GEN 1:1 MIZMIZ 1 Agraretge Agudide kotor a gesep daratagemda,
GEN 1:2 able gesep ge irdireder orwaikak a lukak. Able muimui karem ge gair lu narimlare kupkupi detrapeder abi tumge, a Agudira sasrim atatmirer tumem able nige.
GEN 1:3 Agud eudim etkaret, “Bi obakaeret”, ege bi bakaerti
GEN 1:4 Agudira serer barki nalu e dasmeri.
GEN 1:5 E eudim bi detakemuda kupkupilam, a able bi nei itkiri Gerger a kupkupi nei itkiri Ki. Ki a idim ge kikem gerger irdireder.
GEN 1:6 Agud ga etkaret, “Kes obatreret eipuge ko ni wanakesmuda neis utebem” - ege akaida.
GEN 1:7 Agudide able kes ikaida arem ni detakemuda seplelam.
GEN 1:8 E able kes nei itkiri Mi. Ki a idim ga 2 gerger irdireder.
GEN 1:9 Agud eudim etkaret, “Able ni pe milam sepge egmedi (wataba) okokise waetami ya wayakai ged wedaketi.” - a ege akaida.
GEN 1:10 E able ged nei itkiri Gesep a able ni ge netat utebge etami, e nei itkiri Gur. A Agudira serer barki nalu e dasmeri.
GEN 1:11 Agud ga etkaret, “Gesep turum weud gair tonar lunege; luneg wi no kep waeslare a able lu yaba kep wadaragri muige yaba ageg” - a ege bakerda.
GEN 1:12 Able gesep turum eudi gair tonar lunege a Agudira serer barki nalu e dasmeri.
GEN 1:13 Ki a idim ga 3 gerger irdireder.
GEN 1:14 Agud eudim etkaret, “Mige bi obakaertare ko kepu wanakwaelei gerger a ki, a ko waetomeretlare kerker, gerger a urut;
GEN 1:15 wi zorom obazimurwa mige ko bi waiswelare gesepem” - a ege bakerda.
GEN 1:16 Agudide neis au bi dararsiri - lim ko abra sasrim wadike gergerge a meb ko abra sasrim wadike kige.
GEN 1:17 E wer gako dararsirda. Agudide able bi idagi mige ko gesep bi waiswerlare,
GEN 1:18 sasrim yaba wadaragri gergerem a kiem, a ko kepu wanakweilei bi a kupkupi. Agudira serer barki nalu e dasmeri.
GEN 1:19 Ki a idim ga 4 gerger irdireder.
GEN 1:20 Agud ga etkaret, “Ni turum weud gair tonar large a able mikes turum weud mi eburge.”
GEN 1:21 Agudide daratagemda gair tonar au gur ebur gair tonar ebur pe able gurge waurder a gair tonar mi ebur. Agudira serer barki nalu e dasmeri.
GEN 1:22 Agudide yabi gair werkabem nakerda a able ni ebur daratagerda ko nosik yaba waeprao gurge a ni wadamiare.
GEN 1:23 Ki a idim ga 5 gerger irdireder.
GEN 1:24 Agud ga etkaret, “Gesepide gair tonar gesep ebur waeprao: uteb a ad ebur, aule a kebile” - a ege akaida.
GEN 1:25 Agudide eudim yabi gair darasirda, a abra serer barki nalu e dasmeri.
GEN 1:26 A Agudide eudim detauti, “Pe irdi mi le dararsirei; wi wadaralei merbi kaise a merbi orwaiorwai. Yaba yako sasrim wadarake large, mi eburge a gair gesep eburge, uteb ebur a ad ebur aule a kebile.
GEN 1:27 Agudide eudim le daratagmi yabi nakaida ko abi kaise wadaralei. E yabi kimyar a koskir daratagmi,
GEN 1:28 werkabem nakaida, a detauti, “Mitkar omaskir ko waba wanagri wayakai waba nosik ya waurder kemerkemer gesepge a gesep sir wadamilare. Ka wabi dikweida able sasrimge ko waba wanake large, ni eburge, a gair ad gesep eburge.
GEN 1:29 Ka emetu dararsirda gair tonar kep a kurup lewer wabim arwem;
GEN 1:30 a gair gesep eburem a mi eburem ka sogi a lamlam luneg dararsirda yabim lewerem” - a ege akaida.
GEN 1:31 Agudide gair lu darasmerda ge e dararsirda, ege abra au serer barki. Ki a idim ga 6 gerger irdireder.
JON 1:1 Oplera Mir teosmelu Zonaim, Amataira werem kega, “Bakiamu Ninebeiem able auka uteb, a abi able opem detager ableglam abi lera adud tonar tabakiamudari kari opge ekweidari.”
JON 1:2 Ege Zonade no nerut gab etaruklu e abi bakiamulu Zopaem ge nade nar barsirer Tasis atiem.
JON 1:3 E tabara ati bodomalam dikailu a akawerti able narge waiakai e ko obadmirikdari Opleilam ege Oplelut au wag temariklu, auka wag nade able nar akailu arap paikaige ga dawer.
JON 1:4 Pazar eudi geumge bakeri a netatnetat taba agudem erer bakrier a bakeri narlam beberlu erepda adem dikrida ko able nar waikaidarda perper obaidari.
JON 1:5 Zona ge kikem bakiamulu muige ut tipereder.
JON 1:6 Narkolelut ge abi terdari a abi titmeri, “Ma nalu ikeli ut nauperidi? Eti a mara agud damos upiatidarem karim e merbi ia nasge watidikerare a mi iako nole nabaume.”
JON 1:7 Able pazar tabara netatnetat batagerda, “Baru mi lu dakeware a daraimrare able luglugira atamilam pe netira gem able au wagide deremli.” Able pazargize ga lu dikeuda ege able luglugira tag bamarida Zonaim.
JON 1:8 Wi eudi abi itmerda, “Ma kerbi detagrare nako marialam paki uridli muige able adud paikaige? Nalu pema ikeli? Na gedlam ma tabakiamudari? Ma na gedbuai nali?”
JON 1:9 “Ka Ibru nali”, Zonade iabi daratagrare. “Ka isorgiru waikerer able Ople, able Agud kotorira, ge e able gur a gesep daratagmi.”
JON 1:10 Wi umele urder Zona Opleilam tabadmiriklu. Ablegide iabi geum dararepda wige batkarti, “Ma naluglam able korepge tabadmirikda?”
JON 1:11 Able wag a gur ekelei aukaise adud belei. Able pazargize abi itmerda, “Ki marim nalu akairare waiakai able au wagira urker wedemri?”
JON 1:12 “Kari able gurem natimdare a ei wakai mapodan obai. Ka umele kaka giz nali ableglam able auka adud wagide wabi derpeda.”
JON 1:13 Ege able pazargize no mirem kelaru uzer erebda ko able nar waigareda gesepem a wi umerkak waikadarda ableglam able wagira urker no ko aukaise baisweri.
JON 1:14 Wi ga eudim Opleim erer bakri, “Ople, ki mari namosa, ma nole kerbi dikerare nabaume ese ki able lera idid adem dakadarare.”
JON 1:15 A wi Zonai erpeidarda adem batawereda gurem ege keko metalug barki.
JON 1:16 Ablegide able pazar nakerda Oplei geumge bakeri, wi eudim agimurda tabara zegulu a mir idagda kega wi no abi tebteb wadamilare.
JON 1:17 A Oplei Mirlam au laret Zonai irmilu a ega dawer neis a netat gerger a ki muige able au larira kem.
JON 2:1 Able au lar kemlam Zona erkepasameilu taba Ople Agudim.
JON 2:2 E detauti, “Muige kari adud paikaige ka Agudim ererekri a E kara erer terpeida. Ka ererekri au muimui eudle paierlam a Ma kara erer tasri.
JON 2:3 “Ma kari au karemge natimeda au muikakarem, nade able podagadgize kari narpomerda a mara dugdug zeuber kari tumge baraplare.
JON 2:4 “Kage natkarti: “Mari erkeplam kari adem namarikdarda, ka umele ka iako erkepnakereder Mari zogozogo metaem.
JON 2:5 “Able nide kari kemerkemer natkami eud maike, aukaremira mui kari nairumada. Meo kari kerimge arpomreder.
JON 2:6 “Ka baitri nade paserira sip tadaramar, able gesepem ge kari kar narker niaiem epe mama kari nagimedari eudlam Ople ae kara Agud.
JON 2:7 “Nade kara eded adem dorier, kage Mari nakepwari, Ople, a kara erkepasam baurwari Marim Mari zogo utebem.
JON 2:8 “Netiba pe tag arsirarsir agudem kemerkemer tababu baiswereda, wipe bapekda Agudi upiatidarlam.
JON 2:9 “Marim iaka auspirwed dakrier a ka iako Marim zegulu agimulu a kara nalu mir geka Mari nakwari kai akailu sikak obai. Azimwaret tikase Opleilam.”
JON 2:10 A Oplelut able lar au aler detagri a ege Zonai adem ikeida watwet gesepge.
JON 3:1 Agudide Zonai nerut gaber ga detagri,
JON 3:2 “Bakiamu Ninebeem able au utebem a leem etomeret able mir geka mari nakwari.”
JON 3:3 Zonade Oplera mir dirmiri a bakiamuda Ninebeem able auka uteb irdiredi, lelut wais 3 gerger ko abi wadatupir.
JON 3:4 Zona eudi digmi Ninebeige kemerkemer gerger keubu e able mir etomerti, “40 gergerge Ninebe ia obatkoare.”
JON 3:5 Ninebei legize eudi tabara oka emarda Agudi mirge. Wi tabara batagerda ko gair le lewer obazigwarare a gair le aule kebilekem adud wali waitkirare a tababu obakekrare.
JON 3:6 Nade Ninebera ople able miride erpeilu e ekweilu adem digem taba baolam, wali tabara adem igi, adud wali ami a tibige emrilu.
JON 3:7 E able mir Ninebe leem emariklu: “Able ople a kerimle pa uridli iaba mir wabim pedike: nole lelut netat lewer wairuser; gair le a ebur peki sab daragrida arolam a arilam.”
JON 3:8 Gair legize a eburgize ko adud wali obatkir. Gair le ko alel erkep obasamwa a tabara adud tonar lu aker wadikairtare.
JON 3:9 Karim Agudide tabara akepwar urkerlam wadimipigemer ko omarem a mi nole nabaume.
JON 3:10 Nade Agudide tadasmeri nalu wi ikerda a nako wi taba barbar tonarlam adem batarda Ege iabi omarge tarakerda a nole iabi daratkoda ge E detauti E ia waikaida.
JON 4:1 Zonara sir dormeida able luglam a weku abra barki.
JON 4:2 E eudi erkepasameida, “Ople, ka nole detauti nade ka mena gedge nawer? Ableglam ka dudumge badmirikda Tasisem. Ka umele nawer mama debe tonartonar a au omaromar Ad nali, wapum lidagebge a au degdeg mara lag ike leem a able Ad ma nali ma nole lagkak le detko.
JON 4:3 “Pe irdi, Ople, kara eded adem ikao, karim dike ka sikak nawer eud a nole eded.
JON 4:4 Oplelut abi tiditagri, “Nako marim sikak dike ma wekuge nawer?”
JON 4:5 Zona eosmeda bakiamuda emrida naiger pekge Ninebelam. E mud tabara diuri a able mudge emrida, dikairi nalu ia wakaida Ninebeem.
JON 4:6 Oplede arpomerarpomer luneg ikaida omeida a Zonai kebikebi mud kirmem ikwari waiakaida abra sagim ko adem wadami a Zonara eudi serer barki able lunegem.
JON 4:7 Mabekmabek nerut gergerge, Adi mirge ukide able luneg irwi a ipiti.
JON 4:8 Nade lim ga teupamada Adide urweriurweri naiger wag temarikda a able limira urweri Zonai kirimge emriri abi ikaida abra erkepinor barki. Zona laglag weumida ege eudi able mir detauti, “E au sikak ia wadike karim ka naumilu a nole idid nawer.”
JON 4:9 Ege Adide Zonai detagri kega, “Nalu sasrim pe mara dike ko ma able luneg wekuge akai”? Zonade abi detagri, “Kara sasrim nagri wekuem able korepge ka umele naumilu.”
JON 4:10 Oplede abi detagri, “Able luneg omeida netat kige a eumida nerut kige a mara pe abim omar barukli; ma nole netat lu abim ikaida ko abi waikaida waomeida!
JON 4:11 “Epe Ninebera ebur a pako 120,000em le ko duridli, able le pe nole mamoser umele uridli debele adudlam. Ei kara nole ia nas obaruk Ninebeem able au utebem?”
MAR 1:1 Able debe mir peike Iesu Kerisora, Adira Werem.
MAR 1:2 Able ad ge bagrareta mokakalam ge Isaia peropetade ditari: Ma asor; Ka yaka kikem kara miraisisle amariklu marim gab wadirsir.
MAR 1:3 E ya erer wekrier muige sogipurge, Wa wabu barsirawem Opleem; gair lu ikerewem barkak ober.
MAR 1:4 Able miraisisle, Zone Bapataiso, batomerdari muige sogipurge. E le bapataiso darapaitlare a leem marauermer: “Adem tabatarare wabi witlam a bapataiso bapaitare ya waiakai Adide waba wit adem waitkir.”
MAR 1:5 Le tabakeslare Ierusalemalam a pako kemerkemer Iudaialam bakeslare bauser Zonei wasorda. Na legize ge tabara wit detautlare ege yabi bapataiso darapaitlare muige Ioridanoge.
MAR 1:6 Zonera walige kamela muslam dikereder a ege amier kelarkelar lager abi gemge dimrireder. Abra lewer ge pirn nagriweretlare a pako isawira ni.
MAR 1:7 Ege le natomeretlare, “Able le penoko kari keubu ikaseredi e au sasrimsasrim karim dali; ka nole abkorep ko abra teter gab adem daogilu.
MAR 1:8 Kaka wabi bapataiso nige depaiteda, e ya wabi bapataiso wadikerlare Lamar Zogoge. MRK 1.9-11
MAR 1:9 Keubu, Iesu tabakiamuda Nazaretlam muige Galiiaiage a Zonede abi baptaiso dikailu muige Ioridano keperge.
MAR 1:10 Nade e nilam tegimeda, aududumge Iesude dasmeri kotor ekesmuda a ege Lamar Zogo dibadiba noge abim tabi.
MAR 1:11 Ege kodomir teosmeda kotorlam, “Mama kara nasnas Werem nali. Kaka mari sererge nali.” MRK 1.12-13
MAR 1:12 Au dudumge able Lamar Zogode Iesui emarikda sogipurem.
MAR 1:13 E ge sogipurge dawer Satanade abi mirem ikerer 40 gerger. Aregareg ebur ge urder ege angela no tabatweri abi aseseredlare. MRK 1.14-15
MAR 1:14 Keubu wader luge, Zonei didbarda itimedarda, Iesuge bakiamuda Galilaiaem Adira Debe Mir ermer.
MAR 1:15 “Able barkak kerker pedikeredi,” e atkarti. “Adira basalaia maike ikeredi! Wa tabatarare wabi adud tonarlam a wage Debe Mir irmirare.” MRK 1.16-20
MAR 1:16 Nadege Iesu digmer Galilaia Keper tawerge, ege nardari neis lar-asaperle Saimona a abra barada Andru, wige lar esaperlei larasaperlugu.
MAR 1:17 Iesude yabi daratagri, “Wa tabakiamulam karidoge kai wabi derwere le asaper.”
MAR 1:18 Wige keko tabara larasaperlu darakareta a abi irmirei.
MAR 1:19 E kebikebi ko bakiamuda ege nardari tabara neis barada, Zemis a Zone, Zebediia werem. Wi taba narge darawedei tabara larasaperlu dirsirlei.
MAR 1:20 Nadege Iesude yabi nardari ege keko yabi darabgeri; wige tabara bab Zebedi a abra dorgele narge darakairtiei wige Iesui irmirei. MRK 1.21-28
MAR 1:21 Iesu a abra memegle tabakiamuda able utebge abra nei dikereder Kapanaum. Nerut Sabatge Iesu bakiamuda sunagoge akaida marauermer.
MAR 1:22 Able le ge turder bazigmurati ableglam e barkakle nerwerlare sasrimge, aukaise Aotarleem.
MAR 1:23 Keserkeser ege kimiar tabakiamuda sunagoge. Demoni abidoge dawer e ererekrier,
MAR 1:24 “Mara nole nalu peike, Iesu Nazaretle! Ka umele ma taba kerbi detko. Ka umele mama Zogole Adira naii.”
MAR 1:25 Iesude aukaise dimoni detagri, “Ma mir baimi mage adem able kimiarlam teosmer!”
MAR 1:26 Able dimonide able kimiar aukaise deskerdi, aukaka mir etkarti a adem teosmeda.
MAR 1:27 Ege le bazigmuarti. Wige tabara bautmerlare, “Nalu peike? Able erwer nerut korep ike. Able le pe barkakle dali. E aukaise dimoni detagri a wipe irmirda.”
MAR 1:28 Ablegira mir dudumdudum ebrerdi kemerkemer Galilaiage. MRK 1.29-34
MAR 1:29 Wige sunago dikaireta a bakiauda natkak Saimonyabim metaem Andruei. Zemis iba Zone yabidoge bakiamudariei.
MAR 1:30 Saimonara neiwet ama auka ziruziru gimgim sike ipereder. Au dudumge wi Iesui detagerda abi gimlam.
MAR 1:31 Ege bakiamuda abidoge tekweida abi tage erpeida a abi upiditida abi ikaida imridari. Able zirude abi dikairti ege siklam adem eupamada a akaida yabim ga lewer dirsirer.
MAR 1:32 Able kige nade lim baraigida legize Iesuim taraislare gair gimgimle a wader le ge yaba dimoni urder.
MAR 1:33 Gair le able gedlam etami adge tege.
MAR 1:34 Iesude mitkar le nadgilare gair korep gimlam a dimoni adem nauslare. Able dimoni nole mirkak ableglam Iesu laglag dawer. E able lu ikaida ableglam wi umele urder e nete dali. MRK 1.35-39
MAR 1:35 Nerut idimge keubu ga lim teupumada Iesu siklam adem eupumada a meta dikairti. E adem bakiamuda able uteblam lekak utebem, a ege eudi erkepasameida.
MAR 1:36 Ege Saimona a wader no bakiauda abi daraimerda.
MAR 1:37 Nadege wi abi erdarda, wi abi detagerda, “Gair legize mari naraimreda.”
MAR 1:38 Ege Iesude yabi daratagerda, “E debele dikeredi mi nabakiaware wader utebem pe naridwerteda ya waiakai ka umele koka yabim mir arme. Ableglam kaka tabakiamuda.”
MAR 1:39 Ege digmer muige gair utebge Galilaiage marauermer sunagoge a adud lamar adem nauslare. MRK 1.40-45
MAR 1:40 Netat kimiar gegur-bad gimgim dawer tabakiamuda Iesui opem taba kokmamu emrida a abi upiatidarem bagwi. E etkarlu kega, “Ese ma laglag nali, ma umele kari nakai ogkak nabailu.”
MAR 1:41 Ege Iesura nas barki, tabara tag itrimurikda a able le erpeida. Iesude able kimiar detagri, “Ka laglag nali. Ma akai ogkak bai.”
MAR 1:42 Keko able gimide able le dikairti a ege akaida ogkak baidari Mosei Gelar pekge.
MAR 1:43 Iesude eudi abi aburker adem emarikda, kikem e abi barkak esereser detagri,
MAR 1:44 “Ma nole netat le able luglam detager. Ma no barkak bakiamu a mabu tabatomer merkemem a zegu lewer mara agimu ge Mosede Gelar idagi able tonar gimlam, ya waiakai gair le umele ober ma emetu akaida ogkak baidari Gelar peke.”
MAR 1:45 Ege able le no bakiamudari gair le daratagelare, able mir ebrerder gair utebge. Able luglam Iesu nole paretkak leem eosmerer e no lekak utebge dawer a ege le mena tabakeslare abra ardar gair uteblam.
MAR 2:1 MRK 2.1-12 Kepkep gerger barukdarda Iesu ko akomeda Kapanaumem, ege legize asorda e ko takomeda taba metaem.
MAR 2:2 Au kub lera etami wige meta damida mitkar barki mena adge tege derapeiri. Nawer ge Iesude marauermer mitkar leem,
MAR 2:3 wader le bosi, neis a neis legizege atmutatmut le tigardidere.
MAR 2:4 Wi umerkak able kimiar waigareda Iesuim ableglam yaba gab aomaom ikereder able mitkarlelam, wige ao dirbidere totge lesui natkak. Wige able le ditimdidere taba papekge able nebge.
MAR 2:5 Nade Iesude yaba au owatur dasmeri ege able atmutatmut le detagri, “Kara werem, mara wit pe bamaidereda.”
MAR 2:6 Wader Aotarle ge emreder. Wige dikepwarlare,
MAR 2:7 “E seksek dikeredi able leem e ke waditauter. Nole le ko dali e wit uwadimaidered, no Adide wit wadimaidered.”
MAR 2:8 Iesu keko umelebaidari wi nako dikepwarlare, ege eudige daratagerda, “Wa nole ke dikepwararwem.
MAR 2:9 Wage ke dikepwararwem: nalu sikak dikeredi, able atmutatmut le obatager, “Ma wit bamaiderdi” a “Ma ekwei, papek mara etaruk, mage nagem”?
MAR 2:10 Pe irdi ka yaka wabi datomertare able Le Wermira sasrim dikeredi able gesepge ko wit waimaidered.” E eudige atmutatmut le detagri,
MAR 2:11 “Ka mari aukaise natagri, ma eti, mara papek etaruk, mage bakiamu gedim.”
MAR 2:12 Ege legize abi lidkarem dasmerlare nade ge e ekweilu, tabara papek etarukda a bakiamuda. Wige bazigmuarti a wi Adi dispilare. Wi tabara batagelare, “Mi nole able orwairorwair lu kikem dasmerda.” MRK 2.13-17
MAR 2:13 Iesu akomeda bakiamuda Galilaia keperge wege. Lera kub abim tabakiauda ege eudige akaida yabi nerwerda.
MAR 2:14 Nadege e digmer, ege bodom bakir atkimed le erdari, abra nei dikereder Libai, Alpiasira werem. Libai ge imireder taba dorge utebge. Iesu akaida abi dabgeri, “Ma kari tararmir.” Libai ekweidari a abi irmiri.
MAR 2:15 Keubu, Iesude lewer erwer Libai metage. Wader bodom bakir atkimed le a adud le ko ge turder.
MAR 2:16 Wader Aotarle ge Parisaio urder Iesui erdarda lewer erwer able lekem, wige abra kaimegiz darautmerda, “E naluglam lewer eroli adud lege?”
MAR 2:17 Iesude yaba autmer mir asri, ege eudige akaida, “No gimgimle pe lukuple iaglag uridli, gimkakle pe nole lakak. Kaka tabakiamuda adud le darabgerare, nole debele.” MRK 2.18-22
MAR 2:18 Netat gergerge, Zonera a Parisaiora kaimegiz nole lewer arokak urder. Wader le tabakiauda Iesuim a abi itmerda, “Zonera a Parisaiora kaimegiz lewer arokak uridli. Naluglam mara kaimegiz nole ko lewer arokak waurder?”
MAR 2:19 Iesude detauti, “Wa nalu dikepwareda? Nako le paipu lewerge oba werer ge obakerer? Nole. Nade paipule yabidoge wadawer wi lewer wairolare.
MAR 2:20 Able kerker ya watabaruk nade paipule ya yabialam obakiamu. Able gergerge wi ya lewer arokak waurder.
MAR 2:21 Nole netat lelut kerkar walimog etketi emeret walige. Nalu ya wakai? Able kerkar walimog ya obazrare emeret walilge.
MAR 2:22 A nole netat lelut kerkar waina epaiterdi muige emeret tarporge. Nalu ya wakai? Able kerkar wainade ya able emeret tarpor wadiskimer, a able waina a pako tarpor ya obatkowam. Nole, pardarlegize kerkar waina waipaiterdare muige kekar tarporge.” MRK 2.23-28
MAR 2:23 Sabadge, Iesu a abra kaimegiz wi daragemda bakiauda kon gedubge. Abra kaimegiz bakiauda wader kon etoperda.
MAR 2:24 Ableluglam Parisaio bakeri Iesui ikaidarda, “Ma yabi darasmerare! Wi keriba geiar erapeda wi able lu ikereda Sabadge.”
MAR 2:25 Iesu yabi daratagerda, “Agekar wawa etageda Dawitara mir, nade e a abra armirle wige wererge bakeri.
MAR 2:26 Ege bakiamuda Adi metage badari a arito irwi pe no Adim wagimuaretlare. Able lu ge akaida nadege Abiata Kirim Merkemle dawer. Muige kerbi Gelarge, no merkemide tebteb arito wairwer; Dawitade irwi a wader ge tabara armirle naiswerda.”
MAR 2:27 A e yabi daratagerda, “Sabadge barsirda leem, nole le barsirda Sabadem.
MAR 2:28 Pirdiredi, Lera Werem pe Ople dali gair lugira, Sabad ko irdiredi.
MAR 3:1 MRK 3.1-6 Iesu ge ko bakiamuda sunagoge badari, ege le ge tadawer abra netat tag auserauser.
MAR 3:2 Wader le ge turder wi laglag urder Iesui ikelare e seksek ikeli, wige abi lidem dasmerlare ya waiakaida wi wadasmerda ese e able le waidgiri Sabadge.
MAR 3:3 Iesude able tag auserauser le ikaidari, “Ma ekwei a kei taragem kikemem.”
MAR 3:4 Ege Iesude le nautmerda, “Nalu debeiu ikeredi merbi Gelarge pe merbi dikereda ma Sabadge ikerer? A nalu adudlu? Nako e debele ikeredi ma lera idid daseserder? A debele ikeredi ma abi ipit?” Wige nole abi mir ikwarda.
MAR 3:5 Iesude yabi lidem darasmerlare urkerurker, e eudi akaida okasosoksosok baidari ableglam wi nole umerkak urder. Ege eudige able le ikaida, “Ma mara auserauser tag itrimurik.” Ege abra tag dakaida sikak baidari.
MAR 3:6 Nade Parasaio gize sunago dikaireta, wige baka dudumdudum obapita wader Erodi lekem, a wige mir ipulare nako wi Iesu waipita. MRK 3.7-12
MAR 3:7 Iesu a abra memegle adem bakiauda Galailia keperem ege auka mitkar legize yabi narmirlare. Wi tabakiauda Galilaialam, Iudaialam, Ierusalemalam, Idumialam, able gedlam Ioridanoge apekge a able gedlam pe Taia a Saidon ge naridwerteda. Able au kub lera tabakiauda Iesuim ableglam wi wasolare e able lu waikere.
MAR 3:9 Iesude tabara memegle daratagerda wi kebi nar wadirsirda abim ya waiakaida legize umerkak abi waitmagda.
MAR 3:10 E mitkar le ge nadgilare, a gair gimgim le mena tabakeslare abim ya waiakaida wi abi waitutirda.
MAR 3:11 A gair kerkerge na lera ge dimoni urder yabidoge abi erdarlare, wi kokmamu bamrer abi opem ererbakrier, “Mamanali Adira Werem!”
