﻿Zǝbur.
85.
Nǝƣmiqilǝrning bexiƣa tapxurulup oⱪulsun dǝp, Koraⱨning oƣulliri üqün yezilƣan küy: — Sǝn Ɵz zeminingƣa iltipat kɵrsitip, Yaⱪupni sürgünlüktin ⱪayturƣaniding, i Pǝrwǝrdigar. 
Hǝlⱪingning ⱪǝbiⱨlikini kǝqürüm ⱪilip, Barliⱪ gunaⱨlirini yapⱪaniding. Selaⱨ. 
Sǝn pütün ⱪǝⱨringni iqingdǝ sahlap, Ƣǝzipingning ǝxǝddiylikidin yanƣanidingsǝn. 
Əmdi bizni Ɵz yeningƣa ⱪayturƣaysǝn, i nijatliⱪimiz bolƣan Huda! Bizgǝ bolƣan aqqiⱪingƣa ⱨay bǝrgǝysǝn! 
Sǝn bizgǝ ǝbǝdiy ƣǝzǝplinǝmsǝn? Əwladtin-ǝwladⱪiqǝ ƣǝzipingni sozamsǝn? 
Hǝlⱪing Ɵzüngdin xadlinixi üqün, Bizni ⱪaytidin yengilimamsǝn? 
Bizgǝ ɵzgǝrmǝs muⱨǝbbitingni kɵrsǝtkǝysǝn, i Pǝrwǝrdigar, Bizgǝ nijatliⱪingni ata ⱪilƣaysǝn! 
Nemilǝrni dǝr, Tǝngri Pǝrwǝrdigarimƣa ⱪulaⱪ salay; Qünki ǝylǝydu U aman-esǝnlik hǝlⱪigǝ ⱨǝm mɵminlirigǝ; Dǝr ularƣa ⱪaytmanglar hamaⱪǝtlikkǝ! 
Zeminimizda xan-xɵⱨrǝtning turuxi üqün, Dǝrⱨǝⱪiⱪǝt, Uningdin ǝyminidiƣanlarƣa Uning nijatliⱪi yeⱪindur; 
Ɵzgǝrmǝs muⱨǝbbǝt wǝ ⱨǝⱪiⱪǝt ɵzara kɵrüxti; Ⱨǝⱪⱪaniyǝt wǝ aman-hatirjǝmlik bir-birini sɵyüxti;    
Ⱨǝⱪiⱪǝt yǝrdin ünüp qiⱪmaⱪta, Ⱨǝⱪⱪaniyǝt ǝrxlǝrdin ⱪaraydu. 
Pǝrwǝrdigarning bǝrikiti yaƣsa, Zeminimizmu mol ⱨosulini berǝr; 
Ⱨǝⱪⱪaniyǝt yol aƣar Uning aldida, Uning ⱪǝdǝmlirigǝ yol ⱨazirlaydu! 
