake.”
LUK 20:26 Tu atning a kil akalmpenten kolpa, atom tu wrekg paipm yapo ok alntu pa tatar itna kolti. Sisas ake la yangkipm ur kai ar kai wulmpa a tu wrong kin kipman pa, eng mpa tu a alm ipmawel kil pa laniki mring man pa, kalpis.
LUK 20:27 Atom tu Satyusi tiur pa, tu kul ari Sisas. Tu Satyusi pa tu melnum a akwonalmpen la, melnum a amo pa ake antiwe ikga wrekg.
LUK 20:28 Atom tu aknukwarel la, “Melnum a kaling plan tu, pikekg Moses nako yangkipm titnongket kol kil la, kol melnum ur kil awi kin ur, ari ake wa kil angket warim ur, kil wa amo atnurng kin pa, mpa wa paipmen alkil pa wa uwi wampuk iye wa ngket warim ur eng ngklin wrik a wailen alkil pa.
LUK 20:29 Kol wusokwail wampwomis wampwompwekg ur pa rpma, atom wailen pa awi kin pa aye, ari ake kil angket warim ur kil amo atnuurng.
LUK 20:30 Atom wa ur a wa kai arkekg kil pa wa awi wampuk.
LUK 20:31 Ari kalpis, am wa kil amo atnuurng wa kai, a ake wa kil angket warim ur. Tu am kolpa kimeket pake, tu awi kin pa aye ari ake ur angket warim ur, am tu amo atnuurngkel kolpake.
LUK 20:32 Atom wa kin pa rpma kolpa kaingkai, kil wa amo kai katnunten.
LUK 20:33 Kitn pa la tu melnum a amo kaingkai pa la ikga wrekg wrekg pake? Ti tu wrekg wrekg pa, pa kin pa a pikekg awi kipman wampwomis wampwompwekg pa, pa ikga kil rpmi eng kipman mla?”
LUK 20:34 Ari Sisas akalmpe la, “Tu kin kipman ak wang ti pa tu awi tita pake.
LUK 20:35 Ari tu kin a kipman a Maur Wailen awi wor lawen pa, tu ikga wrekg ik wang kutnukg pa, tu akentiwe ikga uwi tita, kalpis.
LUK 20:36 Atnen a tu ikgake imo nti ur, eng tu pa kol tu maur akwapel a Maur Wailen. Ti tu pikekg amo kaingkai atom wa wrekg wrekg pa, tu pa warim a Maur Wailen.
LUK 20:37 Wa Moses planto la tu a pikekg amo kaingkai pa, tu ake amo kaingkai plalng, kalpis. Pa tu amo kaingkai ti rka pa. Kipm ariwe yangkipm a pikekg Moses la yo wasek a pikekg wakg naruk atne pake, ake wakg al. Atom kil akwe la, 'Wailen, kitn Maur Wailen a Apraam, kitn Maur Wailen a Aisak, a Sekop.'
LUK 20:38 Ti pa planto la Maur Wailen pa kil Maur Wailen a tu melnum a amo kaingkai rpma pa yat. Eng ntei, Maur Wailen ari tu a amo kaingkai pa, wa mentepm a rka ti pa, la mentepm rka yatenen.”
LUK 20:39 Atom tu melnum a aroaro wonel tu yangkipm a Moses pa la, “Melnum a kaling plan tu! Pa kitn akalmpe wor pa.”
LUK 20:40 Atom tu ngkark kolpa atom, ake wa tu asentel ur.
LUK 20:41 Atom Sisas lanaki tu melnum a arpmen yangkipm yiprokgen a Moses pa la, “Kipm akwonalmpen kolai, la Krais, melnum a Maur Wailen ukwa nar la ik uwi kipm wrong kin kipman pa, la kil pa walpopm ur a angket ale a Tepit ti kul tike?
LUK 20:42 Kol pikekg Tepit kil alkil la ela kai wrkapm Nangnang pa la, 'Maur Wailen kil lanaki Krais Wailen akupm pa kolkil la, “Kitn rpmi wam wi akupmen ti,
LUK 20:43 rpmi i, kupm or tu wrongmanto akitnen pa yikak rkganti mengkel itni orngwatneikgen kitn pa.”'
LUK 20:44 Tepit akwe kil pa la Wailen, ti wa antokg kolai atom wa tu akwe kil pa la walpopm a angket ale angkai Tepit pa kul pake?”
LUK 20:45 Tu ak wail atning rka pa Sisas lanaki tu watnom a kil aroaro wonel pa la,
LUK 20:46 “Kipm rki riwe eng tu melnum a aroaro wonel tu yangkipm a Moses pa. Eng ntei, tu pa nowe apm wail wail ti akalm nepmel, tu alntu ti la mpa tu riwen la tu melnum wailen wailen, a la tu wrongkwail yangkipmenten itni tutu akapm. Wa tu kawor wan a atning atning yangkipm a Maur Wailen atnewe pa, tu wasrongen la uwi wrik wor wor pa rpmi pake. Wa ak wang a antokg okipma wail al pa, tu pa la tu ukwewen eng tu pa ngkiten ep pake.
LUK 20:47 Tu kansil awi kweikwei wrongkwail a tu kin karpikg a kipman amo atnuurng pa, a kansil ak ipaar oklala naki Maur Wailen pa itna watin watin paipm, eng mpa tu riwen la tu melnum akwapel wor a Maur Wailen. Kolpa ti ikga ik wang a tu itni yangkipm pa, tu ikga uwi kalkuten wail manten paipm ikilmpe paipm a tu antokg pa.”
LUK 21:1 Wang wris ur pa Sisas kil itna yipmingki wunen a yalming a Maur Wailen pa itna ari tu melnum a antiwe kweikwei pa tu aye kweikwei pa kai alupm kinar yotimpal eng uk Maur Wailen.
LUK 21:2 Atom kil ari kin karpikg yek ur a rpma tukwok pa kil uk marpm watet ok wekg pa.
LUK 21:3 Atom wa kil la, “Kupm lanakepm aklale wrisen la, kin karpikg yek a rpma tukwok kil pa, kil uk wail manten paipm angen tu wrongkwail.
LUK 21:4 Kol tu wrongkwail a antiwe kweikwei pa tu uk pake, ake tu uk plalng, kweikwei wailet tiur alntu pa rmpa. Pake kin karpikg yek a rpma tukwok pa kil uk kimeket kolti kuina ur wasek akilen pa.”
LUK 21:5 Atom tu tiur pa, tu rka akor la yalming a Maur Wailen pa la wan pa ari wor tuwa, tu ale ak wes arimomo, wa tu nakure ak kweikwei wor wor a tu uk Maur Wailen pa. Ari Sisas lanaken la,
LUK 21:6 ”Kweikwei wrongkwail a kipm ari ti pa, wang ur ikga palng pa, ikgake wes ur a tu ak ale wan ti pa ur lile tita itni wrik alkil pa, kalpis, ikga tu tikale ngkli kimeket.”
LUK 21:7 Atom tu wrong kin kipman asen Sisas la, “Melnum a kaling plan tu, kweikwei pa ikga wangkarke palng? Aki, ikga kuina a i palng eng ik lawen wang pa palng pa?”
LUK 21:8 Ari wa Sisas akalmpenten la, “Kipm rki riwe, tu melnum kansil ikga wli kinsilepm eng lokepm iye kai ar pa. Eng ntei, tu watipmen ikga wli la kolkil la, 'Am kupm melnum a kipm nungkwangentopm ti am tike!' A wa, 'Wang a kipm lala pa, am palng tike!' Pake ampur kipm anti katnun tu pa.
LUK 21:9 Kol kipm itning la wrong rapon aki, tu melnum palng melkget paipm pa, ampur kipm ngkark, pa kweikwei kolpa ikgam palng pake, wang umpuwen pa a pa.”
LUK 21:10 Atom wa kil wa la, “Tu anong kanokg ur ikga rapon nti tu anong kanokg ur, a wrong a mring tukgunakg ompur ikga rapon nti wrong a mring tukgunakg ompur.
LUK 21:11 Ti kol yelm wail wail ikga no, wang nikg, a numpet wail wail ikga palng tutu anong kanokg tiur, a ikga kipm ri kweikwei tiur a palng kaino kitnong ti, a wa kweikwei paipm paipm tiur a ikga ik ntokg kipm eng kipm ngkirk pa, ikga palng.
LUK 21:12 Pake ep pa ikga tu rkul yipowepm a ntokgtepm paipm, a ikga tu iyewepm kai itni yangkipm kawor wan a atning atning yangkipm a Maur Wailen atnewe pa, atom iyewepm kawor rpmi wan tipmning. A ikga tu uwiyepm iye kai itni wulmpa a tu melnum tukgunakg a tu mring man wail wail kolpa atnen a kipm ukipma kupm ti.
LUK 21:13 Ik wang pa, ikga wang wor akipm eng laron kipm alkipm la kipm ukipma kupm.
LUK 21:14 Ti kipm lupmen yangkipm a kupm lanakepm kil: ampur kipm akwonalmpen watipmen la ikga kipm la yangkipm kolai ik wang a kipm itni yangkipm pa.
LUK 21:15 Eng ntei, kupm ikga ngklinsepm oklala wor wor eng kipm oklala ik wang pa. Tu wrong manto akipmen pa ikga yangkipm kalpisen a ikga ikilmpe oklala akipmen pa.
LUK 21:16 Ti kipm ikga tu mansan, a tu wail wail wusok wusok, a tu walmpopm wris, a tu yiprokgen alkipm pa uwiyepm iye kai itni yangkipm, a tiur akipmen pa ikga tu orepm imo.
LUK 21:17 Tu wrongkwail ikga lkepm ipma paipm atnen a kipm ukipma kupm ti.
LUK 21:18 Pake kol tukgunakg walk wris ur akipmen pa, ikgake unur.
LUK 21:19 Ti kipm itni titnongket, pa ikga kipm rpmi wor yongkyong.”
LUK 21:20 Wa Sisas kil wa la kolkil la, “Ti kol kipm ri tu melnum a almpwrong pa wli kipringen Serusalem pa, pa kipm riwe la, Serusalem wreren eng a kai paipm pake.
LUK 21:21 Wang pa palng pa, kipm melnum a Sutia ti pa, kipm ngkirk kaino am kaino tipmining ai, wa kipm a rpma Serusalem kil pa, kipm wrekg ngkirk tukuleikgen, wa kipm a rka tatu wreren anong wail ti pa, ampur kipm or kil, kipm ngkirk i pa kai o!
LUK 21:22 Eng ntei, pa wang paipm wrisen a Maur Wailen ikga ikilmpe paipmpaipm a tu wrong kin kipman antokg pa kai kolpa katila kolen yangkipm wrongkwail a nira ela wrkapm ti.
LUK 21:23 Ti arein eng tu kin a itna, wa tu mantin a warim rka ma pa ikga ik wang pa! Kalkuten wail ikga palng itni kanokg ti, a ipma wakget a Maur Wailen itna la ikga ntokg paipm tu wrong kin kipman a Suta a talpulng yangkipm pa.
LUK 21:24 Tu tiur a rka Serusalem ti pa, pa ikga tu a ake a Suta pa wli ik kosakal ilmpen imo, a ikga tu uwiyen plalng iye kai rak yela tutu palpa ikwap orngwatneikgen tu anong kanokg wrongkwail. A wa tu alntu a ake Suta ti uwi wrik pa rki ikgilen Serusalem ti ik wasrongen alntu, kolpa kaingkai ngko wang ur a Maur Wailen la tu ikgilen kai elngen pake.”
LUK 21:25 Wa Sisas kil wa la kolkil la, “Ik wang pa, ikga kipm ri kweikwei a palng kaino kitnong pa kai takgni ti, kainil, a kurmeim pa. A itna kanokg a ti pa, tu wrongkwail ikga itning kilko a unokg wail a ngkat tapor aner arar wli pa. Tu ikga ngkirk paipm num lantiwe warwar.
LUK 21:26 Ti tu wrong kin kipman ikga ngkirk paipm, nol kaino rki okaluk a ikga rki nungkwangen kweikwei ikga palng yela kanokg ti. A kweikwei titnongket titnongket a itna kaino kitnong pa, ikga titu weingkweing eng a nurku. Kweikwei kolpa palng pipa,
LUK 21:27 pa ikga tu ri Warim Kipman a Melnum pa ikga waipmunu pa ik uwiyel iye nar numpokgen titnongket, a klalen wail manten.
LUK 21:28 Ti kol wreren eng kweikwei pa eng a palng pa, pa kipm wrekg ngkit ikg pa kaino kwa pa rpmi itopen nungkwangen, eng wang a Maur Wailen la ik uwiyepm, atom ikga kipm wirng no itni kukula wor pa, am wreren tike.”
LUK 21:29 Atom Sisas lanaken yangkipm kla ur pa la, “Ti kipm ikwonilmpen yo kampuk pa, wa yo tiur ai.
LUK 21:30 Ik wang a kipm ri ipm nur, ok pa tukgun umpen pa pati, kipm ariwe la, wang wreren eng a takgni wor a angketuwai pake.
LUK 21:31 Ti am wa kolpa yat pake, ik wang a kipm ri kweikwei kolpa la palng pa, kipm riwe la, wang wreren eng Maur Wailen eng a itni wailen ikgilen kweikwei wrongkwail pake.
LUK 21:32 Kupm lanakepm aklale wrisen la, kipm wrong kin kipman a rka ak wang ti pa kipm ikgake imo, kipm tiur ikga rki i kaingkai, kipm ri kweikwei pa palng.
LUK 21:33 Ti kitnong a kanokg pa ikga kai plalng, pake yangkipm alkupmen kil pa, ikgake kai plalng, ikgam itna kolpa kai pake.”
LUK 21:34 Wa Sisas kil wa la, “Ti kipm rpmi wonrpme! Ampur kipm won itna okipma a, al u titno kweikwei pa, aki ampur kipm nikgwalpm kalkuten eng kweikwei a numpalk a itna kanokg ti. Kipm rpmi wonrpme, eng wang pa ikga palngtepm kolen lem a ale ep elngitna.
LUK 21:35 Ti kipm ikga wonmis kai ngkowe kolti. Wang pa ikga palng eng tu wrongkwail kin a kipman yela tungtangkem a kanokg ti.
LUK 21:36 Ti kipm rpmi wonrpme a oklala niki Maur Wailen ti ikngklei wang, eng mpa kil lkepm titnongket, eng kipm ikga ntiwe ngkom nilokgen kweikwei a ikga palngtepm pa, a eng kipm ikga ntiwe itni wrongen numpaipm kalpisen itni wulmpa a Warim Kipman a Melnum pa.”
LUK 21:37 Akangklei wang pa, Sisas kil am kaling plan tu wrong kin kipman pa itna kawor yipmingki wunen a yalming a Maur Wailen pake. A wa akangklei nungkurikg mining wris wris pa, kil kai kaino okg okg kaino wrik nangen Olip ai,
LUK 21:38 atom kil nar ak kong miningket wris wris pa. Tu wrong kin kipman pa wli rka atning yangkipm a kil angkli pa, itna kawor yipmingki wunen a yalming a Maur Wailen pa.
LUK 22:1 Wang aripm ur a wring wris wris pa tu Isrel angklon nok tingklak a ak mprang ap mringen ak oren pa am kul wreren tike. Wang wail pa mentepm namput la Wang wail eng tu akwonalmpen a pikekg Maur Wailen ak awi tu amentepmen aye kul takwleikgen tu Isip pa.
LUK 22:2 Pa tu tukgunakgen a tu ipma krakgen a ak ak kwap eng al wor uk Maur Wailen pa, nampokgen tu melnum a aroaro wonel tu yangkipm a Moses pa, tu akwonalmpen watipmen akor ya la mpa tu or Sisas pa imo or kol ya a i, eng ntei, tu ngkark eng tu wrong kin kipman ti.
LUK 22:3 Atom Satan kil kai kawor Sutas pa, tu namput la Iskariot, pa kil melnum wris ur a tu watnom wampwam yikak wekg a Sisas aroaro wonel pa.
LUK 22:4 Atom Sutas kil wrekg kai akor la anti tu melnum tukgunakg a tu melnum ipma krakgen pa wa tu melnum tukgunakg a tu melnum nepimpalo a ikgalen yalming a Maur Wailen pa, la ya kolai mpa kil uk Sisas pa kai wam atuwen pa.
LUK 22:5 Atom tu melnum pa, tu atopen, eng Sutas kil kai alken ya kolpa, atom tu ipma wris la lkel marpm.
LUK 22:6 Sutas kil awi wor, atom kil akor ya ampen ur la mpa uk Sisas pa kai wam a tu pa, eng ampake tu wrong kin kipman pa riwe.
LUK 22:7 Wang wail aripm ur a akangklei wring wris wris men angklon nok tingklak a ak mpim ap mringen ak oren pa am ngkaten ak wang wet tike. Atom ti wang a men alm manto walkg malkgu war ur eng rki ntokg il wor uk Maur Wailen eng ikwonilmpen a pekg Maur Wailen ak awi tu amenen aye kul takuleikgen tu Isip pa rka, ti am wang tike.
LUK 22:8 Atom Sisas kil lanaki Pita ekg Son pa la kolkil la, “Kipmekg kai numprampentilo manto war walkg malkgu kweikwei pa rpmi, mpa men kai pa, mentepm il.”
LUK 22:9 Ari wa tuwekg asentel la, “Ti kitn wasrongen la mpa mentekg numprampen ules pa rpmi kai a i?”
LUK 22:10 Ari wa kil la, “Ti kipmekg itning! Kipmekg kai kawor anong wail pa, mpa kipmekg ri melnum ur a aye u kuntuken pa pipa, kipmekg kutnuntel kai kawor wan ur a kil kawore pa.
LUK 22:11 Atom kipmekg isen melnum yan a wan pa la, 'Melnum a kaling plan men pa lanako, la mentekg isenteitn, la wrik mpa kil numpokgen men watnom alkil pa mpa il manto walkg malkgu war kweikwei rke pa, pa a i?'
LUK 22:12 Atom mpa kil plantepm wan ok okkapmet ur a itna kaino walop ur ai, eng mpa kipmekg numprampentilo kweikwei pa itni pake.”
LUK 22:13 Tuwekg atning plalng pa, tuwekg wrekg kai ari kweikwei wrongkwail pa, am palng katila kolen a wuten Sisas lanaken pake, atom tuwekg numprampen kweikwei pa rpma.
LUK 22:14 Tuwekg numprampen manto walkg malkgu war kweikwei pa elngtirpma pa, pa wang a tu al okipma, atom Sisas kil anti tu wokgen alkil pa kai rpma okg arke tita la il okipma pa.
LUK 22:15 Atom kil lanaken la, “Kupm pikekg wasrongen paipm la il okipma ti numpokgentepm wrisen plalng pipa, kupm rki kalkuten.
LUK 22:16 Ti kupm lanakepm la, kupm ikgake wa il okipma ur kol ti ntiur kai ngko wang a kweikwei pa palng iklale ik wang a Maur Wailen itni wailen ngko wunong ikglen kweikwei wrongkwail.”
LUK 22:17 Atom Sisas kil awi kaimung pa aye itna uk wor Maur Wailen plalng pa, kil la, “Kipm uwi ti mpreing il o!
LUK 22:18 Kupm lanakepm la, kupm ikgake wa il u wain ti nti ur, kolpa kai ngko wang a Maur Wailen kil itni wailen ikglen kweikwei wrongkwail ti ngko wunong.”
LUK 22:19 Atom wa kil awi okipma pa aye itna uk wor Maur Wailen plalng pa, kil kapor alken kolti a kil la, “Kil num akupmen a kupm alkepm la ik ngklinsepm. Ti kipm ik kolpa kai eng ikga kipm ikwonilmpen kupm ti!”
LUK 22:20 Tu al okipma pa plalng pa, kil awi kaimung pa aye itna ak katila kol a wet ep pa plalng pa, kil la, “U wain kaimungen kil pa pati, pa Maur Wailen lam kla weten nampokgen kipm. Kil walmpopm akupmen a ungkwan eng la ik ngklinsepm.
LUK 22:21 Pake ti kipm itning! Melnum a mpa uk ya kupm ti kai wam a tu wrong manto pa, am antiwo al okipma rpma tike!
LUK 22:22 Kol Warim Kipman a Melnum ti ikgam imo kolen pikekg Maur Wailen la pake. Pake woi, arein melnum a uk ya Warim Kipman a Melnum ti kai wam a tu wrong manto pa, kil ikga uwi paipm.”
LUK 22:23 Tu atning kolpa, tu asen tita la, “Mla ur amentepm ti, ikga ikwap pa?”
LUK 22:24 Tu watnom a Sisas pa alilakel tita la mla a i mpa itni wailen eng tu pa.
LUK 22:25 Ari Sisas lanaken la, “Tu melnum tukgunakg a kanokg ti pa, tu plan titnongket a tu ti itna wailen ikgalen tu wrong kin kipman alntu, wa tu melnum wail wail pa tu la tu wrong kin kipman pa riwen la tu melnum wailen wor a akwap wor eng ikgalenten.
LUK 22:26 Pake kipm pa ake mpa ntokg kolpa. Kipm mla ur la palng melnum wailen itni kuin akipmen pa, kil mpa rku kil alkil orngwatneikgen kipm ti, wa mla ur akipmen la palng melnum a itna ep ikglentepm pa, kil mpa palng melnum akwapel wor a angklin kipm ti.
LUK 22:27 Kipm ikwonilmpen: melnum a rpma la il okipma ti pa melnum wailen aki, melnum a ampreing okipma ti eng kil al ti pa melnum wailen? Melnum a kil rpma la il pa melnum wailen pake. Pake, kupm ti ake kolpa, kupm kolen melnum akwapel orngwatneikgen kipm eng angklinsepm.
LUK 22:28 Kipm pikekg antiwopm arki kaikuten ak ai kulngkul kul ti, a ake kipm atnuurngkopm.
LUK 22:29 Kolpa ti mpa kupm ngkit kipm ti itni melnum tukgunakg ikglen kweikwei wrongkwail, pikekg yan alkupm ngkat kupm ti itna melnum tukgunakg ikgalen kweikwei wrongkwail.
LUK 22:30 Ti kipm ikga ntiwopm itopen il okipma wail kaino anong wor akupmen pa, a kipm ikga rpmi wrik wor wor eng ikglen tu om wampwam yikakwekg a Isrel.”
LUK 22:31 Sisas lanaki Saimon la, “Saimon, Saimon! Ti kitn itning! Maur Wailen uk ya Satan la ikga ningkailepm la kipm ngko kai wrisen kolen wit ok plepm a melnum kalkwin pa atom ak wripm awi pa.
LUK 22:32 Pake, kupm oklala naki Maur Wailen la kil ngklinseitn eng ikgake kitn ngko kai wrisen. Kitn wa la yaper kul pipa, kitn ik titnongketel tu wail wail a paipm paipm alkitn pa.”
LUK 22:33 Ari wa Pita kil akalmpe la, “Wailen, kupm am numprampen la tu iyeweitn kai rpmi wan tipmining aki, ilmpeitn imo pa, kupm ikga ikilenteitn!”
LUK 22:34 Ari wa Sisas akalmpentel la, “Pita, kupm lanakeitn la, amti karek ake la pa, mpa kitn lam nang akupmen ti nti wraur la kitn ake ariwe kupm ti.”
LUK 22:35 Atom Sisas kil asen tu watnom alkil pa la, “Pikekg ep a kupm ukwawepm kai pa, ake pikekg kipm aye kweikwei a alupme marpm aki, apm kok aki nepm palk kakir pa, kalpis, kipm pikekg angkompwam. Ti pikekg kipm tukwok eng kwei ur aki, kalpis?” Ari wa tu wa la, “Kalpis, men pikekg ake tukwok eng kwei ur.”
LUK 22:36 Atom Sisas lanaken la, “Pikekg kolpake, kil pa mpa kol kilke, mla ur a antiwe apm kok a kweikwei a alupme marpm pipa, kil mpa uwi iye. A mla ur a kosakal kalpisen pipa, kil uwi apm ur alkil a nowe eng wropuk pa ik uwi marpm pa, atom kil ikrmpen ur iye.
LUK 22:37 Ti yangkipm ur a la ela kai wrkapm a Maur Wailen pa la kolkil, 'Tu wrongkwail pa la kil melnum trangkowet paipm.' Yangkipm kil am la kupm tike. Ti am palng aklale tike. Yangkipm wrongkwail a pikekg nira akla kupm ti pa, ikgam palng iklale pake.”
LUK 22:38 Atom tu lanakel la, “Wailen, kitn iri, kosakal wekg men aye itna ti.” Ari wa kil lanaken la, “A pawo! Ampur akor la pa watipmen.”
LUK 22:39 Sisas kil oklala nampokgen tu watnom alkil pa plalng pipa, kil awiyen anel atnuurng anong pa kai kaino wrik nangen Olip kol a kil ak ak pa.
LUK 22:40 Tu kaino pilng kaino nang pa, Sisas lanaken la, “Kipm oklala niki Maur Wailen eng mpa kil iyewepm ngkom nilokgen kalkuten eng a palng eng ik rkolngkepm pa.”
LUK 22:41 Atom kil atnurngken kai watinet ketn ketn kapor kilko alein a, oklala naki Maur Wailen.
LUK 22:42 Atom kil lanakel kolpa la, “Yaiyai, kol wasrongen alkitn pipa, kitn uwi kaimung kil kai tukuleikgentopm. Pake ampur kitn katnun wasrongen a kupm ti pa, kitn ik ik wasrongen alkitnen pawo!”
LUK 22:43 Atom maur akwapel ur a Maur Wailen pa angkaino kitnong ai nar palngtel, ak titnongketelel.
LUK 22:44 Ipma a kil pa alupm wes noros paipm kolti. Kolpa atom wa kil wa oklala naki Maur Wailen titnongket, pa nsam pa namperkgen wom pa wom elng nar kanokg ti kolen walmpopm pa.
LUK 22:45 Kil oklala naki Maur Wailen plalng, kil wrekg kai ari tu watnom alkil pa ari, tu pa ipma kalkut paipm, atom anel okg rka.
LUK 22:46 Atom kil la, “Ei, wa kipm okg okg rka eng na? Ti kipm wrekg oklala niki Maur Wailen ti eng mpa kil iyewepm ngkom nilokgen kalkuten eng a palng eng ik rkolngkepm ti.”
LUK 22:47 Atom Sisas kil oklala kolpa itna, ari tu wrong wailet am anel wli wli tike. Melnum ur a tu namput la Sutas pa, kil pa melnum ur a tu watnom wampwam yikakwekg a Sisas aroaro wonel pa, am kil pa awiyen aye wli pake. Kil kai wreren Sisas pa la nikrontel.
LUK 22:48 Ari Sisas asentel la, “Sutas, kitn la nukrontopm kolpa eng uk Warim Kipman a Melnum ti kai wam a tu wrong manto tike?”
LUK 22:49 Tu watnom a Sisas pa, tu ari kuina ur eng a palng pa, atom tu la, “Wailen, men ik kosakal ti ik wangketen om?”
LUK 22:50 Ari kalpis, wris ur atuwen pa am ak kosakal pa wangket nungkulkg wi a melnum akwapel a melnum tukgunakg a itna ep eng tu ipma krakgen kimeket pa ise.
LUK 22:51 Ari, Sisas wa la, “Elngen o!” Kolti kil elng wam pa itna nungkulkg a melnum pa, atom nungkulkg pa wa palng wor itna kati kati.
LUK 22:52 Atom kil lanaki tu melnum tukgunakgen a tu ipma krakgen pa, wa tu melnum tukgunakg a tu nepimpalo a ikgalen yalming a Maur Wailen pa, wa tu melnum wailen wailen a wli la rkulel pa la, “Ti kipm aye kosakal a yomis ti wli la rkul kupm ti, eng kupm ti melnum trangkowet ur akipmen tike?
LUK 22:53 Ti akangklei wang kupm antiwepm rpma kawor yipmingki wunen a yalming a Maur Wailen pa, karken a kipm arkulopm ak wang pa. Pake, wang ketn ti pa, pa wang akipmen, pa wang a miningket, mpa Maur Paipm kil ikwap ik titnongket akilen.”
LUK 22:54 Tu arkul Sisas pa aye kai kawor wan a melnum tukgunakg a itna ep eng tu ipma krakgen kimeket pa, Pita pa katnunten kolpa angklokg wang katnukg katnukg kai kawor.
LUK 22:55 Kil kai anti tu arkgin wakg wail ur a tu alile arkgin pa rka mapmingkyun pa wreren wan a tu antokg yangkipm atne pa.
LUK 22:56 Kil arkgin wakg pa rpma ari wakg pa naruk alentel atom kin akwapel ur pa ikg kai ariwel atom kil lala, “Ti melnum ur ari kolen pikekg anti Sisas atn ti pa ti ingkai rpma ti!”
LUK 22:57 Ari Pita kil akalmpe kai kin pa la, “Kupm akwekgel melnum a kitn la pa!”
LUK 22:58 Wa tu wa rka ketn ketn kolpa kai ari, wa melnum ur pa ariwel atom wa la, “Kitn pa melnum ur atuwen am pake!” Ari wa Pita akalmpe la, “Kupm ti kalpis!”
LUK 22:59 Itna watinet ketn ketn ari wa melnum ur pa la titnongket la, “Ti kipm la ntei, melnum a rpma ti pa a Kalili, kil pikekg anti Sisas atn pa.”
LUK 22:60 Ari wa Pita akalmpe la, “Kupm ti ake ariwe kuina ur a kipm la pa!” Pita oklala kolpa itna pa, karek am la ise.
LUK 22:61 Atom Wailen kil plelng ikatnen Pita pa kolpa pipa, nol nikgwalpm a Pita pa am plelngen ise, kil akwonalmpen yangkipm a pikekg Wailen kil la kolpa la, “Amti mpa ik mining ti karek ake la wai, kitn mpa lam nang akupmen ti nti wraur, la kitn ake ariwe kupm ti.”
LUK 22:62 Atom Pita wrekg kawor akg paipm wrisen kawor en ai.
LUK 22:63 Tu melnum a wet arkul Sisas pa, tu anel aknokgelel a, orel.
LUK 22:64 Tu ak apm umpu pa ak yapo wulmpawel plalng pipa, tu orel kai ikgok kil pa, atom asentel la, “Kitn melnum okwripm pa, kitn la ri, la wet mla oreitn?”
LUK 22:65 A wa tu ak nokgelel ak yangkipm paipm paipm tiur ai.
LUK 22:66 Takgni aro pa, tu mring man wailen wailen a ikgalen tu wrong kin kipman pa, pa tu melnum tukgunakgen a tu ipma krakgen pa, a tu melnum a aroaro wonel tu yangkipm a Moses pa, anel ep wli rka wris. Tu pa mring man wailen wailen mapming a rpma eng atning yangkipm ok atom tu aye Sisas pa kai itna antokg yangkipm ok itna tu pake.
LUK 22:67 Atom tu la kolpa la, “Ti kitn laniko ri la, kitn pa Krais?” Ari wa Sisas lanaken la, “Kol kupm lanikepm pa, mpa wa kipm ake ukipma.
LUK 22:68 Wa kol kupm isentepm pa, kipm ampake ikilmpe.
LUK 22:69 Pake kol ak wang ti, wa or pa kai pa, Warim Kipman a Melnum ti pa, kil ikga rpmi kaino wam wi a Maur Wailen a antiwe titnongket wrongkwail.”
LUK 22:70 Atom wa tu asentel la, “Ti kitn ti kitn Warim Kipman a Maur Wailen?” Ari wa kil akalmpe la, “Am kipm alkipm pa la la kupm tike.”
LUK 22:71 Atom tu la kolpa la, “Men ake la itning melnum ur wa laniko or pa kai! Men am wet atning a kil laron kil alkil angko wunong ise, ti a pake!”
LUK 23:1 Tu melnum wail wail antokg yangkipm nampokgen Sisas pa plalng pa, wa tu kimeket ak wail anel awiyel a pa wa aye kai eng Pailat,
LUK 23:2 atom anel lakati naki Pailat pa kolpa la, “Men ari melnum ti pa kil wa alok tu wrong kin kipman amenen ti kai or ya paipm, a wa kil wa angkengko la ake mpa men ngkli marpm kai eng melnum tukgunakg a kipm Rom pa, wa kil ngkat nang a kil alkil ti la kil ti Krais, melnum tukgunakg a Maur Wailen ukwa nar la ikuwi tu wrong kin kipman.”
LUK 23:3 Atom Pailat pa asentel la, “Ti kitn pa melnum tukgunakg a tu Suta pake?” Ari wa Sisas akalmpe la, “Am kitn alkitn pa la kolpake.”
LUK 23:4 Atom wa Pailat pa lanaki tu melnum ipma krakgen tukgunakgen a Maur Wailen pa, wa tu wrongkwail a itna pa la, “Melnum ti ake kupm ari la kil antokg paipm ur eng mpa kupm la tu ilmpel imo pa.”
LUK 23:5 Ari wa tu wa la titnongket paipm la, “Kil pikekg ak kwap kaling plan tu wrong kin kipman itna yela Sutia ti. Pikekg kil ngkaten itna kaino Kalili ai atom am wa aye nar ti kul no tike. Kolpa atom kil arongke nikgwalpm a tu wrong kin a kipman pa rka kai pa kai pa.”
LUK 23:6 Pailat kil atning a tu melnum wail wail la kolpa atom kil asen la, “Kil ti melnum a anong kanokg a Kalili?”
LUK 23:7 Tu akalmpe la, “Ei, kil melnum a Kalili pake.” Atom Pailat tilp tu ayewel kai eng Erot eng ntei, Erot pa kil itna melnum wailen a ikgalen anong kanokg a Kalili pake. Pake ak wang pa, Erot am rpma Serusalem pa yat pake.
LUK 23:8 Tu ayewel kai palng pa, Erot ari Sisas kolpa kil atopen paipm, eng ntei, kil pikekg atning a tu la Sisas pa, atom kil pikekg lantwang wang watinet la kil la kol a riwel. Wa kil akwonalmpen la kol a ri Sisas ntokg kwei ur titnongket kol a pikekg kil antokg atom tu wrong kinkipman ari atom tu wrekg paipm pa, eng kol a kil ri.
LUK 23:9 Atom Erot kil akasen Sisas oklala watipmen, ari ake kil akalmpe oklala ur.
LUK 23:10 Ari tu melnum ipma krakgen tukgunakgen pa nampokgen tu melnum a aroaro wonel tu yangkipm a Moses pa a antiwel itna pa anel arkiwel titnongket la, kil melnum a antokg paipmpaipm.
LUK 23:11 Atom Erot nampokgen tu melnum alkil a almpwrong pa, anel ari elukgen la paipmelel, a ak nokgelel. Atom tu awi apm ariwor ur pa nowewel plalng pipa, anel ukwawel yaper kai eng Pailat.
LUK 23:12 Ak wang ketn pa, Erot ekg Pailat a pikekg wrongmanto eng tita pa, wa ekg kai wangkir a yapon or wris.
LUK 23:13 Atom Pailat kil akwe tu melnum ipma krakgen tukgunakgen, a tu melnum wailen wailen a ikgalen men Suta pa nampokgen tu wrong kin kipman pa anel wli.
LUK 23:14 Atom kil lanaken la, “Wet kipm ayewel wli ep pa, kipm arkiwel la kil arongke nikgwalpm a tu wrong kin kipman pa kai atn palpa. Pake kipm alkipm wet atning pa, kupm ariwel a kupm atning yangkipm akilen pa, ari ake kupm ari kil antokg paipm ur, kol a kipm arkiwel pa.
LUK 23:15 Wa Erot pa ake wa ari la kil antokg paipm ur kolpa, atom wa kil ukwawel yaper kul eng mentepm ti. Ti melnum ti ake antokg paipm ur, eng mpa mentepm ilmpel imo pa.
LUK 23:16 Ti mpa kupm la tu orel plalng pa, kupm ungkwantel kil kai.”
LUK 23:17 Akangklei wring wris wris a tu antokg okipma wail al al kol ri ti pa, Pailat kil mpa ngketen melnum wris ur a rpma wan tipmining pa kul or kai en.
LUK 23:18 Ari tu wrongkwail kin kipman a itna pa anel la wlipa wlipa yikakatnen la, “Or kil pa imo o! A ngketen Parapas pa kul or kai en!”
LUK 23:19 Kol Parapas pa pikekg anti tu melnum tiur wrekg itna anong wail ti la tulpulng ungkwan tu melnum wailen wailen a Rom a ikgalenten ti kai tukulelkg, atom alm melnum ur amo, atom tu awiyel aye kai rpma wan tipmining.
LUK 23:20 Pake Pailat pa wasrongen la mpa wangketen Sisas pa or en, atom wa kil lanaki tu wrong kin kipman pa anti ur.
LUK 23:21 Ari wa tu la yikakatnen la, “Iyewel kai kurkurngkel rki yo okgmangki pawo!”
LUK 23:22 Wet Pailat asenten anti wekg ise, ari wa kil wa asenten anti ur la, “Pikekg kil antokg kuina paipm? Ake kupm ari kil pa antokg paipm ur eng mpa orel imo pa! Ti mpa kupm la tu orel plalng pa, kupm ungkwantel kil kai.”
LUK 23:23 Ari tu itna pa itna pa la plalplal mainmain la, kurkurng Sisas pake, atom ampri okel Pailat pa.
LUK 23:24 Kil atning a tu wrongkwail tu la titnongket kolpa atom, kil awi wor la mpa tu kurkurng Sisas rki yo okgmangki.
LUK 23:25 Atom kil angketen melnum a tu wasrongen a pikekg wrekg la tulpulng ungkwan tu wailen wailen a Rom a ikgalenten pa antokg melkget alm tita atom kil alm melnum ur amo pa, atom tu ayewel kawor rpma wan tipmining pa kul or kai en, a kil elng Sisas pa kai wam a tu melnum a almpwrong pa la tu ntokg kitila ik wasrongen alntu pa.
LUK 23:26 Atom tu melnum a almpwrong pa tu awi Sisas pa kolti, tu aye kai. Tu angkom kai pa, tu ansil melnum ur pa, nang alkilen pa Saimon, kil melnum kai anong Sairini. Kil angkai wring pa kul la kai kawor Serusalem pa ari tu angkengkel kolti, tu alkel yo okgmangki a Sisas pa la kil rki iye kutnun Sisas pa ntiwen iye kai.
LUK 23:27 Tu wrong watipmen paipm pa tu katnun Sisas, nampokgen tu kin tiur pa, akg atop ak ok namputen areinsel.
LUK 23:28 Ari Sisas plelng lanaken la, “Kipm kin a Serusalem pa! Ampur kipm akg arein kupm ti pa, kipm akg rein kipm alkipm ti numpokgen tu warim alkipmen pawo!
LUK 23:29 Ik wang ur pa ipma wakget a Maur Wailen ikga palng, atom tu ikga la kolpa la, 'Tu kin a kimpong, a tu kin mamingkisen, a tu kin a ake uk ma warim pa, ik wang pa tu pa ikga worenen ketnketn pake, ti tu pa tu itopen o!'
LUK 23:30 Ik wang pa, tu wrongkwail ikga la tipmining ti la, 'Tipor nar ik auro!' A la wrik nangen ti la, 'Ik lampo!'
LUK 23:31 Yo maing kil pa tu antokg kolpake, a yo nungkwor pa ikga tu ntokg paipm wrisen ai. Kol melnum a ake antokg paipm ur pa tu antokg kolkilke, a kipm melnum a antokg paipmpaipm pa ikga tu ntokgtepm paipm wrisen ai or kai ai.”
LUK 23:32 Atom melnum trangkowet wekg ur pa wuten tu melnum a almpwrong pa ayewen aye kul la kurkurngken imo numpokgen Sisas pa.
LUK 23:33 Atom tu wli palng kul wrik a tu namput la Melnum Tukgunakg Timpal pa, tu karkurng Sisas rka yo okgmangki nampokgen melnum trangkowet wekg pa, ur rka wam wi pa, wa ur rka wam wangkokg.
LUK 23:34 Atom Sisas kil la, “Yaiyai! Kitn ungkwan paipmpaipm a tu ti, eng ntei, tu ake ariwe kuina ur a tu antokg ti.” Atom tu klasinen wes pa awi awi ari eng mpreing apm akilen pa.
LUK 23:35 Atom tu wrong kin kipman pa anel itna ikatnen kolpa itna, tu melnum wailen wailen pa anel akgnokgel Sisas pa la, “Kil pikekg angklin tu tiur ai. Ti kol kil melnum a pikekg Maur Wailen takweiyel aklale la kil ikuwi tu wrong kin kipman pa, ti kil ngklin kil alkil tiwo!”
LUK 23:36 Wa tu melnum a almpwrong pa wa anel ak nokgelel, anel kulno kolti alkel u titno kinipis pa la kil il,
LUK 23:37 atom anel la kolpa la, “Kol kitn melnum tukgunakg a tu wrong kin kipman a Suta ti pa, kitn ngklin kitn alkitn tiwo!”
LUK 23:38 Ela kaino yo tukgunakgen pa tu nira kolpa la la, “Kil melnum tukgunakg a tu Suta.”
LUK 23:39 Wa melnum trangkowet ur a rka kai yamping wompel a Sisas pa kil wa ak nokgelel la, “Ti kitn ti, kitn la kitn melnum a pikekg Maur Wailen kil ukwaweitn nar ti, kol a kitn ngklin kitn alkitn ti ri, wa kol a kitn ngklin mentekg ti yat!”
LUK 23:40 Ari wa ur a rka yamping wompel pa akle ur a wuten la rka kai yamping wompel pa la, “Ti kitn ti ake ngkarken Maur Wailen ti? Ti mentekg am arki kalkuten wris kol kil pake.
LUK 23:41 Kol mentekg ti pa pikekg antokg paipmpaipm atom tu karkurngko pake, pake kil pa pikekg ake antokg paipmpaipm ur.”
LUK 23:42 Atom kil lanaki Sisas pa la, “Sisas, ik wang a ikga kitn palng wailen ikglen kweikwei wrongkwail pa, kitn ikwonilmpentopm!”
LUK 23:43 Ari wa Sisas lanakel la, “Kupm lanakeitn aklale wrisen la, amti kitn mpa nti kupm rpmi kaino anong wor tike.”
LUK 23:44 Atom ak takgni no pirng pa, elng kul kai mining karng kolti akaur kanokg ti yela, itna a, a, tukoryauk pa angkli om pa, mining pa kai plalng om,
LUK 23:45 elng kul kai mining pa atnen takgni ake el, a apm kaki wail a tu alekg rka akangketen yalming a Maur Wailen pa rakol wompwekg.
LUK 23:46 Atom Sisas kil kirkar akg yikakatnen ak ok namputen yan alkil pa la, “Yaiyai, uwi maur amen wor akupmen pawo!” Kil la kolpa, a kil amo.
LUK 23:47 Melnum itna ep a tu melnum a almpwrong kamel wampwomis pa kil ari kweikwei a palng kolpa atom kil ngkat nang a Maur Wailen pa la, “Aklale wrisen, kil pa ake melnum ur a antokg paipm ur!”
LUK 23:48 Tu wrongkwail a wli rka pa tu ari kweikwei a palng kolpa pa, tu arein paipm kolti, wam yapo nol kolti yaper kaingkai wan anong alntu ai.
LUK 23:49 Tu yiprokgen, a tu melnum wor a Sisas pa, wa tu kin a katnuntel angkaino Kalili ai nar pa, anel itna watinet ketn ketn atom ari kweikwei a palng pa.
LUK 23:50 Melnum ur pa, tu namput la Sosep, melnum ur kai anong Arimatea. Kil anong ur a ela anong kanokg a Sutia, pa melnum ute wor a rpma nungkwangen la ri Maur Wailen itni wailen ikglen kweikwei wrongkwail. Kil pa am wa mring man wail ur a mapming a rpma atning atning yangkipm pa yat pake, pake kil ake pikekg ipma wris nampokgen tu kwapwris alkil a tu rpma yapon yangkipm a ak nikgwalpm kolpa eng Sisas pa.
LUK 23:52 Atom kil kai kawor ari Pailat pa, eng la uwi palk a Sisas pa iye kai lil.
LUK 23:53 Atom Pailat awi wor pa, kil kul or kai nalu palk pa kolti, aye nar ak apm tangkoren pa yapo plalng pipa, kil ngkat aye kai alil ermpa kawor mlamin wunen ur a pikekg tu u pa, a ake pikekg tu alil melnum ur armpe pa.
LUK 23:54 Atom wang pa wang a tu numprampen kweikwei eng rpma eng awi yapm, pa kol weti kai elngen nungkurikg ari kamel lukg wekg pa, a ngkiten i pa kai ikgkil wang misen pa, pa wang wail a tu rpma eng yapm pake.
LUK 23:55 Tu kin tiur a pikekg anti Sisas angkaino Kalili ai nar pa anel katnun Sosep pa atom, tu ari mlamin pa, wa palk a Sisas a kil alil pa.
LUK 23:56 Kolti, tu yaper kai numprampen u yiwa wa kweikwei yaprekget yaprekget pa eng la ikinel palk akilen pa. Atom ak wang wail pa tu rpma eng yapm kol a yangkipm titnongket pa la pa.
LUK 24:1 Wang wail a rpma eng yapm pa plalng pipa, tu kin pa wrekg ak kong miningket paipm ai, aye u a kweikwei yaprekget yaprekget a tu numprampen pa aye kai kirkap pa la ik inel palk a Sisas pa.
LUK 24:2 Ari tu ari wes a pikekg akampri mlamin ok pa, am wa talpul takwleikgen ise.
LUK 24:3 Atom tu kai kawor mlamin wunen pa ari, ake tu ari palk a Wailen Sisas pa.
LUK 24:4 Atom tu itna pa akwonalmpen watipmen ari, tu ari melnum wekg ur a nowe apm klalen muinmainet paipm ai palng itna wrerenten.
LUK 24:5 Tu kin pa ari kolpa tu ngkark paipm, atom anel omtompok lam wulmpa alntu pa kinar kanokg ai kolti. Ari melnum wekg pa lanaken la, “Ti wa kipm kul akor melnum a rpma malepmen ti kul wrik a alil melnum a amo ti, eng ntei?
LUK 24:6 Ti kipm ri, kil ake rmpa ti, kil am wrekg ise. Ti kipm ikwonilmpen yangkipm a pikekg kil lanakepm angkaino Kalili pa la,
LUK 24:7 'Warim Kipman a Melnum pa ikga tu uk kai wam a tu melnum a antokg paipmpaipm pa, atom ikga tu kurkurngkel rki yo okgmangki pa, uwiyel iye kai lilel rmpi, i i, wang wraur pa kai plalng pa, wa kil wa wrekg.'”
LUK 24:8 Atom wa tu kin pa wonarpme yangkipm a pikekg kil la pa,
LUK 24:9 atom wa tu wa yaper a wrik a tu alil Sisas pa kai kolti, lakati naki tu watnom wampwam yikakwris a Sisas pa, nampokgen tu wrongkwail ai, kweikwei wrongkwail a wet tu ari a palng pa.
LUK 24:10 Tu kin a kai lakati yangkipm pa naki tu melnum wokgen a Sisas pa pati, Maria a anong Maktala, a Soana, a Maria, man a Semis pa, wa tu kin tiur ai nampokgenten.
LUK 24:11 Ari tu watnom pa la la, palpa tu la yangkipm kansil ur kolti. Tu ake ukipma yangkipm pa la yangkipm pa aklale pa.
LUK 24:12 Ari Pita pa kil wrekg kolti, kil pirng kai wrik a pikekg tu alil Sisas armpe pa. Atom kil itna en ti ikgarmpen ari, kil ari apm kalpmilel kolti rmpa. Atom kil yaper kai kolti wa akwonalmpen watipmen eng kweikwei a palng kolpa.
LUK 24:13 Itna wang pa, watnom wekg ur a Sisas pa, tuwekg la ekg kai anong ur a tu namput la Emeus, anong ur a ela watinet ketn eng Serusalem pa.
LUK 24:14 Atom tuwekg akor la tatu ya pa kai kweikwei wrongkwail a palng pa.
LUK 24:15 Tuwekg akor la kolpa kai pa, Sisas kil palng angkom kai arken nepm atom teng angkompwris kolpa kai.
LUK 24:16 Atom tuwekg pa ariwel pake, ake tuwekg ariwe la, Sisas pa.
LUK 24:17 Atom Sisas asenten la, “Kipmekg akor la kuina itna wampel ti?” Tuwekg atning pa, tuwekg kai itna, atom kil ari la tuwekg pa ipma kaikut.
LUK 24:18 Atom wris ur a tuwekg a tu namput la Kliopas pa la, “Ti kitn ti pikekg rpma atn kolai, atom kitn ake ariwe kweikwei wail a pikekg palng ti?”
LUK 24:19 Ari wa Sisas asenten la, “Kuina wai?” Ari wa tuwekg akalmpe la, “Mentekg wuten akor la Sisas a Nasaret pa. Kil melnum okwripm a Maur Wailen takweiyel alkel titnongket, atom kil laron yangkipm nampokgen titnongket, wa antokg kweikwei titnongket weten weten, atom tu wrong kin kipman ariwel la kil melnum wailen.
LUK 24:20 Tu melnum ipma krakgen tukgunakgen a tu melnum wailen wailen amentepmen ti uk kil kai wam a tu Rom la orel imo, atom tu karkurngkel rka yo okgmangki.
LUK 24:21 Atom men ti pikekg akwonalmpen la kil pa melnum a kol a ikrmpen mentepm Isrel pake! Atom kweikwei a pikekg palng pa, am wang wraur ak angketen kai ise.
LUK 24:22 Atom weti ak kong pa, wa men wrekg paipm eng tu kin tiur amenen a pikekg atn angklinsel pa, anel wrekg ak kong miningket paipm ai kai kawor mlamin kirk wunen a tu alil Sisas rmpawe pa.
LUK 24:23 Ari tu kai ari palk akilen pa ake rmpa. Atom tu yaper wli lanako la, tu ari maur akwapel wekg a Maur Wailen pa, atom tuwekg lanaken la, kil am wrekg ise!
LUK 24:24 Atom wa tu tiur amenen pa, wa anel kai wrik a tu alilel pa ari, am kol a tu kin pa la pake: ake tu ariwel.”
LUK 24:25 Atom Sisas lanaken la, “Ti kipmekg ti titnowen, a ake wa kipmekg ukipma alupmen yangkipm wrongkwail a pikekg tu melnum okwripm a Maur Wailen la pa!
LUK 24:26 Ti kipmekg ti ake ariwe la wrkapm a Maur Wailen la ikg am palng kolpake, la melnum a pikekg Maur Wailen ukwa nar la ikuwi kipm wrong kin kipman pa, kil ikga uwi wleket wail, plalng pipa, kil kaino rpmi numpokgen Maur Wailen, uwi titnongket a nang wailen pake.”
LUK 24:27 Atom Sisas laron yangkipm ok yiprokgen wrongkwail a lakati kil alkil ti naken ngkaten angkai Moses ai, wa kulngkul tu melnum okwripm a Maur Wailen a tu nira ela kai wrkapm a Maur Wailen pa.
LUK 24:28 Tunteng kul wreren anong pa, atom Sisas pa alen ipma la aren oryawel,
LUK 24:29 ari wa tuwekg pa angkengkel la, “Ti mining kreet eng a mining tike, ti kitn kul ntiwo okg rmpi tipen!” Atom kil kawor la ntiwen rpmi.
LUK 24:30 Tunteng rpma la il okipma pa, kil awi nok tingklak pa ukwor Maur Wailen plalng pipa, kil kapor alken.
LUK 24:31 Kil antokg kolpa atom, wulmpa a tuwekg pa kitnangku ariwel, ari kil am wa kai titalam ise.
LUK 24:32 Atom tuwekg naki tita la, “Aklale, ti wet kil lakati nako yiprokgen a ela kai Wrkapm a Maur Wailen pa angko ya pa, pa wuten almpo ipma.”
LUK 24:33 Atom ak wang ketn pa tuwekg wrekg kolti, yaper kai Serusalem ari tu watnom wampwam yikak wris a Sisas a anel rka wris pa.
LUK 24:34 Ari tu mprak mprak lailai lakati naken kuina ur a wuten palng eng Saimon pa, pa la, “Wailen am wrekg aklale ise! Ti wuten palng eng Saimon ari pa.”
LUK 24:35 Tu la kolpa naken plalng pipa, tuwekg ti wa lakati naken la, Sisas palngten angko ya pa, atom tunteng angkom or ya pa kai pa tuwekg ake ariwe la kil pa Sisas pa. Tunteng kai palng rpma kai wan ai, kil kapor nok tingklak pa alken pipa, tuwekg ariwe la Sisas am pake.
LUK 24:36 Tu watnom a Sisas tu lakati kolpa itna pa, Wailen pa palngten pinterngen kolti lanaken la, “Ipma akipmen pa rki meen!”
LUK 24:37 Ari tu pa la tu ari maur ur atom tu ngkark paipm wrisen kolti.
LUK 24:38 Ari wa kil lanaken la, “Ti wa kipm wrekg paipm akwonalmpen watipmen eng ntei?
LUK 24:39 Ti kipm ri nepm wam akupmen ti! A wa kipm ri la, am kupm tike. Wa kipm kul ri wampirpme ik wampla ik itningke numpwam akupmen ti! La maur pa, kol ake numpu rke kol kupm ti, kol a kipm ri kolti kai titalam ise.”
LUK 24:40 Kil la kolpa plalng pipa, kil planten nepm wam akilen pa.
LUK 24:41 Atom tu atopen, pake nikgwalpm a tu pa rka nowe nare, ake kai wris. Atom kil asenten la, “Kipm aye okipma ur aki?”
LUK 24:42 Atom tu alkel yul tiwel a wet tu alilng pa,
LUK 24:43 atom tu ari a kil awi al pa.
LUK 24:44 Kil al yul pa plalng pa, kil lanaken la, “Kipm ariwe pa, pikekg kupm antiwepm rpma pa, kupm lanakepm la, yangkipm ok wrongkwail a ela kai wrkapm a Moses a tu melnum ok wripm a Maur Wailen nira pa, a wa ela kai wrkapm nangnang a Tepit nira pa, a akla kupm ti pa, pa mpa palng ok rke, ake mpa kalpis pa, ti am palng tike.”
LUK 24:45 Atom kil antokg nol nikgwalpm a tu pa palng wontrakole ariwe yangkipm a Maur Wailen a nira ela wrkapm pa.
LUK 24:46 Atom kil lanaken la, “Tu nira kolpa la, melnum a Maur Wailen ukwa nar la ikuwi tu wrong kin kipman pa, ikga kil imo, atom wang wraur kai plalng pa, wa kil wa wrekg.
LUK 24:47 A ikga tu laron nang akilen pa niki tu wrong kin kipman pa, ikga tu plelng ipma, atom ikga kil ungkwan paipmpaipm atuwen. Ikga tu ngkiten kwap pa ik itni Serusalem ti, atom iye kai yela kanokg ti.
LUK 24:48 Kipm alkipm ti pekg nungkulkg a wulmpa eng kweikwei wrongkwail a palng pa, ti ikgam kipm ti laron ik titnongketel niki tu wrong kin kipman tike la pa aklale.
LUK 24:49 Ti kipm itning, ikga kupm ukwantepm Maur Wor a pikekg Yan alkupmen kil yapon yangkipm pa. Ti ikga kipm rpmi nungkwangen i anong wail ti rpmi i i, ikga kipm uwi titnongket wail pa a ikga kupm ukwantepm nar pa.”
LUK 24:50 Atom Sisas awi tu watnom alkilen pa anel atnurng Serusalem pa kai kinar angko wreren anong Petani pa, atom kil ngkat wam pa, a kil lanaki Maur Wailen pa la kil planten ipma wor alkil pa ngklinsen.
LUK 24:51 Kil lanaki Maur Wailen kolpa itna pa, kil atnurngken kolti, Maur Wailen awiyel kolpa aye kai kaino kaino anong wor alkil ise.
LUK 24:52 Tu kapor kilko alein ngkat nang alkilen plalng pa, tu atopen wail manten yaper kaino kawor Serusalem pa.
LUK 24:53 Atom tu anel rka yipmingki wunen a yalming a Maur Wailen pa ngkat nang alkilen pa angkli alkel wor akangklei wang kolpa rka.
JOH 1:1 Yangkipm a laron nikgwalpm yiprokgen a Maur Wailen pa kil pikekg rpma ep ak ai kul ai, a kitnong a kanokg pa Maur Wailen kil la atom palng katnukg. Wa Yangkipm pa kil pikekg rpma nampokgen Maur Wailen. A wa Yangkipm pa kil Maur Wailen.
JOH 1:2 Yangkipm kil alkil kolti pikekg rpma ak ep lmpiwen ai nampokgen Maur Wailen.
JOH 1:3 Yangkipm pa kil ya a pikekg Maur Wailen la atom kweikwei wrongkwail palng or kil pa, ake pikekg palng kolti pa, am pikekg palng or Yangkipm pake.
JOH 1:4 Yangkipm pa kil yiprokgen a Yaprekg Watin eng rpma wor yongkyong. Yaprekg Watin alkil pa Wakg a naruk ak alen tu wrong kin a kipman.
JOH 1:5 Wakg pa kil naruk ak alen miningket pa, pake miningket pa ake antiwe iye kul kai ik ipaarng kil pa.
JOH 1:6 Melnum ur pa rpma, nang alkilen pa Son, Maur Wailen kil takweiyel ukwawel kul.
JOH 1:7 Kil pikekg atning a Maur Wailen lanakel, atom kil aye yangkipm pa kul laron Wakg pa naki tu kin a kipman pa aktitnongketel la pa aklale, eng mpa tu wrongkwail itning ukipma Wakg pa.
JOH 1:8 Son kil alkil ti pa ake Wakg pa. Pake kil pikekg atning a Maur Wailen lanakel, atom kil kul laron Wakg pa naki tu wrongkwail kin a kipman pa la,
JOH 1:9 Wakg aklale wrisen pa kil eng a nar eng la ik len mentepm wrong kin a kipman wrongkwail a kanokg ti.
JOH 1:10 Wakg pa kil ya a pikekg Maur Wailen la atom kitnong a kanokg a kweikwei wrongkwail ti palng or ya pa. Kil nar rpma kanokg a tike, pake wrong kin a kipman a kanokg ti ake wa ariwe la kil melnum kolpa.
JOH 1:11 Kil nar anong yiprokg alkilen tike, pake tu alkilen ti pa ake wa atopen awiyel kolen la kil pa melnum wailen alntuwen pa, kalpis.
JOH 1:12 Pake tu melnum a atopen awiyel la kil pa melnum wailen atuwen atom wa ukipma kil pa, pa kil alken nang wailen la tu pa palng warim a Maur Wailen.
JOH 1:13 Tu pa ake palng warim a Maur Wailen or ya a man a yan ti angket pa, aki nikgwalpm a melnum ti la, aki melnum ti antokg kuina ur kolai atom tu palng warim a Maur Wailen pa kalpis. Pa Maur Wailen kil alkil pikekg antokg tu palng warim alkilen ai.
JOH 1:14 Yangkipm a laron nikgwalpm yiprokgen a Maur Wailen pa pikekg kil nar kanokg ti pa kil palng melnumpen, atom kil pikekg rpma nampokgen men ti. Pikekg men ari nang wailen a titnongket alkilen. Nang wailen a titnongket pa am a Warim Kipman yek wris anangket pake, pa Yan alkil pa alkel pake. Kil pa melnum wor wrisen a planto ipma wor a angklinso a wa kil antiwe nikgwalpm ute aklale a Yan alkil.
JOH 1:15 Son a kaluk tu kil atning a pikekg Maur Wailen lanakel atom kil itna aktitnongketel laron melnum pa la yikakatnen naki tu wrongkwail pa kolpa la, “Melnum a ikga kul kutnukg kupm ti pa, am melnum a pikekg kupm laron nakepm la kil wreren eng a kul pake. Kil pa nang wailen angen kupm ti. Eng ntei, kil pa pikekg rpma ak klaingkil u ai, a kupm ti man rakuwopm katnukg.”
JOH 1:16 Kil antiwe nikgwalpm ute aklale a kil planto ipma wor angklinso wail manten paipm or kai ai. Atom mentepm kimeket awi kweikwei wor wor wailet paipm nurkg nurkg antiwe kolpa itna.
JOH 1:17 Atom ti kipm ri, yangkipm titnongket pa pikekg Maur Wailen kil yapon uk Moses atom Moses kil alko. Pake nikgwalpm ute aklale a ipma wor a Maur Wailen kil planto a angklinso pa Maur Wailen uk Sisas Krais atom Sisas Krais kil alko.
JOH 1:18 Ake melnum ur ari Maur Wailen pa, kalpis wrisen. Warim Kipman yek wris anangket alkil pa, kil alkil Maur Wailen, kil anip no nol a Yan alkil ai. Am kil alkil wris ata pa kolti laron Maur Wailen pa prepmprepm nako a kaling planto atom mentepm ariwe pake.
JOH 1:19 Yangkipm kil pa Son kil laron Sisas pa aktitnongketel la kil Krais, melnum a Maur Wailen kil yapon la ikga nar ikrmpento pa. Tu melnum wailen wailen a men Suta a rpma kaino anong wail Serusalem pa tu ukwa tu ipma krakgen a ak ak kwap eng al wor uk Maur Wailen nampokgen tu Lipai tiur pa tu nar kul no eng Son atom tu alm ipmawel Son pa asentel la, “Kitn melnum mla atom kitn akwap ti?”
JOH 1:20 Ari Son kil ake lam kil alkil pa, kil laron angko wunong la, “Kupm ake Krais pa.”
JOH 1:21 Ari wa tu asentel anti ur la, “Ti kitn mla? Kitn Elaisa melnum ok wripm a pikekg Maur Wailen la la ikga yaper nar tike aki?” Ari Son kil akalmpe la, “Ake kupm Elaisa pa.” Atom wa tu wa asen anti ur la, “Ti kitn melnum okwripm kol Moses a Maur Wailen pikekg la ukwa nar ti mol?” Ari wa Son wa akalmpe la, “Ake kupm melnum okwripm a kipm la pa, kalpis.”
JOH 1:22 Atom wa tu wa asentel la, “Ti kitn mla? Kitn la kitn alkitn ti riworwor niko ri, eng mpa men wa iye yangkipm ti kinar kai kaino niki tu a pikekg ukwawo nar kul no ti.”
JOH 1:23 Ari kil akalmpe la, “Kupm ti ok ur a okok la yikakatnen itna wrik mpang kalpmlel ti. Kol Aisaia melnum okwripm a Maur Wailen pikekg la ep la ok ur kolpa ikga la kolkil lala, 'Wailen ikga nar, ti kipm numprampen ya pa ik riworwor!' Ti kupm ti am ok pake.”
JOH 1:24 Tu melnum tiur a tu melnum wailen wailen ukwa nar kul no pa, tu pa tu melnum a arpmen yangkipm yiprokgen a Moses,
JOH 1:25 atom tu pa asentel la, “Kol kitn la la kitn ake Krais, aki Elaisa aki melnum okwripm a Maur Wailen la ukwa nar ep pa, ti wa antokg kolai atom wa kitn kaluk tu wrong kin a kipman pa?”
JOH 1:26 Ari Son kil akalmpe la, “Aklale, kupm ti kaluken ak u ti kolti, pake melnum ur antiwepm itna ti a kipm ake ariwe la kil melnum wailen ur.
JOH 1:27 Melnum a ikga kul kutnukg yirokg a kupm ti, kil pa melnum nang wailen, a kupm ti nang kalpisen a ake antiwe mpa kupm inelkgentel ampei a kil ak angkuten nepm palk a kil arpme pa.”
JOH 1:28 Kweikwei wrongkwail pa palng itna wrik Petani itna u kop wompel a Sotan, wrik a Son kaluk kaluk tu wrong kin a kipman atnewe pa.
JOH 1:29 Okg or kong ti pa, Son kil kai oklala naki tu wrong kin kipman pa itna pa, kil ikgkai ari Sisas pa angkom wli la kulntel, atom kil lanaki tu pa la, “Kipm ri, pa Manto Walkg Malkgu War a Maur Wailen ikga ik ungkwan nikgwalpm paipm a itna kanokg ti.
JOH 1:30 Kil melnum a pikekg kupm lanakepm ep lala, 'Melnum a ikga palng kul kutnukg kupm ti pa, kil pa nang wailen angen kupm ti. Eng ntei, kil pa pikekg rpma ak klaingkil u ak ai, a kupm ti pa man rakuwopm pikekg ketn ti.'
JOH 1:31 Kupm pikekg ariwe kil worwor, pake kupm ake pikekg ariwe la kil melnum wailen ur kolpa. Pake kupm ari pa atom kupm kul kalukepm ak u ti itna ti eng mpa kipm Isrel wrong kin kipman a Maur Wailen ti uwi riwe la pa melnum am pake.”
JOH 1:32 Atom Son kil laron kuina ur a pikekg kil ari pa lanaki tu pa la, “Kupm alkupm pikekg ari Maur Wor angkaino Anong Wor a Maur Wailen ai nar kolen wel punum pa rpma melnum pa.
JOH 1:33 Kol kupm ti pa kupm pikekg ake wa ariwe la melnum pa kil melnum wailen ur kolpa, pake melnum a ukwawopm atom kupm kalukepm ak u ti pa, kil pikekg lanakopm la, 'Kitn ri Maur Wor akupmen pa nar rpmi melnum ur pa, pa pati la am melnum pake, melnum a ikga kuluk tu ik Maur Wor akupmen pake.'
JOH 1:34 Atom yangkipm pa aklale. Kupm ari a palng aklale kai melnum pa kolpa atom kupm lanakepm la melnum pa am Warim Kipman a Maur Wailen pake.”
JOH 1:35 Okg or kong ti pa, Son wa wrekg anti watnom wekg ur alkilen a kil aroaro wonel pa kai itna wrik wrik pa anti ur.
JOH 1:36 Kil ari Sisas pa angkom or kai ai, atom kil lanaki tuwekg pa la, “Kipmekg ri, pa Manto Walkg Malkgu War a Maur Wailen ingkai angkom or kai ai!”
JOH 1:37 Watnom wekg a Son aroaro wonel pa atning a kil la kolpa, atom tuwekg kai katnun Sisas.
JOH 1:38 Sisas kil plelng ariwen ari tuwekg katnuntel atom kil asenten la, “Kipmekg a kai or kolai?” Ari tuwekg akalmpe la, “Rapi, kitn ti rpma kai a i?” Yiprokgen a Rapi pa pati la melnum a aro wonel tu melnum.
JOH 1:39 Kil lanaken la, “Ti kipmekg kul o, eng mpa minto kai eng kipmekg ri wrik a kupm arpme ai!” Atom tuwekg kai ari wan a kil arpme ai ak nungkurikg kwikwai pa antiwel rpma pa, kaingkai kai mining kwawen ai pipa tuwekg kai.
JOH 1:40 Melnum wris ur a tuwekg wet atning a Son la pa atom kil kai katnun Sisas pa Antru, paipmen a Saimon Pita.
JOH 1:41 Tuwekg atnuurng Sisas pa kul pa, Antru pa kil wrekg atatu kai akor wailen alkil Saimon pa ep, kolpa kai ansilel kolti a kil lanakel la, “Mentekg ari Mesaya, melnum a Maur Wailen pikekg yapon la ikga nar ikrmpen mentepm wrong kin kipman pa ise.”
JOH 1:42 Kil lanakel kolpa plalng pipa, kil ak awiyel kai eng Sisas. Sisas ariwel kolti atom kil lanakel la, “Kitn pa Saimon, warim a Son. Tu ikga ukweweitn la Sipas.” Nang Sipas a Sisas alilel pa akwe ak ok Krik pa la Pita. Yiprokgen a nang pa pati la wes.
JOH 1:43 Okg or kong pa Sisas la kil a kaino anong kanokg Kalili. Kil kaino pa, kil ari melnum ur nang akilen pa Pilip, atom kil lanakel la, “Kitn kul kutnuntopm!”
JOH 1:44 Anong yiprokg a Pilip pa Petsaita pake. Kil anong wris a Antru ekg Pita.
JOH 1:45 Pilip kil kai ansil Nataniel pa atom kil lanakel la, “Melnum a pikekg Moses nira yangkipm titnongket ak la ela wrkapm alkil pa, wa tu melnum okwripm nira akla la ikga kil nar ikrmpento pa, am minto ansil ise. Pa Sisas a Nasaret, warim kipman a Sosep.”
JOH 1:46 Ari wa Nataniel wa arkolng la, “Yo! Am kolpake! Kwei ur wor ur mpa wa palng kai kinar Nasaret pake?” Ari Pilip wa akalmpe la, “Ei, ti kitn kul eng ekg kai eng kitn ri!” Atom Nataniel antiwel kai.
JOH 1:47 Sisas ari Nataniel pa anti Pilip pa wli pa, kil almpyapmel Nataniel pa la, “Ei, melnum wor yek wris anangket a Isrel a katnun ya a Maur Wailen pa am tike, kil ake melnum a kansil pa.”
JOH 1:48 Ari Nataniel wrekg paipm akalmpe la, “Kitn ariwe kupm ti or kolai?” Ari Sisas akalmpe la, “Ti ak wang a kitn rpmangkai tikga yiprokg ak angkom kupuket pa, pa kupm ariweitn ise. A Pilip wa kai ariweitn lakati kupm ti nakeitn pa, pa katnukg, a kupm ti ariweitn ep ise.”
JOH 1:49 Atom Nataniel la, “Rapi, ti kupm ariwe pake, la kitn pa Warim Kipman a Maur Wailen a wa kitn melnum tukgunakg itna ep a ikgalen Isrel.”
JOH 1:50 Atom Sisas lanakel la, “Ti kitn ukipma atnen a wet kupm lanakeitn a kupm ariweitn ak wang a kitn rpma kai yo tikga yiprokg pake? Pa kweikwei waiketn, kutnukg pa or pa kai pa ikga kitn ri kweikwei wail manten manten paipm angen pa!”
JOH 1:51 Wa Sisas wa lanaki tunteng pa lala, “Kupm lanakepm aklale wrisen, la kutnukg pa ikga kipmteng ri kitnong ti ikga rakol atom tu maur akwapel a Maur Wailen pa ikga narno nepm itnen Warim Kipman a Melnum ti.”
JOH 2:1 Sisas alekgen tu watnom alkil a kil aroaro wonel pa tu rka pa wang wekg pa kai plalng, okg or kong pa, tu a pa la kaino rki wris nimpokgen tu a antokg okipma al atnen kin a kipman a la uwi tita kaino anong Kana a anong kanokg Kalili. Ak wang pa man a Sisas pa kil ep kaino antiwen rpma ise.
JOH 2:2 Tu pikekg akwen Sisas nampokgen tu watnom alkilen pa la tu ntiwen rpmi ik wang pa yat.
JOH 2:3 Atom tu al u wain okipma kweikwei pa rpma kolpa kai pa, u wain pa am plalng ise. Atom man a Sisas pa ari pa, kil lanaki Sisas pa la, “U wain am plalng ise.”
JOH 2:4 Ari Sisas akalmpe naki man alkil pa la, “Mamam, kitn lanakopm la kol a kupm ntokg kwei ur pake, wang alkupmen pa a pa.”
JOH 2:5 Man a Sisas wa kai naki tu melnum akwapel a angklin tu pa la, “Warim kipman akupmen la lanikepm kuina ur la kipm ntokg pa, pa kipm itning ntokg kolti!”
JOH 2:6 Itna wrik a tu arke pa, kuntuk mang wail wampwomis wampwompwris pa rpma. Pa kuntuk a men Suta arpmen u eng ak klak klak nepm wam a kweikwei, pa ya almenen a men katnun katnun eng palng kukula wriwen wor itna wulmpa a Maur Wailen. U wampeng wampwomis wampwompwraur aki wampwam aki wampwam karpo tuwek pa (80-130 lita) antiwe alung elng kinar kuntuk mang wris pa mpa no pik.
JOH 2:7 Sisas lanaki tu melnum akwapel pa la, “Kipm inong u pa wli lung kinar kuntuk mang pa no pik.” Tu atning kolpa atom tu anong u pa alung kinar kuntuk mang pa kulno pik.
JOH 2:8 Atom kil lanaken la, “Kipm unong u tiur a rka kuntuk mang ti ngkiten iye kai eng melnum yan a ngkaten ok okipma pa.” Atom tu ngkaten u pa aye kai.
JOH 2:9 Atom melnum yan a ngkaten ok okipma wail pa al u pa akwiyen, ari u pa am wet palng u wain ise, pake kil ake ariwe la u pa wet palng or kolai? Pake tu melnum a anong u pa aye kaino pa, tu pa ariwe pake. Atom kil akwe melnum kipman a awi kin weten pa kul,
JOH 2:10 a kil lanakel la, “Mla ur a ngkaten ok okipma kol ti pa, kil ampreing ampreing u wain titnongket wor pa uk uk tu pa ep ep. Tu al kolpa kai atom tu eng a kai titno pake, a pa kil ampreing u wain a ake titnongket wor pa alken tu al katnukg. Pake kitn ti lam u wain wor wrisen ti rpma kai a i atom wa kitn awi aye wli ti!”
JOH 2:11 Sisas ake pikekg elng kla ur ak plan titnongket a Yan alkil angkai ai kulngkul, kil antokg itna anong Kana a anong kanokg Kalili tike. Pa kil plan kil alkil angko wunong, atom tu wrong kin kipman ari titnongket a nang wailen alkilen pa. Atom tu watnom alkilen a kil aroaro wonel pa ari pa, atom tu ukipma kil pa.
JOH 2:12 Sisas nampokgen tu wusok wusok, a man alkilen pa wa tu watnom a kil aroaro wonel pa, tu atnuurng anong Kana pa a tu kai kaino rka kaino anong Kaperneam. Tu kai rka pa wang aripm ur a pa.
JOH 2:13 Pa wreren wang wail a men Suta la wli tukwem rki wris ikwonilmpen a pikekg Maur Wailen akawi tu amenen takwleikgen tu Isip pa aye kul wor. Wang wail pa kul wrer, atom Sisas kil angkaino anong kanokg a Kalili pa nar anong kanokg a Sutia ti kul no anong wail Serusalem.
JOH 2:14 Kil no palng Serusalem ai pipa, kil kai kawor yipmingki wunen a yalming a Maur Wailen pa, kil ari tu melnum a aye manto nepm watin, a manto walkg malkgu a wel punum aye wli itna eng mpa tu wrong rmpen iye kai uk tu ipma krakgen a al wor uk uk Maur Wailen. A wa tu alntu a ak ak marpm a yalming awiye marpm a tu ak armpen armpen kweikwei kawor en ai pa rka.
JOH 2:15 Sisas awi ampei pa ak or ungkwan tu pa kimeket nampokgen manto nepm watin, a manto walkg malkgu takwleikgen wan yalming pa, a kil taipurng tipmakg a tu a akawiye tita marpm ok pa elng kai punprarng kai kanokg ai.
JOH 2:16 Kil akle ungkwan tu a ak wel punum awi marpm pa la, “Wrekg wrekg, ilmnon kweikwei alkipm ti plalng iye kai tukuleikgen o! Wa kipm antokg wan a Yan akupmen ti palng kolen la wan ur a armpen kweikwei a ak kweikwei awi marpm atne tuwa!”
JOH 2:17 Tu watnom a kil aroaro wonel pa atning ari pa, atom tu wonuwen yangkipm ur a nira ela wrkapm a Maur Wailen pa lala, “Kupm langkinen wan akitnen pa paipm wrisen, atom kupm la rki kaikuten eng la ntokg wan akitnen pa palng wor.”
JOH 2:18 Tu melnum wailen wailen a men Suta tu ari a Sisas ungkwan tu kolpa atom tu pa la, “Mla la atom kitn ungkwan tu pa kolpa? Kol kitn la kitn melnum a antiwe titnongket nang arke pa, ti kitn elng kla ur pa elngkitni ik planto nang wailen akitnen a kitn antiwe ntokg kweikwei kolpa.”
JOH 2:19 Ari Sisas akalmpe la, “Kipm tikale Wan Yalming a Maur Wailen tiwo! Ikga kupm wa le wan ti itni kiti kiti ik wang wraur kolti.”
JOH 2:20 Tu wailen wailen a men Suta akalmpe la, “Pikekg tu ngkat ale wan ti, pikekg ampenet, itna wringkwringen, wring kamel wekg tuwek wampwomis wampwompwris. Pake wa kitn wa la ngkit le wan ti ik wang wraur kolti!”
JOH 2:21 Pake yalming a Sisas kil la pa, pa kil la num a kil alkil ti.
JOH 2:22 Wa tu watnom a Sisas a kil aroaro wonel pa wa ake wa ariwe yangkipm pa, kolpa kulngkul, kul angko wang a Sisas amo plalng wa kil wrekg rpma, pa tu wonuwen yangkipm a kil la ti. Atom tu ukipma yangkipm a la ela wrkapm a Maur Wailen pa la, aklale wrisen. Yangkipm a kil pikekg la le wan pa, am palng aklale tike.
JOH 2:23 Sisas kil rpma anong wail Serusalem ak wang wail a men wli takwem rka akwonalmpen a pikekg Maur Wailen akawi tu amenen takwleikgen tu Isip pa aye kul wor. Tu wrongkwail kin a kipman pa tu ari kla a Sisas kil elngkitna ak plan titnongket a Maur Wailen pa. Tu ari pa atom tu ukipma Sisas.
JOH 2:24 Ari Sisas kil ake planten kil alkil ti kimek kimek, eng ntei, kil ariwe tu pa worwor.
JOH 2:25 Kil alkil ariwe nol nikgwalpm a melnum pa worwor, ti akentiwe mpa melnum ur lanikel nol nikgwalpm a melnum pa.
JOH 3:1 Melnum ur pa nang alkilen pa Nikotimus. Kil melnum wris ur a tu melnum a arpmen yangkipm yiprokgen a Moses pa, wa kil mring man ur a tu mring man wail wail mapming a ikgalen men Suta ti.
JOH 3:2 Mining ur pa Nikotimus kil kai ari Sisas atom kil la, “Kitn melnum a kaling plan men, men ariwe la kitn pa melnum a kaling plan men, pikekg Maur Wailen ukwaweitn nar la irowonelo pa. Kol Maur Wailen ake rpma nampokgen melnum pa, kil ake antiwe elng kla ak plan titnongket a Maur Wailen pa kol a kitn antokg pa.”
JOH 3:3 Atom Sisas akalmpe la, “Kupm lanakeitn aklale wrisen. Kol Maur Wailen ntokg melnum ur kil palng weten kol warim walmpopmet a man raku weten pa, mpa kil ntiwe kawor yipmingki wunen a Maur Wailen itna wailen ikgalen pa. Kol kalpis pa, mpa kalpis.”
JOH 3:4 Ari Nikotimus pa lala, “Iss! Ake kolpa! Kin nangkwor a mel nangkwor pa mpa wa palng weten pa la kolai? Aki antiwe kin nangkwor a mel nangkwor pa mpa wa kawor ipma a man pa, atom kil wa rakuwel nti ur?”
JOH 3:5 Ari Sisas akalmpe la, “Kupm lanakeitn aklale la, kol Maur Wor a Maur Wailen a u ti ake antokg melnum palng weten pa, melnum pa akentiwe mpa kawor yipmingki wunen a Maur Wailen itna wailen ikgalen pa.
JOH 3:6 Melnum a kanokg ti raku warim pa, kil raku melnum. Maur Wor a Maur Wailen raku warim pa, pa kol kil uk maur wor weten melnum atom kil antiwe katnun nol nikgwalpm a Maur Wailen.
JOH 3:7 Ampur kitn wrekg paipm eng yangkipm a wet kupm lanakeitn la, kipm mpa elngen Maur Wor a Maur Wailen ntokgtepm palng weten kol warim a man raku weten pa.
JOH 3:8 Kolen wripm a el pa kil el ak wasrongen alkil. Mentepm atning milpming alkil pake, ake mentepm ariwe la kil el a pa wli aki a ti kai pa, kalpis. Pati melnum a Maur Wor a Maur Wailen antokg palng weten pa am kolpake.”
JOH 3:9 Nikotimus wa asentel la, “Kitn la Maur Wor a Maur Wailen antokg melnum palng weten pa itna kolai?”
JOH 3:10 Ari Sisas akalmpe la, “Kitn pa melnum ariwe a Isrel a kaling plan tu, pake wa kitn akwekgel pa!
JOH 3:11 Kupm lanakeitn aklale wrisen, men laron kuina ur a men ariwe a pikekg men nungkulkg a wulmpa pa, ari ake wa kipm atopen awi yangkipm pa la yangkipm pa aklale pa.
JOH 3:12 Kupm laron kweikwei a itna kanokg ti, ari ake wa kipm ukipma katnun. Ti kol wa kupm laron nikepm kweikwei a itna kaino anong wor ai pa, pa mpa wa kipm wa ukipma kutnun la kolai?
JOH 3:13 Ake pikekg melnum ur kaino Anong Wor pa atom wa nar kanokg ti lakati nakepm pa, kalpis. Warim Kipman wris a Melnum pa kolti pikekg rpma kaino Anong Wor pa, atom kil ariwe kweikwei a itna kaino pa, atom kil nar lakati nakepm pa.
JOH 3:14 Pikekg Moses ngkat kweiur a kalingen a ari kolen ul pa, atom ak alm itna yo pa aye itna wrik wes ningkrapm kalpmilel pa, la tu melnum a ngkit ikg ikitnen ul pa, tu ake mpa imo, tu mpa rpmi. Ikg am wa tu ik irir kolpake. Tu ikga wa ngkit Warim Kipman a Melnum pa iye kaino kurkurng rki yo okgmangki kolpake.
JOH 3:15 Kolpa atom kol mla ur kil ukipma kutnun kil pa, kil mpa uwi yaprekg watin akilen atom kil ikga rpmi wor yongkyong.
JOH 3:16 Kolpa atnen Maur Wailen kil plan ipma wor wasrongen kipm wrongkwail kin a kipman a kanokg ti. Atom kil ukwa Warim Kipman yek wris anangket alkil pa nar akarmpentepm, eng ikgake melnum wris ur a ukipma kil pa kai paipm, kalpis. Kil ikga uwi yaprekg watin eng rpmi wor yongkyong.
JOH 3:17 Yiprokgen a Maur Wailen kil ukwa Warim Kipman alkilen pa nar kanokg ti eng ake la ntokg yangkipm nimpikgen kipm wrong kin a kipman a kanokg ti, atom la kipm ikga uwi wleket. Kil ukwawel nar eng la ik uwiyepm iye yaper kai eng kil alkil.
JOH 3:18 Mla ur kil ukipma Warim Kipman pa, ikgake Maur Wailen ntokg yangkipm nimpokgen kil pa. Mla ur kil ake ukipma kil pa, kil am itna antokg yangkipm ise. Atom yangkipm pa la kolkil: kil ake ukipma Warim Kipman yek wris anangket a Maur Wailen pa ti kil ikga uwi wleket.
JOH 3:19 Tu melnum a kolpa pa Maur Wailen pikekg la ise, la tu ikga uwi wleket itnen yiprokgen kil: Warim Kipman pa kil wakg a pikekg nar kanokg ti ise, pake wrong kin a kipman ti antokg paipmpaipm kolpa atom tu plan ipma wor wasrongen miningket pa, a tu karken wakg klalen ti.
JOH 3:20 Mla ur a antokg paipmpaipm pa awi wrongmanto lan klalen ti a kil karken a kul kai itna kai klalen pa. Kil karken mpa klalen pa ak alen paipmpaipm a kil pa kai angko wunong.
JOH 3:21 Pake mla ur a katnun nikgwalpm ute aklale pa kil kai itna kai klalen. Pake klalen pa plan angko wunong la kwap a kil ak pa la pa kil katnun nikgwalpm a Maur Wailen.”
JOH 3:22 Sisas nampokgen tu watnom a kil aroaro wonel pa tu rka anong wail Serusalem pa plalng pa, tu atnuurng anong wail pa tu kai rka tatu wrik mpang a anong kanokg Sutia pa. Tu rka pa wang watin ur, atom kil kaluk tu wrong kin a kipman.
JOH 3:23 Ak wang pa Son a kaluk tu pa wa ak ak kwap kaluk tu wrong kolpa itna kaino wrik Ainon a itna wreren anong Salim, pa wrik a u watipmen arke. Tu wrong kin a kipman wli wli la kil kuluken atom kil kaluken kolpa itna.
JOH 3:24 Pa la wang a pikekg Son kil akwap kaluk tu kolpa itna, a wang a pikekg tu arkulel aye kai rpma wan tipmining pa, a pa.
JOH 3:25 Atom wang ur pa, tu watnom a Son a kil aroaro wonel nampokgen melnum ur a mentepm almentepm Suta pa, tu alilakel tita ya a karkuk eng mpa palng kukula wor itni wulmpa a Maur Wailen.
JOH 3:26 Tu watnom a Son pa tu ipma kalkut, atom tu kai ariwel a lanakel la, “Melnum a aroaro wonel men, kitn wonarpme melnum a pikekg antiweitn itna kai u kop wompel Sotan pa? Pikekg kitn laron nako aktitnongketel la, kil pa melnum a pikekg Maur Wailen la ukwa kil nar pa, kil itna akwap kaluk tu kol kitn tike. Atom tu kimeket kaingkai eng kil kaluken.”
JOH 3:27 Ari Son akalmpe la, “Kol Maur Wailen ake yapon melnum eng kwap ur pa, kil ake antiwe akwap pa.
JOH 3:28 Kipm alkipm pikekg atning a kupm laron kupm alkupm pa la, kupm ake Krais, melnum a pikekg Maur Wailen la ukwa nar ik rmpen mentepm wrong kin kipman pa, kalpis. Kupm kil pikekg Maur Wailen yapontopm la kupm numprampen ya elng itna ep eng Krais pa.”
JOH 3:29 Son wa lanaki tu watnom a kil aroaro wonel pa la kolpa kai, “Sisas pa kol kipman a la kul uwi kin pa iye, a kupm ti pa kol melnum wor alkil a numprampen ep eng kil kul uwi kin pa iye pa. Kipman a la uwi kin pa iye pa, kin pa am a kipman pake. Pake melnum wor alkil a numprampen ep pa, kil itning ok kromeng a kipman awi kil pa aye pa, pa kil atopen paipm eng atning ok kromeng a kipman pa. Eng ntei, kwap a kil numprampen ep pa angko oken ise. Am kupm ti kolpa yat pake: kipm kul lanakopm yangkipm ti la tu wailet kai eng Sisas pa, atopen akupmen pa kul plalng kolpake.
JOH 3:30 Kolpa ti Sisas pa palng melnum wailen o! A rku kupm ti kinar o! Kolpa ute wor pake. Pa pikekg Maur Wailen akwonalmpen ep ak ai la ikga palng kolpake!
JOH 3:31 Melnum a angkaino kwa pa nar pa, kil pa melnum itna ep angen kweikwei wrongkwail. Melnum a kanokg ti pa pati, am a kanokg tike. Melnum a kanokg ti kil la kweikwei a kanokg ti kolti. A melnum a pikekg angkaino Anong Wor pa nar pa,
JOH 3:32 kil laron kuina ur a pikekg kil atning a ari pa aktitnongketel la pa aklale. Ari ake wa mla ur atopen awi la yangkipm a kil la pa aklale pa.
JOH 3:33 Mla ur a atopen awi yangkipm a pikekg melnum a angkaino kitnong nar laron pa la aklale pa, kil pa ak titnongketel la kuina ur a Maur Wailen kil la pa, pa kil la ute aklale wrisen.
JOH 3:34 Eng ntei, melnum a pikekg Maur Wailen ukwa nar pa, kil lakati nikgwalpm a oklala a Maur Wailen la pa. Kil antiwe antokg kolpa atnen a Maur Wailen ake alkel Maur Wor pa alung kol u pa waiketn a waiketn pa, kalpis, kil alung akwrisel kimeket kolti.
JOH 3:35 Yan kil plan ipma wor wasrongen Warim Kipman alkilen pa, atom kil elng kweikwei wrongkwail ti kai wam akilen la kil ikglen.
JOH 3:36 Melnum a kil ukipma Warim Kipman pa, pa kil awi yaprekg watin atom rpma wor yongkyong. Pake melnum a talpulng ok a Warim Kipman la pa, melnum pa ake awi yaprekg watin eng kil rpma wor yongkyong pa. Maur Wailen ipma wakget eng melnum pa kolpa rpma.”
JOH 4:1 Wailen Sisas kil atning a tu lakati la tu melnum a arpmen yangkipm yiprokgen a Moses atning a kil ti arkolng melnum wailet ai kul katnuntel, atom kil arowonelen, a kil kaluk tu wailet angen Son ai.
JOH 4:2 Ake Sisas kil alkil ti kaluk tu pa, kalpis. Pa tu watnom a kil aroaro wonel pa ak pake.
JOH 4:3 Sisas atning a tu melnum a arpmen yangkipm yiprokgen a Moses pa atning ari kil ti kolpa atom kil la itnuurng anong kanokg Sutia pa a wa la yaper kaino anong kanokg Kalili.
JOH 4:4 Ya a kaino Kalili pa or anong kanokg Samaria pa kaino, atom kil mpa lekgen tu watnom a kil aroaro wonel pa or ya Samaria pa kaino.
JOH 4:5 Tu or pa kaino palng kaino anong ur a Samaria a tu namput la Sikar. Anong pa ela wreren kanokg a pikekg Sekop uk warim kipman alkilen Sosep, tuwekg yoampei amenen.
JOH 4:6 Angko wrik pa, u yaur a Sekop akwle pa rka. Tu angkom kaino angko u yaur pa, takgni no pirng. Takgni alel a uwaketel a nepm amowel paipm atom kil rpma pa eng yapm.
JOH 4:7 Kil rpma ari kin ur a Samaria pa wli anong u. Atom Sisas kil lanakel la, “Inong u ur pa iye kul eng kupm il!”
JOH 4:8 Ak wang a kin pa wli anong u pa, Sisas kil alkil wris rpma. Tu watnom alkil pa tu kai armpen okipma kai anong pa.
JOH 4:9 Kin Samaria pa atning yangkipm a Sisas la pa atom kil wrekg paipm akalmpe la, “Kitn pa a Suta, a kupm ti pa kin a Samaria, ti wa kitn asentopm la kupm lkeitn u pa il eng itna kolai?” Men Suta pa ake kai orwris anti tu Samaria ti pa, men itna man man, kolpa atom ari kin Samaria pikekg wrekg paipm eng Sisas antiwel oklala pa.
JOH 4:10 Atom Sisas akalmpe la, “Kitn ake ariwe kweikwei wor a Maur Wailen la lkeitn kalpmlel pa. Kitn ake ariwe kupm a wet asenteitn la, kitn lkopm u ti il pa. Kol wet kitn riwe pa, kol a kitn pa wa isen kupm ti pa kol a kupm ti lkeitn u a rka yongkyong ti il.”
JOH 4:11 Ari kin Samaria pa la, “Melnum wailen, u pa rka angkinar watinet paipm ai. Ti kol a wet kitn iye numong ur a angklewe ampei watin pa atom ngkli elng kinar ik inong u pa. Kol kalpis pa, mpa kitn kai inong u a rka yongkyong pa kai a i?
JOH 4:12 Kitn pa akwonalmpen la kitn pa melnum wail angen yan Sekop yoampei amenen pake? Kil pikekg akwle u ti eng alkilen eng anong al ak antokg kweikwei, a anong uk manto nepm watin a manto walkg malkgu al al. Atom wa elng rka kolpa kulngkul, kul men ti anong anong tike.”
JOH 4:13 Ari Sisas akalmpe la, “Melnum a al al u ti pa, kil ikga wa u waketel ntiur.
JOH 4:14 Pake melnum la il u a kupm alkel pa, kil ikgake u waketel ntiur, kalpis. U a kupm alkel pa, pa palng kawor ipma akilen pa kul no kol u yaur a elng kul no antokg melnum pa rpma yongkyong.”
JOH 4:15 Kin a Samaria pa asentel la, “Melnum Wailen, pati kitn lkopm u pa eng kupm il, eng kupm ikgake perper kul inong u ti iye kai eng il eng kupm ikgake u waketopm pa.”
JOH 4:16 Atom Sisas lanakel la, “Ti kitn kai ikyakur kipman alkitn pa, atom wa kipmekg wa kul.”
JOH 4:17 Kin Samaria pa la, “Kupm ti kipman kalpisen.” Ari wa Sisas akalmpe la, “Ei, kitn la pa aklale, kitn kipman kalpisen pake.
JOH 4:18 Pikekg kitn awi kipman wampwomis. Wa kipman a kitn awi ti pa, ake kipman a kitn pa, pa kitn awi aye rpma kolti. Yangkipm a kitn la pa aklale wrisen.”
JOH 4:19 Kin pa la, “Melnum wailen, kupm ari la kitn pa melnum okwripm a Maur Wailen pake.
JOH 4:20 Tu wapyipmiri walyipmiri a men Samaria pa pikekg kapor kilko alein Maur Wailen, a antiwel oklala kolpa ak ai kulngkul, kul wa men ti am wa ak yat kolpake itna wrik nangen Kerisim ti ikg kinar ari kinar ai. Pake kipm Suta pa la, wrik a kapor kilko alein a anti Maur Wailen oklala itnawe pa itna kinar Serusalem ai. Ti kitn akwonalmpen wrik a i wor?”
JOH 4:21 Sisas lanakel la, “Kin, kitn ukipma yangkipm kil a kupm la lanikeitn kil: wangkur ikga palng a kipm ikgake kipor kilko ilein Yan ti itni kinar kinar wrik nangen Kerisim pa aki itni kinar kinar Serusalem pa kolti pa. Kipm ikga kipor kilko ileinsel itni yela tutu palpa.
JOH 4:22 Kipm Samaria pa kipm kapor kilko alein Yan Wailen, pake kipm ake ariwewel worwor. Pake kwap a Yan Wailen pikekg ak eng ak awi tu wrong kin a kipman ti aye yaper kai eng kil alkil ti pa, pikekg ngkaten ep itna men almen Suta tike. Kolpa atom men Suta ti pa men kapor kilko alein Yan Wailen a men ariwewel worwor.
JOH 4:23 Ikga ik wang a wet kupm lala ikga palng pa, tu melnum a wasrongen la kipor kilko ilein Yan Wailen pa ik ipma iklale pa, Maur Wor alkil ikga nar rpmi tu pa, atom ngklinsen eng tu itn a rpmi ikwap kitila nikgwalpm aklale a Yan Wailen pa. Atom tu ikga kipor kilko ilein Yan Wailen pa kolpa. Yan Wailen pa kil wasrongen la tu melnum pa kipor kilko ileinsel kolpake. Wang a ikga palng kolpa, am ngkaten ak wang ti aye kai tike.
JOH 4:24 Maur Wailen pa kil Maur. Kolpa ti kol melnum ur la kipor kilko ileinsel pa, kil mpa elng Maur Wor pa plantel Maur Wailen pa la kil am aklale kolpake, wa elng Maur Wor pa lokel eng mpa kil kipor kilko ilein Maur Wailen pa iklale.”
JOH 4:25 Atom kin Samaria pa la, “Kupm ariwe la Mesaya kil ikga nar pa. Tu namput la Krais. Kil ikga nar kanokg ti pa, ikga kil laron kimek kimek kweikwei wrongkwail ti niko.”
JOH 4:26 Ari Sisas akalmpe la, “Am kupm tike. Kupm a antiweitn oklala tike.”
JOH 4:27 Tuwekg oklala kolpa itna ari tu watnom a Sisas aroaro wonel pa yaper angkai anong pa kul palng. Tu wrekg paipm eng tu ari Sisas pa anti kin Samaria pa oklala. Ari ake tu ur asentel la, kil wasrongen kuina wai, aki kil antiwel oklala eng kuina wai.
JOH 4:28 Atom kil elng u kuntuken pa rpma pa, atom kil pirng atatu ruyapm kai lakati naki tu kai anong ai, kil lanaken la,
JOH 4:29 “Kipm pa, kipm kul eng mentepm kai ri melnum ur a kil lanakopm kweikwei wrongkwail ti pikekg kupm antokg pa. Pa mpam Krais pa ur pake?”
JOH 4:30 Tu atning a kil la kolpa atom tu atnuurng anong pa a tu kaingkai eng Sisas.
JOH 4:31 Kin pa atnuurng kai pa, tu watnom a Sisas pa lanakel la, “Melnum a aroaro wonel men, kitn il okipma wet men kai armpen aye wli ti!”
JOH 4:32 Ari Sisas akalmpe la, “Okipma a kupm al pa rmpa pa, pake kipm ti ake ariwe.”
JOH 4:33 Atom wa tu watnom alkilen pa anel asen tita la, “Kil ti wet melnum ur wli alkel okipma ur aki?”
JOH 4:34 Sisas naken la, “Okipma akupmen pa la kupm kitila nikgwalpm a kil a pikekg ukwawopm nar pa, a wa ikwap akilen pa kai iro yiprokg.
JOH 4:35 Kipm la kolpa la, 'Kainil wikgwikg pa kai plalng pa, wang a angket tuwai pake.' Ari kupm ti la kolkil la, kipm ri wring pa kaino ware a kinar kwak pa ri! Wring pa am tukgun kakir antiwe a angket tuwai tike.
JOH 4:36 Atom melnum a angket tuwai pa kil am awi kweikwei wor wor akalmpe kwap a kil ak pa itna tike. Kil takwem okipma kweikwei pa aye kawor itna wan okipma pa eng ikga rmpi wor yongkyong. Atom melnum a angket tuwai pa anti melnum a alin pa tuwekg atopen yatenen.
JOH 4:37 Kolpa ti yangkipm a kipm lala, 'Melnum ur pa alin a melnum ur manet pa angketuwai pa', pa am palng aklale tike.
JOH 4:38 Kupm ukwawepm la kipm kai ngket tuwai okipma a ake pikekg kipm ti aken kwap eng alin pa. Palpa kipm angket tuwai okipma wunongket a pikekg tu melnum manet ai aken kwap ai.”
JOH 4:39 Tu Samaria wailet a rka anong Sikar pa, tu ukipma Sisas. Eng ntei, tu wet atning a kin pa lakati naken Sisas pa la, “Melnum pa kil laron kweikwei wrongkwail a kupm antokg ak ai kulngkul kul ti.”
JOH 4:40 Tu Samaria atning kolpa, atom tu wrekg la kul eng Sisas. Tu kul palng pa tu la titnongket naki Sisas pa la kil kai ntiwen rpmi. Atom kil alekgen tu watnom a kil aroaro wonel pa kai antiwen rpma wang wekg.
JOH 4:41 Tu atning yangkipm a kil angkli pa, atom tu tiur manet pa wa ukipma kai aken tu wailet ai.
JOH 4:42 Atom tu lanaki kin pa lala, “Kitn pikekg laron Sisas pa nako, atom men ukipma kil. Pake ak wang ti men alpmen ti atning yangkipm a kil alkil ai la, atom men ariwe la kil pa melnum a ak awi mentepm wrong kin a kipman a rka kanokg ti aye yaper kai eng kil alkil pa am aklale pake.”
JOH 4:43 Sisas pa anti tu watnom alkilen pa rpma anong Sikar pa wang wekg pa plalng, tu wrekg a pa la wa ngkom kolpa kaino anong kanokg yiprokg alkilen Kalili ai.
JOH 4:44 Pikekg Sisas kil alkil ari ak wulmpa atom kil pikekg lala, “Melnum okwripm a Maur Wailen pa kil rpma anong kanokg a tu mamikg mamin mansan alkilen pa, tu alkilen pa tu arku nang akilen pa la kil ake melnum okwripm a Maur Wailen pa.”
JOH 4:45 Tu wa kaino kolpa kaino palng kaino anong kanokg yiprokg alkilen Kalili pa, tu wrong kin a kipman a rka pa tu atopentel a awiyel aye kai. Tu wailet pikekg kinar kai kaino anong wail Serusalem ak wang wail a atopen a pikekg Maur Wailen awi tu amenen pa aye kul wor takwleikgen tu Isip pa. Atom tu pa pikekg ari a Sisas kil antokg kweikwei titnongket tiur itna kinar kai kaino Serusalem ak wang wail pa, kolpa atom ari tu atopentel itna no Kalili tike.
JOH 4:46 Sisas atn kolpa or wrik kanokg a Kalili pa kolpa kai kaino palng kaino anong Kana. Pa anong a pikekg Sisas rpma, atom antokg u pa palng u wain atnewe pa. Ak wang pa warim kipman a mring man ur pa numpet paipm rmpa kai kaino anong Kaperneam. Mring man pa ikgalen tu melnum akwapel a melnum tukgunakg a ikgalen anong kanokg Kalili pa.
JOH 4:47 Mring man pa kil atning a tu la Sisas pa kil pikekg angkinar anong kanokg Sutia pa no anong kanokg Kalili ti, ti rpma no anong Kana a anong kanokg Kalili ti. Atom mring man pa angkaino Kaperneam pa nar kul anong Kana ti lanakel la kil ntiwel kai kaino Kaperneam pa ntokg warim kipman akilen a wreren eng a imo pa, palng wor.
JOH 4:48 Atom Sisas lanaki yan a warim numpet pa la, “Kol ake kipm ari kla a kupm elng itna ak plan titnongket a Maur Wailen, a kweikwei a kupm antokg a melnum wrekg paipm eng ari pa, kipm ake la ukipma.”
JOH 4:49 Atom mring man a melnum tukgunakg pa aye uwel Sisas pa la, “Melnum wailen, kitn kul eng mentekg kai kaino itatu ep pen, warim akupmen ti wreren eng a imo tike.”
JOH 4:50 Ari Sisas akalmpe la, “Kitn kai kaino o! Warim kipman akitnen ake mpa imo, mpa wor pa.” Atom mring man pa kil ukipma yangkipm a Sisas la kolpa, atom kil kai kaino.
JOH 4:51 Kil angkom kolpa kai kaino pa, tu melnum akwapel tiur alkil pa nar ansilel angko ya pa atom tu lanakel la, “Warim kipman akitnen pa ake amo, am numpworen ti wrekg rpma ise.”
JOH 4:52 Kil asenten la, “Kil palng wor ak wang kolai?” Ari tu akalmpe la, “Pikekgkil takgni no pirng plelng pa amo numpwakget a kil pa kupuk wor om.”
JOH 4:53 Yan pa atning kolpa, kil ariwe wang ketn a pikekg Sisas lanakel la, “Warim kitn ake mpa imo, mpa wrekg wor rpmi pa.” Kolpa atom kil alkil ti a tu kin a watnom alkil pa, a wa tu a antiwel rka wan wris pa tu ukipma Sisas pa.
JOH 4:54 Sisas pikekg atnuurng anong kanokg Sutia no anong kanokg Kalili ti pa, kil elng kla ur itna eng ak plan titnongket a Maur Wailen pa, wa kil yaper kinar, plalng, wa kil no ti pa, kil wa elng kla titnongket ur ti wa itna atom aken tita kil elng kla titnongket wekg alkil pa elng itna anong kanokg Kalili ti ise.
JOH 5:1 Sisas rpma anong kanokg Kalili kolpa kai angko wreren wang wail ur a men Suta wli wli takwem rka wris no anong wail Serusalem ti eng ngkat nang a Maur Wailen pa, atom Sisas la yaper nar kul no Serusalem ti.
JOH 5:2 Itna Serusalem ti u yaur wail a pikekg tu akwle pa rka. U yaur pa tu akwe ak ok Ipru pa la Petesta. U pa rka wreren yipmingki yayun a anong wail pa, tu namput la Yipmingki Yayun a Manto Walkg Malkgu pa. Wan okore wail wampwomis pa ela yamping a u yaur pa.
JOH 5:3 Tu melnum numpet watipmen pa anel okg klilklil rka wan okore wampwomis pa. Tu melnum a wulmpa tilmpisen, a nepm paipmen, a nepm wam plupmen a num traimingen pa. [Tu nungkwangen la mpa u yaur pa tiklas.
JOH 5:4 Maur akwapel a Wailen pa nar nar u yaur pa ak wangklawe atom ak ak klaingkel u yaur pa tiklas. Atom tu melnum numpet pa okg rka atning u a tiklas pa, tu aken tatu kai kinar u yaur pa. Melnum ur a kil kinar naren u pa ep pa, numpet kolai kolai a itna kil ti pa, kil mpa palng wor.]
JOH 5:5 Melnum wris ur a rmpa pa numpet rmpa wrik pa wring kamel wris tuwek wampwam yikakwomis yikakwompwraur.
JOH 5:6 Sisas kil wli palng rpma Serusalem, atom wang ur pa kil wrekg kai u yaur Petesta pa, pa kil ari melnum a kil rmpa kanokg pa. Kil ariwe la, pa kil yek pikekg numpet rmpa wang watin paipm. Atom kil asentel la, “Kitn la kitn a palng wor?”
JOH 5:7 Ari melnum numpet pa akalmpe la, “Wailen, kupm melnum kalpisen a angklinsopm aye kinar u yaur pa ak wang a u pa tiklas pa. Kupm la mpen kinar pa, tu melnum tiur ai akoporopm kinar ise.”
JOH 5:8 Atom Sisas lanakel la, “Wrekg ngkit wrik alkitn ti ngkom kai o!”
JOH 5:9 Melnum pa palng wor pinterngen kolti, kil wrekg ngkat wrik alkilen pa kolti, kil angkom kai. Sisas antokg melnum pa palng wor pa, pa ak wang wail a men rpma eng yapm.
JOH 5:10 Kolpa atom tu melnum wailen wailen a men Suta pa ari pa atom tu lanaki melnum a wuten Sisas antokg numpet a kil pa wor pa la, “Pa kitn kapor yangkipm titnongket a mentepmen eng kitn akwap a ngkat wrik ti aye ak wang wail a kitn kol a rpmi eng yapm ti.”
JOH 5:11 Ari kil akalmpe la, “Melnum a antokg numpet akupmen ti palng wor pa tilpopm la kupm wrekg ngkit wrik ti ngkom kai.”
JOH 5:12 Wa tu wa asentel la, “Melnum mla wuten lanakeitn la kitn wrekg ngkit wrik a kitn ti atom kitn iye kai pa?”
JOH 5:13 Ari melnum a palng numpworen pa kil ake ariwe melnum a antokg numpet a kil ti palng wor pa, eng ntei, Sisas pa am angkom ak aroaro wrong kuin pa kai ise, kil ake itna.
JOH 5:14 Wangkur ti pa Sisas ansil melnum pa angkawor yipmingki wunen a yalming a Maur Wailen pa, atom kil lanakel la, “Kitn itning, numpet a kitn ti am palng wor ise. Pikekg kitn antokg paipmpaipm pa atom a pawo! Wa kitn wa ntokg kolpa iye kai pa, kitn ikga uwi paipm klangkil pa.”
JOH 5:15 Melnum pa wrekg kolti yaper kai lanaki tu melnum wailen wailen a men Suta pa la, “Melnum a pikekg antokg numpet a kupm pa palng wor pa pati, pa Sisas.”
JOH 5:16 Sisas antokg numpet kweikwei ak wang wail a men rka eng yapm pa atom tu melnum wailen wailen pa tu ngkaten eng la orel a ungkwantel.
JOH 5:17 Sisas lanaken la, “Akangklei wang pa Yan akupmen am akwap kolpa kul pake. Wa kupm ti pa am wa akwap kolpake.”
JOH 5:18 Tu melnum wailen wailen a men Suta atning a Sisas la kolpa, atom tu ipma wakget nikgwalpm arkekgen akor ya la orel imo, la kil kapor yangkipm titnongket a wang wail a kol a rpmi eng yapm pa. Yiprokgen a tu la orel imo pa pati ake la kil kapor yangkipm titnongket a itna la ake mpa ikwap ik wang wail pa wris pa, wa kil wa akwe Maur Wailen pa la Yan alkilen. Kil la kolpa pa, kil ngkat kil alkil ti la kil ti irir kolen Maur Wailen ai.
JOH 5:19 Tu melnum wailen wailen a men Suta arki Sisas kolpa, atom Sisas akalmpe lanaken la, “Kupm lanakepm aklale wrisen, Warim Kipman ti ake antiwe antokg kwei ur ak nikgwalpm a kil alkil pa. Kil ari kuina ur a Yan pa antokg pa, atom kil antokg katila. Kuina ur a Yan pa antokg pa, Warim Kipman am wa antokg kolpake.
JOH 5:20 Yan Wailen pa kil wasrongen Warim Kipman alkilen pa. Atom kil plantel kweikwei wrongkwail a kil alkil antokg pa. Aklale, ti a kipm ari a kil antokg ti pa waiketn, ikga kil wa plantel kweikwei wail wail eng kil ntokg kitila pa, ti kipm ikga wa wrekg paipm eng ri pa.
JOH 5:21 Kol Yan kil la tu melnum a amo kaingkai ai pa wa wrekg rpmi pa, am wa kolpake, Warim Kipman mpa wa la melnum a amo pa wa wrekg rpmi. Kil alkil la mla a i wrekg rpmi pa, pa itna katila nikgwalpm a kil alkil ti.
JOH 5:22 Wa Yan pa ake wa akwap a rpma atning yangkipm a melnum ur pa, atom arila wor a paipm a kil antokg pa. Kil uk kwap pa kimeket kul Warim Kipman alkil tike.
JOH 5:23 Kil ak kolpa eng mpa tu a alupm aye kil Yan pa, mpa wa tu wa lupm iye Warim Kipman ti kol pake. Kol melnum ur ake alupm aye Warim Kipman ti pa, pa kil ake wa alupm aye Yan a pikekg ukwawel nar pa.
JOH 5:24 Kupm lanakepm aklale wrisen la, mla ur kil itning yangkipm akupmen atom ukipma kil a pikekg ukwawopm nar pa, kil mpa uwi yaprekg watin a antokg kil mpa rpmi wor yongkyong. Kil ikgake itni yangkipm wail pa. Kil am apo angen amo pa kul itna kul wompel kil ise, atom ikga rpma wor yongkyong.
JOH 5:25 Kupm lanakepm aklale wrisen, wang ur ikga palng, ti wang am tike, am ngkaten ak ti aye kai tike, atom tu melnum a katnun ya a ikga kai imo pa, tu mpa itning ok a Warim Kipman a Maur Wailen pa. Atom tu mla ur itning kutnun pa, tu mpa uwi yaprekg watin atom tu mpa rpmi wor yongkyong.
JOH 5:26 Yan kil alkil pa kil yiprokgen a uk yaprekg watin melnum atom kil rpma wor yongkyong. Am wa kil wa antokg Warim Kipman alkil pa wa palng yiprokgen a uk yaprekg watin melnum eng kil rpma wor yongkyong.
JOH 5:27 Yan pa naren Warim Kipman a Melnum ti, la kil rpmi itning yangkipm a tu melnum atom ri la wor a paipm a tu antokg pa.
JOH 5:28 Ampur kipm wrekg paipm eng pa, eng ntei, wang ikga palng eng tu melnum kimeket a amo kaingkai pa tu ikga itning ok kromeng alkilen pa pipa, tu ikga wrekg wrekg i kirkap pa.
JOH 5:29 Tu melnum a pikekg antokg nikgwalpm wor wor kolpa kai pa, tu ti ikga wrekg rki wor yongkyong. A tu melnum a pikekg antokg nikgwalpm paipm kolpa kai pa, tu pa ikga wrekg itni yangkipm wail atom uwi wleket ikilmpe paipm a tu antokg pa.
JOH 5:30 Kupm ake antiwe antokg kweiur ak kupm alkupm ti pa, kalpis. Kupm rpma atning kweikwei a tu melnum antokg pa, atom kupm ari la tu antokg wor aki tu antokg paipm eng mpa ikilmpe kitila pa. Pa kupm ak katila kol a melnum a ukwawopm nar la pa. Kupm ake ari la katila wasrongen a kupm alkupm ti pa, kupm ari la katila wasrongen a melnum a ukwawopm nar pa kolti, kolpa atom kupm ak ute wor.”
JOH 5:31 Wa Sisas la kolpa kai la, “Kol kupm alkupm wris ti kolti iktitnongketel yangkipm a kupm alkupm ti nikepm la pikekg Maur Wailen ukwawopm nar ti pipa, pa ake yangkipm kaikut antiwe mpa ik titnongketel yangkipm pa la pa aklale pa, kalpis.
JOH 5:32 Pake melnum ur manet a ariwe kupm ti pa rpma, kil Maur Wailen Yan akupmen, atom kil pa wa laron kupm ti nakepm la pa aklale. A kupm ariwe la, yangkipm a kil laron kupm pa aklale.
JOH 5:33 Wa kipm ti pa, kipm pikekg ukwa tu melnum tiur a awi ok akipmen pa kai eng Son a kaluko, atom Son kil wa laron kupm ti ute aklale.
JOH 5:34 Pake kupm ake rpma ak yangkipm a melnum ti laron kupm ti pa aktitnongketel la kupm mla pa. Palpa kupm ngkat wonelepm kolti eng la kipm ukipma yangkipm a pikekg Son laron kupm ti, eng mpa Maur Wailen ikuwiyepm iye yaper kul eng kil alkil.
JOH 5:35 Son pa kolen wakg a naruk wail alen yela. Kipm pikekg atopen wakg akilen pa itna wang waiketn kolti kai plalng.
JOH 5:36 Pake kupm antiwe kweiur manet a laron kupm ti ak titnongketel yangkipm a kupm ti la kupm ti mla pa: pa kwap a pikekg Yan Wailen kil alkopm pa la kupm ik kai iro yiprokg. Pa titnongket kalkut klangkil a pikekg Son laron kupm ti ep pa. Ti kwap wrongkwail a kupm ak yela pa plantepm angko wunong aktitnongketel la, kupm ti pa pikekg Yan Wailen pa ukwawopm nar pake.
JOH 5:37 Wa Yan Wailen a ukwawopm nar pa kil wa lakati kupm ti aktitnongketel la pa aklale. A wa kipm ake wa atning oklala akilen pa aki ari ikgokg akilen pa, kalpis.
JOH 5:38 Wa ake kipm arkul yangkipm a akilen pa katnun kolpa itna. Eng ntei, kipm ake ukipma kupm ti la kil ti ukwawopm nar pa.
JOH 5:39 Wa kipm wa rpma ari ari wrkapm ti angkleikg, akor akor la mpa kipm nsil ya a awi yaprekg watin a antokg melnum rpma wor yongkyong pa ela wrkapm pake? Am wrkapm pa la ak titnongketel la ya pa am kupm tike.
JOH 5:40 Pake kipm ake la kul eng kupm ti, eng uwi yaprekg watin a antokg melnum rpma wor yongkyong pa.
JOH 5:41 Kupm ake ak ak kwap ti lala kipm melnum pa lupm iye ngkit nang akupmen ti pa.
JOH 5:42 Pake kupm ariwewepm pa, kipm ake alupm nikgwalpm a plan ipma wor wasrongen Maur Wailen pa.
JOH 5:43 Kupm awi ok a Yan alkupmen ai nar lanakepm yangkipm akilen, ari ake wa kipm atopen awi yangkipm a kupm laron nakepm pa. Pake melnum tiur ai wlintepm ak tu alntu pa, kipm wa atopen awi yangkipm a tu laron nakepm pa.
JOH 5:44 Wa kipm wasrongen la lupm iye ngkit nangkel tita, pake kipm ake wa antokg kuina ur wor eng mpa Maur Wailen kil alkil wris pa kolti ngkit nangkelepm a kiporngkepm yangkipm pa. Kipm ak kolpa ti, pa mpa wa kipm wa ukipma yangkipm a kupm la ti kolai, pa mpa akentiwe.
JOH 5:45 Ampur kipm akwonalmpen la kupm ti pa ikga rkiwepm itni Yan pa. Melnum a ikga rkiwepm pa, pa ikgam Moses pake. Kipm pa ukipma akwonalmpen la ikga Moses pa itni yirokgel ngklinsepm ntokg yangkipm pake. Ari kolpa ikga kalpis.
JOH 5:46 Moses pa am pikekg nira yangkipm ak la kupm tike. Kolpa ti kol kipm ukipma yangkipm a Moses la pa pati, kol am wa kipm ukipma yangkipm a kupm ti la yat tike.
JOH 5:47 Pake kol ake kipm ukipma aklale yangkipm a Moses nira ela wrkapm pa, pa mpa wa kipm ukipma yangkipm a kupm la ti!”
JOH 6:1 Sisas atnuurng Serusalem plalng pa, kil yaper kinar kai kaino anong kanokg Kalili, atom kil rpma pa pen. Wang ur ti pa kil alekgen tu watnom a kil aroaro wonel pa awi nim ukupuken pa angket ukupuk Kalili pa kai wompel ai. Nang wompel a ukupuk pa tu namput la Taiperias.
JOH 6:2 Tu wrong ak wail katnunten kai. Tu pikekg ari a Sisas kil antokg tu melnum numpet palng wor pa kolen kla a kil elngitna elngitna ak plan titnongket a Yan alkilen pa. Kolpa atom ari tu akwail katnunten kai.
JOH 6:3 Atom tu watnom a kil aroaro wonel pa tu antiwel kaino rpma kaino wrik laikge kaino nang ai.
JOH 6:4 Wang wail a men Suta wli wli takwem rka wris atopen atnen a pikekg Maur Wailen awi tu amenen pa aye kul wor takwlelkgen tu Isip pa am kul wreren tike.
JOH 6:5 Sisas ngkat ikg pa ari yela ari kil ari tu wrong akwail pa wli wli eng kil ti. Atom kil lanaki Pilip watnom wris ur a kil aroaro wonel pa la, “Mpa mentepm rmpen okipma wailet ur kai a i eng uk tu wrong pa il?”
JOH 6:6 Kil asen la ik ri ipma a kil ti kolti tuwa, kil alkil alupm nikgwalpm ariwe ur rpma mpa kil ntokg pa.
JOH 6:7 Pilip akalmpe la, “Oi, pa ampake antiwe! Kol mentepm ntiwe marpm wes tangkoren kamel wampwam pa, pa antiwe a ak awi okipma wailet pake, pa ampake ntiwe tu pa. Pa mpa kai praras kolti. Pa antiwe melnum yek aripm ur kolti.”
JOH 6:8 Ari wris ur a tu watnom alkil pa Antru, wailen a Saimon Pita pa lala,
JOH 6:9 “Ti warim kipman yek ur itna ti a aye nok tingklak wampwomis a yul tingklak wekg, ti ake antiwe mpa mpreing ik nirake wrong kin kipman wailet a itna ti.”
JOH 6:10 Atom Sisas lanaki tu watnom alkil pa la, “Laniki tu wrong kin kipman pa eng tu rpmi tutu kanokg pa eng tu il okipma pa!” Atom tu lanaken. Wrik pa mi anip wailet atnewe, atom tu arku mi pa rpma yela tatu pa. Tu melnum pa wailet paipm. Kol ngkleikg tu kipman ikalkil pa palng wailet paipm kamel kamel (5,000).
JOH 6:11 Atom Sisas awi nok tingklak pa aye itna, uk wor Maur Wailen, plalng pa, kapor uk tu watnom alkilen ampreing uk tu wrong kin a kipman a wet rpma pa al. Wa yul pa am wa kil ak katila kolpake. Tu al kolpa kaingkai, tu al nikgwor antiwe.
JOH 6:12 Tu al nikgwor antiwe plalng pa, Sisas lanaki tu watnom alkil pa la, “Kipm uwi okipma umpu umpu pa iye wli elngkitni wris eng ikga il! Itna kolpa mpa takote.”
JOH 6:13 Tu awi okipma umpu umpu wet tu al nikgwor atom angko itna pa awi alupm rkwa wail wampwam yikakwekg pa elngkirpma.
JOH 6:14 Tu wrong kin kipman pa tu ari kla titnongket a Sisas elngkitna ak plan titnongket a Maur Wailen pa, atom tu wrekg paipm lanaki tita la, “Yek ei, aklale wrisen! Melnum ti melnum ok wripm a pikekg Maur Wailen kil la ukwa nar kanokg ti am tike!”
JOH 6:15 Sisas pa kil ari la tu pa la kai ikyakurel iye wli tirpmingen la ngkitel palng melnum tukgunakg eng itni ep ikglen anong kanokg a men Suta ti. Kolpa atom kil atnuurng tu pa a kil alkil wris kaino nang ai.
JOH 6:16 Nungkurikg ti pa, tu watnom a Sisas pa tu atnuurng Sisas pa itna kaino wrik nangen ai, a tu yaper nar ukupuk pa.
JOH 6:17 Tu rpma pa nungkwangen Sisas pa ari am kai miningket tike, a Sisas pa ake wa narnten. Atom tu tipra kaino nim ukupuken pa angket ukupuk pa la kul anong Kaperneam.
JOH 6:18 Tu angket or ukupuk pa kul pa, wripm mringmring wail pa el titnongket antokg ukupuk pa ngkat tapor tiklas kai pa kai pa paipm wrisen.
JOH 6:19 Tu angket or ukupuk pa kul angko kuin (5-6 km) pa, tu ari Sisas pa angkom or u kwa pa kul yupute nim ukupuken pa, atom tu ngkark paipm.
JOH 6:20 Ari Sisas lanaken la, “Ampur kipm ngkark, am kupm tike.”
JOH 6:21 Tu atning a kil la kolpa, atom tu wasrongen la mpa kil kaino ntiwen rpmi, ari kalpis, pinterngen kolti tu am palng kul wrik a wet tu la mpa kul pa ise.
JOH 6:22 Tu wrong pa tu itna kai ukupuk wompel pa kolpa itna nungkwangen Sisas pa. Tu pikekg ari nim ukupuken wris ata kolti rka kai pa, wa tu wa ari Sisas pa pikekg ake wa anti tu watnom a kil aroaro wonel pa tipra kaino nim ukupuken pa kul, kalpis. Tu ari tu watnom alkil kolti pikekg tipra kaino pa kul. Okg or kong ti tu am nungkwangentel kolpa rka pake.
JOH 6:23 Ari nim ukupuken tiur a anong Taiperias pa kai rka werpm wreren wrik a pikekg Wailen kil uk wor Maur Wailen eng okipma atnewe atom tu al nikgwor antiwe pa.
JOH 6:24 Tu wrong kin kipman pa ari la Sisas nampokgen tu watnom alkil pa ake rka kai pa, atom tu wrekg kolti, awi nim ukupuken pa angket ukupuk pa kul akor Sisas itna anong Kaperneam ti.
JOH 6:25 Tu wrong pa anel akor Sisas pa itna kul ukupuk wompel ti kolpa kai pa, tu ansilel, atom tu asentel la, “Melnum a aroaro wonel men, kitn wet or kolai?”
JOH 6:26 Ari Sisas akalmpe la, “Kupm lanakepm aklale wrisen, ake kipm akor kupm ti eng kipm ari kla titnongket titnongket a kupm antokg ti, atom kipm awi ariwe kupm ti la kupm mla pa, kalpis. Kipm katnuntopm ti pa atnen a pikekg kipm al okipma ti wailet nikg wor.
JOH 6:27 Ampur kipm aken kwap okipma a ikga kai plalng pa. Kipm iken kwap okipma a ikgake kai plalng. Pa okipma a alkepm yaprekg watin a antokg kipm rpma wor yongkyong. Okipma pa am Warim Kipman A Melnum ti alkepm tike. Maur Wailen Yan akilen pa kil alkil pikekg elng kla akilen pa itna kil ti la mpa kil ik kolpake.”
JOH 6:28 Atom tu asentel la, “Mpa men ntokg kwap kuina eng mpa Maur Wailen uwi wor lawo pa?”
JOH 6:29 Ari Sisas akalmpe la, “Kwap a Maur Wailen awi wor lawepm pa pati kolpa: kipm ukipma kupm melnum a kil ukwawopm nar ti.”
JOH 6:30 Atom wa tu asentel la, “Mpa kitn ntokg kuina weten ik titnongket akitnen pa, eng mpa men ri la pa kla akitnen, mpa men ukipma yangkipm a wet kitn la la Maur Wailen pikekg ukwaweitn nar pa. Mpa kitn ntokg kuina eng men ri?
JOH 6:31 Tu wapyipmiri walyipmiri a mentepmen pikekg tu al okipma mana itna kinar wrik wes ningkrapm kalpmlel. Kol a pikekg nira ela Wrkapm a Maur Wailen pa ak la Moses pa la, 'Kil pikekg alken okipma a angkaino anong wor ai nar eng tu al.'”
JOH 6:32 Sisas akalmpenten la, “Kupm lanakepm aklale wrisen, ake pikekg Moses pa uk okipma a anong wor pa tu akipmen pa al pa, kalpis. Pa am Yan akupmen pa alkepm okipma wor aklale a anong wor tike.
JOH 6:33 Eng ntei, okipma a Maur Wailen uk ti pa, pa la melnum pikekg Maur Wailen ukwa angkaino anong wor pa nar, atom uk yaprekg watin kipm wrong kin a kipman a kanokg ti.”
JOH 6:34 Tu akalmpe la, “Melnum Wailen, wa ik ti kai pa am kitn lko okipma kolpake!”
JOH 6:35 Atom Sisas la prepmprepm kil alkil ti naken la, “Am kupm tike, kupm ti pa okipma a yaprekg watin a al eng rpma wor yongkyong. Melnum a kil kul eng kupm ti pa, kil ikgake nikgilmpel. A melnum a kil ukipma kupm ti pa, kil ikgake u waketel.
JOH 6:36 Pake kipm ti pa, kol wet kupm lanakepm pa, kipm ari titnongket a kupm ak pake, kipm ake wa ukipma.
JOH 6:37 Tu melnum a Yan kil alkopm pa, tu mpa kul eng kupm. A wa melnum a kul eng kupm ti pa, kupm ake mpa ungkwantel, mpa kalpis wrisen.
JOH 6:38 Kol ake kupm angkaino anong wor pa nar la ntokg kuina ur a kupm alkupm ti wasrongen pa. Kupm nar la ntokg kuina ur a melnum a ukwawopm nar pa wasrongen pake.
JOH 6:39 Kil a ukwawopm nar pa kil pa wasrongen la ikgake kupm utnuurng melnum yekwris ur a pikekg kil alkopm pa. Ikga kupm la atom tu ikga wrekg ik wang aimprek a wang ti kai plalng.
JOH 6:40 Kol nikgwalpm a Yan akupmen pa kil wasrongen la melnum a kil ari kupm Warim Kipman pa a ukipma kupm pa, kil pa awi yaprekg watin a Maur Wailen a antokg kil rpma wor yongkyong. Atom ikga kupm la, atom kil ikga wrekg ik wang aimprek a wang ti kai plalng.”
JOH 6:41 Ak wang a Sisas kil la, “Kupm ti pa okipma a angkaino anong wor ai nar”, pa tu melnum wailen wailen a men Suta pa atning kolpa, tu nikgwalpm paipm lawel watipmen
JOH 6:42 kolpa lala, “Palpa Sisas, warim kipman a Sosep, mansan a mentepm ariwe pa. Mpa wa kil wa la kil alkil ti la, kil pikekg angkaino anong wor ai nar?”
JOH 6:43 Ari Sisas akalmpenten la, “Elngen a kipm nikgwalpm paipm lawopm watipmen kolpa!
JOH 6:44 Akentiwe mpa melnum ur kul eng kupm ti ik nikgwalpm alkilen pa. Mpam Yan kil a pikekg ukwawopm nar pa or ipmawel pa, kil antiwe kul eng kupm ti. Atom ikga ik wang aimprek a wang ti kai plalng pa ikga kupm la atom kil wrekg.
JOH 6:45 Nira ela wrkapm a tu melnum okwripm pa la kolkil la, 'Maur Wailen pa kil ikga kiling plan tu wrongkwail kin a kipman pa.' Melnum a atning awi ariwe atom kil katnun Yan pa, pa kil kul eng kupm.
JOH 6:46 Ake melnum ur ari Yan pa, pa melnum a pikekg kil anti Maur Wailen pa rpma atom nar ti pa, kil wris pa ari Yan pake.
JOH 6:47 Kupm lanakepm aklale wrisen la, melnum a kil ukipma kupm pa, pa kil awi yaprekg watin a antokg kil rpma wor yongkyong.
JOH 6:48 Kupm ti pa okipma a yaprekg watin a al eng rpma wor yongkyong.
JOH 6:49 Tu wapyipmiri walyipmiri akipmen pikekg al okipma a tu namput la mana angkinar wrik wes ningkrapm kalpmlel pa. Ari ake wa tu rpma lantlan, tu am wa amo kaingkai ise.
JOH 6:50 Pake okipma a kupm la ti pa, pa okipma a angkaino anong wor ai nar, eng la tu melnum il pa, maur wor a tu pa ikgake imo.
JOH 6:51 Kupm ti pa okipma a rpma wor yongkyong a angkaino anong wor ai nar. Kol melnum ur il okipma kil pa, kil mpa uwi yaprekg watin a antokg kil rpma wor yongkyong. Okipma kil pa pati num akupmen a kupm uk tu wrong kin a kipman a kanokg ti eng mpa tu il eng rpmi wor yongkyong.”
JOH 6:52 Ari tu melnum wailen wailen a men Suta pa nikgwalpm paipm akle tita kolpa la, “Antokg kolai atom melnum ti la lko num a kil ti eng mentepm il ti?”
JOH 6:53 Sisas lanaken la, “Kupm lanakepm aklale wrisen la, kol ake kipm il num a walmpopm a Warim Kipman a Melnum ti pa, kipm ake antiwe mpa uwi yaprekg watin pa rpmi kawor ipma akipmen pa.
JOH 6:54 Melnum a al num a walmpopm akupmen pa, kil pa awi yaprekg watin a antokg kil rpma wor yongkyong. Wa ikga ik wang aimprek a wang ti kai plalng pa kupm ikga la, atom kil ikga wrekg rpmi.
JOH 6:55 Num akupmen ti pa, pa okipma aklale, a wa walmpopm akupmen ti pa, pa u aklale.
JOH 6:56 Melnum a kil al num a walmpopm akupmen ti pa, pa kil rpma kawor kupm ti, wa kupm rpma kawor kil pa.
JOH 6:57 Yan a ukwawopm nar pa kil Yan yiprokgen a uk yaprekg watin melnum atom kil rpma wor yongkyong. Atom kupm rpma yongkyong atnen a kupm awi yaprekg watin kai Yan ai. Am wa irir kolpa yat pake: melnum a kil al al kupm ti pa, kil wa rpma yongkyong atnen a kil awi yaprekg watin kul kupm ti.
JOH 6:58 Kupm kil okipma a angkaino anong wor ai nar. Tu walyipmiri wapyipmiri akipmen pikekg al okipma manet, kolpa atom ari ake wa tu rpma yongkyong, tu wa amo kaingkai. Pake melnum a al al okipma a angkaino anong wor ai nar ti pa, kil pa awi yaprekg watin atom kil rpma wor yongkyong.”
JOH 6:59 Sisas kil la yangkipm kil ak aro wonel tu itna wan a men atning atning yangkipm a Maur Wailen atnewe itna anong Kaperneam.
JOH 6:60 Tu melnum a katnun Sisas pa tu atning yangkipm a kil arowonelen pa, atom tu lanaki tita kolkil la, “Yangkipm pa wonet paipm ai, mpa mla itning pa?”
JOH 6:61 Sisas kil ariwe tu pa tu akor la yangkipm pa watipmen, atom kil lanaken la, “Yangkipm wet a kupm la pa antokg kipm eng a kirken a ukipma aki?
JOH 6:62 Ti ikga kipm wa ikwonilmpen kolai, kol kipm ri kupm Warim Kipman A Melnum ti kupm wa yaper kaino wrik wrik a pikekg kupm arpme ep pa?
JOH 6:63 Maur Wor a Maur Wailen pa kolti antiwe antokg melnum awi yaprekg watin atom kil rpma wor yongkyong. Pake titnongket a melnum ti pa ake antiwe antokg kwei ur. Yangkipm a kupm lanakepm ti pa, yangkipm a Maur Wor arpmen wa yangkipm a uk yaprekg watin melnum atom kil rpma wor yongkyong.
JOH 6:64 Pake tiur akipmen pa ake ukipma yangkipm a kupm la ti la aklale.” Sisas la kolpa atnen a kil ariwe ak wang a kil ngkaten kwap alkil ak ak ai kul ai pa kil ariwe ise la, tu mla mla ake ukipma kil ti pa. A wa kil wa ariwe la melnum mla ikga uk kil ti kai wam a tu wrongmanto.
JOH 6:65 Wa kil la kolpa kai la, “Kolpa atom kupm lanakepm la, ake antiwe melnum ur kul eng kupm ti ik wasrongen alkil pa, kalpis. Yan pa or ipma a kil pa pati, kil antiwe a kul eng kupm pake.”
JOH 6:66 Ak wang pa tu melnum a katnun Sisas pa atning a kil la kolpa, atom tu wailet pa almpil yirokg lawel atnuurngkel, a ake tu katnuntel om.
JOH 6:67 Sisas wa asen kul tu watnom wampwam yikakwekg a kil aroaro wonel pa la, “Ti kipm ti, kipm la wa utnuurngkopm yat?”
JOH 6:68 Ari Saimon Pita akalmpe la, “Wailen, ti kitn la mpa men utnuurngkeitn kai eng mla? Am kitn pa yiprokgen a lanako yangkipm ok a alko yaprekg watin a antokg men rpma wor yongkyong pake.
JOH 6:69 Men pikekg ukipma kitn pa kolpa kul, atom men ariwe worwor la kitn pa Melnum a Maur Wailen Amprin atom ukwaweitn nar pake, kolpa atom men ukipma kitn pa.”
JOH 6:70 Ari Sisas akalmpe la, “Kipm wampwam yikakwekg ti pa pikekg kupm alkupm ti takweiyepm kimeket, pake wris ur akipmen ti pa melnum a Maur Paipm Satan.”
JOH 6:71 Pa kil la Sutas, warim kipman a Saimon Iskariot. Sutas pa melnum wris ur a tu watnom wampwam yikak wekg a kil aroaro wonel a ikga elng kil kai wam a tu wrongmanto.
JOH 7:1 Sisas wrekg atnuurng anong Kaperneam pa, kil atn yela tatu anong kanokg Kalili ti kolti kaling plan tu wrong kin kipman yangkipm a Maur Wailen. Kil karken mla kinar anong kanokg Sutia pa. Eng ntei, tu melnum wailen wailen a men Suta pa yapon yangkipm la ilmpel imo.
JOH 7:2 Kil atn yela kolpa kai, wang wail a men Suta wli takwem rka anong wail Serusalem, ngkam pilmpal arke kalingen wang a pikekg tu a men angkom or wrik wes ningkrapm pa, am kul wreren tike.
JOH 7:3 Atom tunteng paipm paipm a Sisas pa tilpel la, “Kitn itnuurng anong kanokg Kalili ti a kitn kinar anong kanokg a Sutia wai, eng mpa tu melnum a katnunteitn ai ri kwap weten a kitn ak ti.
JOH 7:4 Kol melnum ur la tu wrong kin kipman uwi riwe kil pa la kil mla pa, kil ake mpa ntokg itni ampen. Kil mpa ntokg itni wulmpa a wrongkwail eng mpa tu ri. Ti kweikwei titnongket titnongket a kitn antokg ti pa kol a kitn iye kinar ntokg kinar ai, ik plan kitn alkitn ti, eng mpa tu wrongkwail kin a kipman a itna yela kanokg ti riweitn la kitn melnum wailen ur kol pake!”
JOH 7:5 Tunteng paipm paipm a Sisas ti pa kol am tunteng pa ukipma pake, ari wa kalpis, tunteng aknokgel lawel kolpa.
JOH 7:6 Ari Sisas akalmpe la, “Wang wrongkwail pa wang a kipmteng pake, kai kipmteng pa kinar itopen wang wail pawo! Kupm ti pa kupm mpa kalpis, wang a kupm pa a pa.
JOH 7:7 Tu wrong kin a kipman a kanokg ti yiprokgen kalpisen eng mpa tu nikgwalpm paipm eng kipmteng pa. Pake kupm ti ariwe kweikwei a tu antokg pa ari paipm, atom kupm laron la pa aklale, tu am antokg antokg kolpake, kolpa atom tu nikgwalpm paipm eng kupm tike.
JOH 7:8 Kai kipmteng pa kinar itopen wang wail pawo! A kupm ti pa wang akupmen pa a pa, ti ake mpa kupm kinar itopen wang wail ti pa.”
JOH 7:9 Kil la kolpa atom kil am rpma Kalili pake.
JOH 7:10 Atom tunteng paipm paipm alkilen pa tunteng wrekg atnuurng anong pa la kinar nti tu wrong pa tukwem rki wris kai kaino anong wail pa itopen wang wail pa. Tunteng kinar plalng pa, Sisas kil wa wrekg katnunten kinar atom kai kaino anong wail pa. Pake ake kil plan kil alkil ti angko wunong eng mpa tu wrongkwail ai riwel.
JOH 7:11 Ak wang aripm ur a tu rka atopen wang wail pa, tu melnum wail wail a men Suta pa tu ikgen akor asen tu wrong pa la, “Melnum pa itna kai a i?”
JOH 7:12 Tu wrong kin a kipman a rka pa tu akoo alilakel tita la Sisas pa. Tiur pa lala, “Kil pa melnum wor.” A tiur pa elukgentel la, “Kil ake melnum wor, kil melnum a kansil mentepm wrong kin a kipman atom aloko aye kai ar.”
JOH 7:13 Tu ngkark eng tu melnum wailen wailen a men Suta ti, kolpa atom ake tu akor la Sisas pa ak ok wail pa.
JOH 7:14 Wang wail a men rka pilmpal pa wang wampwomis wampwompwraur. Atom ak wang wail ti pa men rka kolpa rka kai turngkuin pa pilpa, Sisas kai kawor yipmingki wunen a yalming a Maur Wailen pa ngkaten eng kaling plan tu wrong kin a kipman a rka pa.
JOH 7:15 Tu melnum wailen wailen a men Suta pa wrekg paipm kolti anel asen tita la, “Melnum pa ake pikekg melnum ariwe ur kaling plantel yangkipm titnongket amentepmen pa, ti antokg kolai atom wa kil kaling planto kolen kil alkil yiprokgen a yangkipm pa!”
JOH 7:16 Ari Sisas pa akalmpe la, “Ariwe a kupm kaling plantepm ti pa ake a kupm alkupm ti pa. Ariwe kil pa a melnum pikekg ukwawopm nar pake.
JOH 7:17 Kol melnum ur la kutnun nikgwalpm a Maur Wailen kil wasrongen pa pati, pa kil mpa uwi riwe la, yangkipm a i a Maur Wailen, a i a kupm ak nikgwalpm a kupm alkupm ti.
JOH 7:18 Melnum a kil la yangkipm ak nikgwalpm ariwe a kil alkil ti pa, pa kil ak eng mpa tu a atning yangkipm a kil laron pa mpa ngkit nang akilen. Pake melnum a kil wasrongen la tu uk nang wailen melnum a ukwawel kul pa, pa kil ake melnum a alupm nikgwalpm a kansil pa, kil melnum a aye nikgwalpm ute aklale kolti.
JOH 7:19 Pikekg Moses alkepm yangkipm titnongket pa, pake ake kipm ur atning katnun pa. Ti antokg kolai atom kipm wa la ilm kupm ti imo eng na wai?”
JOH 7:20 Ari tu wrong a rka pa akalmpentel la, “Kitn pa maur paipm arpmeweitn! Ti mla la ilm kitn pa imo?”
JOH 7:21 Wa Sisas akalmpenten la, “Ti pikekg kupm ak kwap wris ur ak wang wail a mentepm rpma eng yapm pa, atom kipm plalngten akwonalmpen watipmen eng pa.
JOH 7:22 Kipm pa pikekg Moses alkepm yangkipm titnongket a angket num. Pa pikekg ake Moses pa ngkaten angket num a tu warim kipman pa. Pa pikekg tu yoampei yaru marpmeng wapyipmiri a walyipmiri alkipmen pa ak angkai ai kul ai. Moses ti pa wa angkine ak ak ti kul ti. Kol man ur raku warim kipman ur pa, kil mpa iyewel rpmi i wang wampwomis wampwompwraur pa, kipm mpa ngket num ik wang pa. Atom kipm am wa akwap angket num a tu warim tiur pa wa ak wang wail a rpma eng yapm pa yat pake.
JOH 7:23 Ti kol tu warim kipman tiur pa kipm mpa wa ngket num ik wang wail a rpma eng yapm pa pipa, kipm mpa angket, ake mpa kalpis pa. Eng ntei, kipm ake la kipor yangkipm titnongket a Moses la pa. Pake kipm wa kapor yangkipm titnongket eng kipm wa akwap pa ak wang wail a kipm kol a rpmi eng yapm pa. Ti antokg kolai atom wa kipm nikgwalpm paipm eng kupm a pikekg antokg numpwam, a nol nikgwalpm a maur wor a melnum pa palng wor kimeket ak wang wail a rpma eng yapm pa?
JOH 7:24 Kipm ari kwap wor a kupm pikekg ak pa ak wulmpa pa kolti, la kupm akwap ak wang wail a rpma eng yapm pa. Kipm elngen a ari la kwap a melnum ak pa kolpa! Kipm ri ute iklale kwap a melnum ak pa la kil akwap ute wor aki kil akwap paipm!”
JOH 7:25 Sisas oklala kolpa itna pa, tu melnum tiur a anong wail Serusalem ti asen tita la, “Ti melnum a tu lala ilmpel imo ti am tike!
JOH 7:26 Ti kipm ri, kil am oklala itna wulmpa a mentepm wrongkwail a rka tike, atom ake tu melnum wailen wailen ur angkengkel ti. Aki tu wa plelngen nikgwalpm a awi ariwe la kil ti Krais am pa ur pake?
JOH 7:27 Pake melnum ti pa mentepm ariwe anong yiprokg akilen pake, kolpa ti kil ake Krais. Pake Krais melnum a Maur Wailen lawen itna lala ikga nar pa, pa mentepm ikgake riwe la kil a a i wli.”
JOH 7:28 Sisas pa kaling plan tu pa kawor yipmingki wunen a kapringen yalming a Maur Wailen pa. Kil la ak ok wail la, “Ei, kipm ariwe kupm ti a wa anong a kupm wliwe pa aki? Kupm ti ake wli ti ak nikgwalpm a kupm alkupm ti pa. Melnum a ukwawopm nar pa kil pa, kil melnum a antokg kweikwei a aklale. Ari kipm ake wa ariwe kil pa.
JOH 7:29 Pake kupm ti pa ariwe kil pa pati, atnen kupm am pikekg anti kil pa rpma pake, am kil pa pikekg ukwawopm pake. Kolpa atom kupm ariwe kil pa.”
JOH 7:30 Tu atning kolpa atom tu lala rkulel ari ake melnum ur wam kai la rkulel, eng ntei, wang alkilen pa a pa.
JOH 7:31 Pake tu wailet a rka atning a kil la kolpa, pa tu ukipma kil pa la kil pa Krais melnum a Maur Wailen ukwa nar pa. Atom tu lala, “Melnum ti elng kla titnongket wailet elngitna ak plan titnongket a Maur Wailen pa. Ti wa mentepm nungkwangen melnum ur a wai a ikga nar elng kla wailet klangkil kol a melnum ti elngitna pa eng na? Melnum a Maur Wailen la ukwa nar pa am itna tike!”
JOH 7:32 Tu melnum tiur a arpmen yangkipm yiprokgen a Moses pa tu atning a tu lanaken la tu wrongkwail akoo alilakel tita Sisas pa. Atom tu pa, a tu melnum tukgunakgen a tu ipma krakgen a ak ak kwap eng al wor uk Maur Wailen pa ukwa tu melnum a atnen yalming a Maur Wailen pa eng la tu kai rkulel, atom tu kai.
JOH 7:33 Atom Sisas la kolpa la, “Palpa kupm antiwepm rpma wang tukwok ketn kolti, atom kupm ikga wa yaper kaino eng melnum a pikekg ukwawopm nar ti.
JOH 7:34 Kipm ikga ikoropm, pake kipm ikgake riwopm. Eng ntei, wrik a kupm kaino pa kipm ikgake ntiwe kaino.”
JOH 7:35 Tu melnum wailen wailen a men Suta tu alntu ak nokgel naki tita lala, “Melnum ti kil lala ikga kil kaino wrik a i a ikgake mentepm riwel pa? Ikga kil kaino yela anong kanokg a Krik ai a tu tiur a mentepm Suta arpme ai eng kiling plan tu Krik pa, aki?
JOH 7:36 Wa kil lala, mentepm ikga ikorel, pake mentepm ikgake riwel, wa anong a ikga kil kaino rpme pa mentepm ikgake ntiwe kaino, kil la kolpa eng itna kolai?”
JOH 7:37 Men takwem rka pilmpal wris wris a men ngkam pa atopen wang wail pa, kolpa rka wang wail wampwomis wampwompwekg pa kai plalng pa, atom okg or kong ti pa wang aimprek, pa wang wail manten. Atom ak wang pa Sisas wrekg itna la yikakatnen lala, “Mla ur a u waketel pa kil kul eng kupm ti eng mpa kupm lkel u ti il!
JOH 7:38 Mla ur a kil ukipma kupm ti pa, u mreren wriwen wor a waroong atne ti mpa i nol nikgwalpm a kil pa kul no, atom pik turus or en ti kolpa kai, kolen wrkapm a Maur Wailen la pa.”
JOH 7:39 Pa Sisas ak la Maur Wor a Maur Wailen a ak wang pa ake nar, a pa. Kil ikga kaino rki yo okgmangki imo, wa Maur Wailen ikga uwiyel yaperkaino anong wor lkel titnongket a nang wailen plalng pa pati, kil ikga ukwa Maur Wor pa nar kol u a tarus nar, atom tu a ukipma kil pa uwi.
JOH 7:40 Tu wrong kin kipman atning yangkipm a Sisas kil la kolpa atom tu tiur pa la, “Aklale, melnum ti pa kil melnum okwripm a Maur Wailen a mentepm nungkwangen am pake.”
JOH 7:41 Tu tiur pa la, “Kil Krais.” A wa tiur pa lala, “Krais ikga nar pa, kil ikgake ingkaino anong kanokg a Kalili pa nar pa.
JOH 7:42 Ti ake kipm ariwe la yangkipm a Maur Wailen a nira ela wrkapm pa la, 'Krais pa ikga man rakuwel kinar Petleem anong yiprokg a Tepit melnum tukgunakg akipmen pa, wa kil om wris a Tepit pa.'”
JOH 7:43 Atom tu wrong kin a kipman pa womnowe womnare, arowom arowom atnen Sisas pa.
JOH 7:44 Tu melnum tiur la rkulel ari ake melnum ur arkulel.
JOH 7:45 Atom tu melnum a atnen yalming a Maur Wailen pa anel yaper kul ari tu melnum tukgunakgen a ikgalen tu ipma krakgen a ak ak kwap eng al wor uk Maur Wailen nampokgen tu melnum a arpmen yangkipm yiprokgen a Moses a wet ukwawen la tu kai rkul Sisas pa. Ari tu asenten la, “Antokg kolai atom ake kipm arkul melnum ai aye wli?”
JOH 7:46 Ari tu melnum a atnen yalming pa lanaken la, “Ngkaten ak ai kul men pikekg ake atning melnum ur oklala kol melnum ti oklala ti! Oklala a melnum ti wa manet!”
JOH 7:47 Ari wa tu melnum a arpmen yangkipm yiprokgen a Moses pa asenten la, “Am kil pa kansil alokepm kai ar pake?
JOH 7:48 Wa kipm atning la men mring man wail wail ur mapming a ikgalen mentepm Suta ti, kol men melnum a arpmen yangkipm yiprokgen a Moses ur ti ukipma kil pake? Kalpis wrisen!
JOH 7:49 Tu wrong pa rka wanteng won ai ake ariwe yangkipm titnongket a pikekg Moses alko pa, kolpa atom ari tu ukipma melnum pa. Maur Wailen am ok anti tu wrong pa ise atom tu ikga kai paipm.”
JOH 7:50 Pake Nikotimus melnum wris ur a tulntu melnum a arpmen yangkipm yiprokgen a Moses pa, kil melnum a pikekg kai ari Sisas pa ep ur ak ai, atom kil lanaki tu alntu pa lala,
JOH 7:51 “Yangkipm titnongket a pikekg yapon ti pa la, mpa mentepm uk wleket melnum ur ikilmpe paipm a mentepm arkiwel la kil antokg pa? Aki yangkipm titnongket a pikekg yapon pa la, mpa mentepm uwiyel iye kai itni yangkipm pa itning ri uwi riwe riworwor la kil ntokg paipm pa pipa, ikilmpe pa kutnukg kul?”
JOH 7:52 Tu melnum a arpmen yangkipm titnongket a Moses a tu melnum wailen wailen atning a Nikotimus la kolpa atom tu lawel la, “Yo, ti kitn ti am a Kalili pake! Kitn rpmi ngkleikg wrkapm a Maur Wailen ti riworwor, eng mpa kitn riwe la melnum okwripm ur pa ake mpa ingkai tu Kalili pa kul pa.” [
JOH 7:53 Tu oklala kolpa kai plalng pa, tu rak kai wan anong alntu ai.]
JOH 8:1 Tu wrong pa rak rak kaingkai wan anong alntu ai pa, Sisas wrekg kolti kai kaino nang Olip pa.
JOH 8:2 Wa kong miningket ai kil am wa yaper nar atom kawor yipmingki wunen a kapringen yalming a Maur Wailen pa. Ari tu wrong kin kipman pa wa wli kapringentel. Kil angko rpma kolti a kil kaling planten yangkipm a Maur Wailen pa.
JOH 8:3 Kil kaling plan tu rpma ari, tu melnum a aroaro wonel tu yangkipm a Moses pa, a tu melnum a arpmen yangkipm yiprokgen a Moses pa tu awi kin ur a melnum ur ai ari kil okg kin kipman anti kipman ur, atom ak angketen yangkipm titnongket a kin a kipman awi tita pa. Atom tu awiyel aye wli itna wulmpa a tu wrongkwail.
JOH 8:4 Atom tu lanaki Sisas pa la, “Melnum a kaling plan tu, kin kil pa melnum ur ari kil anti kipman ur okg kin kipman ak angketen yangkipm titnongket a kin a kipman awi tita pa.
JOH 8:5 Ti yangkipm titnongket a Moses a ela wrkapm pa lala, kin a kolpa pa, mpa ikwesel imo kolti. Ti kitn pa la kolai?”
JOH 8:6 Tu alm ipmawel Sisas pa lala kil la yangkipm pa kul or kol a nikgwalpm a tu yapon ti pa, tu a uwiyel iye kai itni yangkipm pake. Ari Sisas pa ikg nar kanokg ti kolti ak wamipis pa nira kweikwei ela kanokg pa rpma.
JOH 8:7 Tu asentel asentel kolpa itna pa, atom kil ngkat ikg pa kai kwa ariwen a kil lanaken la, “Mla ur kitn a itna ti a paipmpaipm kalpisen pa, ti kitn pa ikwesel kin ti ep o!”
JOH 8:8 Kil lanaken kolpa plalng, wa kil wa ikg nar kanokg ti ak wamipis pa nira kweikwei ela kanokg pa.
JOH 8:9 Tu atning a Sisas la kolpa pa, tu wrekg akwris akwekg kolti am kaingkai ise. Tu kilmik a angkaino kwa pa ep ep, a tu a kai arken tu pa katnunten kaingkai, a atnuurng kin pa anti Sisas pa kolti itna.
JOH 8:10 Sisas ngkat ikg pa kaino kwa a kil asen kin pa lala, “Kin! Ti tu a wet awiyeitn aye wli ti itna a i? Ake wa ur a tu wet arkiwetn pa itna ti eng mpa ikwesel kitn ti?”
JOH 8:11 Kin pa akalmpe la, “Melnum wailen, ake melnum ur pa itna ti.” Atom Sisas la karkurngkel la, “Wa kupm ti yat, kupm ake la mpa rkiweitn pa. Ti kitn kai o! Kitn kai a kitn plalng paipmpaipm a kitn antokg pa!”
JOH 8:12 Sisas kil lanaki tu wrong kin a kipman pa anti ur lala, “Kupm ti wakg a akalen kanokg ti. Mla ur a kil katnuntopm pa, kil ake angkom ak miningket pa. Kupm mpa lkel wakg klalen a mpa iklentel ya a awi yaprekg watin eng rpma wor yongkyong.”
JOH 8:13 Tu melnum a arpmen yangkipm yiprokgen a Moses akalmpentel la, “Yangkipm a kitn alkitn wris laron kitn alkitn pa ake kaikut antiwe a ak titnongketel yangkipm pa la aklale pa. Kol melnum ur ai la nimpokgenteitn pa pati, pa kaikut antiwe pake.”
JOH 8:14 Sisas akalmpe la, “Ake kupm wris ti laron kupm alkupm ti pa. Pake kol kupm alkupm wris ti laron kupm alkupm ti pa, pa yangkipm kaikut antiwe a ak titnongketel la kupm la yangkipm aklale. Eng ntei, kupm ti pa ariwe anong a pikekg kupm wliwe, a anong ikga wa kupm wa kaiye. Pake kipm ti ake ariwe anong a pikekg kupm wliwe pa, a ikga wa kupm wa kaiye pa.
JOH 8:15 Kipm melnum a kanokg ti ari la tita atn a rpma a tu melnum ti kol a kipm melnum a kanokg ti ari la tita pa. A kupm ti pa ake ari la melnum pa kol kipm pa ari la pa, kalpis.
JOH 8:16 Pake kol kupm ti ri la melnum ur pa pati, pa yangkipm kaikut antiwe a ak titnongketel la pa kupm ak ute wor pa, eng ntei, ake kupm alkupm ti ari la pa, kupm anti Yan alkupmen a ukwawopm nar pa ari la melnum pa.
JOH 8:17 Kol yangkipm a nira ela Yangkipm Titnongket alkipmen pa lala, melnum wekg la nikgwalpm wekg kolen tita pa, pa yangkipm kaikut antiwe a ak titnongketel la, pa aklale pake.
JOH 8:18 Ti melnum wekg pa laron kupm ti: kupm alkupm ti a wa Yan a pikekg ukwawopm nar pa, wa kil wa laron kupm ti yat ak titnongketel la, pa kupm la aklale.”
JOH 8:19 Atom tu melnum a arpmen yangkipm yiprokgen a Moses pa asentel la, “Ti Yan akitnen ti a i?” Ari Sisas akalmpe la, “Kipm ake ariwe kupm ti, a wa kipm ake ariwe Yan akupmen pa. Kol a kipm riwe kupm ti pa, kol a wa kipm riwe Yan akupm pa kolpa yat pake.”
JOH 8:20 Sisas la yangkipm pa naki tu wrong kin kipman ak wang a kil kaling planten rpma kawor yipmingki wunen a yalming a Maur Wailen pa, rpma wreren wan ok a tu aye marpm wli uk uk Maur Wailen atnewe pa, ari ake wa tu ur arkulel. Eng ntei, wang akilen a Maur Wailen alm pa, a pa.
JOH 8:21 Wa Sisas lanaki tu wrong kin kipman pa kolpa la, “Kupm ikga utnurngkepm kaino. Kipm ikga ikoropm ikoropm ining, atom kipm ikga imo ngkiten paipmpaipm a kipm antokg pa. Wrik a kupm kaino pa, kipm ikgake ntiwe kaino.”
JOH 8:22 Atom tu melnum wailen wailen a men Suta pa naki tita lawel lala, “Kil la wrik a kil ikga kaino pa mentepm ikgake ntiwe kaino. Kil la kolpa eng kil ikga ilm kil alkil ti imo aki?”
JOH 8:23 Kil wa la kolpa la, “Kipm pa a nar ti, a kupm ti pa a kaino kwa ai. Kipm pa melnum a kanokg ti, a kupm ti pa ake melnum a kanokg ti pa.
JOH 8:24 Kolpa atom ari kupm wet lanakepm la, kipm ikga imo itnen paipmpaipm a kipm antokg pa. Kupm ti a Rpma Kolpa Rpma kol a kupm laron kupm alkupm nakepm nakepm pa. Kol ake kipm ukipma kupm ti la kupm melnum kolpa pa, pa kipm ikga imo itnen paipmpaipm a kipm antokg pa.”
JOH 8:25 Tu asentel la, “Ti kitn mla wai?” Ari Sisas akalmpe la, “Wa kipm wa asen, ti pikekg kupm lanakepm ak ep ak ai kul ti!
JOH 8:26 Kupm nikgwalpm watipmen rpma a kol a lanikepm, wa kupm ari la atn a rpma akipmen ti a kol a lanikepm la pa paipm. Pake kupm atning kuina ur a melnum a ukwawopm nar pa kil lanakopm pa, pa kupm la pa kolti naki kipm wrong kin a kipman a kanokg ti. Kil pa melnum a la yangkipm aklale.”
JOH 8:27 Tu atning yangkipm a Sisas la pake, tu ake wa ariwe la pa kil lakati Yan alkilen pa naken pa.
JOH 8:28 Kolpa atom wa Sisas lanaken la, “Kipm ikga ngkit Warim Kipman A Melnum pa iye kaino yo okgmangki pa. Atom ik wang pa kipm ikga riwe kupm ti la Kupm ti a Rpma Kolpa Rpma pake kol a kupm lanakepm lanakepm pa. A wa kipm ikga riwe la kupm ti ake antokg kweikwei ur ak nikgwalpm a kupm alkupm ti pa, kalpis. Kupm la yangkipm kil katila kol a Yan kil alkil pa kaling plantopm pa.
JOH 8:29 Yan a ukwawopm nar ti pa kil antiwopm rpma. Kil ake wa atnuurng kupm ti rpma ak kupm alkupm ti pa, kalpis. Eng ntei, kupm akangklei wang antokg kweikwei a wor wor kolti a ak antokg kil atopen.”
JOH 8:30 Tu atning yangkipm a kil la kolpa, atom tu wailet ukipma kil pa.
JOH 8:31 Atom Sisas naki tu men Suta a ukipma kil pa la, “Kipm rkul yangkipm a kupm aroaro wonelepm pa kutnun kolpa iye kai pati, kipm ikga palng melnum akupmen a katnuntopm aklale.
JOH 8:32 Kipm ikga uwi riwe yangkipm aklale a Maur Wailen pa atom yangkipm aklale pa ikga ntokg kipm a ampei yapowepm pa wirng no kukula wor.”
JOH 8:33 Tu akalmpe la, “Men ti pa men yaru marpmeng a Apraam. Men ake pikekg rka aken kwap kalpmilel orngwatneikgen melnum ur. Ti wa kitn la Maur Wailen ikga ntokg men wirng no itni kukula wor eng na?”
JOH 8:34 Ari Sisas akalmpe la, “Kupm lanakepm aklale wrisen, melnum a antokg paipm pa, am paipmpaipm pa alok yapowel titnongket pake.
JOH 8:35 Melnum a aken kwap kalpmilel orngwatneikgen mring ur pa, pa kil ikgake nti mring a kinwatnom a mring pa rpmi yongkyong pa. Pake Warim Kipman alkil a mring pa kil ikga nti yan alkil pa rpmi yongkyong pake.
JOH 8:36 Kol Warim Kipman ti ngketen ampei a paipmpaipm a yapowepm tukwleikgen kipm ti pa, pa kipm am wirng no kukula wor ise, ake kweiur ketn yapowepm om.
JOH 8:37 Kupm ariwe la kipm yaru marpmeng a Apraam, pake kipm ti ake ukipma kol Apraam pa. Nikgwalpm a kipm ti rka manet, atom kipm akor ya la ilmpopm imo. Eng ntei, kipm ake la rkul yangkipm akupmen ti rpmi kawor ipma akipmen ti.
JOH 8:38 Kupm ti pa lakati nakepm kuina ur a pikekg kupm anti Yan alkupm rpma, atom kupm atning a ari pa. Kipm ti pa antokg kuina ur kol a kipm atning a yan alkipm ti lanakepm pake.”
JOH 8:39 Tu akalmpentel la, “Apraam pa wapyipmiri a walyipmiri amenen.” Ari Sisas wa lanaken la, “Ti kol kipm yaru marpmeng iklale a Apraam pa, kol a kipm ntokg kweikwei kitila kol a pikekg Apraam kil antokg pa.
JOH 8:40 Ari wa kalpis, wa kipm akor ya la ilm kupm melnum a lanakepm yangkipm aklale a kupm atning a Maur Wailen kil nakopm pa. Ti Apraam pa ake pikekg ak nikgwalpm ur kolpa.
JOH 8:41 Kipm ti pa kipm antokg kuina ur kol yan alkipmen antokg pake.” Ari wa tu pa akalmpe la, “Men ti pa ake warim a pikekg man angkli arkul atom angket men ti pa, men ti pa warim a yan wris ata kolti, pa Maur Wailen kil alkil pake.”
JOH 8:42 Sisas atning tu wrong pa la tu pa warim a Maur Wailen atom kil akalmpe lanaken la, “Kol Maur Wailen ti Yan akipmen pa, kipm kol a wa plan ipma wor wasrongen kupm ti. Eng ntei, kupm ti pikekg anti Maur Wailen ai rpma, atom angkaino ai nar ti am antiwepm rpma tike. Ake pikekg kupm ti nar ak wasrongen a kupm alkupm ti pa, kil alkil pa ukwawopm atom kupm nar pake.
JOH 8:43 Antokg kolai atom ake kipm atning awi ariwe yangkipm a kupm la ti? Pa atnen a kipm karken a atning yangkipm a kupm la pa.
JOH 8:44 Kipm pa yan akipmen pa Maur Paipm Satan, atom kipm la kutnun nikgwalpm wasrongen paipm a yan alkipm pa kolpa itni. Pikekg ngkaten ak ep lmpiwen ai kul pa, kil melnum a alm melnum amo, a kil ake itna nampokgen yangkipm a kweikwei a ute aklale pa, kolpa atom kil ake alupm nikgwalpm ute aklale ur rpma kil pa. Kil kansil pa, pa am kil antokg nikgwalpm paipm alkil a kil antokg antokg pake. Eng ntei, kil pa melnum a kansil, a kil pa yan yiprokgen a nikgwalpm kansil.
JOH 8:45 Atom kipm pa alupm nikgwalpm kansil a kil pake. Pake yangkipm a kupm ti lanakepm ti pa, kipm pa ake ukipma la pa aklale pa. Eng ntei, kupm ti laron nakepm nikgwalpm aklale.
JOH 8:46 Ti kol kupm ntokg paipm ur pa, ti kipm laron paipm na ur a kupm antokg pawo! Kol kupm ake antokg paipm ur, a wa la yangkipm iklale pa, ti antokg kolai atom ake wa kipm ukipma kuina ur a kupm la ti la aklale pa?
JOH 8:47 Melnum a Maur Wailen pa Yan eng kil pa, kil pa atning kuina ur a Maur Wailen la pa. Yiprokgen a kipm ake atning yangkipm a Maur Wailen la pa pati, Maur Wailen ake yan eng kipm pa.”
JOH 8:48 Tu men Suta akalmpe yangkipm a Sisas la pa la, “Kitn pa titno kol tu Samaria, kitn pa maur paipm arpmeweitn. Ti kol a men la la pa aklale pake?”
JOH 8:49 Sisas naken la, “Kupm ti ake maur paipm ur arpmewopm. Kupm ti alupm aye Yan akupmen ai, ari wa kipm ti arku nang akupmen ti.
JOH 8:50 Kupm ti ake antokg eng la kipm ngkit nang a kupm alkupm ti pa. Melnum a kil wasrongen la la ngkit nang a kupm ti pa, pa kil rpma, a wa kil ikga rpmi itning yangkipm a mentepm wrongkwail atom ikilmpe kitila pa.
JOH 8:51 Kil kupm lanakepm aklale wrisen la, kol mla ur kil rkul yangkipm akupmen ti pa kil ikgake imo kai.”
JOH 8:52 Ari wa tu men Suta akalmpe la, “Ti men ariweitn worwor la kitn pa maur paipm arpmeweitn. Apraam pikekg amo a wa tu melnum okwripm a Maur Wailen pikekg wa amo, pake kitn ti la, mla ur kil rkul yangkipm a kitn ti pa kil ikgake imo.
JOH 8:53 Ti kitn ti melnum wailen angen yan Apraam wapyipmiri walyipmiri amenen ai? Apraam pikekg amo a wa tu melnum okwripm a Maur Wailen pa pikekg wa amo yat. Ti kitn ti la kitn alkitn ti la kitn ti am melnum kolpake!”
JOH 8:54 Sisas akalmpe la, “Kol kupm alkupm ti ngkit nang alkupmen ti pa la kupm antiwe titnongket a nang wailen pa, pa kupm ake nang arke, pa kupm nang kalpisen kolti. Pake am Maur Wailen a kipm lala Maur Wailen akipmen pa a wa kupm ti lala Yan akupmen ti pa, am kil pa ngkatopm a plan titnongket a nang wailen akupmen tike.
JOH 8:55 Pake kipm pa ake ariwe kil pa, kupm ti ariwe kil pake. Kol kupm ti lala, ake kupm ariwe kil pa, pa kupm ti melnum ur a kansil kolen kipm pa, ari kupm ti ariwe kil pa atom kupm arkul katnun yangkipm akilen pa.
JOH 8:56 Yan Apraam walyipmiri wapyipmiri akipmen pa pikekg kil won momo eng kil ariwe la kil ikga ri wang a kupm ikga nar kanokg ti. Kil ari pa kil atopen.”
JOH 8:57 Ari tu men Suta pa akalmpentel la, “Apraam pa pikekg ak yo ampei ai. A kitn ti pa warimet pikekg ketn ti palng ti, pa kitn ake pikekg ari Apraam pa.”
JOH 8:58 Sisas akalmpe la, “Kupm lanakepm aklale wrisen la, Kupm ti Rpma Kolpa Rpma, a Apraam pa man rakuwel katnukg.”
JOH 8:59 Tu atning kolpa, tu awi wes pa la ik orel, ari Sisas wrekg tital ak angkom tu wrong pa am kul or kai takwuleikgen yipmingki a kapringen yalming a Maur Wailen pa.
JOH 9:1 Sisas anti tu watnom a kil aroaro wonel pa angkom kai pa, tu ari melnum wulmpa tilmpisen ur a pikekg awi ipmangko pa rpma.
JOH 9:2 Atom tu watnom a Sisas aroaro wonel pa asen Sisas pa la, “Melnum a aroaro wonel men, mla antokg paipmpaipm atom kil awi ipmangko wulmpa tilmpisen kolpa? Paipmpaipm a kil alkil ti aki a mansan alkil ai?”
JOH 9:3 Ari wa Sisas akalmpe la, “Ake la kil wulmpa tilmpisen atnen paipmpaipm a kil alkil ti aki a mansan alkil pa, kolpa kalpis. Kil wulmpa tilmpisen pa pati, yiprokgen itna la mpa tu ri titnongket a Maur Wailen mpa ikwap kai kil ti.”
JOH 9:4 Atom Sisas kil lala, “Mentepm ikwap a Wailen a pikekg ukwawopm nar ti ik ran takgni a rpma tike! Mining iye wam kul pa, melnum ur akentiwe mpa ikwap ik mining pa.
JOH 9:5 Ak wang a kupm rpma a kanokg ti pa, kupm ti pa wakg a akalen kanokg ti.”
JOH 9:6 Sisas la kolpa plalng, kil ungkwa wlikg pa kai kanokg pa a ak wam raingen kanokg pa ak anel wulmpa a melnum wulmpa tilmpisen pa.
JOH 9:7 Plalng pipa kil lanakel la, “Kitn kai klak ikgok kai u tungkur Siloam.” Yiprokgen a nang Siloam pa lala, “Ukwa kai.” Atom melnum pa kai karkuk plalng, kil wa yaper wli wan anong alkil pa, kil antiwe ari kweikwei.
JOH 9:8 Tu melnum a rka wris nampokgentel pa a tu tiur a pikekg ariwel a kil rpma akwen akwen kweikwei pa tu la, “Pa melnum wulmpa tilmpisen a pikekg rpma akwen akwen kweikwei am pake?”
JOH 9:9 Ari wa tiur pa lala, “Melnum a kipm la pa am tike.” Ari wa tu tiur pa lala, “Kalpis, ake melnum pa, melnum a kipm la pa am wa ari kolen melnum tike.” Ari wa melnum kil alkil pa wa lala, “Ei, am kupm melnum a kipm la pa am kupm am tike.”
JOH 9:10 Atom tu wa asen melnum pa la, “Antokg kolai atom kitn antiwe ari kweikwei pa?”
JOH 9:11 Ari wa kil akalmpenten la, “Melnum a tu namput la Sisas, kil awi kanokg pa ak wam raingen ak anel wulmpa akupmen ti. Atom kil wa lanakopm la, kupm kai klak ikgok kai u tungkur Siloam ai! Kupm kai klak kolti, kupm wulmpa ore ari kweikwei ak wang ketn a kupm karkuk pake.”
JOH 9:12 Atom tu wa asentel la, “Ti melnum pa a i?” Ari wa kil akalmpe la, “Awai, kupm ake ariwe.”
JOH 9:13 Atom tu awi melnum a wet wulmpa tilmpisen pa aye kai eng tu melnum a arpmen yangkipm yiprokgen a Moses.
JOH 9:14 Wang a wet Sisas ak mang ak anel wulmpa a melnum wulmpa tilmpisen pa palng wor pa, pa kil ak ak wang wail a rpma eng yapm.
JOH 9:15 Ari tu melnum a arpmen yangkipm yiprokgen a Moses pa wa asen melnum pa la, “Antokg kolai atom wulmpa akitnen ti wa wor ti?” Ari wa melnum pa akalmpe la, “Kil ak mang ti anelopm wulmpa ti a kil lanakopm atom kupm kai karkuk klaken kolti a kupm wulmpa ore ari kweikwei.”
JOH 9:16 Pake tu melnum tiur a arpmen yangkipm yiprokgen a Moses pa la, “Melnum a antokgtel wor pa ake melnum a Maur Wailen pa, eng ntei, kil wa lalowe akwap ak wang wail a rpma eng yapm pa.” Ari tiur atuwen pa lala, “Kil melnum a antokg paipm pa, pa mpa wa kil elng kla titnongket titnongket kolti la kolai?” Tu alntu melnum a arpmen yangkipm yiprokgen a Moses pa arowom arowom alilakel tita kolpa kai.
JOH 9:17 Atom wa tu wa asen melnum a pikekg wulmpa tilmpisen pa anti ur la, “Ti kitn alkitn melnum a pikekg kil antokg wulmpa akitnen wor pa, ti kitn akwonalmpen melnum pa la kil melnum kolai?” Ari wa melnum pa akalmpe la, “Kil melnum okwripm a Maur Wailen.”
JOH 9:18 Pake tu melnum wailen wailen a men Suta pa ake tu ukipma la melnum pa pikekg wulmpa tilmpisen pa, atom wa kil wulmpa ore pa. Kolpa atom tu ukwa yangkipm pa kai eng mansan alkil pa eng la tuwekg kul.
JOH 9:19 Tuwekg kul ariwen pa, tu asenten la, “Ti warim kipman akipmekgen a kipmekg lala kil pikekg man raku awi ipmangko wulmpa tilmpisen am tike? Ti antokg kolai atom wulmpa a kil ti wa wor ari kweikwei ti?”
JOH 9:20 Ari wa tuwekg mansan pa akalmpe la, “Mentekg ariwe la ti warim kipman amentekgen, a pikekg man raku awi ipmangko wulmpa tilmpisen am tike.
JOH 9:21 Pake mentekg ti ake ariwe la antokg kolai atom wulmpa akilen pa wor ari kweikwei pa. Wa mentekg ake wa ariwe la pikekg mla a i antokg wulmpa akilen pa palng wor pa. Isen kil alkil pawo, kil wail wontrakole antiwe mpa kil alkil la pa.”
JOH 9:22 Tuwekg mansan alkil pa la kolpa eng ntei, tuwekg ngkark eng tu melnum wailen wailen a men Suta pa yapon nikgwalpm ise, la mla ur a kil ukipma Sisas pa la kil Krais pa, mpa tu ungkwantel kul or tukwuleikgen tu wrong kin kipman mapming a ukipma Maur Wailen pa.
JOH 9:23 Kolpa atom ari tuwekg mansan alkilen pa lanaken la, “Am kipm isen kai kil alkil pake. Kil wail wontrakole wor antiwe mpa kil alkil lanikepm pa.”
JOH 9:24 Atom wa tu melnum a arpmen yangkipm yiprokgen a Moses pa akwe melnum a pikekg wulmpa tilmpisen pa wa kul antiur lanakel la, “Kitn naren Maur Wailen ti la yangkipm ti iklale! Men ti ariwe la melnum pa melnum a antokg paipmpaipm.”
JOH 9:25 Ari wa kil akalmpe la, “Kupm ake ariwe la kil melnum a antokg paipmpaipm pa aki kalpis. Pake kwei ur wris a kupm ariwe pa pati, pikekg ep pa kupm pikekg wulmpa tilmpisen, pake ak wang ti pa kupm antiwe wa ari kweikwei.”
JOH 9:26 Wa tu asentel la, “Melnum pa kil antokg kuina? Kil antokgteitn kolai atom wulmpa akitnen pa wulmpa ore ari kweikwei pa?”
JOH 9:27 Kil akalmpe la, “Ake wet kipm atning a kupm lanakepm pa. Antokg kolai atom kipm wa la wa itning ntiur pen? Kipm la kipm a wa palng watnom akilen eng mpa kil wa iroro wonelepm?”
JOH 9:28 Atom tu la akgnokgelel la, “Kitn pa kitn watnom a kil pa aroaro woneleitn pake. A men ti pa men watnom a Moses ai aroaro wonelo ai.
JOH 9:29 Men ariwe la, Moses pa pikekg Maur Wailen lanakel yangkipm ok pake, pake melnum ti pa, ake men ariwe ketnketn ur la kil ti angkai a i wli.”
JOH 9:30 Ari wa melnum pa akalmpe la, “Ti kipm ake ariwe melnum pa la kil angkai a i wli! Wai, wet ak ai kipm asen asen kolpa itna wai! Ti ake kipm ari wulmpa a pikekg kil antokgtopm wor ti!
JOH 9:31 Mentepm ariwe la, Maur Wailen pa ake antiwe mpa itning mla ur a antokg paipmpaipm pa. Kil atning tu melnum a orngwatneikgen kil antokg kuina ur a kil wasrongen pa.
JOH 9:32 Pikekg ep ak ai kul pa, ake pikekg mentepm atning a melnum ur antokg melnum wulmpa tilmpisen ur a awi ipmangko ur kolpa palng wulmpa ore ari kweikwei pa.
JOH 9:33 Kol melnum pa ake a Maur Wailen pa, kil ake ntiwe ntokg kweikwei ur kolpa.”
JOH 9:34 Tu melnum wailen wailen pa atning a kil la kolpa atom tu aklewel la, “Kitn pikekg paipmpaipm yapoweitn ak a man rakuweitn ai kolpa kul pake, ti kitn la wa kiling plan men tike!” Tu la kolpa a tu ungkwantel kai kawor en ai.
JOH 9:35 Sisas atning a tu melnum wailen wailen a men Suta pa ungkwan melnum a pikekg wulmpa tilmpisen pa kul or en, atom kil kai ansilel kolti a kil lanakel la, “Kitn ukipma Warim Kipman A Melnum ti aki, kalpis?”
JOH 9:36 Ari melnum pa akalmpe la, “Melnum wailen, Warim Kipman a Melnum pa mla wai? Ti kitn lanikopm eng mpa kupm ukipma melnum pa.”
JOH 9:37 Ari Sisas lanakel la, “Kupm lanakeitn aklale wrisen, melnum a kitn ari antiweitn oklala itna ti pa am melnum pake.”
JOH 9:38 Atom melnum pa lala, “Wailen, kupm ukipma kitn pake.” Kolti, kil kapor kilko alein Sisas pa.
JOH 9:39 Sisas lala, “Kupm nar kanokg ti eng ari la tu wrong kin kipman, eng mpa tu melnum a wulmpa tilmpisen pa mpa wa palng wulmpa ore ari kweikwei, a tu a wulmpa ore pa mpa wa tu palng wulmpa tilmpisen.”
JOH 9:40 Ari tu melnum a arpmen yangkipm yiprokgen a Moses tiur a itna pa atning a kil la kolpa atom tu asentel la, “Kitn la kuina wai? Kitn wa la men ti wa wulmpa tilmpisen?”
JOH 9:41 Sisas akalmpe lala, “Kol wulmpa a maur wor akipmen pa tilmpis ake riwe nikgwalpm a Maur Wailen pa pipa, kipm kol a ntiwe yangkipm a ikga ikilmpe yangkipm pa. Pake kipm la wulmpa a maur wor akipmen ore ariwe nikgwalpm a Maur Wailen pa, kolpa ti kipm yangkipm kalpisen a ikga ikilmpe yangkipm pa.”
JOH 10:1 Sisas lanaki tu pa la kolpa la, “Kupm lanakepm aklale wrisen la, melnum a ake or yipmingki yun a manto walkg malkgu pa kawor wunen pa, kil nowen or kol yipmingki yamping ur pa kaino kawor pa, pa kil melnum ikgwampet a la ik ikgwampel manto walkg malkgu ti iye kai.
JOH 10:2 Melnum a kil or yipmingki yun pa kawor wunen pati, kil melnum wor a ikgalen manto walkg malkgu pake.
JOH 10:3 A melnum a arpmen arpmen yipmingki yun pa kukwa kukwa yipmingki yun pa eng melnum wor alkil a ikgalen manto walkg malkgu pa kolti, wa manto walkg malkgu pa am atning kromeng a melnum alkil a ikgalenten pa. Atom melnum pa akwe nang atuwen pa wris wris atom alekgenten aye or en.
JOH 10:4 Kil alekgenten aye or en ti plalng pa, kil ep alekgenten a tu pa rka yirokg akilen pa katnuntel kolpa kai, eng ntei, tu pa ariwe kil pa a atning kromeng akilen ise.
JOH 10:5 Pake kol melnum misen ur ukwe manto walkg malkgu pa, tu mpa ngkirk tukuleikgen melnum pa, eng ntei, tu ake atning ok kromeng a melnum misen pa.”
JOH 10:6 Sisas ak yangkipm kla pa ak la, ari ake tu awi ariwe yangkipm yiprokgen na ur a kil lanaken pa.
JOH 10:7 Atom Sisas lanaken yangkipm yiprokgen pa la, “Kupm lanakepm aklale wrisen, kupm ti pa kupm yipmingki yun a manto walkg malkgu a ore kawor kul or.
JOH 10:8 Tu melnum a pikekg wli ep ep ak palk upaar ikgalen manto walkg malkgu pa, pa tu melnum ikgwampet a tu melnum a atn la ilmpor manto walkg malkgu pa, atom tu manto walkg malkgu pa ake pikekg atning ok kromeng a tu pa. Kolpa itna a a, kupm ti wli palng.
JOH 10:9 Kupm ti pa yipmingki yayun. Manto walkg malkgu a or kupm ti kawor pa, kil ake mpa ngkirk, kil mpa itni wor, a kil mpa kawor kul or il mi itni tutu wrik a mi anip atnewe wor pa.
JOH 10:10 Melnum ikgwampet pa ake wli la ntokg kwei ur pa, kalpis. Kil wli eng la ik ikgwam, a ilmpor ntokg paipm manto walkg malkgu pa. Pake kupm ti pa, kupm nar eng mpa ikglen manto walkg malkgu pa riworwor, tu mpa itni wor ntiwe itopen worwor kolpa itni ikngklei wang.
JOH 10:11 Melnum wor a ikgalen manto walkg malkgu ti pa, am kupm kilke. Melnum wor pa kil ak num upaarng manto walkg malkgu pa la imo ok itnen manto walkg malkgu alkilen pa.
JOH 10:12 Pake melnum a tu armpen eng kil akwap ikgalen manto walkg malkgu pa, pa ake melnum alkil a ikgalen manto walkg malkgu pa, wa kil ake yan yiprokgen a manto walkg malkgu pa, pa kil melnum a akwap marpm kolti. Atom melnum a kolpa pa kil ri nimpa tilpmingen pa wli pa, kil mpa wrekg ngkirk utnuurng manto walkg malkgu pa itni pa a kil am kai ise. Atom nimpa tilpmingen pa mpa wli kolti, kai kawor ilm manto walkg malkgu tiur pa a tiur pa ngkirk punprarng kai tutu palpa.
JOH 10:13 Melnum pa tu armpentel kolti, atom kil ake nikgwalpm arken manto walkg malkgu pa eng ikglen riworwor pa, kolpa atom kil am ngkark kai ise.
JOH 10:14 Pake kupm ti pa melnum wor a ikgalen manto walkg malkgu. Kupm ti ariwe manto walkg malkgu ti a manto walkg malkgu pa wa ariwe kupm ti.
JOH 10:15 Am wa kolpake, Yan kil ariwe kupm ti a kupm ti wa ariwe Yan pa, a kupm ikga imo ikirmpen manto walkg malkgu alkupmen pa.
JOH 10:16 Wa manto walkg malkgu tiur a ake itna kawor yipmingki wunen ti pa, pa akupmen yat. Pa kupm ikga wa lekgen tu pa yat. Atom tu ikga wa itning ok kromeng akupmen ti. Tu ikga wa kawor iken tita itni mapming wris kolti a ikga melnum wris kolti ikglenten.
JOH 10:17 Ti yiprokgen a Yan alkupm plan ipma wor wasrongen kupm ti pati atnen kupm la uk kupm alkupm ti imo. Pake ikga wa kupm wrekg rpmi pa.
JOH 10:18 Kupm ti ikga imo ik wasrongen a kupm alkupm ti kolti, ikgake melnum ur ik wam iyewentopm. Kupm antiwe titnongket a uk kupm alkupm ti eng tu ilmpopm imo pa. Wa kupm antiwe titnongket a wa wrekg rpmi pa. Pa am Yan alkupm pa alkopm yangkipm titnongket pa la kupm ik kol pake, atom kupm ak katila pa.”
JOH 10:19 Tu a men Suta atning yangkipm a kil la kolpa atom, tu wa wrekg alilakel tita arowom arowom itna tu alntu ti.
JOH 10:20 Tu wrong wailet pa la, “Kil pa Maur Paipm arpme atom almpla titnowel kil pa. Ti wa kipm wa atning yangkipm a kil pa la pa eng ntei?”
JOH 10:21 Ari tu tiur pa wa lala, “Melnum a Maur Paipm arpme pa ake mpa oklala kol melnum a oklala itna ti. Ti mpa Maur Paipm pa ntokg melnum a wulmpa tilmpisen pa palng wor la kolai?”
JOH 10:22 Atom men Suta wli wli takwem rka anong wail Serusalem pa. Pa wang wail a men akwonalmpen wang a pikekg tu almenen awi yalming a Maur Wailen angkai wam a tu wrongmanto ai aye yaper kul almenen, atom atopen atnen uk kai wam a Maur Wailen. Pa wang alkil a wripm wail el el pa.
JOH 10:23 Sisas pa angkom narno itna wan male wail ur a itna yipmingki wunen a yalming a Maur Wailen pa. Tu akwe wan male pa la Wan Male a Solomon.
JOH 10:24 Atom tu melnum wailen wailen a men Suta pa anel wli itna kapringentel kolti a asentel la, “Wa kitn ayewo kai wang watin, ake kitn laron oklala ti angko wunong eng mpa men riwe. Kol kitn Krais pa, mpa kitn laron kitn alkitn ti ngko wunong eng mpa men riwe.”
JOH 10:25 Sisas akalmpenten la, “Kupm pikekg lanakepm lanakepm, ining, ake kipm ukipma la pa aklale. Yan akupmen alkopm nang wailen atom kupm antokg kweikwei titnongket titnongket a kipm ari a kupm antokg pa, pa wa laron ak titnongketel kupm ti la kupm mla pa.
JOH 10:26 Pake kipm ake wa ukipma, eng ntei, kipm ake manto walkg malkgu akupmen pa.
JOH 10:27 Kupm ariwe manto walkg malkgu alkupmen pa a manto walkg malkgu atning ok kromeng akupmen pa atom katnuntopm pa.
JOH 10:28 Kupm alken yaprekg watin alkupmen a ak antokg tu rpma wor yongkyong. A tu pa ikgake kai paipm tukwleikgen kupm ti. A ikgake ntiwe melnum ur rkolngken iye kai tukuleikgen wam akupmen ti.
JOH 10:29 Yan akupmen a uk tu pa kul kupm ti, pa kil itna wailen angen kweikwei wrongkwail. Ti melnum ur ake ntiwe rkolng tu melnum pa tukuleikgen wam a Yan akupmen ti.
JOH 10:30 Kupm ti, a Yan pa, mentekg ake manman, mentekg almentekg wris kolti.”
JOH 10:31 Ari wa tu melnum wailen wailen a men Suta pa tu atning a kil la kolpa atom tu wa awi wes pa la wa ik orel eng kil imo.
JOH 10:32 Ari Sisas lanaken la, “Kipm ari kupm ti antokg kweikwei weten weten wor wor watipmen a Yan alkupmen lanakopm la kupm ntokg pa. Ti kipm ari ur a i paipm, atom kipm wa la wa ikweselopm imo pa?”
JOH 10:33 Tu melnum wailen wailen a men Suta akalmpe la, “Men ake la ikweseleitn imo eng kweikwei wor wor tiur ai a kitn antokg pa, men la ikweseleitn itnen a kitn la paipmel Maur Wailen. Ti kitn am melnum kolti kol men tike, ari wa kitn ngkat kitn alkitn ti la kitn Maur Wailen.”
JOH 10:34 Sisas akalmpe naken la, “Ti ake kipm angkleikg yangkipm titnongket alkipmen a ela wrkapm pa nira lakati ok a Maur Wailen la kolkil la, 'Kupm Maur Wailen la, kipm pa maur wailen.' Pa kipm angkleikg angkleikg, ti kipm ariwe pa.
JOH 10:35 Pikekg Maur Wailen akwe tu pa la maur wailen. Pa tu walyipmiri wapyipmiri wailen wailen amentepmen a pikekg ep ak ai kil ukwa yangkipm alkilen pa nar naken pa. Yangkipm alkilen a nira ela wrkapm pa mpam ela kolpake, ake mpa ungkwan.
JOH 10:36 Kupm ti pa, pikekg Yan pa amprinsopm eng alkilen atom ukwawopm nar kanokg ti. Kolpa atom kupm la kupm Warim Kipman a Maur Wailen pa. Ti antokg kolai atom kipm la kupm ti la kupm ak nokgel Maur Wailen pa?
JOH 10:37 Kol ake kipm ari titnongket a Yan alkopm atom kupm ak antokg kweikwei ti, ti ampur wa kipm ukipma yangkipm a kupm la kupm alkupm ti la kupm Warim Kipman alkilen pa.
JOH 10:38 Pake kol kipm ri la kweikwei a kupm antokg ti pa la pa Yan ti lanakopm atom kupm antokg ti, ti kol ake kipm ukipma yangkipm a kupm la kupm ti la kupm Warim Kipman alkilen pa, ti kol a wa kipm ukipma kweikwei a Yan lanakopm atom kupm antokg tiwo! Kol kipm ukipma kolpa pa, nol akipmen ti mpa umpen wontrakole riwe la, kupm ti rpma kawor Yan ti, a Yan ti rpma kawor kupm ti, atom mentekg wris pa.”
JOH 10:39 Tu melnum wailen wailen atning a Sisas la kolpa atom tu aye kul kai la rkulel nti ur, ari kil am kai takwleikgen wam atuwen ise.
JOH 10:40 Atom Sisas kil kinar kai angket u kop Sotan pa kaino rpma kaino wrik a pikekg Son kil kaluk tu atne pa. Kil rpma pa wang aripm ur pa pen.
JOH 10:41 A tu wrong kin a kipman watipmen pa anel wlintel. Tu lanaki tita lala, “Son kil alkil ti pa pikekg ake kil elng kla titnongket titnongket elngkitna ak plan titnongket a Maur Wailen pa, pake yangkipm a pikekg kil lakati melnum ti pa, pa aklale wrisen.”
JOH 10:42 Atom tu wrong kin a kipman watipmen a wli eng Sisas itna wrik pa tu ukipma kil pa.
JOH 11:1 Melnum wris ur pa nang akilen pa Lasarus, kil numpet paipm rmpa no anong Petani. Petani pa anong a Maria ekg Mata, muikgmayen wekg a Lasarus pa.
JOH 11:2 Maria pa kin a pikekg alung u yiwa yaprekget pa ak kaluk nepm a Wailen Sisas pa atom kil ak tukgunakg walk alkilen pa ak alo. A Lasarus a numpet rmpa pa kil muinwror a Maria ekg Mata pake.
JOH 11:3 Atom muikgmayen wekg pa ukwa yangkipm pa kinar kai kaino naki Sisas pa la, “Wailen, melnum a kitn wasrongen pa kil numpet paipm.”
JOH 11:4 Sisas atning kolpa a kil lala, “Numpet pa ikgake lok ngkliwel imo pa, kalpis. Pa tu wrong kin kipman ikga ngkit nang a Maur Wailen, a ikga wa ik plan titnongket a nang wailen a Warim Kipman a Maur Wailen ti wa ngko wunong.”
JOH 11:5 Sisas pa plan ipma wor wasrongen Mata, a paipmen alkil Maria pa wa muinwror alntuwekgen Lasarus pa.
JOH 11:6 Kil atning a tu lanakel la Lasarus pa numpet paipm, ari ake wa nar kul no atatu, wa kil rpma pa wang wekg a pa pen.
JOH 11:7 Atom kil lanaki tu watnom alkilen a kil aroaro wonel pa la, “Ti wa tepm yaper kinar anong kanokg Sutia wai!”
JOH 11:8 Tu akalmpentel la, “Melnum a aroaro wonel men. Ake wang aripm ur angketen a pikekg tu melnum wailen wailen a Suta antokg la ikweseleitn imo ingkinar pa. Ti wa kitn la wa yaper kinar pa eng ntei?”
JOH 11:9 Sisas akalmpe la, “Ti ran wulmpa wail ti! Melnum a atn ak ran ti pa, ake antiwe mpa nilkwok ngko pa, eng takgni ti alen kanokg ti atom kil ari ya ti angkom ti.
JOH 11:10 Kol melnum itn ik mining pa pati, mpa kil nilkwok ngko pake, eng ntei, kil wakg kalpisen a ak alen ya a angkom atn pa.”
JOH 11:11 Kil la kolpa plalng pipa, wa kil wa lanaken la, “Lasarus melnum wor a mentepmen pa okg rmpa, pake mpa kupm kinar irowel ikgyokg, ti kil mpa wrekg pa.”
JOH 11:12 Tu watnom a kil aroaro wonel pa akalmpe la, “Wailen, kol kil okg rmpi pa, ti kil mpa wrekg numpworen rpmi pa.”
JOH 11:13 Sisas pa wet la kil okg pake kil ariwe la kil am amo ut ise, pake tu watnom alkilen pa akwonalmpen la wet Sisas lanaken la la palpa kil okg kolti.
JOH 11:14 Atom Sisas lanaken angko wunong ariworwor la, “Lasarus pa am amo ut ise.
JOH 11:15 Pake kupm atopen eng ake kupm pikekg rpma kinar pa ak wang a kil numpet pa. Ti mpai eng mentepm kinar riwel o! Kweikwei kil ikga kipm ri pa atom ik titnongketel ipma a kipm ukipma kupm ti.”
JOH 11:16 Atom Tomas, nang wompel a kil pa Titimus, kil wrekg itna lanaki tu alntu watnom a Sisas pa la, “Ti wrekg mai eng tepm kimeket kinar imo ikilen kil pa kinar ai!”
JOH 11:17 Ak wang a Sisas anti tu watnom a kil aroaro wonel pa nar wreren eng a palng no anong Petani pa, kil atning yangkipm a tu lanakel la Lasarus pa am tu alilel rmpa kawor kirk a tu u mlaminel pa wang wikgwikg ise.
JOH 11:18 Petani pa ela wreren anong wail Serusalem, tu ngkom a Petani ti kaino Serusalem pa wreren kolen wang tiwel waiketn ur kolti (kilomita wraur).
JOH 11:19 Atom tu Suta wailet pa tu anel nar rka ak num kapor Maria ekg Mata eng kalkuten a muinwror alntuwekgen a amo pa.
JOH 11:20 Tu la Sisas pa yaya wreren eng a palng pake. Atom Mata atning kolpa, kil wrekg kolti atnuurng Maria pa rpma wan pa a kil kinar ansilel angko ya pa akyakurel aye no.
JOH 11:21 Atom Mata lanaki Sisas pa la, “Wailen! Kol pikekg kitn rpmi ti pa, muinwror a kupm ti kol ake imo.
JOH 11:22 Pake kupm ariwe la, kuina ur a kitn lanikel ik wang ti pa, Maur Wailen mpa ntokg pa.”
JOH 11:23 Sisas akalmpentel la, “Muinwror akitnen mpa wrekg rpmi malepmen pa.”
JOH 11:24 Mata akalmpe la, “Kupm ariwe pa, kil ikga wa wrekg rpmi ik wang umpuwen nimpokgen tu a amo kaingkai ai pa.”
JOH 11:25 Sisas lanakel la, “Kupm ti pa yiprokgen a la tu melnum wrekg rpma, a kupm yiprokgen a alken yaprekg watin atom tu rpma wor yongkyong. Melnum a kil ukipma kupm ti kil imo pa, kil mpa rkolng yaprekg watin pa kolpa rpmi wor yongkyong.
JOH 11:26 Melnum a rpma malepmen rpma ti atom kil ukipma kupm ti pa, kil ikgake imo kai wrisen pa. Ti kitn ukipma kolpa aki?”
JOH 11:27 Mata akalmpe Sisas pa kolpa la, “Wailen! Ei, kupm ukipma pake, kupm ukipma la kitn pa Krais, Warim Kipman a Maur Wailen a pikekg Maur Wailen la la ikga ukwa nar kanokg ti eng ik rmpen men wrong kin kipman.”
JOH 11:28 Mata la kolpa plalng pipa, kil yaper no kawor wan lanaki paipmen alkilen Maria pa meenen kai nungkulkg ai la, “Melnum a Kaling Plan Mentepm pa am wli wreren tike. Kil asen eng la ri kitn pake.”
JOH 11:29 Maria atning kolpa, kil wrekg pinterng or en ti kil atatu kinar la riwel.
JOH 11:30 Sisas pa ake no palng no anong ti pa, kil angko ya wai a pa. Kil itna wrik a wuten Mata kinar ansilel pa.
JOH 11:31 Tu Suta a ak num kapor Maria rpma wan pa ari Maria wrekg atatu or en ti atom tu katnuntel. Pa tu akwonalmpen la kil kai akgen Lasarus pa ak ok namputen kai kirkap ai.
JOH 11:32 Maria kil kinar palng ari Sisas pa, kil elngtangko rmpa nepm a kil pa a kil la, “Wailen! Kol kitn pikekg ntiwo rpmi ti pa, muinwror akupmen ti kol ake imo.”
JOH 11:33 Sisas ari Maria pa akg ak ok namputen a wa tu men Suta a antiwel pa wa anel akg ak ok namputen yat. Atom kil arein wail manten paipm.
JOH 11:34 Kil asenten la, “Ti kipm alilel ermpa kaino a i?” Ari tu akalmpe la, “Ti kitn no eng mentepm kai planteitn wrik a men alilel ermpa wai.”
JOH 11:35 Atom Sisas akg.
JOH 11:36 Atom tu Suta pa lanaki tita la, “Kipm ri o! Kil wasrongen Lasarus pa paipm atom kil akg kolpa.”
JOH 11:37 Ari tu tiur pa lala, “Kil melnum a pikekg antokg melnum wulmpa tilmpisen ti palng wor. Ti kol a kil ntokg Lasarus a pikekg numpet paipm la kol a imo ti palng wor eng kol ake kil imo.”
JOH 11:38 Sisas pa ak won kati Lasarus pa kai paipm atom kil akg arein or ya pa kai kirkap pa. Kirk pa tu u mlamin atom tu ak wes kimplangen wail pa ak ipaarng mlamin ok pa.
JOH 11:39 Sisas lanaken la, “Tulpul wes pa tukuleikgen o!” Ari Mata muikgmayen a melnum a amo pa la, “Wailen, kil am men alilel ermpa wang wikgwikg ti am yaprekget paipm ise.”
JOH 11:40 Ari Sisas akalmpentel la, “Ti ake kitn wonarpme a wuten kupm lanakeitn pa la, kitn ukipma pa, mpa kitn ri titnongket a nang wailen a Maur Wailen pa.”
JOH 11:41 Atom tu talpul wes pa takwleikgen a Sisas ikg kaino kwa pa a kil lanaki Yan alkil pa la, “Alkeitn wor Yayai, eng kitn atning atning oklala akupmen.
JOH 11:42 Kupm alkupm pa ariwe la akangklei wang kitn atningkopm atningkopm pa, pake kupm la pa eng tu wrong kin a kipman a itna ti mpa tu itning ukipma la kupm ti pa, am kitn alkitn pa ukwawopm nar pake.”
JOH 11:43 Sisas la kolpa plalng pa kil akwe yikakatnen la, “Lasarus, wrekg i kirk pa or o!”
JOH 11:44 Melnum yipmiri pa wrekg ngkaten apm a tu akalmpel nepm a wam a ak yapowel ikgokg pa ngkaten aye or en ti. Kolti, Sisas lanaken la, “Nelkgen apm pa tukuleikgentel eng kil kai o!”
JOH 11:45 Kolpa atom tu wailet a men Suta a wli ari Maria antiwel rpma pa, anel ari kuina ur a Sisas antokg pa atom tu ukipma Sisas.
JOH 11:46 Ari wa tu tiur pa kai ari tu melnum a arpmen yangkipm yiprokgen a Moses pa atom tu lakati naki tu pa a wet Sisas la Lasarus a amo pa wrekg rpma pa.
JOH 11:47 Atom tu melnum tukgunakgen a tu ipma krakgen a ak ak kwap eng al wor uk Maur Wailen nampokgen tu melnum a arpmen yangkipm yiprokgen a Moses pa ukwa yangkipm kai naki tu mring man wailen wailen a antiwen ikgalen men Suta pa wli kimeket takwem rka akor la asen tita kolpa la, “Mpa mentepm ntokg kolai eng ngketen melnum a antokg kla titnongket titnongket wailet kolpa?
JOH 11:48 Kol mentepm ri wulmpa eng melnum pa kil ikwap pa kolpa iye kai pa, ikga kil ik rkolng tu wailet ikgam wli ukipma kutnun kil pa, la kil melnum a Maur Wailen ukwa nar pake. Atom tu Rom pa ikga ipma wakget wli tikale ntokg paipm yalming a Maur Wailen a ntokg paipm tu wrong kin a kipman a mentepmen ti.”
JOH 11:49 Tu asen tita kolpa, atom melnum wris ur a tu tukgunakgen a tu ipma krakgen a ak ak kwap eng al wor uk Maur Wailen pa, nang alkilen pa Kaiapas. Melnum pa kil tukgunakgen itna ep eng tu kimeket a ak ak kwap itna wan yalming a Maur Wailen ak wring pa. Kil lala, “Kipm ake ariwe kuina ur!
JOH 11:50 Kipm ti titnowen ya a ikga ngklinso ti! Ti mpa kupm lanikepm pa: kol wrong kin a kipman amentepmen ti kai paipm plalng pa, pa ake mpa wor. A kol melnum wris ur pa uwi wrik a tu wrong kin a kipman pa imo pati, pa mpa wor pake.”
JOH 11:51 Ake kil alkil ti la ak nikgwalpm a kil alkil ti pa, kalpis. Ak wring ti pa kil itna ep eng tu ipma krakgen kimeket a ak ak kwap itna yalming a Maur Wailen, kolpa atom Maur Wor a Maur Wailen pa ngkat okel kil pa atom kil la ep lala, Sisas pa ikga uwi wrik a men wrong kin a kipman a Suta ti imo.
JOH 11:52 Ake la imo eng men Suta ti wris pa, kil la ikga imo eng ik uwi tu warim a Maur Wailen a rka purngprarng yela kanokg ti iyewen wli itni wris.
JOH 11:53 Atom tu melnum wailen wailen a ikgalen men Suta pa anel akor la yapon yangkipm la ilm Sisas pa imo. Atom ak wang pa kai pa tu numprampen la ilmpel imo pake.
JOH 11:54 Kolpa atom Sisas ake wa atn or wunong itna wulmpa a tu wrongkwail Suta pa om. Kil wrekg anti tu watnom a kil aroaro wonel pa kinar kai anong ur a tu namput la Epraim, a ela wreren wrik wes ningkrapm kalpmilel. Atom kil anti tu watnom akilen pa rka pake.
JOH 11:55 Wang wreren eng a men Suta a kai rki wris eng ikwonilmpen wang wail a pikekg Maur Wailen awiyo angkai Isip pa aye kul wor pa. Atom tu melnum wailet a yela anong kanokg pa anel wli wli anong wail Serusalem pa la kurkuk il wam kipmanen a kurkuk il wam kinen numprampen tu alntu ti ep rpmi kukula wor itni wulmpa a Maur Wailen, plalng pa tu ikga rki wris itopen wang wail pa.
JOH 11:56 Tu am akor Sisas pake, atom anel asen tita itna kawor yipmingki wunen a yalming a Maur Wailen pa la, “Kipm akwonalmpen kolai? Sisas ikga wli ntiwo itopen ngkit nang a Maur Wailen pa ik wang wail ti aki kalpis?”
JOH 11:57 Tu melnum tukgunakgen a tu ipma krakgen a ak ak kwap eng al wor uk Maur Wailen, a tu melnum a arpmen yangkipm yiprokgen a Moses, tu pa uk yangkipm titnongket la, kol melnum ur ri Sisas pa wli itni kol ur pa pipa, mpa tu wli laniken eng mpa tu kai rkulel iye kai.
JOH 12:1 A wang wampwomis wampwompwris pa a eng men Suta ikwonilmpen wang wail a pikekg Maur Wailen awi tu amenen angkai Isip pa aye kul wor ti. Pipa Sisas nar Petani, anong a Lasarus melnum a pikekg amo atom Sisas la ti wa wrekg rpma pa.
JOH 12:2 Tu numprampen okipma pa eng la il itopen uk Sisas pa. Atom Mata pa ampreing okipma pa a muinwror alkilen Lasarus pa anti tu a wli anti Sisas pa anel rka al okipma pa rka.
JOH 12:3 Pipa Maria pa ngkaten u yiwa wriwen yaprekget wor a pikekg armpen ak marpm wail manten a rpma o maleek ok a no pik pa aye kul kai ak kaluk nepm a Sisas pa. Plalng pipa, kil ak tukgunakg walk alkil ti ak alo. Yaprekg aris wor wrisen pa pus kai or arpme wan wunen pa kimeket.
JOH 12:4 Ari watnom wris ur a Sisas kil aroaro wonel pa, nang akilen pa Sutas Iskariot. Melnum pa ikga uk Sisas kai wam a tu wrongmanto pa, kil lala,
JOH 12:5 “Yekei, u yuwa yaprekget wor pa wa takote ak klak nepm a kil pa tuwa! Kol a mentepm ik uwi marpm wail ur ai eng ik ngklin tu melnum a rpma tukwok.”
JOH 12:6 Oklala a kil la kolpa, palpa kil ake arein la ik ngklin tu yek yek kun a rka paipm tukwok aklale pa, kalpis. Kil melnum a ikgalen marpm apmkoken a tu wrong kin kipman angkli angkli marpm ak angklin Sisas pa a tu watnom a kil aroaro wonel pa, pake kil melnum ikgwampet, atom kil aklampe marpm tiur pa eng alkilen.
JOH 12:7 Ari wa Sisas lala, “Wa la eng ntei, itni eng kil ik u yiwa pa ik inelopm o, numprampen kupm ti ep eng ikga kupm imo pa tu uwi palk a kupm pa iye kai lil kawor kirk a u mlaminel pa rmpi.
JOH 12:8 Kol tu melnum a rpma tukwok pa tu pa antiwepm rpma pa akangklei wang pake. Kupm ti pa ikgake ntiwepm rpmi ti ikngklei wang pa, kalpis.”
JOH 12:9 Ari wailet a tu Suta pa atning la Sisas pa rpma anong Petani. Atom tu wli wli la riwel. Ake tu wli la ri Sisas pa wris pa, tu wli wa la ri Lasarus a pikekg amo atom wa Sisas wa la atom kil wrekg rpma pa.
JOH 12:10 Kolpa atom tu melnum tukgunakgen a tu ipma krakgen a ak ak kwap eng al wor uk Maur Wailen pa akor la yapon yangkipm la wa ilm Lasarus pa wa imo yat.
JOH 12:11 Eng ntei, wailet a men Suta pa atnuurng tu pa rka wai, a tu kul ukipma Sisas pa atnen a kil la Lasarus a amo pa wrekg rpma pake.
JOH 12:12 Atom tu okg or kong ti pa, tu wailet paipm a pikekg anel wli wli eng akwonalmpen wang a pikekg Maur Wailen awi tu a men angkai Isip pa kul wor ti, tu atning la Sisas pa yaya eng a no Serusalem tike.
JOH 12:13 Tu kai angket paimplong ipm pa aye kinar ansilel angko ya pa, tu akyakurel aye no kolpa, tu atop ngkat ok la, “Ti tepm itopentel ngkit nang a Maur Wailen! Maur Wailen, kitn mpa uk ipma wor ngklin melnum a kitn naren atom kil angkom no ti! Kil melnum wailen ikga itni tukgunakg a ikglen men Isrel wrong kin kipman akitnen ti.”
JOH 12:14 Sisas awi nimpa nungkulkg watin warimpen ur pa kaino arpme, kol a wrkapm a Maur Wailen la pa,
JOH 12:15 ”O, kipm wrong kin kipman a Saion pa, ampur kipm ngkark. Kipm ri melnum wailen a itna tukgunakg a kipm Isrel pa rpma kaino nimpa nungkulkg watin warimpen pa ti wli pake.”
JOH 12:16 Ak wang pa tu watnom a kil aroaro wonel pa ake tu ariwe yiprokgen a yangkipm a nira ela wrkapm pa. Kil amo atom wrekg kaino anti Yan pa rpma awi titnongket a nang wailen pa, pa tu ariwe la la kuina ur a pikekg palng eng Sisas ti pa, pa a katnun yangkipm a pikekg tu melnum ok wripm nira ela wrkapm pa ep ak ai.
JOH 12:17 Atom tu wrongkwailet a pikekg anti Sisas itna anong Petani pa anel ari a Sisas la Lasarus pa wrekg a mlamin pa or rpma, atom tu ti pikekg lakati naki tu ai, ti tu atning yela ise.
JOH 12:18 Kolpa atom ari tu ak wail wrekg wli rka la riwel, eng ntei, tu pikekg atning a kil pikekg elng kla titnongket titnongket itna eng ak plan titnongket a Yan alkil pa.
JOH 12:19 Atom tu melnum a arpmen yangkipm yiprokgen a Moses pa anel naki tita la, “Kipm ri, kuina ur a mentepm alok angkengken pa ari akentiwe. Tu wrongkwail a yela kanokg ti pa am kai katnun kil ise.”
JOH 12:20 Tu Krik tiur pa pikekg wli aken men Suta pa, atom tu wa rka anong wail Serusalem pa eng la kipor kilko ilein Maur Wailen ik wang wail ti eng ikwonilmpen wang a pikekg Maur Wailen awi tu a men Isrel angkai Isip pa aye kul pa.
JOH 12:21 Atom tu Krik pa kai ari Pilip. Pilip pa melnum a anong Petsaita a anong kanokg Kalili. Atom tu asentel la, “Melnum wailen, men la ri Sisas.”
JOH 12:22 Atom Pilip pa kai naki Antru pa kolti, tuwekg yatenen wa kai lanaki Sisas.
JOH 12:23 Ari Sisas akalmpenten la, “Wang am kul wreren eng Yan a plan titnongket a nang wailen klalen a kil la uk Warim Kipman A Melnum ti eng kipm ri.
JOH 12:24 Kupm lanakepm aklale wrisen: kol kwei wris ur a ake alin kinar kanokg pa, ikgam rmpa kati kati kolpa rmpa pake. Pake kol kwei a alin kinar kanokg atom nilong pa kai plepm pa, pa kil raku wailet.
JOH 12:25 Kol melnum ur kil ikwonilmpen kil alkil kolti la rpmi wor i kanokg ti pa, pa kil ikga kai paipm. Pake kol melnum ur kil ake akwonalmpen kil alkil kolti la rpmi wor i kanokg ti pa, pa kil awi yaprekg watin eng rpma wor yongkyong.
JOH 12:26 Melnum ur la ikwap eng kupm ti pa, pa kil kul kutnuntopm o! Wrik ur a kupm arpmewe pa, kil ikgam antiwopm rpma wrik pake. Wa kil ikwap eng kupm ti pa, pa Yan mpa ngkit nang akilen ti a lkel wor.”
JOH 12:27 Atom Sisas wa la kolpa la, “Ak ketn ti pa ipma akupmen ti pa kaikut paipm wrisen, ti mpa kupm la kolai? Mpa kupm la kolkil la, 'Oi Yaiyai, wang a kalkuten wail eng a palngtopm tike, ti kitn uwiyopm iye kai tukuleikgen kalkuten ti!' A'a, ake mpa kupm la kolpa. Yiprokgen a pikekg kitn ukwawopm nar pa am la kupm rki kalkuten pake.
JOH 12:28 Yaiyai, kuina ur la mpa palngtopm ti pa, mpa kitn plan titnongket a nang wailen klalen alkitnen pa ngko wunong!” Atom ok ur la angkaino kitnong pa nar lala, “Kupm pikekg plan titnongket a nang wailen klalen akupmen ise, ti mpa wa kupm plan nti ur pa.”
JOH 12:29 Ari tu wrongkwail a itna pa atning atom tu anel la kolpa la, “Pa milmal aki?” Ari tiur pa la, “Palpa maur akwapel a Maur Wailen nakel yangkipm ok ur pa.”
JOH 12:30 Atom Sisas lanaken la, “Ok pa ake la nar la ik ngklin kupm ti pa, pa la nar la ik ngklin kipm pa.
JOH 12:31 Ti am wang a Maur Wailen la kipm wrong kin a kipman a itna kanokg ti la kipm antokg paipm tike atom ikga kipm uwi wleket. Ti am wa wang a kil mpa lok ngkli Maur Paipm Satan a itna tukgunakg ikgalen kanokg ti ik tike.
JOH 12:32 Wa kupm ti pa, ikga tu ngkitopm iye kaino rki kaino yo okgmangki pa. Atom wa Maur Wailen ikga wa uwiyopm iye kaino kwa ai tukwleikgen kanokg ti pa, ikga kupm uwi kipm wrongkwail kin a kipman pa iye kaino eng kupm alkupm.”
JOH 12:33 Kil la yangkipm pa naken ep la tu riwe ya a ikga kil imo pa.
JOH 12:34 Ari tu wrongkwail kin a kipman a itna pa la wli pa wli pa la, “Ti men pikekg atning yangkipm titnongket amenen a la kolpa la, ti Krais a pikekg Maur Wailen la ukwa nar eng ikuwiyo pa ikga rpmi yongkyong. Ti wa antokg kolai ti kitn wa lala Warim Kipman A Melnum ikga wa tu ngkit iye kaino rki yo okgmangki? Warim Kipman A Melnum a kitn la ti pa mla?”
JOH 12:35 Sisas akalmpe la kil alkil la, “Wakg a ak alentepm ti pa ikga iklentepm itni waiketn kolti. Ti ik wang waiketn a wakg alen itna ti pa, kipm ngkom ik klalen tiwo, mpa miningtepm angko ya! Tu melnum a angkom atn ak miningket pa, tu ake mpa ri ya atom tu ngkom pa.
JOH 12:36 Ik wang a wakg ti ak alentepm itna ti pa, kipm kul ukipma wakg tiwo, eng mpa wakg ti kawor len itni ipma akipmen pa.” Sisas lanaki tu wrong kin a kipman pa yangkipmok pa kai plalng pa, kil am atnuurngken kai atom ake kil wa atn angko wunong eng mpa tu riwel.
JOH 12:37 Sisas elng kla wailet ak plan titnongket a Yan alkil pa tu ari ai, pake tu ake wa ukipma kil ti.
JOH 12:38 Kolpa ti yangkipm a Aisaia melnum ok wripm a Maur Wailen pikekg la pa am palng aklale tike. Pikekg kil la, “Maur Wailen, yangkipm ti men lanaken lanaken ining, ti mla a i mpa wa ukipma yangkipm a men lanaken ti? Kalpis tuwa! A wa mla a i mpa wa ri titnongket a kitn Maur Wailen plan plan angko wunong ti? Kalpis tuwa!”
JOH 12:39 Oklala a pikekg Aisaia nira la kolpa, pa am wa palng aklale tike. Kil pikekg nira la tu wrong kin kipman ti ake antiwe ukipma eng ntei. Kil awi ok a Maur Wailen nira kolkil la,
JOH 12:40 ”Kupm ampri wulmpa atuwen pa, atom tu ake antiwe mpa ik ri kuina ur. A kupm antokg ipma atuwen wa kakiren, atom ake antiwe mpa tu riwe yiprokgen a yangkipm pa, atom akentiwe mpa tu plelng ipma wa yaper kul, atom ake antiwe mpa kupm ntokg tu palng wor.”
JOH 12:41 Aisaia pikekg nira pa atnen Maur Wailen plantel ep atom kil ari a Sisas kil awi nang wailen a antiwe titnongket pa, atom kil laron Sisas pake.
JOH 12:42 Ei aklale, tu wrong wailet ake ukipma Sisas pa. Pake tu mring man wailen wailen wailet tiur pa tu ukipma. Pake tu ngkark eng laron tu alntu ti angko wunong atnen ikga tu melnum a arpmen yangkipm yiprokgen a Moses pa ungkwanten tukwuleikgen tu wrong kin a kipman mapming a ukipma Maur Wailen pa.
JOH 12:43 Pa plan la tu ake wasrongen la mpa Maur Wailen pa kiporngken yangkipm ngkit nang atuwen pa. Tu wasrongen la tu melnum ti kiporngken yangkipm ngkit nang atuwen pake.
JOH 12:44 Atom Sisas la yikakatnen ak ok wail pa la, “Melnum a kil ukipma kupm ti pa, pa ake kil ukipma kupm alkupm wris ti kolti pa. Kil wa ukipma melnum a pikekg ukwawopm atom kupm nar pa.
JOH 12:45 Melnum a kil ari kupm ti pa, am wa kil ari melnum a ukwawopm nar pa yat pake.
JOH 12:46 Kupm ti nar kanokg ti kolen wakg a ak alen miningket, eng mla ur a ukipma kupm ti pa kil ikgake rpmi ik miningket pa, kalpis.
JOH 12:47 Kol melnum ur kil itning yangkipm akupmen, pake kil ake katnun pa, pa kupm ti ikgake uwiyel iye kai itni yangkipm la kil ikga uwi wleket pa. Kupm ake nar kanokg ti la uwi kipm wrong kin kipman a kanokg ti iye kai itni yangkipm pa la kipm ikga uwi wleket pa. Kupm nar eng la ikuwiyepm iye yaper kul eng Yan pa.
JOH 12:48 Melnum ur a uk yirokg kupm ti a talpulng yangkipm akupmen ti pa, am yangkipm a kupm laron ti pa ikga uwiyel iye kai itni ntokg yangkipm ik wang umpuwen pake, a kupm ti pa kalpis.
JOH 12:49 Eng ntei, kupm ake laron yangkipm pa ak nikgwalpm alkupmen ti pa, kalpis. Yan alkupmen a pikekg ukwawopm nar pa, kil pa alkopm yangkipm titnongket la mpa kupm la kolai, a wa mpa kupm laron kuina.
JOH 12:50 Kupm ariwe la melnum a atning katnun yangkipm titnongket a kil alkopm pa, yangkipm pa mpa lkel yaprekg watin eng rpmi wor yongkyong. Atom oklala wrongkwail a kupm la ti pa, am Yan alkupm pa alkopm yangkipm titnongket la kupm lakiti kimek kimek nikepm pake.”
JOH 13:1 Wang wail a men Suta takwem rka akwonalmpen wang a pikekg Maur Wailen awi tu a men angkai Isip pa aye kul wor ti wreren eng a palng. Pa Sisas pa kil ariwe la wang a pikekg Yan alkil alm pa am wreren tike, eng kil a utnuurng kanokg ti a kaino nti Yan alkil pa rpmi. Kil pa plan ipma wor wasrongen tu melnum alkilen a katnuntel rpma kanokg ti ak ai kulngkul, kul ngko wang a kil imo pa, pa kil plan ipma wor wasrongenten wrisen.
JOH 13:2 Ak nungkurikg pa Sisas nampokgen tu watnom a kil aroaro wonel pa tu al okipma pa rka pa, Maur Paipm Satan pa am plelngen nikgwalpm a Sutas warim kipman a Saimon Iskariot pa ise, eng mpa kil uk Sisas pa kai wam a tu wrongmanto pa.
JOH 13:3 Sisas pa kil ariwe la Yan alkil pa pikekg alkel kweikwei wrongkwail pa kul wam akilen plalng ise. Kil ariwe la kil pikekg anti Yan Maur Wailen rpma atom nar ti kil ikga wa yaper kainontel.
JOH 13:4 Tu al okipma rka pa, kil wrekg aner apm a wropuk alkil pa, a kil ak apm a ak akul akul num pa ak angket tatu kinslikg alkilen pa.
JOH 13:5 Kil alung u kai kaimung pa ngkaten eng klak nepm a tu watnom a kil aroaro wonel pa a kil ak apm a kil ak angket kinslikg pa ak akul nepm atuwen pa.
JOH 13:6 Kil klak klak nepm a tu pa kolpa kai, kil la klak nepm a Saimon Pita pa pipa, Pita pa asentel la, “Ai, Wailen, ti kitn pa ake melnum wusok ur la mpa klak nepm akupmen ti!”
JOH 13:7 Ari Sisas akalmpentel la, “Kitn ake ariwe yiprokgen a kupm ak kolpa, pake kutnukg pa kitn ikga uwi riwe worwor pa.”
JOH 13:8 Pita akalmpe la, “Akentiwe mpa kitn klak nepm akupmen ti. Kalpis wrisen!” Ari Sisas akalmpentel kolpa la, “Kol kitn ngkengkopm eng ake kupm klakeitn nepm pa, kitn ake mpa kul or wris nimpokgen kupm ti.”
JOH 13:9 Saimon Pita akalmpe la, “Wailen, kolpa pipa, ake mpa kitn klak nepm ti kolti pa, kol a kitn wa klak wam a tukgunakg ti wa nimpokgen!”
JOH 13:10 Sisas la kolpa la, “Melnum a pikekg karkuk pa, pa kil am rukis wor ise, ti kil ake mpa wa kurkuk nti ur pa, mpa klakel nepm ti kolti. Kipm ti pa rukis wor, pake melnum wris ata pa kil pa kimpilpet.”
JOH 13:11 Sisas pa kil ariwe ise, la mla a i mpa uk kil ti kai wam a tu wrongmanto pa, kolpa atom kil la tu kimeket pa kimpilp kalpisen wor pake, wris pa pati kimpilpet.
JOH 13:12 Kil klak nepm a tu pa kai plalng pa, kil awi apm wropuk alkil pa nowe kolti a kil kul rpma wrik a wuten kil arpme pa a tu al okipma pa rka. Atom kil asenten la, “Kipm ariwe kuina ur a wuten kupm aktepm pa aki kalpis?
JOH 13:13 Kipm akwewopm la kupm melnum a kaling plantepm a wa kipm akwewopm la kupm Wailen. Kipm akwewopm kolpa pa, pa kipm akwewopm ute pake, am kupm melnum kolpa aklale pake.
JOH 13:14 Kupm Wailen alkipmen a kupm melnum a kaling plantepm, pake kupm wuten arku kupm alkupm klakepm nepm pa, kolpa ti kipm pa mpam wa rku kipm alkipm ti klak titawel nepm pa kolpa yat pake.
JOH 13:15 Kupm ak kolpa plantepm la ikga kipm ik kitila kol a kupm ak pake.
JOH 13:16 Kupm lanakepm aklale wrisen, melnum a aken kwap orngwatneikgen mring alkil pa kil ake wailen angen mring alkil pa. A melnum a aye yangkipm itna ya pa ake wailen angen melnum a ukwawel kai pa.
JOH 13:17 Kipm am ariwe a wuten kupm ak kalingtepm pa yat ise. Ti kol kipm ikwap kol a kupm ak kil kitila kolpa iye kai pipa, kipm itopen o! Maur Wailen mpa plan ipma wor kipm pake.
JOH 13:18 Yangkipm a kupm la kil pa ake kupm la eng kipm kimeket pa. Kupm ariwe kipm wris wris ti worwor la kipm melnum kolai, pake pikekg kupm takwei kipm ti kimeket eng mpa yangkipm a la ela wrkapm a Maur Wailen pa palng ok rke. Yangkipm pa la kolkil la, 'Melnum a kil antiwopm al okipma ti pa, kil plelng yirokg lawopm.'
JOH 13:19 Yangkipm a kupm la ti pa ake palng, a pa. Pake kupm lanakepm ep ep eng ikga palng kolpa pipa, kipm ikga ukipma la Kupm am Rpma Kolpa Rpma pake kol a wet kupm lanakepm ti.
JOH 13:20 Kupm lanakepm aklale wrisen, melnum ur a kil atopen awi melnum a kupm ukwa kai pa atom kil ukipma pa, pa wa kil atopen awi kupm ti yat. A melnum ur a kil atopen awi kupm ti pa, pa kil atopen awi melnum a kil ukwawopm atom kupm nar pa.”
JOH 13:21 Sisas la kolpa plalng pa, ipma a kil pa kalkut paipm kolti, atom kil laron angko wunong la, “Kupm lanakepm aklale wrisen, melnum wris ur akipmen ti pa mpa uk kupm ti kai wam a tu wrongmanto.”
JOH 13:22 Tu watnom a kil aroaro wonel pa anel tutus ikg kai tita la, pa kil la mla wai.
JOH 13:23 Watnom wris ur a Sisas plan ipma wor wasrongen pa, kil arm yamping rmpa wreren Sisas pa al okipma rmpa.
JOH 13:24 Atom Saimon Pita ak ikg almpel la, “Ti isentel ri, la kil la mla wai!”
JOH 13:25 Kolpa atom kil elng kai rka won a Sisas pa a asentel la, “Wailen, kitn la mla wai?”
JOH 13:26 Sisas lanakel la, “Mpa kupm kipor nok tingklak pa ngklewe ulaket pa lkel pa, pa pati am melnum pake.” Atom kil awi okipma pa kapor kolti angklewe ulaket pa atom uk Sutas, warim kipman a Saimon Iskariot pa.
JOH 13:27 Ak wang a Sutas awi nok tingklak pa, Satan pa am pinterngen kawor rpma ipma alkilen ise. Atom Sisas lanakel la, “Kitn la ntokg kuina pa, kitn ntokg or yawel o!”
JOH 13:28 Tu rka wris al okipma pa ake ur ariwe yangkipm a Sisas naki Sutas pa.
JOH 13:29 Sutas pa kil melnum a ikgalen marpm apmkoken atuwen pa, atom tu akwonalmpen la pa Sisas lanakel la kil kai rmpenten kweikwei elngkirmpi eng wang wail aripm ur ti ikga tu rpmi wris eng ngkit nang a Maur Wailen, aki la kil kai uk marpm tiur ik ngklin tu a rpma tukwok pa.
JOH 13:30 Sutas awi nok tingklak pa al plalng pipa, kil wrekg kawor en ai kai. Am mining tike.
JOH 13:31 Sutas kil kai elng kawor en ai pa, Sisas kil lanaki tu watnom alkil a rka pa kolpa la, “Wreren eng a Maur Wailen la plan titnongket a nang wailen a Warim Kipman a Melnum tike. A kuina ur wreren eng a kil la ntokg ti pa, pa mpa ik plan titnongket a nang wailen a Maur Wailen ti ngko wunong tike.
JOH 13:32 Wa kol kil ntokg kuina ur wreren eng a kil la ntokg ti plalng atom ik plan titnongket a nang wailen a Maur Wailen ti ngko wunong ti plalng pipa, Maur Wailen kil alkil ti mpa wa plan titnongket a nang wailen akilen ti wa ngko wunong kolpa yat pake. Ti ake mpa mpen, kil eng am a ik penterngen tike.
JOH 13:33 Kipm watnom alkupmen, kupm ikgake ntiwepm rpmi i kanokg ti wang watin pa. Kipm ikga ikoropm, pake kupm la lanikepm iklale kuina ur kol a pikekg kupm naki tu melnum wailen wailen a Suta pa, la anong a kupm la kaino pa kipm ikgake ntiwe a kaino pa, kalpis.
JOH 13:34 Kupm la wa lanikepm yangkipm titnongket weten ur kil eng kipm kutnun: ti kipm mpa plan ipma wor wasrongen tita kol a kupm plan ipma wor wasrongen kipm pa! Ti kipm mpa plan ipma wor wasrongen tita kolpake!
JOH 13:35 Kol kipm kutnun nikgwalpm a plan ipma wor wasrongen tita pa pati, mpa ik plan tu wrongkwail riwepm la kipm pa kipm watnom akupmen a kupm arowonelepm pa.”
JOH 13:36 Saimon Pita asen Sisas pa la, “Wailen, kitn a kai a i?” Ari Sisas akalmpe la, “Wrik a i a kupm kaiye pa, kitn akentiwe mpa ntiwopm kai ik wang ti pa. Pake ik wang kutnukg pa ikga kitn kutnuntopm kai pake.”
JOH 13:37 Wa Pita asen la, “Wailen, antokg kolai atom wa kitn angkengkopm la akentiwe mpa kupm ntiweitn kai ik wang ti? Kupm numprampen la imo ikirmpenteitn.”
JOH 13:38 Atom Sisas akalmpentel la, “Kitn numprampen aklale la mpa imo ikilen kupm tike! Kupm lanakeitn aklale la, mpa ik mining ti pa kitn mpa lam nang akupmen pa nti wraur, plalng pa, karek pa la!”
JOH 14:1 Sisas lanaki tu watnom a kil aroaro wonel pa kolpa la, “Ampur kipm ipma kalkut, kipm ukipma kupm ti a wa kipm ukipma Maur Wailen pa itni titnongket.
JOH 14:2 Ti anong a Yan akupmen pa wrik wail itna. Kolpa ti kupm la ep kaino numprampen wan ti ik uwiye kipm ti wris wris iknumputepm elngtepm itni. Kol anong pa kalpis pa, pa kol ake kupm lanakepm la, kupm kaino numprampen wrik pa elngkitna eng kipm pa.
JOH 14:3 Pake wrik wail itna pa, kolpa ti kupm la ep kaino numprampentepm wrik pa elngtepm itni. Ikga kupm wa yaper nar ik yakurepm iye kaino eng alkupmen, eng ikga kipm ntiwopm rpmi kaino anong a kupm arpme ai.
JOH 14:4 Ya a kaino anong a kupm la kainowe pa kipm ariwe pa.”
JOH 14:5 Ari Tomas lanakel la, “Wailen, men ti ake ariwe anong ikga kitn kainowe pa, ti ikga men riwe ya pa kolai eng men kaino pa?”
JOH 14:6 Sisas akalmpentel la, “Kupm alkupm ti pa kupm ya, a kupm yiprokgen a nikgwalpm aklale, a wa kupm yiprokgen a uk yaprekg watin eng rpma wor yongkyong. Akentiwe mpa melnum ur or kol ya manet ur ai ngkom nlokgen kupm ti kaino eng Yan pa, kalpis, mpa or kupm ti kaino pake.
JOH 14:7 Atom kol kipm riwe kupm ti worwor pa, pa am wa kipm ariwe Yan akupmen pa yat pake. Kipm am ariwel ise, atom ik wang ti kai pa, kipm mpa wa uwi riwe kil pa worwor.”
JOH 14:8 Ari Pilip la kai Sisas pa la, “Wailen, kwei ur wail a men wasrongen la kitn ntokg pa pati lala kitn planto Yan ti. Kitn planto pa, men ake mpa wa isenteitn eng Yan pa wa or pa kai om.”
JOH 14:9 Sisas akalmpe la, “Pilip, akangklei wang angkai ai kul ti kupm antiwepm rpma ti, ake wa kitn ariwe kupm ti? Melnum ur a kil ari kupm ti pa, am kil ari Yan akupmen pa yat ise. Ti antokg kolai atom, kitn wa lala plantepm Yan ti?
JOH 14:10 Ti ake kitn ukipma la kupm ti rpma kawor Yan ti a wa Yan ti rpma or kupm ti? Ti yangkipm a kupm lanakepm pa, pa ake yangkipm a kupm la ak nikgwalpm a kupm alkupm ti pa. Pa am Yan pa rpma or kupm ti atom kwap wrongkwail a kupm ak ti pa, am kil alkil pa ak pake.
JOH 14:11 Ti kipm ukipma la Yan pa rpma or kupm ti a wa kupm ti rpma kawor Yan pa. Pake kol ake kipm ukipma kol a kupm la la pipa, ti kol a kipm ri kwap titnongket weten weten a kupm antokg ak titnongket a Yan ti pa, kol kipm ukipma kol a kupm la pa am aklale pake.
JOH 14:12 Kupm lanakepm aklale wrisen la, melnum ur a kil ukipma kupm ti pa, kil ikga ikwap kol kupm ak pa. Wa kil ikga wa ikwap kai klangkil kwap wrongkwail a kupm ak ti, eng ntei, kupm am kaino eng Yan kilke.
JOH 14:13 Atom kuina ur a kipm ikga naren kupm ti niki Yan pa, pa ikga kupm ik pa, eng ikga Yan pa uwi nang wailen itnen kuina ur a kupm Warim Kipman alkilen ikga ik ikilmpe asen akipmen pa.
JOH 14:14 Am wa kolpake, kipm isen kweikwei ur ik ok akupmen ti pa, pa ikga kupm ik pa.”
JOH 14:15 Sisas kil lala, “Kol kipm plan ipma wor wasrongentopm pa, pa kipm orngwatneikg katnun yangkipm titnongket wrongkwail a kupm alkepm la kipm kutnun pa.