MAR 3:12 Iesude dimoni aler daratagerlare, “Wa nole le daratagrawem kaka nete nali.” MRK 3.13-19
MAR 3:13 Ege Iesu baka paserge ogi a tababim le darabgerda ge e laglag dawer, wi abim tabakiauda.
MAR 3:14 Egeyabialam 12 kaimegize natutidarda. E yabi daratagerda, “Ka wabi ditutidarda wa karidoge uridwa. Ka yako wabi damarkare adem marauarmem, a waba ya sasrim wanagri ko dimoni adem islare.”
MAR 3:16 Able 12 pe uridli ge Iesui natutidarda: Saimona (Iesude abi nei itkiri Peteru),
MAR 3:17 Zemis a abra barada Zone, Zebedaiora neis werem darali (Iesude yaba nei ditkiri Boanagiz, pe dikeredi Girgirira Werem).
MAR 3:18 Andru, Pilipo, Batolomu, Mataio, Tomas, Zemis (Alepaiara werem), Tadaio, Saimona able Zelotle,
MAR 3:19 a Iudas Iskariota, ge e keubu akaida Iesi dipi. MRK 3.20-30
MAR 3:20 Iesu a pako abra memegle bakiauda metaem. Wi umerkak lewer wairoda ablelam au kub lera etami muige metage.
MAR 3:21 Legize able mir Iesura buai daratagerlare. Wi detautlare, “E akaida peimpeim baidari!” Ableluglam abra buai tabakiauda mirem abi wairpeirare a waigareda gedim.
MAR 3:22 Able kerkerge wader Aotarle tabakiauda Ierusalemalam. Wi mir igiarlare, “Beelzebul pe Iesui doge dali. E dimoni adem daramaidere able dimoni kirimlera sasrim abidoge dikeredi.”
MAR 3:23 Ableluglam Iesude yabi darabgerda tababim ege yabi daratagelare mir abisir miru. E yabi daratagelare, “Satanade umerkak Satana adem waimu ko ei umerkak mena kelarkelar wadawer.
MAR 3:24 Ese wader gedle obaskare mogmog ober a tabara obareslare, able gedle waiakai sasrimkak obai.
MAR 3:25 Ese wader netatbuai obaskerare mogmog ober a tabara obareslare able netatbuai waiakai sasrimkak obai.
MAR 3:26 Able tonarge, ese Satanade tabara le wanarsare, e waiakai sasrimkak obai a abi sasrimira mop wadikereder.
MAR 3:27 Ese nale mirem aukelarkelar le metage obau ko abra lu erwamer wadais, e kikem able aukelarkelar le lageru wadidbar. No pe dikeredi e umele aukelarkelar lera lu erwamem wadais.
MAR 3:28 Ka wabi agekar detagreda; Adide umele le omar ge waikai witlam a taba gair Adi opmir atagerlam.
MAR 3:29 Adide umerkak wit wadimaidered pe legize Lamar Zogoi opmir detagreda. Yaba witira bodomalam pe niaiem dikeredi.”
MAR 3:30 Iesude able mir detauti ableglam wi Lamar Zogoi dabgelare dimoni dali. MRK 3.31-35
MAR 3:31 Ege Iesura ama a wader barada tabakiauda ga adge tikweider. Wi miraisisle emarikdarda muiem oba Iesui adem watismeda.
MAR 3:32 Able lera kub ge emreder Iesui dairumaretlare a wige abi detagerda, “Ma dasmer, mara ama a barada pema adge tikwedi a wi laglag mari mir wanatagrare.”
MAR 3:33 Iesude eudim detauti, “Nete kara agekar ama dali? Nete kara agekar barada dali?”
MAR 3:34 Ege e le darasmerlare ge abidoge emreder ege detauti, “Wa dasmerare kara agekar ama a barada.
MAR 3:35 Netide Adi irmili e pe kara barada dali, kara sisi dali a kara ama dali.”
MAR 4:1 MRK 4.1-9 Iesude ko dirmisidan le nerwerlare ni keper tawerge. E bakiamuda narge akawerti muige temrida ableglam lera nikidetreder taba abi deirumareta auka mitkar. Able nar gurge eper, a able lera ge nikidetreder ge wege ekweider maike gurge.
MAR 4:2 Ege gair lu nerwerlare mir abisir mirge. Nadege e yabi nerwerlare ege detainer,
MAR 4:3 “Wa asrare! Geduble bakiamuda tabara luneg kep wairti.
MAR 4:4 Nade ga e kep diger muige gedubge, wader batwerer gabdege, ge ebur gize narolare.
MAR 4:5 Wader kep ge batwerer neidneid sepge, ge nade nole mamor sep imireder. Able kep aududumdudum baperigdarda ableglam neidneid sep imiredi.
MAR 4:6 Nage ga lim teupamada, able luneg natitida batrauda. Wi aududumdudum baumi ableglam yaba sip nole au muige daramarwerteda.
MAR 4:7 Wader kep batweri iukazge wige yabi daramisirda, a wige bomi nole agegkak.
MAR 4:8 Ege wader kep ge batweri debe sepge. Wi baperigdarda, a bomi a ageg bakerda; waderlera kepkep ageg daragriweretlare, waderlera kebi mitkarmitkar a waderlera aukamitkar.”
MAR 4:9 A ege yabi daratagerda, “Able mir pe dikeredi gair legize wasrawem a mamor waikedrawem tabadoge.” MRK 4.10-12
MAR 4:10 Nade ge Iesu tebteb dawer, wader abra armirle tabakiauda abim, kemem abra memegle a abi itmerda, “Ma sikak mir abisir mir ko detaut.”
MAR 4:11 Iesude yabi daratagerda, “Wabi ge gumik daiswerda Adira Basalaia. Nade pe wader adge turidli gair lu asreda muige mir abisir mirge. Able korepge, wi ya erkep waigreder a nole momor wadasmerlare; wi ya wasorlare a nole waikedilare. Ableglam ese wi ya barkak wadasmerlare a waikedilare wi ya ko watabatare Adim a e yabi ya wadaramaiderdare. MRK 4.13-20
MAR 4:13 Ege Iesu eudige akaidari yabi daratagerda, “Ese wa nole able mir abisir mir wabidoge ikedilare, wai umerkak gair abisir mir wabidoge idaglare.
MAR 4:14 Able gedublelut Adira Mir wadirit.
MAR 4:15 Wader kerkerge able kep batwerer gabdege; able legize pe mir asreda epe keko Satana tabakesli yabialam able mir adem aisli pe yabidoge barteda.
MAR 4:16 Wader kerkerge able kep batweri neidneid sepge; able legize pe mir asreda a keko irmireda sererserer.
MAR 4:17 Epe no omeili kelarkak sipsip yabidoge, a wi no waurid nole niaikak a yako obaum. Nade ya asiasi wanagri a nade ya yabi wanareslare abieglam wi able mir irmireda, wi aududumdudum obako able mir asorlam.
MAR 4:18 Wader kerkerge able kep batwerer lukazge; able legize pe mir asreda epe gair akepwar able gesepira, bodom bakirlag a gair debelulag niki yabidoge detredi a daramisreda able mirlam, a wipe nole agegkak uridli.
MAR 4:20 Wader kerkerge able kep batweri debe sepge; able legize pe mir asreda a ikadareda a yaba ageg bakeri: wader kepkep, wader kebi mitkar a wader aumitkar. MRK 4.21-25
MAR 4:21 Iesude yabi daratagerda, “Nade wa lampa dirsirkare, nako wa sepge demargerare wa lewer kobarlugu etkamare? Nako wa sikge sepge demargerare? Nolekar, wai ikairare lampa agimur luge demargerare.
MAR 4:22 Nalu lu pe nasibwerteda ya wadaratkiare, a nalu lu atkamatkam nagriwerteda e ya wataraisare bige obos.
MAR 4:23 Abie mir pe dikeredi gair legize wasrawem a wige waikedrawem.”
MAR 4:24 E ko yabi daratagerda, “Wa able mir dikepwararwem pe wawa asorda! Ese wa able mir dikepwalare, waba ya bodomalam waikereder able luglam a pako wader lu pa nagriwerteda.”
MAR 4:25 Na lera pe nalu nagriwerteda ya yabi aumitkar obaiswerare; na lera pe kebikebi nagriwerteda yaba kebikebi ya adem obais.” MRK 4.26-29
MAR 4:26 Iesude ko yabi daratagerda, “Adira Basalaia mokakalam ikeredi able le e tabara gedubge kep irti.
MAR 4:27 E mena kige ut ipereder ege idimge ekiamda, able idimge ge kep baperikdarda a bomi. E nole umerkak wi nako bomi.
MAR 4:28 Able sepide tababu ikeri kep bomi a ageg bakerda; kikem yaba wai bomi, lusik ga bakerda, ageg ga keubu bakerda.
MAR 4:29 Nade ageg neu bakerda, able gedublelut kemerkemer lu adem ismi a ageg adem etkori ableglam nur kerker itutidari.” MRK 4.30-34
MAR 4:30 Iesude ko yabi daratagerda, “Mi nako Adira Basalaia sikak datautare? Nalu mir abisir mir mi akerare ei able Basalaia merbi waditomeretiare?
MAR 4:31 E dali mokakalam mastad keb pe kebi kep dali able gesepge.
MAR 4:32 Nade ma abi emor sepge, ei ya waiomei wakai aukaka lu obai muige gedubge. Abra au tarn obarmare, a ebur ya watabakeslare abi tarn mudge obagrier.”
MAR 4:33 Iesude tabara able marauermer leem mir abisir mirge mokakalam pe nagriwerteda; e yabi daratagerlare able piripiri wi umele tabadoge waidaglare.
MAR 4:34 E no yabi daratagerlare mir abisir mirge; nade e ga tebteb dawer taba memeglekem ege yabi gair lu daratagerlare. MRK 4.35-41
MAR 4:35 Able kikem Iesu akaida tabara memegle daratagerda, “Mi nabakiaware ge mi nerut pek gurge.”
MAR 4:36 Wige bakiauda able narge batri ge nade Iesu ikawerteder a ga bakiauda atiem. Kep kep wader nar yabidoge bakiauda ege lera kub ge no dirgi.
MAR 4:37 Muige nar korge Iesu amazge utipereder. Ege aukaka wag bamrida, zeuber bakwer a baraplare nar etatkolare able nar akaida noga gur digmer. Ege memegle gize Iesui utlam itirda a abi detagerda, “Erwerle, ki nabaume. Ma kerbi upiditidarare ese ma kerbi omarge dikereda.”
MAR 4:39 Ege Iesu ekweidari eudimge wagiba zeuberei daraisumdari, “Wa temrilam! Wa mapodan bailam!” Ege wag ekemuda a gur akaida mapodan baidari.
MAR 4:40 Ege Iesu akaidari tabara memegle daratagerda, “Wawa geumge bakeli abielam waba owatur kebile ikeredi.”
MAR 4:41 Wige bazigmuarti a tabara baotmerlare, “E nalu orwaiorwai le pedali? Wagiba zeuberei umerkak wader le wanasware wipe no abi asriei.”
MAR 5:1 MRK 5.1-20 Wi ge bakarki able utebge maike au uteb Gerasa, nerut pekge ni keperge.
MAR 5:2 Nawar ge Iesu adem narlam eupamada, ege le tabakiamuda able uteblam ge nade paier nagriweretlare abi ops wadipiti.
MAR 5:3 Ege dimoni able lege dawer, e ge dawer bakir paierge. Nole ko le dawer abi malili lageru wadidbari: mitkar kerkerge iegize abra tag a teter wadaraubareda, e gair kerkerge malili lager wadarboli a wadareskimreda taba teterge. E au kelerkelar wadali nole ko nerut lelut abi ikaida ei maiem wekepli.
MAR 5:5 Kige a pako gergerge e paierge a paserge weseseredli ei sasmir wadimeli a tababu bakiru obasakli.
MAR 5:6 Able lelut Iesui terdari aumurislam ege abim korider temridari akaida tababu kokmamumamu emridari Iesui opem abi isorgiru ikaida.
MAR 5:7 Iesude eudige abi ikailu, “Dimoni, ma adem teosmer able lelam!” Ege sasmir dimridari, “Iesu able Au Adira Werem, “Ma nole nerut lu karim ikai! Mage Adi detager ma nole kari nares.”
MAR 5:9 Iesude abi itmeri, “Mara nei nako dikeredi?”. Ege able lelut abi detagri, “Kara nei dikeredi Lera Kub ableglam ki mitkar uridli.”
MAR 5:10 Ege Iesuim bagwi yabi umerkak adem wanamarikdarda able utebiam.
MAR 5:11 Au kub puakara ge lewer erolare maike paserdege.
MAR 5:12 Able dimoni Iesuim bagwi, “Ma kerbi kei demarkare puakaem mage kerbi dikerare ki naba yabidoge nabarte.”
MAR 5:13 Iesu eudige iaglag baida. Ege dimoni adem bausi able lelam bakiauda puakage tabarti. Able kemerkemer maike 2,000 puaka korider bamri deibge barkarki a batweri wege gurim baragda a guni baiterda.
MAR 5:14 Able puaka aseseredle korider adem bamri mir lege ebreredlare muige utebge a gako yabidoge dorgele ge sumesge urder. Mitkar able le tabakiauda wadasmerda nalu lu ge akaida.
MAR 5:15 Wi tabakiauda ge Iesui doge wige able le erdarda ge abra aukaka mitkar dimoni abidoge urder. Wige geumge bakeri ableglam e ge irmireder abra wali damireder e nole ko urker ge dawer.
MAR 5:16 Nalegize ge abi erdarda, wader le daratagerlare nalu ge akaida able leem a able dimoniem a able puakaem.
MAR 5:17 Wi eudige bakeri Iesui itmerda e yaba uteb odikairti.
MAR 5:18 Nawar ga Iesu akawerter narge able le ya abra dimoni waduridli Iesuim bagwi e abidoge obakiamuda atiem.
MAR 5:19 Ege Iesu nole lagkak dawer abi waigardi taba doge. Ege able le detagri, “Ma bakiamu gedim mari buaiem yabi daratagrawem nalu marim Oplelut ikaida a e nalu debele marim dali.”
MAR 5:20 Ege able le bakiamuda 10 Utebem ge wader le daratagelare nalu Iesude abim akaidari. Na iegize ge abi asorda wige bazigmuarti. MRK 5.21-43
MAR 5:21 Iesu ko akomedari narge bakiamuda nerut pekge ni keperge. Nade lera nikidetreder tabakiauda abi dairumareta maike ni keperge.
MAR 5:22 Netat sunago kirimle abra nei dikereder Zairus takabiamuda Iesuim. Nadege e Iesui erdari, Zairus tababu akaida kokmamu emridari aukelarkelar Iesuim bagwi, “Kara kebi neur no tididli e maike weteumi. Kape marim bagwi, ma taba mara tag abidoge tadakmerik ya waiakai abra gim wadesemu ei mena wadawer.”
MAR 5:24 Ege Iesu abidoge atabemeda, a lera ga nikidetreder abi irmirdlare a abi imuaretlare.
MAR 5:25 Netat koskir ko ge dawer e asiasi wadigili abra aukaise mam wadipitli able niainiai 12 urut.
MAR 5:26 Able koskiret ya ko tabara asiasi wadigili gair lukuplelam, e tabara bodom bakir wadikrili lukuplege ya waiakaida wi abi upiwaditidarda. Ege nole akaida sikak baida yabi upiatidarlam, ege no akaida au gimgim baida.
MAR 5:27 Able koskiret wasoli nako Iesude le wanadgireda, ege tabakiamuda keubu daraweida ge le nikidetreder Iesura wali paikai ditutida.
MAR 5:28 Able koskiret dikepwari, “Ese ka umele abra wall datutilu kara gim ya wesimu.”
MAR 5:29 Ege keko able dudumdudum abra mam ya abra wadipitli keko durwarti, ege umele baida abra gem dakaida sikak baidari able gimlam.
MAR 5:30 Keko Iesu umele baida abra sasrim abialam adem deosmeda. Ege bataurikda able kubge ge nikidetreder a yabi nautmerda, “Netide pe kara wali mop itutida?”
MAR 5:31 Abra memegle eudige bakeri abi ikaidarda, “Able le pema uridli mari naumarteda. Mape naluglam eutmeli, 'Netide kari natutidari?'”
MAR 5:32 Ege Iesu no mena ikweireder erkep ikereder able le wairdari ge netide abi itutidari.
MAR 5:33 Abra koskiret ga keubu dikepwari nalu lu abim akaida ege geumgeum tabakiamuda akaida Iesuidoge kokmamu emridari a abi detagri ge e nalu ikaidari.
MAR 5:34 Iesude abi detagri, “Kara neur, mara gim esemuda ableglam mara owatur ikeredi. Ma bakiamu mapodange sikak nawa nole able asiasi ko digiwa.”
MAR 5:35 Nawar ga Iesude mena able mir detauter, wader miraisisle tabakiauda Zairusi metalam a Zairusi detagerda, “Mara neur teumida. Epe nole pa ko ikeredi ma mena able Erwerle damisrer.
MAR 5:36 Iesude nole yabi mirem girip irdireder ge nalu wi detautlare. E akaida able sunago kirimle detagri, “Ma nole geumge akai, ma no kari narmirwa.”
MAR 5:37 Ege no yabi naisidare Peteru a Zemis a abra barada padali Zone bakiaudare kemem, nole nerut le ko dawer.
MAR 5:38 Wi bakiaudare ge able kirimle metage eosidare ge nade Iesude gair le nardarda ge wamisrer. Ege eudige i asri a ii sasmir.
MAR 5:39 Ege bakiamuda able metaem badari a akaida yabi daratagerda, “Wa naluglam pe wa bamisreda a wa naluglam i bazoli? Able kebi neur nole eumida - e no ut iperedi!”
MAR 5:40 Wige eudige bakeri abi ga desaredlare, ege yabi adem nausa metalam. Ege no kebi neurira apuiba babei daragardi a abra neis a netat memegle pa darale bakiaudare able kebi ut uteb ge bartidare nade ge able kebi neur ipereder.
MAR 5:41 Ege bakiamuda abra tag derpeidari a abi taba miru detagri, “Talita kum” - “Kebi neur, ka mari peka natagri, ma ekiam!”
MAR 5:42 Ege keko able kebi neur ekiamda a digmer muige metage. E 12 urut dawer. Wige no kemerkemer bazigmuarti.
MAR 5:43 Iesude yabi kelarkelar daratagerda, “Wa nole gair le daratagrawem.” A ga akaida yabi ko daratagerda, “Wa abi nalu ikwarare ei wairo.”
MAR 6:1 MRK 6.1-6 Iesu able uteblam bakiamudari taba gedim. Abra memegle abi kemem bakiauda.
MAR 6:2 Sabadge ege akaida mitkar le nerwerlare sunagoge. Nade wi abra mir dasorlare wige bazigmuarter a abim mir dimwarlare. Wige tabara netatnetat bautmerlare, “Netilam able lelut able mir taisi? Netilam abra pardar dikeredi? E nako able au dorge ikeli?”
MAR 6:3 E no kamda dali; e no Mariara werem dali; e no Zemisira barada dali, a lose a Iuda a Saimona; a pako abra sisi pa duridli!” A wige nole abi lagkak urder.
MAR 6:4 Iesude yabi daratagerda, “Muige wader gedge, legize peropeta wasreda. Epe legize nole abi asreda nade pe e taba gedge dali, taba buaige dali a taba metage dali.”
MAR 6:5 E umerkak ge mitkar au dorge waikeri. Ege no kepkep le nadgirlare ge e tabara tag dikmerker yabidoge.
MAR 6:6 E ezigmuada ableglam yaba nole owatur nagriweretlare. MRK 6.6-13 Ege bakiamuda ge able gair utebge a le nerwerlare.
MAR 6:7 E tababim able 12 memegle darabgerda, ko yabi neisneis wanamarikdarda. E yabi sasrim nakwarda ko dimoni au kelarkelar wadaratagreda. E yabi au kelarkelar daratagerda, “Wa no koket aisawem nade wa dikasirwertawem. Wa nole lewer aisawem; wa nole epei aisawem; a wa nole bodom bakir aisawem wabi wakge.
MAR 6:9 Wa tetergab amiawem; a nole neis amiwali namiawem.
MAR 6:10 E yabi ko daratagerda, “Nade legize wabim mir watigrilare metaem, wage ge mena uridwa wa nole able uteb dikairetawem.
MAR 6:11 Ese wa taba able utebem ya nole legize wabi wadireplare, a wi nole wabi wadasorlare, wage waba pi wabi teterlam adem etkaperdawem nade wa able uteb dikairtawem, yaba ya atamilam waike.”
MAR 6:12 Wige bakiauda bausi a maraueremlare le wi watabatarda yabi witlam.
MAR 6:13 Wige mitkar dimoni adem nauslare; a wi mitkar gimgimle wakaisoiu darasaulare wige bakerer sikak berer. MRK 6.14-29
MAR 6:14 Erod able Gesep-Ople able lu asri, ableglam legize Iesura mir debreredlare gair utebge. Kepkep legize ge detautiare, “Zone Baptaiso ko akaida idid baidari! Abra sasrim pe Iesuidoge ikeredi.”
MAR 6:15 Wader legize ge detautlare, “E Elaiza dali”, a wader legize ge detautlare, “E peropeta dali mokakalam netat emeret peropeta dali.”
MAR 6:16 Nade Erodide able mir asri, ege detauti, “E Zone Baptaiso dali. Ka abra geka kirim dismida epe ko eudlam ekiamda.”
MAR 6:17 Erodide tababu aresle namarikdarda Zone watirpeidarda a abi wadidbarda a obatawereda kupkpui utebge, ableglam Erodide taba baradara Pilipira koskir Erodias igardi,
MAR 6:18 a Zonede mena Erodi detagrer e seksek dikeredi e taba baradara koskir digardi.
MAR 6:19 Erodiasira urker Zoneim barki e laglag abi waipiti, ege Erodide nole abi ipiti ableglam e geumge ikerer; e Zonei azimuarda ableglam e umele dawer Zone barkak le a zogo le dawer. Gair kerkerge Zonei miride Erodi waikeli okasosok ke wadali, Erod laglag wadali abi wasri Zonede mir waditautli.
MAR 6:21 Erodiaside dasmeri abra kes bagida able Erodi ausmer lewerge. Erodide able lewer dirsiri taba gelar kirimieem, taba ares kirimleem a gair tarimleem Galilaialam.
MAR 6:22 Erodiasira neur taba badari a kaberi. Erod a able le ge abidoge emreder laglag urder abra kab. Erodide eudige abi detagri, “Ma kari nalu lugem namos, kai mari naiswere nalu lu ma laglag.”
MAR 6:23 Erodide able neur detagri, “Ka mari gair lu naiswere, mena obakedi netat pek kari basalaiage.”
MAR 6:24 Able neur baka eosmeda tabara ama titmeri, “Ka nalu lugem tarautmerer?” Abi amade abi tiditagri, “Ma Zone Baptaiso kirimem teutmerwa.”
MAR 6:25 Able neur dudumdudum sopkak ko akomeda Gesep Opleem abi tiditagri, “Ka laglag ma kari nakwar Zone Baptaisora kirim kobarge wadudawa.”
MAR 6:26 Able Gesep Oplera au okasosok barki nade e able mir asri, e umerkak taba mir wadikarikda ableglam abi legize emetu asorda e detauti e able lu waikaida nalu lugem abi able neuret wadamsi.
MAR 6:27 Ege keko au dedumge aseseredle namarikdarda abim watikadarda Zonira kirim. Aseseredle bakiauda Zonira kirim tidismidarda,
MAR 6:28 wige eudi ikaidarda kobarge tadarda a akaidarda able neur ikwari, ege ikada tabara ama tikwari.
MAR 6:29 Nade Zonei memeglegize able mir asorda, wige tabakiauda abra gem ikadarda paierge muige tirdidarda. MRK 6.30-44
MAR 6:30 Able kaimegiz ko tabakomerti Iesui opdipita. Wige abi detagerda gair lu ge wi ikerlare a nerwerlare.
MAR 6:31 Iesu a abra memegle nole ko yaba kes daragriweretlare wi lewer wairoda ableglam au mitkar le tabakeslare barter a ko bauser. Ege akaida tabara memegle daratagerda, “Wa no tabakiaure karidoge mi keimi nabakiaware sasmirkak utebem ge mi ner tarabaziei.”
MAR 6:32 Ege no wi bakiauda narge kei sasmirkak utebem.
MAR 6:33 Ege mitkar legize yabi darasmerlare wi bakiauda wige keko umele berda wi netiba darale. Wige gairle able gedlam ge naridweretlare kikem bakiauda koriderge wi gabge bakiauda able utebem kikem terpeidarda keubu ya Iesu taba memeglekem watabakarki.
MAR 6:34 Nade Iesu narlam adem eupamadari, ege au kub lera dasmeri; abra au nas yabim barki ableglam wi urder mokakalam mamoi nole mamoi aseseredlekak. Ege eudige akaida yabi ga gair lu nerwerlare.
MAR 6:35 Au kikem, abra memegle abim tabakiauda a abi detagerda, “Au kikem pe baida, a epe nole lekak uteb irdiredi.
MAR 6:36 Ma able le adem namarkare able utebem pe naridwerteda ya waiakai wi tabara lewer wairapare.”
MAR 6:37 Iesude yabi daratagerda, “Wa wabu yabi lewer arwem neiswerare.” Wige abi itmerda, “Nako ma laglag nali ki nabakiaware nabause bered tarapare able gair leem pe uridli? Able lewer nagriwerteda au bodom bakir bakir.”
MAR 6:38 Iesude yabi nautmerda, “Waba naket bered nagriwerteda? Wa baka tadasmerare.” Nade wi bakiauda tadasmerda, wige abi detagerda, “Keriba no 5 bered nagriwerteda a neis lar pa nakeredi.”
MAR 6:39 Ege Iesude tabara memegle daratagerda wige le nakelare giringirin sogige namerda.
MAR 6:40 Ege le bamri ga emreder, able gair 100, able gair 50.
MAR 6:41 Ege Iesu akaida neis bered natarukda a neis lar pa nakeredi; eudige kotor espasmuda Adi eswau ikaidari. E bered natrida a mog ikeri tabara memegle neiswerda, ya waiakai ya le ya wanaiswerda. E able korepge neis lar nakaidari le naiswerda.
MAR 6:42 Gair legize lewer eroda mena yaba kem bosi.
MAR 6:43 Keubu ga, memeglegize bered a lar mog etakerda ge nade barida, wige ikerda 12 epei able mogu daramida.
MAR 6:44 Wige 5,000 kimiar urder ge wi able bered eroda. MRK 6.45-52
MAR 6:45 Iesude keko tabara memegle daratagerda wi obakiauda narge obatri a kikem obakiauda Betsaidaem ge nerut apekge tirdireder. Ege kemem emrida able lera kub wanamarikdarda.
MAR 6:46 E lera kub namarikdarda, ege adem bakiamuda paserem erkepwaiasameida.
MAR 6:47 Nade ga ki asameida, able nar mena ge gurge eipuge eper, a Iesu ge tebteb ge dawer gesepge.
MAR 6:48 E tabara memegle darasmerlare nar ereblare wag desaredlare; keubu nedbi ipiti, e yabim maikem tidigmi tumem gurge tidigmer. E no yabimalam kei ikasereder,
MAR 6:49 wige abi erdarda e gurge tidigmer. Wige dikepwarlare e lamar dali; wige sasmir demerda ableglam wi aukaka geumge bakerer. Iesude keko yabi daratagerda, “Wa sererge uridwa. Kakanali. Wa nole geum!”
