GEN 1:1 Makasososan Manetualain nakadadadik lalai no dae-inak.
GEN 1:2 Lelek naa, dae-inak bei ta dadi, ma basa-basan bei runggu-rangga. Bei hambu kada oe, ma makiu-makahatuk tatana nalan. Manetualain Dula-dalen laa-laa neu-mai nai oe naa bafon lain.
GEN 1:3 Basa boe ma Manetualain kokolak nae, “Muste hambu manggaledok.” Kokolak basa nae talo naa, boe ma manggaledok dadi.
GEN 1:4 Ana mete-nita manggaledok naa, boe ma dalen namahoko, nahuu hata fo Ana nakadadadi nalak naa, memak neulauk. De Ana tada feꞌe manggaledok numa makiuk mai fo esa-esak no fai heli-helin.
GEN 1:5 Ana foi manggaledok naa nade, ‘leledok’, ma makiuk naa, ‘leꞌodaek’. Naa, fai kaesan.
GEN 1:6 Basa boe ma Manetualain kokolak seluk bali nae, “Dadi mamana rouk, fo tada feꞌe oe. Huu naa de hambu oe nai tadak lain, ma hambu oe nai tadak dae.” Kokolak basa nae talo naa, boe ma oe naa tada baꞌen neu dua.
GEN 1:8 De Ana foi mamana rouk manai tadak lain naa nade, ‘lalai’. Naa, fai kaduan.
GEN 1:9 Basa boe ma Manetualain kokolak seluk bali nae, “Oe manai tadak dae naa muste nakabubua neu mamanak esa, mita fo hambu dae madak.” Kokolak basa talo naa, boe ma dae madak dadi.
GEN 1:10 De dae madak naa Ana foin nade, ‘mada lai’; ma oe mana makabubuak naa, Ana foin nade ‘tasi’. Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulauk.
GEN 1:11 Boe ma Manetualain kokolak seluk bali nae, “Mada lai muste mori sele-tandek. Muste hambu sele-tandek mana maboak, kadeꞌek, ma mana madoo momodok. Mita fo sele-tandek esa-esak nabuna-boa tungga mata-aon.” Kokolak basa talo naa, boe ma basa sele-tandek dadi.
GEN 1:12 Nai mada lai, basa sele-tandek kara rabuna-boa tungga esa-esak mata-aon. Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulauk.
GEN 1:13 Naa, fai katelun.
GEN 1:14 Basa boe ma Manetualain kokolak seluk bali nae, “Nai tadak lain naa, muste hambu buas manggaledok mata-matak fo tao manggaledo dae-inak ia. Muste hambu mana tao manggaledo fai leledok, ma muste hambu laen mana tao manggaledo fai leꞌodaek. Basa sara dadi reu tanda, mita fo bisa reke fai, teuk, ledo-fair bula lalalin.” Kokolak basa talo naa, boe ma basa buas manggaledok kara dadi.
GEN 1:16 Ana nakadadadik buas manggaledok moꞌok matak dua. Mana moꞌon lenak, nasaꞌa nai fai leledok; kadiꞌik nasaꞌa nai fai leꞌodaek. Ana oo nakadadadik nduuk kara boe.
GEN 1:17 Ma Ana koladu buas sara raa reu lalai, fo ara rasaꞌa tao manggaledo dae-inak.
GEN 1:18 Boe ma ara tao manggaledo fai leledok, ma manggaledo fai leꞌodaek. No dalak naa, ara tada baꞌe manggaledok numa makiuk mai. Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulauk.
GEN 1:19 Naa, fai kahaan.
GEN 1:20 Basa boe ma Manetualain kokolak seluk bali nae, “Muste hambu banda mata-matak kara, leo rai oe dale. Ma muste hambu mbuik mata-matak kara, lambu rai dae-inak lain.”
GEN 1:21 Boe ma Ana nakadadadik basa iꞌak mata-matak kara ro banda moꞌok mana leo nai oe dale. Ana oo nakadadadik basa mbuik mata-matak kara, lambu rai lalai boe. Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulauk.
GEN 1:22 Basa boe ma Ana kokolak fee babaꞌe-babatik neu basa bandar raa lalaꞌen nae, “Iꞌak kara muste tamba ramanoꞌu, fo rasofe basa oer rai bee a mesan. Ma mbuik kara oo muste tamba ramanoꞌu boe.”
GEN 1:23 Naa, fai kaliman.
GEN 1:24 Basa boe ma Manetualain kokolak seluk bali nae, “Muste hambu banda mata-matak kara, leo rai mada lai. Ndia banda neni nekeboik, banda fuir, ma banda mana manodo-manamak nai daer, esa-esak no mata-aon.” Kokolak basa talo naa, boe ma basa bandar dadi. Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulauk.
GEN 1:26 Basa boe ma Manetualain kokolak seluk bali nae, “Mai fo Ita adu hatahori dae-bafok tungga Ita mata-aon. Mita fo ara lopo-linu ma kiu-lolo basa iꞌak kara marai tasi dale, basa mbuik kara marai lalai, basa banda neni nekeboik kara, ma basa banda laen nara mana leo rai dae-inak.”
GEN 1:27 De Ana adu hatahori dae-bafok tungga Ndia mata-aon. Ana adu sara, touk ma inak.
GEN 1:28 Boe ma Ana kokolak fee babaꞌe-babatik neu sara nae, “Ei muste bonggi tamba mamanoꞌu, fo tao masofe ma faduli dae-bafok ia. Au oo fee haak neu ei fo faduli iꞌak kara, mbuik kara, ma basa bandar marai mada lai boe.
GEN 1:29 Nenene matalolole! Au fee ei nanaꞌak mata-matak kara rai dae-bafok ia. Ndia: sele-tande kaboak ma kadeꞌek, ma mana madoo momodok.
GEN 1:30 Au oo fee basa sele-tandek mata-matak kara, fo dadi neu basa banda mata-matak kara nanaꞌan boe. Hambu nanaꞌak soa-neu banda nekeboik, banda fuir, banda mana manodo-manamak, ma mbuik kara.” Kokolak basa talo naa, boe ma basa nanaꞌak mata-matak kara dadi.
GEN 1:31 Ana mete-nita basa naar, boe ma dalen namahoko, nahuu hata fo Ana nakadadadi nalak naa, memak neulaun seli. Naa, fai kaneen.
GEN 2:1 No dalak naa, Manetualain nakadadadik nala lalai no dae-inak no basa oe-isin nara lalaꞌen.
GEN 2:2 Ana adu nala basa sara, boe ma neu beꞌe-main, ndaa no fai kahitun, Ana hahae.
GEN 2:3 No dalak naa, Ana tao fai kahitun neu fai ina-huuk lena basa fai laen nara. Ana koladu talo naa, nahuu nateꞌe Ndia ue-osan ena, boe ma neu fai kahitun Ana hahae.
GEN 2:4a Manetualain nakadadadik lalai no dae-inak tutuin, ndia talo naa.
GEN 2:4b Neu MANETUALAIN bei fo mulai nakadadadik lalai no dae-inak naa,
GEN 2:5 bei ta hambu sele-tandek hata-hata, nahuu Ana bei ta nakonda udan. Lelek naa, bei hambu kada koꞌa-masuk mana hene numa dae mai fo tao nakoe dae-inak. Ma bei ta hambu hatahori dae-bafok fo naue-osa osi-lutu.
GEN 2:7 Basa boe ma MANETUALAIN haꞌi nala dae faa, de Ana adun dadi neu hatahori dae-bafok. Boe ma Ana fuu ani hahaek neni idu bolon neu, de hatahori dae-bafok naa dadi horis neuk ka.
GEN 2:8 Basa boe ma MANETUALAIN tao nala osi esa numa dae Eden, nai dulu. De Ana fee hatahori dae-bafok naa leo neu osi naa dale.
GEN 2:9 Nai osi naa dale, Ana nakamomorik ai huuk malole mata-matak kara ena, ma ai huuk fo hatahori bisa naꞌa no malada. Ana oo nakamomorik ai huuk matak dua numa osi naa talada heon boe. Ai huuk esa, mete ma hatahori naꞌa boan, na, ana bisa nasoda nakandoo. Tehuu ai huuk esa bali, mete ma hatahori naꞌa boan, na, ana bisa bubuluk bee ndia neulauk ma bee ndia manggarauk.
GEN 2:10 Hambu lee esa numa dae Eden, ndia faa dea neu numa osi naa mai. Lee naa nabaꞌe dadi neu panggek haa.
GEN 2:11 Panggek kaesan, nade Pison. Panggek naa eko-feo ndule dae Hawila, fo hambu lilo mbilas noꞌuk ka.
GEN 2:12 Numa naa hambu lilo mbila isik, hambu ai huuk fo daan naboo meni, ma hambu batu manggadilak.
GEN 2:13 Lee naa pangge kaduan, nade Gihon. Panggek naa eko-feo ndule dae Kus.
GEN 2:14 Panggek katelun, nade Tigris. Panggek ia dadi too-lane neu dae Asyur boboan dulu. Lee panggek kahaan, nade Efrat.
GEN 2:15 MANETUALAIN fee hatahori dae-bafok naa leo numa Eden, fo ana faduli natalolole osi naa.
GEN 2:16 De Ana fee parenda neu hatahori dae-bafok naa nae, “O bole muꞌa ai boak hata a mesan numa basa ai huuk marai osi ia dale mai.
GEN 2:17 Tehuu hambu esa, o ta bole muꞌa sana. Ndia, ai huuk fo mana fee o bubuluk bee ndia neulauk ma bee ndia manggarauk. Mete ma o muꞌan, na, neu ko o mate.”
GEN 2:18 Basa boe ma MANETUALAIN kokolak bali nae, “Ta malole mete ma hatahori dae-bafok ia leo-laꞌo mesa kana. De Au nau adu feen, nonook esa nandaa noon.”
GEN 2:19 Lelek naa, MANETUALAIN haꞌi nala dae, de adu nala banda mata-matak kara ma mbuik kara. Basa boe ma Ana neni bandar ro mbuik kara reni hatahori naa reu, mita fo ana foi naden nara. Boe ma hatahori naa foi bandar ma mbuik kara raa, esa-esak no naden. Tehuu ndia mesa kana bei ta hambu nonook esa fo nandaa noon.
GEN 2:21 Basa boe ma MANETUALAIN fee hatahori naa sunggu seli. Neu ana sunggu, MANETUALAIN haꞌi nala kaihusu duin esa, basa de Ana mbambalu falik hinak naa.
GEN 2:22 Numa duik naa mai, Ana adu dadi inak. Basa de Ana loo lima inak neu hatahori naa.
GEN 2:23 Hatahori naa mete-nita inak naa, boe ma ana nae, “Naaa! Ia dei! Ia dei fo nandaa no au! Ndia duin sama leo au duing. Ma ndia mbaan oo sama leo au mbaang boe. Huu ana dadi numa touk mai, de au foin nade ‘inak’.”
GEN 2:24 Huu naa de touk muste laꞌo ela inan ma aman, fo neu leo dalek esa no ndia saon, huu dua sara dadi reu esa ena.
GEN 2:25 Lelek naa, dua sara makaholak kara, tehuu ara ta rameda mae faa boe na.
GEN 3:1 Numa basa bandar fo MANETUALAIN nakadadadi nalak kara nai dae-bafok ia ena, mengge ndia mana malela pepeko-lelekok sudi selik kana. Laꞌe esa, hambu mengge natane neu inak naa nae, “Tebe, do? Manetualain kaꞌi nae, ‘Ei ta bole miꞌa ai boak numa ai huuk kara marai osi ia dale mai, hetu?’ ”
GEN 3:2 Inak naa bala nae, “Taa! Ai bole miꞌa! Tehuu hambu kada ai huuk esa nai osi taladan, ndia Manetualain kaꞌi fo ai ta bole miꞌan. Ana nae ai ta bole miꞌa, ma ta bole mafaroe boan, huu neu ko ai mate.”
GEN 3:4 Tehuu mengge naa naselu nae, “Wee, naa ta ndaa! Ei ta mate!
GEN 3:5 Manetualain memak kaꞌi talo naa, nahuu Ana bubuluk ena mete ma ei miꞌa ai boak naa, ei dadi malelak sama leo Ndia. Ndia, bubuluk bee ndia neulauk, ma bee ndia manggarauk.”
GEN 3:6 Basa boe ma inak naa mete neu te ai huuk naa lolen seli, ma boan nok bali ladan seli. De ana duduꞌa nae, “Mete ma au uꞌa ai boak ia, neu ko au dadi malelak.” Boe ma ana ketu nala ai boak naa, de naꞌa. Basa de ana ketu neni fee saon, de saon naꞌa.
GEN 3:7 Ara raꞌa basa, dei de ara bubuluk rae sira dua sara makaholak kara. Huu naa de ara nato ai dook kara fo ara mbambalu neu sira makaholan.
GEN 3:8 Ledo bobon naa, ara ramanene MANETUALAIN laꞌo-laꞌo numa osi naa dale. Boe ma ara keke reu ai huuk boboan seri, mita fo MANETUALAIN ta mete-nita sara.
GEN 3:9 Tehuu MANETUALAIN nanggou touk naa nae, “Adam, aa! O nai bee?”
GEN 3:10 Touk naa naselu nae, “Au amanene Manetualain haran nai ia. Tehuu au mae, huu au makaholak. Huu naa de au alai mai keke.”
GEN 3:11 Boe ma MANETUALAIN nae, “See ndia nafada nae o makaholak? Talo bee? O muꞌa ai boak fo Au kaꞌi ei boso miꞌak naa, hetu?”
GEN 3:12 Ana naselu nae, “Inak ia fo Manetualain feen mai fo nanonoo no au naa, ana ndia fee au ai boak naa, de au uꞌa!”
GEN 3:13 Basa boe ma MANETUALAIN kokolak no inak naa nae, “Tao hata de o tao talo naa?” Boe ma inak naa naselu nae, “Te mengge kedi-ira nala au na! Huu naa de au uꞌa ai boak naa, leo maa.”
GEN 3:14 Basa boe ma MANETUALAIN nakatoo mengge naa nae, “Huu o tataon ia, de Au huku-doki o. Numa basa banda laen mai, kada o mesa ngga hambu neketook talo ia. Mulai numa hatematak ia neu losa o mate, o roso munik kada o poꞌon, ma o muꞌa nai kada daer.
GEN 3:15 Au tao o mua inak ia, esa musu no esa seku neu. Ma ei dua ngga tititi-nonosim mara oo talo naa boe. O tititi-nonosim neu ko kiki nala hatahori ei tinggan. Tehuu ndia tititi-nonosin esa, neu ko tutu nakalulutu o langgam.”
GEN 3:16 Basa de Manetualain nafada inak naa nae, “Neu ko Au tamba o susa-sonam neu faik fo o mairu, ma tamba nembetak neu faik fo o bonggi. Leo mae talo naa, tehuu o dalem oo bei hii nalan seli neu o saom boe. Ma ana ndia koladu o.”
GEN 3:17 Boe ma Manetualain nafada touk naa nae, “O ta tungga au parendang, tehuu tungga o saom hihiin, losa o muꞌa ai boak fo Au kaꞌik naa ena. Huu naa de o hambu huku-dokik boe. Ma dae oo hambu huku-dokik boe. Mulai numa hatematak ia neu losa o mate, o muste maue-osa fafandek lima-eim doꞌi dae, fo o bisa hambu nanaꞌak. No o maue-osa talo naa, dei fo o bisa masoda.
GEN 3:18 Leo mae o sele-tande mata-matak kara, tehuu dae nakamomorik kada dilak ma nggauk.
GEN 3:19 De o muste maue-osa fafandek lima-eim, dei fo dae fee o nanaꞌak. O muste maue-osa mbusem titi talo naa losa mate. Au adu ala o numa dae mai. De mete ma o mate, na, o fali muu dadi dae bali.”
GEN 3:20 Basa boe ma Adam foi saon, nade ‘Hawa’ (fo sosoa-ndandaan nae ‘mana masodak’), huu ndia naa, basa hatahori mana masodak inan.
GEN 3:21 Boe ma MANETUALAIN tao bua-loꞌa numa banda roun mai, fo fee dua sara pake.
GEN 3:22 Basa boe ma MANETUALAIN kokolak nae, “Hatematak ia, hatahori iar bubuluk ena bee ndia neulauk, ma bee ndia manggarauk, sama leo Ita. Boso losak ara oo raꞌa ai boak numa ai huuk mana fee sara rasoda seku neu boe.”
GEN 3:23 De Ana husi kalua heni sara numa osi manai Eden naa mai, fo ara reni mamanak laen reu, de ara leo-laꞌo no ue daek, fo rasoda numa dae buna-boan mai.
GEN 3:24 Manetualain husi basa sara, boe ma Ana nadenu Ndia ata kalidan nara ruma nusa tetuk do inggu temak mai, fo reu ranea numa osi naa boboan dulu. Ara toꞌu tafar lombe sara reu-mai, rasaꞌa sama leo aꞌi. Manetualain nadenu sara kena dalak mana maso dale neu, huu Ana ta nau hatahorir ketu rala ai boak mana fee sara rasoda seku neu naa.
GEN 4:1 Faik esa, Adam neu sunggu-soro no saon Hawa. Boe ma inak naa nairu. De ana bonggi nala ana touk esa. De ana nae, “Au bonggi ala ana touk esa ena, nahuu MANETUALAIN tulun au ena.” Ana foi kanak naa nade, Kaen (fo sosoa-ndandaan ‘feen dea mai’).
GEN 4:2 Basa boe ma Hawa bongggi seluk ana touk esa bali. Ana foin nade Habel. Neu dua sara ramoꞌo mamais, Habel lolo banda-manur, ma Kaen naue-osa osi-lutu.
GEN 4:3 Laꞌe esa, Kaen haꞌi neni ndia osin buna-boan ketuk, fo fee MANETUALAIN.
GEN 4:4 Habel oo haꞌi neni ndia bibi lombo inan nara ana ulun. Ana hala bibi lombor raa, de haꞌi nala mbaa neulaun lenak fee Manetualain. MANETUALAIN mete-nita talo naa, boe ma Ndia dalen namahoko huu Habel ma tunu-hotun naa.
GEN 4:5 Tehuu Ana ta hii Kaen ma tunu-hotun naa. De Kaen namanasa nalan seli, losa matan manggarau ndoos.
GEN 4:6 Boe ma MANETUALAIN kokolak no Kaen nae, “Weeh, Kaen! Tao hata de o mamanasa talo naa? Talo bee de o matam manggarau ndoos?
GEN 4:7 Mete ma o tao neulauk, neu ko Au oo simbok o no neulauk boe. Tehuu besa-besa! Mete ma o tao manggarauk, na, neu ko manggarauk naꞌa nasafali o, sama leo meo nae kobo lafo. Dadi mete ma o hihiik ka tao manggarauk, malole lenak o timba henin memak kana leo!”
GEN 4:8 Laꞌe esa, Kaen fufudi Habel nae, “Fadi, ee! Mai fo ita laꞌo-laꞌo teni osi teu.” Neu ara losa naa, medak neu ma Kaen poko-femba nakamate fadin.
GEN 4:9 Boe ma MANETUALAIN natane Kaen nae, “Wee, Kaen! O fadim nai bee?” Kaen naselu nae, “Au ta bubuluk ana nai bee! Mae hetu ko au ia, soa toꞌu ndia ein, do?”
GEN 4:10 Boe ma MANETUALAIN kokolak nae, “Tao hata de o tao manggarauk talo naa? Boso duꞌa mae, o bisa mafuni mala o fadim daan nai daer, huu Au mete-ita basa sara ena!
GEN 4:11 Hatematak ia neketook daka nala o ena. Huu neu o hala misa o fadim, dae musi nala daan. De hatematak ia dae naa ta bisa baꞌe fee o soda-ladak ena.
GEN 4:12 Mete ma o tao osi-lutu, dae ta nau baꞌe fee o buna-boak hata esa boe na ena. Mulai numa hatematak ia neu, o soa laꞌo madaba oek muu-mai sama leo hatahori kasian fo mana sangga soda-ladak nai dae-bafok ia.”
GEN 4:13 Tehuu Kaen nasabara neu MANETUALAIN nae, “Awii! Manetualain, ee! Talo bee de Manetualain fee au neketook beran seli, losa au ta bisa lemba abeꞌin bali ia?
GEN 4:14 Huu Manetualain husi heni au numa mamanak ia mai ena, neu ko au dook ka numa Manetualain mai. Au soa adabak uni bee a mesan uu. De see a mesan ndia natonggo no au, na, neu ko ara tao risa au.”
GEN 4:15 Tehuu MANETUALAIN naselu nasafali nae, “Ta talo naa! See ndia tao nisa o, neu ko Au fee huku-dokik neun beran lena laꞌe hitu!” Basa de MANETUALAIN tao tanda neu Kaen, mita fo hatahorir bubuluk fo ara ta tao risan.
GEN 4:16 Basa boe ma Kaen laꞌo ela mamanak naa, fo nakadodook numa MANETUALAIN mai. Ana laꞌok losa mamanak esa, nai osi Eden boboan dulu. Mamanak naa nade Nod, sosoa-ndandaan nae, ‘Nedabak’. De ana leo neu naa.
GEN 4:17 Basa boe ma Kaen sao, de saon nairu. Ana bonggi nala ana touk esa, ara foin nade Henok. Ma Kaen nambaririik nggorok esa, de ana foi nggorok naa nade Henok, tungga ndia anan naden.
GEN 4:18 Boe ma Henok anan, ndia Irad. Irad anan, Mehuyael. Mehuyael anan, Metusael. Ma Metusael anan, Lamek.
GEN 4:19 Lamek saon dua. Esa nade Ada, ma esa bali nade Sila.
GEN 4:20 Ada anan, nade Yabal. Ndia tititi-nonosin nara dadi mana lolo banda. Ara leo lali-lali mamanak, ma leo nai kada laak dale.
GEN 4:21 Yabal fadin nade Yubal. Yubal tititi-nonosin nara dadi hatahori mana makaminak bua kaliik, pake sulik ma bua kaliik kukutik pake loa.
GEN 4:22 Lamek saon Sila bonggi nala Tubal Kaen. Tititi-nonosin nara dadi mana tutu besi, fo tao bua-baꞌu mata-matak numa besi ma riti mai. Tubal Kaen fadi inan, nade Naꞌama.
GEN 4:23 Laꞌe esa, Lamek koa aon neu saon dua sara matan nae, “Ei nenene, ee! Bebeik kara ia tou taꞌe anak esa nggafu au, tehuu au poko isan.
GEN 4:24 Hatahori mana hala nisa Kaen, hambu huku-dokik beran lena laꞌe hitu. Tehuu mete ma see nae bala nembeda dalen neu au, na, ara hambu huku-dokik beran lena laꞌe 77.”
GEN 4:25 Adam saon Hawa, bonggi seluk ana touk esa bali. Boe ma ara foi kanak naa nade, Set (fo sosoa-ndandaan ‘loo feen mai’), nahuu Hawa nae, “Manetualain loo fee au kanak ia ena, nggati Habel fo Kaen hala nisak naa ena.”
GEN 4:26 Doo-doo boe ma Set hambu ana touk esa, nade Enos. Lelek naa, hatahorir mulai rakaluku-rakatele neu MANETUALAIN.
GEN 5:1 Neu Manetualain adu hatahori dae-bafok, Ana adu mata-aon nara sama leo Ndia mata-ao heli-helin. Ana adu sara, touk ma inak. Basa boe ma Ana noke naden nara nae, “hatahori dae-bafok”, boe ma Ana fee babaꞌe-babatik neu sara. Hatahori dae-bafok makasososak naden, Adam. Adam tititi-nonosin nara naden:
GEN 5:3 Neu Adam teun nara 130, boe ma ana hambu ana touk esa, mata-aon sama leo aman. Boe ma ana foi kanak naa, nade Set.
GEN 5:4 Basa boe ma Adam bei nasoda teuk 800 bali, ma ana hambu tamba seluk ana touk ma inak.
GEN 5:5 Teun nara 930, boe ma maten.
GEN 5:6 Neu Set teun nara 105, boe ma ana hambu ana tou anak esa, nade Enos.
GEN 5:7 Basa boe ma Set bei nasoda teuk 807 bali, ma ana hambu tamba seluk ana touk ma inak.
GEN 5:8 Teun nara 912, boe ma maten.
GEN 5:9 Neu Enos teun nara 90, boe ma ana hambu ana touk esa, nade Kenan.
GEN 5:10 Basa boe ma Enos bei nasoda teuk 815 bali, ma hambu tamba seluk ana touk ma inak.
GEN 5:11 Teun nara 905, boe ma maten.
GEN 5:12 Neu Kenan teun nara 70, boe ma ana hambu ana touk esa, nade Mahalalel.
GEN 5:13 Basa boe ma Kenan bei nasoda teuk 840 bali, ma ana hambu tamba seluk ana touk ma inak.
GEN 5:14 Teun nara 910, boe ma maten.
GEN 5:15 Neu Mahalalel teun nara 65, boe ma ana hambu ana touk esa, nade Yared.
GEN 5:16 Basa boe ma Mahalalel bei nasoda teuk 830 bali, ma ana hambu tamba seluk ana touk ma inak.
GEN 5:17 Teun nara 895, boe ma maten.
GEN 5:18 Neu Yared teun nara 162, boe ma ana hambu ana touk esa, nade Henok.
GEN 5:19 Basa boe ma Yared bei nasoda teuk 800 bali, ma ana hambu tamba seluk ana touk ma inak.
GEN 5:20 Teun nara 962, boe ma maten.
GEN 5:21 Neu Henok teun nara 65, boe ma ana hambu ana touk esa, nade Metusalak.
GEN 5:22 Basa boe ma Henok leo-laꞌo dalek esa no Manetualain, losa teuk 300 bali. Boe ma ana hambu tamba seluk ana touk ma inak.
GEN 5:23 Ana leo-laꞌo dalek esa no Manetualain seku neu. Neu teun nara 365, boe ma mopok kana, nahuu Manetualain soꞌuk kana neni lalai neu.
GEN 5:25 Neu Metusalak teun nara 187, boe ma ana hambu ana touk esa, nade Lamek.
GEN 5:26 Basa boe ma Metusalak bei nasoda teuk 782 bali, ma ana hambu tamba seluk ana touk ma inak.
GEN 5:27 Teun nara 969, boe ma maten.
GEN 5:28 Neu Lamek teun nara 182, boe ma ana hambu ana touk esa.
GEN 5:29 Lamek foi anan naa nade, Noh (sangga sama no dedeꞌa deꞌek esa fo sosoa-ndandaan ‘fee kokoe-nanasi’), nahuu ana nae, “Kanak ia neu ko ana kokoe-nanasi tao namahoko ita dalen nara numa ita ue-osa beran mai nai dae ia fo Manetualain nakatoo nalan ena.”
GEN 5:30 Basa boe ma Lamek bei nasoda teuk 595 bali, ma ana hambu tamba seluk ana touk ma inak.
GEN 5:31 Teun nara 777, boe ma maten.
GEN 5:32 Neu Noh teun nara 500 ena, boe ma ana hambu ana touk telu, ndia: Sem, Yafet, ma Ham.
GEN 6:1 Lelek naa, hatahori dae-bafok tamba namanoꞌu ena. Boe ma ara leo ratanggenggela sudi rai bee, ndule basa dae-bafok ia ena. Ara oo bonggi rala ana inak kara boe.
GEN 6:2 Manetualain ana toun nara mete-rita hatahori dae-bafok ana feꞌon nara, neulau ndoos sara. Boe ma ara reu sao rala ana feꞌok see fo ara hii sara.
GEN 6:3 Boe ma MANETUALAIN nae, “Au mangguk ka ena ua hatahori dae-bafok leleo-lalaꞌo takandaan nara ia. Au Dula-daleng mana baꞌe masodak neu sara raa, ta nau fee sara rasoda seku neu ena bali. Ara muste mate. Dadi neu ko ara rasoda losa kada teuk 120.”
GEN 6:4 Tembo-lelek naa, ma tembo-lele bakadeak kara mana tungga naa, hambu hatahori parangguk kara nai dae-bafok ena. Neu lelek fo Manetualain ana toun nara sao rala hatahori dae-bafok ana inan nara, boe ma ara bonggi rala hatahori ta hohoꞌak kara, ndia, malangga musur, fo neni nelelak kara nai tutui lele uluk.
GEN 6:5 Lelek naa, MANETUALAIN mete-nita hatahori dae-bafok nai dae-bafok manggaraun nara sudi selik kana ena. Dalen nara duꞌa kada manggarauk taa-taa.
GEN 6:6 De MANETUALAIN fale dalen adu nala sara ena fo leo nai dae-bafok ia. Naa, tao nala Ndia dalen hedis sudi selik kana.
GEN 6:7 Huu naa de Ana kokolak nae, “No dalak naa, neu ko Au akalulutu hatahori dae-bafok, fo Au adu ala sara rai dae-bafok ia. Au oo akalulutu basa mbuik kara ma banda laen nara lalaꞌen boe. Huu Au fale daleng adu ala sara ena.”
GEN 6:8 Tehuu kada Noh mesa kana, ndia tao namahoko MANETUALAIN dalen.
GEN 6:9 Noh tutuin talo ia: ana toun nara telu, ndia Sem, Yafet ma Ham. Noh naa, leo-laꞌo tungga ndoon, ta tao mangggarauk, ma ana leo-laꞌo deka-deka no Manetualain. Lelek naa, kada mesa kana ndia neulauk.
GEN 6:11 Tehuu Manetualain mete-nita basa hatahori laen manggarau ndoos sara. Nai bee a mesan, hatahorir leleo-lalaꞌon nara ta neulauk sudi selik kana ena. Manetualain mete-nita hatahori dae-bafok nai dae-bafok naa, kada manggarauk kara.
GEN 6:13 Boe ma Ana nafada Noh nae, “Nai bee a mesan, Au mete-ita kada hatahori dae-bafok manggaraun. Dadi Au aketu basa ena ae, Au ae akalulutu basa dae-bafok ia no oe-isin lalaꞌen.
GEN 6:14 De talo ia, Noh! Hatematak ia o tao mala ofa moꞌok esa numa ai teas mai. Nai ofak naa dalen, o tao kamar. Basa naa, balu ofak naa pake ter.
GEN 6:15 O tao ofak naa narun meter 133; loan meter 22; ma deman meter 13.
GEN 6:16 Ofak naa, taon kareredok. Tehuu reredok naa, naomba nai rarain meter seserik esa numa rindi lain mai. O baꞌe ofak naa dadi tadak telu. Boe ma tao lelesu esa nai ofak naa boboan.
GEN 6:17 Masaneda matalolole! Neu ko Au akonda faa moꞌok fo ana nakamate basa hata fo horis marai dae-bafok ia, losa ta ela hata esa boe na.
GEN 6:18 Tehuu Au nau ndara fangga hehelu-bartaak ua o. Neu ko o maso muni ofak naa dale muu, sama-sama mua o saom, o anam mara, ma o feto-feum mara.
GEN 6:19 Numa basa bandar lalaꞌen mai, o muste haꞌi pasan esa-esak, fo muni sara reni ofak naa dale reu, mita fo ara rasoda sama-sama ro o. Sira: banda nekeboik, mbuik kara, ma banda mana manodo-manamak kara, mita fo basa sara rasoda.
GEN 6:21 O muste muni basa nanaꞌak mata-matak kara reni ofak dale reu soa-neu ei, ma basa bandar raa.”
GEN 6:22 Basa boe ma Noh tao tungga basa Manetualain parendan lalaꞌen.
GEN 7:1 Basa boe ma MANETUALAIN kokolak no Noh nae, “Au mete uni sudi bee uu, tehuu hambu kada o mesa ngga ndia, dale ndoos. Huu naa de, o mua o sao-anam mara maso meni ofak dale miu leo.
GEN 7:2 Numa basa bandar mata-matak kara mai fo ei bole miꞌan, ma bee fo ei bole menin fee Au, na, o here mala pasan hitu-hituk, fo muni sara reni ofak naa dale reu. Numa basa mbuik mata-matak kara mai oo, muni pasan hitu-hituk boe. Tehuu numa bandar laen nara mai, muni kada pasan esa-esak. No dalak naa, bandar ma mbuik kara raa dadi bini, fo ta ramaketu.
GEN 7:4 Masaneda matalolole! Huu faik hitu bali, Au akonda udan ta namaketu hatu-leledon losa faik haa hulu. No dalak naa, Au akamate basa horis lalaꞌen marai mada lai fo Au akadadadi alak kara ena.”
GEN 7:5 Basa boe ma Noh tao tungga basa MANETUALAIN parendan lalaꞌen.
GEN 7:6 Neu lelek fo faa moꞌok mai naa, Noh teun nara 600.
GEN 7:7 Boe ma Noh no saon, anan nara, ma feto-feun nara, maso reni ofak naa dale reu, fo ara rasoda numa faa moꞌok naa mai.
GEN 7:8 Tungga MANETUALAIN parendan naa, boe ma Noh neni basa mbuik mata-matak kara, ma bandar laen nara, esa-esak no ndia pasan numa bee fo hatahori bole naꞌan, ma bee fo hatahori ta bole naꞌa sana, de ana neni sara ofak dale reu.
GEN 7:10 Basa faik hitu, boe ma faa moꞌok lala mai, de mulai tatana nala dae-bafok ia.
GEN 7:11 Ndaa neu Noh teun nara 600, tamba bulak dua ma faik 17, boe ma faa moꞌok lala mai! Lelek naa, leo bali lelesu lalais neni soik, de oen mboꞌa dae mai. Ma basa oe bubuk kara marai dae dale kadi sara, de oe rasapupura dea mai.
GEN 7:12 Boe ma udan konda ta namaketu hatu-leledon, losa faik haa hulu dalen.
GEN 7:13 Tehuu faik naa oo, Noh, saon, ana katelun nara, ndia Sem, Yafet, ma Ham, ma Noh feto-feun nara, maso reni ofak naa dale reu.
GEN 7:14 Ara maso sama-sama ro bandar, ndia banda nekeboik, banda fuir, banda mana manodo-manamak, mbuik kara, ma banda laen fo kalidak kara.
GEN 7:15 Pasan esa-esak numa basa horis lalaꞌen mai, maso reni ofak dale reu, sama-sama ro Noh, tungga hata fo Manetualain fee parenda neun. Neu basa sara maso rala ofak dale, boe ma MANETUALAIN nggoe ofak naa lelesun.
GEN 7:17 Uda moꞌok konda nakandoo losa faik haa hulu, de faa moꞌok hene tamba namadema, losa ofak laa boꞌu-boꞌu. Oe hene nakandoo losa ana tatana nala lete demak kara.
GEN 7:20 Oe naa hene ta namaketu, losa deman nakalena letek kara meter hitu.
GEN 7:21 No dalak naa, basa horis marai mada lai, mate basa sara. Ndia: hatahori dae-bafok, banda nekeboik, banda fuir, banda mana manodo-manamak, ma mbuik kara. Kada Noh ma basa marai ofak naa dale, rasoda.
GEN 7:24 Oe naa ta reꞌe-reꞌe, losa faik 150.
GEN 8:1 Tehuu Manetualain ta lilii Noh sara no basa bandar marai ofak naa dale. De Ana fee anin mai fo fuu nareꞌe oe faa moꞌok naa.
GEN 8:2 Ana oo tatana basa oe bubuk kara marai dae-inak, ma Ana fee udan numa lalai mai hahae boe.
GEN 8:3 Boe ma oe reꞌe nakandoo. Basa faik 150, boe ma oe sangga ta demak ka ena.
GEN 8:4 Ndaa no bulak kahitun seli faik 17, boe ma ofak naa hara neu lete demak esa, nade Ararat.
GEN 8:5 Oe reꞌe nakandoo losa bulak kasalahunun faik kaesan, boe ma letek kara poin nara mulai mete-rita sara.
GEN 8:6 Seli faik haa hulu, boe ma Noh soi ofak dinelan esa.
GEN 8:7 Basa boe ma ana mboꞌi mbuik kaa esa. Mbuik naa lambu nakandoo neu-mai losa oe faa moꞌok reꞌe tebe-tebe ena. Ana ta fali neni ofak neu ena.
GEN 8:8 Boe ma Noh mboꞌi seluk mbui lunda sina esa bali, fo sangga bubuluk oe naa, reꞌe tebe-tebe ena do beik.
GEN 8:9 Tehuu oe bei tatana nala basa dae-bafok, de mbuik naa ta hambu mamana sasaꞌek. Boe ma ana lambu fali neni ofak neu. Noh soro liman neu, de ana simbo nala falik mbuik naa maso neni ofak dale neu.
GEN 8:10 Noh nahani faik hitu bali, boe ma ana mboꞌi seluk mbuik naa.
GEN 8:11 Ledo bobon naa, mbuik naa fali neni Noh mai, ma ana neni ai setun dook esa, ana dei fo ketu nalan. Boe ma Noh bubuluk oe reꞌe tebe-tebe ena.
GEN 8:12 Ana nahani faik hitu bali, de ana mboꞌi seluk mbui lunda sina naa. Tehuu oek ia, mbuik naa ta fali ena.
GEN 8:13 Neu Noh teun nara 601, ndaa no bulak kaesan, faik kaesan, oe reꞌe tebe-tebe ena. Boe ma Noh soi ofak naa dinelan, de ana mete sudi bee neu, te daer madak kara ena.
GEN 8:14 Losa bulak kaduan, faik ka-27, dae mada tebe-tebe ena.
GEN 8:15 Basa boe ma Manetualain kokolak no Noh nae,
GEN 8:16 “Noh! Hatematak ia ei basa ngga konda numa ofak ia mai leo.
GEN 8:17 Kalua heni basa bandar raa lalaꞌen leo! Ndia: banda nekeboik, banda fuir, banda mana manodo-manamak, ma mbuik kara. Ela sara fo basa sara tamba ramanoꞌu, ma rasofe dae-bafok ia.”
GEN 8:18 Basa boe ma Noh no saon, anan nara, ma feto-feun nara, basa sara kalua numa ofak naa mai. Basa bandar raa oo kalua boe, esa-esak no ndia matan.
GEN 8:20 Basa boe ma Noh totodo batur fo tao mei tunu-hotuk soa-neu MANETUALAIN. Numa bandar fo bole pake dadi neu banda tunu-hotuk kara mai, Noh haꞌi nala esa-esak. De ana hala fo hotu sara reu mei tunu-hotuk naa lain, dadi neu tanda makasi soa-neu MANETUALAIN.
GEN 8:21 Neu MANETUALAIN hae nala tunu-hotuk naa boo menin, boe ma dalen namahoko. De Ana duduꞌa nae, “Mulai numa hatematak ia neu, Au ta akatoo dae-bafok ia bali, nahuu hatahori dae-bafok manggaraun. Leo mae ara duduꞌa kada manggarauk numa kadiꞌi anan nara mai, tehuu Au ta akalulutu basa horis lalaꞌen bali, sama leo Au taok naa ena.
GEN 8:22 Losa neu dae-bafok ia bei hambun, ledo-fair ia laꞌok rakandoo, tungga sira dalan. Ndia: fai sele-tandek ma fai ketu-koruk, fai makasufuk ma fai hanas, fai fanduk ma fai udan, leledok ma leꞌodaek.”
GEN 9:1 Manetualain fee babaꞌe-babatik neu Noh no anan nara, ma kokolak nae, “Ei bonggi mala noꞌun seli, fo tao masofe falik dae-bafok ia.
GEN 9:2 Neu ko basa banda fuir, mbuik ma iꞌak kara ramataꞌu ei. Ei ndia muste lopo-linu sara.
GEN 9:3 Ei bole miꞌa basa bandar raa mbaan, sama leo ei oo bole miꞌa sele-tandek kara buna-boan boe. Basa iar, Au fee sara reu ei.
GEN 9:4 Kada ei ta bole miꞌa mbaa bei kadaak, nahuu banda samanen nai daan dale.
GEN 9:5 Au adu hatahori dae-bafok tungga Au mata-aong. Huu naa de ta bole hala misa hatahori dae-bafok. Mete ma hambu hatahori do banda, fo tao nisa hatahori dae-bafok, na, muste makanisa sara boe. Hohoro-lalanek ia numa Au mai.
GEN 9:7 Ei muste bonggi noꞌun seli, fo tao masofe dae-bafok ia bali.”
GEN 9:8 Manetualain tuti seluk kokolan nae,
GEN 9:9 “Hatematak ia Au nau ndara fangga Au hehelu-bartaang ua ei, losa ei tititi-nonosim mara boe.
GEN 9:10 Hehelu-bartaak ia oo soa-neu basa hata fo horis boe, ndia banda nekeboik, banda fuir, ma mbuik kara. Kekeꞌun, soa-neu basa hata fo ei sama-sama mia sara, kalua numa ofak naa dale mai.
GEN 9:11 Au hehelu-bartaang naa, talo ia: Au ta haitua faa moꞌok bali, fo tao nisa basa hata fo horis lalaꞌen, ma akalulutu basa dae-bafok ia.
GEN 9:12 Au tao Au elus neu lalai, fo dadi tanda nesenedak neu Au hehelu-bartaang ta mana ketuk ua ei, no basa hata fo horis lalaꞌen, ma dae-bafok ia.
GEN 9:14 Mete ma hambu sosoꞌak nai lalai, boe ma elus dadi, na, neu ko ana fee nesenedak mai Au soa-neu hehelu-bartaak naa, nae: neu ko faa moꞌok ta nakalulutu basa hata fo horis lalaꞌen bali. No dalak naa, Au hehelu-bartaang ta mana basak naa, neni ndara fanggak ena no ei, ma no basa hata fo horis lalaꞌen.”
GEN 9:18 Noh anan nara mana kalua numa ofak naa mai, ndia Sem, Yafet ma Ham (Ham naa, Kanaꞌan aman).
GEN 9:19 Basa hatahorir marai dae-bafok ia, tititi-nonosin nara konda numa Noh ana katelun nara mai.
GEN 9:20 Noh naa, hatahori mana ue daek. Ana ndia makasososan tao osi anggor.
GEN 9:21 Laꞌe esa, ana ninu anggor losa mafu nalan seli. Boe ma ana lufa heni bualoꞌa-papaken, de ana sunggu lololi tao folik numa laan dale.
GEN 9:22 Neu Ham mete-nita aman makaholan naa, boe ma ana nalai dea neu, fo neu nafada kaꞌan Sem no Yafet.
GEN 9:23 Boe ma dua sara haꞌi rala lafa esa, de rakambembelan neu sira dua sara arun nara. Basa boe ma ara laꞌok rakadedeak reni laak naa dale reu, fo rakambambalu rala sira aman. No dalak naa, ara ta mete-rita sira aman nekeholan naa. Basa boe ma ara kalua dea reu.
GEN 9:24 Neu Noh mamafun mulai lende, boe ma ana bubuluk ndia ana muri anan tatao-nonoꞌin.
GEN 9:25 Boe ma ana kokolak nae, “Weeh! Kanaꞌan amanee! Au akatoo o! Neu ko o dadi muu o kaꞌam mara ata-daton!
GEN 9:26 Kokoa-kikiok neu MANETUALAIN! Naa fo Ana fee babaꞌe-babatik neu Sem! Tehuu naa fo Kanaꞌan dadi neu Sem ata-daton.
GEN 9:27 Elan fo Manetualain tao nambaloa Yafet dae oen; Ma tititi-nonosin leo-laꞌo mole-dame ro Sem tititi-nonosin. Tehuu elan fo Kanaꞌan dadi neu Yafet kulin.”
GEN 9:28 Mulai numa faa moꞌok naa basa neu, Noh bei nasoda teuk 350 bali.
GEN 9:29 Teun nara 950, boe ma ana mate.
GEN 10:1 Basa faa moꞌok, boe ma Noh anan nara hambu tititi-nonosik. Ndia tititi-nonosik numa Sem, Yafet, ma Ham mai.
GEN 10:2 Yafet tititi-nonosin nara, ndia Gomer, Magog, Madai, Yawan, Tubal, Mesek, ma Tiras. Esa-esak no sira dedeꞌan, sira leon, ma sira dae oe heli-helin. Gomer tititi-nonosin nara, ndia Askenas, Rifat ma Togarma. Yawan tititi-nonosin nara, ndia Elisa, Tarsis, Kitim hatahorin nara, ma Dodanim, fo mana leo numa tasi tatain nara.
GEN 10:6 Ham tititi-nonosin nara, sira Kus, Misraim, Put, ma Kanaꞌan.
GEN 10:7 Kus tititi-nonosin nara, sira Seba, Hawila, Sabta, Raema ma Sabteka. Raema tititi-nonosin nara, sira Syeba ma Dedan.
GEN 10:8 Kus ana toun, ndia Nimrod. Ndia naa, malangga musu ta hohoꞌak makasososan.
GEN 10:9 Ndia ta hohoꞌan hambun numa MANETUALAIN mai, losa ana oo dadi neu mana sombu ta hohoꞌak mateꞌen boe. Huu naa de hatahorir rasiꞌe kokolak rae, “Naa fo o dadi muu mana sombu ta hohoꞌak sama leo Nimrod, fo ana hambu ndia ta hohoꞌan numa MANETUALAIN mai.”
GEN 10:10 Makasososan Nimrod toꞌu koasa mulai numa Babel, Erek Akad, ma Kalne mai. Basa naar rai Sinear.
GEN 10:11 Numa naa mai, ana koasa tamba no Asyur. Basa boe ma ana nambaririik kota Niniwe, Rehobot-Ir, Kala,
GEN 10:12 ma Resen manai Niniwe no Kala taladan. Basa naar, kota moꞌok kara.
GEN 10:13 Misraim tititi-nonosin nara, sira hatahori Ludim, Anamim, Lehabim, Naftuhim,
GEN 10:14 Patrusim, Kasluhim ma Kaftorim. Hatahori Kasluhim naa, ndia hatahori Filistin nara bei-baꞌin.
GEN 10:15 Kanaꞌan ana ulun, ndia Sidon. Kanaꞌan oo dadi neu hatahori Het,
GEN 10:16 Yebusi, Amori, Girgasi,
GEN 10:17 Hiwi, Arki, Sini,
GEN 10:18 Arwadi, Semari ma Hamati, bei-baꞌin nara. Kanaꞌan tititi-nonosin nara ratanggela losa dook ka
GEN 10:19 losa sira daen too-lanen nara mulai numa Sidon seku neni Gerar neu losa Gasa. Numa naa mai, neni Sodom, Gomora, Adma, Seboim losa Lasa neu.
GEN 10:20 Sira basa naar, Ham tititi-nonosin. Esa-esak no sira dedeꞌan, sira leon, ma sira dae oe heli-helin.
GEN 10:21 Yafet kaꞌan Sem, dadi hatahori Eber bei-baꞌin nara.
GEN 10:22 Sem tititi-nonosin nara, sira Elam, Asyur, Arpakhsad, Lud ma Aram.
GEN 10:23 Aram tititi-nonosin nara, sira hatahori Us, Hul, Geter ma hatahori Mas.
GEN 10:24 Arpakhsad anan, Sela. Sela anan, Eber.
GEN 10:25 Eber hambu ana touk dua. Uluk, hambu nadek Pelek, (fo sosoa-ndandaan ‘bingga-baꞌek’), nahuu lelek naa, hatahorir rabingga-baꞌek nai dae-bafok. Fadin nade Yoktan.
GEN 10:26 Yoktan tititi-nonosin nara, sira Almodad, Selef, Hasar-Mawet, Yerah,
GEN 10:27 Hadoram, Usal, Dikla,
GEN 10:28 Obal, Abimael, Syeba,
GEN 10:29 Ofir, Hawila ma Yobab. Sira basa sara iar, Yoktan tititi-nonosin nara.
GEN 10:30 Sira mamana leleon nara raa, mulai numa Mesa mai, seku neu losa Sefar, ndia mamana mbuku letek nai boboak dulu.
GEN 10:31 Sira basa sara raa, Sem tititi-nonosin nara. Esa-esak no sira dedean, sira leon, ma sira dae oe heli-helin.
GEN 10:32 Basa naar, Noh tititi-nonosin nara, esa-esak no sira leo heli-helin. Neu faa moꞌok hahae, sira iar ndia sasarak tao rasofe dae-bafok.
GEN 11:1 Lele uluk, basa hatahorir rai dae-bafok kokolak pake kada dedeꞌak esak ka.
GEN 11:2 Neu sira ketuk mulai lali reni boboan dulu reu, ara losa dae matetuk esa nai Sinear, boe ma ara leo reu naa.
GEN 11:3 Basa sara rala harak rae, “Wee! Toranoo nggara ein! Mai fo ita tambaririik kota moꞌok esa. Ita muste tao batu mbilas, boe ma ita hotun losa natea. Ma ita totodo batu mbilas raa pake ter. Basa boe ma ita tambaririik manara mandema esa, suꞌun losa lalai, mita fo ita hambu nade kokoak. Mita fo ita dadi teu hatahori nusa moꞌok esa, hae tabingga-baꞌek.”
GEN 11:5 Boe ma MANETUALAIN konda mai titino soba kota naa no manaran, fo ara rambaririik kana.
GEN 11:6 Basa boe ma Ana kokolak nae, “Basa hatahori dae-bafok kara iar hatahori nusak esa, ma pake dedeꞌak esa. Hata fo ara taok hatematak ia, ia bei fo kada ue makasososak. Mbila-beinesak, mete ma basa sara rakaesa dadi reu esa, sama leo hatematak ia, neu ko ara bisa tao hata a mesan.
GEN 11:7 Malole lenak Ita konda fo tao dedeꞌan nara esak matan, mita fo sira esa ta nala esa dedeꞌan bali.”
GEN 11:8 Basa boe ma MANETUALAIN konda fo tao babalik sira dedeꞌan. No dalak naa, Ana tao hatahori dae-bafok kara raa sasarak reni basa mamanak kara rai dae-bafok ia reu. De ara ta rambaririik rakandoo kota naa ena bali.
GEN 11:9 Huu naa de ara foi kota naa, nade Babel, (fo sangga sama leo dedeꞌa deꞌek esa sosoa-ndandaan ‘panggananaa’), nahuu MANETUALAIN tao babalik sira dedeꞌan ma tao sasarak kasa reni sudi bee reu, ndule dae-bafok ia.
GEN 11:10 Ia Sem tititi-nonosin nara. Neu faa moꞌok basa teuk dua ena, nandaa no Sem teun nara 100, boe ma ana hambu ana touk esa, nade Arpaksad.
GEN 11:11 Basa boe ma Sem bei nasoda teuk 500 bali, ma ana hambu tamba seluk ana touk ma inak.
GEN 11:12 Neu Arpaksad teun nara 35, boe ma ana hambu ana touk esa, nade Sela.
GEN 11:13 Basa boe ma Arpaksad bei nasoda teuk 403 bali, ma ana hambu tamba seluk ana touk ma inak.
GEN 11:14 Neu Sela teun nara 30, boe ma ana hambu ana touk esa, nade Eber.
GEN 11:15 Basa boe ma Sela bei nasoda teuk 403 bali, ma ana hambu tamba seluk ana touk ma inak.
GEN 11:16 Neu Eber teun nara 34, boe ma ana hambu ana touk esa, nade Pelek.
GEN 11:17 Basa boe ma Eber bei nasoda teuk 430 bali, ma ana hambu tamba seluk ana touk ma inak.
GEN 11:18 Neu Pelek teun nara 30, boe ma ana hambu ana touk esa, nade Rehu.
GEN 11:19 Basa boe ma Pelek bei nasoda teuk 209 bali, ma ana hambu tamba seluk ana touk ma inak.
GEN 11:20 Neu Rehu teun nara 32, boe ma ana hambu ana touk esa, nade Seruk.
GEN 11:21 Basa boe ma Rehu bei nasoda teuk 207 bali, ma ana hambu tamba seluk ana touk ma inak.
GEN 11:22 Neu Seruk teun nara 30, boe ma ana hambu ana touk esa, nade Nahor.
GEN 11:23 Basa boe ma Seruk bei nasoda teuk 200 bali, ma ana hambu tamba seluk ana touk ma inak.
GEN 11:24 Neu Nahor teun nara 29, boe ma ana hambu ana touk esa, nade Tera.
GEN 11:25 Basa boe ma Nahor bei nasoda teuk 119 bali, ma ana hambu tamba seluk ana touk ma inak.
GEN 11:26 Neu Tera teun nara 70 lenak, boe ma ana hambu ana touk telu, ndia Abram, Nahor ma Haran.
GEN 11:27 Tera tititi-nonosin nara, talo ia: Tera anan nara, ndia Abram, Nahor ma Haran. Haran hambu ana touk esa, nade Lot.
GEN 11:28 Haran mate numa ndia nggoro-tadu huun, nade Ur, nai hatahori Kasdim daen. Neu ana mate naa, aman Tera bei masodak.
GEN 11:29 Abram sao nala Sarai. Nahor sao nala Haran ana inan, nade Milka. Haran oo hambu ana touk esa, nade Yiska.
GEN 11:30 Tehuu Sarai kala tedis, ana ta bisa bonggi.
GEN 11:31 Laꞌe esa, Tera nuni nala anan Abram, feto-feun Sarai, ma umbun Lot, de ara kalua laꞌo ela nggorok Ur. Lelek naa, ara sangga reni dae Kanaꞌan reu. Tehuu losa nggorok Haran, boe ma ara leo reu kada naa leo.
GEN 11:32 Numa naa, Tera maten, neu teun nara 205.
GEN 12:1 Lelek naa, MANETUALAIN kokolak no Abram ena nae, “Abram! O kalua laꞌo ela o nufanelum, o amam uman ma o nggoro-tadum. O muni mamanak esa muu, dei fo Au atudun neu o.
GEN 12:2 Neu ko Au fee babaꞌe-babatik neu o. Ma o tititi-nonosim mara, neu ko ramanoꞌu, ma ara dadi reu hatahori nusa moꞌo ta hohoꞌak esa, losa hatahorir ralela o nadem. De neu ko o dadi muu mana fee babaꞌe-babatik neu hatahori laen.
GEN 12:3 Neu ko Au fee babaꞌe-babatik neu hatahori fo mana fee babaꞌe-babatik neu o. Tehuu Au akatoo neu hatahori fo mana nakatoo o. Nenene matalolole! Neu ko basa hatahori nusa-nusak kara marai dae-bafok ia, hambu babaꞌe-babatik nahuu o.”
GEN 12:4 Lelek naa, Abram teun nara 75. Ana nuni nala saon Sarai, ndia fadin anan Lot, haꞌi neni basa ndia hata-heton lalaꞌen, ma basa hatahori mana maue-osar fo ana hambu sara ruma kota Haran. Boe ma Abram asa laꞌo ela Haran, fo reni mamanak fo MANETUALAIN nafada neun ena. De ara laꞌok rakandoo, losa mamanak esa, nade Kanaꞌan.
GEN 12:6 Losa naa, de Abram laꞌok eo ndule dae naa, losa deka no nggorok esa, nade Sikem. Boe ma ara leo taak deka ai huu moꞌok esa nai More. Lelek naa, hatahori Kanaꞌan nara bei leo numa naa.
GEN 12:7 Numa naa, MANETUALAIN natudu aon neu Abram. Ana nae, “Neu ko Au fee nusak ia neu o tititi-nonosim.” Basa boe ma Abram totodo batur dadi neu mei batu esa fo paken dadi neu mei tunu-hotuk soa-neu MANETUALAIN fo mana natudu Ndia aon numa naa ena.
GEN 12:8 Basa boe ma Abram asa lali reni letek nai kona reu, de ara leo taak numa nggorok Betel ma nggorok Ai taladan. Numa naa, ana nambaririik mei tunu-hotuk esa, de ana nakaluku-nakatele neu MANETUALAIN.
GEN 12:9 Basa boe ma ana lali-lali mamanak, losa dae Negeb nai Kanaꞌan boboan kona.
GEN 12:10 Laꞌe esa, hambu fai ndoe-laꞌas nalan seli numa nusa Kanaꞌan. Huu naa de Abram asa laꞌok ramadoo aon nara bali reni boboan kona reu losa nusa Masir. Ara leo taak reu naa.
GEN 12:11 Neu ara rae maso reni nusa Masir reu, ana nafada saon Sarai nae, “Sarai, ee! O ia, manaꞌa hiek seli.
GEN 12:12 De mete ma hatahori Masir mete-rita o manaꞌa hiek talo ia, na, neu ko ara nau hala risa au, nahuu au ia o saom. No dalak naa, ara bisa leꞌa rala o.
GEN 12:13 Dadi malole lenak, o mafada sara mae, au ia o kaꞌam. No dalak naa, ara ta hala risa au, tehuu neu ko ara malole ro au, nahuu o.”
GEN 12:14 Neu Abram asa losa Masir ena, hatahorir mete-rita inak naa manaꞌa hiek seli.
GEN 12:15 Neu mane Masir penggawen nara mete-ritan, boe ma ara koa inak naa manaꞌa hien numa manek matan. De ara leꞌa ro inak naa neni manek uman neu.
GEN 12:16 Dadi manek malole neu Abram, nahuu Sarai. Boe ma manek fee mudak bandar reu Abram, sira: bibi hiek, bibi lombo, sapi, keledei ma onta. Ana oo fee mudak ata touk ma inak boe.
GEN 12:17 Tehuu no manek leꞌa nala hatahori sao inan neni ndia uman dale neu ena, huu naa de MANETUALAIN fee huku-dokik mata-matak neun no uma isi-oen nara.
GEN 12:18 Basa boe ma manek noke nala Abram, de natanen nae, “Abram! O tao au talo bee ia ena? Tao hata de o ta mafada mae inak naa, o saom?
GEN 12:19 Tehuu o mae ndia ia, o fadim! Ela faak ka au haꞌi alan dadi neu au saong! Ia, o saom ndia. Hatematak ia haꞌi malan fo malai laꞌo heok au matang ia leo!”
GEN 12:20 Basa boe ma manek fee parenda neu ndia penggawen nara, fo ara husi kalua heni Abram, saon, ma basa sira bua-baꞌun nara lalaꞌen fo kalua numa nusak naa mai.
GEN 13:1 Basa boe ma Abram laꞌo ela Masir, fo ana fali neni dae Negeb neu. Ana nuni no saon ma basa ndia hata-heton lalaꞌen. Fadin anan Lot oo tungga sara boe.
GEN 13:2 Abram naa, namasuꞌi nalan seli. Banda nekeboin nara, lilo mbilas ma lilo fulak, noꞌun seli.
GEN 13:3 Numa Negeb mai, ana leo lali-lali, losa ana fali neni nggoro Betel ma nggoro Ai taladan neu. Fai bakahulun ana leo nita numa naa ena.
GEN 13:4 Ma ana oo nambaririik mei tunu-hotuk ena boe. De ana nakaluku-nakatele neu MANETUALAIN numa naa.
GEN 13:5 Lot, fo mana tungga sama-sama no Abram naa oo, naena banda nekeboik noꞌuk ka boe, ma ndia hatahori mana maue-osan nara oo noꞌuk ka boe.
GEN 13:6 Tehuu mamanak naa sangga ta loak ka soa-neu Abram ma Lot, ro basa sira hata-heton lalaꞌen, fo ara leo-laꞌo sama-sama reu naa. Basa boe ma Abram no Lot mana lolon nara mulai rareresi, nahuu naꞌu manai mamanak naa, ta dai sira bandan nara raꞌa. (Lelek naa, hatahori Kanaꞌan ma hatahori Feris oo bei leo ruma naa boe.)
GEN 13:8 Basa boe ma Abram nafada anan nae, “Lot, ee! Ita iar nufaneluk esa. Boso losak ita dua ngga, esa ta malole no esa, boe ma ita hatahori mana maue-osan nara soa rahuur taa-taa.
GEN 13:9 Dadi malole lenak ita dua ngga tabingga-baꞌek leo. Mamanak ia loak ka, de mete ma o here mala dae manai boboa kiin, na, au haꞌi ala dae manai boboa konan. Tehuu mete ma o here mala dae manai boboa konan, na, au haꞌi ala dae manai boboa kiin.”
GEN 13:10 Boe ma Lot mete ndule basan. De ana mete-nita lee Yarden doken sofek no oe, losa nggoro Soar. Mamanak naa daen maisi-minak sama leo MANETUALAIN osin, ma sama leo dae Masir. (Lelek naa, MANETUALAIN bei ta nakalulutu kota Sodom no Gomora. De dae naa bei malole).
GEN 13:11 Huu naa de Lot here nala basa lee Yarden doken lalaꞌen. De dua sara rabingga-baꞌek. Boe ma Lot neni boboak dulu neu.
GEN 13:12 Tehuu Abram leo nakandoo numa dae Kanaꞌan. Ma Lot neu leo numa nggoro-nggorok mana deka kota Sodom nai Yarden doken.
GEN 13:13 Tehuu hatahori Sodom mara manggarauk sudi selik kana. Ma ara ta nau nenene neu MANETUALAIN.
GEN 13:14 Neu Lot no Abram rabingga-baꞌek ena, boe ma MANETUALAIN nafada Abram nae, “Abram! Soba o leleuk sudi bee neu fo mete ndule basa mamanak kara numa mamanak fo o mambariik naa mai. Mete matalolole dea-matan ma kii-konan.
GEN 13:15 Basa daer fo o mete-mitak kara raa, neu ko Au fee sara reu o, ma o tititi-nonosim mara, fo dadi neu ei pusakam nakandoo, losa doon naa neu.
GEN 13:16 Neu ko Au fee o tititi-nonosim mara dadi ramanoꞌu sama leo sarakaek nai tasi tatain. Losa hatahorir ta bisa reke rala o tititi-nonosim mara dedesin.
GEN 13:17 Hatematak ia o laꞌok eo ndule dae ia loa-narun. Huu basa naar, neu ko Au fee sara reu o!”
GEN 13:18 Basa boe ma Abram asa lali mamanak, de reu leo seluk bali numa mamanak fo mana deka no ai huu moꞌok kara marai Mamre, deka no nggoro Hebron. Basa boe ma ana tia-totodo mei tunu-hotuk fo rakaluku-rakatele reu MANETUALAIN numa naa.
GEN 14:1 Lelek naa, hambu manek haa rakabua, sira: Amrafel, manek nusak Sinear. Ariok, manek nusak Elasar. Kedarlaomer, manek nusak Elam. Ma Tideal, manek nusak Goyim.
GEN 14:2 Lelek naa oo, hambu manek laen lima rakabua boe, sira: Bera, manek nusak Sodom. Birsa, manek nusak Gomora. Sinab, manek nusak Adema. Semeber, manek nusak Seboim. Ma manek nusa Bela (ndia nusak Soar). De manek kahaak kara raa reu ratati laban manek kalima laen nara raa.
GEN 14:3 Manek kalimak kara raa rakabubua ro soldadun nara ruma Sidim doken, (fo hatematak ia roken rae, Tasi Mates).
GEN 14:4 Netatik naa momori-dadadin talo ia: fai bakahulun manek Kedarlaomer parenda manek kalimak kara raa losa teuk 12. Tehuu neu teuk ka-13, boe ma ara foꞌa de laban ana.
GEN 14:5 Neu maso teuk ka-14, boe ma manek Kedarlaomer, ma ndia nonoon manek kateluk kara raa, mai ro sira soldadun nara. Boe ma ara ratati rasenggi nusak hida. Sira: hatahori Refaim marai nusak Asterot-Karnaim, hatahori Susim marai nusak Ham, hatahori Emim marai nusak Sawe-Kiryataim,
GEN 14:6 ma hatahori Hori marai letek Seir, losa mamana nees El Paran tatain.
GEN 14:7 Basa boe ma ara lenggu fali reni En Mispat reu (fo hatematak ia nade Kades). Basa naa, ara rakalulutu hatahori Amalek kara nusan, ma hatahori Amori fo mana leo numa nusa Haseson-Tamar.
GEN 14:8 Basa boe ma manek kalimak kara raa ator sira soldadun nara ruma Sidim doken, de ara ratati laban manek kahaak kara raa.
GEN 14:10 Nai dokek naa, hambu lifu ter noꞌuk ka. Neu ara ratati naa, manek Sodom ma manek Gomora ro soldadun nara ralai. Sira ketuk mbesi reni lifu ter dale reu, ma ketuk ralai reni letek reu.
GEN 14:11 De manek kahaak mana masenggik kara raa, reu fonda rala basa bua-baꞌu ma nanaꞌak kara ruma Sodom no Gomora mai. Boe ma ara fali reu sara.
GEN 14:12 Lelek naa, Abram anan Lot leo nai Sodom. De manek kahaak kara raa oo humu rala Lot asa, ma fonda rala basa bua-baꞌun nara boe.
GEN 14:13 Tehuu hatahori esa mboꞌi henin. De ana nalaik neu tui Abram, hatahori Ibrani. Lelek naa, hambu hatahori Amori esa, nade Mamre. Abram leo deka-deka no Mamre ai huu moꞌon nara. Mamre toranoon, ndia Eskol ma Aner. Sira raa, dadi Abram partein.
GEN 14:14 Neu Abram namanene nala nae, hatahorir humu reni ndia fadin anan ena, boe ma ana nakabubua nala ndia hatahori mana maue-osan fo mana malela netatik. Sira basa sara hatahori 318. Basa boe ma reu husi manek kahaak kara raa losa nggorok Dan, dook ka nai boboan kii.
GEN 14:15 Nai naa, Abram baꞌe ndia hatahorin nara dadi reu bubuak hida. Neu leꞌodae, boe ma ara reu nggafu fee hatahorir raa. Tehuu ketuk ralai. Boe ma Abram asa husi rahere sara losa nggoro Hoba, manai kota Damsik boboan kii.
GEN 14:16 No dalak naa, Abram sambu nala falik Lot no hatahorin nara, basa bua-baꞌun nara lalaꞌen, ma hatahori laen nara boe.
GEN 14:17 Neu faik fo Abram fali numa tao nasenggi mane kahaak kara raa mai, boe ma manek Sodom mai soru Abram numa Sawe doken (hatahorir rasiꞌe roken rae, Manek Doken).
GEN 14:18 Lelek naa, Melkisedek dadi manek kota Salem. Ma ndia oo malangga anggama numa Manetualain mana Demak Mateꞌen mai boe. Ana mai neni fee Abram roti no oe anggor.
GEN 14:19 Boe ma ana kokolak fee babaꞌe-babatik neu Abram nae, “Elan fo Manetualain mana Demak Mateꞌen, mana nakadadadik lalai no dae-inak naa, fee babaꞌe-babatik neu o. Koa-kio neu Manetualain, mana tao o masenggi o musum mara.” Basa boe ma Abram baꞌe fee Melkisedek, babaꞌek esa numa salahunu mai, numa basa bua-baꞌur fo ana leꞌa nala falik kara raa.
GEN 14:21 Boe ma manek Sodom doꞌor mbali Abram, de nae, “Papa Abram. Bua-baꞌur fo papa leꞌa nalak kara numa au musung nggara mai, elan fo papa soa basa sara. Tehuu au oke fee falik kada au hatahoring nggara.”
GEN 14:22 Tehuu Abram naselu nae, “Au sumba-soo numa MANETUALAIN mana Demak Mateꞌen matan, fo mana makadadadik lalai no dae-inak
GEN 14:23 ae, au ta nau haꞌi ala hata esa boe na numa o bua-baꞌum mara mai. Leo mae kada aba dook esa oo, au ta nau haꞌi ala sana boe. No dalak naa, o ta bisa kokolak mae, ‘Abram namasuꞌi, nahuu au.’
GEN 14:24 Au ta parluu hata-hata. Kada hata fo au hatahoring nggara pake sara ena, na, taon neu basa ena. Ma elan fo au nonong katelung nggara iar, Aner, Eskol ma Mamre, haꞌi reni sira babaꞌen.”
GEN 15:1 Basa boe ma MANETUALAIN natudu aon neu Abram. De Ana nae, “Abram! O hae mamataꞌu. Huu Au ndia siꞌu heni ma mana babata o numa musu mai. Ma Au fee o nanala moꞌok.”
GEN 15:2 Tehuu Abram nae, “MANETUALAIN. Leo mae MANETUALAIN baꞌe fee au hata-hata noꞌun talo naa oo, sosoan taa boe. Huu au ana taak fo fee au tititi-nonosik. Dadi nau hambu pusaka noꞌun seli tao neu hata? Bole-bole kada au atang, Eliasar numa Damsik mai, ndia hambu basa sara.”
GEN 15:4 Tehuu MANETUALAIN naselu nae, “Ta talo naa! O ana heli-helim ndia neu ko hambu pusaka naa, tehuu ta ata naa.”
GEN 15:5 Boe ma Ana nuni no Abram dea neu, de nae, “Hatematak ia o mete muni lalai muu. Soba o mete neu nduuk kara raa. O bisa reke mala sara, do? O tititi-nonosim mara neu ko noꞌun nara desi leo nduuk kara raa!”
GEN 15:6 Boe ma Abram simbok MANETUALAIN kokolan naa. De MANETUALAIN henggenee nalan dadi neu hatahori dalen ndoos, nahuu Abram namahere neun.
GEN 15:7 Basa boe ma MANETUALAIN tuti seluk kokolan bali nae, “Au ia Manetualain. Au ndia nuni ua o kalua numa nggorok Ur mai ena, nai hatahori Kasdim asa daen. Ma Au ndia fee dae ia dadi neu o pusakam.”
GEN 15:8 Tehuu Abram natane bali nae, “Tehuu talo bee MANETUALAIN? Talo bee fo au bisa bubuluk ae, neu ko dae ia dadi neu au pusakang?”
GEN 15:9 Boe ma Ana naselu nae, “Talo ia! Mai fo ita ndara fangga hata fo Au kokolak bebeik kara ia. Hatematak ia muu haꞌi mala bandar fee Au: sapi ina esa, bibi hiek ina esa, ma bibi lombo mane esa. Basa sara muste teun nara beke teluk. Basa naa o haꞌi muni mbuik teu esa ma mbuik lunda sina esa bali.”
GEN 15:10 Boe ma Abram neu haꞌi nala basa bandar raa. Basa de ana sefa seseri baꞌe duak sapi, bibi hiek, ma bibi lombo naa. Boe ma ana teri mbaar raa dadi babaꞌek dua reu daer, esa nasare esa, dadi neu baris dua. Tehuu ana ta seseri baꞌe mbuik kara raa.
GEN 15:11 Basa boe ma mbuik mana naꞌa nenetuk kara mai fo nau raꞌa mbaar raa. Tehuu Abram husi heni sara.
GEN 15:12 Neu ledo tesa, boe ma Abram sunggu seli. Ana nala meꞌi nae, makiu-makahatuk tatana nalan losa ana namataꞌu nalan seli.
GEN 15:13 Boe ma MANETUALAIN nafadan nae, “Abram! Neu ko o masoda losa o mambalasi malan seli, ma mate no mole-damek, dei fo ara ratoi o no neulauk. Tehuu o tititi-nonosim mara neu ko reu dadi mana leo taak nai hatahori laen nusan. Neu ko hatahori numa nusak naa mai tao sara dadi reu kuli, boe ma ara tuni-ndeni tao doidoso sara sudi selik kana, losa teuk natun haa. Tehuu neu ko Au huku-doki hatahori nusak naa. Boe ma Au nuni ua o tititi-nonosim mara kalua numa naa mai, ma ara reni pusaka noꞌun seli.
GEN 15:16 Neu ko Au koladu fo o tititi-nonosim mara dombe kaliman fali reni ia mai bali. Hatematak ia, hatahori Amorir leo nai dae ia lain. Hatahorir ia manggarauk kara, tehuu bei ta sudi selik kana. Neu ko mete ma o umbu-anam mara fali reni ia mai ena, Au nau pake sara fo huku-doki rakalulutu hatahari Amorir. Huu lelek naa, sira manggaraun nara sudi selik kana ena.”
GEN 15:17 Neu leꞌodae ena, medak neu ma hambu raꞌo neni tamba dae kamasuk esa ma mbele mana mbilak esa unda-unda lele nesik mbaa baris kaduak kara raa taladan.
GEN 15:18 Faik naa oo, MANETUALAIN ndara fangga hehelu-bartaan no Abram boe. Ana nafada nae, “Au helu-bartaa, neu ko Au fee nusak ia neu o tititi-nonosim, mulai numa lee Masir mai losa lee Efrat,
GEN 15:19 no basa hatahori Keni, Kenas, Kadmon,
GEN 15:20 Het, Feris, Refaim,
GEN 15:21 Amori, Kanaꞌan, Girgasi, ma Yebus daen nara.”
GEN 16:1 Lelek naa, Abram fali numa Masir mai ena, de ana leo teuk salahunu numa Kanaꞌan ena. Saon Sarai bei ta hambu anak. Sarai naena ata inak hatahori Masir, nade Hagar. Laꞌe esa, Sarai kokolak no Abram nae, “Papa! MANETUALAIN tatana au ana manan ena. De malole lenak papa muu sunggu mua au atang Hagar, mita fo ana bonggi fee au.” Boe ma Abram tungga ndia saon kokolan. De Sarai fee Hagar dadi neu Abram sao murin.
GEN 16:4 Basa boe ma Abram neu sunggu-soro no Hagar, boe ma inak naa nairu. Tehuu neu Hagar bubuluk ana nairu ena, ana koa ao, de ana mete nakadadaek Sarai.
GEN 16:5 Boe ma Sarai kokolak no Abram nae, “Au ndia fee ata naa, dadi neu o sao murim. Tehuu neu inak naa bubuluk ana nairu, de ana mete nakadadaek au. Basa naar, o salam! Elan fo MANETUALAIN naketu-naladi ita dua ngga dedeꞌan. Dei fo o bubuluk!”
GEN 16:6 Basa boe ma Abram naselu nae, “Talo ia! O ia, sao uluk. Tehuu ndia naa kada sao murik a mesan. Dadi o ndia maena koasa neun. O nau tao hata mbalin, numa kada o mai!” Basa boe ma Sarai tao kada barakai boto-botok mbali Hagar, losa ana nalai.
GEN 16:7 Ana nalai losa moo sarakaek. Boe ma MANETUALAIN atan esa numa nusa tetuk do inggu temak mai, hambun deka no oe matak manai dalak mana neni Sur neu.
GEN 16:8 Boe ma ana nae, “Wee! Hagar, Sarai atan! Tao hata de o nai ia? O numa bee mai, ma nau muni bee muu?” De Hagar naselu nae, “Au alai laꞌo ela au ina umang.”
GEN 16:9 Boe ma MANETUALAIN atan kokoen nae, “Talo ia! Malole lenak o fali muni o ina uman muu. Ana tao o talo bee, na, simbo a mesan.
GEN 16:10 O boso mamataꞌu. Neu ko Au tao o tititi-nonosim namanoꞌu, losa hatahori ta bisa reke rala sara.
GEN 16:11 Hatematak ia o kairuk. Ta dook ka te, o bonggi ana touk esa. O muste foin nade Ismael (fo sangga sama no dedeꞌa deꞌek laen esa sosoa-ndandaan nae ‘Manetualain namanene’), nahuu MANETUALAIN namanene o bubuꞌi nemetanim ena.
GEN 16:12 Tehuu kanak naa namoꞌo mamais a, ana leo-laꞌo dook ka numa toranoon nara mai. Huu ana sama leo ndara langga tema fo ana ta tungga rapa. See a mesan, ana laban asa. Ma basa hatahorir laban rasafalik kana.”
GEN 16:13 Hagar namanene basa talo naa, boe ma ana kokolak nai dalen dale nae, “Au mete-ita MANETUALAIN ena, fo mana loti-mete ma mana lopo-linu au.” Basa boe ma ana mulai noke Manetualain pake nadek, “Manetualain mana Faduli au.”
GEN 16:14 Huu naa de hatahorir foi oe matak naa nade, Beer Lahai Roi, sosoa-ndandaan nae, “Oe matak numa Ndia mana masodak mai, fo mana faduli au.” Oe matak naa mamanan nai nggoro Kades no nggoro Beret talada heon. Oe matak naa bei hambun losa hatematak ia.
GEN 16:15 Basa boe ma Hagar fali neu ngga. Boe ma ana bonggi ana touk esa. Abram foin nade Ismael.
GEN 16:16 Neu Hagar bonggi Ismael, Abram teun nara 86 ena.
GEN 17:1 Neu Abram teun nara 99, MANETUALAIN mai natudu aon neu Abram. Boe ma Ana kokolak nae, “Au ia, Manetualain mana Koasa Mateꞌen. O muste tungga makandoo Au hihii-nanaung, ma leo-laꞌo tungga ndoon.
GEN 17:2 Au nau ndara fangga hehelu-bartaak ua o, ma tao o tititi-nonosim mara ramahefu ralan seli.”
GEN 17:3 Boe ma Abram sendek luu-langgan fo nateꞌe langgan losa daer. De Manetualain kokolak nakandoo nae,
GEN 17:4 “Au tao hehelu-bartaak ua o, talo ia: neu ko o dadi muu hatahori nusak noꞌuk ka bei-baꞌin. Huu naa de o nadem ta Abram bali (fo sosoa-ndandaan ‘amak fo naden neni nelelak’), tehuu nade Abraham (fo sosoa-ndandaan ‘hatahori nusak noꞌuk ka bei-baꞌin’).
GEN 17:6 Neu ko Au tao o tititi-nonosim mara ramahefu ralan seli. Ma neu ko Au oo ambaririik hatahori nusak noꞌuk ka numa sira mai, ma soꞌu manek noꞌuk ka numa tititi-nonosik kara raa mai boe.
GEN 17:7 Au toꞌu akandoo Au hehelu-bartaang ua o, ma o tititi-nonosim mara. Hehelu-bartaak ia ta mana ketuk, huu Au ia, o mua o tititi-nonosim mara Manetualain.
GEN 17:8 Basa dae Kanaꞌan ia, neu ko Au feen neu o mua o tititi-nonosim mara. Hatematak ia o kada leo taak nai ia. Tehuu neu ko o tititi-nonosim mara soa dae Kanaꞌan ia losa doon naa neu. Ma neu ko Au oo dadi neu sira Manetualain boe.
GEN 17:9 Tehuu o ma o tititi-nonosim mara oo muste toꞌu mahere Au hehelu-bartaang ia no dale mahanik boe. Basa touk kara lalaꞌen muste sunat.
GEN 17:11 Mulai numa hatematak ia neu, basa touk kara muste sunat mulai numa bei fo bonggi heni sara faik falu. O nufanelum, basa o hatahori mana maue-osam mara, ma ata-dato fo o hasa malak ena numa nusak laen mai, basa sara muste sunat. Sunat naa, dadi tanda neu ita dua ngga hehelu-bartaan, fo nakadite nai ei ao-inam.
GEN 17:14 Touk bee fo ana ta sunat, ana ta hambu babaꞌek nai Au hehelu-bartaang dale, ma ana ta maso dadi neu Au hatahoring.”
GEN 17:15 Basa boe ma Manetualain kokolak nakandoo bali nae, “Mulai numa hatematak ia neu, o boso moke o saom no nadek Sarai bali, tehuu moke mae kada Sara leo.
GEN 17:16 Neu ko Au fee babaꞌe-babatik noꞌuk ka neu Sara, fo ana bonggi fee o ana touk esa. Tebe! Neu ko Sara dadi neu hatahori nusak noꞌuk ka bei-baꞌin. Ma neu ko Au soꞌu manek noꞌuk ka numa ndia tititi-nonosin mai.”
GEN 17:17 Boe ma Abraham sendek luu-langgan fo nateꞌe langgan losa daer. Tehuu nai dalen dale ana hika. Ana duꞌa nae, “Tou lasi kalu merek, teuk 100 leo au ia, bei hambu anak bali? Ma Sara fo lasi nggoꞌo bauk ena, teuk 90, ana bei bonggi talo bee bali?”
GEN 17:18 De ana nafada Manetualain nae, “Manetualain! Elan fo kada Ismael hambu au pusakan oo ta hata-hata boe.”
GEN 17:19 Tehuu Manetualain naselu nae, “Taa! Huu neu ko o saom Sara, bonggi nala ana touk esa. O foin nade Isak. Au hehelu-bartaang neu ko konda neun no ndia titiiti-nonosin, losa doon naa neu.
GEN 17:20 Au oo amanene hata fo o moke soa-neu Ismael ena boe. Huu naa de Au oo fee babaꞌe-babatik neun, ma Au tao tamba amanoꞌu ndia tititi-nonosin. Neu ko hambu mane leo 12 numa ndia tititi-nonosin mai. Ma neu ko ndia tititi-nonosin dadi hatahori nusak ta hohoꞌak esa.
GEN 17:21 Leo mae talo naa, tehuu Au hehelu-bartaang ia neni ndara fanggak no kada o anam Isak. Neu ko teu mana maik ia, mete te ledo-fain talo ia, Sara bonggi kanak naa.”
GEN 17:22 Manetualain kokolak basa talo naa, boe ma Ana laꞌo ela Abraham mesa kana neu naa.
GEN 17:23 Faik naa oo, Abraham tungga memak Manetualain parendan boe. De ana sunat. Basa boe ma ana sunat Ismael ma basa touk kara marai ndia uman dale. Ana oo sunat basa ata-dato touk kara lalaꞌen boe. Lelek naa, Abraham teuk 99 ena, ma Ismael teuk 13.
GEN 18:1 Faik esa, neu Abraham leo deka ai huu moꞌok kara marai Mamre. MANETUALAIN mai natudu aon neun numa naa. Tutuin talo ia: Faik naa katobi ndoos, de Abraham nanggatuuk nonori anin numa laak lelesu bolon.
GEN 18:2 Neu Abraham botik matan, boe ma mete-nita hatahori telu rambariik nai naa. De ana nalaik neu soru sara lai-laik. Ana sendek luu-langgan,
GEN 18:3 de nae, “Papa nggara ein! Mete ma bisa, na, papa sara tuli taak nai au laang dei. Leo mae minu kada oe hiek oo malole boe.
GEN 18:4 Papa sara hahae taak miu saꞌok. Dei fo kakanak kara haꞌi oe fo safe papa sara ein.
GEN 18:5 Ma au uu sadia nanaꞌak fee papa sara, fo hambu barakaik faa, dei fo papa sara laꞌo rakandoo. Huu au amahoko bisa aono-lalau papa sara.” Basa boe ma ara raselu rae, “Neu. Makasi noꞌun seli. Ai tuli.”
GEN 18:6 Boe ma Abraham nalaik neni laak neu, de nafada Sara nae, “Lai-laik! Haꞌi mala tarigu neulauk lenak saku esa, fo tao roti.”
GEN 18:7 Basa boe ma ana nalaik neni ndia sapin nara neu, de here nala sapi ana maao esa. De nadenu ndia atan hala sapi naa, ma nasu mbaan.
GEN 18:8 Boe ma Abraham neu haꞌi susu, keju, ma mbaa sapi fo bei fo nasu ralak naa, de neni fee fuik kara raa. Neu ara raꞌa, ana nambariik neu ai huuk taen fo naono-lalau sara.
GEN 18:9 Basa boe ma ara ratanen rae, “Abraham! O saon Sara nai bee?” De ana naselu nae, “Nai laak dale.”
GEN 18:10 Boe ma esa numa sira hatahori kateluk kara raa mai kokolak nae, “Nai rarain teu mana maik ia, Au fali mai. Faik naa, o saom Sara bonggi nala ana touk esa ena.” Neu ara kokolak talo naa, Sara nenene numa lelesu dean mai.
GEN 18:11 Lelek naa, Abraham no Sara memak rambalasi ralan seli ena, ma Sara oo ta hambu bulak ena boe.
GEN 18:12 Sara namanene ara kokolak talo naa, boe ma ana hika nai dalen. De ana duꞌa nae, “Awii! Au ambalasi nggoꞌo-nggoꞌo talo ia, ma au saong mana malek ena. Talo bee de ai bei hii leo mana sao beuk, fo sangga anak bali?”
GEN 18:13 Basa boe ma MANETUALAIN natane Abraham nae, “Tao hata de Sara hika? Ana duꞌa nae hata fo Au kokolak ia, ta dadi, nahuu ndia lasik ena, do?
GEN 18:14 Au ia MANETUALAIN! Ta hambu hata esa boe na fo Au ta bisa taon. Masaneda matalolole, ee! Neu ko mete ma Au fali uni ia mai nai teu mana maik ia, na, Sara bonggi nala ana touk esa ena.”
GEN 18:15 Sara namanene nala naa, boe ma namataꞌu. De ana laka nae, “Au ta hika, maa!” Tehuu MANETUALAIN naselu nae, “Memak o hika bebeik kara ia, maa.”
GEN 18:16 Basa boe ma fuik kateluk kara raa laꞌo reni kota Sodom reu. De Abraham nafuli sara losa baꞌe dua dalak. Numa mamanak naa mai, ara bisa mete-rita Sodom.
GEN 18:17 Boe ma MANETUALAIN kokolak nai dalen dale nae, “Malole lenak Au tui fee Abraham ae, Au ae akalulutu kota Sodom.
GEN 18:18 Huu ndia tititi-nonosin nara tamba ramanoꞌu, ma ara dadi reu hatahori nusak ta hohoꞌak kara. Ma neu ko ndia oo dadi mana fee babaꞌe-babatik soa-neu basa hatahori nusa-nusak marai dae-bafok ia boe.
GEN 18:19 Au here alan ena fo nanori anan nara ma hatahori laen nara, fo tungga rakandoo MANETUALAIN eno-dalan, fo ara leo-laꞌo no ndoos ma ta pepeko-leleko. Mete ma ara tao talo naa, na, Au tao atetu Au hehelu-bartaang ua Abraham.”
GEN 18:20 Boe ma MANETUALAIN nafada Abraham nae, “Talo ia! Au amanene hatahori noꞌuk ka unggu-remu laꞌe-neu hatahori numa kota Sodom ma Gomora mai ena. Tatao-nonoꞌi manggaraun nara sudi selik kana ena.
GEN 18:21 Huu naa de Au konda mai, fo Au nau parisa aong, basa hata fo Au amanenek kara raa, tebe do taa. Mete ma taa, na, neu ko Au bubuluk.”
GEN 18:22 Neu MANETUALAIN bei kola-kola no Abraham, fuik kaduak kara raa laꞌo rakandoo reni kota Sodom reu.
GEN 18:23 Abraham neu deka-deka no Manetualain, boe ma ana kokoe nae, “Talo bee? Papa nau makalulutu hatahori ndoos no hatahori manggarauk sama-sama, do?
GEN 18:24 Mete ma hambu hatahori ndoos 50 rai kota naa dale, na, Papa bei nau tao makalutu basa sara boe, do? Do Papa ta makalulutu kota naa, nahuu sira.
GEN 18:25 Papa boso makalulutu sara talo naa! Boso losak hatahori ndoos sara raa oo mate tungga boe, nahuu Papa nau makalulutu hatahori manggarauk kara. Papa ndia dadi Mana Maketu-maladi Dedeꞌa nai lalai ma dae-inak ia. Ma Papa mesa kana bubuluk ena, naa mbeu seserik.”
GEN 18:26 MANETUALAIN naselu nae, “Mete ma Au hambu hatahori ndoos 50 rai kota Sodom, na, Au ta huku-doki kota naa, nahuu sira.”
GEN 18:27 Boe ma Abraham kokolak bali nae, “Papa, au oke ambon, fo au kokolak faa bali. Au ia, hatahori dae-bafok nggoa bebek fo ta bubuluk hata esa boe na.
GEN 18:28 Leo ta hambu hatahori ndoos 50, tehuu hambu kada 45, na, talo bee? Mete ma kuran kada hatahori lima, na, Papa bei nau nakalulutu kota naa, do?” Manetualain naselu nae, “Mete ma Au hambu hatahori ndoos 45 nai naa, na, Au ta akalulutu kota naa.”
GEN 18:29 Basa boe ma Abraham kokoe seluk bali nae, “Mete ma hambu kada hatahori 40, na, talo bee Papa?” De Ana naselu nae, “Mete ma Au hambu 40, na, Au ta huku-doki sara.”
GEN 18:30 Abraham kokoe nakandoo bali nae, “Papa boso mamanasa, tehuu mete ma hambu kada hatahori ndoos 30, na, talo bee?” Ana naselu nae, “Mete ma Au hambu 30, na, Au ta huku-doki sara.”
GEN 18:31 Boe ma Abraham noke naloe seluk bali nae, “Papa boso mamanasa, mete ma au atane faa bali. Mete ma hambu kada hatahori 20, na, talo bee?” De Ana naselu bali nae, “Mete ma hambu 20, na, Au ta akalulutu kota naa.”
GEN 18:32 Boe ma Abraham nateꞌe ndia kokolan nae, “Papa! Au kokolak laꞌe esa bali, tehuu Papa boso mamanasa au, ee! Mete ma hambu kada hatahori ndoos 10, na, talo bee?” De Ana naselu nae, “Mete ma Au hambu hatahori ndoos 10 nai naa, na, Au ta akalulutu kota naa.”
GEN 18:33 Ara kola-kola basa talo naa, MANETUALAIN laꞌo nakandoo, boe ma Abraham fali.
GEN 19:1 Neu Manetualain bei kola-kola no Abraham, Manetualain ata kaduan nara laꞌo rakandoo reni kota Sodom reu. Ara losa naa, boe ma ledo sangga nae tesa ena. Faik naa, Lot bei nanggatuuk numa kota naa lelesu mason. Ana mete-nita hatahori kaduak kara raa, boe ma neu soru sara. De ana sendek luu-langgan, ma nateꞌe langgan neu matan nara.
GEN 19:2 Boe ma ana kokolak nae, “Papa nggara ein! Mai fo tuli taak nai au umang dei, mita fo Papa sara sasafe eim mara, ma sunggu nai naa. Naa fo beꞌe-mai huhua anan, dei fo Papa sara laꞌo makando.” Tehuu ara raselu rae, “Makasi. Tehuu hae masambute! Naa fo ai miu sunggu nai kada kota dae moon.”
GEN 19:3 Tehuu Lot kokoe nakandoo sara, losa ara nau leo taak nai ndia uman. Boe ma Lot asa tunu roti ma sadia mei, de raꞌa sama-sama.
GEN 19:4 Fuik kara raa bei ta reu sunggu, te Sodom toun nara, basa sara moꞌo-kadiꞌik, mai eko-feo rala Lot uman.
GEN 19:5 Ara kii-bolu no hara barakaik neu Lot rae, “Weeh, Lot! Tou kaduak bebeik kara raa rai bee? Fee sara kalua ia mai, te ai nau bode sara!”
GEN 19:6 Boe ma Lot kalua dea neu, basa boe ma kena lelesu neu.
GEN 19:7 Ana kokolak nae, “Toranoo nggara ein! Ei boso tao manggarauk talo naa neu au fuing nggara.
GEN 19:8 Hena ei nenene dei, ee? Au ana feꞌong dua, sira bei ao tema. Naa fo au fee dua sara reu ei. Ei nau tao dua sara talo bee oo, naa numa kada ei mai boe. Tehuu ei boso tao hata esa boe na neu au fuing nggara. Huu tungga ita dala-hadan, na, au muste anea atalolole sara.”
GEN 19:9 Tehuu hatahori Sodom mara raa kii-bolu rae, “O boso sambor! O ia, kada hatahori mana leo taak nai ia! O hatahori deak, de o ta maena haak koladu ai. Malole lenak o malai laꞌo heok ia. Mete ma taa, na, ai tao mala o beran lenak numa hatahori kaduak kara raa mai!” Boe ma ara timba heni Lot, de basa sara rame-rame reu tara lelesu naa, fo rae rakalulutun.
GEN 19:10 Tehuu fuik kaduak kara raa soro liman nara reu, de ara leꞌa Lot neni uma dale neu, boe ma ara nggoe lelesu neu.
GEN 19:11 Basa boe ma dua sara tao rapoke hatahori Sodom mara raa matan, losa ara rafaroroe sangga lelesu, tehuu ta hambu sana.
GEN 19:12 Basa boe ma fui kaduak kara raa, kokolak mbali Lot rae, “Lot! MANETUALAIN bubuluk kota ia manggaraun ena. Ana nadenu ai mai fo nau makalulutu heni kota ia. De o bei maena nufaneluk laen nai kota ia, do taa? Mete ma hambu ana touk do, inak do, mane-feuk do, feto-feuk do, sudi see a mesan, na, muu mala sara fo kalua numa kota ia mai leo!”
GEN 19:14 De Lot neu natonggo no touk dua, fo nae tao sara dadi reu ndia mane-feun nara, boe ma ana nafada sara nae, “Nenene matalolole! Hatematak ia ei kalua lai-laik numa kota ia mai leo, te MANETUALAIN nae nakalulutun ena!” Tehuu ara duꞌa rae, Lot kada kokolak nakoa-kandiaok naa.
GEN 19:15 Neu beꞌe-mai huhua anan, boe ma Manetualain ata kaduan nara raa, rakasetik Lot fo ara kalua lai-laik leo. Ara rae, “Lot! Mambadeik leo! Leꞌa muni o saom, ma ana ina kaduam mara raa, fo ei malai leo. Laꞌo ela kota ia. Boso losak ei mate hie-hie a, ma noe sama-sama mia kota ia.”
GEN 19:16 Tehuu Lot bei naeok, naa te MANETUALAIN nau tao nasoi-nasodan. Huu naa de fuik kaduak kara raa toꞌu rala liman nara fo ara leꞌa Lot, saon, ma ana ina kaduan nara, fo roo sara kalua numa kota naa mai.
GEN 19:17 Boe ma esa numa fuik kaduak kara raa mai parenda nae, “Malaik tetebe, fo sangga masodak leo! Boso leuk dea! Boso hahae nai dokek! Malaik makandoo ndaꞌe meni letek naa miu, mita fo ei boso mate!”
GEN 19:18 Tehuu Lot bala nae, “Awii, Papa! Boso talo naa!
GEN 19:19 Papa memak tulun tao nasoi-nasoda ai ena. Tehuu letek naa doon seli! Boso losak ai bei ta losa naa, te sosoek hambu nala ai nai dala laladak ena.
GEN 19:20 Papa mete dei. Hambu nggorok kadiꞌik esa ta dook ka numa ia mai. Nggorok naa sosoan-ndandaan taa. De mete ma Papa nau, na, naa fo ai miu sangga masodak nai kada naa leo.”
GEN 19:21 Ana naselu nae, “Neu! Miu leo! Neu ko au ta akalulutu nggorok naa.
GEN 19:22 De hatematak ia ei malai tetebe naa miu leo! Huu au ta bisa tao hata-hata, mete ma ei bei ta losa naa.” Mulai numa lelek naa neu, hatahori foi nggorok naa, nade Soar, sosoa-ndandaan nae, ‘kadiꞌik’.
GEN 19:23 Neu ledo mulai hene, boe ma Lot asa losa Soar.
GEN 19:24 Medak neu te, MANETUALAIN mboꞌa aꞌi no balerang mana mbilak numa lalai mai konda neni Sodom no Gomora neu.
GEN 19:25 MANETUALAIN nakalulutu basa kota ma nggorok marai nusak naa, no basa horis lalaꞌen marai naa, sira hatahori dae-bafok, banda-manur, ma sele-tandek kara.
GEN 19:26 Neu ara ralaik, boe ma Lot saon leuk dea. Medak neu ma, ana dadi neu dii masik neuk ka.
GEN 19:27 Neu beꞌe-mai huhua anan, boe ma Abraham fali neni mamanak fo afik ka ana nambariik kokoe MANETUALAIN naa neu.
GEN 19:28 Boe ma ana mete memeli matan neni Sodom no Gomora, ma basa dokek kara raa neu. Ana mete neu te sudi nai bee, aꞌi masu bubuak mboka-mboka hene neni lalai neu. Ma aꞌi naꞌa heni basa sudi hata lalaꞌen.
GEN 19:29 Manetualain tulun Lot kalua henin numa mamana mana hambu huku-dokik naa mai, neu faik fo Ana nakalulutu basa kotar raa, nahuu Ana nasaneda Ndia hehelu-bartaan neu Abraham.
GEN 19:30 Lelek naa, Lot namataꞌu leo nakandoo numa nggorok Soar. Huu naa de ana no ana inan dua sara lali reni letek reu. De ara leo numa luak esa dale.
GEN 19:31 Laꞌe esa, ina ana kaꞌak kokolak no fadin nae, “Ndule basa mamanak ia, ta hambu touk esa boe na fo bisa mai sao no ita. Ma ta dook ka bali te papa boe nambalasi, de ana ta bisa hambu anak ena bali.
GEN 19:32 De malole lenak, ita pou takamafu papa. Basa boe ma ita sunggu-soro toon, mita fo ita tuti papa tititi-nonosin.”
GEN 19:33 Boe ma leꞌodaen naa, ara pou rakamafu sira aman renik oe anggor. Basa boe ma ana ina kaꞌak neu sunggu-soro no aman. Tehuu tou lasik mafu nalan seli, losa ana ta bubuluk ana tao hata mbali ndia ana inan ena.
GEN 19:34 Neu beꞌe-mai, boe ma kaꞌak nafada fadin nae, “Fadi! Leꞌodaek ka au sunggu-soro ua papa ena. Leꞌodaen ia, o babaꞌem. Dei fo ita pou takamafu papa bali, boe ma fadi maso muu sunggu-soro muan. No dalak naa, ita dua ngga sama-sama bisa hambu anak, fo tuti papa tititi-nonosin.”
GEN 19:35 Leꞌodaen naa oo, ara pou rakamafu sira aman bali. Boe ma ina ana murik maso neu sunggu-soro no aman. Tehuu tou lasik mafu nalan seli ena, losa ana ta bubuluk ana tao hata mbali ndia ana inan.
GEN 19:36 No dalak naa, dua sara rairu numa sira ama bonggi heli-helin mai.
GEN 19:37 Basa boe ma ina ana kaꞌak bonggi nala ana touk esa. Boe ma ana foin, nade Moab (fo liin sangga sama leo dedeꞌa deꞌek laen esa, sosoa-ndandaan ‘numa papa mai’). Ana ndia dadi neu hatahori Moab bei-baꞌin hatematak ia.
GEN 19:38 Boe ma ina ana fadik oo, bonggi nala ana touk esa boe. Ana foin nade, Ben Ami (fo sosoa-ndandaan ‘anak numa au hatahoring mai’). Ndia naa, dadi neu hatahori Amon bei-baꞌin hatematak ia.
GEN 20:1 Basa boe ma Abraham lali numa Mamre mai, neni dae Negeb manai boboan kona neu, de ana leo numa nggoro Kades ma Syur taladan. Tehuu ta dook ka, boe ma ana lali seluk bali neni nggoro Gerar neu.
GEN 20:2 De ana nafada hatahorir marai naa nae, Sara naa, ndia fadin. Huu naa de Abimelek, manek Gerar nadenu ndia hatahorin nara reu roke Sara fo roon neni uma manek neu.
GEN 20:3 Leꞌodaek esa, Manetualain natudu aon neu manek nai meꞌis dale. Ana kokolak nae, “O sangga mae mate ia ena! Te o leꞌa mala hatahori saon na.”
GEN 20:4 Tehuu Abimelek naselu nae, “Manetualain! Au bei ta koi laꞌe inak naa. Ma au oo ta sala boe. Abraham mesa kana ndia nae, inak naa, ndia fadin! Ma inak naa oo manaku talo naa boe. Huu naa de au adenu reu ralan no dale lolo-laok. Dadi Manetualain boso fee salak neu au!”
GEN 20:6 Boe ma Manetualain naselu nae, “Memak Au bubuluk o dalem lolo-laok. Huu naa de Au ndia taon fo o ta koi laꞌe inak naa. No dalak naa, o ta tao salak mua Au boe.
GEN 20:7 Hatematak ia o fee falik inak naa neni saon neu. Touk naa, Au mana toꞌu dedeꞌang. De moken fo ana hule-haradoi fee o, mita fo o boso mate. Tehuu mete ma o ta fee falik inak naa, na, o masaneda matalolole! Huu o mua basa o hatahorim mara lalaꞌen, neu ko mate.”
GEN 20:8 Neu beꞌe-mai huhua anan, boe ma manek noke basa ndia penggawe nara, de ana tui ndia meꞌin. Boe ma basa sara ramataꞌu.
GEN 20:9 Basa boe ma manek noke Abraham, de natanen nae, “Au tao sala hata neu o, losa tao sosoek neu au, ua au rau-inggung nggara talo ia? O ta bole tao hata fo ta neulauk talo ia.
GEN 20:10 O duduꞌa hata, losa o tao talo ia?”
GEN 20:11 Boe ma Abraham naselu nae, “Papa manek! Au duꞌa ae, ei basa ngga ta mana malela Manetualain. De neu ko ei ketuk mae makanisa au, mita fo bisa haꞌi mala au saong.
GEN 20:12 Au memak kokolak tebe ae, au fading ndia. Ai dua ngga ama esa, tehuu laen mama. Huu na de ai dua ngga esa tao esa neu sao holu ndaek.
GEN 20:13 Dadi neu Manetualain nadenu ai miu sembo nusak, boe ma au afada au saong ae, ‘Mete ma ita teni bee teu, ma hatahorir ratane ita dua ngga tututin, ma mete ma o sue-lai au, na maselu mae ita dua ngga kaꞌa-fadik kara.’ ”
GEN 20:14 Basa boe ma manek Abimelek fee falik Sara. De ana nafada Sara nae, “Hatematak ia au bae o kaꞌam doi fulak rifun esa, fo dadi neu bukti nae, au bei ta tao sala hata-hata ua o. Mita fo basa hatahorir bubuluk talo naa!” Boe ma manek kokolak no Abraham nae, “Abraham! Au nusang ia neni soik soa-neu o. O nau muu leo nai bee a mesan, bole.” Basa boe ma ana oo fee Abraham, sapi, bibi hiek, ma bibi lombo boe. Ana oo fee ata touk ma inak boe.
GEN 20:17 Fai bakahulun MANETUALAIN tatana basa inak kara ana manan fo mana leo nai Abimelek nusan, nahuu ana leꞌa nala Abraham saon. Tehuu neu manek fee falik Sara neni saon neu, boe ma Abraham hule-haradoi fo Manetualain buka seluk inak kara raa ana manan. De ara bisa bonggi fali.
GEN 21:1 Basa boe ma MANETUALAIN fee babaꞌe-babatik neu Sara, tungga Ndia hehelu-bartaan. Sara nairu nai Abraham fai lasin. Neu ana nae bonggi naa, Abraham teun nara 100 ena. Fain nara dai, boe ma ana bonggi ana touk esa. De Abraham foi kanak naa nade Isak (fo sosoa-ndandaan ‘ana hika’). Sara oo kokolak boe nae, “Manetualain tao nala au hika, nahuu hatematak ia au amahoko. Hatahorir duꞌa rae, nai au fai lasing ia, au ta bisa hambu anak ena. Naa te leo mae au sao toung lasik nggonggok ena, tehuu au bei bonggi feen. De hatematak ia, see a mesan namanene dedeꞌak ia, ara oo hika sama-sama ro au boe.” Neu bonggi heni Isak faik falu, boe ma Abraham sunat ana, tungga Manetualain parendan.
GEN 21:8 Basa boe ma Isak tamba namoꞌo. Neu rae filan, boe ma Abraham tao feta moꞌok.
GEN 21:9 Laꞌe esa, Sara mete-nita Ismael, fo Abraham sao murin Hagar anan, nakaminak nakoa-kandiaok no Isak. Sara mete-nita naa, boe ma kokolak no saon nae, “Husi heni ata-dato manuma Masir mai naa no anan leo! Au ta nau ana ata-dato naa simbo pusaka hata-hata. Kada au anang Isak mesa kana, ndia muste hambu basa sara.”
GEN 21:11 Abraham namanene Sara kokolak talo naa, boe ma ana nameda ta malole, nahuu Ismael naa ndia anan boe.
GEN 21:12 Tehuu Manetualain kokolak no Abraham nae, “Abraham! O boso duduꞌa o sao murim naa no anan. Tungga kada Sara hihiin, nahuu neu ko o hambu tititi-nonosik fo au helu-bartaak naa ena, nesik Isak.
GEN 21:13 Tehuu Au oo fee babaꞌe-babatik neu o sao murin anan boe, nahuu ndia oo, o ana heli-helin boe. Neu ko ndia tititi-nonosin oo dadi neu hatahori nusak esa boe.”
GEN 21:14 Neu beꞌe-mai huhua-anan, boe ma Abraham tao lepa-nggees fo fee Hagar, ma feen oe boto esa, ana nasalilin neu arun. Basa boe ma ana neu nafuli inak naa no anan Ismael, de ara laꞌo leo. Boe ma ara laꞌok ndule basa dae nees, mana deka nai Beer Syeba.
GEN 21:15 Neu oe nininun nara basan ena, boe ma Hagar laꞌo ela anan neu ai huu anak esa saꞌon.
GEN 21:16 Boe ma ana duduꞌa nai dalen dale nae, “Au daleng ta nalak kana, mete-ita kanak ia mamaten.” Boe ma ana nakadedeak, de nanggatuuk doon nai rarain meter 50 numa kanak naa mai. De buꞌi nakarereu.
GEN 21:17 Manetualain oo namanene Ismael hara bubuꞌin boe, boe ma atan numa nusa tetuk do inggu temak mai, nanggou Hagar nae, “Hagar! Tao hata de o susa-sona talo ia? Boso mamataꞌu, huu Manetualain namanene kanak naa bubuꞌin ena.
GEN 21:18 Hatematak ia o mambadeik leo fo muu mete kanak naa. Tao matetea dalen, huu neu ko Au ae tao ndia tititi-nonosin dadi neu hatahori nusak ta hohoꞌak esa.”
GEN 21:19 Basa boe ma Manetualain tao nambaloa matan, de mete-nita oe matak esa numa naa. Boe ma neu nadai oe neni boto naa neu, de neu fee kanak naa ninu.
GEN 21:20 Basa boe ma Ismael no inan leo numa moo sarakaek Paran. Ana namoꞌo mamais a, boe ma ana dadi neu mana kou malelak. Basa boe ma inan feen sao nala ana feꞌo Masir esa. Basa iar dadi, nahuu Manetualain sama-sama no Ismael.
GEN 21:22 Lelek naa, manek Abimelek no ndia malangga musun, nade Fikol, mai ratonggo ro Abraham. Manek kokolak nae, “Abraham! Ai bubuluk ena mae, Manetualain sama-sama no o. Huu naa de o tao hata a mesan, basa-basan dadi.
GEN 21:23 De hatematak ia au oke o soꞌuk sumba-sook nai Manetualain matan mae, o ta pepeko-leleko au ua umbu-anang nggara. Sama leo au atudu au dale susueng neu o ena, de o muste matudu o dale susuem neu au ma nusak ia boe.”
GEN 21:24 Boe ma Abraham naselu nae, “Hou! Au sumba-soo.”
GEN 21:25 Tehuu basa boe ma Abraham kalaak manek nae, “Papa manek hatahorin nara leꞌa rala au oe matang esa.”
GEN 21:26 Manek namanene nala naa, boe ma naselu nae, “Awii! Au bei fo amanene dedeꞌak ia. Tao hata de papa ta kalaak numa fai bakahulun mai? Au ta bubuluk see ndia tao.”
GEN 21:27 Basa boe ma Abraham no Abimelek ndara fangga hehelu-bartaak. Boe ma Abraham leꞌa sapi ma bibi lombo fo fee manek. Basa de ana tada feꞌe bibi lombo tenak hitu bali.
GEN 21:29 Boe ma manek natanen nae, “Tao hata de o tao talo naa?”
GEN 21:30 Abraham nafada nae, “Papa manek simbo mala bibi lombo tena kahituk kara iar fo dadi neu tanda rae, papa manek manaku, au ndia kali oe matak ia.”
GEN 21:31 Huu dua sara soꞌuk sumba-sook numa naa ena, de ara foi mamanak naa nade Beer Syeba. Sosoa-ndandaan nae, ‘Oe mata Sumba-sook’.
GEN 21:32 Ara sumba-soo basa, boe ma manek Abimelek no ndia malangga musun fali reni sira nusan Filistin reu.
GEN 21:33 Basa boe ma Abraham sele ai huu tamariska esa numa Beer Syeba. Mulai numa lelek naa neu, ai huuk naa fee nesenenedak neu Abraham, fo numa naa ana nakaluku-nakatele neu MANETUALAIN mana Masodak Losa Doon Naa Neu.
GEN 21:34 Basa boe ma Abraham leo taak nala dook ka numa hatahori Filistin nara nusan.
GEN 22:1 Ta dook ka boe ma Manetualain fora sudik Abraham dalen, fo nau nita ana namanene neu Manetualain, do taa. Boe ma Manetualain nanggoun nae, “Abraham!” De naselu nae, “Ia, Manetualain.”
GEN 22:2 Basa boe ma Manetualain nadenun nae, “Nenene matalolole! Haꞌi mala o ana kise muꞌen fo o sue malan seli naa. Munin neni dae Moria neu, fo o taon dadi neu tunu-hotuk soa-neu Au. Losa naa, dei fo Au atudu o mamanan nai letek esa.”
GEN 22:3 Neu beꞌe-mai huhua anan, boe ma Abraham tati ai nenaꞌak. Ana fufutu sara, de ana fua sara reu keledei lain. Boe ma ana no Isak, ma atan dua, laꞌo reni mamanak fo Manetualain nafada elak naa reu.
GEN 22:4 Ara laꞌo-laꞌo, de neu bei-nesan, Abraham mete-nita mamanak naa numa dook ka mai.
GEN 22:5 Boe ma nafada ata kaduak kara raa nae, “Ei dua ngga mahani taak mai ia, mia keledei ia, ee! Au ua au anang mae meni lai naa miu, fo nau makaluku-makatele neu Manetualain. Basa dei fo ai fali meni ia mai bali.”
GEN 22:6 Basa boe ma Abraham haꞌi nala ai nenaꞌak kara soa-neu tunu-hotuk naa, de ana ndae sara neu Isak arun. Ma ndia mesa kana neni dombe ma ai suꞌu kaꞌaꞌik. Neu dua sara laꞌok sama-sama,
GEN 22:7 boe ma Isak nanggou aman nae, “Papa!” De Abraham naselu nae, “Tao hata Isak?” Isak natane nae, “Papa. Ita tae tao tunu-hotuk. Ai nenaꞌak no aꞌin nai ia ena. Tehuu bibi lombo ana fo ita taon dadi neu tunu-hotuk nai bee?”
GEN 22:8 Boe ma Abraham naselu nae, “Ana nggee! Neu ko Manetualain mesa kana ndia fee Ndia bibi lombo anan fo paken dadi neu tunu-hotuk.” Basa boe ma dua sara ndaꞌe rakandoo.
GEN 22:9 Neu ara losa mamanak, fo Manetualain nafada elak naa, boe ma Abraham totodo batur fo tao mei mamana tunu-hotuk. De ana naduru ai nenaꞌak kara reu mei batu naa lain. Boe ma ana bonggobudi anan, de feen sunggu nalelengga neu ai nenaꞌak kara lain.
GEN 22:10 Basa boe ma Ana haꞌi nala dombe, de nau hala anan.
GEN 22:11 Tehuu medak neu ma, MANETUALAIN atan nanggou numa lalai mai nae, “Wee! Abraham! Mahani dei!” Boe ma ana naselu nae, “Tao hata, Manetualain?”
GEN 22:12 Harak naa nae, “O boso hala kanak naa! Boso tao hata esa neun boe na! Hatematak ia Au bubuluk ena ae, o tebe-tebe tungga Manetualain hihii-nanaun, nahuu o sadia memak ena fee o ana kise muꞌen naa neu Manetualain, fo dadi neu tunu-hotuk.”
GEN 22:13 Basa boe ma Abraham mete-nita bibi lombo mane esa, susuran kado nai ai huu anak ndanan nara. Boe ma Abraham neu haꞌi nala bibi lombo naa, de ana tunun dadi neu banda tunu-hotuk soa-neu Manetualain, ngganti neu ndia anan.
GEN 22:14 Dadi Abraham foi mamanak naa nade, ‘Neu ko MANETUALAIN sadia hata fo parluu.’ Huu naa de losa hatematak ia oo hatahorir kokolak boe rae, “Nai MANETUALAIN leten naa lain, neu ko Ana sadia hata fo parluu.”
GEN 22:15 Basa boe ma Manetualain atan eki numa lalai mai bali nae,
GEN 22:16 “MANETUALAIN mesa kana nae, ‘Au sumba-soo pake Au nade heli-heling, talo ia: o sadia memak fee Au o ana mane kise muꞌem fo dadi neu tunu-hotuk. Huu naa de
GEN 22:17 neu ko Au fee babaꞌe-babatik noꞌun seli neu o, ma o tititi-nonosim. Neu ko ara ramanoꞌu losa hatahorir ta bisa reke rala sara, sama leo nduuk kara rai lalai, ma sarakaek nai tasi tatain. O umbu-anam mara neu ko ara tao rasenggi basa sira musun nara.
GEN 22:18 Numa o tititi-nonosim mai, neu ko basa hatahori nusa-nusak kara marai dae-bafok hambu babaꞌe-babatik, nahuu o tungga Au parendang ena.’ ”
GEN 22:19 Basa boe ma Abraham no Isak konda fali reni ata kaduan nara reu, fo ara fali sama-sama reni Beer Syeba reu. Abraham asa leo nai naa.
GEN 22:20 Laꞌe esa, Abraham namanene nala nae, ndia fadin Nahor saon Milka, bonggi nala anak kara ena.
GEN 22:21 Ana uluk, nade Us. Fadin nade Bus. Basa naa, Kemuel (fo dadi Aram aman).
GEN 22:22 Boe ma Kesed, Haso, Pildas, Yidlaf, ma Betuel.
GEN 22:23 Betuel naa, Ribka aman.
GEN 22:24 Tehuu Nahor oo hambu tamba seluk anak kara ruma sao tian mai, nade Reuma. Ana bonggi nala Teba, Gaham, Tahas, ma Maaka.
GEN 23:1 Neu Sara mate, teun nara 127 ena. Neu ana mate naa, Abraham asa leo numa Kiryat-Arba (ndia Hebron) nai dae Kanaꞌan. Abraham buꞌi nakarereu, ma ana beꞌe-falufii saon fo mana matek naa ena.
GEN 23:3 Basa boe ma Abraham neu natonggo no hatahori Het asa. Ana nafada nae,
GEN 23:4 “Au ia, kada leo taak nai ei taladam. Au dae oeng taa fo atoi au saong. De mete ma ei nau, na, au hasa ala ei daem bibiak faa, mita fo au atoin neu naa.”
GEN 23:5 Boe ma ara raselu rae,
GEN 23:6 “Talo ia, Papa! Doo basa ia, ai tao papa sama leo lasik esa ena, fo ai fee hada-horomatak tebe-tebe neun. De papa here leo, dae bee ndia neulaun lenak fo nandaa papa hihiin. Ai simbo a mesan.”
GEN 23:7 Boe ma Abraham nambariik, de kaur langgan fo fee hada-horomatak neu tenu daek, hatahori Het asa.
GEN 23:8 De ana nae, “Mete ma ei simbok au kokolang bebeik kara ia, na, au oke tulun ei fo kokolak mia tou lasi Sohar ana toun, Efron.
GEN 23:9 Moken, mete ma bisa, na, ana seꞌo ndia luan, nade Makpela, mana nai osin boboan naa, neu au. Ana noke belin baꞌu hata a mesan, au bae. Au nau bae ketu belin nai ei basa ngga matam, mita fo dae naa dadi neu au enang. Au nau taon dadi neu ai mamana ratem mara.”
GEN 23:10 Faik naa, Efron oo nanggatuuk sama-sama no hatahori Het asa boe. De ana oo namanene Abraham kokolan naa boe. Boe ma ana nambariik, de naselu Abraham numa basa hatahori lasin nara matan nae,
GEN 23:11 “Boso talo naa, papa! Talo ia dei. Au fee osi naa no luan Makpela neu papa. Papa matoi papa saon neu naa leo. Au loo lima dae naa neu papa nai au hatahoring nggara matan, mita fo basa sara dadi reu mana sakasiir!”
GEN 23:12 Boe ma Abraham kaur seluk langgan neu hatahori Het asa.
GEN 23:13 De ana kokolak no Efron nae, “Naa oo malole boe, tehuu ei basa ngga nenene au dei. Au nau hasa ketu dae naa, mita fo au atoi au hatahoring nggara reu naa.”
GEN 23:14 Efron naselu nae, “Dae naa belin kada doi fulak 400! Tao hata de ita dua ngga kada tahule aok neu-mai laꞌe-neu doik baꞌu anak naa? Papa muu fo matoi papa saom neu naa leo.”
GEN 23:16 Abraham nakaheik dae naa belin, tungga Efron kokolan. De numa basa hatahori Het asa matan fo mana dadi sakasiir maruma naa, Abraham reke doi fulak 400, de ana bae neu Efron.
GEN 23:17 De no dalak naa, Abraham laꞌe Efron daen, dadi neu ndia enan. Ndia dae fo manai Makpela naa, deka no Mamre (ndia Hebron). Ana hasa ketu dae naa no osin, luan, ma basa ai huuk manai dae lain. Basa hatahori Het lasin nara dadi reu sakasiir rae, dae naa no basa isin lalaꞌen dadi reu Abraham enan. Basa boe ma Abraham neu natoi Sara neni luak naa dale neu, nai dae Kanaꞌan.
GEN 23:20 No dalak naa, osi naa no luan fo makasososan hatahori Het asa daen, hatematak ia dadi neu Abraham enan ena, de ana taon dadi neu mamana rates sara.
GEN 24:1 Abraham teun naruk ka losa ana nambalasi nalan seli. Ma MANETUALAIN nanea natalololen, boe ma Ana feen leo-laꞌo no mole-damek.
GEN 24:2 Abraham naena hatahori nemeherek esa, mana koladu basa ndia hata-heton lalaꞌen. Laꞌe esa, Abraham nanggou nalan, de nae, “Nenene matalolole! Au oke o sumba-soo mates, pake MANETUALAIN naden. Fo ndia Manetualain mana makadadadik lalai no dae-inak. Mae, o ta bole haꞌi mala inak numa hatahori Kanaꞌan nara ia mai, fo feen sao nala au anang Isak.
GEN 24:4 Tehuu o muste muni au nusa huung muu, nai au nufanelung nggara. O sangga mala ana feꞌok esa nai naa fo feen sao nala au anang.”
GEN 24:5 Basa boe ma ata naa natane Abraham nae, “Malole, Papa! Tehuu mete ma ana feꞌok naa ta nau ia mai, na, talo bee? Mete ma talo naa, na, au muste ua papa anan fo neu sao nai naa, do talo bee?”
GEN 24:6 Abraham naselu nae, “O masaneda matalolole! Leo mae talo bee oo, o ta bole mua au anang naa neu boe.
GEN 24:7 Masaneda te MANETUALAIN mana toꞌu koasa nai lalai, neni au kalua numa au nusa huung mai ena, boe ma nafuli au losa dae ia. Ana oo ndara fangga hehelu-bartaak no au ena nae, ‘Neu ko Au fee basa dae ia neu o titisi-nonosim.’ De o boso babati! Kada muu leo. Neu ko Manetualain nadenu Ndia atan numa nusa tetuk do inggu temak mai nasosoi dalak fee o, fo o bisa matonggo mua ana feꞌok naa, fo neu ko dadi neu au anang saon.
GEN 24:8 Tehuu mete ma ana feꞌok naa ta nau tungga o muni ia mai, na, o makamboꞌik numa sumba-sook ia neu. Leo mae talo bee oo, o boso mua au anang neni naa neu boe.”
GEN 24:9 Boe ma ata naa soꞌuk sumba-sook no Abraham nae, neu ko ndia tao tungga basa Abraham hihii-nanaun.
GEN 24:10 Basa boe ma ata naa here nala banda onta salahunu. De ana fua bua-baꞌu neulauk mata-matak kara reu ontar raa lain. Boe ma ana laꞌo neni Nahor kotan neu, nai Mesopotamia.
GEN 24:11 Mateꞌen, ata naa losa kota naa. Boe ma ana no ontan nara hahae aok numa kota tatain, deka oe matak esa. Faik naa bobok ena, ndaa no ana feꞌok kara reu ndui oe numa oe matak naa.
GEN 24:12 Boe ma ata naa hule-haradoi nae, “MANETUALAIN, au malanggang, Abraham Manetualain. Tulun buka dalak, mita fo au mamaing ia neni ua-nale neulauk. Matudu Manetualain dale susuen neu au malanggang ma masaneda ndia hehelu-bartaan neu au. De naa fo au atonggo ua inak fo ae taon dadi neu Isak saon.
GEN 24:13 Manetualain, au ambariik nai oe matak ia tatain. Ma ana feꞌok kara ruma kota mai ndui oe nai ia.
GEN 24:14 De au hule talo ia: Mete ma au kokolak ua ana feꞌok esa ae, ‘Ana feꞌok, ee! Tulun makonda o ure oem fo fee au inu oe faa dei.’ Mete ma ana naselu nae, ‘Papa minu leo! Ma dei fo au fee papa ontan nara oo rinu oe boe.’ Naa dadi tanda nae, ana feꞌok naa ndia Manetualain here nalan dadi neu Isak saon ena! No tanda talo naa, au bisa bubuluk ae, Manetualain natudu Ndia dale susuen neu au malanggang Abraham ena.”
GEN 24:15 Ana bei ta hule-haradoi nateꞌe, te ana feꞌok esa mai. Naden Ribka. Ndia naa, Abraham fadin Nahor no saon Milka umbun. Ribka aman, nade Betuel. Ribka naa, manaꞌa hiek sudi selik kana ma bei ao tema. Ana konda neni oe matak naa dale neu, boe ma ana nadai oe neni ure oen neu, basa boe ma ana hene fali.
GEN 24:17 Neu Ribka losa lain, boe ma Abraham atan nalaik neu natonggo noon. De ana noke nae, “Ana feꞌok. Tulun fee au inu oe faa dei.”
GEN 24:18 Ana feꞌok naa naselu nae, “Minu leo, toꞌo!” Boe ma nakonda ure oen lai-laik, de ana fee ata naa ninu.
GEN 24:19 Ana ninu basa, boe ma ana feꞌok naa nae, “Naa fo au ndui oe fee toꞌo ontan nara, fo rinu losa rakabete.”
GEN 24:20 Boe ma ana neu sali oe lenan neni bandar haꞌon nara reu. De ana nalaik konda-hene neu ndui oe numa oe matak naa mai, fo fee basa ontar raa rinu losa rakabete.
GEN 24:21 Abraham atan nambariik matu-matu, fo ana mete naherek ana feꞌok naa ue-tataon. Ana duduꞌa nae, “Ana feꞌok ia ndia MANETUALAIN here nalan, do?”
GEN 24:22 Ontar raa rinu losa rakabete. Boe ma ata naa haꞌi nala ndeli iduk lilo mbilas ma kale lilo mbilas pasan esa, de ana olu sara reu ana feꞌok naa liman dua sara.
GEN 24:23 Basa boe ma ata naa natane nae, “Ana feꞌok papan, nade see? Mete ma bisa, na, au sunggu taak nai ana feꞌok papan uman.”
GEN 24:24 Boe ma ana feꞌok naa naselu nae, “Au papang, nade Betuel. Au baꞌing, ndia Nahor. Ma au being, ndia Milka.
GEN 24:25 Nai ai uman hambu mamana susungguk dai toꞌo sara. Ma hambu naꞌu noꞌuk ka soa-neu toꞌo bandan nara.”
GEN 24:26 Basa boe ma ata naa nateꞌe langgan, de ana nakaluku-nakatele neu MANETUALAIN.
GEN 24:27 De ana kokolak nae, “Koa-kio MANETUALAIN! MANETUALAIN soi dalak fee au ena, losa au atonggo matang ua papa Abraham nufanelun nai ia. No dalak naa, MANETUALAIN natudu dale susuen neu au malanggang Abraham, no tao natetu ndia hehelu-bartaan neu au.”
GEN 24:28 Basa boe ma ana feꞌok naa nalai fali lai-laik, de ana tui basa uma isin nara, hata fo dadi ena.
GEN 24:29 Ribka naan, nade Laban. Ana mete-nita bua lilo mbilas sara raa, ma namanene Ribka tutuin, boe ma Laban nalai dea neu lai-laik, de neu natonggo no ata naa fo bei nambariik no ontan nara deka oe matak naa.
GEN 24:31 Boe ma Laban kokolak nae, “Toꞌo! MANETUALAIN nakalalaꞌok toꞌo losa ia no sodak. De boso mambariik muu dea ia! Mai teni ai uman teu. Ai sadia memak kama ena. Nanaꞌak soa-neu toꞌo ontan nara oo mana hetak boe.”
GEN 24:32 Basa boe ma Abraham atan tungga no Laban, de maso reni Betuel uman reu. Boe ma Laban asa sou rakonda fufuak ruma ontar lain mai. Ara fee ontar raꞌa naꞌu. Ma ara oo reni oe fee ata naa no hatahorin nara, de ara safe ein nara boe.
GEN 24:33 Neu ara mbeda nanaꞌa-nininuk kara reu mei lain, boe ma ata naa nae, “Ai mae miꞌa-minu, tehuu au oke parmisi fo afada dale hihiik esa dei.” Boe ma Laban naselu nae, “Toꞌo kokolak leo.”
GEN 24:34 Ata naa nae, “Au ia, ei baꞌim Abraham atan.
GEN 24:35 MANETUALAIN fee babaꞌe-babatik noꞌuk ka neu au malanggang ena, losa ana namasuꞌi nalan seli. MANETUALAIN feen lilo mbilas, lilo fulak, ata tou ma inak, ma banda noꞌun seli, sira: sapi, onta, keledei, bibi hiek ma bibi lombo ena.
GEN 24:36 Neu au malanggang touk no inak lasik kara ena, boe ma mama Sara bonggi fee au malanggang Abraham, ana touk esa. Neu ko kanak naa ndia simbo basa au malanggang Abraham pusakan lalaꞌen.
GEN 24:37 Laꞌe esa, au malanggang Abraham fee au sumba-soo ae, ‘O ta bole haꞌi ana feꞌok Kanaꞌan, fo feen sao nala au anang Isak.
GEN 24:38 Tehuu o muste haꞌi ana feꞌok numa au nufanelu heli-heling nggara mai, dadi neu ndia saon.’
GEN 24:39 Boe ma au atane au malanggang ae, ‘Mete ma ana feꞌok naa ta nau tungga au, na, talo bee?’
GEN 24:40 Ana naselu nae, ‘MANETUALAIN fo au soa tungga kada Ndia hihii-nanaun, neu ko Ana nadenu atan numa nusa tetuk do inggu temak mai soi dalak fee o, mita fo o bisa hambu ana feꞌok esa numa au nufanelu heli-heling nggara mai, fo dadi neu au anang saon.
GEN 24:41 Tehuu mete ma au nufanelung nggara ta simbok fo ta nau fee ana feꞌok naa neni ia mai, na, o makamboꞌik numa sumba-sook naa mai.’
GEN 24:42 De neu bebeik kara ia losa oe matak, boe ma au hule-haradoi nai au daleng ae, ‘MANETUALAIN, au malanggang Abraham Manetualain. Tulun soi dalak, mita fo au mamaing ia neni ua-nale neulauk. Naa fo au atonggo ua inak fo ae taon dadi neu Isak saon.
GEN 24:43 Manetualain, au ambariik nai oe matak ia tatain. Ma ana feꞌok kara ruma kota mai ndui oe nai ia. De au hule talo ia: mete ma au kokolak ua ana feꞌok esa ae, “Ana feꞌok, ee! Tulun makonda o ure oem fo fee au inu oe faa dei.”
GEN 24:44 Mete ma ana naselu nae, “Papa minu leo! Ma dei fo au fee papa ontan nara oo rinu boe.” Naa dadi neu tanda nae, ana feꞌok naa ndia Manetualain here nalan dadi neu au malangga anang saon ena!’
GEN 24:45 Au bei ta hule-haradoi basa, te ana feꞌok Ribka mai ena neni ndia ure oen, fo ndui oe nai oe matak. Neu ana hene nalak ka lain, boe ma au oke ae, ‘Ana feꞌok, ee! Fee au inu oe faa dei.’
GEN 24:46 Boe ma ana nakonda ure oen lai-laik, de nae, ‘Toꞌo minu leo! Ma dei fo au fee toꞌo ontan nara oo rinu boe.’ Boe ma au inu, ma au ontang nggara oo rinu boe.
GEN 24:47 Boe ma au atane ae, ‘Ana feꞌok papan, nade see?’ Ana naselu nae, ‘Au papang, nade Betuel. Au baꞌing, ndia Nahor ma au being ndia Milka.’ De au kado ndeli neu idun, ma olu kaler lilo mbilas pasan esa neu liman nara.
GEN 24:48 Boe ma au ateꞌe au langgang fo akaluku-akatele neu Manetulaian ae, ‘Koa-kio Manetualain! Manetualain soi dalak fee au ena, losa au atonggo aong ua au malanggang Abraham nufanelun nai ia. Ma au atonggo aong ua inak fo ae taon dadi neu malangga anak Isak saon.’
GEN 24:49 Dadi hatematak ia, mete ma papa sara nau matudu susuem neu au malanggang Abraham, na, mafada au no ledo-ledo. Mete ma taa oo, mafada no ledo-ledo boe, mita fo au bubuluk au muste tao hata.”
GEN 24:50 Ata naa kokolak basa, boe ma Laban no Betuel raselu rae, “Mete ma MANETUALAIN ndia nanaen talo naa ena, na, ai nau talo bee bali.
GEN 24:51 Ana feꞌok Ribka nai ia. Moke malan fo mian naa neu leo. Mita fo ana dadi neu baꞌi Abraham feto-feun, tungga hata fo MANETUALAIN naen ena.”
GEN 24:52 Abraham atan namanene nala naa, boe ma ana nateꞌe langgan losa daer, de noke makasi neu MANETUALAIN.
GEN 24:53 Boe ma ana kalua heni bua lilo mbilas, lilo fulak, ma bua-loꞌa neulauk kara, de feen neu Ribka. Ana oo fee Ribka naan ma inan, hadia bua mabelir boe.
GEN 24:54 Basa boe ma Abraham atan no ndia hatahorin nara ranggatuuk raꞌa-rinu. Boe ma ara sunggu ruma naa. Neu beꞌe-mai huhua anan ara beꞌe, boe ma ata naa nafada tenu umak nae, “Au oke luas fo mete ma bisa, na, hatematak ia ai nau fali meni au malanggang miu.”
GEN 24:55 Tehuu Ribka kaꞌan no inan rae, “Ei nau hailai laꞌo tao hata? Elan fo Ribka leo no ai faik salahunu talo naa dei. Basa, na, mian laꞌo leo.”
GEN 24:56 Tehuu ata naa naselu nae, “Awii! Boso kaꞌi au! Huu MANETUALAIN tulu-fali nala au ena, losa au atonggo ua malangga anak saon ena. De mama sara makamboꞌik ai, fo ai fali miu tui au malanggang dei.”
GEN 24:57 Boe ma ara raselu rae, “Talo ia! Mai fo ita tatane aon neu kada Ribka. Ndia hihiin talo bee?”
GEN 24:58 Basa boe ma ara roken, de ratanen rae, “Ribka! Hatematak ia numa kada o mai. O nau tungga memak mua hatahori ia leo, do talo bee?” Boe ma ana naselu nae, “Au nau tungga.”
GEN 24:59 De ara mboꞌik Ribka, no ata inan fo mana malalaun numa kadiꞌin mai, fo reu ro Abraham atan nara. Boe ma ara kokolak fee babaꞌe-babatik neu Ribka rae, “Ribka! Ai mamahena Manetualain fee o bonggi noꞌuk ka, fo o tititi-nonosim neu ko dadi neu rifu-rifuk kara. Ma ai oo mamahena o tititi-nonosim tao rasenggi musun nara boe!”
GEN 24:61 Basa boe ma Ribka no ata inan nara rafafaꞌu bua-loꞌan nara, boe ma ara saꞌe onta, de ara laꞌo leo, tungga Abraham atan nara.
GEN 24:62 Isak leo numa dae Negeb. Faik naa, Ana bei fo fali numa oe matak manai Beer Lahai Roi mai.
GEN 24:63 Ledo bobok esa, ana kalua numa laak mai, fo neu laꞌo-laꞌo haꞌi anin. Ana botik matan, boe ma mete-nita ontar mai.
GEN 24:64 Neu Ribka mete-nita Isak, boe ma ana konda lai-laik numa ontan mai.
GEN 24:65 Ana natane Abraham atan nae, “Toꞌo! Tou mana laꞌok mai naa, see?” Ata naa naselu nae, “Ndia naa, au malangga anang.” Boe ma Ribka haꞌi nala tema popoi langgan, de ana lalaa nafuni matan.
GEN 24:66 Boe ma ata naa tui basa-basan neu Isak.
GEN 24:67 De Isak noke no Ribka neni inan laan dale neu, boe ma dua sara rauma-loo leo. Isak sue nala Ribka sudi selik kana, huu naa de ana ta susa-sona bali no inan mamaten.
GEN 25:1 Abraham sao seluk inak esa, nade Ketura.
GEN 25:2 Ketura bonggi feen anak kara, sira: Simran, Yoksan, Medan, Midian, Isbak ma Sua.
GEN 25:3 Yoksan anan nara, sira: Seba no Dedan. Dedan tititi-nonosin nara, sira: hatahori Asyur, hatahori Etus, ma hatahori Leum.
GEN 25:4 Midian anan nara, sira: Efa, Efer, Henok, Abida ma Eldaa. Sira basa sara raa, Ketura tititi-nonosin.
GEN 25:5 Neu Abraham bei masodak, ana baꞌe fee Hagar ma Ketura anan nara ena, esa-esak no ndia hata-heton. Basa boe ma ana nadenu sara, fo reu leo nai dae Kanaꞌan boboan dulu, mita fo rakadodook ro ndia anan Isak. Tehuu basa ndia pusakan lalaꞌen, ana loo lima basa sara reu Isak.
GEN 25:7 Neu Abraham teun nara 175, boe ma maten.
GEN 25:9 Basa boe ma anan Isak no Ismael ratoin numa lua Makpela mana deka no Mamre. Fai bakahulun Abraham hasa dae naa numa hatahori Het esa nade Efron, ndia Sohar anan. Fai bakahulun ara oo ratoi Sara numa luak naa ena boe.
GEN 25:11 Mate heni Abraham, boe ma Manetualain fee Isak babaꞌe-babatik, losa ana leo-laꞌo no mole-damek. Lelek naa, Isak leo deka oe matak, manade Beer Lahai Roi.
GEN 25:12 Ismael tutuin talo ia: Ndia naa, Abraham no sao murin Hagar anan. Hagar naa, Sara atan numa Masir mai.
GEN 25:13 Ismael ana toun salahunu dua. Naden nara tungga-tungga numa uluk losa muri anak, sira: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, ma Kedma. Kakanak kara raa, dadi reu bei-baꞌik ruma hatahori nusa-nusak salahunu dua mai, esa-esak no ndia nusa heli-helin. Ara foi nusak kara raa naden nara, esa-esak tungga sira baꞌin nara naden.
GEN 25:17 Neu Ismael teun nara 137, boe ma maten.
GEN 25:18 Tehuu tititi-nonosin nara esa musu no esa. De ara leo sasarak, mulai numa Hawila mai losa Syur, fo mana natoo no nusa Masir, nakandoo losa Asyur.
GEN 25:19 Abraham anan Isak tutuin, talo ia.
GEN 25:20 Neu Isak sao nala Ribka, Isak teun nara 40. Ribka aman, Betuel. Ma naan, Laban. Sira raa, hatahori Aram numa Padan Aram mai.
GEN 25:21 Ribka ta bonggi nala anak. Huu naa de Isak hule-haradoi neu MANETUALAIN fo noke-hule Ana buka Ribka ana manan. MANETUALAIN namanene ndia huhule-haradoin, boe ma Ribka nairu.
GEN 25:22 Naa te ana nairu anak dua. Tehuu kakanak kara raa kada rakosi-rasakak nai Ribka poꞌon dale. De Ribka natane nai dalen dale nae, “Tao hata de kakana kaduak kara iar, talo ia?” Basa boe ma ana natane MANETUALAIN.
GEN 25:23 Boe ma MANETUALAIN naselu nae, “Nai o poꞌom dale hambu hatahori nusak dua, neu ko ara ramusuk taa-taa. Neu ko muri anak barakain lena uluk. Ma kaꞌak naue-osa fee fadin.”
GEN 25:24 Neu bula fain nara losa ena, boe ma Ribka bonggi ana duak, tou anak mesan.
GEN 25:25 Ana kaꞌak mbilas, ma basa ao-inan kabuluk. Huu naa de ara foin nade, Esau (fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan ‘kabuluk’).
GEN 25:26 Basa dei de fadin kalua. Tehuu ana toꞌu kaꞌan ei tinggan. Huu naa de ara foin nade, Yakob (fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan ‘ei tinggak’). Neu bonggi dua sara, Isak teun nara 60 ena.
GEN 25:27 Neu kakana kaduak kara raa ramoꞌo mamais, Esau dadi neu mana sombu ta hohoꞌak. Ana hii leo nai lasi dale. Tehuu Yakob naa mana neneek, ma ana hii nahani nai kada uma.
GEN 25:28 Isak hii naꞌa mbaa banda fui. Huu naa de ana sue nakalena Esau. Tehuu Ribka sue nakalena Yakob.
GEN 25:29 Laꞌe esa, neu Yakob nasu kua fufue, Esau bei fo sombu fali. Ana bengge-manggu ma ndoe nalan seli.
GEN 25:30 Boe ma ana nafada Yakob nae, “Fadi, ee! Au ndoe alan seli! De fee au, o kua mbilas manai urek naa faa dei, fo au isi neu au poꞌong.” (Huu naa de ara roken rae, Edom, fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan ‘mbilas’.)
GEN 25:31 Boe ma Yakob naselu nae, “Malole kaꞌa. Tehuu fee kaꞌa haak ana uluk neu au dei!”
GEN 25:32 De Esau naselu nae, “Sokolaa heni haak ana uluk naa! O soan leo! Au ndoe alan seli ia ena. O sode lai-laik kua naa, fo munin mai leo, te au nau uꞌa ia ena.”
GEN 25:33 Tehuu Yakob kokolak seluk bali nae, “Kaꞌa mahani dei! Kaꞌa sumba-soo dei mae, kaꞌa fee haak naa neu au ena.” Boe ma Esau soꞌuk sumba-sook tungga naa.
GEN 25:34 Basa boe ma Yakob sode feen kua fufue naa no roti. Esau naꞌa-ninu basa, boe ma ana laꞌo. No dalak naa, Esau fee mudak ndia haak ana ulun.
GEN 26:1 Laꞌe esa, hambu ndoe-laꞌas ta hohoꞌak numa nusak naa, sama leo ndoe-laꞌas neu lelek Abraham bei masodak. De Isak neu noke luas Abimelek, hatahori Filistin nara manen, fo ana bisa leo nai Gerar.
GEN 26:2 Ana tao talo naa, nahuu MANETUALAIN natudu aon neun ena nae, “O boso muni Masir muu. Neu ko au dudu mamanak laen fee o.
GEN 26:3 Mete ma o leo taak muu mamanak naa, na, neu ko Au sama-sama ua o, ma Au fee o babaꞌe-babatik mata-matak. Neu ko Au tao o tititi-nonosim mara ramanoꞌu, sama leo nduuk kara marai lalai. Ma Au fee o ma o tititi-nonosim mara nusak ia no basa nggoro-tadun nara. Numa o tititi-nonosim mai, neu ko basa hatahori nusa-nusak kara marai dae-bafok hambu babaꞌe-babatik. No dalak naa, Au tao atetu Au hehelu-bartaang neu o amam Abraham.
GEN 26:5 Au tao basa iar, nahuu o amam tungga Au hihii-nanaung, Au parendang, ma Au hohoro-lalaneng ena.”
GEN 26:6 Dadi Isak leo taak numa Gerar.
GEN 26:7 Ribka naa, manaꞌa hiek sudi selik kana, de hatahorir marai naar mete-ritan, boe ma ratatane aok laꞌe-neun. Tehuu Isak naselu nae, “Ribka naa au fading.” Ana namataꞌu, mete ma ana manaku nae ndia saon, na, neu ko hatahorir raa hala risa ndia fo leꞌa reni Ribka.
GEN 26:8 Isak leo doo-doo numa naa ena, de laꞌe esa manek titino tungga dinela, ma mete-nita Isak no Ribka raholuk ma raiduk.
GEN 26:9 Boe ma ana nadenu hatahorir reu roke ro Isak mai, de ana ndindian nae, “Isak! Au bubuluk tebe-tebe ena, inak naa memak o saom! Tehuu tao hata de o mae, ndia naa, o fadim?” Boe ma Isak naselu nae, “Talo ia, papa! Au amataꞌu, mete ma ae au saong, na, boso losak hatahorir hala risa au.”
GEN 26:10 Manek naselu nae, “Tao hata de o tao talo naa neu ai? Mete ma hambu hatahorir rai ia sunggu-soro ro o saom, neu ko o fee salak neu ai, hetu?”
GEN 26:11 Basa boe ma Abimelek ndindia nahere neu rau-inggun nara nae, “Ei basa ngga masaneda matalolole! Ei see nambarani tao manggarauk neu hatahori ia, do saon, na, neu ko au fee hukun mates neun.”
GEN 26:12 Lelek naa oo, Isak sele-tande numa nusak naa boe. De ana hambu falik buna-boak lipa laꞌe 100, nahuu MANETUALAIN fee babaꞌe-babatik neun.
GEN 26:13 Hata-heton tamba nakandoo, losa ana namasuꞌi nalan seli.
GEN 26:14 Ndia sapin, bibi hien ma bibi lombon nara tamba ramanoꞌu. Ndia atan nara oo noꞌuk ka boe. Losa hatahori Filistin dalen nara mbiri neun.
GEN 26:15 Fai bakahulun Isak aman Abraham asa kali oe matak noꞌuk ka ena. Tehuu hatematak ia hatahori Filistin nara reu rakadodofu basa oe matak kara raa renik dae.
GEN 26:16 Basa boe ma manek Abimelek kokolak no Isak nae, “Isak! Malole lenak, o huꞌa laꞌo ela nusak ia leo. Huu o koasam lena heni ai ena.”
GEN 26:17 Basa boe ma Isak nakadedeak numa naa neu, de fali neu leo numa Gerar doken.
GEN 26:18 Boe ma ana neu suu falik oe matak kara raa, fo ara rakadodofu henik kara ena. Ma ana foi oe matak kara raa, tungga nadek kara fo aman foi nala sara ena.
GEN 26:19 Neu Isak atan nara kali oe matak numa Gerar doken, boe ma ara kali laꞌe oe matan, de nasapura kalua.
GEN 26:20 Tehuu mana lolor marai Gerar rareresi ro Isak mana lolon nara, nahuu oe naa. Mana lolor marai Gerar rae, “Oe ia, ai oem!” Huu naa de Isak foi oe matak naa, nade Esek, sosoa-ndandaan nae, ‘rareresi’.
GEN 26:21 Basa boe ma Isak hatahorin nara kali oe matak esa bali. Tehuu ara oo rareresi bali, nahuu oe matak naa boe. Huu naa de Isak foi oe matak naa, nade Sitna, fo sosoa-ndandaan ‘rahuur-ratofa’.
GEN 26:22 Basa boe ma ana laꞌo ela mamanak naa, de ana kali oe matak esa bali. Oek ia, ara ta rareresi. Huu naa de Isak foi oe matak naa, nade Rehobot, fo sosoa-ndandaan ‘mamana loak’. Ma ana kokolak nae, “Hatematak ia, Manetualain fee ita leo nai dae loak ena. De nai ia, dei fo ita bisa tamanoꞌu.”
GEN 26:23 Numa naa neu, Isak asa laꞌo bali fo rae reu leo nai Beer Syeba.
GEN 26:24 Leꞌodaen naa, boe ma MANETUALAIN natudu matan neun, ma kokolak nae, “Isak! Au ia, o amam Abraham Manetualain. De o boso mamataꞌu, huu Au anea o. Neu ko Au fee babaꞌe-babatik neu o. Ma o tititi-nonosim mara neu ko ara tamba ramanoꞌu. Au tao talo ia, nahuu Au hehelu-bartaang neu o amam.”
GEN 26:25 Basa boe ma Isak totodo batur fo nambaririik mei tunu-hotuk numa naa. De ana noke makasi neu MANETUALAIN numa mamanak naa. Ana leo numa naa, ma hatahorin nara mulai kali oe matak bali.
GEN 26:26 Faik naa, manek Abimelek numa Gerar mai. Ana sama-sama no nonoon Ahusat, ma ndia malangga musun, Fikol, mai ratonggo ro Isak.
GEN 26:27 Boe ma Isak natane nae, “Papa manek! Fai bakahulun ei husi heni ai ena. De hatematak ia ei nau mai tao hata bali?”
GEN 26:28 Boe ma ara raselu rae, “Talo ia! Hatematak ia ai bubuluk mae, Manetualain nanea o. Huu naa de ai duduꞌa mae, malole lenak ita dua ngga tao hehelu-bartaak talo ia: O sumba-soo mae,
GEN 26:29 neu ko ei ta tao manggarauk neu ai, sama leo ai oo ta tao manggarauk neu ei boe. Memak ai dalen nara neulauk neu ei. Huu naa de fai maneuk kara, ei kalua no mole-damek numa ai daen mai. Ai bubuluk tebe ena, MANETUALAIN ndia fee babaꞌe-babatik neu ei.”
GEN 26:30 Boe ma Isak tao feta fee sara, de basa sara raꞌa-rinu rame-rame.
GEN 26:31 Neu beꞌe-mai huhua anan, boe ma ara soꞌuk sumba-sook. De Isak nakamboꞌik kasa, fo ara laꞌo no mole-damek.
GEN 26:32 Faik naa, Isak hatahori mana tao ue-osan nara mai tui laꞌe-neu oe matak fo ara kalik rae, “Papa! Ai hambu oe ena.”
GEN 26:33 Boe ma Isak foi oe matak naa, nade Syeba, fo sosoa-ndandaan ‘sumba-sook’. De ara foi kota naa nade Beer Syeba, losa hatematak ia.
GEN 26:34 Neu Esau teun nara 40, boe ma ana sao nala ana feꞌok dua ruma leo Het mai. Esa, Beeri anan, nade Yudit. Ma esa bali, Elon anan, nade Basmat.
GEN 26:35 Ina kaduak kara raa, tao rala Isak no Ribka dalen nara susa-sona.
GEN 27:1 Neu Isak nambalasi ena, matan nita sambu-sambuk ka ena, boe ma noke ana ulun fo ana sue nalan seli naa nae, “Sau! O mai ia dei!” Esau naselu nae, “Tao hata papa?”
GEN 27:2 Isak nafada nae, “Talo ia! Au lasik ena. Au ta bubuluk faik hida au mate.
GEN 27:3 De muu haꞌi o tee-kokoum mara, fo muu sombu fee au banda fui esa dei.
GEN 27:4 Basa naa, tunu-nasu malan malada tungga au hihiing, fo munin mai au. Au uꞌa basa, dei fo au fee memak babaꞌe-babatik neu o. Mete ma au fee babaꞌe-babatik basa neu o ena, na, leo mae au mate oo malole boe.”
GEN 27:5 Basa boe ma Esau laꞌo neu sombu. Tehuu Ribka oo namanene Isak kokolan naa boe.
GEN 27:6 Boe ma Ribka neu nafada Yakob nae, “Ako, ee! Nenene matalolole! Bebeik kara ia au bei fo amanene amam kokolak no Esau nae talo ia:
GEN 27:7 ‘O muu sombu mala banda fui esa, fo tunu-nasu malan malada fee au. Mete ma au uꞌa basa ena, na, dei fo au fee babaꞌe-babatik neu o nai MANETUALAIN matan.’
GEN 27:8 Dadi nenene matalolole! Tao matetu au parendang ia.
GEN 27:9 Hatematak ia o muni ita bibi hiek ma bibi lombon mamanan muu, fo here mala bibi hiek maao tenak dua. Basa boe ma tunu-hala sara fo haꞌi mbaan nara, ma muni sara fee au. Dei fo au tunu-nasu tungga o amam hihiin.
GEN 27:10 Mete ma au tunu-nasu basa ena, na, munin neni o amam neu fo naꞌa. Boe ma neu ko ana fee babaꞌe-babatik neu o dei, dei fo ana mate. No dalak naa, o ndia hambu babaꞌe-babatik naa. Ta o kaꞌam.”
GEN 27:11 Tehuu Yakob kokolak no inan nae, “Mama! Masalan talo ia. Kaꞌa Sau ao-inan kabuluk, tehuu au ao-inang bulu taak.
GEN 27:12 Boso losak papa nafaroe laꞌe au ao-inang, na, ana bubuluk memak au kedi-ira ndia. De ana nakatoo au.”
GEN 27:13 Inan naselu nae, “Ako, ee! O boso babati. Dei fo mama ndia koladu! Mete ma o amam nakatoo o, na, elan fo mama ndia lemba-nasaan! Hatematak ia o muu humu mala bibi hiek naa leo.”
GEN 27:14 Boe ma Yakob neu humu bibi hiek kara raa, de ana tunu-hala sara fo neni feen neu inan. Basa boe ma Ribka tunu-nasu tungga Isak hihiin.
GEN 27:15 Basa de Ribka neu haꞌi nala Esau bua-loꞌa neulaun nara, de ana fee Yakob pake.
GEN 27:16 Ana oo mbambalu Yakob liman, ma boliin pake bibi hiek naa bulun.
GEN 27:17 De ana fee Yakob nanaꞌa malada naa, no roti fo ana tao nalak ena.
GEN 27:18 Basa boe ma Yakob neni nanaꞌak naa fee aman. Ana kokolak nae, “Papa! Au mai ndia ia ena.” Boe ma Isak naselu nae, “Weeh? Te o ia see?”
GEN 27:19 De Yakob naselu nae, “Au ia, papa ana ulun, Esau! Au tao tungga hata fo papa nadenuk bebeik kara ia ena. Mambadeik fo muꞌa leo. Au tunu-nasu ala mbaa fo au sombu alak numa lasi dale naa ena. Muꞌa, fo basa, na, papa fee babaꞌe-babatik neu au leo!”
GEN 27:20 Basa boe ma Isak kokolak nae, “O ia ta hohoꞌak, ee! Te o bisa hambu banda lai-laik talo naa!” De Yakob naselu nae, “Au hambu ia, nahuu MANETUALAIN fo papa nakaluku-nakatele neuk naa, Ana tulu-fali au.”
GEN 27:21 Boe ma Isak noke Yakob nae, “O deka-deka ia mai, fo au afaroe sudik o! O ia Esau tebe, do?”
GEN 27:22 Basa boe ma Yakob deka neni aman matan neu, de tou lasik mulai nafaroen. Boe ma ana kokolak nae, “Harak ia, leo Yakob haran! Tehuu limak ia, Esau liman.”
GEN 27:23 Tehuu Isak ta nalela Yakob, nahuu liman kabuluk sama leo Esau. Neu ana nae fee babaꞌe-babatik neu Yakob,
GEN 27:24 ana natane seluk bali nae, “O ia tebe-tebe Esau, do?” Yakob naselu nae, “Tebe, papa!”
GEN 27:25 Basa boe ma Isak kokolak nae, “O soro mbaa naa mai fo au uꞌa. Basa, dei fo au fee babaꞌe-babatik neu o.” Boe ma Yakob soro mbaa naa neu aman, ma ana feen anggor fo ninu.
GEN 27:26 Basa boe ma aman kokolak nae, “Ana, nggee! Deka-deka ia mai, fo idu au dei.”
GEN 27:27 Neu Yakob deka-deka mata neu fo idun, boe ma Isak hae hambu Esau bua-loꞌan nara boon. De ana kokolak fee babaꞌe-babatik neu Yakob nae, “Au anang boon, sama leo naꞌu mook boon fo MANETUALAIN fee babaꞌe-babatik neun ena.
GEN 27:28 Elan fo Manetualain nakonda dinis numa lalai mai, fo tao nala o osi-lutum mara raisi-mina! Elan fo Ana fee o hade heta-pepede, ma anggor boan nara sofe ta ela luꞌa-lembaneu.
GEN 27:29 Hatahori nusa-nusak kara dadi neu o atam, ma leo-leor holu ei ma fee hada-horomatak neu o. Elan fo o parenda basa o toranoom mara, ma ara sendek luu-langgan nara reu o matam. See ndia fee neketook neu o, na, ara oo hambu neketook boe. Ma see ndia fee babaꞌe-babatik neu o, na, ara oo hambu babaꞌe-babatik boe.”
GEN 27:30 Neu Isak fee babaꞌe-babatik basa, ma Yakob bei fo kalua laꞌo ela aman, kaꞌan Esau fali neni banda fui fo ana sombu nalak.
GEN 27:31 De neu tunu-nasu, basa boe ma neni fee aman. Ana kokolak nae, “Papa! Mambadeik fo muꞌa leo. Au tunu-nasu ala mbaa fo au sombu alak naa ena. Muꞌa basa, na, papa fee babaꞌe-babatik neu au leo.”
GEN 27:32 Boe ma Isak pangganaa, de natane nae, “Weeh! Te o ia, see bali?” Boe ma Esau naselu nae, “Au ia Sau! Papa ana ulun.”
GEN 27:33 Boe ma Isak aon mulai nakabebe. De tou lasik natane nae, “Mete ma talo naa, na, bebeik kara ia see ndia neni fee au mbaa naa, de au uꞌa ena? Basa boe ma au feen babaꞌe-babatik ena. De ta bisa leꞌa falik babaꞌe-babatik naa bali.”
GEN 27:34 Esau namanene aman kokolak talo naa, boe ma dalen hedis, de buꞌi nakarereu ma ana kokolak nahere nae, “Awii! Papa, ee! Fee babaꞌe-babatik neu au boe, papa!”
GEN 27:35 Tehuu Isak nae, “O fadim mai kedi-ira nala au ena, de namanaꞌo neni o babaꞌe-babatim.”
GEN 27:36 Boe ma Esau kokolak nae, “Ana kedi nala au laꞌe dua ena. Makasososan, ana kedi nala au haak ana uluk. Hatematak ia ana kedi nala au babaꞌe-babating bali. Nandaa ndia naden, ‘Yakob’. Tehuu papa bei naena babaꞌe-babatik laen fee au bali, do?” (Nade Yakob sosoa-ndandaan ‘toꞌu neu ei tinggak’. Tehuu sosoa-ndandaan laen ‘mana kedi-irak.’)
GEN 27:37 Basa boe ma Isak naselu nae, “Au soꞌuk alan dadi neu o malanggam ena. Ma basa toranoon nara dadi reu ndia atan ena. Au baꞌe feen hade heta-pepede, ma anggor sofe ta ela luꞌa-lembaneu ena. De ana, nggee! Hatematak ia bei ela babaꞌe-babatik hata bali fo au bisa feen neu o?”
GEN 27:38 Esau namanene nala naa, boe ma ana honi nakandoo neu aman nae, “Papa babaꞌe-babatim kada esak ka, do? Neu ko papa bei bisa sangga babaꞌe-babatik laen fee au. Leo mae babaꞌe-babatik baꞌu anak oo malole boe!” Boe ma ana mulai buꞌi bali.
GEN 27:39 Basa boe ma Isak naselu mbalin nae, “O masodam neu ko dook ka numa osi-lutu maisi-minak mai, huu ta hambu dinis konda numa lalai mai fo tao makoe o daem.
GEN 27:40 O tafam ndia neu ko fee o masoda. Tehuu leo mae talo bee oo, o dadi ata neu o fadim boe. Kada mete ma o bisa laban neun, na, dei fo o bisa makamboꞌik numa liman mai.”
GEN 27:41 Esau mburuk nalan seli neu Yakob, nahuu fadin leꞌa nala ndia babaꞌe-babatin ena. Tehuu ana duduꞌa nae, “Ta dook ka bali papa mate. De nahani a leo. Mete ma beꞌe-falufii basa, au hala isan!”
GEN 27:42 Neu Ribka namanene nala Esau nanaen, boe ma ana noke nala Yakob, de nae, “O nenene matalolole! O kaꞌam sangga nae bala ndia dale hedin, fo nae nakanisa o. De o malai lai-laik muni o toꞌom Laban muu nai Haran.
GEN 27:44 Muu fo leo doo-doo faa nai naa, losa o kaꞌam ta namanasa o ena bali.
GEN 27:45 Mete ma ana lilii heni hata fo o tao neun, dei fo au adenu hatahorir reu rala falik o. Huu au ta nau au anang dua sara, mopo sara rai faik esa dalen.”
GEN 27:46 Basa boe ma Ribka kokolak no Isak nae, “Au doak ua Esau saon, hatahori Het asa! Mete ma Yakob sao nala ana feꞌok Het boe, na, malole lenak au mate leo.”
GEN 28:1 Boe ma Isak noke Yakob, de ana feen babaꞌe-babatik ma ana nanori-nafadan nae, “Nenene matalolole! O boso sao ana feꞌok Kanaꞌan.
GEN 28:2 Tehuu o muni Padan Aram muu, nai baꞌi Betuel uman. O muu sao mala toꞌom Laban, ana inan esa.
GEN 28:3 Elan fo Manetualain mana Koasa Mateꞌen fee babaꞌe-babatik neu o, fo o umbu-anam mara ramanoꞌu, ma o tititi-nonosim mara dadi neu hatahori nusa ta hohoꞌak noꞌuk ka.
GEN 28:4 Elan fo Manetualain hehelu-bartaan neu Abraham, ana konda neu o, ma o tititi-nonosim mara. Elan fo o soa dae ia, fo Manetualain helu-bartaa nae feen neu Abraham ena.”
GEN 28:5 Isak kokolak basa talo naa, boe ma ana mboꞌi Yakob neni Padan Aram neu, fo neni toꞌon Laban ma baꞌin Betuel uman neu.
GEN 28:6 Esau namanene nala nae, Isak fee babaꞌe-babatik neu Yakob ena, ma kaꞌin fo boso sao no ana feꞌok Kanaꞌan. Ana oo namanene nala boe nae, ndia aman nadenu ndia fadin ena, fo neu sao nala toꞌon ana feꞌon esa nai Padan Aram.
GEN 28:7 Boe ma Yakob namanene nala inan no aman parendan, de ana laꞌo neni Padan Aram neu.
GEN 28:8 Ana oo bubuluk boe nae, ndia aman ta hii ndia saon, hatahori Kanaꞌan nara.
GEN 28:9 De ana neni ama ina-huun Ismael neu, boe ma ana sao nala Ismael anan bali, nade Mahalat. Mahalat naa, Nebayot fadi inan.
GEN 28:10 Basa boe ma Yakob laꞌo ela Beer Syeba, de nae neni Haran neu.
GEN 28:11 Neu ledo tesa, ana losa mamanak esa, boe ma ana sunggu neu naa. Neu ana nau sunggu, ana haꞌi nala batu esa fo taon dadi neu kailunu.
GEN 28:12 Leꞌodaen naa ana nala meꞌi, Ana mete-nita hedahuuk esa nambariik neu daer ma suꞌun losa lalai. Boe ma Manetualain atan nara ruma nusa tetuk do inggu temak mai, ara konda-hene hedahuuk naa.
GEN 28:13 Nai meꞌis na dale, Yakob mete-nita MANETUALAIN nambariik nai ndia boboan, de kokolak nae, “Au ia, MANETUALAIN, o baꞌim Abraham ma amam Isak Manetualain. Neu ko Au fee dae ia neu o ma o tititi-nonosim.
GEN 28:14 Neu ko o tititi-nonosim noꞌun nara, sama leo afu. Ma neu ko ara ratanggela sudi bee reu, nai basa mamanak kara. Numa o tititi-nonosim mai, neu ko basa hatahori nusa-nusak kara marai dae-bafok hambu babaꞌe-babatik.
GEN 28:15 Masaneda matalolole! O muni bee muu a mesan, Au sama-sama ma anea o. Neu ko Au ua falik o muni nusak ia mai. Au ta mboꞌi o mesa ngga. Ma neu ko Au tao atetu basa hehelu-bartaak kara fo Au feen neu o.”
GEN 28:16 Neu Yakob beꞌe, boe ma ana nae, “Au bei fo bubuluk ae, MANETUALAIN oo nai ia boe!”
GEN 28:17 Ana namataꞌu, boe ma ana duduꞌa nae, “Awii! Mamanak ia tao nala au aong mumuru. Manetualain uman nai ia! Fama te ia lelesu mana neni nusa tetuk do inggu temak neu.”
GEN 28:18 Neu huhua anan, Yakob nambadeik, boe ma ana haꞌi nala batu fo ana taon neu kailunu naa, de nambaririik kana dadi tanda. Boe ma ana mboꞌa mina neu batu naa lain, fo ana nakaluku-nakatele neu Manetualain.
GEN 28:19 Ana foi mamanak naa, nade, Betel, fo sosoa-ndandaan ‘Manetualain uman’. (Fai bakahulun mamanak naa, nade Luus.)
GEN 28:20 Basa boe ma Yakob soꞌuk sumba-sook nae, “Mete ma Manetualain sama-sama no au, Ana nanea au nai au dala-lalaꞌong ia, ma fee au nanaꞌa-nininuk ma bua-loꞌa,
GEN 28:21 losa au fali no sodak, na, neu ko MANETUALAIN dadi neu au Manetualain.
GEN 28:22 Batu fo au ambaririi alak ia, dadi neu mamana nekeluku-neketelek neu Manetualain. Ma basa hata fo Manetualain fee neu au, neu ko au fee falik babaꞌek esa numa babaꞌek salahunu mai.”
GEN 29:1 Basa boe ma Yakob laꞌok nakandooo neni dulu neu.
GEN 29:2 Faik esa, ana mete-nita oe matak esa deka no nggorok esa. Bibi lombo bubuak telu, deka-deka numa naa, rahani fo rae rinu oe numa naa. Tehuu hambu batu moꞌok esa tatana nala oe matak naa.
GEN 29:3 Sira siꞌen, mete ma basa bibi hiek ma bibi lombor rakabubua ena, na, dei fo mana lolo keko heni batu naa, fo ndui oe fee bandar raa rinu. Rinu basa, ara tatana falik oe matak naa bali.
GEN 29:4 Boe ma Yakob neu natane mana lolor raa nae, “Wee! Ei numa bee mai?” Ara raselu rae, “Air ia, numa nggorok Haran ia mai.”
GEN 29:5 Boe ma Yakob natane seluk bali nae, “Ei malela au toꞌong Laban, do? Laban naa, Nahor anan.” Ara raselu rae, “Ai malelan.”
GEN 29:6 Boe ma Yakob natane nakandoo bali nae, “Ana bei sodak, do?” Ara raselu rae, “Tou lasik bei sodak. Hena mete. Naa, ana inan, nade Rahel, ana foo neni bibi hien ma bibi lombon nara mai rinu oe nai ia. O mahani leo.”
GEN 29:7 Basa boe ma Yakob kokolak seluk bali nae, “Hatematak ia ledo bei nai lain. De malole lenak bandar bee fo rakubua nai ia ena, na, ei fee sara rinu leo. Basa dei fo ei foo meni sara reni mook reu, fo raꞌa naꞌu bali.”
GEN 29:8 Tehuu ara rasabara rae, “Awii, ta bisa talo naa! Ita muste tahani basa mana lolor reni basa bandan nara fo rakabua nai ia dei, dei fo ita keko heok batu naa, fo fee bandar rinu.”
GEN 29:9 Yakob bei kola-kola no hatahorir raa, te Rahel losa no aman bibi hien ma bibi lombon nara. Ana ndia nasiꞌe foo bandar raa.
GEN 29:10 Neu Yakob mete-nita Rahel no bibi hien ma bibi lombon nara, boe ma neu keko heok oe matak naa tatanan. De ana hani toꞌon bandan nara.
GEN 29:11 Basa boe ma neu holu nala Rahel, de ana idun ma ana buꞌi.
GEN 29:12 Ana tui Rahel nae, “Fadi! Au ia, o papam fadin Ribka anan.” Boe ma Rahel nalaik fali neu ngga, fo neu nafada aman.
GEN 29:13 Neu Laban namanene Rahel tutuin laꞌe-neu Yakob, ndia fadin Ribka anan, boe ma ana nalaik neu sorun. Neu natonggon, Laban holu nalan de idun, basa boe ma noo Yakob neni ndia uman neu. Boe ma Yakob tui basa-basan neu Laban.
GEN 29:14a De Laban kokolak nae, “Memak tebe! Ita dua ngga nufaneluk kara!”
GEN 29:14b Neu Yakob leo no sara bulak esa ena,
GEN 29:15 Laban kokolak noon nae, “Talo ia, Ako! Au ta nau o maue-osa mudak fee au, nahuu ita dua ngga nufaneluk. O moke seseba-babaek baꞌu hata?”
GEN 29:16 Laban naa, naena ana inak dua. Kaꞌak nade Lea. Fadik nade Rahel.
GEN 29:17 Lea matan mana mamalek. Tehuu Rahel matan manaꞌa hiek sudi selik kana, ma ao-inan neulauk.
GEN 29:18 Yakob sue Rahel. De ana naselu Laban nae, “Au aue-osa fee toꞌo teuk hitu, sadi toꞌo fee au sao ala Rahel.”
GEN 29:19 Boe ma Laban naselu nae, “Au akaheik! Malole lenak au fee Rahel sao no o, fo au nufanelu heli-heling! Ana hae sao no hatahori laen. De talo kada ia fo maue-osa fee au leo.”
GEN 29:20 Boe ma Yakob naue-osa teuk hitu, mita fo ana hambu Rahel. Tehuu ana sue nalan seli neu Rahel. Dadi teuk hitu naa, ana namedan sama leo kada faik hida a.
GEN 29:21 Seli teuk kahituk kara raa, boe ma Yakob fee nesenedak neu Laban nae, “Toꞌo! Au aue-osa fee toꞌo teuk hitu ia ena, de hatematak ia fee au sao ua Rahel leo.”
GEN 29:22 Boe ma Laban tao feta kabin, de noke basa hatahorir marai nusak naa.
GEN 29:23 Leꞌodaen naa, Laban ta fee Rahel, tehuu ana nadenu Lea maso neni Yakob laan neu. De Yakob sunggu-soro noon. Neu beꞌe-main, dei de Yakob bubuluk nae, ndia sunggu-soro no Lea. Boe ma Yakob neu nasabara no Laban nae, “Tao hata de toꞌo tao kekedik neu au? Au aue-osa fafandek lima-eing teuk hitu dalen fo hambu Rahel. Tehuu tao hata de toꞌo nggati no Lea?” Boe ma Laban naselu nae, “O boso mamanasa talo naa! Tungga ai dala-hadan nai ia, fadik ta bole sao nakahuluk kaꞌak. De malole lenak talo kada ia! O mahani losa feta kabin fai hitu ia basa dei. Dei fo o hambu Rahel, sadi o maue-osa fee au teuk hitu bali.” Boe ma Laban fee ndia ata inan, nade Silpa fo dadi neu Lea atan.
GEN 29:28 Yakob nakaheik. Huu naa de neu feta faik hitu naa basa, boe ma Laban fee Rahel sao nala Yakob.
GEN 29:29 Basa de Laban fee ndia ata inan esa bali, nade Bilha, fo dadi neu Rahel atan.
GEN 29:30 Basa boe ma Yakob sunggu-soro no Rahel. Ana sue Rahel lena heni Lea. De ana naue-osa tamba teuk hitu bali fee ari-aman.
GEN 29:31 Tehuu MANETUALAIN bubuluk Yakob sue Rahel lena heni Lea. Boe ma Ana fee luas fo Lea hambu anak, tehuu Rahel beik.
GEN 29:32 De Lea nairu, boe ma ana bonggi ana touk esa. Ana foi kanak naa, nade Ruben (fo sosoa-ndandaan ‘mete neu, hambu anak’), nahuu ana nae, “MANETUALAIN memak mete-nita au sususang ena. Huu naa de hatematak ia, au saong oo nau mete au boe.”
GEN 29:33 Basa boe ma Lea nairu bali, de ana hambu ana touk esa. Ana foi kanak naa nade Simeon (fo sosoa-ndandaan fama te ‘hatahori namanene ena’), nahuu ana nae, “MANETUALAIN namanene ena nae, au saong ta tao matak neu au. Huu naa de Ana fee tamba anak esa bali neu au.”
GEN 29:34 Basa de, Lea nairu bali, boe ma ana bonggi ana touk esa bali. Ana foi kanak naa nade Lewi, nahuu ana nae, “No anak ia au dedeꞌang basan ena. Neu ko au saong ta bila no au, nahuu au bonggi feen ana touk telu ena.”
GEN 29:35 Basa boe ma Lea nairu bali, de ana hambu ana touk esa. Ana foi kanak naa, nade Yahuda (fo sosoa-ndandaan fama te ‘kokoa-kikiok’), nahuu ana nae, “Oek ia, au nau koa-kio MANETUALAIN!” Basa de Lea ta bonggi leo.
GEN 30:1 Tehuu Rahel bei ta hambu anak. De ana mbiri neu kaꞌan. Boe ma ana kokolak no saon nae, “Kaꞌa! Fee au anak dei. Mete ma taa, na, malole lenak au mate leo.”
GEN 30:2 Boe ma Yakob nasaparak kana nae, “O duꞌa mae au ia Manetualain, de bisa fee o anak!?”
GEN 30:3 Basa boe ma Rahel kokolak nae, “Talo ia! Malole lenak papa haꞌi nala au atang Bilha. Muu sunggu-soro muan fo ana bonggi fee au anak.”
GEN 30:4 Boe ma ana fee Bilha neu ndia saon. De Yakob sunggu-soro noon.
GEN 30:5 Boe ma Bilha nairu, de bonggi ana touk esa.
GEN 30:6 Basa boe ma Rahel kokolak nae, “Manetualain namanene au huhule-haradoing ena. Huu naa de Ana fee au ana touk esa ena. Manetualain naketu-naladi au dedeꞌang ena no ta mbeu seserik.” Boe ma ana foi kanak naa nade, Dan (fo sosoa-ndandaan ‘neketu-neladi dedeꞌak’).
GEN 30:7 Basa boe ma Bilha nairu bali, de bonggi ana touk esa.
GEN 30:8 Boe ma Rahel kokolak nae, “Au akaseseꞌuk ua au kaꞌang ena, de au senggi.” Huu naa de ana foi kanak naa nade Naftali (fo sosoa-ndandaan ‘nekeseseꞌuk’, do ‘nekeheheek’).
GEN 30:9 Neu Lea nameda ndia ta hambu anak seluk ena, boe ma ana fee atan Silpa neu saon, fo ana sao nalan.
GEN 30:10 Basa boe ma Silpa bonggi nala ana touk esa.
GEN 30:11 Boe ma Lea kokolak nae, “Au ua-naleng neulauk ena.” De ana foi kanak naa, nade Gad (fo sosoa-ndandaan ‘ua-nale neulauk’).
GEN 30:12 Basa boe ma Silpa bonggi seluk ana touk esa bali.
GEN 30:13 Boe ma Lea kokolak nae, “Wee! Hatematak ia, bei fo au amahoko! Mete te neu ko basa inak kara kokolak rae, au aua alan seli ena.” Huu naa de ana foi kanak naa, nade Aser (fo sosoa-ndandaan ‘nemehokok’).
GEN 30:14 Laꞌe esa, ndaa no fai koru hader, Ruben neni lasi dale neu, boe ma ana natonggo no sele-tandek modo-aidoo esa fo bisa tao nairu hatahori. Boe ma nenin fee neu inan Lea. Rahel mete-nita naa, boe ma noke Lea nae, “Kaꞌa, ee! Fee au modo-aidoo fo Ruben nenik naa faa dei.”
GEN 30:15 Tehuu Lea naselu nae, “Wee! O ia sudi selik kana! O leꞌa mala au saong ena. Hatematak ia o nau leꞌa mala modo-aidoo naa numa au anang mai bali? O ia ta mae malela!” Tehuu Rahel kokolak nae, “Talo ia kaꞌa. Mete ma au hambu modo-aidoo naa, na, leꞌodaen ia o bole sunggu-soro mua Yakob.” Boe ma Lea nakaheik.
GEN 30:16 Neu ledo bobon, Yakob fali numa osi mai. Boe ma Lea neu natonggo noon, de kokolak nae, “Ako, ee! O muste sunggu-soro mua au leꞌodaek ia! Huu au bae memak o ena, unik au anang modo-aidoon.” Boe ma leꞌodaen naa oo, Yakob sunggu-soro no Lea boe.
GEN 30:17 Manetualain namanene Lea huhule-haradoin. Huu naa de ana nairu, de ana bonggi nala ana touk kaliman.
GEN 30:18 Boe ma Lea foi kanak naa nade Isaskar, (fo sosoa-ndandaan ‘bae sosota-mamangguk’), nahuu ana nae, “Manetualain bae au sosota-mamanggung ena, huu au fee Silpa sao no au saong ena.”
GEN 30:19 Basa boe ma Lea nairu bali, de ana bonggi nala ana touk kaneen.
GEN 30:20 Ana kokolak nae, “Manetualain fee au hadia neulauk ena. De hatematak ia au saong muste fee hada-horomatak neu au, nahuu au bonggi feen ana touk nee ena.” Huu naa de ana foi kanak naa, nade Sebulon (fo sosoa-ndandaan ‘fee hada-horomatak’).
GEN 30:21 Basa boe ma Lea bonggi nala ana inak esa, de ana foin nade Dina.
GEN 30:22 Boe ma Manetualain nasaneda Rahel, de Ana namanene huhule-haradoin. Huu naa de Ana buka ana manan.
GEN 30:23 Basa boe ma Rahel nairu, de ana bonggi nala ana touk esa. Ana nae, “Manetualain siꞌu-sapu heni au dale mamaeng ena.”
GEN 30:24 Boe ma ana foi kanak naa, nade Yusuf (fo sosoa-ndandaan fama te ‘naa fo ana fee tamba’), nahuu ana nae, “Au hule fo Manetualain fee tamba au, ana touk esa bali.”
GEN 30:25 Neu Rahel bonggi basa Yusuf ena, Yakob kokolak no Laban nae, “Papa! Mete ma bisa, na, au ae fali uni au nusang uu dei.
GEN 30:26 Elan fo au fali uu ngga ua au saong ma anang nggara. Papa bubuluk ena, au tao ue-osa fafandek lima-eing fee Papa ena, de au bae ketu sara ena. Huu naa de hatematak ia sira raa, au ndia haak.”
GEN 30:27 Boe ma ari-aman naselu nae, “Ana, nggee! O nenene dei. Au losi-lale basa ena, de bubuluk ae, Manetualain fee babaꞌe-babatik neu au, nahuu o.
GEN 30:28 De hatematak ia, o nau moke baꞌu hata a mesan, na, au bae! Sadi o leo nai ia, ma maue-osa makandoo fee au.”
GEN 30:29 Boe ma Yakob naselu nae, “Papa mesa kana mete-nita, au aue-osa ahere ena. Huu naa de papa banda-manun nara tamba ramanoꞌu rakandooo.
GEN 30:30 Neu au bei ta mai naa, papa hata-heton bei ta noꞌuk ka. Tehuu hatematak ia, papa namasuꞌi ena. Manetualain fee babaꞌe-babatik neu papa ena, nahuu au ue-osang. Hatematak ia fain losa ena, fo au aue-osa soa-neu au sao-anang nggara bali.”
GEN 30:31 Basa boe ma Laban natane nae, “Dadi au muste bae talo bee neu o?” Boe ma Yakob naselu nae, “Papa hae fee au hata-hata. Neu ko au lopo-linu akandoo papa banda-manun nara, sadi au bisa tao matak esa.
GEN 30:32 Fee luas neu au, fo faik ia oo, au uni papa banda-manun nara uu boe, fo tada ala bibi hiek ma bibi lombok. Bee fo ta kokotok ma ta keketak kara, na, naa dadi neu papa enan. Tehuu bee fo kokotok ma keketak kara, na, naa fo au laꞌe sara. Ma au oo haꞌi ala basa bibi lombo nggeok kara boe. Basa naar, dadi neu seseba-babaek soa-neu au sosota-mamanggung.
GEN 30:33 Neu fai bakadean, dei fo papa bisa bubuluk, au ia ndoos do taa. Sudi neu faik bee a mesan, papa bisa mai parisa au bandang nggara. Mete ma papa mete-nita bibi hiek bee fo ta kokotok do keketak, do bibi lombo mutik, na, papa bubuluk memak mae, au ndia amanaꞌo ala papa bandan nara.”
GEN 30:34 Boe ma Laban nakaheik nae, “Malole! Talo kada naa leo!”
GEN 30:35 Tehuu faik naa oo, Laban tada feꞌe basa banda kokotok ma keketak kara, ro bibi lombo nggeok kara boe. Basa boe ma ana nadenu ndia anan nara fo lopo-linu banda-manur raa.
GEN 30:36 Boe ma ara ro bandar raa reni mamanak esa reu, doon fai telu laꞌo eik numa Yakob mai. Yakob bei nakaboi ari-aman bibi hien ma bibi lombo lenan nara.
GEN 30:37 Basa boe ma Yakob tati nala ai huuk matak telu ndanan nara, de ana fina tatada roun nara tao sara leo kokoto-keketak kara.
GEN 30:38 Ana mbeda ai ndana neni fina tatada rouk kokoto-keketak kara raa reni bandar haꞌon dale reu. Bandar hii rahoa rai mamana nininuk naa.
GEN 30:39 De neu bandar rahoa rai ai ndana neni fina tatada rouk kokoto-keketak kara raa matan, neu ko ara bonggi te anan nara bulun oo, kokotok ma hambu keketak boe.
GEN 30:40 Neu Laban bandan nara rae rahoa, Yakob fee sara rasare reni banda bulu kokotok ma keketak reu. De anan nara oo kokotok ma keketak kara boe. No dalak naa, ndia banda heli-helin nara tamba ramanoꞌu. Basa boe ma ana tada feꞌe sara ruma Laban bandan nara mai.
GEN 30:41 Neu banda barakaik kara rahoa, na, Yakob tao ai kokoto-keketak kara raa deka matan nara, neu haꞌon nara dale.
GEN 30:42 Tehuu mete ma ana mete-nita banda kamanauk kara ndia rahoa, na, ana ta tao air raa reu. De Laban hambu basa banda kamanauk kara. Tehuu Yakob hambu basa banda barakaik kara.
GEN 30:43 No dalak naa, Yakob namasuꞌi nalan seli. Ndia bibi hien, bibi lombon, ontan, keledein, ma ata-daton nara noꞌun seli.
GEN 31:1 Laꞌe esa, Yakob namanene Laban anan nara kola-kola rae, “Yakob namasuꞌi nalan seli ena, nahuu ana kakao nala basa ita aman hata-heton ena.”
GEN 31:2 Yakob oo mete-nita ndia ari-aman Laban matan ta nalengga ena, ma ana ta malole no ndia boe, sama leo fai bakahulun bali.
GEN 31:3 Basa boe ma MANETUALAIN kokolak no Yakob nae, “Hatematak ia fain losa ena. De o muste fali muni o ina-amam mara muu. Dei fo Au sama-sama ua o.”
GEN 31:4 Basa de Yakob fee reu roke Rahel no Lea, fo mai ratonggo ro ndia nai bandar mamanan nai mook.
GEN 31:5 Boe ma ana nafada sara nae, “Nai fai bakadean ia, au mete-ita ei amam matan ta nalengga no au ena. Ana oo ta malole no au boe, sama leo fai bakahulun ena bali. Tehuu Manetualain fo au amang nakaluku-nakatele neuk naa, Ana sama-sama no au.
GEN 31:6 Ei dua ngga bubuluk, doo basa ia, au aue-osa fafandek lima-eing sudi selik kana soa-neu ei amam!
GEN 31:7 Leo mae talo naa oo, tehuu ana kedi-ira nakamiminak au laꞌi-laꞌik ka boe. Ana nggati au seseba-babaeng, laꞌe salahunu. Leo mae talo naa, tehuu Manetualain nanea naherek au.
GEN 31:8 Neu ei amam kokolak nae, ‘Banda-manu kokotok kara raa dadi reu o seseba-babaem’, boe ma banda-manur raa bonggi basa ana kokotok lalaꞌen. Faik laen, ana kokolak bali nae, ‘Hatematak ia banda-manu fo keketak kara, dadi reu o seseba-babaem,’ boe ma banda-manur raa bonggi basa ana keketak lalaꞌen.