JOH 14:16 Wa ikga kupm laniki Yan atom kil ikga ukwa Angklin ur a ikga itni yirokgelepm pa narntepm, a ikga ntiwepm rpmi yongkyong.
JOH 14:17 Pa Maur Wor a la yangkipm aklale. Tu melnum a kanokg ti pa ikgake ri Maur Wor pa a tu ikgake uwi riwe kil pa, kolpa ti tu ikgake ntiwe uwi Maur Wor pa. Pake kipm ti pa kil ikga rpmi kawor kipm ti a kil ikga ntiwepm rpmi, kolpa ti kipm ikga riwe kil pa.
JOH 14:18 Kupm ikgake utnuurngkepm rpmi kolen warim lmpo pa, kupm ikga narntepm pa.
JOH 14:19 Ikgake ingkai ai tu melnum a kanokg ti ikgake riwopm om. Pake kipm ti pa ikga riwopm pa, eng ntei, kupm ikga wa wrekg rpmi pa, a kipm ti yat ikga wa rpmi yongkyong pa.
JOH 14:20 Ikga ik wang pa kipm ikga riwe la kupm am rpma kawor Yan alkupmen ise, a kipm ikga rpmi or kupm ti, wa kupm ikga rpmi kawor kipm pa.
JOH 14:21 Melnum ur kil itning yangkipm titnongket a pikekg kupm alkepm la kipm kutnun pa, atom kil kutnun pa, pa kil melnum a kil plan ipma wor wasrongen kupm pake. A melnum a kil plan ipma wor wasrongen kupm ti pa, pa wa Yan akupmen wa plan ipma wor wasrongen kil pa. Wa kupm ti wa plan ipma wor wasrongen melnum pa a kupm ikga plan kupm alkupm ti eng kil ri kupm ti la kupm melnum kolpake.”
JOH 14:22 Sisas la kolpa atom ake Sutas Iskariot pa, Sutas ur manet ai akalmpe la, “Wailen, kitn la ikga plan kitn alkitn ti ngko wunong eng men ti kolti, a ikgake wa kitn plan tu wrongkwail kin a kipman a kanokg ti eng ntei?”
JOH 14:23 Ari Sisas akalmpe la, “Kol melnum ur kil plan ipma wor wasrongen kupm ti pa, pa kil mpa itning kutnun yangkipmok wrongkwail akupmen pa. Wa Yan akupmen mpa wa plan ipma wor wasrongentel, a mentekg mpa wa wlintel a wa kawor ntiwel rpmi.
JOH 14:24 Pake kol melnum ur ake plan ipma wor wasrongen kupm ti pa, pa kil ake antiwe atning katnun yangkipm akupmen ti pa. Yangkipm a kipm atning ti pa a Yan Wailen alkupm ai a ukwawopm nar ai, pa ake yangkipm a kupm alkupm ti pa.
JOH 14:25 Yangkipm a kupm lanakepm ti pa, kupm lanakepm ak wang a kupm antiwepm rpma tike.
JOH 14:26 Pake Maur Wor Angklin a ikga itni yirokgelepm a pikekg Yan la ikga ukwa nar uwi wrik akupmen pa, kil pa ikga kiling plantepm kweikwei wrongkwail, a ikga kil ngkitepm won eng yangkipm wrongkwail a kupm lanakepm kil.
JOH 14:27 Kupm eng a utnuurngkepm tike, ti kupm la lkepm ipma meen wor kil eng mpa kipm rpmi meen wor, pa ipma meen akupmen. A ipma meen wor a kupm la lkepm kil pa, pa ake kol a tu wrong kin a kipman a kanokg ti alkepm pa. Kolpa ti ipma akipmen pa ampur kalkut ngkark pa.
JOH 14:28 Kipm atning a kupm lanakepm pa la, kupm ikga kaino plalng atom kupm ikga wa yaper narntepm. Kol kipm plan ipma wor wasrongentopm pa, kipm mpa itopen eng kupm kaino eng Yan akupmen ti, kil pa Yan a itna wailen angen kupm ti.
JOH 14:29 Kweikwei a kupm la kil pa ake palng, a pa, pake kupm la lanikepm ep, eng kweikwei pa palng pa kipm ikga ukipma kupm ti itni titnongket.
JOH 14:30 Ti ake mpa kupm oklala ntiwepm wang watin, eng Maur Paipm Satan a itna tukgunakg ikgalen kanokg ti am wli tike. Kil ake antiwe titnongket na ur mpa wa itni ep ikglen kupm ti pa, kalpis.
JOH 14:31 Pake kweikwei pa mpam palng pake, eng mpa tu wrong kin a kipman a kanokg ti riwe la kupm plan ipma wor wasrongen Yan akupmen a kupm antokg kweikwei katila nikgwalpm a Yan lanakopm la kupm ntokg pa. Am pake, kolpa ti kipm wrekg wrekg eng tepm kai!”
JOH 15:1 Sisas wa la kolkil la, “Kupm ti pa yo wain wor aklale. A Yan akupmen pa kil pa yan a wring wain.
JOH 15:2 Kil angket angklon wam talpuk a kul itna kupm a ake angko oken pa ungkwan ti aye kai lap takwuleikg. A wamtalpuk a ok arke pa kil kampel angklon awiyen, atom itna wriwen eng mpa ilkg inip no ngko oken yangkyang watipmen wor.
JOH 15:3 Yangkipm a pikekg kupm kaling plantepm atom kipm atning pa ak antokg kipm palng wriwen wor ise.
JOH 15:4 Kipm kirpon kupm kil itni kolpa itni pipa, kupm mpa wa kirpon kipm pa wa itni kolpa itni pa. Wam talpuk a ake almpatne itna yo manten alkil pa, kil ake antiwe mpa ok rke pa, kalpis. Yo talpuk a almpatne itna yo manten kil itna pa, pa mpa ok rke pake. Ti kipm am kolpake, ake kipm almpatne itna kupm ti pa, kipm ake antiwe mpa ok rke pa, kalpis.
JOH 15:5 Kupm ti pa yo wain manten pake. A kipm pa wam talpuk. Wam talpuk kitn pa ilmpitne itni kupm yo manten kil, a wa kupm yo manten kil wa ilmpitne itni kitn wam talpuk pa pati, kitn ikga ok rke wailet. Kol kitn alkitn itni manet tukuleikgen kupm ti pa, kitn ake antiwe ntokg kuina ur ik kitn alkitn pa, kalpis.
JOH 15:6 Melnum ur kitn ake karpon itna kolpa itna kupm kil pa, kitn pa kol yo talpuk wraket ti mpa tu kimpel rkol iye kai itni eng la kil nungkwor nungen pipa, lap.
JOH 15:7 Kol kipm kirpon kupm kil itni kolpa itni a wa kipm nira yangkipm a kupm kil eli kawor nol nikgwalpm akipmen pa, atom kipm isen kuina ur a kipm wasrongen pa, ikga kipm uwi pa.
JOH 15:8 Kol kipm ngko oken wor pa, mpa ik ngkit nang wailen a Yan akupmen, atom mpa plan ngko wunong la kipm watnom aklale a kupm aroaro wonel pa.
JOH 15:9 Kol Yan kil plan ipma wor wasrongen kupm ti pa, kupm am wa plan ipma wor wasrongen kipm pa kolpake. Ti kipm rkul nikgwalpm a kupm plan ipma wor wasrongentepm pa kolpa itni!
JOH 15:10 Kol kipm itning nungkulkg kutnun yangkipm titnongket a kupm alkepm la kipm kutnun pa pati, mpa kipm rkul nikgwalpm a kupm plan ipma wor wasrongentepm pa itni. Kol kupm ti am wa ak kolpake, kupm atning nungkulkg katnun yangkipm titnongket a Yan a kupm alkopm la kupm kutnun pa, atom pa kupm arkul nikgwalpm a kil plan ipma wor wasrongentopm pa itna.
JOH 15:11 Kupm lanakepm yangkipm kil eng mpa kipm uwi atopen akupmen ti rpmi nol nikgwalpm akipmen pa, pa kipm mpa atopen wail paipm wrisen.
JOH 15:12 Yangkipm titnongket a kupm alkepm la kipm kutnun kil pati la kol kil la, kipm mpa plan ipma wor wasrongen tita, kolen a kupm plan ipma wor wasrongen kipm pa.
JOH 15:13 Kol melnum ur plan ipma wor wasrongen melnum wor ur alkil pa atom kil yipo lapen ikilentel pa, pa nikgwalpm wor wrisen itna ep am pake. Ake nikgwalpm ur manet a plan ipma wor wasrongen tita pa angen nikgwalpm pa.
JOH 15:14 Kol kipm ntokg kol kuina ur a kupm lanakepm pa, kipm pa kol melnum wor akupmen.
JOH 15:15 Pikekg kupm akwewepm la kipm melnum a aken kwap orngwatneikgen kupm pa, pake kupm ake wa akwewepm kolpa itna pa, kalpis. Ak ti kai pa kupm akwewepm la kipm pa melnum wor akupmen. Pati atnen melnum a aken kwap orngwatneikgen mring pa, kil ake mpa riwe kuina ur a mring alkil a ikgalentel pa antokg pa, kalpis. Pake kupm am pikekg lanakepm kweikwei wrongkwail pa ise a pikekg kupm atning a Yan alkupmen lanakopm pa.
JOH 15:16 Kipm ake pikekg takwei kupm ti pa, kalpis. Pikekg kupm ti takwei kipm pake, atom ngkat kipm pa elng itna eng la kipm wrekg kai ikwap wor, a la kipm ngko ok rke wor a wa la ok akipmen pa ikga rki yongkyong. Kolpa ti Yan akupmen pa mpa kil lkepm kuina ur a kipm naren kupm ti asentel pa.
JOH 15:17 Wa kupm wa la lanikepm yangkipm titnongket a wet kupm la kipm kutnun pa lala, kipm mpa plan ipma wor wasrongen tita.”
JOH 15:18 Atom wa Sisas wa lanaki tu watnom a kil aroaro wonel pa kolkil la, “Kol tu wrongkwail kin a kipman a alupm nikgwalpm a kanokg ti uwi wrongmanto lan kipm pa pati, kipm mpa wonrpme riwe la kupm am tu pikekg awi wrongmanto lantopm ep kolpa yat pake.
JOH 15:19 Kol kipm a kanokg ti pati, kol a wrong kin a kipman a kanokg ti wasrongen kipm ti kolen la kipm ti atuwen pa. Pake pikekg kupm takwei kipm ti eng alkupmen elngkitna manet takwulelkgen tu melnum a alupm nikgwalpm a kanokg ti. Kolpa ti kipm pa ake a kanokg ti pa. Atom ari wrong kin a kipman a kanokg ti awi wrongmanto lantepm pa.
JOH 15:20 Kipm wonrpme yangkipm a pikekg kupm lanakepm pa: melnum a aken kwap kalpmlel orngwatneikgen mring alkil pa, kil pa ake mpa wa itni wailen klangkil mring alkil pa. Kol pikekg tu uk wleket or ungkwan kupm kil pa, tu ikgam wa uk wleket or ungkwan kipm pa kolpa yat pake. Kol pikekg tu itning yangkipm akupmen kil kutnun pa, tu ikgam wa itning yangkipm akipmen pa kutnun kolpa yat pake.
JOH 15:21 Ikg am tu iktepm paipmel kolpake, itnen kipm ti akupmen. Pati atnen tu ake ariwe melnum a pikekg ukwa kupm ti nar pa.
JOH 15:22 Kol kupm pikekg ake nar naken yangkipm a Yan pa, tu kol a ake elukgen yangkipm a kupm pa, kolpa ti tu kol a ntiwe yangkipm a ikilmpe yangkipm pa. Ari am pikekg tu atning yangkipm a kupm laron naken ise, kolpa ti tu yangkipm kalpisen mpa tu la kolai, eng paipmpaipm a tu antokg pa.
JOH 15:23 Melnum ur a awi wrongmanto lan kupm ti pa, am wa kil awi wrongmanto lan Yan akupmen pa yat pake.
JOH 15:24 Ti kol kupm pikekg ake antokg kweikwei titnongket titnongket itna wulmpa atuwen a kol akentiwe a melnum ur a itna kanokg ti antokg pa, pa tu kol a ntiwe yangkipm a ikilmpe yangkipm pa. Ari tu ari kweikwei titnongket titnongket a kupm antokg ti, ari wa tu wa awi wrongmanto lan kupm ti nampokgen Yan alkupmen pa.
JOH 15:25 Pake pa palng kolpa eng mpa yangkipm titnongket ur alkipm a nira ela wrkapm pa palng ngko ok rke, pa la kolkil la, 'Pa yiprokgen kalpisen a tu awi wrongmanto lan kupm ti.'
JOH 15:26 Pake ikga Maur Wor a anti Yan pa rpma pa narntepm. Kil Maur Wor a ikga itni yirokgelepm a ngklinsepm, a lkepm nikgwalpm ute aklale. Kil anti Yan pa rpma atom ikga kupm ukwawel nar. Kil ariwe kupm ti atom kil ikga laron kupm ti nikepm nikepm ik titnongketel la pa aklale.
JOH 15:27 Wa kipm ti yat, ngkaten ak wang a kupm ak kwap ti pa, kipm am antiwopm rpma ak ai kulngkul am kul tike, kolpa ti kipm ikga wa laron kupm ti ik titnongketel la pa aklale.”
JOH 16:1 Atom wa Sisas lanaki tu watnom a kil aroaro wonel pa kolpa la, “Ti kupm lanakepm kweikwei pa eng ake mpa kipm utnuurng a kipm ukipma kupm pa.
JOH 16:2 Aklale wrisen, ikga tu ungkwantepm i wan a kipm atning yangkipm a Maur Wailen arpme arpme pa or kai en ti tukuleikgen. Wang ur kolpa ikga wa palngtepm a tu melnum ikga wli ilmpepm imo pa, pa tu ikga ikwonilmpen la pa tu akwap wor eng ukwor Maur Wailen.
JOH 16:3 Tu ikga ntokg kweikwei paipm paipm kolpa, eng ntei, tu ake ariwe Yan pa a wa tu ake ariwe kupm ti yat.
JOH 16:4 Ti kupm lanakepm yangkipm kil ep eng ikga wang pa palng pa, kipm ikga riwe la yangkipm pa am pikekg kupm naki karkurngkepm yat ise.” Wa Sisas la kolpa kai la, “Ake pikekg kupm lanakepm kalkuten kweikwei a ikga palngtepm pa ep ak ai, eng ntei, kupm pikekg antiwepm rpma a pa.
JOH 16:5 Kupm am a kaino eng melnum a pikekg ukwawopm nar tike, pake ake wa kupm atning kipm ur wa asentopm la, 'Kitn a kai a i?'
JOH 16:6 Kipm tatar rka eng ntei, kipm atning oklala a wet kupm lanakepm pa atom kipm ipma kalkut paipm.
JOH 16:7 Pake kupm lanakepm aklale wrisen la, kol a kupm utnuurngkepm kaino tukwleikgtepm pa pati, kol a wor eng kipm pake. Ake kupm utnuurngkepm kaino tukwleikgtepm pa, pa Maur Wor a ikga itni yirokgelepm a ngklinsepm pa ikgake narntepm. Ti kupm kaino tukwlelkgtepm pa, ikga kupm ukwa Maur Wor pa narntepm pa.
JOH 16:8 Atom ik wang a Maur Wor pa nar pa, kil ikga plan ngko wunong nikgwalpm kuina kuina a i paipm, a nikgwalpm kuina kuina a i ute wor a kipm wrong kin a kipman a kanokg ti antokg pa. A wa kil ikga wa plan ngko wunong mla mla a i Maur Wailen ikga ri la tu antokg paipm pa, kil ikga lken wleket ikilmpe paipm a tu antokg pa.
JOH 16:9 Tu ake ukipma kupm ti pa, ikga Maur Wor pa planten ngko wunong la pa tu antokg paipmpaipm.
JOH 16:10 Kol kupm melnum paipm kolpa pa, kupm kol ake antiwe kaino eng Yan pa. Ari Maur Wor pa plan tu wrong kin a kipman a kanokg ti la kupm kil pa melnum ute wor itna wulmpa a Yan pa. Atom kupm ikga utnuurngkepm kaino eng Yan pa, a kipm pa ikgake ntiwe wa riwopm.
JOH 16:11 Atom ikga Maur Wor pa plan tu wrong kin kipman pa la Maur Wailen ikga uk wleket tu a antokg paipmpaipm, pa ikgake kalpis pa. Eng ntei, Maur Wailen atning yangkipm a Maur Paipm Satan a itna tukgunakg ikgalen kanokg ti ise, atom kil ikgam wa ntokgtel paipm pake.
JOH 16:12 Kupm nikgwalpm watipmen rpma la kol a lanikepm ari, pa wonet eng kipm uwi riwe yangkipm pa kimeket, kolpa ti tiur pa itni pa pen.
JOH 16:13 Pake ik wang a Maur Wor a alupm nikgwalpm aklale pa kil nar pa, pa kil ikga ikupewepm itn a kiling plantepm nikgwalpm iklale wrongkwail ikalkilel kolpa iye or pa kai. Ikgake kil alkil ti la ik nikgwalpm a kil alkil ti pa, kalpis, kil ikga itning kuina ur a Yan pa la atom kil lanikepm. A kil ikga wa laron nikepm kuina ur ikga palng kutnukg ai.
JOH 16:14 Kil ikga ik ngkit nang wailen klalen akupmen ti iye kaino kwa, eng ntei kil ikga uwi nikgwalpm akupmen atom lanikepm ngko wunong.
JOH 16:15 Kweikwei wrongkwail a Yan pa, pa akupmen. Kolpa atom kupm la Maur Wor pa ikga uwi nikgwalpm akupmen ti atom laron nikepm.”
JOH 16:16 Atom Sisas lanaki tu watnom a kil aroaro wonel pa kolpa itna la, “Ikg a itni wang tukwok ketn kolti, kipm ikgake riwopm. Wa ikga wa itni wang tukwok ketn kolti, kipm ikga wa riwopm pa.”
JOH 16:17 Atom tu watnom alkil pa tu atning kolpa atom tu asen tita la, “Ti kil la kolpa eng itna kolai, la ikga itni wang tukwok ketn kolti, mentepm ikgake riwel. Wa ikga wa itni wang tukwok ketn kolti, mentepm ikga wa riwel. A wa kil la kolpa la kil am kaino eng Yan tike, ti wa kil la kolpa eng itna kolai?”
JOH 16:18 A wa tu wa asen tita kolkil la, “Kil la kolpa la ikga itni wang tukwok ketn kolti, pa kil la kolpa eng itna kolai? Mentepm akwekgel yangkipm a kil la kolpa.”
JOH 16:19 Ari Sisas pa ari ise la tu la isentel, atom kil lala, “Kipm asen tita yangkipm a kupm la la, ikga itni wang tukwok ketn kolti, kipm ikgake riwopm. Wa ikga wa itni wang tukwok ketn kolti, kipm ikga wa riwopm.
JOH 16:20 Kupm lanakepm aklale wrisen, kipm ti ikga akg rein ik ok numputen, pake tu wrong kin a kipman a kanokg ti pa tu ikga itopen. Kipm ikga ipma kalkut wail pake, ipma kalkut akipmen pa ikga wa palng atopen.
JOH 16:21 Pa ikga kolen kin a raku warim pa: ak wang a warim alm num pa kil awi wleket, am wang alkil a kil eng a raku warim pake. Kil raku warim pa plalng pa kil atopen, kil ake wa akwonalmpen wleket pa, eng ntei, warim am kil raku ise.
JOH 16:22 Ti am kolpake, ti wang akipmen a ipma kaikut tike, pake ikga kupm riwepm pa, kipm ikga itopen paipm ik wang pa. Atopen pa ikgake antiwe a melnum ur ungkwan tukwlelkgen kipm pa.
JOH 16:23 Ikg a ik wang pa kipm ikgake wa lanikopm nti ur eng kupm wa lkepm nikgwalpm ur pa. Wa kupm lanakepm aklale wrisen, kuina ur ikga kipm naren kupm ti isen Yan akupmen ti pa, Yan ikga lkepm pa.
JOH 16:24 Pikekg kipm ake narentopm asentel kwei ur. Ti kipm isentel o! Kipm ikga uwi pa. Eng mpa ntokg kipm itopen wail manten.”
JOH 16:25 “Pikekg kupm ak yangkipm kla kolngkolti nakepm nakepm yangkipm ok ti. Pake wang ur ikga palng pa, ikgake kupm lanikepm ik yangkipm kla pa. Ikga kupm lanikepm ngko wunong kolti yangkipm a ak la Yan pa.
JOH 16:26 Ik wang pa kipm alkipm pa ikga naren kupm ti oklala naki Yan pake, ikgake wa kupm ti wa uwi ok akipmen pa atom oklala niki Yan pa.
JOH 16:27 Eng ntei, Yan kil alkil pa wasrongen kipm pa, eng ntei kipm ti pikekg uk ipma wor wasrongen kupm ti a kipm pikekg ukipma la Maur Wailen kil ukwawopm nar.
JOH 16:28 Kupm pikekg atnuurng Yan akupmen pa nar kanokg ti. Ti kupm am wa la utnuurng kanokg ti a wa yaper kaino eng Yan akupmen tike.”
JOH 16:29 Sisas la pa, atom tu watnom a kil aroaro wonel pa lala, “Ti atn atn, kitn wa laron yangkipmok pa kai angko wunong tike, ake kitn ak yangkipm kla pa.
JOH 16:30 Pake men ariwe la kitn ariwe kweikwei wrongkwail, kuina ur a men la mpa oklala nikeitn pa, kitn am ariwe ise, kolpa atom antokg men ukipma la kitn pikekg Yan pa ukwaweitn nar aklale pake.”
JOH 16:31 Sisas akalmpenten la, “Ti kipm ukipma kupm ti aklale!
JOH 16:32 Pake kipm rpmi won rpme! Wang pa ikga palng, ti am palng tike, eng ikga kipm ngkirk purngprarng utnuurngkopm kai tutu palpa, atom ikga kupm alkupm wris kolti itni. Pake ikga ake kupm alkupm wris ti itni pa, Yan alkupmen ikga ntiwopm itni pa.
JOH 16:33 Kupm lanakepm yangkipm kil eng mpa kipm rkul kupm ti rpmingkawor ipma akipmen pa, eng mpa kipm uwi ipma kupuk meen wor. Kipm rpma nampokgen tu melnum a alupm nikgwalpm a kanokg ti pa kipm ikga uwi kalkuten wail wail. Pake titnongket a kanokg ti pa am pikekg kupm alok angkli ise, ti ampur kipm akwonalmpen watipmen, kipm ukipma itopen itni titnongket kolpa kai o!”
JOH 17:1 Sisas la yangkipm pa naki tu watnom a kil aroaro wonel pa plalng pa, kil ikg kaino kitnong ai a kil oklala naki Maur Wailen pa la, “Yayai, wang am kul wreren tike. Ti kai kitn plan titnongket a nang wailen a Warim Kipman alkitnen ti ngko wunong, eng mpa wa Warim Kipman alkitnen ti wa plan titnongket a nang wailen a kitn Yan pa.
JOH 17:2 Pikekg kitn alkel titnongket a nang wailen eng la kil itni ikglen tu wrong kin kipman wrongkwail ti, eng ikga kil uk yaprekg watin akilen pa tu melnum wrongkwail a pikekg kitn uk kul wam akilen ti atom tu ikga rpmi wor yongkyong.
JOH 17:3 Tu ikga uwi yaprekg watin a ak angklin tu rpma wor yongkyong pa ti itna kolkil: tu ikga uwi riwe kitn pa la, kitn Maur Wailen wris ata aklale, a tu ikga wa uwi riwe Sisas Krais pa la kil melnum a pikekg kitn ukwa nar ti.
JOH 17:4 Kwap wrongkwail pikekg kitn alkopm pa, kupm ak plalng, atom pa ak plan titnongket a nang wailen akitnen itna kanokg ti, atom tu wrong kinkipman wrongkwail ari pa.
JOH 17:5 Yaiyai, kupm pikekg antiwe titnongket a nang wailen antiweitn rpma ep ise, atom kitn antokg kitnong a kanokg pa. Ti kitn uwiyopm iye yaper kaino ntiweitn rpmi ntiwe titnongket a nang wailen irir kol a pikekg kupm antiwe ep pa.”
JOH 17:6 “Kupm laron nang akitnen ti naki tu melnum akitnen a itna kanokg ti a pikekg kitn takweiyen atom alkopm pa, atom tu ariwe kitn pa ise. Tu melnum akitnen pake, pikekg kitn uk kul wam akupmen ti, atom tu awi yangkipm akitnen pa katnun.
JOH 17:7 Atom tu ariwe la kweikwei wrongkwail a kitn alkopm pa, pa am angkaino kitn alkitn pa nar pake.
JOH 17:8 Ti yangkipm pikekg kitn alkopm pa, pa kupm lanaken, ti tu atopen awi ise. Tu ariwe la pa aklale wrisen la, kupm pikekg anti kitn pa rpma kaino pa atom kupm angkaino pa nar, a wa tu ukipma la kupm ti pa am pikekg kitn alkitn pa ukwawopm nar pake.
JOH 17:9 Kupm oklala nakeitn eng kitn ngklin tu pa. Ake kupm oklala nakeitn eng kitn ngklin tu melnum a alupm nikgwalpm a kanokg ti pa. Kupm oklala nakeitn eng kitn ngklin tu melnum a kitn alkopm tike, eng ntei, tu pa akitnen.
JOH 17:10 Ti tu melnum akupmen ti pa, pa tu akitnen, a tu melnum akitnen pa, pa tu akupmen. Tu pa plan titnongket a nigkwalpm wor akupmen pa atom ak ngkat nang akupmen ti.
JOH 17:11 Kupm ikgake rpmi watinet i kanokg ti, pake tu ti pa ikga rpma kanokg ti, a kupm ti pa ikga kainonteitn. Yaiyai alkupm! Kitn pa melnum klalen wakget. Ti kitn ik upaarngken o, eng mpa tu rkul nang akitnen a pikekg kitn alkopm pa tongtong, eng mpa tu palng wris nimpokgen tita kol mentekg a wris pa.
JOH 17:12 Ak wang a kupm antiwen rpma ti pa, kupm ak ipaarngken ariworwor ak titnongket a nang akitnen a kitn alkopm pa. Kupm atnenten ariworwor itna pa atom ake melnum ur atnuurngkopm kai am pa, tu kimeket rka. Melnum wris a talpulng ok akupmen pa kolti atnuurngkopm atom ikga uwi wleket itni yongkyong, eng mpa palng ok rke kol a wrkapm la pa.
JOH 17:13 Kupm am a kainonteitn pake. Pake kupm la yangkipmok kweikwei tiur ti ak wang ketn a kupm antiwen rpma kanokg a ti pen, eng mpa tu uwi atopen wail akupmen ti rpmi kawor ipma atuwen pa eng mpa tu itopen worwor kol kupm ti.
JOH 17:14 Kupm laron yangkipm a kitn pa naken plalngten ise, atom tu melnum a alupm nikgwalpm a kanokg ti pa tu awi wrongmanto lan tu ti, atnen tu ti ake alupm nikgwalpm a kanokg ti pa. Kol kupm ti yat, kupm ti ake wa alupm nikgwalpm a kanokg ti pa.
JOH 17:15 Ti kol a kupm lanakeitn ti pa, ake kupm lanakeitn la kitn uwiyen iye kai tukwlelkgen kanokg ti pa, a'a. Kupm lanakeitn la kitn ikglenten eng ake mpa Maur Paipm pa ntokgten paipm pa.
JOH 17:16 Tu ti ake melnum a kanokg ti, a wa kol kupm ti yat pa kupm ti ake wa melnum a kanokg ti pa.
JOH 17:17 Kitn ntokg yangkipm aklale akitnen ti ikwap kawor ipma atuwen ti ik mprinsen elngitni manet eng alkitnen. Ti am yangkipm akitnen pa laron nikgwalpm aklale wrisen pake.
JOH 17:18 Kol a pikekg kitn ukwawopm nar kanokg ti pa, pa am wa kupm wa ukwawen kolpa kai yela kanokg ti.
JOH 17:19 Kupm amprin kupm alkupm ti itna manet eng kitn eng ik ngklin tu ti, eng nikgwalpm aklale wrisen akitnen pa mpa wa ik mprin tu ti wa itni manet eng kitn pa.”
JOH 17:20 Wa Sisas asen Yan alkilen pa kolpa itna la, “Ake kupm oklala nakeitn la kitn ngklin tu watnom a kupm aroaro wonel ti kolti pa, a'a. Kupm wa lanakeitn la la kitn wa ngklin tu melnum a ikga itning yangkipm a tu ti laron niken, atom ikga tu ukipma kupm ti iye or pa kai.
JOH 17:21 Kolpa eng mpa tu ti a tu ai mpa tu palng wris, kol kitn Yaiyai rpma or kupm ti wa kupm ti rpma kawor kitn pa. Wa tu pa yat ikga wa rpmi or mentekg ti, eng mpa tu melnum a kanokg ti tu ukipma la kupm ti pikekg kitn ukwawopm nar pa.
JOH 17:22 Kupm alken titnongket a nang wailen a pikekg kitn alkopm pa, eng mpa ntokg tu palng wris nimpokgen tita kol mentekg a wris pa.
JOH 17:23 Kupm ti rpma kawor tu ti, a kitn pa rpma or kupm ti. Kolpa eng mpa tu palng num wris kolti nimpokgen mentekg ti, eng mpa tu melnum a kanokg ti ri atom tu uwi riwe la, kupm ti pa pikekg kitn alkitn pa ukwawopm nar, a wa kitn plan ipma wor wasrongen tu ti kol a kitn plan ipma wor wasrongen kupm ti pa.
JOH 17:24 Yaiyai, kupm wasrongen tu melnum a kitn alkopm pa la tu ntiwopm rpmi kaino anong a ikga kupm rpmi pa, eng mpa tu ri titnongket a nang wailen a pikekg kitn alkopm pa. Pikekg ep ak wang lmpiwen ai pa kitn pikekg plan ipma wor wasrongentopm, kolpa atom ari kitn pikekg alkopm titnongket a nang wailen pa, plalng pipa, kitn antokg kitnong a kanokg ti pa.
JOH 17:25 Yaiyai, kitn pa ute wor wrisen, ti tu a kanokg ti pa ake ariwe kitn pa. Pake kupm ti ariwe kitn pa, atom tu akupmen ti pa wa awi ariwe kitn pa la pikekg kitn pa ukwawopm nar kanokg ti.
JOH 17:26 Kupm lakati kitn pa naken, ti tu ariweweitn worwor pa. Ti ikgam wa kupm lakiti kitn pa niken kolpa kai pake, eng mpa tu plan ipma wor wasrongen nikgwalpm a plan ipma wor wasrongen tita irir kol kitn plan ipma wor wasrongen kupm ti, eng mpa kupm rpmi kawor tu pa kolpa kai pa.”
JOH 18:1 Sisas oklala naki Maur Wailen pa plalng pa, kil awi watnom a kil aroaro wonel pa atom tu kawor angket kwokg Kitron pa kai kwokg wompel a melnum ur antokg wring olip atnewe pa, atom tu rka pa.
JOH 18:2 Ari Sutas, melnum mpa elng Sisas pa kai wam a tu wrongmanto pa, kil wa ariwe wrik pa. Eng ntei, anti watipmen pa Sisas awi tu watnom a kil aroaro wonel pa aye kawor kai rka rka kai wrik pa.
JOH 18:3 Atom Sutas kai ari tu melnum tukgunakgen a tu ipma krakgen a ak ak kwap eng al wor uk Maur Wailen a wa tu melnum a arpmen yangkipm yiprokgen a Moses pa ukwa tu wantengkwang atuwen a wa tu melnum a almpwrong a tu Rom pa, atom kil awi tu pa anel kulngkul. Tu ngkat wri pa arki arki a wakg yilpo tareing pa aye aye ak alen ya pa anel kulngkul.
JOH 18:4 Tu kul palng kul wrik a tu watnom a Sisas arke ti atom Sisas pa ariwe kuina ur mpa palngtel pa ise, atom kil wrekg or asenten la, “Kipm akor mla wai?”
JOH 18:5 Ari tu pa akalmpe la, “Men akor Sisas a Nasaret.” Kolpa ari wa kil akalmpe la, “Kupm am Rpma Kolpa Rpma pake, kupm am tike!” A Sutas melnum mpa elng kil kai wam atuwen pa antiwen itna.
JOH 18:6 Ak wang ketn a tu atning a Sisas lala, “Kupm am Rpma Kolpa Rpma pake” pipa, tu anel arkolng ak yirokgel kai angko elng kai kanokg ai.
JOH 18:7 Wa Sisas asenten anti ur la, “Kipm akor mla?” Ari tu akalmpe lala, “Men akor Sisas a Nasaret.”
JOH 18:8 Sisas akalmpe la, “Kupm wet lanakepm ti la Kupm am Rpma Kolpa Rpma pake, kupm am tike! Kol kipm ikor kupm ti pa, mpa kipm ntokg kolai kupm ti kolti, a tu pa kalpis, itni eng tu kai o!”
JOH 18:9 Kil la kolpa eng mpa yangkipm a pikekg kil alkil la pa mpa palng ok rke, yangkipm pa la kolkil la “Ake pikekg kupm atnuurng melnum wris ur a pikekg kitn alkopm pa tu kai am pa.”
JOH 18:10 Ari Saimon Pita pa nalu kowri pa no wampor ak wangket melnum akwapel ur a melnum tukgunakgen a itna ep eng tu ipma krakgen kimeket a ak ak kwap itna yalming a Maur Wailen pa, kai nungkulkg wompel wiyen a melnum pa kitnangku kolti ok atnen Sisas pa. Nang a melnum pa Malkus.
JOH 18:11 Ari Sisas lanakel la “Kitn lupm kowri pa kinar timpal alkil ai! Kitn lala, ake mpa kupm uwi wleket ti kol u kinipis a rpma kaimung a pikekg Yan alkopm lala mpa kupm il ngkowe pa aki?”
JOH 18:12 Kolti tu a almpwrong pa nampokgen melnum wailen itna ep alntu pa, a wa tu wantengkwang a tu melnum wailen wailen a men Suta pa anel arkul Sisas pa angkuten ak ampei pa.
JOH 18:13 Atom anel ayewel kai itna Anas pa ep, yalmpin wror a Kaiapas, melnum a pikekg awi wrik a Anas pa itna ep eng tu ipma krakgen kimeket a ak ak kwap itna yalming a Maur Wailen ak wring pa.
JOH 18:14 Kil pa Melnum a pikekg uk nikgwalpm tu melnum wailen wailen a ikgalen men Suta pa la, “Kol melnum wris ur kolti uwi wrik a tu wrong kin a kipman pa imo pati, kol a wor pake.” Melnum a pikekg lanaken kolpa pa am Kaiapas pake.
JOH 18:15 Saimon Pita nampokgen watnom ur manet a Sisas pa, tuwekg katnun Sisas pa kai. Watnom pa melnum tukgunakg a itna ep eng tu ipma krakgen kimeket pa ariwe kil pa worwor pake, atom kil pa katnun Sisas pa kai kawor wan anong a melnum tukgunakg pa.
JOH 18:16 Ari Pita pa kai itna yipmingki yun enen ai itna wai. Atom watnom a Sisas pa a melnum tukgunakg a itna ep eng tu ipma krakgen kimeket pa ariwewel worwor pa yaper or wa anti kin ur a atnen yipmingki yun pa oklala. Atom kin pa awi wor atom kil or ak yakur Pita pa tuwekg kawor yipmingki wunen.
JOH 18:17 Atom kin pa lanaki Pita pa la, “Kupm akwonalmpen la kitn ti am wa watnom ur a melnum a wet or ti aroaro wonel pake.” Ari Pita aner ok lala, “Kupm kalpis.”
JOH 18:18 Ak wang pa kupuk paipm atom tu wantengkwang a ikgalen yalming a Maur Wailen, a nampokgen tu melnum akwapel pa alile wakg, atom Pita pa antiwen arkgin wakg pa itna.
JOH 18:19 Atom tu awi Sisas pa aye kai itna Anas melnum tukgunakgen a pikekg itna ep eng tu ipma krakgen kimeket pa, atom kil asen Sisas pa eng tu watnom alkil a kil aroaro wonel pa ti a wa asentel eng yangkipm a pikekg kil aroaro wonel tu wrong kin kipman pa.
JOH 18:20 Ari Sisas akalmpe la, “Ake kupm la yangkipm ur pa ampen pa. Yangkipm wrongkwail ti pa kupm laron itna wulmpa a tu wrongkwail a kanokg ti. A kupm laron itna wan a mentepm atning yangkipm a Maur Wailen atne atne pa, wa itna yipmingki wunen a yalming a Maur Wailen pa a mentepm Suta wli takwem rka wris pa.
JOH 18:21 Kitn asen kupm ti eng na wai? Kol a kitn isen tu melnum a pikekg atning yangkipm a kupm laron pa. Tu pa ariwe kuina ur a pikekg kupm la pake.”
JOH 18:22 Sisas la kolpa ari kalpis, melnum wantengkwang wris ur a ikgalen yalming a Maur Wailen pa wampor wam plas atnentel kai tangkwei wompel pa a kil la, “Pa nikgwalpm wor a kitn akalmpe kolpa naki melnum tukgunakg a pikekg itna ep eng tu ipma krakgen kimeket a Maur Wailen pake?”
JOH 18:23 Ari Sisas akalmpe la, “Ti pa kupm la paipm, ti kitn lakiti paipm ur a wuten kupm la pawo! Kol kupm la ute wor aklale pa, ti wa kitn wa oropm eng ntei?”
JOH 18:24 Tu oklala kolpa itna pa plalng, atom wa Anas wa lanaki tu awiyel a pa wa aye kai itna Kaiapas melnum tukgunakg a ak wring pa itna ep eng tu ipma krakgen kimeket a Maur Wailen. Kil ngkaten ampei a tu angkutentel pa aye kolpa kai pake.
JOH 18:25 Saimon Pita am anti tu arkgin wakg itna pa itna pake. Atom tu a itna pa asentel la, “Ti kitn ti watnom ur a melnum a kawor ai aroaro wonel pa aki?” Ari Pita wa aner ok la, “Kupm akwekgel melnum pa, kupm kalpis.”
JOH 18:26 Ari melnum ur a akwap orngwatneikgen melnum tukgunakg a itna ep eng tu ipma krakgen kimeket a Maur Wailen pa, melnum pa walmpopm wris ur a melnum wuten Pita angket nungkulkgel pa, kil lala, “Ti kupm wuten ari kitn anti melnum pa itna kai wring olip pa!”
JOH 18:27 Ari wa Pita wa aner ok la anti ur lala, “Kupm akwekgel melnum pa, kupm kalpis.” Kil la kolpa pipa, karek pa la.
JOH 18:28 Tu wailen wailen a men Suta pa antokg yangkipm anti Sisas itna Kaiapas pa plalng pipa, wa tu awi Sisas ak kong miningket ai a wan a Kaiapas pa, wa anel aye kai wan anong a Pailat, mring man wailen a Rom a itna tukgunakg ikgalen anong kanokg a Sutia pa. Atom tu melnum wailen wailen a men Suta pa karken a kawor wan a melnum yimponen a Rom pa, mpa ntokg tu ti kalkut, atom tu ake antiwe ikgkil itopen wang wail a pikekg Maur Wailen awi tu amenen angkai Isip pa kul wor pa.
JOH 18:29 Kolpa atom Pailat pa or en ti, a asenten la, “Kipm arkiwel eng kil antokg na paipm atom kipm ayewel wli la ntokg yangkipm ti?”
JOH 18:30 Ari tu pa akalmpe la, “Kol kil ake ntokg paipmpaipm ur pa, men kol ake uwiyel iye wli itni kitn ti pa.”
JOH 18:31 Atom Pailat pa lanaken la, “Kai kipm uwiyel iye kai ntokg yangkipm kutnun yangkipm titnongket a kipm alkipm Suta yapon pawo!” Kolpa ari wa tu wailen wailen a men Suta pa akalmpe la, “Yangkipm titnongket a kipm Rom pa la ake mpa men ilm melnum ur imo pa.”
JOH 18:32 Yangkipm a tu la Sisas kolpa pa, pa tu la kai katila oklala a kil alkil a pikekg kil lakati la kil ikgam imo or kol ya tike. Atom yangkipm a kil la pa am palng ok arke aklale tike.
JOH 18:33 Wa Pailat wa yaper kawor wan wail alkil pa, atom kil la atom tu awi Sisas pa aye kaworntel. Atom kil asentel lala, “Kitn ti am melnum tukgunakg a kipm Suta tike?”
JOH 18:34 Sisas akalmpe la, “Pa kitn atning tu tiur ai lakati kupm ti nakeitn aki, a kitn ak nikgwalpm a kitn alkitn ti la?”
JOH 18:35 Ari Pailat pa akalmpe la, “Kitn akwonalmpen la la kupm ti melnum Suta pake! Pa am tu wrong kin kipman alkitnen pa nampokgen tu melnum tukgunakgen a tu a ak ak kwap eng al wor uk Maur Wailen alkipmen a kipm Suta pa ayeweitn wli itna kupm tike. Kitn antokg kuina atom tu ayeweitn wli itna kupm ti?”
JOH 18:36 Sisas wa la, “Ake pikekg tu wrong kin kipman a kanokg ti ngkatopm la kupm itni melnum tukgunakg ikglen kweikwei wrongkwail ti. Kol tu a kanokg ti ngkitopm pa, pa kol tu melnum akupmen pa ngklinsopm or tu Suta wailen wailen pa okitnentopm pa. Ari kalpis, pa ake tu a kanokg ti ngkatopm pa!”
JOH 18:37 Atom Pailat pa asentel la, “Ti kitn pa melnum tukgunakg ur aklale pake?” Kil asen kolpa ari wa Sisas pa akalmpe la, “Ei, am kol a kitn la pake, kupm am melnum tukgunakg pake. Yiprokgen a pikekg kupm nar kanokg ti atom man rakuwopm ti pati, am la kupm la ik titnongketel pa ngko wunong eng mpa kipm wrong kin kipman a kanokg ti itning uwi riwe nikgwalpm ute aklale pa. Ti melnum a itna nampokgen nikgwalpm ute aklale pa, kil pa atning katnun yangkipm a kupm la pa.”
JOH 18:38 Wa Pailat pa asentel la, “Ti nikgwalpm ute aklale pa a i?” Kolti Pailat pa wa kul or ari tu melnum wailen wailen a men Suta a nungkwangen itna en pa anti ur atom kil lala, “Ake kupm ari kil antokg paipm ur, kalpis.
JOH 18:39 Akangklei wring wris wris ak wang wail a kipm atopen wang wail a pikekg tu kipm Isrel angkai Isip pa kul pa, kupm elngentepm melnum wris ur or kai takwulelkgen wan tipmining pa. Ti kipm wasrongen la kupm elngentepm melnum tukgunakg a kipm Suta a itna kawor wan akupmen ti kul or en kai om?”
JOH 18:40 Kolpa ari tu la yikakatnen la, “Ampur elngen melnum pa or en kai pa! Elngen Parapas pa or o!” Parapas pa melnum melkget kalnten.
JOH 19:1 Atom Pailat melnum a Rom a itna tukgunakg ikgalen anong kanokg Sutia pa la atom tu melnum a almpwrong pa aye Sisas pa kai eng tu ak wanteng pa ak akewel.
JOH 19:2 Tu melnum a almpwrong pa ayengkalel Sisas pa anel awi ampei iket pa wale atom elng rpma tukgunakg a Sisas pa, a anel awi apm wail torpinet ur pa angkuten ak ningkangen maleng a kil pa la kil kol melnum tukgunakg.
JOH 19:3 Atom tu anel itna kuluwel tita kolpa kai wampor wam pa plas atnentel kai tangkwei ti, a tu aknokgelel lala, “Men alkeitn wor, kitn melnum tukgunakg a kipm Suta!”
JOH 19:4 Atom Pailat pa wa yaper or lanaki tu wrong kin a kipman wailet a rka or en ti la, “Kupm mpa la tu uwintepm melnum pa iye or atom mpa plantepm eng kipm riwe la, kupm ake ansil paipm ur a kil pa antokg pa.”
JOH 19:5 Tu aye Sisas ngkaten ampei iket a rpma tukgunakg pa a apm torpinet a tu angkuten ak ningkangen pa angkawor wan pa or, atom Pailat pa lanaken la, “Kipm ri, kil ti melnum kolti!”
JOH 19:6 Tu melnum tukgunakgen a tu ipma krakgen a ak ak kwap eng al wor uk Maur Wailen pa nampokgen tu nepimpalo alntuwen pa ari Sisas pa atom tu la yikakatnen la, “Kurkurngkel rki yo okgmangki pawo! Kurkurngkel o!” Ari Pailat pa akalmpenten la, “Kipm pa uwiyel iye kai kurkurngkel o! Kupm ti pa kupm ari la kil ake antokg paipm ur.”
JOH 19:7 Tu wailen wailen a men Suta pa akalmpe la, “Men ti yangkipm titnongket pa itna, ti yangkipm titnongket a pikekg men yapon ti la la mpa ik wesel imo pake, eng ntei, kil ngkat kil alkil ti la kil ti Warim Kipman a Maur Wailen.”
JOH 19:8 Pailat pa atning a tu la kolpa atom kil wa ngkark paipm wrisen.
JOH 19:9 Atom kil wa awi Sisas pa aye yaper kawor wan wail alkilen pa, wa kil asentel la, “Kitn ti kai a i?” Ari Sisas pa ake akalmpe.
JOH 19:10 Atom Pailat pa lanakel la, “Kitn karken a akalmpe ok akupmen ti? Ake kitn ariwe la kupm ti antiwe titnongket a angketenteitn eng kitn kai aki, a la eng tu kurkurngkeitn?”
JOH 19:11 Sisas akalmpe la, “Kol Maur Wailen a rpma kaino kitnong pa ake lkeitn titnongket pa, pa kitn ake antiwe titnongket na ur mpa ntokg kuina ur kul kupm ti. Ti melnum a kil awi kupm ti kul uk kai wam a kitn ti pa, paipmpaipm akilen pa wail manten paipm ai.”
JOH 19:12 Pailat atning a Sisas la kolpa atom kil akor ya lala ngketen Sisas pa kai, ari tu melnum wailen wailen a men Suta pa tu itna pa itna pa la yikakatnen la, “Kol kitn ngketen melnum pa eng kil kai pa, kitn ake mpa melnum wor a Kaisarus pa. Kol melnum ur ngkit kil alkil ti la kil melnum tukgunakg a anong kanokg a Kaisarus itna ep ikgalen ti pa, kil mpa tulpulng yangkipm a Kaisarus pa.”
JOH 19:13 Pailat pa atning kolpa, kil la atom tu awi Sisas pa aye or en ti kai akapm ur a tu ak ok Ipru la Kapata. Atom Pailat pa rpma wrik a melnum a rpma eng atning atning yangkipm pa. Yiprokgen a nang pa la akapm a tu ak wes ante eng arke arke.
JOH 19:14 Ti wang ti pa wang a men Suta numprampen kweikwei eng ikgkil rpmi ikwonilmpen wang wail a pikekg Maur Wailen awi tu amenen angkai Isip pa aye kul wor. Wreren eng a takgni no pirng ti pa, Pailat pa lanaki tu melnum wailen wailen a ikgalen men Suta pa la, “Ti kipm ri melnum tukgunakg a ikgalen kipm Suta ti itna ti!”
JOH 19:15 Ari wa tu pa la yikakatnen la, “Uwiyel iye kai o! Uwiyel iye kai o! Uwiyel iye kai kurkurngkel rki yo okgmangki pawo!” Ari wa Pailat asenten la, “Kipm wasrongen la kupm kurkurng melnum tukgunakg akipmen ti?” Ari tu melnum ipma krakgen tukgunakgen pa akalmpe la, “Pa ake melnum tukgunakg amenen pa. Men pa melnum tukgunakg amenen pa Kaisarus wris ata kolti.”
JOH 19:16 Pailat kil atning kolpa atom kil anti ok atuwen pa elng Sisas kai wam a tu melnum almpwrong pa la tu kurkurngkel.
JOH 19:17 Tu melnum a almpwrong pa awi Sisas pa aye kai la kurkurngkel rki yo okgmangki. Sisas kil alkil ngkat yo okgmangki alkil pa arki aye kai atnuurng anong pa aye kai wrik ur a tu namput la, “Wrik a Tukgunakg Timpal”, wa ak ok Ipru pa tu namput la Kolkota.
JOH 19:18 Am tu karkurngkel rka yo okgmangki itna wrik pake. Wa tu karkurng melnum wekg ur pa yat. Ur rka yamping wom a ur rka yamping wom, a Sisas pa rka kuin.
JOH 19:19 Tu karkurngken plalng pa tu awi tangkwrong wompel ur a wet Pailat nira ak krakg wail oklala ur elawe, atom tu karkurng itna kaino yo okgmangki tukgunakgen a Sisas pa. Oklala pa la kolkil la, “Sisas a Nasaret, melnum tukgunakg a tu Suta.”
JOH 19:20 Wrik a tu karkurng Sisas rka yo okgmangki pa itna wreren anong wail pa, a wa oklala a wuten Pailat nira pa kil nira ak ok wraur, kil nira ak ok Ipru, wa ak ok Latin, a wa ak ok Krik. Kolpa atom tu Suta watipmen a wli wli takwem rka anong wail pa tu angkom kaingkul pa tu angkleikg oklala a kil nira pa.
JOH 19:21 Ari wa tu tukgunakgen a tu ipma krakgen a Maur Wailen pa tu yaper kai naki Pailat pa lala, “Kitn ungkwan a wet kitn nira la, kil melnum tukgunakg a men Suta pa, kolpa ake wor. Kol a kitn nira kitila ok a melnum kil alkil pa pikekg la kolkil la, 'Kupm ti Melnum Tukgunakg a kipm Suta.'”
JOH 19:22 Ari wa Pailat akalmpe la, “Kuina ur a wet kupm nira pa, mpam eli kiti kiti kol a nira ela pake.”
JOH 19:23 Tunteng melnum a almpwrong pa tunteng karkurng Sisas pa plalng pipa, tunteng awi apm akilen a wet anerel pa ampreing aknirake tunteng melnum wikgwikg pa elngkirmpa. Wa tunteng awi apm wail ur a kil nowe pa, ari apm pa ake angkut wompel wompel angkine tita pa, kalpis. Pa apm a tu an misen kolti.
JOH 19:24 Kolpa atom tunteng lanaki tita la, “Ake mpa minto ungkwrer apm ti, itni pa. Mpa minto ilm pimpos nep mring pa eng ri la mla a i klangkil pipa, kil iye apm ti.” Kweikwei a palng kil pati, palng eng mpa ok rke iklale kutnun yangkipm a la ela wrkapm a Maur Wailen a la kolkil la, “Tunteng ampreing apm kweikwei akupmen pa aknirake tunteng melnum wikgwikg pa, a tunteng alm pimpos nepmring pa eng la uwi apm misen wail akupmen pa.” Am wet tunteng ak katnun kol a wrkapm pa la pake.
JOH 19:25 Man a Sisas pa, wa man wusok alkil pa, wa Maria kin a Klopas pa, wa Maria a anong Maktala pa, tunteng itna wreren yo okgmangki a tu karkurng Sisas arke pa.
JOH 19:26 Sisas kil ari man alkil pa a watnom alkil a kil plan ipma wor wasrongentel pa itna wreren, atom kil lanaki man alkil pa la, “Mamam, kitn pa, kitn ri, melnum itna ti pa, pa warim kipman akitnen pake.”
JOH 19:27 Wa Sisas wa lanaki watnom alkil pa la, “Kitn ri, kin itna ti pa, pa man akitnen pake.” Kil la kolpa plalng pa, watnom alkil pa awi man a Sisas pa aye kai rpma wan anong alkilen ai ikgalen om.
JOH 19:28 Sisas ariwe kwap pikekg Yan alkilen alkel pa am kil ak kul plalng aro yiprokg kolpake, kolpa atom Sisas la, “Uwaketopm”, eng mpa kweikwei wrongkwail a la ela wrkapm a Maur Wailen pa mpa palng ok rke iklale.
JOH 19:29 U wain kinipis kuntuken pa rpma atom tu angkle nep ikli pa kinar u wain pa atom angkuten elng itna wark isop pa aye kaino itna ok a Sisas pa.
JOH 19:30 Kil arkolng u pa al plalng pa, kil angklo ok pa lala, “Kwap wrongkwail am kupm ak kul plalng aro yiprokg kolpake.” Plalng pa, kil amo ak wang alkil pa nol angkon atom tukgunakg pa elng nar mlak rka.
JOH 19:31 Wang ti pa wang a men Suta numprampen kweikwei eng ikgkil pa wang a men a rpma eng yapm. Wa wang ikgkil pa wang wail a men akwonalmpen wang a pikekg Maur Wailen awi tu amenen angkai Isip pa aye kul wor. Kolpa atom tu melnum wailen wailen a men Suta pa karken paipm la palk a tu melnum a tu karkurng rka yo okgmangki pa ake mpa rki kaino pa ik wang wail pa. Kolpa atom tu kai lanaki melnum tukgunakg Pailat pa la eng kil laniki tu melnum almpwrong pa kipor nepm a tunteng melnum wraur a wet tu karkurngken rka yo okgmangki pa, eng mpa tu imo itatu, atom tu nulu palk a tunteng pa iye nar kai lil kawor kirk a u mlamin pa.
JOH 19:32 Atom tu melnum a almpwrong pa anel kaino la kipor nepm a tunteng pa, atom tu kapor nepm a melnum ur a rka wompel pa ep plalng pa, a wa kai kapor nepm a melnum ur a rka wompel ai.
JOH 19:33 Wa tu la kipor nepm a Sisas pa ari tu ari kil am amo ise, atom ake tu kapor nepm akilen pa, kalpis.
JOH 19:34 Pake melnum ur a almpwrong pa alm Sisas ti ak wri pa kai yampingkik wompel ti kolti, atom walmpopm nampokgen u pa elng kul or ungkwan.
JOH 19:35 Melnum a kil itna ari pa kil laron kweikwei a palng kolpa la pa aklale wrisen. Kil ariwe la kil la yangkipm aklale, a kil laron pa eng mpa kipm a angkleikg yangkipm kil yat pa, kipm mpa wa ukipma.
JOH 19:36 Kweikwei a tu ak kolpa pa tu ak katila yangkipm a la ela wrkapm ti a la kolkil lala, “Tupmungkul ur akilen pa ikgake tu kipor.” Atom tu akwap kolpa eng mpa yangkipm a la ti palng ok rke.
JOH 19:37 Wa yangkipm ur a wa la ela wrkapm a Maur Wailen pa wa lala, “Tu ikga ikitnen melnum a tu alm pa.”
JOH 19:38 Tu melnum a almpwrong pa tu ak kolpa plalng pipa, Sosep melnum ur a anong Arimatea pa kai asen Pailat pa la, kil a uwi palk a Sisas pa iye kai lil kawor kirk ur a tu u mlaminel pa. Kil pa melnum ur a katnun Sisas. Pake kil ake aye kil alkil ti angko wunong, eng kil ngkark eng tu alntu melnum wailen wailen a Suta pa. Kil asen Pailat pa ari, Pailat pa awi wor alkel, atom kil kai nalu Sisas pa aye nar.
JOH 19:39 Itna waiketnketn pipa, Nikotimus, melnum a pikekg kai ari Sisas ak mining pa wa kai palng. Kil aye kweikwei yaprekget aris wor ur a tu alm yo wakum wekg ak arongke tita pa. Kalkut a kweikwei yaprekget pa kolen nok wail ur a yapo pa (33 kg).
JOH 19:40 Tuwekg ngkat palk a Sisas pa ak kweikwei yaprekget aris wor pa ak antokg apm pa, atom ak apm pa akalmpalm num akilen pa ariworwor, katila ya a men Suta ak ak tu melnum a amo amo pa.
JOH 19:41 Wring ur itna wreren wrik a wet tu karkurng Sisas arke pa, atom kirk ur a tu u mlaminel itna wring pa, pa itna kalpmilel, a ake pikekg tu alil melnum yipmiri ur armpe.
JOH 19:42 Pa wang a men Suta numprampen eng wang wail a rpma eng yapm ti pa takgni eng a kinar ngkon tike, a kirk a tu u mlamin pa itna wreren. Atom tuwekg alil palk a Sisas pa rmpa pake.
JOH 20:1 Wang wail a men Suta rpma eng yapm pa kai plalng pa, tu okg, or kong miningket paipm ai pa, Maria a anong Maktala wrekg kai kirk a u mlaminel pa. Kil kai palng kai kirk ai, ari wes pilmpalen wail a pikekg tu ak ipaarng kirk pa am arukge kai takwulelkgen ise.
JOH 20:2 Kil ari kolpa, kil wa pirng wa yaper kul ari Saimon Pita nampokgen watnom a pikekg Sisas wasrongen paipm pa atom Maria kil lanaken la, “Tu ngkat palk a Wailen kai kirk pa aye kai ermpa kol ur pa, men akwekgel la tu awi aye kai ermpa kai wrik a i!”
JOH 20:3 Atom Pita nampokgen watnom wris pa tuwekg atning a Maria Maktala kil la kolpa atom tuwekg wrekg la kai kirk ai.
JOH 20:4 Tuwekg pirng kolpa kai pa, watnom wris pa pirng akopor Pita pa ep kai palng kai kirk ai.
JOH 20:5 Kil ikgarmpen ari kawor kirk wunen pa, ari kil ari apm a pikekg tu ak almpalm palk a kil ti kolti pa rmpa, pake ake kil kawor wunen ai.
JOH 20:6 Ari Saimon Pita pirng katnuntel kai aren kawor kirk wunen ai, atom kil ari akwonalmpen, ari apm alkil a pikekg tu ak almpalm palk a kil pa rmpa kati kati rmpa wrik alkil pa rmpa.
JOH 20:7 A apm alkil a pikekg tu ak almpalm yapo tukgunakg akilen pa ake rmpa nampokgen apm alkil a ak almpalm num pa, pa rmpa man kati kati rmpa wrik alkil pa rmpa.
JOH 20:8 A wa watnom a wuten pirng ep kai pa wa kawor. Kil kawor ari kolpa a kil ukipma la pa aklale, Sisas am wrekg ise.
JOH 20:9 Wrkapm a Maur Wailen pa la kolpa la, Sisas ikga imo atom wa wrekg pa, ikgake kalpis pa. Pake ak wang pa tuwekg ake ariwe yiprokgen a yangkipm pa, a pa.
JOH 20:10 Atom tuwekg watnom a pikekg Sisas aroaro wonel pa tuwekg ari kolpa plalng pa, tuwekg yaper kul wan anong a tu arke pa.
JOH 20:11 Maria pa yaper kai akg itna mlamin en ti. Kil akg kolpa itna pa, wa kil ikgarmpen ari kawor wunen ai.
JOH 20:12 Ari kil ari maur akwapel wekg a Maur Wailen pa ekg nowe apm tangkoren pa ekg rpma wrik a pikekg palk a Sisas armpewe pa. Ur rpma kaino tukgunakgen a wa ur rpma kinar nepmen pa.
JOH 20:13 Atom maur akwapel wekg pa asen Maria pa la, “Kin, kitn yek akg eng na?” Ari wa kil pa akalmpe la, “Tu awi palk a Wailen akupmen ti aye kai atn kol ur pa. Ti ake kupm ariwe la tu aye kai elng rmpa kai a i!”
JOH 20:14 Atom kil wa plelng ikg kinar yirokg alkil pa, ari, kil ari Sisas pa itna, pake kil ake wa ariwe la pa Sisas pa, kalpis.
JOH 20:15 Ari wa Sisas asen Maria pa la, “Kin, kitn akg eng kuina wai? A wa kitn akor mla wai?” Atom kin pa kil atning kolpa, kil wa akwonalmpen la pa kil melnum a ikgalen wring pa. Kolpa atom kil lanaki melnum pa lala, “Melnum wailen, kol kitn awi palk a Sisas pa aye kai elng rmpa kai a i pa, kitn lanikopm wrik a kitn elng rmpa pa eng kupm a kai eng uwi.”
JOH 20:16 Ari wa Sisas lanakel la, “Maria!” Atom kil plelng ariwel kolti, kil ak ok Ipru pa la, “Raponai!” Yiprokgen a ok Raponai pa lala, Melnum a Aroaro Wonel Men.
JOH 20:17 Atom kil kai arkulel, ari Sisas pa lanakel la, “Wampelngentopm, kupm ake mpa kaino eng Yan akupmen ai itatu, kupm mpa ntiwepm rpmi pa pen. Ti kitn wa kai laniki tu melnum wor alkupmen a kipm ukipma kupm ti la, kupm am wrekg ise, ti kupm eng a wa yaper kaino eng Yan akupmen tike. Kil Yan akupmen, a wa kil Yan akipmen, wa kil Maur Wailen akupmen, a wa kil Maur Wailen akipmen.”
JOH 20:18 Maria a anong Maktala pa atning kolpa plalng pa kil wa yaper kul lakati naki tu watnom a pikekg Sisas kil aroaro wonel pa la, kil wet ari Wailen Sisas ise. A wa kil lanaken kuina ur wuten Wailen lanakel pa.
JOH 20:19 Wang wail a men rpma eng yapm pa kai plalng pa, tu okg or kong ti pa, Maria ari Sisas kai kirkap ai. Atom ak mining kwawen ti pa tu watnom a pikekg Sisas aroaro wonel pa tu takwem rka wan pa rka. Tu ngkark paipm eng tu melnum wailen wailen almenen Suta pa atom tu ar wanyun pa ak tilel tongtong atom tu rka. Ari Sisas ake or kolai kawornten pa, kil palngten kolti itna kuin a tu pa a kil lanaken la, “Ipma akipmen pa mpa rki meen wor!”
JOH 20:20 Kil la kolpa a kil plan wam kimpang a yampingkik wompel alkil pa eng tu watnom a pikekg kil aroaro wonel pa ari. Tu ari la pa am Wailen alntuwen pa aklale pake, kolpa atom nikgwalpm atuwen pa atopen wail manten paipm wrisen.
JOH 20:21 Kolpa a Sisas wa lanaken anti ur la, “Ipma akipmen pa mpa rki meen wor. Yan kil pikekg ukwawopm nar kanokg ti atom kupm am wa la ukwa kipm ti kai kolpa yat pake.”
JOH 20:22 Kil la kolpa plalng pipa, wa kil kaplim okyaprekg a kil ti kainten a kil lanaken la, “Kipm uwi Maur Wor pawo!
JOH 20:23 Kol kipm ngketen paipmpaipm a yapo melnum ur pa, paipmpaipm akilen pa ake yapowel itna om, kil am wirng no itna kukula wor ise. Pake kol kipm ake angketen paipmpaipm a yapo melnum ur pa kolpa itni pa, paipmpaipm akilen pa yapowel kolpa itna pa.”
JOH 20:24 Tomas nang wompel alkil pa namput la Titimus, watnom wris ur a tu wampwam yikakwekg a pikekg Sisas aroaro wonel pa, kil ake pikekg anti tu watnom tiur pa rpma ak wang a Sisas wli palng atom tu ariwel pa.
JOH 20:25 Atom tu lanakel la, “Wailen pikekg wli palngto atom men ariwel ise!” Ari Tomas pa wa lala, “Kipm kansil! Kupm ake ukipma oklala a kipm la ti la pa aklale pa! Kupm mpa ri kai wam a tu pikekg ak ikyom karkurngkel pa, a lang wam ipis kawor tawong pa, wa elng wam pa kai wampirpme yampingkik a pikekg tu almpel pa pipa, pa mpa kupm ukipma pake.”
JOH 20:26 Wang wampwomis wampwompwekg pa kai plalng pa, okg or kong ti pa, tu watnom a pikekg Sisas aroaro wonel pa wa tu takwem rka wris rka wan pa. Wa Tomas pa wa antiwen rpma yat. Wanyun pa tu ar ak tilel. Tu rka ari kalpis, Sisas pa wa wli palng itna kuin atuwen pa anti ur a kil lala, “Ipma akipmen pa mpa rki meen wor!”
JOH 20:27 Sisas lanaki tu pa kolpa plalng pa, wa kil wa lanaki Tomas pa kolpa la, “Kitn ri wam akupmen kil, ti kitn iye wam ipis pa kul ik inte o! A kitn ntran wam akitnen ti kul waminti yampingkik akupmen kil! Kitn elngen a kitn akwonalmpen watipmen kolpa, kitn ukipma kolti.”
JOH 20:28 Tomas akalmpe la, “Am aklale pake! Kitn Wailen a kitn Maur Wailen akupmen am tike!”
JOH 20:29 Wa Sisas lanaki Tomas pa lala, “Kitn ariwopm atom kitn ukipma. Pake tu melnum a ake tu ariwopm atom tu ukipma pa, tu pa itopen o! Maur Wailen mpa uk wor tu pa.”
JOH 20:30 Ak wang a pikekg Sisas kil anti tu watnom a kil aroaro wonel pa atn a rpma kanokg ti pa tu ari kla titnongket titnongket wailet a kil elngitna elngitna pa. Pake kla wailet tiur a kil elngitna pa, pa ake wa nira kimeket ela wrkapm ti.
JOH 20:31 A kla a nira ela wrkapm ti pati, pa nira la mpa kipm ngkleikg ukipma la Sisas pa kil Krais, melnum a pikekg Maur Wailen ukwa nar la ik rmpento, wa ukipma la kil pa Warim Kipman a Maur Wailen. Wa nira lala mpa or ya a kipm ukipma Sisas pa mpa Maur Wailen kil kiplim yaprekg watin akilen pa kaintepm eng mpa kipm rpmi wor yongkyong.
JOH 21:1 Wang aripm ur pa kai plalng pipa, Sisas wa palng angko wunong plan kil alkil ti tu watnom a pikekg kil aroaro wonel pa ariwel anti ur itna kai ukupuk Taiperias yamping ai. Kil palngten kolkil:
JOH 21:2 Tu watnom a pikekg kil aroaro wonel pa rka wris rka: Saimon Pita, Tomas, nang wompel ur akilen pa Titimus, a Nataniel melnum a anong Kana a anong kanokg Kalili, a warim kipman wekg a Sepeti nampokgen watnom wekg ur a tu alntu pa.
JOH 21:3 Atom Saimon Pita pa lanaken la, “Kupm a kai ikor yul.” Ari wa tu lanakel la, “Men la ntiweitn kai pake.” Kolpa atom tu kimeket elng kaino nim ukupuken pa kolti a tu kimeket kai akor yul ise. Tu akor yul ak mining pa kaingkai kai akwe kitnangku, ari ake tu awi yul ur, kalpis.
JOH 21:4 Ak kong miningket ti pa Sisas palng itna ukupuk yamping pa. Atom tu watnom alkilen pa tu ariwel, ari tu ake ariwe la pa Sisas pa.
JOH 21:5 Atom kil akwewen asenten la, “Oi, kipm warimpen pa, kipm awi yul tiur aki kalpis?” Ari wa tu akalmpe la, “Kalpis, ake men awi yul ur.”
JOH 21:6 Atom kil lanaken la, “Kipm ngkli apm mumu pa elng kinar ukupuk wam wi a nim ukupuken pa, eng mpa kipm uwi yul pa.” Tu atning kolpa, tu angkli apm mumu pa elng kinar ukupuk pa atom anel arkolng, ari akentiwe mpa tu rkolng apm mumu pa ngkiten yul pa elng kul no pa, eng ntei, yul pa watipmen paipm ai.
JOH 21:7 Atom watnom a Sisas plan ipma wor wasrongentel pa lanaki Pita pa la, “Pa am Wailen pake.” Saimon Pita atning a kil la kolpa, kil awi apm a nowe eng wropuk a wet kil aner ermpa pa nowe kolti a kil tipra elng kinar ukupuk ai.
JOH 21:8 Tu watnom a rka nim ukupuken pa tu awi yo timpam pa ak angket u pa ak arkolng apm mumu pa ngkaten yul pa kolpa la iye kai werpm ai. Ake tu rka watinet takwleikgen werpm pa, tu rka wreren. Kol ngkleikg ik wampeng pa, wampeng watin wampwam (100 m).
JOH 21:9 Tu kul palng kul werpm ti, a tu tipra a nim ukupuken pa elng nar kanokg ti pipa, tu ari wakg a alile itna pa yelket itna, wa yul pa alilng ela wakg pa ela a nok tingklak pa rmpa.
JOH 21:10 Atom wa Sisas lanaken la, “Kipm iye yul tiur a wuten kipm awi ak apm mumu pa iye kul o!”
JOH 21:11 Tu atning kolpa, atom Saimon Pita pa kai tipra elng kaino nim ukupuken pa ampen arkolng apm mumu pa ngkaten yul pa ampen aye meen meen no werpm ti. Yul wail wail aklawe kolti, tu angkleikg ari kamel wampwomis wampwompwekg tuwek wampwam yikakwraur (153). Yul pa wailet paipm ai, pake apm mumu pa ake wa kitnangku.
JOH 21:12 Atom Sisas lanaken la, “Kipm kul il okipma waiketn ti!” Ari tu watnom a pikekg kil aroaro wonel pa akwonayewel atom ake ur asentel la, “Kitn mla pa?” Tu ariwe la pa am Wailen pake.
JOH 21:13 Sisas kai awi nok tingklak pa alken plalng pa wa kil awi yul pa wa alken atom tu al.
JOH 21:14 Sisas pikekg amo atom wa wrekg, atom kil pikekg palng tu watnom a pikekg kil aroaro wonel pa ariwel anti wekg ise. Wa kil wa palngten anti ur ti itna ukupuk yamping ti, atom tu ariwel anti wraur ise.
JOH 21:15 Tu anti Sisas al okipma pa plalng pa, Sisas asen Saimon Pita pa la, “Saimon, warim kipman a Son, kitn plan ipma wor wasrongen kupm ti angen a tu ti aki kalpis?” Ari kil ntran ikg la, “Ei, Wailen. Kitn ariwe ipma akupmen pa, kupm wasrongenteitn pa.” Atom Sisas lanakel la, “Ti kitn uk u a okipma manto walkg malkgu war akupmen pawo!”
JOH 21:16 Wa Sisas asentel anti ur la, “Saimon, warim kipman a Son, kitn plan ipma wor wasrongen kupm ti aki kalpis?” Ari kil akalmpe la, “Ei Wailen, kitn ariwe la kupm wasrongenteitn pa.” Atom wa Sisas lanakel la, “Ti kitn ikglen manto walkg malkgu akupmen pawo!”
JOH 21:17 Sisas asentel anti wekg ise, ti wa kil wa asentel ti eng anti wraur tike, “Saimon, warim kipman a Son, kitn wasrongentopm aki kalpis?” Ari Pita pa kil ipma kalkut atnen a kil asentel kolpa anti wraur la, “Kitn wasrongentopm aki kalpis?” Atom kil akalmpentel la, “Wailen, kitn melnum a ariwe kweikwei wrongkwail, kitn ariwe la kupm wasrongenteitn pa.” Atom Sisas lanakel la, “Kitn uk u a okipma manto walkg malkgu akupmen pawo!
JOH 21:18 Kupm lanakeitn aklale wrisen la, ak wang a kitn itna warimpen ti kitn wrekg atatu kolti awi ampei pa ak angket apm ti a kitn kai wrik a i a kitn la kaiye pa. Pake ik wang a ikga kitn kai wror pa, kitn ikga ngkit wam akitnen pa tukuleikg, atom ikga melnum manet ur ai uwi ampei pa atom ik ngket apm akitnen pa plalng, wampirpmeweitn iyeweitn kai wrik ur a kitn ake wasrongen la kaiye pa.”
JOH 21:19 Yangkipm kla a Sisas la kolpa pati, pa ak laron ya a Pita ikga imo eng ik ngkit nang a Maur Wailen pa. Sisas la kolpa plalng atom kil lanakel la, “Kitn kutnuntopm o!”
JOH 21:20 Pita plelng ari kil ari watnom a Sisas plan ipma wor wasrongen pa katnunten kul. Melnum a pikekg arm yamping rmpa wreren won a Sisas ak wang a pikekg tu arm yamping al okipma pa, atom ak wang pa kil pikekg asen Sisas pa lala, “Wailen, kitn la mla ikga uk kitn ti kai wam a tu wrongmanto pa?”
JOH 21:21 Pita ariwel kolpa, a kil asen Sisas pa la, “Wailen, ti melnum pa tu ikga ntokgtel kolai?”
JOH 21:22 Sisas akalmpe la, “Kol kupm ti lala kil rpmi kanokg ti i i, kai ngko wang a kupm yaper nar pa, ti ake kwei ur akitnen ti eng mpa kitn ti la. Kitn ti pa mpa kutnuntopm kolti!”
JOH 21:23 Tu atning yangkipm a Sisas la watnom a kil plan ipma wor wasrongen pa kolpa, atom tu naki tita kolpa kai, atom tu melnum a ukipma Sisas yela pa tu atning pa atom tu la watnom a Sisas plan ipma wor wasrongen pa, kil ikgake imo. Pake Sisas pa ake la kolpa. Kil la kolti la, “Kol kupm lala kil rpmi kanokg ti i i, kai ngko wang a kupm yaper nar pa, pa ake wa kwei ur akitnen ti eng mpa kitn ti la pa.”
JOH 21:24 Watnom a Sisas plan ipma wor wasrongen ti pa am kil ti melnum pikekg nungkulkg a wulmpa atom kil laron yangkipm ok kweikwei ti la pa aklale wrisen atom nira katila pa ela wrkapm ti, atom men ariwe kuina ur a kil la ti pa aklale.
JOH 21:25 Pake kweikwei watipmen paipm tiur ai a Sisas pikekg antokg pa, ake wa nira kimeket ela wrkapm ti pa. Ti kol nira kweikwei pa kimeket eli wrkapm pa ikga wrkapm wailet paipm ai. Kupm akwonalmpen la kol nira kimeket pa, kanokg ti kol a lawe eng elng wrkapm pa ermpi pa.
ACT 1:1 Melnum wor akupmen Tiopilus, alkeitn wor. Kupm pikekg nira wrkapm pa ak lanakeitn kweikwei kwap wrongkwail a pikekg Sisas kil ak a kaling plan arowonel tu wrong kin kipman ak ep ilmpiwen ai,
ACT 1:2 kulngkul kul angko wang a kil amo wa wrekg rpma, atom kil palng kai tu melnum wokgen akwapel alkilen a kil takweiyen pa tu ariwel. Atom Maur Wor angklinsel atom kil alken kwap, a alken yangkipm ok wrongkwail pa plalng pipa, Maur Wailen awiyel aye kaino kwa ise.
ACT 1:3 Pikekg ak wang a kil pikekg rpma kanokg ti pa, kil arki kalkuten kolpa kai amo. Atom kil wrekg plan kil alkil ti angko wunong, atom tu ariwel la kil am wrekg ise. Ake antiwe mpa melnum ur ikwonilmpen watipmen la kil ake wa wrekg pa. Kil palng wli pa wli pa anti watipmen tu ariwel, kolpa kai wang kamel wekg. A kil laron yangkipm wor pa naken la, Maur Wailen itna wailen ikgalen nol nikgwalpm a tu wrong kin kipman.
ACT 1:4 Wang ur pa kil palng anti tu melnum wokgen akwapel alkil pa rka wris, atom kil la karkurngken lanaken la, “Kipm rpmi Serusalem ti rpmi pen, ampur kipm atnuurng Serusalem ti kai pa. Kipm rki nungkwangen kwei ur a Yan akupmen yapon la lkepm, kol pikekg kupm lanakepm pa.
ACT 1:5 Son kil pikekg kalukepm ak u kolti, pake wang wreren eng Yan akupmen ikga kulukepm ik Maur Wor akilen.”
ACT 1:6 Wa ak wang ur pa kil wa palng kai tu melnum wokgen akwapel akilen a tu wli rka wris pa, atom tu asentel la, “Wailen, wang a kitn la la wrekg itni tukgunakg ikglen mentepm Isrel ti am tike, kol a pikekg tu melnum tukgunakg amentepmen ikgalento pa?”
ACT 1:7 Ari Sisas lanaken la, “Pa ake kwei ur a kipm ti la mpa kipm riwe wring a wang pa, kalpis. Pa kweikwei a Yan kil alkil ai alm wang ak ariwe a titnongket a kil alkil ai, a kil lala ikga palng pa.
ACT 1:8 Pake ikga Maur Wor nar kawor rpmi kipm ti, atom kipm ikga uwi titnongket, atom kipm ikga laron nang akupmen ti itni Serusalem ti, a yela tutu anong kanokg a Sutia ti, wa kai yela tutu anong kanokg a Samaria ai, wa kolpa iye kai yela kanokg ti.”
ACT 1:9 Sisas lanaken yangkipm ok pa plalng pipa, Maur Wailen awiyel aye kaino kwa, a tu melnum wokgen akwapel akilen pa itna ikatnentel kolpa itna. A kil kaino kolpa kaino kaino elng kawor am kawor waipmunu wunen ai kolti, a tu ake ariwel om.
ACT 1:10 Tu itna ikatnentel kaino kitnong kolpa itna a a, tu tutusraing ari melnum wekg ur pa palng kulnar penterngen kolti itna wreren tu ti. Tuwekg pa nowe apm tangkoren muinmainet pa.
ACT 1:11 A tuwekg asenten la, “Kipm melnum a Kalili, wa kipm itna itna ikatnen erkisen kaino kitnong pa kolpa itna eng ntei? Sisas kil a wet Maur Wailen awiyel aye kaino kitnong pa, kil ikgam wa yaper nar kol a kipm ariwel a kil kaino pake.”
ACT 1:12 Wrik a tu melnum wokgen akwapel a Sisas itna ikatnentel pa pati, pa tu namput la la Wrik Nangen Olip. Tu itna ari Sisas pa kaino kitnong plalng pa, tu a pa yaper nar kul no anong wail Serusalem a ela wreren kolti. Pa wang wail a rpma eng yapm atom ake mpa tu ngkom kai watin pa, mpa tu ngkom kai wreren kolti.
ACT 1:13 Tu no palng or Serusalem pa, tu kai kaino rka wan walop ur a ela kaino kwa. Tu rka wan a tu wli arke arke pake. Tu melnum a kai rpma wan pa pati nang atuwen pa pati kil: Pita, Son, Semis, Antru, Pilip, Tomas, Partolomyu, Matyu, a Semis, warim kipman a Alpius, a Saimon, melnum ur a tu Selot, a Sutas, warim kipman a Semis.
ACT 1:14 Tu kulkai takwem rka wris nampokgen tu kin tiur, a wa Maria man a Sisas, a nampokgen tu wusok wusok a Sisas pa. Nikgwalpm a tu pa rka wris oklala naki Maur Wailen akangklei wang kolpa rka pake.
ACT 1:15 Tu rka kolpa kai, wang ur pa tu alntu melnum wokgen akwapel a Sisas nampokgen tu melnum wrongkwailet paipm a ukipma Sisas tu wli takwem rka wris. Tu wrong pa palng kol kamel wampwomis wampwompwris. Atom Pita kil wrekg itna lanaken la,
ACT 1:16 ”Kipm melnum alkupm a mentepm ukipma Sisas, kipm itning! Kuina ur pikekg palng kai Sutas, melnum a pikekg uk ya eng tu arkul or Sisas pa, pa am palng katila kol ok a Maur Wor a Maur Wailen la ep ak ai la wli ok a Tepit, atom kil nira ela wrkapm a Maur Wailen pa.
ACT 1:17 Sutas pa am pikekg melnum wokgen ur amenen a kil akwap wris kol a men ak ti, laron yangkipm a Maur Wailen eng ak angklin tu wrong kin kipman.”
ACT 1:18 Marpm a Sutas akarmpen kanokg pa kil awi or ya paipm, kolpa atom ari kil kai kaino angko aye tukgunakg a kil pa ep kulnar ngkrang rmpa kanokg ti atom nikgnampi pa turus elngkul or en.
ACT 1:19 Atom tu wrongkwail a rka Serusalem ti pa tu atning ari pa, atom tu alil nangkel wrik kanokg pa ak ok anongen alntu pa lala Akeltama. Yiprokgen a wrik nang kil pa pati la, “Kanokg a walmpopm ungkwan atne!”
ACT 1:20 Wa Pita kil wa la, “Ti yangkipm kil a pikekg Tepit nira ela wrkapm Nangnang pa la kolkil la 'Ti anong a kil pa elng itni kupuk, ake mpa melnum ur rke!', wa nira yat la, 'Tu mpa tukwei melnum ur mpa wa uwi wrik a kil pa ikwap pa.' Ti yangkipm wekg a pikekg lawen ak ai la ikga palng pa, am palng tike.
ACT 1:21 Kolpa ti mpa mentepm ngkit melnum ur uwi wrik a Sutas pa. Mpa mentepm ngkit melnum a pikekg antiwo atn akangklei wang ak wang a Sisas kil antiwo atn a rpma pa,
ACT 1:22 ak wang ep lmpiwen a Son kil kaluk Sisas, angkai ai kulngkul wli wang a Maur Wailen Yan alkil awiyel aye kaino kitnong. Kolpa ti mpa mentepm ngkit melnum ur pake, kil a pikekg nungkulkg a wulmpa antiwo atn pa kul ntiwo itn, eng mpa men niki tu wrong kin kipman pa la Sisas a pikekg amo pa, aklale, pa am wrekg ise.”
ACT 1:23 Pita la kolpa plalng pa, tu rkan melnum wekg pa elng itna: ur pa Sosep a tu namput la Parsapas, a nang wompel a kil pa Sastus, a ur pa Matias.
ACT 1:24 Atom tu asen Wailen pa la, “Wailen, kitn alkitn pa ariwe nol nikgwalpm a men melnum ti. Mpa kitn planto wris ur a tuwekg ti a kitn takwei la,
ACT 1:25 mpa uwi wrik a Sutas pa palng melnum wokgen akwapel akitnen, eng mpa ntiwo ikwap akitnen. Ti kwap pa pikekg Sutas antiwo ak pa atom kil atnuurng itna pa, a kil amo kai wrik ur alkil a tu melnum paipm a kolpa amo kai arke arke pake.”
ACT 1:26 Atom tu kapor ker pa ak awiye tita la mla a i klangkil pa, mpa kil pa uwi wrik a Sutas pa, atom am Matias pa klangkil pake. Atom am kil pa awi wrik a Sutas kai aklanti tu melnum wokgen akwapel wampwam yikak wris a Sisas pake.
ACT 2:1 Ak wang pa tu Suta angket tuwai kweikwei ep kai wring alntuwen. Tu angket tuwai plalng pipa, pa wang wail a tu kai rka wris al wor uk Maur Wailen pa. Atom tu melnum a ukipma Krais pa ak wail kai rka wris kolpa rka.
ACT 2:2 Tu rka ari kalpis, tu atning milpming wail kolen wripm wail pa el pupu angkaino kitnong pa kul nar or arpme wan a tu arke pa yela.
ACT 2:3 Tu ari wakg yuk ur pa kul nar ari kolen ok milip pa purngprarng nar itna tukgunakg a tu melnum pa wris wris.
ACT 2:4 Tu plalngten a rka kawor wan pa Maur Wor pa nar rpma kawor ipma atuwen pa, atom tu ak ok watipmen aur aur. Pa Maur Wor pa la kawor ipma atuwen pa, atom ngkat okel tu pa laron oklala pa kai ok a tu pa.
ACT 2:5 Ak wang pa tu Suta watipmen a pikekg rka yela anong kanokg ti pa, tu wli rka Serusalem. Tu pa tu melnum a kapor kilko alein Maur Wailen.
ACT 2:6 Tu atning milpming wail pa, atom anel ak wail a pa a pa wli atning tu melnum a wuten Maur Wor awiyen pa tu ak ok anongen manet manet aur aur a tu wris wris a wli itna atning ti ak la, kolpa atom tu wrekg paipm eng atning pa.
ACT 2:7 Tu wrekg paipm kolti akor lanaki tita la, “Tu melnum a oklala kil pa, tu melnum a Kalili!
ACT 2:8 Ari wa antokg kolai atom wa mentepm atning a tu ak ok anongen manet manet a mentepm wris wris ak ti?
ACT 2:9 Ti mentepm ti a anong kanokg Partia ai wli, a tiur pa a anong kanokg tiur ai a namput la Mitia, a Elam pa wli. A tiur pa a anong kanokg a Mesopotemia, a Sutia, a Kapatosia, a Pontus, a Esia.
ACT 2:10 A tiur pa a anong kanokg a Prikia, a Pampilia, a Isip. A mentepm tiur pa a anong kanokg Lipia a ela wreren anong Sairini, a mentepm tiur ti a anong wail Rom ai wli.
ACT 2:11 Ti mentepm kanokg yiprokg a Suta ti, a tu a ake a Suta, pake tu plelngen katnun rpma a mentepm Suta ti, ti mentepm tiur ti pa a anong kanokg Krit, wa mentepm tiur pa a anong kanokg Arepia. Ti wa antokg kolai atom wa mentepm kimeket, mentepm atning a tu laron kwap titnongket a Maur Wailen pa ak ok anongen wris wris almentepmen ti?”
ACT 2:12 Tu wrekg paipm titnowen akwonalmpen watipmen asen tita la, “Pa tu antokg na kolpa?”
ACT 2:13 Ari tu tiur pa tu la aknokgel tu pa la kolpa la, “Palpa tu al u wain titno watipmen atom ari tu titno.”
ACT 2:14 Tu akwonalmpen watipmen a asen tita kolpa itna pa, Pita kil wrekg nampokgen tu melnum wokgen akwapel wampwam yikak wris a Sisas pa, atom kil la yikakatnen naki tu wrong kin kipman wailet a rka pa la, “Kipm melnum a Suta, a kipm mlaur a wli rka Serusalem ti pa, kupm la lanikepm kuina ur a kipm ari ti riworwor, kolpa ti kupm la kipm elng nungkulkg pa itni eng itning kuina ur a kupm la lanikepm ti.
ACT 2:15 Tu melnum kil pa ake tu al u wain titno pa, atom titno pa, kol a kipm akwonalmpen pa, kil kil takgni no alm num wleket a pa.
ACT 2:16 Kuina ur a kipm atning ari ti pa pati, pikekg palng kai ok a melnum okwripm Soel la ep ak ai, atom nira ela wrkapm pa la kolkil la,
ACT 2:17 'Maur Wailen la kolpa la, “Ikga ik wang umpuwen pa, ikga kupm ukwa Maur Wor akupmen kil kinar kawor rpmi tu wrongkwail kin a kipman. Ti tu warim kin a warim kipman akipmen pa ikga Maur Wor akupmen ngkiten ok, atom tu laron yangkipm akupmen kol tu melnum okwripm. A tu kipman warimpen akipmen pa ikga kiporng wulmpa pa ri kweikwei kolen a tu okgwangket a ikga Maur Wor akupmen planten pa. A tu mel nangkwor akipmen pa ikga planten kai okgwangket.
ACT 2:18 Wa tu kin a kipman akwapel akupmen pa ikga kupm ukwa Maur Wor kil kinar kawor rpmi tu ik wang pa, ti tu ikga Maur Wor akupmen ngkiten ok, atom tu laron yangkipm akupmen kol tu melnum okwripm.
ACT 2:19 A ikga kupm plan kweikwei titnongket weten a kipm melnum wrekg paipm eng ari itni no kitnong kil. Wa ikga kupm plan kla ur itni kinar kanokg pa ik plan wang pa, pa ikga tu ri walmpopm, wakg, a wa wakg wuan kitnilokgis wail paipm ikga nukur iye no no.
ACT 2:20 A takgni pa ikga iner kulkai mining, a kainil pa ikga palng walmpopm rke rke, pa pati wreren wang a Wailen eng a palng nimpokgen titnongket a klalen wail akilen pake.
ACT 2:21 Ikga ik wang pa mla ur kil ukwen nang a Wailen pa, ikga kil uwiyel eng alkilen pa.”' Pa ok a Maur Wailen pikekg palng kai ok a melnum okwripm Soel la.
ACT 2:22 Oklala a ela wrkapm a Maur Wailen pa am la kolpake, kolpa ti kipm melnum a Isrel, kipm elng nungkulkg pa itning yangkipm kil a kupm la mpa lanikepm pa: Sisas a Nasaret pa melnum a pikekg Maur Wailen takweiyel la nar eng la ngklin kipm pake. Ti kil pikekg antokg kweikwei weten a ake melnum ari ep, kweikwei titnongket wrongkwail, a kil elng kla watipmen pa elng itna, ti kipm ariwe pa. Pa Maur Wailen ak plantepm eng kipm ri la la, am Maur Wailen kil alkil pa ukwa Melnum pa nar pake.
ACT 2:23 Ari kipm awi melnum pa uk kai wam a tu melnum a ake katnun yangkipm titnongket a mentepm Suta pa, atom tu almpel amo karkurngkel rka yo okgmangki. Pake pikekg ep ak ai, wasrongen a ariwe a Maur Wailen kil alkil ai ak kolpake, atom am kil akwonalmpen pa yat ise, la kil ikga elng Sisas elng kai wam akipmen. Atom am kipm pikekg ak katnun kolpake.
ACT 2:24 Ari Maur Wailen la kil wrekg, a ungkwan kalkuten a wleket a kil amo pa kai takwlelkg. Eng ntei, Amo ti ake antiwe titnongket mpa rkul kil pa rpmi i wrik om a tu a amo kai arpme pa.
ACT 2:25 Kol a mentepm angkleikg kai wrkapm Nangnang a Tepit awi ok a Sisas pa nira lala, 'Kupm akangklei ari Wailen kil antiwopm rpma. Kil itna wrerentopm alkopm titnongket, eng ake antiwe mpa kupm nulkwok ngko.
ACT 2:26 Kolpa atom ipma akupmen pa atopen paipm, a ok akupmen ti ak ak nangnang atopen kolti. Wa numpalk ti a ikga imo atom uwen kawor kirk a tu u mlaminel pa, kupm ariwe la kupm ikga rmpi uwi yapm rmpi waiketn kolti.
ACT 2:27 Eng ntei, kupm ariwe la kitn Maur Wailen ikgake elng amen wor akupmen pa rpmi i yongkyong kai wrik om a tu melnum a amo pa kai arke pa. A kitn ikgake elngen numpalk a kupm melnum wriwen wor alkitn kil kai rmpi mampis paipm pa.
ACT 2:28 Ti kitn pikekg plantopm ya wor a rpma yongkyong, a kitn ikga uwiyopm iye kaino ntiweitn rpmi, a lkopm atopen wail manten.' Yangkipm a pikekg Tepit awi ok a Sisas lanaki Maur Wailen pa, am kupm lakati nakepm kai kolpake.
ACT 2:29 Ti kipm wusok wusok, wail wail a mansan alkupm a mentepm Suta pa, kupm ake mpa ngkirk, kupm mpa lanikepm ngko wunong la mentepm wrongkwail ariwe mamikgmaminen a mentepmen Tepit pa la, pikekg kil amo, tu alupm kil kawor mlamin pa elngkirmpa, ti mlamin a kil am itna wrerento a tike. Ti ak wang ti pa mentepm ari itna wunong a pa.
ACT 2:30 Tepit pa kil melnum okwripm a Maur Wailen, atom Maur Wailen kil naren kil alkil, atom wa yapon yangkipm nampokgen Tepit pa la, kil ikga ngkit yoampei ur a Tepit pa ikga palng melnum wailen itni tukgunakg kol Tepit kil alkil pa.
ACT 2:31 Tepit kil ariwe pa ep ak ai kuina ur a Maur Wailen la ntokg pa, kolpa atom ari kil laron Krais, melnum a Maur Wailen takwei la ukwa nar ikirmpen paipmpaipm amentepmen ti, la kil ikga imo atom wa wrekg. Atom kil la la Maur Wailen ikgake utnuurngkel rpmi wrik om pa rpmi, wa ikgake wa kil elngen numpalk a kil pa rmpi mampis kawor mlamin a uwen melnum ti armpe pa, kalpis.
ACT 2:32 Atom am Sisas pake, a pikekg amo atom Maur Wailen la atom kil wrekg. Ti men wrongkwail men pikekg nungkulkg a wulmpa ari pa, atom men laron pa.
ACT 2:33 Kil am Maur Wailen Yan alkilen pa ngkatel alkel nang wailen kaino rpma nampokgen kil alkil ise. Kil awi Maur Wor a pikekg Yan alkil yapon yangkipm nampokgentel pa, atom kil ukwa Maur Wor pa narnto, ti am kipm atning a ari itna tike.
ACT 2:34 Tepit kil alkil pa pikekg ake wrekg kaino anong wor a Maur Wailen pa, kalpis. Pikekg kil la ela wrkapm Nangnang akilen pa la Sisas pa kolkil la, 'Maur Wailen pa naki Wailen akupmen pa la, “Kitn kulno ntiwopm rpmi, eng mpa kupm lkeitn titnongket akupmen a lkeitn nang wailen.
ACT 2:35 Kitn kul no rpmi i i, ikga kupm la kitn rkganti tu wrongmanto akitnen pa.”'
ACT 2:36 Kolpa ti kipm wrong kin kipman a Isrel pa, kipm mpa uwi riwe kil: Sisas, melnum a kipm or amo karkurng rka yo okgmangki pa pati, pa pikekg Maur Wailen alkil la kil Wailen, a kil Krais, melnum a pikekg kil takweiyel la ikirmpen mentepm wrong kin kipman ti.”
ACT 2:37 Tu wrong kin kipman atning yangkipm a Pita la pa, pa almpen ipma pa kolpa atom tu numpaipm. Atom tu asen Pita nampokgen tu melnum wokgen akwapel a Sisas pa la, “Kipm melnum wor amenen, ti mpa men ntokg kolai?”
ACT 2:38 Ari Pita pa akalmpenten la, “Kipm wris wris ti mpa kipm plelng ipma, atom kipm kul eng mpa men naren nang a Sisas Krais kulukepm, eng mpa Maur Wailen ungkwan paipmpaipm akipmen kai tukulelkg, plalng pipa, kipm uwi Maur Wor a Maur Wailen.
ACT 2:39 Maur Wailen am pikekg yapon yangkipm nampokgen kipm pa, a tu watnom walpopm akipmen a aye or pa kai pake, la ikga lkepm Maur Wor alkil pa. Wa nampokgen tu mla ur a rka tatu anong ya watinet ai, am tu a Wailen, Maur Wailen amentepmen akwewen pake, la tu kul eng kil.”
ACT 2:40 Pita kil angkli yangkipm lanaken kolpa kai, atom kil wa la karkurngken aloken la, “Kipm rpmi uk ikg riwe ikglen kipm alkipm, eng ikgake kipm uwi wleket kolen tu melnum a antokg paipmpaipm ti ikga uwi wleket atnen paipm a tu antokg pa.”
ACT 2:41 Tu wrong watipmen atning yangkipm a Pita laron naken pa, atom tu a ukipma katnun pa, tu kaluken. Ti tu melnum a ukipma Sisas ak wang pa, pa palng wailet paipm, kamel kamel (3,000).
ACT 2:42 Ti tu a ukipma katnun yangkipm a tu melnum wokgen akwapel a Sisas kaling planten pa, tu uk tu alntu kai eng atning katnun yangkipm pake. Tu akangklei kai rka wris al al okipma wa awi okipma a Sisas a wa oklala naki Maur Wailen kolpake.
ACT 2:43 Tu melnum wokgen akwapel a Sisas pa, tu antokg kweikwei weten titnongket a ak plan titnongket a Maur Wailen ti tu wrongkwail ari pa, tu ngkark paipm.
ACT 2:44 Tu kin a kipman a ukipma Sisas pa, tu am kaingkai rka wris kolpa, a tu alupm nikgwalpm kolpa la kweikwei atuwen pa a wrongkwail. Tu ari la mla ur kil tukwok eng kuina a i pa, tu ak angklin kil pa.
ACT 2:45 Atom tu uk kanokg a kuina ur atuwen pa kai tu armpenten, atom tu awi marpm pa atom tu ak angklin tu mla ur a rpma tukwok pa.
ACT 2:46 Akangklei wang wris wris pa tu am anel kai rka rka wris a yipmingki wunen a yalming a Maur Wailen. Tu anel atopen angklin tita okipma kweikwei ti aye kai takwem al rka wris, wa awi okipma a Sisas al kolpa wan ur wan ur.
ACT 2:47 Tu ngkat nang a Maur Wailen atopen kolpa rpma. Tu wrongkwail ariwen kolpa, tu atopen kaporng yangkipm. Akangklei wang wris wris pa titnongket a Wailen Sisas akwap kolpa awi tu melnum weten weten tiur aye kai aken tu a Maur Wailen akawiyen aye kai eng alkilen pa, atom tu palng wailet a wailet kolpa aye kai.
ACT 3:1 Wangkur ak nungkurikg a tukoryauk angkli om eng ukwa takgni kai pa Pita ekg Son la kawor yipmingki wunen a yalming a Maur Wailen pa, pa wang a tu Suta oklala naki naki Maur Wailen am pake.
ACT 3:2 Tuwekg kai kawor angko yipmingki yun ur a tu namput la Yipmingki Yun Ariwor pa la kai kawor wunen pa, tu ngkat melnum ur a pikekg awi ipma angko nepm plupmen pa aye kai kawor rpma yipmingki yun. Kolpa atom akangklei wang pa tu ngkatel aye kaingkai rpma wanyun pa eng kil rpma rpma akwen marpm kweikwei tu a kai kawor kulor yipmingki wunen a yalming pa.
ACT 3:3 Melnum pa ari Pita nampokgen Son a la kai kawor pa, kil akwenten la tuwekg lkel kweikwei ur.
ACT 3:4 Ari Pita ekg Son pa ikatnentel titnongket, atom Pita pa lanakel la, “Kitn ri mentekg ti ri!”
ACT 3:5 Atom melnum pa ikatnenten, a akwonalmpen nungkwangen la, tuwekg pa mpa lkel kweikwei ur pake.
ACT 3:6 Ari Pita lanakel la, “Kupm marpm kalpis, pake mpa kupm lkeitn kuinaur a kupm antiwe kil pa pati, kupm naren Sisas Krais a Nasaret pa kupm lala kitn wrekg ngkom o!”
ACT 3:7 Atom Pita kil wamparpmewel kai wam wi pa eng kil wrekg. Atom pinterngen kolti nepm wasen a nepm ningkli a pikekg plupm pa itna tita titnongket wor om.
ACT 3:8 Atom kil wrekg itna akwiyen ari nepm a kil pa am wor ise, atom kil angkom om. Kil angkom anti tuwekg pa kolpa kai kawor yipmingki wunen a yalming pa tipra tipra ngkat nang a Maur Wailen pa.
ACT 3:9 Tu wrongkwail tu ariwel a kil ngkat nang a Maur Wailen angkom kolpa kai pa,
ACT 3:10 tu ariwe lala, am melnum wris a pikekg rpma yipmingki yun a tu namput la Yipmingki Yun Ariwor pa, eng akwen akwen marpmel tu pa ampake. Tu ari a kil wrekg angkom wor kolpa, tu wrekg paipm titnowen num akwonalmpen watipmen.
ACT 3:11 Melnum nepm plupmen a palng wor pa, kil anti Pita ekg Son pa atn kolpa kai itna wan kling wail a Solomon pa itna, ari tu wrong wailet paipm tu wrekg paipm titnowen num eng tu ari kolpa, tu pirng akentatu wli itna aye oningkewen.
ACT 3:12 Pita kil ari tu wrong kin kipman a anel wli ariwen pa, atom kil asenten la, “Kipm melnum a Isrel ti! Ti wa antokg kolai atom kipm wa wrekg paipm eng kipm ari ti? Ti wa kipm ikatnen mentekg ti titnongket eng kuina? Pa kipm akwonalmpen la pa mentekg antokg ak titnongket a mentekg ti, aki a mentekg ti ute wor itna wulmpa a Maur Wailen, atom mentekg antokg melnum pa palng wor, atom kil wrekg itna angkom pake?
ACT 3:13 Mentekg ti pa kalpis, pa am Sisas pake. Am Maur Wailen pa ngkat Sisas pa la kil melnum akwapel akilen, atom kil alkel nang wailen pake. Am Maur Wailen a Apraam, a Aisak, a Sekop, wa a tu mamikgmamin mansan amentepmen ti pa am kil pa alkel nang wailen pake. Pikekg ak wang a Pailat, mring man wailen a Rom a pikekg ikgalen anong kanokg a Sutia pa kil rpma atning yangkipm a Sisas pa, kil pikekg la kol a elng kil kai, ari wa kipm ti awi paipm uk karkentel la kil melnum paipm, atom kipm la kai tu ilmpel imo o.
ACT 3:14 Kipm ukyirokg melnum klalen ute wor itna wulmpa a Maur Wailen ti itna, a wa kipm tirpmingen Pailat pa la, kil elngen melnum paipm a alm melnum ti orntepm or en ti.
ACT 3:15 A kipm alm melnum yiprokgen a uk melnum yaprekg watin eng rpma yongkyong pa. Pake Maur Wailen kil la kil wrekg a kirkap pa, ti mentekg ari ak wulmpa almentekgen atom ari, mentekg laron pa.
ACT 3:16 Kipm wrongkwail ariwe melnum a palng wor itna wulmpa akipmen ti; wet mentekg naren nang a Sisas a antiwe titnongket pa nakel, atom melnum pa kil atning ukipma kolpa atom kil palng titnongket wor ise. Sisas kil ngkatel ipma, atom kil ukipma Sisas pa atom kil palng wor atnen pake.
ACT 3:17 Kipm wusok wusok a wail wail, a yantin mantin alkupm a Suta pa, kupm ariwe la kipm ti nampokgen tu melnum wailen wailen akipmen pa, kipm pikekg akwekgel kolpa atom kipm wonmis ak Sisas pa paipm kolpa.
ACT 3:18 Pake pikekg ep ak ai, ok a Maur Wailen kil palng no la kai ok a tu melnum okwripm wrongkwail, atom tu la kolpa la melnum akilen a kil takwei la ikrmpento pa kil ikga rki kalkuten. Ti wleket a pikekg kipm alkel pa, pa palng katila nol nikgwalpm alkil a pikekg kil lanaki tu melnum okwripm pa.
ACT 3:19 Kolpa ti kipm laron paipmpaipm akipmen pa a kipm ukipma, eng mpa Maur Wailen ungkwan paipmpaipm akipmen pa plalng.
ACT 3:20 Eng mpa Maur Wailen kil lkepm titnongket weten kawor ipma wunen akipmen pa, atom kipm uwi itopen wor a rpma wor eng yapm, a eng mpa Maur Wailen ukwa Sisas pa wa narntepm ntiur. Pa melnum a pikekg Maur Wailen kil alkil takwei la ikrmpento. Melnum pa am Sisas pake.
ACT 3:21 Ik wang ti pa kil ikga rpmi kaino kitnong pa i pa pen, nungkwangen wang a ikga Maur Wailen ntokg kweikwei wrongkwail pa palng weten wor pen, kol a Maur Wailen pikekg la kai ok a tu melnum okwripm a Maur Wailen amprin eng alkilen la ep ak ai.
ACT 3:22 Kolen pikekg Moses melnum okwripm la kolpa, 'Wailen, Maur Wailen akipmen kil ikga tukwei melnum okwripm ur, kol a kil takwei kupm ti. Melnum pa ikga melnum ur alkipmen pake. Ti kipm ikga itning kutnun kweikwei wrongkwail a kil ikga lanikepm pa.
ACT 3:23 Kol melnum ur ake atning katnun kuina ur a melnum okwripm pa la pa, pa ikga Maur Wailen ungkwan tu pa kai itni manet tukwuleikgen mentepm wrong kin kipman a Maur Wailen ti atom ilmpen imo.'
ACT 3:24 Oklala a Moses pikekg la pa, kai kolpake. Wa tu melnum ok wripm a pa kulngkul kul angko Samuel ti wa or pa kul pa, am wa la kolpa yat pake, kuina ur kol a palng ok arke ak wang ti.
ACT 3:25 A kipm ti pa kipm walyaru yipetatnong a tu melnum okwripm a angkai ai kulngkul kul ti. Pikekg Maur Wailen lam kla nampokgen Apraam la, 'Ikg a kupm ukwa melnum ur a numwalmpopm wris akipmen ti, atom kai kil pa ikga kupm plan ipma wor ikngklin tu wrong kin kipman wrongkwail a rpma yela kanokg ti.' Kuina ur a pikekg Maur Wailen lam kla nampokgen tu wapyipmiri walyipmiri akipmen ti, a wa kipm a ake Suta ti yat.
ACT 3:26 Kolpa ti Maur Wailen kil takwei melnum wor akwapel akilen pa ukwa eng kipm mentepm ti ep tike, eng la kil uk ipma wor ikngklin kipm mentepm tike, wa ntokg kipm mentepm wrongkwail plelng ipma ukyirokg paipmpaipm a mentepm antokg pa.”
ACT 4:1 Pita ekg Son tuwekg itna angkli yangkipm naki tu wrong kin kipman pa kolpa itna pa, tu melnum ipma krakgen a ak ak kwap eng al wor uk Maur Wailen, nampokgen melnum tukgunakg a tu wantengkwang a atnen yalming a Maur Wailen nampokgen tu melnum tiur a Satyusi pa wa wli.
ACT 4:2 Tu ipma wakget eng tuwekg melnum wokgen akwapel a Krais pa, pa pati atnen tuwekg kaling plan tu wrong kin kipman wa laron Sisas a pikekg amo atom wa wrekg pa naken, atom planten angko wunong la tu melnum a pikekg amo amo pa tu ikga wa wrekg wrekg.
ACT 4:3 Kolpa atom tu arkul tuwekg pa aye kai la kol a ntokg yangkipm, ari mining atom tu ayewen kawor okg rmpa wan tipmining ti pen. Ikgkil kong pa tu ntokg yangkipm.
ACT 4:4 Ari tu wrong kin kipman watipmen pa tu atning yangkipm a pikekg laron pa, atom tu ukipma. Ti tu a ukipma pa palng wailet paipm, tu angkleikg wrong a tu kipman pa wailet paipm kamel kamel (5,000).
ACT 4:5 Okg or kong pa tu mring tukgunakg a ikgalen men Suta, a tu melnum wailen wailen, a tu melnum a aroaro wonel tu yangkipm a Moses pa, tu kai takwem rka wris rka anong Serusalem yapon nikgwalpm la ngketen la ampake Pita ekg Son pa laron Sisas pa.
ACT 4:6 Anas a pikekg itna melnum tukgunakg a itna ep eng tu ipma krakgen a Maur Wailen, wa Kaiapas a itna ep eng tu ipma krakgen kimeket ak wring ti, wa Son, wa Aleksanter wa nampokgen tu tiur ai a om wris alntuwen a tu ngkat ngkat itna melnum tukgunakg a itna ep eng tu ipma krakgen a Maur Wailen pa, tu am rka pake.
ACT 4:7 Tu rka pa, tu la tu awi tuwekg melnum wokgen akwapel a Sisas pa aye kul or itna wulmpa atuwen ti, atom tu asenten naimpilng akor la, “Kipmekg la yangkipmen mring a i atom titnongket a mring pa antokg melnum nepm plupmen ti wrekg wor angkom pa?”
ACT 4:8 Maur Wor a Maur Wailen pa nar rpma wail kawor ipma wunen a Pita ak wang ketn pa, atom kil akalmpe ok a tu pa la, “Kipm mring tukgunakg a ikgalen men wrong kin kipman wa kipm melnum wailen wailen!
ACT 4:9 Ti am kipm ari a mentekg antokg melnum nepm plupmen ti wor kolpa atom kipm la isen ikor itning pake! Wa kipm la itning la mentekg la yangkipmen mring a i atom kil palng wor pa!
ACT 4:10 Kipm akasen kolpa ti mpa kipm wrongkwail itning kil atom uwi riwe kil riworwor, atom mpa wa kipm niki tu wrongkwail a Isrel a rka yela pa wa yat eng tu uwi riwe riworwor, la ti mentekg la yangkipmen Sisas Krais a Nasaret pa, atom melnum a pikekg nepm plupmen ti palng wor itna ti, kipm wrongkwail ari ti. Sisas a pikekg kipm la atom tu karkurngkel amo rka yo okgmangki pa, atom wa Maur Wailen la ti kil wrekg rpma pa. Am kil pa antokg melnum ti palng wor itna tike.
ACT 4:11 Sisas pa kol ong kimpowen a kipm melnum a ale wanel pa elukgen la palpa ong paipm. Pake pa ake ong paipm, pa ong kimpowen titnongket wor wris anangket a ak ale ale wan ampake.
ACT 4:12 Ti ake melnum ur manet antiwe akawiyo aye kai eng Maur Wailen pa. Maur Wailen alko Sisas wris ata kolti. Ti ake wa kil namput nang a melnum manet ur a itna kanokg ti a antiwe akawiyo aye kai wor pa, kalpis.”
ACT 4:13 Tu melnum wailen wailen a rpma atning yangkipm a Pita itna oklala pa, tu wrekg paipm eng ari Pita a Son a ekg itna titnongket wrongen la yangkipm ok kalnten pa, a tu ariwe la, tuwekg pa melnum anongen kolti, ake tuwekg ur pikekg kai awi ariwe wail ur pa. Tu ariwe lala, tuwekg melnum pikekg atn akwap anti Sisas.
ACT 4:14 Wa tu ari melnum a pikekg palng wor pa anti Pita ekg Son pa itna, kolpa atom tu ari pa, tu yangkipm kalpisen eng akalmpe kai tuwekg pa.
ACT 4:15 Kolpa atom tu lanaki tuwekg pa la tuwekg utnuurng wan a tu mring man wail wail a rpma atning yangkipm pa kul or en, a tu alntu pa rka akorla nikgwalpm tiur eng tuwekg pa rka.
ACT 4:16 Tu asen tita la, “Mpa mentepm ntokg kolai melnum wekg pa? Tu wrongkwail a rka Serusalem ti pikekg ari kwap titnongket a ake pikekg mentepm ari ep pa, a tuwekg ak kai melnum ti. Ti mentepm akentiwe mpa kuruken pa.
ACT 4:17 Mentepm or lam ngkengken ik wusoket pake, eng ake mpa tuwekg ikwap kolpa kai wail yela. Mpa mentepm autun lken atom ngkengken la, ampake tuwekg laron nang a Sisas pa niki mla ur nti ur.”
ACT 4:18 Tu akwewen yaper kawor, atom tu alken yangkipm titnongket la, “Pikekg kipmekg akwap kolpa ti kipmekg yat autun. Ikgake wa kipmekg wa kiling plan aki laron nang a Sisas pa niki melnum ur nti ur.”
ACT 4:19 Ari Pita ekg Son pa akalmpe la, “Kipm alkipm ti ikwonilmpen kai kipm alkipm ti la, pa Maur Wailen wasrongen kolai la, mpa mentekg kutnun yangkipm a kipm ti la aki mentekg kutnun yangkipm a Maur Wailen ai?
ACT 4:20 Ti mentekg ake antiwe elngen kuina ur a pikekg mentekg nungkulkg a wulmpa pa, kalpis. Mentekg ikgam laron kolpa kai pake.”
ACT 4:21 Tu wrong kin kipman ari tuwekg antokg melnum pa palng wor pa, atom tu ngkat nang a Maur Wailen yela ise. Kolpa atom tu mring man a rpma atning yangkipm pa tu ngkark eng tu wrong ai kolpa atom ake tu uk kalkuten ur tuwekg pa. Tu alken yangkipm titnongket ti kolti, la tuwekg autun la ikgake tuwekg wa laron nang a Sisas pa nti ur, atom tu ungkwanten kul or en kolti, tuwekg kai.
ACT 4:22 Eng ntei, tu mring man pa ake antiwe karuken melnum nepm plupmen a palng wor pa. Melnum pa wring kamel wekg ise, ti am ompalm ise, pikekg rpma wringkwringen ak ai kul ai, ti tu wrongkwail ariwe ise.
ACT 4:23 Tu ungkwan Pita ekg Son kulor en ti pa, tuwekg wa yaper kai eng tu melnum alntuwekgen pa a lakati naken kuina ur a tu tukgunakgen a tu ipma krakgen, a tu melnum wailen wailen lawen pa.
ACT 4:24 Tu atning pa, tu elng ok itna wris oklala naki Maur Wailen pa la, “Melnum Wailen, kitn Wailen a antokg kitnong, a kanokg a unokg, wa kweikwei wrongkwail yela.
ACT 4:25 Pikekg ep pa Maur Wor akitnen palng la wli ok a Tepit, melnum akwapel akitnen, a kil wapyipmiri walyipmiri amenen pa la kolpa la, 'Antokg kolai ti wa tu a ake a Suta pa tu kai kalnten ipma wakget pa? Wa antokg kolai ti wa tu wrong kin kipman pa yapon yangkipm paipm kolpa, pa tu yapon kalpmilel, pa ikgake ntiwe tu ik, kalpis.
ACT 4:26 Wa tu melnum tukgunakg a yela kanokg ti tu wrekg numprampen la ilmpwrong, atom tu kai rka wris nampokgen tu melnum wailen wailen pa yapon yangkipm pa, atom tu la rapon nti Wailen, Maur Wailen a wa nti melnum a pikekg kil takweiyel la ikirmpen mentepm kin kipman wrongkwail pa.'”
ACT 4:27 Wa Pita wa la, “Pa aklale, am pikekg palng kolpake itna anong wail Serusalem tike. Erot ekg Pontius Pailat, mring tukgunakg wekg pa nampokgen tu wrong kin kipman a ake a Suta pa, wa nampokgen tu a men wrong kin kipman a Isrel ti tu yapon yangkipm wris la ungkwan a ilm Sisas, melnum akwapel akitnen a pikekg kitn alkitn takweiyel elngitna manet la ikrmpen men ti.
ACT 4:28 Titnongket a kitn pikekg yapon la ikga tu ntokg kitila nikgwalpm akitnen a pikekg kitn akwonalmpen ep ak ai la ikga tu ik kolpake. Atom am pikekg tu ak katila kolpake.
ACT 4:29 Wailen, ti kitn wuten atning yangkipm ok a wet tu la ayewo ngkark pa, kolpa ti kitn ngklin men melnum akwapel akitnen ti pen eng ikga men itni titnongket wrongen laron yangkipm akitnen pa.
ACT 4:30 Kitn pa elng wam akitnen pa ele tu melnum numpet pa eng mpa tu palng wor, a kitn ntokg kweikwei titnongket wrongkwail, a kweikwei weten a pikekg ake melnum ari ep, a kitn naren Sisas pa eng mpa tu riwe la titnongket a Sisas, melnum akwapel alkitnen a kitn amprin eng alkitnen pa antiwe ak kwap kolpake.”
ACT 4:31 Tu oklala naki Maur Wailen pa kai plalng pa, wrik a tu kai rka ti pa, am weingkweing titu yela ise. Atom Maur Wor a Maur Wailen pa nar rpma kawor tu pa antiwe, atom alken titnongket, atom tu itna wrongen laron yangkipm a Maur Wailen.
ACT 4:32 Tu melnum a ukipma Sisas pa nol nikgwalpm a tu ti pa kai wris. Ake mpa melnum ur la kweikwei ur alkil pa la, akilen pa, kolpa kalpis. Tu mpa mpreing kweikwei atuwen pa ik ngklin tita kimeket.
ACT 4:33 Tu melnum wokgen akwapel a Sisas tu awi titnongket wail atom tu laron yangkipm a la Wailen Sisas pikekg amo atom wa wrekg pa la aklale. Atom Maur Wailen kil plelng won ariwen planten ipma wor wail manten.
ACT 4:34 Ake wa melnum ur itna kuin a tu pa tukwok eng kuina ur pa. Ti tu melnum a antiwe kanokg wail a wan watipmen pa, tu ak pa ak awi marpm pa atom awi marpm pa ayekul
ACT 4:35 uk kai wam a tu melnum wokgen akwapel a Sisas pa ermpa, atom tu ari mla ur tukwok pa, tu awi marpm pa ak angklin kil pa.
ACT 4:36 Melnum wris ur pa, nang akilen pa Sosep. Kil a om a Lipai, kil kai anong Saiprus. Wa tu melnum wokgen akwapel a Sisas pa akwe nang wompel akilen pa la Parnapas. Yiprokgen a nang pa pati, “Melnum a ak titnongketel ipma a tu melnum.”
ACT 4:37 Kil antiwe kanokg atom kil uk kanokg ur alkil pa, ak awi marpm, atom aye marpm pa aye kulkai uk kai wam a tu melnum wokgen akwapel a Sisas pa ermpa eng la ikga tu ik ngklin tu a rpma tukwok.
ACT 5:1 Tu wrongkwail am ak kolpake, kin kipman wekg ur kil pa, ekg ak manet. Ti nang a kipman pa Ananias a nang a kin pa Sapaira. Ananias uk kanokg ur a tuwekg pa kai tu armpenten.
ACT 5:2 Atom kil awi marpm pa plan kin pa, tuwekg la ipma wris atom kil elng wompel pa ermpa eng tuwekg alntuwekg, a kil aye wompel pa aye kai uk kai wam a tu melnum wokgen akwapel a Sisas pa.
ACT 5:3 Kil alken marpm pa atom kil kansil lanaken la, “Marpm a tu armpentopm kanokg ti pa, am kupm alkepm kimeket am pake.” Ari Pita asentel la, “Ananias, wa kitn elng Satan pa ikgalen nol nikgwalpm akitnen pa atom kitn elng marpm wompel a kitn awi kai kanokg pa elngkirmpa eng kitn alkitn pa eng ntei? Wa kitn kansil Maur Wor a Maur Wailen kolpa eng ntei?
ACT 5:4 Kanokg pa alkitnen. Kitn la uk tu rmpen pa aki kalpis aki, pa nikgwalpm alkitnen. Wa kitn la uwi marpm pa atom kitn la iye aki kitn la uk aripm ur kai Maur Wailen pa, pa itna kai kitn alkitn pa. Ari wa antokg kolai atom wa kitn akwonalmpen kolpa atom kitn ak kolpa! Kitn ake kansil melnum ti pa, pa kitn kansil Maur Wailen.”
ACT 5:5 Ananias kil atning pa, kil elngtangko amo kolti. Wa tu mla ur a tu atning yangkipm pa, tu ngkark paipm wrisen.
ACT 5:6 Kil amo rmpa pa, tu warimpen tiur pa wli awi apm pa akyapowel kolti a tu ngkatel aye kai uwen.
ACT 5:7 Tu uwen kipman pa plalng, a wa tu itna watin ketnketn ari kin alkil pa wa wli palng, kil ake ariwe kipman alkil Ananias a wuten amo atom tu uwen pa.
ACT 5:8 Atom Pita asen la, “Ti kitn lanikopm ri, marpm a tu armpentepm kanokg pa am kil kimeket kilke, aki?” Ari kin pa akalmpe la, “Ei, marpm am pa kimeket pake.”
ACT 5:9 Atom Pita lanakel la, “Antokg kolai ti wet kipmekg yapon yangkipm akwonalmpen la kinsil ningkail Maur Wor a Wailen ti? Tu melnum a wet uwen kipman alkitn pa kul wa itna wanyun a pa, mpa wa ngkiteitn iye kai uwenteitn yat.”
ACT 5:10 Ak wang ketn pa a Pita lanakel kolpa, kil elngtangko amo rmpa nepm a Pita pa, atom tu melnum warimpen pa wa wli ari kil amo rmpa atom tu ngkatel kolti, ayewel kai uwen rpma yamping a kipman alkil pa.
ACT 5:11 Tu mapming a wrong kin kipman a ukipma Maur Wailen pa a nampokgen tu wrongkwail pa, tu atning yangkipm pa, tu ngkark paipm wrisen.
ACT 5:12 Ti tu melnum wokgen akwapel a Sisas pa tu antokg kweikwei titnongket watipmen, wa plan kla manet manet tiur a antokg kweikwei titnongket titnongket tiur a melnum ake antiwe antokg pa, palng itna kuin a tu wrong kin kipman tu ari. Tu melnum a ukipma Sisas pa nampokgen tu melnum wokgen akwapel a Sisas pa tu nikgwalpm wris. Wa tu wli kulkai kawor yipmingki wunen a yalming a Maur Wailen pa rka rka wris rka wan kling wail a Solomon pa.
ACT 5:13 Pake tu melnum a ake ukipma Sisas pa tu ngkark atom tu ake la wa kulkai rki wris numpokgen tu pa. Ti wrongkwail kin a kipman pa ari kaporng yangkipm la pa tu pa akwap wor.
ACT 5:14 Atom tu wrong a wli ukipma Wailen pa, palng wailet a wailet kolpa aye kaino, tu kin a kipman yatenen.
ACT 5:15 Tu ari pa atom tu ngkat tu melnum numpet pa aye kai ukwulampen wrik nimongkwakg kweikwei pa rmpa tatu ya. Tu la mpa Pita kil ngkom or ya pa kai pa, ntokg numpet a tu tiur pa palng wor, a tiur a kalpis pa, mpa takgni uwi mrangkum a kil pa kai eliwen pa, mpa ntokg tu palng wor.
ACT 5:16 Wa tu wrong kin kipman wailet tu a pa a pa a anong tiur a itna wreren anong wail Serusalem ti tu aye tu melnum numpet a nampokgen tu melnum a maur paipm kimpilpet arpmewen pa aye wli wli. Atom tu melnum wokgen akwapel pa ak titnongket a Sisas pa antokgten palng wor.
ACT 5:17 Atom melnum tukgunakg a itna ep eng tu ipma krakgen kimeket pa, a nampokgen tu alkil a atn akwap angklinsel pa, tu kimeket pa a tu Satyusi, tu wrekg ipma paipm wrisen eng tu ari kwap wor a tu melnum wokgen akwapel a Sisas ak pa. Kolpa ti tu akor ya la mpa lken wleket.
ACT 5:18 Kolpa atom tu kai arkulen awiyen kolti aye kai kawor rpma wan tipmining a tu aye tu melnum wrongkwail a antokg melkget pa kai arpme arpme pa.
ACT 5:19 Ari ak mining pa maur akwapel a Maur Wailen pa wli kukwa wanyun a wan tipmining pa atom, kil elngen tu melnum wokgen akwapel a Sisas pa kulor en, atom kil lanaken la,
ACT 5:20 “Kipm kai kawor itni yipmingki wunen a yalming a Maur Wailen pa laniki tu wrong kin kipman yangkipm wor wrongkwail a la ya weten wor a rpma wor yongkyong pa eng la tu kutnun, am tike.”
ACT 5:21 Tu melnum wokgen akwapel a Sisas tu atning pa, tu katnun. Atom akwe nungkwat ti pa, tu atnuurng wan tipmining pa kul or kai kawor wan kling wail a yalming a Maur Wailen pa kaling plan tu wrong kin kipman yangkipm a Maur Wailen. Ak wang a tu kaling plan tu wrong kin kipman itna pa, melnum tukgunakg a itna ep eng tu ipma krakgen kimeket, a nampokgen tu melnum angklin akilen pa tu akwe akor tu alntu mring man wailen wailen wrongkwail a tu Isrel a rka atning atning yangkipm pa. Atom tu anel wli kul kaingkai rka wris eng la ntokg yangkipm. Atom tu ukwa tu nepimpalo kai eng la ikyakur tu melnum wokgen akwapel a Sisas a rka wan tipmining pa iye wli eng ntokg yangkipm.
ACT 5:22 Tu melnum nepimpalo tu kai palng kai wan tipmining pa ari, ake tu melnum wokgen akwapel a Sisas pa rpma kawor wan tipmining pa, atom am wa tu yaper kai lanaki tu melnum wailen wailen pa la,
ACT 5:23 “Men kai palng kai wan tipmning pa, men ari wanyun pa ampei aken ak tilel tongtong worwor itna kati kati, a tu wantengkwang a atnen wanyun pa, tu atnen wanyun pa kolpa itna. Wa men kukwa wanyun pa kai kawor la ikyakuren ari tu melnum pa okwlen, ake rka.”
ACT 5:24 Melnum tukgunakg a tu wantengkwang a ikgalen yalming a Maur Wailen a nampokgen tu melnum tukgunakg a tu ipma krakgen pa tu atning pa, atom tu titnowen num akwonalmpen watipmen la, pa wuten tu kul or kolai or?
ACT 5:25 Tu akor la kolpa itna pa, melnum ur pa kul naken la, “Oi, kipm oklala la kipm itning ri! Tu melnum a kipm akor arongen pa, am itna kai wan kling wail a yalming a Maur Wailen ai, kaling plan yangkipm a Maur Wailen naki tu wrong kin kipman ise!”
ACT 5:26 Tu atning kolpa, melnum tukgunakg a tu wantengkwang a ikgalen yalming a Maur Wailen pa, kil awi tu tiur alkil pa kai akyakur tu melnum wokgen akwapel a Sisas pa aye kul. Tu kai akyakuren meen kolti aye kul, ake tu oren aki antokgten paipm kolai, kalpis. Tu ngkark la kol tu oren aki ntokgten paipm kolai pa kol a tu wrong kin a kipman pa ik weselen imo ikenturng okitnen tu pa.
ACT 5:27 Atom tu akyakur tu melnum wokgen akwapel a Sisas pa aye wli itna tu mring man wail wail a rpma rpma eng atning yangkipm pa. Atom melnum tukgunakg a itna ep eng tu ipma krakgen kimeket pa, wrekg itna oklala antiwen,
ACT 5:28 atom kil lanaken la, “Men pikekg angkengkepm a alkepm yangkipm titnongket la la kipm ikgake laron nang a melnum pa nti ur pa. Ari ake wa kipm atning, kipm alilak kaling plan tu kolpa kai, ti yangkipm pa am palng wail tu atning yela tatu anong wail Serusalem ti ise. A wa kipm ti arki men ti la men ti alm melnum pa amo pake!” Melnum tukgunakg a tu ipma krakgen pa la kolpake.
ACT 5:29 Ari Pita nampokgen tu alntu melnum wokgen akwapel a Sisas pa akalmpe la, “Men ake mpa itning kutnun yangkipm a melnum la pa, men mpa itning kutnun yangkipm a Maur Wailen ai la.
ACT 5:30 Am pikekg kipm pa karkurng Sisas rka yo okgmangki pa atom kil amo pake. Ari Maur Wailen a mamikgmamin mansan a mentepmen ti la atom kil wrekg a kirkap pa rpma.
ACT 5:31 Atom Maur Wailen awiyel aye kaino alkel nang wailen. Kil palng melnum tukgunakg a ikgalento, a wa melnum a akawiyo. Atom kil angklin mentepm Isrel ti akule ya okore itna eng la mentepm antiwe plelng ipma uk yirokg paipmpaipm ti, atom mpa Maur Wailen kil ungkwan paipmpaipm amentepm pa kai plalng.
ACT 5:32 Kweikwei wrongkwail a men laron itna ti pa, men almen ti pikekg nungkulkg a wulmpa. Ake wa men wris ti pa, men ti a wa Maur Wor a Maur Wailen uk tu a atning katnun yangkipm akilen pa wa ak titnongketel yangkipm pa.”
ACT 5:33 Tu melnum wailen wailen a rpma atning yangkipm pa, tu atning yangkipm pa ari paipm, atom tu ipma wakget nikgwalpm kungkruwis paipm, la ilm tu melnum wokgen akwapel a Sisas pa imo.
ACT 5:34 Ari melnum ur a tu melnum a arpmen yangkipm yiprokgen a Moses pa, nang akilen pa Kamaliel, kil melnum a aroaro wonel tu yangkipm a Moses, a tu wrong kin kipman awi wor lawel la kil melnum nang wailen. Kil wris ur a tu mring man wailen wailen a itna ep ikgalen tu Suta pa. Kil wrekg itna a kil lanaki tu melnum wantengkwang pa la, tu uwi tu melnum wokgen akwapel a Sisas pa iye kawor itni kawor en pa itni waiketn pen.
ACT 5:35 Atom kil lanaki tu alntu a rpma atning yangkipm pa la, “Kipm melnum a Isrel ti pa, kol kipm la ik kuina ur eng tu ti pa, kipm ik riwe!
ACT 5:36 Ti kipm ariwe wring aripm ur kai ai pa, pikekg Teutas kil wrekg itna, a ngkat kil alkil ti la, kil pa melnum wailen, atom kipman wailet palng kol kamel kamel (400) tu kai katnun kil pa. Ari tu almpel amo, atom tu melnum alkil a orngwatneikg katnuntel pa am or rak ngkark kai atn palpa ise. Ti kwap akilen pa kai plalng kolpake.
ACT 5:37 Wa itna waiketnketn pipa, Sutas, melnum ur a Kalili wrekg itna wailen ak wang a pikekg tu awi nangkel tu wrong kin kipman. Kil epilng tu wrong wailet kai katnuntel ari am wa kolpa yat pake, wa tu wa almpel amo. Atom tu wrong a kai katnuntel pa, tu ngkark kai atn palpa ise.
ACT 5:38 Kolpa ti ri ti pa kupm lanakepm la, ake mpa kipm ntokg paipm tu melnum ti a la tu alntu ti la tu melnum wokgen akwapel a Sisas pa, kipm elngenten eng tu kai o! Eng ntei, kol tu ikwap pa ik nikgwalpm a titnongket a tu alntu melnum ti kolti, kol a pikekg Teutas a Sutas pa, pa ikga kai plalng.
ACT 5:39 Pake kol tu ikwap nimpokgen Maur Wailen pa, kipm ake antiwe mpa ngkeng pa, kalpis. Pa ikga kipm riwe la pa am kipm rapon nampokgen Maur Wailen kil alkil pake.” Tu alntu a rpma atning yangkipm pa tu katnun oklala a Kamaliel lanaken pa,
ACT 5:40 atom tu awi ipma meen atom tu ak katnun kolpa pen, atom akwe tu melnum wokgen akwapel a Sisas pa yaper kul or wan pa. Atom tu lanaki tu wantengkwang pa akewen ak wanteng pa plalng pipa, tu alken yangkipm titnongket la, ikgake wa tu laron nang a Sisas pa wa nti ur, pa kalpis. Tu oren alken wleket kolpa plalng pipa tu lanaken la tu kai.
ACT 5:41 Atom tu melnum wokgen akwapel a Sisas pa tu atnuurng tu melnum a rpma atning yangkipm rpma wan wail pa, tu kawor en pa, tu atopen wail. Tu alken wleket wa tu awi numpaipm wail atnen nang a Sisas ti, pake tu ariwe la Maur Wailen pa ariwe la la tu pa wor antiwe a arki kalkuten pa, atom tu atopen wail manten arki kalkuten pa.
ACT 5:42 Ake wa tu elngen, tu kaling plan tu wrong kin kipman pa itna wan kling wail a yalming a Maur Wailen ai wa itna wan ur wan ur a tu ti. Tu laron naken la Sisas pa la melnum a pikekg Maur Wailen takwei atom ukwa nar la ik rmpento am pake.
ACT 6:1 Ak wang ti pa tu wrongkwail a katnun Sisas pa tu palng wailet kolpa aye kaino. Atom tu Suta a ak ok Krik pa tu ipma kalkut a tu la watipmen kai tu kanokg yiprokg a Suta a ak ok Aram pa la, “Akangklei wang kipm akwap angklin kweikwei kolpa kai eng tu melnum a rpma tukwok, pake wa kipm ikgelngen tu kin karpikg kipman karompen amenen ti.”
ACT 6:2 Atom tu melnum wokgen akwapel wampwam yikakwekg a Sisas pa, tu akwe tu melnum wrongkwail a katnun Sisas pa tu wli rka wris, atom tu lanaken la, “Ake wor eng mpa men utnuurng kwap a laron yangkipm a Maur Wailen ti, a wa ikglen kwap a wako ampreing kweikwei eng ik ngklin tu melnum a rpma tukwok pa.
ACT 6:3 Kolpa ti kipm melnum alpmenen a mentepm ukipma Sisas, kipm ri kipm alkipm ur ti a atn a rpma wor a tu melnum kaporng yangkipm, a antiwe Maur Wor a Maur Wailen, a nikgwalpm arke ariwe wor pa, pa am mentepm ngkit tunteng melnum wampwomis wampwompwekg ur a kolpake, eng mpa tunteng melnum pa ikglen kwap a ak angklin tu melnum pawo!
ACT 6:4 A men alpmen melnum wokgen akwapel a Sisas ti pa, men mpa uk wang wail amenen ti kai eng oklala niki niki Maur Wailen a laron yangkipm a Maur Wailen.”
ACT 6:5 Ti tu wrong kin kipman tu atning nikgwalpm wor a tu melnum wokgen lanaken pa, atom tu atopen awi wor. Atom tu ngkat Stipen, melnum a kil ukipma Maur Wailen itna titnongket, a kil antiwe Maur Wor a Maur Wailen rpma kawor ipma akilen pa. Wa tu ngkat Pilip, Prokorus, Nikanor, Timon, Parmenas, Nikolas. A Nikolas pa kil melnum a anong Antiok, kil ake a Suta, pake kil plelng ipma kai katnun rpma a atn a tu Suta, atom kil am palng melnum a Suta pake.
ACT 6:6 Atom tu awi tunteng melnum wampwomis wampwompwekg pa aye kaino itna. A tu melnum wokgen akwapel a Sisas pa kul elng wam pa elewen oklala naki Maur Wailen ak titnongketelen la tunteng ikwap pake.
ACT 6:7 Atom yangkipm a Maur Wailen pa palng wail atatu kai or arpme yela. Tu wrong kin kipman wailet paipm a rka anong wail Serusalem pa tu atning yangkipm pa, atom tu plelng ipma a ukipma Sisas. Wa tu melnum ipma krakgen tiur a ak ak kwap eng al wor uk Maur Wailen pa wa tu wa plelng ipma a ukipma Sisas yat.
ACT 6:8 Stipen pa kil melnum a Maur Wailen plan ipma wor alkil ak angklinsel a alkel titnongket wail. Kil plan kla wail wail a kil antokg kweikwei titnongket weten wrongkwail itna wulmpa a tu wrong kin kipman ari.
ACT 6:9 Wan ur a tu atning atning yangkipm a Maur Wailen atnewe pa tu namput la wan a tu wrong wompel ur a pikekg tu ak wri awi aye wli pa. Tiur atuwen, a tu tiur a anong Sairini, a anong Aleksantria, nampokgen tu tiur a anong kanokg Silisia, a anong kanokg Esia, tu wrekg anti Stipen pa ak yangkipm rapon akle tita.
ACT 6:10 Ari Maur Wor a Maur Wailen pa uk nikgwalpm a ariwe watin pa kai Stipen pa, ti tu ake antiwe a akalmpe oklala a kil pa, kalpis.
ACT 6:11 Atom tu kai ak ampen uk marpm tu melnum tiur ai, lanaken la tu kinsil niki tita yangkipm ti yela la, “Men atning ari Stipen pa kil la paipmel Moses nampokgen Maur Wailen.”
ACT 6:12 Tu aye yangkipm pa kai naki tita yela, atom tu wrong kin kipman pa, a tu melnum wailen wailen, a tu melnum a aroaro wonel tu yangkipm a Moses pa atning yangkipm pa, ari ake wor kai ipma atuwen pa. Atom tu kai arkul Stipen pa ayewel kai antokg yangkipm itna tu alntu melnum wailen wailen mapming a atning atning yangkipm pa.
ACT 6:13 Atom tu awi tu melnum tiur pa aye kawor itna yirokgel, la mpa la yangkipm kinsil rki Stipen pa la, “Men nungkulkg a wulmpa atning yangkipm a kil akangklei la paipmel yalming krimperket amentepmen a Maur Wailen ti, nampokgen yangkipm titnongket a Moses yipetatnong amentepmen.
ACT 6:14 Wa men atning a kil la kolpa la, Sisas a Nasaret pa ikga tikale yalming a Maur Wailen ti, a kil ikga lok lmpil ya a pikekg Moses lanaki tu yoampei ak ai lanaki tu kulngkul, kul lanako la mentepm kutnun pa.”
ACT 6:15 Tu wrongkwail a rpma wan a tu rka atning yangkipm pa, tu ikatnen Stipen pa titnongket ari ikgokg akilen pa ari klalen kol ikgokg a tu maur akwapel a Maur Wailen.
ACT 7:1 Melnum tukgunakg a itna ep eng tu ipma krakgen kimeket pa atning yangkipm a tu arki Stipen pa plalng pa, kil wa akasen Stipen pa la, “Yangkipm kol a tu arkiweitn pa aklale aki?”
ACT 7:2 Ari Stipen pa akalmpentel la, “Kipm wusok wusok a wail wail, a yantin akupmen a Isrel! Kipm itning! Yo ampei amentepmen Apraam pa kil ake kaino rpma kai anong Aran pa, a pa, kil rpma anong kanokg Mesopotemia pa a pa, atom Maur Wailen kil antiwe titnongket a nang wailen, kil palng ari Apraam pa
ACT 7:3 antiwel oklala kolpa la, 'Kitn wrekg utnuurng anong kanokg alkitn, a tu om alkitn ti itni pa, a kitn kaino anong kanokg ur ikga kupm planteitn pa!'
ACT 7:4 Apraam kil atning kolpa, kil wrekg atnuurng anong kanokg alkil pa nampokgen tu alkil a Kaltia pa rpma pa, a kil wrekg kaino anong Aran. Kil rpma pa a a, yan alkil pa amo rpma pa plalng pipa, Maur Wailen wa lanakel atom kil wa wrekg a pa nar rpma anong kanokg a kil a kipm arpme ti.
ACT 7:5 Maur Wailen kil ake wa uk kanokg tiwel ketn ur Apraam pa itna ti eng alkilen wrisen pa, kalpis. Am kol pake Maur Wailen kil yapon yangkipm lala kil ikga lkel kanokg ti kutnukg numpokgen tu yipetatnong yoampei alkilen eng ikga tu iye eng alntuwen. Apraam pa warim kalpisen.
ACT 7:6 Wa Maur Wailen lanakel kolpa la, 'Tu yoampei akitnen pa ikga tu anong manet ur ai uwiyen iye kinar rpmi anong kanokg alntuwen, a tu ikga ntokgten ri paipm a tu ikga iken kwap kalpmlel orngwatneikgen tu pa rpmi kol wring kamel kamel (400).
ACT 7:7 Pake ikga kupm iye tu kai itni ntokg yangkipm ikilmpe paipm a tu awiyen aye kinar akten kwap kalpmlel pa.' A wa Maur Wailen wa kil la kolpa la, 'Ikga kutnukg pa tu yoampei alkitnen pa ikga utnuurng anong kanokg pa kulno kipor kilko ilein kupm ti itni wrik kil.'
ACT 7:8 Atom Maur Wailen kil uk yangkipm Apraam la ikga kil, wa tu kilmik a ikga kutnukg pa, wa wangket num a tu warim kipman alntu pa, pa kol kla ur a kil lam nampokgen Apraam pa la tu akilen. Atom Apraam kil angket warim Aisak kai kin alkil pa kil raku aye rpma kol wang wampwomis wampwompwraur pa atom kil wangket num a warim pa.” “Wa Aisak kil wa wangket Sekop plalng, wa kil angket num a kil pa. Wa Sekop wa kil wa wangket warim kipman wampwam yikakwekg pa, plalng, wa kil wa angket num a tu pa. Pa am tu yipetatnong a mentepm Isrel tike.
ACT 7:9 Tu yipetatnong wampwam yikakwekg pa, tu pikekg ipma paipm eng paipmen wangkuinen alntu Sosep, atom tu uk Sosep pa tu anong kanokg manet ur ai armpenten awi kil aye kinar Isip. Ari Maur Wailen pa antiwel rpma, kaikuten wailet palngtel pake,
ACT 7:10 Maur Wailen kil ak awiyel kai takwleikgen kalkuten wrongkwail pa. Atom Maur Wailen kil plantel ipma wor alkil ak angklinsel a alkel nikgwalpm watin wor wor. Atom melnum tukgunakg a Isip pa kil ari atn a rpma, oklala a kil pa ari wor, atom kil ngkatel itna melnum wailen kul arkekg kil itna ikgalen tu wrong kin kipman a Isip wa ikgalen kweikwei wrongkwail a itna wan a melnum tukgunakg kil alkil pa.
ACT 7:11 Atom ak wang pa wang nikg wail manten palng yela kinar anong kanokg Isip a no anong kanokg Kenan ti. Pa kalkuten wail manten paipm, atom tu Isip pa nampokgen tu yipetatnong tiur a mentepmen a pikekg rka kinar pa, a wa rka no ti pa pikekg okipma kalpisen, atom nikgalmpen paipm.
ACT 7:12 Tu rka kolpa kaingkai, Sekop kil atning a tu lala tu Isip pa tu kweikwei kolen wit ok ur rpma pa. Atom kil ukwa tu warim kipman alkil pa, tu kinar Isip, tu pa am tu yipetatnong a mentepmen tike. Tu ake kinar kinar Isip pa ur, atn atn tu eng a kinar tipen.
ACT 7:13 Wa tu wa kinar anti ur ti pipa, Sosep laron kil alkil ti naki wusok alkil a tu wail wail alkil pa la, 'Kupm Sosep, wangkuinen akipmen am tike.' Atom melnum tukgunakg pa wa kil ariwe la pa tu walmpopm wris alkilen a Sosep am pake.
ACT 7:14 Atom Sosep kil naki wusok alkil a tu wail wail alkil pa la 'Kipm kaino ikyakur yan alkil Sekop pa nimpokgen kin a watnom a walwalpopm alkilen pa plalngten iye nar Isip ti.' Ti tu a kil pa kol kamel wraur tuwek wampwam yikakwomis (75).
ACT 7:15 Tu aye yangkipm pa no naki Sekop kil atning yangkipm a Sosep la kolpa, kil almanon kin a warim walwalpopm a nampokgen tu alkil pa, tu kimeket kinar Isip pa rka pa, a a, Sekop pa amo, wa Sosep nampokgen wusok alkil a tu wail wail alkil pa am wa amo itna kinar pake. Tu pa tu yan yiprokgen a angket ale kul angket mentepm tike.
ACT 7:16 Atom tu awi tupmungkul a tu pa aye yaper no kaino anong Sekem. Atom tu aye kawor elngkirmpa mlamin a pikekg tu u a pikekg Apraam armpen a tu warim a Amor a anong Sekem pa.
ACT 7:17 Wang a Maur Wailen pikekg yapon yangkipm nampokgen Apraam pa, am kul wreren eng a ngko ok rke tike. Ti tu wrong kin kipman a mentepmen a rka Isip pa angket ale kolpa aye kaingkai kai wailet paipm ai.
ACT 7:18 Atom tu Isip pa ngkat melnum weten ur alntuwen itna melnum tukgunakg eng ikgalenten, atom kil ake wa ariwe Sosep pa a wa kwap wor a pikekg kil ak pa.
ACT 7:19 Kolpa atom kil ak tu yipetatnong a mentepmen ti ari paipm, kansilen a alken kalkuten, a tirpmingenten la titnongket la tu ngkli tu warim waseksek pa kai ai eng tu imo.”
ACT 7:20 ”Man raku Moses pa ak wang a melnum weten pa itna melnum tukgunakg. Warim pa warim wor, atom Maur Wailen atopen warim pa. Mansan alkil pa ikgalentel lam rpma wan pa kol kainil wraur, plalng pipa,
ACT 7:21 tuwekg ngkat warim pa aye kil or kinar rpma kol up ur ai, atom warim kin a melnum tukgunakg a tu Isip pa kil ansil warim pa atom kil ngkatel ayeno aro kol warim alkilen.
ACT 7:22 Ti tu arowonel a kaling plan Moses pa ariwe wor wor a nikgwalpm watin wrongkwail a tu Isip pa, atom kil wrekg wail palng melnum wontrakole wor a oklala, a melnum tumplowis akwapel wor.
ACT 7:23 Ti kil rpma kinar pa a a, kil am wreren eng a warimpwor tike, a wring a kil pa kamel wekg (40), atom nikgwalpm a kil pa wrekg la kil a kai ri tu alntu melnum a Isrel pa.
ACT 7:24 Atom kil kai ari, kil ari melnum ur a Isip pa antokg paipmel melnum ur a Isrel pa, atom ake wa kil itna ari wulmpa pa, kil kai angklin melnum Isrel pa, atom kil or melnum a Isip pa amo akalmpe a kil antokg paipmel melnum Isrel ti.
ACT 7:25 Kil akwonalmpen la tu melnum alkil a Isrel pa mpa riwe la Maur Wailen kil takwei kil pa la mpa kil ngklinsen uwiyen iye kai tukwelkgen Isip pa, ari tu ake wa ariwe pa. Kalpis.
ACT 7:26 Okg or kong ti pa kil wa kai ari tu alntu Isrel pa, pa kil ari melnum wekg ur ekg or tita. Atom kil kai la angkengken la, 'Oi, kipmekg itning, kipmekg pa kipmekg alkipmekg Isrel pake. Wa kipmekg ipma paipm antokg tita kolpa eng ntei?'
ACT 7:27 Ari melnum a wuten antokg nikgwalpm paipm pa kil talpul Moses pa kai takwelkg, a kil asentel la, 'Mla la atom kitn lala itni melnum wailen eng la ikglen men ti, a wa rpmi itning itning yangkipm a men ti?
ACT 7:28 Kitn la or kupm ti imo, kol pikekgkil kitn or melnum Isip ur pa amo pake?'
ACT 7:29 Moses kil atning a melnum pa la kolpa atom, kil ngkark a Isip pa kai rpma kai anong kanokg a tu Mitian. Kil melnum yawen, kil ake kanokg yiprokg a pa, pake kil awi kin a pa aye rpma pa, angket warim kipman wekg.”
ACT 7:30 ”Moses rpma kai anong kanokg a Mitian pa rpma a a, wring kamel wekg pa pipa, wangkur pa kil ari maur akwapel a Maur Wailen palngtel ari kolen wakg yuk a naruk al yo iket maing wasek ur itna wrik wes ningkrapm kalpmlel a itna wreren tipmining Sainai pa.
ACT 7:31 Moses kil ari pa, kil wrekg paipm, atom kil kai itna wreren yo pa la ri riworwor. Ari kil atning ok a Wailen pa akwewel la,
ACT 7:32 'Kil kupm Maur Wailen a tu yipetatnong akitnen. Kupm Maur Wailen a Apraam, Aisak a Sekop.' Moses kil atning oklala pa kil ngkark numlantiwel warwar kolti, lam ikgokg alkil ti.
ACT 7:33 Ari Wailen pa lanakel la, 'Kitn iner nepm palk a kitn pa tukwleikgen nepm akitnen pa eng kanokg a kitn atne ti pa nauten wakget paipm.
ACT 7:34 Ti kitn itning, kupm ari tu antokg paipm tu wrong kin kipman akupmen oren alken kalkuten itna Isip pa, a kupm atning a tu kirkar akg, kolpa ti kupm nar la ngklinsen uwiyen iye tukwuleikgen Isip pa. Ti kitn kulo, eng kupm la ukwaweitn yaper kai Isip.'”
ACT 7:35 Atom Stipen wa lakati Moses pa la, “Ti am Moses wris pake a pikekg tu yipetatnong amentepmen ti ungkwantel la, 'Mla la atom kitn lala itni melnum wailen ikglen men ti, a kitn la itni melnum a rpma atning atning yangkipm a men ti antokg pa!' Pa am Moses wris pake a maur akwapel a Maur Wailen palngtel kil ari kolen wakg al yo iket pa, kil awi ok a Maur Wailen pa lanaki Moses pa la, kil yaper kai Isip, la kil itni melnum wailen, a melnum a la ikuwi tu alkil pa iye kai tukwelkgen Isip pa.
ACT 7:36 Atom am Moses wris pake, kil awi tu wrong kin kipman pa atnuurng anong kanokg Isip. Atom kil antokg kweikwei titnongket wrongkwail, a antokg kweikwei weten ak plan titnongket a Maur Wailen. Kil antokg itna Isip, a itna Unokg Watet, a tatu wrik wesningkrapm kalpmlel a tu ore kai pa kolngkol pa kaingkai wring kamel wekg.
ACT 7:37 Ti am Moses pake, kil lanaki tu wrong kin kipman a Isrel pa la, 'Maur Wailen kil ikga tukwei tu ur a kipm alkipm pa itni melnum okwripm ur kol kupm ti.'
ACT 7:38 Atom am Moses pake, kil anti tu wrong kin kipman a tu mentepm Isrel tu rka wris angkai wrik wesningkrapm kalpmlel. Kil awi yangkipm a Maur Wailen, a maur akwapel a Maur Wailen nakel itna kaino tipmining Sainai pa atom aye nar naki tu yipetatnong amentepmen pa. Yangkipm a pikekg kil awi aye nar pa Maur arpmen, am pikekg kil aye nar la ik niki mentepm tike.
ACT 7:39 Ari tu yipetatnong amentepmen pa karken atning katnun yangkipm a kil pa, tu talpulng ukyirokg kil pa a nikgwalpm a tu pa rka manet akwonalmpen la tu a yaper kai Isip ai.
ACT 7:40 Kolpa atom tu lanaki Aron pa la, 'Mentepm ake ariwe la Moses a pikekg ayewo angkai anong kanokg Isip ti kul ti, kil kaino rpma main kaino tipmining ti eng antokg kolai. Ti kitn ntokgto kweikwei tiur kilingen kol Maur Wailen kil alkil pa eng mpa tu iye ep ep eng mpa ikglento.'
ACT 7:41 Atom ak wang pa, tu lap wes malungen muinmainet ur pa antokg kalingen kol manto nepm watin war ur pa, atom elngtitna kolen la pa maur wailen ur alntuwen. Atom tu aye wlikgok kweikwei pa aye wli alwor uk a tu atopen antokg okipma wail al nangnang atnen, a kapor kilko alein atnen kuina ur a tu alntu antokg pa.
ACT 7:42 Tu ak kolpa atom Maur Wailen kil alken yirokg, a kil elngen tu la tu kipor kilko ilein ngkit nang a kweikwei kolen takgni kainil kumeim a itna kaino kitnong pawo, kol a nira ela kai wrkapm a tu melnum okwripm a Maur Wailen pa la kolpa la, 'Ti kipm wrong kin kipman a Isrel ti, pikekg kipm rka kai wrik wesningkrapm kalpmlel pa rka kol wring kamel wekg pa, pikekg kipm alm wlikgok a kweikwei lap alwor uk kapor kilko alein kupm tike? Pa kalpis.
ACT 7:43 Wan mantopalk a pikekg kipm alil pa, pa ake kipm alil yalming akupmen ti, pa kipm alil yalming a mring Molek kolen maur wailen ur akipmen. A wa pikekg kipm ari Repan, mring a anong ur ai pa, atom wa kipm antokg mring pa kalingen kol kungku atom ngkat pa aye atn la kipor kilko ilein kolen la pa Maur Wailen akipmen pake. Kolpa ti ikga kupm ungkwantepm tu uwiyepm iye kai rpmi kai yirokgen a anong wail Papilon ai.' Yangkipm a Maur Wailen kil la tu yipetatnong amentepmen pa am kai kol pake.”
ACT 7:44 “Pikekg ak wang a tu yoampei a mentepmen rka kai wrik wesningkrapm kalpmlel pa, tu kapor kilko alein Maur Wailen itna wan manto palk a tu alil pa. Pa planten la Maur Wailen antiwen rpma pa. Wan yalming manto palk pa tu alil katila ok a Maur Wailen lanaki Moses lala tu mpa lil pa, katila kol a kil kaling plan Moses kil ari pa.
ACT 7:45 Atom tu warim a yipetatnong wapyipmiri, walyipmiri amentepmen ti pa tu wrekg awi num angklin yalming manto palk a Maur Wailen pa. Atom Sosua pa itna ep awi tu amentepmen pa awi yalming manto palk pa aye nakur num kai alm ungkwan tu kanokg yiprokg pa. Atom Maur Wailen ungkwan tu pa kai takwleikgen wrik pa, atom tu ti awi wrik pa arke rka. Atom tu alil yalming manto palk a Maur Wailen pa ela tike. Atom yalming pa ela kolpa ela, kulngkul kul angko wang a Tepit pa palng melnum tukgunakg ikgalenten.
ACT 7:46 Ti Tepit kil atn a rpma a akwap wor kolpa itna wulmpa a Maur Wailen pa atom ak awi wonel Maur Wailen. Atom kil asen Maur Wailen la, 'Kitn Maur Wailen a yoampei amenen Sekop kapor kilko aleinseitn pa, kitn awi wor la kupm lenteitn yalming ur?'
ACT 7:47 Tepit yan pa la kolti pake, Maur Wailen ake awi wor, atom warim kipman Solomon alkil pa alentel yalming pake.
ACT 7:48 Pake Maur Wailen Melnum Wailen a angen kweikwei wrongkwail a rpma kaino kitnong ti pa kil ake rpma wan a mentepm melnum ti ale pa, kol a pikekg Maur Wailen la wli ok a melnum okwripm ur pa la
ACT 7:49 kolpa la, 'Kitnong ti pa wrik a kupm arpme ikgalen kweikwei wrongkwail ti, a kanokg ti pa, a kupm elng nepm atne. Ti ikga kipm le wan kolai eli wrik a i eng ikga kupm rpmi eng uwi yapm pa? Pa ake antiwe.
ACT 7:50 Kweikwei wrongkwail ari ti pa kipm ari la mla a i wam antokg? Am kupm alkupm ti wam antokg tike.' Yangkipm a Maur Wailen a melnum okwripm nira pa am la kol pake.”
ACT 7:51 Atom wa Stipen wa lanaki tu melnum wail wail a rpma atning yangkipm a kil pa la, “Kipm pa nungkulkg mitaung munupmtam ingkai ai! Kipm wes rpmawepm nol a kweikwei ampriwepm nungkulkg kolen tu ipmawekg a ake pikekg tu angket num pa, kalpis. Ti kipm pa am kol tu yipetatnong akipmen a pikekg ep akangklei talpulng ok a Maur Wor a Maur Wailen lanakepm pake.
ACT 7:52 Ti tu yipetatnong akipmen ti pikekg ikgalen tu melnum okwripm ur a Maur Wailen pa rpma wor? Kalpis. Pikekg tu antokg paipm alken wleket kimeket. Maur Wailen pikekg kil ngkat okel tu laron melnum ute wor a Maur Wailen la ikga nar pa, tu oren almpen amo kolti. Ti melnum ute wor pa pikekg nar pa, am pikekg kipm ak kol tu yipetatnong alkipm pake, uk ya eng tu wrongmanto wli almpel amo.
ACT 7:53 Yangkipm titnongket a Maur Wailen pa am pikekg tu maur akwapel akilen pa laron naki kipm tike, ari ake wa kipm atning katnun yangkipm pa!”
ACT 7:54 Tu melnum wailen wailen rpma atning yangkipm a Stipen la pa ari yangkipm pa almpen kolen ikyom ikningkil ur, atom nikgwalpm a tu pa ngkrangen a tu nampok paipm kolti.
ACT 7:55 Ari Stipen pa Maur Wor a Maur Wailen akwap titnongket itna kil pa atom kil ikgkaino kitnong pa ari, kil ari titnongket a klalen a Maur Wailen, a wa kil ari Sisas pa kil itna wam wi a Maur Wailen pa,
ACT 7:56 atom kil la, “Ti kipm ikgkaino iri! Kupm ari kitnong ti okore atom kupm ari Warim Kipman a Melnum pa kil itna wam wi a Maur Wailen.”
ACT 7:57 Tu atning a Stipen la kolpa atom, tu anel wrekg ipma wakget ampri nungkulkg ti karken plalplal kolti wrekg a pa a pa wli arkulel tuwa!
ACT 7:58 Tu arkulel talpulel arkol wampel kolpa aye kawor en kai takwelkgen anong wail pa, plalng pipa, tu aner apm kaki wail a tu nowe pa angkli elng kai akuke melnum warimpen a rpma atning yangkipm pa, nang akilen pa Sol. Tu pa ak titnongketel yangkipm pa la am aklale pake, tu melnum a wuten atning ari yangkipm a Stipen la pa, tu ak weselel la kil imo.
ACT 7:59 Plalng pipa, tu plalngten tu awi wes pa a ak or Stipen itna pipa, kil akwe la, “Wailen Sisas, kitn uwi maur wor akupmen pawo!”
ACT 7:60 Kil elng angko elng kilkowel rpma a kirkar akg yikakatnen la, “Wailen, ampur kitn akalmpe nikgwalpm paipm a tu antokgtopm pa.” Kil la kolpa plalng pa, kil amo.
ACT 8:1 Sol pa kil itna ari wulmpa uk wor kolti atom tu or Stipen pa amo. Ak wang pa tu or ungkwan uk wleket tu wrong kin kipman a ukipma Sisas a rka kai Serusalem pa. Atom tu purngprarng or rak kai yela rka tatu palpa a anong kanokg a Sutia a Samaria. Pake tu melnum wokgen akwapel a Sisas pa tu ake ngkark kai tatu a i a i pa, tu am rka pake.
ACT 8:2 Atom tu melnum ute wor tiur a ukipma Maur Wailen pa tu uwen Stipen pa, a tu akgentel wail manten.
ACT 8:3 Ari Sol pa kil atn or ungkwan uk wleket anel melkgel tu wrong kin kipman mapming yela a ukipma Sisas pa. Kil kawor wan ur wan ur or talpul kin a kipman pa angkli elng kulor en ti awiyen aye kai rpma wan tipmining ai.
ACT 8:4 Atom tu wrong kin kipman a ukipma Sisas pa a pikekg purngprarng kai rka yela tatu palpa pa, tu kai atn anong ur anong ur laron yangkipm wor a la Sisas.
ACT 8:5 Pilip pa kil melnum wris ur a tu pa kil kaino anong wail ur a anong kanokg Samaria laron yangkipm a la Krais melnum a Maur Wailen ukwa kulnar la ikuwiyo pa naki tu wrong kin kipman a rka kaino pa.
ACT 8:6 Tu itna atning yangkipm a kil laron a ari kweikwei titnongket weten a kil antokg pa, atom tu wrong akwail kulkai elng nungkulkg pa itna atning yangkipm wor a kil angkli pa.
ACT 8:7 Wa tu wa ari a kil ungkwan maur paipm kimpilpet pa kirkar yikakatnen ngkark takwelkgen tu melnum watipmen pa kul or kai en, a kil antokg tu melnum nepmplupmen a numpwam amowe pa palng wor.
ACT 8:8 Kolpa atom tu wrong kin kipman wailet tu atopen wail manten itna kaino anong pa.
ACT 8:9 Melnum ur a rpma kaino anong wail a Samaria pa, nang akilen pa Saimon. Kil pa melnum yar mapen pikekg akwap pa wang watinet antokg kweikwei titnongket tiur itna kaino anong pa laron kil alkil ti la kil melnum wailen ur. Atom ak antokg tu wrong kin kipman wailet a rka yela anong kanokg a Samaria pa tu wrekg paipm eng tu ari pa.
ACT 8:10 Atom tu wrongkwail, tu a nang arke, a tu a nang kalpisen pa, tu plalngten aye nungkulkg wulmpa a tu pa aye kai itna wreren ak atning ari ariworwor, a tu la kolpa la, “Melnum pa kil antiwe titnongket a mentepm namput la 'Melnum a arpmen titnongket wail kolen a Maur Wailen' pa am melnum pake.” Pa nikgwalpm a tu wrong ti akwonalmpen la kolti.
ACT 8:11 Kil pikekg akwap kolpa ak ai kul ai, kolpa atom kil antokg tu wrekg paipm kunturng katnuntel atn la itning a ri kweikwei a kil antokg ak titnongket a maur paipm pa.
ACT 8:12 Pake ak wang ti tu atning yangkipm wor a Pilip laron Sisas pa kil Krais, melnum a Maur Wailen kil ukwa kul nar la ikirmpento, wa kil laron la Maur Wailen kil la itni wailen ikglen nol nikgwalpm atuwen pa naken, tu atning yangkipm pa ukipma atom tu kaluken kimeket, kin kipmanen.
ACT 8:13 Wa Saimon, melnum yar mapen pa yat kil ukipma atom tu kalukel, atom kil katnun Pilip pa atn yela, ari kuina ur a Pilip antokg ak titnongket a Maur Wailen, kweikwei weten a melnum ake antiwe antokg pa. Kolpa atom kil wrekg paipm akwonalmpen watipmen.
ACT 8:14 Atom tu melnum wokgen akwapel a Sisas tu rka kai Serusalem pa tu atning la, tu a anong kanokg Samaria pa am awi yangkipm wor a Maur Wailen atning atopen ise. Kolpa atom tu ukwa Pita ekg Son pa kainonten.
ACT 8:15 Tuwekg kaino palng kaino anong ur a Samaria pa, tuwekg asen Maur Wailen eng la tu uwi Maur Wor.
ACT 8:16 Pati atnen Maur Wor ake kul nar rpma tu pa a pa. Tu pa pikekg tu naren Wailen Sisas ti kolti kaluken.
ACT 8:17 Atom Pita ekg Son elng wam ele tu pa asen Maur Wailen pa atom tu awi Maur Wor pa.
ACT 8:18 Saimon yar mapen kil ari a tuwekg elng wam ele tu pa asen Maur Wailen pa atom tu awi Maur Wor pa, kolpa atom kil awi marpm pa aye kul uk Pita ekg Son pa, a kil la,
ACT 8:19 “Kupm la kipmekg lkopm titnongket pa yat, eng kupm elng wam ele tu melnum pa, mpa wa tu wa uwi Maur Wor pa yat kolpa.”
ACT 8:20 Ari Pita pa akalmpe la, “Kitn iye nikgwalpm paipm alkitn a la kolpa nimpokgen marpm pa iye kai anong paipm pawo! Mla lanakeitn la kitn la rmpen kweikwei wor a Maur Wailen uk kalpmlel melnum pa ik marpm pa!
ACT 8:21 Kil ake kwap ur a ak arikgnangkel kitn pa, eng mpa kitn ikwap kil nti mentekg ti. Eng ntei, nol nikgwalpm a kitn pa ake ute wor itna wulmpa a Maur Wailen pa.
ACT 8:22 Ti kitn plelng ipma, a ukyirokg nikgwalpm paipm a kitn akwonalmpen pa, atom kitn oklala niki Wailen pa ukwiyen la mpa kil ungkwan nikgwalpm a kitn akwonalmpen kolpa aki kalpis.
ACT 8:23 Kupm ari kitn alupm nikgwalpm raimpe paipm kolpa pa, pa kolen tukuk ur a yapo ipmel kitn aye itna, a wa kitn pa kolen wampung a angkowe ampei ngkaten plalplal rka pa.”
ACT 8:24 Saimon kil atning kolpa atom kil arkolng paipm lanaki Pita ekg Son pa la, “Ti kipmekg oklala niki Wailen eng kil ngklinsopm eng kuina ur kol a wet kipmekg la pa ake mpa wa palng kul kupm ti.”
ACT 8:25 Atom Pita ekg Son laron yangkipm a Wailen a pikekg tuwekg atning ari a antiwel akwap pa naken plalng pa, tuwekg wa yaper kinar Serusalem. Tuwekg yaper kinar pa, tuwekg angkli yangkipm wor a la Wailen pa itna wampel kolpa kinar itna tatu anong tiur a Samaria pa kolpa kinar Serusalem pa.
ACT 8:26 Maur akwapel a Wailen pa lanaki Pilip pa kolpa la, “Takgni no pirng pa kitn wrekg i Serusalem ti kinar or ya a wrik wes ningkrapm kalpmilel pa, ya a kinar plalng wa kai kaino palng kaino anong Kasa pa, pa ya mpa kitn ore pa am pake!”
ACT 8:27 Kil atning kolpa, kil wrekg kinar om. Kil or ya pa kinar ari, kil ansil melnum ur a anong kanokg a Itiopia pa pikekg kaino Serusalem eng ngkat nang a kapor kilko alein Maur Wailen atom wa yaper angkaino ai nar, melnum pa pikekg tu angklo mamrowel. Melnum pa kil alkil mring man wailen a itna ep ikgalen marpm a kweikwei wrongkwail a Kantasi, kin tukgunakg a itna ep a ikgalen tu melnum a Itiopia.
ACT 8:28 Melnum wailen pa kil rpma nimong a manto nepm watin pa arkolngkel aye nar pa, kil awi wrkapm a melnum okwripm Aisaia pa rpma angkleikg itna wampel wampel kolpa yaper nar la kinar anong alkil.
ACT 8:29 Atom Maur Wor pa lanaki Pilip pa la, “Kitn kinar ngkom nti nepm wreren nimong a manto nepm watin arkolng ai kolpa kai kinar.”
ACT 8:30 Pilip kil atning a Maur Wor la kolpa, kil pirng kinar anti nepm wreren nimong a manto nepm watin arkolng pa angkom nar ya yamping nampokgen nimong pa kolpa kai kinar pa, kil atning wrkapm a melnum wailen pa angkleikg. Kil angkleikg wrkapm a melnum okwripm Aisaia pa nira pa. Atom Pilip asentel la, “Kitn angkleikg wor pake, kitn ariwe la wrkapm pa ak la kuina kolai?”
ACT 8:31 Ari melnum wailen pa akalmpe la, “Kol melnum ur ake lakati yiprokgen pa klalen wor pa, mpa wa kupm wa riwe kolai?” Kil lanaki Pilip pa kolpa plalng atom kil lanakel la kil kaino tuwekg rpmi.
ACT 8:32 Atom Pilip kil kaino antiwel rpma. Yangkipm a melnum pa angkleikg kai wrkapm pa pati la kolkil, “Kil pa kol manto walkg malkgu a tu awiyel aye kai la ilmpel imo. Wa kil kol manto walkg malkgu war a elngterng rmpa kolti ak wang a tu ukwalng walkg alkil pa, kil am kolpake, kil ake kirkar ur, kil tarng rmpa kolti.
ACT 8:33 Tu antokgtel ari paipm. Tu arkuwel, a ake wa tu ur itna yirokgel kil pa antokg yangkipm akilen pa, kolpa atom tu angketen yangkipm akilen pa angko wang ti kolti. Kil alkil yek wrisen, ti mpa mla a i la tu walwalpopm walyaru alkil pa? Ti kil am tu almpel amo kai angket lam takwlelkgen kanokg ti.”
ACT 8:34 Melnum wailen pa angkleikg wrkapm pa kolpa, kil asen Pilip pa la, “Kitn nikopm ri, la melnum okwripm a nira wrkapm a kupm angkleikg kil pa kil nira ak la mla? Kil la kil alkil ti aki kil la melnum manet ur ai?”
ACT 8:35 Atom Pilip kil lanaki melnum wailen pa ariworwor yangkipm yiprokgen a wet melnum wailen angkleikg pa. Kil ngkaten angko yangkipm a ela wrkapm pa atom laron yangkipm wor a la Sisas pa aye a pa kul pake.
ACT 8:36 Tuwekg nar ya pa kinar pa, tuwekg kai palng kai wrik ur a u arke pa, atom melnum wailen pa lanaki Pilip pa la, “Kitn ri u ur rka ti. Kol a kitn kulukopm itni tiwo! Aki wa kwei ur itna wai?” [
ACT 8:37 Ari Pilip lanakel la, “Kol kitn ukipma Sisas pa nimpokgen nol nikgwalpm akitnen pa kimeket pa, kupm antiwe kulukeitn pa.” Ari kil akalmpe la, “Ei, kupm ukipma pa. Kupm ukipma la Sisas Krais pa Warim Kipman a Maur Wailen.”]
ACT 8:38 Atom melnum wailen pa lanaki melnum a ikgalen manto nepm watin a arkolng nimong pa eng kil itni. Atom manto nepm watin pa kai itna pa, tuwekg yatenen, Pilip a melnum wailen pa, ekg kai kinar itna u pa, atom Pilip kalukel.
ACT 8:39 Pilip kalukel plalng pa, tuwekg angkinar u pa no pa, Maur Wor a Wailen pa awi Pilip pa titalampen aye kai atn kol ur pa. Atom melnum wailen pa ake wa ari Pilip pa, pake ak wang a kil nar ya pa kinar pa, ipma akilen pa atopen wail manten.
ACT 8:40 Maur Wor awi Pilip pa aye kai titalam atn kolpa, atom wa tu ari kil a palng itna kaino anong Astot ai, atom am kil atn yela tatu anong ulkgung ulkgung pa laron yangkipm wor a la Sisas pa kolpa kaino kaino, kaino palng kai Sisaria ai.
ACT 9:1 Sol kil nikgwalpm kungkruwis wrongen paipm la or melnum a ukipma Wailen pa imo. Kolpa atom kil kai ari melnum tukgunakg a itna ep eng tu ipma krakgen a Maur Wailen.
ACT 9:2 Atom kil asentel la kil nira wrkapm wompel ur, eng kil iye kaino ngkleikg itni tutu wan a tu Suta kai atning atning yangkipm a Maur Wailen atnewe pa kaino anong Tamaskus. Melnum itna ep ipma krakgen a Maur Wailen pa kil atning kolpa, kil nira wrkapm wompel pa uk Sol pa. Wrkapm wompel pa nira kolkil la: “Kol Sol kaino nsil kin aki kipman tiur a katnun Ya a ukipma Wailen pa pipa, kil rkulen, kin kipmanen, yipo wampel atom iyewen kai rpmi, atom uwiyen iye nar Serusalem ti.”
ACT 9:3 Atom Sol kil kaino kolpa kaino wreren anong Tamaskus pa ari, kil ari wakg klalen titnongket ur a plaing pongpong angkaino kitnong ai kul nar alentel kolti kai plalng.
ACT 9:4 Atom kil elng angko kinar rmpa kanokg pa, a kil atning ok ur a akwe kil pa la, “Sol, Sol! Antokg kolai ti kitn uk kalkuten a wleket kupm ti?”
ACT 9:5 Atom Sol kil asen la, “Melnum Wailen, kitn mla pa?” Ari ok pa akalmpe la, “Kil kupm Sisas, kupm melnum a kitn alkopm alkopm kalkuten a wleket pake.
ACT 9:6 Ti kitn wrekg atom kitn kaino kai kawor anong wail pa, mpa melnum ur laniketn kuina ur mpa kitn ntokg pa.”
ACT 9:7 Ti tu melnum a akakupe Sol atn pa tu wrekg paipm titnowen num itna kolti, wa tu atning ok a la pake, ake wa tu ari melnum pa kalpis.
ACT 9:8 Sol kil wrekg a kanokg pa rpma, tita wulmpa alkil pa ari, ake antiwe mpa kil ri kweiur kalpis. Atom tu melnum a antiwel pa wamparpmewel aye kaino kai kawor anong Tamaskus pa.
ACT 9:9 Kil wulmpa ore rmpa, pake kil ake antiwe a ri kweikwei pa, a wa kil ake antiwe a il u a okipma pa, kalpis. Kil rmpa kolpa wang misen wraur.
ACT 9:10 Ti watnom ur a Sisas a rpma Tamaskus pa nang akilen pa Ananias. Kil ari Wailen pa akwewel ak okgwangket pa la, “Ananias.” Ari Ananias pa akalmpe la, “Wailen, kupm am kilke.”
ACT 9:11 Atom Wailen lanakel la, “Kitn wrekg or ya pa kai, ya a tu namput la Ya Ute pa. Kitn or ya pa kai palng wan a Sutas pa, kitn isen melnum ur a anong Tarsus nang akilen pa tu namput la Sol, kil pa am rpma wan pake. Pa kitn kawor riwel o, kil oklala naki Maur Wailen rpma pa.
ACT 9:12 Kil wuten kupm plantel kwei ur kolen okgwangket pa ep ise, ti kil ariwe la la kitn Ananias mpa kai riwel elng wam elewel oklala niki Wailen eng ik ngklin wulmpa a kil pa palng wor eng ri kweikwei pa.”
ACT 9:13 Ananias akalmpe Wailen pa la, “Kupm la kol a kai riwel pake, kupm atning a tu melnum wailet lakati nakopm melnum pa la, kil melnum a antokg paipm uk wrongmanto tu wrong kin kipman ute wor akitnen itna kinar Serusalem.
ACT 9:14 Ti kil pikekg no Tamaskus ti nampokgen wrkapm titnongket a tu melnum tukgunakgen a tu ipma krakgen alkel la, kil rkul tu men a kapor kilko alein kitn a ngkat nang akitnen pa atom uwiyo iye kinar rpmi wan tipmining.”
ACT 9:15 Ari Wailen lanakel la, “Kitn kai o, Sol pa melnum a kupm takwei kolen kosakal kotwang akupmen a la ik ik kwap akupmen eng iye nang akupmen kai laron niki tu melnum a ake a Suta, a tu melnum tukgunakg wail wail itna ep, a tu wrong kin kipman a Isrel.
ACT 9:16 A kupm ikga plantel la ikga kil rki kalkuten a wleket aur aur eng ngkiten ik ik kwap a laron nang a kupm yela.”
ACT 9:17 Ananias kil atning oklala a Wailen kil lanakel kolpa plalng pa, kil ak katila. Kil kai ari wan a Sol arpme pa kolti, kil kai kawor wan wunen ai, elng wam ele Sol pa a kil la, “Melnum wor alkupm a mentekg ukipma Sisas, Wailen Sisas kil ukwawopm kul eng kitn tike, Sisas kil alkil melnum a pikekg palngteitn angko kinar ya pa ak wang a kitn no ti. Kil ukwawopm kul eng kitn ti la wulmpa akitnen ti mpa palng wor ri kweikwei, a kitn mpa uwi Maur Wor a Maur Wailen ntiwe.”
ACT 9:18 Atom penterngen kolti kweiur kol yul kerpm ur a akampri wulmpa a Sol pa elng angko kinar kanokg ai, a wulmpa a kil pa palng wor ari kweikwei pawom. Tu naren nang a Sisas pa kalukel plalng pipa,
ACT 9:19 kil awi okipma pa al om, atom kil awi titnongket pake. Sol kil rpma wang aripm ur anti tu melnum a ukipma Sisas rpma Tamaskus.
ACT 9:20 Ak wang a kil anti tu pa rpma pa, ake ampen kil wrekg kolti ngkaten kwap a laron nang a Sisas ti yela tatu wan a tu Suta atning atning yangkipm a Maur Wailen atnewe pa la, “Sisas pa Warim Kipman aklale a Maur Wailen.”
ACT 9:21 Atom tu melnum a tu atning yangkipm a Sol laron pa, tu wrekg paipm eng yangkipm a kil la pa. Atom tu asen tita la, “Am melnum a pikekg antokg paipm alm amo tu melnum a kapor kilko alein akwen nang a Sisas kinar Serusalem pa am pake! Ti am kil no ti la rkulo uwiyo iye kinar eng tu melnum ipma krakgen itna ep tike!”
ACT 9:22 Ari Sol kil awi titnongket kolpa aye kai wail a wail, atom kil ak laron Sisas pa ariworwor kai itna yiprokg la kil melnum a pikekg Maur Wailen takwei atom ukwa nar la ikuwi tu wrong kin kipman, atom yangkipm a kil la pa ak antokg tu wrong kin kipman a Suta a rka Tamaskus pa, tu wrekg paipm akor yangkipm ur la ikilmpe kai kil pa ari tu yangkipm kalpisen.
ACT 9:23 Wang aripm ur kai plalng pipa, tu Suta tu kai rka wris yapon yangkipm la ilm Sol pa imo.
ACT 9:24 Ari kil atning tu ur lanakel la, tu pa yapon yangkipm la tu a ilmpel imo. Atom akangklei mining a ran pa tu atnen yipmingki wanyun a anong wail pa itna, la kil or wanyun pa kawor ngko en pipa, tu ilmpel imo.
ACT 9:25 Ari tu melnum a pikekg Sol angklinsen atom tu ukipma Sisas pa awiyel ak mining ur pa aye kaino itna yipmingki a kapringen anong pa atom kil kawor rpma rkwa wail ur pa, atom tu alekg kil pa kai ampei pa elng kinar kanokg ai. Atom kil kinar Serusalem ise.
ACT 9:26 Sol kil kinar palng kinar Serusalem pa, kil la kil a kai nti tu watnom a Sisas. Ari tu watnom a Sisas pa tu ngkark paipm eng kil pa, a tu nikgwalpm wekg wekg akwonalmpen watipmen la kil pa watnom a Sisas pa aki kalpis.
ACT 9:27 Ari Parnapas kil awi Sol pa aye kai ikgalentel rpma, atom awiyel aye kai eng tu melnum wokgen akwapel a Sisas pa, a lakati naken la, Sol pikekg ari Wailen angko ya atom Wailen lanakel yangkipmok. Wa kil lakati naken a pikekg kil awi titnongket atom ak laron nang a Sisas itna kaino Tamaskus.
ACT 9:28 Tu atning Parnapas laron Sol kolpa, atom tu ake ngkark om, tu alkel wor. Atom Sol kil kai antiwen rpma atom kil wrongen antiwen atn laron nang a Wailen yela or kai Serusalem pa.
ACT 9:29 Atom wa kil wa laron yangkipm pa naki tu Suta a ak ok Krik pa atom tu ak yangkipm pa rapon, ari tu antokg la ilmpel imo.
ACT 9:30 Pake tu melnum a ukipma Krais, tu atning a tu la, tu a ilmpel imo, kolpa atom tu awiyel aye kaino anong Sisaria atom ukwawel a pa kaino anong Tarsus.
ACT 9:31 Atom tu wrong kin kipman mapming a ukipma Sisas a rka yela tatu anong kanokg a Sutia, a Kalili, a Samaria pa tu rpma meen wor atopen. Tu ngkark eng Wailen pa atom tu rka orngwatneikgen Wailen pa kolti, wa Maur Wor angklinsen alken titnongket, atom tu wrong kin kipman pa kai wailet a wailet kolpa ukipma katnunten.
ACT 9:32 Pita kil atn yela tatu anong tatu palpa, atom wangkur pa, kil kai ari tu wrong kin kipman a Maur Wailen a rka kai anong Lita pa.
ACT 9:33 Atom kai anong pa kil ansil melnum ur, nang akilen pa namput la Ainias. Melnum pa nepm wam plupmen alkil a okg rmpa wrik kolti wringkwringen. Kil rmpa wrik pa rmpa kol wring wampwomis wampwompwraur.
ACT 9:34 Atom Pita lanaki melnum pa la, “Ainias, Sisas Krais kil antokg kitn palng wor ise. Ti kitn wrekg ngkit wrik kweikwei alkitn ti iye kai elngkirki o!” Pita kil la kolpa, melnum pa kil wrekg wor kolti ngkat wrik pa aye kai rka.
ACT 9:35 Atom tu wrong kin kipman watipmen a rka anong Lita, wa rka wrik ipma rmpampen wail a tu namput la Saron pa, tu ari melnum a palng wor pa, pa tu plelng ipma kai katnun Wailen.
ACT 9:36 Kin wris ur a ukipma katnun Sisas a rpma Sopa pa, nang akilen pa Tapita. Nang wompel a akwe ak ok Krik pa, la Torkas. Kil kin a alupmen nikgwalpm wor, akwap wor, a kil akangklei angklin tu melnum a rpma tukwok.
ACT 9:37 Atom ak wang pa kil awi numpet, atom kil amo. Tu kaluk palk akil pa, atom aye kaino elngkirmpa kaino wan kwa walop wekg pa.
ACT 9:38 Anong Lita pa ela wreren anong Sopa ti. Tu watnom a Sisas a rpma Sopa ti pa, tu atning la Pita pa rpma kinar Lita pa, atom tu ukwa melnum wekg ur pa kinar ari Pita pa lanakel la, “Kitn wrekg ntiwo kaino Sopa ti pinterngen!”
ACT 9:39 Atom Pita wrekg antiwen kaino. Kil kaino palng kaino Sopa pa, tu awiyel aye kaino wan kwa walop wekg pa. Tu kin karpikg awi apm a nowe rpma wunen, a apm a nowe ti a pikekg Torkas angkut ak wang a kil rpma pa atom alken pa, akg ak ok namputen ak atop plan Pita.
ACT 9:40 Ari kalpis, Pita la tu kai kawor en, a kil kapor kilko alein oklala naki Maur Wailen. Plalng pa, kil plelng kaino ari melnum yipmiri a rmpa pa la, “Tapita, wrekg o!” Atom kil wulmpa or ari Pita pa, atom kil wrekg rpma.
ACT 9:41 Pita kai wamparpmewel angklinsel eng kil wrekg itna. Atom kil akwe tu wrong kin kipman a Maur Wailen nampokgen tu kin karpikg pa or ariwel la kil wrekg ise.
ACT 9:42 Atom yangkipm pa umpen kai tu atning yela tatu anong Sopa pa, atom tu wailet tu plelng ipma, ukipma katnun Wailen.
ACT 9:43 Atom Pita kil anti Saimon melnum a nerner palk a manto nepm watin pa rpma Sopa pa wang aripm ur.
ACT 10:1 Melnum ur a rpma kaino anong Sisaria pa, nang akilen pa Kornilius. Kil itna ep ikgalen tu melnum kamel wampwomis a almpwrong a tu mapming ur a tu namput la tu Itali.
ACT 10:2 Kil ake melnum a Suta pake kil melnum wor a kapor kilko alein katnun Maur Wailen, wa kil nampokgen tu a rka wan akilen pa tu ngkark eng wulmpa a Maur Wailen, atom tu rpma orngwatneikgen kil. Kil angklin tu Suta watipmen a rpma tukwok, a wa kil oklala naki naki Maur Wailen akangklei wang.
ACT 10:3 Atom wangkur pa takgni plelng kinar ak a tukoryauk angkli om pa kil ari Maur Wailen plantel kolen okgwangket pa kil ari worel kolti maur akwapel a Maur Wailen pa palng orntel wan ti la, “Kornilius!”
ACT 10:4 Kornilius pa ikatnentel atom anuren paipm la, “Melnum Wailen, kitn akwewopm eng kuina?” Ari maur akwapel a Maur Wailen pa akalmpe la, “Maur Wailen atning akwen akitnen pa. Kweikwei wrongkwail a kitn antokg eng ak angklin tu melnum a rpma tukwok pa, Maur Wailen ari pa.
ACT 10:5 Atom kitn ukwa melnum aripm ur pa kinar anong Sopa pa ikyakur melnum ur, nang akilen pa Saimon pa iye no. Nang wompel akilen pa Pita.
ACT 10:6 Kil anti nangkur alkil Saimon, melnum a nerner palk a manto nepm watin pa rpma, wan akilen pa ela unokg yamping.”
ACT 10:7 Maur akwapel a Maur Wailen pa la oklala pa plalng pa kil atnuurngkel kai pipa, Kornilius pa awi melnum akwapel wekg alkil a akwap itna wan alkil pa, nampokgen melnum a almpwrong pa wris. Melnum a almpwrong pa kil melnum wris ur itna kuin a tunteng melnum a alupmel worwor orngwatneikgen Kornilius pa, a wa kil melnum wor a kapor kilko alein katnun Maur Wailen.
ACT 10:8 Kil lanaken a wuten maur akwapel a Maur Wailen palngtel lanakel oklala kweikwei pa plalng, atom kil ukwawen la tunteng kinar Sopa pa ik yakur Pita pa iye no.
ACT 10:9 Tunteng kinar okg rmpa ya pa rmpa, or kong ti pa tunteng wrekg a pa kinar kinar wreren anong Sopa pa, wang a wreren eng a takgni no pirng pa tunteng angkom nar ya ti wreren wreren kai eng a kinar palng ti pa, Pita a rpma kinar Sopa pa am wet kai kaino rpma wan kimpo kwa a wan walop wekg pa oklala naki Maur Wailen pa rpma ise.
ACT 10:10 Kil oklala naki Maur Wailen kolpa rpma ari nikgalmpel, atom kil la il okipma ur. Atom ak wang a tu numprampen okipma pa, kil rpma ari nol akilen pa aner titnowen ti pa, kil ari Maur Wailen plantel kwei ur.
ACT 10:11 Kil ari ari kitnong ti rakol kolti, kil ari numong kimpang wail ur a ampei angklin nimpepm wikgwikg alkil pa, atom alekg angkaino kitnong ti nar kanokg kolen apm wail ur pa.
ACT 10:12 Itna numong kimpang pa wlikgok a ikgur ikgur a tu Suta angklon ake pa. Kolen manto, wampung a kweikwei a lakg tatu kanokg pa kolen ul pa, a wel a or kaino kwa pa.
ACT 10:13 Ari ok ur pa lanakel la, “Pita, wrekg o, ilmpor wlikgok pa ntokg il o!”
ACT 10:14 Ari Pita la, “Wailen, kalpis wrisen! Kupm ake al al kweikwei ur a kalkut kalkut a angklonake kolpa.”
ACT 10:15 Ari kalpis, ok pa wa la antiur la, “Kweikwei pa pikekg angklonake pake, ak wang ti pa Maur Wailen kil antokg wor kimeket a al wangkwris kolti, ti ampur kitn la pa ongket ongket aki a angklonake pa.”
ACT 10:16 Ok pa la anti wekg pa kai plalng, wa la anti wraur ti pilpa, wlikgok a itna nimong kimpang pa am wa arkolng aye yaper kaino kitnong ise.
ACT 10:17 Pita pa rpma akwonalmpen watipmen la kil a riwe yiprokgen a kweikwei wuten kil ari pa. Ari kalpis, melnum wraur a pikekg Kornilius ukwa wli la ikyakurel pa, am teng wli palng itna yipmingki yun tike. Wuten tunteng asen rapo kolpa kinar kinar, atom tu planten la wan a Saimon a Pita arpme pa am pake.
ACT 10:18 Tunteng itna yipmingki yun pa akwe yikakatnen kawor wan pa asenten la, “Oi, Saimon pa antiwepm rpma pake? Nang wompel a kil pa Pita.”
ACT 10:19 Pita pa rpma kaino kwa pa akwonalmpen kweikwei a wuten palngtel pa, ari Maur Wor a Maur Wailen pa nakel la, “Melnum wraur ur akoreitn wli itna kinar ti.
ACT 10:20 Kitn wrekg kinar riwen o! Tunteng pa pikekg kupm ti ukwawen nar la ikyakureitn. Ti ake mpa kitn ikwonilmpen watipmen, kitn ntiwen kaino wo!”
ACT 10:21 Atom Pita atning nungkulkg kolti wrekg kinar ariwen atom lanaken la, “Kupm a kipm akoropm am tike. Ti kipm akoropm wli eng na?”
ACT 10:22 Atom tunteng akalmpe la, “Kornilius melnum ur a ikgalen melnum kamel wampwomis a almpwrong pa ukwawo nar. Kil melnum wor a kapor kilko alein katnun Maur Wailen, wa kil melnum a ngkark eng Maur Wailen. Kil melnum a Rom, pake kil melnum wris anangket a tu Suta ariwewel worwor kaporng yangkipm la pa kil melnum wor. Maur akwapel klalen a Maur Wailen pa pikekg lanakel la kil ukwa minto ti nar ikyakur kitn ti iye kaino wan anong a kil ai, eng kitn lakiti kuina ur a kitn la ikga la ti lanikel kaino ai.”
ACT 10:23 Pita atning a tunteng la kolpa nakel plalng pa, kil akyakuren aye kawor wan pa ikgalenten antiwel okg rmpa mining wris. Atom or kong ti pa kil wrekg antiwen kaino. Pa wa tu melnum tiur a ukipma Sisas a rpma anong Sopa ti pa wa wrekg antiwen kaino.
ACT 10:24 Tu kaino okg rka ya pa mining wris, plalng, wa tu wrekg a pa kaino palng kaino anong Sisaria. Kornilius pa kil awi tu walmpopm wris, a tu melnum wor wor tiur alkil pa wli takwem rka nungkwangenten arkenten rka ise.
ACT 10:25 Tu kaino palng anong pa kolti, Pita awi erk eng a kawor wan ti pa, Kornilius kil kul elngtangko kapor kilko aleinsel alkel wor.
ACT 10:26 Ari Pita lanakel la, “Wrekg o! Kupm am melnum kol kitn pake.” Atom kil wamparpmewel aye wrekg.
ACT 10:27 Tuwekg oklala kolpa itna wampel kai kawor, ari Pita ari tu wrong wailet am rka ise.
ACT 10:28 Atom Pita lanaken la, “Kipm ariwe yangkipm titnongket a men Suta pa la ake mpa men kai itn a rki orwris numpokgen kipm yimponen yimponen a ake a Suta pa, kalpis. Ari ak wang ti Maur Wailen pikekg plantopm mrangkum a la ake mpa kupm ukwe melnum ur lala yimponen itna wulmpa a Maur Wailen aki, lala ake mpa kupm ngklon eng itn orwris numpokgen kil pa.
ACT 10:29 Kolpa atom ake kupm talpulng ok a kitn ukwa tunteng kinar akyakuropm pa. Kupm atning nungkulkg kolti, kupm no. Kolpa ti kupm la wa isenteitn la, kipm la kupm no eng kuina wai?”
ACT 10:30 Ari Kornilius akalmpe la, “Wang wraur angketen ise, pikekg kupm rpma wan ti oklala naki Maur Wailen. Ak wang a takgni plelng kinar ak a tukoryauk a angkli om pa. Kupm oklala naki Maur Wailen rpma ari, pinterng kolti melnum ur palng itna ikgokg a kupm ti. Apm pa klalen muinmainet kolti.
ACT 10:31 Atom namput nang a kupm Kornilius ti a lanakopm la, 'Kupm, Maur Wailen atning asen akitnen pa. Kweikwei a kitn ak angklin tu melnum a rpma tukwok pa kil ari pa.
ACT 10:32 Kolpa ti kitn ukwa melnum tiur kinar Sopa eng ikyakur Saimon, nang wompel akilen pa Pita. Melnum pa rpma wan a Saimon melnum nangkur alkil a nerner palk a manto nepm watin. Wan pa ela unokg yamping a kinar Sopa.'
ACT 10:33 Maur klalen a pikekg palngtopm pa lanakopm kolpake. Atom kupm ukwa melnum wraur ti kinarnteitn pinterngen. Ari wa wor eng kitn atning nungkulkg kolti kitn no. Ti men am wli rka ti itna wulmpa a Maur Wailen ti, la itning yangkipmok a pikekg Wailen lanakeitn pa la mpa kitn laniko.”
ACT 10:34 Pita la kolpa la, “Aklale wrisen, ak wang ti kupm ariwe worwor la, Maur Wailen ake ari angklowe melnum a i wor, a a i paipm pa, kalpis, kil awi wangkwris kolti.
ACT 10:35 Melnum yela kanokg ti mla ur a ngkark itna wulmpa a Maur Wailen pa atom antokg kuina ur a Maur Wailen la pa, Maur Wailen kil awi wor la melnum pake.
ACT 10:36 Kipm ariwe yangkipm a Maur Wailen ukwa nar eng men wrong kin kipman a Isrel pa. Pa yangkipm wor a laron Sisas Krais la kil Wailen a mentepm wrongkwail, a kil pikekg lam kla atom ak antokg ipma a Maur Wailen pa kil kupuk atom mentepm kai orwris nampokgentel pa.
ACT 10:37 Ti kipm ariwe kuina ur a pikekg palng pa. Pikekg Son kil laron yangkipm la tu plelng ipma atom kil kaluken. Kil ngkaten ak itna kaino anong kanokg Kalili pa, atom wa tu laron kul nar yela tatu anong kanokg Sutia ti.
ACT 10:38 A wa kipm ariwe a pikekg Maur Wailen ukwa Maur Wor alkilen kul nar kaluk Sisas a Nasaret, a alkel titnongket wail, atom Maur Wailen antiwel rpma atom kil atn akwap wor ak angklin tu wrong kin a kipman yela, wa ungkwan Satan Maur Paipm takwuleikgen tu tiur a pikekg Satan yapowen pa.
ACT 10:39 Atom men pikekg nungkulkg a wulmpa eng kwap wrongkwail a pikekg kil ak itna anong kanokg a men Suta, a wa itna kinar anong wail Serusalem pa, atom men laron yela la pa aklale. A wa tu karkurng melnum pa rka yo okgmangki pa atom kil amo.
ACT 10:40 Pake wang wraur pa kai plalng pipa, Maur Wailen wa la kil wa wrekg, a wa la kil palng ngko wunong eng tu ri.
ACT 10:41 Maur Wailen ake lala mpa kil kai palng ngko wunong eng tu wrongkwail pa ri pa, kalpis. Kil la mpa kil palng ngko wunong eng tu melnum a pikekg kil takweiyen ep ak ai, pa am men tike. Kil amo wa wrekg kai palngto kolti men ari, men antiwel al u a okipma. Men a pikekg nungkulkg a wulmpa, eng mpa men ti ri tike, atom men laron la pa aklale.
ACT 10:42 Atom kil lanaki men ti la ikga men laron niki tu wrong kin kipman pa la Maur Wailen kil ngkat kil pa itna eng ikga rpmi itning yangkipm a tu melnum a rpma ti a tu melnum a amo kaingkai ai. Atom men laron la pa aklale.
ACT 10:43 Tu melnum okwripm wrongkwail a Maur Wailen pikekg ep pa am wa laron kil pa kolpa yat pake la pa aklale la, nang akilen pa titnongket antiwe a ak ungkwan paipmpaipm a melnum ur a ukipma kil pa.”
ACT 10:44 Pita angkli yangkipm pa kolpa itna ari Maur Wor a Maur Wailen pa nar rpma tu melnum a rpma atning yangkipm pa.
ACT 10:45 Tu melnum a angket num pa plan la tu a Maur Wailen, ukipma Sisas a wet anti Pita no pa, tu ari Maur Wor pa kulnar rpma tu melnum yimponen a ake Suta pa yat, atom tu wrekg paipm.
ACT 10:46 Tu atning oklala ur a palng oklala wli ok a tu melnum a Maur Wor nar rpma pa atom ak ok manet tiur ai oklala, ak ngkat nang a Maur Wailen pa kolpa itna, atom Pita lala,
ACT 10:47 “Ake mpa melnum ur ngkengko, mentepm kuluken o! Kipm riri tu awi Maur Wor irir kolen mentepm ti, ti mpa mentepm kuluken ik u pake.”
ACT 10:48 Atom Pita lanaken la, tu mpa naren nang a Sisas Krais kuluken. Atom tu kaluken plalng pa, tu angkengkel la kil ntiwen rpmi wang aripm ur pen.
ACT 11:1 Tu melnum wokgen akwapel a Sisas nampokgen tu melnum wor alntuwen a tu ukipma Sisas a rka yela tatu anong kanokg a Sutia pa tu atning yangkipm a tu lakati naken la pa ake tu alntu Suta ti kolti pa, pa tu wrong kin kipman tiur a ake a Suta pa tu wa ukipma katnun yangkipm a Maur Wailen pa ise.
ACT 11:2 Atom Pita nar kul no Serusalem ari, tu melnum a ukipma Sisas pa titnongket la, tu ukipma wor pake, kol a tu wangket num pa yat,
ACT 11:3 atom tu aklewel la, “Kitn ak nikgwalpm kolai atom wa pikekg kitn kawor wan a tu melnum yimponen a ake wangket num pa, a wa kitn al okipma pa nampokgen tu pa!”
ACT 11:4 Ari Pita lakati kuina ur a pikekg palngtel pa atom kil ak katila pa naken kimek kimek la,
ACT 11:5 ”Kupm rpma kaino anong Sopa pa rpma a, wang wris ur pa kupm la yangkipmen Maur Wailen pa rpma, ari nol a kupm pa am aner kai titnowen ise. Atom kupm ari numong kimpang wail kolen apm ute wail ur a ampei angklin nimpepm wikgwikg pa atom alekg angkaino kitnong ti ngkaten kweikwei elng nar rmpa won akupmen ti.
ACT 11:6 Kupm ari wulmparpme ariworwor, ari wlikgok om ompen a ikgur ikgur, wlikgok tilpmingen kolen manto wampung, a wa kweikwei kolen ul a lakg tatu kanokg ti, a wel a or kaino kwa wai.
ACT 11:7 Atom kupm atning ok ur pa akwe nang a kupm Pita ti lala, 'Kupm, wrekg ilm wlikgok ur pa ntokg il o!'
ACT 11:8 Ari kupm ti akalmpe la, 'Wailen, ok a kupm ti ake ok atne wlikgok ur a ongket ongket a angklonake kolpa, kalpis wrisen.'
ACT 11:9 Ari kalpis, ok pa wa la angkaino kitnong pa nar anti ur la, 'Kweikwei pa pikekg angklonake pake, ak wang ti pa Maur Wailen kil antokg wor kimeket a al wangkwris kolti. Ti ampur kitn la pa la ongket ongket a angklon kolpa.'
ACT 11:10 Ok pa la anti wraur, plalng pa, wlikgok kimpangen pa am wa arkolng aye yaper kaino kitnong ise.
ACT 11:11 Kupm ari a palng kolen okgwangket pa itna kaino Sopa pa itna pa, melnum wraur a pikekg Kornilius melnum wailen ur pa ukwa angkaino Sisaria ti kul nar Sopa pa, am teng nar palng ak wang ketn pake ariwopm itna wanyun a pikekg men arke rka kaino pake.
ACT 11:12 Atom Maur Wor a Maur Wailen pa lanakopm la, pa kupm ntiwen kaino a ake mpa kupm ikwonilmpen watipmen la tu pa yimponen ake a Suta pa. Kupm atning kolpa kupm wrekg la kaino pa, melnum wampwomis wampwompwris ti wa wrekg antiwopm kolpa men no. Men no palng no wan a Kornilius pake.
ACT 11:13 Kil lakati nako la kil pikekg ari maur akwapel a Maur Wailen nar kawor itna wan akilen. Atom maur akwapel pa namput nang akupmen Saimon ti a nang wompel akupmen Pita pa lanakel lala, kil ukwa melnum tiur pa nar Sopa pa eng ikyakuropm iye no.
ACT 11:14 Kil la kupm ikga nikel yangkipm ur, wa yangkipm pa ikga Maur Wailen ikuwiyel eng alkilen numpokgen tu a antiwel rka wan akilen pa.
ACT 11:15 Kornilius atning a maur akwapel pa lanakel kolpa, atom kil ukwa tunteng kul nar akyakuropm aye kaino. Atom kupm lanaken yangkipmok pa itna, ari Maur Wor pa nar kawor rpma tu wris wris pa, kol a pikekg nar rpma mentepm ti ep lmpiwen pa.
ACT 11:16 Kupm atning a ari pa atom ngkatopm won eng akwonalmpen yangkipm a pikekg Wailen Sisas kil la la Son pikekg kaluk tu ak u, pake mentepm ti pa ikga kuluko ik Maur Wor.
ACT 11:17 Pikekg mentepm Suta ti ukipma Wailen Sisas Krais, atom Maur Wailen kil alko Maur Wor pa kol kweikwei wor alkilen a akangklin mentepm ti. A wa ak wang ti Maur Wailen wa kil uk kweikwei wor akilen pa eng la wa ikngklin tu a ake a Suta pa yat. Kolpa ti kupm ti melnum kolai mpa kupm ik klangkil ngkeng kwap a Maur Wailen pikekg ak kai tu pa!”
ACT 11:18 Tu atning yangkipm a Pita la pa atom nikgwalpm a tu wet aklewel pa wa tu elngen a wa tu ipma wris nampokgentel. Tu ngkat nang a Maur Wailen ti a tu la, “Woi, kipmteng! Mentepm lala mpa kolpa kalpis, ari wa Maur Wailen uk ya tu a ake a Suta pa yat tuwa, atom tu pa yat antiwe plelng ipma atom awi Maur Wor a rpma wor yongkyong or ai kai.”
ACT 11:19 Pikekg tu akwesel Stipen pa amo pa, pa tu uk wleket wail manten tu melnum wrongkwail a ukipma Sisas pa. Kolpa atom tu melnum tiur a ukipma Sisas pa tu ngkark purngprarng kai yela atn tatu palpa. Tu kaino anong kanokg a Ponisia, anong kanokg wusok Saiprus a ela unokg kuin, a anong wail Antiok. Tu ake laron yangkipm a Maur Wailen pa naki tu manet pa, kalpis. Tu laron yangkipm pa naki tu a Suta ti kolti.
ACT 11:20 Pake tu melnum tiur a Saiprus, a tiur a anong Sairini pa wa antiwen atn. Atom tu kaino palng kaino Antiok pa tu wa laron yangkipm wor a la Wailen Sisas pa naki tu Krik a wa naki Parnapas a ake a Suta pa yat.
ACT 11:21 Titnongket a Wailen pa antiwen rpma, kolpa atom tu wrong kin kipman wailet pa tu plelng ipma ukipma katnun Wailen.
ACT 11:22 Tu melnum a ukipma Sisas mapming a rka Serusalem ti atning yangkipm a tu lakati la Maur Wor a Maur Wailen akwap kaino Antiok pa, atom tu ukwa Parnapas pa kaino.
ACT 11:23 Kil kaino palng kaino pa kil ari Maur Wailen kil plan ipma wor alkil pa ak angklin tu pa, atom kil atopen. Kil ngkat nikgwalpmel tu pa la tu uk nol nikgwalpm yauwen a tu ti kai rken Wailen pa itni titnongket iye kolpa kai.
ACT 11:24 Parnapas pa kil melnum wor, Maur Wor pa rpma akwap wail kawor nol nikgwalpm akilen pa, a kil melnum a ukipma Wailen ti titnongket. Atom tu wrong kin kipman wailet tu plelng ipma kai katnun Wailen.
ACT 11:25 Atom Parnapas am kaino akor Sol kaino Tarsus ise.
ACT 11:26 Kil akor kaino kaino, kil ansilel atom kil akyakurel tuwekg kul nar Antiok. Wring misen wris pa tuwekg anti tu melnum wrong kin kipman mapming a ukipma Krais a Antiok pa rpma. Atom tuwekg kaling plan tu wrong kin kipman wailet pa yangkipmok a Maur Wailen. Pikekg ep pa tu ake akwe tu a ukipma Sisas pa la “tu a Krais” pa, atn atn am tu namput nang weten “tu a Krais” itna anong Antiok ti pen.
ACT 11:27 Ak wang pa melnum okwripm tiur a Maur Wailen tu atnuurng Serusalem pa tu no Antiok.
ACT 11:28 Melnum okwripm wris ur atuwen pa, nang akilen pa Akapus, Maur Wor akwap kai kil pa, atom kil wrekg itna lanaki tu wrong kin kipman pa lala wang nikg wail ikga palng kai anong yela. Ei, kol ok a kil la pa, ti wang nikg wail am pikekg palng ise, ak wang a Klotius itna melnum tukgunakg a ikgalen anong kanokg a Rom pa.
ACT 11:29 Kolpa atom tu a ukipma Krais pa tu atning pa tu rka yapon yangkipm la tukwem marpm kweikwei tiur eng iye kinar ik ngklin tu melnum a ukipma a rka kinar Sutia pa. Tu melnum a antiwe pa tu uk wailet, a tu melnum a tukwok pa, tu uk wusoken.
ACT 11:30 Atom am tu ak katila kol a tu la pake. Tu takwem marpm kweikwei pa plalng pa, tu ukwa Parnapas ekg Sol pa ekg aye kweikwei pa kinar uk tu melnum wailen wailen a ikgalen tu wrong kin kipman a ukipma Krais a rka kinar Serusalem pa.
ACT 12:1 Ak wang pa Erot melnum tukgunakg pa kil uk yangkipm tu melnum alkil a almpwrong pa, atom tu arkul tu melnum tiur a tu wrong kin a kipman mapming a ukipma Krais pa eng la tu lken wleket.
ACT 12:2 Erot kil la atom tu ak kowri alm Semis wailen a Son pa amo.
ACT 12:3 Erot kil ari la tu Suta pa atopen a kil ak kolpa, pipa wa kil la tu arkul Pita pa yat. Ari wang wail a tu Suta angklon nok tingklak a ak mpim ap mringen ak ntam pa,
ACT 12:4 kolpa atom tu arkulel plalng pa, Erot lanaken atom tu awiyel aye kawor rpma wan tipmining pa pen. Atom tu elng kil kai wam a tu melnum a almpwrong akilen a kil aro elngitna mapming wikgwikg pa, la tu uk tita wang eng ikglen Pita pa rpmi wan tipmining pa. Mapming wris wris pa melnum a almpwrong pa wikgwikg. Erot la itni nungkwangen wang wail a tu Suta akwonalmpen wang a pikekg Maur Wailen kil awi tu Isrel angkai Isip pa kul wor pa kai plalng pipa, kil uwi Pita pa iye kulor kai en ntokg yangkipm itni wulmpa a tu wrongkwail.
ACT 12:5 Tu atnentel itna wan tipmining pa itna pa, tu wrong kin a kipman mapming a ukipma Krais pa anel oklala naki Maur Wailen pa titnongket eng ak angklinsel.
ACT 12:6 Ak mining pa Pita kil okg rmpa kuin a melnum wekg a almpwrong pa rmpa wan tipmining pa rmpa. Wam wompel ur akilen pa pikekg tu angkuten ak ampei mringen tiwel ur pa kai nampokgen wam wompel ur a melnum ur, a wa angkuten wompel pa nampokgen wam a melnum ur. Wa tu wantengkwang pa tu atnen wanyun a wan tipmining pa itna atom la ikgkil pa Erot melnum tukgunakg pa iye Pita pa kulor kai itni ntokg yangkipm pa.
ACT 12:7 Maur akwapel a Maur Wailen pa palng pinterngen kolti itna won a Pita kawor wan tipmining pa. Atom klalen a kil pa alen tunteng a rka wan tiwel wunen pa. Kil elng wam itna yampingkik a kil ti arowel ikgyokg la, “Pita, kitn ti wrekg oryawel!” Atom kil wrekg ari kalpis, ampei mringen a pikekg tu angkuten wam akilen pa am tikla ise.
ACT 12:8 Atom maur akwapel pa la, “Kitn uwi ampei ti ik ngket apm ti, a kitn uwi nepm palk akitnen ti rpme!” Pita kil atning kolpa kil antokg katila plalng pa, maur akwapel pa wa lanakel la, “Kitn nowe apm wakget ti atom kitn kul kutnuntopm!”
ACT 12:9 Atom Pita kil atning kolti kil atnuurng wan tiwel pa kulor katnun maur akwapel pa. Ake kil ariwe la kuina ur a maur akwapel antokg ti pa aklale pa, kil akwonalmpen la palpa kil ari kwei ur kol okgwangket ti kolti.
ACT 12:10 Atom tuwekg kulor atnuurng wanyun ep a tu melnum wantengkwang atnen itna pa, wa ekg angkawor pa kulor wanyun katnukg pa plalng pa, wa ekg kulor angkom ore kolpa kai kawor itna yipmingki yun titnongket wail a itna or en ti a kapringen wan tipmining pa, ya a kai kawor palng anong wail tike. Yipmingki yun pa pikekg ar tongtong pa ari kalpis, tikla okore kolti. Tuwekg angkom or ya pa kai, ari kalpis maur akwapel a Maur Wailen pa am atnuurngkel kai titalam ise.
ACT 12:11 Pita kil itna akwonalmpen ari nol kil pa umpen wontrakole la, “Ai, aklale tuwa! Kupm ariwe pa, Wailen kil ukwa maur akwapel akilen pa nar awiyopm kai wam a Erot aye kai takwuleikgen nikgwalpm paipm kol a tu Suta nungkwangen la kol a ntokgtopm paipm ti.”
ACT 12:12 Lngkep a kil a wet aner mis titno a pa kitnangku wontrakole worwor pilpa, kil angkom kai wan a Maria man a Son, nang wompel akilen pa Mak. Kil kai itna wanyun pa atning ari tu wrongkwailet pa am anel takwem wli rka oklala naki Maur Wailen pa rka.
ACT 12:13 Pita kalkwon wanyun ti itna kawor en pa, atom Rota kin akwapel ur a itna wan pa kil atning kolpa, atom kil wrekg kai la mpa kukwa wanyun pa.
ACT 12:14 Ari Rota kil atning kromeng pa atom kil akwonalmpen la, pa kromeng a Pita am pake. Kil atning kolpa, kil atopen paipm, kolpa atom ake kil kukwa wanyun pa, kalpis. Kil pirng yaper kawor kolti lanaki tu wrong kawor wan pa la, “Kipm pa, Pita am wli ise, ti itna kawor wanyun a tike!”
ACT 12:15 Ari tu pa la, “Rota, kitn ti titno aki, atom kitn la yangkipm pa!” Ari Rota kil erkisen la pa aklale atom tu la, “Pa kitn atning maur akwapel a kil pa mol!”
ACT 12:16 Tu anel akor la kolpa rka, ari Pita pa am kalkwon kalkwon wanyun pa kolpa itna kawor en pa itna pake. Atom tu or kukwa wanyun pa atom tu ari Pita pa itna, kolpa atom tu wrekg paipm titnowen num kolti eng tu ariwel.
ACT 12:17 Pita ak wam kapor tu pa la, “Kipm tatar rki, eng mpa kupm lanikepm yangkipm wor ur kil. Wet titnongket a Wailen awiyopm kawor wan tipmining pa aye kulor. Ti mpa kipm lakiti yangkipm kil niki Semis numpokgen tu mentepm a ukipma Krais pa!” Pita lanaken kolpa plalng pa, kil am or en kolti am kai anong ur ise.
ACT 12:18 Ak kong tu melnum a almpwrong tu wrekg ari Pita pa ari kalpis, atom anel wrekg paipm ngkark wam itna ok kolti asen akor la, “Wai, melnum ti kai or kolai?”
ACT 12:19 Atom Erot kil lanaki tu la tu itn ikor Pita pa. Atom tu akorel ari kalpis, ake tu ansilel. Kolpa atom Erot kil ipma wakget awi tu wantengkwang pa aye kai itna yangkipm pa atom lanaki tu la oren imo. Plalng pa, kil am wrekg atnuurng anong kanokg Sutia pa kaino rpma kaino anong Sisaria pa pen.
ACT 12:20 Melnum tukgunakg Erot pa pikekg ipma wakget paipm awi wrong manto lan tu wrong kin kipman a anong Tair, a anong Saiton pa. Tu takwem akor tita kai wris, atom anel kunturng nar nar ari Erot pa. Tu anel nar ariwel pati atnen tu am awi awi okipma kweikwei pa nar nar anong kanokg a Erot kil ikgalen pake. Tu nar plalng pa, ep pa tu armpwonel Plastus, melnum mring ur a ikgalen wan a Erot melnum tukgunakg pa. Ari Plastus pa kil awi wor, atom ayewen kai ari Erot pa eng lanakel la kil ungkwan ipma wakget akilen pa a kil reinsen. Eng ntei, okipma kweikwei tu am awi nar anong kanokg a Erot pa ikgalen pake.
ACT 12:21 Itna wang ur a Erot kil alkil alm pa, kil awi apmnung a lukglukg alkil a melnum tukgunakg pa nowe num kolti, kil kai awi wrik alkil a melnum tukgunakg a arpme arpme eng antokg yangkipm pa arpme rpma, atom kil oklala naki tu wrong kin a kipman pa.
ACT 12:22 Tu wrong kin kipman pa anel atning a kil oklala pa atom tu kaporng yangkipm pa la pa wor, pipa anel la plalplal yikakatnen lala, “Ok pa ake atning kol a melnum oklala pa, ok pa atning kol a maur ok ai oklala tuwa!”
ACT 12:23 Tu ngkat nang a kil tike, pake kol a kil ti ngkengken eng tu ngkit nang a Maur Wailen ai. Kil oklala kolpa atopen a tu ngkat nang a kil pa itna a pa, maur akwapel a Maur Wailen pa orel pinterngen kolti kil elng kai angko awi numpet wail kolti wilm alel ipma pa kolpa kaingkai, kai kil kai amo.
ACT 12:24 Pake yangkipm a Maur Wailen ti anip kaino umpen wail akwap titnongket yela.
ACT 12:25 Parnapas ekg Sol akwap aye marpm a kweikwei a tu takwem pa aye kinar ak angklin tu kinar Serusalem pa plalng pa, tuwekg la wa yaper no Antiok ti pa, tuwekg akyakur Son, nang wompel a kil pa namput la Mak pa tunteng no.
ACT 13:1 Tu wrong kin kipman mapming a ukipma Sisas a rka Antiok pa, melnum tiur a tu pa palng melnum okwripm a Maur Wailen, wa tiur pa a kaling plan tu yangkipm wor a Maur Wailen. Nang atuwen pa: Parnapas, Simion, nang wompel akilen pa Niker, a Lusius a anong Sairini, a Sol, a wa Manain, kil ti pa kilmik ur a melnum tukgunakg Erot a pikekg tuwekg wrekg wor wail angkompwris atn erkwon wris.
ACT 13:2 Ak wang a tu kalpis okipma ukwang Wailen a kapor kilko alein a ngkat nang akilen kolpa rka pa, Maur Wor a Maur Wailen pa lanaken la, “Kipm rkantopm Parnapas ekg Sol pa elngtopm itni kai kalpm ai iknumput kwap a pikekg kupm akwewen la mpa tuwekg ik pa.”
ACT 13:3 Tu kalpis okipma rka ukwang oklala naki Maur Wailen pa plalng pa, tu elng wam ele tuwekg pa oklala naki Maur Wailen pa ak angklinsen plalng pa, tu ukwawen kai eng akwap akilen pa.
ACT 13:4 Maur Wor pa ukwawen a pa wa tuwekg wa kai kinar anong Selusia pa. Tuwekg kinar palng anong pa plalng pa, tuwekg awi wan unokgen a pa wa nar tatu unokg pa kinar Saiprus, anong kanokg ur a ela kinar unokg kuin ai.
ACT 13:5 Tuwekg kinar palng kinar Salamis, anong wail a Saiprus pa, tuwekg angkli yangkipm a Maur Wailen pa itna tatu wan a tu Suta atning atning yangkipm a Maur Wailen atnewe pa. Son Mak pa akupewen atn eng angklinsen.
ACT 13:6 Tuwekg atn akwap kolpa yela tatu anong kanokg a Saiprus pa, kolpa kinar palng kinar anong ur a tu namput la Papos. Tuwekg ansil melnum Suta yar mapen ur, nang akilen pa tu namput la Par-Sisas. Wa kil melnum okwripm kansil ur.
ACT 13:7 Melnum ri kil pa kil anti mring man itna ep a ikgalen anong kanokg Saiprus pa rpma. Nang akilen pa Serkius Paulus. Serkius Paulus pa kil melnum a antiwe nikgwalpm a ariwe wail. Kil akwen Parnapas ekg Sol pa wli ariwel kai wan akilen pa eng lanikel yangkipm a Maur Wailen ti eng kil la itning.
ACT 13:8 Par-Sisas, nang wompel a kil pa Elimas, yiprokgen a nang pa pati yar mapen. Elimas pa kil la ngketen kwap a Parnapas ekg Sol, la ake mpa mring man a itna ep Serkius pa itning yangkipm a tuwekg angkli pa atom ukipma kutnun Sisas pa.
ACT 13:9 Atom Sol, nang wompel akilen pa Pol, Maur Wor akwap wail kai kil pa atom kil ikatnen Elimas pa ute iriren kolti,
ACT 13:10 a kil la, “Kitn pa warim a Satan pake! Kitn pa wrongmanto eng kweikwei wrongkwail a ute wor wrisen pa! Nol nikgwalpm wail akitnen pa rka eng ya paipm a worampei a ak ningkail a kansil tu melnum pake! A ake wa kitn elngen a alok ya ute wor a Wailen pa kai raimpe akangklei wang pa.
ACT 13:11 Ti kitn itning: Wailen kil mpa ntraweitn ik wam alkil ai, kil mpa ntokg wulmpa akitnen ti kai miningket, atom ake antiwe mpa kitn ik ri takgni pa.” Pol la kolpa okrerng, am aye waipmunuwis waipmunuwis miningket ti aye kul kai akampri wulmpa a Elimas ti pinterngen kolti ngkaten kaki nowenowe wakisen akor melnum kai pa kai pa la ur wampirpmewel iye or ya ti kai.
ACT 13:12 Miring man itna ep pa kil ari kuina ur a palng kai Elimas pa, atom kil ukipma pake. Kil wrekg paipm eng kil ari titnongket a yangkipm wor a Wailen a tuwekg kaling plantel pa.
ACT 13:13 Pol nampokgen tu tiur a antiwel atn pa, anel awi wan unokgen a Papos pa wa kai kaino anong Perka, a anong kanokg a Pampilia wai. A Son Mak pa wa wrekg atnuurngken a Perka pa wa kai kinar anong wail Serusalem pa.
ACT 13:14 Tunteng wa wrekg atnuurng anong Perka pa wa angkom okg rka yaya kolpa kaingkai tunteng kai kaino palng kaino anong Antiok a anong kanokg a Pisitia wai. Tunteng palng kaino pa, atom ak wang wail a rpma eng yapm pa tunteng kai kawor rpma aken tu wrong kin a kipman a rpma kawor wan a tu Suta atning atning yangkipm a Maur Wailen atnewe pa.
ACT 13:15 Melnum ur angkleikg Yangkipm Titnongket a Moses a yangkipm a tu melnum okwripm pa naken plalng pa, tu melnum tukgunakg a ikgalen wan a atning atning yangkipm a Maur Wailen atnewe pa ukwa melnum ur pa kinar lanaki Pol nampikgen tunteng a antiwel atn pa la, “Kipmteng wusok wusok a wail wail a mentepm Suta ti, kipmteng la la yangkipm ur eng ik titnongketel ipma a men wrong kin a kipman ti pa, ur a kipmteng pa wrekg kaino itni la wo!”
ACT 13:16 Atom Pol wrekg kaino itna la ak wam pa angkeng tu a oklala pa a lanaken la, “Kipm mentepm almentepm a Isrel pa, a kipm melnum a ake a Suta a rpma orngwatneikgen Maur Wailen pa, kipm elng nungkulkg pa itning kuina ur kupm a lanikepm ti!
ACT 13:17 Maur Wailen a mentepm wrong kin a kipman a Isrel ti pa kil takwei tu yo ampei a yipetatnong a mentepm ti eng alkilen. Tu yaworen a pikekg atnuurng anong yiprokg alntu pa wli rka kinar anong kanokg Isip pa, tu pa Maur Wailen antokg tu palng umpen wailet paipm rka kinar Isip pa. Atom pikekg Maur Wailen awiyen kulor takwlelkgen anong kanokg pa kul or ak titnongket wail manten a kil alkil ai.
ACT 13:18 Tu angkom or wrik wes ningkrapm kalpmlel pa almkowangkel Maur Wailen pa kolpa kai, atom Maur Wailen kil arki kalkuten a tu pa atom kil la mpa tu rki kolpa kaingkai kai wring kamel wekg misen.
ACT 13:19 Maur Wailen alm ungkwan wrong a rka anong kanokg wampwomis wampwompwekg a anong kanokg wail a Kenan pa or rak kai takwlelkgen kanokg pa, atom kil ampreing kanokg pa alken, atom tu awi num angklin kanokg pa kolen la pa kanokg alntuwen atom tu arke rka.
ACT 13:20 Wring wang a pikekg tu rka kinar Isip pa, a wa tu angkom tatu wrik wes ningkrapm kalpmlel pa kulno Kenan ti pa, a Maur Wailen talpulng wrongmanto pa takwlelkgen kanokg pa, pa palng aken tita kolen wring kamel kamel wris kamel wekg tuwek wampwam (450). Tu awi kanokg pa arpme plalng pa, Maur Wailen kil ngkat melnum ur itna wailen ikgalen tu pa kolpa kaingkai kai plalng, pa wa kil wa ngkat ur ai wa awi wrik a kil pa wa itna kolpa wa kaingkai kai plalng, wa kil wa ngkat ur ai wa itna kolpa itna pake, itna kai angko wang a kil ngkat Samuel pa itna melnum okwripm akilen.
ACT 13:21 Atom ak wang pa, tu wrong kin a kipman oklala naki Maur Wailen pa la kil ngkit melnum tukgunakg ur eng ikglenten. Atom Maur Wailen ngkat Sol warim kipman a Kis. Kil pa om wris a Pensamin. Kil itna melnum tukgunakg ikgalen tu pa kol wring kamel wekg.
ACT 13:22 Pake Maur Wailen wa ungkwan Sol pa a wa ngkat Tepit pa wa awi wrik a Sol pa itna melnum tukgunakg eng ikgalenten. Kil ariwe Tepit pa worwor kolpa atom kil kaporngkel yangkipm a kil lala, 'Kupm ari Tepit warim a Sesi pa ari nol nikgwalpm wail akupmen ti am arken kil pake. Kil pa ikga ik kutnun kitila nikgwalpm wrongkwail akupmen pake.'
ACT 13:23 Maur Wailen pikekg yapon yangkipm ak ai atom kil ak katila pake. Kil pikekg lala, yoampei ur kai om a mapming a Tepit pa ikga kil tukwei kil melnum a ak awi tu men Isrel kai wam a Satan pa aye kul kai eng kil. Am Sisas pake.
ACT 13:24 Sisas kil nimprampen la kai itn ikwap akilen pa, Son kil angkli yangkipm pa naki tu wrong kin a kipman a mentepm Isrel pa la, tu laron paipmpaipm pa la rein niki Maur Wailen pa eng mpa kil kuluken.
ACT 13:25 Kwap a Son kil ak pa, kil ak kai wreren eng a plalng, atom kil akasen tu wrong kin a kipman pa la, 'Kipm ariwe la kupm ti kupm melnum mla? Kupm melnum a kipm nungkwangen tike? Kipm itning, kupm ake melnum a kipm nungkwangen pa, kalpis. Pake melnum ur ikga wli kutnukg yirokg akupmen ti pa, kupm ti ake melnum wor antiwe ikga iner nepmpalk akilen pa.'
ACT 13:26 Kipm wusok wusok a wail wail alkupmen a mentepm Isrel, a yipetatnong walyipmiri yoampei a Apraam pa, a wa kipm a ake a Suta a rpma orngwatneikgen Maur Wailen pa, kipm itning! Yangkipm a pikekg kipm atning la Maur Wailen la ikuwiyo iye kai eng alkilen ti pa am pikekg kil ukwa wli eng mentepm tike.
ACT 13:27 Tu wrong kin a kipman a anong wail Serusalem a wa tu melnum wailen wailen a ikgalen men Suta ake wa tu ariwe Sisas pa la melnum a pikekg Maur Wailen takwei la ikuwiyo pa. A wa tu ake ariwe a wonarpme yangkipm a pikekg tu melnum okwripm a Maur Wailen nira pa a tu akangklei angkleikg ak wang wail a rpma eng yapm kapor kilko alein Maur Wailen pa. Kolpa atom ari tu alm melnum pa amo, am tu ak katila katnun ute yangkipm a pikekg tu melnum okwripm a Maur Wailen nira pake, am palng ok arke ampake.
ACT 13:28 Ake wa tu ansil ari paipm ur a Sisas kil antokg pa eng mpa ilmpel imo pa. Pake tu tirpmingen Pailat ti la ilmpel imo kolti.
ACT 13:29 Yangkipm wrongkwail a tu melnum okwripm nira ela wrkapm pa, am tu ak katila kolpake, plalng pa, tu ungkwan palk a Sisas angkaino yo okgmangki pa aye nar kolti aye kai alil ermpa kawor kirk a u mlamin ai.
ACT 13:30 Pake Maur Wailen wa la atom kil am wa wrekg a mlamin pa or kai ise.
ACT 13:31 Atom wangkur wangkur ti pa kil kai palng angko wunong anti aripm ur eng tu melnum a pikekg angkom katnuntel a no anong kanokg Kalili ti kinar anong wail Serusalem pa ariwel om. Atom tu a pikekg ariwel pa, tu pa laron yangkipm pa ak wang ti naki tu wrong kin a kipman pake.
ACT 13:32 Mentekg lanakepm yangkipm wor wrisen: yangkipm wor a pikekg Maur Wailen kil yapon anti tu yoampei amentepmen ak ai la ikga kil ik pa.
ACT 13:33 Atom kil la Sisas pa wa wrekg a mlamin pa kulor rpma malepmen pa, pa am kil akto katila kolen a pikekg kil yapon yangkipm la ikga kil ik pa eng mentepm walyipmiri yipetatnong a tu yoampei amentepmen ti. Yangkipm pa kil ak katila kolen a nira ela wrkapm Nangnang pa pati la kolkil la, 'Kitn pa Warim Kipman akupmen. Weti pa kupm palng Yan akitnen.'
ACT 13:34 Maur Wailen la Sisas kil wrekg a mlamin pa kulor rpma, ti ake antiwe mpa wa kil yaper kai imo atom elng kawor rmpi mlamin ti kai mampis pa, kalpis. Am kol a pikekg Maur Wailen la ep pake, la kolpa la, 'Kupm ariwe la kupm ikga ukipma wor ikngklinsepm kweikwei klalen wor wor pa kol a pikekg kupm yapon yangkipm anti melnum tukgunakg Tepit pa. Pa kupm ikgam ik kutnun kuina ur kol a kupm la pake.'
ACT 13:35 Wa la yat ela kai wrkapm a Maur Wailen pa la kolkil la, 'Kitn ikgake elng melnum klalen wor alkitn a pikekg kitn takwei pa rmpi mampis kawor mlamin wunen pa, kolpa kalpis.'
ACT 13:36 Eng ntei, yangkipm pa ake la Tepit pa. Ak wang a Tepit rpma kanokg a ti pa, kil akwap ikgalen tu wrong kin kipman pa katila nikgwalpm wrongkwail a Maur Wailen kil wasrongen pa kolpa kaingkai kai kil amo. Atom kil kai rpma nampokgen tu yoampei mamikg mamin mansan alkil a pikekg amo amo ep kai rka wai, pake palk akilen pa pikekg rmpa mampis kawor mlamin wunen pa rmpa.
ACT 13:37 Yangkipm pa la melnum wris a pikekg Maur Wailen la atom kil wrekg angkawor mlamin pa kulor rpma pa, palk akilen pa ake mampis rmpa mlamin pa, kalpis.
ACT 13:38 Kolpa ti kipm wusok wusok a wail wail alkupm pa, kupm la kipm uwi riwe yangkipm a kupm laron nakepm kil la, Sisas wris ata pa antiwe ungkwan paipmpaipm a melnum antokg pake.
ACT 13:39 A yangkipm titnongket a Moses pa ake antiwe a ak ungkwan paipmpaipm pa atom antokg melnum palng ute wor itna wulmpa a Maur Wailen pa. Atom kipm a ukipma Sisas pa, kil ungkwan paipmpaipm akipmen pa kai plalng takwulelkgtepm atom kipm am wirng no kukula wriwen wor ise.
ACT 13:40 Kipm rpmi wonrpme! Eng ake mpa kuina ur a pikekg tu melnum ok wripm a Maur Wailen la pa wa palng kai kipm ti.
ACT 13:41 Maur Wailen pikekg la kai ok a tu melnum ok wripm pa la, 'Oi! Kipm melnum a aknokgel kupm Maur Wailen ti, kipm itning! Kipm ikga wonmis kolti ntokg mple ante kai wrekg paipm ari kalpis, kipm am amo ise! Kupm ikga ntokg kweiur wail titnongket ik wang tike a kipm rpma kanokg ti. Atom kol melnum ur lakiti nikepm kuina ur kupm ikga ntokg pa, kipm ikgake ukipma lala ikga kupm ntokg kwei ur kolpa!'”
ACT 13:42 Pol angkli yangkipm pa plalng pa, tuwekg eng a utnuurng wan a wet tu atning yangkipm a Maur Wailen atnewe ti la kulor kai ti pipa, tu wrong kin a kipman pa wa asenten la kol a tuwekg wa yaper wli ngkli yangkipm nti ur ik wang wail a ikga tu rpmi eng yapm pa, wa laniken yangkipm pa eng tu la wa itning or ai kai pen.
ACT 13:43 Tu wrong kin a kipman pa kulor en ti eng a rak kaingkai ti pa, tu wailet a Suta a tu wailet a ake Suta a kai katnun ya a tu Suta pa, anel anti Pol a Parnapas pa angkom kolpa kai pipa, tuwekg ngkat nikgwalpmel tu pa lanaken la, “Maur Wailen pa pikekg planto ipma wor a angklinso wail manten. Kolpa ti kipm mpa ukipma kil pa itni titnongket kolpa itni pake!”
ACT 13:44 Wang wampwomis wampwompwris pa kai plalng pa, ak wang wail a rpma eng yapm ti pa tuwekg wa yaper wli angklinsen yangkipm a Maur Wailen. Ari kolen wrong yaurng a rka anong wail pa wli kimeket atning yangkipm a tuwekg laron pa.
ACT 13:45 Tu Suta ari tu wrong wailet paipm wli atning yangkipm pa kolpa atom anel ipma paipm la paipmel elukgen aknokgel yangkipm a Pol angkli pa.
ACT 13:46 Pake Pol a Parnapas itna wrongen lanaken titnongket la, “Yangkipm a Maur Wailen ti pa mpam laniki kipm Suta ti ep tike. Ari kipm talpulng, kolpa atom kipm alkipm ti antokg kipm alkipm ti ake antiwe awi yaprekg watin eng kol a kipm rpmi wor yongkyong pa. Kolpa ti mentekg mpa utnuurngkepm, iye yangkipm wor ti iye kai laron niki tu wrong kin a kipman a ake Suta wai.
ACT 13:47 Pa pikekg Wailen lanako la mpa mentekg ik kolpake la, 'Kupm takwei kitn ti kolen wakg ikga iklen wrongkwail yela kanokg ti. Ikga kitn kiling plan tu pa ya wa ikga Maur Wailen ikuwiyen iye kai eng kil alkil pa, kolpa kai yela orarpme kanokg wrongkwail ti plalng.'”
ACT 13:48 Tu a ake Suta pa tu atning yangkipm a Pol angkli pa, atom tu atopen ukwor yangkipm a Wailen pa. Atom tu melnum a pikekg Maur Wailen yaponten la uwi yaprekg watin akilen eng rpmi wor yongkyong pa, tu pa ukipma katnun yangkipm pake.
ACT 13:49 Atom tu aye yangkipm a Wailen pa kai naki tu yela, atom yangkipm pa kai umpen wail kai orarpme anong kanokg pa.