MAR 6:51 Ege eudi bakiamuda narge ogi akawerti, ege wag ekemuda. Able memegle bazigmuarti ableglam wi nole berwerda able beredlam nete Iesu agekar dawer. Yabi akepwaride nole paretkak dasmerer. MRK 6.53-56
MAR 6:53 Wige gur tadatupidarda tabakiauda ge wege Genesaretge, ge nade wi nar didbarda.
MAR 6:54 Nade ge wi narlam adem baupamarti, le ge urder abi erdarda a umele urder e nete dali.
MAR 6:55 Able le korider bamri gair utebge ge maike naridweretlare a gimgim le papekge erdeder wige taraislare able utebem ge nade wi asorlare Iesu dawer.
MAR 6:56 Gair utebem Iesu basker, kebi utebem a au utemem a gedub uteb ga nagriweretlare, legize tabara gimgimle taraislare able utebem ge nade tama nagriweretlare, wi Iesui ge damoslare e gimgim le wanakerda abi walira mop waditutirda; ege gair gimgim legize netiba ge abra wali ditutilare ege yaba gim basemrer.
MAR 7:1 MRK 7.1-13 Wader Parisaio a Aotarle wi Ierusalemalam tabakiauda taba ge etami Iesui dairumareta.
MAR 7:2 Wi wader Iesura memegle nardarda taba lewer erolare wi nole tabara kikem tag N og natkirda' (able orwairorwair Parisaiogize waikereda).
MAR 7:3 Parisaio a gair Iudaiale wi able erwer wairmireda taba lugizlam: wi gair kerkerge tabara tag ogwaitkireda able barkak tonarge,
MAR 7:4 a gair kerkerge wi tababu og obatkirieda nade wi watabakomerti tamalam keubu wi lewer wairoda. A wi wairmireda mitkar wader erwer yabi lugizlam ablegise barkak tonar nako ma pankin og waitkiri, lewer akasirlu, a wader lewer arotlu a amrirlu pa nagriwerteda.
MAR 7:5 Wige Parisaio a Aotarlegize Iesui itmerda, “Naluglam mari memeglegize nole able erwer irmireda pe merbi lugizlam nagriwerteda? Wi naluglam lewer erweda ogog tagtag?”
MAR 7:6 Iesude yabi daratagerda, “Isaiade agekar detauti nade e wabialam detauter norgornorgor dorgelelam. Isaia ditari, “Adi detauti, Able legize no kari mirge nauspireda, wipe nole kari lagkak uridli.
MAR 7:7 Wi kari isorgiru epe nole karim abkorep ableglam wi tabara bar bar geiar ermeda a le nerwereda wipe nole Adira geiar le nerweredaf
MAR 7:8 Wa Adira geiar ikereda netat pek idageda, wape no lera erwer irmireda.”
MAR 7:9 Iesude yabi daratagerda, “Waba erwam tonar nagriwerteda wa Adira geiar detwakeda ya waiakai wa waba erwer irmirlare.
MAR 7:10 Mosede aukaise detauti, “Wa wabi babiba amaei nasrawem” a “Wage gair le eudem nasrawem pe netiba tabara babiba amaei darasawersireda.”
MAR 7:11 Wape no wa le nerwereda ese yabi babiba amaei laglag wadaralei wader lu yabialam, wi yabi wadaratagerlare, “Wai babiba amaei, able lu pe 'Koban' ikeredi, e Adira lu ikeredi. Ka umerkak wabi dakware,” epe able kerkerlam pe ditimeda ma nole abi ikaidari e taba babem a amaem waikerer.
MAR 7:13 Able to narge pe dikeredi waba erwer, wa pewa ebrerdeda wabidoge, epe akaida Adira mir dikaidari derekak ya waikereder. A wape mitkar wader lu ko wa ikereda able orwairorwair.” MRK 7.14-23
MAR 7:14 Iesude ko lera kub darabgerda tababim a eudige yabi daratagerda, “Wa gair legize karim irispilare a wage mirem mamor wabi idonige ikedrare nalu yaka dataute.
MAR 7:15 Nole ko lu ikeredi e le waikai seksek obai nade able lu obakiamu abi gemge obau. Nolekar. Able le pe akaidari seksek baidari pe nalu abialam adem eosmeda.
MAR 7:16 Wa gair legize able mir erpeirare a wabidoge ikedrare!”
MAR 7:17 Keubu Iesude lera kub darakaireta a bakiamuda metage badari, abi memeglegize abi itmerda able mir abisir mirlam.
MAR 7:18 Iesude yabi daratagerda, “Aise! Nako wako uridli able mir nole wabidoge ikeredi? Lu adlam bakiauda le gemge barti nole yabi nakerda seksek berda,
MAR 7:19 ableglam able lu nole barti bakiauda yabi idonige. Wi bakiauda kemge a mena bakiauda adem kemlam bausi.” (Nade Iesude able mir detauti, e yabi natomeretlare able gair lewer pe nagriweretlare legize umele wairolare).
MAR 7:20 Iesude ga ko detauti, “Nalu lu pe lelam adem eosmeli abi ikeli seksek beli
MAR 7:21 ableglam muilam, le nerkeplam a idonilam pe eosmeli adud akepwar, a kogem, a erwamem, a le apit, erwamem nerut lera koskir a kimiar,
MAR 7:22 gair lu no mara wanagriwertawem, seksek idoni mara waikereder wader leem, besmir, adud mir, debelulag, besmir wader le daratautlare, baospirer, a paimpaim tonar.
MAR 7:23 Gair able au adud lu pe teosmeli le muilam yabi nakereda seksek beli.” MRK 7.24-30
MAR 7:24 Ege Iesude able uteb dikairti a bakiamuda able utebem ge maike au utebge irdireder abra nei dikereder Taia. E bakiamuda metage badari a e nole lagkak dawer le umele oberda e ge dawer: e umerkak wadali wespili.
MAR 7:25 Koskir ge able utebge dawer Girisle: e ge eosmeda au utebge abra nei dikereder Ponesia pe Siriage irdiredi. E tabakiamuda Iesuim a abi opem kokmamu emrida e Iesuim bagwi ko dimoni adem waismeda abi neurlam.
MAR 7:27 Ege Iesude abi ikaidari, “Ka omaskir kikem darasisiare. E seksek ikeredi ka omaskirira lewer adem takalu kai kei ka omaiem nabataweredlu.”
MAR 7:28 Ege able koskiride abi ikaidari, “Ople, able omai pe erdedi wi umele omaskira puipi lewer wairware.”
MAR 7:29 Iesude able koskir detagri, “Ma barkak detautli; ma bakiamu gedim mara neur terdar ableglam dimoni emetu abialam eosmeda.”
MAR 7:30 Nadege able koskir bakiamuda gedge ege tabara neur terdari mapodan sikge ipereder dimoni ge emetu eosmeda. MRK 7.31-37
MAR 7:31 Ege Iesu adem bakiamuda able gedlam ge maike Taiage naridweretlare. E nerut au uteb gabem bakiamuda abra nei dikereder Saidon a no bakiamuda able ged gabem abra nei dikereder 10 Uteb mena Galilaia Nikeperge.
MAR 7:32 Ege kimiar ge dawer nole asorkak e umele no kebikebi mir waditauti. Kepkep legize able kimiar tigareda Iesuim a abim bagoda e tabara tag abidoge wadikmerikda.
MAR 7:33 Iesude able kimiar erpeida ege abi adem datkimwarda yabialam ge le nikidetreder. Ge, ege tabara tagpim nakaidari ge able kimiar geripge namarikda. Ege eudige mos ikeida, a able kimiarira werut itutida.
MAR 7:34 Ege Iesu ga kotorem egremada, au ner batawerdi a eudige akaidari able kimiar ikaidari, “Epata”, able mir dikeredi, “Wa bauskilam.”
MAR 7:35 Ege keko able kimiarira girip bauskidariei a abra werut dakaidari sikak baidari: ege eudige mir detauti nole asikak.
MAR 7:36 Iesude eudige aukaise gair le ge daratagerda wi nole able mir waibrereda wader leem, wige nole asorda. Nade e yabi aukaise daratagerlare, wige able mir mena ebreredlare.
MAR 7:37 Gair legize ge netiba able mir asorlare wi bazigmuarter a wi gair legize abi dispirlare. Wi detautlare, “Gair lu e ikeli epe au debele nagriwerteda. E asorkak le nadgireda ya waiakai wi umele wasorlare, a e mirkak le nadgireda ya waiakai wi umele mir waditautlare!”
MAR 8:1 MRK 8.1-10 Kebi niainiai, nerut au kub lera tababu tabakiauda etami nade Iesu dawer. Nade ga yaba nole ko nalu nagriweretlare arwem, Iesude tabara memegle tababim darabgerda a yabi daratagerda,
MAR 8:2 “Kara nas barukli able leem ableglam wi neis a netat gerger karidoge urdi a pe irdi yaba nole ko nalu nagriwerteda arwem.
MAR 8:3 Ese ka yabi gedim namarkare ka nole yabi kikem darasisiare wader yabiaiam ya gabge erkepnonor ge obaum ableglam wader yabiaiam tabakiuda au murisiam.”
MAR 8:4 Abi memeglegize abi itmerda, “Nako lelut lewer wairdar e able le wadarasisiare able lekak uteb pe irdi?”
MAR 8:5 Iesude yabi nautmerda, “Naket bered nagriwerteda?” Wige abi detagerda, “Keriba 7 bered nagriwerteda.”
MAR 8:6 Ege eudi ge able lera kub daratagerda wi obakeri sepge obamri. Ege eudige 7 bered etakri, Adi eswau ikaiku, ege bered mogem itri a tabara memegle naiswerda ya waiakai wi ya lera kub wanaiswelare. Ege memeglegize ga le naiswelare.
MAR 8:7 Ege memegle ko urder yaba ko kepkep lar daragriweretlare. Iesude Adi eswau ikailu able larlam, a tabara memegle daratagerda wi able lar le wanaiswerare.
MAR 8:8 Wige urder maike 4,000 le, yaba gair lera kem bosi nade yaba lewer aro esemuda. Nade memeglegize kaier etakerda wi dasmerda 7 epei kaier lewerlam bosi. Iesude able lera kub namarikdarda,
MAR 8:10 Ege keko bakiamuda taba memeglekem narge batri a bakiauda able utebem ge able gedge irdireder Dalmanutage. MRK 8.11-13
MAR 8:11 Wader Parisyo tabakiauda Iesuim a abi ikaidarda ga abi desaredlare. Wi Iesui bautmerer atamilam kotorlam ableglam wi laglag abi wadamisirda.
MAR 8:12 Iesude eudige aukaka ner batawerdi a akiadari, “Naluglam le able kerkerge bautmeli nalu atamilam ikeredi? Ka wabi agekar detagreda, wi umerkak ya atamilam wairpeirare!”
MAR 8:13 Ege eudige darakaireta. E ko bakiamuda narge akawerti, wige ko bakomerti bakiauda nerut pekge nikeperira. MRK 8.14-21
MAR 8:14 Memeglegize no netat bered narge tikadarda: wi okataprike darakaireta ko wader wataisa.
MAR 8:15 Iesude yabi kikem daratagerda, “Wa okeoke uridwa! Wa okeoke uridwa Parisaio yislam a pako Erodi yislam.”
MAR 8:16 Wige bakeli able mir ga ipulare tabadoge. Wi batagelare, “E able lu detautli ableglam keriba nole bered nagriwerteda.”
MAR 8:17 Iesu umele dawer wi nalu mir batagelare ege eudige yabi nautmerda, “Wa nalu mir peua ipweda meriba nole bered kak? Wa nole peua umele uridli? Nako waba idoni au wapum dali?
MAR 8:18 Waba poni nagriwerteda wa nole dasmereda, waba girip nagriwerteda, wa umerkak asrare. Wa umerkak dikepwalare?
MAR 8:19 Nade ka 5 bered itri 5000em, wage naket epei daramida able leweru ge kaier barida?” Wige abi detagerda, “12 epei.”
MAR 8:20 “A nade ka 7 bered itri 4000em, wage naket epei daramida able leweru ge kaier barida?” Wige abi detagerda, “7 epei.”
MAR 8:21 Iesude eudige yabi daratagerda, “Nako wa mena umerkak uridli?” MRK 8.22-26
MAR 8:22 Wi bakiauda Betsaiadage bakarki nade ge wader legize sadmerle tigareda Iesuim. Wi abim bagoda Iesude abi waitutida.
MAR 8:23 Iesu akaidari sadmerlera tag derpeidari a abi adem utebiam datkimuada. E sadmerlera poni mosu ditwi a tabara tag ikaida abidoge dikmerida. A eudige eutmeri, “Nako ma lu darasmereda?”
MAR 8:24 Able kimiar eudige egri a abi detagri, “Ka le darasmereda; wi uridli mokakalam lu wipe daragmeda!”
MAR 8:25 Iesude ga tabara tag nakaidari able kimiarge namarikdari. Able kimiaride ga aukaise dasmeri; e umele wadasmeli gair lu paretkak. Abra poni ge badgirda.
MAR 8:26 Iesude able kimiar ko emarikda taba gedim. E able kimiar detagri, “Ma bakiamu gedim, mage nole ko bakiamu able utebem.” MRK 8.27-30
MAR 8:27 Ege Iesu a abra memegle aden bakiauda gair utebem ge Sizaria-Pilipaige naridweretlare. Wi gabge nakasirweretlare ege Iesude yabi nautmerda, “Wa kari natagrare, nako legize detauteda kaka nete nali?”
MAR 8:28 Wige abi detagerda, “Kepkep legize detauteda mama Zone Baptaiso nali: a wader legize pe ikereda mama Elaiza nali: a wader legize pe detauteda mako pema nali able netat le peropetalam.”
MAR 8:29 Iesu yabi nautmerda, “Wawa uridli? Wape nako peua detauteda kaka nete nali?” Peterude abi detagri, “Mama Keriso nali!”
MAR 8:30 Ege Iesude ge yabi kelarkelar daratagerda nole ko able mir waditauteda netat leem. MRK 8.31—9.1
MAR 8:31 Ege Iesu eudige akaidari tabara memegle ya wenerwereda, “Abie Lera Werem ya au asiasi wadigi. Aule, Kirim merkemle a Aotale ya abi wadituaklare. Abi ya waipitare, nade neis a netat gerger obarkare e ya ko idid waiakai.
MAR 8:32 E paretkak able lu yabim daratautlare. Peterude abi kebikebi wader lelam adem igardi eudige akaida abi tetaperti.
MAR 8:33 Iesu tabatawirikda taba memegle darasmerda, eudige Pererui ertaperti. E abi detagri, “Ma adem bakiamuda karialam, Satana! Mara akepwar no lera akepwar nagriwerteda. Wi nole Adira akepwar nagriwerteda!”
MAR 8:34 Iesude eudige tabara memegle tababim dabgerda a wader le pa uridli. E yabi daratagerda, “Nale laglag karidoge watabakiamu e nole tababu obakepwarwa, tabara satauro watepwa a kari watararmirwa;
MAR 8:35 ableglam na lelut laglag tabara idid weper ei weumi: nale karim weumi a pako debe mirge e ya tabara idid watirpei.
MAR 8:36 Nako lelut agekar sikak wadawer ese abi kemerkemer able gesep obakwar ei weumi? Nolekar!
MAR 8:37 Lelut umerkak tabara idid ko wairapei.
MAR 8:38 Nale yabialam able mitkar witwit a seksek lelam kari wanatuak a pako kara mir, Lera Werem dali ei abi ya watidituak nade e watabakiamu muige taba Babi zoromge taba zogozogo angela kem.
MAR 9:1 Ege Iesu akaidari yabi daratagerda, “Ka wabi agekar detagreda, wader le pe able gergerge ekedi ya mena idid waurder nade wi ya wadasmerare Adira Basalaia watabakiamu au kelarkelar. MRK 9.2-13
MAR 9:2 6 gerger barukda, Iesude yabi natakridare Peteru, Zemis a Zone yabi a wige abi irmirdare au aremarem paserem ge nole lekak irdireder. Nade wi ga dasmele, ege Iesu epigemelu; abra wali akaidari zoromzorom zarzerzarzer baidari - nole netat le able gesepge tabara wali waikaidari able zarzerzarzer obaidari.
MAR 9:4 Wige dasmerdare Elaiza a Mose Iesui mir detagelei.
MAR 9:5 Peterude akaidari Iesui detagri, “Erwerle, audebele ikeredi ki peki dale. Ki umele 3 mud dauridere - netat mara, netat Elaizara a netat Mosera.
MAR 9:6 Peteru a neis memegle yaba geum barkidare. Ableluglam Peteru e nole umerkak dawer e nalu mir waditauti.
MAR 9:7 Baz tikada bakmerikda yaba mud. Bazlam kodomir teosmeda, “Kara nasnas werem pedali. Abi asrawem.”
MAR 9:8 Nade wi erkep etardare, wige dasmerdare Iesu tebteb ikeireder.
MAR 9:9 Nade wi tabidare paserlam, Iesude yabi daratagerda, “Wa nole netat le detagridare nalu lu ge wawa dasmerdare.” No pe ikeredi nade ya Lera Werem eudlam wekiam wi umele ya le wadaratagerlare.
MAR 9:10 Wige abra mir dasorda, wige no tabara batagelare nalu agekar lu ikeredi 'eudlam ekiamda'.
MAR 9:11 Wige eudige Iesui itmerda, “Naluglam Aotarlegize detauteda Elaiza kikem watatabakiamu?”
MAR 9:12 Iesude yabi daratagerda, “Agekar Elaiza kikem tabakiamuda ko gair lu wadararsirare. A mipe nalu pemi etagada nako Lera Werem dali muige Zogoziawalige? Mi etageda e asiasi wadigi a abi wadituaklare!
MAR 9:13 Ka wabi detagreda, Elaiza emetu tabakiamuda, ege legize abim adud tonar ikelare nalu ge wi laglag urder, able mokakalam able orwairorwair pe mimi abra ad detagreda.” MRK 9.14-29
MAR 9:14 Nade wi takomertidare wader memegle nardarda, wige erdardare au kub lera yabi daramuareta, a wader Aotale memeglekem basaredlare.
MAR 9:15 Ege legize erdarda, wi bazigmuarti a korider abim bamri ko abi watigareda.
MAR 9:16 Iesude tabara memegle nautmerda, “Wa naluglam pewa tabasardeda?”
MAR 9:17 Ege kimiar ge le kub ge dawer abi akaida abi detagri, “Erwerle, ka kara werem marim tigardi e umerkak mir waditaut ableglam abra dimoni abidoge dali.
MAR 9:18 Nade abi dimonide wairser, epe abi obatawerder sepem, epe abra sik tege obapaitlare, e tabara tirig waikupamater a abra gem lid obatrer. Ka mara memegle daramosa ko able dimoni waismerdarda, wi umerkak waikaidarda.”
MAR 9:19 Iesude yabi daratagerda, “Wa owaturkak le uridli! Ka na niainiai yaka wabidoge nawar? Ka na niainiai yaka okasosok wabialam digier? Wa able werem kei karim tigardare.”
MAR 9:20 Wige able werem tagareda Iesui ikwarda. Nade able dimonide Iesui erdari, ege able le deskerder kei itimder a kei itimder, a eudi sepge abi, sepge epitrer a sik abra tege bapaitlare.”
MAR 9:21 Iesude able lera bab itmeri, “E na niainiai able orwairorwair wadawer?” Ege abi ikaidari, “Able kerkerlam nade e kebi werem wadali.
MAR 9:22 Mitkar kerkerge dimonide abi waiker ko abi waipiti e abi obatawerder urem a niem. Ma kerbi omarge; mai umele kerbi upiditidarare?”
MAR 9:23 Iesude eudige abi detagri, “Ma umele iker! Na lera pe owatur daragriwerteda e umele gair lu waiker.”
MAR 9:24 Ege keko able wermira bab erer ekri, “Kara owatur ikeredi, epe no kebile ikeredi. Ma kari upinati ya waiakai kara owatur waiakai aule obai!”
MAR 9:25 Iesude dasmeri lera kub etamier; ege au kelarkelar dimoni detagri, “Asorkak a mirkaka dimoni, ka mari kelarkelar detagri ma adem teosmer able kebilelam a mage nole ko bakiamu abidoge bau!”
MAR 9:26 Ege dimonide sasmir dimri, eudige able kebile aler deskerdi, a adem teosmeda. Gaie le ge urder eudige natkareta, “E eumida!” ableglam able kebile mokakalam dali eudle.
MAR 9:27 Ege Iesude able kebilera tag derpeida a abi agisida ege akaida ekeida.
MAR 9:28 Keubu, nade Iesu tebteb bakiamuda badari able metage, abi memeglegize titmerda, “Ki naluglam nole ki able dimoni adem ismerdarda?”
MAR 9:29 Iesude yabi daratagerda, “No erkepasamide umele able orwairorwair lu adem waismer.” MRK 9.30-32
MAR 9:30 Wi able uteb dikaireta wige nakasir Galilaiage. Iesu nole lagkak dawer umerkak nerut le umele obaida e nade dawer,
MAR 9:31 ableglam e tabara memegle nerwerlare. Iesu yabi daratagerda, “Able Lera Werem ya waiperare a waigardare able le wanakwarare ya wi abi waipitare. Neis a netat gerger ya obakare e ko ya eudlam wekiam.”
MAR 9:32 Wige nole akmerkak urder e nalu detauter, wige geumge bakerer abi waitmerda. MRK 9.33-37
MAR 9:33 Wi taba Kapanamge bakarki. Nade wi bakiauda metage barti, ege yabi nautmerdi, “Wa naluglam pewa gabge tabasardeda?”
MAR 9:34 Wige nole mir natkareta ableglam nade wi gabge tarakasir wige tabasaredlare nete aukakale dali.
MAR 9:35 Iesu akaida emrida a 12 memegle tababim darabgerda. E yabi daratagerda, “Nete laglag kikem wadawer e tababu obakai keubu watadawer gair lege a e wadawer gair lera memegle.”
MAR 9:36 Iesude eudige netat kebi omaskir erpeidari a ikaidari eipuge ikeidari taba memeglege. Ege eudige akaidari abi gasu erpeidari a yabi daratagerda,
MAR 9:37 “Ese netide karim able netat kebiwerem waseserder pe able kebiomaskir uridli, e kari ko naseseredli a pako able Le ge kari taramarikda.” MRK 9.38-41
MAR 9:38 Zonede abi detagri, “Erwerle, ki kimiar dasmerlare e mari neige dimoni adem iser. Ki abi detagerda, “Ma ge ekwei ma nole able lu ko iker” ableglam e nole merbidoge ikase.”
MAR 9:39 Iesude yabi daratagerda, “Wa nole ko abi daisumdarawem e ge wekweiwa able lu akerkak. Na lelut nadgireda kari neige umerkaka waditaut adud mir karim.
MAR 9:40 Netide Pe Dorge Ikeli Merbi Asaredkak E Merbim Dorge Ikeli.
MAR 9:41 Netide mari gebgeb ni nakwarli ariem ableglam wa Kerisora uridli e ya tabara bodomalam watirpei. MRK 9.42-50
MAR 9:42 E ya aukaka seksek lu waikerider ese netide waditager netat able kebilelam e wit waikai pe abra owatur karidoge dikeredi. E ya audebele waikereder ese idid bakir obamri able le taboge a abi gurem obatimed.
MAR 9:43 Ese mari tagide mari wanakai ma wit ikai mage abi adem ismi. E debele ikeredi ma idid ge bau no netat tagtag. Ese mara neis tag wanakereder mai bakiamu Urasamkak.
MAR 9:44 [Pe nade, “Yaba uk umerkak obaum a ur umerkak obasamare.”]
MAR 9:45 Ese mari teteride mari wanakai ma wit ikai mage abi adem ismi. E debele ikeredi ma idid ge bau no netat teterteter. Ese mara neis teter wanakereder mai bakiamu Urasamkak.
MAR 9:46 [Pe nade, “Yaba uk umerkak obaum a ur umerkak obasamare.”]
MAR 9:47 Ese mari ponide mari wanakai ma wit ikai mage abi adem bataured. E debele ikeredi ma Adi Basalaiage bau no netat poniponi. Ese mara neis poni wanakereder mai bakiamu Urasamkak.
MAR 9:48 Pe nade, “Yaba uk umerkak obaum a ur umerkak obasamare.”
MAR 9:49 Gair le ya solsol waturder urger watabatitilare.
MAR 9:50 Sol pe debelu dali. Ese waiakai lagkak obai, netat lelut ya umerkak waikai solsol ko obai. Wa mokakalm uridwa solise pe debe solsol lewer waikereder; wa mapodan uridwa wader lekem.”
MAR 10:1 MRK 10.1-12 Iesude able uteb dikairti ege bakiamuda Iudaiage a bakiamuda Ioridanoi datupida. Au kub lera ko taba etami abidoge a ege yabi nerwerlare mokakalam ge e able lu gair kerkerge ikerer.
MAR 10:2 Wader Parisaiole tabakiauda abim ko abi taba miru wadamisirda. Wi eudige abi itmerda, “Ma kerbi detagrare, muige kerbi gelarge, aka kimiargize umele tabara koskir wadaratuakare?”
MAR 10:3 Iesude ge yabi nautmerda, “Wabi Mosede nako wabi waditagreda?”
MAR 10:4 Wige abi detagerda, “Mosede kerbi detagerda kimiargize umele tabara atwak-ziawali waditalare a wi tabara koskir adem wanamiklare.”
MAR 10:5 Iesude yabi daratagerda, “Mosede able kelarkelar mir ditari wabim ableglam wabi umerkak waderwerlare.
MAR 10:6 Nadege bagrarti, nadege gesep batagmer able kerkerge, Adide ge yabi daratagmi kimiar iba koskirei.
MAR 10:7 Ableluglam pa ikeredi, kimiargize tabara baba iba apuei wadarakairetlare wi obaker taba koskirge obakep,
MAR 10:8 a able rieisya waiakailam netat obailam. Wi nole neis wadaralei, wi netat wadaralei.
MAR 10:9 Pa dikeredi, lelut nole laglag wadaratakemu nalu ge Adide okasise daratkaprikda.”
MAR 10:10 Nade wi bakomerti bakiauda metage barti, ege able memeglegize Iesui titmerda able iuglam.
MAR 10:11 Ege yabi tadaratagerda, “Na kimiargize pe tabara koskir daratwakeda ei nerut koskir waispi wipe taba koskirem adud tonar ikereda.
MAR 10:12 Able orwairorwair, na koskirgize pe tabara kimiar daratwakeda ei nerut kimiar ge espi wipe taba kimiarem adud tonar ikereda.” MRK 10.13-16
MAR 10:13 Wader legize omaskir taraisa Iesuim ko e yabi wanatutirda ege memeglegize le natapereta.
MAR 10:14 Nadege Iesude able lu dasmeri, ege abra lidbagebda. E akaida tabara memegle daratagerda, “Wa omaskir nakerare wi karim watabakiauare. Wa nole yabi taramrare ableglam Adira basalaia pe ikeredi leem mokakalam wi uridli.
MAR 10:15 Ka wabi agekar detagreda, netide nole Adi basalaiaiem wadabger able korepkorep pe kebiwerem dali ei umerkak ya obau.”