GEN 31:9 Manetualain tao talo naa, mita fo Ana haꞌi nala ei amam banda-manun nara, fo fee sara reu au.
GEN 31:10 Laꞌe esa, neu banda-manur fai nehoan nara, au mete-ita nai meꞌis dale nae, basa banda-manu mane kahoak kara raa, hambu ketuk bulun tatadak, kokotok ma hambu ketuk keketak.
GEN 31:11 Boe ma Manetualain atan numa nusa tetuk do inggu temak mai nanggou au nai meꞌis dale nae, ‘Wee! Yakob!’ Boe ma au aselu ae, ‘Tao hata, Manetualain?’
GEN 31:12 Boe ma ana nafada nae, ‘Mete dei! Basa banda-manu mane kahoak kara hambu kada bulu tatadak, kokotok ma keketak. Au ndia koladu basa naar, nahuu Au mete-ita ena hata fo Laban tao neu o ena.
GEN 31:13 Au ia, Manetualain, fo atudu aong neu o numa Betel. O mambaririik batu esa numa naa, basa boe ma mboꞌa mina neu lain, de makaluku-makatele neu Au. Basa boe ma o ndara fangga hehelu-bartaak mua Au numa naa. Hatematak ia o muste laꞌo ela nusak ia, fo fali muni o ina-amam mara nusan naa muu.’ ”
GEN 31:14 Boe ma Rahel no Lea raselu rae, “Neu! Ai tungga a mesan! Ai ta maena pusaka hata-hata bali numa ai aman Laban mai.
GEN 31:15 Doo basa ia, tou lasik tao ai leo kada hatahori deak kara ena. Ana seꞌo heni ai ena. Boe ma ana naꞌa heni ai beli-mbaan nara ena.
GEN 31:16 Basa hata-heto fo Manetualain haꞌin numa papa Laban mai naa, hatematak ia dadi neu ai ma ai anan nara pusakan. Dadi mete ma Manetualain nae talo bee, na, tungga a leo!”
GEN 31:17 Basa boe ma Yakob mulai nafafaꞌu bua-loꞌan nara. Boe ma ana fua basa sao-anan nara reu onta lain, ma foo neni basa banda-manun nara, ma basa bua-baꞌu fo ana hambu sara ruma Padan Aram, de ara fali reni dae Kanaꞌan reu.
GEN 31:19 Faik naa, Laban neu nggute bibi lombon nara bulun. Boe ma Rahel loi neni aman patong sosonggon nara.
GEN 31:20 Yakob asa laꞌo no kada neneek, ma ta rafada ndia ari-aman.
GEN 31:21 Ana baꞌu neni basa ndia hata-heton nara, de ara laꞌo lai-laik ladi lee Efrat, boe ma rasare reni letek Gilead reu.
GEN 31:22 Seli fai telu, boe ma Laban hambu harak rae, Yakob asa ralai ena.
GEN 31:23 Boe ma Laban nakabubua ndia hatahorin nara, fo reu husi tungga ndia mane-feun. Ara husi losa faik hitu, dei de hambu sara ruma Gilead leten nara.
GEN 31:24 Neu leꞌodaen, boe ma Manetualain natudu aon neu Laban numa meꞌis dale. Ana nae, “Laban! Mete ma o kokolak mua Yakob, na, manea matalolole o bafa-maam.”
GEN 31:25 Leꞌodaen naa, Yakob nambaririik laak numa letek Gilead ena. Boe ma Laban asa oo rambaririik sira laan boe, ta dook ka numa naa neu.
GEN 31:26 Basa boe ma Laban mai natonggo no Yakob. Boe ma ana kokolak nae, “Weeh, Yakob! Tao hata de o malai muni au ana inang nggara no neneek talo ia? Sama leo hatahori fo o humu malak nai netatik dale.
GEN 31:27 Talo bee de o malai no neneek, ta pake mateꞌa au bali! Mete ma o mafada au no malole dei, na, neu ko au tao feta rame-rame, fo afuli ei pake bua kaliik dei fo mboꞌi ei laꞌo.
GEN 31:28 O salam esa bali, ndia o ta fee au idu au umbu-anang nggara, dei fo mboꞌi sara laꞌo. O tataom ia nggoa bebek sudi selik kana!
GEN 31:29 Au bisa tao akasususak o no muda hiek. Tehuu leꞌodaek ka, Manetualain fo o amam nakaluku-nakatele neuk naa kaꞌi-ore au nae, mete ma au kokolak ua o, na, au muste anea atalolole au bafa-maang.
GEN 31:30 Memak au bubuluk ae, o laꞌo nahuu o dalem hii nalan seli mae fali ena. Tehuu tao hata de o bei mamanaꞌo muni au patong sosonggong nggara bali?”
GEN 31:31 Basa boe ma Yakob naselu nae, “Toꞌo boso mamanasa au! Au laꞌo no neneek naa, nahuu au amataꞌu, boso losak toꞌo namanggenggee kakanak kara iar, na, talo bee?”
GEN 31:32 Tehuu Yakob ta bubuluk nae, ndia saon Rahel ndia loi neni patong sosonggok kara raa. De ana nae, “Toꞌo! Laꞌe-neu patong raa, sangga leo! Mete ma hambu sara rai see, na, hukun makanisan. Parisa basa sara! Mete ma hambu toꞌo bua pusaka laen, na, haꞌi mala falik kasa. Elan fo basa hatahori iar, dadi reu sakasii.”
GEN 31:33 Boe ma Laban neu parisa esa-esak laan. Nakahuluk Yakob laan. Basa boe ma neni Lea laan neu. De neni ata ina kaduak kara laan neu. Tehuu ana ta hambu patong raa. Mateꞌen, ana maso neni Rahel laan neu.
GEN 31:34 Tehuu Rahel nafuni patong raa rai onta bebelan ndandaan dae. De nanggatuuk neu bebelak naa lain. Laban parisa no lutuk Rahel laan, tehuu ta hambu sara.
GEN 31:35 Boe ma Rahel kokolak no aman nae, “Papa boso mamanasa. Au ta bisa ambariik, huu au hambu bulak.” De Laban sangga seluk bali, tehuu ana ta hambu patong raa.
GEN 31:36 Boe ma Yakob namanasa, de ana mboka nasaparak Laban nae, “Au tao manggarauk hata neu toꞌo? Losa toꞌo husi tungga au, nok bali au hatahori manggarauk!
GEN 31:37 Toꞌo parisa basa au bua-baꞌung nggara ena. De toꞌo hambu hata? Soba taon neu mata ia fo ita basa ngga mete-tita! Naa fo hatahorir ia raketu rae, bua-baꞌur raa see enan.
GEN 31:38 Teuk 20 ena, au dadi kuli neu toꞌo. Neu au kiu-lolo toꞌo banda-manun nara, esa boe na ta kalaheni. Au ta uꞌa heni esa boe na!
GEN 31:39 Mete ma banda kakiki-kakaak tao nisa toꞌo bandan esa, na, au ta afada toꞌo, tehuu au nggatin. Mete ma hatahorir ramanaꞌo reni toꞌo bandan esa, toꞌo nadenu au nggati, leo mae au ta ndia sala.
GEN 31:40 Leledok, au seꞌi ledo. Leꞌodaek au marini dere faku-faku. Au beꞌe losa ta sunggu, nahuu kiu-lolo toꞌo bandan nara.
GEN 31:41 Memak teuk 20 naa, tebe! Au aue-osa teuk 14, fo hambu toꞌo ana inan nara. Basa de au aue-osa tamba seluk teuk 6 bali, fo bisa hambu au bandang nggara. Au dadi kuli doo basa naa, tehuu toꞌo soa nggati au seseba-babaeng laꞌe salahunu.
GEN 31:42 Endik de hambu Manetualain fo baꞌi Abraham ma papa Isak rakaluku-rakatele neuk. Mete ma Ana ta nanea au, na, neu ko toꞌo nadenu ara husi falik au ua lima rouk ena. Tehuu Manetualain ta napopoke matan neu au susa-sonang, ma ana susuri-memete basa au ue-osang lalaꞌen. Huu naa de leꞌodaek ka, Ana mai ndindia toꞌo.”
GEN 31:43 Laban namanene Yakob kokolan talo naa, boe ma ana naselu nae, “Talo ia! Ina kaduak kara raa, au anang nggara. Kakanak kara fo ara bonggi ralak kara raa, basa sara au umbung nggara. Basa bandar ia, au enang nggara. Basa hata fo o mete-mitak kara iar, memak au enang nggara. Tehuu au ae tao hata? Au ta bisa kena-kaꞌi sara.
GEN 31:44 De malole lenak, ita dua ngga ndara fangga hehelu-bartaak. Ma ita muste leo-laꞌo tungga hehelu-bartaak naa.”
GEN 31:45 Basa boe ma Yakob haꞌi nala batu moꞌok esa, de nambaririik kana numa naa, dadi neu tanda nesenedak.
GEN 31:46 Boe ma Yakob nadenu hatahorin nara reu raduduru batur fo fua totodo neun. Boe ma basa sara ranggatuuk raꞌa-rinu deka batur raa.
GEN 31:47 Basa boe ma Laban foi batu netotodok naa nade, Yegar Sahaduta. Tehuu Yakob foin nade, Galeed.
GEN 31:48 Basa boe ma Laban nae, “Batu netotodok ia, dadi sakasii soa-neu ita dua ngga.” Huu naa de mamanak naa nade Galeed.
GEN 31:49 Laban oo foi mamanak naa nade Mispa boe (fo dedeꞌa deꞌek naa liin sangga sama leo dedeꞌa deꞌek laen, fo sosoa-ndandaan ‘mamana neneak demak’), nahuu ana kokolak nae, “Neu ko MANETUALAIN mesa kana ndia nanea ita dua ngga, fo leo mae ita takadodook oo, ita ta lena-langga hehelu-bartaak ia boe.
GEN 31:50 Mete ma o tao manggarauk neu au anang nggara iar, do sao ina laen nara, neu ko au ta bubuluk. Tehuu masanedak! Manetualain ndia dadi sakasii neu o, ma au.
GEN 31:51 Soba mete neu batu mana mambariik ia, ma batu netotodok. Masaneda huu batur ia oo dadi neu too-lane boe. O ta bole seli batur ia fo tao manggarauk neu au. Ma au oo ta bole seli batur ia fo tao manggarauk neu o boe.
GEN 31:53 Ita dua ngga ndara fangga hehelu-bartaak ia pake ita bei-baꞌin nara Manetualain naden. Fo ndia o baꞌim Abraham, ma au baꞌing Nahor Manetualain. Dei fo Ndia mesa kana ndia dadi mana maketu-maladi dedeꞌak fo naketu-naladi ita dedeꞌan.” Yakob namanene nala naa, boe ma ana soꞌuk sumba-sook mates pake Manetualain naden fo ndia aman Isak nakaluku-nakatele neuk.
GEN 31:54 Basa boe ma Yakob tunu-hala banda-manu, de ana nenin dadi tunu-hotuk fee Manetualain numa letek naa lain. Boe ma ana noke basa hatahorir, de raꞌa-rinu rame-rame ma ara beꞌe losa beꞌe-mai huhua anan numa naa.
GEN 31:55 Neu beꞌe-mai huhua anan, Laban neu idu-holu basa umbu-anan nara. Basa de ana kokolak fee babaꞌe-babatik neu sara, boe ma ana fali neni nusan neu.
GEN 32:1 Basa de Yakob asa laꞌok rakandooo. Boe ma Manetualain atan nara ruma nusa tetuk do inggu temak mai ratonggo roon.
GEN 32:2 Neu ana mete-nita sara, boe ma ana kokolak nae, “Fama te Manetualain soldadun nara mamana hahaen nai ia!” Huu naa de ana foi mamanak naa nade Mahanaim (fo sosoa-ndandaan ‘mamana hahaek dua’).
GEN 32:3 Basa boe ma Yakob nadenu ana nunin hida laꞌok rakahuluk reni nusa Edom reu (ndia Seir), fo rafada ndia kaꞌan Esau rae, ndia nae mai.
GEN 32:4 Yakob nafada ana nunin nara nae, “Ei miu mafada au kaꞌang Esau talo ia: ‘Papa Esau! Papa atam, fadim Yakob, haitua hara masodak noꞌuk ka neu papa. Numa au laꞌo ndia fai bakahulun losa hatematak ia mai, papa atan leo nai toꞌo Laban uman.
GEN 32:5 Hatematak ia papa atan ia naena sapi, keledei, bibi hiek, bibi lombo, ata touk ma ata inak ena. Au adenu hatahorir ia rakahuluk, fo reni harak fee papa laꞌe-neu au mamaing. Au amahena papa nau simbok ai no lima makambelak.’ ” Boe ma hatahorir raa reu.
GEN 32:6 Neu ara lenggu fali Yakob mai, boe ma ara tui rae, “Ai miu matonggo mia papa kaꞌan Esau ena. Hatematak ia ana mai no touk 400, fo nae natonggo no papa.”
GEN 32:7 Yakob namanene nala naa, boe ma tenden nduka-nduka ma namataꞌu nalan seli. Boe ma ana baꞌe basa bandan nara ma hatahorin nara neu bubuak dua.
GEN 32:8 Ana duꞌa nae, “Mete ma Esau mai, fo ana nggafu fee bubuak kaesan, na, bubuak kaduan bisa ralai sangga sodak.”
GEN 32:9 Basa boe ma Yakob hule-haradoi nae, “Manetualain, ee! Manetualain fo au baꞌing Abraham ma au amang Isak rakaluku-rakatele neuk. Nenene neu au dei. Fai maneuk kara, Manetualain ndia nadenu au fo fali uni au nufanelung nggara mai, nai nusak ia. Manetualain ndia helu-bartaa nae, neu ko Manetualain koladu tao natetu basa-basan.
GEN 32:10 Au ta andaa simbok Manetualain susue-lalain, ma Manetualain dale mahanin. Fai bakahulun neu au ladi lee Yarden, au uni kada teteꞌe ai. Tehuu hatematak ia au fali ia mai ngga, uni hatahorir ma banda-manur bubuak dua.
GEN 32:11 Au amataꞌu, boso losak kaꞌa Esau mai nggafu tao nisa ai basa ngga. De au hule fo Manetualain tao nasoi-nasoda au ua basa sao-anang nggara numa kaꞌa Esau mai.
GEN 32:12 Manetualain ndia helu-bartaa nae, Manetualain fee babaꞌe-babatik noꞌuk ka neu au, ma tao au tititi-nonosing nggara tamba ramanoꞌu, sama leo sarakaek nai tasi tatain fo hatahorir ta bisa reke rala sara.”
GEN 32:13 Basa boe ma Yakob sunggu numa mamanak naa. Neu beꞌe-main, boe ma ana here nala banda fo nae fee hadia neu kaꞌan.
GEN 32:14 Ana here nala bibi hie ina 200, bibi hie mane 20, bibi lombo ina 200, bibi lombo mane 20,
GEN 32:15 0nta ina 30 ro ana kalasusun nara, sapi ina 40, sapi mane 10, keledei ina 20, ma keledei mane 10.
GEN 32:16 Basa boe ma ana baꞌe banda-manur raa, matak esa-esak no ndia fofoon. Boe ma ana fee fofook esa-esak nonook mana lolon. Ana nafada sara nae, “Ei laꞌok makahuluk. Dei fo au tungga dea. Tehuu ei muste mete fo fofook esa naomba dook ka faa numa fofook laen mai.”
GEN 32:17 Boe ma Yakob parenda mana lolo numa fofook kaesan mai nae, “Mete ma au kaꞌang Esau natonggo no o, ma ana natane nae, ‘O mae bee muu? O ia, see atan? Banda-manur ia, see enan?’
GEN 32:18 Ei muste maselu mae, ‘Banda-manur ia, papa atan Yakob enan. Ana haitua fee kaꞌan, papa Esau. Tehuu ndia mesa kana bei tungga dea.’ ”
GEN 32:19 Ana oo fee parenda talo naa neu basa mana lolo numa fofook laen nara mai boe nae, “Mete ma matonggo mia kaꞌa Esau ena, ei hadia banda-manur raa neun. Ma ei mafadan mae, au bei tungga dea.” Yakob duduꞌa nae, mete ma ana fee basa banda-manur raa reu Esau, na, neu ko Esau dalen bangganaꞌu neu ndia.
GEN 32:21 De ana haitua banda-manur raa rakahuluk. Tehuu leꞌodaen naa, ana bei nahani numa naa.
GEN 32:22 Leꞌodaen naa, Yakob nambadeik, de fee sao kaduan nara, sao tia kaduan nara, ma ana kasalahunu esan nara, fo ladi reni lee Yabok boboan seri reu.
GEN 32:23 Neu basa sara losak a seri, boe ma ana haitua basa hata-heton nara reni naa reu.
GEN 32:24 Tehuu Yakob mesa kana bei nahani numa naa. Basa boe ma touk esa mai, de naule noon losa lole manggaledo.
GEN 32:25 Neu touk naa nameda Yakob sangga nae senggi ndia ena, boe ma ana femba Yakob sakabukun, de dui buꞌun kosir laꞌo ela mamanan.
GEN 32:26 Boe ma touk naa nae, “Makamboꞌik au, huu doo-doo faa te ledo nae toda ena.” Tehuu Yakob naselu nae, “O fee babaꞌe-babatik neu au dei, dei fo au akamboꞌik o!”
GEN 32:27 Boe ma touk naa natane nae, “O nade see?” Ana naselu nae, “Yakob.”
GEN 32:28 Basa boe ma touk naa kokolak nae, “O ta nade Yakob ena. Tehuu mulai hatematak ia neu, hatahorir roke o rae, Israꞌel, nahuu o maule laban hatahori dae-bafok ma Manetualain ena, losa o masenggin.” (Nade Israꞌel sosoa-ndandaan ‘mana maulek no Manetualain’.)
GEN 32:29 Boe ma Yakob natane nae, “O nade see?” Tehuu touk naa nae, “O nau matane au nadeng tao hata?” Basa boe ma ana fee babaꞌe-babatik neu Yakob numa naa.
GEN 32:30 Basa de Yakob kokolak nae, “Au mete-ita Manetualain matak no matak ena, tehuu au bei masodak.” Huu naa de ana foi mamanak naa nade Peniel, fo sosoa-ndandaan nae, ‘Manetualain matan’.
GEN 32:31 Yakob laꞌo ela mamanak naa, neu ledo nai lain ena. Tehuu ana laꞌok doka-doka, nahuu sakabuku duin nalai sala.
GEN 32:32 Huu naa de losa hatematak ia, hatahori Israꞌel asa ta raꞌa mbaa banda sakabukun, nahuu Manetualain femba sira baꞌin Yakob sakabukun, de duin nalai sala.
GEN 33:1 Faik naa oo, Yakob mete-nita Esau mai no ndia nononggon hatahori 400 boe. Boe ma ana babaꞌe anan nara reni inan nara esa-esak reu.
GEN 33:2 Ana fee sao tia kaduak kara raa ro ana nara laꞌok resi mata. Basa de Lea no anan nara, dei de Rahel no anan Yusuf resi seku dea.
GEN 33:3 Tehuu Yakob laꞌok seku nesi mata numa basa sara mai. Neu ana sangga deka-deka no kaꞌan ena, ana sendek luu-langgan ma nateꞌe langgan losa daer, laꞌe hitu.
GEN 33:4 Tehuu neu Esau mete-nita fadin, boe ma nalaik neu soru Yakob, de ana holu nalan ma idun. Boe ma dua sara buꞌi.
GEN 33:5 Neu Esau mete-nita inak kara ro anan nara raa, boe ma ana natane nae, “Basa hatahorir ia, seer?” Boe ma Yakob naselu nae, “Hatahorir raa Manetualain fee sara reu au ena, fo kaꞌa atan.”
GEN 33:6 Basa boe ma sao tian nara, ma ana nara mai kaur langgan nara mbali Esau.
GEN 33:7 Basa de Lea no anan nara mai kaur langgan nara mbali Esau. Mana tungga dea mateꞌen, Yusuf no inan Rahel mai kaur langgan nara mbali Esau.
GEN 33:8 Basa boe ma Esau natane nae, “Banda-manu fofook kara fo o haituak bebeik kara raa, sosoan hata?” Boe ma Yakob naselu nae, “Talo ia kaꞌa! Au hadia basa banda-manur raa fee kaꞌa, mita fo kaꞌa simbok au no dale loak.”
GEN 33:9 Tehuu Esau bala nae, “Fadi Yakob! Au hata-hetong oo noꞌuk ka boe. De o hae fee au hata-hata.”
GEN 33:10 Boe ma Yakob naselu nae, “Kaꞌa boso talo naa! Kaꞌa muste simbok fo dadi neu tanda nae, kaꞌa simbok au no lima makambelak. Neu au mete-ita kaꞌa huhumen bebeik kara ia, nok bali au ita Manetualain huhumen.
GEN 33:11 De au hule no hada-horomatak, mita fo kaꞌa simbo mala au hadiang ta kandaak ia. No Manetualain neulaun sudi selik kana no au ena, huu naa de Ana fee basa hata fo au toꞌak ena.” Yakob kokoe nakandooon, losa nau ta nau, Esau simbo hadiar raa.
GEN 33:12 Basa boe ma Esau kokolak nae, “Mete ma talo naa, na, ei mahehere fo ita laꞌo leo! Dei fo au afuli ei.”
GEN 33:13 Tehuu Yakob naselu nae, “Bosok kaꞌa! Kaꞌa mete aom. Kanak kara bei kadiꞌi anak kara, de ara ta bisa laꞌo lai-laik. Banda-manu mana bonggi beuk kara oo noꞌuk ka boe. Mete ma ita takasetik kasa laꞌok lai-lai, na, neu ko nai kada faik esa dalen, banda-manur ia bisa mate basa sara.
GEN 33:14 De malole lenak kaꞌa sara laꞌok makahuluk leo. Dei fo ai basa ngga laꞌok koe-koe tungga dea. Dei fo ai neti tiro kaꞌa nai Seir.”
GEN 33:15 Basa boe ma Esau kokolak bali nae, “Mete ma talo naa, na, au ela au ana nunin ruma ro o, fo ara ratudu dalak neu ei.” Tehuu Yakob nae, “Kaꞌa hae tao mbutes neu kaꞌa aon. Sadi au bubuluk ae, kaꞌa simbok nala au no malole ena.”
GEN 33:16 Esau namanene nala naa, boe ma ana laꞌo ela sara de fali neni Seir neu.
GEN 33:17 Tehuu numa mamanak naa neu, Yakob neni Sukot neu. Numa naa, ana nambaririik uma ma tao lalae fee basa banda-manun nara. Huu naa de mamanak naa, ara foin nade Sukot (fo sosoa-ndandaan ‘uma leo taak’).
GEN 33:18 Mateꞌen, Yakob asa losa no sodak ruma Padan Aram mai reni nggoro Sikem reu, nai nusa Kanaꞌan. Boe ma ara rambaririik laak, de leo deka-deka nggorok naa.
GEN 33:19 Dae fo Yakob nambaririik laak neuk naa, ana hasa ketun numa Hemor, fo Sikem aman mai. Ana bae nenik doi fulak 100.
GEN 33:20 Numa naa, ana totodo batur fo tao mei tunu-hotuk. Basa boe ma ana foi mamanak naa nade El-Elohe-Israꞌel fo sosoa-ndandaan ‘Manetualain naa, Israel Manetualain.’
GEN 34:1 Laꞌe esa, Yakob no Lea ana inan, Dina, neu tiro-dangga ana feꞌok kara marai nusak naa.
GEN 34:2 Nusak naa manen, nade Hemor, numa leo Hewi mai. Ana toun nade Sikem. Laꞌe esa, Sikem mete-nita Dina, boe ma leꞌa nenin, de ana boden.
GEN 34:3 Sikem dalen tuda neu Dina, ma ana sue nalan seli. De ana kokolak nalolole no Dina, mita fo Dina oo bala ndia susuen boe.
GEN 34:4 Boe ma Sikem nafada aman nae, “Papa! Tulun muu matane Dina fo au bisa sao alan.”
GEN 34:5 Yakob namanene hambu hatahori bode ndia ana inan ena, tehuu ana kada nenee, ma ta nakaundak hata-hata. Huu faik naa, ana toun nara ranea bandar rai mook. De ana nahani losa basa sara fali.
GEN 34:6 Faik naa, Sikem aman Hemor, neni Yakob neu, fo nae natane Dina.
GEN 34:7 Ndaa no dua sara bei kola-kola, Yakob anan nara fali numa mook mai. Neu ara ramanene rae, Sikem bode sira fadi inan, boe ma dalen nara hedis, ma ramanasa ralan seli. Basa boe ma ara rae, “Dedeꞌak matak talo ia, ta nandaa mori-dadi nai Israꞌel. De ita ta bole simbok hatahori tao manggarauk talo naa.”
GEN 34:8 Boe ma Hemor kokoe Yakob asa nae, “Toranoo Yakob! Au anang Sikem dalen tuda tebe-tebe neu toranoo ana inan ena. De au hule fo fee luas au anang sao nalan.
GEN 34:9 Mete ma bisa, na, ita anan nara esa laꞌe esa. Ei ana toum mara sao ro ai ana inan nara. Ma ai ana toun nara sao ro ei ana inam mara.
GEN 34:10 Elan fo ei leo mabali mia ai nai ia. Ei bisa leo sudi nai bee. Basa naa masembo-danggak, fo hambu hata-heto nai ia.”
GEN 34:11 Basa naa, Sikem kokolak no Dina aman, ma kaꞌan nara nae, “Ei nau moke hata a mesan au tungga. Ei nau moke doi tatana mamaek, ma beli-mban baꞌu hata a mesan, au bae. Sadi ei nau fee luas fo au soa ei fadi inam.”
GEN 34:13 Tehuu Yakob anan nara bubuluk ena rae, Sikem bode sira fadin Dina ena. De ara raselu kekedik Sikem no aman Hemor.
GEN 34:14 Boe ma ara raselu rae, “Ai ta bisa fee ai fadin sao no hatahori fo ta bei neni sunat! Naa, neni mamaek soa-neu ai!
GEN 34:15 Tehuu dala sasain, talo ia: basa ei touk kara lalaꞌen, moꞌo-kadiꞌik, muste sunat sama leo ai.
GEN 34:16 Mete ma ei tao talo naa, dei fo ita bisa esa sao esa. Ma ai oo bisa leo sama-sama mia ei nai ia boe, fo ita bisa dadi teu hatahori nusak esa.
GEN 34:17 Tehuu mete ma ei ta nau tungga ai hihiin, ma ta nau sunat, na, neu ko ai haꞌi falik ai fadin, fo ai huꞌa laꞌo ela ia.”
GEN 34:18 Hemor no Sikem simbok kokolan nara no neulauk.
GEN 34:19 Tehuu Sikem ta nakataka nala dalen ena, nahuu ana sue nalan seli neu Dina. Ma basa hatahorir marai nusak naa ara fee hada-horomatak neu Sikem.
GEN 34:20 De Hemor no Sikem reni mamana neole dedeꞌak nai nggorok lelesu mason reu, boe ma rakokola aok ro basa hatahorir marai nusak naa. Ara kokolak rae,
GEN 34:21 “Basa toranoo nggara ein! Hatahori Israꞌel asa iar hii leo-laꞌo mole-dame ro ita. De ela sara leo sama-sama ro ita nai nusak ia. Nusak ia loan dai soa-neu ita basa ngga. Ita bisa sao tala sira ana feꞌon nara. Sira oo bisa sao rala ita ana feꞌon nara.
GEN 34:22 Ara roke kada dedeꞌa kadiꞌi anak esa numa ita mai. Ndia, basa ita touk kara muste sunat sama leo sira.
GEN 34:23 Mete ma ita leo-laꞌo teu esa ena, na, dei fo sira banda-manun nara ma hata-heton nara oo dadi neu ita pusakan boe, hetu? De malole lenak ita simbok sira hihii-nanaun. Mai fo ita basa ngga sunat sama-sama. Makaheik, do?”
GEN 34:24 Boe ma basa hatahorir fo mana rakabua ruma naa, rakaheik ro Hemor no Sikem kokolan. De basa tour marai nusak naa sunat rame-rame.
GEN 34:25 Neu fai katelun, neu basa mana sunat ara, bisun nara bei rambeta, boe ma Dina kaꞌan Simeon no Lewi, lesu rala dombe-tafan nara de ara maso no neneek reni nggorok dale reu. Boe ma ara hala risa basa touk kara raa.
GEN 34:26 Ara oo hala risa Hemor no Sikem boe. Boe ma ara leꞌa ro Dina kalua numa Sikem uman mai, de ara fali.
GEN 34:27 Basa boe ma Yakob anan laen nara maso reni nusak naa dale reu, de ara foꞌai reni nusak naa isi-oen. Ara ramanasa, nahuu hatahori bode sira fadi inan numa naa ena.
GEN 34:28 Ara foꞌai reni basa hatahorir uman nara isi-oen, ma foo reni basa hatahorir banda-manun nara numa mook mai.
GEN 34:29 Ara leꞌa reni basa inak kara ro anan nara, ma foꞌai reni basa nusak naa bua-baꞌu mabelin nara.
GEN 34:30 Neu Yakob bubuluk anan nara tatao-nonoꞌin naa, boe ma ana kokolak no Simeon ma Lewi nae, “Ei tao ue-tatao nggoa bebek hata ia ena? Kada tao makasususak au! Neu ko hatahori Kanaꞌan, hatahori Peris, ma basa hatahori marai nusak ia, ara mburuk ralan seli ro ita. Sira hatahorin nara noꞌuk ka. Tehuu ita hatahorin nara kada hidak ka. Mete ma ara mai nggafu fee ita, na, neu ko etoboꞌa memak nala ita leo maa.”
GEN 34:31 Tehuu ara raselu ro nasak rae, “Papa! Fama te papa duꞌa nae ai mboꞌi sara tao ai fadim dadi neu ina petak, do?”
GEN 35:1 Basa boe ma Manetualain kokolak no Yakob nae, “Au ia, Manetualain, fo mana natudu aong neu o ena, neu faik fo o malai numa o kaꞌam Esau mai. Hatematak ia o lali muni Betel muu leo. Losa naa, o totodo batur tao mei tunu-hotuk fo makaluku-makatele neu Au. Basa naa o leo muu naa leo.”
GEN 35:2 Boe ma Yakob kokolak no basa ndia uma isin nara nae, “Hatematak ia, ita basa ngga tae laꞌok teni Betel teu. Bakahulun neu au bei numa susa-sonak dale, Manetualain tulun nala au numa naa. Au nau ambaririik mei tunu-hotuk neu naa. Dadi hatematak ia, ei nggari heni basa ei bua sosonggom mara lalaꞌen. Tao malalao ei ao-inam mara, ma nggati ei bua-loꞌam mara, huu ita nau takaluku-takatele neu Manetualain.”
GEN 35:4 Boe ma ara loo lima sira bua sosonggon nara ro basa sira falon nara. Basa boe ma Yakob nakadodofu basa buas sara raa reu ai huu moꞌok esa taen, deka nggorok Sikem.
GEN 35:5 Neu Yakob no ndia nononggon nara laꞌok ruma Sikem mai, Manetualain fee nemeda nemetaꞌuk neu hatahorir rai nusak matia-aok kara, losa ara ta rambarani tao manggarauk neu Yakob asa.
GEN 35:6 Boe ma Yakob no basa ndia nononggon nara, losa Betel (fo fai bakahulun nade Luus) no sodak, nai dae Kanaꞌan.
GEN 35:7 Numa naa, Yakob nambaririik mei tunu-hotuk numa batu mai. Basa boe ma ana foi mamanak naa nade El Betel, (fo sosoa-ndandaan ‘Betel Manetualain’), nahuu fai bakahulun Manetualain natudu aon neu Yakob numa naa, neu faik fo ana nalai numa ndia kaꞌan mai.
GEN 35:8 Deka no nggorok Betel, hambu ai huu moꞌok esa, hatahorir foin nade, Alon Bakut. Sosoa-ndandaan ‘ai huu makarereuk’. Ana hambu nadek naa, nahuu neu Debora fo Ribka ina mana koꞌon maten, ara ratoin neu ai huuk naa taen.
GEN 35:9 Neu Yakob fali numa Padan Aram mai, Manetualain natudu aon bali, ma Ana feen babaꞌe-babatik.
GEN 35:10 Manetualain kokolak nae, “Mulai hatematak ia neu, o nadem ta Yakob bali. Tehuu Au fee o nade beuk, ndia Israꞌel.
GEN 35:11 Au ia, Manetualain mana Koasa Mateꞌen. De o bonggi maumbu-ana noꞌun seli leo! Neu ko hatahori nusak kara mori-dadi numa o tititi-nonosim mara mai. Ma neu ko o bonggi mala mane-manek kara.
GEN 35:12 Nusak fo Au feen neu o baꞌim Abraham ma amam Isak naa ena, hatematak ia Au feen neu o mua basa o tititi-nonosim mara.”
GEN 35:13 Manetualain kokolak basa talo naa, boe ma Yakob nambaririik dii batu esa neu naa, mita fo dadi tanda nesenedak neu Manetualain hehelu-bartaan. Boe ma ana mboꞌa oe anggor no mina neu batu naa lain, de nakaluku-nakatele neu Manetualain.
GEN 35:15 Mamanak naa, ana foin nadeBetel.
GEN 35:16 Basa boe ma Yakob asa laꞌo ela Betel. Neu ara bei dook ka faa numa Efrata mai (ndia Betlehem), Rahel fain fo nae bonggi losa ena. Tehuu ana bonggi nakareo.
GEN 35:17 Neu ana bei nakananasa sota-mate, boe ma hatahori mana makabobonggik nafada neun nae, “Mama Rahel! Tao matetea dalem, huu hambu ana touk bali!”
GEN 35:18 Neu Rahel sangga nae ketu ani hahaen, boe ma ana foi kanak naa, nade, Ben-Oni, (fo sosoa-ndandaan ‘kanak numa au doidosong mai’). Basa boe ma maten. Tehuu Yakob foi kanak naa nade Benyamin, (fo sosoa-ndandaan ‘kanak lima konak.’)
GEN 35:19 Basa boe ma ratoi Rahel neu dalak mana neni Efrata neu tatain (fo hatematak ia, nade Betlehem).
GEN 35:20 Boe ma Yakob nambaririik batu rates esa neu naa. Losa faik ia oo, Rahel batu raten naa bei nai naa boe.
GEN 35:21 Basa boe ma Yakob lali-lali nakandoo. Laꞌe esa, ana tao laak numa manara Eder boboan.
GEN 35:22 Neu ara bei ruma naa, Ruben sunggu-soro no ndia aman sao tian, Bilha. Yakob bubuluk anan tatao-nonoin naa. Yakob ana toun salahunu dua.
GEN 35:23 Lea anan nara, sira: Ruben (fo Yakob ana ulun), Simeon, Lewi, Yahuda, Isaskar, ma Sebulon.
GEN 35:24 Rahel anan nara, sira: Yusuf no Benyamin.
GEN 35:25 Rahel atan Bilha anan nara, sira: Dan no Naftali.
GEN 35:26 Boe ma Lea atan Silpa anan nara, sira: Gad no Aser. Bonggi kakanak kara raa ruma Padan Aram.
GEN 35:27 Basa boe ma Yakob neu tiro aman Isak numa Mamre, deka no nggorok Kiriat-Arba (fo hatematak ia ndia Hebron). Fai bakahulun, baꞌin Abraham oo leo numa naa boe.
GEN 35:28 Isak nasoda losa teun nara 180, dei de maten. Boe ma anan nara Esau no Yakob ratoin.
GEN 36:1 Ia Esau tititi-nonosin nara. Naden laen ndia Edom.
GEN 36:2 Esau sao ana feꞌok Kanaꞌan dua, esa hatahori Het, ndia Elon ana inan, nade Ada. Sao kaduan, hatahori Hewi, nade Oholibama. Aman nade Anah, ma baꞌin nade Sibeon.
GEN 36:3 Esau oo sao nala Ismael ana inan, nade Basmat. Basmat kaꞌa toun, nade Nebayot.
GEN 36:4 Esau sao ulun, Ada, bonggi Elifas. Basmat bonggi Rehuel.
GEN 36:5 Boe ma Oholibama bonggi Yeus, Yalam, ma Kora. Bonggi basa Esau anan nara ruma nusa Kanaꞌan.
GEN 36:6 Laꞌe esa, Esau lali neni nusak laen esa neu dook ka numa Yakob mai. Ana nuni noo sao-anan nara, hatahori mana maue-osan, banda-manun ma ndia hata-heton nara lalaꞌen.
GEN 36:7 Esau nabingga-baꞌek no Yakob, nahuu sira banda-manun ma hata-heton nara noꞌun seli. Dadi ara leo-laꞌo rakaseseꞌe nai nusak naa.
GEN 36:8 Boe ma Esau (ndia Edom), neu leo nusa mbuku-letek nai Seir.
GEN 36:9 Ia, Esau tititi-nonosin fo ara rae, ‘hatahori Edom’. Ara leo numa nusa mbuku-letek nai Seir.
GEN 36:10 Esau saon Ada, bonggi nala anak touk esa, nade Elifas. Elifas ana toun nara lima. Sira: Teman, Omar, Sefo, Gatam, ma Kenas. Elifas sao tian, nade Timna. Ana bonggi nala ana touk esa, nade Amalek. Esau saon mana nade Basmat, bonggi nala ana touk esa, nade Rehuel. Rehuel bonggi nala ana touk haa, sira: Nahat, Sera, Syama, ma Misa.
GEN 36:14 Esau saon Oholibama, fo ndia Anah anan, fo Sibeon umbun naa, bonggi nala ana touk telu, sira: Yeus, Yalam, ma Kora.
GEN 36:15 Esau umbu-anan nara ratanggela dadi reu leo noꞌuk ka. Esa-esak no sira mane leon. Esau ana ulun Elifas anan nara, dadi reu mane leo Teman, mane leo Omar, mane leo Sefo, mane leo Kenas, mane leo Kora, mane leo Gatam, ma mane leo Amalek. Sira basa sara raa, Esau no saon Ada tititi-nonosin.
GEN 36:17 Esau anan Rehuel anan nara, dadi mane leo Nahat, mane leo Sero, mane leo Syama, ma mane leo Misa. Sira basa sara raa, Esau no saon Basmat tititi-nonosin.
GEN 36:18 Esau no saon Oholibama anan nara, dadi mane leo Yeus, mane leo Yalam, ma mane leo Kora.
GEN 36:19 Basa leor raa lalaꞌen, Esau tititi-nonosin.
GEN 36:20 Numa mamanak naa oo hambu hatahori Hori esa boe, nade Seir. Anan nara ratanggela dadi leo noꞌuk ka. Esa-esak no sira mane leon. De ndia anan nara dadi mane leo Lotan, mane leo Sobal, mane leo Sibeon, mane leo Anah, mane leo Dison, mane leo Eser, ma mane leo Disan.
GEN 36:22 Lotan anan, sira: Hori ma Heman (Lotan feton, Timna).
GEN 36:23 Sobal anan nara, sira: Alwan, Manahat, Ebal, Sefo ma Onam.
GEN 36:24 Sibeon anan nara, sira: Aya no Anah. Anah naa, ndia natonggo oe mata katobik numa mamana nees, neu ana lolo aman keledein nara.
GEN 36:25 Anah ana inan ndia Oholibama, ma ana toun ndia, Dison. Dison anan nara, sira: Hemdan, Esban, Yitran, ma Keran.
GEN 36:27 Eser anan nara, sira: Bilhan, Saꞌawan, ma Akan.
GEN 36:28 Disan anan nara, sira: Us ma Aran.
GEN 36:29 Dadi mane leor hatahori Horir raa, sira: Lotan, Sobal, Sibeon, Anah, Dison, Eser, ma Disan. Sira basa sara leo numa nusa Seir.
GEN 36:31 Neu nusa Israꞌel bei ta hambu manek, nai dae Edom hambu manek kara ena. Sira naden nara tungga-tungga, sira:
GEN 36:32 Ara soꞌu Beor anan, nade Bela, dadi manek numa kota Dinhaba.
GEN 36:33 Neu Bela maten, boe ma Yobab hene dadi manek nggatin. Ndia aman, nade Sera numa nggorok Bosra mai.
GEN 36:34 Neu Yobab maten, boe ma Husam hene dadi manek nggatin. Husam naa, numa hatahori Teman nara nusan mai.
GEN 36:35 Neu Husam maten, boe ma Hadad hene dadi manek nggatin. Ndia aman, nade Bedad numa nggorok Awit mai. (Ana ndia nasenggi hatahori Midian neu lelek fo ara ratati numa Moab.)
GEN 36:36 Neu Hadad maten, boe ma Samla hene dadi manek nggatin. Samla naa, numa nggorok Masreka mai.
GEN 36:37 Neu Samla maten, boe ma Saul hene dadi manek nggatin. Saul naa, numa nggorok Rehobot nai lee tatain mai.
GEN 36:38 Neu Saul maten, boe ma Baꞌal-Hanan hene dadi manek nggatin. Ndia aman, nade Akbor.
GEN 36:39 Neu Baꞌal-Hanan maten, boe ma Hadar hene dadi manek nggatin. Hadar naa, numa nggorok Pau mai. Saon nade Mehetabel. Mehetabel aman, nade Matret. Ma ndia baꞌin, nade Mesahab.
GEN 36:40 Dadi mane leor mana konda numa Esau sara mai, sira: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, ma Iram. Sira esa-esak foi sira nusan nara tungga sira nade heli-helin. Dadi basa naar, tutuik laꞌe-neu Esau tititi-nonosin, ndia hatahori Edom mara.
GEN 37:1 Ia Yakob asa tutuin. Fai maneuk kara, Yakob neu leo seluk bali numa dae Kanaꞌan. Naa, ndia aman Isak mamana leleon numa fai bakahulun mai.
GEN 37:2b Lelek naa, Yakob anan esa numa saon Rahel mai, nade Yusuf. Neu teun nara 17, ana no kaꞌan nara rasiꞌe reu ranea sira bibi hien ma bibi lombon nara sama-sama. Kaꞌan nara sira Yakob no saon Bilha ma Silpa anan nara. Tehuu Yusuf ia, mana bafa lafok fee aman laꞌe-neu ndia kaꞌan nara tatao-nonoꞌin.
GEN 37:3 Neu bonggi Yusuf, Yakob lasik ena. Huu naa de ana sue nala Yusuf lena heni anan laen nara. Laꞌe esa, Yakob tao badu naruk esa lolen seli fee Yusuf.
GEN 37:4 Neu kaꞌan nara mete-rita sira aman sue nakalena neu Yusuf, boe ma ara mburuk ralan seli roon, losa ara ta nau kokolak malole roon bali.
GEN 37:5 Leꞌodaek esa, boe ma Yusuf nala meꞌi. Basa boe ma ana nafada meꞌis naa neu kaꞌan nara nae, “Wee! Ei nenene dei! Au ala meꞌi ae, ita basa ngga futu-paꞌa ita hade-nggandum nara ruma osi dale. Boe ma au hadeng nambariik ndoo fido-fidok. Tehuu ei hadem mara rambariik eko-feo rala au enang, de ara kaur langgan nara mbali au enang.” Kaꞌan nara ramanene rala naa, boe ma ara tamba rasakele neun bali.
GEN 37:8 Basa boe ma ara ndindia Yusuf rae, “Woi! O duꞌa mae, o nau dadi neu malanggan fo parenda ai, do?” Ara rasakele ralan seli neun ena, nahuu ana nafada ndia meꞌin naa.
GEN 37:9 Basa boe ma Yusuf nala meꞌi seluk bali. Boe ma ana nafada kaꞌan nara nae, “Wee! Au ala meꞌi bali. Au mete-ita ledo, bulan, ma nduuk salahunu esa. Basa sara kaur langgan nara no malole mbali au.”
GEN 37:10 Yusuf tui basa meꞌis naa neu ndia aman ma kaꞌan nara ena, boe ma aman nahara nahere neun nae, “Meꞌis matak bee naa! O duꞌa mae, au ma o inam, ma o kaꞌa-fadim mara mai fo ai idu o eim? O neulauk naa ena maa!”
GEN 37:11 De Yusuf kaꞌan nara mbiri ralan seli roon. Tehuu ndia aman duꞌa ta basa-basa no meꞌis naa.
GEN 37:12 Faik esa, Yusuf kaꞌan nara foo reni sira aman bibi hien ma bibi lombon nara losa deka nggorok Sikem.
GEN 37:13 Ta dook ka boe ma aman nae, “Usu, ee! O kaꞌam mara lolo bibi hiek ma bibi lombo deka-deka nai Sikem. De mahehere fo muu tiro sara dei.” Boe ma Yusuf naselu nae, “Malole, papa.”
GEN 37:14 De aman nae, “O muu dei, fo tiro sudi o kaꞌam mara ma au bibi hieng ma bibi lombong nggara. Ara talo bee, na, o fali mai fo tui au.” Boe ma Yusuf laꞌo ela dae Hebron moon, de nakandooo neu losa Sikem.
GEN 37:15 Losak ka boe ma ana sangga sara ndule mook. Basa boe ma ana natonggo no hatahori esa, de hatahori naa natanen nae, “O sangga hata?”
GEN 37:16 Yusuf naselu nae, “Toꞌo, au sangga au kaꞌang nggara. Ara foo bibi hiek ma bibi lombo sangga naꞌu deka-deka nai ia. Toꞌo mete-nita sara boe, do?”
GEN 37:17 Boe ma hatahori naa nafada nae, “Ara ta rai ia ena. Tehuu ara rae sira sangga reni deka-deka nggorok Dotan reu.” Basa boe ma Yusuf neu tungga neni kaꞌan nara reu, losa ana mete-nita sara numa Dotan.
GEN 37:18 Tehuu neu Yusuf bei numa dook ka, te ara mete-ritan ena. Boe ma ara rala harak fo rae tao risan.
GEN 37:19 De esa nafada esa nae, “Ei mete dei. Malangga meꞌis mai ena!
GEN 37:20 Mai fo ita tao tisan leo. Basa naa ita nggari henin neni oe mata mates esa dale neu. Dei fo ita tafada papa tae, banda fuir raꞌa henin ena. Dei fo ita mete sudik ndia meꞌin nara raa dadi talo bee!”
GEN 37:21 Kaꞌan Ruben namanene nala naa, boe ma ana sangga dalak fo nae fee Yusuf nasoda. De ana kaꞌi-ore fadin nara nae, “Wee! Ita boso tao tisan!
GEN 37:22 Malole lenak ita nggarin neni kada oe mata mates ia dale neu. Nai ia mamana nees, de ta hambu hatahori esa boe na bubuluk. Sadi boso feen nadaa.” Ana kokolak talo naa, nahuu ana nau nakamboꞌik Yusuf, fo nadenun fali neu ngga.
GEN 37:23 Neu Yusuf losa kaꞌan nara, boe ma ara toꞌu ralan de ara ruꞌi heni badu malolen naa.
GEN 37:24 Boe ma ara leꞌa rorosok kana, de ara timban maso neni oe matak dale neu.
GEN 37:25 Basa boe ma ara fali reu raꞌa-rinu. Ara bei raꞌa-rinu, medak neu ma ara mete-rita hatahori nononggok esa mai. Hatahori nononggok naa, ontan nara fua reni bua-baꞌu neseseꞌok kara, ndia leo ai daa kaboo menik, bumbu-fanir, ma modo-aidoo mata-matak kara. Naa te hatahori nononggok Ismael hatahorin nara raa, ara ruma nggorok Gilead mai, rae reni doon seli reu, nai nusa Masir.
GEN 37:26 Basa boe ma Yahuda nafada kaꞌa-fadin nara nae, “Wee! Malole lenak talo kada ia. Ita boso tao tisan. Nanalan hata? Leo mae talo bee oo, ita ta bisa tafuni tala ndia daan boe.
GEN 37:27 Malole lenak ita teu seꞌon neu hatahori Ismael asa raa. Leo mae ita taon talo bee oo, ndia bei ita fadi bonggin boe. Huu naa de ita boso takahehedik kana!” Boe ma basa sara rala harak tungga ndia kokolan.
GEN 37:28 Ndaa no hatahori mana danggan nara raa laꞌok tungga naa, boe ma Yusuf kaꞌan nara leꞌan numa oe matak naa dale mai. De ara seꞌo henin neu hatahori Ismael asa raa, no belin doi fulak dua hulu. Basa boe ma ara roo Yusuf neni Masir neu.
GEN 37:29 Neu ara seꞌo heni Yusuf naa, Ruben ta bubuluk. Huu naa de neu ana fali neni oe matak naa neu, ana nggengger nalan seli, nahuu Yusuf ta sana ena. De ana sisii nasida bualoꞌa-papaken manai ao-inan, nahuu dalen susa nalan seli.
GEN 37:30 Boe ma ana fali neni fadin nara neu, de nae, “Awii! Kanak naa ta sana ena. Hatematak ia au muste tao hata bali?”
GEN 37:31 Basa boe ma ara hala bibi hiek esa, de haꞌi rala Yusuf badu malolen naa, ara boron neni daak naa neu.
GEN 37:32 Boe ma ara haꞌi rala badu mana lelemu daak naa, de renin fee neu sira aman, ma rafada rae, “Papa! Ai here mala badu ia! Papa mete sudik kana. Fama ko ia fadi Usu badun.”
GEN 37:33 Yakob namumula basak ka badu naa, boe ma nalelan tutik ka. De ana naselu nae, “Awii! Ia memak au anang badun. Mitak mae banda fuir sii rakalulutun numa bee. Awii! Au anang maten ena!”
GEN 37:34 Basa boe ma Yakob sii nakalulutu badun, de ana pake bua-loꞌa soka akinaak, nahuu ana susa nalan seli. Boe ma ana buꞌi nakarereu anan ta pake hahae.
GEN 37:35 Basa ndia ana toun ma ana inan lalaꞌen mai kokoen, tehuu ta rala sana. Ana nae, “Taa! Au bisa susa losa mate, huu au ta bisa lilii kakanak esa ia.” Boe ma Yakob dalen susa nakandoo, nahuu ana nasaneda neu anan Yusuf mana matek naa ena.
GEN 37:36 Neu Yakob bei susa-sona talo naa, tehuu hatahori danggan nara raa, losa Masir ena. Boe ma reu seꞌo Yusuf neu hatahori ina-huuk esa, nade Potifar. Ndia ia, komedan numa basa soldadu mana manea manek Masir uma manen mai.
GEN 38:1 Basa boe ma Yahuda laꞌo ela kaꞌa-fadin nara, fo neu leo no nonoon Hira numa nggorok Adulam.
GEN 38:2 Numa naa, hambu amak esa, hatahori Kanaꞌan, nade Sua. Yahuda nahiik no Sua ana feꞌon esa, boe ma dua sara rauma-loo. Basa naa, ana bonggi nala ana touk hida ratutungga.
GEN 38:3 Ana nomer kaesan, ara foin nade Er.
GEN 38:4 Boe ma nomer kaduan, ara foin nade Onan.
GEN 38:5 Ma nomer katelun, nade Sela. Neu ara bonggi Sela, boe ma ara lali reni nggorok laen reu, nade Kesib.
GEN 38:6 Neu ana nomer kaesan, Er, namoꞌo mamais ena, boe ma Yahuda neu natane feen ana feꞌok esa, nade Tamar. De dua sara rauma-loo.
GEN 38:7 Tehuu Er naa manggarau ndoos. Huu naa de Manetualain hukun nakamaten. De Er mate ta laꞌo ela anak.
GEN 38:8 Basa boe ma Yahuda nadenu ana nomer kaduan nae, “Onan! O kaꞌam maten ena, tehuu anan taa. De hatematak ia, tungga hatahori lasik kara siꞌen, na, o muste lenggu-bara sinik neu o kaꞌam saon, mita fo o bonggi fee o kaꞌam tititi-nonosik.”
GEN 38:9 Onan bubuluk hadak naa ena. Tehuu ana ta nau fee tititi-nonosik neu kaꞌan Er. De tungga-tungga ana sunggu-soro no Tamar, na, ana nggari heni ndia bibi-nggeen, mita fo Tamar hae bonggi nala.
GEN 38:10 Onan tatao-nonoꞌin naa, tao nala Manetualain namanasa nalan seli. Huu naa de Manetualain hukun nakamaten boe.
GEN 38:11 Neu Yahuda mete-nita ana kaduan nara, mana sao Tamar mate sara ena, boe ma ana namataꞌu. Ana duꞌa nae, boso losak ana muri anan Sela sao nala Tamar bali, na, neu ko maten boe. Huu naa de ana neu nafada feto-feun Tamar nae, “Ana nggee! Malole lenak o fali muni o ina-amam muu leo. Naa fo au anang Sela namoꞌo ena dei, dei fo o fali mai ngga fo sao malan.” Boe ma Tamar fali neu ngga.
GEN 38:12 Seli doo-doo boe ma mate Yahuda saon. De ana susa losa fai susa-sonak basa. Boe ma ana noke nonoon Hira, fo dua sara reni nggorok Timna reu. Numa naa, hatahorir rame-rame nggute bibi lombo bulun fo seꞌo.
GEN 38:13 Boe ma hatahorir rafada Tamar rae, “O ari-amam neni Timna neu, fo koladu hatahorir fo nggute ndia bibi lombon nara bulun.”
GEN 38:14 Lelek naa, Yahuda ana muri anan Sela moꞌok ena. Tehuu Tamar bubuluk ena nae, ndia ari-aman ta nau ndia sao nala Sela. Boe ma Tamar sangga dalak fo noke ndia haak. Boe ma ana olu heni ndia bua-loꞌa ina falun, de nggati pake bua-loꞌa malole. Ana pake tema popoi langgak fo lalaa nafuni langgan ma matan. Basa boe ma ana neu nanggatuuk neu nggorok Enaim lelesu mason, ndaa tetar no dalak mana neni Timna neu.
GEN 38:15 Neu Yahuda laꞌok nesik lelesu maso nggorok naa, ana mete-nita inak esa. Ana nae hetuk ko inak naa ina petak, nahuu Tamar namasosoak no bua-loꞌan nara, ma ana lalaa nafuni matan bali.
GEN 38:16 Yahuda ta duꞌa nae inak naa, ndia feto-feun. De ana deka-deka neni inak naa neu, boe ma natane nae, “Wee! Mete ma au ua o, na, o moke baꞌu hata?” Tehuu Tamar naselu nae, “Neu! Numa kada papa hihiin mai.”
GEN 38:17 Yahuda noke naloe belin nae, “Mete ma au fee o bibi hiek esa, na, talo bee?” Boe ma Tamar bala nae, “Malole papa. Sadi papa fee au toꞌu tanda nemeheherek esa dei. Sudi losa faik hida, dei fo papa haitua bibi hiek naa mai.”
GEN 38:18 Boe ma Yahuda natane bali nae, “Au fee o hata dadi neu tanda nemeheherek?” Tamar naselu nae, “Papa laꞌo ela cap fo papa bokoliik naa no talin. Ma laꞌo ela teteꞌe ai boe.” Yahuda namanene nala naa, boe ma ana laꞌo ela basa buas sara raa neun. De dua sara reu sunggu-soro rakabua leo. Basa boe ma Tamar fali neu ngga. Ana buka heni ndia bualoꞌa-papake malolen ma tema popoi langgak naa, de ana pake falik ndia bua-loꞌa ina falun. Ta bubuluk te Tamar nairu ena.
GEN 38:20 Ta dook ka boe ma Yahuda noke tulun ndia nonoon Hira nae, “O muni bibi hiek ia feen neni ina petak manai Enaim naa neu, fo haꞌi muni falik au bua-baꞌung fo ana toꞌuk.” Hira losa naa, de natane neu-mai, tehuu ta natonggo no inak naa.
GEN 38:21 Boe ma ana natane hatahorir marai naa nae, “Wee! Ei mete-mita ina petak fo mana nasiꞌe nanggatuuk nai lelesu mason ia, do? Ana nai bee, ee?” Tehuu ara raselu rae, “Papa, nai ia ta hambu ina petak.”
GEN 38:22 Dadi Hira fali neni Yahuda neu. Ana nafada nae, “Au ta atonggo ua inak naa. Au sangga-sangga, tehuu hatahorir marai naa rafada rae, nai mamanak naa ta hambu ina petak.”
GEN 38:23 Yahuda naselu nae, “Ela bua-baꞌur raa ruma naa, fo ana soa sara leo. Sadi hatahorir ta rakamamaek ita. Huu au nau bae ena, tehuu ita ta tatonggo sana.”
GEN 38:24 Seli bulak telu, boe ma hatahorir reu rafada Yahuda rae, “O feto-feun Tamar naa, ana tao aon, leo ina petak ia. Hatematak ia kairuk ena.” Yahuda namanene nala naa, boe ma namanasa nalan seli. De ana fee parenda neu hatahorir raa nae, “Miu leꞌa muni inak naa ia mai, fo hotu malaok kana!”
GEN 38:25 Boe ma ara reu leꞌa Tamar, tehuu ana kalua heni cap ma teteꞌe ai naa. Boe ma ana nadenu sara reu rafada ndia ari-aman nae, “Papa, parisa sudik bua-baꞌur ia dei. Cap ma teteꞌe ai ia lamatuan ndia tao nairu au.”
GEN 38:26 Yahuda mete-nita bua-baꞌur raa, boe ma ana nalela memak kasa, huu naa ndia enan. De ana nafada nae, “Memak! Inak naa ta sala. Au ndia sala. Ndia ndaa. Tungga hadak, na, au muste feen sao nala au anang Sela. Tehuu au ndia ta nau. Makamboꞌik kana leo!” Basa boe ma Yahuda ta sunggu-soro nakabua no Tamar bali.
GEN 38:27 Tamar fain fo nae bonggi losa ena, boe ma ana bonggi ana duak.
GEN 38:28 Neu ana bonggi, kanak esa soro kalua liman. Boe ma ina mana makabobonggik paꞌa aba mbilas neu limak naa. Ana nae, “Ia ndia nomer kaesan.”
GEN 38:29 Tehuu kanak naa leꞌa falik liman dale neu. Boe ma toranoon ndia kalua nakahuluk. Ina mana makabobonggik kokolak mbali kanak naa nae, “Wee! O ia memak barakaik! Huu naa de o maseti makahuluk!” Boe ma ana foi kanak naa nade Peres (sosoa-ndandaan nae, ‘naseti kalua’).
GEN 38:30 Basa dei de fadin neni paꞌa aba mbilas naa kalua. Ara foin nade Sera (sosoa-ndandaan nae, ‘mbila kara-karak’).
GEN 39:1 Fai maneuk kara, hatahori Ismael asa raa roo Yusuf neni Masir neu. Numa naa, hambu hatahori ina-huuk esa, nade Potifar. Ndia naa, komedan numa basa soldadu mana manea manek Masir uma manen mai. Basa boe ma Potifar hasa nala Yusuf numa hatahori mana danggan nara mai, fo dadi neu ndia ata-daton nai ndia uman. Numa naa, MANETUALAIN tulun Yusuf, de ana tao natetu basa ue-osan no neulauk.
GEN 39:3 Yusuf malanggan mete-nita Yusuf ue-osan neulauk talo naa, boe ma ana bubuluk tebe nae, MANETUALAIN tulun neu Yusuf.
GEN 39:4 Huu naa de malanggan naa hii Yusuf, ma namahere neun. Boe ma ana soꞌuk kana dadi mandor nai ndia uman. Ana oo fee Yusuf koladu ndia uman ma ndia pusakan nara lalaꞌen boe.
GEN 39:5 Mulai numa Yusuf dadi mandor numa naa, Manetualain oo fee babaꞌe-babatik neu ndia malanggan, hatahori Masir naa boe. Ndia uma isin, ndia pusakan, ndia osi-lutun, ma ndia ue-osan basa-basan dadi no malole.
GEN 39:6 Neu Potifar mete-nita Yusuf koladu basa ue-osar no malole, huu naa de ana ta duduꞌa hata-hata bali, nalela kada naꞌa-ninu a mesan. Lelek naa, Yusuf mata-aon lolen seli.
GEN 39:7 Ana leo numa naa bei ta dook ka, tehuu Potifar saon dalen tuda neun ena. Boe ma ana kokoe Yusuf fo sunggu-soro sama-sama noon.
GEN 39:8 Tehuu Yusuf ta nau. Boe ma ana naselu nae, “Boso talo naa, mama! Huu au malanggang Potifar fee au koasa ena fo koladu basa ndia ue-osan lalaꞌen.
GEN 39:9 Nai uma ia, ta hambu hatahori laen ena fo toꞌu koasa lena heni au. Huu malanggan fee au koladu basa-basa sara ena. Kada Mama mesa kana ndia au ta aena haak fo koladu. Talo bee de au bisa tao manggarauk talo naa. Naa oo laban Manetualain hihii-nanaun ena boe!”
GEN 39:10 Leo mae talo naa, tehuu tungga faik malanggan naa saon, kada kokoen nakandooo. Tehuu Yusuf ta tao matak neun.
GEN 39:11 Laꞌe esa, Yusuf maso neni uma dale neu, fo nae mete ndia ue-osan. Faik naa, ta hambu hatahori laen nai uma dale.
GEN 39:12 Boe ma ndia malanggan saon mai, de toꞌu neu Yusuf badun, boe ma ana leꞌa nala Yusuf, de nae, “Mai leo! Hatematak ia ela kada ita dua ngga ena. Mai leo fo dua ngga teu sunggu-soro.” Tehuu Yusuf ta nau. Boe ma ana naleleꞌak, losa mboꞌi heni badun numa aon mai. De nalai dea neu. Tehuu inak naa bei toꞌu naherek badu naa.
GEN 39:13 Neu Potifar saon mete-nita Yusuf nalai dea neu laꞌo ela badun ena,
GEN 39:14 boe ma ana nanggou hatahori mana maue-osar, de nafada nae, “Wee! Ei mai mete-mita ia dei! Bebeik kara ia, tou Ibrani naa, maso neni au kamang dale mai. Ana nau tao manggarauk neu au, tehuu au bolu ahere. Ia, ana laꞌo ela badun, de nalai dea neu. Au saong ia, ana neni hatahori sesesu taak ia, fo tao kada nekemamaek neu ita!”
GEN 39:16 Boe ma Potifar saon toꞌu naherek badu naa losa Potifar fali.
GEN 39:17 Ndaa no saon fali, boe ma ana tui nae, “Kaꞌa, ee! Hatahori Ibrani fo kaꞌa nenin ia mai naa, bebeik kara ana maso neni au kamang dale neu ena, fo nau bode au!
GEN 39:18 Tehuu au bolu ahere fo anggou hatahorir. Boe ma ana kou nalai, laꞌo ela badun ia.”
GEN 39:19 Potifar namanene saon tui talo naa, boe ma ana namanasa nalan seli.
GEN 39:20 De ana nadenu hatahorir reu humu Yusuf. Boe ma ara teen neni manek buin dale neu.
GEN 39:21 Tehuu MANETUALAIN ta lilii neu Yusuf. Huu naa de MANETUALAIN tulun nakandoo neun, losa malangga bui naa oo hii nalan seli neu Yusuf boe.
GEN 39:22 Boe ma ana namahere Yusuf. Huu naa de ana feen koasa fo koladu basa hatahori buir lalaꞌen, ma koladu basa ue-osar marai naa.
GEN 39:23 De malanggan langgan ta nareo koladu hata-hata nai bui naa dale bali ena. MANETUALAIN tulun nakandoo Yusuf, huu naa de basa ue-osar marai bui naa dadi malole.
GEN 40:1 Nai bui naa dale, hambu hatahori dua dadi rita neu malangga mana maono-lalau nai manek Masir uma manen. Esa soa naono-lalau manek nininun. Esa bali soa naono-lalau manek rotin. Dua sara tao rasala manek. Huu naa de manek namanasa, losa ana tee sara reni bui dale reu. Dua sara rakabua rai mamanak esa ro Yusuf.
GEN 40:4 Boe ma malangga bui naa fee parenda neu Yusuf, fo naono-lalau penggawe kaduak kara raa. Ara leo ruma naa losa teuk esa do dua.
GEN 40:5 Leꞌodaek esa, penggawe kaduak kara raa rala meꞌi. Esa-esak no meꞌin. Ma meꞌis sara raa oo esa-esak no sosoa-ndandaan boe.
GEN 40:6 Neu beꞌe-main, Yusuf mai, ma mete-nita dua sara matan nara, mana masaloek kara.
GEN 40:7 Boe ma ana natane sara nae, “Tao hata de faik ia, ei dua ngga matam mara mana nggari henik kara talo naa?”
GEN 40:8 Boe ma ara raselu rae, “Leꞌodaek ka ai mala meꞌi, tehuu ai ta bubuluk sosoa-ndandaan.” Basa boe ma Yusuf kokolak nae, “Ta hambu hatahori dae-bafok esa boe na fo bubuluk meꞌis sosoa-ndandaan, kada Manetualain mesa kana. Soba ei tui dei. Dei fo au sangga sudi sosoa-ndandaan nara numa Manetualain mai.”
GEN 40:9 Basa boe ma hatahori mana maono-lalau manek nininun tui nae, “Talo ia. Nai au meꞌing dale, au mete-ita ai anggur huuk esa,
GEN 40:10 ndanan telu. Ai huuk naa nadoo, nabuna, ma naboa nggingginuk kara, losa rambalatu neuk ka.
GEN 40:11 Basa boe ma au mete-ita, au toꞌu manek nggalaa nininun. Boe ma au haꞌi ala anggor naa boan, de keꞌe oen neni manek nggalaan dale neu. Basa naa, au loon neu manek fo ninu.”
GEN 40:12 Yusuf namanene nala naa, boe ma nafada nae, “Papa. Meꞌis naa sosoa-ndandaan talo ia: Ndanak kateluk kara raa sosoa-ndandaan ndia faik telu.
GEN 40:13 Nai faik telu ia dalen, neu ko manek kalua heni papa numa bui dale mai. Boe ma ana soꞌu falik papa, fo naono-lalau seluk ndia nininun sama leo fai bakahulun.
GEN 40:14 Mete ma papa ua-nalen talo naa ena, na, boso lilii au, ee! Mete ma papa sue au, na, tulun mafada manek, fo ana oo kalua heni au numa ia mai boe.
GEN 40:15 Te mete ma tungga ndoon, na, ara haꞌi reni au no nekesetik numa hatahori Ibrani nggoron mai. Nai ia, au ta tao manggarauk hata-hata. Tehuu ta bubuluk te, ara tee au uni bui ia dale mai, sama leo au ia, hatahori manggarauk a mesan.”
GEN 40:16 Hatahori mana maono-lalau roti naa namanene nala meꞌis naa sosoa-ndandaan neulauk talo naa, boe ma ana tui Yusuf nae, “Fadi, ee. Au oo ala meꞌi talo ia boe: Au suu lembaneu neketotodok telu nai au langgan.
GEN 40:17 Nai lembaneu manai seku lain, ara mbeda manek koki-baroon mata-matak kara. Tehuu mbuik kara mai, de bido heni basa koki-barook kara raa ruma au langgang lain mai.”
GEN 40:18 Yusuf namanene nala naa, boe ma naselu nae, “Papa meꞌin sosoa-ndandaan talo ia: Lembaneu kateluk kara raa sosoa-ndandaan oo faik telu boe.
GEN 40:19 Nai faik telu ia dalen, mete te manek nadenu hatahorir mai tete heni papa langgan. Basa naa ara londa papa nenetun neu dii. Boe ma mbuik kara mai bido heni basa papa ao-mbaan.”
GEN 40:20 Seli faik telu, ndaa no manek fai bobonggin, boe ma ana tao feta moꞌok fee basa ndia penggawen nara. Ana fee parenda fo reu kalua heni penggawe kaduak kara raa ruma bui dale mai.
GEN 40:21 Basa boe ma ana soꞌu falik penggawe mana maono-lalau manek nininun naa, neu falik panggan bakahulun, fo ana naono-lalau seluk manek nininun.
GEN 40:22 Tehuu penggawe mana maono-lalau manek rotin naa, ara londa risan, ndaa tetar no Yusuf kokolan ena.
GEN 40:23 Tehuu penggawe mana maono-lalau nininuk naa, ta nasaneda Yusuf bali. Ana lilii heni Yusuf ena.
GEN 41:1 Seli heni teuk dua, boe ma manek Masir nala meꞌi. Ana nala meꞌi nambariik numa lee Nil tatain.
GEN 41:2 Medak neu ma, ana mete-nita sapi maao hitu. Roun nara manggadila moi-moik kara. Ara kalua numa lee naa mai, de raꞌa naꞌu numa naa.
GEN 41:3 Basa boe ma hambu sapi laen hitu bali kalua numa lee naa mai. Aon nara nggofa-siik kara. Ara rambariik deka-deka ro sapi maaor raa.
GEN 41:4 De sapi nggofa-siik kahituk kara raa, kodo heni sapi maao kahituk kara raa. Boe ma manek afe kaiboik.
GEN 41:5 Ta dook ka boe ma ana sunggu seli bali. De ana nala meꞌi seluk. Ana mete-nita hade mbule neuk hitu, kalua numa hade huu neulauk esa mai.
GEN 41:6 Basa de ana mete-nita bali, hade mbule langgak hitu mana malek kara laꞌe ani katobik ena.
GEN 41:7 Boe ma basa hade mbule langgak kara raa, kodo heni hade mbule neuk kahituk kara raa. Basa boe ma manek afe. Dei de ana bubuluk, ndia nala meꞌi seluk ena bali.
GEN 41:8 Neu huhua anan, boe ma manek duduꞌan ta namaneu. De ana fee parenda neu hatahorir fo reu tungga basa hatahori mana losi-laler ma hatahori malelak kara marai Masir. Basa de ana tui ndia meꞌin neu sara, tehuu ta hambu esa boe na bisa selu nala meꞌis naa sosoa-ndandaan.
GEN 41:9 Basa boe ma penggawe mana maono-lalau manek nininun naa, bei fo nasaneda nala Yusuf. De ana neu nafada manek nae, “Papa manek, au muste manaku au salang.
GEN 41:10 Fai bakahulun neu papa namanasa au ua au nonoong, de tee ai meni bui dale miu,
GEN 41:11 leꞌodaek esa, ai dua ngga mala meꞌi. Esa-esak no meꞌin, ma esa-esak no ndia sosoa-ndandaan.
GEN 41:12 Numa bui naa dale oo, hambu hatahori Ibrani bei muri-soruk esa boe. Malangga bui soꞌu nalan dadi neu malangga mana maono-lalau numa bui dale. Ai tui ai meꞌin neun. Boe ma ana nafada meꞌis sara raa sosoa-ndandaan.
GEN 41:13 Huu naa de papa manek soꞌu falik au. Tehuu au nonoong naa hambu hukun mates. Dadi basa naar, ndaa tetar sama leo hatahori Ibrani naa kokolan.”
GEN 41:14 Manek namanene nala naa, boe ma ana nadenu hatahori lai-laik neu nala Yusuf numa bui. Basa boe ma Yusuf nafafaꞌu nalolole aon, ma nggati bualoꞌa-papaken fo neu nasare manek.
GEN 41:15 Ana losa, boe ma manek kokolak nae, “Taꞌek, ee! Au ala meꞌi, tehuu ta hambu hatahori esa boe na fo bisa selu meꞌis naa sosoa-ndandaan. Tehuu hambu hatahori nafada au nae, o bisa.”
GEN 41:16 Boe ma Yusuf naselu nae, “Papa manek. Au oo ta ala hata-hata boe. Kada Manetualain mesa kana ndia bisa selu no tetuk meꞌis naa sosoa-ndandaan. Neu ko Ana nae nafada hata fo malole neu papa manek.”
GEN 41:17 Basa boe ma manek tui nae, “Nai au meꞌing naa dale, au ambariik numa lee Nil tatain.
GEN 41:18 Boe ma hambu sapi maao hitu, roun nara manggadila moi-moik kara. Ara kalua numa lee mai, de reu raꞌa naꞌu numa lee tatain.
GEN 41:19 Basa boe ma sapi laen hitu mai bali. Tehuu sapir raa nggofa-siik kara. Nai dae Masir ia, au bei ta ita sapi nggofa-siik matak leo naak!
GEN 41:20 Tehuu au heran laꞌe esak kana! Huu medak neu ma, sapi nggofa-siik kahituk kara raa, kodo heni sapi maao kahituk kara raa.
GEN 41:21 Ara kodo heni sara, tehuu sapir raa nggofa-siik rakandoo. Basa boe ma au afe kaiboik.
GEN 41:22 Basa de au sunggu seli bali, boe ma au ala meꞌi seluk. Au mete-ita hade mbule neuk hitu, kalua numa hade huu neulauk esa mai.
GEN 41:23 Basa naa, au mete-ita seluk bali, hade mbule langgak hitu, mana malek kara laꞌe ani katobik ena.
GEN 41:24 Boe ma basa hade mbule langgak kara raa, kodo heni hade mbule neuk kahituk kara raa. Basa naa au afe. Boe ma au tui meꞌis naa neu hatahori malelak kara. Tehuu ta hambu hatahori esa boe na fo bisa selu nala sosoa-ndandaan.”
GEN 41:25 Boe ma Yusuf selu nae, “Papa manek. Meꞌis kaduak kara raa sosoa-ndandaan kada esak ka. Manetualain nafada memak papa manek hata fo Ana nae taon.
GEN 41:26 Meꞌis naa sosoa-ndandaan talo ia: sapi maao kahituk kara raa, ma hade mbule neuk kahituk kara raa, ndia fai betes teuk hitu. Meꞌis sara raa sosoa-ndandaan esak ka.
GEN 41:27 Boe ma sapi nggofa-siik kahituk kara raa, ma hade langgak mbule kahituk kara raa, ndia fai ndoe-laꞌas teuk hitu.
GEN 41:28 De Manetualain nafada memak ena hata fo Ana nae taon. Naa, sama leo hata fo bebeik kara ia au afadak ena.
GEN 41:29 Neu ko ita hambu fai betes losa teuk hitu nai basa mamanak kara marai nusa Masir ia.
GEN 41:30 Basa naa, dei fo ita hambu fai ndoe-laꞌas losa teuk hitu. Neu ko fai ndoe-laꞌas naa, ta hohoꞌak sudi selik kana! Losa ta hambu nanaꞌak nai nusak ia bali. Basa hatahorir ndoe-laꞌa ralan seli, losa ara ta bisa rasaneda fai betes naa ena.
GEN 41:32 Papa manek nala meꞌi laꞌe dua naa sosoa-ndandaan nae, Manetualain henggenee memak ena. Ta dook ka bali, hata fo Ana henggeneek naa, mulai dadi ena.
GEN 41:33 Huu naa de au fee au hahambung talo ia: Malole lenak papa manek sangga hatahori malelak esa, fo bisa nakaneni no malole. Basa naa soꞌu malan fo ana koladu natalolole nusak ia.
GEN 41:34 Neu fai betes teuk hitu naa, malole lenak papa manek oo soꞌu hatahori laen bali boe, fo ara raduduru nanaꞌa lenan nara. Nanaꞌa lenan nara raa, ara baꞌe sara reu lima fo mbeda babaꞌek esa.
GEN 41:35 Ara muste tungga papa manek parendan, fo ara haꞌi hader numa basa nggorok kara marai Masir mai. Basa naa ara muste mbeda hader raa reu soka-poler fo ranea ratalolole sara.
GEN 41:36 Fo neu ko fai ndoe-laꞌas teuk kahituk kara raa losa, na, ita bei taena nanaꞌak. No dalak naa, ta hambu hatahori mate nahuu ndoes.”
GEN 41:37 Manek namanene Yusuf kokolak talo naa, boe ma manek no ndia penggawe moꞌon nara rakaheik tungga Yusuf hahambun naa.
GEN 41:38 Boe ma manek kokolak nae, “Manetualain Dula-dalen koasan hambu memak nai Yusuf ena. Huu naa de ta bisa dadi, ai hambu hatahori laen bali fo lena heni ndia.”
GEN 41:39 Boe ma manek kokolak no Yusuf nae, “Manetualain nafada basa dedeꞌak kara iar reu o ena. Hatematak ia, dei de ai bubuluk mae o ia malelak. Ma o malelan lena heni basa hatahorir.
GEN 41:40 Huu naa de hatematak ia au soꞌuk o dadi neu au lima konang, fo o dadi malanggan nai au uma manen. Ma neu ko basa au rau-inggung nggara tungga o parendan. Kada au mesa ngga ndia lena heni o.”
GEN 41:41 Basa boe ma manek olu heni ndia ndeli cap, de ana olun neni Yusuf lima kukun neu. De ana kokolak nae, “No dalak ia, au soꞌuk o dadi neu au lima konang nai basa nusa Masir ia.” Basa de ana olu badu naru tema bangganaꞌuk esa neu Yusuf, ma ana bokolii rante lilo mbilas neu boliin.
GEN 41:43 Basa boe ma ana fee ndia kareta ndara nomer kaduan neu Yusuf fo ana saꞌe. Hambu hatahori nalaik nakahuluk nesik mata fo nanggou taa-taa nae, “Wee! Soi dalak! Fee hada-horomatak! Hambu hatahori ina-huuk nae nesik ia!” No dalak naa, manek soꞌuk Yusuf dadi neu ndia lima konan nai dae Masir ena.
GEN 41:44 Basa boe ma manek kokolak no Yusuf nae, “Talo ia. O bubuluk memak ena, au ia manek. Au afada basa hatahorir marai Masir ena ae, mete ma o ta fee luas, na, ara ta bisa tao hata-hata.”
GEN 41:45 Basa boe ma manek foi Yusuf nade Safnat Panea, tungga hatahori Masir naden. Ana oo fee Yusuf sao nala inak esa boe, nade Asnat. Yusuf ari-aman nade Potifera. Ana ndia koladu anggama nai kota On. No dalak naa, Yusuf dadi neu hatahori ina-huuk nai dae Masir.
GEN 41:46 Neu ara soꞌuk Yusuf naa, teun nara 30. Basa boe ma ana laꞌo neu memete ndule basa mamanak kara marai dae Masir.
GEN 41:47 Nai fai betes teuk hitu naa dalen, basa osi-lutur nanaꞌan nara dadi ralan seli.
GEN 41:48 Boe ma Yusuf naduduru nanaꞌa lenak kara raa, fo ana mbeda sara. Hambu hader ruma mamanak kara deka no kota bee, na, ana mbeda sara neu kota naa soka-polen.
GEN 41:49 Losa hader buna-boan fo ana naduduru nalak kara raa noꞌun seli, sama leo sarakaek manai tasi tataik, losa ta hambu hatahori bisa uku-sudi nala sara ena.
GEN 41:50 Neu fai ndoe-laꞌas bei ta losa, Yusuf saon Asnat bonggi nala ana touk dua ena.
GEN 41:51 Boe ma Yusuf kokolak nae, “Manetualain tao nala au lilii heni au doidosong, neu au kalua numa au amang uman mai.” Huu naa de ana foi ana ulun nade Manase (fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan nae, ‘lilii’).
GEN 41:52 Neu ana hambu ana kaduan, boe ma ana kokolak bali nae, “Au hambu doidosok noꞌuk ka numa mamanak ia ena. Tehuu Manetualain fee babaꞌe-babatik, ma au hambu anak numa ia ena.” Boe ma ana foi kanak naa nade, Efraim.
GEN 41:53 Basa boe ma fai betes teu kahituk kara raa basa.
GEN 41:54 Boe ma fai ndoe-laꞌas teuk hitu mulai mai, ndaa no hata fo fai bakahulun Yusuf nafada memak ena. Nai mamanak laen hatahorir ndoe-laꞌa ena. Tehuu nai basa mamanak kara marai Masir, hambu nanaꞌak.
GEN 41:55 Doo-doo boe ma hatahori Masir asa mulai ndoe-laꞌa. De ara reu roke nanaꞌak numa manek. Boe ma manek nadenu sara reni Yusuf reu, fo tungga Yusuf parendan.
GEN 41:56 Tehuu fai ndoe-laꞌas naa tamba ta hohoꞌak bali, losa basa mamanak kara marai Masir oo ndoe-laꞌa boe. Boe ma Yusuf mulai sai heni basa soka-poler fo seꞌo hader reu hatahori Masir asa.
GEN 41:57 Basa boe ma hatahorir sudi ruma bee mai reu hasa nanaꞌak numa Masir, nahuu fai ndoe-laꞌas naa nemetaꞌuk ndoos.
GEN 42:1 Lelek naa, papa Yakob namanene hatahorir rae hambu hade nai Masir, boe ma ana kokolak no anan nara nae, “Ana nggara ein, ee! Tao hata de ei nggua-nggua mamananauk kana talo kada naa!
GEN 42:2 Au amanene ena rae, nai Masir hambu nanaꞌak. Malole lenak ei miu hasa nai naa dei, mita fo ita boso mate nahuu ndoes.”
GEN 42:3 Basa boe ma Yusuf kaꞌa kasalahunun nara rahehere fo rae reu hasa nanaꞌak nai Masir.
GEN 42:4 Tehuu Yakob ta nau mboꞌi Yusuf fadi muri anan Benyamin fo neu sama-sama no sara. Ana duꞌa nae, “Boso losak kanak naa hambu sosoek bali!”
GEN 42:5 Huu hatahorir sudi rai bee ramanene ena hambu nanaꞌak nai Masir, de hatahori noꞌuk ka reu hasa nai naa. Fai ndoe-laꞌas naa oo losa dae Kanaꞌan boe. De Yakob anan nara oo tungga reu hasa nai naa boe.
GEN 42:6 Lelek naa, Yusuf dadi neu manek lima konan nai Masir ena. Mete ma hatahorir ruma sudi bee mai fo rae hasa hade, na, Yusuf ndia seꞌo neu sara. Huu naa de neu kaꞌan nara losa, ara reu sendek luu-langgan nara fee hada-horomatak neun, losa idu-matan nara laꞌe daer.
GEN 42:7 Neu ana mete-nita sara, boe ma ana nalela memak kasa. Tehuu Yusuf tao aon sama leo hatahori Masir, huu naa de ara ta ralela sana. Boe ma ana natane sara no hara berak nae, “Eir ia, numa bee mai?” Boe ma raselu rae, “Air ia numa Kanaꞌan mai. Ai mai fo mae hasa nanaꞌak nai papa.”
GEN 42:9 Boe ma Yusuf nasaneda ndia meꞌin fai bakahulun naa. De ana nakatataꞌuk kasa nae, “Au ta amahere! Ei basa ngga ia mana mamaꞌur. Ei mai fo sangga bubuluk dae Masir nemeninon, fo basa naa fali mai nggafu fee ai, hetu!”
GEN 42:10 Tehuu ara raselu rae, “Taa, papa! Air ia kada papa hatahori neondan. Tebe-tebe ai mai kada mae hasa nanaꞌak.
GEN 42:11 Ai basa ngga ia amak esa. Ai ta mana mamaꞌur, papa! Ai hatahori neulauk kara.”
GEN 42:12 Tehuu Yusuf kokolak tamba nahere haran bali nae, “Weeh! Kokola bafa rouk! Boso pepeko-leleko au! Memak tebe eir ia mana mamaꞌur. Ei mai fo mae sangga bubuluk nusak ia nemeninon nara!”
GEN 42:13 Boe ma ara rasabara rae, “Taa, papa! Air ia kada papa hatahori neondan! Ai numa dae Kanaꞌan mai. Ai kaꞌa-fadik hatahori salahunu dua. Ai basa ngga amak esa. Ai fadi muri anan nahani no papa. Ma ai fadim esa ta sana ena.”
GEN 42:14 Boe ma Yusuf naselu nasafali nae, “Taa! Hata fo au afadak bebeik kara ia tebe naa ena! Eir ia memak mana mamaꞌur.
GEN 42:15 De ei muste fee bukti dei, fo au bubuluk ei kokolam bebeik kara ia, memak tebe do taa. Au sumba-soo! Mete ma ei fadi muri anam naa ta neni ia mai, na, ei ta bisa laꞌo ela nusak ia!
GEN 42:16 De ei here mala hatahori esa fo neu nala fadi muri anak naa ia mai. Laen nara, au oka sara. Au nau mete-ita ei kokolak tebe do taa. Mete ma taa, na, memak tebe ei mana mamaꞌur.”
GEN 42:17 Basa boe ma Yusuf nadenu oka sara ruma bui dale faik telu.
GEN 42:18 Neu fai katelun, boe ma Yusuf neu kokolak no sara ruma bui nae, “Au ia, hatahori esa fo mana namataꞌu Manetualain. Ma au soa tungga Ndia hihii-nanaun. Au nau akamboꞌik ei, mita fo ei bisa masoda. Tehuu ei muste tao matetu dedeꞌak esa.
GEN 42:19 Mete ma ei kokolak tungga ndoon, na, ei muste matudu bukti neu au. Dalan talo ia: au oka hatahori esa neu bui dale. Ei laen nara fali fo meni nanaꞌak fee ei nufanelum. Huu ara rahani ei fali meni nanaꞌak.
GEN 42:20 Basa naa ei mia ei fadim naa mai, fo dadi neu bukti nae ei hatahori ndoos sara. Mita fo au boso hukun mates neu ei.” Ara ramanene rala naa, boe ma rakaheik.
GEN 42:21 Basa boe ma esa kokolak no esa nae, “Hatematak ia ita hambu babalak numa ita sala-singgon ndia fai maneuk kara, fo ita taon neu ita fadin ena. Ita mete-tita ana doidoso nalan seli ena, losa ana noke tutulu-fafalik, tehuu ita ta tao matak neun. Huu naa de hatematak ia ita doidoso talo ia.”
GEN 42:22 Boe ma Ruben fee nesenedak neu sara nae, “Fadi nggara ein! Fai bakahulun au kaꞌi ei ena, fo boso tao hata esa boe na neu kanak naa, hetu! Tehuu ei ta nau nenene au kokolang. Huu naa de hatematak ia ita lemba-tasaa tala Yusuf daan ena maa.”
GEN 42:23 Sira esa kola-kola mbali esa talo naa, tehuu ara ta bubuluk rae Yusuf oo nalela sira dedeꞌan boe. Huu neu Yusuf kokolak no sara, ana pote pake dedeꞌa Masir, dei fo mana kokolak salin neni dedeꞌa Ibrani neu.
GEN 42:24 Yusuf namanene sira esa kola-kola no esa talo naa, boe ma ana nambadeik laꞌo ela sara, de neu buꞌi mesa kana numa mamana laen. Neu ana buꞌi basa ena, boe ma ana fali neni toranoon nara neu. De ana nadenu hatahori paꞌa Simeon numa toranoon nara matan.
GEN 42:25 Basa boe ma Yusuf fee parenda neu ndia hatahorin nara, fo radai hader reni kaꞌan nara karon dale reu. Ma mbeda falik esa-esak doin neu sira karon bafon. Ana oo nadenu hatahorir raa fee sara lepa-nggees boe. De hatahorir raa tao tungga Yusuf parendan.
GEN 42:26 Basa boe ma Yusuf kaꞌan nara fua basa karon hader raa reni sira keledein reu. De ara laꞌo fali reu sara.
GEN 42:27 Neu ara hahae taak numa dalak, boe ma esa numa sira mai sefi ndia karon talin, fo nae fee keledein naꞌa. Tehuu ana mete-nita ndia doin numa hader bafon.
GEN 42:28 Ana nggengger nalan seli! Boe ma ana nanggou kaꞌan nara nae, “Awii! Ei mai mete sudik ia dei! Ara fee falik au doing nai au karong dale. De ita soe ia ena maa!” Ara mete-rita talo naa, boe ma tendak heni samanen nara, de ramataꞌu ralan seli. Boe ma ara kokolak rae, “Manetualain tao ita talo bee ia ena bali?”
GEN 42:29 Basa boe ma ara laꞌo rakandoo losa Kanaꞌan, de ara tui sira aman basa hata fo dadi ena.
GEN 42:30 Ara rafada rae, “Papa, ee! Manek Masir lima konan naa, ana sudi selik kana. Ndia kokolan barakai ndoos. Ana nakasasaꞌek salak neu ai nae, ai miu mamaꞌu ndia nusan.
GEN 42:31 Tehuu ai maselu mae, ‘Taa! Ai kokolak tungga kada ndoon. Air ia ta mana mamaꞌuk kara.
GEN 42:32 Ai hatahori neulauk kara. Ai basa ngga toranook salahunu dua. Ai ama bonggik esa. Tehuu esa ta sana ena, ma muri anak nahani no papa nai Kanaꞌan.’
GEN 42:33 Boe ma papa naa nae, ‘Au ae soba, eir ia ndoos sara do taa! Ei esa muste nahani nai ia. Ei laen fali, meni hader fee ei nufanelum mara, mita fo ara boso mate nahuu ndoes.
GEN 42:34 Ei muste mia ei fadim mai dei. No dalak naa, dei fo au bubuluk ei ta mana mamaꞌur, tehuu memak ei hatahori ndoos sara. Dei fo au bisa akamboꞌik ei toranoom fo au oka elak naa ena. Boe ma au fee luas fo ei bole sudi bee miu, nai nusak ia.’ ”
GEN 42:35 Ara tui rateꞌe, boe ma ara mulai sai sira karon nara isin. Medak neu ma, ara mete-rita esa-esak doin bei nai sira karon dale. Yakob mete-nita talo naa, boe ma ana no basa anan nara ramataꞌu ralan seli.
GEN 42:36 Basa boe ma Yakob kokolak no sara nae, “Eir ia tao mamopo au anang nggara ena. Yusuf ta sana ena. Simeon oo leo naak boe. Hatematak ia oo ei mae mia Benyamin bali boe? Eir ia tebe-tebe kada mae tao doidoso au!”
GEN 42:37 Boe ma Ruben kokolak mbali aman nae, “Papa, ee! Loo lima Benyamin neu au leo. Au ndia ataa. Au helu-bartaa, neu ko au ua falik kana neu papa. Tehuu mete ma taa, na, elan fo papa hala heni au ana tou kaduang nggara.”
GEN 42:38 Tehuu Yakob naselu falik kana nae, “Ta bisa! Ei ta bole mia Benyamin. Huu kaꞌan Yusuf maten ena. Hatematak ia ela kada mesa kana. Mete ma ana oo hambu sosoek nai dalak boe, na, ei tao susa-sonak tamba nai au langgang losa au konda uni rates uu.”
GEN 43:1 Lelek naa, fai ndoe-laꞌas numa Kanaꞌan tamba sudi selik kana bali.
GEN 43:2 Yakob nufanelun nara raꞌa rabasa nanaꞌak kara fo fai maneuk kara ndia anan nara reni numa Masir mai. Boe ma ana nafada sara nae, “Ana nggara ein! Malole lenak ei fali meni Masir miu, fo hasa seluk fee ita hade bali dei.”
GEN 43:3 Tehuu Yahuda naselu nae, “Papa! Fai maneuk kara, manek Masir lima konan naa fee nesenedak nahere neu ai ena nae, ai ta bole matudu matan nara reu ndia, mete ma ai ta mia papa ana muri anan Benyamin!
GEN 43:4 De papa muste fee luas neu fadi Benyamin, fo tungga no ai dei. Dei fo ai nau miu hasa nanaꞌak fee papa.
GEN 43:5 Tehuu mete ma papa ta nau fee Benyamin neu, na, ai oo ta miu boe. Te hatahori Masir naa kokolak talo naa ena na!”
GEN 43:6 Boe ma Yakob ndindia sara nae, “Tao hata de ei mafada hatahori naa ena mae, ei fadim bei ela esa bali! Ei sangga-sangga salak fo kada makasususak au!”
GEN 43:7 Boe ma ara kokoe rae, “Papa, ee! Hatahori naa kada natane nakandook kana, fo nae sangga bubuluk ita ma basa ita nufanelun nara lalaꞌen. Ana natane nae, ‘Talo bee? Ei amam bei masodak, do? Ei bei ela fadi touk laen bali, do?’ De ai mae talo bee bali? Nau ta nau, ai kokolak tungga kada ndoon leo. Te see bubuluk nae, ana nau nadenu ai mia ai fadin naa neu?”
GEN 43:8 Boe ma Yahuda kokolak tamba bali nae, “Papa! Fee luas kakanak ia neu no ai leo. Au helu-bartaa, mete ma dadi hata esa neun, na, dei fo au ataa nggatin. Mete ma au ta ua falik kana no sodak neu papa, na, dei fo papa ndae salak naa neu au losa mate. De Papa fee luas kakanak ia leo, huu ai nau laꞌo ia ena. Malole lenak ai miu lai-laik fo ketuk boso mate nahuu ndoes.
GEN 43:10 Soba mete ma ai ta mahani doo basa ia, na, ai miu-maik laꞌe dua ena.”
GEN 43:11 Basa boe ma sira aman nae, “Mete ma talo naa, na, ei tao talo ia leo. Miu haꞌi mala ita daen isi-minan neulaun lenak. Ndia: fani oe, bumbu-fanir, ai daa kaboo menik, modo salaf, kanari ma fufue laen bali. Basa naa meni fee manek Masir lima konan naa, fo mae ia ita fefeen.
GEN 43:12 Ei oo meni doik baꞌu lena laꞌe dua boe, nahuu ei muste fee falik doik fo ei hambun numa ei karom dale, ndia fai maneuk kara raa. Fama te hatahorir raa ndia tao sala.
GEN 43:13 Ei oo mia ei fadim boe, basa naa fali lai-lai naa miu, ee!
GEN 43:14 Au hule-haradoi fo Manetualain mana Koasa Mateꞌen, oꞌofe-fafae manek Masir lima konan naa, fo nameda kasian neu ei. Losa ana nau fee falik Benyamin no Simeon neu ei, fo ei basa ngga fali sama-sama. Tehuu mete ma au anang nggara muste mopo, elan fo au lemba-asaa susa-sonak naa nakandoo leo.”
GEN 43:15 Basa boe ma ara reu rakabubua rala sira fefeen ma doik kara raa, fo reni sara Masir reu. Ara oo roo Benyamin boe. Ara losa naa, boe ma reu rasare Yusuf.
GEN 43:16 Neu Yusuf mete-nita Benyamin no kaꞌan nara, boe ma ana nadenu ndia malangga mana maono-lalaun nae, “Mia hatahorir ia reni au umang reu! Basa naa miu tati sapi esa fo dode-nasu malada-malada. Huu neu ko ara raꞌa nai ledo tetuk ia ro au.”
GEN 43:17 Boe ma malangga mana maono-lalaun naa, tao tungga Yusuf parendan. De ana noo sara reni Yusuf uman reu.
GEN 43:18 Neu ara laꞌo reni Yusuf uman reu, kaꞌan nara ramataꞌu ralan seli. Neu ara bei laꞌok numa dalak, esa kokolak no esa nae, “Tao hata de ana nadenu ro ita ia mai? Fama te ana nae nakasususak ita, nahuu doik fo ara fee falik kasa numa ita karon nara dale ndia fai maneuk naa. Ara kedi rae ro ita ia mai, fo medak neu ma ara humu rala ita, fo tao ita dadi neu ndia ata-daton. Basa boe ma ara leꞌa rala basa ita keledein nara.”
GEN 43:19 Huu naa de neu ara sangga deka-deka Yusuf uman ena, boe ma ara kokolak ro malangga mana maono-lalaun naa rae,
GEN 43:20 “Papa! Ai moke ambon, huu fai maneuk kara ai mai hasa mita nanaꞌak numa ia ena.
GEN 43:21 De neu ai fali meni ai nggoron miu, ai hahae numa dalak fo mae sunggu. Boe ma ai buka ai karon nara fo mae fee bandar raꞌa. Ta bubuluk te ai hambu falik ai esa-esak doi hasa haden nara ruma karon dale. Ai ta bubuluk see ndia tao sara reu naa! Tehuu hatematak ia ai meni falik basa doik kara raa ena. De papa boso mamanasa, ee! Mita fo papa bubuluk, hatematak ia ai oo meni doik laen bali, fo mae hasa nanaꞌa beuk.”
GEN 43:23 Boe ma malangga mana maono-lalau naa naselu nae, “Ei matu-matu a leo! Hae mamataꞌu! Fama te ei Lamatuam ndia fee babaꞌe-babatik neu ei nai ei karom mara naa dale. Fai maneuk naa, au simbo ala basa ei doim mara ena. Ei ta mahuta ena.” Basa boe ma ana mboꞌi falik Simeon neni sira neu.
GEN 43:24 Boe ma basa sara maso reni Yusuf uman dale reu. De malangga mana maono-lalau naa fee sara oe fo ara safe ralao ein nara. Ana oo fee sira keledein nara raꞌa boe.
GEN 43:25 Basa boe ma ana nafada nae, “Dei fo ei miꞌa ledo tetuk sama-sama mia malanggan.” Neu ara bei rahani Yusuf mamain, ara raole memak sira fefeen.
GEN 43:26 Neu Yusuf losa, boe ma basa sara sendek luu-langgan nara reu matan. De loo sira fefeen nara neun.
GEN 43:27 Boe ma Yusuf natane sara nae, “Talo bee? Ei basa ngga sodak kara, do? Ei amam fo lasik naa ena talo bee? Ana oo sodak boe, do?”
GEN 43:28 Ara raselu rae, “Papa ata lasin, fo ai ama bonggin naa bei sodak.” Boe ma ara kaur langgan nara fo fee hada-horomatak neun bali.
GEN 43:29 Basa boe ma Yusuf leleuk ndule sara, losa ana mete-nita ndia fadin Benyamin. Sira dua sara ina esa ma ama esa. Boe ma ana nae, “Ooo! Ndia ena, ei fadi muri anam fo ei tuik fai maneuk kara raa ena, do?” Boe ma ana kokolak no Benyamin nae, “Ana, nggee! Au hule-haradoi fo Manetualain fee babaꞌe-babatik noꞌuk ka neu o.”
GEN 43:30 Yusuf mete-nita Benyamin naa, boe ma dalen hii nalan seli fo nahindan doo basa ia naa nae mboꞌa dea mai ena. Te ana sue nalan seli neu fadin na. Ana ta bisa nakataka nala dalen ena. Boe ma ana lai-laik laꞌo ela sara, fo maso neni kaman dale neu. De ana buꞌi nasakekedun numa naa.
GEN 43:31 Ana buꞌi nateꞌe, boe ma neu narou oe. Ana tao natetea dalen, de dea neu natonggo no sara. Boe ma ana nadenu mana mafafaꞌu uman nara reu rambembeda mei nanaꞌak.
GEN 43:32 Ara fee Yusuf mesa kana naꞌa feꞌe neu mei esa. Ndia kaꞌa-fadin nara raꞌa reu mei laen. Ndia penggawe hatahori Masir asa oo raꞌa feꞌe reu mei laen boe, nahuu ara nunute mete ma raꞌa rakabua ro hatahori Ibranir.
GEN 43:33 Malangga mana maono-lalau naa tao talo naa ena, fo fee kaꞌa-fadin nara ranggatuuk rasasare aok ro Yusuf. Ana fee sara esa-esak ranggatuuk tungga sira teun nara, mulai numa kaꞌa uluk losa fadik mateꞌen. Neu ara mete-rita sira nenggetuun nara talo naa, boe ma ara heran.
GEN 43:34 Basa de Yusuf koladu fo ndia mana mafafaꞌu uman nara haꞌi fee kaꞌa-fadin nara nanaꞌak numa ndia mein mai. Basa sara simbo koko babaꞌuk. Tehuu ara tao Benyamin enan, baꞌu lena laꞌe lima numa ndia kaꞌan nara mai. Boe ma basa sara raꞌa-rinu losa poꞌon nara rakabete ralan seli.
GEN 44:1 Ara raꞌa-rinu basa, boe ma Yusuf kutu-kutu no ndia malangga mana maono-lalaun nae, “O muu madai hader reni hatahorir ia esa-esak karon dale reu, losa sofe sara. Basa naa o tao seluk doin nara reni sira esa-esak karon dale reu.
GEN 44:2 Boe ma o haꞌi mala au moo lilo fulang, fo taon neni kana muri anak karon dale neu.” De neu tao tungga Yusuf parendan.
GEN 44:3 Neu beꞌe-mai huhua anan, boe ma Yusuf mboꞌi sara fo fali reni nanaꞌak kara ro sira keledein.
GEN 44:4 Ara laꞌo bei ta dook ka numa kota mai, boe ma Yusuf nafada ndia malangga mana maono-lalaun nae, “O malaik muu husi tungga hatahorir raa lai-laik. Mete ma husi hambu sara ena, na, o mafada talo ia, ‘Tao hata de ei pepeko tou lasik? De ei bala ndia neulaun no tatao-nonoꞌi manggarauk talo ia!
GEN 44:5 Tao hata de ei dalem mara malak mamanaꞌo meni tou lasik moo lilo fulan? Ei ta bubuluk, do? Naa, ta kada tou lasik moo nininun! Ana oo pake mook naa fo tiro hatahori ua-nalen boe. Te mook naa neni malelak na! Ei tatao-nonoꞌim mara ia memak manggarauk sudi selik kana!’ ”
GEN 44:6 Basa boe ma malangga mana maono-lalau naa husi neu losa hambu sara. Boe ma nafada sara tungga Yusuf kokolan bebeik kara.
GEN 44:7 Boe ma ara rasabara rae, “Papa duduꞌan talo bee ia? Ai sumba-soo. Ta bisa dadi ai tao manggarauk talo naa!
GEN 44:8 Papa mesa kana bubuluk ena, hetu? Doik kara raa maruma ai karon nara dale ndia fai maneuk naa, ai fee falik kasa reu papa ena, hetu? Dadi talo bee de ai bei malak mamanaꞌo malanggan lilo fulan do lilo mbilan numa uman mai! Ta bisa dadi!
GEN 44:9 Papa parisa leo! Hambu buas naa nai see karon dale, na, hukun mates neun leo! Ma elan fo ai laen nara iar, dadi neu papa ata-daton leo.”
GEN 44:10 Basa de malangga mana maono-lalau naa nae, “Taa! Talo kada ia leo. Mete ma hambu mook naa nai see, na, ana dadi neu au kuling. Laen nara bole fali.”
GEN 44:11 Boe ma ara rakonda lai-laik karon nara raa. De ara buka memak kasa.
GEN 44:12 Malangga mana maono-lalau naa parisa no lutuk karon nara raa esa-esak, mulai numa kaꞌa uluk karon mai, losa fadi murik enan. Boe ma ana mete-nita moo lilo fulak naa numa Benyamin karon dale.
GEN 44:13 Benyamin kaꞌan nara mete-rita talo naa, boe ma dalen nara rakalulutu ralan seli. Ara fua falik karon nara raa reni keledei lain reu, de ara lenggu fali reni kota reu.
GEN 44:14 Neu ara fali losa Yusuf uman, ana bei numa naa. Boe ma ara sendek luu-langgan nara reu matan.
GEN 44:15 De Yusuf mboka nasaparak kasa nae, “Weeh! Tao hata de ei tao au talo ia! Ei ta bubuluk mae hatahori ina-huuk leo au ia, bisa pake malelak fo sangga bubuluk hatahori nemeninon?”
GEN 44:16 Boe ma Yahuda naselu nae, “Awii! Manetualain lufa nakaholak ai sala-singgon nara ena, de ai mae kokolak hata bali, papa? Ai mae masalaꞌe ai aon nara talo bee bali. Mete ma papa nae kaꞌi ela ai fadi muri anan ia, na, malole lenak papa kaꞌi ela ai basa ngga. Haꞌi mala ai basa ngga, dadi neu papa ata-daton leo.”
GEN 44:17 Tehuu Yusuf naselu nae, “Taa! Hambu mook naa nai see, na, ana ndia dadi neu au kuling! Ei laen nara akamboꞌik kasa. Fali meni ei amam miu leo!”
GEN 44:18 Basa boe ma Yahuda neu deka-deka no Yusuf, de ana kokolak nae, “Papa! Au bubuluk papa koasan sama leo manek ia. Huu naa de boso mamanasa au dei. Au oke luas fo kokolak faa ua papa.
GEN 44:19 Afik ka papa natane ai ena mae, ‘Ei amam ma fadim esa bei elan, do?’
GEN 44:20 De ai maselu mae, ‘Ai aman lasik ena. Ma hambu ai fadi muri anan boe. Neu bonggin, ai aman lasik ena. Fadi muri anak naa, hambu kaꞌa tora ndunun esa, tehuu maten ena. Sira dua sara inan oo maten ena boe. De hatematak ia, ela kada fadi muri anak mesa kana. Huu naa de ai aman sue nalan seli neun.’
GEN 44:21 Boe ma papa nadenu ai meni ai fadin naa neni ia mai, fo papa bisa mete-nitan.
GEN 44:22 De ai maselu mae, kanak naa ta bisa laꞌo ela aman. Mete ma ana laꞌo elan, na, ai aman maten naa ena.
GEN 44:23 Boe ma papa naselu nae, ‘Mete ma ei ta meni ei fadi muri anam naa, na, ei ta bisa mete-mita au matang ena.’
GEN 44:24 Basa boe ma ai fali. Losa ai aman, boe ma ai mafada basa papa kokolan nara naa lalaꞌen.
GEN 44:25 Doo-doo boe ma ai nanaꞌan nara basa ena. De ai aman nadenu ai fali meni Masir mai, fo hasa nanaꞌak bali.
GEN 44:26 Tehuu ai maselu mae, ‘Papa, ee! Ai ta bisa naa miu ena. Huu manek lima konan naa nafada ena nae, mete ma ai ta mia ai fadi muri anan, na, ai ta bisa mete-mita ndia matan. De ai fadi muri anan muste tungga neu dei, dei fo ai miu.’
GEN 44:27 Basa naa ai aman kokolak bali nae, ‘Ei bubuluk ena, hetu? Au saong Rahel naa, anan kada duak ka.
GEN 44:28 Ana uluk ta sana ena. Mete te banda fuir raꞌa henin ena. Huu naa de losa hatematak ia, au ta mete-ita sana ena.
GEN 44:29 Mete ma ei haꞌi meni kana muri anak ia numa au mai bali, boe ma ana hambu sosoek, na, ei tao tamba makasususak au, fo lasik ia ena, de au mate leo.’
GEN 44:30 Talo ia, papa. Mete ma au fali uni au amang uu, ma ta ua falik fadi muri anak ia, neu ko ai aman maten naa ena. Te ndia samanen nakaesa no kanak ia na. Ana nambalasi nalan seli ena, de mete ma ai tao tamba makasususak kana, neu ko maten.
GEN 44:32 Lenak bali au helu-bartaa ua au amang ena ae, au ndia ataa kanak ia. Au helu-bartaa ua au amang mete ma au ta ua fali kanak ia neu ndia, na, dei fo au ataa salak naa losa mate.
GEN 44:33 De au oke talo ia, papa: Elan fo au mesa ngga ndia ahani ia nggatin, dadi neu papa ata-daton. Elan fo ana fali no kaꞌan nara.
GEN 44:34 Mete ma kanak ia ta tungga, na, au oo ta bisa fali boe. Au ta akatataka ala mete-ita ai aman doidoso losa mate.”
GEN 45:1 Yusuf namanene nala naa, boe ma dalen noe losa ta bisa nakataka nala nai ndia penggawe nara matan bali. Huu naa de ana nadenu sara dea reu, fo ela kada ndia mesa kana no ndia kaꞌa-fadin nara. No dalak naa, ana bisa manaku aon nae, ndia naa, see.
GEN 45:2 De basa penggawer raa dea reu, boe ma ana buꞌi nakarereu nahere, losa basa hatahori Masir asa marai kama naa dea ramanene. Ma hatahorir marai manek uman oo ramanene boe.
GEN 45:3 Basa boe ma Yusuf nafada no ledo-ledo neu ndia toranoon nara nae, “Kaꞌa-fadi nggara ein, ee! Au ia Yusuf, ei toranoom! Memak papa bei sodak, hetu?” Kaꞌa-fadin nara ramanene rala naa, boe ma ramataꞌu ralan seli, losa ara unggu ta kukudu ena.
GEN 45:4 Boe ma Yusuf nggaper asa nae, “Basa ngga deka-deka mai mata ia dei.” De ara reu deka ro Yusuf. Boe ma ana kokolak seluk nae, “Au ia Yusuf, fo fai bakahulun ei seꞌo henin neni Masir neu.
GEN 45:5 Memak ei seꞌo heni au ena. Tehuu boso mamataꞌu, ma boso mareresi fo esa ndae salak neu esa bali. Naa te Manetualain mesa kana ndia no au ia mai, akahuluk numa ei mai. No dalak naa, Ana pake au fo tao asoi-asoda hatahori noꞌuk ka, mita fo ara boso mate nahuu ndoes.
GEN 45:6 Hatematak ia, fai ndoe-laꞌas bei fo dadi teuk dua. Bei ela teuk lima bali. Lelek naa, hatahori ta mbomboꞌa-kakali dae, ta sele-tande, ma ta hambu dae isi-minan hata-hata.
GEN 45:7 No dalak fo ita ta bubuluk sosoa-ndandaan ia, Manetualain neni au akahuluk numa ei mai. Mita fo ketuk numa ei mai, ma ei umbu-anam mara ndia rasoda.
GEN 45:8 Dadi ndondoon ndia, ta huu no ei tataom mara de au losa ia, tehuu ia Manetualain nanaen. Ana ndia naen de au dadi uu manek lima konan nai Masir. Boe ma au dadi malangga mana maono-lalau nai manek uma manen. Ta hambu hatahori laen moꞌon lena heni au.
GEN 45:9 De hatematak ia, ei fali lai-laik leo, fo meni au harang neu papa mae leo ia, ‘Papa anan Yusuf naa, bei masodak! Ana dadi neu hatahori ina-huuk nai Masir ena. Ana oo noke papa neni Masir neu lai-laik boe.
GEN 45:10 Dei fo papa bole leo nai nusa Gosen deka no ndia. Mamanak naa neulauk ma loak, de papa bisa nakaboi basa papa bibi hien, bibi lombon, ma sapin nara lalaꞌen. Boe ma ana oo noke fo papa neu no umbu-anan, uma isin, ma basa pusakan nara lalaꞌen fo leo rakandoo nai naa boe.
GEN 45:11 Mete ma papa nai Gosen, na, ana bisa nanea papa nai naa. Huu fai ndoe-laꞌas bei ela teuk lima bali. De dei fo ana koladu fo papa, nufaneluk kara, ma basa papa banda-manun nara lalaꞌen ta toꞌa kuran hata esa boe na.’ ”
GEN 45:12 Yusuf nafada basa, boe ma ana kokolak bali nae, “Hatematak ia, ei mete-mita no ei matam ena, hetu? Ma o Benyamin. Au ia, memak Yusuf.
GEN 45:13 De mafada ita aman mae, au koasang nai Masir ia moꞌon seli. Ma tui papa basa hata fo ei mete-mitan ena boe. Basa naa ei mia papa lai-laik neni ia mai leo!”
GEN 45:14 Boe ma ana holu nala fadin Benyamin, de dua sara buꞌi.
GEN 45:15 Ana oo holu nala kaꞌan nara boe, de ana idu esa-esak. Basa naa, dei de ara mulai kokolak roon.
GEN 45:16 Basa naa, neu manek no ndia penggawen nara ramanene Yusuf kaꞌa-fadin nara mai, boe ma basa sara ramahoko.
GEN 45:17 Basa boe ma manek kokolak noon nae, “Yusuf, ee! Mafada o kaꞌa-fadim mara, fo ara fua rala hader reu sira keledein nara lain, fo reni sara Kanaꞌan reu.
GEN 45:18 Basa naa madenu sara ro o amam no basa nufanelum mara lalaꞌen, fo ara lali reni ia mai leo. Dei fo au fee sara dae fo neulaun lenak nai Masir, fo ara bisa leo-laꞌo neu naa, ma ara raꞌa numa dae naa isi-minan mai.
GEN 45:19 Boe ma mafada sara, fo ara reni memak kareta hida numa ia neu, fo ara fua kakana anar ma o amam.
GEN 45:20 Boso duduꞌa pusaka fo ara ta bisa koꞌo-baꞌu reni sara raa, huu basa hata fo neulauk lenak nai Masir ia, dei fo ara soa sara.”
GEN 45:21 Yusuf namanene nala naa, boe ma ana fee sara kareta hida, ma lepa-nggees nai dalak, tungga manek parendan. Ma ndia kaꞌa-fadin nara oo raole fo fali reu sara tungga manek parendan boe.
GEN 45:22 Yusuf oo fee sara esa-esak bua-loꞌa beuk pasan esa boe. Tehuu ana fee Benyamin doi fulak 300, no bua-loꞌa beuk pasan lima.
GEN 45:23 Ana oo haitua fee aman bua-baꞌu malole mateꞌen numa Masir mai boe, de ara fua sara reu keledei mane salahunu. Ana fee tamba seluk hade, roti, ma nanaꞌak mata-matak kara, reu keledei ina salahunu lain, fo dadi reu sira lepa-nggeen, neu ara fali reni Masir mai.
GEN 45:24 Basa boe ma ana fee sara fali, ma ana fee nesenedak nae, “Ei boso mareresi nai dalak, ee!”
GEN 45:25 Basa boe ma ara fali reni sira aman nai Kanaꞌan reu.
GEN 45:26 Ara losa naa, boe ma rafada sira aman rae, “Papa, ee! Papa anan Yusuf bei masodak. Ana dadi hatahori ina-huuk ena, de ana parenda nai Masir!” Neu Yakob namanene nala naa, boe ma ana namananauk kana, ma ana ta namahere sira tutuin.
GEN 45:27 Tehuu neu ara rafada basa Yusuf kokolan, ma ana mete-nita karetar fo Yusuf haituak kara fo sangga fua reni ndia neni Masir neu, dei de ana mulai namahere.
GEN 45:28 Boe ma ana kokolak nae, “Awii! Au anang bei masodak, ee! Talo naa dei fo au amahoko! Au muste uu tiron dei, dei fo au bisa mate no lino-lendek.”
GEN 46:1 Basa boe ma Yakob asa rafafaꞌu bua-baꞌun nara, de ara laꞌo ela Kanaꞌan. Losa nggorok Barseba, boe ma ana tunu-hala banda fo tao tunu-hotuk fee Manetualain, fo ndia aman Isak nakaluku-nakatele neun numa fai bakahulun mai.
GEN 46:2 Leꞌodaek esa boe ma ana nala meꞌi. Nai meꞌis dale, ana namanene Manetualain nanggoun nae, “Yakob! O mambadeik dei, fo nenene!” Boe ma ana naselu nae, “Tao hata, Manetualain!”
GEN 46:3 Boe ma Manetualain nae, “Au ia Manetualain fo o amam nakaluku-nakatele neun numa fai bakahulun mai ena. O boso mamataꞌu muni Masir muu, huu neu ko Au tao o tititi-nonosim dadi neu hatahori nusa moꞌok nai naa.
GEN 46:4 Neu ko Au uni Masir uu sama-sama ua o. Ma neu ko Au oo ua falik o tititi-nonosim mara reni dae Kanaꞌan mai boe. Neu ko neu faik fo o mate, o anam Yusuf hambu o ani hahaem.”
GEN 46:5 Basa boe ma Yakob no anan nara laꞌo ela nggoro Barseba. Ara fua Yakob no sao-anan nara reu karetar fo manek Masir haituak ena.
GEN 46:6 Boe ma ara haꞌi reni basa sira pusakan nara, ma basa banda-manun nara fo sira ue rala numa dae Kanaꞌan ena. Yakob no ndia ana toun, ana inan, ma basa umbu-usin nara lalaꞌen laꞌo reni Masir reu.
GEN 46:8 Yakob nufanelun nara fo mana tungga lali reni Masir reu, sira: Ruben, ana uluk.
GEN 46:9 Anan nara sira: Henok, Palu, Hesron, ma Karmi.
GEN 46:10 Simeon, no anan nara, sira: Yemuel, Yamin, Ohad, Yakin, ma Sohar. Ma Saul, ndia anan numa saon, ina Kanaꞌan mai.
GEN 46:11 Lewi no anan nara, sira: Gerson, Kehat, ma Merari.
GEN 46:12 Yahuda no anan nara, sira: Sela, Peres, ma Sera. Yahuda anan laen Er, ma Onan, mate sara ruma Kanaꞌan ena. Ana oo neni Peres anan nara boe, sira: Hesron ma Hamul.
GEN 46:13 Isaskar no anan nara, sira: Tola, Pua, Ayub, ma Simron.
GEN 46:14 Sebulon no anan nara, sira: Sered, Elon, ma Yahleel.
GEN 46:15 Sira basa sara raa, Yakob no saon Lea ana bonggin nara, neu ara leo numa Mesopotamia. Hambu sira ana inan esa bali, nade Dina. De Yakob no Lea tititi-nonosin nara basa sara, sira hatahori 33.
GEN 46:16 Boe ma hambu anan nara ruma saon laen mai, sira: Gad, no anan nara: Siflon, Hagi, Suni, Esbon, Eri, Arodi ma Areli.
GEN 46:17 Aser no anan nara, sira: Yimna, Yiswa, Yiswi, Beria, ma sira feton, nade Sera. Hambu Beria anan nara boe: Heber no Malkiel.
GEN 46:18 Sira basa sara, hatahori 16, fo Yakob no ndia saon Silpa umbu-anan nara. Silpa naa, ina mana malalau uma-loo fo Laban feen neu ana inan Lea, Yakob sao ulun.
GEN 46:19 Boe ma hambu Yakob saon laen bali, nade Rahel. Ana bonggi nala anak dua, sira: Yusuf no Benyamin.
GEN 46:20 Lelek naa, Yusuf sao nala Asnat numa Masir ena. Ndia ari-aman naa, malangga anggama numa Kota On. Ndia naden Potifera. Yusuf no Asnat anan nara, sira: Efraim ma Manase.
GEN 46:21 Benyamin oo tungga Masir neu no anan nara boe, sira: Bela, Beker, Asibel, Gera, Naaman, Ehi, Ros, Mupim, Hupim, ma Ared.
GEN 46:22 De Yakob no saon Rahel tititi-nonosin naa, hambu hatahori 14.
GEN 46:23 Basa naa, bei hambu Yakob saon esa bali, nade Bilha. Dua sara anan nara, sira: Dan no Naftali. Dan anan, nade Husim.
GEN 46:24 Naftali no anan nara, sira: Yasel, Guni, Yeser, ma Silem.
GEN 46:25 Yakob no saon Bilha tititi-nonosin naa, hambu hatahori 7. Bilha naa, Rahel ina mana malalau uma-loon fo ana hambun numa ndia papan Laban mai.
GEN 46:26 De basa Yakob tititi-nonosin nara mana reni Masir reu, hambu hatahori 66. Bei ta reke no ndia mane-feun ma feto-feun nara.
GEN 46:27 Tamba no Yusuf anan nara fo bonggi sara ruma Masir, sira dua. De Yakob no nufanelun nara fo mana leo numa Masir, basa sara hatahori 70.
GEN 46:28 Neu ara sangga deka Masir ena, Yakob nadenu anan Yahuda laꞌok nakahuluk, fo neu noke Yusuf mai natonggo noon nai Gosen. Neu ara losa Gosen ena,
GEN 46:29 boe ma Yusuf saꞌe karetan, fo neu natonggo no aman numa naa. Neu ara ratonggo, boe ma Yusuf holu nala aman, de ana buꞌi nala doon seli.
GEN 46:30 De Yakob kokolak nae, “Anang Yusuf, ee! Hatematak ia au mesa ngga mete-ita o ena. Ma au bubuluk ena o bei masodak. Huu naa de leo mae au mate hatematak ia oo malole boe.”
GEN 46:31 Basa boe ma Yusuf nafada basa ndia kaꞌa-fadin nara nae, “Au muste uu afada manek ae, au nufanelung nggara ruma Kanaꞌan mai ena.
GEN 46:32 Dei fo au afada ae, eir ia hatahori mana makaboi bibi lombo ma sapi. Huu naa de ei oo meni ei banda-manum ma pusakam mara ruma Kanaꞌan mai boe.
GEN 46:33 Mete ma manek noke ei, ma ana natane nae ei masiꞌe tao ue-osa hata,
GEN 46:34 na, ei maselu neun mae, ei basa ngga ia, mana makaboi banda-manu numa kadiꞌi anam mai, sama leo ei bei-baꞌim mara. No dalak naa, neu ko ana nadenu ei leo miu dae Gosen.” Yusuf nafada talo naa, nahuu hatahori Masir asa nunute, mete ma ara leo rakabua ro mana lolo bandar.
GEN 47:1 Basa boe ma Yusuf no ndia toranoon lima reu rasare manek. Yusuf nakalelelak kasa reu manek nae, “Papa manek! Au amang ma au kaꞌa-fading nggara ruma Kanaꞌan mai ena. Ara mai ro basa sira bibi hien, bibi lombon, sapin, ma sira bua-baꞌun nara lalaꞌen. Hatematak ia basa sara rai dae Gosen ena.”
GEN 47:3 Boe ma manek natane nae, “Ei ue-osam hata?” De ara raselu neu manek rae, “Air ia mana lolor sama leo ai bei-baꞌin nara.
GEN 47:4 Hatematak ia, nai dae Kanaꞌan hambu teu ina ta hohoꞌak losa ta hambu nanaꞌak ma naꞌu ai-ana ena. Huu naa de ai meni nusak ia mai fo leo taak. Ai oo meni ai banda-manun nara boe. De hatematak ia, ai moke luas neu papa manek fo ai leo miu dae Gosen, fo makaboi ai banda-manun nara reu naa.”
GEN 47:5 Basa boe ma manek nafada ndia hihiin neu Yusuf nae, “Hatematak ia o amam no o kaꞌa-fadim mara rai ia ena.
GEN 47:6 De ara bole tao nusak ia, sama leo sira nusa heli-helin. Au bubuluk, dae Gosen naa, dae neulauk mateꞌen nai nusak ia. Dadi malole lenak ara leo reu kada naa leo. Mete ma ketuk ruma sira mai toꞌu lima banda-manur ro malole, na, naa fo ara oo toꞌu lima au enang nggara reu naa boe.”
GEN 47:7 Basa boe ma Yusuf nakalelelak aman neu manek. Boe ma Yakob hule-haradoi neu Manetualain fo Ana fee babaꞌe-babatik neu manek naa.
GEN 47:8 Boe ma manek natane Yakob nae, “Papa teun nara hida ena?”
GEN 47:9 Yakob naselu nae, “Au asoda teuk 130 ena, tehuu au ta leo ahuu uu mamanak esa boe na. Au bei-baꞌing nggara oo talo naa boe. Mete ma akasasamak ua sara, na, memak au teung nggara kekeꞌun lena, tehuu sofek no manggataꞌak.”
GEN 47:10 De Yakob noke Manetualain fee seluk babaꞌe-babatik neu manek, basa boe ma ana nateꞌa.
GEN 47:11 Boe ma Yusuf tao tungga manek kokolan, de ana dudu fee sara mamanak nai dae Gosen. Mamanak naa, lolen seli. (Neu ko ara foi mamanak naa nade ‘Rameses’). Basa boe ma Yusuf aman no kaꞌa-fadin nara leo rakandooo reu naa.
GEN 47:12 Yusuf oo sadia nanaꞌak boe fo fee ndia aman, kaꞌa-fadin nara, ma basa sao-anan nara lalaꞌen, mulai numa moꞌok mateꞌen mai, losa kadiꞌi anak mateꞌen.
GEN 47:13 Lelek naa, fai ndoe-laꞌas sudi selik kana, losa sudi nai bee ta hambu nanaꞌak ena. Numa Masir mai losa Kanaꞌan, basa hatahori mana ndole-naꞌuk kara ena. Ara ta bisa tao hata-hata ena, nahuu mana farakuk kara ena.
GEN 47:14 Boe ma hatahorir ruma basa mamanak kara marai Masir ma basa mamanak kara marai Kanaꞌan mai, mai fo hasa nanaꞌak nai Yusuf. De ana naduduru basa doik kara raa, fo neu mbeda sara reu manek uman.
GEN 47:15 Lelek naa, hatahori Masir ma hatahori Kanaꞌan nara ketu doin nara ena. Huu naa de ara ta bisa hasa nanaꞌak bali. Boe ma ara mai rasare Yusuf, de roke rae, “Papa, ee! Fee ai nanaꞌak dei, mita fo ai boso mate nahuu ndoes. Te ketu ai doin nara ena na.”
GEN 47:16 Boe ma Yusuf naselu nae, “Mete ma memak ei doi taak kara ena, na, taon talo ia: fee kada ei banda-manum mara mai, fo au sai-selun no nanaꞌak.”
GEN 47:17 Boe ma ara fee sira banda-manun nara reu Yusuf, fo sai-selun no nanaꞌak. Ndia sira ndaran, bibi lombon, bibi hien, sapin, ma keledein nara, nahuu teuk naa Yusuf helu-bartaa talo naa ena.
GEN 47:18 Manafali boe ma ara reni Yusuf mai bali, de rae, “Papa, ee! Ai kokolak tungga ndoon leo. Ai doin ma ai banda-manun papa sai-selu nala basa sara ena. Hatematak ia ai ta ela hata-hata ena. Ela kada ai aon ma ai dae oen.
GEN 47:19 Boso ela ai mate. Mete ma ai mate, na, see ndia nakaneni dae oer raa? Malole lenak papa haꞌi mala ai dadi neu papa ata-daton. Ma papa oo haꞌi mala ai dae oen nara boe, fo dadi neu papa enan. Basa naa papa fee bini-nggees fo ai sele-tande fee papa. Ai sosota-mamanggum ma ai dae oen naa, papa nggatin no kada nanaꞌak. Sadi ai boso mate.”
GEN 47:20 No fai ndoe-laꞌas boe namatua, huu naa de basa hatahori Masir seꞌo heni sira dae oen. De Yusuf hasa nala basa dae oer marai Masir fo dadi neu manek pusakan.
GEN 47:21 No dalak naa, de basa rau-inggu Masir dadi neu manek ata-daton.
GEN 47:22 Tehuu Yusuf ta hasa malangga anggamar dae oen, nahuu manek fee sara nanaꞌak taa-taa. Huu naa de ara ta parluu seꞌo sira dae oen.
GEN 47:23 Lelek naa oo Yusuf kokolak no rau-inggur boe nae, “Hatematak ia ei dadi miu manek ata-daton ena. Basa ei dae oem lalaꞌen oo, au hasa ala sara ena soa-neu manek boe. Dadi ei haꞌi mala bini-nggees ia, fo miu sele-tande neu dae oer raa leo.
GEN 47:24 Basa naa neu fai ketu-koruk, na, ei baꞌen neu babaꞌek lima. Babaꞌek esa menin fee manek. Ela babaꞌek haa, ei paken dadi bini-ngges, ma ketuk ei miꞌa mia ei nufanelum mara.”
GEN 47:25 Boe ma ara raselu rae, “Papa fali mala ai sodam ena, huu naa de ai moke makasi. Ai nau dadi miu papa manek ata-daton leo.”
GEN 47:26 Basa boe ma Yusuf tao hohoro-lalanek naa dadi neu dala-hadak nai nusa Masir. Huu naa de numa basa hader fo rau-inggur ketu-koru ralak kara, ara baꞌen neu lima. Babaꞌek esa, ara feen neu manek. Babaꞌek haa, sira mesa kasa pake. Kada malangga anggamar dae oen, manek ta hasa sara. Dala-hadak naa, ara bei pake rakandoon.
GEN 47:27 Mulai numa lelek naa mai, boe ma hatahori Israꞌel asa leo rahuu reu Masir rai dae Gosen. Ara dadi reu hatahori kamasuꞌik, ma tititi-nonosin nara oo tamba ramanoꞌu boe.
GEN 47:28 Numa Masir, Yakob bei nasoda teuk 17 bali, losa basa teun nara dadi teuk 147.
GEN 47:29 Neu fai mamaten sangga deka ena, boe ma ana noke nala Yusuf, de nafadan nae, “Anang Usu, ee! Au ameda ta dook ka bali, te Manetualain noke falik au ena. Dadi au oke, mete ma o sue au, na, o sumba-soo fo boso matoi au nai dae Masir ia.
GEN 47:30 O muste muni falik au ao-mbaa mamateng, neni ita bei-baꞌin nara mamana raten neu, fo matoi au neu naa. Naa, papa hihiin.” Boe ma Yusuf naselu nae, “Malole, papa! Mete ma papa nau talo naa ena, na, au tungga a leo.”
GEN 47:31 De Yakob kokolak nae, “Mete ma talo naa, na, hatematak ia o sumba-soo dei, fo mae o tungga papa hihiin.” Basa boe ma Yusuf sumba-soo tungga Yakob kokolan. Boe ma Yakob sendek luu-langgan neu koi lain, fo hule-haradoi noke makasi neu Manetualain.
GEN 48:1 Ta dook ka boe ma hatahorir mai rafada Yusuf rae ndia aman namahedi noꞌuk ka ena. De ana no anan dua sara, sira Manase ma Efraim, fo reu tiro sira baꞌin Yakob.
GEN 48:2 Neu Yakob namanene Yusuf asa mai ena, boe ma ana nakatatakak aon fo nanggatuuk neu koi.
GEN 48:3 Boe ma ana nafada Yusuf nae, “Anang Usu, ee! Fai maneuk kara Manetualain mana Koasa Mateꞌen natudu aon neu au ena numa nggorok Luus nai dae Kanaꞌan. Numa naa, Ana helu-bartaa neu au.
GEN 48:4 Ana kokolak nae, ‘Neu ko Au fee o umbu-anam mara ramahefu, fo o tititi-nonosim dadi neu hatahori nusa moꞌok. Neu ko Au oo fee nusak ia neu o tititi-nonosim mara boe, fo dadi neu sira pusakan losa dae-bafok fai mateꞌen.’
GEN 48:5 Hatematak ia o anam Efraim no Manase naa, sira haak talo ia: au uni Masir mai, tehuu dua sara rai ia ena. Leo mae talo naa oo, hatematak ia au tao dua sara leo au ana heli-heling ena, sama leo Ruben ma Simeon boe.
GEN 48:6 Tehuu mete ma o hambu anak bali, na, naar o anam mara. Au ta tao sara reu au anang nggara. Dadi dei fo ara simbo sira pusakan numa kada sira kaꞌan Efraim ma Manase mai.
GEN 48:7 Au tao talo naa, fo asaneda neu o inam Rahel. Neu ita fali numa Mesopotamia mai fo teni Kanaꞌan teu, boe ma o inam bonggi lenggu numa dalak deka no nggorok Efrata nai dae Kanaꞌan. Faik naa, au dalen susa nalan seli! Boe ma au atoin numa dalak mana neni nggorok Efrata neu tatain.” (Nggorok naa hatematak ia, ara foin nade Betlehem.)
GEN 48:8 Yakob kokolak basa, boe ma ana botik matan, de mete-nita Yusuf anan nara ruma naa. Boe ma ana natane Yusuf nae, “See anan nara iar?”
GEN 48:9 Yusuf naselu nae, “Sira iar, kanak kara fo Manetualain baꞌe fee au numa Masir.” Basa boe ma Yakob kokolak nae, “Mete ma talo naa, na, o mua sara deka-deka au, fo au hule-haradoi oke Manetualain fee babaꞌe-babatik neu sara.”
GEN 48:10 Yakob lasik ena, de matan sambu-sambuk ka ena. Huu naa de ana ta bisa mete-nita no malole ena. Boe ma Yusuf noo anan dua sara reu deka-deka Yakob, de ana holu ma idu sara.
GEN 48:11 Basa boe ma ana kokolak no Yusuf nae, “Doo basa ia au duꞌa ae, ta bisa dadi au atonggo ua o bali. Tehuu hatematak ia Manetualain tao lenak bali, losa au oo bei bisa mete-ita o anam mara boe.”
GEN 48:12 Basa boe ma Yusuf fee anan nara rakaheok numa Yakob mai, de ana sendek luu-langgan no matan losa daer neu aman matan.
GEN 48:13 Boe ma Yusuf nambadeik. De leꞌa nala anan nara, fo fee sara rambariik deka-deka ro ndia aman. Ana tao ana kaesan, Manase, neu Yakob boboa konan, ma ana kaduan Efraim, neu boboa kiin.
GEN 48:14 Tehuu neu Yakob nae ndae liman neu sara, fo noke babaꞌe-babatik fee dua sara, ana lali lima konan neni Efraim langgan neu, ma ana ndae lima kiin neu Manase langgan.
GEN 48:15 Boe ma ana hule-haradoi neu Manetualain fo fee babaꞌe-babatik neu Yusuf nae, “O baꞌim Isak aman Abraham, no o baꞌim Isak naa, dua sara tungga Manetualain hihii-nanaun taa-taa. Manetualain oo nakaboi au numa muri-sorung mai losa hatematak ia boe.
GEN 48:16 Ana nakamboꞌik au ena numa basa sosoek mata-matak kara mai. De au oo oke-hule fo Ana fee babaꞌe-babatik neu kakanak kara iar ro tititi-nonosin nara boe. Mete ma ara hule-haradoi neu Manetualain, na, ara boso lilii raseseik baꞌi Abraham, baꞌi Isak, ma au nadeng. Mita fo sira tititi-nonosin nara tamba ramahefu, fo dadi hatahori nusa moꞌok nai dae-bafok ia.”
GEN 48:17 Tehuu neu Yusuf mete-nita ndia aman ndae lima konan neu fadik Efraim langgan, boe ma ana toꞌu nala aman liman naa, de ana lalin neni kaꞌak Manase langgan neu.
GEN 48:18 Ana nafada aman nae, “Papa, ee! Boso tao talo naa. Huu ndia naa, fadik. Ana uluk ta ndia sana. Papa muste ndae papa lima konan neu kaꞌak langgan. Te naa kaꞌak haak na!”
GEN 48:19 Tehuu aman Yakob ta nau. Boe ma ana nae, “Ana, nggee! Memak au bubuluk. Neu ko Manase dadi hatahori ta hohoꞌak ma tititi-nonosin tamba ramahefu, losa dadi neu hatahori nusa moꞌok. Tehuu ndia fadin Efraim naa, neu ko ana ta hohoꞌak lena henin bali. Ma ndia tititi-nonosin nara, neu ko noꞌun seli losa ara dadi reu hatahori nusak ta hohoꞌak noꞌuk ka.”
GEN 48:20 Basa boe ma ana nafada kakana kaduak kara raa nae, “Mete ma hatahori Israꞌel roke-hule Manetualain fee babaꞌe-babatik neu hatahorir, na, neu ko ara oo raseseik ei dua ngga nadem boe. Neu ko ara roke-hule rae, ‘Ela leo bee na Manetualain fee babaꞌe-babatik neu o, sama leo Ana fee babaꞌe-babatik neu Efraim ma Manase.’ ” No dalak naa, Yakob oo naseseik Efraim naden nakahuluk numa ndia kaꞌan Manase naden mai boe.
GEN 48:21 Basa boe ma Yakob nafada Yusuf nae, “Ana, nggee! Ta dook ka bali te au mate ena. Tehuu neu ko Manetualain tulu-fali ei, boe ma Ana no falik ei meni ei bei-baꞌim mara nusan miu.
GEN 48:22 De hatematak ia, au fee o lena heni au fee o kaꞌa-fadim mara. Ma au fee tamba o letek manai dae Kanaꞌan, fo fai bakahulun au haꞌi alan numa hatahori Amorir mai, neu au atati ua sara.”
GEN 49:1 Basa boe ma Yakob nadenu roke basa anan nara. Ara mai, boe ma nafada sara nae, “Ana nggara ein, ee! Mai fo ei makabubua deka-deka mia au nai ia dei. Au nau afada ei esa-esak leleo-lalaꞌom nai fai bakadean.”
GEN 49:2 Boe ma Yakob mulai nafada memak anan nara nae, “Talo ia! Yakob anan nara ein, ee! Mai ei mambariik eko-feo au. Nenene ei amam Israꞌel ia nae kokolak:
GEN 49:3 Ruben! O ia, au anang kaꞌak mateꞌen! O ia, au teteꞌe aing, ma au lima konang. Hatahorir fee hada-horomatak meteꞌen neu o.
GEN 49:4 Tehuu o dalem ta nakise, ta bubuluk o hihiim ndia bee, sama leo rii nai tasi no kaiboik ana ia mai, ma neni naa neu. Medak neu ma, o muu sunggu-soro mua au saong Bilha ena, de tao manggenggeo o amam koin. Huu naa de o panggak kaꞌam tuda henin memak!
GEN 49:5 Simeon ma Lewi! Ei dua ngga leo esak kara! Ei dua ngga soa lesu tafar no muda hiek, fo tao mala hatahorir doidoso.
GEN 49:6 Ei hihiim ndia kada tati ketu sapir ei mbimbiin nara, losa ara sesendok reu kada mamanan nara. Ma ei manggaraum mara bali, ndia ei henggu nisim mara, dei fo tao misa hatahorir. Huu naa de au ta nau tao matak neu ei kokolam mara. Au oo ta nau sorodododo ua ei dedeꞌam mara boe.
GEN 49:7 De hatematak ia, au akatoo ei mana bobotom mara raa, te sudi selik kana na! Ma ei nasa-odadedeim fo ta mana maena dale kasian faa boe na. Neu ko ei mesa ngga lemba-masaa ei manggaraum. Neu ko Manetualain husi kii-konak ei tititi-nonosim mara. Boe ma ara leo sasarak sudi nai bee, nai dae Israꞌel.
GEN 49:8 Yahuda! O nadem sosoa-ndandaan nae, ‘koa-kio’. O kaꞌa-fadim mara neu ko ara koa-kio o, ma ara rateꞌe langgan nara fee hada-horomatak neu o. O musum mara oo, o ndeꞌi sara, losa ara ta bisa botik langgan nara boe.
GEN 49:9 O ia sama leo singa tena ta hohoꞌak, fo mesa kana bisa sangga nanaꞌan. O sama leo singa mane narereꞌa ao-inan fo nae neu sunggu-luꞌu boe; ta hambu esa boe na nambarani neti nggunggue o. O sama leo singa ina fo mana nanea anan boe; ta hambu hatahori esa boe na nambarani neu rambaraꞌu o. Leo naak oo no o boe, huu hatahorir ramahia o, ma ara ta rambarani tao mata-matak.
GEN 49:10 Neu ko o ndia toꞌu parenda. O tititi-nonosim mara oo, toꞌu parenda tungga-tungga boe, losa neu ko hambu esa naena haak lena heni basa sara fo nanggatuuk toꞌu parenda naa. Ma basa hatahori nusak kara kaur langgan ma ramanene neu Ndia.
GEN 49:11 Neu ko o leo-laꞌo no nemehokok. O hii hata a mesan, hambun! O mae tao hata a mesan, dadi! Boe ma o banda-manum mara, ma osi-lutur buna-boan nara tamba ramanoꞌu, losa neni pipiru-ngganggari henik kara.
GEN 49:12 O nanaꞌa-nininum mara malada-malada mesan, losa ta basa-basa.
GEN 49:13 Sebulon! O dae pusakam loan seli, ma deka no tasi, losa natoo no kota Sidon. Ofak kara sudi ruma bee mai fo nggari naka no linok neu o tasim tatain.
GEN 49:14 Isaskar! O ia, sama leo keledei barakaik, tehuu o langga batun mata bali. Mete ma o sunggu nai dalak ena, na, see ndia bisa nakasetik o mambadeik fo laꞌok makandoo. Tehuu mete ma o mete-mita nggoro neulauk naa nai serik naa ena, na, ta nedenu oo, o lemba mala o fufuam mara ena fo muu boe. De o naa, talo naa leo!
GEN 49:16 Dan! O nadem sosoa-ndandaan nae, ‘mana maketu-maladi dedeꞌak’. Boe ma o ia, ma o tititi-nonosim mara, neu ko raketu-raladi o leom dedeꞌan nara no ta mbeu seserik. Huu o leom naa, esa numa hatahori nusa Israel asa mai.
GEN 49:17 O ia oo kadudin seli sama leo mengge karasok mana luꞌu nai dalak tatain boe. Mete ma hatahori saꞌe ndara nesik naa, na, nggengger neu te o kiki ndara ei dean, losa hatahorin tuda nalenggu pikok.
GEN 49:18 Oo, MANETUALAIN! Au hule-haradoi fo O fee masoi-masodak neu ai basa ngga.
GEN 49:19 Gad! O nadem liin sangga leo ‘nggafu feen’. Neu ko naꞌo manu-meo bubuak kara nggafu fee o, tehuu o nggafu masafali masenggi sara.
GEN 49:20 Aser! Neu ko o osi-lutum buna-boan neulauk mateꞌen, losa o bisa tao koki-baroo maladar, fo mane-manek kara mai banda-hasa nai o.
GEN 49:21 Naftali! O ia, sama leo rusa ina fui, de ta hambu hatahori esa boe na bisa koladu nala o. O bonggi mala o anam mara kada neulauk kara boe.
GEN 49:22 Yusuf! O sama leo ai kalonggek mana mori deka nai oe matak. O ndanam mara ralongge reni tembo demak kara reu.
GEN 49:23 Hambu hatahorir oo tao sundak o, huu dalen nara hedis sara, sama leo musu mana kou o.
GEN 49:24 Tehuu Manetualain fo au akaluku-akatele neuk naa, tulu-fali o. Huu naa de neu ko Ana fee lima boa mapaherek neu o, losa o bisa kou masafali sara, leo mae numa dook ka mai. O bisa masenggi sara, nahuu Manetualain mana tulu-fali o naa, memak koasan ta neni babanggak tetebes. Huu naa de au asarai neun. Huu Ana ndia nanea au.
GEN 49:25 Neu ko Ana oo nanea o boe. Ma Ana fee babaꞌe-babatik neu o, babaꞌe-babatik numa lalai mai, babaꞌe-babatik numa dae-inak mai, ma babaꞌe-babatik bonggi mala anak manahetak fo sodak.
GEN 49:26 Letek kara ta mopo heni sara. Ma au babaꞌe-babating soa-neu o ia, noꞌun lena heni basa letek kara lalaꞌen! Ela leo bee na basa babaꞌe-babatik kara iar mboꞌa reni o reu, nahuu o ndia lena mateꞌen numa basa o kaꞌa-fadim mara lalaꞌen mai.
GEN 49:27 Benyamin! O paranim sama leo busa fui mana lakamarak. Bei huhua anak, te ana neu sombu ena fo humu nala ndia nanaꞌan. Mete ma leꞌodae, na, ana neu babaꞌe nanaꞌa lenan nara fee anan nara. O tititi-nonosim oo ta hohoꞌak talo naa boe!”
GEN 49:28 Baꞌu kada naa leo, Yakob nafada memak ndia anan nara leleo-lalaꞌon nai fai bakadean, esa-esak no tititi-nonosin. Sira basa sara raa, ndia rakonda leo Israꞌel kasalahunu duak kara.
GEN 49:29 Basa boe ma Yakob noke anan nara helu-bartaa, de ana nae, “Ta dook ka bali, te au mate ia ena. Mete ma au mate, na, ei muste miu matoi au uu baꞌi Abraham raten. Rates naa nai luak, deka no nggorok Makpela ma Mamre nai dae Kanaꞌan. Fai bakahulun baꞌi Abraham tifa nala luak naa osin, fo taon neu ndia mamana raten. Ana tifa ketun numa leo Het hatahorin esa mai, nade Efron.
GEN 49:31 Nai naa ara ratoi ita baꞌin Abraham no ita bein Sara, ma au amang Isak no au inang Ribka. De ei oo muste matoi au uu naa boe, neu au saong Lea boboan.
GEN 49:32 Ei boso lilii matoi au neu luak, fo baꞌi Abraham tifa nalak naa ena.”
GEN 49:33 Yakob kokolak basa talo naa, boe ma ana sunggu fali neu koi lain, de maten leo.
GEN 50:1 Basa boe ma Yusuf holu nala aman, de ana buꞌi nakarereu. Ma ana idu nasakukukun.
GEN 50:2 Basa de Yusuf fee parenda neu mana makaneni ao-mbaa mamates sara, fo ara tao modo-aidoo neu Yakob ao-mbaa mamaten, fo ta nakalulutu.
GEN 50:3 Boe ma mana makanenir rakaneni ao-mbaa mamates naa, losa faik 40 dalen, tungga sira siꞌen. Basa hatahori Masir asa oo buꞌi ramatani Yakob mamaten boe. Ara tao talo naa losa faik 70 dalen, taon sama leo sira hatahori ina-huun mate.
GEN 50:4 Basa faik kahitu hulun nara, boe ma Yusuf nafada ndia penggawen nara nae, “Nenene! Au oke fo ei meni au hara liing ia, miu mafada manek mae talo ia:
GEN 50:5 ‘Neu au amang nae mate, ana noke au helu-bartaa fo au uu atoi ndia ao-mbaa mamaten nai dae Kanaꞌan. De au hule manek fee luas fo au uu atoi au amang. Basa naa, dei fo au fali ia mai.’ ”
GEN 50:6 Manek namanene nala naa, boe ma ana naselu nae, “Mete ma o helu-bartaa neu o amam talo naa ena, na, muu fo matoin neu naa leo.”
GEN 50:7 Boe ma Yusuf neu natoi aman. Hatahori noꞌuk ka oo tungga roon boe. Ndia basa manek penggawen nara, ma basa hatahori ina-huuk maruma Masir mai.
GEN 50:8 Yusuf kaꞌa-fadin, ma basa sira hatahori mana maue-osan nara oo tungga reu ratoi Yakob boe. Elak kara maruma Gosen kada sira sao inan no ana diꞌi-doen, ma banda-manun nara.
GEN 50:9 Soldadu noꞌuk ka oo tungga boe. Ketuk saꞌe kareta, ma ketuk saꞌe ndara. No mana tunggak kara raa noꞌun seli, huu naa de nononggok mana laꞌok tungga mamates naa narun seli.
GEN 50:10 Boe ma basa sara laꞌok losa ara ladi lee Yarden numa mamanak esa nade Atad. Hatahorir rasiꞌe mai fo fefemba hade nai naa. Numa mamanak naa, Yusuf asa buꞌi ramatani ndia aman mamaten. Boe ma ara beꞌe-falufii leꞌodaek hitu bali.
GEN 50:11 Neu hatahori Kanaꞌan marai naa mete-rita sususak talo naa, boe ma ara kokolak rae, “Awii! Ei mete dei! Hatahori Masir asa hada bebeꞌe-falufiin sususan sudi selik kana talo naa! Ara buꞌi ramatani losa dadi talo naa.” Huu naa de ara foi mamanak naa nade, Abel-Misraim. Sosoa-ndandaan nae, ‘hatahori Masir sususan.’
GEN 50:12 Basa boe ma Yakob anan nara tao tungga sira hehelu-bartaan.
GEN 50:13 Boe ma ara koꞌo reni Yakob ao-mbaa mamaten, de reu ratoin neu luak deka nggoro Makpela ma Mamre. Abraham tifa nala mamanak naa ena numa leo Het hatahorin esa mai, nade Efron, fo taon dadi neu sira mamana raten.
GEN 50:14 Yusuf natoi basa aman, boe ma ana no kaꞌa-fadin nara lenggu fali reni Masir reu. Leo naak oo, basa hatahori laen mana tungga ro sara reu ratoi mamates boe.
GEN 50:15 Neu ara losa nai Masir, boe ma Yusuf kaꞌan nara mulai ramataꞌu, nahuu sira aman ta sana ena. De ara rakokola aok rae, “Awii! Ei duduꞌa dei! Leo Yusuf bei nambeda dalek neu ita, fo ana bala ita tatao-nonoꞌi manggaraun neun, na, talo bee?”
GEN 50:16 Boe ma ara rala harak esa fo haitua hara liik neu Yusuf rae talo ia: “Papa! Ai bei masaneda neu ita aman bei numa lain naa, ana nadenu ai
GEN 50:17 fo mafada papa mae, ‘Usu muste lilii heni kaꞌan nara salan, nahuu fai bakahulun ara tao manggarauk neun ena.’ Ai oo masaneda ita aman nakaluku-nakatele neu Manetualain numa lele uluk mai boe. Ai oo dadi neu Manetualain atan nara boe. Huu naa de hatematak ia ai mai moke ambon, nahuu ai basa ngga tao masala papa ena.” Yusuf namanene nala naa, boe ma ana buꞌi.
GEN 50:18 Basa boe ma ndia kaꞌan nara mai aon, de ara sendek luu-langgan nara reu ndia matan, ma ara kokolak rae, “Elan fo papa tao ai dadi miu papa ata-daton leo.”
GEN 50:19 Tehuu Yusuf nafada sara nae, “Kaꞌa nggara ein, ee! Ei hae mamataꞌu bali! Kada Manetualain mesa kana ndia naena haak fee hukun neu hatahori. Tehuu au ia, taa.
GEN 50:20 Fai bakahulun naa, ei memak mala harak esa ena, fo mae tao manggarauk neu au. Tehuu Manetualain tao nasafali ei nanae manggaraum, fo Ana taon dadi neu malole. Huu naa de Ana soꞌu au dadi neu hatahori ina-huuk, fo hatahori noꞌuk ka bisa hambu sodak.
GEN 50:21 Dadi hatematak ia, au afada ei fo boso mamataꞌu bali. Huu au helu-bartaa neu ko au loti-mete ei, ma basa ei anam mara lalaꞌen.” No kokolak neulauk talo naa, Yusuf tao nalende kaꞌan nara dalen.
GEN 50:22 Basa boe ma Yusuf no kaꞌa-fadin nara leo rahuu reu Masir. Ana nasoda losa teuk 110.
GEN 50:23 Ana bei hambu Efraim umbu-anan nara. Ma ndia mesa kana oo nakaboi Manase umbun boe, ndia Makir anan nara.
GEN 50:24 Yusuf nafada kaꞌan nara nae, “Kaꞌa nggara ein, ee! Nai au nememedang, na, au fai mamaten deka-deka ena. Tehuu au amahere neu ko Manetualain nakaboi ei. Ana ndia neu ko nakalalaꞌok ei kalua numa nusak ia mai. Ana oo ndia nangganuni ei fali meni nusak fo Ana sumba-soo ena fo nae feen neu baꞌi Abraham, baꞌi Isak, ma papa Yakob.”
GEN 50:25 Boe ma Yusuf noke toranoon nara soꞌuk sumba-sook nae, “Ei muste helu-bartaa neu au. Mete ma losa fain Manetualain no falik ei meni nusak naa miu, na, ei oo muste haꞌi meni au dui-roung nggara boe.”
GEN 50:26 Basa boe ma Yusuf maten numa Masir, neu teun nara 110. Boe ma ara tao modo-aidoo neu ao-mbaa mamaten. De ara taon neni kopan dale neu.
MAT 1:1 Ia, buku tutuik laꞌe-neu Yesus Karistus, Hatahori naa ndia Manetualain helu-bartaa memak kana numa lele uluk mai ena, fo nae nadenun mai. Ndia ia, mane Dauk ma baꞌi Abraham tititi-nonosin. Mulai numa baꞌi Abraham losa mane Dauk hambu dombe salahunu haa. Ndia bei-baꞌin nara tungga susura tititi-nonosin, leo iak: Abraham bonggi nala Isak, Isak bonggi nala Yakob, Yakob bonggi nala Yahuda no kaꞌa-fadin nara,
MAT 1:3 Yahuda bonggi nala Peres no Sera (sira inan, nade Tamar), Peres bonggi nala Herson, Herson bonggi nala Ram,
MAT 1:4 Ram bonggi nala Aminadab, Aminadab bonggi nala Nahason, Nahason bonggi nala Salmoon,
MAT 1:5 Salmoon bonggi nala Boꞌas (ndia inan, nade Rahab), Boꞌas bonggi nala Obet (ndia inan, nade Rut), Obet bonggi nala Isai,
MAT 1:6 Isai bonggi nala Dauk. Numa Dauk mai losa lelek naa, fo hatahori Israꞌel asa neni nggari henik kara reni Babel reu, hambu dombe salahunu haa bali, sira: Dauk bonggi nala Soleman (Soleman inan ndia, bakahulun Uria saon). Soleman bonggi nala Rehabeam, Rehabeam bonggi nala Abia, Abia bonggi nala Asaf, Asaf bonggi nala Yosafat, Yosafat bonggi nala Yoram, Yoram bonggi nala Usia, Usia bonggi nala Yotam, Yotam bonggi nala Ahas, Ahas bonggi nala Heskia, Heskia bonggi nala Manase, Manase bonggi nala Amos, Amos bonggi nala Yosias, Yosias bonggi nala Yekonya no fadin nara, neu lelek fo neni nggari henik kara reni Babel reu.
MAT 1:12 Neu ara neni nggari henik kara reni Babel reu losa Yesus, hambu dombe salahunu haa bali, sira: Yekonya bonggi nala Saltiel, Saltiel bonggi nala Serubabel, Serubabel bonggi nala Abihut, Abihut bonggi nala Elyakim, Elyakim bonggi nala Asor, Asor bonggi nala Sadok, Sadok bonggi nala Akim, Akim bonggi nala Eliut, Eliut bonggi nala Eliasar, Eliasar bonggi nala Matan, Matan bonggi nala Yakob, boe ma Yakob bonggi nala Yusuf. Yusuf naa, sao nala Maria. Maria naa, ndia bonggi nala Yesus Karistus.
MAT 1:17 Dadi mulai numa Abraham mai losa Dauk, hambu dombe salahunu haa; numa Dauk mai losa ara neni nggari henik kara reni Babel reu, hambu dombe salahunu haa; ma numa Babel mai losa bonggi Karistus, hambu dombe salahunu haa.
MAT 1:18 Maria bonggi nala Yesus naa, tutuin talo ia: Maria ia, Yusuf fufudin ena. Dua sara bei ta sunggu-soro rakabua sama leo sao holu-ndaek, naa te medak neu ma, Maria taꞌin naisi numa Manetualain Dula-dale Malalaon mai ena.
MAT 1:19 Neu Yusuf bubuluk talo naa, boe ma ana nae tao naketu sira dua sara nefufudi aon naa. Tehuu ana ta nau nakamamaek Maria nai hatahori noꞌuk kara matan, nahuu ndia dalen neulauk. Huu naa de ana nae tao naketun no kada neneek.
MAT 1:20 De neu ana bei duꞌa-duꞌa neu-mai, boe ma leꞌodaek esa ana nala meꞌi. Numa meꞌis naa, ana mete-nita Manetualain atan numa nusa tetuk do inggu temak mai nafadan nae, “Yusuf! O ia, mane Dauk tititi-nonosin. O boso babati sao mala Maria. Te kakanak manai taꞌin dale naa, Manetualain Dula-dalen ndia tao naa.
MAT 1:21 Neu ko Maria bonggi nala ana tou anak esa. Boe ma o muste foin nade Yesus, nahuu neu ko Ana ndia tao nasoi-nasoda Manetualain hatahorin nara ruma sira sala-singgon nara mai.”
MAT 1:22 Dedeꞌak ia dadi talo naa, nahuu Manetualain nafada memak kana numa lele uluk mai ena. Ana pake nita Ndia mana toꞌu dedeꞌan Yesaya fo surak nae,
MAT 1:23 “Ei nenene, ee! Neu ko hambu ana feꞌok esa bei ao tema, ta bubuluk te taꞌin naꞌisi ena. Boe ma ana bonggi nala Ana tou anak esa. Ara oo foin nade Imanuel boe.” (Nai dedeꞌa Ibrani, ‘Imanuel’ sosoa-ndandaan: Manetualain sama-sama no ita.)
MAT 1:24 Yusuf nala meꞌi basa, boe ma nambadeik. De ana tungga memak Manetualain hara hehelun naa. Ana simbo nala Maria dadi neu ndia saon,
MAT 1:25 tehuu Yusuf ta sunggu-soro nakabua noon sama leo sao holu-ndaek, losa Maria bonggi basa Kakanak naa ena. Bonggi basan, boe ma Yusuf foi Kakanak naa, nade Yesus.
MAT 2:1 Neu bonggi Yesus numa nggorok Betlehem nai profensi Yudea, manek Herodes toꞌu parenda. Faik naa, hambu hatahori hida ruma mamana dook nai mamanak ledo toda, reni kota Yerusalem mai. Sira iar, hatahori mana malela mete nduuk.
MAT 2:2 Neu ara losa Yerusalem, ara ratane reu-mai rae, “Hatahori Yahudir manen fo bei fo neni bonggik naa, nai mamanak bee? Ai mete-mita nduuk esa nai mamanak ledo toda natudu tanda nae, Ana neni bonggik ena. Huu naa de ai mai fo mae makaluku-makatele neun.”
MAT 2:3 Neu manek Herodes namanene nala kokolan nara talo naa, boe ma dalen nameda ta neulauk. Huu naa de, basa hatahorir marai Yerusalem oo rameda leo naak boe.
MAT 2:4 Basa boe ma manek Herodes nakabua nala malangga anggama Yahudi malanggan nara ma meser anggamar lalaꞌen, de natane sara nae, “Soba ei mafada au dei! Karistus naa, fo Manetualain helu-bartaa memak kana ena naa, bonggin nai bee?”
MAT 2:5 Boe ma ara raselu rae, “Nai nggorok Betlehem, profensi Yudea, papa manek. Sama leo Manetualain mana toꞌu dedeꞌan Mika surak memak kana ena numa lele uluk mai, leo iak:
MAT 2:6 ‘Woi, ei hatahori Betlehem marai profensi Yudea naa. Ei boso duꞌa mae, ei nggorom naa, kada nggoro kadiꞌik esa fo sosoan taa. Huu neu ko hambu hatahori moꞌo-inahuuk esa numa naa mai. Neu ko Ana dadi mana lolo soa-neu Au hatahoring Israꞌel asa.’ ”
MAT 2:7 Manek Herodes namanene nala naa, boe ma ana nanggou nala hatahori mana malela mete nduuk kara no neneek. De ana natane sara nae, “Faik bee ei mete-mita nduuk naa toda nai lalai?” Boe ma ara rafadan.
MAT 2:8 De ana nadenu sara reni Betlehem reu ma nafada nae, “Ei miu sangga Kakanak naa ndule basa mamanak manai naa. Mete ma ei matonggo mian ena, na, fali mai ngga fo mafada au. Au oo ae uu akaluku-akatele neun boe.”
MAT 2:9 Ara ramanene rala manek kokolan, boe ma ara reu. Ta bubuluk te, ara mete-rita seluk nduuk naa, fo fai bakahulun mete ritan numa mamanak ledo toda naa ena. Nduuk naa toda neu matan nara, boe ma ana laꞌok nakandoo de nambariik tetar Kakanak naa mamana leleon lain.
MAT 2:10 Ara mete-rita talo naa, boe ma ramahoko ralan seli.
MAT 2:11 De ara maso uma dale reu, boe ma mete-rita Kakanak naa no inan, Maria. De ara sendek luu-langgan nara fo rakaluku-rakatele neun. Boe ma ara buka sira hadia buas mabelir mbombotin, fo fee neu Kakanak naa. Ara fee lilo mbilas, rani, ma ai kaboo menik daan.
MAT 2:12 Ta dook ka boe ma ara hambu meꞌis numa Manetualain mai nae, “Ei boso bei fali meni manek Herodes miu bali.” Huu naa de ara fali reni sira nusan reu, tungga dalak laen.
MAT 2:13 Neu hatahori mana malela mete nduuk kara raa fali reu ngga, boe ma Manetualain atan esa numa nusa tetuk do inggu temak mai nafada Yusuf nai meꞌis dale nae, “Yusuf! Mambadeik lai-lai leo! Malai mua Kakanak naa no inan meni nusa Masir miu. Leo makandoo miu naa, losa Au afada faik bee fo ei bisa fali, te manek Herodes sangga Kakanak naa, fo nae tao nisan!”
MAT 2:14 Boe ma Yusuf nambadeik. Ana nuni nala saon no Kakanak naa, de leꞌodaek naa oo ara ralai reni nusa Masir reu boe.
MAT 2:15 Ara leo numa naa losa Herodes mate. No dalak naa, Manetualain kokolan dadi, sama leo Ndia mana toꞌu dedeꞌan Hosea nafada memak numa lele uluk mai ena nae, “Au anggou falik Au Anang, fo kalua numa Masir mai.”
MAT 2:16 Neu manek Herodes bubuluk ena nae, hatahori mana malela mete nduuk kara raa lelekok kana ena, boe ma ana namanasa nalan seli. Ana parenda soldadun nara nae, “Meni nggorok Betlehem ma nggorok kara mana deka rai naa. Makanisa basa kakana ana touk kara lalaꞌen, fo teun nara dua dae reu.” Herodes parenda talo naa, nahuu ana nasaneda hatahori malelak kara raa tutuin. Ana reke mulai numa makasososan mai mete-rita nduuk naa toda numa lalai.
MAT 2:17 Basa hata mandadik kara iar dadi tungga hata fo Manetualain mana toꞌu dedeꞌan Yeremia surak memak kana numa lele uluk mai ena nae,
MAT 2:18 “Hambu hatahori haran buꞌi namatani nai kota Rama. Rahel buꞌi nakarereu, nahuu ndia anan nara mate basa sara ena. Ana ta nau hatahorir mai kokoe-nanasi neun, nahuu ndia anan nara taa sara ena.”
MAT 2:19 Doo-doo boe ma manek Herodes mate. Faik naa Yusuf asa bei rai Masir. Boe ma Manetualain atan esa numa nusa tetuk do inggu temak mai natudu mata-aon neu Yusuf nai meꞌis dale.
MAT 2:20 Ata naa nae, “Yusuf! Mambadeik leo! Nuni mua Kakanak naa no inan, fo fali muni Israꞌel miu leo. Hatahori fo mana nae nakanisa Kakanak naa, maten ena.”
MAT 2:21 Yusuf namanene nala naa, boe ma ana nambadeik. De ana nuni nala sara fali reni nusa Israꞌel reu.
MAT 2:22 Tehuu neu ana namanene nae, manek Herodes anan Arkalaus ndia toꞌu parenda hatematak ia nai profensi Yudea, boe ma ana namataꞌu fali neni naa neu. De Manetualain parendan nai meꞌis esa dale bali nae, “Yusuf, o boso leo nai Yudea.” Huu naa de ana neu leo nai profensi Galilea,
MAT 2:23 numa nggorok esa nade Nasaret. No dalak naa, Manetualain kokolan naa, dadi tetar ena tungga hata fo Ndia mana toꞌu dedeꞌan surak memak kana ena nae, “Neu ko hatahorir roken rae, Hatahori Nasaret.”
MAT 3:1 Neu Yesus namoꞌo mamais, boe ma Yohanis Mana Saranik mulai nanori hatahorir numa mamana nees, nai profensi Yudea.
MAT 3:2 Ana nafada nae, “Toranoo susue nggara ein! Ei muste manaku ma laꞌo ela ei sala-singgom mara, fo fali meni Manetualain miu leo. Hatematak ia basa hatahorir bisa maso dadi reu Manetualain hatahorin ena.”
MAT 3:3 Lele uluk Manetualain mana toꞌu dedeꞌan esa, nade Yesaya surak laꞌe-neu Yohanis nae, “Neu ko hambu hatahori eki nai mamana nees nae, ‘Basa hatahorir sadia memak tao matalolole dalak, fo soru Lamatuak mamain! Tao matetu dalak kara soa-neun!’ ”
MAT 3:4 Yohanis ia leleo-lalaꞌon sama leo Manetualain mana touꞌ dedeꞌan lele uluk kara. Bua-loꞌan, taon numa banda onta bulun mai. Kalikeen, taon numa banda roun mai. Nanaꞌa-nininun, ndia lamak ma fani oe lasi.
MAT 3:5 Faik naa, hatahori noꞌun seli mai fo rae ratonggo ro Yohanis. Ara ruma Yerusalem, ma ruma profensi Yudea isin lalaꞌen mai. Ara oo ruma nggorok kara mana dekak ro lee Yarden mai boe.
MAT 3:6 Ara buka dalen nara ma manaku sira sala-singgon lalaꞌen, basa boe ma Yohanis sarani sara ruma lee Yarden.
MAT 3:7 Faik naa, hatahorir maruma anggama Farisi partein ma anggama Saduki partein oo mai fo roke Yohanis sarani sara boe. Tehuu neu ana mete-nita sara, boe ma ana mboka nae, “Weeh! Eir ia, sama leo mengge mana pepeko-lelekok! Neu ko Manetualain hukun ei, nahuu ei tatao-nonoi manggaraum mara. Heeh! Boso duꞌa mae, ei bisa makamboꞌik numa Ndia huku-dokin mai.
MAT 3:8 Dadi malole lenak ei fali meni Manetualain miu, ma laꞌo ela ei sala-singgom mara lalaꞌen. Basa naa, tao hata fo neulauk kara, sama leo ai huuk mana maboa neulauk.
MAT 3:9 Boso duꞌa mae, eir ia, baꞌi Abraham tititi-nonosin, de ei masodam mara nai lino-lendek dale ena. Mamahere au! Manetualain bisa adu batur ia fo dadi reu baꞌi Abraham tititi-nonosin.
MAT 3:10 Besa-besa, ee! Te hambu Hatahori toꞌu memak taka, nahani a fo nae hungga heni basa ai huuk ta mana maboa neulauk lalaꞌen. Hungga basa, na, Ana nggari sara reni aꞌi dale reu.
MAT 3:11 Hatematak ia au sarani ei unik oe fo dadi tanda nae, ei masadea laꞌo ela ei sala-singgom mara ena. Tehuu neu ko hambu Hatahori esa ta neni babanggak lena heni au nae mai. Leo mae dadi uu kada Ndia hatahori neondan oo, au ta andaa boe. Neu ko Ana nasofe ei dalem mara nenik Manetualain Dula-dale Malalaon. Ana oo tao nala ei dadi malalaok boe, sama leo hatahori pake aꞌi fo hotu heni dafuk.
MAT 3:12 Ana toꞌu kokoko nonook hade ena fo sangga daꞌi heni hade langgak. Boe ma Ana nadai hade neun nara reni soka dale reu. Tehuu hade langgak kara, Ana mboꞌa sara reni aꞌi mana mbila ta kala matek neu.”
MAT 3:13 Faik naa, Yesus konda numa Galilea mai neni lee Yarden neu. Ana mai noke Yohanis saranin,
MAT 3:14 tehuu Yohanis ta nau. Ana nasabara nae, “Talo bee de au muste sarani Lamatuak? Ta sala ia, do? Lamatuak ndia muste sarani au. Te naa ndia au toꞌak, na!”
MAT 3:15 Boe ma Yesus naselu nae, “Ta hata-hata. Tehuu hatematak ia malole lenak kaꞌa ndia sarani Au. No dalak naa, ita tungga Manetualain hihii-nanaun.” Yohanis namanene nala naa, boe ma ana naselu nae, “Bee a mesan, Lamatuak.” De ana sarani Yesus.
MAT 3:16 Sarani basa, boe ma Yesus kalua numa lee mai. Tehuu medak neu ma, lalai natahuka. Boe ma Ana mete-nita Manetualain Dula-dalen konda mai neni Ndia neu, dadi sama leo mbui lunda sina mai tai neun.
MAT 3:17 Boe ma Manetualain nahara numa lalai mai nae, “Ndia ia, Au Ana susueng. Ana soa tao namahoko Au.”
MAT 4:1 Basa boe ma Manetualain Dula-dalen nuni noo Yesus neni mamana nees neu, mita fo nitur malangga ina-huun soba-doun.
MAT 4:2 Numa naa Ana puasa hatu-leledon faik haa hulu dalen, de Ana ndoe nalan seli.
MAT 4:3 Neu Ana ndoe nalan seli talo naa, boe ma nitur malangga ina-huun mai soba-doun nae, “O ia, tebe-tebe Manetualain Anan, do? Mete ma tebe, na, parenda batur ia dadi reu nanaꞌak leo.”
MAT 4:4 Tehuu Yesus naselu nae, “Sama leo neni surak nai Manetualain Susura Malalaon dale nae: ‘Hatahori dae-bafok ta rasoda numa kada nanaꞌak mai. Tehuu ara oo muste nenene Manetualain Dedeꞌa-kokolan boe, ma tao tungga Ndia hihii-nanaun.’ ”
MAT 4:5 Boe ma nitu naa nuni noo Yesus neni kota Yerusalem neu, ndia Lamatuak kota malalaon. De ana noo Yesus hene reni mamanak fo demak mateꞌen manai Uma Huhule-haradoi Ina-huuk reu.
MAT 4:6 Boe ma nitu naa nae, “Mete ma tebe-tebe Manetualain Anan O, na, soba O boke dae muu leo. Sama leo neni surak nai Manetualain Susura Malalaon nae, ‘Neu ko Manetualain parenda Ndia atan nara ruma nusa tetuk do inggu temak mai, fo ranea O.’ Nai Manetualain Susura Malalaon oo neni surak boe nae, ‘Neu ko ara ratanee rala O renik liman nara, mita fo O ta koi laꞌe batu ma O ao-inam oo ta nambeta boe.’ ”
MAT 4:7 Tehuu Yesus naselu nae, “Hambu neni surak boe nai Manetualain Susura Malalaon dale nae, ‘Manetualain naa, ndia naena haak fo parenda o. Huu naa de o boso soba-doun.’ ”
MAT 4:8 Boe ma nitu naa nuni noo Yesus neni letek fo demak mateꞌen esa poin neu. De ana natudu basa nusak kara marai dae-bafok roo basa ta hohoꞌan nara.
MAT 4:9 Natudu basa naar lalaꞌen, boe ma nitu naa nafada nae, “Sadi O sendek luu-langgam fo makaluku-makatele neu au, neu ko basa iar lalaꞌen au fee sara reu O.”
MAT 4:10 Tehuu Yesus ranggan nae, “Weeh, nitu! O malai heok ia leo! Huu Manetualain Susura Malalaon nae, ‘O muste makaluku-makatele neu Manetualain, ma o muste maue-osa soa-neu kada Ndia mesa kana.’ ”
MAT 4:11 Nitu namanene nala naa, boe ma ana laꞌo ela Yesus. Boe ma Manetualain atan nara ruma nusa tetuk do inggu temak mai fo raono-lalau neun.
MAT 4:12 Lelek naa, manek Herodes sese Yohanis Mana Saranik neni bui dale neu. Neu Yesus namanene talo naa, boe ma Ana fali neni Galilea neu.
MAT 4:13 Ana neni Ndia nggoro-tadun Nasaret neu, basa de Ana laꞌo nakandoo neu leo numa nggorok Kapernaum. Nggorok naa, nai dano Galilea tatain, nai Sebulon no Naftali daen.
MAT 4:14 No dalak naa, Ana tao tungga hata fo Manetualain mana toꞌu dedeꞌan Yesaya surak memak kana ena nae,
MAT 4:15 “Nai Sebulon daen ma Naftali daen, mana deka no dano Galilea, nai lee Yarden boboan seri, hatahori ta Yahudir oo leo rai naa boe.
MAT 4:16 Ara leo-laꞌo nai makiu-makahatuk dale, tehuu hatematak ia ara mete-rita Manggaledok ena. Ma Manggaledok naa nasaꞌa ena soa-neu basa hatahorir fo bei ta ralela Manetualain.”
MAT 4:17 Numa lelek naa mai oo, Yesus mulai nanori hatahorir boe nae, “Ei muste masadea laꞌo ela ei sala-singgom mara, fo leo-laꞌo no lolo-laok leo! Hatematak ia basa hatahorir bisa maso dadi reu Manetualain hatahorin ena.”
MAT 4:18 Faik esa, Yesus laꞌok nesik dano Galilea tatain. Ana natonggo no hatahori dua kaꞌa-fadik kara. Esa nade Simon, tehuu hatahorir rasiꞌe roken rae, Petrus. Ma fadin nade Anderias. Ara dala iꞌak numa dano, nahuu dua sara mana puꞌa-dala.
MAT 4:19 Boe ma Yesus nanggou sara nae, “Woi, mai fo tungga Au leo! Ei masiꞌe sangga iꞌak, tehuu hatematak ia Au anori ei fo dadi miu mana sangga samanek.”
MAT 4:20 Dua sara ramanene rala naa, boe ma ara laꞌo ela sira dalan, de reu tungga tutik ka ro Yesus.
MAT 4:21 Basa naa, Yesus laꞌok nala faa bali, boe ma mete-nita Sabadeus anan nara. Kaꞌak nade Yakobis, ma fadik nade Yohanis. Dua sara rafafaꞌu ralole puꞌak nai ofak dale sama-sama ro sira aman. Boe ma Yesus nanggou dua sara fo tunggan.
MAT 4:22 Dua sara ramanene rala naa, boe ma ara laꞌo ela sira ofan ma aman, fo tungga tutik ka roon.
MAT 4:23 Basa naa, Yesus asa laꞌok ndule profensi Galilea, fo fee nenorik nai hatahori Yahudi uma huhule-haradoin nara dale. Ana fee nenorik laꞌe-neu Manetualain Hara Lii Malolen, ma nafada dalan talo bee fo hatahorir bisa tungga Manetualain parendan. Ana oo, tao nahai basa hatahorir ruma sira hedi mata-matan nara mai boe.
MAT 4:24 Ta dook ka boe ma tutuik laꞌe-neu Yesus tataon naa, natanggela ndule basan losa profensi Siria. De hatahorir roo sira hatahori kamahedin nara fo hedis mata-matak kara reni Yesus reu. Ara oo reni hatahori fo nitu saꞌek, mulu bibik ma keko-luꞌuk boe. Boe ma Ana tao nahai basa sara.
MAT 4:25 Faik naa, hatahori noꞌun seli mai, de tunggan. Ara ruma profensi Galilea mai, ma ruma nusa kota salahunuk fo rasiꞌe roken rae, Dekapolis. Hambu laen bali, na, ruma kota Yerusalem mai, ruma profensi Yudea mai, ma ruma lee Yarden boboan seri mai.
MAT 5:1 Neu Yesus mete-nita hatahori noꞌun seli mai tungga Ndia, boe ma Ana hene neni lete-mbuku anak esa neu, de nanggatuuk neu naa. Ndia ana nunin nara fo neni here nalak kara raa, mai deka-deka fo nenene neun.
MAT 5:2 Boe ma Ana mulai nanori sara nae,
MAT 5:3 “Hatahori kasian nara fo mana parluu Manetualain raua, nahuu Manetualain mesa kana, ndia sira Mane neulaun.
MAT 5:4 Hatahorir mana rameda susa-sonak raua, nahuu Manetualain mesa kana, ndia kokoe-nanasi sara.
MAT 5:5 Hatahori kadiꞌik kara raua, nahuu neu ko ara simbo basa babaꞌe-babatik fo Manetualain helu-bartaak ena.
MAT 5:6 Hatahorir fo dalen nara hii ralan seli neu Manetualain eno-dala ndoon raua, nahuu neu ko Ana tao nala sara rameda dai.
MAT 5:7 Hatahorir mana ratudu dale kasian raua, nahuu neu ko Manetualain oo tuda kasian neu sara boe.
MAT 5:8 Hatahorir fo dalen nara lolo-laok raua, nahuu neu ko sira mesa kasa, ndia mete-rita Manetualain.
MAT 5:9 Hatahorir mana tao mole-damek raua, nahuu neu ko Manetualain nae, ‘Sira iar, Au anang nggara.’
MAT 5:10 Hatahorir mana hambu tuni-ndenik nahuu tungga Manetualain raua, nahuu Manetualain mesa kana, ndia sira Mane neulaun.
MAT 5:11 Neu faik fo hatahori laen tao doidoso ei, nahuu tungga Au, ei oo maua boe. Neu faik fo ara kokolak manggarauk neu ei, ma ratuik puputa-papata tao raboboo ei nadem mara, ei oo maua boe.
MAT 5:12 Leo mae talo naa oo, ei muste tao aom mara mamahoko ma dalem mara kada mbena sau-sau boe, nahuu Manetualain sadia bala fee ei babaꞌem noꞌun seli nai nusa tetuk do inggu temak ena. Tehuu masaneda, ee! Ta kada ei ndia doidoso talo naa, te bakahulun hatahorir oo tao manggarauk talo naa soa-neu Manetualain mana toꞌu dedeꞌan nara boe.”
MAT 5:13 “Mete ma ita tae tao nanaꞌak malada, na, ita tao masik neun dei. Leo naak oo, hatahorir mana leo nai dae-bafok ia, ara toꞌa neu ei boe. Tehuu mete ma masik mami ena, na, nanalan hata bali? Kada nggari henin neu dalak fo heheta-tatabun leo.
MAT 5:14 Ei oo muste leo-laꞌo sama leo lambu boe, mita fo hatahori noꞌuk ka mete-rita no neulauk. Ei mbilam mara muste rasaꞌa, nok bali kota manai letek lain, de basa hatahorir mete-ritan.
MAT 5:15 Hatahori mana nambila lambu tiꞌoek, ara ta ranggunggua lambu naa neu ure dae dale. Tehuu ara ratetende lambu naa neu mamana demak, mita fo ana tao manggaledo uma isin lalaꞌen.
MAT 5:16 Ei oo muste leo-laꞌo talo naa boe. Ei muste masaꞌa, mita fo hatahori laen nara mete-rita ei leleo-lalaꞌo neulaum mara. Neu ara mete-rita talo naa, neu ko ara koa-kio Manetualain rae, ‘Wee! Ei Amam manai nusa tetuk do inggu temak naa, ta neni babanggak!’ ”
MAT 5:17 “Ei boso duꞌa mae, Au uni dae-bafok ia mai, fo koka heni Manetualain hohoro-lalanen fo Ana feek neu baꞌi Musa. Ma boso duꞌa mae, Au ta tao matak neu hata fo Manetualain mana toꞌu dedeꞌan nara kokolak memak kana numa lele uluk mai ena. Huu Au mamaing ia, ae tao basan dadi tetar sama leo basa hata fo ara kokolak memak kana ena.
MAT 5:18 Huu naa de nenene matalolole, ee! Lalai no dae-inak bei ta rakalulutu, mete ma basa-basan bei ta dadi tungga Manetualain hohoro-lalanen nara. Leo mae titik do koma esa oo, ta bisa neni koka henik boe.
MAT 5:19 Numa Manetualain hatahorin lalaꞌen mai, mete ma hambu ketuk lena langga Manetualain hohoro-lalanen, nahuu ana duꞌa nae, ‘Hee! Hohoro-lalanek ia kadiꞌik ka, ta naena sosoak hata esa boe na!’ De ana nanori neu hatahori laen talo naa, neu ko Manetualain henggenee nalan dadi kada hatahori kadiꞌik nai nusa tetuk do inggu temak. Tehuu hatahori mana tao tungga Manetualain hohoro-lalanen lalaꞌen, boe ma ana nanori hatahori laen talo naa, neu ko Manetualain henggenee nalan dadi hatahori mana maena sosoak nai nusa tetuk do inggu temak.
MAT 5:20 Mamahere neu Au! Ei muste leo-laꞌo no ndoos lena heni meser anggama ma hatahori partei Farisir raa. Mete ma taa, na, ei ta bisa maso dadi miu Manetualain hatahorin.”
MAT 5:21 “Ei bubuluk baꞌi Musa hohoro-lalanen fo nafada memak kana neu ita bei-baꞌin nara ena nae, ‘Boso makanisa hatahori, te see nakanisa hatahori, neu ko ana hambu hukun.’
MAT 5:22 Tehuu Au ae afada talo ia: esa boso namanasa esa, te see namanasa ndia toranoon, neu ko ana hambu hukun. Hatahori mana nahuur mbali toranoon nae, ‘O uten leo kea!’ neu ko hatahori naa, muste neu nasare nai lasi anggamar matan. Ma hatahori mana mboka babalik ndia toranoon nae, ‘Nggoa bebek, ee!’, neu ko ana hambu hukun nai aꞌi mbila ta kala matek dale.
MAT 5:23 Dadi mete ma o muni fefeek soa-neu Manetualain, tehuu o masaneda mae, hambu o toranoom bei namanasa o,
MAT 5:24 na, boso mbeda o fefeem naa neu dei. Muu fo mole-dame mua o toranoom dei, basa naa dei fo o muu mbeda o fefeem soa-neu Manetualain.
MAT 5:25 Mete ma hambu hatahori rae radedeꞌa ro o, na, malole lenak o muu maote lai-laik fo mole-dame muan dei. Mete ma taa, na, neu ko hatahori naa leꞌa no o, fo muu masare mbali mana maketu-maladi dedeꞌak. Boe ma mana maketu-maladi dedeꞌak loo lima o muni pulisi muu, de ara sese o muni bui dale muu.
MAT 5:26 Au kokolak tetebes ia! Neu ko o leo makandoo muu bui dale, losa bae maketu basa o hutam lalaꞌen.”
MAT 5:27 “Ei bubuluk baꞌi Musa hohoro-lalanen mana nae, ‘Boso hohongge.’