ACT 13:50 Pake tu Suta pa wa uk nikgwalpm tu kin wailen wailen a nang arke a pikekg plelng ipma rpma orngwatneikgen Maur Wailen pa a wa nampokgen tu melnum wailen wailen a itna ep a anong wail pa, atom tu pa uk yangkipm tu wrong kin a kipman pa, atom tu uk wleket Pol ekg Parnapas pa tirpmingen ungkwanten kulor kai takuleikg anong kanokg a tu pa.
ACT 13:51 Kolpa atom Pol ekg Parnapas pa ekg alo nepm mang pa itna pa ak plan tu la kol Maur Wailen lken wleket pa pati, pa am paipm a tu alntu pake. Atom tuwekg am kai anong Aikoniam ise.
ACT 13:52 Pake Maur Wor pa akwap wail kai tu melnum a ukipma Sisas pa, a wa tu awi atopen wail manten kolpa kai.
ACT 14:1 Kai anong Aikoniam pa Pol ekg Parnapas ak kolen tuwekg ak ak pa: ekg kai kawor wan a tu Suta atning atning yangkipm a Maur Wailen atnewe pa, atom tuwekg angkli yangkipm. Tuwekg angkli yangkipm nampokgen titnongket kolpa atom tu wrong watipmen a Suta a Krik pa tu plelng ipma atom ukipma Sisas.
ACT 14:2 Pake tu tiur a Suta a ake ukipma Sisas pa tu almpil nikgwalpmel tu wrong kin kipman a ake Suta pa atom antokg nikgwalpm a tu ti kai paipm atom tu ipma paipm eng tu a ukipma Sisas pa.
ACT 14:3 Pake Pol ekg Parnapas ake ngkark eng pa, tuwekg rpma wang watin a Aikoniam pa ukipma Wailen itna titnongket wrongen angkli yangkipm itna. Yangkipm a tuwekg angkli pa, tuwekg laron a Maur Wailen plan ipma wor ak angklin mentepm ti. Atom Maur Wailen alken titnongket atom tuwekg antokg kweikwei weten weten, a plan kla wail wail ak titnongket a Maur Wailen a ake antiwe melnum antokg. Pa Maur Wailen ak titnongketel yangkipm a tuwekg angkli pa la, pa aklale.
ACT 14:4 Ari tu wrong kin kipman a anong wail Aikoniam pa tu aro itna wekg. Atom tiur pa anti tuwekg melnum wokgen akwapel a Sisas pa, a tiur pa kai anti tu Suta a ake ukipma Sisas pa.
ACT 14:5 Atom tu melnum a ake Suta, a tu men Suta tu anel wrekg kai anti tu melnum wailen wailen almenen a ikgalento pa tu rka akor nikgwalpm la ntokg tuwekg pa paipm a oren ik weselen eng tuwekg imo.
ACT 14:6 Ari tuwekg atning kolpa atom tuwekg wrekg ngkark kinar anong Listra, plalng pa, wa ekg wrekg a pa kinar Terpe, plalng pa, wa ekg wrekg a pa wa kai yela anong tiur a ela wreren anong wekg a anong kanokg Likonia pa.
ACT 14:7 Atom tuwekg angkli yangkipm wor a la Krais pa itna tatu anong a tuwekg kai pa.
ACT 14:8 Melnum nepm paipmen ur pa rpma kinar anong Listra pa. Nepm akilen pa plupm pikekg awi ipma angko, ti ake antiwe a kil angkom.
ACT 14:9 Kil rpma atning yangkipm a Pol laron pa rpma, ari wulmpa a Pol pa am kai awi melnum pa ise. Kil ari ipma a melnum pa ari, kil ukipma titnongket la kil mpa palng wor.
ACT 14:10 Atom Pol lanakel ak ok wail la, “Wrekg itni kwa ntran nepm ti itni ute!” Atom melnum pa wrekg itna akwiyen ari wor, atom kil tipra tipra kolti am kil angkom atn ise.
ACT 14:11 Tu wrong kin kipman wailet pa tu ari Pol antokg melnum pa wor, atom tu la plalplal mainmain la ak ok anongen alntuwen Likonia pa la, “Ti ti ake melnum, palpa maur wekg ur nar angket ake tuwekg melnum ti mentepm ari itna tike!”
ACT 14:12 Tu akwe nangkel Parnapas pa la mring maur Sus a itna ep alntu. A Pol pa melnum ok yangkipmen a oklala kalnten, kolpa atom tu akwe nangkel kil pa la mring maur Ermes a wor eng oklala.
ACT 14:13 Wan yalming a mring maur Sus pa itna kinar anong yamping pa. Melnum ipma krakgen a ikgalen yalming a Sus pa pati aye manto nepm watin nongko a nokmlai a kweikwei mi rwin la nukure tipmakg a tu alm itna yipmingki yun a kapringen anong wail pa. Kil nampokgen tu wrong kin kipman pa wasrongen la ilwor uk melnum wokgen wekg akwapel a Krais a tu lala mring maur wekg atuwen pa.
ACT 14:14 Melnum wokgen akwapel wekg Parnapas ekg Pol atning ari kweikwei a tu la ntokg pa, atom tuwekg aro apm alntuwekg pa kolti ak plan la tuwekg karken wrisen a tu la ik kolpa. Ekg pirng kai itna kuin a tu ai, a ekg titam la yikakatnen la,
ACT 14:15 ”Wai! Kipm melnum ti! Kipm antokg kolti eng kuina wai? Elngen o! Mentekg ti am melnum tike, mentekg am kol kipm tike. Mentekg wli rpma ti angkli yangkipm wor a la Krais eng mpa kipm yaper wrisen utnuurng maur kansil perk a ake antiwe titnongket a kipm ukipma pa, a kipm kul ukipma kutnun Maur Wailen aklale a rpma yongkyong ti. Kil Maur Wailen a antokg kitnong a kanokg a unokg a kweikwei wrongkwail a itna yela ti.
ACT 14:16 Aklale, pikekg ep ak ai kulngkul kul pa kil elng tu wrongkwail kin a kipman yela kanokg ti pa kai atn ak nikgwalpm alntu pa kolti.
ACT 14:17 Pake ake kil lamtepm wrisen kuina ur a kil aktepm eng plan kil alkil pa, kalpis. Kil plantepm nikgwalpm wor: kil antokg u ti awei, a takgni ti el, atom antokg kweikwei ti palng angko oken ak wang alkilen pa. Kil angklinsepm okipma atom kipm rpma atopen wor.”
ACT 14:18 Tuwekg la angkengken titnongket kolpa, ari tu pa wa tirpmingen titnongket la il wor uk tuwekg ti. Pake tuwekg wa akwap wail eng angkeng alok tu pa kolpa kaingkai, tu elngen nikgwalpm pa.
ACT 14:19 Ari tu Suta tiur a anong Antiok a anong Aikoniam pa tu anel kulnar Listra ti kolti, ungkwan nikgwalpm wor a tu wrong kin kipman pa, a wa alok tu aye kul kai katnun nikgwalpm wakget a tu ti. Atom tu ak wes pa akor Pol pa elngtangko amo rmpa, atom tu arkol aye kai takwleikgen anong pa. Tu akwonalmpen la kil am amo ise.
ACT 14:20 Ari tu watnom a Sisas pa tu kai itna wreren kapringentel, atom kil wrekg kolti, wa yaper kawor anong pa. Kil okg or kong kolti, kil anti Parnapas tuwekg wrekg atnuurng anong pa a kinar anong Terpe.
ACT 14:21 Tuwekg angkli yangkipm wor a la Krais itna anong Terpe pa, atom tu wrong kin kipman wailet atning yangkipm pa, tu plelng ipma palng watnom a Krais. Plalng pa wa tuwekg wa yaper kaino anong Listra, plalng wa wrekg a pa wa kai kaino anong Aikoniam. Plalng wa tuwekg wrekg a pa wa kai kaino anong Antiok.
ACT 14:22 Atom tuwekg uk nikgwalpm wor tu melnum a ukipma Krais pa, a tuwekg ak titnongketel tu yela tatu anong pa la tu ukipma Krais pa itni titnongket. Tuwekg la, “Mentepm elng Maur Wailen pa itni wailen ikglen nol nikgwalpm a mentepmen pa, mentepm ikgam rki kaikuten watipmen kolpa kaingkai kaino rpmi eng yapm kaino anong wor alkil ai.”
ACT 14:23 Tuwekg ak titnongketel tu pa kolpa, a tuwekg ngkat melnum tiur pa itna melnum wailen wailen ikgalen tu wrong kin kipman mapming a ukipma Krais a rpma yela anong wris wris pa. A tuwekg kalpis okipma uk wang oklala naki Wailen a uk tu a ukipma Wailen ak wang ti pa kai wam a Wailen.
ACT 14:24 Atom tuwekg wrekg atnuurng anong Antiok pa angkom or anong kanokg Pisitia pa kolpa kai kinar palng kinar anong kanokg Pampilia wai.
ACT 14:25 Tuwekg kinar kolpa kinar palng kinar anong Perka. Tuwekg angkli yangkipm itna anong pa, plalng pa, wa tuwekg wrekg a pa wa kai kinar anong Atalia a ela unokg yamping.
ACT 14:26 Tuwekg wa wrekg awi wan unokgen atnuurng anong Atalia pa kai kapring yaper kai anong Antiok a ela anong kanokg Siria. Anong pa am tu melnum mapming a ukipma Sisas a pikekg ukwawen a pa kai laron yangkipm wor a la Sisas pa yela pake. Am tu a anong Antiok pake. Tu pikekg takwem kweikwei alken, a oklala naki Maur Wailen eng mpa kil planten ipma wor alkil ik ngklinsen. Tuwekg atn akwap pa kai plalng, wa tuwekg yaper kul akwap pa kul elngen angko Antiok pake.
ACT 14:27 Tuwekg kai palng kai anong Antiok ti pa, tuwekg awi tu mapming wrong kin kipman a ukipma Krais pa kai rka wris, a lakati naken kweikwei wrongkwail wail wail a Maur Wailen kil antiwen atn ak pa, a ya a pikekg a Maur Wailen akwap eng kukwa wanyun eng tu yimponen a ake Suta pa plelng ipma atom ukipma Krais pa.
ACT 14:28 Atom tuwekg rpma pa wang watin anti tu watnom a Krais pa.
ACT 15:1 Tu melnum tiur angkinar Sutia pa no rka no Antiok ti, atom tu kaling plan tu melnum a ukipma Krais pa la kolpa la, “Kipm wangket num kitila yangkipm titnongket a pikekg Moses kil kaling plan pa pati, kipm ikga Maur Wailen ikuwiyepm pa. Kalpis pa, ikga kalpis.”
ACT 15:2 Pol ekg Parnapas ake awi wor eng nikgwalpm a tu la pa. Atom tuwekg anti tu pa la minsrang alilakel tita elukgen nikgwalpm pa. Tu alilakel tita kolpa itna, kolpa atom tu takwei Pol a Parnapas pa nampikgen tunteng melnum tiur pa la ntiwen kinar Serusalem, eng ri tu melnum wokgen akwapel a Sisas, a tu melnum wailen wailen, eng ikisen yangkipm a tu alilakel tita kil.
ACT 15:3 Tu wrong kin a kipman mapming a ukipma Sisas pa takwem kweikwei pa ak angklin Pol a Parnapas nampokgen tunteng pa, eng la tunteng iye nukurnum iye kinar kai kaino Serusalem pa. Tu takwem kweikwei pa ak angklinsen plalng pa, tunteng wrekg kai kinar anong kanokg Ponisia a wa Samaria pa. Tunteng nar pa kai kinar pa, tunteng lanaki tu melnum a ukipma Sisas a rka tatu yaya pa kinar la, ake mentepm Suta ti wris a Maur Wailen pa. Tu a ake Suta pa, tu pa yat tu plelng ipma ukipma Maur Wailen. Tu melnum a mentepm ukipma Sisas pa atning yangkipm a tunteng la kolpa, atom tu atopen paipm wrisen.
ACT 15:4 Tunteng kinar kai kaino palng kaino Serusalem ai, ari tu wrong kin a kipman mapming a ukipma Sisas a rka kaino Serusalem, wa tu melnum wokgen akwapel a Sisas, a tu melnum wailen wailen pa, tu alken wor atopen paipm eng tunteng kaino ariwen. Atom tunteng a kaino ariwen pa lakati naken kwap wrongkwail a Maur Wailen angklinsen eng tunteng atn yela akwap ak angklin tu wrong kin kipman.
ACT 15:5 Ari tu melnum a arpmen yangkipm yiprokgen a Moses tiur a plelng ipma ukipma Sisas pa wrekg itna la, tu a ake Suta pa kol a tu wangket num, a kol a la kurkurngken eng mpa tu kutnun yangkipm titnongket a Moses pa pati, pa plan kol a tu ukipma Sisas pa aklale pake. Kalpis pa, kalpis.
ACT 15:6 Atom tu melnum wokgen akwapel a Sisas nampokgen tu melnum wailen wailen a Maur Wailen, tu kai rka wris eng akorla nikgwalpm a wuten tunteng alilakel tita pa la, mpa tu ik kolai.
ACT 15:7 Tu rpma akorla kolpa kai ari kalpis, am tu wrekg alilakel tita wail ise. Atom Pita kil wrekg itna lanaken la, “Kipm melnum alkupm a mentepm ukipma Sisas. Kipm ariwe, pikekg ep ak ai Maur Wailen takwei kupm ti itna kuin akipmen ti la ikga kupm kai eng laron yangkipm wor a la Krais ti niki tu a ake Suta, eng tu itning eng tu plelng ipma.
ACT 15:8 Maur Wailen kil ariwe nol nikgwalpm a mentepm wrongkwail. Kil uk Maur Wor a kil pa kai tu pa irir kol a kil uk mentepm ti. Pa plan la kil awi wor la tu pa yat.
ACT 15:9 Kil ake ak kolai la mentepm ti manet, a tu ai manet pa. Tu ukipma kil pa, atom kil klak nol nikgwalpm atuwen pa palng wriwen wor ise, irir kolen mentepm tike.
ACT 15:10 Ari kipm wa alilakel tita a tirpmingen tu yimponen a ukipma Sisas ti la kutnun yangkipm titnongket amentepmen ti pa kol a kipm la wa ngkit yo kalkut ur wa lken eng tu rki kai maleng pa. Pikekg ep a tu mamikg mamin amentepmen ai, a wa mentepm almentepm ti pa, mentepm ake wa antiwe arki kalkuten a katnun yangkipm titnongket pa yat. Kipm tirpmingen tu pa kolpa pa, pa kipm wa nolangkil a ningkail Maur Wailen pake.
ACT 15:11 Mentepm ukipma la tu pa am kol mentepm tike, am ipma wor wris a Wailen Sisas planto pa ak awiyo pake. A ake a mentepm katnun yangkipm titnongket pa atom akawiyo pa, kalpis.”
ACT 15:12 Tu wailet a wli rka pa, tu atning yangkipm a Pita la kolpa pa, tu elng tatar rka. A wa tu atning yangkipm a Parnapas a Pol ekg lakati naken kwap a pikekg tuwekg ak ak kwap itna kuin a tu melnum a ake a Suta pa ak titnongket a Maur Wailen alken pa, atom plan kla a kweikwei titnongket a melnum wrekg paipm eng ari.
ACT 15:13 Tuwekg lakati naken yangkipmok kweikwei pa kai plalng pipa, Semis kil wrekg itna lanaken la, “Kipm melnum alkupm a mentepm ukipma Sisas, kipm itning yangkipm a kupm la kil!
ACT 15:14 Pikekg Maur Wailen almpil yirokg la tu a ake Suta pa, kolpa itna itna, a a, wet Saimon lakati nako la Maur Wailen almpil won lawen eng la ik uwi tu pa palng kolen wrong kin kipman alkilen.
ACT 15:15 Yangkipm a Saimon lakati pa, am kai irir kolen yangkipm a tu melnum okwripm a Maur Wailen la ti nira ela wrkapm pati,
ACT 15:16 'Wailen kil la, “Ikga kupm yaper nar pipa, ikga kupm le wan a Tepit a pikekg tapor pa. Ikga kupm le wan a pikekg tapor nar prapm paipm pa wrekg itni kiti kiti kol a pikekg ep pa.
ACT 15:17 Eng ikga wa tu wrong kin kipman manet ai a ake a Suta pake tu plalngten ikga ikor Wailen pa, pa am tu a pikekg kupm awiyen kul awi nang nampokgen kupm alkupm ti.” Yangkipm kil pa yangkipm a Wailen, pikekg kil la ep ak ai la, kweikwei wrongkwail pa ikga plalng.'”
ACT 15:19 Semis kil wa la kolkil la, “Tu melnum okwripm a Maur Wailen pa tu la kolpake. Kolpa atom nikgwalpm a kupm kil pa kai kol tu pa, la mentepm ake mpa la titnongket tu a ake Suta a plelng ipma kaingkai eng Maur Wailen pa kutnun yangkipm titnongket kimeket amentepmen pa. Mentepm ik kolpa pa, pa kolen mentepm alken kalkuten wail ur eng tu arki.
ACT 15:20 Pake yangkipm titnongket aripm ur kil pa mentepm nira eli wrkapm laniken la tu kutnun pake. Yangkipm titnongket kolen - ake mpa tu il okipma a tu al wor uk mring maur, a mring, a kweikwei kolpa atom antokg okipma pa kimpilpet, - wa ake mpa tu ngkli rkul tita, wa ntokg kweikwei numkropis a uk numpaipm kamel pa, - a ake mpa tu il walmpopm, a wa wlikgok ur a amo atom walmpopm pa tapor kinar rpma pa.
ACT 15:21 Yangkipm titnongket a Moses pikekg tu laron yela anong wail wail ak ai kulngkul kul ti, ti tu am angkli angkli itna tatu wan a kai atning atning yangkipm a Maur Wailen atnewe akangklei wang wail a rpma eng yapm pa, ti tu atning atning ti tu ariwe pa.”
ACT 15:22 Kolpa ti tu melnum wokgen akwapel a Sisas nampokgen tu wrong kin kipman plalngten mapming a ukipma Sisas a wa tu melnum wailen wailen itna ep a tu pa, tu rka akorla la tukwei tu tiur alntu pa eng la ukwawen kaino Antiok numpokgen Pol a Parnapas. Atom tu takwei Sutas nang wompel akilen a tu namput la Parsapas, a Sailas. Tuwekg ti ur a tu a itna ep ikgalen tu melnum mapming a ukipma Sisas pa.
ACT 15:23 Tu nira wrkapm ur pa, atom alken tunteng aye kaino. Wrkapm a tu nira pa la kolkil la, “Wrkapm kil pa men melnum wokgen akwapel a Sisas, nampokgen tu melnum wailen wailen itna ep pa, pa men melnum akipmen a mentepm ukipma Sisas, men nirantepm wrkapm kil. Atom ayentepm aye kaino uk wor kipm a ake a Suta a ukipma Sisas a rka kaino anong ulkgung wraur: Antiok, Siria a Silisia.
ACT 15:24 Kol men rpma nar kil atning yangkipm ur a tu lakati nako la, melnum tiur amenen kil pikekg kaino ariwepm alkepm yangkipm, atom alok nikgwalpm a kipm pa kai al itna pa itna pa atom alkepm kalkuten. Pake men ti ake ukwawen kaino la mpa tu ik kolpa, pa tu ak ak nikgwalpm alntu.
ACT 15:25 Kolpa ti men kai rka wris ipma wris yapon yangkipm, atom men takwei melnum wekg a awi ok a men ti, atom ukwantepm kaino nampokgen Pol ekg Parnapas melnum yek wekg a mentepm ukipma Sisas pa.
ACT 15:26 Tuwekg melnum kolpake. Tuwekg ake wa aye num alntuwekg ti ngkark la tu oren imo aki tuwekg rki kalkuten kolai pa, tuwekg uk num alntuwekgen ti kolti kai eng laron nang a Wailen almentepmen Sisas Krais pa kolpa kai.
ACT 15:27 Melnum wekg a men takwei pa Sutas a Sailas men ukwa kainontepm nampokgen tuwekg pake. Tuwekg ikga wa lanikepm ik ok ti kutnun kitila kol a men nira ela wrkapm tike.
ACT 15:28 Maur Wor a Maur Wailen nampokgen men ti, atom men la kai ipma wris la, ake mpa wa men lkepm kalkuten ur, atom ti men la kipm kutnun yangkipm yek aripm ur a kol a men nirantepm ela wrkapm ti kolti. Men ari la kolpa pati, mpa wor eng kipm pake.
ACT 15:29 Ake mpa kipm il okipma a al wor uk mring maur, a mring, a kweikwei kolpa, wa il walmpopm, aki il wlikgok a tu alm atom walmpopm a tapor kinar rpma pa, a wa ake mpa kipm ngkli rkul tita, wa ntokg kweikwei numkropis a uk numpaipm kamel pa. Kol kipm ngkom nilokgen kweikwei ri pa pati, pa wor wrisen ikga ik ngklinsepm pake. Ampake, yangkipm a men nira ak lanakepm am kai kolpake. Men alkepm wor.”
ACT 15:30 Tunteng melnum wikgwikg a tu ukwawen kaino Antiok pa, tunteng kaino palng, atom tunteng akwen tu wrong kin kipman a ukipma Sisas pa wli rka wris, atom tunteng alken wrkapm pa.
ACT 15:31 Tu wrong kin kipman tu angkleikg wrkapm pa, atom yangkipm a tu nira ak lanaken ela wrkapm pa alken ipma kukula atopen wor om.
ACT 15:32 Kol Sutas ekg Sailas pa, tuwekg pa wa melnum okwripm a Maur Wailen pa yat pake. Tuwekg angkli yangkipm watipmen wor wor, atom ak angklin tu pa wail manten paipm, a wa ak titnongketel tu eng tu ukipma itna titnongket.
ACT 15:33 Tuwekg rpma kaino pa wang watinet ketnketn, plalng pa, tu melnum alntu a mentepm ukipma Sisas kaino pa, alken wor, atom ukwawen nampokgen ipma meen wor tuwekg yaper nar eng tu melnum a pikekg ukwawen kai kaino pa. [
ACT 15:34 Sailas pa kil plelngen nikgwalpm alkil la rpmi kaino pa pen. Atom kil am rpma pake, a Sutas alkil wris pa kolti yaper kinar.]
ACT 15:35 Ari Pol ekg Parnapas pa ekg rpma kaino Antiok pa a pa. Atom tuwekg pa nampokgen tu melnum wailet tiur tu kaling plan tu, a laron yangkipm a Wailen naken kolpa kai.
ACT 15:36 Pol ekg Parnapas ekg rpma wang aripm ur kai plalng pipa, Pol kil lanaki Parnapas pa la, “Mentekg wa yaper kai itn ngkompla ri tu melnum a mentepm ukipma Sisas pa yela tutu anong a pikekg mentekg atn laron yangkipm a Wailen pa, ri la tu rpma kolai.”
ACT 15:37 Atom Parnapas kil wasrongen la uwi Son nang wompel akilen pa Mak pa kai ntiwen.
ACT 15:38 Ari Pol kil pa akwonalmpen la pa ake wor la mpa kil pa ntiwen itn pa. Eng ntei, kil pikekg ep pa kil pikekg atnuurngken itna kai Pampilia, atom ake wa pikekg antiwen akwap pa, kalpis.
ACT 15:39 Parnapas la uwi Son pa, ari Pol pa lala ake mpa uwi kil pa. Kolpa atom ekg akle tita eng pa kolpa kai, atom ekg rak kai atn manman. Atom Parnapas kil awi Son Mak am ekg awi wan unokgen kinar Saiprus ise.
ACT 15:40 Wa Pol kil takwei Sailas pa la kil ntiwel itn. Tuwekg la utnuurngken kai pa, tu melnum alntu a mentepm ukipma Sisas pa anel wli asen Wailen pa la plan ipma wor alkil pa ik ngklinsen, atom tuwekg awi ipma meen wor kolpa, tuwekg atnuurngken kai.
ACT 15:41 Tuwekg angkom or ya anong kanokg Siria, wa plelng or ya anong kanokg Silisia pa atn or pa kai pa, atom Pol kil ak titnongketel tu wrong kin kipman mapming a Maur Wailen a rka anong tatu yaya pa.
ACT 16:1 Sailas anti Pol ekg angkom kai palng kai anong Terpe plalng pipa, wa tuwekg wrekg a pa wa ekg kai palng kai anong Listra. Kai anong pa tuwekg kai ari watnom wris ur a Krais am rpma kai pake, nang a melnum pa pati Timoti. Wa man akilen pa wa ukipma Sisas pa yat, kil kin a Suta, wa yan akilen pa a anong kanokg a Krik.
ACT 16:2 Tu melnum a ukipma Sisas a rka kai Listra wa Aikoniam pa tu kaporng yangkipm Timoti pa la kil melnum wor.
ACT 16:3 Pol kil wasrongen la Timoti pa mpa ntiwel kai, ari tu Suta wailet a rka kai wrik pa, tu ariwe la yan a Timoti pa a tu Krik a ake wangket wangket num pa. Kolpa atom kil wangket num a Timoti.
ACT 16:4 Timoti pa wa kul kai anti Sailas ekg Pol tunteng angkom or anong wail wail pa kolpa kai pipa, tunteng lanaki tu melnum a ukipma Sisas pa naken kuina ur a pikekg tu melnum wokgen akwapel a Krais nampokgen tu melnum wailen wailen a rka kinar Serusalem yapon la tu wrong kin kipman a ake Suta pa tu kutnun pa.
ACT 16:5 Tu wrong kin a kipman mapming a ukipma Sisas a rka yela tatu anong a tunteng atn laron yangkipm a Maur Wailen atnewe pa tu ukipma titnongket, atom akangklei wang wris wris ti pa tu wrong ti wli a wli ukipma anip wail a wail kolpa aye kai.
ACT 16:6 Timoti, Sailas nampokgen Pol tunteng la kol a itn or kai anong kanokg a Esia pa, ari Maur Wor a Maur Wailen angkengken la ampake tunteng laron yangkipm kai Esia pa, atom ake tunteng kai. Tunteng atn or kaino anong kanokg a Prikia a Kalesia tike.
ACT 16:7 Atom tunteng wa or pa kaino palng kirng kowak a anong kanokg a Misia pa atom tunteng la kol a wa or pa kai kaino anong kanokg a Pitinia pa. Ari Maur Wor a Sisas pa angkengken la ampake tunteng wa or pa kai kaino pa.
ACT 16:8 Kolpa atom tunteng ya or anong kanokg a Misia ti kai anong Troas ti kolti.
ACT 16:9 Mining pa tunteng elng kai okg ari Maur Wailen plan Pol melnum ur a anong kanokg a Masetonia pa wli itna ariwel, atom tilpel la, “Kitn wrekg kai kaino atom kai ngklin men ti kai Masetonia wai!”
ACT 16:10 Pol ari pa atom minto ariwe la Maur Wailen kil akwewo la minto kaino, atom kai laron yangkipm wor a la Krais pa niki tu wrong kin kipman a rka kai pake.
ACT 16:11 Minto awi wan unokgen pa a Troas pa ayewo kaino atom ayewo aren oryawel kolti kaino Samotres ai, minto okg rmpa pa wa or kong ti pipa, wa awiyo a pa wa aye kai Neapolis ise.
ACT 16:12 Wa minto wrekg atnuurng anong Neapolis pa, wa minto a pa kaino Pilipai, anong a pikekg tu Rom pa wli ngkat ep arke pake, anong pa anong wail itna ep ur a anong kanokg a Masetonia. Atom minto wa rpma anong a pa wang aripm ur a papen.
ACT 16:13 Ak wang wail a rpma eng yapm ngkat nang a Maur Wailen pa, minto a anong wail pa kulor kai kop pa. Atom minto akwonalmpen la, wrik a tu Suta nampokgen tu tiur a rka Pilipai pa arke oklala naki Maur Wailen pa ampam rka kop yamping ti ur tike. Ari kai wrik a minto kai pa minto ari tu kin tiur am wet wli rka wris a pake, atom minto wa antiwen rpma pa oklala.
ACT 16:14 Ti kin wris ur a atning yangkipm amintowen ti pa, nang akilen pa Litia. Kil kin a arpmen apm watet ari wor wor eng ak awi awi marpm, kil kin a anong Taiataira. Kil kin a ake a Suta pake kil ngkat nang a Maur Wailen. Atom Wailen kil antokg nikgwalpm a kin pa umpen wontrakole atom kil atning awi alupmen katnun oklala a Pol kil la pa.
ACT 16:15 Atom kil nampokgen tu alkil a tu rka wan wris pa tu kaluken, atom kil akwento la minto kai wan akilen, kil la erkisen la minto ntiwel kai la, “Kol kipmteng riwe la kupm ti kin a ukipma Wailen ti pipa, kipmteng kul eng minto kai kipmteng uwi wrik a wan akupmen ai, ntiwopm mentepm rki papen.” Kolpa atom minto antiwel kai.
ACT 16:16 Ak wang wris ur pa minto la kai wrik a tu oklala naki Maur Wailen arke pa, atom minto kai, ari ansil kin warimpen ur a akwap kalpmlel orngwatneikgen mring alkil pa, wli ansilo angko ya pa. Warim kin pa pati maur paipm ur akwap kawor ipma a kil pa, atom wulmpa a kil pa ari kweikwei pa atom lanaken. Atom tu mring a kil orngwatneikgen pa tu awi marpm watipmen kai kwap a kil ak pa.
ACT 16:17 Atom kin pa katnun Pol nampokgen men ti kolpa kai pake, a kil kirkar akwe kolpa itna wampel la, “Kipm pa, tunteng melnum pa pati tunteng melnum akwapel a Maur Wailen a itna ep a Wailen angen kweikwei wrongkwail. Tunteng pa lanakepm ya a Maur Wailen a ik uwi mentepm ti iye kai eng alkilen.”
ACT 16:18 Akangklei wang kolpa itna a tunteng atn pa, warim kin pa am katnunten akg kirkar akwewen kolpa atn pake. Kolpa atom Pol kil pa numpilpmaakel paipm eng wet ak ai, kil atning atning a kil kirkar akg akwe kolpa atn ai, kolpa atom kil plelng ariwel kolti, kil lanaki maur paipm pa la, “Kupm naren nang a Sisas Krais la kitn or kai tukwleikgen kin warimpen pa!” Atom maur paipm pa am or takwleikgentel ak wang ketn pake.
ACT 16:19 Atom tu mring a kin warimpen orngwatneikgen pa tu ariwe lala ya yiprokgen a awi marpm kai kwap a kin warimpen pa ak pa, am plalng ise. Kolpa atom tu akenturng a Pol ekg Sailas ak kolpa atom tu arkul arkolen ayewen kai eng tu mring man kai akapm ur a tu wrongkwail kai arke arke pa.
ACT 16:20 Atom tu ayewen kai itna tu melnum a rpma atning yangkipm pa, a tu lanaken la, “Melnum wekg ti pati a tu Suta, tuwekg pa tuwekg ak kalkuten kol wakg a ak al mentepm wrongkwail yela tatu anong wail amentepmen ti.
ACT 16:21 A tuwekg aloko la kai ya a tu alntu Suta, a yangkipm titnongket a mentepm Rom ti la ake mpa mentepm kutnun pa.”
ACT 16:22 Tu lanaken kolpa plalng pipa, tu wrong akwail la ok mprak mprak itna pa itna pa lawen la, pa tuwekg antokg paipm. A tu melnum a rpma atning yangkipm pa lanaki tu melnum tiur a almpwrong la tu angkwrer apm kai num a Pol a Sailas ti, atom tu ak wanteng pa ak ntrawen.
ACT 16:23 Tu ntrawen paipm wrisen irket kolti, plalng pipa, tu awiyen angkliwen kawor rpma wan tipmining pa. Atom tu melnum a rpma atning yangkipm pa uk yangkipm titnongket kai melnum wantengkwang a atnen tu pa la, mpa kil itnenten riworwor.
ACT 16:24 Kil atning a tu alkel yangkipm titnongket kolpa atom kil wa awiyen a pa, wa ayewen kawor rpma kawor wan ok ur a itna kaino wan yilpipm ai. Yo wail wekg a pikekg tu angkut eng tu melnum a antokg melkget lang nepm kawore kawore pa am ermpa ise. Atom kil ayewen kawor kolti tuwekg rpma, a kil awi yo wekg pa ak lamputen nepm a tuwekg pa, atom tuwekg ngkaten rpma pake.
ACT 16:25 Atom ak mining kuin pa Pol ekg Sailas ekg oklala naki Maur Wailen, a ak nangnang pa rpma. Atom tu a antiwen rka wan tipmining pa, tu atning a tuwekg ak nangnang pa rpma.
ACT 16:26 Atom ake wa ampen, yelm pa no wail manten pinterngen kolti la ik wan ti yikakatnen kolti, a wanyun a wan ok wrongkwail a wan tipmning pa kukwa okore plalng, wa ampei mringen kalnten wrongkwail pa tikla plalng takwleikgen tu melnum a rpma wan tipmining pa.
ACT 16:27 Melnum wantengkwang a atnenten pa pirpakg wrekg ari wanyun pa ari am okore plalng ise, atom kil akwonalmpen la tu melnum a rpma wan tipmining pa am or ngkark plalng ise, kolpa atom kil nalu kowri alkil ti la ikilm kil alkil ti imo.
ACT 16:28 Ari Pol kil pilpal la yikakatnen la, “Ai! Ampur alm kitn alkitn pa, elngen o! Men rka kimeket a ti, ake ur ngkark.”
ACT 16:29 Atom melnum wantengkwang pa akwe tu la tu iye wakg ur pa kul eng iklentel eng kil atatu pinterng kawor wan kuin a Pol a Sailas arpme pa, a kil elngtangko warwar wontaipur rmpa nepm a Pol a Sailas pa.
ACT 16:30 Kil wrekg awiyen aye kawor en ai, atom kil asenten la, “Melnum Wailen wekg, mpa kupm ntokg kolai eng mpa Maur Wailen ikuwiyopm eng alkilen pa?”
ACT 16:31 Ari tuwekg pa akalmpentel la, “Kitn ukipma Wailen Sisas, eng mpa kil ikuwiyeitn numpokgen tu alkitnen a rka wan wris pa.”
ACT 16:32 Atom tuwekg laron yangkipm a Wailen pa nakel nampokgen tu alkilen a rka kawor wan akilen pa.
ACT 16:33 Atom ak mining pa melnum wantengkwang pa kaluk klaken i pikekg tu ak wanteng ntrawen pa, plalng pipa, kil nampokgen tu alkil pa tuwekg pa naren nang a Sisas kaluken kimeket ak mining wris pa kolti.
ACT 16:34 Atom melnum pa awi Pol a Sailas pa ayewen kai wan alkil pa alken okipma pa tuwekg al rpma pa, a kil alkil pa nampokgen tu alkil a rka wan wris pa tu plalngten ukipma Maur Wailen, kolpa atom tu awi atopen wail.
ACT 16:35 Or kong miningket ai pipa tu mring a rpma atning yangkipm pa uk yangkipm tu melnum nepimpalo pa la tu kai laniki melnum wantengkwang pa eng kil elngen melnum wekg pa kai.
ACT 16:36 Kil atning a tu melnum nepimpalo pa kul nakel kolpa, kil kai naki Pol pa la, “Tu melnum a rpma atning atning yangkipm a tu melnum pa, ukwa yangkipm kul nakopm la kupm kul elngen kipmekg ti kawor en kai o. Ti kipmekg kawor en kai o! Kipmekg kai numpokgen ipma meen wor kai o!”
ACT 16:37 Ari Pol pa akalmpe ok a tu nepimpalo a wet naki wantengkwang kul lanaken pa la, “Pa yiprokg kalpisen eng pikekg kipm awiyo aye kai ntrawo kalpmlel itna wulmpa a tu wrongkwail pa. Mentekg ti pa am mentekg melnum mentepm almentepm a Rom pake, a kol ake tu ntokgto kolkil. Ari kalpis, tu awiyo angkliwo or rpma wan tipmining ti. Ti ak wang ti pipa tu wa la wa ungkwanto tital ampen kolti kai? Pa ake antiwe! Kol a tu alntu ai wli ungkwanto eng mentekg kawor en ai.”
ACT 16:38 Tu melnum nepimpalo atning a Pol kil la kolpa atom, kil wa awi oklala a Pol kil la pa kai naki tu mring man a rpma atning yangkipm pa. Tu atning la Pol a Sailas pa am a Rom pake, kolpa atom tu wrekg paipm ngkark.
ACT 16:39 Tu kai ariwen kai wan tipmining ai, alken yangkipm wor wor a mo mring ai ak armpwonel akayewen kul or kai en, atom tu lanaken la tuwekg utnuurng anong wail ti kai.
ACT 16:40 Tuwekg atnuurng wan tipmining pa kulor kolti, tuwekg kai rpma kai wan a Litia. Tuwekg la yangkipm ok wor wor tiur pa ak titnongketel tu melnum alntuwekgen a mentepm ukipma Krais, a tuwekg antiwen rpma pa. Plalng pa, wa tuwekg wrekg atnuurngken a pa tuwekg kai.
ACT 17:1 Pol ekg Sailas tuwekg wrekg a Pilipai pa la kai anong wail Tesalonaika. Atom tuwekg wrekg or ya Ampipolis pa kai kinar Apolonia pa atom ekg angket or pa kai palng kai Tesalonaika. Wan ur a tu Suta kai atning atning yangkipm a Maur Wailen atnewe pa am ela anong pake.
ACT 17:2 Pol kil kai anong ur pa, kil mpa kawor wan a tu Suta atning atning yangkipm a Maur Wailen atnewe itna anong pa. Kil pa am akangklei am ak ak kolngkol pake. Atom ak wang wail a rpma eng yapm ngkat nang a Maur Wailen pa, kil anti tu wrong kin kipman rka wan pa akor la yangkipm a Maur Wailen a ela kai wrkapm alkilen pa. Kil ak kolpa ak wang wail wraur a rpma eng yapm pa.
ACT 17:3 Kil laron naken yangkipm yiprokgen a Maur Wailen pa ariworwor planten la, Krais melnum a pikekg Maur Wailen kil takwei la ikga ikuwi tu wrong kin kipman pa, kil ikga rki kalkuten kai imo atom wa wrekg kitila nikgwalpm a Yan ai. Atom wa Pol lanaken la, “Krais a kupm laron nakepm kil pa pati, am Sisas pake.”
ACT 17:4 Kolpa atom tu Suta tiur pa tu ukipma yangkipm a Pol kil la pa, la pa aklale, atom tu kai katnun Pol a Sailas, wa nampokgen tu wrong kin kipman wailet a Krik a ngkark kai wulmpa a Maur Wailen pa, wa tu kin wailen wailen a nang arke pa.
ACT 17:5 Pake tu wailet tiur a tu alntu Suta pa tu ipma paipm eng tu wrong tiur kai katnun Pol ekg Sailas pa. Kolpa atom tu nikgwalpm kungkruwis kai takwem akor tu melnum melkget lpmaak klang alntu a op atn kolti kai akapm a tu takwem rka rka pa, atom tu akor tu wrong pa wli takwem rka wris atom alken nikgwalpm paipm la ntokg paipm tuwekg pa. Atom tu ak wail anel kunturng atatu kai tikale wanyun a Seson pa kawor akor Pol a Sailas pa la uwiyen iye kai uk kai wam a tu wrong kin kipman.
ACT 17:6 Ari ake wa tu ansilen. Atom tu arkol wampel Seson pa nampokgen tu melnum a ukipma Sisas pa ayewen kai itna tu mring tukgunakg a ikgalen anong wail pa. Atom anel plalplal itna pa itna pa lala, “Melnum wekg a arkolng tu wrongkwail yela kanokg ti antokg paipm pa, am wli angkol ti a tike.
ACT 17:7 Ti am Seson ti awiyen aye kawor ikgalenten rpma kawor wan akilen tike, wa tu plalngten a men arkolng aye wli itna ti pa, tu ngkat melnum manet ur awai, nang akilen pa Sisas, la pa melnum tukgunakg ur atuwen. Pa tu kapor yangkipm titnongket a melnum tukgunakg amentepmen Kaisarus tike eng tu la kolpa.”
ACT 17:8 Tu wrong kin kipman a tu mring tukgunakg a ikgalen anong pa, tu atning yangkipm pa ari kolen ikyom ikningkil ur a arkewen wleket atom kirkar lele, kolpa atom akentiwe mpa tu rpmi meen.
ACT 17:9 Atom tu mring tukgunakg a ikgalen anong pa tu la titnongket la Seson nampokgen tu a ukipma Sisas a rka pa la tu rmpen yangkipm a tu oklala ti, atom tu elngen tu pa kai, ikgake tu la oklala ur kolpa kutnukg kutnukg ur pa, kalpis, plalng.
ACT 17:10 Atom ak mining pa tu melnum a ukipma Sisas pa tu ukwa Pol ekg Sailas pa kai anong Peria. Tuwekg kai palng pa, tuwekg kai kawor wan a tu Suta atning atning yangkipm a Maur Wailen atne pa.
ACT 17:11 Tu Suta a rka anong Peria ti pa tu nikgwalpm umpen wontrakole wor angen tu Suta a rka kai anong Tesalonaika ai. Tu atning yangkipm a Pol laron naken pa ari tu atopen paipm. Atom tu ari angkleikg wrkapm a Maur Wailen pa akangklei wang wris wris, eng ari katnun kuina ur a Pol kil laron naken pa la pa aklale aki kalpis.
ACT 17:12 Pol laron yangkipm pa kolpa kaingkai atom wrong kin kipman wailet a tu Suta pa tu ukipma Sisas, wa nampokgen tu wrong kin a kipman wailen wailen watipmen a nang arke a tu Krik wa tu ukipma yat.
ACT 17:13 Ari tu Suta a rka kai Tesalonaika pa tu wa atning a Pol laron yangkipm a Maur Wailen wa itna Peria ti. Kolpa atom tu ipma wakget kul anong ti alok tu wrong kin kipman a rka kul ti alken yangkipm kalkuten, atom antokg ipma a tu pa wakget paipm eng tuwekg pa.
ACT 17:14 Kolpa atom tu melnum a mentepm ukipma Sisas pa tu atning pa, atom tu penterngen ukwa Pol pa la kil ngkirk tukwleikgen tu pa kinar unokg yamping ai. Pake Sailas a Timoti pa ekg yatenen rpma Peria a papen.
ACT 17:15 A tunteng melnum a akaye Pol kinar pa kol a tunteng ikyewel kai kinar elngen unokg yamping ti atom wa yaperno. Ari kalpis, wa tunteng akayewel kolpa kinar aren oryawel kinar palng kinar anong wail Atens ai. Tunteng la wa yaper kulno pa, Pol alken yangkipm pa la, “Kipmteng kaino palng pa, kipmteng laniki Sailas ekg Timoti pa la ampur tuwekg rpma ampenet angkaino pa a pa, pa am wa tuwekg wa kul narntopm itatu nar tike!”
ACT 17:16 Ak wang a Pol kil rpma kinar Atens pa nungkwangen Sailas a Timoti a antiwel atn atn pa, kil atn ari mrangkum a tu antokg kalingen kweikwei tiur a tu kapor kilko alein pa wailet paipm ai itna anong Atens pa, atom kil ipma kalkut wail manten paipm.
ACT 17:17 Kolpa atom kil rapon ak oklala itna kawor wan a tu Suta atning atning yangkipm a Maur Wailen atnewe pa, nampokgen tu Suta, wa nampokgen tu a ake a Suta a ukipma rpma orngwatneikgen ngkark kai wulmpa a Maur Wailen pa. Wa akangklei wang wris wris pa kil wa kai wrik akapm ur a tu kai takwem rka rka pa, kil ari mlaur pa, kil antiwel oklala.
ACT 17:18 Wa tu melnum ariwe tiur a Epikurien a Stoik, tu rapon ak oklala pa nampokgen Pol pa. Atom tu tiur pa la elukgentel la, “Ariwe mpeina nar rpma melnum a kolpa!” Ari tu tiur pa lala, “Palpa kil la laron mring maur a anong manet ur ai ukipma wai.” Tu la pa atnen tu atning a kil laron yangkipm wor a la Sisas a pikekg amo atom wa wrekg.
ACT 17:19 Kolpa atom tu awiyel aye kai itna wulmpa a tu mring man a wli rka wris kaino wrik nangen ur a tu namput la Areopakus pa, atom tu asentel la, “Men la riwe yangkipm weten ur a kitn kaling plan tu wrong kin kipman ti?
ACT 17:20 Yangkipm tiur a kitn la pa men atning ari wa manet kai nungkulkg amenen ti, ti men la itningkri riworwor la pa la yiprokgen kuina?”
ACT 17:21 Tu alntu anong yiprokg a Atens, a tu anong manet tiur a wli rka Atens pa, tu la itning nungkulkg rmpen ikor la yangkipm weten weten kuina ur a tu atning pa.
ACT 17:22 Atom Pol kil wrekg kai itna wreren tu mring man itna wrik nangen Areopakus pa a kil akalmpe la, “Kipm Atens! Kupm ari nikgwalpm a kipm pa ari rka wail la kipor kilko ilein mring wailet.
ACT 17:23 Ti kupm atn yela anong ti pa, kupm ari tipmakg a kipm elng kweikwei a kipm kapor kilko alein mring akipmen atnewe pa watipmen. Wa kupm ari tipmakg ur pa ari, kipm nira la kolpa la, 'Tipmakg kil pati tipmakg a mring ur a ake men ariwe!' Ti mring a ake kipm ariwe kil pa, wa kipm kapor kilko alein kalpmlel kil pa, pa kupm la laron mring pa nikepm pake.
ACT 17:24 Mring kil mring a antokg kanokg a antokg kweikwei wrongkwail atnewe, kil Maur Wailen a rpma kaino kitnong a rpma nar kanokg, kil ake rpma yalming a melnum ale ak wam alntu pa.
ACT 17:25 Wa kil ake rpma tukwok eng kwei ur atom melnum ur angklin kil pa, atnen a kil alkil yiprokgen a uk wripm melnum a antokg melnum rpma malepmen, wa kil uk kweikwei wrongkwail pa kai mentepm wrong kin kipman.
ACT 17:26 Ti Maur Wailen kil antokg melnum wris pa ep atom melnum wrongkwail yela kanokg ti am palng angkai melnum wris pa kul pake. A kil alkil alm wang eng mentepm melnum antiwe rpma kai ngko wang a i a uk kanokg a i la mentepm rke.
ACT 17:27 Am kolpa atom Maur Wailen kil wasrongen la mpa mentepm kai eng kil, eng mpa mentepm riwe kil pa worwor, kolpa atom kil elng mentepm pa rpma la mpa mentepm ikorel. Kil ake rpma kai watin, kil am antiwo rpma pake. Kil rpma anti mentepm wris wris.
ACT 17:28 Mentepm palng melnum ti, a mentepm rpma, a mentepm atn pa, am mentepm rpma ak kil pake. Wa kol melnum ariwe ur akipmen a nira nira wrkapm pa, am wa la irir kolpake la, 'Mentepm ti pa warim akitnen!'
ACT 17:29 Ti kol tu la mentepm warim a Maur Wailen pa, pa ake antiwe mpa mentepm ikwonilmpen la Maur Wailen pa kol wes, aki wes muinmainet, aki wes ariwor tiur pa, aki yo kweikwei tiur a melnum ak wam akipaar ariworwor pa, kolpa yaper.
ACT 17:30 Am kolpa atom pikekg ep ak ai kulngkul ti pa Maur Wailen kil la watipmen pikekg arki kalkuten a tu melnum a titnowen atom kapor kilko alein kweikwei a tu alntu antokg ak wam alntu pa. Pake ak wang ti pa kil la titnongket naki tu wrongkwail kin a kipman yela pa la tu plelng ipma uk yirokg pa.
ACT 17:31 Kol kil am pikekg alm wang ise, la wang a i ikga kil uwi tu wrong kin kipman a yela kanokg ti wli eng ntokg yangkipm. A tu kitila nikgwalpm ute wor akilen pa kolti, akentiwe ikga melnum ur la kolai eng pa. Wa melnum a rpma atning yangkipm pa am pikekg kil takwei ise. Melnum pa pikekg amo, atom Maur Wailen la atom wa kil wrekg ise. Pa Maur Wailen planto la melnum pa ikgam kil ik kol pake.”
ACT 17:32 Tu atning a Pol lanaken Sisas a pikekg amo wa wrekg pa ari, tu tiur pa la akinowel kil pa, ari tu tiur pa la, “Pati men atopen la wa wangkur ai wa kitn wa laniko pen kuina ur a wuten kitn la pa.”
ACT 17:33 Pol lanaken kolpa plalng, kil atnuurng tu mring man pa a kil kai.
ACT 17:34 Pake tu melnum tiur pa kai katnun Pol atom tu ukipma Sisas a kil laron pa. Melnum wris ur a katnuntel pa Tionisius, kil mring man ur a tu mring man a Areopakus pa, wa ur pa kin a tu namput la Tamaris, wa nampokgen tu wailet tiur ai yat.
ACT 18:1 Pol kil atnuurng anong Atens pa a wa kai anong Korin.
ACT 18:2 Kil ansil melnum Suta ur kai anong pa, nang akilen pa Akwila, anong yiprokg akilen pa Pontus. Melnum pa kil wrekg angkai Itali kul nampokgen kin alkilen Prisila. Pikekg Kaisarus Klotius, melnum tukgunakg a Rom pa uk yangkipm titnongket ungkwan tu Suta la tu utnuurng anong Rom pa kai pinterngen, atom pikekg tuwekg kul. Atom Pol wa wrekg kai ariwen.
ACT 18:3 Am kil melnum wris a angkut angkut manto palk irir kolen tuwekg pake eng ikga tu uwi ikle wan manto yilo, kolpa atom am kil antiwen angkut angkut manto palk pa rpma pake.
ACT 18:4 Atom akangklei wang wail wail a rpma eng yapm pa kil kai wan a tu Suta atning atning yangkipm a Maur Wailen atnewe pa alken yangkipm eng ak plelngen nikgwalpm a tu Suta a Krik ti eng kul kai ukipma Sisas Krais ti.
ACT 18:5 Sailas a Timoti ekg atnuurng Masetonia pa nar pa, Pol kil uk wang wail alkil pa kai eng laron yangkipm pa, kaling plan ariworwor naki tu Suta pa la, pa pikekg Sisas melnum aklale pake, pa melnum a pikekg Maur Wailen kil takwei la ikuwiyo.
ACT 18:6 Pake tu Suta pa ake la itning yangkipm a Pol la pa, a wa tu la paipmel kil pa, kolpa tom kil alo nepm mang pa, a kil lanaken kolpa la, “Kol kipm kai paipm pa, pa itna kai kipm alkipm pake. A kupm ti pa kalpis. Ti ak wang ti aye or pa kai pa kupm ikga kai eng tu a ake a Suta wai.”
ACT 18:7 Kil lanaken kolpa plalng pipa, kil atnuurngten itna pa, wa kil narkwok wli wanyun tiwel a wan a tu atning atning yangkipm a Maur Wailen atnewe pa, wa kai kawor wanyun a Titius Sastus pa antiwel rpma pa. Melnum pa melnum wor a ngkark itna wulmpa a Maur Wailen.
ACT 18:8 A melnum a itna ep eng ikgalen wan a tu atning atning yangkipm a Maur Wailen atnewe pa kil ukipma Wailen, nang akilen pa Krispus. Kil anti tu kin watnom alkil pa tu ukipma Wailen. Atom tu alntu watipmen a Korin pa tu atning yangkipm a Pol la pa, atom tu ukipma Wailen, a tu naren nang a Wailen Sisas atom tu kaluken.
ACT 18:9 A mining wris ur pa Pol kil ari kwei ur kol okgwangket pa, atom Wailen kil nakel la, “Ampur kitn ngkark. Kitn laron yangkipm pa iye kolpa kaiyo, ampur kitn wa kai elngen pa!
ACT 18:10 Kupm antiweitn rpma pa, a tu wrong kin kipman wailet a rka anong wail ti pa akupmen, ti akentiwe mpa tu melnum ur ilmporeitn pa.”
ACT 18:11 Pol kil rpma Korin pa wring wris misen wompel kaling plan tu wrong kin kipman yangkipm a Maur Wailen.
ACT 18:12 Pol akwap kolpa kai pa, wa tu Rom ngkat Kalio pa wrekg itna mring man wailen a ikgalen anong kanokg Akaia ti, atom ak wang pa tu Suta naimpilng wris wrekg ipma wakget eng Pol. Atom tu wrekg kimeket awiyel aye kai itna antokg yangkipm,
ACT 18:13 atom tu arkiwel la, “Melnum kil kaling plan tu wrong kin kipman pa armpwonel la uwiyen iye kai kipor kilko ilein Maur Wailen or ya ur manet a ake katila ya a yangkipm titnongket pa la pa.”
ACT 18:14 Atom Pol kil apo ok eng a ikilmpe la, ari Kalio kil lanaki tu Suta pa la, “Kipm Suta pa, kol melnum ri kil ngketen yangkipm titnongket ur aki melkget paipm ur pati, pa kol a kupm lkepm ipma wor rpmi meen itning yangkipm akipmen pake.
ACT 18:15 Ari kipm no angen tita la iklen tita yangkipm a kipm alkipm kaling plan tita, a nang a melnum, a yangkipm titnongket ur alkipmen a Suta pa tuwa, kolpa ti kai kipm alkipm or lam yangkipm pa itni kai kipm alkipm pawom! Kupm ake mpa itning yangkipm a antokg kolpa.”
ACT 18:16 Atom kil ungkwan tu wet la ntokg yangkipm pa yaper kaingkai.
ACT 18:17 Atom tu wrongkwail arkul Sostenes pa, melnum tukgunakg ur a ikgalen wan a tu Suta atning atning yangkipm a Maur Wailen atnewe pa, atom tu orel itna wreren wan a antokg antokg yangkipm atne atne pa. Ari Kalio ari elngen kolti, ake kil angkeng aki antokg kolai ur pa, kalpis.
ACT 18:18 Pol kil rpma Korin pa wang aripm ur kai plalng pipa, kil la ukwa tu melnum alkil a mentepm ukipma Sisas pa la tu rpmi pawo, a kil wrekg akyakur Prisila ekg Akwila pa teng a pa kai anong Senkria a ela unokg yamping pa la uwi wan unokgen pa kinar anong kanokg Siria wai. Teng kai rpma Senkria pa, Pol kil ukwalng tukgunakg alkil pa silalng rpma pa, katnun oklala ur alkil a pikekg kil yapon nampokgen Maur Wailen pa, pa am kul angko wang pake, atom kil ukwalng tukgunakg pa.
ACT 18:19 Wa tunteng wrekg awi wan unokgen apa wa kai palng kai anong Epesus pa, atom Pol kil atnuurng Prisila a Akwila pa rpma pa, a kil alkil pa kai kawor wan a tu Suta atning atning yangkipm a Maur Wailen atne atne pa, atom kil lanaken ariworwor yangkipm yiprokgen pa.
ACT 18:20 Tu lanakel la kil ntiwen rpmi pen. Ari kil lanaken la kil ake mpa rpmi, kil mpa kai.
ACT 18:21 Kil la ukwawen plalng pa kil lanaken la, “Kol Maur Wailen kil uwi wor pa, ikga wa kupm yaper kulntepm pa.” Kil la kolpa plalng pa kil atnuurngken kai awi wan unokgen pa atnuurng anong Epesus pa kinar.
ACT 18:22 Kil kinar palng kinar anong kanokg Sisaria atom kil atnuurng wan unokgen pa rka pa, a kil angkom kinar ari ukwor tu wrong kin kipman mapming a ukipma Maur Wailen nar kai kaino anong wail Serusalem pa plalng pipa, kil wa yaper kinar kai kaino atom wa a pa wa kaino anong Antiok pa.
ACT 18:23 Pol kil rpma Antiok pa wang aripm ur plalng pipa, kil kaino atn yela anong kanokg a Kalesia wa or pa kai anong kanokg a Prikia angkli yangkipm a Maur Wailen pa ak titnongketel tu watnom a Sisas.
ACT 18:24 Pol kil kai atn angkli yangkipm tatu anong tiur ai pa, melnum ur a Suta pa, nang akilen pa Apolos, pikekg man rakuwel rpma kinar Aleksantria, melnum pa kil kulno Epesus. Kil melnum wontrakole ok yangkipmen wor, a kil ariwe yangkipm yiprokgen a nira ela wrkapm pa ariworwor.
ACT 18:25 Kil pikekg tu kaling plantel ya wor a Wailen, kolpa tom kil nikgwalpm arkekgen angkli yangkipm wor pa nampokgen titnongket wail, a kil kaling plan lanaken Sisas pa ariworwor. Pake kil ariwe kol a pikekg Son kil kalukel pake, a kol a naren nang a Sisas kalukel pa, kil pa kalpis.
ACT 18:26 Kil kai kawor wan a tu Suta atning atning yangkipm a Maur Wailen atne atne pa itna wrongen angkli angkli yangkipm. Kolpa atom Prisila ekg Akwila tuwekg rpma atning atning yangkipm a kil angkli angkli kolpa atom tuwekg awiyel aye kai wan alntuwekgen pa lanakel a kaling plantel ariworwor ya a Maur Wailen pa eng mpa kil riwe riworwor.
ACT 18:27 Atom Apolos la kil a wa kai anong kanokg a Akaia, atom tu wrong kin kipman a Epesus a ukipma pa tu alkel nikgwalpm ak titnongketel kil pa la kil kai o. A tu nira wrkapm pa kai ak naki tu a ukipma Sisas kai pa la tu uwiyel iye kai ikglentel riworwor. Apolos kai palng kai pa pipa, kil pa akwap wail angklin tu melnum a Maur Wailen plan ipma wor alkil ak angklinsen atom tu ukipma Sisas pa.
ACT 18:28 Kil wrekg itna kai kuin a tu wrong kin kipman wailet ak okwail nampokgen titnongket akalmpe alok arku oklala a tu Suta. A wa kil awi yangkipm wrkapm a Maur Wailen ak kaling planten angko wunong la Sisas pa kil melnum pikekg Maur Wailen takwei la ikuwi tu wrong kin kipman.
ACT 19:1 Ak wang a Apolos rpma kai Korin pa, Pol kil atn or kaino wrik nangen tipminingen kolpa kaingkai kinar palng kinar anong Epesus ai. Kil kinar palng pa, kil ari watnom a Sisas am rka kinar pake.
ACT 19:2 Atom kil asenten la, “Pikekg kipm plelng ipma atom ukipma pa, pikekg kipm awi Maur Wor pa aki kalpis?” Ari tu akalmpentel la, “Kalpis, men pikekg ake atning ur a tu la Maur Wor pa, kalpis, atn atn am kitn lanako ti pen.”
ACT 19:3 Kolpa atom Pol asenten la, “Ti tu kalukepm eng yiprokgen kuina?” Ari tu akalmpentel la, “Pikekg men plelng ipma atom ari Son kil kaluko.”
ACT 19:4 Ari Pol la, “Son pa kil kaluk tu melnum a plelng ipma kolti, wa pikekg kil lanaki tu wrong kin kipman pa la, tu ukipma melnum ur a wli katnukg yirokg a kil pake. Pa Sisas kil pake.”
ACT 19:5 Tu atning pa, Pol naren nang a Wailen Sisas, atom kaluken.
ACT 19:6 Pol kaluken plalng pa, kil elng wam pa ele tu pa pipa, Maur Wor pa nar awiyen, atom tu ak ok auraur wa Maur Wor ngkat okel tu pa atom tu laron yangkipm a Maur Wailen pa.
ACT 19:7 Tu melnum a Maur Wor akwap kai tu pa kol tu melnum wampwam yikakwompwekg.
ACT 19:8 Pol kil kawor kulor wan a tu Suta atning atning yangkipm a Maur Wailen atnewe pa kolpa akangklei wang wail a tu rpma eng yapm pa akwap a laron yangkipm a Maur Wailen pa titnongket naki tu wrong kin kipman pa kolpa itna kol kainil wraur. Kil anti tu pa ak yangkipm rapon alilakel tita wa planten aklale wrisen la Maur Wailen antiwe itna wailen ikgalen nol nikgwalpm a melnum.
ACT 19:9 Ari ipmanikg a tu tiur pa kakiren paipm wrisen, tu ake la ukipma Maur Wailen pa, a tu la paipmel elukgen ya a Wailen itna wulmpa a tu wrong kin kipman wailet a rka pa. Kolpa atom Pol kil awi tu melnum alkil a antiwel akwap pa tu atnuurng wan a tu Suta atning atning yangkipm a Maur Wailen atne atne pa am anel kai ise. Tu kawor wan wail a Tiranus a tu kaling plan tu kweikwei tiur atnewe atnewe pa. Atom akangklei wang wris wris pa Pol kil kaling plan tu yangkipm a Maur Wailen itna itna wan pake.
ACT 19:10 Am kil ak kolpa itna kol wring wekg, kolpa atom tu wrong kin kipman a tu Suta a tu Krik a rka kai anong kanokg a Esia pa tu atning yangkipm a Wailen pa plalngten.
ACT 19:11 Atom Pol kil antokg kweikwei titnongket titnongket ak plan titnongket a Maur Wailen kol a ake melnum antokg antokg.
ACT 19:12 Atom tu wrong kin kipman tu ari pa tu awi apm a ak akul nsam pa wa apm tiur a nowe ak aur apm wor a akante num a Pol pa, kolen yalong, wa tu wa aye kai elngtela tu melnum numpet pa pipa, numpet a tu pa palng wor, a tu a maur paipm pa kulor kai takwulelkgten.
ACT 19:13 Wa tu Suta tiur pa tu akwap kol yar mneng atn anong ur anong ur ungkwan maur paipm kai tu melnum pa, pa kwap ur a tu ak ak am pake. Tu wa la wa naren nang a Wailen Sisas ti wa ik ungkwan maur paipm tukwleikgen tu melnum a maur paipm arpmewen ti. Tu la yangkipmen kolpa la, “Kupm naren Sisas, melnum a Pol kil laron pa, kupm la kitn or kai tukwulelkg!”
ACT 19:14 Tu warim kipman wampwomis wampwompwekg a Skepa melnum ipma krakgen tukgunakgen ur a tu Suta pa, tu wa ak kwap a ungkwan maur paipm kolpake.
ACT 19:15 Atom maur paipm pa akalmpenten la, “Sisas pa kupm ariwe ak ai wa Pol ti kil akwap kolpa atom kupm ariwe kil pa, pake kipm ti pa kipm mla? Kupm ake ariwe kipm ti.”
ACT 19:16 Maur paipm a arpmewel pa kil asenten kolpa plalng, kil urngkwrekg kolti oren kai pa kai pa paipm kolti alken yongwalmpopm wail, a aro apm a tunteng pa a teng ngkark a wan a kil pa kulor en kolti am teng ngkark numpaipm kai ise.
ACT 19:17 Atom yangkipm a kweikwei a palng pa, kai palng wail tu Suta a Krik a rka kai Epesus pa atning plalng. Kolpa atom tu pa ngkark paipm wrisen, atom tu ngkat nang a Wailen Sisas pa aye kaino kwa.
ACT 19:18 Kolpa atom tu wailet a ukipma pa tu kulkai laron paipmpaipm alntu a tu antokg pa itna wulmpa a tu wrongkwail.
ACT 19:19 Atom tu wailet a antokg kweikwei kolen tukuk a yar kweikwei pa, tu aye wrkapm alntu a alken ariwe a antokg tukuk a yar a kweikwei a kolpa pa aye kulkai alung akentita itna wris plalng pipa, tu lap itna wulmpa a tu wrongkwailet a itna pa. Atom tu angkleikg marpm a akarmpen wrkapm pa ari, watipmen paipm kamel kamel (50,000).
ACT 19:20 Kolpa atom yangkipm a Wailen pa palng wail manten antiwe titnongket kolpa aye kai aye kai.
ACT 19:21 Kwap pa palng titnongket itna Epesus pa, pipa Maur Wor a Maur Wailen pa ngkat nikgwalpmel Pol pa la kil kai kinar anong wail Serusalem, pake kil a kai kaino anong kanokg Masetonia pa plalng, wa kai kinar anong kanokg Akaia pa plalng, wa yaper kul Epesus ti eng kai kinar Serusalem pake. Kil wa lala, “Kupm kai kinar palng rpmi Serusalem pa plalng pipa kupm a wa kai itn ngkompla ri Rom pa yat pake.”
ACT 19:22 Atom kil ukwa angklin wekg alkil pa, Timoti a Erastus pa, ep kaino Masetonia pa. A kil alkil Pol pa rpma wang watinet ketnketn a anong kanokg a Esia pa pen.
ACT 19:23 Ti ak wang ti pa tu ngkat praras wrekg awi wrongmanto lan ya a Wailen ise.
ACT 19:24 Ti melnum ur a nang akilen pa Temitrius, pa kil melnum a ak wam almpen mang antokg kalingen yalming wasek ur atom tu lap pa palng kalnten wor. Pa tu kalingen yalming a mring kin Artemis a tu kapor kilko alein itna yalming pake. Ti kwap marpm a kil pa palng wail manten, a tu melnum a akwap kolpa pa kwap a ak awi marpm warim wailet.
ACT 19:25 Atom Temitrius kil akwe tu pa kul kai rka wris nampokgen tu melnum a tu akwap wris kol a tu ti ak pa, atom kil lanaken la, “Kipm melnum pa, kipm ariwe pa, mentepm ti pa mentepm awi marpm wail wor kai kwap a mentepm ak ti.
ACT 19:26 Ti kipm alkipm atning a ari melnum Pol ti pa, kil almpil nikgwalpmel akarkolng tu wrong kin kipman wailet paipm ai a itna Epesus ti, wa wreren eng kil a wa uwi yela anong kanokg a Esia ti. Kil la mring a melnum antokg ak wam kalingen kolti pa, ake mring aklale.
ACT 19:27 Ti yangkipm a Pol kil la pa antiwe a uk nang paipm arku kwap wor a mentepmen a mentepm ak eng akawi marpm ti. Wa yangkipm a kil pa antiwe a antokg tu wrong kin kipman pa la paipmel elukgen arku yalming wail a mring kin Artemis pa. Ti wrong kin kipman a yela anong kanokg a Esia, a wa yela kanokg ti pa, tu kapor kilko alein mring kin Artemis a mentepmen ti. Ari yangkipm a Pol pa antiwe a uk nang paipm a arku nang wailen titnongket akilen pa!”
ACT 19:28 Tu atning yangkipm pa, tu nikgwalpm wakget paipm la plalplal mainmain wli pa wli pa la, “Miring kin Artemis a men Epesus pa wail manten itna ep pake!”
ACT 19:29 Atom ake ampen pinterngen kolti tu wrong kin kipman plalngten a rka anong wail a pa tu nikgwalpm paipm la lailai atatu aye wampure akwail anel kunturng kaingkai rka kai akapm wail ur a tu wrongkwail kai arke arke ari kalingkake a akatnong arke pa. Atom tu arkul Kaius a Aristarkus, melnum wekg a Masetonia a anti Pol atn pa tu awiyen aye kai itna kai wrik akapm wail pa.
ACT 19:30 Pol kil ari tuwekg pa kolpa atom kil la kai ri tu wrongkwail kin a kipman a rka kai akapm pa, ari tu watnom a Sisas pa angkengkel la ake mpa kil kai.
ACT 19:31 Wa tu mring man tiur pa, tu melnum wor alkilen, tu a ikgalen anong kanokg Esia pa, tu pa wa ukwa yangkipm kai ak angkengkel titnongket la, ake mpa kil kai plan ikgokg a kil alkil ti kai akapm a tu kalingkake a akatnong atne atne pa.
ACT 19:32 Tu wrong kin kipman a wuten kai rka wris a pa, tu itna pa itna pa la plalplal mainmain la wli pa wli pa, ti tu wrongkwailet pa tu ake ariwe yiprokgen na a tu wli rka wris a akapm pa.
ACT 19:33 Atom tu Suta almayel talpul Aleksanta pa kai kaino itna kaino wulmpa a tu wrongkwail ai, atom tu ari pa atom tu wonmis la, pa am melnum a wuten tu la watipmen aklen tita am pake. Atom Aleksanta pa kil la ikilmpe ok a tu wrong kin kipman pa, atom kil ngkat wam alkil pa kaino kwa la ik ngkeng tu pa la mpa tu tatar rki.
ACT 19:34 Tu ariwel pa, tu ariwe la, kil pa kil melnum Suta pake, kolpa atom tu anel kimeket elng ok pa mprak mprak itna wris la yikakatnen langkinen mring alntu pa la wli pa wli pa la, “Miring kin Artemis a men Epesus pa wail manten itna ep pake!” Kolpa itna wang watin, kol takgni wang tiwel waiketn ur.
ACT 19:35 Ari kalpis, mring man a anong wail Epesus a wamparpme yotalpuk a ak nira wrkapm pa kil kilkam tu wrong kin kipman wailet a pa tatar plalng pa kil la, “Kipm melnum a Epesus tu wrongkwail a kanokg ti tu ariwe la am anong wail Epesus ti pa yiprokgen a ikgalen yalming a mring Artemis pake. A am wa kipm Epesus pa yan eng ikgalen wes krimperken a mring Artemis a pikekg angko angkaino kitnong pa nar pake. Kipm alkipm ariwe pa, ti wa kipm wa la watipmen eng kuina wai?
ACT 19:36 Pa ake antiwe mpa melnum ur anerngkokel iklampe pa, kolpa ti kipm kai meen, ampur kipm uren atom antokg paipmel pinterngen pa.
ACT 19:37 Kipm wuten awi melnum wekg kil aye kul itna kil, pake tuwekg kil pa pikekg ake tuwekg ak ikgwampel kwei ur itna yalming a mring a mentepm a ti, aki tuwekg la paipmel mring a mentepmen ti pa kalpis.
ACT 19:38 Kolpa ti ake mpa kipm ntokg kol kipm antokg ti pa. Temitrius nampokgen tu melnum a kipm akwap wris ti pa kol tu ipma paipm eng mla ur pa, pa wang ur alkil a antokg yangkipm ai pa, pa ikga uwiyen iye kai itni wrik alkil a antokg antokg yangkipm pa ntokg yangkipm ai kul. Wa melnum alkil a rpma eng atning atning yangkipm pa ikga rpmi itning pa, atom ikga ikilmpe paipm a melnum antokg pa.
ACT 19:39 Kol kipm yangkipm kaikuten tiur itni pa, kipm iye kai or lam ik wang alkil a tu mring man alm eng tu wrongkwail kin a kipman kai eng antokg antokg yangkipm pa.
ACT 19:40 Kolpa ti kipm itning, kol tu melnum itna ep a Rom kol tu itning kuina ur a wet mentepm antokg ti pa, pa tu antiwe a ayewo kai itni yangkipm, atom rkiwo la mentepm ngkat wrong la ntiwen ntokg yangkipm itna tike. Pake ake yiprokgen wor ur kai nikgwalpm a mentepm ak kolpa. Wa kol tu wa isento la, mentepm wa wli itna wris la na watipmen nurkgatne kolti pa, mentepm mpa yangkipm kalpisen.”
ACT 19:41 Kil lanaken yangkipmok kolpa pa, pa ak ungkwan tu eng wrekg rak kaingkai om.
ACT 20:1 Mring man angkeng tu wrongkwail a plalplal mainmain wli pa wli pa nurkg atne pa, atom tu anel rak plalng pipa, Pol kil akwe tu watnom a pikekg Sisas kaling plan pa kul kai rka wris, atom kil alken yangkipm ti la ik titnongketel ipma atuwen pa. Kil ak kolpa plalng pipa, kil alken wor a kil wrekg atnurngken la kaino anong kanokg a Masetonia ai.
ACT 20:2 Kil atn or ya pa eng kaino pa, kil uk yangkipm tu wrong kin kipman eng ak titnongketel ipma atuwen, kolpa kai lkgungkur lkgungkur kolpa kai kaino Masetonia ai, kai kinar palng kinar anong kanokg a Krik ai.
ACT 20:3 Kil rpma pa a kainil wraur plalng pipa, kil wa numprampen la uwi wan unokgen pa la wa i pa wa kinar kai anong kanokg a Siria. Ari kil atning yangkipm a tu Suta yapon yangkipm la ilmpel imo, kolpa atom kil wa akwonalmpen la kil a wa yaper kaino anong kanokg a Masetonia pa pen, plalng pipa, kil la wa i pa wa kinar Siria pa kul.
ACT 20:4 Atom tu melnum a anti Pol pati nang a tu pa pati kil: Sopater warim kipman a Pirus, kil melnum a anong Peria, wa Aristarkus nampokgen Sekuntus tuwekg melnum a anong wail Tesalonaika, wa Kaius pa a anong Terpe, a Timoti, nampokgen melnum wekg a anong kanokg Esia pa Tikikus a Tropimus. Tu melnum pa tu anti Pol.
ACT 20:5 Atom tu melnum pa tu epto kaino kai kinar rpmanto angkinar anong Troas pa.
ACT 20:6 Pake men tiur a katnunten kil pa, men rpma Pilipai pa rpma a a, wang wail a tu Suta angklon nok tingklak a ak mpim ap mringen ak ntam pa kai plalng pipa, men awi wan unokgen pa atnurng Pilipai pa kai kinar om. Men or unokg pa kol wang wampwomis pa, men kai kinar palng ansil tu a epto kinar rkanto kinar Troas pa. Atom men rka anong pa kol wang wampwomis wampwompwekg.
ACT 20:7 Wang wail a rpma eng yapm pa kai plalng pa, or kong ti pa, tu melnum a ukipma wa men ti men wli rka or wris rka antokg okipma pa al ngkat nang a Maur Wailen pa kolpa rka pipa, Pol kil lakati yangkipm a Maur Wailen pa naki tu men wrong kin kipman pa. Kil la kil ikga wrekg utnuurngken ik kong pa, kolpa atom kil laron naken yangkipm pa kolpa kaingkai, kai mining kuin.
ACT 20:8 Wan a men rka pa walop wraur, atom men rka kaino walop wraur ai. Wakg wailet pa la elngkirpma ak alen wan wunen a men rka pa.
ACT 20:9 Pol kil laron yangkipm pa arkolng itna watin kolpa kai, ari melnum warimpen ur nang akilen pa Yutikus, kil rpma kwa a wanyun ok wusok pa. Kil ikgyokg alel paipm, atom nikgwalpm a kil pa aner kai titnowen kolti, kil taker angko akilka a wanyun ok wusok a wan walop wraur pa elng kinar kanokg ai. Tu kinar ngkatel, ari kil am amo ise.
ACT 20:10 Ari Pol kil pa angkaino wan kwa pa nar kanokg pa kolti, elng kai okg ele arkul melnum warimpen pa, atom kil lanaki tu pa la, “Ampur kipm ipma kaikut pa, nol rka pa.”
ACT 20:11 Kil lanaken kolpa plalng, kil wa yaper kaino wan kwa pa, antiwen rpma al okipma a oklala kweikwei kolpa rka kaingkai kai akwe, a kil atnuurngken kai.
ACT 20:12 A melnum warimpen a wet angko amo pa, am wrekg rpma wor ise. Atom ipma a tu pa wirng no kukula wor om, atom tu ak ayewel kai.
ACT 20:13 Atom Pol lanaki men a antiwel atn pa la, men uwi wan unokgen pa kinar anong Asos pawo, a kil mpa ngkom ngket or ya kanokg ti kinar tike. Atom men awi wan unokgen pa kai kapring kinar Asos pa eng la mpa uwi Pol kinar pake, katnun kol ok a pikekg kil alkil la pa.
ACT 20:14 Kil kinar palng ariwo kolti, wa men awiyel ak wan unokgen a pa kolti, am men kinar anong Mitilini ise.
ACT 20:15 Wa men wa atnuurng anong pa, wa men kinar kinar, kai mining. Wa men ak mining mining kinar kinar, akwe. Kolpa kinar ak anele anong kanokg Kios a ela unokg pa. Kolpa kai kinar, mining angko ya. Wa ak mining mining kolpa kinar kinar kinar, akwe pa, men kinar palng kinar anong Samos pa rka. Wa men wrekg a pa, wa men wa kinar kinar, mining angko ya. Wa men ak mining mining kolpa kinar kinar, akwe ti pa, men kinar palng kinar anong Miletus pawom.
ACT 20:16 Men pikekg ake nar rka Epesus pa, kalpis. Men pikekg am aren nar Miletus pake. Pati atnen Pol karken la men kaken wang tiur rka ya ya a anong kanokg Esia pa. Kil ari akwiyen la wang ur itni pati, kil la or yawel itatu kai kinar rpmi kinar Serusalem ai, nti tu itopen ikwonilmpen wang wail a pikekg Maur Wailen kil ukwa Maur Wor kil nar pa.
ACT 20:17 Men rpma Miletus pa atom Pol uk yangkipm tu pa kaino naki tu melnum wailen wailen a ikgalen tu wrong kin kipman mapming a ukipma Krais a rka kaino Epesus pa la tu kul nar riwel.
ACT 20:18 Tu kul nar ariwel antiwel rpma pipa, kil lanaken la, “Kipm ariwe pa, pikekg ak ep lmpiwen ai a kupm wli anong kanokg a Esia ti, kipm ariwe atn a rpma kwap a pikekg kupm antiwepm ak ak ai kulngkul wli wang ti.
ACT 20:19 Kupm arku kupm alkupm ti orngwatneikgen akwap a Wailen kolpa kai. Tu Suta yapon yangkipm ampen ampen la ilmpopm oropm iklewopm, tu aktopm kolpa ak ai kul ai, kolpa atom kupm akg eng tu alkopm kaikuten a wleket kolpa.
ACT 20:20 Kipm ariwe pa, kupm pikekg ake aye num alkupm ti ngkark eng laron nikgwalpm wor a paipm eng ak angklin kipm pa, kalpis. Kupm pikekg laron a kaling plantepm kimek kimek wan ur wan ur. Wa kupm pikekg laron itna kuin a kipm wrongkwail kimeket atning pa.
ACT 20:21 Kipm Suta a kipm Krik ti pa, kupm am akangklei akangklei lanakepm la pa aklale, kipm ri kalkuten a wleket a kupm arki kil pa, kol a kipm kul eng Maur Wailen, plelng ipma a ukipma Wailen Sisas Krais amentepmen ti.
ACT 20:22 Kipm itning, ak wang ti pa wa Maur Wor a Maur Wailen kil tilpopm titnongket la kupm kai kinar Serusalem. Ti kupm ake antiwe mpa rpmi, kupm mpa kai kinar Serusalem pake. Pake kupm ake ariwe kuina ur ikga palngtopm itni kinar pa.
ACT 20:23 Kupm ariwe kwei ur wris ur a Maur Wor a Maur Wailen lanakopm kil akangklei yela anong wail wail a kupm kai pa pati, la ikga tu uwiyopm iye kai rpmi wan tipmning pa, a wa kaikuten tiur ai am nungkwangentopm itna kolpa kai pake.
ACT 20:24 Pake kupm ake akwonalmpen kupm alkupm ti la rpmi aki a imo pa, kupm uk num alkupm ti kolti. Kupm la kol a pirng kai ngko kirng kowak a Wailen Sisas ukula pa, wa ikwap a pikekg kil alkopm pa kai plalng pen. Kwap pa pati a arki wleket laron yangkipm wor a la Maur Wailen kil plan ipma wor alkil ak angklin mentepm.
ACT 20:25 Wa kipm itning kil: kipm anong a pikekg kupm atn laron yangkipm a la Maur Wailen ikgalen nol nikgwalpm amentepmen pa nakepm pa, ikgake wa wris ur akipmen pa ri ikgokg akupmen ti ntiur pa, kalpis.
ACT 20:26 Yangkipm wrongkwail am kupm lanakepm ak ai kulngkul, am kul itna kolpake. Atom ti kupm lanakepm aklale wrisen la, kol wris ur akipmen ti ikga kai anong paipm pa, paipm pa am itna kai kipm alkipm pake, kupm ti pa kalpis.
ACT 20:27 Nikgwalpm wasrongen wrongkwail a Maur Wailen am kupm laron nakepm kulngkul kul am kul itna kolpake. Kupm ake wa aye num alkupm ti ngkark, atom elngen angko wang pa, kalpis. Kupm laron kimek kimek nakepm pake.
ACT 20:28 Kolpa ti kipm mpa ikglen kipm alkipm ti riworwor. Wa Maur Wor a Maur Wailen kil takwei kipm tike, la kipm ikglen manto walkg malkgu akilen ti, kolpa ti kipm ikglen riworwor. Manto walkg malkgu pa, pa tu wrong kin kipman mapming akilen a pikekg kil akarmpen eng alkilen ak walmpopm alkilen.
ACT 20:29 Kupm ariwe la ikga kupm utnuurngtepm kai pa, ikga nimpa tilpmingen wrongen wli kul itna kuin akipmen pa. Atom ikgake rein, ikga ntokg paipm kolti manto walkg malkgu a kipm ikgalen pa.
ACT 20:30 Wa ikga tu melnum tiur a kipm alkipm ti ikga wa kinsil laron yangkipm ur manet ai, eng ik lok kipm tiur a ukipma Krais pa kai kutnun tu tiur a kipm pa.
ACT 20:31 Kolpa ti kipm rpmi wontrakole ukikg riwe! Kipm ikwonilmpen wring wraur a pikekg kupm atn mining a ran akwap ak ikgakg kalukepm la karkurng kipm wris wris ti.
ACT 20:32 Ti ak wang ti pa kupm elng kipm ti kai wam a Maur Wailen, eng mpa kipm ikwonilmpen yangkipm wor a la Maur Wailen kil plantepm ipma wor alkil ak angklinsepm. Yangkipm wor pa antiwe titnongket a ak titnongketel kipm pa, a alkepm kweikwei wor wor a Maur Wailen kil elngkitna la uk mentepm wrong kin kipman a kil amprin eng alkilen pa.
ACT 20:33 Wa kupm ti ake pikekg aringkowe marpm aki apmnung aki kweikwei wor wor a melnum ur pa, kalpis.
ACT 20:34 Kipm alkipm pikekg ari pa, kupm ti pikekg ake tu ur angklinsopm pa, kalpis. Pikekg kupm alkupm ak wam alkupmen aken kwap eng ak angklin kupm alkupm ti, a wa ak angklin tu melnum a antiwopm atn akwap pa.
ACT 20:35 Ti kipm ari kweikwei wrongkwail a kupm ak pa pati, pa kupm ak plantepm la mpa kipm ik timplowis kitila kolpa, eng mpa ngklin mlaur a titnongket kalpisen pa. A wa lanakepm la kipm wonirpme yangkipm a pikekg Wailen Sisas la pa la, 'Kitn uk kweikwei ur eng ak angklin melnum ur pa, pa kitn awi atopen wail manten angen kol a melnum ur ai angklinseitn kweikwei ur pa.'”
ACT 20:36 Pol kil lanaken yangkipm pa plalng pa, kil kapor kilko alein, a kil anti tu melnum wrongkwail a rka pa tu oklala naki Maur Wailen.
ACT 20:37 Tu oklala naki Maur Wailen pa plalng pa, tu plalngten arkulel nakrontel akgentel wail manten.
ACT 20:38 Tu ipma kaikut paipm wrisen eng ok ur a kil wet lanaken kolpa la, tu ikgake riwel ikgokg nti ur. Atom wa tu aklakgto kai wan unokgen pa.
ACT 21:1 Men atnuurng tu Miletus, a tu melnum wailen wailen a Epesus pa tu rka Miletus a pa, a men awi wan unokgen pa kinar, eng la or pa kinar anong kanokg Kos a ela unokg pa. Wa men okg rka pa, wa or kong wa men wrekg a pa, men wa kinar kai palng kai anong kanokg Rotes a ela unokg pa. A wa men wrekg a pa men kai anong Patara ise.
ACT 21:2 Wan unokgen a men awi angkaino Miletus pa nar kul Patara ti pa, am nar kul elngen angko Patara tike. Wa men wa ari wan unokgen ur manet la kai kinar anong kanokg Ponisia pa, atom am men awi wan unokgen pa kai kinar pake.
ACT 21:3 Men or pa kai kinar kinar kinar pa, men ari anong kanokg Saiprus pa ela unokg pa. Men kolpa kaingkai kinar ak anele Saiprus pa ela wam wangkokg. A men am aren oryawel nar pa kai kinar kinar kinar rka anong wail Tair a ela anong kanokg Siria pa. Men kinar rka wrik a wan unokgen kinar arke arke pa, eng tu nakle wrikya tiur a rpma wan unokgen a men arpme ti.
ACT 21:4 Angko anong pa men kai ari tu melnum a ukipma Sisas pa, atom men antiwen rka pa wang wampwomis wampwompwekg. Ari Maur Wor kil ngkat okel tu pa lanaki Pol pa la, ake mpa kil kinar Serusalem pa.
ACT 21:5 Men antiwen rka kinar Tair pa plalng pa, men wa wrekg la kai pa, tu ak wail wrekg antiwo kimeket nampokgen tu kin a watnom alntu pa, tu ak ayewo atnuurng anong wail pa kul or kai rka unokg yamping ningkrapm pa kolti, men kapor kilko alein oklala naki Maur Wailen.
ACT 21:6 Men kapor kilko alein oklala naki Maur Wailen pa plalng pipa, men ukwa tita kolti, men tipra kaino wan unokgen ti kinar, a tu pa yaper kai kawor wan anong alntuwen pa.
ACT 21:7 Men rpma wan unokgen pa atnuurng anong Tair pa, kinar kinar palng kinar anong Tolemas pa. Ya a men atn tatu unokg pa am kinar elngen angko anong Tolemas pake. Men kai ari tu melnum alpmenen a mentepm ukipma Krais pa, men alken wor atopenten antiwen rka pa wang wris.
ACT 21:8 Wa men okg rka pa, wa or kong ti pa, wa men wrekg a pa men wa kinar palng kinar anong Sisaria. Atom men kai ari Pilip, melnum wris ur a tu wampwomis wampwompwekg a pikekg tu takweiyen itna kinar Serusalem la ikwap a ak angklin tu melnum. Wa kil melnum ur a tu ukwa kai rpma anong ur anong ur eng laron yangkipm a Maur Wailen. Atom am men antiwel rka wan akilen pake.
ACT 21:9 Ti Pilip pa warim kin wikgwikg, tunteng ake awi kipman, a pa. A Maur Wailen alken kwap wor a ak laron kuina ur a Maur Wor a Maur Wailen ngkat okel la tunteng laron pa.
ACT 21:10 Men antiwen rka pa wang aripm ur pipa, melnum okwripm ur a Maur Wailen, nang akilen pa namput la Akapus, kil angkinar anong kanokg a Sutia pa kul no ariwo no Sisaria ti.
ACT 21:11 Kil no ariwo atom kil anelkgen ampei a Pol a ak wangket apm pa, atom kil angkuten nepm wam a kil alkil tike, atom kil la, “Maur Wor a Maur Wailen kil la kolkil la, ikgam tu Suta ngkuten melnum yan a ampei a ak wangket apm kil itni kinar Serusalem pa irir kol a kupm ak angkuten kupm alkupm kilke, atom uk kil kai wam a tu a ake a Suta pa.”
ACT 21:12 Men atning yangkipm a Akapus la kolpa, atom men ti nampokgen tu alntu a rka pa men angkeng Pol pa la, ampake kil kinar Serusalem pa.
ACT 21:13 Ari Pol kil akalmpento la, “Kipm wa akg kolpa angkengkopm eng ntei? Kipm wa akg antokg kolpa ti kipm kangku nol walpm akupmen ti! Kupm numprampen kolti eng ake la mpa tu yipowopm rpmi wan tipmining pa kolti, kupm nimprampen yat la mpa imo kinar Serusalem pa ikirmpen nang a Wailen Sisas pake.”
ACT 21:14 Men angkengkel ari kil alkil titnongket la kinar, kolpa atom nol amenen pa angko a, men awi ipma meen a awi wor alkel kolti la, “Ti kai kitn kitila nikgwalpm a Wailen la pawo!”
ACT 21:15 Men rka wang aripm ur rka anong Sisaria pa kai plalng pipa, men numprampen wrikya kweikwei pa alupm alupm plalng pa, men wrekg la kinar Serusalem om.
ACT 21:16 Atom tu tiur a ukipma Sisas a rka Sisaria pa, tu wa wrekg ak ayewo kinar wrik ur a la mpa men okg rke pa. Pa wrik wan anong a melnum ur nang akilen pa Nason. Kil pa melnum ur a Saiprus, a kil melnum ur a tu a pikekg ukipma Sisas pa ep.
ACT 21:17 Men okg rka pa, or kong ti pa, wa men wrekg a pa, wa men kinar kai kaino palng kaino Serusalem pa. Tu melnum a mentepm ukipma Sisas a rka kaino pa, tu atopento awiyo aye kai ikgalento.
ACT 21:18 Atom men okg rka pa, or kong ti pa, men anti Pol pa kai ari Semis. Wa tu melnum wailen wailen a ikgalen tu wrong kin kipman a ukipma Sisas pa wa wli antiwo rka wris ak wang pa.
ACT 21:19 Men rka pa, Pol kil uk wor tu pa plalng pipa, kil lakati naken kweikwei wrongkwail pa kimek kimek a Maur Wailen kil akwap wail ak wang a kil atn akwap angklin tu a ake Suta pa yela.
ACT 21:20 Tu atning kuina ur a Pol kil lakati naken pa, atom tu ngkat nang a Maur Wailen. Atom tu lanaki Pol pa la, “Kitn melnum alpmenen a mentepm ukipma Sisas, kitn ariwe pa, tu wrong kin kipman watipmen paipm, kamel kamel a mentepm Suta pa, tu ukipma Sisas. Pake tu plalngten tu wa la titnongket la wa rkul yangkipm titnongket amentepmen Suta pa kutnun kitila yek kimeket nimpokgen itni.
ACT 21:21 Ari tu a pikekg atning yangkipm a kitn laron pa, tu pa wa plelngen yangkipm a kitn pa lanaki tu ti la, pikekg kitn kaling plan tu Suta wrongkwail a rka yela tatu anong a tu a ake Suta pa la, tu uk yirokg yangkipm titnongket a Moses ti. Wa tu plelngen la kitn pikekg angkengken la, ake mpa tu wangket num a tu warim walmpopmet pa, aki kutnun atn a rpma a angklonake a mentepm Suta pa, kolpa atom antokg tu ti ipma paipm eng kitn ti.
ACT 21:22 Ti tu wrongkwail mpa itning la kitn am nar palng ise. Ti men mining paipmen num la tu ik wail wli ik yangkipm laweitn ur pa, mpa men ntokg kolai?
ACT 21:23 Kolpa ti kitn ik kuina ur kol a men lanakeitn la kitn ik ti: melnum wikgwikg a antiwo rpma kil pa, tunteng pikekg yapon yangkipm nampokgen Maur Wailen atom tunteng ak katila.
ACT 21:24 Kolpa ti mpa kitn uwi tunteng melnum kil, atom kipmteng kai kurkuk il wam kipmanen, eng mpa kipmteng palng kukula wriwen wor itni wulmpa a Maur Wailen pa kitila yangkipm titnongket a Moses la pa. Ti kitn mpa rmpen kweikwei a tunteng la mpa il wor uk Maur Wailen pa, eng mpa tunteng u tukgunakg alntuntengen ti. Kitn ik kitila kol a men la kil pa, mpa tu wrongkwail riwe la, yangkipm a tu arki kitn pa, pa ake yangkipm aklale, eng mpa tu riwe la, kitn arkul yangkipm titnongket amentepmen Suta pa katnun itna pa.
ACT 21:25 Pake tu a ake Suta pake tu ukipma Sisas pa pati, men pikekg akorla yapon yangkipm la, men ake mpa la tu kutnun yangkipm titnongket wailet a mentepm Suta ti pa, pa mpa wa lken kalkuten. Atom men niranten wrkapm pa kai ak lanaken la, tu mpa kutnun yangkipm titnongket wikgwikg kil kolti: tu ake mpa il okipma ur a tu al wor uk mring a mring maur, a tu ake mpa il walmpopm, aki wlikgok ur a walmpopm a tapor kawor rpma wunen pa, wa tu ti mpa itni watin tukuleikgen a angkli arkul tita a antokg kweikwei numkropis a uk numpaipm kamel pa.”
ACT 21:26 Pol awi wor eng kuina ur a tu melnum wailen wailen pa lanakel kolpa plalng pipa, or kong ti pa, Pol kil awi tunteng melnum wikgwikg pa tunteng kai. Atom kil kai karkuk al eng palng kukula wriwen wor itna wulmpa a Maur Wailen pa. Kolpa atom kil kai kawor yipmingki wunen a yalming a Maur Wailen pa, naki tu melnum ipma krakgen a ikgalen yalming pa la, wang a i ikga tunteng palng kukula wriwen wor, wa tunteng ikga iye kweikwei pa wris wris nar num a tunteng pa iye kai eng il wor uk Maur Wailen pa.
ACT 21:27 Wang wampwomis wampwompwekg pikekg tunteng alm la rpmi pa, wreren eng a kai plalng ti pa, tu Suta tiur a anong kanokg Esia a nar rka Serusalem ti pa, tu ari Pol pa itna kawor yipmingki wunen a yalming a Maur Wailen pa, atom ngkat nikgwalpmel tu wrongkwailet pa tu ipma wakget, atom tu ak wail kunturng kul kai arkul Pol pa.
ACT 21:28 Atom tu la yikakatnen kolpa la, “Kipm melnum a Isrel, kipm ngklinsowo! Melnum ti kil melnum pikekg kaling plan tu melnum wailet yela, wa arku nang a tu wrong kin kipman amentepmen, wa nampokgen yangkipm titnongket a mentepm Suta, wa yalming a Maur Wailen ti. Wa kil ake wa akwap kolpa wris, kil wa awi tunteng melnum yimponen a anong kanokg Krik ti, tunteng wa or yalming ti ak kimpilpel wrik krimperket ti.”
ACT 21:29 Yiprokgen a tu arki Pol pa pati, tu pikekg ari Tropimus a anong Epesus pa anti Pol atn tatu anong wail ti. Atom tu ari a wet Pol kil akyakur melnum wikgwikg pa aye or yipmingki wunen ti, atom tu won mis la, Pol kil wuten akyakur melnum yimponen Tropimus pa aye or yipmingki wunen a yalming a Maur Wailen ti.
ACT 21:30 Tu wrongkwail a rka anong wail pa, tu atning milpming kilko pa, atom tu tatu angko a pa a pa wli. Tu lape arkul Pol ti arkol wampel lulngklulngen aye kai kawor en ai takwleikgen yipmingki wunen a yalming a Maur Wailen pa. Pipa tu alok wanyun pa kul kai ar penterng.
ACT 21:31 Tu antokg la ilm Pol pa imo pa, yangkipm pa kai awi melnum itna ep a ikgalen tu a almpwrong a tu Rom pa. Atom kil atning yangkipm a tu la la, tu wrongkwail a Serusalem pa antokg paipm itna wai, wreren kalpisen eng am a or tita tike.
ACT 21:32 Atom penterngen kolti melnum a itna ep a almpwrong pa kil awi tu tiur alkil a kul arkekgtel pa nampokgen tu tiur a almpwrong pa, tu pirng kai kinar kai ari tu wailet a itna pa. Atom tu wrongkwailet a pa tu ari melnum itna ep a almpwrong pa kil kul nampokgen tu alkil a almpwrong pa, atom tu elngen a or Pol pawom.
ACT 21:33 Atom melnum itna ep a tu almpwrong pa kil kul kolti, kil wamparpme Pol ti, a kil lanaki tu alkil pa awi ampei mringen wekg ti ak angkuten wam wekg ti kai nampokgen wam wekg a melnum wekg a almpwrong pa. Atom kil asen tu wrong pa la la, “Kil ti kil melnum mla, a kil antokg kuina kolai?”
ACT 21:34 Ari tu itna pa itna pa la akalmpe nurkgatne paipm wli pa wli pa, atom melnum itna ep pa ake kil atning nungkulkg arpme ariworwor kuina ur paipm a kil pa antokg pa. Kolpa atom kil lanaki tu melnum alkil a almpwrong pa la, tu uwiyel iye kai kaino wan a tu melnum a almpwrong arke ai pen.
ACT 21:35 Tu awiyel aye kai kaino angko yo kiprinet a tu yapo eng angkom kaino wan ur alntuwen pa, ari tu melnum a almpwrong pa tu ari tu wrong kin kipman pa ipma wakget paipm la orel imo, kolpa atom tu ngkatel la iye kaino wan kwa wai.
ACT 21:36 Tu wrong kin kipman pa kunturng arken katnunten kaino la mprak mprak kolpa kaino la, “Or melnum pa imo wo!”
ACT 21:37 Tu melnum a almpwrong pa la mpa iye Pol kawor rpmi wan ur a tu melnum a almpwrong arke pa, ari Pol kil asen melnum itna ep a almpwrong pa la, “Ti kitn itni waiketn! Antiwe mpa kupm lanikeitn oklala ur aki?” Ari melnum itna ep a almpwrong pa wrekg paipm la, “Kitn pa wa ariwe ok Krik tuwa!
ACT 21:38 Kupm pa wa ariweitn won mis la kitn pa melnum ur a Isip a pikekg ak wangkur pa wrekg itna minsrang la ilm ungkwan tu mring man a ikgalen anong ti, atom awi tu wrong melkget wailet paipm kamel kamel (4,000) a aye kweikwei a ak alm kamel amo pa, anel aye kai takwem rka wrik laikge a wes ningkrapm kalpmilel ai. Kupm ariweitn la mpam kitn melnum pake, ari ake kitn melnum pa.”
ACT 21:39 Atom Pol pa akalmpe la, “Ei, kupm ake melnum pa. Kil kil kupm melnum a Suta. Kupm pikekg man rakuwopm rpma anong Tarsus a anong kanokg Silisia. Ti anong wail pa kipm wrongkwail ariwe pa. Ti kupm melnum kanokg yiprokg am a anong pake. Ti kitn awi wor la kupm la yangkipm ok ur kil niki tu wrong kin kipman ti?”
ACT 21:40 Atom melnum itna ep a almpwrong pa kil awi wor la kil la oklala ur alkil pawo. Atom tu elng kil itna yo kiprinet a yapo eng angkom kaino wan kwa pa, kil itna elng wam pa itna ak angkeng tu wrongkwailet a oklala nurkgatne pa. Tu elng tatar itna pa, kil lanaken oklala pa ak ok Ipru.
ACT 22:1 Tu wrong kin a kipman pa anel elng tatar itna pa, Pol lanaken la, “Kipm yantin, a wusok wusok, a wail wail alkupm pa, kipm awiyopm paipm la kolen kupm antokg paipm. Pake kipm itning kupm la laron nikepm ngko wunong, eng kipm itning kupm ake antokg paipm ur pa, kalpis.”
ACT 22:2 Tu atning a Pol kil ak ok Ipru, ok anongen alntu pa lanaken kolpa atom tu anel tatar elng nungkulkg a tu pa wrak itna eng atning oklala a Pol lanaken pa. Atom Pol kil lanaken yangkipm ok pa kolpa kai,
ACT 22:3 ”Kupm ti pa, kupm melnum a Suta, man pikekg rakuwopm rpma anong Tarsus a anong kanokg Silisia. Pake kupm am wrekg wail itna anong wail Serusalem tike. Kupm am pikekg Kamaliel pa aro wonelopm kaling plantopm pake. Kil kaling plantopm yangkipm titnongket a tu mamikg mamin mansan amentepmen pa la kupm kutnun kitila riworwor kimek kimek. Kupm am pikekg kol kipm pake. Kupm pikekg nikgwalpm arkekgen itna kalnten alok tu eng la kutnun yangkipm a Maur Wailen pa riworwor, kol a kipm ti ak ak ak wang tike.
ACT 22:4 Wa kupm melnum pikekg awi wrongmanto lan tu melnum a katnun ya a Sisas kol kupm katnun kil, atom kupm almpen amo. Wa kupm yapowen awiyen kimeket kin kipmanen ayewen kawor rpma wan tipmining pa.
ACT 22:5 Ti mpa melnum tukgunakg ipma krakgen a itna ep a tu ipma krakgen, wa tu mring man wailen wailen a ikgalen mentepm wrong kin kipman pa, mpa wa tu pa lanikepm yat. Tu pa pikekg nira wrkapm wompel alkopm la kupm iye kaino Tamaskus pa uk tu wail wail, a muikgmayen, a mantin yantin amentepmen a rka kaino pa. Wrkapm wompel pa la la kupm rkul ngkuten wampel tu melnum a ukipma katnun ya wa Sisas ti, atom iyewen kulnar Serusalem ti, eng mpa tu pa lken wleket.”
ACT 22:6 Pol kil oklala kolpa kai la, “Kupm pikekg angkom kolpa kaino, kaino wreren Tamaskus ti pa, kupm tutusraing paipm ari wakg klalen wail angkaino kitnong ti kulnar plaing alentopm wail ak ran takgni wail a no pirng.
ACT 22:7 Kupm angko elng kinar kanokg ti, a kupm atning ok ur pa akwe nang a kupm Sol ti la, 'Kupm, kupm! Antokg kolai atom kitn or ungkwan uk wleket kupm ti?'
ACT 22:8 Atom kupm asentel la, 'Melnum wailen, kitn mla?' Ari kil la, 'Kupm Sisas a Nasaret a kitn ungkwantopm oropm alkopm wleket pa.'
ACT 22:9 Tu melnum a antiwopm pa, tu ari klalen ti kolti tuwa, tu ake wa atning ok a melnum ur a akwewopm pa.
ACT 22:10 Atom kupm asen la, 'Wailen, ti mpa kupm ntokg kolai?' Ari wa Wailen kil pa lanakopm la, 'Wrekg kaino Tamaskus pawo! Melnum ur a rpma kaino anong pa, mpa lanikeitn kwap wrongkwail a ak namputeitn itna la ikga kitn ik pa.'
ACT 22:11 Klalen akilen pa klalen wakget paipm ai wuten plaing kul kaporopm wulmpa, atom kupm ake antiwe ari kwei ur, ti ake antiwe mpa kupm ri ya pa. Atom tu melnum a antiwopm pa tu wamparpmewopm aye kaino Tamaskus ai.
ACT 22:12 Tu ayewopm kaino rpma kaino Tamaskus pa. Atom melnum ur a tu namput la Ananias pa rpma. Kil pa melnum ute wor a orngwatneikgen Maur Wailen, a kil melnum a katnun yangkipm titnongket pa yek kimeket ariworwor. Atom tu Suta wrongkwail a rka kaino anong pa, tu ari kaporng yangkipm la kil pa melnum wor.
ACT 22:13 Kil wrekg kul ariwopm, atom kil kul itna wrerentopm kolti, kil la kul kupm ti la, 'Kupm! Wulmpa akitnen pa kitnangku ri kweikwei tiwo!' Atom ak wang ketn pa wulmpa akupm pa palng wor ari kweikwei, atom kupm ariwel.
ACT 22:14 Atom wa kil wa lanakopm la, 'Maur Wailen amentepmen a tu mamikg mamin, mansan amentepmen katnun pa, pikekg takweiyeitn la kil ikga planteitn kweikwei wraur kil: la kitn uwi riwe nikgwalpm wasrongen wrongkwail akilen, a la kitn ri Melnum Ute Wor akilen a kil awi wor lawel, a la ikga kitn itning yangkipm kai ok a kil alkil pa lanikeitn.
ACT 22:15 Ti kitn pa melnum ur a kil takweiyeitn, la ikga kitn laron kuina ur akilen a kitn atning a ari pa, iye kai yela niki tu wrong kin a kipman pa la pa aklale.
ACT 22:16 Ti kitn rpma nungkwangen kuina? Kitn wrekg o! Kitn ukwen nang akilen pa, eng mpa kil ngklinseitn. Kitn kai eng tu kulukeitn, eng mpa ungkwan paipmpaipm a pikekg kitn antokg pa.'”
ACT 22:17 Pol kil wa lanaken kolpa la, “Kupm wa atnuurng Tamaskus pa yaper nar Serusalem ti pa, kupm kawor oklala naki Maur Wailen itna yipmingki wunen a yalming a Maur Wailen pa itna, ari nol nikgwalpm wulmpa akupmen pa aner kai titnowen kolti,
ACT 22:18 atom kupm ari Wailen pa palng lanakopm la, 'Kitn wrekg itatu utnuurng Serusalem ti kai o! Tu melnum a rka ti pa, ikgake tu itning ukipma yangkipm a kitn laron kupm ti naken pa.'
ACT 22:19 Ari kupm akalmpe kai Wailen pa la, 'Tu ikga itningkopm pa. Tu wrong kin a kipman kil pa tu ariwe a pikekg kupm kai atn yela tatu wan a men atning atning yangkipm a Maur Wailen atne pa, oren anelen melkg uk wleket tu a ukipma kitn pa, atom awiyen aye kai rpma wan tipmining pa, kolen a pikekg tu alntu pa ak pa.
ACT 22:20 Wa ak wang a pikekg tu akwesel Stipen pa amo atnen a kil laron nang akitnen ti pa, kupm pikekg itna ari awi wor. Wa apm a tu melnum a pikekg la ikweselel pa, am pikekg tu aner ermpa nepm akupmen tike, atom kupm ti ikgalen atnen itna tike.'
ACT 22:21 Ari Wailen kil nakopm la, 'Kitn kai o! Kupm mpa ukwaweitn kai anong yawatinet ur ai a tu a ake a Suta pa.'”
ACT 22:22 Tu wrong kin kipman wailet tu itna atning yangkipm a Pol kil la kolpa kaingkai, tu atning ok wris ur a Pol kil namput la la Maur Wailen la ukwawel kai eng tu a ake a Suta pa pipa, tu ipma wrekg kraraitn plalplal mainmain wli pa wli pa la, “Ilm or ungkwan melnum a kolpa imo kai ai tukuleikgen kanokg ti!”
ACT 22:23 Nikgwalpm a tu pa wakget kungkruwis paipm wrisen karken oklala pa, atom tu plalplal mainmain kolpa itna, wamparpme kangku aner apm atuwen ti angkli, a wa angkwol kanokg ningkrapm ti angkli elng kaino kwa wai.
ACT 22:24 Atom melnum a itna ep ikgalen tu melnum a almpwrong pa alken yangkipm titnongket, la tu uwi Pol pa iye kawor wan anong a tu melnum a almpwrong arke pa, la tu ik ampei pa ntrawel, a la tu isen ikor yangkipm yiprokgen na atom tu wrong kin kipman plalplal mainmain eng kil ti kolpa.
ACT 22:25 Atom tu aye Pol pa aye kawor yapo nepm wampel elngtirmpa plalng pipa, tu la ik ampei pa ntrawel. Ari kil ari melnum a itna arkekg melnum a itna ep pa itna wrerentel ti atom kil asentel la, “Yangkipm titnongket pa lanakepm la kipm ntokg mentepm almentepm anong yiprokg a Rom ti koltike? Kol a kipm iyewopm iye kai mentepm ntokg yangkipm pa ep, la kupm ntokg paipm ur pipa, kipm ik ampei pa ntrawopm om.”
ACT 22:26 Melnum a itna arkekg melnum a itna ep pa, kil atning a Pol la kolpa atom kil wa kai lanaki melnum a itna ep pa la, “Kitn ari a kitn antokg melnum pa kolpa, la pa kitn ak wor aki? Kil pa am mentepm almentepm kanokg yiprokg a Rom tike!”
ACT 22:27 Melnum itna ep pa kil atning kolpa atom kil kai asen Pol pa la, “Kitn lanikopm kitn alkitn ti riworwor ri, kitn ti anong yiprokg a kitn ti Rom aki?” Ari Pol akalmpe la, “Ei, anong yiprokg akupmen am Rom pake.”
ACT 22:28 Atom melnum itna ep a almpwrong pa la, “Kupm ti pa, kupm armpen marpm wail uk tu Rom, atom kupm palng anong yiprokg a Rom ti.” Ari Pol pa akalmpe la, “Kitn pa armpen pake, a kupm ti pa mansan pa awi nang nampokgen Rom atom angket kupm tike, atom kupm ti am a Rom pake.”
ACT 22:29 Tu melnum wet la mpa ik ampei pa ntrawel pa, tu anel atning kolpa atom tu ngkark atnuurngkel meen kolti kai. Wa kil alkil melnum a itna ep pa wa ngkark yat, eng kil wet lanaki tu yapo nepm wampel Pol, melnum a anong yiprokg a Rom pa.
ACT 22:30 Melnum a itna ep ikgalen tu melnum a almpwrong pa, kil am wasrongen la ikor yiprokgen kuina ur a tu Suta arki Pol pa riworwor. Atom or kong pa, kil la tu anelkgen ampei pa takwuleikgen nepm wam a Pol pa. Atom kil akwe tu melnum ipma krakgen itna ep a Maur Wailen, a tu mring man wailen wailen wrongkwail a Suta pa, tu wli rka wris pa, kil awi Pol pa kai kinar itna kinar wulmpa a tu pa antokg yangkipm pa.
ACT 23:1 Pol pa ikatnen tu mring man wail wail a rpma atning yangkipm pa, atom kil la, “Kipm wusok wusok, a wail wail amentepm Suta ti, ok wusok akupm pa ak atningke ari, kupm alkupm ti la, atn a rpma akupmen a ak ai kulngkul, kul angko wang ti pa wor, ake kupm antokg paipm ur. Maur Wailen kil ariwe pa.”
ACT 23:2 Ananias melnum ipma krakgen itna ep a Maur Wailen pa, kil karken atning a Pol kil la kolpa, atom kil lanaki tu melnum a itna wreren Pol pa la tu ntra okel Pol pa.
ACT 23:3 Ari Pol pa akalmpe ok a kil pa la, “Kitn pa kol melnum a kansil ak palk upaar rpma pa atning yangkipm akupmen ti kolen melnum ur a rpma atning atning yangkipm katnun kuina ur a yangkipm titnongket la pa. Ari kitn pa lanaki tu pa la tu ntrawopm kolpa atom pa kitn alkitn ti angketen yangkipm titnongket pake. Ikga wa Maur Wailen wa ntra okel kitn pa yat!”
ACT 23:4 Ari tu melnum tiur a itna wreren Pol pa wa lanakel la, “Pa kitn ti ak nokgel melnum ipma krakgen itna ep a Maur Wailen tuwa!”
ACT 23:5 Ari Pol pa akalmpe la, “Kipm yantin, a kipm wusok wusok, a wail wail alkupmen a Suta ti, arein, kupm ti wonmis la kil pa ake melnum ipma krakgen itna ep a Maur Wailen pa, kolpa atom ari kupm la kolpa. Wrkapm a Maur Wailen pa lala, ake mpa mentepm ik nokgel tu melnum wailen wailen a ikgalen mentepm wrong kin kipman pa.”
ACT 23:6 Pol kil ariwe la, tu mring man wailen wailen a rpma atning yangkipm akilen pa la tu tiur pa a Satyusi, wa tu tiur pa melnum a arpmen yangkipm yiprokgen a Moses. Kolpa atom kil lanaken yikakatnen la, “Kipm yantin, a wusok wusok, a wail wail akupmen a Suta ti! Kupm ti pa, kupm a melnum a arpmen yangkipm yiprokgen a Moses, a wa tu yantin a angket ale kul angket kupm ti pa, am a melnum a arpmen yangkipm yiprokgen a Moses pa yat pake. Tu awiyopm aye wli itna ti antokg yangkipm atnen yiprokgen a kupm ukipma ariwe irir kolen kipm melnum a arpmen yangkipm yiprokgen a Moses ti la, tu melnum a amo pa, tu ikga wa wrekg.”
ACT 23:7 Kil la yangkipm pa kai atom tu Satyusi, a tu melnum a arpmen yangkipm yiprokgen a Moses pa, anel wrekg akle tita wail, atom anel wako aro itna man man. Tu tiur kai anti tu Satyusi, a tu tiur kai anti tu melnum a arpmen yangkipm yiprokgen a Moses.
ACT 23:8 Tu Satyusi pa tu lala, tu melnum a amo kaingkai pa, ikgake wa wrekg wrekg, ikga kai main. Wa tu lala, ake wa maur akwapel ur a Maur Wailen, aki mring, a maur ur rpma pa, kalpis. Pake wa tu melnum a arpmen yangkipm yiprokgen a Moses pa tu lala, kweikwei kol mring, a maur, a maur akwapel a Maur Wailen pa rpma pa. Wa tu lala, tu a amo kaingkai pa, tu ikga wrekg wrekg pa.
ACT 23:9 Ari kalpis, am anel plalplal mainmain akle tita kai wail ise. Atom tu melnum a aroaro wonel tu yangkipm a Moses pa tiur atuwen a ak ak kwap nampokgen tu melnum a arpmen yangkipm yiprokgen a Moses pa, tu wrekg itna kapor angkeng la ok titnongket la, “Ake men ansil paipm ur a melnum pa antokg pa. Oklala a kil la pa, palpa mpa mring, aki maur ur, aki maur akwapel ur a Maur Wailen pa lanakel, atom kil lanako ur pake.”
ACT 23:10 Ari am anel akle tita kai wail ise. Atom melnum itna ep a tu melnum a almpwrong pa, kil rpma ari tu kreitnunen tita arkolng Pol pa kai pa kai pa, atom kil ngkark la mpa tu alm angkwrer Pol pa uken tita, kolpa ti kil mpa kai paipm imo ur pa. Kolpa atom kil uk yangkipm tu melnum alkil a almpwrong pa la, tu kinar nimpokgen titnongket pa rkolng Pol pa kai wam a tu pa iye kul kai kawor en ai, iye kai kaino rpmi wan anong a tu melnum a almpwrong arke arke ai.
ACT 23:11 Atom ak mining pa Wailen kil palng itna wreren Pol pa, a kil la, “Pol, kitn itni titnongket, ampur kitn ngkark! Kitn laron nang akupmen naki tu a itna Serusalem ti, ti mpam wa kitn wa laron niki tu a itna kai Rom pa kolpa yat pake.”
ACT 23:12 Okg or kong ti pipa, tu Suta tu takwem kai rka wris yapon yangkipm ampen la ilm Pol pa imo. Atom tu la naren Maur Wailen pa la, ake mpa tu il u a okipma pa, itni i, tu ilm Pol pa imo pen.
ACT 23:13 Ti tu melnum a yapon yangkipm ampen la ilm Pol imo pa, tu wrong pa watipmen angen kol kamel wekg pa.
ACT 23:14 Atom tu melnum pa tu kai ari tu melnum itna ep ipma krakgen a Maur Wailen, nampokgen tu melnum wailen wailen pa, atom tu lanaken la, “Men pikekg yapon yangkipm la naren Maur Wailen pa la, men ikgake il okipma ur, itni i i, men ilm Pol pa imo plalng pipa, men il okipma pa om.
ACT 23:15 Kolpa ti kipm pa nimpokgen tu mring man a kipm akwap rpma atning atning yangkipm pa, kipm ukwa yangkipm ti kaino kinsil lok upaar niki melnum itna ep a almpwrong a Rom pa la, kil ukwa Pol pa nar, eng mpa kipm isen uwi riwe worwor yiprokgen na paipm a Pol kil antokg pa. Tu la iyewel nar eng la ntokg yangkipm pa, men nimprampen rka la men mpa ilmpel ngko ya pa.”
ACT 23:16 Pake warim manto war a Pol pa kil itna arkolng nungkulkg pa atning ari a tu rka akor la la ilm Pol pa imo. Kil atning kolpa, kil am kaino wan anong a tu melnum a almpwrong arke pa, a kil asen tu pa la iyewel kawor eng kil a ri Pol. Atom tu ayewel kawor kil ari Pol pa, atom kil lanakel yangkipm a wuten kil arkolng nungkulkg atning pa.
ACT 23:17 Atom Pol kil lanaki tu kai lanaki melnum ur a itna katnukg melnum itna ep a tu almpwrong pa kul ariwel, atom kil lanakel la, “Kitn ikyakur melnum warimpen ti iye kai ri melnum itna ep ai, eng kil la mpa lanikel yangkipmok ur alkil ti.”
ACT 23:18 Atom melnum itna katnukg pa kil awiyel aye kai ari melnum itna ep alkil pa, lanakel la, “Pol melnum a rpma wan tipmining pa, kil wet akwewopm kai ariwel, atom kil lanakopm la, kupm ikyakur melnum warimpen ti iye kul riweitn, eng kil la mpa lanikeitn yangkipmok ur alkilen.”
ACT 23:19 Melnum itna ep alkil pa atning kolpa, kil wamparpme melnum warimpen pa aye kai itna laikge ur pa, atom kil asentel la, “Kitn kul ariwopm la mpa lanikopm yangkipm kuina?”
ACT 23:20 Atom kil lanakel la, “Tu Suta yapon yangkipm ampen la kinsil lok upaareitn, la ikgkil kitn uwi Pol pa iye kinar, eng tu mring man wailen wailen alntuwen a rpma atning atning yangkipm pa, la tu a uwi riwe worwor yiprokgen na paipm a Pol kil antokg pa.
ACT 23:21 Pake ampur kitn atning yangkipm a tu pa awi wor alken, atom kitn awiyel aye kinar pa. Eng ntei, tu wrong wailet paipm, klangkil kamel wekg pa, tu pa am anel rpma nungkwangen kil pa rpma ya a pake. Tu pikekg yapon yangkipm naren Maur Wailen la tu ikgake il okipma aki il u ur pa, itni i i, tu ilm kil ti imo plalng pa, tu il u a okipma pawom. Ti tu numprampen rka wulmpa ya la ri kitn mpa ik iye Pol pa kinar pa.”
ACT 23:22 Melnum warimpen pa lanakel yangkipm pa plalng pa, melnum itna ep pa la karkurngkel la, “Ake mpa kitn niki mla ur la kitn wuten nakopm yangkipm kil pa.” Atom kil ukwawel kil kai.
ACT 23:23 Atom melnum itna ep a almpwrong pa, kil akwe melnum wekg alkil a almpwrong a kul arkekg kil pa, kul alken yangkipm la, “Kipmekg numprampen tu melnum a almpwrong pa kolkil kolkil: tu melnum a angkom angkom ak nepm pa kol kamel wampwam, wa tu melnum a arpme arpme nimpa nepm watin pa kol kamel wraur tuwek wampwam, wa tu melnum a aye aye wri pa kol kamel wampwam pa. Atom kipmekg uwi tu pa kimeket iye wli itni wris, atom ik mining kwawen ti pa, kipmekg uwiyen kipm utnuurng ti ik lupm Pol pa iye kai kaino anong Sisaria pa.
ACT 23:24 Ti kipmekg numprampen nimpa nepm watin aripm ur pa iye nimpokgen, eng mpa Pol pa rpme. Atom kipm ik lupmel ikglentel riworwor iyewel kolpa kai kaino uk kai wam a Peliks, melnum wailen a ikgalen anong kanokg pa.”
ACT 23:25 Melnum itna ep a almpwrong pa alken yangkipm pa kolpa plalng pa, kil wa nira wrkapm ur pa alken, la mpa tu iye nukure Pol pa iye kaino uk Peliks pa. Wrkapm pa la kolkil la,
ACT 23:26 “Alkeitn wor Peliks, kitn melnum a nang arke wor wail amenen a ikgalen anong kanokg Palestain. Kupm Klotius Lisias, kupm niranteitn wrkapm kil.
ACT 23:27 Melnum kil pati, pikekg tu Suta arkulel la kol a ilmpel imo. Ari kupm atning a tu la kil pa la anong yiprokg akilen pa Rom pa, atom kupm nampokgen tu melnum alkupmen a almpwrong pa, men kai arkolngkel kai wam a tu pa aye kai takwuleikgen.
ACT 23:28 Atom pikekg kupm wasrongen la uwi riwe yiprokgen kuina a tu arkiwel la kil antokg paipm pa. Atom kupm awiyel aye kinar itna wulmpa a tu mring man alntuwen a rpma atning atning yangkipm pa.
ACT 23:29 Kupm atning a tu aklen tita arkiwel la kil kapor yangkipm titnongket ur a tu alntu Suta pa kolti, atom tu awiyel kai itna antokg yangkipm pa atnen pake. Pake ake kupm ari paipm ur a kil antokg pa, eng mpa tu uwiyel iye kawor rpmi wan tipmning pa, aki ilmpel imo pa, kalpis.
ACT 23:30 Ari melnum wris ur pa kul arumpen yangkipm ampen ur lanakopm la tu yapon yangkipm ampen la ilm melnum pa imo. Kolpa atom kupm ukwawel pinterngen kolti kai kainonteitn pake. Wa kupm lanaki tu melnum a arkiwel pa, la kil antokg kuina ur paipm pa, la tu kaino ntokg yangkipm nimpokgen melnum pa itni kitn pake.”
ACT 23:31 Oklala a melnum a almpwrong itna ep nira ela kai wrkapm pa am kai itna kolpake. Atom kil uk wrkapm pa tu melnum a almpwrong alkil pa aye. Atom tu atning katnun yangkipm a kil alken pa, atom tu awi Pol pa ayewel kaino ak mining mining kaino palng kaino anong Antipatris ai.
ACT 23:32 Tu okg rka pa, or kong ti pa, tu ak lakg tita: tu melnum a arpme arpme nimpa nepm watin pa akaye Pol pa kaino, a tu melnum a angkom angkom ak nepm, a tu melnum a aye aye wri pa tu yaper kinar wan anong a tu alntu melnum a almpwrong arke kinar Serusalem ai.
ACT 23:33 Tu melnum a arpme arpme nimpa nepm watin pa, tu kaino palng kaino Sisaria pa, atom tu uk Pol pa nampokgen wrkapm pa kai wam a melnum tukgunakg a ikgalen anong kanokg Palestain pa.
ACT 23:34 Atom melnum tukgunakg pa kil angkleikg wrkapm pa plalng pipa, kil asen Pol pa lala, “Ti kitn ti a anong kanokg yiprokg a i wli?” Ari Pol pa lanakel la, “Kupm a Silisia.”
ACT 23:35 Kil atning a Pol lanakel kolpa, atom kil lanakel la, “Ti kitn kai rpmi pen! Ikga tu melnum a arkiweitn pa kul no palng pa, kupm ikga rpmi itning yangkipm akipmen pa.” Atom kil lanaki tu pa awiyel aye kawor ikgalentel atnentel rpma wan wail alkilen a tu melnum tukgunakg arpme arpme a pikekg Erot la atom tu ale pa rpma nangkin a pa pen.
ACT 24:1 Wang wampwomis kai plalng pipa, Ananias melnum ipma krakgen itna ep pa kil awi tu melnum wailen wailen tiur, a melnum ur a arpmen yangkipm titnongket a tu Rom pa, nang akilen Tertulus, pa anel kul no Sisaria ti. Tu kul no kai rka wrik a tu atning atning yangkipm arke pa, atom tu kai itna la oklala kuina ur a la mpa tu ntokg nti Pol pa naki Peliks, melnum a Rom, kil itna tukgunakg a ikgalen Palestain a rpma atning yangkipm pa.
ACT 24:2 Plalng pipa, melnum tukgunakg pa lanaki tu awi Pol pa kulor itna eng la ntokg yangkipm pa, Tertulus pa awi yangkipm a tu pa kai itna oklala nampokgen Pol pa la, “Peliks, kitn pa melnum a nang arke wor wail amenen. Kitn ikgalento ariworwor, a alok angkeng ya nikgwalpm tiur a paipm pa, atom men rka meen atopen wor wang watin ak ai kulngkul am kul tike. Kitn pa nimnol arke wontrakole wor, atom kitn aye kweikwei weten wor wor aye wli ak angklin men ti rpma atopen wor, atom kweikwei wrongkwail pa palng ari wor.
ACT 24:3 Ti men ariweitn kai ya wrongkwail a kitn ak kolpa ari, pa wor wrisen, atom men wrongkwail a rka yela ti pa, men ariweitn kaporngkeitn yangkipm.
ACT 24:4 Pake ake mpa kupm rkolng yangkipm pa kai watin pa. Kupm la kitn nikgwalpm wor reinso pa, pa kitn itning oklala waiketn amenen kil.
ACT 24:5 Men ari melnum kil ari, kil melnum a arkolng men Suta wrongkwail ti kai angko wakum paipm a kil pake. Kil aye numpet paipm alkil pa ak aro wrong tiur pa kai itna nampokgen kil pa, atom tu akwewen la tu Nasareten. Atom am kil pa itna ep eng tu pake. Kil melnum a alm ipmawel tu melnum eng akle tita or tita.
ACT 24:6 A kil pikekg kalkut watinen yalming a Maur Wailen. Am yiprokgen wail manten a kil ak kolpa, atom ari men arkulel. [Men la mpa uwiyel iye kai itni ntokg yangkipm pa kutnun yangkipm titnongket almenen Suta pa,
ACT 24:7 ari Lisias, melnum itna ep a tu melnum a almpwrong pa, kil wli minsrang nampokgen titnongket, talpul men ti kai pa kai pa, a arkol wampel kil pa aye kai takwleikgen men ti.
ACT 24:8 A kil la la, melnum a la ntokg yangkipm nti melnum ti pa, mpa kil kul no ntokg yangkipm nti kil ti itni kitn tike.] Kolpa atom men ayewel wli itna ti, mpa kitn alkitn pa isen itning kai ok a kil alkil ai lanikeitn kuina ur a men arkiwel itna ti.”
ACT 24:9 Tertulus kil la oklala pa plalng pipa, tu Suta pa am wa anel la yangkipm wris irir kol a kil pa la pake, arki la Pol kil melnum paipm a antokg paipm kolpake.
ACT 24:10 Miring tukgunakg a ikgalen Palestain pa, kil ak ikg naki Pol pa la kil la oklala pawo. Atom Pol akalmpe la, “Kupm ariwe la wring wang watipmen kitn pikekg rpma atning atning yangkipmok wrongkwail a tu wrong kin kipman a yela a wli antokg yangkipm itna kitn ti. Kolpa ti ipma a kupm pa atopen eng kupm antiwe ikilmpe oklala a tu arkiwopm itna ti eng kitn itning.
ACT 24:11 Kalkuten a tu arkiwopm pa, pa ake itna am, itna wunongen, ti kitn alkitn isen pa, mpa kitn itning tu alntu mpa wa lanikeitn pa. Pa ake wa pikekg tak ai, ati kwekekg ti, ak wang wampwam yikakwompwekg kai ise, ak wang a pikekg kupm kinar rpma kinar Serusalem eng kapor kilko alein Maur Wailen pa.
ACT 24:12 Ti tu Suta ake ari kupm rapon ak oklala ur itna yipmingki wunen a yalming a Maur Wailen pa, eng mpa tu rkiwopm kolpa. Wa ake tu ari kupm akle or mla ur itna wan a men Suta atning atning yangkipm a Maur Wailen atne atne pa, aki itna yela tatu anong wail pa, eng mpa tu wrongkwail tutu ngko wli ri pa, pa kalpis.
ACT 24:13 Tu ake la yangkipm ur kai aklale, eng mpa planteitn la yangkipm a tu arkiwopm pa la pa aklale pa, pa kalpis.
ACT 24:14 Pake yangkipm wris ur a tu arkiwopm kil pa pati, kupm la la pa aklale pake. Kupm kil pa kupm kapor kilko alein Maur Wailen a mamikg mamin mansan amenen. Kil Ya ute aklale a Sisas, pake tu pa la kil ya raimpe. Pake kupm ukipma yangkipm wrongkwail a nira ela yangkipm titnongket a Moses, a wa ela wrkapm a tu melnum okwripm a Maur Wailen nira pa.
ACT 24:15 Am wa kolpake, kupm am ukipma rpma nungkwangen kol tu melnum a arkiwopm ti yat tike la, Maur Wailen la pa, mentepm tu a amo amo pa ikga wa wrekg, melnum ute wor a melnum paipm yatenen.
ACT 24:16 Kolpa atom kupm akangklei wang nikgwalpm arkekgen ikgalen ipma akupmen pa rka wriwen wor itna wulmpa a Maur Wailen, a itna wulmpa a tu wrong kin kipman.
ACT 24:17 Wring aripm ur kai ai pa kupm pikekg rpma tatu anong tiur ai. Plalng pa, wa kupm wa yaper kinar Serusalem, aye marpm a apmnung kweikwei tiur a men takwem pa aye kinar ak angklin tu men alpmen Suta a rpma tukwok pa. A wa kupm alwor uk Maur Wailen.
ACT 24:18 Pikekg itna wang a kupm kai kawor yipmingki wunen a yalming a Maur Wailen pa alwor uk Maur Wailen akwap kweikwei pa, kupm pikekg angklone, atom palng kukula wriwen wor itna wulmpa a Maur Wailen pa. Ti tu pikekg ariwopm pa. Ari ake pikekg tu ak wail tatu angko wli la watipmen wli pa wli pa nurkgatne wailet lawopm pa, kalpis.
ACT 24:19 Pake tu Suta tiur a anong kanokg Esia a rka ak wang pa ariwopm pa, kol a tu alntu pa wli itni wulmpa akitnen ti, lakiti kuina paipm a pikekg tu ari a kupm antokg itnangkai pa.
ACT 24:20 Aki kol tu melnum a arkiwopm itna ti, tu lakiti kuina ur paipm a tu ansil kai kupm ti ak wang a pikekg kupm itna kai wulmpa a tu melnum a rpma atning atning yangkipm kinar Serusalem pa.
ACT 24:21 Pa pati mpam oklala wris a pikekg kupm itna kuin a tu pa la yikakatnen naken la, 'Kupm ukipma la tu melnum a amo amo kaingkai pa, ikga wa wrekg wrekg. Am yiprokgen pa atom tu ayewopm wli itna antokg yangkipm itna kipm tike.' Am pikekg kupm la yangkipm ketn kolpa kolti itna kinar ai.”
ACT 24:22 Ti Peliks pa kil ariwe worwor Ya a tu katnun Sisas pa a wet Pol la pa, kolpa atom kil arukge wang pa aye kai wang ur ai lanaken la, “Lisias melnum itna ep a almpwrong pa kil nar pa, ikga kupm isen uwi riwe worwor ntokg yangkipm akipmen pa.”
ACT 24:23 Kil lanaki melnum a itna arkekg melnum a itna ep a almpwrong pa la, kil uwi Pol pa iye kawor rpmi wan tipmining pa pen. Pake ake mpa tu ik ampei pa yipowel aki elng yangkipm titnongket pa itni, eng ik ngketen tu mla ur melnum wor alkilen a wli la riwel a ngklinsel kweikwei tiur a kil tukwok pa.
ACT 24:24 Wang aripm ur kai plalng pipa, Peliks kil kul nampokgen kin alkil Trusila pa. Kin alkil pa a Suta. Peliks ukwa melnum ur kai akyakur Pol pa aye kul. Atom Pol pa lanakel yangkipmok tiur a la ya a ukipma Sisas Krais pa, atom kil atning.
ACT 24:25 Pol lanakel ya a la palng ute wor kai wulmpa a Maur Wailen, ya a alokipaar kitn alkitn, wa Maur Wailen ikga ntokg yangkipm nimpokgen mentepm ik wang kutnukg. Peliks kil atning yangkipm pa ari kil ngkark, a kil la, “Yangkipm a kitn la pa kai kol a pawom, a kai kitn kai pen! Wangkur wa kupm wa ilm wang ur nikeitn pa, wa kitn wa kul kul.”
ACT 24:26 Peliks kil ak num al Pol pa la kol a kil lkel marpm ur eng ik rmponel kil ti, eng mpa kil ngketen yangkipm a kil pa kai tukuleikg. Am wa yiprokgen ur pa yat, atom ari kil ukwa melnum ur pa akyakur Pol pa aye kul anti aripm ur, eng kil la ntiwel oklala.
ACT 24:27 Pol kil rpma wan tipmining pa kolpa kai, angko wring wekg pa pipa, Porsius Pestus kil awi wrik a Peliks pa wa itna melnum tukgunakg. Peliks pa kil wasrongen la kil a ntokg ipma a tu Suta pa itopen kil pa, kolpa atom kil elngen Pol kil rpma wan tipmining pa rpma.
ACT 25:1 Pestus kil awi kwap a melnum tukgunakg a ikgalen anong kanokg Sutia pa. Kil rpma wang wraur misen kai plalng pa, kil wrekg a Sisaria pa kinar kai kaino anong wail Serusalem pa.
ACT 25:2 Kaino anong wail pa tu melnum ipma krakgen itna ep a Maur Wailen, a tu melnum wailen wailen a tu Suta pa, tu wli ari Pestus pa lanakel oklala a ikga tu ntokg yangkipm nti Pol.
ACT 25:3 Wa tu aye oklala wor wor pa kai ak almpil ipma a Pestus la kil inti pa, kol a kil ukwa tu ikyakur Pol pa iye nar kul no ntokg yangkipm no anong wail Serusalem ti. Eng ntei, tu am numprampen la am rki ya pa nungkwangen la, kol a Pol pa nar kul pa, kol a tu ilmpel imo.
ACT 25:4 Ari Pestus pa akalmpenten la, “Pol am tu elngkirpma kaino wan tipmining angkaino Sisaria pake. Ti kupm ti wreren eng a wa yaper kaino pake.
ACT 25:5 Kol kipm la melnum pa antokg paipm pa, kol a kipm ukwa tu melnum wailen wailen tiur akipmen ti ntiwopm kaino Sisaria wai, eng nti melnum pa ntokg yangkipm kaino pa.”
ACT 25:6 Pestus kil rpma pa wang wampwomis wampwompwraur aki wampwam pa kai plalng pa, kil wa wrekg a pa kai kaino Sisaria ise. Kil okg or kong ti pipa, kil kawor rpma wan a antokg yangkipm pa rpma la itning yangkipm pa. Atom kil lanaki tu la uwi Pol pa iye wli itni eng tu ntokg yangkipm.
ACT 25:7 Tu awi Pol pa aye wli itna, tu Suta a pikekg angkinar Serusalem pa no pa, anel kul kai itna kapringentel itna. A tu aye yangkipm kaikuten wailet tiur a pikekg tu arkiwel pa, aye wli itna la ntiwel ntokg. Pake ake yangkipm ur a tu la pa plan la la kil antokg paipm kolpa, kalpis.
ACT 25:8 Atom Pol kil la yangkipm akilen pa ak wangket yangkipmok wrongkwail a tu arkiwel pa la, “Kupm pikekg ake antokg paipm ur, eng mpa ngketen yangkipm titnongket ur a men Suta pa, aki wa antokg paipm yalming a Maur Wailen pa, aki wa antokg paipm Kaisarus melnum tukgunakg a Rom pa.”
ACT 25:9 Pake Pestus pa kil la la yangkipm kil eng la uwi ipma a tu Suta pa, atom kil akasen kai Pol pa la, “Kitn awi wor la kinar Serusalem ntokg yangkipm nti tu pa itni kupm ti kinar pa aki?”
ACT 25:10 Ari Pol pa akalmpentel la, “A kupm wli itna wulmpa a kipm mring man a melnum tukgunakg Kaisarus pa, yangkipm akupmen ti pa mpam kipm a Kaisarus pa itning itni tike, a ake mpa iye kinar Serusalem pa. Ti kitn alkitn pa ariwe worwor pa, la kupm ake antokg paipm ur kai tu Suta pa.
ACT 25:11 Kol kupm ntokg kwei ur paipm, atom yangkipm titnongket pa la ilmpopm imo pa, pa kupm awi wor la tu ilmpopm imo pake. Pake kol yangkipm a tu Suta wli antiwopm antokg yangkipm itna ti pa, pa ake yangkipm ur aklale. Kolpa atom melnum ur ake antiwe elng kupm ti kai wam a tu pa, eng tu ilmpopm imo pa, kalpis. Kupm la mpa yangkipm akupmen ti ikga iye kai ntokg itni Kaisarus ai.”
ACT 25:12 Atom Pestus kil la nampokgen tu melnum ariwe a alkel nikgwalpm ariwe pa plalng, atom kil lanaki kai Pol pa la, “Kitn la mpa ntokg yangkipm itni Kaisarus pa pati, kai kitn kai eng ikga kitn ntokg yangkipm itni Kaisarus pawo!”
ACT 25:13 Tu antokg yangkipm a Pol pa kai plalng, atom wang aripm ur pa kai plalng pipa, Akripa nampokgen Pernike, muikgmayen alkil pa, tuwekg kul Sisaria la ukwor itopen Pestus pa. Akripa pa melnum tukgunakg a ikgalen anong kanokg a Pilip a Lisianias.
ACT 25:14 Tuwekg rpma pa wang aripm ur pipa, Pestus kil lakati oklala a Pol pa naki melnum tukgunakg pa. Kil lanakel kolpa la, “Melnum ur rpma wan tipmining a ti pa pikekg Peliks awiyel elngkerpma ak ai, ti rpma yong a ti.
ACT 25:15 Pikekg ak wang a kupm rpma kinar Serusalem pa, tu melnum tukgunakg itna ep a tu melnum ipma krakgen, a tu melnum wail wail a tu Suta pa, tu wli ariwopm, atom tu arkiwel lanakopm la, 'Kil pa pikekg antokg paipm, ti mpa kitn uk wleket ikilmpe paipm a kil antokg pawo!'
ACT 25:16 Ari kupm lanaken la, 'Yangkipm titnongket a men Rom pa pati la kolpa la, ake mpa rki melnum ur pa a ake kil wli itna ti antokg yangkipm, atom lkel wleket kalpmilel kalpmilel pa, kalpis. Ep pa mpa iyewel kul itni ntokg yangkipm pa, atom wa uk wang itni, eng mpa wa kil pa wa ikilmpe oklala a tu arkiwel pa pen, la kil ntokg paipm pipa, lkel wleket pa kutnukg kul.'
ACT 25:17 Tu atning kolpa tu antiwopm kul no. Ake wa kupm ayewen wang pa kai watinet pa. Men okg or kong ti kolti, kupm kai rpma wan a antokg antokg yangkipm pa, atom kupm lanaki tu awi melnum pa aye wli eng antokg yangkipm ti.
ACT 25:18 Atom tu melnum a antiwel antokg yangkipm pa tu itna kapringentel pa, tu arkiwel la kil antokg paipm, pake kupm a rpma atning yangkipm ti pa, kupm ake atning kil antokg paipm ur pa, kalpis.
ACT 25:19 Ti yiprokgen a tu arkiwel pa pati, tu alilakel tita ya alntuwen Suta a ukipma Maur Wailen alntuwen. A wa tu alilakel tita, a akle tita atnen oklala ur a Pol kil ti la Sisas, melnum ur a pikekg amo pa, kil pa wa wrekg rpma.
ACT 25:20 Ti nikgwalpm akupmen pa am kai titnowen ise, la mpa kupm uwi yiprokgen a yangkipm pa la kolai. Kolpa atom kupm asentel la kol a kil uwi wor pa pati, kol a kil kinar Serusalem ai, eng kol a kupm itning yangkipm akilen pa itni kinar ai.
ACT 25:21 Ari Pol pa la titnongket la, kil a yaper kai rpmi wan tipmining i pa pen, eng yangkipm akilen ti ikga iye kai ntokg itni Kaisarus ai. Kolpa atom kupm lanaki tu awiyel aye kai rpma wan tipmining pa pen. Atom ikga kupm wa ukwawel kil kai ntokg yangkipm itni Kaisarus ai.”
ACT 25:22 Akripa atning a Pestus la kolpa, atom kil akalmpe la, “Ti kupm am wa atopen kolpa yat pake, la ikga itning yangkipm a melnum kil alkil pa la pake.” Ari wa Pestus pa akalmpe la, “Ti ikgkil pa kitn itning yangkipm a kil pake.”
ACT 25:23 Okg or kong ti pa, Akripa ekg Pernike pa tuwekg kul nampokgen lukglukg wor wor kai kawor wan a rpma antokg antokg yangkipm pa, a nampokgen tu melnum itna ep a almpwrong, a tu melnum wailen wailen a ikgalen anong pa. Atom Pestus uk yangkipm tu pa atom tu awi Pol pa aye or wan pa.
ACT 25:24 Atom Pestus kil la kolpa la, “Melnum tukgunakg Akripa, a nampokgen kipm mla ur a antiwo wli itna ti pa, kipm ri melnum kil! Tu wrong kin kipman wrongkwail a Suta, tu la watipmen arki melnum a itna ti kinar Serusalem ai, wa itna Sisaria ti, anel la wli pa wli pa tirpmingen kupm ti la kil ake mpa rpmi pa, mpa ilmpel imo.
ACT 25:25 Pake ake kupm ansil paipm ur kai kil pa, la mpa ilmpel imo pa. Pake kil alkil pa la mpa ntokg yangkipm itni Kaisarus melnum tukgunakg kil alkil pa, kolpa atom kupm akwonalmpen la ukwawel kai Rom.
ACT 25:26 Pake kupm nikgwalpm kalpisen, la mpa kupm nira kolai eng niki melnum tukgunakg pa eng ik la melnum kil. Kolpa ti am kupm awiyel aye kul itna wulmpa a kipm wrongkwail ti, a wa itna wulmpa a kitn melnum tukgunakg Akripa tike. Kolpa eng mpa mentepm plalngten itning yangkipm a kil pa, eng mpa kupm riwe yangkipmok kuina ur a la mpa kupm nira eli wrkapm ti, eng ukwa iye nukure kil ti kai pa.
ACT 25:27 Kol ake kupm nira yangkipmok ur a lakati paipm ur a tu awiyel aye kai rpma wan tipmining pa ukwa nakurewel kai pa kupm ak paipm, pa ake ya ur a ak kolpa.”
ACT 26:1 Tu antokg yangkipm pa itna pa, Akripa lanaki Pol pa la, “Ti kitn ti wa antiwe la oklala akitnen ti kul eng men ti wa itning o!” Atom Pol kil ngkat wam ti kaino kwa a kil itna la akalmpe oklala a tu pa.
ACT 26:2 “Melnum tukgunakg Akripa, kupm akwonalmpen ari wor wrisen eng kupm ari kitn ti wli itna ti, atom kupm mpam amti ntokg yangkipm ikilmpe yangkipm wrongkwail a pikekg tu Suta arkiwopm pa itni kitn tike.
ACT 26:3 Eng ntei, kupm ariwe ari kitn pa ariwe worwor yangkipm titnongket, a rpma amenen Suta, a yangkipm yiprokgen a men antokg antokg alilakel tita pa. Kolpa ti kupm la kitn elng nungkulkg pa itni, eng mpa itning yangkipm akupmen ti.
ACT 26:4 Ti tu Suta pa tu ariwe worwor atn a rpma akupmen a pikekg kupm antiwen rpma anong kanokg yiprokg alkupmen ti ak wang a kupm warim wasek ai, kulngkul, a wa ak wang a kupm kinar rpma kinar Serusalem ai.
ACT 26:5 Ti tu pa pikekg ariwe kupm ti ep ak ai. Ti kol tu wasrongen pa, kol a tu laron kupm ti la kupm pikekg a melnum a arpmen yangkipm yiprokgen a Moses. Kupm pikekg katnun om wris ur a tu pa a elng yangkipm titnongket pa itna, la men mpa ukipma Maur Wailen kutnun kitila yek kimeket yangkipm pa riworwor.
ACT 26:6 Ti a kupm itna ti eng antokg yangkipm itna ti pati, atnen a kupm ukipma rpma nungkwangen kuina ur a Maur Wailen pikekg wangkir a yapo nampokgen tu mamikg mamin amenen pa la ikga kil ntokg pa.
ACT 26:7 Ti kil wangkir a yapo nampokgen tu om wampwam yikak wekg amenen a tu ukipma rpma nungkwangen la ri kuina ur ikga palng. Kolpa atom tu kapor kilko alein Maur Wailen pa miningkranen kolpa itna pake. Ti kitn melnum tukgunakg alkupmen, am kupm ukipma rpma nungkwangen la ri kuina ur Maur Wailen ikga ntokg pa, atom ari tu Suta arkiwopm itna tike.
ACT 26:8 Atom antokg kolai ti kipm ti ake wa ukipma la tu mentepm a amo kaingkai pa, ikga Maur Wailen la atom tu wa wrekg wrekg pa?
ACT 26:9 Pikekg ep pa kupm am pikekg wa akwonalmpen kolpa yat pake. Atom kupm pikekg nikgwalpm arkekgen akwap tumplowis eng arku nang a Sisas a Nasaret pake.
ACT 26:10 Kupm am pikekg akwap kolpa itna kinar Serusalem pake. Atom tu melnum ipma krakgen itna ep a Maur Wailen pa tu pikekg nira wrkapm wompel pa uk wor kupm ti, atom kupm awi tu wrong kin kipman wailet a Maur Wailen ayewen kai rpma kai wan tipmining. Tu elng ok itna wris la ilm tu pa imo. A wa kupm ti am pikekg wa antimprak tu pa la ilmpen imo pa yat pake.
ACT 26:11 Atom akangklei wang tiur pa kupm pikekg atn yela tatu wan a men Suta atning atning yangkipm a Maur Wailen atne pa. Kupm pikekg uk wleket tu wrong kin kipman a Maur Wailen, a kupm tirpmingenten la tu la paipmel Sisas pa. Ake pikekg kupm ak itna anong alkupmen pa kolti pa, kalpis. Nikgwalpm akupmen pikekg kungkruwis paipm kolti angko en, atom kupm pikekg wa kai atn yela tatu anong kanokg tiur ai, eng uk wleket tu pa.”
ACT 26:12 “Ak wang wris ur pa, kupm angkom kaino Tamaskus la itn eng la uk wleket tu wrong kin kipman a Maur Wailen pa. Kupm pikekg aye wrkapm wompel a tu melnum ipma krakgen itna ep a Maur Wailen nira uk wor uk titnongket kupm ti la kupm itn ikwap pa.
ACT 26:13 O, melnum tukgunakg alkupmen! Kupm kaino angko ya pa pipa, wreren eng a takgni no pirng ti, ari kupm ari wakg ur pa klalen wrisen, angen takgni ti, angkaino kitnong pa nar alentopm nampokgen tu melnum a antiwopm kaino pa.
ACT 26:14 Ak wang a men ari wakg klalen a nar alento pa, men kimeket men angko elng kai kanokg ai. A kupm atning ok ur a akwe nang akupmen Sol ak ok Ipru pa la, 'Kupm! Kupm! Wa kitn uk wleket kupm ti eng ntei? Kitn rkolng wanteng yilik a angkli arkeweitn pa, pa kitn alkitn ti awi wleket tike.'
ACT 26:15 Ari kupm asen la, 'Oi, melnum wailen, kitn mla pa?' Ari Wailen pa akalmpe la, 'Kupm Sisas, kupm melnum a kitn alkopm alkopm wleket pake.
ACT 26:16 Ti kitn wrekg itni o! Kupm palng ariweitn tike, eng la kitn itni melnum akwapel akupmen, eng kitn laron kuina ur a wet kitn ari ti, a kuina ur a ikga kupm planteitn kutnukg ai, niki tu wrong kin kipman.
ACT 26:17 Kupm ikga ukwaweitn kai eng tu a ake a Suta pa, wa tu wrong kin kipman akitnen ti tu ikga lkeitn wleket, pake kupm ikga ikglenteitn riworwor pa.
ACT 26:18 Kupm ikga ukwaweitn kai eng ikga kitn ntokg wulmpa a tu pa wulmpa ore, eng ikga tu plelng ipma, a uk yirokg miningket pa, wa kul kai klalen, tukulelkgen titnongket a Satan pa. Tu kul kai eng Maur Wailen, eng ikga tu ukipma kupm, eng ikga kupm ungkwan paipmpaipm atuwen, atom uwiyen iye kul rpmi nimpokgen tu wrong kin kipman pikekg ukipma kupm a Maur Wailen amprinsen eng alkilen pa.'”
ACT 26:19 Pol kil wa la kolpa kai la, “Melnum tukgunakg Akripa, kupm ake mpa tulpulng yangkipm kuina ur a Maur Wailen plantopm ti kupm ari pa.
ACT 26:20 Ti ep pa kupm laron yangkipm pa naki tu Tamaskus pa plalng pipa, wa a pa kupm wa nar kinar laron naki tu a Serusalem pa, wa anong kanokg a Sutia pa, a wa laron naki tu a ake a Suta pa yat. Kupm laron naken la tu plelng ipma ukipma Maur Wailen, atom kutnun nikgwalpm wor wor a Maur Wailen pa, eng mpa ik plan la tu am plelng ipma ise.
ACT 26:21 Am yiprokgen pa atom ari tu Suta arkulopm itna kawor yipmingki wunen a yalming a Maur Wailen pa, antokg la ilmpopm imo pake.
ACT 26:22 Pake pikekg Maur Wailen kil angklinsopm ikgalentopm ariworwor ak ai kulngkul, kul wli wang ti. Kolpa atom ari kupm itna ti laron yangkipm kil naki tu wrongkwail kin kipman a nang kalpisen, a a nang arke. Ti yangkipm kuina ur kupm la kil pati, ake wa kupm angkine oklala ur a pikekg Moses, a nampokgen tu melnum okwripm a Maur Wailen la ikga palng pa.
ACT 26:23 Ti kupm am wa la kol a pikekg tu pa la pake la, Krais melnum a Maur Wailen takwei la ik uwi tu wrong kin kipman pa, kil ikga rki kalkuten imo, a kil ikga wrekg i kirkap pa ep plan ya tu a amo pa, iye klalen pa ik len kipm a ake a Suta pa, a wa ik len men wrong kin kipman a Suta ti yat.”
ACT 26:24 Ak wang a Pol kil la yangkipm pa itna pa, Pestus la plalplal angkon main nsra angketen oklala a Pol la pa la, “Pol, kitn pa titno. Kitn awi ariwe wailet, kolpa atom antokg kitn titno paipm kolti.”
ACT 26:25 Ari Pol akalmpe la, “Melnum wailen wor, kitn alkopm titnowen pake kupm nikgwalpm arke wontrakole. Kuina ur a kupm la pa, pa wor aklale wrisen.
ACT 26:26 Melnum tukgunakg Akripa, kitn ariwe kweikwei wrongkwail a kupm la ti, ti kupm antiwe a laron kweikwei wrongkwail pa kimeket kai itni nungkulkg wulmpa akitnen. Ti kupm ariwe la kitn pikekg atning a ari kweikwei wrongkwail pa ise. Eng ntei, kweikwei wrongkwail pa pikekg ake antokg itna wrik laikge aki ampen ur pa, kalpis.
ACT 26:27 Melnum tukgunakg Akripa, ti kitn pa ukipma yangkipm a tu melnum okwripm nira nira pa aki kalpis? Kupm ariwe la kitn ukipma pa.”
ACT 26:28 Ari Akripa pa akalmpe kai Pol pa la, “Kitn akwonalmpen la oklala waiketn a kitn la kolpa, antiwe mpa ik ilmpil nikgwalpm akupmen ti, eng mpa kupm ukipma Maur Wailen tike?”
ACT 26:29 Ari Pol akalmpe la, “Oklala waiketn aki, oklala wail aki, a kupm lanakepm ti pa, pa kupm oklala naki Maur Wailen la kil ngklin kitn ti, wa tu wrongkwail a atning yangkipm akupmen rka ti, eng la kipm ukipma Maur Wailen irir kol kupm alkupm ti. Pake kupm ake wasrongen la mpa tu yipowepm ik ampei kol a tu yapowopm ti pa.”
ACT 26:30 Tu atning yangkipm pa plalng pa, melnum tukgunakg Akripa pa wrekg. Wa mring itna ep a ikgalen anong kanokg pa, wa Pernike, nampokgen tu mla ur a wet rpma nampokgenten pa, tu wa wrekg.
ACT 26:31 Tu atnuurng wan a tu arpme pa la kawor en pa, tu akorla lanaki tita la, “Melnum pa kil ake pikekg antokg kwei ur paipm, atom tu awiyel aye kai rpma wan tipmning ti, aki la mpa ilmpel imo pa.”
ACT 26:32 Tu oklala kolpa kai pa, Akripa pa lanaki Pestus pa la, “Melnum pa kil alkil pa pikekg la kai ntokg yangkipm itni Kaisarus ai, melnum tukgunakg a Rom ai. Kalpis pati, kol a kitn elngen eng kil kai. Ari kai kil rpmi nangkinen i pa pen.”
ACT 27:1 Tu yapon yangkipm la men mpa uwi wan unokgen pa kai kaino anong kanokg Itali. Atom tu akaye Pol pa nampokgen tu melnum melkget tiur a rpma wan tipmining pa elng kai wam a Sulius melnum itna ep a tu melnum kamel wampwomis a almpwrong a wailet tiur ai a melnum tukgunakg Kaisarus ikgalen pa.
ACT 27:2 Men tipra kaino wan unokgen a anong Atramitium a numprampen rka la kaino kai yela wrik a wan unokgen kai rkawe rkawe a itna tatu anong kanokg a Esia pa. Atom men wrekg a pa kaino. Atom Aristarkus melnum ur a Tesalonaika a anong kanokg Masetonia pa, kil wa antiwo yat.
ACT 27:3 Men rka wan unokgen pa atn kolpa kaino. Kong ti pa, men palng rka kaino Saiton ai. Men rka pa, Sulius pa kil plan nikgwalpm wor Pol pa, a kil uk wor la Pol kil kai ari tu wokgmprak alkilen pa, eng la tu ikglentel a ngklinsel kweikwei tiur a kil tukwok pa.
ACT 27:4 Wa men wa wrekg a anong pa, wa men la kaino pa, ari wripm mring mring pa el titnongket kolpa nar akalmpen wan unokgen pa. Kolpa atom men wa alok wan unokgen pa wa kai kawor kapringen Saiprus anong kanokg a ela unokg kuin pa, ak angkom no pa kai pake.
ACT 27:5 Men wa angket or unokg kuin pa al akule anong kanokg a Silisia, a anong kanokg a Pampilia pa or pa kai rka kai anong Maira a anong kanokg a Lisia.
ACT 27:6 Men kai palng kai Maira pa, melnum itna ep a melnum kamel wampwomis a almpwrong pa kil awi wan unokgen ur a tu Aleksantria pa la kai kaino Itali pa. Atom kil awi men pa kai kaino rpma wan unokgen pa kai.
ACT 27:7 Men rka wan unokgen pa rka wang aripm ur ai, ampen meen meen kolpa kaingkai kaino, ari wripm mringmring wail paipm pa el titnongket wail angkaino anong Nitus pa kul nar akalmpento. Atom wa men wa elng nar wangket or unokg kuin pa kai kinar akanele Salmone ai, anong wulompen a anong kanokg Krit a ela unokg kuin pa, ak angkom kapringen kolpa kai.
ACT 27:8 Men ampen meen meen kolpa katila unokg yamping a Krit pa, kolpa kai palng kai wrik ur a wan unokgen arke arke pa, a tu namput la Unokg Kapmet Wor, kai wreren anong Lasea pa.
ACT 27:9 Men pikekg awi wan unokgen ampen ampen angkai pa kul rka Lasea ti, la wa or pa kai eng kaino Rom pa, pake men kaken wang wailet paipm eng a pa kul pa. Atom kol wa men wa aren i pa wa kai pa, pa ake wang wor, pa wang paipm a unokg tapor wail. Wa wang wail kol a men ilwor uk Maur Wailen eng ungkwan paipmpaipm a tu wrong kin kipman ti pa, pa wa wang paipm yat, pake wang pa am kai ise. Ti wang a men la kol a kai ti pa, ti wang paipm om. Atom Pol la angkeng la,
ACT 27:10 “Kipm melnum pa, kupm ari kol mentepm uwi wan unokgen ti kolpa kai pa, mentepm mpa kai uwi wang paipm. Wan unokgen ti mpa tipurng nimpokgen wrikya ti elng kinar unokg kanokg ai. A wa mentepm melnum ti yat mpa wa elng kinar il u imo.”
ACT 27:11 Ari melnum itna ep a tu kamel wampwomis a almpwrong pa, kil ake atning yangkipm a Pol la pa, kalpis. Kil atning yangkipm a melnum a wamparpme yampis taklo a wan unokgen, a melnum yan a wan unokgen pa la pake.
ACT 27:12 Ti wrik ti pa ake wor a kol a wan unokgen rke rki wrik ti pa ik wang a wripm mringmring wail el pa. Kolpa ti tu melnum wailet pa tu akwonalmpen la, mpa men utnuurng wrik ti kai ikwiyen, kol men ntiwe kai pa, mpa men kai palng kai anong Piniks ai. Rki pa rki nangkin wang a wripm mring mring wail pa el kai plalng. Wrik a wan unokgen mpa kai rki i nangkin kai pa pati, itna anong kanokg Krit tike, rka won kai yamping wekg a takgni kinar. Pa wrik wor a wripm mring mring ake antiwe mpa tipurng wan unokgen pa.
ACT 27:13 Atom wripm pa el waiketnketn kolti a wam wangkokg pa no. Kolpa atom tu akwonalmpen la tu mpa antiwe mpa kutnun nikgwalpm kol a wuten tu la pa. Kolpa atom tu arkolng wes kaikut a ak arkul wan unokgen pa no kwa ti kolti, a tu awi wan unokgen pa tu kai antilawe unokg yamping a Krit ti kai.
ACT 27:14 Ari kalpis. Ake wa itna watin, wripm titnongket wail ur pa el a anong wompel a Krit ti kul nar atne wan unokgen pa. Wripm pa tu namput la “Wripm a el a wam wi wli.”
ACT 27:15 Wripm mring mring wail pa el titnongket nar akayewen wan unokgen pa kinar. Atom tu alok wan unokgen pa ari ake antiwe. Kolpa atom tu elngen kolti katila titnongket a wripm ti aloko ayewo kolti kai.
ACT 27:16 Wripm ti ak aloko kolpa aye kaingkai, kai ak angkom Kauta anong kanokg waiketn ur a ela unokg kuin pa, atom ak ampri wripm a kul titnongket pa kai wusokenen. Atom men antiwe aken kwap wail paipm eng men arkolng nim unokgen a rka wan unokgen yamping a kol a wripm kipor ti aye kul no elngtirpma wan unokgen ti.
ACT 27:17 Men arkolng aye kul no plalng pipa, men akwonalmpen la mpa wan unokgen ti kai tipor paipm. Kolpa atom men awi ampei ti ak angkuten wan unokgen ti tongtong. Wa men wa ngkark, la mpa wripm pa ak awi wan unokgen pa kai al itna wrik kangirngket ur a tu Aprika pati, wan unokgen ti mpa kai tipor paipm. Kolpa atom men arkolng apm a tita eng wripm akawi wan unokgen pa aye kai pa aye nar, a unokg pa tapor titnongket akayewen kolpa kai.
ACT 27:18 Wripm mring mring pa el, a unokg pa tapor kai wail paipm, kolpa atom antokg men ngkark paipm. Atom men rka mining pa kai, or kong ti pa, tu wrekg itna, a awi wrikya a rpma wan unokgen pa, angkli angkli elng kinar unokg ai.
ACT 27:19 Wa men rka mining ur pa kolpa kai, akwe ti pa, wa tu ipma kaikut paipm, atom tu alntu anelkgen a awi kweikwei alkil a itna wan unokgen ti ak wam alntu ti wa angkli elng kinar unokg ai.
ACT 27:20 Ti wang watipmen pa ake wa men ari takgni aki kumeim ur pa, kalpis. Wa wripm mring mring pa am wa el, a unokg pa tapor titnongket kolpa itna pake. Kolpa atom nol a men ti katir kaino rka kaino ok kaluk ai kolti, la men mpa kai paipm plalng kolti.
ACT 27:21 Ti wang watin a wripm mring mring el, a unokg tapor titnongket a pa kul pa, ake men awi aki al okipma ur, kalpis. Atom Pol wrekg itna kuin atuwen pa, a kil lanaken la, “Kipm melnum pa, pikekg kipm itning yangkipm a kupm lanakepm la ake mpa kipm uwi wan unokgen ti i Krit pa kul ti pa, pa kipm kol ake uwi wang paipm kol ti, a kol ake kipm ngkli kweikwei akipmen ti kai unokg ti.
ACT 27:22 Pake ak wang kil pa kupm lanakepm la, ipma akipmen pa ngko i o! Eng ntei, ur akipmen ti ake mpa kai paipm il u imo pa. Wan unokgen ti kolti kai paipm tuwa, pake kipm mpa wor pa.
ACT 27:23 Kupm ti pa melnum akwapel a Maur Wailen, ti wuten ak mining ti pa kil ukwa maur akwapel akilen pa nar itna wrik yamping akupmen ti.
ACT 27:24 Atom akwe nang akupmen Pol ti lanakopm kolkil la, 'Kupm! Yangkipm a pikekg kitn la kitn ikga kai ntokg itni Kaisarus melnum tukgunakg a Rom pa, pa kitn ikgam kai pake. Ti ampur kitn ngkark la kipm mpa kai paipm pa. Maur Wailen kil uk tu melnum wrongkwail a antiweitn rpma wan unokgen ti kimeket kai wam akitnen pake, la wris ur atuwen pa ake mpa imo pa, kalpis, tu mpa rpmi wor kimeket.'
ACT 27:25 Maur akwapel a Maur Wailen wet lanakopm ak mining kolpake. Kolpa ti kipm melnum pa, ampur kipm ngkark, num walmpopm akipmen pa ngko i o! Kupm ukipma Maur Wailen la kil mpa ntokg kitila kolen kuina ur a wet maur akwapel alkil lanakopm pa.
ACT 27:26 Mentepm mpa wor, pake mpam wripm pa ngkat laiko angkliwo kolti elng kai rka kai anong kanokg ur a itna unokg kuin ai.”
ACT 27:27 Wripm mring mring titnongket wail almpento aye kai ak wasrongen alkil aye kai unokg Metiterenian pa. Am men rka kolpa kai, mining wampwam yikakwompwraur pa kai plalng, okg or kong ti kai wreren mining kuin ti pa, tu melnum a akwap itna wan unokgen pa, tu atningke la men wreren eng a kai rki unokg yamping ur pake.
ACT 27:28 Kolpa atom tu angkli ampei pa elng kinar ak antin unokg ti ari watinet a pa. Tu angkleikg ari kolen antiwe wampeng watin wikgwikg a angkine tita. Wa wripm pa wa ayewo kolpa kai ketn ketn pa, wa tu antin anti ur ari antiwe wampeng wraur, kai wreren wreren werpmen pake.
ACT 27:29 Pake tu ngkark paipm wrisen la mpa wan unokgen ti kai il itni wes ur pa, atom mpa tapor. Kolpa atom tu anelkgen wes kaikut wikgwikg ur pa kinar itna wan unokgen kulu pa, angkli elng kinar unokg kanokg ai, eng ak arkul wan unokgen pa rka. A wa tu arpmen ukwa la kil ikwe itatu.
ACT 27:30 Atom tu melnum a akwap itna wan unokgen pa tu akor ya la ngkirk tukuleikgen wan unokgen pa. Atom tu alekg nim unokgen pa elng kinar unokg pa kansil akupaaren la, tu a uwi wes kaikut tiur alkil a ak arkul arkul wan unokgen eng kai rka pa, ngkli elng kinar unokg ngko tukgunakgen a wan unokgen pa.
ACT 27:31 Ari Pol lanaki melnum itna ep a melnum kamel wampwomis a almpwrong pa, a nampokgen tu melnum alkil a almpwrong pa la, “Kol tu melnum a akwap itna wan unokgen ti, kol tu ngkirk utnuurng wan unokgen ti pa, pa kipm ti kol a kai paipm.”
ACT 27:32 Tu melnum a almpwrong pa tu atning kolpa, atom tu wangketen ampei a nim unokgen a tu alekg elng kinar unokg pa takwleikgen, atom unokg ak awi nim unokgen pa aye kai.
ACT 27:33 Atom wreren eng a takgni a no pus ti pipa, Pol tilpen la tu uwi okipma pa il o. Kil lanaken kolpa la, “Wang wampwam yikak wikgwikg pa kipm pikekg ngkark rpma nampokgen ipma kaikut paipm wrisen. Atom am kipm rka kolpa rka atn ak nikg kolpa atn pake, ake wa kipm awi okipma ur al.
ACT 27:34 Kolpa atom ti kupm tilpepm titnongket la kipm uwi okipma ur pa il, eng mpa ik titnongketel ipma akipmen pa, eng mpa kipm rpmi.”
ACT 27:35 Kil lanaken oklala pa plalng, kil awi nok tingklak pa aye itna wulmpa a tu kimeket a rka pa, atom kil uk wor Maur Wailen pa, atom kil kapor nok tingklak pa, a kil al.
ACT 27:36 Tu ari a kil pa al kolpa pipa, ipma a tu pa angko a om, atom tu awi okipma pa al.
ACT 27:37 Ti men kimeket a rka wan unokgen kil pa kol kamel wampwam yikakwompwraur tuwek wampwam yikakwomis yikakwompwris (276).
ACT 27:38 Tu awi okipma pa al antiwe plalng pipa, tu awi wrikya okipma pa angkli elng kinar unokg pa, eng ak angklon kukula wan unokgen pa.
ACT 27:39 Tu rka kolpa kai akwe, wa or kong ti takgni no pus ti pipa, men ari kanokg pawom. Pake tu melnum a akwap itna wan unokgen pa tu ake ariwe worwor la la men kai rka wrik a i. Pake tu ari wrik kapmen wor ur a unokg kawor kapringen alen rka pa. Atom kol tu ntiwe pipa, mpa tu iye wan unokgen pa or pa kai rki kawor pake.
ACT 27:40 Tu la kolpa plalng pa, tu wangket ampei a alekg wes kaikut a ak arkul wan unokgen pa elng kinar rmpa unokg a pa, a tu anelkgen ampei takwuleikgen yo timpam wail wekg a ak angket u eng ak alok wan unokgen. A wa tu arkolng apm kaki wail pa aye kaino alekg rka kaino tukgunakg a wan unokgen pa, atom wripm pa almpen apm kaki wail pa. Atom tu ak yo timpam pa ak angket unokg pa, ak alok wan unokgen pa la iye kai kawor rki kawor wrik kapmen pake.
ACT 27:41 Ari wan unokgen pa kai itna kangirng ur a anip itna unokg pa. Atom wan unokgen tukgunakg pa al itna kangirng pa, kawor karng tongtong rpma pa kolti, ti ake antiwe mpa kil kai. Kolpa atom unokg pa tapor titnongket kul ak kapor wan unokgen kulu pa tapor kai manman paipm kolti.
ACT 27:42 Atom tu melnum a almpwrong pa tu akor nikgwalpm la, tu mpa ilm tu melnum a pikekg tu awiyen rpma wan tipmining la iye kai Rom pa plalng, eng ake mpa wris ur atuwen pa lkgaang ngkirk kai numpworen pa.
ACT 27:43 Pake melnum a ikgalen tu kamel wampwomis a almpwrong pa kil arein Pol, kolpa atom kil angkengken la, ake mpa tu ilmpen imo pa. Atom kil uk yangkipm tu melnum a antiwe lkgaang pa la, tu tipra i wan unokgen pa elng kinar unokg pa lkgaang ep kai werpm pawo.
ACT 27:44 Wa tu tiur a akwekgel lkgaang pa, mpa tu uwi yo wompel aki kweikwei wompel wompel a wan unokgen a unokg kapor pa, atom mpa tu ik lkgaang kai werpm pa. Am men ak katila ok a melnum itna ep a tu melnum a almpwrong pa la, atom men plalngten ti men kai wor kimeket kai werpm ai.
ACT 28:1 Men kimeket kai wor rka kai werpm ai. Men rpma pa, tu lanako la anong kanokg a men rka pa Malta, anong kanokg a ela unokg kuin.
ACT 28:2 U wail awei almpo wropuko paipm wrisen, ari tu anong yiprokg a itna pa tu planto nikgwalpm wor wrisen. Kolpa atom tu awiyo aye kai alilento wakg wail manten pa, men arkgin rka.
ACT 28:3 Wa Pol wa kai akor nung tiur pa ungkwanti aye kul angkli elng kai wakg pa. Ari ul paipm ur a rpma nung ti kul or katikir ngkarken wakg pa, elng kai alm Pol pa plalplal rka wam pa.
ACT 28:4 Tu melnum anong yiprokg a rka pa, tu ari ul a plalplal rka wam a Pol pa, atom anel lanaki tita la, “Melnum ti pa melnum ur a alm melnum amo pa ur pake. Ti wet kol a kil imo kai unokg ai, ari kalpis, kil kul wor kul werpm ti. Kolpa ti ul pa almpel ti pati, pa mpam Mring Maur a akalmpe akalmpe paipm a mentepm antokg pa ilmpel imo pake.”
ACT 28:5 Ari Pol laiken wam ul pa elng kai wakg al kai wakg ai. A ake wa kil awi paipm ur atnen a ul pa almpel pa, kalpis.
ACT 28:6 Atom tu itna ari la mpa num a Pol pa oren, aki a kil elng ngko imo, ari kalpis. Tu itna nungkwangen wang watin, ari ake wa tu ari kuina ur palng kai num a Pol pa. Atom tu plelngen nikgwalpm alntu pa la la, palpa kil maur.
ACT 28:7 Kanokg a itna wreren wrik ti pati, a Puplius melnum itna ep a ikgalen tu wrong kin kipman a rka anong kanokg a ela unokg a ti. Melnum pa kil awiyo aye kai wan anong alkilen pa ikgalento ariworwor. A men antiwel rka pa wang wraur.
ACT 28:8 Ti yan a Puplius pa numpet numpwakget antii walmpopm kalkuten paipm rmpa wrik ai. Atom Pol kil kawor ariwel kawor wan alkilen pa, oklala naki Maur Wailen, a elng wam pa ela num akilen pa, atom numpet a kil pa palng wor.
ACT 28:9 Tu ari a kil ak kolpa, atom melnum numpet tiur a rka anong pa, tu aye numpet alntu pa wa wli, eng Pol oklala naki Maur Wailen ak angklin numpet atuwen pa pipa, numpet atuwen pa wa palng wor.
ACT 28:10 Ti tu anong pa tu ngkat nang amenen ti, alko ipma wor atopento ikgalento ariworwor kolpa, men antiwen rka pa kainil wraur. Plalng pipa, men la numprampen la uwi wan unokgen kai ti pipa, tu takwem kweikwei a men tukwok pa, aye aklakgto aye kai alupmto kai wan unokgen ai.
ACT 28:11 Men rka anong kanokg Malta pa kainil wraur plalng, wa men wa awi wan unokgen ur a pikekg kul rka unokg yamping a Malta ti, rka nangkin wripm mring mring wail a el pa. Wan unokgen pa pati, a anong wail Aleksantria. Tu ipaar yo tiplasen ur kalingen mring maur tiplasen wekg unokgen a tu namput la Kastor ekg Poluks, a ikgalen wan unokgen pa atom pikekg elngitna won a wan unokgen pa.
ACT 28:12 Men wa awi wan unokgen pa atnuurng Malta ti kaino anong Sirakyus pa rpma wang wraur.
ACT 28:13 Wa men wa wrekg a pa kaino rka kaino anong Rekium pa. Men okg rka pa or kong ti, ari wripm el angkinar yirokg pa no almpento aye kaino, atom wang wekg pa am men or unokg pa kaino palng kaino anong Puteoli ai.
ACT 28:14 Atom kaino anong pa men ansil tu melnum tiur a mentepm ukipma Krais pa. Tu asento la men ntiwen rki pa kol wang wampwomis wampwompwekg pa pen. Atom men antiwen rka pa kai plalng pipa, wa men wrekg a pa, men wa la kaino Rom.
ACT 28:15 Tu melnum atuwen a mentepm ukipma Krais a rka kaino Rom pa, tu atning la men mpam kaino pake, pa tu kul nar itnanto ya kolpa nar ansilo angko wrik a tu armpen armpen okipma atne angko ya wail a tu namput la Apius. Wa men angkom kolpa wa kaino pa, men wa ansil tu tiur angko wan wraur a tu kai armpen eng okge okge pa. Pol kil ikg kaino ari tu pa, kil atopen paipm awi titnongket kai tu pa, atom kil uk wor Maur Wailen.
ACT 28:16 Men kaino kolpa kaino kaino palng anong wail Rom pa. Pa melnum itna ep a ikgalen wan tipmining pa, kil awi wor la Pol mpa rpmi wan ur alkil manet, a wa melnum wris ur a almpwrong pa mpa ntiwel rpmi ikglentel.
ACT 28:17 Pol kil rpma wan tipmining pa, wang wraur pa plalng pa, kil akwe tu melnum wailen wailen a tu Suta pa tu wli rka wris. Tu kimeket wli rka wris plalng pa, kil lanaken la, “Kipm mentepm almentepm Suta pa! Kupm ti pikekg ake antokg kwei ur paipm, eng ak arku nang a mentepm Suta pa, aki elukgen atn a rpma a tu mamikg mamin mansan amentepmen pa, kalpis. Kupm pikekg tu arkulopm awiyopm aye kawor rpma wan tipmining a Serusalem, a tu uk kupm ti kai wam a tu Rom pa kalpmilel kolti.
ACT 28:18 Atom tu awiyopm kai itna antokg yangkipm. Tu atning yangkipm akupmen pa, ari ake tu ansil paipm ur a kupm antokg, eng mpa tu ilmpopm imo pa, kalpis. Kolpa atom tu la ungkwantopm i wan tipmining pa kul or kai en.
ACT 28:19 Ari tu Suta pa karken la ake mpa tu elngen kupm ti or en pa. Ya wrongkwail pa tu amprinsopm plalng, ti ya wris ata mpa kupm laniken la, yangkipm akupmen pa mpa iye kul ntokg itni Kaisarus tike, ake mpa ntokg itni kai Serusalem pa. Pa ake la kupm yangkipm ur itna eng la mpa ntokg numpokgen tu mentepm almentepm ti pa, kalpis.
ACT 28:20 Yiprokgen a kupm akwewepm wli la riwepm a ntiwepm oklala kil pati, atnen a kupm ukipma rpma nungkwangen melnum amentepm Isrel, rpma nungkwangen ariwe la ikga yaper nar pa. Am yiprokgen pa atom tu awiyopm aye or angkutentopm elngtirpma wan tipmining ti.”
ACT 28:21 Pol lanaken kolpa atom tu akalmpentel la, “Men ake awi wrkapm ur a tu mentepm Suta nira angkai pa kul ak lanako kitn pa. Wa tu melnum ur amentepmen Suta a angkai pa kul pa, ake wa tu lanako aki lakati nako la kitn pa paipm pa, kalpis.
ACT 28:22 Pake men wasrongen la itning nikgwalpm oklala ur a kitn lakati Sisas pake. Eng ntei, men ariwe la tu wrong kin kipman yela ti pa, tu la paipmel elukgen tu wrong tiur a aro itna man a ukipma Sisas a kitn kai antiwen rpma pa.”
ACT 28:23 Kolpa atom tu alm wang nampokgen Pol, la wang ur pa wa tu wa wli wa riwel. Atom ak wang a tu alm pa, tu wrong kin kipman wailet ketn ketn, tu kai wan tipmining a Pol kil arpme pa. Atom ak kong ai kai elngen nungkurikg pa, kil lanaken ariworwor a laron naken la Maur Wailen la itni Wailen ikglen nol nikgwalpm atuwen pa. Wa kil awi yangkipm titnongket a Moses, a yangkipm a tu melnum okwripm a Maur Wailen pa, eng la ik plelngen nikgwalpm a tu pa uwi riwe riworwor la, Sisas pa melnum a tu nungkwangen pake.
ACT 28:24 Atom tu tiur pa tu ukipma atning yangkipm a Pol la pa la, pa aklale. Pake tu tiur pa tu ake ukipma yangkipm a Pol la pa, la aklale pa.
ACT 28:25 Kolpa atom ipma a tu pa itna man man nowe nare, atom tu la wrekg kai. Ari Pol kil lanaken yangkipm ur pa kolkil la, “Maur Wor kil la yangkipm aklale naki tu mamikg mamin mansan alkipmen, pikekg la wli ok a melnum okwripm Aisaia la kolkil la,
ACT 28:26 'Kitn kai ri tu wrong kin kipman kil, atom kitn laniken kolkil la, “Kipm ikga itning itning pake kipm ikgake riwe yiprokgen alkilen pa. Kipm ikga riri pake kipm ikgake riwe kuina ur.”
ACT 28:27 Kitn kai laniken kolpa, eng ntei, ipma a tu wrong kin kipman pa am kalnten kakiren paipm ise. Tu ampri nungkulkg alntu ti, eng ake mpa tu ik itning kupm ti. A wa tu ampri wulmpa alntu ti, eng ake mpa tu ik ri, eng ake mpa wa nol nikgwalpm atuwen pa wa umpen wontrakole uwi riwe yiprokgen a yangkipm a kupm kil, eng ake mpa tu plelng ipma yaper kul eng kupm ti, eng mpa wa kupm ngklinsen, eng wa tu wa palng wor pa.'”
ACT 28:28 Pol lakati oklala a Aisaia melnum okwripm pa la pa am kai kolpake. Wa kil wa la, “Kipm uk yirokg karken a atning, kolpa ti kupm lanakepm la kipm riwe la, yangkipm wor a lakati kwap wor a Maur Wailen pikekg kil ak eng akawi mentepm wrong kin kipman pa, am pikekg kil ukwa kai eng tu a ake a Suta ise. Ti tu pa tu ikga itning ukipma pake.” [
ACT 28:29 Tu Suta atning ok ketn a Pol la tu pa kolpa, tu wrekg ak laike kolti, akle tita wail itna wampel kolti, am anel kai ise.]
ACT 28:30 Pol kil rpma wan alkilen a kil armpen armpen uk melnum yan a wan pa kolpa kaingkai wring misen wekg. Tu mla ur wli ariwel pa, kil atopen eng ikgalenten.
ACT 28:31 Kil ake ngkark aki melnum ur angkengkel, kalpis. Kil itna wrongen kolti, laron naki tu wrong kin kipman la, Maur Wailen la itni Wailen ikglen nol nikgwalpm atuwen, a kaling plan arowonel tu pa yangkipm wor a la Wailen Sisas Krais pa.
ROM 1:1 Kupm Pol, kupm melnum a akwap orngwatneikgen Krais Sisas. Pikekg Maur Wailen kil akwewopm atom amprinsopm elng itna la kupm itni melnum wokgen akilen atom ukwawopm kai laron yangkipm wor akilen ti. Kupm nira wrkapm kil eng kipm.
ROM 1:2 Yangkipm wor a Maur Wailen a kupm laron ti pa, pike tak ai Maur Wailen wangkir a yapo nampokgen melnum, atom kil pikekg ngkat okel tu melnum ok wripm akilen pa atom tu nira ela wrkapm alkil a Maur Wailen ngkat ngkat okel tu atom tu nira nira ela pa.
ROM 1:3 Yangkipm wor pa lakati Sisas Krais Warim Kipman a Maur Wailen. Man rakuwel kil palng melnum kol mentepm tike. Kil rpma kanokg ti pa kil om wris a Tepit, melnum tukgunakg pa.
ROM 1:4 Maur Wailen kil la kil wrekg angkawor kirk a u mlaminel pa kul or pa, Maur Wor a Maur Wailen pa plan la la kil pa Warim Kipman a Maur Wailen. Kil antiwe titnongket klalen wail manten. Atom yangkipm a kupm laron ti pa, am lakati Sisas Krais Wailen wris ata amentepmen pake.
ROM 1:5 Maur Wailen kil plantopm ipma wor akilen or ya a Krais pa ak angklinsopm, atom kil la kupm itni melnum wokgen akilen pa eng laron yangkipm wor akilen pa niki tu wrong kin a kipman wrongkwail a rka yela pa, eng mpa tu ukipma orngwatneikgen kil pa. Pa mpa ik ngkit nang akilen pa iye kaino kwa.
ROM 1:6 Wa kipm a rpma kaino anong wail Rom pa yat, kipm ake a men Suta, pake kipm pa wa pikekg Maur Wailen akwewepm la kipm a Sisas Krais.
ROM 1:7 Kupm nira wrkapm kil eng kipm wrongkwail kin a kipman a Maur Wailen a rka kaino anong wail Rom pa. Kipm melnum a kil plan ipma wor wasrongentepm a akwewepm a amprinsepm eng alkilen. Kupm oklala naki Maur Wailen, Yan a mentepmen ekg Wailen Sisas Krais, eng mpa tuwekg plantepm ipma wor a tuwekg pa ik ngklinsepm a ntokg ipma akipmen pa rki meen wor.
ROM 1:8 Kupm naren Sisas Krais atom kupm ukwor Maur Wailen akupmen atopen kipm wrongkwail pati atnen a kupm atning a tu wrong kin a kipman yela kanokg ti lakati la, kipm ukipma Maur Wailen.
ROM 1:9 Maur Wailen a kupm kapor kilko alein a nikgwalpm arkekgen laron yangkipm wor a lakati Warim Kipman akilen pa, kil pa ariwe la, pa aklale la kupm akwonalmpen kipm pa akangklei oklala nakel eng ak angklinsepm rpma pa.
ROM 1:10 Kwei ur wris a kupm akangklei oklala naki Maur Wailen pa pati, kol Maur Wailen kil wasrongen pipa, kupm lala kol a kil ntokgtopm ya ur okore eng kupm la kaino riwepm pake.
ROM 1:11 Nikgwalpm wail a kupm ti arken kipm pa rka lantwang la kaino riwepm, eng mpa kupm lkepm kweikwei wor wor a Maur Wor a Maur Wailen alkopm ti, eng ik titnongketel kipm pa.
ROM 1:12 Kupm lala mentepm ik titnongketel tita titiwet. Ik wang a kupm kaino ntiwepm rpmi pa, ikga kipm ri a kupm ukipma Sisas pa, a wa ikga kupm wa ri a kipm ukipma pa, eng ikga mentepm kimeket uwi titnongket weten.
ROM 1:13 Kipm melnum alkupm a mentepm ukipma Sisas, kupm ake lala lamtepm nikgwalpm akupmen a rka la lanikepm la, anti watipmen kupm akwonalmpen lala kol a kaino riwepm, ari kalpis, kweikwei angket angket kulngkul am kul wli wang tike. Kupm la kol a kaino pa pati, kupm la kol a ik ngklin kipm pa kol okipma wor ur a kupm la ngkon pa, kolen a kupm angkon angkon yela tatu anong kanokg tiur ai a ake a Suta pa.
ROM 1:14 Maur Wailen alkopm kuloken wail la kupm ikilmpe laron yangkipm wor akilen pa niki tu a rpma anong a wa niki tu a rpma mpang pa, a wa laniki tu melnum a awi ariwe a wa tu a ake awi ariwe pa.
ROM 1:15 Kolpa ti kol kupm ti pa, kupm nikgwalpm arkekgen la wa kaino laron yangkipm wor a la Krais pa wa niki kipm a rka kaino anong wail Rom pa yat pake.
ROM 1:16 Kupm ake numpaipm eng laron yangkipm wor a la Krais pati atnen yangkipm pa antiwe titnongket a Maur Wailen a ak awi melnum a ukipma pa aye kai eng alkilen. Itna ep pa kil uk yangkipm wor pa eng la ik uwi men Suta ti. Wa itna katnukg pa kil uk yangkipm wor pa eng la wa ik uwi tu kipm a ake Suta pa.
ROM 1:17 Wa yangkipm wor a la Krais pa wa planto ya a Maur Wailen kil ari mentepm ti la mentepm ute wor itna wulmpa akilen pa. Pa am ya wris ata a ukipma pake, ake kwei ur manet. Kol yangkipm ur a ela wrkapm a Maur Wailen pa lala, “Melnum a ukipma atom Maur Wailen ari kil pa la kil melnum ute wor itna wulmpa akilen pa pati, melnum pa kil atn a rpma aklale.”
ROM 1:18 Aklale, ya wris ata a Maur Wailen ariwo la mentepm ute wor itna wulmpa akilen pa, pa ya a mentepm ukipma Krais pa kolti. Eng ntei, Maur Wailen a rpma kaino anong wor pa kil plan tu ipma wakget akilen pa palng angko wunong la kil ikga uk wleket ikilmpe paipmpaipm a tu antokg pa. Kil ipma wakget eng tu melnum a alupm nikgwalpm paipm a antokg paipmpaipm akamprinso yangkipm ute aklale a Maur Wailen pa.
ROM 1:19 Kweikwei wailet a pikekg Maur Wailen antokg ti itna wunong tatu ti pa ak planto Maur Wailen pa. Atom tu antiwe kol a uwi riwe kil pa, ari kalpis, tu wa uk yirokg kil pa. Kolpa atom ari kil ipma wakget eng tu pa.
ROM 1:20 Pikekg ak wang lmpiwen a Maur Wailen kil antokg kitnong a kanokg nampokgen kweikwei wrongkwail pa palng pa, tu melnum ak wang pa a pa kulngkul kul ti, wa mentepm ak wang ti pa wa ari kweikwei wrongkwail pa. Atom pa wa planto kweikwei akilen a Maur Wailen a mentepm ake antiwe mpa ri ik wulmpa pa: kweikwei pa planto la kil alkil Maur Wailen pa antokg pake, a wa planto titnongket akilen a itna yongkyong pa. Kolpa ti tu a uk yirokg kil pa ake antiwe mpa ikilmpe yangkipm pa la la tu akwekgel Maur Wailen pa, kalpis.
ROM 1:21 Kweikwei pa planten Maur Wailen atom tu ariwe Maur Wailen pake, ake wa tu ukwor kil pa, a ake wa tu alupm aye kil pa kol la kil Maur Wailen atuwen pa. Kola tu ik kolpa, ari kalpis. Nikgwalpm ariwe wor a tu pa kai atn kolpa, a tu rka titno kol a tu rka ak miningket pake.
ROM 1:22 Tu plan tu alntu ti la tu melnum ariwe wontrakole wor, pake wa tu wa palng kolen la tu melnum titnowen.
ROM 1:23 Atom tu almpil yirokg la klalen wail manten a Maur Wailen a ikgake kai plalng pa. A tu almpil won la kapor kilko alein kweikwei mrangkum a tu antokg kaling ake kolen melnum, nampikgen kweikwei tiur kol wel a wampung a wapin a itna kanokg ti, pa kweikwei a ikga kai paipm penterng. Atom tu elng pa itna awi wrik la pa Maur Wailen atuwen.
ROM 1:24 Tu almpil yirokg la Maur Wailen pa kolpa atom ari Maur Wailen kil elngenten la kai tu kai kutnun nol nikgwalpm alntuwen a tu wasrongen kolpa lan kaiyo! Kolpa atom wa nol nikgwalpm a tu pa wasrongen la wa ntokg kweikwei kimpilpet ik num alntu ti. Atom tu aye num alntu ti kai anti tu kai antokg kweikwei a uk num paipm a numkropis num alntu ti.
ROM 1:25 Tu melnum a kolpa pa tu kapring nikgwalpm ute aklale a Maur Wailen kol a kutnun pa, wa ak nikgwalpm a kansil a ake aklale pa. Atom tu wa kapor kilko alein kweikwei a pikekg kil antokg pa, a ake tu kapor kilko alein kil alkil melnum yiprokgen a pikekg antokg kweikwei pa, eng mpa mentepm wrongkwail ngkit nang a kil alkil wris ti ngkli ik wang ti a wa ikga itni yongkyong. Aklale.
ROM 1:26 Kolpa atom tu kin pa wa elngen a kol a Maur Wailen la tu nti tu kipman okg kin kipman pa wa itna wai, a wa tu plelngen wa la nti tu alntu kin ti wa okg kin kipman, a ake katila ya alkil a kol a ik kolpa. Eng ntei, tu elngen a kapor kilko alein Maur Wailen, kolpa atom Maur Wailen kil elngenten la kai tu kai kutnun nol nikgwalpm alntuwen pa ik kolpa kai o!
ROM 1:27 Wa tu kipman am wa kolpa yat pake. Kipman elngen a kol a Maur Wailen la tu nti kin okg kinkipman pa wa itna wai, a wa tu ipmanikg wrekg pilpilen titnongket la wa okg kin kipman nti tu alntu kipman ti. Tu antokg kweikwei a numkropis kolpa ak num alntu ti kolpa atom tu awi wleket katila paipmpaipm a tu antokg kolpa.
ROM 1:28 Wa yat, tu ariwe Maur Wailen pati tu kol a rkul ariwe wor pa kutnun, ari kalpis. Atom Maur Wailen kil elngenten la kai tu kai kutnun nikgwalpm lngkep alntuwen a kai paipm ise, atom tu antokg kuina ur a ake wor a tu kol ake ntokg pa.
ROM 1:29 Tu melnum a kolpa alupm nikgwalpm paipm paipm wrongkwail kolkil no pik rpma kawor ipma atuwen ti: tu antokg kweikwei a worampei a paipm raimpe, tu akwen kweikwei la uwi a uwi, tu la ntokg paipmel mlaur, tu nikgwalpm paipm eng mla ur a antiwe kweikwei, tu alm melnum amo, tu akle kamel, tu kansil untakel mla ur, tu akangklei antokg nikgwalpm paipm, tu la elyirokgel kamel,
ROM 1:30 tu melnum a arki kamel, tu awi wrongmanto lan Maur Wailen, tu melkget, tu wam rka nol, tu ngkat nang a tu alntu ti, a tu alupm nikgwalpm weten weten a antokg kweikwei a paipm, tu talpulng yangkipm a mansan,
ROM 1:31 tu nikgwalpm a ariwe wor kalpisen, tu yapon yangkipm kalpmlel pake ake wa tu ak katila, tu ake plan ipma wor wasrongen melnum, tu ake arein melnum, tu antokg kolti.
ROM 1:32 Pikekg Maur Wailen la karkurngko titnongket la kolkil la: tu melnum a antokg kweikwei a kolpa, pa wor eng kol a tu imo. Tu ariwe yangkipm titnongket pake, tu ake katnun, wa tu wa antokg kolpa itna. Ti itni eng tu alntu ntokg paipmpaipm kolpa iye kai o! Ampur tu uk wor tu tiur ai la wa ik kol tu ti pa, ari kalpis, tu ti wa uk wor aktitnongketelen la tu ntokg kolpawo!
ROM 2:1 Kolpa ti arein kitn melnum a elng wam itna melnum ur ai la la, kil pa antokg paipm, ti ikga Maur Wailen lkel wleket ikilmpe pa. Pa kitn ikga yangkipm kalpisen eng ngketen kitn alkitn ti tukuleikgen yangkipm a Maur Wailen pa. Kitn alkitn ti wa antokg paipmpaipm irir kolen melnum a kitn elng wam itna arkiwel pa. Kolpa atom kol kitn elng wam itni rki melnum ur ai pa, am wa kol kitn wa elng wam itna arki kitn alkitn ti yat tike. Atom Maur Wailen ikgake ri melnum pa, kil ikga uk wleket kitn ti yat ikilmpe paipm a kitn antokg pa.
ROM 2:2 Mentepm ariwe la Maur Wailen kil rpma atning yangkipm a tu melnum a antokg paipm kolpa, atom kil elng wam itna arkiwen a alken wleket akalmpe paipm a tu antokg pa, pa kil akangklei antokg ute wor kolti.
ROM 2:3 Arein kitn melnum a antokg paipm irir kol tu melnum a kitn elng wam itna arki pa! Kitn akwonalmpen la ikga kitn ngkom nilokgen wleket a ikga Maur Wailen lkeitn ikilmpe paipm a kitn antokg pake? Pa ake antiwe, kitn mpa riwe la kitn ti yat ikgam wa uwi wleket pake.
ROM 2:4 Aki kitn wa elukgen ipma wor wail manten a Maur Wailen a rka eng kitn pa, atom kil ake ipma wakget pinterng, kalpis, kil nungkwangen kitn ti ayewen kolpa aye kai la kol a kitn plelng ipma. Aki kitn wa akwekgel ipma wor a kil ak arkolngkeitn la kol a kitn plelng ipma ukipma kil pa.
ROM 2:5 A'a, kitn ake akwekgel, kitn ariwe ipma wor a Maur Wailen pa. Pake ipma a kitn pa kakiren paipm, a kitn karken a plelng ipma pa. Kitn antokg paipmpaipm kolpa akarku tita akarku tita kolpa kaino wail manten paipm. Pa kitn antikirel ipma wakget a Maur Wailen pa aye kaino wail, kolpa kai ngko Wang Wail a ikga kil rpmi itning yangkipm amentepmen pa. Atom ikga ik wang pa ikga kil plan ipma wakget a kil pa palng ngko wunong. Wa kil wa plan ngko wunong la kil akwap ute wor kolti, eng kil ari paipmpaipm akitnen la pa paipm atom alkeitn wleket akalmpe pa.
ROM 2:6 Maur Wailen ikga ikilmpe kitila kuina ur a pikekg melnum wris wris antokg pa.
ROM 2:7 Tu melnum a antokg kuina ur a wor kolti itna titnongket kolpa aye kai, atom wasrongen paipm la Maur Wailen kil lken klalen, wa tu wasrongen la kil lken nang wor, a wa tu wasrongen la kil lken num palk weten a ikgake imo pa. Tu melnum a kolpa pa, kil ikga uwiyen iye kai ntiwel rpmi wor yongkyong ik wang pa.
ROM 2:8 Wa tu melnum a akwonalmpen tu alntu ti kolti, elukgen nikgwalpm a aklale ute wor, a wa tu la kutnun nikgwalpm a paipm pa kolpa kai pa, tu melnum a kolpa pa, Maur Wailen ikga ipma wakget uk wleket wail tu pa.
ROM 2:9 Melnum a antokg paipmpaipm pa pati, ikga kil uwi kaikuten a wleket wail. Itna ep pa ikga Maur Wailen uk kaikuten a wleket men Suta pake, ikga wa kil uk wleket a kaikuten kipm a ake Suta pa.
ROM 2:10 Pake tu melnum a antokg kuina ur a wor pa pati, ikga Maur Wailen lken titnongket a nang wailen, a ikga kil ngkit nang atuwen pa, a ikga kil ntokg ipma nol nikgwalpm atuwen pa rki kupuk meen wor. Itna ep pa kil ikga wa uk kweikwei wor wor pa men Suta pake, kil ikga wa uk kipm a ake Suta pa.
ROM 2:11 Maur Wailen kil ake ari la la men ti Suta aki ari la kipm pa ake Suta pa, kalpis, kil ari mentekg yatenen pa irir kolen tita. Ake ari la la ur wor, a ur paipm pa, la irir yatenen.
ROM 2:12 Kipm ake Suta a pikekg akwekgel yangkipm titnongket a Maur Wailen pa, atom kipm antokg paipmpaipm pa, Maur Wailen ikgake yikak itni yangkipm titnongket pa atom lkepm wleket a itna yongkyong ikilmpe paipmpaipm a kipm antokg pa, kalpis. Kil ikga yikak itni paipmpaipm a kipm antokg pa kolti, atom ikga kil ntokgtepm kai paipm, uwi wleket a itna yongkyong. Wa tu men Suta a pikekg ariwe yangkipm titnongket a Maur Wailen pa atom men lalowe kai antokg paipmpaipm pa pati, ikga Maur Wailen yikak itni yangkipm titnongket a men lalowe pa atom lko wleket a itna yongkyong. Maur Wailen ake ari melnum, kil ikga ikilmpe paipmpaipm a mentepm kimeket.
ROM 2:13 Kol melnum ur itning yangkipm titnongket a Maur Wailen pa ik nungkulkg ti kolti pa, pa ake Maur Wailen ari melnum pa la kil ute wor itna wulmpa akilen pa, kolpa kalpis. Kol melnum ur itning atom kutnun kitila pa pipa, Maur Wailen mpa uwi wor lawel la kil melnum ute wor pake.
ROM 2:14 Pikekg Maur Wailen uk yangkipm titnongket pa men Suta tike, a kil ake uk kipm yimponen pa, kalpis. Atom pikekg kipm ake ariwe yangkipm titnongket pa, ari kol kipm pikekg atn a rpma katnun yangkipm alkipmen ak ai kul pa a kai irir kolen yangkipm titnongket a Maur Wailen uk men Suta ti. Pa plan kolen la pikekg kipm alupmen yangkipm titnongket ur manet alkipmen pa rpma kawor nikgwalpm akipmen pa. Atom kipm alkipm akwonalmpen la a i wor a a i paipm, atom kipm am katnun yangkipm titnongket alkipmen pake.
ROM 2:15 Pikekg kipm akwekgel yangkipm titnongket a Maur Wailen uk men Suta. Pake atn a rpma akipmen pa kai irir kolen yangkipm titnongket la men Suta ti kutnun pa, pati ak plan kolen la yangkipm titnongket pa nira ela kawor nol wunen akipmen pa. Wa yat nol nikgwalpm akipmen pa pikekg ak arongke naki kipm alkipm ti la, kuina a i wor a kuina a i paipm. Wa ok wusok a rpma kawor ipma wunen akipmen pa pikekg arkiwepm la kipm antokg paipm, pake ake wa arkiwepm kolti pa, ak wang tiur pa kil wa itnantepm yirokg alkepm titnongket la kipm antokg wor. Pati pa ak plan lala, yangkipm titnongket pa am nira ela kawor nol wunen akipmen pa aklale pake.
ROM 2:16 Ak wang ti mentepm ake antiwe ari pa, ari ikga Maur Wailen laniki Krais Sisas la kil rpmi itning yangkipm a mentepm wrongkwail kin a kipman pa. Ikga ik wang pa kil ri la nikgwalpm ampen a mentepm pa laron ngko wunong. Ikga palng kitila yangkipm wor a kupm laron laron nakepm pa.
ROM 2:17 Wa kitn Suta ti wam rka nol la kitn ti melnum Suta pa, kitn akwonalmpen la kitn ti am rpma ak yangkipm titnongket a pikekg Maur Wailen kil uk Moses, atom pa ak antokg kitn pa ute wor pake. Wa yat, kitn wa atop ak Maur Wailen pa la Maur Wailen pa a kitn Suta ti kolti, a tu a ake Suta wai pa tu yimponen.
ROM 2:18 Kitn antiwe ak nikgwalpm ari angkleikg wrkapm pa planteitn la nikgwalpm a i wor, a nikgwalpm a i paipm itna wulmpa a Maur Wailen pa, atom kitn ariwe nol nikgwalpm a Maur Wailen a rka la mpa kitn ntokg na na, atom kitn awi wor antokg katila pa.
ROM 2:19 Kitn ti akwonalmpen la kitn ti antiwe a alok melnum wulmpa tilmpisen pa aye katila ya pake. Wa kitn akwonalmpen la kitn ti klalen a akalen tu a rka miningket ti.
ROM 2:20 Wa kitn la kitn ti kol mansan a arowonel tu a kol warim a pa aye kai or ya wor, wa kitn ti kol melnum a kaling plan tu a titnowen pa. Kitn akwonalmpen la kitn antiwe antokg kolpa atnen a kitn Suta ti ariwe yangkipm yiprokgen a Maur Wailen uk Moses pa kai aro yiprokg ise. Yangkipm pa ak la ariwe watin a kweikwei wrongkwail a ute aklale.
ROM 2:21 Ti antokg kolai atom wa kitn kaling plan tu ise, wa ake wa kitn kaling plan kitn alkitn ti? Wa kitn angkli yangkipm la ampake ik ikgwampel kweikwei a melnum ur pa, pake wa kitn alkitn ti wa ak ikgwam?
ROM 2:22 Wa kitn lanaki tu la ampake ngkli rkul kin aki kipman a melnum ur pa, pake wa kitn alkitn ti wa angkli arkul tu yat. Wa kitn la kitn karken wrisen yo a wes kweikwei a tu elng itna kapor kilko alein pa la pa Maur Wailen atuwen, pake ake wa wor eng kitn kai awi kweikwei wor wor titnongket titnongket a tu kapor kilko alein itna yalming atuwen pa.
ROM 2:23 Kitn ngkat nang alkitn ti wam rka nol la kitn ti yiprokgen a arpmen yangkipm titnongket a Maur Wailen, pake kitn alkitn ti wa kapor yangkipm titnongket akilen, kolpa atom kitn uk numpaipm kil pa.
ROM 2:24 Nira ela wrkapm a Maur Wailen pa la kolkil la, “Tu a ake Suta pa la paipmel nang a Maur Wailen pa pati, atnen a kipm Suta ti antokg paipm tike.”
ROM 2:25 Kolpa ti aklale, kol kitn ikngklei kutnun yangkipm titnongket a Maur Wailen pa pati, pa a pikekg tu wangketeitn num pa wor, pake mpa kupm la kolkil: kol kitn kipor yangkipm titnongket akilen pa pipa, pa a pikekg tu wangketeitn num pa palng kol ake wa pikekg tu wangketeitn num ak amprinseitn eng Maur Wailen pa kalpis.
ROM 2:26 Kolpa ti, kol melnum a ake Suta a ake tu wangketel num ak amrpinsel eng Maur Wailen pa, kil itn a rpmi kai irir kolen yangkipm titnongket a Maur Wailen la pa, pa mpa kil palng kolen kil melnum a tu wangketel num kol kla a Maur Wailen elngitna ak amprinsel eng alkilen pa.
ROM 2:27 Kitn Suta pa yiprokgen a arpmen wrkapm a yangkipm titnongket a Maur Wailen nira elawe pa, wa a tu wangketeitn num ak amprinseitn eng Maur Wailen pa, pake kol kitn kipor yangkipm titnongket pa pipa, pa kitn antokg paipm. Kol mentepm ri kitn ti nimpokgen melnum yimponen a pikekg ake tu wangketel num pa, mpa mentepm ik melnum yimponen pa ik nowe kitn ti la kol a kitn ti kutnun yangkipm titnongket kol kil pa katnun pake, ari kalpis.
ROM 2:28 Kol melnum Suta ur kil itn a rpmi kol melnum Suta ik num enen ti kolti pa, pa kil ake melnum Suta aklale pa kalpis. Wa yat kol pikekg tu wangketel num pa, pa kweiur a ak or num enen ti kolti, pa ake wa ya aklale a wangket num eng ak amprinsel eng Maur Wailen pa, kalpis.
ROM 2:29 Kol melnum ur kil Suta kawor nol nikgwalpm wunen akilen ai pa, pa kil melnum Suta aklale pake. Wa ya aklale a wangket num pa, pa ake lala katila wrkapm titnongket a Maur Wailen a pikekg tu nira ela pa atom wangket num pa, kalpis. Ya aklale a angket num pa lala wangket nol nikgwalpm a melnum, pa Maur Wor a Maur Wailen ti wangket pake. Melnum Suta aklale kolpa pa ake tu melnum ti kaporng yangkipm awi wor lawel pa, kalpis, ikga Maur Wailen ai kiporng yangkipm uwi wor lawel ai.
ROM 3:1 Yangkipm a wet kupm la pa mpa ntokg tu men alpmen Suta mpa isen la, “Ti kol mentepm Suta ti angket num pa ake ak antokg Maur Wailen ariwo la mentepm ute wor itna wulmpa akilen pa, ti kitn la mentepm Suta ti ake wa wor angen tu a ake Suta pake? Wa a tu pikekg wangketo num pa, ti kitn la, pa kai kalpis kolti?”
ROM 3:2 Mpa kupm ikilmpe kolkil: Yek ei! Mentepm Suta ti pa, mentepm antiwe kweikwei wor wor wailet! Kweiur wail manten pa pati, Maur Wailen kil anti mentepm Suta ti oklala a kil alko yangkipm akilen ti eng la mentepm Suta ti ikglentel.
ROM 3:3 Pake tu mentepm Suta tiur pa ake ukipma katnun yangkipm a Maur Wailen alko pa, ti pa mpa kolai? Tu ake arkul yangkipm pa katnun pati, pa mpa wa ntokg Maur Wailen kiporng yangkipm a pikekg kil wangkir a yapo nampokgento la kil ikgake ntokg kitila pa?
ROM 3:4 Pa mpa kalpis wrisen. Kol mentepm melnum ti pa mentepm melnum a kansil, pake mentepm mpa riwe la Maur Wailen pa akangklei antokg kweikwei aklale katnun yangkipm a kil yapon pa kolti. Pa kolen a Tepit nira ela wrkapm a Maur Wailen pa la, “Yangkipm wrongkwail a kitn antiwo yapon pa aklale kolti, ikga men ri ngko wunong la pa kitn la ute wor kolti. Kol mlaur kil rkiweitn la kitn antokg paipm pa atom kil uwiyeitn iye kai itni ntokg yangkipm pa, kitn antiwe alok angkli yangkipm a kil arkiweitn pa.”
ROM 3:5 Pake kol mentepm Suta ti antokg paipm pa ak plan tu wrongkwail kin a kipman ari wunongen nikgwalpm ute wor a Maur Wailen pa pati, mpa mentepm la kolai? Mpa mentepm la kolkil la, kol Maur Wailen kil ipma wakget uk wleket men ti ikilmpe paipm a men antokg pa, pa kil akwap paipm. Kil kupm la kol a melnum akwonalmpen pa.
ROM 3:6 Maur Wailen ake akwap paipm kolpa, kalpis wrisen! Kol Maur Wailen kil ikwap paipm eng ake uk wleket ikilmpe paipm a mentepm antokg pa, pa ikga kil rpmi itning yangkipm a tu wrongkwail kin a kipman a kanokg ti ikilmpe wor a paipm a tu antokg pa kolai!
ROM 3:7 Wa kol melnum ur la kolkil la, “Kupm antokg nikgwalpm kansil pa wor a ak kaki nalulng nikgwalpm ute wor aklale a Maur Wailen pa aye kul kai angko wunong. Atom tu wrongkwail ari nikgwalpm ute wor aklale akilen pa, atom tu ak ngkat nang wailen a titnongket a akilen. Kolpa ti wa kil arkiwopm la kupm melnum a antokg paipmpaipm ti eng na wai!
ROM 3:8 Tepm ntokg paipmpaipm pa kolpa kai o, eng mpa wa ik kiki nululng nikgwalpm wail wor a Maur Wailen pa iye kul kai ngko wunong!” Tu tiur ak nokgelo a arkiwo la men am antokg kolpake. Pati kol a men ik kolpawo! Pake kolpa kalpis, tu melnum a la oklala paipm kolpa pa, pa ikga Maur Wailen kitila nikgwalpm ute wor alkil pa, atom lken wleket ikilmpe nikgwalpm paipm a tu antokg pa.
ROM 3:9 Ti itna kolai, men Suta ti wor itna wulmpa a Maur Wailen tike, a kipm ake Suta pa kalpis? Kolpa kalpis wrisen. Kol wet kupm lanakepm pa, la mentekg yatenen, men Suta a kipm ake Suta pa, mentekg yatenen melnum a antokg paipmpaipm atom paipmpaipm pa yapowo yatenen.
ROM 3:10 Yangkipm kil a kupm la pa kai irir katnun yangkipm a nira ela wrkapm a Maur Wailen pa, a la kolkil la, “Ake melnum ur rpma kanokg ti Maur Wailen ariwel la kil ute wor pa, kalpis. Ake wris ur wor, kalpis wrisen kolti.
ROM 3:11 Ake melnum wris ur a rpma kanokg ti wontrakole, wa ake melnum wris ur a rpma kanokg ti akor Maur Wailen pa la kil ngklinsel pa, kalpis.
ROM 3:12 Tu kimeket angko atnuurng ya a Maur Wailen kai ar. Tu kimeket kai paipm ise. Ake ur antokg kuina ur a wor pa, kalpis wrisen kolti.
ROM 3:13 Ok atuwen pa tikal oror itna kolen kirk a nungkur elngkinar okore itna, ti mampis paipm ai. A okmilip atuwen pa akla yangkipm kansil ak palk ipaar. A wa ok yaprekg atuwen pa kolen ul paipm a alm kamel pa.
ROM 3:14 Tu pa arpmen ok wleket paipm a ok anti kamel.
ROM 3:15 Tu nepm itna kwa kai pa kai pa eng alm melnum amo.
ROM 3:16 Tu atn kai a i pa, tu antokg paipm anel melkgel tu melnum a kweikwei wrongkwail yela, atom antokg tu melnum rpma paipm wrisen atnen pa.
ROM 3:17 Tu ake ariwe ya a rpma meen wor pa.
ROM 3:18 Tu ake ngkark eng Maur Wailen pa akwonalmpen lala kil pa kil Maur Wailen pa.” Wrkapm a Maur Wailen pa am la kolpake, la mentepm wrongkwail ti am paipm kolpake.
ROM 3:19 Wa mentepm ariwe la, kuina ur a yangkipm titnongket a Maur Wailen la pa, pa kil lanaki men Suta a pikekg kil alko yangkipm titnongket pa. Kolpa atom yangkipm titnongket pa ampri okel men Suta ti yat atom mentepm kimeket, men Suta a kipm ake Suta, mentekg yatenen ya kalpisen a mentekg aner ok la mentekg ake kapor yangkipm titnongket pa. A wa yat, yangkipm titnongket pa wa plan mentepm kin a kipman a kanokg ti la mentepm kimeket paipm, atom mentepm ikga itni yangkipm wail a Maur Wailen uwi wleket ikilmpe paipmpaipm a mentepm antokg pa.
ROM 3:20 Eng ntei, Maur Wailen kil ake ari melnum wris ur pa la kil ute wor itna wulmpa akilen or ya a katnun yangkipm titnongket a Maur Wailen pa, kolpa kalpis. Yangkipm titnongket pa pati kil pikekg alko ak planto la mentepm ake antiwe mpa kutnun pa, eng mpa mentepm riwe la mentepm am antokg paipmpaipm ise.
ROM 3:21 Pake ak wang ti pa, Maur Wailen kil planto ya wa kil antiwe ari mentepm ti la mentepm ute wor itna wulmpa a kil pa. Pa ake la ya a mentepm katnun yangkipm titnongket a pikekg kil uk Moses pa, kalpis. Pake pikekg Moses nira ela yangkipm titnongket alkil ai, wa tu melnum okwripm ep ak ai nira ela wrkapm alntuwen ai laron nako ep ak ai la, pa aklale, la Maur Wailen kil ikga ukule ya manet ur a kil ikga ri mentepm melnum ti la mentepm ute wor itni wulmpa akilen pa.
ROM 3:22 Ya a Maur Wailen kil antokg mentepm melnum palng ute wor pa or ya a kil alko Sisas, la mlaur a kil ukipma Sisas Krais pa pati, Maur Wailen kil ari melnum pa la kil ute wor antiwe a kai wrerentel. Ya pa okore itna eng mentepm wrongkwail a ukipma Sisas Krais pa. Pa kil ake ari la men Suta aki kipm ake Suta pa, kalpis. Kil ari mentepm irir kolti.
ROM 3:23 Pati atnen mentepm kin a kipman wrongkwail pa mentepm kimeket melnum a antokg paipmpaipm. Kolpa atom mentepm plalngten itna watinet eng titnongket a klalen a Maur Wailen.
ROM 3:24 Mentepm paipm kolpa, pake Maur Wailen kil planto ipma wor angklinso, atom kil ari mentepm ti la mentepm ute wor itna wulmpa a kil pa. Kil ukwa Krais Sisas kil amo akarmpen paipmpaipm a yapowo pa, atom mentepm wirng no itna kukula wor ise. Ake mentepm ti antokg kuina ur wor eng mpa kil ngklinso kolpa, kalpis, pa kil ak kalpmlel kolti.
ROM 3:25 Maur Wailen kil elng Krais Sisas pa itna kol wlikgok ur a al wor uk kil ti, la kol melnum ur kil ukipma Krais Sisas pa pipa, walmpopm akilen a pikekg ungkwan pa ak ungkwan paipmpaipm akilen. Maur Wailen ak kolpa, pa kil planto la kil akangklei ak ute wor kolti. Pikekg ak wang ep pa Maur Wailen arkul ipma ukipma meen wor, atom ake kil uk wleket akalmpe paipmpaipm a tu kilmik pikekg ak wang ep ai. Kolpa kulngkul, Krais Sisas kil nar pipa, kil ak angketen ipma wakget a Maur Wailen pa kai kupuk wor ise.
ROM 3:26 Maur Wailen kil alko Sisas pa pati planto ak wang ti yat la, kil pa yiprokgen a kweikwei a ute wor: kil alkil ti ute wor kolti, a wa kil wa ari tu mlaur a ukipma Sisas pa wa la tu pa ute wor.
ROM 3:27 Pa mpa wa mentepm ntiwe ngkit nang a mentepm almentepm ti la mentepm ti palng wor pa? Kolpa kalpis, ya am ampri ise! Ti mpa mentepm kutnun ya kolai? Ya a atn a akwap wor katnun yangkipm titnongket a pikekg Maur Wailen uk Moses pa aki? Kolpa kalpis, mpa mentepm kutnun ya a ukipma Sisas pa kolti, atom mentepm palng ute wor itna wulmpa a Maur Wailen pa.
ROM 3:28 Mentepm ariwe kai kuina ur a wet kupm la ise a la kolkil la, melnum antiwe palng ute wor pati, atnen a kil ukipma Krais Sisas pa kolti. Ake lala kil palng ute wor atnen a kil antokg kuina ur kolen a Maur Wailen kil la ela yangkipm titnongket alkil pa.
ROM 3:29 Aki Maur Wailen pa Maur Wailen a men almen Suta ti kolti? A ake kil Maur Wailen a kipm a ake Suta pa? A'a, ake kolpa, kalpis! Kil Maur Wailen a kipm a ake Suta pa yat.
ROM 3:30 Engntei, Maur Wailen pa kil wris ata, kil Maur Wailen a mentekg yatenen. Kil ari mentepm melnum wrongkwail ti la mentepm ute wor or ya wris ata. Men Suta a pikekg Maur Wailen lanako la men ngket num eng ik plan la kil amprinso eng alkilen, pake kil mpa ri men ti la men ute wor itna wulmpa akilen or ya a men ukipma Sisas ti kolti. Wa kipm a pikekg kil ake la la kipm wangket num eng ikplan la kipm pa am wa kolpa yat pake: kil mpa ri kipm pa la kipm ute wor itna wulmpa akilen atnen a kipm ukipma Sisas ti kolpa yat pake.
ROM 3:31 Maur Wailen ari melnum la kil ute wor itna wulmpa a Maur Wailen pa or ya a kil ukipma Sisas pa aklale pake. Aki kol mentepm la kolpa pa, pa la mentepm antokg yangkipm titnongket a Maur Wailen pa kai titnongket kalpisen ise? Kolpa kalpis wrisen, mentepm ukipma Sisas pa ak plan yiprokgen a yangkipm titnongket a Maur Wailen pa kul kai wunongen atom mentepm ariwe.
ROM 4:1 Ti mpa mentepm la kolai Apraam yoampei a men Suta ti palng wliwe pa? Itna kolai atom Maur Wailen ari kil pa la kil ute wor pa?
ROM 4:2 Aklale, kol Apraam kil itn a rpmi ikwap ute wor pa, atom kol a Maur Wailen kil yikak itni atn a rpma a kwap a kil ak pa atom ari la kil melnum ute wor, pati Apraam kol a ngkit nang alkilen pa. Pake itna wulmpa a Maur Wailen pa kil ake antiwe mpa ngkit nang alkilen pa la kil melnum ute wor pa, kalpis.
ROM 4:3 Ti wrkapm a Maur Wailen pa la kolai? Pa la kolkil la, “Apraam pa kil ukipma yangkipm a Maur Wailen la pa itna titnongket, atom Maur Wailen kil awi ker a kil akawiye paipmpaipm a Apraam pa angkli atom kil ari la kil ute wor.”
ROM 4:4 Kol melnum ur akwap a melnum manet ur atom awi marpm akalmpe kwap a kil ak pa. Melnum a kil akentel kwap pa ake kil areinsel atom alkel marpm pa kalpmilel pa, kalpis, kil akentel kwap pa atom kil alkel marpm pa.
ROM 4:5 Pake melnum a ukipma kolti, kil ake akwonalmpen la kil mpa ikwap wor eng mpa Maur Wailen riwel la kil ute wor pa, kolpa kalpis. Kil ukipma Maur Wailen alkil a ari tu melnum a antokg paipmpaipm pa la tu ute wor. Kolpa atom Maur Wailen yikak itna a kil ukipma kil pa atom kil ariwel la kil ute wor.
ROM 4:6 Maur Wailen ake yikak itna kwap wor a melnum pa ak atom ariwel la kil ute wor pa, kalpis, kil yikak itna a kil ukipma kil ti kolti. Pa kai irir kolen pikekg ep ak ai Tepit kil la atopen wor a tu melnum a ukipma kolpa. Tepit pikekg la kolkil la,
ROM 4:7 ”Tu melnum a Maur Wailen kil ungkwan paipmpaipm atuwen plalng ise, pa tu pa wor pake, tu itopen o! Ei! Maur Wailen kil ake wa akwonalmpen paipmpaipm a tu pa itna, kalpis. Kil am woniketen ise.
ROM 4:8 Melnum a Maur Wailen kil awi ker a kil pikekg akawiye paipmpaipm a kil antokg pa angkli atom kil ari melnum pa la kil ute wor pa, kil pa wor pake, kil itopen o!” Yangkipm a pikekg Tepit la pa am kai itna kolpake.
ROM 4:9 Melnum a Maur Wailen kil awi ker a kil akawiye paipmpaipm a melnum pa antokg pa angkli pa, kil pa wor pake, kil itopen o! Ti pa la men Suta a tu wangketo num katila yangkipm titnongket pa kolti antiwe atopen? A kipm a ake tu wangketepm num kol kla a Maur Wailen anel ak amprin men Suta ti pa, kipm kolpa pa ake mpa kipm itopen? Pati nira ela wrkapm a Maur Wailen pa akalmpe kolkil la, “Maur Wailen kil ari Apraam kil ukipma kil pa kolpa atom kil awi ker a kil akawiye paipmpaipm a Apraam antokg pa angkli a kil ariwel la kil ute wor.”
ROM 4:10 Pikekg Maur Wailen ari Apraam pa la kil ute wor pa ak wang na? Pikekg tu wangketel num pa ep plalng pa, wa Maur Wailen ariwel la kil ute wor pa katnukg? Aki pikekg Maur Wailen ariwel la kil ute wor pa ep plalng pa, a tu wa wangket num pa katnukg? Pikekg Maur Wailen ariwel la kil ute wor pa ep pake.
ROM 4:11 Kil ukipma Maur Wailen pa ep atom Maur Wailen ariwel la kil ute wor. Ak wang pa ake tu angketel num pa, apa. Kolpa itna a a, Maur Wailen lanakel atom tu wangketel num pa. Pa kla a Maur Wailen ak plan ak titnongketel la kil ari Apraam pa la kil ute wor atnen a kil ukipma kil. Apraam kil ake tu wangketel num pa, a pa, pake kil ukipma Maur Wailen, pa atom kil pa palng yan yiprokgen a kipm melnum wrongkwail a ake tu angketepm num kol kla a Maur Wailen ak amprin men Suta ti. Pake kipm ukipma Maur Wailen pa, atom Maur Wailen kil wa ariwepm la kipm pa wa kipm ute wor.
ROM 4:12 A wa kolpa yat pake, kil wa palng yan yiprokgen a men melnum a tu wangketo num pa yat. Ake lala tu wangketo num pa wris pa, kolpa kalpis. Pa la men wa ukipma Maur Wailen. Apraam kil ake tu wangketel num pa, a pa, pake kil ukipma Maur Wailen. Wa kol men ukipma Maur Wailen kutnun nepm yikak a Apraam a pikekg ukipma Maur Wailen pa, pa kil wa palng yan yiprokgen amen ti yat.
ROM 4:13 Maur Wailen pikekg yapon yangkipm nampokgen Apraam a tu a kil angket ale angkai pa kulngkul kul pa la, kil ikga lken kanokg a kweikwei wrongkwail ti. Kil ake yapon yangkipm pa nampokgen Apraam atnen a Apraam atning katnun yangkipm titnongket ur a pikekg kil uk tu a men pa ariworwor, kalpis. Kil yapon yangkipm nampokgentel pati atnen a kil ukipma kil ti atom kil ariwel la kil pa melnum ute wor.
ROM 4:14 Kol pikekg Maur Wailen yipon yangkipm nimpokgen tu melnum a katnun yangkipm titnongket akilen pa ariworwor pa, la ikga kil uk kweikwei wor wor akilen pa tu pa, ti mpa wa mentepm ti wa ukipma Maur Wailen pa kalpmilel kolti eng kuina wai? Kolpa pati yangkipm a pikekg Maur Wailen anti Apraam yapon pa wa kai kalpis kolti.
ROM 4:15 Kol Maur Wailen pikekg ake lko yangkipm titnongket ur pa pipa, mentepm kol ake kipor. Pake kil pikekg alko yangkipm titnongket, pake mentepm ake katnun pa yek kimeket, kolpa atom ak antokg Maur Wailen ipma wakget eng mentepm ti.
ROM 4:16 Kolpa ti ipma wor a Maur Wailen plan ak angklinso pa ak titnongketel yangkipm a pikekg kil yapon nampikgen Apraam pa la tu wapyipmiri a walyipmiri a Apraam pa yat la tu ikgam uwi kweikwei a pikekg kil yapon yangkipm la lken pa. Kweikwei a kil yapon yangkipm pa ake a tu men Suta a pikekg awi yangkipm titnongket a pikekg kil alko pa wris. Kweikwei a kil yapon yangkipm pa a kipm melnum wrongkwail mlaur a ukipma kolen pikekg Apraam ukipma pa. Kolpa atom Apraam pa kil yan yiprokgen a mentekg yatenen atnen a mentekg ukipma pake.
ROM 4:17 Pa kai irir kolen yangkipm yiprokgen a nira ela wrkapm a Maur Wailen pa la Maur Wailen lanaki Apraam pa kolkil la, “Kupm takweiyeitn la ikga tu wrong kin a kipman mapming wailet yela anong kanokg wrongkwail numputeitn la kitn yan atuwen.” Mentepm wrongkwail a ukipma Maur Wailen kolen Apraam pa, itna wulmpa a Maur Wailen pa Apraam pa kolen yan amentepmen. Kil ukipma Maur Wailen, kil Maur Wailen a la tu melnum a amo wa wrekg rpma, a wa kil Maur Wailen a la kweikwei a ake pikekg palng ep pa wa palng itna.
ROM 4:18 Apraam ari kil alkil la kil ake antiwe angket warim ur kol a Maur Wailen yapon yangkipm pa, ari Apraam kil ukipma rpma nungkwangen ariwe la pa ikgam palng kolpake, kolpa atom kil palng yan a wrong kin a kipman mapming wrongkwail kai yela kanokg ti. Katila kolen Maur Wailen pikekg yapon yangkipm lanakel kolpa la, “Tu warim watnom walwalpopm walyaru a wapyipmiri a walyipmiri akitnen pa ikga palng umpen wailet paipm ai.”
ROM 4:19 Apraam ari num alkil pa ari kil am wror paipm tike, wreren wring kamel wampwomis ise, akentiwe mpa kil ngket warim pa, kalpis. Wa kil ari kin alkil Sara pa ari am mayen ise, akentiwe mpa kil iye warim pa, mampleng a warim arpme pa am mis ise. Ari ake kil elngen a kil ukipma pa, kil wa ukipma itna titnongket kolpa itna.
ROM 4:20 Nikgwalpm a kil pa ake rka wekg wekg, a ake kil elngen a kil ukipma yangkipm a pikekg Maur Wailen kil yapon nampikgentel pa, kalpis. Kil ukipma itna titnongket kolpa itna wa kil ngkat nang a Maur Wailen.
ROM 4:21 Nikgwalpm a kil pa ake akwonalmpen watipmen, kalpis, nikgwalpm a kil pa rka titnongket kolti ariwe, la kweikwei a pikekg Maur Wailen yapon yangkipm la ikga palng pa, pa kil antiwe titnongket a ikga ntokg kweikwei pa palng kolpake.
ROM 4:22 Kol wrkapm pa la kolkil la, “Apraam kil ukipma yangkipm a pikekg Maur Wailen yapon pa itna titnongket kolpa kai, atom Maur Wailen kil ariwel la kil melnum ute wor.”
ROM 4:23 Yangkipm a la Maur Wailen ari kil pa la kil melnum ute wor pa, pa ake nira ak la Apraam wris pa, kalpis.
ROM 4:24 Yangkipm pa nira ela eng akangklin mentepm ti yat. Maur Wailen mpa wa ri mentepm ti la mentepm melnum ute wor. Eng ntei, mentepm ukipma Maur Wailen, kil a pikekg la Sisas Wailen a mentepmen a pikekg amo pa wa wrekg rpma.
ROM 4:25 Pikekg Maur Wailen kil uk Sisas kai wam a tu wrong manto almpel atom kil amo eng ak armpen paipmpaipm amentepmen ti. Kil wa la Sisas kil wrekg rpma ak antokg kil ari mentepm ti la mentepm ute wor itna wulmpa akilen.
ROM 5:1 Mentepm ukipma Krais pa atom Maur Wailen ariwo la mentepm ute wor itna wulmpa akilen om. Atom kil anel Sisas Krais Wailen amentepmen pa kol kla tarmpupm wrokgen a ak angketen ipma wakget akilen pa atom kil ak awi mentepm ti kai wrong wampil akilen.
ROM 5:2 Mentepm ukipma atom Sisas Krais antokg Maur Wailen ai planto ipma wor angklinso, ti ak wang ti pa ipma wor a Maur Wailen pa ak auro pake. Kolpa atom mentepm atopen wail ukipma rpma nungkwangen ariwe la ikga Maur Wailen uwi mentepm ti kaino ntiwel rpmi uwi titnongket a klalen.
ROM 5:3 Ake wa mentepm atopen pa wris. Mentepm ariwe kolpa la kaikuten a mentepm arki pa ak antokg mentepm antiwe arkul ipma itna titnongket aye kolpa kai, kolpa atom mentepm wa atopen kaikuten a palngto ti.
ROM 5:4 Wa mentepm wa ariwe kolpa la mentepm antiwe arkul ipma itna titnongket kolpa kai pa, ak antokg mentepm ti itna titnongket eng kalkuten ti akentiwe a alok angkliwo. Wa nikgwalpm titnongket wor kolpa pa ak antokg mentepm antiwe ukipma rpma nungkwangen ariwe la Maur Wailen ikga nar uwiyo iye kaino rpmi wor yongkyong.
ROM 5:5 Mentepm ake ukipma rpma nungkwangen kalpmlel atom ikga uwi numpaipm pa kalpis. Maur Wailen pikekg ukwa Maur Wor alkil ai nar or rpma ipma wunen a mentepmen ti atom Maur Wor pa alung nikgwalpm a Maur Wailen kil plan ipma wor wasrongen mentepm ti pa or no pik kol u pa. Kolpa atom mentepm ariwe ise, la Maur Wailen ikga kutnun kitila ntokgto kuina ur a pikekg kil yapon yangkipm nampikgento la ntokg pa.
ROM 5:6 Mentepm pikekg ya kalpisen, ake antiwe titnongket a angklin mentepm almentepm ti, pake ak wang alkil a pikekg Maur Wailen alm pa, Krais kil amo eng mentepm melnum paipm ti.
ROM 5:7 Woi, mla a i mpa imo ikirmpen melnum paipm a kolpa! Pa kalpis wrisen. Ti antiwe mpa melnum ur imo ik rmpen melnum ute wor ur pa? A wai, mpa kalpis ur! Aki kol kil ri melnum wor wrisen ur alkil pa, kil mpa kinipmen wrong imo ikirmpentel ur pa.
ROM 5:8 Pake mentepm ti pa pikekg ake wor, eng mpa Krais kil imo eng mentepm ti, mentepm pikekg antokg paipmpaipm itna. Pake pa ya alkil a Maur Wailen planto nikgwalpm a la kil planto ipma wor wasrongento, kolpa atom kil ukwa Krais pa kil amo eng mentepm.
ROM 5:9 Pikekg Krais kil amo ak wang a mentepm paipm itna a pa, atom walmpopm akilen pa ungkwan ak kaluk mentepm atom Maur Wailen ariwo la mentepm ute wor itna wulmpa akilen. Kolpa atom ak wang ti a mentepm rka ute wor pa, mentepm ariwe worwor la ikga Krais kil wa uwiyo kai tukwleikgen ipma wakget a Maur Wailen a kil la uk wleket ikilmpe paipm a mentepm melnum antokg pa. Ikgake kalpis pa, kil ikg am ngklinso kolpake.
ROM 5:10 Mentepm pikekg wrong manto a Maur Wailen, pake Warim Kipman akilen pa amo lam kla, atom pa antokg mentepm ti palng wrong wampil akilen. Mentepm pikekg wrongmanto a Maur Wailen, ti kil kol ake imo ik rmpento pa. Ari kalpis, kil wa amo akarmpento. Kolpa atom mentepm ariwe worwor la Warim Kipman alkil pa wrekg rpma pa ikga wa ikuwiyo iye kai wor tukwlelkgen wakg a ikga tu wrong manto akilen pa elng kinare pa.
ROM 5:11 Pake ake wa mentepm ukipma rpma nungkwangen pa kolti, pa mentepm wa atopen Maur Wailen atnen Sisas Krais Wailen amentepmen a pikekg amo lam kla ak angketen ipma wakget a Maur Wailen pa takwleikgen mentepm ti.
ROM 5:12 Krais melnum wris kolti akwap wor ak angklin wrongkwail. Am kolpa yat pake, Atam melnum wris ti kolti antokg paipmpaipm atom paipmpaipm pa palng itna kanokg ti akalile mentepm wrongkwail. Pikekg ep ak ai pa, melnum ake amo, pake melnum wris pa antokg paipm pa, atom Amo pa wa palng itna kanokg ti. Atom antokg mentepm wrongkwail ti amo atnen a mentepm wrongkwail ti antokg paipmpaipm.
ROM 5:13 Ei aklale, pikekg ep ak ai tu antokg paipmpaipm itna kanokg ti ise, pake tu antokg kolti kolpa itna kulngkul, kul angko wang a Moses pa Maur Wailen uk yangkipm titnongket pa. Pake pikekg ak wang pa Maur Wailen ake ak ker awiye paipmpaipm a tu antokg pa, eng ntei, tu yangkipm titnongket kalpisen eng mpa tu ngketen eng mpa Maur Wailen ik ker uwiye paipmpaipm a tu antokg pa.
ROM 5:14 Pikekg ak wang a yangkipm titnongket pa kalpis pa, Maur Wailen ake ak ker awiye paipmpaipm a tu melnum antokg pa. Pake Amo ti itna wail itna kanokg ti atom tu amo amo, kolpa kulngkul kul, Maur Wailen uk yangkipm titnongket Moses pa. Atam pa pikekg atning ok a Maur Wailen lanakel la kil kutnun, pake kil wa talpulng ok a Maur Wailen pa. Pake tu wrongkwail kin a kipman pa pikekg ake antokg paipmpaipm irir kol pikekg Atam talpulng ok a Maur Wailen pa. Tu pa pikekg yangkipm titnongket kalpis atom tu antokg paipmpaipm ti kolti, pake tu pa wa amo yat. Kai kweikwei tiur pa Atam pa kil mrangkum ur a ak plan melnum ur a ikga palng kutnukg.