MAR 10:16 Ege tabara tag nakaida gasu able omaskir narepda, a nakaida yabidoge darakmerikda a werkab yabi nakwarda. MRK 10.17-31
MAR 10:17 Nawer Iesu ga marbamarker obakiamuda, ege le abim korider temrida a kokni erapeida abi opem. E eudige Iesui itmeri, “Debe erwerle, ka nalu lu akere ya waiakai ka niai idid tarpeilu?”
MAR 10:18 Iesude abi itmeri, “Ma naluglam kari nabgeli debele? No pe Ad dali debele.
MAR 10:19 Ma umele nali 10 geiar:' ma nole ipitwa; ma nole kog derevwa; ma nole erwamem; ma nole besdiridwa; ma nole okaderdar; ma mara bab a ama narmirwa?”
MAR 10:20 Able kimiaride abi detagri, “Erwerle, ka able gair lu narmireda able kerkerlam nade kaka kebiwerem watarali.”
MAR 10:21 Iesu egremada abi barkak omaromar dasmeri a abi detagri, “Ma no netat lu laglag nali. Bakiamu mage mara gair lu iker wi wairapare, mage mara gair bakir ais lukak le naiswerare. Mara ya mamor kotorge wataragri. A tabakiamu kari narmir.”
MAR 10:22 Nade kimiaride able mir asri, abra op depigemeda akaidari okasosoksosok erkep ga ikereder. E adem bakiamudari auka okasosoksosok ableglam abra mitkar bakir nagriweretlare.
MAR 10:23 Iesu akaida tabara memegle darasmerda a eudige yabi daratagerda, “Lugizkem leem au sagimsagim ikeredi wi obarot Adi basalaiage!”
MAR 10:24 Ege memegle bazigmuarti able mirlam. Ege Iesude mena detauter, “Kara omaskir, e au sagimsagim ikeredi le obarot Adi basalaiage!
MAR 10:25 Lugizkem lera aukaka sagim daragriwerteda wi obarot Adi basalaiage pe kamela dali e obakiamu obau wali atketlu nebge.
MAR 10:26 Wige aukaise ga bazigmuarti nade wi able mir asorda. Wi tabara bautmerlare, “Pe irdiredi, nete ya idid watakai?”
MAR 10:27 Iesude ga yabim barkak darasmerda a yabi daratagerda, “Legize tebteb umerkak able lu waikerare ei Adide umele waiker. Adide umele gair lu waiker.”
MAR 10:28 Ege Peterude eudige abi ikaidari, “Ma dasmer, kiki emetu gair lu dikrida a paki mari namireda.”
MAR 10:29 Iesude eudige abi tikaidari, “Kaka mari agekar natagerli, na legize pe tabara uteb, barada, sisi, ama, bab, omaskir a gedub darakareta karim a debe mirge
MAR 10:30 ya wairpare aukakale able kerker pe irdiredi. E 100 uteb, barada, sisi, ama, bab, omaskir a gedub ya watirep - a asiasi pa nagriwerteda. A able kerker pe irdi ya obaruk e ya niai idid watirpei.
MAR 10:31 A netiba mitkar pe kikem uridli wi ya keubu waturder, a netiba pe keubu uridli wi ya kikem waturder. MRK 10.32-34
MAR 10:32 Wige gabge nakasirweretlare kei Ierusalemaem; Iesu ge kikem ikasereder memeglege. Ege memegle bazigmuarti, a legize ga abi keubu irmirlare wige geumge bakerer. Iesude ko tabara memegle naisa netat pekge nakoda a no yabi daratagerda able lu ya abim watabakerare.
MAR 10:33 E yabi daratagerda, “Wa asrare, mi pemi dikasir Ierusalemaem ya nade Lera Werem wairpeirare a waigardare Kebi Kirim Merkem a Aotarle wanakwarare. Wi ya waditautlare e seksek le dali, a wi ya waditautlare abra bodomalam pe dikeredi end. Wi ya abi waipeirare a waigardare nogleem.
MAR 10:34 Noglegize ya abi neg wadigalare, abi mosu waitulare, abi wadamrikare a abi waipitare. Neis a netat gerger ya obarkare, e ya ko wekiam idid wakai. MRK 10.35-45
MAR 10:35 Ege Zemisiba Zonei, Zebidaiora werem, wi tabakiamudariei Iesuim. Wi taba abi ikaidariei, “Erwerle, ki laglag ma kerbim nerut lu ikai.”
MAR 10:36 Iesude ge yabi nautmeri, “Wa nalu lu laglag dali ka wabim akailu?”
MAR 10:37 Wige abi detagriei, “Nade ma ya temri mabi zoromzorom basalaiage, ki laglag kiko taramrile maridoge; netat mari narbit pekge a netat mari ber pekge.”
MAR 10:38 Iesude eudige yabi daratagri, “Wa nole umerkak dali wa nalugem eutmereiei. Nako wa umele able asiasi iriam mokakalam able asiasi ya kaka arie? Nako wa umele bapataiso bapaiteredlam okasosokge mokakalam ya kaka nabapaiteredlu okasosokge?”
MAR 10:39 Wige abi ikaidariei, “Wao, ki umele akailei.” Ege Iesude yabi daratagri, “Wa ya iriam nalu ya kaka arie, a wa ya bapataiso bapaiteredlam mokakalam ya kaka bapataiso nabapaiteredlu.
MAR 10:40 Ka nole ka able le nali kaka itutilu nete ya kari narbit pekge wetemri a kari ber pekge. Able uteb ge barsirlare barkak leem, a able uteb ya no able le watabaiswer.”
MAR 10:41 Nadege wader 10 memeglegize able mir asorda ege yaba lid bagebda Zemisibim Zoneei.
MAR 10:42 Iesude yabi gair darabgerda tababim a eudige yabi daratagerda, “Wa umele uridli pe noglege tike yabi kirim le sasrimge turidli, a able legize pa wader le aukelarkelar sirdarameda.
MAR 10:43 Epe wabidoge pe ikeredi, waba tonar ya tabara wanagri. No able tonar pe dikeredi ese netat wabialam aukaka le wadawer e kikem wakai memegle obai waba kemerkemer lera.
MAR 10:44 No able gab pe ikeredi ese netat wabialam waiakai kikem obai e kikem wakai au akekerakeker memegle obai;
MAR 10:45 ableglam Lera Werem ko tabakiamuda leem dorge waikerer, nole legize abim dorge waikelare. E tabakiamuda tabara idid waikwar bodomalamise gair leem.” MRK 10.46-52
MAR 10:46 Wi tabakiauda Zerikoge. Nawerge Iesuiba taba memeglekem a lera kub pa ikeredi Zerikolam nakasirweretlare, able sadmer kimiar abra nei dikereder Batimas (e Timaiasirs werem) gabge imireder a leem bakirem bagwer.
MAR 10:47 Nade legize abi detagerda Iesu Nazaret Le pe ikasiredi, ege eudige ererekri a barbori, “Iesu! Dawitara werem! Ma kari omarge nakai!”
MAR 10:48 Ege gair legize etapereta a abi detagerda, “Ma mirkak emri.” Ege auka aler ko babori, “Dawita weem! Ma kari omarge nakai!”
MAR 10:49 Iesu ekeidari a abi mir detauti, “Wa abi kei dabgerare.” Ege able le ge urder sadmer le dabgerda. Wi abi detagerda, “Ma sererge akai, a ekei! E mari tarabgeli.”
MAR 10:50 Ege tabara gemwali adem igida, aududumdudum ekweida, a Iesuim bakiamuda.
MAR 10:51 Iesude eudige abi itmerda, “Ma nalu laglag nali kaka marim akerer?” Ege abi sadmer kimiaride detagri, “Erwerle, ka laglag nali lea koka dameri.”
MAR 10:52 Iesude abi detagri, “Mari owaturide mari nakaidari sikak baidari. Ma umele bakiamu.” Ege keko able kimiaret umele wadasmeri, ege eudige Iesuidoge atabemeda ga bakiauda.
MAR 11:1 MRK 11.1-11 Wige tabakiauda maike Ierusalemage. Wi taba kikem ge able utebge Betpeiz a Betenia ge Oliwa Paserge. Iesude tabara kikem neis memegle namarikda.
MAR 11:2 Iesude yabi daratagri, “Wa bakiamulam able utebge pe noko kikem irdiredi. Pe noko muige able utebge wa asinara werem ya erdaram pe noko tidimriredi. Nole le abidoge egimudari. Wage tidituimerlam a kei tigaredlam.
MAR 11:3 Ese nalelut wabi waditmerwa, “Wa naluglam able ikereiei?” wage abi detagerwam, “Ople laglag dali. E ya abi kei dudumge watimarik.””
MAR 11:4 Wige bakiamudariei a able asina erdariei metage adge ekweireder, tege dimrireder. Nawer ga wi ditwimeretlei,
MAR 11:5 wader le ge urder yabi nautmerlei, “Wa nalugem wa asina ditwimerteiei?”
MAR 11:6 Wige yabi daratagerda nako ge yabi Iesude tadaratagri, ege le laglag berda.
MAR 11:7 Wige able asina tigardi Iesuim. Wige tabara amiwali tumem asinage isigirda, a Iesu ge akarikda tumem emrida.
MAR 11:8 Mitkar legize tabara amiwali gabge isigerlare, a wader legize lutam isimlare gedublam a gabge isigerlare.
MAR 11:9 Lege kikem Iesuidoge nakasirweretlare a keubu ga tarakasirweretlare ererbakrier, “Mi Adi daospirlare! Adira werkab able lege ikeredi ge tabakiamuda Ople neige!
MAR 11:10 Adira werkab pe merbi bab Dawitai basalaiage ikeredi! Able basalaia pe tikase! Gair aospir Adim!”
MAR 11:11 Iesu Ierusalema balu. E bakiamuda au zogometa badari a erkep ikereder gair lu ge darasmerlare. Ege bakiamuda eosmeda ko akomeda Beteniem taba 12 memeglekem ableglam au kikem irdireder. MRK 11.12-14
MAR 11:12 Nerut gergerge wi Benenialam tabakomerti. Ege Iesura werer barki.
MAR 11:13 Ege egremada aukaka lulam iulam lu murisge taraireder nole agegkak ege bakiamuda able luge agegem watadasmeri nako abra ageg tadaramer. Ege no lam tidiwereder ableglam abra nole kerker dirdireder abra ageg obakerda.
MAR 11:14 Iesude eudi able turumkak lu detagri, “Lelut umerkak ya marialam kurup ko wairo.” Abi memeglegize asorlare e able mir detauter. MRK 11.15-19
MAR 11:15 Nade wi tabakiauda Ierusalemage bosi, Iesu bakiamudari au zogometage badari a eudige gair le adem taramuda ge wi lu baraplare a salem ikelare. E able lera yaba zorom bakir apigerlera laulau irpi adem dikri didbi a eraskiri a pako amrir bao able lera daragri ge wi dibadiba salem ikelare.
MAR 11:16 E le daramagerda, “Wa nole lu ko aisare zogometa gabem.”
MAR 11:17 Ege le ga nerwerda. E yabi daratagerda, “Able mir bautarda zogoziawalige: Kara metaya ivadabgerlare erkepasam meta able legize gair gedlam wape no pewa detauirikdarda akaidari erwamlera kur baidari!”
MAR 11:18 Kebi Kirim Merkem legize a Aotalegize able mir tasorda, wige bakeri mir ipulare nalu korepkorep wi Iesui waipita. Wi abi geumge bakerer ableglam kemerkemer lege bazigmuarti able erwerlam.
MAR 11:19 Nade kupkupi kega atraper Iesu a abra memegle pa duridli adem bakiauda able au uteblam. MRK 11.20-26
MAR 11:20 Nerut idim kakarge, nade wi gabge nakasirweretlare, wige able turumkak lu erdarda. Able lu sipkem ikemuda.
MAR 11:21 Peterude dikepwali nalu ge tabakerda ege akaida Iesui ikaidari, “Erwerle ma kei egremar! Able lu ge mama detagri e eumida!”
MAR 11:22 Iesude eudige yabi daratagerda, “Waba owatur Adidoge waikedawa.
MAR 11:23 Ka wabi agekar detagerda, ese na lelut able paser waditager, “Ma mabu bataruk a mabu batimed gurem,” a nole abra nerkepge wadimarik, ese no wairmirer nalu e waditaut ya watabakerlare, e ya abim ya obakerlare.
MAR 11:24 Abieluglam kaka wabi detagreda, nade wa erkepbasamwa a bamsawem nerut lugem, oetrawem wa ya ereplare, a wa ya ereplare nalu lu wa ya damoslare.
MAR 11:25 A nade wa erkepasamwa, ese waba lidobageblare wader leem, wa nole yabim ipitawem nalu ge wi wabim ikerda, ya waikakai waba Bab kotorge wabi wadimaiderdare wabi witlam.”
MAR 11:26 [Ese wa umerkak wader le daramaideredlare, waba Bab kotorge umerkak wabi wadimaiderdare wabi witlam.] MRK 11.27-33
MAR 11:27 Wi tabakomerti Ierusalemage. Nade Iesu ga tidigmer tabakiamuda Au zogometage, ege Kebi Kirim Merkem Le a Aule pa uridii abim tabakiauda
MAR 11:28 a abi itmerda, “Mara nalu sasrim ikeredi mape able lu ikeli? A netide mari able sasrim nakwari?”
MAR 11:29 Iesude yabi daratagerda, “Ka ko wabi kara netat lu dautmerare. Ese wa kari natagrare kai wabi yaka detagrare nalu sasrimge kaka peka able lu ikeli.
MAR 11:30 Wa kari natagrare, nako Zonera sasrim dikeredi le baptaiso wadarapaitlare tabakiamuda Adilam? Ese nole, nako e lelam ikeredi?”
MAR 11:31 Wige eudige bakeri ga tabara basarediare, “Mi nalu mi detautlare? Ese mi nabatkarte, “Adilam ikeredi”, e merbi ya waditagrare, “Wage naluglam nole Zone asorlare?”
MAR 11:32 Ese mi datautare, “No lelam ikeredi -". (Wi le geumge bakerer ableglam gair le umele urder Zone ge agekar peropeta dawer.)
MAR 11:33 Ableluglam, yaba mir Iesuim ikereder, “Ki nole umerkak.” Iesude ge yabi daratagerda, “Kai umerkak wabi detagrare nalu sasrimge kaka able lu ikeli.”
MAR 12:1 MRK 12.1-12 Ege Iesude yabi daratagerlare mir abisir miru: “Kimiaret tabara luneg waina gedubge irti. Ege kar irki abi deraweidari, e awak dirbi waina agmem a meta dimri muige gedubge. Ege wader asesered le namarikdarda bakiauda gedubge urder ya waiakai wi abi wader lewer waiswereda. Ege bakiamudari muris gedim.
MAR 12:2 Nade ga nur kerker itutidari, ege tabara dorge le emarikda able asesered leem ko yabiaiam abra arapergair wataisa able nur kerkerlam.
MAR 12:3 Ege asesered legize able dorge le erpeidarda a eparsirda a abi emarikdarda nole lukak.
MAR 12:4 Ege able kimiaride nerut dorge le emarikda; ege able asesered legize able dorge le kirimge eresa a abi aiselare.
MAR 12:5 Ege nerut dorge ga emarikda, wige abi ipita. Ege able lelut wader mitkar dorge le ga emarki; asesered legize yabi nareslare a wader ge eudem naresa.
MAR 12:6 Ege able kimiarira no netat le barikda ko waimarikda - abra nasnas werem. Ege keubu ga emarik abra werem bakiamuda asesered leem. E dikepwarer, “Wi ya sikak kara werem wairpeirare.”
MAR 12:7 Nadege able asesered legize abi erdarda, wige tabara batagelare, “Able lukem lera werem pe ikase. Tabakiaware, mi abi apitare, able gedub ya wakai meriba obai!”
MAR 12:8 Wige abi erpeidarda a ipita, a abra gem adem gedublam bataweredarda.
MAR 12:9 Iesude yabi nautmerda, “Aka wa nako dikepwareda able gedub kemlelut nalu ya nerut lu waikai? E ya watakomer a yabi asesered le ya wanarsare, a wader kerkar asesered le ya waiker gedubge wanamrare.
MAR 12:10 Wa dikepwarare able mog zogoziawalilam wawa emetu etageda: 'Able bakir, amer le detuakda e akaidari agekar bakir baidari.
MAR 12:11 Oplede able lu ikeri e merbi poniem sikak ikeredi”'
MAR 12:12 Wige laglag urder Iesui gelar pekge wairpeidarda ableglam wi umele urder able mir abisir miride yaba gem ermer. Wige no geumge bakerer ableglam lera nikidetreder. Wige abi ge dikaireta wige adem bakiauda. MRK 12.13-17
MAR 12:13 Wi wader Parisaio le a Erodira le lesuim taramirikdarda ko abi tabara miru wadamisirda.
MAR 12:14 Wi tabakiauda ge abidoge a abi detagerda, “Erwerle, ki umele uridli ma gair kerkerge agekar waditauter a ma nole le geumge wekerer. Ki umele uridli ma nole girip wairdirer able leem e nete dali; ma le agekar wanerwerlare Adira gab. Ma kerbi detagrare, pe keriba geiar ikeredi, nako e agekar ikeredi mi Kaisai bodomalam aiswelare? Nako nolekar?”
MAR 12:15 Ege Iesude umele wadasmeli yaba mir amisir. Ege yabi nautmerda, “Wa naluglam mokakalam ikereda kari namisreda? Wa zorom bakir tikadarare ya waiakai ka dasmere.”
MAR 12:16 Wige bodom bakir abim tikadarda ege eutmeri, “Netira nei iba opei pe nauperedi?” Wige abi detagerda, “Kaisara.”
MAR 12:17 Ege Iesude yabi daratagerda, “Wa Kaisai aiswerawem nalu lu pe Kaisara nagriwerteda, a Adi aisweawem nalu lu pe Adira nagriwerteda.” Wige abi miriam bazigmuarti. MRK 12.18-27
MAR 12:18 Wader Sadusaio tabakiauda Iesuim (wipe waditautlare le ya umerkak eudlam obakiam).
MAR 12:19 Wige Iesui detagerlare, “Erwerle, Mosede kerbi gelarge ditari ese kimiar nole omaskirkak weieumi able kimiar baradade ya abra maik wadispi ya waiakai able omaskir ya obos abi baradaem.
MAR 12:20 7 barada urder. Narbit baradade koskir ispida ege no eumida nole omaskirkak.
MAR 12:21 Ege nerut baradade ga abra maik dispida, a ega eumida nole omaskirkak. Able lu ko akaida nerut baradaem,
MAR 12:22 a able lu gako akaidari gair able barada ge urder. Gair able 7 barada baumi nole omaskirkak. Keubu ga koskir ko eumida.
MAR 12:23 Able kerker watabaruk nade ya eudle obakiamu ididem, ei netira koskir ya wadawer? Ege gair 7 baradage ispida.”
MAR 12:24 Iesude yabi daratagerda, “Wawa seksek le uridli ableglam wa nole umerkak zogoziawali a waba nole Adira sasrim ikeredi.
MAR 12:25 Nade eud le obakiamu ididem wi ya waurder angelaise waturder kotorge; kimiar koskirkem ya umerkak ko tabara watabasiblare.
MAR 12:26 Agekar, eud le ya obakiamu. Ese wawa emetu etagda able ziawali ge Mosede ditari, muige able adge ge ur edger luneg ititier wa emetu pewa waitaglare Adide Mosei detagri, “Kaka peka abra Ad nali Isakara a Iakobara.
MAR 12:27 Ei idid lera Ad dali, e nole eud lera dali. Wawa aukaka seksek dikepwareda!” MRK 12.28-34
MAR 12:28 Netat le Autarlelam ge dawer able mir asri ge wi miripulare. E asri Iesude barkak mir Sadusaio daratagerda. Ege tabakiamuda lesuim ko abi waitmeri, “Nalu gelar pe aukakale ikeredi?”
MAR 12:29 Iesude abi detagri, “Able aukaka gelar pe ikeredi, 'Israla le, wa asrare! Ople meriba Ad E Ople tebteb dali.
MAR 12:30 Wa omar waba Ople waba Ad kemerkemer waba nerkepu a kemerkemer waba lamaru a kemerkemer waba idoniu a kemerkemer waba kelaru!
MAR 12:31 Maike pe able aukaka gelarge ikeredi, Wa able le omarge nakerawem pe wabidoge maikes uridli able orwairorwairpe wawa wabu omarge bakereda Nole ko nerut gelar ikeredi aukakale yabim pe able neis gelar nakeredi.”
MAR 12:32 Aotarlelut Iesui detagri, “Erwerle, mama agekar detautli. E agekar dikeredi, E no netat Ad dalia nole ko nerut Ad dali.
MAR 12:33 Ese legize Adi omarge waikelare kemerkemer taba nerkepu kemerkemer taba idoniu a kemerkemer taba kelaru, a ese legize tabara maikes le omarge wanakelare, able lu ya sikak waikereder yabim able ieem pe ebur a wader lu wagimuaretlare Adim zogozogo lauiauge.
MAR 12:34 Iesude ge abi detagri, “Mama au maike nali Adi basalaiage!”, ableglam e abi asri able lera mir au pardarpardar ikereder. Keubu, gair le ge urder yaba geum barukda abi wader lugem ko waitmerda. MRK 12.35-37
MAR 12:35 Nade Iesude yabi au zogometage nerwerlare, ege le ge carautmerda, “Aotarlegize nalugem detauteda Keriso ya Dawitara werem wadawer?
MAR 12:36 Lamar Zogode Dawitai detagrer e waditauti, Oplede kara Ople detagri 'Ma ge emri kari narbit pekge nade ka mara kurab le akere mari tetergab aodage!
MAR 12:37 Dawitade Kerisoi dabgerer Ople. Pa dikeredi, Keriso ya naluglam Dawita werem wadawer?” Ege able au kub lera ge nikidetreder Iesu sererserer asorlare. MRK 12.38-40
MAR 12:38 Muige abi erwerge, Iesude lera kub daratagerda, “Wa okeoke uridwa Aotarleem wi laglag wadaragemlare piripiri wali obatkirer a yabi tamage wanareplare.
MAR 12:39 Wi tabara auka debe uteb waitutilare sunagoge a lewer aroge.
MAR 12:40 Wi koskir maikera meta erwamem wadaraislare, a tababu pa obakelare wi zogozogo le uridli pe auka piripiri erkep obasamer. Wi able tonar pe ikereda yaba asiasi bodomalam waiakai aukaise obai!” MRK 12.41-44
MAR 12:41 Iesu ga irmireder maike au zogometara bodom bakir akri bokesge, a le darasmelare bodom bakir abidoge arotlare. Gair lugizkemle kimiar aukaka bodom bakir arotlare.
MAR 12:42 Ege lukak koskir maik tabakiamuda badari a eudige neis kebi bodom bakir natimeda, wi okakise nakereder no neisneis bodom bakir.
MAR 12:43 Iesude tabara memegle okakise darabgerda a eudige daratagerda, “Ka wabi agekar detagreda, able lukak koskir maik pe dali e aukaise arti bodom bakir bokesge pe wader legize arteda.
MAR 12:44 Ege wader legize tabara kaier bodom bakir arotlare, ege e arti nalu lu ge abra daragriweretlare. E lukak le dawer, a able bodom bakir e dikri ge no abra able bodom bakir daragriwertelare.
MAR 13:1 MRK 13.1-2 Nade ga Iesu au zogometalam eosmerer, netat le abi memeglelam akaida abi ikaidari, “Erwerle, ma able aukaka bakir darasmerare! Ma able debe aukaka meta darasmerare!”
MAR 13:2 Iesude abi ikaidari, “Wao able gergerge mama able aukaka meta pema darasmerda, e nole ya netat bakir obariare tumem nerut lege ableglam yabi gair ya adem obakriare.” MRK 13.3-13
MAR 13:3 Nadege Iesu imireder Oliwa Paserge, Peteru, Zemis, Zone a Andru no wi tebteb abim tabakiaudare.
MAR 13:4 Wi taba abi itmerdare, “Ma kerbi detagridare, na kekerge ya able lu obakerare, a ma kerbi detagridare nalu ya atamilam obakerare le wanatomertare gair able lugira ya mop maike wanagri.”
MAR 13:5 Iesude yabi daratagridare, “Wa okeoke uridwa ableglam le ya laglag waurder wabi okawadirdarlare.
MAR 13:6 Le ya kari neige watabakeslare waditautlare, “Kaka peka Keriso nali,” a wi gair le okawadarardalare.
MAR 13:7 Wa nole bazigmuaretwa nade wa ares mir asrawem a nade wa au gedira mirpuipi asrawem wi tabara barseda. Able lu ya obakelare wi nole atamilam wanagriwerteda able gair lugira mop maike wanagri.
MAR 13:8 Au ged gize ya wader au ged wanareslare, a balsaia gize ya wader basalaia wanareslare. Gesep ya obaskered wader utebge. Wader au gedle ya nole lewerkak waurder. Able lu ya obakerare mokakalam pe kikem kebi asiasi waike werem pa keubu weosmer.
MAR 13:9 Wawa uridli wa okeoke uridwa. Wabi ya wadireplare a tag waimariklare a wadaislare kotem. A wabi ya sunagoge wadamriklare. Legize ya wabim tag waimariklare siramile a gesep ople opem ableglam wawa kari narmireda, a wabi ya wadikelare wa yabi Debe Mir daratagerlare.
MAR 13:10 Debe Mir ya kikem wairemlare able leem pe gair gedge uridli.
MAR 13:11 Nade wabi wadireplare a tag waimariklare kotge, waba nole okasosok obarkawem keubu ya kerker watabaruk wa nalu ya detautlare. Nade ya kerker watabaruk, wa detautawem nalu mir wabi Lamar Zogode wadaiswelare, ableglam able mir wa ya detautlare nole wabialam; wi ya wanagriweretlare Lamar Zogolam.
MAR 13:12 Legize ya tabara barada wanaislare yabim apitem, a bab gize ko, tabara omaskir wanaislare yabim apitem. Omaskir ya nole taba bab a apu sasrim lagkak waurder, a wi tabara bab apukem wanaislare apitem.
MAR 13:13 Gair le ya nole lagkak waurder ableglam wawa kari namireda, na le wabialam ya mena wadawer mena mop watabaruk ei idid watakai.” MRK 13.14-23
MAR 13:14 “Pe dikeredi, nade wa dasmerawem able Aukaka Adud Lu Obatkoare Obamaisertare waikwereder pe nole sikak ikeredi e waikwei,” (wa umele uridwa e nalu detauli)
MAR 13:15 ege able le ge Iudaiage urder wi laglag sikak waurder ya adem obakiauare paserem.
MAR 13:16 Kimiar ya taba meta totge waigereder abra umerkak kerker waikereder ese e adem obakiamu oba taba metage tabara amiwali (watikau).
MAR 13:17 Able koskir pe kemkem uridli ya waurder able kerkerge, a able koskir ya kebi omaskir omaskir waurder wi aukaka asiasi wadigilare.
MAR 13:18 Adim erkepasamwa able lu ya umerkak obakerare nade ya gebgeb kerker wairdireder,
MAR 13:19 ableglam able kerkerira le ya asiasi wadigilare aukaise ya wader legize wadigilare, able kerkerlam ge nade Adide gesep detagmi mena able kerker pe irdiredi. Keub kerkerge nole ya nerut lu ko able orwairorwair waikereder.