MAT 5:28 Tehuu Au ae afada talo ia: hatahori mana botik matan fo mete-nita inak esa, boe ma dalen hii nalan seli nae sunggu-soro nakabua noon, na, touk naa hohongge no inak naa nai dalen dale ena.
MAT 5:29 Mete ma o tao salak munik o mata konam, na, doꞌi henin leo. Malole lenak o maso muni nusa tetuk do inggu temak muu, muni kada o matam esak ka lena heni ara nggari o muni aꞌi mbila ta kala matek muu, mua o mata deꞌem dua sara.
MAT 5:30 Ma mete ma o tao salak munik o lima konam, na, tete heni limak naa leo. Malole lenak o maso muni nusa tetuk do inggu temak muu, muni kada o limam esak ka lena heni ara nggari o muni aꞌi mbila ta kala matek muu, mua o limam dua sara.”
MAT 5:31 “Ei bubuluk baꞌi Musa hohoro-lalanen ena nae, ‘Hatahori mana namaketu no sao inan, na, ana muste fee inak naa susura nemeketuk.’
MAT 5:32 Tehuu Au afada talo ia: mete ma hambu hatahori namaketu no sao inan, naa te sao inan bei ta laꞌok sala nita no touk laen, boe ma inak naa sao seluk, na, naa sama leo sao touk makasososan, ndia tao inak naa hohongge-lelena. Mete ma hambu touk sao nala inak esa fo saon elan ena, na, dua sara oo hohongge-lelena naa ena boe.”
MAT 5:33 “Ei bubuluk baꞌi Musa hohoro-lalanen ena fo ana nafada neu ita bei-baꞌin nara nae, ‘Mete ma o soꞌuk hehelu-bartaak pake sumba-sook no Manetualain naden, na, o makaesa mua hehelu-bartaak naa ena.’
MAT 5:34 Tehuu Au afada talo ia: mete ma o soꞌuk hehelu-bartaak, na, boso pake sumba-sook. Boso sumba-soo pake nusa tetuk do inggu temak naden, nahuu nusa tetuk do inggu temak naa, Manetualain mamana leleon.
MAT 5:35 Boso sumba-soo pake dae-inak naden, nahuu dae-inak naa Manetualain ei tatabun. Ma boso sumba-soo pake Yerusalem naden, nahuu Yerusalem naa, Mane Ina-huuk kotan.
MAT 5:36 Boso sumba-soo pake ei langgam. Te ei ta maena koasa fo parenda ei langga bulu doom esa fo bisa dadi nggeok do mutik.
MAT 5:37 Dadi mete ma ei mae soꞌuk hehelu-bartaak mae, ‘hou’, na, mafada mae, ‘hou’ a leo. Tehuu mete ma ‘taa’, na, mae, ‘taa’ a leo. Mete ma ei kokolak lenak numa naa mai, na, naa naoka nai nitu dale ena.”
MAT 5:38 “Ei bubuluk baꞌi Musa hohoro-lalanen ena nae, ‘Mete ma hatahori tao nakalutu o matam, na, balan tao makalutu matan boe. Mete ma hambu hatahori tao namoꞌu heni o nisim, na, balan tao mamoꞌu heni nisin boe.’
MAT 5:39 Tehuu Au afada talo ia: boso bala manggarauk no manggarauk. Mete ma hatahori famba o nasum seri, na, elan numa naa fo ana famba o nasum seri bali.
MAT 5:40 Mete ma hambu hatahori nae nadedeꞌa no o, fo nae haꞌi nala o badum, na, fee o jeket neun bali.
MAT 5:41 Mete ma soldadu esa nakasetik o fo luꞌa-lemba ndia bua-baꞌun laꞌok kilo esa, na, lemba malan makandoo losa kilo dua.
MAT 5:42 Mete ma hambu hatahori noke o buam hata a mesan, na, feen neu leo. Ma mete ma hatahori nae pindan o buam hata a mesan, na, feen neu leo.”
MAT 5:43 “Ei mamanene hatahorir rae, ‘Sue-lai neu o toranoom, ma mburuk neu hatahori mana mburuk neu o.’
MAT 5:44 Tehuu Au afada talo ia: o muste sue-lai neu hatahori mana mburuk neu o. Ma moke-hule fo Manetualain fee babaꞌe-babatik soa-neu hatahori mana tao doidosok neu o.
MAT 5:45 Mete ma o tao talo naa, na, o matudu mae, o ia, Amak manai nusa tetuk do inggu temak anan. Huu Ana tao ledo nasaꞌa soa-neu hatahori neulauk, ma Ana oo tao ledo nasaꞌa soa-neu hatahori manggarauk boe. Ana oo nakonda udan soa-neu hatahori mana tao tungga Ndia parendan, sama-sama ro hatahori mana laban Ndia parendan boe.
MAT 5:46 Dadi mete ma o sue neu kada hatahori mana sue o, na, o duꞌa mae, Manetualain muste balan no fee o babaꞌe-babatik, do? Taa! Te hatahori manggarauk oo sue sira nonoon mana sue neu sara boe.
MAT 5:47 Mete ma o kada kokolak soda-molek neu o nonoom, na, lenan hata? Te hatahori ta kamaherek neu Manetualain oo tao talo naa boe.
MAT 5:48 Dadi masaneda, ee! O Amam manai nusa tetuk do inggu temak sue-lai neu basa hatahorir. Huu naa de o muste tao tungga talo naa boe!”
MAT 6:1 Yesus fee nenorik nakandoo nae, “Masaneda, ee! Boso tungga doꞌo-doꞌo mia anggama hohoro-lalanen, fo kada nau sangga hatahorir koa ei. Te mete ma ei tao talo naa, na, ei Amam manai nusa tetuk do inggu temak, ta fee ei seseba-babaek hata esa boe na.
MAT 6:2 Mete ma ei nau tulu-fali hatahori kasian nara, na, boso miu tui leli-belak kana nai bee a mesan. Te mete ma ei tao talo naa, na, ei sama leo hatahori mana kokolak laen, tao laen ena. Ara soa reu laꞌo-laꞌo nai uma huhule-haradoik, mita fo hatahorir koa sara rae, ‘Awii, hatahori ia, ta hohoꞌak!’ Au kokolang ia ndia tetebes! Huu no hambu kokoak talo naa, ara simbo rala sira seseba-babaen ena.
MAT 6:3 Dadi mete ma ei mae tulu-fali hatahori kasian nara, na, boso mafada see a mesan, ee!
MAT 6:4 No dalak naa, hatahori manai dae-bafok ia ta bubuluk. Tehuu ei Amam manai nusa tetuk do inggu temak ndia bubuluk hata fo ei taon no neneek naa. Neu ko Ana bala ei menik babaꞌe-babatik noꞌun seli.”
MAT 6:5 “Neu ei hule-haradoi, na, boso tao aom mara sama leo hatahori mana kokolak laen, tao laen. Ara soa reu laꞌo-laꞌo nai dala rame, ma rambariik rai uma huhule-haradoik, mita fo hatahori noꞌuk kara mete-rita ma koa sara rae, ‘Awii! Sira iar, hatahori malalaok!’ Tehuu nenene, ee! Huu no hambu kokoak talo naa, de ara simbo rala sira seseba-babaen ena.
MAT 6:6 Tehuu ei ta bole talo naa. Mete ma ei hule-haradoi, na, maso meni kama dale miu dei. Basa naa, nggoe lelesu, dei fo ei hule-haradoi mbali ei Amam no neneek. Leo mae hatahori laen ta mete-rita, tehuu ei Amam mete-nita. Neu ko Ana bala ei no babaꞌe-babatik noꞌun seli.
MAT 6:7 Mete ma ei hule-haradoi, na, boso kokolak maputak miu-mai. Hatahori ta mana malela Manetualain oo bisa hule-haradoi talo naa boe. Ara duꞌa rae, Manetualain hii nenene huhule-haradoin nara fo mana lolola naruk naa.
MAT 6:8 Boso tao tungga sama leo sira, ee! Te mae ei bei ta moke hata-hata neu Amak manai nusa tetuk do inggu temak, tehuu Ana bubuluk memak hata fo ei toꞌak ena.
MAT 6:9 Dadi mete ma hule-haradoi, na, pake netuduk talo ia: ‘Amak manai nusa tetuk do inggu temak! Amak naden malalaok mateꞌen. Naa fo basa hatahorir rakadedemak Amak naden ta neni babanggak.
MAT 6:10 Naa fo Amak dadi Manek soa-neu basa hatahorir! Naa fo basa hatahorir tao tungga Amak parendan nai dae-bafok ia, sama leo Amak atan nara tao tungga Amak parendan nai nusa tetuk do inggu temak.
MAT 6:11 Amak tulun fee ai nanaꞌak mana daik tungga faik.
MAT 6:12 Ai moke-hule Amak koka heni ai sala-singgon nara, sama leo ai oo lilii heni basa hatahorir salan fo ara tao neu ai boe.
MAT 6:13 Amak, manea fo ai ta tao manggarauk. Ma tao masoi-masoda ai numa nitu koasan mai. [Huu Amak ndia, Manek mana maena koasa mateꞌen ma ta neni babanggak. Amak mana toꞌu parenda seku neu. Ai huhule-haradoin talo kada naa, Amak. Amin.]’
MAT 6:14 Tehuu masaneda, ee! Mete ma ei lilii heni hatahori salan neu ei, neu ko ei Amam manai nusa tetuk do inggu temak oo koka heni ei sala-singgom mara boe.
MAT 6:15 Tehuu mete ma ei ta nau lilii heni hatahorir salan neu ei, neu ko ei Amam oo ta koka heni ei sala-singgom mara boe.”
MAT 6:16 “Mete ma ei hule-haradoi ma puasa, na, boso tao idu-matam mara mana sunda-lukak sama leo hatahori mana kokolak laen, tao laen. Ara tao talo naa, mita fo hatahorir koa sara rae, ‘Awii! Sira iar, hatahori malalaok!’ Tehuu nenene, ee! Huu no hambu kokoak talo naa, de ara simbo rala sira seseba-babaen ena.
MAT 6:17 Mete ma ei puasa, na, marou idu-matam mara lao-laok, ma sau malole langga bulum mara!
MAT 6:18 Dadi, neu ko hatahorir mete-rita ei, ara ta bubuluk rae, ei puasa. Tehuu ei Amam ndia bubuluk. Neu ko Ana bala fee ei babaꞌe-babatik noꞌun seli.”
MAT 6:19 “Boso maue-osa fafandek lima-eim mara fo maduduru hata-heto noꞌun seli nai dae-bafok ia. Te fufuk no rutu raꞌa heni sara. Ma naꞌo manu-meo oo mai ofe uma fo baꞌu neni sara boe.
MAT 6:20 Tehuu malole lenak maue-osa fafandek lima-eim mara fo maduduru hata-heto noꞌun seli nai nusa tetuk do inggu temak. Te nai naa fufuk no rutu ta bisa rakalulutu sara. Ma naꞌo manu-meo oo ta bisa mai ofe uma fo baꞌu neni sara boe.
MAT 6:21 Ei mbeda hata-hetom nai bee, neu ko ei dalem mara oo rakadite nai naa boe.”
MAT 6:22 “Hatahori matan, sama leo lambu tao nanggaledo ndia dalen. Mete ma matan manggaledok, na, ana tungga eno-dala masoda malole, sama leo hatahori laꞌok nai manggaledok dale.
MAT 6:23 Tehuu mete ma ndia matan kiu-habu, na, ana ta tungga eno-dala malole, sama leo hatahori laꞌok nafaroroe a nai makiuk dale. Dadi mete ma manggaledok manai ei dalem naa dadi makiuk ena, na, ei oo leo-laꞌo nai makiuk dale boe.”
MAT 6:24 “Hatahori ta bisa naue-osa tebe-tebe soa-neu malanggan dua, nahuu neu ko ana hii malanggan esa, lena heni malanggan laen. Boe ma ana bisa tungga malanggan esa, tehuu ana ta tao matak neu malanggan laen. Huu naa de o ta bisa kokolak mae, ‘Lamatuak naa, ndia naena haak fo parenda au,’ mete ma o tao doik dadi neu o malanggam ena.
MAT 6:25 Huu naa de Au afada talo ia: boso masambute mia duduꞌak, au ae asoda talo bee, au ae uꞌa hata, inu hata, pake hata? Ei duꞌa mae, masodak naa, kada ndia naꞌa-ninuk mesa kana, do? Ma ao-inak naa, kada soa-neu pake bua-loꞌas mesa kana, do? Ta talo naa.
MAT 6:26 Mete sudik mbuik mana lambuk kara rai lalai naa. Ara ta rasambute sele-tande do ketu-koru fo rahinda nanaꞌak nai soka-pole. Tehuu ei Amam manai nusa tetuk do inggu temak nakaboi-nasamao sara rakandoo. Neu ko Ana bisa nakaboi-nasamao ei lena heni basa mbuik kara raa. Dadi duꞌa matalolole dei. Ana timba-tai ei lena heni mbuik kara raa.
MAT 6:27 Mete ma hatahori nambariik nai titiro matan, boe ma ana nasambute no ao heli-helin, ana bisa tao nadema ao-inan, do? Ta bisa!
MAT 6:28 Mete ma taa, na, tao hata de ei masambute fo duduꞌa laꞌe-neu bua-loꞌas bali? Miu mete sudik bungga bakung manai mook. Ara ta lolo abas, ma ta tenu temak.
MAT 6:29 Tehuu nenene matalolole, ee! Manek Soleman bua-loꞌan mana mandela-masaꞌa lenak oo, ta bisa laban bungga raa lolen nara boe.
MAT 6:30 Manetualain dalen susuri-memete neu bungga fo nasoda kada faik ia, boe ma beꞌe-mai maten de hatahori nggarin neni aꞌi dale neu. Mete ma Ana tao talo naa, neu ko Ana oo heti ei lena heni bungga raa boe. Dadi ei muste mamahere tebe-tebe neun.
MAT 6:31 Huu naa de hae masambute duduꞌa mae, ‘Ai mae miꞌa hata?’ do, ‘Minu hata?’ do, ‘Pake hata?’
MAT 6:32 Hatahorir ta mana ramahere neu Manetualain, ara raue-osa fafandek lima-ein nara fo rae soba hambu basa naar lalaꞌen. Tehuu ei boso talo naa, huu ei Amam manai nusa tetuk do inggu temak bubuluk basa hata fo ei toꞌak kara ena.
MAT 6:33 Tehuu ei muste makalalaꞌok makahuluk Ndia uen dei, ma muste tungga Ndia parendan dei, basa naa neu ko Ana fee tamba basa hata fo ei toꞌak.
MAT 6:34 Dadi boso masambute duduꞌa mia hata fo ei toꞌak beꞌe-mai. Huu beꞌe-mai hambu ndia totoꞌan laen bali. Faik ia susa-sonan mesa kana dai ena.”
MAT 7:1 “Ei boso makasasaꞌek salak neu hatahori, mita fo Manetualain ta nakasasaꞌek salak neu ei.
MAT 7:2 Ei timba-tai hatahori talo bee, na, neu ko Manetualain oo timba-tai ei talo naa boe. Ei uku-sudi hatahori laen salan talo bee, neu ko Manetualain oo uku-sudi ei talo naa boe.
MAT 7:3 O hii tanda hatahori sala kadiꞌi anan, tehuu o sala moꞌom, o taon leo bali ta maena salak. Naa, sama leo o mete-mita uꞌuk esa nai o nonoom matan, naa te hambu balo moꞌok natabaa nala o matam, tehuu o ta mameda sana.
MAT 7:4 Talo bee de o mambarani kokolak mae, ‘Tia-laik! Mai fo au nggai heni uꞌuk numa o mata deꞌem mai dei.’ Naa te o mesa ngga ta bisa mete-mita hata-hata, huu hambu balok natabaa nala o matam, na.
MAT 7:5 Woi! O ia, memak hatahori mana dea-matak tebe-tebe! Tulun dei! Piru heni balok naa numa o mata heli-helim mai, dei fo o bisa mete-mita, de tulu-fali mala o nonoom fo nggai heni uꞌuk numa o nonoom naa matan mai.
MAT 7:6 Boso fee nenorik dedeꞌa malalaok laꞌe-neu Manetualain, fee hatahori mana makatitiik. Te sira raa, sama leo busa kakikik fo neu ko ara fali mai fo kiki ei. Sira oo nggoa bebek kara, sama leo bafi boe. Mete ma hatahori feen poemata mabeli, na, ana ta mbali sana. Ana kada roroo-tatabun.”
MAT 7:7 “Mete ma ei hule-haradoi, moke makandoo neu Manetualain; neu ko Ana fee. Mete ma ei sangga makandoo, neu ko Ana natudu dalak. Mete ma ei manggou makandoo; neu ko Ana soi lelesu.
MAT 7:8 Huu basa hatahorir fo mana roke rakandoo neu Manetualain, neu ko ara simbo. Mana sangga rakandoo, neu ko ara hambu. Mana ranggou rakandoo, neu ko Ana soi lelesu.
MAT 7:9 Ei duꞌa sudik kana! Mete ma hambu kakanak fo noke roti, neu ko aman ta feen batu, hetu?
MAT 7:10 Do, noke iꞌak, aman ta feen mengge!
MAT 7:11 Ei Amam manai nusa tetuk do inggu temak naa, memak neulaun seli. Dadi mete ma hatahori dae-bafok manggarauk matak leo ei ia, hii fee hata fo neulauk soa-neu ei anam mara, hata-bali ei Amam! Neu ko Ana fee hata fo ei mokek.
MAT 7:12 Dadi hata fo o nau hatahori laen taon fee o, na, o muste tao talo naa soa-neun boe. Huu dedeꞌak ia dadi neu oka-huuk numa basa hata fo baꞌi Musa no Manetualain mana toꞌu dedeꞌa laen nara fee nenorik memak kasa numa lele uluk mai ena.”
MAT 7:13 “Mete ma hatahori nae maso neni nusa tetuk do inggu temak neu, na, ana muste maso tungga lelesu makabiꞌak. Hambu dala mudak no lelesun loak boe, fo hatahori noꞌuk kara hii tunggan. Tehuu besa-besa, ee! Dalak leo naak ndia neni hatahori reni mamana aꞌi mbila ta kala matek reu, fo ara rabinggak ruma Manetualain mai.
MAT 7:14 Hatahori mana nae maso neni nusa tetuk do inggu temak neu, muste tungga dala manggataꞌak naa, ma maso lelesu makabiꞌak naa. Leo mae kada hatahori hidak ka laꞌok resik naa, tehuu dala makabiꞌak leo naak, neni hatahori reni Manetualain reu.”
MAT 7:15 “Besa-besa mia mana pepeko-lelekok fo soꞌuk aon nara rae, sira iar Manetualain mana toꞌu dedeꞌan. Ara tao aon nara malole nok bali bibi lombo. Naa te sira raa manggarauk, nok bali busa fuir mana mai raꞌa bibi lombo.
MAT 7:16 Talo bee fo ei bisa malela hatahori mana dea-matak kara raa? Mete neu kada hata fo ara taok. Sama leo hatahori mete-rita ai boak, de ralela ai boak naa huun. Ai boa neulauk, ta dadi numa ai huuk ta neulauk mai.
MAT 7:17 Ai huu neulauk naboa neulauk. Tehuu ai huu ta neulauk naboa ta neulauk.
MAT 7:18 Ta hambu ai huu neulauk, naboa ta neulauk. Ma ta hambu ai huu ta neulauk naboa neulauk.
MAT 7:19 Ai huu mana naboa ta neulauk, neu ko ara mai hungga henin fo nggarin neni aꞌi dale neu.
MAT 7:20 Leo naak oo, no mana toꞌu dedeꞌak mana dea-matak kara raa boe. Ei bisa malela sara numa sira tatao-nonoꞌin nara mai.”
MAT 7:21 “Neu ko hambu hatahorir ranggou Au rae, ‘Lamatuak!’, fo mana maena haak parenda neu sara. Tehuu sira iar, raseseik nai kada bifi doon nara. Neu ko Manetualain manai nusa tetuk do inggu temak piru-nggari heni sara. Kada hatahori mana tungga no tebe-tebe Manetualain hihii-nanaun, ndia Ana simbok kana dadi neu Ndia hatahorin.
MAT 7:22 Neu dae-bafok fai mateꞌen, hatahori noꞌuk ka manaku rae, Au ia ndia aena haak parenda neu sara. Ara kokoe Au rae, ‘Lamatuak, ee! Ai miu tui-bengga tao matanggela Lamatuak nenorin ena. Ai oo husi nitur pake Lamatuak naden boe. Ma ai tao tanda heran mata-matak kara pake Lamatuak koasan.’
MAT 7:23 Leo mae ara kada kokoe Au talo naa, tehuu neu ko Au aselu sara ae, ‘Eir ia, see? Au ta alela ei, ei ta leo-laꞌo tungga Manetualain hihii-nanaun. Dadi malai heok laꞌo ela ia leo!’ ”
MAT 7:24 “Hatahori mana mai nenene Au, boe ma tao tungga Au kokolang, ndia naa sama leo hatahori malelak, fo nambaririik uman nai batu fanderen lain.
MAT 7:25 Doo-doo boe ma uda moꞌok konda losa faa lala mai. Ani makarumbuk oo, mai fumbu babalik uma naa boe. Tehuu uma naa ta ndefa heni sana, nahuu nambariik nai batu fanderen matea lain.
MAT 7:26 Hatahori mana mai nenene Au, tehuu ana ta tao tungga Au kokolang, ndia naa sama leo hatahori nggoa bebek fo nambaririik uman nai sarakaek lain.
MAT 7:27 Doo-doo boe ma uda moꞌok konda losa faa lala mai. Ani makarumbuk oo, mai fumbu babalik uma naa boe. De uma naa ndefa henin losa nakalulutu.”
MAT 7:28 Yesus kokolak basa talo naa, boe ma basa hatahorir heran bali-bali ramanene Ndia nenorin,
MAT 7:29 huu Ana bubuluk tebe-tebe nenorik naa isin. Ndia fefee nenorin naa, ta sama no sira meser anggaman nara.
MAT 8:1 Yesus konda numa letek mai, boe ma hatahori noꞌuk ka rame-rame reu fo tunggan.
MAT 8:2 Medak neu ma, hambu hatahori hedi kusta esa mai nasare mbalin. Ana sendek luu-langgan fo noke tulu-falik neu Yesus nae, “Lamatuak, ee! Tulu-fali au dei! Mete ma Lamatuak nau, na, Lamatuak bisa mamopo au heding ia, mita fo hatahori boso nunute au bali, boe ma au bisa hule-haradoi seluk nai uma huhule-haradoik dale.”
MAT 8:3 Yesus namanene nala naa, boe ma Ana loo liman de nafaroe neu hatahori kusta naa, ma kokolak nae, “Au nau a mesan! O hai leo!” Medak neu ma, hatahori naa hedin mopon tutik ka.
MAT 8:4 Boe ma Yesus nafadan nae, “Masaneda, ee! O hai ena, tehuu ta bole mafada esa boe na. O muste tungga baꞌi Musa hohoro-lalanen dei. Dadi muni malangga anggama muu fo ana parisa o ao-inam, mita fo ana bubuluk o hedim mopon tebe-tebe ena, do beik. Boe ma o muste muni o fefeem tanda makasi fo basa hatahorir bubuluk rae, o hai tebe-tebe ena.”
MAT 8:5 Basa boe ma Yesus maso neni nggorok Kapernaum neu. Nai naa, hambu komedan soldadu Roma esa mai noke tulu-falik nae,
MAT 8:6 “Papa, ee! Au ana mana maue-osang esa namahedi berak nai uma. Ana ta bisa nambadeik laꞌo ela mamana susunggun, de ana doidoso nalan seli.”
MAT 8:7 Yesus naselu nae, “Malole! Dei fo Au uu tao ahain.”
MAT 8:8 Tehuu komedan naa nae, “Papa! Papa hae makamamangguk aom fo mai bali, huu au ta andaa simbok Papa nai au umang. Sadi Papa kada kokolak numa ia mai leo, neu ko au ana mana maue-osang naa, hai tutik kana.
MAT 8:9 Au bubuluk dalak ia, nahuu au malanggang naena koasa fo parenda au. Ma au oo aena koasa fo parenda au soldadung nggara boe. Mete ma au parenda au ana nuning ae, ‘Muni naa muu!’ Neu ko ana neu. Mete ma au ae, ‘Ia mai!’ Neu ko ana mai boe. Mete ma adenu au hatahori mana maue-osang ae, ‘Tao ia!’ Neu ko ana tao talo naa. De sadi Papa kada kokolak, neu ko au ana mana maue-osang naa, hai tutik kana.”
MAT 8:10 Yesus namanene nala naa, boe ma Ana heran. Ana kokolak neu hatahori noꞌuk kara mana tunggan nae, “Heran, ee! Doo basa ia, Au bei ta atonggo ita hatahori Yahudi esa boe na, fo nemeheheren matea sama leo hatahori Roma ia!
MAT 8:11 Nenene, ee! Neu ko hambu hatahori feꞌek noꞌuk ka sama leo hatahori Roma ia ruma dulu mai, ma ruma muri mai. Ara mai fo ranggatuuk raꞌa feta sama-sama ro baꞌi Abraham, baꞌi Isak ma baꞌi Yakob nai Manetualain uman nai nusa tetuk do inggu temak.
MAT 8:12 Leo mae Manetualain here nala hatahori Yahudir fo dadi reu Ndia hatahorin, tehuu hambu noꞌuk ka ta tao matak neu sana. Neu ko Ana timba heni sara reni mamana makiu-makahatuk dale reu. Nai naa, ara buꞌi rakarereu ma doidoso ralan seli.”
MAT 8:13 Yesus kokolak basa talo naa, boe ma nafada komedan naa nae, “Ama fali leo. Huu ama ana mana maue-osan naa hai ena, sama leo ama nemeheheren.” Ndaa no hatematak naa, kanak naa hai tutik kana.
MAT 8:14 Laꞌe esa, Yesus neni Petrus uman neu. Ana mete-nita Petrus ari-inan sunggu nai mamana susungguk lain, huu ana sumai.
MAT 8:15 Yesus toꞌu nala liman, boe ma ina lasik sumain mopon tutik ka. De ana nambadeik neu nalalau Yesus asa.
MAT 8:16 Neu ledo sangga tesa, boe ma hatahorir mai reni sira hatahorin fo nitu saꞌek kara. De Yesus parenda nitur raa nae, “Weeh, nitu! Malai heok laꞌo ela hatahorir ia leo!” Boe ma nitur raa ralai tutik ka. Ana oo tao nahai basa hatahori hedis sara boe.
MAT 8:17 Ana tao basa iar, tungga hata fo Manetualain mana toꞌu dedeꞌan Yesaya surak memak kana nae, “Ana tao nahai ita hedin nara. Ma Ana nasaa nala ita doidoson.”
MAT 8:18 Basa naa, Yesus mete-nita hatahori noꞌuk ka mai eko ralan. Boe ma Ana nadenu ana nunin nara nae, “Mai fo ita saꞌe ofak teni dano boboan seri teu.”
MAT 8:19 Boe ma hambu meser anggama esa mai kokolak nae, “Papa Meser! Papa neni bee neu a mesan, na, au ae tungga akandoo ua Papa!”
MAT 8:20 Tehuu Yesus naselu nae, “Malole, boe! Tehuu masaneda talo ia. Basa hatahorir ma banda-manur kamamana leleo-luluꞌuk mesan. Busa fui fali neni ndia bolo luluꞌun neu. Mbuik fali neni ndia ndunun neu. Tehuu Au, Hatahori Dae-bafo Isi-isik ia, ta aena uma heli-heling fo fali uni naa uu. Mamana ndae langgak neu oo, ta hambu boe.”
MAT 8:21 Boe ma hatahori laen esa bali, fo mana tungga-tungga no Yesus mai noke nae, “Lamatuak! Au nau tungga Lamatuak, tehuu elan fo au fali fo faduli ina-amang nggara dei. Mete ma au amang maten ena, na, dei fo au tungga.”
MAT 8:22 Boe ma Yesus kokolak nae, “Talo ia! Elan numa naa fo hatahorir ta mana ramahere neu Manetualain, ara rafafaꞌu sira hatahori mana maten. Tehuu mete ma o mae tungga Au, na, o muste tungga no tebe-tebe!”
MAT 8:23 Basa boe ma Yesus hene neni ofak lain neu sama-sama no Ndia ana nunin nara.
MAT 8:24 Neu ara saꞌe ofak reni dano boboan seri reu, boe ma Yesus sunggu. Ta dook ka boe ma ani makarumbuk mai. Rii tufa reu-mai, de oe lala neni ofak dale neu.
MAT 8:25 Yesus ana nunin nara mete-rita naa, boe ma ara fafaen rae, “Lamatuak! Lamatuak, ee! Mambadeik fo fali mala ai dei! Te ita sangga molo mate ia ena!”
MAT 8:26 Boe ma Yesus naselu nae, “Heeh, tao hata de ei mamataꞌu!? Ei ta mamahere Au, do?” Boe ma Ana nambadeik. De Ana kaꞌi anin ma rii naa nae, “Hahae leo!” Boe ma rii no anin lende tutik kana leo.
MAT 8:27 Yesus ana nunin nara heran. Ara kokolak rae, “Awii! Ndia ia see, ee? Talo bee de Ana bisa parenda anin no rii fo tungga Ndia hihii-nanaun?”
MAT 8:28 Ta dook ka boe ma, ara losa dano tatain seri nai hatahori Gadara nusan. Numa naa, hambu hatahori fo nitu saꞌek dua, ara leo rai lua batu mamana hatahori mates. Sira raa, manggaraun nara seli, de ta hambu hatahori esa boe na nambarani laꞌok nesik naa. Ara mete-rita Yesus mai,
MAT 8:29 boe ma ara eki rae, “Wooi, Manetualain Anan! Tao hata de O mai pode-ura babalik ai? Leo mae fain fo sangga huku-doki ai bei ta losa, tehuu O mae tuni-ndeni ai ena.”
MAT 8:30 Deka-deka no mamanak naa, hambu bafi noꞌuk ka sosoka dae sangga nanaꞌak.
MAT 8:31 Boe ma nitur raa roke-hule neu Yesus rae, “Mete ma O nau husi ai, na, madenu ai maso meni kada bafir raa dale miu!”
MAT 8:32 De Yesus parenda sara nae, “Miu leo!” Basa naa, nitur raa kalua laꞌo ela hatahori kaduak kara raa, de maso reni bafir raa dale reu. Bafir raa ralaik ralenggu-pikok, boe ma ara tuda tungga mbiak tatain reni dano dale reu. De basa sara mate rasamele.
MAT 8:33 Mana manea bafir mete-rita mandadik naa, boe ma ara ralaik fali reni nggorok reu, de ara tui basa-basan.
MAT 8:34 Hatahori noꞌuk kara ramanene rala tutuik naa, boe ma ara kalua reni mamanak naa reu. Ara ratonggo ro Yesus, de ara kokoen nakandoo fo Ana laꞌo ela sira mamanan.
MAT 9:1 Basa naa, Yesus asa saꞌe falik ofak fo reni dano boboan seri reu, de ara losa kota Kapernaum, Ndia mamana leleon.
MAT 9:2 Numa naa, hambu hatahorir ndoro reni sira nonoon keko-luꞌuk neni Yesus neu. Yesus mete-nita naa, boe ma Ana bubuluk ara ramahere reu Ndia rae, Ndia bisa tao nahai sira nonoon naa. Huu naa de Ana kokolak neu hatahori keko-luꞌuk naa nae, “Ana nggee! Matetea o dalem dei! Au koka heni o sala-singgom mara ena.”
MAT 9:3 Tehuu hambu meser anggama Yahudir hida ruma naa, ara ramanene Yesus kokolan naa. Boe ma dalen nara rakasuka tutik kana. De ara rakokola aok rae, “Hatahori ia nambarani nalan seli kokolak talo naa! Kada Manetualain mesa kana bisa fee ambon hatahori sala-singgon. Tehuu hatahori ia kokolan naa, tao aon sama leo ndia ia, Manetualain. Ana nakadadaek naa ena!”
MAT 9:4 Tehuu Yesus bubuluk dale kuru-eron nara. De Ana kokolak nae, “Tao hata de ei duꞌa mae, Au ia kokolak akadadaek?
MAT 9:5 Bee ndia mudan lenak? Mete ma Au afada hatahori keko-luꞌuk ia ae, ‘O sala-singgom hambu ambon ena,’ do, Au ae, ‘Mambadeik leo, fo fali muu ngga.’
MAT 9:6 Mete ma ana nambadeik tutik kana, dei fo ei mete-mita bukti mae, Au ia, Hatahori Dae-bafo Isi-isik. Au aena haak fo fee ambon neu hatahori sala-singgon.” Boe ma Yesus parenda hatahori keko-luꞌuk naa nae, “Mambadeik leo! Luꞌa mala o lalanggam fo laꞌok fali muu ngga leo!”
MAT 9:7 Boe ma hatahori keko-luꞌuk naa nambadeik, de ana laꞌok fali neu ngga.
MAT 9:8 Neu basa hatahorir mete-rita naa, boe ma ara heran. De ara rakadedemak Manetualain naden rae, “Manetualain naa, ta neni babanggak! Ana fee koasa moꞌok talo ia neu hatahori dae-bafok ena.”
MAT 9:9 Basa naa, Yesus laꞌo numa naa mai, boe ma Ana mete-nita hatahori mana susu bea esa, tao ues nai uma sususu bea. Naden Mateos. De Yesus noke nalan nae, “Mai fo tungga Au!” Mateos namanene nala naa, boe ma ana nambadeik fo tunggan tutik kana.
MAT 9:10 Basa de Mateos noke Yesus fo mai naꞌa nai ndia uman. Ana oo noke ndia nonoo mana susu bean nara, ma fuik laen nara boe, fo mai raꞌa sama-sama roo sara.
MAT 9:11 Tehuu hambu hatahori hida ruma partei Farisi mai unggu-remu reu Yesus ana nunin nara rae, “Tao hata de ei mesem nanggatuuk naꞌa sama-sama no hatahori papake taak kara, sama leo mana susu bear raa, ma sira nonoo manggaraun nara?”
MAT 9:12 Boe ma Yesus nafada sara nae, “Hatahori kamahedik memak parluu doter. Tehuu hatahori bee fo sodak ena, ta parluu.
MAT 9:13 Malole lenak ei fali miu ngga fo parisa matalolole Manetualain Dedea-kokolan, fo lele uluk Ana nadenu Ndia mana toꞌu dedeꞌan Hosea surak nae, ‘Au hihii-nanaung ndia, Au hatahoring nggara rasue-laik ma ratudu dale kasian esa no esa. Mete ma ara ta tao talo naa, na, sira tunu-hotun banda fo ara renin fee Au naa, nanalan ta faa boe na.’ Naa, ndia Manetualain nafada ena. Huu naa de Au ta mai fo faduli hatahori mana tao aon neulauk ena, tehuu Au mai fo faduli hatahori ta kambareek kara.”
MAT 9:14 Basa naa, Yohanis Mana Saranik ana nunin nara reni Yesus reu. Ara ratane rae, “Ai mana tungga Yohanis naa, masiꞌe puasa. Hatahori Farisir oo puasa boe. Tehuu tao hata de Papa ana nunin nara raꞌa-rinu rakandoo? Sira raa, ta ralela puasa, do?”
MAT 9:15 Tehuu Yesus naselu sara pake lololek nae, “Talo ia: mete ma hambu feta kabin, fuik kara ta puasa, tehuu ara raꞌa losa rakabete. Mete ma baroit touk bei nai naa, neu ko basa sara raꞌa rame-rame. Tehuu neu laꞌe esa, mete ma hatahori laen humu reni baroit touk, boe ma ndia nonoon nara rameda susa, dei fo lelek naa ara puasa.
MAT 9:16 Hatahori ta haꞌi rala tema beuk bibiak faa fo tandan neu badu raak mana sidak ena. Te mete ma safe badu naa, tema neni tanda beuk naa, neu ko ana kukundu. No dalak naa, badu raak naa sidan boe tamba.
MAT 9:17 Leo naak oo hatahori ta radai oe anggor beuk neni boboꞌik banda rou raak dale neu boe, te neu ko kadin ma ana sii sasarak, de oe anggor beuk naa mboꞌa henin. Dadi oe anggor beuk muste nadain neni boboꞌik banda rou beuk neu, fo dua sara rakatataka no neulauk.” [No lololek naa, Yesus nanori sara nae Ndia nenorin naa, beuk. Dadi boso feen nabali no nenori raak.]
MAT 9:18 Neu Yesus bei kokolak no Yohanis ana nunin nara, boe ma hambu malangga uma huhule-haradoik esa mai natonggo no Yesus. Hatahori naa sendek luu-langgan neu Yesus matan, de noke-hule nae, “Papa, ee! Tulun dei! Te au ana fetong dei fo maten. Papa tulun mai ndae limam neun dei, fo ana bisa nasoda fali numa mamaten mai.”
MAT 9:19 Yesus namanene nala naa, boe ma Ana no ana nunin nara tungga memak ro hatahori naa.
MAT 9:20 Neu ara bei laꞌok numa dalak, hambu inak esa laꞌo tungga sara. Ana hambu bulak ta tungga ndoon losa teuk salahunu dua ena. Ana duduꞌa nai dalen dale nae, “Sadi au bisa afaroe kada Yesus badun, neu ko au hai.” Huu naa de ana neu nafaroe Yesus badun suꞌun.
MAT 9:22 Yesus nameda, boe ma Ana hekor aon de mete neu inak naa. Boe ma Ana kokolak nae, “Ana nggee! Matetea o dalem. Huu o mamahere tebe-tebe neu Au, de o hai ena.” Hatematak naa oo inak naa hai tutik kana boe.
MAT 9:23 Basa de Yesus asa laꞌok rakandoo reni malangga uma huhule-haradoik naa uman reu. Losa naa, boe ma Ana maso de mete-nita manahelo bini susa-sonak, ma hatahori noꞌuk ka buꞌi rakarereu.
MAT 9:24 Boe ma Yesus nafada sara nae, “Hahae bubuꞌik, fali miu ngga leo! Huu kakanak ia ta mate. Ana kada sunggu a.” Tehuu ara hika korombiꞌe bafan nara mbali Yesus.
MAT 9:25 Boe ma hatahorir raa, basa sara kalua. De Yesus maso neni kakanak naa kaman dale neu, ma toꞌu nala liman. Boe ma kakanak naa nasoda fali numa mamaten mai tutik kana.
MAT 9:26 Hatahori mete-rita naa, boe ma ara mulai ratuik ndule sira nusan, laꞌe-neu hata fo Yesus taok naa ena.
MAT 9:27 Basa boe ma Yesus laꞌok nakandoo. Neu bei laꞌok numa dalak, hambu hatahori pokek dua tungga-tungga roon. Ara eki rae, “Mane Dauk tititi-nonosin, ee! Kasian neu ai dei!”
MAT 9:28 Yesus maso neni uma dale neu, boe ma hatahori pokek kaduak kara raa reni Yesus reu. De Ana natane sara nae, “Ei mamahere tebe-tebe mae, Au aena koasa fo tao ei bisa mete-mita?” Boe ma ara raselu rae, “Awii! Papa boso matane bali, te ai mamahere Papa tebe-tebe ena.”
MAT 9:29 Yesus namanene nala naa, boe ma Ana nafaroe matan nara, de kokolak nae, “Mete ma talo naa, na, ana dadi leo tungga ei nemeheherem naa!”
MAT 9:30 Yesus kokolak basa talo naa, boe ma ara mete-rita tutik ka. Tehuu Yesus fee nesenedak maherek neu sara nae, “Masaneda, ee! Boso mafada hatahori esa boe na, hata fo mandadik ia ena!”
MAT 9:31 Tehuu ara ta bisa rakataka rala aon nara. De ara laꞌok ndule nusak naa, fo tui ratanggela hata fo Yesus taok naa.
MAT 9:32 Hatahori pokek kaduak kara raa kalua, boe ma hatahorir nuni roo hatahori laen esa neni Yesus neu. Hatahori naa, ta bisa kokolak, nahuu nitu saꞌen.
MAT 9:33 Yesus mete-nita naa, boe ma Ana parenda nitu naa kalua laꞌo ela hatahori naa. Nitu naa kalua, boe ma hatahori naa kokolak tutik kana. De hatahori noꞌuk kara marai naa, heran bali-bali. Ara rae, “Awii! Ita hatahori Yahudir bei ta mete tita mandadik leo iak ia!”
MAT 9:34 Tehuu hatahori Farisir ta ramahoko. Ara kokolak rae, “Weeh! Nitur malanggan ndia feen koasa fo Ana bisa husi kalua nitur.”
MAT 9:35 Basa de Yesus laꞌok ndule kota ma nggorok noꞌuk ka, fo fee nenorik nai uma huhule-haradoik kara. Ana nanori hatahorir laꞌe-neu Manetualain Hara Lii Malolen, ma tao talo bee fo bisa maso dadi Ndia hatahorin. Ana oo, tao nahai hedis mata-matak kara, ma basa hatahorir fo ao-mbaan nara mana male-maꞌak kara boe.
MAT 9:36 Yesus mete-nita hatahori noꞌuk kara raa, boe ma Ana tuda kasian neu sara, nahuu ara ta bubuluk tao talo bee. Basa sara, sama leo bibi lombo fo mana lolo taak.
MAT 9:37 De Yesus kokolak no Ndia ana nunin nara nae, “Hatahori noꞌuk kara ia, sama leo osi-lutu buna-boan. Leo mae buna-boan noꞌuk, tehuu hatahori mana maue-osa ta dai fo ketu-koru rala buna-boan nara raa, fo rambeda sara rai soka-poler dale.
MAT 9:38 Huu naa de ei muste moke Tenu osik fo Ana nadenu hatahori mana maue-osar, mita fo ara reu rakabubua rala Ndia osin buna-boan nara.”
MAT 10:1 Basa naa, Yesus nanggou nala Ndia ana nunin nara fo mai rakabua. Boe ma Ana fee sara koasa fo husi nitu ma tao rahai hatahori ruma sira hedi-raun mata-matak kara mai.
MAT 10:2 Ana nuni kasalahunu duak kara fo Ana nadenu sara raa naden nara, sira: Kaesan, nade Simon (ara rasiꞌe roken rae, ‘Petrus’), ma fadin, nade Anderias, boe ma Yakobis, ma fadin, nade Yohanis (dua sara, Sabadeus anan).
MAT 10:3 Hambu Felipus boe, ma Bartolomeos. Tomas, ma Mateos (mana susu bea). Boe ma Yakobis (Alpius anan), ma Tadius.
MAT 10:4 Boe ma Simon (mana tungga Selot partei politin), ma Yudas Iskariot (fo neu ko ana ndia seꞌo heni Yesus).
MAT 10:5 Basa naa, Yesus nadenu Ndia ana nuni kasalahunu duan nara, ma Ana fee parenda nae, “Au adenu ei meni ita hatahori Yahudin nara miu, nahuu hambu noꞌuk ka ruma ita hatahorin nara mai, fo ta mana tungga tebe-tebe neu Manetualain eno-dalan. Sira raa, sama leo bibi lombo mana matarak. Huu naa de ei hae meni hatahori ta Yahudir miu, ndia leo hatahori Samariar.
MAT 10:7 Miu mafada ita hatahori Israꞌel asa mae, ‘Fain losa ena fo basa hatahorir bisa maso dadi reu Manetualain hatahorin.’
MAT 10:8 Miu mahai hatahori kamahedik, tao masoda falik hatahori mates, mahai hatahori hedi kusta ma husi kalua heni nitu. Manetualain fee ei mana hetak ena, tehuu Ana ta noke falik hata esa boe na. Dadi hatematak ia, ei oo muste miu fo fee soa-neu hatahori laen boe no ei dale kateman ma hae moke falik hata esa boe na numa sira mai.
MAT 10:9 Miu meni kada lima roum mara, ee. Hae meni doik,
MAT 10:10 lepa-nggees, bua-loꞌa ngganggatik, tabu eis, do teteꞌe ai. Hatahori muste fee hatahori mana maue-osa, hata ndia mandaak fo ara bisa rasoda.
MAT 10:11 Mete ma ei maso meni kota esa dale miu, do nggorok esa, na, sangga hatahori mana nau simbok ei. Basa, na, leo miu naa, losa ei laꞌo ela mamanak naa.
MAT 10:12 Mete ma ei maso meni hatahori uman miu, na, kokolak mae, ‘Soda-molek! Manetualain fee babaꞌe-babatik neu ei.’
MAT 10:13 Mete ma hatahori manai uma naa simbok nala ei no malole, na, moke-hule fo Manetualain fee babaꞌe-babatik neu sara. Tehuu mete ma ara ta simbok ei, Manetualain oo ta fee babaꞌe-babatik neu sara boe.
MAT 10:14 Mete ma hatahori ta nau ramanene ei, na, kalua laꞌo ela uma naa, do kota naa, ma ngganggafu heni afu numa ei eim mara mai, fo dadi neu tanda nae, ara ta nau ramanene, na, sira mesa kasa lemba-rasaa sira neselu-netaan.
MAT 10:15 Tehuu masaneda, ee! Mateꞌen, neu faik Manetualain naketu hukun soa-neu hatahori marai dae-bafok ia, neu ko Ana naketu hukun soa-neu hatahorir fo ta nau simbok ei nai kota naa beran lena heni hatahori Sodom ma Gomora, fo bakahulun manggaraun sudi selik kana!”
MAT 10:16 “Masanenedak, ee! Huu Au adenu eir ia, sama leo Au haitua bibi lombo neni busa fui manggarauk taladan nara neu. Huu naa de, ei muste pake ute-dodolem sama leo mengge malelak fo tao neulauk. Ma ei dalem mara oo, muste ndoos sama leo mbui lunda sina fo ta mana sangga mbutes boe.
MAT 10:17 Tehuu besa-besa, ee! Huu neu ko hatahori tuni-ndeni ei sama leo busa manggarauk kiki nakanisa bibi lombo. Neu ko ara leꞌa reni ei maso meni mamana parisa dedeꞌa anggama miu. Ma neu ko ara poko-femba ei nai sira uma huhule-haradoin nara.
MAT 10:18 Neu ko ara leꞌa roo ei miu masare nggubenor ma manek, nahuu ei tungga Au. Tehuu ei muste pake fai lelak naa, fo tui-bengga Au Hara Lii Maloleng neu sara. No dalak naa, hatahori ta mana nalela Lamatuak oo namanene laꞌe-neu Au boe.
MAT 10:19 Tehuu mete ma ara leꞌa roo ei talo naa, na, ei hae mamataꞌu mae, ‘neu ko au kokolak ae, hata?’ Do, ‘neu ko au aselu ae, leo bee?’ Haen no duduꞌa talo naa, huu losa fain, neu ko ei Amam manai nusa tetuk do inggu temak nafada laꞌe-neu hata fo ei muste kokolak.
MAT 10:20 Faik naa, hata fo ei kokolak, ta naoka numa ei mesa ngga dalem mai, huu Manetualain Dula-dale Malalaon, ndia fee nenorik fo ei kokolak hata.
MAT 10:21 Ei mete leo, huu neu ko nai uma esa dale, mete ma hambu hatahori namahere neu Au, mete te ndia toranoo heli-helin sangga dalak fo nakanisan. Mete ma kanak ndia namahere, neu ko aman ndia nakanisan. Mete ma aman no inan ndia ramahere, neu ko ana heli-helin nara ndia nakanisa sara.
MAT 10:22 Neu ko mateꞌen basa hatahorir mburuk ralan seli roo ei, nahuu ei tungga ma mamahere Au. Tehuu hatahori mana nakatataka losa babasan, Manetualain neu ko tao masoi-masodak soa-neun.
MAT 10:23 Mete ma hatahorir tuni-ndeni ei nai kota esa, na, malai meni kota laen miu. Tebe, naa! Au ia, Hatahori Dae-bafo Isi-isik. Neu ko ei bei ta laꞌok ndule basa kotar marai Israꞌel, tehuu Au fali mai ena.
MAT 10:24 Hatahorir rasiꞌe fee hada-horomatak neu meser esa, lena heni ndia ana nunin nara. Ma hatahori fee hada-horomatak neu malanggan esa, lena heni ndia ana maue-osan nara.
MAT 10:25 Mete ma ana nunik nanori fo malelan sama no ndia mesen ena, ana nameda dai ena. Ma mete ma ana maue-osa nanori fo malelan sama no ndia malanggan ena, na, ana oo nameda dai boe. Dadi masaneda, ee! Mete ma hatahori roke tenu uma rae, ‘O ia, Balsebul, ndia nitur malanggan!’ na, neu ko ndia uma isin oo, hambu nade pake taak lenak bali boe.”
MAT 10:26 “Dadi ei hae mamataꞌu mia hatahori mana laban ei. Huu hata fo hatahori taon no nefufunik, neu ko basa hatahorir mete-ritan.
MAT 10:27 Hata fo Au anori neu ei mesa ngga ena, neu ko ei muste miu mafada basa hatahorir. Ma hata fo Au afada ei no neneek, neu ko ei muste miu mafada ndule basa mamanak kara.
MAT 10:28 Hae mamataꞌu hatahori dae-bafok, huu ara rala kada tao risa hatahori ao-inan, tehuu ta bisa rakalulutu hatahori samanen. Huu naa de, ei muste mamataꞌu neu Manetualain, huu Ana ndia naena koasa fo piru-nggari heni hatahori ao-inan ma samanen, neni tasi aꞌi mana mbila seku neu.
MAT 10:29 Dadi tao matea ei dalem mara. Hatahori seꞌo mbui litik nai pasar, belin kada baꞌu anan seli. Tehuu ta hambu esa boe na tuda neni daer neu fo maten, mete ma ei Amam manai nusa tetuk do inggu temak ta nakaheik kana.
MAT 10:30 Ei Amam manai nusa tetuk do inggu temak oo, tao matak neu ei losa hata fo kadiꞌi anan seli boe. Ei langga bulu doom noꞌun hida nai ei langgam oo, Ana bubuluk ena boe.
MAT 10:31 Dadi ei boso mamataꞌu! Manetualain timba-tai ei belin lena heni basa mbui litik kara raa lalaꞌen.”
MAT 10:32 Basa de Yesus kokolak bali nae, “Hatahori mana nambarani manaku nalela Au nai hatahori noꞌuk matan nai dae-bafok ia, neu ko Au oo manaku alelan nai Au Amang matan nai nusa tetuk do inggu temak boe ae, ‘Ndia ia, Au hatahoring.’
MAT 10:33 Tehuu hatahori fo mana laka nai hatahori noꞌuk matan nae, ndia ta nalela Au, neu ko Au oo afada Au Amang manai nusa tetuk do inggu temak ae, ‘Au ta alela hatahori ia boe.’ ”
MAT 10:34 “Ei boso duꞌa mae, Au mai uni mole-damek nai dae-bafok ia. Au mai fo tao hatahori dae-bafok esa laban esa.
MAT 10:35 Au uni dae-bafok ia mai, tungga hata fo Manetualain mana toꞌu dedeꞌan surak memak kana ena nae, ‘Neu ko ana touk laban ndia aman, ana inak laban ndia inan, ma feto-feuk laban ari-inan,
MAT 10:36 te uma isin nara mesa kasa, esa namusuk no esa.’
MAT 10:37 Dadi hatahori mana nau tungga Au tebe-tebe, ana muste sue-lai neu Au lena heni basa-basan; lena heni ina-aman, ma lena heni anan nara. Mete ma taa, na, hatahori naa ta nandaa dadi neu Au hatahoring.
MAT 10:38 Hatahori mana nau tungga Au, tehuu ta nau lemba-nasaa doidosok, ana ta nandaa dadi neu Au hatahoring.
MAT 10:39 Hatahori mana sadia mate nahuu tungga Au, neu ko ana hambu masodak nakandoo no Manetualain. Tehuu hatahori mana nau nasoda soa-neu kada ndia ao heli-helin, neu ko masodan naa, mopon neuk kana leo!”
MAT 10:40 “Hatahori mana simbok ei no neulauk, ana oo simbok Au boe. Ma hatahori mana simbok Au, ana oo simbok Manetualain mana madenu Au boe.
MAT 10:41 Hatahori mana simbok Manetualain mana toꞌu dedeꞌan, nahuu mana toꞌu dedeꞌak naa kokolak laꞌe-neu Lamatuak, neu ko Lamatuak balan sama leo Lamatuak bala mana toꞌu dedeꞌak esa. Ma hatahori mana simbok hatahori dale ndoos esa, nahuu hatahori naa tungga tebe-tebe Lamatuak hihii-nanaun, neu ko Lamatuak balan sama leo Lamatuak bala hatahori dale ndoos esa.
MAT 10:42 Hatahori mana simbok hatahori esa kadiꞌin seli, nahuu ana tungga Au, neu ko Lamatuak balan. Leo mae hatahori fee kada oe mutik nggalas esa oo, neu ko Manetualain ta lilii heni sana boe.”
MAT 11:1 Neu Yesus helu basa Ndia ana nuni kasalahunu duan nara raa, boe ma Ana laꞌok ndule nggorok kara marai nusak naa, fo nanori hatahori ma tui-bengga Manetualain Hara Lii Malolen.
MAT 11:2 Lelek naa, Yohanis nai bui dale ena. Neu ana namanene basa hata fo Yesus taok ena, boe ma ana nadenu ana nunin nara reu ratane Yesus rae,
MAT 11:3 “Manetualain helu-bartaa memak numa lele uluk mai ena nae, Ana nau nadenu Karistus mai fo tao masoi-masodak neu ita hatahori Yahudir. Papa ia, ndia Karistus, do? Do, ai muste mahani neu hatahori laen bali?” De ara reu ratane Yesus.
MAT 11:4 Yesus namanene nala naa, boe ma Ana naselu nae, “Ei mesa ngga mamanene ena ma mete-mita ena. De fali miu ngga fo tui kaꞌa Yohanis mae, basa-basan dadi ena tungga hata fo Manetualain mana toꞌu dedeꞌan Yesaya surak memak kana ena nae:
MAT 11:5 Hatahori pokek, mete-nita. Hatahori ei kekok, nambadeik laꞌo-laꞌo. Hatahori hedi kusta, dadi nambalao. Hatahori mbakek, namanene. Hatahori mates, nasoda fali numa mamates mai. Hatahori kasian, namanene Hara Lii Malole.
MAT 11:6 Dadi talo ia: miu mafada kaꞌa Yohanis, neu ko ana naua mete ma namahere nakandoo neu Au. Neu ko Manetualain fee babaꞌe-babatik neu hatahori fo nemeheheren neu Au ta nanggenggo!”
MAT 11:7 Neu Yohanis ana nunin nara fali reu ngga, boe ma Yesus kokolak no hatahori noꞌuk kara laꞌe-neu Yohanis nae, “Neu faik ei miu sangga Yohanis numa mamana nees naa, ei duꞌa mae ei matonggo mia hatahori dae-bafok rupak leo beek? Ta bisa dadi ei miu matonggo hatahori mana noe-naꞌuk, nok bali milak mana mbeu neu-mai tungga kada anin!
MAT 11:8 Ma ta bisa dadi ei miu fo mete-mita hatahori mana pake bua-loꞌa mabeli, huu hatahori rupa leo naak, leo nai kada uma manek!
MAT 11:9 Dadi ei miu mete-mita hatahori rupa leo beek nai naa? Ei duꞌa mae, ei miu sangga Manetualain mana toꞌu dedeꞌan? Tebe! Tehuu ndia ia, mana toꞌu dedeꞌak ta hohoꞌan lenak.
MAT 11:10 Sama leo Manetualain Susura Malalaon surak memak laꞌe-neu Yohanis nae, ‘Nenene! Au adenu Au hatahoring, fo neu nasosoi dalak fee O.’
MAT 11:11 Nenene matalolole, ee! Nai dae-bafok ia, ta hambu hatahori esa boe na, ta hohoꞌan lena heni Yohanis. Tehuu numa basa hatahori dae-bafok mana manaku nita Manetualain dadi neu sira Manen, hatahori bakahitok mateꞌen oo, ta hohoꞌan lena heni Yohanis ena boe.
MAT 11:12 Mulai numa Yohanis nakalalaꞌok ue-tataon losa hatematak ia, hatahori noꞌuk ka maso dadi reu Manetualain enan ena. Tehuu hambu ketuk duꞌa sala rae, ara muste ratati fo rakasetik hatahorir maso dadi reu Manetualain hatahorin. Ma hambu ketuk oo mana ratati laban Manetualain hatahorin boe.
MAT 11:13 Losa faik Yohanis Mana Saranik mamain, ita hatahori Yahudir tasiꞌe leo-laꞌo tungga baꞌi Musa ma Manetualain mana toꞌu dedeꞌan nara hohoro-lalanen.
MAT 11:14 Dadi mamahere neu kada Au leo! Yohanis naa, ndia Elia fo Manetualain mana toꞌu dedeꞌan nara rafada memak ndia mamain ena.
MAT 11:15 Dadi mana hii bubuluk muste mamanene matalolole, ee!
MAT 11:16 Au ae fee lololek fo ei bisa bubuluk, hatahori hatematak ia, hatahori dae-bafok rupak bee. Sira raa, sama leo kana anar mana nggua-nggua rai pasar. Ara kada eki ro nonoon nara rae,
MAT 11:17 ‘Woi! Ai fuu sulik rame-rame, tehuu ei ta foti-lendo setelele. Boe ma ai soda sosoda susa-sonak, tehuu ei ta buꞌi mamatani.’
MAT 11:18 Eir ia, sama leo kana kadiꞌi anak kara fo ta mana rameda dai ndoos. Neu Yohanis mai, ana hii puasa, ma ta ninu anggor. De hatahorir henggenee ralan rae, ‘Ndia nitu saꞌek!’
MAT 11:19 Tehuu hatematak ia Au, Hatahori Dae-bafo Isi-isik mai ena. Au ta puasa, ma Au inu anggor. Boe ma hatahorir henggenee rala Au rae, ‘Ndia ia, hatahori bare-naꞌo huun! Mana mafu kamberak bali! Ana neu natia-laik no mana susu bear! Partei esa no hatahori ta papake taak kara! Ta nalela aon bali!’ Tehuu ei tanda Au kokolang leo, ee! Manetualain malelan neni nitak nai Ndia hatahorin leleo-lalaꞌon.”
MAT 11:20 Basa naa, Lamatuak Yesus mulai nahara berak neu hatahorir mana leo rai nggorok hida. Ana tao tanda heran noꞌun lenak numa naa ena, tehuu ara ta nau laꞌo ela sira sala-singgon nara, fo tungga Manetualain eno-dala ndoon.
MAT 11:21 Yesus nahara berak nae, “Ei hatahori Korasin ma hatahori Betsaida rein, ee! Besa-besa, ee! Neu ko ei hambu sosoek! Au tao tanda heran mata-matak kara numa ei matam mara, tehuu ei ta nau mamahere neu Manetualain. Naa te, eir ia hatahori Yahudir fo mana manaku malela Manetualain. Tehuu mete ma tanda heran nara raa fo Au taok kara numa ei nggorom, ara dadi rakahuluk nai kota Tirus ma kota Sidon ena, na, doo basa ia hatahorir marai naar sale dalen do tuke tein nara memak, ma laꞌo ela sira sala-singgon nara ena, fo tungga Manetualain. Ma sira oo pake bua-loꞌa sususak boe, ma tao afu neu langgan nara fo dadi tanda rae, ara fale dalen nara neu sira sala-singgon nara. Naa te, hatahori Tirus ma hatahori Sidon iar, ta hatahori Yahudir fo mana manaku ralela Manetualain.
MAT 11:22 Tebe! Neu ko ei mete a leo! Mete ma Manetualain naketu basa hatahorir dedeꞌan nara, ei huku-dokim mara beran lena heni hatahori Tirus ma hatahori Sidon huku-dokin nara.
MAT 11:23 Ei hatahori Kapernaum! Besa-besa, ee! Ei boso duꞌa mae, neu ko Manetualain soꞌu botik ei maso meni nusa tetuk do inggu temak miu. Taa! Neu ko Manetualain nggari ei meni aꞌi mbila ta kala matek miu! Mete ma tanda heran nara raa fo Au taok numa ei nggorom, dadi nakahuluk numa kota Sodom, na, Manetualain ta parluu nakalulutu kota manggarauk naa. Mete ma hatahori Sodom mara mete-rita tanda heran nara raa, na, ara laꞌo ela sira manggaraun nara ena.
MAT 11:24 Tebe! Neu ko ei mete a leo! Neu faik fo Manetualain naketu-naladi basa hatahorir dedeꞌan nara, ei huku-dokim mara beran lena heni hatahori Sodom huku-dokin nara!”
MAT 11:25 Yesus kokolak basa talo naa, boe ma Ana hule-haradoi nae, “Papa! Papa ndia toꞌu haak parenda basa-basan nai lalai no dae-inak. Au oke makasi noꞌun seli, nahuu Papa tatana mala huku-dokik naa numa hatahori mana tao aon malelak kara, ma mana makadedema aok kara mai. Tehuu Papa buka basa dedeꞌak kara raa neu hatahori kadiꞌik kara, ma hatahori mana makaloloe aok kara.
MAT 11:26 Tebe, Papa! Naa ndia tao nala Papa dalen namahoko!”
MAT 11:27 Yesus hule-haradoi basa talo naa, boe ma Ana nafada hatahorir marai naar nae, “Nenene matalolole, ee! Au Amang manai nusa tetuk do inggu temak fee basa koasa neu Au ena. Mana nalela Au no neulauk naa, kada Amak mesa kana. Ma mana nalela Amak no neulauk, ndia kada Amak Anan mesa kana, ndia Au ia. Ma Au here ala hatahori laen nara fo afada sara, mita fo sira oo ralela Ndia no neulauk boe.
MAT 11:28 Basa ei mana bengge-manggu tao ue-osa berak, mai tungga Au! Basa ei mana lemba-masaa dedeꞌa manggataꞌak, meni Au mai!
MAT 11:29 Mete ma ei simbok Au nenoring, fo laꞌok sama-sama mia Au, na, ita iar nok bali sapi luku dua fo leꞌa sama-sama luku esa. Au ia, dale malole, ma Au ia, dale mana makaloloe aok. Mete ma ei tungga Au, na, ei dadi barakai fali.
MAT 11:30 Huu Au nenoring naa, ta susa. Ma Au parendang naa, ta berak.”
MAT 12:1 Laꞌe esa, ndaa no hatahori Yahudir fai hahae tao ue-osan, Yesus ma ana nunin nara laꞌok resik hatahori osin. Ndia ana nunin nara ndoe, huu naa de ara koru rala hade-nggandum mbulen, boe ma raꞌa laꞌo-laꞌo.
MAT 12:2 Numa naa, hambu hatahori hida ruma partei anggama Farisir mai, fo mana toꞌu rahere hatahori Yahudi dala-hadan. Neu ara mete-rita Yesus ana nunin nara tao talo naa, boe ma ara rahara berak neun rae, “O ana nunim mara koru hade-nggandum laꞌe-ndaa fai hahae tao ue-osa! Ta bole talo naa! Naa, lena-langga ita hohoro-lalanen ena.”
MAT 12:3 Tehuu Yesus naselu nae, “Talo bee, ou? Ei ta masaneda baꞌi Dauk tutuin, do? Baꞌi Dauk no hatahorin nara taꞌin nara kada kikiok, nahuu ndoe ralan seli ena. Boe ma ara maso reni Manetualain Laa Huhule-haradoin dale reu, de haꞌi rala roti fo malangga anggama fee neu Manetualain ena, de ara raꞌa. Naa te kada malangga anggamar mesa kasa ndia bole raꞌa roti naa. Hatahori laen ta bole. Boe ma baꞌi Dauk asa raꞌa, tehuu ta hambu hatahori fee salak neu sara. Ei nok bali ta lees mita Manetualain Susura Malalaon ia!
MAT 12:5 Nai naa, neni surak laꞌe-neu malangga anggama mana maono-lalau nai uma huhule-haradoik, ndaa no fai hahae tao ue-osa. Tehuu ara ta hambu salak hata esa boe na.
MAT 12:6 Nenene, ee! Lele uluk uma huhule-haradoik ndia nenenin lenak, tehuu hatematak ia hambu esa nenenin lenak seli bali. Ndia Au, Hatahori Dae-bafo Isi-isik ia.
MAT 12:7 Nai Manetualain Susura Malalaon dale, Manetualain nae, ‘Au hihii-nanaung talo ia: Au hatahoring nggara muste ratudu dale kasian esa mbali esa. Mete ma ara ta tao talo naa, na, sira tunu-hotun banda fo ara renin fee Au naa, nanalan ta faa boe na.’ Dadi mete ma ei bubuluk no neulauk Manetualain kokolan naa, neu ko ei ta makasasaꞌek salak neu Au ana nuning nggara. Te ara ta tao salak hata-hata na!
MAT 12:8 Au ia, Hatahori Dae-bafo Isi-isik. Au ndia aena haak fo aketu ae, hatahori bole tao hata ndaa no fai hahae tao ue-osa.”
MAT 12:9 Basa boe ma Yesus laꞌo ela mamanak naa, fo neni sira uma huhule-haradoin neu.
MAT 12:10 Numa naa, hambu touk esa fo liman seri mates. Hatahori Farisir raa sangga-sangga dalak fo fee salak neu Yesus, mete ma Ana tao nahai hatahori fo lima mate seserik naa laꞌe-ndaa fai hahae tao ue-osa. De ara ratanen rae, “Tungga ita anggaman hohoro-lalanen, hatahori bole tao nahai hatahori laꞌe-ndaa fai hahae tao ue-osa, do taa?”
MAT 12:11 Boe ma Yesus naselu nae, “Mete ma hatahori bibi lombon esa tuda neni bolok dale neu laꞌe-ndaa fai hahae tao ue-osa, neu ko tenu bibik naa neu leꞌa falik bibi lombo naa, hetu?
MAT 12:12 Leo naak oo, Manetualain sue-lai hatahori dae-bafok lena heni tenu bibik naa sue ndia bibi lombon boe. Huu naa de hatahori bole tao hata neulauk laꞌe-ndaa fai hahae tao ue-osa.”
MAT 12:13 Boe ma Ana kokolak no hatahori fo lima mate seserik naa nae, “Kaꞌa, ee! Loo o limam mai!” Boe ma ana loo liman seri fo matek naa neu, de liman naa hai tutik ka, sama leo ndia liman seri boe.
MAT 12:14 Hatahori Farisir raa mete-rita naa, boe ma ara luri. De ara rambadeik laꞌo ela uma huhule-haradoik naa, boe ma reu rala harak rae, “Ita muste sangga dalak fo tao tisan!”
MAT 12:15 Tehuu Yesus bubuluk sira nanae manggaraun nara raa, huu naa de Ana laꞌo neni mamana laen neu. Hatahori noꞌuk ka tunggan, boe ma Ana tao nahai basa hatahori kamahedik kara.
MAT 12:16 Tehuu Ana kaꞌi sara nae, “Ei boso mafada hatahori laen laꞌe-neu Au.”
MAT 12:17 Ana tao talo naa, tungga hata fo Manetualain nafada neu Ndia mana toꞌu dedeꞌan Yesaya ena nae,
MAT 12:18 “Mete sudik kana! Ndia ia, Au Hatahori neondang fo Au here alan ena. Au sue-lai neun, ma Au daleng namahoko nakandoo ua Ndia. Neu ko Au fee Au Dula-daleng neun, fo Ana neu fee nenorik nai basa hatahori nusak kara laꞌe-neu Au eno-dala ndoon.
MAT 12:19 Ana ta nalela fefemba tenden. Ana ta nalela nakadedemak aon.
MAT 12:20 Ndia dalen malole. Ana ta nakasususak hatahori. Ai mana nae tiꞌuk, Ana ta fae natiꞌu sana. Lambu tiꞌoek mana nae matek, Ana ta fuu nakamate sana. Ana nanori hatahorir nakandoo, losa doo-doo te basa hatahori nusak kara ralela tungga Manetualain eno-dala ndoon.
MAT 12:21 Neu ko basa hatahori nusak kara ramahere neun, nahuu ara bubuluk rae Ndia naa, see.”
MAT 12:22 Laꞌe esa, hatahorir reni Yesus reu roo hatahori nitu saꞌek esa. Hatahori ia nitu saꞌen losa ana poke ma ta bisa kokolak. Boe ma Yesus husi kalua heni nitu naa fo tao nahain. De hatahori naa bisa mete-nita ma kokolak tutik ka.
MAT 12:23 Basa hatahorir mete-rita naa, boe ma ara heran bali-bali. Ara rakokola aok rae, “Fama te Ndia ia, Dauk tititi-nonosin fo Manetualain mana toꞌu dedeꞌan nara surak memak kana numa lele uluk mai ena. Ndia ia, ndia Hatahori fo ita tahani a neun naa ena!”
MAT 12:24 Tehuu neu hatahori Farisir ramanene rala talo naa, boe ma ara ta simbok. De ara rakokola aok rae, “Weeh! Hatahori ia bisa husi kalua heni nitu, nahuu nitur malanggan Balsebul, ndia feen koasa.”
MAT 12:25 Tehuu Yesus bubuluk hatahori Farisir kokolan naa. Boe ma Ana nafada sara nae, “Ei kokolam naa, ta maso nai duduꞌa-aꞌafi neulauk! Mete ma nai nusak esa dale, rau-inggun nara rahuu-ratofak, talo bee de nusak naa bei bisa nakatataka! Leo naak oo, mete ma hatahorir marai kota esa, do uma esa, raruꞌi-raꞌuk esa no esa boe, na, sira iar rabingga-baꞌek losa rakalulutu!
MAT 12:26 Dadi mete ma nitur kada ramusuk ma kada rahusi-mbuuk esa mbali esa, na, sira malanggan ta bisa toꞌu parenda nala dook ka bali!
MAT 12:27 Masaneda, ee! Ei hatahorim mara oo ralela husi nitu boe. Ara pake koasa numa nitu mai, do? Taa! Dadi ei boso kokolak sadi ndaa mae, Au pake nitu koasan fo husi nitu. Neu ko ei hatahori heli-helim mara ndia raketu rae, hata fo ei makasasaꞌek salak naa, sala.
MAT 12:28 Tehuu mete ma Au tebe-tebe husi nitu pake koasa numa Manetualain Dula-dalen mai, naa natudu nae, Manetualain naa, memak Manek mana toꞌu parenda fo nai ei idu-matam mara ena.
MAT 12:29 Mete ma naꞌo manu-meo nae mai foꞌai bua-baꞌu nai hatahori barakaik esa uman, na, ana muste humu nala hatahori naa, boe ma futu-paꞌan dei. Basa dei fo ana bisa foꞌai uma naa bua-baꞌun nara.
MAT 12:30 Masaneda matalolole! Hatahori ta mana mabua-aok esa no Au, ndia naa mana musuk no Au. Ma hatahori ta mana tulun Au ue-osang, hatahori naa kada nakalulutu Au ue-osang.
MAT 12:31 Dadi nenene matalolole Au kokolang ia! Manetualain sadia koka heni hatahori sala-singgon nara. Mete ma hatahori kokolak ta neulauk neu hatahori laen, Manetualain bei sadia fee ambon neun. Tehuu mete ma hambu hatahori nambarani kokolak ta neulauk neu Manetualain Dula-dale Malalaon, Manetualain ta koka heni ndia salan naa.
MAT 12:32 Mete ma hatahori kokolak manggarauk neu Au, Hatahori Dae-bafo Isi-isik ia, Manetualain sadia fee ambon neun. Tehuu mete ma hatahori kokolak rakadadaek laban Manetualain Dula-dale Malalaon, na, Manetualain ta koka heni ndia salan naa, numa hatematak ia losa doon naa neu!”
MAT 12:33 Basa de Yesus kokolak nakandoo mbali hatahori Farisir raa nae, “Duꞌa matalolole! Ai huu neulauk naboa neulauk. Tehuu ai huu ta neulauk naboa ta neulauk. Numa ai huuk boan naa mai, hatahori bisa bubuluk nae, ai huuk naa, neulauk do taa.
MAT 12:34 Eir ia, nok bali mengge mana puta-paik! Ei ta bisa kokolak hata fo neulauk kara. Huu hata fo neni nehindak nai hatahori dalen dale, naa ndia kalua numa bafan mai.
MAT 12:35 Hatahori neulauk, neu ko kokolak neulauk, nahuu hambu hata fo neulauk kara neni nehindak nai dalen dale. Tehuu hatahori manggarauk, neu ko kokolak manggarauk, nahuu hambu hata fo manggarauk kara neni nehindak nai ndia dalen dale.
MAT 12:36 Mamahere neu Au! Neu ko dae-bafok fai mateꞌen losa, Manetualain parisa basa hatahorir dedeꞌan nara. Faik naa, hatahori esa-esak muste naselu-nataa ndia dedeꞌa-kokolan fo sosoan taak.
MAT 12:37 De besa-besa, ee! Neu ko Manetualain timba-tai ei dedeꞌa-kokolam, de naketu nae, ei hambu huku-dokik, do taa.”
MAT 12:38 Meser anggama ketuk ma hatahori Farisir ramanene Yesus kokolan talo naa, boe ma roken rae, “Papa Meser! Ai hii mete-mita Papa tao tanda heran fo dadi bukti nae, Papa koasan naa tebe-tebe numa Manetualain mai.”
MAT 12:39 Tehuu Yesus mbokak kasa nae, “Wiih! Ei hatahori hatematak ia, ta nau nenene neu Manetualain! Ei kada malela tao manggarauk mesa kana! Leo mae ei moke tanda heran, tehuu Au ta fee. Lele uluk, Manetualain fee tanda heran pake Ndia mana toꞌu dedeꞌan Yunus ena. Naa, dai ena!
MAT 12:40 Yunus leo hatu-leledok fai telu numa iꞌa moꞌok poꞌon dale. Leo naak oo, Au Hatahori Dae-bafo Isi-isik ia boe. Neu ko Au leo hatu-leledok fai telu nai batu bolok mamana hatahori mates dale.
MAT 12:41 Neu ko neu dae-bafok fai mateꞌen, mete ma Manetualain dadi mana maketu-maladi dedeꞌak, hatahori Niniwer rambariik dadi sakasii fo rakasasaꞌek salak neu ei rae, ‘Ei basa ngga iar, nggoa bebek kara!’ Lele uluk, hatahori Niniwe raa ramanene neu Manetualain mana toꞌu dedeꞌan Yunus, de ara sale dalen do tuke tein nara ma laꞌo ela sala-singgon nara. Tehuu ei taa. Naa te, hatematak ia hambu Hatahori nai ei taladam mara ta neni babanggak lena heni Yunus, ndia Au ia. Tehuu ei ta nau tao matak faa boe na neu Au.
MAT 12:42 Neu ko neu dae-bafok fai mateꞌen, mete ma Manetualain dadi mana maketu-maladi dedeꞌak, mane inak Seba numa kona mai, ana oo nambariik dadi sakasii boe. Ana dedeu liman fo nakasasaꞌek salak neu ei basa ngga mana masodak hatematak ia nae, ‘Ei basa ngga iar, nggoa bebek kara, ee!’ Lele uluk, mane inak naa numa dook ka mai fo mete-nita no mata heli-helin manek Soleman malelan. Naa te, hatematak ia hambu Hatahori nai ei taladam mara ta neni babanggak lena heni Manek Soleman, ndia Au ia. Tehuu ei ta nau tao matak faa boe na neu Au.”
MAT 12:43 “Mete ma nitu neni husi henik numa hatahori esa mai, nitu naa neni mamana nees neu sangga mamana hahae aok. Tehuu ana ta hambu mamana mandaak.
MAT 12:44 Boe ma ana duꞌa nae, ‘Aweꞌ! Ta hambu mamanak talo ia, de malole lenak au fali uu leo nai hatahori bakahuluk naa.’ Basa de ana fali, boe ma mete-nita mamanak naa, laok ma neni nefafaꞌu neulauk ena.
MAT 12:45 Boe ma nitu naa neu noke ndia nonoon hitu, fo manggaraun nara lenak bali numa ndia mai. Basa sara reu leo rai hatahori naa, de ara nggafu feen rame-rame. Dadi hatematak ia, hatahori naa masodan hambu sosoek lenak bali. Leo naak oo, hatahori tembo-tanak hatematak ia boe.”
MAT 12:46 Faik naa, Yesus bei kokolak no hatahori noꞌuk kara. Boe ma Ndia inan ma fadin nara mai fo rae ratonggo roon. Ara rambariik reu kada uma dea, de radenu hatahori neu noken.
MAT 12:47 Boe ma hatahori mai nafadan nae, “Papa, ee! Papa mamam ma fadim mara rai dea naa. Ara rae ratonggo ro Papa.”
MAT 12:48 Boe ma Yesus naselu nae, “Au mama tebe-tebeng naa, ndia see? Ma Au toranoo tebe-tebeng nggara raa, sira seer?”
MAT 12:49 De Ana dudu neu hatahorir mana tungga Ndia, ma kokolak nae, “Mete, te sira iar, Au mamang ma Au toranoong nggara.
MAT 12:50 Hatahori mana tao tungga Au Amang manai nusa tetuk do inggu temak hihii-nanaun, sira raa Au nufanelu tebe-tebeng.”
MAT 13:1 Faik naa oo Yesus kalua numa uma naa mai boe, de neu nanggatuuk numa dano Galilea tatain.
MAT 13:2 Boe ma hatahori noꞌun seli mai rakarumbu ralan. De Ana hene neu nanggatuuk numa ofa mana seek esa lain numa naa, boe ma Ana fee nenorik. Basa hatahorir marai mada lai nenene nenorin.
MAT 13:3 De Ana fee nenorik noꞌuk ka neu sara pake lololek. Ana soꞌuk tutuik nae, “Hambu hatahori mana ue daek esa neu nggari bini-nggees nai ndia osin.
MAT 13:4 Neu ana nggari bini-nggees raa, hambu ketuk tuda nai dalak. Boe ma mbuik kara mai, de bido rabasa bini-nggees raa lalaꞌen.
MAT 13:5 Ma hambu bini-nggees ketuk tuda ndaa dae batuk. Bini-nggees raa ranumbu lai-lai, tehuu dae isik naa niꞌis,
MAT 13:6 de neu ledo hene mai lain de nahaa, boe ma numbun nara male de mate ramatuu. Te okan nara ta tora losa dae dale, na.
MAT 13:7 Bini-nggees ketuk bali tuda nai dila-nggauk taladan. Boe ma dila-nggauk seti rakamate numbun nara.
MAT 13:8 Ma bini-nggees ketuk bali tuda ndaa dae isik. Bini-nggees raa ranumbu, basa de ramoꞌo losa raboa. Ketuk fee falik buna-boak lipa laꞌe telu hulu, ketuk lipa laꞌe nee hulu, ma hambu ketuk bali losa lipa laꞌe natun esa.
MAT 13:9 See ndia kandiꞌi dook, na, nenene matalolole, ee!”
MAT 13:10 Basa boe ma Yesus ana nunin nara mai, de ratanen rae, “Tao hata de Papa nanori hatahori noꞌuk kara raa pake lololek?”
MAT 13:11 Boe ma Yesus naselu nae, “Huu ei nau bubuluk tebe-tebe Manetualain parendan, de Au afada memak lololek naa sosoa-ndandaan. Tehuu mete ma hatahori laen, na, Au fee nenorik no kada lololek.
MAT 13:12 Te hatahori mana nau sangga tebe-tebe Manetualain hihii-nanaun, neu ko Manetualain feen tamba nalela bali. Tehuu hatahori ta mana tao matak neu Manetualain hihii-nanaun, neu ko Manetualain taon namanggonggoak.
MAT 13:13 Au anori sara pake kada lololek, nahuu: ‘Ara mete-rita ena, tehuu ta nau ralela. Ara ramanene ena, tehuu ta nau bubuluk.’
MAT 13:14 Sira iar sama leo hatahorir fo Manetualain mana toꞌu dedeꞌan Yesaya surak kana ena nae, ‘Neu ko ei mamanene, tehuu ei ta nau bubuluk. Neu ko ei mete-mita, tehuu ei ta nau malela hata fo mandadik ena.
MAT 13:15 Hatahori iar tao rambake ndiꞌi doon nara, ma ara tao rapoke matan nara, nahuu dalen nara matea. De elan numa naa fo ndiꞌi doon nara mbake talo naa leo, ma elan numa naa fo matan nara poke talo naa leo. Naa fo Au hae tao neulau sara, nahuu ara ta nau tao matak neu Au.’
MAT 13:16 Tehuu eir ia maua! Huu ei mete-mita no mata heli-helim mara ena, ma ei mamanene no ndiꞌi doo heli-helim mara ena.
MAT 13:17 Mamahere neu Au! Lele uluk Manetualain mana toꞌu dedeꞌan ma hatahori dale ndoos sara hihiik ka mete-rita hata fo ei mete-mitak ena, tehuu ara ta bisa. Ara oo hihiik ka ramanene hata fo ei mamanenek ena, tehuu ara ta bisa boe.”
MAT 13:18 Yesus kokolak basa talo naa, boe ma Ana nafada sara nae, “Dadi hatematak ia, ei nenene lololek naa sosoa-ndandaan.
MAT 13:19 Bini-nggees fo mana tuda nai dalak naa, ndia hatahori fo mana namanene Dedeꞌa-kokolak laꞌe-neu Manetualain parenda-koasan, tehuu ana ta nalela tebe-tebe. Basa boe ma nitur malanggan mai, de haꞌi neni Dedeꞌa-kokolak naa numa hatahori naa dalen mai.
MAT 13:20 Bini-nggees fo mana tuda nai dae batuk naa, ndia hatahori fo mana namanene nala Manetualain Dedeꞌa-kokolan, boe ma ana simbon no nemehokok.
MAT 13:21 Tehuu Dedeꞌa-kokolak naa ta nahuu-naoka. Huu naa de ta nakai nala dook ka nai hatahori naa dalen. Neu hatahori laen nakasususak kana nahuu ana simbo Dedeꞌa-kokolak naa, boe ma ana nggari henin tutik kana.
MAT 13:22 Ma bini-nggees fo mana tuda nai dila-nggauk taladan, sama leo hatahori fo mana namanene nala Dedeꞌa-kokolak naa ena. Tehuu ana nasambute nalan seli no ue-osa mata-matak kara fo leo-laꞌo tungga dae-bafok lole-ladan. De basa nesembuten nara raa seti heni Dedeꞌa-kokolak naa numa dalen mai losa ta hambu buna-boak.
MAT 13:23 Tehuu bini-nggees fo mana tuda ndaa dae isik, sama leo hatahori fo mana pasa ndiꞌi doon fo simbo nala Dedeꞌa-kokolak naa, ma tungga Manetualain hihii-nanaun. Basa de ana tao kada hata fo neulauk kara, sama leo bini-nggees mana maboak naa. Hambu ketuk raboa lipa laꞌe telu hulu, ketuk oo nee hulu, ma ketuk losa lipa laꞌe natun esa boe.”
MAT 13:24 Yesus nafada seluk lololek esa bali nae, “Manetualain parenda-koasan naa, sama leo hatahori esa neu nggari bini-nggees neulauk nai ndia osin.
MAT 13:25 Neu fai leꞌodaen, basa hatahori mana sunggu selik kara, boe ma hatahori manggarauk mai, de neu nggari bini-nggees naꞌu fuir neu osi naa.
MAT 13:26 Neu osi naa mulai fee buna-boan, boe ma ndia hatahori mana maue-osan nara mete-rita naꞌu fuir mori sama-sama ro hade-nggandum numa naa.
MAT 13:27 Basa boe ma ara reu rafada tenu osik naa rae, ‘Papa, ee! Fai maneuk kara ita sele bini-nggees neulauk numa papa osin, hetu? Tao hata de hatematak ia hambu naꞌu noꞌun seli?’
MAT 13:28 Tenu osik naa naselu nae, ‘Naa, hatahori manggarauk ue-tataon naa.’ Boe ma ndia hatahori mana maue-osan nara fee hahambuk rae, ‘Papa, ai miu feꞌa heni naꞌu naa, do?’
MAT 13:29 Tehuu ana naselu nae, ‘Bosok! Neu ei feꞌa naꞌu naa, neu ko ita sesele-tande neulaun nara oo, neni feꞌa henik kara boe.
MAT 13:30 Ela sara ruma naa fo ara mori sama-sama losa fai ketu-koruk. Neu ko neu faik naa, dei fo au afada hatahori mana maue-osar ae, “Ei maduduru makahuluk naꞌu fuir raa dei. Boe ma futu bubuak esa-esak, fo hotu heni sara. Basa dei fo maduduru buna-boak neulaun nara, fo mbeda sara reni soka-poler reu.” ’”
MAT 13:31 Basa naa Yesus kokolak bali nae, “Au fee tamba lololek esa bali, fo ei bisa malela talo bee de Manetualain dadi Manek soa-neu hatahori noꞌuk ka. Ndia hatahorin nara, mulai sama leo ai deꞌe kadiꞌi anak fo hatahori sele-tanden nai ndia osin dale.
MAT 13:32 Leo mae ai deꞌek naa kadiꞌi anan seli, tehuu mete ma ana mori mai ena, na, ana dadi neu ai huuk moꞌon lenak nai osi dale. Losa mbuik kara mai randunu rai ndanan nara.”
MAT 13:33 Yesus tamba seluk lololek esa bali nae, “Manetualain hatahorin naa oo, sama leo laru taꞌik boe fo inak esa haꞌi nalan de rumun no tarigu saak esa. Boe ma roti naa kaifuu losa namoꞌo, nahuu laru taꞌik fo baꞌu anak naa.”
MAT 13:34 Yesus nanori hatahori noꞌuk no pake tutuik noꞌuk ka leo naak. Ndia kokolan basa sara pake kada lololek.
MAT 13:35 Ana fee nenorik talo naa, tungga hata fo Manetualain mana toꞌu dedeꞌan surak memak kana ena nae, “Neu ko Au fee nenorik pake lololek. Neu ko Au afada hata fo hatahorir bei ta ramanene ritan, mulai numa Manetualain nakadadadik dae-bafok losa hatematak ia.”
MAT 13:36 De Yesus laꞌo ela hatahori noꞌuk kara raa, fo fali uma neu. Boe ma ana nunin nara mai, fo roke tulun neun rae, “Papa! Tulun mafada ai, lololek naꞌu fuir naa sosoa-ndandaan dei!”
MAT 13:37 Boe ma Yesus naselu nae, “Hatahori mana nggari bini-nggees neulauk naa, ndia Au, Hatahori Dae-bafo Isi-isik ia.
MAT 13:38 Ma osi naa, ndia dae-bafok ia. Bini-nggees neulauk naa, ndia hatahorir mana maso dadi reu Manetualain nufanelun nara. Ma naꞌu fuir raa, ndia nitur malanggan hatahorin nara.
MAT 13:39 Boe ma hatahori manggarauk naa, fo mana mai nggari bini-nggees naꞌu deꞌek naa, ndia nitur malangga ina-huun mesa kana. Ma fai ketu-koruk naa, ndia dae-bafok fai mateꞌen. Hatahori mana maue-osar fo mana haꞌi buna-boak naa, ndia Manetualain atan nara ruma nusa tetuk do inggu temak mai.
MAT 13:40 Neu dae-bafok fai mateꞌen, ara raduduru rala naꞌur raa fo hotu heni sara.
MAT 13:41 Au, Hatahori Dae-bafo Isi-isik ia, neu ko adenu atar ruma nusa tetuk do inggu temak mai. Neu ko ara reu rakabubua basa hatahorir ta mana tungga Manetualain parendan. Ma ara oo, rakabubua basa hatahorir mana dudunggu-mbambau hatahori laen boe, fo ara boso tungga Manetualain parendan.
MAT 13:42 Neu ko ara nggari heni basa hatahori manggarauk kara raa, reni aꞌi mbila ta kala matek reu, sama leo naꞌu fo neni hotuk naa. Nai naa, dei fo ara rameda doidosok ralan seli, ma buꞌi rakarereu ta hahae.
MAT 13:43 Tehuu hatahori mana leo-laꞌo no ndoos tungga Manetualain hihii-nanaun, neu ko ara leo rakandoo ro sira Ama Manen nai nusa tetuk do inggu temak. Nai naa, ara rasaꞌa sama leo ledo. Hatahori mana nau nalela Au, pasa ndiꞌi doom matalolole, ee!”
MAT 13:44 Yesus tamba lololek esa bali nae, “Hatahori mana nau nalela Manetualain parenda-koasan, sama leo hatahori mana hii hambu buas fo mabelin seli, fo hatahori nafuni nitan numa dae dale. Hatahori mana hii hambu buas naa mai kalin, boe ma natonggo buas naa numa naa, de namahoko nalan seli. Boe ma ana natoi falik buas naa. Basa de ana fali lai-laik, fo neu seꞌo heni basa ndia hata-heton lalaꞌen. De neu hasa nala dae naa, mita fo ana bisa hambu memak buas mabeli naa.”
MAT 13:45 Yesus tamba bali nae, “Hatahori mana nau nalela Manetualain parenda-koasan naa oo, sama leo hatahori mana danggan esa boe, mana hii hambu poemata fo mabelin seli. Boe ma ana sangga poemata fo nae hasa.
MAT 13:46 Neu ana natonggo no poemata esa lolen seli, boe ma ana fali lai-laik, fo neu seꞌo heni basa ndia hata-heton lalaꞌen. Basa de ana neu hasa nala poemata naa, mita fo ana bisa hambu memak kana.”
MAT 13:47 Yesus tamba bali nae, “Manetualain parenda-koasan naa, sama leo puꞌak esa fo mana puꞌa-dalak kara reu mboꞌin nai dano. De puꞌak naa nala iꞌak mata-matak kara.
MAT 13:48 Neu puꞌak naa sofek no iꞌak ena, boe ma mana puꞌa-dalak kara mai leꞌan fo renin dano tatain neu. Boe ma ara ranggatuuk fo raꞌisi iꞌak kara ruma puꞌak mai. Iꞌa neulauk kara, ara mbeda sara reni luꞌa tasik neu. Tehuu iꞌak ta neulauk, ara nggari heni sara.
MAT 13:49 Leo naak oo, no dae-bafok fai mateꞌen boe. Neu ko Manetualain atan nara ruma nusa tetuk do inggu temak mai, fo reu tada baꞌe hatahori manggarauk kara ruma hatahori dale ndoos mai.
MAT 13:50 Neu ko ara nggari heni basa hatahori manggarauk kara reni aꞌi mbila ta kala matek reu. Nai naa, dei fo ara rameda doidosok ralan seli, ma buꞌi rakarereu ta hahae.”
MAT 13:51 Yesus kokolak basa talo naa, boe ma Ana natane sara nae, “Ei malela basa hata fo Au kokolak bebeik kara ia, do?” Ara raselu rae, “Malela, Papa!”
MAT 13:52 Basa boe ma Yesus naselu falik nae, “Malole! Te meser anggama esa-esak ndia nanori tebe-tebe Manetualain Dedeꞌa-kokolan ena, fo neni surak memak numa fai uluk mai, ma ana oo toꞌu nahere Au nenoring hatematak ia boe, na, ana sama leo tenu uma esa, hii soi ndia nggudang fo natudu ndia hata-heto raan, sama-sama no ndia hata-heto beun.”
MAT 13:53 Neu Yesus nanori basa hatahori noꞌuk kara pake lololek ena, boe ma Ana laꞌo ela mamanak naa,
MAT 13:54 fo fali neni Ndia nggoro-tadun neu. Numa naa Ana maso neni uma huhule-haradoik neu fo nanori hatahorir. Basa hatahori mana ramanene neun, heran ralan seli. Ara rakokola aok rae, “Awii! Hatahori ia malelan mata ia, ma! Ana hambu nenorik numa bee mai? Talo bee de Ana bisa tao tanda heran raa?
MAT 13:55 Naa te Ndia ia, kada tukan ai Anan. Ita talela inan no malole, ndia Maria; ma fadin nara, sira Yakobis, Yusuf, Yudas ma Simon.
MAT 13:56 Ita oo talela Ndia fadi inan nara boe, huu ita basa ngga leo nggorok esa, na! Dadi Ana hambu Ndia malelan naa, numa bee mai bali? Ma Ana hambu Ndia koasan ta neni babanggak naa, numa see mai bali?”
MAT 13:57 Huu naa de ara mbiri ma rasakele, de ara ta nau ramanene neu sana bali. Tehuu Yesus nafada nae, “Memak tetebes! Nai mamanak laen, hatahorir hii fee hada-horomatak neu Manetualain mana toꞌu dedeꞌan. Tehuu nai ndia nggoro-tadu heli-helin ma uma isin nara, hatahori ta nau fee hada-horomatak neun.”
MAT 13:58 Huu dalen nara ratea, losa ara ta nau ramahere neu Yesus, de Ana ta tao tanda heran noꞌuk ka numa naa.
MAT 14:1 Faik naa, manek Herodes toꞌu parenda numa profensi Galilea. Ana oo namanene tutuik mata-matak kara laꞌe-neu Yesus boe.
MAT 14:2 Ana nafada ndia penggawen nara nae, “Yesus ia, fama te Yohanis Mana Saranik fo fai maneuk kara au adenu tete heni langgan. Hatematak ia ana nasoda fali numa mamaten mai ena! Huu naa de ana naena koasa fo tao tanda heran nara raa.”
MAT 14:3 Manek Herodes kokolak talo naa, huu fai bakahulun ana nadedeꞌa no Yohanis losa ana humu nalan, de teen neni bui dale neu. Dedeꞌak naa tutuin talo ia: manek Herodes sao nala fadin Felipus saon, nade Herodias. Naa te Felipus no Herodias bei ta ramaketu.
MAT 14:4 Huu naa de Yohanis kaꞌi-oren laꞌi-laꞌik kana nae, “Papa manek ta bole sao mala papa fadim saon. Naa nalena-langga ita hatahori Yahudi dala-hadan ena!”
MAT 14:5 Tehuu Herodes ta nau tao matak neun, de ana sao nala Herodias leo. Tungga ndoon naa, Herodes hihiin nau tao nisa Yohanis Mana Saranik. Tehuu ana namahia hatahori noꞌuk kara, nahuu ara ramahere rae, Yohanis naa, Manetualain mana toꞌu dedeꞌan. Huu naa de ana nadenu ndia hatahorin fo sese Yohanis neni bui dale neu.
MAT 14:6 Doo-doo boe ma Herodes tao feta fai bobonggik. Faik naa, Herodias ana feton neu lendo mbali fuik kara. Lelendon naa lolen seli, losa tao nala Herodes dalen namahoko nalan seli.
MAT 14:7 Ana fetok naa lendo basa, boe ma Herodes nanggou nalan, de nae, “O mae moke hata numa au mai, na, mafada leo! Neu ko au fee. Au toꞌu tebe-tebe au hehelu-bartaang ia. Ma au sumba-soo pake Manetualain naden.”
MAT 14:8 Ana namanene nala manek kokolan talo naa, boe ma ana fetok naa inan tusu-hain. Huu naa de ana neu noke nae, “Papa! Au oke Yohanis Mana Saranik langgan. Taon neu dulang dale, fo menin fee au.”
MAT 14:9 Manek Herodes namanene nala ana fetok naa nonoken talo naa, boe ma tendak heni taꞌi dalen tutik kana. Tehuu ana ta bisa leꞌa falik ndia sumba-soon, huu basa fuik kara ramanene ena, na. Huu naa de ana tungga kada ana fetok naa hihiin leo.
MAT 14:10 Boe ma ana parenda hatahori fo reu tete Yohanis langgan nai bui dale.
MAT 14:11 Ara tete rala Yohanis langgan, boe ma ara taon neu dulang dale, fo renin fee ana fetok naa. Ana simbo nala dulang naa, boe ma koꞌo nenin fee inan.
MAT 14:12 Neu Yohanis ana nunin nara ramanene rae, ara tete heni Yohanis langgan ena, boe ma ara mai haꞌi rala nenetun, de reu ratoin. Basa de ara reu rafada dedeꞌak naa neu Yesus.
MAT 14:13 Neu Yesus namanene tutuik laꞌe-neu Yohanis naa, boe ma Ana no ana nunin nara rae rakaheok numa mamanak naa mai. De ara saꞌe ofak fo rae reni mamana nees reu fo bisa hahae aon nara. Tehuu hatahori noꞌuk kara mete-rita Yesus asa ofan loro-loro dano tatain. Boe ma ara kalua numa nggorok kara mai, de laꞌok lai-laik tungga dala mada laik. Huu naa de ara losa mamana seseek rakahuluk numa Yesus asa mai.
MAT 14:14 Neu Ana konda numa ofak lain mai, boe ma Ana mete-nita hatahori noꞌuk kara raa rahanin. De Yesus tuda kasian neu sara. Boe ma Ana tao nahai sira hatahori kamahedin nara.
MAT 14:15 Neu ledo bobok ena, boe ma Ndia ana nunin nara mai rafadan rae, “Papa, ee! Malole lenak Papa madenu hatahorir ia, basa sara reu hasa nanaꞌak nai nggoro matia-taik marai iar. Huu ledo bobok ena! Nai ia, ta hambu nanaꞌak hata esa boe na.”
MAT 14:16 Tehuu Yesus naselu nae, “Bosok! Ei ndia mahao sara leo.”
MAT 14:17 Boe ma ara raselu rae, “Awii, Papa, ee! Ai ta hambu hata esa boe na fo mahao hatahori noꞌun seli ia. Ai mae tao talo bee? Huu hambu kada roti lima, ma iꞌak duak ka, ma!”
MAT 14:18 Tehuu Yesus kokolak nae, “Hou! Malole naa ena. Meni sara mai leo!”
MAT 14:19 Boe ma Ana nadenu hatahori raa ranggatuuk rakabubua reu naꞌu lain. De Yesus haꞌi nala roti kalimak kara ma iꞌa kaduak kara raa. Boe ma Ana nasare mbali lalai neu fo noke makasi neu Manetualain. Basa naa, Ana fifiꞌi baꞌe roti naa, de Ana loon neu Ndia ana nunin nara fo reu babaꞌe neu hatahori raa lalaꞌen.
MAT 14:20 Boe ma basa sara raꞌa losa rakabete. Raꞌa basa, boe ma ara reu raduduru rala nanaꞌa lenan nara, losa sofe lembaneu salahunu dua.
MAT 14:21 Basa hatahori mana raꞌak kara raa, nai rarain hambu touk rifun lima. Bei ta reke tamba inak kara ma kakanak kara bali.
MAT 14:22 Hatahorir raa raꞌa basa, boe ma Yesus nadenu ana nunin nara reu saꞌe ofak, fo rakahuluk reni dano boboan seri reu. Tehuu Ana bei nahani numa naa, fo nadenu hatahori noꞌuk kara raa fali reu sara.
MAT 14:23 Neu basa sara fali, boe ma Yesus hene neni letek esa lain neu, fo hule-haradoi. Ndia mesa kana bei numa naa, losa leꞌodae.
MAT 14:24 Faik naa, ana nunin nara ofan losa dook ka ena nai dano taladan. Ara sefe rangginggio, nahuu ani soru, ma rii moꞌok tufa sara.
MAT 14:25 Lole manggaledo, boe ma Yesus neu laꞌo tungga sara. Tehuu Ana laꞌok nesik oe lain.
MAT 14:26 Ana nunin nara mete-rita naa, boe ma ara nggengger ralan seli. Ara kokolak no nemetaꞌuk rae, “Heꞌe! Hambu maro ndia naa!”
MAT 14:27 Tehuu Yesus kokolak tutik kana noo sara nae, “Weeh! Ei boso mamataꞌu, ee! Te Au ia, Yesus! Tao malende ei dalem mara leo!”
MAT 14:28 Petrus namanene nala naa, boe ma naselu nae, “Mete ma memak Lamatuak ndia O, na, madenu au laꞌok usik oe lain fo au uni naa neti.”
MAT 14:29 De Yesus naselu nae, “Neu! Ia mai leo!” Boe ma Petrus kalua numa ofak mai, fo neni Yesus neu laꞌok nesik oe lain.
MAT 14:30 Tehuu neu Petrus nameda ani berak fumbuun, boe ma ana namataꞌu nalan seli. Ana mulai nasamele, de ana bolu nae, “Awii, Lamatuak, ee! Fali mala au dei!”
MAT 14:31 Yesus loo liman tutik ka no lai-laik, de toꞌu nala Petrus liman. Ana kokolak nae, “Ayii, Peꞌu, ee! Tao hata de o dalem nabaꞌek? O ta mamahere tebe-tebe neu Au, do?”
MAT 14:32 Basa naa, dua sara maso reni ofak dale reu. Boe ma anin lende tutik kana.
MAT 14:33 Yesus ana nunin nara mete-rita naa, boe ma ara soꞌuk koa-kiok soa-neun rae, “Awii! Papa ia, memak tebe-tebe Manetualain Anan!”
MAT 14:34 Neu ara losa dano tatain seri, boe ma ara konda numa nggorok Genesaret namo seseen.
MAT 14:35 Neu ara konda, hatahori noꞌuk kara ralela tutik kasa. Boe ma ara mulai bolu rae, “Wee! Yesus mai ena!” Ara ralaik reu rafada ndule basan, boe ma hatahorir mai roo basa hatahori kamahedik kara.
MAT 14:36 Ara roke fo ara bisa rafaroe laꞌe Yesus badun. Huu ara duꞌa rae, “Sadi hatahori kamahedik nafaroe laꞌe kada Yesus badun suꞌun, neu ko ana hai tutik kana.” De basa hatahori kamahedik kara fo mana nafaroe laꞌe Yesus badun naa, hai tutik ka.
MAT 15:1 Faik esa, hambu hatahori Farisir ma meser anggamar bubuak esa ruma Yerusalem mai fo ratonggo ro Yesus.
MAT 15:2 Hatahori Farisir toꞌu rahere sira Yahudir dala-hadan. Neu ara ramanene rae, Yesus ana nunin nara raꞌa ta safe liman nara tungga dala-hadak hihii-nanaun, de ara rasakele. Boe ma ara mai fo fee salak neu Yesus rae, “Tao hata de O ana nunim mara raꞌa, tehuu ta safe liman nara dei? Naa, laban ita bei-baꞌin nara dala-hadan naa ena!”
MAT 15:3 Tehuu Yesus naselu nae, “Eir ia, memak hatahori mana kokolak laen, tao laen! Ei malela laban Manetualain parendan fo tungga kada ei bei-baꞌim mara dala-hadan mesa kana.
MAT 15:4 Manetualain parenda ena nae, ‘Fee hada-horomatak neu ei ina-amam.’ Ma tamba bali nae, ‘Mete ma hatahori esa oꞌole-aꞌali ndia inan do aman, muste hukun mates neun.’
MAT 15:5 Manetualain fee nenorik talo naa, tehuu ei fee nenorik laen bali. Ei mae, ‘Mete ma hatahori esa helu-bartaa basa nae fee ndia bua-baꞌun neu Manetualain ena, na, ana ta parluu pake buas naa fo tulu-fali ndia ina-aman, leo mae ara doidoso ralan seli.’ Tehuu no ei fee nenorik talo naa, ei nggari heni Manetualain parendan ena, fo nggatin no ei hohoro-lalane heli-helim.
MAT 15:7 Huu naa de bebeik kara ia Au kokolak ena ae, eir ia, hatahori mana kokolak laen, tao laen! Naa, ndaa no hata fo Manetualain mana toꞌu dedeꞌan Yesaya surak memak laꞌe-neu ei numa lele uluk mai ena! Ana surak nae,
MAT 15:8 ‘Hambu hatahori koa-kio Au, no kada bafan, tehuu ta no dalen.
MAT 15:9 Leo mae ara tao talo naa oo, naa kada hie-hie a mesan boe. Ara ta tao matak neu Au, ara tao matak neu kada hatahori dae-bafok hohoro-lalanen mesa kana.’ ”
MAT 15:10 Basa boe ma Yesus nanggou nala hatahori laen nara maruma naa, fo nanori sara nae, “Pasa ndiꞌi doom mara matalolole, fo ei bisa malela!
MAT 15:11 Hata fo maso neni hatahori bafan neu, naa ta tao nanggenggeo hatahori. Tehuu hata fo kalua numa hatahori bafan mai, naa ndia tao nanggenggeon.”
MAT 15:12 Basa naa Yesus ana nunin nara mai, de rafadan rae, “Papa bubuluk, do? Hatahori Farisir raa dalen nara hedis neu ramanene Papa kokolan.”
MAT 15:13 Tehuu Yesus naselu nae, “Au Amang nai nusa tetuk do inggu temak, neu ko feꞌa heni hatahori ta mana nau nanori hatahori tungga Amak hihii-nanaun. Naa, sama leo hatahori feꞌa heni basa sele-tandek fo ana ta sele sana.
MAT 15:14 Dadi boso tao matak mia hatahori Farisir raa! Sira raa, sama leo hatahori pokek fo natudu dalak soa-neu hatahori pokek. Neu ko ara tuda maso randaa reni bolok dale reu.”
MAT 15:15 Basa boe ma Petrus kokolak nae, “Papa, tulun mafada ai lololek bebeik kara naa sosoa-ndandaan dei!”
MAT 15:16 Yesus naselu nae, “Dadi ei oo bei ta malela boe, do?
MAT 15:17 Talo ia: hata fo ita taꞌan, maso nai bafak, boe ma nakandoo neni poꞌok dale neu, basa naa kalua henin neni kakus neu.
MAT 15:18 Tehuu hata fo kalua numa bafak mai, naa ndia tao nanggenggeo hatahori losa Manetualain oo nunuten, ma ta nau simbok kana boe.
MAT 15:19 Huu dedeꞌa manggarauk noꞌuk ka kalua numa hatahori dalen mai! Haꞌi netuduk leo: duduꞌa-aꞌafi manggarauk, nekenisa hatahori, hohongge-lelena, laꞌok sala no hatahori sao holu-ndaen, nemenaꞌo, sakasii pepeko-leleko ma kokolak tao naboboo hatahori naden.
MAT 15:20 Basa manggarauk leo naak kara raa, ndia tao rala hatahori nanggenggeo. Tehuu mete ma kada hatahori naꞌa ma ta safe liman tungga dala-hadak hihii-nanaun, na, naa dedeꞌan taa.”
MAT 15:21 Basa boe ma Yesus laꞌo ela mamanak naa, fo neni nusak esa natia-taik no kota Tirus ma kota Sidon.
MAT 15:22 Numa naa, hambu inak esa numa nusak naa mai. Ndia ta hatahori Yahudi. Neu ana namanene Yesus nai naa ena, boe ma ana mai noke-hule tebe-tebe nae, “Mane Dauk tititi-nonosin, ee! Kasian neu au dei! Au ana fetong nitu saꞌen. Awii, kasian, ee! Ana doidoso ena.”
MAT 15:23 Tehuu Yesus tutundindiik, ma ta naselu hata esa boe na. Boe ma ana nunin nara mai rafadan rae, “Papa, inak ia kada kii-bolu tao namuek. Malole lenak Papa madenun nalai heok numa ia mai leo!”
MAT 15:24 Boe ma Yesus naselu nae, “Manetualain nadenu Au mai fo tulu-fali ita hatahori Yahudin, nahuu ara laꞌok sala ena, sama leo bibi lombo mana matarak. Ana ta nadenu Au uu tulu-fali hatahori laen.”
MAT 15:25 Tehuu inak naa mai deka-deka no Yesus bali. Ana sendek luu-langgan ma noke tutulu-fafalik nae, “Lamatuak, ee! Tulun au dei.”
MAT 15:26 Tehuu Yesus tee mbolek nae, “Ta nandaa haꞌi tala kakanak kara nanaꞌan, fo nggari sara fee busa.” [Ma sosoan bei nefunik nae, Yesus muste tulu-fali nakahuluk Ndia hatahori Yahudin, dei fo bisa tulu-fali hatahori laen.]
MAT 15:27 Tehuu inak naa naselu nae, “Tebe, Papa, ee! Tehuu busar rahani a nai mei fengga dalen. Ara oo raꞌa hata fo tuda numa kakanak kara pinggan dale mai boe.” [Ma sosoan nae, neu kakanak kara raꞌa, busa oo hambu naꞌa boe. Leo mae Yesus tulu-fali Ndia hatahorin, tehuu Ana oo muste susuri-memete hatahori laen boe.]
MAT 15:28 Yesus namanene nala naa, boe ma nafada nae, “Awii! Mama mamahere tebe-tebe neu Au! Dadi mama fali muu ngga leo, huu hata fo mama nokek naa, dadi memak ena!” Basa boe ma ana fali neu ngga, de ana mete-nita anan hai memak ena.
MAT 15:29 Basa naa, Yesus no ana nunin nara laꞌo ela mamanak naa, boe ma ara laꞌok loro-loro tungga dano Galilea tatain. Ara hene letek esa, de Yesus nanggatuuk nanori sara.
MAT 15:30 Boe ma hatahori noꞌun seli reni Yesus mai. Ara roo hatahori dokak, hatahori pokek, hatahori keko-luꞌuk, hatahori ta bisa kokolak, ma hatahori hedis laen boe. Ara ranggatutuuk hatahori kamahedik kara raa deka-deka ro Yesus ein. Boe ma Ana tao nahai sara.
MAT 15:31 Hatahori noꞌuk kara raa, mete-rita naa, boe ma ara heran. Ara rakokola aok rae, “Awii! Ta neni babanggak sudi selik kana! Hatahori dokak, bisa laꞌok natetu. Hatahori pokek, bisa mete-nita. Hatahori keko-luꞌuk, bisa laꞌok. Ma hatahori ta bisa kokolak, bisa kokolak ena! Ia, Manetualain ndia taon. Ndia naa, ndia Manetualain fo ita bei-baꞌin nara rakaluku-rakatelen numa lele uluk mai.”
MAT 15:32 Basa faik hida boe ma Yesus nanggou nala Ndia ana nunin nara, de nae, “Au ameda kasian neu hatahori noꞌuk kara iar ena. Hambu ketuk numa dook ka mai, ma ara rakabubua faik telu ena, losa ta ela nanaꞌak ena. Malole lenak ara boso fali reu sara ro poꞌo rouk dei. Boso losak, ara ndiꞌa nai dalak.”
MAT 15:33 Tehuu Yesus ana nunin nara raselu rae, “Papa! Mamanak ia nees, ma dook ka numa nggorok mai. Ta bisa dadi ita tahao hatahori noꞌuk ka talo ia.”
MAT 15:34 Tehuu Yesus natane sara nae, “Ei rotim mara hida de?” Ara raselu rae, “Kada hituk ka! Ma iꞌak faa!”
MAT 15:35 Boe ma Yesus nadenu basa hatahori raa fo ranggatuuk reu daer.
MAT 15:36 Ana haꞌi nala roti kahituk kara ro iꞌak, de noke makasi neu Manetualain. Basa boe ma Ana fifiꞌi baꞌe sara, de Ana fee sara reu ana nunin nara fo reu babaꞌe neu basa hatahorir raa.
MAT 15:37 De basa sara raꞌa losa rameda dai ena. Basa naa ara raduduru rala basa nanaꞌa lenan nara, losa sofe lembaneu hitu.
MAT 15:38 Basa hatahori mana raꞌak kara raa, nai rarain hambu touk rifun haa. Bei ta reke tamba inak kara ma kakanak kara.
MAT 15:39 Basa naa Yesus nadenu hatahori noꞌuk kara fali reu ngga. Boe ma Ana saꞌe ofak fo ara reni nusa Magadan reu.
MAT 16:1 Laꞌe esa, hambu hatahori Farisir ma hatahori Sadukir hida reni Yesus mai. Ara rae rakaseseluk dedeꞌak ro Yesus fo rae ike rakatutudak kana. Huu naa de ara roken rae, “Papa! Tulun matudu tanda heran dei, fo dadi bukti ae, Papa hambu koasa numa Manetualain mai ena.”
MAT 16:2 Tehuu Yesus naselu nae, “Neu ledo tesa ma lalai nasaraa mbila, ei tanda mae, ‘Beꞌe-mai udan taa.’
MAT 16:3 Ma neu ledo toda ma lalai nasosoꞌa nggeo, ei tanda mae, ‘Bekin ia, udan nae mai.’ Dadi mete ma ei bisa tadu-tanda mala fai hanas ma fai oe faak lalalin talo naa, tao hata de ei ta bisa tadu-tanda mala tembo-lelek lalalin?
MAT 16:4 Wuuh! Ei hatahori tanak ia, bisa tao kada manggarauk mesa kana! Ei ta tao matak neu Manetualain! Leo mae ei moke tanda heran, tehuu Au ta fee. Huu fai uluk Manetualain fee tanda heran ena, pake Ndia mana toꞌu dedeꞌan Yunus. Dadi, naa dai ena!” Yesus kokolak basa talo naa, boe ma Ana laꞌo ela sara.
MAT 16:5 Neu Yesus asa saꞌe ofak fo reni dano boboan seri reu, dei de ana nunin nara rasaneda rae, ara lilii reni roti soa-neu sira lepa-nggeen.
MAT 16:6 Yesus namanene nala ara kokolak talo naa, boe ma Ana nafada nae, “Masanenedak, ee! Ei muste besa-besa mia hatahori Farisir ma hatahori Sadukir laru taꞌin.”
MAT 16:7 Yesus ana nunin nara ramanene rala naa, boe ma ara panggananaa. Ara rakokola aok rae, “Tou lasik kokolak hata naa? Fama te Ana kokolak talo naa, nahuu ita ta teni roti, do?”
MAT 16:8 Tehuu Yesus bubuluk sira duduꞌan. De Ana kokolak nae, “Woi! Eir ia, sudi selik kana ena! Tao hata de ei kokolak laꞌe-neu roti? Ei ta mamahere tebe-tebe neu Au, do?
MAT 16:9 Ei bei ta malela Au koasang, do? Neu faik naa, fo Au fifiꞌi baꞌe roti kalimak kara raa fo ahao hatahori rifun lima naa, nanaꞌa lenan nara ei maduduru mala lembaneu hida!?
MAT 16:10 Basa de, talo bee bali no roti kahituk kara fo Au babaꞌe fee hatahori rifun haa naa? Nanaꞌa lenan nara ei maduduru mala lembaneu hida!?
MAT 16:11 Tao hata de ei ta malela Au kokolang bebeik kara naa? Au ta kokolak laꞌe-neu roti. Tehuu Au ae fee nesenenedak neu ei, mita fo ei besa-besa mia hatahori Farisir ma hatahori Sadukir nenorin. Huu sira nenorin nara raa bisa leꞌa-nore nala hatahori noꞌuk a, sama leo laru taꞌik tao kaifuu roti dadi namoꞌo.”
MAT 16:12 Yesus kokolak talo naa, dei de ara ralela rae, Ana ta kokolak laꞌe-neu roti. Tehuu Ana kokolak laꞌe-neu hatahori Farisir ma hatahori Sadukir nenorin fo mana laban Lamatuak hihii-nanaun.
MAT 16:13 Basa boe ma Yesus no ana nunin nara laꞌok reni nusak mana matia-taik ro kota Kaisarea Felipi reu. Neu ara bei laꞌok numa dalak, Ana natane ana nunin nara nae, “Tungga hatahori kokolan, ara rae, Au, Hatahori Dae-bafo Isi-isik ia see?”
MAT 16:14 Ara raselu rae, “Hambu ketuk rae, Papa ia, Yohanis Mana Saranik fo nasoda fali numa mamaten mai ena. Laen rae, fama te Papa ia, baꞌi Elia. Laen bali rae, baꞌi Yeremia. Mete ma taa, na, Manetualain mana toꞌu dedeꞌan laen numa lele uluk mai.”
MAT 16:15 Boe ma Yesus natane sara bali nae, “Mete ma tungga ei mesa ngga, na, Au ia see?”
MAT 16:16 Basa boe ma Simon Petrus naselu nae, “Papa ia, Karistus, ndia Hatahori naa, fo lele uluk Manetualain helu-bartaa ena nae nadenun mai! Ma Papa ia, Manetualain mana masodak seku neu Anan!”
MAT 16:17 De Yesus nae, “Simon, Yunus anan, ee! O ia, maua! Huu hatahori dae-bafok ta ndia nafada dedeꞌak ia neu o. Tehuu Au Amang manai nusa tetuk do inggu temak ndia nafada neu o.
MAT 16:18 Nenene, ee! Hatematak ia Au ae foi nadek ‘Petrus’ neu o. Nadek naa sosoa-ndandaan, ndia batu. Neu ko o dadi muu fanderen soa-neu Au hatahori kamahereng nggara, nahuu o nemeheherem tean leo batu ena. Leo mae ara hambu malendu-mataꞌak losa mate oo, ara rakatataka rakandoo boe.
MAT 16:19 Neu ko Au fee haak neu o, fo koladu Au hatahoring nggara, sama leo o toꞌu nusa tetuk do inggu temak nggoen. No dalak naa, hata fo o kaꞌi-oren nai dae-bafok ia, naa oo Manetualain kaꞌi-oren nai nusa tetuk do inggu temak boe. Ma hata fo o fee luas nai dae-bafok ia, naa oo Manetualain fee luas nai nusa tetuk do inggu temak boe.”
MAT 16:20 Yesus kokolak basa talo naa, boe ma Ana ndindia sara fo boso rafada hatahori esa boe na rae, Ndia naa, Karistus.
MAT 16:21 Mulai numa faik naa mai, Yesus nafada Ndia ana nunin nara nae, “Au muste uni kota Yerusalem uu. Tehuu neu ko nai naa, Au hambu doidosok noꞌun seli numa lasi-lasi hadak kara, malangga anggama Yahudi malanggan nara, ma basa meser anggamar mai. Neu ko ara rakanisa Au, tehuu neu bei-nesan, Au asoda fali numa mamates mai.”
MAT 16:22 Yesus nafada talo naa, boe ma Petrus leꞌa nalan neni tataik neu fo ela kada dua sara mesa kasa, de Petrus kaꞌin nae, “Papa boso kokolak talo naa! Ta bisa dadi Manetualain elan dadi talo naa!”
MAT 16:23 Tehuu Petrus kokolan naa, ta tungga Manetualain hihii-nanaun. Huu naa de Yesus hekor, de nahara berak mbalin nae, “Hei! Malai heok ia! Naa, nitu malanggan ndia kokolak! O boso dadi mana kai-baak soa-neu Au! O duduꞌa tungga kada hatahori dae-bafok hihii-nanaun mesa kana, te ta tungga Manetualain hihii-nanaun!”
MAT 16:24 Basa boe ma Yesus nanori ana nunin nara nae, “Hatahori mana nau tungga Au, ana muste nakatataka nakandoo tungga-tungga faik! Ana muste lilii heni ndia hihii-nanau heli-helin fo tungga kada Manetualain hihii-nanaun mesa kana. Leo mae hatahori rae tao risan, ana muste tungga nakandoo a mesan, sama leo ana lemba-nasaa ndia ai ngganggen fo neu mate.
MAT 16:25 Hatahori mana sadia mate nahuu ana tungga Au, neu ko ana hambu masodak nakandoo no Manetualain. Tehuu hatahori mana nau nasoda soa-neu kada ndia ao heli-helin, neu ko masodan naa, sambu do lalo talo kada naa leo!
MAT 16:26 Nenene, ee! Mete ma o hambu basa dae-bafok oe-isin, tehuu Manetualain timba heni o, na, nanalan hata? Leo mae o lemba muni basa dae-bafok oe-isin oo, o ta bisa saiseluk kana neu o samanem boe!
MAT 16:27 Au afada neu ei dedeꞌak kara ia lalaꞌen, nahuu Au ia, Hatahori Dae-bafo Isi-isik. Neu ko Au konda fali mai ua Au Amang koasan ta neni babanggak, sama-sama ua Ndia atan nara ruma nusa tetuk do inggu temak mai. Faik naa, neu ko Au bala hatahori esa-esak tungga hata fo ana taok.
MAT 16:28 Masaneda matalolole, ee! Numa eir ia mai, neu ko hambu hatahori ketuk bei ta mate, losa faik bee fo mete-rita Au, ndia Hatahori Dae-bafo Isi-isik dadi neu Manek mana toꞌu parenda.”
MAT 17:1 Seli faik nee numa Yesus nafada laꞌe-neu mamaten ma nesoda falin numa mamaten mai, boe ma Yesus nanggou nala Petrus, Yakobis ma fadin Yohanis, fo ara sama-sama hene reni lete demak esa reu, fo mesa kasa reu naa.
MAT 17:2 Losa lain, boe ma ara mete-rita Yesus mata-aon nasafali ena. Matan nasaꞌa leo ledo, ma bualoꞌa-papaken dadi muti manggahadok.
MAT 17:3 Medak neu ma, ara mete-rita Ana kola-kola no baꞌi Musa ma baꞌi Elia.
MAT 17:4 Boe ma Petrus panggananaa, losa ana kokolak sadi ndaa nae, “Papa! Ai mameda malole nai ia ena! Dadi malole lenak ai mambaririik laak telu. Esa soa-neu Papa, esa soa-neu baꞌi Musa, ma esa bali soa-neu baꞌi Elia.”
MAT 17:5 Neu Petrus bei kokolak talo naa, medak neu ma sosoꞌak konda mai de tatana nala sara. Boe ma ara heran bali-bali ramanene harak esa kalua numa sosoꞌak naa mai nae, “Nenene, ee! Yesus ia, Au Ana susueng. Ana soa tao namahoko Au daleng. Nenene matalolole neun, ee!”
MAT 17:6 Ana nunin nara ramanene rala naa, boe ma ramataꞌu ralan seli, losa ara tuda ratono reu daer.
MAT 17:7 Tehuu Yesus mai de kai neu sara, boe ma nae, “Wee! Mambadeik leo. Boso mamataꞌu!”
MAT 17:8 De ara botik matan nara, tehuu ara ta mete-rita hatahori laen esa boe na numa naa, kada Yesus mesa kana.
MAT 17:9 Neu ara mulai konda numa letek naa mai, boe ma Yesus ndindia sara nae, “Hata ndia ei bei fo mete-mitan bebeik kara ia, boso mafada hatahori esa boe na, ee! Au, Hatahori Dae-bafo Isi-isik ia muste mate dei. Neu ko mete ma Au asoda fali numa mamates mai ena, na, dei fo ei bole mafada hatahori.”
MAT 17:10 Boe ma ara ratanen rae, “Papa ia, memak Karistus, tehuu baꞌi Elia nai bee? Huu meser anggamar raa fee nenorik rae, baꞌi Elia muste mai nakahuluk, dei fo Karistus mai. Tehuu tungga Papa, na, talo bee?”
MAT 17:11 Yesus naselu nae, “Memak tebe. Baꞌi Elia muste mai nakahuluk, fo nasosoi dalak soa-neu Karistus.
MAT 17:12 Nenene matalolole, ee! Baꞌi Elia mai ena, tehuu hatahorir ta ralela sana. Ara rakasususak kana, tungga sira hihiin. Neu ko ara oo tao leo naak boe soa-neu Au, Hatahori Dae-bafo Isi-isik ia.”
MAT 17:13 Ara ramanene basa talo naa, dei de ara bubuluk rae, baꞌi Elia fo Yesus kokolak naa, ndia Yohanis Mana Saranik.
MAT 17:14 Neu Yesus asa fali ena, boe ma ara ratonggo ro hatahori noꞌuk ka fo rahani sara. Boe ma hambu papa esa mai sendek luu-langgan fo hule tutulu-fafalik neu Yesus
MAT 17:15 nae, “Lamatuak! Kasian neu au anang dei! Huu ana namahedi mulu bibik, de ana doidoso nalan seli. Mete ma hedis naa sou mai, na, laꞌi-laꞌik ka ana tuda neni oe neu, do neni aꞌi neu. Tulun dei, Lamatuak, ee!
MAT 17:16 Au unin neni Lamatuak ana nunin nara uu ena, tehuu ara ta bisa rahai sana.”
MAT 17:17 Yesus namanene nala naa, boe ma Ana mboka ana nunin nara nae, “Weeh! Eir ia sudi selik kana ena! Au anori ei laꞌi-laꞌik kana ena, tehuu ei ta malela no malole. Ma ei ta mamahere tebe-tebe neu Au! Au muste ahani ua ei losa faik hida bali? Mai fo mia kakanak naa ia mai!”
MAT 17:18 Ara reni kakanak naa neu, boe ma Ana husi kalua heni nitu numa kakanak naa mai. De nitu kalua laꞌo ela kakanak naa, boe ma ana hai tutik kana.
MAT 17:19 Basa naa, neu Yesus mesa kana sama-sama no ana nunin nara, ara ratanen rae, “Papa! Tao hata de bebeik kara ia, ai ta bisa husi kalua heni nitu naa?”
MAT 17:20 Yesus naselu nasafali nae, “Ei ta bisa husi nitu naa, nahuu ei ta mamahere tebe-tebe, na. Masaneda, ee! Mete ma ei mamahere tebe-tebe neu Au, leo mae kada baꞌu anan seli oo, sama leo ai deꞌe kadiꞌi anak esa boe, na, ei bisa parenda letek esa mae, ‘Heeh, letek! Lali naa muu!’ Neu ko ana lali leo. Dadi ei bisa tao hata a mesan, sadi ei mamahere tebe-tebe neu Lamatuak.
MAT 17:21 [Ma nenene, ee! Nitu mata leo iak kara memak manggaraun seli. Mete ma ei ta hule-haradoi ma puasa fo hule tutulu-fafalik neu Lamatuak, na, ei ta bisa husi nitu matak leo naak.”]
MAT 17:22 Laꞌe esa, Yesus no ana nunin nara rakabua numa profensi Galilea. Ana nafada sara nae, “Ta dook ka te ara rae seꞌo heni Au uni hatahori laen uu.
MAT 17:23 De ara tao risa Au, Hatahori Dae-bafo Isi-isik ia. Memak Au mate, tehuu neu ko bei-nesan Au asoda fali numa mamates mai.” Ana nunin nara ramanene Ana kokolak talo naa, boe ma dalen nara susa ralan seli.
MAT 17:24 Neu Yesus no ana nunin nara mai nai nggorok Kapernaum, boe ma mana susu bear mai ratane Petrus rae, “Ei Mesem bae Uma Huhule-haradoi Ina-huuk bean, do taa?”
MAT 17:25 Petrus naselu nae, “Bae, ee!” Neu Petrus maso uma dale neu, boe ma Yesus nafada tutik kana nakahuluk nae, “Simon! Soba o duꞌa sudik kana. Manek kara marai dae-bafok ia, haꞌi bea numa see mai? Numa sira ana heli-helin nara, do, hatahori laen mai?”
MAT 17:26 Petrus naselu nae, “Numa hatahori laen mai!” Yesus tuti bali nae, “Mete ma leo naak, manek anan hae bae, hetu?
MAT 17:27 Leo naak oo, no Uma Huhule-haradoi Ina-huuk bean boe. Tehuu ita hae tao mana susu bear ramanasa. Dadi malole lenak, o muu dolu iꞌak nai dano a leo. O mala iꞌak makasososak, na, buka bafan. Neu ko o hambu doi lilo fulak esa nai naa. De pake doik naa, fo muu bae ita dua ngga bean. Naa, dai ena fo bae ita dua ngga bean.”
MAT 18:1 Faik naa, Yesus ana nunin nara reni Yesus reu fo ratanen rae, “Papa! See ndia moꞌon lenak numa basa Manetualain hatahorin mai?”
MAT 18:2 Boe ma Yesus nanggou nala kakana ana esa, de nambaririik kana neu sira taladan.
MAT 18:3 De Ana nae, “Nenene matalolole! Hatahori mana nae maso dadi neu Manetualain hatahorin, ana muste nggati dala duduꞌan fo dadi sama leo kakana ana fo ta nalela nekededema aok.
MAT 18:4 Huu hatahori fo dale nekeloloen sama leo kakana ana ia, ana ndia dadi neu hatahori moꞌo-inahuuk lenak nai Manetualain matan.
MAT 18:5 Ma hatahori mana simbok nala hatahori kadiꞌik sama leo kakanak ia, nahuu ana namahere neu Au, na, hatahori naa simbok nala Au ena.”
MAT 18:6 Basa boe ma Yesus nafada neu sara bali nae, “Mete ma hambu hatahori tao nala kakana ana esa tungga eno-dala kasalak, losa ana ta namahere Au bali, na, besa-besa, ee! Malole lenak fuli batu moꞌok esa, neu hatahori naa boliin fo feen tena neni tasi demak dale neu.
MAT 18:7 Dae-bafok ia, memak mamana sosoek, nahuu hambu matak noꞌuk ka bisa tao nala hatahori tuda neni kilu-salak dale neu. Tehuu hatahori mana hambu sosoek lenak naa, ndia hatahori mana edo-podek fo hatahori laen tao salak.
MAT 18:8 Mete ma o tao salak munik o limam, do, o eim, na, tete henin leo! Malole lenak o maso nusa tetuk do inggu temak muu, muni kada lima seserik, do ei seserik lena heni ara nggari o muni aꞌi mbila ta kala matek muu, muni o limam ma eim dua sara.
MAT 18:9 Mete ma o tao salak munik o matam, na, edo henin leo! Malole lenak o maso nusa tetuk do inggu temak muu, muni kada mata seserik lena heni ara nggari o muni aꞌi mbila ta kala matek muu, muni o matam dua sara.”
MAT 18:10 Yesus kokolak bali nae, “Besa-besa, ee! Boso losak ei makadadaek kakana ana talo ia. Huu Manetualain atan nara ruma nusa tetuk do inggu temak mai, ndia ranea sara. Ma atar raa bisa maso faik bee a mesan, fo reu rafada Manetualain laꞌe-neu hatahorir ia dedeꞌan nara.
MAT 18:11 Ei duꞌa matalolole, te Au ae fee lololek talo ia: hambu hatahori esa naena bibi lombo natun esa. Faik esa boe ma hambu bibi lombo esa laꞌok sala dalan. Tungga ei duduꞌam, mana lolo naa muste tao hata? Neu ko ana laꞌo ela ndia bibi lombo kasio hulu sion nara reu letek lain, fo neu sangga bibi lombo kisek kala mopok naa. Mete ma ana hambu falik kana, neu ko ana namahoko nalan seli mete-nita bibi lombo kisek naa, lena heni ana mete-nita ndia bibi lombon kasio hulu sio ta kala mopok. [Leo naak oo Au, Hatahori Dae-bafo Isi-isik ia, mai fo tao asoi-asoda hatahori mana laꞌok sala numa eno-dala ndoos mai boe.]
MAT 18:14 Leo mae kada kakana ana esa ndia mopon oo, Au Amang manai nusa tetuk do inggu temak ta namahoko boe.”
MAT 18:15 Yesus kokolak bali nae, “Mete ma o toranoo kamaherem nasala no o, na, muste muu matonggo muan. Mete ma kada ei dua ngga, dei fo mafada ndia salan. Mete ma ana nenene o kokolam, na, ei dua ngga malole masafali naa ena.
MAT 18:16 Tehuu mete ma ana ta nau nenene o, na, muu moke mala o nonoom hatahori esa do dua fo reu sama-sama ro o. Basa de ei miu matonggo mia hatahori naa, fo kokolak seluk mian bali. Huu nai Manetualain Susura Malalaon neni surak nae, ‘Nai dedeꞌak esa dale, muste hambu sakasii dua do telu kokolan nara sama, dei fo bisa simbok sira kokolan nara raa.’
MAT 18:17 Tehuu mete ma ana bei ta nau nenene ei, na, miu mafada saranik kara. Ma mete ma ana ta nau simbok no malole saranik kara kokolan, na, taon ndia sama leo hatahori ta mana nalela Manetualain. Mete ma taa, na, taon leo hatahori manggarauk sama leo mana susu bear.
MAT 18:18 Masaneda matalolole Au kokolang, ee! Hata fo ei kaꞌi-oren nai dae-bafok ia, naa Manetualain kaꞌi-oren nai nusa tetuk do inggu temak ena. Ma hata fo ei makaheik kana nai dae-bafok ia, naa Manetualain nakaheik kana nai nusa tetuk do inggu temak ena.
MAT 18:19 Ma Au afada seluk ae, mete ma hambu hatahori dua ruma ei mai, hule-haradoi no dalek esa, neu ko Au Amang manai nusa tetuk do inggu temak, baꞌe fee hata fo ara rokek.
MAT 18:20 Mete ma hambu hatahori dua do telu rakabua fo hule-haradoi sama-sama, nahuu sira iar, Au hatahoring, na, Au oo nai sira taladan boe.”
MAT 18:21 Basa boe ma Petrus mai natane Yesus nae, “Papa, au ae atane faa dei. Mete ma au toranoo kamahereng nasala laꞌi-laꞌik kana mbali au, na, au muste fee ambon mbalin laꞌe hida? Losa laꞌe hitu, do?”
MAT 18:22 Boe ma Yesus naselu nae, “Taa! O muste fee ambon neun losa laꞌe 7 laꞌe 70, losa o ta bisa reke mala sara bali.
MAT 18:23 Ei muste tao tungga talo naa, nahuu Manetualain naa sama leo manek esa fo reke no lutuk ndia penggawen nara hutan.
MAT 18:24 Neu ana mulai reke, boe ma ana nadenu ndia hatahorin fo neu noke nala penggawe esa mana nahuta doik neun, losa rifu-natuk kara.
MAT 18:25 Tehuu penggawe naa, ta bisa bae ndia hutan nara raa. Dadi manek parenda nae, ‘Miu seꞌo heni hatahori ia no basa sao-anan nara, fo ara dadi reu ata-dator. Ma seꞌo heni hata-heton lalaꞌen fo bae neu ndia hutan nara.’
MAT 18:26 Penggawe naa namanene nala naa, boe ma ana sendek luu-langgan neu manek matan fo kokoen nae, ‘Awii! Papa, ee! Papa manek tulun fee au fai lelak faa dei! Neu ko au bae falik au hutang nggara lalaꞌen.’
MAT 18:27 Manek namanene nala naa, boe ma dalen tuda kasian neun. De ana koka heni memak penggawe naa hutan lalaꞌen. Boe ma ana nakamboꞌik penggawe naa.
MAT 18:28 Tehuu neu penggawe naa laꞌo dea neu, ana natonggo no nonoon esa, mana nahuta doik baꞌu anak ka mbalin. Boe ma ana humu nala nonoon, de hese neu boliin ma mbokan nae, ‘Heeh! Bae o hutam hatematak ia boe!’
MAT 18:29 Nonoon namanene nala naa, boe ma ana sendek luu-langgan fo kokoen nae, ‘Awii! Tia-lai, ee! Tulun fee au fai lelak faa dei! Neu ko au bae falik au hutang nggara neu o.’
MAT 18:30 Tehuu penggawe naa nae, ‘Ta bisa! Nau ta nau, o muste bae hatematak ia!’ Boe ma ana sese nonoon neni bui neu, losa ana bae nabasa hutan nara raa.
MAT 18:31 Neu manek penggawen laen nara mete-rita hata mandadik naa ena, boe ma dalen nara sona. De reu tui manek.
MAT 18:32 Manek namanene nala naa, boe ma noke penggawe ta kalela hadak naa. Ana dedeun nae, ‘Weeh, hatahori manggarauk! Au koka heni o hutam mara lalaꞌen, nahuu o moke au kasian neu o.
MAT 18:33 Tehuu tao hata de o ta maena dale kasian soa-neu o nonoom, sama leo au kasian neu o naa?’
MAT 18:34 Manek naa namanasa nalan seli losa nadenu sese hatahori naa neni bui neu, mita fo ara tuni-ndenin, losa ana bae nabasa hutan nara lalaꞌen.”
MAT 18:35 Yesus nateꞌe Ndia tutuin, boe ma kokolak nae, “Au Amang manai nusa tetuk do inggu temak oo reke no lutuk talo naa boe. Neu ko Ana hukun ei, mete ma ei ta lilii heni tebe-tebe neu ei toranoo hatahori kamaherem mara sala-singgon nara.”
MAT 19:1 Yesus fee basa nenorik kara raa, boe ma Ana laꞌo ela Galilea fo neni profensi Yudea manai lee Yarden boboan seri naa neu.
MAT 19:2 Hatahori noꞌuk ka tunggan, boe ma Ana tao nahai hatahori hedis numa naa.
MAT 19:3 Hambu hatahori Farisir ketuk oo mai boe, fo rae ike rakatudak Yesus. Ara ratane rae, “Papa! Tungga ita anggaman hohoro-lalanen, mete ma touk sao ena, na, ana bole namaketu no saon pake dalak bee a mesan, do talo bee?”
MAT 19:4 Tehuu Ana naselu nae, “Eir ia, hatahori mana malela anggama. Tehuu tao hata de ei ta bubuluk Manetualain Susura Malalaon isin? Masaneda, nai tutui makasososak neni surak nae, ‘Manetualain adu hatahori dae-bafok, touk ma inak.’
MAT 19:5 Ma neni surak bali nae, ‘Huu naa de touk muste laꞌo ela ndia inan ma aman, fo neu leo-laꞌo dalek esa no saon, huu dua sara dadi reu esa ena.’
MAT 19:6 Dadi mete ma Manetualain mesa kana ndia adu nala dua sara dadi reu esa ena, na, hatahori dae-bafok boso mabingga-baꞌe sara bali!”
MAT 19:7 Hatahori Farisir ramanene rala Yesus kokolak talo naa, boe ma ratane bali rae, “Mete ma talo naa, na, tao hata de baꞌi Musa nae, hatahori bole namaketu, sadi ana fee susura nemeketuk soa-neu sao inan dei?”
MAT 19:8 Boe ma Yesus naselu bali nae, “Baꞌi Musa fee lelak ei bei-baꞌim mara ramaketu ro sira sao inan nara, nahuu sira raa, langga batuk kara sama leo ei! Tehuu neu Manetualain nakadadadik dae-bafok ia, Ndia nanaen ta talo naa.
MAT 19:9 Huu naa de Au afada, ee! Mete ma sao inak laꞌok sala nakahuluk, na, touk bole namaketu noon. Mete ma sao inak ta laꞌok sala, tehuu touk ndia namaketu noon, de ana sao seluk no inak laen, na, ana hohongge-lelena naa ena!”
MAT 19:10 Yesus ana nunin nara ramanene rala Ana kokolak talo naa, boe ma ara kokolak rae, “Mete ma talo naa, na, malole lenak boso sao leo.”
MAT 19:11 Boe ma Yesus naselu nae, “Ta basa hatahori bisa simbok rala Au kokolang laꞌe-neu hatahori ta mana saok. Kada hatahori fo Manetualain henggenee memak kana leo.
MAT 19:12 Hambu hatahori ta sao, nahuu numa inan bonggin mai leo naak ena. Hambu ketuk oo ta sao boe, nahuu hatahori tao sara talo naa. Ma hambu boe, ana here aon fo ta sao, nahuu ana nau nakalalaꞌok kada Manetualain ue-osan. Hatahori fo mana bisa nalela nenorik ia, elan numa naa fo ana simbo a mesan leo.”
MAT 19:13 Faik naa, hatahorir koꞌo roo sira anan nara reni Yesus reu, mita fo Ana ndae liman ma kokolak fee babaꞌe-babatik neu sara. Tehuu ana nunin nara rahara berak reu hatahorir raa.
MAT 19:14 Boe ma Ana namanasa ana nunin nara nae, “Ela kakana anar raa reni Au mai! Boso mamanggenggee sara! Huu hatahori mana sama leo sira iar, ndia Manetualain hatahorin.”
MAT 19:15 Boe ma Ana ndae liman neu kakana anar raa ma noke-hule fo Manetualain fee babaꞌe-babatik neu sara. Basa boe ma Ana laꞌo ela mamanak naa.
MAT 19:16 Laꞌe esa, hambu hatahori mai natane Yesus nae, “Papa Meser! Au muste tao hata malole talo bee, mita fo au bubuluk no tetuk ae, au bisa maso nusa tetuk do inggu temak? Huu au ae asoda akandoo ua Manetualain.”
MAT 19:17 Boe ma Yesus naselu nae, “Tao hata de o matane Au laꞌe-neu hata fo malole? Kada Manetualain ndia malole. Mete ma o mae masoda muan, na, leo-laꞌo tungga Ndia parendan.”
MAT 19:18 Hatahori naa natane bali nae, “Parenda bee naa?” Boe ma Yesus naselu nae, “Boso makanisa hatahori; boso laꞌok sala mua ta o saom; boso mamanaꞌo; boso dadi sakasii pepeko-lelekok;
MAT 19:19 fee hada-horomatak neu o inam ma o amam; ma sue neu o toranoom sama leo o sue o ao heli-helim.”
MAT 19:20 Hatahori naa naselu nae, “Basa parenda raa, au tao tungga sara ena. Bei kuran hata bali?”
MAT 19:21 Yesus namanene nala naa, boe ma Ana nae, “Mete ma o mae tungga Manetualain hihii-nanaun lalaꞌen, na, fali muu ngga fo seꞌo heni basa o hata-hetom lalaꞌen. Basa naa, muu babaꞌe doin nara fee hatahori mana toꞌa taak kara. Basa dei fo o mai tungga Au. Huu neu ko Manetualain bala fee o hata-heto manahetak nai nusa tetuk do inggu temak.”
MAT 19:22 Hatahori naa namanene nala naa, boe ma ana fali neu ngga no dalen sona, huu suꞌin noꞌun seli.
MAT 19:23 Basa boe ma Yesus kokolak no ana nunin nara nae, “Mamahere Au, hatahori kamasuꞌik susa laꞌe esak kana maso nusa tetuk do inggu temak.
MAT 19:24 Ndia sususan naa, nok bali banda onta moꞌok esa maso neni lalaen neu nesik ndandauk bolon.”
MAT 19:25 Yesus ana nunin nara ramanene rala naa, boe ma ara heran bali-bali. De ara raselu rae, “Mete ma talo naa, na, see ndia bisa maso nusa tetuk do inggu temak?”
MAT 19:26 Yesus mete natalolole sara, boe ma Ana kokolak nae, “Mete ma hatahori dae-bafok ndia tao, memak ta bisa dadi. Tehuu mete ma Manetualain ndia tao, basan bisa dadi!”
MAT 19:27 Boe ma Petrus fee nesenedak nae, “Papa! Ai laꞌo ela basa ai hata-heton lalaꞌen ena, fo tungga Papa. Tehuu ai hambu hata?”
MAT 19:28 Yesus naselu nae, “Mamahere neu Au! Mete ma Manetualain nakadadadik basan dadi beuk ena, neu ko Au Hatahori Dae-bafo Isi-isik ia, anggatuuk nai kadera man-parenda moꞌo-inahuuk. Faik naa, ei mana tungga Au oo manggatuuk tungga boe nai kadera man-parenda salahunu dua dadi miu mana maketu-maladi dedeꞌak soa-neu ita leon Israꞌel kasalahunu duak kara!
MAT 19:29 Hatahori mana laꞌo ela ndia uman, kaꞌa-fadin, ina-aman, anan nara ma ndia osi-lutun fo tungga Au, neu ko ana simbo falik losa lipa laꞌe natun esa. Ma neu dae-bafok fai mateꞌen, ana oo nasoda nakandoo no Manetualain boe.
MAT 19:30 Dadi masaneda, ee! Tungga Manetualain duduꞌan, hatahori noꞌuk mana soꞌuk aon leo hatahori moꞌo-inahuuk, sira raa, ndia hatahori kadiꞌin lenak. Tehuu hatahori mana tao aon leo hatahori kadiꞌik, sira raa, ndia hatahori moꞌo-inahuuk, tungga Manetualain duduꞌan.”
MAT 20:1 Basa naa Yesus fee nenorik nae, “Manetualain totoꞌu parendan naa, sama leo lololek ia: hambu tenu osik esa kalua bei liꞌu nee huhua anan, neu sangga hatahorir fo raue nai ndia osi anggor.
MAT 20:2 Ana hambu hatahori mana maue-osar, boe ma rala harak fo raue-osa faik esa, babaen doi lilo fulak esa, tungga belin fo rateme ralak. Raketu basa, boe ma ana nadenu sara reu raue nai ndia osin.
MAT 20:3 Liꞌu sio huhuan, boe ma ana kalua bali neni pasar neu. Numa naa, ana mete-nita hatahori ketuk ranggatuuk nado nggoa-nggoak ka.
MAT 20:4 Boe ma ana nafada sara nae, ‘Wee, kaꞌa nggara ein, ee! Ei nau tao ues nai au osing, do? Neu ko au bae ei no mandaak.’ Ara ramanene talo naa, boe ma rakahuꞌu a, de reu raue-osa.
MAT 20:5 Liꞌu salahunu dua ledo tetun, ma liꞌu telu ledo bobon, tenu osik kalua numa uman mai, fo neu sangga hatahori mana maue-osa bali.
MAT 20:6 Ledo bobok ena, fama te liꞌu lima, boe ma tenu osik naa kalua bali. Ana mete neu-mai te bei hambu hatahori kada rambarii hiek. Boe ma natane sara nae, ‘Tao hata de ei kada mambariik ta tao hata esa boe na numa huhuak ka losa ledo bobok ia?’
MAT 20:7 Hatahorir raa raselu rae, ‘Papa, ee! Ta hambu hatahori fee ai ues.’ Boe ma tenu osik naa nae, ‘Mete ma talo naa, na, ei miu tao ues nai au osing leo!’
MAT 20:8 Losa liꞌu fo hahae tao ues, boe ma tenu osik naa nanggou nala ndia mandor, de nae, ‘Manggou hatahori mana maue-osar raa fo bae sira esa-esak doi ue-osan. Mulai numa hatahori mana maso bakahitok losa hatahori mana maso makasososak naa.’
MAT 20:9 Boe ma mandor naa nanggou hatahorir raa mulai numa mana tao ues liꞌu lima ledo bobon. Ana fee sara esa-esak simbo doi lilo fulak esa.
MAT 20:10 Basa de mandor naa nanggou hatahori mana maue-osa laen nara, losa mana maue-osa ndia liꞌu nee huhua anan. Mana tao ues numa huhuan mai duꞌa rae, neu ko sira simbo noꞌun lena heni hatahori fo mana tao ues numa liꞌu lima ledo bobon mai. Naa te sira oo, simbo doi lilo fulak esa boe.
MAT 20:11 Ara simbo rala talo naa, boe ma unggu-remu neu tenu osik naa rae,
MAT 20:12 ‘Aweꞌ! Ta bisa talo ia, papa! Sira mana maik bakadean seli, tao ues kada liꞌu esak ka. Tehuu ai mana maik numa huhua anan mai, maue-osa fafandek lima-ein losa ai mbusen nara faa! Tehuu talo bee de papa bae ai sama leo sira raa?’
MAT 20:13 Boe ma tenu osik naselu neu sira esa nae, ‘Kaꞌa, ee! Au ta panake kaꞌa, nahuu kaꞌa mesa kana ndia nakaheik tao ues faik esa, na, babaen doi lilo fulak esa. Tebe, hetu? Dadi au bae tungga ita nekeketun, hetu?
MAT 20:14 Malole lenak kaꞌa simbo nala kaꞌa doin fo fali muu ngga leo. Mete ma au ae fee hatahori fo mana tao ues bakahitok numa kaꞌa mai, noꞌun sama no au feek neu kaꞌa, na, au haak naa.
MAT 20:15 Au ae pake au doing talo bee a mesan tungga kada au hihiing. Talo bee de kaꞌa nasakele nahuu au dale maloleng?’
MAT 20:16 Leo naak oo, neu Manetualain dadi neu manek soa-neu hatahorir boe, Ana bala hatahorin nara tungga Ndia hihiin. Dadi hatahori mana mai bakahitok, neu ko ana simbo babaꞌen sama leo hatahori mana mai makasososak. Ma hatahori mana mai makasososak, neu ko ana simbo ndia babaꞌen sama leo hatahori mana mai bakahitok.”
MAT 20:17 Basa boe ma Yesus asa laꞌo reni Yerusalem reu. Neu ara bei laꞌok numa dalak, Ana nanggou nala ana nunin nara fo rakabua mesa kasa roon. Boe ma Ana nafada seluk bali nae,
MAT 20:18 “Ei nenene, ee! Hatematak ia ita tae teni Yerusalem teu. Tehuu nai naa ara seꞌo heni Au, Hatahori Dae-bafo Isi-isik ia uni malangga anggama Yahudi malanggan nara, ma meser anggamar uu. Boe ma ara raketu hukun mates neu Au.
MAT 20:19 De ara loo lima Au uni hatahori feꞌek ta mana nalela Manetualain uu. Boe ma ara kokolak rakamamaek Au. Ma ara poko-femba rakalulutu Au ao-mbaang. Basa dei fo ara tao risa Au nai ai ngganggek lain. Memak Au mate tetebes. Tehuu neu bei-nesan, Au asoda fali numa mamates mai.”
MAT 20:20 Basa boe ma Sabadeus saon neni Yesus neu, sama-sama no anan Yakobis ma Yohanis. Boe ma ana sendek luu-langgan ma fee hada-horomatak fo kokoe nakandoo Yesus.
MAT 20:21 De Yesus natanen nae, “Mama parluu hata?” Boe ma inak naa nafada nae, “Talo ia, Papa! Au hule mete ma Papa nanggatuuk toꞌu parenda ena, na, Papa soꞌuk nala au anang dua ia, fo ara oo tungga toꞌu parenda sama-sama ro Papa boe. Au hule fo Papa nanggatutuuk esa neu Papa boboa konan, ma esa neu Papa boboa kiin.”
MAT 20:22 Yesus namanene nala inak naa nonoken, boe ma Ana kokolak no Yakobis ma Yohanis nae, “Ei ta bubuluk hata fo ei mokek. Neu ko Au hambu doidosok noꞌuk ka. Dadi talo bee? Ei duꞌa mae, ei oo mabeꞌi lemba-masaa doidosok naa sama-sama mia Au boe, do?” Dua sara raselu leli-belak kana rae, “Bisa malan seli Papa, ee!”
MAT 20:23 Boe ma Yesus naselu bali nae, “Memak, neu ko ei oo lemba-masaa doidosok naa, sama leo Au boe. Tehuu neu ko see ndia nanggatuuk nai Au boboa konan do boboa kiin, naa Au ta ndia aketu. Manetualain ndia naena haak fo naketun. Ana naketu memak kana ena, see ndia nanggatuuk nai mamanak naa.”
MAT 20:24 Neu ana nuni laen kasalahunuk kara ramanene rala dua sara nonoken talo naa, boe ma ara rasakele.
MAT 20:25 Tehuu Yesus nanggou nala basa sara, boe ma Ana nae, “Talo ia! Ei bubuluk ena, hetu? Hatahori moꞌo-inahuuk kara mana toꞌu parenda rasiꞌe tuni-ndeni sira rau-inggun, losa ara ta bisa rakaundak. Ma malangga nusak kara fo ta mana malela Manetualain, ara fee parenda lena-lenak, losa sira rau-inggun nara ta bisa botik rala langgan nara.
MAT 20:26 Tehuu ei ta bole tao talo naa! See numa ei mai nau dadi neu hatahori moꞌo-inahuuk, ana muste dadi neu ata-dato fo naono-lalau hatahori laen.
MAT 20:27 Ma see ndia nau dadi neu malanggan, ana muste tao aon sama leo ata-dato.
MAT 20:28 Nenene, ee! Au oo leo naak boe. Au, Hatahori Dae-bafo Isi-isik ia, mai fo aono-lalau hatahori. Au ta mai fo hatahori naono-lalau Au. Tehuu Au mai fo fee Au sodang katematuan, fo tefa-soi hatahori noꞌuk ka numa sira sala-singgon nara mai.”
MAT 20:29 Basa naa, Yesus asa laꞌok rakandoo. Neu ara kalua numa kota Yeriko mai, hambu hatahori noꞌuk ka laꞌok tungga sara.
MAT 20:30 Numa naa, hambu hatahori pokek dua ranggatuuk numa dalak tatain. Neu dua sara ramanene rae, mana laꞌok nesik naa, ndia Yesus numa Nasaret mai, boe ma ara bolu rahere rae, “Lamatuak! Dauk tititi-nonosin, ee! Ai mahani a doon seli ia neu Lamatuak ena! Kasian neu ai dei!”
MAT 20:31 Hatahorir ramanene rala dua sara bolu talo naa, boe ma ara kaꞌi sara rae, “Weeh! Ei dua ngga boso mamue!” Tehuu dua sara kii-bolu rahere bali rae, “Lamatuak, ee! Dauk tititi-nonosin, ee! Kasian neu ai dei!”
MAT 20:32 Neu Ana namanene talo naa, boe ma Ana nambarii taak, de natane sara nae, “Ei nau Au tao hata fee ei?”
MAT 20:33 Ara raselu rae, “Lamatuak, ee! Tulun fo ai bisa mete-mita dei!”
MAT 20:34 Yesus namanene nala kokolan nara talo naa, boe ma dalen tuda kasian neu sara. De Ana nafaroe matan nara, boe ma ara mete-rita tutik kana. Basa boe ma ara laꞌok tungga Yesus.
MAT 21:1 Basa naa, Yesus asa laꞌok rakandoo losa nggorok esa nade Betfage, nai letek Setun tatain. Nggorok naa deka-deka no kota Yerusalem ena. Ara hahae taak numa naa. Boe ma Ana nadenu ana nunin dua rakahuluk.
MAT 21:2 Ana parenda sara nae, “Ei dua ngga meni nggorok naa miu. Mete ma ei maso, neu ko ei mete-mita banda keledei ina no ana tenan esa, neni paꞌak kara rai naa. Ei miu sefi heni talin nara, fo leꞌa meni sara ia mai fee Au.
MAT 21:3 Tehuu mete ma hambu hatahori natane ei nae, ‘Tao hata de ei leꞌa meni hatahori keledein?’ Na, ei maselun mae, ‘Lamatuak nae paken. Mete ma pake basa ena, neu ko Ana haitua fali memak kana.’
MAT 21:4 Basa iar muste dadi, tungga hata fo Manetualain mana toꞌu dedeꞌan surak memak kana ena nae,
MAT 21:5 ‘Hee, ei hatahori Yerusalem mara ein! Mai fo mete ia dei! Te ei Manem mai ena. Ana mai no dale nekeloloen. Ana mai no saꞌe banda keledei tenak.’ ”
MAT 21:6 Basa boe ma ana nunin nara reu, ma tao tungga basa-basan, ndaa no Yesus helu neu sara ena.
MAT 21:7 Ara leꞌa roo keledei ina no ana tenan reni Yesus reu. Boe ma ara bela lafan nara neu reredon, de Ana saꞌe neu lain fo nae maso neni kota neu.
MAT 21:8 Neu ara rae maso reni kota dale reu, boe ma hatahori noꞌuk kara haꞌi rala lafan nara ma ndae arun nara, fo bela sara reu dalak. Hambu ketuk reu tati rala mbua sina doon nara, fo ara nggenggela sara reu dalak. No dalak naa, ara tao tanda rae, ara soru Yesus sama leo hatahori moꞌo-inahuuk.
MAT 21:9 Boe ma hatahori ketuk laꞌok rakahuluk resik Yesus matan, ma ketuk tungga dean. Ara eki rame-rame rae, “Hosana! Ai koa-kio Manetualain! Huu Dauk tititi-nonosin mai ena! Hosana! Ai koa-kio Manetualain! Huu Lamatuak nadenu Hatahori ia mai ena. Hosana! Ai koa-kio Manetualain! Huu Lamatuak nanggatuuk toꞌu parenda memak nai lalai fo demak mateꞌen!”
MAT 21:10 Neu Yesus maso Yerusalem no rame-rame talo naa, boe ma kota isin lalaꞌen kalua, de ratane rae, “Awii! See ndia mai ia?”
MAT 21:11 Hatahori noꞌuk kara raselu rae, “Ndia ia, Manetualain mana toꞌu dedeꞌan. Naden Yesus, hatahori Nasaret, numa profensi Galilea mai.”
MAT 21:12 Basa boe ma Yesus asa laꞌok rakandoo, de maso reni Manetualain Uma Huhule-haradoi Ina-huun reu. Numa Uma Huhule-haradoik naa bebelan, hatahori taon dadi neu pasar ena, fo ara raseseꞌo mbui lunda sinar, ndia hatahori paken dadi tunu-hotuk soa-neu huhule-haradoik. Yesus mete-nita talo naa, boe ma Ana neu husi-mbuu kalua heni sara. Ana fae nggari heni basa meir fo ara pake tuka doik, ma fae nalengga heni basa banggur fo ara pake raseseꞌo mbuik kara.
MAT 21:13 Boe ma Ana nafada sara nae, “Manetualain mana toꞌu dedeꞌan surak ena nae, ‘Au ambadedeik Uma ia, mita fo hatahorir bisa mai hule-haradoi nai ia.’ Manetualain nanaun talo naa, tehuu ei tao Uma ia dadi neu naꞌo manu-meor mamana nekebuan!”
MAT 21:14 Basa boe ma hatahori pokek ma hatahori keko-luꞌuk kara reni Yesus mai numa Manetualain Uma Huhule-haradoin naa. De Ana tao nahai basa sara.
MAT 21:15 Numa naa oo hambu malangga anggama Yahudi malanggan nara ma meser anggamar boe. Neu ara mete-rita Yesus tao tanda heran talo naa, boe ma ara rasakele. Lena-lenak bali, neu ara ramanene kakanak kara bolu rame-rame numa Uma Huhule-haradoik rae, “Hosana! Ai koa-kio Manetualain! Huu mane Dauk tititi-nonosin mai ia ena!”
MAT 21:16 Basa de malanggan nara raa kokolak reu Yesus rae, “Heeh! O mamanene kakanak kara raa kokolan? Naa, ta ndaa naa!” Tehuu Yesus naselu sara nae, “Hou, Au amanene. Te hata de? Ei bei ta lees mita nai Manetualain Susura Malalaon laꞌe-neu kakanak kara fo mana koa-kio Manetualain, do? Nai naa neni surak nae, ‘Manetualain sadia memak kakana mbimbila anak ma kakana kadiꞌi anak, fo ara koa-kio neu Ndia.’ ”
MAT 21:17 Basa boe ma Yesus asa kalua laꞌo ela kota naa, fo reu sunggu nai nggorok Betania.
MAT 21:18 Neu beꞌe-mai huhua anan, Yesus asa laꞌok bali fo maso fali reni kota Yerusalem reu. Tehuu neu ara bei laꞌok numa dalak, Ana nameda ndoe ena.
MAT 21:19 Ana mete-nita ai huuk esa numa dalak tatain fo hatahorir rasiꞌe raꞌa boan. De Ana neu deka-deka no ai huuk naa, fo nae mete sudik kaboak do taa. Neu Ana losa ai huuk naa, Ana ta mete-nita boak esa boe na, tehuu mete-nita kada ai huuk naa doon. Boe ma Ana kokolak mbali ai huuk naa nae, “Huu o ta fee o boam soa-neu Au, de o ta bisa maboa ena!” Ana kokolak basa, boe ma ai huuk naa namatuu tutik kana.
MAT 21:20 Ana nunin nara mete-rita talo naa, boe ma ara nggengger. Ara ratane rae, “Tao hata de medak neu ma ai huuk ia namatuu tutik kana?”
MAT 21:21 Boe ma Ana naselu nae, “Nenene matalolole, ee! Mete ma ei mamahere tebe-tebe neu Manetualain, ma ta madale duak faa boe na, ei bisa tao sama leo Au taok naa ena. Ei oo bisa tao lena heni naa boe. Haꞌi netuduk leo: ei bisa parenda letek esa fo lali neni tasi neu. Neu ko Manetualain lali heni memak letek naa, sadi ei mamahere tebe-tebe neu Ndia!
MAT 21:22 Basa hata fo ei moke neu Manetualain, neu ko ei simbon, sadi ei mamahere tebe-tebe neu Ndia.”
MAT 21:23 Basa boe ma Yesus asa laꞌok rakandoo. Losa Yerusalem, ara maso fali reni Uma Huhule-haradoi Ina-huuk bebelan reu bali. Neu Ana nanori hatahorir laꞌe-neu Manetualain eno-dala ndoon, boe ma malangga anggama Yahudi malanggan nara ma lasi-lasi hadak kara mai rakaseseluk dedeꞌak roon rae, “See ndia nadenu o mai tao nemuek numa ia ndia afik ka? See ndia fee o haak naa?”
MAT 21:24 Tehuu Ana bubuluk ara sangga dalak fo rae rakatutudak Ndia. Boe ma Ana bala nae, “Au oo ae atane ei boe. Ei maselu Au dei, dei fo Au aselu ei.
MAT 21:25 Au ae atane talo ia: ei basa ngga malela Yohanis Mana Saranik naa, hetu? See ndia feen haak fo ana sarani hatahorir? Manetualain, do hatahori dae-bafok?” Boe ma ara duduꞌa reu-mai, ma rakokola aok rae, “Awii! Ikek nala ita ia ena, ma! Huu mete ma ita taselu tae, ‘Manetualain ndia feen haak’, neu ko Ana bala nae, ‘Mete ma talo naa, tao hata de ei ta mamahere Yohanis?’
MAT 21:26 Tehuu ita oo ta bisa tae, ‘Hatahori dae-bafok ndia feen haak’ boe, neu ko basa hatahorir ramue mbali ita, nahuu ara ramahere rae, Yohanis naa, Manetualain mana toꞌu dedeꞌan.”
MAT 21:27 Huu naa de ara raselu mbali Yesus rae, “Ai ta bubuluk.” Boe ma Yesus bala nae, “Dadi mete ma talo naa, Au oo ta parluu afada see ndia fee haak neu Au boe.”
MAT 21:28 Yesus kokolak nakandoo no malanggan nara raa nae, “Ei duꞌa talo bee laꞌe-neu lololek ia? Hambu amak esa no ana toun dua. Ana parenda ana ulun nae, ‘Anang gee! O muu maue-osa nai osi dale faik ia dei.’
MAT 21:29 Tehuu kanak naa naselu nae, ‘Eeh! Au ta uu.’ Tehuu ta dook ka boe ma ana fale dalen de ana neu.
MAT 21:30 Basa boe ma amak naa nadenu ana kaduan nae, ‘Anang gee! O muu maue-osa nai osi dale faik ia dei.’ Boe ma kanak naa naselu nae, ‘Malole papa. Dei fo au uu.’ Naa te ana ta neu.”
MAT 21:31 Yesus tui basa talo naa, boe ma natane sara nae, “Au ae atane talo ia: numa kakana kaduak kara raa mai, see ndia tao tungga aman parendan naa?” Boe ma ara raselu rae, “Ndia makasososak naa!” Basa de Ana kokolak nae, “Hou. Nenene matalolole, huu Au kokolang ndia ndaa. Hatahori fo ei henggenee malan ta kambareek kara, sama leo mana susu bea ia ma ina petak, neu ko ara maso dadi reu Manetualain hatahorin rakahuluk ruma ei mai. Huu ei kada mataa hie-hie mbali Manetualain, tehuu ei ta tao tungga Ndia hihii-nanaun.
MAT 21:32 Fai bakahulun, Yohanis Mana Saranik nanori ei ena, dalak talo bee fo ei bisa leo-laꞌo no ndoos. Tehuu ei ta nau mamahere neu sana. Naa te neu faik hatahori ta kambareek kara ramanene Yohanis, ara laꞌo ela basa sira sala-singgon nara fo tungga ndia nenorin naa. Ei oo bubuluk mala basa naar ena boe. Tehuu ei ta nau hahae numa ei sala-singgom mara mai, fo tungga Manetualain hihii-nanaun.”
MAT 21:33 Basa naa, Yesus tui lololek esa bali nae, “Hambu tenu daek esa neu nasosoi nambalao osi beuk fo nae sele ai anggor neu ndia daen lunggun. Basa de ana mbaꞌa eko-feon. Ma ana tao baak fo nae rumu-keꞌe anggor oen. Boe ma ana nambaririik mamana nenea demak. Basa de ana fee osi naa neu mana maue osir fo ara raue ma rabaꞌe buna-boan nara roon. Boe ma ana laꞌo neni nusa feꞌek neu.
MAT 21:34 Losa fai ketu anggor boan, boe ma tenu osik naa nadenu ndia hatahori mana maue-osan neni mana maue osir neu, fo noke ndia babaꞌen.
MAT 21:35 Tehuu mana maue osir ta hosek ndia hatahori mana maue-osan naa. Ketuk hambu fefembak, ketuk rakanisa sara, ma ketuk neni tokok renik batu.
MAT 21:36 Tehuu tenu osik naa nadenu seluk ndia hatahori mana maue-osan nara bubuak esa moꞌon lena makasososak naa. Tehuu mana maue osir raa oo, tao manggarauk talo naa neu basa sara boe.
MAT 21:37 Doo-doo boe ma, tenu osik naa nadenu ndia ana heli-helin. Huu ana duꞌa nae, ‘Mete ma au adenu au ana heli-heling, neu ko ara simbok no malole, ma ramanene neun.’
MAT 21:38 Tehuu neu mana maue osir raa mete-rita kanak naa, boe ma ara rakokola aok rae, ‘Heeh, ei mete dei! Tou lasik nadenu ndia ana heli-helin mai ena. Neu ko ana ndia simbo nala tou lasik pusakan lalaꞌen. Dadi mai fo ita tao tisan leo, mita fo ita ndia laꞌe tala osi ia.’
MAT 21:39 Boe ma ara humu rala kanak naa, de ara nggarin neni osi deak neu fo tao risan.”
MAT 21:40 Yesus tui basa, boe ma natane sara nae, “Au ae atane talo ia: mete ma tenu osik naa fali mai ngga, nai rarain ana tao mana maue osir raa talo bee?”
MAT 21:41 Boe ma hatahori Yahudi malanggan nara raselu rae, “Neu ko ana nakanisa basa hatahori manggarauk kara raa. Basa naa, ana fee hatahori laen seba osi naa, fo neu ko baꞌe buna-boan ndaa no fain.”
MAT 21:42 Boe ma Yesus kokolak no sara nae, “Fama te ei bei ta lees mita hata fo neni surak nai Manetualain Susura Malalaon nae, ‘Hambu batu esa, tukan batur nggari henin, tehuu hatematak ia batu naa dadi neu uma batu netehuun ena! Manetualain mesa kana ndia here nalan, boe ma nanggatutuuk batu naa. Huu naa de ita mete-titan lolen seli!’ ”
MAT 21:43 Boe ma Yesus tuti kokolan nae, “Dadi ei duduꞌa matalolole, ee. Fai bakahulun Manetualain here nala ita hatahori Yahudir ia, fo dadi teu Ndia hatahorin. Tehuu ei ta nau tao matak mbali Au, de neu ko Manetualain here hatahori laen. Kada hatahori mana leo-laꞌo tungga Manetualain hihii-nanaun, ndia bisa maso dadi neu Manetualain hatahorin.
MAT 21:44 [Au afada no kada ndoo-tetun. Au ia, ndia batu netehuuk naa. Hatahori mana tuda laꞌe-ndaa batu ia, neu ko nakalulutu. Ma mete ma batu naa tuda laꞌe hatahori, neu ko hatahori naa dadi makararafuk memak.]”
MAT 21:45 Neu malangga anggama Yahudi malanggan nara, ma hatahori Farisir ramanene rala Yesus tutuin, boe ma ara bubuluk rae, lololek naa ndee laꞌe sira. Sira tetuk sama leo mana maue osir raa, ma tukan batu mana nggari heni batu netehuuk naa.
MAT 21:46 De ara ramanasa ralan seli. Boe ma ara duduꞌa de rala harak fo rae humu Yesus. Tehuu ara ramahia hatahori noꞌuk kara fo mana tao leo Yesus naa, Manetualain mana toꞌu dedeꞌan. Huu naa de ara oo ta bisa tao hata-hata mbalin boe.
MAT 22:1 Basa de Yesus kokolak seluk no sara pake lololek nae,
MAT 22:2 “Manetualain parenda-koasan naa, sama leo manek esa tao feta kabin soa-neu ana toun.
MAT 22:3 Neu raole rala feta ena, boe ma ana nadenu atan fo neu nafada basa hatahorir neni nokek kara nae, ‘Mai leo, te feta nae mulai ia ena.’ Tehuu hatahorir raa ta nau mai.
MAT 22:4 Boe ma atar raa lenggu fali de rafada manek. Manek namanene nala naa, boe ma nadenu ata laen nara nae, ‘Ei miu mafada basa hatahorir fo mai leo, huu sadia ala feta ena. Au tati sapi ena, ma dode-nasu malada-malada ena. Madenu sara mai raꞌa feta leo, huu basan neni sadiak ia ena.’
MAT 22:5 Atar raa reu rafada talo naa. Tehuu hatahori neni nokek kara raa ta nau tao matak. Ketuk reni osi reu, ketuk reni mamana ue-osan reu,
MAT 22:6 ma ketuk humu rala manek atan nara fo tuni-ndeni sara losa mate.
MAT 22:7 Manek namanene nala naa, boe ma namanasa nalan seli. De Ana nadenu soldadun nara reu rakanisa basa hatahorir mana rakanisa ndia atan nara. Basa de soldadur raa hotu heni kota naa losa natetu no daer.
MAT 22:8 Boe ma manek naa nanggou ndia ata laen nara ma nafada nae, ‘Feta kabin neni sadiak ena, tehuu hatahorir fo au okek kara ena, ta randaa tungga au fetang.
MAT 22:9 Hatematak ia ei kalua meni dala ramer miu moke see a mesan, fo ei matonggo mia sara rai naa.’
MAT 22:10 Boe ma atar raa reni dala ramer reu. Ara roo hatahori noꞌuk ka fo ratonggo sara ruma naa, de reni feta kabin reu. Hambu hatahori neulauk kara, ma hambu hatahori manggarauk mana mai tao rasofe mamana feta naa.
MAT 22:11 Basa de manek naa maso neni mamana feta neu, de mete ndule ndia fuin nara. Boe ma ana mete-nita fuik esa ta pake bua-loꞌa feta.
MAT 22:12 De manek natanen nae, ‘Tia-lai, ee! Tao hata de o maso ia mai ta pake bua-loꞌa feta?’ Tehuu hatahori naa panggananaa namanggonggoak kana.
MAT 22:13 Boe ma manek parenda atan nara nae, ‘Futu hatahori ia lima-ein nara fo pirun neni dea naa neu, mita fo ana buꞌi ma doidoso nai mamana makiuk naa.’
MAT 22:14 Leo naak oo, Manetualain noke hatahori noꞌuk ka boe, tehuu Ana here nala kada hidak ka fo dadi neu Ndia hatahorin.”
MAT 22:15 Hatahori Farisir ramanene rala Yesus kokolak talo naa, boe ma ara rala harak fo rae ike ma rakasasaꞌek salak neu Yesus.
MAT 22:16 De ara radenu sira ana nunin nara sama-sama ro hatahori numa Herodes partei politik mai, fo reu rakaseseluk dedeꞌak ro Yesus. Ara rakadedemak kana rae, “Papa Meser! Ai bubuluk Papa dalen ndoos. Papa ta mana pepeko-lelekok ma ta mete matak. Papa soa fee nenorik laꞌe-neu Manetualain Dedeꞌa-kokolan no tetuk.
MAT 22:17 Hatematak ia ai nau matane dedeꞌak esa. Tungga ita anggama Yahudi hohoro-lalanen, ndondoon naa ita muste bae bea fee man-parenda Roma mane ina-huun, do taa?”
MAT 22:18 Tehuu Yesus bubuluk nae, ara rae ike Ndia naa ena fo Ndia kokolak laban man-parenda Roma. Boe ma Ana naselu nae, “Memak, ei hatahori mana dea-matak! Tao hata de ei mae ike Au menik dedeꞌak naa?
MAT 22:19 Matudu sudik doi lilo fulak esa fo hatahorir paken bae bea mai Au dei!” De ara ratudu doi lilo fulak esa neun.
MAT 22:20 Boe ma Ana natane sara nae, “Ia, see nggambar ia? Ma ia, see naden ia?”
MAT 22:21 Ara raselu rae, “Naa keser, man-parenda Roma mane ina-huun naa.” Boe ma Yesus nafada sara nae, “Dadi mete ma talo naa, ei miu fee man-parenda hata fo man-parenda haak. Ma fee Manetualain hata fo Manetualain haak.”
MAT 22:22 Ara ramanene rala Ana naselu talo naa, boe ma basa sara heran bali-bali, huu Ana kokolak ndaa, na. Huu naa de ara ta bisa ike sana. Boe ma ara laꞌo elan leo.
MAT 22:23 Numa naa oo, hambu hatahorir ruma partei Saduki mai boe. Hatahorir maruma partei Saduki mai ia fee nenorik rae, hatahori mates ta nasoda fali numa mamaten mai. Faik naa ara oo, sangga dalak fo rae ike Yesus boe. Huu naa de ara mai rakaseseluk dedeꞌak roon rae,
MAT 22:24 “Papa Meser! Baꞌi Musa surak ela fee ita dala-hadak ia ena nae, mete ma touk esa mate laꞌo ela saon, tehuu anak taa, na, touk naa fadin muste sao nala ina falu naa, mita fo ana fee tititi-nonosik soa-neu kaꞌan mana matek naa ena.
MAT 22:25 Memak lele uluk baꞌi Musa fee nenorik talo naa, tehuu hatematak ia, ai nau matane talo ia: hambu touk hitu kaꞌa-fadik kara. Uluk sao, tehuu maten ma ta laꞌo ela anak. Boe ma fadin mana tunggan, sao nasafali ina falu naa.
MAT 22:26 Ta dook ka, ana oo mate boe, ma anak taa. Leo naak oo no fadik katelun boe; ana sao nala ina falu naa, tehuu ana oo mate boe, ma ta laꞌo ela anak. Talo naa nakandoo losa fadi muri anak oo, maten boe.
MAT 22:27 Basa boe ma ina falu naa maten.
MAT 22:28 Dadi hatematak ia, ai nau matane talo ia: inak naa sao nita no touk hitu ena. Neu ko neu dae-bafok fai mateꞌen, Manetualain nasoda falik hatahori mates sara, inak naa dadi neu see saon, ou?”
MAT 22:29 Boe ma Yesus naselu nae, “Mete ma ei matane talo naa, na, ei sala moꞌok ia ena! Ei ta malela Manetualain Susuran isin. Ma ei oo ta bubuluk Ndia koasan ta neni babanggak boe!
MAT 22:30 Ndoon talo ia. Neu Manetualain nasoda falik hatahori mates sara, ta hambu dedeꞌa sasaok soa-neu sara ena, sama leo Ndia atan nara marai nusa tetuk do inggu temak.
MAT 22:31 Ma Au oo nau kokolak laꞌe-neu hatahori mates bisa nasoda fali numa mamaten mai, do taa boe. Nai baꞌi Musa susuran hambu tutuik naꞌu ai ana neni hotuk, tehuu ta kade sana. Numa tutuik naa mai, ita bubuluk tae, hatahori mates bisa nasoda fali numa mamaten mai. Numa naa Manetualain nafada baꞌi Musa nae,
MAT 22:32 ‘Au ia, Manetualain numa o baꞌim mara mai, sira baꞌi Abraham, baꞌi Isak, ma baꞌi Yakob. Basa sara rakaluku-rakatele rakandoo neu Au, losa hatematak ia.’ Ita bubuluk tae, neu Manetualain kokolak talo naa, baꞌir raa mate dook ka ena. Tehuu Manetualain nafada nakandoo nae, Ndia bei dadi neu sira Lamatuan. Huu naa de ita bubuluk tae, sira samanen nara bei rasoda rakandoo, leo mae ara mate dook ka ena. Dadi leo mae hatahori mate, tehuu ana nasoda fali numa mamaten mai. Kada hatahori masodak ndia mana nakaluku-nakatele neu Manetualain, ta hatahori mates, hetu?!”
MAT 22:33 Hatahori Sadukir raa ramanene rala Yesus fee nenorik talo naa, boe ma ara ta bisa bala hata-hata bali. Tehuu hatahori noꞌuk kara raa heran bali-bali, de kokolak rae, “Awii! Hatahori ia nenorin ta neni babanggak, ee!”
MAT 22:34 Neu hatahori Farisir ramanene rala rae, Yesus bala nala hatahori Saduki raa ena, boe ma ara rakabua rame-rame fo rae rakaseseluk dedeꞌak roon.
MAT 22:35 Sira mana malela anggaman esa nae ike sudik Yesus nae,
MAT 22:36 “Papa Meser! Au nau atane talo ia: ita hohoro-lalanen, ma anggama parendan, noꞌun seli. Numa basa parendar fo maruma baꞌi Musa mai naa, bee ndia nenenin lenak?”
MAT 22:37 Boe ma Yesus naselu nae, “Parenda fo nenenin lenak nai Manetualain Susura Malalaon naa nae talo ia: ‘Manetualain naa, ei Lamatuam. Dadi ei muste sue-lai neu Ndia lena heni basa-basan. Huu naa de ei muste hii malan seli neun, malela Ndia, ma maue-osa fafandek lima-eim mara fo tungga Ndia hihii-nanaun.’
MAT 22:38 Parenda naa, nenenin lena basan, ma ta neni babanggak!
MAT 22:39 Ma hambu parenda kaduan nae leo ia: ‘O muste sue hatahori laen nara, sama leo o sue o ao heli-helim.’
MAT 22:40 Parenda kaduak kara ia, ndia huuk numa baꞌi Musa hohoro-lalanen ma Manetualain mana toꞌu dedeꞌan nara nenorin lalaꞌen. Ta bisa dadi, hatahori tungga parenda laen nara, mete ma ana ta tungga nakahuluk parenda moꞌo kaduak kara iar.”
MAT 22:41 Faik naa, hatahori Farisir bei rakabua numa naa, boe ma Yesus natane nasafali sara nae,
MAT 22:42 “Manetualain helu-bartaa numa lele uluk mai ena nae nadenu Karistus mai fo tao nasoi-nasoda Ndia hatahorin nara. Tungga ei duduꞌam, Karistus naa, see tititi-nonosin?” Boe ma ara raselu rae, “Ndia naa, mane Dauk tititi-nonosin.”
MAT 22:43 Yesus kokolak seluk nae, “Mete ma talo naa, na, hata de Manetualain Dula-dale Malalaon nafada mane Dauk fo noke Karistus naa, ‘Lamatuak’? Sama leo Dauk surak ena nae,
MAT 22:44 ‘Manetualain nafada au lamatuang ena nae, “Mai fo manggatuuk muu Au boboa konang nai mamana hada-horomatak mateꞌen ia. Neu ko Au tao ala o musum mara, losa ara doꞌor mbali O.’ ”
MAT 22:45 Numa susurak naa mai, ita bisa bubuluk tae, mane Dauk mesa kana noke Karistus naa, ‘Lamatuak’. Dadi mete ma hatahori rae Karistus naa, kada mane Dauk tititi-nonosin, naa bei ta dai! Ndia oo dadi neu mane Dauk Lamatuan boe!”
MAT 22:46 Ara ramanene rala Yesus kokolan talo naa, boe ma hatahori Farisir raa kada ramanggonggoak kana, ma ta hambu hatahori esa bisa naselu Yesus boe na. Huu naa de mulai numa faik naa mai oo, ara ramataꞌu ratatane boe, ma ta rambarani rae ike sudik Yesus bali.
MAT 23:1 Basa boe ma Yesus nanori ana nunin nara sama-sama roo hatahori noꞌuk kara fo mana tungga sara.
MAT 23:2 Ana nafada nae, “Meser anggamar ma hatahori Farisir raa toꞌu haak fo fee nenorik laꞌe-neu baꞌi Musa hohoro-lalanen nara.
MAT 23:3 Huu naa de ei muste nenene sara ma tungga nenorin nara. Tehuu boso tungga hata fo ara taok, nahuu ara ta tao tungga sira nenori heli-helin.
MAT 23:4 Ara rakasetik hatahorir fo lemba-rasaa sira anggaman hohoro-lalane kamaberan nara. Tehuu sira mesa kasa ta nau tulu-fali hatahorir fo tao tungga hohoro-lalanek naa.
MAT 23:5 Basa hata fo ara taok, ara taon mita fo hatahori koa sara. Haꞌi netuduk leo: hambu buas esa isin Manetualain Dedeꞌa-kokolan fo ara paꞌan neu langgan nara ma liman nara. Tehuu ara tao ramoꞌo sira enan, mita fo hatahori soꞌuk kasa rae, ‘Wee! Sira iar, hatahori malalaok!’
MAT 23:6 Mete ma ara maso reni uma huhule-haradoik reu, do tungga feta, ara soa sangga mamana nenggetuuk neulaun lenak, fo hatahori noꞌuk mete-rita sara.