ROM 5:15 Pake paipmpaipm a Atam antokg pa ake irir kol ipma wor a Maur Wailen planto ak angklinso pa. Melnum ur kol Atam pa am pikekg palng ise. Atom pikekg melnum wris pa akwap eng mentepm wrongkwail, pa pikekg kil ak irir kol Atam pikekg ak eng mentepm wrongkwail, tuwekg yatenen ak eng mentepm wrongkwail. Pake kwap a tuwekg ak pa manman: Atam pa kil talpulng ok a Maur Wailen ak alile mentepm wrongkwail ti amo. Pake Sisas Krais pa kil pikekg plan ipma wor akilen pa akawiyo aye yaper kul wa rpma. Pa ya a Maur Wailen plan ipma wor wail manten paipm akilen pa ak angklin mentepm wrongkwail, pa ake antiwe mpa ntin nimpokgen paipm a pikekg Atam kil ak pa.
ROM 5:16 Kweikwei a palngto katnun yirokg a Maur Wailen kil ak ipma wor akilen pa ak angklinso kalpmilel, pa ake wa irir kolen kweikwei a palngto katnun yirokg a melnum wris kil antokg paipmpaipm pa, kalpis. Pa manman, ur pa antiwe titnongket a alok angkli ur pa. Katnun yirokg a Atam melnum wris kil pikekg antokg paipm pa, Maur Wailen kil ari mentepm wrongkwail kin a kipman ti la mentepm antokg paipm, atom ikga kil lko wleket ikilmpe paipmpaipm a mentepm antokg pa. Ari wa katnun yirokg a Maur Wailen kil ak ipma wor akilen pa ak angklinso kalpmilel pa, Maur Wailen kil ari mentepm wrongkwail a antokg paipmpaipm wailet pa la mentepm wrong kin a kipman ute wor akilen.
ROM 5:17 Melnum wris a ep pa angko kai antokg paipmpaipm atom akule ya eng Amo pa wli palng itna titnongket alok angkli mentepm melnum wrongkwail ti, atom mentepm wrongkwail ti am amo amo kaingkai atnen melnum wris pake. Pake Maur Wailen kil plan ipma wor wail alkil pa ak angklinso wail manten kalpmilel atom tu mla ur a awi ipma wor akilen pa pipa, mpa Maur Wailen riwen la tu ute wor itna wulmpa akilen. Kolpa ti mpa kipm riwe kolkil la, tu melnum pa tu awi titnongket wail angen titnongket a Amo pa, ti tu ikga wrekg rpmi nti Sisas Krais itni wailen ikglen kweikwei wrongkwail, am atnen kwap a melnum wris Sisas Krais kil pikekg ak pake.
ROM 5:18 Kolpa ti am wa kolpake, paipmpaipm a melnum wris pa antokg pa ak alile wrongkwail kin a kipman pa, atom Maur Wailen kil ari la mentepm wrong kin kipman a antokg paipmpaipm, ti mentepm ikga uwi wleket ikilmpe paipmpaipm a mentepm antokg pa. Am wa kolpake, kwap ute wor a Krais melnum wris ata pa kil ak pa ak angklin wrongkwail kin a kipman a pikekg Maur Wailen ari la mentepm ikga uwi paipm pa, pa am wa palng ute wor itna wulmpa a Maur Wailen, atom mentepm awi yaprekg watin eng rpma wor yongkyong.
ROM 5:19 Am kolpake, melnum wris pa kil talpulng ok a Maur Wailen pa atom ari ak arkolng melnum wrongkwail ti angko kai antokg paipmpaipm. Am wa kolpa yat pake, melnum wris ti kil katnun ok a Maur Wailen pa, atom ari ak antokg Maur Wailen ari mentepm melnum wrongkwail ti la mentepm ute wor itna wulmpa akilen.
ROM 5:20 Melnum wrongkwail antokg paipmpaipm kolpa kulngkul, Maur Wailen alken yangkipm titnongket la tu kutnun eng mpa planten ngko wunong la, tu angketen yangkipm titnongket pa wailet. Pake kol tu ntokg paipmpaipm pa ngkine kolpa iye kai pa, mpa Maur Wailen plan ipma wor akilen ik ngklinsen ngkine ngkine kolpa iye kai iye kai angen pa.
ROM 5:21 Kolpa ti kol paipmpaipm a tu wrongkwail kin a kipman pikekg antokg pa itna wail ikgalenten atom antokg tu amo pa, am wa kolpa yat pake, ipma wor a Maur Wailen planto a angklinso pa wa itna wail ak angklinso atom kil ariwo la mentepm ute wor itna wulmpa akilen a wa kil alko yaprekg watin wor alkil atom mentepm antiwe ikga kaino ntiwel rpmi wor yongkyong. Pa pati kil ak atnen kwap wor a pikekg Sisas Krais Wailen a mentepmen kil ak pa.
ROM 6:1 Kol paipmpaipm a mentepm antokg pa wail, ari wa ipma wor a Maur Wailen pa wa wail manten angen pa, kolpa ti mpa mentepm la kolai? Mpa mentepm ntokg paipmpaipm pa kolpa iye kai pake, eng mpa Maur Wailen kil planto ipma wor wail manten akilen pa kolpa iye kai pake?
ROM 6:2 Kolpa kalpis wrisen! Mentepm am pikekg amo ise ak angketen titnongket a paipmpaipm a yapowo pa ise. Kolpa ti ake antiwe mpa mentepm itn a rpmi ntokg paipmpaipm pa kolpa wa iye kai pa, kalpis.
ROM 6:3 Aki kipm woniketen, a ake kipm ariwe la, mentepm a pikekg tu kaluko atom mentepm kawor rpma Krais Sisas pa, pa mentepm pikekg amo nampokgen kil pa.
ROM 6:4 Kolpa ti kol Krais Sisas pikekg amo atom tu uwentel pa, mentepm ti am wa kolpa yat pake: tu pikekg naren Krais Sisas kaluko pa, mentepm amo, atom tu uwento nampokgen kil ise. Atom Yan pa ak titnongket a nang wailen alkil pa la atom Krais kil wrekg pa, eng mpa wa mentepm ti wa wrekg rpmi uwi yaprekg weten watin kolen Krais pa.
ROM 6:5 Kol pikekg mentepm kirpon nimpokgen Krais pa atom imo kol pikekg kil amo pa, mpa mentepm wa uwi yaprekg weten wrekg rpmi kol Krais pikekg awi yaprekg weten wrekg rpma pa.
ROM 6:6 Mentepm ariwe la ipma tingklaket a mentepmen a kanokg ti am pikekg karkurng rka yo okgmangki amo nampikgen Krais ise, eng mpa ik lok ngkli ipma tingklaket a mentepmen a rka titnongket eng la ntokg paipmpaipm pa. Wa yat, eng mentepm ake mpa orngwatneikgen kutnun paipmpaipm pa kol pikekg ep pa, kalpis om.
ROM 6:7 Mentepm ariwe la, kol melnum ur imo pa, kil ake antiwe wa antokg paipmpaipm ur om, kalpis, atom Krais kil angketen wrpmungkaung a paipmpaipm pa tukwleikgentel atom kil wirng no itna kukula wor om.
ROM 6:8 Pake kol mentepm amo nampikgen Krais pa pati, mentepm wa ukipma ariwe la, mentepm am wa wrekg rpma or wris nampokgentel ise.
ROM 6:9 Mentepm ariwe la Krais pikekg amo atom Maur Wailen la atom wa kil wrekg, ti kil ikgake wa imo nti ur pa, kalpis. Kil ikgam rpma kolpa kai pake. Ake antiwe ikga wa Amo pa itni wailen ikglen kil pa wa imo nti ur pa kalpis wrisen.
ROM 6:10 Eng ntei, pikekg Krais kil amo pa, pa kil amo anti wrisel kolti eng ak angketen titnongket a paipmpaipm pa kai plalng. Wa kol a pikekg kil wrekg rpma pa, pa kil antokg kuina ur a Maur Wailen kil wasrongen ti kolti.
ROM 6:11 Am wa kolpa yat pake, kipm kol a wa ikwonilmpen kipm alkipm ti la, kipm am pikekg amo nampokgen Krais Sisas, ti paipmpaipm pa ake antiwe titnongket mpa wa lok yipowepm pa, kalpis om. Wa kipm am pikekg wrekg rpma nampokgen Krais Sisas, ti kipm mpa ntokg kuina ur a Maur Wailen kil wasrongen ti kolti.
ROM 6:12 Kolpa ti ampur kipm elng paipmpaipm pa itni wailen lok yipo numpalk a kipm a ikga imo ti, atom mpa kipm inti ntokg kuina ur kutnun nikgwalpm wasrongen akipmen a tilpepm la kipm ntokg pa.
ROM 6:13 Wa kipm ampur wa uk numpwam akipmen ti kai ak antokg paipmpaipm pa. Ampur antokg kolpa, kipm ntokg kol kilke: kipm am pikekg amo ise atom Maur Wailen kil wa la atom kipm wa wrekg rpma, kolpa ti kol a kipm uk kipm alkipm ti kai Maur Wailen. Wa kipm uk numpwam wrongkwail akipmen ti kai ik ntokg kweikwei a ute wor wor kolti.
ROM 6:14 Eng ntei, kipm pikekg rpma orngwatneikgen yangkipm titnongket a plantepm la paipmpaipm pa itna wailen alok yapowepm. Pake ak wang ti pa kipm rpma orngwatneikgen ipma wor a Maur Wailen plan ak angklinsepm, atom paipmpaipm pa ake wa itna wailen alok yapowepm om.
ROM 6:15 Kipm ake rpma orngwatneikgen yangkipm titnongket pa om, kipm rpma orngwatneikgen ipma wor a Maur Wailen plan ak angklinsepm om. Kolpa ti mpa kipm wa la kolkil la, “Kolpa ti mpa men ntokg kuina a i? Antiwe mpa men ntokg paipmpaipm kolpa kai itni pake?” Kolpa kalpis wrisen, ake mpa kipm ntokg kolpa.
ROM 6:16 Ti ake kipm ariwe la, kol kipm uk kipm alkipm ti mring ur atom atning nungkulkg aken kwap orngwatneikgen mring pa, pa am kipm melnum akwapel a mring a kipm atning nungkulkg pake. Kipm ariwe pa. Am kolpake, kol kipm melnum akwapel ur a orngwatneikgen paipmpaipm pa pati, pa mpa uwiyepm iye kai or ya a ikga imo. Wa kol kipm melnum akwapel ur a orngwatneikgen nikgwalpm a atning nungkulkg pa pipa, mpa Maur Wailen riwepm la kipm ute wor itna wulmpa akilen.
ROM 6:17 Kipm pikekg melnum a aken kwap orngwatneikgen paipmpaipm. Pake wa Maur Wailen elng kipm itna orngwatneikgen yangkipm akilen pa kolen mring weten a ikgalentepm pa. Atom ak wang ti pa kipm nikgwalpm arkekgen eng atning nungkulkg katnun yangkipm pa. Kolpa atom kupm kaporng yangkipm la Maur Wailen!
ROM 6:18 Kipm pikekg Maur Wailen kil angketen wrpmungkaung a paipmpaipm a yapowepm pa atom kipm wirng no itna kukula wor. Atom kipm palng melnum akwapel wor a antokg kuina ur a ute wor kolti orngwatneikgen Maur Wailen.
ROM 6:19 Nikgwalpm akipmen pa ake umpen wontrakole eng mpa kipm uwi riwe yangkipm a kupm la kil, kolpa ti kupm mpa la yangkipm wunongen ur eng mpa kipm uwi riwe kuina ur a kupm la kil. Kol pikekg kipm uk numpwam akipmen ti itna orngwatneikgen antokg kweikwei a kimpilpet a numkropis, wa kipm antokg paipmpaipm pa kai wail kolpa aye kai pa. Am wa kolpa yat pake, ak wang ti pa kipm mpa uk numpwam akipmen ti itni orngwatneikgen nikgwalpm ute wor a Maur Wailen alkepm pa, eng mpa kipm ntiwe a ntokg kweikwei a ute wor kolti, eng mpa kil mprinsepm elngitni manet eng kil alkil.
ROM 6:20 Ak wang a pikekg kipm aken kwap orngwatneikgen paipmpaipm a yapowepm pa, ake wa nikgwalpm ute wor ur a Maur Wailen wasrongen pa yapowepm pa, kalpis, kipm itna kukula wor kolti antokg paipmpaipm pa ak nikgwalpm alkipmen pa kolti.
ROM 6:21 Kipm pikekg antokg paipmpaipm pa kolpa atom kipm angket tuwai okipma kolai? Pa kipm pikekg angket tuwai okipma paipm, atom ak wang ti kipm numpaipm atnen pa. Kweikwei paipm a kolpa pa ikga ik rkolng kamel iye kai imo.
ROM 6:22 Pake ak wang ti a Maur Wailen kil angketen wrpmungkaung a paipmpaipm a pikekg yapowepm pa atom kipm wirng no itna kukula wor, a wa kil itna kol mring akipmen a kipm akentel kwap orngwatneikgen kil pa, kil antokg nol nikgwalpm akipmen ti rka antokg kweikwei wor wor katnun nikgwalpm akilen ti kolti, pa kol okipma wor a kipm angkon pa. Kipm itna kolpa kai pa, pa ikga ik uwiyepm iye kaino rpmi wor yongkyong.
ROM 6:23 Eng ntei, kweikwei a melnum awi akalmpe paipmpaipm a kil antokg pa am amo pake. Pake ipma wail wor a Maur Wailen angklin kalpmilel melnum a orngwatneikgen Krais Sisas Wailen amentepmen pa, pa mpa lkel yaprekg watin eng rpma wor yongkyong pake.
ROM 7:1 Kipm melnum alkupm a mentepm ukipma Krais, kol mpa kupm la kolkil niki kipm melnum a ariwe yangkipm titnongket a Maur Wailen kil uk Moses pa: yangkipm titnongket pa yapo melnum a rpma kanokg ti kolti, kil imo kai pa, yangkipm titnongket pa ake wa yapowel om, kalpis, am plalng ise.
ROM 7:2 Yangkipm titnongket pa yapo kin a kipman alkil rpma pa la, pa kil kin a kipman pake. Pake kol kipman alkil pa imo itnuurngkel pa pati, yangkipm titnongket a yapowel la kil kin a kipman pa am angketen ise atom kil am wirng no itna mamingkisen kukula ise.
ROM 7:3 Wa kol kin a kipman arpmen rpma pa wa kai nti kipman ur ai okg kin kipman pa, mpa mentepm lawel la, kil kin a angkli arkul kipman. Pake kol kipman alkil pa imo itnuurngkel pa pati, yangkipm titnongket a yapowel nampokgen kipman pa ake wa yapowel om. Kil la kai eng uwi kipman ur pa pipa, kil kai uwi o, pa kil ake angkli arkul kipman pa, kalpis, kil am wirng no itna kukula wor ise.
ROM 7:4 Kolpa ti kipm melnum alkupm a mentepm ukipma Krais, kipm pa am kolpake, pa kolen kipm am amo ise. Kipm pa kolen numpwam ur a num a Krais. Atom ak wang a Krais kil amo pa, pa kolen kipm ti wa amo yat. Kolpa atom pa ak angketen yangkipm titnongket a angklonake kweikwei a pikekg yapowepm pa am plalng ise. Atom kipm wirng no itna kukula wor itna mamingkisen eng mpa kipm kai rpmi eng kipman ur manet a pikekg amo atom Maur Wailen la atom wa wrekg rpma pa, pa Krais. Eng mpa mentepm itn a rpmi wor ntokg kweikwei kitila nikgwalpm wor a Maur Wailen ai kolti, pa kolen mentepm angko yo ok wor eng Maur Wailen.
ROM 7:5 Ak wang a pikekg mentepm rpma orngwatneikgen katnun ipma tingklaket almentepmen pa, yangkipm titnongket a lanako kuina a i paipm a kuina a i wor pa ak ngkat ipma amentepmen ti wrekg wasrongen la ntokg paipmpaipm pake. Ipma wasrongen a antokg paipmpaipm pa pikekg akwap wail itna kawor num wunen amentepmen ti, atom mentepm pikekg angko yo ok paipm atom ikga iyewo kai imo.
ROM 7:6 Pake pikekg mentepm amo nampokgen Krais, atom yangkipm titnongket a pikekg alok yapowo pa, ake antiwe wa arkulo aye itna pa a, kalpis. Pikekg Maur Wailen kil angketen yangkipm titnongket pa takwuleikgento ise, atom ak wang ti pa mentepm wirng no itna kukula wor. Kolpa atom ak wang ti mentepm atn a akwap katnun ya weten a Maur Wor a Maur Wailen. A ake wa mentepm atn a akwap katnun ya tingklaket a krakgkrakg a nira ela wrkapm a yangkipm titnongket a pikekg Maur Wailen uk Moses pa, kalpis.
ROM 7:7 Yangkipm titnongket pa lanako kuina a i paipm a kuina a i wor atom pa ak ngkat ipma amentepmen ti wrekg wasrongen la ntokg paipmpaipm pake. Ti mpa mentepm la kolai? Ti yangkipm titnongket ti paipm? Pa kolpa kalpis wrisen! Kol kupm la ntokg kweiur pa, ake wa kupm ariwe la pa kupm antokg paipm pa. Ari yangkipm titnongket pa lanakopm la ampur kupm antokg pa, pa kupm awi ariwe la pa paipm. Kolpa ti yangkipm titnongket pa ake paipm pa, pa wor. Kol kupm aringkowe kweikwei a melnum ur pa, kupm kol ake wa uwi riwe la pa kupm antokg paipm pa. Ari yangkipm titnongket pa lanakopm la, ampur kupm aringkowe pa, atom kupm awi ariwe la pa paipm.
ROM 7:8 Paipmpaipm pa akor ya atom or ya a yangkipm titnongket a la mentepm kutnun pa angkengkopm la ampur aringkowe antokg paipm pa, atom ak ngkat ipma akupmen ti wrekg wasrongen la ringkowe atom ntokg paipmpaipm auraur pa. Paipmpaipm pa am wrekg atnen a yangkipm titnongket la kupm ake mpa ntokg paipmpaipm pa. Yangkipm titnongket a pikekg yapon pa kalpis pa pati, ipma akupmen pa ake wrekg la ntokg paipmpaipm pa, kol a kalpis, paipmpaipm pa kol am imo ise.
ROM 7:9 Ep pa pikekg kupm rpma wor ak wang a Maur Wailen ake elng yangkipm titnongket pa itna, a pa. Kolpa itna kaingkai, yangkipm titnongket a la mentepm kutnun pa wa palng, atom ak ngkat ipma akupmen pa wa wrekg antokg paipmpaipm a yangkipm titnongket la ake mpa kupm ntokg kolpa, atom palng itna wail titnongket awi wrik pa rpma kolpa kai om,
ROM 7:10 atom maur wor akupmen pa amo atnen pake. Atom pa plantopm angko wunong la yangkipm titnongket a pikekg palng eng la kupm kutnun pa kol a wa ngklin maur wor akupmen pa eng kol a kupm rpmi wor yongkyong. Ari wa kalpis, yangkipm titnongket a kupm akentiwe katnun pa wa antokg maur wor akupmen ti amo atnen pake.
ROM 7:11 Pati atnen yiprokgen pa itna kolkil: Paipmpaipm pa akor ya atom awi yangkipm titnongket pa ak kansilopm atom kupm angko antokg paipmpaipm. Atom Paipmpaipm pa alm maur wor ti amo pake.
ROM 7:12 Kolpa pake yangkipm titnongket pa ake paipm, kalpis. Yangkipm titnongket manten a pikekg Maur Wailen uk Moses pa Maur Wailen kil alkil ti elng itna eng ik ngklinso. A wa yangkipm titnongket wam talpuk pa a ak angkengko a ak tilpo pa wa pikekg kil alkil ai elngkitna pa ute wor kolti.
ROM 7:13 Ti kol yangkipm titnongket a la kupm kutnun pa wor pa pati, kweikwei wor ti pa alm maur wor akupmen pa amo pake? Kolpa kalpis wrisen! Am paipmpaipm ti angkli yangkipm eng yangkipm titnongket wor pa kansilopm atom alm maur wor akupmen pa amo pake. Pa palng kolpa eng mpa plantopm ngko wunong lala paipmpaipm pa paipm. Wa yat, eng mpa yangkipm titnongket a angkengkopm la pa paipm pa ik nululngen paipmpaipm pa iye kul kai ngko mis.
ROM 7:14 Mentepm ariwe la yangkipm titnongket pa am Maur Wor arpmen pake. Kupm ti pa melnum a kanokg ti kolti, atom paipmpaipm pa yapowopm atom kupm aken kwap orngwatneikgen paipmpaipm pa.
ROM 7:15 Kupm ake ariwe kuina ur a kupm antokg pa. Kol kweikwei a kupm wasrongen la ntokg pa, ake wa kupm antokg, kalpis. Pake kweikwei a kupm karken la pa paipm ake mpa kupm ntokg pa, pa wa kupm antokg.
ROM 7:16 Kol kupm karken la ake mpa kupm ntokg kweikwei a paipm pa, ari kalpis, wa kupm wa antokg. Pa antokg kupm ti anti la yangkipm titnongket pa wor.
ROM 7:17 Kolpa ti kweikwei a kupm antokg pa ake lala kupm alkupm ti antokg pa, kolpa kalpis. Pa ipma tingklaket paipm alkil a rpma kawor kupm ti pa antokg paipmpaipm pake.
ROM 7:18 Eng ntei, kupm ariwe la ake kwei ur wor rpma kawor ipma wunen akupmen pa, kalpis, ipma tingklaget a antokg paipmpaipm itna kanokg ati pa rpma pake. Nikgwalpm a kupm rka la ntokg kuina ur a wor, pake ake wa kupm antiwe a antokg katnun nikgwalpm wor pa.
ROM 7:19 Eng ntei, kuina ur a wor a kupm la kol a ntokg pa ake wa kupm antokg, pa wa itna wai. A kuina ur a paipm a kupm karken la pa paipm, ake mpa kupm ntokg pa, kalpis, am wa kupm antokg antokg pa kolpa kai pake.
ROM 7:20 Kolpa ti kol kupm antokg kweikwei a kupm karken la ntokg pa, pa plantopm la pa ake kupm alkupm ti antokg pa, kalpis. Pa paipmpaipm a rpma kawor ipma wunen a kupm ti antokg pake.
ROM 7:21 Ti kupm la ntokg kuina ur a wor pa, ari kalpis, wa kupm antokg kweikwei a paipm ti tuwa. Ti kupm ari kolen paipmpaipm pa kwei ur titnongket a akangklei yapowopm.
ROM 7:22 Kawor ipma akupmen ti, kupm atopen la kutnun yangkipm titnongket a pikekg Maur Wailen kil alko pa la pa wor.
ROM 7:23 Ari wa kupm ari kweikwei ur titnongket manet akangklei akwap kawor numpwam akupmen pa almpwrong nampokgen yangkipm a ok wusok akupmen angkengkopm pa, atom alok angkliwopm yapowopm, atom kupm rpma orngwatneikgen paipmpaipm a ikgalen numpwam akupmen ti.
ROM 7:24 Woi, kupm wokg kitnangkunentopm pake! Mla a i mpa ngklinsopm uwiyopm tukwlelkgen ipma tingklaket a alm maur wor akupmen amo ti!
ROM 7:25 Kupm kaporng yangkipm la Maur Wailen eng kil ukwa Sisas Krais Wailen a mentepmen pa nar angklinsopm. Kolpa ti kupm melnum wris, pake kupm plelng won yirokg: maur wusok a kupm pa orngwatneikgen yangkipm titnongket a Maur Wailen, a wa ipma tingklaket a kupm pa orngwatneikgen paipmpaipm a ikgalentopm pa.
ROM 8:1 Krais Sisas pikekg nar angklinso, kolpa atom Maur Wailen ikgake uwi mentepm melnum a rpma kawor Krais Sisas pa iyewo kai itni yangkipm lko wleket a itna yongkyong ikilmpe paipm a pikekg mentepm antokg pa, ikga kalpis.
ROM 8:2 Kolpa atnen a kitn rpma kawor Krais Sisas pa atom titnongket a Maur Wor akilen a alkeitn yaprekg watin eng kitn rpma wor yongkyong, pa ak angketen titnongket a paipmpaipm a alm maur wor akitnen amo pa kai takwleikgenteitn atom kitn wirng no itna kukula wor.
ROM 8:3 Ipma tingklaket a mentepm melnum ti alok angkliwo atom yangkipm titnongket a Maur Wailen uk Moses pa titnongket kalpisen a angklinso akawiyo aye kai eng Maur Wailen pa. Pake Maur Wailen kil antokg kuina ur a yangkipm titnongket ake antiwe antokg: kil ukwa Warim Kipman alkil pa nar man raku kolen mentepm melnum a kanokg ti a antokg paipmpaipm pa. Kil ukwawel kulnar atnen paipmpaipm amentepm melnum ti antokg tike. Atom kil ak melnum Sisas pa akalmpe mentepm melnum ti atom alkel wleket a akalmpe paipmpaipm a mentepm melnum paipm ti antokg ti.
ROM 8:4 Maur Wailen antokg kolpa eng ak antokg mentepm ti antiwe a atn a rpma ute wor kolen yangkipm titnongket a pikekg kil elngtitna la mentepm kutnun pa. Pa kupm la mentepm a ake katnun ipma tingklaket amentepmen ti, mentepm a atn a rpma katnun ipma wasrongen wor a Maur Wor a Maur Wailen lanako la mentepm kutnun pa.
ROM 8:5 Eng ntei, tu melnum a orngwatneikgen ipma tingklaket atuwen pa, tu antokg katnun kuina ur a ipma tingklaket alntuwen wasrongen la tu ntokg pa. Pake wa tu a wa orngwatneikgen Maur Wor a Maur Wailen pa, tu antokg katnun kuina ur a Maur Wor pa wasrongen la tu ntokg pa.
ROM 8:6 Eng ntei, ipma wasrongen a tuwekg pa manman: kol tu kutnun kuina ur a ipma tingklaket alntuwen wasrongen la tu ntokg pa, pa tu katnun ya a ikga iyewen kai imo. Pake kol tu lok nol nikgwalpm atuwen ti kai kutnun ipma wasrongen a Maur Wor a Maur Wailen ti pa, pa tu katnun ya a awi ipma meen wor, pa ya a awi yaprekg watin eng rpma wor yongkyong.
ROM 8:7 Ipma tingklaket alntuwen ti pa karken orngwatneikgen katnun yangkipm titnongket a Maur Wailen kil lanaken la tu kutnun pa. Pa aklale, kol tu karken katnun yangkipm titnongket a Maur Wailen pa, ti kol tu la kutnun pake, pa ake antiwe mpa tu kutnun, mpa kalpis. Kolpa atom tu awi wrong manto lan Maur Wailen. Kolpa atom ari pa ikga iyewen kai imo.
ROM 8:8 Tu mla ur a orngwatneikgen katnun ipma tingklaket alntuwen pa, tu pa ake antiwe antokg kuina ur wor eng mpa Maur Wailen kil ipma wor itopenten pa, mpa kalpis.
ROM 8:9 Pake kol Maur Wor a Maur Wailen pa rpmi kawor ipma a kipm pa, pa kipm ake orngwatneikgen katnun ipma tingklaket alkipmen pa itna om, kalpis, kipm pa orngwatneikgen katnun Maur Wor a Maur Wailen pa ikgalentepm pake. Pake kol Maur Wor a Krais pa ake rpma kawor ipma wunen a melnum ur pa pati, melnum pa ake a Krais pa, kalpis.
ROM 8:10 Pake kol Krais pa rpmi kawor ipma akipmen pa pati, numpalk akipmen pa ikga imo itnen paipmpaipm, pake Krais kil antokg kipm palng ute wor itna wulmpa a Maur Wailen, atom Maur Wor akilen a rpma kawor kipm pa antokg kipm ikga rpmi wor yongkyong.
ROM 8:11 Maur Wailen pa pikekg la Sisas a pikekg amo pa wa wrekg, atom kol Maur Wor a Maur Wailen a pikekg la Krais Sisas pa wa wrekg pa rpmangkawor kipm pa pati, ikga wa kil la kipm a amo pa ikga wa wrekg nimpokgen numpalk weten pa rpmi. Ikga kil ikwap pa ik titnongket a Maur Wor alkilen a rpma kawor ipma akipmen pa.
ROM 8:12 Kolpa ti kipm melnum wor akupmen a mentepm ukipma Krais, kuloken a Maur Wailen kil akto ti kil uk kul rka maleng amentepmen ti rka pa. Pa ake ipma tingklaket pa alko kuloken pa eng mpa mentepm kutnun nikgwalpm wasrongen akilen pa ntokg kuina ur eng ikilmpe kuloken akilen pa.
ROM 8:13 Kol kipm kutnun ipma tingklaket akipmen pa, kipm ikga imo. Ari kol kipm ik titnongket a Maur Wor a Maur Wailen pa ilm kweikwei a paipm a kipm antokg katnun ipma tingklaket pa imo pa pati kipm ikga rpmi wor yongkyong.
ROM 8:14 Eng ntei, tu a katnun Maur Wor a Maur Wailen a aloken pa, tu pa warim a Maur Wailen pake.
ROM 8:15 Wa Maur Wor a kipm awi ti pati, ake wa maur wor a antokg kipm ti wa la iken kwap rpmi orngwatneikgen mring paipm ur, eng mpa kipm wa ngkirk ntiur eng ikga kil lkepm wleket ikilmpe paipmpaipm a kipm antokg pa, kalpis. Maur Wor a kipm awi ti pa, kil antokg mentepm palng warim a Maur Wailen. Kolpa atom mentepm la ukwewel pa, mentepm antiwe ukwewel lala, “Yaiyai, Yayai akupmen!”
ROM 8:16 Kolpa atom Maur Wor a Maur Wailen a rpma kawor ipma a mentepm ti a wa maur wusok amentepmen pa ekg kai or wris atom lanako kawor ipma wunen amentepmen ai lala, mentepm ti warim a Maur Wailen aklale pake.
ROM 8:17 Kol mentepm warim a Maur Wailen pa pati, mentepm nti Krais Wailen ikga uwi kweikwei wor wor a Yan Maur Wailen amentepmen kil aknamputo elngkitna la ikga lko pa. Wa yat, kol mentepm nti Krais rki kaikuten pa pati, mentepm wa ariwe la ikga wa mentepm ntiwel uwi nang wailen klalen pa.
ROM 8:18 Kupm akwonalmpen ari kolpa: titnongket a nang wailen a Maur Wailen aknamput mentepm ti ikga iye kul kai ngko wunong atom ikga mentepm uwi pa, pa ikga wail manten angen kaikuten a wleket a mentepm awi itna kanokg ak wang ti. Ikga wail manten, a kaikuten a mentepm awi itna kanokg ak wang ti pa waiketn, ake antiwe mpa ntin pa nimpokgen tita pa, kalpis.
ROM 8:19 Kitnong a kanokg nampikgen kweikwei wrongkwail a pikekg Maur Wailen kil antokg pa nikgwalpm pilpilen rpma nungkwangen la ikga ri tu warim alkilen pa uwi klalen a nang wailen pa palng ngko wunong.
ROM 8:20 Kitnong a kanokg nampikgen kweikwei wrongkwail a pikekg Maur Wailen antokg ti pa pikekg wor kolpa kai, ari wa palng paipm, ake itna kati kati kol a pikekg ep lmpiwen pa. Pa ake pikekg la mpa paipm kolpa, kalpis. Pa pikekg Maur Wailen kil alkil antokg la mpa palng kolpake atnen paipmpaipm a mentepm antokg pa. Pake ikgake paipm kolpa itni lantlan pa, kil numprampen ya ur itna atom kweikwei wrongkwail a pikekg kil antokg pa rka nungkwangen kweikwei wor wor a kil la ikga ntokg pa.
ROM 8:21 Kweikwei wrongkwail ti a pikekg palng paipm amo kai mampis a kai mingkirpet paipm pa, ikga wa palng wor. Ikga Maur Wailen ngketen wrpmungkaung a yapo kweikwei ti tukwleikgen, atom wirng no kukula wor atom ikga kil ntokg kweikwei pa wa palng klalen uwi nang wailen kolen mentepm warim akilen pa.
ROM 8:22 Mentepm ariwe la kweikwei wrongkwail a itna kitnong a kanokg ti kimeket kirkar akg awi wleket kolen kin a warim alm num wleket pa. Am kolpake, kweikwei wrongkwail a pikekg kil antokg pa awi wleket arki kaikuten kolpa ngkaten aye itna ak ai kulngkul itna nungkwangen wang a tu ikga rki wor pa.
ROM 8:23 Ake wa kweikwei a pikekg Maur Wailen kil antokg pa wris awi wleket kirkar akg pa. Wa mentepm melnum ti yat, mentepm a awi Maur Wor a Maur Wailen ti kolen okipma yipuken a akplanto la ikga mentepm ngkon okipma wor wrisen ai, ipma wunen a mentepmen ti wa awi wleket kirkar akg kolpa itna nungkwangen wang a ikga mentepm itnuurng palk paipm ti, a wirng no itni kukula wor uwi numpalk weten palng kolen warim lkimpen a kil alkil angket pa.
ROM 8:24 Mentepm ukipma ariwe la mentepm am Maur Wailen akawiyo eng alkilen ise, pake mentepm ake ari kul angko wunong pa, a pa. Atom mentepm ukipma rpma nungkwangen la ikga palng ngko wunong pake, pa ikgake kalpis pa. Pake kol kuina ur a pikekg mentepm ukipma rpma nungkwangen la palng pa, pa am mentepm ari ise, ti mpa wa mentepm ukipma rpmi nungkwangen la wa ri pa eng kuina wai, kalpis. Ti mla a i mpa ukipma rpmi nungkwangen la ri kweikwei a kil am ari ise.
ROM 8:25 Pake kol mentepm ake ari kuina ur a mentepm ukipma rpma nungkwangen ariwe la ikga mentepm ri pa, kweikwei pa itna ampen a pa, kolpa ti mentepm mpa rkul ipma rpmi nungkwangen kolpa rpmi pake.
ROM 8:26 Mentepm arkul ipma rpma nungkwangen kolpa rpma, wa ak wang a mentepm titnongket kalpisen pa, Maur Wor a Maur Wailen kil ak angklin mentepm ti. Mentepm ipma kaikut titnowen num la mpa mentepm oklala niki Wailen pa la kolai wa isen kuina wai. Pake Maur Wor kil alkil ai awi wrik a mentepm ti oklala naki Maur Wailen ai ak ariwe nikgwalpm a kil alkil ai eng ak angklin mentepm ti. Kil atningke kalkut pa akg arein oklala naki Maur Wailen, atom ari mentepm ake antiwe lakati kuina ur a kil asen pa la kil la kolai pa.
ROM 8:27 Atom ti Maur Wailen ari kawor nol nikgwalpm wunen a mentepmen ai worwor pa, kil ariwe kuina ur a Maur Wor kil kirkar akg namput mentepm pa. Eng ntei, Maur Wor pa kil kirkar akg la kil ngklin mentepm wrong kin a kipman alkil kai or nikgwalpm a Maur Wailen kil alkil rka la mpa ngklinso kolpake.
ROM 8:28 Wa mentepm ariwe kolkil: tu wrong kin a kipman a plan ipma wor wasrongen Maur Wailen pa, kweikwei wrongkwail wor a paipm a palngten pa, pa mpa palng wor ik ngklin tu pa. Pikekg kil akwewen eng alkilen katnun nikgwalpm ariwe a pikekg ep ak ai kil akwonalmpen la ikga ukwe tu pa eng alkilen.
ROM 8:29 Nikgwalpm a Maur Wailen pa pati rka kolkil: kil pikekg ariwe ep ak ai la ikga mla mla a i tu wrong kin a kipman akilen pa. Am tu wrong kin kipman pa a pikekg kil takweiyen ep ak ai, la ikga tu inip iro klung yapoko a Warim Kipman alkil pa, eng ikga Warim Kipman alkil pa palng warim ep akilen, a nangkwor tukgunakg a tu paipm paipm klungen alkil pa.
ROM 8:30 Wa tu mlaur a pikekg kil takwei ep ak ai la ikga iro klung yapoko a Warim Kipman akilen pa, am pikekg kil akwe tu a kil takweiyen pake. Wa tu mla ur a pikekg kil akwewen pa, am pikekg kil awi kaporngken yangkipm la tu pa ute wor. Wa yat, tu mla ur a pikekg kil kaporngken yangkipm la tu pa ute wor pa, am ikga kil uk nang wailen klalen tu pake.
ROM 8:31 Ti Maur Wailen kil angklinso kolpa, ti mpa mentepm la kolai? Mpa mentepm la kolkil la, Maur Wailen kil rpma nampokgen mentepm ti, ti mla a i mpa ntokg mentepm ti? Pa kalpis.
ROM 8:32 Maur Wailen ake wa pikekg langkinen Warim Kipman alkil ti, kalpis. Kil uk Warim Kipman alkil ti kai eng tu almpel amo eng akarmpen paipmpaipm a mentepm wrongkwail. Kol pikekg kil alko Warim Kipman alkil ti kolpa, ti kil ake mpa rkul kweikwei a worampei akilen pa, pa mpa kalpis. Kil mpa ngklinso pa.
ROM 8:33 Mentepm melnum a pikekg Maur Wailen kil takweiyo eng alkilen pa, mpa wa mla a i ntiwe rkiwo itni Maur Wailen pa la mentepm antokg paipm pa? Kalpis, ake antiwe mpa melnum ur la pa. Maur Wailen kil alkil ti kolti antiwe la pake, pake kil pikekg kaporng yangkipm mentepm ti la mentepm ute wor.
ROM 8:34 Ti mla a i antiwe mpa la mentepm ti la mentepm ti paipm atom ikga Maur Wailen kil ntokg mentepm ti kai paipm pa? Pa kalpis. Krais Sisas wris ata pa kil antiwe, pake kil pikekg amo akarmpen paipmpaipm a mentepmen pa plalng ise. Ake kil amo pa wris, wa Maur Wailen kil la atom kil wa wrekg rpma. Atom ak wang ti pa kil antiwe titnongket wail manten rpma nampokgen Maur Wailen pa oklala naki Maur Wailen pa la kil ngklin mentepm ti.
ROM 8:35 Antiwe mpa kweikwei ri kil wako iro mentepm ti tukuleikgen nikgwalpm a Krais kil plan ipma wor wasrongento pa: - kaikuten a palngto aki, - wleket a mentepm awi aki, - tu or ungkwanto alko wleket aki, - nikgalmpo aki, - mentepm tukwok eng apmnung aki, - kol tu iyewo ngkirk la ntokgto paipm ur aki, - kol melnum ur ilmpo imo aki? Krais kil arkul nikgwalpm a plan ipma wor wasrongen mentepm ti, ti antiwe mpa kweikwei ri kil iro mentepm ti itni manet tukuleikgen Krais ti? Pa kalpis wrisen.
ROM 8:36 Mentepm arki kaikuten kolpa pa kai or yangkipm a pikekg Tepit lanaki Maur Wailen pa ela wrkapm akilen pa la kolkil la, “Men melnum a ukipma kitn pa kolpa atom ari tu akangklei wang wasrongen la ilmpo imo. Tu arpmen walkg paipmel men ti la ilmpo imo kolen manto walkg malkgu ur a tu almpalm amo pa.”
ROM 8:37 Kol kalkuten wrongkwail kolpa palngto pa, Krais a plan ipma wor wasrongen mentepm ti pa kil angklin mentepm ti, kolpa atom mentepm antiwe alok angkli kalkuten pa itna titnongket atopen arki kalkuten wrongkwail ti kolpa itna.
ROM 8:38 Kupm ukipma ariwe worwor kolkil la: ake antiwe kweikwei ur kolkil wako iro mentepm ti takwleikgen ipma wor a Krais kil plan a kil wasrongento pa: kol mentepm imo aki, rpmi aki, tu maur akwapel a Maur Wailen aki, tu mring a mring maur kweikwei aki; kweikwei a palngto ak wang ti aki, kweikwei a ikga palngto ik wang kutnukg aki, kweikwei titnongket a worampei aki, pa ake wa antiwe, kalpis.
ROM 8:39 Kweikwei a kaino kwa watin ai aki, kweikwei a kinar kanokg walopmen ai aki, kweikwei wrongkwail pikekg Maur Wailen antokg a itna yela aki, kweikwei wrongkwail pa ake antiwe wako aro mentepm ti takwleikgen nikgwalpm a Maur Wailen plan ipma wor wasrongento pa, kalpis wrisen. Kol am pikekg kil planto ise la kil plan ipma wor wasrongen mentepm ti kolpa atom ari kil ukwa Krais Sisas Wailen amentepmen pa nar angklin mentepm pa.
ROM 9:1 Krais kil ariwe kuina ur a kupm la mpa lanikepm kil pa, pa ake yangkipm kansil pa. Wa ok wusok akupmen a wa Maur Wor a Maur Wailen a rpma kawor ipma akupmen ti wa aktitnongketel yangkipm a kupm la mpa la kil pa, pa yangkipm aklale.
ROM 9:2 Ipma akupmen ti pa kalkut paipm alupm wes arein tu wrong kin kipman a tu men Suta pa akangklei wang kolpa itna pake.
ROM 9:3 Woi, kol a Maur Wailen kil ok nti uk wleket kupm ti ngketentopm kai tukuleikgen Krais ti a tu ai kul uwi wrik a kupm ti ukipma itni nimpokgen Krais ti. Eng ntei, tu pa kol wusok wusok a wail wail akupmen a angket ale angkai Sekop ai kul pake.
ROM 9:4 Ti kol am tu men Suta ti ukipma Krais pake! Eng ntei: - men Suta pa wrong kin kipman a angket ale a Sekop Isrel pa kul pake; - wa men pa pikekg Maur Wailen takweiyo la men warim akilen; - wa yat pikekg kil plan titnongket a nang wailen akilen pa eng tu men pa atom tu men pa ari pake; - a wa kil am pikekg lamplam kla anti tu walyipmiri a wapyipmiri a men pake; - wa yangkipm titnongket a pikekg kil uk Moses pa kil am la men ti kutnun yangkipm pake; - a wa ya ute aklale a kol a kipor kilko ilein ngkit nang a Maur Wailen pa am pikekg kil plan tu men tike. - Wa yangkipm a kil yapon la plan ipma wor alkil ngklin mentepm melnum pa, kil am pikekg yapon nampokgen tu men pake. -
ROM 9:5 Wa Apraam, Aisak a Sekop a pikekg Maur Wailen takweiyen pa tunteng pa am wapyipmiri walyipmiri a men tike. - Wa Krais, melnum a pikekg Maur Wailen kil ukwa nar eng akarmpen mentepm wrongkwail ti pa, am pikekg man rakuwel palng melnum kai om a mapming a men tike. Ti kol am tu men ti ukipma Krais pake, ari kalpis, tu wailet wa uk yirokg kil pa. Krais kil wailen itna ep ikgalen kweikwei wrongkwail, kil Maur Wailen. Atom wrongkwail kin a kipman mpa ngkit nang akilen pa ik wang ti a ikga ik wang kutnukg ai. Aklale, am kai kolpake.
ROM 9:6 Tu wailet a men Isrel ti pa ake ukipma Krais, pake kupm ake lala yangkipm a pikekg Maur Wailen kil yapon nampokgen tu men Isrel ti pa la ikga kai kalpmlel pa, kolpa kalpis. Yangkipm pa ok arke pake, ari men a angket ale angkai wapyipmiri walyipmiri amenen Isrel pa kul pa, ake men kimeket pa wrong kinkipman aklale a Maur Wailen pa, kalpis.
ROM 9:7 Am kolpake, tu warim watnom a yan yiprokgen Apraam pa, ake tu kimeket pa warim aklale akilen pa, kalpis. Maur Wailen pikekg lanaki Apraam pa la kol kil la, “Aisak pa warim aklale akitnen a ikga ngket le tu wapyipmiri walyipmiri akitnen pake.”
ROM 9:8 Maur Wailen kil la kolpa naki Apraam pa pati, yiprokgen pa itna kolkil: ake la la tu men warim watnom walwalpopm walyaru a pikekg yan yiprokgen Apraam kil angket ale kolpa kul pa kimeket pa warim aklale a Maur Wailen pa, pa kolpa kalpis. Itna kol kilke: pikekg Apraam angket warim katnun yangkipm a pikekg Maur Wailen antiwel yapon pa la kil ikga ngket warim pa. Am wa kolpake: tu melnum a palng warim a Maur Wailen atnen yangkipm a pikekg Maur Wailen yapon pa, am tu pa kolti warimpwarim walwalpopm walwalyaru aklele akilen pake.
ROM 9:9 Yangkipm a pikekg Maur Wailen kil yapon nampokgen Apraam pa la kolkil la, “Ikga wring kutnukg kai kiti kiti kolti a ikga kupm yaper nar pa, Sara pa am raku warim kipman pa aye rpma ise.”
ROM 9:10 Ake wa palng kolpa eng Sara pa wris, wa palng eng Repeka pa yat: Repeka pa kil itna, Aisak wapyipmiri walyipmiri amenen, pa wangket warim kai kin alkil Repeka atom kil raku warim wekgenen pa.
ROM 9:11 Warim kipman wekgenen pa i ntang. Ak wang a Repeka itna pa, tuwekg warim wekg a rpma kawor ipma wunen pa ake antokg kuina ur a wor aki paipm pa, apa, atom Maur Wailen kil takwei ur pake ur pa kalpis. Pa planto nikgwalpm a Maur Wailen la tukwei melnum pa, pa kil ake ari kwap a melnum pa ak atom kil takweiyel pa, kolpa kalpis. Pa kil alkil ti takwei ur a ur pa kalpis ak wasrongen a kil alkil ti kolti.
ROM 9:12 Atom Maur Wailen kil lanaki Repeka ak wang a kil itna pa la, “Warim i akitnen pa ikga iken kwap orngwatneikgen warim ntang akitnen pa.”
ROM 9:13 Yangkipm pa kai or yangkipm a Maur Wailen pikekg tu melnum okwripm nira ela wrkapm a Maur Wailen pa la kolkil la, “Kupm plan ipma wor wasrongen Sekop pake, Iso pa kupm karken.”
ROM 9:14 Kolpa ti mpa mentepm la kolai? Kalpis tuwa! Tu tiur mpa wa la kolkil la, “Maur Wailen pa kil plan ipma wor wasrongen ur, a kil karken ur pa kil ak paipm!” Pake Maur Wailen ake antiwe mpa ik paipm, kalpis wrisen! Kil takwei melnum pa, pa kil ak ak nikgwalpm alkil.
ROM 9:15 Pikekg Maur Wailen kil lanaki Moses pa la kolkil la, “Kupm la ipma rein ngklin melnum ur pa, pa, kupm ipma arein angklin melnum pa, a wa kupm la rein melnum ur pa, pa kupm arein melnum pa.”
ROM 9:16 Pikekg Maur Wailen lanaki Moses kolpa, ti mpa mentepm riwe kolkil la, Maur Wailen ake kil takwei melnum atnen kwap wor ur a kil ak aki nikgwalpm a melnum pa wasrongen la kil pa tukweiyel pa, kolpa kalpis. Pa ipma arein wail a Maur Wailen kil alkil pa kolpa atom kil takwei melnum pa kolti a ake melnum pa antiwe antokg kuina ur kolai eng mpa kil tukweiyel pa, kalpis.
ROM 9:17 Kol nira ela wrkapm a Maur Wailen pa pikekg Maur Wailen kil lanaki melnum tukgunakg a anong kanokg Isip pa la kolkil la, “Kupm pikekg takwei kitn pa ngkateitn itna wailen pati atnen kupm la ikwap wekg ur kil kai kitn pa: ur pa, kupm la tu ri titnongket akupmen a kupm ik kai kitn pa. A wa ur pa, kupm la tu wrong kin kipman mpa itning a ri pa atom tu laron nang akupmen niki tita kolpa kai yela kanokg ti.”
ROM 9:18 Kolpa ti mpa mentepm riwe kolkil la, kol Maur Wailen la rein ngklin melnum ur ai pa, kil mpa tukwei melnum pa ik wasrongen a kil alkil ai kolti, atom kil rein ngklinsel. A wa kil la ntokg ipma a melnum ur pa kai kakiren paipm pa, kil mpa tukwei melnum pa ik wasrongen a kil alkil ai kolti.
ROM 9:19 Wet kupm nira la Maur Wailen kil ak nikgwalpm wasrongen a kil alkil ai arein melnum tiur atom angklinsen, a kil antokg ipma a melnum tiur kai kakiren paipm, kolpa ti kipm ur mpa wa isentopm kolkil la, “Kolpa ti melnum a ipma akilen kai kakiren paipm pa ake antiwe mpa kil tulpulng nikgwalpm wasrongen a Maur Wailen antokgtel kolpa, ti mpa wa Maur Wailen wa ikle melnum pa la kil kolpa eng ntei!”
ROM 9:20 Kupm mpa ikilmpe asen a kipm pa kolkil: Kitn mla atom kitn nolangkil Maur Wailen pa asen kolpa! Kitn pa melnum a kanokg ti kolti. Ti antiwe mpa wa kuntuk mang pa wa la melnum a ak kuntuk pa la, “Wa kitn ak kupm kil kolkil eng na? Kol a kitn iktopm kol a wai!”
ROM 9:21 Melnum a kil ak kuntuk mang pa, kil antiwe ilei tuwol mang pa eng ik ik kuntuk kolai kolai ik wasrongen a kil alkil. Kil antiwe ilei tuwol kai mang wris pa atom ik ik kuntuk wakgen a ak eng ak antokg okipma al akangklei wang. A wa kil antiwe wa ik kuntuk mangkei a ak elngkirpma eng ak antokg okipma wail wail al ak wangklawe. Mpa mla a i la, pa mpa kalpis, kil mpa ik kitila nikgwalpm wasrongen a kil alkil ti kolti.
ROM 9:22 Maur Wailen ak irir kol melnum a ak kuntuk mang. Tu melnum a antokg paipmpaipm kolpa kai pa, tu kol kuntuk mang pormpor a nimprampen erpma la kol a Maur Wailen kil ngkit rum pa. Eng ntei, kil wasrongen la plan ipma wakget a titnongket wail akilen pa ngko wunong eng mpa mentepm riwe. Pake kol kil wa rkul ipma pa iyewen wang pa itni kolpa kai, pa mla a i mpa la, pa mpa kalpis.
ROM 9:23 Wa kol kil rkul ipma kolpa eng mpa kil wa uk ipma wor rein tu melnum a pikekg kil numprampen ep ak ai elng itna la ikga tu pa kaino ntiwel rpmi uwi titnongket a nang wailen, ti mpa mla a i la, pa mpa kalpis. Tu pa kol kuntuk mang misen a kil ak plan titnongket a nang wailen akilen a ikgake kai plalng ti wa kai ngko wunong eng tu wrong kin a kipman ri.
ROM 9:24 Am wa kolpa yat pake, kil wa akwe mentepm ti la wa palng kol tu a pikekg kil uk ipma wor areinsen pa. Tu a kil planten ipma meen wor pa pati, am mentepm a kil akwewo la mentepm akilen pake. Ake wa kil akwe men Suta ti wris pa, kalpis, wa kil wa akwe kipm ake a Suta pa yat.
ROM 9:25 Kolen yangkipm kil pikekg Osea melnum okwripm a Maur Wailen la ep atom nira katnun ok a Maur Wailen la kolkil la, “Tu wrong kin kipman a ake pikekg kupm akwe ep lala, tu wrong kin kipman akupmen pa ikga kupm ukwewen la tu wrong kin kipman alkupmen. Wa tu melnum a ake pikekg kupm plan ipma wor wasrongenten ep pa ikga wa kupm wa plan ipma wor wasrongenten ukwewen lala, kin wor kipman wor alkupmen.”
ROM 9:26 Wa yat ikga wa palng kolkil, “Tu wrong kin kipman a kai anong a pikekg kupm akwewen la, 'Kipm pa ake kipm wrong kin kipman alkupmen pa', pa ikga kupm ukwe tu a kai anong pa kolkil la, 'Kipm pa warim a kupm Maur Wailen a rpma yongkyong.'”
ROM 9:27 Pake Aisaia melnum okwripm a Maur Wailen pikekg ak wang ep pa la Isrel pa yikakatnen kolkil la, “Kolen wrong a tu men Isrel pa palng watipmen paipm kolen wes ningkrapm a nar no kop pake ikga Maur Wailen kil ik uwi wrong yangkorkgen kolti iye kul kai wor, a yaurngen pa ikga kalpis.
ROM 9:28 Wailen Maur Wailen pikekg la ise, atom ik wang a ikga kil uk wleket tu melnum a kanokg ti ikilmpe paipmpaipm a pikekg tu antokg kolen a pikekg kil la la ikga kil ntokg pa, pa ikga kil lken wleket pinterngen yikakatnen nti wrisel kolti.”
ROM 9:29 Kil wa yangkipm ur manet a Aisaia melnum okwripm a Maur Wailen pikekg la ep ak ai kolkil la, “Kol Wailen, Maur Wailen a antiwe titnongket wail manten, pikekg ake kil elng tu wrong wompelel ur kolti a tu men Isrel pa rki pa, pa pati kol a tu men kol a imo plalng kol tu a pikekg rka anong wail Sotom a Komora pa.”
ROM 9:30 Ti mpa mentepm la kolai pa? Mpa mentepm la kolkil la: tu men Suta pa kai kolpake. Tu kipm a ake Suta pa ake kipm aken kwap kolai akor ya la mpa Maur Wailen ri kipm pa la kipm ute wor itni wulmpa akilen pa. Pake kipm ansil ya a ariwepm la kipm ute wor itna wulmpa a akilen pa, pa ya a ukipma Krais ti kolti.
ROM 9:31 Pake men Isrel ti men akangklei aken kwap paipm wrisen lala kutnun yangkipm titnongket a kweikwei tiur almenen a angklonake pa, atom akwonalmpen la men am ute wor itna wulmpa a Maur Wailen or ya pake. Ari wa kalpis, ake wa men palng ute wor or ya pa.
ROM 9:32 Ti antokg kolai atom ake Maur Wailen ari tu men ti la tu men ute wor itna wulmpa a akilen pa? Pati atnen tu men ake ukipma Krais pa, kalpis. Tu men alpmen ti akwap tumplowis paipm katnun yangkipm titnongket a angklonake kweikwei ti la mpa tu men kutnun ya pa atom tu men palng ute wor itni wulmpa a Maur Wailen pa or ya pake. Tu yikak itna yangkipm titnongket ai ise, a ake tu yikak itna Krais a kol a tu men ukipma pa. Atom Krais pa kolen wes wail ur a rpma ya, atom tu men kai wutat itna wes pa angko kolti.
ROM 9:33 Kol pikekg Maur Wailen la atom Aisaia nira ela wrkapm a Maur Wailen pa la kolkil la, “Kipm itning, ikga kupm elng wes ur pa elngkirpmi Saion, atom ikga tu kai wutat itni wes pa ngko atom wes pa ikga ngket nepm a tu pa.” Pa la Krais pake. Kol melnum ur ukipma kil pa, kil ikgake uwi numpaipm pa, ikga kalpis.
ROM 10:1 Kipm melnum wor alkupm a mentepm ukipma Krais, ipma wail akupmen pa arken tu wrong kin kipman alkupmen a Isrel pa la kol a Maur Wailen kil ikuwiyen iye kul kai eng alkilen. Kolpa atom kupm oklala naki naki Maur Wailen eng la kil ngklinsen kolpake.
ROM 10:2 Kupm alkupm ti pikekg kolpa, atom kupm ariwe tu pa la tu nikgwalpm arkekgen paipm la kutnun Maur Wailen. Pake ake tu ariwe worwor nikgwalpm yiprokgen a Maur Wailen ai eng mpa tu kutnun pa, kalpis.
ROM 10:3 Tu akwekgel ya a Maur Wailen kil antokg melnum palng ute wor itna wulmpa akilen pa, atom wa tu alntu akule ya manet ur alntuwen akwiyen a kol a tu ore eng la palng ute wor pa, a tu ake la rku tu alntu ti orngwatneikgen kutnun nikgwalpm a Maur Wailen a la ntokg melnum palng ute wor pa, kalpis.
ROM 10:4 Tu aken kwap katnun yangkipm titnongket la palng ute wor itni wulmpa a Maur Wailen pa, pake ake antiwe, kolpa kulngkul, Krais pa palng atom kil yikak el yapoko yek kimeket katnun yangkipm titnongket pa kolpa kai aro yiprokg. Atom kil akule ya eng mentepm mla ur a ukipma kil pa pipa, Maur Wailen mpa uwi wor lawo la mentepm ute wor.
ROM 10:5 Moses kil pikekg nira la ya a katnun yangkipm titnongket a la palng ute wor itni wulmpa a Maur Wailen pa, pati kil pikekg nira kolkil la, “Melnum a kil yikak el yapoko katnun yangkipm titnongket wrongkwail a Maur Wailen pa yek kimeket pa pati, kil awi yaprekg watin atom ikga rpmi wor yongkyong.”
ROM 10:6 Pake ya a melnum ukipma Krais eng mpa kil palng ute wor itni wulmpa a Maur Wailen pa ake wonet kolpa. Yangkipm a Maur Wailen lanaki melnum a ukipma pa la kolkil la, “Ampur kitn ak nikgwalpm a kitn alkitn pa ak la kolkil la, 'Mla a i antiwe mpa kaino anong wor a Maur Wailen pa?'” Pa kitn ak asen kolpa la kol a wa kaino ik yakur Krais ai wa iye nar, pake ake kolpa, kil am pikekg nar ise.
ROM 10:7 “Ampur kitn wa ak nikgwalpm a kitn alkitn pa wa ak la kolkil la, 'Wa mla antiwe mpa kinar wrik om a tu melnum amo kai arke arke pa?'” Pa kitn ak asen kolpa la kol a wa kinar ik yakur Krais a pikekg amo ai wa iye yaper no, kolpa kalpis, Maur Wailen pikekg la atom kil am wrekg ise.
ROM 10:8 Yiprokgen a yangkipm a Maur Wailen lanaki melnum a ukipma pa itna kolkil, “Yangkipm a Maur Wailen pa am antiweitn rpma ise. Kitn antiwe ak nol nikgwalpm ti arongke atom ak ok ti la la yangkipm pa am la kolpake.” Ti pa la yangkipm kuina? Pa la yangkipm a men ti laron nakepm nakepm la kitn ukipma Krais pa pati mpa Maur Wailen ri kitn pa la kitn pa ute wor itna wulmpa akilen pa.
ROM 10:9 Kolpa ti, kol nol nikgwalpm a kitn ti rken la kil a pikekg amo pa pikekg Maur Wailen la atom kil wa wrekg rpma, a wa kol kitn ik ok alkitn ti laron la Sisas pa kil Wailen, pa pati kitn mpa kil ikuwiyeitn iye kai eng alkilen.
ROM 10:10 Eng ntei, ya a Maur Wailen ariwo la mentepm ute wor itna wulmpa akilen pa pati, am a mentepm ukipma Krais pake. A wa ya a Maur Wailen ak awiyo eng alkilen pa pati, am a mentepm ak ok almentepmen ti laron Krais pa la kil pa Wailen pake.
ROM 10:11 Wa yangkipm ur a ela wrkapm a Maur Wailen pa la kolkil la, “Ake melnum wris ur a kil ukipma kil pa ikga uwi numpaipm ipma kalkut pa, kolpa kalpis.”
ROM 10:12 Yangkipm pa la mentepm kimeket: men Suta ti a kipm a ake Suta pa, ake wa mentepm itna man man kolai pa, kalpis. Mentepm wrongkwail am irir kolen tita itna wulmpa a Maur Wailen pake. Wailen wris pa kil Wailen itna ep a mentepm wrongkwail. Kil melnum mrer wail a antiwe kweikwei wor wor wailet, kol melnum ur oklala nikel la kil ngklinsel pa, kil mpa ngklinsel pa.
ROM 10:13 Kol nira ela wrkapm a Maur Wailen pa la, “Kol melnum ur kil ukwe Wailen pa la kil ngklinsel pa, kil mpa ikuwiyel iyekul eng alkilen.”
ROM 10:14 Pake kol tu ake ukipma Wailen pa, ti tu mpa wa ukwe Wailen pa la mpa wa kil ngklinsen la kolai? A wa kol tu ake atning yangkipm wor a la Wailen pa, pa mpa wa tu ukipma kil pa la kolai? Wa yat kol ake melnum ur kai laron yangkipm pa niken pa, ti mpa wa tu itning yangkipm pa la kolai?
ROM 10:15 A wa kol mla ur ake ukwa melnum ur kai laron yangkipm pa, ti mpa wa kil kai niki tu wrong kin kipman pa la kolai? Pake tu pikekg kul laron nako yangkipm wor pa. Kolen a nira ela wrkapm a Maur Wailen pa la kolkil la, “Tu wrong kin kipman ari tu melnum a aye yangkipm wor pa kai naken pa, pa tu atopenten paipm awiyen aye kai.”
ROM 10:16 Pake tu a pikekg atning yangkipm wor a la Krais pa ake wa tu kimeket ukipma katnun pa, kalpis. Kol la ela wrkapm a Aisaia nira pa la kolkil la, “Wailen, ti mla a i pikekg ukipma katnun yangkipm wor a pikekg men laron naken pa? Kalpis.”
ROM 10:17 Kolpa ti, mentepm ukipma atnen a mentepm atning yangkipm pa. Wa mentepm atning yangkipm pa atnen a tu laron yangkipm pa nako pa.
ROM 10:18 Kolpa ti mpa kupm isen kolkil la, ti tu men Isrel ake pikekg atning yangkipm wor a tu laron pa mol? Kalpis, tu pikekg atning pa, kol a wrkapm a Maur Wailen la kolkil la, “Ok a tu laron yangkipm wor pa am tu wrong kin kipman wrongkwail yela kanokg ti atning ise kai orarpme kanokg umpuwen ti ise.”
ROM 10:19 Pake kupm wa la wa isen ntiur la, ti tu men Isrel pa akwekgel yiprokgen a yangkipm wor pa la la kolai? Ai, kolpa kalpis, tu ake akwekgel pa, tu ariwe pa! Pake wa tu enen ai wa ariwe yangkipm pa. Kol pikekg Moses awi ok a Maur Wailen la ep ak ai la kolkil la, “Ikga kupm tukwei tu wrong kin a kipman enen ai, lala tu akupmen, atom ikga ntokg kipm ipma paipm eng tu pa. Ikga kupm ngklinsen kolpa atom ik ntokg kipm pa ipma wakget paipm eng tu wrong kin a kipman enen a akwekgel yangkipm pa.”
ROM 10:20 Moses pikekg lakati ok a Maur Wailen kolpake. Kolpa kulngkul, atom wa Aisaia melnum okwripm a Maur Wailen pa kil ake wa ngkark, kil itna wrongen lakati ok a Maur Wailen kolkil la, “Tu wrong kin a kipman enen pa ake pikekg wa akor kupm ti pa, kalpis, pake tu ariwopm. Wa yat, tu ake wa asen la uwi riwe kupm ti pa, kalpis. Pake kupm ti plan kupm alkupm ti kai palng angko wunong atom tu ariwe kupm ti.”
ROM 10:21 Aisaia lakati ok a Maur Wailen a la tu kipm ake Isrel pa kolpake, pake tu men Isrel pa kil awi ok a Maur Wailen pa kil la kolkil la, “Akangklei wang or pa kulngkul kul ti pa, kupm wampalen tu wrong kin a kipman pa nungkwangen kolpa itna la tu mpa ner wam kulntopm! Ari wa kalpis. Tu pa tu wrong kin a kipman nungkulkget talpulng yangkipm.” Pa Maur Wailen am ak la tu men Isrel pake.
ROM 11:1 Ti kupm mpa wa isen kolkil la, tu men wrong kin a kipman a Isrel a pikekg Maur Wailen takwei eng alkilen pa, uk yirokg kil ti, ti kol am kil ungkwanten ise. Ari kolpa kalpis wrisen! Ti kipm ri kupm ti, kupm ti yat am melnum wris ur a tu men Isrel pake. Apraam pa wapyipmiri a walyipmiri atuwen wa akupmen ti yat. Kupm ti a om a Pensamin, yan yiprokgen a om pa.
ROM 11:2 Maur Wailen ake wa plelng yirokg la men wrong kin a kipman akilen pa, kalpis. Men melnum akilen pikekg kil takweiyo ep ak ai la men Isrel pa men wrong kin a kipman akilen. Kolpa atom ake mpa wa kil plelngen nikgwalpm akilen ti atom ungkwanto pa, kalpis. Ti ake wa kipm ariwe yangkipm ur kil a ela wrkapm a Maur Wailen pa la pikekg Elaisa lanaki Maur Wailen arki tu a men Isrel pa? Pikekg Elaisa arkiwen la kolkil la,
ROM 11:3 ”Wailen, tu alm tu men melnum ok wripm akitnen ti amo plalng, a wa tu tikale tipmakg a men alm eng alwor uk kweikwei wlikgok atnewe eng kitn pa ise. A kupm alkupm yek wris ata kolti rpma, atom wa tu ampen arko la wa ilm kupm ti wa imo yat.” Ti yangkipm a Elaisa la ti a ela wrkapm pa kipm ariwe pa!
ROM 11:4 Ari wa Maur Wailen akalmpentel lanakel kolai? Kil akalmpentel lanakel kolkil la, “Pikekg tu alm tu yaurngen pa amo pake, kupm ikgalen kipm wrong yangkorkgen kamel kamel (7,000) kolkil rpma eng alkupmen. Kipm melnum kil ake kipm kapor kilko alein Pal, mring maur pa la pa Maur Wailen aklale akipmen pa.”
ROM 11:5 Pikekg Maur Wailen takwei Elaisa pa nampokgen tu wrong yangkorkgen a ukipma kil pa kolti atom tu pa rpma pake. Wa ak wang ti pa am wa kolpake: men wrong yangkorkgen kolti a Isrel pa men rka. Maur Wailen kil takweiyo eng alkilen atnen a kil planto ipma wor a angklinso, a tu wrong yaurngen pa tu almpil yirokg la kil.
ROM 11:6 Pa ipma wor a kil planto a kil angklinso kolti atom ari kil takweiyo eng alkilen pa. A ake kil ari kwei ur wor a mentepm antokg pa atom kil takweiyo pa, kolpa kalpis. Kol kil ri kwei ur wor a mentepm antokg pa atom kil tukweiyo pa, pa ake kol ipma wor a kil angklinso pa atom kil takweiyo pa, pa kolpa kalpis.
ROM 11:7 Kolpa ti mpa mentepm la kolkil la, ya a tu wrong yaurngen a men Isrel pa tu aken kwap katnun yangkipm titnongket la mpa palng ute wor itni wulmpa a Maur Wailen pa, pake ake wa tu palng ute wor pa or ya a tu aken kwap pa kalpis. Pake men wrong yangkorkgen a Isrel a Maur Wailen kil takweiyo eng alkilen pa, men pa kolti ansil ya a kil ariwo la men ute wor itna wulmpa akilen pake. Pake tu yaurngen pa ipma a tu pa kai kakiren ise.
ROM 11:8 Nira ela wrkapm a Maur Wailen ak la tu pa kolkil la, “Maur Wailen kil antokg nikgwalpm lngkep a tu pa kai titnowen, tu ake antiwe ariwe kuina ur. Wa kil ampri wulmpa atuwen pa atom tu ake antiwe a ak ari kweikwei, a wa kil ampri nungkulkg atuwen pa atom tu ake antiwe ak atning kweikwei, kolpa itna ak ai kulngkul, kul am kolpa itna pake.”
ROM 11:9 A wa Tepit pikekg nira ak la tu pa kolkil la, “Tu ntokg okipma wail alntu pa il itopen kolpa kai o, pa ikga palng kol ampei a tu alekg atom tu alntu ngkowe, wa kolen lem a tu ale atom tu ngkowe. Atom kweikwei pa ikga lken wleket ikilmpe paipmpaipm a tu antokg pa.
ROM 11:10 Pa ikga wulmpa atuwen pa kai tilmpis o eng ikgake tu ik ri kweikwei pa. Ti wa kaikuten tiur rkuwen elng kinar erer tompok tompok kolpa itni o!”
ROM 11:11 Ti mpa wa kupm isen kolkil la, ti tu men Isrel pa wutat itna wes wail pa angko atom ikgam rmpa kanokg pa rmpa pake, a ikgake wa wrekg? Kolpa kalpis wrisen, pa la kolkilke: tu a men Isrel angko pa uk ya Maur Wailen ak awi kipm wrong kin a kipman enen pa aye kul kai eng alkilen. Kil ak awi kipm enen pa eng mpa ik ntokg tu men Isrel pa reikg num alntu pa la, “Tu pa wor pake mentepm ti paipm”, eng mpa ik ngkiten ikg eng wa tu men wa wrekg ukipma kutnun Sisas pa.
ROM 11:12 Pake kol pikekg tu a men wutat angko rmpa ya pa ak akule ya pa eng ak angklin kipm wrong kin a kipman manet a kanokg ti. Wa kol tu a men atnurng nikgwalpm wor a kol a palng ute wor itni wulmpa a Maur Wailen pa ak antokg tu kipm melnum a ake a Suta pa palng ute wor itna wulmpa akilen pa pati, pa planto la ikga wa kil ngklinsepm wail manten or kai ai ik wang a tu a men Isrel ukipma kutnun Sisas pa iyekimeket.
ROM 11:13 Kil kupm la laniki kipm wrong kin a kipman a ake a Suta pa kolkil la: kupm ti kupm melnum wokgen akwapel a Krais a laron yangkipm wor akilen pa naki naki kipm melnum a ake a Suta pake, kolpa atom kupm atopen paipm wrisen kwap a kupm ak kil pa wor wrisen.
ROM 11:14 Wa nikgwalpm ur a kupm akwap ti pa kolkil: kupm la ikwap kil eng mpa ik ntokg tu a men almen Isrel ti ik ngkit ikgel eng mpa tu rein tu alntu, eng mpa kupm ntiwe ikuwi wris wris ur atuwen ti iye kul ukipma Sisas pa, pa kol a wor.
ROM 11:15 Kol pikekg tu a men Isrel elukgen Sisas pa atom pikekg Maur Wailen almpil yirokg lawen pa, pa ak antokg kil lam kla nampokgen kipm wrongkwail kin a kipman a ake a Suta a yela kanokg ti. Ti pa kol paipm a tu a men Isrel pa ak antokg wor ti palng. Kolpa ti kol a mentepm ukipma riwe kolkil la, ti ikgam kolpake, ikga wor a tu a men Isrel pa ak antokg kwei ur wor wrisen a or kai ai wa palng: ikga Maur Wailen lmpil won la tu a men Isrel pa, pa ikga kolen melnum ur a amo kai ari kalpis, wa yaper kul rpma pa, atom mentepm ikga atopen paipm wrisen or kai ai.
ROM 11:16 Kol okipma yipuken a tukgun kakir kai wring pa mentepm elngkitna manet atom iye kai uk Maur Wailen pipa, okipma wrongkwail a itna wring pa am Maur Wailen anel kla ak amprin elngkitna la ikga mentepm ntokg il pake. Wa kol yo olip yiprokg klung yapoko a ningnakg pa Maur Wailen anel kla ak amprin eng alkilen pipa, yo wang a wamtalpuk ipm a ok wrongkwail pa am wa a Maur Wailen alkil pa kimeket pake.
ROM 11:17 Men wrong kin kipman a Isrel pa kolen yo olip awen. Melnum yan a yo pa angket yo talpuk a ake oken pa angkli. A wa kil angket yo olip talpuk mingen ai wa aye wli elng atnewe itna yo manten pa angklin wrik pa. Kipm melnum enen pa kolen yo olip mingen pa. Atom yo talpuk pa kringkone kai almpatne yo manten pa. Atom yo manten pa arkolng u a wakum wor pa kai or arpme wam talpuk ai irir kolen talpuk alkil a itnawe ise, atom kringkone kai oken wor.
ROM 11:18 Kolpa ti kipm yo talpuk a pikekg angket aye wli almpatne itna yo awen manten alkil pa, ampur kipm atop ngkat nang akipmen pa nolangkil yo talpuk alkil a pikekg angket angkli pa, iyai. Kol kipm erkisen itop ngkit nang akipmen kolpa itni pilpa, kipm ntokg riwe, yiprokg kulung yapoko ningnakg pa ake itna ak kipm pa, kalpis. Am ipm a talpuk kipm pa awi u a okipma a yiprokg klung yapoko ningnakg pa atom kipm am itna ak yiprokg kulung yapoko ningnakg pake.
ROM 11:19 Pake mpa wa kipm la kolkil ur la, “Yo talpuk awen pa pikekg kil angket angkli takwleikg wrik eng awi men ti almpatnewe tike.”
ROM 11:20 Mpa kupm ikilmpe kolkil la, kil wangket angkliwen pa aklale, pake ake pikekg tu ukipma atom kil wangket angkli pa. A wa kil awi kipm ti aye kul almpatne itna yo manten pa, pa aklale, pake kipm ukipma pa atom kipm itna pake. Pake kipm ngkirk, ampur kipm atop ngkat nang a kipm ti eng pa!
ROM 11:21 Kol Maur Wailen ake pikekg ari wulmpa yo talpuk alkil a pikekg itna yo olip awen alkil pa, kalpis, kil wangket kolti angkli, kolpa ti kil ake mpa wa ri wulmpa kipm yo talpuk mingen pa. Kol kipm ake ukipma pa, kil ikga am wa wangket kipm ti ngkli kolpa yat pake.
ROM 11:22 Kolpa ti kupm la kipm riwe la, Maur Wailen pa kil plan ipma wor melnum, a wa kil itna nikgwalpm titnongket a kil ake la ri wulmpa melnum ur a antokg paipm pa. Kil itna nikgwalpm titnongket a ake ari wulmpa tu a men a pikekg atnuurngkel angko kai pa, a kil plan ipma wor kipm a ake Suta a ukipma pa. Kol kipm rkul ipma wor a kil plantepm pa itni kolpa iye kai pa, kil mpa wa plantepm ipma wor kolpa itni or pa kai. Kalpis pa, ikga kil wa wangket kipm ti yat ngkli tukwleikgen yo manten awen pa yat.
ROM 11:23 Kol wam talpuk a yo awen a pikekg wangket angkli pa, wa tu yaper kul ukipma Sisas pa pati, mpa wa Maur Wailen uwi iye kul ilmpitne itni wrik wrik a yo awen manten alkil pa. Maur Wailen pa kil antiwe titnongket a wa awi yo talpuk a pikekg wangket angkli pa iye kul ilmpitne itni wrik wrik alkil pa atom ikga kringkone kirpowe ilkget pa.
ROM 11:24 Kipm yo olip talpuk mingen pa kipm kol am itni yo mingen manten alkil pake, pake kipm pikekg kil wangket atom wa aye kul almpatnewe itna yo olip manten awen pa. Pake ake wa wrik a kol a yo talpuk mingen pa kai ilmpitnewe itni pa, pa wrik a kol a yo talpuk awen alkil ai itnewe ai. Ti mpa mentepm riwe kolkil lala, pa wunongket eng ikga Maur Wailen wa uwi yotalpuk awen alkil a pikekg wangket angkli pa, wa iye kul ilmpitne itni yo manten awen alkil a pikekg atnewe pa!
ROM 11:25 Kipm melnum wor alkupm a mentepm ukipma Sisas, kupm karken a kipm a ake a Isrel pa rka titnowen akwekgel nikgwalpm ampen a Maur Wailen kil ikga ik nimpokgen tu a men Isrel pa, mpa wa kipm ti wa ngkat nang a kipm pa kalpmen. Nikgwalpm ampen a kupm la lanikepm pa pati kolkil: ipma a tu wrong yaurng a men Isrel pa pikekg kai kalnten kakiren kolpa itna, eng mpa wa kil wa uk ya kipm ake Suta pa mpa wa kul kai ukipma kil pa pen. Kolpa itni kaingkai, kai ngko aripm ur a pikekg Maur Wailen takweiyen la ikga tu kipm kul ukipma kil pa plalng pipa,
ROM 11:26 ikga kil ikuwi tu men Isrel pa kimeket ti iye kul eng alkilen. Kol a melnum okwripm ur nira ela wrkapm a Maur Wailen katila ok a Maur Wailen la kolkil la, “Melnum a ikga ikuwi tu wrong kin kipman pa iye kul wor eng alkupmen pa, pa ikga i anong Saion ti kinar pake, kil ikga ik ngketen nikgwalpm kalnten a tu walwalpopm a walyaru a Sekop a pikekg uk yirokg kupm ti.
ROM 11:27 Atom kla a ikga kupm lam nimpikgen tu Isrel pa la kupm ikga ungkwan paipmpaipm atuwen pa.”
ROM 11:28 Kol mentepm ikwonilmpen yangkipm wor a la Krais pa pati, pa aklale, tu a men Isrel pa palng wrongmanto a Maur Wailen, atnen a pikekg tu talpulng yangkipm wor pa. Ake kol mentepm ikwonilmpen nikgwalpm a Maur Wailen pikekg takwei men wrong kin kipman a Isrel ti eng alkilen pa pati, kil wa plan ipma wor wasrongen tu a men a pikekg talpulng yangkipm pa wa kolpa itna, atnen pikekg kil yapon yangkipm nampokgen tunteng wapyipmiri a walyipmiri a men Isrel pa.
ROM 11:29 Maur Wailen plan ipma wor wasrongen tu a men kolpa itna pa pati, atnen pikekg Maur Wailen takwei mla mla a i atom alken kweikwei wor wor a ak angklin Maur Wor atuwen pa plalng, pa kil ake mpa plelngen nikgwalpm alkil pa atom wa la nikgwalpm ur manet pa.
ROM 11:30 Pikekg kipm enen pa talpulng yangkipm a Maur Wailen, pake ak wang ti pa Maur Wailen wa arein kipm pa wa akawiyepm aye kul eng alkilen. Tu a men Isrel angko pa uk ya Maur Wailen ak awi kipm wrong kin a kipman enen pa aye kul kai eng alkilen.
ROM 11:31 Am wa kolpake, tu a men Isrel ak wang ti wa talpulng yangkipm a Maur Wailen kolpa itna kolen pikekg kipm pa. Kolpa eng ikga Maur Wailen kil wa rein tu pa wa ikuwiyen iye kul eng alkilen atnen pikekg kil arein kipm pa akawiyepm aye kul eng alkilen pa.
ROM 11:32 Maur Wailen kil elngen mentepm wrong kin a kipman ti talpulng yangkipm akilen pa atom nikgwalpm paipm pa yapowo kimeket. Kolpa eng mpa kil ik plan ipma arein akilen ti mentepm wrong kin a kipman ti kimeket ik ngketen paipmpaipm a yapowo pa kai tukwleikg eng mpa mentekg wirng no itni kukula wor.
ROM 11:33 Woi, mpa mentepm la kolai Maur Wailen pa! Kil alkil pa kil antiwe kweikwei wailet paipm ai, ake antiwe mpa melnum ur ngkleikg! Nikgwalpm wontrakole a wa ariwe a Maur Wailen pa watin mleing paipm wrisen or kai ai! Mla antiwe mpa lakiti yipuk a yiprokg a nikgwalpm ariwe a kil akwonalmpen atom antokg katila eng ak angklinso pa! Mla a i mpa riwe ya a kil ore pa.
ROM 11:34 Nira ela wrkapm pa la kolkil la, “Mla a i ariwe nikgwalpm akwonalmpen a Wailen pa? Aki mla a i pikekg uk nikgwalpm ariwe kil pa atom pikekg kil antokg kweikwei wrongkwail pa?
ROM 11:35 Mla a i pikekg uk kuloken kil pa atom ikga wa kil wa ikilmpentel tukgunen pa?”
ROM 11:36 Kalpis, am kil alkil pa yiprokgen a kweikwei wrongkwail pake. Wa kweikwei wrongkwail pa am rpma ak kil alkil pake. Wa kweikwei wrongkwail pa am wa pikekg kil antokg eng la ik ngkit nang a kil alkil pake. Ti mentepm mpa ngkit nang wailen akilen pa iye kaino kwa ikngklei wang iye or pa kai! Aklale wrisen.
ROM 12:1 Kipm melnum wor alkupm a mentepm ukipma Krais, Maur Wailen kil plantepm ipma wor areinsepm wail kolpa, ti kupm tilpepm titnongket la, - kipm uk kipm alkipm ti kimeket kai eng Maur Wailen. Kol kipm ik kolpa pa, kipm palng kolen wlikgok a kil anel kla ak amprinsepm itna manet eng mpa il wor uk kil pa, wa kolen wlikgok a awi yaprekg watin eng rpma wor yongkyong pa eng mpa kil kirpo yangkipm ute! Kipm uk kipm alkipm ti kimeket kai kolpa eng Maur Wailen pa pipa, pa am ya aklale alkil a kol a kipm kipor kilko ilein Maur Wailen kolpake. -
ROM 12:2 Ampur kipm ak apo ak apo kai katnun atn a rpma a tu wrong kin a kipman a kanokg ti, atom palng kol tu pa. - Kipm mpa elng eng Maur Wailen kil plelngen nol nikgwalpm lngkep akipmen ti waiketn a waiketn kolpa kai palng weten ik ntokg kipm mpa wa itn a rpmi a ikwap wor waiketn a waiketn kolpa kai palng weten. Kipm elng eng kil plelngen nol nikgwalpm akipmen pa kolpa pipa, kipm antiwe mpa ri la kuina a i a Maur Wailen kil wasrongen la mpa kipm ntokg pa, a kuina a i wor akalkilel, a kuina a i kil karpo yangkipm ute pa, a wa kuina a i ute wor wrisen pa.
ROM 12:3 Maur Wailen kil plantopm ipma wor akilen pa angklinsopm atom kil uk kwap kil kul kupm ti. Kolpa ti kupm laniki kipm wris wris pa kolkil la, ampur kipm ngkat nang a kipm alkipm ti kalpmilel pa, kolpa kalpis. Kipm ri ntin kipm alkipm pa la, kipm kolai pa, kipm ikwonilmpen kipm alkipm pa la kipm am kolpake. Mpa kipm wris wris ik ipma a kipm uk Sisas pa ik ntin kipm alkipm ti.
ROM 12:4 Mpa wa kupm lanikepm kolkil la, mentepm ti num wris, pake numpwam wrongkwail ti kul atnewe. Kwap a numpwam wris wris pa man man, ake akwap irir pa.
ROM 12:5 Am wa kolpa yat pake, mentepm melnum watipmen pake, mentepm ukipma Krais pa atom mentepm palng num wris a Krais pa. Wa mentepm numpwam wrongkwail a kai almpatne itna num wris a Krais pa mentepm akwap manman eng akangklin tita.
ROM 12:6 Maur Wailen kil planto ipma wor a kil alkil angklinso pa a wa kil ampreingto kwap a ariwe a titnongket kweikwei wor wor manet manet alkil pa wris wris ak nirakewo. - Kol kil uk kwap a laron nikgwalpm ampen akilen pa palng wli ok a melnum ur pa, mpa kil laron kitila kol a kil ukipma ariwe la am nikgwalpm a Maur Wailen ngkatel ok la kil laron pake. -
ROM 12:7 Wa kol melnum ur pa kil lkel kwap a angklin tu melnum pa, mpa kil ikwap ngklinsen ik ipma wor kolpa kai o! - Wa kol melnum ur pa kil lkel kwap a kaling plan tu melnum pa, mpa kil kiling planten riworwor kolpa kai o! -
ROM 12:8 Wa kol melnum ur pa kil lkel kwap a ak titnongketel ipma a tu melnum pa, mpa kil ikwap pa eng ik titnongketel ipma atuwen kolpa kai o! - Wa kol melnum ur pa kil lkel kwap a ak angklin marpm apmnung kweikwei tu melnum a rpma tukwok pa, mpa kil uk nimpokgen ipma kukula wor ik ngklinsen kolti! - Wa kol melnum ur kil uwi kwap a melnum wailen a ikgalen tu wrong kin a kipman pa, mpa kil nikgwalpm rkekgen ikglen tu pa riworwor! - Wa kol melnum ur kil uwi kwap a plan ipma wor arein tu a rpma paipm arki kaikuten pa, mpa kil ngklin tu pa nimpikgen ipma atopen! Kolpa mentepm numpwam a num wris pake mentepm awi kwap, a ariwe, a titnongket manet manet kolpa eng ak angklin tita. -
ROM 12:9 Kipm mpa plan ipma wor wasrongen tita ik ipma iklale! - A kipm mpa kirken wrisen kweikwei a paipm pa, - a kipm mpa nimpil kweikwei a wor wor pa iye itni titnongket! -
ROM 12:10 Kipm mpa wasrongen tu melnum wor akipmen a kipm ukipma Sisas pa kolen la tu pa wusok wusok a wail wail alkipmen pa. - Kipm mpa nikgwalpm rkekgen ikoporen tita eng ngkit nangkel tita a uk wor tita. -
ROM 12:11 Kipm mpa elng wakg a Maur Wor pa nuruk rpmi kawor kipm pa, eng mpa kipm itni kalnten ikwap tumplowis, ampur kipm ak lpmaaken pa! - Kipm mpa ikwap orngwatneikgen Wailen Sisas. -
ROM 12:12 Kipm mpa itopen rpmi nungkwangen kweikwei a kipm ariwe la ikga Maur Wailen kil ntokg pa. - Kipm mpa rkul ipma itni titnongket rki kaikuten. - Kipm mpa oklala niki Wailen pa ikngklei wang kolpa itni. -
ROM 12:13 Wa kipm mpa rein tu a mentepm wrong kin a kipman a Maur Wailen a rpma tukwok pa atom ngklinsen. - Kipm mpa kipor ilei wokgmprak. -
ROM 12:14 Kipm mpa oklala niki Wailen eng kil ngklin tu melnum a or ungkwantepm alkepm wleket pa. Wa kipm mpa oklala nikel eng kil plan ipma wor akilen pa ngklinsen, a ake mpa kipm ok nti la lalongen tu pa. -
ROM 12:15 Kipm mpa itopen nimpikgen tu a atopen pa. - A kipm mpa akg rein nimpikgen tu a akg arein pa. -
ROM 12:16 Kipm mpa lupm nikgwalpm wris kolti. - Ampur kipm akwonalmpen kipm alkipm ti la kipm ti melnum wailen angen tu melnum a nang kalpisen pa, kipm mpa kai or wris nimpokgen tu pa. - A ake mpa kipm ikwonilmpen kipm alkipm ti la kipm melnum ariwe pa. -
ROM 12:17 Kol melnum ur ntokg kwei ur paipm kai kipm ti pa, ampake wa kipm ikilmpe ntokg kwei ur paipm kai tu pa. - Kweikwei a tu wrongkwail kaporng yangkipm la pa wor pa, kipm mpa nikgwalpm rkekgen ntokg kweikwei wor wor kolpake. -
ROM 12:18 Kipm mpa rpmi meen wor nimpokgen tu wrongkwail. Kol tu melnum tiur ntokg kolai, pake kipm ti mpa iken kwap eng kipor ngkeng nikgwalpm paipm a ak angketen nikgwalpm wor a rpma meen or wris nampokgen tita pa.
ROM 12:19 Kipm melnum alkupm a kupm plan ipma wor wasrongentepm pa, - ampake kipm ikilmpe paipm a tu antokgtepm pa, yaper. Kipm elng pa kai wam a Maur Wailen atom kil alkil pa ikilmpe paipm a tu antokgtepm pa ik ipma wakget a kil alkil pa kul. Melnum ok wripm a Maur Wailen pa nira ela wrkapm pa la kolkil la, “Wailen kil la kolpa, 'Kupm alkupm wris ata pa yan yiprokgen a uk wleket tu melnum ikilmpe paipmpaipm a tu antokg pa.'”
ROM 12:20 Kipm mpa ik kitila kol wrkapm a Maur Wailen la kolkil la, - “Kol wrongmanto akitnen pa la nikg ilmpel pa, kitn mpa lkel okipma il. Wa kil lala uwaketel pa, kitn mpa lkel u il. Kitn itning, kitn plan nikgwalpm wor kolpa pa, pa mpa kitn lkel num paipm wail manten.” -
ROM 12:21 Ampake kitn elng paipm pa itni wailen lok ngkli kitn pa, yaper. Kitn rkul wor pa itni titnongket eng mpa lok ngkli paipm pa.
ROM 13:1 Kipm kin a kipman wris wris mpa orngwatneikgen mring man wrongkwail a itna wailen ikgalentepm pa, ampake kipm tulpulng yangkipm atuwen pa. Eng ntei, ake mring man ur a kanokg ti palng kolti atom ak titnongket a kil alkil akwap pa, kalpis, pikekg Maur Wailen elng tu itna lala tu itni wailen ikglen mentepm wrong kin a kipman itni kanokg ti.
ROM 13:2 Kolpa ti melnum a kil talpulng ok a tu mring man a kanokg ti pa, pa kil talpulng ok a Maur Wailen pikekg rkan tu pa la tu ikwap pa. Atom ti melnum pa kil ikga uwi wleket ikilmpe paipm a kil talpulng ok a mring man pa.
ROM 13:3 Tu mring man pa pikekg ake ngkat elngitna eng mpa iye ngkirk uk wleket tu melnum a antokg kweikwei a wor wor pa, kalpis, pikekg ngkat elng itna eng mpa iye ngkirk uk wleket tu melnum a antokg kweikwei a paipm pa. Kolpa ti kol kitn ake la rpmi nimpokgen ipma kalkut a ngkirk eng tu mring man a alko wleket pa, kitn la rpmi nimpokgen ipma kukula kolti pa pati, kitn mpa rpmi ntokg kweikwei a wor wor kolti! Kol kitn rpmi wor kolpa pipa, tu mring man mpa kiporngkeitn yangkipm la, kitn pa melnum wor pake.
ROM 13:4 Tu mring man a kanokg ti pa, tu melnum akwapel a tu akwap orngwatneikgen Maur Wailen. Tu akwap wor eng la ngklin kitn pake. Pake kol kitn ntokg paipm pa pati, kitn ngkirken tu pawo! Eng ntei, tu aye wanteng a ko wri a wa tu aye tam timpal, ti tu antiwe titnongket a ak ak pa. Tu akwap angklin Maur Wailen eng akalmpe uk wleket tu melnum a antokg paipmpaipm pa.
ROM 13:5 Kolpa ti kipm mpa orngwatneikgen kutnun ok a tu mring man pa, ake mpa kalpis pa. Ake lala kipm ngkirken wleket a tu alkepm akalmpe paipm a kipm talpulng ok atuwen pa kolti atom kipm orngwatneikgen tu pa, kolpa kalpis. Pa ok wusok a oklala rpma kawor nol akipmen pa wa lanakepm yat la wor a i, a paipm a i, kolpa ti pa wor eng kol a kipm orngwatneikgen kutnun ok a tu mring man pa.
ROM 13:6 Tu akwap kolpa eng ak angklin kipm wrong kin a kipman, am kolpa atom ari kipm angkli angkli marpm pa katila marpm mrangkum a tu yapon elngkitna la kipm mpa ngkli ngkli pa. Kwap a tu mring man ak ak kwap kolpa pa, pa tu akwap a Maur Wailen.
ROM 13:7 Tu antiwe ukwentepm kweikwei watipmen pa pati, pa kwap a kipm mpa lken kolti, pa kol kuloken ur rpma num akipmen, ti kipm mpa ikilmpe kolti. Tu ukwentepm la kipm ngkli marpm kitila marpm mrangkum a tu yapon elngkitna la kipm mpa ngkli ngkli pa, pa kipm ngkli! Tu arki kwap wail, kolpa ti kipm mpa ngkirk rpmi orngwatneikgen tu pa. Tu melnum a awi nang wailen kolpa pa, kipm mpa ngkit nang a tu pa.
ROM 13:8 Ake mpa kipm elng kuloken a melnum ur rpmi kipm ti pa. Kuloken wris a rpma mentepm ti pa rpma: kipm plan ipma wor wasrongen tita. Kol melnum ur kil plan ipma wor wasrongen melnum ur pa pati, pa kil katnun yangkipm titnongket wrongkwail a tu yapon la la mentepm kutnun pa.
ROM 13:9 Yangkipm titnongket a nira ela wrkapm a Maur Wailen pa la mentepm kutnun pa la kolkil la, “Ampur kitn angkli arkul kin aki kipman manet ur pa. Ampur kitn alm melnum ur amo. Ampur kitn ak ikgwam. Ampur kitn aringkowe kweikwei a melnum manet ur ai la uwi eng alkitnen pa.” A wa kol yangkipm titnongket tiur itna, pake yangkipm titnongket wrongkwail a la mentepm kutnun pa am rpma kawor yangkipm titnongket manten wail kilke, “Kitn mpa plan ipma wor wasrongen mlaur ai kolen kitn plan ipma wor wasrongen kitn alkitn ti.”
ROM 13:10 Melnum ur a kil plan ipma wor wasrongen mlaur pa, ake antiwe mpa wa kil nikgwalpm paipm eng melnum pa, kalpis. Kol kil plan ipma wor wasrongen mlaur pa pati, pa kil katnun yangkipm titnongket wrongkwail a tu yapon pake.
ROM 13:11 Kipm ariwe la wang ti am kul wreren tike, kolpa ti mpa kipm uk ipma wor wasrongen tita itni titnongket kolpa iye kai. Mentepm pikekg plelng ipma ukipma Krais pa, wang pikekg itna watinet. Pake wang a Maur Wailen ikga ikuwiyo iye kai ntiwel rpmi wor yongkyong pa am kul wreren tike. Kolpa ti kipm wa okg wusoken, a kipm wrekg rpmi numprampen nungkwangen wang pa!
ROM 13:12 Mining itna watin kulngkul, ti eng a ukwe pake. Kolpa ti mentepm iner lukglukg a mining pa elngkirmpi kai ai, a mentepm uwi wri wamung a ak nowe num ak ran ti kul nowe num ti iye itni.
ROM 13:13 Mentepm mpa rpmi a itn ntokg kweikwei a wor kolti, kolen mentepm antokg ak ran itna wulmpa a wrongkwail pa. Pa ake wor a mentepm rka al al u titno pa plalng pipa, mentepm wrekg aro ok antokg melkget kolen tu melnum titnowen a antokg pa. Wa yat, ake wor a mentepm angkli arkul tita, a mentepm antokg kweikwei a numkropis a uk num paipm kamel pa. Wa ake wor a mentepm ipma paipm akle tita pa.
ROM 13:14 Ampur kipm antokg kweikwei ak atopen numpwam a kipm alkipm ti pa, pa mpa ipma akipmen wrekg wasrongen la kutnun nikgwalpm tingklaket akipmen pa. Ti ampur kipm antokg kolpa. Kipm mpa uwi Wailen Sisas Krais pa ik nowe kipm pa kolen kipm napo wri wamung a ak rapon pa.
ROM 14:1 Mpa kupm lanikepm melnum a ukipma Maur Wailen, pake kil ake ukipma itna titnongket pa kolkil la, kipm melnum a ukipma itna titnongket pa, kipm mpa plan nikgwalpm wor a ikglen melnum a kolpa. Ake mpa kipm nti kil pa lilakel tita la, kuina a i wor a kuina a i paipm eng mpa kil kutnun pa, kolpa yaper.
ROM 14:2 Mpa kupm la kolkil la, melnum tiur pa tu akwonalmpen la Maur Wailen ake la mpa mentepm ngklon wlikgok a okipma ur pa, kil la okipma a wlikgok wrongkwail pa al woren kimeket kolti, atom tu al kolti. Pake tu melnum tiur a ake ukipma itna titnongket pa, tu akwonalmpen la Maur Wailen pa la wlikgok a okipma tiur pa ongket ongket atom tu angklon, a tu al okipma a wanukg pa kolti.
ROM 14:3 Melnum a al woren pa, ake mpa wa la elukgen melnum a angklon pa. Wa melnum a angklon pa, ake mpa wa iye wam itni melnum a al woren pa la, pa kil antokg paipm pa. Eng ntei, Maur Wailen kil awi wor la melnum pa yat la kil akilen.
ROM 14:4 Ti mla la atom wa kitn ti wa aye wam kati arki melnum a aken kwap orngwatneikgen mring alkil pa la kil akwap paipm pa? Pa kwap a mring alkil pa mpa riwel la, kil ikwap wor pa, mpa kil ikwap itni, la kil ikwap paipm pa, mpa kil ungkwantel. Melnum akwapel pa ikga ikwap wor itni titnongket itni pa. Pati atnen Wailen pa kil antiwe angklinsel atom kil itna akwap titnongket kolpa aye kai.
ROM 14:5 Melnum tiur pa akwonalmpen la wang tiur pa wa wail angen wang tiur ai. Wa melnum tiur pa wa akwonalmpen la, wang wrongkwail pa irir. Pake kipm melnum wris wris pa kipm mpa ukipma riwe worwor kawor ipma akipmen ti la wang a i wail eng kipm pipa, kipm kutnun kolpake.
ROM 14:6 Melnum a kil akwonalmpen la, wang tiur pa wang wail angen wang tiur ai pa, pa kil akwonalmpen Wailen Krais pa atom kil ari la wang pa atom kil katnun kolpa. Wa melnum a kil al woren pa, pa kil akwonalmpen Wailen Krais pa atom kil al kolpa, wa kil wa uk wor Maur Wailen eng okipma pa atom kil al. Am wa kolpake: melnum a kil angklon okipma tiur pa, pa kil akwonalmpen Wailen Krais pa atom kil ake al. A wa kil wa ukwor Maur Wailen eng okipma kolai a kil al pa, atom kil al.
ROM 14:7 Eng ntei, kol mentepm rpma kanokg ti pa, mentepm ake rpma eng angklin mentepm almentepm ti pa. Wa kol mentepm imo kai ai pa, mentepm ake ikgalen amo a mentepm almentepm ti pa.
ROM 14:8 Wa kol mentepm rpma kanokg ti pa, mentepm rpma eng ak awi ipma a Wailen ai atopen. Wa kol a mentepm imo kai ai pa, mentepm amo eng ak awi ipma a Wailen ai atopen. Kolpa ti kol mentepm rpmi aki mentepm imo kai pa, mentepm a Wailen pake.
ROM 14:9 Yiprokgen a Krais pikekg amo plalng wa wrekg rpma pa pati, kil la itni Wailen ikglen mentekg yatenen: tu a rka ti a tu a amo kaingkai ai.
ROM 14:10 Ti antokg kolai atom wa kipm tiur ti, kipm wa aye wam itna melnum wor akipmen a kipm ukipma Krais pa arkiwel la kil antokg paipm pa? Ti wa antokg kolai atom kipm tiur pa, wa kipm ari elukgen melnum wor akipmen a kipm ukipma Krais pa arkiwel la kil antokg paipm pa eng itna kolai? Ikga ik wang kutnukg pa, mentepm wrongkwail ikga Maur Wailen iyewo kai ntokg yangkipm itni wulmpa a kil alkil pa. Atom ikga kil alkil pa ri ngklowe mentepm ti, atom ikilmpe kitila kuina ur a mentepm wris wris antokg pa.
ROM 14:11 Pati kol melnum okwripm ur a awi ok a Maur Wailen nira ela wrkapm a Maur Wailen pa la kolkil la, “Kupm Wailen, kupm naren kupm alkupm a antiwe titnongket wail a rpma yongkyong, kupm la kolkil la, wrongkwail kin a kipman wris wris pa ikga elng nar kipor kilko ilein kupm ti. Wa ok wrongkwail pa ikga laron kupm ti la kupm Maur Wailen a itna wailen.”
ROM 14:12 Pikekg Aisaia la katila ok a Maur Wailen la kolpake. Kolpa atom kupm la ikga ik wang pa Maur Wailen ikga ngkleikg ker a pikekg kil akawiye kuina kuina a mentepm wris wris antokg pa atom ikga mentepm wris wris laron kweikwei wrongkwail a pikekg mentepm antokg pa ngko wunong itni Maur Wailen.
ROM 14:13 Mentepm wrongkwail ikga itni wulmpa a Maur Wailen, kolpa ti mentepm mpa elngen a mentepm aye wam itna arki tita la, “Kitn pa antokg paipm pa”, kolpa yaper! Kipm wris wris mpa lok nikgwalpm a kipm alkipm pa ikwonilmpen la, ik wang ti kai pa ake mpa kipm kol yopako a wes a tu melnum wor tiur akipmen a kipm ukipma Sisas pa kai il nepm itne atom ngko pa.
ROM 14:14 Wailen Sisas kil plantopm klalen worwor atom kupm ariwe la, ake okipma ur Maur Wailen ari la ongket ongket a angklonake pa, kalpis. Okipma kil alkil ti pa wor kimeket a al wangkwrisen kolti. Pake kol melnum ur kil ikwonilmpen la okipma ur pa ongket a angklonake, atom ake mpa kil il pa pati, pa am paipm eng kil pake. Kol kil il pa, mpa kil ikwonilmpen la, “O, am kupm antokg paipm ise!”
ROM 14:15 Pake kol kitn a ukipma itna titnongket pa kitn il okipma ur a melnum ur alkitn a kipmekg ukipma Krais pa angklon pa, atom kil uwi ipma kaikuten kolpa itnen a kitn al okipma a kil angklon pa, pa plan la ake kitn arkul nikgwalpm a plan ipma wor wasrongen tita pa. Ake mpa kitn il okipma ur a kil pa angklon pa itni wulmpa akilen pa atom ik ntokg melnum alkitn a pikekg Krais amo akarmpen pa ngko kai paipm pa.
ROM 14:16 Kitn am wirng no itna kukula wor a al okipma kweikwei pa wangkwrisen ise. Pake il riwe, mpa tu melnum manet wa la paipmel nikgwalpm a kitn ti a la wor pa wa lala pa paipm.
ROM 14:17 Eng ntei, Maur Wailen itna wailen ikgalen nol nikgwalpm amentepmen pa pati, ake la mpa mentepm ikwonilmpen watipmen la la u a okipma pa mpa mentepm il aki mpa kalpis. Pa la mpa Maur Wor a Maur Wailen ai ngklinso atom mentepm ik kuina ur eng mla ur ai pa, mpa mentepm ik ute wor iklale kutnun nikgwalpm a Maur Wailen, a wa mentepm rpmi meen wor itopen wail nimpokgen tu pa.
ROM 14:18 Kol mla ur kil lupm nikgwalpm wor kolpa, atom kil ikwap wor orngwatneikgen Krais pa, mpa Maur Wailen kiporngkel yangkipm, a wa wrongkwail mla ur a atning ariwel pa, mpa tu uwi wor lawel.
ROM 14:19 Kolpa ti mpa mentepm ikwap tumplowis nikgwalpm rkekgen eng uk ipma meen wor tita, a wa ik titnongketel tita eng mpa mentepm ukipma itni titnongket kolpa iye kai.
ROM 14:20 Ake mpa wa kipm lilakel tita okipma ti atom ik iro tikale kwap a Maur Wailen ak kawor ipma a melnum ti pa. Okipma wrongkwail pa woren kimeket, pa aklale, pake kol kitn il okipma ur a melnum ur pa akwonalmpen la kil il pa, mpa kil ntokg paipm, pa pati, pa kitn antokg melnum pa angko pake, atom pa kitn antokg paipm.
ROM 14:21 Pa wor eng ake mpa kitn il wlikgok aki u wain aki kweikwei tiur a ak antokg melnum wor akitn a kipmekg ukipma Sisas a ake itna titnongket pa kil awi ipma kaikuten pa.
ROM 14:22 Kol kitn angklon okipma tiur aki, kitn al wangkwrisen aki, kitn ari la wang pa kolai aki, pake kitn ukipma la kolai wor pa, pa itni kai kitn alkitn ti nimpikgen Maur Wailen pa kolti. Melnum a kil ukipma la kweikwei a kil ak pa wor, a wa kol ok wusok akilen pa ake aye wam itna arkiwel la pa paipm pa, pa wor pa, kil pa wor pake, kil itopen o!
ROM 14:23 Pake kol melnum ur a kil akwonalmpen watipmen la, kil il kweiur a kil angklon pa, mpa Maur Wailen uwi wor aki kalpis. Melnum a nikgwalpm a kil rka wekg wekg kolpa, atom kil il kweikwei pa pati, mpa Maur Wailen elng wam itni rkiwel la kil antokg paipm. Eng ntei, kweikwei wrongkwail a mentepm antokg pa, pa ake mentepm ukipma la pa wor itna wulmpa a Maur Wailen, pake mentepm wa antokg pati, pa mentepm antokg paipm.
ROM 15:1 Mentepm mla ur a alupm nikgwalpm wris atom ukipma Krais itna titnongket pa, ake mpa mentepm ikwonilmpen eng ngklin mentepm almentepm ti kolti pa. Mentepm mpa plan nikgwalpm wor ngklin tu melnum a alupm nikgwalpm wekg wekg atom ake ukipma itna titnongket pa.
ROM 15:2 Mentepm wris wris ti mentepm mpa ntokg kuina ur a wor eng ik ngklin tu mentepm almentepm a ukipma Sisas ti itopen, eng mpa ik titnongketel tu pa kolpa iye kai eng mpa iktitnongketel ipma a tu ukipma Sisas pa kolpa iye kai wail.
ROM 15:3 Kolen Krais pa kil ake pikekg akwonalmpen kil alkil ti atom angklin kil alkil ti pa, kalpis. Nira ela wrkapm a Maur Wailen pa la Krais kil lanaki Maur Wailen pa kolpa la, “Yangkipm kalkuten a tu ak akle aknokgel kitn pa, pa am wa kol ikyom ikningkil ur a alm kupm ti yat tike.”
ROM 15:4 Kol kweikwei wrongkwail a pikekg nira ela wrkapm a Maur Wailen ep ak ai pa, pa pikekg nira eng ak arowonel mentepm ti. La mentepm ngkleikg yangkipm pa pati, mpa ngklinso eng mpa mentepm rkul ipma itni titnongket rki kaikuten, a ngklinso lko nikgwalpm weten wor wor, atom mentepm rpmi nungkwangen riwe la kweikwei wrongkwail pa ikga palng wor, ikgake kalpis pa.
ROM 15:5 Wa kupm oklala naki Maur Wailen, kil yiprokgen a arkul ipma itna titnongket arki kalkuten, a wa kil yiprokgen a alko nikgwalpm weten wor wor, eng mpa kil ntokg kipm ntiwe ukipma rpmi or wris uwi wor la tita, kitila nol nikgwalpm a Krais Sisas pa,
ROM 15:6 eng mpa kipm iye nikgwalpm ok pa kai itni wris ik ngkit nang a Maur Wailen, kil Yan a Sisas Krais, Wailen a mentepmen.
ROM 15:7 Krais kil wasrongen la kipm a ukipma kil itna titnongket a kipm a ake ukipma itna titnongket pa, la kipm uwi wor la tita, kol Krais kil awi wor la kipm ti. Kolpa eng mpa ik ngkit nang wailen a Maur Wailen.
ROM 15:8 Mpa kupm la kuina ur a wet kupm la pa kolkil la, pikekg Krais kil wli kolen melnum akwapel, atom pikekg kil akwap eng ak angklin tu men Suta a wangket num pa. Kil pikekg ak kolpa eng la ik titnongketel yangkipm a pikekg Maur Wailen kil yapon nampikgen tu wapyipmiri walyipmiri amenen pa eng mpa ik plan la yangkipm a pikekg Maur Wailen yapon pa, pa pikekg kil la aklale wrisen, kil ake kansil pa.
ROM 15:9 Wa pikekg Krais kil wa wli eng wa angklin kipm a ake Suta pa yat. Pa kil plan ipma wor a Maur Wailen a kil arein kipm a ake Suta pa, eng mpa wa kipm pa wa ngkit nang a Maur Wailen pa. Pa palng kolen pikekg nira ela wrkapm Nangnang pa la kolkil la, “Kolpa ti ikga kupm kai itni nimpikgen tu a ake Suta pa laron kitn ti niken la kitn pa Maur Wailen, wa kupm ik nangnang pa ik ngkit nang akitnen.”
ROM 15:10 Wa yangkipm ur kolpa pikekg Moses wa la ela wrkapm a Maur Wailen pa la kolkil la, “Kipm a ake Suta pa, kipm itopen o! Kipm nti tu men wrong kin a kipman a Maur Wailen pa itopen o!”
ROM 15:11 Wa yangkipm ur pa wa la yat ela wrkapm Nangnang pa la kolkil la, “Kipm a ake Suta pa, kipm uk wor Wailen, wa kipm wrongkwail kin a kipman pa, wa kipm ngkit nang a Wailen!”
ROM 15:12 Wa pikekg melnum okwripm Aisaia wa la yat ela wrkapm a Maur Wailen pa la kolkil la, “Melnum ur ikga wrekg i om a Sesi pa, pa kolen yo ilkg weten a anip no klung pa. Kil ikga palng melnum tukgunakg itni wailen ikglen tu a ake Suta pa. Atom tu ikga ukipma rpmi nungkwangen riwe la ikga Maur Wailen lken kweikwei wor wor a pikekg kil yapon la kil ikga lken pa.” Pa pikekg Aisaia kil la kolpake.
ROM 15:13 Kupm oklala naki Maur Wailen, kil yiprokgen a mentepm ukipma rpma nungkwangen kweikwei wor wor a kil yapon la kil ikga lko pa, eng mpa kil ntokg kipm rpmi meen wor a wa ntokg kipm itopen paipm or kai ai, itnen a kipm ukipma Krais pa. Kolpa eng mpa Maur Wor akilen pa ikga ik titnongketel kipm kolpa iye or pa kai rpmi nungkwangen kweikwei wor wor a kil yapon la kil ikga lko pa.
ROM 15:14 Kipm melnum alkupm a mentepm ukipma Sisas, kupm wet la alokepm kolpake, kupm wa ariwe kipm pa worwor la, kipm pa alupm nikgwalpm wor wor wailet, a wa kipm antiwe nikgwalpm ariwe watin aur aur pa yat, ti kipm alkipm ti antiwe kol a kipm kiling plan tita a irowonel tita.
ROM 15:15 Pake yangkipm tiur a kupm nira ela wrkapm kil pa, pa kupm la kweikwei tiur kil ngko wunong nimpokgen titnongket eng la ik ngkit nikgwalpmel kipm pa nti ur. Pa pikekg Maur Wailen kil plantopm ipma wor takweiyopm atom alkopm kwap ti la kupm ik kolpake.
ROM 15:16 Kil la kupm ikwap a Krais Sisas pa eng ikngklin tu kipm a ake Suta pa. Atom kupm akwap kolen melnum ipma krakgen a Maur Wailen pa laron nakepm yangkipm wor akilen a la Krais Sisas pa. Eng mpa kupm ik uwi tu kipm a ake Suta pa wa iye kai eng Maur Wailen kolen okipma wor a al wor uk kil pa, atom kil karpo yangkipm ute. Atom kil wa anel kla a Maur Wor akilen pa ak amprinsepm elngitna manet eng alkilen pa.
ROM 15:17 Kolpa ti kupm ak kwap a Maur Wailen ak titnongket a Krais Sisas a rpma kawor ipma akupmen ti atom kupm tipra atop atnen pake.
ROM 15:18 Kupm ngkark maminikgen eng ake mpa kupm tipra itop ik la kwap ur manet a kupm ak pa, kupm mpa tipra itop ikla Krais pa kolti a angklinsopm atom kupm laron yangkipm kil, a wa kupm ak kwap wrongkwail kil eng ikuwi tu kipm a ake Suta pa plelng ipma ukipma kutnun Maur Wailen pa.
ROM 15:19 Kupm antokg kweikwei ak plantepm titnongket a Maur Wailen, a wa kupm antokg kweikwei a melnum wrekg paipm eng ari pa. Krais kil alkopm Maur Wor akilen pa atom ari kil angklinsopm atom kupm antokg pa. Kupm ngkaten atn ak kwap a laron yangkipm wor a la Krais pa itna kinar anong wail Serusalem pa kul no kaino kai elngen anong kanokg a Ilirikum ai.
ROM 15:20 Kupm la kol a laron yangkipm wor a la Krais pa kai tutu anong a itna kolti a pikekg ake tu ur kai laron yangkipm a la Krais pa naken pa, pa kol a wor pake. Kolpa atom kupm am katnun nikgwalpm kolpake. Kupm kolen melnum a ale wan atom kupm karken mla le wan eli ong wunongket a pikekg tu ur ai ep ukula pa.
ROM 15:21 Kupm akwap kolen nira ela wrkapm a Maur Wailen pa la kolkil la, “Tu mla ur a ake pikekg melnum ur laron Krais pa naken pa, tu pa ikga riwel, a tu mla ur a ake pikekg atning yangkipm a la Krais pa, tu pa ikga wa riwe kil pa yat.”
ROM 15:22 Anti watipmen kupm la kol a kai riwepm, ari am kupm arkewe kwap a wet kupm la pake.
ROM 15:23 Pake ak wang ti pa kwap a pikekg kupm ak ak ai kulngkul kul ti, tatu anong wrongkwail a pikekg itna kolti pa, pa am kupm ak kai plalng ise. Wa wringkwringen ak ai kul pa, kupm wasrongen paipm la kol a kai riwepm, ari kupm arkewe atom ake kupm kai ariwepm.
ROM 15:24 Kolpa ti ikga kupm kai anong kanokg Spein pa, pa kupm wasrongen la ikga kupm or pa kai riwepm ntiwepm rpmi pa kainil aripm ur plalng pipa, kupm i pa kai. Kupm la ikga ntiwepm rpmi mentepm itopen tita, a kipm ik ngklinsopm kuina ur a kupm tukwok pa plalng pipa, kupm wa iye nukurnum i pa wa kai Spein pa.
ROM 15:25 Pake kupm la ikga kai kinar anong wail Serusalem pa pen, la iye marpm a pikekg tu uk Maur Wailen ti la ik ngklin tu wrong kin a kipman akilen a rka kinar pa iyenten kai kinar plalng pa, kupm wa yaper i pa kul no pipa, kupm kaintepm om.
ROM 15:26 Tu wrong kin kipman a ukipma Sisas a rka tatu kaino anong kanokg a Masetonia a tu men wrong kin a kipman a rka anong kanokg Akaia ti, pikekg anel atopen la kai wris takwem marpm kweikwei ise la ukwa kai kinar eng ik ngklin tu men wrong kin a kipman a Maur Wailen a rpma tukwok kinar Serusalem pa. Atom kupm la uwi kweikwei pa iyenten kai kinar pake.
ROM 15:27 Pa aklale, tu alntu anel atopen akwap kolpa la ik ngklin tu men Suta a rka kinar Serusalem pa. Pa am ute wor kolpake. Eng ntei, tu men a rka kinar pa pikekg ake langkinen kweikwei wor wor a pikekg Maur Wor alken pa, kalpis, tu pikekg awi yangkipm wor pa aye no kul laron ak angklin tu a ake Suta a rka tatu ti. Atom pa kol pikekg tu alken kuloken, kolpa atom pa wor eng pikekg tu ti takwem kweikwei a numpalk pa la ikilmpe kuloken pa ikga ukwa iye kai kinar ik ngklin tu a rka tukwok kinar pa.
ROM 15:28 Kolpa ti kupm alkupm ikga ikglen kweikwei ti iye kai kinar uk kai wam a tu alntu ai, kol okipma wor a pikekg tu ai aye no kul alin pa tukgun kakir atom tu a rka ti wa angkon la iye kai kinar ikilmpenten. Kupm ikwap pa plalng, kupm wa yaper no kul la kai Spein pa, kupm kai riwepm itni wampel eng kupm kai pake.
ROM 15:29 Kupm ariwe aklale la, ikga kupm kai riwepm ntiwepm rpmi pa, pa ikga kupm lanikepm nikgwalpm ariwe kweikwei wrongkwail wor wor a Krais kil ak eng ak angklin mentepm wrongkwail pa pati kipm ikga itopen paipm.
ROM 15:30 Pake kipm melnum alkupm a mentepm ukipma Krais, kupm naren Sisas Krais Wailen a mentepmen, a wa Maur Wor akilen a antokg mentepm plan ipma wor wasrongen tita pa, atom kupm tilpepm kolkil la, kipm oklala niki Wailen ntiwopm ilmpwrong nimpokgen Satan.
ROM 15:31 Kipm oklala niki Wailen eng tu men a pikekg elukgen Sisas a rka kai kinar anong kanokg Sutia pa eng ikgake tu ntokgtopm paipm ngko ya pa. A wa lanikel yat eng tu wrong kin a kipman a Maur Wailen a rka kinar Serusalem pa, eng ikga tu uwi wor itopen marpm kweikwei a kupm la ikga iye kai kinar pa.
ROM 15:32 Kipm oklala niki Wailen kolpa eng mpa kupm ngkom nilokgen kaikuten kolpa, atom kol Maur Wailen wasrongen kolpa pa, ikga kupm i kinar ai no atom kai riwepm, pa kupm ikga itopen paipm ntiwepm rpmi, uwi nikgwalpm weten plalng pipa kupm kai.
ROM 15:33 Kupm oklala naki Maur Wailen kil a pikekg awi mentepm ti palng wrong wampil akilen atom alko ipma meen wor pa, eng mpa kil nti kipm kimeket rpmi ikglentepm. Aklale, am kai kolpake.
ROM 16:1 Kupm nira kil ak nakepm Pipi, la kil kin wor amentepmen a mentepm ukipma Krais pa. Kil kin akwapel a Maur Wailen a akwap eng ak angklin tu wrong kin a kipman mapming a Maur Wailen a rka anong wasek Senkria ti.
ROM 16:2 Kupm wasrongen la kipm itopentel uwiyel iye kai. Kil kin akwapel wor a Wailen Sisas kolpa ti kupm lanakepm, la ikga ik wang a kupm ukwawel kaintepm pa, kipm uwiyel iye kai ikglentel riworwor, ik kitila nikgwalpm wor kol a mentepm wrong kin kipman a Maur Wailen ak ak eng ak angklin tita pa. Kil kin wor a ikgalen wrongkwail, a wa kil ikgalen kupm ti yat. Kolpa ti kipm wa ik ngklinsel kuina kuina kol ai a kil tukwok pa.
ROM 16:3 Wa kipm wa uwi ok a kupm kil laniki Prisila ekg Akwila pa, tuwekg melnum wekg a minto akwap wris a Krais Sisas pa la, kupm nikgwalpm arkenten rka pa.
ROM 16:4 Tuwekg pikekg atopen uk num alntuwekg pa la imo ikilen kupm ti, kolpa ti ake wa kupm wris ti nikgwalpm arken tuwekg rka pa, kalpis. Wa tu melnum a ake Suta, mapming a ukipma Krais a kaingkai takwem rka yela tatu ai pa tu wa nikgwalpm arkentepm rka eng tuwekg pa yat.
ROM 16:5 Wa kipm laniki tu wrong kin kipman mapming a wli wli takwem rka kapor kilko alein Krais rka wan a tuwekg pa la kupm nikgwalpm arkenten rka pa. Wa kipm laniki Epainetus, melnum wor a kupm plan ipma wor wasrongentel pa la kupm nikgwalpm arkentel rka pa. Tu wrongkwail a rka kai anong kanokg Esia pa ake pikekg ur plelng ipma ukipma Krais pa, itna a a, Epainetus pa plelng ipma ukipma Krais pa ep pake. Kil kolen okipma ep a pikekg angket tuwai itna kai anong kanokg Esia pa.
ROM 16:6 Wa kipm laniki Maria a pikekg akwap wail eng ak angklin kipm pa la, kupm nikgwalpm arkentel rka pa.
ROM 16:7 Wa kipm laniki Antronikus a Sunias pa la kupm nikgwalpm arkenten rka pa. Tuwekg pa am men alpmen Suta a pikekg minto atn or wris, wa pikekg tu arkul minto wrauren aye kai rpma wan tipmining. Tuwekg pa melnum a nang arke itna kuin a men melnum wokgen akwapel a Krais. Tuwekg pa pikekg plelng ipma ukipma Krais pa ep, a wa kupm ti wa ukipma katnukg.
ROM 16:8 Wa kipm laniki Ampliatus, melnum alkupm a kupm plan ipma wor wasrongentel a mentekg ukipma Wailen Sisas pa la, kupm nikgwalpm arkentel rka pa.
ROM 16:9 Wa kipm laniki Urpanus, melnum amentepmen a pikekg antiwo akwap a Krais pa, a wa laniki Stakis, melnum akupmen a kupm plan ipma wor wasrongentel pa la kupm nikgwalpm arkenten rka pa.
ROM 16:10 Wa kipm laniki Apeles, melnum a pikekg kalkuten palngtel la kol a rkuwel ari kalpis, kil ukipma Krais itna titnongket pa, a wa kipm laniki tu a Aristopulus pa la, kupm nikgwalpm arkenten rka pa.
ROM 16:11 Wa kipm laniki Erotion, mentekg almentekg Suta a pikekg atn or wris pa, a wa kipm laniki tu a rka wan a Narsisus a ukipma Wailen Sisas pa la, kupm nikgwalpm arkenten rka pa.
ROM 16:12 Wa kipm laniki Tripina ekg Triposa, tuwekg kin timplowis wekg a akwap a Wailen pa, la kupm nikgwalpm arkenten rka pa. A wa laniki Persis, kin timplowis paipm a aken kwap Wailen pa, la kupm nikgwalpm arkentel rka pa. Kil kin yek almentepm a mentepm ukipma Wailen pa.
ROM 16:13 Wa kipm laniki Rupus, melnum a pikekg Wailen takweiyel eng kwap akilen, a wa laniki man akilen a pikekg ikgalentopm kolen man alkupmen pa, la kupm nikgwalpm arkenten rka pa.
ROM 16:14 Wa kipm laniki Asinkritus a Plekon a Ermes a Patropas a Ermas wa nimpikgen tu melnum wor alkupm a mentepm ukipma Wailen a antiwen rpma pa la, kupm nikgwalpm arkenten rka pa.
ROM 16:15 Wa kipm laniki Pilolokus a Sulia, wa Nereus nimpikgen muikgmayen alkil pa, a wa Olimpas a wa tu wrongkwail kin a kipman a Maur Wailen a antiwen rka pa la, kupm nikgwalpm arkenten rka pa.
ROM 16:16 Ik wang a kipm kai rki wris eng la ngkit nang a Maur Wailen, kil a pikekg ak amprinsepm eng alkilen pa, kipm nikron tita ik ipma wor kolen la kipm a ukipma Krais pa. A wa tu wrong kin a kipman mapming wrongkwail a ukipma Krais kimeket a rka tatu ti pa, tu la tu nikgwalpm arkentepm rka pa.
ROM 16:17 Kipm melnum wor alkupm a mentepm ukipma Krais pa, kil kupm lanakepm titnongket la, kipm rpmi ukikg riwe tu melnum a kaling plan yangkipm manet a ak ningkailepm kai ngko utnuurng yangkipm aklale a pikekg tu kaling plantepm pa, atom ik wako iro kipm pa itni man man. Ti kipm itni watin tukwuleikgen tu melnum a kolpa!
ROM 16:18 Eng ntei, tu melnum a kolpa pa tu ake akwap orngwatneikgen Krais, Wailen amentepmen pa, kalpis. Tu akwap orngwatneikgen nikgwalpm wasrongen a tu alntu ti kolti. Tu la oklala wor a ak armponel tu melnum a won mis kol warim titnowen a ake ariwe ya a i wor a ya a i paipm pa.
ROM 16:19 Yangkipm a kipm atning nungkulkg orngwatneikgen Krais pa am kai or arpme tu atning yela ise. Kolpa atom kupm atopentepm paipm. Pake kupm wasrongen la kipm rki wontrakole ntokg kweikwei a wor pa kolti. A wa kupm wasrongen la kipm rki titnowen eng ntokg kweikwei a paipm pa.
ROM 16:20 Maur Wailen, kil yiprokgen a alko ipma meen wor pa, ikgake mpen, kil ikga rkganti Maur Paipm Satan pa penterngen kolti ngketen titnongket akilen pa kai tukgwleikgentepm. Kupm asen Wailen Sisas amentepmen ti eng mpa kil plantepm ipma wor alkil pa ngklinsepm kolpa iye kai.
ROM 16:21 Timoti, melnum wor akupmen a mentekg akwap wris pa, wa Lusius a Seson a Sosipater, minto alminto Suta a pikekg minto atn or wris pa, tunteng pa la tunteng nikgwalpm arkentepm rka pa.
ROM 16:22 Wa kupm Tertius tike, kupm melnum a nira nira oklala a Pol ti ela wrkapm kil pa, kupm melnum a mentepm ukipma Wailen Sisas, kupm ti yat kupm wa lanakepm la kupm nikgwalpm arkentepm rka pa.
ROM 16:23 Wa Kaius pa la kil wa nikgwalpm arkentepm rka pa. Kil melnum wor a ikgalen kupm ti rpma wan akilen, wa kil ikgalen tu wrongkwail kin a kipman mapming a ukipma Krais a rka ti a wli wli takwem rka wan akilen ti. A wa Erastus, melnum a akwap ikgalen marpm a anong wail kil, wa nampikgen Kwartus melnum ur a mentepm ukipma Krais pa, tuwekg pa wa la, tuwekg nikgwalpm arkentepm rka pa. [
ROM 16:24 Kupm asen Sisas Krais Wailen amentepmen pa eng mpa kil plan ipma wor akilen pa ngklinsepm kolpa iye kai. Aklale.]
ROM 16:25 Atom ti mentepm mpa ngkit nang wail a Maur Wailen. Kil antiwe titnongket a antokg kipm ukipma itna titnongket. Kil ak titnongketelepm ak yangkipm wor a la Sisas Krais a kupm laron nakepm nakepm pa. Yangkipm pa ak laron nikgwalpm yiprokgen ampen alkil a ake pikekg mlaur laron pa, pa pikekg itna am ak ai kulngkul kul ti.
ROM 16:26 Pake ak wang ti pa, Maur Wailen kil a rpma yongkyong pa plan nikgwalpm ampen akilen pa kul kai angko wunong. Atom kil uk yangkipm men melnum akwapel akilen la men kai laron yangkipm a pikekg tu melnum ok wripm akilen nira ela wrkapm la ikga palng iklale pa. Atom men kai laron naki tu wrong kin a kipman yela kanokg ti, eng mpa tu itning nungkulkg ukipma kutnun Sisas Krais pa.
ROM 16:27 Atom ti mentepm ikwonilmpen nikgwalpm a Maur Wailen a pikekg Sisas Krais akwap katila eng ak angklin mentepm wrongkwail, pa ake mla ur alupm nikgwalpm wontrakole watin kolpa! Maur Wailen kil wris ata pa kil antiwe nikgwalpm ariwe watin kolpa. Kolpa ti mentepm mpa uk wor ngkit nang akilen ti iye kaino kwa ikngklei wang ik wang ti a wa ik wang kutnukg pa. Aklale.
1CO 1:1 Kupm Pol, kupm pikekg Maur Wailen kil ak wasrongen alkil ai takweiyopm la kupm melnum wokgen a Krais Sisas. Kupm ti nampikgen Sostenes melnum almentepmen a mentepm ukipma Krais Sisas pa,
1CO 1:2 mentekg nira wrkapm kil eng kipm wrong kin a kipman a Maur Wailen a kaingkai takwem rka anong Korin, kipm a pikekg Maur Wailen anel Krais Sisas pa kol kla ak amprinsepm eng alkilen, kipm a pikekg kil rkantepm la kipm itni wriwen wor, kol a pikekg kil ak amprin a rkan tu kimeket a kaingkai takwem rka anong wrongkwail yela a naren Sisas Krais pa la, kil Wailen a tu, kol a mentepm narentel la kil Wailen amentepmen pa.
1CO 1:3 Kupm oklala naki Maur Wailen Yan amentepmen nampikgen Wailen Sisas Krais, eng mpa tuwekg plantepm ipma wor atuwekg pa a lkepm ipma meen wor kolpa iye kai.
1CO 1:4 Kipm rpma kawor Krais Sisas pa, atom Maur Wailen akupmen pa plantepm ipma wail wor alkil a angklinsepm pa, kolpa atom akangklei kupm alkel wor eng kipm pa.
1CO 1:5 Kipm rpma kawor Krais Sisas pa, atom Maur Wailen plantepm ipma wail wor alkil pa, atom ari kil alkepm kweikwei wrongkwail angko angen. Kweikwei kol yangkipm wrongkwail alkilen pa kil antokg kipm antiwe laron ariworwor. Wa kol yangkipm yiprokgen wrongkwail alkilen pa kil antokg kipm ariwe worwor.
1CO 1:6 Kipm katnun nikgwalpm ariwe wor wor kolpa pa ak titnongketel yangkipm wor a pikekg men laron Krais nakepm pa la, pa yangkipm aklale.
1CO 1:7 Maur Wailen plantepm ipma wor alkil kolpa ti ake kipm tukwok eng ariwe, a titnongket ur a ak ak kwap auraur a Maur Wor pa ak wang a kipm rpma nungkwangen Wailen Sisas Krais amentepmen ti, eng la kil nar ngko wunong pa.
1CO 1:8 Wa Maur Wailen mpa lkepm titnongket, kolpa kaingkai, kai ngko wang a plalng ai, atom ikga ik wang a Wailen Sisas Krais kil nar la ikilmpe kuina ur wrongkwail a mentepm ak itna kanokg ti, ikgake tu ur lawepm la kipm antokg paipm ur pa kalpis.
1CO 1:9 Am Maur Wailen kil alkil pa pikekg akwewepm aye kai orwris nampokgen Warim Kipman alkilen Sisas Krais, Wailen amentepmen. Kil akangklei antokg kuina ur a kil la ntokg pa, ake mpa kalpis pa. Kolpa atom ari kil ikga ik titnongketelepm pa.
1CO 1:10 Kolpake, kipm melnum alkupm a mentepm ukipma Sisas, kupm naren Sisas Krais, Wailen almentepmen pa, atom kupm tilpepm titnongket la, ampur kipm wako aro kipm alkipm pa itna manman pa, i ai. Kipm la la yangkipm ok pa, kipm la or wris kolti, kipm kai or wris lupm nikgwalpm wris kolti eng kuina ur a kipm ukipma a kuina ur a kipm la ntokg pa.
1CO 1:11 Kupm la kolpa eng tu tiur a Kloi a antiwel rpma wan wris pa pikekg lakati nakopm yek kimeket la la, kipm melnum alkupmen a mentepm ukipma Sisas pa kipm akle tita.
1CO 1:12 Kuina ur kupm la mpa la pa pati, itna kolkil la: tiur akipmen pa la kolkil la, “Kupm kil pa a katnun Pol”, wa ur pa la, “Kupm kil pa a katnun Apolos”, wa ur pa la, “Kupm kil pa a katnun Pita”, wa ur pa la, “Kupm kil pa a katnun Krais.”
1CO 1:13 Ti Krais ti watipmen ur atom mpa wa kipm wako iro ikuwiye kipm alkipm ti, aki? Ti kupm Pol ti pikekg tu karkurngkopm rka yo okgmangki ti akarmpen kipm pa ur pake? Aki pikekg tu naren kupm ti kalukepm tike?
1CO 1:14 Kupm ukwor Maur Wailen atnen a pikekg kupm ake kaluk kipm melnum watipmen a Korin pa kalpis, kupm kaluk Krispus ekg Kayas wekg ata kolti,
1CO 1:15 kolpa ti ake ntiwe mpa melnum ur lala, “Men pikekg tu naren Pol pa kaluko pa.”
1CO 1:16 Wet kupm la kupm kaluk Krispus ekg Kayas wekg pa kolti, a'a, ake wa kupm kaluk tuwekg pa wris pa, wa Stipen nampikgen tu a rka wan wris akilen pa yat, pa pikekg kupm kaluken pake. Pake wa or pa kai pa ake kupm ariwe la kupm kaluk tiur aki kalpis.
1CO 1:17 Krais ake pikekg ukwa kupm ti la kupm kuluk tu melnum pa. Kil pikekg ukwawopm eng la kupm laron yangkipm wor a laron kil pa. A ake lala kupm la ik nikgwalpm ariwe a melnum ak laron yangkipm itna kanokg a ti pa, kalpis. Kol kupm laron ik ariwe a melnum pa, pa mpa ik ungkwan titnongket a yangkipm a la kil pikekg amo rka yo okgmangki pa kai kalpis kolti.
1CO 1:18 Tu melnum a angkom or ya a ikga tu kai paipm pa, tu atning yangkipm a la Krais amo rka yo okgmangki pa, tu la, pa yangkipm titno ur kolti. Pake mentepm melnum a angkom or ya a Maur Wailen akawiyo eng alkilen la ikga mentepm kai wor pa, mentepm ariwe la pa yangkipm wor titnongket a Maur Wailen am pake. Kolpa atom ari kupm wuten lanakepm la yangkipm wor a la Krais pikekg amo rka yo okgmangki pa antiwe titnongket a Maur Wailen.
1CO 1:19 Ti nikgwalpm ariwe a kanokg pa ake wor eng ak ari la yangkipm a la Krais amo rka yo okgmangki pa la pa yangkipm titno aki yangkipm wor. Kolen yangkipm a pikekg Maur Wailen la atom tu nira ela wrkapm alkil pa la, “Ikga kupm ungkwan ariwe a tu melnum ariwe pa, wa ikga kupm ngketen nikgwalpm wontrakole a tu melnum nikgwalpm umpen pa.”
1CO 1:20 Wrkapm pa la kolpa ti mpa wa mentepm la tu melnum a nikgwalpm ariwe watin a kanokg ti la kolai? Mpa wa mentepm la tu melnum a arpmen yangkipm yiprokgen a Moses ti la kolai? Mpa wa mentepm la tu melnum nimnol arke a ak yangkipm rapon rapon ti la kolai? Tu melnum kolpa ikga ik ariwe alntu a kanokg ti ik ngklinsepm la kolai? Pa kalpis. Maur Wailen elngen Krais amo rka yo okgmangki, atom ak antokg nikgwalpm ariwe wrongkwail a la itna kanokg ti pa la pa titno kolti.
1CO 1:21 Nikgwalpm ariwe a Maur Wailen pa watin mleing, kolpa atom kil antokg tu melnum ariwe a kanokg ti ake antiwe mpa tu ik ariwe a tu alntu ti riwe Maur Wailen pa. Tu pa awi paipm uk yangkipm a kupm a tu kwapwris akupmen laron pa la, pa yangkipm titno paipm ur kolti. Pake nikgwalpm wasrongen a Maur Wailen pa atom wa kil plelngen yangkipm a tu awi paipm uk pa, pa wa palng wontrakole wor a kil la ik uwi tu a ukipma pa iye kul kai eng alkilen.
1CO 1:22 Pake tu a men Suta a atning yangkipm a kupm a tu kwapwris akupmen laron pa, tu la ik wulmpa ri kweikwei weten weten a palng ak titnongket a Maur Wailen pa, pa tu ukipma pake. A tu a kipm a ake a Suta a atning yangkipm a men laron pa tu la itning yangkipm a ak nikgwalpm ariwe watin a melnum ok wail ti laron pa pipa, tu ukipma pake.
1CO 1:23 Tu pa la itning yangkipm kol pake, a kupm a tu kwapwris akupmen ti pa, men laron Krais a pikekg amo rka yo okgmangki pa. Atom tu a men Suta pa atning yangkipm pa, pa tu la pa ake planten titnongket a Maur Wailen, yangkipm pa kol wes ur a tu kai al nepm atne pa. A tu a kipm a ake Suta pa atning yangkipm pa, pa tu la pa yangkipm titno ur kolti.
1CO 1:24 Pake men a Suta aki, kipm ake a Suta aki, mentepm kimeket a pikekg Maur Wailen akwewo ti pa, mentepm ari angko wunong la Krais amo rka kaino yo okgmangki pa am titnongket a ariwe wail manten a Maur Wailen ampake.
1CO 1:25 Nikgwalpm titno a tu melnum akwonalmpen la Maur Wailen antokg titno pa, pa kil antokg wontrakole wor angen nikgwalpm ariwe a melnum ti. Wa tu ari la kwap a Maur Wailen ak pa la ake antiwe titnongket pa, ari kwap pa antiwe titnongket wail manten angen titnongket a melnum ti.
1CO 1:26 Ti kipm ri, kipm melnum alkupm a mentepm ukipma Krais, kipm ikwonilmpen a pikekg Maur Wailen akwewepm ep pa atom kipm kai ukipma pa, kol mentepm melnum ti ari la tita pa ake pikekg wailet tiur akipmen ti melnum a awi ariwe pa aki, melnum a nang arke aki, melnum tempil a anong ur pa, kalpis.
1CO 1:27 Pa ake kolpa, kol kilke: Maur Wailen kil angklo awi tu melnum lngkep titnowen itna wulmpa a tu melnum ariwe a kanokg ti, eng la uk numpaipm tu melnum ariwe a itna kanokg ti. A kil angklo awi tu melnum a tu ari la tu pa ake antiwe titnongket pa, eng la uk numpaipm tu melnum a antiwe titnongket pa.
1CO 1:28 Kil angklo awi tu melnum a tu a itna kanokg a ti ari elukgen la pa tu melnum a ake itna tempil a anong ur, a tu melnum wor paipm a nang kalpisen. Nikgwalpm a Maur Wailen pa kil antokg kolpa, eng mpa ik ntokg tu melnum wor wail wail nang arke pa palng kol tu melnum wor paipm a nang kalpisen pa.
1CO 1:29 Kil angklowe awi tu melnum a kolpa eng melnum ur ake antiwe mpa wam rka nol itni wulmpa a Maur Wailen pa.
1CO 1:30 Pake kipm ti pa, kipm antiwe rpma kawor mrangkum a Krais Sisas pa atnen kuina ur a Maur Wailen kil antokg eng kipm pa. Mentepm rpma kawor mrangkum a Krais pa atom mentepm awi nikgwalpm ariwe a Maur Wailen alko pa. A wa Krais pa kol kla a ak amprinso eng Maur Wailen, wa atnen kwap a pikekg Krais kil ak pa Maur Wailen kil ariwo la mentepm ti wa ute wor kol Krais pa, wa Krais kil armpen mentepm ti aye yaper kul wirng no itna kukula wor.
1CO 1:31 Kolpa ti mentepm kitila yangkipm a ela wrkapm a Maur Wailen pa lala, “Mla ur kitn la itop ik la mla ur pa pipa, kitn itop ik la Wailen wris ita kolti.”
1CO 2:1 Kipm melnum alkupmen a mentepm ukipma Krais, mentepm mpa itop ik la Wailen wris pa kolti. Kolpa atom ak wang a pikekg kupm kai ariwepm eng angkli yangkipm a Maur Wailen a pikekg itna ampen pa nakepm pa, ake pikekg kupm laron kolen melnum ur a ariwe wail a nim nol arke oklala worwor pa, kalpis.
1CO 2:2 Pikekg ep kupm akwonalmpen la ikga kupm kai ntiwepm rpmi pa, yangkipm wrongkwail pa ikga itni pa, a ikga kupm laron amo a Sisas Krais rka yo okgmangki wris ita ti nikepm kolti.
1CO 2:3 Atom ak wang a pikekg kupm laron yangkipm antiwepm rpma kai pa, kupm pikekg titnongket kalpis, kupm ngkark warwar kolti.
1CO 2:4 Oklala akupmen a yangkipm a pikekg kupm laron pa, ake pikekg kupm laron ak ariwe wail ur pa, eng mpa ik rkolngkepm iye kul kutnun yangkipm pa, kalpis. Pikekg kupm laron yangkipm pa, atom Maur Wor a Maur Wailen kil alkil plantepm titnongket alkil ak titnongketel yangkipm a kupm laron pa.
1CO 2:5 Pikekg kupm ake la kipm yikak itni ariwe wail a melnum a laron yangkipm pa atom kipm ukipma. Kupm la kipm ri titnongket wris ita a Maur Wailen pa atom kipm ukipma pake.
1CO 2:6 Ei, ariwe a melnum pa ake antiwe, pake ak wang a men anti tu melnum a ukipma Sisas a Maur Wor atuwen itna kol mel nangkwor kin nangkwor pa rpma pa, men laron naken yangkipm ak nikgwalpm ariwe watin ur manet, akla ariwe a ake a kanokg ti pa aki, ariwe a tu melnum tukgunakg a kanokg ti pa, tu pa nampokgen ariwe atuwen pa ngkaten kolpa kai eng ikga kai plalng.
1CO 2:7 Nikgwalpm ariwe a men laron kil pa nikgwalpm ariwe a Maur Wailen a pikekg itna ampen eng mentepm melnum ti, a lala ikga uwi mentepm ti iye kai itni kai klalen alkil ai. Nikgwalpm ariwe pa pikekg kil akwonalmpen ep ak ai a kitnong a kanokg ti kil antokg katnukg.
1CO 2:8 Ake wris ur a tu melnum tukgnakg a kanokg ti ariwe nikgwalpm ariwe a Maur Wailen la ik pa. Kol pikekg tu riwe pa pati, kol ake wa tu kurkurng Melnum Wailen a antiwe klalen wail pa rki yo okgmangki pa, kol a kalpis.
1CO 2:9 Pa kol yangkipm a Maur Wailen la ela wrkapm pa la, “Ake wulmpa ur ari, ake nungkulkg ur atning, ake nikgwalpm ur palng kai melnum ur eng mpa kil ikwonilmpen riwe nikgwalpm ariwe a pikekg Maur Wailen kil numprampen elntitna la ik eng ik ngklin tu melnum a plan ipma wor wasrongen kil pa.”
1CO 2:10 Pake men ti pa Maur Wailen kil alko Maur Wor alkil pa nar kaling planto nikgwalpm ariwe ampen a Maur Wailen la ik pa kul kai angko wunong. Eng ntei, Maur Wor pa kil ikgen akor ari kweikwei wrongkwail. Ti nikgwalpm ariwe ampen a Maur Wailen a kinar watin walopmen paipm ai pa kil antiwe ariwe plalng.
1CO 2:11 Ti mentepm melnum ti ake mla ur ariwe nol nikgwalpm a mentepm melnum ti pa, kalpis. Pa maur wor wris ata a melnum kil alkil pa kolti pa pati, antiwe ariwe nol nikgwalpm a kil alkil pake. Am wa kol pa yat pake, ake melnum ur antiwe ariwe nol nikgwalpm a Maur Wailen pa, kalpis. Maur Wor a Maur Wailen wris ata pa pati, antiwe ariwe nol nikgwalpm a kil alkil pake.
1CO 2:12 Pake Maur Wor a mentepm awi ti pa, ake maur wor ur a itna kanokg a ti atom mentepm awi pa, kalpis. Mentepm awi maur wor a Maur Wailen alko angkaino kitnong ai nar ai, eng mpa mentepm riwe kuina ur wor wor a Maur Wailen kil alko ak nikgwalpm wasrongen a kil alkil ai.
1CO 2:13 Ake men la kweikwei wor wor a Maur Wailen angklinso pa ak nikgwalpm ariwe a melnum ti kaling planto pa, kalpis. Men la ak nikgwalpm ariwe a Maur Wor alkil ai kaling planto pa. Atom men awi nikgwalpm ariwe a Maur Wor pa ak la kweikwei a Maur pa ak ok yangkipm alkil a Maur pake.
1CO 2:14 Pake tu melnum a ake awi Maur Wor a Maur Wailen pa, tu karken atning kweikwei a Maur Wor a Maur Wailen pa. Tu akwonalmpen la pa kweikwei titnowen. Tu ake antiwe mpa uwi riwe pa atnen ake tu awi Maur Wor a Maur Wailen pa. Kweikwei a Maur Wor pa, kil alkil wris ata antiwe kaling planten eng mpa tu ik nikgwalpm ik irongke atom uwi riwe pa.
1CO 2:15 Pake melnum a awi Maur Wor a Maur Wailen pa, kil antiwe ari ak nikgwalpm ak arongke kweikwei wrongkwail pa. Pake kil alkil pa ake antiwe mpa mla ur a ake awi Maur Wor a Maur Wailen pa riwel ik nikgwalpm ik irongke ikwonilmpen la, kil kolai kolai pa, kalpis.
1CO 2:16 Ake antiwe mpa mla ur riwel, eng ntei, nira ela wrkapm a Maur Wailen pa la kol kil la, “Mla ur kil ariwe nikgwalpm a Wailen pa? Kalpis. Mla ur antiwe mpa uk nikgwalpm kil pa? Kalpis.” Wrkapm pa la kol pake, a mentepm a awi Maur Wor ti pa, mentepm alupm nikgwalpm a Wailen Krais pake.
1CO 3:1 Kipm melnum alkupm a mentepm ukipma Krais, kipm pikekg ukipma Krais pake, kipm ake pikekg katnun nikgwalpm weten a Maur Wor akilen alkepm pa ariworwor pa kol a kupm laron yangkipm pa nikepm kol a kipm kin nangkwor a mel nangkwor pa, ari kalpis. Kipm wa katnun ipma tingklaket alkipmen pa wa itna wai, kolpa atom kupm pikekg alkepm yangkipm pa kolen kipm warim waseksek.
1CO 3:2 Atom kupm pikekg alkepm ma ti al kolti, ake kupm alkepm okipma pa al, eng kipm ake antiwe mpa uwi okipma kalnten pa. Antokg kolai atom wa ak wang ti wa kipm wa erkisen al ma pa wa itna wai, a ake wa kipm antiwe mpa il okipma kalnten pa?
1CO 3:3 Pa pati atnen a kipm rpma katnun ipma tingklaket alkipm ti itna a pa. Kipm ipma paipm eng tita, wa akle tita, pati plan kolen la kipm rpma katnun ipma tingklaket alkipm pa itna pa. Kolpa atom ari kipm antokg kweikwei kol a tu melnum a rpma kanokg ti antokg itna pa. Aki pa kipm la pa ake kolpa?
1CO 3:4 Kol ur akipmen pa la kolkil la, “Kupm kil a katnun Pol”, a ur pa la, “Kupm kil a katnun Apolos.” Kipm antokg kolpa, pa plan kolen la kipm katnun nikgwalpm kolen tu a rpma kanokg ti katnun itna pa. Aki pa kipm la pa ake kolpa?
1CO 3:5 Ti kipm la Apolos pa kil mla, a kupm Pol ti pa kupm mla, eng mpa kipm iro kipm alkipm ti itni kutnun mentekg ti? Mentekg ti melnum akwapel a Wailen ti kolti. Wailen ti kil alko kwap ti manman eng mentekg ak, pake mentekg yatenen akwap wris eng ak awi kipm aye kul eng ukipma Krais.
1CO 3:6 Kupm ti alin okipma, wa Apolos pa awi miwel ak tungkwampel, pake Maur Wailen kil alkil pa antokg atom anip.
1CO 3:7 Pake melnum wekg pa, melnum a alin, a wa melnum a awi miwel ak tungkwampel pa tuwekg nang kalpisen. Pake melnum a nang arke pa Maur Wailen pake. Kil pa antokg kweikwei pa anip pake.
1CO 3:8 Pake melnum a alin pa, wa melnum a awi miwel ak tungkwampel pa, tuwekg pa akwap wris a Maur Wailen. Pake tuwekg pa ikga uwi kweikwei ikilmpe kitila kwap na ur a pikekg tuwekg ak pa. Pake tuwekg yatenen pa akwap wris a Maur Wailen.
1CO 3:9 Kolpa atnen mentekg kil melnum akwapel a Maur Wailen, a kipm pa kolen wring a Maur Wailen. Wa kipm pa kolen wan a Maur Wailen ale eng kil alkil a rpme.
1CO 3:10 Kipm pa kolen wan a Maur Wailen. A kupm kil pa Maur Wailen plantopm ipma wor a alkopm ariwe pa atom kupm uwen ong ariworwor kolen melnum tingklaket a ale wanel pa. Atom tu melnum manet wa ale wan ela ong pa. Pake tu mla mla la le wan pa eli ong pa pipa, mpa tu ri ukikg le wan pa riworwor, ampur ale paipmel pa.
1CO 3:11 Ong kimpowen wor am pikekg kupm ukula ep itna ise, am Sisas Krais kil alkil pake, a ake antiwe mpa Maur Wailen le wan alkilen pa eli ong kimpowen manet pa kalpis.
1CO 3:12 Melnum akwapel ur pa kil akor kweikwei kalnten kalnten wor wor pa, a melnum akwapel ur pa kil akor kweikwei pirpar pirpar paipm paipm pa. Ekg aye wli ak ale wan pa ela ong kimpowen a pikekg kupm uwen itna pa.
1CO 3:13 Kwap a tu melnum ale wanel pa, ikga kutnukg pa palng kai ngko wunong, tu ri la pikekg tu ak kweikwei wor wor ale wan pa aki kalpis. Wang pa pikekg Maur Wailen alm la ikga ntokg yangkipm nimpokgen mentepm wrong kin a kipman pa. Ikga ik wang pa wripm mring mring wail pa el, atom ikgam wripm alkil pa ikri wan a tu ale pa la ikga itni titnongket aki kalpis.
1CO 3:14 Kol kwap a melnum ur a pikekg kil ore tangklep aki angkon kling pa itni titnongket wor pa pati, ikga kil uwi kweiur wor ikilmpe kwap a pikekg kil ak pa.
1CO 3:15 Pake kol kwap a melnum pa tipor pa pati, kwap a pikekg kil ak pa kai kalpmlel kolti, ikga ake kil uwi kweikwei wor wor ikilmpe kwap a kil pikekg ak pa. Pa kil kol melnum a ale wan alkil paipmel pa plalng arpme rpma, ari wan pa tapor elng kai prapm kai kanokg ti, a kil alkil melnum ti kol a paipm ari kalpis, kil wrekg purngkupirngka ngkark wampwam wris kul or en ti kai wor ise.
1CO 3:16 Kipm ake ariwe la kipm ti wan yalming a Maur Wailen, atom Maur Wor a Maur Wailen rpma kawor kipm ti? Pa kipm ariwe pa.
1CO 3:17 Wan yalming a Maur Wailen pa kil amprin eng alkilen kolti. Kolpa ti kol melnum ur ntokg paipmel wan yalming a Maur Wailen pa pati, ikga wa Maur Wailen kil wa ntokg paipm melnum pa. Wan yalming pa am kipm tike.
1CO 3:18 Ampur kipm kansil kipm alkipm pa. Kol kipm ur ikwonilmpen la, kil antiwe nikgwalpm ariwe wor a kanokg ti pati, kil elngen nikgwalpm a kolpa, a kil kai kutnun nikgwalpm ariwe wor a Maur Wailen. Kil ik kolpa pa, tu melnum a itna kanokg ti mpa riwel la pa kil awi nikgwalpm titno ur kolti. Pake kil melnum ariwe wor a antiwe nikgwalpm am pake.
1CO 3:19 Kol tu melnum alupm nikgwalpm ariwe a kanokg ti pa, Maur Wailen pa ari la, pa nikgwalpm titnowen, kolpa atom ari kupm wuten la kipm elngen nikgwalpm a kolpa. Kolen wrkapm a Maur Wailen la kolkil la, “Nikgwalpm ariwe a Maur Wailen pa watin mleing, kil mpa ntokg nikgwalpm wontrakole a tu melnum a kanokg ti palng kol ampei a kil alekg atom tu kai ngkowe pa.”
1CO 3:20 Wa la yat ela wrkapm akilen pa la, “Wailen kil ariwe nol nikgwalpm a tu melnum a awi ariwe a kanokg ti plalng, atom kil ariwe la pa ake ak angklinsen kweiur.”
1CO 3:21 Kolpa ti ake mpa kipm ur ik melnum akwapel a Krais ur ik nowe melnum akwapel a Krais ur pa; tu pa a kweikwei wrongkwail pa akipmen kimeket irir ak angklin kipm pake.
1CO 3:22 Men melnum akwapel a Krais kolen kupm Pol ti, wa Apolos, wa Sipas, nampokgen kweikwei wrongkwail kolen kitnong a kanokg ti, a mentepm rka ti, a mentepm ikga imo pa, a kweikwei ak wang ti, a ikga ik wang kutnukg pa, kweikwei pa akipmen kimeket irir a ak angklinsepm.
1CO 3:23 Aklale, kweikwei wrongkwail pa akipmen, pake kipm ti pa, kipm a Krais, a Krais pa a Maur Wailen.
1CO 4:1 Ti ampur kipm ak melnum ur aknowe melnum ur. Kipm ikwonilmpen riwe men ti la, men ti melnum a akwap orngwatneikgen Krais. A men yan a arpmen yangkipm yiprokgen a kweikwei a Maur Wailen a pikekg itna ampen pa, atom laron naki tu wrong kin kipman pa.
1CO 4:2 Kol melnum ur akwap arpmen ikgalen wan anong kweikwei a mring ur pa pati, mring mpa la ri melnum pa kil ikwap riworwor iyekimeket kitila nikgwalpm wasrongen a mring alkil pake.
1CO 4:3 Kol kipm la ri la kwap a kupm ak ti, wa kipm aki kol tu ur ai la iye kupm ti kai itni ntokg yangkipm nimpokgen mring man ur, atom ri la kupm ti la, kupm melnum kolai pa, kupm ake wa akwonalmpen pa watipmen. Kupm ti yat, ake wa kupm ari la akwonalmpen kupm alkupm ti la, kupm akwap kolai aki kupm melnum kolai pa.
1CO 4:4 Eng ntei, kupm ake ariwe la kupm akwap paipmel eng mpa melnum ur lawopm la kupm ti antokg paipm pa, pake kupm ti ake antiwe mpa ri la kupm alkupm ti la, kupm melnum ute wor itna wulmpa a Wailen pa. Melnum wris ata pa antiwe rpma atning a ari kupm ti la kupm melnum kolai aki kupm akwap kolai pa, pa Wailen kil alkil pake.
1CO 4:5 Kolpa ti ampur kipm uren ari kwap a men melnum akwapel a Maur Wailen ak pa la wor aki paipm pa, iyai! Iyewen itni nungkwangen itni i i, kai ngko wang a Wailen alkil ai nar ai kul. Ikga kil laron kweikwei a rpma kai miningket a ipma a melnum pa iye kul kai itni kai klalen ai. A kil ikga iye nikgwalpm yiprokgen a men akwonalmpen eng ak ak kwap pa, ikga iye kul kai ngko wunong. Ikga ik wang pa, pa ikga Maur Wailen kil laniko kwap a melnum wris wris ak pa la kil ak wor aki kil ak paipm.
1CO 4:6 Atom kipm melnum alkupm a mentepm ukipma Krais, yangkipm a kupm la kil pa akla kupm alkupm ti a akla Apolos ai eng la ik ngklin kipm pa, eng mpa kipm uwi riwe kul mentekg ti atom kutnun yangkipm a lala, “Ake mpa ngkine yangkipm a pikekg nira pa!” Atom ampur kipm antokg mplen ante ak melnum akwapel ur a Krais pa akoo pa, atom aknowe melnum ur a tuwekg akwap wris pa, iyai!
1CO 4:7 Eng ntei, mla elng kitn ti itna angen tu tiur ai? Kuina ur a kitn pa, kitn la pa ake a Maur Wailen alkeitn? Kweikwei wrongkwail pa kitn awi angkai Maur Wailen pa kul pake. Ti wa kitn ak kweikwei pa akoo eng kuina wai lala kitn alkitn ti awi?
1CO 4:8 Aki kipm am awi okipma a Maur Wor pa al antiwe ise, atom kipm rpma antiwe kweikwei wrongkwail pa wor ise, atom am kipm ak pa akoo pake? Kipm wa la la kipm am atnuurng men ti ise, atom kipm alkipm kolti rpma palng melnum tukgunakg a ikgalen kweikwei wrongkwail pa ise aki? O, kol am kipm pa palng melnum tukgunakg kolpa pa kol am wor pake! Ti kol a wa men ti wa la kai palng melnum tukgunakg kol kipm pa, atom men ntiwepm mentepm itni ikglen kweikwei wrongkwail pa!
1CO 4:9 Eng ntei, ari kolen Maur Wailen kil elng men melnum wokgen akwapel a Krais ti itna kinar yirokg ai, atom tu wrong kinkipman a kanokg ti alko nang paipm. Men ti kol wrongmanto a tu kai oro atom tu anel atop arkol arkolo wam aye katnukg katnukg wli aye kai itna wulmpa a tu wrongkwail ai la ri eng mpa tu ilmpo imo pa. Atom tu wrong kin kipman, anti tu maur akwapel a Maur Wailen, tu wulmparpmewo ikatnento itna pa.
1CO 4:10 Men akwap a Krais ti kolpa atom tu wailet tu la men ti la men ti men melnum titnowen, wa kipm pa akwonalmpen la kipm a rpma kawor Krais pa, kipm pa melnum ariwe wor wor pake. Men kil ake titnongket, pake kipm pa titnongket wor ur pake. Kipm pa tu ngkatepm nang aye kaino kwa wor pake, wa men kil pa tu alko nang paipm.
1CO 4:11 Pikekg ak ai kul angko wang ti pa, men atn ak nikgel a kromeng tingklako. Men nowe apm paipm, a tu oro talpulng ungkwanto, a men atn akwap lkgungkur lkgungkur wan anong kalpisento.
1CO 4:12 Men almen akwap ak wam almenen eng ak angklin men almen ti, atom tu ari la men ti la wor paipm ur kolti, a ake tu ari la men ti melnum wail ur kol a i a kaling plan yangkipm tu pa. Tu ak nokgelo pa, men ti wa oklala naki Maur Wailen la lken wor. Tu oro anelo melkg alko yong walmpopm pa, men ake akalmpe, men arkul ipma arki kaikuten pa itna kolti.
1CO 4:13 Tu lawo paipmel pa, men kai akalmpe ak ipma meen. Tu wrong kin a kipman a itna kanokg ti pa, tu ari men ti kolen ipik palk a tu angkli angkli kinar up ai, a kolen kuntuk kirngepm a tu klak aye kai alung alung. Am pikekg kolpa ak ai kul wli wang ti, am kolpa itna pake.
1CO 4:14 Yangkipm a wet kupm nira pa ake kupm nira eng la uk numpaipm kipm pa, ake kolpa. Kil kupm nira la ik niki kurkurng kipm pa kolen warim yekyek akupmen.
1CO 4:15 Eng ntei, kipm ake yan watipmen. Men melnum aripm ur kaling plantepm arowonelepm yangkipm a Krais, pake kol a wa tu wailet paipm ai wa kiling plantepm irowonelepm, pake kipm ake yan watipmen. Kupm ti pikekg laron yangkipm wor a la Krais Sisas ti nakepm, atom kipm ukipma, kolpa atom kipm palng kol warim akupmen, wa kupm palng kol yan a pikekg angket alewepm pa.
1CO 4:16 Kolpa ti kupm tilpepm la kipm kutnun nepm yikak a kupm ore pa ntokg kuina ur kol a kupm la pa.
1CO 4:17 Kolpa atom ari kupm pikekg ukwa Timoti, angkol yaya ur pa eng a kai riwepm pake. Kupm pikekg angklinsel atom kil ukipma Wailen, kolpa atom kil kol warim wor alkupmen a kupm plan ipma wor wasrongentel pa. Kil pa kupm ariwe la kil nikgwalpm arken kwap a Wailen. Kil kai eng la ngkitepm nikgwalpm eng kutnun kwap a rpma akupmen a kupm ukipma katnun Krais Sisas pa. Pa kai or wris yangkipm a pikekg kupm angkli yela naki ak arowonel tu wrong kin a kipman mapming a ukipma Krais, lkgung ur lkgung ur.
1CO 4:18 Tu tiur akipmen pa antokg mplen ante kolti katiwen la, kupm ti ikga ake kai riwepm ur.
1CO 4:19 Pake wasrongen a Wailen pa, ake angkai ai, angkul ketn ti eng kupm a kai riwepm pake. Pa ikga kupm alkupm kai itningkiri uwi riwe riworwor pen la tu a antokg mplen ante kolpa la, tu ak titnongket a Maur Wailen aklale aki? Kupm ikgake itning yangkipm ok ur a tu la pa.
1CO 4:20 Ti itni eng kupm alkupm ikga kai itningkiriwe la tu a antokg mplen ante kolpa, pa tu akwap ak titnongket a Maur Wailen aki tu oklala kolti pa. Eng ntei, kol klalen titnongket a Maur Wailen a nar alen mentepm ti pa, pa ake antiwe mpa mentepm itning kai okyangkipm a melnum oklala ariworwor ti pa kalpis, mpa mentepm ri kai titnongket a Maur Wailen a melnum ak ak kwap ti kolti.
1CO 4:21 Kipm alkipm pa la nikgwalpm wekg ur pawo: la la ikga kupm kai riwepm pa, pa kupm iye nikgwalpm a plan ipma wor wasrongentepm a ipma meen wor aki, kipm la ikga kupm iye wanteng ti kai ik riwepm?
1CO 5:1 Kupm atning a tu la la kipm tiur pa akwap numkropis a uk numpaipm kamel. Tu lakati la warim kipman ur pa kil awi man katnukg alkil pa aye atn. Pa kwap paipm wrisen a tu melnum a ake ariwe Maur Wailen kol ake wa ikwap a ak kolpa.
1CO 5:2 Ti wa kipm ariwulmpa atop antokg mplen ante elngen melnum pa kil akwap numkropis a uk num paipm kamel kolpa eng ntei? Kol a kipm ipma kalkut itnen melnum a ak paipm kolpa. Atom kol a kipm ungkwantel kai tukuleikgen.
1CO 5:3 Kupm rpma ak yokluk ti rpma kilke, maur akupmen pa am antiwepm rpma kai pake. Ti melnum pa, kupm am akwonalmpen ari yat ise, la mpa mentepm ntokg kolai melnum a antokg kolpa.
1CO 5:4 Kupm la ikga kipm kai rki wris atom kipm ukwen Wailen Sisas amentepmen pa, wa ikga yokluk akupmen pa rpmi kul kilke, pake maur akupmen pa ikga wa ntiwepm rpmi kai pa, a titnongket a Wailen Sisas ikga wa rpmi nimpikgento ik wang pa pipa,
1CO 5:5 mentepm elng melnum pa elngkai wam a Maur Paipm Satan pa. Eng mpa numpalk a kil pa kai uwi wleket, plalng pipa, kil plelngen nikgwalpm alkilen pa atom maur wor akilen pa ikga kai wor ik wang umpuwen a Wailen kil yaper nar pa.
1CO 5:6 Kipm ariwulmpa melnum a akwap numpaipm pa atom kipm wa atop antokg mplen ante kolpa, pa ake wa wor. Ti kipm ake ariwe pa, kol kipm lung mpim ap waiketn ur ti ikoren nok mringen pa pa, nok pa mpa ngki kai palng wail. Melnum a akwap numpaipm pa kil kol mpim ap pa.
1CO 5:7 Men Isrel ti alm manto walkg malkgu al wor uk Maur Wailen atopen atnen a pikekg Maur Wailen awi tu amenen aye kul wor takulelkgen tu Isip pa. Ti Krais pa kol manto walkg malkgu a pikekg ak wang wail pa tu alm ntampen numprampen elngitna ise. Kolpa kil am antokg kipm wrong kinkipman mapming a Maur Wailen palng kolen nok mringen weten a mpim ap kalpisen pa ise a tu ak ale manto walkg malkgu yawor a numprampen elngitna pa. Kolpa ti kipm mpa ungkwan mpim ap pa tukuleikgen wan akipmen pa atom kipm rpmi kol nok mringen weten a ake ak mpim ap akoren pa kolpa rpmi!
1CO 5:8 Kolpa ti kol men Suta ungkwan ungkwan mpim ap pa takuleikgen wan pa, wa mentepm ti pa mentepm mpam wa ungkwan nikgwalpm paipm a rka eng ak antokg paipmpaipm pa kai tukuleikg kolpa yat pake! Wa mentepm mpa wa rki wriwen wor kolti a la okyangkipm a la aklale kolti eng mpa mentepm palng kolen nok mringen weten a ake ak mpim ap pa akoren pa. Atom mentepm ikwonilmpen wang wail pa rki itopen Krais a pikekg Maur Wailen ak awiyo aye kul wor!
1CO 5:9 Ela wrkapm a pikekg kupm nirantepm pa, pikekg kupm lanakepm lala, ampur kipm erkwon anti tu melnum a akwap numpaipm pa.
1CO 5:10 Pa ake pikekg kupm nirantepm eng akla tu melnum ipmawekg a kanokg ti a akwap num paipm aki, a aringkowe kweikwei a melnum manet ai aki, a ak ikgwam aki, a kapor kilko alein mring, a mring maur a kweikwei kolpa. Kol pikekg kupm ak la tu melnum kimeket a akwap paipm kolpa pa mpa palng wailet paipm, ti mpa kipm ngkom nilokgen tu pa kolai? Ya wris ata a kol a kipm ngkom nilokgen tu a antokg paipmpaipm kolpa pati, kol a kipm imo tukulelkgen kanokg ti pati, pa antiwe pake.
1CO 5:11 Ti kupm wa la or wrikel kuina ur a pikekg kupm nirantepm pa: pikekg kupm akla melnum ur alkipmen a mentepm ukipma Krais pa, pake kil akwap num paipm aki, kil aringkowe kweikwei a melnum manet ai, aki kil kapor kilko alein mring, a mring maur a kweikwei kolpa aki, kil la paipmel mlaur aki, kil melnum a al u titno aki, kil ak ikgwam. Pa ake mpa kipm nti melnum a ukipma a akwap kolpa erkwon pa, a wa ake mpa kipm ntiwel rpmi il okipma pa, kalpis.
1CO 5:12 Ti kwap a kupm ti eng mpa elng wulmpa pa itni eng ri tu a itna en pa la, tu wor aki tu paipm? Pa kwap a Maur Wailen kil alkil ai, ikga riwen ai kul. Ti kipm ti la pa ake kwap akipmen ti a elng wulmpa pa elng itna ak ari tu a kipm alkipm a itna wunen pa la, tu wor aki tu paipm? Am kipm pa ri la tu pake, kol yangkipm a Maur Wailen ti lala, “Kipm ungkwan melnum a antokg paipmpaipm a antiwepm rpma pa kai tukuleikg!”
1CO 6:1 Kol kipm mla ur a ukipma Krais pa ipma kalkuten itna eng la la okyangkipm nimpokgen melnum ur alkipm a mentepm ukipma Krais pa pati, ti mla la, atom kipm wa aye ipma kaikuten akipmen pa kai naki tu mring man enen a wa antokg paipmpaipm ai! Karken a kipm niki tu kipm alkipm melnum a Maur Wailen ti itning yangkipm pa, atom ntokg pa kai plalng!
1CO 6:2 Ati kipm ake ariwe la mentepm wrong kin a kipman a Maur Wailen ti ikga ik wang kutnukg pa ikga ntiwepm rpmi itning yangkipm a tu wrong kin a kipman a kanokg ti? Kipm ariwe pa. Ti kol kipm ikga rpmi itning yangkipm ok wail a tu wrong kin a kipman a kanokg ti, ti wa yangkipm waiketn akipmen ti kipm akwonalmpen la kipm alkipm ti akentiwe mpa itning, atom ntokg yangkipm pa kai plalng pa? Kipm alkipm antiwe kol a ik pa.
1CO 6:3 Ai, ake kipm ariwe a mentepm wrong kinkipman a Maur Wailen ti ti ikga wa rpmi itning yangkipm a tu maur akwapel a Maur Wailen ti! Kipm ariwe pa. Ti kipm ikwonilmpen o: kol kipm ntiwe a rpmi itning yangkipm a tu maur pa pati, kipm alkipm antiwe kol a rpmi itning yangkipm ok kweikwei a kipm antokg itna kanokg a ti.
1CO 6:4 Pake kalpis, kol kipm la rki tita ntokg yangkipm ok kweikwei a kipm antokg itna kanokg a ti pa, kipm wa aye yangkipm kalkuten akipmen ti aye kai eng tu mring man a itna en ai rpmi itning eng ntei? Tu pa nang arke itna kawor en pake, itna or mapming a mentepm wrong kin kipman a Maur Wailen pa tu pa nang kalpisen kol a rpmi itning yangkipm kaikuten a amentepmen pa.
1CO 6:5 Kipm alkipm ti ake melnum ur a nikgwalpm wontrakole wor kolpa itna antiwe mpa rpmi itning yangkipm a kipm alkipm melnum a ukipma Krais ti, atom ntokg yangkipm ti kai plalng pa? Yangkipm a kupm la ti pa, kupm la eng la uk numpaipm kipm pake.
1CO 6:6 La mpa kipm ntokg kolpa ari kalpis. Melnum ur pa aye melnum ur alkil a tuwekg ukipma Krais pa aye kai antokg yangkipm pa, pa paipm. Wa kil wa ayewel kai antokg yangkipm pa itna wulmpa a tu melnum a ake ukipma pa, pa paipm wrisen.
1CO 6:7 Kipm alok angkli tu ai aki tu ai alok angkli kipm pa, pa ake wa kolai. Pake kipm alkipm melnum a ukipma Krais ti aye tita kai antokg yangkipm pa, pa ake wor. Pa plan la kipm am atnuurng ya wor a mentepm a ukipma Krais pa kol a kutnun, atom kipm kai ar angko wrisen. Kol melnum ur la ntokgtepm paipm pa, pa mpa wa ntei, kipm lken ipma kolti. Aki kol melnum ur la ik ikgwampel kweikwei ur akipmen pa, pa mpa wa ntei, lken ipma eng tu ai ntokgtepm kolpa or wompel kolti.
1CO 6:8 Ari kalpis. A wa kipm wa ak ikgwam wa antokg kweikwei paipm kolpa kol tu pa, pa ake wor. Wa kipm wa ak kolpa kai eng kipm alkipm a kipm ukipma Sisas ti kolpa yat pake, pa kipm antokg paipm wrisen.
1CO 6:9 Tu melnum a antokg paipm pa, tu pa ikga ake ntiwe kawor anong wor a Maur Wailen itna wailen ikgalen pa, ti kipm ake ariwe pa? Ti kipm elngen a kipm kansil kipm alkipm pa. Atom kipm antokg kweikwei paipm paipm kolen a antokg num paipm, a kapor kilko alein mring, a mring maur, a kweikwei kolpa, a kin angkli arkul kipman a kin manet, a kipman angkli arkul kin nanen, a tu kipman uk tu alntu kol kin eng tu kipman aye, a tu kipman awi tu alntu kipman aye kol tu kin,
1CO 6:10 a ak ikgwampel kweikwei, aringkowe kweikwei, al u titno atom titno, a la paipmel melnum ur, a aye kweikwei paipm a aknaken wrongkel num eng awi kweikwei. Tu a antokg kweikwei kolkil pa, tu pa ikga ake ntiwe kawor anong wor a Maur Wailen itna wailen ikgalen pa.
1CO 6:11 Kipm tiur am pikekg kolpake, pake kipm pikekg kul rpma mrangkum a Wailen amentepmen Sisas Krais pa la kil wa Wailen alkipmen yat. Atom Maur Wailen pikekg alkepm Maur Wor alkil pa ak ak kwap ak angklinsepm kol kil: kil klak paipmpaipm akipmen atom kipm palng rukis wor, wa kil anel kla ur ak amprinsepm elngkitna manet eng kil alkil, wa kil ungkwan ker a ak awiye paipmpaipm a kipm antokg pa angkli, la kipm palng ute wor ise.
1CO 6:12 Kipm tiur mpa la, “Kupm ti antiwe antokg kweikwei wrongkwail ak wasrongen alkupm.” Ei, pa aklale, pake kweikwei tiur ti ake wor eng akangklinseitn pa. Kupm ti antiwe antokg kweikwei wrongkwail ak wasrongen alkupm, pake kupm ake mpa elng kweikwei pa itni wailen ik yipo kupm ti.
1CO 6:13 Kipm tiur mpa la, “Okipma pa a al kinar rpma nikg, a nikg pa a okipma kinar arpme, a ikga Maur Wailen kil ntokg nikg a okipma pa yatenen kai plalng.” Ei, pa aklale, pake num akipmen pa ake kolpa, la ikwap numkropis a uk numpaipm kamel pa kol nikg a akwen la il okipma pa. Num akipmen pa a Wailen eng ik ik kwap a Wailen, a wa Wailen pa a ikgalen num akipmen.
1CO 6:14 Wa titnongket a Maur Wailen a antokg Wailen a pikekg amo pa wa wrekg pa, ikga wa kil la mentepm a amo pa ikga wa wrekg kol Wailen pikekg wrekg pa.
1CO 6:15 Ti ake kipm ariwe la num akipmen ti pa numpwam a Krais? Ti antiwe mpa kupm iye numpwam a Krais ti kai ngkli rkul kin a atn ya pake, atom numpwam a Krais ti palng numpwam a kin a atn ya pake? Pa kalpis wrisen!
1CO 6:16 Aki ti ake kipm ariwe la, kol kipman ur ngkli rkul kin a atn ya kolpa pa, num a kipman pa mpa palng wris numpokgen kin pake. Pa am la ela wrkapm a Maur Wailen pake, la “Tuwekg palng num wris.”
1CO 6:17 Pake kol melnum ur kil kai kirpon nimpokgen Wailen pa, mpa maur wor a kil pa kai wris nimpokgen Maur Wor a Wailen.
1CO 6:18 Kipm ngkirk itni watin tukulelkgen nikgwalpm a angkli arkul kin a kipman manet ur ai, wa akwap numkropis a uk numpaipm kamel pa, atnen paipmpaipm wailet a melnum antokg pa ake ak antokg paipm num a kil alkil pa, pa ak antokg paipmel melnum ur ai. Pake melnum a angkli arkul kin aki kipman pa, pa kil antokg paipmel num a kil alkil ti.
1CO 6:19 Ti ake kipm ariwe la, num akipmen ti pa wan yalming a Maur Wor a pikekg Maur Wailen kil alkepm, atom Maur Wor kil rpma kawor kipm tike. Kolpa ti num akipmen ti ake a kipm alkipm ti pa kalpis, num akipmen pa a Maur Wailen alkil ai.
1CO 6:20 Kipm ti am pikekg kil armpentepm ak marpm wail manten ise, kolpa atom kipm akilen. Kolpa ti num akipmen ti kipm ik ntokg kuina kol a i pa, mpa kipm ik ntokg kolen mpa kipm ik ngkit nang a Maur Wailen.
1CO 7:1 Atom kupm la ikilmpe wrkapm a pikekg kipm nira lanakopm la, tiur akipmen pa la pa wor eng kol a kipman nanen a ukipma pa ake mpa nti kin alkil okg kin kipman pa.
1CO 7:2 Pake melnum ake antiwe mpa lok ipaar num alkil ti, kolpa ti kupm la kolpa la, kipman mpa nti kin alkil okg kin kipman a kin mpa nti kipman alkil okg kin kipman. Eng ake mpa kipm ngkli rkul kin a kipman manet ur ai wa ikwap numkropis a uk numpaipm kamel.
1CO 7:3 Pa kwap a kipman mpa nti kin alkil okg kin kipman, a wa kwap a kin mpa nti kipman alkil okg kin kipman, eng mpa ntokg tuwekg yatenen rpmi itopen.
1CO 7:4 Num a kin pa a kipman alkilen, akentiwe mpa kil langkinen num alkilen pa. A num a kipman pa a kin alkilen, akentiwe mpa kil langkinen num alkilen pa.
1CO 7:5 Ampur kipmekg talpulng num alkipmekg la nti tita okg kin kipman pa. Pake kol kipmekg alkipmekg ipma wris yipon yangkipm la kipmekg a rpmi wang aripm ur eng uk wang oklala niki Wailen pa pipa, kipmekg mpa kalpis a anti tita okg kin kipman pa. Kipmekg oklala niki Wailen plalng pipa, kipmekg wa okg kin kipman or pa kai o! Kol kipmekg i kolti i wang watin pa, kipmekg ake antiwe mpa lok ipaar nikgwalpm a kipmekg a wrekg la okg kinkipman pipa, kipmekg uk ya eng Maur Paipm Satan mpa rkolngkepm iye kai ngkli rkul kin aki kipman manet ur ai.
1CO 7:6 A wet kupm la kil pa, ake wa kupm la yangkipm titnongket ur a la, mpa kipm kutnun pa. Palpa kupm la kolti tuwa, kol kin kipman tuwekg ur ipma wris la tuwekg ake mpa nti tita okg kin kipman pa rpmi wang aripm ur kolti, pa kai tuwekg ik kolpawo!
1CO 7:7 Kupm akwonalmpen la kol a kin a kipman wrongkwail pa kol ake uwi kin a uwi kipman pa, kol a itni mamingkisen kolen kupm ti. Ari Maur Wailen kil alko kweikwei wor wor pa aknirakewo manman. Kil angklin melnum ur pa kil antiwe uwi kin aki uwi kipman, a kil angklin melnum ur pa kil antiwe itni mamingkisen kolti.
1CO 7:8 Wa kupm wa akalmpe akasen akipmen a la tu kin a kipman mamingkisen, a wa nampikgen tu kipman karompen, a tu kin karpikg. Kol ake tu uwi kin aki uwi kipman pa, kol a tu itni mamingkisen kol kupm ti pa pati, kol a wor.
1CO 7:9 Pake kol tu ake antiwe mpa lokipaar num alntu pa, kai tu uwi kin aki uwi kipman pawo! Tu itni mamingkisen kolti pa wor, pake kol nikgwalpm a tu pa keteng maimpung ikra, akentiwe mpa rku ngkeng pa, pa paipm, a kol a tu uwi kin aki uwi kipman pa wor pake!
1CO 7:10 Wa kipm kin nanen pa, kupm alkepm yangkipm kil - ake wa kupm ti pa, Wailen pake. Kipm kin pa ampur kipm atnurng kipman alkipm pa.
1CO 7:11 Kol kitn utnurng pipa, ampur kitn awi kipman ur, kitn rpmi mamingkisen kolti. Kol kalpis pa, kitn kai la orwris nimpokgen kipman alkitnen pa plalng pipa, kitn wa yaper kaintel. Wa kitn kipman pa am wa kolpa yat pake. Ampur kitn ungkwan kin alkitn pa.
1CO 7:12 Kipm kipman a ukipma Krais pa, kupm la kolkil - ake Wailen pa la, am kupm ti la tike. Kol kin alkitnen ake ukipma Krais pa, pake kol kil la rpmi eng kitn rpmi pa, kil rpmi o! Ampur kitn ungkwantel.
1CO 7:13 Wa kipm kin a ukipma Krais pa, kupm la kolkil: kol kipman alkitnen ake ukipma Krais pa, pake kol kil uwi wor la kitn rpmi pa, pa kitn rpmi o! Ampur kitn atnurngkel.
1CO 7:14 Ampur kitn atnuurngkel pa, kitn rpmi o! Eng ntei, kipman ur a ake ukipma pa kil kai rka mrangkum a kin alkil a ukipma pa. A kin ur a ake ukipma pa kil kai rka mrangkum a kipman alkil a ukipma pa. Kol ake kolpa pa, warim a tuwekg pa kol a kimpilpet. Ari ur a tuwekg pa rka mrangkum a ur pa atom, warim a tuwekg pa am wa Maur Wailen wa amprin eng alkilen pake.
1CO 7:15 Pake kol kin a ake ukipma pa la utnurng kitn kipman a ukipma pa, kitn uwi wor lkel kolti eng kil kai o! Aki kol kipman a ake ukipma pa la ungkwan kitn kin a ukipma pa, kitn uwi wor lkel kolti eng kil ungkwanteitn kai o! Kwei ur kolpa palng kitn kin aki kitn kipman a ukipma pa pipa, pa yangkipm a pikekg kipmekg yapon eng awi tita pa, pa ake wa arkuleitn itna pa kalpis. Kol kitn iye rpmi aki kil utnurngkeitn pa, Maur Wailen pikekg akweweitn la kitn rpmi ik ipma meen wor kolti.
1CO 7:16 Kitn kin a ukipma pa, mpa kitn riwe la kolai, la atn a rpma akitnen ti ikga ikuwi kipman alkitn pa iye kul eng uk ipma Krais pa aki kalpis? Pa kitn ake ariwe. Wa kitn kipman a ukipma pa, mpa kitn riwe la kolai, la atn a rpma akitnen ti ikga ikuwi kin alkitn pa iye kul eng ukipma Krais pa aki kalpis? Pa kitn ake ariwe.
1CO 7:17 Kil kupm la lanikepm kuina ur a wet kupm lanakepm pa la, kipm wris wris mpa kipm rpmi a ikwap or pa kai, kol a pikekg Wailen kil amprin kipm wris wris, la mpa kipm rpmi a ikwap pa. Atom kil pikekg akwewepm la kipm kul kutnuntel pa, kipm am wa rpmi a ikwap kol a kil pikekg amprinsepm pake. Yangkipm kil wa kupm uk tu wrong kin a kipman mapming a ukipma Krais a rka yela tatu pa eng mpa tu kutnun.
1CO 7:18 Kol pikekg tu wangket num akitnen pa, atom Maur Wailen akweweitn pa, ake mpa wa kitn ikor ya ur eng ntokg num a pikekg tu wangket eng wa kai kiti kiti kol pikekg ep ake wangket pa. Wa kol ake pikekg tu wangketeitn num pa, atom Maur Wailen akweweitn pa, ake mpa wa kitn wa kai tu wangketeitn num pa.
1CO 7:19 Kol wangket num aki ake wangket num pa, pa ake kwei ur. Wail manten pa la kutnun yangkipm titnongket a Maur Wailen ti kolti.
1CO 7:20 Kipm pikekg rpma a akwap kol a i atom Wailen akwewepm pa, am kipm rki ketn kolpa rki pake.
1CO 7:21 Kitn mla ur a mring ur armpenteitn eng akwap kalpmilel orngwatneikgen kil pa atom Maur Wailen akweweitn pa, pati ake mpa kitn ikwonilmpen watipmen eng a kitn akwap kalpmilel orngwatneikgen mring alkitn pa kolpa. Kitn ikwap rpmi orngwatneikg kolpa kai o! Pake kol ya ur okore itni la kitn kai rpmi ik wasrongen alkitn pa, kitn kai or ya pawo!
1CO 7:22 Kitn a akwap orngwatneikgen mring alkitn katnun nikgwalpm a kil pa or pa kai pa, ampur kitn akwonalmpen watipmen. Eng ntei, kol Wailen kil akweweitn la kitn plelng ipma ukipma kil pa, kitn akwap orngwatneikgen mring alkitn kolpa kai pake. Wailen pa kil ariweitn la kitn pa wirng no itna kukula wor akwap katila nikgwalpm alkitn kol ake kweiur amprinseitn om. Am wa kolpa yat pake, melnum a ake melnum ur amprinsel kil itna kukula wor ak wasrongen a kil alkil pa atom Wailen Krais kil akwewel pa, kil pa palng melnum a Krais amprinsel atom kil akwap orngwatneikgen katnun nikgwalpm a Krais pa.
1CO 7:23 Kipm melnum a akwap katnun nikgwalpm a mring alkipm a yapowepm, a kipm melnum a rpma ak nikgwalpm a kipm alkipm pa, am Maur Wailen armpentepm ak lukg wail ise. Ti ampur kipm wa elng nikgwalpm ariwe a tu melnum tiur pa a alok yapowepm, atom kipm wa rpma orngwatneikgen nikgwalpm ariwe a tu pa.
1CO 7:24 Kipm melnum alkupm a mentepm ukipma Krais, kipm pikekg rpma a akwap kolai atom Krais akwewepm pa, am kipm rki ketn kolpa rki wulmpa a Maur Wailen pa rki pake.
1CO 7:25 Wa kupm la tu kin mamingkisen a tu kipman mamingkisen pa pati, ake kupm awi yangkipm titnongket ur angkai Wailen alkil pa kul eng mpa kupm laniki kipm pa. Pake nikgwalpm ur akupmen a kupm akwonalmpen ari wor atom mpa kupm lanikepm pa, Wailen kil plantopm ipma wor alkil pa, atom ari kil antokg kupm palng melnum a kipm antiwe kol a itning kutnun nikgwalpm a kupm la lanikepm kil:
1CO 7:26 Ari kolen kaikuten wailet ngkaten eng a palng a palng pake, kolpa ti wor eng kipm mamingkisen pa kai kipm itni kol pawo!
1CO 7:27 Kitn a tu a kin aknamputeitn la kitn uwi pa, ake mpa kitn ngketen yangkipm a pikekg tu yapon la kitn uwi kin pa iye pa. Kitn kin kalpisen pa pati, ampur wa kitn akor nikgwalpm ur la ikor kin ur la uwiye pa, i ai.
1CO 7:28 Pake kol kitn uwi kin pa pati, pa ake kitn antokg paipm pa. Wa kitn kin mamingkisen kitn la wa uwi kipman pa, pa kitn ake wa antokg paipm ur pa kalpis. Pake tu kin a awi kipman pa a tu kipman a awi kin pa, pa ikga kalkuten a wleket palngten pa, ikga wonet eng tu. Kolpa atom ari kupm lanakepm kolpa eng la ik ngklin kipm pake eng ikgake wa kalkuten paipm eng kipm pa.
1CO 7:29 Kipm melnum alkupm a mentepm ukipma Krais, a kupm la la kil pa pati kupm la kolkil: ake wang ur watin itna, kolpa ti ik wang ti kai pa nikgwalpm akipmen pa mpa rki kolkil: kipm a aye kin pa, kipm mpa rki kol kipm ake aye kin pa.
1CO 7:30 Kipm a akg arein pa, kipm mpa rki kol kipm ake akg arein pa. Kipm a atopen pa, kipm mpa rki kol kipm ake atopen pa. Kipm a armpen kweikwei pa, kipm mpa rki kol kipm ake aye kweikwei pa.
1CO 7:31 Kipm a ak ak kwap a awi kweikwei a itna kanokg ti ak angklin kipm alkipm ti pa, kipm mpa rki kol kipm ake ak ak kwap a awi kweikwei ak angklin kipm alkipm ti pa. Eng ntei, rpma amentepm, a kweikwei wrongkwail a mentepm antokg rpma kanokg ti kol ak wang ti pa, ikgake itni wang watin, am ngkaten ak wang ti ikga iye kolpa kaingkai kai plalng.
1CO 7:32 Kupm wasrongen la, ampake kweikwei a wet kupm la pa arkuwepm alkepm ipma kalkut, atom kipm ake antiwe mpa ikwap a Wailen pa. Kolen melnum mamingkisen a ake aye kin pa, nikgwalpm akilen pa rka eng la ikwap a Wailen eng mpa ik ntokg ipma a Wailen pa itopen.
1CO 7:33 Pake melnum a aye kin pa, nikgwalpm wail akilen pa rka eng la ikwap kweikwei a numpalk ti, eng mpa ik ntokg ipma a kin pa itopen.
1CO 7:34 Kolpa atom nikgwalpm a kil pa rka wekg. Kin a kipman kalpisen, a kin warimpen a ake kai eng kipman ur pa pati, pa am wa kolpake, nikgwalpm wail atuwen pa rka eng la uk num ti nimpikgen Maur Wor alntuwen ti kai eng ikwap a Wailen. Pake kin a awi kipman pa, nikgwalpm wail akilen pa rka eng kweikwei a numpalk ti, eng mpa ik ntokg ipma a kipman akilen ti itopen.
1CO 7:35 Yangkipm a kupm la kil pa ake kol ampei ur a la ik ngkutentepm tongtong eng ake mpa kipm kipman uwi kin iye a ake mpa kipm kin kai eng kipman ur iyewepm pa. Kil kupm la eng la ik ngklin kipm pake. Kupm la eng mpa kipm rpmi ute wor kolti, eng akentiwe mpa kweiur ik irongke nikgwalpm akipmen a rka eng Wailen pa.
1CO 7:36 Pake kol kipman ur a tu a kin warimpen ur pikekg aknamputel aki, kol kipman ur a kin warimpen ur pikekg tuwekg yapon yangkipm la uwi tita pa, pake kipman pa la itni mamingkisen ikwap a Wailen kolti. Kolpa ari kil akwonalmpen la kil antokg paipm eng kin pa eng kil ake awiyel aye pa. Wa kol ipma a kil wrekg titnongket la kil la nti kin pa okg kin kipman, wa kil ake antiwe arku angkeng ipma alkil pa pati, kai kil kutnun ipma wasrongen akilen pawo, pa kil ake antokg paipm, ti kai tuwekg uwi tita wo!
1CO 7:37 Wa kol kipman ur nikgwalpm alkil pa itna titnongket la kil la itni mamingkisen ikwap a Wailen, wa kol ake nikgwalpm alkil ti aki a tu ur ai tirpmingentel, a wa kil antiwe arkul ipma alkil a wrekg la nti kin pa okg, a nikgwalpm a kil alupm titnongket la kil la itni mamingkisen kolti pati, pa kai kil elngen kin pa itni mamingkisen kolpawo! Pa kil ake antokg paipm pa, pa kil antokg wor.
1CO 7:38 Kolpa ti kol kipman ur a tu a kin ur pikekg aknamputel pa kil uwi kin pa iye pa, kil akwap wor. Wa kol kipman ur a tu a kin ur pikekg aknamputel pa, kil ake uwi kin pa iye pa, kil akwap wor wrisen.
1CO 7:39 Kin a kipman alkil ake amo atnuurngkel pa, pa kol ampei a angkutenten kai wris itna pa. Kipman alkil pa imo utnurngkel pa, ampei pa ake wa angkutenten itna om, am tikla ise. Kil wasrongen la uwi kipman ur pa, kil uwi o! Pake kil uwi kipman ur a tuwekg ukipma Wailen pa.
1CO 7:40 Pake kol a kil rpmi kolti ake kil awi kipman ur, pa kol a wor wrisen. Pa nikgwalpm a kupm alkupm kolti, pake kupm akwonalmpen ari Maur Wor a Maur Wailen kil wa rpma kawor ipma akupmen ti yat atom ak titnongketel nikgwalpm a kupm la kil.
1CO 8:1 Pikekg kipm akasen la antiwe mpa mentepm melnum a ukipma Krais pa il wlikgok kweikwei a tu lap al wor uk mring, a mring maur, a kweikwei kolpa pa aki kalpis? Kipm tiur pa la, “Mentepm kimeket ariwe pake.” Pa aklale, mentepm ariwe pake, kol mentepm kutnun nikgwalpm ariwe almentepmen ti kolti pa, pa mentepm tipra atop ak ngkat nang almentepmen ti nolangkil tu melnum tiur ai. Pake wa nikgwalpm kol a mentepm plan ipma wor wasrongen tita pa ak titnongketel tu.
1CO 8:2 Kol melnum ur kil ikwonilmpen la kil ti ariwe worwor kuinaur a kil ariwe pa, pa planto kol kil ake awi ariwe aklale pa kol a kil kol am uwi ariwe aklale ai.
1CO 8:3 Pake melnum a plan ipma wor wasrongen Maur Wailen pa, Maur Wailen kil ariwe melnum pa la kil ariwe worwor kweikwei pa kai aro yiprokg pake.
1CO 8:4 Ti a la kweikwei a al wor uk mring, a mring maur, a kweikwei kolpa pati, kipm melnum a la kipm ariwe pa kipm la, “Mentepm ariwe la kweikwei wrongkwail a itna kitnong a kanokg ti a tu kapor kilko alein la pa maur wailen alntuwen, pa ake Maur Wailen aklale pa”, wa kipm la, “A mentepm ariwe la Maur Wailen aklale pa wris ata kolti.”
1CO 8:5 Kweikwei kol a kipm la pa aklale, pake tu melnum wailet pa akwonalmpen la tu mring a mring maur a kweikwei kolpa pa itna atom tu ukipma la pa maur wailen alntuwen. Tu maur wailen a mring wailen kolpa wailet aur aur itna kanokg a ti, wa itna kaino kitnong ai,
1CO 8:6 pake mentepm ti pa ariwe la Maur Wailen pa wris ata, pa Yan a mentepmen. Wa kil Yan yiprokgen a mentepm ti a kweikwei wrongkwail palng wliwe, wa kil antokg mentepm ti eng mpa mentepm itn a rpmi ikwap kitila nikgwalpm a kil alkil pa kolti. Wa Wailen pa wris ata, pa Sisas Krais. Pikekg Yan kil la atom kweikwei wrongkwail ti palng or Sisas Krais, wa mentepm palng wrong kin kipman aklale a Maur Wailen pa am wa or Sisas Krais pake, atom mentepm rpma.
1CO 8:7 Pake tu tiur pa ake ariwe worwor la Maur Wailen pa wris ata kolti. Tu pikekg kapor kilko alein tu mring a mring maur pa kolpa kul, tu plelng ipma, atom ak wang ti kol tu il okipma a al wor uk mring a mring maur pa, ok wusok alntuwen a ake itna titnongket pa akwonalmpen watipmen la pa tu am kapor kilko alein mring, a mring maur pa ise, kolpa atom antokg maur wor a tu pa kimpilpet ise.
1CO 8:8 Pake kipm tiur pa la, “Okipma pa ake antiwe akawiyo aye kai wreren Maur Wailen pa. Aki kol ake mentepm il pa, pa ake wa ak antokg mentepm paipm kol ai itna wulmpa a Maur Wailen pa. Wa kol mentepm il pa, pa ake wa ak antokg mentepm wor kolai itna wulmpa a Maur Wailen pa.”
1CO 8:9 Ei, yangkipm a kipm tiur la kolpa pa aklale, pake kol kipm a ukipma Krais itna titnongket pa il okipma a alwor uk mring maur pa, pa yangkipm kalpisen, ake wa kweiur yapowepm pa, kipm antiwe a il. Pake kipm ntokg riwe, mpa wa kipm wa ak arkolng tu a ake ukipma itna titnongket pa wa al okipma ak talpulng ok wusok atuwen a angkengken la kimpilpet pa, atom tu atningke la tu am antokg paipm ise.
1CO 8:10 Kol melnum a ake ukipma Krais itna titnongket pa kil ri kitn kai wan alntu a tu al al wor uk mring, a mring maur a kweikwei kolpa atne atne pa ntiwen il okipma pa, pati mpa wa ik ngkitel nikgwalpm atom mpa wa kil wa il kol kitn pa yat pake. Kitn pa ariwe la pa ake paipm itna wulmpa a Maur Wailen pa, pake melnum a ok wusok a kil pa la pa paipm atom kil il pa, pa ak antokg nikgwalpm a kil pa kai paipm kimpilpet.
1CO 8:11 Kil melnum alkitn a kipmekg ukipma Krais, kil pikekg Krais amo akarmpentel pake ok wusok alkilen pa ake itna titnongket, atom ariwe akitnen a kitn la ake okipma ur paipm itna wulmpa a Maur Wailen pa antokgtel kai paipm wrisen.
1CO 8:12 Pa kipm antokg paipm kai tu melnum wor alkipm a kipm ukipma Krais ti, atnen a kipm antokg ok wusok a tu a ake itna titnongket pa akwonalmpen watipmen la kuina a i wor a kuina a i paipm. Kipm antokg paipm kolpa kai tu pa, pa wa kipm antokg paipm kolpa wa kai Krais pa yat.
1CO 8:13 Kolpa ti kol kweikwei a kupm al kil ik rkolng melnum alkupm a mentekg ukipma Krais pa ngko, atom kil il okipma a ok wusok alkil pa la, pa paipm pa. Pati kupm ikgake il wlikgok pa eng ampake kupm ntokg melnum wor alkupm pa ngko pa kalpis.
1CO 9:1 Ti kipm la la kweiur akyapowopm atom kupm ake antiwe mpa kutnun kuinaur a maur wusok alkupm lanakopm la pa wor eng mpa kupm kutnun pa? Ati kipm la la kupm ti ake melnum wokgen akwapel a pikekg Wailen Sisas ukwawopm pa? Ati kipm la la ake pikekg kupm ari Wailen Sisas almentepmen ai? Kupm pikekg laron yangkipm a Wailen pa nakepm atom kipm ukipma kil pa, ti kipm pa la la kipm pa ake okipma a kwap a pikekg kupm ti aken pa? Ti kipm am akwonalmpen kolpake? Ake kolpa, pa kalpis.
1CO 9:2 Kol tu tiur ai wa la kupm ti la kupm ti ake melnum wokgen akwapel a pikekg Wailen Sisas ukwawopm pa. Pake kipm alkipm ti pa, kipm ariwe la kupm melnum wokgen akwapel a pikekg Wailen Sisas ukwawopm ampake. Kipm ukipma Wailen Sisas pa, kolpa atom pa plan angko wunong la kupm ti melnum wokgen a pikekg Wailen Sisas kil alkopm kwap a kupm ak kil.
1CO 9:3 Kil ok titnongket a kupm la talpulng tu melnum tiur a rpma ari la kwap a kupm ak ti la kupm melnum wokgen akwapel a Wailen Sisas pa aki kalpis.
1CO 9:4 Ati kipm ti akwonalmpen la mentekg ti ake melnum nang arke a melnum wokgen akwapel a Sisas pa, ti ake antiwe mpa mentekg uwi u a okipma ikilmpe kwap a mentekg ak ti?
1CO 9:5 Ti kipm la la mentekg ti ake melnum nang arke a melnum wokgen pa eng mpa mentekg uwi kin almentekgen a ukipma Wailen Sisas pa iye itn ik ik kwap a Wailen Sisas ti, kolen tu men melnum wokgen akwapel a Wailen Sisas ai, a kolen tunteng krap krap paipm paipm a Wailen Sisas ti, a wa kolen Sipas ai, tu a awi kin alntu aye atn ak ak kwap pa?
1CO 9:6 Aki kipm la la tu ai kolti pa nang arke a melnum wokgen a Wailen Sisas pa, a mentekg Parnapas ti kalpis, kolpa atom ari kipm angklin tu ai kolti okipma a kweikwei eng tu ak ak kwap a Wailen ai? Pake mentekg Parnapas ti ake atnurng kwap a ak angklin num palk ti, atom kipm ari la la, mentekg ti kolti ake nang arke a melnum wokgen pa, kolpa atom ari mentekg akwap ak angklin numpalk ti wa nampokgen kwap a Wailen ai? Pake ake kolpa.
1CO 9:7 Ti tu melnum a almpwrong pa mpa tu ikglen tulntu eng kweikwei a akangklin num palk ti? Wa tu melnum a alin kweikwei pa ake mpa tu ngket tuwai kweikwei alntu pa ntokg il? Aki wa tu melnum a ikgalen karek pa ake mpa tu uwi karek lmpa pa ntokg il? Pa ake kolpa, tu mpa uwi eng ntokg il pake.
1CO 9:8 Mpa wa kipm ikwonilmpen la kil kupm katnun nikgwalpm a tu melnum kolti atom kupm la yangkipm kil? Kolpa kalpis, yangkipm a kupm la kil pati yangkipm titnongket a Maur Wailen pa wa la yat.
1CO 9:9 Ti yangkipm titnongket ur a Maur Wailen a Moses kil nira pa pati la kolkil la, “Ak wang a manto nepm watin pa ak nepm alkil pa rkganti apur wit ok pa, ampur yipo ok pa eng ake mpa kil il wit ok pa.” Ti yangkipm a la kil pa am Maur Wailen kil arein manto nepm watin pa atom kil la pake aki?
1CO 9:10 Ti kipm lala Maur Wailen ake akwonalmpen mentekg ti atom kil la yangkipm pa? Kil am pikekg akwonalmpen mentekg ti atom kil la atom Moses nira ela wrkapm pake. Eng ntei, melnum a aser wring aki melnum a angketuwai pa, kil akwap nampikgen nikgwalpm ariwe akwonalmpen la, kwap a wuten kil ak pa, kil mpa uwi okipma tiur alkil ikilmpe kwap a wuten kil ak pa.
1CO 9:11 Mentekg pikekg alin okipma a Maur Wor pa eng akangklin kipm pa. Ti ake antiwe mpa mentekg ngketuwai okipma tiur akipmen ti ik ngklin numpalk amentekgen ti?
1CO 9:12 Kol kipm angklin tu tiur a kipm la la tu awi nang melnum wokgen a Sisas pa kweikwei a akangklin numpalk akalmpe kwap a tu ak pa, kol a wa kipm ngklin mentekg ti ep tike, eng ntei, mentekg ti melnum wokgen wailen angen tu ai. Pake mentekg karken a ngkat nang wailen amentekgen ti akwen la kipm ngklinso kweikwei a numpalk ti. Mentekg la rpmi kolpa rki kalkuten ikwap kalpmelel ik ngklinsepm kolpa atnen kol mentekg uwi kweikwei pa, pa mpa ikmpri ya a kipm atning yangkipm wor a la Krais a mentekg lanakepm pa.
1CO 9:13 Ti ake kipm ariwe la, tu melnum a ak ak kwap itna wan yalming a Maur Wailen pa, tu am awi awi okipma kweikwei itna wan yalming a Maur Wailen a pake. A tu melnum ipma krakgen a ak ak kwap al wor uk Maur Wailen pa, tu awi wlikgok kweikwei a tu wrong aye wli pa elngtermpa tipmakg alkil a al al wor uk Maur Wailen pa lap, atom tu am awi awi wlikgok kweikwei tiur pa akangklin tu alntu ipma krakgen a akwap itna pake.
1CO 9:14 Am kolpa yat pake, Wailen kil alko yangkipm la men melnum a laron yangkipm wor a akla Krais pa la, kipm melnum a atning yangkipm wor pa kipm mpa uk kweikwei ik ngklin men melnum a laron yangkipm pa nakepm pa.
1CO 9:15 Pake ake kupm ngkat nang wailen akupmen ti akwen la rpmi kol melnum nang wailen pa kalpis. Kupm melnum wokgen a Wailen, pake ake wa kupm nira yangkipm kil eng la kipm iktopm kol a kupm melnum a nang arke pa kalpis. Kupm tipra atopen nikgwalpm alkupm a kupm akwap kalpmilel kolpa, ti ake mpa melnum ur lkopm kweikwei ik ngketen nikgwalpm a kupm a rka la ikwap kolpa. Kolpati kol a itni eng kupm ti kai imo ep ur plalng pipa, kipm ik kolpa kul.
1CO 9:16 Kupm ake antiwe mpa tipra itopen ngkit nang a kupm alkupm ti la kupm akwap wor laron yangkipm wor a la Krais pa, kolpa kalpis. Pa kwap a pikekg kil elngkul wam akupmen ti la mpa kupm ik tike, ake mpa kalpis. Wei! Kol ake kupm laron yangkipm wor akilen pa pati kupm ikga paipm tuwa!
1CO 9:17 Kol kupm ikwap ti ik nikgwalpm wasrongen a kupm alkupm ti kolti pa pati, kupm kol a la eng tu lkopm kweiur ikilmpe kwap a kupm ak pake. Pake ake kupm ak ti ak nikgwalpm a kupm alkupm ti pa, pa pikekg Wailen kil alkil ai kil ariwe kupm ti atom kil amprinsopm eng la kupm ikglen kwap wail akilen ti pa kol a kupm ikgalen wan anong alkupmen.
1CO 9:18 Kolpa ti mpa kupm uwi kuina ikilmpe kwap a kupm ak ti? Yangkipm wor pa la kolpa la, kupm awi nang melnum wokgen akwapel a Krais pa ti kol a kupm ukwentepm la kipm lkopm kweikwei eng kwap a kupm ak ti. Pake pa ipma wasrongen a kupm alkupm ti la ikwap laron yangkipm wor alkilen ti kalpmilel kolti. Atom pa kol marpm a kupm awi am pake.
1CO 9:19 Ake tu mla ur alkopm kweikwei ur akalmpe kwap a kupm ak ti atom yapowopm la kupm ikwap orngwatneikgen tu pa. Pake kupm alkupm ti arku kupm alkupm ti akwap orngwatneikgen tu kin a kipman wrongkwail aur aur pa. Kupm ak kolpa eng la ik rkolng tu wrong kin a kipman wailet iye kul ukipma Krais. Kolpa atom ari kupm wet lanakepm la kupm la ik ik kwap kalpmilel ik ngklinsepm kolti.
1CO 9:20 Atom ak wang a kupm anti tu men alpmen Suta pa rpma pa, am kupm atn rpma antokg kweikwei ak plan kupm alkupm ti kolen men alpmen Suta pake. Kupm antokg kolpa eng la ik rkolng tu pa iye kul ukipma Krais. Wa yat, yangkipm nilping a angklonake tiur a mansan a pikekg Maur Wailen kil uk Moses pa, kupm ti ake melnum a katnun yangkipm titnongket pa, pake ak wang a kupm antiwen rpma pa, am kupm rpma katnun atn a rpma a tu alntu a katnun yangkipm titnongket pake. Kupm antokg kolpa eng la ik rkolng tu iye kul ukipma Krais pake.
1CO 9:21 Am kolpa yat pake, kipm pa pikekg Maur Wailen ake alkepm yangkipm titnongket kol pikekg kil uk Moses atom Moses uk tu men Suta pa. Kolpa atom ak wang a kupm anti kipm a ake Suta pa rpma pa, ake kupm katnun yangkipm titnongket a Moses uk tu men alpmen Suta pa, kalpis, kupm katnun rpma a atn a kipm a pikekg Maur Wailen ake alkepm yangkipm titnongket pa. Kupm antokg kolpa eng la ik rkolng kipm pa iye kul ukipma Krais pake. Pa ake wa lala, kupm ti ake katnun yangkipm titnongket a Maur Wailen pa, kolpa kalpis, kupm ti katnun yek kimeket yangkipm titnongket a Krais pa.
1CO 9:22 Am wa kolpa yat pake, ak wang a kupm anti tu ake ukipma Krais itna titnongket pa rpma pa, kol kupm alkupm ti ake kwei ur yapowopm pa, pake kupm am wa elng nar katnun kolen tu pake, eng ake mpa kupm ntokg tu ikwonilmpen watipmen atom tu ngko pa. Kupm antokg kolpa eng la tu ukipma Krais itni titnongket. Kupm akor ya wrongkwail kolpa katila nikgwalpm atn a rpma a tu melnum wrongkwail a kanokg ti eng la ik rkolng tu wrong kin a kipman wailet iye kul ukipma Krais.
1CO 9:23 Kupm wasrongen la yangkipm wor a la Krais ngko ok rke wailet kolpa iye kai. Kolpa atom ari kupm katnun katila ya wrongkwail a kolpa, eng ikga wa kupm ti yat nimpokgen kipm wrongkwail a ukipma yangkipm wor pa ikga mentepm wam a wulmpa ngkwrerng kruitn wor wor a yangkipm wor la pa.
1CO 9:24 Ti kipm ariwe tu melnum a pirng akoporen tita pa, tu mpa kimeket pirng pake, wris ur a pirng ep kai ngko wrik ur a tu la mpa kai elngen pa, mpa kil pa uwi kruitn wor a tu akoporen tita la mpa uwi pa. Kipm pirng nikgwalpm rkekgen kolen melnum a awi kruitn pa.
1CO 9:25 Tu melnum a pirng akoporen tita eng la uwi kweikwei wor wor pa, tu wris wris angklon kampelng alok upaar tu alntu ti riworwor. Kweikwei wor wor a tu la uwi pa ikga itni wang tukwok kolti a kai paipm pinterngen. Pake mentepm ti pa, mentepm angklon kampelng alok upaar mentepm almentepm ti ariworwor eng la uwi kweikwei a ikgake kai paipm pa kalpis, pa ikga itna yongkyong aye or pa kai.
1CO 9:26 Kolpa ti kupm ake mpa ikg kai pa kai pa pirng pa, mpa kupm wulmpa itni ya wai pirng kolti kai wrik ur a wet tu lala mpa kai elngen ai. Wa kol kupm la nti melnum ur ik katnong a or tita pa, kupm ake mpa wampor wam pa kai itn titi pa kalpis, kupm mpa wampor wam pa kai itni melnum pa kolti.
1CO 9:27 Kupm mpa or kupm alkupm ti lok eng mpa numpwam akupmen ti kai orngwatneikgen kitila nikgwalpm a kupm alkupm ti. Atom kol ake kupm alok ipaar numpwam a kupm alkupm ti pa, ikga tu tiur a atning yangkipm a kupm laron naken pa ikga tu uwi kweikwei wor wor pake, a kupm alkupm ti pa ikga tu ungkwantopm.
1CO 10:1 Kipm melnum alkupm a mentepm ukipma Krais, kipm itning! Kupm wasrongen la kipm wonrpme kuina ur a pikekg palng ep eng tu wapyipmiri a walyipmiri amenen a pikekg katnun Moses pa. Tu kimeket pikekg angkom katnun waipmunu pa planten ya pa kolpa kai. A wa tu kimeket pikekg angkom kai itna Unokg Watet pa. Unokg Watet pa arkol tingklak aye kaino, aye kinar, a tu angkom ore tatu pa kai wompel ai.
1CO 10:2 Tu pikekg angkom katnun waipmunu pa a tu angkom or kanokg tingklak a Unokg Watet kuin pa kai wompel ai. Pa kalingen kol pikekg Maur Wailen kaluken ak plan la tu kimeket am orwris itna orngwatneikgen Moses.
1CO 10:3 Tu kimeket pikekg al okipma wris a Maur Wor a Maur Wailen ai alken angkaino kitnong ai nar.
1CO 10:4 Wa tu kimeket pikekg wa al u wris a Maur Wor a Maur Wailen ai alken. Tu al u a angkawor kangirng ti or, kangirng pa katnunten kolpa kai ise. Kangirng pa am Krais kil alkil pake.
1CO 10:5 Maur Wailen ikgalenten kolpa kai ari tu wailet pa tu ake antokg ipma a kil pa atopen, kolpa atom ari wailet a tu am pikekg amo rmpa tatu yaya or wrik wes ningkrapm kalpmilel kolpa kai ise.
1CO 10:6 Atom kweikwei a pikekg palng ep pa, pa mrangkum wor eng ak planto la ampur mentepm uk nol nikgwalpm a mentepm ti kai rka eng antokg kweikwei paipm paipm kol a pikekg tu pa antokg pa.
1CO 10:7 Wa ampur wa kipm kapor kilko alein mring, a mring maur a kweikwei kolpa, kol a pikekg tu wapyipmiri a walyipmiri wailet tiur amenen antokg pa. Kol ela wrkapm a Maur Wailen ti pa la kolkil, “Tu kai takwem rka wris atom anel rka al u a okipma pa plalng pipa, tu wa anel wrekg antokg nangnang ak katnong aringkowe tita kolpa itna.”
1CO 10:8 Wa ampur mentepm akwap numpaipm, kolen wailet tiur a tu pa pikekg ak pa, atom melnum wailet paipm kamel kamel (23,000) pikekg amo ak wang wris kolti.
1CO 10:9 Wa ampur mentepm alm kowangkel Wailen Krais pa la ri titnongket akilen pa, kolen pikekg tu wailet tiur antokg pa, atom tu pikekg ul paipm almpen amo pa.
1CO 10:10 Kipm elngen a kipm la tingtang tingtang, kol a pikekg tu wailet tiur la tingtang tingtang pa, atom pikekg Maur Wailen ukwa maur akwapel alkil a almpalm tu melnum amo pa, nar almpen amo pa.
1CO 10:11 Kweikwei ari ti pikekg palng eng tu wapyipmiri a walyipmiri a men Suta ai, pake yangkipm pa nira akplan mrangkum wor eng la ik iye ngkirken mentepm a rka ak wang umpuwen a arukge aye kul wreren eng a plalng tike, eng ake mpa mentepm ti kutnun kol a pikekg tu pa antokg pa.
1CO 10:12 Kolpa ti mla ur kitn akwonalmpen la kitn itna titnongket pa, kitn itn ukikg riwe, mpa wa kitn angko yaper kai.
1CO 10:13 Kweikwei a palngtepm eng ningkail la kipm ngko pa pati, ake palng eng kipm wris pa kolti pa. Tu melnum wrongkwail ai am palngten kolpa yat pake. Wa Maur Wailen kil arkul yangkipm alkil a lala ikgake kil utnuurngkepm ik wang a kweikwei ur ningkailepm pa. Kil akentiwe mpa riwepm wulmpa atom kweikwei pa ningkailepm atom kipm angko pa kalpis. Kol kil uk wor atom kweikwei pa ningkailepm pa, mpa kil ukulentepm ya ngklinsepm eng kipm ntiwe itni titnongket.
1CO 10:14 Kipm kapor kilko alein mring, a mring maur a kweikwei kolpa pa, pa kipm almkowangkel Maur Wailen. Kolpa ti kipm workganen yek yek alkupm, kipm itni watin tukwleikgen, ampur kipm kapor kilko alein mring, a mring maur a kweikwei a kolpa.
1CO 10:15 Kupm la la kipm pa nim nol arke, kolpa atom kupm la lanikepm yangkipm kil, atom kipm alkipm pa itning ikwonilmpen kweikwei wekg a kupm la lanikepm kil la wor aki paipm.
1CO 10:16 Kipm ikwonilmpen kweikwei wekg kil: okipma a Sisas, a kweikwei a al wor uk mring, a mring maur a kweikwei kolpa. U wain pa elngitna akla Maur Wailen lam kla nampokgen mentepm ti, atom mentepm alkel wor plalng pa, mentepm al pa. Atom u wain a mentepm al pa ak awi mentepm kai wris nampokgen walmpopm a Krais kil alkil pa. Wa okipma a mentepm kapor atom al pa, pa ak awi mentepm kai wris nampokgen num a Krais kil alkil pa. Aki kipm pa la la ake kolpa!
1CO 10:17 Mentepm wailet pake, mentepm awi okipma wris. Wa mentepm wrong watipmen pake, mentepm wa palng num wris a Krais atnen a mentepm awi okipma wris.
1CO 10:18 Ti kipm ikwonilmpen ya a tu men wrong kin kipman a Isrel al al wor uk Maur Wailen pa, tu men awi wlikgok okipma tiwel pa al pa, pa akawiyo aye kai wris kapor kilko alein Maur Wailen wris pa.
1CO 10:19 Wa ikwonilmpen tu a al wor uk mring, a mring maur, a kweikwei kolpa. Ti kipm tiur pa mpa isentopm watipmen ur la wet kupm la mring, a mring maur a tu kapor kilko alein pa la tu pa antiwe titnongket pake? Ti wa kipm tiur pa la wet kupm la kweikwei a tu alwor uk tu pa antiwe titnongket pake? Kupm ake la kweikwei a kolpa pa antiwe titnongket pa, kalpis.
1CO 10:20 Kolpa kalpis wrisen, kupm wet la wlikgok kweikwei a tu alwor uk mring, a mring maur pa, pa ake wa tu al wor uk Maur Wailen pa kalpis. Pa tu al wor uk tu maur paipm akwapel a Satan. Kolpa ti kupm karken la mpa kweikwei pa ik uwiyepm kai or wris nimpokgen tu maur paipm akwapel a Satan pa.
1CO 10:21 Kipm kai al u wain a tu maur paipm akwapel a Maur Paipm Satan pa atom pa ak awiyepm aye kai or wris nampokgen tu maur paipm akwapel a Satan pa, wa kul wa al u wain a Wailen pa la mpa ik uwiyepm iye kul or wris nampokgen Wailen pa, pa kolpa kalpis, pa ake antiwe. A wa kipm al okipma a la il wor uk maur paipm akwapel a Satan a tu elngkirmpa tipmakg pa atom pa ak awiyepm aye kai or wris nampokgen tu maur paipm akwapel a Satan pa, wa kul wa al okipma a Wailen pa, la pa mpa ik uwiyepm iye kai or wris nimpokgen Wailen pa, pa kolpa kalpis, pa ake antiwe.
1CO 10:22 Ti mentepm ak akor Maur Wailen ai la kil ai ipma wakget eng mentepm ti? Atom mentepm ti antiwe titnongket na a i eng mpa ik tulpulng titnongket akilen ai?
1CO 10:23 Kipm pa la, “Maur Wailen awi wor la kupm antiwe antokg kweikwei wrongkwail, a melnum ur ake antiwe mpa ngkengkopm.” Ei, am kolpa aklale, pake kweikwei tiur pa ake wor antiwe mpa ik ngklinso. Ei, kipm tiur pa am la kolpake la, “Maur Wailen awi wor la kupm antiwe antokg kweikwei wrongkwail, melnum ur ake antiwe mpa ngkengkopm.” Ei, am kolpa aklale, pake kweikwei tiur pa ake wor antiwe mpa ik titnongketel ipma a mentepm a ukipma pa.
1CO 10:24 Melnum ur ake mpa ikwonilmpen kil alkil ti kolti atom ntokg kweiur a ak angklin kil alkil ti kolti pa, kolpa kalpis. Kil mpa ikwonilmpen tu tiur ai atom wa ik ngklin tu tiur ai yat.
1CO 10:25 Kipm ake mpa ikwonilmpen watipmen ngklonike ikisen lala wlikgok kweikwei a i ongket ongket a a i wor pa. Wlikgok na ur a tu elngkirmpa wrik a tu armpen armpen wlikgok atne atne pa, kipm rmpen ntokg il kolti.
1CO 10:26 Kipm ake mpa ikisen watipmen, eng ntei, wrkapm a Maur Wailen pa la kolpa la, “Kanokg, a kweikwei wrongkwail a itna kanokg ti pa a Wailen.”
1CO 10:27 Wa kol melnum ur a ake ukipma Krais pa lanikeitn la kitn kai eng kipm il okipma kweikwei kai wan akilen, atom kitn awi wor la kai pipa, okipma kweikwei a wet kil numprampen la mpa kipm il pa, kitn il kolti. Ampur kitn akwonalmpen watipmen angklonake akasen wlikgok kweikwei pa, i ai.
1CO 10:28 Pake kol melnum ur lanikeitn la, pa wlikgok a wet tu alwor uk mring, a mring maur, pa kitn ikwonilmpen melnum a wuten lanakeitn pa wa ikwonilmpen ok wusok akilen a lanakel la pa paipm pa, atom kitn ake mpa il wlikgok pa.
1CO 10:29 Ti ake kupm la ok wusok a kitn ti atom kupm angkengkeitn pa, kalpis, kupm la ok wusok a melnum a wuten lanakeitn ai, kolpa atom ari kupm angkengkeitn pa. Kitn alkitn pa akwonalmpen la, ok wusok a kitn alkitn pa la, “Kupm am wirng no kukula wor ise, ake wa kweikwei ur ak yapo kupm ti, ti mpa ok wusok a mla a i ikglen kupm ti la kupm antokg kuina a i paipm a kupm antokg kuina a i wor?
1CO 10:30 Ti kol okipma a kupm ukwor Maur Wailen atom kupm al pa, ti mpa wa melnum manet ai wa la paipmelopm la kupm antokg paipm eng ntei? Okipma pa am kupm uk wor Maur Wailen atom kupm al ise.”
1CO 10:31 Okipma a u a kipm al a kuina ur a kipm antokg pa, kweikwei wrongkwail a kipm antokg pa mpa kipm ntokg kweikwei wrongkwail eng mpa Maur Wailen alkil ai uwi nang wailen ai!
1CO 10:32 Atn a rpma akipmen pa, kipm rpmi kolen akentiwe mpa mla ur a tu men Suta, a tu a ake Suta pa, wa tu wrong kinkipman a Maur Wailen a kaingkai takwem rka wris ngkat nang a Krais pa riwepm la kipm antokg paipm ur pa.
1CO 10:33 Kipm mpa ngkom kitila nepm yikak a kupm angkom kil. Kwap wrongkwail a kupm ak ti pa, pa kupm ak la mpa ik uwi ipma a tu wrongkwail pa itopen kweikwei wrongkwail a kupm antokg pa. Kupm ake antokg kuinaur eng la ik ngklin kupm alkupm ti pa, kalpis. Kupm antokg la ik ngklin wrongkwail ti, eng mpa Maur Wailen ik uwiyen iye kai wor.
1CO 11:1 Kipm mpa ngkom kitila nepm yikak a kupm angkom ti, kolen a kupm wa angkom katila nepm yikak a Krais ai.
1CO 11:2 Kipm wonarpme yangkipm kweikwei wrongkwail a pikekg kupm arowonelepm pa, wa kipm arkul tongtong katila ya a kwap wrongkwail a tu wrong kin kipman a Maur Wailen ak pa a pikekg kupm almpuk nakepm a kaling plantepm pa, kolpa atom kupm kaporngkepm yangkipm ngkat nang akipmen pa.
1CO 11:3 Pake kupm la lanikepm la, kipm riwe kil la, itna tukgunakg a kipman pa am Krais pake, a wa itna tukgunakg a tu kin pa am tu kipman pake, a wa itna tukgunakg a Krais pa am Maur Wailen kil alkil pake.
1CO 11:4 Kolpa ti kol kipman ur ik kweiur aur tukgunakg atom itni oklala niki Maur Wailen aki laron yangkipm ur a Maur Wor a Maur Wailen la wli ok akilen pa itni wulmpa a tu wrongkwail pa, kil mpa uk numpaipm tukgunakg alkil Krais pa.
1CO 11:5 Wa tu kin pa, kol kin ur ake aur tukgunakg alkilen pa atom kil itni oklala niki Maur Wailen aki laron yangkipm ur a Maur Wor a Maur Wailen la wli ok akilen pa itni wulmpa a tu wrongkwail pa, pa wa uk numpaipm kipman alkil a itna tukgunakg eng kin pa. Pa ake wa manet, pa kil kol kin ur a tu ukwalng tukgunakg alkil pa kai silalng kol kipman eng mpa uk numpaipm kil alkil kin pa.
1CO 11:6 Kolpa ti kol kin ur kil kirken a aur tukgunakg walk alkil pa, ti kai kil la tu ngket tukgunakg alkilen pa kai kolen tu kipman pawo! Pake kol tu ngket aki u tukgunakg alkil pa, pa mpa uk numpaipm kil, ti kai kil aur tukgunakg walk alkil, plalng pipa, kil kai itni wulmpa a tu wrongkwail oklala niki Maur Wailen pawo!
1CO 11:7 Kipman pa ampake aur tukgunakg pa atnen a Maur Wailen pikekg antokg kipman pa kol lukg mrangku a kil alkil Maur Wailen, atom kipman pa ak plan nang wailen a Maur Wailen; a kin pa ak plan nang wailen a kipman.
1CO 11:8 Eng ntei Maur Wailen pikekg ake angkleng tupmungkul yampingkik kai kin pa atom ak antokg kipman pa kalpis. Kil pikekg angkleng tupmungkul yampingkik kai kipman pake, atom ak antokg kin pa.
1CO 11:9 Maur Wailen pikekg ake akwonalmpen kin pa atom antokg kipman pa la ngklin kin pa kalpis. Kil pikekg akwonalmpen kipman pa atom kil antokg kin pa la ngklin kipman pake.
1CO 11:10 Pikekg Maur Wailen am antokg tuwekg pa kolpake, wa yat, tu maur akwapel a Maur Wailen pa tu anel itna ari, kolpa ti kol kin pa la kai nti tu tukwem rki kipor kilko ilein Maur Wailen pa, kil mpa aur tukgunakg walk alkilen pa, pa kol kla a kil ak plan la kil rpma orngwatneikgen kipman alkil.
1CO 11:11 Pake mentepm kin a kipman a rpma kawor Wailen pa pati, kipman pa ake rpma ak kil alkil pa, wa kin pa ake rpma ak kil alkil pa, tuwekg rpma ak tita.
1CO 11:12 Kol kin pa wa pikekg Maur Wailen awi yampingkik a kipman pa atom ak antokg. Am wa kolpa yat pake: kipman pa am wa palng kai kin pa raku. Pake Maur Wailen pa kil yiprokgen a antokg tuwekg yatenen a wa nampokgen kweikwei wrongkwail pake.
1CO 11:13 Kol kin ur ake kil aur tukgunakg alkil pa ep, atom kil oklala niki Maur Wailen itni wulmpa a kipm wrongkwail pa, mpa kipm alkipm ti ri la pa kil ak wor aki kil ak paipm?
1CO 11:14 Kipm alkipm ariwe pa, la kipman nangkinen tukgunakg pa anip watin kinar kolpa pa ake wor eng kil ak kolpa. Pa kil uk numpaipm kil alkil.
1CO 11:15 Wa kipm alkipm ariwe pa, kin nangkin tukgunakg walk pa kaino watin pa, kil mpa uk nang wor kil alkil. Kolpa atom ari Maur Wailen alkel tukgunakg walk pa la itni watin kol apm pa eng mpa ik aur tukgunakg alkilen pa.
1CO 11:16 Pake kol melnum ur wasrongen la nolangkil okyangkipm akupmen kil la ake wor pa, kil mpa riwe la ya almenen a aur tukgunakg a ake aur tukgunakg pa men am katnun ya almenen kolpake, men ake katnun ya ur manet pa. Wa tu wrong kinkipman a Maur Wailen a kaingkai takwem rka kapor kilko aleinsel rka yela anong wrongkwail pa tu am katnun ya wris kol a men katnun tike, ake wa tu katnun ya ur manet pa kalpis.
1CO 11:17 Kupm la lanikepm okyangkipm tiur la mpa kipm kutnun pa. Okyangkipm ur kil a kupm la la pa, ake wa kipm wa katnun ariworwor, kolpa atom kupm ake wa atopen eng nikgwalpm a kipm ak kolpa, eng ntei, kipm kaingkai takwem rka wris eng kapor kilko alein Maur Wailen pa, pa ake wa ak angklin kipm ti wa kai wor ur kol a i, kalpis, pa antokg kipm pa palng paipm.
1CO 11:18 Ep pa kupm mpa la yangkipmok kil: kupm pikekg atning yangkipmok ur a tu la kolkil la, kipm kaingkai takwem rka wris kapor kilko alein Maur Wailen pa, kipm wako aro kipm alkipm ti itna manman. Yangkipmok a tu la pa, kupm atning la pa am kolpa aklale ur pake.
1CO 11:19 Kipm wako aro itna manman kolpa pa pati, mpa kipm ikwonilmpen raimpe paipm kolkil ur la, “Kol mentepm wako iro mentepm almentepm itni manman pa, pa mpa ri worel kolti, la mapming a i Maur Wailen mpa uk ipma wor itopen, a mapming a i Maur Wailen ake mpa uk ipma wor itopen pa.” Pake Maur Wailen kil ake atopen nikgwalpm raimpe kolpa, pa kalpis wrisen kolti.
1CO 11:20 Kipm aro itna manman kolpa, atom ak wang a kipm wli takwem rka wris la il okipma a u wain eng ikwonilmpen Wailen a pikekg amo rka yo okgmangki pa, pa ake kipm al okipma a mentepm akwonalmpen Wailen atom mentepm al pa, kalpis. Palpa kipm rka al okipma ur kolti.
1CO 11:21 Eng ntei, okipma a kipm wris wris aye wli rpma la il okipma a Sisas pa, kipm pa wa pirpiren wa kai ngkaten okipma alkipmen pa atom kipm al. Ake wa kipm elngkirpma nungkwangen la kipm mpreing il ngkompwris pa kalpis. Kolpa atom tu tiur a tukwok pa tu nikgalmpen, a tu tiur a aye u wain watipmen alntu aye wli rpma la il pa, tu awi al atom tu titno.
1CO 11:22 Ti kipm ti wan anong kalpisen a antokg u a okipma al arpme! Aki kipm ari la tu kipm wrong kinkipman mapming a ukipma Maur Wailen a wli takwem rka la il okipma a Wailen Sisas pa, la pa kwei ur wasek ur kolti? Pa kipm uk numpaipm tu melnum alkipm a kipm ukipma Krais a rka tukwok pa. Ai, mpa kupm la kolai! Ti kupm ti mpa itopen kiporng yangkipm nikgwalpm a kipm ak kolpake? Kolpa kalpis, nikgwalpm kolpa pa kupm ake atopen kaporng yangkipm pa.
1CO 11:23 Yangkipm pikekg kupm lanakepm la mpa kipm kitila kil pati, kupm awi kai Wailen kil alkil ai: ak nungkurikg mining a pikekg Sutas kil la uk Wailen Sisas pa kai wam a tu wrongmanto pa, Wailen Sisas kil awi okipma pa aye itna,
1CO 11:24 atom kil uk wor Maur Wailen pa plalng, kil kapor atom kil la, “Kil num akupmen la ikga ikngklin kipm. Kipm mpa ik ik kolkil or pa kai eng ikwonilmpen kupm ti!”
1CO 11:25 Am wa kolpa yat pake, tu awi okipma pa plalng pipa, kil awi u wain pa aye itna, atom kil la, “U wain kil pa, kla weten a Maur Wailen ikga lam ik walmpopm akupmen. Ik wang a kipm il il kolkil or pa kai pa, kipm ik eng ikwonilmpen kupm ti!”
1CO 11:26 Wailen kil pikekg kaling planten kolpa, eng ntei, ikngklei wang a kipm il okipma wa il u wain alkilen or pa kai pa, pa kipm laron a pikekg kil amo akarmpento pa, kolpa iye kaingkai, kai ngko wang a kil yaper nar ai.
1CO 11:27 Kolpa ti melnum ur a kil awi okipma a u wain a Wailen pa, kol ake kil ari la pa numpwam a Wailen pa, kil ari la palpa okipma ur a al kolti pipa, pa kil arku num a walmpopm a Wailen pa. Atom kil ikga itni yangkipm wail nimpokgen tu a pikekg karkurng Sisas rka yo okgmangki pa.
1CO 11:28 Kolpa ti melnum la il okipma a u wain a Wailen pa, kil mpa ikwonilmpen itningke ipma alkilen pa riworwor ep plalng pipa, kil il okipma a u wain pa.
1CO 11:29 Eng ntei, kol kil il okipma a u wain a Wailen pa kil ikwonilmpen kawor ipma alkilen pa riworwor la pa okipma kolti, a kil ake akwonalmpen kawor ipma alkilen pa ariworwor la pa num a walmpopm a Wailen pa, atom kol kil il pa, mpa ntokg ipma a Maur Wailen pa wakget atom ikga kil ntokgtel paipm ikilmpe paipm a kil antokg pa.
1CO 11:30 Am yiprokgen a kipm ak kolpa atom wailet akipmen awi numpet a titnongket kalpisen a tiur akipmen pa amo ise.
1CO 11:31 Pake kol mentepm ikwonilmpen kawor ipma almentepmen pa riworwor atom mentepm il okipma a u wain pa pipa, Maur Wailen ake mpa lko kalkuten pa ikilmpe paipmpaipm amentepmen pa.