MAR 13:20 Ege Adide no able gerger ikeri teopai baida mokakalam tuprik. Ese e nole able waikeri, le ya umerkak idid wauridli. E able tuprik ikaida teopai baida able leem ge e natutirda.
MAR 13:21 Nade able kerker ya watabaruk, ese legize wabi waditagerlare, “Kei bager Keriso pedali!” a “Kei bager e itadali!”, wi ya besle waurder.
MAR 13:22 Bes Keriso a bes peropeta ya waurder wi ya atamilam waikelare a wader lu ya waikelare le wanakelare wi obazigmuarter, ya waiakai wi umele able le okawadaradalare ge Adide itutri, ese wi umele able lu waikelare.
MAR 13:23 Wa okeoke uridwa! Ka wabi gair mir peka detagreda keubu ya kerker watabaruk.” MRK 13.24-27
MAR 13:24 “Keubu able gair okasosok ke, able kerker watabaruk lim ya waiakai kupkupi kupkupi obai, meb ya wakai bikak obai,
MAR 13:25 wer ya watabatwer milam, a able au kelarkelar lu kotorge ya watabaskered.
MAR 13:26 Keubu, legize ya Lera Werem wadasmerare ei bazge watabakiamu au sasrimsasrim a zoromzorom.
MAR 13:27 E angeia ya wanamarkare kemerkemer gespge able le wanatkimdare ge Adide itutri gair gedlam.” MRK 13.28-31
MAR 13:28 “Wa Omilam berwerawem. Nade abra tarn obaker gebgeb ober a abra lulam obatiare, wa umele uridwa Koki kerker ya maike obaruk.
MAR 13:29 Able orwairorwair, nade wa dasmerawem able lu ga obakelare, wage umele uridwa kerker pe maike dikeredi.
MAR 13:30 Kaka wabi agekar detagreda, able lu ya kikem obakelare keubu ya able le obaum.
MAR 13:31 Kotor iba gesepei ya obasmauare, kara mir ya umerkak obasmauare. MRK 13.32-37
MAR 13:32 Le nole umerkak uridli na gergerge ya able lu obakerare. Angela muige kotorge a Werem pa dali wi nole umerkak, no Bab tebteb umele dali.
MAR 13:33 Wa utkak uridwa! Erkepeskawem! Ableglam wa nole umerkak na kerkerge ya able lu obakerare.
MAR 13:34 Able paikai pe dikeredi mokakalam kimiar obakiamu au muris gedim. E kikem tabara memegle sasrim wanaiswerare ko tabara dorge waikelare, a e asesered le waditager e mena utkak wadawer a erkep waisker.
MAR 13:35 Wage eskepeskawem ableglam wa nole umerkak uridli na kerkerge lukem le ya ko metaem watakomer - kiki limge, eipkige, idim kakarge, lim aupamaretge.
MAR 13:36 Ese e keserkeser watakomer nade ma ya ut naoperider e ya mari wanardar.
MAR 13:37 Ka wabim peka able mir detautli a gair le pa uridli: Wa erkepaskawem!”
MAR 14:1 MRK 14.1-2 Neis gerger barkiei keubu ya Yiskak Beredira Aro Gerger watabarki, Kebi Kirim Merkem a Aotarle Iesuim dasmerlare ko abi wairpeidarda a waipita.
MAR 14:2 Wige no tabara batagerda, “Mi nole able lu akairare able lewer aro kerkerge ableglam le ya waturder yaba urker obarkare. MRK 14.3-9
MAR 14:3 Nade Iesude lewer erwer muige metage able kimiarira meta abra nei dikereder Saimona Lepera Le, ege koskir tabakiamuda au bodombodom debe laglag wakaiso teper au bodombodom taporge tigmeder. E tapor mop daratrumda a debe laglag wakaiso epaiterdi Iesui kirimge.
MAR 14:4 Wader le ge urder yaba lid bageblare a tabara batagelare, “E nalugiam debe laglag wakaiso pe no ikiaii?
MAR 14:5 Legize merbi bodom bakir wadaiswerda mokakalam netat urut bodomalam able wakaisolam. Mi umele able bodom bakir lukak le wanaiswerda!” Wige au kelarkelar etapereta.
MAR 14:6 Ege Iesude yabi daratagerda, “Noiekar, wa able koskir dikairtare! Wa nalugiam abi okasosok ikereda? E karim debe lu ikaidari.
MAR 14:7 Lukak le ya mena wabidoge waurder, wa umele yabi ya upidaratidaiare na kerker ya wa laglag urder. Ka umerkak yaka ika nawar.
MAR 14:8 Able koskiride ikeri nalu gair lu e karim ikeri; e kari gemge debe laglag wakaiso epaiterdi e kara gem dirsiri ya waiakai e apkorep wadawer wetkobei.
MAR 14:9 Kaka wabi agekar detagreda, nade ga legize able debe mir marau wairmawem kemerkemer gesepge, legize ya able mir wasolare pe able koskiret ikeri. Gair le ya abi umele waurder. MRK 14.10-11
MAR 14:10 Ege netat le 12 memegielam abra nei dikereder Iuda Isakariota bakiamuda Kebi Kirim Merkemleem ya waiakaida e Iusui yabi wanakwarda.
MAR 14:11 Nade wi abi asorda yaba au serer barukdarda, wige detauta wi ya abi bodomalam waikwarda. Iuda ga daraimrer nalu korepkorep e Iesui wadipi. MRK 14.12-21
MAR 14:12 Kikem gergerge irdireder Yiskak Beredira Aro Gerger wi aresa arenio Paseka Lewer Arwem, a Iesui memeglegize eudige abi itmerda, “Ma laglag nali ki nabakiaware nade mara Paseka Lewer darsirare?”
MAR 14:13 Iesude neis yabiaiam namarikdarda, e kikem yabi daratagri, “Wa bakiamulam au utebge. Kimiaret ya ni tarpor weper ya wabi opwadidipit. Wage abi irmiram.
MAR 14:14 Nade e obakiamu metaem obau, wako balam. Wa able metara lukemle detagerwam, “Erwerle laglag dali ma kerbi kes natometare nade e a taba memeglekem ya Paseko Lewer wairware.”
MAR 14:15 E wabi ya able au kes watiditomer penoko aremge ikeredi. Gair lu wawa laglag dali able lewerem ya i wataragi. Wage merbim gair lu ge tidirsirwam.”
MAR 14:16 Able memeglegize abi dikairtiei wige bakiamudariei au utebge nade wi dasmelei gair lu mokakalam nagriweretlare ge e yabi tadaratagrer, wige Paseka Lewer tidirsiriei.
MAR 14:17 Keubu ga lim baraigida, Iesu ge tabakiamuda 12 memeglekem able utebge bosi.
MAR 14:18 Nade ga wi laulau lewer erolare Iesua akaida ge yabi daratagerda, “Kaka wabi agekar detagreda, netat wabialam pe kari kemem lewer eroli ya kari wanaup.”
MAR 14:19 Ege memeglera okasosok barukdarda wige bakeri abi netat itmerlare, “Agekar, nole kakanali?”
MAR 14:20 Iesude yabi daratagerda, “Netat wabialam 12 lelam e able le wadawer, netat le ya kiki keriba bered okakise kobarge naitelei.
MAR 14:21 Lera Werem ya weumi able korepkorep ge bautarda Zogoziawalige. Epe able le dali ya e Lera Werem wadip ya au asiasi wadigi! E wadikeper, “Ka naluglam osmeda?”” MRK 14.22-26
MAR 14:22 Nawer ge wi mena lewer erolare, Iesude bered eturuklu ege Adi ableluglam dispiri. Ege bered itri a ikaida tabara memegle nakwarda. Ege yabi daratagerda, “Wa able lu ikadarare, e kara gem peikeredi.”
MAR 14:23 Keubu ga akaida pankin etaruklu ge waina egmeder Adi ga ableluglam eswao ikaida. E ga ikaida yabi nakwarda, a wige netatnetat ga tep diskilare.
MAR 14:24 Iesude eudige yabi daratagerda, “Kara mam peikeredi ya wabim weiapaitered mitkar leem wabi le waditomertare Adira lag pedike.
MAR 14:25 Kaka agekar mir detautli, Ka umerkak yaka waina koka arie mena yaka kerkar tonar waina tarie Adi baselaiage.”
MAR 14:26 Wi eudige eswao wed Adim dikrida a bakiauda Oliwa Paserem. MRK 14.27-31
MAR 14:27 Iesude yabi gair le daratagerda, “Wa ya kemerkemer bakesmer wabi owaturge mokakaiam ge mir bautarda emeretge pe kiki detauteda, 'Adide ya mamoe aseseredle waipit ei mamoe ya adem obatrakrare.'
MAR 14:28 Keubu yaka koka idid nakailu, kai kikem nabakiamu Galilaiaem wai keubu ya taba.”
MAR 14:29 Peterude abi detager, “Able wader le umele taba owaturge obakesmer nole kakanali!”
MAR 14:30 Iesude eudige Peterui detager, “Kaka agekar mir detautli; ma ya neis a netat gaber detaut ma nole kari umerkak nali, able kige keubu ya kimiar paul neis gaber ererwekri.”
MAR 14:31 Peteru eudige esereser akaida, “Kai umerkak yaka dataute ka nole mari umerkak nali! Ese wi kari wanarsare a maridoge wanapitare kai mena yaka nawar ka umerkak able mir detaute.” Gair memeglegize able orwairorwair detautlare. MRK 14.32-42
MAR 14:32 Wi bakiaudare able utebge abra nei dike Getsemani ge nade Iesude tabara memegle daratagridare, “Wa mena ge dawidarwem nawar ka naba erkeptarasameirer.”
MAR 14:33 Ege yabi neisidare Peteru, Zemis a Zone nerut utebge ge nade e au muimui okasosoke dawer.
MAR 14:34 Ege yabi daratagridare, “Kara lamar okasosok ke dali maike eud paikaige. Wa ge dawedarwem a wage idid dawedarwem.”
MAR 14:35 Ege yabiaiam kebikebi kikemem bakiamuda a akaida sepge etkobeilu erkepasameida a Adim bagwi e umerkak asiasi wadigi nako Adide abim able lu waikaida.
MAR 14:36 E erkepasameirer, “Baba, kara Bab! Ma umele gair lu iker; Ma karialam able asiasi adem ikau. Ma nole kara lag ikerwa mage mabara lag ikerwa.”
MAR 14:37 E eudige ko akomeda bakiamuda tabara neis a netat memegle nardardare wige ut nardeder. E akaida Peterui ikailu, “Saimona, ma naluglam ut nauperedi? Mai umerkak idid wanali kebikebi wadikaili?”
MAR 14:38 A ga akaida yabi daratagridare, “Wa idid dawiderwem a erkepasamiderwem ya waiakai wabi umerkak mirem wadikerdare. Waba lamar laglag darale epe waba gem pe auka erarerar nagri.”
MAR 14:39 Ege ko akomeda yabiaiam bakiamuda erkepasameida able mirmir ge kikem tasameirer.
MAR 14:40 E eudige ko akomeda bakiamuda tabara neis a netat memegle nardardare wige ut nadeder. Yaba poni yaba au beberbeber utide darasapelare. Wi nole umerkak wi abi nalu mir waditagerda.
MAR 14:41 E nade ge ko takomeda neis a netat kerkerge, ege yabi daratagridare, “Wa naluglam mena ut derdedi? Wage no ge ut eididare waba gem dirsirdare; a nole! Able kerker pe itutida! Wa kei egridare! Abie le pema ikase ya Lera Werem wairpei wide wanakwarare.
MAR 14:42 Wa ekwidare mi nabakiaudare. Wa kei egidare, able le pedali ge kariaiam badmirikda akaida kara kurable baida. MRK 14.43-52
MAR 14:43 Nawer ge Iesude mena mir detauter, Iuda, netatle Iesui memeglelam, tabakiamuda lekem wi teibur ausos tulik a gabagaba taislare. Wi yabi Kebi Kirim Merkemgize, Aotale a Aulegize taramarikdarda.
MAR 14:44 Ege Iudade able le daratagerda, “Ka wabim yaka umerem atutilu able le yaka uma dakailu, e able le pedali wawa abim dasmereda. Abi erpeiarwem a abi igardawem le ge wauridwa abi waseserdawem.
MAR 14:45 Nade Iuda tabakiamuda able utebge ege keko bakiamuda Iesui erdari a abi ikaiada, “Erwerle!”, a abi uma dikaida.
MAR 14:46 Wige Iesui erpeidarda mena abi erpeilare.
MAR 14:47 Ege netat able lelam ge ikweireder tabara teibur ausos tulik iseda Kirim Merkemira Memegle laip dismida.
MAR 14:48 Ege Iesude yabi daratagerda, “Ka nole erwamle peka nali; wa pe karim tabakiauda gabagaba kem a teibur ausos tulik kem.
MAR 14:49 Gair gergerge ka le wanerwerlare muige au zogometa utebge, wa nole kari gewa narpeidarda. Epe sikak dikeredi; able Zogoziawali ya obatomer nalu lu agekar ikeredi.”
MAR 14:50 Ege gair abi memegiegize abi dikaireta wige korider bamre adem bakiauda.
MAR 14:51 Netat kirgir kebilelut ge Iesui irmirer e dawer no netat wali abra damireder. Wige laglag abi wairpeidarda e tabara wali dikairti ege korider emrida nesurkak. MRK 14.53-65
MAR 14:53 Wige Iesui igareda Kirim Merkemle metaem ge nade Kebi Kirim Merkemle, Aule a Aotale tabakiauda tababu ge etami.
MAR 14:54 Peterude yabi lagdaratmida baka ge espirer murisge a bakiamuda able utebge badari maike Kirim Merkemle metage, ge e nade no ge able utebge emrilu maike urge aseseredlekem ya waiakai e geb obaugli.
MAR 14:55 Ege Kebi Kirim Mekemle a kemerkemer Iudaia gelarle laglag urder nalu barkak lu wairdarda wi Iesuim ya tag waimarkeda ya waiakai wi abi waipita; wige nole nerut lu erdarda.
MAR 14:56 Mitkar legize Iudaia gelarle bes dararidlare Iesui detaudare, wige able le ge netatnetat urder yabidoge nole able mir bakedrer.
MAR 14:57 Wader le ga bakwer able besmir detautlare Iesui ikelare; “Ki abi wasorlare e ke waditauter, 'Ka yaka able au zogometa arape ge legize demerda, a neis a netat gergerge ka yaka koka nerut au zogometa damre ya umerkak legize wadimrare.'”
MAR 14:59 Ege wi ko able le urder yabidoge nole netatnetat bakedrer.
MAR 14:60 Able Kirim Merkemle yabi gair le opem ekweida a Iesui itmeri, “Mai umele mamor detaut nalu pe bamisreda? Ma ge detaut.”
MAR 14:61 Ege Iesu mena mirkak ekweireder, e nole yabim nerut mir detauti. Ege Kirim Merkem Lelut nerut orwairorwair ga abi itmeri, “Nako mama Keriso nali?, able Werkabwerkab Adira Werem?”
MAR 14:62 Iesu eudige akaida, “Kaka nali, wa ya dasmerare Lera Werem watigireder Au Sasrimsasrim Adi tuter tag pekge a ya abi dasmerare e ya watabakiamu kotor bazkem.”
MAR 14:63 Nade wi able mir asorda, ege Kirim Merkem Lelut urkerge tabara wali etwati a akaidari yabi daratagerda, “Mi nole laglag uridli wader legize merbi waditagrare nalu e ikeli; mi abra bes dasorda e Adi opmir detagri! Mi nalu abim akairare?” Wige gair legize detauta abi no apitare.
MAR 14:65 Wader no bakeri Iesui mosu ituda, a wi abra waliu op damisilare a ereslare. Wi abi detagelare, “Ese mama peropeta nali, ma kerbi detagrare nete kerbialam pedali mari naresli. Aseseredle ko urder abra op detapilare a ereslare. MRK 14.66-72
MAR 14:66 Peteru mena ge sepgr tadawer able utebge maike metage nade ge memegle neur tabakiamuda abim.
MAR 14:67 E Peterui erdari ege geb bauger; e abi natkak lidem dasmeri a eudige abi ikaidari, “Mako gema tarawer Iesui doge pe Nazaretlam dali.”
MAR 14:68 Ege Peterude desardi able mir. E eudige akaida, “Ka nole umerkak nali, ka nole able mir irmili pe mama detauti,” a ege eudige digmi bakamuda nerut pekge able utebge maike metage. Ege keko kimiar paol ererekri.
MAR 14:69 Able memegle neuret ge abi terdari a ko akaida able le daratagerda ge ekweder ur dairumaretlare, “E netat pe able lelam dali!”
MAR 14:70 Peterude ko able mir desardi. Ege kebikebi ga ko ikereder, able le ge ekweder eudige bakeri abi ikaidarda, “Agekar, mama netat pema yabialam nali, ableglam mako nali Galilaia le.”
MAR 14:71 Ege yabi kelarkelar daratagerda, “Kaka agekar detautii; ese ka bes darder, Adide ya kari bodomalam wanakai asiasi dagie. Ka nole able le umerkak nali pe wawa detauteda.”
MAR 14:72 Ege keko kimiar paol ko ererekri. Peterude eudige dikepwari Iesude ge abi detagri, “Ma ya neis a netat gaber detaut ma nole kari umerkak nali ka nete nali keubu ya kimiar paol neis gaber ererwekri.” A e akaida au okasosoksosok baida, eudige i ditimeda.
MAR 15:1 MRK 15.1-5 Nedbi ipiter nerut idimge, able Kebi Kirim Merkemle tabakiauda op bapita Aulekem, Autale a kemekemer Iudaiara gelarle ya waiakaida wi mir waipuda nalu wi waikaidarda. Wi Iesui didbarda a edomedarda bakiauda Pilatoim.
MAR 15:2 Pilatode abi itmeri, “Nako ma Mamus Iudaia lera nali? Iesu ge atkarti, “Mama agekar detautii kaka nali.”
MAR 15:3 Kebi Kirim Merkemlegize abim tag emariklare ge gair lu bamisilare. Ege Pilatode abi ko itmeri, “Ma naluglam nole nerut mir detaut? Wi marim tag emarkeda able gair lu bamisreda.”
MAR 15:5 Iesu mena mirkak dawer, ege Pilato ezigmuada. MRK 15.6-15
MAR 15:6 Gair Datupir Lewer kerkerge, Pilatode yabi wanauseda audbarlam able le ya le abim obagweda.
MAR 15:7 Able kerkerge able le ya wadali abi wadaggereda Barabas, e audbaraudbar wadali. E netat le able lelam ge wi basaredlare a le ga eudem naresa.
MAR 15:8 Nade ge lera nikidetreder taba etami a bakeri Pilatoim bagoda e yabim waikaida nalu e yabim waikerer able Datupir Lewer kererge, ege yabi nautmerda, “Nako wa laglag ka Mamus Iudaia Lera adem datwie?”
MAR 15:10 E umele dawer able Kebi Kirim Merkemlegize Iesui abim tigareda wi abim kurabkurab urder.
MAR 15:11 Ege Kebi Kirim Merkemlegize mir mitwarlare ge le nikidetreder wi obamusa Barabasim e adem wausmeda nole Iesu.
MAR 15:12 Pilatode ko yabi daratagerda ge le nikidetreder, “Wa nako a laglag uridli ka nalu akailu able leem wabi dabgereda Mamus Iudaia Lera?”
MAR 15:13 Wige abim baborda, “Abim nilaru sataoroge detagrare!”
MAR 15:14 Pilatode yabi nautmerda, “E nalu adud lu ikeri?”
MAR 15:15 Piiatode Barabasi ditwi yabim, ableglam e laglag dawer e yabidoge waisisimuda. A ga akaidari tabara sariksarikle au kelarkelar miru daratagerda ko Iesui odamrikdarda, a ya abi adem waigareda nilaru satauroge waditagerda. MRK 15.16-20
MAR 15:16 Ege sariksarik legize Iesui igareda muige able utebge maike au gelarle metage a ege eudige kemerkemer okakise aseseredle darabgerda.
MAR 15:17 Wi eudige papol wali Iesui doge; wi sikersiker aper daradara tamlam dirsirda a ikaidarda abi kirimge amida.
MAR 15:18 A wi bakeri abim ererbakrier, “Ei, Iudaia lera Mamus!”
MAR 15:19 Wi abi kirimge abi lugu areslare a abim mosu ituiare. Wi kokmamuamu bamrer abi opem a abi isorgiru ikelare.
MAR 15:20 Nade wi basemri ge emetu abi adud merwaru ikereda, wige abi tabara wali ko itkirda, a abi igareda adem ismedarda ko abi satauroge nilaru waditagerda. MRK 15.21-32
MAR 15:21 Wi gabge nakasirweretlare wige kimiar erdarda abra nei dikereder Saimona e able uteblam tabakiamuda ge nade gedub naridweretlare e kei ikasereder au utebem. E Sirini le dawer, a e Alezanda iba bab dawer Rupas ei. Ege abi ares legize aukaise detagerda e Iesura satauro wadepli.
MAR 15:22 Wige Iesui datkimuareta able utebem abra nei dikereder Golgota (able nei merbi mirge dikeredi Kirim Lidira Uteb).
MAR 15:23 Wige laglag ge urder Iesui waina waikwarda ataperet ataperet lukup able lukup muro, ege nole iri.
MAR 15:24 Wige eudige abi satauroge detagerda. Wige luglug segur batker ya waiakaida wi wadasmerda netide yabialam ya wairpeida nalu mog abi walilam.
MAR 15:25 Wi idimge ga 9 koloke abi nilaru detagerda satauroge.
MAR 15:26 Wige able mir ditarda tag emariklare, “E Iudaia lera gesep ople dali”.
MAR 15:27 Able utebge ge Iusui satauroge detagerda, wi neis erwam le ko daratagerda taba satauroge, netat Iesui narbit pekge emerider a nerut ge abi keimer pekge emereder.
MAR 15:28 [Able tonartonar zogoziawalira mir pe barmisreda pe ke detautii, Abige ikedidarda able lege wi nole gelar waimireda.]
MAR 15:29 Le ke nakasirweretlare a ke nakasirweretlare kirim deskeredlare a abi aiselare. Wi erer bakrier, “Mama sikak ikeri! Ma yama obakiamuda able au zogometa wairapi a koma wadimri neis a netat gergerge!
MAR 15:30 Pe irdiredi ma mabu adem tetugered a mage sataurolam sepem tarabu!”
MAR 15:31 Able tonartonar Kebi Kirim Merkem Le a Aotarle abi merwarem ikelare. Wi tabara batagelare, “E wader le nakerda sikak berda, e umerkak tababu obakai sikak obai!
MAR 15:32 Ei! Keriso mamanali, mamanali Isralara gesep ople, able kerker pe irdi ma sataurolam sepem tarabu ya waiakai ki umele mari nasmerare mama able lu ikeli, a ki umele mari narmirlare!” A neis le ga taba nerut satauroge namereder wi ko abi aiserlei. MRK 15.33-41
MAR 15:33 Kikem lim baida kemerkemer ged akaida kupkupi kupkupi baidari e kupkupi kupkupi irdireder mena neis a netat awa erpeida.
MAR 15:34 Neis a netat kolokge Iesu aler ererekri, “Eloi, Eloi lema sabaktani?” Able mir pe merbi mir dikeredi, “Kara Ad! Kara Ad! Ma nalugiam ma kari nakairti?”
MAR 15:35 Wader le ge urder abra erer dasorda a wige natkareta, “Wa asrare, e Elaizaem ererekrili!”
MAR 15:36 Netat able lelam korider emridari span tikada kerkar wainage titri, ikaida luge dasrida. E ikaidari Iesu ikwari ya waiakaida e wairi. Able lelut eudige detauti, “Mena, mi yami dasmerare ese Eiaiza watabakiamu abi adem sataurolam sepem watitugered.”
MAR 15:37 Iesu aler ererekri keubu ga eumida.
MAR 15:38 Wali au zogometage waitrerdedi eipuge aremlam batwata mena sepge.
MAR 15:39 Ares lera kirimle ge Iesui opem ikweireder abra ererdasri a e Iesui erdari eumida. Ege eudige atkarti, “Agekar, able le e Adira werem dali!”
MAR 15:40 Wader koskir ge urder murislam erkep tegreder. Wader le yabialam ge Maria Magdalalam, Maria (Zemis Able Kebile a lose yaba ama), a Salomi.
MAR 15:41 Muige Galilaiage able koskir gize Iesui wairmireda a abi upiwaditidareda. A wader gair koskir ko ge urder ge wi Iesuipkem tabakiauda Ierusalemaem. MRK 15.42-47
MAR 15:42 Iosepa Arimatia Le akarikda. E agekar le dawer yabialam Iudaia Opapit Lelam. E wadali wadikaili Adira basalaia ko watabakiamuda. E bakiamuda Pilatoim a abi tadamsi Iesui gemem, ableglam au kikem irdireder a able gerger ge irdireder Arsir Gerger (able gerger keubu ya Iudaia Sabad obarki).
MAR 15:44 Nadege Pilatode asri Iesu emetu eumida, ege abra serer barki. Ege ares kinmle dabgeri a abi itmeri nako Iesu emetu eumida.
MAR 15:45 Ege ares leem girip irdirer ge e abi detagri e agekar dikeredi. Pilotode Iosepai detagri e abra gem wadikada.
MAR 15:46 Iosepade marmar wali terapeidari ege gem titugerdi sataurolam, able waliu abi damisri, a ikaidari paierge ikedidari. A ga akaidari aukaka bakir terparki paier gab tege daterti.
MAR 15:47 Maria Magdalalam a Maria (Iosera ama) abi dasmele e abi nade irdidari.
MAR 16:1 MRK 16.1-8 Nade Sabad gerger emetu barki, Maria Magdalalam, Maria (Zemisira ama) a Salomi pas laglag lu terapidare ya waiakaida wi Iesura gem waditimuardare.
MAR 16:2 Sabad idim kakarge keubu ya lim wateupamada, wi bakiaudari paierge.
MAR 16:3 Nade wi gabge barukle wige tabara bautmele, “Netide ya adem bakir watirparik merbim able paier gabtelam?” ableglam able bakir aukakale ikereder. Wige egridere a erdardare able bakir emetu barparki.
MAR 16:5 Wige paierge bartidare a terdardere kirgir kebi le ke timireder narbit pekge ege abra zazerzazer wali damireder. Able koskirira au geum barkidare a azigmuartidare.
MAR 16:6 Ege yabi able kimiaride daratagridare, “Wa nole geumge ekerdare. Ka umele nali wa pewa Iesui Nazeret Le daraimele ge abi satauroge nilaru detagerda. E nole pedali, abi Adide ko ekiamda! Wa dasmerdare, able uteb pe irdiredi ge nade wi abi ikedidarda.
MAR 16:7 Bakiauare a abra memegle daratagrare, Peteru penoko dali, “E kikem bakiamuda Galilaiaem wa keubu ya bakiauare. Abi ya terdarare able orwairorwair e wabi waditagreda.
MAR 16:8 Wige bakiaudare paierlam eosidare a adem korider emridare ableglam yaba durdur a geum, a wi nole umerkak wi nalu waikaidare. Wi nole le mir daratagelare ableglam wi geumge ikele. MRK 16.9-11
MAR 16:9 [Keubu Iesu idim kakarge eudlam ekiamdari able kikem gergerge irdireder, e tababu kikem batomeda Maria Magdalaleem, (able koskir ge dawer Iesude 7 dimoni adem abialam isi.)