MAT 23:7 Mete ma reni pasar reu, ara oo hihii kada hatahori fee sara hada-horomatak boe. Ara sangga fo hatahori doꞌor neu sara rae, ‘Soda-molek, papa meser mana hambu hada-horomatak.’
MAT 23:8 Tehuu ei boso tungga sira hihiru-heheon naa! Hatahori ta bole roke ei rae, ‘papa meser’, nahuu ei Mesem kada esak ka. Ma ei basa ngga ia, toranook kara.
MAT 23:9 Boso makadedemak hatahori nai dae-bafok ia mae, ‘papa’, nahuu ei Amam nai nusa tetuk do inggu temak kada esak ka.
MAT 23:10 Hatahorir oo ta bole roke ei rae, ‘lamatuak’ boe, nahuu ei Lamatuam kada esak ka, ndia Au ia fo Manetualain helu-bartaa nadenun numa lele uluk mai ena.
MAT 23:11 Huu naa de Au afada fo ei ta bole soꞌuk aom mara, sama leo hatahori mana hii kada hambu hada-horomatak kara raa. See numa ei mai nau dadi miu hatahori moꞌo-inahuuk, ana muste dadi sama leo ata-dato fo naono-lalau hatahori laen.
MAT 23:12 Hatahori mana nakadedemak aon nara, neu ko Manetualain nakaloloek kana. Tehuu hatahori mana tao aon sama leo hatahori kadiꞌik, neu ko Manetualain nakadedemak kana.”
MAT 23:13 Basa naa, Yesus tuti kokolan nae, “Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu ei ta nau mamahere neu Au, ndia Hatahori fo Manetualain helu-bartaa ena nae nadenun mai ia. Ma manggaraun lenak bali, ei mamanggee mala hatahorir mana nau mai maso nai Manetualain parenda-koasan dale fo ara boso ramahere neu Au.
MAT 23:14 [Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu ei kada pepeko-leleko ina falur, basa de ei fonda mala uman nara. Tehuu nai hatahori noꞌuk kara matan, ei mafuni ei manggaraum mara naa, ma mambariik hule-haradoi mala dook ka fo hatahorir rae, ei dalem mara lolo-laok. Tehuu neu ko Manetualain fee huku-dokik beran seli neu ei.]
MAT 23:15 Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu ei saꞌe ofak meni bee miu a mesan, ma konda-hene letek, nau sangga kada hatahori esak ka, fo maso neni ei anggamam neu. Tehuu mete ma ana maso ena, na, ei tao mala masodan manggaraun lenak bali, losa ana hambu huku-dokik nai aꞌi mbila ta kala matek, beran lena ei laꞌe dua.
MAT 23:16 Weeh! Ei dadi hatahori pokek nai dalem mara ena, tehuu hata de ei bei nau matudu dalak fee hatahori laen bali? Neu ko ei hambu sosoek, nahuu ei fee nenorik leli-belak kana mae, ‘Mete ma hatahori soꞌuk hehelu-bartaak pake sumba-sook ma seseik Uma Huhule-haradoi Ina-huuk, na, hatahori naa ta nakaesa no ndia hehelu-bartaan naa. Tehuu mete ma ana soꞌuk hehelu-bartaak pake sumba-sook ma seseik bua lilo mbilas manai Uma Huhule-haradoik naa, na, dei fo ana nakaesa no ndia hehelu-bartaan naa.’
MAT 23:17 Eir ia, hatahori nggoak kamangganggak ta bubuluk hata esa boe na! Ei rarain mae, Manetualain duꞌa nae bua lilo mbilas nenenin lena heni Ndia Uma Huhule-haradoin, do? Taa! Uma naa ndia tao buas naa dadi malalaok!
MAT 23:18 Ei oo fee nenorik leli-belak kana mae, ‘Mete ma hatahori soꞌuk hehelu-bartaak pake sumba-sook ma seseik mei tunu-hotuk manai Uma Huhule-haradoi Ina-huuk, na, hatahori naa ta nakaesa no ndia hehelu-bartaan naa. Tehuu mete ma ana soꞌuk hehelu-bartaak pake sumba-sook ma seseik tunu-hotuk manai mei lain, na, dei fo ana nakaesa no hehelu-bartaan naa.’
MAT 23:19 Eir ia, memak poke tetebes sara ena. Neu ko mei tunu-hotuk naa nenenin lena heni tunu-hotuk manai mei naa lain. Mei naa ndia taon, de sira tunu-hotun nara dadi malalaok fee Manetualain.
MAT 23:20 Huu naa de mete ma hatahori sumba-soo ma seseik mei tunu-hotuk, na, malole lenak seseik mei naa, no basa hata manai mei naa lain boe.
MAT 23:21 Mete ma hatahorir sumba-soo ma seseik Uma Huhule-haradoi Ina-huuk, na, malole lenak seseik Uma Huhule-haradoik sama-sama no Manetualain naden. Huu Ana ndia leo nai naa.
MAT 23:22 Mete ma hatahori sumba-soo ma seseik nusa tetuk do inggu temak, na, naa sama leo ana seseik Manetualain kadera man-parendan sama-sama no naden, huu Ana ndia nanggatuuk toꞌu parenda nai naa.
MAT 23:23 Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu ei malelam mara seli fo reke fee Manetualain babaꞌek esa numa salahunu mai. Ei soa reke makandoo basa-basan, losa ei bumbu-fanim mara ruma osi mai oo, ei reke no lutuk boe. Haꞌi netuduk leo, ei reke lutuk ei daradaim, adas makeek, ma jintan. Naa te ei lilii heni Manetualain hohoro-lalanen nara fo nenenin lenak mateꞌen! Ei ta leo-laꞌo no ndoos. Ei ta sue hatahori kasian nara. Ma ei ta leo-laꞌo makandoo tungga Manetualain hihii-nanaun. Malole lenak, ei tao tungga basa naar, dei fo miu reke ei bumbu-fanim mara fo ei nau fee Manetualain.
MAT 23:24 Ei dalem mara makatemak kara ena, tehuu hata de ei bei nau matudu dalak fee hatahori laen bali? Ei tao hohoro-lalanek no lutu-lelon losa ei madenu hatahori laen nara tungga, tehuu Manetualain hohoro-lalanen fo nenenin lenak mateꞌen naa, ei mesa ngga ta tungga. Sama leo, ei parisa no lutuk ma seꞌe heni mumuu numa ei oe nininum mai. Tehuu banda moꞌok sama leo kamba, ei kodo katemak kana!
MAT 23:25 Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu ei safe mala ei pingga-manggom mara losa ranggadilak, tehuu naa nai kada dean. Naa te dalen nara nggeon ndoos sofek no ei tatao-nonoꞌi manggaraum ndia leo naꞌo manu-meo ma bare-naꞌo.
MAT 23:26 Weeh! Hatahori Farisir pokek kara ein! Safe makahuluk ei pingga-manggom dalen nara dei! No dalak naa, dean nara oo, dadi laok boe!
MAT 23:27 Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek, nahuu eir ia nok bali rates neni dama mutik. Hatahorir mete-rita kada dean naa, lolen seli. Tehuu dalen naa, sofek no hatahori mates duin nara, ma basa mana kaboo mburuk.
MAT 23:28 Ei oo sama boe! Ei soa tao aom mara nok bali hatahori lolo-laok. Hatahori mete-rita ei numa dea mai, sama leo hatahori dale ndoos. Naa te ei dalem mara sofek no dedeꞌa manggarauk ena. Ei kokolak laen, tao laen, ma lilii heni Manetualain parendan nara.
MAT 23:29 Weeh, ei meser anggamar ma hatahori Farisir ein! Numa ei hihiru-heheom huun mai, eir ia, hatahori mana dea-matak kara! Neu ko ei hambu sosoek! Ei tao rates moꞌok kara soa-neu Manetualain mana toꞌu dedeꞌan nara, ma heti mala hatahori dale maloler raten nara neulau ndoos.
MAT 23:30 Tehuu ei mae, ‘Mete ma ita leo tanak esa to ita bei-baꞌin nara, neu ko ita ta tungga a mesan takanisa Manetualain mana toꞌu dedeꞌan nara.’
MAT 23:31 No dalak naa, ei mesa ngga ndia matudu mae, ei oo manggarauk sama leo ei bei-baꞌim mara boe.
MAT 23:32 Dadi malole lenak, ei tao manggarauk talo naa losa basan, tungga ei bei-baꞌim sala-singgon nara!
MAT 23:33 Eir ia, tebe-tebe manggarauk nok bali mengge karasok. Ei duꞌa mae, Manetualain ta fee huku-dokik neu ei! Boso mamahena! Neu ko Ana piru ei meni aꞌi mbila ta kala matek miu!
MAT 23:34 Nenene, ee! Neu ko Au nadenu fee ei Au nedenung nggara, fo ara fee nenorik ma ratudu ei Manetualain eno-dala ndoon. Tehuu neu ko ei hala misa ketuk, ma paku makanisa ketuk nai ai ngganggek. Hambu ketuk oo, ei poko-femba sara rai uma huhule-haradoik kara dale boe, ma ketuk ei tuni-ndeni sara losa ralai ruma kota esa reni kota laen reu.
MAT 23:35 Lele uluk ei bei-baꞌim hala nisa Habel. Naa te ndia ia, hatahori dale ndoos. Ei bei-baꞌim mara soa rakanisa hatahori ndoos sara, numa dombe esa neni dombe laen neu. Neu losa Sakaria, fo Barakia anan. Ara rakanisan numa Uma Huhule-haradoi Ina-huuk bebelan, deka no mei tunu-hotuk. Ei muste lemba-masaa mala hatahori dale ndoos sara raa, daan lalaꞌen, nahuu ei tungga bei-baꞌim mara manggaraun.
MAT 23:36 Memak tebe! Ei marai hatematak ia, neu ko hambu huku-dokik, nahuu basa dedeꞌa manggarauk kara iar fo ei bei-baꞌim mara taok ena, ndia fai uluk naa.”
MAT 23:37 “Heeh, hatahori Yerusalem mara ein! Ei ndia soa makanisa Manetualain mana toꞌu dedeꞌan nara, ma toko makamate nedenuk fo nae mai tulu-fali ei. Au kokoe ei laꞌi-laꞌik kana fo meni Au mai, nok bali manu ina nau nakarombo nala anan nara nai ndia lidan. Tehuu ei ta nau.
MAT 23:38 Huu naa de Manetualain ta nau tao matak no ei umam bali. Neu ko mbila-beinesak, te rouk ena.
MAT 23:39 Nenene matalolole, ee! Neu ko ei ta mete-mita Au bali losa fain ei manaku mae, ‘Ita toke fo Manetualain fee babaꞌe-babatik neu Hatahori ia, nahuu Manetualain ndia nadenun mai.’ Ei manaku talo naa, dei fo ei mete-mita Au bali.”
MAT 24:1 Basa naa, Yesus kalua laꞌo ela Uma Huhule-haradoi Ina-huuk naa. Neu Ana kalua, ana nunin nara mai ratudu Uma huhule-haradoik naa lolen.
MAT 24:2 Tehuu Ana naselu nae, “Uma ia, memak malole! Tehuu nenene, ee! Ta dook ka bali te ara randefa heni basa batur ia lalaꞌen.”
MAT 24:3 Yesus laꞌo neu nanggatuuk numa letek Setun. Boe ma ana nunin nara mai fo ara kokolak rasare matak roon rae, “Papa! Hena Papa mafada seluk Papa kokolan bebeik kara ia dei. Ndondoon naa Papa fai mamain dadi nai faik bee, ee? Ma tandan nara ndondoon naa leo beek? Talo bee bali no dae-bafok fai mateꞌen?”
MAT 24:4 Boe ma Yesus naselu nae, “Manea aom mara matalolole, ee! Fo ei boso hambu kedi-irak.
MAT 24:5 Neu ko hambu hatahori mata-matak kara mai fo femba tenden nara rae, ‘Au ia, Karistus, Hatahori fo Manetualain helu-bartaa ena numa lele uluk mai.’ No dalak naa, ara kedi-ira rala hatahori noꞌuk ka.
MAT 24:6 Mete ma ei mete-mita hatahorir ratati, do ei mamanene harak nae, hambu netatik nai bee a mesan, na, ei hae mamataꞌu. Dedeꞌak leo naak naa muste dadi. Tehuu dae-bafok fai mateꞌen bei ta losa.
MAT 24:7 Neu ko leo esa natati laban leo laen. Nusak esa natati laban nusak laen. Hambu dae nanggenggo nai bee a mesan. Ma fai ndoe-laꞌas oo, ta hohoꞌak sudi selik kana boe!
MAT 24:8 Tehuu basa naar, bei fo tanda kaesan fo nafada nae, dae-bafok fai mateꞌen deka-deka mai ena. Naa, sama leo inak bei fo mulai nameda hedis, nahuu faik nae bonggi deka-deka mai ena.
MAT 24:9 Dadi ei muste manea aom mara matalolole, ee! Neu ko ara tuni-ndeni ma tao risa ei. Ma neu ko basa hatahori nusak kara mburuk ralan seli ro ei, nahuu ei tungga Au.
MAT 24:10 Faik naa, hatahori noꞌuk ka rasadea ma ta nau ramahere neu Au bali. Sira, esa mburuk mbali esa, ma esa seꞌo esa.
MAT 24:11 Neu ko hambu mana kedi-irak kara rae, sira raa, Manetualain mana toꞌu dedeꞌan. Ma hatahori noꞌuk ka ramahere neu sara.
MAT 24:12 Neu ko hatahori manggaraun nara doo-doo boe ma ramanoꞌu, losa hatahorir ta rasue-laik esa no esa bali ena.
MAT 24:13 Tehuu hatahori mana makatataka nakandoo losa mate, neu ko Manetualain tao masoi-masodak neun.
MAT 24:14 Hatahorir muste tao ratanggela Manetualain Hara Lii Malolen, losa dae-bafok buꞌun nara, mita fo basa hatahorir bisa bubuluk Manetualain eno-dala ndoon. Basa naa, dei fo dae-bafok fai mateꞌen mai.”
MAT 24:15 Yesus kokolak nakandoo nae, “Manetualain mana toꞌu dedeꞌan Daniel surak laꞌe-neu hatahori esa fo manggaraun sudi selik kana ena. Neu ko ana maso nambariik neu mamana nelulik nai Manetualain Uma Huhule-haradoi Ina-huun. No dalak naa, ana tao nunute mamanak naa. Huu naa de Manetualain nasadea laꞌo ela mamanak naa. Mete ma ei mete-mita talo naa ena, na, besa-besa, ee! (See ndia lees susurak ia, muste nalela no malole!)
MAT 24:16 Naa dadi tanda nae, fai susa-sonak kara nai lelesu bafan ena. Hatahorir marai profensi Yudea malai meni letek miu leo, mete ma mete-mita talo naa ena.
MAT 24:17 Mete ma hambu ketuk kalua numa uma mai ena, na, boso fali miu haꞌi bua-baꞌum bali. Malaik lai-lai leo, mita fo boso hambu sosoek.
MAT 24:18 Hatahori manai osi dale, boso fali miu haꞌi lafa nelusek bali. Malai makandoo leo!
MAT 24:19 Mana kasian lenak ndia ina kairuk, ma inak kara mana rasususu ana mbimbila anan. Ara ta bisa ralai nggafak, na.
MAT 24:20 Dadi malole lenak ei hule-haradoi fo moke sosoek naa, boso tuda laꞌe-ndaa fai udan, do laꞌe-ndaa fai hahae tao ue-osa.
MAT 24:21 Faik naa, susa laꞌe esak kana! Mulai numa Manetualain nakadadadik dae-bafok losa hatematak ia, hatahorir bei ta mete-rita susa-sonak moꞌok matak leo naak. Ma neu ko hatahorir ta mete-rita seluk susa-sonak matak leo naak bali.
MAT 24:22 Tehuu ei maua malan seli, nahuu Manetualain tao kekeꞌu faik naa. Mete ma taa, na, ta hambu hatahori esa boe na bisa nakatataka nasoda. Manetualain tao kekeꞌu fai susa-sonak kara raa, nahuu Ana sue-lai Ndia hatahorin fo Ana here nalak ena.
MAT 24:23 Mete ma faik naa losa ena, neu ko ei mamanene hatahorir rae, ‘Mete dei! Karistus nai ia!’ Ma hatahori laen nae, ‘Karistus nai naa!’ Tehuu ei boso mamahere, ee!
MAT 24:24 Neu ko hambu hatahori kalua mai fo fefemba tenden nae, ‘Au ia, Karistus!’ Ma laen bali nae, ‘Au ia, Manetualain mana toꞌu dedeꞌan.’ Mete te ara tao tanda heran mata-matak kara renik koasa makiuk fo pepeko-leleko hatahori. Ara oo soba-soba fo Manetualain hatahorin nara hambu kedi-irak boe!
MAT 24:25 De ei muste manea aom mara matalolole, ee! Fai susa-sonak kara raa bei ta losa, tehuu Au fee nesenedak memak neu ei, ee!
MAT 24:26 Mete ma hatahorir rafada ei rae, ‘Karistus nai dae mook naa ena!’ na, ei boso naa miu. Ma mete ma hambu ketuk rae, ‘Karistus nai uma ia ena!’, na, ei boso mamahere sira pepeko-lelekon naa.
MAT 24:27 Au ia, Hatahori Dae-bafo Isi-isik. Mete ma Au fali uni dae-bafok ia mai, neu ko basa hatahorir mete-rita Au, sama leo hatahorir mete-rita ndelas nanggahadok numa mamana ledo toda neni mamana ledo tesa neu.
MAT 24:28 Mete ma Au fali mai, neu ko ei bubuluk Au nai bee. Sama leo hatahorir bubuluk rae, mete ma hambu mbui mana naꞌa nenetuk kara rakabua nai mamanak esa, na, neu ko nai naa hambu nenetuk.”
MAT 24:29 Boe ma Yesus tuti seluk bali, fo nafada ana nunin nara nae, “Mete ma fai susa-sonak kara raa basan ena, ‘Neu ko ledo dadi makiuk, bulan oo ta nasaꞌa bali ena boe. Nduuk kara bese tuda ruma lalai mai, ma basa koasa marai lalai rapiru-padok.’
MAT 24:30 Boe ma basa hatahorir mete-rita tanda nai lalai rae, Hatahori Dae-bafo Isi-isik nae fali mai. Mete-rita talo naa boe ma, basa hatahori nusak kara rai dae-bafok ia ramataꞌu losa ara buꞌi rakarereu. Neu ko Au konda mai pake sosoꞌak, dei fo ara mete-rita Au koasang ma Au manula-manapung lalaꞌen.
MAT 24:31 Boe ma Au pake toꞌik lii moꞌok fo parenda Manetualain atan nara marai nusa tetuk do inggu temak reu rakabubua basa hatahorir fo Au here alak kara ruma dae-bafok buꞌun haa sara mai, numa ledo toda mai losa ledo tesa; numa kii mai losa kona.”
MAT 24:32 “Au haꞌi netuduk leo ai huuk. Mete ma doon mulai uni, naa tanda nae, fai hanas deka-deka mai ena.
MAT 24:33 Leo naak oo, mete ma ei mete-mita fai susa-sonak kara raa ena, sama leo Au afada bebeik kara ia ena, naa tanda nae, Au deka-deka mai ena boe.
MAT 24:34 Hatematak ia, nenene matalolole! Numa basa hatahorir fo masodak hatematak ia, neu ko hambu ketuk bei ta mate, tehuu fai susa-sonak kara raa mai ena.
MAT 24:35 Leo mae lalai no dae-inak sambu do lalo ena, tehuu Au Dedeꞌa-kokolang ia mahanik seku neu.”
MAT 24:36 “Ta hambu hatahori fo bubuluk faik bee Au fali mai. Manetualain atan nara marai nusa tetuk do inggu temak oo, ta bubuluk boe. Au mesa ngga oo ta bubuluk boe. Kada Au Amang mesa kana ndia bubuluk.
MAT 24:37 Au ia, Hatahori Dae-bafo Isi-isik, neu faik fo Au fali mai, neu ko naa sama leo lele uluk fo Noh bei masodak.
MAT 24:38 Faa moꞌok naa bei ta mai, te hatahorir raꞌa-rinu malada-malada, esa sao esa rame-rame sama leo biasa. Ara tao talo naa rakandoo, losa Noh maso neni ofa moꞌok dale neu.
MAT 24:39 Tehuu neu faa mai, de lala neni basa sara, dei de matan nara mete-rita fo ara bubuluk hata mandadik ena naa. Leo naak oo no Au fai mamaing boe.
MAT 24:40 Faik naa, mete ma hatahori dua raue-osa nai osi dale, medak neu te Manetualain soꞌuk neni esa, ma Ana laꞌo ela esa.
MAT 24:41 Mete ma inak dua mbau hade, medak neu te Manetualain soꞌuk neni esa, ma Ana laꞌo ela esa.
MAT 24:42 Huu naa de, ei oo muste manea hatu-leledon boe, te ei ta bubuluk faik bee ei Lamatuam fali mai.
MAT 24:43 Duduꞌa matalolole, ee! Mete ma tenu uma bubuluk leꞌodae naꞌo manu-meo nae mai, neu ko ana nanea nakandoo ena, mita fo naꞌo manu-meo boso maso neni uman dale neu.
MAT 24:44 Huu naa de, ei oo muste mahani a boe. Te Au fai mamaing naa no kada nggengger neuk ka!”
MAT 24:45 Boe ma Yesus kokolak tamba nae, “Ei muste sama leo hatahori neondak mana tungga nakandoo ndia malanggan hihii-nanaun. Mete ma malanggan nae laꞌok neni mamana dook neu, ana soꞌuk hatahori neondak leo naak, fo nakaneni ndia uma isin nanaꞌa-nininun nara.
MAT 24:46 Mete ma malanggan fali ma mete-nita ndia hatahori neondan naue-osa neulauk, neu ko dalen namahoko no hatahori naa.
MAT 24:47 Dadi mamahere neu Au leo, te neu ko malanggan naa fee hatahori neondak naa koasa fo toꞌu lima ndia hata-heton lalaꞌen.
MAT 24:48 Tehuu mete ma hatahori neondak naa manggarauk, neu ko ana kokolak nai dalen nae,
MAT 24:49 ‘Malole ena! Malanggan laꞌo talo ia, see bubuluk faik bee fo ana fali mai ngga!’ Duꞌa talo naa, boe ma ana mulai poko-femba ndia nonoon hatahori mana maue-osa laen nara. Ma ana nanggatuuk naꞌa-ninu malada-malada sama-sama no mana mafuk kara.
MAT 24:50 Tehuu neu ana ta meda nala sana, nggengger neuk ka, ndia malanggan fali.
MAT 24:51 Boe ma malanggan naa tuni-ndeni nalan beran seli, basa de pirun dea neu, fo ana leo sama-sama no hatahori mana dea-matak kara. Nai mamanak naa, basa sara buꞌi rakarereu, nahuu ara doidoso ralan seli.”
MAT 25:1 Boe ma Yesus tuti kokolan laꞌe-neu Manetualain parenda-koasan nae, “Ei muste mahani a fo soru Au fafaling, sama leo lololek ia. Talo ia: laꞌe esa, hambu ana feꞌok salahunu kalua leꞌodaek ma reni sira lambu tiꞌoen nara fo reu soru baroit touk nai sira nonoon uman.
MAT 25:2 Tehuu numa ana feꞌok kasalahunuk kara raa mai, hambu lima nggoa bebek kara, ma lima malelak kara.
MAT 25:3 Nggoa bebe kalimak kara raa lilii reni mina lenak.
MAT 25:4 Tehuu malela kalimak kara reni lenak memak ena.
MAT 25:5 Losa uma naa, te baroit touk naa oo bei ta mai boe. Doo-doo boe ma ana feꞌok kara raa tekaur, de ara sunggu seli.
MAT 25:6 Naa te neu fatilada, boe ma ara ramanene hatahorir eki rae, ‘Wee! Baroit mai ena! Mai fo ita teu sorun leo!’
MAT 25:7 Ara ramanene rala naa, boe ma ana feꞌok kara raa rambadeik rame-rame. De reu raole sira lambu tiꞌoen nara.
MAT 25:8 Tehuu ana feꞌo nggoa bebek kara raa kokolak ro sira nonoon nara rae, ‘Wee, tia-lair, ee! Tulun baꞌe fee ai mina faa dei, huu ai lambun nara sangga mate ia ena!’
MAT 25:9 Tehuu ana feꞌo malelak kara raa raselu rae, ‘Awee! Boso mamanasa, te ta bisa, ou. Ai minan ia, ta dai soa-neu ita basa ngga! Malole lenak ei miu hasa nai kios leo.’
MAT 25:10 Boe ma ara laꞌo reu hasa mina. Tehuu neu ara kalua, baroit naa losa ena. De ana feꞌo malelak kara raa maso tungga reni mamana feta reu sama-sama ro baroit ma basa fuik kara. Basa sara maso rala uma dale, boe ma hatahorir kena lelesu.
MAT 25:11 Basa de ana feꞌo nggoa bebek kara raa oo mai boe. Ara eki roke talu-talu rae, ‘Lamatuak! Lamatuak, ee! Tulun soi lelesu dei!’
MAT 25:12 Tehuu ana naselu nae, ‘Heeh, ta bisa! Au ta alela ei!’
MAT 25:13 Huu naa de ei oo muste mahani a ma manea makandoo boe, te ei oo ta bubuluk Au mamaing laꞌe-ndaa faik bee, do liꞌu bee boe.”
MAT 25:14 Basa de Yesus tuti seluk lololek esa bali nae, “Mete ma Au laꞌo ela ei ena, na, ei muste maue-osa matalolole soa-neu Au, sama leo lololek ia. Talo ia: hambu malanggak esa nae neni mamana dook neu. Neu faik ana naole nae laꞌo ena, nanggou ndia hatahori neondan nara, boe ma ana parenda sara nae, ‘Ei pake doik ia dadi neu poko. Mete ma au fali mai ngga, neu ko ei muste tui au, ei hambu bunak baꞌu hata.’
MAT 25:15 Boe ma ana fee hatahori neondak kaesan, doi lilo mbilas saku lima, fo ana nakabubunak kasa. Basa de ana fee hatahori neondak kaduan doik saku dua, ma hatahori neondak katelun doik saku esa, tungga esa-esak bebeꞌin. Basa boe ma ana laꞌo neni dook neu.
MAT 25:16 Hatahori neondak kaesan simbo nala doik kara raa, boe ma ana kalua memak fo neu danggan. Ta dook ka te ana hambu nala bunak doik saku lima ena bali.
MAT 25:17 Leo naak oo, no hatahori neondak kaduan, ana hambu nala bunak doik saku dua bali boe.
MAT 25:18 Tehuu hatahori neondak katelun fo mana simbo doik saku esa naa, neu kali bolok nai dae, de nafuni ndia malanggan doin naa.
MAT 25:19 Dook ka boe ma, dei de malanggan naa mai. De ana nakabubua nala ndia hatahori neondan nara fo mulai parisa ndia doin fo ara koladuk naa ena.
MAT 25:20 Hatahori neondak kaesan naa maso, de loo lima doik saku salahunu, ma nae, ‘Papa! Papa doin ndia ia. Fai maneuk kara papa fee au doik saku lima ena. Tehuu hatematak ia, au hambu bunak saku lima bali.’
MAT 25:21 Malanggan namanene nala naa, boe ma ana namahoko. Ana kokolak nae, ‘Malole! O ia, hatahori neonda neulauk. O maue-osa no manggatek ena, ma tungga makandoo au parendang ena, mae au ta ngga nai ia. Neu ko au soꞌuk o fo koladu dedeꞌak moꞌon lenak bali, nahuu o bisa koladu mala dedeꞌa kadiꞌik leo iak. Neu ko au tao feta fo ita basa ngga tamahoko rame-rame.’
MAT 25:22 Basa de hatahori neondak kaduan naa, mai loo lima neu ndia malanggan doin saku haa, ma nae, ‘Papa! Fai bakahulun, papa loo lima au doik saku dua. Mete dei, au hambu bunak doik saku dua bali.’
MAT 25:23 Boe ma malanggan naa namahoko. Ana kokolak nae, ‘Malole! O ia oo, hatahori neonda neulauk boe. O maue-osa no manggatek ena, ma o tungga makandoo au parendang ena, mae au ta ngga nai ia. Neu ko au soꞌuk o fo koladu dedeꞌak moꞌon lenak bali, nahuu o bisa koladu mala dedeꞌa kadiꞌik leo iak. Neu ko au tao feta fo ita basa ngga tamahoko rame-rame.’
MAT 25:24 Basa de hatahori neondak katelun mai. Boe ma ana nafada nae, ‘Papa! Au bubuluk papa ia hatahori dale batuk. Papa haꞌi nala hata fo hatahori laen taok, ma ketu-koru nala hata fo hatahori laen sele-tandek.
MAT 25:25 Au amataꞌu, boso losak doi kara iar mopo sara, boe ma papa hukun au. Huu naa de au afuni atalololen. Ndia ia, papa! Simbo mala falik kana leo, huu papa doin saku esa ia, bei tema-tema!’
MAT 25:26 Malanggan naa namanene nala naa, boe ma ana mbokan nae, ‘O ia, hatahori neonda manggarauk ma mbera-barek mateꞌen! Mete ma o bubuluk ena mae, au haꞌi hata fo hatahori laen taok, ma ketu-koru ala hata fo hatahori laen sele-tanden,
MAT 25:27 tao hata de o ta muu mbeda au doing nai kada bank? Mita fo au fali, na, au bisa hambu bunan, mae baꞌu anak ka oo malole boe!’
MAT 25:28 De malanggan naa nadenu ndia hatahori neondan laen nae, ‘Haꞌi mala doik naa numa ndia mai, fo loo liman neu hatahori neondak mana hambu bunak doik saku lima naa.
MAT 25:29 Hatahori fo mana koladu nalole hata fo ana toꞌun ena, neu ko ana hambu tamba noꞌuk ka bali. Tehuu hatahori fo ta mana koladu hata fo ana toꞌuk naa ena, neu ko ara haꞌi rala basa-basan numa ndia mai.
MAT 25:30 Humu mala hatahori neondak fo nanalan taak ia. Leꞌa roroson fo nggari henin neni dea naa neu. Elan numa naa fo ana buꞌi nakarereu ma doidoso neu mamana makiuk naa!’ ”
MAT 25:31 Basa boe ma Yesus kokolak nakandoo nae, “Au, Hatahori Dae-bafo Isi-isik ia, neu ko konda fali pake Au Amang koasan ta neni babanggak, sama-sama ua Ndia atan nara ruma nusa tetuk do inggu temak mai. Boe ma Au anggatuuk uu Au kadera man-parenda ta neni babanggang, fo parisa basa hatahorir leleo-lalaꞌon.
MAT 25:32 Neu ko basa hatahorir fo mana leo nita nai dae-bafok ia, mai rasare Au. Boe ma Au bingga sara, sama leo mana lolo bingga heni bibi lombo numa bibi hiek mai, fo dadi reu bubuak dua.
MAT 25:33 Hatahorir mana leo-laꞌo tungga Manetualain hihii-nanaun, Au tao sara reu Au boboa konang. Tehuu laen nara tao sara reu Au boboa kiing.
MAT 25:34 Lelek naa, Au toꞌu parenda sama leo Manek. Neu ko Au afada hatahorir marai Au boboa konang ae, ‘Eir ia, ndia simbo babaꞌe-babatik numa Au Amang mai. Mai fo maso meni Ndia uman fo Ana sadia memak kana ena, numa makasososan mai soa-neu ei.
MAT 25:35 Au oke ei, nahuu fai bakahulun neu Au ndoe, ei fee Au uꞌa. Neu Au dale mada, ei fee Au inu. Au mai, sama leo hatahori deak, tehuu ei simbok mala Au nai ei umam.
MAT 25:36 Au bua-loꞌa taak, tehuu ei fee Au bua-loꞌa. Au amahedi, tehuu ei mai malalau Au. Au nai bui dale, tehuu ei mai tiro-dangga Au.’
MAT 25:37 Hatahori dale ndoos marai Au boboa konang naa ramanene talo naa, neu ko ara raselu rasafali rae, ‘Lamatuak, talo bee ia? Lamatuak nae, Lamatuak ndoe, boe ma ai fee O muꞌa. Lamatuak dale mada, boe ma ai fee O minu.
MAT 25:38 Lamatuak sama leo hatahori deak, boe ma ai simbok maso nai ai uman. Lamatuak bua-loꞌa taak, boe ma ai fee.
MAT 25:39 Lamatuak namahedi, boe ma ai miu malalau. Lamatuak nai bui, boe ma ai miu tulu-fali. Tehuu neu faik bee ai tao basa matak kara leo naak?’
MAT 25:40 Neu ko Au aselu sara ae, ‘Mamahere neu Au! Huu neu ei tao basa matak kara raa soa-neu Au hatahoring nggara, mae tao soa-neu hatahori ta kambareek kara oo, na, ei tao naa soa-neu Au ena boe!’
MAT 25:41 Boe ma Au afada hatahorir marai Au boboa kiing raa ae, ‘Weeh, hatahori manggarauk kara ein! Manetualain nakatoo ei ena. Malai heok numa ia mai! Neu ko Au adenu hatahorir piru ei meni aꞌi mbila ta kala matek miu. Huu Manetualain sadia memak mamana doidosok naa ena, fee nitur ma sira malangga moꞌon.
MAT 25:42 Au husi heni ei, nahuu neu Au ndoe, ei ta fee Au uꞌa. Neu Au dale mada, ei ta fee Au inu.
MAT 25:43 Au mai sama leo hatahori deak, tehuu ei ta simbo Au nai ei umam. Au bua-loꞌa taak, tehuu ei ta fee Au bua-loꞌa. Au amahedi, tehuu ei ta mai malalau Au. Au nai bui, tehuu ei ta mai tulu-fali Au.’
MAT 25:44 Hatahori manggarauk kara raa ramanene rala naa, neu ko ara raselu rae, ‘Lamatuak, talo bee ia ena? Lamatuak nae, Lamatuak ndoe, tehuu ai ta fee O muꞌa. Lamatuak dale mada, tehuu ai ta fee O minu. Lamatuak sama leo hatahori deak, tehuu ai ta simbok maso nai ai uman dale. Lamatuak bua-loꞌan taa, tehuu ai ta fee. Lamatuak namahedi, tehuu ai ta miu malalau. Lamatuak nai bui, tehuu ai ta miu tulu-fali. Tehuu neu faik bee ai tao Lamatuak talo naa?’
MAT 25:45 Neu ko Au aselu sara ae, ‘Mamahere neu Au! Huu neu ei ta tulu-fali hatahori ta kambareek kara, na, naa sama leo ei ta tulu-fali Au.’
MAT 25:46 Boe ma hatahori manggarauk kara raa, hambu doidosok rakandoo losa doon naa neu. Tehuu hatahori dale ndoos sara, hambu masoi-masodak rakandoo ro Manetualain losa doon naa neu.”
MAT 26:1 Neu Yesus fee nenorik basa dedeꞌak kara raa neu sara ena, boe ma Ana nafada Ndia ana nunin nara nae,
MAT 26:2 “Ei bubuluk ena, neu ko faik dua bali te ita fai malolen, ndia Feta Paska. Neu ko neu faik naa, hambu hatahori seꞌo heni Au, Hatahori Dae-bafo Isi-isik ia. Boe ma ara paku risa Au nai ai ngganggek lain.”
MAT 26:3 Faik naa, malangga anggama Yahudi malanggan nara ma lasi-lasi hadak kara rakabua numa Kayafas uman. Kayafas naa, ndia malangga anggama Yahudi malangga ina-huun.
MAT 26:4 Ara sangga dalak fo rae humu Yesus no neneek, fo tao risan.
MAT 26:5 Tehuu ara duduꞌa fo rala harak rae, “Makatataak dei! Ita boso humu Yesus lai-laik, nahuu fai maloler deka-deka ena. Boso losak hatahori noꞌuk kara mana hii Yesus, ara ramue.”
MAT 26:6 Nai nggorok Betania, hambu hatahori esa, nade Simon. Fai bakahulun hatahorir nunuten, nahuu ana hambu hedi kusta. Tehuu hatematak ia ana hai ena. Faik naa, fai maloler bei ta losa, boe ma Yesus asa reu raꞌa numa Simon uman.
MAT 26:7 Neu ara raꞌa, boe ma inak esa mai natonggo no Yesus. Ana toꞌu boto esa, neni taok numa batu mabeli mai. Boto naa isin, mina kaboo menik fo belin seli. De inak naa femba tepa boto naa leusain. Boe ma ana mboꞌa nakafafaak koe-koe mina naa neu Yesus langgan, fo dadi tanda ana fee hada-horomatak neu Yesus.
MAT 26:8 Tehuu neu Yesus ana nunin nara mete-rita inak naa tao talo naa, boe ma ramanasa, de ara rakokola aok rae, “Weeh! Tao hata de ana nggari heni hiek mina kaboo menik fo mabelin seli naa!
MAT 26:9 Malole lenak ana seꞌo mina naa! Mita fo doin, babaꞌen neu hatahori mana tofa-tarak kara!”
MAT 26:10 Tehuu Yesus bubuluk sira duduꞌan naa, boe ma Ana kokolak nae, “Ei hae makasususak inak ia! Elan numa naa leo! Au amahoko, nahuu ana mboꞌa mina kaboo menik neu Au ao-mbaang ena.
MAT 26:11 Hatahori mana tofa-tarak kara soa rai ei taladam mara. Tehuu ta dook ka bali, te Au ia, ta sama-sama ua ei ena.
MAT 26:12 Ma inak ia mboꞌa mina ia, ana sadia Au ao-mbaang ena, sama leo ana fee rambe memak Au ao-mbaang mamaten. Huu Au sodang ta dook ka ena bali.
MAT 26:13 Masaneda matalolole, ee! Nai bee a mesan, Manetualain Tutui Malolen natanggela nai dae-bafok ia, neu ko ara oo tui inak ia malolen boe, mita fo basa hatahorir rasanedan.”
MAT 26:14 Hambu hatahori esa numa Yesus ana nuni kasalahunu duan nara mai, nade Yudas Iskariot. Faik naa oo, ana kalua neu sangga malangga anggama Yahudi malanggan nara boe fo nae loo lima Yesus neu sara.
MAT 26:15 Losa matan nara, boe ma ana natane nae, “Papa sara ein, ee! Mete ma au tulun humu Yesus naa, na, ei fee au hata?” Boe ma ara raselu rae, “Mete ma o nau seꞌon neu ai, na, ai bae.” Basa boe ma, ara reke rala doi lilo fulak telu hulu, de loo lima sara reu Yudas.
MAT 26:16 Basa naa, Yudas laꞌo dea neu, de ana mulai sangga dalak fo nae loo lima Yesus neu sara.
MAT 26:17 Tungga teuk, hatahori Yahudir raena fai maloler doon faik hitu. Ara seseik fai maloler raa rae, ‘Feta Roti Ta Pake Laru Taꞌik’. Faik naa, feta sangga mulai ena, boe ma Yesus ana nunin nara mai ratanen rae, “Papa! Leꞌodaen ia, ita muste buka ita fai malolen nara. Dadi Papa nau fo ai miu hala bibi lombo, ma sadia mamana feta Paska nai bee?”
MAT 26:18 Boe ma Ana naselu nae, “Ei maso meni kota miu, neu ko ei matonggo mia touk esa. Mafadan mae talo ia, ‘Kaꞌa, ee! Papa Meser nameda nae ta dook ka te Ana mate ena. De Ana noke mamanak nai kaꞌa uman, fo Ana paken tao feta Paska sama-sama no ana nunin nara.’ ”
MAT 26:19 Yesus ana nunin nara ramanene rala naa, boe ma ara reu tao tungga Ndia kokolan naa. De ara sadia feta Paska neu naa.
MAT 26:20 Neu fai leꞌodae ena, boe ma Yesus no ana nuni kasalahunu duan nara ranggatuuk raꞌa feta.
MAT 26:21 Neu ara raꞌa, boe ma Ana kokolak nae, “Ei nenene, ee! Hambu esa numa ei mai, ndia neu ko seꞌo heni Au uni hatahori laen nara uu.”
MAT 26:22 Ara ramanene rala naa, boe ma dalen nara rameda ta malole. De ara esa-esak ratane neu Yesus rae, “Hatahori fo Papa kokolak naa, ta ndia au, hetu?”
MAT 26:23 Boe ma Ana naselu nae, “Hatahori mana boro rotin nai manggo ia sama-sama no Au, ana ndia neu ko seꞌo heni Au.
MAT 26:24 Masaneda, ee! Au, Hatahori Dae-bafo Isi-isik ia, muste mate sama leo ara surak memak kana nai Manetualain Susura Malalaon. Tehuu besa-besa! Hatahori mana nae seꞌo heni Au naa, neu ko ana lemba-nasaa nala ndia sosoen! Malole lenak mete ma inan ta bonggi sana!”
MAT 26:25 Basa naa, Yudas oo tungga natane boe nae, “Neu ko hatahori fo Papa kokolak naa, ta ndia au, hetu?” Tehuu Yesus naselu nae, “Memak o mesa ngga ndia mae leo naa ena. Te see bali?”
MAT 26:26 Neu ara bei raꞌa, boe ma Yesus soꞌu botik roti balok esa, de noke makasi neu Manetualain. Boe ma Ana fifiꞌi baꞌe roti naa, de Ana loon neu ana nunin nara, ma nafada nae, “Roti ia, Au ao-mbaang. Ei haꞌi malan fo miꞌa leo!”
MAT 26:27 Basa naa, Ana haꞌi nala nggalas esa sofek no oe anggor, de noke makasi neu Manetualain. Basa boe ma, Ana oo loon neu ana nunin nara boe, ma nafada nae, “Ei basa ngga haꞌi malan fo minu.
MAT 26:28 Oe anggor ia, Au daang. Neu ko Au mate, Au daang titi henin fo tao nasoi-nasoda neu hatahori noꞌuk kara ruma sala-singgon nara mai. Daak ia, dadi bukti fo fee nesenedak nae, hata fo Manetualain helu-bartaan naa ena, memak hatematak ia ana dadi ena. De, haꞌi malan fo minu leo!
MAT 26:29 Tehuu nenene matalolole! Numa leꞌodaen ia neu, Au ta inu oe anggor ena bali. Neu ko mete ma Au ua Au Amang manggatuuk toꞌu parenda nai nusa tetuk do inggu temak ena, dei fo Au inu bali ua ei.”
MAT 26:30 Basa boe ma ara soda sosodak esa fo koa-kio Manetualain. Leꞌodaen naa oo, ara kalua reni letek Setun reu boe.
MAT 26:31 Neu ara bei laꞌok naa, Yesus nafada memak ana nunin nara nae, “Neu ko leꞌodaen ia, ei basa ngga malai laꞌo ela Au. Sama leo ara surak memak kana nai Manetualain Susura Malalaon nae, ‘Neu ko Manetualain tao nisa mana lolo, de bibi lombon nara ralai sasarak.’
MAT 26:32 Memak Au mate. Tehuu mete ma Au asoda fali numa mamates mai ena, neu ko Au ahani ei nai profensi Galilea naa.”
MAT 26:33 Tehuu Petrus nasabara nae, “Papa! Leo mae basa hatahori laen nara ralai laꞌo ela Papa, tehuu Au ta alai!”
MAT 26:34 Boe ma Yesus naselu nae, “Talo naa Peꞌu, do? Mamahere Au! Leꞌodaen ia, manu bei ta kokoa, tehuu o laka laꞌe telu ena mae, o ta malela Au!”
MAT 26:35 Tehuu Petrus natetea nae, “Taa, Papa! Mete ma Papa mate, au oo mate tungga sama-sama boe. Au ta alai laꞌo ela Papa!” Petrus nonoon laen nara oo, esa-esak nae leo naa boe.
MAT 26:36 Basa de, Yesus asa laꞌok rakandoo reni letek Setun reu, losa osi esa, nade Getsemani. Numa naa, Ana nafada ana nunin nara nae, “Ei manggatuu taak mai ia dei, huu Au ae uu hule-haradoi nai naa.”
MAT 26:37 Tehuu Ana noke no Petrus, Yakobis, ma Yohanis, fo telu sara reu sama-sama roon. Mulai numa naa neu, Ndia dalen sona ma ta natetu faa boe na.
MAT 26:38 Ara bei fo laꞌok doo-doo faa, te Ana nafada sara nae, “Au daleng susa nalan seli! Au ameda nok bali ae mate a ena. Ei manggatuuk beꞌe manea mia Au nai ia dei.”
MAT 26:39 Boe ma Ana hodok mata neu faa, de sendek luu-langgan fo hule-haradoi nae, “Papa! Mete ma Papa nau, na, Au hae lemba-asaa doidosok ia. Tehuu boso tungga Au hihii-nanaung; naa fo tungga kada Papa hihii-nanaun.”
MAT 26:40 Ana hule-haradoi basa, boe ma fali neni Ndia ana nuni katelun nara neu. Tehuu ara sunggu seli. Ana fafae sara, boe ma Ana kokolak no Petrus nae, “Heeh, Peꞌu! Tao hata de ei sunggu? Au uu losak ka numa naa, tehuu ei ta bisa beꞌe manea faa boe na!
MAT 26:41 Kukuku maneu ei matam mara dei, fo mambadeik manea mia Au! Ei dalem mara memak nau tao neulauk, tehuu ei ao-inam mara barakai taak. Dadi malole lenak ei hule-haradoi, fo mete ma hambu soba-douk, na, ei bisa makatataka mala.”
MAT 26:42 Basa de, Ana laꞌo neu hule-haradoi bali nae, “Papa! Mete ma Au muste lemba-asaa doidosok ia, na, naa fo tungga kada Papa hihii-nanaun leo.”
MAT 26:43 Ana hule-haradoi basa, boe ma fali neni ana nuni katelun nara neu. Tehuu ara sunggu seluk ena bali, nahuu matan nara ramabera ralan seli.
MAT 26:44 Boe ma Ana laꞌo ela sara, fo neu hule-haradoi laꞌe esa bali. Ana noke seluk neu Amak fo boso laꞌo ela Ndia lemba-nasaa doidosok naa, tehuu naa fo tungga kada Amak hihii-nanaun leo.
MAT 26:45 Ana hule-haradoi basa, boe ma fali neu fafae nambadedeik ana nunin nara nae, “Ei bei sunggu makandoo ia, do? Mambadeik leo! Hatahori fo mana nae seꞌo heni Au, Hatahori Dae-bafo Isi-isik ia, deka ena. Hatematak ia ara rae humu Au, fo loo liman neni hatahori manggarauk liman nara reu.
MAT 26:46 Heeh! Mambadeik leo! Buka ei matam mara fo mete sudi neni naa neu dei! Hatahori fo mana nae seꞌo heni Au naa, mai ena.”
MAT 26:47 Neu Yesus bei kola-kola talo naa, Yudas mai ena no hatahori noꞌun seli. Ara mai reni tafa mukuk ma tongga fo rae humu Yesus. Ara tao talo naa, tungga parenda numa malangga anggama Yahudi malanggan nara ma lasi-lasi hadak kara mai.
MAT 26:48 Yudas fee tanda memak kasa nae, “Ei mete matalolole, ee! Hatahori bee fo au iduk naa, humu malan leo! Ndia naa, ndia hatahori naa fo ei sanggak!”
MAT 26:49 Neu ara losa Yesus, boe ma Yudas neni Yesus matan neu tutik kana, de nae, “Soda-molek, Papa Meser!” Boe ma Yudas holu nalan ma idun.
MAT 26:50 Boe ma Yesus natanen nae, “Heeh, Yudas! O mamaim ia, o mae tao hata, na, taon leo!” Boe ma hatahori noꞌuk kara raa mata reu, fo rae humu Yesus.
MAT 26:51 Medak neu te Yesus hatahorin esa lesu nala felan, de sambi naketu hatahori esa ndiꞌi doon. (Hatahori mana makahinak naa, ndia malangga anggama Yahudi malangga ina-huun hatahori neondan.)
MAT 26:52 Yesus mete-nita naa, boe ma nafadan nae, “Mbeda falik fela neni manan neu. Hatahori mana leo-laꞌo no tafa, neu ko ana mate oo, no tafa boe.
MAT 26:53 O ta bubuluk, do? Au bisa oke Au Amang fo nadenu Ndia atan nara rifu-rifuk kara ruma nusa tetuk do inggu temak mai, fo tulu-fali Au.
MAT 26:54 Tehuu haen leo. Ela sara ruma naa fo hatahori iar humu rala Au. Te basan neni surak memak kana nai Manetualain Susura Malalaon dale laꞌe-neu Au naa, muste dadi.”
MAT 26:55 Boe ma Yesus kokolak no hatahori noꞌuk kara mana mai humun naa nae, “Heeh! Ei duꞌa mae, Au ia, hatahori manggarauk, do? Tao hata de ei mai humu Au menik tafa mukuk ma tongga? Naa te tungga faik Au anori ei nai Manetualain Uma Huhule-haradoi Ina-huun dale, tehuu ta hambu hatahori esa boe na tao hata-hata mbali Au.
MAT 26:56 Tehuu elan numa naa leo! Mai, humu mala Au leo! Basa iar neni surak memak kana numa lele uluk mai nai Manetualain Susura Malalaon dale ena.” Yesus ana nunin nara mete-rita talo naa, boe ma ara ramataꞌu ralan seli. De ara ralai laꞌo elan.
MAT 26:57 Basa boe ma hatahorir mana humu Yesus raa, roo Yesus neni malangga anggama Yahudi malangga ina-huun Kayafas uman neu, nahuu hatahori moꞌo-inahuuk kara rakabua rai naa ena. Sira ndia malangga anggama Yahudi malanggan nara, meser anggamar, ma lasi-lasi hadak kara.
MAT 26:58 Neu ara toꞌu roon neu naa, Petrus oo laꞌo bambi-bambi tungga dea, losa malangga ina-huuk naa uman boe. Petrus oo maso neni uma bebelan neu boe, fo nanggatuuk sama-sama no hatahorir marai naar. Huu ana nau bubuluk hata ndia neu ko ana dadi.
MAT 26:59 Numa uma naa dale, malangga anggama Yahudi malanggan nara rakokola aok roo basa hatahorir mana maketu-maladi dedeꞌa anggama. Basa sara sangga bukti fo nau sangga dala neketuk hukun mates neu Yesus.
MAT 26:60 Tehuu leo mae ara fee sakasii pepekok noꞌun seli oo, ara ta hambu bukti hata esa boe na, fo ara bisa pake boe. Neu mateꞌen, ara hambu hatahori sakasii dua.
MAT 26:61 Sakasii kaduak kara raa rae, “Ai mamanene mita Hatahori ia kokolak nae, ‘Neu ko Au andefa heni Uma Huhule-haradoi Ina-huuk. Tehuu nai faik telu dalen oo, Au ambaririik falik kana boe.’ ”
MAT 26:62 Boe ma malangga anggama Yahudi malangga ina-huun naa nambariik neu basa hatahorir mana manggatuuk rai naa matan. De ana natane Yesus nae, “O mamanene hatahori noꞌuk ka rakasasaꞌek salak neu O ena. Tao hata de O kada tutundindiik?”
MAT 26:63 Tehuu Yesus ta naselu hata esa boe na. Boe ma malangga ina-huuk naa natanen bali nae, “Au ae atane ia! Tehuu O muste maselu tebe-tebe sama leo O maselu mbali Manetualain mana masodak nai nusa tetuk do inggu temak. Hambu hatahori nae, O ia, Karistus, Manetualain Anan fo Ana helu-bartaan ena numa lele uluk mai naa. Tebe naa, do?”
MAT 26:64 Boe ma Yesus naselu nae, “Memak tebe, sama leo papa kokolan naa. Tehuu masaneda, ee! Neu ko ei basa ngga mete-mita Au, Hatahori Dae-bafo Isi-isik ia. Neu ko Au anggatuuk nai nusa tetuk do inggu temak nai Manetualain boboa konan fo toꞌu parenda sama-sama ua Ndia, mana maena koasa mateꞌen. Basa naa, neu ko Au kond fali mai pake sosoꞌak.”
MAT 26:65 Malangga ina-huuk naa namanene nala naa, boe ma ana namanasa nalan seli, losa ana sii nasida badu narun. Boe ma ana bolu nafada basa hatahorir mana manggatuuk ruma naa nae, “Wuuh! Ita ta parluu sakasii bali! Ei mamanene no ei ndiꞌi doo heli-helim ena, Ndia kokolan naa, hetu! Ana soꞌuk aon dadi neu Manetualain Anan. Ia, nakadadaek Manetualain ia ena! Ei basa ngga bubuluk ena mae, tungga ita anggama hohoro-lalanen, mete ma hambu hatahori tao aon sama leo Manetualain, na, hatahori naa muste maten!
MAT 26:66 Dadi hatematak ia, ei mae maketu hata?” Boe ma basa sara bolu rae, “Hatahori ia memak sala tetebes! Dadi muste hambu hukun mates!”
MAT 26:67 Ma hambu hatahori hida mata reu pura ambe neu Yesus. Boe ma ara popoko rakamiminak kana ma famban.
MAT 26:68 Basa boe ma ara rakatitiik kana rae, “Heeh! O ia, Karistus, hetu? Hena O selu sudik kana! See ndia tutu O?”
MAT 26:69 Faik naa, Petrus bei nanggatuuk numa uma bebelan. Boe ma ata inak esa mai kokolak noon nae, “Bebeik kara ia, o tungga sama-sama mua Yesus, hatahori Nasaret naa boe, hetu?”
MAT 26:70 Tehuu ana laka neu hatahori noꞌuk kara raa matan nae, “Taa! Tao hata de o matane talo naa! Au ta alela sana, ma.”
MAT 26:71 Basa boe ma Petrus laꞌo dea neu nambariik neu mbaꞌa lelesu matan. Boe ma hambu inak laen mete-nitan numa naa. De ana nafada hatahorir marai naa nae, “Wee, bebeik kara au mete-ita hatahori ia, sama-sama no Yesus, hatahori Nasaret naa.”
MAT 26:72 Boe ma Petrus nasabara nae, “Fama te, o kamuluk! Au ta alela Hatahori naa, ma! Au sumba-soo!”
MAT 26:73 Ta dook ka bali, hatahori laen nara maruma naa, kokolak roon bali rae, “Weeh! O boso pepeko-leleko bali mae, o ta sama-sama mua hatahori naa! Ai mamanene o kokola-dadasin naa, sama tetar no hatahori Galilea!”
MAT 26:74 Tehuu ana mulai oꞌole-aꞌali, boe ma ana laban nae, “Heeh! Au sumba-soo pake Manetualain naden! Au ta alela Hatahori naa!” Ndaa no ana kokolak talo naa, boe ma manu kokoa.
MAT 26:75 Petrus namanene nala manu kokoan naa, boe ma nasaneda Yesus kokolan bebeik kara nae, “Manu bei ta kokoa, tehuu o laka laꞌe telu ena mae, o ta malela Au.” Petrus nasaneda nala naa, boe ma ana nalai dea neu de buꞌi nasakekedu.
MAT 27:1 Bei huhua anan seli, basa hatahorir mana parisa dedeꞌa anggama raa, rala harak fo rae tao risa Yesus.
MAT 27:2 Huu naa de ara futu-paꞌa roo Yesus neu nasare nggubenor Pilatus. Ara nau fo nggubenor fee hukun mates neun.
MAT 27:3 Neu Yudas bubuluk nae, Yesus hambu hukun mates, boe ma ana fale dalen, nahuu ana seꞌo heni Yesus. De ana fali neni malangga anggama Yahudi malanggan nara, ma lasi-lasi hadak kara neu fo fee falik doi lilo fulak telu hulu naa.
MAT 27:4 Ana nafada nae, “Au akilu-asala ena, nahuu au loo lima Hatahori ta naena salak hata esa boe na.” Tehuu ara raselu rae, “Weeh! Ai ta nau tao matak mia o bali! O mesa ngga ndia lemba-masaa kilu-salak naa.”
MAT 27:5 Boe ma Yudas toko falik doik kara raa reni Uma Huhule-haradoi Ina-huuk reu. De ana kalua neu londa aon losa maten.
MAT 27:6 Boe ma malangga anggama Yahudi malanggan nara raduduru rala doik kara fo Yudas nggari henik kara ena naa. Ara rakokola aok rae, “Ita ta bole tao falik doik kara iar reni peti doik neu, nahuu doik kara iar manggenggeok.
MAT 27:7 Dadi malole lenak ita teu hasa tala dae faa numa mana tao ure dae mai. Mete ma hambu hatahori feꞌek mate, ma ta hambu hatahorir ralelan, na, ita bisa tatoin neu naa.”
MAT 27:8 Basa boe ma ara pake doik naa fo reu hasa dae naa. Huu naa de losa hatematak ia, hatahorir seseik dae naa rae, ‘Dae Daak’.
MAT 27:9 No dalak naa, ara tungga hata fo Manetualain mana toꞌu dedeꞌan Yeremia kokolak memak kana ena nae, “Ara pake doi lilo fulak telu hulu fo hasa dae. Ara pake doik naa, nahuu doik desi naa, ara rasiꞌe paken fo bae neu hatahori esa belin, tungga hata fo hatahori Israꞌel asa raketu memak.
MAT 27:10 Dae naa, ara hasan numa mana tao ure dae mai, tungga Manetualain parendan neu au.”
MAT 27:11 Neu hatahorir leꞌa roo Yesus losa nggubenor, boe ma ana natane Yesus nae, “Talo bee? O ia, tebe-tebe hatahori Yahudir Manen, do?” Yesus naselu nae, “Tebe. Papa kokolak ndaa naa ena.”
MAT 27:12 Neu malangga anggama Yahudi malanggan nara ma lasi-lasi hadak kara rakasasaꞌek salak matak noꞌuk ka neu Yesus, tehuu Ana ta naselu hata esa boe na.
MAT 27:13 De nggubenor natanen nae, “O ta mamanene sira kokolan naa? Ara fee salak neu O noꞌun seli ena. Tehuu tao hata de O ta bala sara boe?!”
MAT 27:14 Tehuu Ana ta naselu faa boe na, losa nggubenor naa heran bali-bali.
MAT 27:15 Tungga teuk, mete ma hatahori Yahudir tao feta Paska, hatahori noꞌuk kara rasiꞌe here rala hatahori bui esa fo nggubenor nakamboꞌik kana.
MAT 27:16 Faik naa, hambu hatahori bui esa, nade Barabas. Basa hatahorir bubuluk ndia naa see, nahuu manggaraun sudi selik kana.
MAT 27:17 Faik naa oo hatahori noꞌuk kara reni nggubenor Pilatus reu boe, fo roke ana nakamboꞌik hatahori bui esa, tungga sira siꞌen. Boe ma Pilatus natane sara nae, “Malole! Tehuu au akamboꞌik see? Nai ia oo, hambu Barabas ma hambu Yesus fo hatahorir raseseik kana rae, Karistus boe. Au akamboꞌik see? Ei here leo.”
MAT 27:18 (Nggubenor kokolak talo naa, huu ana bubuluk malangga anggama Yahudi malanggan nara leꞌa roo Yesus neni ndia neu, nahuu ara mbiri rala Yesus seli.)
MAT 27:19 Neu nggubenor bei parisa dedeꞌak naa, boe te saon haitua harak feen nae, “Papa, ee! Besa-besa, ou, huu Yesus ia Hatahori ta naena salak hata-hata. Huu Ndia ia, de leꞌodaek ka au ala meꞌi ta malole. Losa hatematak ia oo, au bei ameda ta neulauk boe.”
MAT 27:20 Tehuu malangga anggamar ma lasi-lasi hadak kara raa dudunggu hatahori noꞌuk kara raa, fo ara roke nggubenor nakamboꞌik Barabas, ma hukun mates Yesus.
MAT 27:21 De ana natane seluk bali neu sara nae, “Numa hatahori kaduak kara iar, au akamboꞌik see?” Boe ma basa sara raselu rame-rame rae, “Barabas! Makamboꞌik kada Barabas leo!”
MAT 27:22 Boe ma ana natane sara nae, “Mete ma talo naa, na, au tao hata neu Yesus ia, fo hatahorir raseseik kana rae, Karistus?” Boe ma basa sara eki rame-rame rae, “Paku tao misan nai ai ngganggek leo!”
MAT 27:23 De nggubenor natane seluk nae, “Ndia salan hata? Au parisan ena, tehuu au ta hambu salak hata esa boe na!” Tehuu basa sara boe eki rahere bali rae, “Tao misan! Pakun neu ai ngganggek leo!”
MAT 27:24 Doo-doo boe ma Pilatus bubuluk nae, ndia ta bisa tao hata-hata bali, huu hatahori noꞌuk kara raa rae ramue-anggik ena. Huu naa de ana haꞌi nala oe fo safe liman neu hatahorir raa matan nara, ma nafada nae, “Au ta lemba-asaa Hatahori ia mamaten! Naa fo ei ndia lemba-masaa malan!”
MAT 27:25 De hatahori noꞌuk kara raa eki raselu rae, “Hou, neu leo! Naa fo ai mia ai umbu-anan nara ndia lemba-masaa mala Ndia daan naa!”
MAT 27:26 Pilatus namanene nala naa, boe ma ana nae, “Neu leo.” De ana nakamboꞌik Barabas tungga sira hihiin. Basa boe ma ana parenda mana manear, fo poko-femba Yesus pake fifiuk. Poko-femba basan, boe ma soldadur leꞌa roo Yesus fo rae reu paku tao risan nai ai ngganggek lain.
MAT 27:27 Basa naa, soldadur leꞌa roo Yesus neni sira kota batun bebela loan neu. Numa naa, ara roke rala sira nonoon nara batalion esa.
MAT 27:28 Boe ma ara rabua Yesus badu naru mbila kara-karak esa.
MAT 27:29 Ma ara haꞌi rala ai kanggouk ndanan fo nanen dadi solangga. Boe ma ara ndeꞌi solangga kanggouk naa neu Yesus langgan, fo rakamiminak kana, sama leo ara rae soꞌuk mane beuk pake solangga manek. De ara rakatotoꞌuk ai esa neu lima konan, nok bali teteꞌe ai man-parenda. Boe ma ara sendek luu-langgan nara mbalin, ma rakatitiik kana rae, “Hada-horomatak neu hatahori Yahudir Manen.”
MAT 27:30 Boe ma ara pura ambe neu Yesus, ma haꞌi rala teteꞌe ai naa numa liman mai, de delu rakamiminak langgan.
MAT 27:31 Ara rakatitiik rakamiminak basa Yesus, boe ma ara buka heni badu naruk naa. De ara feen pake falik bua-loꞌan nara. Basa boe ma ara leꞌa roon neni kota Yerusalem dean neu, fo rae reu pakun nai ai ngganggek lain losa maten.
MAT 27:32 Neu ara bei laꞌok fo leꞌa roo Yesus, ara ratonggo ro hatahori kota Kirene esa, bei fo nae maso neni kota Yerusalem neu. Ndia naden, Simon. Ara rakasetik kana fo lemba-nasaa nala ai ngganggek naa nggati Yesus.
MAT 27:33 Boe ma ara losa mamanak esa, nade Golgotaa. (Nai dedeꞌa Aram, sosoa-ndandaan nae, “Mamana langga duik.”)
MAT 27:34 Numa naa, ara rae fee Yesus ninu anggor neni babalik no modo malik, mita fo Ana nakatataka nala hedis. Yesus ninu nala kada faa, boe ma ana timba henin.
MAT 27:35 Basa boe ma ara paku Yesus neu ai ngganggek lain. Ma soldadur leꞌa lot fo sangga bubuluk see ndia hambu Yesus bua-loꞌan.
MAT 27:36 Boe ma ara ranggatuuk ranea Yesus numa naa.
MAT 27:37 Ara oo surak neu papak esa boe nae, “IA YESUS, HATAHORI YAHUDIR MANEN” De ara paku papak naa neu Yesus langgan ndandaan lain fo rafada huun hata de sira fee hukun mates neun.
MAT 27:38 Numa naa oo ara paku rakanisa hatahori naꞌo manu-meo dua boe. Esa neu Yesus boboa konan; esa neu boboa kiin.
MAT 27:39 Basa hatahorir mana laꞌok resik naa, mete-rita Yesus. Boe ma ara korombiꞌe bafan nara, de rakatitiik kana.
MAT 27:40 Ara eki mbalin rae, “Hoi! O mae O bisa mandefa heni Manetualain Uma Huhule-haradoi Ina-huun, basa de mambadedeik falik kana nai faik telu dalen, hetu? Mete ma O tebe-tebe Manetualain Anan, na, soba O makamboꞌik aom, fo konda numa ai ngganggek naa mai leo.”
MAT 27:41 Leo naak oo malangga anggama Yahudi malanggan nara, meser anggamar ma lasi-lasi hadak kara tungga rakatitiik Yesus boe rae,
MAT 27:42 “Ana tao nasoi-nasoda hatahori laen ena, tehuu Ana ta bisa tao nasoi-nasoda Ndia ao heli-helin! Ana nae, Ndia ia hatahori Israꞌel Manen! Mete ma talo naa, na, malole lenak Ana konda memak numa ai ngganggek naa mai. Mete ma ita mete-tita talo naa, dei fo ita tamahere neun.
MAT 27:43 Mete ma tebe-tebe Ndia Manetualain Anan, naa fo ‘Ana namahena neu Manetualain. De mete ma Manetualain nau Ndia, na, mita fo Manetualain tao nasoi-nasodan.’ ”
MAT 27:44 Naꞌo manu-meo kaduak kara raa oo, tungga rakatitiik kana talo naa boe.
MAT 27:45 Basa naa, makiu-makahatuk tatana nala mamanak naa, numa ledo namatetu losa liꞌu telu ledo bobon.
MAT 27:46 Ndaa no liꞌu telu ledo bobon, boe ma Yesus eki pake dedeꞌa Aram nae, “Eli! Eli! Lema sabaktani?” (Sosoa-ndandaan nae, “Au Lamatuang! Au Manetualaing, ee! Tao hata de Amak nasadea laꞌo ela Au talo ia?”)
MAT 27:47 Hambu hatahori hida deka-deka ruma naa ramanene Yesus haran naa. Boe ma rae, “Hoi! Ei mamanene dei. Ana nanggou Elia, Manetualain mana toꞌu dedeꞌan lele uluk naa!”
MAT 27:48 Boe ma hatahori esa nalai neu haꞌi lombu fo boron neni anggor makeis neu. De ana nato lombu naa neu teteꞌe ai suꞌun, boe ma soron neni Yesus bifi doon neu, fo Ana musi.
MAT 27:49 Tehuu hambu hatahori laen bali kokolak nae, “Tahani dei, fo ita mete sudik kana, Elia nae mai tao nasoi-nasodan, do taa?”
MAT 27:50 Boe ma Yesus eki seluk bali no hara berak, de maten.
MAT 27:51 Nai Uma Huhule-haradoi Ina-huuk dale, hambu tema ririndi loak esa neni londak fo babata Manetualain Kama Malalao Mateꞌen. Ndaa no Yesus ketu ani hahaen, boe ma tema ririndik naa sii baꞌen neu dua, numa lain mai losa dae. Boe ma dae nanggenggo, losa batu moꞌok kara fanggi baꞌes sara.
MAT 27:52 Rates sara oo ratahuka boe. Ma Manetualain hatahorin mana matek kara ena, Ana tao nasoda falik ketuk ruma mamates mai.
MAT 27:53 Neu Yesus nasoda fali numa mamaten mai ena, boe ma ara kalua ruma rates mai, de maso reni Yerusalem reu. Hatahori noꞌuk ka mete-rita sara ruma naa.
MAT 27:54 Numa Golgotaa, hambu komedan no soldadun nara mana ranea Yesus ai ngganggen. Neu ara mete-rita dae-inak nanggenggo, ma basa hata fo mandadik naa ena, boe ma ara ramataꞌu ralan seli. Ara rakokola aok rae, “Awii! Hatahori ia, memak tebe-tebe Manetualain Anan!”
MAT 27:55 Numa naa oo, hambu inak hida fo ara tungga mete Yesus mamaten numa dook ka mai boe. Ara tunggan numa Galilea mai ena, huu ara ndia raono-lalaun numa bakahulun mai.
MAT 27:56 Numa inak kara raa mai, hambu Maria numa nggoro Magdala mai, Maria esa bali (ndia Yakobis ma Yusuf inan), ma Sabadeus saon (ndia Yakobis no Yohanis inan).
MAT 27:57 Numa naa, hambu hatahori kamasuꞌik esa numa nggorok Arimatea mai, nade Yusuf. Ana tungga Yesus nenorin dook ka ena. Yesus mamaten naa, tuda laꞌe-ndaa fai kaliman. Beꞌe-mai tuda laꞌe-ndaa hatahori Yahudir fai huhule-haradoin. Huu naa de, neu ledo sangga tesa, boe ma Yusuf sangga dalak fo nae nakonda memak Yesus ao-mbaa mamaten numa ai ngganggek lain mai.
MAT 27:58 De ana neni nggubenor Pilatus neu, fo noke Yesus ao-mbaa mamaten. Boe ma nggubenor parenda fo ara loo lima mamates naa neu Yusuf.
MAT 27:59 Boe ma Yusuf neni Golgotaa neu. De ana nakonda Yesus ao-mbaa mamaten numa ai ngganggek naa mai. Boe ma ana mbomboti natalolole ao-mbaa mamates naa, no tema beuk mabeli.
MAT 27:60 Faik naa, hatahorir bei fo toꞌi basa bolok esa numa lete batu fo sadia memak rates fee Yusuf no nufanelun nara, mete ma ara mate. De Yusuf asa koꞌo roo Yesus ao-mbaa mamaten fo reu taon neni bolok naa neu. Boe ma ara loli rala batu moꞌok esa, de tatana ratalololen neu bolok naa lelesun. Basa naa, Yusuf asa fali reu sara leo.
MAT 27:61 Faik naa, Maria numa Magdala mai ma Maria laen naa oo tungga losa mamanak naa boe. Ara nggua-nggua mbali bolok naa.
MAT 27:62 Neu beꞌe-mai, ndaa no hatahori Yahudir fai hahae tao ue-osan. Boe ma malangga anggama Yahudi malanggan nara ma hatahori Farisir reu rasare nggubenor.
MAT 27:63 Ara rafada rae, “Papa nggubenor, ai masaneda neu mana kedi-irak bei masodak, ana kokolak nita nae talo ia: ‘Memak Au mate, tehuu seli faik telu boe ma Au asoda fali numa mamates mai.’
MAT 27:64 Huu naa de papa tulun madenu soldadur fo ranea ratalolole rates naa, losa fai katelun. No dalak naa, Ndia ana nunin nara ta bisa loi rala ao-mbaa mamaten, fo kedi-ira hatahorir rae, Ana nasoda fali numa mamaten mai ena. Mete ma ara kedi-ira talo naa, naa manggaraun lena ara kedi-ira fai bakahulun naa, neu ara rae Ndia ia, ndia Karistus.”
MAT 27:65 Nggubenor namanene nala naa, boe ma naselu nae, “Malole boe! Tehuu ei kahatahori mana manear. Malole lenak pake kada sira leo, fo reu ranea ratalolole mamanak naa.”
MAT 27:66 Boe ma ara reni mamanak naa reu, ma roo sira hatahori mana manean nara. Losa naa, ara segel rakamate batu manai rates lelesu bafan. De ara radenu hatahorir raa ranea rakandoo mamanak naa, mita fo hatahori laen boso mai haꞌi reni mamates naa.
MAT 28:1 Neu fai Menggu huhua anan, boe ma Maria numa Magdala mai ma Maria laen naa, reu dangga rates naa.
MAT 28:2 Medak neu ma, dae-inak nanggenggo ta hohoꞌak. Manetualain atan esa numa nusa tetuk do inggu temak konda mai, de neu loli heni batu moꞌok naa, fo mana tatana bolok naa. Boe ma ana nanggatuuk neu batu naa lain.
MAT 28:3 Ata naa matan nasaꞌa sama leo ndelas, ma bua-loꞌan muti lao ndoos.
MAT 28:4 Hatahori mana manear raa ramataꞌu ralan seli, losa dere faku-faku, ma ara ta bisa rakaundak nok bali hatahori mates.
MAT 28:5 Boe ma ata numa nusa tetuk do inggu temak mai naa, nafada inak kara raa nae, “Ei boso mamataꞌu! Au bubuluk ei mai sangga Yesus, Hatahori fo ara paku risak numa ai ngganggek naa.
MAT 28:6 Tehuu Ana ta nai ia ena. Ana nasoda fali numa mamaten mai ena, sama leo Ana kokolak memak kana ena. Mai maso dale miu fo mete no ei mata heli-helim, mamanak naa fo ara ralololi Ndia ao-mbaa mamaten. Mamanak naa rouk ena!
MAT 28:7 Hatematak ia, ei fali lai-laik leo! Miu mafada ana nunin nara mae, Yesus nasoda fali numa mamaten mai ena. Ana laꞌok nakahuluk neni Galilea neu ena. Ara muste reu ratonggo roon nai naa, sama leo fai bakahulun Ana helu-bartaa memak neu sara ena. Mamahere leo. Fali leo fo mafada hata fo au kokolak ia ena!”
MAT 28:8 Boe ma inak kara raa ralai kalua laꞌo ela mamanak naa. Ara ramataꞌu, tehuu ara oo rameda nemehokok boe. Ara fali lai-laik fo tui basa dedeꞌak kara raa reu Ndia ana nunin nara.
MAT 28:9 Tehuu neu ara bei laꞌok numa dalak, medak neu ma Yesus mai natonggo no sara. Ana kokolak nae, “Soda-molek!” Ara mete-rita naa, boe ma reu deka-deka de holu rala ein, ma rakaluku-rakatele neun.
MAT 28:10 Boe ma Ana kokolak nae, “Boso mamataꞌu, ee! Miu mafada Au ana nuning nggara, fo reu rahani Au nai Galilea.”
MAT 28:11 Neu inak kara raa bei laꞌok numa dalak, boe ma hatahori mana manear raa fali reni kota reu. Ara reu tui malangga anggama Yahudi malanggan nara basa mandadik kara raa ena.
MAT 28:12 Boe ma malanggak kara raa sangga dalak ro lasi-lasi hadak kara, fo fee hatahori mana manear raa doik noꞌun seli fo tatana bafan nara.
MAT 28:13 Malanggak kara raa rafada rae, “Talo ia. Mete ma hatahori ratane, na, ei muste maselu mae, neu fai leꞌodaek ei sunggu seli. Ta bubuluk te Ndia ana nunin nara mai, de ramanaꞌo reni ao-mbaa mamaten.
MAT 28:14 Mete ma papa nggubenor namanene dedeꞌak naa, na, ei boso mamataꞌu, te neu ko ai ndia mataa mbali tou lasik.”
MAT 28:15 Boe ma hatahori mana manear raa haꞌi rala doik naa. Ara tao tungga malanggak kara raa hihiin. Huu naa de losa hatematak ia, hatahori Yahudir bei ramahere tutui pepeko-lelekok naa.
MAT 28:16 Yesus ana nuni kasalahunu esan nara raa ramanene basa inak kara raa tutuin, boe ma ara laꞌo reni profensi Galilea reu fo reu ratonggo roon nai letek esa, tungga Ndia hehelu-bartaan.
MAT 28:17 Neu ara mete-ritan numa naa, boe ma rakaluku-rakatele neun. Leo mae talo naa, tehuu bei hambu ketuk dalen nara bei rabaꞌe.
MAT 28:18 Boe ma Ana mai deka-deka no sara, de kokolak nae, “Manetualain fee Au koasa ena, fo Au parenda basa hata manai nusa tetuk do inggu temak, ma basa hata manai dae-bafok.
MAT 28:19 Dadi ei meni bee miu a mesan, na, muste tui-bengga neu basa hatahori nusa-nusak kara, Au Tutui Maloleng. Ei muste fee nenorik matalolole neu sara, mita fo ara dadi reu Au ana nuning. Ma ei muste sarani sara, fo dadi tanda nae, sira rakaesa ro Amak, Ndia Anan, ma Ndia Dula-dale Malalaon ena.
MAT 28:20 Ma manori sara tao tungga basa parendar fo Au afada neu ei ena. Masaneda, ee! Au ua ei taa-taa nai ei taladam mara, losa dae-bafok fai mateꞌen.”
MAR 1:1 Ia tutui malole, fo Manetualain Anan tutuin. Ndia naden Yesus Karistus. Manetualain dudu elan numa lele uluk mai ena. Ndia tutuin mulai talo ia:
MAR 1:2 Yesus bei ta mulai Ndia ue-osan, te Manetualain nadenu hatahori esa, nade Yohanis, fo nakahuluk buka dalak soa-neu Yesus mamain. Lele uluk Manetualain pake Ndia mana toꞌu dedeꞌan esa ena, nade baꞌi Yesaya. Ana surak memak kana ena nae: “Nenene, ee! Au adenu Au hatahoring esa fo neu buka dalak fee O.
MAR 1:3 Hatahori naa neu ko neni mamana nees neu, de ana bolu nae, ‘Basa hatahorir lalaꞌen tao malole dalak kara, fo simbok Lamatuak mamain! Ma fua matetu dokek kara fo simbok kana.’ ”
MAR 1:4 Hatahorir roke rateme Yohanis rae Mana Saranik. Ana leo nai mamana nees. Bualoꞌa-papaken, ara taon numa banda onta bulun mai. Kalekeen numa banda roun mai. Nanaꞌa-nininun ndia lamak ma fani oe. [Yohanis leleo-lalaꞌon ia, sama leo baꞌi Elia lele uluk.] Lelek naa, hatahorir ruma kota Yerusalem ma profensi Yudea isin nara mai ratonggo ro Yohanis numa ndia mamanan naa. Ara mai fo rae rita Yohanis ma sangga ramanene Yohanis nenorin. Yohanis nafada sara nae, “Ei muste manaku ma laꞌo ela basa ei sala-singgom mara lalaꞌen, fo ela Manetualain koka heni ei sala-singgom mara. Boe ma ei muste sarani dei, fo dadi neu tanda nae ei malole fali mia Manetualain ena.” Ramanene talo naa, boe ma ara manaku sala-singgon nara, de ana sarani sara numa lee Yarden.
MAR 1:7 Ana nafada nae, “Neu ko Hatahori moꞌo-inahuuk esa lena heni au bali nae mai. Leo mae dadi uu kada ndia ana neondan oo, au ta andaa boe.
MAR 1:8 Au sarani ei pake kada oe, tehuu neu ko Ana tao lena heni au, ma Ana tao nasofe ei dalem mara no Manetualain Dula-dale Malalaon.”
MAR 1:9 Neu faik naa, Yesus numa nggoro Nasaret manai profensi Galilea mai, mai natonggo no Yohanis. Boe ma Yohanis sarani Yesus numa lee Yarden.
MAR 1:10 Yesus bei fo kalua numa oe dale mai, medak neu ma nita lalai natahuka, boe ma Manetualain Dula-dalen sama leo mbui lunda sina konda neni Yesus neu.
MAR 1:11 Boe ma Manetualain nahara numa lalai mai nae, “O ia, Au Ana susueng. O soa tao mamahoko Au.”
MAR 1:12 Basa boe ma Manetualain Dula-dalen nuni Yesus neni mamana nees esa neu.
MAR 1:13 Nai mamanak naa, hambu kada banda fuir. Yesus leo numa naa doon faik haa hulu. Numa mamanak naa, nitur malanggan neu soba-dou Yesus fo tunggan, tehuu ta nala sana. Basa boe ma Manetualain atan nara ruma nusa tetuk do inggu temak mai fo reu ralalaun.
MAR 1:14 Faik naa fo ara tao Yohanis neni bui dale neu, boe ma Yesus neni profensi Galilea neu tui-bengga Manetualain Hara Lii Malolen nai naa.
MAR 1:15 Ana nafada nae, “Nenene, ee! Hatematak ia Manetualain fain losa ena! Hatematak ia basa hatahori bei fo bubuluk rae, Manetualain toꞌu parenda. Huu naa de ei muste hahae numa ei pepeko-lelekom mai leo, fo tungga falik Manetualain, ma mamahere neu Ndia Hara Lii Malolen ia leo.”
MAR 1:16 Faik esa, Yesus laꞌok tungga dano Galilea tatain. Ana nita hatahori esa, nade Simon no fadin nade Anderias. Dua sara dala iꞌak. Naa sira ue-osan tungga-tungga faik.
MAR 1:17 Yesus nanggou sara nae, “Woi! Mai fo tungga au leo! Ei masiꞌe sangga iꞌak, tehuu hatematak ia Au tao ei dadi miu mana sangga samanek.”
MAR 1:18 Dua sara ramanene rala naa, boe ma ara laꞌo ela dala naa, fo reu tungga Yesus tutik ka.
MAR 1:19 Basa de Yesus laꞌok nala faa bali, boe ma nita Sabadius anan nara. Kaꞌak nade Yakobis no fadin nade Yohanis. Dua sara rafafaꞌu ralole puꞌak nai ofak lain.
MAR 1:20 Yesus nanggou dua sara nae, “Wee! Mai fo tungga Au!” Boe ma dua sara laꞌo ela sira aman ma hatahori manaꞌa nggadin nara rai ofak lain. De ara reu tungga Yesus.
MAR 1:21 Basa boe ma Yesus no hatahori kahaak kara fo mana tungga Ndia naa, losa kota Kapernaum. Faik naa ndaa no hatahori Yahudir fai huhule-haradoin, boe ma Yesus maso neni uma huhule-haradoik dale neu, de fee nenorik numa naa.
MAR 1:22 Basa hatahori heran bali-bali neu ramanene Ndia kokolan, huu Ana bubuluk no tetuk nenorik naa isin. Naa, ta sama no hatahori Yahudi meser anggaman nara.
MAR 1:23 Faik naa, hambu hatahori fo nitu saꞌek esa. Ana oo neni uma huhule-haradoik dale neu, boe ma nitu manai hatahori naa dale bolu
MAR 1:24 nae, “Weeh! Yesus hatahori Nasaret! O mai tao hata mua ai nai ia! O mai sangga makalulutu ai, hetu? Ai malela O. O ia, Hatahori Malalaok fo lele uluk Manetualain helu-bartaa nae nadenun mai.”
MAR 1:25 Yesus mbokan nae, “Makatema o bafam! Kalua laꞌo ela hatahori naa!”
MAR 1:26 Boe ma nitu naa tao nala hatahori naa ao-inan leꞌa kede-kede. De ana kalua numa hatahori naa neu, ma nakau nahere.
MAR 1:27 Boe ma basa hatahori manai uma huhule-haradoik naa dale bafan nara bese mboo, de rakokola aok rae, “Awii! Ia hata ia? Ana parenda nitur, de ara kalua tungga Ndia hihiin. Ia nenori beuk, do? Tou lasik kokolan ta neni babanggak!”
MAR 1:28 Boe ma hatahorir mulai tui-bengga mandadik naa ndule nggorok kara marai profensi Galilea.
MAR 1:29 Ara kalua numa uma huhule-haradoik naa dale mai, boe ma Yesus neni Simon no Anderias uman neu. Yakobis no Yohanis tungga sara boe.
MAR 1:30 Simon ari-inan sumai, de ana sunggu nai mamana susungguk lain. Neu Yesus no ana nunin nara bei fo maso reni uma naa reu, te hatahori mai rafadan rae, “Ina lasik hambu sumaik.”
MAR 1:31 Basa boe ma Yesus neu tiro ina lasik, de Ana toꞌu nala liman fo nadedein. Ina lasik hedin mopon tutik kana. Boe ma ana nambadeik, de neu nalalau sara.
MAR 1:32 Neu ledo dei fo nae tesa, hatahorir reni sira hatahori kamahedin nara ma sira hatahorin fo nitu saꞌek kara mai, fo hule Yesus tulu-fali sara.
MAR 1:33 Losa basa hatahori kota esa isin nara rakarumbu reu de sofe uma naa bebelan.
MAR 1:34 Hatahorir raa hedin nara mata-matak kara, tehuu Yesus tao nahai basa-basa sara. Ma Ana oo husi kalua heni nitu noꞌuk ka boe. Ana ta fee lelak nitur raa kokolak, te ara oo ralelan boe, na.
MAR 1:35 Neu beꞌe-mai dulu silu fo bei makiuk, Yesus beꞌe ena de laꞌo numa uma naa neu. Ana neni mamana nees esa neu fo Ana hule-haradoi, kola-kola no Manetualain.
MAR 1:36 Neu Simon asa beꞌe, ta mete-rita Yesus de reu sanggan.
MAR 1:37 Ara ratonggo ro Yesus, de rafadan rae, “Papa, hatahori noꞌuk ka mai sangga Papa.”
MAR 1:38 Boe ma Ana naselu nae, “Naa oo malole boe. Tehuu malole lenak ita teni nggorok laen mana deka nai ia teu dei. Au oo nau tui-bengga Hara Lii Malole neu sara boe. Te naa Au ue-osan, na.”
MAR 1:39 Basa boe ma Ana laꞌo ndule basa profensi Galilea fo tui-bengga Manetualain Hara Lii Malolen nai sira uma huhule-haradoin nara dale. Ma Ana oo husi heni basa nitur numa hatahorir mai boe.
MAR 1:40 Faik naa, hambu hatahori hedi kusta esa neni Yesus neu. Boe ma ana sendek luu-langgan de noke tulu-falik neu Yesus nae, “Papa, ee! Tulu-fali au dei! Au bubuluk Papa bisa tao mamopo au heding ia, mita fo hatahori boso nunute au bali. Sadi Papa nau.”
MAR 1:41 Basa boe ma Yesus dalen tuda kasian neu hatahori naa, de Ana loo liman fo nafaroe neun, ma nae, “Memak Au nau! O hai leo!”
MAR 1:42 Medak neu ma, hatahori naa hedin mopon tutik ka. De ana hai leo.
MAR 1:43 Boe ma Yesus nadenu hatahori naa fali neu ngga, ma Ana fee nesenedak neun
MAR 1:44 nae, “Masaneda matalolole, o hai ena, tehuu ta bole tui esa boe na! Ma o muste tungga baꞌi Musa parendan dei. De muni malangga anggama muu dei, fo ana parisa o ao-inam, fo mete-nita o hedin mopon tebe ena, do beik. Boe ma muste muni o fefeem tanda makasi, mita fo basa hatahori bubuluk rae, o hai tebe-tebe ena.”
MAR 1:45 Tehuu hatahori naa kalua, boe ma ana tui ndule sudi nai bee. De hatahori noꞌuk ka sangga fo rae ratonggo ro Yesus, losa-losak Ana ta bisa natudu matan nai nggorok dale. Ana leo nai mamana nees nai kada nggorok dea. Tehuu hatahorir sudi lua ruma bee mai fo sangga ratonggo roon.
MAR 2:1 Tada faik hida boe ma Yesus neni Kapernaum neu seluk bali. Boe ma hatahorir ramanene rae Yesus nai uma ena.
MAR 2:2 De hatahorir sudi ruma bee mai. Ara rakarumbu reu de rakaseseꞌe uma dale, ara sasi losa lelesu dea. Boe ma Yesus nafada sara Manetualain hihii-nanaun.
MAR 2:3 Yesus bei kola-kola, te hatahori haa ndoro reni hatahori keko-luꞌuk esa neni Yesus neu.
MAR 2:4 Tehuu hatahori sofen seꞌe-seꞌe, huu naa de ta bisa reni hatahori naa losa Yesus matan. Boe ma ara hene reni uma lain reu, de ara ofe heni uma sinin nai Yesus ndandaan lain. Ara ofe heni uma sinin, boe ma rakonda hatahori keko-luꞌuk naa no neneꞌin dae neu.
MAR 2:5 Neu Yesus mete-nita sara, Ana bubuluk ara ramahere tebe-tebe neu Ndia. Boe ma nafada hatahori keko-luꞌuk naa nae, “Ana nggee! Au fee ambon neu o sala-singgom mara ena!”
MAR 2:6 Hambu meser anggama Yahudi hida ranggatuuk ruma naa. Neu ara ramanene Yesus kokolan naa, boe ma rameda ta malole nai dalen nara.
MAR 2:7 De rakokola aok rae, “Hatahori ia nambarani sudi selik kana kokolak nae leo naa, ee! Kada Manetualain mesa kana bisa fee ambon neu hatahori sala-singgon. Hatahori ia kokolan naa, nakasasamak aon sama leo Manetualain. Ana nakadadaek Manetualain naa ena, ma!”
MAR 2:8 Tehuu Yesus bubuluk memak dalen nara ena. De Ana nafada sara nae, “Ei boso duꞌa talo naa!
MAR 2:9 Tungga ei hahambum, na, bee ndia dakuk? Mete ma Au afada hatahori keko-luꞌuk ia ae, ‘O sala-singgom hambu ambon ena,’ na, neu ko ei ta bubuluk ana dadi tebe talo naa, do taa. Tehuu mete ma Au ae, ‘Mambadeik leo! Lulu mala o neneꞌim fo fali muu ngga leo’. Mete ma ana nambadeik tutik kana, naa ei bei fo mete-mita no ei matam mara mae, Au ia Hatahori Dae-bafo Isi-isik. Au aena koasa ma haak fo fee ambon neu hatahori sala-singgon.” Basa boe ma Yesus nafada hatahori keko-luꞌuk naa nae,
MAR 2:11 “O nenene, ee! Hatematak ia o hai ena! De mambadeik, lulu mala o neneꞌim fo fali muu ngga leo, ee.”
MAR 2:12 Ana namanene nala talo naa, boe ma nambadeik tutik kana. De ana lulu nala neneꞌin, boe ma ana kalua laꞌo. Basa hatahorir ruma naa mete-rita ro mata deꞌen. Boe ma basa sara bafa bese mboo, de rae, “Awii! Ita bei fo mete tita dedeꞌa leo iak! Manetualain memak ta neni babanggak!”
MAR 2:13 Basa boe ma Yesus fali neni dano Galilea tatain neu bali. Hatahori noꞌuk ka mai ratonggo roon, boe ma Ana nafada sara Manetualain hihii-nanaun.
MAR 2:14 Numa naa, hambu hatahori esa nade Lewi, Alpius anan. Ana dadi neu man-parenda Roma mana susu bean. Yesus laꞌok nesik naa boe ma Ana mete-nita Lewi, de nae, “Wee! Mai fo tungga Au!” Lewi namanene nala Yesus nae leo naa, boe ma ana nambadeik fo tunggan tutik kana leo.
MAR 2:15 Basa boe ma Yesus asa raꞌa numa Lewi uman, sama-sama ro Lewi nonoo mana susu bean nara. Hambu hatahorir laen oo fo hatahori Yahudir henggenee sara rae, hatahori ta neulauk kara, tungga raꞌa ro sara numa naa boe. Numa hatahori mana ranggatuuk raꞌa naa mai, noꞌuk ka hii ramanene Yesus.
MAR 2:16 Faik naa, hambu meser anggama hida ruma partei Farisi mai, mete-rita Yesus nanggatuuk naꞌa no mana susu bear ma hatahori ta neulauk kara. Boe ma ratane ana nunin nara rae, “Tao hata de ei mesem nanggatuuk naꞌa no hatahori mana susu bear ma hatahori ta neulauk kara raa?”
MAR 2:17 Tehuu Yesus namanene ara ratatane aok talo naa, boe ma Ana naselu nae, “Hatahori kamahedik memak parluu doter, tehuu hatahori bee fo sodak ena ta parluu. Au mai fo alalau hatahori ta neulauk kara. Tehuu Au ta mai fo alalau hatahori fo mana nameda aon hatahori ndoos ena.”
MAR 2:18 Laꞌe esa, partei anggama Farisi hatahorin nara puasa tungga anggama hohoro-lalanen. Ara mete-rita Yohanis Mana Saranik ana nunin nara oo puasa boe. Tehuu ta mete-rita Yesus ana nunin nara puasa leo sira. Boe ma sira hatahorin nara mai ratonggo ro Yesus, de ratanen rae, “Papa. Ai puasa. Yohanis hatahorin nara oo puasa boe. Tehuu tao hata de Papa ana nunin nara ta puasa?”
MAR 2:19 Boe ma Yesus naselu nae, “Memak ei bubuluk ena, mete ma tao feta kabin, na, fuik kara ta puasa, tehuu raꞌa-rinu losa rakabete. Mete ma baroit touk bei nai naa, na, neu ko basa sara raꞌa-rinu rame-rame.
MAR 2:20 Tehuu neu faik esa mete ma hatahorir humu reni baroit touk, na, nonoon nara rameda susa, dei fo ara puasa.”
MAR 2:21 Boe ma Yesus tamba lololek esa nae, “Hatahori ta tanda tema beuk neu badu raak. Te mete ma safen, na, tema beuk naa kukundu de ana tao nasida tamba seluk badu raak naa.
MAR 2:22 Leo naak oo hatahori ta radai oe anggor beuk neni boboꞌik banda rou raak dale neu boe, te neu ko kadin ma ana sii sasarak, de oe anggor beuk naa mboꞌa henin. Dadi oe anggor beuk muste nadain neni boboꞌik banda rou beuk neu.” [No lololek naa, Yesus nanori sara nae Ndia nenori beun boso babalik kana no hatahori Farisir nenori raan.]
MAR 2:23 Laꞌe esa, ndaa no hatahori Yahudir fai huhule-haradoin, Yesus asa laꞌok resik osi esa dale. Boe ma Ndia ana nunin nara ketu rala hade-nggandum, de raꞌa.
MAR 2:24 Tehuu hatahori Farisir mete-rita, de ratane Yesus rae, “Tao hata de O ana nunim mara lena-langga ita anggaman hohoro-lalanen? Ara ketu hade-nggandum ndaa no fai hahae tao ue-osa. Ei boso tao talo naa!”
MAR 2:25 Ana naselu nae, “Talo bee, ou? Ei ta masaneda baꞌi Dauk tutuin, do? Lelek naa Abiatar dadi neu malangga anggama Yahudir malangga ina-huun. Baꞌi Dauk no ana nunin nara taꞌin nara kada kikiok, nahuu ndoe ralan seli ena. De ara maso reni Manetualain Laa Huhule-haradoin dale reu, boe ma haꞌi rala roti fo malangga anggamar fee basan neu Manetualain ena, de ara raꞌa. Naa te kada malangga anggamar ndia raꞌa roti naa, tehuu hatahori laen ta bole. De baꞌi Dauk asa raꞌa, tehuu ta hambu hatahori esa boe na fee salak neu sara.”
MAR 2:27 Boe ma Yesus nafada seluk bali nae, “Ei boso lilii-ndondou, huu Manetualain tao fai hahae tao ue-osa dadi neu babaꞌe-babatik fo tulu-fali ita hatahori dae-bafok. Ana ta tao ita hatahori dae-bafok fo kada tungga fai hahae tao ue-osa hohoro-lalanen.
MAR 2:28 Au ia, Hatahori Dae-bafo Isi-isik. De Au ndia aena haak fo afada hatahori dae-bafok ae bole, do ta bole tao sudi hata ndaa no fai hahae tao ue-osa.”
MAR 3:1 Basa boe ma Yesus fali seluk neni uma huhule-haradoik neu. Numa naa, Ana mete-nita hatahori esa fo liman seri mates.
MAR 3:2 Numa naa oo, hambu hatahori ruma ara sangga-sangga dalak fo fee salak neu Yesus boe. De ara mete mamakun fo sangga bubuluk Ana tao nahai hatahori naa ndaa no fai hahae tao ue-osa, do taa.
MAR 3:3 Boe ma Yesus nanggou hatahori fo lima mate seserik naa nae, “Mai fo mambariik muu mata ia.”
MAR 3:4 Boe ma Ana natane basa hatahorir raa nae, “Mete ma tungga ita anggaman hohoro-lalanen, ita bole tao kada hata ndaa no fai hahae tao ue-osa? Ita tao malole, do taa? Ita tao tahai hatahori, do tao tisan?” Tehuu basa sara bengge nee.
MAR 3:5 De Yesus dalen susa nalan seli, nahuu ara hii kada tao matak neu anggama hohoro-lalanen, tehuu ta mbali neu hatahori fo lima mate seserik naa. Boe ma Ana namanasa de nakabubulak matan mbali sara. Basa de Ana nafada hatahori naa nae, “Loo o limam mai leo!” Hatahori naa loo liman neu, boe ma medak neu te liman hai tutik ka.
MAR 3:6 Basa boe ma hatahori Farisir raa laꞌo ela uma huhule-haradoik naa. De ara reu rala harak esa ro Herodes partei politin hatahorin nara fo ara sangga dalak rae tao risa Yesus.
MAR 3:7 Laꞌe esa, Yesus no ana nunin nara rakadedeak reni dano Galilea tatain reu. Tehuu hatahori noꞌuk ka ramanene basa hata fo Ana taon ena, huu naa de ara ruma basa nggorok kara mai fo tunggan. Ara ruma profensi Galilea, profensi Yudea ma profensi Idumea mai. Hambu ketuk ruma kota Yerusalem, kota Sidon ma kota Tirus mai. Ketuk bali ruma lee Yarden boboan dulu mai. Basa sara sangga Yesus fo rae ratonggo roon.
MAR 3:9 Huu hatahori noꞌun seli de Yesus nadenu ana nunin nara sadia feen ofak esa. Yesus hii kokolak numa ofak lain mai, mita fo basa sara ramanene ma mete-ritan no malole.
MAR 3:10 Fai bakahulun Ana tao nahai nita hatahori hedis noꞌuk ka. Huu naa de hatematak ia basa hatahori kamahedik kara rakaseseti fo nau rafaroe Yesus.
MAR 3:11 Neu hatahori fo nitu saꞌek kara mete-rita Yesus, boe ma lenggu heni sara ma rakaluku neu Yesus losa matan nara laꞌe daer. De ara bolu rahere rae, “O ia, memak Manetualain Anan!”
MAR 3:12 Tehuu Ana kaꞌi nahere sara nae, “Boso mafada hatahori esa boe na mae, Au ia see!”
MAR 3:13 Basa boe ma Yesus hene neni letek esa lain neu. Ana nanggou nala hatahori ruma fo ndaa no Ndia dalen. De ara reu ratonggo roon.
MAR 3:14 Boe ma Ana here nala hatahori salahunu dua. De Ana nafada sara nae, “Au here ei fo tungga Au seku neu, fo dadi miu Au nedenung. Au fee ei miu tui-bengga Manetualain hara hehelun neu basa hatahori lalaꞌen.
MAR 3:15 Ma Au ae baꞌe fee ei koasa, fo ei bisa husi heni nitur ruma hatahorir mai.”
MAR 3:16 Hatahori kasalahunu duak kara raa naden, sira: Simon (Yesus foin nade Petrus boe), Yakobis, Yohanis (Yakobis no fadin Yohanis ia, dua sara, Sabadius anan. Yesus foi dua sara nade ‘Boanerges’, sosoa-ndandaan nae ‘sama leo lalai nakaruu’.) Anderias, Felipus, Bartolomeos, Mateos, Tomas, Yakobis (Alpius anan), Tadius, Simon (mana tungga partei politik Selot), ma Yudas Iskariot (ana ia ndia neu ko seꞌo heni Yesus).
MAR 3:20 Basa boe ma Yesus no ana nunin nara konda fali numa letek lain mai. De ara maso reni uma dale reu. Tehuu hatahori noꞌuk ka mai rakarumbu rala Yesus bali, losa ara ta hambu lelak fo raꞌa-rinu.
MAR 3:21 Hatahori mete-rita talo naa, boe ma rae, “Hena mete neu Yesus dei. Ana lilii faduli ao-inan ena.” Nufanelun nara ramanene hatahori kokolak talo naa, boe ma ara mai rae nuni roon laꞌo.
MAR 3:22 Faik naa, meser anggamar ruma Yerusalem mai fo rafada hatahori marai naa rae, “Weeh! Ei boso tungga doꞌo-doꞌo mia Yesus naa. Te Ana bisa husi nitu talo naa, nahuu Ana hambu koasa numa nitur malanggan mai, fo hatahori rasiꞌe roken rae, Balsebul.”
MAR 3:23 Yesus namanene nala naa, boe ma ana noke nala basa sara, de nafada nae, “Ta dadi leo naak! Nitur malanggan ta bisa husi nasafali aon.
MAR 3:24 Mete ma nai nusak esa dale rau-inggun nara rahuur-ratofa, na, neu ko nusak naa ta bisa nakataka nala dook.
MAR 3:25 Mete ma uma-loo esa isin nara kada raraꞌu ao, na, neu ko uma-loo naa tetu-teman taa.
MAR 3:26 Leo naak oo mete ma nitur esa musu no esa boe, na, ndara baꞌe sara. No dalak naa, ara sida rakalulutu.
MAR 3:27 Mete ma naꞌo manu-meo nae mai foꞌai bua-baꞌu nai hatahori barakaik esa uman, na, ana muste humu nala hatahori naa, boe ma futu-paꞌan dei. Basa dei fo ana bisa foꞌai uma naa bua-baꞌun.
MAR 3:28 Dadi Au afada memak ei: Manetualain sadia koka heni hatahori sala-singgon. Mete ma hatahori kokolak nakadadaek hatahori laen, na, Manetualain bei sadia fee ambon neun.
MAR 3:29 Tehuu mete ma hatahori nambarani kokolak nakadadaek Manetualain Dula-dale Malalaon, na, Manetualain ta fee ambon neun, losa dae-bafok fai mateꞌen boe!”
MAR 3:30 Yesus kokolak talo naa, nahuu ara henggeneen rae, “Hatahori naa, nitu saꞌen ena!”
MAR 3:31 Basa boe ma Yesus inan ma fadin nara reni uma naa reu, fo sangga ratonggo roon. Ara losa boe ma rambariik kada dea, de ara fee hatahori neu noken.
MAR 3:32 Faik naa, Yesus nanggatuuk kola-kola no hatahori noꞌuk ka. Boe ma hatahori mai nafadan nae, “Papa, ee! Papa mamam ma fadim mara rai dea. Ara sangga ratonggo ro Papa.”
MAR 3:33 Tehuu Yesus naselu nae, “Au mamang ma toranoong tebe-teben, sira seer?”
MAR 3:34 Boe ma Ana mete basa hatahori mana manggatuu eko-feon. De Ana nae, “Basa ei lalaꞌen ia ndia Au mamang ma toranoong tebe-teben.
MAR 3:35 See ndia tungga Manetualain hihii-nanaun, na, ana ndia Au nufanelu tebe-tebeng.”
MAR 4:1 Laꞌe esa, Yesus neni dano Galilea neu bali. Boe ma hatahori noꞌuk ka mai rakarumbu ralan. De Ana hene neu nanggatuuk numa ofa mana seek esa numa naa lain, boe ma Ana fee nenorik. Basa hatahori marai mada lai nenene nenorin.
MAR 4:2 De Ana fee nenorik noꞌuk ka neu sara pake lololek nae,
MAR 4:3 “Ei nenene matalolole, ee! Hambu hatahori esa neu nggari bini-nggees nai ndia osin dale.
MAR 4:4 Neu ana nggari bini-nggees sara raa, hambu ketuk tuda nai dalak. Boe ma mbuik kara mai, de bido rabasa sara.
MAR 4:5 Ma bini-nggees ketuk tuda ndaa dae batuk. Bini-nggees sara raa ranumbu lai-lai, tehuu dae niꞌis,
MAR 4:6 de neu ledo hene mai lain de nahaa, boe ma numbun nara male de mate ramatuu. Te okan nara ta tora losa dae dale na.
MAR 4:7 Bini-nggees ketuk bali tuda nai dila-nggauk taladan. Boe ma dila-nggauk seti rakamate numbun nara, de ta bisa raboa.
MAR 4:8 Ma bini-nggees ketuk bali tuda ndaa dae isik. Bini-nggees sara raa ranumbu, basa de ramoꞌo losa raboa. Ketuk fee falik buna-boak lipa laꞌe telu hulu, ketuk lipa laꞌe nee hulu, ma hambu ketuk bali losa lipa laꞌe natun esa.
MAR 4:9 Dadi ei see ndia kandiꞌi dook, na, nenene matalolole, ee!”
MAR 4:10 Boe ma neu Yesus mesa kana, Ndia ana nuni kasalahunu duan nara ma hatahori laen ruma fo mana ramanene rita Ndia nenorin naa, ara mai ratonggo roon. Ara roken nafada lololek naa sosoa-ndandaan.
MAR 4:11 Boe ma Yesus naselu nae, “Huu ei nau bubuluk tebe-tebe Manetualain parendan, de Au afada memak lololek naa sosoa-ndandaan. Tehuu mete ma hatahori laen, na, Au anori no kada lololek.
MAR 4:12 Hatahori laen nara sama leo hata fo Manetualain mana toꞌu dedeꞌan surak memak kana ena nae, ‘Ara mete-rita ena, tehuu ta nau ralela. Ara ramanene ena, tehuu ta nau bubuluk. Naa fo ara hae ramahere neu Manetualain, fo Manetualain ta parluu fee ambon neu sara bali.’ ”
MAR 4:13 Basa boe ma Yesus nafada sara lololek naa sosoa-ndandaan nae, “Mete ma ei bei ta paꞌa-nato mala lololek ia sosoa-ndandaan, na, talo bee fo ei bisa paꞌa-nato mala lololek laen sosoa-ndandaan bali?
MAR 4:14 Dadi sosoa-ndandaan talo ia: hatahori mana nggari bini-nggees naa, sama leo hatahori mana tui-bengga Manetualain Dedeꞌa-kokolan.
MAR 4:15 Ma bini-nggees fo mana tuda nai dalak de mbuik kara bido raꞌa heni sara, naa sama leo hatahori mana namanene nala Manetualain Dedeꞌa-kokolan. Tehuu ta dook ka boe ma nitur malanggan mai, de haꞌi neni Dedeꞌa-kokolak naa numa hatahori naa dalen mai.
MAR 4:16 Bini-nggees fo mana tuda ndaa dae batuk naa, sama leo hatahori fo namanene ma simbok nala Manetualain Dedeꞌa-kokolan no nemehokok.
MAR 4:17 Tehuu Dedeꞌa-kokolak naa ta nahuu-naoka. Huu naa de ana ta nakai nala dook ka nai hatahori naa dalen. Neu hatahori laen nakasususak kana nahuu ana simbo Dedeꞌa-kokolak naa, boe ma ana nggari henin tutik kana.
MAR 4:18 Ma bini-nggees fo mana tuda nai dila-nggauk taladan naa, sama leo hatahori fo namanene nala Dedeꞌa-kokolak naa ena.
MAR 4:19 Tehuu ana nasambute nalan seli no ue-osa mata-matak kara fo leo-laꞌo tungga dae-bafok lole-ladan. De basa nesembutek kara raa seti heni Dedeꞌa-kokolak naa numa dalen mai losa ta hambu buna-boak hata esa boe na.
MAR 4:20 Ma bini-nggees fo mana tuda ndaa dae isik, sama leo hatahori fo mana pasa ndiꞌi doon fo ana simbok nala Dedeꞌa-kokolak naa, ma ana tungga Manetualain hihii-nanaun. Basa de ana tao kada hata fo neulauk kara, sama leo bini-nggees mana mabuna-boak naa. Hambu ketuk rabuna-boa lipa laꞌe telu hulu, ketuk lipa laꞌe nee hulu, ma ketuk bali losa lipa laꞌe natun esa.”
MAR 4:21 Yesus kokolak nakandoo numa ofak naa lain mai. Ana fee tamba lololek esa bali nae, “Talo bee! Ei mete mita ena do beik. Hatahori dede lambu tiꞌoek, de ana tatanan nenik lembaneu, do ana natetenden neni mamana susungguk fengga dalen neu. Taa hetu? Mete ma taon talo naa, na, ana ta manggaledo ena. Hatahori muste natetende lambu naa neu mamana demak mita fo hambu manggaledon.
MAR 4:22 De hata fo neni nefunik hatematak ia, neu ko mete-titan. Ma hata fo hatahori ta bubuluk kana hatematak ia, neu ko bubuluk kana.
MAR 4:23 Dadi see ndia kandiꞌi dook, na, nenene matalolole.
MAR 4:24 De, duduꞌa matalolole! Mete ma ei uku-sudi hatahori laen tatao-nonoꞌin, na, hatahori oo uku-sudi ei leo naak boe. Manetualain oo uku-sudi nasafali ei leo naak boe. Tehuu Ndia uku-sudin beran lena bali.
MAR 4:25 Dadi mete ma hatahori nau sangga bubuluk tebe-tebe Manetualain hihii-nanaun, na, ana boe nalela. Tehuu mete ma hatahori ta tao matak neu Manetualain hihii-nanaun, na, ana boe namanggoa.”
MAR 4:26 Basa boe ma Yesus kokolak tamba nae, “Manetualain mamana parenda-koasan boe namoꞌo, sama leo bini-nggees fo hatahori nggarin nai osin dale.
MAR 4:27 Hatahori naa fali, leo mae ana sunggu do beꞌe, ta nasaneda bini-nggees naa bali, tehuu bini-nggees naa nanumbu ma ana boe namoꞌo nakandoo.
MAR 4:28 Bini-nggees naa mori aon nai dae, boe ma nasarangga kahada, nabuna, naboa, losa naisi.
MAR 4:29 Mete ma hade namatasa ena, na, tenu osik nalela kada neu ketu-koru leo. Manetualain mamana parenda-koasan oo leo naak boe. Basa naar, Manetualain ndia naue-osan.”
MAR 4:30 Basa naa Yesus tuti kokolan bali nae, “Au fee tamba lololek esa bali, talo ia: ei bisa makasasamak sudik Manetualain hatahorin nara. Mulai makasososan kada hidak ka, tehuu bakadean boe ma ara tamba ramanoꞌu.
MAR 4:31 Naa, nok bali ai deꞌe kadiꞌi anan seli.
MAR 4:32 Tehuu mete ma ita sele-tande tala ai deꞌek naa ena, na, ana mori dadi neu ai huu mana moꞌon lenak. Boe ma mbuik kara mai hae saꞌok ma randunu rai naa.”
MAR 4:33 Yesus nasiꞌe nanori sara tungga sira malelan.
MAR 4:34 Ana nasiꞌe pake lololek, neu nanori hatahorir. Tehuu mete ma no Ndia ana nunin nara, na, Ana nafada lololek naa sosoa-ndandaan lalaꞌen.
MAR 4:35 Ledo bobon naa, Yesus bei nai ofak lain. Boe ma Ana nadenu ana nunin nara nae, “Mai ita saꞌe ofak teni serik teu.”
MAR 4:36 Boe ma ara saꞌe ofak sama-sama ro Yesus. De ara laꞌo ela hatahori noꞌuk kara raa ruma naa. Tehuu hambu ketuk saꞌe tungga ofak laen.
MAR 4:37 Faik naa Yesus ndae langgan neu kailunu, de Ana sunggu seli numa ofak ikon. Ta dook ka boe ma, ani makarumbuk mai. Rii tufa oe maso neni Yesus asa ofan dale neu, losa sangga sofen. De ana nunin nara ramataꞌu rae mate. Boe ma ara mai fafae Yesus rae, “Papa! Mambadeik dei! Ita sangga tae molo ia ena! Tehuu Papa ta tao matak neu ai!”
MAR 4:39 Yesus namanene nala naa, boe ma nambadeik de Ana kaꞌi anin nae, “Nenee!” Ma Ana parenda neu dano nae, “Lende leo!” No hatematak naa anin hahae ma dano dadi neu lino-lendek leo.
MAR 4:40 Boe ma Yesus nahara berak ana nunin nara nae, “Tao hata de ei basa ngga mamataꞌu talo ia? Ei ta mamahere Au, do?”
MAR 4:41 Basa sara ramataꞌu ma heran, de rakokola aok rae, “Ndia ia see, ee? Losa rii ma anin oo ramanene neun boe, ee!”
MAR 5:1 Basa boe ma Yesus no ana nunin nara losa dano Galilea boboan seri numa mamanak esa nade Gerasa.
MAR 5:2 Numa mamanak naa, hambu touk esa nitu saꞌen de namulu. Ana leo nai rates sara. Hatu-leledon ana nadaba oek ndule basa mbumbukuk kara marai naa no hola-hola, ma ana kii-bolu nakandoo. Ana tutu nakahina ao-inan pake batu. Barakain sudi selik kana. Ta hambu hatahori esa boe na bisa futu-paꞌan, leo mae pake rante besi boe. Laꞌi-laꞌik ka hatahorir paꞌa lima-ein renik rante besi ena, tehuu ana tao ketu rante besi naa ma tao natepa heni besi numa ein mai. Ndia barakain sudi selik kana, de ta hambu hatahori esa boe na bisa nakatataka nalan. Neu Yesus asa konda numa ofak mai, de heta ein reu mada lai boe ma hatahori kamuluk naa mete-nita sara numa dook ka mai. De ana kalua numa rates ara mai, boe ma nalaik neu sendek luu-langgan neu Yesus matan.
MAR 5:7 Yesus mete-nita hatahori naa talo naa, boe ma Ana kokolak nae, “Heeh, nitu! O kalua numa hatahori ia neu leo!” Boe ma hatahori naa kii-bolu nahere nae, “Weeh! O mae tao hata neu au! Au bubuluk O ia, memak Yesus, Manetualain mana koasa mateꞌen Anan. Au hule fo O boso tuni-ndeni au!”
MAR 5:9 Boe ma Yesus natanen nae, “O nadem see?” Hatahori naa naselu nae, “Au nadeng Legion, huu ai noꞌun seli, nok bali soldadur batalion noꞌuk ka.”
MAR 5:10 Basa de nitur pake hatahori naa fo noke Yesus boso nadenu sara kalua numa mamanak naa mai.
MAR 5:11 Hatahorir ranea bafi lalae esa deka-deka no mamanak naa. Bafir raa, basa sara fama te rifun dua. Ara sangga nanaꞌak rai letek tatain.
MAR 5:12 Boe ma nitur raa roke-hule Yesus rae, “Madenu ai maso mini bafir raa miu.”
MAR 5:13 Yesus namanene nala nonoken nara raa, boe ma nakaheik. De nitur raa kalua numa hatahori naa neu, boe ma ara maso reni bafir raa reu. Bafi rifun kaduak kara raa ralaik ralenggu-pikok, boe ma ara tuda tungga mbiak tatain reni dano dale reu, de basa sara mate rasamele reu naa.
MAR 5:14 Hatahori mana manea bafir raa mete-rita mandadik naa, boe ma basa sara ramataꞌu ralan seli. De ara ralaik reu rafada hatahori ndule nggorok kara marai naa. Boe ma hatahori noꞌuk ka kalua mai fo rae mete hata mandadik ena.
MAR 5:15 Ara mai ratonggo ro Yesus, boe ma ara mete-rita hatahori fo nitu saꞌek naa nanggatuuk numa naa. Duduꞌan namaneu ena, de ana pake bua-loꞌa ena. Hatahorir raa mete-rita naa, boe ma ramataꞌu, nahuu ara bubuluk rae, see ndia bisa husi kalua heni nitu noꞌuk kara numa hatahori naa neu, na, ndia memak hatahori ta hohoꞌak tebe-tebe.
MAR 5:16 Boe ma basa sara bengga ndule nggorok rae, sira mete-rita no sira mata deꞌe heli-helin hatahori kamuluk naa hai ena, ma bafir raa fo mate rasamele ena.
MAR 5:17 Boe ma hatahori nggorok marai naa, ara mai roke-hule Yesus fo laꞌo ela sira mamanan.
MAR 5:18 Neu Yesus nae hene ofak dale neu, boe ma hatahori fo bebeik kara nitu saꞌek naa mai noke-hule Yesus fo ndia oo nau tungga boe.
MAR 5:19 Tehuu Yesus ta nau. De nafadan nae, “Malole lenak o fali muu ngga fo mafada o nufanelum lalaꞌen, hata fo Manetualain taon fee o ena. Ma mafada mae, Manetualain sue nalan seli neu o.”
MAR 5:20 Basa boe ma hatahori naa fali neu ngga, de ana laꞌo ndule nusa kota salahunuk fo rasiꞌe roken rae, ‘Dekapolis’. Ana tui hata fo Yesus tao neu ndia ena. Basa hatahori mana ramanene tutuin naa, ara heran ralan seli, de rae, “Memak tetebes!”
MAR 5:21 Basa boe ma Yesus asa saꞌe ofak fali reni dano tatain seri reu. Neu ara konda numa ofak lain mai, te hatahori noꞌun seli mai rakarumbu ralan.
MAR 5:22 Numa naa oo hambu hatahori esa boe nade Yairus. Ndia naa, malanggan uma huhule-haradoik nai kota naa. Neu ana mete-nita Yesus, boe ma ana sendek luu-langgan neu Yesus matan,
MAR 5:23 de ana kokoen nae, “Papa, ee! Au ana feꞌong bei fo teuk salahunu dua, ana namahedi ela kada faa maten. Papa tulun mai fo tao mahain dei.”
MAR 5:24 Boe ma Yesus tungga Yairus neni uman neu. Neu ara mulai laꞌok, boe ma hatahori noꞌuk ka tunggan de raseseti numa boboa kii-konan mai.
MAR 5:25 Nai hatahori noꞌuk kara raa taladan, hambu inak esa hambu bulak ta tungga doon teuk salahunu dua ena.
MAR 5:26 Ana nabasa tali-doin ma hata-heton nara fo bae neu doter asa. Tehuu ta hambu esa bisa tao nahain boe na. Hedin naa, kada mai-maik nakandoo.
MAR 5:27 Inak naa namanene noꞌuk ka laꞌe-neu Yesus ena. De ana naseseti nai hatahori noꞌuk kara raa taladan fo nau deka-deka neu Yesus numa dean mai. Ana duduꞌa nai dalen dale nae, “Sadi au bisa afaroe laꞌe kada Yesus badun, neu ko au hai!” Neu ana nafaroe laꞌe Yesus badun, medak neu te ndia daa mana mboꞌak naa hahae tutik kana. Ana nameda ana hai tebe-tebe ena.
MAR 5:30 Hatematak naa oo Yesus nameda hambu barakaik kalua numa ao-inan mai. Boe ma Ana mbali dea, de mete neu hatahori noꞌuk kara raa. De Ana natane nae, “Ei see ndia nafaroe laꞌe Au badung, ee?”
MAR 5:31 Ana nunin nara raselu rae, “Papa mesa kana mete leo. Hatahori noꞌuk kara iar esa naseseti no esa na. Naa te Papa natane nae, ‘See ndia nafaroe laꞌe Au badung?’ ”
MAR 5:32 Tehuu Yesus leleuk ndule basan, fo sangga bubuluk bebeik kara ia see ndia nafaroe Ndia.
MAR 5:33 Inak naa namanene nala Yesus natane talo naa, boe ma namataꞌu nalan seli. De ana sendek luu-langgan neu Yesus matan fo ana mboꞌa nae, “Papa! Au ndia afaroe laꞌe Papa badun.”
MAR 5:34 Boe ma Yesus naselu neun nae, “Huu mama namahere tebe-tebe neu Au, de mama hai ena. Hatematak ia mama fali uma muu no dale lino-lendek leo, huu mama susa-sonan basan ena.”
MAR 5:35 Yesus bei kola-kola talo naa, boe ma hatahori esa numa Yairus uman mai, de nafada nae, “Kasian ee, ana feꞌok maten ena. Dadi boso makasosotak Papa Meser bali. Ana hae neu bali.”
MAR 5:36 Tehuu Yesus ta tao matak hatahori naa kokolan. De Ana nafada Yairus nae, “O hae mamataꞌu, ee! Mamahere neu kada Manetualain.”
MAR 5:37 Boe ma Yesus laꞌo ela ana nunin laen nara. Tehuu Ana nuni no Petrus, Yakobis ma fadin Yohanis, de ara laꞌo rakandoo.
MAR 5:38 Neu ara losa Yairus uman, ara mete-rita hatahori noꞌuk ka ramue-anggik, ma ramanene ara buꞌi rakarereu.
MAR 5:39 Yesus maso uma dale neu, de natane sara nae, “Tao hata de ei mamue-anggik ma buꞌi makarereu talo ia? Kakanak ia ta mate. Ana kada sunggu a.”
MAR 5:40 Ara ramanene Yesus kokolak talo naa, boe ma basa sara hika rakatitiik kana. Boe ma Ana nadenu basa sara dea reu. Ana noke nala kakanak naa aman no inan ma Ndia ana nunin telu sara, de basa sara maso reni kakanak naa kaman dale reu.
MAR 5:41 Boe ma Yesus toꞌu nala kakanak naa liman, de Ana kokolak neu kakanak naa pake sira dedeꞌa Aram nae, “Talita kum!” (Sosoa-ndandaan nae, “Ana feꞌok! Mambadeik leo!”)
MAR 5:42 Medak neu ma, ana fetok naa nambadeik, de ana mulai laꞌok. Boe ma Yesus nadenu inan nae, “Fee kakanak ia naꞌa leo!” Basa hatahorir fo mana mete-rita hata fo mandadik naa, heran bali-bali. Tehuu Yesus kaꞌi nahere sara nae, “Ei boso mafada esa boe na mae, Au asoda falik kana numa mamaten mai ena!”
MAR 6:1 Basa boe ma Yesus no ana nunin nara fali reni Ndia nggoron Nasaret reu.
MAR 6:2 Ndaa no hatahori Yahudi fai huhule-haradoin, Yesus maso neni uma huhule-haradoik dale neu de Ana fee nenorik. Faik naa, hambu hatahori noꞌuk ka reu hule-haradoi. Neu ara ramanene Yesus nenorin, ara heran bali-bali, de rae, “Hatahori ia malelan mata ia, ma! Ana oo naena koasa boe! Talo bee de Ana bisa leo naak?
MAR 6:3 Naa te Ndia kada tukan ai. Ita talela inan, ndia Maria; no fadin nara, sira Yakobis, Yoses, Yudas ma Simon. Ndia oo naena fadi inak hida boe. Ita basa ngga leo nai nggorok esa, ma!” Huu naa de ara mbiri ma rasakele, de ara ta nau ramanene neu sana bali.
MAR 6:4 Boe ma Yesus nafada nae, “Memak tetebes! Hatahori hihiin lenak fee hada-horomatak neu Manetualain mana toꞌu dedeꞌan numa mamanak laen mai. Tehuu nai ndia nggoro-tadun, hatahori ta fee hada-horomatak neun.”
MAR 6:5 Tehuu hatahorir raa dalen nara matea ndoos, de ara ta nau ramahere neu Yesus. Huu naa de Ana heran, de Ana ta nau pake koasan nai naa bali. Ana tao nahai kada hatahori kamahedik esa do dua.
MAR 6:6b Basa boe ma Yesus laꞌo ndule basa nggoro matia-taik kara, de nanori hatahorir Manetualain hihii-nanaun.
MAR 6:7 Ana noke nala ana nuni kasalahunu duan nara, de Ana nadenu sara laꞌok dua-duak reu tui-bengga Manetualain Hara Lii Malolen. Ana oo fee koasa neu sara boe fo ara bisa husi nitu.
MAR 6:8 Ana parenda neu sara nae, “Ei hae meni hata noꞌuk ka nai dalak. Neu ko Manetualain ndia koladun. Hae meni lepa-nggees, tali-doik ma tas. Tehuu meni kada teteꞌe ai, tabu eis ma badu esak ka.
MAR 6:10 Mete ma hambu hatahori simbok ei nai uman nara, na, ei muste leo nai naa losa ei laꞌo seluk bali.
MAR 6:11 Tehuu mete ma losa mamanak esa, ma hatahori marai naa ta nau simbok ma ta nau ramanene neu ei, na, nggani laꞌo ela naa. Ma mafada sara mae, ‘Ei ta nau mamanene, na. De ela numa naa fo ei mesa ngga lemba-masaa neselu-netaam!’ ”
MAR 6:12 Basa boe ma ara laꞌo reu tui-bengga Hara Lii Malole naa. Ara rafada basa hatahori fo muste hahae leo numa sira sala-singgon nara mai, de fali fo leo-laꞌo tungga Manetualain hihii-nanaun.
MAR 6:13 Ara oo husi kalua heni nitur boe. Basa naa ara tao mina neu hatahori hedis langgan nara, fo hule-haradoi tao rahai sara. De ara hai tutik kana.
MAR 6:14 Faik naa, hatahori nai mamanak bee a mesan ralela Yesus ena. Tutuik laꞌe-neu Ndia koasan naa, losa Manek Herodes ndiꞌi doon ena boe. Hambu hatahori rae, “Yohanis Mana Saranik naa nasoda fali nai Yesus aon dale. Huu naa de Ana bisa tao nala tanda heran nara raa lalaꞌen.”
MAR 6:15 Tehuu hambu hatahori laen rae, “Taa! Ia Elia ndia mana nasoda falik nai Ndia aon.” Hambu laen bali rae, “Ndia naa, Manetualain mana toꞌu dedeꞌan laen numa lele uluk mai.”
MAR 6:16 Neu manek Herodes namanene ara kokolak laꞌe-neu Yesus talo naa, boe ma ana naselu nae, “Ia mete te ndia Yohanis Mana Saranik fo fai maneuk kara au adenu tete rala langgan. Hatematak ia ana nasoda fali numa mamaten mai ena!”
MAR 6:17 Manek Herodes nadenu fo tete heni Yohanis Mana Saranik langgan talo naa, nahuu ana naena dedeꞌa moꞌok no Yohanis. Tutuin talo ia: manek Herodes sao nala fadin Felipus saon, nade Herodias. Naa te Felipus no Herodias ta bei raelak. Huu naa de Yohanis kaꞌi-ore laꞌi-laꞌik ka nae, “Papa manek ta bole sao mala papa fadim saon. Naa nalena-langga ita hatahori Yahudir dala-hadan ena!” Leo mae talo naa, tehuu Herodes sao nala inak naa boe. Basa boe ma ana nadenu hatahorir reu humu Yohanis fo mason neni bui dale neu.
MAR 6:19 Huu no Yohanis kaꞌi-ore laꞌi-laꞌik ka ena talo naa, de inak naa nambeda dalek fo nae tao nisan. Tehuu ta bei dadi, te Herodes kena nala Yohanis nai bui dale ena.
MAR 6:20 Boe ma ana nadenu soldadur fo ranea ratalololen. Herodes memak namahia Yohanis. Ana bubuluk nae, Yohanis naa, Manetualain ndia nadenun. Ma Yohanis naa oo hatahori neulauk boe. Herodes memak namahoko namanene Yohanis kokolan. Tehuu laꞌe-laꞌe esa dalen nameda ta neulauk, neu ana namanene Yohanis kokolan boe.
MAR 6:21 Basa boe ma faik esa, Herodias hambu dalak fo bala ndia dalen fo mana nameda hedis. Faik naa, ara tao manek Herodes fai bobonggin. Ara roke hatahori moꞌo-inahuuk kara fo mai raꞌa feta fai bobonggik. Mana maik kara raa, hatahori mana parendar, malangga soldadur ma lasi-lasi hada Galilear.
MAR 6:22 Neu feta bei laꞌok, boe ma Herodias ana feton maso neu lendo. Lelendon lolen seli, de tao namahoko Herodes no fuin nara. Boe ma Herodes noke nalan, de natanen nae, “O mae moke hata numa au mai, na, mafada leo! Neu ko au fee.
MAR 6:23 Leo mae o moke au nusang baꞌe duan oo au fee boe. Au sumba-soo pake Manetualain naden!”
MAR 6:24 Boe ma ana fetok naa neu natane inan nae, “Mama! Tungga mama, na, au oke hata ndia neulaun seli numa papa mai?” Boe ma inan naselu nae, “Naaa! Muu fo moke mala Yohanis naa langgan.”
MAR 6:25 Basa boe ma ana fetok naa lai-laik neni Herodes neu, de nae, “Papa! Au oke fo meni fee au Yohanis langgan, taon neu dulang dale. Hatematak ia leo!”
MAR 6:26 Herodes namanene nala naa, boe ma tendak heni taꞌi dalen tutik kana. Tehuu ana ta bisa leꞌa falik sumba-soon ena, nahuu basa hatahori ramanene ena, na.
MAR 6:27 Basa boe ma ana parenda malangga soldadu esa fo neu tete Yohanis langgan nai bui dale.
MAR 6:28 Boe ma ara tete rala Yohanis langgan, de taon neu dulang dale, fo renin fee ana fetok naa. Ana simbo nala dulang naa, boe ma koꞌo nenin fee inan.
MAR 6:29 Neu Yohanis ana nunin nara ramanene rae, ara haꞌi reni Yohanis langgan ena, boe ma ara mai haꞌi rala Yohanis nenetun, de reu ratoin. Yohanis mamaten tutuin baꞌu kada naa.
MAR 6:30 Faik esa, Yesus ana nunin nara fo Ana nadenu sara ena reu tui-bengga Manetualain Hara Lii Malolen naa, ara fali de rakabua seluk ro Yesus. Ara rafada basa hata fo ara taok, ma hata fo ranori neu hatahorir ena.
MAR 6:31 Tehuu faik naa, hatahori noꞌuk ka laꞌok reu-mai fo sangga Yesus. Losa-losak ka Ndia no ana nunin nara ta bisa raꞌa-rinu rala ena. Boe ma Yesus nafada ana nunin nara nae, “Mai fo ita teu sangga mamana nees fo ita bisa hahae tala faa dei ma.”
MAR 6:32 De basa sara hene reni ofak dale reu fo reu sangga mamana nees fo dook ka numa nggorok mai.
MAR 6:33 Tehuu hatahori noꞌuk kara raa mete-rita Yesus asa ofan laꞌok loro-loro dano tatain. Boe ma ara kalua numa nggorok reu tungga dala mada laik, de ara losa rakahuluk numa Yesus asa mai.
MAR 6:34 Neu Yesus konda numa ofak lain mai, boe ma Ana mete-nita hatahori noꞌuk ka rahanin ena. Basa boe ma dalen tuda kasian neu sara, nahuu basa sara ta bubuluk nau tao hata, sama leo bibi lombo mana lolo taak. Boe ma Yesus nanori sara Manetualain hihii-nanaun
MAR 6:35 losa ledo bobok. Boe ma ana nunin nara rafadan rae, “Papa! Malole lenak Papa madenu hatahori iar basa sara reu hasa nanaꞌak nai nggorok matia-taik kara marai iar. Huu ledo bobok ia ena, ma ta hambu nanaꞌak nai ia.”
MAR 6:37 Tehuu Yesus naselu nae, “Bosok! Ei ndia mahao sara leo.” Tehuu ara ratane rasafali rae, “Awii! Mete ma ai mahao hatahori noꞌuk kara iar, na, ai muste kalua doik noꞌun seli. Desi leo tukan esa nggadin teuk esa! Ta bisa dadi ai hambu doik desi naa!”
MAR 6:38 Boe ma Yesus naselu nae, “Ei miu matane sudi sara dei, hambu see ndia neni lepa-nggees.” Ara reu ratane basa boe ma ara fali mai, de rafada rae, “Hambu kada roti lima ma iꞌak dua.”
MAR 6:39 Boe ma Yesus nadenu basa hatahori raa fo ranggatuuk rakabubua reu naꞌu lain.
MAR 6:40 De ara reu ranggatuuk rakabubua. Hambu bubuak ruma beke natun esak, ma ruma beke lima huluk.
MAR 6:41 Basa boe ma Yesus haꞌi nala roti kalimak kara ma iꞌa kaduak kara raa. De Ana nasare mbali lalai neu fo noke makasi neu Manetualain. Boe ma Ana fifiꞌi baꞌe roti naa, de Ana loon neu ana nunin nara fo reu babaꞌe fee basa hatahori raa. Ana oo babaꞌe iꞌa kaduak kara raa fee sara boe.
MAR 6:42 Basa sara raꞌa losa rakabete.
MAR 6:43 Ara raꞌa basa boe ma ana nunik kara raa reu raduduru rala nanaꞌa lenan nara, sofe lembaneu salahunu dua.
MAR 6:44 Hatahori mana raꞌak kara raa nai rarain desi rifun lima. Naa bei kada touk kara. Ta bei reke tamba inak kara ma kakanak kara.
MAR 6:45 Basa boe ma Yesus nadenu ana nunin nara reu saꞌe ofak fo rakahuluk reni nggoro Betsaida nai dano boboan seri naa reu. Tehuu Ana bei nahani nai naa fo nadenu hatahori noꞌuk kara raa fali reu sara.
MAR 6:46 Neu basa sara fali boe ma Ana hene neni letek esa lain neu fo hule-haradoi.
MAR 6:47 Neu fai leꞌodae ena, boe ma Yesus konda fali. Ana mete-nita ana nunin nara ofan ena losa nai dano taladan. Tehuu ara sefe rangginggiok, nahuu ani soru. Neu lole manggaledo, boe ma Yesus neu laꞌo tungga sara. Tehuu Ana laꞌok nesik oe lain. Neu Ana nae laꞌo seli ofak naa ena, boe ma ara mete-ritan. Ara nggengger ralan seli. Boe ma esa natane esa nae, “Weeh! Hata ia? Maro, do hata?” Tehuu Yesus nahara tutik ka nae, “Wei! Ei boso mamataꞌu, ee! Te Au ndia ena.”
MAR 6:51 Neu Yesus hene neni ofak dale neu, boe ma anin lende tutik kana. Ndia ana nunin nara lalaꞌen heran ta basa-basa.
MAR 6:52 Ara bei fo mete-rita Yesus pake koasan fo nahao hatahori rifun lima lenak. Tehuu ara bei ta ralela tebe-tebe Yesus koasan, nahuu sira dalen nara bei matea ndoos.
MAR 6:53 Neu ara losa dano tatain seri, boe ma ara see numa kota Genesaret namo seseen.
MAR 6:54 Neu ara konda numa ofak lain mai, hatahori noꞌuk ka mete-rita sara ena. De ara bolu rae, “Wei! Yesus mai ena!”
MAR 6:55 Basa sara ralaik reu rafada ndule hatahorir, de ara koꞌo-luꞌa reni hatahori hedis sara mai. Sadi ara ramanene rae, Yesus nai mamanak esa, na, ara rame-rame koꞌo-luꞌa reni hatahori hedis sara fo ralololi sara reu dae moo-loak. Ara duduꞌa rae, “Sadi hatahori hedis sara raa rafaroe laꞌe kada Yesus badun suꞌun oo, ara hai tutik kana boe.” Ara rafaroe laꞌen talo naa, boe ma ara hai tutik kana.
MAR 7:1 Hambu hatahori Farisi bubuak esa ro meser anggama hida ruma Yerusalem mai fo ratonggo ro Yesus.
MAR 7:2 Hatahori Farisir raa toꞌu rahere sira Yahudir dala-hadan. Ndia leo, mete ma hatahori rae raꞌa-rinu, na, muste safe liman tungga sira dala-hadan hihiin. Leo naak oo mete ma fali numa pasar mai boe, ara muste radiu oe dei. Losa-losak sira bua-baꞌun manai dapur, ndia leo urek, pinggak, nggalaas ma cerek, muste safe basa sara tungga sira dala-hadan hihiin, dei fo bole raꞌa-rinu pake sara. Mete ma hambu hatahori Yahudi laen fo ta tao tungga dala-hadak naa, na, hatahori Farisir ramanasa. Neu ara mete-rita Yesus ana nunin nara raꞌa ta safe liman tungga dala-hadak hihiin, de ara ramanasa. Boe ma ara mai fo fee salak neu Yesus rae, “Tao hata de O ana nunim mara raꞌa, tehuu ta safe limak dei? Naa, ara laban ita dala-hadan numa bei-baꞌir mai!”
MAR 7:6 Tehuu Yesus naselu nae, “Eir ia, memak hatahori mana kokolak laen, tao laen. Numa lele uluk mai baꞌi Yesaya surak Manetualain hara hehelun ena nae, ‘Hatahorir ia koa-kio Au, no kada bafan nara, tehuu ta no dalen nara. Ara tao talo naa oo, naa kada hie-hie a mesan boe. Ara ta tao matak Au hihii-nanaun, tehuu ara tungga kada hatahori dae-bafok hihii-nanaun.’ Ei oo sama leo naak boe.
MAR 7:8 Ei laꞌo ela Manetualain hihii-nanaun ena, fo tungga kada hatahori dae-bafok dala-hadan. Memak tungga naa, na, ei malelan seli!
MAR 7:10 Lele uluk baꞌi Musa nafada Manetualain parendan ena nae, ‘Fee hada-horomatak neu ei ina-amam.’ Ma tamba bali nae, ‘Mete ma hatahori esa oꞌole-aꞌali inan do aman, na, muste hukun mates neun.’
MAR 7:11 Manetualain fee nenorik talo naa, tehuu ei fee nenorik laen bali. Ei mae, ‘Mete ma hatahori helu-bartaa nae fee ndia bua-baꞌun esa neu Manetualain, na, ta bole pake buas naa fo tulu-fali ina-aman, leo mae ara doidoso ralan seli, huu ana helu-bartaa ena, nae neu ko ana feen neu Manetualain.’
MAR 7:13 Huu naa de bebeik kara ia Au kokolak ena ae, ei nggari heni Manetualain hihii-nanaun ena, de ei nggatin no hohoro-lalane beuk. Hambu hohoro-lalanek noꞌuk ka, ei nggati sara ena talo naa.”
MAR 7:14 Basa boe ma Yesus nanggou nala hatahori laen numa naa, de nae, “Pasa ndiꞌi doom mara dei, fo ei malela.
MAR 7:15 Hata fo maso neni poꞌok dale neu, naa ta tao nanggenggeo hatahori. Tehuu hata fo kalua, naa ndia tao nanggenggeon.
MAR 7:16 [See ndia kandiꞌi dook, na, nenene matalolole, ee!]”
MAR 7:17 Basa boe ma Yesus no ana nunin nara laꞌo ela hatahorir raa, de maso reni uma esa dale reu. Boe ma ana nunin nara ratane lololek naa sosoa-ndandaan.
MAR 7:18 Yesus naselu nae, “Ei oo ta malela boe, do? Talo ia: hata fo hatahori naꞌan, na, naa malole. Tehuu hata fo ana kalua, naa ndia ta malole. Hata fo ita taꞌan, maso neni poꞌok dale neu, basa naa kalua henin bali. (Lamatuak Yesus lololen naa sosoan nae, hatahori sudi raꞌa hata a mesan, ta kena-kaꞌi.)
MAR 7:20 Tehuu hata fo kalua numa hatahori dalen mai, naa ndia tao nanggenggeon losa Manetualain nunuten, de ta nau nakabua noon.
MAR 7:21 Huu dedeꞌa manggarauk noꞌuk ka kalua numa hatahori dalen mai! Sama leo: duduꞌa manggarauk, laꞌok sala no hatahori fo ta ndia sao toun do ndia sao inan, nemenaꞌo, nekenisa hatahori,
MAR 7:22 bare-naꞌo, hohongge-lelena, tatao manggarauk, pepeko-leleko, tungga kada ao-mbaak hihiin, dale mana mbirik, kokolak tao naboboo hatahori naden, koa ao, ta malela hadak, ma langga batuk.
MAR 7:23 Dadi basa manggarau leo naak kara raa kalua numa hatahori dalen mai. Naa ndia tao nanggenggeon. Losa Manetualain oo nunuten boe.”
MAR 7:24 Basa boe ma Yesus asa laꞌo ela mamanak naa, de reni kota esa reu nade Tirus. Losa naa boe ma ara maso reni uma esa dale reu, nahuu Yesus ta nau hatahorir bubuluk Ndia nai naa. Tehuu Ana ta bisa nafuni nala aon.
MAR 7:25 Numa naa hambu inak esa fo ta hatahori Yahudi. Ndia neni bonggin numa nusa Fenisia nai profensi Siria. Neu ana namanene Yesus mai, de ana neu noke-hule Yesus fo husi heni nitu numa ana feton neu.
MAR 7:27 Tehuu Yesus tee mbolek nae, “Kakanak kara muste raꞌa rakahuluk, dei fo nggari nanaꞌa lenan fee busa.” [Ma sosoan bei nefunik nae, Yesus muste tulu-fali Ndia hatahori Yahudin nakahuluk, dei fo bisa tulu-fali hatahori laen.]
MAR 7:28 Tehuu inak naa naselu nae, “Tebe, Papa! Tehuu busa naa nai mei fengga dalen. Ana oo naꞌa hata fo tuda numa kakanak naa pinggan dale mai boe.” [Ma sosoan nae, kakanak kara raꞌa, na, busa oo hambu naꞌa boe. Leo mae Yesus tulu-fali Ndia hatahorin oo, tehuu Ana muste susuri-memete hatahori laen boe].
MAR 7:29 Yesus namanene nala naa, boe ma nafada nae, “Awii! Mama kokolak ndaa tebe! Dadi mama fali muu ngga leo, te nitu naa kalua numa mama anan mai ena.”
MAR 7:30 Basa boe ma inak naa fali neu ngga. Ana losa uma, te anan mana sunggu selik. Memak nitu naa kalua tebe ena.
MAR 7:31 Basa boe ma Yesus asa kalua laꞌo ela kota Tirus, laꞌok tungga tasi tatain resik kota Sidon. Numa naa mai ara laꞌo rakandoo losa dano Galilea. Boe ma ara laꞌo reni nusa kota salahunuk fo rasiꞌe roken rae, ‘Dekapolis’.
MAR 7:32 Nai mamanak naa hambu hatahori esa nggoak ma mbakek. Ndia nonoon nara roon neni Yesus neu. Ara roke-hule Yesus ndae liman neu hatahori naa, fo tao nahain.
MAR 7:33 Boe ma Yesus laꞌo ela hatahori noꞌuk kara raa, de Ana fiti feꞌe no kada hatahori naa. Yesus tao lima kukun neni hatahori naa ndiꞌi doon dua sara dale neu. Basa boe ma Ana tao ambe neu lima kukun de nafaroe hatahori naa maan.
MAR 7:34 Yesus nasare mbali lalai neu, de leꞌa hahaen, boe ma ana parenda pake sira dedeꞌan nae, “Efata!” (Sosoa-ndandaan nae, “Buka leo!”)
MAR 7:35 Ana kokolak talo kada naa, boe ma hatahori naa ndiꞌi doon namanene tutik kana. Hatahori naa maan fo mana barakaik naa, bangganaꞌu tutik ka, de ana mulai kokolak no malole.
MAR 7:36 Basa boe ma dua sara fali reni hatahori noꞌuk kara reu. Yesus ndindia sara nae, “Nenene, ee! Ei boso mafada hatahori mae, Au tao ahai hatahori ia ena.” Leo mae Yesus ndindia nahere sara, tehuu ara tui-bengga sudi nai bee.
MAR 7:37 Hatahori fo mana ramanene tutuik naa, ara heran ralan seli. Ara bese kola rae, “Ta neni babanggak! Hatahori ia tao basan dadi neu malole. Hatahori mbakek bisa namanene. Hatahori nggoak bisa kokolak.”
MAR 8:1 Laꞌe esa boe ma hatahori noꞌuk ka mai rakabubua fo ramanene neu Yesus kokolan. Ara tungga Yesus fai telu ena, huu naa de ta ela nanaꞌak ena bali. Boe ma Yesus nanggou nala ana nunin nara, de nae, “Au ameda kasian neu hatahori noꞌuk kara iar. Hambu ketuk numa dae dook mai, ma ara rakabubua faik telu ena, losa ta ela nanaꞌak ena. Malole lenak kara boso fali reu sara ro poꞌo rouk dei. Boso losak, ara ndiꞌa nai dalak.”
MAR 8:4 Yesus ana nunin nara raselu rae, “Papa! Mamanak ia nees, ma dook ka numa nggorok mai. Ta bisa dadi ita tahao hatahori noꞌuk ka talo ia!”
MAR 8:5 Tehuu Yesus natane sara nae, “Ei rotim mara hida de?” Ara raselu rae, “Papa. Ai mambeda kada roti hitu a.”
MAR 8:6 De Yesus nadenu basa hatahori raa fo ranggatuuk reu daer. Boe ma Ana haꞌi nala roti kahituk kara raa, de noke makasi neu Manetulain. Basa boe ma Ana fifiꞌi baꞌe roti naa nenik liman, de fee sara neu ana nunin nara. Boe ma ara reu babaꞌe fee basa hatahorir raa.
MAR 8:7 Ara oo raena iꞌak hida boe. De Yesus noke seluk makasi neu Manetualain soa-neu iꞌak kara raa. Boe ma Ana nadenu ana nunin nara reu babaꞌe fee hatahorir raa bali.
MAR 8:8 Basa sara nai rarain hambu hatahori rifun haa. Ara raꞌa losa rakabete. Raꞌa basa boe ma Yesus ana nunin nara reu raduduru nanaꞌa lenan nara, sofe lembaneu hitu. Basa boe ma Yesus nadenu basa sara fali reu sara.
MAR 8:10 Neu ara fali reu sara, boe ma Yesus no ana nunin nara hene reni ofak dale reu, fo reni mamanak esa reu, nade Dalmanuta.
MAR 8:11 Neu Yesus asa losa Dalmanuta, boe ma hambu hatahori hida numa partei anggama Farisi mai ratonggo ro Yesus. Ara rakaseseluk dedeꞌak ro Yesus fo rae ike rakatutudak kana. Ara roke Yesus rae, “Papa! Matudu tanda heran esa fo dadi neu bukti ae, Papa memak hambu koasa numa Manetualain mai.”
MAR 8:12 Yesus leꞌa hahaen, de nae, “Mete ma Au amanene ei kokolak talo naa, na, Au fale daleng! Tao hata de ei moke tanda heran? Boso talo naa! Memak hambu tanda heran, tehuu Au ta tao fee ei.”
MAR 8:13 Basa boe ma Yesus laꞌo ela sara, de neu fo no ana nunin nara hene fali ofak dale reu. Boe ma ara laꞌo reni dano boboan seri reu.
MAR 8:14 Neu Yesus asa losa dano taladan, dei de ana nunin nara rasaneda sira lilii reni lepa-nggees. Ara reni kada roti esa.
MAR 8:15 Yesus namanene nala ara kokolak laꞌe-neu roti, boe ma Ana nae, “Ei muste besa-besa! Boso tungga manek Herodes no hatahori Farisir leleꞌa-nonore manggaraun. Sira leleꞌa-nonore manggaraun naa, sama leo laru taꞌik fo hatahori paken tao kaifuu roti dadi namoꞌo.”
MAR 8:16 Ana nunin nara ramanene rala Yesus kokolak talo naa, boe ma ara panggananaa. Boe ma ara rakokola aok rae, “Tou lasik kokolak hata naa? Fama te Ana kokolak talo naa, nahuu ita ta teni roti, do?”
MAR 8:17 Tehuu Yesus bubuluk duduꞌan nara. De Ana nafada nae, “Tao hata de ei kokolak laꞌe-neu kada roti! Ei ta malela Au kokolan sosoa-ndandaan, do? Memak ei utem mara ta rakaminak, na!
MAR 8:18 Ei mete-mita no ei mata deꞌe heli-helim mara ena, tehuu ei ta bubuluk sosoa-ndandaan! Nok bali ei pokek kara. Ei mamanene mala no ei ndiꞌi doo heli-helim mara, tehuu ta malela hata esa boe na. Nok bali ei mbakek kara. Ei lilii heni
MAR 8:19 roti kalimak kara fo Au fifiꞌi baꞌe sara, de ahao hatahori rifun kalimak kara raa ena, do? Faik naa ei maduduru mala roti lenan nara lembaneu hida?” Ara raselu rae, “Lembaneu salahunu dua, Papa.”
MAR 8:20 Yesus natane seluk bali nae, “Ei bei masaneda faik naa, Au fifiꞌi baꞌe roti kahituk fo ahao hatahori rifun kahaak kara raa, do? Ei maduduru mala lenan nara lembaneu hida?” Ara raselu rae, “Hitu, Papa!”
MAR 8:21 Boe ma Yesus nae, “Memak tebe! Ei mete-mita no ei mata ao heli-helim ena, tehuu hata de ei bei ta malela Au koasang numa bee mai?”
MAR 8:22 Basa boe ma Yesus asa laok losa nggorok Betsaida. Numa naa hatahorir ralalaꞌo ro hatahori pokek esa neni Yesus neu. Ara roke-hule neu Yesus fo nafaroe tao nahai hatahori pokek naa.
MAR 8:23 Boe ma Yesus toꞌu nala hatahori naa liman, de noon laꞌo neni nggorok dea neu. De Ana pura ambe neu hatahori naa matan, basa boe ma Ana nafaroe matan. Ana natane nae, “Talo bee? O bisa mete-mita ena, do?”
MAR 8:24 Hatahori naa botik matan fo mete kii-konan, boe ma naselu nae, “Hou! Au mete-ita hatahori laꞌo-laꞌo. Tehuu nok bali au mete-ita ai huuk laꞌo-laꞌo ia!”
MAR 8:25 De Yesus tao seluk liman neu hatahori naa matan bali. Boe ma hatahori naa soba mete seluk, medak neu te matan hai tebe-tebe ena. Hatematak ia ana mete-nita no manggaledok ena.
MAR 8:26 Boe ma Yesus nadenu hatahori naa fali neu ngga, ma Ana fee nesenedak neun nae, “O fali muu ngga leo, tehuu tungga dalak laen. Boso fali muni Betsaida muu bali.”
MAR 8:27 Basa boe ma Yesus no ana nunin nara laꞌok ndule nggorok kara marai Kaisarea Felipi. Yesus natane sara numa dalak nae, “Mete ma tungga hatahori tutuin, na, ara rae, Au ia see?”
MAR 8:28 Ara raselu rae, “Hambu ketuk rae, ‘Yohanis Mana Saranik’. Hambu ketuk bali rae, ‘baꞌi Elia’, fo Manetualain mana toꞌu dedeꞌan lele uluk naa. Laen bali rae, Papa ia, Hatahori esa numa Manetualain mana toꞌu dedeꞌa laen nara numa lele uluk mai.”
MAR 8:29 Boe ma Yesus natane bali nae, “Tehuu ei mesa ngga mae, Au ia see?” Petrus naselu nae, “Papa ia, Karistus! Ndia Manetualain henggenee memak kana numa lele uluk mai ena.”
MAR 8:30 Tehuu Yesus ndindia sara nae, “Ei boso mafada esa boe na, ee!”
MAR 8:31 Basa boe ma Yesus mulai nafada ana nunin nara nae, “Au ia, Hatahori Dae-bafo Isi-isik. Neu ko Au hambu doidosok noꞌuk ka, nahuu lasi-lasi hadak kara, malangga anggama malanggan nara, ma meser anggamar timba heni Au. Neu ko ara tao risa Au, tehuu ndaa no bei-nesan, Au asoda fali numa mamates mai.”
MAR 8:32 Yesus nafada no manggaledon talo naa, boe ma Petrus leꞌa nala Yesus neni tataik neu, de ana kaꞌi Yesus nae, “Papa boso kokolak talo naa! Au ta mboꞌi sira liman dai Papa.”
MAR 8:33 Tehuu Petrus kokolak talo naa, ta tungga Manetualain hihii-nanaun. Boe ma Yesus hekor fo mete neni ana nunin laen nara neu. De Ana nahara berak neu Petrus nae, “Hei! Naa, nitur malanggan kokolan naa! Malai heok ia! O duduꞌa tungga kada hatahori dae-bafok hihii-nanaun, te ta tungga Manetualain hihii-nanaun!”
MAR 8:34 Basa boe ma Yesus nanggou nala hatahori laen nara fo mai rakabua ro ana nunin nara. De ana nanori sara nae, “See ndia nau tungga Au, ana muste nakatataka nakandoo tungga-tungga faik. Ana muste lilii heni ndia hihii-nanaun heli-helin fo tungga kada Manetualain hihii-nanaun mesa kana. Leo mae hatahori rae tao risan, ana muste tungga nakandoo a mesan, sama leo hatahori lemba-nasaa ai ngganggen fo neu mate.
MAR 8:35 Hatahori mana nau nasoda soa-neu kada ndia ao heli-helin, neu ko masodan naa, sambu do lalo talo kada naa leo! Tehuu hatahori mana sadia mate nahuu ana tungga Au ma tui-bengga Manetualain Hara Lii Malolen, neu ko ana hambu masodak nakandoo no Manetualain.
MAR 8:36 Nenene ee! Mete ma o hambu basa dae-bafok oe-isin, tehuu Manetualain timba heni o, na, nanalan hata?
MAR 8:37 Leo mae o lemba muni basa dae-bafok oe-isin oo, o ta bisa saiseluk kana neu o samanem boe!
MAR 8:38 Masanenedak, ee! Hatahori manai dae-bafok tanak ia tatao-nonoꞌi manggaraun nara mata-matak kara. Ara ta tao matak neu Manetualain. De see ndia mae tungga Au, do mae toꞌu Au nenoring, neu ko Au oo mae manakun nai Manetualain matan boe. Au, Hatahori Dae-bafo Isi-isik ia, neu ko Au fali mai numa nusa tetuk do inggu temak mai. Ma Manetualain atan nara ruma nusa tetuk do inggu temak mai oo, konda sama-sama ro Au boe. Ai konda numa nusa tetuk do inggu temak mai no Amak koasan ta neni babanggak, dei fo hatahori bubuluk Au ia see.
MAR 9:1 Ei boso lilii-ndondou Au kokolan ia. Hambu ketuk numa ei marai iar, bei ta mate, losa neu ko mete-rita Manetualain toꞌu parenda no koasa ina-huuk.”
MAR 9:2 Seli faik nee numa Yesus nafada laꞌe-neu mamaten ma nesoda falin numa mamates mai, boe ma Yesus noke no Petrus, Yakobis ma Yohanis, fo ara sama-sama reu hene lete demak esa fo ta hambu hatahori nai naa. Neu ara losa lain, de ara mete-rita Yesus mata-aon nasafali.
MAR 9:3 Ma Ndia bualoꞌa-papaken dadi neu muti manggahadok. Nai dae-bafok ia, ta hambu hata esa muti manggahadon lena heni Yesus bualoꞌa-papaken naa.
MAR 9:4 Medak neu ma, ara mete-rita Yesus kola-kola no baꞌi Elia ma baꞌi Musa.
MAR 9:5 Petrus asa ramataꞌu ralan seli. Boe ma Petrus pangganaa, losa ana kokolak sadi ndaa. De ana nafada Yesus nae, “Papa! Ai mameda malole nai ia! Dadi malole lenak ai mambaririik laak telu. Esa soa-neu Papa, esa soa-neu baꞌi Musa, ma esa bali soa-neu baꞌi Elia.”
MAR 9:7 Basa boe ma sosoꞌak konda mai de tatana nala sara. Boe ma ara ramanene harak esa numa sosoꞌak naa mai nae, “Nenene, ee! Yesus ia, Au Ana susueng. Ei nenene matalolole neun leo!”
MAR 9:8 Neu Petrus asa ramanene rala harak naa, boe ma ara leleuk ndule basan, tehuu medak neu ma ara ta mete-rita hatahori laen bali. Kada Yesus mesa kana.
MAR 9:9 Basa boe ma Yesus no ana nunin nara konda numa letek naa mai. Yesus helu sara nae, “Hata fo ei mete-mitan bebeik kara ia, ei boso mafadan neu hatahori esa boe na. Au ia, Hatahori Dae-bafo Isi-isik. Au muste mate dei. Neu ko mete ma Au asoda fali numa mamates mai ena, na, dei fo ei bole mafada hatahori.”
MAR 9:10 Ara toꞌu ratalolole Yesus hara hehelun naa, de ara ta rafada hatahori esa boe na. Tehuu telu sara mulai ratatane aok rae, “Ana kokolak nae, ‘Ana nasoda fali numa mamaten mai’, sosoan hata, ee? Talo bee, ee?”
MAR 9:11 Boe ma ara ratane Yesus rae, “Meser anggamar raa rae, ‘Baꞌi Elia muste mai nakahuluk, dei fo Karistus mai.’ Tehuu tungga Papa, na, talo bee?”
MAR 9:12 Yesus naselu nae, “Memak tebe! Baꞌi Elia muste mai nakahuluk, fo nasosoi dalak soa-neu Karistus, Hatahori naa ndia Manetualain henggenee memak kana numa lele uluk mai ena. De talo bee? Ei bei ta malela hata fo ara surak kana ena nai Manetualain Susura Malalaon soa-neu Hatahori Dae-bafo Isi-isik naa, do? Ara surak memak kana ena rae, neu ko mete ma Ana mai ena, na, hatahori rakasususak kana, losa ara nau tao risan.
MAR 9:13 De ei muste pasa ei ndiꞌi doom mara matalolole, ee! Baꞌi Elia naa memak mai ena. Tehuu hatahori rakasususak kana tungga sira hihiin. Naa oo, ndaa no hata fo baꞌir surak memak kana numa lele uluk mai ena boe.”
MAR 9:14 Neu Yesus no ana nunin kateluk kara raa ratonggo fali ro ana nunin laen, ara mete-rita hatahori noꞌuk ka rakabua. Hatahori noꞌuk kara raa mai, de ara mete-rita Yesus ana nunin laen rareresi ro meser anggamar.
MAR 9:15 Neu hatahori noꞌuk kara raa mete-rita Yesus, ara nggengger nahuu ara duꞌa rae, Ana bei nai letek lain. Boe ma ara ralaik reu ratonggo ro Yesus.
MAR 9:16 Boe ma Yesus natane sara nae, “Ei mareresi hata nai ia?”
MAR 9:17 Hambu hatahori esa mai, de nae, “Papa, nenene dei! Au uni au ana toung mai, fo Papa tao mahain dei. Nggoak, ta bisa kokolak nala, huu nitu saꞌen.
MAR 9:18 Mete ma nitu naa masok ena, na, ana fae nggari kakana ia ao-inan neu daer. Boe ma bafan lua fufudek kara, ma ana henggu nisin. Ao-inan barakai ndoos leo ai tuuk ia. Au oke Papa ana nunin nara fo ara husi heni nitu naa. Tehuu ara ta bisa tao hata esa boe na.”
MAR 9:19 Yesus namanene nala naa, boe ma Ana mboka sara nae, “Weeh! Eir ia, sudi selik kana ena! Au anori ei laꞌi-laꞌik ka ena, tehuu ei ta malela Au nenoring no malole. Ma ei ta mamahere tebe-tebe neu Au! Au ahani ua ei losa faik hida bali? Mai fo mia kakanak naa ia mai!”
MAR 9:20 Boe ma ara koꞌo roo kakanak naa neni Yesus neu. Tehuu neu nitu mete-nita Yesus, boe ma ana fae nggari kakanak naa losa tuda loli-loli neu daer, ma bafan lua fufudek kara.
MAR 9:21 Basa boe ma Yesus natane kakanak naa aman nae, “O anan dadi talo ia, ndia bee ena?” Kakanak aman naselu nae, “Numa kadiꞌi anan mai.
MAR 9:22 Nitu naa nau tao nisa kakanak ia dook ka ena. Ana tumbu piru au anang laꞌi-laꞌik ka neni aꞌi dale neu, ma ana nggarin neni oe dale neu losa nasamele. Dadi Papa tulun dei! Mete ma bisa, na, Papa kasian neu ai fo tao mahai kakanak ia dei.”
MAR 9:23 Yesus naselu nae, “Tao hata de o mae, ‘mete ma bisa’? Memak Au bisa tao hata a mesan, sadi hatahori ramahere dei!”
MAR 9:24 Basa boe ma tou lasik naselu leo bali nae buꞌi ia, ma nae, “Papa! Memak au amahere ena. Tehuu tulun fo au nemehehereng boe natea bali!”
MAR 9:25 Faik naa, Yesus mete-nita hatahori noꞌuk ka mulai rakarumbu mai ruma naa. De Ana parenda nitu naa nae, “Weeh, nitu! O kalua numa kakanak ia mai leo, fo ana bisa namanene ma kokolak nala. O boso maso fali muni ndia neu bali!”
MAR 9:26 Nitu namanene Yesus kokolak talo naa, boe ma ana kii-bolu nahere. Ana fae nggari kakanak naa neu daer, de leꞌa kede-kede, basa dei de ana kalua laꞌo elan. Boe ma kakanak naa ndiꞌa nok bali sangga mate ia ena. De hatahorir marai naa rae, “Naa! Maten ena!”
MAR 9:27 Tehuu Yesus toꞌu nala kakanak naa liman de nambadedeik kana. Boe ma ana nambadeik tutik kana.
MAR 9:28 Basa boe ma Yesus no ana nunin nara laꞌo ela mamanak naa, fo ara maso reni uma esa dale reu. Numa naa, ana nunin nara ratane Yesus rae, “Papa! Tao hata de bebeik kara ia, ai ta bisa husi nitu naa?”
MAR 9:29 Boe ma Yesus nafada nae, “Nenene matalolole! Nitur memak manggarauk. Dadi mete ma ei ta hule-haradoi moke tutulu-fafalik numa Manetualain mai, na, ei ta bisa mabeꞌi husi nitur matak leo naak.”
MAR 9:30 Basa boe ma Yesus no ana nunin nara laꞌo ela mamanak naa, fo ara maso reni nusa Galilea reu. Faik naa, Yesus ta nau hatahorir bubuluk Ndia nai naa,
MAR 9:31 huu Ana nau nanori kada Ndia ana nunin nara. Ana nafada sara nae, “Ta dook ka te ara rae seꞌo heni Au uni hatahori laen nara uu. Boe ma ara tao risa Au, Hatahori Dae-bafo Isi-isik ia. Memak Au mate, tehuu neu ko bei-nesan, Au asoda fali numa mamates mai.”
MAR 9:32 Yesus nafada talo naa, tehuu ana nunin nara panggananaa. Te ara ta rambarani ratane seluk Yesus kokolan naa sosoa-ndandaan hata.
MAR 9:33 Basa boe ma Yesus asa laꞌok losa Kapernaum. Neu ara maso reni uma dale reu, boe ma Yesus natane ana nunin nara nae, “Bebeik kara ia ei mareresi hata numa dalak naa?”
MAR 9:34 Tehuu ta hambu esa nambarani naselu, nahuu neu ara bei laꞌok numa dalak, ara rareresi rae, see ndia moꞌon lenak numa sira basa sara mai.
MAR 9:35 Boe ma Yesus nanggatuuk fo nanori sara nae, “See ndia nau dadi hatahori moꞌo-inahuuk, na, leleo-lalaꞌon muste dadi tebe-tebe sama leo hatahori kadiꞌik fo naono-lalau basa hatahorir.”
MAR 9:36 Boe ma Yesus koꞌo nala kakana ana esa numa naa, de ana fali neni ana nunin nara taladan neu. De Ana kokolak nae,
MAR 9:37 “See nau tungga Au fo ana naono-lalau hatahori kadiꞌik sama leo kakanak ia, na, sosoa-ndandaan nae, hatahori naa naono-lalau Au boe. Ma ana oo naono-lalau Au Amang fo mana madenu Au uni dae-bafok ia mai.”
MAR 9:38 Basa boe ma Yesus ana nunin Yohanis kalaak nae, “Papa! Laꞌe esa ai mete-mita hatahori esa pake Papa naden fo ana husi nitu. De ai kaꞌin, nahuu ndia naa, ta ita hatahorin.”
MAR 9:39 Tehuu Yesus naselu nae, “Weeh! Ei boso kaꞌin. Huu see ndia pake Au nadeng fo tao tanda heran, na, ana ta kokolak tao naboboo Au nadeng.
MAR 9:40 Mete ma ana ta lena-laba ita, sosoa-ndandaan nae, ndia naa oo ita hatahorin boe.
MAR 9:41 Masaneda matalolole! Mete ma hambu hatahori bubuluk nae, ei tungga Karistus, boe ma ana tulu-fali ei, na, neu ko Manetualain ta lilii heni hatahori naa sosota-mamanggun. Leo mae ana fee ei minu kada oe hiek nggalaas esa oo, Manetualain ta lilii hatahori naa boe.”
MAR 9:42 Basa boe ma Yesus nafada sara bali nae, “Mete ma hambu hatahori tao kakana ana esa leo-laꞌo tao salak, losa kakanak naa ta namehere neu Au bali, na, besa-besa, ee! Malole lenak haꞌi batu moꞌok esa, fuli neu hatahori naa boliin, fo feen tena neni tasi demak dale neu.
MAR 9:43 Mete ma o tao salak munik o limam, na, tete henin leo! Malole lenak o maso nusa tetuk do inggu temak muu, muni kada lima seserik lena heni ara nggari o muni aꞌi mbila ta kala matek muu, muni o limam dua sara.
MAR 9:44 [Aꞌi mbila ta kala matek naa, memak mamana doidosok. Ulek kara marai naa ta hahae tao kaboo mburuk.]
MAR 9:45 Mete ma o tao salak munik o eim, na, tete henin leo! Malole lenak o maso nusa tetuk do inggu temak muu, muni kada ei seserik lena heni ara nggari o muni aꞌi mbila ta kala matek muu, muni o eim dua sara.
MAR 9:46 [Aꞌi mbila ta kala matek naa, memak mamana doidosok. Ulek kara marai naa ta hahae tao kaboo mburuk.]
MAR 9:47 Mete ma o tao salak munik o matam, na, edo henin leo! Malole lenak o maso nusa tetuk do inggu temak muu, muni kada mata seserik lena heni ara nggari o muni aꞌi mbila ta kala matek muu, muni o matam dua sara.
MAR 9:48 ‘Aꞌi mbila ta kala matek naa, memak mamana doidosok. Ulek kara marai naa ta hahae tao kaboo mburuk.’
MAR 9:49 Au nenoring ia, memak berak ka. De see ndia nau tungga Au, na, ana muste nakatataka tungga nakandoo, sama leo mbaa fo hatahori mamasin, ma ara seꞌin neu aꞌi, mita fo mbaa naa nakai nala dook ka.
MAR 9:50 Masik naa, malole. Ita paken fo tao nalada nanaꞌak kara. Tehuu mete ma masik naa mami ena, na, nenenin hata bali? Ita nggari henin leo. Ei oo muste dadi sama leo masik boe, fo leo-laꞌo no masue-laik mia basa hatahori lalaꞌen. De ei hahae mareresi bali mae, see ndia hatahori moꞌo-inahuuk, do see ndia kadiꞌik!”
MAR 10:1 Basa boe ma Yesus asa reni profensi Yudea reu, ma mamanak laen manai lee Yarden boboan dulu. Yesus nai mamanak bee a mesan, hatahori noꞌuk kara mai rakarumbu ralan. De Yesus nanori sara sama leo nasiꞌen.
MAR 10:2 Hambu hatahori Farisi hida mai fo rae tao rakatudak kana. Ara ratanen rae, “Tungga ita anggaman hohoro-lalanen, mete ma touk esa sao ena, na, ana bole namaketu no saon, do taa?”
MAR 10:3 Yesus naselu nae, “Masaneda dei! Hohoro-lalanek laꞌe-neu sao holu-ndaek fo baꞌi Musa tao elan fee ita nae leo bee?”
MAR 10:4 Ara raselu rae, “Baꞌi Musa hohoro-lalanen nae, hatahorir bole ramaketu, sadi fee susura nemeketuk neu sao inan dei.”
MAR 10:5 Yesus bala nae, “Weeh! Nenene, ee! Huu ei langga batum mara dei, de baꞌi Musa surak talo naa!
MAR 10:6 Boso lilii-ndondou tutui makasososak, neu lelek Manetulain adu lalai no dae-inak! Neni surak nae, ‘Manetualain adu hatahori dae-bafok, touk no inak.
MAR 10:7 Huu naa de touk muste laꞌo ela ndia inan ma aman, fo neu leo-laꞌo dalek esa no saon
MAR 10:8 huu dua sara dadi reu esa ena.’
MAR 10:9 Mete ma Manetualain mesa kana ndia adu nala dua sara dadi reu esa ena, na, hatahori dae-bafok boso mabingga-baꞌe sara bali!”
MAR 10:10 Basa boe ma Yesus no kada ana nunin nara maso reni uma esa dale reu. Numa naa, ara ratane Yesus nenorin bebeik kara ia.
MAR 10:11 Yesus naselu nae, “See ndia namaketu no sao inan, de ana sao seluk, na, ana hohongge-lelena naa ena!
MAR 10:12 Sao inak oo leo naak boe! Mete ma ana namaketu no saon, de ana sao seluk, na, ana oo hohongge-lelena naa boe!”
MAR 10:13 Faik esa, hambu hatahorir roo sira anan nara reni Yesus reu, fo roke-hule Ana ndae liman ma kokolak fee babaꞌe-babatik neu sara. Tehuu Yesus ana nunin nara rahara berak reu hatahorir raa.
MAR 10:14 Yesus mete-nita talo naa, boe ma Ana namanasa ana nunin nara nae, “Ela kakana anar raa reni Au mai! Boso mamanggengge sara! Huu hatahori mana sama leo kakana anar iar, ndia Manetualain hatahorin.
MAR 10:15 Ei masaneda matalolole! See ndia nau mai nasare Manetualain, na, muste dalen hii nalan seli neun, sama leo kakana anar dalen nara hii ralan seli neu sira inan ma aman. Mete ma ta leo naak, na, ara ta randaa dadi reu Manetualain hatahorin.”
MAR 10:16 Basa boe ma Yesus holu nala kakana anar raa, ma Ana ndae liman neu esa-esak langgan, de Ana fee babaꞌe-babatik neu sara.
MAR 10:17 Neu Yesus asa sangga laꞌo, boe ma hatahori kamasuꞌik esa nalaik mai fo nae natonggo no Yesus. Ana sendek luu-langgan nai Yesus matan, de natane nae, “Papa Meser mana hambu hada-horomatak. Au ae atane baꞌu anak. Talo ia Papa. Au muste tao talo bee fo au bubuluk no tetuk ae, au bisa maso nusa tetuk do inggu temak fo au asoda akandoo ua Manetualain?”
MAR 10:18 Yesus naselu nae, “Tao hata de o moke Au mae ‘mana hambu hada-horomatak’? Ta hambu hatahori esa boe na mana hambu hada-horomatak, kada Manetualain mesa kana.
MAR 10:19 O bubuluk Manetualain parendan numa lele uluk mai ena nae, ‘Boso makanisa hatahori; Boso hohongge-lelena; Boso mamanaꞌo; Boso dadi sakasii pepeko-lelekok; Boso pakanaꞌe mala hatahori hatan; Ma fee hada-horomatak neu o inam ma o amam.’ ”
MAR 10:20 Hatahori naa naselu nae, “Tebe, Papa Meser! Mulai numa muri-sorung mai, au tungga basa parenda raa ena.”
MAR 10:21 Yesus dalen kasian neu hatahori naa. Boe ma Ana nae, “Tebe! Tehuu bei ela matak esa bali. Hatematak ia o fali muu ngga leo fo seꞌo heni basa o hata-hetom lalaꞌen. Doin nara, o muu babaꞌe fee neu hatahori mana susak kara. Basa naa, o fali mai fo tungga Au leo. Dei fo Manetualain bala fee o hata-heto manahetak nai nusa tetuk do inggu temak.”
MAR 10:22 Hatahori naa namanene nala Yesus kokolan talo naa, boe ma dalen nakalulutu. De ana fali neu ngga no dalen susa nalan seli, nahuu suꞌin noꞌun seli.
MAR 10:23 Boe ma Yesus mete neu-mai, de kokolak neu ana nunin nara nae, “Nenene, ee! Hatahori kamasuꞌik memak susa laꞌe esak kana maso nusa tetuk do inggu temak!”
MAR 10:24 Ana nunin nara ramanene rala Yesus kokolak talo naa, boe ma ara panggananaa. Boe ma Yesus kokolak seluk bali nae, “Nenene matalolole! Memak manggataꞌan seli, mete ma nau dadi neu Manetualain hatahorin. Boso duduꞌa mae, muda hiek.
MAR 10:25 Hatahori kamasuꞌik maso nusa tetuk do inggu temak fo dadi neu Manetualain hatahorin, naa manggataꞌan sama leo banda onta moꞌok esa maso neni lalaen neu nesik ndandauk bolon.”
MAR 10:26 Yesus kokolan naa, tao nala basa sara boe panggananaa. Boe ma ara ratatane aok rae, “Mete ma tebe leo naak, na, see ndia bisa hambu nala masoi-masodak, ee?”
MAR 10:27 Yesus mete sara esa-esak, boe ma Ana nae, “Soa-neu hatahori dae-bafok memak ta bisa dadi. Tehuu boso lilii-ndondou: soa-neu Manetualain basan bisa dadi!”
MAR 10:28 Basa boe ma Petrus soꞌuk kokolak nae, “Papa. Ai laꞌo ela basa ai hata-heton lalaꞌen, fo tungga Papa. Tehuu ai hambu hata?”
MAR 10:29 Yesus nae, “Au nau afada ei ae leo ia: hatahori mana tungga Au, fo laꞌo ela ndia ina-aman, kaꞌa-fadin, anan nara, osi-lutun, ue-osan, ma basa uma oe-isin lalaꞌen, fo neu tui-bengga Manetualain Hara Lii Malolen sudi nai bee, neu ko ana simbo falik losa lipa laꞌe natun esa. Basa hata fo ana laꞌo elak kara raa, neu ko ana simbo falik manahetak. Ma neu ko ana oo hambu tuni-ndenik, nahuu ana tungga Au. Tehuu neu dae-bafok fai mateꞌen, neu ko ana nasoda nakandoo no Manetualain. Naa, babalan ndian ena.
MAR 10:31 Masaneda, ee! Hatahori fo mana tao aon leo hatahori moꞌo-inahuuk, tungga Manetualain duduꞌan, neu ko ana dadi neu hatahori kadiꞌin lenak. Tehuu hatahori fo mana tao aon leo hatahori kadiꞌik, tungga Manetualain duduꞌan, neu ko ana dadi neu hatahori moꞌo-inahuuk.”
MAR 10:32 Faik naa, Yesus asa laꞌo reni Yerusalem reu, Ana nesik mata. Ndia ana nuni kasalahunu duan nara ro hatahori laen nara laꞌok tunggan. Ara bei rasaneda Ndia kokolan fai maneuk kara nae, hatahori nae tao nisan nai Yerusalem. De ara pangganaa ma ramataꞌu. Yesus namanene nala naa, boe ma Ana nanggou nala ana nunin nara mesa kasa, de nafada seluk bali hata fo hatahori nae tao neun nai Yerusalem.
MAR 10:33 Ana nafada nae, “Ei nenene, ee! Hatematak ia ita teni Yerusalem teu. Au ia, Hatahori Dae-bafo Isi-isik. Tehuu nai naa ara seꞌo heni Au, neu malangga anggama malanggan nara ma meser anggamar. Basa de ara raketu hukun mates neu Au. Boe ma ara fee heni Au uni hatahori laen fo ta mana malela Manetualain uu.
MAR 10:34 Boe ma ara rakamamaek Au. Ara pura ambe neu Au. Ara poko-femba rakalulutu Au ao-mbaang. Basa dei fo ara tao risa Au. Memak Au mate tetebes. Tehuu neu bei-nesan, Au asoda fali numa mamates mai.”
MAR 10:35 Basa boe ma, Yakobis ma Yohanis, ndia Sabadeus anan nara reni Yesus reu. Ara rafada rae, “Papa Meser! Ai parluu Papa.”
MAR 10:36 Yesus natane sara nae, “Ei parluu hata?”
MAR 10:37 Ara raselu rae, “Talo ia, Papa! Neu ko mete ma Papa nangggatuuk toꞌu parenda ena, na, ai moke-hule Papa fo fee ai kadera nenggetuuk, esa neu Papa boboa konan, ma esa neu Papa boboa kiin, fo ai oo toꞌu parenda boe.”
MAR 10:38 Yesus naselu nae, “Ei dua ngga ia ta bubuluk hata fo ei mokek. Au ia, neu ko hambu doidosok noꞌuk ka. De talo bee? Ei duꞌa mae, ei oo bisa mabeꞌi lemba-masaa doidosok naa sama-sama mia Au losa mate boe, do?”
MAR 10:39 Ara raselu rae, “Ai bisa, Papa!” Yesus bala sara bali nae, “Memak, neu ko ei oo lemba-masaa doidosok naa sama leo Au boe.
MAR 10:40 Tehuu see ndia nanggatuuk nai Au boboa kiin do Au boboa konan, Au ta ndia aketu naa. Manetualain ndia naena haak fo naketu. Ana naketu memak ena, see ndia nanggatuuk nai mamanak naa.”
MAR 10:41 Neu ana nuni laen nara ramanene rala Yakobis no Yohanis roke talo naa, boe ma ara ramanasa.
MAR 10:42 Basa boe ma Yesus nanggou nala basa sara, de Ana nae, “Talo ia! Ei bubuluk ena, hetu? Hatahori moꞌo-inahuuk fo mana toꞌu parenda nasiꞌe tuni-ndeni rau-inggun nara, losa ara ta bisa rakaundak rala. Ma malangga nusak kara fo ta mana malela Manetualain, ara fee parenda lena-lenak, losa rau-inggun nara ta bisa botik rala langgan nara.
MAR 10:43 Tehuu ei ta bole tao talo naa! See numa ei mai nau dadi neu hatahori moꞌo-inahuuk, na, ana muste dadi sama leo hatahori neondak fo naono-lalau hatahori laen.
MAR 10:44 Ma see ndia nau dadi neu malanggan, na, ana muste tao aon leo ata-dato.
MAR 10:45 Au, Hatahori Dae-bafo Isi-isik ia ta mai fo hatahorir raono-lalau Au. Tehuu Au mai fo aono-lalau hatahori noꞌuk ka. Au mai fo fee Au sodang katematuan, fo tefa-soi ala hatahori noꞌuk ruma sala-singgon nara mai.”
MAR 10:46 Yesus no ana nunin nara ma hatahori noꞌun seli losa kota Yeriko. Neu ara rae laꞌo rakandoo, te hatahori pokek esa nanggatuuk fo hule-hule numa dalak tatain. Naden Bartimeos, ndia papa Timeos anan.
MAR 10:47 Neu ana namanene nae, mana laꞌok nesik naa, ndia Yesus numa Nasaret mai, boe ma ana bolu nahere nae, “Yesus, Dauk tititi-nonosin, ee! Ai mahani a neu Papa dook ka ena. Kasian neu au dei!”
MAR 10:48 Hatahorir ramanene ana bolu talo naa, boe ma ara kaꞌin rae, “Weeh! Nenee!” Tehuu ana boe kii-bolu nahere nae, “Yesus! Dauk tititi-nonosin, ee! Kasian neu au dei!”
MAR 10:49 Boe ma Yesus nambarii taak, de nae, “Mian mai dei!” Boe ma ara reu, de rafadan rae, “O nenee leo! Papa Meser noke o. Mai leo!”
MAR 10:50 Bartimeos namanene talo naa, boe ma ana piru heni lafan, de nambadeik lai-laik neu natonggo no Yesus.
MAR 10:51 Yesus natane nae, “O hii hata?” Hatahori pokek naa naselu nae, “Papa, ee! Au oke-hule fo au bisa mete-ita.”
MAR 10:52 Yesus nafada seluk kana bali nae, “Huu o mamahere mae, Au bisa tao ahai o, de hatematak ia o hai ena. Muu leo!” Boe ma Bartimeos matan mete-nita tutik kana leo. Basa boe ma ana laꞌo tungga neu nafuli Yesus.
MAR 11:1 Neu ara sangga deka kota Yerusalem, boe ma ara losa nggorok dua, ndia Betfage ma Betania, rai letek Setun tatain. Numa naa, Yesus asa hahae taak. Boe ma Ana nadenu ana nunin dua laꞌo rakahuluk.
MAR 11:2 Ana helu sara nae, “Ei dua ngga makahuluk, meni nggorok naa miu. Mete ma ei maso, neu ko ei mete-mita banda keledei esa anan neni paꞌak nai naa. Hatahorir bei ta saꞌe ritan. Miu sefi heni talin fo leꞌa menin ia mai.
MAR 11:3 Tehuu mete ma hambu hatahori natane ei nae, ‘Tao hata de ei sefi meni keledei naa?’ Na, ei maselun mae, ‘Ai Lamatuan nae paken. Mete ma Ana pake basa, neu ko Ana haitua fali memak kana.’ ”
MAR 11:4 Boe ma hatahori kaduak kara raa reu, de mete-rita keledei naa anan neni paꞌak nai uma esa bebelan, nai dalak tatain. Boe ma ara sefi heni talin, de leꞌa renin.
MAR 11:5 Tehuu hatahorir fo mana rambariik ruma naa ratane rae, “Weeh! Tao hata de ei sefi meni hatahori keledein?”