1CO 11:32 Pake kol Wailen kil lko kalkuten ikilmpe paipmpaipm a mentepm antokg ti, pa kolen kil alko wanteng eng la ik loko iye kai eng alkilen, eng ikgake kil uwi mentepm ti nimpokgen tu wrong kinkipman a kanokg ti a ake ukipma kil pa, iye kai itni ntokg yangkipm pa atom laniko la mentepm antokg paipm.
1CO 11:33 Kolpa ti kipm melnum wor alkupm a mentepm uk ipma Wailen, kol kipm la wli rki wris eng il okipma a Wailen pa, kipm mpa rki nungkwangen tu tiur pa wli plalng pa, kipm il ngkompwris om!
1CO 11:34 Ik wang a kipm la uwi okipma a Wailen pa, mla ur kitn a nikgalmpeitn pa, kitn ntokg okipma pa il nikgwor rpmi wan alkitn pa plalng pa, kitn wli kipm tukwem rki eng uwi okipma a Wailen pa eng ake mpa Maur Wailen ntokgtepm paipm pa. Kipm ik kitila kol a kupm kaling plantepm kil kolpa iye kai pen, a yangkipm tiur a kupm la lanikepm pa, ikga kupm kaintepm pa, ikga kupm lanikepm kul.
1CO 12:1 Kipm melnum alkupm a mentepm ukipma Krais, kupm ake la kipm akwekgel titnongket, a ariwe, a kwap a Maur Wor a Maur Wailen la mpreing lkepm pa.
1CO 12:2 Kipm ariwe pa, pikekg kipm ake ukipma Krais pa, kweiur titnongket pikekg arkolngkepm aye kai eng tu mring, a tu mring maur a ok mise pa atom kipm katnun pa kolti, kipm ake antiwe mpa tulpulng pa.
1CO 12:3 Kolpa ti kupm la lanikepm riworwor eng mpa kipm riwe pa la, melnum a Maur Wor a Maur Wailen arpme atom alkel nikgwalpm pa, kil ake antiwe mpa ok nti Sisas pa la, “Sisas pa kil kai paipm o!” A wa melnum a ake Maur Wor a Maur Wailen arpme eng mpa lkel nikgwalpm pa, kil ake antiwe mpa lala, “Sisas pa kil Wailen”, melnum a Maur Wor arpme a alkel nikgwalpm pa kolti antiwe la kolpa.
1CO 12:4 Titnongket a ariwe a kwap a Maur Wor alko pa watipmen auraur, pake Maur Wor pa wris ata.
1CO 12:5 Mentepm akwap auraur a Wailen eng ak angklin tu wrong kinkipman akilen, pake Wailen pa wris ata.
1CO 12:6 Titnongket a Maur Wailen ak ak kwap atom angko ok auraur arke, pake Maur Wailen pa kil wris ata a antokg okipma wrongkwail pa arke kawor mentepm wrongkwail.
1CO 12:7 Maur Wailen elng Maur Wor alkil akwap kawor mentepm atom angko ok manman rka mentepm wris wris eng mpa ik ngklin mentepm kimeket a ukipma Krais pa.
1CO 12:8 Melnum wris ur pa Maur Wor kil alkel yangkipm ur a ak laron nako nikgwalpm watin ur a Maur Wailen kil alkil ai. Wa melnum ur ai pa Maur Wor kil alkel yangkipm ur a ak laron nako ariwe watin ur a Maur Wailen kil alkil ai pa. Pa am Maur Wor wris ata pa ak pake.
1CO 12:9 Melnum ur pa kil antokg kil uk ipma itna titnongket, pa am Maur Wor wris pake. Wa melnum ur ai pa, Maur Wor wris pa alkel titnongket a ak antokg melnum numpet palng wor.
1CO 12:10 Wa melnum ur pa kil alkel titnongket a ak antokg kweikwei titnongket titnongket a ake antiwe melnum antokg. A melnum ur pa kil alkel kwap a melnum ok wripm. A melnum ur pa, kil alkel ariwe a ak ari tu maur wris wris pa la pa maur kolai. A melnum ur pa kil alkel ariwe a ak ok aur aur la ok yangkipm a palng kil la wli ok a kil a kil alkil ake ariwe. A melnum ur pa kil alkel ariwe a ak plelng ok aur aur a kil alkil ake ariwe atom kil laron naki tu wrong kin kipman.
1CO 12:11 Kwap wrongkwail pa am Maur Wor wris pa ak pake. Kil ampreing kwap wris wris pa uk kai melnum wris wris katila nikgwalpm wasrongen alkilen.
1CO 12:12 Ti kipm ri, num a melnum pa wris ata. Pake numpwam watipmen itna num pa. Am wa kolpake, numpwam pa watipmen pake plalngten am itna num wris pake. Ti Krais kil pa am kol pake, num pa wris, a numpwam wrongkwail am kai itna num wris pake.
1CO 12:13 Eng ntei, pa la mentepm kimeket, la men Suta, a kipm a ake Suta, a mentepm a akwap kalpmelel orng kwatneikgen mring ur, a mentepm a akwap ak wasrongen almentepm kolti, mentepm kimeket pikekg ukipma Krais pa atom Maur Wor alkil nar ak auro kol u a pikekg tu ak kaluko pa. Wa ak wang pa mentepm kimeket pikekg awi Maur Wor wris pa kawor rpma ipma a mentepm pa kol u wris a kil alko atom mentepm al pa. Pa Maur Wor wris antokg mentepm palng num wris a Krais pa.
1CO 12:14 Ti kipm ri, numpwam wris wris pa ake kolen num misen wris ur pa, kol pa kalpis. Numpwam wrongkwail ti kai almpatnewe tita pa, pa am palng kol num wris pake.
1CO 12:15 Kolen nepm pa mpa wa lala, “Kupm kil ake wam pa, kol pa ti kupm ake itna num pa.” Pake kupm ti la, pa ake kolpa, nepm am wa numpwam ur a itna num pake.
1CO 12:16 Wa kolen nungkulkg pa mpa wa lala, “Kupm kil ake wulmpa pa, kol pa ti kupm ake itna num pa.” Pake kupm ti la, kol pa kalpis, nungkulkg am numpwam ur a itna num pake.
1CO 12:17 Kol wulmpa pa num wris kolti pa pati, kol a wa kil ik itning kweikwei pa la kol a i? Wa kol nungkulkg pa num wris kolti pa pati, kol a wa kil ik iris yaprekg a kweikwei pa la kol a i?
1CO 12:18 Num pa ake kolpa, Maur Wailen kil elng numpwam wrongkwail wris wris ti elngkitna tita ak wasrongen alkil ai eng kil palng kolen num wris pa.
1CO 12:19 Kol numpwam wrongkwail ti pa kol numpwam wris ur kol wulmpa kolti pa, mpa wa kil palng kol num wris pa kol a i? Pa kalpis.
1CO 12:20 Kol numpwam wrongkwail pa itnen itni kol alkil a itna ti pati, pa wor pake, numpwam watipmen pake num pa wris ata kolti.
1CO 12:21 Kol pa ti wulmpa pa akentiwe mpa wa laniki wam pa la, “Kupm ake wa la kitn pa itna num kil pa, kupm antiwe itna kupm alkupm.” A wa tukgunakg pa akentiwe mpa wa laniki nepm wekg pa la, “Kupm ake wa la kipmekg pa itna num wris kil pa, kupm antiwe itna kupm alkupm.”
1CO 12:22 Pa ake kol pa, numpwam wrongkwail ti pa a ak ak kwap plalng. Kol numpwam ti ur a mentepm ti ake kalnten, pake numpwam ti ur a kol pa kalpis pa pati, mentepm ake antiwe kol a ntokg kwei ur, kol numpwam ti ur a ake kalnten kolpa ake itna pa.
1CO 12:23 A wa numpwam yampingen ti ur a mentepm akwonalmpen la pa ake angklin wail kol numpwam yauwen wail wail tiur a angklin wail pa, pa mentepm nakure ariworwor eng mpa ri wor kol numpwam yauwen wail wail tiur pa. A numpwam ur a mentepm la ake mpa tu ur ai ri pa, mentepm wa lam ariworwor, kol tu ur ri pa, mpa uk numpaipm kamel.
1CO 12:24 Numpwam ti ur a mentepm ake numpaipm atnen pa a antiwe itna kol ti pa, ake mentepm lam pa, pa itna kol ti. Pa Maur Wailen pikekg kil antokg numpwam wrongkwail ti kai itna wris atom palng num wris kolpake, la numpwam tiur a mentepm akwonalmpen la pa ake kweiur wail pa, pa am Maur Wailen elng numpwam pa itna ep awi nang wailen pake.
1CO 12:25 Kil antokg kol pa eng ake mpa numpwam wrongkwail pa iro itni man man pa kalpis, kil la numpwam wris wris ti mpa lupm nikgwalpm wris ikglen tita kimeket.
1CO 12:26 Kol numpwam ur ti uwi wleket pa, numpwam wrongkwail ti mpa wleket plalng. Wa kol numpwam wris ur pa kil uwi nang wailen pa, numpwam wrongkwail pa mpa wa itopen plalngten nimpokgen numpwam wris pake.
1CO 12:27 Okyangkipm a akla num pa, am akla kipm pake. Kipm wrongkwail ti pa kipm num a Krais, kolpatom kipm wris wris ti pa kipm numpwam a Krais pake.
1CO 12:28 Atom Maur Wailen kil ampreingen titnongket a ariwe a kwap pa uk kipm wris wris eng la ikwap alkilen ik ngklin kipm wrong kin a kipman mapming a ukipma kil pa kol kil: kwap ep pa pati kil takwei tu melnum tiur pa elngkitna kol melnum wokgen akwapel a Krais, wa kai arkekg tu pa kil elng tu melnum tiur pa itna kol tu melnum okwripm alkilen, wa kai arkekg tu pa kil elng tu melnum tiur pa itna kol tu melnum a arowonel kaling plan tu wrong kinkipman ya a tu ukipma Maur Wailen, wa tu ti ur pa kil alken titnongket a ak antokg kweikwei titnongket titnongket a melnum akentiwe antokg, wa tu ti ur pa kil wa uk titnongket a antokg numpet a tu melnum palng wor, wa tu ti ur pa kil alken kwap a angklin yiprokg watinet, a tu ti ur pa wa kil alken kwap a itna ep ikgalen tu wrong kinkipman alkilen, a tu ti ur pa wa kil alken kwap a ak ok aur aur a tu alntu ake ariwe.
1CO 12:29 Ti tu kimeket pa am tu melnum wokgen akwapel a Krais pake? Aki tu kimeket pa tu am melnum okwripm a Maur Wailen pake? Aki tu kimeket pa tu melnum a kaling plan arowonel tu yangkipm a Maur Wailen pake? Aki tu kimeket pa tu melnum a antokg kweikwei titnongket titnongket a melnum ake antiwe antokg pake? Kolpa kalpis.
1CO 12:30 Aki tu kimeket pa tu am antiwe a ungkwan numpet pake? Aki tu kimeket pa tu am ak ok auraur a tu alntu ake ariwe pake? Aki tu kimeket pa tu am antiwe plelng lakati ariworwor yiprokgen a okyangkipm a palng wli ok atuwen a tu alntu ake ariwe pake? Kolpa kalpis. Tu wris wris pa Maur Wailen alken titnongket a ariwe a kwap pa manman.
1CO 12:31 Pake kipm wris wris mpa nikgwalpm rkekgen eng uwi titnongket a ariwe a kwap wor wor a itna ep a Maur Wor la lkepm pa. Atom kupm mpa kiling plantepm ya a ikga kipm ngklin tu wrong kin a kipman a Sisas pa. Pa ya wor wrisen itna ep, a ya wrongkwail pa kul arkekg.
1CO 13:1 Kol kupm ntiwe laniki tu wrong kinkipman okyangkipm ik ok anongen aur aur a kupm ake ariwe a palng kupm la wli ok a kupm pa, wa ik ok a tu maur angklin a Maur Wailen pa, pake kol kupm ake plan ipma wor wasrongen tu pa pati, kupm kol nim a ak a nol a tiplam kalpmilel kolti, ake tu atning la nimpom pa akla kuina.
1CO 13:2 Kol kupm melnum ok wripm laron okyangkipm a Maur Wailen wli ok akupmen ti laniken, a wa kol kupm riwe nikgwalpm ampen wrongkwail a Maur Wailen ti, a wa kol nol nikgwalpm a kupm ti rki umpen wontrakole ntiwe ik riwe kweikwei wrongkwail, a wa kol kupm ntiwe ukipma titnongket la tipmining ti rukge iye kai itni kai wompel ai, atom tipmining pa itning kolti rukge kai itni kai wompel ai, pake kol ake kupm arkul nikgwalpm a plan ipma wor wasrongen tu wrong kin kipman pa pati, kupm akwap kalpmilel kolti, kupm melnum a nang kalpisen kolti.
1CO 13:3 Kol kupm mpreing kweikwei wrongkwail akupmen ti ik ngklin tu melnum a rpma tukwok pa, aki kol kupm uk num akupmen ti la tu rkul lapopm kai wakg ti itnen a kupm atop ngkat nang a kupm alkupm ti plan la kupm ukipma Wailen ti, pake kol ake kupm arkul nikgwalpm a plan ipma wor wasrongen tu wrong kin a kipman pa pati, kwap a kupm ak kolpa, pa kai kalpis kolti, ake ak angklinsopm ketn ur.
1CO 13:4 Melnum a arkul nikgwalpm a plan ipma wor wasrongen tu wrong kin kipman pa, kil pa melnum a alupm nikgwalpm kolkil: kil arkul ipma atom kil ake akalmpe paipm a melnum ur aktel pa, kil plan nikgwalpm wor tu wrongkwail, kil ake aringkowe kwei ur a melnum ur. A wa kil ake tipra atop ngkat nang akilen pa.
1CO 13:5 Kil ake antokg melkget. Kil ake akwonalmpen kil alkil ti kolti, a kil ake melnum a ipma wakget, a kil ake karpo lala paipm ur a melnum ur antokgtel pa.
1CO 13:6 Kil ake wa atopen nikgwalpm paipm a mentepm antokg eng tita, kalpis, kil atopen nikgwalpm aklale ute wor kolti.
1CO 13:7 Kil ake akalmpe kalkuten a melnum alkel pa. Kil ukipma la kweikwei wrongkwail a Maur Wailen la pa, kil ikg am ik kitila kolpake, kil rpma nungkwangen ariwe la Maur Wailen ikga ntokg kweikwei wrongkwail ti palng wor. Ak wang a kalkuten palngtel pa, kil arkul ipma itna titnongket kolpa kai.
1CO 13:8 Nikgwalpm a plan ipma wor wasrongen tita pa ikgake kai plalng pa, ikga itni kolpa iye kai pake. Pake kwap tiur kol a Maur Wor la palng wli ok a melnum ok wripm laron pa ikga kai plalng. Wa kwap a ak ok auraur la wli ok a melnum angklo la pa ikga wa kai plalng. Wa Maur Wailen antokg nikgwalpm a melnum ur pa umpen atom kil laron ariwe watin wor a Maur Wailen pa ikga wa kai plalng.
1CO 13:9 Eng ntei, ak wang ti pa nol nikgwalpm a mentepmen ti ake umpen worwor antiwe a laron ariwe watin wor a Maur Wailen pa iyekimeket pa. Wa melnum okwripm ak wang ti pa ake antiwe a laron yek kimeket nikgwalpm a Maur Wailen a palng la wli ok akilen pa, kalpis.
1CO 13:10 Pake ikga ik wang a mentepm ntiwe riwe nikgwalpm a Maur Wailen pa iyekimeket pa pati, kweikwei a mentepm antokg tiwel tiwel ti pa ikga kai plalng.
1CO 13:11 Ak wang a kupm warim pa pati, kupm la okyangkipm kol warim pa, a nikgwalpm a ariwe akupmen pa kol a warim pa. Wa ak wang a kupm palng wail pa, kupm ake wa katnun okyangkipm, nikgwalpm ariwe kol a warim pa, kalpis ise.
1CO 13:12 Am wa kolpa yat pake, kweikwei a Maur Wailen a mentepm ari ak wang ti pa, mentepm ari mrangkumpel kolti, kolen a mentepm ari ikgokg ti kai mrangku pa. Pake ikga ik wang kutnukg pa ikga mentepm ri riworwor, kol melnum wekg a itna wris ari ikgokgel tita pa. Ak wang ti pa kupm ariwe waiketnketn kolti, pake ikga ik wang kutnukg pa ikga kupm riwe Maur Wailen pa riworwor kolen a Maur Wailen kil ariwe kupm ti ariworwor pa. Kolpa atom ari wuten kupm nira la titnongket a ariwe a kwap aur aur a Maur Wor ampreing alko atom mentepm ak ak kwap pa, ikga kwap kalpisen atom ikga plalng.
1CO 13:13 Pake nikgwalpm wor wraur kil kolti ikga ake kai plalng, ikga itna kolpa itna pake: wris ur pa mentepm ukipma Maur Wailen, a wris ur pa mentepm rpma nungkwangen ariwe lala, ikga Maur Wailen ntokg kweikwei wrongkwail ti palng wor, a wris ur pa mentepm plan ipma wor wasrongen tita. Nikgwalpm wraur pa wor pake, nikgwalpm a mentepm plan ipma wor wasrongen tita pa itna ep pake, a wekg pa kul arkekg.
1CO 14:1 Kipm mpa ikor timplowis eng uwi nikgwalpm a plan ipma wor wasrongen tita! Kipm mpa nikgwalpm rkekgen eng uwi kwap a ariwe a titnongket a Maur Wor a Maur Wailen la lkepm, pake kwap wor a kol a kipm uwi ep pa pati, kwap wor a melnum ok wripm aklaron nikgwalpm a Maur Wailen a palng la wli ok a melnum pa.
1CO 14:2 Pa kwap wor itna ep am pake, eng ntei, tu melnum a atning pa, tu antiwe awi ariwe yiprokgen pake. Pake melnum a kil la okyangkipm ak ok manet a palng la wli ok akilen pa pati, ake kil la okyangkipm naki melnum ti pa kalpis, kil la okyangkipm naki Maur Wailen. Kil la okyangkipm ak ariwe a Maur Wor pa naki Maur Wailen kweikwei a itna ampen a kil alkil ti ake ariwe, a tu melnum a atning pa ake wa ariwe yat.
1CO 14:3 Pake melnum okwripm a kil laron nikgwalpm a Maur Wailen a palng la wli ok alkil pa, pa kil laron ak naki tu melnum, eng mpa lken nikgwalpm weten wor wor, a ik kirkitiwen, a ik titnongketel ipma a tu mapming a ukipma Krais pa eng mpa tu itn a rpmi a ikwap or wris kolpa iye kai wail.
1CO 14:4 Melnum a kil la okyangkipm ak ok manet a palng la wli ok akilen pa, pa kil ak titnongketel ipma a kil alkil ti kolti. Pake melnum okwripm a kil laron nikgwalpm a Maur Wailen a palng la wli ok akilen ak ok a tu wrongkwail antiwe atning pa, pa kil ak titnongketel ipma a tu wrong kin kipman wrongkwail a Maur Wailen a takwem rka pa.
1CO 14:5 Kupm wasrongen la kipm kimeket kol a Maur Wor a Maur Wailen lkepm ariwe a la okyangkipm ak ok manet a palng la wli ok akipmen pa. Pake kupm wasrongen paipm la kipm uwi ariwe a laron nikgwalpm a Maur Wailen a palng la kawor ok akipmen pa kol melnum okwripm pa. Kol ariwe a melnum okwripm laron nikgwalpm a Maur Wailen a palng la kawor ok a kipm ur pa pati, angen ariwe a kipm ur la oklala ak ok manet a melnum ake ariwe la kil la kuina pa. Pake kol Maur Wor uk ariwe melnum ur pa atom kil ntiwe plelng okyangkipm a kil la ik ok manet pa pati, pa antiwe a wa ak titnongketel ipma a kipm wrong kin a kipman a Maur Wailen a takwem rka wris pa yat, kol nikgwalpm a Maur Wailen a melnum okwripm laron aktitnongketel ipma akipmen pa.
1CO 14:6 Kipm melnum alkupm a mentepm ukipma Krais, kol kupm kai riwepm atom la okyangkipm ik ok manet pa palng kupm la kawor ok akupmen pa pati, pa mpa wa ik ngklinsepm la kol a i? Pa ake antiwe mpa ik ngklinsepm. Kol kupm la ngklinsepm pa pati, kol a kupm laron kweikwei a Maur Wailen a itna am pa palng kul kai ngko wunong, aki kol a kupm laron nikepm nikgwalpm ariwe watin a Maur Wailen plantopm kawor ipma akupmen ti lanikepm, aki kol a kupm melnum okwripm pa kol a kupm laron nikgwalpm ampen a Maur Wailen plantopm kawor ipma a kupm ti lanikepm, aki kol a kupm irowonelepm kiling plantepm yangkipm a Maur Wailen. Kol a kupm ik kolpa pati, kol a ik ngklinsepm pake.
1CO 14:7 Kweikwei a ake maur arpmen kol melnum pa, kolen wampeng a nim kweikwei a ak antokg nangnang pa pati, kol tu tiplam wampeng a ik nim pa kitikutuket pa pati, pa ake antiwe mpa tu wrong pa riwe la mpa tu ik nangnang a i a ik kromeng a i kitila milpming a nim a wampeng pa.
1CO 14:8 Wa kol melnum a kil tiplam nol pa, ake kil tiplam ariworwor ak lanaki tu wrong la mpa tu wli eng rapon pa, kol pa ti mpa tu nimprampen la kol a i eng kai eng rapon pa.
1CO 14:9 Kipm am wa kol pa yat pake, kol kipm la okyangkipm ik ok manet ur a ake melnum antiwe atning pa pati, mpa wa tu riwe okyangkipm a kipm la pa la kol a i? Ti okyangkipm akipmen pa mpa kai kalpmelel kolti.
1CO 14:10 Ok anongen watipmen aur aur itna kanokg a ti pa wor kimeket, ake antiwe mpa mla ur ngkleikg. Pake ake ok wris ur pa yiprokgen kalpisen pa kalpis, ok wris wris pa antiwe yiprokgen kimeket.
1CO 14:11 Kolpa ti kol ake kupm antiwe atning okyangkipm ur a melnum ur la pa pati, mpa kil ikwonilmpen la kupm ti melnum ok manet a anong manet ur ai wli. A wa kupm ti pa mpa wa ikwonilmpen la kil pa melnum ok manet a anong manet ur ai, ti ok a mentekg aklanaki tita ti pa mentekg ake wa ariwe la mentekg ak lanaki tita kuina.
1CO 14:12 Ti am wa kol kipm pa yat pake, kol kipm ur la okyangkipm ik ok manet ur a palng la wli ok a melnum pa a ake tu melnum atning pa, pa ake wa ak titnongketel ipma atuwen pa. Kolpa ti kipm nikgwalpm rkekgen oklala niki Maur Wailen eng wa kil lkepm kwap a ariwe a titnongket a Maur Wor pa watipmen aur aur, eng mpa ik titnongketel ipma a tu wrong kin a kipman a ukipma Krais a wli wli takwem rka pa. Eng ntei, kipm am wasrongen paipm la uwi kwap a ariwe a titnongket wor wor a Maur Wor ampreingtepm pake.
1CO 14:13 Kolpa ti melnum a Maur Wor alkel okyangkipm ak ok manet a palng la wli ok akilen pa pati, mpa kil oklala niki Maur Wailen eng mpa Maur Wor kil wa lkel ariwe a ak plelng okyangkipm a kil la pa eng mpa tu itning.
1CO 14:14 Kol kupm oklala niki Maur Wailen pa ik ok ur manet a ake kupm alkupm ariwe pa pati, maur wusok akupmen pa la atom palng la wli ok akupmen, pake nikgwalpm a kupm ti ake umpen ak arongke ariwe kuina ur a maur wusok akupmen la pa, eng mpa kupm ngklin tu pa.
1CO 14:15 Kolpa ti mpa kupm ik kol a i? Mpa kupm ik wekgenen kolkil: wangkur pa maur wusok akupmen oklala atom palng la wli ok akupmen ti kupm niki Maur Wailen ik ok a mentepm ake atning. Wa wangkur pa nikgwalpm a kupm alkupm wa oklala niki Maur Wailen ik ok a mentepm antiwe atning. Wa wangkur pa maur wusok akupmen ti ik nangnang ik ngkit nang a Maur Wailen, atom palng wli ok akupmen ti kupm ik nangnang ik ngkit nang a Maur Wailen. Wa wangkur pa kupm ik nikgwalpm a kupm alkupm ti ik nangnang ngkit nang a Maur Wailen pa.
1CO 14:16 Eng ntei, kol melnum ur ntiwepm rpmi kipor kilko ilein Maur Wailen pa, pake kil yimponen kwap a Maur Wor a Maur Wailen pa, atom wa kol maur wusok akitnen palng la wli ok akitnen kitn ukwor Maur Wailen pa ik ok manet a ake mentepm atning pa pati, melnum a antiwepm rpma ti pa, mpa wa itning yangkipm a kitn la pa kolai, atom mpa kil lala yangkipm a kitn ukwor Maur Wailen pa la pa aklale la kol a i?
1CO 14:17 Kitn ukwor Maur Wailen pa wor pake, melnum pa ake kil atning yangkipm pa pati, mpa wa iktitnongketel ipma akilen pa la kolai?
1CO 14:18 Kupm ti wa ukwor Maur Wailen pa atnen a kipm ur ake oklala watipmen ak ok manet a Maur Wor a Maur Wailen alko pa kol kupm kil ak pa.
1CO 14:19 Pake ak wang a kupm anti tu wrong kin a kipman a ukipma pa rka wris eng kapor kilko alein Maur Wailen pa, kupm la mpa la yangkipm ok aripm ur kolti ik ok a tu antiwe atning pa, eng mpa tu uwi riwe kuinaur a kupm kaling planten pa, pa wa wor. A kol a kupm la okyangkipm watipmen ik ok manet ai a tu ake atning ai itni watin atom tu ake antiwe mpa itning kuina ur a kupm la pa, pa paipm.
1CO 14:20 Kipm melnum wor alkupm a mentepm ukipma Krais, nikgwalpm ariwe akipmen a rka kol warimet a pa, pa kipm elngen! Kipm la rki kolen warimet pa pati, kipm rki kolen tu warim paipm a ake antiwe antokg paipmpaipm pa! Nikgwalpm ariwe akipmen ti wa rki umpen kolen la kipm kin nangkwor melnangkwor!
1CO 14:21 Pikekg Maur Wailen la yangkipm ok naki tu men Suta pake tu ake atning katnun, kolpa atom kil wa lawen kol melnum okwripm ur nira ela wrkapm a Maur Wailen pa la kolkil la, “Kupm ikga wa la yangkipm ok niki tu wrong kin a kipman akupmen ik ok manet a tu anong manet ai. Pake tu ikgake wa wrekg paipm la pa ok akupmen atom tu kutnun pa, kalpis tuwa.”
1CO 14:22 Kol pikekg Maur Wailen la tu men Suta pa aklale ak wang ti yat: ariwe a ak ok manet oklala a palng la wli ok a melnum pa, pa kla a Maur Wailen kil ak plan titnongket alkilen pa tu a ake ukipma pa eng tu riwe. Pa ake kla a kil ak plan tu melnum a ukipma pa kalpis. Maur Wor a Maur Wailen la wli ok a melnum ok wripm ur atom kil laron nikgwalpm a Maur Wailen pa, pa kla ur a ak titnongketel tu a ukipma, a tu a ake ukipma pa, pa ake kla a ak titnongketel tu pa, kalpis.
1CO 14:23 Kol kipm wrong kin a kipman a ukipma Maur Wailen pa kipm kai iken tita rki wris kipor kilko ilein Maur Wailen, atom kipm kimeket ik ok manman a ake melnum ariwe pa pati, tiur a yimponen kwap a Maur Wor a Maur Wailen aki tu ipmawekg tiur a ake ukipma pa wet kai ntiwepm rki wris i pa pati, mpa wa tu lawepm la kipm antokg kolpa ti kipm ti titno.
1CO 14:24 Pake kol kipm kimeket ikwap kol melnum okwripm laron nikgwalpm a Maur Wailen ik ok a kipm antiwe a atning pa pati, kol melnum ur a yimponen aki melnum ur a ake ukipma a wet kai ntiwepm rki wris i pa pati, mpa yangkipm a kipm kimeket laron pa, mpa wa ik nukwar ipma a kil pa. Atom pa wa plantel la kil melnum a antokg paipmpaipm.
1CO 14:25 Atom mpa ik plan nikgwalpm ampen paipm paipm alkil a lam nar kai yilokitnin ai wa iye kul or ngko wunong ti. Kolpa atom mpa wa kil elng ngko won tipur ngkit nang a Maur Wailen ti la, “Ei, aklale wrisen! Maur Wailen kil anti kipm rpma pa.”
1CO 14:26 Kol pa ti kipm melnum alkupm a mentepm ukipma Krais, mpa kipm ik kol a i ik wang a kipm kai rki wris eng kipor kilko ilein Maur Wailen pa? Kipm mpa iye kuina ur a Maur Wor a Maur Wailen alkepm wor wor pa, kipm wris wris mpa iye pa wli. Ur alkil pa mpa iye nangnang alkil pa eng ik. Ur alkil pa mpa kiling plan yangkipm a Maur Wailen, ur alkil pa mpa laron nikgwalpm ampen a Maur Wor a Maur Wailen plan kawor ipma akilen. A ur alkil pa mpa ik ok manet a melnum ur ake atning, a ur alkil pa mpa plelng ok pa ik ariwe a Maur Wor a Maur Wailen eng mpa kipm plalngten itning. Kweikwei wrongkwail a kipm ak kolpa pa mpa kipm ik eng ik titnongketel nikgwalpm a kipm alkipm wrong kin a kipman a uk ipma Maur Wailen a rka pa eng mpa kipm rki orwris.
1CO 14:27 Kol kipm ur la okyangkipm ik ok manet a kipm ake atning pa pipa, pa ake mpa melnum watipmen, melnum wekg aki wraur ur kolti. Pake ake mpa kipmteng la ngkompwris pa i ai, mpa kipmteng la ep kunukgen. Wa ur pa wa plelng yangkipm a kipmteng la pa ik ariwe a Maur Wor a Maur Wailen, eng mpa kipm kimeket a rka pa itning.
1CO 14:28 Kol ake melnum a Maur Wor alkel ariwe a plelng ok rpmi wan a kipm kai rka wris kapor kilko alein Maur Wailen pa pati, melnum ur a la kil mpa ik ok manet ur la okyangkipm pa, pa kil tatar rpmi kolti. Ake mpa kil la yangkipm pa ik ok manet pa, kil rpmi oklala ik nikgwalpm alkil ti nimpikgen Maur Wailen ai kolti.
1CO 14:29 Wa kol tu melnum ok wripm pa am wa kolpake. Wekg aki wraur a tunteng pa laron o, a wrongkwail pa rki itning ikwonilmpen yangkipm a tunteng laron pa, kai kunturng yangkipm a Maur Wailen pa aki kalpis.
1CO 14:30 Kipm rpmi itning melnum ok wripm a itna laron yangkipm a Maur Wor alkel pa kolpa kai, ari kol Maur Wailen plan kweikwei ampen melnum manet ur a anti kipm rpma pa pipa, mpa wa kil elngen tatar rpmi a wa uk wang melnum pa eng wa kil laron kweikwei a Maur Wailen plantel pa.
1CO 14:31 Kipm la ep kanukgen kolpa pipa, kipm kimeket mpam laron kuina ur a Maur Wor kil plantepm pake, eng mpa yangkipm a Maur Wailen pa irowonel kipm wrongkwail pa a lkepm nikgwalpm weten wor wor ik ngklin ipma akipmen pa.
1CO 14:32 Tu melnum a Maur Wor a Maur Wailen alken kwap a laron nikgwalpm ampen a Maur Wailen pa naki tu a wli rka ti pa, tu antiwe itna ep ikgalen maur wusok alntuwen, atom tu mpa itni nangkinen tu ti ur ai wa la okyangkipm pa pen, plalng pipa, wa kil wa la.
1CO 14:33 Kipm ik kolpa, eng ntei Maur Wailen kil ake yiprokgen a akwap paipmel atn titi pa, kalpis. Kil yiprokgen a akwap wor meen meen orngwatneikgen tita. Wa kupm mpa lanikepm yangkipm ur kil eng mpa kipm kitila, kol tu wrong kin a kipman a Maur Wailen a rka yela pa katnun katila pa.
1CO 14:34 Kipm la kaingkai rki wris eng kipor kilko ilein Maur Wailen pa pati, tu kin pa ampur tu la yangkipm ok ur pa, i ai! Tu tatar rki kolti orngwatneikgen tu wrong kin kipman mapming a ukipma pa kol yangkipm titnongket a Moses la pa.
1CO 14:35 Pake tu kin a wa la ikisen kweiur eng uwi riwe pa pipa, wor eng kol a tu ik isen tu kipman alntu kai wan anong alntu ai kul. Pa paipm eng tu la okyangkipm itna wulmpa a kipm wrong kin a kipman a Maur Wailen a rka wris pa pati, mpa tu uk num paipm kamel.
1CO 14:36 Yangkipm a Maur Wailen ti pikekg kipm ti awi ep, atom aye kai or palpa? A ti am kipm wris ti awi yangkipm a Maur Wailen pake, a tu tiur ai pa kalpis?
1CO 14:37 Kol melnum ur kil ikwonilmpen la, kil pa melnum ok wripm aki kil melnum a awi kwap ariwe titnongket a Maur Wor a Maur Wailen pa pati, mpa wa kil wa riwe yat la, yangkipm a kupm nirantepm ak alokepm kil pa pati, pa yangkipm titnongket a Wailen a kil alkil ai alko la mentepm kutnun ai.
1CO 14:38 Pake kol melnum ur kil elukgen yangkipm a kupm nirantepm ak alokepm kil pa la, pa ake yangkipm titnongket a Wailen pa pati, kipm mpa wa elukgen melnum pa la kil pa ake melnum ok wripm a Maur Wailen pa.
1CO 14:39 Kolpa ti kipm melnum wor alkupm a mentepm ukipma Krais, wa kupm wa la yangkipm tupmungkul aripm ur a wet kupm la pa kai eng a plalng pake: nikgwalpm a kipm pa mpa rki rkekgen eng laron nikgwalpm ampen a Maur Wailen plantepm kawor ipma akipmen pa kolen melnum okwripm ak pa! A kol tu ur akipmen la la okyangkipm ik ok manet a melnum ur ake atning pa, ake mpa kipm ngkengkel! Kipm itni eng kil lawo!
1CO 14:40 Pake kweikwei wrongkwail pa mpa kipm ntokg riworwor kutnun ya ute wor alkil kolti a kaingkai takwem rka wris kapor kilko alein Maur Wailen pa.
1CO 15:1 Ti kipm melnum alkupm a mentepm ukipma Krais, yangkipm wor a la Krais a pikekg kupm laron nakepm pa, pikekg kipm atning alupmen, atom kipm am nepm itna titnongket itna yangkipm pake, kupm la wa ngkitepm nikgwalpm a kiling plantepm eng kipm won rpme riwe yangkipm pa.
1CO 15:2 Kol kipm rkul yangkipm pa irir kolen a pikekg kupm laron nakepm pa pati, yangkipm wor pa mpa ik uwiyepm kai wor pake. Kalpis pa pati, kipm ukipma kalpmlel kolti.
1CO 15:3 Yangkipm wor a kupm kai laron nakepm pa, pikekg kupm alkupm awi ep ak ai, kupm wa aye kai eng laron nakepm. Yangkipm pa yangkipm titnongket wail itna ep a la Krais kil amo eng akarmpen paipmpaipm a mentepmen, kai katnun wrkapm a pikekg Maur Wailen la pa.
1CO 15:4 Kil amo plalng pa, tu ngkat yipmiri pa aye kawor rmpa kanokg ur a tu u mlaminel pa, rmpa wang wekg pa kai plalng pa, wa or kong ti pa Maur Wailen la atom kil wa wrekg, kai katnun wrkapm a pikekg Maur Wailen la pa.
1CO 15:5 Kil wrekg plalng pipa, kil wa plan kil alkil ti angko wunong Pita ariwel. Plalng pipa, wa kil wa plan kil alkil ti angko wunong tu watnom wampwam yikakwekg pa tu wa ariwel.
1CO 15:6 Plalng pipa, wa kil wa plan kil alkil ti angko wunong tu melnum wor almentepm a mentepm ukipma kil pa wa ariwel. Tu wrong wailet a angen kamel kamel (500+) tu ariwel angkompwris. Tu a pikekg ariwel pa yaurngen pa rka, a yangkorkgen pa amo ise.
1CO 15:7 Pa plalng pipa, wa kil wa plan kil alkil ti angko wunong Semis pa wa ariwel, plalng pipa, wa kil wa plan kil alkil ti angko wunong tu melnum wokgen plalngten akwapel alkilen pa wa ariwel.
1CO 15:8 Kil plan kil alkil ti angko wunong tu ariwel plalng pipa, kil wa plan kil alkil ti angko wunong kupm ti wa ariwel eng rerng om, ake wa kil kai palng eng tu ur, am plalng kol pake. Kupm ti kolen warim a man raku paipmel.
1CO 15:9 Kupm ti ake kol tu melnum wokgen akwapel a Sisas pa. Kalpis, kupm melnum paipm a pikekg or ungkwan uk wleket tu wrong kin a kipman mapming a Maur Wailen pa. Kolpa ti kol Maur Wailen ake takweiyopm pa, tu melnum pa kol ake wa ukwewopm la kupm melnum wokgen akwapel a Sisas pa.
1CO 15:10 Pake pikekg Maur Wailen kil plantopm ipma wor alkil pa, atom kil antokg kupm ti palng melnum wokgen akwapel akilen, kol a kupm ak itna ti. A wa ipma wor alkil a pikekg kil plantopm ak angklinsopm ti pa ake kai kalpmilel pa. Kupm ti pa melnum a akwap tumplowis paipm wrisen angen tu melnum wokgen akwapel wrongkwail akilen pa. Pa ake kupm akwap pa ak titnongket a kupm alkupm ti pa, kalpis. Pa ipma wor a Maur Wailen kil alkil ai plan ak angklinsopm atom kupm ak ak kwap kolpa.
1CO 15:11 Kol kupm ti aki kol tu pa, men kimeket am laron yangkipm wris a la Wailen Sisas a pikekg amo atom wa wrekg pake. Atom am kipm atning, a ukipma katnun pake.
1CO 15:12 Kipm atning yangkipm a men laron nakepm la la Sisas pikekg amo atom Maur Wailen kil la atom kil wa wrekg pa. Ari wa antokg kolai atom kipm tiur ti wa la lala, tu a amo pa ikgake wa wrekg pa?
1CO 15:13 Pake kol iklale lala, tu melnum a amo pa ikgake wa wrekg pa, Maur Wailen kil kol ake la Krais pa wa wrekg pa.
1CO 15:14 Kol Krais pa pikekg ake wrekg pa pati, yangkipm a men laron ti pa, men laron kalpmilel kolti, ti pa ake ak angklin melnum ur kalpis. Am kolpa yat pake, kipm a ukipma Krais pa, ti kipm ukipma kalpmilel kolti.
1CO 15:15 Kol iklale lala, Maur Wailen ikgake la tu melnum a amo pa wrekg pa pati, pa plan la kol kil ake wa pikekg la Krais pa wa wrekg pa. Wa kol men pikekg nungkulkg a wulmpa laron nakepm la Maur Wailen pikekg la atom Krais kil wrekg pa pati, pa plantepm la men ti pa men melnum a kansil kolti la pikekg Maur Wailen antokg kweiur a kil ake antokg pa.
1CO 15:16 Kol Maur Wailen ikgake la tu a amo pa wa wrekg pa pati, kil pikekg kol ake wa la Krais a pikekg amo pa wa wrekg pa, kol a kalpis.
1CO 15:17 Wa kol Krais pa pikekg ake Maur Wailen la atom kil wrekg pa pati, paipmpaipm akipmen pa kol am ikyipowepm kolpa itni pake a wa kol a kipm ukipma kil pa kalpmlel.
1CO 15:18 Kolpa iklale pa, tu a pikekg ukipma Krais pa atom tu amo kaingkai pa, tu pa itna kol a ikga kai paipm wrisen kolti.
1CO 15:19 Ak wang ti a mentepm rpma kanokg ti, kol mentepm ukipma la Krais a pikekg amo pa wa wrekg rpma, atom mentepm rpma nungkwangen la mentepm ikga wa wrekg ntiwel rpmi wor yongkyong pa. Pake kol Krais pikekg ake wrekg pipa, pa mentepm yekyek kun ari angkon won, ake tu yekyek tiur ai ari angkon won kolen mentepm ti.
1CO 15:20 Tu la Krais a amo pa ake wrekg pake Maur Wailen kil pikekg la Krais a pikekg amo pa am wa wrekg ise. A tu melnum a pikekg amo kai rka rka pa, a mentepm a rka ti pa, mentepm ikga wa wrekg kol kil pa yat pake, pake kil pa pikekg wrekg ep pa kolen mentepm angkon okipma yipuken a tukgun kakir pa.
1CO 15:21 Melnum ur pa kil ep akwule ya a amo. Am wa kolpa yat pake, melnum ur pa kil ep akwule ya a wrekg pa.
1CO 15:22 Wrong kin kipman a palng katnun Atam pa, tu ikga imo. Am wa kolpa yat pake, wrong kin kipman a katnun Krais pa, tu ikga wrekg rpmi wor yongkyong.
1CO 15:23 Pake mentepm ikga wrekg ep kunukgen: Krais kil pa pikekg wrekg ep ise, kolen okipma yipuken a tukgun kakir pa, wa ikga ik wang a kil yaper nar pipa, mentepm akilen pa ikga wa wrekg ik wang pa.
1CO 15:24 Pa wang umpuwen a kitnong a kanokg ti ikga kai plalng. Krais kil itna akwap alok angkli tu melnum, a mring, a maur wrongkwail a nang arke antiwe titnongket kalnten itna tukgunakg ikgalen kweikwei wrongkwail pa, a ntokgten kai paipm angket lam kinar itna orngwatneikgen kil alkil. Plalng pipa, kil elng kweikwei wrongkwail a kil itna tukgunakg ikgalen pa elng yaper kai wam a Maur Wailen, Yan akilen pa, eng kil alkil Yan itni ep ikglen om.
1CO 15:25 Pake ak wang ti Krais kil itna melnum tukgunakg ikgalen kweikwei wrongkwail pa pen. Kil alok angkli tu wrongmanto akilen pa kolpa itna kaingkai, kai ngko wang a ikga kil rku tu wrongmanto kimeket kinar rmpi nepm watneikgen akilen.
1CO 15:26 Kil alok angkli wrongmanto wailet ai kai plalng ise. Wrongmanto aimprek pa pati, am Amo pake, a ikga kil lok ngkli ik wang a mentepm wrekg pa kai eng plalng pake.
1CO 15:27 Ti kol wrkapm a Maur Wailen pa la kolkil la, “Maur Wailen kil elng kweikwei wrongkwail pa kinar itna orngwatneikgen Krais pa, atom Krais pa itna melnum tukgunakg ikgalen kweikwei wrongkwail pa.” Pa la kweikwei wrongkwail, pake Maur Wailen kil alkil ti pa kalpis, ake kil elng kil alkil pa kinar itna orngwatneikgen Krais pa.
1CO 15:28 Ik wang a kweikwei wrongkwail pa itni orngwatneikgen Krais pa eng kil ikglen kweikwei wrongkwail pa kimeket pipa, ikga ik wang pa Krais kil ikga wa rku kil alkil ti kinar itni orngwatneikgen Maur Wailen, melnum a pikekg kil elng kweikwei wrongkwail pa kinar itna orngwatneikgen Krais pa. Atom Maur Wailen pa kil ikga itni tukgunakg eng ikglen kweikwei wrongkwail pa plalngten.
1CO 15:29 Ti ya a kipm tiur la tu naren Sisas kalukepm eng ak angklin tu akipmen a amo kaingkai pa, pa kipm antokg kolpa eng na? Kol kipm tiur akwonalmpen la la, tu melnum a amo kaingkai pa ikgake wa wrekg pa, ti kipm la la tu naren Sisas kulukepm ik ngklin tu melnum a amo pa eng ntei?
1CO 15:30 Kol tu melnum a amo pa kol tu ikgake wa wrekg pa pati, kol a wa men a akwap a Krais ti iye men alpmen ti ikngklei wang itn ikwap kuinel kolti eng ik ngklin kipm pa eng ntei, pa men kol ake wa itn ikwap ti.
1CO 15:31 Kipm melnum alkupm a mentepm ukipma Krais, kupm atop ak kipm pa ak la atnen pikekg kupm angklinsepm atom kipm ukipma Krais Sisas wailen amentepmen, kolpa ti kol ake mpa kupm kurukentepm yangkipm kil, pa kupm la aklale, akangklei angklei kupm aye amo ti atn nakur num atn kolti.
1CO 15:32 Kupm pikekg rpma anong Epesus ti atom tu melnum tiur kolen nimpa tilpmingen wrongen paipm a nam kamel pa la ngkwrer ilopm atom kupm antiwen or tita. Kol kupm ikwonilmpen kolen nikgwalpm a tu melnum akwonalmpen pa, kupm kol ake ngkli num alkupm rpmi Epesus ti eng kweiur ntokgtopm pa. Kol tu melnum a amo pa ikgake wa wrekg pipa, “Mentepm itopen il u a okipma pa wrisen rpmi kanokg ti, eng ikgkil pa mentepm imo!”
1CO 15:33 Kipm itn uk ikg riwe, mpa tu melnum pa arkolngkepm kai angko. Kol yangkipm a mentepm lala pa la, “Ake mpa kipm itn orwris nti tu melnum a alupm nikgwalpm paipm titnowen a kolpa. Mpa wa tu plelngen nikgwalpm wor akipmen ti kai paipm atom kipm atn a rpma antokg paipm.”
1CO 15:34 Kuina almpla titnowel kipm ti akwonalmpen la tu melnum a amo kaingkai pa ikgake wa wrekg wrekg pa! Kipm tiur pa kipm ake ariwe Maur Wailen pa ketn ketn ur, kalpis. Kipm wontrakol o! A kipm elngen a kipm antokg paipmpaipm! Kupm la kolpa eng mpa lkepm numpaipm.
1CO 15:35 Pati kipm tiur mpa wa la elukgen yangkipm a kupm la tu melnum a amo pa tu ikga wa wrekg pa, mpa wa isen ur kolkil la, “Kol iklale la tu ikga wa wrekg pipa, tu ikga wa wrekg rpmi malepmen kolai? Numpalk a tu pa ikga ri kolai?”
1CO 15:36 Kitn mla titnowen mpa ik isen yangkipm ok kolpa! Kuina ur a kitn alin pa, mpa imo nungkur kai paipm pa pen, plalng pa, wa raku weten wor ai.
1CO 15:37 Kol kitn la lin kwei aki kimpa pa, kitn ake mpa inel yurk alkil aki ngket waleng a ikga inip kul no pa kai lin pa, kolpa kalpis. Kitn mpa uwi kwei alkil ai lin kolti.
1CO 15:38 Maur Wailen kil antokg kweikwei ok pa anip kai kaino katila nikgwalpm alkil a kil la la mpa palng kolpake. Kil antokg kweikwei a anip pa katila kweikwei ok alkil a kitn alin aki arm pake.
1CO 15:39 Num a kweikwei malepmen a itna kanokg ti pa manman. Num a melnum pa man, num a yul a wel a wlikgok wrongkwail pa manman manman plalng.
1CO 15:40 Numpalk alkil a kanokg ti pa itna, ake kalpis pa. Numpalk alkil a kitnong ai pa wa itna, ake kalpis pa. Numpalk alkil a kaino kitnong pa klalen arimo akilen pa ari manet. Wa numpalk alkil a itna kanokg ti pa klalen arimo akilen pa wa ari manet.
1CO 15:41 Klalen a takgni alkil pa alen manet, wa klalen a kainil alkil pa alen manet, wa klalen a kumeim alkil pa alen manet, wa klalen a kumeim wris wris pa alen manman, tiur pa alen wail, a tiur pa alen wusok, a tiur pa alein waiketn.
1CO 15:42 Mentepm amo kaingkai wa wrekg pa am wa kolpake, numpalk a mentepm uwen pa ikga kai paipm, pake numpalk a ikga wrekg pa ikgake kai paipm, pa ikga rpma wor yongkyong.
1CO 15:43 Numpalk a mentepm uwen pa ake nang arke, numpalk a ikga wrekg pa klalen nang arke. A numpalk a mentepm uwen pa titnongket kalpisen, numpalk a ikga wrekg pa antiwe titnongket.
1CO 15:44 Numpalk a mentepm uwen pa, pa numpalk alkil a mentepm rpma malepmen rpma kanokg ti arpmewe kolti. Kol numpalk a ikga wrekg pa, pa numpalk alkil a ikga mentepm rpmi malepmen rpmi kaino kitnong ai rpmewe kolti. Mentepm ari numpalk alkil a kanokg a mentepm rpma malepmen arpmewe ti pa itna, kolpa wa numpalk alkil a kaino kitnong ai a ikga mentepm rpmi malepmen rpmewe kaino ai wa itna, pa ake kalpis pa.
1CO 15:45 Nira ela wrkapm a Maur Wailen pa la kol wuten kupm la pa la, “Atam melnum ep pa, kil palng malepmen rpma kanokg ti.” Wrkapm pa la Atam ep pa kolpa. Wa Atam katnukg pa kil pa kil maur a uk yaprekg watin mentepm wrong kin kipman eng mpa mentepm rpmi ik wang ti kolpa kaingkai kaino kitnong ai.
1CO 15:46 Pake Maur Wailen kil ake alko numpalk alkil a ikga mentepm rpmi malepmen rpmi kaino kitnong ai rpmewe ep pa, kalpis. Kil alko numpalk alkil a mentepm rpma malepmen rpma kanokg ti arpmewe ep tike. Atom ikga kutnukg pa kil lko numpalk weten alkil a ikga mentepm rpmi malepmen rpmi kaino kitnong ai rpmewe, uwi wrik a numpalk a kanokg ti.
1CO 15:47 Melnum ep pa pikekg Maur Wailen kil ak wam almpen kanokg ti atom antokg tike, atom kil am a kanokg tike. A melnum katnukg pa pati a kitnong ai.
1CO 15:48 Mentepm melnum a kanokg ti pa, mentepm pa am kol pikekg melnum ep a kanokg tike. Am wa kolpa yat pake, mentepm melnum a ikga a kitnong pa, mentepm pa ikgam kolen melnum a kitnong pake.
1CO 15:49 Kol numpalk a mentepm nowe ak wang ti pa, pa ari kolen pikekg numpalk a melnum ep a kanokg ti. Am wa kolpa yat pake, numpalk a ikga mentepm nowe pa, pa ikgam wa ri kolen numpalk a melnum a kitnong ai.
1CO 15:50 Kipm melnum wor alkupm a mentepm ukipma Krais, yangkipm a kupm la kil pa itna kolkil: numpalk a mentepm melnum walmpopm wakget a kanokg ti a ikga kai paipm pa ikgake antiwe kaino anong wor a Maur Wailen kil ikgalen pa, atom uwi num ngklin kweikwei worwor a rpma yongkyong a ikg ake kai paipm pa. Pa pikekg Maur Wailen kil ak namputo elngtitna pa.
1CO 15:51 Kipm itning yangkipm ampen weten ur a kupm la lanikepm kil: mentepm ikgake imo kimeket pa, tu tiur ikga rki, pake num a mentepm ti pa ikga palng ri manet.
1CO 15:52 Pa ikga palng penterngen kolti, kolen mring malo a plaing pa. Ikga ik wang umpuwen pa ikga maur akwapel a Maur Wailen pa tiplam nol ur pa la wang am plalng pake, pipa tu a pikekg amo pa wa wrekg nimpikgen num palk weten a ikgake kai paipm pa. Wa mentepm melnum a ikga rki pa numpalk amentepm pa ikga wa palng manet.
1CO 15:53 Eng ntei? Numpalk a ikga kai paipm kil pa mentepm ikga iner rmpi ti, atom mentepm ikga wa nowe numpalk weten a ikga ake kai paipm pa. Numpalk a ikga imo kil pa, mentepm ikga iner, atom mentepm ikga wa nowe numpalk weten a ikgake imo pa. Pa ikgam palng kolpake, pa ikgake kalpis.
1CO 15:54 Ikga ik wang a mentepm iner numpalk a ikga paipm kil pa, atom wa nowe numpalk a ikgake paipm pa, wa mentepm iner numpalk a ikga imo kil pa wa nowe numpalk a ikgake imo pa pati, yangkipm a la ela wrkapm a Maur Wailen pa ikga palng ok rke. Ti yangkipm pa la kolkil la, “Maur Wailen pa alok angkli amo pa kai plalng angket lam.”
1CO 15:55 ”Amo! Titnongket a kitn pikekg alok angkli tu wrong kin a kipman pa a i? Amo! Ok paipm alkitn a pikekg kitn ak alm tu wrong kin a kipman amo pa itna kai a i?”
1CO 15:56 Wrkapm pa la Maur Wailen alok angkli Amo pa kai plalng ise. Ti kipm ariwe pa, ok paipm a ak alm kamel amo pa pati am paipmpaipm a mentepm antokg pake. Maur Wailen pikekg yapon yangkipm titnongket pa la, melnum a antokg paipmpaipm pa ikga imo. Yangkipm titnongket pa ak titnongketel paipmpaipm pa kol ok paipm a alm kamel amo pa.
1CO 15:57 Pake Wailen Sisas Krais almentepmen pikekg amo akarmpen paipmpaipm almentepmen ti, atom Maur Wailen alok angkli Amo a alok yapo mentepm ti kai kalpis om, kolpa ti mentepm mpa uk wor Maur Wailen!
1CO 15:58 Kolpa ti kipm melnum yek yek alkupm a mentepm ukipma Krais, kipm itni titnongket, ampur kipm uren tutusen katnun mla ur a la rkolngkepm iye kai eng kipm ngko pa. Kipm ikngklei nikgwalpm rkekgen won itni ikwap a Wailen pa. Eng ntei, kipm ariwe la kwap a kipm aken eng Wailen pa, pa ake kipm aken kalpmilel pa, kalpis.
1CO 16:1 Wa kupm la wa lanikepm marpm a kipm la tukwem ik ngklin tu wrong kin a kipman a Maur Wailen a rka kinar anong wail Serusalem ai. Pa kipm mpam ik kitila kol a pikekg kupm lanaki tu wrong kin kipman mapming wrongkwail a uk ipma Sisas a rka yela anong kanokg Kalesia la tu ik pa.
1CO 16:2 Mpa kipm ik kolkil: ikngklei wang a kipm takwem rka wris atning yangkipm a Maur Wailen pa, okg or kong pa kipm wris wris mpa numprampen marpm ur pa ep elng ermpi manet rmpi wan alkipm ai kitila kweikwei a kipm antiwe pa ik numput eng ikga tukwem. Atom ikga ik wang a kupm wli pa, ikgake kipm wa ningningen eng ikor marpm pa.
1CO 16:3 Ti kipm tukwei tunteng melnum tiur a kipm ari kaporng yangkipm la wor pa atom elngitni. Ik wang a ikga kupm kai palngtepm pa, ikga kupm nira wrkapm tiur tunteng iye nukure marpm a kipm takwem pa iyentepm kinar Serusalem pake.
1CO 16:4 Kol kweiur ikepilng lala ikga kupm alkupm kinar pa, pa ikga tunteng ntiwopm kinar pa.
1CO 16:5 Kupm akwonalmpen la ikga kai riwepm. Kupm ikga kai or ya Masetonia pa kinar pake. Kolpa ti kupm la ikga i Epesus ti kaino kai kipring kinar itn yela tutu anong kanokg a Masetonia pa pen, plalng pipa, kupm i Masetonia pa kinar riwepm pake.
1CO 16:6 Kupm ikga ntiwepm rpmi kinar pa i kainil aripm ur kai plalng pa kupm kai. Aki kupm rpmi nungkwangen wang kupuk a wripm wail a el pa pen, kai plalng pa pipa, kipm tukwem marpm a kweikwei pa ik ngklinsopm eng ikga kupm iye nukurnum kai anong a i a kupm la kai pa.
1CO 16:7 Kupm ake la kinar riwepm itni wampel kolti atom wa kupm kai pa. Kolpa kalpis. Kol wasrongen a Wailen pipa, ikga kupm ntiwepm rpmi wang watinet ketnketn ur kinar pa.
1CO 16:8 Pake kupm ikga rpmi anong Epesus kil i i, kai ngko wang wail a men Suta kimeket atopen okipma ep a men angket tuwai pa kai plalng pipa, kupm a kai kinar pake.
1CO 16:9 Maur Wailen kil kukwa wanyun pa okore itna kolti eng kupm antiwe akwap titnongket atom tu wrongkwailet tu atning alupmen yangkipm a kupm laron Sisas Krais pa, kolpa atom kupm la ikwap pa itni kil ik ngklin tu kil pen. Tu melnum wailet a talpulng yangkipm pa wa awi wrongmanto lan men ti.
1CO 16:10 Pake Timoti pa am yaya kai kinar pake. Kipm ri kil kai kinar palngtepm pa, ampur kipm ntokg kweiur eng mpa kil ngkirk, eng mpa kil uwi ipma meen wor ntiwepm rpmi. Eng ntei Timoti pa wa kil melnum akwapel a Wailen pa irir kolen kupm tike.
1CO 16:11 Ampur kipm ur elukgentel pa. Kipm plan ipma wor ik ngklinsel kolpa kai atom ik wang a kipm la ukwawel yaperkulntopm pa kil ikga utnuurngkepm nimpokgen ipma meen wor. Kupm rpma wulmpa ya nungkwangen rpma la kipm ukwawel nti tu melnum alkupm a mentepm ukipma Krais pa tu ntiwel yaper kulno kulntopm.
1CO 16:12 Wa kupm la Apolos melnum almentepm a mentepm ukipma Krais pa. Kupm tilpel titnongket la kil nti tu melnum tiur a mentepm uk ipma Krais pa la kil kai riwepm, ari kil karken. Kil ikwonilmpen ri wang a i kil la kai riwepm pipa, kil ikga kai pa.
1CO 16:13 Kipm rpmi wonirpme, a uk ipma Krais pa itni titnongket! Kipm itni wrongen, ampur kipm ngkark, kipm rkul ipma alkipm pa itni titnongket!
1CO 16:14 Kipm la ikwap wrongkwail pa kipm ik ik ipma wor a wasrongen tita kolti!
1CO 16:15 Kipm ariwe Stipenas a tunteng alkilen a rka wan wris pa pikekg plelng ipma. Pikekg ake melnum ur a rka anong kanokg Akaia pa plelng ipma pa kalpis, atn atn am Stipenas nampokgen tunteng pa plelng ipma ep pake. Pa kol okipma yipuken itna anong kanokg Akaia pa. Tunteng uk tunteng alntunteng ti kai akwap eng ak angklin wrong kin a kipman a Wailen. Kolpa ti kipm melnum alkupm a mentepm ukipma Krais, kupm tilpepm la,
1CO 16:16 kol a kipm orngwatneikgen Stipenas nimpokgen tunteng alkilen a rka wan wris pa a wa tu wrongkwail mla ur a uk tu alntu pa anti tu aken kwap eng ak angklin tu wrong kin kipman a Wailen pa.
1CO 16:17 Kupm atopen eng Stipenas a Portunatus a Akaikus tunteng kul ariwopm. Kipm kimeket pa ake antiwe kul ariwopm a angklinsopm, kolpa atom tunteng pa awi wrik a kipm pa wli angklinsopm atom kupm awi atopen pake.
1CO 16:18 Tunteng antokg ipmanikg akupmen pa rka kukula wor om. Kol kipm alkipm pa yat, ikga tunteng yaper kaintepm pa, ikga kipm itning a tunteng lakiti pa atom kupm akwonalmpen ari ipma akipmen pa ikg am wa rki kukula wor kolpa yat pake. Kolpa ti kipm mpa kiporng yangkipm tu melnum wor a kolpa.
1CO 16:19 Tu wrong kin a kipman mapming wrongkwail a ukipma Sisas a rka tatu anong kanokg a Esia kil tu la tu nikgwalpm arkentepm rka pa. Akwila nampokgen kin alkil Prisila a tu melnum mapming a ukipma Sisas a kaingkai takwem rka wan a tuwekg pa, tu wa la nikgwalpm wail a tu pa arkentepm rka atnen a Wailen Sisas awiyo aye kai or wris pa.
1CO 16:20 Tu melnum a ukipma Sisas a rka kil pa tu kimeket wa la tu nikgwalpm arkentepm rka pa. Ti kipm a rka kai pa, kipm mpa nikron tita plan la kipm melnum a Wailen.
1CO 16:21 Yangkipm akupmen kai plalng pake. Ti kupm awi yangul ti kai wam a melnum a rpma nirantopm nirantopm wrkapm kil atom kupm nira kolkil la, “Kupm lanakepm la kupm nikgwalpm arkentepm rka.” Ti kipm ri a kupm nira kil pa, pa wam a kupm alkupm Pol nira.
1CO 16:22 Kol melnum ur ake uk ipma wor wasrongen Wailen pa ti kil kai paipm o! Maranata! Oi, Wailen amenen, nar o, kitn nar o!
1CO 16:23 Kupm oklala naki Wailen Sisas pa eng mpa kil plantepm ipma wor a ngklinsepm.
1CO 16:24 Krais Sisas kil awiyo kai or wris nampokgen kil alkil kolpa atom kupm plan ipma wor wail wasrongen kipm pa kimeket. Ti yangkipm a kupm lanakepm kil pa am kai itna kolpake.
2CO 1:1 Kupm Pol nira wrkapm kil ukwor kipm wrong kin kipman mapming a ukipma Maur Wailen a rka kinar anong Korin pa, wa kipm wrong kin a kipman a Maur Wailen takweiyepm elng itna manet eng alkilen a rka yela anong kanokg akipmen a Akaia pa. Wa Timoti melnum almentepm a mentepm ukipma Krais a antiwopm rpma kil pa, kil wa ukwor kipm pa yat. Kupm kil pa Maur Wailen alkil pa takweiyopm la kupm melnum wokgen akwapel a Krais Sisas, melnum a kil ukwa nar eng ak armpen mentepm wrong kin kipman.
2CO 1:2 Kupm oklala naki Maur Wailen Yan almentepmen, wa Wailen Sisas Krais, eng mpa tuwekg plantepm ipma wor ik ngklinsepm a lkepm ipma meen wor kolpa iye kai.
2CO 1:3 Mentepm mpa ngkit nang a Maur Wailen, Yan a Wailen Sisas Krais almentepmen, kil Yan yiprokgen wor a ipma arein, a kil Maur Wailen a akangklei wang kil ak num karkitiwo.
2CO 1:4 Kil ak num karkitiwo ak wang a mentekg arki kalkuten auraur, eng mpa wa mentekg ti ntiwe ik num kirkiti tu mlaur a arki kalkuten auraur ai, kol a Maur Wailen ak num karkiti mentekg ti pa.
2CO 1:5 Kalkuten kol a pikekg Krais kil arki pa, mentekg am wa arki kalkuten wailet kolpa yat pake, kol ampei a kaino kapor yo ngkaten kinar ploplo. Ti am kolpake, Maur Wailen ak num karkiti Krais pa, wa Krais am wa ak num karkiti mentekg ti anti watipmen kolpa yat pake, kol ampei aung a angketen atnuurng takwlelkgen yo atom wirng no kukula wor pa.
2CO 1:6 Kol men melnum wokgen akwapel a Krais arki wleket kolpa pa, pa ak titnongketel ipma akipmen pa, atom antokg kipm ukipma itna titnongket. Wa kol Maur Wailen ak num karkiti men ti pa, pa am wa ak titnongketel ipma akipmen yat. Pa ak titnongketelepm eng kipm itna titnongket arki wleket kol a men arki ti.
2CO 1:7 Mentekg ariwe la kalkuten na ur a kipm arki pa, am wa kipm arki irir kol a mentekg ti arki tike. Maur Wailen ak num karkiti mentekg kil pa, ti mentekg ariwe la kil am wa ak num karkiti kipm pa kolpa yat pake. Kolpa atom mentekg ukipma titnongket ariwe la kipm ikga itni titnongket pa.
2CO 1:8 Kipm melnum almenen a mentepm ukipma Krais pa, mentekg ake lala kipm rpmi ikwekgel kalkuten a pikekg palngto itna kinar anong kanokg a Esia pa. Kalkuten a pikekg arkuwo pa kalkut wail manten paipm ai angento, ti mentekg rpma titnowen num kolti la am mentekg kol am imo itnen kalkuten wail pa.
2CO 1:9 Ti aklale wrisen, mentekg ariwe la mentekg kol am imo pake. Kalkuten pa arkuwo kolpa eng ak arowonelo la mentekg riwe la titnongket a mentekg melnum ti ake antiwe, wa ak antokg eng mentekg ukipma Maur Wailen a antiwe titnongket a la tu melnum a amo pa wa wrekg.
2CO 1:10 Mentekg am wreren eng kol a imo ise, ari kil kul awiyo kai takwulelkgen kalkuten pa. Ti kil am angklinso kolpa ak wang ti, wa mentekg ukipma ariwewel la kil ikgam ngklinso kolpa kai pake.
2CO 1:11 A kil angklinso pa am atnen a kipm pa nampokgen tu anong tiur ai oklala naki naki Maur Wailen eng ak angklinso pake, atom kil planto ipma wor alkil angklinso pake. Eng mpa tu wrongkwail ri pa pipa, tu ngkit nang a Maur Wailen pa ngkli.
2CO 1:12 Kuina ur a antokg kupm ngkat nang atop ak la pa pati kol kil: ipma wor a Maur Wailen kil alkil ai plan ak angklin kupm ti kolpa kolti, atom kupm atningke kawor ok wusok a kupm pa ari atn a rpma akupmen itna kanokg a ti pa rukis ute wor kolti, ake kupm katnun ariwe a melnum ur pa, kalpis. Ti tu wrongkwail ai ariwe, wa kipm ti yat kipm ariwe kuina ur a kupm aktepm kolai pa, la kupm ake aktepm paipm pa.
2CO 1:13 Ti wrkapm a kupm nirantepm nirantepm pa, kupm ake nirantepm yangkipm ur manet pa kalpis, kuina ur a kupm nirantepm pa am ela kolpake. Kipm atningko ketnketn ur pa, pake kupm rpma nungkwangen ariwe lala kipm ikga uwi riwe nikgwalpm a kupm ti worwor kai itni yiprokgen ai,
2CO 1:14 kolen ak wang ti pa kipm ariwewopm yangkorkgen la ikga ik wang a Wailen Sisas kil nar pa, ikga kipm uwi nang wailen itnen kupm ti, wa kupm ti ikga wa uwi nang wailen itnen kipm pa.
2CO 1:15 Kupm ukipma titnongket la pa am kol pa aklale pake. Atom ep pa kupm pikekg akwonalmpen la kinar ri kipm pa, plalng pa, wa kupm i pa wa kul no tutu anong kanokg a Masetonia ti. Pa plalng pa, wa kupm yaper i ti wa kinar riwepm nti ur, eng kipm ngklinsopm marpm okipma apmnung kweikwei tiur a kupm tukwok pa, eng ikga kupm iye nukur num kai kinar anong kanokg a Sutia ai. Kol pikekg kupm kinar riwepm nti wekg atom kipm kol a wa ngklinsopm nti wekg pipa, Maur Wailen kol a wa plan ipma wor ngklinsepm nti wekg.
2CO 1:17 Kupm pikekg lala kol a kinar riwepm, ari kalpis, ake kupm kinar. Ti kipm akwonalmpen lala pa kupm la ak ok kalpmlel ur kolti, aki yangkipm a kupm yapon pa kipm akwonalmpen la pa kupm yapon kol tu melnum a rpma kanokg a tike, atom kupm la ok milip wekgenen, ur pa kupm la awi wor, a ur pa kupm la kalpis.
2CO 1:18 Pake Maur Wailen pa kil melnum a la nikgwalpm wris kolti. Ti men melnum wokgen akwapel akilen ti pa am kol pa yat pake, men ake ok milip rakol wekgenen la awi wor, a la kalpis pa.
2CO 1:19 Ti Warim Kipman a Maur Wailen, Krais Sisas pa, a minto Sailas a Timoti pikekg laron nakepm ak wang a minto antiwepm rpma kinar pa, kil ake melnum a ok milip rakol wekgenen la awi wor wa la kalpis pa. Kil melnum a akangklei la awi wor kolti katila kuina ur a Yan pa la pa.
2CO 1:20 Mentekg ariwe pa eng ntei, Maur Wailen kil wangkir a yapo yangkipm watipmen aripm ur ai, atom Krais kil awi wor ak katila yangkipm wrongkwail a Maur Wailen wangkir a yapo pa plan la pa am wor am pake. Kolpa atom mentepm naren Krais ak titnongketel yangkipm a Maur Wailen wangkir a yapo pa lala “Pa aklale wrisen.” Pa mentepm la kolpa pipa, pa ak ngkat nang a Maur Wailen.
2CO 1:21 Ti melnum a awi kipm pa, a awi mentekg ti kai wris nampokgen Krais pa Maur Wailen kil alkil pa, atom mentepm ukipma itna titnongket. Kil alkil pa pikekg ak u yiwa ur alkil ai ak kaluko a ak amprinso eng alkilen.
2CO 1:22 Kil pa anel kla alkil pa akamprinso eng alkilen. Wa kil pa elng Maur Wor alkil pa rpma kawor ipma a mentepmen pa, eng ak plan kweikwei waiketn pa la kweikwei wail pa ikga kil lko kutnukg.
2CO 1:23 Kupm naren Maur Wailen la yangkipm a kupm la kil pa aklale. Kil ariwe nol ampen akupmen ti, la kol a pikekg kupm kinar riwepm itatu kinar Korin pa, kol a kupm la minsrang lokepm pa, pa kol a lkepm ipma kalkuten ur pa, kolpa atom ari ake pikekg kupm kinar ariwepm.
2CO 1:24 Minto ake la mpa itni eng tirpmingen ikglen lok kipm pa la ukipma kolkil kolkil. Eng ntei, kipm am ukipma itna titnongket yat ise. Ti minto ti akwap anti kipm pa orwris la ik ngklinsepm eng mpa kipm ukipma rpmi numpokgen atopen.
2CO 2:1 Kol pikekg kupm kinar riwepm ik wang pa pipa, kol a lkepm ipma kalkuten nti ur pen. Kolpa atom pikekg kupm akwonalmpen rpma ipma alkupmen ti la kupm ake mpa kinar riwepm ik wang pa.
2CO 2:2 Kol kupm kinar riwepm la minsrang lokepm atom lkepm ipma kaikuten ik wang pa pipa, ti mpa mla a i lkopm nikgwalpm wor wor eng ntokg kupm ti wa itopen? Kalpis, am kipm melnum a kupm alkepm ipma kalkuten pake.
2CO 2:3 Am kipm pa melnum a antokg kupm atopen pake, atom pikekg kupm karken mla kinar riwepm kinar pa, pa mpa wa kipm tiur lkopm ipma kalkuten. Am yiprokgen kolpa atom kupm pikekg nirantepm wrkapm pa kolti kinar la minsrang alokepm. Ti kupm ariwe kipm pa lala, kol kupm itopen pa, pa wa ntokg kipm pa wa itopen nimpokgentopm yat.
2CO 2:4 Ak wang a pikekg kupm nirantepm wrkapm pa, kupm pikekg akg a areinsepm wail a ipma kalkut wail manten paipm. Kupm pikekg ake nira la mpa ntokg kipm pa ipma kalkut pa, kupm pikekg nira la ntokg kipm riwe la kupm arkul nikgwalpm a plan ipma wor wasrongentepm titnongket paipm.
2CO 2:5 Melnum a pikekg uk ipma kalkuten pa, pa kil ake uk ipma kalkuten kupm wris ata ti pa, kil am wa uk ipma kalkuten kipm wrongkwail pa yat pake. Kupm la kolkil la, ipma kalkuten tiur pa kil am alkepm pake, pake kupm ake la pulmpulen eng pa.
2CO 2:6 Paipm a pikekg kil ak eng kipm pa, wailet tiur akipmen pikekg kipm alkel wleket akalmpe paipm a kil pa am kai kol a pawom!
2CO 2:7 Kipm akalmpe kai kol a pawom, kolpa ti wor wrisen eng kipm ungkwan paipmpaipm akilen pawo, a kipm ngklinsel a ik num kirkitiwel, mpa kalkuten wail pa alok angkliwel kai paipm.
2CO 2:8 Kolpa ti kupm tilpepm la kipm wa plantel nikgwalpm wor akipmen ti la kipm wasrongentel titnongket kolpa ik ti wa iye or pa kai o!
2CO 2:9 Yiprokgen a pikekg kupm nirantepm wrkapm pa pati, kupm nira akalmpepm ipma la ri la, kipm nungkulkg wor katnun yangkipm wrongkwail a kupm la pa aki kalpis.
2CO 2:10 Kol kipm ungkwan paipmpaipm a melnum ur pa, kupm mpa wa ungkwan paipmpaipm akilen pa yat. Ti paipmpaipm a melnum pa am pikekg kupm ungkwan ise. Ti kalkuten a pikekg kil alkopm pa, ake wa wail, pake paipmpaipm akilen pa am pikekg kupm ungkwan ise, la ikingklin kipm pake, ti Krais kil ari pa.
2CO 2:11 Kupm pikekg ungkwan paipmpaipm a melnum pa akangklinso, eng ake mpa maur paipm Satan pa lok ngkliwo pa. Ti mentepm ake wa titnowen, mentepm ariwe nikgwalpm ampen a Satan la uwiyo pa.
2CO 2:12 Atom kupm wrekg no anong Troas la laron yangkipm wor a la Krais pa, ari kupm ari wanyun no anong pa kukwa okore itna la kupm ikwap a Wailen.
2CO 2:13 Pake kupm ake ari Taitus, melnum akupmen a minto ukipma Krais pa no pa, kolpa atom nikgwalpm a kupm pa rka pilpilen la kupm a no ikorel no anong kanokg a Masetonia ti, atom kupm ukwor tu Troas pa atnuurngken kolti a kupm no.
2CO 2:14 Pake kupm uk wor Maur Wailen eng kil pa ep akarkol men melnum wokgen akwapel a Krais ti ayewo kolpa kai yela laron Krais pa, atom tu awi ariwe a ukipma kil pa. Pa kol kweikwei yaprekget wor ur a wripm awi aye kai yela atom tu aris. Kil akangklei wang ep akarkolo, men atop arkol kolpa kai yela anong ur anong ur la tu wrong ri Krais a rpma kawor men pa la kil am alok angkli tu wrong manto pa kolpa aye kai pake.
2CO 2:15 Ti aklale wrisen, men ti pa kol kweikwei yaprekget wor ur a Krais kil al wor uk Maur Wailen, atom yaprekg wor pa wripm awi aye kai yela, atom melnum a ore ya a ikga kaino anong wor pa aris, a tu melnum a ore ya a ikga kai anong paipm a wakg itne pa wa aris yat.
2CO 2:16 Tu melnum a ikga kai wakg pa, pa tu la pa yaprekg paipm a melnum a amo, pa ikga ilm tu imo pake. Wa tu melnum a ikga kaino anong wor pa, pa tu la pa yaprekg wor a rpma wor yongkyong, pa ikga iyewen kaino anong wor a rpma yongkyong. Yekei, pa kwap kalkuten, ti mla a i antiwe mpa ikwap ti?
2CO 2:17 Tu melnum watipmen tiur pa laron yangkipm a Maur Wailen pa la tu akwap marpm eng mpa tu rmpenten, tu pa ake antiwe a akwap pa. Pake minto ti ake kol tu pa. Minto ti Maur Wailen kil alkil alko yangkipm alkil pa la mpa minto laron yangkipm pa ik ipma iklale itni wulmpa akilen kai or wris nimpokgen Krais.
2CO 3:1 Kipm tiur akwonalmpen la pikekg mentekg lanakepm pa, wa mentekg wa la lanikepm nti ur la mpa kipm ikwonilmpen la minto ti melnum wor ur aki? Aki minto ti kol melnum tiur a asen tu melnum tiur ai nira wrkapm ak naki kipm ti, aki minto asen kipm ti nira wrkapm ak naki tu ai la minto ti melnum wor ur aki? Kolpa kalpis.
2CO 3:2 Kipm alkipm pa kol wrkapm a nira ela nol amintowen ti alil aye atn ak laron minto ti ak naki tu wrongkwail tu angkleikg a awi ariwe minto ti la minto ti minto melnum kolai pa.
2CO 3:3 Ti tu wrongkwail pa ariwepm worel kolti la kipm pa wrkapm a Krais kil nira ak yo talpuk pa; yotalpuk pa kol kwap a minto ti ak angklin kipm pa. Ti kil ake wa angkle yangul pa ak nira pa, kalpis, kil nira ak Maur Wor a Maur Wailen a rpma yongkyong ai. Wa kil ake wa nira ela wes pilmpalen pa, kalpis, kil nira ela kawor nol nikgwalpm a melnum.
2CO 3:4 Minto antiwe la minto alminto kolpa atnen minto or wris nampokgen Krais pa atom minto ariwe worwor la Maur Wailen pa alko titnongket angklinso atom minto akwap pa.
2CO 3:5 Minto ake akwonalmpen lala minto alminto ti antiwe ari la kuina ur kwap a minto ak pa la minto ak ariwe a titnongket a minto alminto ti ak pa. Ariwe a titnongket a minto ak ak ti pa, pa Maur Wailen kil alkil ai alko atom minto ak ak kwap pake.
2CO 3:6 Kil alkil ti pikekg antokg minto ti antiwe akwap a laron nakepm kla weten a Maur Wailen lam nampokgen mentepm pa. Kla weten a minto laron nakepm pa, pa ake nira ak krakg pa kol kla tingklaket pa, kalpis, minto laron nakepm kla weten a Maur Wor a Maur Wailen pa nira ela kawor ipma a melnum ai. Krakg a aknira kla tingklaket pa, pa antiwe antokg Maur Wor a rpma kawor melnum pa amo, pake Maur Wor a Maur Wailen a aknira kla weten pa, pa antokg melnum rpma wor yongkyong.
2CO 3:7 Kwap a laron kla tingklaket a nira ela wes pa pikekg Maur Wailen uk Moses laron naki tu wrong kin kipman la ake tu katnun pa, mpa Maur Wor a rpma kawor tu pa imo. Kwap a pikekg Maur Wailen uk Moses pa palng klalen wakget itna ikgokg a Moses pa. Atom wa tu Isrel ari ikgokg akilen pa ari klalen wakget paipm ai, kolpa atom tu ake antiwe ikatnen ikgokg akilen pa itna erkisen pa. Pake klalen wakget pa itna waiketn kolti, am kai plalng ise.
2CO 3:8 Ti kwap a minto laron Maur Wor a Maur Wailen pa kipm la la pa ake klalen wakget kolpa, kalpis. Pa klalen wakget paipm ai angen kwap a pikekg Moses laron kla tingklaket pa.
2CO 3:9 Moses pikekg laron kla tingklaket a Maur Wailen lam pa la tu wrong kin kipman a antokg paipmpaipm angketen pa ikga imo uwi wleket kai wakg. Ti kwap a pikekg kil ak pa palng klalen wakget wail. Minto laron kla weten a Maur Wailen lam pa la, tu wrong kin kipman a ukipma Sisas pa, pa tu palng ute wor itna wulmpa akilen pa. Ti kwap pa palng klalen wakget wail manten orkai ai angen kwap a pikekg Moses ak pa.
2CO 3:10 Ti pa aklale, klalen wakget a kla tingklaket a Maur Wailen pa palng wail manten, pake klalen wakget a kla weten a Maur Wailen kil lam pa, wa klalen wakget alen wail manten or kai ai angen klalen wakget a kla tingklaket a pikekg Moses laron pa, ti ari kolen klalen wakget a kla tingklaket pa ake klalen, miningket kolti.
2CO 3:11 Kla tingklaket pikekg Moses laron pa ikga itna wang tukwok kolti, pake pikekg palng nampokgen klalen wakget. Kolpa ti mentepm ariwe la kla weten a minto laron ti a ikga itni yongkyong pa, pa antiwe klalen wakget wail manten alen orai orai angen pa.
2CO 3:12 Kolpa ti minto ukipma rpma nungkwangen ariwe la klalen wail manten pa palng iklento itna yongkyong, kolpa ti minto ti ake wa ngkark eng laron klalen pa angko wunong pa, kalpis.
2CO 3:13 Wa minto ake kol Moses a pikekg klalen alen ikgokg alkil pa atom kil ak apm pa aur ikgokg alkil pa, eng tu men alpmen Isrel ake antiwe mpa ri ikgokg akilen a klalen pa, eng ntei, klalen pa ake wa kolpa itna, ari kolpa kaingkai kai miningket.
2CO 3:14 Kolpa atom nikgwalpm a tu alpmen pa wa palng kalnten kakir yapoko. Wa ak wang ti a tu angkleikg wrkapm a la kla tingklaket a pikekg Maur Wailen lam pa, pa apm pa akampriwen nol nikgwalpm atuwen pa itna kolpa itna pa. Pake kol tu ukipma Krais pa pipa, Maur Wailen kil ikga ungkwan apm pa tukwlelkg nol nikgwalpm atuwen pa.
2CO 3:15 Ti wa ak wang ti yat, tu angkleikg yangkipm titnongket a Moses pa, apm pa akampri nol nikgwalpm atuwen pa.
2CO 3:16 Pake melnum ur kil plelng ipma a ukipma Wailen pa pipa, pa ikga Maur Wailen ungkwan apm a akampri nol nikgwalpm akilen pa kai tukwlelkgentel.
2CO 3:17 Ti Wailen pa kil Maur. Maur a Wailen pa rpma kawor melnum ur pa, kil antokg melnum pa katir wirng no itna kukula wor.
2CO 3:18 Wa mentepm mla ur a ake kwei ur akaur ikgokg a mentepm ti pa, mentepm kol mrangku a klalen a Wailen pa elngkul itna mentepm ti kai akalen tu wrong kin kipman tiur ai. Wa mentepm ti klalen a kil pa ak alento kolpa aye kaingkai ak plelngen mentepm almentepm ti palng kai kolen Wailen kil alkil ai. Am Wailen kil alkil pa ak pake, kil alkil pa Maur.
2CO 4:1 Maur Wailen planto ipma arein alkil pa atom kil alko kwap kil a laron kla weten a kil lam pa, kolpa ti minto ake mpa ngkirk atom elngen kwap pa.
2CO 4:2 Minto pa ake antokg kweikwei a uk numpaipm a tu antokg ampen, wa minto ake melnum a atn laron yangkipm kansil aki plelngen yangkipm a Maur Wailen pa kai raimpe manet pa, kalpis. Minto melnum a laron yangkipm aklale angko wunong, eng mpa ik plan tu wrongkwail ri atom ikwonilmpen itni wulmpa a Maur Wailen pa itning ok wusok alntuwen la minto ti melnum kolai kolai pa.
2CO 4:3 Ti tu tiur atning yangkipm wor a minto laron Krais kil pa, tu lala pa miningket, kol minto ak apm aur yangkipm pa. Ari kolpa kalpis, apm pa akaur nol nikgwalpm a tu melnum pake, atom tu pa ikga kai wakg.
2CO 4:4 Satan maur paipm a ikgalen kanokg itna ti akampri nol nikgwalpm a tu a ake ukipma Sisas pa, atom klalen ake antiwe mpa iklen tu pa. Tu ake antiwe atning yangkipm wor a la Krais pa la kil antiwe klalen wail manten, a wa tu ake antiwe ari Krais pa la kil planten mrangkum a Maur Wailen kil alkil pa.
2CO 4:5 Minto ake laron kuina ur a la minto alminto ti pa kalpis, minto laron Krais Sisas pa la kil melnum Wailen, wa minto ti pa ukipma Sisas, kolpa atom minto aken kwap orngwatneikgen kipm pa a angklin kipm pa.
2CO 4:6 Pikekg ep pa Maur Wailen kil la, “Ti klalen pa len miningket pawo!” Kil alkil pa klalen alen ikgokg a Krais, atom mentepm ari pa, pa ak alen ipma amentepmen atom mentepm awi ariwe la pa klalen a Maur Wailen am pake.
2CO 4:7 Minto ariwe klalen a Maur Wailen a rpma kawor ipma amintowen pa kol kweiur wor wrisen alkilen, pake alupm rpma kuntuk mang ti kolti, eng mpa plan tu wrongkwail riwe la pa ake titnongket amintowen ti pa, pa titnongket wail manten a Maur Wailen ai.
2CO 4:8 Kalkuten wailet a pa a pa wlinto pake, pa ake wa ak arkuwo kai paipm pa. Wa kweikwei wailet kul akampriwo, atom minto rpma titnowen num la mpa minto ntokg kolai? Pake pa ake wa ak antokg minto ti wa elngen kwap pa.
2CO 4:9 Tu itnawento kolpa kai alko wleket, pake Maur Wailen ake atnuurngko. Tu oro paipm kalkuten elng kai rmpa kanokg pake, ake wa ur a minto pa amo.
2CO 4:10 Minto aye amo ti nakur num atn kolti, kol Sisas a pikekg kil atn atom tu orel amo pa. Eng mpa ik plan eng tu ri la Sisas pa rpma atom angklinso atom minto rpma.
2CO 4:11 Ak wang a minto akwap a Sisas rpma kanokg a ti pa, minto aye amo ti nakur num atn kolti, pa ak plan eng tu ri la Maur Wor a Sisas a rpma yongkyong pa rpma numpalk a mintowen a ikga kai imo ti.
2CO 4:12 Minto ti akangklei atn angkli num akwap kuinel la imo ikilen kipm pa, atom kipm awi yaprekg watin eng rpma yongkyong.
2CO 4:13 Minto nikgwalpm wris kol melnum a nira ela kai wrkapm a Maur Wailen pa la, “Kupm ukipma, kolpa atom ari kupm la.” Ti minto am wa ukipma kolpa yat pake, atom ari wa minto wa la.
2CO 4:14 Atnen minto ariwe la, Maur Wailen a pikekg la atom Wailen Sisas a pikekg amo pa wa wrekg, ti kil ikga wa la minto ti yat, atom minto ti ikga wa wrekg numpokgen Sisas pa. Wa kil ikga wa uwi minto ti numpokgen kipm pa iye kai itni wulmpa alkilen.
2CO 4:15 Kweikwei wrongkwail a palngto ti pa, pa minto arki eng akangklin kipm pake. Atom ipma wor a Maur Wailen plan ak angklin kipm pa wa plan ak angklin tu wrongkwailet wa plan ak angklin kolpa kolpa aye kai wail yela, eng mpa tu wrongkwailet ukwor Maur Wailen ngkit nang alkilen pa iye kolpa kai wail.
2CO 4:16 Minto akwap a Maur Wailen a wor kolpa, atom minto ake ngkark kai rpma pa. Titnongket a numpwam amintowen pa aye kinar aye kinar eng a kai plalng pake, maur wor a mintowen pa palng weten akangklei wang wris wris kolpa aye kai.
2CO 4:17 Kalkuten a wleket a minto arki ti pa kukulawen ikga itni wang tukwok waiketn kolti, pake Maur Wailen ikga ikilmpe lko klalen wail manten paipm ai klangkil or kai ai a ikga itni yongkyong iye or pa kai.
2CO 4:18 Minto ake nigkwalpm arkekgen kweikwei a minto ari ari ti pa, kalpis. Minto nikgwalpm arkekgen kuina ur a ake minto ari ari pa, apa. Minto ariwe la kuina ur a minto ari ari ti pa, ikga itni wang waiketn kolti kai plalng, kuina ur a minto ake ari ari pa, pa ikga itni yongkyong.
2CO 5:1 Minto ake ipma kalkut elngen kwap pa atnen, minto ariwe kolpa: numpalk a minto ti pa kol kimplik a ikga ela wang tukwok waiketn kolti. Wa minto wa ariwe la kol tu tikale kimplik ti pa, Maur Wailen kil numprampen wan maing a ikga eli yongkyong elnto itna kaino kitnong ai a ikga minto kaino rpme pa. Ti wan pa ake melnum a rpma kanokg ti ale pa.
2CO 5:2 Ak wang ti minto rpma kimplik kil kirkar akg arein la minto a kaino rpme wan maing almenen a ela kaino kitnong ai, pa kolen minto nowe apm maing ur.
2CO 5:3 Maur amintowen ti ikga kaino uwi num palk weten pa kolen minto nowe apm maing pa, atom ikga ake tu ur ri minto ti la minto rpma numpalpen pa.
2CO 5:4 Ei, minto a nowe apm nungkwor ti pa, minto ipma kalkut kirkar akg arein la minto karken la mla iner apm nungkwor ri ti wa rpmi numpalpen pa. Minto la iner apm nungkwor ti a ikga kai rakol paipm pa ngkli, wa uwi apm maing a rpma wor yongkyong pa wa nowe.
2CO 5:5 Am Maur Wailen kil alkil pa numprampento la minto ikga nowe apm maing pa, atom kil pikekg alko Maur Wor alkil pa ak planto waiketn pa la kil ikgam wa lko apm maing pa yat pake.
2CO 5:6 Kolpa atom minto ariwe la, minto rpma kimplik a numpalk ti pa, minto ake anti Wailen pa rpma kaino anong mreren almenen pa, apa. Pake akangklei wang minto rpma ipma kukula wor rpma pa.
2CO 5:7 Eng ntei, minto ake ari Wailen ak wulmpa pa, minto ukipma kolti rpma.
2CO 5:8 Kolpa atom minto ake ngkark, minto rpma ipma kukula wor kolti. Wa minto wasrongen paipm la itnuurng kimplik a numpalk ti rmpi ti, a minto la kaino nti Wailen rpmi kaino anong nep klung mreren almintowen ai.
2CO 5:9 Kol minto rpmi nimpokgen numpalk i ti aki, minto utnurng numpalk ti kaino anong mreren aki, minto mpa nikgwalpm rkekgen ikwap kolpa kai, eng mpa ik ntokg nikgwalpm a Wailen pa atopen.
2CO 5:10 Eng ntei, mentepm wrongkwail ikga kaino itni yangkipm wail itni Krais pa, atom kil ikga itning yangkipm a mentepm ti ikilmpe kitila kwap wor aki kwap paipm a mentepm wris wris ak ak wang a mentepm rpma nampokgen numpalk ti pa.
2CO 5:11 Minto ariwe la ikga mentepm itni yangkipm wail itni Krais pa, minto wa la pa wor wrisen eng mentepm ngkirk a rpmi orngwatneikgen Maur Wailen, kolpa atom minto akwap kolpa tilp tu wrong kin kipman pa uwi iyekul la tu ukipma Krais pa. Wa tu mpa riwe minto ti la minto ti ake melnum a kansil melnum ur, ti Maur Wailen kil ariwe minto ti pa. Wa kupm wasrongen la kipm mpam wa riwe kolpa yat pake, ti kipm itningke ok wusok alkipmen mpa lanikepm pa la minto ti akwap ute wor pa.
2CO 5:12 Mentekg ake laron mentekg almentekg ti nakepm antiur la mentekg ti mentekg melnum akwapel wor pa, eng mpa kipm uwi wor lawo pa, kalpis. Mentekg laron mentekg almentekg ti nakepm, eng mpa kipm ntiwe ngkit nang a mentekg itop ikla kwap wor a mentekg ak pa, wa eng mpa wa kipm ntiwe ik laniki tu a wam rka nol ngkat nang a tu alntu ti plan ak num enen ti kolti, la tu wrongkwail riwen la tu ti melnum wor. Pake ipma ampen a tu pa rka, pake tu ake la mpa laron pa, kalpis.
2CO 5:13 Kol kipm ari la, minto ti atn a oklala kol melnum titnowen pa, am ntei, pa minto ak eng ak ngkat nang a Maur Wailen ai. Wa kipm ari la, minto atn a oklala kol melnum wontrakole pa, pa minto ak eng ak angklin kipm pake.
2CO 5:14 Minto ari Krais kil plan ipma wor wasrongento titnongket, kolpa atom ari minto rpma kolti pa paipm, nikgwalpm almintowen pa pilpilen arkekgen la ikwap alkilen pake. Minto ukipma ariwe la, melnum wris pa kil awi wrik a mentepmen ti amo akarmpen mentepm wrongkwail, kolpa atom ipma tingklaket a mentepm wrongkwail am pikekg amo nampokgen kil ise.
2CO 5:15 Kil awi wrik a mentepm wrongkwail ti amo akarmpento, kolpa ti mentepm a pikekg awi Maur Wor weten pa, ake mpa mentepm itn a rpmi ikwap ikwonilmpen mentepm almentepm ti kolti pa, kalpis. Mentepm mpa itn a rpmi ikwap ikwonilmpen melnum a pikekg awi wrik a mentepm ti amo akarmpento plalng wa kil wa wrekg rpma.
2CO 5:16 Kolpa ti ik wang ti kai pa minto ake mpa ri ngklowe tu melnum pa kutnun nikgwalpm a melnum a kanokg ti pa, kalpis. Pa aklale, pikekg ep pa minto akwekgel Krais pa la kil melnum ur kolti, pake ak wang ti pa minto wulmpa kitnangkuwe ari Krais pa la, kil ake melnum ur kolti pa.
2CO 5:17 Kolpa ti melnum ur kil rpma kawor Krais pa, melnum pa palng weten ise. Ipma tingklaket pa am atnuurngkel ise, atom ipma a kil pa palng weten om.
2CO 5:18 Kwap wail ari kil pa am Maur Wailen kil alkil pa ak pake. Pikekg ep pa mentepm pikekg wrong manto a Maur Wailen. Pake Krais pikekg amo akarmpento pa kol kla tarmpupm wrokgen a Maur Wailen lam nampokgento, atom pa ak angketen ipma wakget akilen a itna nampokgen mentepm ti atom ak kupukel ipma akilen ai wor, mentepm ore tita om. Atom kil alko kwap ti la minto laniki tu wrong manto akilen pa la kil pikekg lam kla nampokgenten atom ak ungkwan ipma wakget akilen pa.
2CO 5:19 Kil la mpa minto lanikepm kolkil la: Maur Wailen kil alkil pa Krais a Maur Wailen rpma kawor Krais, atom kil pikekg amo akarmpen mentepm wrong kin a kipman a kanokg ti, pa kol kla tarmpupm wrokgen a kil lam nampokgento, atom pa ak angketen ipma wakget akilen itna nampokgento pa, atom ak kupukel ipma a kil ai wor, atom mentepm antiwe ore tita wom. Atom kil ake wa ak ker awiye paipmpaipm a mentepm antokg pa. Atom kil alko yangkipm kil la minto laniki tu wrongmanto akilen pa la kil pikekg lam kla nampokgenten atom ak ungkwan ipma wakget akilen a itnanten pa.
2CO 5:20 Krais ukwawo atom minto awi ok akilen ti lanaki kipm wrong kin kipman pa kol minto awi ok a Maur Wailen ai laron nakepm la: minto awi wrik a Krais ti tilpepm la, kipm ukipma la Krais amo akarmpentepm ise atom Maur Wailen palng wampil akipmen ise, ti kipm elngen a wrong manto antiwel pawo!
2CO 5:21 Krais kil rukis wor, kil ake antokg paipmpaipm ur kalpis, pake Maur Wailen elng paipmpaipm a mentepmen ti elng kai Krais pa arki. Kil arki kolen la kil pa antokg paipmpaipm pake. Kolpa eng mpa mentepm a rpma kawor Krais pa mpa palng ute wor itni wulmpa a Maur Wailen.
2CO 6:1 Minto ti pa minto akwap nampokgen Maur Wailen, ti minto la tilpepm la, ipma wor a Maur Wailen pikekg plan ak angklinsepm pa, ampur kipm atnuurng kai takote pa!
2CO 6:2 Kol minto la kil atnen a Maur Wailen kil alkil la kolkil ela wrkapm alkil pa la, “Wang a kupm pikekg alm la ngklinseitn pa, pa am pikekg kupm atning akg akitnen pa atom kupm angklinseitn ak wang pake. A wa wang a pikekg kupm alm la ikuwiyeitn iye kul eng alkupmen pa, pa am pikekg kupm akawiyeitn aye kul eng alkupmen ak wang pake.” Maur Wailen pikekg la kolpake. Kolpa ti minto la kipm itning! Wang wor a Maur Wailen alm la ngklinsepm pa, ti am wang wor am tike. A wa wang wor a kil alm la ikuwiyepm iye kai eng alkilen pa, ti am wang wor am tike.
2CO 6:3 Kweikwei wrongkwail a minto antokg pa, ake tu ari minto antokg paipm ur eng mpa ntokg melnum ur nulkwok ngko pa, atom ntokg tu elukgen kwap a minto ak ti pa, kalpis.
2CO 6:4 Ti kipm ri nikgwalpm a minto ti ak wang a kweikwei wrongkwail a palngto pa, eng mpa kipm kiporng yangkipm uwi wor lawo la minto ti melnum akwapel wor a Maur Wailen. Kweikwei wrongkwail a pikekg palngto pa pati kolkil: - minto itna titnongket arki kalkuten ak wang a tu alko wleket a wakget, - a wang tiur pa minto wokg kitnangkunento; -
2CO 6:5 a wang tiur pa minto pikekg tu ak wantengkelo, - a wang tiur pa tu awiyo aye kai rpma wan tipmining, - a wang tiur pa tu akwail ipma wakget aklewo or talpulo. - A wang tiur pa numpwam minto ti irket paipm eng minto akwap miningkranen, - a wang tiur pa minto nikgalmpo, - a wang tiur pa ikgyokgalo paipm atnen minto ake okg wor, kalpis. -
2CO 6:6 A minto rpma wriwen wor, - minto ipma krakgen nikgwalpm umpen. - Nikgwalpm a minto ti rkim kupuk wor, - minto plan ipma wor angklin mla ur. - Minto awi Maur Wor a Maur Wailen akangklinso, - a minto plan ipma wor wasrongen mla ur ak ipma aklale kolti. -
2CO 6:7 Wa minto akangklei la yangkipm aklale kolti, - wa minto akwap ak titnongket a Maur Wailen; - minto rpma atn akwap ute wor pa kolen wri a nampil aye kai wam wi, a wamung a napo kai wam wangkokg ngkaten akrapon. -
2CO 6:8 Tu tiur pa tu ngkat nang amintowen, a tu tiur pa arku nang amintowen. - Wa tu tiur pa tu kaporng yangkipm awi wor lawo, a wa tu tiur pa la elyirokgel elukgento. - Wa tu tiur pa la minto melnum a laron yangkipm kansil akarongke nikgwalpm a tu wrong kin a kipman, pake minto ake kolpa, minto a la yangkipm aklale. -
2CO 6:9 Wa tu tiur pa tu ake ariwe minto ti melnum kolai, pake tu wailet pa tu ariwe minto ti worwor la minto ti melnum wokgen akwapel a Sisas. - Minto pikekg kol am imo ise, ari kalpis, minto rpma tuwa; tu oro alko wleket, pake ake wa tu oro amo pa kalpis, minto rpma. -
2CO 6:10 Minto ipma kalkut, pake minto akangklei atopen rpma. - Minto rpma tukwok, pake wa minto angklin tu wrong watipmen ti rpma antiwe. - Minto ti ake antiwe kwei ur yek ur, pake minto wa rpma antiwe kweikwei wrongkwail. Kweikwei wrongkwail a palngto a minto lakati nakepm ti pa, pa ak laron minto alminto ti la minto melnum akwapel wor a Sisas.
2CO 6:11 Kipm Korin ti, nol nikgwalpm a kweikwei wrongkwail am minto alken prepmprepm rmpa kai wunong lanakepm am pake, kipm pa palng kolen nolwalpm amintowen.
2CO 6:12 Minto ti ake arkul ipma, minto plan ipma wor wasrongen kipm pa or wompel kolti. A kipm pa arkul ipma atom ake wa kipm plan ipma wor wasrongen minto ti pa kalpis.
2CO 6:13 Pa kupm lanakepm kolen yan ur lanaki tu warim alkilen pa la, kipm warim alkupmen. Kuina mpa minto ti plan kai kipm ti or wompel pa, iss, ake kolpa, pa kol am mentepm ik ikilmpe tita pake.
2CO 6:14 Ampur kipm kai aut tukgunakg kai wris kolpa kai nampokgen tu a ake ukipma Krais pa iyai. Katnun ya ute wor pa, a wa katnun ya raimpe pa, mpa kai or wris la kolai, pa kalpis, pa itna manman itna pa. A wa miningket a klalen pa ake mpa kai orwris, klalen pa palng pa, miningket pa am kai takwuleikgen ise, wa miningket pa palng pa, klalen pa am wa kai takwuleikgen ise.
2CO 6:15 Krais a Satan mpa tuwekg ipma wris kai or wris la kolai? Pa kalpis. Melnum a ukipma Krais a melnum a ake ukipma pa, pa mpa wa tuwekg kai ipma wris ore tita la kol a i? Pa kalpis.
2CO 6:16 Wan yalming a Maur Wailen pa mpa wa wan a ngkat nang a kweikwei kolen krimperk, a mring, a mring maur pa atnewe pake? Kolpa kalpis. Am mentepm ti pa yalming a Maur Wailen a rpma yongkyong pake. Kol a pikekg Maur Wailen kil alkil la kolkil la, “Kupm ikga Maur Wailen atuwen, a tu pa ikga wrong kin a kipman akupmen. A kupm ikga rpmi kawor tu pa kol wan anong alkupmen, a kupm kawor kul or a ntiwen itn.”
2CO 6:17 Kolpa ti mentepm mpa kutnun kitila kolen Wailen la ela wrkapm pa la, “Kipm mpa utnuurng tu pa itni watin, a ngkom nilokgen kweikwei a antokg kipm kimpilpet itna wulmpa akupmen pa, eng kipm pa kupm ikga uwiyepm eng alkupmen.
2CO 6:18 Atom kupm ti ikga palng Yan akipmen, a kipm pa ikga palng warim kin a warim kipman akupmen. Kupm Wailen a antiwe titnongket wrongkwail kupm la yangkipm pa.” Ti yangkipm a ela wrkapm a Maur Wailen pa la kolpake.
2CO 7:1 Wet kupm nira la yangkipm a Maur Wailen pikekg yapon pa, am kil yapon nampokgen mentepm tike. Kolpa ti kipm melnum wor yek yek alminto, mentepm mpa kurkuk klak kimpilp paipm na ur a antokg num a nol nikgwalpm a amen wor a mentepmen ti kimpilpet pa. Wa mentepm ilm itnen kwei ur a mentepm arkol aye kati pa kol a mentepm itni wriwen wor kolti ngkirk orngwatneikgen Maur Wailen ti inip kolpa kaino.
2CO 7:2 Pikekg minto antokg na paipm kai kipm pa atom kipm almpil yirokg lawo pa? Aki minto alok kipm kai ar, aki minto armpepm won atom awi kweikwei akipmen pa. Pa kalpis. Ti kipm lmpil won lawo o!
2CO 7:3 Kupm ake la kil la kupm arkiwepm pa. Kipm pa kol nol walpm amintowen. Kol kipm imo pipa, minto ikga wa imo yat, a kol kipm rpmi pipa, minto ikga wa rpmi yat, mentepm ikga ikilen tita.
2CO 7:4 Kupm ariwe kipm pa kimeket worwor kolpa ti kupm ake mpa ngkirk eng laron nikgwalpm na ur akupmen ti la lokepm pa, wa kupm antiwe a ngkit nang akipmen ti lakiti niki tu wrongkwail atnen yiprokgen watipmen. Minto arki kaikuten pa kipm ak titnongketelo worwor atom minto wirng no kukula awi nikgwalpm weten wor wor, kolpa atom minto tipra atopentepm wail manten.
2CO 7:5 Wa ak wang a pikekg minto no kul palng kul anong kanokg Masetonia ti pa, ake wa minto rpma eng numpyapm ur pa, kalpis. Kalkuten watipmen auraur palngto a pa a pa wli: minto awi ipma kalkut kawor ipma wunen amintowen ai, wa tu alko wleket or num enen ti.
2CO 7:6 Ari Maur Wailen pa kil ak num karkiti tu a kalkuten arkuwen kinar ploplo paipm pa, atom kil ak num karkitiwo pa ukwa Taitus pa nonto, atom ak antokg ipma amintowen pa wirng no kukula rka wor om.
2CO 7:7 Maur Wailen ake ak num karkitiwo a kolen a kil ukwa Taitus pa nonto no ti wris pa, kalpis. Wa kil wa ak num karkitiwo or ya ur kolkil yat: Taitus ari nikgwalpm a kipm ak katila wrkapm a kupm nirantepm kinar pa atom pa ak num karkiti Taitus pa. Atom kil wa aye yangkipm pa kulno lakati nako, atom pa wa ak titnongketel ipma a minto ti. Yangkipm a kil no lakati nako pa la kipm ari paipm a pikekg kipm antokg pa atom kipm akg arein paipm, wa kipm nikgwalpm arkekgen lala ipma wris nimpokgentopm a itni yirokgelopm, a nikgwalpm wail akipmen pa ak areinsopm la riwopm. Kupm atning Taitus lakati a kipm ak kolpa atom kupm atopen paipmpaipm or kai ai.
2CO 7:8 Kupm ariwe wrkapm a pikekg kupm nirantepm kinar pa, am alkepm ipma kalkuten aklale pake. Pake kupm ake wa arein eng kupm nirantepm wrkapm kolpa. Kupm arein pake kupm ari la ipma kaikuten a kipm awi pa itna wang tukwok kolti.
2CO 7:9 Kolpa atom ak wang ti pa kupm atopen. Pake kupm ake atopen atnen a kipm awi ipma kalkut pa, pa kupm atopen atnen ipma kalkut a numpaipm a kipm awi pa ak antokg kipm plelng ipma. Ti ipma kaikut a numpaipm a kipm arki kolpa, pa am katnun nikgwalpm a Maur Wailen kil wasrongen pake, a oklala a pikekg minto nirantepm ti pa ake antokgtepm paipm ur.
2CO 7:10 Kol ipma kalkut a numpaipm a mentepm arki pa katnun nikgwalpm a Maur Wailen pa, pa ak antokg eng mentepm plelng ipma, pa ya a Maur Wailen kil ak kolpa eng la ikuwiyo, kolpa ti ake mpa wa mentepm ipma kalkut eng pa. Pake ipma kalkut a numpaipm a katila nikgwalpm a kanokg ti pa, pa antiwe antokg melnum amo kai rpma anong paipm a wakg atnewe.
2CO 7:11 Ti kipm ri, ipma kalkuten a num paipm pikekg kipm arki katnun nikgwalpm a Maur Wailen pa plelngen kipm wa palng wor kolkil: - pa antokg kipm wrekg nikgwalpm arkekgen eng la or lam kalkuten pa kai imo. - Pa wa antokg kipm ipma paipm eng kipm alkipm ti, eng pikekg ake kipm ari alok melnum a antokg paipm pa. - Pa wa antokg kipm a pikekg rka won mis pa wrekg tutusraing ngkark, - pa wa antokg kipm akwonalmpen arein kuina ur a kupm pikekg lanakepm ari ake kipm ak pa. - Pa wa antokg kipm nikgwalpm arkekgen la lok melnum a antokg paipm pa atom wa lkel wleket eng paipm a kil ak pa. Kweikwei wrongkwail a kipm ak kolpa pa, pa plan la kalkuten pa ake wa itna, pa am kipm palng kukula wor ise.
2CO 7:12 Kolpa atom wrkapm a pikekg kupm nira kinarntepm pa, kupm pikekg ake la lok melnum a antokg paipm pa, a wa kupm ake wa la la melnum a kil alkel kaikuten pa, kalpis. Kupm nira la mpa kipm ik riworwor kolpa itni wulmpa a Maur Wailen eng mpa kipm wulmpa ore ri la nikgwalpm akipmen pa arkento wail rka pa.
2CO 7:13 Minto ari kolpa atom ak angklinso a minto awi ipma kukula wor om. Minto awi ipma kukula wor kai pa, wa minto wa awi atopen wail or kai ai atnen a minto ari a Taitus pa kil no pa kil atopen. Pikekg kil aye wrkapm akupmen aye kinar alkepm pa, kipm wrongkwail awi atopen ak katnun kolti, atom ipma a Taitus pa angko a wor om.
2CO 7:14 Pikekg kupm atop atnen kipm pa ak la itna wulmpa a Taitus ti la kipm pa melnum wor, atom oklala akupmen pa angko ok arke atom ake wa kipm alkopm num paipm pa, kalpis. Kol oklala wrongkwail a pikekg minto lanakepm pa aklale wrisen, am kolpa yat pake, oklala a kupm pikekg atop atnen kipm ti ak lanaki Taitus pa, pa am palng aklale katila kolpake.
2CO 7:15 Pikekg Taitus kinar ariwepm pa kipm pikekg ngkark warwar pake kipm awiyel aye kai, atom kipm wrongkwail atning nungkulkg ak katila kolen a kil lanakepm pa. Atom ak wang ti kil akwonalmpen nikgwalpm wor a pikekg kipm ak pa, nikgwalpm a kil ti arkentepm rka wail kolpa aye kai.
2CO 7:16 Ti kupm ariwe la ak wang ti pa la kipm ikgam ak katnun katila kweikwei wrongkwail kolpake, atom ipma akupmen pa atopen wail paipm.
2CO 8:1 Ti kipm melnum almintowen a mentepm ukipma Sisas, minto la lanikepm eng kipm riwe la ipma wor a Maur Wailen pa pikekg akwap wail kai tu wrong kin kipman mapming a ukipma Sisas a rka anong kanokg a Masetonia ti, atom tu ak kweikwei ak angklin tu mla ur ai a rpma tukwok pa.
2CO 8:2 Kalkuten a wleket wail wail pa palngten eng ak ari ipma atuwen, pake tu atopen wail paipm. Tu rpma tukwok paipm wrisen, pake ipma atuwen pa pikekg wrekg atopen lailai paipm ai atom tu palng kolen tu melnum a antiwe kweikwei atom tu wam mlaset uk kweikwei tu.
2CO 8:3 Kuina ur tu pikekg antiwe pa tu uk, wa tu wa uk klangkil pa, pa tu alntu akwon angko ak kolti. Kupm pikekg nungkulkg a wulmpa, atom ari kupm la pa.
2CO 8:4 Wa tu pikekg asento erkisen la minto lken wor eng tu nti tu wrong kin kipman a ukipma Sisas a rka anong tiur ai ikwap kolpa eng ikngklin tu wrong kin a kipman a Maur Wailen a rka kinar anong kanokg a Sutia wai.
2CO 8:5 Minto pikekg akwonalmpen la kol a tu uk kweikwei pa kolti. Ari ake wa tu uk kweikwei pa wris pa, wa tu wa uk tu alntu ti kai Wailen pa ep plalng pipa, tu wa uk tu alntu ti kul eng minto ti katila nikgwalpm a Maur Wailen pa.
2CO 8:6 Kol pikekg Taitus itna ep awi kipm eng kipm ngkaten takwem marpm kweikwei pa, kolpa atom minto tilp Taitus pa ikga yaper kinar la eng mpa kipm plan nikgwalpm wor a wasrongen eng ngklin tu Suta pa, pa kipm ikwap wor kolpa kai iro yiprokg ai.
2CO 8:7 Aklale, kipm pa wor wrisen eng kweikwei wrongkwail. Kipm wor eng kweikwei kolkil: kipm ukipma itna titnongket, kipm melnum a oklala wor, kipm ipma krakgen wontrakole, wa kipm nikgwalpm arkekgen akwap wor. Minto plan ipma wor wasrongen kipm pa, pa wa ak ngkat ipmawel kipm pa, atom kipm pa plan ipma wor wasrongen minto ti. Kolpa ti kipm plan ipma wor ikwap wor kolpa ikngklin tu Suta a rpma tukwok pa kolpa iye kai o!
2CO 8:8 Ti ake kupm tirpmingentepm la kipm ik pa. Palpa kupm wet lakati nakepm tu Masetonia ti a nikgwalpm arkekgen angklin tu a rpma tukwok pa, atom kupm ak tu pa ak lanakepm pa eng la ik ri nikgwalpm a kipm plan ipma wor wasrongen mla ur aklale kolpa, aki kalpis.
2CO 8:9 Kipm ariwe ipma wor a Wailen Sisas Krais a mentepmen pikekg plan ak angklinsepm pa pati kil alkil pa pikekg rpma antiwe kweikwei wrongkwail, pake kil ari arein kipm pa atom kil wa kulnar rpma tukwok, ti a kil rpma tukwok pa la ikngklin kipm ti rpmi ntiwe tike.
2CO 8:10 Kupm la lkepm nikgwalpm ur kolkil a marpm a kweikwei a kipm takwem eng ak angklin tu pa: kol a wor eng kipm ik kuina ur a pikekg kipm ngkaten ep ak ak wring ai pa kai plalng pen, pa ikga wa ik ngklin kipm pa yat. Pa ake pikekg kipm ak kolti pa, kalpis, pa pikekg kipm alupm nikgwalpm wor atopen kolpa atom kipm ak pa.
2CO 8:11 Kipm ikwap a kipm pikekg ak kai itna pa, kai iro yiprokg! Nikgwalpm a kipm pikekg rka titnongket la ik pa, pa am kipm nikgwalpm rkekgen ik pa kolpa iye kai plalng o! Kipm wris wris pa, kipm uk kitila kolen kuina ur a kipm antiwe pa.
2CO 8:12 Kol kipm nikgwalpm rkekgen la uk kweikwei Maur Wailen pa, kipm uk kuina ur kol a kipm antiwe pawo! Maur Wailen ake uk paipm kuina ur a melnum ake antiwe uk irir kol tu tiur a uk ai pa, kolpa kalpis. Kil kaporng yangkipm kuina ur a kipm antiwe uk pa.
2CO 8:13 Kupm ake lala tu ai rpmi uwi wunongket or wompel kai kipm ti, atom mpa ikuke kipm ti iken kwap eng ik ngklin tu ai pa. Kolpa kalpis, mpa kipm ik kolpa ik ngklin tita ti ti.
2CO 8:14 Kupm lala ak wang ti a kipm rpma antiwe pa, kipm ngklin kuina ur a kipm antiwe pa ik ngklin tu a rpma tukwok ai. Ik wang ur a kipm ti rpmi tukwok a wa tu ai rki ntiwe pa, ikga wa tu ai wa ngklinsepm pa. Kolpa kipm ngklin ikilmpe tita titi kolpa pa wor pake.
2CO 8:15 Kol nira ela kai wrkapm a Maur Wailen pa la okipma mana pa la kolkil la, “Melnum a kil takwem kweikwei watipmen pa, ake wa kil aye wailet klangkil kolai pa, wa melnum a kil takwem wusoken pa, ake wa kil tukwok pa, kalpis.”
2CO 8:16 Maur Wailen ngkat nikgwalpmel Taitus pa kil wa nikgwalpm arkekgen wasrongen la ikwap eng ik ngklin kipm pa kitila kolen nikgwalpm amintowen ti, kolpa atom minto ukwor Maur Wailen atopen rpma ti.
2CO 8:17 Kil wrekg katnun nikgwalpm a pikekg kupm tilpel lanakel pa, pake nikgwalpm wail a kil alkil pa am rka ise la kil la kinar ngklinsepm pake.
2CO 8:18 Wa minto la ukwa melnum almintowen ur a mentepm ukipma Krais pa wa ntiwel kinar. Melnum pa tu wrongkwail kin a kipman mapming a Maur Wailen yela ti kaporng yangkipm la kil melnum akwapel wor a laron yangkipm wor a la Krais pa.
2CO 8:19 Wa yat, kil pa pikekg tu wrong kin kipman mapming a Maur Wailen tu ngkatel la, ikga kil ntiwo iye marpm a kweikwei a mentepm takwem ti iye kinar anong wail Serusalem eng ik plan nikgwalpm wor amentepmen ti ik ngklin tu pa, a wa la ik ngkit nang a Wailen.
2CO 8:20 Melnum a pikekg tu takwei pa ikga kil ikupewo iye kweikwei pa iye kinar eng ake mpa melnum ur rkiwo la minto aklampe kweikwei wailet wor wor a pikekg mentepm takwem ti atom la men ikgalen ti.
2CO 8:21 Nikgwalpm wail a minto ti rka la ik kweikwei ti kai ute wor. Ake la minto ik itni wulmpa a Maur Wailen wris ti kolti pa, minto wa la ik itni wulmpa a melnum ti yat.
2CO 8:22 Kupm wa la lanikepm yat la melnum almentepmen ur kil a mentepm ukipma Krais pa ikga minto wa ukwa ikupe tuwekg pa kinar. Melnum yekwris anangket a men ariwewel worwor la kil melnum akangklei wang nikgwalpm arkekgen eng kweikwei wrongkwail. Kil alupmen a ukipma titnongket kipm pa kolpa atom kil nikgwalpm arkekgen paipm la kinar nti kipm ikwap pa.
2CO 8:23 Ti kol Taitus pa kil melnum wor a kupm a mentekg akwap orwris eng ak angklinsepm. A kol melnum wekg a ikga ntiwel kinar pa, tuwekg melnum wokgen a tu wrong kin a kipman mapming aripm ur a Maur Wailen a rka yela tatu ti ukwawen. Tuwekg pa akwap kolpa atom tu ngkat nang a Krais.
2CO 8:24 Kolpa ti ikga ik wang a tunteng kinar palngtepm pa, kipm plan ipma wor wasrongen tunteng pa titnongket eng mpa plan tu wrongkwail kin a kipman mapming a ukipma Maur Wailen pa tu riwe la la oklala a pikekg minto atop ngkat nang a kipm pa akla pa, pa tu ri la pa aklale.
2CO 9:1 Ya a angklin tu wrong kin kipman ute wor a Maur Wailen pa am kipm am ariwe ise, ti mpa wa kupm wa nira kuina ur a i wa lanikepm.
2CO 9:2 Kol kupm ti ariwe la kipm pa nikgwalpm arkekgen la ngklin tu men Suta pa, atom kupm am pikekg atop ak kipm pa ak lanaki wrong kin kipman a itna anong kanokg a Masetonia ti, atom kupm lanaken la, kipm anong kanokg a Akaia pa am pikekg nikgwalpm arkekgen la tukwem marpm kweikwei erpma la uk tu pa ak wring kai ise. Ak wang a tu Masetonia ti atning la kipm pa nikgwalpm arkekgen wrekg la ikwap pa atom ak antokg tu watipmen pa wa wrekg nikgwalpm arkekgen lailai la ikwap pa atom tu ak.
2CO 9:3 Pikekg kupm atop ak kipm pa ak lanaki tu nikgwalpm a kipm atop lailai la ik kolpa, kolpa ti kupm la ukwa tunteng ti kinar ngklinsepm eng kipm nimprampen marpm kweikwei pa elngtitni. Eng ake mpa oklala a pikekg kupm ak kipm pa akla pa kai aipiken pa.
2CO 9:4 Ti kol tu Masetonia tiur ti ntiwopm kutnun tunteng pa kinar riwepm pa la kol ake kipm nimprampen marpm kweikwei pa ep elngtitna pa, kupm ti ikga uwi numpaipm pake, kipm pa ikga wa uwi numpaipm wail or kai ai.
2CO 9:5 Kolpa atom kupm akwonalmpen la wor eng kupm ukwa tunteng pa ep kinar ri la eng kipm nimprampen marpm a kweikwei a pikekg kipm lawen ep ak ai la ikga uk pa. Kweikwei pa kipm ri la eng kipm numprampen wailet ep elngkitni wo! Eng ikga tu ntiwopm kinar pa, ikga tu ri kipm atopen atom kipm uk kweikwei pa, atom ake mpa kipm la men ti tirpmingentepm atom kipm uk pa.
2CO 9:6 Ti kipm riwe kil: melnum ur a alin wusoken pa, kil wa angketuwai wusoken. Pake melnum ur a kil alin watipmen pa, kil wa angketuwai wailet.
2CO 9:7 Kipm wris wris pa mpa kipm ikwonilmpen la kipm la uk kolai pa, kipm uk kitila kol a kipm akwonalmpen pa. Kipm uk pa, ake mpa kipm uk nampokgen nikgwalpm a langkinen pa aki akwonalmpen la tu tirpmingentepm pa, ampur kipm uk. Maur Wailen pa kil plan ipma wor wasrongen melnum a kil atopen uk kweikwei.
2CO 9:8 Maur Wailen antiwe plan ipma wor alkepm kweikwei wor wor wailet a worampei, eng mpa kipm rpmi ntiwe wor kweikwei wrongkwail wor wor ikngklei wang, eng mpa kipm ntiwe ik ik kwap wor wor wrongkwail tiur ai.
2CO 9:9 Melnum a kil uk kweikwei wailet ak angklin tu melnum a rpma tukwok pa, kil kol wrkapm a Maur Wailen pa la kolkil la, “Kil aro angkli kweikwei ak angklin tu mla ur a rpma tukwok pa, pa kol kil melnum wam mlaset. Nikgwalpm ute wor a kil ak kolpa pa Maur Wailen ikga won rpme rpmi iye kolpa kai pake.”
2CO 9:10 Maur Wailen kil yiprokgen a alko okipma eng mentepm alin a wa alko okipma eng mentepm antokg al pa. Am kil pa ikga wa ntokg kwei nimong wris ti a kipm alin kai wring ti pa um wailet, atom ikga kipm lin kwei nimong wekg kai wring ai pa ikga um wailet a wailet kolpa iye kai. Ikga kil wa ntokg okipma a kipm alin pa tukgun kakir atom ikga kipm ngkon okipma wailet a wailet kolpa iye kai. Okipma pa kolen nikgwalpm ute wor a kipm alupmen eng ak angklin tu pa. Nikgwalpm a kipm ak kolpa pa, Maur Wailen kil ikga am ngklinsepm wail a wail kolpa iye kai pake.
2CO 9:11 Kolpa ti Maur Wailen kil alkepm kweikwei wailet a worampei atom kipm antiwe. Kolpa atom kipm antiwe uk kweikwei wailet a worampei pa wa ik ngklin tu tiur ai. Kipm pa mitaket wor a uk kweikwei tu a rka tukwok pa atom ikga men uwi kweikwei pa iye kinar mpreing lken pa, tu pa ikga ukwor Maur Wailen.
2CO 9:12 Kol kwap a kipm ak kolpa eng ak angklin tu wrong kin a kipman ute wor a Maur Wailen a rpma tukwok pa, pa ake wa ak angklin kol a tu tukwok ti kolti pa, tu ak kuina ur a tu antiwe kolpa pa, tu ukwor Maur Wailen, pa kwei ur wail itna ep pake.
2CO 9:13 Kwap a kipm ak eng ak angklin tu kolpa pa, pa plan nikgwalpm wor akipmen angko wunong eng tu wrongkwail ari la kipm ukipma aklale yangkipm wor a la Krais pa atom kipm katnun katila. Tu ari a kipm mitaket wam mlaset alken kweikwei a wa uk tu tiur ai yat, kolpa atom tu ukwor ngkat nang a Maur Wailen atnen pa.
2CO 9:14 Ipma wor a Maur Wailen pa akwap wail manten kai kipm pa atom kipm akwap angklin tu kolpa. Kolpa atom nikgwalpm wail a tu ti arken kipm pa, atom tu oklala naki naki Maur Wailen ti eng la ik ngklinsepm.
2CO 9:15 Mpa wa mentepm wa la kolai eng kweikwei wor wor a Maur Wailen kil alko kalpmlel kolpa, kalpis, mpa mentepm lkel wor kolti.
2CO 10:1 Ti tiur a kipm pa lala, ak wang a kupm antiwepm rpma pa, kupm malokgen. Wa tu lala, ak wang a kupm atnuurngkepm kai rpma watin ai pa, kupm nirantepm oklala ti pa, kupm lawepm minsrang kalnten. Pake kupm Pol ti pa kupm katnun nikgwalpm wor a Krais kil pikekg arku kil alkil a atn meen. Kolpa ti kupm lanakepm la kipm ikwonilmpen yangkipm a kupm la lanikepm kil tulpulng lok nikgwalpm a kolpa.
2CO 10:2 A wa tu tiur akipmen pa wa akwonalmpen la minto ti atn a rpma kolen tu melnum a rpma kanokg ti antokg pa. Kupm lanakepm la kupm ikga kinarntepm pa, kupm ikgake ngkit ok kalkut eng lawepm pa, kupm ikga la minsrang kolti kai tu tiur a arkuwopm kolpa. Pake kupm lanakepm la kol kupm kinar pa, ake mpa kipm ntokg kupm ipma wakget tirpmingen kupm ti eng kupm lawepm minsrang pa.
2CO 10:3 Pa aklale, minto rpma kanokg a ti pake, minto ake rapon irir kolen tu melnum a rpma kanokg ti rapon pa, kalpis.
2CO 10:4 Minto ti rapon ak wri wamung manet, ake irir kolen a tu melnum a rpma kanokg ti ak rapon pa. Minto ti ak wri wamung nokget a Maur Wailen a antiwe titnongket kalnten wail manten antiwe a alm ungkwan tikale wrik mringket a wrongmanto arpme pa.
2CO 10:5 Minto tikale nikgwalpm raimpe paipm a ak kol yipmingki ak angketen ya a tu a la uwi riwe Maur Wailen pa. A wa minto alok yapowen nikgwalpm a tu melnum pa aye kai wris orngwatneikgen kutnun Krais ti kolti.
2CO 10:6 Ti kol minto ri la kipm kutnun yangkipm a minto la pa kimeket riworwor pipa, minto ngkat wrong numprampen rka la uk wleket tu melnum a talpulng yangkipm pa.
2CO 10:7 Am kipm ari en ti kalpmen, kipm ri kawor wunen ai! Kol melnum ur kil alkil titnongket la aklale la kil am ukipma katnun Krais pake, pa kol a wa kil ikwonilmpen riwe la, minto ti am wa ukipma katnun Krais kol kil pake.
2CO 10:8 Pikekg Wailen kil alko nang wailen la minto ik titnongketel kipm pa eng kipm ukipma itni titnongket pa, ake la minto angkon nepmel kipm pa eng kipm ngko rmpi kanokg pa rpmi pa. Kolpa ti kol kupm ngkit nang wailen a mintowen ti pa, pa mpa wantei, kupm ake antiwe mpa wa numpaipm eng pa.
2CO 10:9 Kupm ake lala mpa kipm ikwonilmpen la kupm ti kupm melnum a nira wrkapm eng ayewepm ngkark pa, kalpis.
2CO 10:10 Tu tiur pa la kupm ti kolkil la, oklala a kupm nira pa kai kalkuten mimisen a antiwe titnongket. Pake ak wang a kupm antiwepm rpma oklala pa, kupm ti ake titnongket, a wa lala, oklala akupmen ti kukula kalpmlel kolti.
2CO 10:11 Ti kipm melnum a antokg oklala kolpa kol a kipm riwe la, minto rpma watin ti aki kol minto kinar riwepm pa, pa ake mpa wa manet kolai, pa mpam minto plan irir kolen wrkapm a minto nirantepm nirantepm pake.
2CO 10:12 Ei aklale, minto ti ake antiwe mpa numput minto alminto ti a ri ntin minto alminto ti numpokgen tu mla ur a laron tu alntu la tu melnum wor pa. Tu antin tu alntu nampokgen tu alntu, wa tu ari tu alntu nampokgen tu alntu, kolpa ti tu pa titnowen!
2CO 10:13 Ti kol minto ti pa, minto ake ngkat nang a minto alminto ti kaino wail angen nang kwap kolen pikekg Maur Wailen kil ari antin atom alko pa, kalpis. Kil ari antin atom am awi kipm Korin pa aye kawor wunen pake, la ikga minto ikwap kai kinar elngen kinar ngko kinar kipm pake.
2CO 10:14 Ari kipm tiur pa lawo la kirng kowak a pikekg Maur Wailen elngtitna la mentekg ikga ikwap kinar elngen itni pa, la mentekg akwap kolpa kinar klangkil kil kinar awi kipm pa. Ari ake wa kolpa. Maur Wailen pikekg alko kwap ti, atom ake pikekg tu ur ai, am pikekg mentekg ti kolti ep awi yangkipm wor a la Krais pa aye kinar lanakepm, atom am wa mentekg akwap katnun a pikekg mentekg ak ep pa kinar itna wrik pake.
2CO 10:15 Atom ti minto ti ake wa ngkat nang amintowen eng kwap a tu tiur pa ak kinar klangkil kirng kowak a Maur Wailen kil elngkitna la minto ik kinar elngen pa. Wa minto ukipma nungkwangen la mpa kipm ukipma itni titnongket kolpa kai pa, minto ariwe la kwap a pikekg minto ak kinar kuin akipmen pa palng wail ak kolpa aye kai aye kai pake.
2CO 10:16 A wa minto ikga ntiwe kinar laron yangkipm wor a la Krais pa kinar anong kanokg tiur a ela yirokg eng kipm pa. Minto ake la kinar ikwap pa or wrikel kinar wrik ur a pikekg tu tiur ep kinar akwap pa, atom minto itop ikwap a pikekg tu ak ep pa ik la pa, kalpis.
2CO 10:17 Kol wrkapm a Maur Wailen pa la kolkil la, “Kol melnum ur la itop ik kuina ur ti ik la pilpa, kil itop ik Wailen pa ik la pake!”
2CO 10:18 Kolpa ti kol melnum ur kil alkil laron kil alkil pa la kil melnum wor pa, pa pati ake mpa kipm kiporng yangkipm uwi wor lawel pa, kalpis. Pake kol Wailen pa kil laron melnum ur pa la kil melnum wor pa, pa pati kol a kipm kiporng yangkipm uwi wor la melnum pake.
2CO 11:1 Ti kol a kipm itning oklala paipm titno ur a kupm a la kil! Ari kol kipm am atopen oklala kolpake atom kipm mpa itning pa.
2CO 11:2 Nikgwalpm a kupm ti kolen a Maur Wailen, Maur Wailen pa kil langkin kipm ti eng alkilen kolti. Kipm pa kol kin kunakul walmpopm wris itna pa, atom kupm yapon yangkipm nampokgen Maur Wailen pa lala uk kipm ti kai Krais wris pa kolti uwi iye kolen kin alkilen.
2CO 11:3 Atom kipm am pikekg nikgwalpm wriwen wor arken Krais pa kolti, atom ake kipm pikekg atn anti kipman ur pa, kalpis. Pake ak wang ti kupm ipma kalkut eng mpa wa tu ur lmpil nikgwalpmel kipm ti kai manet atom kipm utnuurng Krais pa nikgwalpm rken tu ur manet ai. Kolen pikekg ul ningkail Ip pa, atom kil anti katnun nikgwalpm ariwe paipm a ul pa.
2CO 11:4 Kupm ipma kaikut ngkark atnen tu melnum tiur pa wli laron Sisas ur manet lanakepm, ake wa Sisas wris a minto laron nakepm pa. Am wa kolpa atom kipm wa awi maur wor ur manet, ake wa Maur Wor a pikekg kipm awi ep pa. A wa kipm atning tu laron yangkipm wrkapm ur manet la pa yangkipm wor a la Sisas, ake wa yangkipm wrkapm wor a pikekg minto laron nakepm pa. Kupm ariwe la kipm am atopen tu melnum paipm kolpake. Kol tu lmpil nikgwalpmel kipm pa kolpa atom, kipm mpa inti kutnun kolti.
2CO 11:5 Ti kipm itning, kupm akwonalmpen la kupm ti ake wa kai arkekg tu melnum wokgen akwapel “wailen wor wor” akipmen pa!
2CO 11:6 Kupm ti ake tu kalingtopm eng mpa kupm laron yangkipm ti riworwor, pake kupm ti wa wontrakole wor ariwe angen tu pa. Minto pikekg plantepm a lanakepm kimek kimek kweikwei wrongkwail pa ariworwor klalen atom kipm ariwe pa.
2CO 11:7 Wa kipm ariwe la kupm ake pikekg awi marpm ur kai kipm pa eng akalmpe yangkipm wor a Maur Wailen a pikekg kupm laron nakepm pa, kalpis. Kupm pikekg arku kupm alkupm ti eng la ngkit kipm pa iye kaino kwa pake. Aki pa kupm antokg paipm?
2CO 11:8 Kupm pikekg awi marpm kai tu wrong kin a kipman mapming tiur manet a Maur Wailen ai, pa kolen kupm ak ikgwampel marpm a tu pa eng ak angklin kupm ti eng kupm akwap eng ak angklin kipm ti.
2CO 11:9 Wa ak wang a pikekg kupm antiwepm rpma pa, kupm rpma tukwok pa, tu melnum alkupm a mentepm ukipma Krais pa a kinar Masetonia pa no pa, tu pikekg aye kweikwei a kupm tukwok pa no ak angklinsopm. Kupm ake pikekg akwen kipm pa la kipm ngklinsopm pa, eng mpa lkepm kalkuten pa. Kupm pikekg angkom nalokgen ep ai eng ake mpa kupm ikuke kipm pa eng lkepm kaikuten, a ik wang ti, a ikga kolpa iye kai.
2CO 11:10 Kupm naren Krais, yiprokgen a yangkipm aklale ti yela anong kanokg Akaia ti pa ake antiwe melnum ur yipo ok akupmen ti eng ake mpa kupm ngkit nang akupmen ti itnen nikgwalpm a kupm akwap kalpmilel angklinsepm kolpa.
2CO 11:11 Ti kol kupm antokg kolpa la pa ake kupm plan ipma wor wasrongentepm? A'a, Maur Wailen kil ariwe la kupm plan ipma wor wasrongentepm pa.
2CO 11:12 Ti kol kupm ti ikgam ikwap kalpmilel ngklinsepm kol a kupm ak itna tike, eng ik ngketen ya a tu melnum wokgen akwapel tiur a Krais a ngkat akor ya la ngkit nang alntu la tu akwap irir kolen a minto ti ak pa.
2CO 11:13 Tu pa ake tu melnum wokgen akwapel aklale a Krais pa, pa tu melnum a akwap kansil pake, tu plan ak num enen ti kolti la tu melnum wokgen akwapel wor a Krais.
2CO 11:14 Ti ampur kipm wrekg paipm atnen pa, wang tiur pa Satan kil alkil pa angket ake maur akwapel klalen wor ur a Maur Wailen pa.
2CO 11:15 Am wa kolpa yat pake, ampur kipm wrekg paipm atnen tu melnum alkil a akwap orngwatneikgen kil pa. Tu pa yat plan ak num enen ti lala tu melnum akwapel wor a katnun nikgwalpm ute wor. Kutnukg pa ikga tu uwi paipm ikilmpe kwap a tu ak pa.
2CO 11:16 Ti kol kupm la wa la nti ur la, ake mpa melnum ur la kupm ti la titnowen pa. Pake kol kipm lala kupm ti titnowen pa, pa mpa wantei, kipm uwi wor lkopm lala kupm am titnowen pake, eng mpa kupm ntiwe wa ngkit nang akupmen ti waiketnketn yat.
2CO 11:17 Kuina ur lala kupm lala pa, ake kupm katnun nikgwalpm wasrongen a Wailen pa, kalpis. Palpa kupm alkupm ti oklala kolen la melnum titnowen ti kolti, atom kupm ngkat nang akupmen ti ketnketn.
2CO 11:18 Tu wrongkwailet tu antokg kuina ur wor a kanokg ti pa atom tu ngkat nang alntuwen pake. Ti kupm ti mpam wa kolpake, kupm mpa wa ngkit nang akupmen ti yat.
2CO 11:19 Ti kipm alkipm pa melnum wontrakole worwor pake, atom kipm wa ari wulmpa melnum titnowen paipm a kolpa la tu pa kilingtepm titno alntu pake!
2CO 11:20 Kol tu uwiyepm iye kai ikenten kwap kalpmlel, a wa kol tu kiken kweikwei akipmen ti kai nar wang itnen tu pa, a wa tu ningkailepm aye kai ngkowe lem a tu ale pa, a wa tu ngkat tu alntu ti itna wailen atom arkuwepm, a wa tu rkawepm kai tangkwei ti, pake ake wa kipm karken, kipm am aye terng itna kolpa la tu ntokgtepm kolpake!
2CO 11:21 Wai, kol a minto ti ik kol a tu ak pake, pake kupm ti wa numpaipm eng minto ti ake wa wrongen antiwe titnongket eng kol a ik kolpa. Ti kol tu pa wrongen atom ngkat nang alntu ti pa, mpa wa kupm wa la oklala titnowen ur kolkil la, kupm wa wrongen antiwe a wa ngkat nang akupmen ti yat.
2CO 11:22 Ti tu pa la tu om a Ipru? Ti kupm ti yat, kupm am a om a Ipru pake. Aki tu pa la tu Isrel? Ti kupm ti yat, kupm am a Isrel pa yat pake. Aki tu pa la tu walwalpopm yaru marpmeng a Apraam? Ti wa kupm ti yat, kupm walwalpopm yaru marpmeng a Apraam pa yat pake.
2CO 11:23 Aki tu pa la tu melnum akwapel a Krais pake? Kupm ti pa wa angen tu pa wa orkai ai. Palpa kupm oklala kolen melnum titnowen ur. Kupm akwap timplowis orkai ai, wa tu awiyopm aye kai rpma wan tipmining anti watipmen paipm, tu akopm wanteng paipm yikakatnen or kaingkai ai, wa anti watipmen kupm kol a imo.
2CO 11:24 Tu men Suta pa tu akwantengkel kupm ti wanteng kamel wris tuwek wampwam, yikakwomis yikakwompwikgwikg. Tu akopm wanteng kolpa anti wang wampwomis.
2CO 11:25 A tu Rom pa akewopm ak purkum anti wraur, a tu men Suta pa tu ak weselopm anti wris la kol a kupm imo, wa wan unokgen manet manet a kupm arpme atn atn pa, paipm anti wraur, atom wa wris ur pa tapor kai paipm tikla kai manman atom kupm ngkark tipra elng kai lkgaang ela unokg kwa wai mining wris a ran wris.
2CO 11:26 Kupm atn kai pa kai pa ya wrik a worampei, kupm pikekg kol a uwi paipm itnen a angket u kop a el, a wa kupm kol a uwi paipm itnen tu melnum melkget, a wa kupm kol a uwi paipm itnen tu men almen ti, a wa kupm kol a uwi paipm itnen tu kamel mis ai, a wa kol a kupm uwi paipm itni tutu anong wail wail ti, a wa kol a kupm uwi paipm ngko tutu yaya wa mpang kalpmlel ti, a wa kol a kupm uwi paipm ngko kai unokg ai, a wa kol a kupm uwi paipm kai wam a tu a kansil ak num enen ti la tu melnum almentepm a mentepm ukipma Krais.
2CO 11:27 Ti kupm pikekg akwap wail wail amowen num atnen atnen, ake kupm okg wor, u waketopm a nikgalmpopm, a wang tiur pa ake kupm al okipma, wa wropukopm, a wa kupm tukwok eng apm nung a nowe ti.
2CO 11:28 Kalkuten a kupm la pa kolpake. Wa akangklei wang kupm akwonalmpen la ikglen tu wrong kin a kipman mapming wrongkwail a ukipma Maur Wailen yela pa riworwor kolpa atom pa kolen kalkut wail manten ur a arkuwopm akangklei wang yat pake.
2CO 11:29 Melnum ur titnongket kalpisen pa, kupm wa titnongket kalpisen yat. Melnum ur antokg melnum ur angko kai paipmpaipm pa, pa kil antokg kupm ti kol wakg a naruk itna kawor nol wunen akupmen ti.
2CO 11:30 Ti ari kolen ya ur manet kalpis, ti mpa kupm ngkit nang akupmen itopen ik la itnen a kupm titnongket kalpisen pa. Kupm mpa lakiti kalkuten a pikekg palngtopm la kol a ik rkuwopm pa, atom kupm mpa ngkit nang akupmen ti itnen pa.
2CO 11:31 Kupm naren Maur Wailen Yan a Wailen Sisas a mentepm ngkat nang akilen akangklei wang pa, la ake kupm kansil pa, kalpis.
2CO 11:32 Kol pikekg kupm rpma anong Tamaskus pa, melnum mring man a akwap orngwatneikg melnum tukgunakg Aretas pa elng tu wantengkwang alkil pa itna yipmingki yun a anong wail pa la kol a rkul yipowopm.
2CO 11:33 Ari tu a mentepm ukipma Sisas pa tu la kupm kawor okg rmpa rkwa wail ur pa atom tu alekg kupm ti or wanyun wasek ur kai kawor elng nar yipmingki yamping ai kai kinar kanokg ai, atom kupm ngkark kai takwlelkgen mring man pa.
2CO 12:1 Ti yangkipm akupmen ti ake antiwe a angklin mla ur, pake ya kalpis, ti mpa kupm ngkit nang akupmen ti kolpa iye kai. Ti kupm mpa itop ik la kweikwei ampen a pikekg Wailen plantopm angko wunong pa, a wa kweikwei a kupm ari kolen ak okgwangket pa.
2CO 12:2 Ti kupm ariwe melnum wris ur a ukipma Krais pa, wring wampwam yikak wikgwikg kai ai, pa pikekg Maur Wailen awiyel aye kaino kitnong walop wraur ai. Ake kupm ariwe la melnum pa kil atnuurng yokluk ti rmpa a maur wusok alkil kolti kaino, aki melnum kil alkil nampokgen numpalk ti kaino aki, mpa mla riwe, Maur Wailen kil alkil pa ariwe pake.
2CO 12:3 Kupm ariwe la Maur Wailen awi melnum pa aye kaino pake. Kil awiyel nampokgen numpalk ti aye kaino aki kil awi Maur Wor kolti aye kaino, a yokluk ti rmpa ti. Mla ariwe, Maur Wailen kil alkil pa ariwe pake.
2CO 12:4 Kupm ariwe la kil awiyel aye kaino anong wor. Kil kaino anong pa, kil atning oklala ampen ur a nakel. Oklala pa wail mimisen walopmen kinar ai kaino ai a melnum ake ntiwe lakiti pa, wa kil ake mpa laron pa, pa mpa rpma kil alkil ti kolti.
2CO 12:5 Kupm ake mpa itopen ngkit nang a kupm alkupm ti, pake kupm antiwe atopen ngkat nang a melnum a kolpake. Kupm antiwe ngkat nang a kupm alkupm ti atnen kwei ur wris kil pa pati: a kupm titnongket kalpisen.
2CO 12:6 Pikekg kupm ari kolen okgwangket pa kweikwei wor wor a Maur Wailen plantopm itna kaino anong wor pa, atom ti kol kupm ti la ngkit nang alkupmen ti itop ik la pa pipa, pa mpa wa ntei, pa ake kol la kupm titnowen atom kupm itop ik la pa, kalpis, pa kupm la pikekg palngtopm aklale wrisen. Kupm la yangkipm aklale. Pake kupm ake la mpa ngkit nang akupmen eng mpa kipm ur la kupm ti la kupm melnum wailen kolpa. Kupm wasrongen la kol a kipm ri kuina ur a kupm plan ti, a wa itning kuina ur a kupm la ti, atom mpa kipm ikwonilmpen kupm ti la kupm melnum kolpake.
2CO 12:7 Maur Wailen plantopm kweikwei wor wor wailet ampen pa angen or kai ai angko wunong, a ti kol a kupm itop ngkit nang akupmen ti ik la pa. Pake kil ak ikningkil ikyom ur arkewopm itna lan, eng la ake mpa kupm ngkit nang akupmen ti itop itnen pa. Pa maur akwapel ur a Satan pa angkom ele rkgantiwopm raingen kolpa itna, eng la ake mpa kupm ngkit nang akupmen ti itop itnen pa.
2CO 12:8 Atom kupm oklala naki Wailen pa titnongket anti wraur, la kil ungkwan kaikuten pa kai tukwleikgtopm.
2CO 12:9 Ari wa kil akalmpentopm la, “Kupm planteitn ipma wor akupmen a ikgalenteitn pa, a pake. Eng ntei, titnongket a kupm ti pa am akwap titnongket ak wang a melnum a titnongket kalpisen pake.” Maur Wailen lanakopm kolpa, atom kupm ake la itop ngkit nang akupmen ti ik la kwei ur manet pa. Kupm atop ngkat nang akupmen ak la wris ti kolti a kupm titnongket kalpisen pa, eng mpa kupm ri titnongket a Krais pa ikwap wail kul kupm ti.
2CO 12:10 Kupm akwap a Krais pa kolpa atom tu anelopm melkg paipm paipm, titnongket a kupm ti plalng, kupm rpma paipm, tu alkopm wleket, kupm arki kaikuten wonet wonet. Pake kaikuten kolpa palngtopm pa kupm rpma wor atopen kolti. Eng ntei, kupm ariwe la, kupm titnongket kalpisen pa, kupm am antiwe titnongket wail ak wang pake.
2CO 12:11 Kol am kipm pa laron atn a rpma a kwap wor a pikekg kupm ak ak pa lakiti niki tu pake, ari wa kalpis. Atom kipm ti antokg kolpa atom ak arkolng kupm ti kai kolen titnowen eng kupm alkupm ti wa lakati kupm alkupm ti la kupm melnum wor kolpa. Ei aklale, kupm melnum kalpmlel, pake kupm ti ake melnum wor paipm ur nang kalpisen kai arken melnum wokgen akwapel wor wor wail wail akipmen pa, kalpis.
2CO 12:12 Ak wang a kupm antiwepm rpma pa kupm pikekg itna titnongket arki kaikuten ngkaten akwap kweikwei wail wail a melnum ake antiwe antokg, a kweikwei weten a palng atom tu wrekg paipm eng ari, a plan kla weten titnongket titnongket. Pa plan aklale la kupm ti melnum wokgen akwapel aklale a Maur Wailen.
2CO 12:13 Ti kipm la kupm antokg tu wrong kin kipman mapming wrongkwail a Maur Wailen yela wai ariworwor ise, a kipm Korin ti pa kupm antokgtepm aripaipmpaipm? Kwei ur wris kil pati ei, kupm antokgtepm paipm pake, kupm ake la uk kaikuten kipm pa eng ukwen kipm pa la ik ngklinsopm kweikwei pa. Kolpa ti kol kipm ikwonilmpen la kupm antokg paipm pa, kipm utnuurng paipmpaipm akupmen pa.
2CO 12:14 Pikekg kupm kinar ariwepm anti wekg ise, ti wa kupm nimprampen eng la ikga wa kinar riwepm nti ur. Pake kupm ake la wa lkepm kaikuten eng ukwentepm marpm kweikwei pa la kipm ikglentopm, kalpis. Kupm ake akor la uwi marpm kweikwei akipmen pa, kupm akor la uwi kipm melnum tike. Pa ake kwap a tu warim pa akor kweikwei elngtitna ak namput mansan alntu pa, kalpis. Pa kwap a mansan pa akor kweikwei elngtitna ak namput tu warim pake.
2CO 12:15 Kupm ti atopen kolti eng uk kweikwei wrongkwail akupmen ti, a wa uk kupm alkupm ti kimeket kai akwap kolai eng ak angklin kipm pa. Pa plan kolen la kupm plan ipma wor wasrongen kipm pa wail manten, a kipm pa wa plan ipma wor wasrongen kupm ti waiketn kolti eng itna kolai?
2CO 12:16 Ti mentepm ariwe la kupm ake pikekg alkepm kaikuten ur a la kipm ikglen kupm pa. Pake tu tiur pa akwonalmpen la kupm ti wontrakole, atom kupm ale lem pa atom kansil armpwonel kipm ti aye kai angkowe.
2CO 12:17 Aki pikekg kupm ti la kinsil uwi kweikwei akipmen pa, atom kupm ukwa tu tiur a pikekg kinar pa la uwi kweikwei akipmen pake?
2CO 12:18 Ti pikekg kupm tilp Taitus pa kinar ariwepm, a wa pikekg kupm ukwa melnum wris ur amintowen a minto ukipma Sisas pa wa antiwel kinar. Atom pikekg Taitus pa kansil armpwonel kipm pa mol, la uwi kweikwei ur akipmen pake? Ti Taitus pa wa ak manet kolai? Kil pa a kupm ti pa, nikgwalpm amintowen pa wris, a minto antokg kuina ur pa, minto katnun tita or ya wris.
2CO 12:19 Ti kipm angkleikg wrkapm ti akwonalmpen kolpa angkai ai kulngkul ai la, palpa minto ti nira yangkipm kalnten kil ak talpulng oklala a tu kipm lawo pa kolti, pa kolen mentekg antokg yangkipm itna kipm pa. Kolpa kalpis. Minto melnum a Krais, atom oklala a minto oklala pa, minto oklala itna wulmpa a Maur Wailen pake. Kipm melnum wor yekyek alkupm, kweikwei wrongkwail a minto oklala a antokg kolpa, pa am minto antokg la ik titnongketel kipm pake.
2CO 12:20 Kol kupm ti ipma kaikut ngkark la ik wang a ikga kupm kinar riwepm pa, kupm ikga ri la atn a rpma akipmen pa ikgake kol a kupm wasrongen pa. Wa kipm ikga riwopm a kupm ikga kinar riwepm pa, kipm ikga kirken nikgwalpm oklala akupmen ti a kupm ikga lokepm la minsrang pa. Ti kupm ipma kaikut karken a ari a kipm akle tita, ipma paipm, ipma wakget, kinipis akwonalmpen kipm alkipm, ak nokgel tu mla ur, la yangkipm el yirokgel tita, atop aye torke, akwap atn titi arongke kwap wrongkwail.
2CO 12:21 Tu kipm wailet tiur pikekg angko yaper kai antokg paipmpaipm kolpa ak ai kulngkul kul itna ti, kweikwei a kol a kimpilpet, wa angkli arkul tita, wa nikgwalpm wrekg antokg kweikwei a numkropise kamel. Atom wa kupm ipma kaikut ngkark la, ik wang a ikga kupm kinar riwepm pa, kol kupm ri tu kipm ake wa laron uk yirokg pa, kupm ikga akg rein paipm tu kipm wailet tiur pa, wa ikga Maur Wailen wa uk numpaipm kupm ti itni wulmpa akipmen pa.
2CO 13:1 Pikekg kupm kinar ariwepm anti wekg ise, ti wa kupm lawen itna la ikga wa kinar riwepm nti ur pa iken wekg ai eng kai nti wraur. Ti kipm ikwonilmpen yangkipm kil: am kol mentepm la or lam kaikuten a melnum ur antokg pa kai imo pa, mentepm itning melnum wekg aki wraur ur a nungkulkg a wulmpa eng kaikuten pa ik titnongketel yangkipm pa pipa, pa mentepm antiwe or lam yangkipm pa kai imo pake.
2CO 13:2 Ti kupm am pikekg uk yangkipm titnongket kipm mla ur a antokg paipmpaipm pa a wa kipm tiur ai yat ak wang a kupm pikekg kinar ariwepm anti ur ep pa. Ti ak wang a kupm pikekg kinar ariwepm katnukg ti pa, kupm pikekg uk yangkipm titnongket kipm mla ur a antokg paipmpaipm pa. Wa ak wang a kupm rpma no watin kil a kupm ake antiwepm rpma pa, kupm wa uk yangkipm tu pa, a wa kipm tiur ai yat, anti ur ti la, kupm ikga kinar riwepm pa, kupm ikgake yelawepm pa, kupm ikga uk wleket kolti.
2CO 13:3 Kipm ngkat akor la kipm ri ik wulmpa a Krais kil akwap kul kupm ti. Kil ikgake iktepm meen pa, kil ikga iktepm minsrang kalnten.
2CO 13:4 Aklale, kol pikekg ep pa kil titnongket kalpisen ak wang a tu karkurngkel rka yo okgmangki pa, pake kil wrekg atom rpma ak titnongket a Maur Wailen. Ti kol minto ti akilen pa, minto yat titnongket kalpisen, pake wa minto anti Krais akwap ak titnongket a Maur Wailen kolpa aye kai ak angklin kipm pa.
2CO 13:5 Kipm akor la ri kupm pake ti kol a kipm ikor la ri kipm alkipm pa ikwiyen pen, la la kipm ukipma Krais pa aki kalpis. A wa kipm ri kawor ipma a kipm alkipm ti la kipm ukipma aklale, aki kalpis! Ti ake kipm ariwe kipm alkipm ti la Sisas Krais rpma kipm ti aki kalpis? La kipm ake atn kol melnum a Sisas Krais rpma kawor kipm pa pipa, pa plan la kipm ake ukipma aklale, atom Maur Wailen ake awi wor lawepm pa.
2CO 13:6 Kupm ukipma nungkwangen la kol kipm ri ikwiyen kwap kweikwei a pikekg minto ak pa, mpa kipm wontrakole riwe la minto ti pa melnum wokgen akwapel aklale a Krais a Maur Wailen awi wor lawo pa.
2CO 13:7 Ti wa minto oklala naki Maur Wailen eng kil ngklinsepm eng ake mpa kipm ngko kai ntokg paipmpaipm pa. Yiprokgen a minto oklala naki Maur Wailen pa kolpa, pa ake lala tu melnum ri la minto ti melnum wokgen akwapel aklale a Krais pa, kalpis. Minto oklala nakel lala mpa kipm kutnun ya ute wor pake. Kol ake kol minto melnum wokgen akwapel a Krais pa aklale pa aki, kalpis aki, pake wail manten pa kol a kipm kutnun ya ute wor pake.
2CO 13:8 Ti minto ake antiwe ikga ntokg kwei ur eng ik ngketen yangkipm aklale pa, kalpis. Minto ikga iken kwap ik titnongketel yangkipm aklale pake.
2CO 13:9 Wa ak wang a minto ti titnongket kalpisen a kipm pa antiwe titnongket pa, minto atopen. Ti minto am oklala naki Maur Wailen la kipm or kaikuten pa kai imo eng mpa kipm palng wriwen wor.
2CO 13:10 Kolpa atom ari kupm nirantepm wrkapm kil ak wang a kupm rpma no watin kil pa la kipm ik kolpa pen, eng ik wang a kupm ikga kinar pa, kupm karken la minsrang kalnten kitila nang wailen a kupm aye itna ti. Nang wailen ti pikekg Wailen Sisas alkopm la ikga kupm lkepm yotuk eng kipm ik ngkom titnongket, a ake la kupm ik mlasel ya pa eng kipm ngko pa.
2CO 13:11 Atom kipm melnum wor alkupm a mentepm ukipma Krais, oklala akupmen eng a kai plalng. Ti kipm rpmi itopen wor, kipm iken kwap eng palng wriwen wor, kipm itning kutnun kuina ur a minto la pa uwi wor kolti orngwatneikgen yangkipm a kupm la alokepm pa, kipm lupm nikgwalpm wris itning nungkulkg tita, a rpmi numpokgen ipma meen wor, eng Maur Wailen, kil yiprokgen a arkul nikgwalpm a plan ipma wor wasrongento, a kil yiprokgen a alko ipma meen wor pa, pa mpa kil ntiwepm rpmi kolpa iye kai pa.
2CO 13:12 Ti kipm uk wam nikron tita wamrmpen mraingkilel tita kolen la kipm melnum a ukipma Krais. Wa tu wrong kin kipman wriwen wor a Maur Wailen a rka ti tu la kupm nira nikepm la tu nikgwalpm arkentepm rka.
2CO 13:13 Ti minto mpa oklala niki Wailen eng mpa Wailen Sisas Krais kil plan ipma wor alkil ngklinsepm a wa Maur Wailen kil plan ipma wor wasrongentepm, a wa Maur Wor kil ikwap kai kipm pa, atom kipm rpmi ipma wris ore tita. Oklala akupmen am kai kolpake, alkepm wor.
GAL 1:1 Kupm Pol kupm melnum wokgen akwapel a Krais. Ake nikgwalpm a melnum atom melnum pa takweiyopm atom ngkatopm la kupm melnum wokgen akwapel a Krais pa, kalpis. Pa pikekg Sisas Krais nampokgen Maur Wailen Yan pa, kil a pikekg la Krais kil amo atom wa wrekg pa, am tuwekg alntuwekg pa alkopm kwap kilke.
GAL 1:2 Kupm Pol, nampokgen tu melnum alkupmen a men ukipma Krais a antiwopm rka wris a ti pa, men nira wrkapm kil ukwa kai eng kipm wrong kin kipman mapming kimeket a ukipma Krais a rka yela kai anong kanokg a Kalesia pa.
GAL 1:3 Ti kupm oklala naki Maur Wailen Yan almentepmen, a nampokgen Wailen Sisas Krais, la eng mpa kil plantepm ipma wor alkil pa atom ngklinsepm a lkepm ipma meen wor.
GAL 1:4 Pa nikgwalpm a Maur Wailen Yan almentepmen ti atom Krais kil uk kil alkil ti kai amo akarmpen paipmpaipm a mentepmen, atom ak ungkwan ipma tingklaket a yapowo itna kanokg ak wang ti.
GAL 1:5 Aklale, Maur Wailen pa kil wor wrisen kolpa ti mentepm mpa ngkit nang akilen pa ikngklei ikngklei wang pa iye or pa kai.
GAL 1:6 Maur Wailen pikekg akwonalmpen kwap a pikekg Krais kil ak pa atom kil plantepm ipma wor alkil pa atom akwewepm eng alkilen. Pake ake wa itna wang watinet ur, kalpis. Kupm wrekg paipm eng atning a wa kipm almpil yirokg la Krais pa pinterngen kolti. A wa kipm almpile yangkipm wor aklale a la Krais pa atom kipm kai katnun pa kolen la pa yangkipm wor a la Krais pa.
GAL 1:7 Ake yangkipm wor ur manet a la Krais pa, kalpis. Pa tu melnum tiur antokg la lmpilepm nikgwalpm, eng tu la lok yangkipm wor a la Krais pa kai manet raimpe.
GAL 1:8 Pa tu ikga uwi wleket a itna yongkyong. Wa kol ur a men ti aki, kol maur akwapel ur a Maur Wailen kaino kitnong ai yat, kol men laron nikepm yangkipm manet raimpe a la Krais kol a pikekg ep men laron nakepm ute kil pa, men ikga wa uwi wleket a itna yongkyong pawo!
GAL 1:9 Kupm wa la la or wrikel kuina ur a pikekg men lanakepm ep pa la, kol mlaur kil laron nikepm yangkipm wor a la Krais pa manet kol a pikekg kipm atning alupmen a pikekg men lanakepm ep pa, melnum pa kil ikga uwi wleket a itna yongkyong pawo!
GAL 1:10 Ti kipm ari a kupm la kol kil la kupm ak eng la kipm melnum ti uwi wor lawopm aki Maur Wailen ai? Aki kipm ari la kupm armponel kipm melnum ti eng la kupm uwi nang wailen? Kol kupm irmponel kipm melnum ti pa pati, kupm ake melnum wor akwapel a Krais pa, kalpis.
GAL 1:11 Kipm melnum alkupm a mentepm ukipma Krais, kupm la lanikepm eng mpa kipm riwe riworwor la, yangkipm wor a la Krais a kupm laron laron kil pa, ake melnum ti akwonalmpen akor la atom kupm laron pa.
GAL 1:12 Ake wa kupm atning yangkipm kil melnum ur lakati atom kupm awi pa kalpis, aki melnum ur kaling plantopm pa. Pa ake kolpa, yangkipm kil Sisas Krais kil alkil pa plantopm angko wunong pake.
GAL 1:13 Kipm pikekg atning a tu lakati nakepm a pikekg kupm nikgwalpm arkekgen katnun ya a men Suta ukipma Maur Wailen, a rpma amenen pa. Kolpa atom pikekg kupm or ungkwan anelen melkg paipm paipm tu wrong kin a kipman mapming a ukipma Krais, ake kolen a men ukipma katnun Maur Wailen pa. Pa pikekg kupm ak ak wang a kupm ake ukipma Krais pa.
GAL 1:14 Ti kupm ti pa pikekg wrekg wor wail nampokgen ya a men Suta a katnun Maur Wailen kaling kaling ak ariworwor angen tu kilmik wris alkupmen pa. Wa kupm ngkat titnongket itna lim maleng kol a ai katnun ya a tu mamikg mamin a men Suta ti.
GAL 1:15 Ari ipma wor a Maur Wailen plantopm, kolpa atom ari pikekg kil takweiyopm ep ak ai ak a kupm a rpma ipma a man ai. Wa kil yapon kupm ti la kupm alkilen. Nikgwalpm a Maur Wailen alkil pa atom,
GAL 1:16 kil plantopm Warim Kipman alkilen pa angko wunong, eng mpa kupm laron yangkipm wor a la Warim Kipman alkil pa eng ik ngklin kipm wrong kin kipman a ake Suta pa. Pikekg ak wang a Warim Kipman pa palngtopm angko wunong pa, ake pikekg kupm urngkurekg atatu kai akor melnum ur alkopm nikgwalpm ur pa, kalpis.
GAL 1:17 Wa yat, kupm melnum weten akwap weten, ti pikekg kol a kupm kinar Serusalem pa ri tu melnum wokgen akwapel a Krais a pikekg awi kwap pa ak itna tingklaket pa, eng kol a tu pa lkopm nikgwalpm ariwe pake, ari kupm pikekg ake kinar ariwen, kalpis. Kupm pikekg kinar Arepia pa wrik wes ningkrapm kalpmilel a itna kupuk pa, rpma a a, plalng, wa kupm wa yaper kulno anong Tamaskus ti.
GAL 1:18 Kupm rpma pa wring wraur, plalng pa, wa kupm wrekg a pa kai kinar Serusalem, eng la ri Pita atom ntiwel rpmi ikorla nikgwalpm kweikwei tiur. Atom kupm antiwel rpma pa wang wampwam yikakwomis.
GAL 1:19 Ak wang a kupm antiwel rpma pa, kupm ari Semis wusoken a Wailen Sisas Krais ti. Ake wa kupm ari tu melnum wokgen akwapel tiur a Krais pa, kalpis, kupm ari tuwekg yek wekg pa kolti.
GAL 1:20 Ti kipm itning! Aklale wrisen itna wulmpa a Maur Wailen, la kuina ur a kupm nirantepm kil pa, pa ake wa kupm kansilepm pa. Pa aklale.
GAL 1:21 Kupm wa wrekg a pa kai kaino anong kanokg a Siria, plalng pa, wa kupm wrekg a pa, wa kupm wa kai kaino anong kanokg a Silisia wai.
GAL 1:22 Ak wang pa tu melnum mapming a ukipma Krais itna anong kanokg Sutia pa, tu pikekg ake ari ikgokg akupmen ti, kalpis.
GAL 1:23 Tu atning a tu tiur lakati naken kolti la, “Melnum a pikekg or ungkwanto alko wleket ampake, ari wa kil laron yangkipm wor a Krais kol a mentepm ukipma itna tike. Kolpa tuwa!”
GAL 1:24 Tu atning la kupm ukipma Sisas pa la Krais, melnum a pikekg Maur Wailen ukwa kul nar la ik uwiyo pa, atom tu ngkat nang a Maur Wailen.
GAL 2:1 Wring wampwam yikak wikgwikg pa kai plalng pa, kupm wa yaper kinar Serusalem pa, Parnapas antiwopm kinar. Wa kupm akyakur Taitus pa antiwo kinar yat.
GAL 2:2 Maur Wailen plantopm nikgwalpm tiur alkilen, kolpa atom kupm kinar pake. Kupm kinar kai kaino palng kolti, kupm awi tu melnum wailen wailen akwapel a Maur Wailen pa kolti, men kai angklo rka ak men alpmen. Atom kupm lakati naken yangkipm wor a la Krais a kol a kupm angkli angkli naki tu a ake Suta pa naken. Eng ake mpa tu elukgen kwap a pikekg kupm ak ak ep ai, a wa kupm ak ak ak wang ti pa, la mpa kai kalpmlel kolti pa. Ari tu kaporng yangkipm kwap a kupm ak pa la wor pa.
GAL 2:3 Pake kol a tu la tirpmingen Taitus, melnum a antiwopm pa kol a kil wangket num ti. Eng ntei, kil ake Suta pa, kil Krik. Ari kalpis, tu ake wa tirpmingentel.
GAL 2:4 Am aklale pake. Pikekg Krais Sisas kil angketento kai takwleikgen yangkipm titnongket a Moses a pikekg yapowo pa, atom mentepm wirng no rpma kukwula wor ise. Ari kalpis, tu melnum tiur a kansilo ak palk ipaaro la tu ipma wris a la tu ukipma Krais pa, tu pa wa wli la wa loko iye yaper kai kutnun yangkipm titnongket tingklaket a la wangket num pa pen.
GAL 2:5 Pake ake wa men alken ya waiketn ur, eng mpa tu loko iye kai kutnun nikgwalpm atuwen pa, kalpis. Pati atnen men la rkul yangkipm ute wor aklale a la Krais pa iye itni, eng yangkipm aklale wor kil pa ikga itni eng ik ngklin kipm pa iye or ai kai.
GAL 2:6 Kol tu melnum tiur a awi nang kolen la tu melnum wailen pa - tu melnum kolai pa, pa ake wa antokg kupm ti kolai, Maur Wailen pa ake ari ikg narnowen melnum pa la kil melnum kolai pa - tu melnum a awi nang wailen pa ake wa tu la karkurng alkopm nikgwalpm manet tiur la mpa kupm ik kitila kolai pa.
GAL 2:7 Kolpa kalpis, tu ari la pa kwap a Maur Wailen kil alkopm eng la kupm laron yangkipm wor a la Krais naki kipm melnum a ake Suta a ake angket num pa. Am kol a pikekg kil uk kwap Pita atom kil laron naki naki men Suta a angket num pa yat pake.
GAL 2:8 Am Maur Wailen pa uk titnongket Pita pa atom, kil ak ak kwap a melnum wokgen a Krais eng angklin men Suta a angket num. Ti tu melnum wailen wailen pa wa ari kupm ti am wa kolpa yat pake, am wa Maur Wailen pa uk titnongket kupm ti, atom kupm akwap eng angklin kipm a ake Suta pa.
GAL 2:9 Kupm laron naken kimeket kolpa atom tu awi ariwe worwor ise, la Maur Wailen kil plantopm ipma wor alkil atom kil alkopm kwap kil. Kolpa atom Semis, Pita, a Son - tunteng pa tu wrong kin kipman ariwewen la tunteng pa ong a ikgalen kwap a Maur Wailen - tunteng wrekg al wuntuwel mentekg Parnapas ti. Pa plan la men ipma wris la men ikga ikwap orwris. Atom mentekg ikga ikwap eng ik ngklin kipm a ake Suta pa, a wa tu pa ikga ikwap eng ik ngklin tu a men Suta a angket num pa.
GAL 2:10 Tu atning kwap a kupm ak pa ari wor. Pake nikgwalpm wris ur alntuwen pa pati, tu la ngkit wonel mentekg ti la la mentekg kai pa, mentekg ngklin tu mla ur atuwen a rka tukwok pa kolpa iye kai. Nikgwalpm a tu la pa, am kupm nikgwalpm arkekgen ak ak itna tike.
GAL 2:11 Pita no ariwo no Antiok ti pa, kil kansil plan mrangkum paipm ak num enen ti kolti, kolpa atom kupm la aklewel titnongket kai nungkulkg wulmpa akilen ti.
GAL 2:12 Yiprokgen a kil plan mrangkum paipm pa pati itna kolkil: kil kaingkai anti tu a ake Suta a ukipma Krais pa rka al al okipma. Kolpa, kolpa kaingkai, wang ur pa tu melnum tiur a anti Semis rka kinar Serusalem pa kul no palng ariwo pa, Pita kil ngkark, la mpa tu a pikekg angket num pa kul no, ti mpa riwel atom ipma paipm iklewel. Kolpa atom kil wrekg ngkark atnuurng tu a ake Suta pa wom.
GAL 2:13 Wa tu Suta tiur almentepmen a mentepm ukipma Sisas pa wa kai katnun mrangkum paipm a Pita kil planten ak num enen ti kolti. Tu itnawen paipm a Pita kil ak kolpa kai, ari wa kai ak arkolng Parnapas wa kai angko wakum paipm kol a Pita kil ak pa.
GAL 2:14 Kupm ari tu ake angkom or ya ute a katnun yangkipm wor aklale a la Krais pa kalpis, kolpa atom ari kupm lanaki Pita pa ak arongke wulmpa a tu wrongkwail pa la, “Kitn ti melnum Suta pake ake wa kitn katnun ya a mentepm Suta ti pa, wa kitn wa katnun ya a tu melnum a ake Suta pa. Kolpa ti kitn wa kansil ak ipaar ak num enen ti la tirpmingen tu a ake Suta pa la wa tu kutnun ya a mentepm Suta tike?”
GAL 2:15 Men ti pa am mansan a Suta pa angket alewo pake, ti men am num walmpopm a Suta pake. Ake men melnum yimponen a ake Suta a antokg paipmpaipm pa, kalpis.
GAL 2:16 Pake men ariwe la kol melnum ur kutnun yangkipm titnongket a men Suta yapon pa, pa ake antokg kil palng ute wor itna wulmpa a Maur Wailen pa, kalpis. Kil ukipma Sisas Krais wris ata pa, pa antokg kil palng ute wor itna wulmpa a Maur Wailen. Kolpa atom wa men Suta ti yat, men ukipma katnun Krais Sisas, eng mpa men palng ute wor itni wulmpa a Maur Wailen kai a men ukipma Krais, a ake kai a katnun yangkipm titnongket pa. Eng ntei, melnum ur ake antiwe mpa palng ute wor itni wulmpa a Maur Wailen kai a kil katnun yangkipm titnongket a men Suta yapon pa, kalpis.
GAL 2:17 Kol men la palng melnum ute wor itni wulmpa a Maur Wailen pa, atom men ukipma Krais pa, ari pa wa planto angko wunong la men ti men melnum a antokg paipmpaipm yat kol kipm a ake Suta pa. Ti mpa Krais ti ntokg men ti ngko kai ntokg paipmpaipm tike! Kolpa kalpis wrisen.
GAL 2:18 Yangkipm titnongket a pikekg kupm katnun pa, am pikekg kupm elngen ise. Ari kol kupm wa la kutnun, pa kolen wan wam tingklaket a pikekg kupm tikale ise. Ari kol a wa kupm wa la le nti ur pen, aklale la, am kupm angketen yangkipm titnongket pa ise.
GAL 2:19 Yangkipm titnongket pa pikekg arkulopm tongtong, atom almpopm amo ise. Atom am ak angketen yangkipm titnongket pa ise, ake wa yapowopm om, eng mpa kupm wa wrekg wirng no rpmi kukula malepmen nimpokgen Maur Wailen. Ei, ti kupm am pikekg tu karkurngkopm amo nampokgen Krais Sisas rka yo okgmangki ise,
GAL 2:20 ari kupm ake wa amo, kupm wa rpma. Pake ake kupm alkupm ti pa, Krais kil alkil pa rpma or kupm tike. Rpma akupmen a kupm rpma ak numpalk ti pa, kupm rpma ukipma Warim Kipman a Maur Wailen pa rpma. Kil pikekg plan ipma wor wasrongen kupm ti, kolpa atom kil uk num alkil pa tu almpel amo eng akarmpen kupm ti.
GAL 2:21 Kupm ake la mpa tulpulng nikgwalpm wor kol a Maur Wailen planto a angklinso pa kai kalpis pa. Kol mentepm ntiwe palng ute wor itni wulmpa a Maur Wailen kai a katnun yangkipm titnongket a Moses pa, pa kwap a Krais kil pikekg amo akarmpento pa, pa kol a kai kalpis kolti.
GAL 3:1 Kipm Kalesia pa, mla almpepm atom plelngen nikgwalpm akipmen pa atom wa kipm erkisen la kutnun tu pa! Men pikekg kaling plantepm ariworwor Sisas Krais a tu karkurngkel rka yo okgmangki, atom kipm awi ariwe worwor kolen a kipm alkipm ari ak wulmpa akipmen ti. Ari wa antokg kolai atom wa kipm wa palng titnowen paipm kolti!
GAL 3:2 Ti kupm la kipm lanikopm kwei ur wris ur kil: kipm katnun yangkipm titnongket a Moses pa atom kipm awi Maur Wor pa aki, kipm atning ukipma yangkipm wor atom kipm awi Maur Wor pa?
GAL 3:3 Antokg kolai atom kipm la wa palng titnowen itni wangkel ti! Pikekg ep pa kipm pikekg ngkaten ak wor nampokgen Maur Wor a Maur Wailen pa, pake wa antokg kolai atom wa kipm wa atnuurng Maur Wor pa, a wa kipm wa ak ak titnongket alkipm ti?
GAL 3:4 Kipm pikekg ukipma arki kalkuten wrongkwail, ari wa kipm uk yirokg angkli kai ai la pa kol kwei ur waiketn ur kolti aki?
GAL 3:5 Yiprokgen a Maur Wailen alkepm Maur Wor a wa kil antokg kweikwei tiur ak plan titnongket akilen pa itna kolai? Itna kol a kipm katnun yangkipm titnongket a Moses aki, a itna kol a kipm atning ukipma yangkipm wor a Maur Wailen pa?
GAL 3:6 Am kol a wrkapm a Maur Wailen la Apraam a pikekg ep pake, kil ukipma Maur Wailen pa atom Maur Wailen kil awi wor lawel la kil melnum ute wor.
GAL 3:7 Pati kipm mpa riwe la, mla melnum ur a kil ukipma Maur Wailen atom akwonalmpen la Maur Wailen ikga uwi wor lawel pa, kil pa warim aklale a Apraam pake.
GAL 3:8 Ti Maur Wailen pikekg akwonalmpen ep ak ai la, tu a ake Suta pa ukipma kil pa, ikga kil uwi wor lawen la tu pa tu melnum ute wor. Atom kil laron yangkipm wor ti naki Apraam pa ep ak ai la, kol a nira ela wrkapm alkilen pa la, “Atnen kitn ti atom ikga Maur Wailen uk ipma wor ak angklin tu wrongkwail kin kipman a rka yela kanokg ti.”
GAL 3:9 Apraam kil ukipma Maur Wailen kolpa atom Maur Wailen kil uk ipma wor akangklinsel. Am kolpake, kol tu mla ur a ukipma Maur Wailen pa, mpa wa kil uk ipma wor ikingklin tu pa yat, kol a kil uk ipma wor akangklin kil pa.
GAL 3:10 Tu mla ur katnun yangkipm titnongket a Moses pa kolpa kai pa, atom akwonalmpen la Maur Wailen ikga uwi wor lawen pa, kolpa pa, tu pa ikga Maur Wailen ok ntiwen atom tu ikga uwi paipm. Kol a wrkapm la pa la, “Mla ur ake akangklei yikak el yapoko katnun kweikwei wrongkwail a nira ela wrkapm a yangkipm titnongket a Maur Wailen pa, kil pa ikga Maur Wailen ok ntiwel ti kil ikga uwi paipm.”
GAL 3:11 Ti pa planto wunongen la melnum ur a katnun yangkipm titnongket a Moses pa, pa ake antokg kil palng melnum ute wor itna wulmpa a Maur Wailen pa. Eng ntei, wrkapm pa la, “Melnum a ukipma Maur Wailen pa, Maur Wailen awi wor lawel la kil melnum ute wor. Atom kil awi Maur Wor pa arpmentel rpma yongkyong.”
GAL 3:12 Ya a katnun yangkipm titnongket a Moses pa, pa ake ya a ukipma Maur Wailen pa, pa kolpa kalpis. Wrkapm a Maur Wailen pa la, “Melnum a kil katnun yangkipm titnongket la kil a uwi Maur Wor a rpma yongkyong pa pati, kil mpa yikak el yapoko kutnun kweikwei wrongkwail a yangkipm titnongket pa la pa yek kimeket.”
GAL 3:13 Mentepm ake yikak el yapoko katnun yangkipm titnongket pa pati, mentepm ikga Maur Wailen ok ntiwo atom mentepm ikga uwi paipm. Pake Krais kil awi wrik amentepm ti awi wleket pa akarmpen mentepm ti atom ak ungkwan ok a Maur Wailen pikekg ok antiwo pa. Krais kil akwap pa kai katila kol a la ep ela kai wrkapm a Maur Wailen pa la la, Melnum a tu karkurng rka yo okgmangki pa, ikga Maur Wailen ok ntiwel atom kil ikga uwi paipm.
GAL 3:14 Krais kil akarmpento, eng mpa kipm a ake Suta pa ikga rpmi mrangkum a Apraam, eng ikga uwi kweikwei a Maur Wailen uk ipma wor ak angklin Apraam pa, eng mpa mentepm uwi Maur Wor a kil pa kitila yangkipm a pikekg kil yapon ak ai la uk tu a ukipma kil pa.
GAL 3:15 Kipm melnum alkupm a mentepm ukipma Krais, mpa kupm uwi kwei ur wris kil kai a mentepm melnum ti ak ak ik la kilingen yangkipm kil: kol a wekg ur ipma wris la wangkir a yipo eng nim a yalming aki yangkipm ok ur pa, akentiwe mpa melnum ur lalowe kipor aki plelngen nikgwalpm alkil pa wa kai ik manet ur pa.
GAL 3:16 Ti am kolpake, Maur Wailen kil pikekg wangkir a yapo nampokgen Apraam, a wa nampokgen walyaru ur alkilen. Ti wrkapm a Maur Wailen pa ake wa la, Kupm wangkir a yapo nampokgen tu walyaru akitnen pa. Kol kil la kolpa pipa, pa la melnum watipmen. Ari ake wa kil la kolpa. Pa kil la kol kilke, Kupm wangkir a yapo nampokgen walyaru ur akitnen pa. Pa kil la melnum wris ata kolti, pa am kil la Krais pake.
GAL 3:17 Yangkipm yiprokgen a kupm la la pa pati kil: Maur Wailen pikekg lam kla nampokgen Apraam pa la ikgake kil la lalowe aki kipor pa, pa kalpis, pa ikgam itna kolpake. Kil wangkir a yapo nampokgen Apraam pa plalng pa, wring kamel kamel (430) pa, Maur Wailen pa wa uk yangkipm titnongket pa kai Moses pa. Pake yangkipm titnongket pa akentiwe ak wangketen wangkir a yapo a kil ak nampokgen Apraam pa.
GAL 3:18 Kol kweikwei wor wor a Maur Wailen a ikga mentepm uwi num ngklin pa atnen a mentepm katnun yangkipm titnongket a Moses pa, kolpa pa wangkir a yapo a Maur Wailen nampokgen Apraam pa ikga kai kalpis kolti. Pake ake kolpa, pa wangkir a yapo a Maur Wailen pa nampokgen Apraam pa atom kil alkel kweikwei pake.
GAL 3:19 Kolpa ti yangkipm titnongket a Moses pa wa itna eng kuina wai? Pa itna eng la ik plan la melnum a kil kapor yangkipm titnongket pa, pa kil antokg paipm. Yangkipm titnongket pa pikekg Maur Wailen uk tu maur akwapel alkilen, atom tu pa almpuk naki melnum yangkipm kuin Moses pa, atom kil pa lanako. Itna kolpa kulngkul, kul angko wang a walyaru a Apraam pa palng, a pikekg Maur Wailen wangkir a yapo nampokgentel pa.
GAL 3:20 Pake Maur Wailen kil wangkir a yapo la kil la ik kuina ur ik kil alkil ti kolti pa, pa kil ak kolti. Kil ake wa la ik nimpokgen melnum yangkipm kuin ur pa kalpis.
GAL 3:21 Ti Maur Wailen wangkir a yapo nampokgento pa, kipm ari la pa wrongmanto a yangkipm titnongket a Maur Wailen uk Moses pake? Pa ake kolpa, yangkipm titnongket a pikekg Maur Wailen uk Moses pa kol a ntiwe lko yaprekg watin eng rpma wor yongkyong pipa, pa mentepm kol a palng ute wor itni wulmpa a Maur Wailen atnen a mentepm katnun yangkipm titnongket pa ariworwor pake.
GAL 3:22 Ari ake kolpa, wrkapm a Maur Wailen pa la, mentepm wrong kin kipman a rpma yela kanokg ti pa mentepm antokg paipmpaipm, kolpa atom paipmpaipm pa alok yapowo. Kolpa ti kweikwei wor wor a Maur Wailen wangkir a yapo nampokgento pa, kil la uk mentepm mla ur a ukipma Sisas Krais pa, ikgam kil uk atnen a mentepm ukipma pake.
GAL 3:23 Pikekg ep ak wang a men ake ukipma Sisas Krais pa, yangkipm titnongket a Moses pa arkulo tongtong. Atom pa alok yapowo itna kolpa kaingkai, Maur Wailen alkil planto ya a ukipma Sisas Krais pa angko wunong om.
GAL 3:24 Kolpa atom yangkipm titnongket a Moses pa kolen yan almengen a alko nikgwalpm a aloko aye kai eng Krais pa. Atom mentepm ukipma Krais pa antokg mentepm palng ute wor itna wulmpa a Maur Wailen.
GAL 3:25 Ti mentepm am ukipma Krais ise, kolpa atom mentepm ake wa rpma orngwatneikgen yangkipm titnongket a Moses pa kolen yan almengen a aloko pa, kalpis.
GAL 3:26 Kipm wrongkwail ukipma Krais Sisas pa atom kipm palng warim a Maur Wailen.
GAL 3:27 Ti kipm wrongkwail mla ur a pikekg tu naren Krais kalukepm pa, pa kolen kipm nowe Krais pa kolen apm maing ur.
GAL 3:28 Kolpa ti ake wa kwei ur ak wakowo manman kolai la, tu pa a Suta, a tu pa ake a Suta; tu pa melnum a aken kwap orngwatneikgen mring ur, a tu pa melnum a rka kolti ak wasrongen alntuwen pa; wa tu pa kin, a tu pa kipman. Kolpa kalpis, kipm plalngten a rpma kawor Krais Sisas pa, atom kipm wris kolti.
GAL 3:29 Kol kipm melnum a Krais pa, kipm pa walyaru a Apraam a ikga kipm uwi num ngklin kuina ur a Maur Wailen kil wangkir a yapo la lkel pa.
GAL 4:1 Kuina ur a kupm la pa pati, la yan a warim ur kil antokg kweikwei pa ak namput warim alkil pake warim alkil pa paipmen a pa. Ti warim pa kil kol tu melnum a akwap orngwatneikgen melnum a ikgalen kweikwei a yan alkil pake. Kil alkil am num atnen kweikwei pa itna pake kil paipmen a pa.
GAL 4:2 Ak wang a kil paipmen a pa, kil rka nungkwlepm a tu melnum a ikgalentel, a ikgalen kweikwei wrongkwail alkilen pa, itna kolpa kaingkai, wang a yan alkilen alm pa, kil alkil palng wail ikgalen kweikwei alkilen pa wom.
GAL 4:3 Men ti am wa kolpa yat pake. Men pikekg warim paipm, ti men pikekg rpma orngwatneikgen krimperk a mring maur a kweikwei wrongkwail a ikgalen kitnong a kanokg ti.
GAL 4:4 Pake wang a pikekg Yan alkil alm pa palng pa, Yan alkil ukwa Warim Kipman alkil pa nar kanokg ti. Kil palng rpma ipma a kin ur atom kil rakuwel, kil wrekg wail orngwatneikgen katnun yangkipm titnongket a men Suta pa,
GAL 4:5 atom kil amo akarmpento eng la ik ngketen yangkipm titnongket a yapowo pa, eng mpa men palng warim a yan alkilen a kil uk lanti pa.
GAL 4:6 Ti kipm ti yat, kipm ti warim alkilen, kolpa atom Maur Wailen ukwa Maur Wor a Warim Kipman alkil pa nar kawor ipma akipmen atom Maur Wor pa akg akwe la, Yaiyai, Yaiyai akupmen.
GAL 4:7 Kolpa atom kitn pa ake wa kitn melnum a aken kwap orngwatneikgen yangkipm titnongket a yapoweitn itna kanokg ti pa, kalpis. Kitn pa warim a Maur Wailen, ti kuina ur a Maur Wailen ak namput Warim Kipman alkil pa, ikgam kitn pa uwi num ngklin pake.
GAL 4:8 Pikekg ak wang ep pa kipm pikekg ake ariwe Maur Wailen pa, ti kipm pikekg ukipma orngwatneikgen krimperk a mring maur a kanokg ti, kolen la pa Maur Wailen ur alkipmen, pake pa ake Maur Wailen aklale pa.
GAL 4:9 Pake ak wang ti pa kipm ariwe Maur Wailen, aki mpa kupm la kolkil la, ati Maur Wailen kil ariwe kipm ti, ari wa antokg kolai atom kipm wa la wa yaper kai ukipma krimperk a mring maur a kweikwei wrongkwail a kanokg ti a ari paipm kolti ake antiwe titnongket pa. Ai, wa antokg kolai atom kipm wa la palng kol melnum a aken kwap orngwatneikgen tu pa wa nti ur pen?
GAL 4:10 Kipm rpma orngwatneikgen kweikwei kolpa atom kipm katnun wang alkil a kipm antokg kweikwei aur aur kolen nim a yalming, krim pa werk, a kweikwei wor okipma a kolpa.
GAL 4:11 Kupm ipma kalkuten paipm eng kipm ti. Kupm maminikgen la kwap wail a pikekg kupm ak eng ak angklin kipm pa ikga kai kalpmlel kolti.
GAL 4:12 Woi, areinsepm, kupm alepm pain nanikg, kipm melnum alkupm a mentepm ukipma Krais. Kupm angkengkepm la kipm elngen pa, wa kipm kul kutnun kupm ti. Kupm pikekg antiwepm rpma pa, kupm ti am kol kipm pake. Kupm ake pikekg tirpmingentepm la kipm kutnun yangkipm titnongket a men Suta pa, kalpis. Ti kipm pikekg ake antokg paipmel kupm ti, kalpis.
GAL 4:13 Kipm wonarpme ur pa, pikekg ake kupm kai ariwepm ariwepm ur, itna itna, kupm la mpa kai wrik ur ai. Ari numpet pa awiyopm angko anong akipmen pa atom, pikekg kupm antiwepm rpma pa laron yangkipm wor a la Krais pa nakepm.
GAL 4:14 Wa kipm ariwe pa, kupm pikekg numpet pa kol a lkepm kalkuten wail, pake ake wa kipm ungkwantopm aki almpil yirokg lawopm pa, kalpis. Kipm angklinsopm ariworwor kol la kupm maur akwapel ur a Maur Wailen aki kol la Krais Sisas kil alkil ti.
GAL 4:15 Kupm pikekg nungkulkg a wulmpa ari pa la kipm pikekg atopen wail manten paipm or kai ai, kipm antiwe kol a inen wulmpa wompel ur alkipmen ti lkopm eng ik ngklin numpet akupmen ti. Ti atopen akipmen ak wang ti pa, wa kai or kolai?
GAL 4:16 Kupm ti palng kol wrongmanto alkipmen ti atnen a kupm laron yangkipm aklale pa nakepm pake?
GAL 4:17 Tu a almpile yangkipm wor a Krais pa tu nikgwalpm arkekgen angklinsepm ak ipaarepm eng la ik lampe nikgwalpm paipm a tu a la iro wako kipm pa itni tukuleikgen kupm ti, eng la kipm nikgwalpm rkekgen eng kutnun tu alntu pake.
GAL 4:18 Kol tu lupm nikgwalpm wor atom nikgwalpm rkekgen eng ngklinsepm pa kol a wor pake. Ake la la tu ik ik wang a kupm antiwepm rpma kai pa pa, kolpa kalpis, ak wang kol a kupm atnuurngkepm kil pa, am kol a tu ik kolpa ikngklei wang kolpa iye kai pake.
GAL 4:19 O, kipm kol warim yekyek alkupm a mentepm ukipma Krais pa. Kipm yaper kai kolpa pa, kipm wa alkopm wleket anti ur kol a man a warim alm wleket la raku warim pa wa ntiur. Wleket a kupm awi kil pa ikga itni kolpa kaingkai, kipm palng warim a Maur Wailen a iye nikgwalpm wor wor kolen Krais kil alkil pa.
GAL 4:20 Oi, kupm rpma akwonalmpen watipmen titnowen num la kipm pa wa palng kolpa eng ntei? Kupm wasrongen paipm la kol a kupm alkupm ntiwepm rpmi kai pa ik wang tike, pake mpa wa kupm lanikepm ik ok ur kolai nikepm eng mpa wa kipm itning pa!
GAL 4:21 Kipm mla ur a wasrongen rpma orngwatneikgen yangkipm titnongket a men Suta pa, kupm la isentepm kolkil la, ti ake wa kipm atning yangkipm titnongket a la pa?
GAL 4:22 La ela wrkapm a Maur Wailen pa la, Apraam pa angket warim kipman wekg, ur pa kil angket kai Akar kin a akentel kwap orngwatneikgen kil, a ur pa kil angket kai kin alkil Sara.
GAL 4:23 Warim a kil angket kai kin a akentel kwap pa, pa warim a kil alkil angket katila nikgwalpm a melnum. A warim a kil angket kai kin alkil pa, pa warim pikekg Maur Wailen yapon yangkipm la lkel.
GAL 4:24 Ti yangkipm a la kin wekg pa pati kupm awi la ik la yangkipm kil: kin wekg pa pati ak la yangkipm wekg a pikekg Maur Wailen kil lam kla nampokgen mentepm melnum ti. Kin Akar a pikekg aken kwap orngwatneikgen Apraam pa pati ak la yangkipm titnongket pikekg Maur Wailen kil uk Moses kai tipmining Sainai. Ti mla ur a orngwatneikgen yangkipm titnongket pa, kil ikga iken kwap orngwatneikgen yangkipm titnongket pake. Kil kol walwalpopm walyaru a Akar pikekg aken kwap orngwatneikgen Apraam pa.
GAL 4:25 Akar pa ak la tipmining Sainai kai anong kanokg Arepia. Ti wa ak la anong wail Serusalem pa yat itna ak wang ti. Serusalem pa kolen man nampokgen warim walwalpopm walyaru alkilen a aken kwap orngwatneikgen yangkipm titnongket pa.
GAL 4:26 Pake Serusalem a itna kaino kitnong ai pa itna wor, ake kuina ur yapowel pa, pa kol man Sara amentepmen.
GAL 4:27 Wrkapm a Maur Wailen pa la, “Kitn kin a kimpong pa, kitn itopen o! Kitn ake awi wleket eng raku warim pa, kitn itop tipra wo! Kitn kin a kipman atnurngteitn pa, kitn ikga iye warim watipmen angen kin a kipman arpmen rpma pa.”
GAL 4:28 Kipm melnum alkupm a mentepm ukipma Krais, kipm pa walwalpopm walyaru a Apraam pikekg Maur Wailen yapon yangkipm nampokgen kol warim kipman Aisak alkil pa.
GAL 4:29 Warim a pikekg Apraam angket ak wasrongen alkil pa, pikekg uk wleket warim a Apraam angket katila yangkipm a Maur Wailen yapon nampokgentel pa. Ti ak wang ti pa am wa uk wleket kolpa itna pake.
GAL 4:30 Ti wrkapm a Maur Wailen pa la kolai? Pa la kolkil la, Kitn ungkwan kin a aken kwap orngwatneikgen kitn pa nimpokgen warim apmen alkil pa kai tukulelkg. Eng ntei, ikgake warim apmen pa uwi num ngklin kweikwei a warim tempilen a kitn angket kai kin alkitn ti a pikekg Maur Wailen yapon yangkipm nampokgenteitn pa.
GAL 4:31 Kolpa ti kipm melnum alpmenen a mentepm ukipma Krais pa, mentepm ti ake wa walwalpopm walyaru a kin a aken kwap orngwatneikgen Apraam pa, kalpis. Mentepm ti pati walwalpopm walyaru a kin alkil a Apraam pake.
GAL 5:1 Krais kil angketen wrpmungkaung pa takwleikgento atom mentepm wirng no itna wor ise. Ti kipm itni titnongket, ake mpa kipm elng yangkipm titnongket ur pa rkuwepm kinar ploplo ntiur pa.
GAL 5:2 Ti kipm itning kuina ur a kupm Pol lanakepm kil: kol kipm la eng tu ngketepm num kitila ya a men Suta pa la la ik ntokg kipm palng ute wor itni wulmpa a Maur Wailen pa, pa kwap a pikekg Krais kil ak pa, pa ake wa angklinsepm ur, pa kai kalpis kolti.
GAL 5:3 Kupm la wa lanikepm titnongket nti ur la, kitn mla ur la tu ngketeitn num eng ntokg kitn palng ute wor itni wulmpa a Maur Wailen pa, kitn mpa kutnun yangkipm titnongket wrongkwail a men Suta la pa.
GAL 5:4 Kipm mla ur a katnun yangkipm titnongket a men Suta atom la palng ute wor itni wulmpa a Maur Wailen pa, pa kipm wangketen kipm alkipm ti takwuleikgen Krais ise. Kipm ak kolpa atom ak angketen ipma wor a Maur Wailen plantepm atom angklinsepm pa.
GAL 5:5 Pake mentepm ti pa, mentepm ukipma Krais atom kil alko Maur Wor alkilen kolpa atom mentepm ukipma rpma nungkwangen ariwe la ikga Maur Wailen kil ariwo la mentepm ute wor kai wulmpa akilen.
GAL 5:6 Mentepm ukipma Krais Sisas pa, mentepm ngket num aki ake mentepm angket num pa, pa ake wail manten, kalpis. Mentepm ukipma Krais Sisas pa atom ari, mentepm plan ipma wor wasrongen tita pa pati, wail manten itna ep pake.
GAL 5:7 Pikekg ep pa kipm pikekg pirng wor pake. Ari wa mla amprinsepm angko ya ti atom kipm elngen a atning katnun yangkipm aklale ute wor pa?
GAL 5:8 Nikgwalpm paipm a alokepm kolpa pa kipm awi kai mla? Maur Wailen pa kalpis. Am pikekg kil pa akwewepm atom kipm kul katnuntel pake.
GAL 5:9 Kinipm waiketn pa antiwe pus kai orarpme wampung a kitn anel pa, atom pa mpa kinipis paipm.
GAL 5:10 Pake kupm ukipma a kupm ariwe la Wailen kil antiwe lokepm iye kul kutnun nikgwalpm akupmen, eng ake mpa kipm kutnun nikgwalpm ur manet. Kupm akwekgel la mla a i almpilepm nikgwalpm pa. Mla ur a kil antokg paipm kolpa pa, ikga Maur Wailen ikilmpe paipm a kil antokg pa.
GAL 5:11 Kipm melnum alkupm a mentepm ukipma Krais pa, tu tiur arkiwopm la kupm ti laron yangkipm titnongket a men Suta a la tu wangket num pa. Ari kol kupm ik kolpa iklale pa, ti wa antokg kolai atom wa tu arpmentopm paipm alkopm wleket kolpa itna? Kol iklale la kupm laron yangkipm la tu wangket num pa, ik lepet a kupm laron Sisas pikekg amo rka yo okgmangki pa kol ake ilmpen atom tu lkopm wleket pa, kol a kalpis.
GAL 5:12 Kupm lala tu melnum mla ur a almpilepm nikgwalpm la wangketepm num pa, kol a tu alntu ti kai wangket num alntu ti kai waiketnketn kitnangku kai tukulelkg!
GAL 5:13 Kipm melnum almentepm a mentepm ukipma Krais pa pati, pikekg Maur Wailen takweiyepm atom wangketen wrpmungkaung pa takwleikgentepm, atom kipm wirng no itna kukula wor ise. Ti ampur kipm akwonalmpen la kipm am kukula wor ise eng mpa kipm ntokg kuina ur ik nikgwalpm wasrongen akipmen ti, kolpa kalpis. Kipm am itna kukula wor ise eng mpa kipm rkul nikgwalpm a plan ipma wor wasrongen tita wa ik ngklin tita.
GAL 5:14 Kitn kutnun yangkipm titnongket wris kil a la, “Kitn plan ipma wor wasrongen yiprokg watinet ai pa kolen a kitn plan ipma wor wasrongen kitn alkitn ti.”
GAL 5:15 Pa, pa kitn katnun yangkipm titnongket wrongkwail pa ise. Pake kipm kol nimpa manto a alm angkwrer tita pa, pa kipm ntokg riwe. Kalpis pa, kipm ikga ilm tita kai paipm imo plalng.
GAL 5:16 Kolpa ti kupm la la lupm lupm lanikepm kolkil la, kipm elng Maur Wor a Maur Wailen pa itni wailen ikglen atn a rpma akipm pa, pati mpa ngklinsepm, eng ake mpa kipm yaper kai kutnun ipma wasrongen a ipma tingklaket a numpalk pa.
GAL 5:17 Ti mentepm ariwe pa, kuina ur kol a ipma tingklaket a numpalk ti wasrongen pa, Maur Wor pa karken. Kuina ur a Maur Wor pa wasrongen pa, ipma tingklaket a numpalk ti pa karken. Pa kol a tuwekg wrongmanto eng tita, ti ari kol la kitn ake antiwe antokg kuina ur a kitn wasrongen la mpa ntokg pa.
GAL 5:18 Kol Maur Wor pa itni wailen ikglenteitn pa, kitn ake wa kweiur pa yapoweitn pa, kalpis.
GAL 5:19 Kipm ariwe nikgwalpm a numpalk pa, nikgwalpm pa pati kolkil: angkli arkul tita, antokg kweikwei a kimpilpet, a kirkokget a numkropis a uk numpaipm kamel.
GAL 5:20 Kapor kilko alein mring a mring maur, a alm tukukel melnum, a wrongmanto eng tita, a akle or tita, no angen tita, a ipma wakget eng tita, a akwonalmpen nikgwalpm paipm eng tita, a nikgwalpm pa ake kai or wris atom wako aro itna man man,
GAL 5:21 a aringkowe kuina ur a melnum manet ai, a al u titno atom melkget iprapet atom aro ok yela, a wa antokg kweikwei manet tiur yat. Ti kupm wa la lanikepm kol kupm pikekg lanakepm ep pa la, mla ur a alupm nikgwalpm a kolpa pa, Maur Wor a Maur Wailen ake itna wailen ikgalen ipma a melnum a kolpa, wa kil ikgake kawor anong wor a Maur Wailen ikgalen pa.
GAL 5:22 Pake okipma a Maur Wor a itna wailen ikgalen nol nikgwalpm a melnum pa pati palng kolkil: plan ipma wor wasrongen tita, atopen, ipma meen kupuk wor, ake ipma wrekg pirpiren la ikilmpe paipm a melnum antokg, plan nikgwalpm wor yiprokg watinet, angklin mla ur, arkul nikgwalpm wris pa titnongket kolpa itna,
GAL 5:23 arein mla ur, atn meen, alok ipaar kil alkil. Mentepm lupm nikgwalpm wor wor kolpa atom kutnun pa, ake yangkipm titnongket ur ak angketento la ake mpa mentepm kutnun nikgwalpm wor kolpa.
GAL 5:24 Tu wrong kin kipman a Krais Sisas pa, tu elng ipma tingklaket a nampokgen nikgwalpm wasrongen alntuwen a rka pilpilen la ntokg kuina ur a paipm pa, am tu erka kaino yo okgmangki ai atom am tu karkurng amo ise.
GAL 5:25 Mentepm a Maur Wor arpmento rpma pa, mentepm mpa ngkom kitila nikgwalpm a Maur Wor pake.
GAL 5:26 Kolpa ti ake mpa nikgwalpm a mentepm ti ikwonilmpen la tu ngkit nang a mentepm ti, aki ik ikor tita, aki ipma paipm eng aringkowe kuina ur a mla ur ai, pa kalpis.
GAL 6:1 Kipm melnum alkupm a mentepm ukipma Krais, kol kipm ri melnum ur kil ngko kai ntokg paipm ur pa, kipm melnum a Maur Wor arpmewepm pa, kipm ngklin lok kil pa iye kai or ya ute wor, pake kipm mpa lokel ik ipma meen wor kolti. Wa kipm alkipm ti mpa wa ngkom ukikg riwe eng mpa wa Maur Paipm pa wa akarkolng kipm pa wa aye kai angko kol kil pa.
GAL 6:2 Wa mla ur a kil arki kalkuten pa, kipm mpa ngklin tita. Kipm ik kolpa pa, pa kipm katnun yangkipm titnongket a Krais la pake.
GAL 6:3 Wa kol melnum ur kil ikwonilmpen la, kil pa melnum wailen pa, pake kil ake melnum wailen kolpa, pa kil kansil kil alkil ti kolti.
GAL 6:4 Melnum wris wris alkil mpa kil ri kuina ur a kil alkil ti antokg ti ikwonilmpen la pa wor aki paipm, la kol wor pa pati mpa kil itopen ngkit nang alkilen ti eng kuina ur a kil antokg pa. Ampake kil ri kuina ur a kil alkil ti antokg nimpokgen kuina ur a melnum manet ur ai antokg pa.
GAL 6:5 Melnum wris wris kil mpa ngkit kaikut wris wris a kil alkil.
GAL 6:6 Melnum ur a kaling planteitn yangkipm a Maur Wailen pa, mpa kitn mpreing kweikwei wor wor tiur akitnen ti ik ngklinsel.
GAL 6:7 Kipm la iknokgel Maur Wailen pake! Ti kipm ukikg riwe! Maur Wailen kil ake mpa ri wulmpa melnum ur a limserpmung kil pa. Pa kalpis. Kipm lin okipma kolai pa, kipm mpam angketuwai okipma alkil a kipm alin pake.
GAL 6:8 Kol kipm lin okipma kai wring akipmen pa, wring pa la ipma tingklaket. Okipma alkil a ikga kipm ngketuwai kai ipma tingklaket pa, pa ikga kipm imo kai paipm kolti. Kol kipm lin okipma kai Maur Wor pa, okipma alkil ikga kipm ngketuwai kai Maur Wor pa, pa ikga kipm rpmi wor yongkyong.
GAL 6:9 Kolpa ti mentepm plan nikgwalpm wor wor pa, ampur mentepm kai num lpmaako karken angko wang pa. Mentepm ik timplowis kolpa kaingkai tukgun kakir pipa, ikga mentepm ngkon okipma wor wor alkil pa.
GAL 6:10 Kolpa ti wang ti pa, wang wor a mentepmen la mentepm plan nikgwalpm wor a wa ngklin tu wrongkwail. Pake ep pa mpa mentepm ik kai tu mentepm almentepm a ukipma Krais pa.
GAL 6:11 Ti kipm ri krakg wail a kupm nirantepm ela wrkapm kil, pa kupm alkupm nirantepm ak wam alkupmen ti.
GAL 6:12 Tu melnum a wasrongen la tu Suta kiporng yangkipm uwi wor lawen pa, am tu pa tirpmingentepm la kipm ngket num pake. Tu la kol a kiling plantepm la kipm ukipma Krais a pikekg amo rka yo okgmangki pa kolti, pake tu ngkark la mpa tu Suta pa alken kaikuten a alken wleket, kolpa atom tu lanakepm la la kipm ngket num pa nimpokgen pa pati, pa kipm palng wor itni wulmpa a Maur Wailen pake.
GAL 6:13 Tu melnum a angket num pa, tu alntu pa ake wa katnun yangkipm titnongket tiur a men Suta pa. Palpa nikgwalpm ampen a tu pa tirpmingentepm la mpa kipm ti wangket num kitila nikgwalpm atuwen pa, eng mpa ik ngkit nang a tu alntu ti.
GAL 6:14 Pake kupm ti pa, ake antiwe mpa ngkit nang a melnum aki kuina ur a itna kanokg a ti pa, kalpis wrisen. Kupm mpa ngkit nang a Wailen Sisas Krais wris ita a pikekg amo rka yo okgmangki ti kolti. Kweikwei wrongkwail a itna kanokg a ti pa, am pikekg karkurng amo rka yo okgmangki ise, ti kweikwei pa ake antiwe mpa lok yipo kupm ti pa, kalpis. Wa kupm ti am pikekg tu karkurngkopm amo rka yo okgmangki ise, ti ake antiwe mpa kupm kutnun kweikwei wrongkwail a itna kanokg a ti pa, kalpis.
GAL 6:15 Ti wangket num aki ake wangket num pa, pa ake wa kwei ur wail pa kalpis. Maur Wailen kil antokg mentepm ti palng weten pa, pa wail manten pake.
GAL 6:16 Ti kol mla ur a tu atning yangkipm a kupm nira ela kil atom katnun pa, kupm oklala naki Maur Wailen eng mpa kil rein tu pa a lken ipma meen wor. Tu pa pati, tu Isrel, tu melnum aklale a Maur Wailen am pake.
GAL 6:17 Ak wang ti kai pa kupm karken a mla ur ai alkopm kalkuten ur, eng ntei, mlik a itna tatu num akupmen ti pa, pa plan la kupm melnum akwapel a Sisas pa atom tu oropm.
GAL 6:18 Kupm asen Wailen Sisas Krais a mentepmen pa eng mpa kil plan ipma wor ngklin kipm melnum alkupm a mentepm ukipma Krais. Yangkipm a kupm nira kil pa aklale, am kai itna kolpake.
EPH 1:1 Kupm Pol, kupm melnum wokgen akwapel a Krais Sisas, a pikekg Maur Wailen kil takweiyopm ak wasrongen alkil. Kupm nira wrkapm kil kai eng kipm wrong kin a kipman wriwen wor a Maur Wailen a ukipma Krais Sisas itna titnongket kai anong Epesus.
EPH 1:2 Kupm oklala naki Maur Wailen, Yan amentepmen, a Wailen Sisas Krais eng mpa tuwekg plan ipma wor ik ngklinsepm atom ntokg kipm rpmi ipma meen wor.
EPH 1:3 Mentepm itopen ngkit nang a Maur Wailen, Yan a Wailen Sisas Krais amentepmen ti iye kaino kwa, a lkel wor wail manten eng kil alko kweikwei wor wor a Krais a rpma kaino anong wor ai eng ak angklin Maur Wor amentepmen.
EPH 1:4 Pikekg ep ak ai ak wang a Maur Wailen kil ake antokg kitnong a kanokg ti pa, kil arkul nikgwalpm a plan ipma wor wasrongen mentepm ti, atom kil takwei mentepm ti ep ise. Atom Krais kil awiyo aye kai itna num eng alkilen la mentepm rpmi wriwen wor, a paipmpaipm kalpisen itni wulmpa a Maur Wailen.
EPH 1:5 Maur Wailen uk ipma wor wasrongen mentepm ti. Atom kil awi mentepm ti kai arowo kolen warim alkilen atnen kwap a Sisas Krais kil ak pa. Pa pikekg kil akwonalmpen ep ak ai, atom am kil ak katila nikgwalpm wasrongen alkil kolpake.
EPH 1:6 Kil plan ipma wor wasrongen Warim Kipman alkil pa kolpa, atom ari kil plan nikgwalpm wor alkil pa ak angklin wail mentepm ti. Yiprokgen a kil plan nikgwalpm wor alkil pa mentepm ti kolpa pati, la mentepm wrongkwail kiporng yangkipm lkel wor wail manten, ngkit nang akilen iye kaino kwa.
EPH 1:7 Maur Wailen kil planto ipma wor alkil angklinso wail paipm wrisen kolpa, atom Sisas Krais kil amo akarmpento. Walmpopm a kil pa ungkwan ak klak paipmpaipm amentepmen pa kai plalng atom, mentepm wirng no itna kukula wor.
EPH 1:8 Maur Wailen kil arein mentepm ti wail manten paipm, atom kil alko nikgwalpm ariwe wor wor wrongkwail alkilen ti kalpmlel kimeket angkomis. Atom mentepm nikgwalpm ungkwarngen eng ariwe wrongkwail akilen.
EPH 1:9 Nikgwalpm ariwe wor a Maur Wailen pikekg kil yapon itna ampen ep ak ai la ikga ik kai Krais pa, pa kil ariwe la pa wor. Pa am kil plan kai angko wunong mentepm ariwe ise.
EPH 1:10 Nikgwalpm yiprokgen a Maur Wailen pikekg yapon la ntokg kweikwei wrongkwail a itna kaino kitnong a itna kanokg ti iye kai or wris, atom Krais kil pa itni tukgunakg ikglen pa. Pa kil ak katnun wang alkil a pikekg alm ep elng itna.
EPH 1:11 Maur Wailen pikekg takwei men Suta ti ep ak wasrongen alkil katila nikgwalpm alkil a pikekg kil yapon ep ak ai, la men ti ikga palng wrong kin a kipman a Krais.
EPH 1:12 Men Suta ti pa pikekg ukipma rpma nungkwangen Krais pa ep. Yiprokgen a kil takwei men ti ep pa pati, la men lkel wor ngkit nang wailen klalen alkilen pa iye kaino kwa.
EPH 1:13 Wa kipm ti yat, kipm a Krais ise. Kipm atning yangkipm wor aklale a pikekg Krais amo akarmpentepm pa, atom kipm ukipma katnun pipa, wa kil anel kla alkil pa akamprin kipm pa yat katnun yangkipm alkil a pikekg yapon pa. Maur Wor alkilen a kil alkepm pa am kol kla ur a kil anel ak amprinsepm pake.
EPH 1:14 Mentepm ariwe la Maur Wailen kil ikga ri kla a kil ak amprin mentepm ti, atom ikga mentepm ngkwrerng kruitn a uwi num itnen kweikwei wrongkwail wor wor a kil numprampen elng itna eng mentepm wrong kin a kipman a ukipma kil pa. Kolpa ti mentepm itopen ngkit nang wailen akilen pa iye kaino kwa!
EPH 1:15 Pikekg kupm atning a kipm ukipma Wailen Sisas, a wa kipm plan ipma wor wasrongen tu wrongkwail kin a kipman ute wor a Maur Wailen pa.
EPH 1:16 Am yiprokgen kolpa atom kupm ake wa elngen a ukwor Maur Wailen eng kipm pa, kalpis. Ak wang a kupm oklala naki Maur Wailen pa, kupm akangklei asentel la kil ngklinsepm.
EPH 1:17 Kupm oklala naki Maur Wailen a Wailen Sisas Krais, Yan amentepmen a antiwe klalen titnongket wail manten pa kolpa kai, eng mpa Maur Wor akilen pa kiling plantepm kweikwei ampen akilen pa palng ngko wunong, eng kipm uwi riwe yangkipm wor a Maur Wailen pa riworwor iye or pa kai.
EPH 1:18 A wa kupm asen eng mpa kil ntokg wulmpa a Maur Wor a kipm ti ore a nikgwalpm umpen. Eng mpa kipm uwi riwe yiprokgen a pikekg kil akwewepm, atom kipm ukipma rpma nungkwangen la ikga ngkwrerng kruitn a kweikwei wor wor wailet paipm antiwe a pikekg kil elngkitna aknamput mentepm wrong kin a kipman alkilen la ikga lko pa.
EPH 1:19 Wa kupm wasrongen la kipm uwi riwe titnongket a kalnten wail manten a Maur Wailen kil uk mentepm wrong kin a kipman a ukipma kil pa. Am titnongket a kalnten irir kolen,
EPH 1:20 a pikekg kil la atom Wailen Sisas a pikekg amo pa wa wrekg kaino rpma nampokgentel awi nang wailen kolen kil alkil kaino anong wor.
EPH 1:21 Kolpa atom Krais kil itna ep Wailen ikgalen tu wrongkwail a antiwe titnongket, kolen tu mring, a mring maur, maur akwapel a Maur Wailen, a maur wrongkwail a antiwe titnongket, tu melnum a arpmen titnongket paipm paipm, a tu mring tukgunakg a mring man, tu pa tu a mentepm la tu nang wailen antiwe titnongket. Pake Krais pa kil itna ep angen tu wrongkwail pake, ak wang ti a wa ikga ik wang kutnukg iye or pa kai.
EPH 1:22 Atom Maur Wailen elng kweikwei wrongkwail pa kulnar itna orngwatneikgen titnongket a kalnten a Krais. Atom elng kil pa itna tukgunakg ikgalen mentepm wrong kin a kipman mapming a Maur Wailen pake.
EPH 1:23 Mentepm wrong kin a kipman mapming a Maur Wailen pa, mentepm num a Krais. Atom am Krais kil alkil pa rpma or arpme kweikwei wrongkwail kimeket yela pake.
EPH 2:1 Pikekg ep pa, kipm pikekg kai ar antokg paipmpaipm, atom Maur Wor akipmen pa am pikekg amo ise.
EPH 2:2 Aklale, pikekg ep pa kipm pikekg katnun ya paipm wrongkwail a itna kanokg ti, katnun maur paipm a itna wailen ikgalen yela kitnong a kanokg ti. Am maur paipm wris pake akwap rpma kawor ipma a tu wrong kin a kipman a talpulng yangkipm a Maur Wailen pake.
EPH 2:3 Ti men ti pikekg rpma kolen kipm pa. Mentepm wrongkwail pikekg katnun nikgwalpm tingklaket paipm almentepm ti, atom antokg kuina ur a num a mentepmen ti wasrongen, kolen kirkokget a melmelen eng la il kweikwei tiur, wa nikgwalpm amentepmen rka la mentepm ntokg kuina ur a paipm pipa, mentepm antokg. Mentepm antokg kuina ur katila kol tu kin a kipman wrongkwail pa. Ti mentepm pikekg palng man rakuwo nampokgen paipmpaipm, kolpa atom mentepm itna ipma wakget a Maur Wailen la mentepm ikga uwi paipm.
EPH 2:4 Pake ipma arein a Maur Wailen a itna eng mentepm pa wail manten paipm ai, atom ari kil plan ipma wor wasrongen mentepm ti wrisen.
EPH 2:5 Aklale, mentepm antokg paipmpaipm atom mentepm am pikekg kol a amo ise. Pake Maur Wailen kil antokg mentepm pa anti Krais wrekg rpma, atom mentepm palng weten. Kil alkil pa planto ipma wor pa ak angklinso, atom akawiyo aye yaper kul eng alkilen.
EPH 2:6 Maur Wailen la mentepm a pikekg kol am amo ise, pa wa wrekg anti Krais Sisas pa rpma. Atom kil ak wrik wor kaino anong wor pa ak namput mentepm ti, atom mentepm kol rpma nampokgen Krais Sisas pa rpma pa rpma pake.
EPH 2:7 Maur Wailen kil wor wrisen eng mentepm ti, atom kil ukwa Krais Sisas kil narnto. Kil ak kolpa eng la ik plan tu melnum ak wang ti wa ikga ik wang kutnukg wa iye or pa kai la ipma wor akil a kil ak angklinso pa wail manten paipm or kai ai.
EPH 2:8 Kipm ukipma Maur Wailen pa, atom ipma wor a Maur Wailen kil alkil pa akawiyepm kai paipm a kipm antokg pa yaper kul kai wor. Pa ake kipm ti antokg kuina ur atom kil ak awiyepm pa, kalpis. Pa ipma wor a kil alkil ai kolti ak awiyepm.
EPH 2:9 Ake ak awiyepm atnen kwap aki kuina ur wor a kipm antokg, eng mpa kipm wam rki nol ngkit nang alkipm pa, kalpis.
EPH 2:10 Maur Wailen kil antokg mentepm ti la mentepm rpmi nimpokgen Krais Sisas, itn a rpmi a ikwap kitila nikgwalpm wasrongen a pikekg kil alkil yapon ep ai, la mpa mentepm kutnun ikwap wor kolpake.
EPH 2:11 Kipm ariwe la, men Suta pa men angket num. Pa melnum ti ak ak wam a melnum ti kolti. Wa tu akwe kipm ti la, kipm ti melnum a ake angket num pa. Kolpa ti kipm ti riwe o, kipm ti ake Suta pa.
EPH 2:12 Pikekg ep pa, kipm pikekg itna manet takwleikgen Krais pa. A mpa kipm ukipma rpmi nungkwangen mla a i, kipm Maur Wailen kalpisen a itna kanokg ti. Wa Maur Wailen kil yapon yangkipm titnongket a wa lam kla nampokgen men Isrel pake, a kipm ti pa kipm kolen melnum yawen atom kipm ti kalpis.
EPH 2:13 Kipm pikekg ep pa, kipm am pikekg itna watin kolpake. Pake ak wang ti pa, walmpopm a Krais Sisas kil akawiyepm aye kul kai wreren Maur Wailen pake.
EPH 2:14 Pikekg ep pa, men Suta a kipm a ake Suta pa, mentepm pikekg wrong manto eng tita. Pikekg kol yipmingki watin ur ak angketen mentepm itna man man. Ari Krais pa kil kla tarmpupm wrokgen amentepmen a ak arku angkeng ipma wakget amentepm pa kai kupuk wor or wris ore tita.
EPH 2:15 Krais kil ungkwan yangkipm titnongket a Moses, a angklon ake, a yangkipm tiur a pikekg men Suta yapon pa a pikekg ak angketen mentepm itna man man pa, eng la ik uwi mentepm om wekg pa iye kai or wris pa kolen melnum wris ata. Kil lam kla atom kil antokg mentepm om wekg pa ipma wris ore tita rpma nampokgen ipma meen wor om.
EPH 2:16 Krais kil uk num alkil amo kai yo okgmangki pa, atom kil ungkwan ipma wakget a mentepm om wekg awi wrong manto lan tita pa kai plalng. Atom mentepm palng kolen melnum wris, wa ak angketen ipma wakget a Maur Wailen itna eng mentepm pa kai plalng, atom mentepm kai ipma wris a or wris ore tita.
EPH 2:17 Krais kil nar eng laron yangkipm wor a kil antokg kipm a ake Suta a rka kai watin pa, a men Suta a rka wreren ti mentepm ipma meen wor or wris.
EPH 2:18 Krais kukwa yalming yun pa atom mentekg om wekg pa mentekg antiwe a awi Maur Wor wris ti yatenen kawor eng Yan amentekgen pa.
EPH 2:19 Kolpa ti kipm a ake Suta pa, kipm ake melnum yaworen ur aki yawen a angkol ur ai wli ela pa, kalpis om. Ak wang ti pa, kipm am palng wrong kin a kipman a Maur Wailen, kipm kolen kipm alkipm melnum mreren a rka wris a pake. Kipm kolen nan watnom a rka wan wris a Maur Wailen.
EPH 2:20 Kipm pa kolen ampei wanteng, a wark, a tangkurong a ak ale wan pa. A men melnum wokgen akwapel a Krais a Maur Wailen takweiyo, a tu melnum okwripm a Maur Wailen pa, tu pa kolen ong tangklepen pa. A Krais Sisas kil alkil pa pati, kil ong kimpowen wor wrisen a wan pa elawe pake. Wan arum elawe wa angkon kling pa, pa am wli almpatne itna ong kimpowen pake.
EPH 2:21 Krais pa kil ong kimpowen wor a ngkat wan pa aye itna tongtong. A tu arum angkon klingkel naren ake itna man pa ak wutneik ale a ore tangklepel, angket yun ar. Plalng pa, wan pa mpa palng kol a yalming klalen wor a Wailen.
EPH 2:22 Atom Maur Wailen awi kipm pa yat wa nampokgen men wrong kin a kipman alkilen ti kai ak ale wan wris ela ong kimpowen, pa am Krais pake. Atom kipm palng kol yalming a Maur Wor a Maur Wailen arpme.
EPH 3:1 Kupm Pol, kupm akwap a Krais Sisas, atom tu awiyopm aye or rpma wan tipmining ti atnen a kupm laron yangkipm wor a Maur Wailen naki kipm a ake Suta pake.
EPH 3:2 Kipm pikekg atning ur pa lala, nikgwalpm a Maur Wailen pa kil plan ipma wor alkil ak angklinso, atom kil rkan kupm ti itna ep eng akwap a laron yangkipm wor alkilen pa nakepm la, kil wa la plan ipma wor alkil wa ik ngklin kipm ti yat.
EPH 3:3 Maur Wailen plantopm nikgwalpm ampen akilen a pikekg itna am pa palng kai klalen angko wunong eng kupm, atom wuten kupm nirantepm waiketnketn ep ela wrkapm kil.
EPH 3:4 Kol kipm ngkleikg kuina ur a kupm nira kil pa, mpa kipm ri la kupm ariwe worwor kai itna yiprokg nikgwalpm ampen a pikekg Maur Wailen yapon la Krais ik pa.
EPH 3:5 Tu yoampei mamikgmamin mansan ak ai kul angko wang ti pa, ake pikekg Maur Wailen planten nikgwalpm ampen pa, kol ak wang ti Maur Wor akilen pa plan nikgwalpm ampen pa kai angko wunong, naki men melnum wokgen a Krais a wa tu melnum okwripm a Maur Wailen amprinsen eng alkilen pa.
EPH 3:6 Nikgwalpm ampen pa la kolkil la, kipm a ake Suta pa kipm atning yangkipm wor a Maur Wailen pa, atom kipm ukipma Krais Sisas pa. Atom kil awi kipm pa aye kul kai wris nampokgen men Suta pa kol mentepm almentepm num wris. Atom kipm antiwo awi num angklin kweikwei wor wor a Maur Wailen yapon yangkipm la uk mentepm warim alkilen pa.
EPH 3:7 Kupm palng melnum akwapel akilen eng laron yangkipm wor akilen a la Krais. Ipma wor a kil alkil plantopm ak angklin kupm ti, atom kil alkopm kalpmilel titnongket alkilen ak titnongketel kupm ti, eng la kupm ik ik kwap pa.
EPH 3:8 Kupm ti ake melnum wor kol tu wrong kin kipman wor a Maur Wailen ai. Pake Maur Wailen kil plantopm ipma wor alkil ak angklinsopm, atom kil uk kwap pa kul kupm ti la laron niki kipm a ake Suta pa kweikwei wor wor wailet paipm ai itna kai Krais pa, ake antiwe melnum ur ik won kiti pa kai itni yiprokg pa.
EPH 3:9 A Maur Wailen a pikekg kil antokg kitnong a kanokg pa, kil yapon nikgwalpm ampen pa itna ep ak ai. Itna ampen kolpa kulngkul, palng kai angko wunong. Atom wang ti pa kil uk kwap kul kupm ti, la kupm laron pa eng tu riwe worwor.
EPH 3:10 Ak wang ti Maur Wailen kil laron nikgwalpm ampen a kil pa kai angko wunong, eng mpa plan tu maur akwapel alkilen a tu maur a antiwe titnongket a nang wailen itna kaino kitnong ai. Eng mpa tu ri mentepm wrong kin a kipman ti kai or wris ukipma kil pa, eng mpa tu riwe nikgwalpm ariwe wor wor wail watin a kil pa.
EPH 3:11 Pa am Maur Wailen kil ak kai katnun ute katila nikgwalpm wrongkwail epet a pikekg kil yapon itna ep ak ai, la ikwap kolpa kai Krais Sisas, Wailen amentepmen pake.
EPH 3:12 Mentepm ukipma Krais pa atom pa antokg mentepm ake mpa ngkirk. Krais kukwa yalming yun pa, atom mentepm antiwe kawor eng Maur Wailen, a mentepm ariwe la kil mpa uwiyo pa.
EPH 3:13 Kolpa ti kupm lanakepm, la ampur kipm ari a kupm arki kaikuten kol kil atom kipm elngen a kipm ukipma pa, iyai. Kupm kai kolpa pa, pa wor eng ak angklin kipm pa eng ikga kipm uwi nang wailen.
EPH 3:14 Am yiprokgen a kupm akwonalmpen kweikwei wrongkwail pa, atom kupm kapor kilko alein asen Yan pake.
EPH 3:15 Yan pa kil angklo ompel alil nangkel tu melnum, a kweikwei wrongkwail a itna kanokg a ti, a wa rka kai anong wor ai yat.
EPH 3:16 Kolpa atom kupm oklala naki Maur Wailen a antiwe klalen titnongket wor wrisen pa, eng mpa kil ik titnongketel nol nikgwalpm akipmen pa ik titnongket a Maur Wor alkilen ai.
EPH 3:17 Wa yat kipm ukipma kolpa ti kupm oklala naki Maur Wailen, eng mpa Krais kil uwi wrik rpmi kawor nol nikgwalpm akipmen. A wa eng mpa kipm rkul nikgwalpm a uk ipma wor wasrongen tita titnongket kolen yo a angkli yapoko ningnakg elng kinar kanokg wunen watin ai atom arkul kanokg itna titnongket pa.
EPH 3:18 Eng mpa kipm nimpokgen men wrong kin a kipman wriwen wor a Maur Wailen pa kipm uwi riwe ipma wasrongen a Krais pa, la watinet a kaingkul akilen, a wail akilen, a watinet a kaino kinar akilen pa kolai. Pa kipm antiwe antin eng riwe ipma wasrongen a Krais pa am kolpake.
EPH 3:19 Nikgwalpm a Krais a plan ipma wor wasrongen mentepm ti titnongket pa kinar walopmen watinet paipm kinar ai, a ake antiwe a melnum mpa riwe pa. Pake kupm oklala naki Maur Wailen pa, eng mpa kipm uwi riwe nikgwalpm a kil uk ipma wor wasrongen mentepm pa atom pa mpa kipm lupm nikgwalpm kweikwei wrongkwail wor wor a kil pa ntiwe kolen kil alkil a antiwe pa.
EPH 3:20 Titnongket a Maur Wailen a kil akwap kai mentepm ti pa, wail manten paipm wrisen kai ai, pa ake antiwe mentepm ntin aki isen a rapo aki ikwonilmpen kai kolai pa, kalpis.
EPH 3:21 Kolpa ti mentepm kin a kipman mapming wrongkwail yela a ukipma Maur Wailen a kai or wris nampokgen Krais Sisas pa, mpa mentepm ngkit nang a Maur Wailen iye kaino kwa lkel wor ikngklei wang ikngklei wang kilmik auraur ik wang ti wa iye or pa kai! Aklale wrisen.
EPH 4:1 Tu awiyopm aye or rpma wan tipmining kil atnen kupm akwap a Wailen. Pake kupm lanakepm titnongket, la kipm kutnun nikgwalpm ute wor kolen pikekg Maur Wailen akwewepm la kipm kutnun pa.
EPH 4:2 Kipm ikngklei wang itn a rpmi meen orngwatneikgen tu mlaur ai, a wa itopen eng rki kaikuten a mlaur ai alkepm, wa rkul nikgwalpm a plan ipma wor wasrongen tita eng mpa kipm ntiwe lok ngkli tita.
EPH 4:3 Kol Maur Wor a Maur Wailen kil awiyepm aye kai or wris, atom kipm rpma meen wor ukipma tita ise. Kolpa ti kipm iken kwap tumplowis eng kipm rkul ipma pa itni titnongket kolpa kai pake.
EPH 4:4 Ake mentepm manet manet pa, kalpis. Mentepm numpalk wris, wa mentepm awi Maur Wor wris. Maur Wailen takwei mentepm ti atom akwe mentepm ti, la mentepm ukipma rpmi nungkwangen kweikwei wris pa kolti.
EPH 4:5 Wailen a mentepm pa wris, wa ya a mentepm ukipma Wailen pa wris, a tu kaluko pa wris.
EPH 4:6 Maur Wailen, Yan a mentepm wrongkwail pa wris. Kil wris ata pa itna wailen ikgalen kweikwei wrongkwail, kil rpma yela, kil akwap wrongkwail kai kweikwei wrongkwail.
EPH 4:7 Krais kil planto ipma wor alkil pa atom kil ampreing kweikwei wor wor pa uk kalpmlel akawiye mentepm melnum ti wris wris, eng ak angklin maur wor amentepmen. Kil uk katila nikgwalpm mitaket wor alkil.
EPH 4:8 La ela wrkapm a Maur Wailen pa la kolkil la, “Kil kaino kwa pa, kil akawi tu tuk wusok yotalpuk a kil almpen atom kil alok angkliwen pa aye kaino, atom ampreing kweikwei wor wor pa uk tu melnum pa alken wris wris.”
EPH 4:9 Oklala a la, “Kil kaino kwa ai” pa, yiprokgen pa la kolkil la, ep pa pikekg kil kinar kanokg wunen walopmen kinar ai, plalng pa atom ari kil kaino kwa pa.
EPH 4:10 Kil wris a pikekg ep kinar kanokg wunen ai pa, am wa kil kai kaino angen kitnong pa kai kaino tak ai. Kil ak kolpa, atom kil alkil ti rpma or arpme kweikwei wrongkwail ti yela.
EPH 4:11 Am Krais kil alkil pa ampreing kweikwei wor wor auraur alkil pa uk tu melnum pa wris wris. Tiur pa kil takweiyen la tu palng melnum wokgen alkilen, a tiur pa melnum okwripm, a tiur pa kai atn laron yangkipm akilen, a tiur pa itna ep eng ikgalen wrong kin a kipman a Maur Wailen, a wa tiur pa kaling plan tu yangkipm a Maur Wailen.
EPH 4:12 Kil ampreing kweikwei wor wor aur aur akilen pa akawiye mentepm wrong kin kipman a Maur Wailen ti la mentepm iktel kwap wor a kil alko pa eng ik titnongketel tu wrong kin kipman eng ik ntokg numpwam akil pa wrekg watin wail.
EPH 4:13 Wrekg inip kolpa kaingkai eng mpa plan la, am mentepm palng warim nangkworen ise. Mentepm wrekg wail nikgwalpm arke wor wrisen kolen Krais kil alkil pake.
EPH 4:14 A ake mpa kipm kol warim a anel angkom pa, a wa kol nim ukupuken a wripm el akawi aye kai pa kai pa. Wripm pa kolen tu melnum a kansil kaling plantepm yangkipm aur aur la ik rkolngkepm iye kai ar pa.
EPH 4:15 Kolpa kalpis. Mentepm mpa rkul nikgwalpm a plan ipma wor wasrongen tita, atom laron yangkipm iklale kolti niken. Mentepm mpa wrekg wail kai kirponte Krais pa tongtong kai kweikwei wrongkwail, a kil pa itna tukgunakg amentepmen.
EPH 4:16 Krais pa tukgunakg pake. A melnum ti pa kolen numpwam a kai almpatne angkli ore tita karponte itna num akilen ai tongtong. Atom numpwam wrongkwail ti akwap wris wris alntuwen plan ipma wor wasrongen tita pa, atom antokg num a kil pa anip watin palng wail wor antiwe titnongket.