MAR 16:10 Maria bakiamudari able le daratagelare ge wi Iesuipkem urder. Able le wi budge urder a i bazwer,
MAR 16:11 a nadege Mariade yabi daratagelare Iusu idid akaida wi nole abi asolare. MRK 16.12-13
MAR 16:12 Keubu, Iesu tababu batomeda nerut noge yabim neis leem nadege wi gabge nakasireder kei gedub utebem.
MAR 16:13 Wi akomedariei wader le daratagerda, wige nole yabi nasolare. MRK 16.14-18
MAR 16:14 Keubu ga Iesu tababu batomedari 11 memegleem nade wi lewer erolare, e yabi natapereta ableglam wi nole owaturkak urder a wi nole asolare nadege yabi wader legize daratagelare ge wi Iesui erdarda idid akaida.
MAR 16:15 E akaida yabi daratagerda, “Wa bakiauare gair gedim able gesepge a Debe Mir marauermawem gair leem.
MAR 16:16 Netiba ya wasolare a bapataiso obapaitlare wi ya sikak waurder. Netiba ya nole wasolare ya yaba ya adud bodomalam wanagri.
MAR 16:17 Abie legize wi ya wasolare yaba ya able atamilam wanagri: Wi yadimoni adem waislare muige kari neige. Wi ya kerkar mir wanagalare.
MAR 16:18 Ese wi tabo watakelare wi nole ya asikak waurder. Ese wi eudeud ni wairilare yabi umerkak gimide wanatutilare. Nade wi tabara tag wadikmiriklare gimgim lege able lera ya gim obasemrer.” MRK 16.19-20
MAR 16:19 Nade yabi Oplelut emetu mir daratagerda, ege eudige abi Adide igardi kotorem ya waiakai e Adi tuter tag pekge waitimi.
MAR 16:20 Ege memegle adem bausi a marau eremlare gair utebge. Oplede dorge yabi kemem ikerer; e atamilam le natomeretlare Debe Mir ge memeglegize eremlare e agekar mir dikeredi.]
LUK 7:11 Mizmiz 7 nosik 11-17 Kebi niainiai, Iesu bakiamuda able kebi utebge abra nei dikereder Nein; abra memegle a lera ga nikidetreder abi kemem bakiauda.
LUK 7:12 Nawarge Iesu tabakiamuda maike able uteb karge, wader legize ge eudle tigaredlare; e no netat werem koskir maikira wadali. Gair le able uteblam ge urder able eudle apuidoge.
LUK 7:13 Nade ga Oplelut able koskir dasmeri, abra aukaka nas barki. E akaida abi detagri, “Ma nole iezo.”
LUK 7:14 Ege digmi bakiamuda eudlera meta itutida; able legize ge eplare wige no bakwi. Iesude abi detagri, “Kirgirle, ka mari natagri, ma ekiam!”
LUK 7:15 Ege able eudle etida emrida a akaida mir detauti, a Iesude abi ikaida abra apu ikwari.
LUK 7:16 Gair le ge urder wi bazigmuarti; wi Agudi dispirda a ke detautlare, “Au peropeta pe merbim batomeda! Agud tabakiamuda tabara le upidaratidareda!”
LUK 7:17 Legize Iesura able mir debreredlare kemerkemer Iudayage a pako wader ged maike narid. mizmiz 7 nosik 36 - mizmiz 8 nosik 3
LUK 7:36 Netat lelut Parisayolam Iesuim mirigri ko abidoge lewer wairwi; e bakiamuda Parasayoi metage badari a eididari lewer arwem.
LUK 7:37 Netat koskir witge wadali able utebge; e asri Iesude ge lewer erwer Parisayo metage, ege tikada au bakirbakir debe laglag wakaiso able au bakirbakir tarporge igmeder. E Iesuidoge keubu ikweireder maike abi teterge iezwer. Ege abra i pog deskeder abra teter daratimuarer, ege abra teter taba musu daratkirer, uma darakerer a debe laglag wakaiso yabidoge epaiter.
LUK 7:39 Nade able Parisayo, ge Iesuim mir igri able lu dasmeri, e eudige dikepwari, “Ese able kimiar agekar peropeta wadali, e ya umele wadali nalu koskiret pe abi itutili, a e umele wadali abra tonar pe witwit dikeredi!”
LUK 7:40 Iesude abi detagri, “Simona ka laglag mari nerut mir natagrer.” Simonade abi detager, “Wau erwerle, ma kari natager.”
LUK 7:41 Iesude abi detagri, “Able bakir taragrile neis le bakiru tardaragri; netat le 500 zoromzorom bakir a nerut le 50 zoromzorom bakir.
LUK 7:42 Able neis le ge yaba nole bakir daragriweretlare ko abi bodomalam waiswereriei, ege no yabi daratwi. Nete able neislelam abi au omarge ikerer?”
LUK 7:43 Simonade abi detagri, “Ka dikepwali, able le ge adem batwi ge mitkar bakir aisi.” Iesude abi detagri, “Ma kari barkak natagri.”
LUK 7:44 Iesu bataurigda able koskirem a akaida Simona detagri, “Ma able koskir dasmer. Ka tabakiamuda mari metage badari mape nole kari ni nakwari kara teter ogwanatkiri, epe e kara teter ognatkili taba iyu a taba musu pe natkirli akaidariei watwet baidariei.
LUK 7:45 Ma nole kari uma nakaida, epe able koskiret mena kara teter uma darakeli nade pe kaka tabakiamuda badari mena bakedida able kerkerge pe irdi.
LUK 7:46 Ma nole wakayso kari kirimge epaiterdi epe able koskiret kara neis teter kemerkemer nakadari able au bakirbakir debe laglag wakaisoyu darasali.
LUK 7:47 Ka mari natagri, mi umele abi au omarlam dasmerei abra mitkar wit pe batkirda. Nete pe batkirli kebikebi e no kebikebi omarge dali.”
LUK 7:48 Ege Iesu akaida able koskir detagri, “Mara wit pe batkirda.”
LUK 7:49 Wader le ge emreder eudige dikepwarda, “Nete pe able le dali e umele wit waitkir?”
LUK 7:50 Iesude able koskir detagri, “Mari owaturide mari nakaidari sikak baida; ma bakiamu mapodange.”
LUK 8:1 Kebi niainiai Iesu ikasereder kemerkemer au uteb a kebi utebge ge e marauermer Debe Mir able Agudira Basalaia detauter. Able 12 memegle abi kemem bakiauda,
LUK 8:2 a pako wader koskir ge netiba nadgirda adud lamarlam a gimlam. Maria (ge abi dabgelare Magdalale), able le ge abra 7 demoni abialam adem disa, ge dawer; a pako Zoana (Kuzara koskir ge Erodira kirim memegle dawer); a pako Suzana a pako mitkar wader koskir ge Iesui a abra memegle wi upidaratilare tabara turumu.
LUK 9:18 mizmiz 9 nosik 18-24 Nerut kerkerge, Iesu tebteb erkepasameirer. Ege memegle ko ge urder, ege eudi ge yabi nautmerda, “Nako legize detauteda kaka nete nali?”
LUK 9:19 Wige abi detagerda, “Kepkep legize detauteda mama Zone Baptaiso nali; a wader legize pe ikereda mama Elaiza nali; a wader legize pe detauteda mama au emeret peropeta nali ko ma idid akaida.”
LUK 9:20 Ege yabi nautmerda, “A wape nako pewa detauteda ka nete nali?” Peterude abi detagri, “Mama Agudira Keriso nali.”
LUK 9:21 Ege Iesude yabi kelarkelar daratagerda ko nole able mir waditauteda netat leem.
LUK 9:22 Ega yabi ko daratagerda, “Able Lera Werem e ya au asiasi wadigi, a Aule, a Kebi Kirim Merkem, a Aotale ya nole abi lagkak waurder. Abi ya waipitare, e neis a netat gergerge ya ko wayakai idid obai.”
LUK 9:23 Ege ga akaida gair le daratagerda ge ge urder, “Nete laglag karidoge watabakiamu, e nole tababu obakepwarwa, tababu tabara satauro wepwa gair gegerge, a kari wanarmirwa.
LUK 9:24 Netide laglag tabara idid wakur, e ya weumi: nete ya karim weumi e ya tabara idid watirpei.” MIZMIZ 9 NOSIK 28-36
LUK 9:28 Able piripiri mokakalam 8 gerger barukdarda ge Iesude able lu daratautlare, ege Peteru, Zone a Zemis naisidare paserem ogidare erkepasamem.
LUK 9:29 Nade ga e erkepasameirer, abra op depigemelu a abra wali akaida mokakalam poni atkiredatkired perper.
LUK 9:30 Keserkeser neis le, Mose a Elaiza, ge daralei abi mir detagelei.
LUK 9:31 Wi batomerdariei yabi zoromide nadari, wige Iesui detagerlei nako abra ididira mop ya Yerusalemage waikereder muige Agudi mirapuge.
LUK 9:32 Peteru a nerut neis memegle wi ut nardeder, ege wi ekiamdare a Yesura zorom dasmerdare a neis le nakweireder abi kemem.
LUK 9:33 Nade able legize Iesui dikairetlei, Peterude abi ikailu, “Kirimle, e debele ike ki peki dale. Ki neis a netat mud akerdare, netat marim, netat Moseim a netat Elaizaim.” (E nole umerkak e nalu detauter.)
LUK 9:34 Nade ga e mena mir detauter, baz tikalu a abi mudide yabi natkamidare. Able memegle geumge bakerer ge yabi bazide nartidare.
LUK 9:35 Ege kodomir teosmeda bazlam, “Kara werem pedali, Kaka itutida. Abi asrawem!”
LUK 9:36 Nade ga kodomir esemuda, Yesu ga tebteb ikweireder. Ege memeglegize gumik ispilare a wi nole le daratagerda able kerkerge. mizmiz 9 nosik 51-62
LUK 9:51 Maike ga dikereder abra kerker waditutida nade Iesui ya ko waigardi kotorem, ege tabara idoni detaurigda obakiamuda Ierusalemaem.
LUK 9:52 Ege mir aisisle kikem namarikdarda; wi bakiauda ge able utebge muige Samariage ko abim lu watidisirda.
LUK 9:53 Ege le ge turder nole Iesui opdipita ableglam e kei ikasereder Ierusalamaem.
LUK 9:54 Nade able neis memegle Zemisiba Zonei able mir asriei wige eutmeriei, “Ople, nako ma laglag nali ki ur dabgerei kotorlam watabu able le wanasare?”
LUK 9:55 Iesu bataurikda ge yabi nataperti, wige no bakiaudare nerut utebem.
LUK 9:57 Nawer ga wi gabge nakasirweretlare, ege kimiaride Iesui detagri, “Ka mari namirer nagedim ma nakasereder.”
LUK 9:58 Iesude ge abi ikaidari, “Sumes ebur uridli yaba sumesge uteb nagriwerteda, a aperdaraperdar ebur pe uridli yaba tabara pek darawerteda epe Lera Werem pedali abra nole tabara uteb dirdiredi ko weidi a ner wezi.
LUK 9:59 Iesu akaidari nerut kimiar detagri, “Ma kari tararmir.” Ege able kimiaride abi ikaidari, “Ople, ma kari kikem namarik ka nabakiamulu kara bab tatkobeilu.”
LUK 9:60 Ege Iesude abi detagri, “Eudlegize umele tababu tabara eud buai wanatkoblare. Mage bakiamu eosmer able mir Agudi Basalayara ebrered.”
LUK 9:61 Nerut kimiar ge akaidari, “Ople, Kaka yaka mari narmire, mage kari nakai ka nabakiamulu kara buai taramrare.”
LUK 9:62 Iesude eudige abi detagri, “Netiba pe nole tababu kemerkemer baiswereda taba dorgeem pe Agudi gedubge ikeredi e nole abkorep dali Agudi Basalayage.”
LUK 10:1 mizmiz 10 nosik 1-20 Keubu, Oplelut wader 72 le etakri a yabi namarikdarda bakiauda bausi neis neis nakasirweretlare gair au utebge, a gair kebi utebge ge nade Iesu tababu ikasereder able utebge le darasmerlare.
LUK 10:2 Iesude yabi daratagerda, “Aukaka nur pe abi epe kepkep dorgele uridli ko lewer waitgare. Wa Ople damsawem erkepasamu, e lukemle dali nurira, ya wayakai e wader dorgele ko wataramarkare abra nur waditkimdare.
LUK 10:3 Wa bakiaware! Kaka wabi damarkeda bakiaware baus a wa ya nole aseseredlekak urder mokakalam mamoi waurder yabidoge aregareg eburge.
LUK 10:4 Wa nole bakir aisawem lugarapem, nole epeikak, a nole tetergablukak. Wa nole gabge bakowa le mir daratagrawem.
LUK 10:5 Nade wa metage barotwa wage kikem detkartawem, “Mapodan gairleem muige able metage.”
LUK 10:6 Ese able lelut mapodan lag waikerer ge wadawer, wabi mapodanira werkab ya abidoge wadawer. Ese able lelut nole mapodan lag waikerer, wage waba werkab ko abialam adem ikadarawem.
LUK 10:7 Wa no ge able netat metage uridwa. Erwawem a iriawem nalu lu wi wabi wadaiswerawem, ableglam dorgele e sikak dali tabara bodomalam wairep. Ese wa bakiawawem nerut metalam nerut metaem, wage ko tabakomeretwa able metaem nade ya wa urder.
LUK 10:8 Nade wa bakiawawem muige able utebge, able legize wabi wadirpawem, wi wabi lewer wadaiswerawem wage erwawem.
LUK 10:9 Wa gimgim le ge nadgirawem able utebge, a able le ge daratagrawem, “Kotor Basalaya pe tabakiamuda wabim maikem.”
LUK 10:10 Ese wa bakiawawem nerut utebge barotwa, a legize nole wabi wadirpawem, wage ko adem bakiawawem gabge bauswa a wage detautawem,
LUK 10:11 “Kiki wabi utebira pi kerbi teterlam adem etkaperdeda ko waba sirip obarkare. Agekar Agudira Basalaya pe tabakiamuda wabim maikem.”
LUK 10:12 Kaka wabi detagreda, Keub Gergerge, Agudira omar pe aukakale ikeredi witwit leem Sodomira ya abra omar wadikereder leem able utebira.
LUK 10:13 Wai Korazin! Wai Betsaida! Wabi legize ya asiasi wadigiare! Ese able etamilam ge bakerda muige wabidoge eipuge ge bakerda muige Tayage a Saidonge able le pe turidli wi no obamri tabara okasosok wali wamida a tababu tibiu obatimwareda ko merbi waditomerteda wi taba witlam tabatareda!
LUK 10:14 Keub Gergerge Agudira omar ya Taya a Saidon leem aukakale waikereder ya abra omar wabi leem wadikereder.
LUK 10:15 Marim Kapanam! Nako ma laglag nali mari kotorem nagisrare? Mari ya adem wataratimdare Asiasi Utebem!”
LUK 10:16 Iesude eudige tabara memegle daratagerda, “Netide wabi wadasorlare wi kari ko wanasorlare. Netide wabi detwakeda wipe kari ko natwakeda. Netide kari natwakli epe Agudi ko detwakli ge kari taramarikda.”
LUK 10:17 Nade able 72 le tabakomerti wige au sererge urder. Wi detautlare, “Ople keriba aukaka sasrim nagri able demonide ko kerbi dasreda nade ki mari neige ki yabi au kelarkelar daratagreda!”
LUK 10:18 Iesude eudige yabi nakerda, “Ka Satanai geka dasmerer e takesmeri kotorlam mokakalam perper.
LUK 10:19 Wa asrare! Ka wabi kelar daiswerda ya wayakai wa umele wabi teteru tabo a bokani daraskimelare, a wader sasrimsasrim lu pa Kurablera daragriwerteda, a umerkak wabi nalugide ya wabi wadireslare.
LUK 10:20 Wa nole sererge uridwa ableglam wabi adud lamargize wabi dasorlare. Wa sererge uridwa ableglam waba nei inoko kotorge taraisirwerteda. mizmiz 10 nosik 25-37
LUK 10:25 Netat kerkerge, able Gelar Erwerle ekweilu laglag Iesui wadamisri taba miru. Able kimiaret eudige Iesui itmeri, “Erwerle, ka nalu lu akailu ya wayakai ka niai idid tarpeilu?”
LUK 10:26 Ege Iesude abi detagri, “Nalu lu pe naisirwerteda muige Gelar Ziawalige? Ma nalu waitager able ziawalilam?”
LUK 10:27 Ege abi able kimiaride ikaidari, “Ma omarge mara Ople mara Agud ikerwa kemerkemer mari nerkepu, a kemerkemer mari lamaru, a kemerkemer mari kelaru, a kemerkemer mari idoniu” a “Ma omarge mara le maikes maridoge able orwairorwair mokakalam ma mabu omarge bakeli”.
LUK 10:28 Ege Iesude abi ikaidari, “Ma nalu pema kari detagri e barkak dikeredi. Ese ma mena able lu ikerer ma ya mena idid nawer.”
LUK 10:29 Ege able kimiar dawer tababu obakaida aukaka wadali gair legize abi wadasmereda, e Iesui ga itmeri, “Kara nete le dali maikes karidoge?”
LUK 10:30 Iesude abi detagri, “Nade able le bakiamuda Ierusalemaem Zerikolam, abi wader erwamlegize erpeidarda gair lu abi adem etkamerda, a abi eresa. Nade wi abi dikaireta gab dege, e maike weumida.
LUK 10:31 Ege Iudaya merkem ko tikasireder able gabge. Nade e tabakiamuda able kimiar erdari ege no bakiamuda able gabge nerut pekge.
LUK 10:32 Able orwairorwair merkemira upiatidarle ga tidikasereder. E ko tabakiamuda able utebge osmeda, e able kimiar erdari e ko no bakiamuda nerut pekge able gabge.
LUK 10:33 Samariale e ga tikasireder, abra mimi tidikereder taba able utebge osmeda nade ge able kimiar dawer. Nade ge abi Samarialelut erdari ege abra aukaka nas abim barki.
LUK 10:34 E bakiamuda abi erdari ege waina a wakaiso napaiterdi abi zizge a able ziz bad amer wali mogu irpi, keubu ga able kimiaride abi ikaidari taba eburge igimudari ya able eburgize le wanaiseda. Ege abi igardi able metage ya nade wi le wanaseserdeda. E abi ge able metage imridari.
LUK 10:35 Nerut gergerge e able meta aseseredle neis zoromzorom bakir nakwari a abi detagri, “Ma able kimiar aseseredwa. Ka nade yaka tarakomeilu ka mari yaka koka bodomalam nakailu ese ma ya nalu lu abim ikerer.”
LUK 10:36 Iesude eudige detauti, “Maridoge pe nako dikeredi, nete yabialam able neis a netat le ge maikesle dawer able kimiarira ge abi erwamlegize eresa?”
LUK 10:37 Ege eudige able Gelar Erwerle akaidari Iesui ikaidari, “Able kimiaride ge abi nasdigari.” Ege eudige Iesu akaidari abi detagri, “Ma bakiamu eosmer ma ge mara omar ikai wader leem aukakale obai mokakalam able kimiarira aukaka omar dikeredi wader leem.” mizmiz 10 nosik 38-42
LUK 10:38 Nade Iesu a abra memegle yaba mimi mena kei ikereder, Iesu bakiamuda able utebge nade ge able koskir dawer abra nei dikereder Mata, ge e Iesui dabgeri taba metaem.
LUK 10:39 Matara nerut berbet dawer abra nei dikereder Maria, e sepge imireder Iesura mir dasrer.
LUK 10:40 Mata nole ge tadawer Mariaidoge ablelam e baugwater mitkar lu dararsirlare. E eudige akaida Iesui ikaidari, “Ople, nako mama dikepwali e seksek dikeredi kari berbetide nakairti paka tebteb nali nole upiatidarkak mitkar dorge kaka ikeli? Ma abi detager e watabakamu kari upiwanati!”
LUK 10:41 Ege Oplelut abi ikaidari, “Mata! Mata! Mama au sagim digili a au mitkar lugize mari nausakeda.
LUK 10:42 No netat barkak lu ikeredi ma ikerer: Mariade emetu itutida able netat barkak lu, a ei umerkak ya adem obakau abialam.”
LUK 13:1 MIZMIZ 13 NOSIK 1-9 Able kerkerge ge wader le tabakiauda Iesui detagerda able Pilatode wader Galilayale naresa nade wi zegulu agimuaretlare Agudim.
LUK 13:2 Ege Iesude yabi nakerda, Wa nako dikepwareda, able le wi au witle uridli pe nole mokakalam gair Galilayale uridli ableglam wi asiasi digieda able orwairorwair?
LUK 13:3 Nolekar! Ka wabi detagreda, ese wa nole wabi witlam tabatarare, wa ya gairle baum maike able orwairorwair.
LUK 13:4 A able 18 le ge baumi Siloamge nade ge able meta arapeida yabidoge abi. Wa nako dikepwareda, able eudide merbi detomerteda wige au witle urder nole mokakalam pe wader Ierusalemale uridli?
LUK 13:5 Nolekar! Ka wabi detagreda, ese wa nole wabi witlam tabatarare, wa ya gairle baum maike able orwairorwair.
LUK 13:6 Ege Iesude yabi able mir abisir mir daratagerda, “Netat lelut taba gedubge lu irti tabara ageg arwem. E bakiamuda agegem dasmerer able luge ege nole nardarda.
LUK 13:7 Ege eudige akaida tabara geduble ikaida, “Ma asor, ka pako ka tabakiamuda agegem dasmeli able luge neis a netat urut pe irdiredi, ka nole ageg nardarda. Ma abi adem ismi! E no seb detkoli.”
LUK 13:8 Ege able gedub lelut ikailu, “Kerimle, ma ko dikair netat urut; ka yaka abi darbe kemerkemer a lukup apaite.
LUK 13:9 Ese able lu ya ageg obakerare, ei debele waike; ese nolekar, ma umele ya adem ismi.”
LUK 15:1 MIZMIZ 15 NOSIK 1-32 Nerut kerkerge gair bakir-atkimedle a witwitle taba etamida Iesui dairumareta ko abi wasorda.
LUK 15:2 Ege Parisayo a Aotale abi mudmir damilare, “Able le e witwit lege imiredi, a yabidoge ko lewer eroli!
LUK 15:3 Ege Iesude yabi mir abisir mir daratagerda:
LUK 15:4 “Ese wabialam netatle wadawer abra 100 mamoe waurder ei netat obadmirik sumesem obau, ei nalu waikai? E no wader 99 mamoe wadarakairtare e obakiamu able admirikadmirik mamoeem wadasmer mena e wairdar.
LUK 15:5 Nade ya e wairdar, ei waikai taba gilidge watidikmerik a watigered gedim. Keubu e ya tabara tebud buaikem okakise wadarabgerare, a yabi wadaratagrare, `Mi okakise sererge nabaprekrare ableglam ka koka kara able mamoe erdari ge badmirikda.'
LUK 15:7 Ka wabi datagrare, able orwairorwair nale penoko kotorge turidli ya au sererge otabaprekrare able netat witleem pe Agudim ko takomeda nole mokakalam 99 barkak le ge wi nole Agudi dikaireta.”
LUK 15:8 A ese able koskirira 10 zoromzorom bakir wadaragri, ei netat odidmirikda, ei nalu waikai? E bakiamudari lampa dirsirikda, meta tabara udirpi a abi deraimri mena e erdari.
LUK 15:9 Nade ga e erdari, e ya tabara tebud buaikem okakise wadarabgerare, a yabi wadaratagrare, `Mi okokise sererge nabaprekrare ableglam ka koka kara able zoromzorom bakir erdari ge badmirikda.'
LUK 15:10 Ka wabi datagrare, able orwairorwair Agudira angela sererge tabaprekreda able netat witle pe Agudim ko takomeda.”
LUK 15:11 Iesude yabi ko daratagerda, “Able kimiar dawer abra neis werem daralei.
LUK 15:12 Ege keimer werem akailu abi ikaida, “Pe irdi ma kari kara lu naiswer keubu ya ma eumi. Ege able kimiaret tabara gair debelu derapeiri a ikeri tabara neis werem neisweri.
LUK 15:13 Able kepkep gerger barukdarda, ege keimer wermet tabara gair lu okakise itkimdi a aisi bakiamuda aumuriz gedim, ge nade e dikrier tabara bakir gair adudluge.
LUK 15:14 E tabara gair bakir dikri. Able kerkerge le able gedira asiasi odigieda ableglam lewer no kebile wanagri, a able kebilera au werer obarukli.
LUK 15:15 Ege eudi ge akailu memegle bailu able gedlera. Abi kerimlelut emariklu eosmelu bakiamuda abi gedubge puaka wanaseserdeda.
LUK 15:16 E akailu au wererwerer baida e laglag puipi wairwi ge nalu puakagize erolare, ableglam abi nole netat lelut lewer ikwari.
LUK 15:17 Ege eudi ga barkak dikepwari, “Kari babira penoko gair memegle uridli yaba mitkar lewer penoko daragriwerteda arwem, a wader ko kayer barieda. Ka pe peka nali able gedge wererge ekeli ableglam nole lewer arokak.
LUK 15:18 Ka geka nakweilu a nabakiamulu kari babem a abi datagre, “Bab, kaka wit ikaida Agudi opem a mari opem.
LUK 15:19 Ka nole abkorep koka nali mara werem: ma kari ko nakai mara memegle nabailu mokakalam pema wader uridli.'”
LUK 15:20 Ege eudige tekweilu a ko takomeda taba babem. E mena ge murizge tikasereder ege abi babet erdari a ege abra au omar taba diketida. E korider emrida taba wermem tabara tag igardi abi gasu erpeida a uma dikaida.
LUK 15:21 Able wermet eudige abi ikailu, “Bab, kaka wit ikaida Agudi opem a mari opem. Kaka nole abkorep koka nali mara werem.”
LUK 15:22 Ege abi babide tabara memegle darabgerda, “Wa dudumge! Wa bakiaware debe wali taisare a abidoge amiare. A tag amilu tikadarare abra tag pimge damiare a tetergab tarakdarare abi teterge daramiare.
LUK 15:23 A ga bakiaware au derged-derged werem kau tipitare mi lewer akelare, ableglam kara werem maike weumida a epe idid mena dali; ege badmirikda a abi pe ko bardarda.” Wige lewer ikerda.
LUK 15:25 Able kerkerge narbit werem ge adge gedubge dawer. Nade e tabakiamuda maike metage e umele wasri warupira mut a le kab barier.
LUK 15:26 Ege narbit wermet memegle dabgeri a abi itmeri, “Nalu pe ikereda?”
LUK 15:27 Ege eudige memeglelut abi ikailu, “Mara barada ko takomeda, a mari babet au derged-derged werem kau ipiti ableglam abra werem ko tadakomeda sikak nole gimkak.”
LUK 15:28 Ege eudi abi au baradara au weku barki a nole lagkak dawer obakiamuda metaem obada. Ege abra bab kei adem teosmeda taba abi igarder obakiamuda muiem obada.
LUK 15:29 Ege eudim tabara bab ikailu, “Ma karim girip irdi; gair urut ge barukdarda kaka marim dorge waikeli mokakalam memegle a ka no mari wanasoli. Ma nole kari nakwari able nani ko lewer obakerda kerbi tebud lekem.