MAR 11:6 Boe ma ara raselu rae, “Ai Lamatuan nae paken. Mete ma Ana pake basa, neu ko ai meni fali memak kana!” Boe ma hatahorir raa ela sara leꞌa reni keledei naa.
MAR 11:7 Ara leꞌa renin neni Yesus neu. Boe ma ara bela lafan nara neu keledei naa lain, de Yesus saꞌen.
MAR 11:8 Neu ara sangga maso kota dale reu, boe ma hambu hatahori noꞌuk ka haꞌi rala lafan nara ma ndae arun nara, de ara tao sara reu dalak lain. Hambu ketuk reu tati rala mbua sina doon nara numa dalak tatain fo ara nggenggela sara reu dalak taladan. No dalak naa, ara tao tanda rae, sira soru Lamatuak Yesus no hada-horomatak. Sama leo ara rasiꞌe soru hatahori moꞌo-inahuuk kara.
MAR 11:9 Boe ma hambu hatahori ketuk laꞌok rakahuluk resik Yesus matan, ma ketuk laꞌok tungga dean. Ara mulai eki rae, “Hosana! Ita koa-kio Manetualain! Manetualain fee babaꞌe-babatik neu hatahori fo ana mai pake Manetualain naden, huu Manetualain nadenun mai ena!
MAR 11:10 Hosana! Ita koa-kio Manetualain! Huu Manetualain nae nambadedeik falik mane Dauk parendan! Hosana! Ita koa-kio Manetualain! Huu Manetualain nanggatuuk toꞌu parenda ena nai lalai fo demak mateꞌen!”
MAR 11:11 Yesus asa losa kota dale, boe ma ara maso reni Manetualain Uma Huhule-haradoi Ina-huun bebelan reu. Boe ma Yesus mete natalolole ndule basa uma naa nanalan. Tehuu sangga makiuk ena, de ara fali reni nggoro Betania reu.
MAR 11:12 Neu beꞌe-mai huhua anan, boe ma ara kalua numa Betania mai, de ara maso fali reni kota Yerusalem reu. Tehuu neu ara bei laꞌok numa dalak, boe ma Yesus nameda ndoe.
MAR 11:13 Ana mete-nita ai huuk esa numa dalak tatain. Hatahorir rasiꞌe raꞌa boan. De Yesus laꞌok deka-deka neni ai huuk naa neu fo nae mete sudik kaboak, do taa. Neu Ana losa ai huuk naa, Ana ta mete-nita boak esa boe na, Ana mete-nita kada ai huuk naa doon. Huu memak fai neboan bei ta losa.
MAR 11:14 Boe ma Yesus parenda ai huuk naa nae, “Huu o ta bisa fee o boan mai Au, de mulai numa hatematak ia neu o ta bisa fee o boan neu hatahori laen ena!” Ana nunin nara ramanene, Ana nahara berak talo naa.
MAR 11:15 Basa boe ma ara laꞌok rakandoo losa Yerusalem, de Yesus maso seluk neni Manetualain Uma Huhule-haradoi Ina-huun neu. Numa Uma Huhule-haradoi Ina-huuk naa bebelan, hatahori taon dadi neu pasar, fo ara raseseꞌo mbui lunda sinar, ndia hatahori paken dadi neu tunu-hotuk soa-neu hule-haradoik. Yesus mete-nita talo naa, boe ma Ana neu husi-mbuu kalua heni sara. Ana fae nggari heni basa meir fo ara pake tuka doik, ma fae nalengga heni basa banggur fo ara pake raseseꞌo mbuik kara.
MAR 11:16 Boe ma Ana kaꞌi-ore basa hatohori fo ta bole reni bua-baꞌun nara fo laꞌok tepa tungga Uma naa bebelan bali.
MAR 11:17 Boe ma Ana nanori sara nae, “Ei bubuluk memak ena hata fo Manetualain mana toꞌu dedeꞌan nara surak ena rae, ‘Au ambadedeik Au Umang ia fo basa hatahori nusa-nusak kara mai hule-haradoi nai ia.’ Tehuu ei tao Uma ia dadi neu naꞌo manu-meor mamana nekebuan!”
MAR 11:18 Neu malangga anggama Yahudir malanggan nara ma meser anggamar ramanene Yesus tao talo naa ena, boe ma ara rasakele neun. De ara mulai sangga dalak fo rae tao risan. Tehuu ara oo ramahia boe, nahuu hatahori noꞌuk ka hii ralan seli neu Ndia nenorin.
MAR 11:19 Neu ledo mulai tesa ena, boe ma Yesus asa kalua numa kota Yerusalem mai, fo fali reu sunggu nai nggorok Betania.
MAR 11:20 Neu beꞌe-mai huhua anan, boe ma ara fali reni Yerusalem reu bali. Neu ara bei laꞌok numa dalak, ara resik ai huuk naa, fo afik ka Yesus kokolak neun. Ana nunin nara heran bali-bali, nahuu ai huuk naa mate namatuu losa okan nara ena. Boe ma Petrus nasaneda Yesus kokolan afik ka naa. Basa boe ma ana nafada nae, “Papa! Mete sudik! Ai huuk naa fo afik ka Papa nakatoon naa, maten ena!”
MAR 11:22 Boe ma Yesus naselu nae, “Memak tetebes! Sadi ei oo mamahere tebe-tebe neu Manetualain leo naak boe.
MAR 11:23 Mete ma ei mamahere tebe-tebe, na, ei bisa madenu letek esa fo lali neni tasi neu. Dei fo Manetualain lali heni letek naa, sadi ei nemeheherem boso bibiak! Ei muste mamahere tebe-tebe neu Manetualain.
MAR 11:24 Boso lilii-ndondou, ee! Sadi ei mamahere tebe-tebe mae, Manetualain bisa nabeꞌi fee hata fo ei mokek, neu ko Ana taon fee ei!
MAR 11:25 Tehuu mete ma hambu hatahori esa hule-haradoi, naa te dalen ta neulauk no hatahori laen, na, ana muste malole fali no hatahori naa dei. Talo naa dei fo ei Amam manai nusa tetuk do inggu temak, koka heni ei sala-singgom.
MAR 11:26 [Mete ma hambu numa ei mai bei nambeda dalek, ma ta nau fee ambon neu hatahori, neu ko ei Amam manai nusa tetuk do inggu temak oo ta nau lilii heni ei sala-singgom mara boe.”]
MAR 11:27 Basa boe ma ara laꞌo rakandoo. Losa Yerusalem, boe ma ara maso reni Manetualain Uma Huhule-haradoi Ina-huun reu bali. Neu ara maso losa Uma bebelan, boe ma malangga anggama Yahudi malanggan nara, meser anggamar, ma lasi-lasi hadak Yahudir mai,
MAR 11:28 fo ratane Yesus rae, “See ndia nadenu O mai tao nemuek numa ia ndia afik ka? See ndia fee O haak?”
MAR 11:29 Tehuu Yesus bubuluk ara sangga dalak fo rae rakatutudak Ndia. Boe ma Ana bala nae, “Au oo ae atane ei boe. Ei maselu Au dei, dei fo Au aselu ei.
MAR 11:30 Au ae atane talo ia: ei basa ngga malela Yohanis, Mana Saranik naa, hetu? See ndia feen haak fo ana sarani hatahorir? Manetualain, do hatahori dae-bafok?”
MAR 11:31 Boe ma ara duduꞌa reu-mai, ma rakokola aok rae, “Awii! Ikek nala ita ia ena, ma! Huu mete ma ita taselu tae, ‘Manetualain ndia feen haak’, neu ko Ana bala nae, ‘Mete ma talo naa, tao hata de ei ta mamahere Yohanis?’
MAR 11:32 Ma ita oo ta bisa tae, ‘Hatahori dae-bafok ndia nadenun.’ Neu ko basa hatahori ramue, nahuu ara ramahere rae, Yohanis naa, Manetualain mana toꞌu dedeꞌan.”
MAR 11:33 De ara raselu rae, “Ai ta bubuluk!” Boe ma Yesus naselu seluk bali nae, “Mete ma talo naa, na, Au oo ta nau afada boe ae, see ndia nadenu Au.”
MAR 12:1 Basa boe ma Yesus nafada seluk bali neu malangga anggama Yahudi malanggan nara, meser anggamar, ma lasi-lasi hadak Yahudir. Ana pake lololek nae, “Hatahori esa neu tao osi neu daen faa, fo sangga sele ai anggor. Basa de ana mbaꞌa eko-feon. Ma ana tao baak fo nae natanee anggor oen. Ana oo nambaririik mamana nenea demak esa boe. Basa de ana fee osi naa neu hatahori laen fo ara raue ma rabaꞌe buna-boan nara roon. Boe ma ana laꞌo neni nusa feꞌek neu.
MAR 12:2 Losa fai ketu anggor boan, boe ma tenu daek naa nadenu ndia hatahori mana maue-osan esa neni hatahori mana maue osir raa neu, fo noke ndia babaꞌen.
MAR 12:3 Tehuu neu ana losa, mana maue osir raa humu ralan, de ara popokon. Boe ma ara radenun fali no lima rouk.
MAR 12:4 Basa boe ma tenu daek nadenu ndia hatahori mana maue-osan esa bali. Tehuu mana maue osir raa popoko hatahori naa langgan losa hinak kara. Boe ma ara rakamamaek kana ma ara husi henin.
MAR 12:5 Boe ma tenu daek naa nadenu seluk ndia hatahori mana maue-osan laen bali. Tehuu ara hala risan. Leo mae ara tao talo bee oo, tenu daek naa kada nadenu ndia hatahori mana maue-osan neu nakandoo boe. Tehuu mana maue osir raa popoko ketuk, ma hala risa ketuk.
MAR 12:6 Hatematak ia ela kada hatahori esa, ndia tenu daek ana tou kisen, fo ana susuen mateꞌen. Huu ana ta hambu dalak seluk ena, de nadenu kada kanak naa neu. Ana duꞌa nae, ‘Mete ma au adenu au ana heli-heling ndia neu, neu ko ara simbon no malole, ma ara ramanene neun.’
MAR 12:7 De ana nadenu anan neu. Tehuu mana maue osir raa mete-rita kanak naa mai, boe ma ara rakokola aok rae, ‘Woi! Ei mete dei! Tou lasik nadenu ana heli-helin mai ena! Mete ma tou lasik maten, na, kanak ia ndia simbo nala basa pusakar raa lalaꞌen. Mai fo ita hala tisan, mita fo ita laꞌe tala ndia pusakan ia.’
MAR 12:8 Boe ma ara rame-rame humu ralan, de ara hala risan. Basa naa ara koꞌo rala ao-mbaa mamaten, de ara nggarin neni osi dea neu. Lololek ia losa kada naa.”
MAR 12:9 Basa boe ma Yesus natane hatahori moꞌo-inahuuk kara nae, “Tungga ei hahambum mara, na, tenu daek tao mana maue osir raa talo bee? Tungga Au, na, neu ko tenu daek mai fo hala nisa basa mana maue osir raa. Basa naa, ana fee osi naa neu hatahori laen fo naue ma rabaꞌe buna-boan.
MAR 12:10 Ita basa ngga lees tita Manetualain Susura Malalaon ena nae, ‘Hambu batu esa tukan nara nggari henin ena. Tehuu hatematak ia, batu naa dadi neu batu netehuuk ena.
MAR 12:11 Manetualain mesa kana ndia here nalan, de nanggatutuuk batu naa. Huu naa de ita mete-titan lolen seli!’ ”
MAR 12:12 Hatahori moꞌo-inahuuk kara raa ralela ralak kana rae, Yesus pake lololek naa ndee laꞌe sira. Ara tetuk sama leo mana maue osir bebeik kara raa. Basa boe ma ara mulai sangga dalak fo rae humu Yesus. Tehuu ara ramahia hatahori noꞌuk kara fo mana hii Yesus nenorin. De ara laꞌo ela Yesus leo.
MAR 12:13 Basa boe ma hatahori Yahudir moꞌo-inahuun nara radenu hatahori Farisi hida ro Herodes partein hatahorin hida bali reu rakaseseluk dedeꞌak ro Yesus fo ara rae iken.
MAR 12:14 Ara mai de rakaseseluk dedeꞌak ro Yesus rae, “Papa Meser! Ai basa ngga bubuluk Papa dalen ndoos, ma ta mana nalela pepeke-lelekok. Papa kada mete hatahori dalen. Papa oo nafada Manetualain hihii-nanaun no manggaledok boe, nahuu Papa ta mana mete matak. De hatematak ia, ai nau matane dedeꞌak esa. Tungga ita anggama Yahudi hohoro-lalanen, ndondoon naa ita bae bea neu man-parenda Roma mane ina-huun, do taa?”
MAR 12:15 Tehuu Yesus bubuluk nae, ara rae ike Ndia naa ena fo Ndia kokolak laban man-parenda Roma. Boe ma Yesus naselu no nahere haran nae, “Tao hata de ei nau ike Au no dedeꞌak naa! Matudu sudik Au doi fulak esa dei!”
MAR 12:16 Boe ma ara loo fee Yesus doi fulak esa. Yesus haꞌi nalan, de ana namumulan. Basa boe ma Ana natane sara nae, “Nggambar ia, see matan? Ma ia see naden?” Boe ma ara raselu rae, “Naa, man-parenda Roma mane ina-huun!”
MAR 12:17 Boe ma Yesus nae, “Mete ma leo naa, na, ei miu fee man-parenda hata fo man-parenda haak. Ma fee Manetualain hata fo Manetualain haak.” Ara ramanene rala Yesus naselu talo naa, boe ma basa sara heran bali-bali, huu Ana nafada ndaa, na. Huu naa de ara ta bisa ike rala sana.
MAR 12:18 Hambu partei anggama laen esa, fo hatahorir roken rae, partei Saduki. Ara fee nenorik rae, hatahori mates ta bisa nasoda fali numa mamaten mai. Laꞌe esa, hambu hatahori Saduki hida oo, mai fo rae ike Yesus boe. Ara kokolak ro Yesus rae,
MAR 12:19 “Papa Meser! Baꞌi Musa surak ela fee ita dala-hadak ia nae: Mete ma touk esa mate laꞌo ela saon, ma anak taa, na, touk naa fadin muste sao nala ina falu naa, mita fo ana fee tititi-nonosik soa-neu kaꞌan mana matek naa ena.
MAR 12:20 Memak Musa fee nenorik talo naa. Tehuu ai nau matane talo ia: hambu touk hitu kaꞌa-fadik kara. Uluk sao nakahuluk, boe ma maten, tehuu anak taa.
MAR 12:21 Boe ma fadik mana tunggan, sao nasafali ina falu naa. Ta dook ka, ana oo mate boe, ma anak taa. Leo naak oo no fadik katelun boe. Ana sao nala ina falu naa, tehuu ana mate, ma anak taa.
MAR 12:22 Talo naa nakandoo losa fadi muri anak oo, maten boe. Basa boe ma ina falu naa maten.
MAR 12:23 Dadi hatematak ia, ai nau matane talo ia: inak naa sao nita no touk hitu ena. Neu ko neu dae-bafok fai mateꞌen, Manetualain nasoda falik hatahori mates sara, inak naa dadi neu see saon numa touk kahituk kara mai, ou?”
MAR 12:24 Boe ma Yesus naselu nae, “Mete ma ei matane talo naa, sosoan-ndandaan nae, ei ta malela tebe-tebe Manetualain Susura Malalaon isin. Ma ei oo ta malela Manetualain koasan boe. Dadi eir ia sala tebe-tebe ena!
MAR 12:25 Nenene, ee! Talo ia: ta hambu dedeꞌa sasaok nai nusa tetuk do inggu temak. Basa hatahori mates lalaꞌen fo Manetualain tao nasoda falik kasa, ta hambu esa sao bali. Leo naak oo, Manetualain atan nara marai nusa tetuk do inggu temak ta sao boe.
MAR 12:26 Ma Au oo nau kokolak laꞌe-neu hatahori mates bisa nasoda fali numa mamaten mai, do taa boe. Baꞌi Musa surak laꞌe-neu ai huu anak fo aꞌi naꞌan, tehuu ta kade sana. Ei masaneda tutuik naa, do taa? Neu aꞌi mbila numa ai huuk naa, Manetualain nafada baꞌi Musa nae, ‘Au ia, Manetualain numa o baꞌim mara mai, sira baꞌi Abraham, baꞌi Isak, ma baꞌi Yakob. Basa sara rakaluku-rakatele rakandoo reu Au losa hatematak ia.’
MAR 12:27 De ita bubuluk tae, ita baꞌin nara raa mates sara dook ka ena. Tehuu Manetualain nafada ena nae, Ndia bei dadi neu sira Lamatuan, huu naa de ita bubuluk tae, ara rasoda fali ena. Dadi leo mae hatahorir mate ena oo, ara rasoda fali numa mamates mai boe. Memak hatahori masodak ndia rakaluku-rakatele neu Manetualain, ta hatahori mates, hetu? Dadi mete ma ei toꞌu makandoo nenorik naa mae, hatahori mates ta nasoda fali numa mamaten mai, memak ei sala malan seli naa ena!”
MAR 12:28 Faik naa, neu Yesus nanggatuuk kola-kola no partei Saduki hatahorin nara, hambu meser anggama esa tungga namanenen. Meser anggama naa duꞌa nae, Yesus naselu hatahori Sadukir netanen nara no malole ena. Boe ma ana natane Yesus nae, “Papa! Au nau atane talo ia: ita dala-hadan hohoro-lalanen, ma anggama parendan, noꞌun seli. Numa basa parendar fo maruma baꞌi Musa mai naa, bee ndia nenenin lenak mateꞌen?”
MAR 12:29 Yesus naselu nae, “Parenda fo nenenin lenak mateꞌen nai Manetualain Susura Malalaon dale naa nae talo ia: ‘Basa hatahorir marai Israel! Ei nenene matalolole! Manetualain naa, memak ita Lamatuan, ma ita Mana Parenda Mana Koasan. Ta hambu seluk laen, kada Ndia mesa kana ena.
MAR 12:30 De ei muste sue-lai neun lena heni basa-basan. Huu naa de ei muste hii malan seli neun, malela Ndia, ma maue-osa fafandek lima-eim mara fo tungga Ndia hihii-nanaun.’
MAR 12:31 Ma parenda kaduan nae talo ia: ‘O muste sue hatahori laen nara, sama leo o sue o ao heli-helim.’ Parenda kaduak kara ia nenenin lenak mateꞌen. Ta hambu parenda laen bali fo nenenin lena heni parenda kaduak kara ia.”
MAR 12:32 Basa boe ma meser anggama naa kokolak seluk no Yesus nae, “Memak Papa kokolan naa, tetebes. Manetualain dadi neu ita Malangga Ina-huun, ma ta hambu Lamatuak laen ena.
MAR 12:33 Ita muste sue-lai Manetualain lena heni basa-basan, losa ita hii talan seli neun, ma ita talela Ndia, ma taue-osa fafandek ita lima-ein nara fo tungga Ndia hihii-nanaun. Ma ita muste sue basa hatahorir sama leo ita sue ita ao-ina heli-helin. Ita tao talo naa, na, Manetualain namahoko nalan seli lena heni ita tungga kada anggama hohoro-lalanen. Naa, lolen lena numa kada ita tao banda tunu-hotuk, do fee bua-baꞌuk laen neu Ndia.”
MAR 12:34 Yesus namanene nala ana naselu talo naa, boe ma Ana duꞌa nae, meser anggama naa nalela no malole ena. Boe ma Yesus nae, “O sangga mae dadi muu Manetualain hatahorin ena.” Basa boe ma ta hambu seluk hatahori laen bali nambarani nakaseseluk dedeꞌak no Yesus, te ta hambu hatahori esa senggi Yesus boe na.
MAR 12:35 Yesus bei nanori hatahorir raa nai Manetualain Uma Huhule-haradoi Ina-huun. Boe ma Yesus natane sara nae, “Tungga ei hahambum, na, talo bee? Meser anggamar fee nenorik rae, Karistus naa, ndia Manetualain here memak kana numa lele uluk mai ena. Tungga sira, na, Ndia kada mane Dauk tititi-nonosin. Tehuu naa, ta ndaa.
MAR 12:36 Lele uluk Manetulain Dula-dale Malalaon pake mane Dauk fo ana surak ena nae, ‘Manetualain nafada au lamatuang ena nae, “Mai fo manggatuuk muu mamana hada-horomatak mateꞌen ia nai Au boboa konang. Neu ko Au tao ala o musum mara losa ara doꞌor mbali O.’ ”
MAR 12:37a Numa naa mai, ita bubuluk tae, mane Dauk mesa kana noke Karistus naa nae, ‘Lamatuak’. Sosoa-ndandaan nae, mete ma hatahorir kokolak rae, Karistus naa, kada mane Dauk tititi-nonosin, na, naa ta bei dai. Ana oo dadi neu mane Dauk Lamatuan boe!”
MAR 12:37b Neu Yesus kokolak talo naa, boe ma hatahori noꞌuk ka hii ralan seli nenene neun.
MAR 12:38 Basa boe ma Yesus nafada neu sara bali nae, “Ei muste besa-besa mia meser anggamar. Ara rasiꞌe laꞌo-laꞌo pake badu naruk roroso losa daer, reu ratonggo ro hatahori noꞌuk kara, mita fo hatahorir mete-rita sara, na, rae, ‘Wee! Sira iar, hatahori moꞌo-inahuuk!’
MAR 12:39 Mete ma ara maso reni uma huhule-haradoik dale reu, do reu raꞌa feta, na, ara soa sangga mamana nenggetuuk neulaun lenak, mita fo hatahori noꞌuk kara mete-rita sara.
MAR 12:40 Tehuu besa-besa! Ara soa pepeko-leleko ina falur fo fonda rala uman nara lalaꞌen. Tehuu nai hatahori noꞌuk kara matan, ara rafuni sira manggaraun ma rambariik hule-haradoi dook ka. Ara nau fo hatahori rae, sira iar, hatahori lolo-laok. Tehuu neu ko Manetualain fee hukun beran lenak neu sara.”
MAR 12:41 Basa boe ma Yesus neu nanggatuuk nasare neni mamana kolete manai Manetualain Uma Huhule-haradoi Ina-huun naa neu. Ana mete-nita hatahorir mai mbeda sira doi koleten nara reni mamanan dale neu. Yesus mete-nita hatahori kamasuꞌik kara oo mai mbeda sira doin noꞌun seli numa naa boe.
MAR 12:42 Boe ma ina falu hata taak esa oo mai tungga hule-haradoi boe. Ana mbeda doik seen dua neni mamanak naa neu. Doik naa belin kadiꞌi anan seli.
MAR 12:43 Boe ma Yesus nggape ana nunin nara, de nae, “Ei mete matalolole ina falu hata taak naa dei. Ana mbeda kada doik seen dua, tehuu ana fee baꞌu lena heni basa hatahorir lalaꞌen ena.
MAR 12:44 Basa hatahori laen nara raa fee kolete numa doi sisan nara mai. Tehuu ina falu ia fee basa ndia doin neu Manetualain.”
MAR 13:1 Basa naa, Yesus no ana nunin nara rae laꞌo ela Uma Huhule-haradoi Ina-huuk. Neu ara kalua, boe ma ana nunin esa dudu Uma Huhule-haradoik naa, ma nae, “Papa, ee! Hena Papa mete sudik ia dei. Uma ia lolen seli! Ara tia-totodo rala batu moꞌon nara neulaun seli!”
MAR 13:2 Boe ma Yesus naselu nae, “Uma ia memak malole! Tehuu ta dook ka bali te ara randefa heni basa batun nara lalaꞌen.”
MAR 13:3 Basa boe ma Yesus asa reni letek Setun reu fo ranggatuuk ruma mamana mana mbali neni Uma Huhule-haradoi Ina-huuk naa neu. Boe ma ana nunin haa mai, de mesa kasa kokolak ro Yesus. Ana nuni kahaak kara raa sira Petrus, Yakobis, Yohanis ma Anderias.
MAR 13:4 Ara ratane rae, “Papa! Hena Papa mafada seluk Papa kokolan bebeik kara ia dei! Neu faik bee fo fain losa? Boe ma tandan nara leo beek?”
MAR 13:5 Boe ma Yesus naselu nae, “Sadi ei manea matalolole! Fo ei boso hambu kedi-irak.
MAR 13:6 Neu ko hambu hatahori mata-matak kara mai fo femba tenden nara rae, ‘Au ia ndia Karistus, fo Manetualain helu-bartaa memak kana numa lele uluk mai.’ Boe ma ara oo kedi-ira rala hatahori noꞌuk ka boe.
MAR 13:7 Mete ma ei mete-mita hatahori ratati, do ei mamanene dedeꞌa anik rae, hambu netatik sudi nai bee, na, hae mamataꞌu. Matak leo naak kara muste dadi rakahuluk, tehuu dae-bafok fai mateꞌen bei ta losa.
MAR 13:8 Neu ko leo esa natati laban leo laen. Nusak esa natati laban nusak laen. Hambu dae nanggenggo nai bee a mesan. Ma fai ndoe-laꞌas oo, ta hohoꞌak sudi selik kana boe! Basa iar dadi reu tanda, sama leo ina kairuk fo nameda hedis sangga nae bonggi.
MAR 13:9 De ei muste manea matalolole! Neu ko ara mai humu rala ei fo leꞌa roo ei meni malangga anggamar uma neketu-neladi dedeꞌan miu. Ma ara popoko ei nai uma huhule-haradoik kara dale. Ma ara paꞌa reni ei, meni hatahori mana toꞌu koasa miu, nahuu ei tungga Au. Tehuu naa oo, ei hambu lelak fo dadi sakasii soa-neu Au.
MAR 13:10 Manetualain hatahorin muste neu nafada nakahuluk Au Tutui Maloleng neu basa leo nai dae-bafok ia, dei fo dae-bafok fai mateꞌen losa.
MAR 13:11 Masaneda, ee! Mete ma ara paꞌa reni ei meni mamana neketu-neladi dedeꞌak miu, na, ei hae mamataꞌu mae, ‘Neu ko au kokolak ae leo bee? Do, Au aselu ae leo bee?’ Mete ma faik naa losa ena, na, ei kokolak leo tungga kada hata fo Manetualain Dula-dale Malalaon nafada neu ei.
MAR 13:12 Nai uma-loo esa dale, mete ma hambu uma isi ruma ramahere neu Au, neu ko ndia toranoo bonggin sangga dalak fo ana tao nisan. Boe ma mete ma anan ndia namahere, na, ama bonggin tao nisan. Mete ma aman no inan sira ramahere neu Au, neu ko sira ana bonggin ndia tao nisa sara.
MAR 13:13 De neu ko hatahorir dalen nara mburuk roo ei, nahuu ei mamahere Au. Tehuu see ndia nakatataka losa babasan, neu ko Manetualain tao nasoi-nasodan.”
MAR 13:14 Yesus kokolak nakandoo nae, “Hatahori esa fo manggaraun nalan seli nae mai. Ana maso neu nambariik nai mamana nelulik manai Manetualain Uma Huhule-haradoi Ina-huun, naa te ana ta nandaa neu naa, losa ana tao nunute mamanak naa. Huu naa de Manetualain nasadea ela mamanak naa. Mete ma ei mete-mita talo naa ena, na, besa-besa, ee! (See ndia lees ia, na, ana oo muste besa-besa boe). Naa dadi neu tanda nae, fai susa-sonak losa nai lelesu bafan ena. Mete ma mete-mita leo naak ena, na, hatahori manai nusa Yudea malai meni letek miu leo.
MAR 13:15 Ma muste malai lai-lai, mita fo boso hambu susa-sonak. Mete ma ketuk kalua laꞌo ela uma ena, na, boso fali miu haꞌi bua-baꞌum bali.
MAR 13:16 Boe ma see ndia nai osi dale, boso fali neu haꞌi lafa nelusek bali, tehuu malai makandoo leo!
MAR 13:17 Mana kasian lenak ndia ina kairuk, ma inak kara mana rasususu ana mbimbila anan. Ara ta bisa ralai nggafak, na.
MAR 13:18 Dadi malole lenak ei hule-haradoi fo moke dedeꞌa manggarauk naa, boso tuda laꞌe-ndaa fai udan.
MAR 13:19 Faik naa, susa nalan seli! Mulai numa Manetualain nakadadadik dae-bafok losa hatematak ia, hatahorir bei ta mete-rita susa-sonak moꞌok matak leo naak. Ma neu ko hatahorir ta mete-rita seluk susa-sonak matak leo naak bali.
MAR 13:20 Mete ma Manetualain ta tao kekeꞌu faik naa, neu ko ta hambu hatahori esa boe na bisa nakatataka nasoda. Manetualain tao kekeꞌu fai susa-sonak kara raa, nahuu Ana sue-lai Ndia hatahorin fo Ana here nalak ena.
MAR 13:21 Mete ma faik naa losa ena, ei mamanene hatahorir rae, ‘Mete dei! Karistus nai ia!’ Ma hatahori laen bali nae, ‘Karistus nai naa!’ Tehuu ei boso mamanene sara, ee!
MAR 13:22 Neu ko hambu hatahori kalua fo femba tenden nae, ‘Au ia, Karistus!’ Laen bali nae, ‘Au ia, Manetualain mana toꞌu dedeꞌan.’ Neu ko ara tao tanda heran mata-matak kara pake nitu koasan fo pepeko-leleko hatahori. Ara oo soba-soba fo Manetualain hatahorin nara hambu kedi-irak boe.
MAR 13:23 Tehuu Ei muste manea matalolole, ee! Fai susa-sonak kara raa ta bei losa, tehuu Au fee nesenedak memak neu ei, ee!”
MAR 13:24 Boe ma Yesus tuti seluk bali, fo nafada ana nunin nara nae, “Mete ma fai susa-sonak kara raa basan ena, ‘Neu ko ledo dadi makiuk, bulan oo ta nasaꞌa bali ena boe.
MAR 13:25 Nduuk kara bese tuda ruma lalai mai, ma basa koasa marai lalai rapiru-padok.’
MAR 13:26 Basa naa dei fo basa hatahorir mete-rita Au, Hatahori Dae-bafo Isi-isik ia. Neu ko Au mai nai sosoꞌak numa lalai mai. Ma basa hatahorir mete-rita Au koasang, Au manula-manapung lalaꞌen!
MAR 13:27 Boe ma Au parenda Manetualain atan nara manai nusa tetuk do inggu temak fo reu rakabubua basa hatahorir fo Au here alak kara ruma dae-bafok buꞌun haa sara mai, numa ledo toda mai losa ledo tesa; numa kii mai losa kona.”
MAR 13:28 Yesus tuti Ndia kokolan nae, “Au haꞌi lololek numa ai huuk mai. Mete ma doon mulai uni, naa tanda nae, fai hanas deka-deka mai ena.
MAR 13:29 Leo naak oo, mete ma ei mete-mita fai susa-sonak kara mai ena, sama leo Au afada bebeik kara ia ena, naa tanda nae, Au deka-deka mai ena boe.
MAR 13:30 Hatematak ia, nenene matalolole! Numa basa hatahorir mana masodak hatematak ia mai, neu ko hambu ketuk bei ta mate, tehuu fai susa-sonak kara raa mai ena.
MAR 13:31 Leo mae lalai no dae-inak sambu do lalo ena, tehuu Au Dedeꞌa-kokolang ia mahanik seku neu.”
MAR 13:32 Yesus kokolak seluk nae, “Ta hambu hatahori esa boe na bubuluk faik bee do liꞌu hida Au fali mai. Manetualain atan nara marai nusa tetuk do inggu temak oo, ta bubuluk boe. Au mesa ngga oo ta bubuluk boe. Kada Au Amang mesa kana ndia bubuluk.
MAR 13:33 Huu naa de ei muste manea matalolole, nahuu ei ta bubuluk neu faik bee ndia fain losa.
MAR 13:34 Ta dook ka ena te Au laꞌo ela ei, tehuu Au fali mai. Sama leo tenu uma laꞌo ela ndia uman fo neni mamana dook neu. Ana nadenu ndia ana mana maue-osan nara fo rafafaꞌu ralolole uma naa. Ma ana baꞌe esa-esak no uen. Ana parenda neu mana manea lelesu fo nanea no malole, losa ndia fali mai ngga.
MAR 13:35 Ei oo muste manea hatu-leledon boe, nahuu ei ta bubuluk faik bee fo tenu uma fali mai ngga. Fali mai ngga nai ledo bobok do fai baꞌe duak, do leledok, do huhuak, do ledo kamatetuk. Ei ta bubuluk faik bee.
MAR 13:36 Boso losak Ana mai no kaiboik boe ma ana hambu nala ei mana sunggu masanggorok kara.
MAR 13:37 De hata fo Au afada ei ia, Au oo afada basa hatahori laen nara ena boe ae, ‘Ei muste manea matalolole fo soru Au mamaing.’ ” [Lamatuak Yesus kola-kola no ana nunin nara numa letek Setun losa kada naa.]
MAR 14:1 Basa boe ma malangga anggama Yahudir malanggan nara bei sangga dalak fo rae humu Yesus no neneek, fo rae tao risan. Ma ara duduꞌa fo rala harak rae, “Makatataak dei! Ita boso humu Ndia lai-laik, nahuu fai maloler deka-deka ena. Boso losak hatahori noꞌuk kara ramue.” Ara kokolak talo naa, nahuu bei ela faik dua bali, hatahori Yahudir fai malolen nara fo ara raseseik rae, ‘Fai Paska’, ma ‘Fai Feta Roti Ta Pake Laru Taꞌik’. No fai maloler raa, ara rasaneda lele uluk, neu bei-baꞌin nara kalua numa nusa Masir mai.
MAR 14:3 Nai nggoro Betania, hambu hatahori esa nade Simon. Bakahulun hatahorir nunuten, nahuu ana hambu hedi kusta. Tehuu hatematak ia ana hai ena. Faik naa, fai maloler bei ta losa, Yesus asa reu raꞌa-rinu numa Simon uman. Neu ara bei raꞌa-rinu, boe ma inak esa mai natonggo no Yesus. Ana toꞌu boto esa, ara taon numa batu mai. Boto naa isin mina kaboo menik fo belin seli. Inak naa femba tepa boto naa leusain. Boe ma ana mboꞌa nakafafaak koe-koe mina naa neu Yesus langgan, fo dadi tanda ana fee hada-horomatak neu Yesus.
MAR 14:4 Tehuu hambu hatahori laen hida fo tungga raꞌa numa naa boe. Neu ara mete-rita inak naa tao talo naa, boe ma ara ramanasa, de ara rakokola koa aok rae, “Huuh! Ina hata ia, fo ana neu nggari heni hiek mina kaboo menik mabelin seli naa!
MAR 14:5 Malole lenak ana seꞌo mina naa! Fo neu babaꞌe doi noꞌun nara fee hatahori mana tofa-tarak kara! Mina kaboo menik naa belin, sama leo hatahori esa nggadin teuk esa.” De ara rahara berak neun.
MAR 14:6 Tehuu Yesus bala nae, “Ei hae tao makasususak inak ia. Elan numa naa leo! Au amahoko, nahuu ana mboꞌa mina kaboo menik ia neu Au ao-mbaang.
MAR 14:7 Hatahori mana tofa-tarak kara soa roo ei. De ei bisa tulu-fali sara sudi neu faik bee. Tehuu Au, na, ta dook ka te Au ta akabua ua ei ena.
MAR 14:8 Au masodang ta dook ka ena. Ma ina mana mboꞌa mina bebeik kara ia sadia nakahuluk Au ao-mbaang, sama leo ana fee rambe memak neu Au ao-mbaang mamaten.
MAR 14:9 Masaneda matalolole, ee! Nai bee a mesan, Manetualain Tutui Malolen natanggela nai dae-bafok ia, neu ko ara oo tui inak ia malolen boe, mita fo basa hatahorir rasanedan.”
MAR 14:10 Basa boe ma Yesus ana nuni kasalahunu duan nara, esa nade Yudas Iskariot. Ana kalua neu sangga malangga anggama Yahudir malanggan nara fo nae seꞌo heni Yesus neu sara. Ana losa neu sara, boe ma nafada ndia dale ikon.
MAR 14:11 Malangga anggamar ramanene Yudas nae talo naa, boe ma ara ramahoko ralan seli. De ara helun rae, “Mete ma o nau seꞌo Yesus neu ai, na, ai bae.” Boe ma Yudas kalua dea neu, de ana sangga dalak fo nae fee Yesus neu sara.
MAR 14:12 Basa boe ma Yesus ana nunin nara mai ratanen rae, “Papa! Faik ia ita Fai Paska ena. De Papa nau ai miu sadia mamana feta Paska nai bee?” Te faik naa hatahori Yahudir fai malole makasososan. Nai faik naa ara rasiꞌe tunu roti ta pake laru taꞌik, ma ara oo hala bibi lombo boe.
MAR 14:13 Boe ma Yesus nadenu ana nunin dua nae, “Ei dua ngga makahuluk meni kota miu. Nai naa ei matonggo mia touk esa nasaa oe nai nggusi anak esa dale. Ei miu laꞌo tunggan leo.
MAR 14:14 Mete ma ana maso neni uma bee neu, na, ei tungga naa miu. Basa naa, ei mafada tenu uma naa mae, ‘Papa! Ai Papa Mesen noke mamanak esa, fo nae paken neu mamana feta Paska no ana nunin nara.’
MAR 14:15 Neu ko tenu uma naa dudu fee ei kama loak esa nai uma tadak lain. Ana sadia nala kama naa no matetuk ena. Ela kada ei dua ngga miu sadia nanaꞌak nai naa leo.”
MAR 14:16 De dua sara laꞌo reni kota reu. Numa naa ara ratonggo ro basa hata fo Yesus nafada memak neu sara naa ena. Boe ma ara sadia basa-basan fo Yesus asa raꞌa feta Paska nai naa. Basa boe ma dua sara reu roke Yesus asa.
MAR 14:17 Neu ledo mulai tesa ena, boe ma Yesus no ana nuni kasalahunu duan nara reni naa reu.
MAR 14:18 Boe ma basa sara ranggatuuk, de raꞌa-rinu sama-sama. Neu ara raꞌa-rinu, boe ma Yesus kokolak nae, “Ei nenene ee! Hambu hatahori esa numa ei taladam mara mai, neu ko ana seꞌo heni Au neni hatahori laen nara neu.”
MAR 14:19 Ara ramanene rala naa, boe ma dalen nara rameda ta malole. De ara esa-esak ratane Yesus rae, “Hatahori fo Papa nafadak naa, ta ndia au, hetu?”
MAR 14:20 Yesus naselu nae, “Hatahori fo mana sama-sama no Au boro roti neni manggo ia dale neu naa ndia neu ko nae seꞌo heni Au.
MAR 14:21 Masaneda, ee! Au, Hatahori Dae-bafo Isi-isik ia muste mate sama leo neni surak memak nai Manetualain Susura Malalaon dale. Tehuu besa-besa! Hatahori fo mana nae seꞌo heni Au naa, ana ndia lemba-nasaa nala ndia sosoen. Malolen lenak mete ma inan ta bonggi sana!”
MAR 14:22 Neu ara bei raꞌa, boe ma Yesus soꞌu botik roti balok esa, fo noke makasi neu Manetualain. Boe ma Ana fifiꞌi baꞌe roti naa, de Ana loon neu ana nunin nara, ma nafada nae, “Roti ia, Au ao-mbaang. Haꞌi malan fo miꞌa leo!”
MAR 14:23 Basa naa, Ana haꞌi nala nggalaas neni isi oe anggor. Ana oo noke makasi neu Manetualain boe. Basa boe ma Ana loo nggalaas naa neu ana nunin nara fo basa sara rinu.
MAR 14:24 Boe ma Ana nae, “Anggor ia, Au daang. Neu ko titi henin fo tao nasoi-nasoda hatahori noꞌuk ka. Daak ia, dadi bukti fo tasaneda tae, hata fo Manetualain helu-bartaak ena, memak hatematak ia ana dadi ena. Haꞌi malan fo minu leo.
MAR 14:25 Nenene matalolole dei! Mulai numa leꞌodaen ia neu, Au ta inu oe anggor ena. Losa Au anggatuuk parenda sama-sama ua Au Amang manai nusa tetuk do inggu temak, dei fo Au inu bali.”
MAR 14:26 Basa boe ma ara soda sosodak esa fo koa-kio neu Manetualain. Boe ma ara kalua leꞌodaek naa fo reni letek Setun reu.
MAR 14:27 Neu ara bei laꞌok naa, Yesus nafada memak nae, “Neu ko leꞌodaen ia, ei basa ngga malai laꞌo ela Au. Naa sama leo ara surak memak nai Manetualain Susura Malalaon dale nae, ‘Neu ko Manetualain tao nisa mana lolo, de bibi lombon nara ralai sasarak.’
MAR 14:28 Memak Au mate. Ma neu ko mete ma Au asoda fali numa mamates mai ena, na, Au laꞌo akahuluk ei uni profensi Galilea uu.”
MAR 14:29 Boe ma Petrus nasabara nae, “Papa! Leo mae basa hatahori laen nara ralai laꞌo ela Papa oo, au ta alai boe!”
MAR 14:30 Yesus naselu nae, “Peꞌu! Masaneda, ee! Leꞌodaen ia, manu bei ta kokoa laꞌe dua, tehuu o kokolak laꞌe telu ena mae, o ta malela Au!”
MAR 14:31 Tehuu Petrus naselu nahere nae, “Taa, Papa! Mete ma Papa mate, na, au oo mate sama-sama ua Papa boe. Au ta alai laꞌo ela Papa, ma au ta laka ae, ta alela Papa!” Petrus nonoon laen nara oo, esa-esak nae leo naa boe.
MAR 14:32 Basa naa, Yesus asa laꞌok rakandoo losa osi esa nai letek Setun nade ‘Getsemani’. Boe ma Yesus nafada sara nae, “Ei manggatuuk mahani ia, ee. Au nau uu hule-haradoi nai naa.”
MAR 14:33 Tehuu Yesus noke no Petrus, Yakobis ma Yohanis fo ara laꞌok ro Ndia. Mulai numa naa neu, Yesus dalen sona ma ta natetu faa boe na.
MAR 14:34 Yesus nafada sara nae, “Au daleng susa nalan seli! Au ameda nok bali ae mate a ena. Ei manggatuuk manea mai ia dei.”
MAR 14:35 Boe ma Yesus laꞌo nakadodook aon faa, de Ana sendek luu-langgan neu daer fo Ana hule-haradoi nae, “Papa. Mete ma Papa nau, na, Au hae lemba-asaa doidosok naa losa mate leo iak. Au bubuluk memak ena ae, ta hambu hata esa boe na fo Papa ta bisa tao nalan. De mete ma Papa nau, na, nggari makadodook doidosok ia numa Au mai. Tehuu boso tungga Au hihii-nanaung, naa fo tungga kada Papa hihii-nanaun.”
MAR 14:37 Basa boe ma Ana fali neni ana nuni katelun nara neu, tehuu ara sunggu seli. Boe ma Yesus fafae sara, de kokolak no Petrus nae, “Heeh, Peꞌu! O sunggu, do? Au numa naa ta doo anak ka, tehuu ei ta bisa beꞌe manea faa boe na.
MAR 14:38 Kukuku maneu o matam dei. Boe ma mambadeik fo manea mua Au. Ei dalem mara memak nau tao neulauk, tehuu ei ao-inam barakai taak. De malole lenak ei hule-haradoi fo mete ma hambu soba-douk, na, ta senggi ei.”
MAR 14:39 Basa boe ma Yesus neu hule-haradoi seluk laꞌe esa bali. Ana hule seluk neu Manetualain fo boso fee Ndia lemba-nasaa doidosok naa.
MAR 14:40 Boe ma Ana fali neni ana nuni katelun nara neu. Tehuu ara sunggu seluk bali, nahuu matan nara ramabera ralan seli. Boe ma Ana fafae seluk kasa bali, tehuu ara ta bubuluk fo raselu rae leo bee neu Yesus.
MAR 14:41 Basa boe ma Yesus laꞌo ela sara bali fo neu hule-haradoi seluk laꞌe katelun. Boe ma Yesus fali, de Ana fafae sara. Ana nae, “Ei bei sunggu bali, do? Dai ena! Mambadeik! Hatahori fo nae seꞌo heni Au, Hatahori Dae-bafo Isi-isik ia, deka ena. Hatematak ia ara rae humu Au, fo ara fee Au uni hatahori manggarauk kara liman uu.
MAR 14:42 Mambadeik leo! Buka ei matam mara fo mete sudi neni naa neu dei! Hatahori fo nae seꞌo heni Au naa, ana mai ena. Mai fo ita teu tatonggo too sara!”
MAR 14:43 Neu Yesus bei kola-kola talo naa, te nggengger neuk ka, Yudas mai ena no hatahori noꞌun seli. Ara mai reni tafa mukuk ma tongga fo rae humu Yesus. Ara tao talo naa, tungga parenda numa malangga Yahudir malanggan nara mai. Sira raa, ndia malangga anggama malanggan nara, meser anggamar, ma lasi-lasi hadak kara.
MAR 14:44 Yudas fee tanda memak kasa ena nae, “Ei mete matalolole, ee! Au idu see, na, ei humu malan leo! Ndia naa, ndia hatahori fo ei sanggak!”
MAR 14:45 Dadi, neu Yudas asa losa naa, boe ma Yudas nasare matan no Yesus. De ana nahara nae, “Papa Meser!” Boe ma ana holu ma idu Yesus.
MAR 14:46 Basa boe ma hatahori noꞌuk kara mata reu fo humu Yesus.
MAR 14:47 Tehuu Yesus hatahorin esa lesu nala fela mukun, de ana sambi naketu hatahori esa ndiꞌi doon. Hatahori mana makahinak naa, ndia malangga anggama Yahudi malangga ina-huun hatahori neondan.
MAR 14:48 Boe ma Yesus kokolak no hatahorir fo mana mai humu Ndia naa nae, “Talo bee? Ei duꞌa mae, Au ia hatahori manggarauk, do? De ei mai humu Au meni tafa ma tongga?
MAR 14:49 Tungga faik Au anori ei nai Manetualain Uma Huhule-haradoik Ina-huun dale, ma ta hambu esa boe na mai humu Au. Mai, humu mala Au leo! Te ia neni surak memak kana numa lele uluk mai nai Manetualain Susura Malalaon dale ena.”
MAR 14:50 Yesus ana nunin nara ramataꞌu ralan seli. Boe ma ara ralai laꞌo ela kada Yesus mesa kana.
MAR 14:51 Numa naa oo, hambu tou muri anak esa tungga Yesus dean boe. Ana naluse ao-inan nenik kada sidi anak esa. Hatahorir raa rae humun boe.
MAR 14:52 Tehuu ara ndaso rala kada sidin, de mboꞌi henin. Boe ma ana nalai fali neu ngga no kada makaholak, nahuu namataꞌu nalan seli ena.
MAR 14:53 Basa boe ma ara toꞌu roo Yesus neni anggama Yahudi malangga ina-huun uman neu. Numa naa, hatahori moꞌo-inahuuk kara rakabua ena. Sira ndia malangga anggamar malanggan nara, meser anggamar, ma lasi-lasi hadak kara.
MAR 14:54 Neu ara humu reni Yesus, Petrus laꞌo bambi-bambi tungga dea losa nai anggama Yahudi malangga ina-huun uman. Ana oo maso neni uma bebelan neu, de nanggatuuk dara aꞌi sama-sama no hatahori manear marai naa.
MAR 14:55 Numa uma naa dale, malangga anggamar malanggan nara kola-kola ro hatahorir mana maketu-maladi dedeꞌa nai mamana neketu-neladi dedeꞌa anggama. Basa sara sangga bukti fo nau fee salak neu Yesus nahuu ara rae hukun mates neun. Tehuu ara ta hambu bukti hata esa boe na.
MAR 14:56 Boe ma ara roke sakasii noꞌuk ka fo sangga rakatutudak Yesus. Tehuu kokolan nara esa ta nandaa no esa.
MAR 14:57 Boe ma hambu sakasii hida bali rambariik fo kokolak pepeko-lelekok rae,
MAR 14:58 “Ai mamanene hatahori ia kokolak nae, ‘Neu ko Au ndefa heni Uma Huhule-haradoi Ina-huuk fo hatahori dae-bafok rambadedeik kana no liman nara. Basa faik telu bali, na, neu ko Au ambaririik falik Uma naa, tehuu ta pake hatahori dae-bafok liman.’ ”
MAR 14:59 Tehuu sira kokolan naa, esa ta nandaa no esa.
MAR 14:60 Basa boe ma malangga ina-huuk naa, nambariik neu basa hatahori mana maketu-maladi dedeꞌa matan nai mamana neketu-neladi dedeꞌa anggama naa. Boe ma ana natane Yesus nae, “Hatahori noꞌuk ka kalaak O. Tao hata de O ta mahara?”
MAR 14:61 Tehuu Yesus ta nahara faa boe na. Basa boe ma malangga ina-huuk naa natane seluk kana bali nae, “Hena O mafada dei! Memak O ia tebe-tebe ndia Karistus, Manetualain Anan fo Ana helu-bartaan numa lele uluk mai naa ena, do?”
MAR 14:62 Yesus naselu nae, “Memak tebe! Karistus naa, ndia Au ia. Neu ko ei basa ngga mete-mita Au, Hatahori Dae-bafo Isi-isik ia anggatuuk nai nusa tetuk do inggu temak nai Manetualain boboa konan. Ndia koasan ta neni babanggak! Neu ko Au ua Ndia toꞌu parenda sama-sama! Basa naa, neu ko Au konda numa nusa tetuk do inggu temak mai ua sosoꞌak.”
MAR 14:63 Malangga ina-huuk naa namanene Yesus kokolak talo naa, boe ma ana namanasa nalan seli, losa ana sii nasida badu narun. Boe ma ana bolu nafada neu basa hatahori mana nggero-furak kara nai mamana neketu-neladi dedeꞌa anggama naa nae, “Ita ta parluu sakasii ena!
MAR 14:64 Ei mamanene no ei ndiꞌi doo heli-helim mara ena, Ndia mesa kana kokolak talo naa, hetu? Ana soꞌuk aon dadi neu Manetualain Anan. Ia nakadadaek nalan seli Manetualain ia! Tungga anggama hohoro-lalanen, mete ma hambu hatahori esa soꞌuk aon sama leo Manetualain, na, hatahori naa muste tao maten! De hatematak ia, ei nau maketu-maladi taon talo bee?” Boe ma basa sara raketu rae, “Hatahori ia memak tebe-tebe sala! Dadi Ana muste hambu hukun mates!”
MAR 14:65 Boe ma hatahori hida mata reu, de ara pura ambe neu Yesus. Ara mboti ketu matan, boe ma ara popokon. Basa boe ma ara radenun rae, “Mete ma O Manetualain mana toꞌu dedeꞌan, na, selu sudik see ndia tutu O?” Basa boe ma ara fee parenda neu hatahorir mana manea Uma Huhule-haradoi Ina-huuk fo mai reni Yesus. Ara roon neu, boe ma ara famba rakamiminak kana.
MAR 14:66 Faik naa, Petrus bei nanggatuuk sama-sama numa uma bebelan. Boe ma anggama Yahudi malangga ina-huun ata inan esa mai meten dara aꞌi. Ana namumula Petrus matan, boe ma ana kokolak nae, “Bebeik kara ia o tungga sama-sama mua Yesus, hatahori Nasaret naa boe, hetu? Tebe, hetu?”
MAR 14:68 Tehuu Petrus naselu nae, “Taa! Tao hata de o matane talo naa! Au ta alela sana.” Boe ma Petrus kalua fo neu nambariik neu mbaꞌa lelesu matan. [Hatematak naa oo manu kokoa boe.]
MAR 14:69 Boe ma ata inak naa mete-nita seluk Petrus bali. De nafada basa hatahorir marai naar nae, “Ndia ia, esa numa hatahorir raa mai!”
MAR 14:70 Boe ma Petrus nasabara nae, “Fama te, o kamuluk! Au ta alela Hatahori naa, ma!” Doo-doo faa boe ma hatahori laen esa numa naa kokolak seluk bali neu Petrus nae, “Wee! O bei nau masapepeko bali mae, o ta sama-sama mua hatahorir raa! Heeh! Ei basa ngga, hatahori Galilea, hetu?”
MAR 14:71 Tehuu Petrus nareresi bali nae, “Heeh! Au sumba-soo! Au ta alela Hatahori naa!”
MAR 14:72 Ndaa no ana kokolak talo naa, boe ma manu kokoa laꞌe kaduan. Boe ma Petrus nasaneda Yesus kokolan bebeik kara nae, “Manu bei ta kokoa laꞌe dua, tehuu o laka laꞌe telu ena mae, o ta malela Au.” Petrus nasaneda Yesus kokolan naa, boe ma ana buꞌi nakarereu.
MAR 15:1 Bei huhua anan seli, basa hatahorir marai mamana neketu-neladi dedeꞌak naa, rala harak fo rae tao risa Yesus. De ara futu-paꞌa roon neu nasare nggubenor Pilatus.
MAR 15:2 Neu ara losa nggubenor Pilatus, boe ma ana natane Yesus nae, “Talo bee? Tebe-tebe O ia, hatahori Yahudir Manen, do?” Yesus naselu nae, “Tebe. Papa nggubenor kokolak ndaa naa ena.”
MAR 15:3 Boe ma malangga anggamar malanggan nara kokolak ro nggubenor rae, “Hatahori ia tao salak noꞌun seli ena!” De ara hingga salan esa-esak.
MAR 15:4 Boe ma nggubenor natane seluk Yesus bali nae, “O ta mamanene sira kokolan nara de? Ara fee salak noꞌun seli neu O ena. Soba O bala dei!”
MAR 15:5 Tehuu Yesus ta naselu hata esa boe na, losa nggubenor heran bali-bali.
MAR 15:6 Tungga teuk, mete ma hatahori Yahudir tao feta Paska, hatahori noꞌuk kara rasiꞌe here rala hatahori bui esa fo nggubenor nakamboꞌik kana.
MAR 15:7 Faik naa hatahori bui esa, nade Barabas. Fai maneuk kara ara humu ralan no nonoon nara, nahuu ana laban man-parenda Roma, ma ana oo nakanisa hatahori boe.
MAR 15:8 Huu feta Paska sangga deka ena, de hatahori noꞌuk ka reni nggubenor Pilatus reu, de ara eki rae, “Papa nggubenor! Fai Paska mai ena. Mete ma bisa, na, Papa nggubenor tulun fo makamboꞌik hatahori bui esa tungga ai siꞌen!”
MAR 15:9 Boe ma nggubenor naselu nae, “Au ae akamboꞌik see? Talo bee, leo au akamboꞌik ei hatahori Yahudi Manen ia? Ei makaheik, do?”
MAR 15:10 Nggubenor kokolak talo naa, naa te ana bubuluk ena malangga anggamar malanggan nara leꞌa roo Yesus neni ndia neu, nahuu ara mburuk ralan seli neu Yesus.
MAR 15:11 Tehuu malangga anggamar malanggan nara dudunggu hatahori noꞌuk kara raa, de basa sara roke nggubenor rae, “Ai ta nau sana! Makamboꞌik kada Barabas dei!”
MAR 15:12 Boe ma nggubenor natane seluk nae, “Mete ma talo naa, na, Au tao Yesus talo bee, fo roken rae, ‘Mane hatahori Yahudi’ ia?”
MAR 15:13 Boe ma basa sara eki rame-rame rae, “Tao misa kada Yesus! Pakun neu ai ngganggek!”
MAR 15:14 Boe ma nggubenor natane nae, “Ana sala hata? Au parisan ena, te au ta hambu Ana sala hata esa boe na!” Tehuu basa sara boe eki rahere bali rae, “Tao misan! Pakun neu ai ngganggek leo!”
MAR 15:15 Huu nggubenor sangga tao namahoko hatahori noꞌuk kara dalen nara, de ana mboꞌi Barabas, tungga sira hihiin. Boe ma ana parenda mana manear fo reu poko-femba Yesus pake fifiuk. Ara poko-femba basan, boe ma soldadur leꞌa renin leo fo rae reu paku tao risan neu ai ngganggek.
MAR 15:16 Basa boe ma soldadur leꞌa roo Yesus neni sira uma bebela loan neu. Numa mamanak naa, roke rala sira nonoon nara batalion esa.
MAR 15:17 De ara fee Yesus pake badu naru mbila maranggeok esa, sama leo manek kara bualoꞌa-papaken nara. Boe ma ara haꞌi ai dila-nggauk longgen, de ara nanen dadi neu solangga. Boe ma ara ndeꞌi solangga kanggouk naa neu Yesus langgan, fo rakamiminak kana sama leo rae soꞌu mane beuk fo feen pake solangga manek.
MAR 15:18 Boe ma basa sara fee hada-horomatak rakamiminak kana, ma rae, “Sodak Papa Manek Yahudi!”
MAR 15:19 Boe ma ara kaur rakekeik langgan nara mbali Yesus. Basa boe ma ara pupura ambe neu matan, ma ara dedelu laꞌi-laꞌik ka neun pake ai.
MAR 15:20 Ara rakamiminak basan, boe ma ara buka heni badu naruk naa. De ara feen pake falik bua-loꞌan nara. Basa boe ma ara roon laꞌo ela kota Yerusalem fo reu paku londan neu ai ngganggek lain losa maten.
MAR 15:21 Neu ara bei laꞌok kalua numa Yerusalem mai, boe ma ara ratonggo ro hatahori esa numa kota Kirene mai. Hatahori naa, nade Simon. Ndia ia, Aleksander ma Rufus aman. Ana dei fo nae maso neni Yerusalem neu, tehuu soldadur toꞌu ralan, de rakasetik kana lemba-nasaa nala Yesus ai ngganggen.
MAR 15:22 Ara leꞌa roo Yesus neni mamanak esa neu nade Golgotaa. (Ndia sosoa-ndandaan nae, ‘mamana langga duik’.)
MAR 15:23 Numa naa, ara fee Yesus ninu anggor makeis neni seseok no modo-aidoo, mita fo Ana bisa nakataka hedis. Tehuu Yesus ta nau ninu.
MAR 15:24 Basa boe ma ara paku ralelengga Yesus neu ai ngganggek lain. De ara rambaririik ai ngganggek naa, fama te neu liꞌu sio huhuan. Boe ma soldadu leꞌa lot fo sangga bubuluk see ndia hambu Yesus bua-loꞌan nara.
MAR 15:26 Basa boe ma ara surak neu papak esa, de ara pakun neu Yesus langgan dandaan lain nae, “Ia, hatahori Yahudir Manen.” Ara pake naa dadi neu huun fo hukun Yesus.
MAR 15:27 Numa naa oo, ara paku tao risa hatahori naꞌo manu-meo dua boe. Esa nai Yesus boboa konan, ma esa nai boboa kiin.
MAR 15:28 [No dalak naa, ara tungga hata fo neni surak memak nai Manetualain Susuran nae, “Ara taon sama leo hatahori manggarauk.”]
MAR 15:29 Basa hatahorir fo mana laꞌo tungga naa, mete-rita Yesus neni londak nai ai ngganggek lain. Boe ma ara kakale langgan nara ma rakatitiik-rakamamaek Yesus rae, “Weeh! O mae O bisa tao mandefa heni Manetualain Uma Huhule-haradoi Ina-huun fo mambadedeik falik kana doon kada faik telu, hetu?
MAR 15:30 Soba O konda numa ai ngganggek naa lain mai, fo makamboꞌik O aom leo! Mete ma dadi talo naa, na, dei fo ai mamahere memak mae, O ia Manetualain Anan.”
MAR 15:31 Malangga anggama Yahudir malanggan nara ma meser anggamar oo rakatitiik Yesus boe, ma ara kokolak rae, “Ana tao nasoi-nasoda hatahori laen, tehuu ana ta bisa tao nasoi-nasoda Ndia ao heli-helin!
MAR 15:32 Ana nae, Ndia naa, ‘Karistus’, fo Manetualain helu-bartaa memak kana numa lele uluk mai. Hatahori laen rae, Ndia ia hatahori Israel Manen. Mete ma tebe leo naak, na, elan numa naa fo Ana konda numa ai ngganggek lain mai, fo ita mete-tita dei. Mete ma tebe leo naak, dei fo ita bisa tamahere neun.” Hatahori kaduak kara raa fo neni londak sama-sama ro Yesus numa ai ngganggek naa oo tungga rakatitiik Yesus boe.
MAR 15:33 Basa naa, makiu makahatuk tatana nala mamanak naa numa ledo namatetu losa liꞌu telu ledo bobon.
MAR 15:34 Ndaa no liꞌu telu ledo bobon, boe ma Yesus eki pake dedeꞌa Aram nae, “Eloi! Eloi! Lema sabaktani?” (Sosoa-ndandaan nae, “Au Lamatuang! Au Manetualaing, ee! Tao hata de Amak masadea laꞌo ela Au talo ia?”)
MAR 15:35 Hambu hatahori hida deka-deka ruma naa, ramanene Yesus haran naa. Boe ma rae, “Hoi! Ei mamanene dei. Ana nanggou Elia, Manetualain mana toꞌu dedeꞌan lele uluk naa!”
MAR 15:36 Boe ma hatahori esa nalaik neu haꞌi lombu, de ana boron neni anggor makeis dale neu. Boe ma ana nato lombu naa neu teteꞌe ai suꞌun, de soron neni Yesus bifi doon neu, fo Ana musi. Boe ma hatahori naa kokolak nae, “Tahani fo ita mete sudik kana. Fama te Elia mai fo nakondan numa ai ngganggek lain mai.”
MAR 15:37 De Yesus eki seluk bali, boe ma maten.
MAR 15:38 Nai Uma Huhule-haradoi Ina-huuk dale, hambu tema loak esa neni londak fo babata neu Manetualain Kama Malalaon Mateꞌen. Ndaa no Yesus ketu ani hahaen, boe ma temak naa sii baꞌen neu dua, numa lain mai losa dae.
MAR 15:39 Numa Golgotaa, hambu komedan mana manea esa, nambariik deka no Yesus ai ngganggen. Neu ana mete-nita Yesus mamaten, ana nggengger. Boe ma ana nae, “Awii! Hatahori ia, memak tebe-tebe Manetualain Anan, ee!”
MAR 15:40 Ma hambu inak hida fo ara tungga mete Yesus mamaten numa dook ka mai. Inak kara raa, ndia bakahulun raono-lalau Yesus asa numa Galilea. Sira raa, ndia Salomi, Maria numa nusak Magdala mai ma Maria esa bali (fo Yakobis anak no Yoses inan), ma inak laen noꞌuk ka bali mana sama-sama ro Yesus reni Yerusalem mai.
MAR 15:42 Basa boe ma hatahori esa sangga dalak fo nakonda Yesus ao-mbaa mamaten numa ai ngganggek naa lain mai. Hatahori naa, nade Yusuf numa kota Arimatea mai, ma hatahori ia oo hatahori esa numa mana maketu-maladi dedeꞌak anggama Yahudi mai boe. Ndia dalen malole. Ma ana nahani taa-taa Manetualain parenda-koasan mai. Yesus fai mamaten naa, ndaa no fai limak. Beꞌe-mai laꞌe-ndaa no hatahori Yahudir fai huhule-haradoin. Huu naa de fai limak naa, Yusuf nau nakonda nakahuluk Yesus ao-mbaa mamaten. De ana tao nambarani dalen fo neu noke Yesus ao-mbaa mamaten nai nggubenor Pilatus.
MAR 15:44 Neu nggubenor namanene Yusuf noke talo naa, boe ma ana heran. De ana nae, “Awii! Hatahori naa mate lai-laik neuk ka. Au duꞌa ae, ta bisa dadi talo naa, oo!” Boe ma nggubenor nadenu hatahorir fo reu roke komedan soldadu naa mai, de natane nae, “Talo bee? Yesus naa, maten ena, do beik?”
MAR 15:45 Komedan soldadu naa naselu nae, “Memak Ana mate numa bebeik kara ia mai ena, Papa.” Nggubenor namanene nala naa, boe ma ana nakaheik Yusuf neu haꞌi nala Yesus ao-mbaa mamaten.
MAR 15:46 De Yusuf neu hasa tema naruk mabeli. Boe ma ana neni Golgotaa neu. Ana nakonda Yesus ao-mbaa mamaten numa ai ngganggek lain mai. Ana oo mboti nalololen nenik tema beuk naa. Faik naa, ara bei fo toꞌi basa rates esa nai lete batu dale. Boe ma ara koꞌo rala Yesus ao-mbaa mamaten, de ralololin neni bolok naa dale neu. Basa de ara loli rala batu bebela moꞌok esa fo ara tatana ralololen neu rates naa lelesun. Boe ma Yusuf asa fali reu sara leo.
MAR 15:47 Faik naa, Maria numa Magdala mai, ma Maria laen (ndia Yoses inan) oo, tungga losa naa boe. Dua sara mete fo rasaneda ratalolole mamanak naa, fo ara tao Yesus ao-mbaa mamaten naa neu.
MAR 16:1 Beꞌe-mai fo fai neek, ndia hatahori Yahudir fai huhule-haradoin. Neu ledo tesa ena, Maria numa nusak Magdala mai, Maria esa bali (Yakobis inan) ma Salomi, reu hasa mina kaboo menik fo rae reu bibiru neu Yesus ao-mbaa mamaten, tungga hatahori Yahudir dala-hadan.
MAR 16:2 Neu fai Menggu huhua anan, telu sara reni rates naa reu.
MAR 16:3 Neu ara bei laꞌok numa dalak, boe ma rakokola aok rae, “Naa! See ndia bisa tulun ita fo keko heni batu moꞌok naa numa rates lelesun mai? Neu ko ita telu ngga ta tabeꞌi sana, te batu naa moꞌon seli na!” Tehuu neu ara losak ka naa, ara mete-rita batu naa neni loli henik ena.
MAR 16:5 Boe ma ara maso reni rates naa dale reu. Ara nggengger ralan seli, nahuu mete-rita hatahori muri anak esa nanggatuuk nai sira boboa konan, ana pake bua-loꞌa muti manggadilak.
MAR 16:6 Boe ma hatahori muri anak naa nafada sara nae, “Ei hae mamataꞌu! Au bubuluk ei mai sangga Yesus numa Nasaret mai, fo ara rakanisan numa ai ngganggek naa lain. Ana ta nai ia ena, Ana nasoda fali numa mamaten mai ena. Mai fo mete-mita no ei mata heli-helim mara mamanak fo ara tao Yesus ao-mbaa mamaten neuk naa rouk ena.
MAR 16:7 Ei fali lai-lai leo! Miu mafada Petrus asa mae, Yesus nasoda fali numa mamaten mai ena. Ana laꞌo nakahuluk neni Galilea neu ena. Dei fo ara ratonggo ro Yesus nai naa, sama leo nafada ela sara ndia fai bakahulun. De fali miu ngga leo!”
MAR 16:8 Neu inak kara raa mete-rita mamanak naa rouk, boe ma ara nggengger. De ara ralai dea reu. Basa boe ma ara fali lai-laik. Ara ta rafada esa boe na, neu ara bei numa dalak, nahuu ara ramataꞌu ralan seli.
MAR 16:9 Fai Menggu huhua anan naa, Yesus neu natudu matan nakahuluk neu Maria numa Magdala mai, fo fai bakahulun Yesus husi nita nitu hitu numa aon mai.
MAR 16:10 Ana mete-nita basa Yesus, boe ma ana fali de nafada basa hatahorir fo fai maneuk kara ara tungga Yesus. Ara bei bua-bua no dale sonak, ma luu-oen nara bei ta mada, rasaneda Yesus mamaten naa.
MAR 16:11 Boe ma Maria nafada sara nae, “Tao hata de ei bei susa? Hae susa bali, te Yesus nasoda fali numa mamaten mai ena! Bebeik kara ia au dei fo atonggo uan!” Tehuu basa sara raselu rae, “Weeh! O kada kokolak lelik!”
MAR 16:12 Basa boe ma Yesus ana nunin dua laꞌok reni nggorok esa reu. Neu ara bei laꞌok numa dalak, boe ma Yesus neu natudu matan neu sara. Yesus mata-aon nasafali ena, tehuu ta dook ka, boe ma ara ralelan.
MAR 16:13 Basa boe ma dua sara fali reu rafada nonoon nara rae, “Ei nenene dei! Bebeik kara ia, ai bei fo matonggo mia Yesus numa dalak!” Tehuu nonoon nara basa sara raselu rae, “Heeh! Ei boso kada kokolak lelik talo naa!”
MAR 16:14 Basa boe ma Yesus natonggo no ana nuni kasalahunu esan nara, neu ara ranggatuuk raꞌa-rinu. Ana nahara neu sara nae, “Weeh! Ei langga batum mara seli! Hatahori rafada ei ena rae, ara mete-rita Au no mata deꞌe heli-helin nara ena, tehuu ei ta nau mamahere! Ei mae, basa sara kada kokolak lelik! Naa! Hatematak ia Au mesa ngga mai ena. Memak Au mate ena, tehuu hatematak ia Au asoda fali numa mamates mai ena! Ei mesa ngga mete no ei matam mara leo.
MAR 16:15 De hatematak ia ei muste laꞌo ndule basa dae-bafok ia, fo miu mafada basa hatahorir laꞌe-neu Au Tutui Maloleng ia.
MAR 16:16 Hatahori fo mana namahere neu Au, ma ana hambu saranik, neu ko Manetualain tao nasoi-nasodan, fo ana leo seku neu no Manetualain nai nusa tetuk do inggu temak. Tehuu hatahori fo mana ta namahere, neu ko ana hambu hukun, ma Manetualain ta simbok kana nai nusa tetuk do inggu temak, de ana leo kada dea seku neu.
MAR 16:17 Ma hatahorir fo mana ramahere neu Au, ara bisa tao tanda heran mata-matak kara, fo basa hatahorir bubuluk rae, sira koasan naa memak numa Manetualain mai. Haꞌi netuduk, neu ko ara bisa husi nitur pake Au nadeng. Neu ko Manetualain fee sara bisa kokolak pake dedeꞌak laen, leo mae ara ta bei ralela dedeꞌak naa.
MAR 16:18 Ma leo mae ara toꞌu mengge karasok, do, ara rinu hambu raso, ara ta hambu sosoek. Boe ma mete ma ara ndae liman nara reu hatahori hedis sara langgan, neu ko ara hai.”
MAR 16:19 Yesus kokolak basa no ana nunin nara, boe ma Manetualain soꞌu botik kana hene neni nusa tetuk do inggu temak neu. Nai naa, Yesus dadi neu Manetualain lima konan, fo Dua Sara ranggatuuk toꞌu parenda sama-sama.
MAR 16:20 Basa boe ma ana nunin nara tungga Ndia parendan. De ara sudi bee reu fo tui-bengga neu basa hatahorir laꞌe-neu Yesus Tutui Malolen. Boe ma Manetualain fee sara koasa fo ara tao basa tanda heran nara fo Yesus nafada elak kara raa. De hatahori noꞌuk ka ramahere neu Yesus, te ara bubuluk ena rae, Tutui Malole naa, memak tebe.] Neu ina kateluk kara raa losa Petrus asa ena, boe ma ara rafada basa-basan laꞌe-neu hatahori muri anak naa, fo mana kokolak numa rates ndia bebeik kara raa. Basa boe ma Yesus parenda ana nunin nara fo reu tui-bengga laꞌe-neu Ndia Tutui Malolen ia nai basa mamanak kara losa dae-bafok buꞌun nara. Tutui Malole ia natudu dalak fo Manetualain tao nasoi-nasoda hatahorir numa sala-singgon nara mai fo rasoda seku neu ro Ndia. Tutui Malole ia, memak tetebe ndoos. Huu naa de ana nakatataka nakandoo losa ta namaketu.]
LUK 1:1 Ama Teofilus fo mana hambu hada-horomatak. Soda-molek. Hatahori noꞌuk ka soba surak tutuik laꞌe-neu hata fo ara mori-dadi nai ai taladan nara ena. Ara surak tutuik kara raa, pake tutuik mana koko mafeo-falik numa ai fali neni ai mai seluk, numa fai uluk mai, fo ai bubuluk numa Lamatuak Yesus hatahori uma dalen nara ma numa hatahori laen mai boe fo ara mete-rita ro mata heli-helin nara. Basa tutuik kara raa, tungga tetu-tetu no Manetualain hehelu-bartaan numa lele uluk mai. Dadi au parisa no lutuk basa matak kara raa lalaꞌen mulai numa tutuik oka-huun mai ena. Boe ma au aketu fo surak basa sara ro malole tungga tututin. No dalak naa, papa bisa bubuluk no tetuk hata fo mori-dadi ena.
LUK 1:4 Ma papa oo bisa namahere mae, hata fo hatahorir tuik kara raa ena, ta tutui pepeko-lelekok boe. Basa naar, hambu sara tetebes!
LUK 1:5 Tutuik ia oka-huun talo ia: neu manek Herodes toꞌu parenda numa profensi Yudea, hambu hatahori esa, nade Sakaria. Hatahori ia, malangga anggama Yahudi esa. Ma ndia oo bua-aok esa no baꞌi Abia malangga anggaman nara boe. Sakaria saon, nade Elisabet. Ndia oo tititi-nonosik numa malangga anggamar mai boe, huu ndia ia, baꞌi Musa kaꞌan Harun tititi-nonosin.
LUK 1:6 Dua sara leo-laꞌo no ndoos tungga Manetualain parendan ma hohoro-lalanen lalaꞌen. Hatahorir oo fee hada-horomatak neu sara boe.
LUK 1:7 Dua sara oo lasik kara ena boe, tehuu ana taak kara, huu Elisabet ana manan makatemak.
LUK 1:8 Laꞌe esa, Sakaria no ndia bua-aon Abia sara hambu babaꞌek tao ues numa Uma Huhule-haradoi Ina-huuk nai Yerusalem.
LUK 1:9 Tungga sira siꞌen, malangga anggama raa leꞌa lot fo sangga bubuluk see ndia hambu babaꞌek maso neni Uma Huhule-haradoi Ina-huuk Kama Malalaon Mateꞌen dale neu. Nai naa, hatahori naa muste hotu ai kaboo menik, nai Manetualain matan. Faik naa, lot tuda laꞌe-ndaa Sakaria.
LUK 1:10 Boe ma ana maso dale neu. Neu ana hotu ai kaboo menik numa Kama naa, hatahori noꞌun seli hule-haradoi numa uma bebelan naa.
LUK 1:11 Medak neu ma, Manetualain atan esa numa nusa tetuk do inggu temak mai, nambariik numa mamana hotu ai kaboo menik boboan kona.
LUK 1:12 Sakaria mete-nita naa, boe ma namataꞌu nalan seli, losa ana ta bubuluk nae tao hata ena.
LUK 1:13 Tehuu ata naa kokolak nae, “Sakaria! Boso mamataꞌu, ee! Manetualain namanene nala o huhule-haradoim ena. Dadi neu ko o saom bonggi nala ana touk esa fee o. O muste foin, nade Yohanis.
LUK 1:14 Neu ko hatahori noꞌuk ka oo ramahoko sama-sama ro ei boe, nahuu ei hambu anak ena. Kakanak ia, neu ko tao nala o dalem mbena sau-sau.
LUK 1:15 Manetualain Dula-dalen koasan sama-sama noon, mulai numa inan bei fo nairun mai. Ana muste naluli basa laru-ara. Neu ana namoꞌo mamais a, Manetualain paken dadi neu hatahori mana nesi mata.
LUK 1:16 Neu ko ana kokoe-nanasi hatahori Israꞌel noꞌuk ka fo tungga falik sira Manetualain, fo mana naena haak parenda sara.
LUK 1:17 Ndia hihiru-heheon ma koasan, neu ko sama tetar leo baꞌi Elia fo Manetualain mana toꞌu dedeꞌan numa lele uluk mai. Ana mai nakahuluk numa ita Lamatuan mai. Ana tao nala ina-amar dalen sue-lai rasafali anan nara. Ma hatahori mana masadea Manetualain oo, ana tao nasafali sara fo ara bisa tungga Manetualain hihii-nanaun boe. No dalak naa, ana tao nala hatahorir sadia dalen nara fo simbok Lamatuak mamain.”
LUK 1:18 Tehuu Sakaria naselu nasafali mbali ata naa nae, “Ta bisa dadi?! Au ua au saong lasik talo ia ena! Talo bee de au bisa bubuluk ae, basa iar bisa mori-dadi?”
LUK 1:19 Boe ma ata naa naselu nae, “Talo ia! Au ia, Nggabarial, Manetualain neondan. Ana ndia nadenu au mai fo afada hara lii malole ia neu o.
LUK 1:20 Tehuu o ta nau mamahere au kokolang. Dadi tandan fo o mokek talo ia! O maam nakadite ma o ta bisa kokolak mala numa hatematak ia neu, losa ei hambu mala kakanak naa. Dei fo o tadu aom leo. Te hata fo au afadak ia, neu ko ana mori-dadi ndaa no fain.”
LUK 1:21 Hatahori noꞌuk kara fo mana hule-haradoi ruma dea, ara tutundindiik, nahuu Sakaria ta kalua-kalua.
LUK 1:22 Neu ana dea mai, ana ta bisa kokolak nala hata ena. Boe ma ana dududu a mbali sara nenik liman, de ara bubuluk rae, Manetualain natudu feen tanda heran esa ena, numa Kama Malalaok Mateꞌen naa dale.
LUK 1:23 Basa sira ue babaꞌen, boe ma Sakaria fali neni uman neu.
LUK 1:24 Ta dook ka boe ma Elisabet taꞌin naisi. Boe ma ana kama aon losa bulak lima. Ana kokolak nae, “Koa-kio Manetualain! Mateꞌen boe ma Manetualain natudu Ndia dale susuen neu au. Mete ma au hambu tititi-nonosik ena, na, hatahorir ta rakamamaek au ena bali.”
LUK 1:26 Neu Elisabet taꞌin laꞌok bula nee ena, boe ma Manetualain nadenu atan numa nusa tetuk do inggu temak mai, fo neni nggorok esa nai profensi Galilea neu, nade Nasaret. Ata naa, nade Nggabarial.
LUK 1:27 Nai Nasaret hambu ana feꞌok esa, nade Maria. Maria ia, ta mesa kana, huu touk esa, nade Yusuf fufudin ena. Yusuf naa, mane Dauk tititi-nonosin. Nggabarial neu natonggo no ana feꞌok Maria.
LUK 1:28 Ana natudu aon neu ana feꞌok naa, boe ma nae, “Soda-molek ina! Manetualain here nala o ena, fo nae tao hata neulauk esa neu o. Manetualain sama-sama no o, Maria.”
LUK 1:29 Maria namanene nala naa, boe ma ana pangganaa doak ata naa kokolan. Ana ta nalela ata naa kokolan.
LUK 1:30 Boe ma ata naa tutin bali nae, “Maria! O hae mamataꞌu. Huu Manetualain nae natudu Ndia dale susuen neu o.
LUK 1:31 Ta dook ka bali te o taꞌim naisi ena, de neu ko o bonggi mala ana touk esa. O muste foin, nade Yesus.
LUK 1:32 Neu ko Ana dadi neu Hatahori moꞌo-inahuuk. Neu ko Manetualain seseik kana nae, ‘Ndia ia, Au Ana heli-heling.’ Fo ndia ia, Manetualain mana Demak Mateꞌen Anan. Neu ko Manetualain soꞌu nalan fo toꞌu parenda, sama leo Ndia baꞌin mane Dauk.
LUK 1:33 Neu ko Ana ndia toꞌu parenda seku neu soa-neu hatahori Israꞌel asa. Huu Ndia parendan ta mana basak.”
LUK 1:34 Tehuu Maria natane Nggabarial nae, “Au ia, bei ta sunggu-soro ita ua touk esa boe na! De talo bee fo au taꞌing bisa naisi?”
LUK 1:35 Boe ma Nggabarial naselu nae, “Talo ia! Neu ko Manetualain Dula-dale Malalaon neni o neti. Ma Manetualain mana Demak Mateꞌen koasan, neu ko ana nasaꞌo nala o. No dalak naa, neu ko Kakanak fo o bonggi malak naa, malalao ndoos. Huu Kakanak naa, Manetualain Anan.
LUK 1:36 Boso heran! O bobonggim esa, nade Elisabet, taꞌin naisi ena boe. Hatahorir rae, ana ta bisa bonggi nala ena, nahuu lasik ena. Hatematak ia taꞌin kaisik ma laꞌok bulak nee ena.
LUK 1:37 Huu soa-neu Manetualain, basa hata a mesan bisa dadi!”
LUK 1:38 Boe ma Maria naselu nae, “Malole. Au ia Manetualain atan. Naa fo basa sara dadi tungga papa kokolam naa. Au sadia tungga kada Manetualain hihii-nanaun.” Basa boe ma, ata numa nusa tetuk do inggu temak mai naa laꞌo ela Maria.
LUK 1:39 Seli fai hida, boe ma Maria lai-lai hiek numa Nasaret mai, neni Sakaria nggoron manai profensi Yudea mbuku leten neu. Losa naa, boe ma ana dudi tutik kana neni Sakaria uman dale neu. De ana lole haran neu Elisabet.
LUK 1:41 Neu Elisabet namanene Maria haran naa, boe ma kakanak manai Elisabet taꞌin dale naa, natingga-nasaka. Ma Manetualain Dula-dale Malalaon maso neni Elisabet neu.
LUK 1:42 Boe ma ana nanggou, de nafada nae, “Maria! Neu ko hatahorir soꞌu botik o nadem lena heni basa inak kara marai dae-bafok ia! Neu ko hatahorir oo soꞌu botik Kakanak manai o taꞌim dale naa boe!
LUK 1:43 Au oo neni soꞌu botik boe, nahuu au Lamatuang inan mai tiro-dangga au.
LUK 1:44 Neu o mai, de lole haram neu au, boe ma kakanak manai au taꞌing oo natingga-nasaka, huu namahoko boe.
LUK 1:45 Manetualain natudu dale susuen neu o ena, nahuu o mamahere mae, Ana nau tao tungga Ndia hehelu-bartaan.”
LUK 1:46 Maria soꞌuk haran nae, “Numa au dale kuru-erong mai, au akadedemak Lamatuak!
LUK 1:47 Au daleng mbena sau-sau, nahuu Manetualain tao nasoi-nasoda au!
LUK 1:48 Ana loti-mete natalolole au ena, Ndia hatahori neondan fo sosoan taak ia. Numa hatematak ia neu, basa hatahorir tao au ia leo, ina mana mauak nalan seli,
LUK 1:49 nahuu Manetualain tao dedeꞌa heran nara neu au. Ndia naa, mana Koasa Mateꞌen ma Malalao Ndoos.
LUK 1:50 Manetualain soa natudu dale kasian neu basa hatahorir mana fee hada-horomatak ma rakaluku-rakatele neun, numa tanak esa neni tanak esa neu.
LUK 1:51 Ana pake koasan, fo tao nala hatahori mana koa aok kara ramue-anggik.
LUK 1:52 Ana hai heni hatahori mana toꞌu koasar, nahuu sira nekededema aon nara. Tehuu Ana soꞌu botik hatahori mana makaloloe aok kara.
LUK 1:53 Ana hao-hani hatahori mana ndoe-laꞌak kara losa rakabete, tehuu Ana husi heni hatahori kamasuꞌik kara fo ara laꞌo ro lima roun nara.
LUK 1:54 Ana tulu-fali Ndia hatahori Israꞌel asa, ma soa natudu Ndia dale kasian neu sara.
LUK 1:55 Lele uluk, Ana ndara fangga hehelu-bartaak no ita bei-baꞌin nara, fo ndia, baꞌi Abraham no basa ndia tititi-nonosin lalaꞌen. Hatematak ia hehelu-bartaak bei neni ndara fanggak seku neu.”
LUK 1:56 Boe ma Maria leo no Elisabet losa bulak telu. Basa de ana fali neni ndia uman nai Nasaret neu.
LUK 1:57 Fain losak ka, boe ma Elisabet bonggi nala ana touk esa.
LUK 1:58 Hara liik naa natanggela neni ndia nufanelun ma nggoro isin nara rae, Manetualain natudu dale susuen, de fee anak esa neu Elisabet ena. Boe ma basa sara ramahoko.
LUK 1:59 Neu kakanak naa bei fo faik falu, boe ma ara sunat ana, tungga hatahori Yahudi hohoro-lalanen. Ara rae foi kakanak naa, nade Sakaria, tungga aman naden.
LUK 1:60 Tehuu inan nareresi nae, “Ta bisa talo naa! Muste nade Yohanis!”
LUK 1:61 Tehuu ara bala rae, “Tao hata de here nadek Yohanis? Ta hambu hatahori esa boe na nai ei nufanelum ndia pake nadek naa!”
LUK 1:62 Boe ma ara dududuk Sakaria fo sangga bubuluk ana nau foi kakanak naa nade see.
LUK 1:63 Sakaria dududu fo noke batu lei. Ara feen, boe ma ana surak nae, “Ndia naden Yohanis!” Boe ma basa hatahorir heran bali-bali.
LUK 1:64 Medak neu ma, Sakaria maan mana barakaik naa, bangganaꞌu tutik kana. Boe ma ana soꞌuk koa-kiok neu Manetualain.
LUK 1:65 Basa hatahorir fo mana leo deka-deka rai naa, ramataꞌu ma heran. Boe ma tutuik naa natanggela numa bafak mai neni bafak neu, losa hatahorir marai profensi Yudea leten nara oo bubuluk boe.
LUK 1:66 Hatahorir fo mana ramanene tutuik naa duduꞌa rae, “Manggaledok ena, Manetualain koasan sama-sama no kakanak naa. Neu ko namoꞌo mamais a, ana dadi neu hatahori dae-bafok rupak leo beek, ou?”
LUK 1:67 Basa boe ma Manetualain Dula-dale Malalaon maso neni Sakaria neu. Huu naa de ana kokolak nae,
LUK 1:68 “Koa-kio Lamatuak, hatahori Israꞌel Manetualain! Ana mai ena fo tefa-soi nala Ndia hatahorin nara, mita fo ara boso sama leo ata-dator bali.
LUK 1:69 Manetualain soꞌu nala Hatahori esa ena fo Ndia koasan ta neni babanggak, fo neu ko Ana tao nasoi-nasoda ita. Ndia ia, numa baꞌi Dauk tititi-nonosin mai.
LUK 1:70 Manetualain helu-bartaa memak basa iar ruma lele uluk mai ena, pake Ndia mana toꞌu dedeꞌan fo dalen mahanik kara.
LUK 1:71 Hatematak ia Ana nau nakamboꞌik ita numa ita musun nara mai, ma numa hatahorir fo dalen nara mburuk neu ita mai.
LUK 1:72 Ana natudu Ndia dale susuen neu ita bei-baꞌin nara, nahuu Ana nasaneda taa-taa neu Ndia hehelu-bartaan neu sara, fo Ana ndara fangga no baꞌi Abraham.
LUK 1:74 Ana nakamboꞌik ita numa ita musun nara mai ena, fo ita bisa takaluku-takatele neun, ma ta parluu tamataꞌu bali.
LUK 1:75 Ana nakamboꞌik ita ena, mita fo ita bisa leo-laꞌo nai matan no lolo-laok ma ndoos seku neu.
LUK 1:76 Anis! O ia, Au anang. Neu ko hatahorir ralela o rae, o ia, Manetualain mana Demak Mateꞌen mana toꞌu dedeꞌan. Neu ko o muu mafada hatahorir, fo ara simbok Lamatuak mamain no dale malenggak.
LUK 1:77 Neu ko o muu matudu dalak neu Manetualain hatahorin nara, fo ara bubuluk rae, ara hambu masoi-masodak, nahuu Manetualain koka heni sala-singgon nara.
LUK 1:78 Huu Manetualain dalen bangganaꞌu ma tuda kasian neu ita, de Ana fee lelak beuk neu ita, sama leo fai beuk neni manggaledo beuk. Ita mana leo-laꞌo nai makiuk dale, ma ita mana tamataꞌu mamates, nahuu bei ta malole to Manetualain, neu ko hambu manggaledok fo nakalalaꞌok ita teni dala mole-dame teu.”
LUK 1:80 Basa boe ma Yohanis tamba faik boe namoꞌo. Ma Manetualain Dula-dalen tao natetean. Ana namoꞌo mamais a, boe ma neu leo numa mamana nees, losa ana mulai tao uen soa-neu hatahori Israꞌel asa.
LUK 2:1 Laꞌe esa, neu Kirenius dadi neu nggubenor numa Siria, boe ma mane ina-huuk, nade Agustus fee kalua parenda esa nae, “Basa hatahorir marai man-parenda Roma koasan, muste fali nggoro-tadun nara reu, fo tungga sensus!” Naa, ndia makasososan fo man-parenda Roma reke rau-inggun nara.
LUK 2:3 De basa hatahorir fali nggoro-tadun nara reu fo tungga sensus.
LUK 2:4 Faik naa, Yusuf leo numa nggoro Nasaret nai profensi Galilea. Ana fufudi ana feꞌok esa ena, nade Maria, fo taꞌin kaisik. Yusuf naa, mane Dauk tititi-nonosin, de ana muste fali neni Dauk kotan Betlehem neu nai profensi Yudea, fo tungga sensus. Huu naa de dua sara laꞌo reni kota Betlehem reu.
LUK 2:6 Neu ara ruma naa, Maria fain fo sangga nae bonggi losa ena.
LUK 2:7 Tehuu numa naa ara ta hambu kama sesebak nai uma leo taak ena. Huu naa de ara dudi reni lalae esa dale reu. De ana bonggi Ana makasososan, Ana tou anak. Boe ma ara ralusen renik tema nelusek, fo rasusunggun neu haꞌo dale.
LUK 2:8 Leꞌodaen naa, hambu mana lolo hida beꞌe ranea sira bibihie-bibilombon numa mook nai kota deak.
LUK 2:9 Medak neu ma, ara mete-rita Manetualain atan numa nusa tetuk do inggu temak mai. Boe ma Lamatuak saꞌan nasaꞌa ndule basa sara, de ramataꞌu ralan seli.
LUK 2:10 Tehuu ata naa nafada nae, “Ei boso mamataꞌu dei! Nenene matalolole, ee! Au mai fo nau afada ei hara lii malole esa. Basa mana namanene hara liik ia, neu ko ramahoko.
LUK 2:11 Hara lii malole ia liin talo ia: Faik ia inak esa bonggi nala Karistus ena nai Betlehem, nai mane Dauk kotan. Karistus naa, Hatahori fo Manetualain helu-bartaa memak kana numa lele uluk mai. Manetualain nadenun mai fo Ana tao nasoi-nasoda hatahori numa sala-singgon nara mai! Ndia ia, neu ko hatahorir roken rae, ‘Lamatuak’, te Ana ndia naena haak parenda basa-basan!
LUK 2:12 Dei fo ei malelan no dalak talo ia: ei matonggo mia Kana mbimbila anak esa neni nelusek no tema nelusek. Ana sunggu nai haꞌo bandar dale.”
LUK 2:13 Ata naa kokolak basa boe ma, medak neu ma Manetualain atan noꞌun seli numa nusa tetuk do inggu temak mai fo rakabubua roon. Boe ma ara koa-kio Manetualain ma soda rae,
LUK 2:14 “Ai makadedemak Manetualain naden! Ndia mana toꞌu parenda nai lalai fo demak mateꞌen. Manetualain nau fee mole-dame soa-neu hatahorir marai dae-inak, fo mana tao ramahoko Ndia dalen!”
LUK 2:15 Basa boe ma Manetualain atan nara fali reni nusa tetuk do inggu temak reu. Boe ma mana lolor raa kokolak rae, “Wee! Mai ita teni Betlehem teu, fo teu mete-tita Kakanak naa dei! Te Lamatuak haitua harak naa neu ita ena.”
LUK 2:16 Boe ma ara laꞌo lai-lai hiek reni Betlehem reu. De ratonggo ro Maria ma Yusuf. Ma ara oo mete-rita Kana mbimbila anak naa, sunggu nai haꞌo dale boe.
LUK 2:17 Neu ara mete-rita Kakanak naa, boe ma ara tui rae, “Bebeik kara ia, Manetualain atan nara ruma nusa tetuk do inggu temak mai rafada laꞌe-neu Kakanak ia neu ai ena!” Boe ma ara tui no lutuk losa basan.
LUK 2:18 Basa hatahorir heran bali-bali, ramanene mana lolor raa tutuin.
LUK 2:19 Tehuu Maria mbedan neu dalen, basa mandadik kara raa. Ana duduꞌa no neneek fo nae sangga bubuluk sosoa-ndandaan hata.
LUK 2:20 Basa de mana lolor fali reni sira bibihie-bibilombon nara reu. Boe ma ara rakadedemak Manetualain naden. Ara roke makasi neun, huu hata fo ramanenek ma mete-ritak naa, sama tetar no hata fo Manetualain atan nafadak naa ena.
LUK 2:21 Bonggi basa fai falu, boe ma ara sunat Kana mbimbila anak naa tungga baꞌi Musa hohoro-lalanen. Ina-aman foin, nade ‘Yesus’. Nadek naa, ndia nadek fo ata numa nusa tetuk do inggu temak mai nafada sara ena, neu inan bei ta nairun.
LUK 2:22 Hambu hohoro-lalanek esa numa baꞌi Musa mai nae, ina mana bonggi basak fai haa hulu ena muste neu tao tungga dala-hadak nelao aok nai Uma Huhule-haradoi Ina-huuk. No dalak naa, ara bisa maso uma huhule-haradoik leo biasa. Huu naa de Yusuf no Maria reni Yerusalem reu fo tao tungga dala-hadak naa. De ara roo sira Ana mbimbila anan naa neni Uma Huhule-haradoi Ina-huuk dale neu, fo loo liman dadi neu Lamatuak enan.
LUK 2:23 Ara tungga Lamatuak hohoro-lalanen fo rae, “Inak esa-esak fo mana bonggi ana makasososak, mete ma tou anak, na, ana muste loo lima kakanak naa dadi neu Lamatuak enan.”
LUK 2:24 Tungga Lamatuak hohoro-lalanen, mete ma loo lima kakanak neu Lamatuak, na, ina-aman muste fee mbui teu pasan esa do mbui lunda sina tenak dua. Huu naa de Yusuf no Maria oo tao tungga hohoro-lalanek naa boe.
LUK 2:25 Faik naa, hambu baꞌi esa, nade Simeon, leo numa kota Yerusalem. Hatahori ia, dalen ndoos ma dalen hii nalan seli neu Manetualain. Manetualain Dula-dale Malalaon nafadan ena nae, ana mete-nita Karistus dei fo ana mate. Karistus naa, ndia neu ko tao masoi-masodak neu hatahori Israꞌel asa.
LUK 2:27 Faik naa, Manetualain Dula-dalen nuni no Simeon neni Uma Huhule-haradoi Ina-huuk neu. Naa, nandaa no Yesus ina-aman roon neni naa neu, fo loo liman dadi neu Lamatuak enan.
LUK 2:28 Baꞌi Simeon mete-nita Kakanak naa, de ana koꞌo nalan, boe ma ana koa-kio Manetualain nae,
LUK 2:29 “Koa-kio Manetualain! Manetualain tao tungga Ndia hehelu-bartaan neu au ena. Dadi hatematak ia Manetualain bisa nakamboꞌik au, mita fo au bisa mate no mole-damek,
LUK 2:30 huu au mete-ita Hatahori fo Manetualain nadenun mai ena, fo tao nasoi-nasoda ai numa ai sala-singgon nara mai!
LUK 2:31 Manetualain nae pake Kakanak ia fo tao nasoi-nasoda basa hatahori nusa-nusak kara.
LUK 2:32 Neu ko Ana sama leo saꞌak, fo neni hada-horomatak soa-neu Manetualain hatahorin Israꞌel asa. Ana oo sama leo manggaledok boe, fo natudu Manetualain eno-dalan soa-neu basa hatahori nusa-nusak laen nara.”
LUK 2:33 Yusuf no Maria ramanene rala naa, boe ma ara heran bali-bali neu hata fo baꞌi Simeon kokolak laꞌe-neu sira Anan.
LUK 2:34 Basa naa Simeon fee babaꞌe-babatik neu sara. Boe ma nafada Maria nae, “Yesus inan, ee! Neu ko hatahori noꞌuk ka rai Israꞌel timba-ndundu heni ina Anan ia. Tehuu sira tatao-nonoꞌin neun naa, neu ko natuda falik kasa. Ina Anan ia oo tao nala hatahori noꞌuk ka dalen mbena sau-sau boe.
LUK 2:35 No dalak naa, neu ko Manetualain buka nakambela hatahorir dalen. Tehuu Maria, neu ko o hambu susa-sona moꞌok, nok bali mbau dombe tafak neu o tende boam.”
LUK 2:36 Numa Uma Huhule-haradoi Ina-huuk oo hambu ina lasik esa boe, nade Hanaa. Teun nara falu hulu haa. Aman, nade Fanuel, numa leo Aser mai. Ana nauma-loo teuk hitu, boe ma saon mate laꞌo elan. Beꞌa Hanaa ia, Manetualain mana toꞌu dedeꞌan. Ue-tataon soa hule-haradoi ma puasa nai Uma Huhule-haradoi Ina-huuk, fo nakaluku-nakatele neu Manetualain hatu-leledon.
LUK 2:38 Neu Simeon kola-kola no Yusuf ma Maria, ina lasik naa mai deka-deka. De ana namanene sara, boe ma ana koa-kio Manetualain. De ana kokolak laꞌe-neu Yesus soa-neu basa hatahori mana rahani Manek fo Manetualain helu-bartaa ena nae, nau nadenun mai fo nakamboꞌik hatahori Israꞌel asa.
LUK 2:39 Neu Yusuf no Maria tao tungga basa baꞌi Musa hohoro-lalanen lalaꞌen numa kota Yerusalem ena, boe ma ara fali reni profensi Galilea reu, nai sira nggoron Nasaret.
LUK 2:40 Yesus oo namoꞌo mamais a boe, Ana tamba nakadere, tamba nalela ma Ana bubuluk dalak noꞌuk ka. Manetualain oo natudu dale susuen neun boe.
LUK 2:41 Tungga teuk, Yusuf no Maria reni kota Yerusalem reu, fo raꞌa feta Paska numa naa.
LUK 2:42 Laꞌe esa, neu Yesus teun nara salahunu dua, ara oo laꞌok sama-sama reni Yerusalem reu fo tungga feta naa leo biasa boe.
LUK 2:43 Fai Paska nateꞌe, boe ma Yusuf no Maria laꞌok fali reni Nasaret reu rambalololok ro hatahori noꞌuk ka, fo fali reni Galilea reu. Tehuu ara ta bubuluk laꞌo ela Yesus numa Yerusalem. Ara duꞌa rae, fama te Yesus nambalololok no nonoon nara. Tehuu losa bobok, ara ta mete-rita sana. Boe ma ara mulai sangga reu-mai, ndule basa bobonggin nara ma nonoon nara.
LUK 2:45 Huu ara ta ratonggo roon, de ara lenggu fali reni Yerusalem reu, fo rae sanggan nai naa.
LUK 2:46 Losa naa, ara sanggan losa faik telu dalen, dei de ratonggo roon numa Uma Huhule-haradoi Ina-huuk dale. Ana nanggatuuk nakaseseluk dedeꞌak no meser anggama Yahudir.
LUK 2:47 Basa hatahori mana mamanenek kara heran bali-bali, nahuu Ana bubuluk tebe-tebe Manetualain Susuran isin ma Ana bisa naselu nala sira netatanen nara no neulauk.
LUK 2:48 Ina-aman mete-rita talo naa, boe ma ara heran. De inan nae, “Yesus! Tao hata de O tao mala ai sota talo ia? O amam ma au pangganaa doak ma maputa-piok miu-mai sangga O!”
LUK 2:49 Tehuu Yesus naselu nae, “Tao hata de mama no papa sota ma susa sangga Au? Bubuluk ena, hetu? Au aena ues nai Au Amang Uman.”
LUK 2:50 Tehuu ara ta bubuluk no tetuk hata fo Ana kokolak naa.
LUK 2:51 Boe ma basa sara fali reni Nasaret reu. Yesus tao tungga Ndia inan no aman parendan. Boe ma inan mbeda basa mandadik kara raa neu dalen.
LUK 2:52 Leo naak ena Yesus oo namoꞌo mamais losa Ana dadi taꞌe ana, tamba nalela leo-laꞌo neulauk boe. Manetualain ma hatahorir oo sue-lai neun boe.
LUK 3:1 Faik naa, Tiberius dadi neu mane ina-huuk mana toꞌu parenda numa Roma teuk salahunu lima ena. Pontius Pilatus dadi neu nggubenor numa profensi Yudea. Herodes dadi neu nggubenor numa profensi Galilea. Herodes kaꞌan Felipus dadi neu nggubenor numa profensi Iturea ma profensi Trakonitis. Ma Lisanias dadi neu nggubenor numa profensi Abilene. Faik naa oo Hanas ma Kayafas dadi reu malangga anggama Yahudi malangga ina-huun nai kota Yerusalem boe. Faik naa, Yohanis fo Sakaria anan naa, leo numa mamana nees dook ka numa nggorok mai. Numa naa Manetualain feen hara heheluk.
LUK 3:3 Yohanis namanene basa, boe ma ana laꞌok neni basa nggoro mana deka-deka lee Yarden fo nafada hatahorir nae, “Ei muste manaku ma laꞌo ela basa sala-singgom mara fo Manetualain koka heni basa sala-singgok kara raa. Basa naa ei muste sarani dei, fo dadi tanda nae, ei malole mia Manetualain ena.”
LUK 3:4 Lele uluk Manetualain mana toꞌu dedeꞌan baꞌi Yesaya surak laꞌe-neu Yohanis ia nae, “Hambu hatahori nai mamana nees eki nae, ‘Basa hatahorir mahehere tao malole dalak fo simbok Lamatuak mamain! Tao matetetu dalak fo simbok kana.
LUK 3:5 Fua matetu dokek kara. Fera matetu letek kara. Tao mandoo dala peko-pakik kara, tao manggatusi dala mana duku-leꞌuk kara.
LUK 3:6 Mita fo basa hatahori nusa-nusak kara bisa bubuluk rae, Manetualain nau tao nasoi-nasoda hatahori numa sira sala-singgon mai.’ ”
LUK 3:7 Hatahori noꞌuk ka sudi ruma bee mai, fo roke Yohanis sarani sara. Tehuu ana mboka sara nae, “Heeh! Ei mana pepeko-lelekok! Ei sama leo mengge karasok! Boso duꞌa mae ei bisa makamboꞌik numa Manetualain huku-dokin mai, no ei kekedik mae ei sale dalem do tuke teim mara! Taa! Ta dook ka ena, te Manetualain huku-doki basa hatahorir ta mana sale dalen do tuke tein nara no tebe-tebe.
LUK 3:8 Ei boso duꞌa mae, ‘Au ta hambu huku-dokik, nahuu au ia, baꞌi Abraham tititi-nonosin.’ Hambu nai bee dadi talo naa? Naa, ta bisa tulu-fali ei, nahuu ta tao nala ei dadi miu hatahori lolo-laok. Manetualain bisa tao nala batur ia dadi reu baꞌi Abraham tititi-nonosin. Au afada, ee! Matudun tungga ei leleo-lalaꞌom mara mae, ei masadea laꞌo ela ei sala-singgom mara ena, ma tungga falik Manetualain ena.
LUK 3:9 Ei muste tao hata fo neulauk. Mete ma taa, na, Manetualain huku-doki beran tuda laꞌe ei, sama leo hatahori pake taka fo hungga heni ai huuk numa okan mai. Leo naak ena! Ai huuk sosoan ta ena, mete ma buna-boan ta neulauk. Dadi malole lenak hungga henin, fo pirun neni aꞌi dale neu.”
LUK 3:10 Basa de hatahori noꞌuk kara raa ratane Yohanis rae, “De ai muste tao hata?”
LUK 3:11 Boe ma ana naselu nae, “Mete ma o badum dua, na, fee esa neu hatahori badu taak. Mete ma o kananaꞌak, na, baꞌe fee hatahori nanaꞌa taak kara.”
LUK 3:12 Boe ma mana susu bear mai fo roke Yohanis sarani sara. Ara ratane rae, “Papa Meser! Ai muste tao talo bee?”
LUK 3:13 Ana naselu nae, “Ei soa puputa-papata. Tehuu hatematak ia, ei muste maue-osa no ndoos. Boso puku bea lenak numa man-parenda hohoro-lalanen mai. Mita fo rau-inggu bae bea ndaa no hohoro-lalanen.”
LUK 3:14 Hambu soldadu hida ruma naa boe. Ara ratane Yohanis rae, “Mete ma ai, na, talo bee? Ai muste tao hata?” Boe ma ana naselu nae, “Boso pakanaꞌe mala hatahorir doin tungga ei hihiim. Ma boso makasasaꞌek salak neu hatahori no bolo-dalan taa. Ei muste moke makasi ma mameda dai no simbo katemak ei nggadim.”
LUK 3:15 Basa hatahorir ramanene rala kokolan naa, boe ma esa kei esa ma kutu-nuꞌu rae, “Awii! Fama te Yohanis ia, Karistus fo Manetualain helu-bartaa nae nadenun mai numa lele uluk mai ena!”
LUK 3:16 Tehuu Yohanis nafada sara nae, “Nenene matalolole! Neu ko hambu Hatahori esa ta neni babanggak lena heni au nae mai. Leo mae dadi uu kada Ndia nedenun oo, au ta andaa boe. Au bisa sarani ei pake kada oe, tehuu neu ko Ana tao lena heni au bali, ndia Ana tao nasofe ei dalem mara no Manetualain Dula-dale Malalaon. Neu ko Ana tao nalalao ei, sama leo hatahorir hotu dafu dae pake aꞌi.
LUK 3:17 Ana hukun hatahori mana tao salak kara, sama leo mana ue dae kukuru anin fo bingga feꞌe hade neuk numa hade langgak kara mai. Boe ma ana mbeda hade neuk neni soka dale neu ma hotu heni hade langgak kara. Leo naak oo Karistus hukun hatahori kasalak kara, ma piru sara reni aꞌi mbila ta kala matek dale reu boe.”
LUK 3:18 No dalak naa, Yohanis fee nesenedak neu hatahori laꞌe-neu dedeꞌak mata-matak kara, ma nafada sara Manetualain Hara Lii Malolen.
LUK 3:19 Faik naa, Yohanis oo mulai kokolak no manggaledon laꞌe-neu Herodes tatao-nonoꞌin boe. Dedeꞌak naa talo ia: Herodes ia, nggubenor nai profensi Galilea. Salan malunu ndoos. Haꞌi netuduk leo, ana leꞌa neni fadin saon, nade Herodias. Naa te fadin bei masodak, ma bei ta namaketu no Herodias. Herodes leleo-lalaꞌo ta neulaun naa, tao nala Yohanis kaꞌin no ledo-ledo, losa Herodes doak neun. Boe ma Herodes humu nala Yohanis, de ana teen neni bui dale neu.
LUK 3:21 Fai bakahulun, neu ara bei ta humu rala Yohanis, ana sarani hatahori noꞌuk ka. Ma ana oo sarani Yesus boe. Basa naa Yesus hule-haradoi, boe ma lalai natahuka.
LUK 3:22 De Manetualain Dula-dale Malalaon konda neni Yesus neu. Dula-dalek naa mata aon dadi sama leo mbui lunda sina. Basa de hambu harak numa lalai mai nae, “O ia, Au Ana susueng. O soa tao mamahoko Au.”
LUK 3:23 Neu Yesus mulai tui-bengga hatahorir laꞌe-neu Manetualain eno-dala sodan, Ndia teun nara, fama te teuk telu hulu. Hatahorir bubuluk rae, Yesus ia, Yusuf anan. Yusuf bei-baꞌin nara, sira: Yusuf aman, Eli.
LUK 3:24 Eli aman, Matat. Matat aman, Lewi. Lewi aman, Melki. Melki aman, Yanai. Yanai aman, Yusuf.
LUK 3:25 Yusuf aman, Matatias. Matatias aman, Amos. Amos aman, Nahum. Nahum aman, Hesli. Hesli aman, Nagai.
LUK 3:26 Nagai aman, Maat. Maat aman, Matatias. Matatias aman, Semein. Semein aman, Yosek. Yosek aman, Yoda.
LUK 3:27 Yoda aman, Yohanan. Yohanan aman, Resa. Resa aman, Serubabel. Serubabel aman, Sealtiel. Sealtiel aman, Neri.
LUK 3:28 Neri aman, Melki. Melki aman, Adi. Adi aman, Kosam. Kosam aman, Elmadam. Elmadam aman, Er.
LUK 3:29 Er aman, Yosua. Yosua aman, Elieser. Elieser aman, Yorim. Yorim aman, Matat. Matat aman, Lewi.
LUK 3:30 Lewi aman, Simeon. Simeon aman, Yahuda. Yahuda aman, Yusuf. Yusuf aman, Yonam. Yonam aman, Elyakim.
LUK 3:31 Elyakim aman, Melea. Melea aman, Mena. Mena aman, Matata. Matata aman, Natan. Natan aman, Dauk.
LUK 3:32 Dauk aman, Isai. Isai aman, Obet. Obet aman, Boas. Boas aman, Salmon. Salmon aman, Nahason.
LUK 3:33 Nahason aman, Aminadab. Aminadab aman, Admin. Admin aman, Arni. Arni aman, Hesron. Hesron aman, Peres. Peres aman, Yahuda.
LUK 3:34 Yahuda aman, Yakob. Yakob aman, Isak. Isak aman, Abraham. Abraham aman, Tera. Tera aman, Nahor.
LUK 3:35 Nahor aman, Seruk. Seruk aman, Rehu. Rehu aman, Pelek. Pelek aman, Eber. Eber aman, Sela.
LUK 3:36 Sela aman, Kenan. Kenan aman, Arpaksad. Arpaksad aman, Sem. Sem aman, Noh. Noh aman, Lamek.
LUK 3:37 Lamek aman, Metusalak. Metusalak aman, Henok. Henok aman, Yared. Yared aman, Mahalalel. Mahalalel aman, Kenan.
LUK 3:38 Kenan aman, Enos. Enos aman, Set. Set aman, Adam. Adam ia, Manetualain ana nekedadadin.
LUK 4:1 Yohanis sarani basa Yesus, boe ma Yesus laꞌo ela lee Yarden. Manetualain Dula-dale Malalaon sama-sama noon. Boe ma Dula-dalek naa nuni no Yesus neni mamana nees neu.
LUK 4:2 Yesus leo numa naa losa faik haa hulu. Faik naa Yesus ta naꞌa hata esa boe na, de Ana ndoe nalan seli. Boe ma nitur malanggan mai soba-doun fo sangga nae iken.
LUK 4:3 Ana kokolak mbali Yesus nae, “Mete ma tebe-tebe Manetualain Anan O, na, O maena koasa. De madenu batur ia dadi roti fo O muꞌa sara leo.”
LUK 4:4 Tehuu Yesus naselu nae, “O nanaum talo bee, ia! Ta bubuluk, do? Sama leo neni surak nai Manetualain Susura Malalaon dale nae, ‘Hatahori dae-bafok ta nasoda numa kada nanaꞌak mai, hetu!’ ”
LUK 4:5 Basa boe ma nitur malanggan nuni no Yesus neni mamana demak esa neu, de natudun basa man-parenda manai dae-inak no basa nula-napun lalaꞌen. Boe ma ana kokoe Yesus nae, “Basa man-parendar ro sira koasan lalaꞌen naa, au enang basa naar. Leo naak oo, no basa ndia nula-napun boe! De au aena haak fee neu see, fo au nau.
LUK 4:7 Au nau fee basa sara reu O. Tehuu O tao matak esa dei, dei fo au fee. Muda hiek! O makaluku-makatele neu kada au. Kada naa!”
LUK 4:8 Tehuu Yesus naselu mbalin nae, “Hambu nai bee talo naa? Sama leo neni surak nai Manetualain Susura Malalaon nae, ‘O muste makaluku-makatele neu kada Manetualain. Ma o muste maono-lalau neu kada Ndia.’ ”
LUK 4:9 Basa boe ma nitur malanggan nuni no Yesus neni kota Yerusalem neu. Numa naa, ana nuni no Yesus hene reni mamana demak mateꞌen manai Uma Huhule-haradoi Ina-huuk reu. Boe ma ana nae, “Mete ma tebe-tebe Manetualain Anan O, na, boke dae muu leo!
LUK 4:10 Sama leo neni surak nai Manetualain Susura Malalaon nae, ‘Dei fo Manetualain nadenu Ndia atan nara ruma nusa tetuk do inggu temak mai, fo ranea O.
LUK 4:11 Neu ko ara mai ratanee rala O, mita fo O eim ta koi laꞌe batu faa boe na.’ ”
LUK 4:12 Tehuu Yesus naselu nae, “Boso papata Au. Sama leo neni surak nai Manetualain Susura Malalaon dale nae, ‘Boso soba-dou Manetualain!’ ”
LUK 4:13 Nitur malanggan soba-dou Yesus no dalak mata-matak kara, tehuu ana ta nala sana. Boe ma ana laꞌo ela Yesus, fo nahani fai neulauk dei.
LUK 4:14 Basa boe ma Yesus fali neni profensi Galilea neu, ma Manetualain Dula-dale Malalaon fee koasa neun. Ta dook ka boe ma hatahorir marai nusak naa, mulai ralela Ndia naden.
LUK 4:15 Ana fee nenorik numa hatahori Yahudi uma huhule-haradoin nai bee a mesan. Boe ma hatahorir koa-kion rae, “Yesus naa, Hatahori ta neni babanggak, ee!”
LUK 4:16 Laꞌe esa, Yesus neni ndia nggoron Nasaret neu. Ndaa no hatahori Yahudir fai huhule-haradoin, ndia ‘fai Sabat’, Ana maso neni uma huhule-haradoik neu, tungga Ndia siꞌen. De Ana nambadeik fo nae lees numa Manetualain Susura Malalaon mai.
LUK 4:17 Boe ma ara loo feen baꞌi Yesaya susuran. Ana buka susurak naa de sangga lalanek, ma lees nae,
LUK 4:18 “Manetualain Dula-dalen koasan nai Au. Huu naa de Ana henggenee memak Au, fo tui-bengga Lamatuak Hara Lii Malolen neu hatahori kasian nara. Ana nadenu Au ena, fo afada ae, mana nai buir, neu ko hambu nekemboꞌik; pokek kara, neu ko bisa mete-rita rasafali; mana hambu tuni-ndenik kara, neu ko leo-laꞌo no nekemboꞌik.
LUK 4:19 Hatematak ia Lamatuak fain losa ena, fo tao nasoi-nasoda Ndia hatahorin nara.”
LUK 4:20 Lees basa susurak naa, boe ma Yesus lulu falik kana de loon neu mana koladu uma huhule-haradoik, basa de Ana nanggatuuk. Basa hatahorir maruma uma huhule-haradoik naa, mete raherek kana.
LUK 4:21 Boe ma Ana nafada sara nae, “Hata fo ei mamanenen numa Manetualain Susura Malalaon mai naa, hatematak ia dadi ena!”
LUK 4:22 Boe ma basa hatahorir maruma naa mulai koa Yesus rae, “Awii! Hata fo Ana kokolak bebeik kara ia, neulau ndoos. Tehuu Ndia ia, Usu Anan, hetu? Talo bee de ana bisa talo ia?”
LUK 4:23 Boe ma Yesus nafada sara nae, “Ei basa ngga bubuluk ena hambu dedeꞌak nae, ‘Heeh, doter! Puli mala o ao heli-helim dei!’ Ei mae pake dedeꞌak naa, fo ndee masafali neu Au mae, ‘Tao hata de O ta tao tanda heran esa boe na soa-neu ai marai ia, fo sama leo O taok numa kota Kapernaum naa?’
LUK 4:24 Ndoon talo ia: hatahori ta nau simbok Manetualain mana toꞌu dedeꞌan nai ndia nggoro-tadu heli-helin.
LUK 4:25 Haꞌi netuduk numa Manetualain mana toꞌu dedeꞌan baꞌi Elia mai. Laꞌe esa, udan ta konda teuk telu seserik ena. Lelek naa, hambu ina falu noꞌuk ka ruma Israꞌel. Tehuu Manetualain ta nadenu Elia fo tulu-fali sara. Manetualain nadenun neni kada ina falu esa numa nggorok Sarfat neu deka no kota Sidon. Naa te ina lasik naa, ta hatahori Yahudi. Tehuu ana namahere Manetualain koasan.
LUK 4:27 Haꞌi netuduk laen numa Manetualain mana toꞌu dedeꞌan Elisa mai. Lelek naa, hatahori Yahudi noꞌuk ka hambu hedi kusta ruma Israꞌel. Tehuu Manetualain ta fee hahaik neu sara. Manetualain nadenu Elisa fo tao nahai kada hatahori kusta esa, nade Naaman. Naa te ndia naa, hatahori Siria, ta hatahori Yahudi. Tehuu ana namahere Manetualain koasan.”
LUK 4:28 Neu ara ramanene rala Yesus kokolan naa, boe ma basa sara lurin.
LUK 4:29 Boe ma basa sara rambadeik randaa, de ara husi heni Yesus numa uma huhule-haradoik naa mai. Boe ma ara leꞌa roon neni nggorok tatain neu, fo rae timba nggarin neni mbiak manai naa dale neu.
LUK 4:30 Tehuu Ana laꞌo dea neu nesi kada hatahori noꞌuk kara talada heon, de laꞌo ela sara ruma naa.
LUK 4:31 Basa boe ma Yesus konda neni Kapernaum neu nai dano Galilea tatain. Tungga-tungga fai huhule-haradoik, Ana nanori hatahorir rai uma huhule-haradoik dale.
LUK 4:32 Hatahorir heran bali-bali nenene Ndia kokolan, huu Ana bubuluk no tetuk nenorik kara raa isin.
LUK 4:33 Laꞌe esa, neu Yesus fee nenorik numa uma huhule-haradoik naa, hambu hatahori fo nitu saꞌek esa mulai bolu tingga-tingga nae,
LUK 4:34 “Hoi! Yesus Hatahori Nasaret, ee! O mai tao hata mua ai nai ia! O mai fo mae makalulutu ai, do? Ai malela O. O ia, Hatahori Malalaok fo lele uluk Manetualain helu-bartaa nae nadenun mai.”
LUK 4:35 Tehuu Yesus mbokan nae, “Makatema o bafam! Kalua numa hatahori naa mai!” Medak neu ma, nitu naa fae nggari hatahori naa neu daer numa hatahorir taladan mai. Basa boe ma nitu naa kalua laꞌo ela hatahori naa, ma ana ta tao nahedi sana.
LUK 4:36 Basa hatahori bafan nara bese mboo, de rae, “Heran, ee! Hatahori ia kokolan naena koasa ta neni babanggak! Losa neu nitu oo tungga parendan boe, de kalua numa hatahori mai!”
LUK 4:37 Boe ma tutuik laꞌe-neu Yesus mulai natanggela nai basa mamanak kara marai nusak naa.
LUK 4:38 Ara kalua numa uma huhule-haradoik naa mai, boe ma Yesus neni hatahori esa uman neu. Hatahori naa nade Simon. Simon ari-inan hambu hedi sumaik, de ao-inan natobi roo-roo. Boe ma ara roke-hule Yesus rae, “Papa! tulun tao mahai ina lasik dei!”
LUK 4:39 Yesus neu nambariik deka neu mamana susungguk tatain, boe ma Ana husi kalua heni hedi sumaik numa ina lasik mai. Hatematak naa oo hedi sumain mopon tutik ka boe. Boe ma nambadeik tutik ka, de neu sadia nanaꞌak fee sara.
LUK 4:40 Bobon naa, neu ledo sangga nae tesa ena, hatahorir roo basa hatahori hedis sara reni Yesus reu. Hedin nara mata-matak kara. Boe ma Ana nafaroe hatahori hedis sara raa, de tao nahai basa sara.
LUK 4:41 Numa hatahori hedis sara raa mai oo, hambu hida nitu saꞌek kara boe. De Yesus parenda nitur raa, fo kalua numa hatahorir raa mai. Ara kalua ma bolu rae, “O ia, Manetualain Anan!” Nitur raa bubuluk rae, Ndia ia, Karistus fo Manetualain helu-bartaa memak kana numa lele uluk mai ena fo nae nadenun mai. De Yesus kaꞌi sara fo boso kokolak dedeꞌa deꞌek esa boe na laꞌe-neu Ndia aon.
LUK 4:42 Neu beꞌe-mai lole manggaledo, boe ma Yesus beꞌe fo neni mamana nees esa neu, nai kota dea. Hatahorir sanggan sudi nai bee. Neu ratonggon, boe ma ara kokoen rae, “Papa leo mua ai leo! Hae muni mamanak laen muu!”
LUK 4:43 Tehuu Ana naselu nae, “Au oo muste uni nggorok laen uu boe, fo uu tui-bengga Hara Lii Malole laꞌe-neu Manetualain parenda-koasan. Manetualain nadenu Au ena fo akalalaꞌok ues naa.”
LUK 4:44 Boe ma Ana laꞌok numa nggorok esa mai neni nggorok esa neu, fo fee nenorik nai uma huhule-haradoik kara marai profensi Yudea.
LUK 5:1 Laꞌe esa, Yesus nanori hatahorir ruma dano Galilea tatain. Hatahori noꞌuk ka mai fo rae nenene Manetualain Dedeꞌa-kokolan. Losa neu ara raseseti rakarumbu rala Yesus.
LUK 5:2 Deka naa, hambu mana puꞌa-dalak kara raole ralao puꞌan nara ruma mada lai. Boe ma Yesus mete-nita ofa lambu rouk dua nafu ruma naa.
LUK 5:3 Ofa kaduak kara raa, Simon enan esa. Yesus hene neni Simon ofan lain neu, boe ma noken fo ana tonda ofak neni oe demak faa neu dei. De Ana nanggatuuk nanori hatahori noꞌuk kara raa.
LUK 5:4 Ana fee nenorik basa, boe ma kokolak no Simon nae, “Simon! Tonda ofak muni tasi demak faa muu fo nggari puꞌak neu naa. Neu ko ei mala iꞌak noꞌuk ka.”
LUK 5:5 Tehuu Simon naselu nae, “Awii, Lamatuak boe oo! Ai puꞌa fafandek ai lima-ein nara hatu katemak esa ena, tehuu ta mala iꞌak esa boe na! Tehuu Papa nae leo naa ena, na, neu ta hata-hata! Au nggari sobak kana.”
LUK 5:6 Boe ma ara nggari puꞌak neu. Neu rae leꞌa falik puꞌak, naa te puꞌak sofek no iꞌak noꞌun seli, losa puꞌak mulai sida ena.
LUK 5:7 Boe ma Simon bolu nonoon nara marai ofak laen fo mai tulun. De ara raꞌu iꞌak kara reni ofak reu, losa ofa kaduak kara raa sofen tetu-tetu no iꞌak, de ela baꞌuk ka ara molo.
LUK 5:8 Simon nonoo mana puꞌa-dalan, Yakobis no Yohanis fo Sabadeus anan nara oo ruma naa boe. Ara oo heran ralan seli boe, nahuu ara rala iꞌak noꞌun seli talo naa. Neu Simon mete-nita mandadik kara raa, boe ma ana sendek luu-langgan neu Yesus matan, de nae, “Au ia, hatahori esa mana tao salak noꞌun seli ena. Dadi malole lenak Lamatuak boso deka-deka au bali.” Tehuu Yesus naselu nae, “Mon! Boso duduꞌa noꞌuk ka neu dedeꞌak naa, huu Au sangga ae pake ei. Eir ia, masiꞌe sangga iꞌak. Tehuu hatematak ia Au anori ei sangga hatahorir fo tungga Au.”
LUK 5:11 Basa boe ma ara tonda sira ofan tutik ka fo nafun neni mada lai neu. Boe ma ara laꞌo ela sira bebeain, fo tungga Yesus.
LUK 5:12 Numa nggorok esa, Yesus natonggo no hatahori esa hedi kusta ndule basa ao-inan ena. Neu ana mete-nita Yesus, boe ma neu sendek luu-langgan ma nateꞌe matan losa daer. Boe ma ana nae, “Papa, ee! Tulu-fali au dei! Au bubuluk, Papa bisa tao mamopo au heding ia, mita fo hatahori boso nunute au bali. Sadi Papa nau.”
LUK 5:13 Boe ma Yesus loo liman fo nafaroen. Ana kokolak nae, “Au nau a mesan! O hai leo!” Kokolak basak ka boe, ma hatahori naa hedi kustan mopon tutik ka.
LUK 5:14 Boe ma Yesus fee nesenedak neun nae, “Masaneda matalolole! O hai ena, tehuu boso mafada esa boe na, ee! Ma o muste tungga baꞌi Musa parendan lele uluk. Dadi muni malangga anggama muu, fo ana parisa o ao-inam, mita fo ana bubuluk o hedim mopon tebe ena, do beik. Boe ma o muste muni o fefeem tanda makasi fo basa hatahori bubuluk rae, o hai tebe-tebe ena.”
LUK 5:15 Leo mae Yesus kaꞌi-ore, tehuu tutuik laꞌe-neu Ndia koasan naa natanggela numa bafak mai neni bafak neu sudi nai bee. De hatahorir lua mai, fo rae ramanene Ndia nenorin. Basa boe ma Ana tao nahai hatahori hedin nara mata-matak kara.
LUK 5:16 Tehuu Yesus oo hii nakaheok numa hatahori noꞌuk kara mai boe, fo neu hule-haradoi nai mamana nees.
LUK 5:17 Laꞌe esa, Yesus nanori hatahorir numa uma esa dale. Faik naa, hatahorir ruma partei anggama Farisir ma meser anggama hida mai fo tungga nenene Yesus nenorin. Ara ruma nggorok kara marai profensi Galilea, profensi Yudea, ma kota Yerusalem mai. Manetualain fee koasa neu Yesus fo tao nahai hatahori hedis sara.
LUK 5:18 Faik naa, hatahori hida ndoro reni hatahori keko-luꞌuk esa nai lalanggak lain. Ara raote tebe-tebe reni hatahori keko-luꞌuk naa fo Yesus tao nahain. Tehuu uma naa, sofek seꞌe-seꞌe no hatahorir, losa rae rakaseseti dale reu oo, ta bisa boe. Huu naa de ara ndoro roo hatahori keko-luꞌuk naa neni uma lain neu. Boe ma ara ofe uma naa, soi bolok fo rakonda hatahori keko-luꞌuk naa nonook lalanggan. Ara rakondan neu hatahori noꞌuk kara taladan, ndaa tetar neu Yesus matan.
LUK 5:20 Yesus mete-nita naa, boe ma Ana bubuluk nae, ara ramahere Ndia bisa tao nahai sira nonoon naa. Boe ma Ana kokolak no hatahori keko-luꞌuk naa nae, “Ana nggee! Au koka heni o sala-singgom mara ena.”
LUK 5:21 Hatahori Farisir ma meser anggamar ramanene Yesus kokolak talo naa, boe ma ara mulai ratatane aok rae, “Na dei! Kada Manetualain mesa kana ndia naena haak fo koka heni hatahori sala-singgon nara. Te ndia ia see, de tao aon leo Manetualain! Ia, nekedadaek ta hohoꞌa ndoos ia!”
LUK 5:22 Tehuu Yesus bubuluk dale kuru-eron nara. Boe ma Ana kokolak nae, “Tao hata de ei duꞌa mae, Au ia kokolak dedeꞌa nekedadaek?
LUK 5:23 Au ia, Hatahori Dae-bafo Isi-isik. Ma Au aena haak fo fee ambon neu hatahori sala-singgon nara. Mete ma Au kada afada neu hatahori keko-luꞌuk ia ae, ‘Au fee ambon neu o salam mara ena,’ ei ta mete-mita Au koasan nai dae-bafok ia. Tehuu mete ma Au ae, ‘Mambadeik leo! Luꞌa mala o lalanggam fo fali muu ngga leo.’ Mete ma ana nambadeik tutik ka, na, dei fo ei mete-mita Au koasang. Huu naa de Au nau tao ahai hatahori keko-luꞌuk ia, mita fo ei oo bubuluk Au aena haak boe, fo fee ambon neu hatahori sala-singgon nara.” Boe ma Ana mbali hatahori keko-luꞌuk naa, de kokolak nae, “Mambadeik leo! Luꞌa mala o lalanggam, fo fali muu ngga leo!”
LUK 5:25 Medak neu ma, hatahori naa nambadeik de nambariik neu hatahori noꞌuk kara matan, boe ma luꞌa nala lalanggan. De ana fali neu ngga, ma koa-kio Manetualain.
LUK 5:26 Neu basa hatahori mete-rita naa, boe ma ara heran. De ara rakadedemak Manetualain naden rae, “Manetualain ta neni babanggak, ee! Faik ia, ita mete-tita mandadi ta hohoꞌak to ita mata heli-helin nara!”
LUK 5:27 Ta dook ka boe ma Yesus kalua numa uma naa mai, de mete-nita hatahori mana susu bea esa, nanggatuuk numa ndia mamana sususu bean. Hatahori naa, nade Lewi. Boe ma Yesus noken nae, “Mai tungga Au!”
LUK 5:28 Lewi namanene nala naa, boe ma ana nambadeik tutik ka, de ana laꞌo ela basa bebeain marai naa, fo tungga Yesus.
LUK 5:29 Basa boe ma Lewi tao feta moꞌok fo noke Yesus neni ndia uman neu. Ana oo noke ndia nonoo mana susu bean nara ma fuik laen nara bali, fo mai raꞌa feta boe.
LUK 5:30 Tehuu hambu hatahori partei Farisi hida ma meser anggamar, ara unggu-remu numa Yesus ana nunin nara matan rae, “Tao hata de ei manggatuuk miꞌa-minu sama-sama mia hatahori papake taak kara, ndia leo mana susu bear ma hatahori ta neulauk kara? Hatahori neulauk kara boso rakabua ro hatahori matak leo naak kara!”
LUK 5:31 Boe ma Yesus nafada sara nae, “Hatahori hedis memak parluu doter. Tehuu hatahori sodak ena, ta parluu.
LUK 5:32 Au mai fo tao matak neu hatahori ta neulauk kara. Tehuu ta mai fo tao matak neu hatahori fo mana nameda aon ndoos.”
LUK 5:33 Basa de, hatahori maruma partei anggama Farisi ma meser anggamar raa oo unggu-remu reu Yesus boe rae, “Talo ia, Papa! Yohanis Mana Saranik ana nunin nara puasa ma hule-haradoi laꞌi-laꞌik ka. Hatahori Farisir ana nunin nara oo tao talo naa boe. Tehuu tao hata de Papa ana nunin nara kada raꞌa-rinu rakandook kana? Ara ta puasa ralela, do?”
LUK 5:34 Tehuu Yesus bala sara pake lololek nae, “Memak ei bubuluk ena, mete ma tao feta kabin, na, fuik kara ta puasa, tehuu ara raꞌa-rinu losa rakabete. Mete ma baroit touk bei nai naa, neu ko ara raꞌa-rinu sama-sama.
LUK 5:35 Tehuu mete ma neu laꞌe esa, hatahori laen humu reni baroit touk naa, na, neu ko nonoon nara rameda susa, dei fo ara puasa.”
LUK 5:36 Basa boe ma Yesus fee lololek esa bali nae, “Ta hambu hatahori haꞌi nala tema beuk faa fo tandan neu badu raak mana sidak. Te mete ma safe badu naa, neu ko tema bibia beuk naa kukundu, de badu raak naa boe sidan.
LUK 5:37 Leo naak oo hatahori ta radai oe anggor beuk neni boboꞌik banda rou raak dale neu boe, te neu ko kadin ma ana sii sasarak, de oe anggor beuk naa mboꞌa henin. Dadi oe anggor beuk muste nadain neni boboꞌik banda rou beuk neu. [No lololek naa, Yesus nanori sara nae Ndia nenori beun boso babalik kana no hatahori Farisir nenori raan.]
LUK 5:39 Hatahori fo mana ninu nita oe anggor raak, ta hii ninu oe anggor beuk. Huu ana bubuluk nae, ‘Anggor neni nehinda dook naa, ndia ladan seli, na!’ ”
LUK 6:1 Laꞌe esa, Yesus no ana nunin nara laꞌok resik hatahori osin dale, ndaa no hatahori Yahudir fai hahae tao ue-osan. Boe ma ana nunin nara koru rala hade-nggandum mbulen maruma sira matan. Ara raisin, de raꞌa.
LUK 6:2 Numa naa, hambu partei anggama Farisi hatahorin hida fo mana toꞌu rahere sira Yahudi dala-hadan. Ara mete-rita Yesus ana nunin nara tao talo naa, boe ma ara rahara berak neu Yesus rae, “Tao hata de O ana nunim mara lena-langga ita anggaman hohoro-lalanen? Ara tao ues laꞌe-ndaa fai hahae tao ue-osa! Mete ndia naa! Ara koru hade-nggandum. Boso talo naa!”
LUK 6:3 Tehuu Yesus bala nae, “Talo bee, ou? Ei ta masaneda baꞌi Dauk tutuin, do? Baꞌi Dauk no ndia ana nunin nara taꞌin nara kada kikiok, nahuu ndoe ralan seli ena. Boe ma ara maso reni Manetualain Laa Huhule-haradoin reu, de haꞌi roti fo malangga anggamar fee basan neu Manetualain, fo ara raꞌa. Naa te kada malangga anggamar ndia bole raꞌa roti naa. Hatahori laen ta bole. Boe ma baꞌi Dauk asa raꞌa, tehuu ta hambu hatahori fee salak neu sara. Ei nok bali ta bei lees mita Manetualain Susura Malalaon!
LUK 6:5 Pasa ndiꞌi doom mara fo nenene matalolole! Au ia, Hatahori Dae-bafo Isi-isik. Au ndia aena haak fo aketu ae, hatahori bole tao hata-hata ndaa no fai hahae tao ue-osa.”
LUK 6:6 Laꞌe esa, ndaa no fai hahae tao ue-osa esa bali, Yesus neu fee nenorik numa uma huhule-haradoik. Numa naa, hambu touk esa fo liman seri mates.
LUK 6:7 Numa naa oo, hambu meser anggama hida ma hatahorir ruma partei anggama Farisi mai, ara sangga lelak fo rae rakatutudak Yesus. De ara rahani a fo mete sudik, fama te Ana nae tao nahai hatahori fo lima mate seserik naa, ndaa no fai hahae tao ue-osa. No dalak naa, ara bisa rakasasaꞌek salak neun nai hatahori noꞌuk matan.
LUK 6:8 Tehuu Yesus bubuluk no tetuk sira duduꞌan. Huu naa de Ana nanggou hatahori fo lima mate seserik naa nae, “Kaꞌa, ee! Mai mambariik muu talada ia dei!” Boe ma neu nambariik tutik kana.
LUK 6:9 De Yesus natane hatahorir raa nae, “Hena Au atane ei dei. Tungga ita anggaman hohoro-lalanen, na, kada hata ndia ita taon fo ndaa no fai hahae tao ue-osa? Ita tao malole do, manggarauk? Ita tao tasoi-tasoda hatahori do, takalulutu ndia masodan?”
LUK 6:10 Boe ma Yesus mete ndule basa sara, de Ana kokolak no hatahori fo lima mate seserik naa nae, “Loo o limam mai!” Boe ma ana loo liman neu, de liman hai tutik ka.
LUK 6:11 Yesus musun nara mete-rita talo naa, boe ma ara luri. De ara mulai duduꞌa fo rala harak rae, “Ai muste sangga dalak laen bali fo mae makatutudak kana!”
LUK 6:12 Ta dook ka bali, boe ma Yesus neni letek esa neu fo hule-haradoi. De Ana hule-haradoi numa naa, leꞌodae katemak esa.
LUK 6:13 Neu beꞌe-mai huhua anan, boe ma Ana nanggou nala Ndia ana nunin nara. Numa sira lalaꞌen mai, Ana here nala salahunu dua fo dadi neu Ndia nedenun nara. Hatahori fo Ana here nalak kara raa, sira:
LUK 6:14 Simon (Yesus nasiꞌe noken nae, ‘Petrus’), Anderias (Simon fadin), Yakobis, Yohanis (Yakobis fadin), Felipus, Bartolomeos,
LUK 6:15 Mateos, Tomas, Yakobis (Alpius anan), Simon (mana tungga partei politik Selot),
LUK 6:16 Yudas (Yakobis anan), ma Yudas Iskariot (fo neu ko ana ndia seꞌo heni Yesus).
LUK 6:17 Neu Yesus no ana nunin nara konda numa letek naa mai, boe ma ara rambariik ruma dae matetuk. Numa naa oo, hatahori noꞌuk kara rakabua boe. Hatahorir raa, ruma profensi Yudea, kota Yerusalem, Tirus ma Sidon mai, fo kota dua rai tasi tatain.
LUK 6:18 Ara mai fo rae nenene Yesus, ma ketuk rae hule Yesus tao nahai hatahori hedis sara. Boe ma Ana tao nahai sara. Ana oo tao nahai hatahori fo nitu saꞌek, ma husi heni nitur kalua numa hatahorir raa mai boe.
LUK 6:19 Basa hatahorir nau koi laꞌe Yesus, te mete ma ara koi laꞌen, na, hambu koasa kalua numa Yesus mai fo tao nahai sara.
LUK 6:20 Boe ma Yesus nasare mbali ana nunin nara, de fee nenorik nae, “Hatahori kasian nara ein! Ei maua, nahuu Manetualain mesa kana, ei Mane neulaun.
LUK 6:21 Hatahori mana ndoe-laꞌak kara ein! Ei maua, nahuu Manetualain neu ko fee ei makabete. Hatahori mana buꞌi mamatanik kara ma mana susa-sonak kara ein! Ei maua, nahuu neu ko ei dalem mara ramahoko ma hika setelele.
LUK 6:22 Hatahori mana hambu susa-sonak, nahuu ana tungga Au, Hatahori Dae-bafo Isi-isik ia! Ei maua, nahuu neu ko Manetualain bala ei nai nusa tetuk do inggu temak. Leo mae hatahori mburuk ro ei, do, rakalulutu ei nade malolem, do, momolo-tatabu ei, do, husi-mbuu lulukur ei nok bali hatahori manggarauk, ei maua, nahuu Manetualain neu ko nasaneda ei nai nusa tetuk do inggu temak. Dadi mete ma hatahorir rakasususak ei talo naa, na, tao ei dalem mara kada mbena sau-sau leo! Ma makaboboku mamahoko! Hae heran, nahuu hatahori mana makasususak ei hatematak ia, sira bei-baꞌin nara ndia tao rakasususak Manetualain mana toꞌu dedean nara ndia lele uluk. De, mete ma ei hambu susa-sonak matak leo naak, tao ei dalem mara kada mbena sau-sau leo, nahuu Manetualain neu ko bala ei manahetak nai nusa tetuk do inggu temak!
LUK 6:24 Tehuu hatahori kamasuꞌik kara ein! Ei hambu sosoek, nahuu ei masoda setelelem mara, losa kada ia leo.
LUK 6:25 Hatahori mana makabetek kara ein! Ei hambu sosoek, nahuu fai ndoe-laꞌas ta hohoꞌak daka nala ei. Hatahori mana hika sadi ndaak kara ein! Ei hambu sosoek, nahuu manggataꞌak mai tao nala ei buꞌi makarereu.
LUK 6:26 Hatahori taꞌe koak kara ein! Ei hambu sosoek, nahuu bakahulun ei bei-baꞌim mara oo koa-kio mana toꞌu dedeꞌa pepeko-lelekok kara boe!”
LUK 6:27 Boe ma Yesus tuti nae, “Pasa ndiꞌi doom fo nenene matalolole! O muste sue o musum mara, ma tao hata fo malole neu hatahori mana mburuk no o.
LUK 6:28 Hule-haradoi neu Manetualain fo Ana tao hata fo malole neu hatahori mana nakatoo o. Ma moke fo Ana tao hata fo malole neu hatahori mana soa tao manggarauk neu o.
LUK 6:29 Mete ma hatahori famba o nasum seri, na, mboꞌin fo ana famba tamba o nasum seri bali. Mete ma ketuk leꞌa nala o jeket, na, fee tamba seluk o badum neun bali.
LUK 6:30 Mete ma hatahori roke o hatan esa, na, feen neu leo. Mete ma ketuk baꞌu reni o hatam esa, na, elan numa naa fo ana soan leo. Boso muu moke falik kana bali!
LUK 6:31 O muste tao hatahori laen nara oo, sama tetar no hata fo o hii hatahorir taon soa-neu o boe.
LUK 6:32 O hii matudu susuem neu kada o hatahori heli-helim mara. Naa malole. Tehuu lenan, hata? Hatahori manggarauk kara oo sue sira hatahori heli-helin nara boe!
LUK 6:33 Mete ma o tao neulauk neu kada hatahori mana tao neulauk neu o, na, lenan nai bee? Te hatahori manggarauk kara oo tao neulauk esa mbali esa talo naa boe.
LUK 6:34 Mete ma o fee pindan doik neu kada hatahori see fo ana bisa fee falik kana, na, lenan hata? Te hatahori manggarauk kara oo bisa fee pindan doik neu hatahori laen boe, sadi mbila-beinesak ara simbo falik kasa tema-tema.
LUK 6:35 Tehuu mana lenak naa, ndia talo ia: sue o musum mara! Ma tao hata fo malole neu sara. Ara toꞌa hata, na, fee pindan neu sara. Hae duꞌa mae, ara bisa fee falik kasa, do taa. No dalak naa, neu ko Manetualain bala o. Ma o dadi muu Manetualain mana Demak Mateꞌen anan. Huu o leo-laꞌo sama leo o Amam fo hii tao hata fo malole soa-neu hatahori manggarauk. Ana oo tao hata fo malole soa-neu hatahori ta mana malela noke makasi boe.
LUK 6:36 Dadi o muste matudu dale kasian neu hatahori, sama leo o Amam manai nusa tetuk do inggu temak natudu dale kasian neu o.”
LUK 6:37 Yesus fee nenorik nakandoo nae, “Boso timba-tai hatahori, mita fo hatahori boso timba-tai rasafali o. Boso maselu kisubalik hatahori, te neu ko hatahorir oo raselu kisubalik o boe. Lilii heni hatahori sala-singgon, mita fo hatahori oo lilii heni o sala-singgom boe.
LUK 6:38 Mete ma o fee hata fo hatahori toꞌa, na, neu ko o simbo masafalik kana. Neu ko Manetualain koladu fo o simbo falik sasi kao-kao. Naa, sama leo hatahorir radai fufue noꞌun seli neu balee uꞌukuk, boe ma ara ndondokon, ndeꞌin, basa de radai seluk bali losa ana sasi kao-kao. O simbo malak kara raa, sama leo naak. Mete ma o fee baꞌuk, na, o simbo falik oo baꞌuk boe. Tehuu mete ma o fee noꞌuk, na, o simbo falik oo manahetak boe.”
LUK 6:39 Yesus oo fee nenorik pake lololek boe. Ana tui nae, “Ta hambu hatahori pokek natudu dalak fee hatahori pokek laen. Neu ko dua sara tuda reni bolok dale reu!
LUK 6:40 Kakana sakola ta bisa lena heni ndia mesen! Tehuu mete ma ana tungga natalolole ndia mesen nenorin, na, ana bisa dadi sama leo ndia mesen.
LUK 6:41 O hii kada tanda matalolole hatahori sala kadiꞌi anan. Tehuu o sala moꞌom, o taon leo bali ta ia. Naa, sama leo o mete-mita uꞌuk nai hatahori matan, naa te hambu balo moꞌok natabaa nala o matam, tehuu o ta mameda sana!
LUK 6:42 Talo bee de o mambarani kokolak mae, ‘Tia-laik! Mai fo au nggai heni uꞌuk numa o matam mai dei.’ Naa te o ao heli-helim ta bisa mete-nita hata-hata, nahuu balok natabaa nala o matam, na! Woi! O ia, memak hatahori mana dea-matak tebe-tebe! Tulun dei! Piru heni balok naa, numa o mata heli-helim mai dei. Dei fo o bisa mete-mita fo nggai heni uꞌuk numa o nonoom naa matan mai.”
LUK 6:43 Yesus tamba seluk lololek esa bali nae, “Ta bisa dadi ai huu neulauk naboa ai boa ta neulauk. Ma ta bisa dadi ai huu ta neulauk naboa ai boa neulauk.
LUK 6:44 Hatahori bisa tanda rala, ai huuk esa neulauk do taa, numa ai huuk naa boan mai. Basa hatahorir bubuluk rae, ta bisa dadi hatahori seu ufa boan, do anggor boan numa ai kanggouk mai.
LUK 6:45 Leo naak oo, hatahori dale lolo-laok bisa tao hata fo neulauk kara boe. Tehuu hatahori dale manggenggeok tao hata manggarauk kara. Te numa hatahori kokolan mai, natudu ndia isi-isin.”
LUK 6:46 Yesus tuti seluk kana bali nae, “Ei soa kada moke Au taa-taa mae, ‘Lamatuak’. Tehuu tao hata de ei ta nau tungga Au kokolang?
LUK 6:47 Hatahori mana mai nenene Au, boe ma ana tao tungga Au kokolang, ana sama leo
LUK 6:48 hatahori mana nae nambaririik uma matea. Ana kali natalolole fanderen bolon nai dae isik dei, losa hambu batu isik. Basa naa, ana tao fanderen tetar neu batu naa lain, dei fo nambaririik uma. Mete ma faa lua mai, na, uma naa ta natanggenggo, nahuu fanderen matea ena.
LUK 6:49 Tehuu hatahori mana nenene no kada dale bibiak ma ta tungga Au kokolang, ana sama leo hatahori mana nae nambaririik uma, te sadi ana dadi. Ana ta tao fanderen, tehuu ana kada netetende uma naa neu dae isik nai lee tatain. De neu faa lua mai, boe ma ana sapu nakalulutu heni uma naa!”
LUK 7:1 Yesus fee nenorik basa talo naa, boe ma Ana fali neni kota Kapernaum neu.
LUK 7:2 Nai naa, hambu komedan soldadu Roma esa. Ana naena ana mana maue-osa esa, dadi neu ndia ana nemeheren. Hatahori mana maue-osa naa tuda hedis, de ela baꞌuk ka maten.
LUK 7:3 Neu komedan naa namanene laꞌe-neu Yesus, boe ma ana nadenu lasi Yahudir hida fo reu roke Yesus mai tao nahai ana mana maue-osa naa.
LUK 7:4 Ara kokoe Yesus, fo mete ma bisa, na, Ana mai no sara fo tao nahai hatahori naa. Ara kokoen rae, “Papa! Hatahori Roma ia, hatahori neulauk! Ana nandaa, Papa tulu-falin.
LUK 7:5 Ana nambaririik nala uma huhule-haradoik esa fee ita, te ana sue ita hatahori Yahudi na.”
LUK 7:6 Boe ma Yesus tungga no sara. Ara bei ta losa uma, tehuu komedan naa, fee nonoon neu fo nafada Yesus ena nae, “Lamatuak hae makamangguk aom fo mai bali, huu au ta andaa simbok Lamatuak nai au umang.
LUK 7:7 Ma au oo, ta andaa neti asare matak ua Lamatuak boe. Memak manggaledok ena, Lamatuak naena koasa. De, sadi Lamatuak kada kokolak numa naa mai, neu ko au ana mana maue-osang hai neuk ka. Au bubuluk matak ia, nahuu au malanggang nggara raena koasa fo parenda au. Ma au oo, aena koasa fo parenda au soldadung nggara boe. Mete ma au fee parenda neu au ana nuning ae, ‘Muni naa muu!’ neu ko ana neu. Mete ma au ae, ‘Ia mai!’ neu ko ana mai. Mete ma au adenu au hatahori mana maue-osang ae, ‘Tao ia!’ neu ko ana tao talo naa. De, sadi Lamatuak kada kokolak, neu ko au ana mana maue-osang ia, hai neuk ka.”
LUK 7:9 Yesus namanene nala naa, boe ma Ana heran. Ana hekor aon fo nasare hatahori noꞌuk kara mana tungga Ndia. Boe ma Ana nae, “Heran, ee! Doo basa ia, Au bei ta atonggo ita hatahori Yahudi esa boe na, nemeheheren matea leo hatahori Roma ia!”
LUK 7:10 De, Yesus laꞌok losa kada naa. Basa boe ma komedan nonoon nara lenggu fali. Losa komedan uman, boe ma mete-rita ana mana maue-osa naa, mana haik ena.
LUK 7:11 Neu beꞌe-mai, boe ma Yesus no Ndia ana nunin nara laꞌo reni nggorok esa reu, nade Nain. Hatahori noꞌuk ka rambalolok ro sara.
LUK 7:12 Ara sangga deka nggorok naa lelesun, boe ma hatahori bubuak esa rae kalua reu ratoi mamates. Mana matek naa, ina falu esa ana tou kise-muꞌen.
LUK 7:13 Neu Yesus mete-nita ina falu naa, boe ma dalen tuda kasian. De Ana kokolak no inak naa nae, “Mama! Na leo, hae buꞌi!”
LUK 7:14 Yesus deka mata neu, de Ana koi lalangga mamates naa. Boe ma hatahori mana ndoro lalanggak naa, hahae taak. Basa boe ma Yesus kokolak neu hatahori mates naa nae, “Taꞌek! Mambadeik leo!”
LUK 7:15 Boe ma kanak naa nasoda fali numa mamaten mai, de nanggatuuk tutik ka. Ana mulai kokolak no hatahori mana rambariik eko-feon. Boe ma Yesus nafada inak naa nae, “Mama! Ia mama anan.”
LUK 7:16 Basa hatahorir maruma naa, ramataꞌu ralan seli! Boe ma ara koa-kio Manetualain rae, “Manetualain nadenu Ndia mana toꞌu dedeꞌan ta neni babanggak esa soa-neu ita!” Hambu laen bali rae, “Manetualain mai nai ita talada heon ena, fo natudu Ndia dale susuen!”
LUK 7:17 Boe ma tutuik naa oo, natanggela sudi bee neu numa profensi Yudea, losa nai basa mamanak laen nai nusak naa boe.
LUK 7:18 Yohanis Mana Saranik ana nunin nara ramanene rala basa hata fo Yesus taon ena. De ara reu tui Yohanis numa bui dale. Boe ma ana nadenu hatahori dua reni Yesus reu fo ratanen rae, “Papa ia, tebe-tebe Karistus fo ai mahanik naa, do? Do, ai muste mahani hatahori laen bali?” Ara ratonggo roo Yesus, boe ma ratanen talo naa.
LUK 7:21 Neu nedenuk kara raa bei ruma naa, Yesus tao nahai hatahori noꞌuk ka hedin nara mata-matak kara. Ana husi heni nitur ruma hatahori fo nitu saꞌek kara mai. Ma tao nahai hatahori pokek kara, de ara bisa mete-rita.
LUK 7:22 Basa boe ma, Yesus nafada Yohanis ana nunin nara nae, “Ei fali miu mafada kaꞌa Yohanis, basa hata fo ei mamanene malan ma mete-mitan no mata heli-helim ena, sama leo Manetualain mana toꞌu dedeꞌan Yesaya surak nae, ‘Hatahori pokek, mete-nita. Hatahori ei kekok, nambadeik laꞌo-laꞌo. Hatahori hedi kusta, dadi nambalao. Hatahori mbakek, namanene. Hatahori mates, nasoda fali numa mamates mai. Hatahori kasian namanene Hara Lii Malole.’
LUK 7:23 Fali miu mafada kaꞌa Yohanis mae, ‘hatahori fo ta mana mae simbok Au, neu ko raua ralan seli.’ ”
LUK 7:24 Yohanis ana nunin nara fali ena, boe ma Yesus kokolak no hatahori noꞌuk kara raa laꞌe-neu Yohanis nae, “Neu ei miu sangga Yohanis numa mamana nees naa, ei duꞌa mae matonggo mia hatahori rupa leo beek? Ta bisa dadi ei naa miu fo matonggo mia hatahori mana noe-naꞌuk, sama leo milak mbeu neu mai, tungga kada anin!
LUK 7:25 Ta bisa dadi ei miu fo mete-mita hatahori mana pake bua-loꞌa mabeli, te hatahori matak leo naak, ana leo nai kada uma manek!
LUK 7:26 Dadi ei miu mete-mita see numa naa? Ei duꞌa mae, ei miu sangga Manetualain mana toꞌu dedeꞌan? Tebe! Tehuu ndia naa, mana toꞌu dedeꞌak ta hohoꞌan lenak.
LUK 7:27 Sama leo Susura Malalaok surak ela laꞌe-neu Yohanis nae, ‘Nenene! Au adenu Au hatahoring, fo neu nasosoi dalak fee O.’
LUK 7:28 Nai dae-bafok ia, ta hambu hatahori esa boe na, fo ta hohoꞌak lena heni Yohanis. Tehuu nai Manetualain mamana parenda-koasan, hatahori mana nesik dea mateꞌen oo, ta hohoꞌan lena heni Yohanis boe.”
LUK 7:29 Hatahori mana mamanene Yesus dedeꞌa-kokolan naa, ara bubuluk ena rae, Manetualain eno-dalan naa, eno-dala masodak tetebes. Mana susu bear oo bubuluk boe, nahuu bakahulun Yohanis sarani ma nanori sara ena.
LUK 7:30 Tehuu hatahorir ruma partei anggama Farisi ma mana malela hukun Yahudir, ara ta nau tungga Manetualain hihii-nanaun ena. Huu naa de, ara ta roke Yohanis sarani sara.
LUK 7:31 Boe ma Yesus natane nae, “Au ae akasasamak hatahorir hatematak ia ro hata? Sira iar, hatahori rupak bee?
LUK 7:32 Sira iar, sama leo kana anar mana nggua-nggua rai pasar. Ara kii-ouk ma unggu-remu rae, ‘Ai fuu sulik rame-rame, tehuu ei ta foti-lendo setelele. Boe ma ai soda-helo sosoda beꞌe mamates, tehuu ei ta buꞌi mamatani.’
LUK 7:33 Huu Yohanis Mana Saranik ta ninu anggor ma ta hii puasa, de ei henggenee malan mae, ‘Ndia nitu saꞌek!’
LUK 7:34 Tehuu hatematak ia Au, Hatahori Dae-bafo Isi-isik ia, inu anggor ma uꞌa roti sama leo biasa. Boe ma ei henggenee mala Au mae, ‘Ndia ia, hatahori bare-naꞌo huun! Mana mafu kamaberak bali! Neu natia-laik no mana susu bear! Partei esa no hatahori papake taak kara! Ana ta nalela aon bali!’
LUK 7:35 Tehuu ei tanda leo, neu Au kokolang, ee! Hatahori mana bubuluk no tetuk, ara tungga Manetualain hihii-nanaun.”
LUK 7:36 Numa kota naa, hambu hatahori Farisi esa, nade Simon. Laꞌe esa, ana noke Yesus asa mai raꞌa numa ndia uman. Yesus asa simbo rala nonokek naa, boe ma reu fo rae ranggatuuk raꞌa-rinu.
LUK 7:37 Faik naa, ina petak esa namanene nae, Yesus nae naꞌa nai naa. Boe ma ana dudi mai, ma toꞌu neni boto mina kaboo meni mabeli esa.
LUK 7:38 Ana deka neni Yesus neu, nesi Yesus dean. Boe ma sendek luu-langgan neu Yesus ein. Ana buꞌi nakarereu losa luun tuda laꞌe Yesus ein. De ana seka Yesus ein nenik ndia langga bulun, ma idu nasakukuku Yesus ein. Basa boe ma ana mboꞌa mina kaboo menik naa neu Yesus ein.
LUK 7:39 Simon naa, bubuluk inak naa leleo-lalaꞌon. Huu naa de ana duꞌa nai dalen nae, “Ia dadi neu bukti ena, Yesus ia, ta Manetualain mana toꞌu dedeꞌan! Mete ma tebe-tebe Manetualain ndia nadenun mai, na, neu ko Yesus bubuluk ena nae, inak mana koi laꞌe Ndia naa, ina petak. Manetualain mana toꞌu dedeꞌan ta sama leo Ndia ia, huu hatahori malalaok ta bole deka-deka no hatahori manggenggeok kara!”
LUK 7:40 Tehuu Yesus bubuluk no tetuk hata fo nai Simon duduꞌan. Boe ma Ana nae, “Kaꞌa Simon! Talo ia, kaꞌa. Au sangga afada kaꞌa matak esa.” Boe ma Simon naselu nae, “Neu! Papa Meser kokolak neu leo.”
LUK 7:41 Boe ma Yesus tui lololek non nae, “Hatahori esa nasiꞌe fee pindan doin nara neu hatahori laen. Ana fee pindan nita doin neu hatahori dua. Esa, ana feen doi lilo fulak natun lima, esa bali, ana feen kada lima hulu.
LUK 7:42 Tehuu neu fain fo fee falik doik kara raa, dua sara ta rabeꞌi. Boe ma mana fee pindan doik naa, dalen tuda neu dua sara. Huu naa de ana nakamboꞌik kasa ruma dua sara hutan mai. Dadi mete ma tungga kaꞌa Simon duduꞌan, numa hatahori kaduak kara mana pindan doik naa, see ndia susuen lenak neu mana fee pindan doik naa?”
LUK 7:43 Simon nggado laik kana nae, “Neu ko ndia mana nahutak noꞌun lenak, ee!” Yesus naselu nae, “Tebe, kaꞌa!”
LUK 7:44 Ana nasare mbali inak naa, boe ma kokolak no Simon nae, “Hena kaꞌa Simon mete neu inak ia. Neu Au dudi uni kaꞌa uman dale mai, kaꞌa ta sadia oe fo safe Au eing, tungga ita hadan. Tehuu inak ia nakoe Au eing nenik ndia luu-oen, boe ma ana seka nalaon nenik ndia langga bulun.
LUK 7:45 Ma bebeik kara ia, neu kaꞌa mai soru Au uni uma dale mai, kaꞌa Simon ta idu Au, tungga ita hadan. Tehuu mulai numa Au dudi uni uma ia dale mai, inak ia ta hahae idu Au eing.
LUK 7:46 Kaꞌa Simon oo, lilii heni hadak mboꞌa mina neu fuik kara langgan boe, neu Au dudi mai bebeik kara ia. Tehuu inak ia, mboꞌa mina kaboo menik mabelin seli neu Au eing.
LUK 7:47 Kaꞌa Simon nenene matalolole dei! Inak ia memak salan noꞌuk ka. Tehuu Manetualain koka heni sara ena, nahuu ana natudu susuen ma dale makasin noꞌuk ka neu Au. Tehuu hatahori fo mana nameda ndia aon ta tao salak noꞌuk ka, ana oo nameda ta parluu hambu ambon noꞌuk ka boe. Huu naa de ana ta sue nalela ma ta noke makasi mbali Manetualain.”
LUK 7:48 Basa boe ma Yesus nafada inak naa nae, “Au koka heni o salam mara ena!”
LUK 7:49 Hatahorir mana ranggatuuk raꞌa sama-sama mulai bese kutu rae, “Wou! Ana duꞌa nae Ndia ia, see?! Ana nambarani fee ambon neu hatahori salan, ee! Naa te kada Manetualain mesa kana ndia naena haak fo koka heni hatahori salan! Cih!”
LUK 7:50 Tehuu Yesus nafada inak naa nae, “O mamahere neu Au ena, huu naa de Manetualain tao nasoi-nasoda o ena. Fali muu ngga leo no mole-damek!”
LUK 8:1 Ta dook ka boe ma Yesus no ana nuni kasalahunu duan nara, laꞌo ndule kota ma nggorok kara marai naar. Ana laꞌo neu nafada hatahorir laꞌe-neu Manetualain parenda-koasan. Naa dadi neu hara lii malole soa-neu sara.
LUK 8:2 Numa hatahori bubuak naa dale, hambu inak hida tungga boe. Inak kara iar, ketuk hambu rita hedis mata-matak kara ma ketuk nitu saꞌe nita sara. Tehuu Yesus tao nahai basa sara. Ndia leo, Maria numa nggoro Magdala mai. Fai bakahulun, Yesus husi nita nitu hitu numa Maria mai.
LUK 8:3 Susana no mama Yohana oo, ruma hatahori bubuak naa dale boe. Mama Yohana ia, papa Kusa saon. Kusa naa, malangga mana maono-lalau nai manek Herodes uma manen. Ma bei hambu inak laen noꞌuk ka rambalololok ro Yesus asa. Inak kara iar pake sira doi heli-helin fo tanggon rala Yesus asa doi dalan.
LUK 8:4 Laꞌe esa, hatahori numa nggorok noꞌuk ka mai fo sangga Yesus. Hatahori noꞌuk kara raa rakabua, boe ma Ana tui sara pake lololek esa nae,
LUK 8:5 “Hatahori mana tao ue daek esa neu nggari bini-nggees numa osin. Bini-nggees ketuk tuda ndaa dalak. Neu hatahorir laꞌok resik naa, boe ma ara heta laꞌe bini-nggees raa. Basa boe ma mbuik kara mai, de bido ralao sara.
LUK 8:6 Bini-nggees ketuk bali tuda ndaa dae batuk. Bini-nggees raa mulai ranumbu, tehuu male heni sara, nahuu oe baꞌuk ka.
LUK 8:7 Bini-nggees laen tuda ndaa mamana dila-nggauk. Neu bini-nggees raa mulai ranumbu, dila-nggauk kara seti rakamate sara.
LUK 8:8 Ma bini-nggees laen tuda ndaa dae isi neulauk. Ara ranumbu, boe ma mori losa raboa. Bini-nggees raa fee falik buna-boak lipa laꞌe natun esa.” Yesus tui basa talo naa, boe ma Ana nateꞌe lololek naa, ma kokolak nahere haran nae, “Ei kandiꞌi dook kara, na, duꞌa malan matalolole!”
LUK 8:9 Basa boe ma Yesus ana nunin ara ratane lololek naa sosoa-ndandaan.
LUK 8:10 Ana naselu nae, “Talo ia! Huu ei tungga tebe-tebe ena Manetualain hihii-nanaun, de Au buka no manggaledon fo ei bubuluk talo bee Manetualain nae parenda Ndia hatahorin nara. Tehuu hatahori laen nara ta nau tao matak Manetualain hihii-nanaun. Huu naa de Au anori sara pake kada lololek. Sama leo Manetualain mana toꞌu dedeꞌan surak memak laꞌe-neu hatahorir ia ena nae, ‘Ara mete-rita ena, tehuu ta nau ralela. Ara ramanene ena, tehuu ta nau bubuluk.’ ”
LUK 8:11 Boe ma Lamatuak Yesus nafada lololek naa sosoa-ndandaan nae, “Bini-nggees naa, ndia Manetualain Dedeꞌa-kokolan.
LUK 8:12 Bini-nggees fo mana tuda ndaa dalak naa, ndia hatahorir fo mana ramanene rala Manetualain Dedeꞌa-kokolan, tehuu basa boe ma nitur malanggan mai de leꞌa neni Dedeꞌa-kokolak naa, numa dalen nara mai. No dalak naa, ara ta ramahere neu Manetualain, de ta hambu masoi-masodak.
LUK 8:13 Bini-nggees fo mana tuda ndaa dae batuk naa, ndia hatahorir fo mana ramanene rala Manetualain Dedeꞌa-kokolan no nemehokok. Tehuu okan nara ta tora rala demak ka. Ara mulai ramahere, tehuu mete ma susa-sonak daka nala sara, na, ara tuda no muda hiek.
LUK 8:14 Bini-nggees fo mana tuda ndaa mamana dila-nggauk naa, ndia hatahorir fo mana ramanene ma simbok rala Manetualain Dedeꞌa-kokolan. Tehuu ta dook ka boe ma ara lilii heni Dedeꞌa-kokolak naa, huu ara rasambute ralan seli no ue-osa heli-helin nara, sira hata-heton mata-matak kara, ma ara hii leo-laꞌo no kada setelelek. Huu naa de sira nemeheheren naa, nenenin taa.
LUK 8:15 Tehuu bini-nggees fo mana tuda ndaa dae isi neulauk, ndia hatahorir dale malole ma dale ndoos. Neu ara ramanene rala Manetualain Dedeꞌa-kokolan, boe ma rahinda ratalololen neu dalen nara. No dalak naa, ara ramahere taa-taa, ma tao hata fo neulauk noꞌuk ka.”
LUK 8:16 Boe ma Yesus kokolak bali nae, “Ta bisa dadi hatahori dede lambu tiꞌoek, basa naa tatanan pake ure dae. Ma ta hambu hatahori natetende lambu neni koi fengga dalen neu. Mete ma taon talo naa, na, hatahori ta bisa mete-nita manggaledon bali. Lambu fo kanenenik, ndia neni netetendek nai mamana demak, mita fo saꞌan tao manggaledo hatahori mana dudi mai.
LUK 8:17 Basa hata fo neni nefunik hatematak ia, neu ko neni mete-nitak. Ma basa hata fo hatahori ta bubuluk kana hatematak ia, neu ko hatahori bubuluk kana.
LUK 8:18 Dadi ei muste duduꞌa matalolole dedeꞌak kara iar. Hatahori mana nau sangga bubuluk tebe-tebe Manetualain hihii-nanaun, ana boe nalela. Tehuu hatahori ta mana tao matak neu Manetualain hihii-nanaun, ana boe namanggoa.”
LUK 8:19 Laꞌe esa, Yesus mbute-mue no hatahori noꞌuk kara. Boe ma Ndia inan ma fadin nara mai fo rae ratonggo roon. Tehuu ara ta bisa deka-deka roon, nahuu hatahori noꞌun seli.
LUK 8:20 Boe ma hatahori neu nafada Yesus nae, “Papa! Papa mamam ma fadim mara rai dea naa. Ara rae ratonggo ro Papa.”
LUK 8:21 Boe ma Ana naselu nae, “Hou! Tehuu talo ia, Au inang ma toranoong tebe-teben nara ndia, hatahori fo mana namanene Manetualain Dedeꞌa-kokolan, de tao tunggan.”
LUK 8:22 Laꞌe esa Yesus noke nala ana nunin nara, de nae, “Mai ita saꞌe ofak fo teni dano boboan seri teu.” Boe ma ara saꞌe ofak esa, de ara mulai laꞌo.
LUK 8:23 Neu ofak laꞌok, boe ma Yesus sunggu. Ta dook ka boe ma ani makarumbuk mai. Rii tufa, de oe lala neni ofak dale neu. De ara sangga hambu sosoek ena.
LUK 8:24 Ana nunin nara mete-rita naa, boe ma ara fafae Yesus rae, “Lamatuak! Lamatuak, ee! Mambadeik fo tulun dei! Ita sangga molo mate ia ena!” Boe ma Yesus nambadeik. De Ana kaꞌi anin ma rii naa nae, “Hahae leo!” Boe ma rii ma anin lende tutik kana.
LUK 8:25 Boe ma Ana nahara berak neu ana nunin nara nae, “Tao hata de ei bei ta mamahere neu Au boe?” Ara ramataꞌu ma heran. Boe ma esa natane esa nae, “Awii! Yesus ia see? Talo bee de Ana bisa parenda anin ma rii, de ara tungga Ndia hihii-nanaun?”
LUK 8:26 Ta dook ka boe ma, ara losa nusa Gerasa nai dano Galilea boboan seri.
LUK 8:27 Numa naa, hambu hatahori esa fo nitu saꞌen dook ka ena. Hatahori ia uma taak, de ana leo nai kada rates sara. Tungga faik ana laꞌo neu-mai no hola-hola, nahuu nitur parendan taa-taa. Hatahori futu-paꞌan laꞌe-laꞌek kana pake rante ma langge besi ena, tehuu ana kada tao ketu sara. Boe ma nitur kada rakasetik kana fo nalai neni mamana nees neu. Neu Yesus asa konda numa ofak lain mai, hatahori kamuluk naa neni Yesus mai. Hatahori naa kii-bolu ma ana lenggu-bara aon neu Yesus ein. Boe ma Yesus parenda nae, “Heeh, nitu! Kalua numa hatahori ia mai!” Boe ma hatahori kamuluk naa kii-bolu nae, “Wooi! Boso pode-ura babalik au! Au bubuluk O ia Yesus, Manetualain mana Demak Mateꞌen Anan! O boso tuni-ndeni au!”
LUK 8:30 Yesus natanen nae, “O nadem see?” Boe ma nitu naa naselu nae, “Legion, huu ai noꞌuk ka, nok bali soldadu rifu-rifuk kara.” Ana kokolak talo naa, nahuu hambu nitu noꞌuk ka maso leo nai aon dale.
LUK 8:31 Nitur raa kada roke-hule taa-taa neu Yesus fo boso nadenu sira reni Bolo Doidosok reu, fo ndia mamana kekenak soa-neu koasa manggarauk kara.
LUK 8:32 Tehuu deka-deka naa, hambu bafi bubua moꞌok esa, ara sosoka dae fo sangga nanaꞌak ruma letek tatain. Boe ma nitur raa roke-hule neu Yesus rae, “Madenu ai maso meni kada bafir raa dale miu leo!” Boe ma Yesus nakaheik.
LUK 8:33 De nitur raa kalua laꞌo ela touk naa, boe ma ara maso reni bafir raa dale reu. Basa bafir raa ramulu, boe ma ralaik ramananauk kana tuda ruma letek naa mai, de mbesi reni dano dale reu. Boe ma basa sara mate rasamele.
LUK 8:34 Mana manea bafir mete-rita naa, boe ma ralai ndule nggorok matia-taik marai naar, de ara tui basa-basan.
LUK 8:35 Hatahori noꞌuk kara raa ramanene rala tutuik talo naa, boe ma ara kalua reni mamanak naa reu. Ara nau mete-rita ro mata heli-helin nara hata fo mandadik ena. Losa naa, boe ma ara mete-rita hatahori fo nitu saꞌek naa, nanggatuuk matu-matu deka Yesus ein. Ana pake bua-loꞌa ena, ma ta namulu ena. Basa sara mete-rita naa, boe ma ramataꞌu.
LUK 8:36 De hatahorir fo bebeik kara mete-rita mandadik naa, ara tui hatahori mana bei fo maik kara, talo bee de hatahori kamuluk naa hai ena.
LUK 8:37 Boe ma basa hatahori Garasa fo mana leo numa nusak kara raa roke-hule neu Yesus fo laꞌo ela sara, nahuu basa sara ramataꞌu ralan seli. Boe ma Yesus asa hene reni ofak dale reu, fo rae fali reni dano Galilea boboan seri reu.
LUK 8:38 Tehuu hatahori fo bebeik kara nitu saꞌek naa, kokoe nakandoo Yesus nae, “Papa! Naa fo au oo tungga ua Papa boe!” Tehuu Yesus naselun nae,
LUK 8:39 “Talo kada ia! Malole lenak o fali muni o nufanelum mara muu, fo tui sara laꞌe-neu Manetualain susuen fo Ana taon fee o ena.” Boe ma hatahori naa laꞌok ndule kota naa, de ana tui neu basa hatahorir laꞌe-neu Yesus tao nahai ndia.
LUK 8:40 Basa boe ma Yesus asa saꞌe ofak fali reni dano Galilea tatain seri reu. Neu ara konda numa ofak lain mai, hatahori noꞌuk ka rahani a ena. Ara rakarumbu mai fo rae reu sorun.
LUK 8:41 Numa naa oo hambu hatahori esa nade Yairus boe. Hatahori ia, malangga uma huhule-haradoik nai kota naa. Anan, kada kisek; ina anak, teun salahunu dua. Hatematak ia ana fetok naa namahedi nalan seli ela kada faa maten. Neu Yairus mete-nita Yesus mai, boe ma ana neu sendek luu-langgan neu Yesus matan. Ana noke-hule Yesus neni ndia uman neu, fo tulu-fali ndia ana feton. Neu Yesus nakahuꞌun, boe ma ara laꞌo reni Yairus uman reu. Tehuu hatahori noꞌuk kara oo ta rala neun fo rae tungga boe. Huu naa de ara laꞌok raseseti.
LUK 8:43 Hambu inak esa oo laꞌok tungga no sara boe. Ana hambu bulak ta tungga ndoon teuk salahunu dua ena. Ana nabasa tali-doin ma hata-heton ena fo bae neu doter asa. Tehuu ta hambu esa bisa tao nahain boe na. Hedin naa, kada mai-maik nakandoo.
LUK 8:44 Boe ma ana mai deka-deka neu Yesus numa dean mai. De ana nafaroe Yesus badun suꞌun. Neu ana nafaroe basa, boe ma ndia daan mana mboꞌa-mboꞌak hahae tutik kana.
LUK 8:45 No kaiboik Yesus nambariik, boe ma Ana natane nae, “See ndia nafaroe Au ia?” Tehuu ta hambu hatahori esa manaku boe na. Boe ma Petrus nae, “Lamatuak boe oo! Hatahori noꞌuk ka raseseti talo ia! Sira ena, ndia ratumbu ruma dea mai.”
LUK 8:46 Tehuu Yesus nafadan nae, “Taa! Bebeik kara ia Au ameda hambu koasa kalua numa Au mai. Dadi Au bubuluk hambu hatahori esa nafaroe Au.”
LUK 8:47 Neu inak naa nameda neu ko ndia ta bisa nafuni nala aon, boe ma namataꞌu nalan seli. Ana dere bebe-bebe, de sendek luu-langgan neu Yesus matan. De ana tui ndia dedeꞌan huu-suꞌun neu basa hatahorir matan. Basa de ana nafada nae, ndaa neu ndia nafaroe Yesus, boe ma ndia hai tutik kana.
LUK 8:48 Boe ma Yesus kokolak neun nae, “Kaꞌa inak! O hai ena, nahuu o mamahehere neu Au. Fali uma muu ngga leo no mole-damek!”
LUK 8:49 Neu Yesus bei kola-kola no inak naa, te Yairus hatahorin esa mai nafadan nae, “Awii, Papa, ee! Papa anan ta sana ena! Ana mate ena, de hae bei makasosotak Papa Meser bali.”
LUK 8:50 Tehuu neu Yesus namanene hatahori naa nefadan, boe ma Ana nafada Yairus nae, “Kaꞌa! Malende o dalem! Boso babati! Mamahere neu kada Manetualain. Ana ndia tao nasoi-nasoda kaꞌa anan.”
LUK 8:51 Neu ara losa Yairus uman, hatahorir sofe naa ena. Ara buꞌi rakarereu. Boe ma Yesus kaꞌi sara nae, “Ei hahae buꞌi leo! Kakanak ia ta mate. Ana kada sunggu a!” Tehuu hatahorir kada hika korombiꞌe bafan nara mbali Yesus, huu mesa kasa ndia mete-rita kakanak naa ketu hahaen ena. Boe ma Yesus noke nala ana fetok naa ina-aman, Petrus, Yohanis ma Yakobis, maso dale reu sama-sama ro Ndia. Sira laen nara, Ana nadenu sara rahani kada dea.
LUK 8:54 Ara maso, boe ma Yesus toꞌu nala kakanak naa liman, de nanggou nae, “Ana feꞌok! Mambadeik leo!”
LUK 8:55 Medak neu ma, kakanak naa nasoda fali numa mamaten mai, de nambadeik tutik kana. Boe ma Yesus nadenu ana fetok naa inan nae, “Fee kakanak ia naꞌa dei!”
LUK 8:56 Ana fetok naa inan no aman heran ralan seli. Tehuu Yesus fee nesenedak neu sara, fo boso fee dedeꞌak naa natanggela neni hatahorir reu.
LUK 9:1 Laꞌe esa, Yesus nakabubua nala Ndia ana nuni kasalahunu duan nara. Boe ma Ana fee sara koasa fo bisa husi nitu, ma bisa tao rahai hatahori ruma sira hedin mata-matak kara mai.
LUK 9:2 Ana nadenu sara fo laꞌok reu rafada hatahorir laꞌe-neu Manetualain parenda-koasan. Ana oo nadenu sara fo tao rahai hatahori hedis sara sudi rai bee boe.
LUK 9:3 Ma Ana nafada sara nae, “Masaneda matalolole! Ei hae meni hata-hata nai dalak. Meni kada badu manai ei ao-inam. Hae meni teteꞌe ai, do tas, do lepa-nggees, do tali-doik. Badu ngganggatik oo hae meni boe!
LUK 9:4 Mete ma ei maso meni nggorok esa miu, ma hambu hatahorir rae simbok ei, na, miu fo leo nai kada sira uman nara. Boso dodoki uma. Leo miu naa makandoo, losa ei laꞌo ela nggorok naa.
LUK 9:5 Mete ma ei maso meni nggorok esa miu, basa de hatahorir marai naa ta nau simbok ma ta nau ramanene neu ei, na, nggani laꞌo ela sara leo. Mete ma ei kalua numa mamanak naa mai, tao tungga dala-hadak fo ngganggafu heni afu numa ei eim mara mai. Ma mafada sara mae, ‘Ei ta nau mamanene na. De ela numa naa fo ei mesa ngga lemba-masaa neselu-netaam!’ ”
LUK 9:6 Basa boe ma ana nunik kara raa laꞌok numa nggorok esa mai reni nggorok esa reu. Ara tui-bengga hatahorir laꞌe-neu Manetualain Hara Lii Malolen. Boe ma ara oo tao rahai hatahori kamahedik kara boe.
LUK 9:7 Faik naa, tutuik mata-matak kara laꞌe-neu Yesus losa manek Herodes Antipas ndiꞌi doon ena. Ana namanene tutuik kara raa, boe ma ana panggananaa, nahuu hambu hatahori ketuk rae, “Yesus naa, ndia Yohanis Mana Saranik fo mana nasoda fali numa mamaten mai ena.”
LUK 9:8 Hambu ketuk bali rae, “Ndia naa, baꞌi Elia fo mana nasoda fali numa mamaten mai ena.” Hambu laen bali rae, “Ndia naa, esa numa Manetualain mana toꞌu dedeꞌan lele uluk laen nara mai.”
LUK 9:9 Tehuu Herodes nasaneda nae, “Fai maneuk kara au adenu tete heni Yohanis langgan ena. Ana nasoda fali numa mamaten mai ena, do hata? De esa ia, see bali?” Boe ma ana sangga dalak fo nae natonggo no Yesus.
LUK 9:10 Faik esa, ana nunik kara fo Yesus nadenu sara reu tui-bengga Manetualain Hara Lii Malolen naa ena, ara fali de rakabua seluk ro Yesus. Ara rafadan basa hata fo ara taok ena. Boe ma Yesus asa laꞌo neneek reni mamanak esa reu deka no nggoro Betsaida fo reu hahae aon numa naa.
LUK 9:11 Tehuu hatahori noꞌuk kara hae hambu Yesus asa rae bee reu, boe ma ara tungga doꞌo-doꞌo roon. De Yesus simbok kasa no malole, boe ma Ana tao nahai basa hatahori hedis sara, ma Ana tui sara laꞌe-neu Manetualain parenda-koasan.
LUK 9:12 Neu ledo bobok ena, boe ma ana nuni kasalahunu duan nara fee hahambuk neu Yesus rae, “Malole lenak Papa madenu hatahorir ia reni nggorok matia-taik marai ia reu, fo ara bisa sangga aon nanaꞌan nara. Ma naa fo ara reu sangga mamanak fo ara sunggu taak. Mamana nees talo ia, na, talo bee fo ara bisa hambu nanaꞌak?”
LUK 9:13 Tehuu Yesus naselu nae, “Talo ia! Naa fo ei ndia mahao sara leo!” Tehuu ara rareresi rae, “Awii, Papa dei! Hata de bisa talo naa? Hatahorir ia, rifun lima lenak! Naa, bei kada touk kara, bei ta reke inak kara ma kakana anak kara bali! Naa te ita rotin kada lima, ma iꞌak duak ka. Mete ma Papa nau ai mahao basa hatahori noꞌuk kara iar, na, talo bee fo ai bisa hasa nanaꞌak noꞌun seli fee sara?!” Boe ma Yesus nadenu sara nae, “Koladu hatahori iar fo ranggatuuk rakabubua beke lima huluk.”
LUK 9:15 De ara reu tao tungga talo naa.
LUK 9:16 Neu ara ranggatuuk rala, boe ma Yesus haꞌi nala roti kalimak kara ma iꞌa kaduak kara. De Ana nasare mbali lalai neu fo hule-haradoi noke makasi. Basa boe ma Ana fifiꞌi baꞌe roti ma iꞌak kara raa, de Ana loo sara reu ana nunin nara fo reu babaꞌe fee hatahorir raa.