EPH 4:17 Kolpa ti kupm awi ok a Wailen pa lanakepm titnongket la, ampur kipm yaper kai itna kolen tu ipmawekg a talpulng yangkipm a Maur Wailen pa, yaper. Tu pa ake ariwe kuina ur, kalpis, nol nikgwalpm a tu pa titno paipm kolti.
EPH 4:18 Nol nikgwalpm a tu pa miningket paipm kolti. Ake tu ari klal ketn ur aki ariwe kuina ur kalpis. Pati atnen a tu uk yirokg Maur Wailen. Nol nikgwalpm atuwen pa kakir yapoko kolti. Tu pa wulmpa tilmpis titnowen, atom ari tu itna manet eng tu wrong kin a kipman wor a awi Maur Wor klalen a Maur Wailen ai.
EPH 4:19 Tu pa uk num alntu ti kai eng antokg kuina ur a numpaipm ti kolti. Tu akentiwe alok upaar tu alntu ti, kalpis. Akangklei tu wasrongen paipm la ntokg kuina ur a kimpilpet paipm, kolpa iye kai, atom tu numpaipm kalpisen.
EPH 4:20 Kipm pa, pa ake ya a pikekg tu kaling plantepm la mpa kipm kutnun Krais pa kolpa.
EPH 4:21 Ya a katnun Krais pa pati, tu pikekg kaling plantepm atom kipm pikekg atning pa. Pa tu kaling plantepm la kipm kutnun yangkipm aklale a Sisas ti kolti.
EPH 4:22 Kipm pikekg tu kaling plantepm ep pa la kipm mpa yaper wrisen uk yirokg ipma tingklaket a pikekg kipm kaie ep pa ik yirokgel. Nikgwalpm kirkokget paipm a kipm antokg kuina ur ak ipma wasrongen ak num alkipm ti, atom pa almpilepm kai paipm. Pa kol apm nungkwor upmukgis rakolet paipm ti mpa kipm iner ngkli.
EPH 4:23 A wa pikekg tu kaling plantepm la nol nikgwalpm akipmen pa mpa palng weten wor.
EPH 4:24 Atom pa kol kipm nowe apm maing terng terng. A wa Maur Wailen antokg nol nikgwalpm akipmen ti palng ute wor klalen rukis katnun nikgwalpm aklale wrisen a Maur Wailen kil alkil.
EPH 4:25 Kolpa ti kipm ake mpa kinsil tita pa. Kipm la yangkipm iklale kolti niki tita. Pati atnen mentepm ti ake manet manet pa, kalpis. Mentepm tiwel tiwel a num wris a Krais.
EPH 4:26 Kol kipm ipma wakget pa, ampur antokg kipm angko kai paipmpaipm pa. Ti ake mpa kipm rkul ipma wakget kolpa i i, takgni pa kai kinar am pa.
EPH 4:27 Ampur kipm uk ya ketn ur Maur Paipm Satan pa, yaper wrisen.
EPH 4:28 Melnum ikgwampet pa, mpa kil elngen a kil ak ikgwam pa, a kil kirki won ikwap riworwor ik wam alkil ti, eng ik ngklin rpma alkilen ti a wa ik ngklin tu mlaur a rpma tukwok ai.
EPH 4:29 Ok akipmen pa ake mpa palng la yangkipmok tiur a paipm pa, kalpis. Ok akipmen pa mpa palng la yangkipmok a wor wor kolti, oklala a ak titnongketel a ak angklin melnum pa. Kil itning pa, pa kil atning atopen pa.
EPH 4:30 Ampur kipm antokg Maur Wor a Maur Wailen pa ipma kaikut akg arein. Maur Wor a Maur Wailen rpma kai kipm pa, pa kla a Maur Wailen anel ak amprin kipm elng itna. Eng ikga ik wang umpuwen pa, ikga kil alkil inelkgen kla pa, kil ik uwi kipm iye kai wor eng alkilen.
EPH 4:31 Kipm mpa ungkwan ipma paipm, ipma wakget, plalplal mainmain, akle kamel, a wa ak uwepel kamel. Kweikwei wrongkwail a paipm kolpa mpa kipm elngen wrisen.
EPH 4:32 Ti kipm mpa ipma wor lok ngkli tita, a kipm kai la rein utnuurng paipmpaipm a melnum ur pa, atom woniketen. Kolen Krais pikekg amo pa, atom Maur Wailen kil arein atnuurng paipmpaipm akipmen ti atom kil woniketen.
EPH 5:1 Kolpa ti kipm mpa ik ok no inip perng iro klung yapoko a Maur Wailen pa, wa ntokg kitila kuina ur a kil alkil antokg pa. Kil pa plan ipma wor wasrongentepm kol kipm warim wor yekyek alkilen.
EPH 5:2 Ti atn a rpma akipmen pa, kipm mpa plan ipma wor wasrongen tita, kol pikekg Krais kil plan ipma wor wasrongen kipm ti. Atom kil awi wrik a mentepm ti uk kil alkil kalpmlel kol kweikwei yaprekget wor a Maur Wailen atopen.
EPH 5:3 Kipm ti pa, kipm wrong kin a kipman ute wor a Maur Wailen. Kolpa ti kipm mpa elngen wrisen a antokg kweikwei a kimpilpet, aki angkli arkul tita, aki antokg kweikwei numkropis a uk numpaipm kamel kolti, a wa akwental kweikwei a worampei pa.
EPH 5:4 Wa yat, ake mpa kipm ik nokgel ngkli itne tita kai ngko mis pa, kalpis. Wa yat, ake mpa kipm rpmi ilm nini okel yangkipm ok a paipm paipm titno titno, aki iye torke itni kuin a kipm pa, kalpis. Pa ake wor eng mpa kipm ik kolpa. Kipm mpa la yangkipm ok a wor wor a ukwor Maur Wailen kolti.
EPH 5:5 Kol kipm ariwe aklale la, tu melnum a angkli arkul tita, a antokg kweikwei kimpilpet a uk numpaipm kamel, a tu a ari angkowe kuina ur a melnum ur ai akwental la uwi a uwi wrongen pa, pa kol tu kapor kilko alein maur kansil. Kolpa ti tu pa akentiwe mpa Maur Wailen a wa Krais kawor rpmi Wailen ikglen nol nikgwalpm atuwen pa, kalpis.
EPH 5:6 Ampur kipm atning katnun yangkipm paipm a tu pa alkepm kalpmen, iyai. Ipma wakget a Maur Wailen am itna eng tu melnum a talpulng yangkipm akilen kolpake.
EPH 5:7 Kolpa ti ampur kipm kai rpma aki anti tu a kolpa atn erkwon pa, yaper wrisen.
EPH 5:8 Kol kipm pikekg ep pa, kipm pikekg itna kai miningket pake. Ari ak wang ti pa kipm palng wrong kin a kipman a itna kai klalen a Wailen. Kolpa ti kipm rpmi kol tu warim a Maur Wailen a itna kai klalen pawo!
EPH 5:9 La itni kai klalen pa, mpa kol yo a angko yo ok wor wor kolkil: mpa rpmi itn wor, a ntokg kweikwei a ute aklale kolti.
EPH 5:10 Atn a rpma akipmen pa, kipm mpa uwi riwe la mpa kipm rpmi a itn kolai, eng mpa ntokg Maur Wailen pa kil itopen uwi wor lawepm.
EPH 5:11 Ampur kipm antimprak tu a itna kai miningket pa antokg kuina ur a paipm paipm pa kolen yo a angko yo ok paipm paipm pa, yaper. Kipm mpa iye kuina ur a tu antokg itna kai miningket pa iye kul kai klalen ti planten la pa tu antokg paipm.
EPH 5:12 Num kropis kamel eng rpma lakati kuina ur a tu pa antokg itna ampen pa.
EPH 5:13 Pake kweikwei wrongkwail a antokg itna kai miningket ampen pa, mpa klalen pa akalen aye kul kai angko wunong, atom wrongkwail antiwe ari.
EPH 5:14 Klalen pa antiwe ak awi kweikwei wrongkwail a itna am kai miningket pa aye kul kai angko wunong. Kol oklala ur la kolkil la, “Wrekg wrekg o! Kipm okg eng na? Wrekg i kirkap pa kulno wo, eng mpa klalen a Krais pa iklentepm.”
EPH 5:15 Atn a rpma akipmen pa, kipm itn a rpmi riwe. Ampur kipm atn a rpma kolen melnum titnowen pa, yaper. Kipm itn a rpmi kolen melnum wontrakole.
EPH 5:16 Ampur kaken wang ur kai kalpmlel. Wang wris wris ti pa wang akitnen a kol a kitn ntokg kuina ur a wor kolti. Eng ntei, wang wrongkwail ti pa wang paipm plalng, ake ur wang wor.
EPH 5:17 Kolpa ti ampur kipm rpma kolen melnum a titnowen pa. Kipm rpmi kolen melnum a wontrakole, eng mpa kipm uwi riwe kuina ur a Wailen kil wasrongen la kipm ntokg pa.
EPH 5:18 Ti kipm ampake il u titno pa, kalpis. Pa mpa antokg kipm titno atom antokg kipm kai paipm, ake antiwe kipm alok ipaar kipm alkipm. Kolpa ti, pa yaper, eng mpa kipm il u klalen a Maur Wor ti ntiwe ikngklei wang kolpa kai.
EPH 5:19 Kipm laniki tita ik oklala a la ela kai wrkapm Nangnang a Tepit nira, wa ik nangnang a ak ak eng ak ngkat nang a Wailen, a wa ngketen nangnang weten a Maur Wor a Maur Wailen ngkat okelepm la kipm ik pa. Kipm ik nangnang pa ik ik kweikwei wrongkwail a ak o nangnang pa nimpokgen titi, wampeng, mitark, nim a yotimpal. Kipm kilpo kweikwei pa ik ik nang wrongkwail pa nimpokgen nol nikgwalpm akipmen ti eng ik ngkit nang a Wailen.
EPH 5:20 A wa ikngklei wang pa kipm mpa naren Wailen Sisas Krais atom ukwor Maur Wailen Yan pa eng kweikwei wrongkwail a worampei.
EPH 5:21 Kipm ngkirk itni wulmpa a Krais pa atom, kipm rpmi itning nungkulkg orngwatneikgen tita.
EPH 5:22 Kipm kin pa, kipm mpa orngwatneikgen kipman alkipm pa, kolen a kipm orngwatneikgen Wailen pa.
EPH 5:23 Kol kipman pa kil itna tukgunakg eng kin alkil. Am wa kolpa yat pake, wa Krais pa kil itna tukgunakg eng mentepm wrong kin a kipman mapming a ukipma Krais pa kolen numpwam wrongkwail a Krais, atom pikekg kil amo eng ak awiyo.
EPH 5:24 Kol mentepm wrong kin a kipman mapming a ukipma Krais orngwatneikgen kil pa, am wa kolpa yat pake, kipm kin pa, kipm mpa orngwatneikgen kipman alkipmen pa eng kweikwei wrongkwail.
EPH 5:25 Wa kipman kipm pa yat, kipm mpa plan ipma wor wasrongen kin alkipm pa kolen Krais kil plan ipma wor wasrongen mentepm wrong kin a kipman mapming a ukipma kil pa, atom kil uk kil alkil kai eng akawiyo pa.
EPH 5:26 Kil alko yangkipm wor alkilen pa, mentepm atning ukipma katnun, atom kil kaluko ak u pa, eng mpa ntokg mentepm palng klalen wriwen wor.
EPH 5:27 Kil la ikga elng mentepm wrong kin a kipman mapming a ukipma kil ti elng kai eng kil alkil. Mentepm pa mpa palng kolen kin kunakul arimo, a ake num arkole unokget aki ari paipm ur pa, kalpis. A wa ikgake tu rkiwo la mentepm antokg paipm ur pa, kalpis, mentepm ikga klalen wriwen wor kolti.
EPH 5:28 Am kolpa yat pake, kipman mpa plan ipma wor wasrongen kin alkil kol kil plan ipma wor wasrongen num alkil ti. Kipman a plan ipma wor wasrongen kin alkil pa, pa plan la kil plan ipma wor wasrongen kil alkil.
EPH 5:29 Am kolpake, kipman pa ake antiwe mpa ntokg paipm num alkil pa, kalpis. Kil mpa il okipma a ikglen kil alkil riworwor. Krais kil wa ikgalen mentepm wrong kin a kipman mapming a ukipma kil kolpa yat pake.
EPH 5:30 Kol mentepm ti pa numpwam ur a num akilen.
EPH 5:31 La ela kai wrkapm a Maur Wailen pa la kol kil la, “Kipman mpa itnuurng man a yan alkil pa, atom uwi kin pa iye rpmi wan manet, atom tuwekg mpa palng kolen num wris.”
EPH 5:32 Yangkipm kla pa yangkipm ampen wail manten. Yangkipm kla pa kupm ak la Krais a mentepm wrong kin a kipman mapming a ukipma Krais.
EPH 5:33 Am kol wet a la pake: kipm kipman wris wris pa, kipm mpa plan ipma wor wasrongen kin alkipm pa irir kol a kipm plan ipma wor wasrongen kipm alkipm pa. Wa kipm kin pa yat, kipm mpa orngwatneikgen ngkit nang a kipman alkipmen pa.
EPH 6:1 Kipm warim pa, kipm mpa itning nungkulkg orngwatneikgen kutnun mansan alkipm pa! Kipm ik kolpa pa, pa ute wor pake. Wailen kil wasrongen a kipm ak kolpake.
EPH 6:2 ”Kipm mpa orngwatneikgen ngkit nang a tu man a yan akipmen pa!” Pa yangkipm titnongket itna ep pikekg Maur Wailen yapon, wa yangkipm antuwe la,
EPH 6:3 ”Kol kipm ik kitila kolpa pa, kipm ikga itopen rpmi wor uwi wang watin i kanokg ti.”
EPH 6:4 Kipm yantin pa, ake mpa kipm ntokg paipmel tu warim alkipm pa eng tu ipma wakget pa. Kipm mpa irowonel a kiling planten a la kurkurng kolen a Wailen kil wasrongen pa.
EPH 6:5 Melnum a aken kwap kalpmlel orngwatneikgen mring a kanokg ti pa, kil mpa ngkirk ikwoniye a wa ik nikgwalpm wor a itning nungkulkg kolen la pa kil katnun Krais.
EPH 6:6 Ake lala kipm ik itni wulmpa a melnum pa, eng mpa melnum pa uwi wor lawepm pa, kalpis. Kipm mpa ik kolen tu melnum a aken kwap Krais pa kalpmlel nampokgen nol nikgwalpm aklale katnun nikgwalpm a Maur Wailen.
EPH 6:7 Kipm itopen nikgwalpm rkekgen ikwap pa riworwor kol la pa kipm ak eng Wailen pake, a ake kipm ak eng melnum pa.
EPH 6:8 Kipm ariwe la, Wailen pa kil ikga ikilmpe melnum wris wris kitila kwap wor a kil ak pa. Kil ikgake ri la mring aki melnum a aken kwap mring pa, kil ikga uk kitila kwap wor a kipm ak ti kolti.
EPH 6:9 A kipm mring pa, kipm ikglen tu melnum a aken kwap kalpmlel orngwatneikgen kipm pa riworwor kolpake. Ampur naken wrongkel, eng ntei, kipm ariwe la Mring Wailen a kipmekg yatenen pa rpma kaino kitnong ai. Kil ikga ikilmpe paipm a kipmekg yatenen pa irir.
EPH 6:10 Oklala akupmen wreren eng a kai plalng pake, ti kupm la ngkitepm won la, kipm itni titnongket kai wris nimpokgen Wailen, eng mpa kipm ntiwe titnongket a kalnten a Wailen.
EPH 6:11 Kipm nipo wamung a nimpil wri a Maur Wailen alkepm pa iye kimeket, eng mpa kipm ik tulpulng Maur Paipm Satan a kansilepm pa.
EPH 6:12 Kol mentepm ake almpwrong nampokgen mentepm almentepm melnum ti pa, kalpis. Mentepm almpwrong nampokgen mring, a mring maur, a maur paipm wrongkwail a antiwe titnongket wrongkwail, a maur tiur a awi nang wailen antiwe titnongket itna kaino kitnong ai, a wa itna ikgalen kanokg ti. A wa anti maur paipm a antiwe titnongket a akwap itna kai miningket a yela kanokg ti.
EPH 6:13 Kolpa ti kipm nipo wamung a nimpil wri kweikwei a Maur Wailen pa itni num pa kimeket, atom itni mongklan nimprampen o! Atom ak wang a kalkuten palngtepm pa, kipm antiwe titnongket a itna almpwrong, atom alok angkli maur paipm pa kai ai, a itna titnongket itna or pa kai.
EPH 6:14 Kolpa ti kipm wrekg itni ukikg numprampen kolkil: - rpmi kutnun nikgwalpm ute wor a Maur Wailen kolti, pa kol apm klingen watipmen a kipm alil akla num alkipmen; - kutnun nikgwalpm aklale kolti, pa kol tapminei umpu a kipm ak angkirng apm a alil pa tongtong. -
EPH 6:15 Kipm nikgwalpm rkekgen eng laron yangkipm wor a la Krais pikekg lam kla ak angkeng ipma wakget a Maur Wailen a itna eng mentepm ti. Pa pati, pa kolen kipm rapon ti kipm owen kukwula, atom ake ik wri ur awiyepm kai nepm pa, kalpis. -
EPH 6:16 Wa kai aken kweikwei tiur a kipm awi itna num pa, kipm uwi wamung kakir pa nipo ik la num pawo! Pa kolen kipm ukipma Krais pa itna titnongket pati, pa antiwe ak talpulng wri nokget a Maur Paipm ak almpepm pa. -
EPH 6:17 Kipm mpa wonirpme riwe la Maur Wailen ak awiyepm yaper kul ise, pa kol kipm ngkat wamung pa aye kaino kwa eng ak la tukgunakg ikgokg alkipm ti. - Wa kipm rkul yangkipm a Maur Wailen pa kolen wri a Maur Wor a kipm nampil aye pa.
EPH 6:18 Kipm ik titnongket a Maur Wor pa oklala niki a ukwen Maur Wailen pa ikngklei wang eng mpa kil ngklinsepm. Kipm ak kolpa pa, pa kolen kipm itna atnen ya wokgwokg pa itna. Ampur kipm elngen pa. Kipm oklala niki niki Maur Wailen pa kolpa ikngklei eng kil ngklin tu wrong kin a kipman a ukipma kil pa.
EPH 6:19 Wa yat, kipm oklala niki Maur Wailen eng mpa kil lkopm yangkipm ur alkilen pa ik wang a kupm itni eng laron pa, eng mpa kupm itni titnongket wrongen laron yangkipm ampen wor alkil a la Krais pa.
EPH 6:20 Pikekg Maur Wailen alkil ukwawopm eng la kupm laron yangkipm wor akilen, atom tu awiyopm aye kul rpma wan tipmining a kilke. Kolpa ti kipm oklala niki Wailen pa, eng mpa kupm itni titnongket wrongen laron yangkipm akilen pa kol a kil wasrongen la kupm laron pa.
EPH 6:21 Kupm ukwa Tikikus kil kaintepm pake. Kil mentepm almentepm melnum a ukipma Krais pake a mentepm plan ipma wor wasrongentel. Kil melnum akwapel wor a Wailen. Kil pa ikga lanikepm kimek kimek kuina ur wrongkwail a palng eng kupm itna kil. Atom ikga kipm uwi riwe la kupm rpma kolai, a kupm antokg kuina.
EPH 6:22 Yiprokgen a kupm ukwawel kaintepm pa pati itna kolkil: kupm ukwawel kai eng la ikga kil lanikepm la men rka kolai, eng ikga kipm uwi ipma meen wor.
EPH 6:23 Kipm melnum akupmen a mentepm ukipma Krais, kupm oklala naki Maur Wailen Yan, a Wailen Sisas Krais, eng mpa tuwekg ngklinsepm nikgwalpm wor a rpma meen wor, a plan ipma wor wasrongen tita titnongket, a ukipma itni titnongket.
EPH 6:24 Kupm oklala naki Maur Wailen eng kipm mlaur a plan ipma wor wasrongen Sisas Krais Wailen amentepmen pa, eng mpa kil plantepm nikgwalpm wor a ngklinsepm kimeket iye kolpa kai. Yangkipm a kupm Pol nira pa am kai kolpake.
PHI 1:1 Kupm Pol nampokgen Timoti, mentekg melnum akwapel a orngwatneikgen Krais Sisas, mentekg uk wor kipm wrong kin a kipman wriwen wor a Krais Sisas a rka kai anong Pilipai. Kupm nira wrkapm kil eng kipm, nampokgen kipm melnum a itna ep ikgalen kwap a Maur Wailen, wa kipm melnum akwapel a angklin tu melnum.
PHI 1:2 Kupm oklala naki Maur Wailen, Yan amentepmen, nampokgen Wailen Sisas Krais, eng mpa tuwekg plantepm ipma wor alntuwekgen ik ngklinsepm a lkepm ipma meen wor.
PHI 1:3 Akangklei wang a kupm akwonalmpentepm pa, kupm uk wor Maur Wailen akupmen.
PHI 1:4 Akangklei wang a kupm oklala naki naki Maur Wailen eng angklin kipm kimeket pa, kupm atopen oklala nakel nakel pa.
PHI 1:5 Kupm uk wor Maur Wailen atnen a kipm antiwopm akwap wris a laron yangkipm wor a la Krais pa, ep ilmpiwen a kipm ukipma Maur Wailen ai, kulngkul, kul wli wang ti.
PHI 1:6 Kolpa ti kupm ariwe ise la la, Maur Wailen kil alkil a pikekg ngkaten kwap wor ak kawor ipma akipmen pa, kil alkil ikgam ikwap kolpa kawor ipma akipmen pa iye kaingkai, kai iro yiprokg ik wang a Sisas Krais kil yaper nar.
PHI 1:7 Kipm pa kol nol walpm akupmen, ti wor wrisen eng kupm akwonalmpentepm kolpa. Kupm ari kipm pa alupm nikgwalpm wor wor a Maur Wailen plantepm irir kol nikgwalpm wor wor a kil uk kul kupm ti. Atom kipm angklinsopm ak wang a kupm rpma wan tipmning ti, wa ak wang a kupm pikekg atn ak titnongketel yangkipm wor a la Krais pa itna minsrang talpulng yangkipm a tu alilakelopm pa.
PHI 1:8 Maur Wailen kil ariwe la, kil kupm la aklale wrisen: nikgwalpm wail akupm pa arkentepm rka, kol nikgwalpm a Sisas Krais kil alkil arkentepm rka pa.
PHI 1:9 Kupm oklala naki Maur Wailen eng mpa kil ngklin kipm pa, eng mpa kipm rkul nikgwalpm a plan ipma wor wasrongen tita iye or pa kai wail, eng mpa ariwe akipmen ti mpa wa inip iye kaino watin, a kai wail, wa nikgwalpm akipmen ti mpa wa umpen wontrakole wor, eng mpa kipm ntiwe ik ri la kuina ur a i wor, a kuina ur a i paipm.
PHI 1:10 Wa kupm wa oklala naki Maur Wailen pa eng mpa kipm ntiwe tukwei kuina ur a wor wrisen ai, eng mpa kipm rpmi wriwen wor kolti, eng ake antiwe mpa melnum ur rkiwepm la kipm melnum a antokg paipm pa, kolpa iye kaingkai ngko wang a Krais kil yaper nar.
PHI 1:11 Kipm kutnun nikgwalpm wor wor kolpa pa, pa kipm kolen yo a Sisas Krais kil alkil ikgalen, atom angko ok arke wailet wor pa, eng mpa tu wrongkwail ri pa, pa tu uk wor ik ngkit nang a Maur Wailen.
PHI 1:12 Kupm la kipm melnum alkupm a mentepm ukipma Krais, kipm mpa riwe la, kalkuten a palngtopm kil pati, ampur kipm ipma kalkut la pa ak angkeng kwap a laron yangkipm wor a la Krais pa, kalpis. Pa palng eng ak titnongketel kwap pa.
PHI 1:13 Kolpa ti tu melnum wantengkwang a rka wan wail a melnum tukgunakg, a atnen wanyun tatu ti, a tu tiur yela wai, tu ariwe la kupm rpma wan tipmning ti atnen kupm melnum a akwap a Krais.
PHI 1:14 Wa tu melnum wailet alntuwen a mentepm ukipma Krais a itna kil pa, tu ari titnongket a Maur Wailen angklinsopm rpma wan tipmning kil, atom pa ak titnongketel tu pa. Atom tu ake wa ngkark, tu itna wrongen laron yangkipm a Maur Wailen kolpa aye kai.
PHI 1:15 Am aklale pake, tu tiur pa ipma paipm la no itni klangkil kupm ti, atom tu laron nang a Krais pa. Pake tu tiur pa nikgwalpm wor atom laron nang a kil pa ak ipma wor.
PHI 1:16 Tu plan ipma wor atnen a tu wasrongentopm. Eng ntei, tu ariwe la Maur Wailen kil alkopm kwap eng la itni tulpulng yangkipm ok a tu a la paipmel yangkipm wor a la Krais pa, atom kupm planten la pa yangkipm aklale wrisen.
PHI 1:17 Tu a laron nang a Krais ak ipma paipm ti pa, tu akwonalmpen tu alntu ti kolti la uwi nang wailen angen kupm ti. Nikgwalpm a tu pa rka raimpe, tu akwonalmpen la tu a wa lkopm kalkuten tiur ik iken kalkuten a kupm arki rpma wan tipmning ti.
PHI 1:18 Ti mpa ntei! Pa wor wrisen eng ya watipmen itna eng tu laron nang a Krais. Kol tu laron ik ipma kansil aki ik ipma aklale aki, kupm ti atopen kolti eng tu laron nang akil kolpa kai pake. Kupm atopen kolpa aye kai.
PHI 1:19 Kupm atopen atnen kupm ariwe la kipm oklala naki naki Maur Wailen pa eng angklinsopm. A wa kupm ariwe la Maur Wor a Sisas Krais pa wa angklinsopm yat. Kolpa ti ikgake kalkuten ti lok ngkliwopm pa, kupm ikga angen pa.
PHI 1:20 Pikekg ep ak ai pa kupm pikekg itna wrongen laron nang a Krais pa kulngkul ak wang ti. Ti wa nikgwalpm wail akupmen pa, kupm am wa nikgwalpm arkekgen la wa itni wrongen uk num alkupmen ti kai ikirmpen Krais, la kupm imo aki, kupm rpmi aki, pa ak ngkat nang a Krais pake. Eng kupm ikgake la uwi numpaipm itni wulmpa a kil pa.
PHI 1:21 Kol kupm ake amo, kupm rpmi kanokg ti i i pa, kupm la ik ngkit nang a Krais pa kolpa kai pake. Pake kol kupm imo pa, pa wa wor wrisen angen pa.
PHI 1:22 Pake kol kupm ake amo, kupm rpmi ti i pa, kwap a kupm aken pa ikga ngko ok rke wailet kolpa iye kai. Kolpa ti kupm ake ariwe la a i wor, kupm imo aki kupm rpmi ti.
PHI 1:23 Nikgwalpm akupm ti pa rka wekg wekg rka ti: nikgwalpm ur pa kupm wasrongen paipm la imo utnuurng kanokg ti kaino nti Krais pa rpmi, pa kol a wor wrisen or kaingkai ai.
PHI 1:24 Ari wa kupm akwonalmpen la kol a kupm rpmi ti i ikwap kolpa iye kai pa, pa wor eng la kol a ngklin kipm pake.
PHI 1:25 Kupm ariwe la kwap wail itna kol a kupm rpmi eng ik pake. Kolpa atom kupm ariwe la kupm ikgake imo, kupm ikga rpmi. Kupm ikga nti kipm wrongkwail rpmi eng ngklinsepm, eng kipm ukipma Maur Wailen ti itni titnongket kolpa iye kai, eng mpa kipm itopen rpmi.
PHI 1:26 Ti kipm ikga ri kupm ikga wa yaper kaintepm pa, kipm ikga ngkit nang a Krais Sisas pa itopentopm wail manten paipm.
PHI 1:27 Kwei ur wail wris ur kol a kipm kutnun pa pati kil: kipm mpa itn a rpmi kutnun yangkipm wor kol a Krais kil la la kipm alkilen kutnun pa! Kol kupm kai riwepm aki, kol kupm rpmi kil itning aki, kupm la itning tu lakiti la kipm alupm nikgwalpm wris akwap or wris itna titnongket talpulng wrongmanto, eng mpa tu wrong kin kipman ukipma yangkipm wor a la Krais pa.
PHI 1:28 Wa kupm la wa itning la, kipm ake ngkark eng wrongmanto alkipm pa, kalpis. Kipm itna wrongen kolpa, pa kla ur a Maur Wailen elngtitna la ik plan tu wrongmanto la, tu pa ikga kai paipm pake, a wa ik plan kipm pa la kipm pa ikga Maur Wailen ik uwiyepm pake.
PHI 1:29 Eng ntei, Maur Wailen kil alkepm kwap la kipm ukipma Krais pa. A ake wa la kipm ukipma ti kolti pa. A wa kil wa alkepm kwap la kipm rki kalkuten pa yat itnen a kipm ukipma Krais ti.
PHI 1:30 Kolpa atom ari kipm arki kaikuten wris kol pikekg kipm ari a kupm antiwepm rpma kai pa atom kupm arki pa. Wa wang ti kipm wa atning a kupm arki kaikuten kolpa itna ti.
PHI 2:1 Ak wang a ake kipm titnongket pa, Krais pa ak titnongketelepm pake? Kil plan ipma wor wasrongentepm, kolpa atom kil ak num karkitiwepm pake? Maur Wor kil pa awiyepm aye kai wris, kolpa atom kipm nikgwalpm wor arein tita alok angkli tita pake?
PHI 2:2 Ti kupm tilpepm la, kipm lupm nikgwalpm wris, kipm kimeket rkul nikgwalpm a plan ipma wor wasrongen tita, a wa kipm or wris ore tita. Kipm ik kolpa pipa, kupm mpa itopen wail manten paipm.
PHI 2:3 Ampur kipm akwonalmpen kipm alkipm ti kolti, atom kipm antokg kweikwei pa, la kipm la uwi nang wailen angen tu tiur ai, kolpa iyai. Kipm rku kipm alkipm ti iye nar orngwatneikgen mla ur ai, a kipm ngkit nang a tu pa la tu pa wor pake.
PHI 2:4 Kipm itningkri kuina ur a tu tiur ai wasrongen ai, atom kipm ngklin tu ai ep ep pen. Ampur kipm akwonalmpen kipm alkipm pa la ngklin kipm alkipm ti kolti pa.
PHI 2:5 Nikgwalpm a kipm pa, mpa kipm lupm nikgwalpm kol a Krais Sisas kil alkil pake:
PHI 2:6 Krais kil alkil am irir kolen Maur Wailen pake, ari wa kil ake wa la rkul nang wailen alkil pa itni pa i.
PHI 2:7 Kil atnuurng nang wailen alkil a irir kolen Maur Wailen pa. Wa kil awi wor eng kil palng kolen melnum a aken kwap orngwatneikgen mring ur kolti. Kil pikekg man rakuwel palng melnum kol mentepm ti. Tu melnum ariwel pa, tu la kil pa melnum kol mentepm tike.
PHI 2:8 Kil arku kil alkil pa atning nungkulkg orngwatneikgen Maur Wailen. Kil atning nungkulkg kolpa kaingkai, kai amo, tu karkurngkel rka yo okgmangki pa amo kolen la pa melnum paipm ur.
PHI 2:9 Kil arku kil alkil kolpa atom Maur Wailen awiyel aye kaino alkel nang wailen a itna ep angen nang wailen wrongkwail.
PHI 2:10 Maur, a mring maur, a melnum, a kweikwei wrongkwail a itna kaino kitnong ai, a itna yela kanokg a ti, a rka kinar kanokg wunen ai, tu ikga elng nar kipor kilko ileinsel, a orngwatneikgen kil wris ita.
PHI 2:11 Ikg a tu yela laron nang a Sisas Krais ti la, kil pa Melnum Wailen a itna ep, atom ik ngkit nang a Maur Wailen, Yan Wailen ai.
PHI 2:12 Kolpa ti kipm workganen yekyek alkupm, akangklei kipm atning nungkulkg ak wang a pikekg kupm antiwepm rpma pa. Pake wail manten pa pati, kipm itning nungkulkg ik wang ti a kupm ake antiwepm rpma. Kolpa ti kipm mpa ngkirk numnantiwepm itni wulmpa a Maur Wailen pa, ikwap timplowis kolpa iye kai eng kil am pikekg angklin ak awiyepm ise.
PHI 2:13 Pa atnen Maur Wailen kil alkil pa kil yiprokgen, atom kil antokg kipm atopen eng atning nungkulkg, wa alkepm titnongket pa, atom kipm akwap katnun nikgwalpm wasrongen a kil alkil wris ata.
PHI 2:14 Kweikwei wrongkwail la ntokg pa pati, ampur kipm la tintangen tita ok yangkipmen pa, iyai.
PHI 2:15 Eng ake mpa melnum ur lawepm la, kipm pa melnum a antokg paipmpaipm pa kalpis. Kipm rpmi rukis wriwen wor kolen warim wor a Maur Wailen. Kipm rpma kanokg miningket a tu melnum a antokg paipmpaipm arke, atom atnuurng ya ute, a wa angkom or ya raimpe pa. Kipm iye yangkipm klalen a Maur Wailen pa laron ik ngklin tu pa eng tu itning kutnun pa, ikga tu rpmi wor yongkyong. Kipm pa kolen wakg a akalen ya eng tu pa angkom ore. Kol kipm ik kutnun iye kolpa kai pa, kupm ikga itopentepm paipm tipra ik wang a Krais kil yaper nar pa. Pa ak plan la kwap wail a pikekg kupm ak eng ak angklin kipm pa, ake kupm ak kalpmlel pa.
PHI 2:17 Pikekg kipm ukipma Maur Wailen kolen kipm al wor uk kipm alkipm kai eng Maur Wailen. Kol tu ntokg la ilmpopm ur pipa, kupm atopen. Kol walmpopm akupm ti ungkwan eng ik kuluk kipm a kipm al wor uk kipm alkipm ti kai eng Maur Wailen ti pa, kupm ikga wa itopen nimpokgentepm yat.
PHI 2:18 Kolpa ti kipm am wa kolpa yat pake. Kipm itopen nimpokgentopm yat o, kol a kupm atopen ti!
PHI 2:19 Kupm akwonalmpen la, wasrongen a Wailen Sisas ti pipa, kupm la ukwa Timoti ti penterngen kai itn riwepm itningkiriwepm la kipm rka kolai. Plalng pipa, wa lakiti nikopm la kipm rka wor pipa, ipma a kupm pa mpa rki kukula wor om.
PHI 2:20 Ake kupm ari melnum ur a i a alupm nikgwalpm irir kol kupm ti pa kalpis. Kupm ari kol Timoti wris ata kolti kil nikgwalpm arkentepm aklale la ngklinsepm pa.
PHI 2:21 Ari kolen wrongkwail ti nikgwalpm arkekgen akwonalmpen kuina ur a tu alntu ti kolti. Ake tu nikgwalpm arkekgen kwap a Sisas Krais ti.
PHI 2:22 Pake kipm am ariwe Timoti pa, kil melnum wor a itna titnongket arki kaikuten. Kil am pikekg kimpilp atn anti kupm ti kolen warim pake. Kil angklinsopm eng mentekg akwap angkli yangkipm wor a la Krais.
PHI 2:23 Ti kupm wasrongen la ikga ukwa Timoti kil alkil pa kai riwepm pake. Ari kupm la itni nungkwangen yangkipm alkupmen kil pen, la tu ntokg yangkipm akupmen kil kai kolai plalng pipa, kupm ukwawel kai om.
PHI 2:24 Ti kupm alkupm ti pa, kupm ariwe la Wailen ikga ngklinsopm pa, ti kupm rpma nungkwangen la kupm ikgam kutnuntel kai riwepm pake.
PHI 2:25 Kupm wa akwonalmpen yat la ikga ukwa Epaprotitus ti wa yaper kaintepm. Melnum yek pa pikekg kipm ukwawel kul kol melnum yangkipm kuin akipmen, atom kil angklinsopm eng kwap lakip wrongkwail. Kil pa kolen paipmen alkupmen, kil pikekg antiwopm akwap wris. Mentekg yatenen pikekg arki kalkuten eng talpulng tu a la paipmel yangkipm a Maur Wailen pa.
PHI 2:26 Pikekg tu ur lanakepm la kil ti numpet paipm, atom kipm ipma kalkut eng kil. Kil atning pa, atom kil nikgwalpm arkentepm pilpilen atnen la kil la kol a kai riwepm, ti kupm la ukwawel kai pake.
PHI 2:27 Ei, aklale, kil am pikekg awi numpet wail la kol a imo pake. Ari am pikekg Maur Wailen kil alkil pa akimek areinsel atom angklinsel, ti kil palng wor rpma pa. Ake kil arein kil wris pa, wa kil wa arein kupm ti yat, kolpa eng ake mpa wa iye kalkuten ur pa wa iye kul ik rkuwopm iken kaikuten a kupm arki kil pa.
PHI 2:28 Kolpa ti kupm wasrongen paipm la kupm a ukwawel kaintepm pake. Ik wang a kil kai palngtepm pipa, kipm itopentel o! Kolpa eng ikga ntokg ipma akupmen ti wa rki kukulawen ketnketn.
PHI 2:29 Kipm lkel wor itopentel kol a kil melnum ur almentepmen a ukipma Wailen. Kipm ikglen tu melnum a kolpa kolen melnum yelen alkipmen,
PHI 2:30 eng melnum yek pikekg uk num alkil ti kai akwap a Krais, awi numpet wail la kol a imo ikirmpen kwap a kil pake. Kil ari la kipm pa rpma ya watinet, ake antiwe mpa kipm kul ngklinsopm, kolpa atom kil ti awi wrik a kipm pa kul angklinsopm pake.
PHI 3:1 Yangkipm a wet kupm la ep pa, kai eng a plalng pake. Kipm melnum alkupm a mentepm ukipma Wailen, kipm a Wailen pa ti kipm rpmi itopen kolpa iye kai o! Kupm ake wa kai karken num lpmaakopm eng la, wa la ntiur yangkipm a wuten kupm nirantepm ep pa. Pa wor eng la kipm itning orwrikel kolpa kai eng la ik ngklin kipm pa, eng ikga kipm kai wor pake.
PHI 3:2 Tu tiur pa la, kol ake kipm angket num a tu kipman pa katnun ya a men Suta pa, kipm ake warim a Maur Wailen pa. Tu pa tu melnum a angket num alntu ti ayengkalel ari paipm. Tu pa tu melnum akwapel paipm kolen nimpa wrongen a nam kamel pa. Ti kipm mpa ngkom nilokgen ukikg riwe tu melnum a kolpa!
PHI 3:3 Eng ntei, kol mentepm ngket num a mentepm kipman atom mentepm lala, mentepm am palng ute wor itna wulmpa a Maur Wailen ise, pake ake kolpa. Mentepm awi Maur Wor atom mentepm kapor kilko alein Maur Wailen, a mentepm atopen ngkat nang a Krais Sisas eng kwap a pikekg kil akto pa pati, pa kol la mentepm angket num aklale pake. Mentepm ariwe la kuina ur a mentepm melnum ti antokg kai num a melnum ti, wa kweikwei wrongkwail a mentepm melnum ti antokg pa, pa ake antiwe antokg melnum ti palng ute wor itna wulmpa a Maur Wailen pa, kalpis.
PHI 3:4 Kol kupm ngkit nang a kupm alkupm ti eng kuina ur pa, kupm antiwe. Eng ntei, kol kupm ti wa lakiti yipuk a yiprokg akupmen ti pa, pa wailet paipm, pake pa ake antiwe antokg kupm ti palng ute wor itna wulmpa a Maur Wailen pa, kalpis. Kol mla ur kil ikwonilmpen la kil antiwe ngkat nang a kil alkil pa, mpa wa kil riwe yat la, kupm antiwe wa ngkit nang akupmen ti angen kil pa yat.
PHI 3:5 Pake kol kupm la lakiti yipuk a yiprokg alkupmen pa pati kolkil: kupm pikekg man rakuwopm, rpma wang wampwomis wampwompwraur pipa, tu wangketopm num pa. Yiprokgen a angket ale men Suta ti kulngkul kul ti pa, am Isrel pake. Isrel wa wangket Pensamin, Pensamin wa angket ale kulngkul, kul wangket kupm tike. Tu mamikgmamin mansan akupmen pa, tu ak ok Ipru wris ata, wa ake tu awi kin ur kai ok ak manet ur pa kalpis. Kupm a men melnum a arpmen yangkipm yiprokgen a Moses pa, kolpa ti yangkipm titnongket a Moses, a tu mamikgmamin mansan a men pa kupm alupm worwor, atom kupm katnun yek kimeket.
PHI 3:6 Arpmen yangkipm titnongket a Moses ti pa, am kupm alkupm wris ti pikekg itna titnongket minsrang tike, atom kupm or tu a ukipma katnun Sisas pa alken wleket ungkwanten. Wa tu wrong kin kipman pikekg ari atn a rpma akupmen pa nampokgen yangkipm titnongket a Moses, a tu mamikgmamin mansan amenen pa, ake pikekg tu ur ari kupm ti la kupm ti kai ar ur pa, kalpis. Kupm pikekg katnun yangkipm titnongket pa yek kimeket.
PHI 3:7 Kweikwei wor wor a wet kupm la a pikekg ak ngkat nang akupmen pa, pa pikekg kupm ari la la pa wor ak angklinsopm. Ari wa kupm ukipma Krais ti, atom kupm ari la kweikwei wor wor a kolpa pa, ake wor, ake antiwe a ak angklinsopm.
PHI 3:8 Ake kweikwei wor wor a wet kupm la pa kolti pa, kweikwei wrongkwail ti am kupm ungkwan la, pa paipm, atnen kupm la uwi riwe Krais Sisas, Wailen akupmen pa itna ep wor wrisen angen kweikwei wrongkwail wor wor ai. Kweikwei wrongkwail wor wor pa kupm ungkwan kol ipik palk paipm a angkli pa, eng mpa kupm rkul Krais pa itni titnongket pake.
PHI 3:9 Wa eng mpa nikgwalpm akupm ti kai rki wris nimpokgen kil. Pikekg kupm katnun yangkipm titnongket a Moses, a tu mamikgmamin mansan, pa ake wa antokg kupm ti wor itna wulmpa a Maur Wailen pa. Kolpa atom kupm ukipma Krais pa, eng mpa kupm palng ute wor itni wulmpa a Maur Wailen. Kupm ukipma Krais pa, atom Maur Wailen kil alkil pa antokg kupm palng ute wor itna wulmpa alkilen pake.
PHI 3:10 Kweikwei wrongkwail am kupm uk yirokg ise, eng kupm la riwe Krais eng palng kolen kil, wa kupm la riwe titnongket kol a pikekg kil wrekg a kirkap pa. Wa kupm la rki kalkuten kol a pikekg kil arki pa, kolpa kaingkai imo kol pikekg kil amo pa.
PHI 3:11 Wasrongen a Maur Wailen la kupm wrekg i kirkap pa, kupm ikga wrekg pa.
PHI 3:12 Kupm ake akwonalmpen la kupm pirng kai angko wrik a kai elngen pa, a pa, kupm pirng itna pa. Kupm ake lala kupm ti wor ise, kolpa kalpis. Kupm nikgwalpm arkekgen pirng atatu ti pa, eng la uwi Krais Sisas ti kol kwei ur wor a tu pirng akoporen tita eng la uwi pa, kol a pikekg kil awi kupm ti eng alkilen pa.
PHI 3:13 Kipm melnum alkupm a mentepm ukipma Krais, am aklale pake, ake kupm akwonalmpen la kupm pirng kai palng kai wrik a awi kweikwei wor pa, pa apa. Pake nikgwalpm wris ata a kupm akwonalmpen pa pati, kupm la pirng wulmpa itni ya kolti kai pake, a ake la ikgel yirokg pa.
PHI 3:14 Ti kupm pirng nikgwalpm arkekgen atatu angko ya a pa, eng la kai ngko wrik a elngen pa, eng la uwi lukglukg wor wor a pikekg Maur Wailen aknamput tu melnum a ukipma Krais Sisas pa, la ikga tu kaino uwi kaino anong wor alkilen ai.
PHI 3:15 Mentepm wrongkwail a nikgwalpm amentepm ti pa rka kolen kin nangkwor mel nangkwor pa, mentepm mpa lupm nikgwalpm kol a wet kupm la pa. Tu tiur a alupm nikgwalpm manet pa, ikga Maur Wailen planten nikgwalpm wor alkilen pa, eng mpa tu kutnun.
PHI 3:16 Mla ur a kil ep aki angko kuin aki katnukg pa, mpa wa ntei. Pake wail manten pa pati, mentepm kimeket mpam kutnun tita or ya wris pa kai pake.
PHI 3:17 Kipm melnum alkupm a mentepm ukipma Krais, mpa kipm ri atn a rpma akupmen pa, atom kipm kutnun! Wa kipm ri tu tiur a katnun yikak milik a kimpron a pikekg men angkom ore pa, kipm kutnun kitila pawo!
PHI 3:18 Pikekg kupm lanakepm ep anti watipmen, pake kupm wa lanakepm ak ikgakgel anti ur la, tu wailet pa tu angkom or ya manet, ti tu pa wrongmanto a Krais a pikekg amo rka yo okgmangki.
PHI 3:19 Tu katnun kuina ur a ipma a tu alntu ti wasrongen la ntokg ti kolti la, pa kol maur wailen atuwen pake. Tu antokg kweikwei a numkropis a uk numpaipm kamel pa tu atopen ngkat nang alntuwen pa la, tu antokg kweikwei a numpwor. Tu nikgwalpm arkekgen kweikwei a itna kanokg a ti kolti, kolpa ti tu pa ikga kai paipm kai wakg.
PHI 3:20 Mentepm ti pati, anong mreren a mentepmen pa kaino kitnong. Mentepm ti nikgwalpm arkekgen rpma nungkwangen Wailen Sisas Krais, melnum a ikga ingkaino kitnong nar ikuwiyo iye kaino.
PHI 3:21 Ikg a kil ik titnongket a kil alkil ti ik lok kweikwei wrongkwail pa kai orngwatneikgen kil alkil, a kil itni ep ikglen kweikwei wrongkwail pa. Ikga ik titnongket wris pa, kil ikga ntokg numpalk paipm amentepmen ti kai tukuleikg a uwi numpalk weten wor kol a numpalk klalen wor a kil alkil ai.
PHI 4:1 Kolpa ti, kipm melnum a mentepm ukipma Krais, kipm itni titnongket iklale wrisen kutnun Wailen! Yekyek alkupm, kupm ti plan ipma wor wasrongentepm paipm, nikgwalpm arkentepm rka. Kipm pa kol lukglukg wor wor ur a pikekg kupm aken kwap atom kupm pirng la uwi.
PHI 4:2 Kupm la kipmekg kin wekg Yuotia ekg Sintike, kipmekg kin a ukipma Wailen Sisas, kolpa ti kipmekg elngen nikgwalpm a kolpa, a kipmekg lok ngkli tita rpmi riwor.
PHI 4:3 Wa kitn Sisikus, melnum alkupm a mentekg arki kalkuten akwap wris, kupm la kitn ngklin kin wekg pa, eng mpa tuwekg rpmi ukipma wor tita! Tuwekg pikekg akwap timplowis angklinsopm ak wang a kupm laron yangkipm wor a la Krais. Tuwekg pa nampokgen Klemen, wa tu tiur a pikekg men akwap or wris pa, nang atuwen pa ela wrkapm a Maur Wailen nira nang a tu a ikga rpmi wor yongkyong elawe pa.
PHI 4:4 Kipm a Wailen pa ti, kipm itopen o! Wa kupm wa la lanikepm nti ur la, kipm itopen ikngklei wang kolpa iye kai o!
PHI 4:5 Wailen wreren eng a nar, ti kipm lok ngkli tita meen tatar rki wor! Kipm ik kolpa, eng mpa ik plan tu wrongkwail ai, eng mpa tu ri.
PHI 4:6 Ampur kipm mining paipmen num, ngkark atnen kalkuten ur pa! Pa kipm ukwen Maur Wailen pa oklala nikel, a wa lkel wor, eng mpa kil ngklinsepm kuina ur kalkuten a kipm arki pa.
PHI 4:7 Kipm oklala niki Maur Wailen kolpa pa, kil mpa lkepm ipma meen wor a Krais Sisas pa rpmi wail ikglen nol nikgwalpm akipmen pa, ti kipm ake mpa ngkirk. Ipma kukula kupuk meen wor a Maur Wailen alkepm kolpa pa kinar kanokg walopmen kinar ai, a wa kaino kwa watin kaino ai, a ariwe a melnum ti ake antiwe ariwe pa.
PHI 4:8 Kipm melnum alkupm a mentepm ukipma Sisas, oklala akupmen eng a kai plalng pake. Ti kupm la la lupm lupm kipm pa la, nikgwalpm akipm pa rki eng kweikwei a wor, a wa kweikwei a wrongkwail ari kaporng yangkipm la pa wor. Kweikwei a wor pa kol kil: kweikwei a aklale, kweikwei a ute wor, kweikwei a wriwen wor, kweikwei a atopen, a wa kweikwei kol a tu awi wor lawepm! Nikgwalpm a kipm pa rki eng kweikwei a wor wor kolpa kolti!
PHI 4:9 Kuina ur a pikekg kupm kaling plantepm atom kipm awi ariwe pa, wa pikekg kipm atning a kupm laron pa, wa ari a kupm antokg pa, am kipm uwi ik kitila kolpa iye kai o! Kolpa pa mpa Maur Wailen ntiwepm rpmi lkepm ipma meen wor. Kil pa yan yiprokgen a ipma meen wor pake.
PHI 4:10 Kipm pikekg itna lailaien angklinsopm kweikwei ak ai kul pake. Kupm atnuurngkepm ti pa, kipm atopen kolpa itna la ngklinsopm, pake ya kalpisen mpa kipm ukwa kweikwei pa kul ik ngklinsopm or kolai. Atom ak wang ti kipm wa wonlan eng wa ukwa kweikwei pa kul ak angklinsopm tike, ti kupm atopen paipm ngkat nang a Wailen.
PHI 4:11 Ake la la pikekg kupm rpma paipm aki tukwok eng okipma a kweikwei a numpalk pa, atom kipm angklinsopm pa, kolpa kalpis. Kupm rpma kolai pa, pa ake paipm. Kupm rpma wor atopen rpma kolti. Wang wor wang paipm pa, kupm am rpma ariwe ise.
PHI 4:12 Kupm ariwe a kupm rpma antiwe kweikwei, a kupm ariwe a kupm rpma tukwok, pa am kupm rpma ariwe ise. Akangklei wang a kupm rpma ti aki, rpma tatu ai ai pa, nikgalmpopm aki, nikgwor aki, kupm antiwe kweikwei wailet aki, kupm rpma tukwok pa, kupm rpma wor kolti. Ya wrongkwail a kolpa pa am kupm ariwe yat ise.
PHI 4:13 Kupm antiwe arki kalkuten, a antokg kweikwei wrongkwail pa ak titnongket a Krais alkopm pa.
PHI 4:14 Ari kipm ukwa kweikwei pa kul ak angklinsopm ak wang a kupm arki kalkuten, a kupm rpma tukwok kolkil pa wa wor yat.
PHI 4:15 Ak wang ep a pikekg kupm angkli yangkipm wor a la Krais pa ak angklin kipm pa itna anong kanokg Masetonia, wa kupm atnurngkepm kai anong ur ai pa, am kipm melnum a ukipma Maur Wailen kai Pilipai pa ukwa kweikwei pa kul ak angklinsopm pake. Kipm pa ariwe pa, ake wa tu anong manet tiur a ukipma Maur Wailen pa wangkir a yapo nampokgen kupm ti pa, kalpis, am kipm alkipm pa kolti. Kupm pikekg laron yangkipm pa ak angklinsepm, wa kipm wa akalmpe ukwa kweikwei a kupm tukwok pa kul ak angklinsopm.
PHI 4:16 Wa ak wang a pikekg kupm rpma kai Tesalonaika pa, kupm tukwok eng kuina ur pa, kipm pa pikekg ukwa kweikwei kul ak angklinsopm anti aripm ur pake.
PHI 4:17 Kupm atopen kweikwei kol a kipm ukwa kul ak angklinsopm, pake wail manten pa kupm wasrongen la kipm ik kolpa iye kai pa, pa kolen kipm ak angkine marpm akipmen a Maur Wailen ikgalen kaino anong wor pa kil anip kolpa aye kaino wail.
PHI 4:18 Ti kil, ker a pikekg kupm wangket akawiye kweikwei a pikekg kipm uk Epaprotitus ayentopm kul pa, wailet paipm angen ai. Pa kol yaprekg wor a kipm al wor uk Maur Wailen ti kil awi wor atopen pa.
PHI 4:19 Maur Wailen akupmen, wa kil Maur Wailen akipmen yat, kil antiwe kweikwei wor wor wrongkwail wailet. Kipm melnum a ukipma Krais Sisas pa, kuina ur a kipm tukwok pa, mpa Maur Wailen kil lkepm pa.
PHI 4:20 Kolpa ti mentepm ngkit nang a Maur Wailen, Yan almentepmen pa, ikngklei wang kolpa iye kai! Aklale wrisen.
PHI 4:21 Alkepm wor, kipm wrong kin kipman a Maur Wailen a ukipma Krais Sisas, kupm nikgwalpm arkentepm rpma pa! Tu melnum a mentepm ukipma Sisas a antiwopm rka ti pa, wa tu la kupm nirantepm la tu nikgwalpm arkentepm rka pa.
PHI 4:22 Tu kin kipman wrongkwail a Maur Wailen a rka kil pa, wa nampokgen tu a akwap rka wan wail a melnum tukgunakg a Rom kil pa, tu wa la tu nikgwalpm arkentepm rka kolpake.
PHI 4:23 Yangkipm a kupm Pol nira eng ak angklinsepm am kai kolpake. Kupm asen Wailen Sisas Krais la kil plantepm ipma wor alkil a ngklin kipm wris wris pa rpmi wor.
COL 1:1 Kupm Pol, melnum a pikekg Maur Wailen kil takweiyopm ak wasrongen alkil atom ukwawopm kai akwap a Sisas Krais, wa nampikgen Timoti, melnum wor akupmen a mentekg ukipma Krais.
COL 1:2 Mentekg nira wrkapm kil kai eng kipm wrong kin kipman a Maur Wailen a rka kai anong Kolosi, kipm melnum almentekgen a ukipma Krais. Mentekg oklala naki Maur Wailen, Yan amentepmen eng mpa kil plantepm ipma wor akilen ik ngklinsepm atom ntokg kipm rpmi nimpokgen ipma meen wor.
COL 1:3 Mentekg akangklei uk wor Maur Wailen, Yan a Wailen Sisas Krais amentepmen, ak wang a mentekg oklala naki Maur Wailen eng kil ngklinsepm.
COL 1:4 Mentekg ukwor Maur Wailen pati atnen a mentekg atning a kipm ukipma Krais Sisas a wa kipm plan ipma wor wasrongen tu wrongkwail kin a kipman wriwen wor a Maur Wailen pa.
COL 1:5 Kipm ukipma ariwe rpma nungkwangen la ikga ngkwrerng kruitn a kweikwei wor wor a Maur Wailen kil numprampen ikgalen elng itna kaino anong wor ai. Kipm pikekg atning katnun yangkipm wor aklale wrisen a Maur Wailen pa atom, kipm ukipma rpma nungkwangen pake.
COL 1:6 Pikekg tu melnum aye yangkipm wor pa aye kaintepm. Yangkipm wor pa kai yela anong kanokg wrongkwail ti, atom palng wail anip wor kaino wail angko okarke yela kanokg ti ise. Am kol pikekg ep kipm atning kai anong akipmen pake. Kipm atning yangkipm wor aklale a la nikgwalpm wor a Maur Wailen plantepm a angklinsepm pa atom kipm atning awi ariwe katnun pa.
COL 1:7 Epapras kaling plantepm ti kipm awi ariwe wor pa. Kil yek pa melnum akwapel nungkulkg wor a Krais amenen, kil akwap wris kolen men ti, kil laron yangkipm wor a Krais pa ak angklin kipm pa.
COL 1:8 Am pikekg Epapras kil pa wa lakati naki mentekg ti la Maur Wor akwap kai kipm pa atom kipm plan ipma wor wasrongen tita pake.
COL 1:9 Kolpa atom ari, ak wang a mentekg atning a tu lakati kipm pa pipa, ake wa mentekg elngen a akwen Maur Wailen eng la kil ngklinsepm pa. Mentekg asentel eng mpa kipm uwi riwe kweikwei wrongkwail a kil wasrongen pa kimeket, eng mpa ik ngklin Maur Wor akipmen ti uwi riwe a nikgwalpm wontrakole worwor wrongkwail pa.
COL 1:10 A wa mentekg oklala naki Maur Wailen eng mpa rpma akipmen pa mpa palng wor itni wulmpa a Wailen. Wa kipm uwi ariwe a Maur Wailen pa atom kipm ik ik kwap wor eng kil pa, pa kol kipm angko ok wor kai kweikwei a worampei a kipm antokg pa, eng mpa Wailen kil kiporng yangkipm.
COL 1:11 A wa mentekg oklala naki Maur Wailen eng mpa kil ik titnongketel kipm pa kai ya watipmen ik titnongket klalen wail manten akilen pa, atom ti kol kaikuten tiur a la palngtepm pa, kipm antiwe rpmi meen rki kaikuten pa nimpokgen ipma itopen pa.
COL 1:12 Mentekg oklala naki Maur Wailen eng mpa kipm itopen ngkit nang a Yan Maur Wailen pa iye kaino kwa lkel wor eng kil antokg kipm antiwe awi kweikwei wor wor alkipmen a kil numprampen eng tu wrong kin a kipman alkilen itna kaino anong akilen ai.
COL 1:13 Maur Wailen kil ungkwan titnongket a Satan itna wailen ikgalen nol nikgwalpm amentepmen a yapowo kai miningket pa kai takwlelkg, a kil awiyo kai pa aye kul kai eng Warim Kipman alkil a kil plan ipma wor wasrongentel pa itna wailen ikgalen nol nikgwalpm amentepmen.
COL 1:14 Warim Kipman pa kil akarmpen paipmpaipm a mentepmen plalng ise, atom ungkwan paipmpaipm a mentepmen.
COL 1:15 Mentepm ake antiwe mpa ri Maur Wailen, pake mentepm ari Krais pa am ari irir kol Maur Wailen pake. Kil pa warim i alkil am pikekg rpma ep ak ai rpma pake, a kitnong a kanokg a kweikwei wrongkwail ti pa pikekg palng katnukg.
COL 1:16 Maur Wailen am anti kil pake antokg kweikwei wrongkwail: kweikwei a itna kaino kitnong ai, a itna kanokg ti, kweikwei a ari ak wulmpa, a kweikwei a ake antiwe ari, tu mring, a mring maur, a maur a antiwe titnongket, a tu a itna tukgunakg ikgalen kanokg ti. Kweikwei wrongkwail pa pikekg Maur Wailen anti Krais pa antokg pake, wa kil elng kweikwei wrongkwail pa orngwatneikgen ngkat nang a Krais pa.
COL 1:17 Kil pikekg rpma ep ak ai, a kweikwei wrongkwail ti pa palng katnukg. Atom kil alkil pa wamparpme kweikwei wrongkwail pa ikgalen aye itna.
COL 1:18 Mentepm wrongkwail kin a kipman a Maur Wailen pa, mentepm kolen numpwam akilen. A kil alkil pa tukgunakg a numpwam ti. Kil pikekg amo pake kil wa wrekg akwule ya eng tu melnum a amo amo pa ikga wa wrekg wrekg, kil alkil pa itna tukgunakg eng kweikwei wrongkwail.
COL 1:19 Maur Wailen pa kil atopen la, atn a rpma a nim a nol a kwap a kol a kil ti ik pa, am Warim Kipman alkil pa ak plan kil tike. Kolpa atom kil ti am rpma kawor Warim Kipman alkil pake.
COL 1:20 Maur Wailen lam kla eng akawi kweikwei wrongkwail a itna kanokg ti a itna kaino kitnong ai aye kai or wris aken tita or ya a Warim Kipman alkilen pake. Kil ukwawel amo kai yo okgmangki pa atom walmpopm a kil pa ungkwan atom ak ungkwan ipma wakget a Maur Wailen itna eng mentepm wrongkwail pa kai plalng.
COL 1:21 Kipm pikekg ep pa, kipm pikekg itna kai watin ai antokg paipmpaipm awi wrongmanto lan Maur Wailen.
COL 1:22 Krais kil palng melnum kolen mentepm ti, atom kil amo kai yo okgmangki ak ungkwan ipma wakget a Maur Wailen itna eng kipm pa, atom kil antokg kipm ti palng wriwen wor, paipmpaipm kalpisen, itna wulmpa a Maur Wailen. Wa ake antiwe mpa mla ur rkiwepm la kipm paipm pa, kalpis.
COL 1:23 Pake kipm mpa ukipma Maur Wailen pa itni titnongket kolen yo a angkli yapoko elng kinar kanokg wunen ai atom arkul kanokg itna titnongket pa. A mpa wa kipm ukipma rpmi nungkwangen kuina ur a kipm atning a tu laron yangkipm wor a Maur Wailen nakepm pa, pa ampur kipm atnuurng. Yangkipm wor pa pikekg laron naki tu wrongkwail kin a kipman yela kanokg ti. Kupm alkupm ti am pikekg palng melnum akwapel a laron yangkipm wor pake.
COL 1:24 Ak wang ti pa, kupm atopen eng arki kaikuten eng ak angklin kipm pa. Kupm wa atopen yat eng uk num a kupm alkupm ti kai eng arki kaikuten tiur ak angkine kaikuten pikekg Krais kil arki pa kolpa kai eng ak angklin tu wrong kin a kipman a Maur Wailen pa, tu kolen num a Krais pake.
COL 1:25 Kupm pikekg Maur Wailen kil takweiyopm ep ak ai, atom kupm palng melnum akwapel akilen eng laron yangkipm wor akilen ti klalen yek kimeket riworwor niki tu wrong kin a kipman a Maur Wailen.
COL 1:26 Nikgwalpm a Maur Wailen kil pati pikekg itna ampen eng tu yoampei a mamikgmamin mansan ak ai kul ai. Pake ak wang ti pa, kil laron angko wunong eng tu wrong kin a kipman wriwen wor alkilen.
COL 1:27 Kai tu pa, Maur Wailen kil pikekg yapon yangkipm wasrongen la kil ikga laron nikgwalpm a kweikwei wailet wor wor a itna ampen pa kul kai ngko wunong eng tu wrongkwail a ake Suta pa yat. Nikgwalpm ampen pa pati, la Krais kil rpma kawor ipma wunen a kipm ti atom ti kipm ukipma rpma nungkwangen la ikga kipm ungkwrerng kruitn a kweikwei wor wor akilen ai ri kawor yalming wunen ai.
COL 1:28 Men laron yangkipm wor pa naki tu kimeket a kaling plan ya wor ak nikgwalpm ariwe wor wor a aloken takwleikgen ya paipm. Kolpa mpa men iyewen kai itni wulmpa a Maur Wailen, a tu wrongkwail tu riwen la tu pa rpma kawor Krais, atom tu aye wrisen nikgwalpm wor wor aworampei a Krais.
COL 1:29 Kolpa atom ari kupm aken kwap nikgwalpm arkekgen timplowis ak titnongket a Krais a akwap titnongket tumpulmpis kawor kupm ti.
COL 2:1 Kupm wasrongen la kipm riwe la, kupm ampurkg ampenen aken kwap angklin kipm pa a wa tu a rka kai Laotisia, a wa tu a ake ari ikgokg a kupm ti yat.
COL 2:2 Yiprokgen a kupm ak kolpa pati, kupm ak eng la mpa ik titnongketel nol nikgwalpm atuwen pa eng mpa tu rkul nikgwalpm a plan ipma wor wasrongen tita pa, eng mpa tu uwi riwe yek kimeket kai itni yiprokg nikgwalpm ariwe wrongkwail. Eng mpa tu riwe nikgwalpm ariwe ampen a Maur Wailen pa. Nikgwalpm ariwe ampen wrongkwail pa am Krais kil alkil pake.
COL 2:3 Kai kil pa kil melnum yiprokgen a ariwe a nikgwalpm wontrakole worwor pa am rpma ampen kai kil pake.
COL 2:4 Kupm lanakepm yangkipm a Krais kil pati, atnen kupm karken ikga wa tu tiur manet ai lkepm yangkipm ur manet a atning wor kai nungkulkg akipmen ti atom, wa ik rkolng kipm ti iye kai or ya paipm pa.
COL 2:5 Kol kupm ake antiwepm rpma, pake nikgwalpm wail akupmen kil pa am arken kipm pa rpma kai pake. Ti kupm atopen eng kupm atning a kipm or wris rpma wor katnun yangkipm a Maur Wailen, a wa kipm ukipma Krais pa itna titnongket.
COL 2:6 Kipm awi Krais Sisas kolen Wailen akipmen ise, kolpa ti ampur kipm elngen, kipm kutnun kil pa itning yangkipm kolpa iye kai o!
COL 2:7 Kipm ukipma Krais pa itni titnongket kolen yo klung a angkli yapoko ningnakg alkil pa elng kinar ak arkul kanokg ai. A wa kipm ukipma kil pa itni titnongket kolpa iye kai pa, pa kol a kipm itna ale ale wan ela ong kimpowen wor pa itna aye kolpa aye kai. Kol a pikekg men kalingtepm ise. Ti ipma wunen akipmen ti mpa itopen wail manten a wa ukwor kil pa.
COL 2:8 Kipm rpmi riwe wonirpme eng ikga wa tu melnum tiur kinsilepm lokepm iye kai ar, eng kiling plantepm nikgwalpm ariwe kansil a kanokg ti a pikekg tu mamikg mamin mansan awi kai tu mring maur a maur kansil a ikgalen kanokg ti atom kaling plantepm pa, pa ake ariwe wor a Krais pa.
COL 2:9 Maur Wailen pa rpma kawor Krais. Kil awi numpalk kolen mentepm melnum ti, pake Maur Wailen kil alkil ti rpma kawor wunen a kil pa.
COL 2:10 Wa Krais pa rpma wail kawor kipm ti atom kipm antiwe antokg kweikwei wrongkwail. Kil pa itna tukgunakg ikgalen kweikwei wrongkwail. Kil itna wailen ikgalen tu maur, a melnum wail wail a antiwe titnongket pa.
COL 2:11 Tu angket num a kipm kipman pa, pa tu ungkwan num walmpopm paipm a kipm pa kai takwleikg. Pa kolen Krais ungkwan paipmpaipm akipmen kai plalng ise, pa pati ake melnum pa angket num akipmen ak ungkwan walmpopm paipm pa, kalpis, pa Krais pa angket pake.
COL 2:12 Wa kol tu naren Krais kalukepm pa, pa plan kol kipm amo nampokgen Krais pa ise, atom uwentepm kai kirkap pa ise. Wa kipm ukipma la titnongket a Maur Wailen pa antiwe, atom kil la atom kipm anti Krais pa wrekg rpma. Pa kol pikekg Maur Wailen kil la Krais kil wa wrekg rpma pa.
COL 2:13 Kipm pikekg kolen tu a ake alm num pa atom paipmpaipm akipmen pa antokg maur wor akipmen pa am amo ise. Pake Maur Wailen la atom wa kipm wa wrekg rpma nampokgen Krais pa pati, kil ungkwan paipmpaipm wrongkwail amentepmen pa plalng ise.
COL 2:14 Maur Wailen ungkwan yangkipm titnongket a pikekg itna, atom ake mentepm katnun pati, pa kol a iyewo kai itni yangkipm atom mentepm kol a uwi paipm itnen pa. Pa am kil angketen takwleikgtepm kai karkurng rka yo okgmangki ise.
COL 2:15 Krais kil amo rka yo okgmangki pa kil alok arku ungkwan titnongket a melnum wailen wailen, a a maur a antiwe titnongket a itna wailen akwap yela pa. Kil awi nang wailen ti uk numpaipm tu itna wulmpa a tu wrongkwail a itna kanokg ti a kaino kitnong ai, pa kil planten la kil itna ep angenten ise.
COL 2:16 Kolpa ti ampur tu akor la kipm a al wangkwrisen aki kipm a angklon ake pa, wa akor la kipm a antokg okipma wail al atnen wang wail ur aki, atnen okipma nangnang ur aki, kin a raku aki, kin a wor aki, wa akor la wang wail a kipm rpma eng yapm pa.
COL 2:17 Palpa kweikwei a mentepm ari lukgel aki mrangkumpel kolti. Pake aklale ikga palng eng mentepm ri uwi riwe worwor pa, pa ikga mentepm nsil ri pa am mentepm ansil ari kai Krais pake.
COL 2:18 Ake mpa kipm itning kutnun nikgwalpm a tu mla ur ai a arkolngkepm aye kai takwleikg ya wor a kipm ore pa. Kolen tu melnum tiur a arku tu alntu kalpis okipma uk wang Maur Wailen pa ak plan tu alntu ti la tu pa wor pake. A kolen tu tiur a ari kweikwei a kol a Maur Wailen planten aki, kolen okgwangket wor wor pa, tu ngkat nang a tu alntu ti. A wa tu tiur a kapor kilko alein tu maur akwapel a Maur Wailen pa. Palpa tu kansilepm, eng ntei, tu pa arkul nikgwalpm tingklaket paipm alntu ti a wam rka nol a ngkat nang la, am ya wor wrisen am tu ansil am tike.
COL 2:19 Tu pa nanukgen tu alntu ti kai itna takwleikgen Krais ti. Krais pa kil tukgunakg a numpwam wrongkwail alkilen pake. Numpwam wrongkwail ti kai almpatne itna num a Krais. Ningkli ti angkli ore tita ak arkul numpwam wrongkwail ti aye kai itna wris, atom anip ak titnongket a Maur Wailen wrekg wor wail.
COL 2:20 Kipm am pikekg amo nampokgen Krais ise eng kweikwei ya tingklaket paipm paipm a itna kanokg ti ise. Atom titnongket a ya tingklaket a katnun itna kanokg ti pa ake wa itna wailen angen kipm ti pa, kalpis. Kipm ti angen pa yat ise. Ti wa antokg kolai atom wa kipm kai orngwatneikgen katnun pa itna erkisen itna pa?
COL 2:21 Kol tu ngkengkepm la, “Ake mpa kipm nungkulkg a wulmpa aki ok a ipma eng kweikwei tiur a angklon ake pa.”
COL 2:22 Pake kolpa kalpis. Pa kweikwei a kol a mentepm ak arpme. Yangkipm tingklaket titnongket a rpma kanokg a ti kolti, pa ikga kai plalng. Palpa melnum ti naki alupmen kaling plantepm kolti.
COL 2:23 Kol tu kutnun yangkipm a tu kaling plantepm pa, tu arku tu alntu atn meen a rpma meen kansil plan ak num enen ti kolti. Wa tu uk wleket num alntu ti kalpmlel kolti. Tu wrongkwail ariwen pa, pa tu la pa tu katila ariwe wor a kapor kilko alein Maur Wailen, ari pa akentiwe titnongket a ak arku angkeng ipma tingklaket atuwen eng tu elngen nikgwalpm pa.
COL 3:1 Maur Wor akipmen am pikekg amo ise, atom Maur Wailen antokg kipm wrekg rpma malepmen nampokgen Krais. Kolpa ti kipm mpa lok nol nikgwalpm akipmen ti rki eng nikgwalpm wor wor a kweikwei wrongkwail a itna kaino anong wor ai kolti. Kaino anong wor a Krais kil rpma wam wi a Yan alkil awi nang wailen itna ep eng ikgalen kweikwei wrongkwail.
COL 3:2 Lok nol nikgwalpm akipmen ti rki eng ikwonilmpen nikgwalpm wor wor a kweikwei kaino Anong Wor ai kolti. A ake mpa ikwonilmpen nikgwalpm a kweikwei a itna kanokg ti.
COL 3:3 Maur Wor akipmen am pikekg amo ise, atom ti Maur Wor akipmen wrekg rpma malepmen nampokgen Krais, atom Maur Wailen lam ikgalen ariworwor rpma.
COL 3:4 Krais, melnum a alkepm Maur Wor weten pa kil ikga palng ngko wunong pa, kipm ti yat, kipm ikga palng ngko wunong uwi titnongket klalen wail manten nimpokgen kil.
COL 3:5 Kipm mpa ilm ipma tingklaket wrongkwail a kanokg ti a akwap kawor ipma akipmen pa imo plalng. Kupm la ipma a kol kil: angkli arkul tita aki, antokg kweikwei a kimpilpet a numkropis a uk numpaipm kamel aki, nikgwalpm wrekg la ntokg kuina ur a paipm aki, ari angkowe kuina ur a mla ur ai, pa am wa irir kolen a kapor kilko alein mring a mring maur a kweikwei wailet a itna kanokg a ti kol la pa maur a kipm pa.
COL 3:6 Maur Wailen kil ipma wakget paipm atom ikga kil uk wleket ntokg paipm tu mlaur a talpulng yangkipm a kil kolpa.
COL 3:7 Kipm am pikekg nikgwalpm kolpa arkulepm atom kipm rpma antokg kweikwei kolpake.
COL 3:8 Kolpa ti, kipm mpa ungkwan nikgwalpm wrongkwail a paipm pa kimeket. Nikgwalpm kolen: ipma wakget, a ipma wrekg or kamel, a nikgwalpm paipm, a aknokgel kamel a numkropis kweikwei pa.
COL 3:9 Ake mpa kipm kinsil mlaur, eng ntei, kipm am pikekg ungkwan ipma tingklaket a pikekg kipm ak kolpa yat ise.
COL 3:10 A nol nikgwalpm akwonalmpen akipmen pa am palng weten ise, kolen kipm awi apm maing pa wa nowe. Melnum a pikekg antokg kipm ti pa, am kil antokg kipm palng weten a weten kolpa aye kai pake, atom kipm awi ariwe kil pa worwor, atom ikga kipm palng irir kol kil alkil pa.
COL 3:11 Kipm a palng weten ukipma atom awi Maur Wor klalen pa, mentepm ake wa manet manet, tu Krik aki, men Suta, tu a pikekg angket num aki, tu a ake pikekg angket num, tu a ak ok manet manet aki, tu a anong kanokg manet manet, a tu a aken kwap kalpmlel orngwatneikgen mring ur aki, tu a rka akwap ak wasrongen alntu. Pake Krais wris ata pa kil a mentepm wrongkwail atom kil pa rpma kawor ipma a mentepm wrongkwail.
COL 3:12 Maur Wailen kil plan ipma wor wasrongen kipm atom kil takweiyepm la kipm rpmi wriwen wor eng alkilen. Kolpa ti nol nikgwalpm akipmen pa mpa rki kolkil: mpa kipm ipma wor rein ngklin tita, rku kipm alkipm iye kinar rpmi meen orngwatneikgen tita, rpmi meen rki kaikuten nimpokgen ipma wor.
COL 3:13 Melnum ur la lkepm kaikuten pa, ake mpa wa kipm ikilmpe pa, kalpis. Kipm itopen rki kaikuten pa nimpokgen ipma wor rpmi kolti. A wa kipm itnuurng paipm kuina ur a tu antokg kul kipm pa. Pati atnen Maur Wailen kil pikekg atnuurng paipmpaipm akipmen ise.
COL 3:14 Nikgwalpm wrongkwail a wet kupm la ela ep pa wor pake, itna ep angen pa pati, kupm la la kipm mpa rkul nikgwalpm a plan ipma wor wasrongen tita. Pa pati mpa iye kipm iye kai orwris a wa kipm mpa itni titnongket eng kitila nikgwalpm wrongkwail pa riworwor.
COL 3:15 Kipm elng ipma meen wor a Krais pa itni wailen ikglen nol nikgwalpm akipmen pa. Krais kil takwei kipm ti kolen numpwam wris wris ur a kai almpatne itna num wris akilen ti. Atom ti kipm mpa rpmi meen wor a wa uk wor Maur Wailen ikngklei wang kolti.
COL 3:16 Kipm ngkleikg a kipm itning yangkipm a laron Krais pa atom lupmen iye rpmi, uwi riwe worwor eng mpa kipm uk ariwe tita, a lok kiling plan tita. Wa kipm ik nangnang a ela wrkapm a Nangnang a Tepit, a kipm ukwor ik nangnang a ak ak eng ak ngkat nang a Wailen, a wa ik nang weten weten tiur a Maur Wor alkepm pa. Kipm ik kolpa itopen ik ngkit nang a Maur Wailen.
COL 3:17 Kai kweikwei wrongkwail a kipm antokg pa, kipm oklala aki kipm ikwap pa, kipm ik kolen la pa kipm akwap a Wailen Sisas a wa kipm ukwor Maur Wailen, Yan amentepmen pa, atnen kwap a Sisas kil ak pa.
COL 3:18 Kipm kin pa, kipm mpa itning nungkulkg orngwatneikgen kipman alkipm pa. Wailen kil atopen la kipm kutnun kolpake.
COL 3:19 Kipm kipman pa, kipm mpa plan ipma wor wasrongen tu kin alkipm pa, ake mpa kipm ntokg tu pa ipma paipm eng kipm pa.
COL 3:20 Kipm warim pa, kipm mpa itning nungkulkg orngwatneikgen man a yan alkipm pa eng kweikwei a worampei. Wailen kil awi wor lawepm kaporng yangkipm eng kipm ak kol pake.
COL 3:21 Kipm yantin pa, ake mpa kipm or ikle tintangen tu warim alkipm pa ikngklei wang, kolpa pa mpa tu ipma kaikut a rpma la rere a atn paipmpaipm nampokgen ipma kaikut.
COL 3:22 Kipm melnum a pikekg mring ur armpentepm eng aken kwap kalpmlel orngwatneikgen kil pa, itning nungkulkg ikwap kuina ur kitila wasrongen a mring alkipm pa riworwor. Ake lala kipm kinsil ik itni wulmpa akilen pa eng mpa kil uwi wor lawepm pa. Kipm ngkirk atom kipm ikwap nimpokgen nol nikgwalpm iklale. Kipm ik kolen la pa kipm ak eng Wailen Sisas.
COL 3:23 Kolpa ti, kuina ur a kipm antokg pa, kipm ik nimpokgen nol nikgwalpm iklale, kolen la pa ak eng Wailen Sisas ai, a ake ak eng melnum pa.
COL 3:24 Kol kipm ariwe la, kipm ikga uwi num itnen kweikwei wor wor a Maur Wailen kil numprampen elng itna eng ikilmpe kwap a kipm ak eng Wailen pa. Pa ake la kipm ak eng melnum ur kolti pa, pa kipm ak eng Wailen Sisas Krais.
COL 3:25 Mlaur a kitn antokg paipm pa, kitn ikga uwi paipm ikilmpe paipm a kitn alkitn antokg. Kil ikgake iye la ur a ntokg paipm ti wompel pa, kalpis. Kil ikga ik kolpa kitila kwap a mentepm ak pa kimeket pake.
COL 4:1 Kipm mring pa, kipm ikglen tu melnum a pikekg kipm armpen eng la iktepm kwap pa ute wor a irir. Eng ntei, kipm ti wa ariwe yat la mring a ikgalen kipm ti pa rpma kaino kitnong ai.
COL 4:2 Ake mpa kipm elngen a kipm oklala naki naki Maur Wailen pa. Kipm mpa nikgwalpm rkekgen uk wor kil a oklala nikel ikngklei wang kolpa kai pake.
COL 4:3 A wa kipm oklala niki Wailen eng ikingklin men ti yat, eng mpa Maur Wailen kil ukulento ya eng mpa men laron nikgwalpm ampen a lakati Krais pa. Am yiprokgen pa atom ari tu awiyopm aye or rpma wan tipmining kil.
COL 4:4 Kipm oklala niki Wailen pa eng mpa kil ngklin kupm ti eng kupm antiwe laron yangkipm a kil ti klalen wor kitila nikgwalpm a kil alkil.
COL 4:5 Kai kuin a tu a ake ukipma pa, kipm mpa itn a rpmi wontrakole. Ya ur okore eng kipm pa, ake mpa kipm kiken wang ur pa kai kalpmlel pa. Kipm mpa plan nikgwalpm wor a Maur Wailen.
COL 4:6 Kipm lala oklala nti tu mla ur ai pipa, kipm oklala meen nimpokgen nikgwalpm wor. A kipm ri tu kai paipm pa, kipm wa la loken, pa kol a ik nokg raro i pa eng kil kai la. Wa yat, kipm mpa riwe a akalmpe akasen a tu asentepm pa.
COL 4:7 Tikikus pa ikga lanikepm riworwor kweikwei wrongkwail a palng eng kupm itna kil. Kil yek pa melnum almentepm a mentepm ukipma Krais. A wa kil melnum akwapel nungkulkg wor a antiwopm akwap a Krais titnongket itna.
COL 4:8 Kolpa atom ti kupm la ukwa kil pa kaintepm eng ikga kil lanikepm kuina ur a palngto itna kul kil, eng mpa kipm uwi ipma meen wor.
COL 4:9 A wa kupm ikga ukwa Onesimus ntiwel kaintepm. Kil yek melnum nungkulkg wor a orngwatneikgen a wa melnum wor almentepmen a mentepm ukipma Krais. Kil pa am melnum ur a kipm alkipm Kolosi pake. Ikga tuwekg lakiti nikepm kweikwei wrongkwail a palng itna kilke.
COL 4:10 Aristarkus, melnum wor ur alkupm a mentekg rpma wan tipmining kil nampokgen Mak, nongko a Parnapas, tuwekg la kupm nirantepm la tuwekg nikgwalpm arkentepm rka pa. Pikekg kupm lanakepm ep ise la kil kaintepm pa, kipm itopen eng uwiyel iye kai wan pa ikglentel riworwor.
COL 4:11 Sisas, nang wompel akilen pa namput la Sastus, kil pa yat wa alkepm wor. Kai kuin a tu Suta aripm ur a pikekg tu wangketen num a rka pa, am tunteng melnum wraur pa kolti, tunteng kimpilp antiwopm atn akwap angklin tu wrong kin kipman, eng mpa tu uwi Maur Wailen ti itni wailen ikglen nol nikgwalpm atuwen. A wa wail manten pa tunteng wor a ak titnongketel ipma a kupm ti.
COL 4:12 Epapras, melnum alkipmen pake, kil wa la la kil nikgwalpm arkentepm rpma pa. Kil melnum akwapel a Krais Sisas. Kil akangklei oklala naki Maur Wailen titnongket eng la kil ik titnongketel kipm pa, eng kipm palng kolen kin a kipman wriwen wor a itni titnongket kutnun kitila nikgwalpm wasrongen a Maur Wailen kolti.
COL 4:13 Aklale wrisen, kupm alkupm ti pikekg atning a ari a kil aken kwap wail eng kipm wrong kin a kipman a Maur Wailen a rka kai pa a wa tu a rka kai anong Laotisia a Ierapolis pa.
COL 4:14 Luk, melnum wor almentepm a mentepm plan ipma wor wasrongentel, kil melnum a akwap a i numpet, ekg Temas, tuwekg pa wa la tuwekg nikgwalpm arkentepm rka pa.
COL 4:15 Kipm laniki tu melnum a mentepm ukipma Krais kai anong Laotisia pa a wa laniki kin nang a tu namput la Nimpa pa nimpokgen tu wrong kin a kipman mapming a ukipma Sisas a wli rka kaingkai wan a kil pa la, kupm nikgwalpm arkenten rka pa.
COL 4:16 Kipm ngkleikg wrkapm kil eng kipm wrong kin a kipman a Kolosi pa itning plalng pipa, wa iye kai eng tu ngkleikg niki tu wrong kin a kipman mapming a ukipma Sisas a takwem rka Laotisia wai. A wa uwi ur manet a pikekg kupm nira kai eng tu Laotisia wai, wa iye wli ngkleikg niki kipm Kolosi pa.
COL 4:17 Kipm laniki Arkipus pa, ri la eng mpa kil ikglen a ikwap a pikekg Wailen alkel pa ik riworwor kolpa kai.
COL 4:18 Kupm Pol, kupm nira wrkapm aimprek kil ak wam alkupmen la, kupm alkepm wor. Ampur kipm woniketen kupm a rpma wan tipmning kil. Kupm oklala naki naki Maur Wailen eng mpa kil plantepm ipma wor akilen ik ngklinsepm kolpa iye kai. Yangkipm akupmen kil am kai kolpake.
1TH 1:1 Kupm Pol nampokgen Sailas a Timoti, minto nira wrkapm kil ukwa kai ukwor kipm wrong kin kipman mapming a ukipma Sisas a rka kai anong Tesalonaika. Kipm pa a Yan Maur Wailen a Wailen Sisas Krais. Minto oklala naki tuwekg pa la plantepm nikgwalpm wor a ngklinsepm a lkepm ipma meen wor pa iye kolpa kai.
1TH 1:2 Ak wang a minto oklala naki Maur Wailen pa, akangklei minto ukwor Maur Wailen pa eng kipm pa.
1TH 1:3 Minto oklala naki Yan Maur Wailen amentepmen pa, akangklei minto akwonalmpen kwap a kipm ak atnen a kipm ukipma Sisas. Wa minto akwonalmpen kwap a kipm aken akangklin tu mla ur ai atnen a kipm plan ipma wor wasrongenten. Wa minto akwonalmpen a kipm itna titnongket arki kalkuten atnen a kipm ariwe Krais pa, atom kipm ukipma rpma nungkwangentel.
1TH 1:4 Kipm melnum amintowen a mentepm ukipma Krais, minto ariwe la Maur Wailen kil plan ipma wor wasrongen kipm, atom kil takwei kipm eng kil alkil.
1TH 1:5 Minto ariwe kolpake, atnen yangkipm wor a Maur Wailen a pikekg minto aye kai laron nakepm pa, pa ake yangkipm kalpmilel kolti. Yangkipm pa Maur Wor arpmen a antiwe titnongket, atom antokg kipm ariwe la yangkipm pa aklale wrisen. Kipm alkipm pikekg ari atn a rpma a minto antiwepm rpma pa, pa mrangkum a minto plan la ik ngklin kipm pake.
1TH 1:6 Kipm pikekg awi yangkipm pa wa kipm katnun mrangkum wor amintowen ti, pa pati mrangkum wor a Wailen alkil ai. Tu alkepm wleket wail manten atnen pa, ari ake wa kipm akwonalmpen pa, kalpis. Maur Wor a Maur Wailen alkepm atopen wail atom kipm arki kalkuten pa.
1TH 1:7 Kipm katnun kolpa kaingkai, tu akipmen a ukipma Maur Wailen a rpma yela anong kanokg a Masetonia, a wa tu a men a rka yela anong kanokg a Akaia ti atning a ari mrangkum wor a kipm plan pa, la wor atom tu katnun pa.
1TH 1:8 Ti yangkipm a kipm laron Wailen pa ake wa itna pa a pa, kipm laron aye kai yela anong kanokg Masetonia pa ise. Ake wa kipm laron itna anong kanokg Masetonia pa wris, wa kipm wa aye kul laron kul anong kanokg Akaia ti yat, kai tatu palpa yela ise. Tu atning la kipm am ukipma Maur Wailen wor ise, ti mpa wa minto wa kai lakiti or wrikel niken eng na, tu am atning kimeket yela ise.
1TH 1:9 Minto atning am tu pa lakati yela nako la kipm pikekg awiyo ikgalento ariworwor ak wang a pikekg minto kai ariwepm antiwepm rpma pa. Tu lakati a pikekg kipm ukyirokg tu maur manet alkipmen a kipm la pa maur wailen alkipmen pa, wa kipm almpil won la Maur Wailen, atom kipm orngwatneikgen kapor kilko aleinsel la pa Maur Wailen aklale akipmen a rpma yongkyong.
1TH 1:10 Atom wa kipm numprampen rpma nungkwangen Warim Kipman Sisas alkilen a pikekg amo atom Maur Wailen kil la kil wrekg kaino kitnong. Atom kipm rpma nungkwangen la kil ikga yaper nar ikuwiyo iye kai tukuleikgen ipma wakget a Maur Wailen a ikga palngto pa.
1TH 2:1 Kipm melnum almintowen a mentepm ukipma Krais, kipm alkipm ariwe pa, pikekg a minto kai ariwepm pa, ake wa rurusen pa, pa am karpon wor atom ok arke ise.
1TH 2:2 Ti pikekg ak wang a minto rka kai anong Pilipai pa, pikekg tu arpmen paipmel minto ti. Minto awi wleket wail wail rpma kai pa, ti kipm ariwe pa. Wa minto wa kai ari kipm pa, am wa kolpa yat pake, wa tu a kipm pa wa alko kalkuten yat. Pake Maur Wailen amintowen ak titnongketel minto, atom minto ake ngkark, minto antiwepm rpma laron yangkipm wor a Maur Wailen a la Krais pa nakepm.
1TH 2:3 Kol kai yangkipm a minto pikekg laron nakepm pa, ake yangkipm a kai ar or manet pa, ake minto lam nikgwalpm kimpilpet ampen ur la ik ningkailepm pa, aki yangkipm ur a la kinsilepm pa, kalpis.
1TH 2:4 Maur Wailen kil almpil atne ari minto ti, atom kil kaporng yangkipm minto ti atom kil uk kwap ti kul minto ti, la minto laron yangkipm wor a la Krais pa. Minto ake laron yangkipm la mpa melnum ti uwi wor lawo pa, minto laron yangkipm la mpa Maur Wailen alkil ai uwi wor lawo ai. Maur Wailen alkil ai kil ari nol nikgwalpm amintowen ai.
1TH 2:5 Kipm ariwe pa, ake minto laron yangkipm la irmponel melnum ur pa, wa minto ake wa aringkowe kweikwei akipmen pa, atom minto laron yangkipm pa la ik uwi kweikwei akipmen pa eng ik lampe pa, kalpis.
1TH 2:6 Minto ake akwap la mpa kipm aki melnum ur ai pa ngkit nang a minto ti pa, kalpis.
1TH 2:7 Krais kil alkil takwei minto ti elng itna melnum wailen wokgen akwapel akilen, ti kol am kipm pa ikwap eng ikglen minto tike, ari wa minto ti wa alok angkli ikgalen kipm pa kol man a uk ma warim al pa tuwa.
1TH 2:8 Minto plan ipma wor wasrongentepm worwor kolpa, atom ake minto laron nakepm yangkipm wor a la Krais pa wris ata kolti pa. Minto wa uk num alminto ti eng la ik ngklin kipm pa. Eng ntei, kipm pa palng kol yilokitnin a yilowark ur amintowen.
1TH 2:9 Kipm melnum almintowen a mentepm ukipma Krais, kipm wonarpme rpma pa, a pikekg minto aken kwap awi wleket wakget pa. Minto la ampake minto uk kalkuten kipm a ikgalen minto ti pa. Kolpa atom ari minto pikekg laron yangkipm wor a Maur Wailen a la Krais ti nakepm, a wa akwap miningkranen a ak angklin minto alminto ti.
1TH 2:10 Kipm pa nampokgen Maur Wailen pa pikekg nungkulkg a wulmpa ari atn a rpma kwap a pikekg minto ak ak angklin kipm a ukipma Krais pa. Pikekg minto ak ute wor kolti, ake antiwe melnum ur arki la minto antokg paipm ur aki miningket ur pa, kalpis.
1TH 2:11 Kol kipm ariwe pa, pikekg minto ikgalentepm wris wris kol a yan kil ikgalen tu warim alkil pa.
1TH 2:12 Minto pikekg alkepm yangkipm ak titnongketelepm, wa la karkurngkepm la kipm itn a rpmi wor kol kil alkil eng mpa ntokg Maur Wailen pa kil itopen. Kil pa melnum a akwewepm aye kul klalen wor alkilen, atom kil itna wailen ikgalen nol nikgwalpm akipmen.
1TH 2:13 Akangklei wang minto uk wor Maur Wailen, eng ntei, pikekg wang a kipm atning yangkipm akil a minto ti laron pa, ake kipm atning la kol a yangkipm a minto melnum ti pa. Kipm atning katnun atopen la pa yangkipm a Maur Wailen pake. Am yangkipm aklale a Maur Wailen am pake a akwap titnongket kai kipm a ukipma kil pa.
1TH 2:14 Kipm melnum almintowen a mentepm ukipma Krais, kweikwei a palngtepm ti pa, am pikekg palng ep kai tu a ukipma Krais Sisas mapming wrongkwail a rka kai anong kanokg a Sutia pa. Tu anong yiprokg alkipm ti uk kalkuten kipm ti kol a tu a men Suta uk kalkuten tu melnum a ukipma Maur Wailen a rka kai Sutia wai.
1TH 2:15 Am tu a men Suta pa pikekg alm tu melnum ok wripm a Maur Wailen pa ak ai kulngkul, am wa tu pa alm Wailen Sisas ti amo, wa alm ungkwan minto ti takwlelkg. Tu antokg kolpa pa ake ak antokg Maur Wailen pa atopen, pa kalpis, wa tu awi wrongmanto lan tu wrongkwail.
1TH 2:16 Pa tu ak angketento la ampake minto ti laron yangkipm wor pa niki kipm a ake Suta pa, eng mpa kipm ukipma Sisas pa, eng mpa kil ikiwiyepm. Ti paipm a tu antokgto kolpa pa, am aye kaino wail paipm ise, kolpa ti Maur Wailen ipma wakget paipm itna la ikilmpe paipm a tu antokg pa.
1TH 2:17 Kipm melnum almintowen a mentepm ukipma Krais, pikekg minto atnurngkepm kul rpma ti kol wang tukwok waiketn kolti ak numpalk ti kolti tuwa, nikgwalpm wail amintowen pa arkentepm rka kai pake, ti minto akor ya ur la yaper kai riwepm.
1TH 2:18 Kupm Pol antokg la kaingkai riwepm, pake ake kupm alkupm wris ti pa, minto kimeket la kai riwepm, ari Satan ti amprinto ya.
1TH 2:19 Minto ti rpma nungkwangen la ri mla a i ukipma itni titnongket, kolpa kaingkai nsil wang a Wailen Sisas kil ikga yaper nar pa. Minto ariwe la pa am kipm pake. Wa minto la ikga itopen mla ik wang pa? Pa am kipm pake. Wa mla ikga ngkit nang kiporng yangkipm kwap a minto ak ti ik wang pa? Pa am kipm pake.
1TH 2:20 Aklale, yiprokgen a minto ti atopen pa am kipm pake. Wa nang wailen a minto ti uwi pa, ikgam minto uwi kai kipm pake.
1TH 3:1 Minto ti nikgwalpm pilpilen arken kipm pa rpma kolpa rpma, atom ake antiwe mpa minto rkul ipma pa rpmi, atom minto akwonalmpen la kai riwepm pake. Minto rpma la wris la mentekg Sailas pa rpmi anong Atens kilke,
1TH 3:2 a mentekg ukwa paipmen almentepmen Timoti pa kai riwepm. Kil pa melnum akwapel a Maur Wailen a laron yangkipm wor a la Krais pa. Am mentekg ukwa kil pa kai la ngklinsepm nikgwalpm wor wor a ik titnongketel kipm pa.
1TH 3:3 Eng ampake kalkuten a wleket a tu alkepm pa rkuwepm atom kipm ngko yaper kai pa. Ti kipm alkipm ariwe pa, mentepm ukipma Maur Wailen pa, kalkuten a wleket kolpa pa mpa palngto palngto pake.
1TH 3:4 Aklale, ak wang a pikekg minto antiwepm rpma pa, minto pikekg lanakepm oren kong la tu ikga lko kalkuten a wleket kolpa. Ti kipm ari pa, ti am palng katila kolpake.
1TH 3:5 Ti kupm ipma kalkut kolpa eng kipm pa rpma, ake antiwe mpa kupm rkul ipma pa rpmi, kolpa atom kupm ukwa Timoti pa kai la kil kai itningkri la kipm ukipma itna titnongket aki kalpis. Kupm maminikgentepm la mpa maur a almpil nikgwalpmel kamel pa lmpilepm nikgwalpm ti atom kipm ngko, ti kupm maminikgentepm lala kwap wail a pikekg minto ak pa mpa kai tikote kolti.
1TH 3:6 Pikekg Timoti kai ariwepm antiwepm rpma ari kipm wa ukipma Sisas itna titnongket apa, wa kipm arkul nikgwalpm a plan ipma wor wasrongen tita rka wor rpma pa. Kil kul lakati nako kipm pa kolpa pipa, nikgwalpm amentekgen pa angko a om. Kil nako la nikgwalpm akipmen pa arkento a plan ipma wor wasrongen minto ti la kulngkul riwo. Minto ti am wa kol pake, minto nikgwalpm arkentepm la wa kai riwepm yat.
1TH 3:7 Kipm melnum almintowen a mentepm ukipma Krais, tu alko kalkuten a wleket, pake minto atning a Timoti lakati la, kipm ukipma Sisas itna titnongket pa wa ak angklin ak titnongketel ipma amintowen ti.
1TH 3:8 Ti minto atning ariwe la kipm ukipma Sisas itna titnongket itna pa, kolpa atom numwalmpopm amintowen pa angko a, a rpma wor om.
1TH 3:9 Ti ak wang ti pa minto atopentepm, kolpa atom minto uk wor wail manten Maur Wailen eng kipm pa or kaingkai ai, pake minto yangkipm kalpisen eng mpa minto la kolai.
1TH 3:10 Nikgwalpm wail amintowen pa arkentepm kolpa atom minto oklala naki Maur Wailen pa miningkranen la kol a minto kai riwepm, a wa ngklinsepm kiling plantepm nikgwalpm wor wor tiur a kipm tukwok pa kolpa iye kai, eng mpa kipm ukipma Sisas pa iye kimeket riworwor.
1TH 3:11 Eng mpa Maur Wailen, Yan Wailen kil alkil, a Wailen Sisas a mentepmen pa la mpa tuwekg ukulento ya ur pa wokget itni eng mpa minto kai riwepm.
1TH 3:12 Minto wa asen Wailen la mpa kil ngklinsepm eng mpa kipm plan ipma wor wasrongen tita wa plan ipma wor wasrongen tu wrong kin kipman a rka yela pa iye kolpa iye kai, kol a minto ti plan ipma wor wasrongen kipm pa.
1TH 3:13 Minto wa asen Wailen la mpa kil ik titnongketel nol nikgwalpm akipmen pa, eng mpa Yan Wailen amentepmen pa kil ikgake ri paipm ur la kipm antokg pa, kil ikga ri kipm a rpma wriwen wor kolti ik wang a Wailen Sisas kil ikga yaper nar nimpokgen tu wrong kin a kipman alkilen pa.
1TH 4:1 Kipm melnum almintowen a mentepm ukipma Krais, ti minto wa la lanikepm yangkipm ur kil. Minto pikekg kaling plantepm la kipm rki wor kolti, eng mpa Maur Wailen kil mpa itopentepm a kiporngkepm yangkipm. Ti aklale, kipm am katila kol a minto kaling plantepm pake. Minto awi ok a Wailen Sisas pa wa ak titnongketelepm a la tilpepm la kipm wa ikwap wor kolpa iye kai o!
1TH 4:2 Kipm ariwe yangkipm titnongket na ur a pikekg Wailen Sisas alko pa, pikekg am minto nakepm nakepm pake.
1TH 4:3 Maur Wailen wasrongen la ampake kipm ngkli rkul tita aki ntokg kweikwei numkropis kolpa a uk numpaipm kamel. Kil wasrongen la mpa kipm ngkirk itni watinet, tukulelkg rpmi wriwen wor iye kolpa kai.
1TH 4:4 Kitn wris wris mpa lokipaar numpwam alkitnen ti kai eng kin alkitn ti kitila nikgwalpm wriwen wor a Maur Wailen ti kolti.
1TH 4:5 Tu melnum ipmawekg a ake katnun Maur Wailen pa, tu antokg kitengket angkli arkul tita, pake kipm ti pa ake mpa ik kolpa. Kipm lokipaar kipm alkipm ti, eng ake mpa nikgwalpm a kolpa rkulepm titnongket pa.
1TH 4:6 Ake mpa melnum ur ntokg paipmel melnum ur alkil a tuwekg ukipma Krais pa, kol kil ikg nar nowen kin a melnum pa aki, kol kil ntokg kweikwei tiur ai eng uk itopen kil alkil pa. Kil ak kolpa pa, ake wa kil ak arein melnum alkil a tuwekg ukipma Krais pa. Minto pikekg la karkurngkepm ayewepm ngkark la Wailen ikga ikilmpe uk wleket melnum a akwap paipm kolpa.
1TH 4:7 Kipm ariwe pa, Maur Wailen pa ake takweiyo la mentepm ikwap numkropis a kimpilpet kolpa. Kil amprinso la mentepm rpmi klalen wriwen wor kolti.
1TH 4:8 Kolpa ti mla ur ake katnun yangkipm a minto kaling plantepm ti pa, kil pa ake uk yirokg minto melnum ti pa, pa kil uk yirokg Maur Wailen ai, melnum yiprokgen a alkepm Maur Wor alkilen pa.
1TH 4:9 Minto ake wa la nira ik lanikepm ya a mentepm a ukipma Sisas pa plan ipma wor wasrongen tita pa. Kipm alkipm pikekg Maur Wailen kil alkil kaling plantepm atom kipm am plan ipma wor wasrongen tita katila kolpake.
1TH 4:10 Pa aklale, kipm am wasrongen tu a kipm a ukipma a rka yela anong kanokg Masetonia pa ise. Pake minto la karkurngkepm la, kipm nikgwalpm rkekgen wasrongen tita kolpa iye kai o!
1TH 4:11 Kipm wris wris mpa nikgwalpm rkekgen eng rpmi meen tarng rpmi kolti. Wa oplawokg itn tumplo worwor ikwap a tu kamel misen pa wusoken, rpmi kanokgel ikipor ilei kin a watnom alkitn ti ntokg il rpmi. Ti pikekg kol a minto kaling plantepm a la karkurngkepm pa.
1TH 4:12 Kol kipm kutnun nikgwalpm wor a minto lanakepm ti pa, mpa tu ipmawekg ri itopen ngkit nang akipmen pa la kipm pa akwap wor, wa kipm ake mpa rpmi ik melnum ur pa.
1TH 4:13 Kipm melnum almintowen a mentepm ukipma Krais, minto ake lala kipm rpmi titnowen la tu melnum a amo kaingkai pa, la tu pa ikga kai rki kolai. Eng ampake kipm nikgwalpm kalkuten paipm kol tu melnum a akwekgel ya pa la tu melnum a amo kai pa tu ake kai kalpis pa, pa tu kai rpma eng ikga wa wrekg.
1TH 4:14 Mentepm ariwe ya pa aklale la, Sisas kil pikekg amo atom wa kil wrekg, kolpa ti mentepm wa ariwe la, tu melnum a pikekg ukipma Sisas pa atom amo pa, tu ikga wa Maur Wailen kil la tu wrekg palng ingko wunong nimpokgen Sisas.
1TH 4:15 Kil yangkipm a Wailen ai, atom minto lanakepm la, ikga ik wang a Wailen nar pa, mentepm a ukipma rpma ti pa, pa ikgake mentepm ti wrekg ep pa, ikgam tu a amo kaingkai pa wrekg ep pake.
1TH 4:16 Ikga ik wang pa mentepm itning ok ur ikga pilpal yikakatnen ingkaino kitnong ai, wa kromeng a maur itna ep a tu maur akwapel a Maur Wailen pa ikga ukwe, wa nol a Maur Wailen ikga tiplam pipa, Wailen kil alkil ingkaino kitnong ti nar, atom tu melnum a pikekg ukipma Krais pa atom amo pa, tu pa ikga wrekg ep.
1TH 4:17 Tu pa wrekg ep pa, wa mentepm a rpma ti pa wa Maur Wailen wa ik uwiyo iye kaino nampokgen tu pa kawor waipmunu wunen ai kolpa kaino ari Wailen ai kolti, a mentepm kimeket antiwel rpma yongkyong kaino anong wor ise.
1TH 4:18 Yangkipm kil wor wrisen, kolpa ti kipm laniki tita ik titnongketel tita.
1TH 5:1 Kipm melnum almintowen a mentepm ukipma Krais, minto ake la mpa nira nikepm wring a wang a Wailen ikga nar pa.
1TH 5:2 Kipm alkipm ariwe worwor pa la, wang a Wailen ikga nar pa ikga palng ik misel kolti kol melnum ikgwampet a wli ak mining pa.
1TH 5:3 Ikga ik wang pa tu ikga wonmis itopen laniki tita lala, “Ti mentepm am rka wor tike, ikgake kalkuten ur palngto.” Pipa, wleket wail ur am ikgam palngten pinterngen kolen kin a warim alm eng a raku pa, ti tu akentiwe ikga ngkom nilokgen wleket pa.
1TH 5:4 Pake kipm melnum almintowen a mentepm ukipma Krais pa, kipm ake melnum a rpma kai miningket pa, kalpis, kolpa ti ikga wang pa palngtepm pa, kipm ikgake wrekg paipm eng pa.
1TH 5:5 Eng ntei, kipm plalngten pa kipm melnum klalen a atn ak ran. Mentepm ti ake melnum miningket a atn ak mining pa.
1TH 5:6 Ti ampur mentepm okg kol tu tiur a okg pa. Mentepm rki wulmpa ore a wontrakole ikwon lok numpwam wris wris almentepmen ti.
1TH 5:7 Tu melnum a okg okg pa, tu am okg ak mining pake. Wa tu melnum a al al u titno pa, tu am titno titno ak mining pake.
1TH 5:8 Pake mentepm ti melnum a atn ak ran, kolpa ti mentepm rpmi wontrakole lok ipaar numpwam almentepmen ti: mentepm ukipma Sisas wa plan ipma wor wasrongen tita pa kol apm klingen a mentepm alil ak ipaarng num a mentepmen pa. Mentepm ariwe la Sisas ikga nar eng ikuwiyo iye kai wor, kolpa ti mentepm rpmi nungkwangentel, pa kol wamung a mentepm ngkat ak ampri ikgokg tukgunakg a mentepmen pa.
1TH 5:9 Yiprokgen a Maur Wailen pikekg takweiyo pa pati, ake lala ikga lko wleket ikilmpe paipmpaipm a mentepm ti antokg pa, kalpis. Yiprokgen a kil pikekg takweiyo pa pati, lala ikga Sisas ikiwiyo tukuleikgen ipma wakget akilen pa.
1TH 5:10 Sisas pikekg amo akarmpen mentepm. Ti mentepm imo kai aki, mentepm rpmi aki, pa kil ikga ikiwiyo iye kaino, mentepm rki wris nimpokgentel.
1TH 5:11 Kolpa kipm la yangkipm kil ikingklin tita a ik titnongketel tita, kol a kipm ak ak itna ti pa.
1TH 5:12 Kipm melnum almintowen a mentepm ukipma Krais, minto la lanikepm la, kipm ngkit nang a tu melnum a aken kwap eng ikgalentepm pa. Tu pikekg Wailen kil takweiyen eng la itni ep eng mpa tu kling plan a lokepm pa.
1TH 5:13 Tu akwap wail wor, kolpa ti kipm ngkit nang atuwen pa iye kaino kwa, wa kipm planten ipma wor wasrongenten. Wa kipm alkipm pa lok ngkli tita terng rpmi meen kolti.
1TH 5:14 Kipm melnum almintowen a mentepm ukipma Krais, minto alkepm yangkipm la, kipm niki kurkurng a lok tu melnum a antokg melkget pa, wa kipm uk nikgwalpm wor wor ik ngklin tu melnum a rpma nampokgen nikgwalpm kalkuten pa, wa kipm ngklin ik titnongketel tu a ake itna titnongket pa. Tu mlaur alkepm kalkuten pa, kipm uwi nimpokgen ipma meen wor kolti.
1TH 5:15 Kipm la kurkurngten la ake mpa melnum ur ikilmpe paipmpaipm a melnum ur antokgtel pa. Ikngklei wang kipm mpa nikgwalpm rkekgen eng plan nikgwalpm wor eng tita wa eng tu wrongkwail ai yat.
1TH 5:16 Kipm rki itopen ikngklei wang!
1TH 5:17 Wa oklala niki Wailen pa ikngklei wang kolpa iye kai.
1TH 5:18 Uk wor Maur Wailen pa ikngklei wang eng kweikwei a wor ampei. Kipm pa a Krais Sisas, ti Maur Wailen wasrongen la mpa kipm ik kolpake.
1TH 5:19 Ampur ampe wakg a Maur Wor a Maur Wailen pa.
1TH 5:20 Ampur wa elukgen yangkipm a Maur Wor a Maur Wailen kil palng wli ok a melnum okwripm a Maur Wailen laron pa.
1TH 5:21 Kipm itning a ri kweikwei wrongkwail pa riworwor la a i wor pa, kipm rkul, a i paipm pa, kipm elngen.
1TH 5:22 Kipm itni watinet tukuleikgen paipmpaipm a wor ampei.
1TH 5:23 Minto oklala naki Maur Wailen, kil alkil yiprokgen a uk ipma meen wor pa, la kil mprinsepm elng itni manet eng alkilen, wa la kil ikglen numpwam, nol nikgwalpm, Maur Wor a kipm pa rpmi rukis wor kolpa kai. Eng ikga Wailen Sisas Krais amentepmen nar pa, ikgake kil ri yiprokgen ur eng ikga kil rkiwo pa, kalpis.
1TH 5:24 Ti kipm ariwe pa, melnum a pikekg akwewepm pa, kil nungkulkg wor, kil ikga ntokg kol a minto asentel pa.
1TH 5:25 Kipm melnum almintowen a mentepm ukipma Krais, kipm wa oklala niki Wailen pa eng ik ngklin minto ti yat.
1TH 5:26 Kipm itopen nikron tita kolen la kipm melnum a ukipma Maur Wailen.
1TH 5:27 Minto awi ok a Wailen pa lanakepm titnongket la, kipm uwi wrkapm kil ngkleikg plalng pipa, wa ukwa iye kai eng ngkleikg niki tu wrong kin kipman a ukipma Krais a rka yela pa.
1TH 5:28 Minto oklala naki Wailen amentepmen Sisas Krais la kil plan ipma wor alkil ik ngklin kipm. Ti wrkapm ep a minto nira kil pa am kai kolpake.
2TH 1:1 Kupm Pol nampokgen Sailas a Timoti, minto nira wrkapm kil ukwa kai eng kipm wrong kin kipman a rpma kawor Maur Wailen Yan amentepmen a Wailen Sisas Krais a rka kai anong Tesalonaika.
2TH 1:2 Minto oklala naki Maur Wailen Yan amentepmen a Wailen Sisas Krais amentepmen, eng mpa tuwekg plantepm ipma wor alkil ngklinsepm a ntokg ipma akipmen pa rki meen wor iye kolpa kai.
2TH 1:3 Kipm melnum almintowen a mentepm ukipma Krais, minto ari a kipm ukipma Sisas, wa nikgwalpm a kipm plan ipma wor wasrongen tita pa palng wail kolpa aye kai, kolpa ti minto atopentepm uk wor Maur Wailen. Pa wor wrisen la kol a minto uk wor kolpa iye kai pake.
2TH 1:4 Kipm arki kalkuten a kipm awi wleket, ari kipm ukipma Sisas pa itna titnongket kolpa aye kai, pa ake wa kipm elngen pa, kalpis. Ti minto atop ak la kipm pa naki tu wrong kin kipman mapming a ukipma Maur Wailen a rka yela tatu anong tiur ai.
2TH 1:5 Kalkuten a wleket a tu alkepm pa, pa plan la Maur Wailen kil la ik ri melnum pa, pa kil ak ute wor kolti. Kipm akwap akilen eng mpa tu wrong kin kipman elng kil pa itni wailen ikglen nol nikgwalpm atuwen, kolpa atom ari kipm arki kalkuten kolpa pa, pa ak plan la kil awi wor eng kipm atom kil itna wailen ikgalen nol nikgwalpm akipmen.
2TH 1:6 Maur Wailen kil ikga uk wleket ikilmpe tu melnum a uk wleket kipm pa. Pa kil ari la pa ute wor atom kil ikgam ik kol pake.
2TH 1:7 Wa kil ikga ngketen kalkuten a ak arkolng kipm pa, wa ak arkolng men ti yat, pa mentepm wirng no kukula wor. Kil ikga ik pa ik wang a Wailen Sisas kil ik uwi tu maur titnongket akwapel a Maur Wailen pa ingkaino kitnong pa nar.
2TH 1:8 Kil ikga nar nimpokgen wakg a naruk pa atom kil ikilmpe ntokg paipm tu melnum a ake ariwe Maur Wailen pa, wa ake atning katnun yangkipm wor a la Wailen Sisas amentepmen pa.
2TH 1:9 Ikga ik wang pa kil ikga ikilmpe paipm a tu antokg pa pati kil: tu ikga uwi wleket a itna yongkyong, a tu ikga rpmi watinet tukuleikgen Wailen, a tu ikgake ri nang wailen a titnongket akilen pa.
2TH 1:10 Ti ikga ik wang a kil yaper nar pa tu wrong kin kipman alkil a kil pikekg amprin eng kil alkil pa ikga ngkit nang akilen pa, tu melnum a pikekg ukipma kil pa tu ikga wrekg paipm atopentel paipm wrisen or kai ai. Ti kipm pa ikgam itopen kol pake, eng ntei, kipm atning alupmen yangkipm pikekg minto laron nakepm pa.
2TH 1:11 Minto akwonalmpen Wailen ikga nar pa, kolpa atom akangklei wang minto oklala naki Maur Wailen la kil ngklinsepm, eng la kipm rpmi wor kol a pikekg kil akwewepm la kipm kutnuntel pa. Minto wa oklala nakel la kil ik titnongket alkilen pa ik titnongketelepm, eng mpa kipm ntiwe ik ik kwap kitila nikgwalpm wor wor a kipm akwonalmpen la ntokg pa. Wa ik ngklin kwap wor a kipm ak ak atnen a kipm ukipma Sisas pa, eng mpa kipm ntiwe ik kai plalng.
2TH 1:12 Kipm ik kol a minto oklala naki Maur Wailen ti pa, mpa ik ngkit nang a Wailen almentepmen Sisas. Wa Sisas kil mpa ngkit nang akipmen pa yat, kitila ipma a Maur Wailen a Wailen Sisas Krais amentepmen, tuwekg mpa plan ipma wor a tuwekg pa ngklinsepm pa.
2TH 2:1 Minto wa la lanikepm yangkipm ur kil la, Wailen amentepmen Sisas Krais kil ikga yaper nar, atom uwi mentepm wrongkwail ti iye kai tukwem rki wris nimpokgentel. Ti minto la laniki kipm melnum almintowen a mentepm ukipma Krais pa titnongket la,
2TH 2:2 kol kipm itning la melnum ur la Maur Wor a Maur Wailen alkel yangkipm kolkil la, wang a Wailen la nar pa am tike. Aki kol tu ur ai laron yangkipm pa aki, kipm atning a tu la minto ti nira wrkapm ur aki, pa ampur kipm atning yangkipm pa atom wrekg paipm ipma kalkuten ngkark eng pa.
2TH 2:3 Kipm rpmi uk ikg riwe tu melnum a kolpa a la rkolngkepm iye kai ar pa. Wang a Wailen Sisas la nar pa apa, tu wailet ikga ngko yaper kai uk yirokg Maur Wailen. Wa melnum a talpulng yangkipm titnongket wrongkwail a Maur Wailen pa ikga palng kulkai pake. Pa kil ikga plalng ngket lam. Plalng pipa, wang a Wailen pa palng.
2TH 2:4 Melnum pa wrongmanto a Maur Wailen, kil ikga ngkit nang a kil alkil ti itni wailen a rku Maur Wailen a tu maur, a tu mring maur wrongkwail a mentepm kapor kilko alein la pa maur wailen amentepmen pa. Wa ikga kil kawor yalming a Maur Wailen ti laron nang alkilen ti la kil ti Maur Wailen.
2TH 2:5 Ti kipm wonarpme ur pa: kupm pikekg antiwepm rpma pa, kupm pikekg lanakepm yangkipm a la melnum pa.
2TH 2:6 Kipm ariwe kwei ur a arkul melnum wrongmanto pa itna, atom kil ake palng angko wunong ak wang ti. Kolpa kaingkai, wang ur alkil a Maur Wailen alkil ai alm ai pa, kil ikga palng ngko wunong pake.
2TH 2:7 Nikgwalpm a talpulng yangkipm titnongket wrongkwail pa am akwap ampen yela tatu kanokg ti itna tike. Ti ikgam ik ampen kolpa kaingkai, kai ngko wang a Maur Wailen ai la kwei ur a ampri ya pa kai tukuleikgen plalng pipa,
2TH 2:8 melnum a talpulng yangkipm wrongkwail pa palng ngko wunong. Pake ik wang a Wailen Sisas kil nar pa, ikga kil nar nimpokgen klalen wakget titnongket ik ntokg melnum pa kai paipm, atom kil ngklo ok pa la pa, ok yaprekg a kil pa ilmpel imo kolti.
2TH 2:9 Pake, mpa minto yaper kai la melnum a ikga palng ngko wunong pa pen, la kil ikga ikwap kolai. Melnum pa ikga palng wli nimpokgen titnongket wail a Satan alkel pa. Atom kil ikga ntokg kweikwei titnongket titnongket, a kweikwei weten ur a ake melnum ur antiwe antokg, a plan kla titnongket tiur eng kinsil tu wrong kin kipman pa.
2TH 2:10 Tu melnum a angkom or ya a ikga kai anong paipm pa, kil ikga ik kweikwei paipm paipm wrongkwail pa ik kinsil ningkail eng ik uwi tu pake. Eng ntei, tu pikekg karken yangkipm aklale a Maur Wailen a la kol a ikuwiyen iye kai wor pa.
2TH 2:11 Kolpa atom ari Maur Wailen ikga ukwanten yangkipm kansil titnongket ur pa lken, eng ikga tu ukipma yangkipm kansil pa.
2TH 2:12 Kolpa atom tu atopen paipmpaipm wrongkwail, a ake ukipma yangkipm aklale a Maur Wailen pa, tu ikga itni yangkipm a Maur Wailen pa atom kil ikga ntokg tu ikga uwi wang paipm ikilmpe paipm a tu antokg pa.
2TH 2:13 Kipm melnum almintowen a mentepm ukipma Wailen a plan ipma wor wasrongentepm, kil pikekg takweiyepm la kil ikga ikuwi kipm pa ep kaino anong wor pake. Kolpa atom Maur Wailen kil anel kla akilen pa Maur Wor pa ak amprin kipm pa eng alkilen la kipm rpmi wriwen wor, wa kipm ukipma yangkipm aklale alkilen. Kolpa ti minto akwonalmpen pa ari wor kol a minto ikwonilmpen kipm pa ikngklei wang eng uk wor Maur Wailen.
2TH 2:14 Yangkipm wor a la Sisas a pikekg minto laron nakepm pa, pa kolen akwe ur a Maur Wailen la lkepm klalen a Wailen almentepmen Sisas Krais pa, eng mpa kipm rpmi klalen wriwen wor kol kil alkil ai.
2TH 2:15 Kolpati kipm melnum almintowen a mentepm ukipma Krais, kipm itni titnongket rkul yangkipm a pikekg minto laron a wa kaling plantepm ak ok ti aki minto nira nira ela wrkapm ti ak nakepm pa.
2TH 2:16 Minto oklala naki Wailen amentepmen Sisas Krais nampokgen Yan Wailen a mentepmen. Kil pa melnum a plan ipma wor wasrongen mentepm ti, atom ari kil angklinso nikgwalpm wor wor a ikga itni yongkyong, kil melnum a alko ariwe wor wor atom ari mentepm ukipma rpma nungkwangentel la kil ikga ngklinso pa,
2TH 2:17 minto oklala naken la mpa tuwekg ngklinsepm nikgwalpm wor wor a lkepm titnongket ikngklei wang, eng mpa kipm ikwap wor wor a la okyangkipm wor wor ikalkilel kolti.
2TH 3:1 Kipm melnum almintowen a mentepm ukipma Krais, ti minto wa la lanikepm yangkipm wris ur kil pen: ti kipm oklala niki Wailen pa eng kil ngklin minto ti, eng mpa yangkipm wor a laron Wailen pa mpa kai pinterngen yela tutu anong wrongkwail ai; wa kipm oklala nikel eng mpa tu ti yat uwi yangkipm pa itopen ukipma kol a pikekg kipm awi pa.
2TH 3:2 Tu melnum tiur ake ukipma Maur Wailen, ti kipm wa oklala niki Wailen eng kil ikglento eng ake mpa tu melnum melkget a antokg paipmpaipm kol pa ntokg minto ti kai paipm pa.
2TH 3:3 Pake Wailen kil nungkulkg wor, kil mpa lkepm titnongket a ikglentepm eng ake mpa Satan ntokgtepm paipm pa.
2TH 3:4 Minto ariwe la Wailen pa kil am kolpake, kolpa atom minto ariwe la kipm katnun yangkipm titnongket a pikekg minto alkepm pa, wa minto ariwe la kipm ikga kutnun kolpa iye kai pa.
2TH 3:5 Minto asen Wailen la kil lok nikgwalpm a kipm pa eng mpa kipm uwi nikgwalpm wor a Maur Wailen a plan ipma wor wasrongen mla ur, wa kipm itni titnongket rki kalkuten kol Krais pa.
2TH 3:6 Kipm melnum almintowen a mentepm ukipma Krais, minto awi ok a Wailen Sisas Krais pa, atom minto lanakepm titnongket la, kipm itni watinet tukulelkgen tu alkipmen a rka ak lpmaak rka pa wa ake katnun yangkipmok a minto kaling planten pa.
2TH 3:7 Kipm alkipm ariwe pa, kol am kipm kutnun mrangkum kol a pikekg minto plantepm pake. Pikekg minto antiwepm rpma kai pa, pa minto pikekg ake rpma ak lpmaak pa.
2TH 3:8 Minto ake pikekg rpma al okipma wunongket ur a kipm pa angklinso pa, kalpis. Minto ake la rpmi ik kipm pa, kolpa atom minto pikekg ngkaten kalkuten aken kwap miningkranen ak titnongket almintowen ti eng ak angklin minto alminto ti.
2TH 3:9 Minto ti pa melnum wokgen akwapel a Krais, kolpa ti kol am kipm pa ngklinso pake. Pake minto wasrongen la plantepm mrangkum wor kil la kol a kipm kutnun ik kitila.
2TH 3:10 Kol a pikekg minto antiwepm rpma pa, minto alkepm yangkipm titnongket kolkil la, kol melnum ur karken akwap pa, ampur kil al okipma pa.
2TH 3:11 Yiprokgen a minto la kil pa pati: minto atning la tu tiur akipmen pa ake akwap pa. Tu tumplo wor eng kai akwap a tu tiur ise, tu akwap eng ak angklin tu alntu ti pa kalpis, tu rka ak lpmaak kolti.
2TH 3:12 Minto awi ok a Wailen Sisas Krais pa, atom minto alken yangkipm titnongket la karkurngken la, tatar rpmi iken kwap okipma ntokg il ikipor ilei kin watnom alntu pa rpmi wan kanokgel.
2TH 3:13 Pake kipm melnum almintowen a mentepm ukipma Krais ti pa, kipm lupm nikgwalpm wor wor pa ik kitila iye kolpa kai, a ampur ak kai elngen angko ya pa.
2TH 3:14 Kol melnum ur ake atning orngwatneikgen yangkipm a minto nirantepm ela wrkapm kil kaintepm pa, pa kipm laron kil pa itni kai wunong. Kipm itni watin tukuleikgen melnum pa. Ampur kipm kai or wris nampokgentel pa, eng ikga kil num paipm.
2TH 3:15 Pake ampur kipm antokg paipmel melnum pa, kol a kil wrongmanto ur alkipmen pa. Kipm ri la kol la kil melnum ur alkipmen a kipm ukipma Krais pa, kai kipm la kurkurngkel kolti.
2TH 3:16 Kipm rpma atopen aki kipm ipma kalkuten aki, pa minto oklala naki Wailen la kil lkepm ipma meen wor pa kolpa kai. Kil alkil pa yiprokgen a alko ipma meen wor pake. Wa minto wa oklala nakel la kil ntiwepm rpmi kolpa iye kai.
2TH 3:17 Kupm ak wam alkupmen Pol nira ok umpuwen ketn kil la, alkepm wor. Wrkapm a kupm nira kai eng a plalng pa, akangklei kupm am nira krakg krakg kolngkol pake.
2TH 3:18 Minto oklala naki Wailen amentepmen Sisas Krais la kil plantepm ipma wor a ngklinsepm kimeket. Ti yangkipm katnukg a minto nira kil pa am kai kolpake.
1TI 1:1 Kupm Pol, kupm melnum wokgen akwapel a Krais Sisas. Maur Wailen a pikekg awi mentepm ti aye kai eng alkilen pa, a wa Wailen Krais Sisas kil melnum a mentepm ukipma rpma nungkwangen la riwel pa, tuwekg pikekg takweiyopm la kupm melnum wokgen akwapel a tuwekg.
1TI 1:2 Kupm nira wrkapm kil eng kitn Timoti pake. Kupm pikekg angklinseitn atom kitn ukipma atom kitn palng kol warim akupmen aklale. Kupm asen Yan Maur Wailen pa wa nampokgen Wailen Krais Sisas a mentepmen pa eng mpa tuwekg plan ipma wor ngklinseitn, a ntokg ipma akitnen pa rki meen wor.
1TI 1:3 Kil kupm la lanikeitn or wrikel yangkipm a pikekg kupm lanakeitn ep ak wang a kupm la kaino anong kanokg Masetonia pa la, kitn rpmi anong Epesus pa, eng mpa kitn ri la tu melnum a kaling plan yangkipm ur manet a ake kai katila yangkipm a Maur Wailen pa, pa kitn mpa la ok titnongket ngkengken eng ampake tu ik kolpa. Ti kupm la wa tilpeitn titnongket nti ur la kitn ik kolpa kai o!
1TI 1:4 Wa kupm la wa tilpeitn or wrikel la kitn laniken eng mpa tu elngen a tu akwonalmpen akorla por kweikwei a kolpa a wa tu ak ker awiye nang a tu mamikg mamin mansan atuwen pa. Eng ntei, tu ik kolpa pa mpa wa ak antokg tu alntu pa wa alupm nikgwalpm watipmen nolangkil tita eng kweikwei a kolpa. Wa ake mpa wa ik ngklin tu melnum pa eng tu ikwonilmpen ya wor a Maur Wailen akwlenten la uwiyen eng alkilen. Melnum a uk ipma Krais pa kolti antiwe ore ya pa.
1TI 1:5 Pake yiprokgen a kupm ti lanakeitn la kitn laniken titnongket a ngkengken kolpa pa itna kolkil: kupm wasrongen la tu mpa rkul nikgwalpm a plan ipma wor wasrongen tita iklale. Kol nol nikgwalpm atuwen pa mpa rki kukula wriwen wor kolti, wa kol ok wusok atuwen pa mpa iktitnongketelen la tu ake antokg paipm ur, wa kol tu mpa ukipma Sisas pa iklale, tu kutnun nikgwalpm kolpa pipa, pa ak angklin tu atom tu antiwe arkul nikgwalpm a plan ipma wor wasrongen tu melnum.
1TI 1:6 Tu melnum tiur pa, tu am pikekg kai ar or ya manet atnuurng nikgwalpm wor kolpa yat ise, atom anel rka akor la yangkipm tiur a ake ak angklin melnum ur kolai pa, kalpis.
1TI 1:7 Tu wasrongen la tu ti melnum a kaling plan yangkipm titnongket a Maur Wailen naki tu wrong kin kipman, pake tu alntu ti ake wa ariwe yiprokgen a yangkipm a tu kaling planten a lanaken la pa yangkipm aklale pa.
1TI 1:8 Pake mentepm ti pa, mentepm ariwe la kuina ur nira ela yangkipm titnongket pa wor a ak angklinso. Kol melnum ur kil kiling plan yangkipm titnongket pa riworwor pa, yangkipm titnongket pa wor.
1TI 1:9 Wa mentepm wa ariwe la, yangkipm titnongket pa ake itna eng la ik ngketen tu melnum a antokg kuina ur a wor pa, kalpis. Pa itna eng la ik ngketen tu melnum paipm kolkil: - tu melnum a talpulng yangkipm, - tu melnum a ake la orngwatneikgen melnum ur aki yangkipm titnongket ur, - tu melnum a itna watin eng Maur Wailen, - tu melnum a antokg paipmpaipm, - tu melnum a ake katnun nikgwalpm ute wor a Maur Wailen, - tu melnum a ake ngkark orngwatneikgen Maur Wailen ti, - tu melnum a alm man alntu amo a tu melnum a alm yan alntu amo, - tu melnum a alm melnum amo, -
1TI 1:10 wa tu kin a kipman a angkli arkul tita, - wa tu kin a anti tu kin okg kinkipman, a tu kipman a anti tu kipman okg kinkipman, - tu melnum a arkul ak ikgwampel melnum manet ur ai aye kai eng akawi marpm, - tu melnum a kansil, - tu melnum a naren Maur Wailen aki wrik om aki kweiur kolpa eng ak titnongketel yangkipm kansil atuwen pa, - wa tu melnum a antokg kweikwei tiur manet kolpa a ak angketen yangkipm wor aklale a Maur Wailen a mentepm kaling plan pa. Yangkipm titnongket pa am elng itna la ik lok tu melnum a antokg paipm kolpake.
1TI 1:11 Kol mentepm uwi yangkipm titnongket pa ik titnongketel a ik lok tu melnum pa riworwor kolpa pa, yangkipm titnongket pa wor a ak angklinso. Wa Yangkipm titnongket pa am kai irir yangkipm wor a la Krais a pikekg Maur Wailen elngkul kupm ti la kupm laron tike. Yangkipm wor pa lanako la Maur Wailen pa kil antiwe titnongket klalen wail manten, atom mentepm mpa ngkit nang akilen pa iye kaino kwa.
1TI 1:12 Kupm uk wor Krais Sisas Wailen almentepmen, melnum a alkopm alkopm titnongket pa eng kil pikekg ariwopm la kupm ti nungkulkg wor antiwe ikga ikwap wor, kolpa atom kil pikekg takweiyopm la kupm ikwap akilen pa.
1TI 1:13 Aklale, pikekg ep pa kupm melnum pikekg itna kalnten awi wrongmanto lan tu a ukipma Sisas pa atom or ungkwan aknokgel tu pa, pati atnen a kupm ake pikekg ukipma kil pa a wa kupm ake pikekg ariwe kuina ur a kupm antokg pa, kalpis. Kolpa atom ari kil plan ipma arein alkil pa ak angklinsopm
1TI 1:14 Wailen a mentepmen pa kil plan ipma wor areinsopm wail manten paipm wrisen or kai ai. Pa ak angklinsopm, atom kupm ukipma kil a wa kupm plan ipma wor wasrongen tu wrongkwail. Am Krais Sisas pa kil alkopm nikgwalpm kolpake.
1TI 1:15 Mentepm wrongkwail antokg paipmpaipm, pake kupm kil pa melnum paipm wrisen a pikekg antokg paipmpaipm angkomis or kai ai. Pake Krais Sisas kil pikekg nar kanokg ti eng ak awi mentepm melnum a antokg paipmpaipm. Kil yangkipm a mentepm atning atning a tu laron nako nako pa. Pa yangkipm wor aklale wrisen a kol a mentepm ukipma kutnun riworwor iye kimeket pa pati, kol a wor wrisen.
1TI 1:16 Pikekg Sisas Krais kil arkul itna nungkwangen mentepm melnum a antokg paipm kolti. Kil la plan ipma wor alkil pa rein mentepm ti, kolpa atom ari kil plan ipma wor alkil pa arein kupm ti, kupm ti melnum paipm wrisen or kai ai. Kolpa atom kil elng kupm ti itna kol mrangkum ur a ikga tu melnum paipm kolai kolai ikga tu ri pa, tu riwe la, kil ikgam wa rkul ipma itni nungkwangen tu pa yat pake, la tu ukipma kil pa, tu ikga uwi yaprekg watin a rpma yongkyong.
1TI 1:17 Kil pa Maur Wailen, ake Maur Wailen ur manet rpma, kalpis, kil alkil wris pa kolti. Kil melnum tukgunakg a rpma yongkyong, a kil ikgake imo, wa melnum ur ake ari kil pa, kalpis. Ti mpa mentepm ngkit nang a kil alkil wris ita pa iye kaino kwa ikngklei wang itni iye or pa kai pake! Aklale wrisen.
1TI 1:18 Timoti, kitn kol warim kipman alkupm a mentekg ukipma Krais, kupm alkeitn yangkipm a ela wrkapm kil la kitn ikwap kitila rpmi kai pa. Yangkipm kil kai katila yangkipm a pikekg Maur Wor a Maur Wailen ngkat okel tunteng melnum okwripm la kitn pa ep ak ai la ikga kitn ik pa. Ti kol a kitn lupmen yangkipm a pikekg tunteng aktitnongkeleitn pa rpmi kawor ipma akitnen. Pa kol wri wamung ur eng mpa kitn ik rapon riworwor, atom mpa kitn ik ngketen yangkipm manet a tu tiur kaling planten pa.
1TI 1:19 Kitn ilmpwrong itni kolpa kai pa, kitn mpa rkul a kitn ukipma Sisas pa, a kitn kutnun ok wusok alkitn a alokeitn la kitn itn a rpmi wriwen wor pa. Kitn rkul kweikwei wekg pa iye itni titnongket ik rapon kolpa iye kai. Tu tiur a pikekg ukipma pa tu pikekg talpulng ok wusok alntu a aloken pa, atom tu angko kai antokg paipmpaipm. Atom a tu ukipma pa kolen wan unokgen a kai al atne wes atom tapor kai paipm pa.
1TI 1:20 Imeneus a Aleksanter pa tuwekg melnum wekg ur a pikekg talpulng ok wusok a aloken pa atom a tuwekg ukipma pa kai paipm kolpa. Kolpa atom kupm elng tuwekg pa kai wam a Satan pa eng kil lken wleket, eng mpa tuwekg uwi riwe paipm a tuwekg antokg pa, eng ake mpa tuwekg la ik nokgel nang a Maur Wailen pa.
1TI 2:1 Ti kwei ur wail manten itna ep pa pati, kupm la tilpeitn la kitn laniki tu wrong kin a kipman a kipm ukipma Sisas pa eng kipm isen isen Maur Wailen pa, kipm oklala nikel, a kipm uwi ok a tu melnum wrongkwail pa ik isen eng ngklinsen, wa kipm wa ukwor a ngkit nang akilen pa. Kipm nti Maur Wailen pa oklala kolpa eng ik ngklin tu melnum wrongkwail.
1TI 2:2 Tu melnum wrongkwail kol tu melnum tukgunakg a tu mring man wailen wailen a nang arke pa, eng mpa tu ikglentepm riworwor eng kipm terng rki meen wor, eng mpa kipm itn a rpmi ntokg kuina ur kitila nikgwalpm a Maur Wailen kil wasrongen pa.
1TI 2:3 Kipm oklala naki Maur Wailen kolpa pipa, Maur Wailen, Melnum a pikekg awiyo aye kai eng kil alkil pa, kil mpa itopen kirpo yangkipm ute wor eng oklala a kipm antiwel oklala pa.
1TI 2:4 Kil wasrongen la uwi wrongkwail kin a kipman ti iye kul kai eng alkilen, wa kil wasrongen la tu uwi riwe yangkipm aklale akilen ti kutnun.
1TI 2:5 Mentepm ariwe la Maur Wailen pa wris ata, wa melnum kuin a itna Maur Wailen a itna mentepm melnum ti pa, am Krais Sisas pake, kil pa melnum kol mentepm tike
1TI 2:6 Pikekg Maur Wailen kil alm wang la kil ikga plan ngko wunong iklale la kil wasrongen la ikga ik uwi wrongkwail kin a kipman ti iye kai wor. Kolpa atom Krais Sisas pikekg uk kil alkil pa amo akarmpen paipmpaipm a mentepm wrongkwail kin a kipman pa eng mpa mentepm wirng no itni kukula wor.
1TI 2:7 Am yiprokgen kolpa atom ari Maur Wailen kil pikekg yapon kupm ti elngkitna kolen melnum a laron yangkipm wor kil, wa kolen melnum wokgen akwapel a Krais Sisas pa - kil kupm la aklale, ake kupm kansil pa. A wa kil yapontopm elngkitna kol melnum a kaling plan tu wrong kin kipman a ake a mentepm Suta pa, la kupm kiling planten yangkipm aklale pa eng tu ukipma.
1TI 2:8 Kolpa ti kol kipm a ukipma Sisas pa kai tukwem rki wris kipor kilko ilein Maur Wailen rki yela tutu palpa pa, pa kupm wasrongen la kipm oklala niki Maur Wailen. Wa kupm wasrongen la kipm kipman pa la oklala niki Maur Wailen pa, kipm mpa ngkit wam alkipm pa iye kaino kwa oklala niki Maur Wailen pa, kipm ake mpa rkul ipma paipm a nikgwalpm watipmen atom oklala niki Maur Wailen pa, kipm mpa rpmi wriwen wor kolti.
1TI 2:9 Kupm wasrongen la tu kin pa mpa nowe apm wor wor ik aur num atuwen pa, pa am apake. Ake mpa tu nowe apm paipm eng mpa ik rkolng tu ikorla ringkowe a uk num paipm tu pa. A ake mpa tu nowe apm lukglukg wor wor a ari wor wrisen. Ake mpa tu klapm kampong noworel nukure numpwam alntu pa riworwor kai ngko mis ik kweikwei kolen mikgni yawet rpmi wam, lil kroitnimpon, yipo tukgunakg pa, kolpa yaper.
1TI 2:10 Kol tu la plan tu alntu ti la tu kin a ukipma katnun Maur Wailen pa, tu mpa ntokg kuina ur a wor kolti ik alkilel, pa kol lukglukg wor ur a tu ngkat ak nakure tu alntu pake.
1TI 2:11 Tu kin pa mpa rku tu alntu ti kinar orngwatneikgen tu mla ur ai a kiling plan yangkipm a Maur Wailen pa tatar rpmi meen eng itning yangkipm pa.
1TI 2:12 Kupm ake uk ya la mpa tu kin pa itni kiling plan tu wrong kin a kipman pa yangkipm a Maur Wailen pa, kalpis. Wa kupm ake wa uk ya la mpa tu wrekg itni wailen angen tu kipman pa, kalpis. Tu mpa tarng rpmi itning kolti.
1TI 2:13 Eng ntei, pikekg Maur Wailen antokg Atam pa ep, plalng pa wa kil antokg Ip pa katnukg.
1TI 2:14 Wa ake pikekg Satan pa ak palk ipaar kansil Atam pa, pa pikekg Ip pake. Atom Ip pa angko kai angketen yangkipm titnongket a Maur Wailen pake.
1TI 2:15 Kin pa pikekg antokg paipm atom kil wa raku warim pa kil awi wleket. Atom tu kin pa wa raku warim pa tu wa awi wleket kolpa kul. Pake kol tu rku tu alntu orngwatneikgen atom ukipma Sisas pa, wa plan ipma wor wasrongen tu mla ur ai, a wa rpmi wriwen wor kolpa iye kai pa, Warim Kipman pa mpa uwiyen eng alkilen.
1TI 3:1 Yangkipm a kupm la la kil pa aklale: kol nikgwalpm a melnum ur rka la kil a itni tukgunakg eng ikglen tu wrong kin kipman mapming a ukipma Krais Sisas pipa, kwap a kil wasrongen la uwi pa, pa mentepm kaporng yangkipm la pa kwap wor.
1TI 3:2 Kolpa ti melnum a la itni melnum tukgunakg eng ikglen tu wrong kin kipman mapming a ukipma pa, kil mpa melnum kolkil: - kil mpa melnum a ake wrongkwail elukgen ari la kil antokg paipm ur, - kil mpa melnum a awi kin wris kolti, - kil mpa melnum wontrakole, - kil mpa melnum a arkul ipma alupm nikgwalpm wor, - kil mpa melnum a mentepm alupmel worwor, - kil mpa kipor ilei tu wokgmprak, - kil mpa melnum wor a arowonel a kaling plan tu wrong kin a kipman nikgwalpm a Maur Wailen kil wasrongen pa. -
1TI 3:3 Kil ake mpa melnum a al u titno, - kil mpa melnum a ake ipma wakget atom or aki ikle kamel pa, - kil mpa melnum nikgwalpm wor kolti, - kil ake mpa melnum a nikgwalpm arken la uwi marpm pa. -
1TI 3:4 A kil mpa melnum a ikgalen kin watnom a wan anong alkil pa ariworwor, - kil mpa melnum a naki karkurng alupmen tu warim alkil pa ariworwor, eng mpa tu itning kutnun yangkipm akilen. Kil mpa ik won iro lok kil alkil ti, kil ake mpa ik ipma wakget ntokgten kai paipm pa.
1TI 3:5 Kol melnum ake antiwe ikgalen alok kin a watnom alkil pa rka ariworwor pa, pa mpa wa kil ikglen tu wrong kin a kipman a Maur Wailen pa la kolai?
1TI 3:6 Ake mpa kipm ngkit melnum a ukipma Sisas weten pa. Kol kipm ngkitel pa, kil mpa atop wam rka nol la kil ti melnum wor. Ti ikga wa Maur Wailen lkel wleket ikilmpe paipm a kil antokg pa, kolen pikekg kil uk wleket Maur Paipm Satan akalmpe paipm a pikekg kil antokg pa.
1TI 3:7 Kil mpa tu melnum yimponen ai wa riwel kiporng yangkipm la kil pa melnum wor. Kolpa eng ake mpa tu iknokgel la paipmel kil pa atom kil ngkowe ran a Maur Paipm Satan ngkat pa.
1TI 3:8 Am kolpake, kipm la ngkit tu melnum a akwap a ak angklin tu wrong kin a kipman mapming a kaingkai kapor kilko alein Maur Wailen pa, kipm mpa ngkit tu melnum kolkil: - tu mpa melnum a kipm alupm worwor, - tu mpa melnum a ake okmilip wekgenen, - tu mpa melnum a ake al u titno atom titno pa, - tu mpa melnum a ake aklampe marpm kweikwei a tu tiur ai. -
1TI 3:9 Tu mpa melnum a atning katnun ok wusok alntu a naken pa atom tu ariwe la tu ake antokg paipm ur, - a tu mpa rkul nikgwalpm ampen wrongkwail a Maur Wailen pa itni titnongket a pikekg kil laron nako atom mentepm ukipma pa, atom tu arkul katnun ari la pa aklale.
1TI 3:10 Kipm ngkit tu melnum a kolpake, pake kipm lken kwap ur pa ep eng tu ik eng ik riwen la kol tu ikwap wor pipa, kipm ngkiten itni melnum akwapel a angklin tu wrong kin a kipman a ukipma Maur Wailen pa wom.
1TI 3:11 Wa tu kin alntuwen pa, tu mpam wa kolpa yat pake. - Tu mpa kin a kipm alupmen worwor, - ake mpa tu la yangkipm elyirokgel melnum ur, - tu mpa wontrakole, a tu mpa nungkulkg wor ikwap wrongkwail a tu alken pa iklale ute riworwor.
1TI 3:12 Wa tu kipman kipm la ngkit pa, - tu mpa melnum a aye kin wris ata, - a tu mpa melnum a ikgalen tu warim a wan anong alntu ti ariworwor.
1TI 3:13 Ti kipm mpa ngkit tu melnum wor kolpake, eng ntei, tu melnum a akwap ak angklin tu wrong kin a kipman a Maur Wailen pa, kol tu ikwap riworwor kolpa kai pa, tu pa mpa uwi nang wor a tu ake mpa ngkirk, tu mpa itni titnongket laron Krais Sisas a tu ukipma pa.
1TI 3:14 Kupm wasrongen la kupm a kai riweitn itatu kai pake, kupm niranteitn wrkapm kil kainteitn tipen.
1TI 3:15 Kol kweiur ik lokopm atom kupm mpenet ingkul kil i pa, kitn ngkleikg wrkapm kil pipa, mpa kitn uwi riwe kuina ur a kupm lanakeitn pa, la kipm mpa itn a rpmi ikwap na na kolai itni kawor yalming a Maur Wailen, kil alkil yiprokgen a yaprekg watin a rpma yongkyong. Wan yalming pa ak la kipm wrong kin a kipman mapming akilen a ukipma kil pa. Wa kipm kol ong a ak atne yangkipm aklale a Maur Wailen a men laron laron pa atom itna ute aklale.
1TI 3:16 Mentepm ariwe worwor kolpa la, “Nikgwalpm yiprokgen ampen wrongkwail a Maur Wailen a mentepm ukipma pa, pa wail manten aklale”, pa mentepm wrongkwail ariwe atom laron la am kolpa aklale pake. Nikgwalpm yiprokgen ampen a pikekg Maur Wailen planto pa pati kolkil: - Kil pa pikekg palng melnum, man rakuwel, kil rpma kanokg ti kolpa kaingkai, kai kil amo kol mentepm tike. - Wa kil wa melnum kol mentepm tike, nikgwalpm wrongkwail a kil alupm pa ute wor kol a Maur Wailen kil alkil pa. - Kil pa plan kil alkil ti tu maur akwapel a Maur Wailen pa wa ariwel. - Kil pa pikekg tu laron naki tu wrong kin a kipman a ake ukipma yela. - Kil pa tu wrong kin a kipman yela kanokg ti ukipma katnun. - Kil pa pikekg Maur Wailen awiyel aye kaino anong wor ai alkel nang wailen.
1TI 4:1 Mentepm wrong kin a kipman a Maur Wailen pa kol ong a ak atne yangkipm aklale akilen pa. Pake Maur Wor pikekg la klalen angko wunong la, ikga ik wang kutnukg pa tu melnum tiur a ukipma Maur Wailen pa tu ikga uk yirokg yangkipm aklale a Maur Wailen a mentepm ukipma pa, wa ngko yaper kai kutnun maur manet a ikga iyewen kai ar. A tu ikga itning kutnun yangkipm a tu mring, a mring maur a kweikwei kolpa, a tu melnum tiur ikga kiling plantepm pa.
1TI 4:2 Tu melnum a ikga kiling plantepm yangkipm kansil pa, pa tu melnum a ak palk ipaarepm kolti. Satan pa anel kla ak amprin tu pa eng alkilen ise, atom ok wusok a tu melnum a kolpa am amo ise, atom tu ake antiwe ariwe la tu antokg paipm pa.
1TI 4:3 Tu ikga kinsil kiling plantepm lala, ake mpa kin a kipman uwi tita iye, a wa la ake mpa il wlikgok aki okipma a angklonake pa. Okipma a wlikgok wrongkwail ti pa pikekg Maur Wailen kil antokg la pa woren plalngten. Kil la mentepm wrong kin a kipman a ukipma Sisas, a awi ariwe yangkipm aklale akilen pa, mpa mentepm uk wor kil pa plalng pipa, il. Pa Maur Wailen kil am awi wor kolpake.
1TI 4:4 Eng ntei, kweikwei wrongkwail a Maur Wailen kil antokg ti pa, pa wor kimeket, ake ur paipm. Ti ake mpa mentepm ngklonike kweikwei ur, kalpis. Mentepm mpa ukwor Maur Wailen ti kolti atom mentepm il.
1TI 4:5 Eng ntei, yangkipm a Maur Wailen pa la kweikwei wrongkwail pa wor kimeket, a wa mentepm ukwor kil pa atom kil ari kaporng yangkipm la pa wor.
1TI 4:6 Kitn kaling plan yangkipm kil tu melnum alkitn a kipm ukipma Krais Sisas pa, atom kitn pa melnum akwapel wor a Krais Sisas. Kitn awi yangkipm wor a mentepm ukipma pa wa nikgwalpm ariwe wor aklale a pikekg kaling planteitn atom kitn katnun pa, pa kol okipma a kitn awi al eng wa ak titnongketel kitn alkitn pa yat.
1TI 4:7 Kitn mpa uk yirokg itni watinet tukuleikgen yangkipm a tu kin nangkwor tiur a rka aut ok kalpmilel a elukgen Maur Wailen kolpa. Kitn mpa kiling kiling eng itn a rpmi ntokg kuina ur kitila nikgwalpm a Maur Wailen kil wasrongen pa.
1TI 4:8 Eng ntei, mentepm ariwe la, mentepm kiling kiling ik titnongketel numpalk ti pa, pa mpa ik ngklin numpwam ti kolti. Pake mentepm kiling kiling ik titnongketel Maur Wor almentepm ti kutnun nikgwalpm a Maur Wailen pa, pa mpa ik ngklinso kai kweikwei wrongkwail pa. Eng ntei, kil pikekg yapon yangkipm la ikga ik ngklin mentepm ti ik wang ti a mentepm rpma kanokg a ti, a wa ikga ik ngklin ik wang kutnukg a mentepm ntiwel rpmi kaino ai.
1TI 4:9 Yangkipm kil pa yangkipm aklale wrisen, a kol a mentepm itning yangkipm kil ukipma kutnun yek kimeket pa kol a wor wrisen.
1TI 4:10 Engntei, mentepm ukipma rpma nungkwangen ariwe Maur Wailen a rpma yongkyong, kil melnum a amo eng ak awi mentepm wrongkwail kin a kipman, wa kil melnum a ak awi mentepm melnum a ukipma pa. Kil pikekg yapon yangkipm la lko Maur Wor ik ngklinso ik wang ti, wa ikga ik wang kutnukg kaino anong wor ai. Am yiprokgen kolpa atom ari mentepm aken kwap tumplowisen nikgwalpm arkekgen kaling kaling nol nikgwalpm amentepm ti eng mpa mentepm itn a rpmi kutnun wasrongen a kil pa kolti.
1TI 4:11 Kitn la kurkurng tu wrong kin kipman pa laniken a kiling planten yangkipm kweikwei kil eng tu kutnun.
1TI 4:12 Kitn ti warimpen, pake ake mpa kitn elng melnum ur ri elukgen kitn ti la kitn warim ur kolti pa. Kitn mpa plan mrangkum wor kolkil tu melnum a ukipma Sisas pa eng mpa tu ri pa tu kutnun: - kitn oklala, a wa ntokg kuinaur a wor kolti, - kitn plan ipma wor wasrongen mlaur, - kitn ukipma Sisas itni titnongket, - a kitn wa itni wirng no kukula rukis wor itni wulmpa a Maur Wailen, eng mpa tu ri pa, tu kiling kiling kutnun. -
1TI 4:13 Kitn alkitn ti mpa ngkleikg yangkipm wrkapm a Maur Wailen pa niki kurkurng tu, a wa kiling planten tumplowis itni kolpa itni i i, kupm kainteitn. -
1TI 4:14 Ampur kitn elngen kwap titnongket wor wor a pikekg Maur Wor a Maur Wailen alkeitn la kitn ik ik kwap alkilen pa, ik yikwon ningkrapm ilei rmpi kanokg pa. Kitn mpa wam nti tongtong kol kweiur wor a ak ak kwap pa. Pa pikekg Maur Wor alkeitn ak wang a tu melnum wailen wailen a ikgalen mapming a tu wrong kin a kipman a Maur Wailen pa elng wam eleweitn oklala naki Maur Wailen. A wa Maur Wailen pikekg angklo la wli ok a melnum okwripm ur laron kwap a titnongket a ariwe a Maur Wor alkeitn, la ik titnongketel kitn eng kwap a ikga kitn ik pa. -
1TI 4:15 Ti ikngklei wang pa kitn mpa uk kitn alkitn ti kimeket kiling kiling iken timplo kwap kweikwei wrongkwail a kupm la ti, eng mpa tu wrong kin a kipman ri atn a rpma a kwap a kitn ak pa palng wor kolpa iye kai iye kai. -
1TI 4:16 A kitn ukikg lokipaar atn a rpma a kitn alkitn ti a wa yangkipm a kitn kaling plan tu wrong kin kipman pa, atom kitn ikwap pa kolpa iye kai o! Eng ntei, kol kitn ik kolpa pa, mpa ik ngklin kitn alkitn ti a wa tu mlaur a atning yangkipm a kitn kaling planten pa, ik iyewen iye kai wor.
1TI 5:1 Kupm la lanikeitn la, ake mpa kitn la kurkurng tu mel nangkwor pa minsrang. Kitn mpa laniken ik ipma meen wor kolti, kolen a kitn oklala anti yan alkitnen pa. Wa kitn la la kurkurng tu kipman warimpen pa, kitn mpa laniken ik ipma meen wor kolti, kolen a kitn anti wailen aki paipmen alkitn oklala pa.
1TI 5:2 Wa tu kin nangkwor pa am wa kolpake, kitn mpa laniken la kurkurngken meen kolen a kitn anti man alkitn oklala pa. Wa tu kin warimpen pa am wa kolpake, kitn mpa laniken la kurkurngken meen kolen la kitn oklala anti muikg mayen alkitn pa. Kitn ik nimpokgen nikgwalpm ute wriwen wor itni wulmpa a Maur Wailen.
1TI 5:3 Tu kin karpikg a warim kalpisen a ikgalenten pa, kitn mpa riwen wulmparpmewen riworwor eng laniki wrong kin kipman mapming a ukipma Sisas pa mpa orngwatneikgenten ngklinsen a ikglenten riworwor.
1TI 5:4 Pake kol kin karpikg ur a warim aki walwalpopm alkil pa rpma pa, tu mpa ikglentel nimpokgen mla ur a antiwel rpma wan wris pa, tu mpa ikglentel ikilmpe wam a pikekg tu akten pa. Pa kwap itna ep a kol a tu ik am pake. Tu ik kolpa pa, mpa ik ntokg nikgwalpm a Maur Wailen pa itopen.
1TI 5:5 Pake kin karpikg ur a kil rpma ak kil alkil ti kolti a ake wa melnum ur rpma eng mpa ikgalentel pa, kil ukipma rpma nungkwangen ariwe la Maur Wailen mpa ngklinsel pa, atom akangklei wang kil oklala naki Maur Wailen miningkranen eng kil ngklinsel.
1TI 5:6 Pake kol kin karpikg ur kil antokg kuina ur katila nikgwalpm wasrongen a numpalk alkil ti pa, kil antokg Maur Wor alkil ti amo ise.
1TI 5:7 Ti kitn uk yangkipm kil tu kin karpikg a wa tu warim walwalpopm atuwen pa, eng mpa tu itni rukis wriwen wor, atom ake antiwe mpa melnum ur ri lawen la tu antokg paipm ur pa, kalpis.
1TI 5:8 Pake kol melnum ur kil ake ikgalen tu walmpopm wris alkil pa ariworwor pa, pa kol kil ak paipm wrisen. Wa kol ake kil ikgalen tu mamin wror mamikg mayen mansan a antiwel rpma wan wris alkil pa, pa kol kil ak paipm wrisen. Pa plan kolen la kil ake ukipma itna pa, kil am angko yaper kai paipm ise, a tu melnum a ake ukipma Sisas pa ake antokg paipm kol kil pa antokg pa.
1TI 5:9 Kol kitn uwi nangkel tu kin karpikg pa, mpa kitn uwi nang a tu kin karpikg a kol kil: - Uwi nangkel kin karpikg a angko wring kamel wraur a pa aye kaino, ake mpa kitn uwi nangkel tu kin karpikg a wring atuwen a kaino arken wring kamel wraur angko pa aye nar pa. - Wa uwi nangkel kin karpikg a pikekg rpma eng kipman wris kolti. -
1TI 5:10 A kitn mpa uwi nangkel kin karpikg a tu wrongkwail kaporng yangkipm la kil kin a akwap wor: tu ariwe la kil pikekg ikgalen tu warim alkil pa ariworwor, a kil kapor alei yiprokg watinet, a kil klak nepm a tu melnum tiur alntu a ukipma Sisas a ya ur wli pa, wa angklin mlaur a arki kalkuten, a wa uk kil alkil ti kai akwap wrongkwail a wor. Pa mpam kitn uwi nangkel tu kin karpikg a akwap kolpa ikalkilel pake.
1TI 5:11 Pake kitn ake mpa nira nang a tu kin karpikg warimpen pa, eng ntei, kol tu yipon yangkipm la rpmi kolti ikwap a Krais pa, ari nikgwalpm wasrongen atuwen pa wa wrekg la nti kipman okg kin kipman. Kolpa kaingkai wail titnongket pa, pa mpa wa ntiwe ik rkolngken iye kai utnuurng Krais pa, atom tu wa la uwi kipman pa.
1TI 5:12 Tu ik kolpa pa, pa mpa ik ngketen yangkipm a pikekg tu wangkir a yapo nampokgen Krais pa. Pa tu wrong kin a kipman mpa ri la pa tu antokg paipm.
1TI 5:13 Kol ikga tu itn wan ur wan ur ikwap ik ngklin tu melnum tiur pa, nikgwalpm a tu pa ikga rki manet, atom tu ikga ikwap ik lpmaakel. Ikgake tu ikwap ik lpmaakel pa wris pa, tu ikga wa nepm itni kwa op lawokg wan ur wan ur elng nungkulkg rmpi itning oklala na ur a tu tiur ai akor la wai, a wa la elyirokgel tu mla ur ai, a wa tu ikga oklala kweikwei tiur a ake wor kol mpa tu la pa.
1TI 5:14 Kolpa atom kupm mpa ngketen la, ake mpa kipm nira nang a tu kin karpikg warimpen pa nimpokgen tu kin karpikg a kin nangkwor pa. Kupm akwonalmpen ari tu kin karpikg warimpen pa wor kol a tu kai uwi kipman pawo, eng ikga tu iye warim, a ikglen tu nan watnom alntu pa rpmi wan anong alntu pa. Kol tu ikwap wor kolpa pa, pa ake mpa tu wrong manto amentepm pa tu ri paipm ur atom la paipmelo pa.
1TI 5:15 Ti kitn ari pa, tu kin karpikg warimpen tiur am angko yaper kai atnuurng ya wor pa kai ar katnun Satan ise.
1TI 5:16 Kol kin mlaur a ukipma Krais pa, kol kin karpikg walmpopm wris ur alkil pa rpmi pa, mpam kil alkil pa ikglen kin karpikg pake. Eng ake mpa wa ikuke tu wrong kin kipman mapming a ukipma Krais pa wa ikglentel pa. Kolpa eng mpa tu wa ntiwe ikglen tu kin karpikg a ake melnum ur rpma eng ikgalenten pa.
1TI 5:17 Tu melnum wailen wailen a akwap wor tumplowis ikgalen tu wrong kin kipman mapming a ukipma Krais pa, tu wrong kin a kipman pa mpa uk wor wail: tu mpa ngkit nang atuwen, a wa lken marpm a kweikwei ikilmpe kwap wor a tu ak pa. Tu melnum a kol a kipm uk marpm kweikwei a uk wor wail ep pa am tu melnum a akwap a angkli yangkipm, a tu melnum a kaling plan kipm yangkipm a Maur Wailen pake.
1TI 5:18 Ti wrkapm a Maur Wailen pa la kolkil la, “Kitn ampur yapo ok a manto nepm watin a angkom ele apur wit ok pa.” Wa Sisas pikekg la kolkil la, “Melnum akwapel pa, kil mpam uwi marpm eng ikilmpe kwap a kil ak pake.”
1TI 5:19 Kol melnum wris ur lala rki melnum wailen akwapel ur a Maur Wailen pa la kil antokg paipm pa, ake mpa kitn itning la pa aklale pa. Kitn mpa itning melnum wekg aki wraur pa la oklala pa irir kolen tita pipa, kitn itning o!
1TI 5:20 Melnum a kil ntokg paipm kolpa itni pa, mpa kitn la lok paipm a kil antokg pa itni wulmpa a tu wrongkwail ai, eng mpa tu ri pa, tu mpa ngkirk.
1TI 5:21 Kil kupm naren Maur Wailen a Krais Sisas a tu maur akwapel klalen pa, la kitn mpa kutnun yangkipm a wet kupm la karkurngkeitn pa, atom kitn ake mpa ngkit rku tu melnum wailen wailen a nang arke aki yiprokgen ur alkitnen pa. Kitn ri la ikten kolai pa, kitn mpa ikten irir kimeket kolti.
1TI 5:22 Ake mpa kitn elng wam pa ele melnum ur pa itatu ik mprinsel eng la kil palng melnum akwapel a Maur Wailen pa, pa yaper. Melnum pa ngko kai paipm pa, pa kipmekg yatenen am angko kai paipm ise, atnen a kitn pikekg elng wam ele melnum pa atatu. Ti kitn mpa ikglen kitn alkitn ti itni rukis wor kolti.
1TI 5:23 Timoti, kitn ti numpet perper itna kolti, ti ampur kitn al u kolti pa. Kitn wa il u wain waiketnketn ur pa nti wris wris numpokgen, eng mpa wa ik ngklin ipmanikg akitnen pa.
1TI 5:24 Kol a wet kupm la pa la, ake mpa kitn elng wam ele melnum ur itatu ik mprinsel eng la kil ikwap a Maur Wailen pa eng ntei. Paipmpaipm a tu melnum tiur pa palng angko wunong mentepm atning ari ise, atom mentepm la mpa ngkit melnum kolai kolai. Pake paipmpaipm a melnum tiur pa itna am itna pa, ikga wa palng ngko wunong kutnukg.
1TI 5:25 Am wa kolpa yat pake, nikgwalpm wor a antokg kuina ur a wor pa am palng angko wunong tu ari pake. Wa nikgwalpm wor a antokg kuina ur a wor a itna am pa, ikgake wa itni am pa, ikga wa palng ngko wunong pa.
1TI 6:1 Tu melnum a ukipma Krais a pikekg tu mring ipmawekg armpenten eng aken kwap kalpmlel orngwatneikgen tu pa, tu mpa lupm nikgwalpm a orngwatneikgenten a arku tu alntu a ngkat nang a tu mring alntu pa. Mpa tu ik kolpa eng ake mpa tu mring alntu pa la paipmel nang a Maur Wailen a yangkipm wor a mentepm kaling plan pa.
1TI 6:2 Melnum a aken kwap kalpmlel orngwatneikgen mring alkil pa, kol mring alkil pa kil melnum a ukipma Krais pa, ake mpa wa melnum akwapel alkil pa lala, “Palpa mentekg almentekg a ukipma Krais pa, ti mpa kupm ikwap paipmel.” Kolpa kalpis, kil mpa ikwonilmpen lala, mring a kil aken kwap angklinsel pa kil melnum alkil a tuwekg ukipma Krais, a kil melnum a tuwekg plan ipma wor wasrongen tita, ti kil kol a itopen ikwap riworwor. Kitn mpa laron yangkipm kil kiling plan ik titnongketel tu wrong kin kipman eng mpa tu kutnun.
1TI 6:3 Kol melnum ur kil kiling plan yangkipm manet a ake kai irir katila yangkipm ute wor aklale a Wailen amentepmen Sisas Krais pa wa nikgwalpm wor a katnun nikgwalpm a Maur Wailen a mentepm kaling plan pa.
1TI 6:4 Kolpa pipa mentepm ariwe la, melnum pa kil wam rka nol kalpmilel kolti, pa kil ake ariwe nikgwalpm wor ur kalpis. Kil arpmen nikgwalpm raimpe paipm alkil pa rpma wail, la nti tu ik yangkipm rapon a nolangkil tu pa. Atom pa ak antokg tu melnum tiur wrekg ipma paipm aringkowe kweikwei a melnum manet, tu akle tita, tu aknokgel tita, a tu arki tita kalpmlel kalpmlel.
1TI 6:5 Melnum pa kil ak kolpa pa wa ak antokg tu melnum tiur alilakel tita akangklei wang. Tu melnum pa pikekg wampelngen yangkipm aklale a Maur Wailen, a nikgwalpm a tu pa kai paipm raimpe ise. A wa tu akwonalmpen la ya a katnun Maur Wailen a akwap akilen pa ya a awi marpm kweikwei eng rpma antiwe am pake.
1TI 6:6 Ei, pa aklale: kol mentepm itopen kweikwei wrongkwail a mentepm antiwe rpma ti ise, la pa am apake, pati pa ya a ukipma katnun Maur Wailen pa am ya a awi kweikwei wor wor wailet a Maur Wor a Maur Wailen pake.
1TI 6:7 Pikekg man rakuwo pa ake pikekg mentepm aye kweiur nakurnum wli kanokg ti pa, kalpis. Wa ikga mentepm wa imo utnurng kanokg ti pa, ikgake wa mentepm iye kweiur nukurnum kai pa, kalpis.
1TI 6:8 Kolpa ti, kol mentepm antiwe okipma apmnung pa, mpa mentepm itopen pa la pa am apake.
1TI 6:9 Pake mlaur kil wasrongen la rpmi ntiwe kweikwei wailet angen a kil antiwe pa, pa nikgwalpm kolpa pa mpa ik lokel kai ngkowe lem a Satan ale pa. Nikgwalpm a kil pa wrekg wasrongen paipm la ntokg kweikwei a kol a tu melnum titnowen ntokg pa a kweikwei a uk wleket kil alkil ti. Nikgwalpm wasrongen a wrekg titnongket kolpa mpa ik rkolngkel iye kai ngkliwel elng kinar lkim watin atom kil ikga kai paipm.
1TI 6:10 Ipma wrekg wasrongen paipm la uwi marpm pa am yiprokgen a ak arkolng kamel aye kai antokg paipmpaipm wrongkwail pake. Tu tiur pikekg wasrongen paipm la uwi marpm, atom tu kai ar uk yirokg Maur Wailen, atom tu uk wleket wailet tu alntu kolen ikyom a ikningkil a arkewen pa.
1TI 6:11 Tu a nikgwalpm wrekg wasrongen paipm la uwi marpm a kweikwei wailet pa kolpake, kitn ti pa, kitn melnum a Maur Wailen. Ti kitn mpa uk yirokg ngkom nlokgen nikgwalpm wrongkwail a kolpa. Kitn mpa nikgwalpm rkekgen eng kutnun nikgwalpm kolkil: rpmi ute wor kolti, ntokg kuina ur kolen a Maur Wailen kil wasrongen pa, a ukipma Sisas itni titnongket, a plan ipma wor wasrongen mlaur, a rkul ipma itni titnongket rki kalkuten wrongkwail, a plan ipma meen wor eng wrongkwail.
1TI 6:12 Kitn mpa ukipma Krais pa riworwor kolpa iye kai, pa kol kitn anti tu ak kiporen tita pirng titnongket. A kitn mpa rkul Maur Wor pa tongtong kolpa kaingkai, kai palng anong wor a ikga kitn rpmi yongkyong pa, pa kol kitn pirng ak kipor tu pa kai ngko wrik alkil a mentepm pirng kai elngen pa, atom kitn uwi kweiur wor. Krais pa pikekg akweweitn la kitn kul ukipma eng mpa uwi yaprekg watin a rpma yongkyong. Atom kitn pikekg itna wulmpa a tu wrongkwail pa kitn laron kitn alkitn ti la, “Kupm ukipma Krais”, atom tu wrongkwail pikekg atning ari pa.
1TI 6:13 Kupm naren Maur Wailen, kil melnum a uk yaprekg kweikwei wrongkwail ti eng palng malepmen pa, a kupm naren Krais Sisas, kil melnum a pikekg antokg yangkipm itna Pontius Pailat pa kil laron kil alkil ti ak titnongketel yangkipm aklale a kil alkil ak laron kil alkil ti, ti kupm naren Maur Wailen a Krais Sisas pa la la kurkurng kitn Timoti ti la kolkil la,
1TI 6:14 kitn mpa rkul yangkipm pa ikglen riworwor eng mpa itni ute, ake mpa kai am aki kai ar pa eng ake mpa mla ur laweitn la kitn ikgalen paipmel pa. Kitn ikglen riworwor kolpa kai ngko wang a Wailen amentepmen Sisas Krais kil yaper nar ai.
1TI 6:15 Maur Wailen kil ikga la, atom Krais kil ikga nar palng ngko wunong ik wang alkil a pikekg Maur Wailen kil alm ai. Maur Wailen kil melnum mrer wail wor atom mentepm kapor kilko aleinsel a mentepm atopentel. Kil wris ata kil wail manten itna ep antiwe titnongket ikgalen kweikwei wrongkwail, kil melnum tukgunakg itna ep ikgalen tu melnum tukgunakg wrongkwail, a wa kil Wailen itna ep ikgalen tu melnum wailen wailen wrongkwail.
1TI 6:16 Kil alkil wris pa ake antiwe amo. Wa kil pa melnum klalen wakget paipm ai a kil itna klalen, akentiwe melnum ur kai wreren kil pa, wa melnum ur ake pikekg ari kil pa, wa melnum ur ake wa antiwe ariwel ak wulmpa pa, kalpis. Ti ikngklei wang pa mentepm mpa ngkit nang akilen iye kaino kwa itni yongkyong titnongket iye or ai kai! Aklale wrisen.
1TI 6:17 Wa tu melnum a antiwe kweikwei wailet itna kanokg ti pa, kitn mpa la kurkurngken la, ake mpa tu wam rka nol ngkit nang pa eng kweikwei wailet a tu antiwe pa. Wa ake mpa tu nikgwalpm rken ukipma la kweikwei alntuwen pa ikga ik ngklinsen kolpa iye kai pa, pa kalpis, kweikwei pa ikga kai paipm plalng. Tu mpa ukipma Maur Wailen wris ita kolti, kil melnum a alko kweikwei wor wor wrongkwail a mentepm ak arpme rpma kanokg ti eng la ik ntokg mentepm itopen.
1TI 6:18 Wa kitn mpa wa la kurkurngken eng mpa tu ik nikgwalpm a wor wor kolti. Tu ake mpa langkinen kweikwei atuwen ti pa, tu mpa itopen eng mpreing kweikwei wailet atuwen ti eng ik ngklin tu mlaur a rpma tukwok ai, pa tu ikga ntiwe nikgwalpm wor wor kolpa.
1TI 6:19 Kol tu mitaket a ik ngklin tu ur kolpa pa, pa kol tu takwem kweikwei wailet wor wor elng itna, eng ikga tu won ngklin ik wang kutnukg ai. Pa kol tu alm tipmakg wor pa eng la ikga tu kaino rpmi wor yongkyong uwi kweikwei wor wor pa.
1TI 6:20 O Timoti, kitn mpa iken yipmingki ikglen kwap a yangkipm wor a pikekg Maur Wailen alkeitn pa riworwor. A kitn mpa uk yirokg oklala tiur a yiprokgen kalpisen a Maur Wailen ake atopen, a yangkipm tiur a ake wor a tu ak alilakel tita yangkipm aklale a Maur Wailen pa. Pa tu melnum a lala tu ti awi ariwe wor wor yangkipm aklale pa, pake pa tu kai ar kaling plan yangkipm kansil la pa yangkipm aklale a Maur Wailen pa. Ti kitn mpa itni watin tukuleikgen tu pa.
1TI 6:21 Tu melnum tiur am pikekg la tu alntu ti la, tu ariwe worwor yangkipm a Maur Wailen kolpake, atom tu atnurng Krais a pikekg tu ukipma pa, atom tu kai ar. Yangkipm akupmen am kai itna kolpake. Kupm oklala naki Maur Wailen eng mpa kil plan ipma wor alkil ngklinsepm iye kolpa kai.
2TI 1:1 Kupm Pol, kupm melnum wokgen a Krais Sisas. Pikekg Maur Wailen kil alkil ai takweiyopm ak wasrongen a kil alkil ai, atom ukwawopm la kupm laron niki tu wrong kin kipman la Maur Wailen kil pikekg yapon yangkipm la mentepm ukipma kutnun Krais Sisas pa, kil mpa lko yaprekg watin a rpma wor yongkyong.
2TI 1:2 Timoti, yek alkupm, kitn pa kol warim akupmen a kupm plan ipma wor wasrongenteitn, kupm nira wrkapm kil eng kitn pake. Kupm asen Yan Maur Wailen a Wailen Krais Sisas a mentepmen pa, eng mpa tuwekg plan ipma wor ngklinseitn a reinseitn atom ntokg ipma akitnen pa rki kupuk meen wor.
2TI 1:3 Kupm oklala naki Maur Wailen miningkranen pa kupm akwonalmpenteitn rpma akangklei wang a kupm ukwor Maur Wailen. Kil Maur Wailen a tu mamikgmamin mansan akupmen, ok wusok atuwen pikekg aktitnongketel la tu pikekg rka rukis wor atom tu kapor kilko aleinsel kolpa kul, atom kupm am wa kapor kilko aleinsel kol tu pake.
2TI 1:4 Kupm akwonalmpen ikgakg akitnen a pikekg ungkwan pa, kolpa atom kupm wasrongen paipm la riweitn pen, eng mpa kupm rpmi wor uwi ipma atopen wor.
2TI 1:5 Kupm wonarpme kitn pa la, kitn pikekg ukipma Sisas Krais aklale irir kol a pikekg mamikg mayen alkitn Lois, a man alkitn Yunis ukipma pa. Ti kupm ariwe la kitn am wa ukipma kolpake.
2TI 1:6 Kupm ariwe la kitn ukipma aklale. Pikekg Maur Wailen alkeitn kweikwei titnongket wor wor a Maur Wor pa ak wang a pikekg kupm elng wam eleweitn oklala naki Maur Wailen ak angklinseitn pa. Kolpa ti kupm la ngkiteitn won eng kitn rkul kweikwei pa titnongket ik ik kwap pa kolpa iye kai o! Pa kol wakg waiketn a kitn karpen atom naruk al wail pa.
2TI 1:7 Maur Wor a pikekg Maur Wailen alko pa, pa ake Maur Wor a antokg mentepm ngkark pa, kalpis. Pa Maur Wor a alko titnongket, a kil Maur Wor a ak angklin mentepm ti plan ipma wor wasrongen tita, a kil Maur Wor a antokg mentepm wontrakole ikgalen atn a rpma a oklala almentepmen ti ariworwor.
2TI 1:8 Kolpa ti ake mpa kitn numpaipm eng laron Wailen Sisas amentepmen pa. Wa ake mpa kitn numpaipm eng kupm a pikekg laron yangkipm akilen, atom tu awiyopm rpma wan tipmining ti. Kitn mpa ntiwopm rki kaikuten eng laron yangkipm wor a la Sisas pa, Maur Wailen kil mpa lkeitn titnongket a ngklinseitn pa.
2TI 1:9 Maur Wailen kil melnum a pikekg awiyo a amprinso atom akwewo, lala mentepm itni wrong kin kipman akilen. Ake kil awiyo atnen kwap wor kolai a mentepm ti ak pa, kalpis. Palpa kil pikekg akwonalmpen yiprokgen ur alkil ai atom kil planto ipma wor areinso kolpa. Pikekg ak ep lmpiwen ai pa, Maur Wailen kil takwei mentepm ti ep ise, a kitnong a kanokg a kweikwei wrongkwail pa pikekg kil antokg katnukg. Kil alkil pa planto ipma wor areinso kolpa atom kil alko Krais Sisas pa la ik ngklin mentepm wrong kin a kipman tike.
2TI 1:10 Ipma wor a kil pikekg lawen la reinso pa, ak wang ti am kil ak pa angko wunong ise. Pa am la Krais Sisas a pikekg nar akarmpento pake. Kil angketen titnongket a Amo a alok yapo melnum pa plalng yat ise, wa antokg mentepm rpma malepmen itna klalen a ikga rpmi yongkyong. Mentepm am pikekg yangkipm alkil pa armpento wam pake.
2TI 1:11 Maur Wailen kil takwei kupm ti la kupm melnum wokgen akwapel akilen, wa kupm melnum a laron, a wa kupm melnum a kaling plan yangkipm wor a armpen wam mentepm wrong kin a kipman ti.
2TI 1:12 Am yiprokgen pa atom ari kupm arki kalkuten kil, pake kupm ake numpaipm atnen pa, kalpis. Eng ntei, kupm ariwe worwor melnum a kupm ukipma pa. Wa kupm ariwe worwor la, kil antiwe titnongket a ikga iken yipmingki ikglen yangkipm wor a kwap a pikekg kil uk kul wam akupmen ti eng ikga itni wor kolpa kai ngko wang wail a ikga Krais kil yaper nar.
2TI 1:13 Kitn rkul yangkipm ute wor aklale a pikekg kupm kaling planteitn pa, atom elng pa itni kol mrangkum wor a kitn la kitila ik kiling tu wrong kin kipman pa irir kol pikekg kupm kaling planteitn pa. Kitn pa a Krais Sisas, atom kitn ukipma kil, wa kitn wa plan ipma wor wasrongen tu wrong kin kipman, ti kitn rkul nikgwalpm pa ik kiling planten iye kolpa kai o!
2TI 1:14 Maur Wailen pikekg ariwe kitn pa wor wor kolpa atom kil elng yangkipm wor pa elng kai wam akitnen pa la kitn ikglen. Pa kweikwei wor wrisen. Ti kitn mpa iken yipmingki ikglen riworwor. Maur Wor akilen a rpma mentepm ti pa mpa wa ngklinseitn eng kitn ikglen riworwor pa.
2TI 1:15 Kitn ariwe pa, tu wailet a anong kanokg a Esia pa am pikekg plelng yirokg lawopm a atnuurngkopm kai plalng ise. Ti Pikelus a Ermokenes pa tuwekg am wa atnuurngkopm kai ise.
2TI 1:16 Pake Onesiporus pa ake atnuurngkopm, kalpis. Kupm asen Wailen eng mpa kil plan ipma arein wor ngklin Onesiporus nimpokgen kin a watnom alkilen pa. Kupm rpma wan tipmining ti, pake kil ake wa numpaipm atom atnuurngkopm pa, kalpis. Kil yek pikekg wli wli ariwopm atom ak titnongketel ipma akupmen ti anti watipmen atom kupm rpma wor.
2TI 1:17 Ak wang a kil pikekg kul rpma anong wail Rom ti pa, kil pikekg nikgwalpm arkekgen pilpilen akoropm kai pa kai pa kaingkai, kil kul ariwopm om.
2TI 1:18 Kupm asen Wailen pa eng mpa kil reinsel a plan ipma arein wor ngklinsel ik wang wail a ikga ntokg yangkipm itni Wailen pa. Ti kitn pa pikekg ariwe worwor pake a kil angklinsopm wail or ya yawen ak wang a kupm rpma kai Epesus pa.
2TI 2:1 Timoti warim yek alkupm, Krais Sisas pa kil plan ipma wor angklinseitn kolpa ti kitn elng kil pa itni ik titnongketel kitn ti.
2TI 2:2 Yangkipm kweikwei wrongkwail a kitn atning a pikekg kupm laron a kaling plan pa, wa tu kin a kipman wailet atning ari la pa am yangkipm ute aklale am pake. Ti kitn mpam wa itning kitila wa niki lupmen tu melnum a kitn ariwe worwor la tu antiwe ikga iken yipmingki ikglen riworwor pa, wa tu antiwe ikga wa kiling plan tu tiur ai wa iye kolpa kai.
2TI 2:3 Kitn itni melnum wor a almpwrong a Krais Sisas rki kalkuten ik ik kwap kolen men ti.
2TI 2:4 Melnum wor a almpwrong pa kil ake mpa nikgwalpm rken kweikwei wrongkwail a mentepm ak arpme pa. Kil mpa won itni ilmpwrong ai kolti kai, eng mpa melnum itna ep a alekgen tu kai almpwrong pa, kiporng yangkipm la kil pa melnum wor a almpwrong.
2TI 2:5 Wa melnum a la nti tu ikoporen tita eng la uwi kweikwei pa am wa kolpake, kil mpa kutnun riworwor ya alkil a ak kiporen tita pa a tu yapon la tu mpa kutnun kolpake. Kol ake kil kutnun ya alkil a ak kiporen tita pa riworwor pa, pa kil ake mpa uwi kweikwei ur a tu ak kiporen tita pa, kalpis.
2TI 2:6 Wa melnum a akwap tumplowis itna wring pa, kil pa mpa uwi okipma a tu angket tuwai ampreing pa ep pake, a tu a akwap lpmaaken pa, tu mpa uwi kutnukg.
2TI 2:7 Kitn ikwonilmpen ik nikgwalpm pa irongke yangkipm kla a wet kupm la pa! Eng ntei, kitn ik kolpa pa, Wailen mpa kil ntokg nikgwalpm akitnen pa umpen, eng mpa kitn uwi riwe yangkipm yiprokgen wrongkwail a kupm la pa.
2TI 2:8 Kitn mpa ikwonilmpen Sisas Krais a pikekg amo atom wa wrekg rpma pa, a wa kil pa kulung wris a melnum tukgunakg Tepit pa, pa kol a kupm laron yangkipm wor pa lanakepm nakepm pa.
2TI 2:9 Kupm am arki kalkuten wailet auraur atnen a kupm angkli angkli yangkipm wor a la Krais pake. La mpa kai elngen kolpa ari kalpis, wa tu wa arpmentopm kurngkurng la kupm ti la kupm ti melnum trangkowet paipm ur atom tu yapo nepmwampel kupm ti awiyopm aye kai rpma wan tipmining ti. Pake yangkipm a Maur Wailen pa tu ake antiwe mpa yipo pa, kalpis.
2TI 2:10 Aklale, yangkipm a Maur Wailen pa tu ake antiwe mpa yipo, kolpa atom ari kupm ake wa elngnar rpma pa. Kupm itna titnongket arki kaikuten wrongkwail pa, eng mpa kupm wa ik ngklin tu wrong kin kipman a pikekg Maur Wailen takweiyen pa, eng mpa tu ukipma Krais Sisas pa atom kil wa ikuwiyen eng alkilen. A wa kupm wasrongen la tu ikga kaino ntiwel rpmi anong klalen wor pa rpmi yongkyong.
2TI 2:11 Yangkipm kil pa yangkipm aklale wrisen: - “Kol mentepm nti Krais imo pa, mentepm mpa wa wrekg ntiwel rpmi pa. -
2TI 2:12 Kol mentepm ntiwel itni titnongket rki kaikuten wrongkwail pa kolpa iye kai pa, pa mentepm ikga wa ntiwel itni wailen ikglen kweikwei wrongkwail. - Pake kol mentepm lam nang akilen pa, kil ikga wa lam nang a mentepmen ti yat. -
2TI 2:13 Kol mentepm yipon yangkipm la mentepm akilen, ari wa mentepm kipor yangkipm a mentepm yapon pa, pake kil pa ake antiwe a kipor yangkipm alkilen a kil yapon pa, kalpis. Kil pa ake melnum a kansil pa atom mpa kil kipor yangkipm a kil yapon pa.”
2TI 2:14 Kitn mpa ngkit wonel tu wrong kin kipman pa eng mpa tu won rpme yangkipm kil. Kitn mpa naren Maur Wailen pa la ngkengken titnongket la tu elngen a ak yangkipm pa rapon alilakel tita la yiprokgen a yangkipm pa manman pa. Yangkipm a kolpa pa ake antiwe ak angklin melnum ur, kalpis. Pa ak antokg ipma a tu melnum a atning yangkipm pa kai paipm.
2TI 2:15 Kitn mpa plan kitn alkitn ti Maur Wailen pa ikwap riworwor, eng mpa Maur Wailen pa mpa kiporngkeitn yangkipm uwi wor laweitn, la kitn melnum akwapel wor a ake numpaipm eng kwap wor a kil ak pa. Wa kil mpa uwi wor laweitn la kitn melnum akwapel wor a kaling plan yangkipm aklale akilen pa ute wor kolti.
2TI 2:16 Kitn mpa itni watin tukwleikgen yangkipm ok tiur a tu tiur la a ake katnun nikgwalpm a Maur Wailen pa, wa yangkipm kansil tiur a tu lala pa yangkipm aklale pa. Eng ntei, tu la yangkipm ok kolpa kai pa, ikga ik rkolngken iye kolpa kaingkai kai tu utnuurng Maur Wailen pa.
2TI 2:17 Yangkipmok a oklala a kolpa pa, ikga kai yela tu wrongkwail itning, kol i watet ur a angket al numpwam a melnum kaingkai kai paipm pa. Yangkipmok a oklala a kolpa pa, am Imeneus ekg Piletus melnum wekg pa oklala pake.
2TI 2:18 Tuwekg la kolpa la, tu melnum a pikekg amo kaingkai pa, am pikekg wa wrekg wrekg ise. Ti yangkipm a tuwekg la kolpa pa, pa tuwekg atnuurng yangkipm ute aklale a mentepm ukipma pa kai ar ise, atom pa tuwekg wa ak arkolng tu wrong kin a kipman wailet a ukipma pa wa angko kai paipm. Pa kol tuwekg tikale wan pa elngnar prapm paipm ise.
2TI 2:19 Pake ong kalnten titnongket a pikekg Maur Wailen kil uwen pa tongtong itna, antiwe ngkat wan pa itna titnongket. Wa kil nira yangkipm ur ela ong pa ak amprin eng alkilen pa la kolkil la, “Wailen pa kil ariwe worwor tu wrong kin a kipman alkilen pa ise.” Wa yangkipm ur pa wa kil nira kolpa la, “Mla ur a laron kil alkil pa la kil a Wailen pa, kil mpa uk yirokg nikgwalpm wrongkwail a ake katnun nikgwalpm a Maur Wailen kil wasrongen pa.”
2TI 2:20 Rpma wan wail pa ake kuntuk mangkei wail wail akalkilel kolti rpma wan pa, kuntuk wakgen ikgur ikgur pa wa rpma nampokgen. Kuntuk tiur pa anongen a pikekg ak ak kanokg mang ti, pa kol kuntuk wil, kuntuk kark, kuntuk kok, kuntuk mangkei, a kuntuk tiur pa mringen. Kuntuk wakgen pa tu elng itna eng ak antokg okipma al akangklei wang, wa kol kuntuk mangkei wail wail pa tu elng itna eng ak antokg okipma wail wail al ak wang tiur.
2TI 2:21 Kol melnum ur kil ungkwan nikgwalpm raimpe a ake katnun yangkipm ute aklale a Maur Wailen pa, pa kol kil atnurng wrpmungkaung a yapowel pa kai takwlelkgentel atom kil wirng no itna rukis kukula wor pa, kil pa palng kol kuntuk mangkei wor a akantokg antokg okipma wail wail. Atom yan a wan pa elng kuntuk pa rpma ak namput kwap wail wail pa kolti atom pa ikga ngklinsel. Kuntuk pa itna numprampen eng yan a wan pa ikga uwi eng ik ik kwap wailet wor wor aur aur.
2TI 2:22 Ti Timoti, kitn mpa ngkom nilokgen nikgwalpm wasrongen a kipm warimpen a la ngkli rkul tu kin a nikgwalpm a uren la ntokg kweikwei pa. A kitn mpa nikgwalpm rkekgen eng kutnun nikgwalpm kolkil: - rpmi ute wor kolti, - ukipma kutnun Krais itni titnongket, - plan ipma wor wasrongen mla ur, - wa nikgwalpm pa rki kupuk meen wor. Kitn itn nti tu wrong kin a kipman a nol nikgwalpm atuwen kukula rukis wor pa wa tu a kipm kapor kilko alein alein Maur Wailen pa, kipm kimeket mpa nikgwalpm rkekgen kutnun nikgwalpm kolpake.
2TI 2:23 Kitn itni watin tukuleikgen tu melnum a rka alilakel tita yangkipm ok a titnowen a tu ake ariwe kuina ur a tu la pa. Kitn ariwe pa, yangkipmok a kolpa pa ak arkolng kamel aye kai eng akle or tita.
2TI 2:24 Melnum a akwap orngwatneikgen Wailen pa - kil ake mpa ikle melnum ur aki or melnum ur pa. - Kil mpa plan nikgwalpm wor tu wrongkwail, - wa kil mpa kiling plan tu wrong kin kipman pa riworwor, - melnum ur kil ntokgtel paipm ur kolai pa, kil mpa rkul ipma itni titnongket, -
2TI 2:25 kil mpa lok tu melnum a talpulng yangkipm ute aklale pa nimpokgen ipma meen wor. Atom Maur Wailen mpa wa ngklinsen ikwap kawor ipma atuwen pa, atom tu ikga wa plelng ipma pa, a wa uwi riwe yangkipm aklale akilen pa.
2TI 2:26 Tu pikekg Satan alekg ampei pa la tu ngkowe ntokg kuina ur kutnun nikgwalpm akilen ti. Pake kol tu uwi riwe yangkipm aklale a Maur Wailen pa, nol nikgwalpm atuwen pa ikga wa umpen wontrakole, atom ikga ngketen ampei a Satan a yapowen pa atom tu ikga wirng no itni kukula wor.
2TI 3:1 Timoti, kitn mpa wonrpme yangkipm kil: ik wang umpuwen pa kaikuten wail wail paipm ikga palngto.
2TI 3:2 Ik wang pa ikga wonet paipm, tu wrong kin kipman ikga lupm nikgwalpm paipm aur aur kolkil: - tu ikga wasrongen tu alntu ti kolti, - nikgwalpm wail a tu pa ikga rkekgen la uwi marpm wailet, - tu ikga wam rka nol ngkit nang a tu alntu ti, a rku nang a tu mla ur ai, - wa tu ikga la paipmel a ik nokgel Maur Wailen, - wa tu ikga nungkulkget a tulpulng yangkipm ok a mansan, - wa tu ikgake uk wor tu mlaur a angklinsen kuina ur pa, - wa tu ikgake ngkirken Maur Wailen pa atom rpmi orngwatneikgen kil pa. -
2TI 3:3 Tu ikgake uk ipma wor wasrongen mlaur, - tu ikga lupmen nikgwalpm paipm a tu ak nampokgen mla ur pa rpmi kolpa rpmi pake, - tu ikga ik uwepel mlaur, - wa tu ikgake ntiwe ngkeng lok ipaar nikgwalpm wasrongen atuwen a wrekg titnongket tilpen la ntokg kuina ur pa, kalpis. - Wa tu ikga ok la wam wampor, - wa tu ikga uwi wrong manto lan nikgwalpm wor wor wrongkwail. -
2TI 3:4 Tu ikga ningkail tu melnum pa kai ngko ampei a tu angkli pa, - tu ikga wrekg uren itatu kutnun nikgwalpm alntuwen ti kolti. - Tu ikga ngkit nangkel tu alntu ti la tu ti melnum wailen nang arke. - Nikgwalpm wail atuwen pa ikgake rken Maur Wailen pa, kalpis, nikgwalpm wail atuwen pa ikga rken eng ntokg kuina ur la ik itopen tu alntu ti kolti. -
2TI 3:5 Tu ikga kinsil kipor kilko ilein Maur Wailen ti plan ik numpalk enen ti kolti wa tu ikgake riwe ketn ketn ur titnongket a Maur Wailen a kol a ikwap kawor ipma wunen atuwen pa, kalpis. Ti kitn mpa itni watin tukwuleikgen tu melnum a kolpa.
2TI 3:6 Tu melnum tiur kolpa a laron yangkipm manet pa tu ikga ik palk ipaar kai kawor wan a tu kin a antokg paipmpaipm. Tu kin yek yek pa ake antiwe titnongket a arku angkeng nikgwalpm wasrongen wrongkwail alntuwen a alok al tukgunakg kai pa kai pa atom tu rpma nampokgen ipma kalkuten. Atom tu ikga ik palk ipaar kai kawor wan a tu kin pa, tu kol ampei a aut rpma mengkel tu kin pa rkolngken iye kai la kutnun nikgwalpm atuwen.
2TI 3:7 Tu kin pa la uwi riwe kweikwei a mla ur kiling planten, pake nol nikgwalpm atuwen ti ake wa umpen wor antiwe mpa tu uwi riwe yangkipm aklale a Maur Wailen pa.
2TI 3:8 Tu melnum a ikga ik palk upaar tu pa, ikga ikwap kolen Sanes ekg Sampres a pikekg ekg ak pa. Tuwekg pikekg awi wrong manto lan Moses. Ti tu ti ikgam wa ik kolpake, tu ikga uwi wrong manto lan yangkipm aklale a Maur Wailen ti. Nol nikgwalpm atuwen pa ikga kai titnowen paipm kolti, atom tu ikga kai ar utnurng ya a ukipma katnun Sisas pa.
2TI 3:9 Pake nikgwalpm a tu ikga ik kolpa, pa ikgake wa tu ntokg kolpa itni kai watin pa, ikga tu ntokg itni kai waiketn kolti, atom nikgwalpm titno a tu pa ikgam palng kai ngko wunong wrongkwail ri pake. Am kolen nikgwalpm titno a pikekg Sanes ekg Sampres ak pa pikekg palng angko wunong.
2TI 3:10 Pake kitn ti pa, kitn ikgake kol tu melnum a alok tu wrong kin kipman aye kai ar pa, kalpis. Kitn pa pikekg antiwopm atn a rpma, a atning a ari, a awi ariwe atn a rpma akupmen pa worwor, - wa kitn ariwe yangkipm na na a pikekg kupm kaling plan tu wrong kin kipman pa. - Wa kitn ariwe nikgwalpm yiprokgen wrongkwail a kupm akwonalmpen pa. - Wa kitn ariwe a kupm ukipma Krais pa. - Wa kitn ariwe a kupm arkul ipma itna titnongket arki kaikuten wrongkwail pa. - Wa kitn ariwe nikgwalpm wail akupmen a plan ipma wor wasrongen tu mla ur ai pa. - Wa kitn ariwe kwap a kupm ak angkai ai kulngkul pa kupm ake elngen pa kalpis.
2TI 3:11 Kitn ariwe kalkuten wail wail a pikekg tu or ungkwantopm alkopm wleket itna anong wail Antiok, Aikoniam a Listra pa. Woi, pa pikekg kalkuten wail wail a wleket wakget paipm pikekg kupm arki itna anong pa! Pake pikekg Wailen kil alkil pa angklinsopm kaikuten wrongkwail pa, kolpa atom kupm rpma wor.
2TI 3:12 Am aklale pake, pa ake pikekg tu antokg paipmel kupm wris ti kolti pa, kipm mla ur a la kai kirpon Krais Sisas pa atom kutnun nikgwalpm a Maur Wailen pa, kipm ikgam wa rki kaikuten a wleket kolpa yat pake, tu ikgam or ungkwantepm lkepm wleket kolpa yat pake.
2TI 3:13 Pake tu melnum paipm, a tu melnum a ningkail tu melnum pa kai ngko ampei a tu angkli pa, tu ikga wa lmpil lok tu wrong kin kipman pa iye kai ar utnuurng yangkipm aklale pa. Wa tu pa wa lmpil lok tu tiur ai wa iye kai ar kolpa iye kai paipm wrisen.
2TI 3:14 Pake Timoti kitn pa, kitn mpa rkul yangkipm nikgwalpm ariwe wrongkwail a pikekg kitn awi wa kitn ariwe la pa ute aklale ampake. Eng ntei, pa kitn ariwe men a pikekg kaling planteitn pa la men ti melnum a kaling plan kuina ur a ute aklale kolti.
2TI 3:15 Wa ngkaten ak a kitn a warim wasek ai kul pa, kitn am awi ariwe yangkipm wrkapm a laron nako Maur Wailen pa ak ai kul ise. Kolpati kitn mpam rkul yangkipm pa titnongket itni kolpa itni pake! Yangkipm a ela wrkapm pa antiwe titnongket a alkeitn ariwe eng kitn ukipma Krais Sisas eng mpa Maur Wailen uwiyeitn iye kul eng alkilen.
2TI 3:16 Maur Wor a Maur Wailen alkil pikekg ikan yangkipm pa atom tu melnum nira ela wrkapm pa, pa yangkipm wrkapm wor a ak angklinso kolkil: - pa ak kaling planto yangkipm aklale, - wa ak akle la karkurng mentepm a antokg paipm, - wa ak alok nikgwalpm a raimpe pa kul kai ute wor, - wa ak kaling planto la mentepm mpa itn a rpmi kutnun nikgwalpm a Maur Wailen wasrongen pa.
2TI 3:17 Am yangkipm pa ak angklinso eng mpa mentepm wrong kin kipman a Maur Wailen pa uwi nikgwalpm ariwe wrongkwail wor wor atom pa ik numprampen mentepm ti antiwe ikwap wrongkwail wor wor.
2TI 4:1 Krais Sisas kil ikga nar ngko wunong, atom kil ikga itni melnum tukgunakg ikglen kweikwei wrongkwail pa itni yongkyong, atom kil ikga ntokg yangkipm nimpokgen tu melnum a rka ti wa tu a amo kaingkai ai. Ti kupm naren Maur Wailen a Krais Sisas pa la tilpeitn kolpa la, -
2TI 4:2 kitn mpa ngkli yangkipm wor a la Krais pa niki tu wrong kin a kipman pa. - Kol tu wasrongen la itning yangkipm aki tu kirken pa, kitn ake mpa elngen pa, kitn mpa ngkli yangkipm pa kolpa kai pake. - Kitn mpa ikle la kurkurng tu melnum a antokg paipm, - kitn mpa wa la loken, - wa kitn mpa wa lken nikgwalpm weten wor wor. Kweikwei wrongkwail pa, pa kitn mpa rkul ipma kiling planten ik ipma meen wor kolti.
2TI 4:3 Ti kitn itning, ikga ik wang kutnukg pa, tu wrong kin kipman ikgake la itning yangkipm ute aklele a tu kaling planten pa, kalpis, tu ikga kirken wrisen. Tu ikga elng nungkulkg rmpen itning kuina ur a tu wasrongen la itning ti kolti. Atom tu ikga ukwen tu melnum tiur ai wli kiling planten yangkipm a tu alntu ti wasrongen la tu a itning pa.
2TI 4:4 Atom tu ikga uk yirokg yangkipm aklale pa, a tu ikga wa elng nungkulkg rmpen eng itning yangkipm kansil a pikekg tu rka akorla atom kaling planten pa.
2TI 4:5 Pake kitn ti pa, kitn mpa rpmi wontrakole lokipaar ikglen kitn alkitn ti eng kweikwei wrongkwail, wa itni titnongket rki kaikuten a wleket a palngteitn pa. Wa kitn mpa ikwap a ngkli yangkipm wor a la Krais pa niki tu wrong kin kipman. Kitn mpa ikwap a Maur Wailen pikekg alkeitn pa riworwor kolpa kai plalng.
2TI 4:6 Kupm ikgake rpmi eng lkeitn nikgwalpm ngklinseitn iye or pa kai. Walmpopm akupmen am ungkwan eng al wor uk Maur Wailen tike. Ti wang akupmen am kul wreren eng kupm a imo utnuurngkeitn tike.
2TI 4:7 Kupm ukipma Wailen Krais Sisas, a akwap a pikekg kil alkopm pa katila nikgwalpm a kil pa ariworwor kolpa kulngkul, kul elngen tike. Pa kolen kupm pikekg pirng titnongket wulmpa itna ya anti tu akoporen tita kolpa kulngkul, kul angko wrik a kul elngen ti ise.
2TI 4:8 Kweikwei wor wor a melnum pirng ep kai ngko wrik a tu pirng kai elngen pa la uwi pa, pa am nimprampen elngtopm itna ise. Wailen, melnum a katila nikgwalpm ute alkil rpma atning atning yangkipm a mentepm wrong kin kipman pa, kil ikga lkopm kweikwei wor wor pa ik wang wail a ikga mentepm ntokg yangkipm itni kil pa. Kweikwei wor wor pa pati kolkil: Wailen ikga ukwewopm la kupm melnum ute wor. Kil ikgake wa uk kweikwei wor wor kupm wris ti pa, kalpis. Kil ikga wa uk tu melnum a plan ipma wor wasrongen paipm la ikga riwel atom rpma nungkwangentel la kil nar palng ngko wunong pa.
2TI 4:9 Timoti, kitn ikor ya ur pa wa itatu pinterngen wa kul riwopm!
2TI 4:10 Eng ntei, nol nikgwalpm a Temas pa arken kweikwei wrongkwail a itna kanokg ti atom kil am atnurngkopm kai anong Tesalonaika ise. Wa Kresens pa am wa kai anong kanokg Kalesia, a Taitus pa am wa kai anong kanokg Talmatia ise.
2TI 4:11 Luk alkil wris ti kolti antiwopm rpma kul kilke. Ti kitn la kul pa, kitn kul ikyakur Mak pa kipmekg kulntopm o! Eng ntei, kil pa melnum wor a ikga ngklinsopm ikwap pake.
2TI 4:12 A Tikikus kil pa kupm ikga ukwawel kai Epesus kilke.
2TI 4:13 Kitn la kul pa, kitn kaino uwi apm a nowe eng wropuk a pikekg kupm ermpa kaino wan a Karpus kaino Troas pa atom iye nar. Wa uwi wlikgok palk a oklala elewe pa wa wrkapm akupmen pa wa iye nimpokgen nar, ampur kitn woniketen wlikgok palk a aye nar pa.
2TI 4:14 Aleksanter pa, melnum a antokg kweikwei ak wes watet pa, kil pikekg alkopm kalkuten watipmen. Pake ikga Wailen kil ikilmpe nikgwalpm a kwap wrongkwail a kil ak pa kul.
2TI 4:15 Melnum pa pikekg awi wrongmanto lan yangkipm a mentepm angkli pa, kolpa ti kitn ti mpa wa itn ukikg riwe melnum pa.
2TI 4:16 Pikekg ak wang lmpiwen a kupm itna antokg yangkipm a tu arkiwopm pa, ake pikekg melnum ur itnantopm yirokg angklinsopm antokg yangkipm pa, kalpis. Tu wrongkwail pikekg atnuurngkopm plalng. Pake kupm oklala naki Maur Wailen eng ake mpa kil ik ker uwiye paipm a tu pikekg atnuurngkopm pa atom ikga kil ikilmpe pa.
2TI 4:17 Tu pikekg atnuurngkopm, pake Maur Wailen kil alkil pa pikekg atnentopm wrer atom alkopm titnongket, eng la kupm ikwap a laron yangkipm wor akilen a la Krais pa niki tu wrong kin kipman wrongkwail a ake a Suta a rka ti itning. Kolpa atom Maur Wailen kil alkil pa pikekg awiyopm aye kai takwleikgen ok a nimpa tilpmingen wrongen a la nampopm imo pa. Atom am kupm akwap kulngkul, kul elngen angko tike.
2TI 4:18 Am wa kolpake, ti Wailen kil alkil pa ikga wa uwiyopm iye kai tukuleikgen nikgwalpm paipm na ur a tu la la wa ntokg paipm kupm ti. Wa kil alkil ikga uwiyopm iye kaino kitnong rpmi anong wor a kil alkil itna tukgunakg ikgalen kweikwei wrongkwail pa. Ti mentepm ngkit nang klalen wakget akilen pa ikngklei wang itni lantlan iye or pa kai! Aklale.
2TI 4:19 Ti Timoti, kitn laniki Prisila ekg kipman alkil Akwila pa, a kitn wa laniki Onesiporus nimpokgen kinwatnom alkil a tu a antiwen rka wan wris a pa la kupm nikgwalpm arkenten rka pa.
2TI 4:20 Erastus pa kil rpma kai Korin pa apa. Pake Tropimus pa numpet kolpa atom kupm atnurngkel rpma kai Miletus ise.
2TI 4:21 Ti kitn ikor ya ur pa pinterng itatu kul o! Kitn rpmi mpenet pa, wang kupuk a wripm mring mring wail ikga el ik ngketenteitn atom kitn ikgake kul. Yupulus, Putens, Linus, Klotia nampokgen tu melnum a mentepm ukipma Krais pa kimeket a rpma kul kil pa tu la kupm nira nikeitn la nikgwalpm a tu pa arkenteitn rka pa.
2TI 4:22 Kupm asen Wailen pa la kil ntiweitn rpmi, wa plan ipma wor alkil pa ngklin kipm kimeket. Yangkipm akupmen am kai itna ketn kolpake.
TIT 1:1 Yek alkupm, alkeitn wor Taitus! Wrkapm kil pa kupm Pol niranteitn. Kupm melnum a pikekg Maur Wailen kil takweiyopm, atom ukwawopm la kupm melnum akwapel akilen. Wa kupm awi ok a Sisas Krais ak laron yangkipm akilen. Ti Maur Wailen ukwawopm la kupm kai ngklin tu wrong kin a kipman a kil takweiyen, eng mpa tu ukipma kil pa yek kimeket, wa uwi riwe eng yangkipm aklale akilen pa riworwor. Am yangkipm pa ak angklinsen la Maur Wailen la tu rki kutnun nikgwalpm akilen.
TIT 1:2 Tu ukipma, a awi ariwe kolpa, kolpa ti tu rpmi nungkwangen wang wor a ikga tu ntiwel rpmi yongkyong. Eng ntei, tu ariwe la pikekg ep a ake Maur Wailen antokg kitnong a kanokg pa, kil yapon yangkipm aklale wrisen la tu wrong kin kipman ikga ntiwel rpmi wor yongkyong, pa kil ake kansil.
TIT 1:3 Atom ak wang a Maur Wailen alkil pa la, pa melnum a akwap alkil pa laron yangkipm yiprokgen alkil pa palng kai angko wunong. Ti kupm ti pikekg Maur Wailen kil alkil takweiyopm, kil a pikekg amo akarmpento pa, kil lanakopm la kupm laron yangkipm a kil pa niki tu wrong kin kipman pa.
TIT 1:4 Kupm nira wrkapm kil kai eng kitn Taitus. Kupm pikekg angklinseitn, atom kitn ukipma Krais Sisas, atom kitn palng kolen warim kipman akupmen, a mentekg yatenen ukipma Krais Sisas. Kupm oklala naki Maur Wailen, Yan amentepmen, ekg Krais Sisas a pikekg akarmpento pa, eng mpa tuwekg planteitn ipma wor alkil a ngklinseitn, eng kitn rpmi ipma kukula meen wor kolti.
TIT 1:5 Kwap umpu am kupm Pol atnurng akukeweitn itna Krit a pake. Mpa kitn rpmi atom ikwap pa kai plalng. Wa kitn ngkit tu melnum a wor pa tu itni tukgunakg eng ikwap a Maur Wailen a yela anong wris wris pa, kol a pikekg kupm lanakeitn pa.
TIT 1:6 Melnum tukgunakg a akwap a Maur Wailen pa, mpa kipm ngkit melnum wor ur a ake melnum ur ari lala, kil pa antokg paipmpaipm ur pa: - Melnum a kolpa pa, kil mpa iye kin wris kolti. - Tu warim alkil pa mpa ukipma Sisas Krais. Ake mpa tu tulpulng yangkipm pa. Ake mpa tu ntokg melkget eng uwi nang paipm pa.
TIT 1:7 Melnum a itna ep pa, kil pa pati ikga ikglen tu wrong kin a kipman a ukipma Maur Wailen. Kolpa ti: - mpa kil melnum a ake melnum ur ari lala kil pa antokg paipmpaipm ur pa. - Kil ake mpa plan kil alkil pa la kil melnum wailen, - kil ake mpa ipma wakget itatu pa, - kil ake mpa il u titno pa, atom kil titno pa, - kil ake mpa melnum a okla wam wampor pa, - kil ake mpa ikwentil rmpi wail eng kweikwei wrongkwail.
TIT 1:8 Ake mpa kil ntokg kolpa, mpa kil ntokg kol kilke: - mpa kil mitaket wor eng kiporlei wokgmprak, - mpa kil wasrongen kuina ur a wor, - nikgwalpm a kil pa mpa rki wor eng ntokg kuina ur a wor, - mpa kil melnum ute wor, - mpa kil melnum wor itna wulmpa a Maur Wailen, - mpa kil lokipaar kil alkil. -
TIT 1:9 Mpa kil rkul yangkipm aklale a Maur Wailen a pikekg kil atning awi pa, itni titnongket, eng mpa kil ik yangkipm aklale alkil pa ik titnongketel tu, wa ik plan tu a talpulng ok a Maur Wailen pa la tu pa kai ar ise.
TIT 1:10 Ikgam kitn ngkit melnum wor kol a wet kupm la pa, atnen tu melnum watipmen a Krit pa tu talpulng yangkipm aklale a Maur Wailen, laron yangkipm kalpmlel, eng ak arkolng tu melnum kul katnun yangkipm kansil alntuwen kolti. Pa pati am tu pake, tu melnum a tirpmingen tu a ukipma Krais Sisas pa la, tu la ukipma Krais Sisas pa, tu mpa ngket num kutnun ya a men Suta.
TIT 1:11 Ti ngkengken eng tu elngen yangkipm a tu laron kolpa. Eng ntei, tu kaling planten yangkipm a kol ake mpa tu kling planten pa. Kolpa atom tu alok tu om ompen aye kai ar la, tu la ukipma Sisas pa, tu mpa ngket num kutnun ya a men Suta. Tu kansilen la tu a uwi marpm kalpmlel, ti pa ake tu numpwor eng tu akwap kolpa.
TIT 1:12 Kolen pikekg melnum ok wail ur a tu Krit la tu alntu kolkil, “Men Krit pa men melnum a la yangkipm kansil kansil, men melnum paipm kolen melp a nam kamel pa. Men lpmaak klang alpmen la rki la il kolti.”
TIT 1:13 Ti yangkipm a melnum alntu pa la pa aklale, kolpa ti kitn ikle tu melnum a ukipma Sisas pa yikakitnen, eng mpa tu wontrakole a ukipma yangkipm aklale a Maur Wailen pa itni titnongket.
TIT 1:14 Laniken eng ake mpa tu rkul por tingklaket a men Suta ti, wa ampake tu kutnun ya a men Suta ti a tu melnum a uk yirokg yangkipm aklale a Maur Wailen pa la la kipm kutnun pa.
TIT 1:15 Kol ipma a melnum ur pa wriwen wor itna wulmpa a Maur Wailen pa, kweikwei wrongkwail a kil antokg pa, kil ake angklonake. Pake kol ipma a melnum ur pa kimpilpet itna wulmpa a Maur Wailen pa, wa ake kil ukipma Krais Sisas pa, kweikwei wrongkwail a kil antokg pa, kimpilpet. Aklale wrisen, kil akentiwe mpa ikwonilmpen kuina a i wor a kuina a i paipm pa, ti ake kil numpaipm eng kuina ur paipm a kil antokg pa. Nikgwalpm akilen a ok wusok a oklala rpma kawor ipma akilen pa kimpilpet paipm ise.
TIT 1:16 Kil ak ok aloken kil alkil pa la kil ukipma Maur Wailen, pake atn a rpma akilen pa pati, plan kol a kil ake ukipma kil pa. Kil pa nungkulkget paipm, Maur Wailen karkentel paipm. Nikgwalpm ur a kil pa, ake mpa palng wor pa, kalpis kolti.
TIT 2:1 Ti yangkipm a kitn Taitus laron pa, mpa kitn laron or yangkipm aklale a Maur Wailen.
TIT 2:2 Tu mel nangkwor pa kitn kiling planten kolkil: - tu mpa lok ipaar tu alntu pa rki riworwor, - tu mpa rki kol tu wail wail, eng mpa tu ri pa, tu orngwatneikgenten, - tu mpa rki wontrakole, - tu mpa itni titnongket ukipma yangkipm aklale a Maur Wailen, - tu mpa rkul nikgwalpm a plan ipma wor wasrongen tu wrongkwail iklale, - tu mpa wa itni titnongket eng rki kaikuten. Tu mel nangkwor pa, mpam kitn kiling planten kolpake.
TIT 2:3 Wa tu kin nangkwor pa, mpa kitn kiling planten kolpa yat pake: - mpa tu rpmi wor kolen kin wor a ukipma Maur Wailen, - ampake tu la yangkipm elyirokgel mlaur, - ampake tu il u titno pa, atom titno pa. - Ampake tu ntokg kolpa, mpa tu kiling plan kuina ur a wor kolti.
TIT 2:4 Atom mpa tu kin nangkwor pa tu irowonel tu kin warimpen - eng mpa tu ntokg nikgwalpm wor kai tu nanwatnom alntuwen, -
TIT 2:5 eng mpa tu rki rukis wor, - eng mpa tu lok ipaar tu alntu, - ampake tu ngkli rkul kipman ur ai. - Tu mpa ikwap timplowis wor kolti, eng ikglen nanwatnom alntu a orngwatneikgen kipman alntu. - Mpa tu kutnun yangkipm a tu kin nangkwor lanaken pa. Kalpis pa, tu mlaur ri kolpa, mpa tu ik nokgel yangkipm a Maur Wailen pa la, palpa ake aklale.
TIT 2:6 Tu kipman warimpen mpam wa kitn laniken kolpake, la mpa tu lok ipaar tu alntu.
TIT 2:7 Ti kai kweikwei wrongkwail pa, mpam kitn alkitn Taitus ti planten mrangkum wor, eng mpa tu ri kwap wor a kitn ak pa, atom mpa tu kutnun. Yangkipmok a kitn la ngkli pa, kitn ngkli iklale kolti, kolen warim nangkwor.
TIT 2:8 Kai oklala akitnen pa, mpa kitn oklala wontrakole kolti, eng ake mpa melnum ur rkiweitn la oklala akitnen pa kai ar pa. Kil elukgen oklala akitnen pa, ikga kil numpaipm, eng kil lawo kalpmlel kolti.
TIT 2:9 Tu melnum a akwap kalpmlel orngwatneikgen mring ur pa, mpa kitn kiling planten kolkil: - tu mpa orngwatneikgen mring alntuwen pa eng kweikwei wrongkwail, - tu mpa no worel tu mring alntuwen pa, - ake mpa tu ilmpokel yangkipmok kuina ur a tu la pa. -
TIT 2:10 Ake mpa tu ik ikgwam kweikwei a mring alntuwen pa wris a wris pa, - mpa tu ikwap wor ikgilen kweikwei a mring alntuwen pa kol kweikwei alntuwen, - Mpa tu ikwap wor eng mpa tu wrong kin kipman riwen kolpa, mpa tu ikwonilmpen la, yangkipm a Maur Wailen, melnum a pikekg akawiyo pa, pa wor wrisen.
TIT 2:11 Am pikekg ipma wor a Maur Wailen kil alkil planto a angklinso pake, atom ari kil ukwa Sisas Krais pa nar eng akarmpen paipmpaipm a mentepm wrong kin kipman wrongkwail.
TIT 2:12 Ipma arein alkil pa ak lanako la, mentepm elngen kweikwei paipm a mentepm antokg a ake ak noworel Maur Wailen pa. Mpa wa mentepm elngen ipma wasrongen kuinaur a mentepm antokg itna kanokg a ti. Mpa mentepm ilok ipaar mentepm almentepm ti rpmi ute wor, mpa tu wrong kin kipman uwi wor lawo. Rpmi kutnun nikgwalpm a Maur Wailen kolti, eng mpa Maur Wailen uwi wor lawo, kolpa ikngklei wang a rpmi kanokg ti.
TIT 2:13 Eng ntei, mentepm ariwe la Sisas Krais ikga nar nimpokgen klalen wail, ti mentepm ikga itopen paipm. Ti mentepm nungkwangen wang wail alkil pa rpmi. Kil pa Maur Wailen almentepmen a antiwe titnongket, melnum a pikekg amo akawiyo.
TIT 2:14 Kil uk num alkil ti akarmpen paipmpaipm wrongkwail amentepmen, ak angklinso, eng ake mpa mentepm ngko kai paipmpaipm, ak klak ipma wunen amentepmen pa palng wriwen wor. Kil takweiyo eng wrong kin kipman alkilen la mentepm ikwap nikgwalpm rkekgen, eng ntokg nikgwalpm wor wor kolti.
TIT 2:15 Am kitn uwi ok a kupm Pol kil ik kiling planten yangkipm kweikwei a kupm niranteitn kil. Kitn ik titnongketel tu eng tu kutnun yangkipm kil a Maur Wailen pikekg alkeitn la kitn laron titnongket naki tu. Wa kitn antiwe la yangkipm kil titnongket, eng iklok tu mlaur a ake katnun yangkipm kil. Mla ur la elukgenteitn pa, kitn ampur atning pa.
TIT 3:1 Kitn ngkit ngkit wonel tu wrong kin kipman eng mpa tu orngwatneikgen itning kutnun tu melnum tukgunakg nimpokgen tu mring man alntuwen pa. Nikgwalpm a tu pa mpa rki itopen wor eng ikwap wrongkwail a wor pa.
TIT 3:2 Ti kitn laniken la ampake tu la paipmel melnum ur, a ikle melnum ur. Tu lok ngkli tita tatar rki, tu rku tu alntu ti ntokg nikgwalpm a wor eng tu wrongkwail.
TIT 3:3 Pikekg mentepm a ukipma Maur Wailen ti yat, mentepm pikekg am ak kolpake. Mentepm pikekg titnowen, mentepm pikekg nungkulkget, kai ar or ya paipm. Pikekg ipma wasrongen a ipma wrekg aringkowe tu kin a kipman pa ak arkulo titnongket. Mentepm ti pikekg tu karkento paipm, wa mentepm karken tu pa yat. Mentepm ti pikekg ipma paipm eng tita. Nikgwalpm a mentepm ti pikekg rka eng antokg paipmpaipm kolti.
TIT 3:4 Ari Maur Wailen, melnum a akawiyo pa, kil planto ipma arein a ipma wasrongen a kil alkil pa, atom
TIT 3:5 kil akawiyo. Ake wa kil akawiyo eng kwap na wor ur a mentepm ti ak pa, kalpis. Ati am ipma arein a kil alkil ti, atom ari kil akawiyo pake. Atom Maur Wor alkil pa kaluko, atom mentepm palng warim alkilen, Maur Wor antokg mentepm palng weten.
TIT 3:6 Maur Wor pa Maur Wailen lanaki Sisas Krais, melnum a pikekg akawiyo pa, kil alung wailet kol u pa nar akwap titnongket kawor ipma a mentepmen ti.
TIT 3:7 Kolpa atom ipma wor alkil a kil plantepm a angklinsepm pa, kolpa atom ari kil antokg mentepm palng ute wor itna wulmpa akilen. Wa mentepm ikga uwi kweikwei wor wor a kil yapon yangkipm la ilko pa. Mentepm ariwe la, kil nimprampento anong wor a ikga mentepm rpmi wor yongkyong.
TIT 3:8 Ti yangkipm a wet kupm la pa aklale wrisen. Ti kupm wasrongen la kitn ngkit nikgwalpmel tu eng yangkipm wrongkwail pa, eng mpa tu a ukipma Maur Wailen pa wonitnen ikwap pa riworwor. Yangkipm pa wor, a yangkipm pa ak angklin mentepm wrongkwail.
TIT 3:9 Kol kitn itning la tu lilakel tita tu mamikg mamin mansan yoampei a men Suta aki, nikgwalpm kungkruwis iklen tita eng yangkipm titnongket pikekg tu mamikg mamin a men Suta yapon pa, tu aklen tita kolpa pa tu titno. Yangkipm pa ake wor eng ak angklin mlaur, kuina ur akentiwe mpa palng kai yangkipm pa. Ti kitn ngkom nilokgen yangkipm pa!
TIT 3:10 Kol melnum ur kil ngkli yangkipm a ake kai or yangkipm a Maur Wailen pa akaro kipm pa kai itna manman, kitn ngkengkel kolpa kai nti wekg ur ai! La ake kil atning pa, kitn ungkwantel!
TIT 3:11 Eng ntei, kitn ariwe pa, melnum a kolpa pa kil kai ar, ti paipmpaipm alkil pa arkulel titnongket paipm ise. Kol kil ariwe pa, ari kil am la ntokg kolpa iye kai pake.
TIT 3:12 Ti kupm lanakeitn la ik wang a kupm ukwa Artemas aki Tikikus, tuwekg ur kil kai uwi wrik a kitn pa, kitn pa wa ikor ya ur pa pinterngen wa kulntopm kai anong Nikopolis pa. Ik wang a uwei wripm mringmring el pa, kupm ikgam kai rpmi kai anong pake, rpmi i, wang a uwei pa kai plalng.
TIT 3:13 Wa kol melnum wekg ur kil, Sinas, mringman a itna yirokgel melnum eng antokg yangkipm, wa nampikgen Apolos, pa kitn ri itningkewen la tuwekg tukwok eng kuina pipa, kitn ngklinsen numprampen, eng ikga tuwekg iye kai.
TIT 3:14 Am kolpa yat pake, tu wrong kin kipman almentepmen a ukipma Maur Wailen pa, mpa tu uwi nikgwalpm wor ikwap wor eng ik ngklin tu mlaur a rpma tukwok pa, eng mpa tu rpmi wor. Kol ake tu angklinsen pa, tu mpa palng kolen yo a ake ok arke.
TIT 3:15 Yangkipm am kai itna kolpake. Ti tu wrong kin a kipman a antiwopm rka anong kil pa, tu la kupm nira nikeitn la tu nikgwalpm arkenteitn rka pa. Ti wa kitn laniki tu melnum a wasrongento a mentepm ukipma Krais pa la men nikgwalpm arkenten rka pa. Ampake, wrkapm a kupm Pol niranteitn am kai itna kolpake. Maur Wailen mpa plantepm ipma wor a ngklinsepm kolpa iye kai.
PHM 1:1 Oi, Pilimon yek alkupm! Kil kil kupm Pol kilke, kupm akwap a Krais Sisas, kolpa atom tu awiyopm ayekul rpma wan tipmining kilke, ti kupm nira wrkapm kil kai eng kitn pake. Kupm nampokgen Timoti, melnum almentepm a mentepm ukipma Krais, mentekg nikgwalpm arkenteitn rka, kitn melnum a mentekg plan ipma wor wasrongenteitn a minto akwap wris a Krais.
PHM 1:2 Wa mentekg uk wor Apia, muikgmayen wor amentepmen a mentepm ukipma Krais. Wa mentekg uk wor Arkipus, melnum a mentepm akwap wris arki kaikuten talpulng wrong, wa mentekg uk wor tu melnum a ukipma Sisas Krais a kaingkai takwem rka wris kai wan akitn eng atning yangkipm a Maur Wailen.
PHM 1:3 Mentekg oklala naki Maur Wailen, Yan amentepmen, nampokgen Wailen Sisas Krais, tuwekg mpa plan ipma wor ik ngklinsepm a ntokg ipmanikg akipmen pa rki kukula meen wor.
PHM 1:4 Kupm atning a kitn Pilimon, kitn melnum alkupm a mentepm ukipma Krais, kitn ukipma, a kitn uk kitn alkitn pa kai Wailen Sisas pa. Wa kupm atning kitn plan ipma wor wasrongen tu wrong kin kipman a Maur Wailen pa. Kitn angklinsen atom tu awi titnongket wor. Yangkipm a kupm atning a kitn akwap wor kolpa, pa ak titnongketel ipma akupmen ti yat, kolpa atom kupm atopen. Kolpa atom akangklei kupm uk wor Maur Wailen akwonalmpenteitn ak wang a kupm oklala naki Maur Wailen akupmen pa. Kupm oklala naki Maur Wailen la, kitn laron kuina ur a Maur Wailen angklinseitn pa, mpa Maur Wailen ngkine lkeitn ariwe, eng mpa kitn ri kweikwei wrongkwail wor wor a mentepm a ukipma Krais awi pa.
PHM 1:8 Kupm la lanikeitn la, kitn ntokg kweiur wris ur kil pa la, kitn rein Onesimus kil, kol kitn arein tu wrong kin kipman a Maur Wailen pa. Ak wang a kupm rpma wan tipmning kil pa, kupm lanakel yangkipm a Maur Wailen kaingkai, kil plelng ipma, atom kil palng kol warim akupmen. Kupm Pol, kupm am wror tike, kupm akwap a Krais Sisas, atom tu awiyopm aye or rpma wan tipmining kilke. Ti Krais takweiyopm atom kupm ake ngkark, kupm wrongen antiwe titnongket, mpa lanikeitn titnongket ya ute la kitn kitila. Pake nikgwalpm a arein pa arkulo yatenen, kolpa ti kupm lanakeitn meen, la kitn rkul nikgwalpm a plan ipma wor wasrongen Onesimus pawo!
PHM 1:11 Ep pa ake kil akwap wor ak angklinseitn pa, kalpis. Ak wang kil pa kil akwap wor ak angklin kupm ti, ti ikga wa ik ngklin kitn pa yat pa.
PHM 1:12 Mpa kupm ukwawel yaper kainteitn pake, pa wa kangku nol akupmen tuwa.
PHM 1:13 Kupm angkli yangkipm wor a la Krais Sisas, atom tu awiyopm aye or rpma wan tipmining ti. Kolpa atom kupm wasrongentel paipm la kil ntiwopm rpmi, eng mpa kil ngklin wrik akitnen ngklinsopm ik wang a kupm rpma wan tipmning kil.
PHM 1:14 Pake kol kitn ri kupm rkul Onesimus iye rpmi kil pa, mpa wa kitn ikwonilmpen la kupm angkweingen la, angklin alkitn pa rpmi eng ngklinsopm kalpmen. Kolpa kalpis, kol kitn alkitn pa uk wor pa pati, kol a kil rpmi eng ngklinsopm pake. Kolpa ti mpa kupm ukwa Onesimus kil yaper kainteitn pa pen.
PHM 1:15 Ti pikekg kil atnuurngkeitn kai a waiketn, kolpa eng ikga kitn uwiyel eng alkitnen wrisen. Ti mpa kolpa ur ai.
PHM 1:16 La ake mpa kitn uwiyel kol melnum a akwap kalpmlel orngwatneikgen kitn pa kolti, kalpis. La mpa kitn plan ipma wor wasrongentel uwiyel kol melnum wor yek alkitn a kipmekg ukipma Krais. Ti wa kol kupm ti, kupm wa plan ipma wor wasrongen kil pa yat. Ti kupm ari kitn pa mpa plan ipma wor wasrongentel or kai ai pa. Eng ntei, kil pa palng melnum wor alkitnen a kipmekg yatenen uk ipma Wailen Krais, a kil palng melnum wor a ikga ikenteitn kwap pa riworwor.
PHM 1:17 Kol kitn ikwonilmpen kupm ti la, kupm ti melnum alkitnen a mentekg akwap wris pa, Onesimus la wli pa, mpa kitn uwi wor la kil pa, kol a kitn awi wor la kupm ti.
PHM 1:18 Pikekg kil antokgteitn kuina ur paipm aki, ake kil akalmpenteitn kuina ur a kil awi kai kitn pa pipa, la eng mpa kupm ikilmpenteitn.
PHM 1:19 Kil kupm Pol, kupm nira yangkipm kil ak wam alkupmen aklale la, kuloken wasek pa ikga kupm ikilmpe kuloken alkitnen pa lkeitn pa. Pake kitn ikwonilmpen kuloken wail a pikekg kupm angklinseitn eng kitn palng kolen melnum a ukipma Krais pa, pa rpma num a kitn pa a pa.
PHM 1:20 Pilimon, kitn melnum wor alkupm a mentekg ukipma Krais, kol kitn la ikilmpe kuloken akupmen pa, kitn ntokg Onesimus pa kitila kol a kupm la pa atnen a mentekg yatenen a Wailen Krais, eng mpa ntokg ipmanikg akupmen pa palng wor itopen.
PHM 1:21 Kupm niranteitn wrkapm kil, eng ntei, kupm ariwe pa, kitn melnum a atning nungkulkg yangkipmok, kitn mpa ntokg klangkil kitila kuina ur a kupm nira kil.
PHM 1:22 Kupm yangkipm wris ur wa itna pa: pa kupm akwonalmpen la, wreren eng a Maur Wailen ikilmpe asen alkipmen, eng tu elngen kupm or wan tipmining ti kawor en eng yaper kai eng kipm pa. Kolpa ti kitn numprampen wan ur pa elngtitni eng kupm pa.
PHM 1:23 Epapras, kil melnum a mentepm akwap wris a Krais Sisas, mentekg rpma wan tipmining kil, kil la kupm nira nikeitn la kil nikgwalpm arkenteitn rka pa.
PHM 1:24 Wa tunteng melnum a men akwap wris, Mak, Aristarkus, Temas, Luk, wa tunteng la kupm nira nikeitn la nikgwalpm a tunteng pa arkenteitn rka pa. Ampake, yangkipm a kupm Pol am kai itna kol pake.
PHM 1:25 Kupm oklala naki Wailen Sisas Krais la kil plan ipma wor alkil ik ngklinsepm kolpa iye kai.
HEB 1:1 Pikekg ep lmpiwen ai pa ok yaprekg a Yan pa palng la wli ok a Warim Kipman pa atom kitnong a kanokg a kweikwei wrongkwail ti palng. Pikekg kil ari Warim Kipman alkil pa atom kil rkampalekg kweikwei wrongkwail ak namput kil pa la kil ikga uwi num ngklin. Pikekg ep ak ai pa, Maur Wailen kil la yangkipm naki naki tu yoampei a walyipmiri wapyipmiri amentepmen ak ai kulngkul kul ti, or ya watipmen wli ok a tu melnum ok wripm watipmen.
HEB 1:2 Pake pikekg ngkaten angko wang a Warim Kipman alkil pa palng melnum, a pa kul pa kil la yangkipm pa naki naki Warim Kipman pa atom kil pa almpuk nako nako.
HEB 1:3 Warim Kipman alkil pa wakg a Yan pa kai itna kil atom klalen pa alen yela. Kil irir kolen Yan alkil. Kil arpmen ok yaprekg titnongket kalnten a Yan alkil pa atom kil ikgalen kweikwei wrongkwail a itna kaino kitnong ai, a wa itna kanokg ti kolpa itna. Kil kaluk klak ungkwan paipmpaipm a mentepm wrong kin kipman pa palng rukis wor itna wulmpa a Maur Wailen. Kil akwap pa plalng pipa, kil kaino kitnong awi nang wailen rpma nampokgen Maur Wailen a antiwe titnongket wail a itna wailen ikgalen kweikwei wrongkwail.
HEB 1:4 Warim Kipman pa palng wailen itna ep klangkil tu maur akwapel a Maur Wailen pa. Am wa kolpake, nang a kil akwewel la Warim Kipman pa wail klangkil nang a tu maur akwapel pa.
HEB 1:5 Maur Wailen ake lanaki maur akwapel ur alkil pa la, “Kitn pa warim kipman akupmen. Ak wang ti pa, kupm ti palng kol yan a angketeitn”, kolpa kalpis. Wa kil ake wa la maur akwapel ur alkil pa la, “Kupm ikga Yan akitnen, a kitn pa ikga warim kipman akupmen”, kil ake namput maur akwapel ur kolpa, kalpis.