LUK 15:30 Ege mari nerut wermet no mara debelu adem dikri gabneurge. Nade e takomeda gedim mage derged-derged kau werem abim ipiti.”
LUK 15:31 Ege abra bab akaida abi ikailu, “Kara werem, ma pema wanawer karidoge. Kara gairlu pe nagriwerteda mara.
LUK 15:32 Epe debele dikeredi wi lewer ikereda a sererge uridli, ableglam mara barada maike weumida a epe idid mena dali; ege badmirikda epe abi ko pe bardarda.”
LUK 16:19 mizmiz 16 nosik 19-31 Netat kerkerge lugizkem le wadali, e gair kerkerge au bakirbakir debe wali wetkili. E gair gergerge sererserer wadali. Abra gair debelu wadaragri.
LUK 16:20 Nerut kimiar abra nei waditkeredi Lazaro e nole bakirkak wadali. Badgize abra gem dikadarda, a e gair gergerge adge waiperedi able au mitkar luglug le metalam maike tege.
LUK 16:21 E laglag wairwi able lewer puipi ya obatwereda able mitkar lugizkem le laulaulam. Ei omai gair kerkerge watbaskeda abra bad wadisomdeda.
LUK 16:22 Able lukak le eumida ege abi angelagize igareda Abramaidoge timridarda ge able lewer kotorge tidirsilare. Able lugizira apu ga eumida, a abi etkobeidarda.
LUK 16:23 Muige Urasamkak utebge, ge e au asiasi digier, e egremada Abramai erdari aumurizge a Lazaro ge abidoge timireder.
LUK 16:24 Ege eudige ererekri, “Baba Abrama! Ma kari omarge tarakai: ma Lazaro temarik e tabara tagpim nige watakmei a watabakiamu kara werut gebem waitimuar ableglam kaka asiasi digili muige able urge!”
LUK 16:25 Ege abi Abramade tidetagri, “Kara werem, ma mena dikepwali nako mama idid watarali mai gair debelu ma watirepli. A Lazarode ya gair adud lu watirepli. Able kerker pe irdi epe sererge dali mape asiasi pema digili.
LUK 16:26 A nerut pe dikeredi, able aukaka muimui awak pe merbidoge eipuge iperedi, ya waiakai netat lelut umerkak wadatupi kerbialam obakiamu mari watarardar, a netat lelut umerkak watadatupi kei watabakiamu kerbim pe nade mama tarali.”
LUK 16:27 Ege able lugizira apu akaidari abi detagri, “Baru bab, ka marim bagwi, ma Lazaro emarik obakiamu kari bab metage
LUK 16:28 pe nade kara 5 barada turidli. Ma abi emarik yabi umerem watadaratagrare ya waiakai wi umerkak watabakiauare able asiasi utebem.”
LUK 16:29 Abramade abi detagri, “Mari baradara tuduridli Mose a perepeta ko yabi umerem watadaratagerlare. Mari baradagize umele yabi watarasorlare.
LUK 16:30 Ege lugizira apu akaida abi ikaidari, “Nole bab Abrama, wi umerkak yabi watarasorlare! Ese netat le eudlam wekiam a yabim obakiamu wi ya taba witlam watabatare.”
LUK 16:31 Ege Abramade abi detagri, “Ese wi nole Mose a peropeta tarasreda, wi umerkak ya watarasrare ese netat le ya eudlam wekiam.”
LUK 17:5 mizmiz 17 nosik 5-10 Able kaimegiz gize Ople detagerda, “Ma keriba owatur ikai aukakale obai.”
LUK 17:6 Ege Oplelut yabi daratagerda, “Ese waba owatur no kebile nagriwerteda able orwairorwair pe kebi mastad kep ikeredi, wa umele baker able au kelarkelar sipsip lu detagrare, “Ma mabu adem sipkem barbormur seplam a mabu bamordar ge gurge,” e ya wabi wadasrare.
LUK 17:7 Ese netat wabialam abra memegle wadawer, ei mara gedub wadirber; nerut kerkerge ei mara ebur wanaseserdlare, nade e taba dorgelam watakomer, nako ma abi detager, “Ma kei taba ge namri a lewer aro”?
LUK 17:8 Ma umerkak abi detager! Mai akai abi detager, “Ma kara lewer dirsir, a keubu ga akai mabu barsir, a kei tabakiamu taba kari sirnami nade yaka kara lewer arwer. Keuba ya ma mabra lewer ero.”
LUK 17:9 Ma umerkak ya able memegle eswao ikai nalu ge e ikeri nalu ge mama abi aukaise detagri e waikeri.
LUK 17:10 E able orwairge wabidoge ikeredi. Nade wa gair lu ikereda ge wabi detagerda wa waikerda, wage bakaretwa, “Ki no memegle uridli. Ki no able dorge ikerda ge kerbi detagerda ki waikerda.” mizmiz 17 nosik 11-19
LUK 17:11 Iesu digmer Ierusalemaem ege bakiamuda ge ikasereder Sameria ke irdireder a Galilaia ke irdireder.
LUK 17:12 Nade ge e ikasereder able utebem, ege 10 Lepera legize abi opdipita. Wige murizge tikweider
LUK 17:13 wige erer tabakri, “Iesuoi! Ople! Ma kerbi omarge dikerare!”
LUK 17:14 Nade ge Iesude yabi nardarda ege yabi daratagerda, “Wa bakiauare, wabu batomertare merkemem.” Wi nade ga gabge merkemem nakasir, wige bakeri sikak berda.
LUK 17:15 Netat yabialam tababu basmeri e akaida sikak baidari e takomeda tabakiamuda Iesuim aukaka aler Adi dispiri.
LUK 17:16 Able kimiar, e Samaria le dawer, tababu ikaida ge esigimeda Iesui opem a abi eswau ikaidari.
LUK 17:17 Iesude eudige abi ikaidari, “10 lepera le ge bakeri sikak berda; wader 9 pe nade uridli?
LUK 17:18 Nuluglam pe able suble no e takomedari Adi eswau waikai?”
LUK 17:19 Iesude eudige abi detagri, “Ma ekwei a bakiamu. Mama akaidari sikak baida ableglam mara owatur ikeredi.
LUK 18:1 mizmiz 18 nosik 1-8 Ege Iesude yabi able mir abisir mir daratagerda, ya waiakaida wi oberwerda wi nako erkep obasamer a nole erkepasam wadikairtare.
LUK 18:2 Muige utebge ei autmer le wadali e nole Adi wasoli a e nole le wanasreda.
LUK 18:3 Muige able utebge ei koskir maik ko wadali. E mena watabakseli autmer leem a abi waikeli, “Ka laglag ma kari nazimu kari kurablelam!”
LUK 18:4 Able piripiri ei autmer le obaukarikli, ege keubu ga dikepwari, “Gair wader kerkerge ka nole Adi wasrer a ka nole le wanasorlare,
LUK 18:5 epe no able kerker pe irdiredi ka yaka able koskir maik upidatilu ableglam e mena tikasiredi kari natkoli. Ese nolekar, ei mena watikasereder karim a keubu ya kari aukaise wanatko.”
LUK 18:6 Ege Oplede ga daratagerda, “Wa dasmerare nako seksek autmer lelut detauti.
LUK 18:7 Wa nako dikepwareda? Nako Adide able le upiwadaratidarare ge e itutri, pe wi erer bakrili abim gair gergerge a kige? Nako e wapum wadawer yabi upiatidarem?
LUK 18:8 Kaka wabi detagreda, wao e ya yabi upiwadaratidarare; e ya dudumdudum wadawer yabi upiatidarem. Nade ya Lera Werem watabakiamu able gesepem nako e owatur wairdar?
LUK 21:25 MIZMIZ 21 NOSIK 25-36 Iesude detauti, “Able adudlu ya obakelare limge, mebge a pako werge. Able gesepge, wader buaigiz ya able gur bumerlam a au meglam geumge obakelare.
LUK 21:26 “Le ya geumge erkepinorge obakelare nade wi odasmerlare able bodomalam ya watabakiamu kemerkemer gesepem; wer a wader lu pe mige nagri ya adem obaker taba agekar uteblam.
LUK 21:27 “Keubu wi odasmerare Lera Werem watabakiamu bazge au sasrimsasrim a au zoromzorom.
LUK 21:28 “Nade able lu ya obagrertare, wa bako a erkep adem nagredawa ableglam wabi azimwaretira kerker pe itutida.”
LUK 21:29 Ege Iesude yabi gesepira ad daratagerda; “Wa bager a dasmerare able roz lusik.
LUK 21:30 “Nade wa dasmerarwem yaba lulam ya obatiare a obom, wa umele Koki ya obaruk.
LUK 21:31 “Able korepge, nade wa dasmerlare able wader adud a geumgeum lu ya obakelare, wage umele uridwa Agudira Baselaya ya watabakiamu.
LUK 21:32 “Kaka wabi agekar detagreda, able lu ya obakelare keubu ya able le obaom.
LUK 21:33 “Kotor iba gesep ei ya obasmawam, kara mir ya mena niayem waikereder.”
LUK 21:34 “Wa okeoke! Wa erkepeskawem! Wa nole wabu baiswerawem a gair akepwar waba wanagriwertawem aumitkar lewer erwawem, a nole au goroki iriawem a nole waba gesep akepwar wanagriwertawem.
LUK 21:35 “Ese wa able lu ikelare, able Gergeride ya wabi keserkeser wadirpare nole atagerkak.
LUK 21:36 “Wa erkepeskawem, a erkebasamwa ya wayakai wa umele adem bakeslare gair able luglam, a wa umele nole geumkak nakweder Le Werem opem.”
LUK 24:35 MIZMIZ 24 NOSIK 35-48 Able neis lede detauti paretkak taba kaimegizem nalu akaidari gabge, a wi azigmadariei Ople nali nade e able areto itrida.
LUK 24:36 Nade e wiabi detagerda tabara memegle, bazigmarti Ople epedali iabidoge. “Mapodan wabim,” e etkarti.
LUK 24:37 Iaba geum barukda ableglam wi dikepwarda e namar dali.
LUK 24:38 E no etkarlu iabim, “Naluglam wa geumge bakeli? Naluglam able adud idoni taba wabi akepwarge?
LUK 24:39 “Dasmer kara tag a teter, a wa umele kakanali. Wa kara gem itutrare waiakai wa umele ka nole namar nali. Kara gem a kara lid; namar nolekar.
LUK 24:40 Ege tabara tag a teter natometare tabara memegle.
LUK 24:41 Au serer barukda, wi nalu waikaidarda, abi nautmerda, “Wa asreda gair lu arwem able utebge?”
LUK 24:42 Wi abi wib lar ikwarda, e irwi iabi opem.
LUK 24:44 Ege iabi etkarlu kega, “Able orwaiorwai lu peike kaka detauti wabim ka iaka nawer iabidoge; gair lu dautarer ga Gelar Mosera, ge daurarer peropetara a pako Samge, otaba agekar obai.”
LUK 24:45 E iaba idoni bauskilu wige Zogoziawali dimirwartare.
LUK 24:46 E wabim etkarlu, “Able mir bautarda: Able Mesaiade asiasi digi, ege ekiamda eudlam neis a netat gergerge.
LUK 24:47 “Lu ma abra mir ais etomeret meriba wit mir waditaut Ierusalamage a gair le pe uridli able gesepge.
LUK 24:48 “Wa dasmeri able mir e barkak mir dike.”
JOH 1:1 MIZMIZ 1 NOSIK 1-20 Keubu able gesep batagmi able Logo dawer; e dawer Agudi kemiem a e dawer able orwaiorwai mokaklam Agud.
JOH 1:2 E dawer Agudi doge able giz agraretlam.
JOH 1:3 E Agudi kemiem dawer giz agraret kerkerge.
JOH 1:4 Abi neige Agudide gair lu daratagemda; nole netat lu ge abi umerkak barsirda muige gair lu atagemge.
JOH 1:5 Able Logo dawer giz ididira, a able idid dawer bi gair leem.
JOH 1:6 Able bi zorom ezimuli kupkupige a able kupkupide nole netat gaber abi esami.
JOH 1:7 Agudide temarikda tabara mir aisisle, abra nei dikereder Ioane.
JOH 1:8 E tabakiamuda le wadaratagerda able bilam, wayakaida legize able mir wayasorda a yaba o wadaraturda.
JOH 1:9 E nole dawer able bi tababu; e tabakiamuda yabi wadaratagerda able bilam.
JOH 1:10 Able agekar bi pe bi waiswerer gair leem ya watabakiamuda gesepem.
JOH 1:11 Able Logo dawer muige able gesep a Agudide able gesep detagmi abi neige ege able gesepide nole abi opdasrerti.
JOH 1:12 E tabakiamuda able gedim ge abra irdireder ege abi buaigize nole abi erpeidarda.
JOH 1:13 Wader legize abi erpeidarda a abidoge tabara owatur idagda ege yabi sasrim naiswerda ko bakeri Agudira omaskir berda.
JOH 1:14 Wi nole Agudira omaskir berda gesep tonarge ablegise mokakalam omaskir obaos gesep ablam; Agud dawer tababu yaba Ab.
JOH 1:15 Able Logo akaida le baida a dawer merbi doge mi abra zorom dasmerda, able zorom ge e terpeida a ableglam Babira netat a tebteb werem e dawer au mitkar a omarge agekarge.
JOH 1:16 Ioanede abi detauti.
JOH 1:17 E erer ekrier kega, “Pe dali able le geka abi tiditauter kega, 'e kari keubu tikase a epe no aukale dali karim ableglam e tadawer keubu kaka eosmeda'.”
JOH 1:18 A abi mitkar omarlam mi gair legize erepda werkab a yako areplare gair kerkerge.
JOH 1:19 Gelar ge tabakiamuda mosei doge; omar a agekarmir tabakiamulei Iesu Kerisoi doge.
JOH 1:20 Nole netat lelut Agudi dasmeri no able netat a tebteb wermet pe timi Babi tuter tag peke, e abi ikaida paretkak baida.
JOH 2:13 NOSIK 13-25 Able kerker Iudaia lera paseka taba maike, Iesu bakiamuda Ierusalemaem.
JOH 2:14 Muige erkepasam metage e le nardarda kau, mamoe a dibadiba (salemikelare) ia waiakai agimurtem; ege nardarda bakir dorgele dorgege urder.
JOH 2:15 Ege tabara amriklu dirsiri lagerlam ege namuda kau a mamoe adem erkepasam metalam. Ege bakir dorgelera zoromzorom bakir depeki, a iaba laulau epaiti.
JOH 2:16 E eudige dakaidari le daratagerda ge dibadiba salemikelare: “Adem bakiaware! Wa nole kari Babira meta ikairare lu arap uteb obai!”
JOH 2:17 Abra memegle dikepwarda able mir zogoziawalide detautli, “Kara lag mari metaem, Agud, karidoge urise dikweiredi.”
JOH 2:18 Ege Iudaia le aukelarkelar bautmeri, “Nalu Lamarira kelar obakelare kerbi oditomertare mamanali ma umele able lu iker?”
JOH 2:19 Iesude iabi daratagerlare, “Able erkepasam meta detkoare, kai koka dewelare neis a netat gergerge.”
JOH 2:20 Iudaia legize abi detagerda, “Ki 46 urut aisa able erkepasam meta ki demerda - ma nako ia demer neis a netat gergerge?”
JOH 2:21 Agekar mir, Iesude able erkepasam meta detauter pe abra gem dike.
JOH 2:22 Keubu e eudlam ikiamda abi memeglera mena abra mir wanagri iabi idonige nalu ia e oditautli, a wi umele wauridli zogoziawali a Iesura mir agekar mir.
JOH 2:23 A nade ga Iesu dawer able paseka lewerge Ierusalemage, gair legize abi irmirlare nadege Iesude Lamarira kelar ikerer.
JOH 2:24 Ege Iesu nole iabi doge okase dawer ableglam a auka umele gair lera idoni.
JOH 2:25 E nole lakak nale abi oditagri lera idoni umele sopkak obatawirik.
JOH 8:1 MIZMIZ 8 NOSIK 1-11 Wige gair bakiauda taba gedim, ege Iesu ge bakiamuda Oliwa Paserem.
JOH 8:2 Nedbi ipiter nerut gergerira ege takomeda a bakiamuda able utebge ge nade au zogometa ewereder, nade ge lera nikidetreider taba abi deirumareta. E ge akaida emrilu ga yabi nerwerlare.
JOH 8:3 Able Aotale a Parisayo legize netat koskir tigareda ge wi adud tonar kimiarei ikelei ge nole abra kimiar dawer. Wige abi ikaidarda gair le opem ekweidarda.
JOH 8:4 Wige eudi Iesui ikaidarda, “Erwerle, nerut lelut able koskir terdari wi kimiarei tadarali pe nole abra kimiar dali.
JOH 8:5 Muige kerbi Gelarge, Mosede kerbi kelarkelar detagerda ki koskir bakiru eudem natimedlare nade wi able lu waikelare. Nako mako detautli mokakalam ge Mosede detauter?”
JOH 8:6 Wi able miru abi ikelare laglag abi kesrem udimaridarda ya waiakai wi abi miru waikereda a abim tag waimarkeda. Ege Iesu no etkobeida taba tagpimu war sebge ditarer.
JOH 8:7 Nawerge wi mena abi itmerlare, ege etilu barkak emrilu yabi daratagerda, “Nete wabialam nole witkak dali ege kikem able koskir bakiru wairbor.”
JOH 8:8 Ege ko etkobeida a war sebge ditarer.
JOH 8:9 Nade ge wi able mir asorda wige netatnetat abialam adem bauser aulelam ditimeda mena bakedida wi gair puipikem adem bakiauda. No Iesu ga dawer tebteb a able koskir ga mena ikweireder abi opem.
JOH 8:10 E etilu barkak emrilu able koskir itmeri, “Wi nade uridli? Nako, le nole abkorep dali mari bakiru natimdi?”
JOH 8:11 Ege abi koskiride ikaida, “Nole lelut kari bakiru natimdi, ople.” Iesu ge akaida abi detagri, “Kako umerkak mari bakiru natimde. Ma no bakiamu mage nole ko wit ikerwa.”
JOH 10:22 MIZMIZ 10 NOSIK 22-30 Able kerker tabarki wetpurem a Ko Turper Wadikedidarda muige Ierusalemage. E au gebgeb kerker irdireder, ege Iesu baka muige tidigmer au zogometage, able utebge ge dabgelare Solomona Maisoge.
JOH 10:24 Iudaya le ge etami Iesu dairumareta a abi itmerda, “Ma na niainiai kerbi dereplare ki nabaremlare? Ma kerbi paretkak detagrare; nako mama Keriso nali?”
JOH 10:25 Iesude yabi daratagerda, “Kaka wabi emetu detagerda, waba nole karidoge oka dali. Able lu kaka ikeli kari Bab sasrimge wabi agekar detomerteda, waba nole karidoge oka dali ableglam wa nole kara mamoi uridli.
JOH 10:27 Kari mamoigize kara kodomir asreda; ka yabi umele nali a wipe kari namireda.
JOH 10:28 Ka yabi niai idid naiswereda wi ya umerkak obaum; netat lelut ya umerkak yabi kari taglam adem wanaisare.
JOH 10:29 Kari Babet yabi kari naisweri; e aukelarkelar dali gair leem, a nole netat lelut ya umerkak yabi kari taglam adem wanaisare.
JOH 10:30 Bab a ka ki netat dali.”
JOH 18:33 MIZMIZ 18 NOSIK 33-37 Pilato ko akomeda Gelar Metaem. Ege Iesui dabgeri a abi itmeri, “Aka ma Iudaia lera gesep-ople nali?”
JOH 18:34 Iesude detauti, “Able karim ikeredi Iudaia lera autmer. Nako mara autmer ike?”
JOH 18:35 Pilatode abi ikaida, “Ka nole Iudaia le nali! Mara buai a pako yaba kirim mirkemle mari kari nakwarda; ma nalu ikai ma bodomalam ya able erpei?”
JOH 18:36 Iesude akaida, “Kaka nole gesep-ople nali able gesepge. Ese ka gesep-ople ika wanali, kara armirlegiz ya wairesa ya wayakai wi wadimegerda able Iudaia le kari arpeilam. Nolekar, kara baselaya nole geseplam ike.”
JOH 18:37 Ege Pilato akaida, “Aka ma pema detauti mama gesep-ople nali?” Iesude abi ikaida, “Mama detauti kaka gesep-ople, a mama agekar detauti. Kaka gesepge eosmeda ya wayakai ka agekar detauter. Netiba ya agekar laglag waurder wi kari ya wanasorlare.
JOH 20:1 MIZMIZ 20 NOSIK 1-10 Idim kakarge able Sabad idimge, keubu ya lim wateupumada, Maria Magdalalam bakiamuda able bakir kurge ege terdari bakir adem ikadarda able bakir kurlam.
JOH 20:2 Ege eudige korider emrida Simona Peteruim a nerut memegle ge Iesude abim lag ikerer. E Bakiamuda yabi daratagri, “Wi Ople adem ikadarda bakir kurlam a mi nole umerkak wi abi nade ikedidarda!”
JOH 20:3 Ege Peteru a nerut memegle Mariai dikairtiei a wige korider emridariei bakir kurem. Able nerut memegle korider emrida baka kikem bakir kurge ableglam e au korider korider dawer Peteruim.
JOH 20:5 E bakiamuda aparsirer a deketrer able bakir kurge. Ege eudige erdari piripiri wali ipereder ege nole bakiamuda muiem badari.
JOH 20:6 Simona Peteru keubu baka ge teosmeda a keko bakiamuda bakir kurge muiem badari. E ko terdari able piripiri wali ge tipereder, a able wali pa ikeredi ge Iesui kirimge erpeder. Able wali ge tabara ipereder wader walilam ege no tababu able utebge batrata.
JOH 20:8 Ega able nerut memegle, ge korider emrida bakiamuda kikem bakir kurge, bakiamuda bakir kurge badari. E bakiamuda able lu erdari a ege umele baida.
JOH 20:9 Wi mena umerkak daralei yabi idonige nole zogoziawalira mir ikereder, ge ke detauter Iesui yako eudlam wekiam.
JOH 20:10 Wige able memegle ko akomedariei gedim. MIZMIZ 20 NOSIK 19-31
JOH 20:19 Able Sabad kige, memegle okakise etami. Te ge eimireimir nagriweretlare ableglam wi geumge bakerer Iudaia kerimlelam. Ege Iesu tabakiamuda yabidoge eipuge ekweidari. Eudige yabi able miru daratagerda, “Mapodan wabim.”
JOH 20:20 E akaida yabi tabara tag a bir natomereta. Ege memegle au sererge baprekerda nade ge wi Oplei erdarda.
JOH 20:21 Ege Iesu ga ko akaidari yabi daratagerda, “Mapodan wabim. Ka wabi damarkare mokakalam ge Babide kari taramarikda.”
JOH 20:22 A ga akaidari yabi daratagridare, “Wa Lamar Zogo erpeirare.” Eudige yabidoge wag emariklu.
JOH 20:23 Nalu wit wa lelam ya natkilare ei obatkilare; nalu wit wa ya lera daraudaglare yabidoge wi mena ya wanagri.
JOH 20:24 Netat le 12 memeglelam, abra nei dikereder Tomas (abra nerut nei wadikeredi Okak Aosmele) nole ge yabidoge dawer nadege Iesu tabakiamuda yabim.
JOH 20:25 Nade ge wader memeglegize abi detagerda, “Ki Oplei erdarda!”, Tomaside eudige yabi nakerda, “Kara nole oka emari able mirge. Ese ka able nilar dub dasmere abi tage a ka kara tagpim amariklu abi dubge, a kara tag datware abi birge, ka yaka kara oka amariklu able mirge.”
JOH 20:26 8 gerger barukdarda able memegle ge ko metage etami, able kerkerge Tomasge yabidoge dawer. Te ge aumiraumir nagriweretlare ege Iesu ga tabakiamuda yabidoge ekweidari, a able miru ga yabi daratagerda “Mapodan wabim.”
JOH 20:27 A keubu ga akaida Tomasi ikaidari, “Ma mara tagpim ge darazirik: ma darasmer kara tag pe nakeredi. A mara tag titrimurik a ikai kari birge dazirik. Ma nole owaturkak nawa, ma no mara oka karidoge emari.”
JOH 20:28 Tomaside eudige abi ikaidari, “Kara Ople a kara Agud!”
JOH 20:29 Ege Iesu eudige akaida abi ikaidari, “Ma mara oka ikaida karidoge emarikda ableglam mama kari nardari. Na legize ya tabara oka waimarilare karidoge wi nole kari nasmerda ya au sererge waurder.”
JOH 20:30 Taba memegle opem Iesude ga gair wader lu ikerer ge nole bautarda muige able ziawalige.
JOH 20:31 Agekar, able lu ge bautarda ya waiakai waba idid wanagri muige Iesui doge nade waba oka waimari Iesui doge e dali Keriso, Agudira Werem.
JOH 21:1 MIZMIZ 21 NOSIK 1-19 Nerut kerkerge, Iesu ko tababu batomeda taba memegleem maike Taiberia aukeperge, e able tonartonar batomeilu:
JOH 21:2 Simona Peteru, Tomas (abi dabgelare Okak Aosmerle), Natanial (Canalam muige Galilige), Zebedaiora werem pa darali, a tabara neis ga daralei Iesui memeglelam ge okakise etami.
JOH 21:3 Simona Peterude eudige yabi wader daratagerda, “Ka tabakiamulu larem.” Wige wader natkareta abi ikaidarda, “Mimi nabakware.” Wige adem daragemda a bakiauda narge batri, wige kemerkemer able ki ikadarda nole lar asaperkak.
JOH 21:4 Nade ga lim deskeser, Iesuge wege ekweireder, ege memegle nole umerkak urder e Iesu ge tikweireder.
JOH 21:5 Ege eudige yabi darabgerda, “Kara buai, aka wa nole lar esaperda ao”? Wige abi tiditagerda, “Nolekar.”
JOH 21:6 Ege eudige yabi daratagerda, “Wa waba larasaperlu batawerdare narbit tag pekge narira; wa ya lar nardarare.” Wige larasaperlu batawereda wi umerkak ko wadigwarda ableglam auka mitkar lar ge nagriweretlare.
JOH 21:7 Able memegle ya Iesude abim lag waikeli Simona Peteru detagri, “E Ople pedali!” Simona Peterude ge tabara wali adem igilu. Nade e asri Ople ge tadawer, e tababu waliu ko bamisri a eupamada gurim.
JOH 21:8 Wader memegle narge tabakiauda weem larasaperlu tigwatlare emetu lar dabweiri; ableglam wi nole welam murizge urder.
JOH 21:9 Nade wi wege baupamarti, wige erdarda lar urge ikairtedera bered ga nagriweretlare.
JOH 21:10 Iesu ge akaida yabi daratagerda, “Wa wader lar taisare pe wawa tesaperda.”
JOH 21:11 Simona Peteru bakiamuda narge a takomeda lar asaperlu tigwater emetu large dabweiri. Ge nagriweretlare 153 au lar muige larasaperluge ge e nole bargeirda.
JOH 21:12 Iesude yabi daratagerda, “Wa tabakiaure lewer arwem.” Able memegle ge gair geumge bakerer abi waitmerda, `Ma nete nali?' ableglam wi umele urder e Ople dali.
JOH 21:13 Iesu bakiamuda yabim, bered etarukda a ikaida yabi nakwarda. A ga akaida yabi lar nakwarda able orwairorwair.