LUK 9:17 Basa sara raꞌa losa rakabete. Basa boe ma rakabubua rala nanaꞌa lenan nara raa, losa sofe lembaneu salahunu dua.
LUK 9:18 Laꞌe esa, Yesus mesa kana hule-haradoi numa mamanak esa. Ana nunin nara oo rakabua deka-deka roon numa naa boe. Ana hule-haradoi basa, boe ma natane sara nae, “Ei mamanene hatahorir kola-kola rae, Au ia see?”
LUK 9:19 Ara raselu rae, “Hambu ketuk rae, Papa ia, Yohanis Mana Saranik. Laen bali rae, fama te Papa ia, baꞌi Elia. Mete ma taa, na, Hatahori esa numa Manetualain mana toꞌu dedeꞌan lele uluk fo mana nasoda fali numa mamates mai ena.”
LUK 9:20 Boe ma Yesus natane seluk kasa nae, “Mete ma tungga ei mesa ngga, na, ei duꞌa mae, Au ia see?” Boe ma Petrus naselu nae, “Papa ia, Karistus, ndia Hatahori fo Manetualain henggenee memak kana numa lele uluk mai ena!”
LUK 9:21 Basa de Yesus ndindia sara fo boso rafada esa boe na rae, Ndia naa, Karistus.
LUK 9:22 Basa boe ma Yesus kokolak seluk nae, “Au ia, Hatahori Dae-bafo Isi-isik. Au muste lemba-asaa doidoso berak mata-matak kara. Neu ko hatahori Yahudi lasi-lasi hadan nara, malangga anggama malanggan nara, ma meser anggamar ta nau simbok rae, Au ia, Karistus. Basa te neu ko ara tao risa Au. Memak Au mate, tehuu neu bei-nesan, Au asoda fali numa mamates mai!”
LUK 9:23 Basa boe ma Ana nafada hatahori noꞌuk kara nae, “Hatahori fo mana nau tungga Au, ana muste nakatataka nakandoo tungga-tungga faik. Ana muste solaa heni basa ndia hihii-nanau heli-helin. Ana muste tungga nakandoo, mae hatahori rae tao risan, sama leo hatahori lemba-nasaa ai ngganggen fo neni ndia mamana mamaten neu.
LUK 9:24 Hatahori fo mana sadia mate, nahuu ana tungga Au, neu ko nasoda nakandoo no Manetualain. Tehuu hatahori fo mana nau nasoda soa-neu kada ndia ao heli-helin, neu ko ana natalenggo feꞌe numa Manetualain mai.
LUK 9:25 Mete ma hatahori hambu basa dae-bafok oe-isin, tehuu Manetualain timba henin, na, ana hambu nanalak hata?
LUK 9:26 Au ia, Hatahori Dae-bafo Isi-isik. Dadi hatahori see fo ana mae tungga Au, ma mae toꞌu Au nenoring, neu ko Au oo mae manakun nai Manetualain matan boe, neu Au fali numa nusa tetuk do inggu temak mai. Neu ko Au konda mai ua Amak koasan ta neni babanggak, sama-sama ua Ndia atan numa nusa tetuk do inggu temak mai.
LUK 9:27 Au afada tebe-tebe neu ei. Hambu ketuk numa ei marai iar, neu ko mete-rita ro mata heli-helin nara Manetualain parenda-koasan, dei fo ara bisa mate.”
LUK 9:28 Seli fai kafalun numa Yesus nafada laꞌe-neu mamaten ma nesoda falin numa mamates mai, boe ma Ana no Petrus, Yohanis ma Yakobis hene reni letek esa reu fo rae hule-haradoi.
LUK 9:29 Neu Yesus hule-haradoi, boe ma mata-aon nasafali ma bualoꞌa-papaken dadi neu muti manggahadok.
LUK 9:30 Medak neu ma, hatahori dua toda mai. Hatahori kaduak kara raa, baꞌi Musa ma baꞌi Elia siran ena. Boe ma ara kola-kola ro Yesus.
LUK 9:31 Mete sara oo ta hohoꞌa ndoos sudi selik kana boe. Telu sara kola-kola laꞌe-neu Yesus neu ko maten nai Yerusalem.
LUK 9:32 Faik naa, Petrus no nonoon kaduan nara tekaur ralan seli, losa ara sunggu seli. Ara rambadeik, boe ma mete-rita Yesus nambariik no hatahori dua. Ara oo mete-rita Yesus nandela-nasaꞌa boe.
LUK 9:33 Neu baꞌi Musa no baꞌi Elia rae laꞌo ela Yesus ena, boe ma Petrus namananauk kana, ta bubuluk ana nae tao hata. Boe ma ana baro lelik nae, “Lamatuak! Ai mameda malole nai ia, ee! De malole lenak ai mambaririik laak telu. Esa soa-neu Lamatuak, esa soa-neu baꞌi Musa, ma esa bali soa-neu baꞌi Elia.”
LUK 9:34 Tehuu neu ana bei kola-kola talo naa, sosoꞌa bubuak esa konda mai de tatana nala sara. De Petrus asa ramataꞌu.
LUK 9:35 Boe ma ara ramanene harak numa sosoꞌak naa dale mai nae, “Ia, Au Anang fo Au here memak kana ena! Ana kokolak, na, nenene matalolole neun!”
LUK 9:36 Harak naa hahae, boe ma Petrus asa mete-rita kada Yesus mesa kana. Telu sara rakatema bafan nara fo ta tui neu esa boe na, hata fo ara mete-ritak naa. Doo-doo dei de ara buka bafan nara fo tui neu hatahori laen.
LUK 9:37 Neu beꞌe-mai fo Yesus no Petrus asa konda numa letek naa mai, hatahori noꞌuk ka mai ratonggo ro Yesus.
LUK 9:38 Boe ma hambu hatahori esa bolu neun nae, “Papa Meser, ee! Tulun mete neu au ana tou kise-muꞌeng dei!
LUK 9:39 Huu nitu kada toꞌu naherek kana, de tao nalan kii-bolu kaiboik, ma ndondokon losa fufudek kara kalua numa bafan mai. Nitu naa oo popoko-paparun boe, ma ana tao babalik kana taa-taa.
LUK 9:40 Au hule tutulu-fafalik neu Papa ana nunin nara ena fo husi kalua heni nitu naa, tehuu ara ta rasenggi sana!”
LUK 9:41 Yesus namanene nala naa, boe ma Ana mboka basa sara nae, “Weeh! Ei ta mamahere mae, Manetualain bisa tao nahai hatahori, do? Eir ia, memak hatahori ta mana leo-laꞌo tungga eno-dala ndoos! Au muste sama-sama ua ei doon losa bee bali, ma ahani ua ei losa faik hida bali, dei fo ei mamahere neu Au?” Boe ma Ana kokolak nasafali no papa naa nae, “Muni o anam neni ia mai leo!”
LUK 9:42 Neu ara roo kakanak naa neni Yesus neu, boe ma nitu naa fae nggari kakanak naa neu daer, ma ndondoko nakamiminak kana. Tehuu Yesus parenda nitu naa, fo kalua laꞌo ela kakanak naa, boe ma ana hai tutik ka. De Yesus loo lima kakanak naa neu aman.
LUK 9:43a Hatahori mana mete-rita Manetualain koasan ta neni babanggak naa, basa sara heran bali-bali.
LUK 9:43b Neu basa hatahori bei bese kola laꞌe-neu tanda heran nara fo Yesus taok, Ana nafada Ndia ana nunin nara nae,
LUK 9:44 “Ei tadu matalolole Au kokolang ia! Ta dook ka bali te ara rae seꞌo heni Au, Hatahori Dae-bafo Isi-isik ia. Boe ma ara loo lima Au uni hatahori deak kara uu.”
LUK 9:45 Tehuu ana nunin nara panggananaa. Ara ta ralela Ndia kokolan naa. Ara oo ramataꞌu ratane sosoa-ndandaan hata boe.
LUK 9:46 Laꞌe esa, Yesus ana nunin nara mulai rareresi laꞌe-neu see ndia dadi neu hatahori nomer kaesan numa sira mai.
LUK 9:47 Tehuu Yesus bubuluk ara rareresi huu hata. Boe ma Ana nanggou nala kakana ana esa, de Ana nambaririik kana neu Ndia boboan.
LUK 9:48 Boe ma Ana nafada sara nae, “Nenene matalolole! Hatahori mana tungga Au fo naono-lalau hatahori kadiꞌik sama leo kakanak ia, sosoa-ndandaan nae, hatahori naa oo naono-lalau Au boe. Ma ana oo naono-lalau Au Amang manai nusa tetuk do inggu temak boe, fo mana madenu Au uni dae-bafok ia mai. Hambu hatahori noꞌuk ka hii rakadadaek hatahori kasian, hatahori mana susa-sonak, hatahori ta neulauk, hatahori ua kadorok, ma hatahori kadiꞌik. Tehuu hatahori fo mana naono-lalau hatahori matak leo naak kara, na, Manetualain taon leo hatahori ta hohoꞌa ndoos.”
LUK 9:49 Basa de Yohanis nafada Yesus nae, “Lamatuak! Laꞌe esa, ai mete-mita hatahori esa husi kalua heni nitu pake Papa naden. De ai kaꞌin fo boso naseseik Papa naden, nahuu hatahori naa, ta ita hatahorin.”
LUK 9:50 Tehuu Yesus naselu nae, “Elan numa naa! Huu hatahori ta mana lena-laba ita, sosoa-ndandaan nae, ndia naa, ita nonoo heli-helin.”
LUK 9:51 Yesus bubuluk nae, Ndia fai hehenen neni nusa tetuk do inggu temak neu ta dook ka ena. Boe ma Ana nakise basa ena fo neni kota Yerusalem neu.
LUK 9:52 Ana nadenu hatahorir fo laꞌok rakahuluk ruma sira mai, mita fo ara bisa sadia nanaꞌa-nininuk. Boe ma ara maso reni nggorok esa nai profensi Samaria reu, fo rae sangga mamana luꞌu-leok.
LUK 9:53 Tehuu hatahori Samariar ta nau simbok Yesus asa, nahuu Ana nae laꞌo neu nakaluku-nakatele neu Manetualain nai kota Yerusalem.
LUK 9:54 Neu Yakobis no Yohanis ramanene hatahori Samariar tatao-nonoꞌin, boe ma ara kokoe Yesus rae, “Lamatuak! Talo bee leo ita toke Manetualain nakonda aꞌi numa lalai mai fo naꞌa heni basa sara?”
LUK 9:55 Tehuu Yesus nasare mbali dua sara, boe ma nahara berak mbali sara nae, “Hae duꞌa talo naa.”
LUK 9:56 Boe ma ara laꞌok rakandoo reni nggorok laen reu.
LUK 9:57 Neu ara bei laꞌo-laꞌo numa dalak, hatahori esa kokolak no Yesus nae, “Papa! Papa neni bee neu a mesan, na, au nau tungga akandoo ua Papa!”
LUK 9:58 Yesus naselu nae, “Malole, boe! Tehuu masaneda talo ia. Basa hatahorir ma banda-manur kamamana leleo-luluꞌuk mesan. Busa fui fali neni ndia bolo luluꞌun neu. Mbuik fali neni ndia ndunun neu. Tehuu Au, Hatahori Dae-bafo Isi-isik ia, ta aena uma heli-heling fo fali uni naa uu. Mamana ndae langgak neu oo, ta hambu boe.”
LUK 9:59 Laꞌe esa, Yesus nanggou hatahori laen esa nae, “Mai tungga Au, fo dadi muu Au hatahoring.” Hatahori naa naselu nae, “Neu! Tehuu talo ia, Lamatuak. Elan fo au fali fo afafaꞌu ina-amang nggara dei. Mete ma au amang maten ena, na, dei fo au tungga.”
LUK 9:60 Tehuu Yesus nafadan nae, “Talo ia! Elan numa naa fo hatahorir ta mana ramahere neu Manetualain, rafafaꞌu sira hatahori mana maten. Tehuu ei mana mamahere neu Manetualain, ei uem miu tui-bengga laꞌe-neu Manetualain parenda-koasan.”
LUK 9:61 Hatahori esa bali nae, “Malole boe, Lamatuak! Au nau tungga Lamatuak akandoo. Tehuu mboꞌi au uu idu ateꞌa au nufanelung nggara, dei fo au fali mai tungga Lamatuak.”
LUK 9:62 Tehuu Yesus nafadan nae, “Talo ia! Mete ma hatahori mulai dodoꞌi-kakali dae, tehuu ana nasambute no ues laen losa ana lilii sele-tande, na, osin ta dadi. Leo naak oo, soa-neu hatahori mana naketu nala nae tungga Au boe, tehuu nasaneda taa-taa neu ndia leleo-lalaꞌon fai uluk. Hatahori rupa leo naak sosoan taa, dadi neu hatahori mana maue-osa nai Manetualain parenda-koasan.”
LUK 10:1 Basa boe ma Yesus here nala ana nunik laen, hatahori hitu hulu dua. Boe ma Ana baꞌe sara dua-duak, fo rakahuluk reni mamanak kara fo Yesus nae naa neu.
LUK 10:2 Ana nadenu sara nae, “Hambu hatahori noꞌuk ka sama leo hade nae namatasa. Nahani kada tenu osik nadenu ndia hatahori mana maue-osan nara fo reu ketu-koru. Dadi ei muste hule-haradoi moke Manetualain nadenu tamba Ndia hatahori mana maue-osan nara fo rakabubua rala hatahori mana nau tungga Au. Memak hatahori mana nau tungga Au naa noꞌuk ka. Tehuu hatahori mana maue-osa kada hidak ka.
LUK 10:3 Hatematak ia ei miu leo! Au adenu ei fo meni hatahori noꞌuk ka miu. Tehuu masaneda talo ia. Ei sama leo bibi lombo ana dale malole, fo mana neni busa fui kakikik kara talada heon miu.
LUK 10:4 Ei hae meni tali-doik, do tas bua-loꞌa, do tatabu ei lenak nai dalak. Boso nggari heni ledo-fai no muda hiek neu kada ei lole haram mara mia hatahorir rai dalak.
LUK 10:5 Mete ma ei maso meni nggorok esa miu, ei boso lali-lali numa uma esa mai meni uma laen miu. Mete ma hatahori simbok ei no neulauk nai uma esa, na, leo miu kada naa leo, losa ei laꞌo ela nggorok naa. Mete ma ei maso meni uma esa miu, na, ei muste moke-hule fo Manetualain fee babaꞌe-babatik neu uma naa isin nara. Mete ma tenu uma simbok ei no neulauk, neu ko Manetualain natudu Ndia dale susuen neu uma naa isin nara. Tehuu mete ma ara ta nau simbok ei, na, naa fo Manetualain natudu dale susuen neu kada ei mesa ngga. Mete ma ei maso meni uma esa do nggorok esa miu, ara fee hata a mesan, na, miꞌa-minu leo. Simbok no nemehokok, huu neu sesesun mete ma ara fee ei talo naa fo nggati ei mbuse titim.
LUK 10:9 Tao mahai sira hatahori hedin nara. Ma mafada sara mae, ‘Manetualain parenda-koasan deka-deka nai mata-iduk kara ena!’
LUK 10:10 Tehuu nggorok ketuk hatahori nara oo, ta nau simbok ei boe. Mete ma ara tao talo naa neu ei, na, miu mambariik miu nggorok naa dalan fo kokolak mae,
LUK 10:11 ‘Nenene matalolole! Ai mai meni Manetualain Dedeꞌa-kokolan soa-neu ei ena, tehuu ei ta hosek faa boe na. Dadi hatematak ia ai nggafu heni nggorok ia afun numa ai ein nara mai, fo dadi neu tanda mae, neu ko ei laꞌe aom mala nenenin! Tehuu masaneda matalolole! Manetualain parenda-koasan deka-deka nai mata-iduk kara ena!’
LUK 10:12 Ei bubuluk kota Sodom manggaraun, hetu? Au afada, ee! Neu ko ndaa no dae-bafok fai mateꞌen, te Manetualain fee hukun neu hatahori fo mana timba heni ei naa, beran lena heni hatahori Sodom mara!”
LUK 10:13 Yesus kokolak tamba bali nae, “Besa-besa neu ei marai nggorok Korasin ma nggorok Betsaida! Sosoek daka nala ei! Au tao tanda heran mata-matak kara numa ei matam mara ena, tehuu ei ta nau mamahere neu Manetualain. Naa te eir ia, hatahori Yahudi fo manaku mae ei malela Ndia. Tehuu mete ma tanda heran nara raa fo Au taok kara numa ei nggorom mara, leo dadi numa kota Tirus ma kota Sidon dei, na, neu ko doo basa ia, hatahori marai naa, ara sale dalen do tuke tein nara memak kana, ma ara laꞌo ela sira sala-singgon nara fo fali mai tungga Manetualain ena. Ma neu ko ara pake bua-loꞌa sususak, ma tao afu neu langgan nara fo dadi neu tanda nae, ara fale dalen nara huu sira sala-singgon nara. Naa te hatahori Tirus ma Sidon nara iar, ta hatahori Yahudi fo mana manaku rae sira ralela Manetualain.
LUK 10:14 Tebe! Ei mete leo! Neu ko mete ma Manetualain naketu basa hatahorir dedeꞌan nara, na, hatahori Tirus ma hatahori Sidon hambu huku-dokik bei dakun lena heni ei huku-dokim.
LUK 10:15 Besa-besa, ei hatahori nggorok Kapernaum! Ei boso duꞌa mae, neu ko Manetualain soꞌu botik ei maso meni nusa tetuk do inggu temak miu. Taa! Neu ko Manetualain nggari ei meni aꞌi mbila ta kala matek miu!
LUK 10:16 Masaneda matalolole! Hatahori fo mana nenene ei, sama leo ana nenene Au. Ma hatahori fo ta mana nau nenene ei, sama leo ana ta nau nenene Au. Lenak bali, hatahori fo ta mana nau nenene Au naa, sama leo ana ta nau nenene Manetualain, mana nadenu Au uni dae-bafok ia mai.”
LUK 10:17 Neu hatahori nedenu kahitu hulu duak kara lenggu fali, dalen nara mbena sau-sau. Boe ma ara tui Yesus rae, “Awii! Ta hohoꞌa ndoos! Neu ai husi nitur pake Lamatuak naden, nitur raa nenene ai, basa boe ma ara kalua tutik ka! Sudi selik kana!”
LUK 10:18 Boe ma Yesus naselu nae, “Tebe! Neu ei tao talo naa, Au ita Manetualain nggari heni nitur ro sira malanggan numa lalai mai, nok bali ndelas te kii-konak kana numa lalai mai!
LUK 10:19 Masaneda, ee! Nitur malanggan naa, ita musun. Ma ana oo naena koasa boe! Tehuu Au fee ei koasa ena fo tao masenggi ndia koasan. Mete ma ei heta laꞌe mengge karasok, do kurak, na, ei ta hata-hata. Ta hambu esa tao sosoek neu ei boe na.
LUK 10:20 Ei dalem mara mbena sau-sau, nahuu nitur nenene neu ei. Malole boe, tehuu naa kada dedeꞌa kadiꞌi anak! Malole lenak ei dalem mara mbena sau-sau, nahuu Manetualain surak nala ei nadem mara fo dadi miu Ndia rau-inggun fo mana maso nusa tetuk do inggu temak.”
LUK 10:21 Faik naa, Manetualain Dula-dale Malalaon tao nala Yesus dalen mbena sau-sau. Boe ma Ana koa-kio Manetualain nae, “Papa! Papa ndia toꞌu haak parenda basa-basan nai lalai ma dae-inak. Au oke makasi noꞌun seli, nahuu Papa tatana mala dedeꞌak kara iar neu hatahori fo mana tao aon malelak kara ma mana makadedema aok kara. Tehuu Papa buka basa dedeꞌak kara iar neu kakana kadiꞌi anak kara, ma hatahori fo mana makaloloe aok kara. Tebe, Papa! Naa ndia tao nala Papa dalen namahoko!”
LUK 10:22 Boe ma Yesus nafada hatahori noꞌuk kara nae, “Nenene, ee! Au Amang manai nusa tetuk do inggu temak fee basa koasa lalaꞌen neu Au ena. Mana bubuluk no tetuk nae, Au ia see, kada Amak. Ma mana bubuluk no tetuk nae, Amak naa see, kada Amak Anan fo ndia Au ia. Ma Au here ala hatahori laen fo afada sara, mita fo ara oo ralela Amak boe.”
LUK 10:23 Boe ma Yesus nasare mbali ana nunin nara, de nafada kada mesa kasa nae, “Mauak tetebes neu ei, nahuu ei mete-mita Manetualain koasan ena.
LUK 10:24 Manek kara ma mana toꞌu dedeꞌa lele uluk kara hihiik ka mete-rita hata fo ei mete-mitan ena, tehuu ara ta bisa. Ara oo hihiik ka ramanene hata fo ei mamanenek ena, tehuu ara ta bisa boe.”
LUK 10:25 Laꞌe esa, hambu hatahori mana malela hukun Yahudi esa nambariik fo nae ike Yesus. Ana natane nae, “Papa Meser! Tulun mafada dei! Au muste tao hata, mita fo au bubuluk au bisa asoda akandoo sama-sama ua Manetualain nai nusa tetuk do inggu temak?”
LUK 10:26 Yesus naselu nae, “Baꞌi Musa surak hata laꞌe-neu dedeꞌak ia? Nai o hahambum talo bee neun?”
LUK 10:27 Hatahori naa nafada nae, “Ana surak nae: ‘O muste sue-lai Manetualainlena heni basa-basan, te Ana ndia naena haak parenda o. Huu naa de o muste hii malan seli neun, maue-osa fafandek lima-eim mara fo tungga Ndia hihii-nanaun, ma malela Ndia.’ Ma neni surak boe nae, ‘O muste sue o toranoom sama leo o sue o ao heli-helim.’ ”
LUK 10:28 Yesus bala nae, “Tebe! Mete ma o tao tungga talo naa, o masoda mua Manetualain seku neu.”
LUK 10:29 Tehuu hatahori naa, tao aon leo hatahori mana matu-matuk ia. Boe ma ana natane Yesus nae, “Tehuu au ‘toranoong’ naa, ndia see?”
LUK 10:30 Boe ma Yesus naselu nae, “Talo ia! Au nau fee lololek esa. Dei fo o ndia mafada mae, see ndia o ‘toranoom’ tebe-tebe. Tutuin talo ia: Hatahori Yahudi esa laꞌok numa Yerusalem mai, konda neni Yeriko neu. Tehuu medak neu ma, hambu naꞌo manu-meor mai de ara foꞌain. Ara popokon, basa boe ma ara leꞌa rala basa tali-doin nara ma bua-loꞌan nara. Boe ma ara nggarin neni dalak tatain neu, de ara laꞌo elan. Hatahori naa, ela baꞌuk ka maten ena.
LUK 10:31 Medak neu ma hambu malangga anggama Yahudi esa oo laꞌok nesik dalak naa boe. Ana mete-nita hatahori makahinak mana malenggak numa dalak tatain, tehuu ana ta hahae fo tulu-fali sana. Ana sio nesik dalak tatain seri, de laꞌo nakandoo.
LUK 10:32 Ta dook ka boe ma, hambu hatahori laen esa bali nesik naa. Hatahori naa, numa leo Lewi mai, fo ara rasiꞌe doi-sou neono-lalauk nai Manetualain Uma Huhule-haradoi Ina-huun. Neu ana mete-nita hatahori naa mana lenggu-barak numa dalak tatain, ana deka-deka mata neu meten, tehuu ana ta tulu-fali sana. Boe ma ana sio nesik dalak tatain seri de laꞌo nakandoo.
LUK 10:33 Ta dook ka bali boe ma, hambu hatahori esa numa nusa Samaria mai, nesik naa no ndia keledein. Ita basa ngga bubuluk tae, hatahori Yahudir rasiꞌe mete hatahori Samariar, na, ara pui a. Neu hatahori Samaria ia mete-nita hatahori neni foꞌaik naa, boe ma dalen tuda kasian neun. Ana deka-deka mata neu fo nau tulu-fali hatahori naa. Ana tao nalao hinan nara nenik anggor, boe ma ana rose mina neu sara. De ana mbambalu nalololen, ma ana fuan neni ndia keledein lain neu. Boe ma ana noon neni kota neu. De ana feen leo taak numa uma sesebak, ma nafafaꞌu nalololen.
LUK 10:35 Neu beꞌe-mai, hatahori Samaria naa, neu bae nakahuluk doi lilo fulak dua neu tenu uma sesebak, ma nafada nae, ‘Pake doik ia, fo mafafaꞌu malolole hatahori hedis naa losa ana hai. Mete ma ta dai, na, pake taak papa doin dei. Neu au lenggu fali, dei fo au nggati falik basa papa doin nara.’ ”
LUK 10:36 Yesus lololen hondak kada naa. Boe ma Ana natane hatahori mana malela hukun naa nae, “Tungga o, na, see ndia ‘toranook’ tebe-tebe soa-neu hatahori neni foꞌaik bebeik kara naa?”
LUK 10:37 Hatahori naa naselu nae, “Neu ko ndia hatahori fo dalen tuda kasian neun naa.” Yesus nae, “Tebe, kaꞌa! Muu leo fo tao tungga.”
LUK 10:38 Basa naa, Yesus no ana nunin nara laꞌo rakandoo reni Yerusalem reu. Boe ma ara tuli numa nggorok esa. Numa naa, hambu kaꞌa-fadik dua, nade Martaa ma Maria. Martaa noke Yesus asa fo sunggu taak nai ndia uman. De ara leo taak numa naa. Neu Yesus nanggatuuk, fo nanori hatahorir, boe ma Martaa mbute-mue no nafafaꞌu nanaꞌa-nininuk nai mamana dode-nasuk. Tehuu fadin Maria, nanggatuuk deka Yesus ein, fo nenene kokolan. Doo-doo faa, boe ma Martaa maso neu de unggu-remu mbali Yesus nae, “Papa, ee! Talo bee! Au mbute-mue alan seli afafaꞌu nanaꞌa-nininuk, naa te au fading kada nanggatuuk pasi-pasi nai ia. Tulun dei! Madenun fo ana sou au faa dei nai mamana dode-nasuk!”
LUK 10:41 Tehuu Lamatuak Yesus naselun nae, “Maꞌa, Maꞌa, ee! O ia, mbute-mue duduꞌa kada mata-matak kara.
LUK 10:42 Malole, tehuu hatematak ia hambu matak esa belin lenak bali. No Maria nanggatuuk nenene Au Dedeꞌa-kokolang, ana tengga nala hata fo neulauk mateꞌen ena. Hatahori ta bisa leꞌa rala Dedeꞌa-kokolak naa numa ndia mai.”
LUK 11:1 Laꞌe esa, Yesus neu hule-haradoi. Hule-haradoi basa, boe ma Yesus ana nunin esa mai, de noke nae, “Papa! Yohanis Mana Saranik nanori ana nunin nara ena, de ara hule-haradoi ralela. Ai moke fo Papa oo manori ai hule-haradoi boe dei!”
LUK 11:2 Boe ma Yesus nae, “Malole boe! Hule-haradoi pake netuduk leo iak: Amak! Amak nadem malalao ndoos. Naa fo basa hatahorir rakadedemak Amak nadem fo ta neni babanggak naa. Naa fo Amak dadi Manek soa-neu basa hatahorir.
LUK 11:3 Amak tulun fee ai nanaꞌak mana daik tungga faik.
LUK 11:4 Ai moke-hule fo Amak lilii heni ai sala-singgon nara, sama leo ai oo lilii heni hatahori salan fo ara taok neu ai boe. Amak manea fo ai ta tao manggarauk.”
LUK 11:5 Boe ma Yesus fee nenorik tamba neu sara laꞌe-neu huhule-haradoik. Ana pake lololek nae, “Taon neu leo fati ladak, hambu tia-laik numa dae dook mai, fo ana sunggu taak nai o umam. Tehuu o ta hambu hata esa boe na, fo feen naꞌa-ninu. Boe ma o muni o nonoom laen esa uman muu, fo hule nasi-nasi numa dea mai mae, ‘Kaꞌa, ee! Fee taak au roti balok telu dei. Huu au hambu fuik nai uma, tehuu ai ta raꞌu ndaa hata esa boe na ia! Kaꞌa, tulun dei! Kada balok telu a boe! Dei fo au nggati!’
LUK 11:7 Mete te o nonoom naa naselu nae, ‘Kaꞌa boe oo! Hatahori sunggu seli ena, tehuu kaꞌa mai fafae bali! Lelesur neni nggoe nisak kara ena, ma! Kakanak kara sunggu seli ena. Boso mamanasa, ee! Laꞌe esa bali dei kaꞌa!’
LUK 11:8 Leo mae talo naa oo, tehuu masaneda matalolole boe. Leo mae hatahori naa ta nambadeik fo fee o, nahuu o, ndia nonoon, de mete ma o kada moke makandoo, neu ko ana nambadeik fo fee o.
LUK 11:9 Leo naak oo soa-neu hule-haradoik boe. Moke-hule makandoo neu Manetualain; neu ko Ana fee. Sangga makandoo; neu ko Ana natudu dalak. Manggou makandoo; neu ko Ana soi lelesu.
LUK 11:10 Basa hatahori mana noke nakandoo neu Manetualain, neu ko simbo. Mana sangga nakandoo, neu ko hambu. Mana nanggou nakandoo, neu ko Ana soi lelesu.
LUK 11:11 Hena ei duꞌa sudik kana! Hambu nai bee amak esa, mete ma anan noke iꞌak, na, ana feen mengge?
LUK 11:12 Do, anan noke manu tolo, na, ana feen kurak? Ta bisa leo naak, hetu?
LUK 11:13 Hatahori dae-bafok, memak numa netehuun mai manggarauk. Tehuu ei Amam manai nusa tetuk do inggu temak naa, netehuun neulau ndoos. Dadi mete ma hatahori dae-bafok manggarauk matak leo kada ei ia, hii fee hata fo neulauk neu ei anam mara, hata-bali Amak! Ana ta fee kada hata fo ei toꞌa, tehuu lenak bali, Ana fee Ndia Dula-dale Malalaon neu hatahorir fo mana noke-hule neun.”
LUK 11:14 Laꞌe esa, Yesus husi kalua heni nitu numa hatahori nggoak esa mai. Boe ma hatahori naa mulai kokolak nala nasafali. Hatahorir maruma naa, heran bali-bali.
LUK 11:15 Tehuu hambu ketuk rae, “Memak, Ana bisa husi heni nitu! Te Ana hambu koasa numa nitur malanggan mai fo ndia Balsebul na.”
LUK 11:16 Hatahori laen nara rae sangga soba Yesus. Boe ma ara roken fo Ana tao tanda heran esa bali natudu neu sira nae, memak Ndia koasan numa Manetualain mai.
LUK 11:17 Tehuu Yesus bubuluk memak sira ute manggaraun nara. De Ana kokolak nae, “Mete ma nai nusak esa, rau-inggun nara rahuur-ratofak, neu ko nusak naa nakalulutu. Leo naak oo, mete ma nai uma esa dale, uma isin nara leo-laꞌo ro kada rareresi esa no esa, na, neu ko uma-loo naa, tetu-teman ta ena boe!
LUK 11:18 De mete ma nitur hii kada rahuur, ma esa husi esa, na, sira malanggan ta bisa toꞌu parenda nala dook ka ena bali! Dadi ta maso nai duduꞌak, mete ma ei mae, Au pake nitur koasan fo husi nitu bali!
LUK 11:19 Masaneda, ee! Ei hatahorim mara oo, ralela husi nitu boe. Ara pake nitu koasan, do? Taa, hetu! Dadi ei boso kokolak sadi ndaa mae, Au pake nitu koasan fo husi-mbuu nitu. Dei fo ei hatahori heli-helim mara ndia raketu rae, hata fo ei makasasaꞌek salak naa, sala.
LUK 11:20 Tehuu mete ma tebe-tebe Au husi-mbuu nitu pake Manetualain koasan, na, natudu nae, Manetualain parenda-koasan nai ei idu-matam ena. Nai ia ena, tehuu nok bali ei ta bubuluk.
LUK 11:21 Mete ma hatahori kalakak esa pake tee-tande kii-konak fo nanea natalolole ndia uman, neu ko basa ndia hata-heton, lino-lendek.
LUK 11:22 Tehuu neu ko hambu esa barakain lena heni ndia mai nasenggin, ma ndondo neni hatahori naa tee-tanden nara. Basa boe ma ana huru neni hatahori naa hata-heton nara fo ana babaꞌe neu ndia ana nunin nara. Doo basa ia ena, hatahori kalakak naa namahena neu ndia tee-tanden. Tehuu hatematak ia ana ta namahena neu tee-tandek kara ena bali.
LUK 11:23 Masaneda matalolole! Hatahori fo ta mana mabua-aok esa no Au, ndia naa, Au musung. Ma hatahori fo ta mana tulun Au ue-osang, na, ndia naa, kada nakalulutu bua-aok.”
LUK 11:24 Yesus kokolak tamba bali nae, “Neu ita husi nitu kalua numa hatahori esa mai, na, ana neni mamana nees neu fo sangga mamana hahae aok. Huu ana ta hambu mamana mandaak, boe ma ana duꞌa nae, ‘Aweꞌ! Ta hambu mamanak talo ia, de malole lenak au fali uu leo nai hatahori bakahuluk naa.’
LUK 11:25 Boe ma ana fali, de natonggo no mamanak naa, neni sapu-saa laok ma nefafaꞌu neulauk ena.
LUK 11:26 De nitu naa neu noke ndia nonoon hitu, manggaraun lena ndia bali. Boe ma basa sara reu leo rai hatahori naa, de ara nggafu feen. Dadi hatematak ia, hatahori naa masodan hambu sosoek lenak bali.”
LUK 11:27 Neu Yesus bei kola-kola no hatahori noꞌuk kara raa, inak esa numa naa eki nae, “O inam mauan seli, nahuu ana ndia bonggi nala O, ma ana nasusu O!”
LUK 11:28 Yesus naselu nae, “Tebe, mama! Tehuu mana mauan lenak bali, ndia hatahori mana pasa ndiꞌi doon fo nenene Manetualain Dedeꞌa-kokolan ma tao tunggan!”
LUK 11:29 Neu Yesus bei kola-kola, rea rakarumbu reu eko-feo rala Yesus. Boe ma Ana mulai kokolak nae, “Hatahori tembo-tanak ia, soa tao kada manggarauk. Ara kada roke taa-taa fo Au tao tanda heran fee sara, fo ara bubuluk Au ia, tebe-tebe Lamatuak hatahorin. Naa te, lele uluk Lamatuak fee tanda heran neu sara tungga Ndia mana toꞌu dedeꞌan Yunus. Naa, dai ena.
LUK 11:30 Lele uluk Yunus nafada hatahorir marai kota Niniwe nae, ara muste sale dalen do tuke tein nara dei. Hata fo dadi neu Yunus ndia lele uluk, dadi tanda soa-neu sara nae, Manetualain ndia nadenun. Leo naak oo, soa-neu Au, Hatahori Dae-bafo Isi-isik boe. Au mai afada ei, fo ei muste sale dalem do tuke teim mara dei. Ma hata fo dadi nai Au, neu ko dadi neu tanda soa-neu hatahori tembo-tanak ia nae, memak Manetualain ndia nadenu Au.
LUK 11:31 Neu ko neu dae-bafok fai mateꞌen, Lamatuak nambariik dadi neu Mana Maketu-maladi Dedeꞌak, mete te mane inak numa kona mai, nasoda fali fo dadi neu sakasii. Ana dedeu liman fo nakasasaꞌek salak neu ei basa ngga mana masodak hatematak ia nae, ‘Ei basa ngga iar, nggoa bebek kara!’ Huu lele uluk mane inak naa numa dook ka mai, fo mete-nita no mata heli-helin manek Soleman malelan. Naa te hatematak ia, hambu Hatahori nai ei talada heom, ta neni babanggak lena heni manek Soleman. Tehuu ei ta nau tao matak neun faa boe na!
LUK 11:32 Ma ta kada ndia mesa kana! Mete te hatahori ruma Niniwe mai, ara oo rambariik fo dedeu ei mana masodak hatematak ia boe rae, ‘Ei basa ngga, nggoa bebek kara!’ Ara kokolak talo naa, huu fai bakahulun neu Yunus neu nafada Manetualain hihii-nanaun neu sara, boe ma ara sale dalen do tuke tein nara memak kana. Naa te hatematak ia, Hatahori ta neni babanggak lena heni Yunus nai ei talada heom, tehuu ei ta nau sale dalem do tuke teim mara faa boe na!”
LUK 11:33 Yesus tuti kokolan bali nae, “Hatahori dede lambu tiꞌoek, boe ma ana mbedan neu mamana demak, mita fo ana tao manggaledo kama naa, soa-neu basa hatahori mana maso reni naa reu. Ta hambu hatahori dede lambu, boe ma tatanan pake ure dae fo nafuni nisan. Naa, sosoan taa!
LUK 11:34 Ei matam oo sama leo lambu boe. Ana tao manggaledo ei dalem. Mete ma matak kiu-habu, na, hatahori mete hata a mesan no dale manggarauk. Tehuu mete ma matak manggaledo, na, hatahori mete hata a mesan no dale malole.
LUK 11:35 Tao tetebe fo manggaledok manai ei dalem naa, saꞌan lenak bali, sama leo ledo saꞌan. Manggaledok manai ei dalem naa, boso sama leo bulan saꞌan fo fee mete-tita kada saꞌon.
LUK 11:36 Mete ma ei dalem manggaledok, losa ta hambu makiuk nai buꞌuk faa boe na, neu ko ei masodam oo basa-basan manggaledok boe, nok bali hambu lambu moꞌok tao manggaledo ei masodam boe.”
LUK 11:37 Yesus kokolak basa, boe ma hatahori esa numa partei anggama Farisi mai, noken fo neu naꞌa nai ndia uman. Losa naa, boe ma Yesus maso uma dale neu, de nanggatuuk neu mei nanaꞌak.
LUK 11:38 Tehuu tenu uma heran mete-nita Yesus naꞌa, ma ta nafui oe nakahuluk, tungga hatahori Farisi hohoro-lalanen.
LUK 11:39 Boe ma Yesus nafadan nae, “Ei hatahori Farisir, ta hohoꞌak kara! Ei toꞌu mahere ei anggaman hohoro-lalanen! Ei masaneda tao malalao pinggak ma nggalas dean losa nanggadilak, tehuu ei ta masaneda tao malalao ei dale manggenggeom naa, fo manggarauk ma bare-naꞌom seli!
LUK 11:40 Nggoa bebek kara ein, ee! Boso lilii-ndondou. Manetualain ndia adu manai dea. Ana oo, ndia adu manai dale boe.
LUK 11:41 Tehuu malole lenak ei fee hatahori kasian nara numa hata fo ei maenam, mita fo ei bisa dadi miu lolo-laok nai Manetualain matan.
LUK 11:42 Hatahori Farisir ein, ee! Neu ko ei hambu sosoek! Laꞌe-neu fee Manetualain babaꞌek esa numa salahunu mai, ei soa kada reke basa-basan, moꞌo-kadiꞌik. Losa ei bumbu-fani kadiꞌi anan numa osi mai oo, ei reke no lutuk boe! Tehuu ei ta hosek matak bee fo nenenin lenak. Laꞌe-neu dedeꞌa susuek neu Manetualain, ma dedeꞌa ta mbeu seserik, ei lilii heni sara! Memak ita muste fee takandoo Manetualain babaꞌen, tehuu boso lilii-ndondou hata fo manenenin lenak kara.
LUK 11:43 Neu ko ei hambu sosoek! Ei soa sangga mamanak bee fo neulaun lenak nai uma huhule-haradoik dale, ma soa sangga hada-horomatak nai rea mamanan nara.
LUK 11:44 Neu ko ei hambu sosoek! Ei nok bali rates fo daen natetu ena. Hatahorir laꞌok resik naa, tehuu ara ta bubuluk rae, nai naa hambu rates, nahuu rates bafon laok, naa te nai dale kabook. Tehuu tungga ita dala-hadan, na, hatahori mana tabu laꞌe rates tao nanggenggeo ndia ao heli-helin, de ta nandaa neni uma huhule-haradoik neu. Ei hatahori Farisir sama leo rates naa! Mete numa dea mai, na, nok bali ei lao ndoos sara ia. Tehuu nai ei dalem dale sofek no kaboo mburuk kara.”
LUK 11:45 Hambu hatahori malela dedeꞌa hukun Yahudi esa numa naa, nggado laik Yesus kokolan nae, “Papa Meser! Papa kokolan bebeik kara ia, ndee laꞌe ai boe!”
LUK 11:46 Boe ma Yesus balan nae, “Tebe! Ei mana malela dedeꞌa hukun Yahudir, naa fo ei oo, hambu sosoek boe! Ei ta tulu-fali hatahori ma ta tao mambadaku sira leleo-lalaꞌon nara, tehuu boe kada tao makasususak kasa no ei anggamam hohoro-lalanen kamaberan. Ma ei fee hatahori lemba-rasaa ei hohoro-lalanem mata-matak kara. Tehuu ei oo ta soba lemba sou mala berak naa no kada lima kukuk esa boe!
LUK 11:47 Neu ko ei hambu sosoek! Ei mbute-mue mia lutu tutuus fee Manetualain mana toꞌu deꞌan nara lele uluk fo fee hada-haromatak neu sara. Naa te ei bei-baꞌim mara mesa kasa ndia rakanisa mana toꞌu dedeꞌak kara raa!
LUK 11:48 Ei oo, eik esa mia ei bei-baꞌim mara raa boe. Ara timba heni Manetualain mana toꞌu dedeꞌan nara ma rakanisa sara. Basa de, ei lutu tutuus fee mana toꞌu dedeꞌak kara raa, fo dadi tanda mae, ei oo mbeu tungga ei bei-baꞌim mara boe.
LUK 11:49 Huu naa de Manetualain fo mana bubuluk basa-basan, kokolak nita nae, ‘Neu ko adenu Au mana toꞌu dedeꞌang ma nedenuk laen nara, fo reni hatahori Israꞌel asa reu. Basa boe ma hatahorir raa tuni-ndeni rakamiminak ketuk ma rakanisa ketuk.’
LUK 11:50 Hatahori mana masodak hatematak ia, muste lemba-nasaa nala neselu-netaan, numa hatahori fo mana makanisa Manetualain mana toꞌu dedeꞌan nara mai ena. Naa, reken numa Manetualain adu dae-bafok ia mai, mulai numa Habel mamaten mai losa bakadeak mateꞌen, Sakaria. Ndia naa, ndia hambu nekenisak numa mei tunu-hotuk, ma Kama Malalaok taladan nai Manetualain Uma Huhule-haradoi Ina-huun. Ei oo, lemba-masaa mala sira huku-dokin naa boe!
LUK 11:52 Ei mana malela dedeꞌa hukun Yahudir ein, ee! Neu ko ei hambu sosoek! Ei toꞌu nggoek fo bisa soi lelesu fo hatahorir ralela no malole Manetualain hihii-nanaun. Tehuu ei ta maso naa miu. Manggaraun lenak bali, ei mamanggenggee hatahorir fo boso maso naa reu!”
LUK 11:53 Neu Yesus kokolak nateꞌe, boe ma meser anggama ro hatahori Farisir lurin. Mulai numa faik naa neu, ara soa ratane mata-matak kara fo rae ike ratutudak kana. Ara duduꞌa taa-taa sangga dalak de rala harak fo tao dedeꞌak roon.
LUK 12:1 Faik naa, hambu hatahori rifun hida naa, ara mai rae nenene Yesus. Ara laꞌok raseseti ma rakarumbu rala Yesus. Boe ma Ana kokolak nakahuluk no ana nunin nara nae, “Manea aom mara fo boso tungga hatahori Farisir dea-matan. Te ara soa kokolak laen, tao laen.
LUK 12:2 Ara tao nok bali sira neulauk, tehuu sira dea-matan naa, neu ko neni nitak. Basa hata fo nefunik hatematak ia, neu ko neni nitak.
LUK 12:3 Hata fo ei kokolak no nefufunik hatematak ia, neu ko hatahorir ramanene sara ledo-ledo. Hata fo ei kutu-nuꞌu nai kama dale, neu ko hatahorir kokolak kasa rahere nai hatahori noꞌuk ka matan.”
LUK 12:4 Yesus kokolak tamba nae, “Ana nggara ein! Boso bii-mamataꞌu mete ma hatahorir rae tao risa ei. Ara bisa tao risa kada ei ao-mbaam, tehuu ta bisa tao hata-hata neu ei samanem.
LUK 12:5 Au sangga afada ae, ei muste mamataꞌu neu see. Ei muste mamataꞌu neu Manetualain. Ana ndia bisa tao nisa, ma piru heni ei meni aꞌi mbila ta kala matek dale miu. De Ndia ia, ndia ei muste mamataꞌun tebe-tebe.
LUK 12:6 Ei duꞌa sudik kana, mbui litik belin baꞌu hata? Belin baꞌu anak ka, hetu?! Mbuik lima belin seen dua, hetu ma! Leo mae talo naa, tehuu Manetualain ta lilii heni esa boe na.
LUK 12:7 Leo naak oo, Manetualain tao matak neu ei boe. Ana bubuluk no tetuk, ei langga bulun dook hida nai ei langgam mara. Dadi ei hae mamataꞌu, nahuu Manetualain timba-tai nala ei belim lena heni basa mbui litik noꞌuk kara raa.”
LUK 12:8 Basa de Yesus kokolak bali no Ndia ana nunin nara nae, “Pasa ndiꞌi doom mara matalolole! Mete ma hambu hatahori ta mae manaku Au nai hatahori noꞌuk ka matan nai dae-bafok ia, neu ko Au oo, ta mae manaku sana nai Manetualain atan nara matan nai nusa tetuk do inggu temak boe ae, ndia ia Au hatahoring.
LUK 12:9 Tehuu mete ma hambu hatahori kokolak nai hatahori dae-bafok matan nae, ndia ta nalela Au, neu ko Au oo, kokolak nai Manetualain atan nara matan nai nusa tetuk do inggu temak boe ae, Au ta alela sana.
LUK 12:10 Au ia, Hatahori Dae-bafo Isi-isik. Mete ma hambu hatahori kokolak nakabobook Au nade maloleng, na, Manetualain bei sadia lilii heni ndia salan naa. Tehuu mete ma ana kokolak nakabobook Manetualain Dula-dale Malalaon nade malolen, Manetualain ta lilii ndia salan naa.
LUK 12:11 Neu hatahorir leꞌa reni ei meni mamana parisa dedeꞌa anggamar miu, do meni hatahorir mana parendar miu, nahuu ei mamahere neu Au, ei hae mamataꞌu masalaꞌe aom mara talo bee.
LUK 12:12 Neu ko faik naa oo, Manetualain Dula-dale Malalaon nanori ei dedeꞌa deꞌek fo nandaa no maselu mbali sara boe.”
LUK 12:13 Basa boe ma hatahori esa numa hatahori noꞌuk kara raa mai natane Yesus nae, “Papa Meser! Tulun madenu au kaꞌang fo baꞌe ai aman pusakan no au dei.”
LUK 12:14 Tehuu Yesus naselun nae, “Heeh! See ndia soꞌuk Au dadi Mana Maketu-maladi Dedeꞌak fo aketu ei dua ngga dedeꞌam matak leo naak naa?”
LUK 12:15 Boe ma Yesus kokolak no basa hatahori noꞌuk kara raa nae, “Ei muste besa-besa fo boso miꞌa mata lenak. Huu hata-heto noꞌuk ka oo, ta neni fee masoda lino-lendek boe.”
LUK 12:16 Basa boe ma Ana tui lololek esa nae, “Hambu hatahori kamasuꞌik esa, osin buna-boan noꞌun seli.
LUK 12:17 Losa basa nggudang mamana mbembedak sofen seꞌe-seꞌe ena, de ana ta bubuluk tao talo bee bali.
LUK 12:18 Boe ma ana naketu nae, ‘Au nau tao talo kada ia! Au ofe heni nggudang raak kara iar, fo ambaririik seluk moꞌon lenak bali, dei fo au ahinda osi isin ma basa suꞌi-betes laen nara reu naa.
LUK 12:19 Mete ma talo naa ena, na, dei fo au kokolak ua au aong ae, “Wee! Nggudang sofek ena! Nanaꞌak dai ena fo muꞌa losa teu-teuk kara. De muꞌa-minu malada-malada, ma ndae betok eim fo setelele leo!’ ”
LUK 12:20 Tehuu Manetualain nafada neun nae, ‘Woi! Nggoa bebek, ee! Leꞌodaen ia oo, o mate boe. De see ndia soa basa o nggudang naa isin lalaꞌen, ee?’
LUK 12:21 Dadi talo ia! Hatahori bisa naduduru hata-heto noꞌun seli nai dae-bafok ia soa-neu ndia ao heli-helin, tehuu nai Manetualain duduꞌan, ndia ia hata taak, nahuu ana ta malole no Manetualain.”
LUK 12:22 Basa de Yesus nanori tamba neu Ndia ana nunin nara nae, “Ei hae masambute mia masodam mara tungga faik laꞌe-neu mae miꞌa hata, do, pake hata.
LUK 12:23 Huu ita masodan ia, neulaun lena heni hata fo ita taꞌa, ma hata fo ita pake.
LUK 12:24 Mete sudik mbui kaa nggeok kara! Ara ta sele-tande, ta ketu-koru, ta raena soka-pole fo rahinda nanaꞌak, tehuu Manetualain nakaboi sara. Mete ma talo naa, neu ko Ana oo bisa nakaboi ei boe, nahuu Ana timba-tai nala ei belim mara lena heni mbuik kara raa.
LUK 12:25 Mete ma hatahori nambariik nasare titiro, boe ma ana kada nasambute no ao heli-helin, nai rarain ana bisa tao nambanaru ndia teu-fain, do taa? Ta bisa!
LUK 12:26 Dadi mete ma ei masambute mia kada dedeꞌa kadiꞌi anak leo naak, ta neni nanalak hata esa boe na, talo bee de ei bei mae masambute mia dedeꞌa moꞌok kara bali? Nanalan hata?
LUK 12:27 Mete sudik bungga fuir. Ara ta raue osi-lutur, ma ta tenu-lolo. Tehuu manek Soleman bua-loꞌan neulaun lenak oo ta bisa lena heni bungga fuir naa lolen boe.
LUK 12:28 Huu Manetualain nakaboi naꞌu kadiꞌi anak fo sosoan taa, fo mana nasoda kada faik ia, boe ma beꞌe-mai maten, fo hatahori nggarin neni aꞌi dale neu. Mete ma leo naak, Ana oo bisa nakaboi-nasamao ei fo belim mara lena heni naꞌu naa boe. Dadi tao hata de ei ta tai-mamahena neu Manetualain tebe-tebe?
LUK 12:29 Leo naak oo ei hae masambute laꞌe-neu nanaꞌa-nininuk boe. Huu neu ko Manetualain ndia koladu.
LUK 12:30 Hatahorir fo ta mana tai-ramahena neu Manetualain, ara raue-osa fafandek lima-ein nara fo koladu basa matak kara raa. Tehuu eir ia, boso talo naa, nahuu Amam manai nusa tetuk do inggu temak bubuluk basa hata fo ei toꞌa.
LUK 12:31 Mete ma ei makalalaꞌok makahuluk Manetualain ue-osan, neu ko Ana koladu basa matak kara iar fee ei.”
LUK 12:32 Basa de Yesus tuti seluk kokolan nae, “Ei sama leo bibi lombo bubua anak esa, fo ta raena barakaik faa boe na. Tehuu hae mamataꞌu! Ei Amam manai nusa tetuk do inggu temak naa, Mane Ina-huuk. Hata fo Ndia enan, Ana feen neu Ndia ana susuen nara no nemehokok.
LUK 12:33 Dadi miu seꞌo heni basa ei bua-baꞌum mara, basa, na, doin nara miu babaꞌe fee hatahori hata taak kara. No dalak naa, ei mahinda hata-heto nai nusa tetuk do inggu temak, mamana lino-lendek ma matea ndoos. Naꞌo manu-meo ta bisa maso neu namanaꞌo nala sara. Lafo-iꞌinggir oo ta bisa raꞌa rakalulutu sara boe.
LUK 12:34 Masaneda matalolole! Ei hata-hetom nai bee, na, ei dalem oo nai naa boe.”
LUK 12:35 Yesus kokolak bali nae, “Hatu-leledon ei muste mahani a fo maono-lalau neu Manetualain. Sama leo hatahori neondak beꞌe nahani tenu uma fali numa feta kabin mai. Mete ma tenu uma dedelu lelesu, na, ana bisa soin no lai-laik.
LUK 12:37 Neu tenu uma fali ma mete-nita hatahori mana maue-osar rahani a talo naa, neu ko ara raua. Neu ko tenu uma natudu dale susuen neu sara. Ana pake hatahori mana maue-osar bua-loꞌan nara, boe ma neu naono-lalau hatahori mana maue-osar raa no nanaꞌa malada-malada.
LUK 12:38 Hatahori mana maue-osar raa memak raua, nahuu ara raono-lalau tenu uma no malole. Leo mae tenu uma mai liꞌu hida a mesan, fati ladak do, lole mbilak, ara rahani a taa-taa.
LUK 12:39 Duꞌa matalolole! Mete ma tenu uma bubuluk no tetuk liꞌu hida naꞌo manu-meo nae mai, neu ko ana ta fee lelak fo naꞌo manu-meo foꞌai ndia uman.
LUK 12:40 Dadi ei muste mahani a taa-taa, te ta hambu hatahori esa boe na bubuluk no tetuk faik bee, Hatahori Dae-bafo Isi-isik nae fali mai.”
LUK 12:41 Boe ma Petrus natane Yesus nae, “Papa Meser! Papa lololen bebeik kara ia, laꞌe kada ai mesa ngga do laꞌe basa hatahorir?”
LUK 12:42 Yesus naselu nae, “Lololek naa laꞌe-neu basa hatahorir fo mana tao sama leo malanggan mana koladu, fo mana malela koladu no dalen mahanik soa-neu ndia malanggan. Neu ko ndia malanggan soꞌuk kana fo dadi mana baꞌe nanaꞌak fee hatahori mana maue-osa laen nara. Mete ma ana manggate tao tungga ndia uen talo naa, mae malanggan mai neu faik bee a mesan, tehuu ana soa tao hata no tetuk. Boe ma ana hambu nanalak, nahuu ndia malanggan neu ko soꞌuk kana fo koladu basa hata-heton lalaꞌen.
LUK 12:45 Tehuu sosoek mete ma malanggan mana koladuk naa, mulai duꞌa nae, ‘Mete te tou lasik dook ka dei fo ana fali.’ De ana mulai poko-femba hatahori mana maue-osa laen nara, touk ma inak. Boe ma ana nanggatuuk naꞌa-ninu no nemehokok losa mafu.
LUK 12:46 Tehuu faik esa, neu malangga mana koladuk naa ta meda nala sana, nggengger neuk ka, ndia malanggan fali. Neu malanggan bubuluk dedeꞌa matak naa, boe ma ana poko-femban tutik kana. De ana husi henin, fo ana simbo nala babaꞌen nai deak sama-sama no hatahori fo dalen ta mahanik tungga ndia malanggan hihiin.
LUK 12:47 Hatahori mana maue-osa fo bubuluk ndia malanggan hihiin, tehuu ta sadia tao tungga, do ta nau tao tungga, neu ko hambu hukun berak.
LUK 12:48 Tehuu hatahori mana maue-osa fo naue sala, nahuu ana ta bubuluk ndia malanggan hihiin, neu ko ana hambu hukun ta berak. Hatahori fo mana simbo noꞌuk, ndia babalan oo noꞌuk boe. Hatahori fo mana simbo ue-osa moꞌok, ndia neselu-netaan oo moꞌok boe.”
LUK 12:49 Yesus tuti seluk kokolan nae, “Au mai fo tada feꞌe Au hatahoring numa hatahori laen mai nai dae-bafok ia. Naa, sama leo hatahori pake aꞌi fo hotu heni dafuk. Au hihiing naa, mete fo aꞌi naa mulai mbila nai basa mamanak ena.
LUK 12:50 Tehuu Au muste lemba-asaa ala doidoso berak akahuluk. Neu ko Au doidoso tebe-tebe losa Au uen basan ena dei.
LUK 12:51 Ei duꞌa mae, Au mai uni mole-damek nai dae-bafok ia, do? Taa! Au mai fo tao ala hatahorir rahuur rasimbo bafak, ma tao hatahorir rabingga-baꞌek, nahuu Au nenoring.
LUK 12:52 Numa hatematak ia neu, hatahori ratoranook kara rabingga-baꞌek. Nai nufaneluk esa dale, telu laban dua, dua laban telu.
LUK 12:53 Ama bonggik laban ana bonggin; ana bonggik laban ama bonggin. Ina bonggik laban ana bonggin; ana bonggik laban ina bonggin. Ari-inak laban feto-feun; feto-feuk laban ari-inan.”
LUK 12:54 Boe ma Yesus kokolak no hatahori noꞌuk kara raa nae, “Mete ma ei mete-mita sosoꞌak katek ka nai buꞌun muri, ei mae, ‘Ia tanda nae, udan sangga mai ena.’ Memak tebe leo naak.
LUK 12:55 Mete ma ani konak fuu mai, na, ei mae, ‘Ia tanda nae, faik ia katobi ndoos!’ Memak tebe leo naak.
LUK 12:56 Woi! Ei hatahori dae-bafok mana dea-matak fo kokolak laen, tao laen! Ei tadu-tanda malela dae-inak ia tungga fai hanas ma fai oe faak lalalin hihiin. Tehuu tao hata de ei ta nau malela Manetualain hihii-nanaun nai hatematak ia?”
LUK 12:57 Yesus kokolak tamba nae, “Mete ma ei madedeꞌa, na, tao hata de ta bisa maketu aom bee ndia ndaa! Malole lenak koladu fo mole-dame dei! Boso losak ei miu nai mana maketu-maladi dedeꞌak matan ena, boe ma ana naketu fo fee ei maso bui.
LUK 12:59 Mete ma talo naa, neu ko ei ta bisa kalua, losa bae maketu basa ei hutam mara fo mana maketu-maladi dedeꞌak naketu basak naa.”
LUK 13:1 Faik naa, hambu hatahori nafada Yesus nae, nggubenor Pilatus nakanisa hatahori Yahudi hida maruma Galilea mai, neu ara reni tunu-hotuk numa Uma Huhule-haradoi Ina-huuk nai Yerusalem.
LUK 13:2 Yesus namanene nala naa, boe ma Ana natane nae, “Ndondoon naa tungga ei duduꞌam, na, hatahori neni nekenisak kara raa salan nara moꞌon lena heni basa hatahori Galilear laen? Huu naa de ara hambu hukun mates, do?
LUK 13:3 Taa! Tehuu mete ma ei ta laꞌo ela ei leleo-lalaꞌo manggaraum mara, fo tungga falik Manetualain hihii-nanaun, neu ko ei oo hambu nekelulutuk sama leo sira boe.
LUK 13:4 Boe ma talo bee bali no hatahori kasalahunu faluk fo mana matek kara, huu manara manai Siloam ndefa henin de tuni nala sara, ndia fai maneuk kara naa? Salan nara moꞌon lena heni basa hatahorir marai Yerusalem, do?
LUK 13:5 Taa! Tehuu mete ma ei ta laꞌo ela ei leleo-lalaꞌo mana puta-paik fo tungga falik Manetualain eno-dalan ndoon, neu ko ei oo hambu nekelulutuk leo sira boe.”
LUK 13:6 Basa boe ma Yesus fee lololek esa nae, “Hambu hatahori esa naena ai huuk esa nai osin dale. Ana mai taa-taa fo sangga mete sudik ai huuk naa naboa do, beik. Tehuu ai huuk naa, bei ta naboa.
LUK 13:7 Basa boe ma ana nadenu ndia mana maue osin nae, ‘Basa teuk telu ia ena, au mai afalik fo sangga ai huuk ia boan, te ta hambu hata esa boe na. Dadi hungga henin leo, te ai huuk ia kada nanala mamana a.’
LUK 13:8 Tehuu mana maue osi naselu nae, ‘Papa boso mamanasa. Fee tembo neu ai huuk ia teuk esa bali. Mita fo au dodoꞌi ndule huun, ma fua dae maminak neun, fo doo ain neulau.
LUK 13:9 Mete ma teu mana maik ia, ai huuk ia naboa, na, malole. Tehuu mete ma taa, na, neu hungga henin leo.’ ”
LUK 13:10 Laꞌe esa, ndaa no hatahori Yahudi fai huhule-haradoin, Yesus neu fee nenorik numa uma huhule-haradoik.
LUK 13:11 Numa naa, hambu inak esa nggotin mbukuk teuk salahunu falu ena, huu nitu tatao-nonoꞌin. Ana ta bisa nambariik no matetuk.
LUK 13:12 Yesus mete-nita inak naa, boe ma Ana nanggou nalan, de nafada nae, “Ina, ee! Hatematak ia ina hai ena.”
LUK 13:13 Boe ma Yesus ndae liman neu inak naa nggotin. Medak neu ma, nggoti mbukun naa natetu tutik kana. Boe ma ana noke makasi noꞌuk ka ma koa-kio Manetualain.
LUK 13:14 Tehuu malangga uma huhule-haradoik naa namanasa, nahuu Yesus tao nahai hatahori laꞌe-ndaa fai huhule-haradoik. Boe ma nafada hatahori noꞌuk kara raa nae, “Nai menggu esa dalen hambu fai ue-osa nee. De malole lenak hatahori kamahedik kara mai nai kada fai ue-osar raa, fo sangga hatahori tao nahai sara. Boso mai nai fai huhule-haradoik!”
LUK 13:15 Tehuu Yesus naselu neun nae, “Weeh! Hatahori mana dea-matak. Nai fai huhule-haradoik oo ei maue-osa boe, hetu? Ei miu mboꞌi sapir ma keledeir, fo fee sara rinu oe, hetu?
LUK 13:16 Inak ia oo Abraham tititi-nonosin sama leo ita boe. Nitur malanggan futu-paꞌa nalan, doon teuk salahunu falu ena. Mete ma Au akamboꞌik kana laꞌe-ndaa fai huhule-haradoik, na, sala, do?”
LUK 13:17 Yesus musun nara ramanene rala naa, boe ma ara mae. Tehuu hatahori noꞌuk kara raa ramahoko ro Ndia ue-tatao neulaun nara.
LUK 13:18 Boe ma Yesus tuti kokolan bali nae, “Ndondoon naa Au akasasamak Manetualain hatahorin nara sama leo hata, ee?
LUK 13:19 Makasososan bei kada hidak ka, tehuu doo-doo boe ma tamba ramanoꞌu. Sira iar, mulai sama leo kada ai deꞌe kadiꞌi anak. Hatahori sele-tanden nai osi dale. Basa boe ma ana mori, de dadi neu ai huu moꞌok. De mbuik kara mai randunu nai ndanan nara.”
LUK 13:20 Boe ma Yesus kokolak seluk nae, “Ndondoon naa Au akasasamak Lamatuak hatahorin nara, sama leo hata bali, ee?
LUK 13:21 Ana sama leo laru taꞌik, fo inak kara haꞌi ralan de rumun no tarigu saak dua, fo tao roti noꞌuk ka. Boe ma tarigu naa basa sara kaifuu losa dadi moꞌok, nahuu laru taꞌik baꞌu anak naa. Lamatuak hatahorin nara leleꞌa-nonoren nara oo tamba rambaloa leo naak boe.”
LUK 13:22 Basa naa, Yesus asa mulai laꞌo reni kota Yerusalem reu. Tungga-tungga dalak, Ana tuli ndule kota ma nggorok fo nanori hatahorir.
LUK 13:23 Numa mamanak esa, hambu hatahori esa natanen nae, “Papa Meser! Fama te kada hatahori rumak ka ndia bisa hambu masoi-masodak, do?”
LUK 13:24 Ana naselu nae, “Nusa tetuk do inggu temak lelesun dale neu, makabiꞌak. De maote tebe-tebe fo ei bisa maso tungga naa miu. Hambu hatahori noꞌuk ka rae soba maso, tehuu ta bisa.
LUK 13:25 Mete ma tenu uma nggoe lelesu ena, neu ko ei mambariik miu dea fo dedelu lelesu, ma eki moke tulu-falik mae, ‘Lamatuak! Soi lelesu dei!’ Tehuu neu ko ana naselu nae, ‘Eir ia, see? Au ta alela ei!’
LUK 13:26 Boe ma ei mae, ‘Talo bee de lamatuak ta nalela ai? Ai masiꞌe manggatuuk miꞌa-minu mia lamatuak. Lamatuak oo nasiꞌe fee nenorik nai ai okofoon nara boe.’
LUK 13:27 Ma neu ko Ana naselu nae, ‘Au afada bebeik kara ena, au ta alela ei! Eir ia, hatahori fo mana tao kada manggarauk. Malai heok numa ia miu!’
LUK 13:28 Mete ma Manetualain naketu-naladi basa hatahorir dedeꞌan nara, neu ko ei kada buꞌi makarereu ma henggu nisim mara. Ei mete-mita baꞌi Abraham, baꞌi Isak, baꞌi Yakob ma Manetualain mana toꞌu dedeꞌan nara, basa sara maso ranggatuuk rai nusa tetuk do inggu temak dale ena. Tehuu ei neni husi henik kara rai kada dea.
LUK 13:29 Neu ko hatahori dae-bafok manuma dae-bafok ia buꞌun nara mai, numa ledo toda mai losa ledo tesa; numa kii mai losa kona, ranggatuuk raꞌa-rinu sama-sama rai Manetualain uma mane ina-huun.
LUK 13:30 Tanda matalolole matak kara iar: neu Manetualain naketu-naladi basa hatahorir dedeꞌan, neu ko hatahori see fo bakahulun tungga hatahori memeten rae, hatahori kadiꞌi anak, tehuu ana hambu hada-horomata moꞌok. Ma see fo bakahulun rae, ndia hatahori moꞌo-inahuuk, naa te Manetualain taon ndia leo kada hatahori kadiꞌi anak.”
LUK 13:31 Faik naa, hambu hatahori Farisi hida mai rasare Yesus de rafada rae, “Malole lenak Papa Meser makaheok muni mamanak laen muu, huu manek Herodes sangga nae tao nisa Papa.”
LUK 13:32 Boe ma Yesus naselu nae, “Weeh! Tou lasik naa, sama leo kue mana puta-paik. Miu mafadan mae, ‘Au husi nitur ma tao ahai hatahori kamahedik kara faik ia ma beꞌe-mai. Neu bei-nesak, dei fo Au ue-osang basan ena.’ Leo mae talo bee oo, Au bei nau tao ues baꞌu anak bali nai Au lalaꞌong uni Yerusalem uu boe. Huu hatahori Yerusalem mara fo mana soa rakanisa Manetualain mana toꞌu dedeꞌan nara.
LUK 13:34 Awii, hatahori Yerusalem mara, ee! Eir ia, kada makanisa taa-taa Manetualain mana toꞌu dedeꞌan nara, ma toko makamate nedenuk bee fo nae mai natudu Manetualain eno-dalan soa-neu ei. Laꞌi-laꞌik ka ena Au nau aduduru anea fo lopo-linu ei numa manggarauk mai, nok bali manu ina nau nakarorombo nala anan nara nai lidan dale. Tehuu ei ta nau.
LUK 13:35 Hatematak ia Manetualain ta nau tao matak neu ei uma huhule-haradoin bali. Mbila-beinesak te rouk ena. Neu ko ei ta mete-mita Au, losa ei manaku mae, ‘Manetualain fee babaꞌe-babatik neu hatahori mana mai neni Manetualain naden, nahuu Manetualain nadenu Ndia ena!’ ”
LUK 14:1 Faik esa, ndaa no fai huhule-haradoik, hatahori partei anggama Farisir malanggan esa noke Yesus fo mai naꞌa nai ndia uman. Ana nanggatuuk naꞌa, tehuu hambu hatahorir makun fo sangga mete Ana tao hata laꞌe-ndaa fai huhule-haradoik.
LUK 14:2 Faik naa, hatahori esa hambu hedi mbae aok, nanggatuuk numa naa.
LUK 14:3 Boe ma Yesus natane neu mana malela hukun Yahudi ma hatahori Farisir mana ranggatuuk raꞌa sama-sama numa naa nae, “Tungga baꞌi Musa hohoro-lalanen, na, bole tao ahai hatahori kamahedik laꞌe-ndaa fai huhule-haradoik, do taa?”
LUK 14:4 Tehuu ta hambu hatahori esa boe na fo buka bafan. Boe ma Yesus nafaroe hatahori kamahedik naa, de ana hai tutik kana. Basa de Yesus nadenu falik kana.
LUK 14:5 Boe ma Yesus natane seluk kasa bali nae, “Mete ma hambu kakanak esa, tuda neni oe matak dale neu laꞌe-ndaa fai huhule-haradoik, ei miu leꞌan dea mai, do taa? Mete ma sapi ndia tuda, ei elan numa naa, do ei leꞌan dea mai? Neu ko ei leꞌan dea mai. Naa sosoa-ndandaan nae, ei tao ue-osa naa ena, hetu!”
LUK 14:6 Ara ramanene Yesus kokolak talo naa, tehuu ta hambu esa boe na fo bisa naselu mbalin.
LUK 14:7 Faik naa, Yesus memete hatahorir fo mana mai raꞌa feta numa uma naa. Hambu hatahori noꞌuk ka here mamanak nai mata fo reu ranggatuuk reu naa. Yesus mete-nita naa, boe ma Ana kokolak nae,
LUK 14:8 “Besa-besa, ee! Neu hatahorir roke ei fo miu miꞌa feta kabin, na, boso miu sangga mamana nenggetuuk nai hatahori moꞌo-inahuuk kara mamanan. Boso losak tenu fetak noke fuir fo neulaun lenak.
LUK 14:9 Mete ma talo naa, neu ko tenu fetak mai kokolak no o nae, ‘Boso mamanasa, ee! Ama lali muni dea muu dei, te au sadia kadera ia fee hatahori moꞌo-inahuuk ia.’ Boe ma o mambadeik laꞌo ela kadera naa no mamaek fo lali muu manggatuuk nai kadera fo manai dea mateꞌen.
LUK 14:10 Dadi neu o hambu nonokek, na, manggatuuk muu kadera fo manai dea mateꞌen. Dei fo tenu fetak mete-nita o, boe ma ana mai nae, ‘Papa, ee! Mai fo manggatuuk muu mata ia dei.’ No dalak naa, o hambu hada-horomatak nai basa hatahori fuir matan nara.
LUK 14:11 Hatahori fo mana nakadedemak aon, neu ko Manetualain nakaloloek kana. Tehuu hatahori fo mana tao aon sama leo hatahori kadiꞌi anak, neu ko Manetualain nakadedemak kana.”
LUK 14:12 Basa naa Yesus kokolak no tenu uma nae, “Laꞌe esa bali, mete ma ama tao feta, na, boso moke kada ama nufanelum ma nonoo kamasuꞌim mara! Huu ara bisa bala ama nonokem.
LUK 14:13 Neu ama tao feta, na, moke hatahori hata taak, hatahori dokak, hatahori kekok fo ta bisa laꞌok, ma hatahori pokek kara.
LUK 14:14 Neu ko ara ta bisa bala ama nonokem. Tehuu neu ama noke sara, Manetualain ndia bala. Mete ma Ana nasoda falik hatahori kamaherek mana matek kara ena, neu ko Ana ta lilii ama dale susuen.”
LUK 14:15 Hatahori fo mana nanggatuuk no Yesus mei esa, namanene talo naa, boe ma ana kokolak nae, “Mauan seli soa-neu hatahori fo mana naꞌa sama-sama nai Manetualain uma mane ina-huun!”
LUK 14:16 Yesus naselu mbalin nae, “Au tui talo ia: hambu hatahori esa tao feta moꞌok. Boe ma ana noke hatahori noꞌun seli.
LUK 14:17 Neu ara sadia rala feta ena, ana nadenu ndia hatahori neondan fo neu nanggou basa hatahori neni nokek kara nae, ‘Mai, te feta sangga mulai ena.’
LUK 14:18 Tehuu basa sara tui sira kai-baan mata-matak kara, mita fo ara hae mai. Esa nafada ndia kai-baan nae, ‘Awii! Au bei fo hasa ala osi esa, de muste uu mete sudik kana dei. Boso mamanasa, ee! Au ta bisa neti.’
LUK 14:19 Hambu esa bali fee ndia kai-baan nae, ‘Au bei fo hasa ala sapi luku pasan lima. Au ae uu soba sudik kasa, de oke ambon, ee!’
LUK 14:20 Laen bali nae, ‘Au bei fo kabin, de ta bisa.’
LUK 14:21 Boe ma hatahori neondak naa fali, de nafada ndia malanggan. Malanggan namanene nala naa, boe ma ana namanasa nalan seli. De ana parenda ndia hatahori neondan naa nae, ‘Mete ma talo naa, o kalua lai-laik leo! Muni basa okofook ma dala kabik lalaꞌen nai kota ia fo moke mua hatahori kasian, hatahori dokak, hatahori pokek, ma hatahori kekok kara.’
LUK 14:22 Hatahori neondak naa namanene talo naa, boe ma neu noke basa hatahorir raa. Ana fali de nafada nae, ‘Papa! Basa sara mai ena, tehuu mamana rouk bei noꞌuk ka.’
LUK 14:23 Boe ma malanggan naa nae, ‘Mete ma talo naa, na, muu seluk bali muni basa nggorok marai kota deak, losa basa osir lalaꞌen. Kokoe neu see a mesan fo mia sara mai, sadi tao masofe mamana feta ia.
LUK 14:24 Nenene, ee! Hatahorir fo mana timba heni au nonokeng ia, ara ta rameda rita feta ia lole-ladan faa boe na!’ ”
LUK 14:25 Basa naa, Yesus asa laꞌo rakandoo reni Yerusalem reu. Hatahori noꞌuk ka tunggan. Boe ma Ana nasare sara, de kokolak nae,
LUK 14:26 “Hatahori mana nau tungga Au tebe-tebe, ana muste sue-lai Au lena heni basa-basan: lena heni ina-aman, lena heni sao-anan, lena heni kaꞌa-fadin, lenak bali lena heni ao heli-helin. Mete ma taa, na, hatahori naa ta nandaa dadi neu Au ana nuning.
LUK 14:27 Hatahori fo ta mana nau lemba-nasaa doidosok nahuu ana tungga Au, ana ta nandaa dadi neu Au hatahoring. Hatahori fo mana nau dadi neu Au hatahoring, leo mae hatahorir tao risan oo, tehuu ana lemba-nasaa nakandoo ndia doidoson boe.
LUK 14:28 Dadi mete ma nau tungga Au, na, timba-tai matalolole dei. Haꞌi netuduk leo hatahori fo mana nae nambaririik uma katatadak. Ana muste reke natalolole doik dedesin no lutuk. Boso losak doik ta dai.
LUK 14:29 Mete ma ta reke no lutuk, fama te ana dei fo tao uma fanderen, te basa doik ena. Boe ma hatahorir hika rakamamaek kana
LUK 14:30 rae, ‘Ei mete sudik hatahori naa dei! Ana bei fo tao fanderen, tehuu bei ta hata-hata, te basa doik ena.’
LUK 14:31 Haꞌi netuduk laen ndia dedeꞌa netatik. Manek fo mana nae natati muste nanggatuuk fo timba-tai nakahuluk no ndia nonoon nara dei. Mete ma soldadun nara kada hatahori rifun salahunu, na, ana bisa laban musu hatahori rifun dua hulu, do taa?
LUK 14:32 Mete ma timba-tai basa ena, tehuu mateꞌen ma ana ta senggi netatik, na, malole lenak neu musu bei nai dook, ana nadenu memak nedenuk, fo raote kada mole-dame leo.
LUK 14:33 Leo naak oo, neu hatahori mana nae tungga Au boe. Ana muste timba-tai neu-mai nae, ana nahani a memak ena fo laꞌo ela basa-basan, do taa? Mete ma taa, na, hatahori naa ta nandaa dadi neu Au ana nuning.”
LUK 14:34 Yesus tuti kokolan no netuduk laen bali nae, “Masik naa, neulauk. Ita paken fo tao nalada nanaꞌak. Tehuu mete ma masin ta ena, na, sosoan hata bali? Ta bisa paken fo tao malada nanaꞌak kara bali. Paken fo fufuꞌa neu sele-tandek kara oo, ta bisa boe. Ita nggari henin leo. Dadi ei oo muste sama leo masik boe, fo leo-laꞌo no susue-lalaik mia basa hatahorir. See ka ndiꞌi dook, na, nenene matalolole, ee!”
LUK 15:1 Faik naa, hatahori mana susu bea ma hatahori papake taak laen nara reni Yesus reu taa-taa fo rae nenenen. Tehuu hatahori Yahudi tao sara leo, hatahori ta neulauk kara.
LUK 15:2 Hatahori Farisir ma meser anggama Yahudir mete-rita naa, boe ma ara unggu-remu rae, “Ciih! Hatahori ia, nakabua no hatahori papake taak kara. Lenak bali Ana nanggatuuk naꞌa-ninu no sara!”
LUK 15:3 Yesus namanene nala naa, boe ma Ana tui sara lololek ia nae,
LUK 15:4 “Leo numa ei mai hambu hatahori esa naena bibi lombo natun esa. Boe ma mopo esa. Hatematak ia ana muste tao hata? Neu ko ana laꞌo ela bibi lombo kasio hulu siok kara neu mamana linok, boe ma neu sangga bibi lombo kala mopok naa losa hambu falik kana.
LUK 15:5 Mete ma ana hambu falik bibi lombo naa ena, na, ana luꞌa neni falik kana no nemehokok.
LUK 15:6 Losa uma, ana noke nonoon nara, de nafada nae, ‘Ei mai fo mamahoko mia au dei! Huu au hambu falik au bibi lombong kala mopok naa ena.’
LUK 15:7 Nai nusa tetuk do inggu temak oo leo naak boe. Mete ma hambu hatahori masala-singgok esa sale dalen do tuke tein, boe ma fali neni Manetualain neu, basa nusa tetuk do inggu temak isin ramahoko. Ara ramahoko lenak bali, nahuu hatahori kisek ia fali neni Manetualain neu, lena heni nemehokok huu hatahori sio hulu sio leo-laꞌon nara ndoos ma ta laꞌo sala dalan nara.”
LUK 15:8 Boe ma Yesus tui lololek laen bali nae, “Hambu inak esa naena doi lilo fulak salahunu. Naa te, mopo esa. Hatematak ia ana nae tao hata? Neu ko ana dede lambu, de neu loti nai basa mamanak, ma sasapu uma naa losa buꞌun nara fo sangga natalolole doik naa.
LUK 15:9 Neu ana mete-nita falik doik naa, boe ma nanggou hatahori marai uma kotia-tain nara, de nafada nae, ‘Wee! Mai fo mamahoko sama-sama mia au dei! Huu au hambu falik doik kala mopok naa ena!’
LUK 15:10 Nai nusa tetuk do inggu temak oo leo naak boe. Mete ma hambu hatahori kasala-singgok esa sale dalen do tuke tein, boe ma fali neni Manetualain neu, neu ko basa ata marai nusa tetuk do inggu temak ramahoko ralan seli.”
LUK 15:11 Basa de Yesus tuti seluk ndia tutuin no lololek laen bali nae, “Hambu amak esa no ana toun dua.
LUK 15:12 Laꞌe esa, kana muri anak nafada aman nae, ‘Papa! Fee au babaꞌe pusakang hatematak ia leo!’ Boe ma aman baꞌe hata-hetor raa neu anan dua sara.
LUK 15:13 Ta dook ka boe ma, kana muri anak seꞌo heni ndia babaꞌen. Boe ma ana mbomboti nala bua-loꞌan nara, de laꞌo neni nusa dook ka neu. Numa naa, ana ngganggari heni tali-doin nara no setelelek.
LUK 15:14 Neu faik fo basa doin nara, boe ma ndoe-laꞌas ta hohoꞌak daka nala nusak naa, losa ana oo toꞌa taa nalan seli boe.
LUK 15:15 Boe ma ana neu sangga ue-osa. Hambu hatahori esa numa nusak naa simbok kana, de nadenun hani bafir.
LUK 15:16 Huu ana ta nakatataka nala poꞌo ndoen ena, de ana hihiik ka naꞌa bafir nanaꞌan. Tehuu ta hambu hatahori esa boe na fo nau feen naꞌa-ninu.
LUK 15:17 Doo-doo boe ma ana mulai duꞌa neu-mai nae, ‘Nai au amang uman, basa hatahori mana maue-osar hambu nanaꞌa-nininuk losa rakabete. Naa te au nai ia ae mate, huu ndoes ena.
LUK 15:18 Malole lenak au fali uni au amang uu. Boe ma au afadan ae, “Papa! Au tao sala moꞌok mbali Manetualain ma papa ena.
LUK 15:19 Au ta andaa dadi uu papa anan bali ena. Leo mae papa simbok au dadi kada ata-dato nai papa uman oo malole boe!’ ”
LUK 15:20 Ana duꞌa basa talo naa, boe ma nambadeik de fali neni aman uman neu. Bei nai dook ka te tou lasik mete-nitan ena, boe ma dalen tuda kasian neun. Ana konda numa uman mai, de nalaik neu soru anan mana falik naa ena. Boe ma tou lasik holu nalan, de idun.
LUK 15:21 Kanak naa kokolak no aman nae, ‘Papa! Au tao sala moꞌok mbali Manetualain ma papa ena. Au ta andaa dadi uu papa anan bali ena.’
LUK 15:22 Tehuu aman parenda tutik ka hatahori mana maue-osan nara nae, ‘Woi! Lai-lai, ee! Miu haꞌi mala badu fo lolen lenak fo feen pake. Olu ndeli neu lima kukun ma sopatu neu ein.
LUK 15:23 Miu leꞌa mala sapi maꞌao naa fo halan, te ita tae tao feta nemehokok.
LUK 15:24 Huu au anang ia, nok bali maten ena, tehuu hatematak ia ana nasoda fali ena. Mopon, tehuu hatematak ia au hambu falik kana ena.’ Kokolak basa talo naa, boe ma ara mulai feta ramahoko.
LUK 15:25 Faik naa, ana uluk ta nai uma, te naue-osa nai osi dale. Neu ana fali, bei nai dook ka te namanene hatahorir rakaminak bua kaliik ma mete-nita ara foti-lendo.
LUK 15:26 Boe ma nanggou nala hatahori mana maue-osa esa, de natanen nae, ‘Woi! Tao setelelek hata ia?’
LUK 15:27 Hatahori mana maue-osa naa naselu nae, ‘Malanggan fadin fali mai ngga ena. De papa nadenu hala sapi fo tao feta moꞌok, huu anan fali no sodak ena.’
LUK 15:28 Ana uluk namanene talo naa, boe ma ana namanasa. Ana ta nau maso uma dale neu ena. Boe ma aman mai kokoen fo maso dale neu.
LUK 15:29 Tehuu ana luri nae, ‘Papa! Duꞌa sudik kana dei! Doo-doo basa ia, au aue-osa fafandek lima-eing nggara nok bali ata-dato ia fee papa. Au ta lena-langga papa hihii-nanaun. Leo mae talo naa oo bei ta laꞌe esa boe na, papa fee nita bibi hie ana esa fo au tao feta nemehokok sama-sama ua au nonoong nggara boe.
LUK 15:30 Naa te papa anan fo mana ngganggari doik ia, neu nakaminak inak kara tao nabasa papa doin. Hatematak ia ana fali mai ngga, boe ma papa tati sapi neulaun lenak fo tao feta-dote moꞌok soa-neun.’
LUK 15:31 Tehuu aman naselu nae, ‘Au ana susueng, nggee! Nenene besa-besa dei! Doo basa ia, o leo mua papa. Basa hata fo papa enan basa naar lalaꞌen, o enam boe.
LUK 15:32 Tehuu hatematak ia ita muste feta no nemehokok, nahuu o fadim kisek ia. Fai bakahulun sama leo maten ena, tehuu hatematak ia ana nasoda fali ena. Mopon, tehuu hatematak ia hambu falik kana ena.’ ”
LUK 16:1 Boe ma Yesus tui seluk lololek esa bali soa-neu ana nunin nara nae, “Hambu hatahori kamasuꞌik esa, soꞌuk nala hatahori esa dadi neu malangga mana koladu. Tehuu doo-doo ma hatahori kamasuꞌik naa namanene dedeꞌa anik nae, malanggan mana koladuk naa, mulai panake tao narunggin.
LUK 16:2 De ana noke nala malangga mana koladuk naa fo nafadan nae, ‘O talo bee ia? Au amanene o panake au hata-hetong nggara. Hatematak ia o surak ue-osam mbembeda-ngganggaon fo au parisan dei. Huu basa naa, au ae fee o hahae leo.’
LUK 16:3 Malangga mana koladuk naa namanene nala naa, boe ma ana duꞌa neu-mai nae, ‘Au soe ia ena, ma! Hatematak ia au ae tao hata? Doꞌi-dadaꞌu dae oo au ta abeꞌi boe. Dadi mana hule-kaik oo au mae boe.
LUK 16:4 Mete ma au ta bisa aue-osa nai ia ena, na, au muste sangga dalak, mita fo hatahori laen nara bei nau tulun simbok au.’
LUK 16:5 Huu naa de ana noke nala basa hatahorir fo mana rahuta mbali ndia malanggan fo hatahori kamasuꞌik naa. Ana natane hatahori kaesan nae, ‘Wee! O mahuta baꞌu hata neu au malanggang?’
LUK 16:6 Hatahori naa naselu nae, ‘Au ahuta mina setun liter 4.000.’ Boe ma malangga mana koladuk naa nae, ‘Tebe. O susura hutam, ndia ia. Hatematak ia sii henin leo, basa naa manggatuuk fo surak susura beuk mae, o hutam kada liter 2.000.’
LUK 16:7 Boe ma ana neu natane hatahori kaduan nae, ‘O bali, na, mahuta baꞌu hata?’ Ana naselu nae, ‘Au ahuta hade karon 1.000.’ Malangga mana koladuk naa nafada nae, ‘Sii heni o susura huta raam naa, basa, na, surak beuk mae, kada karon 800.’
LUK 16:8 Ana tao talo naa, losa hatahori kamasuꞌik naa bubuluk nala duduꞌa-aꞌafi mana kokoliꞌun. De hatahori kamasuꞌik naa muste manaku nae, malangga mana koladu manggarauk naa, memak kokoliꞌun seli. Au afada lololek ia fo ei bubuluk mae, mete ma nekesasamak kana no hatahori kamaherek, na, hatahori ta kamaherek kara memak leo-laꞌo ro kokoliꞌun lenak rai rau-inggur taladan hatematak ia.
LUK 16:9 Dadi ei duꞌa sudik kana dei. Leo mae hatahori dae-bafok soa tao manggenggeok pake sira hata-heton, tehuu malole lenak ei pake hata-heto dae-bafok fo tulu-fali hatahorir. No dalak naa, ei oo hambu nonook noꞌuk ka boe. Leo mae hata-hetor raa basa sara, tehuu neu ko Manetualain sadia mamanak fee ei nai nusa tetuk do inggu temak.
LUK 16:10 Mete ma hatahori nadale ndoos no dedeꞌa kadiꞌi anak kara, neu ko nadale ndoos no dedeꞌa moꞌok kara boe. Tehuu mete ma hatahori panake no dedeꞌa kadiꞌi anak kara, neu ko ana oo panake no dedeꞌa moꞌok kara boe.
LUK 16:11 Mete ma hatahori ta bisa namahere ei fo koladu hata-heto biasa no dedeꞌa kadiꞌi anak kara nai dae-bafok ia, talo bee fo Manetualain namahere ei soa-neu dedeꞌa moꞌok kara?
LUK 16:12 Mete ma ei ta bisa koladu hatahori laen hata-heton, na, see nambarani fee hata-heton neu ei?
LUK 16:13 Hatahori neondak esa ta bisa nenene malanggan dua. Neu ko dalen mburuk mbali esa ma ana sue esa. Do, dalen mahanik neu esa, ma ana ta tao matak neu esa. Leo naak oo soa-neu ei boe, nahuu hatahori ta bisa sue-lai Manetualain sama-sama no tali-doik.”
LUK 16:14 Faik naa, hambu hatahori Farisir ketuk tungga ramanene Yesus kokolan bebeik kara ia. Boe ma ara rakamamaek kana, nahuu ara dale hedi doik.
LUK 16:15 Tehuu Yesus naselu sara nae, “Heeh! Leo mae ei tao malao aom mara rai hatahori matan, tehuu Manetualain bubuluk ei dalem mara raa, manggarauk. Hambu matak noꞌuk ka fo hatahori dae-bafok rakadedemak kasa, naa te Manetualain taon neu dedeꞌa manggarauk, ma Ana nunute sara.
LUK 16:16 Losa Yohanis Mana Saranik mamain, ita hatahori Yahudir leo-laꞌo tungga baꞌi Musa ma Manetualain mana toꞌu dedeꞌan nara hohoro-lalanen. Tehuu hatematak ia, Manetualain Hara Lii Malolen natanggela losa bee a mesan ena. Hatahori noꞌuk ka raote tebe-tebe, mita fo ara bisa leo-laꞌo tungga Manetualain hihii-nanaun.
LUK 16:17 Leo mae lalai no dae-inak sambu do lalo, tehuu Manetualain hohoro-lalanen baꞌu anak oo ta mopo sana boe! Titik esa oo ta mopo sana boe!
LUK 16:18 Hatahori fo mana namaketu no sao inan, de ana sao seluk no inak laen, na, ana hohongge-lelena naa. Ma hatahori fo mana sao nala inak bee fo saon elan ena, na, ana oo hohongge-lelena boe.”
LUK 16:19 Yesus tui tamba nae, “Hambu hatahori kamasuꞌik esa. Ana soa pake bua-loꞌa neulauk kara, fo tao sara numa tema bangganaꞌuk mabelir mai. Hatu-leledon nanggatuuk naꞌa-ninu malada-malada ma soa setelelek.
LUK 16:20 Numa naa oo, hambu hatahori hata taak mana ndoe-laꞌak esa boe. Naden Lasarus. Ao-inan sofek no bisu mburuk. Tungga faik, nonoon nara roon fo taon neu hatahori kamasuꞌik naa uma lelesu bafan.
LUK 16:21 Ana hihiik ka hambu nanaꞌak numa hatahori kamasuꞌik naa nanaꞌa sisan nara mai, tehuu ana ta hambu hata-hata. Kada busar mai lalambe ndia bisu nanan.
LUK 16:22 Basa boe ma Lasarus maten. Boe ma Manetualain atan nara ruma nusa tetuk do inggu temak mai koꞌo roon, de reu ranggatutuuk kana neu baꞌi Abraham boboan. Ta dook ka boe ma hatahori kamasuꞌik naa oo maten boe, de hatahorir ratoin.
LUK 16:23 Tehuu ana ta maso nusa tetuk do inggu temak. Ana maso neni aꞌi mbila ta kala matek neu, sama-sama no hatahori mates noꞌuk ka. Nai naa, ana hambu malendu-mataꞌak ma doidosok nakandoo. Laꞌe esa, ana botik matan boe ma mete-nita Lasarus nanggatuuk no nemehokok nai baꞌi Abraham boboan.
LUK 16:24 Boe ma ana eki nae, ‘Baꞌi Abraham, ee! Kasian neu au dei! Madenu Lasarus, boro lima kukun neu oe, fo mai deta makoe kada au maang suꞌun oo malole boe. Huu au doidoso ae mate nai aꞌi mbila ta kala matek ia!’
LUK 16:25 Boe ma Abraham naselu nae, ‘Ana nggee! Masaneda matalolole, dei! Fai maneuk kara fo bei nai dae-bafok, o hambu mala basa neulauk lalaꞌen. Tehuu Lasarus hambu kada susa-sonak. Dadi hatematak ia Manetualain kokoe-nanasin nai ia, ma o doidoso.
LUK 16:26 Lenak bali, numa o mua ai mai, Manetualain tao nala mbia demak. De hatahori manai ia ta bisa naa neti, ma hatahori manai naa, ta bisa ia mai.’
LUK 16:27 Tehuu hatahori kamasuꞌik naa noke nae, ‘Mete ma talo naa, na, baꞌi tulun madenu Lasarus neni au amang uman neu dei.
LUK 16:28 Huu au bei aena fadi touk lima rai naa. Madenu Lasarus fee nesenedak neu sara, fo fali reni Manetualain reu leo. Mita fo ara mate, na, ta maso reni mamana doidosok ia mai.’
LUK 16:29 Tehuu Abraham naselu nae, ‘Manetualain fee sara baꞌi Musa no mana toꞌu dedeꞌak kara susuran ena. O fadim mara bisa lees laꞌi-laꞌik kana, fo ara bubuluk Manetualain hihii-nanaun.’
LUK 16:30 Tehuu hatahori kamasuꞌik naa nareresi nae, ‘Baꞌi Abraham, ee! Naa, bei ta dai. Ara ta nau tao matak mbali Manetualain Dedeꞌa-kokolan! Muste hambu hatahori mates kalua numa rates mai fo neu nafada sara, dei fo ara sale dalen do tuke tein, boe ma nau ramanene.’
LUK 16:31 Tehuu Abraham naselu nae, ‘Mete ma ara ta nau nenene baꞌi Musa no Manetualain mana toꞌu dedeꞌan nara dedeꞌa-kokolan, na, leo mae hatahori mates kalua numa rates mai fo neu kokolak no sara oo, neu ko ara ta nau nenene boe.’ ”
LUK 17:1 Yesus nafada ana nunin nara nae, “Laꞌe noꞌuk ka hambu hatahori tuda neni salak dale neu, nahuu hatahori laen edo-poden. Tehuu hatahori mana edo-podek naa, ndia mana hambu sosoek lenak.
LUK 17:2 Mete ma hatahori edo-pode losa hambu kakana ana esa ta namahere neu Au, neu ko Manetualain fee hukun berak neun. Malole lenak fuli batu moꞌok esa neu hatahori naa boliin, fo nggarin neni tasi demak dale neu.
LUK 17:3 Dadi manea aom mara matalolole fo ei oo boso makatutudak hatahori neni salak dale neu boe! Mete ma o toranoom tao salak, na, kaꞌi-ore neun. Mete ma ana sale dalen do tuke tein, de ana mai noke ambon, na, lilii heni ndia salan naa leo.
LUK 17:4 Mete ma o toranoom tao salak laꞌe hitu nai faik esa dale, boe ma ana sale dalen do tuke tein, de ana mai laꞌe hitu noke ambon, na, o muste lilii heni salan laꞌe hitu boe.”
LUK 17:5 Faik esa, Yesus ana nunin nara mai rasaren, de roke rae, “Papa Meser! Ai nemeheheren ta matea. Tulun tao tamba matea ai nemeheheren dei.”
LUK 17:6 Boe ma Yesus naselu nae, “Mete ma ei mamahere neu Manetualain koasan, leo mae kada kadiꞌi anak ka oo, ei bisa parenda ai huu moꞌok boe mae, ‘Neni feꞌak leo, fo lali neni tasi dale neu!’ Neu ko ai huuk naa tungga memak ei parendam.”
LUK 17:7 Basa de Yesus kokolak bali nae, “Haꞌi netuduk. Hambu ata-dato dadaꞌu dae nai osi, do nanea bibi lombo nai mook. Ata-dato naa tao basa ue-osan boe ma fali uma neu. Neu ko ta bisa dadi malanggan kokolak noon nae, ‘Mai fo ita dua ngga tanggatuuk taꞌa sama-sama leo!’
LUK 17:8 Taa! Tungga netemek naa ndia malanggan parendan nae, ‘Muu sadia mei fee au dei. Basa dei fo o muu muꞌa-minu nai seku dea naa.’
LUK 17:9 Mete ma ata-dato naa tao tungga ndia malanggan hihiin ena, ei duꞌa mae, ana noke makasi neun, do? Taa!
LUK 17:10 Ei oo leo naak boe. Mete ma ei maue-osa basa hata fo Manetualain parendak ena, na, ei kokolak mae, ‘Ai kada hatahori neondak, fo ta nandaa simbo hata-hata. Ai ta sangga kokoak. Ai kada makalalaꞌok ues a mesan.’ ”
LUK 17:11 Neu Yesus asa laꞌok reni Yerusalem reu, ara losa profensi Galilea ma profensi Samaria dae toon.
LUK 17:12 Neu ara rae maso reni nggorok esa numa naa reu, hambu hatahori hedi kusta salahunu mai, fo rae ratonggo ro Yesus. Ara rambariik rai dook ka.
LUK 17:13 Boe ma ara eki randaa rae, “Yesus! Lamatuak! Kasian neu ai dei!”
LUK 17:14 Neu Yesus mete-nita sara, boe ma Ana nadenu nae, “Ei miu matudu ao-inam mara neu malangga anggamar dei, mita fo ara parisa rae, ei hedi kustam mopon ena, do beik.” Ara ramanene rala naa, boe ma reu. Tehuu neu ara bei laꞌok numa dalak, medak neu ma basa sara hai memak.
LUK 17:15 Ara laꞌok rakandoo no nemehokok. Tehuu hambu esa fali neni Yesus neu. Ana eki nae, “Koa-kio Manetualain! Au hai ena!”
LUK 17:16 Boe ma ana sendek luu-langgan, de noke makasi noꞌun seli neu Yesus. (Naa te ndia ia, ta hatahori Yahudi. Ndia hatahori Samaria fo mana radedeꞌa rakandoo ro hatahori Yahudir.)
LUK 17:17 Boe ma Yesus natane hatahorir fo mana tunggan nae, “Talo bee ia? Bebeik kara Au tao ahai hatahori salahunu, hetu? Kasiok kara rai bee?
LUK 17:18 Tao hata de kada hatahori feꞌek ia fali mai noke makasi neu Manetualain, ma soꞌuk koa-kiok neun?”
LUK 17:19 Boe ma Ana nafada hatahori naa nae, “O hai ena, nahuu o mamahere tebe-tebe neu Au. Dadi mambadeik fo fali muu ngga no sodak leo!”
LUK 17:20 Faik esa, hambu hatahori Farisir ketuk mai ratane Yesus rae, “Papa Meser! Mafada sudik dei! Faik bee Manetualain mulai nakalalaꞌok Ndia parenda-koasan?” Boe ma Yesus naselu nae, “Talo ia! Boso duꞌa mae Manetualain nakalalaꞌok parenda-koasan nai dae-bafok ia, no tanda mata-matak kara fo hatahorir bisa parisa ro mata deꞌen nara. Hatahorir ta hambu bukti rae, ‘Mete sudik nai ia! Te Manetualain nakalalaꞌok parenda-koasan nai ia!’, do ‘Nai naa!’ Taa! Huu Ana nakalalaꞌok parenda-koasan nai ei taladam ma nai hatahorir dalen.”
LUK 17:22 Basa de Yesus nafada ana nunin nara nae, “Ta dook ka te Au Hatahori Dae-bafo Isi-isik ia, ta sama-sama ua ei ena. Neu ko nai fai susa-sonak kara, ei dalem mara hii mete-mita Au fafaling. Tehuu Au bei ta fali.
LUK 17:23 Mete ma hatahorir mai rafada rae, ‘Karistus nai ia!’ do, ‘Karistus nai naa!’ na, ei boso mamue-osak sangga miu-mai, huu sira kokolan nara raa, pepeko-lelekok.
LUK 17:24 Huu mete ma tebe-tebe Hatahori Dae-bafo Isi-isik fali mai, neu ko tandan nara manggaledo ndoos, sama leo ndelas nanggahadok tao nala lalai dadi manggaledok numa suꞌun seri mai losa suꞌun seri.
LUK 17:25 Tehuu Ana oo muste lemba-nasaa doidoso mata-matak kara dei boe. Ma hatahori dae-bafok tanak ia, ta nau nenenen ma rae timba henin.
LUK 17:26 Neu Ana nae fali mai, neu ko hatahori leo-laꞌo no kada manggarauk leo biasa, sama leo numa Noh tembo-lelen.
LUK 17:27 Faik naa, ara raꞌa-rinu, tao feta kabin, losa faik fo Noh maso neni ofak dale neu. Tehuu hatahorir raa oo ta nau nenene boe. Medak neu ma faa moꞌok mai, de nakalulutu basa sara.
LUK 17:28 Naa oo, sama leo hatahorir fo mana leo-laꞌo no manggarauk numa Lot tembo-lelen boe. Faik naa, ara raꞌa-rinu, raseꞌo banda hasa, tao osi-lutur, rambaririik uma, ma leo-laꞌo biasa no kada manggarauk.
LUK 17:29 Tehuu hatahorir raa oo ta nau nenene boe. Basa de huhuan naa, neu Lot nalai laꞌo ela kota Sodom, medak neu ma uda aꞌik no balerang tuda numa lalai mai, de naꞌa heni basa sara.
LUK 17:30 Dadi ei besa-besa, ee! Boso losak, mete ma Hatahori Dae-bafo Isi-isik nae fali mai, hatahorir leo-laꞌo no kada biasa-biasa a mesan. Tehuu medak neu ma Ana toda mai.
LUK 17:31 Faik naa, hatahori see fo nai uma pandopon, na, boso bei maso uma dale neu nafafaꞌu bali. Hatahori mana maue-osa nai osi dale, boso fali uma neu haꞌi bua-loꞌa bali.
LUK 17:32 Masaneda mandadik hata neu Lot saon lele uluk. Ana mate, nahuu nasaneda hata-heto marai uma.
LUK 17:33 Hatahori fo ta mana nau tungga Au, nahuu ana sue ao-ina heli-helin, neu ko masodan sosoan taa. Tehuu hatahori fo mana nau tungga Au, losa ana loo lima masodan, nahuu sue-lai Au, neu ko hambu masoi-masodak, ma leo-laꞌo nakandoo no Manetualain.
LUK 17:34 Au afada memak! Neu Hatahori Dae-bafo Isi-isik fali mai, mete ma hambu hatahori dua sunggu nai mamana susungguk esa, medak neu ma Lamatuak soꞌuk nala esa, ma ela esa.
LUK 17:35 Mete ma hambu inak dua mbau hade sama-sama, neu ko Lamatuak soꞌuk nala esa, ma laꞌo ela laen.
LUK 17:36 [Mete ma hambu hatahori dua raue-osa sama-sama numa osi dale, neu ko Lamatuak soꞌuk nala esa, ma laꞌo ela laen.]”
LUK 17:37 Yesus ana nunin nara ramanene rala naa, boe ma ratanen rae, “Papa Meser! Mete te basa naar dadi nai bee?” Boe ma Yesus tee dedeꞌak nae, “Talo ia. Mete ma ei mete-mita mbui manaꞌa nenetuk lambu rakabua rai bee, na, ei bubuluk ena, naa dadi tanda rae, neu ko ara raꞌa nenetuk nai mamanak naa.” [No sosoa-ndandaan nefunik nae, mete ma Karistus fali mai, neu ko tandan manggaledo ndoos, soa-neu hatahori mana bisa lees.]
LUK 18:1 Laꞌe esa, Yesus nanori ana nunin nara pake lololek fo ara hule-haradoi ta ramaketu, ma ta monda-maꞌa. Ara muste ramahere rakandoo neu Manetualain.
LUK 18:2 Tutuin talo ia: “Numa kota esa, hambu mana maketu-maladi dedeꞌak esa fo ta mana tao matak neu Manetualain. Ana ta hosek hatahori esa boe na.
LUK 18:3 Numa naa oo, hambu ina falu esa boe, ana mai taa-taa neni mana maketu-maladi dedeꞌak naa neu fo noke nae, ‘Papa mana maketu-maladi dedeꞌak! Maketu au dedeꞌang no ndoos dei, ee!’
LUK 18:4 Sososan, mana maketu-maladi dedeꞌak naa ta hosek neu ina falu naa. Tehuu doo-doo boe ma ana mbera nenene neun. De ana duduꞌa nae, ‘Memak au ia ta tao matak neu Manetualain, hata-bali neu hatahori dae-bafok.
LUK 18:5 Tehuu ina falu ia tao nala au langgan nabako. Huu naa de malole lenak au aketu dedeꞌan tungga dalan dei. Mete ma taa, na, neu ko ana kada mai taa-taa tao nakamamangguk au.’
LUK 18:6 Ei duꞌa sudik mana maketu-maladi dedeꞌak manggarauk naa kokolan.
LUK 18:7 Tehuu doo-doo boe ma ana tulu-fali ina falu naa ena, na, neu ko Manetualain oo nau tulu-fali Ndia hatahorin mana hule-haradoi hatu-leledon boe, fo roke tutulu-fafalik neun. Tehuu Manetualain ta mana keko-lali fai.
LUK 18:8 Ana koladu sira dedeꞌan no lai-laik. Au ae atane talo ia: neu Au Hatahori Dae-bafo Isi-isik ia, fali mai ena, na, Au bei atonggo ua hatahori kamaherek kara rai dae-inak ia, do taa?”
LUK 18:9 Yesus tui tamba lololek esa laꞌe-neu hatahori mana makadedema aok, ma mana hii nakadadaek hatahori laen. Ana tui nae,
LUK 18:10 “Hambu touk dua reu hule-haradoi numa Uma Huhule-haradoi Ina-huuk. Hatahori esa numa partei anggama Farisi mai, ma esa bali, mana susu bea. [Hatahori Yahudir tao hatahori Farisir raa, nok bali hatahori malalaok. Tehuu ara tao hatahori mana susu bear raa, nok bali hatahori ta neulauk.]
LUK 18:11 Losa uma huhule-haradoik, boe ma hatahori Farisi naa nambariik mesa kana de hule-haradoi nae, ‘Makasi Manetualain, huu au ia hatahori neulauk. Au ta manggarauk leo hatahori laen nara. Au ta mana amanaꞌo. Au ta mana bare-naꞌo. Au ta mana laok sala ua hatahori saon. Makasi Manetualain, huu au ta manggarauk sama leo mana susu bea ia.
LUK 18:12 Au manggate puasa, nai menggu esa laꞌe dua. Ma au soa fee babaꞌek esa numa salahunu mai numa basa hata fo au hambuk.’ Hatahori Farisi naa, hule-haradoi talo naa.
LUK 18:13 Tehuu mana susu bea naa, nambariik neu dook ka nai seku dea, Ana ta nambarani botik matan mbali lalai neu. Ana hule-haradoi no kada nateꞌe langgan ma dalen makalulutuk nae, ‘Manetualain, ee! Sue-lai neu au, hatahori makilu-masalak ia! Fee ambon neu au!’
LUK 18:14 Neu hatahori kaduak kara raa fali reni uman nara reu, nai rarain see ndia malole no Manetualain? Hatahori Farisi mana koa aok naa, do, mana susu bea naa? Neu ko Ana simbok no malole hatahori mana susu bea dale nekeloloe aok naa. Tehuu Ana ta hosek hatahori Farisi naa. Huu Manetualain nakatutudak hatahori mana koa aok, tehuu Ana soꞌu botik hatahori mana nakaloloe aok.”
LUK 18:15 Laꞌe esa, hatahori koꞌo roo sira anan nara reni Yesus reu, mita fo Ana ndae liman ma kokolak fee babaꞌe-babatik neu sara. Yesus ana nunin nara mete-rita naa, boe ma ara rahara berak reu hatahorir raa.
LUK 18:16 Tehuu Yesus simbok nala kakana ana mana maik kara raa. Boe ma Ana nahara berak ana nunin nara nae, “Ela kakana anar raa reni Au mai. Boso mamanggenggee sara. Masaneda matalolole! Huu hatahori fo mana nau dadi neu Manetualain hatahorin, ana muste tai-namahena neu Manetualain, sama leo kakana anar tai-ramahena reu sira inan ma aman.”
LUK 18:18 Laꞌe esa, hambu hatahori Yahudi hatahori moꞌo-inahuun esa mai natane Yesus nae, “Papa Meser mana hambu hada-horomatak! Au muste tao talo bee, mita fo au bubuluk no tetuk ae, au bisa maso nusa tetuk do inggu temak fo asoda akandoo ua Manetualain?”
LUK 18:19 Boe ma Yesus naselu nae, “Tao hata de o moke Au mae, ‘mana hambu hada-horomatak?’ Kada esak ka fo mana hambu hada-horomatak, ndia Manetualain mesa kana.
LUK 18:20 O bubuluk ena, hetu, Manetualain hohoro-lalanen numa lele uluk mai nae: Boso hohongge-lelena; Boso makanisa hatahori; Boso mamanaꞌo; Boso sakasii pepeko-leleko; ma fee hada-horomatak neu o inam ma o amam.”
LUK 18:21 Hatahori naa naselu nae, “Tebe, Papa! Au tungga hohoro-lalanek kara raa mulai numa au bei kadiꞌik ka mai.”
LUK 18:22 Yesus namanene nala naa, boe ma Ana nae, “Malole! Tehuu o bei kuran matak esa. Huu naa de hatematak ia fali muu ngga fo seꞌo heni basa o hata-hetom lalaꞌen. Basa naa, muu babaꞌe doin nara fee hatahori mana toꞌa taak kara. Basa dei fo fali mai fo tungga Au. Huu neu ko Manetualain bala fee o hata-heto nai nusa tetuk do inggu temak.”
LUK 18:23 Hatahori naa namanene nala naa, boe ma dalen sona, nahuu suꞌin noꞌun seli.
LUK 18:24 Yesus mete-nita ana laꞌok no dale makalulutun, boe ma Ana nafada ana nunin nara nae, “Hatahori kamasuꞌik memak susa laꞌe esak kana maso neni nusa tetuk do inggu temak neu.
LUK 18:25 Ita takasasamak kana no matak laen. Memak banda onta moꞌok ta bisa maso lalaen neu nesik ndandauk bolon. Leo naak oo soa-neu hatahori fo mana namahena neu kada ndia hata-heton, tehuu ta namahena neu Manetualain, ta bisa dadi ana maso nusa tetuk do inggu temak boe.”
LUK 18:26 Hatahorir mana ramanene Yesus kokolan talo naa, ratanen rae, “Mete ma memak susa leo naak soa-neu hatahori kamasuꞌik, na, hatahori matak bee ndia bisa hambu masoi-masodak?”
LUK 18:27 Yesus naselu nae, “Memak soa-neu hatahori dae-bafok, matak noꞌuk ka ta bisa dadi. Tehuu soa-neu Manetualain, basa-basan bisa dadi.”
LUK 18:28 Boe ma Petrus tuti kokolan nae, “Papa! Ai laꞌo ela basa ai hata-heton lalaꞌen ena, fo tungga Papa. Tehuu neu ko ai hambu hata?”
LUK 18:29 Yesus naselu nae, “Peꞌu! Nenene matalolole, ee! Hatahori fo mana laꞌo ela uman, sao inan, kaꞌa-fadin, ina-aman, do anan nara, nahuu ana nakalalaꞌok ues numa Manetualain mai,
LUK 18:30 neu ko ana simbo falik lenak noꞌuk ka nai dae-bafok ia. Ma neu dae-bafok fai mateꞌen, ana oo nasoda nakandoo no Manetualain boe.”
LUK 18:31 Yesus nuni noo ana nuni kasalahunu duan nara fo neu kokolak no mesa kasa nae, “Ei basa ngga bubuluk ena mae, hatematak ia ita laꞌo teni kota Yerusalem teu. Losa naa, basa hata fo Manetualain mana toꞌu dedeꞌan nara surak kana ndia lele uluk laꞌe-neu Hatahori Dae-bafo Isi-isik naa ena, neu ko dadi no tetuk sama leo hata fo ara surak kasa.
LUK 18:32 Neu ko ara loo lima Au uni hatahori feꞌek kara fo ta mana ramahere reu Manetualain uu. Boe ma ara rakamamaek Au, rakadadaek mata-matak kara neu Au, pura ambe neu Au,
LUK 18:33 poko-femba Au, basa te tao risa Au. Tehuu neu bei-nesan, Au asoda fali numa mamates mai.”
LUK 18:34 Ara ramanene rala Yesus kokolak talo naa, boe ma ana nunin nara panggananaa, nahuu ara bei ta ralela dedeꞌa-kokolak kara raa sosoa-ndandaan.
LUK 18:35 Neu Yesus asa rae maso kota Yeriko, hambu hatahori pokek esa nanggatuuk hule-hule numa dalak tatain.
LUK 18:36 Neu ana namanene hatahori noꞌuk ka laꞌok resik naa, boe ma natane nae, “Woi! Hata ia?”
LUK 18:37 Boe ma hatahorir rafadan rae, “Yesus, Hatahori Nasaret naa, laꞌok nesik ia.”
LUK 18:38 Hatahori pokek naa namanene nala naa, boe ma ana bolu nahere nae, “Yesus! Mane Dauk tititi-nonosin, ee! Kasian neu au dei!”
LUK 18:39 Hatahori mana laꞌok nesi Yesus matan, kaꞌi-oren fo nenee. Tehuu ana boe kii-bolu nahere bali nae, “Mane Dauk tititi-nonosin, ee! Kasian neu au dei!”
LUK 18:40 Neu Yesus namanene talo naa, boe ma Ana nambarii taak. De Ana nadenu hatahorir reu leꞌa roo hatahori pokek naa mai. Losa Yesus matan, boe ma Ana natanen nae,
LUK 18:41 “O nau Au tao hata fee o?” Ana naselu nae, “Papa! Au oke-hule fo au bisa mete-ita.”
LUK 18:42 Yesus naselu mbalin nae, “Malole. Huu o mamahere mae, Au bisa tao ahai o, de hatematak ia o bisa mete-mita.”
LUK 18:43 Medak neu ma, hatahori naa mata poken hai tutik kana leo. Boe ma ana tungga Yesus ma koa-kio Manetualain. Basa hatahori mana mete-rita talo naa oo soꞌuk koa-kiok neu Manetualain boe.
LUK 19:1 Boe ma Yesus asa maso resi kota Yeriko, fo rae laꞌok rakandoo.
LUK 19:2 Numa naa, hambu malangga mana susu bea esa fee man-parenda Roma. Naden Sakeos, ma ndia hatahori kamasuꞌik.
LUK 19:3 Neu ana namanene Yesus nae nesik naa, boe ma ana hihiik ka mete-nita Yesus. Tehuu ana ta bisa mete-nita no malole, nahuu hatahori noꞌun seli rakarumbu rala Yesus, ma ndia ao-inan boboku anak ka.
LUK 19:4 Huu naa de ana nalaik nakahuluk, fo hene neni ai huuk esa numa dalak tatain fo Yesus nae nesik naa.
LUK 19:5 Losa ai huuk naa taen, boe ma Yesus mete lain neu. De nanggou Sakeos nae, “Sakeos! Mai, konda leo! Lai-lai, bekin ia Au nau leo taak nai o umam.”
LUK 19:6 Sakeos heran bali-bali. Boe ma ana konda lai-laik, de no Yesus neni uman neu. Dalen namahoko nalan seli.
LUK 19:7 Tehuu hatahori noꞌuk kara unggu-remu rae, “Ciih! Sakeos ia, hatahori ta neulauk! Tao hata de Yesus maso neu leo taak nai uman?! Basa hatahorir bubuluk ena!”
LUK 19:8 Losa uma, boe ma Sakeos nambariik neu Yesus matan, de kokolak nae, “Papa Meser! Numa faik ia neu au baꞌe dua au hata-hetong lalaꞌen, fo fee babaꞌek esa neu hatahori mana toꞌa taak kara. Mete ma au susu ita bea lena-lenak, au bae falik kasa lipa laꞌe haa.”
LUK 19:9 Yesus naselu nae, “Malole. Faik ia Manetualain tao nasoi-nasoda o mua basa o nufanelum mara, nahuu o mamahere neu Manetualain sama leo baꞌi Abraham.
LUK 19:10 Manetualain nadenu Au dadi uu Hatahori Dae-bafo Isi-isik nai dae-bafok ia. Au mai fo sangga hatahori mana laꞌok sala numa Manetualain eno-dalan mai, fo tao asoi-asoda sara.”
LUK 19:11 Faik naa, hatahori noꞌuk ka tungga nenene Yesus. Ara deka-deka ro kota Yerusalem ena. Ara oo duꞌa rae, Ana nau nakalalaꞌok Manetualain parenda-koasan nai naa, nok bali manek esa boe. Boe ma Yesus tui sara lololek esa bali
LUK 19:12 nae, “Hambu hatahori moꞌo-inahuuk esa. Ana nae neni nusa feꞌek neu, fo ara soꞌuk kana dadi manek. Basa naa, dei fo ana nau fali neu dadi manek nai ndia nusa-namo heli-helin.
LUK 19:13 Neu ana naole fo nae laꞌo ena, nanggou ndia hatahori mana maue-osan salahunu, de ana fee sara hatahori esa na, doi lilo mbilas esa. Ana parenda sara nae, ‘Ei pake doik ia dadi neu poko. Mete ma au fali, neu ko ei tui ei hambu bunak hida ena.’ Boe ma ana laꞌo.
LUK 19:14 Tehuu ndia rau-inggun nara mburuk roon. De ara radenu nedenuk neu nafada nai naa nae, ‘Ai ta nau hatahori ia toꞌu parenda soa-neu ai.’
LUK 19:15 Leo mae talo naa oo, tehuu ara soꞌuk kana nai naa boe. Basa boe ma ana fali. Losa uman, boe ma ana nanggou nala hatahori mana maue-osa kasalahunuk kara raa, de natane sara nae, ‘Ei hambu bunak hida numa doi lilo mbilas fo au fee ei naa ena?’
LUK 19:16 Hatahori mana maue-osa kaesan nafada nae, ‘Papa manek! Au hambu bunak lipa laꞌe salahunu numa poko fo au simbok naa mai!’
LUK 19:17 Boe ma manek nafadan nae, ‘Malole! O ia, hatahori mana maue-osa neulauk. Huu au bisa amahere o nai dedeꞌa kadiꞌi anak, de hatematak ia au soꞌuk o fo parenda kota salahunu.’
LUK 19:18 Boe ma hatahori mana maue-osa kaduan nafada nae, ‘Papa manek! Au hambu bunak doi lilo mbilas lima numa poko fo au simbok mai.’
LUK 19:19 Boe ma manek naa koan nae, ‘Malole! Mete ma talo naa, au soꞌuk o fo parenda kota lima.’
LUK 19:20 Tehuu hatahori mana maue-osa katelun neni falik ndia doi lilo mbilan. De nafada nae, ‘Papa manek doin ndia! Au mbotin, basa de afunin no malole fo boso mopon.
LUK 19:21 Au tao talo naa, nahuu au amataꞌu. Au bubuluk papa ia, hatahori kalakak. Huu papa soa haꞌi nala hata fo ta papa enan, ma ketu-koru hata fo papa ta sele-tanden.’
LUK 19:22 Manek namanene nala naa, boe ma ana mbokan nae, ‘O ia, hatahori sesesu taak! O kokolam fee hukun neu o ao heli-helim ena. O duꞌa mae au ia, hatahori kalakak fo haꞌi ala hata fo ta au enang, ma ketu-koru hata fo au ta sele-tanden.
LUK 19:23 Mete ma talo naa, na, tao hata de o ta muu mbeda doik naa nai bank? Mita fo neu au fali, na, bisa hambu bunan. Leo mae baꞌu anak ka oo malole boe.’
LUK 19:24 Boe ma manek naa nadenu hatahori laen marai naar nae, ‘Haꞌi mala doin naa, fo loo liman neu hatahori mana maue-osa bebeik kara fo mana hambu bunak salahunu.’
LUK 19:25 Tehuu ara ta rakaheik rae, ‘Papa! Hatahori naa, hambu dai ena. Tao hata de sangga haꞌi numa hatahori fo enan baꞌuk ka, fo tamban neu ndia bali?’
LUK 19:26 Boe ma manek naa naselu nae, ‘Duꞌa matalolole! Hatahori fo mana nalela koladu hata fo hatahori fee nemeheherek neun ena, neu ko ana hambu tamba bali. Tehuu hatahori fo mana mbera koladu, neu ko ara haꞌi rabasa hata fo ndia enan.
LUK 19:27 Hatematak ia ei miu humu mala au musung nggara fo ta mana hii au dadi manek nai ia. Mia sara ia mai, boe ma hala misa sara rai au matang. Miu leo!’ ”
LUK 19:28 Yesus tui basa, boe ma ara laꞌok rakandoo reni Yerusalem reu. Yesus laꞌok nesik mata.
LUK 19:29 Ara deka-deka ro nggorok dua, ndia Betfage ma Betania marai letek Setun tatain, boe ma Ana nadenu ana nunin dua laꞌok rakahuluk.
LUK 19:30 Ana nadenu sara nae, “Ei dua ngga meni nggorok manai mata naa miu. Neu ko ei mete-mita banda keledei tenak esa neni paꞌak nai naa. Hatahorir bei ta saꞌe ritan. Ei sefi keledei naa talin fo leꞌa menin ia mai.
LUK 19:31 Tehuu mete ma hambu hatahori natane nae, ‘Tao hata de ei sefi keledei naa talin?’ Na, ei mafadan mae, ‘Ai Lamatuan nae paken.’ ”
LUK 19:32 Dua sara reu, de ratonggo ro keledei tenak naa, ndaa no Yesus kokolan.
LUK 19:33 Neu ara sefi heni keledei naa talin, boe ma tenu enan natane sara nae, “Tao hata de ei sefi banda ia talin?”
LUK 19:34 Boe ma ara raselu rae, “Ai Lamatuan nae paken.”
LUK 19:35 Keledei naa tenu enan simbok no malole, de dua sara leꞌa reni keledei tenak naa neni Yesus neu. Ara bela lafan nara reu keledei tenak naa reredon. Boe ma ara rakasasaꞌek Yesus neu lain.
LUK 19:36 Hatahori noꞌuk kara oo haꞌi rala lafan nara ma ndae arun nara, de rakambembela sara reu dalak fo reu soru Yesus, sama leo simbok hatahori moꞌo-inahuuk.
LUK 19:37 Neu Ana mulai konda numa letek Setun mai, boe ma hatahori noꞌuk kara raa, ma Ndia ana nunin nara mulai eki-randu koa-kio neu Manetualain, nahuu basa koasa tandan nara fo ara mete-ritak kara ena.
LUK 19:38 Ara eki rae, “Ndia ia, Manek fo Manetualain nadenun mai! Manetualain fee babaꞌe-babatik neun! Hatematak ia hatahori dae-bafok bisa mole-dame no Lamatuak nai nusa tetuk do inggu temak. Koa-kio neu Lamatuak mana nanggatuuk parenda nai lalai fo demak mateꞌen.”
LUK 19:39 Tehuu hambu hatahori Farisir rai hatahori noꞌuk kara raa taladan. Ara kokolak neu Yesus rae, “Papa Meser! Kaꞌi sara fo boso eki talo naa, huu ia sudi selik kana ia ena!”
LUK 19:40 Tehuu Yesus naselu nae, “Weeh! Au afada memak! Mete ma hatahori iar rakatema bafan nara, neu ko batur ndia koa-kio Lamatuak!”
LUK 19:41 Neu ara deka-deka maso Yerusalem, Yesus mete-nita kota naa, boe ma Ana buꞌi
LUK 19:42 nae, “Awii, hatahorir Yerusalem, ee! Au nau fo faik ia ei simbok mala mole-damek fo Au unik. Huu ei ta tao matak neu Manetualain, de hatematak ia fain babanggo ena. Mole-damek naa, dook ka numa ei mai ena.
LUK 19:43 Neu ko ei musum mara fua dae ndule kota tembon, boe ma ara maso nggafu fee ei.
LUK 19:44 Ara randefa heni ei kotan natetu no daer, boe ma rakanisa ei ma ei anam mara lalaꞌen. Ara ta ela batu esa nambariik boe na, nahuu Manetualain mai ena fo nau tao nasoi-nasoda ei, tehuu ei ta malela sana!”
LUK 19:45 Basa boe ma Yesus maso neni Uma Huhule-haradoi Ina-huuk neu. Numa uma naa bebelan, hatahori taon dadi neu pasar fo raseꞌo banda tunu-hotuk. Yesus mete-nita naa, boe ma Ana husi-mbuu heni sara numa naa mai.
LUK 19:46 Ana mboka sara nae, “Manetualain mana toꞌu dedeꞌan surak memak kana nae, ‘Au ambadedeik Uma ia, fo basa hatahorir bisa mai hule-haradoi nai ia.’ Tehuu ei taon dadi neu naꞌo manu-meor mamana nekebubuan ena.”
LUK 19:47 Basa naa, tungga faik Yesus neni Uma Huhule-haradoi Ina-huuk neu fo fee nenorik nai naa. Tehuu malangga anggama Yahudi malanggan nara, meser anggamar ma lasi-lasi hadak Yahudir sangga dalak fo tao risa Yesus.
LUK 19:48 Tehuu ara ta hambu dalak, nahuu hatahori noꞌuk kara raa bei ramanene Yesus kokolan no nemehokok.
LUK 20:1 Faik esa, Yesus neni Uma Huhule-haradoi Ina-huuk neu, de fee nenorik laꞌe-neu Manetualain Hara Lii Malolen numa Uma bebelan. Boe ma malangga anggama Yahudi malanggan nara, meser anggamar ma lasi-lasi hadak kara mai rakaseseluk dedeꞌak roon.
LUK 20:2 Ara ratanen rae, “See fee haak neu O fo husi-mbuu hatahori mana maseꞌo banda hasak numa ia ndia afik ka? Mafada sudik kana dei!”
LUK 20:3 Boe ma Yesus naselu nae, “Au oo ae atane dedeꞌak esa boe, basa dei fo Au aselu ei.
LUK 20:4 Talo ia: ei malela Yohanis Mana Saranik, hetu? See ndia feen koasa fo sarani hatahorir? Manetualain do, hatahori dae-bafok?”
LUK 20:5 Boe ma ara rakokola aok reu-mai, ma rae, “Awii! Laꞌe-ndaa ita ia ena, ma. Mete ma ita tae, ‘Manetualain ndia nadenu’, neu ko Ana bala nae, ‘Mete ma talo naa, tao hata de ei ta mamahere neu Yohanis?’
LUK 20:6 Tehuu ita oo ta bisa tae, ‘hatahori dae-bafok ndia nadenu’ boe, neu ko hatahori iar haꞌi batu fo pesi risa ita. Huu ara ramahere rae, Yohanis naa, Manetualain mana toꞌu dedeꞌan.”
LUK 20:7 De ara raselu neu Yesus rae, “Ai ta bubuluk.”
LUK 20:8 Boe ma Yesus bala sara nae, “Mete ma talo naa, Au oo ta nau afada see ndia nadenu Au boe.”
LUK 20:9 Basa boe ma Yesus tui hatahori noꞌuk kara raa, lololek esa bali nae, “Hambu hatahori esa sele anggor nai osin. Ana fee osi naa neu mana maue osir fo rabaꞌe buna-boan nara. Boe ma ana lali neni nusa feꞌek neu, de leo dook ka numa naa.
LUK 20:10 Losa fai ketu anggor boan, boe ma tenu osik nadenu ndia hatahori mana maue-osan esa neu simbo ndia babaꞌen numa mana maue osir raa mai. Tehuu mana maue osir raa popoko hatahori mana maue-osa naa, basa de ara husi henin fali neu ngga no lima rouk.
LUK 20:11 Boe ma tenu osik naa nadenu ndia hatahori mana maue-osan esa neu bali. Tehuu mana maue osir raa popokon ma rakamamaek kana. Basa de ara husi falik kana no lima rouk.
LUK 20:12 Boe ma tenu osik nadenu seluk ndia hatahori mana maue-osan katelun neu, tehuu ara popoko rakahinan, basa de ara pirun dea neu.
LUK 20:13 Tenu osik naa nanggatuuk duduꞌa nae, ‘Au muste tao talo bee bali? Malole lenak au adenu kada au ana susueng. Neu ko ara fee hada-horomatak ma simbok ralan no malole.’ De ana nadenu ana bonggin neni naa neu.
LUK 20:14 Tehuu neu mana maue osir raa mete-ritan, boe ma ara kokolak rae, ‘Heeh! Ei mete dei! Tou lasik nadenu ndia ana heli-helin mai ena. Neu ko ana ndia simbo basa tou lasik pusakan lalaꞌen. Dadi mai fo ita hala tisan leo! Naa fo ita ndia soa osi ia.’
LUK 20:15 Neu tenu osik anan naa losa, boe ma ara leꞌa roroson neni osi dea neu, basa de ara hala risan. De Au ae atane talo ia: ei duꞌa mae tenu osik tao mana maue osir raa talo bee?
LUK 20:16 Tungga Au, neu ko ana mai fo tao nisa basa sara, boe ma ana fee osi naa neu hatahori laen fo naue ma rabaꞌe buna-boan.” Neu hatahori raa ramanene rala Yesus kokolak talo naa, boe ma ara raselu rae, “Mete ma bisa, na, Manetualain boso fee hukun neu ai talo naa!”
LUK 20:17 Boe ma Yesus mete nakateteek kasa, de natane nae, “Mete ma ta dadi fee hukun talo naa, na, tao hata de Manetualain mana toꞌu dedeꞌan surak ena nae, ‘Hambu batu esa tukan nara nggari henin ena, tehuu hatematak ia dadi neu dii inak batu netehuun.’
LUK 20:18 Hatahori see fo nakatunu laꞌe batu naa, neu ko nakalulutu, nahuu huku-dokik laꞌen ena. Mete ma batu naa tuda laꞌe-ndaa hatahori, na, ana oo nakalulutu rafu-rafu, nahuu huku-dokik laꞌen ena boe.”
LUK 20:19 Neu meser anggama ma malangga anggamar malanggan nara ramanene rala tutuik naa, ara bubuluk rae, Yesus pake lololek naa, fo ndee sira. Sira tetar sama leo mana maue osir raa. De ara ramanasa ralan seli. Boe ma ara sangga dalak fo rae humu Yesus. Tehuu ara ramahia hatahori noꞌuk kara mana hii Yesus nenorin. De ara laꞌo elan leo.
LUK 20:20 Basa naa, Yesus musun nara makun. Ara sangga mana makur, mana bisa tao aon leo hatahori mana matu-matuk fo ike sudik Yesus. Ara ramahena Yesus bisa kokolak laban man-parenda Roma, boe ma ara rae reu tui nggubenor, mita fo ara radenu hatahorir reu humu Yesus.
LUK 20:21 Boe ma ara radenu mana maku naa neu nakaseseluk dedeꞌak no Yesus nae, “Papa Meser! Ai bubuluk Papa dalen ndoos. Papa ta mana pepeko-lelekok, ma ta mana mete matak. Papa soa fee nenorik laꞌe-neu Manetualain Dedeꞌa-kokolan no tetuk.
LUK 20:22 Hatematak ia ai mae matane dedeꞌak esa: tungga ita anggama Yahudi hohoro-lalanen, ndondoon naa ita bole bae bea fee man-parenda Roma mane ina-huun, do taa?”
LUK 20:23 Tehuu Yesus bubuluk sira nanaen manggarauk fo sangga ike Ndia. Boe ma Ana naselu nae,
LUK 20:24 “Matudu sudik doi lilo fulak esa mai Au dei.” Boe ma ara ratudun doik naa. De Ana natane nae, “Ia, see nggambar ia? Ma ia, see naden ia?” Ara raselu rae, “Naa mane ina-huuk, keser.”
LUK 20:25 Boe ma Yesus nae, “Mete ma talo naa, na, fee man-parenda hata fo man-parenda haak. Ma fee Manetualain hata fo Manetualain haak.”
LUK 20:26 Ara ramanene rala naa, boe ma ara heran bali-bali, nahuu ara ta bisa ike sana nai hatahori noꞌuk kara matan. Boe ma ara kokoꞌo bafan nara leo.
LUK 20:27 Basa naa, hambu hatahori hida ruma anggama Saduki partein mai fo rae ike Yesus. Hatahori Sadukir fee nenorik rae, hatahori mates ta nasoda fali numa mamaten mai, nai dae-bafok fai mateꞌen. Ara mai rakaseseluk dedeꞌak ro Yesus rae,
LUK 20:28 “Papa Meser! Baꞌi Musa surak ela fee ita hohoro-lalanek nae: mete ma touk esa mate, tehuu ta laꞌo ela anak, na, hatahori naa fadin muste sao nala ina falu naa, mita fo bisa fee tititi-nonosik soa-neu kaꞌan mana matek naa ena.
LUK 20:29 Memak lele uluk, baꞌi Musa fee nenorik talo naa. Tehuu hatematak ia, ai nau matane talo ia: hambu kaꞌa-fadik touk hitu. Kaꞌak sao, tehuu maten ta ela anak.
LUK 20:30 Basa de fadik mana tunggan sao nala ina falu naa. Ta dook ka boe ma maten, tehuu ta ela anak.
LUK 20:31 Leo naak oo, no fadin katelun boe. Ana sao nala ina falu naa, tehuu ana oo mate, ma ta ela anak boe. Talo naa nakandoo losa fadi muri anak oo, maten boe.
LUK 20:32 Boe ma ina falu naa oo maten boe.
LUK 20:33 De hatematak ia, ai nau matane talo ia: inak naa sao nita no tou hitu ena. Mete ma dae-bafok fai mateꞌen, neu Manetualain nasoda falik hatahori mates sara, na, inak naa dadi neu see saon, ou?”
LUK 20:34 Boe ma Yesus naselu nae, “Dedeꞌa sasaok hambun soa-neu kada hatahori dae-bafok nai dae-bafok ia.
LUK 20:35 Tehuu neu ko nai nusa tetuk do inggu temak, ta hambu dedeꞌa sasaok soa-neu hatahori ena bali. Ma nai naa ara ta mate ena bali. Ara dadi sama leo Manetualain atan nara marai nusa tetuk do inggu temak. Neu Manetualain nasoda falik hatahori mates sara, Ana here nala sara dadi reu Ndia anan nara.
LUK 20:37 Nai baꞌi Musa susuran hambu tutuik laꞌe-neu aꞌi naꞌa naꞌu ai anar, tehuu ta kade sara. Numa baꞌi Musa tutuin naa mai ita bubuluk tae, hatahori mates bisa nasoda fali numa mamaten mai. Numa naa, Manetualain nafada baꞌi Musa nae, ‘Au ia, Manetualain numa o baꞌim mara mai, sira baꞌi Abraham, baꞌi Isak, ma baꞌi Yakob. Basa sara rakaluku-rakatele rakandoo neu Au losa hatematak ia.’
LUK 20:38 Naa te baꞌir raa mate sara ndia lele uluk ena. Tehuu Manetualin nafada nae Ndia bei dadi neu sira Lamatuan, de ita bubuluk tae, ara rasoda. Dadi leo mae hatahori mate ena oo, ara rasoda fali boe. Huu kada hatahori masodak ndia rakaluku-rakatele neu Manetualain, ta hatahori mates, hetu?!”
LUK 20:39 Ara ramanene rala Yesus naselu talo naa, boe ma hambu meser anggama kokolak nae, “Papa Meser neselun naa, ndaa laꞌe esak kana.”
LUK 20:40 Numa faik naa mai oo, ta hambu hatahori esa nambarani natane Yesus bali, ma ta hambu esa bisa ike nala sana boe.
LUK 20:41 Basa naa, Yesus bei nanori hatahorir raa numa Uma Huhule-haradoi Ina-huuk. Boe ma Ana natane nasafali sara nae, “Tungga ei duduꞌam, na, talo bee? Meser anggamar fee nenorik rae, Karistus naa, ndia Hatahori fo Manetualain here memak kana numa lele uluk mai ena. Tungga sira, na, Ndia dadi neu kada mane Dauk tititi-nonosin. Tehuu naa bei ta dai.
LUK 20:42 Mane Dauk ndia surak memak nai buku Sosodak Kokoa-kikiok kara nae, ‘Manetualain nafada au lamatuang ena nae, “Mai fo manggatuuk muu mamana hada-horomatak mateꞌen nai Au boboa konang ia.
LUK 20:43 Neu ko Au tao ala O musum mara, losa ara doꞌor mbali O.’ ”
LUK 20:44 Numa susurak naa mai, ita bubuluk tae, mane Dauk noke Karistus naa nae, ‘Lamatuak’. Naa sosoa-ndandaan nae, mete ma hatahorir rae Karistus naa, kada mane Dauk tititi-nonosin, na, bei ta dai! Te Ana oo dadi neu mane Dauk Lamatuan boe na!”
LUK 20:45 Neu basa hatahorir pasa ndiꞌi doon nara fo nenene Yesus, boe ma Ana kokolak no ana nunin nara nae,
LUK 20:46 “Ei muste besa-besa mia meser anggamar. Ara rasiꞌe laꞌo-laꞌo pake badu naruk roroso losa daer, reu ratonggo ro hatahori noꞌuk kara, mita fo hatahorir mete-rita sara, na, rae, ‘Awii! Sira iar, hatahori moꞌo-inahuuk!’ Ara soa sangga mamana hada-horomatak mateꞌen nai basa uma huhule-haradoik kara, mamana feta, ma mamanak fo hatahori noꞌuk kara soa rakabua.
LUK 20:47 Tehuu besa-besa! Ara soa pepeko-leleko ina falur fo fonda rala uman nara. Tehuu nai hatahori noꞌuk kara matan, ara rafuni sira manggaraun ma rambariik hule-haradoi dook ka. Ara nau fo hatahori rae sira iar, hatahori mana matu-matuk. Tehuu Manetualain bubuluk sira sala-singgon nara, de neu ko Ana fee huku-dokik neu sara beran lenak.”
LUK 21:1 Neu Yesus fee nenorik numa Uma Huhule-haradoi Ina-huuk, Ana mete-nita hatahori kamasuꞌik kara mai mbeda kolete neni mamana kolete neu.
LUK 21:2 Ana oo, mete-nita ina falu hata taak esa mai tungga hule-haradoi boe. Inak naa mbeda doik seen dua neni mamanak naa neu. Doik naa belin kadiꞌi anan seli.
LUK 21:3 Boe ma Yesus kokolak no Ndia ana nunin nara nae, “Nenene matalolole! Ina falu hata taak ia mbeda kada doik seen dua, tehuu ana fee baꞌu lena basa hatahorir lalaꞌen ena.
LUK 21:4 Hatahori laen nara mbeda kolete numa sira doi sisan nara mai. Tehuu ina falu ia, ana fee basa ndia doin lalaꞌen. Naa te, naa ndia doin fo pake neu ndia sodan.”
LUK 21:5 Faik naa, Yesus ana nunin nara koa Uma Huhule-haradoi Ina-huuk rae, “Papa! Mete neu Uma ia dei, lolen seli! Ara taon pake batu neni sambik moꞌon seli, de ara tia-totodo sara no neulauk. Ma hambu hatahorir fee bua-baꞌu mabelir ena fo heti Manetualain Uman ia!” Boe ma Yesus naselu nae,
LUK 21:6 “Uma ia, memak malole, tehuu ta dook ka bali te hatahorir randefa heni basa batu iar lalaꞌen, losa ratetu ro daer.”
LUK 21:7 Boe ma Yesus ana nunin nara ratane rae, “Papa Meser! Hata fo Papa kokolak bebeik kara naa, ndondoon naa neu ko fai hida ana dadi? Mete ma fain deka-deka ena, na, neu ko tandan talo bee?”
LUK 21:8 Boe ma Yesus naselu nae, “Sadi ei manea matalolole fo boso hambu kedi-irak. Neu ko hambu hatahori mata-matak kara mai fo femba tenden nara rae, ‘Au ia, Karistus.’ Ketuk oo rae, ‘Dae-bafok fai mateꞌen deka-deka mai ena boe!’ Tehuu boso mamahere!
LUK 21:9 Mete ma ei mamanene harak rae, hatahorir tao nemuek ma netatik nai bee a mesan, na, hae mamataꞌu. Memak, basa naar muste dadi rakahuluk dei. Tehuu dae-bafok fai mateꞌen bei ta losa.
LUK 21:10 Neu ko leo esa natati laban leo laen. Nusak esa natati laban nusak laen.
LUK 21:11 Neu ko hambu dae nanggenggo moꞌon seli. Nai bee a mesan, hambu fai ndoe-laꞌas ta hohoꞌak, ma hedi-raus ndule basan. Neu ko hatahorir oo, mete-rita mandadik tao rala aon nara mumuru, ma tanda ta hohoꞌak kara rai lalai boe.
LUK 21:12 Basa dedeꞌak kara iar bei ta dadi basa, tehuu neu ko hatahorir humu rala ei ma tuni-ndeni ei, nahuu ei mamahere neu Au. Boe ma ara loo lima ei miu fo hatahori parisa ei dedeꞌam nai uma huhule-haradoik kara, ma reu kena ei nai bui dale. Ara oo, radenu ei fo miu mataa manek ma man-parenda laen nara boe. Basa iar dadi, nahuu ei tungga Au.
LUK 21:13 Tehuu ei muste pake fai lelak naa fo tui sara Au Hara Lii Maloleng.
LUK 21:14 Dadi ei hae duduꞌa makahuluk mae, ei masalaꞌe aom mara talo bee.
LUK 21:15 Neu ko Au fee dedeꞌa-kokolak ndaa no ei mae masalaꞌe aom mara. No dalak naa, ei musum mara ta bubuluk rae leo bee bali.
LUK 21:16 Neu ko hatahori noꞌuk ka mburuk ralan seli ro ei, nahuu ei tungga Au. Hambu ketuk numa ei nufanelu heli-helim mara mai, netuduk leo ina-ama, kaꞌa-fadik, toranook kara, ma nonook kara. Neu ko hambu sira ketuk sangga dalak fo seꞌo heni ei, losa ei ketuk hambu nekenisak.
LUK 21:18 Tehuu ei boso mamataꞌu, neu ko Manetualain ta lilii ei. Langga bulu dook esa oo, ta moꞌu heni sana numa ei langgam mara mai, mete ma ta no Ndia hihii-nanaun boe.
LUK 21:19 Mete ma ei makatataka makandoo, neu ko Manetualain tao nasoi-nasoda ei.”
LUK 21:20 Yesus kokolak seluk nae, “Neu ei mete-mita soldadu musur mai eko-feo rala kota Yerusalem, ei bubuluk mae, ana nae ndefa naa ena.
LUK 21:21 Mete-rita talo naa, na, hatahori marai profensi Yudea ralai reni letek reu leo. Hatahori marai kota oo, malai leo boe. Ma hatahori marai nggorok, hae bei kota reu bali.
LUK 21:22 Manetualain haitua fai susa-sonak kara fo huku-doki hatahorir ta mana nenene neu Ndia. Basa iar dadi, ndaa no hata fo Manetualain mana toꞌu dedeꞌan surak memak kana numa lele uluk mai.
LUK 21:23 Faik naa, hatahori mana kasian nalan seli, ndia ina kairuk, ma inak kara mana rasususu ana mbimbila anan. Faik naa, basa nusak katematuan hambu susa-sonak, ma basa hatahori Yahudir hambu doidoso berak, nahuu Manetualain namanasa sara.
LUK 21:24 Neu ko musu tao nisa ketuk ma leꞌa reni ketuk fo dadi reu ata-dator nai bee a mesan nai dae-bafok ia. Boe ma hatahori feꞌek ta mana malela Manetualain, mai roroo-tatabu tao ranggenggeo nai kota Yerusalem, ma koasa rala kota isi-oen, losa sira koasan naa, fain basa.”
LUK 21:25 Boe ma Yesus nafada laꞌe-neu Ndia fai mamain nae, “Neu Hatahori Dae-bafo Isi-isik nae fali mai ena, neu ko hambu tandar kalua ruma ledo, bulan, ma nduuk kara mai. Nai dae-inak oo hambu tanda boe, ndia leo tasi namue, ani berak nakarumbu ma rii moꞌok rambombonu mai. Basa iar tao rala hatahori dae-bafok kara ramataꞌu ma pangganaa, losa ara ta bubuluk nau tao hata bali.
LUK 21:26 Basa koasar marai lalai ranggongga sadi ndaa. Hatahorir mete-rita talo naa, boe ma ara ramataꞌu ralan seli, nahuu dae-inak sangga noe ena!
LUK 21:27 Basa naa, dei fo hatahorir mete-rita Au, ‘Hatahori Dae-bafo Isi-isik konda mai pake sosoꞌak’. Au konda ua koasa, ma Au manula-manapung lalaꞌen.
LUK 21:28 Mete ma basa tandar ia mulai dadi ena, na, botik ei langgam mara leo, te Manetualain fain losa ena fo tao nasoi-nasoda ei.”
LUK 21:29 Basa naa Yesus soꞌuk lololek esa nae, “Ei tadu matalolole neu ai huuk kara.
LUK 21:30 Mete ma doon nara mulai uni, naa dadi tanda nae, fai hanas deka-deka mai ena.
LUK 21:31 Leo naak oo no fai susa-sonak kara raa boe. Neu ara toda mai ena, naa dadi tanda nae, Manetualain parenda-koasan deka-deka mai ena.
LUK 21:32 Au afada memak! Numa basa hatahorir mana masodak hatematak ia mai, neu ko hambu ketuk bei ta mate, te fai susa-sonak kara raa toda mai ena.
LUK 21:33 Leo mae lalai no dae-inak sambu do lalo ena, tehuu Au Dedeꞌa-kokolang mahanik seku neu.”
LUK 21:34 Boe ma Yesus tuti kokolan nae, “Manea matalolole, te medak neu ma Au toda mai ena! Boso losak ei ta duꞌa mala no tebe-tebe ena bali, boe ma ei leo-laꞌo mia kada minu mafuk, ma mbute-mue sangga kada masodak lole-ladan. Boso losak ei ta tadu tandan, nahuu ei mamue mia kada koladu matak laen.
LUK 21:35 Boso duꞌa mae ta laꞌe ei. Medak neu te Au mai. Ma neu Au fali mai, ta hambu hatahori esa boe na bisa nafuni nala aon numa Au matang mai.
LUK 21:36 Huu naa de manea taa-taa. Hule-haradoi ta mana ketuk, mita fo ei bisa makatataka nai basa susa-sonak kara raa dale. No dalak naa, neu Au fali mai ena, ei ta mameda mae mambariik nai Hatahori Dae-bafo Isi-isik matan.”
LUK 21:37 Tungga faik Yesus neu fee nenorik nai Uma Huhule-haradoi Ina-huuk. Tehuu mete ma leꞌodae ena, na, Ana kalua numa Yerusalem mai fo neu sunggu nai nggorok manai letek Setun naa.
LUK 21:38 Bei huhua anak, hatahori noꞌuk ka mai rakabua ena, fo nau nenene Ana fee nenorik nai Uma Huhule-haradoi Ina-huuk.
LUK 22:1 Faik naa, deka no hatahori Yahudir fai malolen, ndia feta Roti Ta Pake Laru Taꞌik. Numa fai malole naa, ara oo hala bibi lombo fo tao feta Paska boe. Ara tao talo naa fo rasaneda fai bakahulun, neu sira bei-baꞌin nara kalua numa Masir mai.
LUK 22:2 Faik naa, malangga anggama Yahudi malanggan nara, ma meser anggamar sangga dalak fo rae tao risa Yesus. Tehuu ara ramataꞌu hatahori noꞌuk kara raa tao nemuek, nahuu ara hii nenene Yesus.
LUK 22:3 Numa Yesus ana nuni kasalahunu duan nara raa mai, esa nade Yudas Iskariot. Neu malangga anggama Yahudi malanggan nara sangga dalak fo rae tao risa Yesus, nitur malanggan maso neni Yudas dalen neu.
LUK 22:4 Boe ma ana kalua neu sangga malangga anggamar malanggan nara ma malangga mana manea Uma Huhule-haradoi Ina-huuk. Ana nae neu nala harak fo seꞌo heni Yesus neu sara.
LUK 22:5 Faik naa, malanggan nara ramanene rala Yudas kokolan talo naa, boe ma ara ramahoko ralan seli. Ara helun rae, “Malole! Mete ma o nau seꞌo Yesus mai ai, neu ko ai bae.”
LUK 22:6 Yudas nakaheik. Boe ma ana mulai sangga lelak fo seꞌo heni Yesus no neneek neu sara, mita fo hatahori noꞌuk kara raa ta bubuluk.
LUK 22:7 Hatahori Yahudi fai malolen naa losa ena, de ara rae hala bibi lombo ana fo tao feta Paska.
LUK 22:8 Boe ma Yesus nadenu Petrus ma Yohanis nae, “Ei dua ngga makahuluk fo sadia fee ita taꞌa feta Paska sama-sama.”
LUK 22:9 Boe ma dua sara ratane rae, “Papa! Ai muste miu sadia mei nai bee?”
LUK 22:10 Ana naselu nae, “Neu ei maso meni kota Yerusalem dale miu, neu ko ei matonggo mia touk esa nasaa nggusi oe. Tungga mian losa uma.
LUK 22:11 Mafada tenu uma naa mae, ‘Ai Papa Mesen noke kama fo nae paken tao feta Paska no Ndia ana nunin nara. Hambu, do?’
LUK 22:12 Neu ko tenu uma naa dudu fee ei kama loak esa nai uma tadak lain. Ana sadia nala kama naa no matetuk ena. Ela kada ei dua ngga miu sadia nanaꞌak nai naa leo.”
LUK 22:13 De dua sara reu. Boe ma ara ratonggo ro basa hata fo Yesus nafada memak kasa. De ara sadia nanaꞌa Paska neu naa leo.
LUK 22:14 Neu basa-basan neni sadia nalak, Yesus asa mai. Ana haꞌi mamana nenggetuuk nai mei, ma Ndia ana nunin nara oo, ranggatuuk raꞌa feta boe.
LUK 22:15 Boe ma Yesus nafada sara nae, “Au daleng hii nalan seli anggatuuk uꞌa feta Paska ia ua ei ena, nakahuluk numa Au bei ta hambu doidosok mai.
LUK 22:16 Tanda mala ia, matalolole. Basa ia, Au ta anggatuuk uꞌa seluk feta Paska ena ua ei bali. Neu ko hatahorir bubuluk no ledo-ledo rae, Amak toꞌu parenda-koasa, dei fo Au uꞌa seluk feta bali.”
LUK 22:17 Boe ma Ana soꞌu nala nggalas neni isik oe anggor. De Ana noke makasi neu Manetualain, boe ma Ana loo nggalas naa neu sara. Basa boe ma Ana kokolak nae, “Simbo mala nggalas ia fo ei esa-esak minu.
LUK 22:18 Masaneda, ee! Mulai numa leꞌodaen ia neu, Au ta inu oe anggor ena bali. Neu ko hatahorir bubuluk no ledo-ledo rae, Amak toꞌu parenda-koasa, dei fo Au inu bali.”
LUK 22:19 Basa naa, Ana haꞌi nala roti balok esa, de Ana noke makasi neu Manetualain. Basa boe ma Ana fifiꞌi baꞌe roti naa, de Ana loon neu sara. Ana nae, “Roti ia, Au ao-mbaang fo Au loo liman neu ei basa ngga. Tungga-tungga ei miꞌa roti ia, ei muste masaneda neu Au.”
LUK 22:20 Neu ara raꞌa basa ena, boe ma Ana soꞌu nala nggalas neni isi oe anggor. De Ana kokolak seluk bali nae, “Anggor ia, Au daang fo neni mboꞌak fo tao nasoi-nasoda ei. Manetualain pake daak ia fo ndara fangga hehelu-bartaa beuk no ei.
LUK 22:21 Tehuu besa-besa! Hambu hatahori fo hatematak ia nanggatuuk naꞌa sama-sama nai mei ia, neu ko ana seꞌo heni Au.
LUK 22:22 Memak Au, Hatahori Dae-bafo Isi-isik muste mate tungga Manetualain hihii-nanaun. Tehuu hatahori mana seꞌo Au naa, besa-besa! Neu ko ana lemba-nasaa ndia sosoen!”
LUK 22:23 Yesus ana nunin nara ramanene rala naa, boe ma ara mulai ratatane aok rae, “Ndondoon na, see ndia nae tao manggarauk mbalin talo naa?”
LUK 22:24 Boe ma Yesus ana nunin nara mulai rareresi laꞌe-neu see ndia moꞌo-inahuun lenak mateꞌen numa sira mai.
LUK 22:25 Tehuu Yesus nahara berak neu sara nae, “Nai hatahori nusa-nusak ta mana malela Manetualain, manek kara tuni-ndeni rau-inggun nara ro parenda lena-lenak. Naa te ara nau rau-inggur roke sara rae, ‘Amak mana tulu-fali rau-inggun’.
LUK 22:26 Tehuu ei ta bole talo naa. See nau dadi neu hatahori moꞌo-inahuuk, ndia leleo-lalaꞌon muste tebe-tebe dadi sama leo hatahori kadiꞌik fo naono-lalau basa hatahorir. See nau dadi neu malanggan muste naono-lalau sama leo hatahori neondak.
LUK 22:27 Ei duꞌa sudik kana, hatahori moꞌo-inahuuk naa ndia see? Hatahori mana manggatuuk nai mei, do, mana maono-lalau mei? Neu ko ndia hatahori mana manggatuuk naa ena, ndia hatahori moꞌo-inahuuk naa, hetu? Naa te, Au ta tao Au aong leo naak. Au mai fo aono-lalau ei.
LUK 22:28 Eir ia, ndia soa sama-sama mia Au, neu Au hambu doidosok.
LUK 22:29 Au Amang soꞌuk Au fo toꞌu parenda nai Ndia mamana parenda-koasan. Dadi hatematak ia Au oo soꞌuk ei boe,
LUK 22:30 mita fo mateꞌen ei manggatuuk miꞌa mei esa mia Au nai nusa tetuk do inggu temak. Au oo fee koasa fo ei parenda leo kasalahunu duak kara marai Israꞌel boe.”
LUK 22:31 Boe ma Yesus nafada Petrus nae, “Peꞌu, ee. Nitur malanggan nae soba tao nabinggak ei numa Au mai, sama leo hatahori daꞌi isik fo here heni hade taak numa isik mai.
LUK 22:32 Tehuu Au hule-haradoi fee o, Peꞌu, mita fo o mamahere makandoo neu Au. Mete ma o fali muni Au mai ena, na, neu ko o muste matetea o toranoom mara dalen.”
LUK 22:33 Boe ma Petrus naselu nae, “Taa, Papa! Au ta laꞌo ela Papa. Au sadia maso bui sama-sama ua Papa. Leo mae mate sama-sama ua Papa oo, malole boe.”
LUK 22:34 Tehuu Yesus naselu nae, “Peꞌu! Nenene matalolole. Leꞌodaen ia, manu bei ta kokoa, tehuu o laka laꞌe telu ena mae, o ta malela Au.”
LUK 22:35 Basa boe ma Yesus kokolak no sara nae, “Fai bakahulun, neu Au adenu ei fo miu tui-bengga Au Hara Lii Malolen nai bee a mesan, Au afada ei fo boso meni doik, tas ma tabu eis. Faik naa, ei toꞌa kuran hata?” Boe ma ara raselu randaa rae, “Fai bakahulun, ai ta toꞌa kuran hata esa boe na!”
LUK 22:36 Boe ma Ana kokolak tamba nae, “Tehuu hatematak ia laen ena. Mete ma ei kadoik, na, toꞌu menin. Mete ma ei ka tas, na, menin boe. Mete ma ta maena tafa, na, seꞌo heni ei badum esa fo hasa.
LUK 22:37 Huu hatahori Yahudir tao Au, leo hatahori manggarauk. Doo-doo faa bali te ara mai humu Au. Sama leo hata fo baꞌi Yesaya surak memak kana ena nae: ‘Ara taon sama leo hatahori manggarauk!’ ”
LUK 22:38 Ara rafada rae, “Papa! Ai meni fela dua.” Boe ma Yesus naselu nae, “Dai ena. Hae kokolak naa bali!”
LUK 22:39 Yesus no ana nunin nara raꞌa basa Paska, boe ma ara kalua reni letek Setun reu, leo sira siꞌen.
LUK 22:40 Losa naa boe ma Ana nafada sara nae, “Ei muste hule-haradoi mita fo soba-douk ta laꞌe ei.”
LUK 22:41 Basa de Ana heok ela sara faa. Ana laꞌok ta losa dook, boe ma Ana sendek luu-langgan fo hule-haradoi nae,
LUK 22:42 “Papa! Mete ma Papa nau, na, piru heni doidosok ia dook ka numa Au mai. Tehuu boso tungga Au hihii-nanaung; naa fo tungga kada Papa hihii-nanaun mesa kana.”
LUK 22:43 [Boe ma Manetualain atan esa numa nusa tetuk do inggu temak mai fo natetea Ndia dalen.
LUK 22:44 Ana doidoso nalan seli ena, losa mbusen titi sama leo daak.]
LUK 22:45 Ana hule-haradoi basa, boe ma Ana nambadeik neu natonggo no ana nunin nara. Tehuu mana sungguk kara, nahuu ara manggu ralan seli ma dalen nara sona.
LUK 22:46 Boe ma Yesus nafada nae, “Tao hata de ei sunggu?! Malole lenak ei hule-haradoi mita fo neu ei hambu soba-douk, na, ei ta tuda.”
LUK 22:47 Yesus bei kokolak talo naa, boe ma Yudas (ana nuni kasalahunu duak kara esa), mai no hatahori noꞌuk ka. Ana mai deka-deka Yesus fo nae holu ma idun.
LUK 22:48 Tehuu Yesus nahara berak neun nae, “Weeh, Yudas! O mae seꞌo heni Hatahori Dae-bafo Isi-isik pake iꞌiduk, do?”
LUK 22:49 Neu Yesus ana nunin laen nara bubuluk Yudas duduꞌa manggaraun talo naa, boe ma ara ratane Yesus rae, “Papa! Ai laban asa, do? Ai meni fela nai ia.”
LUK 22:50 Boe ma esa numa sira mai lesu ndia felan, de tati naketu hatahori esa ndiꞌi doo konan. Hatahori neni tati ketu ndiꞌi dook naa, malangga anggama Yahudi malangga ina-huun hatahori neondan.
LUK 22:51 Tehuu Yesus naselu nae, “Hahae leo! Boso laban asa!” Boe ma Ana nafaroe hatahori naa ndiꞌi doon, de tao nahain.
LUK 22:52 Hatahorir fo mana mai humu Yesus naa, sira: malangga anggama Yahudi malanggan nara, lasi-lasi hadak kara ma mana manea Uma Huhule-haradoi Ina-huuk, ma hatahori laen bali. Yesus natane sara nae, “Talo bee? Ei duꞌa mae, Au ia, hatahori manggarauk, losa ei mai humu Au pake tafa ma tongga, do?
LUK 22:53 Tungga faik, Au anori ei nai Uma Huhule-haradoi Ina-huuk, tehuu ta hambu esa boe na mai humu Au. Tehuu elan numa naa leo! Ia, ei faim ena. Hatematak ia, nitur malanggan koasan ia!”
LUK 22:54 Basa boe ma ara humu rala Yesus, de leꞌa roon neni malangga anggama Yahudi malangga ina-huun uman neu. Petrus oo laꞌo bambi-bambi tungga dea boe.
LUK 22:55 Numa uma naa bebelan, hatahorir tao aꞌi mata moꞌok. Petrus oo neu nanggatuuk dara aꞌi numa naa boe.
LUK 22:56 Hambu ata inak esa mete-nita Petrus nanggatuuk deka aꞌi. Ana mete namumula Petrus matan, boe ma neu tui hatahori laen manuma naa nae, “Wee! hatahori ia oo tungga Yesus boe!”
LUK 22:57 Tehuu Petrus laka nae, “Taa! Au ta alela Hatahori naa, ma. O bubuluk hata?”
LUK 22:58 Ta dook ka boe ma hatahori esa leuk matan de mete-nita Petrus, boe ma kokolak nae, “Memak, o ia, esa numa Yesus hatahorin nara mai, hetu?” Tehuu Petrus nasabara nae, “Taa! O kada kokolak lelik!”
LUK 22:59 Nai rarain fama te liꞌu esa, boe ma hambu hatahori laen esa bali kokolak nae, “Wou! Au bubuluk, hatahori ia, Yesus ana nunin esa, huu ndia oo hatahori Galilea boe.”
LUK 22:60 Tehuu Petrus laka nahere nae, “O baro lelik naa!” Ndaa no Petrus kokolak talo naa, boe ma manu kokoa.
LUK 22:61 Yesus leuk, de mete neun. Boe ma Petrus nasaneda Yesus kokolan bebeik kara naa nae, “Leꞌodaen ia, manu bei ta kokoa, tehuu o laka laꞌe telu ena mae, o ta malela Au.”
LUK 22:62 Petrus nasaneda nala naa, boe ma ana kalua laꞌo ela uma bebelan naa, ma buꞌi nakarereu.
LUK 22:63 Boe ma hatahorir mana manea Yesus naa, mulai rakamamaek ma pokopo rakamiminak kana.
LUK 22:64 Boe ma ara mboti Yesus matan pake temak, de ratanen rae, “Heeh! Mete ma o Manetualain mana toꞌu dedeꞌan, na, o selu sudik kana! See ndia tutu o, ia?”
LUK 22:65 Basa boe ma ara oꞌole-aꞌali ralan seli.
LUK 22:66 Bei huhua anak, te malangga anggama Yahudi malanggan nara, meser anggamar, ma lasi-lasi hadak kara rakabua ena fo parisa Yesus dedeꞌan. Boe ma ara radenu hatahorir fo reu leꞌa reni Yesus neni mamana neketu-neladi dedeꞌa anggama neu.
LUK 22:67 Neu Ana maso nala dale ena, boe ma ara ratanen rae, “Soba o mafada sudik kana dei! O ia, memak tebe-tebe ndia Karistus, do?” Tehuu Ana naselu nae, “Leo mae Au aselu ae tebe oo, ei ta mamahere boe.
LUK 22:68 Boe ma mete ma Au atane asafali ei dedeꞌak esa, neu ko ei ta maselu.
LUK 22:69 Ta dook ka te, Manetualain pake koasan ta neni babanggak naa, fo soꞌu botik Au, Hatahori Dae-bafo Isi-isik ia. Basa boe ma Au anggatuuk uu Ndia boboa konan fo parenda sama-sama uan.”
LUK 22:70 Basa sara ramanene rala naa, boe ma ara ratane rae, “Mete ma talo naa, o duꞌa mae, o ia, Manetualain Anan, do?” Boe ma Yesus naselu nae, “Memak, ei kokolan naa, tebe.”
LUK 22:71 Basa boe ma hatahorir mana parisa dedeꞌak kara raa rame-rame kokolak rae, “Ita basa ngga tamanene talan ena, hetu? Ana soꞌuk aon dadi neu Manetualain Anan. Ia, nakadadaek Manetualain ia! Tungga ita anggama hohoro-lalanen, mete ma hambu hatahori tao aon sama leo Manetualain, na, hatahori naa muste maten. Dadi talo bee? Ita ta parluu sakasii bali. Hukun mates neun leo!”
LUK 23:1 Tehuu mana parisa dedeꞌa anggama Yahudir raa, ta raena haak fo hukun mates hatahori. Huu naa de ara leꞌa roo Yesus neu nasare nggubenor numa man-parenda Roma manai naa, ndia Pilatus. Ara nau fo nggubenor hukun Yesus.
LUK 23:2 De losa nggubenor matan, boe ma ara tui Yesus salan nara rae, “Hatahori ia, tukan laban man-parenda Roma. Ana fee nenorik nae, hatahorir boso bae bea fee man-parenda. Ana oo soꞌuk aon nae, ndia ia, Karistus fo hatahori Yahudi manen boe.”
LUK 23:3 Nggubenor namanene nala naa, boe ma ana natane Yesus nae, “Tebe, do? O ia, hatahori Yahudi manen, do?” Boe ma Yesus naselu nae, “Tebe. Sama leo papa kokolan naa.”
LUK 23:4 Parisa basa, boe ma nggubenor nasare mbali malangga anggama malanggan nara ma hatahori noꞌuk kara raa. De nae, “Talo ia. Au ta hambu hatahori ia salan baꞌu anak faa boe na.”
LUK 23:5 Tehuu ara ratitingga rahere rae, “Taa, papa nggubenor. Hatahori ia neu fee nenorik nai bee a mesan, dunggu-mbau rau-inggur fo tao nehuuk. Ana tao nemuek mulai numa profensi Galilea mai, losa kota Yerusalem ia.”
LUK 23:6 Nggubenor namanene nala naa, boe ma natane sara nae, “Mete ma talo naa, hatahori ia, hatahori Galilea, do?” Boe ma ara raselu rae, “Tebe, Papa. Ana numa Galilea mai!”
LUK 23:7 Nggubenor bubuluk talo naa, boe ma ana nadenu sara roo Yesus neu nasare manek Herodes, mana parenda profensi Galilea. Faik naa, ana numa kota Yerusalem.
LUK 23:8 Manek Herodes namanene tutuik noꞌuk ka laꞌe-neu Yesus ena, ma ana hiik ka mete-nita Yesus numa fai bakahulun mai ena. Ana namahena fo bisa mete-nita Yesus natudu tanda heran esa-dua. Huu naa de neu ara roo Yesus neun, dalen namahoko nalan seli.
LUK 23:9 Boe ma ana natane mata-matak kara neu Yesus, tehuu Ana ta naselu hata esa boe na.
LUK 23:10 Herodes bei kola-kola no Yesus, tehuu malangga anggama malanggan nara ma meser anggamar mulai rafada seluk Yesus salan mata-matak kara bali neu manek.
LUK 23:11 Boe ma manek Herodes no soldadun nara mulai rakatitiik ma rakamamaek kana fo tao rakadadaek Yesus. Basa de ara feen pake badu neulauk esa sama leo manek kara rasiꞌe pake, boe ma ara rakatitiik kana rakandoo. De ara fee falik kana neni nggubenor Pilatus neu.
LUK 23:12 Fai bakahulun, nggubenor naa no manek Herodes mana musuk kara. Tehuu mulai numa faik naa mai dua sara ratia-laik.
LUK 23:13 Basa boe ma Nggubenor Pilatus noke nala malangga anggama Yahudi malanggan nara ma lasi-lasi hadak laen nara, sama-sama ro hatahori noꞌuk kara raa mai rakabubua fo ramanene ndia neketu-neladin.
LUK 23:14 Ana kokolak nae, “Ei mia Yesus neni au mai, ma makasasaꞌek salak neun mae, Ana soa dudunggu rau-inggur fo laban man-parenda Roma. Au parisa alan no lutuk, numa ei matam mara, tehuu au ta hambu salak hata esa boe na.
LUK 23:15 Manek Herodes parisan ena boe, tehuu ta hambu salak hata esa boe na. Huu naa de ana fee falik Hatahori ia neni au mai. Hatahori ia ta naena salak hata-hata, de au ta bisa feen hukun mates.
LUK 23:16 Dadi au ae aketu talo ia: au adenu poko-femban, basa naa au akamboꞌik kana.”
LUK 23:17 Ara ramanene rala naa, boe ma mulai eki rame-rame rae, “Ta bisa! Tao misan. Makamboꞌik kada Barabas.” [Ara eki talo naa, nahuu tungga teuk mete ma hatahori Yahudir tao feta Paska, nggubenor nasiꞌe nakamboꞌik hatahori bui esa tungga ndia hihiin.]
LUK 23:19 (Barabas ia, maso bui nahuu ana dadi mana nggenggefu, tao nehuuk laban man-parenda Roma manai kota Yerusalem, ma ana oo nakanisa hatahori boe.)
LUK 23:20 Tehuu nggubenor nau nakamboꞌik Yesus. Dadi ana natane seluk hatahori noꞌuk kara nae, “Mete ma au akamboꞌik Yesus ia, na, talo bee?”
LUK 23:21 Tehuu basa sara eki rame-rame rae, “Taa! Paku tao misan nai ai ngganggek lain leo! Paku tao misan nai ai ngganggek lain!”
LUK 23:22 Tehuu nggubenor nameda naa ta ndaa, boe ma natane seluk laꞌe ka telun nae, “Tao hata de au muste paku tao isan talo naa? Ndia salan hata? Au parisan ena, tehuu au ta hambu huun hata esa boe na, fo ae hukun mates sana. De malole lenak au adenu kada poko-fembak kana, basa naa mboꞌik kana.”
LUK 23:23 Tehuu basa hatahorir raa boe eki rahere bali fo rakasetik nau paku tao risan neu ai ngganggek. Mateꞌen, nggubenor ta nakataka nala,
LUK 23:24 boe ma ana naketu tungga kada sira hihiin.
LUK 23:25 De ana nakamboꞌik Barabas, mana laban ma mana makanisa hatahori naa. Tehuu ana loo lima Yesus neu sira liman nara, mita fo ara tao Yesus tungga sira hihiin nara.
LUK 23:26 Basa naa, soldadu Romar leꞌa roo Yesus kalua numa kota Yerusalem mai. Numa dalak, ara ratonggo ro hatahori esa numa kota Kirene mai, nade Simon. Ana bei fo fali numa kota deak mai. Ara rakasetik kana fo lemba-nasaa nala ai ngganggek naa nggati Yesus, boe ma laꞌok tungga Yesus dean.
LUK 23:27 Faik naa, hatahori noꞌuk ka mai tungga fo ranilu Yesus. Hambu inak kara oo, buꞌi rakarereu mbalin boe.
LUK 23:28 Yesus namanene ara buꞌi talo naa, boe ma Ana nasare sara, de kokolak nae, “Ina Yerusalem mara ein, ee! Hae buꞌi soa-neu Au. Malole lenak buꞌi soa-neu ei ao heli-helim, ma ei anam mara.
LUK 23:29 Neu ko mbila-beinesak susa-sona moꞌok nae mai, losa hatahorir kokolak rae, ‘Inak mana maua lenak, ndia inak bei ta bonggi nita, ma bei ta nasusu nita ana mbimbila anak.’
LUK 23:30 Neu fai susa-sonak naa losa, hatahorir doidoso ralan seli, losa ara roke rae, ‘Malole lenak letek kara ndefa mai fo tuni mala ai leo!’ Ara oo kokolak boe rae, ‘No doidosok talo ia, malole lenak dae mbukuk kara tatana mala ai leo!’
LUK 23:31 Mete ma hatahorir bisa tao susa-sonak talo ia soa-neu hatahori sala taak kara, hata-bali neu hatahori manggarauk kara?”
LUK 23:32 Neu soldadu leꞌa roo Yesus naa, ara oo leꞌa roo hatahori manggarauk dua boe fo rae hukun tao risa sara sama-sama ro Yesus.
LUK 23:33 Ara losa mamanak esa nade, ‘Lete Langga Duik’. Boe ma ara paku Yesus no hatahori manggarau kaduak kara raa reu sira esa-esak ai ngganggen. Basa de ara rambaririik ai ngganggek kara raa. Ara londa hatahori manggarauk esa neu Yesus boboa konan, ma esa bali neu boboa kiin.
LUK 23:34 [Faik naa, Yesus hule-haradoi nae, “Papa! Lilii heni hatahori iar salan nara, huu ara ta bubuluk hata fo ara taok.”] Basa boe ma soldadur leꞌa lot fo sangga bubuluk see ndia hambu Yesus bua-loꞌan.
LUK 23:35 Hatahori noꞌuk ka mai ranilu numa mamanak naa. Hatahori Yahudi malanggan nara rakatitiik Yesus rae, “Ana tao nasoi-nasoda hatahori laen ena, tehuu ta bisa tao nasoi-nasoda Ndia ao heli-helin. Mete ma Ndia ia, tebe-tebe Karistus, fo Manetualain here memak kana ena, na, elan numa naa fo Ana konda aon numa ai ngganggek naa mai leo.”
LUK 23:36 Soldadur raa oo rakatitiik kana boe. Ara feen ninu oe anggor makeis,
LUK 23:37 ma ara eki rakatitiik kana rae, “Mete ma o ia tebe-tebe hatahori Yahudi manen, na, tao masoi-masoda o aom leo!”
LUK 23:38 Ara surak neu papak esa nae, “Ia, hatahori Yahudi manen.” Boe ma ara paku papak naa neu Yesus langgan ndandaan lain, fo rafada huun hata de sira fee hukun neun.
LUK 23:39 Hatahori manggarauk esa fo neni londak nai Yesus boboan oo, nakatitiik kana boe nae, “O tebe-tebe Karistus, do? Mete ma leo naak, na, tao masoi-masoda ita basa ngga leo!”
LUK 23:40 Tehuu hatahori manggarauk esak naa kaꞌin nae, “Heeh! O ia, ta mamataꞌu Manetualain, do? O hambu hukun mates sama leo Ndia boe.
LUK 23:41 Ita dua ngga hambu hukun ndaa no ita manggaraun. Tehuu hatahori ia ta tao manggarauk hata-hata.”
LUK 23:42 Boe ma ana kokolak seluk nae, “Yesus, ee! Mete ma Papa toꞌu parenda nai Papa mamana parenda-koasan ena, na, masaneda neu au, ee.”
LUK 23:43 Yesus naselu nae, “Au afada memak! Faik ia oo, o maso muni nusa tetuk do inggu temak muu sama-sama mua Au boe.”
LUK 23:44 Faik naa, ledo namatetu ena. Tehuu ledo ta nasaꞌa, de makiu-makahatuk tatana nala mamanak naa, losa liꞌu telu ledo bobon. Numa Uma Huhule-haradoi Ina-huuk, hambu tema ririndi loak neni londak fo babata Manetualain Kama Malalaon Mateꞌen. Medak neu ma, tema ririndik naa sii baꞌen neu dua.
LUK 23:46 Numa mamanak ‘Langga Duik’ naa, Yesus oo eki boe nae, “Papa! Hatematak ia, Au loo lima Au samaneng neu Papa liman.” Ana kokolak basa talo naa, boe ma ketu ani hahaen memak.
LUK 23:47 Hambu komedan soldadu Roma esa, nambariik deka no Yesus ai ngganggen. Neu ana mete-nita Yesus mamaten naa, boe ma ana koa-kio Manetualain nae, “Waa! Hatahori ia tebe-tebe Hatahori dale ndoos, ee!”
LUK 23:48 Neu hatahori noꞌuk kara mana rakabua numa naa mete-rita Yesus mamaten naa, boe ma ara fale dalen nara, ma ara fali ro dale mana sonak kara.
LUK 23:49 Tehuu Yesus hatahorin nara rambariik numa dook ka mai fo mete Yesus mamaten. Inak kara mana tunggan numa Galilea mai losa Yerusalem oo ruma naa boe.
LUK 23:50 Neu Yesus maten ena, boe ma hambu hatahori esa sangga dalak fo nae nakonda Yesus ao-mbaa mamaten numa ai ngganggek mai. Hatahori naa, naden Yusuf, numa kota Arimatea mai. Ndia naa, dalen ndoos, tao hata fo neulauk noꞌuk ka. Ana nahani taa-taa Manetualain natudu parenda-koasan. Ndia oo hatahori esa numa mana parisa dedeꞌa anggama Yahudi mai boe, tehuu ana ta nakaheik no sira neketun fo hukun mates Yesus.
LUK 23:52 Huu ana nae nakonda Yesus ao-mbaa mamaten numa ai ngganggek lain mai, de ana neu nasare aok mbali nggubenor Pilatus fo nae noke nafafaꞌu mamates naa.
LUK 23:53 Pilatus nakaheik kana, boe ma ana neu nakondan. Basa de ana mbomboti mamates naa no tema bangganaꞌuk. Boe ma ana neu nalololi mamates naa neu batu bolok esa, hatahorir bei fo toꞌi ralan dadi rates. Rates naa, bei ta ralololi rita mamates esa nai naa boe na.
LUK 23:54 Yesus mamaten naa, laꞌe-ndaa fai kaliman. Neu Yusuf asa ratoi basa naa, ledo bobok ena. Mete ma ledo tesa ena, na, hatahori Yahudi fai huhule-haradoin mulai ena.
LUK 23:55 Inak kara raa fo mana sama-sama ro Yesus numa Galilea mai, ara oo reu tungga Yusuf boe fo sangga bubuluk rae, ana nambeda mamates naa nai rates bee.
LUK 23:56 Mete ratalolole rala rates naa mamanan, boe ma inak kara raa fali reu sadia rambe no mina kaboo menik. Ledo tesa boe ma, ara hahae tao ue-osa tungga hatahori Yahudi fai huhule-haradoin hohoro-lalanen. Ara rahani fai huhule-haradoik laꞌo seli, dei fo ara rae reu ngganggari rambe neu Yesus ao-mbaa mamaten.
LUK 24:1 Neu fai Menggu lole manggaledon, inak kara raa reni mina kaboo menik ma rambe fo reni Yesus raten reu.
LUK 24:2 Ara losa naa, boe ma mete-rita batu moꞌok fo ara paken tatana rates naa lelesun, loli neni tataik neu ena.
LUK 24:3 De ara dudi reni rates dale reu, tehuu ta mete-rita Yesus ao-mbaa mamaten nai naa ena.
LUK 24:4 De ara ramananauk kana. Medak neu ma, hambu hatahori dua pake bua-loꞌa manggadilak, rambariik reu inak kara raa boboan.
LUK 24:5 Inak kara raa ramataꞌu ralan seli, de rateꞌe langgan nara losa daer. Boe ma hatahori kaduak kara raa ratane rae, “Tao hata de ei mai sangga hatahori masodak nai hatahori mates mamanan?
LUK 24:6 Yesus ta sana ia ena! Ana nasoda fali numa mamaten mai ena. Fama te ei lilii heni hata fo nafada nitan neu Ana bei numa Galilea, do?
LUK 24:7 Te Ana nafada memak nae, neu ko ara seꞌo heni Hatahori Dae-bafo Isi-isik neni hatahori manggarauk liman neu. Boe ma ara paku rakanisan neu ai ngganggek. Tehuu bei-nesan boe ma Ana nasoda fali numa mamaten mai.”
LUK 24:8 Ara ramanene rala naa, dei de rasaneda Yesus kokolan fai bakahulun naa.
LUK 24:9 Boe ma ara fali lai-laik fo rafada Yesus ana nuni kasalahunu esan nara, ma hatahori laen mana tungga Ndia.
LUK 24:10 (Inak kara mana reni rates reu naa, sira Yakobis inan Maria, ma Maria numa nggorok Magdala mai. Boe ma Yohana ma inak laen ruma bali. Inak kara iar ndia reu tui basa iar reu Yesus nedenun nara.)
LUK 24:11 Tehuu neu ana nunin nara ramanene tutuik naa, ara duꞌa rae, inak kara raa kada kokolak lelik.
LUK 24:12 Tehuu Petrus nambadeik, de nalaik neni rates neu. Losa naa, boe ma ana mete neni rates dale neu, tehuu mete-nita kada tema mbomboti mamates. Boe ma ana fali ma duduꞌa nae, “Ia talo bee ia ena, ee?”
LUK 24:13 Faik naa, Yesus ana nunin dua reni nggorok esa reu, nade Emaus. Doon numa kota Yerusalem mai, fama te kilo salahunu esa.
LUK 24:14 Neu ara bei laꞌok naa, ara kola-kola laꞌe-neu Yesus mamaten.
LUK 24:15 Medak neu ma, Yesus mesa kana deka-deka no dua sara, de laꞌok sama-sama no sara.
LUK 24:16 Tehuu ara ta ralela rae, Ndia naa, Yesus, nahuu Lamatuak tao sara fo boso ralela.
LUK 24:17 Boe ma Yesus natane sara nae, “Ei dua ngga kola-kola hata ia, de?” Dua sara ramanene rala naa, boe ma ara rambariik. Matan nara nok bali ara susa ralan seli.
LUK 24:18 Boe ma mana nade Kleopas, natanen nae, “Papa ia, nok bali hatahori beuk fo ta bubuluk hata mandadi bei lai-laik ia numa Yerusalem, do?”
LUK 24:19 Boe ma Yesus natane nae, “Hata naa de?” Ara raselu rae, “Yesus numa Nasaret mai naa! Hatahori naa, tebe-tebe Manetualain mana toꞌu dedeꞌan. Ma Manetualain fee koasa neun fo tao tanda heran mata-matak kara. Ana oo malelan seli nanori hatahorir boe. Basa hatahorir hii ralan seli neun. Ma Manetualain oo hii nalan seli neun boe.
LUK 24:20 Naa te, ai malangga anggama Yahudi malanggan nara ma lasi-lasi hadak kara humu ralan. De ara loo liman neni nggubenor neu fo hukun mates sana. Basa de ara paku rakanisan numa ai ngganggek.
