﻿Zǝbur.
83.
Asafning küy-nahxisi: — Ün qiⱪarmay turuwalma, I Huda, Süküt ⱪilip jim turuwalma, i Tǝngrim! 
Qünki mana, Sening düxmǝnliring dawrang ⱪilmaⱪta, Sanga ɵqmǝnlǝr bax kɵtürmǝktǝ. 
Ular ⱪuwluⱪ bilǝn suyiⱪǝst ⱪilar hǝlⱪinggǝ, Ⱪarxi pilan tüzüxǝr Sǝn ⱪǝdirligǝnlǝrgǝ. 
Eytar ular: — «Yürünglar, barqǝ ⱪowm ⱪataridin yoⱪ ⱪilayli ularni! Elinmisun eƣizƣa ⱪayta Israilning nami». 
Ular ⱨǝmnǝpǝs, ⱨǝmdil mǝsliⱨǝtlǝxti; Ular Sanga ⱪarxi ittipaⱪ tüzdi. 
Mana, Edom wǝ Ismaillarning qedirliri, Moab ⱨǝm Ⱨagriylar; 
Gǝbal, Ammon, wǝ Amalǝk; Filistiyǝ ⱨǝmdǝ Tur aⱨaliliri, 
Asuriyǝmu ularƣa ⱪoxuldi; Ular Lut oƣulliriƣa yar-yɵlǝk bolup kǝlgǝnidi. Selaⱨ. 
Sǝn Kixon dǝryasida Midiyaniylarƣa, Siseraƣa wǝ Yabinƣa ⱪandaⱪ taⱪabil turƣan bolsang, Ularƣimu xundaⱪ ⱪilƣaysǝn; 
Bular Ən-Dor yezisida ⱪirilƣanidi, Yǝr üqün tizǝk-oƣutⱪa aylanƣanidi. 
Ularning ǝmirlirini Orǝb wǝ Zeǝbkǝ, Ularning daⱨiylirini Zǝbaⱨ ⱨǝm Zalmunnaƣa ohxax ⱪilƣaysǝn; 
Qünki ular dǝp eytⱪanidi: «Hudaning qimǝn-yaylaⱪlirini ɵzimizgǝ mülük ⱪiliwalayli!». 
I Hudayim, ularni domilinidiƣan ⱪamƣaⱪtǝk, Xamalda uqurulƣan saman kǝbi soruwǝtkǝysǝn. 
Ot ormanliⱪⱪa tutaxⱪanƣa ohxax, Yalⱪun taƣlarni kɵydürgǝngǝ ohxax, 
Sǝn yǝnǝ ularni borining bilǝn ⱪoƣliƣaysǝn, Ⱪara ⱪuyuning bilǝn wǝⱨimigǝ salƣaysǝn; 
Ularning Sening namingni izdixi üqün, Ularning yüzlirini xǝrm-ⱨaya bilǝn qɵmdürgǝysǝn, i Pǝrwǝrdigar! 
Ular nomustin ǝbǝdiy xǝrmǝndǝ bolƣay, Jaⱨanƣa rǝswa bolup yoⱪitilƣay. 
Bilsun ular, Naming Pǝrwǝrdigar bolƣan Sǝnla pütkül jaⱨandiki Əng Aliy Bolƣuqidursǝn. 