JOH 21:14 Able kerkerge neis a netat gaber Iesu tababu batomeda taba memegleem nade ge eudlam ekiamda.
JOH 21:15 Nade yaba lewer aro esemeda, Iesude Simona Peterui itmeri, “Simona, Zonera werem, nako ma karim mamor lag ikeli pe able legize karim lag ikereda?” Ege abi detagri, “Waw Ople, mama umele nali ka marim lag ikeli.” Iesu eudige akaida abi detagri, “Ma kara kebi mamoi naseserdawem.”
JOH 21:16 Neis gaber Iesude ga ko eutmeri, “Simona, Zonera werem, nako ma karim lag ikeli?” Ege abi detagri, “Waw Ople, mama umele nali ka karim lag ikeli.” Iesude ga abi detagri, “Ma kara mamoe naseserdawem.”
JOH 21:17 A neis a netat gaber Iesude ko abi itmeri, “Simona, Zonera werem, nako ma karim lag ikeli?” Peterura okasosok barki ableglam Iesude abi itmeri neis a netat gaber `Nako ma karim lag ikeli?' E Iesui detager, “Ople, mama umele nali gair lu; mama umele kaka marim lag ikeli!” Iesu ga akaida abi detagri, “Ma kara mamoe naseserdawem.”
JOH 21:18 “Ka mari agekar mir natageli; nade mama kelarkelar wanali mai mabu ma mara wali waisgerikli a obakesli nagedim ma laglag obakiamuda; nade ma ya akai aule bai, mai mara ya tag itrimurker a wader legize ya mari wanazgiriklare a mari wanagaredlare able utebem ma nole lagkak obakiamuda.”
JOH 21:19 Muige able mirge Iesude Peteru detager e nako weumida a Agudim zorom waigardi. Ege Iesu akaida abi detagri, “Ma kari tararmir.”
ROM 8:12 MIZMIZ 8 NOSIK 12-23 Pedikeredi kara berbet, e no merbim dikeredi mi able tonar dakairtare nalu meriba witwit idoni laglag dali.
ROM 8:13 Ese wa waba adud akepwar irmirlare waba lamar ia weumi; ese wa no Lamar Zogo asorlare a waba adud tonar dikairtare waba lamar ia idid waurder.
ROM 8:14 Able le Agudi Lamaride daratkimwarteda Agudira omaskir uridli.
ROM 8:15 Able Lamar Zogo wa erpeidarda nole wabi dikerda geumgeum atriatri le berda; nolekar, e wabi dikerda Agudira omaskir berda. Abi Lamar Zogo sasrimge mi Agudim ererbakrili: “Baba kara Bab!”
ROM 8:16 Lamar Zogo a meriba lamar okakise merbi detagreda paretkak mimi uridli Agudira omaskir.
ROM 8:17 Mimi uridli Agudira omaskir a mi ia mi tarperare Kerisora werkab abi doge. Mi ia Kerisora zorom nabagarare ableglam mi asiasi digieda mokakalam ge e diger.
ROM 8:18 Kari doge dikeridi mi asi digieda pe mi able gergerge no kebi kakale nagriwerteda ia able zorom merbim waike paretkak.
ROM 8:19 Gair lu Agudi detagem dikaireda erkep iskeda Agudim e tabara omaskir wanatomertare.
ROM 8:20 Gair lu Agudi detagem bakeri atutirkak berda Agudi ubilam, nole tabalam. Agudide ko detaut gair lu Agudi detagem ia debele wanagri semersemerlam, a wi ia amisirkak waurder mokakalam Agudira omaskir ia amisirkak waurder.
ROM 8:22 Mimi umele gair lu Agudi detagem asiasi digilare mena able kerker pe irdi mokakalam koskir werem aosmerge wadawer.
ROM 8:23 A nole tebteb gair lu Agudi detagem; mimi netiba Lamar Zogo daragriwerteda (able kikem Agudira bodomalam merbim) mi ko mi merbibu moketmir digareda nawar mi dikaireda Agudide merbi kemerkemer waditakrare tabara omaskir a meriba gem waikai amisirkak obai.
1CO 1:22 MIZMIZ 1 NOSIK 22-25 Iudaia legize aukaise obautmerer nalu Lamarira kelar obakelare waiakai oditomeretlare Kerisora kelar. Giris legize aukaise odasmerlare pardarem.
1CO 1:23 Kipe no iabim wairemlare Kerisora eud tumem satauroge. Able Iudaia legise dikepwareda able lugide detomerteda Keriso gebgeb dali, a Giris legize dikepwareda e paim lu dikeredi.
1CO 1:24 Ege Agudide no wader Iudaia le a Giris le darabgerda ko abi wairmirlare, epe able le umele uridli ki wairemlare able Keriso e Agudira sasrim dali a Agudira pardar dali.
1CO 1:25 Nalu mi dasmereda mokakalam Agud nole kelarkak epe au kelarkelar ikeredi le kelarem, a nalu mi dasmereda mokakalam Agud nole pardarkak epe au pardarpardar ikeredi le pardarem.
1CO 8:1 MIZMIZ 8 NOSIK 1-13 Pedikeredi, ka iaka wabi datagrare able lewerlam pe keisor agudim wagimuretlare. Agekar, meriba aukaidoni nagri, pe wawa detauteda. Aukaidonide le waikai weber a aospirlam epe omaride no le odimer barkak gabge.
1CO 8:2 Aukaidoni waike umerkak le waikai sikak obai gair luge.
1CO 8:3 Epe able le Agudi irmiri ikeli, Agudira pardar ia abidoge waike.
1CO 8:4 Pedikeredi, kara okakes lewerarwem pe keisor agudem agimuretlare. Mi umele able keisor agud wi beslu nagri, a mi umele epe no netat agekar Agud dali.
1CO 8:5 Wader legize detauteda aumitkar agud uridli a ople muige kotorge a gesepge.
1CO 8:6 Epe mimi umele no netat Agud dali. E dali Bab ge gair lu detagmi. Mi abra uridli. Epe no netat Ople, able Ople Iesu Keriso. Gair lu batagerma abi doge a mimi uridli abi doge.
1CO 8:7 Wader le nole umerkak able agekar mir. Kikem kerkerge, wi wadikepwareda iaba keisor agud idid wauridli, a able lewer wi wagimurteda agekar wanagri keisor agudira. Able kerkerge muige abi okage wi mena uridli okakise keisor agudide a wader korep lewer. Nade wi able lewer erweda wi odikepware wi seksek ikereda, a wi odikepware wi batkoeda.
1CO 8:8 Epe leweride nole merbi daiseda Agudim maikem. Mi nole gair lu depekeda nade mi able lewer erweda, a mi nole able lu erpeireda nade mi dikaireta able lewer aro.
1CO 8:9 Wa okeoke, wa nole amisirkak uridwa ese wa netat le ikairare wit waikai able lera pe owatu gebgeb ikeredi.
1CO 8:10 Ese netat lera pe abra owatu gebgeb ikeredi wabi odasmerlare (pe waba aukaidoni ike) wairolare muige keisor agudi metage, wa umele uridli abi upiatidar obakwar able lewer wairo pe keisor agudim wagimuretlare; e iako odikepwar e batkoi.
1CO 8:11 Able tonarge wabi auidonide detkoi owatu wabi gebgeb berbetira, ge abim Keriso eumida.
1CO 8:12 Wa wit ikereda Kerisoim nade wa wit ikereda wabi berbetem, wa iabi nakereda sirip bakereda.
1CO 8:13 Pedikeredi, ese lewerlam kara berbetide wit waikai, ka iako dakailu leweraro niaikarem. Able tonarge ka umerkak kara berbet datkoi.
1CO 9:16 MIZMIZ 9 NOSIK 16-23 Ka umerkak nabauspire peka Debe Mir eremli; nolekar, kari aukaise natagri ka armer. Ese ka umerkak able Debe Mir armer ka umerkak sererge nawer.
1CO 9:17 Ese ka armer no ableglam pe kaka laglag nali, ka laglag nawer ka bodomalam arpeilu. Kape eremli ableglam Agud laglag dali ka akerer. Kaka irmirli e kari aukaise natageli.
1CO 9:18 Nalu kara bodomalam? Ka able Debe Mir eremli ka nole bakir erepli ableglam ka nole aukaise autmeli pe nalu kara ike - kara bodomalam.
1CO 9:19 Kaka amisirkak le nali, nole nerut lera memegle; kape kababu bakeli gair lera memegle ia waiakai mitkar le obaker Kerisoim.
1CO 9:20 Nade ka nawer Iudaialege, kape wekerer mokakalam Iudaiale ia waiakai ka iabi taraislare. Able leem pe nade Gelarge uridli, ka akaida iabi kaise baida (epe ka kababu nole Gelarge nali).
1CO 9:21 Nade ka nawer able lege pe adge uridli Gelarlam, kape wekerer mokakalam able le (epe ka kababu nole amisirkak Agudi gelarlam - kaka Kerisoi gelarge nali).
1CO 9:22 Nade ka nawer able lege pe iabi owatu gebgeb nagri, kape wekerer mokakalam gebgeb owatule, ia waiakai ka wader akere sikak ober gair korep tonarge.
1CO 9:23 Ka gair able lu ikeli ia waiakai ka umele upidaratidalare able Debe Mir abreredge. MIZMIZ 9 NOSIK 24-27
1CO 9:24 Wa barkak umele uridli; muige korider amerge, gair koriderle korider nakasir no netat lelut bodomalam watirpei. Ka wabi detagreda, aukaise ikerawem mokakalam koriderle sikak korider nakasir ia waiakai e umele urtirpei.
1CO 9:25 Gair able legize mirem gair tonar segurge tabara kemerkemer oka waidagare oberwerlare able gair tonar segurem ia waiakai wi kirim gogob watirperare. Keubu able kirim gogob bodomalam ia weumi a adem obaskimrare. Mi ia mi able aper tarpeirare umerkak obaskimrare; wi ia niaikarem wanagri.
1CO 9:26 Pedikeredi, gair tonar segurge ka korider namrilu natkak asemorpekem a ka wairser nole segur atukak, ka nole kelar waditkoer.
1CO 9:27 Ka kara gem werwerer waiakai kelarkelar obai abi waikerer kari wanarmir ia waiakai keubu kaka wader okadaraskare, ka umerkak kababu adem nabakailu able korider amerlam.
2CO 4:13 MIZMIZ 4 NOSIK 13 - MIZMIZ 5 NOSIK 5 Sama autarlelut muige taba asiasige ditarer kega, “Ka Agudi irmili ableluglam ka geumkak detautli.” Kiko uridli muige kerbi asiasige, ki geumkak detauteda. Ableglam ki umele uridli
2CO 4:14 Agudide ia kerbi odikerare eudlam idid warder, mokakalam ge E Iesui ikaida eudlam idid baida, a ki umele Agudide merbi odirpare.
2CO 4:15 Gair keriba able asiasi wabi debeleem nole kerbim. Mitkar a mitkar legize ia eswao erkepasam wagimuretlare nade Agudide iabi upiudaratidalare taba omarge. Ableluglam Agud ia wakai au zoromzorom obai.
2CO 4:16 Able pardarlam ki bakeri nole geumkakberi. Keriba gem aukaka erarerar epe no keriba lamar au kelarkelar ia waurder.
2CO 4:17 Able kebi amisirlu kiki asiasi digeda nole ia niaiem waikereder, epe ableluglam ki ia ki tarpeirare able au niai zorom.
2CO 4:18 Ableglam pa kiki uridli keriba poni mena namarwerteda asmerkak zoromge pe niaiem nagriwerteda nole able amisirluge pe mi dasmereda pe no besem nagriwerteda.
2CO 5:1 Ki bakeri nole geumkak uridli ableglam ki umele ese keriba gem obatkoare mokakalam keriba mud adem ikadarda, keriba ia wataragri debe kerkar gem muige kotorge mokakalam meta Agudide tababu daramerda muige able tonarge wi ia wataragri niaikarem.
2CO 5:2 Able gemge pemi uridli mi moketmir digareda ableglam mi aukaise laglag uridli meriba kerkar gem muige kotorge kesotais able gesep gemira.
2CO 5:3 Ableglam nade able lu wakai, mi ia mi sikak tarabarsirare, a mi nole ia mi lamar tuarder nole gemkak.
2CO 5:4 Mi moketmir digareda meriba adud oka beberbeber ike nade mi pemi able gemge uridli, nole ablelam mi laglag walikak warder epe ablegem mi laglag sikak nabarsirlare muige merbi kotor gemge. Able tonarge, meriba gem ia umele weumi able gemide ia keswatais umerkak weumi.
2CO 5:5 Agudide tababu merbim tidirsiri meriba kerkar gem ia mi tapeirare. A E merbi Lamar Zogo dikwarda e kikem lu ikeredi able lugira. MIZMIZ 5 NOSIK 6-10
2CO 5:6 Ki mena nole geumkak uridli pe able lu ia watakai nade mi nabaume ablelam mi umele mi able piripiri waurder mena able gesep gemge, mi mena waurder adge Agudi gedlam,
2CO 5:7 epe ki uridli owaturlam Agudi doge, nole owetreda able luge pe kiki dasmereda.
2CO 5:8 Pe irdi ki mena nole geumkak uridli a kiki laglag ki geki tuarder Ople gedge a nole iki waurder able gesep gemge.
2CO 5:9 Ki mitkar dorge ikereda ia waiakai Agud sererge odawer neis tonarge ki gesep gemge waurder a adge geseop gemlam,
2CO 5:10 ablelam mi gair le ia mi netatnetat tarabakwei muige Kerisoi autmer kerkerge ia waiakai E merbi utiditmerare. Gair legize ia otirpare tabara bodomalam ge nalu ikerer, debele a adud, muige able kerkerge.
PHI 2:1 MIZMIZ 2 NOSIK 1-11 Ableglam wa netat Kerisoi doge abra upiatidar, ableglam abi omaride wabi dasesaderda, ableglam wa Lamar Zogoge uridli, ableglam waba lag a omar,
PHI 2:2 wa no netat idonige uridwa, wa no netat omarge uridwa, wa no netat mirge uridwa. Kai sererge iako nawer.
PHI 2:3 Wa nole lu darakepwararwem wabi auspirem, aukaise wabialam.
PHI 2:4 Netatnetat wabialam wa nole wabu bakepwararwem, wage no wader le ge ko turidwa.
PHI 2:5 Able tonartonar uridwa mokakalam Keriso Iesura tonar:
PHI 2:6 E agekar Agud dawer ege nole ekerer e Agud dali.
PHI 2:7 Ege tababu bakekri nogleise, akaida mokakalam memegle, eosmeda le noge.
PHI 2:8 Moige le noge, e tababu bakekri ege laglag dawer able eud - able piripiri aukaka nei tumem gair nei.
PHI 2:10 Ableglam gair legize tabara kokni wairapare Iesuim, moige kotorge, tumem able gesepge, a moige able gesepge.
PHI 2:11 A gair le ia obatkaret Iesu Keriso e Ople dali, Agud Babi zorom.
PHI 4:4 MIZMIZ 4 NOSIK 4-9 Wa no sererge uridwa Ople doge gair kerkerge. Kai iako koka dataute: wa sererge baprekrawem!
PHI 4:5 Wa no uridwa wader leem debele. Ople pe maike dali.
PHI 4:6 Wa nole wader lu darakepwarawem ege no wabi erkepasamu, Agudi damsawem nalu wa laglag; gair amos waba wanagri no eswaukem.
PHI 4:7 Ia waiakai Agudi mapodange Iesu Kerisoi doge. Agudira mapodan au sikak wadikedawa pe nalu dike wabi idonige dike.
PHI 4:8 Mop maike kara mir, buai: nalu lu pe nagri agekar, nalu lu pe nagri amrem, nalu lu pe nagri barkak, nalu lu pe nagri puipikak a zogozogo, nalu lu pe nagri audebele, a nalu barkak lu wage darauspirawem - wa no able lu darakepwarawem.
PHI 4:9 Wa ge mena gair lu ikerarwem wa karialam berwerda a wage tadasmerda a tasorda kaka tikerer. Ege Agudide mapodan PILIPAI MIZMIZ 4 NOSIK 12-20
PHI 4:12 Kaka wanali mokakalam lukak le a mokakalam able mitkar luglug le. Ka geka teberweri able gumik mapodanira ka nawer gair tonar utebge; lewer aroaro, lewer arokak; mitkar a nolekarge.
PHI 4:13 Ka umele gair lu akere Kerisoi doge pe kari kelar naiswerli.
PHI 4:14 Mena bakedida wa debele urder wa kara beber wa ikaidarda perper baida.
PHI 4:15 Wa Pilipaira le umele uridli able kikem kerkerge able debe mirira, ka Masedonialam bakiamuda, ege no wabi zogometade kari upinatida, kari neisweri a kage irpi.
PHI 4:16 Nade ka mena geka nawer Tesalonikage wage karim upiatidar emarikdarda neis kerkerge, ge kaka laglag nawer.
PHI 4:17 Ka nole koka lugem dasmeli; kape no laglag nali ka wabi auspireda ableglam wa aiswereda.
PHI 4:18 Ka kemerkemer bodomalam erpeida a dadgiko. Kara aumitkar nagri ableglam Epaprodaitaside kari neisweri able lu ge wawa temarikdarda. Pe nagri werteda debelaglag zegurlu.
PHI 4:19 Kari Agudide mari gair lu wanaiswer nalu ma laglag taba zoromlam moige Iesu Kerisoi doge.
PHI 4:20 Abim meriba Agud a Baba able zorom nagri niaiem niaikarem.
1TH 1:1 MIZMIZ NOSIK 1-10 Iabialam Paulo, Sailas a Timoto, wabim zogometa Tesalonikage muige Baba Ad a Ople Iesu Keriso. Adira omar a mapodan wabim.
1TH 1:2 Ki gair kerkerge Adi eswao wabim waikelare waba nei odarabgelare kerbi erkepasamge.
1TH 1:3 Kiki mena wabi wadikepwalare meriba Ad a Baba opem waba dorge owaturge, waba meregsusapit omarge a wa barkak erkepwaikoslare abim meriba Ople Iesu Keriso.
1TH 1:4 Buai, Adide wabi omarge dikereda, ki umele dale E wabi ditutirda,
1TH 1:5 Ableglam ki debe mir wabim taisa nole no mir tebteb epe sasrim ko ableglam able mir barkak ike. Wa umele ki nako waurder nade ki wabi doge wadale wabi debeleem.
1TH 1:6 Wa kerbi doge a Oplege takmeirda. Wa asiasi tidigida a wage mir erpeidarda a sererge baprekerda Lamar Zogolam.
1TH 1:7 Able gair legize mir irmireda Masedoniage a Akaiage mokakalam pe wawa ikereda.
1TH 1:8 Oplera mir wabialam ebrerdi nole Masedoniage a Akaiage tebteb epe waba owatur Adi doge able mir ko ebrerdi gair gedge. Nole pa kerbim dike ki waderle daratagrare wabi owaturlam,
1TH 1:9 Ableglam wader legize kerbi detagreda wa nako wa kerbi derepda a wa nako wa Adim batarda able bes adilam ko agekar a idid Ad irmireda
1TH 1:10 a iako able werem dikailare mena e kotorlam watabakamu: abra werem Iesu ge e abi eudlam ikiamda a e merbi degderapda adud bodomalam pe tikaseredi.
1TH 2:7 MIZMIZ 2 NOSIK 7-13 Kiki Kerisora kaimegiz, ki umele kiki ge ki wabi dikerda beberbeber berda, ege ki no sikak urder nade ki wabi doge dale mokakalam apude tabara omaskir onaseseredlare.
1TH 2:8 Ableglam keriba omar wabim kige no able lu ikerida wabi doge nole debe mir tebteb ki ko geki urder wabi doge sererserer.
1TH 2:9 Buai, wa dikepwareda keriba au dorge ki a gerger wa nole gewa bodomalam ikelare kiki wabi doge urder geki Agudira debe mir detautlare.
1TH 2:10 Wa wabu dasmerda a pako Agude dasmeli kiki dale zogozogo, barkak a nole sek amrirkak wabim able leem peiwawa irmireda.
1TH 2:11 Wa umele uridli ki wabim geki ikelare mokakalam babet waikerer taba omaskirem.
1TH 2:12 Ki wabi okadeskeda a ki wabi degderapeda a ki wabi sirdaiswereda wa able tonar ge uridwa pe Agudi doge debele ike pe E wabi dabgereda Abi baselaiem a Abi zoromem.
1TH 2:13 Ki Agudi mena eswao ikereda ableglam Agudira mir bakamuda wabim kerbialam wage erpeidara ableglam Agudira mir ike a nole lera mir ike. Agudira mir pe wabi doge dali pe wawa irmireda.
1TH 4:13 MIZMIZ 4 NOSIK 13-18 Buai, ki laglag wa umele urder able agekar mir netiba ut erdedi eudge, ia waiakai wa umerkak okasosok urder mokakalam able le nole umerkak nalu pe dikase.
1TH 4:14 Mi umele uridli merbi nerkeplam Iesu eumida a ko ekiamda, pako mi umele uridli merbi nerkeplam Agudide ia watais Iesui kemem able le ge baumi.
1TH 4:15 Abialam Oplera mir ki wabi detagreda able le pe kiki mena idid uridli able le ge kerbi dikaireta paki uridli mena Ople watakomer, iaki umerkak nabakiaware kikem able lege ge baumi,
1TH 4:16 Ableglam Ople ia tababu otabu kotorlam abra mir ia aukelakela waike, a pako kirim angelara kodomir a Agudira burar, able eudle pe Kerisoi doge erdedi ia kikem obakiam.
1TH 4:17 Keubu mimi pemi mena idid uridli ia mi tatkimdare okakise muige basge a Ople op tadapidare mige.
1TH 4:18 Wa waba okabaskawem able miru.
HEB 1:1 MIZMIZ 1 NOSIK 1-6 Kerker barki Agudide peropetage tiditauter merbi arerem mitkar kerkerge a gair tonarge, a keubu e merbim tiditauti taba Weremge. E dali ge Agudide kotor a gesep daratagmi abi neige. E dali ge Agudide abi eraigida narbit gair lugira. Able Werem dali auka bi Agudi zoromira a dali kemerkemer mokakalam Agud tababu, gair lu e erepli taba au sasrimsasrim mirge. Nade e terpeida witira amaidered e temrida taba Bab tuter tag peke kotorge. Able Werem akaida angelaem aukale baida mokakalam abra nei dike aukale angelaem ge abi Agudide ikwari. Ableglam Agudide nole netat tabara angela detagri kega, “Mama nali kara Werem able gergerge ka akaida mara Bab baida.” A Agudide nole netat angelalam detauti kega, “Ka yaka nawer abra Bab a ei wadawer kara Werem.” Nade Agudide maike tabara narbit werem watimarikda ege detauti, “Gair angela gize ko abim isor wairapawem.”
1JO 1:1 1 IOANE 1.1—2.2 Kiki wabim ditarda ia waiakai wa umelebai able ididira mir ge Babidoge tikereder nade ge digrarti. Kiki tasorda a kiki dasmerda kerbi poniu. Kiki sikak dasmerda a kiki itutirda kerbi tagu.
1JO 1:2 Nade able idid tabakiamuda gem baida kiki abi dasmerda. Kiki able le uridli geki urder, kipe wabi peki detagreda able niai idid ge dawer Babidoge okakise a merbim batomerda.
1JO 1:3 Kiki wabi koki detagerda nalu kiki dasmerda a tasorda, ia waiakai wako umele kerbidoge batabemeret netat buaise Babidoge a abi Weremge, Iesu Keriso.
1JO 1:4 Kiki wabim able mir digrareta waiakai wa gair sikak sererge baprekrare.
1JO 1:5 Able mir kiki tasorda abialam a kipe wabi peki barkak detagreda: Agud bi dali, nole kupkupi abi doge ike.
1JO 1:6 Ki besle ki umerkak sikak warder ese kiki detautlare mimi netatbuai Agudi doge mi no kupkupige warder.
1JO 1:7 Mimi no netat buai uridli nade mi bige uridli. Epe able mam ge agimuda abi wermira Iesura gair wit waitkir ese mi bige warder.
1JO 1:8 Ki kerbibu besbardeda a nole lakak able agekar obarpei nade ki detauteda kiki witkak uridli.
1JO 1:9 Nade ki keriba wit detauteda Agudim, e tabara mir odikepwarer e ia meriba wit odimaidered. E umele able waiker, e meriba gair adud tonar merbialam adem waitkir.
1JO 1:10 Mi Agudi dabgereda besle a mi abra mir diweda ese mi detauteda mimi nole witkak.
1JO 2:1 MIZMIZ 2 NOSIK 1-6 Kaka wabim able mir ditali, kara kebi omaskir, ia waiakai wa umerkak wit ikelare. Ese na lelut ia wit waikai, Iesu Keriso e merbim kesge tabagoli able barkak le taba Babim.
1JO 2:2 Nade able idid tabakiamuda gem baida kiki abi dasmerda. Kiki able le uridli geki urder, kipe wabi peki detagreda able niai idid ge dawer Babidoge okakise a merbim batomerda.
1JO 2:3 Ki agekar umele uridli ki netatbuai Agudidoge uridli no abra mir tebteb kiki asreda.
1JO 2:4 Nade wader legize oditautlare, “Kaka Agudira tebud nali,” wi nole abra mir wasorlare, wipe besle uridli, a wi Agudira Mir direda.
1JO 2:5 Lera lag Agudim kemerkemer obakiamu nade e abra mir odasrer.
1JO 2:6 Mi umele nale Agudidoge uridli ableglam mi umele dasmerlare nale uridli mokakalam Iesu dawer. 2.28—3.7
1JO 2:28 Pedikeredi, kara kebi omaskir, mena uridwa Kerisoidoge ia waiakai mi umele siripkak warder a nole ko abialam nabaspe siripge nade e takomer.
1JO 2:29 Wa umele uridli Keriso pe barkakle dali; ableluglam wa umele uridli nale pe nade barkak waurder wi Agudira omaskir.
1JO 3:1 Wa dasmerare merbi Babide aukaise omarge tikereda; merbi dikereda Agudira omaskir dikereda - a mir agekar uridli Agudira omaskir. Le adge uridli Kerisoilam nole meriba tonar berwerda ableglam wi nole Agudi tonar berwereda.
1JO 3:2 Kara nasnas buai, mimi Agudira omaskir uridli; mimi nole umele uridli nalu mi ia mi tuarder. Epe mi no umele nade Keriso obatomer a mi ia mi abi dasmerare pe e agekar dali, mi ia mi abikaise tuarder.
1JO 3:3 Nete penoko umele dali e muige odawer, tababu obaseserder puipikak a zogozogo mokakalam pe Keriso dali puipikak a zogozogo.
1JO 3:4 Nete penoko dali mena wit waikerer obasker adge Agudi gelarlam ableglam wit adge ikeredi abi gelarlam.
1JO 3:5 Wa umele Keriso batomeda ia waiakai e lera wit adem wadais, a wa umele e nole kemerkemer witkak dali.
1JO 3:6 Pedikeredi, wader le Kerisoidoge uridli wi nole mena witge uridli; wader legize mena wit ikereda nole abi dasmereda a wi nole abra uridli.
1JO 3:7 Okeoke uridwa, omaskir, legize ia wabi besudiridlare a adem wadaislare. Na gize ia barkak waikelare wi barkak uridli mokakalam pe Keriso barkakle dali.