LUK 24:21 Makasososan ai basa ngga mamahena mae, Ndia ia, Karistus fo mai nakamboꞌik ai nusan numa man-parenda Roma mana tuni-ndeni ai mai. Tehuu fai Limak bei lai-laik ia, ara rakanisan ena.
LUK 24:22 Hatematak ia, ai tamba panggananaa. Te bebeik kara ia, ai inam mara mai tui rae, huhuak ka sira reni rates reu.
LUK 24:23 Boe ma ara tui rae, Yesus ao-mbaa mamaten, mopon ena. Boe ma ara mete-rita Manetualain atan numa nusa tetuk do inggu temak mai nafada sara nae, Yesus nasoda fali numa mamaten mai ena!
LUK 24:24 Ai nonoon hida ramanene rala naa, boe ma ralaik reni rates reu. De ara oo mete-rita sama leo inak kara raa nefadan nara boe. Ara oo ta mete-rita Yesus ao-mbaa mamaten boe.”
LUK 24:25 Dua sara tui basa talo naa, boe ma Yesus nahara neu sara nae, “Ei nggoa bebem mara seli! Tao hata de ei ta nau mamahere hata fo Manetualain mana toꞌu dedeꞌan nara rafada memak kana numa lele uluk mai ena!
LUK 24:26 Ara surak ena rae, Karistus naa, muste hambu doidosok talo naa, dei fo Ana simbo hada-horomatak ma koasa ta neni babanggak.”
LUK 24:27 Boe ma Yesus nanori sara, basa hata fo Manetualain mana toꞌu dedeꞌan nara surak laꞌe-neu Karistus ena. Mulai numa baꞌi Musa susuran mai, losa mana toꞌu dedeꞌak laen nara enan.
LUK 24:28 Neu ara sangga losa Emaus, boe ma Yesus tao leo bali Ndia nae laꞌo nakandoo.
LUK 24:29 Tehuu dua sara roke rae, “Papa! Leo taak mua ai leꞌodaen ia, te ledo sangga tesa ena.” Boe ma Yesus maso sama-sama no dua sara uma dale reu.
LUK 24:30 Neu ara ranggatuuk fo rae raꞌa, boe ma Yesus haꞌi nala roti balok esa. De Ana hule-haradoi noke makasi neu Manetualain, boe ma Ana fifiꞌi baꞌe roti naa. Neu Ana soro fee dua sara roti naa,
LUK 24:31 dei de dua sara ralelan rae, naa, Yesus. Tehuu medak neu ma, mopok kana numa matan nara mai.
LUK 24:32 Boe ma dua sara rakokola aok rae, “Awii! Neu tamanene tala Ana kokolak tao manggaledo mana toꞌu dedeꞌak kara susuran, ita tameda nok bali ita dalen nara rombe-rombe.”
LUK 24:33 Faik naa oo, dua sara rambadeik de fali tutik ka reni Yerusalem reu boe. Ara ratonggo ro Yesus ana nuni kasalahunu esan nara, ma hatahori laen mana makabua numa naa.
LUK 24:34 Boe ma ana nunik kara raa rafada dua sara rae, “Memak tebe Lamatuak Yesus nasoda fali numa mamaten mai ena. Bebeik kara natudu aon neu kaꞌa Peꞌu.”
LUK 24:35 Boe ma hatahori kaduak kara raa oo, tui hata mandadi numa dalak boe, losa dua sara bisa ralela Yesus, neu Ana fifiꞌi baꞌe roti.
LUK 24:36 Neu ana nunin nara bei tui-tui laꞌe-neu dedeꞌak naa, medak neu ma, Yesus mesa kana nambariik neu taladan nara. Ana lole haran neu sara nae, “Soda-molek!”
LUK 24:37 Tehuu ara nggengger ma ramataꞌu, nahuu rae hetuk ka maro.
LUK 24:38 Tehuu Yesus kokolak nae, “Tao hata de ei mamataꞌu ma ei dalem mara babati talo ia? Ei ta mamahere mae, Au ia ndia asoda fali numa mamates mai ena, do?
LUK 24:39 Hena mete Au limang ma eing nggara. Ia Au. Loo limam mara mai, fo ei mesa ngga mafaroe leo! Naa fo ei mamahere mae, ia Au, ta maro. Maro ao-mbaa taak, ma ei basa ngga bisa mete-mita Au ao-mbaang, hetu?!”
LUK 24:40 Yesus bei kola-kola talo naa, boe ma Ana natudu sara foa manai liman ma ein.
LUK 24:41 Ara ramahoko ralan seli, nahuu Yesus nasoda fali numa mamaten mai ena. Ara pangganaa, nahuu ara ta bisa bubuluk, talo bee de bisa dadi talo naa. Boe ma Yesus natane sara nae, “Ei miꞌa hata nai ia, ee?”
LUK 24:42 Boe ma ara loo fee Yesus iꞌa neni tunuk bibiak esa.
LUK 24:43 Yesus simbo nala iꞌak naa, de Ana naꞌan numa matan nara.
LUK 24:44 Boe ma Ana kokolak nae, “Talo bee? Ei bei masaneda Au sama-sama ua ei ndia fai bakahulun? Au afada ei neu faik naa ae, basa hata fo Manetualain mana toꞌu dedeꞌan nara surak laꞌe-neu Au naa, ana muste mori-dadi. Fo ndia numa baꞌi Musa mai, ma mana toꞌu dedeꞌak laen nara, ma numa buku Sosoda Kokoa-kikiok mai.”
LUK 24:45 Basa boe ma Ana tao namaneu duduꞌan nara fo ara bubuluk no tetuk Manetualain Susura Malalaon sosoa-ndandaan.
LUK 24:46 Ana kokolak seluk nae, “Manetualain mana toꞌu dedeꞌan nara surak ela rae, Karistus fo Manetualain nadenun mai naa, muste hambu doidoso mata-matak kara, basa boe ma maten. Tehuu neu bei-nesan Ana nasoda fali numa mamaten mai. Te ara surak basa-basa sara ena, na!
LUK 24:47 Hatematak ia Au fee koasa fo ei meni Hara Lii Malole ia neni basa hatahori nusa-nusak kara miu, mulai numa Yerusalem ia neu. Mafada sara mae, hatahori mana manaku sala-singgon ma fali neni Manetualain neu, neu ko Manetualain koka heni basa sala-singgon nara.
LUK 24:48 Ei muste dadi miu sakasii fo tui-bengga mae, Au hambu doidosok, boe ma mate, basa de asoda fali numa mamates mai.
LUK 24:49 Neu ko Au adenu Dula-dale Malalaok fo Au Amang helu-bartaan ena. Tehuu ei muste mahani nai kota Yerusalem ia, losa simbo koasa numa nusa tetuk do inggu temak mai.”
LUK 24:50 Faik esa, Yesus noo sara reni kota deak reu. Neu ara deka ro nggoro Betania, boe ma Ana botik liman, de kokolak fee sara babaꞌe-babatik.
LUK 24:51 Ana bei kola-kola fee babaꞌe-babatik talo naa, boe ma Ana hene neni nusa tetuk do inggu temak neu.
LUK 24:52 Basa sara mete-rita naa, boe ma ara sendek luu-langgan nara fo rakaluku-rakatele neun. Basa de ara fali reni Yerusalem reu ro dalen nara ramahoko ralan seli.
LUK 24:53 Tungga faik, ara rakabua nai Uma Huhule-haradoi Ina-huuk fo soꞌuk kokoa-kikiok neu Manetualain. Papa Teofilus! Au tutuing losa ia dei. Soda-molek, Lukas
JOH 1:1 Makasososan, Manetualain Dedeꞌa-kokolan hambun ena. Manetualain Dedeꞌa-kokolan naa, ndia Hatahori esa. Hatahori naa, sama-sama no Manetualain. Ma Ndia oo, ndia Manetualain boe.
JOH 1:2 Neu lalai no dae-inak bei ta dadi, Hatahori naa hambu memak kana ena, sama-sama no Manetualain.
JOH 1:3 Manetualain nakadadadik basa-basan, pake Ndia Dedeꞌa-kokolan naa. Ta hambu buas esa dadi boe na, mete ma Hatahori naa ta adu sana.
JOH 1:4 Ndia naa, masodak oka-huun. Dadi hatahori mana hambu masodak tetebes, ara rasoda numa Ndia mai. Ana oo sama leo Manggaledok mana masaꞌak boe, fo hatahori mana leo-laꞌo nai Manggaledok naa, bisa mete-nita ma nalela.
JOH 1:5 Manggaledok naa, saꞌan tora maso neni makiuk neu; ma makiuk ta bisa nakatataka nala Manggaledok naa. Huu Manggaledok naa, nasaꞌa nakandoo.
JOH 1:6 Hambu hatahori laen esa, nade Yohanis. Manetualain oo nadenun boe,
JOH 1:7 fo dadi sakasii fo mana nafada hatahorir laꞌe-neu Manggaledok naa, mita fo basa hatahorir bisa ramahere neu Manetualain nahuu Yohanis kokolan naa.
JOH 1:8 Yohanis ia, ta ndia Manggaledok naa. Tehuu Manetualain nadenun fo nafada hatahori laꞌe-neu Manggaledok naa.
JOH 1:9 Hatahori fo mana dadi Manggaledok tetebes naa nae neni dae-bafok ia mai. Manggaledok naa, tao nala basa hatahorir mete-rita basa hata fo tetebes sara.
JOH 1:10 Leo mae Ana nakadadadik basa-basan manai dae-bafok ia ena, tehuu hatahorir marai dae-bafok ia ta ralela sana, neu Ana mai leo nai ia.
JOH 1:11 Leo mae Ana mai leo no Ndia hatahori heli-helin nara, tehuu ara ta nau simbok kana.
JOH 1:12 Leo mae talo naa, tehuu basa hatahorir mana simbok ma ramahere neun, Ana fee sara haak fo dadi reu Manetualain anan nara.
JOH 1:13 Naa, sama leo sira neni bonggi seluk kara ena. Tehuu sira neni bonggi beun nara raa, ta sama leo hatahori bonggi kakana ana. Ma ta numa touk esa hihiin mai, fo hambu tititi-nonosik. Te ara dadi reu Manetualain anan nara, nahuu Manetualain ndia fee sara masoda beuk naa.
JOH 1:14 De ‘Manetualain Dedeꞌa-kokolan’ naa oo, neni bonggik dadi neu hatahori dae-bafok boe. Ana nasoda nai ita taladan. Ita mete-tita Ndia ta neni babanggan. Ndia ta neni babanggak talo naa, nahuu Ndia naa, Manetualain Ana kise muꞌen. Ana hii natudu Ndia dale susuen neu ita, nahuu Ndia hada-tataon memak leo naak. Ma basa hata fo Ana kokolak laꞌe-neu Manetualain, memak tetebes.
JOH 1:15 Yohanis naa, nafada laꞌe-neu Hatahori ia. Ana eki nae, “Nenene, ee! Ndia ia, ndia au tuik ena ae, ‘Neu ko Hatahori esa nae mai. Ndia naa, ta neni babanggak lena heni au. Au bei ta neni bonggik, te Ana nakahuluk ena na!’ ”
JOH 1:16 Yohanis kokolak talo naa, nahuu Hatahori naa hii nalan seli natudu Ndia dale susuen. Ma Ana tao laꞌi-laꞌik kana talo naa nakandoo fee ita basa ngga.
JOH 1:17 Lele uluk, baꞌi Musa ndia nakonda Manetualain Hohoro-lalanen neu ita bei-baꞌin nara. Tehuu hatematak ia Hatahori naa, ndia Yesus Karistus, ndia natudu Manetualain dale susuen neu ita. Ma basa hata fo Ana kokolak laꞌe-neu Manetualain, memak tetebes.
JOH 1:18 Ta hambu tita hatahori esa boe na, mete-nita tetebes Manetualain. Tehuu Ndia Ana kise muꞌen fo Ana suek naa, ndia natudu ita Manetualain dalen ena. Kanak naa, hambun nai Ndia Aman boboan. Huu Ndia oo ndia Manetualain boe.
JOH 1:19 Laꞌe esa, hatahori Yahudi malanggan nara marai Yerusalem radenu malangga anggama hida, ma hatahori hida ruma leo Lewi fo mana rasiꞌe raono-lalau nai Manetualain Uma Huhule-haradoi Ina-huun mai. Ara reni lee Yarden boboan seri reu, fo ratane Yohanis Mana Saranik rae, “O ia, Karistus fo Manetualain helu-bartaa ena nae nadenun mai, do?” Boe ma ana nafada sara nae, ndia naa, see.
JOH 1:20 Ana manaku no ledo-ledo nae, “Taa. Karistus ta ndia au.”
JOH 1:21 Boe ma ara ratane seluk bali rae, “Mete ma talo naa, o ia, see? Baꞌi Elia, do?” Ana naselu nae, “Taa boe.” Ara ratane rakandoo bali rae, “Boso losak o ia, Manetualain mana toꞌu dedeꞌan laen, do?” Ana naselu nae, “Taa boe.”
JOH 1:22 Basa boe ma ara ratane bali rae, “Mete ma talo naa, o ia, see? Mafada dei! Huu ai muste fali miu mafada malanggan nara mana madenu ai. Tulun, dei!”
JOH 1:23 Boe ma ana kokolak tungga hata fo baꞌi Yesaya surak nita nae, “Au ia, ndia hatahori mana bolu nai mamana nees nae, ‘Basa hatahorir sadia tao neulau dalak kara, fo simbok Lamatuak mamain! Tao matetu dalak kara fo soru Ndia.’ ”
JOH 1:24 Nai hatahorir maruma Yerusalem mai taladan nara raa, hambu hatahori hida oo ruma partei anggama Farisi mai boe.
JOH 1:25 De ara ratane Yohanis rae, “Talo ia. Mete ma o ta ndia Karistus, ta baꞌi Elia, ma ta Manetualain mana toꞌu dedeꞌan naa, tao hata de o sarani hatahorir? O hambu haak numa bee mai?”
JOH 1:26 Boe ma Yohanis naselu nae, “Au ia sarani hatahorir pake kada oe mesa kana. Tehuu hambu Hatahori esa nai ei taladam mara ena, te ei ta malela sana.
JOH 1:27 Ndia naa, ta neni babanggak lena heni au, leo mae au ndia mulai anori akahuluk hatahorir. Leo mae dadi kada Ndia hatahori neondan oo au ta andaa boe.”
JOH 1:28 Basa dedeꞌak bebeik kara iar dadi numa Betania, numa lee Yarden boboan seri. Yohanis no ana nunin nara sarani hatahorir ruma naa.
JOH 1:29 Neu beꞌe-mai, boe ma Yohanis mete-nita Yesus laꞌok neni ndia mai. De ana kokolak nae, “Mete neu Hatahori manai naa dei! Ndia naa, Manetualain Bibi lombo Anan mana dadi tunu-hotuk fo koka heni hatahorir marai dae-bafok ia sala-singgon nara.
JOH 1:30 Hatahori ia, ndia au afada neu ei afik ka ae, ‘Neu ko hambu Hatahori esa sou mai. Ndia naa, ta neni babanggak lena heni au, nahuu Ana mai nakahuluk numa au mai ena.’
JOH 1:31 Fai uluk au ta bubuluk, mete ma Ndia naa, Karistus. Leo mae talo naa, tehuu au bubuluk ena, au muste akalelelak kana neu hatahori Israꞌel asa. Huu naa de au mai fo sarani hatahorir pake oe.
JOH 1:32 Manetualain nadenu au fo sarani hatahorir pake oe. Ana oo nafada au boe nae, ‘Neu ko Hatahori esa nae neni o neti. Boe ma Au Dula-daleng konda neu leo nai Ndia. Hatahori naa, neu ko ndia neni Au Dula-dale Malalaong, fo fee koasa neu Au hatahoring nggara.’ Neu Hatahori naa mai, au bei ta bubuluk ae, Ndia naa ndia Manetulain nafada memak neu au. Tehuu neu au mete-ita Manetualain Dula-dalen konda numa lalai mai sama leo mbui lunda sina tee neu Ndia lain, dei de au bubuluk ae, ‘Ndia ia, ndia Hatahori naa!’
JOH 1:34 Au mete-ita dedeꞌak kara raa unik au mata deꞌe heli-heling. De au afada ei ae, ‘Hatahori mana maik naa, ndia Manetualain Anan!’ ”
JOH 1:35 Neu beꞌe-mai, Yohanis nambariik no ndia ana nunin dua.
JOH 1:36 Neu Yohanis mete-nita Yesus laꞌok nesik naa, ana nafada nae, “Mete dei! Ndia naa, Manetualain Bibi lombo Anan fo neu ko dadi neu tunu-hotuk!”
JOH 1:37 Basa boe ma Yohanis ana nuni kaduan nara fo mana nenene kokolan naa laꞌo elan, de laꞌok tungga Yesus.
JOH 1:38 Boe ma Yesus leuk dea, de mete-nita sara tungga Ndia. De Ana natane sara nae, “Talo bee? Parluu, do?” Ara ratane rasafalin rae, “Rabi leo nai bee?” (Nai sira dedeꞌa Aram, ‘Rabi’ naa sosoa-ndandaan nae, ‘Papa Meser’.)
JOH 1:39 Yesus naselu nae, “Mai fo mete-mita no ei mata heli-helim leo.” Boe ma ara tunggan, de mete-rita Ndia mamana leleon. Neu ara losa, nai rarain liꞌu haa ledo bobon. De ara leo ro Yesus losa ledo tesa.
JOH 1:40 Numa hatahori kaduak kara raa mai fo mana nenene Yohanis kokolan, de laꞌok tungga Yesus naa, esa nade, Anderias. Ndia ia, Simon Petrus fadin.
JOH 1:41 Anderias fali losak ka boe ma neu sangga kaꞌan Simon, de nae, “Kaꞌa, ee! Ai matonggo mia Mesias ena!” (Nai sira dedeꞌan, ‘Mesias’ sosoa-ndandaan nae, ‘Karistus, ndia Hatahori fo Manetualain helu-bartaa memak kana numa lele uluk mai ena, fo nae nadenun mai.’)
JOH 1:42 Basa de ana nuni no kaꞌan neni Yesus neu. Yesus mete-nita Simon, boe ma Ana nafada nae, “O ia, Simon. O amam ndia, Yohanis. Mulai numa hatematak ia neu, hatahorir roke o, ‘Kefas’ ” (Sosoa-ndandaan sama no ‘Petrus’, ndia ‘batu’.)
JOH 1:43 Numa naa oo hambu hatahori laen esa boe, nade Felipus. Ndia nggoro-tadu huun, ndia Betseda. Petrus no Anderias oo ruma naa mai boe. Neu beꞌe-mai, boe ma Yesus naketu nae neni profensi Galilea neu. Ana neu natonggo no Felipus, de Ana noken nae, “Mai, tungga Au fo dadi muu Au hatahoring!”
JOH 1:45 Basa de Felipus neu sangga Natanel, boe ma nafadan nae, “Kaꞌa, ee! Ai matonggo mia Hatahori naa, fo baꞌi Musa surak kana nai Manetualain Hohoro-lalanen dale ena. Manetualain mana toꞌu dedeꞌan nara lele uluk oo, surak laꞌe-neu Hatahori ia boe. Naden Yesus numa nggoro Nasaret mai. Aman, nade Yusuf.”
JOH 1:46 Tehuu Natanel naselu nae, “Hatahori Nasaret!? Awii! Ta hambu hata esa boe na fo neulauk kalua numa naa mai!” Boe ma Felipus nae, “Weeh! Boso talo naa. Mai fo o mesa ngga mete-mita leo!”
JOH 1:47 Neu Natanel laꞌok mai, Yesus mete-nita memak kana ena, boe ma nae, “Ndia ia, hatahori ndoos! Huu nai dalen dale, ta hambu puputa-papatak. Ndia ia, hatahori Israꞌel isi-isik!”
JOH 1:48 Natanel natane nae, “Talo bee de Lamatuak nalela au?” Yesus naselu nae, “Talo ia. Au mete-ita o ena, neu o bei numa ai huuk naa taen. Neu oras Felipus bei ta neti nanggou o.”
JOH 1:49 Boe ma Natanel manaku nae, “Papa Meser ia, tebe-tebe Manetualain Anan! Ma Papa oo ai hatahori Israꞌel Manen boe!”
JOH 1:50 Yesus natanen nae, “Ndondoon naa o ia, mamahere neu Au nahuu bebeik kara ia Au ae, ‘Au mete-ita o, neu o bei numa ai huuk naa taen,’ do? Masaneda, te neu ko o mete-mita dedeꞌak ta neni babanggak kara bali!
JOH 1:51 Tetebes! Au afada memak. Neu ko ei mete-mita lalai natahuka. Boe ma Manetualain atan nara marai nusa tetuk do inggu temak konda-hene dae-lain nai Au matang. Te Au ia, Hatahori Dae-bafo Isi-isik.”
JOH 2:1 Neu bei-nesan, hambu feta kabin numa nggoro Kana, nai profensi Galilea. Yesus inan tungga.
JOH 2:2 Yesus no ana nunin nara oo hambu nonokek boe. De ara oo reu boe.
JOH 2:3 Tehuu doo-doo boe ma oe anggor manai mamana feta mulai basan. De Yesus inan nafadan nae, “Tulun, dei! Te sira oe anggor basan ia ena.”
JOH 2:4 Tehuu Yesus naselu nae, “Mama. Tao hata de mama nau Au ndia koladu? Au fain bei ta nandaa ia.”
JOH 2:5 Tehuu inan nafada neu hatahori mana maue-osar marai naa nae, “Nenene, ee! Ana nadenu ei tao hata, na, kada tao tungga leo.”
JOH 2:6 Numa naa, hambu nggusi nee, fo hatahorir tao sara numa batu mai. Nggusi esa naa natandee oe fama te liter 75-115. Hatahori Yahudir rasiꞌe pake oe numa nggusi leo naak mai, fo tao ralao aok tungga sira anggaman hohoro-lalanen.
JOH 2:7 Boe ma Yesus nafada hatahori mana maue-osar raa nae, “Miu haꞌi oe fo madai neu nggusir raa.” De ara radai losa sofe sara tetu-tetu.
JOH 2:8 Boe ma Ana nafada sara nae, “Ndui mala faa, fo menin neni malangga feta neu.” De ara tao tungga.
JOH 2:9 Losa naa, malangga feta naa soba sudik oe naa. Ta bubuluk te oe naa dadi anggor ena! Ana panggananaa, huu ana ta bubuluk ara hambu anggor naa numa bee mai. (Tehuu hatahori mana maue-osar raa bubuluk.) Boe ma ana nanggou nala baroit touk.
JOH 2:10 De ana nae, “Talo ia. Ita siꞌen, tenu umak baꞌe oe anggor neulaun lenak nakahuluk. Mete ma hatahorir rinu noꞌuk ka ena, dei fo ana kalua anggor nomer kaduan. Tehuu o tao masafalin. O kalua anggor nomor kaduan nakahuluk, basa dei de anggor neulaun lenak nakahitok!”
JOH 2:11 Dedeꞌak naa dadi numa nggoro Kana, manai profensi Galilea. Naa, makasososan fo Yesus tao tanda heran fo hatahorir mete-ritan. Ana natudu Ndia ta neni babanggan talo naa, boe ma ana nunin nara ramahere neun.
JOH 2:12 Basa boe ma Yesus, Ndia inan, Ndia fadin nara, ma Ndia ana nunin nara konda reni kota Kapernaum reu. Tehuu ara leo numa naa kada faik hidak ka.
JOH 2:13 Neu hatahori Yahudir fai malolen Paska deka-deka mai ena, Yesus hene neni kota Yerusalem neu.
JOH 2:14 Numa Uma Huhule-haradoi Ina-huuk bebelan, Yesus mete-nita hatahorir raseꞌo sapi, bibi lombo, ma mbui lunda sina fo hatahorir hasa, fo paken dadi neu tunu-hotuk. Numa naa oo hambu mei fo hatahorir paken soa-neu Manetualain nai Uma Huhule-haradoi Ina-huuk naa, tehuu hatahorir pake mei naa dadi neu mamana tuka doik boe.
JOH 2:15 Boe ma Ana haꞌi nala tali fifiik hida, de Ana iꞌin dadi neu fifiuk. Basa de Ana husi-mbuu heni basa sara ruma uma bebelan naa mai. Ana oo foo heni basa sapir ma bibi lombor lalaꞌen boe. Ana fae nalengga-natono meir, ma mboꞌa sasarak heni doik kara raa.
JOH 2:16 Boe ma Ana naonda hatahori mana seꞌo mbui lunda sinar nae, “Baꞌu kalua heni basa buas sara iar ruma ia mai! Mamanak ia, ta pasar! Boso tao Au Amang Uman dadi neu mamana danggan!”
JOH 2:17 Boe ma ana nunin nara rasaneda Manetualain Susura Malalaon surak nae, “Au sue-lai alan seli neu Manetualain Uman. Huu naa de au daleng dere-dere hiek fo anea ndia nade malolen.”
JOH 2:18 Basa de hatahori Yahudi malanggan nara radenu Yesus rae, “Mete ma O memak maena haak husi-mbuu hatahorir talo naa, na, matudu tanda heran esa neu ai fo dadi bukti!”
JOH 2:19 Yesus naselu nae, “Mete ma ei makalulutu mamana malalaok ia, neu ko bei-nesan, Au ambadedeik falik kana.”
JOH 2:20 Tehuu ara rasabara rae, “Hambu nai bee? Te hatahorir rambadedeik Uma Huhule-haradoi Ina-huuk ia doon teuk haa hulu nee. Tao hata de O duꞌa mae, O parluu kada faik telu a fo mambadedeik falik kana?!”
JOH 2:21 Tehuu ara ta ralela, mete ma Yesus kokolak laꞌe-neu Ndia ao-inan, fo sama leo mamana malalaok esa.
JOH 2:22 Dadi mai fai bakadean, neu Yesus mate ena, basa de nasoda fali numa mamaten mai, dei de ana nunin nara rasaneda hata fo Ana nafada memak neu sara ena. Boe ma ara ramahere neu hata fo Manetualain Susura Malalaon surak numa lele uluk mai, ma hata fo Yesus nafada memak neu sara ena.
JOH 2:23 Yesus leo taak numa kota Yerusalem, fo tungga fai malole Paska numa naa. Boe ma hatahori noꞌuk ka mete-rita tanda heran nara fo Ana taok, de ara ramahere neun.
JOH 2:24 Tehuu Yesus ta namahere sara, nahuu Ana bubuluk basa hatahorir dale kuru-eron nara ena. Ana ta parluu hatahorir rafadan, nahuu Ndia mesa kana bubuluk memak hatahori dae-bafok nenggetuu-nemberiin ena.
JOH 3:1 Hambu hatahori esa numa partei anggama Farisi mai, nade Nikodemus. Ndia ia, hatahori Yahudi meser ina-huun esa.
JOH 3:2 Laꞌe esa, ana mai neu leꞌodaek fo natonggo no Yesus. Boe ma ana nae, “Papa Meser! Ai bubuluk mae, Manetualain ndia nadenu Papa fo manori ai. Tanda heran nara fo Papa taok kara raa ratudu bukti rae, Manetualain ndia fee koasa neu Papa. Mete ma ta talo naa, na, neu ko tanda heran nara raa ta bisa dadi.”
JOH 3:3 Yesus naselu nae, “Tebe! Ma Au oo, ae afada talo ia boe: mete ma hatahori ta neni bonggi falik, na, ana ta bisa dadi neu Manetualain hatahorin.”
JOH 3:4 Boe ma Nikodemus natane nae, “Tehuu talo bee de hatahori bisa neni bonggi falik talo naa, mete ma ana namoꞌo mamais ena!? Ana ta bisa maso fali neni inan taꞌin dale neu laꞌe kaduan, basa fo inan bonggi seluk kana. Ta bisa dadi, hetu!?”
JOH 3:5 Yesus naselu nae, “Tebe! Tehuu Au afada talo ia: hatahori muste bonggin nenik oe fo dadi lolo-laok, ma bonggin nenik dula-dalek fo dadi hatahori beuk. No dalak naa, dei fo ana bisa maso dadi neu Manetualain hatahorin.
JOH 3:6 Hatahori dae-bafok bonggin numa hatahori dae-bafok mai, tehuu hatahori dula-dalen bonggi beuk kana numa Manetualain Dula-dalen mai.
JOH 3:7 Boso heran, mete ma Au afada ae, ‘Ei muste neni bonggi beuk, fo hambu masoda beuk’.
JOH 3:8 Ita takasasamak kana no anin. Anin fumbu tungga ndia hihiin. Ita bisa tamanene liin, tehuu ta bubuluk ana numa bee mai, ma nae bee neu. Basa hatahorir fo neni bonggi beuk numa Manetualain Dula-dalen mai oo leo naak boe. Ita bisa mete-tita Manetualain Dula-dalen tao hatahorir dadi beuk ena, mae ita ta talela talo bee de dedeꞌak naa bisa dadi.”
JOH 3:9 Boe ma Nikodemus natane nae, “Talo bee de bisa dadi talo naa?”
JOH 3:10 Yesus naselu nae, “Wee, kaꞌa. Kaꞌa dadi neu hatahori Israꞌel meser ina-huun ena. Tao hata de kaꞌa ta nalela dedeꞌak bebeik kara iar?
JOH 3:11 Au afada hata fo tetebes. Au ma Au hatahoring nggara, malela dedeꞌak bebeik kara iar. Huu ai dadi sakasii laꞌe-neu dedeꞌak kara fo ai mete-mita no ai mata heli-helin nara ena. Tehuu ei ta simbok no malole ai kokolan.
JOH 3:12 Neu Au afada laꞌe-neu hata mandadik kara rai dae-inak, ei ta nau mamahere. Hata-bali mete ma Au afada laꞌe-neu hata mandadik kara rai lalai. Neu ko lena-lenak bali ei ta mamahere!
JOH 3:13 Ta hambu hatahori esa boe na hene neu nasare mbali Manetualain nai lalai. Kada Au mesa ngga, ndia Hatahori Dae-bafo Isi-isik ia fo mana konda numa Ndia mai.
JOH 3:14 Lele uluk numa mamana nees, baꞌi Musa londa mengge riti esa neu ai lain, fo basa hatahorir mete-ritan, boe ma ara hambu sodak. Dedeꞌak leo naak oo muste dadi soa-neu Au, Hatahori Dae-bafo Isi-isik ia boe. Neu ko ara rae londa Au neu ai lain,
JOH 3:15 fo basa hatahorir mana ramahere neu Au, hambu masodak tetebes ta mana ketuk.
JOH 3:16 Huu Manetualain sue nalan seli neu basa hatahorir marai dae-bafok ia, de Ana nadenu Au, Ndia Ana kise muꞌen ia, mita fo basa hatahorir mana ramahere neu Au, ta lenggo feꞌe numa Manetualain mai. No dalak naa, ara hambu masodak tetebes ta mana ketuk.
JOH 3:17 Manetualain ta nadenu Au, Ndia Anan neni dae-bafok ia mai, fo huku-doki hatahorir. Tehuu Ana nadenu Au fo tao asoi-asoda hatahorir numa sala-singgon nara huku-dokin mai.
JOH 3:18 Manetualain ta hukun hatahori mana namahere neu Au. Tehuu Ana naketu memak huku-dokik soa-neu hatahori ta mana namahere neu Au, nahuu hatahori naa ta namahere neu Au, ndia Manetualain Ana kise muꞌen ia.
JOH 3:19 Talo ia: Manetualain haitua manggaledok mai ena fo nasaꞌa nai dae-bafok ia. Tehuu hatahori hihiin lenak leo-laꞌo nai makiu-makahatuk. Ara ta nau leo-laꞌo nai manggaledok, nahuu sira tatao-nonoꞌin, ta neulauk. Huu naa de Manetualain nae hukun asa.
JOH 3:20 Huu basa hatahorir mana tao ta neulauk kara, mburuk ro manggaledok naa. Ara ta hii manggaledok naa nasaꞌa neu sara, mita fo manggaledok naa boso lufa nakaholak manggaraun nara.
JOH 3:21 Tehuu hatahorir mana tao tungga hata fo ndoos, ara mai, mita fo manggaledok naa nasaꞌa neu sara. Huu manggaledok naa natudu nae, sira tao tungga Manetualain hihii-nanaun.”
JOH 3:22 Basa naa, Yesus no Ndia ana nunin nara kalua numa kota Yerusalem mai, de ara leo taak numa dae Yudea. Numa naa, ara sarani hatahorir.
JOH 3:23 Faik naa, Herodes asa bei ta sese Yohanis Mana Saranik neni bui dale neu. De Yohanis oo sarani hatahori numa nggoro Ainon, deka nai nggorok Salim boe, nahuu hambu oe noꞌuk ka nai naa. Boe ma hatahorir reni Yohanis reu rakandoo fo ana sarani sara.
JOH 3:25 Hatahori anggama Yahudir raena hadak esa fo tao ralao aok, dei fo ara bole hule-haradoi. Numa naa, hambu hatahori Yahudi esa, nadedeꞌa no Yohanis ana nunin nara laꞌe-neu dala-hadak naa.
JOH 3:26 De ara reni Yohanis mai fo rafada rae, “Papa Meser! Masaneda do taa, neu Hatahori fo mana sangga papa numa lee Yarden boboan seri naa, fo papa nafadak nae, Ndia naa, ndia Karistus? Ana oo sarani hatahorir boe! De ta hambu reni ai mai bali! Huu basa hatahorir reni kada Ndia reu!”
JOH 3:27 Yohanis naselu nae, “Talo ia! Hatahorir ta bisa tao hata-hata, mete ma Manetualain nai nusa tetuk do inggu temak, ta nasosoi dalak feen.
JOH 3:28 Ei mesa ngga mamanene ena, au afada no ledo-ledo ae, ‘Au ia, ta ndia Karistus naa, fo ita tahani a neun. Tehuu Manetualain nadenu au akahuluk, fo asosoi dalak soa-neu Karistus. Talo kada naa leo!’
JOH 3:29 Lololek, baroit touk naena baroit inak. Tehuu baroit touk sakasiin, fo mana nambariik no ndia, dalen namahoko mete ma ana bubuluk baroit touk namahoko. Yesus naa, sama leo baroit touk esa. Ma au ia, sama leo Ndia sakasiin. Huu naa de hatematak ia, au daleng namahoko nalan seli.
JOH 3:30 Nenenin lenak ndia, Ana muste tamba nakandoo dadi neu hatahori moꞌo-inahuuk, ma elan fo au boe kuran akandoo dadi hatahori kadiꞌi anak.”
JOH 3:31 Yohanis tuti kokolan bali nae, “Ana konda numa Manetualain manai lalai mai, huu naa de Ndia moꞌon lena heni basa-basan. Tehuu au numa kada dae-bafok ia mai, huu naa de au sama leo basa hatahorir marai dae-bafok ia. Au kokolak laꞌe-neu basa hata mandadik tungga faik rai dae-bafok ia. Tehuu mana konda numa Manetualain manai lalai mai naa, neu ko Ndia ta neni babanggan lena heni basa-basan.
JOH 3:32 Ana nafada laꞌe-neu hata fo Ndia mesa kana mete-nita ma namanenen ena. Tehuu hatahorir ta simbok no malole hata fo Ana nafadak ena.
JOH 3:33 Mete ma hatahori simbok no malole hata fo Hatahori manuma lain mai naa nafadan ena, naa oo natudu bukti boe nae, ana namahere Manetualain kokolan naa, tetebes.
JOH 3:34 Hatahori fo Manetualain nadenun mai naa, nafada Manetualain hara hehelun. Huu Manetualain fee Ndia Dula-dalen fo koasan ta kala basak neun.
JOH 3:35 Huu Amak manai nusa tetuk do inggu temak, sue nalan seli neu Anan. Ma Ana loo lima basa-basan neu Kanak naa liman.
JOH 3:36 De hatahori fo mana namahere neu Kanak naa, ara hambu masodak tetebes ta mana ketuk. Tehuu hatahori fo ta mana namahere neun, ma ta tao tungga Ndia hara hehelun, ara ta hambu masodak naa, huu Manetualain natudu nakandoo Ndia nasan fo huku-doki sara.”
JOH 4:1 Mete ma takasasamak Yohanis no Yesus, na, Yesus ana nunin nara mulai sarani hatahori mana tungga Ndia noꞌun lenak. Yesus mesa kana ta sarani hatahori, kada Ndia ana nunin nara ndia sarani hatahorir. Neu Yesus bubuluk nae, hatahori numa partei anggama Farisi mai ramanene Yesus asa sarani hatahorir noꞌun lenak ena,
JOH 4:3 boe ma Yesus no ana nunin nara laꞌo ela dae Yudea, fo fali reni profensi Galilea reu.
JOH 4:4 Tehuu ara muste laꞌok resik profensi Samaria fo tora losa Galilea.
JOH 4:5 Ara laꞌok, boe ma ara losa kota esa nai Samaria, nade Sikar, deka-deka nai dae fo baꞌi Yakob feen neu ndia anan Yusuf.
JOH 4:6 Nai naa, hambu oe matak esa, nade ‘Yakob oe matan’. Ledo namatetu, boe ma Yesus asa losa mamanak naa. Ana nameda manggu numa sira lalaꞌon mai, de Ana nanggatuuk hahae aon numa oe matak naa. Basa de Ndia ana nunin nara laꞌo ela mesa kana neu naa, de ara maso reni kota reu hasa nanaꞌak. Boe ma inak esa numa kota naa mai, fo neu nala oe nai oe matak naa. Yesus noken nae, “Kaꞌa inak. Au bisa oke oe nininuk faa dei do?”
JOH 4:9 Tehuu inak naa nggengger, nahuu hatahori Yahudi ta nasiꞌe nakabubua no hatahori Samaria. De ana natane nasafali mbali Yesus nae, “Wee! Toꞌo hatahori Yahudi. Au ia, hatahori Samaria. Ta sala ia, do? Toꞌo noke ninu numa au mai?”
JOH 4:10 Yesus nafada nae, “Talo ia. Mete ma kaꞌa inak bubuluk hata fo Manetualain nae fee neu basa hatahorir, ma bubuluk Au mana noke nininuk ia, See, neu ko kaꞌa inak noke nasafali oe numa Au mai. Boe ma Au fee oe mana neni masodak.”
JOH 4:11 Inak naa nae, “Toꞌo ndundui leꞌa oen taa. Ma oe matak ia oo demak ka boe. Numa bee mai, Toꞌo nae hambu oe mana neni masodak naa? Do, oe naa nai bee bali?
JOH 4:12 Bisa dadi talo bee fo Toꞌo ta neni babanggan lena heni ai baꞌin Yakob! Ana ndia laꞌo ela oe matak ia soa-neu ai. Ma ndia mesa kana oo ninu numa oe matak ia mai boe. Ndia anan nara ma bandan nara oo leo naak boe.”
JOH 4:13 Yesus naselu nae, “Masaneda, ee! Hatahori mana rasiꞌe rinu numa oe matak ia mai, neu ko ara dale mada seluk bali.
JOH 4:14 Tehuu hatahori mana ninu oe fo Au feek naa, neu ko ana ta dale mada seluk bali. Huu oe fo Au feek naa, sama leo oe matak esa fo nasapura dea mai. Oe naa, neni masodak tetebes ta mana ketuk.”
JOH 4:15 Inak naa nae, “Mete ma talo naa, na, Toꞌo fee au oe naa leo, mita fo au ta dale mada bali! No dalak naa, au hae mai ndui oe laꞌi-laꞌik kana nai ia bali.”
JOH 4:16 Boe ma Yesus nadenun nae, “Talo ia. Kaꞌa inak fali muu ngga dei. Manggou kaꞌa inak saon, basa naa fali ia mai.”
JOH 4:17 Ana naselu nae, “Tehuu au sao taak.” Boe ma Yesus nae, “Tebe. O kokolak ndoos. Huu o sao mita touk lima. Ma hambuk hatematak ia oo, ta o saom boe.”
JOH 4:19 Boe ma inak naa nae, “Awii! Hatematak ia au bubuluk ena, Toꞌo ia, Manetualain mana toꞌu dedeꞌan esa.
JOH 4:20 Dadi au ae atane. Ai hatahori Samaria bei-baꞌin nara rakaluku-rakatele neu Manetualain nai letek Gerisim. Tehuu ei hatahori Yahudir mae, mete ma nau makaluku-makatele neu Manetualain, na, basa hatahorir muste reni Yerusalem reu. Tungga Toꞌo, mana ndaak naa, ndia bee?”
JOH 4:21 Yesus naselu nae, “Kaꞌa inak mamahere neu Au kokolang ia, huu ia tetebes. Mae makaluku-makatele neu Amak Manetualain nai letek ia do, nai Yerusalem do, neu ko losa fain, dua sara nanalan ta bali.
JOH 4:22 Ei hatahori Samariar ta bubuluk noꞌuk ka laꞌe-neu ei makaluku-makatele neu see. Tehuu ai hatahori Yahudir bubuluk noꞌuk ka laꞌe-neu Manetualain fo ai makaluku-makatele neun. Huu Ana nau pake ai fo sosoi dalak, mita fo hatahorir bisa hambu masoi-masodak numa sira sala-singgon nara mai.
JOH 4:23 Neu ko losa fain, ndia mulai numa hatematak ia mai ena, hatahorir mana makaluku-makatele no ndoos neu ita Aman manai nusa tetuk do inggu temak, na, ara rakaluku-rakatele neu Ndia, tungga Ndia Dula-dalen ma tungga hata fo ndoos. Amak manai nusa tetuk do inggu temak, hii hatahori matak leo naak fo mana nakaluku-nakatele neu Ndia.
JOH 4:24 Manetualain naa, dula-dalek. Dadi hatahori fo mana nakaluku-nakatele neun naa, muste nakaluku-nakatele tungga Ndia Dula-dalen, ma tungga hata fo ndoos.”
JOH 4:25 Inak naa nafada nae, “Au bubuluk ena, Mesias naa nae mai, ndia hatahorir seseik rae, ‘Karistus’, fo Manetualain helu-bartaa memak kana fo nae nadenun mai. Mete ma Ana mai ena, na, neu ko Ana nafada basa-basan neu ita.”
JOH 4:26 Yesus naselu nae, “Ndia Au ia ena, fo mana kokolak hatematak ia.”
JOH 4:27 Neu Ndia ana nunin nara fali numa kota mai, boe ma ara heran, nahuu mete-rita Yesus kokolak no ina Samaria esa. Tehuu ta hambu esa boe na, natane inak naa nae, “O nau hata?” Ma ta hambu esa boe na natane Yesus nae, “Tao hata de Lamatuak kokolak no inak ia?”
JOH 4:28 Boe ma inak naa laꞌo ela nggusin neu naa, fo fali neni kota dale neu. Boe ma ana tui hatahorir marai naa nae,
JOH 4:29 “Mai fo mete sudik Hatahori ia dei! Huu Ana buka nakambela basa-basan fo au tao itak. Boso losak Ndia ia, Karistus, fo Manetualain helu-bartaa ena fo nae nadenun mai!”
JOH 4:30 Boe ma hatahorir kalua numa kota naa mai, de reu ratonggo roon.
JOH 4:31 Ndaa no inak naa bei fo fali neni kota neu, Yesus ana nunin nara fufudin rae, “Papa Meser! Mai muꞌa dei!”
JOH 4:32 Tehuu Ana naselu nae, “Au aena nanaꞌak ena fo ei ta bubuluk kana.”
JOH 4:33 Ndia ana nunin nara ratatane aok esa mbali esa rae, “Talo bee ia? See ndia mai ena fo neni feen nanaꞌak?”
JOH 4:34 Tehuu Yesus nafada nae, “Talo ia. Manetualain nadenu Au fo tao tungga Ndia hihii-nanaun, ma akalalaꞌok Ndia ue-osan losa basan. Naa, sama leo nanaꞌak soa-neu Au.
JOH 4:35 Ei masiꞌe suri-memete nai tine-osir, boe ma makandandaak mae, ‘Bei ela bulak haa bali, dei fo bisa ketu-koru.’ Nenene, ee! Au afada, mete ma ei suri-memete matalolole, tine-osir hatematak ia rahani a ena fo ketu-koru. Tine-osir raa, sama leo hatahori noꞌuk kara marai naa, fo reni ita mai. Huu hatahorir raa rahani a ena fo ramahere neu Au.
JOH 4:36 Ta kada naa mesa kana, tehuu mana ketu-koruk kara fo mana raduduru sira buna-boan nai nggudan dale, ara mulai simbo rala sira nggadin ena. Sira raa, sama leo mana roo hatahorir fo ramahere neu Manetualain, boe ma hambu masodak tetebes ta mana ketuk. No dalak naa, hatahori fo mana sele-tande bini-nggees, ma hatahori fo mana ketu-koru buna-boan bisa ramahoko sama-sama.
JOH 4:37 Hatahorir rae, ‘Hatahori esa sele-tande bini-nggees; hatahori laen nakabubua ndia buna-boan.’ Naa, ndaa naa.
JOH 4:38 Au adenu ei ena fo miu maduduru buna-boak numa hatahori laen ue-osan mai. Memak ei ta ndia maue-osa, tehuu ei ndia hambu nanalak numa sira sota-benggen mai.”
JOH 4:39 Faik naa, hambu hatahori Samaria noꞌuk ka marai kota naa ramahere neu Yesus, nahuu inak naa kokolan nae, “Ana buka nakambela basa-basan fo au tao itak ena.”
JOH 4:40 De neu faik fo ara reni Yesus reu, ara roke-hule mbalin rae, “Papa, mai leo mua ai dei!” Boe ma Ana leo taak fai dua numa naa.
JOH 4:41 Ma hatahori laen noꞌuk ka oo ramahere neun boe, nahuu Ndia kokolan.
JOH 4:42 Ara oo rafada inak naa boe rae, “Afik ka naa, ai mamanene kada o kokolam mesa kana. Tehuu hatematak ia, ai mamahere neun, nahuu ai mamanene no ai ndiꞌi doo heli-helin numa Ndia mai. Ai bubuluk tebe-tebe mae, Hatahori ia, ndia bisa tao nasoi-nasoda ita basa ngga marai dae-bafok ia numa ita sala-singgon nara mai.”
JOH 4:43 Yesus asa leo basa numa naa, boe ma ara laꞌo rakandoo reni profensi Galilea reu.
JOH 4:44 (Laꞌe esa Yesus kokolak nita nae, “Hatahorir ta hii fee hada-horomatak neu Manetualain mana toꞌu dedeꞌan nai ndia nggoro-tadu heli-helin.”)
JOH 4:45 Fai bakahulun, neu bei ta feta Paska, hatahori Galilear noꞌuk ka reni kota Yerusalem reu ena, fo tao fai malole nai naa. De ara hambu lelak mete-rita basa hata fo Yesus taok numa Yerusalem. Huu naa de neu Ana fali neni Galilea neu, ara simbok kana no malole.
JOH 4:46 Basa de Yesus asa laꞌo rakandoo bali reni nggorok Kana manai profensi Galilea reu. Ana tao nita oe dadi anggor numa naa. Neu faik naa, hambu penggawe esa numa kota Kapernaum mai. Ana toun namahedi.
JOH 4:47 Neu faik fo penggawe naa namanene nae, Yesus fali neni Galilea neu numa profensi Yudea mai, boe ma ana laꞌok ndaꞌe neni Kana neu sangga Yesus. Natonggo noon, boe ma ana kokoe nasi-nasi fo Yesus konda neu tao nahai ndia anan. Huu kanak naa nae mate ena.
JOH 4:48 Yesus nafada penggawe naa nae, “Mete ma ei ta mete-mita Au tao tanda heran mata-matak, na, ei ta nau mamahere neu Au!”
JOH 4:49 Penggawe naa naselu nae, “Lamatuak, tulun mai dei. Te mete ma taa, na, au anang maten ia ena.”
JOH 4:50 Boe ma Yesus nafadan nae, “Fali muu ngga leo. Te o anan naa, sodak.” Boe ma ana hekor nasafali de fali memak, nahuu ana namahere Yesus kokolan naa.
JOH 4:51 Neu ana fali, ndia hatahori mana maue-osan nara mai ratonggo roon numa dalak rae, “Papa boso susa bali, huu papa anan sodak ena.”
JOH 4:52 Boe ma natane sara nae, “Ana mulai hai ndia liꞌu hida?” Ara raselu rae, “Ndia afik ka ledo namatetu liꞌu esa, katobin konda memak.”
JOH 4:53 Boe ma penggawe naa nasaneda memak nae, ndia anan dadi hai ena, mulai numa Yesus nafada nae, “Papa anan naa, sodak.” De ana no basa ndia uma isin ramahere neu Yesus.
JOH 4:54 Mandadik ia, ndia tanda heran kaduan fo Yesus taok, neu Ana kalua numa Yudea mai, fo neni Galilea neu.
JOH 5:1 Basa naa, hambu anggama Yahudi fai malolen esa. Huu naa de Yesus asa laꞌok reni kota Yerusalem reu.
JOH 5:2 Numa naa, hambu lifu esa naena pandopo lima deka no lelesu esa, nade Lelesu Bibi lombo. Nai sira dedeꞌa Aram, lifu naa naden ‘Batesda’.
JOH 5:3 Hambu hatahori kamahedik noꞌuk ka rasiꞌe rahani rai pandopor raa. Haꞌi netuduk leo: hatahori pokek, hatahori kekok, ma hatahori ta mana bisa nakaundak. [Ara rahani a, faik bee fo oe naa mulai nadombo.
JOH 5:4 Huu laꞌe-laꞌe esa, Manetualain atan numa nusa tetuk do inggu temak mai maso neni oe naa dale neu, fo dombo nakababalik oe. Basa naa, see ndia maso nakahuluk neni oe naa dale neu, na, ana ndia hai numa hedin mai.]
JOH 5:5 Numa naa, hambu hatahori esa namahedi teuk telu hulu falu ena.
JOH 5:6 Boe ma Yesus mete-nita hatahori naa sunggu numa naa. Ana bubuluk hatahori naa namahedi dook ka ena, de Ana natane nae, “Kaꞌa, ee! Nau hai, do?”
JOH 5:7 Ana naselu nae, “Nau a mesan, Papa. Tehuu mana dadi kai-baak, ndia: mete ma oe mulai nadombo ena, ta hambu hatahori fo koꞌo au uni oe dale uu. Mete ma au soba aong, na, hambu hatahori laen maso nakahuluk numa au mai ena.”
JOH 5:8 Boe ma Yesus nadenun nae, “Mambariik leo! Lulu mala o neneꞌim, fo fali muu ngga leo.”
JOH 5:9 Yesus kokolak basa talo naa, boe ma hatahori naa hai memak. De ana nambadeik, haꞌi nala neneꞌin, boe ma ana mulai laꞌok fali neu ngga. Mandadik naa laꞌe-ndaa hatahori Yahudi fai huhule-haradoin.
JOH 5:10 Dadi hatahori Yahudir malanggan nara rafada hatahori bei fo hai naa rae, “Woi! O bubuluk, do taa? Faik ia, fai hahae tao ue-osa. Tungga ita anggama hohoro-lalanen, ta bole hambu hatahori esa boe na tao ue-osa, sama leo o koꞌo muni o neneꞌim!”
JOH 5:11 Ana naselu nae, “Awii, papa nggara ein, ee! Papa sara boso mamanasa. Te Hatahori fo mana tao nahai au naa, ndia parenda au nae, ‘Lulu mala o neneꞌim, fo fali muu ngga leo.’ ”
JOH 5:12 Boe ma ara ratanen rae, “Weeh! Mana nadenu o koꞌo neneꞌim naa, see?”
JOH 5:13 Tehuu hatahori bei fo hai naa, ta nalela Yesus naa, see. Yesus kalua no neneek ena, nahuu hambu hatahori noꞌuk ka ruma naa.
JOH 5:14 Doo-doo boe ma Yesus natonggo no hatahori naa numa Uma Huhule-haradoi Ina-huuk bebelan. Boe ma Yesus nafadan nae, “Nenene, ee! Hatematak ia o hai ena. Boso tao salak bali, mita fo o boso hambu mala hata fo manggataꞌan lenak bali.”
JOH 5:15 Boe ma hatahori naa neu sangga hatahori Yahudir malanggan nara, de nafada nae, “Mana tao nahai au naa, nade Yesus.”
JOH 5:16 Huu naa de ara mulai tao doidoso Yesus, nahuu Ana tao nahai hatahori laꞌe-ndaa fai huhule-haradoik.
JOH 5:17 Tehuu Yesus nafada sara nae, “Talo ia. Au Amang ta nalela hahae tao ue-osa. Dadi Au oo aue-osa akandoo boe.”
JOH 5:18 Hatahori Yahudir malanggan nara henggenee rala Yesus rae, Ana nalena langga sira hohoro-lalanen laꞌe-neu fai hahae tao ue-osa, huu naa de ara sangga dalak barakain lenak bali fo rae tao risan. Lena-lenak bali, Ana oo nafada boe nae, Manetualain naa, Ndia Aman. No Ana kokolak talo naa, Ana soꞌuk aon sama leo Manetualain.
JOH 5:19 Boe ma Yesus nafada sara nae, “Tebe! Au afada memak ae, Au ta bisa tao hata-hata numa Au ao heli-heling mai. Au ia, Manetualain Anan. Huu naa de Au bisa tao tungga kada hata fo Au mete-ita Amak taon. Au mete-ita Au Amang tao hata, na, Au oo tao tungga talo naa boe.
JOH 5:20 Au Amang manai nusa tetuk do inggu temak sue-lai nalan seli neu Au, fo Ndia Anan. Ana oo natudu Au basa-basan fo Ana taok boe. Neu ko Ana nau natudu Au basa hata fo ta neni babanggak bali, mita fo ei mete-mitan, de heran bali-bali!
JOH 5:21 Au Amang tao nasoda falik hatahori mates. Leo naak oo, neu ko Au fee masodak tetebes tungga Au hihiin soa-neu see a mesan boe.
JOH 5:22 Teteben, talo ia: Amak mesa kana ta naketu-naladi huku-dokik soa-neu hatahorir. Tehuu Ana loo lima basa-basan neu Au, huu Au ia, Ndia Anan. Dadi Au ndia aketu-aladi ae, hatahori tatao-nonoꞌin ndoos do taa.
JOH 5:23 Au Amang hii fo basa hatahorir fee hada-horomatak neu Au, sama leo ara oo fee hada-horomatak neu Ndia boe. De mete ma hatahori ta mana fee hada-horomatak neu Au, fo Ndia Anan ia, na, ana oo ta fee hada-horomatak neu Amak mana nadenu Au ena boe.
JOH 5:24 Tebe! Au afada memak. Hatahori fo mana namanene Au kokolang, ma namahere neu Manetualain mana nadenu Au, na, ana hambu nala masodak tetebes ta mana ketuk ena. Manetualain ta huku-doki sana bali. Hukun mates ta tuda laꞌe hatahori naa bali, tehuu ana maso dadi neu hatahori mana masodak nakandoo no Manetualain ena.
JOH 5:25 Tebe! Au afada memak. Ndia fain deka-deka mai ena, ndia mulai hatematak ia ena, fo hatahori mates namanene harak numa Au mai, ndia Manetualain Anan. Huu hatahori fo mana namanene ma simbok no malole Au kokolang, neu ko ana hambu masodak tetebes.
JOH 5:26 Basa masodak kara raoka nai Au Amang. Ana oo fee Au koasa fo baꞌe masodak tetebes neu hatahorir boe. Te Au ia, Ndia Anan na.
JOH 5:27 Au Amang oo fee haak ma koasa neu Au boe, fo aketu-aladi basa hatahorir huku-dokin, nahuu Au ia, ndia Hatahori Dae-bafo Isi-isik.
JOH 5:28 Ei boso heran neu hata fo Au kokolak ia, te ta dook ka bali, neu ko basa hatahori mates sara ramanene Au harang.
JOH 5:29 Basa naa, neu ko ara rasoda fali ruma mamaten nara mai. De ara kalua numa rates mai. Hatahori fo bakahulun tao neulauk, hambu masodak tetebes ta mana ketuk. Tehuu hatahori fo bakahulun tao manggarauk, hambu huku-dokik nakandoo.”
JOH 5:30 Yesus kokolak tamba nae, “Au ta bisa tao hata-hata, mete ma Au bei ta amanene numa Au Amang mai. Mete ma Au amanene basa ena, dei fo Au aketu-aladi hatahori dedeꞌan. Huu naa de hata fo Au aketuk naa tetebes. Au ta soba tungga Au hihii-nanau heli-heling mesa kana, tehuu tungga Au Amang hihii-nanaun. Te Ana ndia nadenu Au na!
JOH 5:31 Mete ma kada Au mesa ngga ndia afada laꞌe-neu Au aong, na, Au kokolang naa bisa ta nemeherek.
JOH 5:32 Tehuu hambu hatahori laen dadi sakasii laꞌe-neu Au. Ma Au bubuluk ara kokolak tetebes laꞌe-neu Au.
JOH 5:33 Ei madenu mita hatahori fo neu natane Yohanis Mana Saranik. Boe ma ana kokolak tetebes laꞌe-neu Au.
JOH 5:34 Naa te Au ta parluu hatahori dae-bafok nekehein. Tehuu Au fee nesenedak dedeꞌak bebeik kara iar, fo ei bisa hambu masoi-masodak numa ei sala-singgom mara mai.
JOH 5:35 Yohanis kokolan naa, sama leo lambu esa mana mbila manggaledok. Neu manggaledon bei mbila nasaꞌa, ei dalem namahoko.
JOH 5:36 Naa te hambu Hatahori esa mana kokolak tetebes laꞌe-neu Au, ta neni babanggak lena heni Yohanis. Hatahori naa, ndia Au Amang manai nusa tetuk do inggu temak, mana loo lima ues noꞌuk ka neu Au, fo Au akalalaꞌok kasa losa basan. Ues sara iar, ndia ratudu bukti rae, Amak ndia nadenu Au.
JOH 5:37 Ma Ndia mana nadenu Au oo, kokolak tetebes laꞌe-neu Au boe. Ei mesa ngga bei ta mamanene mita Ndia haran pake ei ndiꞌi doo heli-helim, do, mete-mita no masasare matak Ndia mata-aon.
JOH 5:38 Manetualain Dedeꞌa-kokolan ta leo nai ei dalem, nahuu ei ta mamahere neu Au, fo Ana nedenuk.
JOH 5:39 Ei hii parisa no lutu-lelon Manetualain Susura Malalaon, nahuu ei duduꞌa neu ko nai naa, ei matonggo dalak fo hambu masodak tetebes ta mana ketuk. Naa te Susurak kara raa surak laꞌe-neu Au.
JOH 5:40 Tehuu ei ta nau meni Au mai, boe ma maso dadi miu Au hatahoring, mita fo ei bisa hambu mala masodak tetebes ta mana ketuk naa.
JOH 5:41 Au ta parluu fo hatahori soꞌuk Au.
JOH 5:42 Tehuu Au bubuluk no tetar ei dale kuru-erom. Huu naa de Au bubuluk ae, ei ta maena susue-lalaik neu Manetualain.
JOH 5:43 Au uni dae-bafok ia mai, nahuu Au Amang mana toꞌu koasa ndia nadenu Au mai. Tehuu ei ta simbo Au. Naa te mete ma hambu hatahori laen mai pake ndia koasa heli-helin, ei simbok kana no malole.
JOH 5:44 Ei esa no esa hii hambu kokoak. Tehuu ei hihiim leo naak naa natudu ei ta tao matak mae, Manetualain koa ei, do taa. Naa te Ndia naa, Manetualain! Ta hambu laen bali. Dadi mete ma ei ta tao matak neu Ndia, talo bee de ei bisa mamahere neun?
JOH 5:45 Boso duꞌa mae, Au ndia ndae salak neu ei nai Au Amang matan. Taa. Mana ndae salak neu ei naa, ndia baꞌi Musa. Naa te ei mamahena neun, nahuu ana ndia fee ei Manetualain Hohoro-lalanen.
JOH 5:46 Mete ma ei mamahere tebe-tebe neu Musa, neu ko ei oo mamahere neu Au boe. Huu ana surak laꞌe-neu Au.
JOH 5:47 Tehuu ei ta mamahere tebe-tebe neu hata fo ana surak, talo bee fo ei mamahere hata fo Au kokolak? Ta bisa dadi, hetu!”
JOH 6:1 Basa naa, hatahori Yahudir fai malolen ‘Paska’ deka-deka ena. Boe ma Yesus asa reni dano Galilea boboan seri reu. (Dano naa naden laen, ndia, ‘dano Tiberias’.) Hatahori noꞌuk ka tunggan reni naa reu, nahuu ara mete-rita tanda heran nara, fo Ana taok neu Ana tao nahai hatahori kamahedik kara. Losa dano boboan seri, boe ma Yesus no ana nunin nara hene reni lete mbumbukuk esa reu. De ara ranggatuuk reu naa.
JOH 6:5 Neu Yesus mete-nita hatahori noꞌuk ka mai rakabubua, boe ma Ana natane ana nunin esa, nade Felipus nae, “Ita bisa hasa nanaꞌak nai bee, fo tahao hatahorir ia?”
JOH 6:6 Memak Yesus bubuluk, Ndia nae tao talo bee ena. Tehuu Ana kokolak talo naa, fo nae fora Felipus.
JOH 6:7 Boe ma Felipus naselu nae, “Awii! Leo mae tukan esa tao ue-osa faik natun dua oo, tehuu nggadin bei ta dai fo hasa roti fee basa sara boe! Leo mae hatahori esa hambu roti baꞌu anak oo naa bei ta dai boe!”
JOH 6:8 Basa de Yesus ana nunin esa bali, nade Anderias, ndia Simon Petrus fadin, nafada Yesus nae,
JOH 6:9 “Papa! Hambu kakanak esa nai ia neni roti lima, ma iꞌak dua. Tehuu ta bisa dadi, naa dai fo tahao hatahori noꞌun seli talo ia!”
JOH 6:10 Numa naa hambu naꞌu noꞌuk ka. De Yesus nadenu Ndia ana nunin nara nae, “Koladu sara fo basa sara ranggatuuk.” De ara ranggatuuk. Faik naa, hatahori noꞌun seli. Kada touk kara, nai rarain hambu hatahori rifun lima.
JOH 6:11 Boe ma Yesus haꞌi nala rotir raa, de noke makasi neu Manetualain. Boe ma Ana baꞌen neu Ndia ana nunin nara. De ara reu babaꞌen neu hatahori noꞌuk kara raa. Ana oo tao sama talo naa, neu iꞌak naa boe. Basa sara raꞌa losa rakabete.
JOH 6:12 Neu ara raꞌa losa rakabete ena, boe ma Yesus nadenu ana nunin nara nae, “Maduduru mala nanaꞌa lenan nara raa, fo boso hambu neni ngganggarik no muda hiek.”
JOH 6:13 De ara rakabubua rala nanaꞌa lenan nara ruma roti kalimak kara raa mai, losa sofe lembaneu salahunu dua.
JOH 6:14 Neu hatahori noꞌuk kara mete-rita tanda heran fo Yesus taok naa ena, ara rae, “Awii! Ndia ia, neu ko Mana Toꞌu Dedeꞌak fo Manetualain helu-bartaa memak kana ena fo nae nadenun mai.”
JOH 6:15 Yesus bubuluk nae, hatahori noꞌuk kara raa rae rakasetik kana fo dadi neu manek. Boe ma nambadeik laꞌo, de Ana ndaꞌe namadoo bali neni lete mbumbukuk esa neu, mita fo Ana bisa mesa kana neu naa.
JOH 6:16 Neu ledo bei fo tesa, Yesus ana nunin nara laꞌok konda reni dano reu.
JOH 6:17 Basa de ara saꞌe ofak esa, boe ma ara sefe reni kota Kapernaum reu, nai dano boboan seri. Tehuu Yesus bei ta mai nakabua no sara. Neu ara mulai sefe naa, fai makiuk ka ena.
JOH 6:18 Boe ma dano oen mulai narii tufa neu-mai, nahuu ani sanggu nakarumbuu nalan seli.
JOH 6:19 Neu Yesus ana nunin nara sefe fama te kilo lima, boe ma ara mete-rita Ana laꞌok nesik oe lain. Ana mai deka-deka no sira ofan, boe ma ramataꞌu ralan seli.
JOH 6:20 Tehuu Yesus nafada nae, “Woi! Boso mamataꞌu! Te Au ndia ena.”
JOH 6:21 Huu naa de ara ta ramataꞌu ena bali. Boe ma ara nau-nauk ka fo Ana saꞌe ofak sama-sama no sira. Medak neu te ofak naa losa nai sira mamana seseen ena.
JOH 6:22 Neu beꞌe-mai, hatahori noꞌuk kara raa bei rai dano boboan seri. Ara deka-deka ro mamanak fo Yesus noke makasi neu Manetualain, de fee sara raꞌa. Ara oo bubuluk boe rae, afik ka hambu kada ofak esa numa naa. Tehuu Yesus ana nunin nara saꞌe ofak naa ena, fo laꞌo ela mamanak naa. Ma Yesus mesa kana ta saꞌe ofak naa, fo laꞌo sama-sama no Ndia ana nunin nara. Tehuu hambu ofak laen hida ruma kota Tiberias reu-mai nai mamanak naa. Neu hatahori noꞌuk kara raa bubuluk rae, Yesus no ana nunin nara ta rai naa ena bali, boe ma ara saꞌe ofak laen nara, fo reu sangga Yesus nai Kapernaum, manai dano boboan seri naa.
JOH 6:25 Boe ma ara ratonggo ro Yesus numa dano boboan seri. De ara ratanen rae, “Papa Meser! Papa losa ia, ndia bee?”
JOH 6:26 Yesus naselu nae, “Teteben, talo ia: ei ta sangga Au, nahuu ei malela no tebe-tebe tanda heran nara fo ei mete-mitak kara sosoa-ndandaan ena. Tehuu ei sangga Au, nahuu Au ahao ei, losa ei makabete.
JOH 6:27 Nenene matalolole! Boso kada maue-osa fo hambu nanaꞌak fo neu ko naboo heni hiek kana. Malole lenak tao ue-osa fo hambu nanaꞌak mana nakatataka nakandoo, mana neni masodak tetebes ta mana ketuk. Au ia, ndia Hatahori Dae-bafo Isi-isik. Au ndia bisa fee masodak soa-neu ei. Te Amak manai nusa tetuk do inggu temak loo lima haak naa neu Au ena na.”
JOH 6:28 Boe ma ara ratane rae, “Mete ma talo naa, na, ai muste tao talo bee, mita fo ai bisa makalalaꞌok Manetualain ue-osan?”
JOH 6:29 Yesus nafada nae, “Manetualain ue-osan naa, talo ia: ei muste mamahere neu Au. Huu Manetualain naa, ndia nadenu Au.”
JOH 6:30 Boe ma ara ratane bali rae, “Papa nau matudu tanda heran do, tao talo bee soa-neu ai bali fo ai bisa mete-mitan ma mamahere neu Papa?
JOH 6:31 Haꞌi netuduk leo, ita bei-baꞌin nara raꞌa roti manna numa mamana nees. Naa, dadi sama leo neni surak nai Manetualain Susura Malalaon nae, ‘Ana fee sara roti fo mana konda numa lalai mai, fo ara raꞌa.’ ”
JOH 6:32 Yesus nae, “Au afada ndoon, talo ia: lele uluk baꞌi Musa ta ndia nakonda roti naa numa lalai mai soa-neu ei bei-baꞌim mara. Tehuu mana makondak naa, Au Amang manai nusa tetuk do inggu temak. Hatematak ia Ana oo sadia nala soa-neu ei roti numa lalai mai boe. Roti ia, Roti tetebes mana nakatataka nakandoo.
JOH 6:33 Huu Roti ia numa Manetualain mai, ndia Mana konda numa nusa tetuk do inggu temak mai, fo neni masodak fee hatahorir marai dae-bafok ia.”
JOH 6:34 Boe ma ara roke rae, “Papa, fee roti naa neu ai nakandoo dei!”
JOH 6:35 De Yesus nafada sara nae, “Au ia, ndia Roti naa. Huu Au ndia uni masodak tetebes. Dadi hatahori fo mana maso dadi neu Au hatahoring, ta ndoe bali! Ma hatahori fo mana namahere neu Au, ta dale mada bali!
JOH 6:36 Tehuu Au afada ita neu ei ae, leo mae ei mete-mita Au ena, tehuu ei oo bei ta mamahere Au boe.
JOH 6:37 Naa te basa hatahorir fo Au Amang here nala sara dadi neu Au hatahoring ena, neu ko ara reni Au mai. Mete ma hatahori neni Au mai, ta bisa dadi Au ae husi henin!
JOH 6:38 Au konda numa lalai mai. Au mai fo tao tungga Au Amang hihii-nanaun, te Ana ndia nadenu Au na. Au ta nau tao tungga kada Au hihii-nanaung mesa kana.
JOH 6:39 Ndia hihii-nanaun, talo ia: numa basa hatahorir fo Ana here nalak kara ena fo dadi neu Au hatahoring, Ana nau fo Au ta bole akamboꞌik esa boe na fo mopon. Tehuu neu dae-bafok fai mateꞌen, neu ko Au muste tao asoda falik basa sara ruma mamaten nara mai.
JOH 6:40 Sama leo Au afada bebeik kara ia, Au Amang nau fo basa hatahorir fo mana ralela ma ramahere neu Au, fo Ndia Anan ia, na, ara bisa hambu masodak tetebes ta mana ketuk. Neu ko nai dae-bafok fai mateꞌen, Au tao asoda falik kasa ruma mamaten nara mai.”
JOH 6:41 Hatahori Yahudi malanggan nara mulai unggu-remun, nahuu Ana nae, “Roti manuma Manetualain mai naa, ndia Au, fo mana konda numa nusa tetuk do inggu temak mai.”
JOH 6:42 Ara rakokola aok rae, “Talo bee ia ena? Hatahori ia, ndia Yesus, papa Yusuf anan, hetu? Ai malela Ndia ina-aman. Dadi talo bee de hatematak ia Ana nae, ‘Au konda numa nusa tetuk do inggu temak mai’? Hambun numa bee mai?”
JOH 6:43 Yesus kaꞌi sara nae, “Weeh! Hahaen no unggu-remu miu naa, ee!
JOH 6:44 Au Amang manai nusa tetuk do inggu temak ndia nadenu Au ia mai. Ta hambu hatahori bisa neni Au mai, mete ma Au Amang ta nuni noon mai. Neu dae-bafok fai mateꞌen, Au tao asoda falik kasa ruma mamaten nara mai.
JOH 6:45 Manetualain mana toꞌu dedeꞌan lele uluk kara surak rita rae, ‘Manetualain nau nanori basa hatahorir.’ Basa hatahorir fo mana ramanene neu Amak manai nusa tetuk do inggu temak, ma ranori numa Ndia mai, ara reni Au mai fo dadi reu Au hatahoring.
JOH 6:46 Au ia, ndia konda numa Manetualain mai. Dadi kada Au mesa ngga ndia mete-itan. Ta hambu hatahori laen esa boe na mete-nita nasare aok no Amak nai nusa tetuk do inggu temak.
JOH 6:47 Tebe! Au oo afada memak neu ei boe! Hatahori fo mana namahere neu Au, neu ko hambu masodak tetebes ta mana ketuk.
JOH 6:48 Huu Au ia, ndia Roti mana neni masodak naa.
JOH 6:49 Lele uluk, ei bei-baꞌim mara raꞌa roti manna neu ara laꞌok eo reu-mai ndule mamana nees. Leo mae ara raꞌa roti naa, tehuu doo-doo boe ma ara oo mate boe.
JOH 6:50 Tehuu roti fo mana konda numa nusa tetuk do inggu temak mai hatematak ia, laen. Basa hatahorir bole raꞌan. Sosoa-ndandaan nae, basa hatahorir fo mana ramahere neu Au naa, ara ta bisa lenggo feꞌe numa Manetualain mai bali.
JOH 6:51 Huu Au ia, ndia Roti mana neni masodak, fo mana konda numa nusa tetuk do inggu temak mai. Neu Au mate, Au loo lima Au ao-inang ena fo basa hatahorir marai dae-bafok ia bisa rasoda. Boe ma hatahorir fo mana raꞌa numa Roti naa mai, sira raa hambu masodak tetebes ta mana ketuk.”
JOH 6:52 Hatahori Yahudi malanggan nara ramanene talo naa, boe ma ara mulai rareresi esa mbali esa rae, “Awii! Ana kokolak hata naa? Talo bee de Hatahori ia, bisa fee Ndia ao-mbaan fo ita taꞌa?”
JOH 6:53 Boe ma Yesus nafada sara nae, “Au kokolak tetebes. Au afada talo ia: Au ia, Hatahori Dae-bafo Isi-isik. Hatahori mana nau nasoda tetebes, musti nakaesa no Au. Dadi mete ma ei ta miꞌa Au ao-mbaang, ma ta minu Au daang, na, ei ta bisa hambu masodak tetebes ta mana ketuk.
JOH 6:54 Hatahori fo mana naꞌa Au ao-mbaang, ma ninu Au daang, hambu nala masodak tetebes ta mana ketuk ena. Neu dae-bafok fai mateꞌen, neu ko Au oo tao asoda falik kana numa mamaten mai boe.
JOH 6:55 Huu nanaꞌak tetebes, ndia Au ao-mbaang. Ma nininuk tetebes, ndia Au daang.
JOH 6:56 Dadi hatahori fo mana naꞌa Au ao-mbaang, ma mana ninu Au daang naa, nasoda nakaesa no Au. Ma Au oo akaesa uan boe.
JOH 6:57 Amak manai nusa tetuk do inggu temak mana nadenu Au naa, Ana nasoda tetebes. Ma Au oo asoda tetebes huu Ndia boe. Huu naa de hatahori fo mana naꞌa Au ao-mbaang, neu ko ana oo hambu masodak tetebes ta mana ketuk numa Au mai boe.
JOH 6:58 Lele uluk, ei bei-baꞌim mara raꞌa roti manna naa, fo mana konda numa lalai mai. Leo mae ara raꞌa roti naa, tehuu doo-doo te ara oo mate boe. Tehuu Roti fo mana konda numa nusa tetuk do inggu temak mai hatematak ia, laen. Hatahori fo mana naꞌa Roti ia, neu ko hambu masodak tetebes.”
JOH 6:59 Yesus fee nenorik laꞌe-neu dedeꞌak kara iar numa hatahori Yahudi uma huhule-haradoin esa nai kota Kapernaum.
JOH 6:60 Hambu hatahori noꞌuk ka tungga Yesus. Neu ara ramanene Ana fee nenorik talo naa, boe ma hambu ketuk kokolak rae, “Ndia nenorin naa, berak, ee! Ta hambu hatahori esa boe na bisa simbo nala nenorik naa.”
JOH 6:61 Tehuu Yesus bubuluk ara unggu-remu talo naa, boe ma Ana natane nae, “Nenorik ia tao nala ei susa, do?
JOH 6:62 Talo bee bali mete ma ei neu ko mete-mita Au, Hatahori Dae-bafo Isi-isik ia, hene fali uni Au mamana bakahulun naa uu?
JOH 6:63 Manetualain Dula-dalen ndia neni masodak tetebes. Ta hatahori ao-mbaan ndia bisa neni masodak tetebes naa. Tehuu Au Dedeꞌa-kokolang naoka numa Manetualain Dula-dalen mai. Dadi Dedeꞌa-kokolak naa oo neni masodak tetebes soa-neu hatahorir boe.
JOH 6:64 Tehuu hambu ei noꞌuk ka ta mamahere neu Au.” Yesus kokolak talo naa, nahuu Ana bubuluk numa makasososan mai see ndia ta namahere, ma see ndia neu ko seꞌo heni Ndia.
JOH 6:65 Boe ma Ana kokolak tamba nae, “Huu naa de Au afada ei ena ae, Au Amang manai nusa tetuk do inggu temak muste nasosoi nakahuluk dalak fee hatahori, dei fo hatahori naa bisa maso dadi neu Au hatahoring.”
JOH 6:66 Mulai numa faik naa mai oo, hambu noꞌuk ka numa Ndia ana nunin nara mai boe, rakaheok laꞌo numa Ndia mai, huu ara ta nau tungga sana bali.
JOH 6:67 Boe ma Yesus natane Ndia ana nuni kasalahunu duan nara raa nae, “Ei talo bee? Nau makaheok numa Au mai boe, do?”
JOH 6:68 Tehuu Simon Petrus naselu nae, “Lamatuak! Ai mae meni see miu bali? Ta hambu hatahori laen bali fo bisa nafada ai, talo bee fo ai bisa hambu mala masodak tetebes ta mana ketuk naa. Kada Lamatuak mesa kana!
JOH 6:69 Ma ai mamahere neu Lamatuak. Huu ai bubuluk ena mae, Lamatuak ia, ndia Manetualain Hatahori Malalaon naa.”
JOH 6:70 Yesus nafada sara nae, “Au here ala ei hatahori salahunu dua ena. Tehuu masaneda, ee! Hambu esa numa ei mai ndia leo nitu!”
JOH 6:71 Ndia kokolan naa nafada nae, ndia Yudas fo Simon Iskariot anan. Yudas naa, hatahori esa numa Ndia ana nuni kasalahunu duan nara mai. Ana ndia neu ko seꞌo heni Yesus.
JOH 7:1 Basa boe ma Yesus asa laꞌok ndule profensi Galilea. Ana ta nau laꞌok ndule profensi Yudea, nahuu hambu hatahori Yahudi malanggan nara marai naa rae tao risan.
JOH 7:2 Faik naa, hatahori Yahudir feta ketu-korun fo ara raseseik rae, “Feta Laak”, deka-deka ena.
JOH 7:3 Boe ma Yesus fadin nara radenun rae, “Malole lenak Kaꞌa laꞌo ela mamanak ia, fo muni Yudea muu. Mita fo hatahori mana tungga Kaꞌa marai naa oo, bisa mete-rita dedeꞌak matak bee fo Kaꞌa taok boe.
JOH 7:4 Mete ma hatahori esa nau fo hatahori noꞌuk ka mete-rita ndia ta hohoꞌan, na, ana boso taon no nefunik. Kaꞌa tao nala tanda heran mata-matak kara ena, de malole lenak bali, mete ma basa hatahorir mete-rita hata fo Kaꞌa taok naa!”
JOH 7:5 Fadin nara kokolak talo naa, nahuu sira mesa kasa ta ramahere ralan seli neun.
JOH 7:6 Boe ma Yesus naselu nae, “Talo ia. Hatematak ia Au faing bei ta losa. Tehuu mete ma ei mae miu, na, fai hida a mesan oo bisa boe.
JOH 7:7 Hatahorir marai dae-bafok ia, ta radale mburuk ro ei. Tehuu ara mburuk ralan seli neu Au, nahuu Au buka akambela basa sira tatao-nonoꞌin nara. Huu sira dalen nara manggarauk.
JOH 7:8 Ita fai malole anggaman fo feta laak naa, deka-deka mai ena. Naa fo ei mesa ngga ndia ndaꞌe makahuluk meni Yerusalem miu. Au bei ta nau uu, huu fain bei ta nandaa.”
JOH 7:9 Ana kokolak basa talo naa, boe ma Ana leo numa kada profensi Galilea leo.
JOH 7:10 Tehuu neu fadin nara laꞌo fo reu tungga hatahori Yahudir fai malolen nai Yerusalem ena, Yesus oo tungga neu boe. Tehuu Ana neu no nefunik, mita fo hatahorir ta bubuluk.
JOH 7:11 Numa Yerusalem, neu fai malole, hatahori Yahudi malanggan nara sanggan. Ara ratatanek rae, “Hatahori naa, nai bee, ee?”
JOH 7:12 Hatahori noꞌuk ka rakukutuk laꞌe-neu Yesus. Ketuk rae, “Ndia naa, hatahori malole.” Ketuk bali rae, “Taa! Ndia naa, mana pepeko-lelekok, mana hii kedi-ira hatahori noꞌuk kara.”
JOH 7:13 Tehuu ta hambu mana nambarani kokolak ledo-ledo laꞌe-neu Yesus, nahuu ramataꞌu malanggan nara raa.
JOH 7:14 Ndaa no baꞌe dua fai malole naa, boe ma Yesus maso neni Uma Huhule-haradoi Ina-huuk bebelan neu. Boe ma Ana mulai fee nenorik numa naa.
JOH 7:15 De hatahori Yahudir malanggan nara heran rae, “Hatahori ia, ta nanori nita noꞌuk ka sama leo ita. Tehuu tao hata de Ana bubuluk nenorik noꞌuk ka talo ia?”
JOH 7:16 Boe ma Yesus nafada sara nae, “Nenene, ee. Basa hata fo Au fee nenorik lalaꞌen, ta numa Au mesa ngga mai, tehuu numa Ndia mana madenu Au mai.
JOH 7:17 Hatahori fo mana nau tao tungga tebe-tebe Manetualain hihii-nanaun, neu ko ana bubuluk, Au nenoring naa, tetebes numa Manetualain mai, do numa kada Au mesa ngga mai.
JOH 7:18 Hatahori fo mana kokolak pake kada ndia koasan, ana nau sangga kada hada-horomatak soa-neu ndia ao heli-helin. Tehuu hatahori fo mana nau fee hada-horomatak neu hatahori mana madenu ndia naa nade malolen, neu ko ana kokolak ndoos, ma ta naena puputa-papatak.
JOH 7:19 Baꞌi Musa fee Manetualain Hohoro-lalanen neu ei ena. Tehuu ei ta tao tungga, tao hata de ei sangga dalak fo mae tao misa Au?”
JOH 7:20 Basa boe ma hatahori noꞌuk kara ratane rae, “O kokolak hata ia? Fama te nitu saꞌe o, do? See ndia sangga dalak fo nae tao nisa o de?”
JOH 7:21 Boe ma Yesus naselu nae, “Talo ia. Au bei fo tao kada tanda heran esa nai fai huhule-haradoik, tehuu ndee neu ei basa ngga boto liin ena.
JOH 7:22 Tehuu laꞌe-laꞌe esa, ei oo maue-osa nai fai huhule-haradoik boe, sama leo talo ia: baꞌi Musa nakonda sunat hohoro-lalanen nae, mete ma hatahori bonggi nala ana touk, na, neu fai kafalun, ei muste sunat kakanak naa. Leo mae faik naa, laꞌe-ndaa fai huhule-haradoik, ei muste sunat ana. (Tehuu tungga ndoon naa, hohoro-lalanek naa lasin lena baꞌi Musa. Huu Manetualain fee hohoro-lalanek naa nakahuluk neu baꞌi Abraham ena.)
JOH 7:23 Dadi mete ma sunat kakanak esa laꞌe-ndaa fai huhule-haradoik, naa ta lena langga Musa hohoro-lalanen, na, tao hata de ei mamanasa Au nahuu Au ahai hatahori keko-luꞌuk ndaa no fai huhule-haradoik? Ta maso nai duduꞌa-aꞌafi neulauk, hetu!?
JOH 7:24 Boso timba-tai hatahori tungga kada hata fo ei mete-mita no matam mara. Duduꞌa naruk fo timba-tai basa-basan no neulauk dei, basa dei fo ei maketu no tetebes.”
JOH 7:25 Basa naa, hambu hatahori hida numa kota Yerusalem ratatanek rae, “Hatahori ia, ndia ara sanggan fo rae tao risan, do?
JOH 7:26 Wee, ta neni babanggak, ee! Ana kokolak ledo-ledo nai hatahori noꞌuk kara matan. Tehuu ta hambu esa nafadan fo Ana kokoꞌo bafan. Tungga ei, talo bee? Nai rarain naa, mana toꞌu koasar bubuluk ena do taa rae, Hatahori ia, ndia Karistus fo Manetualain helu-bartaa memak kana ena fo nae nadenun mai, do?
JOH 7:27 Tehuu talo ia: mete ma Manetualain nadenu Karistus mai, neu ko ta hambu hatahori bubuluk Ana numa bee mai. Tehuu ai bubuluk ena Hatahori ia numa bee mai.”
JOH 7:28 Faik naa, Yesus bei nanori hatahorir numa Uma Huhule-haradoi Ina-huuk bebelan. Neu Ana namanene hatahorir kokolak talo naa, boe ma Ana natane sara no hara berak nae, “Ei duꞌa mae, ei malela Au, ma bubuluk no tetuk Au numa bee mai, do? Au ia, ta uni ia mai tungga Au hihiing mesa kana. Huu mana nadenu Au naa, hambun tebe-tebe. Ma ei ta malela sana.
JOH 7:29 Tehuu Au alelan, te Au numa Ndia mai, ma Ana ndia nadenu Au.”
JOH 7:30 Basa boe ma ara soba humun. Tehuu ta hambu esa bisa humu nalan, huu Ndia fain bei ta losa.
JOH 7:31 Numa hatahori noꞌuk kara marai naa, hambu noꞌuk ka oo ramahere neun boe. Ara rakokola aok rae, “Hatahori ia tao tanda heran noꞌuk ka ena. De mete ma Karistus mai, neu ko ta bisa dadi Ana tao lena heni Hatahori ia, hetu?”
JOH 7:32 Nai hatahori noꞌuk kara taladan oo, hambu hatahori hida ruma partei anggama Farisi mai boe. Ara ramanene hatahori noꞌuk ka rakukutuk dedeꞌak kara raa laꞌe-neu Yesus. De ara ro malangga anggama Yahudi malanggan nara radenu mana manea Uma Huhule-haradoi Ina-huuk hida, fo reu humu Yesus.
JOH 7:33 Boe ma Yesus nafada nae, “Au fain fo sama-sama ua ei, ela kada faak ka ena. Ta dook ka bali, Au fali uni Ndia mana nadenu Au uu.
JOH 7:34 Basa, neu ko ei mae sangga Au, tehuu ei ta matonggo Au. Huu Au ae uni mamanak esa uu, fo ei ta bisa tungga.”
JOH 7:35 Basa boe ma hatahori Yahudi malanggan nara ratatane aok esa mbali esa rae, “Ndondoon naa Hatahori ia, nae bee neu? Ana neni mamanak bee neu, fo ita ta bisa tatonggo toon? Ana nae neu keke nai hatahori Yahudir fo mana leo ratanggela nai nusa deak, do? Ana nae neu nanori hatahorir pake dedeꞌa Yunani nai naa, do? Do, talo bee?
JOH 7:36 Ana nau nafada hata, de Ana kokolak nae, ‘Ei mae sangga Au, tehuu ei ta matonggo.’ Ma ‘Au ae uni mamanak esa uu, fo ei ta bisa tungga’?”
JOH 7:37 Ndaa no feta fai mateꞌen, fo mana dadi fai ina-huun lenak naa, boe ma Yesus nambariik, de eki nae, “Nenene, ee! See dale mada, na, elan neni Au mai fo ninu!
JOH 7:38 Mete ma hambu see namahere neu Au, na, mai minu leo! Sama leo Manetualain Susura Malalaon surak nae, ‘Oe fo neni masodak neu ko nasapura kalua numa hatahori kamaherek kara dalen mai.’ Fo ara hambu masodak tetebes. No dalak naa, ara oo tulu-fali hatahori laen fo hambu masodak tetebes naa boe.”
JOH 7:39 Yesus kokolak laꞌe-neu Manetualain Dula-dalen, nahuu basa hatahorir fo mana ramahere neu Yesus, neu ko simbo Dula-dalek naa. Tehuu neu Yesus kokolak talo naa, ara bei ta simbok Dula-dalek naa, nahuu Manetualain ta bei fee. Manetualain memak ta bei fee, nahuu Ana bei ta nakadedemak Yesus.
JOH 7:40 Hatahori noꞌuk marai naa ramanene Yesus kokolak talo naa. Boe ma hambu ketuk rakokola aok rae, “Neni henggeneek Hatahori ia, Manetualain Mana Toꞌu dedeꞌan, fo Ana helu-bartaa memak kana numa lele uluk mai ena!”
JOH 7:41 Hambu ketuk bali rae, “Taa! Ndia ia, ndia Karistus fo Manetualain dudu memak kana numa lele uluk mai ena!” Tehuu ketuk bali rasabara rae, “Ta bisa! Karistus naa, ta hatahori Galilea. Tebe, hetu?
JOH 7:42 Huu Manetualain Susura Malalaon surak nae, Karistus naa, mane Dauk tititi-nonosin. Nai mamanak laen oo neni surak boe, nae Hatahori naa, hatahori Betlehem, ndia mane Dauk nggoro-tadun. Talo naa, hetu?”
JOH 7:43 Dadi hatahorir mulai rasida-lida nahuu Yesus.
JOH 7:44 Hambu hatahori hida oo rae humu Yesus boe. Tehuu ta hambu esa boe na humu nala sana.
JOH 7:45 Basa boe ma hatahorir mana manea Uma Huhule-haradoi Ina-huuk fo mai rae humu Yesus, fali reni malangga anggama Yahudi malanggan nara ma hatahori Farisir reu. De hatahori moꞌo-inahuuk kara raa ratane rae, “Heeh! Tao hata de ei ta mia sana mai?”
JOH 7:46 Ara raselu rae, “Awii! Ta hambu hatahori kokolak nita sama leo Ndia!”
JOH 7:47 Hatahori Farisir raa ratane rae, “Weeh! Ei oo hambu kedi-irak ena boe, do?
JOH 7:48 Masaneda, ee! Ta hambu esa boe na numa ai hatahori Farisir, do, numa ai malanggan nara mai fo ramahere neu Ndia. Ndaa, hetu? Mete ma hatahori moꞌo-inahuuk ta ramahere, na, tao hata de ei nau mamahere neu Ndia?
JOH 7:49 Hatahori noꞌuk kara iar fo nau ramahere neu Ndia, ta bubuluk Manetualain Hohoro-lalanen. Neu ko Manetualain hukun berak neu sara!”
JOH 7:50 Tehuu numa naa oo, hambu hatahori Farisi esa boe, nade Nikodemus. Ndia naa, ndia mana mai nita neu fai leꞌodaen, fo kokolak no Yesus. De ana natane sara nae,
JOH 7:51 “Talo bee? Tungga ita anggama hohoro-lalanen, ita taketu-taladi memak takahuluk hatahori dedeꞌan? Do, ita muste tamanene ndia dei, fo sangga bubuluk ana tao hata, dei fo bisa taketu-taladi ndia dedeꞌan?”
JOH 7:52 Boe ma ara mbokan rae, “Heeh! O ia, hatahori Galilea sama leo Ndia, do? Soba parisa no lutuk Manetualain Susura Malalaon dei! Lees matalololen, fo o bubuluk mae, ta hambu Manetualain mana toꞌu dedeꞌan esa boe na numa Galilea mai!”
JOH 7:53 [Boe ma ara rasida, de basa sara fali.
JOH 8:1 Tehuu Yesus neni letek Setun neu.
JOH 8:2 Neu beꞌe-mai huhua anan, boe ma Ana maso neni Uma Huhule-haradoi Ina-huuk bebelan neu. Hatahori noꞌuk ka mai rakabubua roon. Basa boe ma Ana nanggatuuk, de mulai nanori sara.
JOH 8:3 Faik naa, hambu inak esa humu ralan bei nai tatao hohonggek dale. Boe ma meser anggama hida ma hatahori Farisi hida leꞌa roon neni Yesus neu. De ara rakasetik inak naa fo nambariik neu sira basa sara matan.
JOH 8:4 Boe ma rafada Yesus rae, “Papa Meser. Inak ia, humu ralan bei nai ndia tatao hohonggen dale.
JOH 8:5 Tungga baꞌi Musa Hohoro-lalanen nara, hambu parenda nae, ‘Hatahori mana hohonggek muste hambu huku-dokik tokon pake batu losa maten.’ Tungga Lamatuak, talo bee?”
JOH 8:6 Ara rae soba iken. No dalak naa, ara bisa ndae salak neun fo sangga rakatutudak kana. Yesus ta naselu tutik kana, tehuu Ana nanggatuuk nakaluku de surak neu dae, pake Ndia lima kukun.
JOH 8:7 Ara ratatanen rakandoo. Boe ma Ana nambariik, de nafada sara nae, “Talo ia. Mete ma numa ei mai hambu see ta tao nita salak, na, ana ndia toko batu nakahuluk fo hukun inak ia.”
JOH 8:8 Boe ma Ana nanggatuuk nakaluku seluk bali, de surak tamba neu daer.
JOH 8:9 Neu ara ramanene Yesus kokolan naa, ara dadi mae. Huu nai dale kuru-eron nara, ara bubuluk rae, sira oo tao rita salak boe. Boe ma ara rasida esa-esak, mulai numa lasin losa muri anak. Doo-doo boe ma, ela kada Yesus no inak naa mesa kana numa naa.
JOH 8:10 Yesus nambariik bali, de natane nae, “Wee? Ara rai bee? Ta hambu hatahori laen nai ia fo nau fee salak do hukun o, do?”
JOH 8:11 Boe ma ana naselu nae, “Taa Papa.” Basa boe ma Yesus nafadan nae, “Au oo, ta nau hukun o boe. Fali muu ngga leo. Tehuu masanenedak. Boso tao salak bali!”]
JOH 8:12 Basa de Yesus kokolak seluk bali no hatahori noꞌuk kara nae, “Au ia sama leo manggaledok soa-neu hatahorir marai dae-bafok ia. Hatahori fo mana tungga Au ta leo-laꞌo nai makiu-makahatuk dale, tehuu ana leo nai manggaledok mana neni masodak tetebes.”
JOH 8:13 Hambu hatahori Farisi hida rasabara rae, “Heeh! O mae dadi sakasii laꞌe-neu O ao heli-helim, do? Ta bisa! Tungga ita hohoro-lalanen, na, muste hambu hatahori laen ndia dadi sakasii soa-neu hatahori esa, ta hatahori naa mesa kana. Dadi ai ta nau simbo ma ta nau mamahere.”
JOH 8:14 Yesus naselu nae, “Talo ia. Leo mae Au dadi sakasii soa-neu Au ao heli-heling, tehuu Au kokolang naa, tetebes. Huu Au mesa ngga ndia bubuluk no tetuk Au numa bee mai, ma ae bee uu. Ei ta bubuluk Au numa bee mai, ma neu ko ei oo ta bubuluk Au ae bee uu boe.
JOH 8:15 Ei timba-tai hatahori pake hatahori dae-bafok uku-sudin. Tehuu Au ta pake hatahori dae-bafok uku-sudin fo timba-tai hatahori esa boe na.
JOH 8:16 Mete ma Au timba-tai hatahori, Au uꞌukun naa, tetebes. Huu Au ta mesa ngga timba-tai, tehuu Au tao basa-basan sama-sama ua Au Amang mana nadenu Au.
JOH 8:17 Boso lilii-ndondou neu hata fo neni surak nai ei anggaman Hohoro-lalanen nae, ‘Mete ma hambu sakasii hatahori dua kokolak dedeꞌak sama, na, naa ndaa nai mana maketu-maladi dedeꞌak matan.’
JOH 8:18 De ta kada Au mesa ngga ndia dadi sakasii laꞌe-neu Au aong. Au Amang mana nadenu Au oo, dadi sakasii fo mana kokolak laꞌe-neu Au boe.”
JOH 8:19 Ara ratanen rae, “O Amam naa, nai bee?” Boe ma Yesus naselu nae, “Ei ta malela Au no tetebes. Ei oo ta malela Au Amang boe. Mete ma ei malela tetebes neu Au, na, ei oo malela Ndia boe.”
JOH 8:20 Yesus nafada basa iar lalaꞌen, neu Ana fee nenorik numa Uma Huhule-haradoi Ina-huuk, deka-deka no mamanak fo ara pake raduduru doi kolete. Ta hambu esa boe na humun, nahuu fain bei ta losa.
JOH 8:21 Yesus kokolak tamba neu sara nae, “Neu ko Au laꞌo ela ei, fo uni mamanak laen uu. Neu ko ei sangga-sangga Au, tehuu ta matonggo, huu ei ta maena haak meni mamanak naa miu. De mete ma ei mate, neu ko ei bei lemba-masaa ei sala-singgom.”
JOH 8:22 Boe ma hatahori Yahudi malanggan nara ratatane aok esa mbali esa rae, “Ana kokolak hata ia? Ana nae hala aon, do? Huu Ana nae, ‘Ei ta bisa meni mamanak naa miu.’ ”
JOH 8:23 Boe ma Yesus nafada sara nae, “Ei numa dae-inak nai dae mai. Tehuu Au numa lalai nai lain mai. Ei hatahori numa dae-bafok ia mai. Tehuu Au ta hatahori numa dae-bafok ia mai.
JOH 8:24 Huu naa de bebeik kara ia, Au afada ae, neu ei mate, neu ko ei bei lemba-masaa ei sala-singgom. Mete ma ei ta mamahere mae, Au ia, ndia Karistus, fo Manetualain nadenun mai ena, na, neu ei mate, neu ko ei bei lemba-masaa ei sala-singgom.”
JOH 8:25 Boe ma ara ratanen rae, “Weeh! O ia, see?” Yesus naselu nae, “Au afada memak numa makasososan mai ena.
JOH 8:26 Bei hambu dedeꞌak noꞌuk ka fo Au bisa afada laꞌe-neu ei. Ei sala-singgom oo noꞌuk ka boe. Tehuu Au ta atudu basa dedeꞌak kara raa. Mana nadenu Au uni ia mai naa, mete ma Ana kokolak, Ana bubuluk kokolak kada tetebes a mesan. Ma Au afada kada hatahori marai dae-bafok ia, basa hata fo Au amanene numa Ndia mai.”
JOH 8:27 (Yesus kokolan nai ia laꞌe-neu Ndia Aman manai nusa tetuk do inggu temak. Tehuu ara ta simbo rala kokolan.)
JOH 8:28 Boe ma Yesus kokolak tamba nae, “Neu ko mete ma ei londa Au, Hatahori Dae-bafo Isi-isik ia nai ai ngganggek lain ena, dei fo ei malela mae, Au ia, ndia Karistus. Ma Au ta tao hata-hata numa Au ao heli-heling mai, tehuu Au fee nenorik laꞌe-neu kada hata fo Amak manai nusa tetuk do inggu temak nanori Au ena.
JOH 8:29 Mana nadenu Au oo sama-sama no Au seku neu boe. Ana ta nakamboꞌik nita Au mesa ngga, nahuu Au soa tao tungga Ndia hihii-nanaun.”
JOH 8:30 Neu Yesus nafada dedeꞌak bebeik kara iar, boe ma hambu hatahori noꞌuk ka ramahere neun.
JOH 8:31 Basa boe ma Yesus nafada hatahori Yahudir raa fo mana ramahere neu Ndia nae, “Mete ma ei leo-laꞌo makaesa mia Au Dedeꞌa-kokolang nggara, ma ei manori makandoo numa Au mai, na, ei dadi miu Au ana nuning tetebes.
JOH 8:32 Boe ma ei bisa bubuluk mala basa hata fo ndoos. Ma basa hata fo ndoos sara raa, sira rakamboꞌik ei, fo hae bei dadi ata-dato bali.”
JOH 8:33 Boe ma ara rasabara rae, “Heeh! Air ia, ta hatahori ata-daton! Air ia, baꞌi Abraham tititi-nonosin! Dadi tao hata de O kokolak mae, neu ko ai dadi nekemboꞌik?”
JOH 8:34 Boe ma Yesus nafada sara nae, “Hata fo Au kokolak naa, tetebes. Basa hatahori fo mana leo-laꞌo tao sala-singgok kara, dadi sama leo ata-dato esa ena fo tungga kada sala-singgok hihii-nanaun mesa kana.
JOH 8:35 Tehuu ndia siꞌen talo ia: ata-dator raa ta bisa leo rakandoo nai uma esa dale. Te kada malanggan anan ndia leo nakandoo nai naa.
JOH 8:36 Dadi mete ma Au, ndia Manetualai Anan, koka heni ei sala-singgom mara, na, ei hambu nekemboꞌik ena, ma ta dadi miu sala-singgok ata-daton ena bali. No dalak naa, ei hambu nekemboꞌik tetebes, ma hae tungga sala-singgok hihii-nanaun bali!
JOH 8:37 Au bubuluk eir ia ena, ndia baꞌi Abraham tititi-nonosin. Leo mae talo naa, tehuu ei kada sangga-sangga dalak fo mae tao misa Au, nahuu ei ta nau simbo Au nenoring. Nai ei dalem, ta hambu mamanak ena bali, fo mahinda Au Dedeꞌa-kokolang.
JOH 8:38 Au afada basa hata fo Au mete-ita sara ena, fo Au Amang natudu neu Au ena. Ma ei tao tungga basa hata fo ei mamanene numa ei amam mara mai ena.”
JOH 8:39 Ara raselu rae, “Air ia, baꞌi Abraham tititi-nonosin!” Boe ma Yesus nafada nae, “Mete ma ei dadi miu baꞌi Abraham tititi-nonosin tetebes, ei muste haꞌi netuduk numa ndia mai.
JOH 8:40 Tehuu baꞌi Abraham ta tao nita manggarauk sama leo ei taok naa! Ei kada sangga-sangga dalak fo mae tao misa Au. Naa te Au ia, ndia mana mafada ei hata fo ndoos, fo Au amanene numa Manetualain mai.
JOH 8:41 Ei tatao-nonoꞌim, memak ta nalai dook ka numa ei amam mai.” Tehuu ara rasabara rae, “Heeh! Air ia, ana bonggik tetebes! Boso mae, air ia, kakana iko-langga taak! Te ai Aman, kada esak ka, ndia Manetualain!”
JOH 8:42 Boe ma Yesus nafada sara nae, “Tehuu mete ma Manetualain tebe-tebe dadi neu ei Amam, na, neu ko ei sue-lai Au. Huu Au numa Ndia mai, ma Au nai ia. Au ta mai tungga Au hihii-nanaung mesa kana. Tehuu Au mai, nahuu Ana ndia nadenu Au.
JOH 8:43 Tao hata de ei ta malela Au kokolang? Fama te ei ta nau nenene na!
JOH 8:44 Eir ia, rupak esa mia nitur malanggan. Huu ei hii tao tungga ndia hihiin! Numa makasososan mai, ana ndia mana makanisa hatahori. Ana laban hata fo ndoos, te ana tola heni basa sara ena na. Mete ma ana pepeko-leleko, naa memak ndia siꞌen naa. Huu ndia ia, mana pepeko-lelekok, ma mana kokolak bafa rouk baꞌin!
JOH 8:45 Au ia, ndia afada hata fo ndoos. Tehuu ei ta mamahere neu Au.
JOH 8:46 Soba! See numa ei mai ndia bisa natudu bukti nae, Au tao salak ena? Heran, ee! Mete ma Au kokolak hata fo ndoos, na, tao hata de ei ta nau mamahere neu Au?
JOH 8:47 Hatahori manuma Manetualain mai nenene neu Ndia Dedeꞌa-kokolan. Tehuu eir ia, ta numa Manetualain mai, de ei ta hii nenene Au.”
JOH 8:48 Hatahori Yahudi malanggan nara raselu rae, “Heeh! Ai kokolak ndaa naa ena. Ai mafada ena mae, O ia, ta hatahori Yahudi isi-isik, tehuu O hatahori Samaria. O nitu saꞌek ena boe!”
JOH 8:49 Boe ma Yesus naselu nae, “Au ta nitu saꞌek. Au fee hada-horomatak neu Au Amang manai nusa tetuk do inggu temak, tehuu ei ta fee hada-horomatak neu Au.
JOH 8:50 Au ta soꞌuk ao heli-heling fo atudu Au ta neni babanggan mesa kana. Tehuu hambu Esa ndia nau natudu Au ta neni babanggan. Elan numa naa fo Ana ndia naketu Au kokolang ndaa, do taa.
JOH 8:51 Au Dedeꞌa-kokolang, memak tetebes! De hatahori fo mana nenene ma tao tungga Au Dedeꞌa-kokolang nggara, ta mate.”
JOH 8:52 Hatahori Yahudi malanggan nara ramanene talo naa, boe ma rafadan rae, “Hatematak ia, ai bubuluk ena O kokolam kamuluk, nahuu nitu saꞌe O ena. Te baꞌi Abraham mesa kana mate. Manetualain mana toꞌu dedeꞌan nara lele uluk oo mate boe. Tehuu O mae, ‘hatahori fo mana nenene ma tao tungga O Dedeꞌa-kokolam mara, ta mate.’ Memak O mamulu ena!
JOH 8:53 Do O duꞌa, O ta neni babanggak lena heni Abraham mana matek? Do, O ta neni babanggak lena heni Manetualain mana toꞌu dedeꞌan mana matek kara ena? O duꞌa mae, O ia, see?”
JOH 8:54 Boe ma Yesus naselu nae, “Mete ma Au ndia soꞌuk aong, hatahori ta nau simbok. Naa te Au ta ndia soꞌuk aong, tehuu Au Amang ndia soꞌuk Au. Ndia naa, ndia ei manaku mae, Ana dadi neu ei Manetualain.
JOH 8:55 Tehuu ei ta malela sana. Au alelan no malole. Mete ma Au ae Au ta alela sana, Au mana kokolak bafa rouk, sama leo ei. Tehuu Au alelan no malole, ma Au oo tao tungga Ndia Dedeꞌa-kokolan boe.
JOH 8:56 Ei baꞌim Abraham dalen namahoko nalan seli, neu ana nahani a nae mete-nita Au mamaing. Memak ana mete-nita ena, de ana nameda dai.”
JOH 8:57 Hatahori Yahudi malanggan nara rafada rae, “O teum oo bei ta losa teuk 50 boe! Tehuu O mae, O mete-mita baꞌi Abraham ena. Tebe, do?”
JOH 8:58 Boe ma Yesus naselu nae, “Tebe! Neu baꞌi Abraham bei ta hambun nai dae-bafok ia, tehuu Au akahuluk ena.”
JOH 8:59 De hatahorir raa haꞌi batur fo rae tokon, nahuu Ana soꞌuk aon sama leo Manetualain. Tehuu Ana laꞌok no nefunik fo kalua numa Uma Huhule-haradoi Ina-huuk bebelan mai.
JOH 9:1 Laꞌe esa, Yesus asa bei laꞌok numa dalak. Boe ma Ana mete-nita hatahori pokek esa, fo poken memak numa inan bonggin mai ena.
JOH 9:2 De Yesus ana nunin nara ratane rae, “Papa Meser! See ndia tao salak, losa hatahori ia dadi pokek talo ia? Ndia mesa kana pode-uren do, huu ndia ina-aman?”
JOH 9:3 Yesus naselu nae, “Hatahori pokek ia ta tao salak. Ma ndia ina-aman oo ta tao salak fo ana dadi poke boe. Ana neni bonggik talo naa, mita fo basa hatahorir bisa mete-rita Manetualain tatao neulaun nai ndia.
JOH 9:4 Manetualain ndia nadenu Au. Dadi ita muste taote tebe-tebe fo takalalaꞌok Ndia ue-osan neu bei hambu fai manggaledok. Neu ko makiuk mai ena, de hatahori ta bisa raue-osa bali.
JOH 9:5 Neu Au bei nai dae-bafok ia, Au sama leo manggaledok mana nasaꞌa soa-neu basa hatahorir.”
JOH 9:6 Yesus kokolak basa talo naa, boe ma Ana pura ambe neu daer. De Ana nanggatuuk nakaluku, fo babalik kana dadi tane. Boe ma Ana rose tane naa neu hatahori pokek naa matan.
JOH 9:7 Basa boe ma Ana helu nae, “Muni lifu Siloam muu, fo marou o matam nai naa.” (Nai dedeꞌa Ibrani, Siloam sosoa-ndandaan nae, ‘denun mai’.) Boe ma hatahori pokek naa neni naa neu, de ana narou matan. Neu ana fali mai ngga, ana bisa mete-nita ena!
JOH 9:8 Basa boe ma hatahori naa kotia-tain nara, fo mana mete rita ana hule-kai, mulai ratatanek rae, “Wee! Ndia ia, hatahori pokek fo bakahulun nasiꞌe nanggatuuk hule-kai, hetu?”
JOH 9:9 Hatahori ketuk rae, “Hou! Ndian ena!” Hatahori ketuk laen rae, “Taa! Ndia ia, kada homben sama leo esak naa!” Tehuu hatahori naa mesa kana nafada sara nae, “Taa! Au ndian ena! Fo fai bakahulun pokek naa!”
JOH 9:10 Boe ma ara ratanen rae, “Talo bee de losa o bisa mete-mita ia?”
JOH 9:11 Boe ma Ana naselu nae, “Talo ia! Hatahori mana nade Yesus naa, babalik tane, de Ana rosen neu au matang. De Ana nadenu au nae, ‘Muni lifu Siloam muu, fo marou o matam nai naa.’ Boe ma au tao tunggan. Huu naa de hatematak ia, au bisa mete-ita ena!”
JOH 9:12 Basa de ara ratanen bali rae, “Hatahori naa nai bee?” Ana naselu nae, “Te sii, au ta bubuluk!”
JOH 9:13 Faik naa, neu Yesus babalik tane, de tao nala hatahori pokek bisa mete-nita naa, laꞌe-ndaa hatahori Yahudi fai hahae tao ue-osan. Boe ma ara nuni roo hatahori mana poke nitak naa, fo reu rasare mbali partei anggama Farisi hatahorin nara.
JOH 9:15 Basa de hatahori Farisir raa ratanen rae, “Soba o mafada dei! Tao hata de hatematak ia o bisa mete-mita ena?” Ana naselu nae, “Talo ia. Hatahori naa rose tane neu au matang. De au uu arou oe. Hatematak ia au bisa mete-ita ena.”
JOH 9:16 Hambu hatahori Farisi ketuk rae, “Hatahori fo mana tao nahai o naa, ta numa Manetualain mai. Ai bubuluk, nahuu Ana nalena-langga hohoro-lalanek laꞌe-neu fai hahae tao ue-osa ena.” Hambu ketuk bali rae, “Talo bee de losa hatahori fo mana tao salak bisa adu tanda heran talo naa?” Boe ma basa sara rareresi losa rasida-lida.
JOH 9:17 Dadi ara ratane seluk hatahori fo bakahulun pokek naa rae, “Tungga o, na, Hatahori mana tao nahai o matam naa, hatahori mata-aon leo beek?” Ana naselu nae, “Tungga au, na, Ndia naa, Manetualain mana toꞌu dedeꞌan esa.”
JOH 9:18 Tehuu hatahori Yahudi malanggan nara ta ramahere rae, hatahori naa, poke nita, de hatematak ia bisa mete-nita ena. Boe ma ara radenu reu ranggou ina-aman fo mai rataa.
JOH 9:19 Neu ara mai, malanggan nara raa ratane rae, “Hatahori ia, ei anam, do? Tebe do taa, ana poke memak numa bonggin mai ena? Boe ma talo bee de hatematak ia ana bisa mete-nita ena?”
JOH 9:20 Hatahori naa ina-aman raselu rae, “Ndia ia, memak ai anan. Ma ana poke memak numa bonggin mai ena.
JOH 9:21 Tehuu ai ta bubuluk, ana pake hata de hatematak ia, ana bisa mete-nita ena. See ndia tao nahai matan oo ai ta bubuluk boe. Ndia naa, moꞌok ka ena. Matane neuk kana leo, te mesa kana bisa tui!”
JOH 9:22 Ara kokolak talo naa, nahuu ara ramataꞌu hatahori Yahudi malanggan nara. Ara bubuluk rae, malanggan nara raa rala harak ena rae, “Mete ma hambu hatahori manaku rae, Yesus naa, ndia Karistus, na, ai muste husi heni hatahori fo mana manaku talo naa, numa ita hatahori Yahudi uma huhule-haradoin mai.”
JOH 9:23 Huu naa de hatahori naa ina-aman raselu rae, “Ndia moꞌok ka ena. Matane neuk kana leo.”
JOH 9:24 Basa de ranggou seluk hatahori fo bakahulun pokek naa. Boe ma rae, “Talo ia! O muste kokolak no ndoos nai Manetualain matan fo manea Ndia nade malolen. Huu ai bubuluk no tetuk, Yesus naa, hatahori manggarauk.”
JOH 9:25 Hatahori fo mana poke nitak naa naselu nae, “Papa sara boso mamanasa ee! Au ta bubuluk mete ma Ndia naa, hatahori manggarauk do taa. Au bubuluk no tetuk, fai bakahulun au pokek; tehuu hatematak ia au bisa mete-ita ena.”
JOH 9:26 Ara ratanen rae, “Te Ana tao hata neu o? Ana buka o matam talo bee?”
JOH 9:27 Boe ma ana naselu nae, “Weeh! Bebeik kara ia au tui ena, tehuu ei ta nau mamanene. Tao hata de ei nau au tui seluk bali? Fama te papa sara oo nau dadi miu Ndia ana nunin nara boe, do?”
JOH 9:28 Boe ma ara aꞌalin, de rae, “Naa fo kada o mesa ngga ndia dadi neu Ndia ana nunin! Air ia, baꞌi Musa ana nunin nara.
JOH 9:29 Ai bubuluk Manetualain kokolak no Musa. Tehuu ai ta bubuluk Hatahori naa numa bolok bee mai.”
JOH 9:30 Hatahori fo bakahulun pokek naa naselu nae, “Heran, ee! Ei ta bubuluk Ana numa bee mai. Naa te Ana ndia tao nahai au matang, de hatematak ia au bisa mete-ita.
JOH 9:31 Ita basa ngga bubuluk tae, Manetualain ta nenene hatahori manggarauk, hetu? Tehuu Manetualain nenene hatahori dale ndoos, fo mana leo-laꞌo tao tungga Ndia hihii-nanaun.
JOH 9:32 Mulai numa Manetualain nakadadadik lalai no dae-inak losa hatematak ia, bei ta hambu tutuik esa boe na, laꞌe-neu hatahori mana tao nahai hatahori pokek numa ara bonggin mai, fo ana bisa mete-nita.
JOH 9:33 Dadi mete ma Yesus ta numa Manetualain mai, na, Ana ta bisa tao hata esa boe na, hetu?”
JOH 9:34 Boe ma ara raselu rae, “Heeh! O ia, hatahori manggarauk numa o inam bonggi nala o! Talo bee de losa o duꞌa mae, o bisa manori falik ai?” Basa boe ma ara husi henin numa sira uma huhule-haradoin mai.
JOH 9:35 Neu Yesus namanene ara husi heni hatahori fo mana poke nitak naa numa uma huhule-haradoik mai, boe ma Ana neu sangga hatahori naa, losa natonggo noon. De Ana nae, “Talo bee! O mamahere neu Hatahori Dae-bafo Isi-isik, do?”
JOH 9:36 Hatahori fo mana poke nitak naa natane nasafali nae, “Ndia naa, ndia see, Papa? Tulun mafada dei, mita fo au bisa amahere neun.”
JOH 9:37 Boe ma Yesus nafada nae, “O matonggo muan ena. Ndia naa, ndia Au ia, fo hatematak ia Ana kokolak no o.”
JOH 9:38 De hatahori naa nae, “Papa, au amahere!” Boe ma ana sendek luu-langgan fo nakaluku-nakatele neu Yesus.
JOH 9:39 Basa boe ma Yesus nafadan nae, “Au uni dae-bafok ia mai fo atudu hatahori sala-singgon nara, mita fo hatahori pokek bisa mete-nita, ma hatahori mana bisa mete-nita dadi pokek.”
JOH 9:40 Numa naa, hambu hatahori Farisi hida fo ramanene Yesus kokolan naa. Boe ma ara ratane rae, “Talo bee, ia? Manggaledok ena, ita ta pokek, hetu?”
JOH 9:41 Yesus naselu nae, “Talo ia. Mete ma ei memak pokek, na, ta hambu hatahori fo fee salak neu ei. Tehuu ei mae, eir ia, hatahori fo mana bisa mete-nitak. Huu naa de ei bei lemba-masaa ei sala-singgom.”
JOH 10:1 Yesus kokolak pake lololek esa nae, “Hata fo Au afada neu ei ia, tetebes. Bibi lombo naena lalae. Mete ma hambu hatahori ta maso nesik lelesu, tehuu hene maso tungga mbaꞌa, na, manggaledok ena, ndia naa, naꞌo manu-meo.
JOH 10:2 Tehuu mana maso nesik lelesu naa, ndia bibi lombo mana lolon fo mana nakaboi-nasamao sara.
JOH 10:3 Mana manea lelesu nalela mana lolo naa, de soi lelesu soa-neun. Bibi lombor oo ralela mana lolo naa haran boe. De mete ma ana nanggou sara esa-esak naden, ara tunggan dea reu.
JOH 10:4 Neu ana lolo sara dea reu, ana laꞌok nesi mata. Bibi lombor tunggan resik dea, nahuu ara ralela ndia haran.
JOH 10:5 Mete ma hambu hatahori fo bibi lombo ta ralela sana, na, ara ta tungga sana. Tehuu ara ralai tetebe, nahuu ara ta ralela hatahori feꞌek haran.”
JOH 10:6 Leo mae Yesus tui lololek naa fee sara, tehuu ara oo ta bubuluk Ndia kokolan sosoa-ndandaan boe.
JOH 10:7 Boe ma Yesus nafada tamba neu sara nae, “Hata fo Au afada neu ei ia, tetebes. Au sama leo lelesu nai bibi lombo lalaen.
JOH 10:8 Basa hatahorir fo mana mai rakahuluk numa Au mai, ara sama leo naꞌo manu-meo. Leo mae ara kada ranggou rakandoo, tehuu bibi lombor ta ramanene hatahorir raa.
JOH 10:9 Boe ma Au sama leo lelesu naa. Mete ma hambu mana nau maso nesik Au, na, Manetualain nau tao nasoi-nasodan numa ndia sala-singgon nara mai. Naa, sama leo ana maso neni Manetualain mamanan neu, nesik Au fo mana dadi ndia lelesun. Ma hatahori mana maso nesik Au, ana laꞌok no nekemboꞌik neni bee neu a mesan, ma hambu nanaꞌa-nininu tetebes.
JOH 10:10 Naꞌo manu-meor kada tao mue-anggik a mesan, huu ara mai fo ramanaꞌo, rakanisa, ma rakalulutu heni hatahorir masodan. Tehuu Au uni masodak lolen lenak, huu Au mai, mita fo hatahorir bisa leo-laꞌo no lino-lendek, ma raena masodak tetebes.
JOH 10:11 Au oo sama leo mana lolo malole esa boe. Mana lolo malole sadia ena fo loo lima aon losa maten, mita fo ndia bibi lombon nara bisa rasoda.
JOH 10:12 Tehuu mana lolo neni sebak, mete ma ana mete-nita hambu busa fui esa mai, ana nalai tetebe, de laꞌo ela bibi lombor raa reu naa. Basa de busa fui kiki nala bibi lombo, boe ma bibi lombo laen nara ralai ratanggela.
JOH 10:13 Mana lolo neni sebak naa nalai, nahuu ndia kada naue sangga doik mesa kana. Ana ta tao matak fo nanea natalolole bibi lombor raa.
JOH 10:14 Tebe! Au sama leo mana lolo malole. Au alela Au bibi lombong nggara. Ma ara oo ralela Au boe.
JOH 10:15 Naa, sama leo Amak manai nusa tetuk do inggu temak nalela Au, ma Au oo alela Ndia boe. Au oo sadia loo lima Au ao-inang ena boe losa mate, mita fo Au bibi lombong nggara bisa rasoda.
JOH 10:16 Hambu Au bibi lombong laen, fo bei ta rakabua ro Au bibi lombong nggara marai iar. Au muste uu akabubua ala sara boe. Neu ko mete ma ara ramanene Au harang ena, ara ralela memak kana. Basa boe ma ara mai rakabua fo dadi reu bua-aok esa fo raena mana lolo esa.
JOH 10:17 Huu naa de Au Amang manai nusa tetuk do inggu temak sue-lai Au. Au sadia loo lima Au ao-inang ena losa mate, fo Au bisa asoda asafali numa mamates mai.
JOH 10:18 Ta hambu hatahori nakasetik Au fo mate, tehuu Au mesa ngga ndia sadia loo lima Au ao-inang losa mate. Au aena haak fo loo lima Au ao-inang. Au oo, aena haak fo haꞌi falik kana boe. Parenda ia, Au simbon numa Au Amang manai nusa tetuk do inggu temak mai ena.”
JOH 10:19 Hatahori Yahudir rasimbo bafak seluk bali, nahuu ramanene Yesus kokolan naa.
JOH 10:20 Hambu noꞌuk ka numa sira mai rae, “Heeh! Hatahori ia, kamuluk! Nitu saꞌen ena! Tao hata de ei bei nau nenene neun?”
JOH 10:21 Tehuu hambu ketuk bali rae, “Ia ta hatahori kamuluk kokolan, hetu? Dedeꞌa-kokolak leo naak naa, ta kalua nita numa nitu bafan mai! Ma nitu oo ta tao nala hatahori pokek bisa mete-nita boe, hetu?”
JOH 10:22 Faik naa, hatahori Yahudir sangga tao sira anggaman fai malolen esa. Fai malole naa, laꞌe-ndaa fai makasufuk. Numa feta naa, hatahori Yahudir rasaneda faik fo hatahori laen tao ranggenggeo Manetualain Uma huhule-haradoi Ina-huun nai kota Yerusalem, de ara tao ralalaon ma tabis seluk kana.
JOH 10:23 Yesus laꞌok ndule Uma Huhule-haradoi Ina-huuk naa bebelan, nai mamanak fo ara seseik kana rae, ‘Manek Soleman Uma Loos’.
JOH 10:24 Boe ma hatahori Yahudi malanggan nara mai rakarumbu ralan, de rae, “Ai muste mahani losa faik bee bali, dei fo ai bisa bubuluk? Mete ma Papa ia, ndia Karistus, na, tulun mafada no ledo-ledo dei.”
JOH 10:25 Yesus naselu nae, “Au afada memak ena, tehuu ei ta nau mamahere. Naa te basa hata fo Au taok, basan tungga kada Au Amang parendan mesa kana. Basa naar ndia ratudu rae, Au ia see.
JOH 10:26 Tehuu ei ta mamahere neu Au, nahuu ei ta Au bibi lombong nggara.
JOH 10:27 Au bibi lombo tetebeng nggara ralela Au harang. Ara oo tungga Au boe. Au oo alela sara boe.
JOH 10:28 Au fee sara masodak tetebes ta mana ketuk, ma sira oo ta lenggo feꞌe numa Manetualain mai boe. Ta hambu hatahori esa boe na bisa fonda nala sara numa Au mai.
JOH 10:29 Au Amang manai nusa tetuk do inggu temak ndia loo lima sara neu Au. Ndia ta neni babanggak lena heni basa-basan. Huu naa de ta hambu esa boe na bisa fonda nala sara numa Ndia liman mai.
JOH 10:30 Ai manea sara, nahuu Au Amang no Au ia, esa.”
JOH 10:31 Hatahori Yahudi malanggan nara ramanene rala naa, boe ma ara haꞌi batu laꞌe esa bali, fo nau toko risa Yesus.
JOH 10:32 Boe ma Yesus nafada sara nae, “Heeh! Au atudu hata fo neulauk noꞌuk ka numa Au Amang mai ena. Ei pake hata fo neulauk bee, de ei mae toko misa Au?”
JOH 10:33 Ara raselu rae, “Ai ta toko o, nahuu o tao hata fo neulauk. Tehuu ai hukun toko o, nahuu o makadadaek berak kana ena! O kada hatahori dae-bafok, tehuu o soꞌuk aom sama leo Manetualain! Sudi selik kana ena!”
JOH 10:34 Boe ma Yesus naselu nae, “Talo bee? Nai Anggama Hohoro-lalanen fo ei toꞌuk naa neni surak nae, ‘Au afada memak kana ae, ei malanggam mara iar, lamatuak’.
JOH 10:35 Ita bubuluk ena tae, basa hata fo neni surak nai Manetualain Susura Malalaon naa, tetebes, ma ta bisa neni koka henik. Manetualain mesa kana seseik hatahorir raa nae, sira raa, ‘lamatuak’.
JOH 10:36 Dadi talo bee de losa ei bisa kokolak mae Au akadadaek, nahuu Au ae, Au ia, Manetualain Anan? Ta maso nai duduꞌa-aꞌafi neulauk! Amak manai nusa tetuk do inggu temak ndia henggenee memak Au, ma Ana nadenu Au uni dae-bafok ia mai.
JOH 10:37 Talo ia. Mete ma Au ta akalalaꞌok Au Amang ue-osan, na, ei hae mamahere Au.
JOH 10:38 Tehuu Au akalalaꞌok Ndia ue-osan nakandoo. Dadi leo mae ei ta nau mamahere Au, tehuu kada baꞌu anak ka faa oo, ei muste simbok tanda heran fo Au taok boe. No dalak naa, ei oo bisa malela boe mae, Au Amang nakaesa no Au. Ma Au oo akaesa ua Ndia boe.”
JOH 10:39 Basa de ara soba seluk rae humu Yesus, tehuu ta rala sana.
JOH 10:40 Boe ma Yesus fali seluk neni lee Yarden boboan seri neu, numa mamana makasososak naa, fo fai bakahulun Yohanis sarani hatahori. De Ana leo taak neu naa.
JOH 10:41 Hatahori noꞌuk ka mai sanggan. Boe ma ara rakokola aok rae, “Yohanis ta tao tanda heran esa boe na. Tehuu basa hata fo ana kokolak laꞌe-neu Yesus ia, tetebes, ee!”
JOH 10:42 Boe ma hatahori noꞌuk ka ramahere neu Ndia numa naa.
JOH 11:1 Hambu hatahori esa, nade Lasarus. Ana leo nai nggorok Betania, sama-sama no kaꞌa inan dua, Maria ma Martaa. (Maria ia, ndia mana mboꞌa mina kaboo menik neu Lamatuak Yesus ein, de ana sekan pake ndia langga bulu heli-helin.) Laꞌe esa Lasarus namahedi berak.
JOH 11:3 Boe ma kaꞌa inan nara haitua harak neu Yesus rae, “Papa nonoon, Lasarus, namahedi berak.”
JOH 11:4 Neu Yesus namanene hara heheluk naa, boe ma Ana kokolak nae, “Hedis ia, ta tao nala sana mate. Manetualain nae pake dedeꞌak ia, fo natudu Ndia ta neni babanggan. Mita fo hatahorir rakadedemak Au, ndia Manetualain Anan.”
JOH 11:5 Yesus sue-lai Martaa no fadin Maria ma sira dua sara fadin Lasarus.
JOH 11:6 Neu Ana namanene rae, Lasarus namahedi, Ana bei leo faik dua bali numa lee Yarden boboan seri.
JOH 11:7 Basa naa, Ana nafada Ndia ana nunin nara nae, “Mai, ita teu seluk bali teni profensi Yudea, fo Lasarus mamanan.”
JOH 11:8 Tehuu Ndia ana nunin nara rasabara rae, “Papa Meser. Bei lai-laik ia, hatahori Yahudi malanggan nara rae toko risa Papa numa naa. Tehuu hatematak ia, Papa nae fali neni naa neu bali, do?”
JOH 11:9 Boe ma Yesus naselu nae, “Boso mamataꞌu, ee! Tungga faik, ledo nasaꞌa numa huhuak losa ledo bobon. Naa, hambu liꞌu salahunu dua, hetu? Mete ma laꞌok nai manggaledok, hatahori ta nakatunu. Manggaledok nasaꞌa nai dae-bafok ia, de hatahori bisa mete-nita.
JOH 11:10 Tehuu mete ma hatahori laꞌok nai makiuk, ana nakatunu laꞌi-laꞌik kana, huu ana ta naena manggaledok.”
JOH 11:11 Yesus kokolak basa talo naa, boe ma Ana nafada nae, “Ita nonoon Lasarus sunggu ena. Tehuu neu ko Au ambadedeik kana.”
JOH 11:12 Boe ma ana nunin nara rae, “Papa. Mete ma ana kada sunggu, sosoa-ndandaan, neu ko ana hai fali, hetu?”
JOH 11:13 Ara kokolak talo naa, nahuu ara duꞌa, Yesus kokolak laꞌe-neu susunggu biasa. Naa te Ana kokolak laꞌe-neu Lasarus mamaten.
JOH 11:14 Boe ma Yesus nafada no ledo-ledo nae, “Talo ia. Lasarus maten ena.
JOH 11:15 Au amahoko Au ta nai naa, neu ana bei ta mate, mita fo ei dalem boso sona. Huu hata fo nau dadi hatematak ia, tao nala ei bisa mamahere neu Au. Mai fo ita teni naa teu leo!”
JOH 11:16 Basa boe ma Tomas, fo ara seseik rae, “ana duak,” nafada ana nunik laen nara nae, “Mai leo! Malole lenak ita basa ngga tungga teu, mita fo ita mate sama-sama to Ndia.”
JOH 11:17 Boe ma Yesus asa laꞌok reni nggorok Betania reu. Nggorok naa doon kada kilo telu numa kota Yerusalem mai. De hatahori Yahudi noꞌuk ka ruma naa mai, fo beꞌe-falufii ma kokoe-nanasi Martaa no Maria. Neu Yesus asa losa naa, boe ma ara bei fo bubuluk rae, hatahorir ratoi heni Lasarus faik haa ena.
JOH 11:20 Neu Martaa namanene nae, Yesus mai ena, boe ma ana kalua fo neu natonggo no Yesus. Tehuu Maria nahani nai kada uma dale.
JOH 11:21 Boe ma Martaa nafada Yesus nae, “Awii, Papa, ee! Mete ma Papa nai ia, na, au fading neu ko ta mate sana.
JOH 11:22 Tehuu au amahere tebe-tebe, Papa noke hata neu Manetualain, na, neu ko Papa hambun.”
JOH 11:23 Boe ma Yesus nafadan nae, “Maꞌa! Neu ko o fadin nasoda fali numa mamaten mai.”
JOH 11:24 Martaa nakaheik nae, “Au alela, neu ko nai dae-bafok fai mateꞌen, neu Lamatuak tao nala basa hatahori mates sara rasoda fali, Ana oo tao nasoda falik au fading boe.”
JOH 11:25 Boe ma Yesus nafada nae, “Au ndia tao hatahori mates dadi nasoda fali. Au oo ndia fee masodak tetebes boe. Dadi hatahori fo mana namahere neu Au, neu ko hambu masodak naa, leo mae ana mate.
JOH 11:26 Boe ma hatahori fo mana hambu masodak tetebes naa, ma namahere neu Au, neu ko nasoda nakandoo. Maꞌa, o mamahere Au kokolang, do?”
JOH 11:27 Martaa naselu nae, “Ia, Papa! Au amahere ae, Papa ia, ndia Karistus, Hatahori naa fo Manetualain henggenee memak kana numa lele uluk mai ena. Ma Papa ia, Manetualain Anan, fo Ana helu-bartaa ena nae nadenun neni dae-bafok ia mai.”
JOH 11:28 Martaa kokolak basa talo naa, boe ma ana laꞌo fali neu ngga. De ana nanggou fadin Maria, fo kada dua sara mesa kasa, boe ma nafada nae, “Papa Meser mai ena. Ana nae natonggo no o.”
JOH 11:29 Maria namanene nala naa, boe ma nambadeik lai-lai de neu sangga Yesus. Hatahori Yahudir fo mana beꞌe-falufii ro Maria numa uma dale, mete-rita ana nambadeik lai-laik fo nalai dea neu. Boe ma ara laꞌok tungga dean. Huu ara duꞌa rae, ana nae neu buꞌi nai rates. Oras naa, Yesus asa bei ta maso reni nggorok dale reu. Ana bei nai mamanak naa fo Martaa natonggo noon ena.
JOH 11:32 Neu Maria losa mamanak naa, boe ma ana mete-nita Yesus. De ana sendek luu-langgan neu Yesus ein. Boe ma ana kokolak nae, “Awii! Mete ma Papa nai ia, na, au fading neu ko ta mate sana.”
JOH 11:33 Neu Yesus mete-nita ana buꞌi namatani, ma hatahori Yahudir fo mana tunggan oo rakarereu boe. De dalen hedis ma nameda susa.
JOH 11:34 Ana natane nae, “Ei matoin nai bee?” Ara raselu rae, “Mai, Papa! Mai fo o mesa ngga mete-mitan leo.”
JOH 11:35 Boe ma Yesus buꞌi namatani.
JOH 11:36 De hatahori Yahudir rakokola aok rae, “Mete dei. Ana sue nalan seli neu Lasarus!”
JOH 11:37 Tehuu ketuk bali kokolak rae, “Hatahori ia, ndia tao nahai hatahori pokek matan, de ana bisa mete-nita. Tao hata de Ana ta bisa kaꞌi Lasarus fo ana ta mate?”
JOH 11:38 Yesus nameda dalen hedis bali. Boe ma Ana neu deka-deka no luak fo ara paken ratoi Lasarus. Ara tatana rala luak naa ena pake batu moꞌok esa.
JOH 11:39 Boe ma Yesus nadenu hatahorir marai naa nae, “Keko heni batu ia, fo soi heni luak ia lelesun dei!” Tehuu Martaa, ndia mana matek naa kaꞌan nasabara nae, “Awii, Papa! Maten faik haa ena ma! Au henggenee naboo ena.”
JOH 11:40 Boe ma Yesus fee nesenedak neun nae, “Masaneda bebeik kara ia, hetu? Au afada memak ena ae, mete ma Maꞌa tebe-tebe mamahere Au, neu ko bisa mete-mita Manetualain ta neni babanggan.”
JOH 11:41 Basa boe ma hambu hatahori hida keko heni batu naa numa luak mai. Boe ma Yesus nasare neni lalai neu, de Ana nae, “Papa! Au oke makasi, nahuu Papa nenene Au.
JOH 11:42 Au bubuluk numa fai uluk mai ena ae, Papa soa namanene neu Au. Tehuu Au kokolak talo naa hatematak ia, mita fo hatahorir fo mana rambariik rai ia bisa bubuluk rae, Papa ndia nadenu Au.”
JOH 11:43 Neu Ana kokolak basa talo naa, boe ma Ana eki no hara beran nae, “Lasarus! Dea mai leo!”
JOH 11:44 Boe ma hatahori mates naa kalua numa luak mai. Hambu temak mbomboti mamates mboti nala liman ma ein. Ma hambu temak fo mboti nala matan boe. Yesus nadenu hatahorir marai naa nae, “Lofa heni temak kara raa dei, mita fo ana laꞌok nala!”
JOH 11:45 Neu ara mete-rita hata fo Yesus taok naa, hatahori Yahudi noꞌuk ka fo mana mai beꞌe-falufii ro Maria, ramahere Yesus.
JOH 11:46 Tehuu hambu ruma bali reu ratonggo ro hatahori partei Farisir fo rafada sara, Yesus tataon naa.
JOH 11:47 Basa boe ma malangga anggama malanggan nara, ma hatahori Farisir rakabua fo rakokola aok. Ara ratatane aok rae, “Hatahori naa tao tanda heran mata-matak kara! Dadi ita muste tao talo bee bali?
JOH 11:48 Mete ma ita elan numa naa, na, neu ko basa hatahorir ramahena neun sama leo Ana dadi neu sira manen. No dalak naa, neu ko man-parenda Roma soldadun nara, mai rakalulutu ita Uma Huhule-haradoi Ina-huun ma ita nusa Yahudi hatahorin.”
JOH 11:49 Teuk naa, Kayafas ndia dadi neu malangga anggamar malangga ina-huun. Ana kokolak nae, “Nggoa bebek kara ein, ee! Ei ta bubuluk hata-hata!
JOH 11:50 Malole lenak soa-neu ei, mete ma hambu kada hatahori esa mate soa-neu basa hatahorir. Mete ma taa, neu ko soldadu Romar rakalulutu nusa Yahudi hatahorin katematuan!”
JOH 11:51 Kayafas ta kokolak tungga ndia hihiin mesa kana. Te Lamatuak pake ndia bafan, nahuu teuk naa, ana dadi malangga anggamar malangga ina-huun. Huu naa de Kayafas nafada memak nae, neu ko Yesus mate soa-neu basa hatahori Yahudir.
JOH 11:52 Naa te, Ana ta mate soa-neu kada nusa Yahudi hatahorin mesa kasa, tehuu soa-neu basa Manetualain anan nara mana ratanggela nai dae-bafok ia. Neu ko Ana tao basa sara dadi reu nusak esa hatahorin.
JOH 11:53 De mulai numa faik fo Kayafas kokolak naa mai, hatahori Yahudi malanggan nara duduꞌa fo rala harak rae tao risa Yesus.
JOH 11:54 Dadi Yesus ta laꞌok ledo-ledo bali, nai hatahori Yahudi malanggan nara taladan. Ana no Ndia ana nunin nara rakaheok reni kota esa reu, nade Efraim, mana deka-deka no mamana nees. De ara leo taak reu naa.
JOH 11:55 Faik naa, anggama Yahudir fai malole Paska deka-deka ena. Netetemek nai naa, hatahori noꞌuk ka ruma deak mai rakabubua nai kota Yerusalem fo tungga feta Paska nai naa. Ara losa rakahuluk, fo tao rambalao aon nara tungga anggama hohoro-lalanen.
JOH 11:56 Hatahori noꞌuk ka mana reni Yerusalem reu, sangga Yesus nai naa. Neu ara rambariik numa Uma Huhule-haradoi Ina-huuk bebelan, ara ratatane aok rae, “Tungga ei, talo bee? Ei duꞌa mae, Yesus nau mai tungga feta anggama ia, do taa?”
JOH 11:57 Tehuu malangga anggama malanggan nara, ma hatahori Farisir parenda ena rae, “Mete ma hambu hatahori bubuluk Yesus nai bee, na, mafada ai dei!” Naa te ara raena nanaek fo rae humu Yesus.
JOH 12:1 Neu bei ela faik nee dei fo fai Paska, Yesus asa reni nggoro Betania mai. Lasarus asa leo rai naa. Lasarus naa, ndia hatahori fo Yesus nasoda falik kana numa mamaten mai.
JOH 12:2 Boe ma ara dode-nasu fo Yesus naꞌa leꞌodaek no sara. Martaa ndia naono-lalau mei. Lasarus nanggatuuk nai mei sama-sama no Yesus.
JOH 12:3 Boe ma Maria haꞌi nala mina kaboo menik isik mabeli esa. De ana mboꞌan neu Yesus ein. Ma ana pake langga bulun fo seka Yesus ein. Boe ma uma naa katematuan naboo meni.
JOH 12:4 Tehuu Yesus ana nunin esa, nade Yudas Iskariot, fo neu ko ana seꞌo heni Yesus, nasabara nae,
JOH 12:5 “Weeh! Hata de ana ta seꞌo mina kaboo menik ia leo? Mina ia belin sama leo hatahori esa nggadin teuk esa. Malole lenak seꞌon leo, fo doin feen neu hatahori mana tofa-tarak kara!”
JOH 12:6 Naa te Yudas kokolak talo naa, nahuu ndia ia, naꞌok, ta huu ana sue hatahori mana tofa-tarak kara. Ana dadi Yesus asa mana toꞌu doin, tehuu ana nasiꞌe loi doik numa mamana doik mai.
JOH 12:7 Tehuu Yesus naselu nae, “Ela inak ia numa naa leo. Ana nambeda mina kaboo menik ia ena, fo nafafaꞌu Au ao-mbaang mamaten fo ara ratoi Au.
JOH 12:8 Hatahori mana matofa-tarak kara soa rai ei taladam mara. Tehuu neu ko Au ta sama-sama ua ei akandoo.”
JOH 12:9 Basa de hatahori Yahudi noꞌuk ka bubuluk rae, Yesus nai nggorok Betania. De ara mai fo nau mete-ritan. Ara oo mai fo sangga mete-rita Lasarus boe. Huu ara ramanene ena rae, Yesus tao nasoda falik Lasarus numa mamaten mai ena.
JOH 12:10 Tehuu malangga anggamar malanggan nara oo, rakokola aok fo sangga dalak rae tao risa Lasarus boe.
JOH 12:11 Huu hatahori Yahudi noꞌuk ka ramanene laꞌe-neu Lasarus tutuin ena, de ara ramahere neu Yesus. Ara ta nau nenene neu hatahori Yahudi malanggan nara ena bali.
JOH 12:12 Neu beꞌe-mai, hatahori noꞌuk kara raa fo mana mai tungga feta Paska nai kota Yerusalem naa, ramanene rala rae, Yesus oo sangga neni naa neu boe.
JOH 12:13 Boe ma ara reu tati rala mbua sina doon fo pake reu soru Yesus mamain, sama leo Ndia naa, hatahori moꞌo-inahuuk. Boe ma ara eki rame-rame rae, “Hosana! Ita koa-kio Manetualain! Huu Lamatuak natudu Ndia dale susuen neu Israꞌel Manen, mana maik no Lamatuak naden!”
JOH 12:14 Boe ma Yesus hambu banda keledei tenak esa, de Yesus saꞌe neu lain. Naa, sama leo neni surak ena nai Manetualain Susura Malalaon dale nae,
JOH 12:15 “Ei hatahori kota Yerusalem mara, boso mamataꞌu, ee! Ei hatahori kota ‘Sion’ ia, mete neni naa neu dei! Huu ei Manem mai! Ana mai saꞌe nai banda keledei tenak esa lain.”
JOH 12:16 Faik naa, Yesus ana nunin nara ta ralela dedeꞌak ia sosoa-ndandaan. Tehuu neu ko, neu Ana nasoda fali numa mamaten mai ena, ma Manetualain nakadedemak kana, dei fo ara rasaneda dedeꞌak kara fo Manetualain Susura Malalaon surak laꞌe-neu Ndia. Ara oo rasaneda hatahori noꞌuk kara iar tataon soa-neu Yesus boe.
JOH 12:17 Neu Yesus nasoda falik Lasarus numa mamaten mai, boe ma nanggoun kalua numa rates mai naa, hambu hatahori noꞌuk ka sama-sama ro Yesus. Dadi hatematak ia, ara ratuik kii-konak laꞌe-neu hata fo fai bakahulun sira mesa kasa mete-ritan.
JOH 12:18 Huu naa de hatahori noꞌuk ka mai soru Yesus deka-deka no Yerusalem, nahuu ara ramanene rala ena rae, Ana tao tanda heran naa ena.
JOH 12:19 Boe ma hatahori Farisir rakokola aok rae, “Ciih! Mete dei! Basa hatahori marai dae-bafok ia ramue-osek fo rae tungga Ndia! Neu ko neu mateꞌen, ita ndia susa! Mete ma talo naa, na, ita tae tao talo bee bali?”
JOH 12:20 Hambu hatahori Yunani hida reni kota Yerusalem mai sama-sama ro hatahori laen nara, fo rae tungga feta Paska nai naa. Ara oo nau rakaluku-rakatele neu Manetualain nai naa boe.
JOH 12:21 Boe ma ara mai ratonggo ro Felipus, manuma nggoro Betseda manai profensi Galilea mai. Ara roke rae, “Kaꞌa! Ai nau matonggo mia Yesus.”
JOH 12:22 Boe ma Felipus neu nafada Anderias. De dua sara reu kokolak ro Yesus.
JOH 12:23 Boe ma Yesus nafada sara nae, “Au faing mai ena. Dadi Au muste mate dei, dei fo Manetualain nau nakadedemak Au. Tebe naa! Ita takasasamak kana no bini-nggees esa. Mete ma ita sele hade binin esa, na, ana muste nakalulutu nai dae dale dei, dei fo ana mori, fo ana kalua nala buna-boak noꞌun seli. Mete ma ta talo naa, ana bei kada hade deꞌek esa ka leo.
JOH 12:25 Hatahori fo ta mana tao matak neu Manetualain hihii-nanaun, nahuu ana sue nalan seli neu ndia masodan nai dae-bafok ia, neu ko masodan naa nakalulutu henin. Tehuu hatahori fo mana sadia loo lima heni ndia masodan nai dae-bafok ia, neu ko hambu masodak tetebes ta mana ketuk.
JOH 12:26 Hatahori fo mana nau naono-lalau Au, ana muste tungga nakandoo Au. Huu naa de Au nai bee, na, Au hatahori neondang nggara oo rai naa boe. Mete ma hambu hatahori naono-lalau Au, na, neu ko Au Amang manai nusa tetuk do inggu temak baꞌe feen hada-horomatak.”
JOH 12:27 Yesus kokolak tamba nae, “Au daleng nameda susa. Tehuu Au ae talo bee bali? Au muste oke ae, ‘Papa! Makamboꞌik Au, mita fo Au hae mate hatematak ia,’ do? Taa! Au ta oke talo naa, nahuu Ana nadenu Au mai, fo Au mate.
JOH 12:28 Dadi Au okek ndia, talo ia: ‘Papa. Naa fo Au tungga kada Papa hihii-nanaun mesa kana, mita fo basa hatahorir rakadedemak Papa naden.’ ” Boe ma hambu harak esa numa lalai mai nae, “Au akadedemak Au nadeng ena. Ma Au oo nau akadedemak kana seluk bali boe.”
JOH 12:29 Basa boe ma hatahori noꞌuk kara fo mana rambariik rai naa ramanene harak naa, de rae, “Hei! Hambu makaruuk!” Hambu hatahori ketuk bali kokolak rae, “Taa! Manetualain atan esa numa nusa tetuk do inggu temak mai kokolak noon.”
JOH 12:30 Tehuu Yesus nafada nae, “Harak bebeik kara naa soa-neu ei, ta soa Au.
JOH 12:31 Hatematak ia hatahori marai dae-bafok ia muste rasare mbali Manetualain fo Ana naketu sira dedeꞌan. Ana oo nae husi heni Mana Tao Manggarauk mana toꞌu parenda nai dae-bafok ia boe.
JOH 12:32 Mete ma hatahorir londa Au nai ai ngganggek lain, neu ko Au leꞌa basa hatahorir fo ara ramahere neu Au.”
JOH 12:33 (Ana kokolak talo naa, fo natudu neu ko Ndia mamaten no dalak talo bee.)
JOH 12:34 Boe ma hatahorir marai naa ratane rae, “Ai mamanene mita numa Manetualain Hohoro-lalanen mai nae, neu ko Karistus nasoda nakandoo. Karistus no Hatahori Dae-bafo Isi-isik naa, sama, do? Dadi tao hata de Papa nae, ‘Neu ko ara rae londa Hatahori Dae-bafo Isi-isik nai ai ngganggek lain?’ Hatahori Dae-bafo Isi-isik naa, see?”
JOH 12:35 Boe ma Yesus naselu nae, “Ta dook ka te Au manggaledon ta nasaꞌa nai ei ena bali. Dadi neu Au bei nai ia, ei muste leo-laꞌo ndoos, mita fo manggarauk boso tatana nala manggaledok manai ei dalem. Hatahori fo mana laꞌok nai makiuk, ana ta bubuluk nae bee neu.
JOH 12:36 Neu Au manggaledon bei hambun, ei muste mamahere neu Au, mita fo ei dadi miu hatahori mana leo-laꞌo nai manggaledok dale, de ei bubuluk mae bee miu.” Yesus kokolak basa talo naa, boe ma Ana nakaheok numa hatahori noꞌuk kara raa mai, mita fo Ndia bisa mesa kana.
JOH 12:37 Leo mae Yesus tao nala tanda heran noꞌun seli nai hatahori noꞌuk kara matan ena, tehuu ara ta nau ramahere neun.
JOH 12:38 Naa, sama leo Manetualain mana toꞌu dedeꞌan Yesaya nafada nita memak kana nae, “Lamatuak, ee! Ta hambu hatahori mana namahere neu ai kokolan! Leo mae Lamatuak natudu Lamatuak koasan ena, tehuu hatahorir tao leo bali ta mete-rita hata-hata na!”
JOH 12:39 Huu naa de hatahori Yahudi ketuk ta bisa ramahere Lamatuak hatematak ia, sama leo Yesaya surak nai mamanak laen nae,
JOH 12:40 “Manetualain tao napoke dalen nara ena, mita fo ara ta bisa mete-rita bali. Ana ela dalen nara ratea, fo ara hae ralela tebe-tebe. Ela sara talo naa, fo ara hae fali sangga Au, ma Au hae tao ahai sara.”
JOH 12:41 Yesaya kokolak talo naa, nahuu ana mete-nita Yesus ta neni babanggan ena, de ana tui memak laꞌe-neu Yesus.
JOH 12:42 Leo mae talo naa, tehuu hatahori noꞌuk ka ramahere neu Yesus. Ta kada hatahori biasa a mesan, tehuu hambu hatahori Yahudi malanggan ketuk oo ramahere neu Ndia boe. Tehuu ara ta manaku Yesus no ledo-ledo nai hatahori noꞌuk kara matan, nahuu ara ramataꞌu hatahori Farisir fo neu ko husi heni sara ruma uma huhule-haradoik mai.
JOH 12:43 Malanggan nara raa ta nau hambu kokoak numa Lamatuak mai, nahuu hihiin nara lenak fo hambu kokoak numa hatahori dae-bafok mai.
JOH 12:44 Basa de Yesus kokolak no hara berak nae, “Hatahori fo mana namahere neu Au naa, ana ta namahere kada Au mesa ngga, tehuu ana oo namahere neu Hatahori fo mana nadenu Au boe.
JOH 12:45 Mete ma hatahori mete-nita Au, na, ana oo mete-nita Hatahori fo mana nadenu Au boe.
JOH 12:46 Au mai fo dadi sama leo manggaledok nai dae-bafok ia. Mita fo basa hatahorir fo mana ramahere Au, ta leo-laꞌo nai makiuk.
JOH 12:47 Mete ma hambu hatahori namanene Au Dedeꞌa-kokolang, tehuu ta tao tunggan, na, Au ta aketu-aladi ndia huku-dokin. Au nanaeng uni dae-bafok ia mai, ta ae aketu-aladi hatahorir huku-dokin, tehuu Au nau tao asoi-asoda hatahorir numa sira sala-singgon nara mai.
JOH 12:48 Basa hatahorir fo mana timba heni Au, ma ta nau simbok Au Dedeꞌa-kokolang, ana naena mana maketu-maladi dedeꞌak. Mete ma dae-bafok fai mateꞌen losa, Dedeꞌa-kokolak fo Au kokolak ita, ndia neu ko naketu-naladi hatahori matak leo naak huku-dokin.
JOH 12:49 Au ta kokolak ita unik Au nade heli-heling, tehuu Au kokolak unik kada Au Amang manai nusa tetuk do inggu temak naden. Ndia naa, ndia nadenu Au. Ma Ana ndia parenda Au fo Au muste kokolak hata.
JOH 12:50 Au oo bubuluk boe ae, Ndia parendan naa, neni masodak tetebes ta mana ketuk. Huu naa de Au kokolang tungga no tetuk hata fo Au Amang nadenu fo Au kokolak.”
JOH 13:1 Neu fai malole Paska bei ta mulai, Yesus bubuluk ena nae, Ndia fain losa ena, fo Ndia muste kalua laꞌo ela dae-bafok ia, ma fali neni Ndia Aman manai nusa tetuk do inggu temak neu. Huu Ana sue nalan seli neu Ndia hatahorin nara marai dae-bafok ia, losa Ana loo lima Ndia masoda katematuan soa-neu sara.
JOH 13:2 Faik naa, nitur malanggan dudunggu Yudas, ndia Simon Iskariot anan ena, fo ana seꞌo heni Yesus. De Yudas naketu nala ena fo nae tao talo naa, neu Yesus asa ranggatuuk raꞌa feta Paska naa.
JOH 13:3 Yesus bubuluk ena nae, Manetualain ndia nadenu Ndia neni dae-bafok ia mai, ma ta dook ka bali Ndia muste fali neni Manetualain neu. Ma Ana oo bubuluk nae, Ndia Aman manai nusa tetuk do inggu temak loo lima basa-basan nai Ndia liman ena boe.
JOH 13:4 De Yesus nambadeik numa mei mai, boe ma Ana olu heni Ndia badu dean. Ana haꞌi nala handuk esa, fo paꞌan neu Ndia fofoꞌen.
JOH 13:5 Boe ma Ana mboꞌa oe neni bokor kadiꞌik esa neu. De Ana mulai safe Ndia ana nunin nara ein. Safe basa esa, na, Ana seka namadan pake handuk fo Ana paꞌak nai fofoꞌen naa.
JOH 13:6 Ana safe sira esa-esak ein. Ndaa losa Simon Petrus, boe ma Petrus natane nae, “Papa oo mae safe au eing boe, do?”
JOH 13:7 Yesus naselu nae, “Hatematak ia o bei ta bubuluk laꞌe-neu hata fo Au taok ia. Tehuu doo-doo dei fo o malela.”
JOH 13:8 Tehuu Petrus nasabara nae, “Boso talo naa, Papa! Au ta fee lelak fo Papa safe au eing.” Boe ma Yesus naselu nae, “Mete ma Au ta safe alao o eim, na, o ta makaesa mua Au.”
JOH 13:9 Boe ma Simon Petrus naselu nae, “Mete ma talo naa, Papa boso safe kada au eing mesa kana. Tehuu safe au limang ma langgang boe!”
JOH 13:10 De Yesus nafadan nae, “Hatahori fo nadiu basa oe ena, parluu kada safe ein mesa kana. Huu ndia ao-inan basan laok ena. Memak ei dalem mara lolo-laok ena, tehuu ta basan lolo-laok.”
JOH 13:11 (Yesus kokolak talo naa, nahuu Ana bubuluk see ndia nae seꞌo heni Ndia ena. Huu naa de Ana nafada nae, “Ta basa-basan lolo-laok.”)
JOH 13:12 Neu Yesus safe basa ein nara, boe ma Ana pake falik badun, de Ana neu nanggatuuk fali neu mei. Boe ma Ana natane sara nae, “Talo bee? Neu Au safe ei eim mara, ei malela Au tataon naa, do taa?
JOH 13:13 Ei masiꞌe seseik Au mae, ‘Papa Meser’ ma ‘Lamatuak’ fo naena haak parenda ei. Naa ndaa, nahuu Au memak ndian ena.
JOH 13:14 Tehuu mete ma ei Mesem ma Lamatuam ia, safe eim mara ena sama leo hatahori neondak esa, na, talo bee neu ei? Ei oo muste maono-lalau esa mbali esa boe; haꞌi netuduk leo: ei oo esa no esa muste masafe eik boe.
JOH 13:15 Huu Au dadi netuduk ena soa-neu ei. Au tao talo bee, na, ei oo muste tao tungga talo naa boe.
JOH 13:16 Tebe! Au afada ei. Hatahori neondak esa, ta hohoꞌan ta lena heni ndia lamatuan. Ma nedenuk esa ta hohoꞌan ta lena heni hatahori fo mana nadenu ndia.
JOH 13:17 Hatematak ia ei bubuluk dedeꞌak ia ena, de ei maua mete ma ei tao tungga talo naa.
JOH 13:18 Au ta kokolak laꞌe-neu ei basa ngga. Au alela tetebes hatahori fo Au here alak kasa ena. Leo mae talo naa, tehuu naa muste dadi, sama leo hata fo neni surak memak kana nai Manetualain Susura Malalaon nae, ‘Hatahori fo mana nanggatuuk naꞌa sama-sama no Au, nasadea fo laꞌo ela Au ena.’
JOH 13:19 Au afada memak neu ei, fo mete ma neu ko hatahori laꞌo ela Au talo naa ena, na, ei bisa mamahere mae, Au ia, ndia Karistus.
JOH 13:20 Tebe! Au oo afada boe ae, see ndia buka dalen fo simbok no malole neu hatahori fo Au adenuk, na, ana oo simbok Au boe. Ma see ndia simbok Au no malole, na, ana oo simbok Hatahori fo mana nadenu Au boe.”
JOH 13:21 Yesus kokolak basa talo naa, boe ma dalen mulai nameda ta malole. De Ana nafada nae, “Hata fo Au kokolak ia, tetebes. Esa numa ei mai, neu ko ana seꞌo heni Au.”
JOH 13:22 Ana nunin nara ramanene rala naa, boe ma esa mete esa, de ara pangganaa. Ara ta bubuluk Ana nafadak naa ndia see.
JOH 13:23 Numa naa oo, hambu esa numa sira mai, fo Yesus suen boe (ndia au, Yohanis, mana surak buku ia). Au anggatuuk nai Yesus boboan.
JOH 13:24 Boe ma Simon Petrus fee tanda nenik langgan, fo au soba sangga bubuluk Yesus nefadan naa ndia see.
JOH 13:25 Basa de au keko aong deka-deka no Yesus, fo atane ae, “Hatahori fo Lamatuak nafadak naa ndia see, ee?”
JOH 13:26 Boe ma Yesus naselu nae, “Talo ia. Au ae haꞌi ala roti bibiak esa, fo boron neni manggo dale neu, basa de Au feen neni hatahori fo Au afadak naa.” Ana boro basa roti naa, boe ma Ana feen neu Yudas, ndia Simon Iskariot anan.
JOH 13:27 Simbo nalak ka roti naa, boe ma nitu malanggan maso neni Yudas dale neu. De Yesus nafadan nae, “Lai-lai leo! O nau tao hata, na, taon leo. Boso mahani bali.”
JOH 13:28 Tehuu hatahori laen mana manggatuuk nai naa, ta nalela tao hata de Yesus kokolak talo naa.
JOH 13:29 Ketuk duduꞌa rae Yesus kokolan bebeik kara raa, nadenu Yudas nae, “Muu hasa hata fo ita parluu taꞌa nai feta Paska.” Ma hambu ketuk oo duduꞌa boe rae, Ndia kokolan naa nae, “Muu fo fee doik faa neu hatahori mana tofa-tarak kara.” Ara duduꞌa talo naa, nahuu Yudas dadi neu sira mana toꞌu doin.
JOH 13:30 Neu Yudas simbo basa roti naa, boe ma ana kalua laꞌo lai-laik. Neu ana kalua laꞌo naa, fai leꞌodae ena.
JOH 13:31 Neu Yudas kalua laꞌo ena, boe ma Yesus nafada nae, “Au ia, Hatahori Dae-bafo Isi-isik. Hatematak ia fain losa ena fo Manetualain nakadedemak Au. Ma naa oo, neu ko tao nala hatahorir mete-rita Manetualain ta neni babanggan boe.
JOH 13:32 Au akaesa ua Manetualain ma atudu Ndia ta neni babanggan, huu naa de Ana nakadedemak Au. Ma Ana ta pake nahani bali.
JOH 13:33 Ana nggara ein, ee! Leo mae Au sue alan seli neu ei, tehuu ta dook ka te Au ta sama-sama ua ei ena bali. Neu ko ei mae sangga Au, tehuu ta hambu. Au afada ei ia, sama leo hata fo Au afada hatahori Yahudi malanggan nara ae, ‘Au uni mamanak esa uu, fo ei ta bisa tungga.’
JOH 13:34 Au fee ei parenda beuk esa, talo ia: ei muste masue-laik esa no esa, sama leo Au sue-lai neu ei. Dadi ei oo muste masue-laik esa no esa boe.
JOH 13:35 Mete ma ei masue-laik talo naa, na, basa hatahorir bisa bubuluk rae, eir ia, Au ana nuning nggara.”
JOH 13:36 Basa de, Simon Petrus natanen nae, “Te Lamatuak sangga nae bee neu?” Boe ma Yesus nafada nae, “Au uni mamanak esa uu, fo o bei ta bisa tungga muu hatematak ia. Tehuu mateꞌen te o muni naa muu boe.”
JOH 13:37 Petrus natane nae, “Lamatuak, ee! Tao hata de au bei ta bisa tungga uu hatematak ia? Au ahani a ena fo mate soa-neu Lamatuak!”
JOH 13:38 Yesus naselu nae, “Tetebes, do? O nau loo lima o sodam fo mate soa-neu Au? Ndodoon ndia talo ia: manu bei ta kokoa, te o laka ta malela Au laꞌe telu ena.”
JOH 14:1 Yesus kokolak tamba nae, “Boso dadi duduꞌak neu ei. Mamahere neu Manetualain. Ma mamahere neu Au boe.
JOH 14:2 Nai Au Amang mamana leleon, hambu kama noꞌun seli. Mete ma mamanak ta dai, na, neu ko Au afada memak neu ei ena. Hatematak ia Au ae uu sadia mamanak fee ei nai naa.
JOH 14:3 Mete ma Au uu ena, ma sadia ala ei mamanam mara ena, neu ko Au fali mai, fo ei tungga sama-sama mia Au. No dalak naa, Au nai bee, na, ei oo nai naa boe.
JOH 14:4 Huu ei bubuluk dalak mana neni mamanak fo Au ae uu naa ena.”
JOH 14:5 Tehuu Tomas natanen nae, “Lamatuak, ee! Ai ta bubuluk Lamatuak nae neni bee neu. Dadi talo bee de ai bisa bubuluk dalak mana neni naa neu?”
JOH 14:6 Boe ma Yesus nafada nae, “Ta hambu dalak laen fo no hatahori reni Amak nai nusa tetuk do inggu temak neu. Kada nesik Au mesa ngga. Huu Au ia, dalak mana neni Manetualain neu. Au ia, mana toꞌu ndoo-tetuk. Ma Au ia, mana fee masodak tetebes. Ta hambu dalak laen bali.
JOH 14:7 Leo ei malela Au tetebes, na, ei oo malela Au Amang boe. Dadi mulai numa hatematak ia mai, ei oo malela Ndia ena, ma mete-mita Ndia ena boe.”
JOH 14:8 Felipus noke nae, “Lamatuak, ee! Tulun matudu Lamatuak Aman mai ai dei! Kada naa, dai ena.”
JOH 14:9 Boe ma Yesus nafadan nae, “Ipu, ee. Au sama-sama ua ei doo basa ia ena, tehuu ei bei ta malela Au no tebe-tebe, do? Hatahori mana mete-nita Au ena, sama leo ndia oo mete-nita Au Amang ena boe. Tao hata de bebeik kara o moke mae, ‘Matudu Amak neu ai’ bali?
JOH 14:10 Talo bee? Neu Au ae, Au akaesa ua Amak, ma Amak oo nakaesa no Au boe, na, o mamahere neu Au, do taa? Dedeꞌa-kokolak fo Au kokolak neu ei naa, ta raoka nai Au mesa ngga, tehuu ara raoka nai Au Amang. Ma Ana pake Au fo tao akandoo Ndia ue-osan.
JOH 14:11 Mamahere Au, neu Au ae, Au akaesa neulauk ua Au Amang, ma Ndia oo nakaesa neulauk no Au boe. Tehuu mete ma ei ta bisa mamahere talo naa, na, mamahere neu Au, nahuu ei mete-mita dedeꞌak kara fo Au taok kara ena.
JOH 14:12 Au kokolang naa, tetebes! Ia oo tetebes boe, hatahori fo mana namahere neu Au, neu ko ana oo tao dedeꞌak sama leo Au taok boe. Huu Au uni Au Amang uu, de hata fo hatahori naa taok, neu ko ta hohoꞌan lena heni Au taok.
JOH 14:13 Ei mana makaesak mia Au, maena haak fo meni Au nadeng. Dadi mete ma ei hule-haradoi fo moke hata a mesan, menik Au nadeng, neu ko Au tao fee ei. No dalak naa, Au akadedemak Au Amang, mita fo basa hatahorir bubuluk.
JOH 14:14 Au afada seluk bali: ei hule-haradoi fo moke hata a mesan, menik Au nadeng, neu ko Au taon fee ei.”
JOH 14:15 Yesus kokolak tamba nae, “Mete ma ei sue-lai Au, na, ei tao tungga Au parendang nggara.
JOH 14:16 Au oke neu Au Amang, neu ko mete ma Au ta sama-sama ua ei bali, na, Ana fee ei Mana Makalalaꞌok esa fo natudu dalak soa-neu ei. Ndia naa, Manetualain Dula-dalen, mana manori ei hata fo ndoos. Hatahori ketuk nai dae-bafok ia, ta nau simbok kana, nahuu ara ta bisa mete-rita Ndia, ma ta ralelan. Ei malelan, nahuu Ana nakaesa no ei. Neu ko Ana leo nai ei dalem. Boe ma Ana oo, neu ko sama-sama no ei nakandoo boe.
JOH 14:18 No dalak naa, Au ta laꞌo ela ei mesa ngga, sama leo kakanak fo ta naena ina-ama. Tehuu masaneda, te neu ko Au fali mai uni ei neti.
JOH 14:19 Baꞌu anak bali te, hatahori laen manai dae-bafok ia, ta mete-rita Au ena bali. Neu ko ei mete-mita Au, nahuu Au asoda fali numa mamates mai. De ei oo hambu masodak tetebes boe.
JOH 14:20 Ma neu faik fo Au asoda fali numa mamates mai ena, neu ko ei bubuluk tebe-tebe mae, Au akaesa ua Au Amang; ei makaesa mia Au; ma Au oo akaesa ua ei boe.
JOH 14:21 Hatahori fo mana simbok ma tao tungga Au parendang nggara, na, hatahori naa ndia sue-lai Au. Ma Au Amang oo sue-lai hatahori fo mana sue-lai Au naa boe. Au oo sue-lai ndia boe, ma atudu Au aong neun.”
JOH 14:22 Numa naa, hambu hatahori esa, nade Yudas. Ndia naa, ta Yudas Iskariot. Neu ana namanene Yesus kokolan, boe ma natane nae, “Lamatuak nae natudu aon neu ai. Tehuu tao hata de Lamatuak ta nau natudu aon neu hatahori laen manai dae-bafok ia?”
JOH 14:23 Yesus naselu nae, “Talo ia. Hatahori fo mana sue-lai Au, neu ko ana tao tungga Au Dedeꞌa-kokolang. Au Amang oo suen boe. De Au ma Au Amang leo dalek esa mian.
JOH 14:24 Tehuu hatahori fo ta mana sue-lai Au, Ana oo ta tao tungga Au Dedeꞌa-kokolang boe. Basa dedeꞌak kara fo ei mamanene numa Au mai ia, ta raoka nai Au, tehuu raoka nai Au Amang mana nadenu Au.
JOH 14:25 Hatematak ia Au bei sama-sama ua ei. Huu naa de Au afada memak dedeꞌa bebek kara iar.
JOH 14:26 Tehuu doo-doo te Au Amang nae nakonda Mana Makalalaꞌok esa, ndia Ndia Dula-dale Malalaon. Dula-dalek naa neu ko nggati Au nai dae-bafok ia. Ndia uen naa, ndia: nanori ei laꞌe-neu basa dedeꞌak kara, ma fee nesenedak basa dedeꞌak kara fo Au afada ita sara neu ei.
JOH 14:27 Neu faik fo Au uu ena, neu ko Au tao fo ei bisa leo-laꞌo no mole-damek ma dale linok. Kada Au mesa ngga ndia bisa fee dale lino-lendek talo naa. Basa hata fo marai dae-bafok ia ta bisa tao nala ei dalem mara linok talo naa. De boso elan fo dadi duduꞌak ma nemetaꞌuk soa-neu ei.
JOH 14:28 Ei mamanene mita Au afada ei ae, ‘Au laꞌo ela ei, basa boe ma neu ko fali mai.’ De dalem mara hae sona. Mete ma ei sue-lai Au, na, ei dalem mara ramahoko, nahuu Au uni Au Amang uu. Au Amang naa, ta neni babanggak lena heni Au.
JOH 14:29 Masaneda, te Au afada memak neu ei ena. No dalak naa, mete ma dedeꞌak bebeik kara iar neu ko ara dadi, na, ei bisa mamahere neu Au.
JOH 14:30 Baꞌu anak bali te Au ta kokolak ua ei ena. Nitur malanggan fo mana toꞌu parenda nai dae-bafok ia, hatematak ia ana mai, tehuu ndia koasan ta laꞌe Au.
JOH 14:31 Leo mae ana mai, tehuu Au laꞌok akandoo fo tao tungga Au Amang parendan. Naa, natudu neu hatahorir marai dae-bafok ia nae, Au sue alan seli neu Au Amang. Mai fo ita teu leo!”
JOH 15:1 Yesus kokolak nae, “Nenene, ee! Ei makaesa mia Au. Au sama leo ai anggor esa huun. Tehuu Au ia, ai huu anggor tetebes! Ma Au Amang naa, sama leo mana tao osi.
JOH 15:2 Dadi mana tao osi tati heni basa ndanak bee fo ta kaboak kara sama leo Au Amang nggari heni hatahori fo mana kada nae ndia nakaesa no Au, tehuu ta tao hata esa boe na. Tehuu hatahori esa-esak fo mana nakaesa tebe-tebe no Au, Amak tao nalao basa dafuk numa dalen mai, sama leo mana tao osi nggute kekeꞌu ndanak esa fo boan boe namanoꞌu.
JOH 15:3 Au Dedeꞌa-kokolang naa, bisa tao nalalao ei dalem mara ena, sama leo mana tao osi tao nalalao ndia ai huun ndanan nara.
JOH 15:4 Ei muste makaesa makandoo mia Au, sama leo Au akaesa ua ei. Te ndanak bee fo senggi henin numa ndia huun mai, ta bisa naboa hata esa boe na. Ei oo leo naak boe. Ei ta bisa tao hata neulauk esa boe na, mete ma ei ta makaesa makandoo mia Au.
JOH 15:5 Au ia, sama leo ai huu anggor esa. Eir ia, sama leo ndia ndanan. Dadi hatahori fo mana nakaesa nakandoo no Au, ma Au oo akaesa uan boe, ndia naa sama leo ndanak esa mana naboa noꞌuk. Tehuu mete ma ei ta makaesa makandoo mia Au, na, ei ta bisa tao hata fo neulauk.
JOH 15:6 Hatahori fo ta mana nakaesa nakandoo no Au, ndia naa sama leo ndanak esa fo sosoan taa. Ndanak matak leo naak naa, hatahori nasiꞌe tati henin, fo elan namatuu. Boe ma hatahori naduduru nala ndanak kara raa, de nggari sara reni aꞌi dale reu, fo hotu heni sara.
JOH 15:7 Tehuu mete ma ei makaesa makandoo mia Au, ma Au Dedeꞌa-kokolang oo, leo nakandoo nai ei dalem mara boe, na, ei bisa moke hata a mesan neu Manetualain, basa te neu ko Ana taon fee ei.
JOH 15:8 Mete ma ei tao hata neulauk makadotok, sama leo ndanak esa naboa makadoto ndoos, naa nakadedemak Manetualain. No dalak naa, ei oo matudu boe mae, eir ia, Au ana nuning nggara.
JOH 15:9 Sama leo Amak sue-lai Au, Au oo sue-lai ei talo naa boe. Ei muste makaesa makandoo mia Au, mita fo Au bisa atudu Au susueng neu ei.
JOH 15:10 Mete ma ei tao tungga Au parendang nggara, na, ei makaesa makandoo mia Au, boe ma Au bisa atudu Au susueng neu ei. Naa, sama leo Au tao tungga Au Amang parendan, de Ana natudu susuen nakandoo neu Au.
JOH 15:11 Au afada dedeꞌak bebeik kara iar neu ei numa fai bakahulun mai, mita fo ei dalem mara bisa mbena sau-sau, sama leo Au daleng mbena sau-sau. Huu Au nanaung fo ei dalem mara mbena sau-sau noꞌun seli!
JOH 15:12 Au parendang talo ia: ei muste masue-laik esa no esa, sama leo Au oo sue-lai ei ena boe.
JOH 15:13 Mete ma hatahori esa sadia mate mita fo ndia nonoon bisa nasoda, ana sue nalan seli neu nonoon. Ta hambu susuek ta hohoꞌak lena heni naa.
JOH 15:14 Mete ma ei tao tungga makandoo Au parendang, ei dadi miu Au nonoong nggara.
JOH 15:15 Au ta nau seseik ei ae, Au ‘hatahori neondang’ bali. Huu hatahori neondak esa ta nalela no tetuk ndia malanggan hihii-nanaun. Tehuu Au seseik ei, ndia Au ‘nonoong nggara’, nahuu Au buka no ledo-ledo basa hata fo Au Amang nafada neu Au ena.
JOH 15:16 Ei ta ndia here Au. Tehuu Au ndia here ma soꞌu ala ei fo makalalaꞌok ues ia. Dadi ei muste miu tao hata fo neulauk noꞌuk ka fo mana nakatataka losa dook. Naa, sama leo ai huu anggor esa naboa neulauk nakandoo. Mete ma ei tao talo naa, na, ei bisa moke hata a mesan neu Au Amang, basa de Ana taon fee ei.
JOH 15:17 Dadi hata fo Au parenda neu eir ia, talo ia: ei muste masue-laik esa no esa.”
JOH 15:18 Yesus kokolak tamba nae, “Mete ma hatahori marai dae-bafok ia mburuk ro ei, na, masaneda te ara mburuk ro Au rakahuluk ena.
JOH 15:19 Mete ma eir ia, sama leo hatahori laen marai dae-bafok ia, na, ara sue ei. Tehuu ei ta sama mia sara. Au here ala ei, fo bingga heni ei numa sira mai. Huu naa de ara mburuk ro ei.
JOH 15:20 Boso lilii-ndondou hata fo Au afada neu ei ena ae, ‘Hatahori neondak esa ta hohoꞌan ta lena heni ndia malanggan.’ Dadi mete ma ara tao doidoso Au, na, ara oo tao doidoso ei boe. Mete ma ara ramanene Au Dedeꞌa-kokolang, na, ara oo nenene ei boe.
JOH 15:21 Neu ko ara tao doidoso ei, nahuu ei makaesa mia Au. Huu ara oo ta ralela Ndia mana nadenu Au boe.
JOH 15:22 Mete ma Au ta mai kokolak ita ua sara, boe ma atudu eno-dala masodak tetebes neu sara, na, ara duduꞌa rakandoo rae, sira ta raena salak hata esa boe na. Tehuu Au mai ena, ma kokolak talo naa ena. Dadi hatematak ia, mete ma ara tao salak, na, ara ta raena dedeꞌa huuk hata esa bali fo kokolak rae, ‘Wee! Air ia, ta bubuluk hata fo ai taok naa, sala.’
JOH 15:23 Hatahori fo mana mburuk no Au, ana oo mburuk no Au Amang boe.
JOH 15:24 Au tao tanda heran mata-matak kara nai matan nara ena, fo hatahori laen ta tao nita. Mete ma Au ta tao dedeꞌak kara raa, ara oo ta sala, leo mae ara ta nau simbok Au boe. Naa te ara mete-rita tanda heran raa ena, fo Au taok kara ena. Leo mae talo naa, tehuu ara oo bei mburuk ro Au ma Au Amang manai nusa tetuk do inggu temak boe.
JOH 15:25 Tehuu basa dedeꞌak bebeik kara iar dadi ena, fo tao tungga hata neni surak ena nai Manetualain Hohoro-lalanen dale fo ei toꞌu maherek naa nae, ‘Ara mburuk ro Au. Naa te sira dale mburun naa, ta raena huuk faa boe na.’
JOH 15:26 Tehuu neu ko Mana Makalalaꞌok naa nae mai. Ndia naa, Dula-dalek fo mana tao ei malela hata fo ndoos. Ana numa Au Amang mai. Mete ma Au uni Au amang uu ena, na, neu ko Au akonda Ndia Dula-dalen mai fee ei. Ana nafada ei laꞌe-neu Au.
JOH 15:27 Ei oo neu ko mafada hatahori laꞌe-neu Au boe, nahuu ei sama-sama mia Au numa makasosoan mai ena.
JOH 16:1 Au afada dedeꞌak bebeik kara iar neu ei ena, mita fo ei ta makaheok numa Au mai.
JOH 16:2 Neu ko hatahori Yahudir husi heni ei numa sira uma huhule-haradoin mai. Ta talo kada naa, te neu ko hambu tembo-lelek esa boe, mete ma hatahorir tao risa ei, ara duꞌa rae ara tao tatao neulauk soa-neu Manetualain.
JOH 16:3 Ara tao talo naa soa-neu ei, nahuu ara ta ralela Au no tetebes. Ara oo ta ralela Au Amang boe.
JOH 16:4 Tehuu Au afada dedeꞌak bebeik kara iar neu ei ena, fo mete ma dedeꞌak bebeik kara iar dadi ena, na, neu ko ei bisa masaneda mae, Au afada akahuluk memak ei ena. Au bei ta afada ndia fai bakahulun, nahuu Au bei sama-sama ua ei.”
JOH 16:5 Yesus fee nenorik tamba nae, “Hatematak ia Au fali uni Ndia fo mana nadenu Au uni dae-bafok ia mai. Tehuu ta hambu numa ei mai matane Au mae, ‘Lamatuak nae bee neu?’
JOH 16:6 Ei dalem mara rameda hedis, nahuu Au afada dedeꞌak ia neu ei ena.
JOH 16:7 Tehuu hata fo Au afadak neu ei naa, tetebes. Mete ma Au uu, na, naa lolen lenak soa-neu ei. Mete ma Au ta uu, na, Mana Makalalaꞌok naa ta mai natudu dalak soa-neu ei. Tehuu mete ma Au uu, na, Au akondan mai soa-neu ei.
JOH 16:8 Mete ma Ana mai ena, na, neu ko Ana natudu hatahorir marai dae-bafok ia nae, sira dalen ma tatao-nonoꞌin nara raa, sala. Ana fufudi sara fo tungga eno-dala masodak tetebes. Ma Ana oo fee nesenedak neu sara boe nae, neu ko Manetualain nae naketu-naladi sira dedeꞌan nae, sira raa, ndaa, do sala.
JOH 16:9 Mana Makalalaꞌok naa natudu salan nara, nahuu ara ta ramahere neu Au.
JOH 16:10 Ana oo natudu eno-dala masodak tetebes boe. Neu ko ei ta mete-mita Au bali, nahuu Au fali uni Au Amang uu. Huu naa de Mana Makalalaꞌok naa mai fo nggati Au.
JOH 16:11 Ana oo natudu boe nae, Manetualain nae naketu-naladi hatahori dedeꞌan no tetuk, nahuu Manetualain naketu-naladi dedeꞌak soa-neu nitur malanggan ena, fo mana parenda nai dae-bafok ia.
JOH 16:12 Bei hambu dedeꞌak noꞌuk ka fo Au bei nau afada ei, tehuu ei bei ta bisa malela hatematak ia.
JOH 16:13 Tehuu mete ma Dula-dalek mana natudu hata fo ndoos mai ena, na, Ana nakalalaꞌok mita fo ei bisa malela basa hata fo ndoos. Ana ta kokolak numa kada Ndia ao heli-helin mesa kana mai, tehuu Ana nafada hata fo Ana namanenen numa Au Amang mai. Ana oo nau nafada ei boe, hata fo doo-doo te neu ko ana dadi.
JOH 16:14 Ana nau nakadedemak Au, nahuu Ana nae buka basa hata fo ndoos laꞌe-neu Au, ma natudun neu ei.
JOH 16:15 Basa hata fo mana dadi neu Au Amang enan oo dadi neu Au enang boe. Huu naa de Au kokolak bebeik kara ia ae, Manetualain Dula-dalen neu ko nae buka basa hata fo ndoos laꞌe-neu Au, ma natudun neu ei.”
JOH 16:16 Yesus nafada tamba nae, “Ta dook ka bali te ei ta mete-mita Au ena. Tehuu ta dook ka boe te ei mete-mita falik Au bali.”
JOH 16:17 Basa naa, Ndia ana nunin nara ketuk rakokola aok rae, “Tao hata de Lamatuak kokolak nae, ‘Ta dook ka bali ei ta mete-mita Au ena. Tehuu ta dook ka boe te ei mete-mita falik Au bali.’ Ma tao hata de Ana kokolak nae, ‘Au ae uni Au Amang uu’?”
JOH 16:18 Boe ma ratatane aok rae, “Tao hata de Ana kokolak nae, ‘Ta dook ka bali’? Ita ta talela.”
JOH 16:19 Yesus bubuluk ena ara rae ratane dedeꞌak esa neu Ndia. Boe ma Ana kokolak nae, “Bebeik kara Au kokolak ae, ‘Ta dook ka bali, ei ta mete-mita Au. Tehuu ta dook ka boe te ei mete-mita falik Au bali.’ Ei matatanek mae leo naa, hetu?
JOH 16:20 Malole boe, mete ma ei nau sangga bubuluk talo naa. Au oo ae afada neu ei talo ia boe: neu ko ei buꞌi ma dalem mara sona, tehuu hatahori laen nara marai dae-bafok ia ramahoko. Leo mae ei dalem mara sona talo naa, tehuu neu ko ei dalem mara dadi ramahoko rasafali.
JOH 16:21 Naa, sama leo inak esa nameda hedis nae bonggi. Dalen nameda hedis dei, nahuu ndia susa-sonan mai ena. Tehuu mete ma ana bonggi basa kakanak naa ena, ndia susa-sonan mopon tutik kana. Te ndia dalen dadi namahoko, nahuu hambu hatahori beuk bonggin nai dae-bafok ia ena.