HEB 1:6 Wa ak wang a Maur Wailen la ukwa Warim Kipman payen wris ata alkil pa nar kanokg ti pa, kil la atom tu nira ela wrkapm pa la, “Tu maur akwapel akupmen pa mpa tu kipor kilko ilein Warim Kipman payen wris ata akupmen pa!”
HEB 1:7 Maur Wailen pikekg la tu maur akwapel akilen pa kolkil la, “Mpa kil ntokg tu maur akwapel akilen a akwap orngwatneikgen kil pa kol wripm, a wa kil ntokg tu pa palng kol wakgyuk a naruk pa.”
HEB 1:8 Pake kil la Warim Kipman alkil pa la kil pa Maur Wailen kol kil alkil, kol pikekg kil lanaki Warim Kipman alkil pa la, “Maur Wailen, kitn pa melnum wailen a antiwe titnongket a itna tukgnakg ikgalen kweikwei wrongkwail, kitn pikekg rpma akangklei wang or pa kai pake. Kitn ikgalen tu wrong kin kipman katila nikgwalpm ute wor a kitn alkitn ti kolti.
HEB 1:9 Kitn pa pikekg wasrongen nikgwalpm ute wor, a kitn pikekg karken nikgwalpm raimpe paipm pa; am atnen yiprokgen a kitn ak kolpa atom ari, kupm Maur Wailen alkitnen, kupm takweiyeitn a alkeitn nang wailen kolpa atom kitn atopen wail manten angen a tu melnum akitnen atopen pa.”
HEB 1:10 Wa Maur Wailen pikekg wa lanaki Warim Kipman alkil pa la, “Wailen, pikekg ak ep lmpiwen ai pa, kitn alkitn pikekg antokg kitnong pa ak wam alkitnen pake, wa kitn alkitn pikekg ak wam almpen kanokg tike.
HEB 1:11 Kitnong a kanokg ti ikga kai plalng, pake kitn alkitn pa ikgake kolpa, kitn pa ikg am rpma kolpa rpma pake. Kitnong a kanokg ti ikga kol apm a nowe kai nungkwor rakol paipm pa.
HEB 1:12 Ikga kitn iner nungkwor pa ngkli, wa uwi weten ur ai wa ining. Pake kitn pa ikga itna kol kitn alkitn pa itna pake. Kitn ikgake imo pa, kitn ikgam rpma kolpa kai pake.”
HEB 1:13 Maur Wailen kil ake wa lanaki maur akwapel ur akilen pa la, “Kitn kul ntiwopm rpmi wam wi ti i i, kupm ungkwan tu wrongmanto akitnen pa kai tukwleikgteitn, plalng pipa, tu mpa rpmi orngwatneikgen kitn pa, a kitn pa uwi nang wailen itni ep ikglen kweikwei wrongkwail.” Maur Wailen la kolpa naki Warim Kipman alkil, pake ake kil wa la ur kolpa naki tu maur akwapel ur alkil pa, kalpis.
HEB 1:14 Tu maur akwapel a Maur Wailen pa tu kolai? Tu pa maur a akwap orngwatneikgen Maur Wailen pa kolti. Kil ukwawen nar eng ak angklin tu mla ur a ukipma Warim Kipman a ikga uwiyen iye kaino ntiwel rpmi wor yongkyong.
HEB 2:1 Yangkipm a pikekg Warim Kipman pa aye wli pa wail manten, kolpa ti mentepm mpa rkul yangkipm aklale a pikekg mentepm atning a tu laron nako pa lupmen riworwor, pa mentepm ikgake kolen a kop almpento aye kinar takwleikgen yangkipm pa.
HEB 2:2 Yangkipm a Maur Wailen a pikekg tu maur akwapel akilen aye wli ep laron naki Moses pa, pa yangkipm aklale a arkul tu wrong kin kipman tongtong, atom mla ur pikekg nungkulkget talpulng yangkipm pa, pa kil pikekg awi wleket akalmpe paipm a kil antokg pa.
HEB 2:3 Kol yangkipm a pikekg tu maur akwapel a Maur Wailen aye nar laron naki Moses pa arkulen tongtong kolpa, ti kol mentepm uk yirokg yangkipm a Warim Kipman alkil aye nar laron nako ti pa, pa mentepm ikga ngkirk ngkom nilokgen wleket pa or kolai? Pa ake antiwe. Eng ntei, yangkipm pa lanako kwap wail manten a pikekg kil ak eng akawiyo takgwleikgen ipma wakget a Maur Wailen eng paipmpaipm a mentepm antokg pa. Pa Wailen Sisas kil alkil pikekg laron naki tu tiur a pikekg atning yangkipm a kil laron kwap wail pa, tu pa aktitnongketel yangkipm pa, la pa aklale wrisen, atom aye wli laron nako pa.
HEB 2:4 Wa Maur Wailen kil alkil pikekg antiwen akwap elng kla itna, wa antokg kweikwei weten weten a mentepm wrekg paipm eng ari, wa kil antokg kweikwei titnongket titnongket manet manet palng angko wunong a melnum ake antiwe antokg, wa kil ampreing titnongket ariwe kwap wris wris a Maur Wor pa aknirake tu wrongkwail kin a kipman pa katila nikgwalpm wasrongen a kil alkil ai. Atom kil antiwen akwap kolpa aktitnongketel yangkipm a pikekg tu laron nako pa la pa aklale wrisen.
HEB 2:5 Eng ntei, Maur Wailen pikekg ake takwei tu maur akwapel alkil pa la ikga ikglen tu wrong kin kipman nimpokgen kweikwei wrongkwail ik wang kutnukg a klalen a titnongket akilen ikga palng ngko wunong pa, kol a kupm nira lanakepm ti pa, kalpis.
HEB 2:6 Kil pikekg takwei mentepm ti la ikga ikglen tu wrong kin kipman a kweikwei wrongkwail pa. Pake kol yangkipm ur a melnum ur lanaki Maur Wailen a nira ela wrkapm a Maur Wailen pa lanako kolpa la, “Men melnum ti kolai, atom wa kitn akwonalmpen men ti! Men ti warim kipman a melnum, pake wa kitn ikgalento worwor kolpa eng ntei!
HEB 2:7 Kitn pikekg antokg men rpma nang kalpisen orngwatneikgen tu maur akwapel akitnen pa kolpa itna wang tukwok waiketn kolti, plalng pa, kitn wa ngkat nang amenen pa aye kaino kwa a kitn alko titnongket klalen wail. Wa kitn ngkato atom men itna wailen ikgalen kweikwei wrongkwail a pikekg kitn antokg ti.
HEB 2:8 Kitn elng kweikwei wrongkwail a itna kaino kitnong ai, a itna kanokg ti itna orngwatneikgen men ti.” Nira ela wrkapm a Maur Wailen pa la kolpake. Pikekg Maur Wailen kil ake pikekg arkul kwei ur ketn ur a itna kaino kitnong ai aki itna kanokg ti pa, kalpis, kil elng kweikwei wrongkwail ti itna orngwatneikgen mentepm ti. Atom kweikwei tiur pa mentepm ari la mentepm ti ikgalen pake, a kweikwei tiur pa ake mentepm ari la mentepm ikgalen ak wang ti pa, a pa.
HEB 2:9 Pake mentepm ari Sisas pake, melnum a Maur Wailen ngkatel aye kaino kwa a alkel titnongket klalen wail pa. Pikekg Maur Wailen kil plan ipma wor wail a kil ak angklin mentepm ti, kolpa atom kil elng Sisas pa itna orngwatneikgen tu maur akwapel akilen pa kolpa itna wang tukwok waiketn kolti, atom Sisas pikekg awi wrik amentepmen ti awi wleket amo akarmpen paipmpaipm a mentepm wrongkwail.
HEB 2:10 Maur Wailen pa kil yiprokgen a pikekg la atom kitnong a kanokg a kweikwei wrongkwail ti palng, a kil ikgalen kweikwei wrongkwail pa eng alkilen. Kil wasrongen la uwi mentepm warim wailet iye kaino ntiwel rpmi kaino anong klalen pa a lko nang wailen. Ti kil la pa wor kol a kil numprampen Sisas pa riworwor, eng mpa kil palng melnum a antiwe a akawi mentepm warim pa eng alkilen iyentel, a wa ikga ikyakuro iyentel kaino pake, kolpa atom ari kil pikekg arku Sisas kinar awi wleket amo akarmpento pa.
HEB 2:11 Melnum a anel kla ak amprinso eng Maur Wailen pa kil anti mentepm a kil amprinso pa klung wris. Am yiprokgen kolpa atom Sisas pa kil ake numpaipm eng akwe mentepm ti la wail wail a wusok wusok alkilen pa.
HEB 2:12 Pikekg kil plan la mentepm ti wusok wusok a wail wail alkilen pa, atom kil lanaki Yan alkil pa ep atom nira ela wrkapm nangnang pa la kolpa la, “Kupm ikga laron nang akitnen niki tu wusok wusok a wail wail akupmen. Wa kupm ikga ik nangnang ik ngkit nang akitnen pa iye kaino kwa itni wulmpa a tu wrong kin kipman akitnen a wli wli takwem rka wris kapor kilko aleinseitn pa.”
HEB 2:13 Wa nira ela wrkapm a Maur Wailen pa kil wa la kolpa la, “Kupm ukipma ariwe kitn pa worwor atom kupm uk kupm alkupm ti kai eng kitn pa la kitn ntokg kuina ur kitila nikgwalpm wasrongen a kitn alkitn pake.” Wa kil wa la angkine la kolpa la, “Ti kipm ri, kil kupm rpma nampokgen tu warim a Maur Wailen a pikekg kil alkopm pa.”
HEB 2:14 Tu warim pa am la mentepm melnum tike, mentepm a rpma nampokgen numpalk, kolpa atom Sisas pikekg palng kolen mentepm melnum tike. Kil la imo kol mentepm melnum a amo tike, eng mpa kil ik kipor ngketen wri nokget a Maur Paipm Satan pa, melnum yan a aken okwrong Amo pa la itni kolpa itni pake, ake la mpa wa ur ungkwan ngketen titnongket pa.
HEB 2:15 Akangklei wang kolpa ak ai kulngkul kul wli wang ti pa, Amo pa kol wrpmungkaung ur a yapowo, kolpa atom mentepm wrongkwail kin a kipman ngkark eng amo. Kolpa atom Sisas pikekg palng melnum la imo eng mpa wa ik ngketen Amo a akyapowo pa kai tukwleikgento eng mpa mentepm wirng no itni kukula wor.
HEB 2:16 Sisas pikekg palng melnum, kolpa atom mentepm ari la kil pikekg ake la ikwap pa ik ngklin tu maur akwapel a Maur Wailen pa, kalpis. Kil pikekg la ikwap pa ik ngklin mentepm wrong kin kipman a ukipma kil kol pikekg Apraam ukipma Maur Wailen pa.
HEB 2:17 Kil pikekg la ikwap ik ngklin mentepm melnum tike, am yiprokgen kolpa ti atn a rpma a nikgwalpm a kweikwei wrongkwail akilen pa mpa irir kol a mentepm melnum a kanokg ti, a kil akwe mentepm ti la wusok wusok a wail wail akilen pa. Pa ake ya ur manet kalpis, pa ya wris ata a ak angklinso am pake, eng kil palng melnum tukgunakg ipma krakgen a antiwe arein mentepm melnum, a wa akwap wor nungkulkgwris itna wulmpa a Maur Wailen, eng kil la ik rmpen paipmpaipm a mentepm wrong kin a kipman.
HEB 2:18 Kil alkil pikekg arki kalkuten a awi wleket, a wa kil pikekg kweikwei wailet ningkailel atom kil am ariwe ise. Kolpa atom ak wang ti pa kil antiwe a arein a angklin mentepm melnum a kweikwei wailet ningkailo la mentepm ngko pa.
HEB 3:1 Kolpa ti kipm melnum alkupmen a mentepm ukipma Krais, a pikekg Maur Wailen a rpma kaino kitnong ai akwewepm a amprinsepm eng alkilen pa, kipm elng wulmpa pa itni ikitnen Sisas, a pikekg Maur Wailen ukwawel nar la itni melnum wokgen akilen, a wa itni melnum tukgunakg ipma krakgen a mentepm ukipma laron laron la kil amentepmen pa.
HEB 3:2 Sisas pa pikekg atning nungkulkg akwap ariworwor katila kuina ur a Maur Wailen pikekg lanakel la mpa kil ik pa. Am wa kolpake, Moses pikekg atning nungkulkg akwap ariworwor eng ikgalen tu wrong kin a kipman a Maur Wailen, pa ak la wan anong a Maur Wailen.
HEB 3:3 Pake kol mentepm ri wan pa nimpokgen melnum a ale wan pa, am melnum a ale wan pa mpa mentepm kiporng yangkipm lkel nang wailen klangkil wan a kil ale pake. Ti am wa kolpake, kol Maur Wailen kil ari Moses pa nampokgen Sisas pa ari, Sisas pa melnum wailen angen Moses pa.
HEB 3:4 Wan wris wris ti pa, melnum ale, ake wan ur palng kalpmilel kolti pa, pake kweikwei wrongkwail pa Maur Wailen kil alkil pa antokg pake.
HEB 3:5 Moses pa kil pikekg ikgalen tu wrong kin kipman a Maur Wailen pa kol melnum akwapel wor a atning nungkulkg orngwatneikgen kil pa akwap wrongkwail kol a kil la pa. Kil pa kol kla ur a pikekg Maur Wailen elngkitna la ik plan ep kuina ur ikga palng kutnukg a kil la la ikga laron ngko wunong ik wang kutnukg pa.
HEB 3:6 Pake Krais pa ake melnum akwapel kolti kol Moses pa, kil pa Warim Kipman a Maur Wailen, kil pa yan a ikgalen wan anong akilen. Wa kil pa yat wa atning nungkulkg akwap wor katila nikgwalpm a Maur Wailen la kol a kil ik pa. Ti mentepm ti pa wan anong akilen. Kol mentepm ake ngkark pa, mentepm itop mowel kolti, rkul ipma ukipma rpmi nungkwangen riwe kuina ur a Maur Wailen la ikga lko pa itni titnongket kolpa iye kai pa, pa mentepm pa kol wan anong akilen.
HEB 3:7 Mentepm ti wan anong a Maur Wailen, kolpa ti kipm itning yangkipm a Maur Wor a Maur Wailen a nira ela wrkapm pa la kolkil la, “Kol kipm itning ok a kupm Maur Wailen pa ik wang am ti pa,
HEB 3:8 ampur kipm yapo ipma akipmen pa tongtong, kol a pikekg tu walyipmiri wapyipmiri akipmen antokg ak wang a tu angkom atn or wrik ineret tingklak kalpmilel pa kai pa. Tu pikekg uk yirokg talpulng ok akupmen a almkuwangkelopm la ik ri la mpa kupm ngklinsen kuina ur kol a tu la pa, aki kalpis.
HEB 3:9 Pikekg tu ari kweikwei titnongket a kupm antokg or wrik ineret tingklak kalpmilel pa kolpa or pa kai kol wring kamel wekg, pake tu almkuwangkelopm kolpa eng la ik ri ipma akupmen.
HEB 3:10 Am yiprokgen kolpa atom pikekg kupm ipma wakget paipm eng tu pa, atom kupm la kolpa la, 'Akangklei wang nikgwalpm atuwen pa itna watin takwleikgen kupm ti! Atom tu ake awi ariwe ya akupmen a kupm la kol a tu ore pa, kalpis.'
HEB 3:11 Am kolpa atom pikekg kupm ipma wakget la naren kupm alkupm ti la, 'Tu pa ikga akentiwe no anong a kupm numprampen elngkitni eng ikga tu no ntiwopm rpmi eng yapm pa, kalpis wrisen.'”
HEB 3:12 Pikekg Maur Wailen ipma wakget eng tu walyipmiri wapyipmiri amentepmen pa kolpa, ti kipm melnum alkupm a mentepm ukipma Krais, kipm mpa rpmi riwe ikglen tita riworwor, eng ake mpa ur akipmen pa wa lupm nikgwalpm paipm atom ake ukipma Maur Wailen a alko yaprekg watin eng rpma wor yongkyong pa kol pikekg tu pa antokg pa.
HEB 3:13 Maur Wailen kil uk wang mentepm ti la, “Kipm ukipma kupm ti ik wang am ti!” Maur Wailen la kolpa, ti kipm ikor la yangkipm a Maur Wailen ik titnongketel tita, eng ake mpa paipmpaipm pa ningkailepm atom ik rkolng ur a kipm ti ngko atom kil yipo ipma akil pa tongtong. Kipm ik titnongketel tita itni titnongket kolpa ik wang am ti, ampur arukge kai ikgkil, kwaikg, kiki kolpa iye kai pa, kipm iktitnongketel tita ik wang am tike!
HEB 3:14 Pikekg ep lmpiwen pa mentepm ukipma Krais pa ariwe la mentepm antiwel wampwam eng kweikwei wrongkwail wor wor a Yan alkil alkel pa. Wa kol mentepm rkul nikgwalpm pa itni titnongket kolpa iye kaingkai kai ngko wang a mentepm imo pa, mpa mentepm ntiwel wampwam eng kweikwei wor wor akilen pa kolpa kai pake. Pake kol mentepm ake arkul nikgwalpm pa kolpa itna titnongket kolpa aye kai pa, mentepm akentiwe ntiwel wampwam kweikwei wor wor akilen pa. Kolpati mentepm ik titnongketel tita ikngklei wang kolpa iye kai o!
HEB 3:15 Ti wuten kipm atning a kupm lakati ok a Maur Wailen a tu nira ela wrkapm pa la, “Ti kol kipm itning ok a kupm Maur Wailen ti ik wang am ti pa, ampur kipm yapo ipma akipmen pa tongtong, kol pikekg tu walyipmiri wapyipmiri akipmen uk yirokg talpulng ok akupmen pa. Ti kipm ti ampur wa ak kol tu pa, ti kol ik wang am ti kipm itning ok akupmen pa, pa kipm lupmen kutnun kolti!”
HEB 3:16 Ti tu mla mla pikekg atning oklala a Maur Wailen pa, ari wa tu uk yirokg talpulng ok akilen pa? Pa am tu walyipmiri wapyipmiri amentepmen pake, tu a pikekg rka Isip pa atom Moses awiyen a pa kul pa.
HEB 3:17 Ti Maur Wailen kil pikekg ipma wakget eng tu mla mla itna kolen wring kamel wekg pa? Am pikekg nampokgen tu pake, tu a pikekg antokg paipmpaipm atom tu amo, a yipmiri a tu pa rmpa tatu wrik tingklak ineret pa or pa kai pa.
HEB 3:18 Ti tu mla mla pikekg Maur Wailen ipma wakget naren kil alkil ti la, tu pa ikgake ntiwe kaino anong a kil numprampen elng itna la ikga tu kaino rpmi eng yapm pa? Am tu a pikekg ake atning nungkulkg yangkipm akilen pake.
HEB 3:19 Kolpa ti pa planto la, tu a pikekg atnuurng Isip pa, tu pa pikekg karken a ukipma, atom pa pikekg ak angketen tu kai takwleikgen Maur Wailen, atom tu ake pikekg no rpma eng yapm pa, kalpis.
HEB 4:1 Yangkipm a pikekg Maur Wailen wangkir a yapo pa itna okore itna la ikga uwiyo iye kaino anong a kil numprampento la mentepm rpmi eng yapm pa. Kolpa ti kipm mpa itn riwe ikglen kipm alkipm pa riworwor eng ikgake Maur Wailen kil ri ikgokg ur akipmen pa wulen pa, kol pikekg tu walyipmiri wapyipmiri amentepmen ake pikekg ukipma atom tu amo rmpa tatu ya pa kai pa.
HEB 4:2 Eng ntei, yangkipm wor a la Krais pa pikekg mentepm yatenen atning, mentepm ti a wa tu walyipmiri wapyipmiri amentepmen pa. Ari tu ake wa ukipma yangkipm pa alupmen rpma kawor ipma atuwen pa ariworwor, kolpa atom yangkipm pa ake wa ak angklinsen ketn ur, kalpis wrisen.
HEB 4:3 Pake mentepm a ukipma pa kolti, kil ikga uwiyo iye kaino anong akilen pa rpmi eng yapm. Am kol pikekg kil la tu a pikekg ake ukipma pa la, “Kolpa atom pikekg kupm ipma wakget la naren kupm alkupm ti la, 'Tu pa ikgake ntiwe ikga no anong a pikekg kupm numprampen elngkitna eng tu pa la ikga tu no rpmi eng yapm ti.'” Pikekg Maur Wailen lanaken kolpake. Kil pikekg numprampen anong a kweikwei wrongkwail pa itna ise. Pikekg kil ak plalng ak wang lmpiwen a kil antokg kitnong a kanokg ti ise.
HEB 4:4 Kol yangkipm ur a nira ela wrkapm akilen pa la a pikekg kil antokg kitnong a kanokg pa la kolpa la, “Maur Wailen kil antokg kitnong a kanokg a kweikwei wrongkwail pa ak wang wampwomis wampwompwris pa plalng, okg or kong ti pa, kil rpma eng yapm.” Pa wrkapm pa la wang aimprek a wang wampwomis wampwompwekg ampake.
HEB 4:5 Wa kupm wa la la yangkipm a Maur Wailen wet kupm la pa, kupm la wa la or wrikel nti ur la, “Tu pa ikgake ntiwe no anong a kupm numprampen elngkitna eng tu pa la ikga tu no rpmi eng yapm ti.”
HEB 4:6 Pake tu tiur a ukipma pa ikgam kaino ntiwel rpmi eng yapm pake, pa ikgake kalpis pa, pa ikgam kolpake. Wa tu a pikekg atning yangkipm wor pa ep pa, tu pikekg nungkulkget talpulng yangkipm pa atom tu pikekg ake no anong a kil numprampen la tu no rpmi eng yapm pa.
HEB 4:7 Kolpa itna kilmik watipmen paipm kulngkul kul angko wang a Tepit ti pa, Maur Wailen wa la, atom Tepit nira ela wrkapm a wet kupm lakati nakepm anti aripm ur ise, la, “Kol kipm itning oklala akupmen a lanikepm yangkipm ur ik wang am ti pa, ampur kipm wa yapo ipma akipmen pa itna tongtong.” Ti pa planto la Maur Wailen pikekg alm wang ur manet la mentepm itning nungkulkg kutnun yangkipm akilen pa, kol wang weten a kil alm pa am la mentepm itning yangkipm akilen pa ik wang am tike.
HEB 4:8 Kol tu walyipmiri wapyipmiri amentepmen pikekg ake tu nungkulkget pa, Sosua kil kol a lekgenten iye kaino palng anong a tu kol a rpmi eng yapm pa pipa, pa Maur Wailen kol ake wa ilm wang weten manet ur la ikga mentepm rpmi eng yapm pa. Pake tu pikekg nungkulkget, atom ari kil alm wang weten manet pa.
HEB 4:9 Kol pikekg kil alkil akwap itna kol wang wampwomis wampwompwris a antokg kitnong a kanokg ti plalng pa, or kong ti pa, kil rpma eng yapm. Mentepm wrong kin kipman a Maur Wailen pa ikgam kolpake, mentepm ikga kaino eng rpmi eng yapm pa, ikgake kalpis, mentepm ikgam rpmi eng yapm pake. Pa wang wail a Maur Wailen la mentepm wrong kinkipman akilen ikga kaino rki eng yapm.
HEB 4:10 Wa kol melnum ur kil kaino rpmi anong akilen a pikekg kil numprampen elngkitna la mentepm kaino rpmi eng yapm pa pipa, kwap wrongkwail am pikekg melnum pa ak plalng ise, ti kil ikgake wa ikwap ur om, kalpis. Kol pikekg Maur Wailen kil akwap wrongkwail pa kai plalng, atom kil rpma eng yapm pa.
HEB 4:11 Kolpa ti mentepm mpa nikgwalpm rkekgen eng kaino rpmi eng yapm pa, eng ikgake ur amentepmen ti ngkom kitila kol tu a pikekg nungkulkget talpulng yangkipm a Maur Wailen pa.
HEB 4:12 Ti mentepm nikgwalpm rkekgen kutnun yangkipm a Maur Wailen pa, eng ntei, yangkipm akilen ti pa maur arpmen a akwap itna, antiwe titnongket, lepet kirngka, ake kosakal a lepet wom wompen ur lepet kolpa, pa antiwe a angket aro kawor tupmungkul a ningkli wrongkwail a almpatne tita kawor num wunen a mentepm melnum ti, kol yangkipm a Maur Wailen pa antiwe titnongket a angket aro kawor nol nikgwalpm a maur a mentepm ti, plan nol nikgwalpm akwonalmpen a ipma wasrongen a mentepm ti la mentepm la ntokg kuina kuina kolai a i a i pa.
HEB 4:13 Ti ake kwei ur yek ur a pikekg Maur Wailen kil antokg pa, antiwe kai titalam takwleikgen wulmpa a kil pa, kalpis wrisen, kweikwei wrongkwail ti pa itna wunong kil alkil ari ikgarpme kimeket itna pa. Kil melnum a ikga rpmi itning mentepm wris wris itni ikilmpe lanikel kimek kimek kweikwei wrongkwail, kitila ker a pikekg kil ak awiye kweikwei a wor a paipm a pikekg mentepm antokg pa.
HEB 4:14 Mentepm pa melnum tukgunakg ipma krakgen wailen a ikgalento pa rpma, pa Sisas, Warim Kipman a Maur Wailen. Kil melnum a pikekg yaper kaino anong wor kawor yalming klalen anti Yan alkil rpma, kolpa ti kol a mentepm ukipma laron Sisas pa rkul titnongket itni kolpa iye kai.
HEB 4:15 Kil pa pikekg ake kol melnum tukgunakg ipma krakgen ur a ake ipma arein melnum ur pa, kil melnum a ipma arein. Kil pa pikekg kweikwei wailet ningkailel la kol a kil ngko, kolpa atom kil ariwe kweikwei wailet a ningkail mentepm ti pa, kolpa ti kil antiwe arein mentepm a angko pa atom kil angklinso. Pake kil alkil pa kil pikekg ake angko kai antokg paipmpaipm pa, kalpis.
HEB 4:16 Maur Wailen kil alkil yan yiprokgen a plan ipma wor angklin mentepm ti, kolpa ti mentepm ake mpa ngkirk pa, mentepm mpa ngkom wrongen kai wreren kil ti kolti, eng mpa kil reinso a planto ipma wor alkil pa ngklinso ik wang a kalkuten palngto pa.
HEB 5:1 Melnum tukgunakg ipma krakgen pa am Maur Wailen takwei wris ur a mentepm melnum ti elngtitna, la kil melnum kuin awi wrik a mentepm melnum ti eng ikwap kweikwei wrongkwail a Maur Wailen pa: kil mpa uwi kweikwei wor wor a mentepm ayentel kai pa atom kil uwi uk wor Maur Wailen, a wa uwi wlikgok pa wa iye kai lap ilwor uk Maur Wailen eng ik ungkwan paipmpaipm amentepmen pa.
HEB 5:2 Kil pa am melnum irir kol mentepm tike a ake antiwe titnongket a talpulng kuina ur a ningkailo la mentepm ngko pa. Kolpa atom kil antiwe akwap meen nampokgen ipma wor. Kil arein mentepm wrong kin kipman a won mis kai ar antokg paipmpaipm pa.
HEB 5:3 Kil titnongket kalpisen kol mentepm ti, atom kil mpa lap wlikgok pa il wor uk Maur Wailen pa eng ik ungkwan paipmpaipm a kil alkil ti yat, kol a kil ak eng ak ungkwan paipmpaipm a mentepm ti.
HEB 5:4 Melnum ur ake antiwe mpa ngkit kil alkil ti palng melnum tukgunakg ipma krakgen a Maur Wailen pa, kalpis. Melnum wailen a kolpa pa Maur Wailen kil alkil ai takwei ai, kol a pikekg kil takwei Aron pa.
HEB 5:5 Wa Krais pa am wa kolpa yat pake, kil ake pikekg ngkat kil alkil ti palng melnum tukgunakg ipma krakgen a Maur Wailen pa, kolpa kalpis, pikekg Maur Wailen kil alkil ai takweiyel a lanakel kolpa la, “Kitn pa Warim Kipman akupmen. Ak wang ti pa, kupm ti palng yan a angketeitn.”
HEB 5:6 Wa kil wa la yat ela wrkapm pa la kolkil la, “Kitn pa melnum ipma krakgen a al al wor uk kupm, a ikga kitn ik ik kwap kolpa itni yongkyong iye or pa kai. Kitn pa melnum ipma krakgen irir kol melnum ipma krakgen Melkisetek pa.”
HEB 5:7 Ak wang a Krais rpma kanokg a ti pa, kil akg arein ak ok namputen oklala naki Maur Wailen titnongket ak ok a ikgakgel la kil ngklinsel ik wang a kil imo pa, eng ikga kil wa wrekg rpmi malepmen. Kil ariwe la Maur Wailen pa antiwe mpa ngklinsel ikuwiyel iye kai wor. Maur Wailen pikekg atning akg arein akilen pa atom angklinsel, atnen a pikekg kil atning nungkulkg arku kil alkil orngwatneikgen Maur Wailen pa.
HEB 5:8 Krais pa Warim Kipman a Maur Wailen, pake kil pikekg wa arki kalkuten a awi wleket ak wang a kil rpma kanokg ti. Atom kalkuten a wleket a palngtel pa kalingkel atom kil awi ariwe worwor nikgwalpm a atning nungkulkg orngwatneikgen Maur Wailen pa.
HEB 5:9 Kweikwei wrongkwail a palng eng mentepm ti pa am pikekg wa palng kolpa eng kil pa yat pake, atom kil kaling kaling nikgwalpm ariwe ute wor watin akilen pa, ak kolpa kai karpo itna man. Kil palng yan yiprokgen a ak awi mentepm wrong kin a kipman a atning nungkulkg orngwatneikgen kil pa aye yaper kul eng Maur Wailen pa, atom kil alko yaprekg watin eng rpma wor yongkyong.
HEB 5:10 Kil melnum a Maur Wailen takweiyel elngtitna melnum tukgunakg ipma krakgen akilen, katila nepm yikak a kwap a pikekg melnum tukgunakg ipma krakgen Melkisetek ak pa.
HEB 5:11 Yangkipm wailet itna wai la mpa kupm lanikepm la Sisas pa la kil melnum tukgunakg ipma krakgen kol Melkisetek, pake wonet eng kupm laron nakepm kimek kimek ariworwor yiprokgen a yangkipm pa, eng ntei, kipm pa palng lpmaaken eng atning katnun, kolpa atom ake antiwe mpa kipm riwe yangkipm pa riworwor.
HEB 5:12 Ti kipm pa pikekg ariwe yangkipm pa ep ise, ti kol a kipm pa kiling plan irowonel tu melnum yangkipm a Maur Wailen pa niken pake. Ari wa kalpis, kipm la wa laniki melnum ur ai eng wa yaper kinar wa ngkiten eng kiling plantepm or wrikel yangkipm wunongket a tu pikekg kaling plantepm ep pa wa ntiur pen! Ti kipm pa am kin nangkwor melnangkwor ise antiwe a kol a il okipma kalnten tike, ari wa kipm pa wa la kol tu warim pa la ok rki ma ti rki pen!
HEB 5:13 Melnum a ok rka ma pa rka pa, kil ake antiwe al okipma kalnten pa, a pa, kil pa kol warimet pa itna pa. Kil ake antiwe mpa ik nikgwalpm ik irongke yangkipm a Maur Wailen a kaling planto la kuina a i wor a kuina a i paipm pa, kalpis.
HEB 5:14 Okipma kalnten pa a tu kin nangkwor mel nangkwor pa al pake, tu pikekg kaling kaling al okipma kalnten pa akwiyen, atom tu am ariwe ise la a i wor a a i paipm.
HEB 6:1 Kupm yangkipm watipmen a la Krais a kol a laron nikepm pa itna, ari mentepm wa kaling kaling kol tu warim nimongkoken yikalangkeiyen pa la wa uwi riwe yangkipm wunongket wunongket a Krais pa pen a pikekg mentepm atning ariwe ise. Mentepm kol melnum a ukula ong ti kol am ngkit le wan tike, ari kalpis, mentepm wa yaper kinar wa ukula ong ti pen. Mentepm elngen a la wa uwi riwe yangkipm wunongket wunongket a Krais pa pen, a mentepm mpa nikgwalpm rkekgen uwi riwe yangkipm manten wail wail pa eng mpa mentepm palng kin nangkwor mel nangkwor pa. Yangkipm wunongket wunongket a pikekg mentepm awi ariwe ise pa, la kolkil: - plelng ipma laron paipmpaipm a antokg maur wor amentepmen amo atom ikga ngkliwo kinar lkim watin a wakg atne itna yongkyong pa, - a ukipma Maur Wailen, -
HEB 6:2 ya auraur a tu naren Krais kaluko, - a ya auraur a elng wam elewo lanaki Maur Wailen, - a tu a amo kaingkai pa ikga wa wrekg rpmi yongkyong, - a wrongkwail ikga itni yangkipm wail pa atom tiur ikga uwi itopen a tiur ikga uwi wleket rpmi yongkyong. Pa am yangkipm wunongket wunongket a Krais a pikekg mentepm atning ariwe ise.
HEB 6:3 Kolpa ti mentepm mpa nikgwalpm rkekgen uwi riwe yangkipm wail wail ik ngkine kol pa iye kai palng titnongket kol tu kin nangkwor mel nangkwor pa. Ti kol Maur Wailen uk wor kolpa pipa, mpa mentepm ik kolpake.
HEB 6:4 Eng ntei, tu melnum a pikekg wa angko arpme waiketnketn kweikwei wor wor kaino anong klalen a Maur Wailen pa ise, tu am pikekg ipma krakgen eng kweikwei a Maur Wailen pa ise. Maur Wailen am pikekg alko Maur Wor pa kimeket ise, ti tu pa am pikekg awi pake. Pake wa tu utnuurng ngko ya pa, pa tu pa ikgakentiwe a mentepm wa uwiyen iye yaperkul wa plelng ipma wa ntiur pa, kalpis wrisen.
HEB 6:5 Tu pa am pikekg al akwiyen waiketnketn yangkipm a Maur Wailen pa ari pa wor, wa tu pikekg atningke waiketnketn titnongket a Maur Wailen a ikga palng ngko wunong ik wang kutnukg a kitnong a kanokg weten a palng pa.
HEB 6:6 Ari kalpis, wa tu atnuurng angko ya pa, ti tu pa ake antiwe mpa mentepm wa uwiyen iye yaperkul eng tu wa plelng ipma ntiur pa, kalpis wrisen. Eng ntei, pa kol tu wa la kurkurng Warim Kipman a Maur Wailen ti rki yo okgmangki pa nti ur pen, itni ya wail a tu wrongkwail kaingkul ari aknokgel la paipmelel a ungkwa wlikgelel pa.
HEB 6:7 Kol kanokg pa u awei ak atne atne atom kanokg pa arkolng u pa ak antokg kweikwei a melnum almpalin itna wring pa, anip ariwor ak angklin melnum pa. Kanokg a wor kolpa pa, Maur Wailen pa mpa plan ipma wor ngklin kanokg pake.
HEB 6:8 Pake kol kanokg pa ake arkolng u a awei atne atne kanokg pa, atom mi paipm paipm a ampei iket iket inip itnewe pa, kanokg a kolpa pa ake ak angklin melnum ur, kalpis. Pa Maur Wailen ipma wakget wreren eng kil a ok nti kanokg a kolpa, ti ake antiwe mpa kweiur wor ur inip itni kanokg pa kolpa kaingkai, ikga tu elngen kanokg pa itni kai paipm kolti.
HEB 6:9 Ti kipm melnum alkupm a kupm wasrongentepm, kupm wet la karkurngkepm titnongket, pake kupm ukipma ariwe la kipm pa ake kol kanokg paipm pa. Kipm wor ketnketn pake kutnukg pa kipm ikga wor, atom Maur Wailen ikga uwiyepm eng alkilen kol kanokg wor a kweikwei anip wor atnewe pa.
HEB 6:10 Eng ntei, Maur Wailen pa ake kil melnum a akwap raimpe ari angklowe melnum pa, atom kil mpa woniketen kwap wor a kipm ak pa, kalpis. Kipm pikekg angklin tu wrong kin kipman akilen pa, wa kipm wa angklinsen kolpa wa itna, pa plan nikgwalpm wor a kipm wasrongen kil pa. Ti kil ak ker akawiye wonarpme kwap a nikgwalpm wor akipmen kolpa rpma pa.
HEB 6:11 Pake nikgwalpm wasrongen wail akupmen pa, la ri kipm wris wris pa mpa nikgwalpm rkekgen rkul nikgwalpm a ukipma rpmi nungkwangen riwe worwor, iye kolpa kai ngko wang umpuwen pa, la kuina ur pa, kipm ikgam uwi pake.
HEB 6:12 Wa kupm wasrongen paipm la ake mpa kipm ik ik lpmaakel. Kipm mpa itn kitila tu a pikekg ukipma arkul ipma itna titnongket nungkwangen kolpa aye kai pa, ikga tu uwi kweikwei a Maur Wailen yapon yangkipm la lken pa.
HEB 6:13 Pikekg ak wang a Maur Wailen kil wangkir a yapo nampokgen Apraam pa, kil naren kil alkil ti. Eng ntei, ake wa melnum ur wailen klangkil kil ti pa, kalpis, kolpa atom kil naren kil alkil ti ak titnongketel kuina ur a kil wangkir a yapo pa.
HEB 6:14 Ti Maur Wailen pikekg wangkir a yapo nampokgentel kolpa la, “Kupm mpa plan ipma wor akupmen ti ngklinseitn, a ntokg tu watnom walpopm walyaru akitnen pa ikga palng umpen wailet kai rki yela tutu kanokg ti. Ti a kupm wangkir a yapo pa, ikgam palng kitila kolpake.”
HEB 6:15 Atom Apraam kil pikekg arkul ipma itna titnongket ukipma kolpa rpma nungkwangen kolpa itna kaingkai, kil ari kuina ur a pikekg Maur Wailen wangkir a yapo la ngklinsel pa.
HEB 6:16 Atom kol melnum ur kil wangkir a yipo la ntokg kwei ur pipa, kil mpa naren melnum titnongket wail ur a klangkil kil alkil ti, ik titnongketel yangkipm pa la kil ikgam ik kitila kolpake, ikgake kalpis pa, wa ik mpri okel tu melnum a la arku yangkipm a kil wangkir a yapo pa.
HEB 6:17 Maur Wailen pikekg ak kolpa yat pake: kil pikekg wangkir a yapo nampokgen Apraam pake, wa kil pikekg wa naren kil alkil ak titnongketel yangkipm pa. Eng ntei, kil wasrongen la mentepm watnom walpopm walyaru a Apraam pa mentepm mpa uwi riwe riworwor la, kil ikgake plelngen nikgwalpm ur akilen pa kalpis. Kil pikekg naren kil alkil planto la kil ikgam ngklinso kuina ur a pikekg kil yapon yangkipm nampokgen Apraam pa.
HEB 6:18 Kweikwei wekg kil pa Maur Wailen pikekg ak ak titnongketel yangkipm alkil pa: kil wangkir a yapo a wa kil naren kil alkil. Kweikwei wekg kil pa ake antiwe kweiur ik ngketen a ik ungkwan pa, kalpis wrisen. Kil ake melnum a la yangkipm kansil pa atom kil pikekg ake kansil kuina ur a pikekg kil wangkir a yapo nampokgen Apraam pa. Kil wasrongen la kweikwei wekg a kil la pa pati, wangkir a yapo, a naren kil alkil, pa mpa ik titnongketel mentepm melnum a pikekg ngkark kai eng kil, atom kil ak iplepm alkil pa ak upaarngko la mentepm rkul ipma ukipma rpmi nungkwangen riwe, la kuina ur a kil la ngklinso pa ikgam kil ngklinso pake, ikgake kalpis pa.
HEB 6:19 Mentepm ukipma rpma nungkwangen ariwe la kuina ur a pikekg Maur Wailen wangkir a yapo nampokgen mentepm ti la ikga ngklinso pa, kil ikga ngklinso pa. Wa mentepm angkli wes kaikut pa elng kawor yalming a Maur Wailen, ak aro apm kalnten wail a tu alekg ak angketen rka pa, elng kawor wan ok klalen wakget a yalming a ela anong wor a Maur Wailen pa. Pa ak arkul nol nikgwalpm amentepmen a mentepm ukipma rpma nungkwangen pa itna tongtong.
HEB 6:20 Sisas pa kil pikekg angklinso ak kapor angketen wan ok klalen wakget a Yan akilen pa kai kupuk wor atom kil akwulento ya pa ep, a mentepm ti ikga wa kutnuntel kawor pa. Kil pikekg palng melnum tukgunakg ipma krakgen a rpma yongkyong a akwap irir kol Melkisetek melnum tukgunakg ipma krakgen a rpma yongkyong pa.
HEB 7:1 Melkisetek a wet kupm la pa, kil pa melnum wailen itna tukgnakg a ikgalen anong wail Salem, a wa kil melnum ipma krakgen a ak ak kwap eng al wor uk Maur Wailen, Maur Wailen a itna wailen a ake wa melnum wailen ur wa klangkil kil pa kalpis. Apraam kil pikekg alekgen tu melnum almpwrong alkil pa kai almpwrong, atom alok angkli tu melnum almpwrong a tu melnum tukgunakg tiur alekgen pa plalng, atom tu wa yaper kul pa, Melkisetek pa kai ansil Apraam pa angko ya pa. Atom kil oklala naki Maur Wailen la kil plan ipma wor alkil ik ngklin Apraam pa.
HEB 7:2 Atom Apraam awi kweikwei wrongkwail a tu wrongmanto a kil alok angkliwen pa aye kul ampreing elng itna mapming wampwam, atom awi mapming wris ur pa uk Melkisetek pa. Melkisetek pa “melnum tukgunakg a alupm nikgwalpm ute wor aklale” pa itna ep, yiprokgen a nang Melkisetek pa am kolpake. Wa itna arkekg pa kil “melnum tukgunakg a ikgalen anong wail Salem”, yiprokgen pa la kil “melnum tukgunakg a aye kla tarmpupm wrokgen a ak angketen ipma wakget.”
HEB 7:3 Wrkapm a Maur Wailen pa ake wa la ur la, Melkisetek pa mamikg mamin a mamin wror ur a angket ale kul angket mansan a angket Melkisetek pa, a ake la ur la kil amo ur pa kalpis. Kil melnum ipma krakgen a Maur Wailen, kil am pikekg akwap eng al wor uk Maur Wailen kolpa rpma pa rpma pake. Atom pa plan la kil pa kol Warim Kipman a Maur Wailen.
HEB 7:4 Ti kipm ikwonilmpen ri la Melkisetek pa melnum wailen kolai eng mpa melnum wailen yan ep amentepmen Apraam pa mpreing kweikwei wor wor wrongkwail a pikekg kil awi kai a tu alok angkli tu a almpwrong pa, iye kul elngkitni mapming wampwam atom kil uwi mapming wris ur pa uk Melkisetek pa? Am Melkisetek pa melnum wailen klangkil Apraam pa atom ari kil alkel pake.
HEB 7:5 Tu melnum a awi awi mapming wris a mapming wampwam a kweikwei a mentepm pa, pa tu melnum nang wailen a klangkil mentepm ti. Pake mentepm wrong kin kipman om kimeket a Isrel ti pa pikekg rpma nepm wam a melnum wailen amentepmen Apraam pa rpma, atom mentepm irir kol tu om a Lipai pa, tu om a Lipai pa ake nang wailen klangkil mentepm om tiur pa. Pake yangkipm titnongket a Moses pa la kolpa la, tu watnom walwalpopm walyaru a Lipai a ak ak kwap a melnum ipma krakgen a al wor uk Maur Wailen pa, tu mpa uwi mapming wris ur a mapming wampwam a kweikwei a mentepm om wrongkwail a Isrel ti.
HEB 7:6 Pake Melkisetek pa ake wa om wris ur a tu Lipai pa, eng mpa kil uwi mapming wris ur a mapming wampwam a kweikwei a melnum ur pa. Ari wa kil pikekg wa awi mapming wris ur a mapming wampwam a kweikwei a pikekg Apraam yan ep amentepmen alkel pa. Maur Wailen pikekg wangkir a yapo nampokgen Apraam pa, atom Apraam pa melnum wailen, ti pikekg kol am Apraam pa laniki Maur Wailen la kil plan ipma wor akilen pa ik ngklin Melkisetek pake, ari kalpis, wa Melkisetek ti wa lanaki Maur Wailen la kil plan ipma wor akilen ti ik ngklin Apraam ti!
HEB 7:7 Ti mentepm wrongkwail ariwe pa, melnum a kil lanaki Maur Wailen la kil plan ipma wor akilen ti ik ngklin melnum ur pa, pa kil melnum wailen nang arke klangkil melnum a kil awi angklin a Maur Wailen pa. Melnum a kil awi angklin a Maur Wailen pa, kil pa wa itna orngwatneikgen melnum a lanaki Maur Wailen pa.
HEB 7:8 Mpa mentepm ri Melkisetek ti a tu melnum ipma krakgen a Lipai ai: tu melnum ipma krakgen a ak ak kwap a al wor uk Maur Wailen pa tu a awi awi mapming wris a mapming wampwam a kweikwei a mentepm wrong kin kipman alken alken pa, pa tu walwalpopm walyaru a Lipai, pa am tu melnum kol mentepm tike, melnum a amo amo kaingkai ai, wa kilmik weten weten wa awi awi wrik. Pake kol mentepm ikwonilmpen Melkisetek a pikekg awi mapming wris a mapming wampwam a kweikwei a pikekg Apraam alkel pa, kil pa wrkapm a Maur Wailen pa lanako kolpa la kil ake amo, kil am rpma yongkyong kolpa rpma pake.
HEB 7:9 Apraam pa pikekg awi mapming wris a mapming wampwam a kweikwei akilen pa uk Melkisetek pa. Wa katnukg pa wa tu walwalpopm walyaru a Lipai a awi kwap a melnum ipma krakgen pa wa awi awi mapming wris a mapming wampwam a kweikwei a mentepm wrong kin kipman alken alken pa. Pikekg ak wang a Apraam awi mapming wris a mapming wampwam a kweikwei akilen pa uk Melkisetek pa, pa pikekg kil ak wrisen ak aur tu Lipai a pikekg ake palng, a pa. Atom antiwe mpa mentepm wa la kolkil la la, pa am kol tu alntu Lipai a awi awi kweikwei pa pikekg rpma nepm wam a Apraam ak wang a kil uk kweikwei Melkisetek pa.
HEB 7:10 Pa kolkil: tu Lipai pa pikekg ake man rakuwen, tu pikekg rpma nepm a wam a Apraam pa a pa, ak wang a pikekg Melkisetek kai ansil Apraam angko ya pa.
HEB 7:11 Tu a om a Lipai pa pikekg awi kwap a melnum ipma krakgen a Maur Wailen pa atom tu pa yan yiprokgen a arpmen ikgalen yangkipm titnongket a Maur Wailen a pikekg Moses uk tu wrong kin kipman amentepmen ti. Ti kol kwap a tu melnum ipma krakgen a ak ak kwap a al wor uk Maur Wailen pa pikekg ntiwe ntokg mentepm ti palng ute wor itni wulmpa a Maur Wailen kutnun yangkipm titnongket pa riworwor pa, pa kol ake wa Maur Wailen wa ukwa melnum ipma krakgen weten ur ai wa palng eng ngklinso pa, pa kol a kalpis. Ari wa kil ukwa melnum ipma krakgen ur a akwap irir kol Melkisetek pa, pake kil pa ake wa kol tu melnum ipma krakgen wrongkwail a klung a Aron a om a Lipai pa, kalpis.
HEB 7:12 Eng ntei, pikekg Maur Wailen ngkat melnum ipma krakgen weten ti awi wrik a tu melnum ipma krakgen tingklaket pa pipa, pa mpa wa yangkipm titnongket weten a ak la melnum ipma krakgen weten ti, ti wa uwi wrik a yangkipm titnongket tingklaket a ak la melnum ipma krakgen tingklaket pa, ake mpa yangkipm titnongket tingklaket pa itni, mpa kalpis.
HEB 7:13 Eng ntei, melnum ipma krakgen weten a mentepm la ti pa, kil pa pikekg ake palng wli om a Lipai pa, kil a om a mapming manet. Ake pikekg wris ur atuwen pa akwap a melnum ipma krakgen pa atnen tipmakg a lap wlikgok al wor uk Maur Wailen atne atne pa ak ai kul pa.
HEB 7:14 Melnum ipma krakgen weten ti pa Wailen amentepmen Sisas. Ti mentepm wrongkwail ariwe ise la kil pa melnum a pikekg palng wli om a Suta. Pake Moses pa pikekg ake wa la ur la melnum ur a om a Suta pa ikga itni ikwap a melnum ipma krakgen a Maur Wailen pa.
HEB 7:15 Melnum ipma krakgen weten ti a pikekg palng pa kil irir kol Melkisetek, atom pa planto angko wunong mentepm ariwe worwor la melnum ipma krakgen weten ti pa kil akwap klangkil tu melnum ipma krakgen a om a tu Lipai ai.
HEB 7:16 Yangkipm titnongket tingklaket pa la tu om a Lipai pa kolti kol a itni melnum ipma krakgen pake. Pake Sisas pa kil alkil antiwe yaprekg watin a antokg kil rpma yongkyong atom kil palng melnum ipma krakgen.
HEB 7:17 Ti wrkapm a Maur Wailen pa laron ak titnongketel pa la am aklale kolpake la, “Kitn pa itna melnum ipma krakgen kolpa itna yongkyong a akwap irir kol Melkisetek pa.”
HEB 7:18 Kolpa atom Maur Wailen ungkwan yangkipm titnongket tingklaket pa aye kai elngkitna yampingen, eng ntei, yangkipm titnongket tingklaket pa ake antiwe titnongket a ak angklin mla ur eng kil palng kukula pa, kalpis.
HEB 7:19 Yangkipm titnongket tingklaket a pikekg Maur Wailen uk Moses pa, pa ake wa antiwe titnongket a ak angklin mentepm melnum a kalkut kalkut ti eng palng kukula antiwe a kai wreren Maur Wailen pa, kalpis. Pake Maur Wailen wa akulento ya weten a ak angklin mentepm ti palng kukula antiwe a or ya weten pa kai wrerentel. Ya weten pa Sisas melnum ipma krakgen amentepmen. Pa ya wor wrisen ai angen ya a katnun yangkipm titnongket pa. Kolpa atom mentepm elng wulmpa itna ya rpma nungkwangen Sisas.
HEB 7:20 Wa Maur Wailen pikekg ake elng Sisas itna melnum ipma krakgen pa kalpmilel kolti pa, kalpis. Ep pa kil naren kil alkil ak titnongketel a kil la elng Sisas kil itna melnum ipma krakgen pa. A tu melnum ipma krakgen pikekg ep pa, pa kil pikekg elngten itna melnum ipma krakgen pa kalpmilel kolti, kil ake naren kil alkil ti ep plalng pa elngten itna pa, kalpis.
HEB 7:21 Pake Sisas ti pa pikekg palng melnum ipma krakgen pati atnen ep pa Maur Wailen kil naren kil alkil ak titnongketel yangkipm alkil a pikekg kil la atom Tepit nira ela wrkapm pa la, “Wailen, Maur Wailen, kil pikekg naren kil alkil ak titnongketel yangkipm alkil pa lanaki Sisas pa la, 'Kitn pa melnum ipma krakgen a rpma yongkyong kolpa rpma pake.' Ti kil ikgake plelngen nikgwalpm akilen pa eng kuina ur a pikekg kil la naren kil alkil pa kalpis.”
HEB 7:22 Kolpa wa kla weten a pikekg Maur Wailen lam pa wor wrisen wa titnongket klangkil kla tingklaket a pikekg kil lam ep pa. Wa Sisas kil alkil pa ak titnongketel kla a pikekg Maur Wailen lam ti la kil ikga ik kitila pa.
HEB 7:23 Wa kweiur manet weten pati wa kil: tu melnum ipma krakgen tingklaket a ak ak kwap eng alwor uk Maur Wailen pa tu pikekg wailet. Atom tiur pikekg akwap kolpa kai amo, wa tiur wa angklin wrik pa wa akwap karpo tita karpo tita, kolpa aye kai.
HEB 7:24 Pake Sisas ti pa am rpma pa rpma pake, kolpa ti ake antiwe wa melnum ur wa uwi wrik a kil pa itni melnum ipma krakgen ikwap pa, kalpis. Kil alkil pa ikga melnum ipma krakgen ikwap pa kolpa itni iye or pa kai pake.
HEB 7:25 Kolpa atom Sisas pa kil kol wanyun, atom tu melnum a or wanyun pa kai eng Maur Wailen pa, kil pa antiwe titnongket a akawi tu pa aye yaper kul wrisen anti Maur Wailen pa rpma yongkyong. Pati atnen kil pa rpma ak wang ti a ikga ikngklei wang iye or pa kai, eng awi ok atuwen pa rpma naki naki Maur Wailen pa la kil ngklinsen.
HEB 7:26 Mentepm la kol am uwi melnum tukgunakg ipma krakgen ur a kolpake eng mpa ngklinso pake: kil pa melnum klalen wor wrisen, kil pa pikekg ake antokg paipmpaipm ur, kil pa rukis wor kolti, kil pa pikekg Maur Wailen takweiyel elng itna manet takwleikgen mentepm wrongkwail kin kipman a antokg paipmpaipm itna kanokg ti, wa ayewel kaino anong wor akilen ai a ngkatel alkel titnongket a nang wailen klangkil kitnong a kanokg ti.
HEB 7:27 Wa kil pa ake wa melnum tukgunakg ipma krakgen kol tu melnum tukgunakg ipma krakgen wrongkwail pa. Tu pa pikekg lap wlikgok al wor uk Maur Wailen pa eng ak ungkwan paipmpaipm alntuwen pa ep, plalng pipa, wa ak ungkwan paipmpaipm a tu wrong kin kipman pa katnukg. Tu pa am ak ak kolpa akangklei wang pake. Kil ti pa ake ak kol tu pa, kil ti pa pikekg uk kil alkil ti kol wlikgok ur a al wor uk Maur Wailen ti anti wris kolti eng ak ungkwan paipmpaipm a mentepm wrongkwail kin kipman pa, pa am kil ak kai plalng kolpake.
HEB 7:28 Eng ntei, yangkipm titnongket a pikekg Maur Wailen uk Moses pa takwei tu melnum a kanokg ti itna melnum tukgunakg ipma krakgen pa, tu pa ake antiwe titnongket a rpma yongkyong aki itna klalen kukula wor wrisen pa. Pake yangkipm a pikekg Maur Wailen naren kil alkil atom kil wangkir a yapo pa kul katnun yangkipm titnongket a pikekg kil uk Moses pa, atom takwei Warim Kipman alkil pa itna melnum tukgunakg ipma krakgen kolpa itna aye or pa kai akangklei wang. Kil pa antiwe titnongket a itna klalen kukula wor wrisen.
HEB 8:1 Yangkipm tupmungkul yauwen wail a mentepm akor la kil pa pati kil: mentepm ti melnum tukgunakg ipma krakgen kolkil a ikgalento pa rpma: kil awi nang wailen anti Maur Wailen rpma kaino anong wor ai, Maur Wailen a itna ep ikgalen kweikwei wrongkwail a itna kaino kitnong ai a itna kanokg ti.
HEB 8:2 Kil melnum tukgunakg ipma krakgen a akwap itna kawor yalming a Maur Wailen. Pa yalming aklale a tita manto walkg tumpulmpis palk pa ak ale. Pa pikekg ake wa melnum a itna kanokg ti ale wan pa, pa pikekg Wailen, Maur Wailen kil alkil ai ale ai.
HEB 8:3 Tu melnum tukgunakg ipma krakgen a itna kanokg ti pa pikekg Maur Wailen takweiyen elngitna la tu iye iye kweikwei wor wor pa kai lkel lkel, a uwi wlikgok pa iye kai lap lap il wor uk kil pa. Kolpa ti wor wrisen kol a melnum tukgunakg ipma krakgen weten amentepmen ti mpa wa iye wlikgok ur kai lap il wor uk kil pa kol a tu pa ak pa, kil ampake wlikgok kalpisen a iye kai pa.
HEB 8:4 Kol kil rpmi kanokg ti pa, kil kol ake wa uwi kwap a melnum ipma krakgen a al al wor uk Maur Wailen pa, pa kol a kalpis. Eng ntei, tu melnum ipma krakgen alntu a ak ak kwap awi kweikwei aye kaingkai uk Maur Wailen pa am ak ak kwap kolpa itna pake, katila yangkipm titnongket a pikekg Maur Wailen uk Moses atom kil la pa.
HEB 8:5 Kwap a tu ak ak itna yalming a Maur Wailen a itna kanokg ti pa, pa kol mrangkum aki mirap kolti a ak plan kwap kweikwei a Sisas ak ak aklale itna kaino anong wor ai. Kol a pikekg Maur Wailen lanaki Moses la kil tita manto walkg tumpulmpis palk ik le yalming wail ur akilen pa, atom kil lanakel kolpa la, “Kitn ri ik kweikwei wrongkwail kitila riworwor kol mrangkum a pikekg kupm planteitn itna kaino tipmining pa.”
HEB 8:6 Pake kwap a pikekg Maur Wailen uk Sisas pa, pa wa wail manten angen kwap a tu melnum ipma krakgen ak ak pa. Ti am wa kolpake, Sisas ti melnum yangkipm kuin atom kla weten a pikekg Maur Wailen lam nampokgen mentepm ti pa wa wor wrisen, angen kla tingklaket a pikekg Moses pa itna melnum yangkipm kuin atom pikekg Maur Wailen lam nampokgen tu mentepm a pikekg ep pa. Wa kla weten ti pa wa wor wrisen atnen kuina ur a pikekg Maur Wailen wangkir a yapo weten ti la ikga ngklinso pa wa wor wrisen aktitnongketel kla weten ti, angen kuina ur a pikekg kil wangkir a yapo nampokgento ep la ikga ngklinso pa.
HEB 8:7 Ti kol kla tingklaket a pikekg Maur Wailen lam nampokgen tu mentepm a pikekg ep pa, kol pikekg ikwap kitila nikgwalpm akilen ai atom ik ntokg mentepm palng ute wor itni wulmpa a Maur Wailen pa, pa Maur Wailen kol ake wa pikekg lam kla weten ur ti pa, kol a kalpis.
HEB 8:8 Pake Maur Wailen ari la kla tingklaket a pikekg kil antiwen lam pa, ake wa akwap katila nikgwalpm akilen ai angklin tu wrong kin kipman pa palng ute wor kolai pa, kalpis. Kolpa atom kil pikekg la aklewen kolpa la, “Itning, kupm Wailen, Maur Wailen, la kolkil la, pikekg kupm alm wang ise, la ikga kupm lam kla weten nimpokgen tu om a Suta a wa tu wrong kin kipman a Isrel pa.
HEB 8:9 Ti kla weten a ikga kupm lam kil pa ake wa kol kla tingklaket a pikekg kupm lam ep nampokgen tu walyipmiri a wapyipmiri atuwen pa ak wang a kupm wamparpewen awiyen ayewen takwleikgen anong kanokg Isip pa kul pa. Eng ntei, tu pa pikekg ake wa ukipma itna titnongket katnun kla a pikekg kupm lam nampokgenten pa kolpa itna, kalpis. Kolpa atom kupm pikekg almpil yirokg lawen. Kupm Wailen, Maur Wailen, kupm la yangkipm kil kolpake.
HEB 8:10 Pake kupm ikga wa lam kla weten nimpokgen tu wrong kin kipman a Isrel ik wang kutnukg a pikekg kupm alm pa. Kla weten pa ikgake kol kla tingklaket pa. Kupm Wailen, Maur Wailen kupm la kolkil la, kupm ikga nira yangkipm titnongket akupmen pa eli lngkep atuwen, ti tu ikga riwe yangkipm akupmen pa riworwor, a kupm ikga nira eli kawor nol nikgwalpm atuwen, ti tu ikga itopen eng kutnun pa. Wa kupm ikga Maur Wailen atuwen a tu pa ikga wa wrong kin kipman akupmen.
HEB 8:11 Ti tu pa ikga riwe kupm ti riworwor, tu melnum a nang arke a tu melnum a nang kalpisen pa tu kimeket ikga riwe kupm ti. Ikgake melnum ur kiling plan yangkipm pa niki melnum anong wris ur alkil pa aki kiling plan wail wail aki wusok wusok ur alkil pa eng tu riwe kupm ti la, 'Kitn riwe Wailen pawo la kil pa Maur Wailen.' Eng ntei, tu pa ikga riwe kupm ti kimeket.
HEB 8:12 Eng ntei, kupm ikga reinsen atom ungkwan ker a kupm ak awiye paipmpaipm atuwen pa kai tukwleikgenten a kupm ikgake wa ikwonilmpen paipmpaipm atuwen pa rpmi pa, pa ikga kalpis.”
HEB 8:13 Yangkipm a pikekg Maur Wailen la ti pa am kai itna kolpake. Kla a ikga kil lam nimpokgento pa, pa pikekg kil la pa kla “weten”, pa kil planto la kla a pikekg kil lam nampokgen tu mentepm a pikekg ep pa am kai tingklaket ise. Kol kweikwei wrongkwail a kai tingklaket pa, pa am kai titnongket kalpisen ise, ti ikgake wa itni watinet pa, pa ikga kai plalng.
HEB 9:1 Aklale, kla weten a pikekg Maur Wailen lam nampokgento pa wor wrisen. Pake kla tingklaket a pikekg kil lam ep pa kweikwei tiur pa wor itna: yangkipm alkil a laron nako ya alkil a mentepm kapor kilko alein Maur Wailen kolai kolai katnun yangkipm pa wa itna, ti tu katnun kolpa itna; wa yalming alkil a tu mentepm a pikekg kapor kapor kilko aleinsel itna kanokg ti pa wa itna.
HEB 9:2 Wan yalming pa pikekg tu tita manto walkg tumpulmpis palk ak ale, atom tu angkli mpatning pa ak angketen wan ok pa wekg. Ur a tu melnum ipma krakgen kawor ep pa tu namput la wan ok klalen, a tu elng kweikwei kolkil itna wan ok klalen pa: tu elng kol kilpmat a ma tempil a ore wunei ok atnewe pa elngkitna eng lala wakg atne atne, wa tu elng tipmakg pa itna. Tipmakg pa tu elng noktingklak a tu melnum ipma krakgen alwor uk Maur Wailen pa armpe armpe.
HEB 9:3 Wa wan ok a tu alekg apm kaki wail pa rka ak angketen pa tu namput la pa wan ok klalen wakget a Maur Wailen.
HEB 9:4 Kawor wan ok klalen wakget wunen pa tipmakg a tu ak wes malungen muinmainet ak antokg pa itna, pa tipmakg a lap kweikwei yaprekget wor wor atnewe eng alwor uk Maur Wailen. A wa yotimpal a ak la kla a pikekg Maur Wailen antiwo lam pa wa rpma, pa tu ak wes malungen muinmainet pa ak antokg kapringen kimeket. Yo timpal wunen pa tu alupm kuntuk wes malungen muinmainet pa rpma, pa tu alupme okipma mana a pikekg Maur Wailen alken pa rpma, wa yo tuk a pikekg Aron ak atnen atnen pa ilkg kilkase anip atnewe pa, wa nampokgen wes pilmpalen wekg a pikekg Maur Wailen nira yangkipm titnongket alkil pa ele pa.
HEB 9:5 Itna kaino yo timpal kwa pa tu antokg kweiur malepmen klalen wekg kalingen kol maur akwapel wekg ak plan la pa wrik a Maur Wailen arpme. Tuwekg pa plelng won la tita ak upaarng yotimpal a tu ak yo wompel ak tikrawin yo timpal ok pa, pa wrik a Maur Wailen ungkwan paipmpaipm a mentepm wrong kin kipman atne atne. Pake ak wang ti pa kupm ake la laron yipuk a yiprokg a kweikwei wrongkwail pa kimek kimek ngko wunong pa, kalpis.
HEB 9:6 Kweikwei wrongkwail a itna wan yalming wunen a Maur Wailen pa am tu ak kolpake. Akangklei wang wris wris pa, tu melnum ipma krakgen pa tu kawor yalming pa akwap alntu a ak ak pa itna kawor wan ok klalen pa.
HEB 9:7 Pake kawor wan wunen tiwel a alekg apm kaki wail pa ak angketen pa, pa wan ok klalen wakget, mpa melnum ipma krakgen a itna tukgunakg pa kolti mpa kawor ntiwris a wring wris wris kolti. Kil ake mpa wampwampwris kolti kawor pa, kil mpa iye walmpopm nukurnum kawor eng mpa uk Maur Wailen eng ik ungkwan paipmpaipm a kil alkil ti a wa ik ungkwan paipmpaipm a tu wrong kin kipman a tu ake ariwe kuinaur a tu antokg ti la pa paipm pa.
HEB 9:8 Pa Maur Wor a Maur Wailen pa kaling planto yiprokgen a kweikwei wrongkwail a wet la pa la, tu ak ak kwap kolpa itna wan ok klalen a yalming pa itna nangkin kolpa itna pa, wanyun a kawor wan ok klalen wakget pa ake wa kukwa okore itna pa, a pa.
HEB 9:9 Tu ak ak kwap kolpa itna wan yalming a Maur Wailen pa kol mrangkum ur a ak plan kuina ur a palng ak wang ti. Tu katnun kla tingklaket a pikekg Maur Wailen anti tu a mentepm lam ep ak ai atom am itna kolpa kulngkul kul angko wang tike. Atom tu awi kweikwei pa aye wli uk wor Maur Wailen a tu awi wlikgok pa aye wli lap al wor uk Maur Wailen. Pake pa ake wa antiwe a antokg ok wusok a tu a kapor kilko alein Maur Wailen pa kukula wor wrisen pa, kalpis.
HEB 9:10 Kol tu ngklonake u a okipma kweikwei tiur pa, wa klak kweikwei a kurkuk klak num kimpilp eng la palng kukula wor itni wulmpa a Maur Wailen pa, pa kweikwei a num enen ti kolti a yangkipm titnongket pa la atom tu antokg katila pa. Am wa kolpa yat pake, tu uk kweikwei Maur Wailen a tu lap wlikgok al wor uk Maur Wailen pa, pa wa tu ak kweikwei a num enen ti kolti katnun yangkipm titnongket a la mpa tu ik kolpake. Pikekg Maur Wailen alken yangkipm titnongket pa la tu kutnun kolpa kaingkai, kai ngko wang a Maur Wailen alm la ikga ntokg kweikwei wrongkwail ti wa palng weten pipa, tu elngen kla tingklaket pawom.
HEB 9:11 Pake Krais pa am pikekg palng melnum tukgunakg ipma krakgen ise. Kil aye kweikwei wor wor wrongkwail a pikekg Maur Wailen wangkir a yapo la ikga ik ngklinso pa, ayento wli ak angklinso ak wang ti a ikga wa ik wang kutnukg ai. Kil kawor yalming a tu tita manto walkg tumpulmpis palk ak ale pa, pa yalming wail manten wor wrisen, pa ake kol wan ur a melnum ti ale ela kanokg ti pa, pa kalpis.
HEB 9:12 Kil kawor wan ok klalen wakget a Maur Wailen pa anti wris kolti. Pa ake pikekg kil aye walmpopm a wlikgok ur kol manto walkg tumpulmpis ur aki manto nepm watin war ur pa aye kawor pa, kalpis. Kil aye walmpopm a kil alkil ti kawor anti wris kolti ak armpen mentepm wrongkwail kin kipman ti ak angketen wrpmungkaung a paipmpaipm a yapowo ti eng mpa mentepm wirng no itni kukula wor yongkyong.
HEB 9:13 Kol melnum a kalkut kalkut pa, mpa melnum ipma krakgen ur a Maur Wailen pa kil uwi walmpopm a manto walkg tumpulmpis ur aki, walmpopm a manto nepm watin nongko ur pa. Aki kil ngkwol wakg yipan a tu lap manto nepm watin unu ur pa kai yipan atom ik u ngkon elng kinar kaimung pa atom ngkle yalong pa kinar u yipan pa laik ik rka melnum pa, pa walmpopm nampokgen wakg yipan a ak u angkon pa antiwe titnongket a ak antokg tu melnum a kalkut kalkut pa wa palng kukula wor antiwe a wa kawor yalming a Maur Wailen pa.
HEB 9:14 Ti walmpopm a Krais a pikekg ungkwan pa antiwe titnongket wail manten paipm wrisen klangkil walmpopm a wlikgok a pikekg tu al wor uk Maur Wailen pa. Kil pa kukula wor, atom pikekg Maur Wor a Maur Wailen a antiwel rpma yongkyong pa angklinsel alkel titnongket atom kil uk num alkil ti kol wlikgok pa lap al wor uk Maur Wailen pa. Atom walmpopm akilen pa ak ungkwan paipmpaipm a ak kimpilpel ok wusok amentepmen a la ikga iyewo kai imo pa, atom mentepm palng kukula rukis wor eng mpa mentepm kipor kilko ilein Maur Wailen a rpma yongkyong pa.
HEB 9:15 Maur Wailen wasrongen la tu wrong kin kipman a kil akwewen eng alkilen pa tu mpa uwi kweikwei wor wor a rpma wor yongkyong a pikekg kil wangkir a yapo antiwen la ikga kil lken pa. Am yiprokgen kolpa atom ari Krais pa palng kol melnum kuin a kla weten a Maur Wailen lam nampokgenten pa. Pikekg kil amo eng ak ungkwan paipmpaipm a tu wrong kin kipman a pikekg rpma orngwatneikgen kla tingklaket pa itna atom ak angketen eng tu wirng no kukula wor.
HEB 9:16 Yan ur la ikga warim alkil pa uwi num itnen kweikwei wrongkwail akilen a ikga kil imo utnuurng pa, pa kol kla ur a kil anel ak amprin kweikwei pa eng warim alkilen pa. Ikga warim alkilen pa la uwi num itnen kweikwei wrongkwail pa pipa, tu mring man pa tu ikga ri la yan pa am amo ise pipa, pa tu ikga uwi wor la kil uwi kweikwei wrongkwail a yan alkilen pawom. Pake tu riwe la yan alkil pa ake amo pa, warim alkil pa ikgake uwi kweikwei pa, ikga itni pen.
HEB 9:17 Eng ntei, kla pa ake wa titnongket ak wang a yan alkil pa rpma pa, a pa. Yan alkil pa imo pa, kla pa ak titnongketel warim pa la kil antiwe uwi kweikwei wrongkwail a yan alkil pawom.
HEB 9:18 Kol yan pa imo pa, warim pa antiwe ungkwan kla pa ngkli a uwi kweikwei wrongkwail a yan alkil pa. Ti am wa kolpake, kla ep a pikekg Maur Wailen lam nampokgen tu mentepm wrong kin kipman pa, pikekg tu alm wlikgok ur amo atom walmpopm ti ungkwan pa, kla pa antiwe titnongket a ak antokg kweikwei pake.
HEB 9:19 Ti tu pikekg ak kolkil: Moses pikekg angkleikg yangkipm titnongket wampwam a yangkipm wrongkwail a Maur Wailen a ela wrkapm alkil a yangkipm titnongket pa laron naki tu wrong kin kipman pa plalng pipa, wa kil wa awi walmpopm a manto nepm watin war pa, a wa kil wa awi walmpopm a manto walkg tumpulmpis pa, atom kil wa alung elng kinar u kaimung pa arongke. Wa kil awi walkg watet a manto walkg malkgu a tu angkuten itna yo isop talpuk wasek pa kol yalong pa angkle u walmpopm pa ak rka wrkapm a nira yangkipm titnongket ele pa a wa ak rka rka tu wrong kin kipman pa.
HEB 9:20 Atom kil ak rka rka la yangkipmen kolpa la, “Walmpopm kil pa walmpopm a ak titnongketel kla a Maur Wailen lam nampokgen kipm wrong kin kipman pa la kipm ukipma kutnun pa.”
HEB 9:21 Ti wa Moses kil wa akwap irir kol a wet kil ak ep pake: kil angkle yalong walmpopm pa wa ak rka rka yalming a tita manto walkg tumpulmpis palk ak ale pa kimeket a wa kil wa ak rka rka kweikwei wrongkwail a tu ak ak kwap itna yalming pa.
HEB 9:22 Ti aklale, yangkipm titnongket pa la kweikwei wailet a tu ak ak kwap itna yalming pa. Walmpopm a wlikgok pa ak yalongkel kweikwei pa ise, mpa palng kukula wor pake, a kweikwei aripm ur pa yangkipm titnongket ake la atom ake tu ak yalongkel pa. Kol ake tu ilm wlikgok ur pa imo atom ngkiten walmpopm pa lung eng il wor uk Maur Wailen pa, ti Maur Wailen pa ake antiwe mpa ungkwan paipmpaipm a melnum pa.
HEB 9:23 Kweikwei kil a tu ak ak kwap itna yalming a tita manto walkg tumpulmpis palk ak ale pa, pa tu ak ak katila kweikwei wor wor aklale alkil a itna kaino kitnong ai. Tu ake mpa kalpis pa, tu mpa uwi walmpopm a wlikgok eng ik yalongkel kweikwei pa mpa palng kukula wor pake. Pake walmpopm a wlikgok pa ake antiwe ik yalongen kweikwei wor wor aklale a itna kaino kitnong ai palng kukula wor pa, pa mpa uwi kweiur wor wrisen ai a angen walmpopm a wlikgok a tu al wor uk Maur Wailen itna kanokg ti.
HEB 9:24 Ti Krais pa pikekg ake kawor wan ok klalen wakget a Maur Wailen a melnum ti ale itna kanokg ti kol mrangkum a yalming wor aklale alkil a ela kaino kitnong ai pa, kalpis. Kil pikekg wampare kaino kitnong ai kolti, atom ak wang ti kil ak ak kwap a melnum kuin a itna Maur Wailen ai a itna mentepm ti angklinso angklinso kolpa itna.
HEB 9:25 Pake kil pikekg kaino eng mpa uk kil alkil ti kol wlikgok ur a al wor uk Maur Wailen pa anti wris kolti. Kil ake wa akwap pa anti watipmen, kol melnum tukgunakg ipma krakgen a Maur Wailen a akwap itna kanokg ti: akangklei wring wris wris pa kil awi walmpopm a wlikgok a tu al wor uk Maur Wailen pa aye kawor wan ok klalen wakget pa eng ak ungkwan paipmpaipm a tu wrong kin kipman pa. Pake pa ake walmpopm a kil alkil pa, pa kil awi walmpopm a wlikgok ai.
HEB 9:26 Ti pikekg kol Krais kil uk kil alkil ti ikngklei wring wris wris pa, kil kol a rki wleket imo nti watipmen ngkiten ngko kai a Maur Wailen antokg kitnong a kanokg, a kweikwei wrongkwail ai kolpa ikngklei wring wris wris iye kolpa kulngkul kul ti. Pake kil pa ake kolpa, kil pikekg nar ak wang umpuwen ti, uk kil alkil ti amo kol wlikgok a al wor uk Maur Wailen pa anti wrisen kolti eng ak ungkwan paipmpaipm a mentepm wrongkwail kin a kipman a kilmik aripm aripm ur ak ai kulngkul kul angko wang ti a wa ikga wa iye or pa kai.
HEB 9:27 Wa kol mentepm melnum ti pa ikga imo nti wris ita kolti atom ikga mentepm kai itni yangkipm wail a Maur Wailen pa. Atom kil ikga ri la ngkleikg ker a akawiye kwap na ur a pikekg mentepm ak kolai kolai pa.
HEB 9:28 Ti Krais pa am wa kolpake, kil pikekg amo anti wris ata kolti, kol wlikgok a al wor uk Maur Wailen eng ak ungkwan paipmpaipm a mentepm wrong kin kipman wailet yela kanokg ti. Ti kil ikga wa yaper nar ntiur pa, kil ake nar eng la ungkwan paipmpaipm pa, kalpis, kil nar eng la ik uwi mentepm wrong kin a kipman a ukipma rpma nungkwangentel ti kolti.
HEB 10:1 Yangkipm titnongket a pikekg Maur Wailen uk Moses pa la tu iye wlikgok kweikwei pa iye wli il wor uk Maur Wailen pa, atom tu katnun aye kweikwei wris pa or wrikel or wrikel wringkwringen kolpa itna. Pake pa ake kweikwei aklale alkil a ikga wa palng kutnukg pa, palpa kol mrangkum a plan ep ti pen. Kolpa atom pa ake antiwe mpa ntokg tu palng kukula wor wrisen itni lantlan antiwe kawor kul or wan ok klalen wakget a Maur Wailen pa, kalpis, kolpa atom tu ak ak itna.
HEB 10:2 Ti kol wlikgok a tu al wor uk Maur Wailen pa ntiwe ngklin eng ik ungkwan paipmpaipm a tu a wli wli kapor kilko alein itna yalming akilen pa palng kukula wor pa pipa, pa tu kol ake wa ok wusok atuwen pa wa rkiwen la tu antokg paipmpaipm ur pa, kol a kalpis. Pa tu kol ake wa iye wlikgok a kweikwei pa iye wli il wor uk Maur Wailen pa wa nti ur pa, kol a kalpis, pa kol am plalng ngko kai ise.
HEB 10:3 Pake ti ake wa kolpa, ti wlikgok a tu lap al wor uk Maur Wailen akangklei wring wris wris pa wa ak ngkat nikgwalpmel tu eng tu wa akwonalmpen paipmpaipm a pikekg tu antokg akangklei wring wris wris pa kolpa itna pa, ari pa paipm.
HEB 10:4 Yiprokgen a tu akwonalmpen paipmpaipm pa kolpa itna pati, atnen walmpopm a manto nepm watin nongko a manto walkg tumpulmpis pa ake antiwe titnongket a ak ungkwan paipmpaipm a mentepm melnum antokg pa, kalpis wrisen.
HEB 10:5 Ti am yiprokgen kolpa atom, pikekg ak wang a Krais kil wreren eng a nar kanokg ti pa, kil pikekg lanaki Maur Wailen pa la, “Kitn pa ake wasrongen kweikwei a tu ayenteitn wli alkeitn wor, a kitn ake wa wasrongen wlikgok a tu aye wli al wor uk kitn pa. Ari wa kitn numprampen palk a melnum pa la ikga kupm kinar nowe eng lkeitn kol wlikgok a alwor uk kitn pa.
HEB 10:6 Ari wa kitn ake wa atopen wlikgok a tu lap wakg al ongket ela tipmakg alkil a lap lap wlikgok kweikwei atnewe eng ak ngkat nang akitnen pa. A wa kitn ake wa atopen wlikgok a tu al wor uk kitn pa eng ak ungkwan paipmpaipm a tu pa.
HEB 10:7 Kolpa atom kupm lanakeitn la, 'Maur Wailen, kupm am itna tike. Ti kupm mpa ik kitila nikgwalpm wasrongen a kitn alkitn pa la pake, kol a pikekg tu nira ak la kupm ti ela wrkapm akitnen pa.'”
HEB 10:8 Pikekg Krais lanaki Maur Wailen kolpake. Ti kupm mpa nira or wrikel oklala akilen pa. Ti kipm itning: ep pa kil la kolkil, “Kweikwei a tu ayenteitn wli alkeitn wor, a wlikgok a tu al wor uk kitn pa, pa kitn ake wasrongen. A wlikgok a tu lap wakg al ongket eng ak ngkat nang akitnen pa, wa wlikgok a tu al wor uk kitn pa eng ak ungkwan paipmpaipm atuwen pa, kitn ake wa atopen la mpa ik kolpa, kalpis.” Oklala a pikekg Krais la ep pa kolpa. Pake kweikwei a tu ak ak kwap kolpa pa am katnun yangkipm titnongket a pikekg Maur Wailen kil alkil uk Moses pake, ti antokg kolai atom Maur Wailen ake wa wasrongen kweikwei a tu akwap kolpa!
HEB 10:9 Ti Krais pikekg la ep kolpake, wa kil wa angkine lanaki Maur Wailen kolkil la, “Kitn ri, kupm am itna tike. Ti kupm mpa ik kitila nikgwalpm wasrongen a kitn alkitn pa la pake.” Krais lanaki Maur Wailen pa kolpa plalng pipa, Maur Wailen wa elng kla tingklaket a lap wlikgok al wor uk kil pa arukge kai yampingen ai, wa kil elng Krais pa kai angklin wrik kol kla weten ur a kil lam nampokgen mentepm wrong kin kipman ti.
HEB 10:10 Ti am nikgwalpm wasrongen a Maur Wailen alkil a la ik mprin mentepm wrong kin kipman ti eng alkilen pa. Atom pikekg Sisas Krais kil katila nikgwalpm a Maur Wailen pa atom kil uk num alkil pa amo kol wlikgok ur a tu lap alwor uk Maur Wailen eng ak ungkwan paipmpaipm amentepmen pa anti wris kolti, kil ikgake wa ik nti ur, pa kalpis.
HEB 10:11 Tu melnum ipma krakgen wrongkwail pa tu ak ak kwap alntuwen pa kolpa itna, a tu awi kweikwei pa aye kai al wor uk Maur Wailen pa kolpa akangklei wang wris wris kolpa itna. Tu am akwap or wrikel kweikwei wris pa akangklei wang kolpa itna katila kla tingklaket a tu al al wor uk Maur Wailen pake. Pake wlikgok a tu lap alwor uk Maur Wailen pa, pa ake antiwe titnongket a ak ungkwan paipmpaipm a tu mentepm wrong kin a kipman pa kalpis.
HEB 10:12 Ti tu melnum ipma krakgen pa am ak ak kwap kolpake, a Krais pa kil pikekg uk num alkil ti amo kol wlikgok a al wor uk Maur Wailen pa anti wris kolti eng ak ungkwan paipmpaipm a tu wrong kin kipman pa kai plalng. Atom kil am pikekg kaino awi nang wailen anti Maur Wailen pa rpma kaino anong wor ise. Wa kwap a pikekg kil ak pa wor wrisen antiwe titnongket a ikga itni yongkyong iye or pa kai.
HEB 10:13 Ti kil ikgam rpmi kaino pa rpmi nungkwangen kolpa rpmi i i, Maur Wailen kil lok ngkli tu wrongmanto a Sisas pa rmpi atom Sisas rkganti iye itni.
HEB 10:14 Kil pikekg kaino anti Maur Wailen rpma ise, eng ntei, kwap a pikekg kil ak eng akarmpen mentepm melnum ti pa, am pikekg kil ak anti wris kolti kai plalng kolpake, atom antokg mentepm melnum a pikekg kil amprinso eng Maur Wailen pa mentepm ikgam rpmi klalen rukis wor wrisen yongkyong kolpa kai pake.
HEB 10:15 Wa Maur Wor a Maur Wailen a rpmangkawor ipma amentepmen pa wa lanako ak titnongketel la pa aklale wrisen, atom ep pa kil aktitnongketel yangkipm a nira ela wrkapm a Maur Wailen pa la kolpa la,
HEB 10:16 ”Maur Wailen kil la kolpa la, 'Kil kla weten a ikga kupm lam numpokgen tu wrong kin kipman ik wang kutnukg. Kupm ikga elng yangkipm titnongket akupmen pa rpmi kawor nol nikgwalpm atuwen, a wa nira eli lngkep atuwen pa.'
HEB 10:17 A kil wa la kolpa la, 'Paipmpaipm a pikekg tu antokg eng ak kapor yangkipm titnongket akupmen pa, kupm ikga uk yirokg woniketen paipmpaipm pa.'”
HEB 10:18 Maur Wailen pikekg lam kla weten kolpa ti kol kil pikekg ungkwan ker a akawiye paipmpaipm a melnum ur pa plalng pipa, pa ake antiwe mpa wa ilm wlikgok ur lap il wor uk Maur Wailen eng ik ungkwan paipmpaipm pa wa ntiur pa, kalpis wrisen.
HEB 10:19 Kipm melnum akupmen a mentepm ukipma Krais ti, pikekg walmpopm a Sisas pa ungkwan, atom mentepm antiwe a kawor wan ok klalen wakget a Maur Wailen pa, mentepm ake mpa ngkirk.
HEB 10:20 Ti apm a alekg ak angketen wan ok klalen wakget pa am rakol okore ise. Kil pikekg uk num alkil ti rakol kol apm kaki wail a tu alekg rka ak angketen wan ok wekg pa a ak amprinso ya pa, atom ak akulento ya weten wor a alko yaprekg watin a antokg mentepm rpma wor yongkyong.
HEB 10:21 Wa mentepm ti pa melnum wailen ipma krakgen pa ikgalento rpma pa, kil yan a ikgalen mentepm yalming a Maur Wailen pa.
HEB 10:22 Mentepm ariwe la kil pikekg awi walmpopm alkil pa laik ak rka nol nikgwalpm amentepmen pa palng kukula wor, wa kil ak u wriwen wor alkil ak kaluk num amentepmen ti atom palng rukis wor ise, atom ya okore itna pa. Kolpa ti mentepm mpa or ya pa kawor kai wreren Maur Wailen pa nimpokgen nikgwalpm iklale, a nikgwalpm wris kolti.
HEB 10:23 Wa mentepm mpa wa rkul ipma itni titnongket laron kuinaur a mentepm ariwe atom mentepm ukipma rpma nungkwangen pa. Eng ntei, Maur Wailen pa ake melnum a kansil, kuinaur a pikekg kil antiwo wangkir a yapo pa, mentepm ariwe la kil ikgam ik kitila kolpake.
HEB 10:24 Wa mentepm mpa wulmparpme tita ikglen tita riworwor a ik titnongketel tita eng mpa mentepm wris wris plan ipma wor wasrongen tu mla ur ai a wa ntokg nikgwalpm wor wor kolti.
HEB 10:25 Wa mentepm wris wris mpa kaingkai nti tu mapming a mentepm ukipma Krais pa tukwem rki or wris kipor kilko ilein Maur Wailen ik titnongketel tita, a ake mpa mentepm elngen kol a tu tiur ak pa. Kipm ri wang a ikga Krais yaper nar pa am kul wrer a wrer tike, ti mentepm mpa nikgwalpm rkekgen ik titnongketel tita itni kolpa iye kai.
HEB 10:26 Eng ntei, kol mentepm am pikekg ariwe worwor nikgwalpm aklale a Maur Wailen pa ise. Ari wa mentepm tiur pa wa erkisen la wa ntokg paipmpaipm pa kolpa wa iye kai pa, pa ake wa wlikgok ur aki kweiur wa itna wai la ikga wa ik rmpen paipmpaipm pa wa nti ur pa, kalpis wrisen.
HEB 10:27 Kweiur paipm wrisen numprampen elngto itna nungkwangen wang a ikga Maur Wailen iyewo kai itni ntokg yangkipm wail alkil pa, ti mentepm ya kalpisen a ikga mentepm ngkom nilokgen ipma wakget akilen pa kol wakg wail titnongket a ikga il mentepm mla ur a almpil yirokg lawel pa.
HEB 10:28 Kol melnum ur kipor yangkipm titnongket a pikekg Maur Wailen uk Moses pa, atom kol melnum wekg ur aki, wraur ur, nungkulkg a wulmpa eng melnum a pikekg antokg paipm pa atom laniki melnum a rpma atning yangkipm pa la, “Ei, melnum pa am pikekg antokg kolpake”, pa tu ake mpa rein aki iye lawel pa, kalpis, mpa tu orel imo kolti.
HEB 10:29 Ti kol melnum ur kil lmpil yirokg la Warim Kipman a Maur Wailen pa kol ipik palk a kil angkli elng kinar kanokg atom ak nepm raingen kol kweiur paipm pa; wa kol kil wa la walmpopm a Krais a pikekg Maur Wailen kil antiwel lam kla eng ak amprinsel eng alkilen pa la, palpa walmpopm a melnum ur kolti; wa kol kil wa la paipmel Maur Wor a Maur Wailen a pikekg areinsel a plantel ipma wor pa pipa, mpa kipm ikwonilmpen la mpa ntokg kolai melnum a antokg kolpa? Pa ikga kil uwi wleket paipm ngko mis ikilmpe paipm a kil antokg pa klangkil wleket a melnum a kapor yangkipm titnongket a Moses pa awi pa.
HEB 10:30 Ti kil ikgam uwi wleket paipm wrisen pake, eng ntei, mentepm ariwe Maur Wailen pa, kil ikga ikilmpe pa. Kil pikekg la kolpa la, “Kwap a akalmpe pa, pa kwap a kupm alkupm kilke. Pa ikga kupm alkupm kil ikilmpe paipm kuina ur a melnum ur pa antokgteitn pa.” A yangkipm ur wa la kolpa la, “Wailen, Maur Wailen kil alkil ikga rpmi itning yangkipm a tu wrong kin a kipman akilen atom ikilmpe kitila kuina ur a pikekg tu antokg pa.”
HEB 10:31 Ti Maur Wailen pa kil melnum a rpma yongkyong antiwe titnongket wrongkwail, kol kil rkul melnum a la paipmel Krais a walmpopm a kil, aki Maur Wor a kil pa, atom kil la ntokgtel kolai kolai pa, melnum pa ikga ngkirk num nantiwe warwar paipm wrisen uk num alkil ti kolti kai la kil ntokgtel kolai kolai pa, pa itna kai nikgwalpm a Maur Wailen kil alkil pa.
HEB 10:32 Kipm ikwonilmpen wang wor a pikekg wakg klalen ur a Krais nar alento pa! Pa pikekg kalkuten wailet palngtepm atom wonet paipm eng kipm, pake pa ake wa alok angkliwepm pa, kalpis, kipm pikekg ukipma itna titnongket wor kolpa itna.
HEB 10:33 Wang tiur pa pikekg tu awiyepm aye kai itna wulmpa a tu wrongkwail atom tu la aknokgelepm ari paipm a alkepm wleket. A wang tiur pa pikekg kipm wa akalen tu tiur a tu la paipmel a aknokgelen alken wleket wail wail pa ak num karkitiwen angklinsen.
HEB 10:34 Kol pikekg tu arkul tiur a kipm pa ayewen kawor rpma wan tipmining pa, kipm pikekg wa kai or wris nampokgen tu pa ak angklinsen. Wa tu pikekg akikgwampel kweikwei akipmen pa, kipm pikekg atopen wor rpma kolti, eng ntei, kipm ariwe la kipm ikga uwi kweikwei wor wor a klangkil pa a pikekg Maur Wailen elngtepm itna a ikga itni wor yongkyong pa.
HEB 10:35 Kipm pikekg ukipma itna titnongket ak wang a kalkuten wrongkwail palngtepm pa, ti ampur wa kipm wa elngen a ukipma itna titnongket kolpa angko ya pa. Eng ntei, kol kipm itni titnongket kolpa pa, pa ikga kipm uwi kweikwei wor wor a pikekg Maur Wailen elngtepm itna ak namputepm pa.
HEB 10:36 Kol kipm rkul ipma itni titnongket pa, mpa kipm ntiwe ntokg kuina ur kitila nikgwalpm wasrongen a Maur Wailen pa, wa kipm wa ntiwe uwi kweikwei wor wor a pikekg kil wangkir a yapo nampokgentepm pa.
HEB 10:37 Ti wrkapm a Maur Wailen pa la kolpa la, “Ti ikgake wa itni wang watin, ikga itni wang tukwok waiketn kolti, ti melnum a pikekg lawen la kil ikga nar pa, kil ikgam nar pake, kil ikgake i mpenet pa, kil ikga nar pinterngen kolti.
HEB 10:38 Pake melnum a kil antokg kuina ur katila nikgwalpm wasrongen akupmen pa, kil ukipma kupm pa pipa, kil pa arkolng yaprekg watin akupmen pa. Ari kil wa ngkirk rkolng yaper kai pa, pa kupm ake mpa ipma wor itopen melnum pa, kalpis.”
HEB 10:39 Pake mentepm ti pa, mentepm ake wrong kin a kipman a ikga ngkirk rkolng yaper kai atom ikga uwi paipm pa kalpis. Mentepm wrong kin kipman a ukipma Maur Wailen ti pa, kil ikga ik uwiyo iye kaino ntiwel rpmi wor yongkyong.
HEB 11:1 Yiprokgen a mentepm ukipma pa pati itna kolkil: kuina ur a mentepm akwonalmpen rpma nungkwangen pa, pa mentepm ukipma titnongket ariwe la pa am itna pake, a mentepm ake ari ak wulmpa ti pa, a pa. Pake nikgwalpm a mentepm pa ak ari arken kol a mentepm akwonalmpen la pa ikg am palng kolpake.
HEB 11:2 Tu walyipmiri wapyipmiri amentepmen a pikekg ep ak ai pa tu pikekg ukipma Maur Wailen pa atom kil kaporngken yangkipm awi wor lawen.
HEB 11:3 Am atnen a mentepm ukipma pa atom mentepm ariwe la kitnong a kanokg a kweikwei wrongkwail a pikekg Maur Wailen antokg ti pa, kil la ak ok ti kolti pa kweikwei pa palng. Kitnong a kanokg a kweikwei wrongkwail a mentepm ari ti pa, pikekg palng kai kuina ur a ake mentepm ari ak wulmpa.
HEB 11:4 Am atnen a pikekg Apel kil ukipma Maur Wailen pa atom wlikgok a kil al wor uk Maur Wailen pa, Maur Wailen kil atopen pake. A kweikwei a wailen alkil Ken a pikekg al wor uk Maur Wailen pa, Maur Wailen kil karken. Pikekg Maur Wailen karpo yangkipm ute wlikgok a Apel al wor alkel pa pati plan la kil kaporng yangkipm awi wor la Apel pa la, kil pa melnum ute wor wrisen, am atnen a pikekg Apel pa ukipma pake. Ti Apel pikekg amo ise, pake a kil ukipma Maur Wailen pa pikekg ak angklin tu a ak ai kulngkul wa ak angklin mentepm ti wa iye or ti kai.
HEB 11:5 Ti Enok pa am wa pikekg ukipma Maur Wailen kolpa yat pake, kolpa atom kil pikekg ake amo pa, kalpis, kil pikekg Maur Wailen awiyel nampokgen num palk ti tital ampen tu melnum ti aye kaino kitnong ai. Ti wrkapm a Maur Wailen pa la kolpa la, “Pikekg ake melnum ur ariwel la kil kai a i pa kalpis, eng ntei, kil pikekg Maur Wailen awiyel aye kaino kitnong ai.” Pikekg Enok kil rpma kanokg ti a pa, kil antokg Maur Wailen kil ipma wor atopentel kaporngkel yangkipm, plalng pa, kil awiyel aye kaino kitnong ai.
HEB 11:6 Kol melnum ur ake ukipma Maur Wailen pa pipa, ake antiwe mpa kil ntokg Maur Wailen pa ipma wor itopentel pa, kalpis. Eng ntei, kol melnum ur kil la kul eng Maur Wailen pa, kil mpa ukipma riwe la Maur Wailen pa rpma pa, a kil mpa ukipma riwe la Maur Wailen pa melnum a akalmpe mlaur a akorel pa.
HEB 11:7 Ti Nowa pa am pikekg wa kolpake, kil pikekg ukipma Maur Wailen pa, kolpa atom kil atning orngwatneikg katnun ok a Maur Wailen lanakel kaikuten wail a ak wang pa itna ampen a ikga palng kutnukg pa. Kil atning kolpa, a kil ale wan unokgen ur pa la ik ngklin kil alkil ti a numpokgen tu kinwatnom alkil pa. Kil ale wan pa plalng pipa, kil awi tu kin watnom alkil pa aye kawor wan unokgen pa takwlelkgen kalkuten pa. Nowa pikekg ukipma Maur Wailen pa kolpa, atom pa pikekg ak plan tu wrong kin kipman pa la, tu antokg paipm atnen tu a ake pikekg atning nungkulkg ok a Maur Wailen pa. Pake Nowa pa pikekg Maur Wailen ari la kil pa melnum ute wor, am atnen a kil ukipma kil pake, kol kil ari la tu mlaur ukipma kil pa, pa kil awi wor lawen la, tu pa melnum ute wor.
HEB 11:8 Ti Apraam pa am wa pikekg ukipma Maur Wailen pa kolpa yat pake, kolpa atom kil atning nungkulkg ok a Maur Wailen lanakel la kil wrekg utnuurng anong kanokg alkil pa, a kil kul anong kanokg ur manet a kil ake pikekg ariwe anong pa. Kanokg pa pikekg Maur Wailen kil yapon yangkipm nampokgentel la lkel eng ikga kil kul ngkit anong rpme.
HEB 11:9 Atom Apraam pikekg kul rpma anong kanokg a pikekg Maur Wailen yapon yangkipm nampokgentel la ikga lkel pa. Pake kil ake la ngkit anong ur pa rpmi kanokgel rpmi pa, kalpis. Kil pikekg ukipma Maur Wailen pa atom kil pikekg kol melnum yaworen ur a angkol anong kanokg ur ai wli rpma. Kil pikekg almanon kweikwei alkil pa aye nakur num atn kai tita manto walkg tumpulmpis palk pa ak ale wan arpme rka pa rka pa kolpa kai pake. Wa warim kipman alkil Aisak pa wa walpopm alkil Sekop pa tuwekg am atn atn kolpa kai pake, kol a pikekg Apraam atn pake. Wa yangkipm a pikekg Maur Wailen yapon nampokgen Apraam pa, pikekg kil wa yapon nampokgen tuwekg pa, la tuwekg ikgam wa rpmi anong kanokg pa yat pake.
HEB 11:10 Ti Apraam pa pikekg ukipma rpma nungkwangen la ikga kaino rpmi anong wor a Maur Wailen a pikekg kil alkil yiprokgen a rpma ari akwonalmpen ep ak ai atom kil ngkat anong pa. Pikekg kil alkil ak kweikwei kalnten kalnten wor wor ak ale wan pa la ikga itni yongkyong. Ikg am Apraam pa kaino rpmi anong pa yongkyong kolen la pa anong yiprokg akilen pake.
HEB 11:11 Ti Apraam a Sara pa am pikekg kai wror a mayen ise. Sara pa kil pikekg kimpong ake antiwe a angket warim ur pa kalpis. Pake kil ukipma ariwe la Maur Wailen la ikga lkel warim ur kitila yangkipm alkil a pikekg kil yapon pa. Atom kil pikekg aye warim kipman wris pa.
HEB 11:12 Apraam pa am pikekg kai wror ise, atom num akilen pa plupm ake antiwe titnongket a angket warim pa. Pake am pikekg yan wris pa wangket ale warim watnom walwalpopm walyaru pa palng umpen wailet paipm wrisen kol kumeim a itna kaino kitnong ai wa kol wes ningkrapm itna unokg yamping ai, pa ake antiwe mpa melnum ur ngkleikg pa, kalpis.
HEB 11:13 Tu melnum a wet kupm la pa, tu pikekg ake awi kuinaur a pikekg Maur Wailen yapon yangkipm nampokgenten pa kalpis, pake tu ukipma Maur Wailen pa itna titnongket kolpa kaingkai tu amo. Tu pikekg ak wulmpa a maur wor ti itna watin ti ikg kaino ari anong yiprokg a itna am itna kaino watin ai, atom tu atopen wail manten ukipma la ikga tu kaino rpme pa. Wa tu pikekg ake wa num paipm eng laron tu alntu ti la tu melnum yaworen a angkol anong ur ai wli rpma wang waiketn kolti, a kanokg a tu rpma ti pa ake anong nep kulung atuwen pa, kalpis.
HEB 11:14 Pikekg tu ukipma atom pikekg tu la kolpake. Wa kol melnum ur kil laron kil alkil angko wunong kolpa pa, pa mentepm ariwe la kil am nikgwalpm arkekgen la yaper kaino anong nep kulung alkil pake.
HEB 11:15 Kol tu pikekg la anong yaworen alntu a pikekg tu atnuurng no ti la, tu la wa yaper kinar pa, ya pa kol a okore itni eng tu kol a wa yaper kinar anong yaworen alntu pa. Ari kalpis, tu ake wa akwonalmpen anong yaworen alntuwen pa kalpis, tu wa akwonalmpen la wa kaino anong manet.
HEB 11:16 Pa tu pikekg la kaino uwi anong kanokg mreren kaino kitnong ai a angen anong yaworen alntuwen a itna kanokg ti. Wa pikekg tu akwe Maur Wailen pa la, Maur Wailen atuwen, kil pikekg ake wa num paipm eng tu akwewel kolpa, kalpis, kil awi wor eng tu akwewel kolpa. Eng ntei, kil numprampen anong wor pa elng itna ak namput tu melnum a ukipma kil pa la, tu ikgam rpmi anong pake.
HEB 11:17 Maur Wailen pikekg yapon yangkipm nampokgen Apraam pa la, warim kipman alkil Aisak pa ikga ngketle kai wailet. Ari pikekg Maur Wailen la ri ipma a Apraam pa. Kolpa atom kil pikekg lanaki Apraam la, ikga kil lkel Aisak pa kol wlikgok ur a lap al wor uk kil pa. Woi, pa warim kipman wris anangket alkilen tuwa! Ari pikekg Apraam ukipma Maur Wailen pa atom kil pikekg uk Aisak pa numprampen la ilm imo kol wlikgok ur pa.
HEB 11:18 Yangkipm a pikekg Maur Wailen yapon nampokgen Apraam pa kil pikekg lanakel kolpa la, “Kupm yapon yangkipm nampokgenteitn la ikgam warim kipman alkitn Aisak pa kil ikga ngketle walwalpopm, walyaru yipetatnong akitnen pake, pa ikga palng umpen wailet paipm.”
HEB 11:19 Eng ntei, pikekg Maur Wailen yapon yangkipm nampokgen Apraam pa kolpa atom Apraam pa pikekg ukipma akwonalmpen la, kol kupm ilm Aisak ti imo pa, Maur Wailen kil antiwe ikga wa la kil wa wrekg rpmi pa. Atom pa kol a kil awi warim kipman alkil a kol a imo ai wa aye yaper kul rpma.
HEB 11:20 Ti Aisak pa am pikekg wa ukipma Maur Wailen pa kolpake. Kil pikekg la yangkipmen warim kipman wekg alkil Sekop ekg Iso pa la Maur Wailen mpa ngklinsen a ikglenten ik wang pa a ikga wa ik wang kutnukg ai. Kil pikekg ukipma ariwe la ikgam Maur Wailen ikglenten kolpake.
HEB 11:21 Ti Sekop pa am wa kolpake, kil pikekg wreren eng kil a imo ti pa, kil la yangkipmen walpopm wekg alkil a pikekg warim kipman alkil Sosep angket pa, lanaken la Maur Wailen mpa planten ipma wor alkil ngklinsen pa. Kil pikekg ukipma ariwe la Maur Wailen ikgam ikglenten kolpake. Kil la yangkipmen lanaken kolpa plalng kil elng ok manto pa itna yo tuk pa a kil ngkat nang a Maur Wailen pipa, kil amo.
HEB 11:22 Ti Sosep pa am wa kolpake. Wreren eng kil a imo ti pa, kil pikekg akwonalmpen yangkipm a pikekg Maur Wailen yapon nampokgen Apraam pa la, tu wrong kin kipman a Isrel pa ikga utnuurng Isip pa wa yaper kul anong yiprokg alntu Isrel ti. Sosep kil ukipma yangkipm a pikekg Maur Wailen yapon kolpa atom kil pikekg ngkat wonel tu wrong kin kipman ti la, pa ikgam palng iklale kolpake. Wa kil pikekg wa la tupmungkul akilen pa la ikga tu ngkit iye nimpokgenten kul ik wang a ikga tu utnuurng Isip pa.
HEB 11:23 Mansan a Moses pa am pikekg ukipma Maur Wailen pa kolpa yat pake. Atom ak wang a pikekg man pa raku Moses pa, tuwekg pikekg ake wa ngkark eng yangkipm titnongket a melnum tukgunakg a Isip pa la tu or tu warim kipman a tu kin a tu Suta raku pa imo kimeket. Tuwekg ari warim pa ari, warim wor arimo, kolpa atom pikekg tuwekg lam warim pa rpma a a kol kainil wraur.
HEB 11:24 Ari warim kin a melnum tukgunakg a anong kanokg Isip pa kil pikekg ari Moses pa atom kil ngkat warim pa aro kol warim kipman alkilen, atom pikekg tu akwe nampokgen melnum tukgunakg pa la warim kipman a warim kin a melnum tukgunakg. Kolpa kaingkai, Moses wrekg wail pa, kil ukipma Maur Wailen a tu alntu Suta pa atom kil karken a tu akwewel la kil warim kipman a warim kin a melnum tukgunakg a Isip pa.
HEB 11:25 Kil karken a atopen kweikwei wor wor a kil antiwe itna kanokg ti a ikga itni wang tukwok waiketn kolti pa, a wa ikga ik rkolng melnum pa kai ntokg paipmpaipm pa. Kil wasrongen la nti tu wrong kin kipman alkilen a ukipma Maur Wailen pa rki kalkuten a uwi wleket kol a tu arki pa.
HEB 11:26 Kil akwonalmpen titnongket rpma nungkwangen la kil ikga uwi kweikwei wor wor a Maur Wailen numprampentel ak namputel elngtitna la ikga lkel ai. Kolpa atom ari kil la uk kil alkil ti la tu la paipmel kil ti kol ikga tu la paipmel melnum a pikekg Maur Wailen naren la ikga ik uwi mentepm wrong kin kipman akilen pa pati, pa wor wrisen angen marpm a kweikwei wrongkwail wor wor a kil antiwe itna Isip ti.
HEB 11:27 Ti Moses pa am pikekg ukipma Maur Wailen kol tunteng walyipmiri wapyipmiri alkilen a pikekg ukipma pake. Kolpa atom kil pikekg wrekg alekgen tu wrong kin kipman a Isrel pa atnuurng anong kanokg Isip pa kul. Atom melnum tukgunakg a Isip pa pikekg ipma wakget paipm, pake Moses pa pikekg ake wa ngkark, kalpis. Eng ntei, pa kil pikekg kolen kil ari Maur Wailen a mentepm melnum ti ake antiwe ari ak wulmpa pa, kolpa atom kil pikekg itna titnongket arki kaikuten pa.
HEB 11:28 Ti am wa kolpake, Moses kil pikekg ukipma katnun ok a Maur Wailen pikekg lanakel kolpa atom ari kil lanaki tu wrong kin kipman a mentepm Isrel ti la, mpa tu ilm manto walkg malkgu war pa atom mpa tu uwi walmpopm pa ik inel wanyun wris wris alntuwen pa kimeket. Atom maur akwapel a Maur Wailen la ukwa nar la ilm tu warim payen a tu Isip pa imo pa, mpa kil ri walmpopm pa pipa, ake mpa kil ilm warim payen a tu Isrel pa. Atom Moses wa lanaken la mpa tu lap manto walkg malkgu pa ntokg okipma pa il itni kwawel eng tu kai. Wa kil elng oklala pa itna la ikga tu ntokg kitila kolpa ikngklei wring wris wris kolpa iye or pa kai, eng ikwonilmpen wang wail ti a maur akwapel a Maur Wailen mpa ikukule wan a tu Isrel ti kai, a mpa ilm tu warim payen a tu Isip pa imo plalng.
HEB 11:29 Ti tu a mentepm Isrel pa am pikekg kolpake, tu pikekg ukipma Maur Wailen pa atom Maur Wailen antokg Unokg Watet pa tapor kinar a tapor kaino, atom tu angkom or wes ningkrapm tingklak pa kai wompel ai. Tu Isip pa katnunten kolpa kai la mpa tu wa ngkom or wrik tingklak kol tu Isrel pa wa kai palng kai unokg wompel ai, ari kalpis, unokg pa tapor kintir kuntur nar aye wampure ak aloken ayewen kai alen amo plalng.
HEB 11:30 Am wa kolpake, tu a mentepm Isrel pikekg ukipma Maur Wailen pa atom tu katnun ok a Maur Wailen pa angkom kapringen yipmingki wes kalnten a kapringen anong Seriko pa kolpa itna wang wampwomis wampwompwekg pa kai plalng pa, yipmingki pa tapor elng nar paipm man man.
HEB 11:31 Reap, kin a angkli arkul tu kipman eng ak awi marpm pa am wa kolpake, kil pikekg ukipma Maur Wailen pa atom kil ak yakur melnum wekg a tu a mentepm Isrel a wli atn ikgampat ari anong wail pa, aye kai lam ikgalen rpma wan akilen pa kol melnum yiprokgen wor ur alkil. Kolpa atom ak wang a tuwekg yaper kul nampokgen tu alntu Isrel pa la ilm tu wrong kin kipman a Seriko a tu talpulng yangkipm a Maur Wailen pa, tu ake wa alm Reap pa, kalpis.
HEB 11:32 Kupm nira tiur kol a pake, ake mpa wa kupm wa nira lakiti tu melnum a pikekg ukipma Maur Wailen pa nikepm or pa kai pa. Kol kupm nira ik lanikepm tu melnum kil: Kition, a Parak, a Samson, a Septa, a Tepit, a Samuel pa a wa tu melnum okwripm a Maur Wailen a angkai ai kul ai pa pati, mpa yangkipm watin mleing paipm, ti wang kalpisentopm a kupm nira lakati la por a tu melnum wris wris pa.
HEB 11:33 Tu pa am wa kolpake, tu pikekg ukipma Maur Wailen pa atom tu akwap nampokgen titnongket a Maur Wailen kolkil: - tu tiur a tu pa alm tu melnum tukgunakg watipmen a ikgalen anong kanokg tiur pa alok angkliwen. - Wa tu tiur pa alok tu wrong kin kipman pa katila nikgwalpm ute wor a Maur Wailen wasrongen pa, - wa tu tiur pa ari a Maur Wailen angklinsen kol a pikekg kil yapon yangkipm la ngklinsen pa, - a wa tu tiur pa wa ampri okel nimpa tilpmingen wrongen paipm a itna ep klangkil wlikgok wrongkwail a la ilmpen ngkwreren pa. -
HEB 11:34 A wa tiur a tu pa, tu angkliwen elng kinar wakg titnongket paipm a naruk srurng nurnur pa, pake wakg pa ake wa alen, - wa tiur pa antiwe ngkark takwleikgen kowri a tu la ik ilmpen pa, - wa tu tiur a ake pikekg antiwe titnongket pa, tu wa palng antiwe titnongket wor, - wa tu tiur pa palng melnum titnongket wor a almpwrong, - wa tu tiur pa antiwe a alm ungkwan tu melnum tiur a almpwrong a angkol ur ai wli la ilmpen pa. -
HEB 11:35 A wa tu kin tiur a ukipma pa, tu pikekg ari tu tiur atuwen a pikekg amo pa Maur Wailen la atom tu wa wrekg rpma. Pake tu tiur a tu pa pikekg awi wleket wail wail kolkil atnen a tu ukipma Maur Wailen: - tu tiur a tu pa tu wrongmanto arkulen alken wleket wail wail ak kaporng nepm la tu uk yirokg Maur Wailen pa pipa, tu elngen a alken wleket pa. Ari kalpis, tu ake wa uk yirokg Maur Wailen pa, kalpis. Tu la tu ilmpen imowo, tu akwonalmpen la wor wrisen eng kol a tu imo utnurng kanokg ti pati mpa tu rpmi wor yongkyong pake. -
HEB 11:36 Wa tu tiur atuwen pa pikekg tu aknokgelen a ak wanteng pa ak akewen. Ake pikekg tu ak kolpa wris pa, kalpis, tu tiur pa pikekg wa tu yapo nepm wampel, a wa tiur pa tu awiyen aye kai rpma wan tipmning ai. -
HEB 11:37 Wa tu tiur pa pikekg tu ak wesel amo, - tu tiur pa tu ak ririok ak angketen wangkwekg, - a tu tiur pa tu almpen ak kowri pa amo. - Wa tu tiur pa pikekg aning manto walkg malkgu palk a manto walkg kakir palk pa kol apm atuwen pa, a wa tu rpma tukwok paipm wrisen atom tu atn kolpa kai tatu palpa. - Wa tu tiur pa pikekg tu alken kalkuten a anelen melkg ari paipm paipm.
HEB 11:38 Tu pa Maur Wailen awi wor lawen la tu pa wor wrisen. Pake tu wrong kin kipman a kanokg ti - arpmen paipmel la tu pa wor paipm ur kolti. Kolpa atom tu ngkark kai atn rka pa rka pa atn kolti tatu wrik kalpmlel a ake tu melnum arke pa, a kai kaino atn tatu kaino tipmining ai, wa tu okg rka tatu male a wa tatu yo klung a yo lmpatno ai.
HEB 11:39 Tu melnum pa pikekg ukipma Maur Wailen pa kolpa atom Maur Wailen kaporngken yangkipm la tu pa wor, pake tu ake pikekg awi kweikwei wor wor a pikekg kil yapon yangkipm nampokgenten la lken pa, a pa.
HEB 11:40 Eng ntei, Maur Wailen kil pikekg numprampento kweikwei wor wrisen ai elngto itna a klangkil kweikwei a kil pikekg yapon yangkipm la ikga lken pa. Kolpa atom kil ake wasrongen la mpa tu a pikekg ukipma ep pa uwi kweikwei pa ep pa, kalpis. Kil wasrongen la ikga tu ai wa mentepm ti kimeket ikga uwi kweikwei wor wrisen pa ngkompwris.
HEB 12:1 Wet kupm nira lakati tu wailet a pikekg ukipma Maur Wailen ep pa. Tu pa tu wrong wailet paipm a ak wail itna kapringento ari akentok la la mentepm ukipma kol tu melnum a ak kaporen tita pirng wulmpa itna ya pa. Kolpa ti mentepm mpa maleng rerngen kweikwei wrongkwail a ak kaikutelo pa, wa ungkwan paipmpaipm a kol kweiur a kul kai ak yapowo meen kolti pa. A mentepm mpa rkul ipma pa itni titnongket ik kiporen tita pirng kolpa kai wulmparpme wrik a tu la mentepm mpa pirng kai elngen pa.
HEB 12:2 Mentepm mpa elng wulmpa pa itni ikitnen Sisas! Kil pa melnum yiprokgen a pikekg pirng ep alekgento atom mentepm pikekg plelng ipma ukipma katnuntel. Wa kil wa melnum a pikekg pirng kai palng angko wrik a kai elngen pa, atom mentepm ari, ti mentepm mpa pirng kutnuntel kai elngen ngko wrik a pikekg kil pirng kai elngen pa. Kil pikekg akwonalmpen la kil ikga uwi atopen wail, kolpa atom kil pikekg uk kil alkil ti kolti, tu karkurngkel amo rka yo okgmangki ai, pa ya a tu alm tu melnum paipm amo kolpa pa alken num paipm wail. Pake Sisas pa ake pikekg akwonalmpen num paipm pa, kil pikekg awi num paipm pa rka kolpa kai amo pake. Kil pikekg amo plalng, wa kil wa wrekg kaino awi nang wailen anti Maur Wailen pa rpma.
HEB 12:3 Ti kipm ikwonilmpen kil a pikekg tu melnum a antokg paipmpaipm pa awi wrongmanto lan kil pa a alkel kalkuten a wleket wail manten kolpa. Ti kipm mpa ikwonilmpen kil pa, eng ake mpa kipm uwi ipma kalkuten atom kipm elngen a ukipma katnun kil pa kolpa kai pa.
HEB 12:4 Aklale, kipm almpwrong nampokgen paipmpaipm wrongkwail pa itna pa, pake ake wa ur alok angkliwepm alkepm yong walmpopm atom kipm amo kol pikekg Sisas almpwrong kai alung walmpopm atom kil amo pa.
HEB 12:5 Pati, kipm woniketen yangkipm a kol a lkepm titnongket a nikgwalpm weten kol yan wor lanaki kipm warim alkilen pa la kolkil la, “Warim kipman alkupm, kitn ake mpa ik lo numpel wleket a Wailen alkeitn eng ak alokeitn pa, wa kil la karkurngkeitn alokeitn paipm na ur a kitn antokg pa, pa ampur kitn wa ipma kalkut eng pa.
HEB 12:6 Eng ntei, Wailen kil alkeitn wleket eng ak alokeitn pa pati, pa plan la kil plan ipma wor wasrongenteitn; a wa kil ak wantengkeleitn pa pati, pa plan kol a kitn pikekg kil awiyeitn kol la kitn warim alkilen.”
HEB 12:7 Ti kipm kol a wonrpme yangkipm ai: kipm kawor kalkuten pa, Maur Wailen mpam kaling plantepm a alokepm kol pake, ti kipm rkul ipma pa itni titnongket! Kil aktepm kolpa kolen la kipm warim akilen. Ti warim mla a i ake mpa yan alkil la karkurngkel a la alokel pa? Tu yantin wris wris a tu warim pa, tu am ak tu warim alntu pa kolpake.
HEB 12:8 Kol Maur Wailen ake la karkurngkepm a la alokepm kol kipm warim alkilen pa, pa kil la kol la kipm ake warim nanikg walmpopm alkilen pa, palpa kipm kol warim ur a awi rmpa ya a yan kalpisen ai.
HEB 12:9 Wa kipm ikwonilmpen tu yantin amentepm a angket alewo itna kanokg ti pa, tu la karkurngko a tu la aloko pa, pa mentepm atning orngwatneikgen tu pa, pake wail manten pa mentepm kol a wa itning orngwatneikgen Yan amentepmen a alko Maur Wor pa, eng mpa Maur Wor alkil pa rpmento ikglento kolpa iye kai pake.
HEB 12:10 Tu yantin amentepmen ti pa, tu la karkurngko a la aloko katila ariwe alntuwen pa ak angklinso a wang tukwok waiketn ti kolti. Pake Yan a ikgalen Maur Wor amentepmen pa, kil pa akwonalmpen kuina a i wor la ik ngklin mentepm ti eng mpa mentepm uwi nikgwalpm wor klalen kol kil alkil pa, kolpa atom kil la karkurngko a la aloko pa.
HEB 12:11 Ak wang a yan ak wantengkel a alok tu warim pa, tu ake atopen, kalpis, tu awi wleket atom tu ipma kalkut paipm. Pake warim a kil awi ariwe paipm na ur a yan alkil ari la paipm atom kil alokel kolpa pa, ikga kutnukg pa kil ikga wa uwi ipma meen wor a uwi nikgwalpm ute wor pa kol okipma wor ur a ikga kil ngket tuwai pa.
HEB 12:12 Kalkuten a kipm awi awi pa wor eng ak alokepm, kolpa ti “kipm kipor ntran nepm a wam akipmen a amo plupm rka pa wa itni titnongket!”
HEB 12:13 Wa “kipm ipil ngkle ya a tungkuren tungkuren pa riworwor eng mpa kipm pirng ore riworwor wulmparpme ya ti ute kolti kai”, eng ake mpa nepm ur akipmen a amo plupm pa noorkg pa, kalpis, mpa wor kolti.
HEB 12:14 Ti kipm mpa nikgwalpm rkekgen rpmi meen ipma wris kolti nimpokgen tu wrongkwail kin a kipman pa. Wa kipm mpa nikgwalpm rkekgen rpmi klalen ute wor itni wulmpa a Maur Wailen ai, eng ntei, kol melnum ur ake palng klalen ute wor pa, kil ikgake ri Wailen pa, kalpis.
HEB 12:15 Kipm mpa wulmparpme ikglen tita, eng ake mpa ur a kipm pa ngko yaper kai utnuurng nikgwalpm wor a Maur Wailen angklinso pa. Am wa kolpake, kipm mpa wa wulmparpme ikglen tita, eng ampake ur a kipm pa wa lupm nikgwalpm paipm ur pa, pa kol mi paipm ur a anip itna wring pa atom ikga ik aur kweikwei pa atom ikga paipm pa. Atom ikga ntokg ipma a kipm wailet pa kai paipm itnen paipm a melnum wris pa.
HEB 12:16 Wa kipm mpa wa ikglen tita eng ake mpa ur akipmen ti wa ngkli rkul kin ur aki kipman ur pa, aki ntokg paipmel kweikwei wor wor a Maur Wailen pa, kol pikekg Iso wailen a Sekop antokg pa. Pikekg kil nikgalmpel atom kil takote kweikwei wor wor a yan alkil elng itna aknamputel kol warim ep akilen pa atom kil pirpiren kolti ak awiye u kuntuk klaing waiketn a Sekop pa al.
HEB 12:17 Kil ak kolpa plalng, wa katnukg pa kil la uwi kweikwei kol a warim ep a yan alkil elng itna ak namputel pa, ari yan alkil pa lanakel la, “Arein, kalpis tuwa.” Kil atning a yan alkil la kolpa, a kil akg arein paipm wrisen, ari kalpis, kil ya kalpisen a awi kweikwei wor wor a pikekg kil takote a yan alkil la kol a lkel pa. Kolpa ti kipm ikglen tita wo, eng ake mpa ur akipmen pa uk yirokg Maur Wailen atom kil tikote kweikwei wor wor pa kol pikekg Iso ak pa.
HEB 12:18 Kipm ake kai itna wreren kwei ur a melnum antiwe ari a wamanti pa, kolen pikekg tu walyipmiri a wapyipmiri a mentepm Isrel kai itna wreren tipmining Sainai pa, atom tu pikekg ari wakg wail a naruk itna tipmining pa, a wa waipmunu kalkut miningket ur pa nar ak aur tipmining pa, atom mining titno lep paipm. A wa pikekg tu ari u awei milmal poren paipm a wripm mring mring wail el itna tipmining pa.
HEB 12:19 Wa pikekg tu atning nol ur a tiplam yikakatnen pa, plalng pipa, wa tu atning ok ur oklala, ari tu karken ngkark paipm wrisen atom tu lanaki Moses pa la tu karken a wa atning ok pa wa la antiur pa.
HEB 12:20 Eng ntei, nikgwalpm a tu pa pikekg ngkrangen a atning ok a Maur Wailen a la kolpa la, kol melnum ur kil kai ik num inte tipmining pa pipa, mpa tu or ik wesel imo kolti. Ari wa kil wa la wlikgok pa yat la kol wlikgok ur wa kai ik num inte tipmining pa pipa, mpa wa tu wa ik wesel wlikgok pa wa imo kol tu pa yat.
HEB 12:21 Tu wrong kin kipman pa tu itna ari kweikwei titnongket paipm wrisen a palng itna kaino tipmining Sainai pa, atom tu ngkark warwar paipm wrisen kolti. Wa Moses wa la kil alkil pa la kolpa la, “Kupm ti am wa ngkark numnantiwopm warwar paipm wrisen kol pa yat pake.”
HEB 12:22 Pikekg tu walyipmiri a wapyipmiri amentepmen pa, tu pikekg kai itna wreren tipmining Sainai pa atom tu pikekg ngkark. Pake kipm ti pa, kipm am pikekg kaino itna tipmining Saion ise, kaino anong wor a Maur Wailen a itna yongkyong, pa anong weten Serusalem a ela kaino kitnong ai. Wa kipm pikekg kaino eng tu maur akwapel a Maur Wailen kamel kamel wailet paipm, ake antiwe mpa ngkleikg pa, tu wli takwem rka wris atopen rka anong pa.
HEB 12:23 Wa kipm kai eng tu warim ep mapming a Maur Wailen a takwem rka wris kapor kilko alein Maur Wailen pa rka, a pikekg Maur Wailen nira nang atuwen pa ela wrkapm akilen pa la tu am palng melnum yiprokg a anong pake. Wa kipm kai eng melnum a ikga rpmi eng ngkleikg ker pa ik uwiye kuina ur a mentepm wrongkwail ak itna kanokg ti atom ikga ikilmpe kitila pa, kil wa antiwen rpma, kil pa Maur Wailen a mentepm kimeket. Wa kipm kai eng maur a tu melnum a palng wor wrisen a Maur Wailen kaporngken yangkipm la tu melnum ute wor a pikekg amo kaingkai pa, tu wa antiwen atopen rka anong pa.
HEB 12:24 Wa kipm kai eng Sisas pa antiwel rpma, kil pa kla weten a pikekg Maur Wailen antiwo lam atom ukwawel nar kol melnum kuin a itna kil ai a itna mentepm ti. Wa kipm kai eng walmpopm a Sisas a pikekg kil ak rkawo ak titnongketel kla weten pa wa itna. Atom walmpopm pa walmpopm wor a ak ungkwan paipmpaipm amentepmen, pa ake kol walmpopm a Apel a kirkar akg akwe Maur Wailen pa la kil ikilmpe paipm a pikekg Kein orel amo pa.
HEB 12:25 Ti kipm mpa rpmi riwe eng ake mpa kipm lam nungkulkg eng ake la itning yangkipm a Maur Wailen lanakepm pa. Pikekg tu walyipmiri a wapyipmiri amentepmen pa tu pikekg talpulng ok a Maur Wailen naken itna tipmining Sainai a itna kanokg ti pa. Tu pa pikekg ya kalpisen a angkom nalokgen ipma wakget a kil a pikekg akalmpe paipmpaipm a pikekg tu antokg pa. Ti pikekg ak wang a kla tingklaket pa am pikekg kolpake, pake wa ak wang a kla weten ti pa, kol mentepm ukyirokg yangkipm a kil lanako angkaino kitnong ai nar pa, pa mentepm ikga ngkirk ngkom nilokgen ipma wakget akilen a ikga ikilmpe paipmpaipm a mentepm antokg pa la kolai? Pa kalpis wrisen, pa mentepm ikga wa uwi wleket paipm wrisen klangkil wleket a pikekg tu awi pa.
HEB 12:26 Pikekg ak wang pa, Maur Wailen pikekg oklala nampokgen titnongket, atom laik kanokg pa pikekg titu. Pake ak wang ti pa kil pikekg yapon yangkipm la kolpa la, “Kupm ikga wa laik kanokg ti titu yikakatnen paipm wa nti wris kolti, atom kanokg ti kai plalng. Pake ikgake wa kanokg pa wris pa, kupm ikga wa laik kitnong ai yikakatnen paipm wa titu kai plalng yat.”
HEB 12:27 A kil la la, “kil ikga wa laik kolpa nti wris kolti, kil ikgake wa laik kolpa wa iye or pa kai pa, kalpis.” Yiprokgen a kil la kolpa pati, kil la kolpa la, kweikwei wrongkwail a pikekg kil la atom palng ti pa, kil ikga laik titu kai paipm plalng tukwlelkgen, eng ikga kweikwei titnongket titnongket a ake antiwe titu pa ikga palng itna kati kati wor kolpa itna pa.
HEB 12:28 Maur Wailen awiyo aye or rpma yipmingki wunen a kil itna wailen ikgalen pa. Atom yipmingki pa ake antiwe ikga warwar aki titu ur kolai pa, kalpis wrisen. Kolpa ti mentepm a rpma or wunen pa mentepm mpa rkul nikgwalpm wor a kil angklinso pa atom lkel wor. Wa mentepm mpa lupm iyewel a ngkirk rpmi orngwatneikgentel.
HEB 12:29 Eng ntei, kil Maur Wailen amentepmen a klalen wakget paipm kol wakg titnongket wail a ak al kweikwei pa kai plalng pa.
HEB 13:1 Kipm mpa rkul ipma wor a wasrongen tita pa itni kolpa iye kai kolen la kipm alkipm melnum a ukipma Krais pa.
HEB 13:2 Kipm ake mpa woniketen eng kiporlei ikglen tu yiprokg watinet pa. Eng ntei, tu tiur am pikekg won mis kapor alei tu maur akwapel a Maur Wailen pa la tu melnum ur kolti, a tu ake wa ariwe la tu kapor alei tu maur akwapel a Maur Wailen pa, kalpis.
HEB 13:3 Kipm mpa ikwonilmpen tu melnum a rpma wan tipmining pa atom ngklinsen, kol la kipm alkipm ti wa antiwen rpma wan tipmining pa yat pake. Wa kipm mpa wa ikwonilmpen tu melnum a tu oren alken wleket pa, kol la num akipmen ti wa awi wleket kol a tu pa awi pa.
HEB 13:4 Kin a kipman a awi tita ti pa, pa kweiur wail wor wrisen, atom kipm kimeket mpa iken yipmingki ikglen pa riworwor. Ake mpa kipm wam naren ko apmel tita pa. Wa tuwekg kin a kipman a awi tita pa, mpa ikglen tuwekg alntuwekg ti itni rukis wor kolti. Kipm ariwe pa: tu a akwap numpaipm a angkli arkul tita pa, Maur Wailen ikga uwiyen iye kai itni ntokg yangkipm, atom lken wleket ikilmpe paipm a tu antokg pa.
HEB 13:5 Kipm ake mpa nikgwalpm rkekgen eng la uwi marpm pa. Kipm mpa uwi wor itopen ur a kipm awi kolai pa, pa am apake. Eng ntei, Maur Wailen kil alkil la kolpa la, “Kupm ikgake lmpil yirokg laweitn aki rkolngkeitn wam utnuurngkeitn rpmi ik lmpo pa, kalpis wrisen.”
HEB 13:6 Maur Wailen kil alkil la ise, kolpa ti mentepm ake mpa ngkirk, mentepm mpa ik titnongketel ipma a mentepm almentepm ti kolkil la, “Wailen pa melnum a angklinsopm, kolpa atom kupm ake ngkark. Kolpa ti melnum mla a i mpa ntokg kupm ti?”
HEB 13:7 Kipm ikwonilmpen tu melnum wailen wailen akipmen a pikekg ikgalen kipm wrong kin kipman a ukipma pa, tu a pikekg laron yangkipm wor a Maur Wailen pa lanakepm pa. Ti kipm mpa ikwonilmpen ri la tu pikekg atn a rpma a akwap kolai, kaingkai tu kai amo pa, ti kipm wa ukipma Sisas Krais pa itni titnongket kitila kol a pikekg tu pa ukipma pa.
HEB 13:8 Sisas Krais pa kil akangklei wang itna kol kil alkil pa itna pa, pikekg ak ai, a wa ak wang ti, a wa ikga ik wang kutnukg ai, pa kil ikgam itna kol kil alkil pa itna pake.
HEB 13:9 Kipm ake mpa uk ya ur eng tu mla ur kolai kolai kiling plantepm yangkipm manet manet aur aur pa, mpa wa akarkolngkepm aye kai takwuleikgen yangkipm aklale pa. Tu elng okipma kweikwei a angklonake kolpa itna la kipm kutnun pa pati mpa ik titnongketel ipma akipmen a kipm ukipma Sisas pa. Pake pa ake wa ak titnongketel ipma a tu a katnun angklonake pa. Pake kuina ur antiwe a ak titnongketel ipma amentepmen ti pa, pa ipma wor a Maur Wailen a ak akangklinso. Pa wor kol a mentepm elng ipma wor a Maur Wailen ak angklinso pa ik titnongketel ipma amentepmen pa.
HEB 13:10 Mentepm ti tipmakg ur amentepm a elng wlikgok armpe armpe eng al wor uk Maur Wailen pa itna. Pake tu melnum ipma krakgen a mentepm Suta a ak ak kwap itna yalming a Maur Wailen katila ya tingklaket pa, tu pa ake antiwe a il wlikgok a rmpa tipmakg amentepmen pa, kalpis.
HEB 13:11 Anti wris a wring wris wris pa melnum tukgunakg ipma krakgen pa kil awi walmpopm a wlikgok pa aye kawor wan ok klalen wakget a yalming pa al wor uk Maur Wailen pa eng ak ungkwan paipmpaipm a mentepm wrong kin kipman pa. Pake wlikgok num pa tu lap wakg al kai ongket itna wrik laikge ur ai takwlelkgen wrik a tu wrong kin a kipman arke pa.
HEB 13:12 Am yiprokgen pa atom Sisas kil pikekg awi wleket tu orel karkurngkel amo itna kawor yipmingki enen a anong wail pake, la ik walmpopm alkil pa ik ungkwan paipmpaipm a tu wrongkwail kin a kipman pa, atom ik mprinsen elng itni manet eng Maur Wailen pa.
HEB 13:13 Kolpa ti mentepm kaworntel kawor en ai kai itni wrik laikge a pikekg tu orel karkurngkel atne ai tukwleikgen wrik a tu wrong kin a kipman arke ti, atom uwi wleket a numpaipm pa kol a pikekg kil alkil awi pa.
HEB 13:14 Eng ntei, ake anong ur a itna kanokg a ti pa kol anong nep klung ur a mentepm a ikga rpmi yongkyong pa. Mentepm ariwe la anong nep klung amentepmen pa itna, atom mentepm rpma nungkwangen anong pa rpma pa.
HEB 13:15 Kolpa ti mentepm mpa naren Sisas pa ngkit nang a Maur Wailen a uk wor kil pa ikngklei wang, a wa mentepm mpa laron ik ok ti la kil pa Wailen amentepmen, pa kol okipma kweikwei wor wor a mentepm aye kai al wor uk Maur Wailen pa.
HEB 13:16 Wa kipm ake mpa woniketen eng plan tita nikgwalpm wor, wa uk kweikwei akipmen ti ik ngklin mla ur ai. Eng ntei, nikgwalpm wor a kolpa pa, pa kol wlikgok wor ur a mentepm lap al wor uk Maur Wailen pa atom kil karpo yangkipm ute.
HEB 13:17 Tu melnum wailen wailen a Maur Wailen a ikgalen kipm wrong kin a kipman a ukipma Maur Wailen pa, tu ikgalen maur wor akipmen pa ariworwor, eng ntei, tu ikga wa iye ker alntu a akawiye kuinaur kwap a tu ak eng ikgalentepm ak wang ti, uk Maur Wailen eng ikga kil ngkleikg. Kolpa ti kipm mpa rku kipm alkipm ti itning nungkulkg rpmi orngwatneikgen tu pa, eng mpa kwap kuina ur a tu ak pa, mpa tu ik nimpokgen ipma atopen. Kol kipm nungkulkget pa, kwap kuinaur a tu ak pa mpa tu ik nimpokgen ipma kalkut, pa ikgake wa ik ngklin kipm pa yat, kalpis.
HEB 13:18 Ti kupm la kipm oklala niki Maur Wailen pa eng kil ngklinso, eng ntei, minto wasrongen la ik kweikwei wrongkwail pa ute wor kolti, atom ok wusok amintowen pa lanako la nol nikgwalpm amintowen pa rka rukis wor kolti.
HEB 13:19 Kolpa ti wa kupm wasrongen paipm la kipm wa oklala niki Maur Wailen pa titnongket ngklinsopm eng kupm antiwe a ikga wa yaper kai riwepm pinterngen.
HEB 13:20 Kipm ariwe Maur Wailen a mentepm pa: kil pa melnum a planto ipma kupuk wor alkilen. Kil pikekg la Wailen Sisas amentepmen a pikekg amo pa wa wrekg a kirk a tu u mlaminel pa or rpma. Ti walmpopm a kil pa pikekg ungkwan ak titnongketel kla a Maur Wailen lam nampokgento pa, kla pa ikgake kipor pa, pa ikgam itna yongkyong kolpa itna pake. Kil pa melnum a elng Sisas pa itna melnum Wailen a ikgalen mentepm wrong kin kipman alkilen pa kol yan a manto walkg malkgu a ikgalen manto walkg malkgu alkilen pa ariworwor. Ti kil pa Maur Wailen a kupm mpa oklala nikel eng mpa kil ngklinsepm.
HEB 13:21 Ti kupm mpa oklala nikel eng mpa kil ngklinsepm nikgwalpm wrongkwail wor wor eng mpa kipm ntiwe ntokg kuina ur kutnun nikgwalpm a kil alkil wasrongen pa. Wa melnum wor kolai ak antokg ipma a kil pa atopen pa, kupm mpa wa oklala nikel eng mpa kil ntokg kipm pa palng melnum wor kolpake itnen titnongket wail a Sisas Krais pa. Ti kupm lanakepm la mentepm mpa ngkit nang a kil pa ikngklei wang iye kolpa kai. Aklale.
HEB 13:22 Kipm melnum wor alkupm a mentepm ukipma Sisas, yangkipm a kupm nirantepm kil pa watinet pake, kupm nira wangket tukwok kolti. Kolpa ti kupm la lanikepm la, kipm rkul ipma elng nungkulkg pa itning yangkipm a kupm nirantepm kil la ik kurkurngkepm a ik titnongketel kipm pa.
HEB 13:23 Kupm wa la nira eng lanikepm la mpa kipm riwe la, Timoti melnum wor almentepmen a mentepm ukipma Sisas pa am pikekg tu ungkwantel a wan tipmining pa or en ise. Ti kol kil kulntopm penterngen pa, ikga mentekg yatenen kai riwepm pa.
HEB 13:24 Ti kipm laniki tu melnum tukgunakg a Maur Wailen a ikgalentepm pa a wa tu kipm wrong kin kipman a Maur Wailen amprin eng alkilen pa la men nikgwalpm arkentepm rka pa. Wa tu melnum wor almentepm a mentepm ukipma Sisas angkai anong kanokg Itali pa kul men rka kil pa, tu wa la nikgwalpm a tu pa arkentepm rka pa.
HEB 13:25 Kupm mpa oklala niki Maur Wailen pa eng mpa kil plan ipma wor alkil ik ngklin kipm wrongkwail a rka kai pa.
JAM 1:1 Kipm om wampwam yikak wekg a Isrel, yoampei amentepm, kipm a or rak kai rka tatu palpa pa, kupm alkepm wor! Kupm Semis, kupm melnum a akwap a Maur Wailen, wa a Wailen Sisas Krais, kupm nira wrkapm kil eng ak angklin kipm.
JAM 1:2 Kipm melnum alkupm a mentepm ukipma Sisas Krais, kalkuten a kipm arki pa, ampur kipm akwonalmpen la pa paipm pa, kalkuten wrongkwail pa wor eng ak angklinsepm, ti kipm itopen o!
JAM 1:3 Kipm ariwe pa, kipm rkul Sisas Krais pa ik wang a kipm rki kalkuten pa, pa ak antokg kipm eng kipm antiwe itna titnongket.
JAM 1:4 Kipm itni titnongket kolpa iyekai, eng ikga kipm palng wor, eng ikgake kipm tukwok eng nikgwalpm wor ur pa. Kipm ikga itn wor, ikwap wor wrisen.
JAM 1:5 Kol kipm tukwok eng ariwe a nikgwalpm wor pa, kipm oklala niki Maur Wailen, kil antiwe mpa lkepm. Kil melnum a ake langkinen kweikwei pa, kil melnum mitaket wor. Kol mla ur kil isentel eng kuina ur pa, kil mpa uk kolti.
JAM 1:6 Ampur kipm akwonalmpen watipmen atom kipm oklala naki Maur Wailen pa. Kipm lupm nikgwalpm wris ita kolti, atom kipm oklala niki Wailen! Melnum a alupm nikgwalpm watipmen pa, kil itna kaingkul kolen unokg a wripm el kai ak antokg atom tapor pa.
JAM 1:7 Nikgwalpm a melnum pa kai pa kai pa, ti yawrik a kil atn pa, ake wa kil atn ute. Melnum a kolpa pa ampur kil akwonalmpen la mpa Wailen ikilmpe asen akilen pa atom lkel kweiur pa, mpa kalpis.
JAM 1:9 Melnum a ukipma Sisas Krais, a rpma tukwok nang kalpisen eng kweikwei pa, melnum a kolpa pa kil itopen o! Kil pa nang wailen antiwe kweikwei itna wulmpa a Maur Wailen pake.
JAM 1:10 Maur Wailen plan melnum a nang wailen, a antiwe kweikwei pa kil palng tukwok wrisen itna wulmpa akilen pa kil itopen o! Kweikwei a kil antiwe pa ikga kai plalng, kol ampei rwin ariwor a takgni al.
JAM 1:11 Takgni al atom kai plulng rurus pa. Melnum a antiwe kweikwei pa am kolpake, kil ikga kai plalng kol pake, ngket wangkel wang a kol a rpmi kanokg ti ikwap pa rpmi i pen.
JAM 1:12 Melnum a itna titnongket arki kalkuten pa, kil itopen o! Kil ampur angko! Kil rkul Sisas pa itni titnongket ik wang a kil rki kalkuten pa, pa mpa Maur Wailen kil lkel yaprekg watin eng rpmi yongkyong, kol pikekg kil yapon yangkipm la uk tu a plan ipma wor wasrongen kil pa.
JAM 1:13 Kol kalkuten ur palng melnum ur la ik riwel pa, ampur kil akwonalmpen la, Maur Wailen kil almpilel nikgwalpm la kil ngko kai paipmpaipm pa, kolpa kalpis. Paipmpaipm pa ake antiwe mpa rkolng Maur Wailen kai ngko pa, wa Maur Wailen pa ake mpa ilmpil nikgwalpmel melnum ur eng ngko kai paipmpaipm pa, kalpis.
JAM 1:14 Pa ipma wasrongen a melnum kil alkil pa ak ningkail kil alkil angko kai paipmpaipm. Kol kweikwei a ak ningkail wampung kai angkowe ampei a melnum ur angkli pa.
JAM 1:15 Ipma wasrongen a kil pa itna kaingkai, kil antokg ise. Pa kol kin a itna, kai ipma wail, raku pa. Kil antokg paipmpaipm pa kolpa kaingkai kai wail kolti, maur wor a kil pa am amo ise. Pa kol warim alkil pa wrekg wail kai wa angket warim.
JAM 1:16 Kipm melnum yek yek alkupm a mentepm ukipma Sisas Krais, kipm itn riwe, ampur kipm arki Maur Wailen la kil pa paipm pa. Kil pa wor wrisen.
JAM 1:17 Yiprokgen a nikgwalpm wor a kweikwei wor wor wrongkwail pa angkaino anong wor a Yan Maur Wailen pa nar pake. Kil antokg takgni, kainil, kumeim a am palng, am palng, a antokg mrangkum pa tukwok watin. Pake kil alkil pa ake am palng, tukwok watin kolpa, kil pa am itna katikati kol a kil itna pake.
JAM 1:18 Ipma wasrongen a Maur Wailen alkil pa atom, kil alko yangkipm wor aklale a la Sisas Krais pikekg amo akarmpen mentepm ti, atom mentepm palng kol warim alkilen, eng mpa mentepm palng kol okipma a tukgun ep a kil antokg. A kweikwei wrongkwail tiur a kil antokg pa kul kai itna katnukg.
JAM 1:19 Kipm melnum yek yek alkupm a mentepm ukipma Sisas, kipm itning yangkipm kil riworwor! Ampur ok akipm pa kukula eng la yangkipm ok pa itatu. Kipm itning nungkulkg rpme riworwor plalng pipa, kipm la yangkipm ok! Ampur kipm ipma wakget atatu!
JAM 1:20 Melnum a ipma wakget kol pa, pa ake kil akwap wor itna wulmpa a Maur Wailen.
JAM 1:21 Kolpa ti kipm ungkwan nikgwalpm kimpilpet a kweikwei paipm paipm wrongkwail pa plalng, kipm rku kipm alkipm, uwi yangkipm a Maur Wailen a kil arm rpma kawor ipmanikg akipmen ti. Yangkipm pa la Sisas Krais a antiwe ak awiyepm aye kai eng Maur Wailen.
JAM 1:22 Kipm itning kutnun kitila yangkipm alkilen pa pati wor pake. Kipm atning ak nungkulkg kalpmilel kolti, pa kipm kansil ipma alkipmen.
JAM 1:23 Melnum a atning yangkipm a Maur Wailen pake ake katnun pa pati, kol melnum a awi mrangku ak ari ikgokg alkil pa.
JAM 1:24 Kil ak ari plalng, kil elngkirmpa kolti kil kai, am wa kil woniketen ikgokg alkilen ise.
JAM 1:25 Kol melnum ur kil uwi yangkipm titnongket wor a Maur Wailen pa ik ri riworwor ikngklei wang iye kolpa kai pa, wa kol kil uwi atom ake kil woniketen pa, kil awi kolti, kil antokg katila, atom yangkipm a Maur Wailen pa ak angketen paipmpaipm a kil pa palng wor. Atom kuina ur a kil antokg pa, palng wor kolti.
JAM 1:26 Kol melnum ur kil ikwonilmpen la, “Kupm kil melnum wor a akwap a Maur Wailen.” Pake ake kil ikgalen ok alkil pa ariworwor. Pa kil kansil ipma alkilen ti. Ti kwap a Maur Wailen a kil ak pa, ake palng ok arke.
JAM 1:27 Kwap a Yan Maur Wailen pa pati, kil wasrongen la kipm kai ngklin tu a rpma paipm, kolen warim ilmpo a kin karpikg, a kil wasrongen yat la kipm alkipm ngkom nilokgen kweikwei paipm paipm kimpilpet a itna kanokg ti. Kipm ikwap kolpa pati, pa ute wor wrisen itna wulmpa a Maur Wailen pake.
JAM 2:1 Kipm melnum alkupm a mentepm ukipma Wailen amentepmen Sisas Krais, kol kipm ukipma Sisas Krais, Wailen amentepmen a rpma Klalen pa, ampur kipm awi wor uk melnum ur pa, a awi paipm uk melnum ur pa, kolpa yaper!
JAM 2:2 Kol kipm ikwonilmpen yangkipm kil: ak wang a kipm rpma atning yangkipm a Maur Wailen rpma wan alkilen pa, kipm ari melnum wailen ur a ak lukglukg wor wor nowe num pa kulor wan pa, wa melnum ur a rpma tukwok a nowe apm rakolet pa wa kulor.
JAM 2:3 Kipm ari melnum wailen a ak lukglukg wor wor pa nowe num pa, kipm pirpiren ukulamtel wrik wor pa la kil rpme. Pake melnum a rpma tukwok pa, kipm la, “Kitn itni kai kwa pa aki, kitn ngko rpmi kanokg ti!”
JAM 2:4 Kipm antokg nikgwalpm kolpa kipm ari la pa wor aki? Pa kipm wako kipm alkipm ti itna mapming wekg. Pa kipm kol melnum a elng wam itna arki melnum ur la pa kil pa wor a melnum ur pa la kil pa paipm katila nikgwalpm paipm alkipmen ti kolti.
JAM 2:5 Kipm melnum yek yek alkupm a mentepm ukipma Krais pa! Kipm itning yangkipm kil: melnum a rpma tukwok itna wulmpa a tu melnum ari la melnum pa kil rpma tukwok atom kil ukipma Sisas Krais pa, pa kil palng melnum wailen antiwe kweikwei itna wulmpa a Maur Wailen. Wa kil ikga uwi num ngklin kweikwei wor wor a Maur Wailen pake, kol pikekg kil yapon yangkipm la uk tu a plan ipma wor wasrongen kil pa.
JAM 2:6 Ti antokg kolai ti wa kipm uk num paipm tu a rpma tukwok pa? Ake tu pa arpmentepm paipm alkepm kalkuten arkolngkepm aye kai antokg yangkipm pa, kalpis. Pa tu melnum a antiwe kweikwei pa arpmentepm paipm pake.
JAM 2:7 Kipm a Sisas Krais, kipm aye nang alkilen, ari nang wor wrisen alkilen pa am tu melnum a antiwe kweikwei pa la paipmel ise.
JAM 2:8 Kol kipm kutnun yangkipm titnongket kil a ela kai wrkapm a Maur Wailen pa pati wor pake. Pa itna ep angen yangkipm titnongket wrongkwail a Maur Wailen la pa, la, “Kitn plan ipma wor wasrongen tu wrongkwail, kol a kitn plan ipma wor wasrongen kitn alkitn ti!”
JAM 2:9 Kol kipm ri melnum a rpma tukwok pipa, kipm awi paipm uk. A kipm ri melnum a rpma antiwe pipa, kipm awi wor la, kolpa pa kipm ake ak wor. Pa kipm ak paipm angketen yangkipm titnongket kil ise, a la, “Kitn wasrongen tu wrongkwail, kol a kitn wasrongen kitn alkitn!”
JAM 2:10 Eng ntei, kipm katnun yangkipm titnongket wrongkwail tiur pake, kipm wangketen yangkipm titnongket wris ur kolti pa, pa kipm antokg paipm kol a tu melnum a angketen yangkipm titnongket wrongkwail pa.
JAM 2:11 Maur Wailen kil la kolpa la, “Ampur kitn awi kin nanen kipman kinen a mlaur ai pa.” Wa kil la kolpa yat la, “Ampur kitn ilm melnum amo.” Kol ake kitn awi kin nanen kipman nanen pake, kol kitn ilm melnum ur imo pa, ampake, am kitn antokg paipm angketen yangkipm titnongket wrongkwail a Maur Wailen pa yat ise.
JAM 2:12 Ikg a Maur Wailen kil alkil iyewepm kai itni ntokg yangkipm kitila yangkipm titnongket pikekg ak angketen paipmpaipm akipmen atom palng wor pa. Kolpa ti kipm itn riworwor la yangkipm ok wor wor kutnun kitila yangkipm titnongket pa.
JAM 2:13 Ik wang a Maur Wailen uwiyepm iye kai itni ntokg yangkipm pa, kil ikgake rein melnum ur a ake arein melnum ur pa, kalpis. Kil ikga ikilmpe paipmpaipm akilen. Melnum ur kil rein melnum ur pa, Maur Wailen ikga reinsel ik wang a kil ikga itni ntokg yangkipm pa, kil ikgake ikilmpe paipmpaipm akilen pa.
JAM 2:14 Woi, kipm melnum alkupm a mentepm ukipma Sisas Krais! Kol melnum ur la, “Kupm kil ukipma Sisas Krais.” Pake atn a rpma a kil pa palng manet, kolpa pa ake wor. Ipma a kil uk kolpa pa mpa wa ngklinsel ik uwiyel iyekul wor kolai? Kalpis.
JAM 2:15 Kol kin aki kipman ur a mentepm ukipma Sisas Krais kil rpmi tukwok eng okipma aki, nung aki, kweikwei kolpa,
JAM 2:16 kol kitn la, “Yek alkupm, Maur Wailen alkeitn wor, kai o! Kitn kai lile wakg pa rkgin rpmi, ntokg okipma pa il nikgwor rpmi riworwor rpmi o!” Ok a kitn ti la kolti tuwa, ake wa kitn angklinsel okipma a nung kweikwei ur pa, kalpis. Yangkipm a kitn la kolpa pa ak angklinsel la kolai? Pa kalpis.
JAM 2:17 Kitn ukipma Sisas Krais pake, atn a kwap a kitn ak pa palng manet. Kolpa ti ake kitn ukipma Sisas pa aklale.
JAM 2:18 Ati nikgwalpm akipmen pa ur mpa la kol kil la, “Kupm kil ukipma Sisas Krais, a kitn pa atn wor akwap wor, am mentekg katnun Sisas Krais kolen tita pake.” Pake kupm la lanikeitn kol kil la: kol kitn ake akwap wor, atn wor pa, mpa kupm riwe la kolai la kitn ukipma Sisas Krais pa? Pake kol kitn ri atn wor, a kwap wor a kupm ak pa, pa planteitn la kupm ukipma Sisas Krais pake.
JAM 2:19 Kitn ukipma ariwe la Maur Wailen kil wris ata. Kitn ariwe wor pake, pa tu mring maur am wa ukipma ariwe kolpa yat pake, la Maur Wailen pa kil wris ata, ti tu ngkark warwar paipm.
JAM 2:20 Nikgwalpm a kitn la kolpa pa kitn titno, kitn ukipma Sisas Krais pake, kitn ake atn wor, kitn ake akwap wor, ti a kitn ukipma Sisas Krais pa ake angko ok arke. Ti kitn la kupm lanikeitn yangkipm yiprokgen alkil pa riworwor pen?
JAM 2:21 Ti antokg kolai Apraam yoampei amentepmen ti? Kil elng warim kipman alkil Aisak elngtela kaino nung kwa a wes a kil ngkat alile tita pa, la ilmpel imo lap il wor uk Maur Wailen ti. Kil antokg katnun yangkipm ok a Maur Wailen la pa atom, Maur Wailen kil ukipma kil pa la kil melnum ute wor pa.
JAM 2:22 Apraam kil ukipma Maur Wailen ti, wa kil alkil ngkat wes pa alile tita, la ilm Aisak pa imo lap il wor uk Maur Wailen, katnun yangkipm alkilen a kil la pa. Ti kitn ari aki kalpis? Kil akwap katnun ok a Maur Wailen lanakel pa atom, pa planto la kil ukipma Maur Wailen pa aklale.
JAM 2:23 Ti yangkipm a Maur Wailen pikekg tu nira ela wrkapm, ti palng aklale ak wang a Apraam la ilm Aisak imo lap il wor uk Maur Wailen. Yangkipm pa la kolpa, “Apraam kil ukipma Maur Wailen, ti kil palng melnum ute wor itna wulmpa a Maur Wailen.” Kolpa ti Maur Wailen kil akwewel la melnum wor alkilen.
JAM 2:24 Ti kipm ariwe pa, melnum ake antiwe mpa ukipma Sisas Krais kalpmilel kolti pa, kalpis. Kil ukipma, kil ikwap pa kutnun pati, pa mpa kil palng melnum ute wor itni wulmpa a Maur Wailen pake. Kalpis pati, mpa kalpis.
JAM 2:25 Kol Reap, kin a pikekg atn ya pa yat, kil pa am kolpake. Kil katnun yangkipm ok a Maur Wailen kolpa atom, Maur Wailen kil akwewel la kil kin ute wor itna wulmpa alkilen eng kil awi melnum wekg a Isrel lam, kil lanaken ya pa la mpa tuwekg ngkom nilokgen wrongmanto alntuwen.
JAM 2:26 Kol melnum ur ukipma Maur Wailen kalpmilel kolti pa, ake wa kil akwap katnun yangkipm ok a Maur Wailen la pa, kil ake wa ukipma aklale. Ti a kil ukipma kolpa pa kai kalpis kolti kol yokluk a amen wor or kai takwlelkgtel ise.
JAM 3:1 Kipm melnum wor alkupm a mentepm ukipma Sisas Krais! Kipm ariwe pa, men melnum a kaling plan tu yangkipm a Maur Wailen ti, ikga ik wang a Maur Wailen ntokg yangkipm nimpokgen mentepm wrong kinkipman pa, kil ikga ri ikg rpme atn a rpma a oklala a men a kaling plan tu pa riworwor atom ikga ikilmpe paipm a men antokg pa klangkil a tu melnum a ukipma kolti. Kolpa ti ake wor eng mpa mentepm melnum watipmen uwi kwap a kiling plan tu yangkipm a Maur Wailen pa.
JAM 3:2 Mentepm melnum a antokg paipm plalng. Ti kol melnum ur ake la yangkipm ok paipm ur kai ok a kil pa, pa kil pa wor wrisen pake. Melnum a kolpa pa antiwe ikgalen numpwam a ok wrongkwail alkil ariworwor pake.
JAM 3:3 Kol mentepm elng wes wasek ur pa elngtitni kawor ok a nimpa nepm watin wail pa, ngkuten ampei pa itni pa antiwe mpa ik lok nimpa nepm watin wail pa itn kai ai ik wasrongen amentepmen pa, kil mpa itning nungkulkg kolti kai.
JAM 3:4 Kipm ikwonilmpen wan unokgen pa! Wan unokgen pa wail manten paipm ai. Wripm titnongket wail el ik uwi wan unokgen pa iye kai unokg kuin ai, pake yampis taklo wasek ari kil pa antiwe a ik lok iye wan unokgen wail pa kai wrik ur la mpa melnum a wamparpme yampis taklo pa la iye kai pa. Ti wripm titnongket pa ake antiwe mpa ilmpen wan unokgen pa iye kai itn kol ur pa kalpis.
JAM 3:5 Kol ok milip ti wasek pake, kil antiwe a oklala wail wail mimisen. Ti kol wakgyelk waiketn ur kil tipor ngko nar il kwei ur nungkwor waiketn ur pa, pa mpa nungkwat wail kai il kirpo mpang wail ur ai kai plalng.
JAM 3:6 Ti ok milip amentepmen pa kol wakg pa, paipmpaipm wrongkwail pa am palng a ok milip amentepmen pa kai pake. Ok milip limpen waiketn a numpwam wrongkwail amentepmen ti antokg numpwam wrongkwail, a atn a rpma amentepmen ti kai paipm. Pa kol wakg a angkon kai anong paipm a wakg atne pa aye kul ak lap mpang wail ur atom wakg al karpo karpo kolpa kai.
JAM 3:7 Wlikgok tilpmingen wusok, a wail wrongkwail kolen wel, a wlikgok tiur a itna tatu kanokg, a itna tatu unokg pa, melnum uk ikgalen pa, pa antiwe mpa palng wampil.
JAM 3:8 Pake ok amentepmen ti pa kalpis, tikat palng paipm itna kolti, kol wanin a plelng alm kamel kulutukgunakgen pa. Melnum ur ake antiwe a ikgalen ok alkil pa kalpis.
JAM 3:9 Wangkur pa ok amentepmen ti ak ngkat nang a Wailen, a Yan Wailen. Wa wangkur pa ok amentepmen ti ak la melnum ur a Maur Wailen kil antokg kol kil alkil.
JAM 3:10 Ok a mentepm pa palng wekg, palng wor ak ngkat nang a Maur Wailen, a palng paipm ak la melnum ur. Kipm melnum wor alkupm a mentepm ukipma Sisas, ok a mentepm ak la kolpa pa paipm, elngen o!
JAM 3:11 Ti yitnokg a ukupuk pa antiwe mpa i wris i kanokg ti no aki? Kolpa kalpis.
JAM 3:12 Kipm melnum alkupm a mentepm ukipma Sisas! Mentepm ariwe pa, yo kampuk pa ake antiwe mpa iye olip ok, wa yo wain pa ake antiwe mpa iye tikga kulok aki tikga tukgun pa, kalpis. Am kolpa yat pake, mentepm ake antiwe mpa inong ukupuk pa kai yitnokg pa, kalpis. Ti ok amentepmen am kolpake, ampur palng wekg ak la yangkipm wor a paipm pa, kolpa yaper!
JAM 3:13 Kol melnum ur akipmen pa la kil ariwe wor a nikgwalpm ungkwarngen pa, kil mpa rku nang alkil pa itn wor a rpmi wor, mpa tu ri la kil pa melnum ariwe watin a nikgwalpm ungkwarngen pake.
JAM 3:14 Kol kawor ipmanikg wunen a kil pa, kil akwonalmpen kil alkil, a ipma akilen pa wrekg la ik ikle or melnum ur, a kil ri kweikwei a mla ur a antiwe kweikwei watipmen pipa, kil ipmanikg paipm. Kolpa ake wor eng kil ngkat nang alkil pa la, kil awi ariwe watin pa. Palpa kil kansil, kil ake katnun yangkipm aklale a Maur Wailen pa.
JAM 3:15 Ariwe a kolpa pa ake Maur Wailen pa alkel pa, kalpis. Ariwe a kolpa pa ariwe a ipma tingklaket a kanokg ti kolti. Pa angkai Maur Paipm pa kul pake.
JAM 3:16 Tu melnum a ipma paipm eng melnum ur, a ngkat nang alntuwen ti, a arku nang a melnum ur pa, tu melnum a kolpa pa, tu antokg paipmpaipm wrongkwail, atom tu ak aro rpma orwris a kipm ukipma Maur Wailen pa kai itna manman.
JAM 3:17 Melnum a awi ariwe watin, nikgwalpm wor a Maur Wailen alkel pa pati kol kil: itna ep pati la kolkil: - kil alupm nikgwalpm rukis wor, itna arkekg pa la kolkil: - kil karken a akle or tita, - kil nikgwalpm wor, rpma atn meen, - kil melnum a orngwatneikgen mla ur, - kil melnum a ipma arein, - kil akwap a Maur Wailen wor kol yo a angko oken aye ok wor. - Kil ake ari angklowe la melnum a i wor, melnum a i paipm. - Kil melnum a la yangkipm ok aklale, a antokg kweikwei aklale kolti.
JAM 3:18 Kol mentepm ipma wor ore tita pa, pa kol mentepm alin okipma wor. Atom ikga mentepm ngket tuwai nikgwalpm ute wor.
JAM 4:1 Nikgwalpm a kipm almpor tita akle tita kolpa kipm awi kai a i? Nikgwalpm alkipmen wrekg aringkowe, wasrongen kweikwei wrongkwail, akwonalmpen kuina ur watipmen, nikgwalpm paipm a kolpa pa kwreitnunen tita rpma kawor ipmanikg akipmen pa atom, kipm almpor tita akle tita pake.
JAM 4:2 Ipmanikg akipm pa wrekg aringkowe kweikwei wrongkwail a itna kanokg ti, pake ake wa kipm awi, kolpa atom ari kipm alm melnum amo pa. Kipm warwaren kweikwei a kamel ur ai, ari ake wa kipm awi, atom ari kipm or akle tita pa. Ake kipm awi, eng ntei, ake kipm asen Maur Wailen eng mpa kil lkepm pa.
JAM 4:3 Kipm asen pake ake kipm awi, eng ntei, nikgwalpm yiprokgen paipm akipmen pa kipm akwonalmpen la uwi kweikwei pa, eng ik ngklin kipm alkipm ti kolti tuwa.
JAM 4:4 Kipm wasrongen kweikwei a itna kanokg ti, pa kipm uk yirokg Maur Wailen. Pa kipm antokg paipm kol kin a atnurng kipman alkil kai awi kipman ur ai. Kipm ariwe aki kalpis? Nikgwalpm a mla ur kil rka wail eng kweikwei wrongkwail a itna kanokg ti, pa kil wrongmanto a Maur Wailen.
JAM 4:5 Yangkipm ur a ela kai wrkapm a Maur Wailen pa la kol kil, “Maur Wor a kil alko rpma kawor ipma amentepmen ti pa, pa kil langkinen paipm wrisen mentepm ti eng kil alkil.” Yangkipm a Maur Wailen ti kipm atning la yangkipm kalpmilel ur kolti aki? Pa kalpis, pa yangkipm aklale.
JAM 4:6 Pake ipma wor a Maur Wailen pa ak angklin mentepm ti pa, pa wail manten paipm ai, kol wrkapm alkilen la pa la, “Kol melnum ur a kil ngkit nang a kil alkil pa, mpa Maur Wailen kil uk yirokg kil. Melnum a kil rku kil alkil pa, mpa Maur Wailen kil plan ipma wor alkil pa atom kil ngklinsel.”
JAM 4:7 Kolpa ti kipm rku kipm alkipm pa orngwatneikgen Maur Wailen, itni titnongket tulpulng Maur Paipm pa, mpa kil ngkirk kai tukulelkgtepm.
JAM 4:8 Kipm kai wreren Maur Wailen pa, mpa Maur Wailen kil kul wreren kipm! Kipm melnum a antokg paipmpaipm pa, kipm mpa ntokg kipm alkipm pa rukis kolen melnum a klak wam alkil rukis pa! Kipm melnum a nikgwalpm wekg pa, kipm elngen nikgwalpm paipm pa, kipm rkul nikgwalpm wor pa iye itni!
JAM 4:9 Kipm a rpma atopen pa, kipm akg rein rpmi ipma kalkuten! Kipm a nimpa pa, kipm akg rein paipmpaipm a kipm antokg pa! Kipm la rein paipmpaipm a kipm antokg pa akg ik ok numputen! Kipm a nimpa pa, kipm elngen atom kipm rumpok akg rein, a kipm a rpma atopen pa, kipm rpmi ipma kalkuten!
JAM 4:10 Kipm rku kipm alkipm pa orng watneikg Maur Wailen pa, mpa kil ngkit nang akipmen.
JAM 4:11 Kipm melnum wor alkupm a mentepm ukipma Sisas, ampur kipm la paipmel tita. Kol melnum ur kil la paipmel melnum ur, aki la melnum ur pa la paipm pa, pa kil la paipmel yangkipm titnongket a Maur Wailen, wa kil la yangkipm titnongket a kil pa la pa paipm. Kol kil la yangkipm titnongket a Maur Wailen pa la paipm pa, pa kil ake orngwatneikgen yangkipm titnongket pa, kil palng kol melnum wailen a rpma atning atning yangkipm a i wor, a yangkipm a i paipm.
JAM 4:12 Maur Wailen kil alkil kil ikga rpmi itning yangkipm ok amentepmen. Kil alkil kil yiprokgen a yangkipm titnongket wrongkwail. Kil alkil kil antiwe titnongket ak awi melnum pa aye yaper kul eng kil alkil aki antokg melnum pa kai paipm. Ti kil alkil am kol pake. Ti kitn asen mla atom kitn rpma kol melnum a rpma atning yangkipm a melnum ur pa la, kil pa wor, a rpma atning yangkipm a melnum ur pa la, kil pa paipm, kolpa pa ake wor.
JAM 4:13 Kipm tiur pa kipm la kipm rpmi ik wasrongen alkipmen, atom kipm la kolpa la, “Am ti aki ikgkil pa men la kai anong wail ur ai, rpmi kol wring wris ur, ikor kwap eng ikwap marpm wail ur ai.” Nungkulkg kipm pa itning o, kipm ariwe la kipm ikgkil rpmi aki kalpis? Kipm pa kol u miprak a angko ak kong pa, a takgni pa no la ilmpen pa, am kai tingklak ise. Ti kipm am kolpake. Kipm rpma waiketn kolti, am amo ise.
JAM 4:15 Kolpa ti ake wor eng kipm la kolpa. Pa wasrongen a Maur Wailen alkil ai. Kil la mentepm ntokg kuina a i pa, mentepm ntokg. Kolpa ti kipm mpa la kol kilke, “Kol wasrongen a Wailen alkil pa, ikga mentepm rpmi kanokg ti i watin, ntokg kweikito kil aki ntokg kweikito pa rpmi ti i.”
JAM 4:16 Ari ake kipm la kolpa, kalpis. Kipm akwonalmpen kipm alkipm ti la kipm antiwe titnongket. Melnum a atop wam rka nol ngkat nang a kil alkil kolpa pa ake wor.
JAM 4:17 Ti kipm ikwonilmpen kil riworwor: kol melnum ur kil riwe kweikwei wor la mpa kil ntokg, pake ake wa kil antokg, pa kil antokg paipm.
JAM 5:1 Kupm la la yangkipm kil niki kipm melnum a antiwe kweikwei watipmen, kipm itning! Kipm ikwonilmpen kalkuten wail manten ikga kipm rki kutnukg, ti kipm akg rein o!
JAM 5:2 Kweikwei wrikya akipmen pa atok kapor a apm nung kweikwei akipmen pa tinginin wangket.
JAM 5:3 Kipm takwem marpm kweikwei wes muinmainet a wes tangkoren wor wor pa elntirmpa, ari ake kipm akwonalmpen wang umpuwen a kul wreren ti. Marpm a kweikwei wor wor alkipmen pa kai mingkirpet, kweikwei wailet akipmen a itna mingkirpet pa ikga ik la kwap a kipm ak pa ake wor, pa ikga ilepm kol wakg.
JAM 5:4 Kipm itning, tu melnum a aktepm kwap angkon kweikwei kai wring akipmen pa, tu akg la watipmen eng ake kipm armpenten, ti Maur Wailen a antiwe titnongket am kil atning ise.
JAM 5:5 Ak wang a kipm rpma kanokg ti kipm antiwe kweikwei wor wor watipmen ak antokg kipm alkipm ti rpma atopen. Kipm antiwe kweikwei wor wor wrongkwail, pake kipm itna titnowen, kol manto a tu uk ti itna titnowen akwekgel wang a tu la ilmpel imo pa.
JAM 5:6 Kipm awi melnum ute wor aye kai itna antokg yangkipm, kipm orel amo, pake ake kil akalmpe wam a kipm orel pa, kil uk num kolti.
JAM 5:7 Kipm melnum wor alkupm a mentepm ukipma Sisas, kipm rkul ipmanikg alkipm pa itni titnongket nungkwangen wang a Wailen kil ikga nar pa. Ti kipm rkul ipma alkipmen pa itni nungkwangen kol melnum a antokg wring, atom kil arkul ipma alkil pa itna titnongket nungkwangen wang a u a takgni la ik ntokg kanokg pa eng mpa okipma pa palng wor.
JAM 5:8 Kipm am kol pake. Kipm rkul ipma alkipm pa itni titnongket, ipma akipmen pa rpmi kukula, eng ntei, wang a Wailen nar pa ake itna watin, wang am kul wreren tike.
JAM 5:9 Kipm melnum wor alkupm a mentepm ukipma Sisas, ampur kipm ipma paipm la yangkipm elyirokgel tita pa, mpa Maur Wailen uwiyepm iye kai itni yangkipm. Melnum a rpma atning yangkipm pa ikga nar pa, wang am kul wreren tike.
JAM 5:10 Kipm melnum wor alkupm a mentepm ukipma Sisas, kipm ikwonilmpen tu melnum ok wripm a Maur Wailen a pikekg tu laron nang a Maur Wailen. Tu pikekg arkul ipma alntu pa itna titnongket arki kalkuten. Ti kipm ntokg kol tu pa, kipm rkul ipma alkipm pa itni titnongket rki kalkuten.
JAM 5:11 Ikwonilmpen yangkipm a mentepm la tu melnum a pikekg arkul ipma alntu pa itna titnongket arki kalkuten pa, tu pa wor pake, tu itopen o! Kipm ariwe melnum okwripm Sop pa, kil pikekg arki kalkuten wail pake kil pikekg arkul ipma alkil pa itna titnongket kolpa kaingkai, kai pa, Wailen kil arein angklinsel. Aklale, Wailen pa melnum a plan ipma wor a ipma arein eng mentepm melnum ti.
JAM 5:12 Kipm melnum wor alkupm a mentepm ukipma Sisas, kipm itning yangkipm titnongket kil! Ampur kipm naren krimperk, aki naren Maur Wailen, aki la kweiur a ak titnongketel yangkipm ur a kipm la pa. Kipm la la iklale pa, kipm la iklale kolti. Kipm la la kalpis pa, kipm la kalpis kolti. Pa Maur Wailen kil ikga yangkipm kalpis ik wang a kil uwiyepm iye kai itni yangkipm.
JAM 5:13 Kipm mla ur kipm arki kalkuten pa, kipm ukwen Maur Wailen! A kipm mla ur kipm rpma atopen pa, kipm ik nang ik ngkit nang a Maur Wailen.
JAM 5:14 Melnum ur kil numpet pa, kil ukwen tu melnum a itna ep akwap a Maur Wailen pa tu wli, naren Wailen pa ik uyiwa pa ik inel melnum numpet pa elng wam elewel pa, oklala niki Wailen eng mpa kil ngklinsel.
JAM 5:15 Kol tu ukipma Maur Wailen la kil antiwe mpa ikilmpe kuina ur a tu isentel pa, atom tu isentel pa, mpa kil ngklin melnum pa wrekg palng wor. Kol kil ntokg paipmpaipm ur pa, mpa Maur Wailen kil ungkwan paipmpaipm a kil pa.
JAM 5:16 Kolpa ti kipm laron paipmpaipm alkipm pa niki tita, a kipm ukwen Maur Wailen pa ik ngklin tita eng mpa kil ntokg kipm pa palng wor. Kol melnum ute wor ur kolpa pa kil oklala naki naki Maur Wailen pa titnongket pa, asen a kil pa mpa palng ngko ok rke wailet.
JAM 5:17 Elaisa pa melnum ur kolti kol mentepm tike. Kil pikekg oklala naki Maur Wailen titnongket la u pa ake mpa uwei. Kolpa atom u pa pikekg ake awei itna kanokg ti kol wring wraur wompel.
JAM 5:18 Atom wa kil asen antiur, atom u pa awei nar ak atne kanokg pa atom tu antokg kweikwei pa wa palng wor.
JAM 5:19 Kipm melnum wor alkupm a mentepm ukipma Sisas, kol melnum ur a kipm ngko yaper kai uk yirokg yangkipm wor aklale a Maur Wailen, wa kol melnum ur uwiyel yaper kul pa,
JAM 5:20 kipm itning yangkipm kil: kil awi melnum pa yaper kul, atom kil angklin maur wor a kil pa wor. Kalpis pa, maur wor a kil pa kol am imo ise. Kil akwap wor, atom Maur Wailen ungkwan paipmpaipm wrongkwail a melnum pa antokg pa. Yangkipm a kupm Semis nira pa am kai itna kolpake.
1PE 1:1 Kupm Pita, kupm melnum wokgen a pikekg Sisas Krais kil takweiyopm atom ukwawopm kai la ikwap akilen. Kupm nira wrkapm kil kai eng kipm melnum yaworen a pikekg Maur Wailen takweiyepm eng alkilen a pikekg or rak kai rka yela tatu anong kanokg a Pontus, Kalesia, Kapatosia, Esia a Pitinia.
1PE 1:2 Kipm pa melnum a pikekg Yan Maur Wailen kil alkepm Maur Wor akilen ak amprinsepm elngitna manet katila nikgwalpm alkil a pikekg kil akwonalmpen ep ak ai. Atom kil takweiyepm eng la kipm itning nungkulkg orngwatneikgen Sisas Krais pa, wa kil wa takweiyepm eng la kipm wa palng rukis wor itnen walmpopm a Sisas a kil la ik kulukepm pa. Ti kupm oklala naki Maur Wailen eng mpa kil plan ipma wor akilen pa rein ngklinsepm kolpa iye or pa kai eng mpa ipma akipmen pa rki meen wor.
1PE 1:3 Mentepm ngkit nang a Maur Wailen, Yan a Wailen Sisas Krais amentepmen ti lkel wor. Eng ntei, pikekg kil areinso wail manten atom kil kaplim yaprekg watin alkil alko ak antokg mentepm ti palng weten, atom mentepm atopen ukipma rpma nungkwangen kuinaur a mentepm ariwe la ikga kil lko pa. Pa pikekg Maur Wailen akwap or ya a pikekg kil la Wailen Sisas Krais a pikekg amo pa wa wrekg.
1PE 1:4 Pikekg kil antokg mentepm ti palng weten antiwe ikga kaino rpmi wor yongkyong ntiwe kweikwei wor wor wrisen a ikgake mingkirpet a kimpilpet a kai plalng ngketlam pa kalpis, pa ikga wor itni yongkyong. Kweikwei wor wor pa Maur Wailen numprampen ikgalen ariworwor ak namputepm elngtepm itna kaino anong wor pa.
1PE 1:5 Kipm ukipma Sisas pa, atom titnongket a Maur Wailen pa ikgalentepm kol yipmingki kakir ur a ak kapringentepm. Kolpa itna kaingkai kai ngko wang a pikekg Maur Wailen kil alkil alm eng la ikga anong wor a kweikwei wor wor a pikekg kil numprampen pa ikga palng ngko wunong atom kipm ikga kaino rpmi wor yongkyong.
1PE 1:6 Kolpa atom ari kipm pa atopen rpma. Ei, aklale, ak wang ti a kipm rpma nungkwangen pa, kalkuten a wleket auraur pa ikgake kalpis pa, pa ikgam palngtepm pake, eng ak arkolngkepm a ak ariwepm la kipm kolai, atom kipm awi ipma kalkut pake palpa ikgake itni wang watin pa, ikga itni wang tukwok waiketn kolti.
1PE 1:7 Kalkuten a palngtepm palngtepm ti pa, pa palngtepm eng ak ari la kipm ti ukipma Sisas pa aklale aki kalpis. A kipm ukipma pa kol wes muinmainet wor a armpen ak marpm wail a tu ak wakg kalnten pa lap eng ak ari la pa wes muinmainet a palng muinmainet aklale ariwor ise, aki a pa. Wes muinmainet ariwor pa ikga kai paipm, pake kipm ukipma Sisas aklale pa, pa kweiur wail manten wor klangkil wes muinmainet wor a armpen ak marpm wail pa, atom ikga Maur Wailen kiporngkepm yangkipm itopentepm a ngkit nang akipmen ti iye kaino kwa ik wang umpuwen a ikga Sisas Krais kil nar palng ngko wunong pa.
1PE 1:8 Kipm pikekg ake ariwel, pake kipm plan ipma wor wasrongentel. Wa ak wang ti ake wa kipm ariwel, pake kipm wa ukipma kil pa itna titnongket kolpa itna. Wa kipm atopen kai kaino klangkil or kai ai, oklala kalpisen mpa wa ikla atopen kolai.
1PE 1:9 Kipm atopen wail kolpa atnen a kipm ukipma Krais pa atom Maur Wailen akawiyepm aye angkai miningket pa kul eng alkilen, wa kil ikga ngklinsepm kolpa kai. Pa am yiprokgen a kipm ukipma Krais pa ampake.
1PE 1:10 Pikekg ep ak ai Maur Wor a Maur Wailen ngkat okel tu melnum okwripm akilen pa, atom pikekg tu laron naki tu wapyipmiri walyipmiri amentepmen pa la ep kolpa la, Maur Wailen ikga plan ipma wor ngklin mentepm ti. Tu melnum okwripm pa pikekg akor meen meen ariworwor la uwi riwe yiprokgen pa. Pake pa am ak la ipma wor akilen a kil la ikuwi kipm tike.
1PE 1:11 Maur Wor a Krais pa pikekg wa akwap rpma tu melnum okwripm a Maur Wailen pa, atom pikekg planten ep la melnum a Maur Wailen ikga ukwa nar eng ik uwiyo pa, kil ikga uwi wleket imo plalng pa wa kutnukg pa kil ikga wrekg uwi nang wailen. Atom wa tu akor la uwi riwe la, “Wang a i ikga melnum a ikga ikuwiyo pa nar pa, wa kil ikga ikwap pa kolai ik wang pa?”
1PE 1:12 Wa tu pikekg laron yangkipm a palng wli ok a tu pa ak la ipma wor wail a Maur Wailen a ikga plan ngko wunong melnum a ikga nar eng ikuwiyo pa. Wa Maur Wailen pikekg lanaken la pa ake wa tu laron eng wa ak angklin tu alntu ak wang pa, kalpis. Pa tu pikekg laron eng ikga ik ngklin tu kilmik a ikga kutnukg ai, pa am ak la kipm melnum a ukipma Krais ak wang tike. Ak wang ti pa Maur Wailen pikekg ukwa Maur Wor alkil angkaino kitnong ai nar ak titnongketel tu men melnum a laron yangkipm wor a la Krais pa, atom men pikekg laron nakepm kuina ur a pikekg tak ai palng wli ok a tu melnum okwripm laron ep pa. Wa tu maur akwapel a Maur Wailen pa yat tu wa wasrongen paipm la uwi riwe ipma wor a Maur Wailen a la ik ngklin mentepm melnum eng ikuwiyo eng alkilen.
1PE 1:13 Maur Wailen kil akwap kweikwei wailet kolpa angklinsepm kolpa ti kipm lok upaar nol nikgwalpm akipmen pa rki wontrakole yayawen nimprampen. A wa kipm ukipma riwe itni titnongket nungkwangen ipma wor wail a Maur Wailen ikga reinsepm ik ngklinsepm ik wang a Sisas Krais kil palng ngko wunong pa.
1PE 1:14 Kipm mpa nungkulkg wor kolen tu warim a atning nungkulkg pa. Ake mpa kipm lok kipm alkipm ti kai kutnun nikgwalpm titnongket a ipma wasrongen alkipm a pikekg kipm ak ep pa ak wang a pikekg kipm ake ariwe Krais pa.
1PE 1:15 Eng ntei, Maur Wailen kil a akwewepm atom kipm kul ukipma katnuntel pa, kil pa klalen wor wrisen. Kolpa ti kipm mpa itn a rpmi kai klalen a ntokg kweikwei wrongkwail a wriwen wor kolti.
1PE 1:16 Kol wrkapm a Maur Wailen pa la kolpa la, “Kupm ti pa klalen, kolpa ti kipm ti mpa wa klalen kolpa yat pake!”
1PE 1:17 Kipm oklala naki Maur Wailen pa, kol kipm ak ok noworel akwewel la “Yaiyai”, pake kipm mpa riwe la kil ake mpa iktepm kuina ur kol la kipm warim akilen ti pa, kalpis. Kil ari atn a rpma a kwap a mentepm wris wris ti antokg pa, atom kil akalmpe katila kuina ur a mentepm wris wris antokg pake. Kolpa ti ak wang ti a kipm kol melnum yaworen a wli rpma kanokg ti pa, kipm mpa ngkirk, atom rpmi orngwatneikgen kutnun nikgwalpm a Maur Wailen ai kolti.
1PE 1:18 Atn a rpma akipmen pa kipm pikekg karpo karpo katnun angkai tu yoampei alkipm ai kul ai, atom pa ake ak angklinsepm eng ak antokg kipm palng rukis wor itna wulmpa a Maur Wailen pa. Pake kipm ariwe kuina a i a pikekg akarmpen paipmpaipm akipmen pa, pati pa antiwe kalkut wail angen marpm krim kanu a marpm krim kwalo a mentepm ak armpen kweikwei a itna kanokg ti a ikga kai paipm plalng pa.
1PE 1:19 Pake marpm a pikekg Maur Wailen akarmpentepm pa kalkut wail manten angen marpm ti. Pa walmpopm a Krais, kil pa kol Manto Walkg Malkgu War num misen wor a i numpet kalpisen pa, kil pikekg amo akarmpentepm.
1PE 1:20 Krais pa pikekg Maur Wailen takweiyel ep ak ai ak wang a kil ake antokg kitnong a kanokg ti pa, a pa. Kil yapontel ak ai kolpa itna a, kai angko wang aimpreken a kil alkil alm ti pa kil la Krais kil palng angko wunong eng ak angklin kipm ti.
1PE 1:21 Am Krais pa angklinsepm atom kipm ukipma katnun Maur Wailen pake. Maur Wailen kil melnum a pikekg la Krais a pikekg amo pa kil wrekg atom kil alkel klalen a nang wailen. Kolpa atom kipm ukipma Maur Wailen rpma nungkwangen ariwe la kil ikga ntokg kweikwei wrongkwail a pikekg kil yapon yangkipm lala ikga ntokg eng ik ngklinsepm pa.
1PE 1:22 Kipm atning nungkulkg katnun yangkipm aklale wor a ak la Krais pa atom ak angketen wrpmungkaung a paipmpaipm akipmen pa atom kipm wirng no kukula wor itna wulmpa a Maur Wailen pa ise, atom kipm wasrongen tu kipm alkipm a ukipma Krais pa aklale. Kolpa ti kipm mpa nikgwalpm rkekgen plan ipma wor wasrongen tita ik ipma wriwen wor kolpa iye kai.
1PE 1:23 Wa kipm mpa wa nikgwalpm rkekgen plan ipma wor wasrongen tita itnen a pikekg kipm palng melnum weten kol warim a man raku weten. Pake ake mansan a ikga imo pa angket alewepm pa, pa yangkipm a Maur Wailen a ikgake imo pa angket alewepm pake. Yangkipm a Maur Wailen a kipm awi pa Maur arpmen a itna yongkyong.
1PE 1:24 Eng ntei, pikekg melnum okwripm ur la ela wrkapm a Maur Wailen pa la kolkil la, “Melnum wrongkwail pa kolen mi a ake itna wang watin pa, wa nang wailen a kweikwei wrongkwail wor wor a melnum ak arpme rpma kanokg ti pa kolen mi rwin a ake itna wor yongkyong pa. Am kol pake, mi pa amo nungkur, a mi rwin pa anur nar paipm.
1PE 1:25 Pake yangkipm a Wailen pa ikga itni yongkyong.” Ti yangkipm a pikekg melnum ok wripm la ikga itni yongkyong pa, am yangkipm wor a la Krais a tu men laron nakepm pa am pake.
1PE 2:1 Kipm am palng rukis wor ise. Ti kipm mpa itni watin tukwleikgen paipmpaipm wrongkwail pa. Ake mpa kinsil yangkipmok, ake mpa kinsil plan ik num enen ti la wor pake a num wunen ai pa paipm, ake mpa ringkowe kweikwei a melnum manet ur, ake mpa la paipmel a la elyirokgel mlaur.
1PE 2:2 Maur Wailen am pikekg ak awiyepm eng alkilen ise, pake kipm mpa kolen warim mawet a nikgalm akwen la il ma munet pilpilet wor a yangkipm ute aklale a Maur Wailen pa kolti. Eng mpa ik ngklinsepm eng kipm ukipma itni titnongket kolpa iye kai kolen warim a wrekg wail anip watin antiwe titnongket pa.
1PE 2:3 Wrkapm a Maur Wailen pa la kolkil la, “Kipm pikekg ariwe ipma wor a Wailen ak angklinsepm pa ari, wor wrisen.” Pa kol kipm pikekg al ma pa ari, pilpilet munet wor, ti kipm il lan kolpa kai o!
1PE 2:4 Kipm kul kutnun Wailen Sisas pa, kil kol ong kimpowen wor a Maur Wor arpmen a itna yongkyong. Ong pa tu wrong kin a kipman elukgen a la paipmel la pa ong paipm. Pake pikekg Maur Wailen takwei ong pa la pa ong wor wrisen akilen a antiwe titnongket angen kweikwei wrongkwail ampake.
1PE 2:5 Kipm iye kipm alkipm ti kai kol ong tangklepen wor a Maur Wor arpmen a itna yongkyong ti kai eng Maur Wailen ik le wan a kil alkil ai a rpme. A wa uk kipm alkipm ti kai eng Maur Wailen inel kla ik mprinsepm atom kipm mpa ikwap kol melnum ipma krakgen akilen. Atom kipm mpa uk kipm alkipm ti kimeket kai eng Sisas Krais pa kol wlikgok a kipm al wor uk Maur Wailen. Wlikgok kolpa pa Maur Wailen kil karpo yangkipm ute pake.
1PE 2:6 Kol wrkapm a Maur Wailen pa la kolkil la, “Kipm ri, ti ong kimpowen wor wrisen pikekg kupm takwei ep ak ai elngitna atom kupm angket uwen itna wrik nangen Saion la le wan pa elewe pa, pa ong kalnten titnongket wor wris ata a ak ale wan pa eng itna titnongket yongkyong ampake. Atom mla ur kil okg rki ong pa, pa kil ikgake uwi num paipm pa.”
1PE 2:7 Kipm melnum a ukipma kil pa, kipm ari la pa ong kalnten titnongket wor a ikga ngklinsepm. Pake tu melnum a ake ukipma kil pa, tu pa kol tu melnum a ale wanel a wrkapm a Maur Wailen la tu pa kolkil la, “Ong a tu melnum a ale wanel pa tu akraro elukgen la pa ong paipm, pake Maur Wailen kil antokg ong pa palng ong kimpowen titnongket kalnten wor wrisen a itna yongkyong pa am pake.”
1PE 2:8 Wa yangkipm ur ela wrkapm a Maur Wailen pa wa la kolkil la, “Kil pa kol ong ur a rmpa ya a tu melnum kaingkul atom al nepm atnewe, wa kil kol ong ur a tu elng nepm ele ari mlaset atom tu silalng angko.” Wrkapm pa la tu al nepm atne pati atnen a tu elukgen uk yirokg yangkipm wor a la Sisas pa. Pikekg ep ak ai Maur Wailen akwonalmpen la ep la ikgam palng kolpake, ti am palngten katila kolpake.
1PE 2:9 Pake kipm pa pikekg Maur Wailen takweiyepm la kipm wrong kin kipman om wris akilen. Kipm melnum ipma krakgen a akwap itna orngwatneikgen kil alkil melnum tukgunakg a itna wailen ikgalen kweikwei wrongkwail. A wa kipm wrong kin a kipman a pikekg Maur Wailen anel kla ak amprinsepm eng alkilen, a wa kipm wrong kin a kipman mapming a pikekg kil takweiyepm elngtepm itna manet, eng mpa kipm laron kwap wail manten wor wor akilen a ngkit nang akilen. Kil melnum a pikekg akwewepm atom awiyepm angkai miningket pa aye kul kai itna kai klalen wor wrisen akilen ai.
1PE 2:10 Pikekg ep pa kipm pikekg ake kol wrong kin a kipman a anong kanokg wris ur pa, pake ak wang ti pa kipm palng wrong kin kipman mapming a Maur Wailen. Pikekg ep pa ake pikekg Maur Wailen areinsepm atom angklinsepm pa, pake ak wang ti pa kil areinsepm atom angklinsepm.
1PE 2:11 Kipm yekyek alkupm pa, kupm la mpa lanikepm yangkipm kol kipm melnum yaworen a angkol ur ai wli rpma kanokg ti kolti. Ti kupm la tilpepm lala kipm mpa uk yirokg wrisen ipma wasrongen tingklaket alkipm a rka titnongket la ntokg kweikwei paipm paipm a almpwrong nampokgen maur wor a rpma kawor kipm pa.
1PE 2:12 Kol kipm nti tu ipmawekg pa itn a rpmi pa, kipm mpa plan mrangkum wor kolti. Kol tu lawepm la kipm melnum paipm a antokg paipmpaipm, pake kol tu ri atn a rpma wor a kipm plan ikngklei wang kolpa pa, tu ikga ngkit nang a Maur Wailen ik wang umpuwen a ikga kil nar riwen pa.
1PE 2:13 Kipm ikwonilmpen Wailen Sisas a pikekg orngwatneikgen tu mring man pa, ti kipm mpa rku kipm alkipm ti nar orngwatneikgen tu melnum wrongkwail a awi nang wailen itna ikgalento pa: pa ak la melnum tukgunakg a itna ep ikgalen anong kanokg akipmen pa,
1PE 2:14 a wa ak la tu mring man wailen wailen a wusok wusok a orngwatneikgen melnum tukgunakg pa. Melnum tukgunakg pa alken titnongket atom kil ukwawen la tu kai wanteng atnen tu melnum a antokg melkget pa eng tu ik kweiur ik ilmpe melkget a tu antokg pa. A kil wa ukwawen la tu kai ukwor ngkit nang a tu melnum a akwap wor pa.
1PE 2:15 Maur Wailen pa kil wasrongen la kipm mpa ntokg kuinaur a wor kolti eng mpa ik mpri okel tu melnum a antokg nikgwalpm titno a karken a awi ariwe yangkipm aklale pa atom tu la paipmel arkiwepm kalpmilel pa.
1PE 2:16 Kipm mpa orngwatneikgen tu mring man a itna wailen ikgalentepm pa, pake tu pa ake wa yapowepm pa, kalpis kipm am wirng no itna kukula ise. Pake ake mpa wa kipm ntokg kol tu a lala tu am wirng no kukula wor ise, atom tu antokg kweikwei a wor a paipm pa ak wasrongen alntu pa, atom tu awi pa kol apm ur a akaur paipmpaipm a tu antokg pa. Ei, kipm am wirng no kukula ise, pake kipm mpa rpmi kolen melnum a aken kwap kalpmlel orngwatneikgen mring alkipm Maur Wailen a yapowepm pa.
1PE 2:17 Kipm mpa lupm iye tu melnum wrongkwail, wa kipm mpa plan ipma wor wasrongen tu kipm alkipm a ukipma Sisas pa. Wa kipm mpa ngkirk rpmi orngwatneikgen Maur Wailen, a wa kipm mpa wa lupm iye melnum tukgunakg a itna ep ikgalen anong kanokg akipmen pa.
1PE 2:18 Kipm melnum a tu mring armpentepm la kipm ikenten kwap kalpmilel pa, kipm mpa lupm iye rku kipm alkipm ti rpmi orngwatneikgen tu pa. Ake mpa kipm a mring alkipm aktepm wor pa kolti lupm iye tu mring alkipm ti pa, kalpis, kipm a tu mring alkipm aktepm paipm pa, kipm mpam wa lupm iye rku kipm alkipm ti rpmi orngwatneikgen tu mring paipm alkipm pa kolpa yat pake.
1PE 2:19 Kol kitn ntokg kuina ur a wor kitila kuina ur a kitn ariwe la pa wor katnun nikgwalpm a Maur Wailen pa, atom tu lkeitn wleket pa kalpmilel, atom kitn rkul ipma pa rki kalkuten pa, pa kitn pa wor pake, Maur Wailen pa kil plantepm nikgwalpm wor a kolpake.
1PE 2:20 Kol tu orepm lkepm wleket itnen paipm a kipm antokg pa, atom kipm rkul ipma uk wor kolti rki kalkuten pa, mpa mla a i mpa kiporngkepm yangkipm la kipm pa wor pa, kalpis. Pake kol tu lkepm wleket itnen a kipm antokg kuina ur wor atom kipm rkul ipma uk wor kolti pa, pa kipm pa wor pake, Maur Wailen kil mpa kiporngkepm yangkipm pa.
1PE 2:21 Pikekg Maur Wailen akwewepm la kipm kutnun nikgwalpm kolpake. Eng ntei, pikekg Krais kil wa awi wrik amentepm pa arki kalkuten eng ak angklin mentepm ti. Kil alkil ep plantepm ya la kipm mpa ik kolpa kitila nepm yikak akilen pake.
1PE 2:22 Kil ake antokg paipmpaipm ur a wa ok a kil ti ake wa ak la yangkipmok ur a kansil pa, kalpis wrisen.
1PE 2:23 Tu ak nokgel kil pa, kil ake wa akalmpe tu a aknokgel kil pa. Wa tu alkel wleket pa, kil ake wa naken wrongkel tu pa la wa ikilmpe pa, kalpis. Kil ukipma ariwe la Maur Wailen mpa ik kweikwei ute wor kolti atom kil uk kil alkil ti nampokgen kalkuten pa kai wam a Maur Wailen ai.
1PE 2:24 Krais kil awi num angklin paipmpaipm amentepmen ti uk num a kil alkil ti tu karkurngkel rka yo okgmangki ti eng ak alm nol nikgwalpm amentepmen a rka la ntokg paipmpaipm ti amo kai plalng, atom mentepm wirng no itna kukula wor rpma katnun nikgwalpm ute wor a Maur Wailen alkil ai kolti. “Tu orel alkel wleket, num a kil pa kitnangku rakol, atom ak angklin kipm pa palng wor.”
1PE 2:25 Kipm pa pikekg kolen manto walkg malkgu a pikekg kai tilpming a mpang ise. Pake wa ak wang ti pa kipm am wa yaper wli eng melnum yan a ikgalen manto walkg malkgu pa atom kil angklin kipm pa palng wor, pa kol kipm wli anong ise palng wampil a a wam akilen om.
1PE 3:1 Kipm kin nanen pa, kipm mpam wa rpmi orngwatneikgen tu kipman alkipmen pa. Kipm itn a rpmi plan mrangkum wor eng mpa wa ik uwi tu kipman tiur alkipm a ukyirokg yangkipm a Maur Wailen pa iye kul eng Maur Wailen. Pa ake la mpa kipm laniken ik ok ti pa,
1PE 3:2 tu alntu mpa ri atn a rpma klalen rukis wor akipmen pa pati, pa mpa ik uwi tu pa iye kul kai ukipma kutnun Maur Wailen pake.
1PE 3:3 Kol kipm la palng rimo iklale pa, ake mpa kipm kurkuk il klapm kampong noworel num enen akipmen pa riworwor ik kweikwei kolen, lil kroitnimpon, ngkli marpm mis kweikwei rki nungkulkg, yipo tukgunakg a nowe apm nung ari wor wor kolti pa.
1PE 3:4 Kol kipm la palng rimo iklale pa, kipm nukure ik lukglukg wor wor a ikgake kai paipm pa kawor ipma wunen akipmen ai. Kol kipm itn a rpmi meen wor orngwatneikgen pati, pa kol lukglukg wor a kipm ak nakure kawor wunen eng arimo, atom Maur Wailen ari la pa wor wrisen itna ep pake.
1PE 3:5 Kipm mpa nukure kolpa eng ntei, pikekg ep ak ai pa tu kin a ukipma Maur Wailen pa tu pikekg nakure tu alntu ariworwor kolpake: tu pikekg orngwatneikgen kipman alntu pa a ukipma rpma nungkwangen kuina ur a Maur Wailen kil lala ikga ntokg pa.
1PE 3:6 Kolen Sara pa, kil pikekg orngwatneikgen kipman alkil Apraam pa, atom kil akwewel la Melnum Wailen akilen. Kol kipm kutnun nikgwalpm wor kolpa a kipm ake ngkark eng kalkuten ur a palngtepm pa, pa kipm plan kolen la kipm pa warim kin a Sara pake.
1PE 3:7 Wa kipm kipman pa, kipm mpam wa ikwap wor eng tu kin alkipm pa kolpa yat pake. Nikgwalpm a kipm pa mpa umpen riwe la, tu kin pa kolen kuntuk mang a ake kalnten pa, kolpa ti ikglen riworwor, eng mpa um. Kipm mpa lupm iyewen ikglenten riworwor, eng ntei, Maur Wailen pikekg won wor eng tu pa, atom tu pa yat, ikga kipmekg kinkipmanen yatenen kaino rpmi wor yongkyong kaino anong wor ai. Ti kol kipm ik kolpa pa, ikgake kwei ur ik ngketen a kipmekg oklala nimpokgen Maur Wailen pa.
1PE 3:8 Yangkipm akupmen eng a plalng, ti kupm la lanikepm kolpa la, - kipm kimeket mpa lupm nikgwalpm wris, - tu a akg pa, kipm ntiwen akg, tu a atopen pa, kipm ntiwen itopen, - kipm plan ipma wor wasrongen tu melnum alkipm a kipm ukipma Sisas pa, - kipm plan tita ipma wor ik ngklin tita, - a kipm rku kipm alkipm orngwatneikgen tita. -
1PE 3:9 Ake mpa kipm ikilmpe ntokg paipm mla ur a antokgtepm paipm pa, a wa la paipmel mla ur a la paipmel kipm pa, kolpa i ai. - Kipm mpa ikilmpe kolkil: kipm lken ipma wor ngklinsen. Eng ntei, pikekg Maur Wailen am takweiyepm la kipm ik wor kolpake, eng mpa wa Maur Wailen kil wa uk ipma wor ngklin kipm pa.
1PE 3:10 Eng ntei, wrkapm a Maur Wailen pa la kolkil la, “Kol mla ur kil wasrongen la rpmi itopen wor, a wa kil wasrongen la rpmi wor wang watin pa, - kil mpa yipo ok akilen eng ake mpa la oklala a paipm a wa ake mpa kil la yangkipm kansil pa. -
1PE 3:11 Kil mpa plelng yirokg la paipmpaipm pa a kil mpa ntokg kuina ur a wor kolti. - Wa kil mpa nikgwalpm rkekgen eng ikor nikgwalpm wor a rpma meen wor nampokgen wrongkwail atom kil mpa rkul nikgwalpm pa iye kolpa kai.
1PE 3:12 Eng ntei, Wailen pa kil wulmparpme tu melnum ute wor pa, a kil nungkulkg lan oklala a tu lanakel nakel pa, a kil plelng yirokg la tu melnum a antokg paipmpaipm pa.”
1PE 3:13 Kol kipm nikgwalpm rkekgen tumplowis eng ntokg kuina ur a wor pa, ti mpa mla a i ntokgtepm paipm?
1PE 3:14 Pake kol kipm rki kalkuten itnen a kipm plan nikgwalpm ute wor a Maur Wailen pa, kipm pa wor pake, kipm itopen o! “Ake mpa kipm ipma kalkut ngkirk eng tu melnum a ayewepm ngkark pa.”
1PE 3:15 Ei, ake mpa kipm ngkirk pa, kipm mpa elng Krais pa rpmi Wailen ikglen ipma akipmen pa. Atom kipm mpa numprampen nikgwalpm ti iye itni eng kol tu mla ur isentepm yiprokgen a kipm ukipma rpma nungkwangen kuina a i pa pati, kipm mpa ikilmpe laniken pa.
1PE 3:16 Kipm mpa lupm iye tu pa a ikilmpe meen asen atuwen pa. Wa kuina ur kipm oklala aki ntokg pa, ntokg ute wor kolti, eng ake mpa ok wusok akipmen ti rkiwepm la kipm antokg paipm ur pa. Kol kipm ntokg kolpa pa, tu a la paipmel kipm a atn a rpma wor katnun nikgwalpm wor wor a Krais pa, ikga tu uwi num paipm eng yangkipm a tu la paipmel kipm pa.
1PE 3:17 Kipm rki kalkuten itni titnongket kolpa eng ntei, kol Maur Wailen uk ya la kipm rki kalkuten pa pati kipm riwe kil: kol kipm rki kalkuten itnen a kipm antokg kuinaur a wor pa pati, pa wor pake, a kol kipm rki kalkuten itnen a kipm antokg kuina ur a paipm pa pati, pa paipm.
1PE 3:18 Kol kipm rki kalkuten itnen a kipm antokg kuinaur a wor pa pati, pa wor, eng ntei Krais kil pikekg wa arki kalkuten amo atnen paipmpaipm akipmen pa anti wris kolti. Kil melnum klalen ute wor itna wulmpa a Maur Wailen pa kil awi wrik a mentepm melnum paipm a ake antiwe kai itna wulmpa a Maur Wailen pa, atom kil arki kalkuten amo eng akawi mentepm ti aye yaper kai eng Maur Wailen. Numpalk akilen ti pa, pa pikekg tu karkurngkel amo, pake maur akilen pa, pa Maur Wailen pikekg la atom wrekg nowe numpalk alkil a Maur ai atom kil rpma yongkyong.
1PE 3:19 Sisas pikekg palng maur pa, kil kai wrik a tu melnum a amo kai rka rka pa angkli yangkipm naki maur a tu melnum a amo kai rka rka pa, pikekg Maur Wailen amprinsen, ti tu rka pa.
1PE 3:20 Pa maur a tu melnum a pikekg talpulng yangkipm a Maur Wailen ak wang a Nowa pa. Maur Wailen kil arein tu melnum pa ikgalen rpma nungkwangen kolpa kai la kol a tu plelng ipma ik wang a Nowa ale wan unokgen pa, ari kalpis. Atom kil naki Nowa alm ompel kweikwei wrongkwail pa a awi tu kinwatnom alkil pa kolti aye kawor rpma wan unokgen pa, a Maur Wailen kil ak u al tu wrong kin a kipman pa plalng. A tu melnum wampwomis wampwompwraur pa pikekg rpma wan unokgen pa atom u ayewen kai rka, atom tu pa wor rpma pake.
1PE 3:21 U a pikekg ak awi tu pa kai wor pa kol kla ur a la u a tu naren Krais ak kaluk kipm a plelng ipma pa, pa u a wa ak awi kipm eng alkilen pa. Pa ake wa tu kalukepm eng ak klak kimpilp a num enen ti pa, kalpis. Pa kol kipm oklala naki Maur Wailen eng kil ak klak kimpilp a nol nikgwalpm ai palng rukis wor. Kil ak katila kolpa atnen Sisas Krais a pikekg amo atom wa wrekg pa.
1PE 3:22 Kil kaino rpma wam wi a Maur Wailen kaino anong wor. Kil awi nang wailen a antiwe titnongket ikgalen tu maur akwapel a Maur Wailen, a tu mring a maur a antiwe nang wailen, a kweikwei wrongkwail a antiwe titnongket a itna kanokg ti a itna kaino kitnong ai am nar itna orngwatneikgen kil pake.
1PE 4:1 Krais kil pikekg uk num alkil ti arki kalkuten awi wleket, kolpa ti kipm ti mpa wa rkul nikgwalpm titnongket rki kalkuten kol pikekg Krais kil arkul pa. Mla ur kil arki kalkuten awi wleket pa, kil ake wa akwonalmpen eng antokg paipmpaipm pa.
1PE 4:2 Kolpa ti ik wang wrongkwail a kipm rpma kanokg a ti pa, kipm ake mpa kutnun nikgwalpm wasrongen paipm a melnum katnun itna kanokg a ti pa, kalpis. Kipm mpa kutnun nikgwalpm a Maur Wailen kil alkil ai kolti.
1PE 4:3 Kipm am pikekg atn a rpma antokg kuina ur kol a tu ipmawekg antokg pa antiwe yat ise. Kipm pikekg angkli arkul tita kai paipm angko mis, ipma wrekg aringkowe la ntokg kuina ur a paipm, al u titno atom titno, antokg okipma wail al nangnang atnen al u titno kolpa kai klangkil angko mis, kapor kilko alein mring a mring maur a kweikwei wrongkwail a kipm la pa kol Maur Wailen akipmen pa.
1PE 4:4 Pikekg kipm antimprak tu ipmawekg pa antokg paipmpaipm pa itna wunong wunong numpaipm kalpisen pa kol kipm kai karkuk kai u kop a pilpilet u titnongket ela pa. Ari ak wang ti pa tu ipmawekg pa wa wrekg paipm eng ari kipm ake wa antimprak tu pa antokg paipmpaipm pa om, atom tu la paipmel ak nokgel kipm pa.
1PE 4:5 Pake tu ikga uwi ker a ak awiye kuina kuina ur a tu antokg ti iye kai uk Maur Wailen ai ngkleikg, kil melnum a numprampen rpma la ikga rpmi itning yangkipm a tu a rpma ti a wa tu a pikekg amo kaingkai ai, atom ikga ikilmpe kitila ker pa.
1PE 4:6 Kolpa atom ari Krais pikekg wa laron yangkipm wor alkil pa naki tu melnum a amo kaingkai rka pa, eng la lken yaprekg watin a rpma wor yongkyong kol a Maur Wailen kil rpma pa. Ei, numpalk a tu pa pikekg amo kol numpalk a mentepm wrongkwail ikga wa imo itnen paipmpaipm a mentepm antokg pa.
1PE 4:7 Wang umpuwen a kweikwei wrongkwail ti am kul wreren eng a plalng tike. Kolpa ti kipm rpmi wontrakole a lokipaar kipm alkipm ti rpmi riworwor eng mpa kipm ntiwe oklala niki niki Maur Wailen.
1PE 4:8 Kwei ur wail itna ep angen kweikwei wrongkwail pa pati, kipm mpa rkul nikgwalpm a plan ipma wor wasrongen tita ik ipma iklale. Eng ntei, nikgwalpm a kipm plan ipma wor wasrongen tu melnum pa ak angklinsepm eng kipm antiwe ungkwan paipmpaipm wailet a tu antokgtepm pa.
1PE 4:9 Kipm mpa kiporlei wokgmprak pa ik ipma wor kolti, a ampur kipm angklin nampokgen ipma paipm tingtang tingtang pa.
1PE 4:10 Maur Wailen pikekg plantepm ipma wor a angklinsepm atom kil ampreing kwap, ariwe a titnongket akilen pa aknirake kipm ti, la kipm ik ik kwap riworwor eng ik ngklin tita. Ti kuina ur wor a kipm wris wris awi pa, kipm ikglen riworwor ik ik kwap ik ngklin tita.
1PE 4:11 Mla ur a Maur Wailen alkel kwap a angkli yangkipm pa, kil laron yangkipm a Maur Wailen pawo! Wa mla ur a kil awi kwap a ak angklin mla ur ai pa, kil ngklin mla ur pa ik titnongket a Maur Wailen alkel pawo! Kipm ik kolpa eng mpa tu ri a kipm ukipma Sisas Krais pa antokg kweikwei kolpa pa, mpa tu ngkit nang a Maur Wailen a antiwe titnongket a klalen wail manten a ikga itni yongkyong iye or pa kai. Aklale wrisen.
1PE 4:12 Kipm workganen yekyek alkupm, kalkuten a wleket a kipm arki pa kolen wakg a rawepm wleket paipm eng ak ariwepm pa, pake ampur kipm wrekg paipm la pa kol kwei ur weten a palng eng ak arku kipm ti pa.
1PE 4:13 Kipm mpa itopen eng rki kalkuten kol pikekg Krais kil arki kalkuten a tu alkel pa. Eng ikga Krais kil nar ngko wunong nimpokgen nang wailen a titnongket alkil pa, kipm ikga tipra itopen wail manten.
1PE 4:14 Kol tu la paipmel kipm pa itnen a kipm arki nang a Krais pa, kipm pa wor pake, kipm itopen o! Pa plan la Maur Wor klalen a Maur Wailen pa am rpma kawor kipm pake.
1PE 4:15 Kipm awi wleket atnen yiprokgen wor kolpa pa wor pake. Ake mpa kipm ur uwi wleket itnen a kil alm melnum ur amo, aki kil ak ikgwam aki itna melkget antokg paipm ur, aki kil pilpilen kai pa kai pa arolanti kweikwei a melnum manet ur ai, pa pati pa paipm.
1PE 4:16 Pake kol kipm ur uwi wleket itnen a kil arki nang a Krais pa pati, ampur kil num paipm atnen pa, kil mpa uk wor itopen ngkit nang a Maur Wailen ti kolti itnen a kil arki nang a Krais ti.
1PE 4:17 Kipm itopen rki kalkuten eng ntei, wang a Maur Wailen la ntokg yangkipm nti mentepm wrongkwail ti pa, am kul wreren tike. Kil la ngkiten ntokg yangkipm nti mentepm wrong kin kipman akilen ti ep tike. Kol kil ik mentepm ti kolpa, ti kil ikga wa ik ngkowe eng tu a karken katnun yangkipm wor akilen pa.
1PE 4:18 Wrkapm a Maur Wailen pa la kolkil la, “Kol melnum ute wor kil la kaino anong wor pa, pa ake wunongket, pa kil arki wleket wakget pa ikga Maur Wailen mplimpel kai wakg wail pa iye kul kai wor. Ti kuina kolai ikga palng eng tu melnum a antokg paipmpaipm a almpil yirokg la Maur Wailen pa? Pa tu ikga kai paipm kolti tuwa.”
1PE 4:19 Kolpa ti, kol nikgwalpm a Maur Wailen la uk wleket a kalkuten tu mla ur pa, tu pa mpa itn a rpmi a ntokg kuina ur a ute wor a uk tu alntu ti kimeket kai eng Maur Wailen melnum a pikekg armpen wam tu ti a akangklei wang kil melnum a ak katila kuina ur a kil la pa.
1PE 5:1 Kupm ti, kupm melnum wailen akwapel a Krais kolen kipm melnum wailen wailen akwapel a Krais a rpma kai pa. Kupm alkupm ti pikekg itna ari Krais kil arki kalkuten pa ak wulmpa a kupm alkupm ti, wa kupm ti ikga wa wampwam uwi nang wailen a titnongket a Krais pa ik wang a ikga kil palng ngko wunong pa. Kolpa ti kupm la tilpepm la kolpa la,
1PE 5:2 kipm mpa ikglen manto walkg malkgu a Maur Wailen elng kai wam akipmen pa riworwor, kil ariwe kipm pa atom kil am elng kai wam akipmen pa eng la kipm ikglen pake. Kipm ik won ngko ikwap pa kolen la pa kwap alkipmen, ake mpa mlaur tirpmingentepm la kipm ik pa, kipm itopen ikglen ik nol a ipma iklale kitila nikgwalpm a Maur Wailen. Nikgwalpm akipmen pa mpa rken eng ikwap pake, ake mpa kipm ikwonilmpen la kipm a ikwap eng la uwi marpm pa.
1PE 5:3 Ake mpa wa kipm ti plan kolen la kipm ti melnum wailen a antiwe titnongket a kalnten, atom rku tu manto walkg malkgu a pikekg Maur Wailen elngkai wam a kipm la kipm ikglen pa, kolpa kalpis. Kipm mpa itn a rpmi ikwap wor kolti eng mpa tu manto walkg malkgu pa ri pa, mpa tu kitila
1PE 5:4 Kipm ikglenten riworwor kolpa pati, ikga ik wang a melnum itna ep a mentepm melnum a ikgalen manto walkg malkgu pa wli palng riwepm pa, ikga kil lkepm nang wailen a titnongket wail akilen pa kolen kweiur wor a melnum wris ur a tu a pirng akoporen tita pa awi pa, pa kweikwei a ikga itna yongkyong, ikgake kai paipm pa.
1PE 5:5 Kipm warimpen pa, kipm am wa kolpa yat pake, kipm mpa orngwatneikgen tu melnum wailen wailen akwapel a Maur Wailen a ikgalentepm pa. A wa kipm kimeket a ukipma pa, kipm mpa lupm nikgwalpm a arku kipm alkipm ti ik ngklin tita. Eng ntei, wrkapm a Maur Wailen pa la kolkil la, “Maur Wailen pa kil plan ipma wor alkil ak angklin melnum a arku kil alkil, a kil almpil yirokg la melnum a wam rka nol atop ngkat nang a kil alkil pa.”
1PE 5:6 Kolpa ti kipm rku kipm alkipm ti nar rpmi orngwatneikgen wam titnongket kalnten a Maur Wailen pa. Eng ikga kil alkil ngkit nang akipmen pa iye kaino kwa ik wang wor ur alkil a kil alkil alm ai kul.
1PE 5:7 Kil ikgalentepm rpma pa, kolpa ti kipm elng kalkuten wrongkwail akipmen ti kimeket elng kai rki maleng a kil pawo!
1PE 5:8 Kipm mpa itn wontrakole uk ikg riwe, Maur Paipm Satan wrongmanto amentepmen pa kolen nimpa tilpmingen wail manten wrongen a itna ep a wlikgok wrongkwail pa aner krining kruitn kruitn atn yela ikgen akor melnum la ilm il pa.
1PE 5:9 Kipm mpa ukipma Krais pa itni titnongket tulpulng Maur Paipm Satan pa kai tukwleikg. Kipm ariwe pa la, ake wa kipm wris ti pa, tu melnum wrongkwail akipmen a kipm ukipma Krais a rka yela kanokg ti am arki kalkuten irir kol a kipm ti arki tike.
1PE 5:10 Pake kalkuten a kipm arki ti pa, ikga itni wang tukwok kolti kai plalng, atom ikga Maur Wailen ngklin kipm a kalkuten arkuwepm pa wrekg rpmi wor, a ik itnewepm itni tongtong, a ik num kirkitiwepm, a wa ik titnongketel kipm eng ake mpa kuina ur ik ngkon nepmel kipm pa. Maur Wailen kil alkil ikga ngklinsepm kolpake. Kil melnum a plan ipma wor ak angklinsepm a kil melnum a pikekg akwewepm la kipm a rpma kawor Krais pa kul uwi nang wailen a titnongket wail akilen a ikgake itni wang tukwok pa, pa ikga itni yongkyong.
1PE 5:11 Kil alkil wris ata pa kolti antiwe titnongket wail manten a ikga itni yongkyong or pa kai. Pa aklale wrisen.
1PE 5:12 Kupm lanaki Silpanus, melnum a nungkulkg wor almentepmen a mentepm ukipma Krais pa, kil angklinsopm nira wrkapm tukwokenen kil kai eng kipm. Kupm la ak titnongketel kipm pa la, kol a kipm arki kalkuten ti pa, pa am nikgwalpm wor aklale a Maur Wailen plantepm ak angklinsepm am pake. Kupm alkupm ariwe kolpa ise, kolpa atom kupm la tilpepm la, kipm itni titnongket kolpa kai o!
1PE 5:13 Tu wrong kin kipman mapming a ukipma Krais a rka anong wail Papilon kil pa tu la tu nikgwalpm arkentepm rka pa. Tu pa pikekg Maur Wailen takweiyen kol pikekg kil takwei kipm pa. Wa Mak, a kupm akwewel la kil warim kipman akupmen pa kil wa la kil nikgwalpm arkentepm rka pa.
1PE 5:14 Kipm nikron tita ik plan la kipm wasrongen tita ak ipma aklale. Kupm oklala naki Maur Wailen eng mpa kil uk ipma meen wor akilen pa kipm wrongkwail a rpma kawor Krais pa. Yangkipm wrkapm a kupm nirantepm ti pa am kai itna kolpake.
2PE 1:1 Kupm Saimon Pita, kupm melnum wokgen a akwap orngwatneikgen Sisas Krais. Kil Maur Wailen amentepmen, kil melnum a pikekg amo eng akawiyo aye yaper kai eng Maur Wailen. Kil melnum ute wor kolpa atom kil angklin kipm pa atom kipm ukipma kil pa irir kolen a pikekg kil angklin men ti atom men ukipma kil pa. Pa kweiur wail manten wor a mentepm kimeket awi. Kupm nira wrkapm kil eng kipm eng ak angklin kipm pa.
2PE 1:2 Mpa kupm oklala niki Wailen eng mpa kil plantepm ipma wor a kil pa ik ngklinsepm a lkepm ipma meen wor ngkine wail a wail kolpa iye kai o, atnen a kipm ariwe Maur Wailen a Wailen amentepmen Sisas pa rpma kawor ipma akipmen pa.
2PE 1:3 Mentepm ariwe Sisas Krais pa ariworwor, atom kil alko kweikwei wrongkwail wor wor a Maur Wor eng mpa mentepm ntiwe itn a rpmi kutnun nikgwalpm ute wor a Maur Wailen. Kil pa kil Maur Wailen, kil antiwe titnongket wail manten, kolpa atom kil antiwe angklinso kolpa. Kil alkil pa kil klalen a kil antiwe nikgwalpm ute wor wrisen, atom kil akwewo la mentepm kaintel eng uwi nikgwalpm klalen a ute wor wrisen akilen pa.
2PE 1:4 Kil klalen a kil antiwe nikgwalpm ute wor wrisen, atom pikekg kil yapon yangkipm la ikga lko nikgwalpm ariwe watin a kweikwei wor wor wail wail wailet paipm. Kil la lko kweikwei wor wor pa, eng mpa kipm ntiwe ngkom nilokgen paipmpaipm a itna wailen ikgalen kanokg ti atnen ipma wasrongen a wrekg ak arkolngko atom mentepm angko kai paipm pa. A wa kil la lko kweikwei wor wor pa, eng mpa kipm wa uwi nikgwalpm ute wor a Maur Wailen kil alkil ai.
2PE 1:5 Ti kweikwei wor wor am kil alkepm ise, ti kipm am pikekg ukipma Sisas pa ise, pake ake la kipm mpa ukipma kolti pa, wa kipm mpa wa nikgwalpm rkekgen iken kwap timplowis eng plan nikgwalpm wor. Pake ake la kipm mpa plan nikgwalpm wor kolti pa, wa nol nikgwalpm akipmen ti mpa wa umpen wontrakole uwi riwe Maur Wailen.
2PE 1:6 Pake ake la mpa kipm uwi riwe Maur Wailen ti kolti pa, mpa wa kipm wa lokipaar kipm alkipm ti rpmi meen. Wa ake la mpa kipm lokipaar kipm alkipm ti kolti pa, mpa wa kipm wa rkul ipma itni titnongket. Wa ake la mpa kipm rkul ipma itni titnongket kolti pa, mpa wa kipm wa itn a rpmi kutnun nikgwalpm a Maur Wailen ai.
2PE 1:7 Wa ake la mpa kipm itn a rpmi kutnun nikgwalpm a Maur Wailen pa kolti pa, wa kipm mpa wa plan ipma wor wasrongen tu melnum alkipm a kipm ukipma Sisas pa. Wa ake la kipm mpa plan ipma wor wasrongen tu melnum alkipm a kipm ukipma Sisas pa kolti pa, wa kipm mpa wa plan ipma wor wasrongen tu wrongkwail pa.
2PE 1:8 Kol kipm kirpo lupmen nikgwalpm wor wor wrongkwail kil kutnun iye kolpa kai wail a wail kolpa kai pa, pa plan la kipm am ariwe Sisas Krais, Wailen amentepmen pa worwor ise, atom pa ak angklinsepm eng ake antiwe mpa kipm rpmi ik lpmaak pa, a wa ak angklinsepm eng kuina ur a kipm antokg pa ake mpa aipiken pa.
2PE 1:9 Pake kol melnum ur kil ake atning alupmen katnun nikgwalpm wor wor kolpa pa, pa kil woniketen a pikekg Maur Wailen kil ungkwan paipmpaipm akilen takwleikg atom kil palng rukis wor pa. Ti kil pa palng kol melnum wulmpa miningket aki kol melnum wulmpa tilmpisen pa.
2PE 1:10 Kolpa ti kipm melnum alkupm a mentepm ukipma Krais, kipm am pikekg Maur Wailen akwewepm a takweiyepm eng alkilen ise, ti ake mpa wa kipm yaper kai wulmpa tilmpisen pa. Kipm mpa nikgwalpm rkekgen iken kwap wail eng plan la pikekg kil akwewepm a takweiyepm pa ake kai anuren pa, pa karpon titnongket itna pa. Kipm ik kutnun kitila kolpa pa, kipm ikgake wa ngko yaper kai pa.
2PE 1:11 Kol kipm kutnun kitila kolpa pa, Wailen Sisas Krais amentepmen a pikekg akawiyo aye yaper kai eng Maur Wailen atom itna wailen ikgalento pa, wanyun am kil kukwa okore itna ise eng kipm antiwe ikga kawor anong wor a kil ikga ikglentepm itni yongkyong itni anong pa.
2PE 1:12 Yangkipm a wet kupm la pa kipm ariwe ise, wa yangkipm aklale wrisen a pikekg kipm atning alupmen pa, kipm arkul itna titnongket yat ise, pake kupm ikga wa ngkitepm nikgwalpm kolpa iye kai.
2PE 1:13 Kupm akwonalmpen ari ute wor kol a kupm ngkitepm nikgwalpm ikngklei wang kolpa iye kai ik wang a kupm rpma nampokgen numpalk a kanokg tike eng kipm rpmi won rpme.
2PE 1:14 Eng ntei, kolen pikekg Wailen Sisas Krais amentepmen plantopm pa, kupm ariwe ari ake a wang watin, wang wreren eng kupm a utnurng palk paipm tike.
2PE 1:15 Kolpa ti kupm ikga nikgwalpm rkekgen ngkitepm nikgwalpm kolpa iye kai eng kipm wonirpme kutnun yangkipm aklale kil itni or pa kai, a kupm am amo kai ise.
2PE 1:16 Yangkipm a kipm atning a men melnum wokgen laron nakepm nakepm la mpa kipm uwi riwe la, Wailen amentepmen Sisas Krais kil antiwe titnongket wail manten, a wa la kil ikga yaper nar, pa ake por ur a men alpmen ti ak ariwe a nikgwalpm a men almen ti rka akorla atom laron nakepm pa, kalpis wrisen. Men pikekg nungkulkg a wulmpa ari titnongket a klalen wail manten a kil pa.
2PE 1:17 Kol pikekg wangkur pa Maur Wailen Yan a Sisas pa ngkat nang a kil pa aye kaino kwa a antokg kil palng klalen atom tunteng ariwel. Atom ok a kil alkil a antiwe klalen titnongket wail manten ai angklo la angkaino kitnong ai kul nar lala, “Pa Warim Kipman yekwris ata alkupmen, a kupm plan ipma wor wasrongenentel a ipma akupmen wor atopentel.”
2PE 1:18 Minto pikekg anti Sisas itna kaino wrik nangen pa atning ok a Yan akilen angklo la kolpa angkaino kitnong ai nar.
2PE 1:19 Pa aktitnongketel yangkipm a pikekg tu melnum ok wripm a Maur Wailen la pa, atom men ukipma ariwe la yangkipm pa aklale wrisen. Ti kol a kipm ti wa rkul yangkipm pa kutnun yek kimeket pa ti kol a wor wrisen. Yangkipm pa kolen wakg a akalen miningket pa kai akwe nungkwat, a wa kolen kumeim kongen a ak ungkwan miningket a rpma kawor ipma akipmen pa kai plalng, a ak aye ran pa kulkai.
2PE 1:20 Kwei ur wris ur wail manten a itna ep a kol a kipm uwi riwe pa pati kil: yangkipm wrongkwail a tu melnum ok wripm a Maur Wailen laron atom nira ela wrkapm a Maur Wailen pa, akentiwe mpa melnum ur ik nikgwalpm ariwe a kil alkil ti ik laron yiprokgen a yangkipm pa, kolpa kalpis wrisen.
2PE 1:21 Eng ntei, ake yangkipm wris ur a pikekg tu melnum okwripm a Maur Wailen ti nira aki laron pa, tu nira ak nikgwalpm ariwe a tu alntu ti pa, kalpis. Pa pikekg Maur Wor a Maur Wailen ai ngkat okelen atom tu nira a laron yangkipm pa.
2PE 2:1 Pikekg ep tu melnum okwripm a Maur Wailen a anti tu walyipmiri a wapyipmiri a men wrong kin kipman a Isrel rka pa, tu pikekg laron yangkipm pa ute, pake tu tiur pa pikekg ak palk ipaar almpile yangkipm pa la tu melnum okwripm a Maur Wailen. Ti am wa kolpa yat pake, tu melnum tiur a anti kipm rka pa ikga wa wrekg lmpile yangkipm ute pa wa ik palk ipaar kiling plantepm yangkipm a Maur Wailen ti kai raimpe a ikga ik lokepm kai paipm. Wa ikga tu wa elukgen Wailen atuwen a pikekg amo akarmpenten pa. Tu ak paipm kolpa ti ake angkai ai, angkul ti, tu ikga uwi paipm penterngen kolti itnen paipm a tu ak kolpa.
2PE 2:2 Atom wailet ikga kai kutnunten kai ntokg paipmpaipm a uk numpaipm numkropis kamel. Kolpa ti tu a ake ukipma yangkipm aklale pa ikga ri tu a kai katnunten kolpa, ikga tu la paipmel ya ute a yangkipm aklale a tu pikekg katnun ti.
2PE 2:3 Tu melnum pa ikga tu ri ngkowe marpm kweikwei akipmen ti atom ikga tu ik nikgwalpm alntu ti lmpile oklala alntu ti kiling plantepm ik epilngkepm uwiyepm iyekul eng la uwi marpm kweikwei akipmen ti. Pake Maur Wailen pikekg la ep ak ai la, ikga uwi tu pa iye kai itni yangkipm atom ntokgten paipm ikilmpe paipm a tu ikga ntokg pa. Pa kol tukul a ampei angklin o o rka pa.
2PE 2:4 Eng ntei, kipm ariwe pa, Maur Wailen ake wa pikekg ayela tu maur akwapel akilen a pikekg antokg paipmpaipm pa, kalpis. Kil pikekg ungkwanten yapowen angkliwen kinar rka lkim miningket watin paipm kinar tak ai a miningtitnolep, atom rka pa nungkwangen wang a ikga ntokg yangkipm wail pa.
2PE 2:5 Wa kipm ariwe pa, pikekg ep ak ai Maur Wailen ake pikekg wa ayela tu wrong kin kipman yela kanokg ti a ake pikekg ukipma katnun Maur Wailen pa ak wang a Nowa pa, kalpis, atom Maur Wailen ak u alen plalng. Pake kil pikekg angklin Nowa pa nampikgen tunteng melnum wampwomis wampwompwekg pa kolti. Nowa pa melnum a pikekg ukipma atom kil lanaki tu wrong kin kipman la tu itn a rpmi ute wor kitila yangkipm a Maur Wailen.
2PE 2:6 Wa Maur Wailen pikekg wa lap anong wekg Sotom a Komora pa wakg al kai yipan kalpmlel kolti akalmpe paipmpaipm a tu antokg pa. Kil ak kolpa eng ak plan tu wrongkwail mla ur a almpil yirokg la Maur Wailen kolpa la tu ri la ikgam kil ikten kolpake.
2PE 2:7 Pake Maur Wailen kil angklin Lot melnum ute wor a rpma nampokgen tu pa kai takwleikgenten atom kil lap anong wekg pa. Kil ari Lot kil numkropis atnen a kil ari tu a angkli arkul tita wa antokg kweikwei a numkropis a kolpa kai angko mis paipm wrisen.
2PE 2:8 Melnum ute wor wris pa kil rpma anti tu melnum a antokg paipm oren kong kolpa kai pa, pa kolen kwei ur paipm arkuwel kinar paipm wrisen. Ti kil la lam nungkulkg a wulmpa akilen ti tukulelkgen kweikwei a tu antokg kolpa ngkirk kai rpmi ya watinet ur ai.
2PE 2:9 Kuina ur a pikekg palng eng tu a ep ai pa, pa wa ak plan mentepm ak wang ti la Maur Wailen kil antiwe a awi mentepm melnum a katnuntel pa aye kai takwleikgen kaikuten a palng la ik ningkailo la kol a mentepm ngko pa. Wa ak planto la kil antiwe a yapo tu melnum a talpulng yangkipm akilen pa alken wleket rka nangkin wang wail a ikga ntokg yangkipm wail pa.
2PE 2:10 A tu tiur a tu pa ikga uwi wleket paipm wrisen klangkil tu pa, atnen a tu katnun ipma wasrongen alntu a wrekg angkli arkul tita ak kimpilpetel tu alntu ti, a tu elukgen ok yangkipm a Maur Wailen lanaken la tu ntokg pa, wa tu ake la orngwatneikgen yangkipm titnongket ur pa. Tu melnum a ikga kiling plantepm yangkipm a Maur Wailen ti kai raimpe pa tu wam rka nol katnun wasrongen alntu ti kolti. Tu ake numpaipm ngkark warwar eng tu maur klalen wailen wailen antiwe titnongket pa, kalpis. Tu wa la ak nokgel tu pa yat.
2PE 2:11 Kol am tu maur akwapel a Maur Wailen a titnongket kalnten angen tu melnum paipm pa, kol am tu pa lawen pake, ari kalpis. Tu pa ake wa lawen la tu pa paipm a wa ak nokgelen itna wulmpa a Maur Wailen pa, kalpis.
2PE 2:12 Tu melnum pa titnowen paipm kolen wlikg ok tilpmingen pa, ti tu antokg kweikwei ak wasrongen a tu alntu ti kolti. Kuina ur a tu ake ariwe pa, am tu la paipmel tu pake. Tu pa kolen wlikg ok tilpmingen pikekg palng itna kanokg ti la melnum ti ilm imo kolti. Tu pa ikga kai paipm kolen wlikg ok tilpmingen a amo kai mampis kolti.
2PE 2:13 Tu ikga uwi wleket ikilmpe paipm a pikekg tu antokg. Tu al u a okipma manto manto a antokg kweikwei wailet a ake wor pa ak atopen tu alntu ti kolti. Tu antokg kweikwei kolpa ak ran wulmpa wail ti lala pa wor ampake. Tu kai antiwepm rka wris al okipma pa tu uk numpaipm a nang paipm kipm ti kol kimpilp a ak alei apm pa. Pake tu pa atopen eng akwap paipm kolpa kansil akipaar kipm ti kolti.
2PE 2:14 Tu pa wulmpawet aringkowe la ngkli rkul tu kin pa. Nikgwalpm paipm pa kol ipmanikg a tu elel itna kolti la tu a il okipma pa ikngklei wang itni kolti. Wa tu ale lem eng la iklok tu melnum a ake ukipma itna titnongket pa wa kai ngkowe. Nikgwalpm a tu pa aringkowe atom tu ikgkupuken paipm la uwi kweikwei a tu wasrongen kolti, tu am ak kolpa ariwe ise. Kolpa atom pikekg Maur Wailen kil ok antiwen eng ikga ntokgten kai paipm.
2PE 2:15 Tu a antokg kolpa pa, tu atnuurng ya wor pa ise. Tu kai ar akwekgel ya a tu ore pa atom tu katila ya a pikekg Palam melnum okwripm a Maur Wailen, warim kipman a Peor ore pa. Pikekg tu ur la Palam ikten kwap paipm ur pa tu mpa ikilmpe lkel marpm. Nikgwalpm wail a Palam pa rka la uwi uwi marpm pa, kolpa atom kil awi marpm or ya paipm a tu melnum alkel la kil ikwap paipm pa.
2PE 2:16 Ari nimpa nepm kuinen a Palam arpme aye kai la ikwap paipm pa angklo wli ok ti oklala kolen melnum ti aklewel a angkengkel, la ake mpa kil ntokg nikgwalpm titnowen a kolpa.
2PE 2:17 Yangkipm a Maur Wailen a tu melnum pa la kiling plantepm kai raimpe pa ake mpa ngklinsepm kolai, mpa kalpis. Tu melnum pa kolen u yaur a arkol kai tingklak, wa kolen waipmunu kaikut a aye u tatu ketn ti la mpa uwei eng ik itne kanokg, ari kalpis, am wa wripm titnongket pa el kul ak ungkwan kai takwleikg ise. Maur Wailen kil numprampen wrik miningket turkget paipm pa elngkitna eng tu pa itna ise.
2PE 2:18 Tu wam rka nol ngkat nang alntuwen anel u la, pake pa yiprokgen kalpisen. Tu katnun nikgwalpm wasrongen paipm a numpalk atuwen ti ningkail tu yekyek tiur a plelng ipma weten a anel ngkarken tu a antokg paipm kolpa kulngkul pa ak arkolngken la tu wa yaper kul ntiwen ntokg kweikwei numkropis a uk numpaipm pa.
2PE 2:19 Tu armpwonel tu pa la, “Kipm kul kutnun men ti pa, ikga kipm ntiwe ntokg kweikwei wrongkwail ti ik wasrongen alkipmen pa, ake mpa wa kwei ur lok yipowepm kolai pa kalpis.” Pake tu alntu ti pa am paipmpaipm pa ak alok yapowen angkirngken titnongket ise. Eng ntei, kol melnum ur kwei ur pa lok yipowel ngkirngkel pa, kil am akwap orngwatneikgen kweiur pake.
2PE 2:20 Tu yek yek a pikekg awi ariwe Sisas Krais Wailen amentepmen, la kil melnum a pikekg akawiyen, atom pa ak angklinsen eng tu antiwe ngkark kai takwleikgen paipmpaipm wrongkwail a ak kimpilpetel ipma a mentepm wrong kin kipman a kanokg ti ise. Ari wa kol tu yaper kai wa ngkowe paipmpaipm atom wa paipmpaipm pa wa lok ngkliwen a lok yipowen pa, ak wang ti pa tu rpma kolpake, tu wa yaper kai pa, tu ikga rpmi paipm wrisen.
2PE 2:21 Kolpa ti pikekg tu wa akor na ariwe yangkipm wor a Maur Wailen pa, atom katnun ya ute wor akilen pa, plalng pipa, wa tu wa la yaper kai uk yirokg yangkipm titnongket a Maur Wailen a pikekg tu men kaling planten la tu kutnun pa! Pa tu antokg paipm wrisen.
2PE 2:22 Kuina ur a palng eng tu melnum a wa angko yaper kai antokg paipmpaipm pa pati, palng aklale kai katila yangkipm kla a la aklale kolkil la, “Nimpa pa anung plalng pipa, wa yaper kai al anung alkilen ti.” Wa yangkipm kla ur pa wa la aklale kolkil la, “Wa manto wet karkuk kai u wor pa plalng pa wa yaper kai wa angko mang.”
2PE 3:1 Workganen yekyek alkupm, kupm pikekg nirantepm wrkapm ur pake, a wa kupm wa nirantepm kil. Ela wrkapm a pikekg kupm nirantepm pa, a wa kupm nirantepm kil pa, kupm nira la ik irowepm ikgyokg a wa ik ngkit wonel kipm a alupm nikgwalpm rukis wor pa.
2PE 3:2 Kupm la kipm wonrpme yangkipm pikekg palng wli ok a tu melnum ok wripm a Maur Wailen amprinsen eng kwap akilen pa atom tu laron nakepm ep ak ai. Wa kupm la kipm wonrpme yangkipm titnongket a Wailen Sisas, melnum a pikekg akawiyo aye yaper kul eng Yan alkil a pikekg tu men melnum wokgen akwapel akilen kaintepm laron nakepm pa.
2PE 3:3 Wail manten itna ep a kupm la ngkitepm ikg eng kipm uwi riwe pa pati kil: ik wang umpuwen pa tu melnum a alupm nikgwalpm titnongket paipm alntu a alok yapowen atom tu katnun pa ikga palng, pa tu ikga ik nokgelepm paipm.
2PE 3:4 Tu ikga ik nokgelepm kolpa la, “Ti kil pikekg yapon yangkipm la ikga nar ti? Ti wang a i ikga kil nar? Aki kil nar ise? Palpa yangkipm tingklaket, ikga kuina ur palng kai pa! Palpa kansil. Men am werk almpo eng yangkipm pake. Tu mamikg mamin mansan almentepmen a pikekg atning yangkipm pa angkai ai kulngkul kul ti pa tu am amo kaingkai plalng ise, ti ake men ari kwei ur palng. Kweikwei wrongkwail am itna katikati kol a kitnong a kanokg a pikekg antokg weten ai.”
2PE 3:5 Ketn pa tu karukla wampel Maur Wailen pa la ake pikekg kil antokg kitnong a kanokg ti palng. Tu ariwe pake tu karken ukipma la pikekg ep ak ai pa u kolti rka, atom Maur Wailen kil la pa, kitnong a kanokg ti palng itna kai u ti. Wa kil wa la atom, u ti arkol kai rka wrik tiur, a wrik tiur pa kanokg pa itna. Ok a Maur Wailen pa la pa, kweikwei wrongkwail ti palng.
2PE 3:6 Itna kolpa kaingkai kai angko wang a Nowa pa, pikekg kil wa ak kweikwei wekg pa antokg tu wrong kin kipman a kweikwei a itna kanokg ak wang pa kai paipm plalng: ak oklala akilen ti, a wa kil ak u tike: kil angklo ok la atom u ti kintir kuntur elng kul no ak upaarng kanokg pa ak al melnum nampokgen kweikwei wrongkwail pa kai paipm. Pake tu pa karken ukipma kolpa atom tu karuk la wampel Maur Wailen pa la ake pikekg kil antokg kolpa, kalpis.
2PE 3:7 Pake kil ikgam wa ik kweikwei wekg pa wa ik ntokg kitnong a kanokg a mentepm arpme ak wang ti pa kai paipm pake, kil ikga ik pa ik oklala kol a pikekg kil la atom u al tu pa, wa kil ikga ik wakg: kitnong a kanokg ti pa am itna nungkwangen a ikga kil la atom ikga wakg il pake, a wa itna nungkwangen wang a ikga ntokg yangkipm wail pa. Ikga ik wang pa ikga kil ntokg paipm tu melnum a ake ukipma kil pa.
2PE 3:8 Workganen yekyek alkupm, ampur kipm uk yirokg kwei ur wris kil pa: Maur Wailen kil ari wang wris pa la wring kamel kamel (1,000). Wa kil ari wring kamel kamel (1,000) pa la wang wris ata kolti. Kil ari la wring kamel kamel pa wa wang wris pa ekg irir kolti.
2PE 3:9 Tu tiur pa akwonalmpen la Maur Wailen pa akatne atne paipm eng wang a pikekg kil yapon yangkipm la ikga kil nar pa. Pake ake kolpa, nikgwalpm wail akilen pa kil akwonalmpen kipm tike, la ake mpa wris ur a kipm ti kai paipm pa. Kolpa atom ari kil ayewen wang pa itna nungkwangen la kipm wrongkwail ti mpa plelng ipma kai kutnuntel pen, plalng pipa kil iye wang pa kul.
2PE 3:10 Aklale, Wailen kil ayewen itna nungkwangen la mentepm wrongkwail ti plelng ipma pen. Pake wang a ikga kil nar pa ikga palng ik misel kolen melnum a ak ikgwam pa. Atom ikga ik wang pa, kitnong pa ikga kunturng praun pus kai plalng, a kweikwei wrongkwail a itna kaino kitnong pa ikga wakget waiwai lampul kweikwei pa kai lolos plalng. Wa kanokg ti numpokgen kweikwei wrongkwail a melnum antokg itna ti pa ikga kai ngko wunong itni wulmpa a Wailen pa.
2PE 3:11 Ti kipm akwonalmpen la ikga ik wang a kweikwei wrongkwail pa lolos kai paipm kolpa, ti kipm ti ikga kolai! Ya wris ata a kol a kipm uk kipm alkipm ti kai Maur Wailen pa yek kimeket, rpmi rukis wor kutnun kitila nikgwalpm a Maur Wailen kil wasrongen ai kolti.
2PE 3:12 Kipm rpmi kolpa nungkwangen a kipm rki nikgwalpm rkekgen laron yangkipm wor a Maur Wailen pa eng ik iyewen wang wail a ikga Maur Wailen uwiyo iye kai itni yangkipm wail pa kul kai palng itatu. Ikga ik wang pa ikga wakg kalnten wail wrekg il kitnong pa kai plalng a kweikwei wrongkwail a itna kaino kitnong pa ikga wakget waiwai lampul lolos kai plalng kolti.
2PE 3:13 Pake mentepm ti rpma nungkwangen kitnong a kanokg weten a pikekg Maur Wailen kil yapon yangkipm la ikga kil ntokg atom ikga mentepm rpme pa. Ikga ik wang pa nikgwalpm paipm pa ikga kalpis. Tu melnum a ikga rki anong pa ikga kitila nikgwalpm ute wor a Maur Wailen wris ita kolti.
2PE 3:14 Ikga Wailen kil nar pa, kitnong a kanokg ti ikga plalng. Kolpa ti workganen yekyek alkupm, kipm rpma nungkwangen wang wail a ikga palng pa ti, kipm mpa nikgwalpm rkekgen eng ikga ik wang a kipm itni wulmpa a Wailen pa, kil ikgake ri kimpilp ur a kai karpon kipm pa, a wa ikgake kil nsil ri paipm ur a kipm antokg pa, wa kil ikga riwepm la kipm wrong wampil akilen a awi ipma meen wor.
2PE 3:15 Kipm mpa ikwonilmpen kolkil la, Wailen amentepmen kil ake nar pinterngen pa pati, kil ayewen kolpa kai meen meen nungkwangen itna la kil la ik uwi mentepm ti kimeket tukwleikgen miningket ti iye kai eng alkilen tipen. Kol pikekg Maur Wailen kil uk nikgwalpm ariwe wor wor Pol yek almentepm a mentepm ukipma Sisas pa atom kil pikekg nirantepm yangkipm irir kol a kupm nirantepm kil,
2PE 3:16 kol kil wa nira irir kolpa ela wrkapm wrongkwail a kil nira akla wang wail a ikga palng pa. Ei aklale, kil nira ak la kweikwei tiur a wonet eng mpa melnum riwe la pa ak la kuina. Kolpa atom tu melnum tiur a ake awi ariwe a wa ake ukipma itna titnongket pa, tu wa almpile yangkipm a kil nira pa kai raimpe, kol tu wa almpile yangkipm tiur a tu melnum manet pikekg nira ela wrkapm a Maur Wailen pa wa kai raimpe. Tu antokg kolpa pa tu antokg tu alntu pa ikga kai paipm ik wang wail a Wailen ikga nar pa.
2PE 3:17 Pake kipm workganen yekyek alkupm, kipm am ariwe kuina ur ikga palng eng tu melnum a kolpa ise, kolpa ti kipm rpmi ukikg riwe tu melnum a talpulng yangkipm titnongket pa ikga wa lokepm iye kai ar a utnuurng ya wor a pikekg kipm ukipma katnun itna titnongket pa.
2PE 3:18 Pake kipm itni titnongket kolpa kai o! Kipm kai wreren Wailen amentepmen Sisas Krais, melnum a pikekg akawiyo aye yaper kul eng Yan alkilen pa, eng mpa kil plantepm ipma wor aur aur wrongkwail akilen pa kolpa iye kai. Wa kipm uwi riwe kil pa worwor iye kolpa kai. Kil pa klalen a awi nang wailen, ti mentepm mpa ngkit nang akilen pa iye kaino kwa ikngklei wang, ik wang ti, wa iye or pa kai itni yongkyong. Aklale wrisen. Oklala a kupm Pita nirantepm kil am kai itna kolpake.
1JO 1:1 Kupm nira wrkapm kil ak lanakepm melnum a pikekg rpma ep ak ai kul ai. Men pikekg nungkulkg a wulmpa, a men wamparpmewel ak wam a men almen ti atom men nira ak lanakepm melnum pa, la kil Yangkipm yiprokgen a alko yaprekg watin a ak antokg mentepm rpma wor yongkyong.
1JO 1:2 Kil yiprokgen a alko yaprekg watin pa pikekg palng angko wunong, men nungkulkg a wulmpa, atom men lakati nakepm la pa aklale wrisen. La kil yiprokgen a yaprekg watin a ak antokg mentepm rpma wor yongkyong pake, kil pikekg rpma nampokgen Yan ai, wa kil pikekg wa palng angko wunong eng men ti atom men ariwel.
1JO 1:3 Kuina ur a pikekg men nungkulkg a wulmpa pa men am lakati nakepm pake, eng mpa kipm pa wa or wris ipma wris nimpokgen men ti, atom mentepm kimeket mpa or wris ipma wris nimpokgen Yan a nimpokgen Sisas Krais Warim Kipman akilen pa.
1JO 1:4 Atom men nirantepm yangkipm kil, eng mpa kipm pa wa or wris ipma wris itopen kol men kil. Kol kipm ntokg kolpa pipa, men mpa itopen wail manten.
1JO 1:5 Men pikekg atning yangkipm wor a Sisas Krais kil laron pa atom men lakati nakepm. Maur Wailen pa kil klalen, ake miningket ketnketn ur itna kil pa, kalpis wrisen.
1JO 1:6 Kol mentepm lala, mentepm ti or wris ipma wris nampokgen Maur Wailen, pake atn a rpma amentepmen pa wa plan lala mentepm ti rpma kai miningket pa a pa, pa mentepm kansil. Ake mentepm antokg kuina ur a ute aklale pa.
1JO 1:7 Pake kol mentepm ngkom or klalen kolen kil alkil a klalen pa, pa mentepm mpa or wris ipma wris nimpokgen tita. Wa walmpopm a Sisas Warim Kipman akilen pa mpa ik klak paipmpaipm wrongkwail a mentepm ti plalng, atom mentepm palng rukis wor.
1JO 1:8 Kol mentepm lala mentepm ti paipmpaipm kalpisen, pa mentepm kansil ipma a mentepm almentepm ti. Atom pa plan la nikgwalpm ute aklale a Maur Wailen pa ake rpma kawor mentepm pa, kalpis.
1JO 1:9 Pake kol mentepm laron paipmpaipm a mentepm antokg pa, Maur Wailen mpa ik kitila nikgwalpm ute wor a kil kol pikekg kil la pa atom mpa ungkwan paipmpaipm amentepmen pa plalng, a wa kuluk klak nikgwalpm paipm wrongkwail a mentepm pa, atom mpa mentepm palng rukis wor.
1JO 1:10 Pake kol mentepm lala mentepm ti ake antokg paipmpaipm ur pa, pa mentepm plan kolen lala Maur Wailen pa kil melnum a la yangkipm kansil. A wa plan la la yangkipm akilen pa ake rpma kawor ipma amentepmen ti pa, kalpis.
1JO 2:1 Warim yekyek alkupm, kupm nira yangkipm kil nakepm eng ake mpa kipm ngko kai ntokg paipmpaipm ur pa, kalpis. Pake kol melnum ur kil ngko kai ntokg paipmpaipm pa pipa, mentepm Sisas Krais, melnum ute wor wrisen anti Yan rpma pa, kil pa itna mentepm ti talpulng Maur Paipm a arkiwo pa.
1JO 2:2 Kil alkil pa kla a Maur Wailen lam aro yom ak wanteng ak angketen ipma wakget akilen pa, atom kil ungkwan paipmpaipm a mentepm ti. Ake wa kil ak eng mentepm ti wris pa, kil wa ak eng ak ungkwan paipmpaipm a wrongkwail kin a kipman a yela kanokg ti.
1JO 2:3 Kol mentepm kutnun yangkipm titnongket a Maur Wailen la la mentepm kutnun pa pati, pa planto la mentepm ariwe Maur Wailen pake.
1JO 2:4 Kol melnum ur kil la kolkil lala, “Kupm kil ariwe Maur Wailen”, pake ake wa kil antokg katila kol yangkipm titnongket akilen la la kil kutnun pa pipa, kil pa melnum a kansil. Nikgwalpm ute aklale a Maur Wailen pa ake rpma kawor melnum pa, kalpis.
1JO 2:5 Pake kol melnum ur kil kutnun yangkipm a Maur Wailen pa, pa melnum pa kil plan ipma wor wasrongen Maur Wailen pa kol Maur Wailen kil alkil plan ipma wor wasrongen mentepm tike. Kol nikgwalpm amentepmen ti rki kolpa pipa, pa planto la mentepm am rpma kawor Maur Wailen pake.
1JO 2:6 Melnum ur kil la kil rpma kawor Maur Wailen pa pati, kil mpa itn a rpmi irir kolen pikekg Sisas kil atn pa.
1JO 2:7 Workganen yekyek alkupm, kil kil ake kupm nirantepm yangkipm titnongket weten ur la kipm kutnun pa, kalpis. Kupm nirantepm yangkipm titnongket tingklaket a pikekg kipm awi ak ep lmpiwen ai la kipm kutnun pa. Pa am yangkipm wor a pikekg kipm atning ise.
1JO 2:8 Yangkipm titnongket a kupm nirantepm kil la kipm kutnun pa, yangkipm titnongket tingklaket pake, wa palng kol yangkipm titnongket weten, eng ntei, men ari a pikekg Sisas Krais kil alkil katnun pa, a wa kipm katnun itna pa. Ti miningket pa aye kai kolpa aye kai, a klalen aklale pa palng itna akalen miningket pa.
1JO 2:9 Melnum ur a kil la kil alkil ti la kil ti itna kai klalen, pake kil ipma paipm eng melnum alkil a tuwekg ukipma Sisas pa pati, kil pa itna kai miningket pa a pa.
1JO 2:10 Melnum ur a kil plan ipma wor wasrongen melnum alkil a tuwekg ukipma Krais pa pati, kil pa itna kai klalen pake. A ake wa paipm ur itna kai klalen pa eng mpa ik ntokg melnum pa kai wutat ngko pa, kalpis.
1JO 2:11 Pake kol melnum ur kil ipma paipm eng melnum alkil a tuwekg ukipma Sisas pa pati, kil pa itna kai miningket pa a pa. Kil angkom kitir kutur atn ak miningket, ti kil ake ariwe ya a i a kil angkom ore pa. Pa miningket atom kil ake antiwe ri ya pa.
1JO 2:12 Warimpwarim yekyek alkupm, kupm nirantepm yangkipm kil la, paipmpaipm akipmen a Maur Wailen ak ker awiye pa, am pikekg kil ungkwan plalng ise atnen kwap a pikekg Krais ak pa.
1JO 2:13 Kipm yantin pa, kupm nirantepm yangkipm kil la ngkitepm won la kipm pa pikekg awi ariwe melnum a pikekg rpma ak ep lmpiwen ai kul ai. Kipm warimpen pa, kupm nirantepm yangkipm kil la ik ngkitepm won la kipm pa pikekg alok angkli Satan yan a arpmen paipmpaipm pa.
1JO 2:14 Wa kipm warim yekyek alkupm pa, wa kupm nirantepm yangkipm kil nti ur la ik ngkitepm won la kipm pa pikekg awi ariwe Yan Maur Wailen akipmen pa. Wa kipm yantin pa, kupm wa nirantepm yangkipm kil nti ur la ngkitepm won la, kipm pa pikekg awi ariwe melnum a pikekg rpma ak ep lmpiwen ai kul ai. Wa kipm warimpen pa, kupm wa nirantepm yangkipm kil nti ur la ngkitepm won la, kipm pa itna titnongket, a kipm arkul yangkipm a Maur Wailen pa aye itna titnongket, a wa kipm pikekg alok angkli Satan yan a arpmen paipmpaipm pa.
1JO 2:15 Ampur kipm arkul nikgwalpm a wasrongen kanokg ti nampokgen kweikwei wrongkwail a itna kanokg ti pa. Kol melnum ur kil wasrongen kweikwei a itna kanokg ti pa, kil pa ake elng nikgwalpm ketn ketn ur pa rka eng plan ipma wor wasrongen Yan ai, kalpis.
1JO 2:16 Eng ntei, kol nikgwalpm kweikwei wrongkwail a itna kanokg ti, kolen ipma wasrongen a melnum a wrekg eng antokg ak atopen num a kil alkil ti, a wa kil aringkowe kuina ur a kil ari ak wulmpa ti, a wam rka nol tipra ngkat nang eng kuina ur akilen ti pa. Kweikwei nikgwalpm wrongkwail a kolpa ake ur angkai Yan pa kul pa, kalpis. Kweikwei wrongkwail pa, a itna kanokg ti kolti.
1JO 2:17 Kanokg ti nampokgen nikgwalpm wrongkwail kol nikgwalpm wasrongen a wrekg eng antokg kweikwei ak atopen kil alkil ti kolti pa, pa ikga kai plalng. Pake melnum a kil katnun antokg kuina ur a Maur Wailen kil wasrongen pa, kil pa rpma kolpa rpma yongkyong.
1JO 2:18 Warim yekyek alkupm a mentepm ukipma Krais, wang am kul wreren itna yamping a tike. Kipm pikekg atning la Wrongmanto a Krais pa ikga wli. Pa aklale, ti tu wrongmanto watipmen a Krais pa am wli palng ise. Kolpa ti mentepm ariwe la wang umpuwen pa am wli wreren tike.
1JO 2:19 Tu melnum pa pikekg antiwo itna mapming wris, pake tu pikekg ake ukipma aklale nampokgen mentepm ti pa, kolpa atom tu pikekg atnuurng mentepm ti wa kai katnun yangkipm manet ai. Kol tu ukipma iklale nimpokgen mentepm ti pa, tu kol a itni nimpokgento pa. Ari pa plan angko wunong la, tu melnum a antiwo itna pa, tu pa ake wa kimeket ukipma aklale nampokgen mentepm ti pa, kalpis.
1JO 2:20 Pake kipm ti pa, kipm pikekg Krais kil alung Maur Wor akilen pa ak amprinsepm eng alkilen ise, kolpa atom kipm kimeket ariwe kweikwei wrongkwail a aklale pa ise.
1JO 2:21 Kupm ake akwonalmpen lala, kipm akwekgel kweikwei wrongkwail a aklale pa, atom kupm nirantepm yangkipm kil pa, kolpa kalpis. Kipm am ariwe kweikwei wrongkwail a aklale pa ise, la melnum a alupm nikgwalpm ute aklale a Maur Wailen pa, kil ampake la yangkipm kansil pa.
1JO 2:22 Melnum mla a i a kansil yangkipmok pa? Pa am melnum a lala Sisas pa kil ake Krais, melnum a Maur Wailen naren la kil nar eng ikuwiyo pa. Pa melnum pa kil wrongmanto a Krais pake. Kil lam nang a tuwekg pa yatenen, Yan nampokgen Warim Kipman alkil pa.
1JO 2:23 Kol melnum ur kil lam nang a Warim Kipman pa, am wa kil lam nang a Yan pa kolpa yat pake. Wa kol melnum ur kil laron Warim Kipman pa, am wa kil laron Yan pa kolpa yat pake.
1JO 2:24 Kipm mpa rkul yangkipm a pikekg kipm atning ak ep lmpiwen ai lupmen rpmi kawor nol nikgwalpm akipmen pa. Kol kipm rkul yangkipm a pikekg kipm atning ak ep lmpiwen ai lupmen rpmi pa, pa kipm rpma kawor Warim Kipman a Yan pa rpma.
1JO 2:25 Kil yangkipm a pikekg Krais kil yapon nampokgento la kil lko yaprekg watin a antokg mentepm rpma wor yongkyong.
1JO 2:26 Kupm wet nirantepm yangkipm kil, ak la tu tiur a wa la kinsil rkolngkepm iye kai ar or ya paipm pa.
1JO 2:27 Pake kipm ti pa, kipm am pikekg Krais kil alung Maur Wor akilen ai nar rpma kawor kipm ti akamprinsepm ise. Atom Maur Wor kil am rpma kawor ipma akipmen ise, kolpa atom kipm ake wa la mpa melnum ur ai wa kiling plantepm iyewepm kai ar pa. Maur Wor akilen a rpma kawor kipm ti mpa kiling plantepm kweikwei wrongkwail. Kweikwei a Maur Wor kaling plantepm pa, pa kweikwei aklale kolti, ake kwei ur a kansilepm ayewepm kai ar pa. Kipm mpa rkul Krais pa itni titnongket kawor ipma akipmen kol a Maur Wor kil kaling plantepm pa.
1JO 2:28 Kipm warimpwarim alkupm a mentepm ukipma Krais, kipm rkul Krais pa itni titnongket kawor ipma akipmen pa kolpa kai pa pati, mentepm ikgake ngkirk numpaipm itni wulmpa akilen pa ik wang a ikga kil yaper nar pa.
1JO 2:29 Kipm ariwe Krais pa kil alupm nikgwalpm ute aklale akalkilel kolti, kolpa ti kipm mpa wa riwe yat la, tu melnum a alupm nikgwalpm ute aklale pa, tu pa warim a Maur Wailen pake.
1JO 3:1 Kipm ri, Yan pa kil plan ipma wor wasrongento. Kolpa atom ari kil awi mentepm ti kai namput nampokgen kil alkil ai la mentepm warim akilen. Atom mentepm am warim akilen kolpa aklale pake. Kolpa atom ari tu melnum a alupm nikgwalpm a kanokg ti pa tu akwekgel mentepm ti, pa pati atnen a tu akwekgel Maur Wailen ai.
1JO 3:2 Workganen yekyek alkupm, ak wang ti pa mentepm warim a Maur Wailen, pake ikga ik wang kutnukg pa mentepm ikga palng kolai pa, pa ake kil planto ariworwor eng mpa mentepm riwe pa. Pake mentepm ariwe la ik wang a Krais kil palng ngko wunong pa, mentepm ikga palng ri kolen kil alkil. Pa pati atnen ikga mentepm ri kil pa ngko wunong la kil am ari kolpake.
1JO 3:3 Mla ur mentepm a ukipma rpma nungkwangen Krais pa mentepm ikgalen mentepm almentepm ti rpma rukis wor, kolen Krais kil alkil a rukis wor pa.
1JO 3:4 Wa mla ur a antokg paipmpaipm pa, pa kil ak angketen yangkipm titnongket a yapon pa. Nikgwalpm a antokg paipmpaipm pa, pa am nikgwalpm a ak angketen yangkipm titnongket pake.
1JO 3:5 Pake kipm ariwe la Krais pa pikekg nar eng ungkwan ker a akawiye paipmpaipm amentepmen ti, a kil alkil pa ake antokg paipmpaipm ur eng mpa ik ker ikuwiye pa kalpis.
1JO 3:6 Kolpa atom ake wa melnum ur a rpma kawor Krais pa wa kil antokg paipmpaipm pa kolpa itna pa, kolpa kalpis. Melnum a antokg paipmpaipm pa kolpa itna pa, kil pikekg ake wa ari Krais pa, wa kil pikekg ake awi ariwe kil pa, pa kalpis.
1JO 3:7 Kipm warim yekyek a mentepm ukipma Krais pa, ampur kipm uk ya melnum ur kil lokepm iye kai ar pa. Melnum mla a i a kil alupm nikgwalpm wor a antokg kweikwei a ute wor wrisen pa, kil pa ute wor wrisen pake. Kol Krais kil alkil pa ute wor wrisen.
1JO 3:8 Mla ur a kil antokg paipmpaipm pa, kil pa warim a Maur Paipm Satan pake. Pati atnen Satan pa pikekg ngkaten antokg paipmpaipm pa ak ep lmpiwen ai kul ai. Am yiprokgen kolpa atom ari Warim Kipman a Maur Wailen pa kil nar eng la ungkwan kwap a Satan ak pa kai plalng.
1JO 3:9 Kol melnum ur pa kil warim a Maur Wailen pa, kil ake antokg paipmpaipm pa kolpa itna pa, kalpis. Eng ntei, kil pa nanikg walmpopm a Maur Wailen, kolpa ti ake antiwe mpa wa kil wa ntokg paipmpaipm pa kolpa itni pa, kalpis, kil pa warim a Maur Wailen.
1JO 3:10 Mentepm la riwe la, mla mla a i warim a Maur Wailen, a mla mla a i warim a Satan pa, pa pati mentepm mpa riwe kolkil: melnum a ake kil antokg kweikwei a ute wor wrisen a wa ake kil plan ipma wor wasrongen tu melnum alkil a tu ukipma Krais pa, kil pa ake warim a Maur Wailen pa.
1JO 3:11 Kil ake yangkipm weten ur pa, kil yangkipm a pikekg kipm atning ak ep lmpiwen ai pa a la kolkil la, mentepm mpa plan ipma wor wasrongen tita.
1JO 3:12 Ake mpa mentepm kol Ken, warim a Maur Paipm pa a pikekg or wusok alkil amo pa. Wa kil or wusoken alkil pa amo eng na wai? Kil orel amo pati atnen atn a rpma a wusoken alkil pa ute wor pake, a kil alkil ti pa paipm.
1JO 3:13 Kipm melnum alkupm a mentepm ukipma Krais, ake mpa kipm wrekg paipm kol tu melnum a alupm nikgwalpm a kanokg ti ipma paipm eng kipm pa.
1JO 3:14 Mentepm plan ipma wor wasrongen tu melnum almentepm a mentepm ukipma Krais pa, pa planto la mentepm pikekg kol melnum a amo ise ari wa yaper kul rpma. Pake kol mla ur ake plan ipma wor wasrongen tu melnum almentepm a mentepm ukipma Krais pa, tu pa kol melnum a amo rmpa pa.
1JO 3:15 Mla ur kil ipma paipm eng melnum ur alkil a mentepm ukipma Krais pa pati, pa kil kolen melnum a or melnum ur amo pa. Wa kipm ariwe la melnum a or melnum ur amo pa, pa kil ake awi yaprekg watin a Maur Wor pa eng mpa kil rpmi wor yongkyong pa kalpis.
1JO 3:16 Mentepm pikekg awi ariwe nikgwalpm aklale a plan ipma wor wasrongen tita pa pati kolkil: Krais kil pikekg plan ipma wor wasrongen mentepm ti atom kil uk num alkil ti amo eng ak angklin mentepm ti. Kolpa ti kol a wa mentepm ti wa uk num amentepmen ti kai imo eng ik ngklin tu almentepm a mentepm ukipma Krais ai.
1JO 3:17 Kol melnum ur kil antiwe kweikwei a kanokg ti, kil ari melnum ur alkil a mentepm ukipma Krais a rpma tukwok pa, pake kil kirngen kweikwei alkil pa atom ake kil arein angklin melnum pa, kalpis. Ti melnum pa kil alupm nikgwalpm wor a Maur Wailen a plan ipma wor wasrongen melnum pa aki kalpis? Kolpa kalpis.
1JO 3:18 Warim yekyek alkupm a mentepm ukipma Krais, mentepm plan ipma wor wasrongen mla ur ai pa, ampur mentepm la ak ok kalpmlel ti kolti pa, mentepm la wa ik kitila nikgwalpm iklale kolen a Maur Wailen la pa.
1JO 3:19 Kol ok wusok amentepmen ti rkiwo la mentepm ti melnum paipm, pake kol mentepm lupmen tita wa ik kitila pa pati, pa mpa lko riwe la la mentepm alupm nikgwalpm aklale a Yan yiprokgen amentepmen a antokg kweikwei aklale pa. Kolpa ti mentepm antiwe mpa ik titnongketel ok wusok amentepmen ti itni titnongket itni wulmpa akilen. Eng ntei, ok wusok amentepmen ti wasek, a ipma arein a Maur Wailen pa wail manten, kil ariwe kweikwei wrongkwail a mentepm antokg pa.
1JO 3:21 Workganen yekyek alkupm, kol ake ok wusok amentepmen ti lawo la mentepm antokg paipm ur pa pati, mentepm mpa ntiwe rpmi ipma kukula itopen itni wulmpa a Maur Wailen pa.
1JO 3:22 Mentepm isentel eng kuina ur pa, kil mpa lko pa, pa pati atnen a mentepm arkul yangkipm titnongket akilen a kil la mentepm kutnun pa, a wa mentepm antokg kweikwei a wor pa katnun nikgwalpm akilen a kil wasrongen pa.
1JO 3:23 Yangkipm titnongket akilen pa la kolkil la: mentepm mpa ukipma kutnun Warim Kipman akilen Sisas Krais a wa mentepm mpa plan ipma wor wasrongen tita kol yangkipm titnongket akilen lanako la mentepm kutnun pa.
1JO 3:24 Melnum ur kil rkul yangkipm titnongket akilen a la mentepm kutnun pa, pa pati kil rpma kawor Maur Wailen a wa Maur Wailen rpma kawor kil pa. Ti mpa mentepm riwe la kolai la kil rpma kawor mentepm ti? Am kil alko Maur Wor akilen pa ak planto atom mentepm ariwe la kil rpma kawor mentepm ti.
1JO 4:1 Workganen yekyek alkupm, ampur kipm ukipma lala tu melnum a maur akwap kawor ipma a tu pa la, pa Maur Wor a Maur Wailen pa. Kipm mpa ri itningke ep lala, pa Maur Wor a Maur Wailen aki pa maur a Maur Paipm Satan ai. Eng ntei, tu melnum okwripm kansil watipmen a kaling plan yangkipm manet pa am kai atn yela tatu kanokg ti ise.
1JO 4:2 Ti kipm mpa riwe la maur a rpma kawor melnum ur pa Maur Wor a Maur Wailen aki pa maur ur manet ai? Kol melnum a maur ur arpmewel pa kil ukipma atom laron kolkil la, “Sisas pa kil Krais, melnum a pikekg Maur Wailen naren la kil nar ikuwi mentepm ti, wa kil pikekg palng melnum aklale kol mentepm ti”, melnum pa laron kolpa pati mpa lkepm ariwe la maur wor a rpma kawor melnum pa am Maur Wor a angkai Maur Wailen pa kul pake.
1JO 4:3 Pake kol melnum ur a maur wor arpmewel pa kil ake laron Sisas pa la, kil melnum a pikekg Maur Wailen naren la kil nar ikuwiyo pa pati, kil pa ake awi Maur Wor a Maur Wailen pa, palpa kil awi maur wor a Wrongmanto Antikrais a pikekg kipm atning a tu la ikga wli pa. Ti am wli akwap itna tatu anong kanokg ti ise.
1JO 4:4 Kipm warim yekyek alkupm a mentepm ukipma Krais, kipm pa a Maur Wailen. Maur wor a rpma kawor kipm ti pa antiwe titnongket wail manten klangkil maur wor a rpma kawor tu melnum a alupm nikgwalpm a kanokg ti. Kolpa atom kipm itna kalnten alok angkli tu pa.
1JO 4:5 Tu pa a kanokg ti kolti. Kolpa atom yangkipm a tu la pa, tu la yangkipm a kol a melnum a alupm nikgwalpm a kanokg ti la pa, atom tu a kanokg ti atning yangkipm a tu pake.
1JO 4:6 Pake mentepm ti pa warim a Maur Wailen. Kol melnum ur ariwe Maur Wailen pa, kil pa atning mentepm tike. Melnum ur a ake warim a Maur Wailen pa, kil pa ake atning yangkipm a mentepm ti. Pa am ya a mentepm ariwe maur wor pake, la maur wor a i a laron yangkipm aklale, a maur wor a i a alok melnum ti kai ar.
1JO 4:7 Workganen yekyek alkupm, Maur Wailen pa kil arkul nikgwalpm a plan ipma wor wasrongen mentepm ti, kolpa ti mentepm ti mpa wa plan ipma wor wasrongen tita. Melnum ur kil plan ipma wor wasrongen melnum ur pa, kil pa palng warim a Maur Wailen, atom kil pa ariwe Maur Wailen pake.
1JO 4:8 Nikgwalpm yiprokgen a plan ipma wor wasrongen melnum ur ai pati, pa nikgwalpm a Maur Wailen pake. Kolpa atom melnum ur kil ake plan ipma wor wasrongen melnum ur pa, kil pa ake ariwe Maur Wailen pa.
1JO 4:9 Maur Wailen kil pikekg ukwa Warim Kipman yekwris anangket alkilen pa nar eng ak armpento eng mpa Warim Kipman alkil pa lko yaprekg watin a antokg mentepm rpma wor yongkyong. Kil angklinso kolpa pa planto la kil plan ipma wor wasrongento aklale wrisen.
1JO 4:10 Nikgwalpm a plan ipma wor wasrongen melnum ur pa pati, itna kolkil: ake lala mentepm ti pikekg plan ipma wor wasrongen Maur Wailen ai ep pa, kolpa kalpis. Maur Wailen kil alkil ai kil plan ipma wor wasrongen mentepm ti ep tike, atom kil ukwa Warim Kipman alkilen pa nar amo eng ak armpen paipmpaipm amentepmen ti.
1JO 4:11 Workganen yekyek alkupm, Maur Wailen kil pikekg planto nikgwalpm kolpa lala kil plan ipma wor wasrongen mentepm ti, kolpa ti mentepm ti mpa wa plan ipma wor wasrongen tita kolpa yat pake.
1JO 4:12 Ake melnum ur ari Maur Wailen ak wulmpa pa, kalpis. Pa aklale, pake kol mentepm plan ipma wor wasrongen tita pa pati, pa plan la Maur Wailen am rpma kawor mentepm ti, a wa plan yat la mentepm am plan ipma wor wasrongen tita kol a kil wasrongen la mpa mentepm plan ipma wor wasrongen tita kolpake.
1JO 4:13 Ti mentepm mpa riwe kolai la mentepm rpma kawor Maur Wailen ai a Maur Wailen rpma or mentepm ti? Kil pikekg ampreing kweikwei wor wor a Maur Wor akilen pa rpma kawor ipma amentepmen ti, atom mentepm ariwe la kil rpma or mentepm ti a mentepm rpma kawor kil pa.
1JO 4:14 Yan Wailen pa pikekg kil ukwa Warim Kipman alkil pa nar amo ak awi wrongkwail kin a kipman a kanokg ti. Atom men pikekg nungkulkg a wulmpa, atom men lanaki tu wrong kin a kipman pa la, pa aklale, pa ake kansil pa.
1JO 4:15 Melnum ur kil ukipma Sisas pa atom laron kil pa la kil Warim Kipman a Maur Wailen pa, melnum pa kil rpma kawor Maur Wailen a Maur Wailen pa rpma kawor kil pa kolpa kai.
1JO 4:16 Mentepm pikekg awi ariwe nikgwalpm a Maur Wailen kil plan ipma wor wasrongen mentepm ti, atom mentepm ukipma kolpa itna la Maur Wailen kil plan ipma wor wasrongento pa. Maur Wailen pa kil yan yiprokgen a nikgwalpm a plan ipma wor wasrongen mentepm wrongkwail, atom kol melnum ur kil rkul nikgwalpm a plan ipma wor wasrongen mla ur pa, pa Maur Wailen rpma kawor melnum pa, a melnum pa kil rpma kawor Maur Wailen.
1JO 4:17 Mentepm rpma kawor Maur Wailen, a Maur Wailen rpma or mentepm ti. Atom pa ak antokg mentepm alupm nikgwalpm a Maur Wailen kol a kil wasrongen la mpa mentepm plan ipma wor wasrongen tita kolpake. Kolpa ti mentepm ikgake ngkirk ik wang wail a ikga mentepm itni ntokg yangkipm wail itni Maur Wailen pa. Pa pati atnen a mentepm rpma kanokg ti a pa, pake mentepm rpma kawor Maur Wailen kol a Sisas kil rpma kawor Maur Wailen pa.
1JO 4:18 Melnum a kil alupm nikgwalpm titnongket a plan ipma wor wasrongen tu melnum pa, pa kil ake ngkark, kalpis. Eng ntei, nikgwalpm a plan ipma wor wasrongen tita pa, pa ak ungkwan nikgwalpm a ngkark pa kai takwlelkgen. Yiprokgen a ngkark pa pati kil akwonalmpen la kil ikga uwi paipm ikilmpe paipmpaipm a kil antokg pa. Kol kil ngkirk pa, kil ake alupm nikgwalpm a Maur Wailen a plan ipma wor wasrongen tu melnum pa kol a Maur Wailen kil wasrongen la kil mpa plan ipma wor wasrongenten pa, a pa.
1JO 4:19 Mentepm plan ipma wor wasrongen tita atnen a Maur Wailen kil pikekg plan ipma wor wasrongen mentepm ti ep.
1JO 4:20 Kol melnum ur kil lala, “Kupm ti plan ipma wor wasrongen Maur Wailen”, pake wa kil ipma paipm eng melnum alkil a tuwekg ukipma Krais pa pati, pa kil melnum a kansil kolti. Kol kil ake plan ipma wor wasrongen melnum alkil a kil ari ak wulmpa pa, pati ake antiwe mpa kil plan ipma wor wasrongen Maur Wailen a kil ake ari ai.
1JO 4:21 Ti yangkipm a pikekg Krais kil alko la mentepm kutnun pa pati la kolkil la, melnum ur a kil plan ipma wor wasrongen Maur Wailen pa, kil mpa wa plan ipma wor wasrongen melnum alkil a tuwekg ukipma Krais pa kolpa yat pake.
1JO 5:1 Melnum ur a kil ukipma la Sisas pa Krais, melnum a pikekg Maur Wailen naren la ikuwi mentepm wrong kin kipman a kanokg ti pa pati, kil pa warim aklale a pikekg Maur Wailen armpentel wam. Kol melnum ur plan ipma wor wasrongen yan a angket warim ur pa, pa wa kil wa plan ipma wor wasrongen warim a yan a pikekg angketel pa. Am wa kolpa yat pake: melnum ur a kil plan ipma wor wasrongen Maur Wailen pa, pa kil wa plan ipma wor wasrongen tu melnum alkilen a tu ukipma Krais pa.
1JO 5:2 Kol mentepm plan ipma wor wasrongen Maur Wailen pa, a wa mentepm kutnun yangkipm akilen a kil la mentepm kutnun pa pati, mentepm ariwe la mentepm plan ipma wor wasrongen tu warim a Maur Wailen.
1JO 5:3 Wa ya a plan ipma wor wasrongen Maur Wailen pa pati itna kolkil: kol mentepm rkul yangkipm titnongket akilen a kil la mentepm kutnun pa itni titnongket pa pati, pa ya a mentepm plan ipma wor wasrongentel pake. Yangkipm titnongket akilen a kil la mentepm kutnun pa, ake wa wonet eng mentepm katnun pa, pa wunongket.
1JO 5:4 Eng ntei, mentepm warimpwarim a pikekg Maur Wailen armpento wam pa mentepm antiwe titnongket a itna kalnten alok angkli nikgwalpm a kanokg ti. Ti mpa mentepm lok ngkli kolai? Mentepm ukipma Krais pa pati, mentepm antiwe a alok angkli nikgwalpm a kanokg tike.
1JO 5:5 Ti mla a i antiwe a alok angkli nikgwalpm a kanokg ti? Am melnum a kil ukipma la Sisas pa kil Warim Kipman a Maur Wailen pa pati, am kil pa kolti antiwe a alok angkli nikgwalpm a kanokg pake.
1JO 5:6 Am Sisas pa Krais kil alkil a pikekg nar angko u, a wa kil wa alung walmpopm pa. Ake wa u pa wris pa, u a wa walmpopm pa wa aktitnongketel yangkipm pa la kil Warim a Maur Wailen. Wa Maur Wor pa kil yiprokgen a yangkipm aklale, atom kil wa aktitnongketel yangkipm pa la pa am aklale kolpake la Sisas pa Warim a Maur Wailen.
1JO 5:7 Kweikwei wraur kil pa ak titnongketel la Sisas pa pikekg Maur Wailen pa ukwa nar akawiyo pake:
1JO 5:8 Maur Wor, u, a walmpopm, kweikwei wraur kil pa teng kai or wris ore tita ak la Krais pake.
1JO 5:9 Kol melnum ur kil lakiti kwei ur a kil nungkulkg a wulmpa pa iktitnongketel la pa aklale, pa mentepm kaporng yangkipm la pa am aklale kolpake. Ti yangkipm a Maur Wailen lakati kwei ur ak titnongketel yangkipm alkil pa la pa aklale, pa wa titnongket kalkut angen yangkipm a melnum ti lakati pa. Yangkipm a Maur Wailen aktitnongketel la pa aklale pa, pa yangkipm a ak la Warim Kipman alkil a kil ukwa nar amo ak armpento pa.
1JO 5:10 Melnum ur a kil ukipma Sisas a Maur Wailen laron la pa Warim Kipman aklale akilen, pa kil ariwe kawor ipma akilen ti lanakel la pa am Warim Kipman a Maur Wailen pake. Pake melnum ur a kil ake ukipma la yangkipm a Maur Wailen laron Warim Kipman alkil pa ake aklale pa, pa kil plan kolen la Maur Wailen pa melnum a la yangkipm kansil. Eng ntei, kil ake ukipma kaporng yangkipm la yangkipm a Maur Wailen la Warim Kipman akilen pa aklale pa.
1JO 5:11 Yangkipm a pikekg Maur Wailen kil aktitnongketel la pa aklale pa pati la kolkil: kil am alko yaprekg watin alkil a antokg mentepm rpma wor yongkyong pa ise, wa la kolkil la, mentepm awi yaprekg watin alkil atom mentepm rpma wor yongkyong pa pati, pa am or ya a mentepm rpma kawor Warim Kipman akilen pake.
1JO 5:12 Melnum a Warim Kipman a Maur Wailen rpma kawor ipma a kil pa, pa kil awi yaprekg watin atom kil rpma wor yongkyong. Pake melnum a Warim Kipman ake rpma kawor ipma a kil pa, pa kil ake awi yaprekg watin a rpma wor yongkyong pa.
1JO 5:13 Kupm nira wrkapm kil eng kipm wrong kin kipman a ukipma Sisas pa la kil Warim Kipman a Maur Wailen, eng mpa kipm riwe la kipm am awi yaprekg watin a antokg kipm rpma wor yongkyong pa ise.
1JO 5:14 Mentepm ake ngkark, ipma amentepm pa rka kukula atom mentepm antiwe kai wreren Maur Wailen pa. Atom mentepm isentel eng kuina ur kitila nikgwalpm a kil alkil pa, pa kil mpa itning asen a amentepmen pa.
1JO 5:15 Wa mentepm ariwe la, Maur Wailen kil atning asen amentepmen pa, kolpa atom mentepm wa ariwe la kuina ur a mentepm asentel pa, pa mentepm am awi kuina ur a mentepm asentel pa ise.
1JO 5:16 Kol kipm ur ri melnum ur alkipm a mentepm ukipma Krais pa kil ntokg paipmpaipm ur a ake yapo ipmel yaprekg watin atuwen a antokg tu rpma wor yongkyong pa kai paipm imo pa, mpa kitn oklala niki Maur Wailen eng mpa kil ron yaprekg watin a melnum pa eng mpa wa kil wa wrekg rpmi. Pa kupm la tu melnum a antokg paipmpaipm ur a ake yapo ipmel yaprekg watin atuwen a antokg tu rpma wor yongkyong pa kai paipm imo pa. Pake melnum a antokg paipmpaipm a yapo ipmel yaprekg watin atuwen a antokg tu rpma wor yongkyong pa kai paipm imo pa, pa kupm ake la la kipm mpa oklala niki Wailen eng mpa kil ron yaprekg watin a tu melnum a antokg paipmpaipm a kolpa.
1JO 5:17 Melnum a antokg kweikwei a ake ute wor pa, pa kil antokg paipmpaipm. Pake paipmpaipm tiur pa ake arku yaprekg watin akilen a antokg kil rpma yongkyong pa kai amo paipm pa, kalpis.
1JO 5:18 Mentepm ariwe la melnum a pikekg Maur Wailen armpentel wam pa, pa kil ake mpa wa ntokg paipmpaipm pa kolpa itni pa, kalpis. Pati atnen Warim Kipman a Yan alkil armpentel wam pa ak yipmingki kapringentel ariworwor atom Maur Paipm Satan akentiwe mpa rkul kil pa.
1JO 5:19 Wa mentepm ariwe kolpa la, mentepm ti warim a pikekg Maur Wailen armpento wam. Pake mentepm ariwe kolpa yat la, tu melnum a alupm nikgwalpm a kanokg ti pa, tu rpma orngwatneikgen titnongket a Maur Paipm a itna wailen ikgalen kanokg ti.
1JO 5:20 Kolpa aklale, pake mentepm wa ariwe kolpa yat la, Warim Kipman a Maur Wailen pa kil pikekg nar atom antokg nol amentepmen ti umpen wontrakole, eng mpa mentepm uwi riwe Maur Wailen kil wris anangket a aklale pa. Mentepm rpma kawor Warim Kipman akilen Sisas Krais ti pa, pa am wa mentepm rpma kawor Maur Wailen a aklale pake. Wa Sisas Krais pa Maur Wailen aklale, a wa kil pa yiprokgen a alko yaprekg watin a antokg mentepm rpma wor yongkyong.
1JO 5:21 Warim yekyek alkupm, kipm itni watin tukuleikgen kweikwei kolen wes a yo a tu elngkitna atom tu kapor kapor kilko alein alein la pa maur wailen atuwen pa.
2JO 1:1 Kupm melnum tingklaket itna ep a akwap a Maur Wailen, kupm nira wrkapm kil eng kitn kin yek a pikekg Maur Wailen takweiyeitn eng alkilen pa, nampokgen tu warim watnom akitnen pa. Kupm plan ipma wor wasrongen kipm a mentepm arkul nikgwalpm ute aklale a Maur Wailen pa worwor. Ake wa kupm wris ti pa, wa tu wrongkwail a pikekg awi ariwe nikgwalpm ute aklale a Maur Wailen pa atom tu arkul aye itna pa, wa tu pa wa plan ipma wor wasrongentepm yat.
2JO 1:2 Nikgwalpm ute aklale a Maur Wailen pa rpma wail kawor ipma a mentepm ti, a ikga ntiwo rpmi yongkyong or pa kai, kolpa atom ari kupm plan ipma wor wasrongentepm ak ipma aklale.
2JO 1:3 Mpa Yan Maur Wailen a wa Sisas Krais Warim Kipman a Yan alkil pa mpa tuwekg lko ipma wor reinso wa ntokg ipma amentepmen ti rki meen wor, eng mpa mentepm rkul nikgwalpm ute aklale a Maur Wailen wa plan ipma wor wasrongen tita kolpa iye kai.
2JO 1:4 Kupm atopen wail eng kupm atning a tu la tu warim tiur akitnen pa tu atn a rpma a akwap katnun nikgwalpm aklale a pikekg Yan kil la titnongket la mpa mentepm kutnun pa.
2JO 1:5 Ti kitn kin yek pa, kupm la lanikeitn kil eng mpa kipm kutnun: kil kil ake kupm niranteitn yangkipm titnongket weten ur la kitn kutnun pa kalpis. Kil kil yangkipm titnongket tingklaket a pikekg itna ak ep lmpiwen ai, a la kol kil lala, mentepm plan ipma wor wasrongen tita!
2JO 1:6 Nikgwalpm a plan ipma wor wasrongen tita pa itna kolkil: mentepm mpa itn a rpmi ikwap kutnun yangkipm titnongket a pikekg Maur Wailen alko la mentepm kutnun pa. Pa yangkipm a pikekg kipm atning ak ep lmpiwen ai la kipm mpa itn a rpmi plan ipma wor wasrongen tita iye kolpa kai.
2JO 1:7 Kipm mpa rpmi plan ipma wor wasrongen tita rpmi or pa kai, atnen a tu melnum watipmen a pikekg atnuurng yangkipm aklale pa am kai atn yela tatu kanokg ti kaling plan yangkipm a kai raimpe ak alok tu wrong kin a kipman pa kai ar ise. Tu melnum pa tu la Sisas pa ake Krais melnum a pikekg Maur Wailen naren la ikuwi mentepm ti iye kai wor pa, wa tu ake wa ukipma la kil pikekg palng melnum kol mentepm ti pa. Tu melnum pa tu awi nikgwalpm kai Wrongmanto Antikrais, Yan Yiprokgen a alok tu melnum aye kai ar.
2JO 1:8 Kolpa ti kipm itn a rpmi ikglen kipm alkipm pa riworwor, mpa kweikwei a kipm aken kwap la ikga kipm uwi pa, ikga kai tikote. Kipm ikglen kipm alkipm pa riworwor kolpa pa, kipm ikga uwi kweikwei pa kimeket ikilmpe kwap a kipm ak pa.
2JO 1:9 Mla ur a ake kil arkul yangkipm irir kol a pikekg Krais kaling planto pa a wa kil angkine yangkipm pa kai raimpe pa pati, pa Maur Wailen kil ake rpma kawor ipma akilen pa, kalpis. Pake mla ur a kil arkul yangkipm irir kol a pikekg Krais kaling planto pa pati, kil pa awi Yan a Warim Kipman pa yatenen rpma kawor ipma akilen pa.
2JO 1:10 Kol melnum ur kil kai riwepm nimpokgen yangkipm a ake kai ore yangkipm a Krais kaling plan ti pa, ampur kipm ukwor awiyel aye kawor wan akipmen pa.
2JO 1:11 Eng ntei, mla ur a kil ukwor awi melnum a kolpa aye kawor wan pa, pa kil am kai karpon nampokgen melnum pa antimprak antokg kweikwei a paipm kol a melnum pa antokg pa yat ise.
2JO 1:12 Kupm yangkipm watipmen rpma la kol a nirantepm, pake kupm karken a nirantepm ela wrkapm ti, kupm wasrongen lala, ikga kupm alkupm ti kai riwepm a ntiwepm rpmi oklala pati, ikga mentepm kimeket tipra itopen tita wail.
2JO 1:13 Kitn kin pa, men warimpwarim a wailen alkitn a pikekg Maur Wailen takweiyel a men rka kil pa, men la lanikepm la men nikgwalpm arkentepm rka wa men alkepm wor.
3JO 1:1 Kupm ti kupm melnum tingklaket itna ep a akwap a Maur Wailen. Kupm nira wrkapm kil eng kitn Kaius, melnum wor yek alkupm. Kupm plan ipma wor wasrongen kitn a mentepm arkul yangkipm aklale a ak la Krais pa.
3JO 1:2 Melnum wor yek alkupm, wa kupm oklala naki Maur Wailen eng mpa kil ngklinseitn eng kweikwei wrongkwail a kitn antokg kai pa mpa palng wor, wa ngklinseitn eng ake mpa numpet ur palngteitn, mpa kitn rpmi numpworen wor, kol kupm ariwe la nol nikgwalpm wunen akitnen pa wor itna pa.
3JO 1:3 Kupm atning a tu melnum tiur akupmen a mentepm ukipma Krais pa, tu yaper wli lakati kitn pa nakopm la, kitn arkul yangkipm aklale pa kolpa itna pa. Pa aklale, kitn am atn a rpma katnun yangkipm aklale kolpa itna pake. Kolpa atom kupm wa atopenteitn wail manten.
3JO 1:4 Ake kweiur manet antokg kupm atopen wail manten kolpa. Am kupm atning a kipm ukipma atom palng kol warim akupmen a katnun yangkipm aklale pa kolpa itna pa, pa antokg ipma akupmen pa atopen wail manten or kai ai.
3JO 1:5 Melnum wor yek alkupm, kitn pa melnum nungkulkg wor a katnun yangkipm aklale akwap wor eng ak angklin tu melnum a mentepm ukipma Krais pa, a ak angklin tu melnum tiur manet a kitn ake wa ariwe pa yat.
3JO 1:6 Tu tiur a pikekg atn kai pa kai pa akwap a Maur Wailen atom kai ariwepm pa, tu kul lakati kitn pa naki men a ukipma Krais mapming a kaingkai takwem rka kil la, kitn pa pikekg plan ipma wor wasrongenten a angklinsen. Ti wa kol tu melnum kolpa la kai ikwap a Maur Wailen pa, kitn wa ngklinsen worwor kolen a kitn angklin kil alkil Maur Wailen pa, eng mpa tu iye nukur num kai eng tu ikwap pa. Kitn ik kolpa pa, pa kitn ak wor pake.
3JO 1:7 Eng ntei, tu atn akwap laron nang a Krais pa, atom tu ake wa asen la tu a ake ukipma Krais pa ik ngklinsen kweikwei ur pa.
3JO 1:8 Kolpa ti pa kwap a mentepm a ukipma Krais ti mpa ik titnongketel tu melnum a atn ak ak kwap a Krais pa, eng mpa mentepm kimeket ik titnongketel kwap a laron yangkipm aklale kol a Krais kaling planto pa iye kolpa kai.
3JO 1:9 Kupm pikekg nira wrkapm ur eng kipm melnum alkupm mapming a kaingkai takwem rka wris kai pa, pake Tiotrepes a wasrongen la kil la itni ep ikglen kipm pa, kil ake la itning kutnun kuina ur a kupm la pa.
3JO 1:10 Kolpa ti ik wang ur a ikga kupm kaintepm pa, ikga kupm lanikepm itni wulmpa a kipm wrongkwail nikgwalpm kuina ur a kil ak kolpa. Kil arkiwo kalpmilel la paipmel men ti. Ake pa wris pa, wa kil wa ak kolkil: ake kil kapor alei tu melnum amenen a atn ak ak kwap a Krais pa. Wa tu tiur a wasrongen la kipor ilei tu pa, kil wa angketen, a wa ungkwanten kai takwleikgen kipm a ukipma Sisas mapming a kaingkai takwem rka wris kai pa.
3JO 1:11 Melnum wor yek alkupm, ampur kitn ntokg kitila kuina ur a paipm pa, yaper. Kitn ntokg kitila kuina ur a wor pa kolti. Mla ur kitn a antokg kuina ur a wor pa, kitn pa a Maur Wailen. A mla ur kitn a antokg kuina ur a paipm pa, kitn pa ake kitn ari Maur Wailen pa.
3JO 1:12 Kupm wa la Temitrius, tu melnum wrongkwail ti tu kaporng yangkipm lakati la kil melnum wor. Wa atn a rpma akilen pa kai katila yangkipm aklale a Maur Wailen kil alkil ai wa planto lala kil pa melnum wor. Ti wa men antimprak la yat la kil pa melnum wor. A kitn ariwe yangkipm a men la kaporng yangkipm kil pa, pa aklale.
3JO 1:13 Kupm yangkipm watipmen rpma lala kol a kupm niranteitn, pake kupm ake la nira eli wrkapm ti.
3JO 1:14 Kupm wasrongen la kupm a kai riweitn, ake a wang watin, wang wreren eng kupm a kai riweitn ntiweitn rpmi mentekg oklala pake.
3JO 1:15 Kupm oklala naki Maur Wailen eng mpa kil ngklinseitn eng mpa ipma akitnen pa rki meen wor kolpa kai. Wa tu workganen alkitnen a rka kul kil pa, tu wa la lanikeitn la tu nikgwalpm arkenteitn rka pa. Kitn ri tu melnum wor alkupmen kai pa pa, kitn laniken wris wris la, alken wor, kupm nikgwalpm arkenten rka pa. Yangkipm a kupm niranteitn kil pa am kai itna kol pake.
JUD 1:1 Kupm Sut, kupm melnum akwapel a orngwatneikgen Sisas Krais, a wa kupm paipmen a Semis. Kupm nira wrkapm kil eng kipm wrong kin a kipman a Yan Maur Wailen. Kil plan ipma wor wasrongentepm, a wa akwewepm ayekul eng alkilen, a wa ikgalentepm ariworwor itna, la ikga uk kai wam a Sisas Krais pa.
JUD 1:2 Wa kupm oklala naki Maur Wailen eng mpa kil reinsepm a lkepm ipma meen wor a ngklinsepm eng mpa kipm plan ipma wor wasrongen tita. Pa kupm asentel la nikgwalpm ari pa mpa palng wail a wail titnongket itni kawor ipma akipmen pa kolpa iye kai.
JUD 1:3 Kolpa ti workganen yekyek alkupm, kupm wasrongen paipm la nira wrkapm ur kai eng ik lanikepm kwap a pikekg Maur Wailen kil ak awiyo eng alkilen pa, pa kil ak angklinso kimeket irir, atom kupm la nirantepm ikla pake. Ari kalpis, kupm mpa wa nira lanikepm yangkipm wail manet ur kil, atom kupm tilpepm titnongket la, kipm itni titnongket tulpulng tu a awi wrong manto lan nikgwalpm a mentepm ukipma yangkipm wor a Maur Wailen pa. Am yangkipm wor a Maur Wailen pikekg akwewo atom mentepm wrongkwail kin a kipman alkilen yela ukipma katnun am pake. Ake mpa wa melnum ur plelngen nikgwalpm akipmen pa atom kipm wa ukipma kutnun yangkipm manet ur pa, kalpis.
JUD 1:4 Eng ntei, tu melnum tiur a talpulng yangkipm a Maur Wailen pa, tu pikekg wli akangkompen kipm ti antiwepm rpma pa. Tu plelngen yangkipm wor a la Maur Wailen plan ipma wor ak angklin mentepm ti wa kai manet. Tu wa plelngen yangkipm kil kolkil la, Maur Wailen pa kil wa awi wor la mentepm ntokg kweikwei paipm paipm kimpilpet pa pati pa wor, pa ake paipm pa, kalpis. Wa tu lam nang a Wailen Sisas Krais, mring tukgunakg wris anangket a mentepm orngwatneikgen pa. Kolpa atom pikekg Maur Wailen la ep ak ai kolpa la, tu pa ikga itni yangkipm atom ikga yangkipm kalpisen a ikilmpe yangkipm akilen, atom tu ikga kai paipm.
JUD 1:5 Kol yangkipm a kupm la lanikepm kil pa kipm pikekg ariwe kimeket ise, pake kupm la wa la eng ik ngkitepm nikgwalpm a pikekg Wailen kil angklin tu Isrel atom awiyen aye kai takwlelkgen anong kanokg Isip pa. Ari tu angkom or ya pa kai alm kowangkel Wailen pa, kolpa atom ari kil wa antokg tu wailet tiur amo atnen a tu ake ukipma kil pa.
JUD 1:6 A kupm la wa ngkitepm nikgwalpm la kipm ikwonilmpen tu maur akwapel tiur a Maur Wailen pa: tu ake la ikwonilmpen nang wailen a pikekg Maur Wailen alken pa, tu atnuurng wrik wor alntu pa. Atom Maur Wailen kil angkutenten ak ampei kalnten a ikga itni yongkyong pa, atom angkliwen elng kinar rpma wrik miningket turkget paipm pa rpma nungkwangen wang wail a ikga ntokg yangkipm itni Maur Wailen pa.
JUD 1:7 Am wa kolen anong wekg Sotom a Komora pa a wa anong tiur a ela wreren anong wekg pa. Tu pikekg antokg kweikwei paipm kolen tu maur akwapel a Maur Wailen antokg pa. Tu ipmanikg wrekg antokg kweikwei paipm paipm a uk num paipm a numkropis kamel, a tu ake okg kin kipman katila ya kol a okg kin kipman pa wa tu ak kai manet. Kolpa atom Maur Wailen kil lap anong pa kai paipm akalmpe paipmpaipm a tu antokg pa. Kil pikekg ak kolpa ak plan tu pa kol kla ur a kil elngtitna la ikga wrongkwail kin a kipman a antokg kweikwei paipm paipm a kolpa ri, atom tu ikwonilmpen la Maur Wailen ikgam ungkwanten ngkliwen elngkinar lkim watin a wakg atne itna yongkyong pake.
JUD 1:8 Tu melnum tiur a antiwepm rpma atom plelngen yangkipm wor a Maur Wailen ti wa kai manet pa, tu pa am wa kolpa yat pake. Tu la Maur ti planten kweikwei kolpa atom ak ngkat nikgwalpmel tu pa wrekg wa antokg kuina ur a paipm kolpa ak kimpilpetel tu alntu. A tu nungkulkget atom tu ake orngwatneikgen mla ur a itna ep ikgalento ti. A wa tu la paipmel tu maur klalen antiwe titnongket ai.
JUD 1:9 Kol am tu maur akwapel a Maur Wailen pa la paipmel Satan pake, ari tu pa wa kalpis. Kol am Maikel, maur akwapel a itna ep pa pikekg anti Satan ekg alilakel tita num palk a Moses la uwen pa, kil ake wa la paipmel arki Satan pa, kalpis. Kil ake la uwi kwap a Wailen pa, kol am Wailen kil alkil pa ok ntiwel pake, kolpa atom kil lanakel kolti la, “Wailen pa mpa ikilmpe paipm akitnen pawo!”
JUD 1:10 Pake tu melnum paipm a kolpa a wli antiwepm rpma pa, tu la paipmel kweikwei a tu alntu ti ake wa ariwe. Tu antokg katila kolen tu wlikgok tilpmingen a nikgwalpm kalpisen wasrongen la ntokg kuina ur a tu alntu ti wasrongen la tu a ntokg pa. Ariwe kol a tu katnun wlikgok tilpmingen pa, pa antokg tu kai paipm. Tu antokg kolpa pati, pa tu antokg paipm tu alntu.
JUD 1:11 Woi, kipm pa, tu pa ikga uwi paipm! Tu pa katila nikgwalpm paipm kolen a Ken pa. A wa tu la uwi marpm kolti kutnun kol a pikekg Palam alok tu Isrel kai ar pa. Wa tu ake orngwatneikgen melnum wailen a ikgalenten pa kolen a pikekg Kora wrekg la nolangkil Moses pa, ti tu pa ikga uwi paipm.
JUD 1:12 Kipm melnum a ukipma Sisas pa kai rka wris eng antokg okipma ur al ak plan nikgwalpm a kipm uk ipma wor wasrongen tita pa, tu melnum paipm kolpa antiwepm rpma pa, mpa tu wangkwrisen kipm pa ti kipm mpa paipm. Tu al manto manto kolti la ikngklin tu alntu ti kolti. Tu kolen u waipmunu kaikut a kol a uwei ari kalpis, wripm el ungkwan aye kai atn kol ur ise. Wa tu kolen yo aipiken a ake oken. A wa kolen yo a yokg almpen atom nungkwor pa. Atom tu kol amo anti wekg ise.
JUD 1:13 Tu pa kolen unokg wail a ngkat tapor wail pa. Ake tu numpaipm eng antokg kweikwei a numpaipm num kropis itna wunong wunong wulmpa a wrongkwail kolen unokg ipopm a ela unokg kwa pa. A wa tu kolen kleinup a narku ti ake katila ya alkil a ore pa. Kolpa ti Maur Wailen kil nimprampen lkim miningket turkget paipm ai ak namput tu pa elng itna eng ikga tu kinar rpmi pa yongkyong.
JUD 1:14 Kol ik ker uwiye tu wapyipmiri a walyipmiri ngkiten ingkai Atam ai kulngkul, kul ngko Enok pa, pa wapyipmiri walyipmiri wampwomis wampwompwekg. Pikekg Maur Wailen ngkat okel Enok pa la tu melnum paipm pa kolpa la, “Kipm riri, Wailen kil nar nampikgen tu maur klalen akwapel wailet paipm alkilen ai!
JUD 1:15 Kil nar eng mpa uwi tu wrongkwail pa iye kai itni yangkipm, atom mpa kil uk wleket tu a ake ukipma kil pa ikilmpe paipmpaipm wrongkwail a pikekg tu antokg katnun nikgwalpm paipm a tu la uk yirokg kil pa. A mpa wa kil ikilmpe yangkipmok paipm paipm wrongkwail a pikekg tu lawel pa.”
JUD 1:16 Tu melnum a pikekg Enok la pa, tu paipm kolkil: pa tu awi ipma kalkut la watipmen tintang tintang eng kuina ur a palngten pa. A tu wa katnun nikgwalpm wasrongen paipm a numpalk atuwen ti. Wa tu aro ok ngkat nang alntu ti, wa tu armpwonel ningkail tu melnum la kul ntokg kuina ur kutnun nikgwalpm a tu tike.
JUD 1:17 Pake workganen yekyek alkupm, kipm wonrpme yangkipm a pikekg tu melnum wokgen akwapel a Sisas Krais Wailen amentepmen laron nakepm ep pa.
JUD 1:18 Pikekg tu laron nakepm la, “Ikga ik wang umpuwen pa, tu melnum a ak nokgel kamel pa ikga wli, atom tu uk yirokg Maur Wailen a antokg kuina ur katnun nikgwalpm wasrongen paipm a numpalk atuwen pa kolti.”
JUD 1:19 Tu melnum a ak paipm kolpa pa tu wako aro wrong kin a kipman a ukipma Maur Wailen a kaingkai takwem rka wris pa. Tu rpma katnun ipma tingklaket alntu a itna kanokg a ti kolti. Atom Maur Wor a Maur Wailen pikekg tu awi pa am atnuurngken ise.
JUD 1:20 Pake kipm workganen yekyek alkupm, kipm ukipma Krais Sisas pa kol ong a kipm uwen kolpa ti kipm le wan krimperket a ukipma pa eli ong pa riworwor itni titnongket kolpa iye kai o! Kipm elng Maur Wor a Maur Wailen pa rpmi kipm pa eng mpa kipm oklala niki Maur Wailen pa ik titnongket a Maur Wor pa.
JUD 1:21 Nikgwalpm a Maur Wailen plan ipma wor wasrongentepm pa mpa kipm lupmen rpmi eng mpa ikglentepm kolpa kai. Atom mpa kipm rpmi nungkwangen Wailen Sisas kil ikga plan ipma wor akilen a kil areinsepm pa palng ngko wunong atom ik uwiyepm iye kai ntiwel rpmi wor yongkyong.
JUD 1:22 Kipm rein ngklin tu melnum a nikgwalpm a rka wekg wekg a ake ukipma itna titnongket pa.
JUD 1:23 Tu melnum tiur pa itna kolen lala ikga ngkli elng kai wakg, kolpa ti kipm rein eng mplim tu a itna kai wakg pa iye yaper kul. Kipm la rein eng ngklin tu pa, kipm ik ik ngkirke. A kipm itni watin tukwelkg tu melnum a kolpa. Tu pa katnun ipma tingklaket alntu kolpa ti tu palng kimpilpet. Wa apm atuwen ti wa kimpilpet yat. Kolpa ti kipm itni watin tukuleikgen kweikwei a kimpilpet itna wulmpa a Maur Wailen pa.
JUD 1:24 Mentepm mpa ngkit nang a Maur Wailen! Kil Maur Wailen a antiwe titnongket a ikgalentepm ariworwor, ti kipm ake antiwe mpa wutat itni kanokg iprak pa ngko pa. Kil melnum a antiwe uwiyepm iye kaino ntiwel rpmi anong klalen alkil ai, a wa kil ikga ri kipm pa la kipm pa wriwen wor kolti, paipmpaipm kalpisen, ti kipm ikga tipra itopen wail manten.
JUD 1:25 Am kil alkil wris ata pa kil Maur Wailen, wa kil melnum a pikekg ukwa Sisas Krais Wailen amentepmen pa kil nar akawiyo aye yaper kai eng kil. Ti mentepm mpa itopen ngkit nang akilen itnen kil awi nang wailen, a kil klalen wail manten, kil antiwe titnongket wail manten, kil itna tukgunakg ikgalen kweikwei wrongkwail. Pikekg ep kil am rpma kolpa rpma pake, wa ak wang ti kil rpma, a wa ikga wa ik wang kutnukg pa, kil ikgam rpmi wa iye or pa kai itni lantlan kolpa rpmi pake. Ti mentepm itopen ngkit nang akilen pa iye kaino kwa! Aklale. Wrkapm a kupm nirantepm ti pa am kai itna kolpake.
REV 1:1 Kil kweikwei ampen a Maur Wailen uk Sisas Krais la kil plan ngko wunong tu melnum akwapel a orngwatneikgen kil pa kuina ur a kil la ikga palng pa, pa am wreren eng a palng tike. Atom kil ukwa maur akwapel alkil pa nar laron kuina ur a pikekg Sisas kil atning a ari pa, angko wunong naki kupm Son, melnum akwapel alkilen a orngwatneikgen kil.
REV 1:2 Atom kweikwei wrongkwail a kupm atning a ari atom kupm nira ela kil pa, pa yangkipm a Maur Wailen aklale wrisen, a wa kweikwei wrongkwail a Maur Wailen plan Sisas Krais atom Sisas kil plan kupm kil pa, pa aklale wrisen.
REV 1:3 Wang umpuwen a kweikwei wrongkwail ikga palng pa, am kul wreren tike. Kolpa ti mla ur kitn a angkleikg naki tu wrong yangkipm ampen a Maur Wailen laron nakopm kil pa, kitn pa wor pake, kitn itopen o! Wa mla ur kipm a atning katnun yangkipm a nira ela wrkapm kil pa, kipm pa wor pake, kipm itopen o!
REV 1:4 Kupm Son kupm nira wrkapm kil ukwa kai eng kipm wrong kin a kipman a ukipma Sisas a mapming wampwomis wampwompwekg a rka tatu anong kanokg a Esia pa. Kupm lanaki Maur Wailen eng mpa kil plantepm ipma wor alkil ngklinsepm a lkepm ipma meen wor kolpa iye kai; kil melnum tukgnakg a pikekg rpma ep, a wa rpma ak wang ti, a wa ikga yaper nar. A wa kupm lanaki kolpa Maur Wor wampwomis wampwompwekg a itna won wrik tipmakg a melnum tukgunakg a awi nang wailen arpme arpme pa mpa wa ngklinsepm kolpa iye kai yat.
REV 1:5 A wa kupm lanaki kolpa Sisas Krais, kil melnum a nungkulkg a wulmpa eng kweikwei wrongkwail pa atom kil laron katila aklale ute kolti. Ake melnum ur pikekg amo atom wa wrekg pa, kalpis. Kolpa itna itna, kil pa ep akule ya a amo a wa a wrekg pa. A wa kil melnum wailen a itna ep ikgalen tu melnum tukgunakg a ikgalen kanokg ti. Kupm lanaki tunteng pa kolpake, la tunteng mpa plantepm ipma wor alkil ik ngklinsepm a lkepm ipma meen wor kolpa iye kai. Sisas kil plan ipma wor wasrongen mentepm ti atom walmpopm akilen pa ak ungkwan paipmpaipm amentepmen pa kol ak angketen wrpmungkaung a ak yapowo pa wirng no kukula wor.
REV 1:6 Wa kil wa antokg mentepm ti palng melnum tukgunakg la itni ikglen kweikwei wrongkwail, wa kil antokg mentepm ti palng melnum ipma krakgen atom mentepm al wor uk Maur Wailen, Yan a kil ai. Kolpa ti kupm kapor kilko alein ngkat nang akilen pa la kil itni klalen a ntiwe titnongket itni yongkyong kolpa iye kai o! Pa aklale wrisen.
REV 1:7 Ti kipm itning, kil ikga waipmunu ik iyewel nar. Mentepm wrongkwail ikga riwel ik wulmpa amentepmen ti a wa tu a pikekg ak wri almpel pa yat. Wa wrongkwail kin a kipman a numpalk aur aur yela kanokg ti ikga akg rein wail a ik ok numputel. Pa aklale, ikgam kolpake.
REV 1:8 Maur Wailen, kil Wailen a antiwe titnongket wrongkwail pa, kil pikekg rpma ep ak ai, a wa kil rpma ak wang ti, a ikga wang kutnukg pa kil ikga wa rpmi atom wa nar, kil la kolkil la, “Kupm melnum ep a ngkaten kweikwei wrongkwail, a wa kupm melnum a amprin aimprek a kweikwei wrongkwail.”
REV 1:9 Kupm Son, kupm a mentepm ukipma Sisas. Mentepm a katnun Sisas atom kupm nampokgen kipm pa mentepm kimeket awi wleket, wa Maur Wailen itna wailen ikgalen nol nikgwalpm akupmen ti kol a ikgalen a kipm pa, a wa kupm nampokgen kipm pa mentepm kimeket itna titnongket arki kalkuten ngkaten ak ak kwap. Kupm ti pikekg laron yangkipm a Maur Wailen a kweikwei wrongkwail a Sisas laron nako pa, aklale wrisen, kolpa atom tu arkulopm ukwawopm kul rpma anong kanokg Patmos a ela unokg kuin ti.
REV 1:10 Kupm rpma ti atom ak wang wail ur a Wailen pa a mentepm rpma eng yapm ngkat nang akilen pa, Maur Wor kil akwap titnongket kul kupm ti, atom kinar yirokg akupmen pa, kupm atning ok ur a akwewopm kolen nol a tu tiplam yikakatnen pa.
REV 1:11 Ok pa akwewopm atom kil la kolkil la, “Kweikwei wrongkwail a kupm la planteitn la kitn ri kil pa, kitn nira kimeket eli wrkapm pa. Atom ukwa uk tu iye kai uk tu wrong kin a kipman mapming wampwomis wampwompwekg a ukipma kupm a rka anong Epesus, Smerna, Perkamum, Taiataira, Sartis, Pilatelpia a Laotisia pa.”
REV 1:12 Ok pa la kolpa plalng atom kupm ikg plelng la ri melnum ur a wuten akwewopm pa. Kupm plelng pipa, kupm ari tipmakg wampwomis wampwompwekg a tu ak wes malungen muinmainet alm. Atom tipmakg pa tu elng wakg pa arpme arpme eng akalen yela kanokg pa.
REV 1:13 Atom kupm ari melnum ur pa ari kolen Warim Kipman a Melnum itna kuin a wes muinmainet a elng wakg arpme arpme pa. Kil nowe apm watin mleing kinar ak aur nepm alkil pa, wa kil ak ampei ur a tu ak wes muinmainet ak antokg pa ak angket tatu mkang alkil pa.
REV 1:14 Tukgunakg walk akilen pa tangkoren pupu kolen waipmunu aki tangkor pa. A wulmpa akilen pa kolen wakg a naruk pongpong pa.
REV 1:15 Nepm akilen pa ari kolen wes a lap kai wakg wail atom watet klelklel pa. A kupm atning ok kromeng akilen pa pati atning kolen milpming wail a kop ur a el kintir kuntur pa.
REV 1:16 Atom kil wamparpme kumeim wampwomis wampwompwekg pa aye itna wam wi akilen pa, a kwei ur kolen sakal a lepet womwompen pa kul or wli ok akilen pa, a ikgokg akilen pa klalen mainmain kolen takgni a el titnongket pa.
REV 1:17 Kupm ariwel kolti kupm elng angko amo kolen melnum yipmiri pa rmpa nepm akilen pa. Kil elng wam wi akilen pa elawopm a kil la, “Ampur kitn ngkark, kupm melnum a ep, a wa kupm melnum a katnukg.
REV 1:18 Kupm yiprokgen a rpma yongkyong. Kupm pikekg amo pake kitn ri, kupm wrekg rpma, kupm ikgam rpmi yongkyong kolpa iye kai pake. Wa kupm wamparpme ampei umpu a wrik om a tu a amo kai arpme arpme pa.
REV 1:19 Kolpa ti mpa kitn nira kweikwei a kitn ari pa, ikla kweikwei a ak wang ti, a wa kweikwei a ikga wa palng ik wang kutnukg pa.
REV 1:20 Kitn ari kumeim wampwomis wampwompwekg a kupm wamparpme aye itna wam wi akupmen ti, a wes muinmainet wampwomis wampwompwekg a elng wakg pa arpme arpme ti pa pati, yiprokgen a itna ampen a ak pa ak la pa pati itna kolkilke: kumeim wampwomis wampwompwekg pa ak la tu maur akwapel a Maur Wailen a ikgalen tu wrong kin kipman mapming wampwomis wampwompwekg a ukipma kupm pa. A wes muinmainet wampwomis wampwompwekg a elng wakg pa arpme arpme ti pati, pa ak la tu wrong kin a kipman mapming wampwomis wampwompwekg a ukipma kupm pa.”
REV 2:1 Melnum a kupm ari pa kil lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Epesus pa. Mpa kitn nirantel kolkil, 'Kupm melnum a wamparpme kumeim wampwomis wampwompwekg kil aye itna wam wi akupmen ti. Atom kupm angkom or kuin a tipmakg wampwomis wampwompwekg a ak wes muinmainet ak alm eng elng wakg arpme arpme pa. Kupm lanaki kitn maur akwapel a ikgalen tu melnum a ukipma kupm mapming a rka Epesus pa yangkipm kil:
REV 2:2 Kupm ariwe atn a rpma a kwap akitnen ti plalng, kupm ariwe la kitn melnum timplowis wor a akentopm kwap arki kalkuten itna titnongket kolpa aye kai. A kupm ariwe la kitn melnum a karken tu melnum paipm. Tu melnum tiur pa pikekg ngkat nang a tu alntu ti la tu melnum wokgen akwapel a kupm, pake kitn pikekg alken kwap eng ak ariwen ari, palpa tu melnum a kansil ak ipaar ak num enen ti kolti.
REV 2:3 Kitn ukipma kupm ti atom tu melnum alkeitn kalkuten, ari ake wa kitn wa kai karken angko ya pa, kalpis, kitn arki kalkuten itna titnongket kolpa itna.
REV 2:4 Pake nikgwalpm wris ur kil a kitn alupm pa kupm ake atopen: pikekg ak wang lmpiwen pa kitn plan ipma wor wasrongen kupm ti titnongket, pake ak wang ti pa wa kalpis.
REV 2:5 Ikwonilmpen yaper kai nikgwalpm wor a pikekg kitn alupm ep pa atom kitn atnuurng pa, atom kitn ngkiten la rein i pa iye kul kai plalng pa plelng ipma, wa kitn lupm nikgwalpm wor a plan ipma wor wasrongentopm kutnun kitila kol a pikekg kitn ak ep pa. Kalpis pa pati, ikga kupm kai ungkwan tipmakg akitnen a ak wes malungen muinmainet ak alm eng elng wakg arpme arpme pa kai tukwlelkgen wrik alkilen a arpme pa.
REV 2:6 Pake nikgwalpm wor wris ur akitnen a kupm atopen pa pati itna kolkil: kitn karken paipm wrisen kwap a tu a katnun nikgwalpm a pikekg Nikolas ak pa. Aklale, kupm ti yat kupm wa karken paipm wrisen nikgwalpm pa yat.
REV 2:7 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail yela. Kol melnum ur kil itni titnongket tulpulng tu wrongmanto pa pati, ikga kupm lanikel la kil il yo ok yiprokgen a antiwe a uk yaprekg watin eng rpma wor yongkyong. Yo pa itna kaino wring a Maur Wailen kaino kitnong ai.'”
REV 2:8 Melnum pa wa lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Smerna pa. Mpa kitn nirantel kolkil la, 'Kupm melnum a pikekg rpma ep ak ai, wa kupm melnum a ikga wa rpmi kutnukg, a kupm melnum a pikekg amo, a kupm melnum a pikekg wrekg rpma pa, kupm lanaki kitn maur akwapel a ikgalen tu mapming a rka Smerna pa yangkipm kil:
REV 2:9 Kupm ariwe kalkuten a wleket a palngteitn palngteitn pa, a kupm ariwe la kitn rpma tukwok paipm wrisen, pake kalpis kitn wa rpma antiwe kweikwei wailet. Pa kupm ariwe yangkipm paipm a tu tiur ak nokgeleitn pa. Ti tu pa wa la tu alntu pa la tu Suta, tu melnum a Maur Wailen takweiyen, pake kalpis, ake tu Suta aklale pa, tu pa wrong kin a kipman mapming a kapor kilko alein Satan.
REV 2:10 Ake angkai watin, angkul ikga kitn uwi wleket wakget, pake ampur kitn ngkark. Kupm lanakeitn la, Satan kil ikga rkul tiur akipmen pa iye kawor rpmi wan tipmining eng la ik riwepm la kipm ukipma itna titnongket aki kalpis. Kipm ikga rki kalkuten a wleket rpmi kolen wang wampwam. Pake kipm rkul ipma a ukipma kupm pa itni titnongket, kolpa kaingkai kipm tiur imo aki kipm tiur rpmi aki, pa ikga kupm uwiyepm iye kaino ntiwopm rpmi wor yongkyong, pa kolen tamtimpal ur a ikga kupm lkepm ik plan la kipm alok angkli wrongmanto ise.
REV 2:11 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail a rka yela pa. Amo ep pa a numpalk ti kolti, a amo katnukg pa a maur wor. Melnum a kil ake itna titnongket talpulng tu wrongmanto pa, maur wor a kil pa ikga kai wakg uwi wleket wakget a itna yongkyong; pa amo katnukg ampake. Melnum ur kil itni titnongket tulpulng tu wrongmanto pa pati, maur wor a kil pa ikga ngkom nilokgen anong wakget paipm pa.'”
REV 2:12 Melnum pa wa lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Perkamum pa. Mpa kitn nirantel kolkil, 'Kupm melnum a aye sakal a lepet womwompen pa, kupm lanakeitn yangkipm kil:
REV 2:13 Kupm ariwe worwor anong a kitn arpme pa, pa wrik a Satan itna wailen ikgalen kweikwei itna wrik pake. Pikekg ep pa Antipas pa kil melnum wor alkupm a kil laron yangkipm akupmen pa naki tu pa la yangkipm pa aklale, kolpa atom ari tu almpel amo itna anong wail akipmen pa. Am anong pa a Satan pa arpme pake. Ari ake wa kitn lam a kitn ukipma kupm pa, kalpis. Kitn ukipma arkul kupm ti aye itna titnongket.
REV 2:14 Pake kupm karken nikgwalpm tiur a kitn arkul aye rpma pa: tu melnum tiur a antiweitn rpma kaino anong Perkamum pa tu arkul nikgwalpm a pikekg Palam pa kaling plan kipm pa itna pa. Kil pikekg kaling plan Palak pa atom kil ale lem atom tu wrong kin a kipman a kipm Isrel pa kai angkowe lem a kil ale pa atom tu al wlikgok a tu alwor uk mring a mring maur a krimperk a kweikwei kolpa, a wa tu angkli arkul tita.
REV 2:15 Am wa kolpake, tu tiur akitnen pa wa tu katnun nikgwalpm kolpake a tu a pikekg Nikolas pa kaling planten.
REV 2:16 Kolpa ti kitn plelng ipma, a kitn uk yirokg paipmpaipm akitnen pawo! Kalpis pa pati, ake angkai watin ai, wreren tike ikga kupm yaper kinar pa pati, ikga kupm ilmpen ik ok akupmen ti pa kolen sakal a lepet womwompen pa.
REV 2:17 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail yela pa! Kol melnum ur kil itni titnongket tulpulng tu wrongmanto pa pati, ikga kupm lkel okipma mana tiur a rpma ampen a wa kupm lkel wes ur a tangkoren pupu. Ela wes pa ikga kupm nira nang weten ur a ake antiwe melnum wris ur kil ariwe nang pa, kalpis. Melnum wris ata a kil awi wes pa kil pa ikga riwe nang a ela wes pake.'”
REV 2:18 Melnum pa wa lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Taiataira pa. Mpa kitn nirantel kolkil, 'Kupm Warim Kipman a Maur Wailen. Wulmpa akupmen pa klalen alen yela kolen wakg wail a naruk srurng nurnur pa. A nepm akupmen pa ari yipayet klelklel kolti, kupm lanakeitn yangkipm kil:
REV 2:19 Kupm ariwe atn a rpma a kwap akitnen ti plalng. Kupm ariwe kitn plan ipma wor wasrongen kupm ti wa nampokgen tu mla ur ai, a kupm ariwe kitn ukipma kupm, a kitn wa akwap eng ak angklin tu tiur ai. Kupm ariwe kitn melnum a itna titnongket arki kalkuten wrongkwail a palngteitn pa. Kupm ariwe nol nikgwalpm a pikekg kitn antokg ep pa ti wor pa, pake wa ak wang ti pa nol nikgwalpm a kitn antokg pa wa wor wrisen angen a pikekg ep ai.
REV 2:20 Kupm kaporngkeitn yangkipm pake, nikgwalpm wris kil a kitn arkul aye rpma pa kupm karken paipm wrisen: kitn ariwulmpa kin Sesepel pa a la kil alkil ti la kil kin okwripm a Maur Wailen. Pake kil kansil kaling plan tu melnum akwapel akupmen ti ayewen kai ar atom tu angkli arkul tita, a wa al wlikgok a tu alwor uk mring a mring maur a kweikwei kolpa.
REV 2:21 Kupm alkel wang la mpa kil plelng ipma a uk yirokg nikgwalpm a antokg numkropis kolpa a uk numpaipm kamel, ari kil karken.
REV 2:22 Kitn itning, ikga kupm ok nti kin pa ngkit ngkrangkel elng kai rmpi wrik pa uk numpet a wleket wail. A wa tu kipman a anti katnun nikgwalpm a kin pa, ake tu plelng ipma uk yirokg nikgwalpm a tu angkli arkul nampokgen kin pa pipa, ikga kupm lken wleket wail ikilmpe paipm a tu ak kolpa.
REV 2:23 Ikg a kupm or ntokg paipm tu melnum alkil a katnuntel pa imo. Kolpa eng mpa tu melnum a ukipma kupm mapming wrongkwail yela pa riwe la kupm ti melnum a ari ipma nol nikgwalpm a melnum wrongkwail pa worwor. Ikga kupm ik ikilmpe kitila atn a rpma a kwap a kipm wris wris ak pa.
REV 2:24 Pikekg kin pa kaling plan kipm wrong kin a kipman a rka kaino Taiataira pa nikgwalpm paipm akilen, pake kipm tiur pa pikekg ake arkul nikgwalpm a kin pa, a kipm pikekg ake awi ariwe nikgwalpm ampen a Satan lam nar kai yilokitnin a kil ai kolen a tu lala pa. Kupm lanakepm kolpa la kupm ake mpa lkepm kalkuten eng kuina ur a kupm la kipm kutnun pa.
REV 2:25 Pake kweiur wris ur a kupm lanakepm la kipm kutnun pa pati kil: kweikwei wrongkwail a kipm awi pa mpa kipm rkul tongtong iye itni kolpa iye kai ngko wang a kupm yaper nar.
REV 2:26 Kol melnum ur kil itni titnongket tulpulng tu wrongmanto, a kitila nikgwalpm akupmen pa kai ngko wang umpuwen pa pati, ikga kupm lkel tamtimpal a itni melnum tukgunakg eng ikgalen tu wrong kin a kipman a rka yela anong kanokg ti.
REV 2:27 Atom ikga kil iye yotuk kalnten pa itni ikglenten numpokgen titnongket atom rum tu pa waiketnketn kolen melnum a arum kuntuk mang pa.
REV 2:28 Tamtimpal a ikga kupm lkel pa kolen tamtimpal a pikekg kupm awi a Yan alkopm pa atom kupm ikgalen wrong kin a kipman ti. A wa ikga kupm lkel nangkom wail a rpma ak kong miningket pa eng ik plan la kil wa awi titnongket kolpa.
REV 2:29 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail yela pa.'”
REV 3:1 Melnum pa wa lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Sartis pa. Mpa kitn nirantel kolkil, 'Kupm yan a ikgalen maur wampwomis wampwompwekg a Maur Wailen pa nampokgen kumeim wampwomis wampwompwekg pa, kupm lanakeitn yangkipm kil: Kupm ariwe atn a rpma a kwap akitnen ti plalng. Tu wa akor laweitn kolkil la, kitn ukipma kupm itna titnongket pake, kalpis, maur wor a kitn am amo ise.
REV 3:2 Kitn wrekg o, ikwap ik titnongketel maur wor waiketn a rpma pa eng ake mpa imo plalng. Eng ntei, ake kupm ari nikgwalpm wrongkwail ur akitnen pa katnun kaino irir nikgwalpm a Maur Wailen Yan akupmen pa.
REV 3:3 Kolpa ti kitn yaper kai ikwonilmpen yangkipm a Maur Wailen a pikekg kitn atning alupmen ep pa, atom kitn rkul yangkipm pa iye rpmi pa, kitn mpa la rein a kitn yaper kul! Kol kitn okg ikwekgel rmpi pa, kupm ikga nar kolen melnum ikgwampet ti kitn ikgake riwe wang a i a kupm narnteitn pa.
REV 3:4 Pake wrong kin a kipman tiur akitnen a rpma Sartis pa, tu pa ake ak kimpilpel apm atuwen pa. Tu plan kol a nol nikgwalpm atuwen pa rukis wor kolpa atom tu ikga ntiwe nowe apm tangkoren pa erkwon nti kupm ti itn.
REV 3:5 Kol melnum ur kil itni titnongket tulpulng tu wrongmanto pa kol tu pa pati, ikga kupm nowewel apm tangkoren pa, atom ake antiwe mpa kupm ungkwan nang akilen a ela wrkapm a nira nang a tu melnum elawe a ikga uwi yaprekg watin a antokg tu rpma yongkyong pa. Ikg a kupm laron nang akilen ti itni wulmpa a Yan akupmen ti, a wa itni wulmpa a tu maur akwapel akilen pa yat.
REV 3:6 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail yela pa.'”
REV 3:7 Melnum pa wa lanakopm kolpa la, “Mpa kitn nira yangkipm kil ukwa iye kaino uk maur akwapel a ikgalen tu melnum a ukipma kupm mapming a takwem rka kaino anong Pilatelpia pa. Mpa kitn nirantel kolkil, 'Kupm melnum klalen wakget a Maur Wailen anel kla ak amprinsopm a kupm melnum a alupm nikgwalpm aklale wrisen. Kupm yan a wamparpme ampei sil wanteng palk a ak tilel wanyun a melnum tukgunakg Tepit. Kupm alkupm yiprokgen a kukwa wanyun pa, ake antiwe mpa melnum ur manet ir. A kupm alkupm yiprokgen a ar wanyun pa, ake antiwe mpa wa melnum manet ur kukwa, kupm lanakeitn yangkipm kil:
REV 3:8 Kupm ariwe atn a rpma a kwap akitnen ti plalng. Ti kitn ri, wanyun am kupm kukwanteitn elng okore itna pake. Akentiwe mpa melnum ur kil ir wanyun pa, kalpis. Kupm ariwe la kitn ake antiwe titnongket watipmen pake kitn arkul yangkipm akupmen pa itna, atom kitn ake wa lam nang akupmen pa.
REV 3:9 Kitn itning, tu wrong kin a kipman mapming a kapor kilko alein Satan a tu la tu alntu ti la tu Suta a Maur Wailen takweiyen eng alkilen, pake tu ake Suta aklale pa. Palpa tu kansil. Ikga kupm ntokg tu kul kipor kilko ileinseitn, atom ikga tu riwe la kupm plan ipma wor wasrongenteitn.
REV 3:10 Kitn itna titnongket a arki kalkuten wrongkwail a palngteitn pa katnun yangkipm a pikekg kupm lanakeitn pa. Kolpa ti ikga kupm ikglenteitn eng kalkuten wrongkwail a ikga palng eng ik ri tu wrong kin a kipman a rka kanokg ti.
REV 3:11 Wreren eng kupm a kinar pake. Ti kitn rkul titnongket kuina ur kol a kitn aye itna pa, eng ake mpa melnum ur ai wa uwi tamtimpal a kupm aknamputeitn erpma pa.
REV 3:12 Kol melnum ur kil itni titnongket tulpulng tu wrongmanto pa pati, ikga kupm ukulawel kolen ong kimpowen pa ikitne yalming a Maur Wailen Yan akupmen, a ake antiwe ikga kil utnuurng yalming pa wa yaper or en pa, kolpa kalpis wrisen. Ikga kupm nira nang a Maur Wailen Yan akupmen pa eli kil pa, a wa nira nang a anong wail a Maur Wailen Yan akupmen pa eli kil pa, pa anong weten Serusalem. Pa anong a ikga i kitnong pa kinar. A ikga wa kupm nira nang weten akupmen ti wa eli kil pa.
REV 3:13 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum a ukipma kupm mapming wrongkwail yela pa.'”
REV 3:14 Melnum pa wa lanakopm kolpa la, “Mpa kitn nira yangkipm kil ukwa iye kai uk maur akwapel a tu melnum a ukipma kupm mapming a takwem rka kai anong Laotisia pa. Mpa kitn nirantel kolkil, 'Kupm melnum a ak titnongketel yangkipm a Maur Wailen yapon pa la aklale wrisen, a kupm melnum a atning ari nikgwalpm a kwap a Yan ti ak pa atom kupm laron katila ute ariworwor aklale kolti. Wa am kupm ti atom pikekg Maur Wailen kil antokg kitnong a kanokg a kweikwei wrongkwail tike, kupm melnum kolpake, kupm lanakeitn yangkipm kil:
REV 3:15 Kupm ariwe atn a rpma a kwap akitnen ti plalng. Kupm ariwe la kitn ake kupuk a kitn ake wakget. Pake kupm wasrongen la kitn la kupuk pipa, kitn itni kupuk pa lanen kai o, a kitn la itni wakget pa, kitn itni wakget pa lanen kai o!
REV 3:16 Ari kalpis, kitn kupuk wleket. Ake kitn wakget paipm a ake kitn kupuk paipm pa. Kolpa atom kupm la ngkwawenteitn or wli ok akupmen ti.
REV 3:17 Kitn la kolpa la, “Kupm ti ake rpma tukwok eng kweiur, kupm rpma wor antiwe kweikwei wrongkwail.” Pake kitn alkitn ti ake kitn ariwe la kitn rpma paipm wrisen: kitn rpma tukwok, a wulmpa tilmpisen a rpma numpalpen, rka ari arein angkon won.
REV 3:18 Kolpa ti kupm la lkeitn nikgwalpm kil la, kitn rmpen wes muinmainet wor akupmen ti, am pikekg wakg al ungkwan ipik ipik pa kai takwlelkgen ise atom wes malungen muinmainet wor kolti rmpa om. Kolpa ti kupm la kitn rmpen wes malungen muinmainet akupmen ti eng mpa kitn rpmi ntiwe. A wa kupm la kitn rmpen apm tangkoren eng nowe ik ipaarng num alkitn ti, eng ampake tu riweitn la kitn itna numpalpen pa atom kitn numpaipm pa. A wa kupm la kitn kipor wakrepm muk pa ngko wulmpa alkitn pa eng mpa kitn ik ri kweikwei pa.
REV 3:19 Melnum ur a kupm wasrongen pa, kupm mpa iklewel la lokel a niki kurkurngkel. Kolpa ti kitn la rein a uk yirokg nikgwalpm wrongkwail a kitn antokg pa, a kitn nikgwalpm rkekgen eng rpmi ute wor kolti.
REV 3:20 Kipm itning! Kupm wampur kromeng kalkwon itna wanyun itna pa. Kol melnum ur kil itning kromeng a kupm wampur itna wanyun pa atom kil kukwa wanyun pa pati, mpa kupm kaworntel, mentekg rpmi il okipma pa.
REV 3:21 Kol melnum ur a kil itni titnongket lok ngkli tu wrongmanto pa pati, ikga kupm uwiyel ntiwopm rpmi wrik tipmakg a kupm awi nang wailen arpme arpme pa, kolen pikekg kupm itna titnongket alok angkli tu wrongmanto pa, atom kupm anti Yan alkupm rpma wrik tipmakg a kil awi nang wailen arpme arpme pa.
REV 3:22 Kolpa ti kitn mla ur a nungkulkg atnewe pa, mpa kitn itning yangkipm kil a Maur Wor laron naki kipm melnum mapming wrongkwail a ukipma kupm pa.'”
REV 4:1 Kupm ari kweikwei pa plalng, wa kupm wa ariri: yek ei, kipm pa! Wanyun kaino kitnong pa okore itna. Atom ok a akwewopm ep pa wa akwewopm yikakatnen kolen nol a tiplam pa la, “Kitn kulno kwa kil ri, eng mpa kupm planteitn kuina ur a Maur Wailen la ikga palng kutnukg pa!”
REV 4:2 Maur Wor kil palng pinterngen akwap titnongket kul kupm ti atom kupm ari kaino kitnong pa ari, wai! Kupm ari wrik tipmakg a melnum a awi nang wailen arpme arpme pa ari am melnum arpme rpma ise.
REV 4:3 Melnum a rpma wrik tipmakg pa krungkrakget ariwor kolen wes saspa a wa kolen wes watet klalen konilien. Ul kinipm wris ur wa kapringen wrik a melnum awi nang wailen arpme arpme pa. Kupm ari ul kinipm mrap pa alen kolen wes emeral.
REV 4:4 Wrik tipmakg kamel wris tuwek wikgwikg a awi nang wailen arpme arpme pa, rpma kapringen wrik tipmakg a melnum wailen pa arpme arpme pa. Atom tu melnum wailen wailen kamel wris tuwek wikgwikg pa rpma, melnum wris aknirake wrik tipmakg kamel wris tuwek wikgwikg pa. Tu melnum wailen wailen pa tu nowe apm tangkoren watinet ak alkil, a wa arpme wanukgmis a melnum a awi nang wailen a ak wes malungen muinmainet antokg pa.
REV 4:5 Itna wrik tipmakg a awi nang wailen arpme arpme pa kupm ari milmal pa plaing kolpa kai pa, kupm atning milpming wail kunturng praun itna kai wrik tipmakg a awi nang wailen arpme arpme pa. Wakg yilpo tareing wampwomis wampwompwekg a naruk itna won a wrik tipmakg pa pati, ak la Maur Wor wampwomis wampwompwekg a Maur Wailen.
REV 4:6 Itna won a wrik tipmakg a awi nang wailen arpme arpme pa, kwei ur kol u wail ur a ari kol u wri a wirwir klalklal kol mrangku pa rka. Wa kweikwei malepmen wikgwikg pa itna won yirokgen a itna kapringen kuin a wrik tipmakg a melnum a awi nang wailen arpme arpme pa. Kweikwei malepmen wikgwikg pa wulmpa watipmen lape itna won yirokgen.
REV 4:7 Kwei ur malepmen wris a itna ep pa pati, ari kolen nimpa tilpmingen wail a itna ep a wlikgok wrongkwail. A ur a kai arken pa pati, ari kolen manto nongko nepm watin. A wa ur pa pati, ari kolen ikgokg a melnum. A kwei ur malepmen ur a amprin aimprek pa pati, ari kolen kmong wail a pelng ela or kaino kwa pa.
REV 4:8 Kweikwei malepmen wikgwikg pa wris wris atuwen pa iplepm wampwomis wampwompwris atnewe. Wulmpa pa lape yela itna tatu kawor num wunen ai wa itna tatu or num enen ti plalng. Miningkranen itna kolti ake tu elngen a lala, “Klalen wakget, klalen wakget, klalen wakget! Kil Maur Wailen, Wailen a antiwe titnongket wail manten. Pikekg rpma ep ak ai, a wa rpma ak wang ti, a wa ikga rpmi atom wa yaper kinar.”
REV 4:9 Akangklei wang kweikwei malepmen wikgwikg pa laron melnum a rpma yongkyong rpma wrik tipmakg a awi nang wailen arpme arpme pa la, kil melnum klalen a antiwe nang wailen atom tunteng ngkat nang akilen alkel wor pipa,
REV 4:10 tu melnum wailen wailen kamel wris tuwek wikgwikg pa, tu wa elngtangko kapor kilko alein rmpa won a melnum a rpma wrik tipmakg a melnum a awi nang wailen arpme arpme pa. Tu aner wanukgmis a melnum a awi nang wailen arpme arpme ti angkli elng kai ermpa wreren won wulmpa a wrik tipmakg a melnum a awi nang wailen arpme arpme pa. A tu wa kapor kilko alein kil melnum a ikga rpmi yongkyong or pa kai, atom tu la kolkil la,
REV 4:11 “Wailen, kitn Maur Wailen amenen! Kitn pikekg antokg kitnong a kanokg a kweikwei wrongkwail. Pikekg kitn akwonalmpen ep ak ai atom kitn antokg kweikwei wrongkwail ti palng katila nikgwalpm wasrongen alkitnen. Kolpa ti kitn wris ata kolti klalen, a antiwe nang wailen, a antiwe titnongket wail manten, kolpa atom men ngkat nang akitnen pa aye kaino kwa.”
REV 5:1 Wa kupm ari melnum a rpma wrik tipmakg a awi nang wailen arpme arpme pa, kil aye wrkapm ur a wale pa aye rpma wam wi akilen pa. Wrkapm pa ak kla wampwomis wampwompwekg alkil pa ak amprin kolen pelp wakum pa ak karponte tongtong. Krakgkrakg a ela wrkapm pa tu nira ela kawor wunen a nira ela or enen.
REV 5:2 Atom kupm ari maur akwapel titnongket wris ur pa kil la yikakatnen ak ok wail asen la, “Melnum mla a i klalen ute wor antiwe mpa kil tikerng pelp wakum a kla a pikekg ak karponte ak amprin wrkapm kil?”
REV 5:3 Ari kalpis, akentiwe melnum wris ur a rpma kaino kitnong ai, aki rpma kanokg ti, aki rpma wrik om a tu melnum a amo amo kai arke arke pa kil antiwe mpa ungkwan kla pa tukwlelkgen wrkapm pa atom kil mpreingen ri.
REV 5:4 Kupm akg akg paipm itna atnen tu ake ari melnum ute wor ur antiwe mpa kil ungkwan kla pa tukwlelkgen wrkapm pa mpreingen ri.
REV 5:5 Pake wris ur a tu melnum wailen wailen pa lanakopm la, “Ampur kitn akg, kitn ri! Nimpa tilpmingen wail a itna ep a wlikgok wrongkwail a pikekg palng a om a Suta pa, kil yo ilkg a anip no itna klung yapoko a melnum tukgunakg Tepit pa, kil pikekg alok angkli wrongmanto pa ise. Atom ti kil antiwe mpa ungkwan kla tukwlelkgen wrkapm pa atom mpreingen ri pa.”
REV 5:6 Maur akwapel pa lanakopm kolpa atom kupm taperkg kolti, kupm ari Manto Walkg Malkgu War wris pa itna. Pake ari kolen am pikekg tu almpel amo ise. Kil itna kuin a wrik tipmakg a melnum tukgunakg kil arpme pa. A kweikwei wikgwikg a rpma malepmen pa, a tu melnum wailen wailen pa rpma kapringentel. Manto Walkg Malkgu War pa yoyuk wampwomis wampwompwekg atnewe, a wulmpa wampwomis wampwompwekg atnewe, pa Maur Wor wampwomis wampwompwekg a Maur Wailen a pikekg Maur Wailen kil ukwa kai yela ngkempwekg a kanokg ti.
REV 5:7 Atom Manto Walkg Malkgu War pa kai awi wrkapm kai wam wi a melnum a rpma wrik a melnum a awi nang wailen arpme arpme pa.
REV 5:8 Kil awi wrkapm pa atom kweikwei malepmen wikgwikg pa, a wa tu melnum wailen wailen kamel wris tuwek wikgwikg pa tu kapor kilko alein elngtangko wontaipur rmpa won a Manto Walkg Malkgu War pa. Tu melnum wris wris pa tu aye yotimpal a ak antokg nangnang, a tu aye kuntuk wil a alupme kweikwei yaprekget yaprekget a lap eng aris wor pa alupm kinar kuntuk pa pik aknirake tu pa. Kweikwei yaprekget yaprekget a lap eng aris wor pa akla oklala a tu wrong kin a kipman a Maur Wailen a oklala naki naki Maur Wailen.
REV 5:9 Atom tu ak nangnang weten pa la kol kil la, “Kitn pa pikekg tu almpeitn amo, a wa walmpopm akitnen pa ungkwan akarmpen tu wrong kin a kipman wailet pa uk Maur Wailen. Ei, pa kitn akarmpen wrong kin kipman a om ompen, a ak ok manman, a anong kanokg wrongkwail, a numpalk manman. Ti kitn wris ata pa ute wor wrisen antiwe mpa uwi wrkapm pa atom ungkwan kla a ak amprin wrkapm pa.
REV 5:10 Kitn antokg tu wrong kin kipman wailet pa palng melnum ipma krakgen a Maur Wailen a Maur Wailen itna wailen ikgalenten. Atom tu ikga wa itni melnum wailen ikglen tu wrong kin kipman a kanokg pa.”
REV 5:11 Tu ak nangnang pa plalng pipa, kupm ari tu maur akwapel wailet paipm wrisen ai, wrong a tu pa kamel kamel, ake antiwe mpa ngkleikg. Tu itna kapringen wrik a melnum tukgunakg a awi nang wailen arpme arpme pa, a kweikwei malepmen wikgwikg pa, a wa tu melnum wailen wailen pa. A kupm atning ok a tu maur akwapel pa,
REV 5:12 tu atopen ak nangnang ak ok wail ak la, “Manto Walkg Malkgu War a pikekg tu alm amo ari kil wa wrekg pa, kil alkil wris ata pa awi tam timpal, kil rpma antiwe kweikwei wrongkwail wor wor, kil alupm nikgwalpm ariwe watin wor wor, kil antiwe titnongket wail, kil awi nang wailen, kil awi klalen, kolpa atom mentepm mpa ngkit nang akilen.”
REV 5:13 Wa kupm atning kweikwei wrongkwail a itna kaino kitnong ai, a wa itna kanokg a ti, a wa itna kinar kanokg wunen ai, a wa itna kai unokg pa, kweikwei wrongkwail a Maur Wailen antokg a itna yela kitnong a kanokg ti, tu ak nangnang ak la kolkil la, “Melnum pa kil rpma wrik tipmakg a melnum a awi nang wailen arpme arpme pa, a wa Manto Walkg Malkgu War ti, tuwekg alntuwekg pa kolti antiwe nang wailen, a klalen, a titnongket wail, kolpa ti mentepm am akangklei ngkat nang a tuwekg pa kolpa kai pake.”
REV 5:14 Tu ak nangnang pa plalng pa, kweikwei malepmen wikgwikg pa tunteng la kolkil la, “Pa aklale!” Atom tu melnum wailen wailen pa tu elngtangko kapor kilko alein tuwekg pa.
REV 6:1 Kupm ari kol Manto Walkg Malkgu War pa kil takerng kla pelp wakum ur a ak karponte wrkapm a wale pa. Pipa kupm atning wris ur a kweikwei malepmen wikgwikg pa oklala, atom atning kolen milmal a praun pa, pa kil akwe yikakatnen kolpa la, “Kitn kul o!”
REV 6:2 Wa kupm ikg kai ari, wai! Kupm ari nimpa tangkoren nepm watin pa kul palng. Melnum a arpme rpma pa kil aye yikal angkei. Tu alkel wanukgmis ur a plan kolen la kil pa melnum a alok angkli wrongmanto. Atom kil kai kolen kil melnum a alok angkli wrongmanto, a wa kil ikga wa rapon kolpa wa lok ngkli wrongmanto tiur ai.
REV 6:3 Manto Walkg Malkgu War pa takerng kla pelp wakum wris ur a ak karponte amprin wrkapm pa plalng ise, wa kil wa takerng ur pa pipa, kupm atning kweikwei malepmen a kai arken a wet la ep pa wa akwe la, “Kitn kul o!”
REV 6:4 Atom wa nimpa nepm watin ur a kul palng itna arken pa pati, watet yipayet. Tu uk titnongket melnum a rpma nimpa nepm watin watet yipayet pa, pa titnongket a ak antokg wang wor a tu wrong kin a kipman a rpma meen wor a kanokg ti kai plalng om. Atom ikga tu iro wrong atom ikle or tita, ilm tita, ntokg paipmel tita. Pa tu alkel sakal wail ur a lepet womwompen a ak ak kwap pa.
REV 6:5 Manto Walkg Malkgu War pa kil takerng kla pelp wakum wekg a ak karponte wrkapm pa plalng ise, wa kil wa takerng ur pa pipa, wa kupm atning kweikwei malepmen ur a kai arken wekg ai pa wa kil akwe kolkil la, “Kitn kul o!” Atom wa kupm ikg kai ari, wai! Kupm ari nimpa nepm watin waipmun ur pa kul palng. Melnum a kil arpme pa kil aye kweikwei a ak ari kalkuten a okipma kweikwei pa wampalekge aye itna, eng mpa tu riwe la mpa tu ik marpm aripm ik rmpen kweikwei pa.
REV 6:6 Atom kupm atning ok ur a akwe itna kuin a kweikwei malepmen wikgwikg pa la, “Melnum ur ikga uwi marpm a tu armpentel kwap a kil ak ak wang wris pa iye kai ik rmpen kweikwei pa, marpm pa ikga ntiwe ik uwi wit ok pa tampi wekg, a wa ik uwi nok mringen pa tampi wampwomis wampwompwris kolti. Pake ampur kitn ipaar nep pa tukgun kakir kimeket, kolpa ikga nep pa nare atom ikgake ngko, ti kitn yipon nangkin elngitni pen.”
REV 6:7 Manto Walkg Malkgu War pa kil takerng kla pelp wakum wraur a ak karponte amprin wrkapm pa plalng ise, wa kil wa takerng ur pa pipa, kupm atning ok ur a kweikwei malepmen a kai arken wraur pa akwe la, “Kitn kul o!”
REV 6:8 Wa kupm ikg kai ari, wai! Kupm ari nimpa nepm watin pungkis ur pa kul palng. Melnum a arpme pa nang akilen pa Amo. Wa melnum ur nang akilen pa Wrik Om a tu melnum a amo amo kai arpme pa wa kul katnuntel. Tu uk titnongket tuwekg pa, eng ikga ikglen kanokg yangkorkgen (1/4) pa ik wasrongen a tuwekg pa, atom tuwekg la ilm tu wrong kin a kipman wris a wris a pa a pa imo. Tiur ikga tuwekg ilmpen ik sakal a lepet womwompen, tiur ikga imo itnen numpet wail wail, tiur ikga tuwekg tilp wlikgok tilpmingen a kanokg ti ilmpen imo, a tiur ikga wang nikg palngten atom tu imo eng nikg, atom tu yangkorkgen (1/4) pa ikga imo, a tu yaurngen (3/4) pa ikga rki.
REV 6:9 Manto Walkg Malkgu War pa kil takerng kla pelp wakum wikgwikg a ak karponte amprin wrkapm pa plalng ise, wa kil wa takerng ur pa pipa, kupm ari maur a tu melnum a pikekg tu almpen a oren amo kaingkai pa, tu itna kaino tipmakg watneikgen a alwor uk Maur Wailen pa. Pa tu amo atnen a pikekg tu ukipma Maur Wailen itna titnongket laron yangkipm akilen pa la, pa aklale wrisen.
REV 6:10 Tu pa kirkar akwe yikakatnen kol kil la, “Kitn pa Wailen a antiwe titnongket, kitn pa melnum klalen wakget a kitn yiprokgen a la yangkipm aklale kolti! Wang a i ikga kitn ntokg yangkipm nimpokgen tu wrong kin a kipman a kanokg ti? Men rpma nungkwangen a ti. Wang a i ikga kitn ikilmpe walmpopm amenen a pikekg tu oro amo pa?”
REV 6:11 Atom tu uk apm tangkoren watin pa aknirake tu maur a tu melnum pikekg almpen amo kaingkai pa, atom lanaken la, “Kipm rki uwi yapm waiketn pen! A tu wrongmanto ikga ilm tu melnum alkipm a kipm ukipma Sisas a pikekg kipm akwap wris pa pen, kolen a pikekg tu alm kipm ti amo pa. Maur Wailen kil takwei tu wrong kin a kipman aripm ikga tu ilm imo pa. Tu wrongmanto ilm tu pa plalng pipa, Maur Wailen ikga kil ikilmpe walmpopm akipmen pa.”
REV 6:12 Manto Walkg Malkgu War pa kil takerng kla pelp wakum wampwomis a ak karponte wrkapm pa takuleikgen plalng ise, wa kil wa takerng ur pa pipa, yelm wail pa no itna kanokg ti, atom takgni pa palng kongket kolen apm nungkwor. A kainil pa palng watet kolen walmpopm arke arke.
REV 6:13 Kumeim pa narku angkaino kitnong pa kulnar kanokg ti kolen wurkgangkok a wripm wail el ak wuan atom rurus elng kul nar pa.
REV 6:14 Kitnong ti rakol wale kai atn kol ur pa kol wrkapm a tu wale pa, a tipmining, a anong kanokg wusok a ela unokg kuin pa arukge kai takwleikg wrik alkil pa.
REV 6:15 Tu melnum tukgunakg a itna ep ikgalen wrong kin kipman a kweikwei wrongkwail a kanokg ti, tu melnum a awi nang wailen, a tu melnum tukgunakg a tu a almpwrong, a tu melnum a rpma antiwe, a tu melnum a antiwe titnongket, a tu melnum a aken kwap kalpmlel orngwatneikgen mring alntu, a tu a rka ak wasrongen alntu. Tu pa kimeket anel ngkark kai am tatu tipmining yiprokg, wes male, a wrik paipm paipm ai.
REV 6:16 Atom tu akwe wes wail wail a tipmining malengke pa la, “Kipm tipor nar ik auro eng men ake antiwe itna wulmpa ikgokg a melnum tukgunakg a rpma kaino wrik tipmakg a melnum a awi nang wailen arpme arpme pa! A wa ik auro eng ipma wakget a Manto Walkg Malkgu War pa!
REV 6:17 Wang wail a ipma wakget a tuwekg pa am kul itna tike. Ti mla antiwe mpa itni titnongket tulpulng ipma wakget a tuwekg pa? Kalpis.”
REV 7:1 Kupm ari kweikwei pa plalng, wa kupm wa ari maur akwapel wikgwikg a Maur Wailen pa tunteng itna ak awiye tungtangkem wikgwikg a kanokg ti, alok angkeng wripm pa eng ake mpa wripm pa el ilmpen kweikwei itni kanokg ti, a el kai unokg ai, a yo ur pa.
REV 7:2 A wa kupm ari maur akwapel ur pa kil itna wrik a takgni no pa, atom kil no. Kil aye kla a Maur Wailen a rpma yongkyong pa aye itna wam pa. Atom kil akwe yikakatnen naki tunteng maur akwapel wikgwikg a Maur Wailen pikekg kil alken wor a alken titnongket, la tunteng ntokg paipm kanokg a unokg ti.
REV 7:3 Kil angkengken kolkil la, “Ampur kipmteng antokg paipm yo a kanokg a unokg pa pinterngen! Itni nangkin eng men inel kla ti elngtitni lngkep ik mprin tu melnum akwapel a Maur Wailen amentepmen pa pen!”
REV 7:4 Tu wrong om ompen a Isrel a tu ak kla a Maur Wailen pa ak amprinsen pa, kupm atning a tu la pa tu wailet paipm ai kamel kamel (144,000).
REV 7:5 Tu om kil kil pa am Maur Wailen ak kla pa akamprinsen eng alkilen: tu om a Suta pa kamel kamel (12,000). Tu om a Rupen pa kamel kamel (12,000). Tu om a Kat pa kamel kamel (12,000).
REV 7:6 Tu om a Aser pa kamel kamel (12,000). Tu om a Naptali pa kamel kamel (12,000). Tu om a Manase pa kamel kamel (12,000).
REV 7:7 Tu om a Simeon pa kamel kamel (12,000). Tu om a Lipai pa kamel kamel (12,000). Tu om a Isakar pa kamel kamel (12,000).
REV 7:8 Tu om a Sepulun pa kamel kamel (12,000). Tu om a Sosep pa kamel kamel (12,000). Tu om a Pensamin pa kamel kamel (12,000). Am tu om kil kil pa tu ak kla a Maur Wailen pa ak amprinsen pake.
REV 7:9 Kupm ari pa kai plalng, wa kupm wa ariri, yek ei! Tu wrong kin a kipman wailet paipm wrisen, ake antiwe mpa ngkleikg. Wrong kin a kipman a numpalk manman, a om ompen, a anong kanokg yela, a ok ak manman, tu itna won a wrik tipmakg a melnum tukgunakg a awi nang wailen arpme arpme pa, a Manto Walkg Malkgu War pa. Tu nowe apm tangkoren watin pa kimeket, atom anel aye paimplong ipm pa nar num kimeket ak atopen itna.
REV 7:10 Tu ak atopen la ak ok wail la, “Maur Wailen amentepmen ti kil rpma wrik alkil a awi nang wailen arpme arpme pa, kil pa nampokgen Manto Walkg Malkgu War pa tuwekg pa yiprokgen a akawi mentepm ti.”
REV 7:11 Maur akwapel wrongkwail a Maur Wailen pa tu itna kapringen wrik tipmakg alkilen a awi nang wailen arpme arpme pa, a wa kapringen tu melnum wailen wailen a wa kweikwei malepmen wikgwikg pa. Tu kapor kilko alein elng angko won taipur rmpa won a wrik tipmakg pa kolti a ngkat nang a Maur Wailen la kolkil la,
REV 7:12 ”Aklale wrisen! Maur Wailen amentepmen a ikga itni yongkyong pa wris ata kolti pa antiwe klalen, a nikgwalpm ariwe wor wor, a titnongket, a kalnten, kolpa ti mentepm mpa ukwor a ngkit nang akilen! Aklale.”
REV 7:13 Atom wris ur a tu melnum wailen wailen pa asentopm la, “Tu melnum a nowe apm tangkoren watinet pa tu mla pa? Aki wa tu pa angkai a i wli?”
REV 7:14 Atom wa kupm akalmpe yangkipm akilen pa kolkil la, “Melnum wailen! Kupm ake ariwe pa, kitn alkitn pa ariwe pake.” Atom wa kil akalmpe la, “Tu wrong kin a kipman ari pa, tu pikekg awi wleket wakget wail manten a palng ak wang umpuwen ti pa, ari tu takwlelkgen wleket wakget a awiyen pa kul no. Pikekg tu klak apm watin atuwen pa ak walmpopm a Manto Walkg Malkgu War pa, atom antokg apm a tu pa palng tangkoren wor.
REV 7:15 Kolpa atom ari tu itna won a wrik tipmakg a Maur Wailen awi nang wailen arpme arpme pa. Tu ngkat nang akilen pa itna yalming akilen ti miningkranen kolpa itna pake. Atom Maur Wailen a rpma wrik tipmakg alkilen pa kil arolekg kimplik alkil pa ak auren.
REV 7:16 Tu pa ikgake nikgilmpen aki uwaketen wa nti ur pa. A ikgake takgni ilen aki kwei ur a wakget waiwai pa rawen aki lampulen pa.
REV 7:17 Eng ntei, Manto Walkg Malkgu War a rpma kuin a wrik tipmakg a awi nang wailen arpme arpme pa, kil pa melnum a ikga ikglenten. Ikga kil iyewen kai il u wriwen wor ur a kanokg no a rka yongkyong pa atom ikga tu rki wor yongkyong. Atom Maur Wailen ikga kil lo ikgakg atuwen pa atom tu ikgake akg nti ur.”
REV 8:1 Manto Walkg Malkgu War pa kil takerng kla pelp wakum wampwomis wampwompwris a ak karponte wrkapm pa plalng ise, wa kil wa takerng ur pa pipa, elng tatar lilalng kolti, ake kwei ur antokg milpming kilko ur itna anong wor pa. Kolpa kai itna wang tukwok kolti kolen a lan u itna naimpur pa.
REV 8:2 Elng tatar pa, kupm ari maur akwapel wampwomis wampwompwekg pa itna wulmpa a Maur Wailen pa. Tu awi nol wampwomis wampwompwekg a tu alken pa aye itna.
REV 8:3 Atom maur akwapel ur manet ai kul itna wreren tipmakg a lap kweikwei yaprekget wor eng al wor uk Maur Wailen pa. Kil aye wes muinmainet kaingkuren a alupme alupme kweikwei yaprekget wor a lap eng aris wor pa aye itna. Atom tu alung kweikwei yaprekget wor wailet pa elng kinar, eng mpa kil ikoren nimpokgen oklala a tu wrong kin a kipman a Maur Wailen naki naki Maur Wailen pa, lap itni tipmakg a tu alm ak wes muinmainet pa eng mpa yaprekg pa pus no kaino eng Maur Wailen iris. Tipmakg a al wor uk Maur Wailen pa itna won a wrik tipmakg alkilen a awi nang wailen arpme arpme pa.
REV 8:4 Maur akwapel pa alung kweikwei yaprekget a lap atom aris wor pa, nampokgen oklala a tu wrong kin a kipman naki naki Maur Wailen pa pus wrekg a wes kaingkuren muinmainet ti kaino Maur Wailen aris.
REV 8:5 Atom maur akwapel pa kil awi wakg a tipmakg pa alupm kinar wes kaingkuren a wakg wuan yaprekg a aris wor arpmewe pa, atom kil angkli elng nar kanokg ti pipa, milmal pa plaing, a milmal pa praun kunturng a yelm pa no.
REV 8:6 Atom maur akwapel wampwomis wampwompwekg pa tu aye nol wampwomis wampwompwekg pa itna numprampen eng a tiplam.
REV 8:7 Maur akwapel ur pa ep tiplam nol akilen pa atom wakg, a u lmpa kupuk kalnten kol wes pa a walmpopm pa ak oren tita alung elng nar kanokg ti. Wakg al yo a ampei wailet a pa a pa itna kanokg yangkorkgen a pa (1/3) kai plalng, a yaurngen (2/3) pa itna, pake mi pa wakg al plalng.
REV 8:8 Maur akwapel wris pa tiplam nol pa plalng ise, wa maur akwapel ur pa wa tiplam nol alkil pa pipa, tu angkli kwei ur kolen tipmining wail ur a wakg naruk al atne atne pa elng kinar unokg pa. Wa ari kolen unokg tiwel waiketn (1/3) pa palng walmpopm arke arke, a tiwel wail (2/3) pa wor rka.
REV 8:9 Kweikwei malepmen a itna unokg pa yangkorkgen pa (1/3) amo, a yaurngen pa itna; a wa wan unokgen wailet a atn a rka yela tatu unokg pa yangkorkgen pa (1/3) kai paipm, a yaurngen (2/3) pa rka.
REV 8:10 Maur akwapel wekg pa tiplam nol atuwekg pa plalng pa, wa ur pa wa tiplam pa, kumeim wail a wakg naruk pongpong atnewe kol yilpo pa narku angkaino kitnong pa elng nar, atom minip kop a u yaur yangkorkgen (1/3) pa kai paipm ise, a yaurngen pa wor rka.
REV 8:11 Nang a kumeim pa namput la Mi Kinipm, atom kinipm a kumeim pa kai ak oren u pa, atom tu al u a kinipis pa, atom tu wailet amo.
REV 8:12 Maur akwapel wraur tiplam nol atunteng pa plalng ise, wa maur akwapel ur pa wa tiplam nol akil pa pipa, tu ntra takgni kainil kumeim pa atom takgni tiwel yangkorkgen pa palng miningket. A wa kainil tiwel yangkorkgen pa wa palng miningket. A wa kitnong tiwel yangkorkgen (1/3) ur a kumeim arpme pa wa palng miningket. A ran tiwel wris ur a ran wris wris pa wa palng miningket. A wa mining tiwel wris ur a mining wris wris pa am wa kolpake.
REV 8:13 Wa kupm ikg kaino ari kmong wail pa pelng or kaino kwa pa, atom kupm atning a kil kirkar kirkar la yikakatnen kolpa la, “La woi, la woi, la woi! Arein paipm wrisen tu wrong kin a kipman a kanokg ti, kalkuten a wleket a palng ep pa kolpake, a kalkuten a wleket a ikga palng ik wang a maur akwapel wraur tiplam nol a tunteng ti pa, ikga wa paipm wrisen angen pa.”
REV 9:1 Maur akwapel wikgwikg pa tiplam nol pa plalng ise, wa maur akwapel ur pa wa tiplam nol akilen pa pipa, kupm ari kumeim ur a wuten narku angkaino kitnong pa angko elng nar rmpa kanokg ti. Atom tu alkel kweikwei a ak ar a ak kukwa wes pilmpalen wail a ak ipaarng lkimpok a lkim watin kinar tak ai a plalng kalpisen pa. Atom kumeim wris pa kolti antiwe a ak kweikwei a kil aye a ak ipaarng a ak kukwa pa ik ipaarng a ik kukwa lkimpok pa.
REV 9:2 Atom kumeim pa nukwarng wes a ak ipaarng lkimpok pa pipa, wakg wuan angkinar lkim pa kulno kaino kolen wakg wail ur ai. Wakg wuan a angkinar lkim pa kulno puurp kolen lap wring pa kaino ela ak ampri takgni atom kanokg pa kai miningket.
REV 9:3 Kweikwei waiketnketn kolen ka pa tu atnuurng wakg wuan pa wa kul or nar kai yela tatu kanokg ti. Tu alken titnongket irir kolen kirko wanin pa antiwe a uk wleket melnum.
REV 9:4 Atom tu lanaki tu ka pa kol kil la, “Ampur kipm antokg paipm al mi a yo a kweikwei aur aur a anip itna kanokg a ti pa, i ai. Kipm ntokg paipm tu melnum a ake Maur Wailen anel kla ak amprinsen pa kolti.”
REV 9:5 Tu ake alken titnongket la mpa tu ilm tu wrong kin a kipman pa imo pa, tu antiwe alken wleket itni kolen kainil wampwomis kolti. Atom ka wrongkwail pa kai yela uk wleket paipm wrisen tu wrong kin a kipman. Wleket a tu uk pa irir kolen wleket a kirko wanin alm melnum.
REV 9:6 Ikg a ik wang pa, wleket pa palng paipm wrisen. Kolpa atom tu wrong kin a kipman ikga wasrongen paipm la tu a imo, ari ya kalpisen a tu amo. Tu karken wleket pa atom tu la imo tukwlelkgen, ari akentiwe mpa tu imo ik wang pa, kalpis.
REV 9:7 Kupm ari tu ka pa ari kolen manto nepm watin a nowe lukglukg pa numprampen rka la kai ilmpwrong pa. Tu arpme kwei ur kolen wanukgmis muinmainet pa rpma tukgunakg atuwen pa. A ikgokg atuwen pa ari kolen ikgokg a melnum.
REV 9:8 A tukgunakg walk atuwen pa watinet kolen tukgunakg walk a tu kin pa, a ok telp atuwen pa watin kolen ok telp a nimpa tilpmingen wail a itna ep a wlikgok wrongkwail pa.
REV 9:9 Nol mkang atuwen pa ak kweikwei ur kalnten kolen wamung kakir pa ak aur. A iplepm atuwen pa milpming kilkowet wailet paipm ai kolen nimong a nimpa nepm watin wailet arkolng aye atn ak almpwrong pa.
REV 9:10 Tu pa wrom atnewe. Wleket atuwen a kolen kirko wanin pa am rpma kinar wrom pake. Pa antiwe titnongket a uk wleket paipm wrisen tu wrong kin a kipman. Wleket pa ikga itni kolen kainil wampwomis.
REV 9:11 Tu pa melnum tukgunakg ur alntuwen a itna ep ikgalen tu pa pati, maur paipm akwapel a lkim watin kinar tak ai a plalng kalpisen. Ok a tu Ipru namput nang a maur paipm akwapel pa la Apaton. Wa ok Krik pa tu namput la Apoliyon. Yiprokgen a nang pa pati la kolkil la, Melnum a antokg paipm kweikwei wrongkwail kai plalng angketlam.
REV 9:12 Atom kalkuten wleket a arkolng wonsesan wail wris a ep pa am kai plalng kolpake. Pake kalkuten wleket a arkolng wonsesan wail wekg ur itna eng a wa palng pake.
REV 9:13 Maur akwapel wampwomis pa tiplam nol pa plalng ise, wa maur akwapel ur pa wa tiplam nol alkil pa pipa, kupm atning ok ur a palng wli wompel wikgwikg a wrik tipmakg wes malungen muinmainet a al wor uk Maur Wailen a itna ikgokg a Maur Wailen pa.
REV 9:14 Kil lanaki maur akwapel wampwomis wampwompwris a aye nol itna pa kolpa la, “Kipm inelkgen ampei pa tukwleikgen maur akwapel wikgwikg a kipm ari a yapowen itna kai u kop Yupretis pa eng tunteng kai o!”
REV 9:15 Maur akwapel wikgwikg pa tu yaponten numprampenten elngkitna nungkwangen takgni wang, a kainil a wring a Maur Wailen la pa pipa, tu ukwawen kai ilm tu wrong kin kipman wailet pa, atom yangkorkgen pa amo, a yaurngen pa rka.
REV 9:16 Kupm atning a tu la tu melnum a arpme nimpa nepm watin a pikekg kai rapon pa pati, tu wrong wailet paipm ai kamel kamel (200 milion).
REV 9:17 Plantopm tu melnum a arpme nimpa nepm watin, a tu nimpa nepm watin pa ari kolkil: tu melnum a arpme nimpa nepm watin pa tu napo apm wamung a watet yipayet, a kongket, a pungkis kol pung pa. Tukgunakg a nimpa nepm watin pa pati ari kolen tukgunakg a nimpa tilpmingen wail a itna ep a wlikgok wrongkwail pa. A wakg a naruk, a wakg wuan, a wes salpa a wakg al pa palng or wli kai ok a tu nimpa nepm watin pa kul or kai en yela.
REV 9:18 Tu alm tu wrong kin a kipman yangkorkgen pa ak kweikwei paipm wraur kil: ak wakg, a ak wakg wuan, a ak wes salpa, a wa ak wakg a palng kulor wli kai ok a tu nimpa nepm watin pa ak alen, a yaurngen pa wor rka.
REV 9:19 Titnongket a tu nimpa nepm watin pa rpma kai ok, a rpma kinar wrom atuwen. Wrom atuwen pa ari kolen ul, pake wa tukgunakg atnewe. Tu ak wrom pa alm tu wrong kin a kipman pake.
REV 9:20 Tu wrong kin a kipman yaurngen a ake pikekg kweikwei paipm wraur pa almpen amo pa, tu ake wa la arein a wa uk yirokg kweikwei a pikekg tu antokg ak wam alntu pa. Tu kapor kilko alein maur paipm pa aye kolpa kai pake. Wa kweikwei a tu antokg ak wam alntuwen elngkitna kolen maur wailen alntuwen, pa tu antokg ak wes malungen muinmainet, wes tangkoren muinmainet, a wes watet, a wes kolti, a yo kweikwei a ake antiwe mpa ri, a itning a ngkom itn pa.
REV 9:21 Tu ake plelng ipma a uk yirokg kweikwei a tu ak kolkil: tu alm melnum amo, tu antokg tukuk, a tu antokg kweikwei titnongket paipm tiur ai kol a ak alm kin, a ak alm wlikgok a wa kweikwei tiur ai, a tu angkli arkul tita a akwap numkropis a uk numpaipm kamel, a tu ak ikgwam.
REV 10:1 Atom wa kupm ari maur akwapel titnongket ur pa angkaino anong wor a Maur Wailen pa nar. Kil nowe waipmunu pa kolen apm ur, a ul kinipm pa itna kapringen tukgunakg a kil pa. Ikgokg akilen pa ari klalen kolen takgni pa, a nepm akilen pa ari kolen ong wekg a ukula itna atom wakg al atne itna pa.
REV 10:2 Maur akwapel pa kil aye wrkapm wasek a wuten nampreingen pa aye itna wam akilen pa. A kil elng nepm wi pa itna kai unokg ai a nepm wangkokg pa itna kul kanokg ti.
REV 10:3 Kil kirkar yikakatnen paipm kolen nimpa tilpmingen wail a itna ep a wlikgok wrongkwail a prongprong yikakatnen pa. Kil kirkar yikakatnen pipa, milmal wampwomis wampwompwekg pa praun kolen ok ur a oklala.
REV 10:4 Milmal wampwomis wampwompwekg pa praun la plalng pipa, kupm numprampen la nira oklala a wet milmal pa praun la pa, ari kupm atning ok ur a akwe angkaino kitnong pa nar angkengkopm la, “Ampur kitn nira! Kitn inel kla pa ik mprin oklala pa erpmi ampen kai kitn alkitn ti kolti!”
REV 10:5 Atom maur akwapel a Maur Wailen a wuten kupm ari elng nepm wompel pa itna kai unokg ai, a wa nepm wompel pa itna kul kanokg ti pa, kil ngkat wam wi akilen pa aye kaino anong wor a Maur Wailen.
REV 10:6 A kil naren Maur Wailen a rpma yongkyong a pikekg kil antokg kitnong a kweikwei wrongkwail a itna kaino kitnong pa, a wa kil antokg kanokg a kweikwei wrongkwail a itna kanokg ti, a wa kil antokg unokg a kweikwei wrongkwail a itna kai unokg pa. Atom maur akwapel pa naren Maur Wailen pa kolpa la, “Ake antiwe ikga Maur Wailen kil iyewen wang pa iye or pa kai, kalpis.
REV 10:7 Maur akwapel wampwomis wampwompwris pa tunteng tiplam nol a tunteng pa plalng ise, wa ik wang a ikga maur akwapel wris a amprin aimprek pa wa numprampen la tiplam nol a kil pa pipa, nikgwalpm ampen a pikekg Maur Wailen akwonalmpen la ikga ik atom kil ak katila kulngkul kul pa, ikgam ik kul plalng iro yiprokg ik wang pake. Kol pikekg kil laron naki tu melnum okwripm akwapel alkilen pa.” Yangkipm a maur akwapel naren Maur Wailen pa, kai plalng kolpake.
REV 10:8 Wa ok ur a kupm atning lanakopm angkaino kitnong pa nar tilpopm antiur kolkil la, “Kitn kai o! Kitn kai ri maur akwapel a nepm wompel itna kai unokg a nepm wompel itna kai kanokg ai, atom kitn uwi wrkapm a kil nampreingen aye itna wam pa!”
REV 10:9 Kupm atning kolpa kupm kai eng maur akwapel a Maur Wailen pa, atom kupm asentel la kil lkopm wrkapm wasek a nampreingen aye itna wam pa. Atom kil lanakopm kolkil la, “Kitn uwi atom kitn il o! Mpa kinipis kinar nikg wunen pake, a kai ok akitnen ti mpa kitn il kleset wor kolen a kitn al pong u pa.”
REV 10:10 Kil la kolpa plalng pipa, kupm awi wrkapm wasek a nampreingen aye itna wam akilen pa kolti, kupm al. Atom kai ok akupmen pa kleset kolen pong u pa. Pake kupm al angklei plalng pipa, wa palng kinipis kinar ipmanikg akupmen ti.
REV 10:11 Atom ok ur wa lanakopm kolkil la, “Kitn ikga laron yangkipm a Maur Wailen a palng wli ok akitnen pa nti ur ikla kweikwei a ikga palng tu wrong kin a kipman wailet, a tu anong kanokg watipmen, a tu a ak ok manman, a tu melnum tukgunakg watipmen a ikgalen anong kanokg pa!”
REV 11:1 Tu alkopm wampeng ur a ak antin kweikwei, atom ok ur pa lanakopm la, “Kitn wrekg ntin yalming a Maur Wailen, a wa ntin tipmakg a alwor uk Maur Wailen pa! A kitn ngkleikg tu wrong kin a kipman a kawor kapor kilko alein Maur Wailen itna wan pa la aripm!
REV 11:2 Pake ampur kitn antin wrik a ak yipmingki angketen a tu yimponen kawor arke arke pa. Eng ntei, wrik pa am pikekg uk kai tu a ake Suta pake. Tu ikga rkganti ntokg paipmel anong a Maur Wailen amprin pa itni kolen kainil kamel wekg tuwek wekg (42).
REV 11:3 Kupm ikga uk titnongket melnum wekg ur akupmen pa eng tuwekg laron ik titnongketel nikgwalpm ampen akupmen a palng wli ok a tuwekg pa. Atom tuwekg nowe apm paipm ik mang yipan pa ik laron yangkipm pa itni i i, wang kamel kamel (1,260) pa kai plalng.”
REV 11:4 Melnum okwripm wekg pa pati tuwekg itna kolen yo olip wekg, a kolen tipmakg wekg a tu ak wes malungen muinmainet ak alm eng elng wakg arpme arpme a itna won a Wailen a ikgalen kanokg ti.
REV 11:5 Kol melnum ur la ntokg paipmel tuwekg pa, pa ikga wakg palng wli ok a tuwekg pa atom il tu wrongmanto a tuwekg pa kai paipm ngket lam. Kol melnum ur la ntokg paipmel tuwekg pa, pa kil ikga imo or ya pake.
REV 11:6 Tuwekg antiwe titnongket a angkeng u ti eng ampake uwei ik wang a tuwekg laron yangkipm ampen a Maur Wailen a palng wli ok a tuwekg pa. A tuwekg antiwe titnongket a antokg u wrongkwail ti palng kolen walmpopm, a wa antiwe uk numpet wail wail kol mring pain walmpopm, a antokg kweikwei paipm paipm aur aur ti palng, eng antokg tu wrong kin a kipman wailet a kanokg ti imo. Tuwekg antiwe antokg kweikwei wrongkwail pa palng ik wasrongen alntuwekgen ti.
REV 11:7 Tuwekg ikga ikwap a laron iktitnongketel yangkipm ampen a Maur Wailen pa kai plalng pipa, ikga wlikgok tilpmingen paipm ur pa utnuurng lkim watin kinar tak ai a plalng kalpisen pa kulno kwa, atom nti tuwekg ti rapon kolpa kai, atom ikga kil oren lok ngkliwen kai imo.
REV 11:8 Atom palk a tuwekg pa ikga rmpi ya wail a anong wail a mentepm akwe ak yangkipm kla pa la, Sotom aki Isip. Am anong wail a pikekg tu karkurng Wailen a tuwekg pa kai yo okgmangki pa atnewe pake.
REV 11:9 Tu melnum a numpalk a ikg ur ikg ur, a anong kanokg yela, a ak ok manman, a wrong kin a kipman a om ompen, ikga tu kaingkul ri palk a tuwekg pa ikga rmpi kolpa i i, wang wraur misen wompel. Tu won workgen la ake mpa uwen palk a tuwekg pa.
REV 11:10 Melnum okwripm wekg a Maur Wailen pa pikekg uk wleket tu wrong kin a kipman a kanokg ti kolpa atom tu ikga ri tuwekg a amo pa, tu ikga won mo mo itopen wail ntokg okipma wail il nangnang itnen, a uk kweikwei tita.
REV 11:11 Palk a tuwekg pa ikga imo rmpi i i, wang wraur misen wompel pa kai plalng pipa, Maur Wailen kil ikga kiplim yaprekg pa kawor tuwekg pa, atom tuwekg wrekg itni malepmen. Atom tu melnum a ikga riwen pa tu ikga wrekg ngkirk paipm wrisen.
REV 11:12 Wa tuwekg ikga itning ok ur a ikga ukwe yikakitnen ingkaino kitnong ai kul nar la, “Kipmekg nowo!” Atom waipmunu pa ikga ikaur tuwekg pa kolti ik uwiyen iye kai kaino kitnong ai. Pipa tu wrongmanto a tuwekg pa ikga itni ikitnenten itni.
REV 11:13 Ik wang ketn a ikga tuwekg kaino kitnong pa yelm wail pa ikga no yikakitnen, atom anong lkgung wris ur a anong wail pa ikga kai paipm. A anong lkgung wampwomis wampwompwikgwikg pa ikga itni. Atom wrong kin a kipman wailet paipm kamel kamel (7,000) pa ikga imo itnen yelm wail pa. A tu wrong kin a kipman tiur a ikga rki pa tu ikga numnantiwe warwar ngkirk paipm. Kolpa atom tu ikga ngkit nang a Maur Wailen kaino kitnong.
REV 11:14 Atom arkolng won sesan num eng kalkuten wleket wakget ur pikekg kai plalng ise, wa arkolng won sesan num eng kalkuten wleket wakget katnukg a palng ti pa am kai plalng kolpake. Pake wa kipm itning: wang wreren kalpisen eng rkolng won sesan num eng kalkuten wleket wakget ur eng a wa palng pake.
REV 11:15 Atom maur akwapel wampwomis wampwompwris pa tunteng tiplam nol a tunteng pa plalng ise, wa maur akwapel ur pa wa tiplam nol a kil pa pipa, kupm atning tu a rka kaino kitnong pa atop ak nangnang pa yikakatnen kolkil la, “Wailen, Maur Wailen amentepmen nampokgen melnum a kil takwei atom akawiyo pa, tuwekg am awi nang wailen a titnongket a itna Wailen ikgalen kitnong a kanokg a kweikwei wrongkwail ti ak wang tike, a ikga wa itni iye or pa kai.”
REV 11:16 Atom tu melnum wailen wailen kamel wris tuwek wikgwikg a rpma wrik tipmakg alntuwen a tu awi nang wailen arpme arpme pa tu rpma won a Maur Wailen pa, tu elngtangko wontaipur kapor kilko alein kil pa.
REV 11:17 Tu la kolkil la, “Wailen! Kitn Wailen a antiwe titnongket wrongkwail. Kitn a rpma ak wang ti, a wa kitn pikekg rpma ep ak ai. Kitn am awi titnongket wail a ikgalen tu wrong kin a kipman ise, kolpa ti men alkeitn wor.
REV 11:18 Tu wrong kin a kipman a yela anong kanokg ti a ake ukipma kitn pa, tu ipma wakget paipm wrisen. Pake wang a kitn plan ipma wakget akitnen ti pa am palng tike. Am wang a tu melnum a pikekg amo ep ep pa mpa tu kul ntokg yangkipm itni kitn tike. Am wang a uk kweikwei wor wor tu melnum okwripm akwapel akitnen ikilmpe kwap a pikekg tu ak pa, kol tu melnum a nang kalpisen a tu melnum a awi nang kolai kolai pa, pa tu melnum wrongkwail a ngkark la kitn pa klalen wakget atom tu rpma orngwatneikgen kitn pake. Wa am wang a antokg paipm tu melnum a pikekg antokg paipm kanokg ti.”
REV 11:19 Tu melnum wailen wailen ak nangnang pa kai plalng pa, kupm ari wanyun a yalming a Maur Wailen kaino kitnong pa kukwa okore itna, atom antiwe ikg kawor ari worel yo timpal klalen wakget a alupme yangkipm a Maur Wailen wangkir a yapo pa arpme pa rpma. Atom milmal ti plaing kintir kuntur prispras, a yelm wail ti no, a u lmpa kupuk kalnten kol wes ti angko elng nar kanokg ti.
REV 12:1 Atom kupm ari kla wail manet ur pa palng ela kaino kitnong pa: yek ei, kin wris ur pa itna atom kil nowe takgni pa kolen apm pa. A kainil pa rpma kinar nepm watneikgen akilen ti. A kil arpme wanukgmis a awi nang wailen, a kumeim wampwam yikak wekg atnewe pa rpma kaino tukgunakg akilen pa.
REV 12:2 Kin pa itna warim kakir eng a raku warim, atom warim almpel wleket paipm wrisen eng kil a raku, atom kil kirkar walong walong yikakatnen.
REV 12:3 Wa kla wail manet ur pa wa palng ela kaino kitnong ai: la woi, kipmteng, wapin paipm watet wail manten ur kolen wapin wranung pa tukgunakg wampwomis wampwompwekg atnewe. A wa yo yuk wampwam pa itna tatu tukgunakg pa. A wa wanukgmis a tu melnum a awi nang wailen arpme pa rpma aknirake kaino tukgunakg wampwomis wampwompwekg akilen pa.
REV 12:4 Wapin wrom pa ak kansimpen kumeim yangkorkgen (1/3) kaino kitnong pa angkli elngkul nar kanokg ti, a yaurngen (2/3) pa rpma. Atom wapin paipm wail pa wrekg itna waiwai itna won a kin ti, itna nungkwangen la kin pa raku warim pa elng nar eng kil a il warim pa.
REV 12:5 Kin pa kil raku warim kipman. Warim kipman pa ikga ntiwe titnongket, atom ikga itni kalnten iye yotuk kalnten ikglen tu wrong kin a kipman a kanokg ti. Kin pa kil raku warim pa plalng, atom tu arkolng warim pa takwlelkgen kolti aye kaino kitnong ai, uk Maur Wailen kaino wrik tipmakg a kil awi nang wailen arpme arpme pa.
REV 12:6 A kin man pa ngkark kai wrik mpang kakir kalpmilel ur a pikekg Maur Wailen kil numprampentel elngtitna pa, eng ikga tu ikglentel rpmi kai pa i i i, wang kamel kamel (1,260) pa kai plalng.
REV 12:7 Kin man pa ngkark wrekg kai pipa, maur akwapel Maikel a Maur Wailen pa wrekg alekgen tu maur akwapel alkil pa kai anti Satan wapin wranung paipm wail manten a alekgen tu maur akwapel alkil pa anel rapon wail paipm itna kaino kitnong ai.
REV 12:8 Wapin paipm wail manten pa nampokgen tu maur akwapel alkil pa tu ake antiwe titnongket, atom tu a Maikel pa alok angkliwen, atom tu ikgake ntiwe rpmi kaino kitnong pa.
REV 12:9 Atom tu angkliwen elng nar kanokg ti. Wapin paipm wail manten pa am la ul tingklaket wris a pikekg kansil Ip ekg Atam pake, nang a kil pa Maur Paipm aki Satan. Kil melnum a kansil alok tu wrong kin a kipman a kanokg ti kai ar angko kai antokg paipmpaipm. Kolpa atom ari tu angkliwel nampokgen tu maur akwapel alkil pa elng nar kanokg ti.
REV 12:10 Kupm atning ok a la yikakatnen angkaino kitnong ai la kolpa lala, “Maur Wailen amentepmen pikekg kil akawiyo eng alkilen pa am palng angko wunong tike. Wa kil awi titnongket a itna wailen ikgalen kweikwei wrongkwail ti am wa palng angko wunong tike. A wa melnum a pikekg kil takwei atom kil akarmpen tu wrong kin kipman pa kil awi titnongket a nang wailen pa am wa palng angko wunong tike. Maur Paipm a pikekg itna wulmpa a Maur Wailen amentepmen pa miningkranen elng wam itna itna tu a mentepm pa arkiwen la tu antokg paipmpaipm pa am tu angkliwel elng kinar kanokg ise.
REV 12:11 Tu melnum a ukipma Krais pa tu alok angkli Satan a pikekg arki arki tu pa. Tu alok angkliwel or ya wekg: ya ur pa tu ukipma la walmpopm a Manto Walkg Malkgu War pa ungkwan paipmpaipm atuwen pa ise, wa ya ur pa tu laron tu alntu ti la tu ukipma Krais pa. Tu ake ngkark eng amo pa atom la ikglen num alntu ti pa, tu angkli num alntu ti la tu ilmpen imo itn ai ai.
REV 12:12 Kolpa ti kipm kitnong ti a kipm a rka no ti pa, kipm itopen o! Pake lawoi kipm melnum a kweikwei a rka kinar kanokg a rka kai unokg pa, pa areinsepm atnen Maur Paipm am pikekg ungkwan kinarntepm kinar kanokg pake. Kil ipma wakget paipm eng kil ariwe la wang akilen am kul wreren tike.”
REV 12:13 Wapin paipm wail manten pa ariwe la, kil am tu angkliwel elng nar kanokg ti yat ise, kolpa atom kil kai antokg paipm uk kalkuten kin a pikekg raku warim kipman pa.
REV 12:14 Kin pa tu alkel iplepm wail wekg a kmong pa la kil ik pelng kai wrik kalpmilel a ake melnum ur arpme. Ikga tu ikglentel rpmi kai wrik pa i kolen wring misen wris pa kai, wa wring misen wekg wa kai, karpo wring wompel pa tukwulelkgen wapin paipm wail manten pa.
REV 12:15 Wapin paipm wail manten pa ungkwawen u a ok akilen pa kulor kolen kop a minip a el pa. Kil ungkwawen u pa elng kai tumute kin pa eng la ikilmpen kin pa iye kai.
REV 12:16 Ari kanokg pa kil angklin kin pa atom kil tikal ok pa al u a wet wapin pa ungkwawen la kol a ikilmpen kin pa.
REV 12:17 Kolpa ti wapin pa ipma wakget wrongen eng kin pa. Atom kil kai la nti tu watnom walpopm a kin pa rapon. Tu watnom walpopm pa ak la tu a arkul katnun yangkipm a Maur Wailen a wa laron tu alntu ti la tu a Sisas.
REV 12:18 Wapin paipm wail manten pa kil wrekg itna unokg ningkrapm pa.
REV 13:1 Kupm ari wlikgok tilpmingen ur pa a unokg pa wrekg kulno itna. Tukgunakg akilen pa wampwomis wampwompwekg, a yo yuk wampwam itna tatu tukgunakg akilen pa. A wanukgmis pa kolen wanukgmis a melnum tukgunakg arpme arpme pa, pa rpma aknirake yo yuk wampwam pa. A wanukgmis wris wris pa tu nira yangkipm a ak nokgel Maur Wailen pa ele ele.
REV 13:2 Wlikgok tilpmingen a kupm ari pa pati wrongen kolen wampung nimpa rim wrongen wail ur pa. Nepm akilen pa titnongket alm kamel kolen nepm a mapok wail ur ai. A ok akilen pa kalnten kolen ok a nimpa tilpmingen wail a itna ep a wlikgok wrongkwail. Wapin paipm wail manten pa wa uk titnongket a kalnten wail akilen ti kai eng wlikgok tilpmingen a wrongen pa. Kil antokg kil pa palng melnum tukgunakg a antiwe titnongket kolen kil alkil ti atom kil ikgalen tu wrong kin a kipman.
REV 13:3 Tukgunakg wris ur a wlikgok tilpmingen a wrongen pa ari kolen am pikekg tu alm amo ise. Ari ake kil amo, i tingklaket a pikekg tu almpel pa am la ise, ti kil am wa palng wor ise. Atom wrongkwail kin a kipman a kanokg ti wa wrekg paipm eng ari pa kolpa atom tu wa katnuntel.
REV 13:4 Tu kapor kilko alein wapin paipm wail manten pa atnen a kil uk titnongket a nang wailen wlikgok tilpmingen a wrongen pa. Atom wa tu kapor kilko alein wlikgok tilpmingen pa atopentel angklo ok la, “Mla kolen wlikgok tilpmingen kil? A mla antiwe ikga or lok ngkli wlikgok tilpmingen kil? Kalpis.”
REV 13:5 Maur Wailen kil uk ya wlikgok tilpmingen a wrongen pa la kil antiwe la yikakatnen wam rka nol ngkat nang a kil alkil ti wa ak nokgel Maur Wailen. Titnongket a nang wailen kil awi la ik ik kwap kolpa ikga kil ik kolpa itni i i, kainil kamel wekg tuwek wekg (42).
REV 13:6 Wlikgok tilpmingen pa wa tikal ok pa la paipmel Maur Wailen a la paipmel nang akilen pa, a wa la paipmel anong wor a kil arpme, a wa la paipmel tu a rka kaino anong wor pa.
REV 13:7 Maur Wailen kil wa uk ya wlikgok tilpmingen a alm kamel pa atom kil anti tu wrong kin a kipman akilen pa rapon kolpa kai kolti, kil alok angkliwen. Pa kil awi titnongket a nang wailen eng ikgalen tu om ompen, a anong kanokg yela, a ak ok manman, a tu numpalk aur aur.
REV 13:8 Tu wrong kin a kipman wailet a kanokg ti a nang a tu ake nira ela wrkapm pa, tu pa ikga ngkit nang a kipor kilko ilein wlikgok tilpmingen pa. Pake tu melnum a nang a tu a ela wrkapm a Manto Walkg Malkgu War a pikekg tu alm amo pa, tu pa ikgake ngkit nang a kipor kilko ilein wlikgok tilpmingen pa, kalpis. Maur Wailen pikekg ak wang a kil ake antokg kitnong a kanokg pa, a pa, kil nira nang a tu a awi yaprekg watin eng rpma wor yongkyong pa ela wrkapm alkil pa ise.
REV 13:9 Melnum a nungkulkg atnewe pa, kil itning yangkipm kil lupmen riworwor!
REV 13:10 Kol Maur Wailen la tukwei tu melnum ur pa kawor rpmi wan tipmining pa, ikgam tu uwiyel iye kawor rpmi wan tipmining pake. Wa kol kil la tu ilm melnum ur imo ik sakal a lepet womwompen pa, pa tu ikgam ilmpel imo ik sakal pake. Ik wang a kweikwei kolpa palng pa, tu wrong kin a kipman a Maur Wailen pa mpa tu rkul ipma a ukipma itni titnongket ik wang a kolpa.
REV 13:11 Atom wa kupm ari wlikgok tilpmingen wrongen ur pa angkinar kanokg wunen ti kulno. Yoyuk wekg atnewe kolen yoyuk a Manto Walkg Malkgu War pake a oklala akilen pa paipm kolen a wapin paipm wail manten pa.
REV 13:12 Wlikgok tilpmingen katnukg ti pa kil wli awi nang wailen a titnongket a wlikgok tilpmingen ep ai alkel atom kil ak ak kwap itna wulmpa a kil ai. Kil tirpmingen alok wrong kin a kipman a kweikwei wrongkwail a kanokg ti kapor kilko alein ngkat nang a wlikgok tilpmingen ep ai, a i a pikekg tu almpel amo pa am la atom kil am wa wor ise.
REV 13:13 Wlikgok tilpmingen katnukg ti pa elng kla wail weten weten itna ak titnongket alkilen ti. Kla weten manet wris ur pa kolkil: kil antokg wakg pa angko angkaino kitnong ai nar kanokg ti atom tu ari.
REV 13:14 Itna wulmpa a wlikgok tilpmingen ep ai kil ak titnongket a pikekg wapin paipm wail manten alkel pa, elng kla weten weten pa elngitna la iklok rkolng tu wrongkwail kin a kipman a kanokg ti kai ar. Ti kil naki karkurng tu wrong kin a kipman a kanokg ti, la tu ukual yo wail ur pa kilingen wlikgok tilpmingen ep, a pikekg tu ak sakal a lepet womwompen alm amo atom wa wrekg pa, elngkitni eng kipor kilko ilein ngkit nang akilen.
REV 13:15 Atom wlikgok tilpmingen katnukg pa wapin paipm wail manten pa alkel titnongket eng la kil uk yaprekg yo a tu ukual kalingen wlikgok tilpmingen ep pa, atom yo pa antiwe oklala. Atom kil antiwe a la tu melnum a ake kapor kilko alein ngkat nang a yo pa pipa, mpa kil la tu eng ilmpen imo.
REV 13:16 Wa yo a tu ukual kalingen wlikgok tilpmingen ep pa kil tirpmingen tu wrongkwail kin a kipman, tu melnum a nang arke a tu a nang kalpisen, a tu a antiwe kweikwei a tu a rpma tukwok, a tu a aken kwap orngwatneikgen mring alntu a tu a rpma akwap ak wasrongen alntu pa, la tu nira krakg pa kol kla a kil ak amprin eng akilen pa eli wam wi aki lngkep atuwen pa.
REV 13:17 Melnum a ake tu nira krakg a wlikgok tilpmingen ep pa elawel pa, kil ake antiwe mpa rmpen aki ik kweikwei ik uwi marpm pa. Krakg a tu nira pa nang a wlikgok tilpmingen aki kol tu angket ker akawiye krakg wris wris a nang akilen a angkleikg aken tita atom palng nang akilen.
REV 13:18 Pa wonet paipm, kol melnum a wontrakole pa mpa kil uwi riwe. Ti melnum a nikgwalpm kwarngen pa, mpa kil ik ker uwiye krakg wris wris a nang a wlikgok tilpmingen pa ngkleikg iken tita, la pa nira ak la nang a mla? Krakg wris wris a ak ker awiye pa nang a melnum, wa kol ngkleikg ker pa iken tita pa pati wampwomis wampwompwris, wampwomis wampwompwris, wampwomis wampwompwris (666).
REV 14:1 Atom kupm ikatnen itna ari, woi, kupm ari Manto Walkg Malkgu War pa kil itna kaino wrik nangen Saion pa, a tu wrong kin a kipman wailet paipm ai kamel kamel (144,000) pa itna nampokgentel. Wa kupm ari nang a Manto Walkg Malkgu War pa wa nang a Yan alkil pa nira ela lngkep atuwen pa.
REV 14:2 Kupm atning milpming ur kaino kitnong pa kol u waiin wail a elng nar praspras pa, a wa kolen milmal wail a praun pa. Kwei ur milpming a kupm atning pa pati kolen tu melnum a kalpo kalpo yotimpal pa kalpo pa.
REV 14:3 Tu kin a kipman wailet paipm ai kamel kamel (144,000) pa tu itna won a wrik a melnum a awi nang wailen arpme arpme pa, a wa itna won a kweikwei malepmen wikgwikg pa, a tu melnum wailen wailen pa. Tu ak nangnang weten ur pa itna a ake mpa wa tu melnum manet ur ntiwe wa uwi riwe nangnang pa, kalpis, pa tu alntu a pikekg Maur Wailen kil amo akarmpenten akawiyen a kanokg ti ayeno pa mpam tu pa akalkilel kolti.
REV 14:4 Am tu pa tu ake pikekg okg kin kipman anti kin ur pa eng mpa ntokg tulntu ti kimpilpet pa, kalpis. Tu pa kukula wor kolti kolen kipman a walmpopm wriwen. Ya wrik a wor a paipm a Manto Walkg Malkgu War angkom ore pa, tu am katnuntel atn or ya pake. Kai kuin a tu wrong kin a kipman a rka kanokg ti pa, am tu pa pikekg Maur Wailen akarmpen eng alkilen ise. Tu pa rka kolen okipma yipuken yipuken a al wor uk Maur Wailen a Manto Walkg Malkgu War pa.
REV 14:5 Ok a tu pa ake akla yangkipm ur a kansil pa, wa ake antiwe a mla ur arkiwen la tu pa antokg paipm ur.
REV 14:6 Atom wa kupm ari maur akwapel ur a Maur Wailen pa pelng or kaino kwa wai. Kil aye yangkipm wor ur a Maur Wailen a itna yongkyong pa aye itna la laron niki tu wrong kin a kipman a rka kanokg ti a numpalk ikg ur ikg ur, a om ompen, a ak ok manman, a anong kanokg yela.
REV 14:7 Maur akwapel pa la yikakatnen kolkil la, “Am wang tike, wang a Maur Wailen la uwi wrongkwail kin a kipman iye kai ntokg yangkipm itni kil alkil. Kolpa ti kipm ngkirken ipma wakget a kil pa a ngkit nang akilen! Kil melnum pikekg antokg kitnong a kanokg a unokg a u yaur wrongkwail, kolpa ti kipm kipor kilko ileinsel!”
REV 14:8 Atom maur akwapel ur pa wa pelng katnun ur a wet ep pa kai atom wa la kolkil la, “Anong nang wail Papilon pa am angko kinar paipm ise! Ei, am paipm ise! Am anong wail Papilon wris pa arkolng nepm wrongkwail kin a kipman pa aye kai katnun nikgwalpm paipm alkil a angkli arkul tu a kil akwap numkropis a uk numpaipm kamel pake. Pa kolen kil uk u titno titnongket pa tu pa atom tu al.”
REV 14:9 A wa maur akwapel ur pa wa pelng katnun wekg wet a ekg pelng ep kul pa. Atom kil la yikakatnen kolkil la, “Kol mla ur kitn kipor kilko ilein wlikgok tilpmingen a yo a tu ukual kalingen wlikgok tilpmingen pa atom tu nira krakg pa eli lngkep aki wam akitnen pipa,
REV 14:10 kitn pa yat kitn ikga il u titno a ipma wakget a Maur Wailen. Ikga Maur Wailen kil lung ipma wakget akilen ti kimeket elng kinar kaimung ti kolen u titno a ake ak u ur ak kapor kinipis alkil pa, atom kitn il ikilmpe paipmpaipm a kitn antokg pa. Ikga kitn uwi wleket paipm kai wakg wes a karin atne atne a wakget waiwai a aris paipm wrisen itni wulmpa a tu maur akwapel wriwen wor a Maur Wailen a itni wulmpa a Manto Walkg Malkgu War pa.
REV 14:11 Ikgam wakg wuanten alken wleket itna yongkyong kolpa itna pake. Tu melnum a kapor kilko alein wlikgok tilpmingen pa, a yo a tu ukual kalingen wlikgok tilpmingen pa, a wa tu a awi krakg a wlikgok tilpmingen elawe pa, ake mining a ran ur tu rpma eng yapm pa kalpis.”
REV 14:12 Kweikwei a kolpa palng pa, tu wrong kin a kipman a Maur Wailen a arkul yangkipm akilen pa a ukipma Sisas pa, tu ukipma itni titnongket kolpa iye kai o!
REV 14:13 Atom kupm atning ok ur la angkaino kitnong pa nar la, “Kitn nira yangkipm kil: ik wang ti iye or pa kai, kitn mla ur kin a kipman a katnun Wailen pa atom kitn amo pa, kitn pa wor pake, kitn itopen o!” Maur Wor wa la ak titnongketel pa yat la, “Pa aklale, pikekg tu aken kwap a arki wleket, pake tu ikga iye ker a akawiye kwap wor wris wris a pikekg tu ak pa iye nukur num kaino, atom ikga tu itopen rpmi eng yapm.”
REV 14:14 Kupm ikg kai ari waipmunu tangkoren pa ari kupm ari melnum ur kolen Warim Kipman a Melnum pa rpma kai waipmunu pa. Kil arpme wanukgmis a tu antokg ak wes muinmainet kai tukgunakg alkilen pa a kil aye tuk lepet paipm pa aye itna wam akilen pa.
REV 14:15 Atom wa maur akwapel ur pa wa angkawor yalming a Maur Wailen pa kulor kolti akwe yikakatnen lanaki melnum a rpma waipmunu pa la, “Wang a angketuwai okipma tike. Okipma a kanokg ti am tukgun kakir itna tike, ti kitn uwi tuk lepet a kitn pa iye kinar eng ik ngketuwai okipma ti!”
REV 14:16 Atom melnum a aye tuk rpma kaino waipmunu pa aye tuk alkil pa kulnar kolti ak angketuwai okipma a tukgun kakir itna kanokg ti.
REV 14:17 Wa maur akwapel ur manet a Maur Wailen pa wa atnuurng yalming kaino kitnong pa wa kulor en pa. Kil pa am wa aye telp lepet ur kol a kil pa aye tuk lepet pa yat pake.
REV 14:18 Atom wa maur akwapel ur alkil a ikgalen wakg a naruk itna tipmakg a alwor uk Maur Wailen pa kil kul itna, atom akwe yikakatnen naki maur akwapel a aye telp lepet pa la, “Ampei wain elngelng am tukgun rka ise. Ti kitn iye telp lepet alkitn pa iye kinar ik ngketen ampei wain elngelng a rka kinar kanokg pa atom uwi iye kai itni wris!”
REV 14:19 Atom maur akwapel pa awi telp alkil pa aye kinar kanokg ti ak angketen ampei wain elngelng pa, atom takwem awi aye kai elngkitna wris plalng pipa, wa awi angkli elngkinar lkim kulkwempen wail ur pa eng la rkganti kurkur tipon u alkilen pa. Pa pati akla ipma wakget a Maur Wailen.
REV 14:20 Lkim kulkwempen pa ake itna kawor anong wail wunen pa, pa itna laikge takwleikgen anong pa. Tu rkganti karkur ampei wain elngen elngen pa, atom walmpopm akilen pa turus kinar kolen kop a u pa, kol naren kinar antin kapmen a kil pa, mpa kaino wli okmraingkil a melnum ti, yerare or arpme kanokg ti kai watinet paipm ai (300 km).
REV 15:1 Kupm wa wrekg paipm wrisen eng ari kwei ur manet wail ur ai wa palng itna kaino kitnong ai. Kupm ari maur akwapel pa wampwomis wampwompwekg pa tu aye kweikwei paipm wampwomis wampwompwekg eng la ik ntokg paipm tu wrong kin a kipman. Ipma wakget auraur a alupm rpma kuntuk wil pa Maur Wailen ikgam lung a lung kolpa kaingkai, kuntuk wil wampwomis wampwompwekg pa kai plalng pa, kil ipma kupuk om.
REV 15:2 Kupm ari kwei ur kolen unokg pa wirwir klalklal ari kolen mrangku, atom wakg ti naruk atom ari tatu unokg pa. Tu melnum a pikekg alok angkli wlikgok tilpmingen pa, a tu ake kapor kilko alein yo a tu ukual a tu kalingen wlikgok tilpmingen pa, a tu a ake tu nira krakg akilen ela tu pa, tu pa itna unokg yamping a ari kolen mrangku pa. Atom tu aye kweikwei kolen yo timpal a ak antokg nangnang a Maur Wailen kil alken pa aye itna.
REV 15:3 Atom tu ak nangnang a Moses, melnum akwapel a Maur Wailen, a nangnang a Manto Walkg Malkgu War pa. Nangnang pa ak kolkil la, “Maur Wailen, kitn wailen a antiwe titnongket wrongkwail. Kitn pikekg akwap titnongket wail wail wor wor a ikg ur ikg ur. Kitn melnum tukgunakg a itna ep ikgalen anong kanokg yela. Nikgwalpm nol akitnen pa ute aklale wrisen kolti.
REV 15:4 Wailen, kitn wris ata pa wailen. Kolpa atom wrongkwail kin a kipman ti ngkark eng kitn pa, atom tu ngkat nang klalen akitnen pake. Kitn alkitn wris ata pa kitn klalen wakget, a kweikwei a kitn antokg ti pa ute wor kolti. Ti kwap a kitn ak kolpa ake am, pa palng angko wunong tu wrongkwail ari. Kolpa ti tu wrong kin kipman yela kanokg ti ikga wli kipor kilko ilein ngkit nang akitnen pa.”
REV 15:5 Tu ak nangnang pa kai plalng pipa, kupm wa ikg kai ari, wan ok wusok klalen wakget a ak apm angketen pa a tu elng yangkipm titnongket wampwam pa elngkirpma pa okore itna kawor yalming a Maur Wailen pa.
REV 15:6 Maur akwapel wampwomis wampwompwekg pa tu aye kweikwei paipm wampwomis wampwompwekg a ak antokg paipm tu wrongkwail kin a kipman pa, aye angkawor yalming a Maur Wailen pa kul or en ti. Tu aning apm rukis klalen wor wrisen a tu ak ampei kalnten ur a tu antokg ak wes muinmainet pa ak angket tatu nol mkang atuwen pa.
REV 15:7 Atom wris ur a kweikwei malepmen wikgwikg pa ngkaten kuntuk wil wampwomis wampwompwekg a alupme ipma wakget a Maur Wailen, melnum a rpma yongkyong pa, uk tu maur akwapel wampwomis wampwompwekg pa.
REV 15:8 Klalen a titnongket a Maur Wailen ti kawor kolen wakg wuan ti kawor or arpme yalming ti antiwe. Ti ake antiwe mpa melnum ur kawor wan wunen pa, kalpis. Ikga tu itni nangkin eng maur akwapel wampwomis wampwompwekg pa ikwap kweikwei paipm wampwomis wampwompwekg pa kai plalng pen.
REV 16:1 Atom kupm atning ok ur a la yikakatnen angkawor yalming a Maur Wailen pa kulor naki maur akwapel wampwomis wampwompwekg pa kolkil la, “Kipm kai o! Kipm kai lung kuntuk wil wampwomis wampwompwekg a alupme ipma wakget a Maur Wailen ai elng kinar kanokg ai!”
REV 16:2 Atom maur akwapel wris a ep pa kai taipurng kuntuk wil akilen pa elng kinar kanokg ai. Pipa i paipm wail wail a wleket paipm pa al tu melnum a pikekg tu nira krakg a wlikgok tilpmingen pa elawen a wa tu kapor kilko alein yo a tu ukual kalingen wlikgok tilpmingen pa.
REV 16:3 Maur akwapel wris pa taipurng kuntuk wil alkil pa elngkinar plalng, wa maur akwapel ur wa taipurng kuntuk wil alkil pa alung elngkinar unokg pa, atom u pa palng kurkukgis mismis kolen walmpopm a tu melnum a amo pa. Kolpa atom kweikwei malepmen wrongkwail a itna unokg pa amo plalng.
REV 16:4 Maur akwapel wekg pa taipurng kuntuk wil alntuwekg pa elngkinar plalng, a wa maur akwapel ur pa kil taipurng kuntuk wil alkil pa elng kinar u kop minip kuwokg pa a wa elng kinar tatu u yaur ti, atom u wrongkwail pa palng walmpopm arke arke plalng.
REV 16:5 Atom kupm atning maur akwapel ur a ikgalen u wrongkwail pa la, “Maur Wailen, kitn a rpma ak wang ti, a wa kitn pikekg rpma ep ak ai, kitn pa klalen wakget, a kitn ute wor kolti. Eng ntei, kalkuten a kitn uk tu pa, pa kitn akalmpe paipmpaipm a pikekg tu antokg pa. Pa kitn akwap ute wor wrisen kolti.
REV 16:6 Tu pa melnum a pikekg alm tu melnum okwripm akitnen, a tu wrong kin a kipman akitnen, atom antokg walmpopm atuwen pa ungkwan. Atom kitn alken walmpopm pa eng tu al. Ti tu il o! Pa tu al eng akalmpe nikgwalpm paipm paipm a pikekg tu antokg pa.”
REV 16:7 Wa kupm atning ok ur a la angkaino tipmakg a tu alwor uk Maur Wailen atne pa la kolkil la, “Aklale wrisen, Maur Wailen, kitn Wailen a antiwe titnongket wrongkwail. Yangkipm a kitn antokg anti tu wrong kin a kipman akalmpe paipmpaipm a tu antokg pa ute wor wrisen kolti.”
REV 16:8 Maur akwapel wraur pa taipurng kuntuk wil alntuntengen pa elngkinar plalng, wa maur akwapel ur pa kil wa taipurng kuntuk wil alkil pa tarus itna takgni pa atom takgni pa palng wakget paipm wrisen, atom wakget akilen pa wakget paipm al tu melnum ti kolen wakg.
REV 16:9 Takgni pa palng wakget paipm kolpa atom al tu melnum pa paipm wrisen. Kolpa ti tu pa kol a plelng ipma a ngkit nang klalen a Maur Wailen. Eng ntei, Maur Wailen pa yiprokgen a alken kalkuten tike. Ari wa kalpis, wa tu wa wrekg la paipmel Maur Wailen ti.
REV 16:10 Maur akwapel wikgwikg pa taipurng kuntuk wil alntuntengen pa plalng, a wa ur pa taipurng kuntuk wil alkil pa elng kinar itna wrik a wlikgok tilpmingen a awi nang wailen arpme arpme pa pipa, miningket wail pa kai ak ipaarng tu melnum a rka orngwatneikgen titnongket a wlikgok tilpmingen pa. Atom tu wleket paipm, atom tu nampok alntu ti.
REV 16:11 I wail wail alen alken wleket, pake tu ake ari wleket a tu awi pa atom tu plelng ipma a uk yirokg paipmpaipm a tu antokg pa, kalpis, tu la la paipmel Maur Wailen a rpma kaino kitnong pa kolpa itna.
REV 16:12 Maur akwapel wampwomis pa taipurng kuntuk wil alntuntengen pa elngkinar plalng, a wa maur akwapel ur pa wa taipurng kuntuk wil a kil pa alung elngkinar u kop wail Yupretis pa pipa, u kop wail pa arkol kai tingklak. Atom uk ya tu melnum tukgunakg pa mpa tu ingkai takgni aro pa kul pa.
REV 16:13 A wa kupm ari maur paipm kimpilpet wraur a ari kolen kwikwai pa. Ur pa kulor wli ok a wapin paipm wail manten pa, a ur pa wa or wli ok a wlikgok tilpmingen pa, a wa ur pa wa or wli ok a melnum okwripm kansil pa.
REV 16:14 Tunteng pa tunteng maur paipm a elng kla weten weten elngtitna atom melnum wrekg paipm eng ari pa. Maur paipm wraur pa teng kai alok tu melnum tukgunakg a ikgalen tu wrong kin a kipman yela anong kanokg ti uwiyen iye kul kai itni wris, eng rapon ik wang wail manten a ikga Maur Wailen a antiwe titnongket wrongkwail pa ikga uwi tu iye kai itni ntokg yangkipm pa.
REV 16:15 Wailen la kolkil la, “Kipm itning, kupm ikga palngtepm ikmisel kolti kolen melnum ikgwampet pa. Ti ampur kipm okg, kipm rpmi numprampen nungkwangen ikitnen ya pa rpmi! Kipm nowe apm pa atom kipm itn a rpmi! Kipm itn a rpmi numpalpen itni wulmpa a tu wrongkwail pa, kipm ikga numpaipm. Kipm mla ur a ak katnun kolpa pipa, kipm pa wor pake, kipm itopen o!”
REV 16:16 Atom tunteng maur paipm pa awi tu melnum tukgunakg a ikgalen anong kanokg yela pa, awiyen kai rka wris aken tita rka wrik ur a tu akwe ak ok Ipru pa la, Armaketon.
REV 16:17 Maur akwapel wampwomis wampwompwris pa tunteng taipurng kuntuk wil alntuntengen pa alung elngkinar plalng pipa, maur akwapel aimprek pa wa taipurng kuntuk wil a kil pa elng kinar nampokgen yaprekg a melnum angklo pa. Ok ur la yikakatnen itna wrik a melnum a awi nang wailen arpme arpme pa angkawor yalming a Maur Wailen pa kul or la, “Kwap wrongkwail a kupm ak pa am kai plalng kol pake.”
REV 16:18 Kil la kolpa plalng pipa, milmal pa plaing praun angko a kunturng nurnur, a yelm wail manten pa no. Yelm wris pa no wail manten paipm kolti. Ake melnum ur ari yelm ur kolpa pikekg no ep ur kolpa itna kanokg a ti pa, kalpis.
REV 16:19 Atom anong wail Papilon pa rakol palng kolen wompel wraur, a anong wail wail a yela kanokg pa nungkur arpme tita elng kinar paipm plalng. Maur Wailen kil wonarpme anong wail Papilon pa pikekg itna paipm, kolpa atom Maur Wailen antokg kil al u wain titno pa. U wain titno pa pati ipma wakget paipm a Maur Wailen.
REV 16:20 Anong kanokg wusok wusok a ela unokg kuin pa nungkur elngkinar kai plalng, a wa tipmining wrongkwail ti wa tapor elng kinar kai kalpis plalng kolti.
REV 16:21 A u mringkwripm wail pa awei a u lmpa kupuk wail wail pa kolen wes kaikut wail wail pa angko angkaino kitnong pa elngnar yela kanokg ti, atom ak or tu melnum a kanokg ti kai paipm wrisen kolti. Atom tu la paipmel Maur Wailen a kil elng u lmpa kupuk wail wail pa elng kul nar ak oren pa.
REV 17:1 Wris ur a tu maur akwapel wampwomis wampwompwekg a Maur Wailen a aye kuntuk wil wampwomis wampwompwekg pa kil lanakopm la, “Kitn kul eng kupm planteitn wleket wail ikga kin wulmpawet a angkli arkul tu kipman pa uwi ikilmpe paipm a kil antokg pa. Kin pa rpma ukupuk, kop, minip, kwokg watipmen.
REV 17:2 Tu melnum tukgunakg a ikgalen kanokg ti antokg wulmpawet atom angkli arkul kin pa, a antokg numkropis a uk numpaipm kamel. Atom wrongkwail kin a kipman a kanokg ti tu wa al u wain titno lupmet a kin pa, atom tu palng titnowen kol kil pa ise.”
REV 17:3 Maur Wor a Maur Wailen pa akwap titnongket kul kupm ti, atom aye kupm ti kai wrik kalpmilel ur a ake melnum ur arpme pa. Itna wrik pa kupm ari kin ur pa rpma yirokg a wlikgok tilpmingen watet pa. Nang watipmen a nira ela num wrongkwail a wlikgok tilpmingen ti pa, pa yangkipm a tu aknokgel Maur Wailen. Wa wlikgok tilpmingen pa tukgunakg wampwomis wampwompwekg atnewe a wa yo yuk wampwam itna tatu tukgunakg pa.
REV 17:4 Kin pa kil nowe apm watin watet pongpong a torpinet. A wa kil nakure ak lukglukg a worampei a ari wor wor, kol wes malungen muinmainet, a wes ari wor wor a ak marpm wail armpen kol krim mikam, marpm mis, kroitnyimpon a wor wrisen ai. Kil ngkaten wes kaingkuren malungen muinmainet ur aye itna wam pa. Wes kaingkuren pa pik atnen kweikwei numkropis a uk numpaipm kamel a kweikwei kimpilpet kimpilpet aur aur kolen a kil angkli arkul anti anti tu kipman pa.
REV 17:5 Ela lngkep a kin pa tu nira yangkipm kla ampen pa kolkil la, “Anong nang wail Papilon, man a kin wrongkwail a angkli arkul tu kipman, a kil man a kweikwei wrongkwail a tu antokg itna kanokg ti a uk numkropis kamel pa.”
REV 17:6 Tu alm tu wrong kin a kipman a Maur Wailen, a laron tu alntu ti la tu a Sisas pa amo, atom kin pa al walmpopm atuwen pa atom kil titno kol tu melnum a al u titno pa. Kupm ari kin pa atom kupm wrekg paipm akwonalmpen watipmen eng pa.
REV 17:7 Maur akwapel pa wa kil asentopm kolkil la, “Wa kitn wrekg paipm akwonalmpen pa watipmen eng na? Mpa kupm lanikeitn yiprokgen a wlikgok tilpmingen a tukgunakg wampwomis wampwompwekg a yoyuk wampwam atnewe pa, wa yiprokgen a kin a arpme wlikgok tilpmingen pa ngko wunong.
REV 17:8 Ti wlikgok tilpmingen a wet kitn ari ti pa, pikekg kil rpma ep, pake ak wang ti am wa kai titalam ise. Ikga kutnukg pa ikga kil ingkinar lkim watin kinar tak ai a plalng kalpisen pa kulno rpmi waiketn kolti atom ngkliwel elng kinar wakg. Pikekg ak wang lmpiwen a Maur Wailen ake antokg kitnong a kanokg ti pa, kil nira nang a tu a ikga uwi yaprekg watin eng rpmi wor yongkyong pa ela wrkapm alkilen pa. Tu wrong kin a kipman a kanokg ti, tu a nang atuwen pikekg ake nira ela wrkapm pa, tu ikga wrekg paipm eng ri wlikgok tilpmingen a pikekg rpma ep, a ake rpma ak wang ti, a ikga wa rpmi kutnukg pa.
REV 17:9 Pa wonet paipm. Kol a melnum a nikgwalpm wontrakole wor pa, mpa kil riwe yiprokgen a yangkipm kil. Tukgunakg wampwomis wampwompwekg pa akla wrik nangen wampwomis wampwompwekg a kin pa rpma ikgalen pa. A wa akla melnum tukgunakg wampwomis wampwompwekg.
REV 17:10 Kwap a melnum tukgunakg wampwomis pa am plalng ise. Pake wris pa itna. A ur pa ake wa palng, a pa, kil ikga wli ik itni wang tukwok waiketn kolti.
REV 17:11 Wlikgok tilpmingen a pikekg rpma, ari wa ak wang ti kil ake wa rpma, pake kil wris ur a tunteng wampwomis wampwompwekg pa. Kil ikga wa wli iken tunteng wampwomis wampwompwekg pa atom palng melnum tukgunakg wampwomis wampwompwraur. Kil pa ikga kai paipm wrisen.
REV 17:12 Yoyuk wampwam a kitn ari a itna tukgunakg pa pati, akla melnum tukgunakg wampwam a ake tu awi nang wailen a itna wailen ikgalen kweikwei wrongkwail pa, a pa. Ikga tu lken titnongket eng itni wailen ikglen kweikwei wrongkwail pa nimpokgen wlikgok tilpmingen pa itni kolen takgni wang waiketn ur kolti.
REV 17:13 Tu ikga itni nikgwalpm wris a tu ikwap or wris, atom tu uk titnongket a nang wailen pa wlikgok tilpmingen pa, atom tu pa ikga itni orngwatneikgen kil pa.
REV 17:14 Ikga tu nti Manto Walkg Malkgu War pa rapon pake. Kil pa kil itna wailen a tu melnum wailen wailen wrongkwail pa itna orngwatneikgen kil ti, a wa kil melnum tukgunakg a tu melnum tukgunakg wrongkwail pa wa itna orngwatneikgen kil ti. Kolpa ti ikga kil ti lok ngkli tu melnum tukgunakg wampwam pa. Atom tu a kil takweiyen eng alkilen atom akwewen pa, atom tu arkulel itna tongtong pa ikga ntiwel rpmi itopen.”
REV 17:15 A wa maur akwapel ur pa wa lanakopm kolkil la, “U kupuk, kop, minip, kuwokg a pikekg kitn ari kin a atn ya pa arpme pa pati, pa akla wrongkwail kin a kipman wailet paipm aur aur, a ok ak manman, a anong kanokg yela ngkempwekg ti.
REV 17:16 Yoyuk wampwam a kitn ari itna wlikgok tilpmingen pa, pa akla melnum tukgnakg wampwam pa nampokgen wlikgok tilpmingen pa. Tu ipma wakget karken paipm wrisen kin a atn ya pa. Atom ikga tu inerel apm, a uwi kweikwei wrongkwail akilen ti, utnuurngkel numpalpen kil itni pa, a tu kai. Atom ikga tu ngkwrer kinal akilen ti il, a lap tupmungkul a nikg kweikwei pa ik wakg.
REV 17:17 Maur Wailen kil uk nikgwalpm tu melnum tukgunakg wampwam pa, eng tu ntokg kweikwei pa palng kitila nikgwalpm akilen, kolen a pikekg kil lawen ep la ikga palng pa. Atom titnongket a kalnten a tu aye itna kolen melnum tukgunakg ti pa, ikga tu ipma wris uk wlikgok tilpmingen pa la kil itni tukgnakg ikglenten ik kolpa kai itni nangkin eng Maur Wailen kil ntokg kweikwei a pikekg kil lawen la ikga palng pa kai plalng iro yiprokg pen.
REV 17:18 Kin a kitn ari pa pati, pa yangkipm kla a akla anong nang wail pa itna wailen ikgalen tu melnum tukgunakg a kanokg ti.”
REV 18:1 Kupm ari kweikwei pa plalng pa, wa kupm wa ari maur akwapel ur a Maur Wailen pa wa angkaino kitnong pa wa nar. Kil nar nampokgen nang wail antiwe titnongket a klalen wail akilen pa klalen klalklal nar alen kanokg ti.
REV 18:2 Maur akwapel kil la yikakatnen kolkil la, “Papilon am angko ise! Anong nang wail Papilon pa am angko kai paipm ise! Atom anong pa palng kol wrik a maur paipm arpme, a kol wrik laikge ur a maur paipm kimpilpet a wel mauret a wlikgok paipm a alm kamel kai arke arke pake.
REV 18:3 Anong Papilon pa kol kin a tu anong kanokg wrongkwail pa pikekg tu angkli arkul pa. Pa kolen kin pa alken u titno akil pa atom tu al atom tu titno, atom tu la wa il kolpa kai. A wa tu melnum tukgunakg a kanokg ti pikekg wa angkli arkul kin pa, atom akwap numkropis a uk numpaipm kamel. Wa tu melnum a ak kweikwei wor wor alntu pa ak awi marpm pa, kin pa antiwe marpm wail atom armpen kweikwei wor wor alntu, atom tu melnum a ak kweikwei wor wor alntu pa ak awi marpm pa tu rpma antiwe wor.”
REV 18:4 Maur akwapel pa la kolpa plalng pipa, wa kupm atning ok ur a wa akwe angkaino kitnong pa wa nar la kolkil la, “Kipm wrong kin a kipman akupmen pa, kipm kai tukwulelkgen kin pa! Ampur kipm antiwel antokg paipmpaipm pa a antiwel awi wleket a kaikuten akalmpe paipmpaipm a kil antokg pa.
REV 18:5 Paipmpaipm a kil antokg pa, kil antokg elngtitna mapming mapming alile tita kolpa aye kaino kitnong ai, kolpa ti Maur Wailen kil wonarpme paipmpaipm a kil antokg pa.
REV 18:6 Kipm ikilmpe irir kitila kol kuina ur a pikekg kin pa aktepm pa. Wa kipm ikilmpe paipm a pikekg kil aktepm pa nti ur! A wa kipm ilm u wain titno pa kai kaimung alkil a pikekg kipm al angkowe pa wa lkel eng kil il o! Wa ilm u kolpa wa lkel nti ur eng wa kil wa il!
REV 18:7 Kipm lkel kalkuten pa klangkil eng mpa kil akg rein! Atnen a kil ngkat nang alkilen ti la, kin a antiwe kweikwei wor wor a antokg kweikwei wor wor a antokg kil alkil ti rpma atopen a rpma antiwe wor. Kil ngkat nang alkilen pa la, 'Kupm alkupm ti kin tukgunakg tike, kupm itna ep ikgalen kweikwei wrongkwail. Kupm rpma wrik tipmakg a melnum a awi nang wailen arpme arpme pa. Kupm ake rpma tukwok kol kin karpikg pa eng mpa kupm akg rein pa.'
REV 18:8 Kin pa la kolpake, ikga ik wangkur pa kil ikga uwi numpet wail wail, a tu tiur alkilen ikga imo, kil ikga akg rein paipm, a wang nikg wail ikga palngtel. Kweikwei paipm paipm kolpa ikga palngtel ngkompwris ik wang wris kolti. Wailen, Maur Wailen a Antiwe Titnongket pa ikga uwiyel iye kai itni yangkipm atom lapel ik wakg.
REV 18:9 Tu melnum tukgunakg a ikgalen kanokg ti, tu a pikekg angkli arkul kin pa, a tu awi atopen a rpma wor antiwe kweikwei wrongkwail wor wor nampokgen kin pa, pa tu ikga ri wakg wuan a nakur kaino kwa, atom tu la wakg pa am al kin pake. Ikga tu ikg kai ri kolpa, atom tu akg rein paipm.
REV 18:10 Tu ikga ri wleket paipm a kil awi pa, ti tu ikga num lantiwen ngkirk warwar paipm wrisen kai itni watin ai, atom rkolngkwi lala, 'Woi, woi, arein anong titnongket wail Papilon pa! Ak takgni wang waiketn kolti pa kitn awi wleket pa akalmpe paipmpaipm a pikekg kitn antokg pa!'
REV 18:11 Tu melnum wrongkwail yela kanokg ti a armpen kweikwei kai anong ur ai aye wli ak awi marpm pa tu akwonalmpen Papilon pa, atom tu akg arein ak ok namputen. Eng ntei, tu akwonalmpen ari ikga wa mla a i wa rmpen kweikwei wrikya a tu aye wli la ik uwi marpm ti.
REV 18:12 Kweikwei wrikya a tu aye wli pa pati, kol wes malungen muinmainet, wes tangkoren muinmainet, a wes ari wor wor ikgur ikgur, a kroitnyimpon muinmainet, a apm ute tangkoren wor wor, a apm ute torpinet, a apm ute mlaset wor wor, a apm ute watet pongpong. A wa yo yaprekget wor auraur, a kweikwei tiur a tu antokg ak oktelp a manto lim watinet kapringke, a wa kweikwei tiur a tu antokg ak yo a ak marpm wail armpen, a wes watet, a wes kalnten, a wes krukg krakgis ari wor.
REV 18:13 Wa wrikya tiur a tu aye wli pa pati kweikwei wor wor a ak angklin okipma eng al wor pa kil: yo sinamon palk wulkga, a nik yutn katamon, a kweikwei a lap eng yaprekget aris wor, a kweikwei wor wrisen ai a akoren tita atom yaprekget aris wor, a wa uyiwa yaprekget wor a ak anel num; a u wain, a uyiwa, a nok maing mringen kolen nok nep, a nok maing mringen kolen nok ikgim. Wa kweikwei kolkil tu pa wa itna yat: manto nepm watin unu nongko a ikgur ikgur, a manto walkg malkgu, a nimpa nepm watin a melnum arpme arpme aye atn, a nampokgen tipmakg a nepm wikgwikg atnewe a alupme kweikwei wrikya atom nimpa nepm watin pa arkolng aye atn. A wa tu awi melnum aye wli eng tu alntu la ik uwi marpm uk tu mring ur rmpen la ikenten kwap kalpmlel orngwatneikgen tu pa, a melnum a tu awi or ya kolai aye wli eng num alntu pa wa tu wa ak awi marpm. Papilon am angko kai paipm ise, ti kweikwei wrongkwail pa ikga mla a i rmpen!
REV 18:14 Tu ikga la, 'Kitn Papilon! Kweikwei wor wor a kitn won moen pa am kai takwlelkgteitn ise. Kweikwei lukglukg titnongket wor wor akitnen pa am kai am takwlelkgteitn ise. Kitn ikga ikor okel kweikwei pa la ikga kitn uwi kai a i, kalpis, kitn am wokg kitnangkunen ise.'
REV 18:15 Tu melnum a armpen kweikwei kai anong ur ai aye wli atom anong wail pa armpenten, atom tu pa antiwe marpm wail paipm, tu pa itna ari anong wail pa awi wleket, atom tu ngkark itna watin ai, ipma kalkut akg arein ak ok namputen itna.
REV 18:16 Tu akg kirkar kolkil la, 'Woi, woi, arein anong wail pa! Pikekg ep pa, pa pikekg kil aning apm ute tangkoren wor wor, a apm ute torpinet a watet pongpong ari wor. Kil wa ak wes malungen muinmainet, a wes a ikgur ikgur ari wor wor, a kroitnyimpon muinmainet pa ak nakure num pa.
REV 18:17 Ak takgni wang waiketn pa kweikwei wail wail wrongkwail wor wor pa kai paipm kimeket kolti.' Tu melnum a wamparpme yampis taklo a wan unokgen pa, a tu melnum a rka wan unokgen pa ayewen kai anong ur anong ur, a tu melnum alntu a akwap itna wan unokgen pa, a tu melnum a akwap marpm or kai unokg pa, tu melnum wrongkwail pa ikga kai ngkirk rkolng itni watin ai tukwlelkgen Papilon a kai paipm pa.
REV 18:18 Ikg a wakg il anong wail pa atom tu ri wakg wuan nakur kul no pipa, ikga tu rkolngkwi lala, 'Takote anong wail wor pa! Ake anong wail ur kol anong wail pa a wakg al pa.'
REV 18:19 Tu ikga mang yipan kolti rkolngkwi akg ik ok namputen lala, 'Lawoi, lawoi, anong wail pa am kai paipm kolti tuwa! Pa anong wail a antiwe kweikwei wrongkwail, ti tu yan a wan unokgen wris wris pa tu awi wrikya kweikwei aye kulngkul anong wail pa. Atom tu anong wail pa armpenten pa, atom tu pa awi marpm wail wail itna anong wail pa, atom tu rpma antiwe. Ari ak takgni wang waiketn kolti anong wail pa wakg al kai paipm plalng kolti!' Tu ikgam akg ik ok numputen anong wail pa kolpake.
REV 18:20 Kipm a rka kaino kitnong pa, a kipm wrong kin a kipman a Maur Wailen pa, a kipm melnum wokgen a Sisas kil takweiyepm atom ukwawepm pa nampokgen tu melnum okwripm a Maur Wailen pa, kipm itopen o! Maur Wailen kil awi tu a rka anong wail pa kai antokg yangkipm atom antokgten paipm akalmpe a pikekg kil antokgtepm paipm pa, ti kipm itopen o!”
REV 18:21 Kupm atning kolpa plalng pa, kupm wa ari maur akwapel titnongket wail ur pa wa ngkat wes wail manten paipm ur a kalkut paipm a akentiwe mpa wrong wusoken ur ngkit pa, angkli elng kinar am kinar unokg kanokg ai, a kil la, “Anong wail Papilon pa ikga ngkliwel kinar paipm kolen wes a kupm angkli elng kinar unokg pake, atom ikga kai am wrisen kolti, ikgake wa ri nti ur pa, kalpis.
REV 18:22 Kipm Papilon! Kipm ikgake wa itning tu o titi, owen nim, tiplam nol a wampeng, a ntokg nangnang kolpa itni anong pa nti ur. Wa kipm ikgake wa ri tu melnum a ariwe akwap aur aur kolpa itni anong pa nti ur. A wa kipm ikgake wa itning ko milpming a tu ak ak kwap itni anong pa nti ur. Kipm ikgake itning warimpok akg, karek la, a milpming kilko ur itni anong pa, kalpis.
REV 18:23 Wakg yilpo tareing pa ikgake ri a la len anong pa nti ur. Kipm ikgake itning tu mring man itning oklala a tu kin a tu kipman a la uwi tita itni anong pa nti ur, kalpis. Tu melnum akipmen a armpen armpen kweikwei ayewli eng ak awi marpm pa, tu pa pikekg palng melnum wailen wailen nang arke a tu pikekg ngkat nangkel itna yela kanokg ti. Tu melnum akipmen a alm tukukel melnum, a tampungen melnum, a arpmen kweikwei paipm paipm, a arpmen ok paipm aur aur kapor nepmel kansil tu wrong kin a kipman a kanokg ti, kolpa ti kipm ikga uwi paipm.
REV 18:24 Walmpopm a tu melnum okwripm a Maur Wailen, a walmpopm a tu wrong kin a kipman a Maur Wailen, a wa tu wrongkwail a tu alm itna kanokg ti amo pa, tu ari walmpopm atuwen pa ungkwan itna anong wail pake. Pa ak plan la tu melnum a alm tu amo pa ikga uwi paipm.” Yangkipm a maur akwapel titnongket a Maur Wailen la pa, am kai kol pake.
REV 19:1 Kupm ari pa plalng pipa, wa kupm atning milpming ur kaino kitnong pa kolen ok watipmen ur a ak nangnang la yikakatnen kolkil la, “Mentepm ngkit nang a Maur Wailen amentepmen pa plan la, kil wris ata antiwe titnongket a nang wailen, a kil Maur Wailen a pikekg akawiyo eng alkilen.
REV 19:2 Wleket a kil uk tu pa, pa kil uk ute wor aklale akalmpe paipm a tu antokg pa. Kil uk wleket kin wailen a nang arke eng atn ya antokg kweikwei numkropis a uk numpaipm kamel, a angkli arkul tu pa atom antokg kanokg yela ti kai paipm. Maur Wailen kil uk wleket kin pa akalmpe a kil or alm tu melnum akwapel alkilen pa amo.”
REV 19:3 Wa tu a rka kaino kitnong pa la yikakatnen anti ur la, “Mentepm ngkit nang a Maur Wailen pa iye kaino kwa, eng ntei, wakg wuan a wakg a al kin pa puurp kaino kwa pa ikga itna yongkyong kolpa itna.”
REV 19:4 Tu melnum wailen wailen kamel wekg tuwek wikgwikg, a kweikwei malepmen wikgwikg pa tu kapor kilko alein ngkat nang a Maur Wailen a rpma wrik alkil a awi nang wailen arpme arpme pa, atom tu ngkat wam pa la kolkil la, “Kolpa aklale pake, ti mentepm ngkit nang akilen!”
REV 19:5 Atom ok ur la angkaino wrik tipmakg a melnum a awi nang wailen arpme arpme pa la nar la, “Kipm melnum akwapel wrongkwail alkilen a orngwatneikgen kil pa, kipm a nang arke a kipm a nang kalpisen, kipm a ngkark rpma orngwatneikgen Maur Wailen pa, kipm kimeket pa mpa ngkit nang a Maur Wailen pa!”
REV 19:6 Kupm atning ok ur a la kolpa plalng pipa, kupm wa atning ok ur kolen tu wrong wailet a oklala yikakatnen paipm kolen milpming a kop a minip a u kintir kuntur ai, a wa kolen milmal a praun yikakatnen pa. Tu la yikakatnen kolkil la, “Mentepm ngkit nang a Maur Wailen! Kil Wailen, kil Maur Wailen a antiwe titnongket wrongkwail, kil wailen itna ep ikgalen kweikwei wrongkwail.
REV 19:7 Mentepm atopen Manto Walkg Malkgu War eng kil a uwi kin alkil a nimprampen rpma ti iye. Ti am wang a kil a uwi kin alkil ti iye tike. Kolpa ti mentepm ngkit nang wailen akilen ti iye kaino kwa itopentel o!
REV 19:8 Maur Wailen kil uk kin pa apm ute tangkoren pupu rukis wor pa la kil ining.” Apm ute tangkoren wor pa, pa akla nol nikgwalpm a atn a rpma ute wor a tu wrong kin a kipman a Maur Wailen.
REV 19:9 Atom maur akwapel pa kil la kul kupm ti la, “Kitn nira oklala kil, 'Tu melnum a pikekg Maur Wailen kil akwenten wli rka la il okipma wail itnen Manto Walkg Malkgu War la uwi kin iye pa, tu pa wor pake, tu itopen o!'” Maur akwapel kil wa angkine yangkipm pa la, “Pa yangkipm aklale wrisen a Maur Wailen.”
REV 19:10 Maur akwapel kil la kolpa atom kupm wa elng angko rmpa nepm akilen pa la kipor kilko ileinsel ari kil angkengkopm kolkil la, “A'a, ampur kitn antokg kolpa! Kupm am wa akwap orngwatneikgen Maur Wailen kol kitn ti yat tike, a wa kolen tu melnum alkipm a kipm ukipma Sisas pake, kipm a atning alupmen yangkipm a Wailen Sisas kil laron pa. Kitn mpa kipor kilko ilein Maur Wailen wris ita kolti! Am yangkipm aklale a Sisas kil laron pa ngkat nikgwalpmel tu melnum okwripm akilen angklo la wli ok a tu pa, atom tu laron pake.”
REV 19:11 Kupm ari kitnong pa ari okore itna, woi, kipmteng pa! Kupm ari nimpa nepm watin tangkoren pa itna, a melnum a arpme nimpa nepm watin tangkoren pa tu namput la Melnum a atning nungkulkg ikgalen kwap alkil ariworwor, wa nang wompel ur a kil pa Melnum a alupm nikgwalpm ute aklale kolti. Kil rpma atning yangkipm a tu antokg itna kil pa atom kil akalmpe aklale ute kolti katila kuina ur a melnum antokg pa. Kil wrekg itna rapon pa, pa kil alupm nikgwalpm ute wor kolti ak rapon talpulng wrongmanto eng ak angklin tu wrongkwail.
REV 19:12 Wulmpa akilen pa ari kolen wakg yuk a naruk pa. A tukgunakg akilen pa, kil arpme wanukgmis watipmen a melnum a awi nang wailen arpme arpme pa. Nang ur a nira ela num akilen ti ake mla ur ariwe, kil alkil wris pa ariwe kolti.
REV 19:13 Kil nowe apm watin wail a pikekg angkle walmpopm. Nang akilen pa namput la, Yangkipm a Maur Wailen.
REV 19:14 Tu mapming mapming a almpwrong a rka kaino kitnong pa, tu nowe apm watinet tangkoren rukis wor pa arpme nimpa nepm watin tangkoren pa aknrake tu alntu ti katnuntel.
REV 19:15 Sakal a lepet wom wompen pa or itna ok a kil pa, pa ikga laik ik ngket tu wrongkwail kin a kipman a kanokg ti. Ikga kil itni wailen iye yotuk kalnten itni ikglenten. A wa kil ikga rkganti raingen wain ok pa eli wes pilmpalen kulkwempen a rkganti rkganti wain ok atne pa, pa plan kolen ipma wakget a Maur Wailen a antiwe titnongket wail manten, pa kolen wakg a naruk itna ipma akilen pa la kil ikgam ik kolpake.
REV 19:16 Nira ela apm watin wail a kil nowe pa a ela kinar tatu nepm kimang yipuken akilen pa la kolkil la, Melnum Tukgunakg a tu melnum tukgunakg yela orngwatneikgentel, a Wailen a tu melnum wailen yela orngwatneikgentel.
REV 19:17 Atom wa kupm ari maur akwapel a Maur Wailen ur pa kil itna nampokgen takgni pa. Atom kil akwe yikakatnen naki tu wel a pelng or kaino kitnong pa la, “Kipm kul rki wris eng il okipma wail a Maur Wailen!
REV 19:18 Eng mpa kipm il num a tu melnum tukgunakg, a tu melnum itna ep ikgalen tu melnum a almpwrong, a tu melnum titnongket titnongket, a nimpa nepm watin, a tu melnum a arpme nimpa nepm watin pa, a il num a tu melnum wrongkwail kol tu melnum a aken kwap kalpmlel orngwatneikgen mring alntu, a tu melnum a atn a rpma ak wasrongen alntu, a tu melnum a nang arke, a tu melnum a nang kalpisen. Pa kipm il num a tu pa kimeket o!”
REV 19:19 Pipa wa kupm ari wlikgok tilpmingen pa nampokgen tu melnum tukgunakg a ikgalen kanokg ti a tu melnum alntuwen a almpwrong pa, tu kai takwem rka wris eng la rapon nti melnum a arpme nimpa nepm watin tangkoren pa nimpokgen tu melnum alkilen a almpwrong pa.
REV 19:20 Ari melnum a arpme nimpa nepm watin tangkoren pa arkul wlikgok tilpmingen pa, wa kil wa arkul melnum okwripm kansil pa. Melnum okwripm kansil pa pikekg kansil elng kla a kweikwei titnongket titnongket a tu melnum wrekg paipm eng ari pa itna won wulmpa a wlikgok tilpmingen pa. Kil antokg kweikwei pa ak arkolng tu a tu nira krakg a wlikgok tilpmingen pa elawen, a tu a kapor kilko alein yo a tu ukual kalingen wlikgok tilpmingen pa. Atom melnum a arpme nimpa nepm watin tangkoren pa kil angkli wlikgok tilpmingen pa nampokgen melnum okwripm kansil pa yatenen elng kinar lkim watin a wakg al wes salpa atne itna yongkyong pa.
REV 19:21 A tu melnum atuwekg a antiwel rapon pa melnum a arpme nimpa nepm watin pa almpen amo plalng ak kowri lepet a or itna ok akilen pa. Atom wel wrongkwail pa kai arpmen al tu melnum yipmiri a wuten kil alm amo pa ninan nikgwor.
REV 20:1 Atom wa kupm ari maur akwapel ur pa angkaino anong wor a Maur Wailen pa kulnar. Kil aye ikyom mringen a ak kukwa lkim ok a lkim watin kinar tak ai a plalng kalpisen pa aye kai wam wompel, a wampalekge ampei kalnten kalkut a angkli ore tita pa kai wam wompel.
REV 20:2 Maur akwapel kil arkul wapin paipm wail manten pa, pa ul tingklaket a pikekg tak ai a pikekg kansil Ip ekg Atam ai. Pa Maur Paipm aki Satan pake. Atom maur akwapel a Maur Wailen pa kil yapo nepm wampel Maur Paipm Satan pa la ikga kil rpmi kolpa wring kamel kamel (1,000).
REV 20:3 Maur akwapel angkli ul pa elng kinar lkim watin kinar tak ai a plalng kalpisen, atom kil ak ikyom mringen pa ak ar lkim ok pa tongtong, a anel kla a Maur Wailen pa ak amprin la kil rpmi pa kol wring kamel kamel (1,000). Eng ake mpa kil kinsil lok tu wrong kin a kipman yela kanokg ti iye kai ar pa, kalpis. Wring kamel kamel (1,000) pa kai plalng pipa, tu nukwarng lkim ok pa la kil kul no rpmi i wang tukwok waiketn kolti.
REV 20:4 A wa kupm ari wrik tipmakg a tu melnum a awi nang wailen arpme arpme pa tu melnum rpma pa, Maur Wailen la tu rpmi itning yangkipm a tu wrong kin a kipman pa, atom ikilmpe kitila kuina ur a pikekg tu antokg pa. Wa kupm ari maur a tu melnum watipmen a pikekg laron tu alntu pa la tu ukipma Sisas a wa tu laron yangkipm a Maur Wailen pa atom tu almpen amo pa, tu pa rka. Tu pikekg ake kapor kilko alein wlikgok tilpmingen pa a yo a ukual kalingen kil pa, a tu a ake pikekg tu nira krakg akilen pa ela lngkep a wam atuwen pa. Tu wrong kin a kipman pa tu ikga wa wrekg rpmi atom palng melnum tukgunakg nimpokgen Krais pa ikglen kweikwei wrongkwail pa rpmi i kol wring watipmen kamel kamel (1,000).
REV 20:5 Pikekg ep pa pikekg ake melnum ur amo atom wa wrekg pa, kalpis, atn atn am tu pa wrekg ep pake. Tu pa kolpake, a tu melnum wrongkwail a pikekg amo kaingkai rka pa, tu ikgake wrekg ik wang pa, tu ikga rki kolpa kai wring kamel kamel (1,000) pa kai plalng pipa, tu wrekg rpmi.
REV 20:6 Tu melnum a pikekg amo atom wrekg ep pa, tu pa rukis wriwen wor pake, ti tu itopen o! Amo katnukg pa akentiwe titnongket ur a alok angkli maur wor a tu pa uwi paipm pa, kalpis. Tu pa ikga rki melnum ipma krakgen a Maur Wailen a wa a Krais pa. Atom ikga tu nti Krais pa rpmi itni wailen ikglen kweikwei wrongkwail pa rpmi kolen wring kamel kamel (1,000). Atom maur wor a tu pa ikgake wa imo nti ur, kalpis.
REV 20:7 Wring kamel kamel (1,000) pa kai plalng pipa, tu nukwarng lkim ok pa atom Satan pa kul no kai en.
REV 20:8 Atom kil ikga kai yela nimpelng wikgwikg a kanokg ti kinsil lok tu Kok a Makok pa kai kutnuntel, pa akla tu wrongkwail kin a kipman a anong kanokg yela. Atom uwiyen iye kai tukwem rki wris eng ikga rapon. Tu melnum pa wailet paipm kolen wes ningkrapm a narno unokg ningkrapm pa.
REV 20:9 Satan kil awi tu wrong kin kipman pa rak itna kai elngen kai kanokg yipuken ai a elngen kai kanokg wulompen ai, aye wampure kolti kai kapringen wrik a tu wrong kin kipman a Maur Wailen arke pa, a wa nampokgen anong wail a Maur Wailen kil plan ipma wor wasrongen pa. Tu ak kolpa pipa, wakg angkaino kitnong ti nar alen kai paipm kolti.
REV 20:10 Satan a pikekg kansil alok tu wrong kin kipman kai ar pa, Maur Wailen kil angkliwel elng kinar lkim watin a wakg naruk atne al wes salpa a aris paipm pa itna. Kil angkliwel elng kinar aken wlikgok tilpmingen ep pa nampokgen melnum okwripm kansil pa atom am teng rpma kinar lkim pake. Ikga teng uwi wleket wail miningkranen kolpa itni yongkyong or pa kai pake.
REV 20:11 Wa kupm ari wrik tipmakg tangkoren wail ur a awi nang wailen arpme arpme pa, wa kupm ari melnum ur pa wa arpme wrik tipmakg pa rpma. Atom kitnong a kanokg ti ngkark kai takwlelkgen won a wulmpa a kil ti kolti kai kalpis atn kolpa.
REV 20:12 Wa kupm ari tu melnum a pikekg amo ep pa wa tu wa wrekg itna won a wrik tipmakg a melnum a awi nang wailen arpme arpme pa, tu a nang arke a tu a nang kalpisen. Atom wrkapm pa takerng rmpa, wrkapm pa a pikekg nira kuina ur a pikekg tu melnum a pikekg rka kanokg ti antokg pa. Atom wa tu takerng wrkapm ur a nang a tu a ikga rpmi yongkyong pa. Melnum a rpma atning yangkipm pa, kil rpma atning yangkipm a tu melnum wrongkwail a pikekg amo amo kaingkai pa. Atom kil akalmpe katila kuina ur wor a paipm a pikekg tu antokg katila kol a kil nira ela wrkapm pa.
REV 20:13 Tu a pikekg amo amo elng kinar unokg pa, atom unokg arkulen aye rpma pa, pa unokg pa elngenten no no. A wa tu a amo weten atom maur a tu a itna en a pa, a tu a amo amo kai rka wrik om pa, atom tu a wrik om pa arkulen aye rpma pa, pa elngenten yaper kulngkul. Atom tu kai itna yangkipm, atom melnum a kil rpma wrik tipmakg a melnum a awi nang wailen arpme arpme pa kil rpma ari a atning atn a rpma a kuina ur a pikekg tu antokg pa, atom kil akalmpe katila pa.
REV 20:14 Atom kil angkli Amo, a Wrik Om ti elng kinar lkim watin a wakg wail naruk atnewe pa atom tu awi paipm a ikga itni yongkyong. Pa kol amo katnukg a maur wor a tu a kinar lkim watin a wakg wail naruk atnewe pa a ikga uwi paipm itni yongkyong.
REV 20:15 Kol nang a melnum ur ake nira ela wrkapm a Maur Wailen nira nira nang a tu a awi yaprekg watin eng rpma wor yongkyong ai pa, kil pa wa Maur Wailen la atom tu angkliwel elng kinar wakg wail a ari paipm or ai or ai pa.
REV 21:1 Atom wa kupm ari kitnong weten a kanokg weten. A kitnong tingklaket a kanokg tingklaket pa am kai plalng angket lam ise. A unokg pa am wa kai plalng kol pake, ake wa rka.
REV 21:2 A wa kupm ari anong klalen wail, pa Serusalem weten, a Maur Wailen ukwa angkaino kitnong ai kulnar nampokgen lukglukg wor kolen kin a nakure ariwor nimprampen eng la uwi kipman pa.
REV 21:3 Kupm atning ok ur a akwe a wrik tipmakg a melnum a awi nang wailen arpme arpme pa yikakatnen la, “Ti kipm ri! Maur Wailen am nar ale wan anong rpma nampokgen tu wrong kin a kipman a tike. Kil mpa ntiwen rpmi a tu mpa rpmi kolen wrong kin a kipman akilen. Maur Wailen kil atuwen a kil mpa rpmi nimpokgenten, a wa kil Maur Wailen atuwen.
REV 21:4 Mpa kil lo ikgakg atuwen pa. A tu ake mpa ipma kalkut akg ik ok numputen a uwi wleket, a imo pa, ikga kalpis. Kweikwei tingklaket a kolpa pa am kai plalng ise.”
REV 21:5 Atom melnum a rpma wrik tipmakg a melnum a awi nang wailen arpme arpme pa kil la kolpa la, “Kitn itning, kupm antokg kweikwei weten!” Wa kil wa lanakopm yat la, “Kitn nira kuina ur a wet kupm la kil, yangkipm a kupm la kil pa yangkipm wor aklale wrisen, atom kol a tu itning ukipma kutnun!”
REV 21:6 A wa kil lanakopm la, “Kweikwei am kupm ak kai plalng kol pake. Kupm pikekg ep a wa kupm ikga wa kutnukg. Kupm pikekg ngkaten a wa kupm ikga mprin aimprek. Mla ur a uwaketel pa, mpa kupm la kil il u yaur wor eng mpa kil rpmi wor yongkyong. U pa mpa kil il kalpmlel kolti, a ake mpa rmpen pa.
REV 21:7 Mla ur kil rapon kolpa kai alok angkli wrongmanto alkil pa pipa, kil mpa uwi num itnen kweikwei wor wor kil. Kupm mpa Maur Wailen a kil, a kil mpa warim akupmen.
REV 21:8 Pake tu melnum a ngkark eng awi wleket a arki kalkuten, a tu a ake ukipma Sisas, a tu a antokg kweikwei a paipm pa kai klangkil angko mis, a tu a alm melnum amo, a tu a angkli arkul tita, a tu a antokg tukuk, a tu a arpmen kweikwei titnongket paipm paipm, a tu a kapor kilko alein mring, a mring maur, a krimperk, a kweikwei kolpa, a tu a kansil yangkipmok, tu pa mpa kinar lkim watinet a wakg wail naruk al wes salpa aris paipm pa atnewe pa, pa anong a tu pake. Amo katnukg pa, pa maur wor a tu pa mpa wa uwi wleket a itna yongkyong kinar lkim watin a wakg wail atne pa.”
REV 21:9 Tu maur akwapel wampwomis wampwompwekg a pikekg aye kuntuk wil pa nar num aknirake tu pa atom pikekg Maur Wailen alung ipma wakget aimpreken akilen pa elngnare atom tu ngkaten alung elng nar kanokg pa, atom wris ur atuwen pa kul lanakopm kolkil la, “Kitn kul ntiwopm eng mpa kupm planteitn kin a ak namput Manto Walkg Malkgu War ti la kil ikga uwi kol kin alkilen pa!”
REV 21:10 Maur akwapel pa akyakur maur wor a kupm ti aye kaino itna kaino nang a tipmining watin ur pa, atom kil plantopm anong klalen weten Serusalem pa, anong a Maur Wailen ukwa angkaino kitnong ai kulnar.
REV 21:11 Klalen a Maur Wailen a alen itna anong wail pa, alen klalen paipm kolti, kolen wes ariwor a ak marpm wail ak armpen pa, klalen akilen pa alen kolen wes saspa, a wa kolen u a wri wirwir klainokg pa.
REV 21:12 Yipmingki watin kaino ai kapringen anong pa, a tu angket wanyun pa wampwam yikakwompwekg atnewe. Maur akwapel a Maur Wailen wampwam yikakwompwekg ikgalen yipmingki yayun wris wris pa rpma. Ela tatu yipmingki yayun pa nira nang a om wampwam yikakwompwekg a tu wrong kin a kipman a Isrel pa ela.
REV 21:13 Tu angket yipmingki yayun pa wraur wraur aknrake yipmingki yamping wikgwikg pa. Angket wraur aye kai wompel a takgni aro pa, a wraur aye kai yamping a takgni kinar pa, a wraur aye kinar yamping wompel, a wraur aye kaino yamping wompel.
REV 21:14 Wes wampwam yikakwompwekg a tu ukulam elng rpma ep eng tu ak yipmingki pa elawe pa, tu nira nang a tu melnum wokgen wampwam yikakwompwekg akwapel a Manto Walkg Malkgu War pa elawe.
REV 21:15 Maur akwapel a antiwopm oklala pa, kil aye wampeng ur a tu ak wes malungen muinmainet ur pa akanel pa aye itna, pa wampeng a ak antin kweikwei. Kil ak antin anong wail, a yipmingki, a yipmingki yayun a anong wail pa.
REV 21:16 Yamping wikgwikg a anong wail pa teng irir kolen tita. Maur akwapel kil antin anong wail pa ari watinet akilen pa wampeng a ak antin pa watipmen paipm ai kamel kamel (2,200 kilomita). Wail akilen, a watin akilen, a narno akilen pa, kil antin ari irir kolen tita kimeket.
REV 21:17 Maur akwapel pa kil antin mimisen a yipmingki a kapringen anong wail pa ak wampeng pa ari aken tita pa wampeng kamel wraur tuwek wampwomis wampwompwris (66 mita). Maur akwapel kil antin kweikwei pa ak kweikwei kol a mentepm melnum ak antin antin kweikwei pa ak antin pake.
REV 21:18 Yipmingki pa ak ak wes muinmainet saspa. A wan anong pa ale ak wes malungen muinmainet wirwir klainokg ari kolen mrangku pa.
REV 21:19 Wes a ak armpen yiprokgel yipmingki a anong wail pa pati, nakure ariworwor ak wes auraur a ak marpm wail. Wes a ari wor pa wes saspa. A wa wes ur a kai arken pa wes torpinet sapaia. Wa wes ur a kai arken wekg pa wes aket. Wa wes ur a kai arken wraur pa wes wanukgis emeral.
REV 21:20 Wa wes ur a kai arken wes wikgwikg pa wes satonikis, pa wes watet tangkoren angkete angkete. Wa wes ur a kai arken wes wampwomis pa wes watet konilien. Wa wes ur a kai arken wes wampwomis wampwompwris pa wes pungkis krisolait. Wa wes ur a kai arken wes wampwomis wampwompwekg pa wes pungkis peril a ari kolen unokg. Wa wes ur a kai arken wes wampwomis wampwompwraur pa wes walimpen topas. Wa wes ur a kai arken wes wampwomis wampwompwikgwikg pa wes wanukgis krisopres. Wa wes ur a kai arken wes wampwam pa wes torpinet kuntukgis aisin. Wa wes ur a kai arken wes wampwam yikakwompwris pa wes torpinet watet ametis.
REV 21:21 Tangkwrong wompel wampwam yikakwompwekg a ak ar yipmingki yayun wampwam yikakwompwekg pa kwei ur marpmet wor wor kolen kroitnyimpon muinmainet pa. Tangkwrong wompel wris wris pa tu antokg ak kroitnyimpon wail manten wris kolti. Ya wail a anong wail pa tu antokg ak wes malungen muinmainet klalen wirwir klainokg kolen mrangku klalen pa.
REV 21:22 Ti ake kupm ari yalming a Maur Wailen pa ela anong wail pa. Wailen, Maur Wailen a antiwe titnongket pa, a Manto Walkg Malkgu War pa tuwekg alntuwekg pa yalming a ela anong wail pake.
REV 21:23 Anong wail pa ake la mpa klalen a takgni a kainil pa iklen pa, kalpis. Pa mpa klalen a Maur Wailen a wakg yilpo tareing a Manto Walkg Malkgu War pa mpa klalen len pake.
REV 21:24 Tu wrongkwail kin a kipman yela kanokg ti ikgam ngkom itn ik klalen pake. A tu melnum tukgunakg a kanokg ti ikga wa uwi kweikwei wrikya wor wor atuwen ti iye kawor ik ngkit nang a anong wail pa.
REV 21:25 Mining pa ikga kalpis, ikga ran ikngklei wang ti itni kolti. Yipmingki yayun a anong wail pa ikgam okore itni kolpa ikngklei wang pake.
REV 21:26 Tu melnum wrongkwail yela ikga iye kweikwei wail wail wor wor alntu iye kawor ik ngkit nang a anong wail pa.
REV 21:27 Tu melnum a kalkut watinen, a antokg kweikwei a uk numkropis kamel, a tu a kansil yangkipmok pa, tu pa ikgake kawor anong klalen pa. Nang a tu melnum kukula kukula a nira ela wrkapm a Manto Walkg Malkgu War a awi yaprekg watin eng rpma wor yongkyong pa, tu pa kolti ikga kawor rpmi kawor anong wail pa.
REV 22:1 Maur akwapel a Maur Wailen pa kil plan kupm ti u kop ur a palng angkaino wrik tipmakg a Maur Wailen a wa a Manto Walkg Malkgu War a awi nang wailen arpme arpme pa nar. Melnum ur kil il u pa, kil mpa uwi yaprekg watin eng rpmi yongkyong. U pa wirwir klainokg kolen mrangku pa.
REV 22:2 U pa am angkaino pa kulnar kai am nar ya kuin a anong weten pa kinar pake. A yo ur pa itna kul kop yamping wompel ti, a ur pa itna kai yamping wompel ai. Yo pa wli anti wampwam yikakwompwekg akangklei wring wris wris ti. Ok akilen ti arke akangklei kainil wris wris ti. Melnum ur kil il yo ok pa, kil mpa uwi yaprekg watin eng rpmi yongkyong. Ise a ipm akilen pa a ak angklin tu wrong kin a kipman numpalk aur aur a anong kanokg yela ti numpworen wor kolpa itna.
REV 22:3 Kweikwei wrongkwail a paipm a Maur Wailen kil okanti pa, ikgake iye kawor anong weten pa. A wrik tipmakg a Maur Wailen a Manto Walkg Malkgu War a awi nang wailen arpme arpme pa ikga itni anong weten pake, a tu melnum akwapel a orngwatneikgen tuwekg pa ikgam kipor kilko ilein tuwekg pake.
REV 22:4 Tu ikga ri ikgokg akilen pa a wa nang akilen ti ikga eli lngkep atuwen pa.
REV 22:5 Ikga mining kalpisen, ikga ran kolti itna, ikgake klalen a takgni a wakg yilpo tareing ur iklen anong pa, kalpis. Ikga klalen a Wailen, Maur Wailen pa iklenten kolti. Atom ikga tu palng kolen melnum tukgunakg ti itni wailen ikglen kweikwei wrongkwail ti itni yongkyong.
REV 22:6 Atom kupm atning ok ur a lanakopm kolkil la, “Wailen, Maur Wailen, kil melnum a ngkat okel tu melnum okwripm pa, kolpa atom yangkipm kil a kipm atning pa aklale wrisen, kol a kipm wrongkwail ukipma lupmen kutnun pa. Pa yangkipm a kil ukwa maur akwapel alkil pa kulnar plan kipm melnum akwapel alkilen ti kuina ur wreren eng a palng ti, kutnun nikgwalpm alkilen ti.”
REV 22:7 Kol Sisas kil alkil la, “Ai, kipm itning! Wreren kalpisen kolti eng kupm a kinar pake.” Kipm mla ur a ukipma katnun yangkipm a nira ela wrkapm kil a ak la kweikwei a palng ak wang ti wa ikga palng ik wang kutnukg pa, kipm pa wor pake, kipm itopen o!
REV 22:8 Kupm Son kupm atning a ari kweikwei wrongkwail kil. Kupm ari a atning kweikwei pa plalng pipa, kupm elngtangko won taipur rmpa nepm a maur akwapel a plantopm kweikwei ti la mpa kipor kilko ilein kil ti,
REV 22:9 ari wa kil angkengkopm la, “A'a, ampur kitn antokg kolpa! Kupm am wa akwap orngwatneikgen Maur Wailen kol kitn tike, a wa kol tu melnum okwripm a Maur Wailen a kipm ukipma Sisas pa, a wa kol wrongkwail a atning yangkipm a ela wrkapm kil katnun pa. Kitn mpa kipor kilko ilein Maur Wailen wris ita kolti!”
REV 22:10 Atom wa kil lanakopm la, “Wang ti am wreren kul itna yamping eng kweikwei wrongkwail ti eng a palng tike. Ti ampur kitn ak kla pelp wakum pa ak karponte oklala a kweikwei ampen a planteitn atom kitn nira ela wrkapm kil pa, i ai.
REV 22:11 Mla ur kitn a antokg paipm pa, kai kitn ntokg paipm pa kolpa lanen kai o, a mla ur kitn a antokg kweikwei kimpilpet paipm kolpa pa, kai kitn ntokg kweikwei kimpilpet pa kolpa lanen kai o! Wa mla ur kitn a antokg kweikwei a ute wor pa, kai kitn ntokg kweikwei a ute wor pa lanen kai o, a mla ur kitn a Maur Wailen amprinseitn elngkitna manet pa, kai kitn itni manet lanen kolpa kai o!”
REV 22:12 Maur akwapel pa la kolpake, wa Sisas kil la kolkil la, “Ai, kipm itning! Wreren kalpisen eng kupm a kinar pake. Ikga kupm iye kweikwei pa kinar lkepm wris wris ikilmpe kitila kwap wris wris a pikekg kipm ak pa.
REV 22:13 Kupm melnum a pikekg itna ep ilmpiwen, a wa ikga itni kutnukg. Kupm melnum a ngkaten a kupm melnum a amprin aimprek. Kupm melnum a itna won a kupm melnum a itna yirokg.
REV 22:14 Tu melnum a klak apm watin alntuwen pa rukis ari wor pa, tu pa wor pake, tu itopen o! Tu antiwe a il yo ok a lken yaprekg watin eng rpmi wor yongkyong. A wa antiwe a or yipmingki yun pa kai kawor anong wunen a anong wail wor pa.
REV 22:15 Pake tu a akwap paipm kol nimpa, a tu a antokg tukuk, a tu a arpmen kweikwei titnongket paipm paipm, tu a angkli arkul tita, a tu a alm melnum amo, a tu a kapor kilko alein mring, a mring maur, a krimperk, a tu a wasrongen nikgwalpm a kansil yangkipmok, pa am tu ak ariwe ise, atom pa am rpma walmpopm ise, pa tu ikgakentiwe or yipmingki yun pa kawor anong wail wor pa.
REV 22:16 Kupm Sisas, kupm aktitnongketel yangkipm a maur akwapel a kupm ukwa kinar laron naki kipm wrong kin a kipman mapming mapming a ukipma kupm a rka yela pa, pa la pa aklale wrisen. Kupm ti am Yo Ilkg a no wli klung yapoko a Tepit pake. A wa kupm ti wa Nangkom klalen a rpma ak kong miningket pake.”
REV 22:17 Maur Wor a Maur Wailen pa nampokgen kin a aknamput Manto Walkg Malkgu War pa tuwekg lala, “Nar o!” Kipm melnum wrongkwail a atning yangkipm kil pa wa kipm la yat kolkil la, “Nar o!” Mla ur a u waketel pa, kol kil wasrongen pa, kil kul il u a uk yaprekg watin eng rpma wor yongkyong kil, a ake a armpen pa.
REV 22:18 Kipm wrongkwail a atning yangkipm a kweikwei a Maur Wailen plantopm atom kupm nira ela wrkapm kil pa, kupm alkepm yangkipm titnongket kil kolkil la, kol melnum ur kil ngkine yangkipm manet tiur kai iken yangkipm a ela wrkapm kil pa, ikga Maur Wailen kil ngkine kalkuten tiur kol a la ela wrkapm kil kai eng melnum pa.
REV 22:19 Kol melnum ur kil wa ungkwan yangkipm tiur a Maur Wailen plantopm atom kupm nira ela wrkapm kil pa, ikga wa Maur Wailen ungkwan yo ok a kil ak namputel la kol a kil il eng uwi yaprekg watin eng rpma wor yongkyong, a kil ikgake ntiwe kawor anong klalen wail a kil ak namputel pa, pa la kweikwei wor wor a la ela wrkapm kil pa.
REV 22:20 Kweikwei a kupm nira kil atom melnum a kil atning a ari atom ak titnongketel yangkipm kil pa, kil la kolkil la, “Am aklale pake, wreren kalpisen eng kupm a kinar pake.” Pa aklale, Wailen Sisas, kitn nar o!
REV 22:21 Kupm oklala naki Wailen Sisas eng mpa kil plantepm ipma wor a ngklin kipm wrongkwail kin a kipman a Maur Wailen. Aklale wrisen.