JOH 16:22 Ei oo leo naak boe. Hatematak ia ei buꞌi ma dalem mara sona. Tehuu doo-doo boe ma Au mai tiro seluk ei, basa de ei dalem mara dadi namahoko nasafali. Mete ma dedeꞌak naa dadi ena, na, ta hambu hatahori esa boe na, bisa nakatataak nala ei dalem nemehokon.
JOH 16:23 Mete ma Au mai seluk bali, na, ei ta matatane hata esa boe na neu Au ena. Tebe! Au afada seluk bali neu ei ae, mete ma ei moke hata a mesan numa Au Amang mai menik Au nadeng, na, neu ko Ana taon talo naa fee ei.
JOH 16:24 Losa hatematak ia, ei bei ta moke hata-hata menik Au nadeng. Dadi moke leo, fo ei simbon. No dalak naa, ei dalem mara bisa ramahoko tetebes.”
JOH 16:25 Yesus kokolak tamba nae, “Losa hatematak ia, Au asiꞌe anori ei pake lololek kara. Tehuu neu ko hambu faik, fo Au fee nenorik ta pake lololek bali. Huu Au nau kokolak ledo-ledo laꞌe-neu Au Amang.
JOH 16:26 Mete ma faik naa mai ena, na, ei mesa ngga ndia hule-haradoi fo moke aom neu Au amang menik Au nadeng. Au hae hule-haradoi bali soa-neu ei.
JOH 16:27 Au Amang sue-lai ei, nahuu ei sue-lai Au. Ma ei oo mamahere tebe-tebe boe mae, Manetualain ndia nadenu Au.
JOH 16:28 Fai bakahulun Au laꞌo ela Au Amang, fo leo taak nai dae-bafok ia. Tehuu hatematak ia Au ae laꞌo ela dae-bafok ia, fo uu leo falik ua Ndia.”
JOH 16:29 Yesus ana nunin nara ramanene rala naa, boe ma rafada rae, “Lamatuak hatematak ia kokolak ledo-ledo ena, ma ta fee nenorik pake lololek kara bali!
JOH 16:30 Ai mamahere tebe-tebe ena, Lamatuak bubuluk basa dedeꞌak kara. Hatahorir ta parluu ratane hata-hata bali neu Lamatuak, nahuu Lamatuak bubuluk nakahuluk hata fo ara rae ratanek, ma neselun leo beek. Naa, natudu ai nae, Lamatuak memak numa Manetualain mai.”
JOH 16:31 Boe ma Yesus natane sara nae, “Tebe, do? Hatematak ia ei mamahere neu Au, do?
JOH 16:32 Talo ia. Baꞌu anak bali, ndia doo faa ia, ei basa ngga malai matanggela. Hatahori esa-esak nalai laꞌo ela Au, fo neu keke nai ndia mamana heli-helin. Leo mae talo naa, tehuu Au ta mesa ngga, nahuu Au Amang sama-sama no Au.
JOH 16:33 Au afada dedeꞌak bebeik kara iar ena neu ei, mita fo ei dalem mara bisa linok, nahuu ei makaesa mia Au. Hatahorir marai dae-bafok ia, neu ko rakasususak ma tao doidoso ei. Tehuu matetea ei dalem mara, te Au tao asenggi basa koasar ena marai dae-bafok ia!”
JOH 17:1 Yesus kokolak basa talo naa, boe ma Ana nasare mbali lalai neu, de hule-haradoi nae: “Ama Bonggik, ee. Au faing losa ena, fo Amak nakadedemak Au. Au ia, Amak Anan. Amak fee Au haak ena fo koladu basa hatahorir marai dae-bafok ia. Amak fee haak naa, mita fo Au fee masodak tetebes ta mana ketuk soa-neu basa hatahorir fo Amak loo liman ena, fo dadi reu Au hatahoring. Dadi hatematak ia, Au oke fo Amak nakadedemak Au, mita fo hatahorir mete-rita Amak ta neni babanggan.
JOH 17:3 Dalan fo hambu masodak tetebes ta mana ketuk naa, talo ia: hatahorir muste ralela Amak no tetuk, ndia Manetualain fo tetebes. Ta hambu laen bali. Ara oo muste ralela Au no tetuk boe, ndia Yesus Karistus, fo Amak nadenun neni dae-bafok ia mai ena.
JOH 17:4 Au atudu Amak ta neni babanggan nai dae-bafok ia ena. Au tao abasa ues naa ena, fo Amak feen neu Au ena.
JOH 17:5 Fai bakahulun, neu Ita bei ta takadadadik dae-bafok ia, Au sama-sama ua Amak. Faik naa, Au ta neni babanggan oo sama leo Amak ta neni babanggan boe. Hatematak ia Au ae fali uni Amak uu. Dadi Au oke fo Amak nakadedemak Au, mita fo Au ta neni babanggan fali leo fai bakahulun.”
JOH 17:6 Yesus hule-haradoi tamba nae, “Amak fee hatahorir marai dae-bafok ia ena, fo dadi reu Au hatahoring nggara. Au anori sara ena, fo ara ralela Amak. Ara dadi reu Amak enan, de Amak oo loo lima sara fo dadi reu Au enang boe. Ma ara tao tungga Amak Dedeꞌa-kokolan.
JOH 17:7 Hatematak ia ara ralela ena rae, basa dedeꞌak kara fo Amak loo lima sara neu Au naa ena, okan nai Amak.
JOH 17:8 Au anori sara ena, basa Dedeꞌa-kokolak fo Amak nafada nita sara neu Au. Ara oo simbok Dedeꞌa-kokolak kara raa boe. Ara oo bubuluk rae, Au numa Amak mai boe. Ma ara ramahere rae, Amak ndia nadenu Au uni dae-bafok ia mai.
JOH 17:9 Au hule-haradoi fee sara. Au ta hule-haradoi fee basa hatahorir marai dae-bafok ia. Tehuu Au hule-haradoi fee kada hatahori fo Amak loo lima sara neu Au, huu sira raa, Amak enan nara.
JOH 17:10 Basa hata fo dadi neu Au enang oo dadi reu Amak enan ena boe. Ma basa hata fo dadi reu Amak enan oo dadi reu Au enang ena boe. Ma Au hatahoring nggara raa, ndia rakadedemak Au.
JOH 17:11 Au ta leo ahuu nai dae-bafok ia ena bali, nahuu ta dook ka te Au ae fali uni Au Amang uu. Tehuu hatahori iar muste leo rahuu nai dae-bafok ia. Amak naa, malalaok tebe-tebe. Dadi Au oke fo Amak nanea sara, pake Amak koasan fo Amak feen neu Au ena. Au oo oke fo ara rakaesa dadi neu esa, sama leo Au akaesa ua Amak dadi neu esa boe.
JOH 17:12 Neu Au bei sama-sama ua sara nai dae-bafok ia, Au lopo-linu sara, nahuu ara dadi reu Amak enan ena. Au anea atalolole sara, mita fo ara rakaesa rakandoo ro Amak. Ta hambu esa mopon boe. Kada Yudas mesa kana ndia lenggo feꞌe, tungga hata fo Manetuaain Susura Malalaon surak memak kana ena numa lele uluk mai.
JOH 17:13 Hatematak ia Au sangga fali uni Amak uu. Au afada dedeꞌak bebeik kara iar, neu Au bei nai dae-bafok ia. No dalak naa, Au hatahoring nggara dalen nara bisa ramahoko rakandoo, sama leo Au daleng oo namahoko boe.
JOH 17:14 Au afada Amak Dedeꞌa-kokolan neu sara ena. Hatahori laen marai dae-bafok ia mburuk ro Au hatahoring nggara, nahuu Au hatahoring ta leo-laꞌo sama leo sira. Au oo leo naak boe, te Au ta sama ua hatahori laen manai dae-bafok ia.
JOH 17:15 Neu Au hule-haradoi, Au ta oke fo Amak feꞌa kalua heni sara ruma dae-bafok ia mai. Taa! Tehuu Au oke fo Amak nanea sara, fo ara dook ka numa manggarauk mai.
JOH 17:16 Ara ta sama leo hatahori laen manai dae-bafok ia, sama leo Au oo ta sama leo hatahori laen manai dae-bafok ia boe.
JOH 17:17 Ama Bonggik, pake hata fo ndoos, fo tao sira dalen nara malalaok. Huu Amak Dedeꞌa-kokolan nara, ndoos.
JOH 17:18 Amak ndia nadenu Au uni dae-bafok ia mai. De Au oo adenu sara talo naa boe, mita fo ara leo-laꞌo ratanggela nai hatahori dae-bafok kara taladan.
JOH 17:19 Anea Au aong fo malalaok nakandoo soa-neu Amak. No dalak naa, Au hatahoring nggara oo ranea aon nara fo malalaok rakandoo soa-neu Amak boe. Amak Dedeꞌa-kokolan fo ndoos, ndia tao nala sara loo lima ao katematuan nara reu Amak.”
JOH 17:20 Yesus hule-haradoi tamba nae, “Au hule-haradoi ta soa-neu kada sira marai hatematak ia. Tehuu Au oo hule-haradoi soa-neu hatahori fo neu ko namahere neu Au boe, nahuu hatahori iar kokolan.
JOH 17:21 Ama Bonggik, Au oke fo sira basa sara bisa rakaesa dadi reu esa, sama leo Ita oo takaesa dadi teu esa boe. Au oo nau fo sira rakaesa ro Ita dadi teu esa boe, mita fo hatahori laen nara marai dae-bafok ia bisa ramahere rae, Amak mesa kana ndia nadenu Au.
JOH 17:22 Amak natudu Au ta neni babanggan neu hatahorir ena. Boe ma Au akadedemak kasa ena, sama leo Au. No dalak naa, sira rakaesa dadi reu esa, sama leo Ita oo takaesa dadi teu esa boe.
JOH 17:23 Au akaesa ua sara. Amak oo nakaesa no Au boe. Ara muste rakaesa dadi reu esa talo naa, losa ara leo-laꞌo dalek esa tebe-tebe. Mete ma ara leo-laꞌo dalek esa talo naa, hatahori laen nara marai dae-bafok ia neu ko bubuluk rae, Amak ndia sue-lai sara, sama leo Amak sue-lai Au. No dalak naa, ara oo bubuluk boe rae, Amak ndia nadenu Au.
JOH 17:24 Ama Bonggik. Amak sue-lai memak Au ena, de makadedemak Au numa faik Ita bei ta takadadadik dae-bafok ia mai. Hatematak ia Au daleng hii nalan seli fo basa hatahorir fo Amak loo lima sara neu Au naa ena, sama-sama ro Au. Mita fo ara bisa mete-rita Au ta neni babanggan.
JOH 17:25 Ama Bonggik dalen ndoos. Tehuu hatahorir marai dae-bafok ia ta ralela Amak. Au ndia alela Amak. Ma Au hatahoring nggara oo bubuluk boe rae, Amak ndia nadenu Au uni dae-bafok ia mai.
JOH 17:26 Au afada sara ena, Amak naa, See. Ma neu ko Au afada sara talo naa akandoo, nahuu Au nau fo ara bisa rameda tebe-tebe Amak susuen. Au nau susuek fo ara ramedak naa, sama leo Amak susuen fo Amak feen neu Au. Mita fo Au akaesa akandoo ua sara.”
JOH 18:1 Neu Yesus hule-haradoi nateꞌe talo naa ena, boe ma Ana kalua sama-sama no Ndia ana nunin nara. Ara reni osi esa nai lee Kidron boboan seri, de ara maso naa reu.
JOH 18:2 Faik naa, malangga anggama Yahudir malanggan nara, ma hatahorir ruma partei anggama Farisir mai, ara loo lima soldadur ma mana manear hida reu Yudas ena. Ana nae seꞌo heni Yesus. Yudas oo, bubuluk osi naa boe, nahuu Yesus nakabua laꞌe noꞌuk ka ena numa naa no Ndia ana nunin nara. Boe ma Yudas asa reni osi naa reu, toꞌu reni mbele, lantera, ma tee-tandek.
JOH 18:4 Naa te Yesus bubuluk basa hata fo neu ko dadi neu Ndia ena. Boe ma Ana mata neu, de natane sara nae, “Ei sangga see?”
JOH 18:5 Boe ma ara raselu rae, “Ai sangga hatahori esa, nade Yesus, numa nggorok Nasaret mai.” Boe ma Yesus nafada nae, “Ndia, Au ia.” Faik naa, Yudas nambariik sama-sama no sara. Ndia ia, ndia mana seꞌo heni Yesus.
JOH 18:6 Neu Yesus kokolak nae, “Ndia Au,” boe ma hatahorir raa rakadedeak numa Yesus mai, de bara heni sara reu daer.
JOH 18:7 Boe ma Yesus natane seluk kasa nae, “Ei sangga see?” Ara raselu rae, “Yesus hatahori Nasaret.”
JOH 18:8 Boe ma Yesus kokolak nae, “Au afada bebeik kara ia ena ae, Hatahori naa, ndia Au. Dadi mete ma ei sangga Au, na, boso humu hatahori laen. Ela sara reu leo.”
JOH 18:9 (Ana kokolak talo naa fo taon dadi hata fo Ana kokolak nita nae, “Amak. Basa hatahorir fo Amak loo lima sara neu Au ena, ta hambu esa boe na mopon.”)
JOH 18:10 Faik naa, Simon Petrus toꞌu neni tafa mukuk esa. Boe ma ana lesu henin, fo nae tati hatahorir. Medak neu te, ana tati ketu hatahori esa ndiꞌi doo konan. (Hatahori naa, nade Malkus. Ndia naa, hatahori neondak numa malangga anggama Yahudir malangga ina-huun mai.)
JOH 18:11 Boe ma Yesus nafada Petrus nae, “Peꞌu! Mbeda falik tafa neni manan neu. Au Amang nafada ena nae, Au muste hambu doidosok matak leo iak. Dadi elan numa naa leo! Naa, sama leo Ana fee Au nggalaas esa ena, fo isin malik. Elan numa naa fo Au inu abasan.”
JOH 18:12 Basa boe ma komedan, soldadur ma hatahori Yahudir mana manean nara, humu rala Yesus, de ara futun.
JOH 18:13 Boe ma ara renin nakahuluk neni Anas neu. Anas naa, ndia Kayafas ari-aman. Teuk naa, Kayafas dadi neu malangga anggama Yahudir malangga ina-huun.
JOH 18:14 Kayafas ia, ndia fee nita nenori-nefadak neu hatahori Yahudi malanggan nara nae, “Malole lenak soa-neu ei, mete ma hambu kada hatahori esa ndia mate nggati basa hatahorir.”
JOH 18:15 Simon Petrus tungga Yesus dean, sama-sama no Yesus ana nunin esa bali, ndia au, Yohanis. Anggama Yahudi malangga ina-huun nalela au. Huu naa de au bisa maso uni bebelan dale uu, sama-sama ua Yesus.
JOH 18:16 Tehuu Petrus nambariik neu dea, deka-deka no mbaꞌa lelesun. Boe ma au dea uu, de kokolak ua inak esa mana nanea nai naa, mita fo au bisa ua Petrus dale neu.
JOH 18:17 Boe ma inak naa natane Petrus nae, “Weeh! O ia, Hatahori naa ana nunin esa, do?” Tehuu Petrus naselu nae, “Taa!”
JOH 18:18 Faik naa, makasufuk ena. Huu naa de hatahori manear ma hatahori neondak kara rambariik dara aꞌi. Boe ma Petrus neu, de dara aꞌi sama-sama no sara.
JOH 18:19 Faik naa, anggama Yahudi malangga ina-huu lasin parisa Yesus laꞌe-neu Ndia nenorin, ma Ndia ana nunin nara.
JOH 18:20 Boe ma Yesus nafada nae, “Au kokolak ledo-ledo fo basa hatahorir bisa ramanene. Au soa fee nenorik nai mamanak bee fo ita hatahori Yahudir rasiꞌe rakabubua, ndia ita uma huhule-haradoin nara, ma nai Uma Huhule-haradoi Ina-huuk dale. Au ta kokolak ita nai dea-deak.
JOH 18:21 Tao hata de o matane Au? Matane mbali kada hatahorir fo mana ramanene Au kokolang nggara. Huu Au henggenee ara bubuluk hata fo Au kokolak ena.”
JOH 18:22 Neu Ana kokolak talo naa, hatahori mana manea esa fo nambariik numa naa famba Yesus, boe ma nae, “O boso kokolak talo naa mbali malangga ina-huuk!”
JOH 18:23 Boe ma Yesus nafadan nae, “Mete ma Au kokolak sala, na, matudu salan ndia bee. Tehuu mete ma Au kokolak ndaa, na, tao hata de o famba Au?”
JOH 18:24 Basa boe ma Anas nadenu ro Yesus neni Kayafas neu, fo mana dadi anggama Yahudi malangga ina-huun. Neu ara roon neu naa, bei neni futuk.
JOH 18:25 Faik naa, Simon Petrus bei nambariik fo dara aꞌi. Boe ma hatahori laen nara maruma naa ratanen rae, “O ia, Ndia ana nunin esa, hetu?” Tehuu Petrus laka nae, “Taa!”
JOH 18:26 Numa naa oo, hambu anggama Yahudi malangga ina-huun hatahori neondan esa boe. Ndia naa oo, nufaneluk numa hatahori fo Petrus tati ketu ndiꞌi doon boe. De ana natane nae, “Weeh! Bebeik kara ia, o numa osi naa, hetu? Huu au mete-ita o numa naa!”
JOH 18:27 Tehuu Petrus laka seluk bali, boe ma manu kokoa tutik kana.
JOH 18:28 Neu bei huhua anan, ara leꞌa roo Yesus numa Kayafas mai, fo reni nggubenor uma man-parendan nai soldadu Romar kota batun reu. Hatahori Yahudir mesa kasa ta maso reni hatahori Roma mamanan reu, huu naa tao nanggenggeo sara, fo ara ta bisa raꞌa feta Paska.
JOH 18:29 Dadi nggubenor Pilatus muste dea mai fo natonggo no hatahori Yahudir raa. De ana natane nae, “Ei ndae salak hata neu Hatahori ia?”
JOH 18:30 Boe ma ara raselu rae, “Talo ia, papa. Mete ma Ndia ia, ta hatahori manggarauk, na, ai ta mai tao babalik papa. Hata-bali ai loo lima Ndia neu papa liman dale.”
JOH 18:31 Boe ma nggubenor nafada sara nae, “Talo ia. Naa fo ei ndia koladu Ndia dedeꞌan, tungga ei hatahori Yahudir hohoro-lalanen.” Boe ma hatahori Yahudi malanggan nara rafada rae, “Ta bisa, papa. Ai hatahori Yahudir ta maena haak fo maketu hukun mates. Naa, kada ei man-parenda Roma ndia maena haak talo naa.”
JOH 18:32 (Neu ara kokolak talo naa, hata fo Yesus kokolak nita fai uluk, dadi ena. Ana nafada Ndia hatahorin nara ena nae, neu ko Ndia mate tungga man-parenda Roma dalan, ndia ara paku Ndia nai ai ngganggek lain.)
JOH 18:33 Boe ma nggubenor maso fali neni soldadur kota batun dale neu. Ana nanggou nala Yesus, de natane nae, “Talo bee? O ia, hatahori Yahudir manen, do?”
JOH 18:34 Yesus natane nasafali neun nae, “Papa mesa kana ndia matane talo naa, do, hambu hatahori laen ndia nafada papa laꞌe-neu Au?”
JOH 18:35 Boe ma nggubenor naselu nae, “Weeh! Au ia, ta hatahori Yahudi, hetu? O hatahorim mesa kasa, ndia loo lima o ena. Hata-bali malangga anggamar malanggan nara oo, sira leꞌa roo o mai boe. Te o ia, tao sala hata? Soba o mafada dei!”
JOH 18:36 Boe ma Yesus nafada nae, “Au ta manek esa numa dae-bafok ia mai. Mete ma Au dadi uu manek talo naa, neu ko Au hatahori neondang nggara tao mue-anggik, de hatahori Yahudir ta dadi humu rala Au. Memak Au dadi uu Manek. Tehuu ta hambu hatahori esa nai dae-bafok ia, ndia soꞌuk Au talo naa.”
JOH 18:37 De nggubenor natane seluk nae, “Dadi o ia, Manek, do?” Boe ma Yesus naselu nae, “Papa mesa kana ndia nae, Au dadi uu Manek. Ndondoon naa, bonggi Au fo dadi Manek. Au oo uni dae-bafok ia mai fo dadi Manek boe, mita fo Au afada laꞌe-neu hata fo ndoos. Basa hatahorir fo mana toꞌu rahere hata fo ndoos, na, sira raa, nenene Au.”
JOH 18:38a De nggubenor natanen nae, “Ndoos naa, hata?”
JOH 18:38b Neu nggubenor Pilatus kokolak basa talo naa, boe ma ana kalua fali neni hatahori Yahudir neu. Ana kokolak nae, “Au parisan ena, tehuu au ta hambu Ndia salan hata esa boe na.
JOH 18:39 Tehuu ei siꞌem, tungga teuk nai feta Paska, au muste akamboꞌik hatahori bui esa fee ei. Dadi teuk ia, ei nau fo au akamboꞌik hatahori Yahudir manen, do talo bee?”
JOH 18:40 Basa sara eki rame-rame rae, “Boso makamboꞌik Hatahori ia! Makamboꞌik kada Barabas leo!” Naa te Barabas naa, hatahori esa fo manggaraun sudi selik kana.
JOH 19:1 Basa boe ma nggubenor Pilatus nadenu ndia soldadun nara fo poko-femba Yesus pake fifiuk.
JOH 19:2 Soldadur raa oo haꞌi rala ai kanggouk ndanan boe, fo nanen dadi solangga. De ara ndeꞌi solangga kanggouk naa neu Yesus langgan, fo rakamiminak kana sama leo ara nau soꞌuk mane beuk pake solangga manek. Ara oo olu badu naru mbila maranggeok esa neu Yesus boe, sama leo manek kara rasiꞌe pake. Boe ma ara rakatitiik rakamiminak kana rae, “Sodak, hatahori Yahudir manen!” Ara oo famba rakamiminak Yesus boe.
JOH 19:4 Basa boe ma nggubenor kalua laꞌe esa bali, fo nafada hatahori noꞌuk kara nae, “Talo ia! Au kalua uni Yesus dea mai, fee ei. Ma ei muste bubuluk, au parisan ena, tehuu au ta hambu Ndia salan hata esa boe na.”
JOH 19:5 Neu Yesus kalua, Ana pake solangga kanggouk ma badu naruk mbila maranggeok naa. Boe ma nggubenor nafada hatahori noꞌuk kara raa nae, “Mete neu Hatahori ia dei!”
JOH 19:6 Neu malangga anggamar malanggan nara ma hatahori manear mete-rita Yesus, boe ma ara eki rame-rame rae, “Tao misan leo! Pakun neu ai ngganggek!” Tehuu nggubenor nafada sara nae, “Naa fo kada ei mesa ngga ndia mian fo tao misan nai ai ngganggek. Au ta hambu Ndia salan hata esa boe na, fo nandaa fee hukun mates neun.”
JOH 19:7 Hatahori Yahudir raselu rae, “Ai maena Hohoro-lalanek fo mana konda numa Manetualain mai. Tungga Hohoro-lalanek naa, hatahori ia muste mate, nahuu ana soꞌuk aon dadi neu Manetualain Anan.”
JOH 19:8 Neu nggubenor namanene nala sira kokolan naa, boe ma ana tamba namataꞌu.
JOH 19:9 De ana noo falik Yesus maso neni soldadur uma kota batun dale neu, boe ma ana natane Yesus nae, “O ia, hatahori beek?” Tehuu Yesus ta naselu mbali sana.
JOH 19:10 Boe ma nggubenor mbokan nae, “Heeh! Tao hata de o ta kokolak mua au? Au henggenee, o bubuluk ena, hetu? Au ia, ndia aena koasa fo tao isa o, do, akamboꞌik o.”
JOH 19:11 Boe ma Yesus naselu nae, “Talo ia, Papa. Mete ma papa naena koasa talo naa, na, nahuu papa hambu koasa naa numa Manetualain manai nusa tetuk do inggu temak mai. Kada Ndia mesa kana ndia fee lelak neu papa, fo tao hata a mesan neu Au. Tehuu hatahori fo mana loo lima Au uni papa mai, sira ndia lemba-rasaa salak beran lenak.”
JOH 19:12 Mulai numa naa mai, nggubenor sangga-sangga dalak fo nakamboꞌik Yesus. Tehuu hatahori Yahudir eki rame-rame rae, “Mete ma papa nakamboꞌik Hatahori ia, na, naa nafada ledo-ledo ena, papa nonoon ta mane ina-huuk keser. Hatahori fo mana soꞌuk aon dadi neu manek, ana laban keser.”
JOH 19:13 Dadi, neu nggubenor namanene nala sira kokolan nara naa, boe ma ana kalua heni Yesus. De ana nanggatuuk neu mana maketu-maladi dedeꞌak kaderan, nai mamanak esa fo ara foin rae, “Dae Loak numa Batu Bebelak mai”. (Nai dedeꞌa Aram naden, Gabata.)
JOH 19:14 Neu faik naa, Fai Sadia Feta Paska. Nai rarain, ledo namatetu, boe ma nggubenor nafada hatahori Yahudir nae, “Mete leo! Ndia ia, ei manem!”
JOH 19:15 Tehuu ara boe eki tingga-tingga rae, “Mian dea neu! Tao misan leo! Pakun neu ai ngganggek!” Boe ma nggubenor natane seluk kasa nae, “Dadi talo bee? Tungga ei, au muste tao isa ei manem ia, do?” Boe ma malangga anggamar malanggan nara raselu rae, “Ai manen kada esak ka, ndia keser! Ta hambu laen bali!”
JOH 19:16a Boe ma nggubenor loo lima Yesus neni soldadur neu, fo reu paku tao risan nai ai ngganggek lain.
JOH 19:16b Basa boe ma soldadur raa simbok rala Yesus.
JOH 19:17 Boe ma Ana lemba-nasaa nala ai ngganggen, de kalua numa kota mai. Ara reni mamanak esa reu fo ara seseik kana rae, “Mamana Langga Duik”. (Nai sira dedeꞌa Aram, mamanak naa naden, Golgotaa.)
JOH 19:18 Losa naa, boe ma ara paku Yesus neu ai ngganggek naa. Ara tao talo naa soa-neu hatahori laen dua boe. Ara londa esa neu Yesus boboa konan, esa bali neu boboa kiin, ma Yesus nai dua sara taladan.
JOH 19:19 Boe ma nggubenor nadenu ndia soldadun nara fo surak neu papak esa, de pakun neu Yesus langgan ndandaan lain. Nai papak naa, ara surak rae,
JOH 19:20 Ara surak papak naa, pake dedeꞌak telu. Sira: dedeꞌa Aram, dedeꞌa Yunani ma dedeꞌa Latin. Hatahori Yahudi noꞌuk ka lees papak naa, nahuu Yesus mamana mamaten naa, deka no kota Yerusalem.
JOH 19:21 Tehuu malangga anggama Yahudir malanggan nara ta simbok. De ara reu rafada nggubenor rae, “Papa! Boso surak ‘hatahori Yahudir Manen’! Malole lenak surak mae, ‘Hatahori ia nafada nae, ndia naa, hatahori Yahudir manen.’ ”
JOH 19:22 Tehuu nggubenor naselu nae, “Au ndia adenu surak talo naa. Dadi elan numa naa leo!”
JOH 19:23 Neu soldadur paku londa basa Yesus numa ai ngganggek lain, boe ma ara babaꞌe Ndia bua-loꞌan nara neu babaꞌek haa. Babaꞌek esa soa-neu soldadu esa. Boe ma ara haꞌi rala Ndia badu dean fo neni tenuk katemak numa lain losa dae, ta pake sosook.
JOH 19:24 De ara rakokola aok rae, “Wee! Ita boso sii heni Ndia badun ia. Malole lenak, ita leꞌa lot leo, fo sangga bubuluk see ndia hambun.” Naa, ndia taon dadi, hata fo neni surak nai Manetualain Susura Malalaon nae, “Ara babaꞌe au bua-loꞌang, ma ara leꞌa lot fo hambu au badung.” De soldadur raa tao talo naa.
JOH 19:25 Numa naa oo hambu inak hida rambariik boe. Sira raa, ndia: Yesus inan, Yesus teꞌon, Klopas saon Maria, ma Maria numa nggorok Magdala mai.
JOH 19:26 Yesus mete-nita inan nambariik numa naa, sama-sama no ana nunik fo Ana suek, ndia au, Yohanis. Basa boe ma Ana nafada inan nae, “Mama, ee. Ndia ia, mama anan.”
JOH 19:27 Boe ma Ana nafada au nae, “Talo ia. Hatematak ia, tao ndia dadi neu o inam leo!” De mulai numa faik naa mai, Yesus inan leo no au.
JOH 19:28 Mulai numa naa mai Yesus bubuluk ena nae, Ndia tao nabasa Ndia uen lalaꞌen ena. Naa tao natetu basa hata fo Manetuaain Susura Malalaon surak memak kana numa lele uluk mai ena. Boe ma Ana nae, “Au dale mada ia ena.”
JOH 19:29 Numa naa, hambu oe anggor makeis nai nggusi kadiꞌik esa dale. De soldadur haꞌi rala lombu fo boron neni oe anggor naa dale neu, boe ma taon neu ai keketuk esa suꞌun, de soron neu Yesus bifi doon.
JOH 19:30 Neu Ana musi nala oe anggor naa ena, boe ma Ana kokolak nae, “Basa-basan basa ena.” Boe ma Ana nateꞌe langgan, de ketu ani hahaen memak.
JOH 19:31 Faik naa laꞌe-ndaa fai kaliman. Tungga anggama hohoro-lalanen, hatahori Yahudir muste rafafaꞌu nai faik naa, fo neu beꞌe-main simbok sira fai hule-haradoin. Huu naa de ara ta nau hatahori ao-mbaa mamaten neni londak nakandoo nai ai ngganggek lain, ndaa no fai huhule-haradoik. Hata-bali fai huhule-haradoik naa, ndaa no fai malole. Dadi hatahori Yahudi malanggan nara roke nggubenor fo nadenu hatahorir femba tiꞌu hatahorir marai ai ngganggek lain ei duin nara. No dalak naa, ara bisa mate lai-lai, mita fo hatahorir bisa rakonda sira ao-mbaa mamaten dai fai.
JOH 19:32 De soldadur reni naa reu, boe ma femba tiꞌu hatahori esa ei duin. Basa boe ma ara femba tiꞌu hatahori esa ei duin bali. Sira dua sara raa, ndia hatahorir fo ara paku londa sara sama-sama ro Yesus.
JOH 19:33 Tehuu neu ara losa Yesus, ara mete-rita Ana mate tebe-tebe ena. Huu naa de ara ta femba ratiꞌu Ndia ei duin nara.
JOH 19:34 Tehuu soldadu esa haꞌi nala ndia teen, de ana mbaun neu Yesus boboan. Boe ma hambu daak faa, ma oe oo kalua boe.
JOH 19:35 (Hatahori esa fo mana dadi neu sakasii matak naa, ndia au. Au mete-ita basa-basan, ma au surak no tetebes nai ia. Au bubuluk hata fo au tuik naa, tetebes, mita fo ei bisa mamahere au kokolang.)
JOH 19:36 Basa dedeꞌak bebeik kara iar dadi, nahuu Manetualain Susura Malalaon surak nae, “Ndia duin nara, ta hambu esa tiꞌun boe na.”
JOH 19:37 Nai Susura Malalaok naa oo hambu mamanak laen surak boe nae, “Neu ko ara mete-rita hatahori naa fo ara mbauk ena.”
JOH 19:38 Hambu hatahori esa, nade Yusuf, numa nggorok Arimatea mai. Ndia oo dadi neu Yesus ana nunin boe. Tehuu ana tungga Yesus no nefunik, nahuu ana namataꞌu hatahori Yahudi malanggan nara. Ana neni nggubenor Pilatus neu, de noke fo nggubenor fee lelak neu ndia, fo haꞌi neni Yesus ao-mbaa mamaten. Nggubenor simbok no malole. De Yusuf neu nakonda Yesus ao-mbaa mamaten, boe ma nenin laꞌo.
JOH 19:39 Nikodemus oo neu sama-sama no Yusuf boe. Hatahori ia, ndia bakahulun fo neu natonggo no Yesus nai fai leꞌodaek. Ana hasa nala rambe noꞌun seli, nai rarain kilo telu hulu telu, fo tao neu Yesus ao-mbaa mamaten.
JOH 19:40 Boe ma ara mboti-fefeo Yesus ao-mbaa mamaten pake tema bangganaꞌuk. Tungga-tungga fefeok, ara tao rambe neun dei. Ara tao talo naa, tungga hatahori Yahudir dala-hadan ratoi mamates.
JOH 19:41 Ta dook ka numa Yesus mamana mamaten naa, hambu osi neulauk esa. Nai osi neulauk naa, hatahorir bei fo toꞌi rala rates esa. Ara bei ta ralololi rita mamates numa naa.
JOH 19:42 Faik naa, hatahori Yahudir fai sadian fo simbok sira fai huhule-haradoin sangga nae basan ena. Huu naa de ara mbeda Yesus ao-mbaa mamaten neni rates naa dale neu, huu mamanak naa, ta dook ka.
JOH 20:1 Fai Menggu, ndia menggu beuk fai kaesan, Maria numa nggorok Magdala mai, bei huhua anak te neni Yesus raten neu. Losa naa, ana mete-nita batu moꞌok fo ara paken tatana rates naa, neni loli henik numa mamanan mai ena.
JOH 20:2 Boe ma ana nalai fali neni Simon Petrus neu, ma au, ndia Yesus ana nunin fo Ana suek naa, de nafada tutik kana nae, “Ara loi reni ita Lamatuan ao-mbaa mamaten numa Ndia raten mai ena! Ai ta bubuluk ara taon nai bee!”
JOH 20:3 Boe ma au ua Petrus malai meni rates miu.
JOH 20:4 Ai malaik sama-sama, tehuu au nggafan lenak. De au losa rates naa akahuluk.
JOH 20:5 Tehuu au ta dudi dale uu. Au kada titino dale neu. Numa naa, au mete-ita tema bangganaꞌuk naa fo ara paken mboti-fefeo Yesus ao-mbaa mamaten.
JOH 20:6 Tehuu neu Petrus losa, boe ma ana dudi nakandoo dale neu. Ana oo mete-nita tema bangganaꞌuk naa numa naa boe.
JOH 20:7 Ana oo mete-nita lesu esa boe, fo ara paken mboti Yesus langgan. Tehuu lesu naa, neni dikuk ma lenggo feꞌe numa tema bangganaꞌuk naa mai.
JOH 20:8 De au, fo mana losa akahuluk nai rates oo dudi dale uu boe. Neu au mete-ita basa naar, boe ma au amahere neu Yesus kokolan fai bakahulun nae, neu ko Ana nae nasoda fali numa Ndia mamaten mai.
JOH 20:9 Neu Ana bei ta mate, ai fo mana dadi miu Ndia ana nunin bei ta malela Manetualain Susura Malalaon fo mana surak memak kana numa lele uluk mai nae, Karistus muste nasoda fali numa Ndia mamaten mai.
JOH 20:10 Basa boe ma ai dua ngga fali.
JOH 20:11 Tehuu Maria bei nambariik numa rates naa dean. Ana buꞌi nakandoo. Neu ana bei buꞌi, boe ma ana titino neni rates naa dale neu.
JOH 20:12 Ana mete-nita Manetualain atan dua numa nusa tetuk do inggu temak mai. Ara pake bua-loꞌa mutik. Dua sara ranggatuuk reu mamanak fo fain na hatahorir ralololi Yesus ao-mbaa mamaten neun. Esa nanggatuuk neu langgan mamanan. Esa bali nanggatuuk neu ein mamanan.
JOH 20:13 Ara ratanen rae, “Tao hata de kaꞌa inak buꞌi?” Boe ma ana naselu nae, “Au buꞌi, nahuu ara koꞌo reni au Lamatuang ao-mbaa mamaten ena. Tehuu au ta bubuluk ara taon neni bee neu.”
JOH 20:14 Ana kokolak basa talo naa, boe ma ana nasafali de leuk dea neu. Ana mete-nita hatahori esa nambariik numa naa, tehuu ana ta bubuluk, Hatahori naa, ndia Yesus.
JOH 20:15 Boe ma Yesus natanen nae, “Tao hata de kaꞌa inak buꞌi? Kaꞌa inak sangga see?” Maria nae hetuk ko hatahori naa, ndia kada mana tao osi. Boe ma ana kokoen nae, “Papa. Mete ma papa koꞌo neni Lamatuak ao-mbaa mamaten ena, na, mafada dei, papa mbedan nai bee. Mita fo au unin neni mamana laen neu fo atoin no neulauk. Tulun dei!”
JOH 20:16 Boe ma Yesus nanggoun nae, “Maria!” Ana nasare mbali Yesus, de nae, “Raboni!” (Nai dedeꞌa Aram, sosoa-ndandaan nae, “Au Meseng!”)
JOH 20:17 Yesus nafadan nae, “Boso lai mafaroe Au dei, te Au bei ta hene uni Au Amang nai nusa tetuk do inggu temak uu. De kaꞌa inak muu leo, fo mafada Au toranoong nggara mae, ‘Au ae hene uni Au Amang uu. Ndia oo, ndia ei Amam boe. Ndia naa, Au Manetualaing. Dadi Ndia naa oo, ei Manetualain boe.’ ”
JOH 20:18 Basa boe ma Maria numa Magdala mai, neu tui Yesus ana nunin nara nae, “Au atonggo ua ita Lamatuan, Yesus ena!” Boe ma ana nafada Yesus hara hehelun neu sara.
JOH 20:19 Faik naa tuda ndaa fai Menggu, ndia menggu beuk fai kaesan. Ledo bei fo tesa. Boe ma Yesus ana nunin nara rakabua. Ara nggoe risa uma lelesun nara, nahuu ara ramataꞌu hatahori Yahudi malanggan nara. Medak neu ma, Yesus mai nambariik neu taladan nara, de nae, “Soda-molek!”
JOH 20:20 Neu Yesus lole haran neu sara talo naa, boe ma Ana natudu hinan nara marai Ndia liman ma boboan. Ana nunin nara ramahoko ralan seli, neu ara mete-rita sira Lamatuan.
JOH 20:21 Boe ma Yesus nafada sara nae, “Naa fo ei lino-lendek. Masaneda, Au Amang nadenu Au talo bee ena, na, Au oo adenu ei talo naa boe.”
JOH 20:22 Ana kokolak basa talo naa, boe ma Ana neu deka-deka no sara, de fuu Ndia ani hahaen neu sara esa-esak. De Ana nae, “Au fee Manetualain Dula-dale Malalaon neu ei. Simbo malan leo.
JOH 20:23 Dadi mete ma ei lilii heni hatahori salan, na, salak naa mopo henin, huu Manetualain oo koka heni salak kara raa ena boe. Tehuu mete ma ei ta nau lilii heni hatahori salan, na, Manetualain oo ta koka heni salak naa boe.”
JOH 20:24 Hambu esa numa Yesus ana nuni kasalahunu duan mai. Ndia naden Tomas, fo ara oo seseik kana boe rae, ‘ana duak’. Neu Yesus mai natudu aon neu sara, Tomas ta sama-sama no ana nunik laen nara.
JOH 20:25 Huu naa de neu nonoon nara rae, “Ai matonggo mia ita Lamatuan ena,” boe ma ana naselu nae, “Talo ia. Au muste mete-ita hinak numa pakuk manai Ndia liman naa dei. Ma au muste boro au lima kukung neni hinak manai Ndia boboan naa neu. Mete ma au bei ta tao talo naa, na, au bei ta nau amahere ae, Ana nasoda fali numa mamaten mai ena.”
JOH 20:26 Basa menggu esa bali, boe ma Yesus ana nunin nara sama-sama ro Tomas numa uma esa dale. Leo mae lelesur neni nggoek kara ena, tehuu Yesus maso nambariik neu sira taladan. Ana lole haran mbali sara nae, “Soda-molek!”
JOH 20:27 Boe ma Ana kokolak mbali Tomas nae, “Loo o lima kukum mai ia, fo parisa Au liman dei. Basa, na, mai mafaroe hinak manai Au boboang. Mamahere leo mae, Au asoda fali numa mamates mai ena! Nggari heni o nememedam ta mamahere naa.”
JOH 20:28 Tomas naselu nae, “Awii, Papa, ee! Hatematak ia au amahere tebe-tebe. Papa ia, ndia au Lamatuang fo mana naena haak fo parenda au, ma au Manetualaing boe!”
JOH 20:29 Boe ma Yesus nafada neun nae, “Tomas! O mamahere Au asoda fali numa mamates mai ena, nahuu o mete-mita Au pake o mata heli-helim. Tehuu mana mauak lenak bali, ndia hatahori ta mana mete-nita Au, tehuu ara ramahere.”
JOH 20:30 Yesus oo tao tanda heran laen noꞌuk ka boe, fo au ta surak kasa nai buku ia. Ndia ana nunin nara mete-rita tanda heran nara raa ro sira mata heli-helin.
JOH 20:31 Tehuu hata fo au surak nai buku ia dale ena, au surak kana mita fo ei mamahere mae, Yesus naa, ndia Karistus fo Manetualain helu-bartaa memak kana fo nae nadenun mai. Yesus oo ndia Manetualain Anan boe. Ma lelek ei mamahere neu Ndia, ei hambu masodak tetebes ta mana ketuk, nahuu ei dadi miu Ndia hatahorin nara.
JOH 21:1 Basa faik hida, boe ma Yesus natudu aon seluk bali numa dano Tiberias tatain. Ndia tutuin talo ia:
JOH 21:2 Faik naa, Yesus ana nunin hatahori hitu rakabua. Sira raa, ndia: Simon Petrus, Tomas, fo ara seseik kana rae, ‘ana duak’, Natanel, numa nggorok Kana manai profensi Galilea mai, Sabadeus anan dua, ma Yesus ana nunin laen dua.
JOH 21:3 Simon Petrus nafada ndia nonoon nara nae, “Au ae uu nggari puꞌak.” Boe ma ara raselu rae, “Hou! Ai oo tungga boe.” Basa boe ma ara reni dano tatain reu. De ara saꞌe ofak fo reu sangga iꞌak. Tehuu leꞌodaen naa, ara ta puꞌa rala hata esa boe na.
JOH 21:4 Neu beꞌe-mai huhuan, boe ma Yesus nambariik neu dano tatain. Tehuu ana nunin nara ta bubuluk Ndia naa, Yesus.
JOH 21:5 Boe ma Ana nanggou nahere fo natane sara nae, “Kaꞌa sara ein, ee! Ta mala iꞌak, do?” Ara raselu rae, “Rouk, Kaꞌa! Ai ta mala esa boe na.”
JOH 21:6 Boe ma Ana nafada sara nae, “Soba nggari puꞌak naa neu ofak boboan. Neu ko ei hambu.” Boe ma ara tao tungga. De ara hambu iꞌak. Tehuu iꞌak kara raa noꞌun seli, losa ara ta bisa leꞌa puꞌak naa fali neni ofak dale neu.
JOH 21:7 Au oo numa naa boe. Au ia, ana nunik fo Yesus suek. Boe ma au afada Petrus ae, “Awii! Ndia naa, ita Lamatuan!” Simon Petrus namanene au kokolang, boe ma ana olu falik ndia badun, de nakaboku neni dano dale neu fo nae nane mada lai neu.
JOH 21:8 Ofak naa nai rarain kada meter natun esa numa mada lai mai. Boe ma ndia nonoon nara sefe ofak fali neni mada lai neu, ma leꞌa reni puꞌak naa fo sofek no iꞌak numa ofak ikon mai.
JOH 21:9 Losa mada lai, boe ma mete-mita aꞌi kaak mana mbilak numa naa. Nai aꞌi lain, hambu iꞌak. Ma hambu roti boe.
JOH 21:10 Yesus nafada sara nae, “Meni iꞌak hida numa ei bei fo puꞌa malak bebeik kara naa mai.”
JOH 21:11 Basa boe ma Simon Petrus hene fali neni ofak lain neu, de ana leꞌa puꞌak naa neni mada lai neu. Puꞌak naa sofek no iꞌa moꞌok. Iꞌak dedesin 153. Leo mae iꞌak noꞌuk ka talo naa, tehuu puꞌak naa ta sida sana.
JOH 21:12 De Yesus noke sara nae, “Mai fo miꞌa dei!” Ara bubuluk ena rae, Ndia naa, sira Lamatuan. Huu naa de ara ta rambarani ratane rae, “Kaꞌa ia, see?”
JOH 21:13 Boe ma Yesus haꞌi nala roti ma iꞌak, de fee sara.
JOH 21:14 Naa, ndia laꞌe katelun Yesus natudu aon neu Ndia ana nunin nara, neu Ana nasoda fali numa mamaten mai ena.
JOH 21:15 Neu ara raꞌa basa, Yesus natane Simon Petrus nae, “Wee, Simon, Yohanis anan. Talo bee? O sue Au lena heni o nonoom mara iar sue Au, do?” Ana naselu nae, “Tebe! Lamatuak bubuluk au sue Lamatuak.” Boe ma Yesus helun nae, “Mete ma talo naa, na, lolo matalolole Au bibi lombo anang nggara fo ara hambu raꞌa.”
JOH 21:16 Boe ma Yesus natane seluk kana nae, “Simon, Yohanis anan. Talo bee? O sue Au, do?” Ana naselu nae, “Tebe! Lamatuak bubuluk ena au sue Lamatuak.” Boe ma Yesus helun nae, “Mete ma talo naa, makaboi matalolole Au bibi lombong nggara.”
JOH 21:17 Basa boe ma Yesus natane seluk kana bali nae, “Simon, Yohanis anan. Talo bee? O sue Au, sama leo Au ia, o nonoom, do?” Boe ma Petrus dalen sona memak, nahuu Yesus natane laꞌe telu ena nae, “O sue Au, do?” De ana naselu nae, “Lamatuak ndia bubuluk basa dedeꞌak. Dadi Lamatuak bubuluk ena mae, au ia, Lamatuak nonoon.” Boe ma Yesus helun nae, “Mete ma talo naa, na, lolo matalolole Au bibi lombong nggara fo ara hambu raꞌa.
JOH 21:18 O bisa malela Au kokolang bebeik kara iar ena, do? Au oo nau afada talo ia boe: fai bakahulun neu o bei taꞌe anak, na, o masiꞌe pake badu ma pake kalikeek, boe ma o laꞌok muni bee muu a mesan, tungga o hihiim. Tehuu mete ma o mambalasi ena, na, neu ko loo o limam fo hatahori laen paꞌa limam mara, nenik o kalikee heli-helim. Basa boe ma ara leꞌa reni o muni mamanak esa muu fo o ta nau muu.”
JOH 21:19 (Yesus kokolak talo naa, fo nafada Petrus laꞌe-neu hata fo neu ko ana dadi nai ndia aon. Neu ko Petrus mamaten naa natudu Manetualain ta neni babanggan.) Basa boe ma Yesus nafada Petrus nae, “Mai fo dadi muu Au hatahoring leo!”
JOH 21:20 Faik naa, Petrus hekor nasafali de leuk dea. Boe ma mete-nita au tungga dua sara dean. Au ia, ndia ana nunik fo Yesus suek. Au oo ndia anggatuuk nai Yesus boboan, neu ai miꞌa feta Paska boe. Au ia, ndia atanen ae, “Lamatuak, ee! See ndia neu ko ana seꞌo heni Lamatuak?”
JOH 21:21 Neu Petrus mete-nita au, boe ma ana natane Yesus nae, “Lamatuak, ee! Lamatuak kokolak laꞌe-neu au bebeik kara ia ena. Tehuu ndia ia talo bee?”
JOH 21:22 Yesus nafada Petrus nae, “Leo Au nau fo ana kada nahani nai ia, losa Au fali ma, na, o dedeꞌam ta naa. Nenenin lenak ndia, o muste masaneda hata fo Au heluk neu o bebeik kara naa, ndia: mai fo dadi muu Au hatahoring leo.”
JOH 21:23 Yesus ana nuni laen nara ramanene Yesus kokolak talo naa, huu naa de ara mulai rakokola aok rae, “Yohanis naa, ana ta mate.” Naa te Yesus ta kokolak talo naa. Ana kokolak naa, ndia: “Leo Au hihiing fo ana kada nahani nai ia, losa Au fali mai, na, o dedeꞌam ta naa.”
JOH 21:24 Ana nunik fo Yesus kokolak naa, ndia au, Yohanis. Au ndia tui basa dedeꞌak kara iar fee ei. Au ndia mete-ita no au mata heli-heling. Basa de au surak basa-basan. Ma ita bubuluk ena tae, hata fo au afadak neu ei naa, tetebes.
JOH 21:25 Ma bei hambu dedeꞌak laen noꞌuk ka fo Yesus taok. Mete ma hatahorir soba surak basa-basan, mulai numa Yesus nakalalaꞌok ue-osan losa basan, na, au duꞌa ae, dae-bafok esa katematuan oo ta bisa fua nala buku raa lalaꞌen boe. Baꞌu kada naa leo, Yohanis
ACT 1:1 Papa Teofilus fo malole. Hara masodak numa au mai, Lukas. Nai susurak bakahulun, au surak memak basa-basan laꞌe-neu Lamatuak Yesus masodan. Ndia basa hata fo Ana taon ena, ma basa hata fo Ana fee nenorik numa makasososan mai ena. Nae, Ana here nala Ndia nedenun nara. Leo mae hatahori rakasususak kana ma rakanisan ena, tehuu Manetualain tao nasoda falik kana numa mamaten mai. Neu Ana nasoda fali numa mamaten mai ena, boe ma Ana natudu aon neu Ndia nedenun nara. Ara mete-ritan laꞌi-laꞌik ka losa faik haa hulu dalen, de ara bubuluk memak rae, Ana nasoda fali tebe-tebe numa mamaten mai ena. Ana oo nafada sara boe nae, Manetualain naa, sama leo Manek mana toꞌu parenda-koasa. Ana oo nadenu sara pake Manetualain Dula-dale Malalaon koasan boe. Losa neu Lamatuak Yesus hene fali neni nusa tetuk do inggu temak neu. Basa naar ndia au surak itan ena.
ACT 1:4 Laꞌe esa, Yesus nakabua no Ndia nedenun nara numa letek Setun. Ana fee parenda neu sara nae, “Masanedak! Fai bakahulun Yohanis sarani hatahori pake kada oe, tehuu hatematak ia ei muste mahani faik hida bali, te Manetualain nae tao tatao ta hohoꞌak lenak soa-neu ei, nahuu Ana nau fee Ndia Dula-dale Malalaon neu ei. Dadi ei boso laꞌo ela kota Yerusalem ia dei. Ei mahani nai ia losa Au Amang fee Ndia Dula-dale Malalaon neu ei, sama leo Ana helu-bartaa nitan naa ena. Ma Au oo afada ei leo naak ena boe.”
ACT 1:6 Neu Yesus nakabua no Ndia nedenun nara, boe ma ara ratanen rae, “Papa! Ai nau matane talo ia: Papa bei nasaneda lele uluk, neu hatahori Israꞌel asa parenda aon sira nusan. Hatematak ia Papa nae nakamboꞌik ita numa hatahori laen parendan mai, do, ita muste tahani fai laen bali?”
ACT 1:7 Boe ma Yesus naselu nae, “Ei hae sangga bubuluk ndia fain. Kada Au Amang mesa kana ndia naena haak fo Ana koladu faik naa.
ACT 1:8 Mete ma Manetualain Dula-dale Malalaon mai maso neni ei neu ena, na, dei fo ei hambu koasa. Basa naa ei muste miu tui-bengga neu basa hatahorir laꞌe-neu Au. Tui-bengga neu hatahorir marai kota Yerusalem, ma neu basa nggorok kara marai profensi Yudea ma profensi Samaria, seku losa dae-bafok buꞌun nara.”
ACT 1:9 Yesus kokolak basa talo naa, boe ma Ana hene neni lalai neu numa matan nara. Ana hene losa sosoꞌak mboti nalan, de ara ta mete-rita sana ena bali.
ACT 1:10 Neu ara bei mete lalai neu, medak neu ma hambu hatahori dua rambariik ruma boboan nara ena, ma ara pake bua-loꞌa muti ndoos.
ACT 1:11 Hatahori kaduak kara raa kokolak rae, “Wee! Hatahori Galilear ein, ee! Tao hata de ei bei nado bafam bese mboo mbali lalai miu? Bebeik kara ia ei mete-mita no ei mata deꞌe heli-helim Yesus hene neni lalai neu losa sosoꞌak mboti nalan. Ei mete-mita Ana hene lain neu talo bee, na, neu ko Ana oo konda fali mai talo naa boe.”
ACT 1:12 Basa boe ma Yesus nedenun nara konda numa letek Setun mai fo fali reni kota Yerusalem reu. Letek naa numa kota mai nai rarain na doon kilo esa.
ACT 1:13 Losa kota, boe ma ara dudi reni uma esa dale reu fo ara leo taak. De ara hene reni kama manai lain reu. Nedenuk kara raa naden nara sira: Petrus, Yohanis, Yakobis, Anderias, Felipus, Tomas, Bartolomeos, Mateos, Yakobis (Alpius anan), Simon (partei Selot hatahorin), ma Yudas (Yakobis anan).
ACT 1:14 Basa sara rasiꞌe rakabua fo hule-haradoi no dalek esa. Ara oo hule-haradoi sama-sama ro Yesus inan Maria, inak laen hida, ma ro Yesus fadin nara.
ACT 1:15 Laꞌe esa, ara rakabua seluk bali, nai rarain hambu hatahori 120. Boe ma Petrus nambariik de kokolak nae,
ACT 1:16 “Basa ina-ama, toranoo ma kaꞌa-fadi nggara ein! Ei bei masaneda neu Yudas, fo fai maneuk kara nuni noo hatahori bubuak esa reu humu Lamatuak Yesus. Hata fo Yudas taok naa, memak ana muste mori-dadi leo naak. Lele uluk Manetualain Dula-dalen pake mane Dauk fo surak laꞌe-neu Yudas talo naa ena.
ACT 1:17 Ndia naa, bakahulun ita hatahorin. Ana oo tungga naue-osa no ai boe.”
ACT 1:18 (Tehuu neu Yudas seꞌo heni Lamatuak Yesus ena, boe ma ana haꞌi nala doi manggenggeok kara raa fo neu hasa nala dae faa. Boe ma dae naa dadi neu ndia mamana mamaten, te ana tuda natono bafan numa naa, losa ndara baꞌe poꞌon ma taꞌin loo dea mai.
ACT 1:19 Basa boe ma hatahorir mulai tui numa bafak esa mai neni bafak esa neu, losa basa hatahorir fo mana leo numa kota Yerusalem ramanene laꞌe-neu Yudas mamaten naa ena. Huu naa de ara foi mamanak naa tungga sira dedeꞌa Aram rae ‘Hakeldama’, sosoa-ndandaan ‘Dae Daak’.)
ACT 1:20 Petrus kokolak nakandoo bali nae, “Lele uluk mane Dauk surak memak talo naa nai susura Sosoda Kokoa-kikiok kara ena. Ana surak nae, ‘Elan numa naa fo mamana leleon naa, dadi neu mamana nees; ta bole hambu hatahori leo nai naa bali.’ Boe ma ana surak seluk nae, ‘Ela leo bee na ndia uen naa, ara fee lalin neni hatahori laen neu leo.’
ACT 1:21 Dadi ita muste sangga hatahori fo nggati Yudas. Ita parluu hatahori esa fo dook ka ena ana tungga sama-sama no ita. Ndia naa, muste hatahori fo mana tungga taa-taa no Lamatuak Yesus neni bee neu a mesan, mulai numa Yohanis sarani Yesus mai. Ana oo mesa kana muste mete-nita no ndia matan boe nae, Lamatuak Yesus nasoda fali numa mamaten mai ena, losa Ana hene fali neni nusa tetuk do inggu temak neu.”
ACT 1:23 Neu Petrus kokolak basa talo naa, boe ma hatahorir fo mana tungga rakabua ruma naa, fee nadek dua. Esa nade Matias ma esa bali nade Yusuf (fo ara rasiꞌe roken rae, Barsabas; naden esa bali, ndia Yustus).
ACT 1:24 Boe ma ara hule-haradoi rae, “Amak mana nai nusa tetuk do inggu temak! Amak bubuluk tebe-tebe basa hatahori dalen. Yudas mate laꞌo ela ndia ue-osan ena. De Amak matudu fee ai basa ngga numa hatahori kaduak kara ia mai see ndia Amak here nggati neu Yudas; fo ai soꞌun dadi neu Lamatuak Yesus nedenun.”
ACT 1:26 De ara nggari lot pake hatahori kaduak kara raa naden. Boe ma lot naa tuda laꞌe Matias. Huu naa de ara soꞌuk ralan dadi neu nedenuk sama-sama no hatahori kasalahunu esak kara raa.
ACT 2:1 Ndaa no hatahori Yahudir fai malolen fo ara raseseik kana rae ‘Fai Pentakosta’, basa hatahori fo mana tungga Lamatuak Yesus rakabua ruma uma esa dale. Nggengger neu ma ara ramanene liik numa lalai mai leo bali ani makarumbuk ia. Liik naa moꞌon seli, losa basa hatahorir maruma naa ta bisa ramanene hatahori laen haran bali.
ACT 2:3 Boe ma ara mete-rita leo bali aꞌi mbilak sengga nababaꞌe neni sira esa-esak lain neu.
ACT 2:4 De Manetualain Dula-dalen maso nai basa sara dale. Basa boe ma ara mulai kokolak pake hatahori laen nara dedeꞌan mata-matak kara, tungga hata fo Dula-dalek fee sara kokolak.
ACT 2:5 Faik naa, hambu hatahori Yahudi noꞌuk ka sudi ruma nusak bee mai nai basa dae-bafok ia mai rakabua ruma Yerusalem. Dalen nara hii ralan seli tungga Manetualain.
ACT 2:6 Neu ara ramanene liik naa, boe ma ara mai rakarumbu numa mamanak naa. Sira esa-esak ramanene dedeꞌa heli-helin nara numa Lamatuak Yesus hatahorin nara bafan mai. Huu naa de ara heran bali-bali.
ACT 2:7 Basa sara nado bafa bese mboo, boe ma ara kokolak rae, “Hatahori mana kokolak kara iar, basa sara hatahori Galilear, hetu?
ACT 2:8 Tehuu talo bee de ita tamanene ara bisa kokolak pake ita esa-esak nusan dedeꞌan mesa kana?
ACT 2:9 Ita iar, numa profensi Partia, Media, Elam, Mesapotamia, Yudea, Kapadokia, Pontus, Asia,
ACT 2:10 Farigia, Pamfilia, Masir, numa Libia deka no kota Kerene; boe ma ita ketuk ruma kota Roma mai; ketuk bali ruma pulu Kereta, ma ruma dae Arab mai. Ita ketuk hatahori Yahudir, ma hambu ketuk ruma hatahori nusa-nusak laen mai, fo ara oo maso anggama Yahudi ena boe. Tehuu ita basa ngga tamanene hatahori iar kokolak pake ita esa-esak dedeꞌan, laꞌe-neu basa hata fo ta hohoꞌak, fo Manetualain taok ena. Awii! Ita heran talan seli!”
ACT 2:12 Basa sara nado bafa bese mboo, de esa natane esa nae, “Talo bee de bisa dadi talo naa, ee? Sosoa-ndandaan hata naa?”
ACT 2:13 Tehuu hambu hatahori laen nara rakatitiik kasa. Hatahorir raa rae, “Heeh! Boso hosek kasa! Te hatahorir raa, mafu ralan seli na!”
ACT 2:14 Numa naa, Petrus no Lamatuak Yesus nedenun kasalahunu esak laen nara. Boe ma Petrus nggani mata neu, de ana kokolak neu hatahori noꞌuk fo mana rakarumbu ruma naa. Ana kokolak nahere nae, “Ina-ama, toranoo, kaꞌa-fadi nggara ein! Ei fo hatahori Yahudir ma ei fo mana mai leo nai kota Yerusalem ia! Pasa ei ndiꞌi doom matalolole fo nenene au kokolang ia, huu hambu dedeꞌak nenenin lenak fo au nau afadan neu ei basa ngga.
ACT 2:15 Ei boso duꞌa mae, hatahori iar mafu. Ta bisa dadi talo naa! Masanedak, te ta hambu hatahori esa ninu mafuk bei huhua anak. Hata-bali hatematak ia bei fo liꞌu sio huhuan!
ACT 2:16 Ei basa ngga mamanene hatahori iar kokolak pake ei esa-esak dedeꞌam. Ndondoon talo ia: Lelek naa, Manetualain nafada memak dedeꞌak ia pake Ndia mana toꞌu dedeꞌan Yoel ena nae:
ACT 2:17 ‘Manetualain kokolak nae, “Mete ma faik kara sangga rateꞌe, na, Au ae fee Au Dula-daleng, sama leo mboꞌa-totoli oe neu basa hatahorir. Ei ana tou anam mara ma ina anam mara, neu ko Au pake sara dadi neu Au mana toꞌu dedeꞌang. Ei ana feꞌo-taꞌem mara, neu ko mete-rita hata fo Au ae atudu neu sara. Ma ei hatahori lasim mara, neu ko rala meꞌi hata fo Au ae fee sara mete-rita.
ACT 2:18 Ndaa neu fair fo sangga rateꞌe ena naa, Au akonda Au Dula-daleng neu Au neondang nggara. Au fee neu touk kara, ma Au oo fee neu inak kara boe. Neu ko ara kokolak hata fo Au afada neu sara.
ACT 2:19 Neu ko Lamatuak Fain losa. Faik naa ta bei mai, tehuu Au tao akahuluk tanda heran nara rai lalai lain. Tanda heran ndia leo ledo dadi makiuk; ma bulan oo dadi mbilas sama leo daak boe. Au oo ae tao dedeꞌa ta hohoꞌak kara nai dae-inak dae boe. Dedeꞌak kara raa, nok bali daak, aꞌi mbilak, ma aꞌi masu bubuak kara hene lain reu. Neu ko losa Lamatuak fai ta hohoꞌan nara raa, hatahori fo nanggou noke tutulu-fafalik neu Lamatuak, sira raa ndia hambu masoi-masodak.’ ” Naa, ndia lele uluk Yoel surak kana ena.
ACT 2:22 Toranoo Israꞌel nggara ein! Pasa ei ndiꞌi doom fo nenene hata fo au nau kokolak hatematak ia. Manetualain henggenee memak Yesus, hatahori Nasaret naa. Ita bubuluk ena tae, naa ndaa, nahuu ita mesa ngga mete-tita Manetualain pake Yesus fo tao tanda heran nara ma hata ta hohoꞌak kara. Ei oo bubuluk dedeꞌak ia ena boe, nahuu Yesus tao tanda heran nara raa numa ei taladam ena.
ACT 2:23 Tehuu ei makanisan, no dalak ei miu fufudi hatahori manggarauk kara fo ara paku risan neu ai ngganggek lain. Naa te Manetualain bubuluk basa naar numa lele uluk mai ena, fo memak ndaa no Ndia nanaen.
ACT 2:24 Memak ei tao talo naa losa Ana mate tetebes ena. Tehuu Manetualain ta nau Yesus mate nakandoo. Huu naa de Manetualain buka nakamboꞌik kana numa mamates koasan mai, ma tao nasoda falik kana. Te mamates koasan ta bisa nasenggi sana na.
ACT 2:25 Lele uluk mane Dauk surak memak laꞌe-neu Yesus naa ena, talo ia: ‘Au bubuluk Lamatuak soa sama-sama no au. Huu naa de ta hambu hata esa boe na bisa tao natuda au, nahuu Lamatuak nai au boboang taa-taa.
ACT 2:26 Huu naa de au daleng namahoko; de au koa-kio akandoo soa-neun, ma au matu-matu ahani a neu Lamatuak leo.
ACT 2:27 Ana ta ela au samaneng leo nakandoo nai hatahori mates mamanan. Ma Lamatuak ta ela Ndia Hatahori Malalaon naa, ao-mbaa mamaten dadi mburu naboo nai rates dale.
ACT 2:28 Lamatuak natudu au eno-dala masodak tetebes ena. Huu naa de au daleng namahoko nalan seli, te Lamatuak sama-sama no au na.’ Naa ndia lele uluk mane Dauk surak kana ena.
ACT 2:29 Basa toranoo nggara ein! Hatematak ia fee au lelak dei, fo au kokolak ledo-ledo ua ei laꞌe-neu ita baꞌin Dauk. Ana kokolak talo naa, tehuu ana ta dudu neu ndia ao-ina heli-helin. Huu ana mate ena, ma ratoi henin ena. Ndia raten bei hambun nai ita taladan losa faik ia.
ACT 2:30 Mane Dauk naa dadi neu Manetualain mana toꞌu dedeꞌan esa. Ma ana bubuluk nae, Manetualain helu-bartaa pake sumba-sook nae, Dauk tititi-nonosin esa neu ko toꞌu parenda, ndia Hatahori fo Manetualain henggenee memak kana numa lele uluk mai naa ena.
ACT 2:31 Lelek naa, Dauk mete dook mata neu. Ma ana nafada nakahuluk laꞌe-neu Hatahori fo Manetualain henggenee memak kana naa ena. Neu ko Hatahori naa mate, tehuu Ana oo nasoda fali numa mamaten mai boe. Boe ma Dauk oo nae, Hatahori naa ta leo nakandoo nai hatahori mates sara mamanan, ma ao-mbaa mamaten ta dadi mburu naboo boe.
ACT 2:32 Hatahori fo Dauk seseik kana naa, ndia Yesus! Manetualain tao nasoda falik kana numa mamaten mai ena. De ita basa ngga ia mete-tita to ita mata deꞌe heli-helin Ana nasoda fali numa mamaten mai ena!
ACT 2:33 Ma hatematak ia Manetualain soꞌu nala Yesus fo toꞌu panggak demak mateꞌen. Ana nanggatuuk nai Manetualain boboa konan, nai mamanak fo Manetualain sadia memak kana ena. Ma Ndia Aman fee Dula-dale Malalaon naa neun ena, ndaa leo Manetualain helu-bartaa memak kana numa lele uluk mai ena. Ana oo helu-bartaa nau fee ita Ndia Dula-dale Malalaon naa boe. Dadi Manetualain fee Ndia Dula-dalen, ndia hata fo ei mamanene ma mete-mita hatematak ia.
ACT 2:34 Dauk mesa kana ta hene neni nusa tetuk do inggu temak neu, tehuu ana surak nae, ‘Manetualain kokolak no au Lamatuang nae, “Manggatuuk muu Au boboa konang nai mamanak fo Au sadia memak kana ena,
ACT 2:35 losa Au tao O musum mara holu ei neu O.’ ”
ACT 2:36 Huu naa de basa hatahori Israꞌel muste bubuluk tebe-tebe laꞌe-neu Yesus naa, fo ei paku makanisan numa ai ngganggek lain ena. Ndia naa, Karistus fo Manetualain henggenee memak kana numa lele uluk mai ena. Ma Ndia oo, ndia naena haak parenda neu ita boe!”
ACT 2:37 Hatahorir raa ramanene rala naa, boe ma dalen nara neni mbambauk memak kana. De ara ratane neu Petrus ma nedenuk laen nara rae, “Kaꞌa nggara ein! Ai muste tao hata bali?”
ACT 2:38 Boe ma Petrus naselu nae, “Ei esa-esak muste laꞌo ela basa ei kilu-salam mara lalaꞌen fo tungga falik Manetualain. Basa naa, ei muste moke fo hambu sarani, fo dadi tanda nae, ei fali tungga Yesus Karistus Eno-dala Masodan ena. Naa oo dadi tanda boe nae, Manetualain koka heni ei sala-singgom mara ena. De ei oo hambu Manetualain Dula-dale Malalaon boe.
ACT 2:39 Huu Manetualain naa, ndia ita Lamatuan fo helu-bartaa memak dedeꞌak naa soa-neu basa hatahorir fo mana maso dadi neu Ndia hatahorin ena. No dalak naa, Ndia hehelu-bartaan naa, soa-neu ei ma tititi-nonosim mara. Ana oo helu-bartaa soa-neu hatahori laen nara boe.”
ACT 2:40 Petrus bei kokolak no loa-naruk neu sara talo naa, fo nafada sara nae, “Hatematak ia hatahori noꞌuk ka sio laꞌo ela eno-dala masodak tetebes ena. Huu naa de ei muste besa-besa, fo ei boso tungga hatahori manggarauk kara eno-dalan. Tehuu ei muste tungga Manetualain eno-dala ndoon a mesan. No dalak naa ei hambu masoi-masodak fo masoda seku neu sama-sama mia Ndia.”
ACT 2:41 Basa boe ma hatahori noꞌuk kara raa simbo rala Petrus kokolan soa-neu sara. Boe ma ara tungga Yesus Eno-dala Masodan, de ara roke fo sarani sara. Faik naa oo hambu hatahori rifun telu maso dadi bua-aok esa ro Yesus hatahorin nara boe.
ACT 2:42 Ara hii rakabua sama-sama ro hatahori laen fo mana tungga Yesus. Ma ara esa malole no esa. Tungga-tungga faik ara manggate nenene nenorik numa Lamatuak Yesus nedenun nara mai. Ara hii hule-haradoi sama-sama. Ma ara oo hii raꞌa-rinu sama-sama boe.
ACT 2:43 Faik naa, Lamatuak nedenun nara tao tanda heran noꞌuk ka, losa basa hatahori heran bali-bali ma ramataꞌu.
ACT 2:44 Hatahorir raa fo mana tungga Lamatuak Yesus Eno-dala Masodan naa rakabua ma leo-laꞌo ro dalek esa, losa hata a mesan fo sira enan, na, ara pake sama-sama.
ACT 2:45 Boe ma hambu ketuk fo seꞌo sira bua-baꞌun ma hata-heton, de ara babaꞌe doin nara neu basa hatahori kamaherek kara, tungga esa-esak totoꞌan.
ACT 2:46 Tungga faik ara hii rakabua nai Manetualain Uma Huhule-haradoi Ina-huun. Ara raꞌa-rinu lali-lali numa uma esa mai reni uma esa reu no dale nemehokok. Basa sara hii leo-laꞌo ratulu-falik esa no esa, ma ara ta rambadaa.
ACT 2:47 Tungga faik basa sara soꞌuk kokoa-kikiok neu Manetualain no ta namaketu. Basa hatahori deak kara hii ralan seli neu sara. Tungga faik Manetualain tao nasoi-nasoda hatahorir, boe ma ara maso dadi bua-aok esa ro Lamatuak Yesus hatahorin nara. De ara tamba ramanoꞌu rakandoo.
ACT 3:1 Faik esa, neu liꞌu telu ledo bobon, Petrus no Yohanis reni Manetualain Uma Huhule-haradoi Ina-huun reu, fo ara sangga hule-haradoi ro hatahori laen nara.
ACT 3:2 Ara rae maso tungga lelesu moꞌok esa, nade ‘Lelesu Malole’. Numa naa, ara mete-rita touk esa fo ein kekok memak mulai numa inan bonggin mai. Tungga faik hatahori luꞌa roon neni mamanak naa neu, fo ana bisa hule-kai numa sudi see a mesan mai, fo mana maso neni Uma Huhule-haradoi Ina-huuk naa neu.
ACT 3:3 Neu ana mete-nita Petrus no Yohanis rae maso dale reu, boe ma ana soro liman fo hule nae, “Papa nggara ein! Kasian au dei. Fee au hata esa dei!”
ACT 3:4 Dua sara mete ratalolole neun, boe ma Petrus nae, “Kaꞌa! Mete ia mai dei!”
ACT 3:5 Boe ma hatahori naa botik matan fo mete dua sara, de ana duduꞌa nae, “Aah! Dua sara ia rae fee hata-hata neu au ia.”
ACT 3:6 Tehuu Petrus nae, “Kaꞌa! Au ta aena doik seen esa boe na. Tehuu au nau fee kaꞌa hata fo au aenang hatematak ia. Kaꞌa mamanene matalolole, ee! No Yesus Karistus, hatahori Nasaret naa koasan, au adenu kaꞌa mambariik fo laꞌok leo!”
ACT 3:7 Boe ma Petrus toꞌu nala hatahori kekok naa lima konan, de ana tulun leꞌa nambaririik kana. Hatematak naa oo ein nara hai neuk ka boe.
ACT 3:8 Nggengger neuk ka ana nakaboku de nambariik, boe ma ana laꞌok neu-mai, fo soba ndia ein. Basa boe ma ana maso tungga neni Uma Huhule-haradoik dale neu sama-sama no hatahori kaduak kara. Ana laꞌok nakaboboku ma koa-kio Manetualain.
ACT 3:9 Basa hatahorir mete-rita ana laꞌo-laꞌo ma koa-kio Manetualain.
ACT 3:10 Neu ara ralelan, boe ma ara nado bafa bese mboo, de rae, “Ndia ia, ndia hatahori kekok fo mana hule-kaik ma soa nanggatuuk nai Lelesu Malole naa, hetu? Talo bee de ana bisa dadi talo naa, ee?”
ACT 3:11 Boe ma hatahori naa laꞌok deka-deka no Petrus ma Yohanis. Telu sara losa uma loos esa, nade ‘Manek Soleman Uma Loos’. Boe ma basa hatahorir mai rakarumbu rala sara ma ara heran bali-bali.
ACT 3:12 Neu Petrus mete-nita hatahorir raa, boe ma ana mulai kokolak nae, “Hatahori Israꞌel ein, ee! Tao hata de toranook kara heran mete-mita matak ia? Tao hata de ei kada nado maherek ai? Ei duꞌa mae, hatahori ia bisa laꞌok nahuu ai pake dae-bafok koasan, do, nahuu ai manggate tungga Manetualain? Do, talo bee?
ACT 3:13 Au nau afada talo ia: Ita bei-baꞌin nara fo ndia baꞌi Abraham, baꞌi Isak ma baꞌi Yakob rakaluku-rakatele neu Manetualain. Manetualain naa, ndia nakadedemak Ndia Hatahorin fo Ana henggenee memak naa, ndia Yesus. Yesus naa, ndia Hatahori fo fai maneuk kara ei piru henin ma loo liman neni nggubenor Pilatus neu. Nggubenor nau nakamboꞌik kana, tehuu ei laban hihiin, mita fo ana boso nakamboꞌik Yesus.
ACT 3:14 Tehuu Yesus naa, Hatahori esa fo sala taak. Ndia dalen malole. Nggubenor nae nakamboꞌik Hatahori fo sala taak naa, tehuu ei basa ngga laban ana. Manggaraun lenak bali, ei tusu-hain fo madenun nakamboꞌik hatahori manggarauk esa fo mana makanisa hatahori, fo fee falik kana neu ei.
ACT 3:15 De ei ndia makanisa Yesus. Naa te Ana ndia dadi oka-huun numa basa mana masodak mai. Memak Ana mate ena, tehuu Manetualain tao nasoda falik kana numa mamaten mai ena. Ma Ndia ia, ndia ai mete-mita no ai mata deꞌe heli-helin nara ena.
ACT 3:16 Ei malela hatahori kekok ia ena. Hatematak ia ana barakai ena, tehuu ai ta ndia tao mahain. Ai ta maena koasa hata esa boe na. Koasa naa, numa kada Yesus mai. Hatahori ia barakai nasafali ena, nahuu ana namahere neu Lamatuak Yesus. Yesus naa, ndia tao nahain numa ei matam ena.
ACT 3:17 Toranoo nggara ein! Hatematak ia au bubuluk ae, ei ma malanggam mara tao manggarauk neu Yesus ena, tehuu ei ta bubuluk tebe-tebe hata fo ei taok ena.
ACT 3:18 Tehuu Manetualain nafada memak numa lele uluk mai pake Ndia mana toꞌu dedeꞌan nara nae, Karistus ndia Hatahori fo Ana henggenee memak kana naa ena, muste lemba-nasaa doidosok. Ma hatematak ia dedeꞌak naa, dadi ena.
ACT 3:19 Huu naa de ei muste masadea laꞌo ela ei sala-singgom mara, fo fali meni Manetualain miu, mita fo Ana koka heni sara ma Ana ta nasaneda ei sala-singgom mara bali.
ACT 3:20 Manetualain neu ko tao natea ei dalem. Ma Manetualain oo nau nadenu falik fee ei, Karistus naa, fo Ana henggenee memak kana ena. Ma Karistus naa, ndia Yesus fo Ana nadenu nitan neu ei ena.
ACT 3:21 Numa lele uluk mai Manetualain kokolak pake Ndia mana toꞌu dedeꞌan nara ena nae, ‘Manetualain neu ko tao nandoo basa dedeꞌak kara losa ara dadi beuk.’ Ma Yesus muste nahani nai Ndia Mamana Malalaon losa Ndia fain losa, fo Ana tao basa dedeꞌak kara dadi beuk.
ACT 3:22 Lele uluk baꞌi Musa oo kokolak nita no hatahori Israꞌel boe nae, ‘Manetualain ndia ei Lamatuam, neu ko Ana nadenu Hatahori esa numa ei mai fo dadi neu Ndia mana toꞌu dedeꞌan, sama leo Ana pake au dadi uu Ndia mana toꞌu dedeꞌan. Dadi ei muste pasa ei ndiꞌi doom mara fo mamanene neu basa hata fo Ana nau nafadan neu ei.
ACT 3:23 Tehuu hatahorir fo ta nau ramanene ratalolole Hatahori naa kokolan, neu ko lenggo feꞌe numa Manetualain hatahorin mai. De ara ta raena haak sama leo Manetualain hatahorin bali.’
ACT 3:24 Ta kada baꞌi Musa mesa kana kokolak nae leo naa. Manetualain oo pake hatahori laen, fo dadi neu Ndia mana toꞌu dedeꞌan boe, de ara oo rafada rae leo naa boe. Sama leo lelek naa, Manetualain pake baꞌi Semuel, fo nafada basa hata fo hatematak ia ita mete-tita to ita mata deꞌe heli-helin.
ACT 3:25 Manetualain oo helu-bartaa neu baꞌi Abraham boe nae, ‘Numa o tititi-nonosim mai, neu ko Au fee babaꞌe-babatik soa-neu basa hatahori nusa-nusak lalaꞌen marai dae-bafok ia.’ Hehelu-bartaak kara fo Manetualain fee neu mana toꞌu dedeꞌak lele uluk kara raa, hatematak ia dadi nai ei ena, ndia au toranoong hatahori Israꞌel asa.
ACT 3:26 Manetualain nadenu Ndia Anan fo Ana henggenee memak kana naa, fo natudu dalak, mita fo ei laꞌo ela ei sala-singgom. No dalak naa, Ana natudu Ndia dale susuen neu ei. Manetualain nadenu Kanak naa nakahuluk soa-neu ei, dei fo Ana nadenun soa-neu hatahori nusa-nusak laen nara. Naa dadi babaꞌe-babatik soa-neu ita basa ngga.”
ACT 4:1 Faik naa Petrus no Yohanis bei kola-kola ro hatahorir raa, te hatahori moꞌo-inahuuk hida mai. Sira ketuk anggama Yahudi malanggan nara ma ketuk hatahori ruma partei anggama Saduki mai, ro malangga mana manea Uma Huhule-haradoi Ina-huuk. Ara mai rareresi ro Petrus ma Yohanis.
ACT 4:2 Hatahori moꞌo-inahuuk kara raa ramanasa, nahuu dua sara soa tui-bengga neu basa hatahorir rae, “Yesus nasoda fali numa Ndia mamaten mai ena! No dalak naa, Ana soi dalak soa-neu hatahori mates sara fo ara bisa rasoda fali numa mamates mai.”
ACT 4:3 Basa boe ma ara parenda sira hatahorin nara fo reu humu dua sara. Ma huu ledo nae tesa ena, de ara sese sara reni bui dale reu. Neu beꞌe-mai dei fo ara raole dedeꞌak naa.
ACT 4:4 Tehuu numa hatahori fo mana hii nenene nedenuk kara raa mai, hatahori noꞌuk ka manaku ena rae, hata fo ara fee nenorik kara raa, memak tetebes. Huu naa de sira hatahorin nara tamba ramanoꞌu, nai rarain losa hatahori rifun lima.
ACT 4:5 Neu beꞌe-mai boe ma hatahori Yahudir hatahori moꞌo-inahuun nara rakabua ruma kota Yerusalem. Sira ndia, malanggan nara, lasi-lasi hadak kara ma meser anggama Yahudir.
ACT 4:6 Ma malangga anggama Yahudi malangga ina-huun oo numa naa boe. Naden Hanas. Hatahori moꞌo-inahuuk laen nara ndia Kayafas, Yohanis, Aleksander ma malangga ina-huuk nufanelun laen nara oo ruma naa boe.
ACT 4:7 Neu basa sara maso dale reu ena boe ma ara parenda hatahorir, fo reu leꞌa ro Petrus no Yohanis fo ara mai rasare matak ro malanggan nara raa. Neu ara maso ena, boe ma ratane sara rae, “Talo bee de ei bisa tao mahai hatahori kekok naa? Ei pake see koasan? See ndia fee luas fo ei mambarani tao talo naa?”
ACT 4:8 Boe ma Manetualain Dula-dalen tao nambarani Petrus, de ana naselu nae, “Ama nggara ein, fo mana dadi hatahori moꞌo-inahuuk ma lasi-lasi hadak kara numa hatahori Israꞌel asa mai! Boso mamanasa mete ma ai pangganaa baꞌu anak.
ACT 4:9 Nok bali ama sara nau radedeꞌa mia ai, nahuu ai tulu-fali tao mahai hatahori kekok esa ena. Boe ma ama sara nau sangga bubuluk ai pake see koasan?
ACT 4:10 De au nau aselu talo ia: ama sara bei masaneda hatahori Nasaret naa, fo naden Yesus naa. Hatahori naa, ndia Karistus fo Manetualain henggenee memak kana numa lele uluk mai. Ei paku makanisan numa ai ngganggek lain ena. Tehuu Manetualain tao nasoda falik kana numa Ndia mamaten mai ena. Au nau fo ama sara mia basa hatahori Israꞌel asa bubuluk leo, te ai tao mahai hatahori kekok naa, pake Yesus naa koasan.
ACT 4:11 Yesus ia, ndia ara surak memak kana nai Manetualain Susura Malalaon nae, ‘Hambu batu esa fo tukan nara nggari henin ena, tehuu hatematak ia batu naa, dadi neu batu netehuuk ena.’
ACT 4:12 Nai dae-bafok ia katematuan, Manetualain ta soi dalak laen ena fo tao nasoi-nasoda ita numa ita sala-singgon nara mai. Hambu kada dalak esa, ndia Yesus. Mete ma ta Ndia, na, ta hambu hatahori laen esa boe na, fo bisa tao nasoi-nasoda ita.”
ACT 4:13 Hatahorir fo mana ranggatuuk ruma naa ara bubuluk rae, Petrus no Yohanis naa kada hatahori kadiꞌi anak, sama leo hatahori ta mana lees ma surak ralela. Tehuu ara heran bali-bali neu dua sara nemberanin nara, huu ara kokolak ta pake sili-sili do bii-bambik. Lenak bali ara bubuluk rae, hatahori kaduak kara raa, eik esa ro Yesus.
ACT 4:14 Huu naa de bafan nara rakatema losa ara ta bisa kokolak noꞌuk ena, hata-bali hatahori fo hai numa hedi kekon mai naa ena, ana oo nambariik no sodak numa naa boe, tetar numa matan nara.
ACT 4:15 Basa boe ma radenu Yesus nedenun kaduak kara raa rae, “Ei dea miu taak dei.” Boe ma ara rakokola aok fo sangga dalak.
ACT 4:16 Ara rakokola aok rae, “Toranoo nggara ein! Ita muste tao hata neu hatahori kaduak kara ia? Te basa hatahorir maruma Yerusalem bubuluk ena rae, dua sara ndia tao tanda heran ia. Ita tae tamanino hata bali, te buktin hambun ndia naa ena.
ACT 4:17 Malole lenak ita sangga dalak, mita fo dedeꞌak ia boso losa natanggela sudi bee neu bali. Ma malole lenak boe, ita takatataꞌuk dua sara, fo ara boso fee nenorik laꞌe-neu Yesus Eno-dala Masodan bali. Mete ma ara ta nau ramanene, na, ara ralela ralak kana leo!”
ACT 4:18 Basa boe ma ranggou falik hatahori kaduak kara raa maso dale reu, de rafada sara rae, “Besa-besa, ee! Ei ta bole manori hatahorir laꞌe-neu Yesus naa bali!”
ACT 4:19 Tehuu Petrus no Yohanis raselu rae, “Soba papa sara duꞌa aom mara leo. Bee ndia lolen lena? Tungga papa sara parendan do tungga Manetualain parendan?
ACT 4:20 Ai mete-mita no ai mata deꞌem mara, ma ai mamanene no ai ndiꞌi doom mara dedeꞌak noꞌuk ka. Talo bee de ai muste makatema ai bafam, fo ai ta bisa mafada hatahorir bali!”
ACT 4:21 Boe ma hatahorir raa fo mana ranggatuuk raole dedeꞌak naa kaꞌi seluk kasa bali. Basa de ara mboꞌi hatahori kaduak kara raa reu, nahuu ara ta bubuluk hukun nasa talo bee bali. Ma ara oo ramataꞌu boe, boso losak hatahori noꞌuk kara marai dea ara ramue. Ara koa-kio Manetualain, nahuu hatahori kekok naa hai ena.
ACT 4:22 (Hatahori naa keko lena teuk haa hulu ena, dei de ana bisa laꞌok nala.)
ACT 4:23 Neu ara rakamboꞌik Petrus no Yohanis, boe ma dua sara fali reni sira nonoon nara reu. Basa boe ma ara tui basa hata fo malangga anggama Yahudi malanggan nara ma lasi-lasi hadak kara kaꞌi sara ena.
ACT 4:24 Basa nonoon nara ramanene rala naa, boe ma ara rakabua no dalek esa de hule-haradoi rae, “Manetualain fo mana Koasa Mateꞌen. Amak fo mana makadadadik lalai ma dae-inak no basa oe-isin.
ACT 4:25 Lele uluk Manetualain Dula-dale Malalaon pake baꞌi Dauk dadi neu Manetualain mana toꞌu dedeꞌan ena. Ana nafada memak nae, neu ko hatahori laban Yesus. Ana surak nae: ‘Hatahori numa nusa-nusak laen nara ramanasa ena, nahuu dedeꞌa anik; Ara kada tao lelik, fo adu dedeꞌa huu-suꞌu taak.
ACT 4:26 Manek kara marai dae-bafok ia rakabua fo rae ratati laban Lamatuak; ma malanggan nara rala harak fo reu laban Manetualain no Karistus, ndia Hatahori fo Manetualain henggenee memak kana numa lele uluk mai ena.’
ACT 4:27 Hata fo baꞌi Dauk surak naa ena, hatematak ia dadi ena. Ma ndia sosoa-ndandaan hatematak ia manggaledok ena. Memak nai kota ia, manek Herodes no nggubenor Pontius Pilatus rakabua ro ai hatahori Israꞌel lasi-lasin nara, ma nusak laen malanggan nara ena. De basa sara rala harak fo laban Yesus, Hatahori fo Manetualain henggenee memak kana naa ena.
ACT 4:28 Tehuu hatematak ia, ai bubuluk basa naar ndaa tetar no Manetualain hihii-nanaun ena, tungga hata fo Manetualain naketu memak kana numa lele uluk mai ena.
ACT 4:29 Hatematak ia hena Lamatuak mete, te ara rangga rakatataꞌuk ai. Dadi ai moke-hule fo Lamatuak tao mambarani ai. Fo ai laꞌok miu tui-bengga Lamatuak Tutui Malolen laꞌe-neu Yesus neu basa hatahorir rai bee a mesan. Ma ai hae mamataꞌu hata esa boe na.
ACT 4:30 Ai oo moke-hule fo Lamatuak baꞌe fee ai koasa, fo ai bisa tao mahai hatahori kamahedik kara boe. Ai oo moke-hule koasa fo tao tanda heran mata-matak kara boe fo hatahorir bubuluk rae, koasa naa, numa Hatahori Malalaok fo Lamatuak nadenuk mai, ndia Yesus. Lamatuak ai huhule-haradoin talo kada ia.”
ACT 4:31 Neu ara bei hule-haradoi, te uma fo ara rakabua numa naa, na, nanggenggo. Boe ma Manetualain Dula-dale Malalaon maso nai basa sara dale. De ara kalua fo laꞌo reu tui-bengga Manetualain Hara Lii Malolen no ta bii-bambik.
ACT 4:32 Boe ma basa hatahorir mana ramahere neu Yesus, ara dalek esa ma leo-laꞌo rasue-laik esa no esa. Ta hambu esa boe na nambadaa, ma esa hii babaꞌe fee esa sudi hata. Hatahori esa-esak no hata-heto heli-helin, ana koladu fo ara pake sama-sama.
ACT 4:33 Boe ma Lamatuak fee koasa neu Ndia nedenun nara, fo rafada hatahori rae, Lamatuak Yesus nasoda fali numa mamaten mai ena. Te ara mete-rita ro sira mata deꞌe heli-helin na. Boe ma Manetualain fee babaꞌe-babatik noꞌun seli neu sara.
ACT 4:34 Numa sira naa mai oo, hambu hatahori seꞌo ndia daen, do, ndia uma heli-helin boe. Doin nara, ana feen neu Lamatuak nedenun nara. De ara pake sara fo koladu soa-neu hatahori noꞌuk fo mana toꞌak kara. Huu naa de ara ta hambu esa toꞌa kuran hata faa boe na.
ACT 4:36 Haꞌi netuduk leo Yusuf. Ndia ia, Lewi tititi-nonosin, numa pulu Siprus mai. (Lamatuak nedenun nara roke naden rae, ‘Barnabas’, te nadek naa sosoa-ndandaan, ‘hatahori mana fufuꞌa hatahori laen dalen’.) Ana neu seꞌo daen faa, de ana neni doin nara reni Lamatuak nedenun nara reu.
ACT 5:1 Tehuu faik naa oo hambu touk esa, nade Ananias boe. Saon, nade Safira. Dua sara oo seꞌo sira daen faa boe.
ACT 5:2 Tehuu dua sara rala harak fo rafuni doik ketuk numa dae naa belin mai. Ara seꞌo basa dae naa, boe ma Ananias neu nafada Lamatuak nedenun nara nae, “Ai bei fo seꞌo heni ai daen faa. Hatematak ia ai nau fee basa doin nara neu Manetualain.”
ACT 5:3 Tehuu Petrus nahara berak neun nae, “Heeh! Ananias! O sudi mala selik kana! Talo bee de o bei malak mafuni doik numa dae o seꞌok naa mai? O dalem manggarau ndoos, nahuu o tungga nitur malanggan hihii-nanaun. O mambarani laꞌe esak kana pepeko-leleko Manetualain Dula-dale Malalaon!
ACT 5:4 Talo ia! O nau seꞌo dae naa do, ta nau seꞌo sana oo, naa numa kada o mai boe. Mete ma o seꞌo henin ena, na, o nau fee doin katemak do taa oo, naa numa kada o mai boe. Tehuu talo bee de o bisa tao talo naa? O soba-soba tao manggoa ai hatahori dae-bafok ia, tehuu ta hambu hatahori esa boe na bisa tao nanggoa Manetualain!”
ACT 5:5 Ananias namanene nala Petrus kokolan talo naa, nggengger neu ma lenggu henin neu daer, de maten tutik ka. Basa hatahorir fo mana ramanene dedeꞌak naa, ramataꞌu ralan seli.
ACT 5:6 Basa boe ma taꞌe anak hida maso dale reu, de ara mboti-mbalu Ananias ao-mbaa mamaten fo reu ratoin.
ACT 5:7 Basa de nai rarain liꞌu telu bali, boe ma Ananias saon maso dale mai. Tehuu ana ta bubuluk mandadik naa.
ACT 5:8 Boe ma Petrus natanen nae, “Talo bee, ina? Ina sara seꞌo heni dae naa, de belin ndia ena, do?” Ana naselu nae, “Tebe, Papa. Dae belin ndian ena.”
ACT 5:9 Boe ma Petrus nahara berak neun nae, “Talo bee de o mua o saom mala harak esa, fo sangga soba Lamatuak Dula-dalen? O mete leo! Hatahori mana bei fo ndoro roo o saom reu ratoin naa, ara fali ena. Doo-doo faa bali te ara oo ndoro reni o ao-mbaa mamaten fo reu ratoin neu o saom boboan boe.”
ACT 5:10 Inak naa namanene Petrus kokolan naa, nggengger neu ma ana lenggu neu, de maten tutik ka neu mamanan. Neu taꞌe anak kara raa maso fali, ara mete neu te inak naa oo maten ena boe. De ara ndoro reni ao-mbaa mamaten fo reu ratoin neu saon boboan.
ACT 5:11 Boe ma hatahorir fo mana ramahere neu Yesus naa, ara ramataꞌu. Ma basa hatahori laen fo mana ramanene harak laꞌe-neu Ananias no Safira mamaten naa oo ramataꞌu boe.
ACT 5:12 Faik naa, Yesus nedenun nara tao tanda heran noꞌun seli, de hatahorir mete-rita. Nedenuk kara raa soa maso reni Manetualain Uma Huhule-haradoi Ina-huun dale reu. Ara rakabua ro dalek esa numa Manek Soleman Uma Loos.
ACT 5:13 Faik naa oo, hatahori noꞌuk ka koa Lamatuak Yesus hatahorin nara boe. Mete ma hambu hatahori fo bei ta namahere neu Yesus, na, ana ta nambarani maso neu nakabua no sara nai naa.
ACT 5:14 Tehuu hatahori fo mana namahere neu Yesus, ara boe tamba ramanoꞌu. Hambu touk ma inak boe.
ACT 5:15 Faik naa dedeꞌak mata-matak kara raa dadi talo naa ena, losa hatahorir reni hatahori kamahedik kara mai, de ara ralololi sara reu neneꞌik lain numa dalak tatain. Huu ara duꞌa rae, “Mete ma Petrus no Yohanis laꞌok resik ia, na, leo mae ara laꞌe kada lalaon nara oo, hatahori kamahedik kara iar hai boe.”
ACT 5:16 Boe ma hatahorir mai ta ramaketu, ruma nggorok kara marai kota Yerusalem tatain mai. Ara ndoro reni sira hatahori kamahedin nara, de Lamatuak nedenun nara tao rahai basa sara. Ma ara oo nuni roo sira hatahorin fo nitu saꞌek kara boe, de Lamatuak nedenun nara husi heni basa nitur raa.
ACT 5:17 Huu Lamatuak Yesus nedenun nara ue-tataon de hatahori mana tungga sara tamba ramanoꞌu, boe ma malangga anggama Yahudi malangga ina-huun no ndia tia-lain nara numa partei Saduki mai, ndee neu boto liin nara.
ACT 5:18 Huu naa de reu humu rala Yesus nedenun nara, fo sese sara reni bui dale reu.
ACT 5:19 Tehuu leꞌodaen naa oo, Manetualain atan esa numa nusa tetuk do inggu temak mai, neni bui naa neu boe, de ana soi lelesun. Basa boe ma ana nuni sara dea reu. De ana kokolak nae,
ACT 5:20 “Hatematak ia ei laꞌo memak meni Manetualain Uma Huhule-haradoi Ina-huun miu. Miu mafada basa-basan neu hatahorir marai naa, fo ara tungga Lamatuak Eno-dalan fo Neni Masoda Beuk ia.”
ACT 5:21 Neu beꞌe-mai huhua anan, ara tao tungga Manetualain atan numa nusa tetuk do inggu temak mai hara hehelun naa. Boe ma ara maso reni Uma Huhule-haradoi Ina-huuk bebelan reu, de ara ranori hatahorir maruma naa. Ta dook ka boe ma malangga ina-huuk naa no ndia tia-lain nara mai sama-sama ro hatahori moꞌo-inahuun nara ma lasi-lasi hadak kara ruma Israꞌel katematuan mai. Ara rakabua fo rae parisa dedeꞌa anggama laꞌe-neu Lamatuak Yesus nedenun nara. De ara radenu hatahori mana manear reu rala Petrus asa numa bui mai, fo ara rae raole dedeꞌak naa.
ACT 5:22 Tehuu neu hatahori mana manear raa losa bui, Petrus asa ta rai naa ena. Boe ma hatahori mana manear reu rafada hatahori moꞌo-inahuuk kara numa mamana neole dedeꞌa anggama naa.
ACT 5:23 Ara tui rae, “Papa sara boso mamanasa. Neu ai losa bui, ai mete-mita basa lelesun nara mana nggoe nisak kara. Ma basa manear rambariik rai naa. Tehuu neu ai madenu sara soi lelesu fo ai maso, ai ta mete-mita hata-hata nai naa.”
ACT 5:24 Malangga anggama Yahudir ma malangga mana manea Manetualain Uma Huhule-haradoi Ina-huun ramanene rala naa, boe ma basa sara panggananaa ramanggonggoak kana, nahuu mopo duduꞌa neulaun nara ena.
ACT 5:25 Basa boe ma hambu hatahori esa mai nafada nae, “Papa sara mamanene dei! Hatahorir fo ei oka sara ruma bui dale naa, sira dea ia! Hatematak ia ara rambariik fo ranori hatahorir rai Uma Huhule-haradoi Ina-huuk ia!”
ACT 5:26 Malangga mana manea Uma Huhule-haradoi Ina-huuk namanene nala naa, boe ma nanggou ndia ana nunin nara fo reu humu seluk Petrus no nonoon nara. Tehuu malanggan naa ana nunin nara ramataꞌu, nahuu hatahori noꞌuk kara bei nenene Petrus kola-kola. Ara duꞌa rae, “Boso losak hatahori noꞌuk kara ramue-anggik fo ara toko batu neu ita.” Huu naa de, neu faik fo ara humu seluk Petrus asa, ara ta rambarani haꞌi sara no nekesetik.
ACT 5:27 Basa boe ma ara toꞌu roo Petrus asa reni mamana neole dedeꞌak reu. De malangga ina-huuk natane sara
ACT 5:28 nae, “Ai kaꞌi ei ena, fo boso manori hatahorir laꞌe-neu Hatahori fo nau neni eno-dala masoda beuk naa, hetu? Eir ia langga batu! De ei ta nau hosek neu ai parendan bali, te ei tao tungga kada ei hihiim! Ei miu fee nenorik miu-mai ndule kota Yerusalem ia. Nok bali ei ndae salak neu ai mae, air ia ndia madenu hatahori fo reu rakanisa Yesus naa.”
ACT 5:29 Basa boe ma Petrus nambariik fo dadi neu basa nedenuk kara mana toꞌu dedeꞌan. De ana naselu nae, “Ama nggara ein! Mete ma hambu hatahori dae-bafok parendan fo laban Manetualain hihii-nanaun, na, ai ta bisa tungga. Tehuu ai muste tungga kada Manetualain parendan!
ACT 5:30 Hatahori fo mana soi fee ai eno-dala masoda beun naa, ndia Yesus. Ndia naa, ndia Hatahori fo ei paku makanisan numa ai ngganggek lain ena. Numa lele uluk mai, ita baꞌin nara hii kada hule-haradoi neu Manetualain. Manetualain naa, ndia tao nasoda falik Yesus numa mamaten mai ena!
ACT 5:31 Hatematak ia Manetualain soꞌuk nala Yesus fo dadi neu Ndia lima konan ena. De Yesus toꞌu koasa sama leo mane ina-huuk. Ana soi dalak ena fo hatahorir hambu nekemboꞌik numa sira sala-singgon nara mai. Ana nau fee dalak neu ita hatahori Israꞌel ia, fo ita hahae numa basa ita sala-singgon nara mai, de lenggu fali fo tungga falik Manetualain eno-dala ndoon. No dalak naa, Manetualain dalen bisa dadi makasufu losa Ana ta tino ita hatahori Israꞌel asa salan ena bali.
ACT 5:32 Ita iar, mete-tita to ita mata deꞌe heli-helin tae, memak Yesus maten ena, tehuu Ana nasoda fali numa mamaten mai. Hatematak ia Manetualain Dula-dale Malalaon oo nafada dedeꞌak ia neu hatahori, fo mana tungga Yesus Eno-dala Masodan boe.”
ACT 5:33 Basa hatahorir fo mana ranggatuuk ruma mamana parisa dedeꞌak naa ramanene rala Petrus kokolan naa, boe ma ara luri losa rae hala risa Lamatuak nedenun nara.
ACT 5:34 Tehuu numa naa oo, hambu hatahori esa nanggatuuk fo tungga parisa dedeꞌak naa boe. Hatahori naa, nade Gamaliel. Hatahori noꞌuk ka fee hada-horomatak neun, huu hatahori ia, meser malelak esa numa partei anggama Farisi mai. Neu Petrus kokolak basa, boe ma ara rae hala risan. Tehuu Gamaliel nambadeik fo nadenu hatahorir leꞌa roo Petrus asa dea reu.
ACT 5:35 Neu ara dea reu ena, boe ma Gamaliel mulai kokolak neu basa malanggan maruma naar nae, “Toranoo nggara ein! Ita muste besa-besa dei! Boso losak ita hai-lai tao manggarauk neu hatahorir ia. Ita muste pake duduꞌa naruk dei.
ACT 5:36 Ei bei masaneda neu hatahori esa, nade Teudas. Ana mate doon seli ena, tehuu neu ana bei nasoda, ana soꞌuk aon nae, ndia naa, hatahori moꞌo-inahuuk, losa nangganuni nai rarain hatahori natun haa. Tehuu neu hatahorir rakanisan, ana nunin nara ralai sasarak, losa hatematak ia hatahori fo mana tunggan naa, ta ita esa idu-matan boe na. Ara ralai mopo matan nara ena.
ACT 5:37 Boe ma ei muste masaneda tutuik esa bali. Lelek naa, ndaa no man-parendar surak hatahori dedesin nara ndule nusak katematuan. Hambu hatahori esa, nade Yudas, numa profensi Galilea mai. Hatahori noꞌuk ka tunggan boe. Tehuu hatahorir oo hala risan boe. De hatahorir fo mana tunggan oo ralai sasarak kii-konak kana boe, losa ita ta mete-tita sara ena.
ACT 5:38 Dadi hatematak ia toranoo nggara ein, au duduꞌang talo kada ia: Hae takanisa sara. Ela sara ruma naa. Te sira nenorin ma sira tatao-nonoꞌin naa, mete ma numa hatahori dae-bafok mai, na, ta nakataka nala dook, neu ko mopo henin.
ACT 5:39 Tehuu mete ma nenorik ia memak numa Manetualain mai, na, neu ko ei ta bisa tao hahae sara. Huu naa de ei muste besa-besa dei. Boso losak ei mesa ngga ndia laban Manetualain.” Basa sara ramanene rala naa, boe ma ara rakahou a leo, tungga Gamaliel nenori-nefadan.
ACT 5:40 Basa boe ma ara roke ro nedenuk kara raa maso dale reu, de ara radenu hatahorir fo popoko sara. Popoko basa, boe ma ara kaꞌi sara fo ta bole seseik Yesus naden bali. Basa de ara mboꞌi sara reu.
ACT 5:41 Boe ma nedenuk kara raa kalua laꞌo ela mamana neole dedeꞌak naa. Ara duꞌa rae, leo mae sira naden nara raboo, nahuu sira tungga Yesus ena, tehuu ara oo ramahoko boe, nahuu Manetualain duꞌa nae, sira randaa hambu susa-sonak talo naa. Huu naa de dalen nara ramahoko ralan seli.
ACT 5:42 De tungga faik, ara reu ranori hatahorir rae, “Hatahori fo Manetualain henggenee memak kana numa lele uluk mai naa, ndia Yesus.” Boe ma ara oo tui-bengga dedeꞌak naa taa-taa nai hatahorir uman nara, ma nai Uma Huhule-haradoi Ina-huuk boe.
ACT 6:1 Faik naa, Lamatuak Yesus hatahorin nara tamba ramanoꞌu ena. Tehuu ara pake dedeꞌak dua. Sira ketuk ndia hatahori Yahudi mana kokolak pake dedeꞌa Aram. Ma ketuk bali ndia hatahori Yahudi mana kokolak pake dedeꞌa Yunani. Doo-doo boe ma, hambu dedeꞌak mori-dadi nai bubuak kaduak kara iar. Bubuak mana kokolak pake dedeꞌa Yunani dalen nara ta neulauk neu bubuak mana kokolak pake dedeꞌa Aram. Ara kokolak rae, “Ia, ta ndaa ia! Mete ma ei banggi-baꞌe nanaꞌak tungga faik, na, ei boso mambera seserik! Te ai ina falun nara ta hambu sira babaꞌen.”
ACT 6:2 Huu naa de Lamatuak nedenu kasalahunu duan nara raa roke rakabubua basa Lamatuak Yesus hatahorin nara. De ara kokolak rae, “Basa toranoo nggara ein! Mete ma ai hahae fo kada maono-lalau ei nanaꞌa-nininum, na, naa oo bisa boe, tehuu naa ta nandaa! Huu air ia muste fee nenorik laꞌe-neu Manetualain Dedeꞌa-kokolan makandoo.
ACT 6:3 Dadi ai duduꞌam leo iak: Malole lenak ei here hatahori hitu numa ei mai. Sangga hatahori see fo naden malole, ana bisa nanonoo no see a mesan, ana nalela dalak noꞌuk ka, ma Manetualain Dula-dalen ndia nakalalaꞌok leleo-lalaꞌon. Mete ma ei here mala hatahori leo naak ena, na, dei fo ai soꞌuk kasa fo ara raono-lalau nanaꞌa-nininuk kara raa.
ACT 6:4 No dalak naa, ai bisa hule-haradoi noꞌuk lenak ma fee nenorik laꞌe-neu Manetualain Dedeꞌa-kokolan.”
ACT 6:5 Basa boe ma ara rakaheik Petrus asa kokolan naa. De ara here rala hatahori hitu. Ndia: Hatahori esa nade Stefanus. Hatahori naa namahere tebe-tebe neu Lamatuak Yesus ma Manetualain Dula-dale Malalaon paken. Ndia nonoon laen nara, sira: Felipus, Prokorus, Nikanor, Timon, Parmenas, ma Nikolas numa kota Antiokia mai. Ndia ia ta hatahori Yahudi, tehuu ana maso anggama Yahudi ena.
ACT 6:6 Boe ma ara roo hatahori kehituk kara fo ara here rala kara raa ena reni Lamatuak nedenun nara reu. De nedenuk kara raa ndae liman nara reu sara, ma hule-haradoi fo soꞌuk kasa dadi reu hatahori mana maono-lalau nanaꞌa-nininuk, fo basa hatahori kadiꞌik kara hambu babaꞌek koko-babaꞌuk.
ACT 6:7 Huu naa de Manetualain Dedeꞌa-kokolan nara natanggenggela sudi bee neu. Ma hatahori fo mana tungga Yesus Eno-dala Masodan naa, tamba ramanoꞌu rakandoo nai Yerusalem. Hambu malangga anggama Yahudi noꞌuk ka oo, lali reni Yesus hatahorin nara reu boe.
ACT 6:8 Faik naa, Manetualain natudu Ndia dale susuen noꞌun seli neu Stefanus. Ana oo fee koasa boe fo Stefanus bisa tao tanda heran ma dedeꞌak ta hohoꞌak kara, fo hatahori noꞌuk ka mete-rita ro mata deꞌe heli-helin nara.
ACT 6:9 Numa naa, hambu hatahori Yahudi hida fo maruma mamana dae dook kara mai. Ndia kota Kerene, kota Aleksandria, profensi Kilikia ma profensi Asia. Fai bakahulun, ara dadi reu hatahori laen ata-daton nara, tehuu mateꞌen boe ma sira lamatuan nakamboꞌik kasa. Hatahori iar reu rakabua numa Yerusalem. Ara rasiꞌe maso reni uma huhule-haradoik esa, nade ‘Nekemboꞌik numa Ata-datok mai’. Boe ma laꞌe esa, ara ramanene Stefanus kokolan ena, tehuu ara ta hii sana, de ara mulai rareresi roon.
ACT 6:10 Tehuu Stefanus naa, hatahori fo malelan seli, nahuu ana kokolak pake Manetualain Dula-dale Malalaon koasan. De ara ta bisa tao rasenggin.
ACT 6:11 Huu naa de ara sangga dala manggarauk. Boe ma ara reu kosu rala hatahori ketuk, mita fo ara reu kokolak pepeko-leleko rae, “Ai mamanene hatahori ia kokolak ta neulauk neu Musa no Manetualain! Memak ana nakadadaek naa!”
ACT 6:12 Ara dudunggu hatahorir, losa hatahori Yahudi lasi-lasi hadan nara, ma meser anggamar oo ramanene boe. Ara ramanene talo naa, boe ma ramanasa. Ara reu humu rala Stefanus, de ara leꞌa roon neni mamana neole dedeꞌa anggama neu.
ACT 6:13 Sira sakasii pepeko-lelekon nara kokolak fua ndae dedeꞌa pepekok laꞌe-neu Stefanus rae, “Hatahori ia soa kokolak manggarauk taa-taa laꞌe-neu Uma Huhule-haradoi Ina-huuk. Ma ana oo, hii kada kokolak nakalulutu Manetualain parendan nara, fo baꞌi Musa nakonda sara fee ita ena boe.
ACT 6:14 Ai oo mamanene ana kokolak ena boe nae, Yesus, Hatahori Nasaret naa nae nandefa heni Uma Huhule-haradoi Ina-huuk ia. Ma Ana oo nae nakalulutu basa ita hadan hohoro-lalanen, fo baꞌi Musa nakondan fee ita naa ena boe!”
ACT 6:15 Basa boe ma basa hatahorir fo mana ranggatuuk numa mamana neole dedeꞌa anggama naa mete ramumula Stefanus, nahuu idu-matan nasaꞌa sama leo Manetualain atan nara ruma nusa tetuk do inggu temak mai idu-matan ia.
ACT 7:1 Basa boe ma malangga anggama Yahudi malangga Ina-huun natane Stefanus nae, “Ara rakasasaꞌek salak neu o naa, tebe do taa?”
ACT 7:2 Stefanus naselu nasafali nae, “Ama nggara ma toranoo nggara ein! Soba ei nenene au dei. Lele uluk ita baꞌin Abraham bei ta lali ela ndia nggoro-tadu huun. Tehuu Manetualain fo ta neni babanggak natudu aon neun ena. Manetualain parenda neun nae, ‘Muu leo, laꞌo ela o nusam ia ma laꞌo ela o nufanelum mara. O laꞌo leo, muni nusak esa muu dei fo Au atudun neu o!’ Basa boe ma ana laꞌok numa dae Mesopotamia mai, fo nae lali neni kota Haran neu.
ACT 7:4 De ana laꞌo ela hatahori Kasdim asa nusan fo lali neni kota Haran neu. Neu ama bonggin mate, boe ma Manetualain nuni nalan lali neni dae Kanaꞌan ia mai, ndia dae fo ama sara ma toranook kara leo hatematak ia.
ACT 7:5 Lelek naa Manetulain ta baꞌe fee dae hangga esa boe na numa nusak ia mai fo dadi neu baꞌi Abraham dae pusakan. Tehuu Manetualain helu-bartaa memak kana ena nae, neu ko Ana fee dae ia neun fo dadi neu ndia tititi-nonosin nara dae pusakan. Naa te lelek naa baꞌi Abraham bei ta hambu ana bonggik esa boe na.
ACT 7:6 Tehuu Manetualain kokolak neun nae, ‘O tititi-nonosim mara neu ko reu leo nai hatahori laen nusan. Neu ko hatahori tuni-ndeni sara, de tao sara dadi reu ata-dator ma tao hohoꞌak kasa losa teuk natun haa.
ACT 7:7 Tehuu basa teuk natun haa naa, na, neu ko Au fee huku-dokik neu nusak mana tao o tititi-nonosim mara dadi reu sira ata-daton. Basa boe ma o tititi-nonosim mara laꞌo ela nusak naa, fo reni mamanak ia mai fo hule-haradoi roke makasi neu Au.’
ACT 7:8 Ana kokolak basa talo naa, boe ma Ana ndara fangga hehelu-bartaak naa no dalak sunat, fo dadi tanda nae, baꞌi Abraham no tititi-nonosin nara, dadi reu Manetualain hatahorin ena. Basa de neu bonggi heni ndia anan Isak faik falu, boe ma Abraham sunat ana. Basa de Isak sunat anan Yakob. Basa de Yakob oo sunat ndia ana tou kasalahunu duan nara raa boe, neu faik fo esa-esak bei fo bonggi henin faik falu. Basa iar, sira ita hatahori Yahudir bei-baꞌin nara.
ACT 7:9 Laꞌe esa, ita bei-baꞌin nara dalen mbiri sira fadin Yusuf, losa ara seꞌo henin de ana neu dadi ata-dato numa dae Masir naa. Tehuu Manetualain ta laꞌo ela nita sana.
ACT 7:10 Huu naa de Manetualain nakamboꞌik kana numa basa susa-sonan mai. Manetualain oo baꞌe feen malelak boe, fo ana bisa nalela dalak noꞌuk ka losa manek Masir suen, de soꞌuk kana dadi nggubenor neu dae Masir katematuan. Ma ana oo toꞌu koasa nai uma manek dale boe.
ACT 7:11 Basa boe ma fai ndoe-laꞌas daka nala dae Masir ma dae Kanaꞌan. Fai ndoe-laꞌas naa, sudi selik kana, losa hatahori noꞌuk ka doidoso nai bee a mesan. Huu naa de lelek naa, ita bei-baꞌin nara oo ta bisa hambu nanaꞌak hata esa boe na.
ACT 7:12 Tehuu baꞌi Yakob namanene harak nae, hambu nanaꞌak nai dae Masir. Boe ma ana nadenu anan nara, ndia ita bei-baꞌin nara iar, fo ara reni dae Masir reu fo hasa nanaꞌak nai naa.
ACT 7:13 Ara hasa rala boe ma ara fali. Neu nanaꞌan nara raa basa, boe ma Yakob nadenu seluk kasa soba fali reu hasa nanaꞌak numa dae Masir naa bali. Neu ara reu seluk naa, dei de Yusuf buka dalen nae, ndia ia, sira toranoo bonggin Yusuf. Basa naa, dei de Yusuf nakalelelak nufanelun nara raa reu manek Masir.
ACT 7:14 Basa boe ma Yusuf noke fo ndia ama bonggin no basa ndia nufanelun lalaꞌen lali reni dae Masir reu. Basa sira fo mana reni naa reu, hambu hatahori hitu hulu lima.
ACT 7:15 Dadi Yakob lali neni dae Masir neu losa ana no ita bei-baꞌin nara mate numa naa.
ACT 7:16 Tehuu doon seli, boe ma ara reni falik bei-baꞌir dui-roun reni nggoro Sikem nai dae Kanaꞌan reu. De ara ratoi dui-rouk kara raa reu mamana rates fo fai bakahulun baꞌi Abraham hasa nalak numa Hemor tititi-nonosin nara mai ena.”
ACT 7:17 Stefanus tuti ndia kokolan nae, “Basa iar dadi, nahuu Manetualain helu-bartaa memak nae, neu ko Ndia fee dae pusaka neu Abraham nai mamanak naa. Neu mulai deka faik fo Manetualain tao natetu Ndia hehelu-bartaan naa, ita hatahori Yahudir tamba tamanoꞌu nai dae Masir naa ena.
ACT 7:18 Lelek naa, mane beuk esa mulai toꞌu parenda numa dae Masir. Tehuu ana ta bubuluk laꞌe-neu Yusuf.
ACT 7:19 Manek naa heheta-tatabu nakamiminak ita hatahorin. Ndia ia manggaraun seli neu ita bei-baꞌin nara. Boe ma ana nakasetik kasa fo ara nggari heni ana mbimbila anan nara, mita fo mate sara.
ACT 7:20 Lelek naa, baꞌi Musa inan bonggi nalan. Kanak aon mana momote ndoos. Ndia inan no aman ta tao tungga manek naa parendan. Ara rakaboi rafuni kanak naa numa sira uman, losa bulak telu.
ACT 7:21 Neu ara ta bisa rafuni rala sana nai sira uman dale ena, boe ma reu nggari henin. Tehuu manek Masir ana inan esa nita kanak naa, boe ma here nalan de nakabibibin sama leo ndia ana bonggin ia.
ACT 7:22 Huu naa de hatahori Masir asa ranori basa sira malelan nara neu Musa, losa mesa kana dadi neu hatahori ta hohoꞌak. Ma ndia naa, malela kokolak ma malela ue-osa.
ACT 7:23 Neu Musa teuk haa hulu ena, boe ma ana neu nau nalelela aok no ndia hatahorin Israꞌel mesa kasa.
ACT 7:24 Neu ana dea neu, boe ma ana mete-nita hatahori Israꞌel esa hambu popokok numa hatahori Masir esa mai. Ana neu tulun ndia hatahori Israꞌel, de hala nisa hatahori Masir naa.
ACT 7:25 Musa nae hetuk ko ndia hatahorin bubuluk nae, Manetualain nadenu ndia ena, fo neu nakamboꞌik kasa numa sira susa-sonan nara mai. Tehuu ara bei ta ralela dedeꞌak naa.
ACT 7:26 Neu beꞌe-mai, Musa kalua bali fo neu tiro-dangga ndia hatahorin Israꞌel asa. Boe ma ana mete-nita hatahori dua ratutu. Ana nau fee dua sara dame, de nae, ‘Heeh! Ei dua ngga ia kaꞌa-fadik kara. Tehuu talo bee de ei dua ngga matutu talo ia?’
ACT 7:27 Tehuu hatahori fo mana popoko ndia nonoon naa tola heni baꞌi Musa neni tataik neu, de nae, ‘See ndia soꞌuk o dadi neu ai malanggan? Ma see ndia soꞌuk o dadi neu ai mana maketu-maladi dedeꞌan boe?
ACT 7:28 O duꞌa mae, o nau tao misa au, sama leo o tao misa hatahori Masir afik ka naa, do?’
ACT 7:29 Musa namanene nala naa, boe ma ana huꞌa nalai laꞌo ela Masir. De ana neu leo numa hatahori Median asa nusan. Ana sao numa naa, boe ma ara bonggi rala ana touk dua.
ACT 7:30 Basa teuk haa hulu, boe ma Musa neni mamana mada mbi eik esa neu deka no letek esa fo hatahorir rae, Letek Sinai. Numa naa, Manetualain atan numa nusa tetuk do inggu temak mai, kalua numa aꞌi mana mbilak dale nai ai huu kadiꞌik esa naa, fo natonggo no Musa. Ai huuk naa aꞌi naꞌan, tehuu ta kade sana.
ACT 7:31 Musa mete-nita naa, boe ma ana namananauk kana. De ana nggani mata neu fo ana nau bubuluk hata naa. Tehuu nggengger neu ma ana namanene Lamatuak kokolak numa aꞌi naa dale mai nae,
ACT 7:32 ‘Au ia, o bei-baꞌim mara Manetualain; ndia baꞌi Abraham, baꞌi Isak, ma baꞌi Yakob Manetualain.’ Musa namanene nala naa, boe ma ana namataꞌu nalan seli losa ana dere faku-faku, ma ana ta nambarani botik matan fo mete ai huuk fo aꞌi naꞌak naa.
ACT 7:33 Basa boe ma Lamatuak kokolak seluk bali nae, ‘Musa! O mambariik nai dae malalaok. Buka heni o tatabu eim!
ACT 7:34 Boso duꞌa mae, Au lilii heni Au hatahoring Israꞌel asa marai Masir naa ena. Taa! Au bei asaneda sara. Au bubuluk sira doidoson. Au amanene ara rakuu-rakau roke tulu-falik ena. Dadi hatematak ia Au konda fo uu akamboꞌik kasa. Mai ia dei! Au ae adenu o fo fali muni Masir naa muu.’
ACT 7:35 No dalak naa, Manetualain fo mana natudu aon numa aꞌi dale naa, parenda Musa fo fali neni Masir neu. Manetualain here nalan fo neu nakamboꞌik hatahori Israꞌel asa numa sira doidoson mai. Musa ia, ndia fai bakahulun fo hatahorir ratanen rae, ‘See ndia soꞌuk o dadi neu ai malanggan?’ Tehuu hatematak ia Manetualain mesa kana ndia soꞌuk nalan!
ACT 7:36 Basa boe ma Musa fali neni Masir neu. Numa naa, ana tao tanda heran ta hohoꞌak kara. Basa de ana nuni noo hatahori Israꞌel asa kalua laꞌo ela Masir. Ana nuni noo sara ladi Tasi Mbilas, boe ma ara laꞌok ndule mamana nees losa teuk haa hulu dalen.
ACT 7:37 Musa mesa kana nafada hatahori Israꞌel asa nae, ‘Neu ko Manetualain soꞌu nala hatahori esa numa ei taladam mai fo Ana dadi neu Ndia mana toꞌu dedeꞌan, sama leo Ana soꞌuk nala au ia.’
ACT 7:38 Musa sama-sama no ita hatahorin Israꞌel asa ruma mamana nees. Ana ndia dadi neu lelete soa-neu ita bei-baꞌin nara ro Manetualain atan numa nusa tetuk do inggu temak mai. Ata naa nakonda Manetualain Dedeꞌa-kokolan neu Musa, fo natudu ita eno-dala masodak tetebes. Dedeꞌa-kokolak kara raa ndia Manetualain nakonda sara numa letek Sinai.
ACT 7:39 Leo mae talo naa oo, tehuu ita bei-baꞌin nara ta nau nenene neu Musa boe. De ara timba henin, fo ara rasuu kada fali reni Masir reu.
ACT 7:40 Boe ma ara reu kokoe Harun rae, ‘O fadim Musa nuni noo ita kalua numa dae Masir naa mai ena. Tehuu hatematak ia ai ta bubuluk kana nai bolok bee. De ai moke fo o tao fee ai bua sosonggok, mita fo ana mesa kana ndia laꞌok nuni ai.’
ACT 7:41 Basa boe ma ara tao rala patong esa dadi bua sosonggok. Buas naa rupan sama leo sapi ana esa. De ara tati-mbau banda fee bua sosonggok naa. Boe ma ara feta rame-rame, nahuu dalen nara rameda dai no bua sosonggok fo ara doki ralak renik sira lima heli-helin.
ACT 7:42 Manetualain mete-nita naa, de nasadea sara. Basa boe ma ara mulai songgo-tanggu neu hata manai lalai, ndia leo ledo, bulan ma nduuk kara. Tehuu Manetualain laꞌo ela sara talo naa leo. Naa, ndaa no hata fo Manetualain mana toꞌu dedeꞌan nara surak numa lele uluk mai ena rae, ‘Heeh! Hatahori Israꞌel ein! Teuk haa hulu dalen ei laꞌok ndule mamana nees naa, boe ma ei tati-mbau bandar fo ei makaluku-makatele neu Au, do, ei songgo-tanggu neu see?
ACT 7:43 Ei ta koa-kio neu Au! Tungga faik ei kada songgo-tanggu neu ei patong sosonggom mara. Ei soa maso-kalua meni nitu Molok uma sosonggon miu. Ei oo soa songgo-tanggu neu nduuk esa nitun, nade Refan boe. Dadi ei kada songgo-tanggu neu hata fo ei dokin menik ei lima heli-helim ena. Huu naa de neu ko Au piru heni ei meni dook ka miu, meni Babel boboan naa miu.’ ”
ACT 7:44 Stefanus tuti kokolan nae, “Manetualain natudu fee baꞌi Musa mamana huhule-haradoik esa rupan. Boe ma Musa sara rambadedeik Laa Huhule-haradoik esa fo ara taon numa banda rouk ma temak mai tungga rupak naa. De hatahori Israꞌel asa mai hule-haradoi neu Manetualain numa naa. Mete ma ara lali numa mamanak esa mai reni mamanak esa reu, na, ara ofe heni Laa Huhule-haradoik naa, boe ma ara fufutun, fo ndoro renin neni mamana beuk neu. Numa mamanak naa, ara rambadedeik seluk Laak naa.
ACT 7:45 Mai fai bakahiton, neu lelek Yosua sara ratati laban hatahori nusa-nusak laen nara marai dae Kanaꞌan, Manetualain husi kalua heni hatahori nusa laen nara raa. Basa boe ma Ana babaꞌe nusak naa neu ita bei-baꞌin nara. Neu lelek ara reu leꞌa rala nusak naa, ara oo ndoro reni Manetualain Laa Huhule-haradoin de renin neni mamanak naa neu boe. Laak naa, nambariik nakandoo numa naa losa mane Dauk toꞌu parenda.
ACT 7:46 Mane Dauk ia hule-haradoi neu Manetualain sama leo ita baꞌin Yakob asa oo hule-haradoi neun boe. Boe ma Dauk tao namahoko Manetualain dalen, de Manetualain fee babaꞌe-babatik neun. Basa de ana noke-hule neu Manetualain fo ana ndia nambadedeik Uma Huhule-haradoi Ina-huu beuk.
ACT 7:47 Tehuu Dauk anan Soleman ndia nambadedeik Manetualain Uma Huhule-haradoi Ina-huun.
ACT 7:48 Tehuu ita bubuluk tae, Manetualain mana Demak Mateꞌen ta leo nai uma fo hatahori dae-bafok taok, nahuu lele uluk Manetualain mana toꞌu dedeꞌan esa surak memak kana ena nae,
ACT 7:49 ‘Lalai naa, Au kadera man-parendang. Ma dae-inak naa, Au mamana tatabu eing. Talo bee de ei bisa mambadedeik fee Au uma esa fo nandaa Au leo uu naa? Ta bisa dadi!
ACT 7:50 Te lalai ma dae-inak no basa oe-isin lalaꞌen, Au ndia akadadadik sara na.’ ”
ACT 7:51 Basa boe ma Stefanus tuti kokolan, de ana mboka sara nae, “Ei memak hatahori dae-bafo langga batuk kara! Ei sama leo hatahori ta mana malela Manetualain, ma ta nau nenene neu sana. Ei hatahori mana laban Manetualain, sama leo bei-baꞌir lele uluk kara fo rasadean. Hatematak ia ei bei mae laban Manetualain Dula-dale Malalaon bali, do?
ACT 7:52 Ei bei-baꞌim mara oo tao susa-sonak taa-taa neu Manetualain mana toꞌu dedeꞌan nara boe. Soba ei mafada: mana toꞌu dedeꞌak see ndia ara ta tao doidosok neun? Ta hambu, hetu! Lele uluk Manetualain mana toꞌu dedeꞌan nara soa rafada memak rae, neu ko Manetualain nae nadenu Ndia Hatahori Malalaon mai. Tehuu ei bei-baꞌim mara hala risa Manetualain mana toꞌu dedeꞌan nara. Losa ei mesa ngga oo sangga dalak boe, fo pake hatahori laen hala risa Manetualain Hatahori Malalaon naa.
ACT 7:53 Ma Manetualain atan nara maruma nusa tetuk do inggu temak mai oo reni basa hadak hohoro-lalanen nara fo Manetualain nae feen neu ita boe, tehuu ei ta nau tao matak.”
ACT 7:54 Neu hatahorir fo mana ranggatuuk raole dedeꞌak ramanene rala Stefanus kokolan naa, ara bubuluk memak rae, ana ndae salak neu sara. De dalen nara mana kikitok kara ma ara hehengguk nisin nara.
ACT 7:55 Tehuu Stefanus fo Manetualain Dula-dale Malalaon maso nai ndia dale naa, botik matan de mete lalai neu. Numa mamanak naa, ana mete-nita Manetualain ta neni babanggak, ma Lamatuak Yesus nambariik nai Manetualain boboa konan, nai mamana hada-horomatak mateꞌen.
ACT 7:56 Boe ma Stefanus kokolak nae, “Talo ia ama nggara ein. Au mete-ita lalai natahuka, ma Hatahori Dae-bafo Isi-isik nambariik nai mamana hada-horomatak mateꞌen nai Manetualain boboa konan.”
ACT 7:57 Hatahori mana maole dedeꞌak kara raa ramanene rala naa, boe ma ara sena ndiꞌi doon nara. De ara mboka radenu Stefanus nakatema bafan. Boe ma basa sara rakaboku rame-rame fo reu ruruꞌi-paparun.
ACT 7:58 Basa de ara leꞌa roroso roon neni kota dea neu. Boe ma sakasiir buka heni sira badu dean, fo ratotoꞌu sara reu hatahori taꞌe anak esa. Hatahori naa nade Saulus, ana dadi neu sira hatahori mana makabubusan. Basa boe ma ara reu toko rakamiminak Stefanus pake batu.
ACT 7:59 Neu ara bei toko Stefanus, boe ma ana nanggou no haran nahere nae, “Lamatuak Yesus! Au faing deka-deka ena. Simbok mala au leo!”
ACT 7:60 Basa boe ma ana ndole de diku neu luu-langgan, boe ma ana nanggou no haran nahere seluk bali nae, “Amak, boso fee sara lemba-rasaa kilu-salak ia!” Basa boe ma ketu ani hahaen, de maten.
ACT 8:1 Saulus oo numa mamanak naa boe, de ana simbok no malole ara hala risa Stefanus.
ACT 8:2 Neu Stefanus maten naa, hambu hatahori hida hii ralan seli neu Lamatuak. Ara reu haꞌi rala Stefanus ao-mbaa mamaten, fo reu ratoin, ma ara buꞌi rakarereu neun. Numa faik naa mai, hatahorir mulai tao susa-sonak neu Lamatuak Yesus hatahorin nara marai kota Yerusalem, losa ara doidoso ralan seli. Basa boe ma ralai sasarak reni profensi Yudea ma profensi Samaria reu. Basa sara ralai, ela kada Yesus nedenun nara ruma Yerusalem.
ACT 8:3 Tehuu Saulus sangga dalak nakandoo fo nae nakalulutu Yesus hatahorin nara. Ana neu sangga sara sudi rai mamanak bee. Ana maso-kalua basa umar fo neu sangga sara. Leo mae touk do inak oo, ana humu neni sara, fo ana tee sara reni bui dale reu boe.
ACT 8:4 Leo mae hatahorir tao susa-sonak neu Yesus hatahorin nara losa ara ralai sasarak, tehuu ara ta hahae tui-bengga Lamatuak Yesus Tutui Malolen soa-neu hatahorir sudi rai bee.
ACT 8:5 Haꞌi netuduk leo, faik esa Felipus neni kota esa nai profensi Samaria neu, fo nafada basa hatahorir raa nae, “Yesus naa, Karistus, ndia Hatahori fo Manetualain henggenee memak kana numa lele uluk mai ena.”
ACT 8:6 Neu hatahori noꞌuk kara mete-rita tanda heran nara fo ana taok, boe ma ara rakabua fo nenene ratalolole hata fo ana kokolak.
ACT 8:7 Haꞌi netuduk leo, numa mamanak naa oo hambu hatahori fo nitu saꞌek kara boe. Nitur raa kalua laꞌo ela hatahori, boe ma ara eki tingga-tingga. Hambu hatahori kekok kara ma hatahori ei dokak kara oo hai memak boe.
ACT 8:8 Huu naa de hatahorir marai kota naa dalen nara ramahoko ralan seli.
ACT 8:9 Numa kota naa hambu hatahori malelak esa, nade Simon. Doon seli ena, ana pake ndia koasa makiun fo ana teka-doki hatahori Samariar. Ana koa aon nae, “Au ia, hatahori ta hohoꞌak!”
ACT 8:10 Dadi numa kota naa mai, kakana anak do hatahori moꞌok, touk do inak, basa sara kola-kola hatahori naa naden rae, “Awii! Hatahori ia sudi selik kana! Hata fo ana taok naa numa Manetualain koasan mai!” Huu ndia koasa makiun, de hatahorir soa paken numa fai uluk mai.
ACT 8:12 Tehuu hatematak ia ara ramanene Felipus nanori sara laꞌe-neu Manetualain parenda-koasan. Ma ana oo natudu dalak fo ara bisa maso dadi reu Manetualain hatahorin renik Yesus naden boe. Hatahori noꞌuk ka ramanene rala naa, boe ma ara ramahere fo maso dadi reu Lamatuak nufanelun. Touk ma inak, basa sara oo dadi leo naak boe. Huu naa de ara hambu saranik.
ACT 8:13 Ta bubuluk te Simon oo namahere ma nau dadi neu Yesus hatahorin boe. De ara saranin. Basa boe ma ana tungga no Felipus neni bee a mesan neu. Neu ana mete-nita tanda heran nara fo Felipus taok naa, boe ma ana kakale langgan nae, “Awii! Mana dadi leo iak ia, sudi selik kana ena!”
ACT 8:14 Faik naa, Lamatuak Yesus nedenun nara marai Yerusalem ramanene rae, hatahorir marai profensi Samaria ramahere neu Manetualain Tutui Malolen ena. Basa boe ma ara radenu Petrus no Yohanis reni naa reu.
ACT 8:15 Neu dua sara losa naa, boe ma ara bubuluk rae, hatahorir marai naa bei ta simbo Manetualain Dula-dale Malalaon. Ara hambu kada saranik pake Yesus naden mesa kana. Boe ma Petrus no Yohanis ndae liman nara reu hatahorir raa, ma ara hule-haradoi fo hatahori Samariar oo hambu Manetualain Dula-dale Malalaon boe. Boe ma hatahorir raa simbo memak kana.
ACT 8:18 Faik naa, Simon mete-nita dua sara ndae liman nara reu hatahorir raa, de ara simbo Manetualain Dula-dalen. Boe ma Simon soro fee Petrus ma Yohanis doik, de noke nae,
ACT 8:19 “Ama nggara ein, ee! Ei fee koasa naa neu au boe. Fo mete ma au nau ndae limang neu see a mesan lain, na, ara oo simbok Manetualain Dula-dale Malalaon boe.”
ACT 8:20 Tehuu Petrus mbokan nae, “Ndua hadak neu o, ma o doim naa. O duꞌa mae, o bisa hasa Manetualain Dula-dale Malalaon koasan munik doik? Taa! Hatahori ta bisa hasa Manetualain Dula-dalen!
ACT 8:21 O ta maena haak hata esa boe na neu Manetualain Dula-dalen, nahuu o dalem ta ndoos. O kada sangga dalak a mesan.
ACT 8:22 O hahae numa o kilu-salam ia neu leo. Malole lenak o hule-haradoi neu Lamatuak fo mete ma bisa, na, Ana koka heni o duduꞌa-aꞌafi kaboo mburum.
ACT 8:23 Au bubuluk ae, o dalem sofek no dale mana mbirik, ma hambu dedeꞌa manggarauk noꞌuk ka futu-paꞌa o!”
ACT 8:24 Boe ma Simon hule dua sara nae, “Ama nggara ein! Mete ma talo naa, na, ei tulun hule-haradoi fee au, mita fo neketook fo ei kokolak bebeik kara ia, boso laꞌe au.”
ACT 8:25 Boe ma Petrus no Yohanis tui-bengga Lamatuak Yesus Tutui Malolen lalaꞌen, ma ara rafada Lamatuak Dedeꞌa-kokolan numa kota naa. Basa de ara fali reni Yerusalem reu. Nai sira dala lalaꞌon naa, ara tuli nai nggorok kara marai profensi Samaria, fo reni Lamatuak Yesus Tutui Malolen fee hatahorir marai naa.
ACT 8:26 Boe ma Manetualain atan numa nusa tetuk do inggu temak mai nadenu Felipus nae, “Ana nggee! O laꞌok tungga dalak mana kona neu. Tungga dala raak fo numa kota Yerusalem mai tora losa nusa Gasa naa.”
ACT 8:27 Felipus namanene nala parenda naa, boe ma ana laꞌo tutik ka. Neu ana bei laꞌok numa dalak naa, boe ma ana mete-nita hatahori esa. Hatahori naa, hatahori moꞌo-inahuuk esa numa nusa Etiopia mai. Ana ndia koladu ina manek Kandake hata-heton lalaꞌen. Ana bei fo hule-haradoi basa numa Yerusalem, de hatematak ia ana fali neu ngga saꞌe kareta. Neu Felipus mete-nitan, ana nanggatuuk lees numa kareta naa lain. Ana lees Manetualain mana toꞌu dedeꞌan baꞌi Yesaya susuran.
ACT 8:29 Boe ma Manetualain Dula-dalen nadenu Felipus laꞌok deka-deka neni kareta naa neu, fo natonggo no hatahori naa.
ACT 8:30 Neu ana sangga deka ena, boe ma namanene hatahori naa lees numa baꞌi Yesaya susuran mai. De ana natanen nae, “Papa! Papa nalela hata fo papa lees naa, do taa?”
ACT 8:31 Boe ma hatahori naa naselu nae, “Taa. Muste hambu hatahori esa fo nafada sosoa-ndandaan neu au dei, dei fo au bisa alela. Hene lain mai fo manggatuuk mua au nai ia.”
ACT 8:32 Susurak fo ana lees naa, liin talo ia: “Ara leꞌa reni Ndia, sama leo hatahori leꞌa reni bibi lombo, fo rae halan. Ana oo dadi sama leo bibi lombo ana boe, fo hatahori nggute bulun, tehuu Ana ta nakuu-nakau faa boe na. Ana ta buka bafan, ma ana ta naselu dedeꞌa deꞌek esa boe na.
ACT 8:33 Basa boe ma ara rakadadaek kana. Ara raketu Ndia dedeꞌan ta tungga tetun. Lelek naa, ara tao risan, naa te Ana ta naena salak hata esa boe na. Huu naa de ita ta bisa kokolak hata faa boe na laꞌe-neu Ndia tititi-nonosin.”
ACT 8:34 Hatahori moꞌo-inahuuk naa lees basa talo naa, boe ma ana natane Felipus nae, “Talo bee? Baꞌi Yesaya ia kokolak laꞌe-ndaa ndia aon do, ana kokolak laꞌe-ndaa hatahori laen?”
ACT 8:35 Boe ma Felipus nanori fee amak ia, Lamatuak Yesus Tutui Malolen. Ana mulai numa Yesaya susuran bebeik kara naa, fo natudun dalak tungga Yesus.
ACT 8:36 Neu ara bei laꞌok numa dalak, amak naa mete-nita oe numa lee dale. Boe ma ana nggero Felipus kokolan, de fee hahambun nae, “Papa! Soba mete dei, hambu oe ndia naa. Mete ma papa nau, na, mai ita konda fo papa sarani au nai ia leo.”
ACT 8:37 [Basa boe ma Felipus naselu nae, “Mete ma memak papa mamahere tebe-tebe neu Lamatuak Yesus, na neu, ta hambu kai-baak. Mai ita konda fo au sarani papa.” Boe ma ana manaku nae, “Au amahere tebe-tebe ae, Yesus naa, Hatahori fo Manetualain henggenee memak kana numa lele uluk mai ena. Ndia naa, Manetualain Anan.”]
ACT 8:38 Basa boe ma amak naa nadenu fee ndia karetan nambariik. De ara konda fo maso reni oe naa dale reu. Boe ma Felipus saranin numa naa.
ACT 8:39 Dua sara bei fo kalua numa oe mai, boe ma Manetualain Dula-dale Malalaon soꞌu noo Felipus neni mamanak laen neu. Hatahori moꞌo-inahuuk naa ta mete-nita sana ena. De amak naa laꞌok nakandoo, ma dalen namahoko nalan seli.
ACT 8:40 Tehuu Felipus toda numa nggorok esa, nade Asotus. Numa nggorok naa mai, ana laꞌok nakandoo fo tui-bengga neu hatahorir laꞌe-neu Lamatuak Yesus Tutui Malolen. Ana laꞌok tuli-tuli ndule basa nggorok kara, losa kota Kesarea.
ACT 9:1 Faik naa, Saulus ndindia ma tao doidosok taa-taa neu hatahorir mana tungga Yesus. Ana oo sangga dalak fo nae tao nisa sara. Huu naa de ana neni anggama Yahudir malangga ina-huun neu,
ACT 9:2 fo noke susura koasar fo ana neni fee malangga uma huhule-haradoik kara marai kota Damsik naa. Ana noke fo mete ma ana natonggo no hatahorir mana tungga Yesus Eno-dala Masodan, leo mae touk do inak, na, ana humu ma futu-paꞌa nala sara fo leꞌa noo falik kasa reni Yerusalem reu.
ACT 9:3 Ana no nonoon nara simbo rala susura koasar raa, boe ma ara reni Damsik reu. Neu ana deka no kota naa ena, nggengger neu ma manggaledok esa nanggahadok numa lalai mai nasaꞌa tetar neu Saulus.
ACT 9:4 De lenggu henin tutik ka neu daer. Boe ma ana namanene harak esa kokolak noon nae, “Saulus! Tao hata de o tao doidosok neu Au talo ia?”
ACT 9:5 Saulus natane nae, “Papa fo mana kokolak ia, see?” Harak naa naselu nae, “Au ia, Yesus, fo o soa tuni-ndeni malan seli.
ACT 9:6 Hatematak ia mambadeik fo maso muni kota dale muu leo. Nai naa dei fo Au afada o ae, o muste tao hata.”
ACT 9:7 Ndia nonoon nara ramanene harak naa liin, tehuu ara ta mete-rita hatahori esa boe na. Boe ma mopo duduꞌan nara losa ara ta bisa kokolak hata-hata.
ACT 9:8 Basa boe ma Saulus nambadeik. Ana soba nalaak matan, tehuu ana ta bisa mete-nita hata esa boe na ena. Boe ma ara toꞌu rala liman, de leꞌa roon maso neni kota Damsik neu.
ACT 9:9 Faik telu dalen, ana ta bisa mete-nita hata-hata. Ma ana ta naꞌa-ninu hata esa boe na.
ACT 9:10 Hambu Lamatuak Yesus hatahorin esa numa naa, nade Ananias. Lamatuak mai natudu matan neun nok bali nai meꞌi-afe dale, de nanggou neun nae, “Ananias!” Ananias nataa nae, “Ia, Lamatuak!”
ACT 9:11 Lamatuak nafada nae, “Mai dei. O muu sangga Au hatahoring esa. Laꞌo muni dalak esa muu, nade Dala Ndoos, nai hatahori esa uman. Hatahori naa, nade Yudas. Nai naa, o sangga hatahori kota Tarsus esa, nade Saulus. Hatematak ia hatahori naa bei hule-haradoi.
ACT 9:12 Au oo feen ninitak boe nae, neu ko hambu touk esa neni ndia mai. Ndia o, Ananias. De o muu fo ndae limam neun, mita fo ana mete-nita nasafali.”
ACT 9:13 Tehuu Ananias naselu nasafalin nae, “Talo ia, Lamatuak! Ai mamanene hatahori tui numa kii-konak mai laꞌe-neu hatahori naa ena, nahuu ana tao doidoso nalan seli neu Lamatuak hatahorin nara nai Yerusalem. Losa ara ta bisa-bisa ena!
ACT 9:14 Hatematak ia ai mamanene seluk bali rae, malangga anggamar feen koasa fo mai humu nabasa hatahorir fo mana maso tungga Lamatuak Yesus Eno-dala Masodan.”
ACT 9:15 Tehuu Lamatuak kokolak bali neu Ananias nae, “Leo mae talo naa oo, hatematak ia o kada muu boe! Huu Au here alan ena fo neu sosoi dalak, mita fo ana neni Au Hara Lii Maloleng fee neu hatahori nusa-nusak laen nara, manek kara ma fee hatahori Israꞌel asa boe.
ACT 9:16 Ma neu ko Au atudun, mita fo ana bubuluk doidosok matak bee ndia nahanin, nahuu ana tungga Au.”
ACT 9:17 Ananias namanene Lamatuak kokolak talo naa, boe ma ana laꞌo neni uma naa neu, de ana maso dale neu. Boe ma ana ndae liman neu Saulus, de nae, “Kaꞌa Saulus. Lamatuak Yesus fo kaꞌa mete-mitan numa dalak, neu kaꞌa ia mai naa, Ana ndia nadenu au mai fo atonggo ua kaꞌa. Ana nadenu au hule-haradoi ma ndae limang neu kaꞌa, mita fo kaꞌa bisa mete-mita bali. Ma Ana nau fo kaꞌa simbok Ndia Dula-dale Malalaon.”
ACT 9:18 Neu ana kokolak basa, boe ma Saulus nameda hata esa leo bali iꞌak unen, lofa henin numa matan mai, de ana mete-nita nasafali. Boe ma ana nambadeik, de ara saranin.
ACT 9:19a Basa boe ma ana naꞌa-ninu. De ao-inan barakai nasafali.
ACT 9:19b Saulus bei leo faik hida dalen bali no Lamatuak Yesus hatahorin nara numa kota Damsik.
ACT 9:20 Ma ana neu maso nakandoo neni hatahori Yahudir uma huhule-haradoin neu, de ana nafada sara nae, “Ei nenene matalolole! Memak Yesus, tebe-tebe Manetualain Anan.”
ACT 9:21 Basa hatahorir heran ma pangganaa ramanene Saulus kokolak talo naa. Boe ma ara rakokola aok rae, “Ndia ia ndia nakalulutu Yesus hatahorin nara ruma Yerusalem, hetu? Basa de ana ia mai, fo nae humu neni sara, reni malangga anggama Yahudi malanggan nara reu! Talo bee ia ena?”
ACT 9:22 Tehuu Saulus soa natudu bukti nae, Yesus naa, ndia Karistus fo Manetualain helu-bartaa numa lele uluk mai ena, fo Ana nae nadenun mai. Saulus fee nenorik no neulaun seli talo naa, losa hatahori Yahudir ta rasenggi sana. No dalak naa, Saulus leleꞌa-nonoren tamba faik, tamba namoꞌo.
ACT 9:23 Ta dook ka boe ma hatahori Yahudir rala harak fo rae tao risa Saulus.
ACT 9:24 Tehuu Saulus hae nala sira duduꞌa manggaraun naa. Hatahorir tepan hatu-leledon numa kota lelesun nara, fo rae tao risan.
ACT 9:25 Tehuu leꞌodaek esa boe ma Saulus nonoon hida haꞌi ralan, de ara rakondan neu loꞌak esa dale tungga kota tembon. No dalak naa, ana bisa nalai laꞌo ela kota Damsik.
ACT 9:26 Basa boe ma Saulus neni Yerusalem neu. Losa naa, ana nae neu nakabua no Lamatuak Yesus hatahorin nara. Tehuu basa sara ramataꞌun, nahuu ara duꞌa rae, ana kada kekedik tao aon leo hatahori kamaherek fo mana tungga Lamatuak Yesus. Tehuu dei fo ana humu nasafali sara.
ACT 9:27 Boe ma hambu hatahori esa, nade Barnabas. Ana ndia nalelelak Saulus neu Lamatuak Yesus nedenun nara ruma naa. Ana tui sara laꞌe-neu hata fo mandadik neu Saulus numa dalak naa ena. Ana oo nafada nae, Saulus natonggo no Yesus ena. Ma Lamatuak oo kokolak matan noon ena boe. Ana oo tui sara, Saulus naa nemberanin nafada hatahorir maruma Damsik laꞌe-neu Lamatuak Yesus Eno-dala Masodan.
ACT 9:28 Basa sara ramanene rala naa, boe ma ara simbok Saulus. De ana leo sama-sama no sara numa kota Yerusalem. Ana oo nambarani tui-bengga Lamatuak Yesus Tutui Malolen neu see a mesan, te ana ta namataꞌu, na.
ACT 9:29 Ana oo nakaseseluk dedeꞌak no hatahori Yahudi hida fo mana kokolak pake dedeꞌa Yunani. Tehuu ara ta nau simbok ndia kokolan, huu naa de ara sangga dalak fo rae tao risan.
ACT 9:30 Tehuu neu Lamatuak Yesus hatahorin nara ramanene rala rae, hatahorir sangga duduꞌa-aꞌafi manggarauk talo naa ena, boe ma ara roo Saulus neni kota Kesarea nai tasi tatain neu. Basa de ara radenu falik kana neni kota Tarsus neu.
ACT 9:31 Boe ma Yesus hatahorin nara maruma profensi Yudea, profensi Galilea ma profensi Samaria, leo-laꞌo ro mole-damek. Ara tamba ramanoꞌu. Ara tungga Lamatuak hihii-nanaun. Boe ma Manetualain Dula-dale Malalaon tao natea dalen nara.
ACT 9:32 Faik naa, Petrus soa laꞌo ndule sudi bee a neu fo tiro-dangga Lamatuak hatahorin nara. Faik esa ana neu tiro-dangga sira mana leo nai nggoro Lida.
ACT 9:33 Numa naa, ana natonggo no touk esa, nade Eneas. Hatahori naa ein kekok, de ana ta bisa nambadeik numa mamana susunggun mai, teuk falu dalen ena.
ACT 9:34 Petrus kokolak neun nae, “Eneas! Hatematak ia, Yesus Karistus tao nahai o. De mambadeik leo! Mafafaꞌu o mamana susunggum!” Hatahori naa namanene talo naa, boe ma ana nambadeik tutik ka.
ACT 9:35 Basa hatahorir maruma nggoro Lida ma nggoro Saron mete-rita Eneas hai talo naa ena, boe ma basa sara ramahere neu Lamatuak Yesus.
ACT 9:36 Faik naa, hambu inak esa nade Tabita, fo leo numa tasi tataik nai kota Yope. (Inak naa naden tungga dedeꞌa Yunani nae, ‘Dorkas’, fo sosoa-ndandaan nae, ‘rusa’). Ana namahere Lamatuak Yesus. Ma ana soa tao hata fo neulauk kara neu hatahorir, ma ana soa tulu-fali neu hatahori kasian nara.
ACT 9:37 Faik naa ina Tabita tuda hedis, de maten. Boe ma radiun oe, ma ara mboti-mbalu ao-mbaa mamaten, de ralololin neu ndia kaman manai tadak lain.
ACT 9:38 Neu faik naa ara ramanene rae, Petrus nai kota Lida ena, kota esa fo nai rarain laꞌo eik doon fai seserik esa numa kota Yope mai. Boe ma ara radenu hatahori dua reu tungga Petrus rae, “Papa! Ai hule fo papa mai lai-lai nai Yope dei.”
ACT 9:39 Petrus namanene nala naa, boe ma ana nambadeik fo ana tungga memak no sara. Losa naa, boe ma ana maso nakandoo neni ina Tabita kaman dale neu. Kama naa sofek ena no ina falur fo mana mai buꞌi rakarereu nai naa. Ara ratudu Petrus sira badun ma bua-loꞌa laen nara fo Dorkas soo-seu fee sara ndia bei masodan.
ACT 9:40 Petrus nadenu basa sara kalua numa kama naa mai. Boe ma ana sendek luu-langgan fo hule-haradoi. Basa boe ma ana nasare mbali mamates naa neu, de ana kokolak nae, “Tabita! Mambadeik leo!” Nggengger neu ma inak naa nalaak matan. Neu ana mete-nita Petrus, boe ma ana nambadeik de nanggatuuk.
ACT 9:41 Petrus toꞌu nala liman fo tulun nambaririik kana. Boe ma Petrus nanggou ina falur ma hatahori laen nara fo fee falik inak mana nasoda falik numa mamaten mai naa neu sara.
ACT 9:42 Mandadik naa tutuin natanggela sudi bee neu ndule kota Yope katematuan, losa hatahori noꞌuk ka ramahere neu Lamatuak Yesus.
ACT 9:43 Petrus leo numa naa faik hida dalen bali numa hatahori esa uman. Hatahori naa nade Simon. Ndia ue-osan, soa tao nalao banda rouk.
ACT 10:1 Faik naa, hambu soldadu Roma esa nade Kornelis. Ana dadi komedan neu soldadu natun esa. Ara ruma dook ka mai, ruma Italia mai. Ana leo nai kota Kesarea.
ACT 10:2 Dalen hii nalan seli neu Manetualain, ma ndia uma isin nara oo leo naak boe. Tehuu hatahori Roma laen nara ta leo naak. Ana tulu-fali hatahori hata taak noꞌuk ka, ma ana soa hule-haradoi neu Manetualain.
ACT 10:3 Faik esa, nai rarain liꞌu telu ledo bobon, nok bali nala meꞌi ia, ana mete-nita no manggaledo ndoos Manetualain atan esa numa nusa tetuk do inggu temak mai de nanggoun nae, “Kornelis!”
ACT 10:4 Neu Kornelis mete-nita ata manuma nusa tetuk do inggu temak mai naa, boe ma ana namataꞌu nalan seli. De ana natane nae, “Hata ia, Papa?” Ata naa naselu nae, “Lamatuak namanene o huhule-haradoim mara ena, ma Ana nasaneda o dale malolem neu basa hatahorir. De Lamatuak loti-mete o.
ACT 10:5 Dadi hatematak ia fee hatahorir reni kota Yope reu, fo reu tungga roo hatahori esa nai naa mai, nade Simon Petrus.
ACT 10:6 Ana leo taak nai uma esa nai tasi tatain, no hatahori esa soa tao nalao banda rouk. Naden oo Simon boe.”
ACT 10:7 Neu ata numa nusa tetuk do inggu temak mai naa laꞌo ela Kornelis, boe ma ana nanggou ndia hatahori mana maue-osan dua, ma soldadun esa fo dalen oo hii nalan seli neu Lamatuak boe.
ACT 10:8 Kornelis tui basa dedeꞌak kara raa, boe ma nadenu sara reni kota Yope reu.
ACT 10:9 Neu beꞌe-mai, nai rarain ledo namatetu, Kornelis nedenun nara sangga deka Yope ena. Oras naa, Petrus hene neni Simon uman tadak lain neu fo hule-haradoi.
ACT 10:10 Ana bei hule-haradoi, tehuu ana oo nameda ndoe boe. Ana nahani hatahorir raole mei. Neu ana bei hule-haradoi talo naa, boe ma Manetualain fee ninitak neun nok bali ana nala meꞌi.
ACT 10:11 Ana mete-nita leo bali lalai natahuka, boe ma tema loak esa toda, doko-doko neu buꞌun haa sara. Boe ma temak naa mulai konda mai.
ACT 10:12 Nai temak naa dale, ana mete-nita banda mata-matak kara, ndia banda ei haak, banda mana manodo-manamak ma mbuik mata-matak kara.
ACT 10:13 Boe ma ana namanene harak esa nadenun nae, “Peꞌu! Mambadeik leo! Tunu-hala heni bandar ia fo muꞌa leo!”
ACT 10:14 Tehuu Petrus naselu nae, “Ta bisa, Papa! Boso talo naa! Au bei ta uꞌa ita banda leo naak kara! Ai hatahori Yahudir maluli basa bandar raa!”
ACT 10:15 Tehuu harak naa naselu nasafali nae, “Mete ma Manetualain kokolak ena nae, hata esa malalaok, na, o boso mae hata naa manggenggeok bali!”
ACT 10:16 Temak naa toda talo naa losa laꞌe telu, boe ma ana neni soꞌuk fali lalai neu.
ACT 10:17 Basa de Petrus bei duduꞌa neu mai, fo sangga bubuluk meꞌis naa sosoa-ndandaan hata. Ndaa no oras naa, Kornelis ana nunin nara losa Simon uman. Ara rambariik numa uma lelesu bafan ena.
ACT 10:18 Boe ma ara ranggou rae, “Ai sangga fuik esa fo ana leo taak nai uma ia. Naden Simon Petrus. Fama te papa malelan, do?”
ACT 10:19 Faik naa, Petrus bei duꞌa-duꞌa sangga bubuluk meꞌis naa sosoa-ndandaan, tehuu Manetualain Dula-dale Malalaon nafadan nae, “Peꞌu, ee! Hambu hatahorir rai dae, ara mai sangga o.
ACT 10:20 O konda fo tungga mua sara leo. O dalem boso babati. Leo mae hatahorir raa ta hatahori Yahudi, tehuu o boso nunute sara ma tao sara leo hatahori manggenggeok, tungga hatahori Yahudi dala-hadan. Au ia ndia adenu sara mai rala o.”
ACT 10:21 Boe ma Petrus konda fo neu natonggo no sara, de nae, “Au ia ndia ei sanggak. Ei parluu au hata?”
ACT 10:22 Boe ma ara raselu rae, “Hambu soldadu Romar komedan esa ndia nadenu ai ia mai. Ndia naa, komedan neu soldadu natun esa. Ndia dalen ndoos, ma hii nalan seli neu Manetualain. Hatahori Yahudi noꞌuk ka bubuluk hatahori ia dale malolen ena. Bei fo ndia afik ka Manetualain atan numa nusa tetuk do inggu temak mai, nadenu ai malanggan fo noke papa neni ndia uman mai, fo ana nau namanene papa kokolan.”
ACT 10:23 Petrus namanene nala naa, boe ma ana noke sara fo ara sunggu taak leꞌodaen naa nai naa. Neu beꞌe-mai boe ma ara rambadeik, de Petrus laꞌo no sara. Hambu hatahori hida ruma Lamatuak hatahorin marai Yope, reu ranonoo ro sara.
ACT 10:24 Leꞌodaen naa ara sunggu numa dalak, de beꞌe-mai dei de ara losa kota Kesarea. Ara losa Kornelis uman, te ana nahani memak kasa ena. Ana nakabubua nala ndia nufanelun ma tia-lai eik esan nara ruma naa ena.
ACT 10:25 Neu Petrus nae maso uma naa dale neu, Kornelis nalaik mata neu, de sendek luu-langgan neu Petrus ein fo nakaluku-nakatele neun.
ACT 10:26 Tehuu Petrus nambadedeik kana, boe ma nae, “Kaꞌa! Mambariik leo. Boso makaluku-makatele neu au. Au ia, hatahori dae-bafok biasa sama leo kaꞌa boe.”
ACT 10:27 Kornelis namanene nala naa, de ana nambariik. Boe ma dua sara mulai kola-kola fo maso uma dale reu. Basa boe ma Petrus mete-nita hatahori noꞌuk ka rakabua fo ara rahanin numa naa ena.
ACT 10:28 Ana mete ndule basa sara, de ana kokolak nae, “Toranoo nggara ein. Ei bubuluk memak ai hatahori Yahudi dala-hadan ena. Tungga ai dala-hadan, na, ai ta bole makabua-maesa mia hatahori laen nara. Hata-bali maso meni uman nara dale miu. Tehuu Manetualain natudu au ena nae, mete ma Ndia mesa kana kokolak ena nae, hata esa malalaok, na, au boso ae naa manggenggeok. Dadi hatematak ia au ta bole nunute neu hatahori laen bali. Tehuu au muste tao sara leo au nufanelu heli-heling.
ACT 10:29 Huu naa de, neu ei mai tungga au, au laꞌo tutik kana. Au ta aeok, nahuu Lamatuak nafada leo naak neu au ena. Tehuu soba ei mafada dei! Ei parluu au hata nai ia?”
ACT 10:30 Boe ma Kornelis tui basa-basan nae, “Faik haa maneuk kara, neu ledo sangga bobok ena, au hule-haradoi numa au umang ia. Nggengger neu ma, hambu touk esa nambariik numa au matang. Bualoꞌa-papaken naa nanggadilak.
ACT 10:31 Boe ma ana nanggou au nae, ‘Kornelis! Lamatuak namanene o huhule-haradoim ena. Ma Ana nasaneda o dale malolem neu basa hatahorir.
ACT 10:32 De hatematak ia, madenu hatahorir reni Yope reu, fo tungga reni hatahori esa nai naa, nade Simon Petrus mai. Ana leo taak nai uma esa nai tasi tataik, nai hatahori mana tao nalao banda rouk. Naden oo Simon boe.’
ACT 10:33 Huu naa de au adenu memak hatahorir fo reti tungga papa. Ai moke makasi malan seli, nahuu papa mai tutik ka. Dadi hatematak ia ai makabua nai ia, fo nau nenene basa hata fo Manetualain nadenu papa nafada neu ai!”
ACT 10:34 Boe ma Petrus kokolak nae, “Hatematak ia, dei de au bubuluk ae, Manetualain naa, tebe-tebe mete basa hatahorir leo esak kara. Ana ta memete matak nae ia hatahori Yahudi, ma laen hatahori ta Yahudi.
ACT 10:35 Mete ma hambu hatahori numa nusak do leo bee a mesan mai fo dalen ndoos, ma ana soa hule-haradoi neu Manetualain, boe ma tungga kada Manetualain hihii-nanaun, na, hatahori naa tao namahoko Manetualain dalen.
ACT 10:36 Ei bubuluk hata fo Manetualain nafada neu ai hatahori Israꞌel ena nae, Ndia nadenu Karistus naa ena, ndia Yesus. Basa de Yesus naa, mate fo tao mole-dame hatahori dae-bafok no Lamatuak. Ana oo ndia naena haak parenda neu basa hatahorir boe.
ACT 10:37 Ei oo mamanene ena hata fo ana dadi nai profensi Yudea katematuan ena boe. Tutuik naa mulai numa Yohanis nafada hatahorir nae, ara muste hahae numa sira sala-singgon nara mai. Ma ara muste hambu saranik fo dadi neu tanda nae, sira malole ro Manetualain ena.
ACT 10:38 Basa boe ma Manetualain fee Ndia Dula-dale Malalaon neu Yesus, hatahori Nasaret naa. Manetualain oo fee Ndia koasan neu Yesus boe. De Yesus maso-kalua nggorok kara fo tao tatao malole fee hatahorir. Ma Ana tulun hatahori fo nitur malangga ina-huun nakasususak kana. Ana tao talo naa, nahuu Manetualain sama-sama no Ndia nakandoo.
ACT 10:39 Air ia, ndia mete-mita no ai mata deꞌe heli-helin, hata fo Ana taok numa kota Yerusalem ma hatahori Yahudir nggoro-tadun katematuan. Leo mae talo naa oo, tehuu hatahori bei paku londan neu ai ngganggek losa maten boe.
ACT 10:40 Ana mate tebe-tebe, tehuu neu bei-nesan boe ma Manetualain tao nasoda falik kana numa mamaten mai. De Ana natudu aon, fo hatahorir bubuluk rae, tebe-tebe Ana nasoda fali numa mamaten mai ena.
ACT 10:41 Tehuu ta basa hatahorir mete-ritan, te kada ai mesa ngga. Neu Ana nasoda fali numa mamaten mai naa, ai soa miꞌa-minu sama-sama mian. Manetualain oo here nala ai dadi sakasii boe fo miu tui-bengga Yesus Tutui Malolen neu hatahori noꞌuk kara sudi rai bee.
ACT 10:42 Dadi Manetualain ndia nadenu ai fo miu mafada no manggaledon laꞌe-neu Hatahori fo Ana henggenee memak kana numa lele uluk mai naa, ndia Yesus. Ma Manetualain oo soꞌuk nala Yesus dadi neu Mana Maketu-maladi Dedeꞌak boe, fo mana naena haak nae, see ndia neu ko bisa nasoda nakandoo no Manetualain, ma see ndia taa. Yesus naa, ndia naketu-naladi dedeꞌak soa-neu hatahori fo mana matek ena ma hatahori fo bei masodak kara.
ACT 10:43 Numa lele uluk mai, Manetualain mana toꞌu dedeꞌan nara basa sara oo kokolak laꞌe-neu Yesus ia boe rae, basa hatahorir fo mana ramahere neun, neu ko Manetualain simbok kasa, ma Manetualain neu ko koka heni sira sala-singgon nara.”
ACT 10:44 Neu Petrus bei kola-kola talo naa, te medak neu ma Manetualain Dula-dale Malalaon konda neni basa hatahorir fo mana nenene Petrus naa neu.
ACT 10:45 Numa naa oo, hambu Petrus nonoon hatahori Yahudir, fo ara sama-sama roon numa kota Yope mai naa boe reni Kornelis uman nai kota Kesarea reu. Neu ara mete-rita hatahori noꞌuk kara raa simbok Manetualain Dula-dalen, boe ma ara heran bali-bali, nahuu ara bei fo mete-rita Manetualain fee Ndia Dula-dalen neu hatahori ta Yahudi.
ACT 10:46 Ara ramanene hatahorir marai Kornelis uman naa kokolak pake dedeꞌak mata-matak kara, ma ara koa-kio Manetualain. Boe ma Petrus kokolak nae,
ACT 10:47 “Ei mesa ngga mete leo! Hatahori iar oo simbo rala Manetualain Dula-dalen ena, sama leo ita boe. Dadi hatematak ia, mai fo ita sarani sara leo. Ta hambu esa boe na bisa kaꞌi bali.”
ACT 10:48 Boe ma Petrus nadenu fo ara sarani Kornelis no hatahorir fo maruma naa, fo ara maso dadi reu Lamatuak Yesus hatahorin. Basa boe ma ara roke fo Petrus leo no sara faik hida bali, dei fo ara feen fali neni Yerusalem neu.
ACT 11:1 Petrus bei ta fali, tehuu Yesus nedenun nara ma hatahori kamaherek laen nara marai Yerusalem ramanene rala ena rae, hatahori ta Yahudi simbok rala Lamatuak Tutui Malolen ena.
ACT 11:2 Dadi neu Petrus fali losa Yerusalem, hambu hatahori kamaherek hida ruma partei Yahudi mai fee salak neun
ACT 11:3 rae, “Heeh! O tao talo bee naa ena? O bubuluk ita dala-hadan, do taa? O mambarani maso muni hatahori ta Yahudi uman muu! Muꞌa-minu mua sara bali! Ta bole tao talo naa, te sira raa, bei ta tungga rita ita dala-hada sunat! Ita ta tandaa takabua to sara!”
ACT 11:4 Boe ma Petrus tui basa hata fo ana dadi ena nae,
ACT 11:5 “Faik esa, neu au bei numa kota Yope, ndaa no au uu hule-haradoi, boe ma Lamatuak fee au ninitak sama leo meꞌis. Au mete-ita leo bali lalai natahuka, boe ma tema loak esa toda mai, neni londak neu buꞌun haa sara. Boe ma temak naa mulai konda neni au mai.
ACT 11:6 Neu au titino neni temak naa dale neu, boe ma au mete-ita banda mata-matak kara, ndia banda ei haak, banda mana manodo-manamak ma mbuik mata-matak kara. Basa bandar raa, ita hatahori Yahudir banda nelulin nara.
ACT 11:7 Boe ma au amanene harak esa nadenu nae, ‘Peꞌu! Mambadeik leo! Tunu-hala bandar ia fo muꞌa leo!’
ACT 11:8 Tehuu au aselu ae, ‘Ta bisa, Papa! Boso talo naa! Au bei ta uꞌa ita banda leo naak kara! Basa bandar raa, ita hatahori Yahudir taluli sara!’
ACT 11:9 Tehuu harak naa naselu nasafali nae, ‘Mete ma Manetualain kokolak ena nae, hata esa malalaok, na, o boso mae ndia manggenggeok bali!’
ACT 11:10 Au mete-ita temak naa toda talo naa losa laꞌe telu, boe ma ana neni soꞌuk fali lalai neu.
ACT 11:11 Ndaa no faik naa, hambu hatahori telu losa uma naa. Ara ruma Kesarea mai fo sangga au.
ACT 11:12 Boe ma Manetualain Dula-dale Malalaon nafada au nae, ‘O konda fo muu laꞌo tungga hatahorir ia leo. O dalem boso babati. Leo mae sira raa, ta hatahori Yahudi, tehuu o boso nunute sara, fo tao sara leo manggenggeok.’ Neu au amanene basa talo naa, ita toranoon hatahori nee ia, ara oo laꞌok tungga sama-sama ro au meni Kesarea miu boe. Numa naa, ai basa ngga maso meni komedan soldadu Roma esa uman dale miu.
ACT 11:13 Komedan naa tui nae, fai hida maneuk kara ndia mete-nita Manetualain atan numa nusa tetuk do inggu temak mai nambariik numa ndia uman, de nae, ‘Madenu hatahorir reni Yope reu fo roke hatahori esa, nade Simon Petrus.
ACT 11:14 Dei fo hatahori naa natudu o, ma mua basa o uma isim mara, Lamatuak eno-dalan talo bee fo tao nasoi-nasoda ei, ma koka heni ei sala-singgom mara.’
ACT 11:15 Huu naa de au mulai atudu Lamatuak Eno-dala Masodan neu sara. Medak neu ma, Manetualain Dula-dale Malalaon konda neu basa hatahorir raa, sama leo ita oo simbo talan ndia fai maneuk kara raa ena boe.
ACT 11:16 Au mete-ita ara oo simbo Manetualain Dula-dalen talo naa boe, ma au asaneda Lamatuak Yesus kokolan fai bakahulun nae, ‘Yohanis sarani ei pake kada oe, tehuu neu ko Manetualain nae tao ta hohoꞌan lenak neu ei, ndia Ana fee Ndia Dula-dale Malalaon neu ei.’
ACT 11:17 Manetualain mesa kana ndia fee Ndia Dula-dalen neu hatahori laen nara raa, tetar leo Ana fee neu ita boe. Dadi ei hihiim nau au laban Manetualain, do talo bee? De au ae kokolak hata bali?”
ACT 11:18 Ara ramanene Petrus nasalaꞌe aon talo naa, boe ma ara ta fee salak neun ena bali. De basa sara koa-kio Manetualain rae, “Awii! Sudi selik kana! Manetualain soi dalak ena fo hatahori laen nara oo bisa laꞌo ela sira leleo-lalaꞌo kasalan nara boe, fo Manetualain koka heni sala-singgon nara, de ara oo hambu masodak rakandoo ro Ndia boe.”
ACT 11:19 Fai maneuk kara neu ara rakanisa basa Stefanus, boe ma ara mulai tao doidosok ma rakasususak Yesus hatahorin nara. Huu naa de ara ralai sasarak sudi bee reu. Ketuk ralai reni profensi Fenisia reu. Ketuk oo reni pulu Siprus reu boe, ma ketuk bali ralai dook ka losa kota Antiokia nai profensi Siria reu. Hatahori mana malaik kara iar oo tui-bengga Lamatuak Yesus Tutui Malolen nai bee a mesan boe. Tehuu ara rafada reu kada sira hatahori Yahudin nara. Ara ta rafada neu hatahori laen nara.
ACT 11:20 Tehuu hambu Lamatuak hatahorin nara oo ruma pulu Siprus ma kota Kerene mai boe. Ketuk laꞌo rakandoo reni kota Antiokia nai profensi Siria reu. Sira iar ndia tui-bengga Lamatuak Yesus Tutui Malolen neu hatahori ta Yahudir marai naa.
ACT 11:21 Lamatuak fee Ndia koasan neu sara, losa hatahori noꞌun seli ramahere Lamatuak Yesus.
ACT 11:22 Faik naa, Lamatuak Yesus hatahorin nara maruma Yerusalem ramanene rae, hatahori laen nara rai Antiokia oo ramahere neu Yesus ena boe. Basa boe ma ara radenu hatahori esa, nade Barnabas, fo neu tiro sara rai naa. Barnabas ia, hatahori dalen malole, ma namahere tebe-tebe neu Manetualain. Manetualain Dula-dalen oo nakalalaꞌok kana boe. Neu ana losa naa, ana mete-nita nae, memak tebe Manetualain naue-osa nai hatahori laen leleo-lalaꞌon nara taladan ena. Boe ma dalen namahoko. De ana fufuꞌa dalen nara, mita fo ara tungga rakandoo Lamatuak Eno-dala Masodan no tebe-tebe. No dalak naa, Lamatuak hatahorin nara tamba faik, tamba ramanoꞌu.
ACT 11:25 Basa boe ma Barnabas neni kota Tarsus neu fo nae neu sangga Saulus.
ACT 11:26 Neu ana natonggo noon, ana kokoe Saulus, fo ara sama-sama fali reni Antiokia reu. De dua sara leo ruma Antiokia sama-sama ro Lamatuak hatahorin nara, losa teuk esa. Tungga faik, dua sara fee nenorik laꞌe-neu Lamatuak Yesus Eno-dalan Masodan neu hatahori noꞌuk kara. (Numa kota Antiokia naa, dei de hatahori mulai roke Lamatuak Yesus hatahorin nara rae, ‘hatahori Karisten’.)
ACT 11:27 Neu dua sara bei ruma Antiokia, hatahori hida ruma Yerusalem mai. Lamatuak nasiꞌe pake hatahorir raa fo dadi reu Ndia mana toꞌu dedeꞌan.
ACT 11:28 Numa mana toꞌu dedeꞌak kara raa mai, hambu hatahori esa, nade Agabus. Manetualain Dula-dalen nafadan nae, “Neu ko hambu fai ndoe-laꞌas tahohoꞌak nai basa dae-bafok katematuan, losa buꞌun nara.” Boe ma ana neu nafada seluk hatahorir. (Ndia kokolan naa, ana mori-dadi tebe neu lelek Roma mane ina-huun keser, nade Kladius toꞌu parenda).
ACT 11:29 Lamatuak Yesus hatahorin nara maruma Antiokia ramanene Agabus kokolan talo naa, boe ma ara rala harak fo ara tutuꞌu doik fee sira toranoon nai Yesus dale marai profensi Yudea fo mana leo-laꞌo nai susa ma toꞌa taak dale. Esa-esak fee tungga sira nebeꞌin.
ACT 11:30 Ara tutuꞌu basa, boe ma ara here Barnabas no Saulus, fo dua sara reni doik kara raa, fo fee sara reu malangga saranik kara marai naa. De malangga saranik kara raa baꞌe fee neu hatahori mana susa ma toꞌa taak kara.
ACT 12:1 Faik naa oo manek Herodes mulai tao nala Lamatuak Yesus hatahorin ketuk doidoso ralan seli boe.
ACT 12:2 Ana fee parenda neu hatahorir fo reu tati risa Yakobis pake tafa. Yakobis naa, Yohanis kaꞌa toun.
ACT 12:3 Neu Herodes mete-nita nae, Yakobis mamaten neni nemehokok soa-neu hatahori Yahudi malanggan nara, boe ma ana boe tao lena-lenak bali. Ndaa no fai ina-huuk fo seseik kana rae, feta Roti Ta Pake Laru Taꞌik, boe ma ana nadenu hatahorir reu humu rala Petrus bali.
ACT 12:4 Humu ralan, boe ma ara teen neni bui dale neu. De ara fee soldadu bubuak haa fo ranea ko nggatik neu Petrus hatu-leledon. Soldadu bubuak esa, hambu hatahori haa. Herodes nau fo naketu Petrus dedeꞌan nai hatahori noꞌuk kara matan, mete ma feta naa basan ena.
ACT 12:5 Dadi neu ara bei oka Petrus numa bui dale, Lamatuak Yesus hatahorin nara hule-haradoi ta ramaketu, roke fo Lamatuak loti-mete Petrus.
ACT 12:6 Neu beꞌe-main, manek Herodes nau naketu Petrus dedeꞌan nai rea matan. Leꞌodaen naa ara paꞌa Petrus pake rante besi dua neu soldadu dua liman nara beke serik numa bui dale. Boe ma ana sunggu nai soldadu kaduak kara taladan. Hambu soldadu laen nara fo ranea rai uma lelesu bafan.
ACT 12:7 Medak neu ma, Manetualain atan numa nusa tetuk do inggu temak mai nambariik numa naa, de kama naa nasaꞌa manggaledo ndoos. Boe ma ata naa fafae nabeꞌe Petrus nae, “Peꞌu, ee! Mambadeik lai-lai!” Hatematak naa, rante besi naa mboꞌi henin numa Petrus liman mai.
ACT 12:8 Boe ma ata naa nadenun nae, “Olu o badum neu! Ma olu o tabu eim neu!” Petrus papake basa, boe ma ata naa nadenu seluk kana bali nae, “Olu o badu deam neu, fo mai tungga au leo!”
ACT 12:9 Petrus tungga ata naa, de ara kalua numa bui dale mai. Tehuu Petrus nae hetu ko ndia kada nala meꞌi naa. Naa te memak dadi tebe leo naak.
ACT 12:10 Neu ara laꞌo seli mamana neneak kaesan ma kaduan, boe ma ara losa lelesu besik. Lelesu naa soi aon, boe ma dua sara kalua, de ara tungga dala mana neni kota neu. Medak neu ma, Manetualain atan naa, laꞌo ela Petrus mesa kana numa naa.
ACT 12:11 Ata naa mopon, boe ma Petrus nameda nasafali de nae, “Memak tebe, ee! Hatematek ia au bei fo bubuluk. Lamatuak naa, tebe-tebe Ana nadenu atan mai ena fo nakamboꞌik au numa Herodes liman mai. Lamatuak tao talo naa, fo hatahori Yahudir duduꞌa-aꞌafi kaboo mburun nara ta laꞌe au.”
ACT 12:12 Basa boe ma Petrus neni mama Maria uman neu. Ndia naa, Yohanis inan. Yohanis naa naden laen, ndia Markus. Numa naa, hatahori noꞌuk ka rakabua hule-haradoi, roke fo Lamatuak tulu-fali Petrus numa dedeꞌan mai.
ACT 12:13 Losa uma naa, boe ma Petrus dedelu mbaꞌa lelesun, ma nanggou numa lelesu naa mai, boe ma ina mana malalau uma-loo esa, nade Rode, neu titino see ndia mana maik naa.
ACT 12:14 Ana namanene Petrus haran, boe ma nalelan neuk ka. Ana namahoko nalan seli, de nalaik uma dale neu, boe ma nafada hatahorir nae, “Petrus nambariik nai dea naa!” Tehuu ana panggananaa, de ana lilii soi lelesu fee Petrus.
ACT 12:15 Boe ma ara raselu rae, “Ta dadi leo naak! Boso makoa-kandiaok talo naa!” Tehuu inak naa naherek enan nae, “Taa! Naa tebe-tebe Petrus haran! Ana nai dea naa!” Te ara ta mbali sana, de rae, “Fama te, naa kada ata numa nusa tetuk do inggu temak mai nanea Petrus.”
ACT 12:16 Ara bei ratola-helak, tehuu Petrus nanggou nakandoo, losa ara reu soi lelesu. Ara soi heni lelesu, boe ma ara panggananaa, nahuu Petrus ndian ena.
ACT 12:17 Petrus batak liman mita fo ara nenee. Basa boe ma ana tui sara talo bee de losa Manetualain kalua heni ndia, numa bui dale mai ena. De nadenu sara nae, “Ei miu tui basa mandadik kara iar, neu Yakobis no nedenuk laen nara, ee.” Basa boe ma Petrus kalua neni mamanak laen neu.
ACT 12:18 Beꞌe-mai huhua anan, neu soldadu mana manear mete neu te Petrus ta sana ena, boe ma ara pangganaa, ma ramataꞌu ralan seli, nahuu ara ta bubuluk hata dadi neu sira bali.
ACT 12:19 Neu Herodes bubuluk mandadik naa, boe ma ana parenda sara reu sangga Petrus. Tehuu ara ta ratonggo sana. Boe ma Herodes fee parenda fo parisa soldadur mana maneak kara raa. Ara parisa basa, boe ma ana fee hala risa basa soldadu mana manear raa. Basa boe ma Herodes laꞌo ela Yudea, de neu leo numa Kesarea.
ACT 12:20 Lelek naa, hatahorir ruma kota dua, nade Tirus ma Sidon mai, ara rasiꞌe hasa nanaꞌak numa manek Herodes nusan mai. Tehuu numa dook ka mai, manek naa namusuk no sara ena. Boe ma ara rala harak fo sangga dalak reu mole-dame roon. De ara here hatahori bubuak esa fo reu ratonggo ro Herodes. Ara losa Kesarea, ara ratia-lai ro Herodes hatahori uma dalen esa, nade Blastus. Hatahori naa malangga mana koladu esa nai manek uma manen. Ara rala harak ro Blastus fo ana dadi neu sira mana kokoen fo nasosoi dalak fee sara, mita fo bisa ratonggo ro Herodes.
ACT 12:21 Boe ma Herodes nakaheik simbok kasa, de ara henggenee faik esa fo ara ratonggo. Faik naa, ara tao tatao moꞌok. Herodes pake ndia bua-loꞌa manen, basa boe ma nanggatuuk neu kadera man-parendan. Boe ma ana mulai kokolak noo sara.
ACT 12:22 Hatahorir ramanene haran, boe ma ara mulai koa rakadedemak kana rae, “Nenene haran naa! Ia ta hatahori dae-bafok haran! Ia dewa haran!”
ACT 12:23 Medak neu ma, Manetualain atan esa numa nusa tetuk do inggu temak mai haitua fee Herodes hedis esa, nahuu ana simbo hatahori kokoa-kikion neu ndia, ma ana seti nakaheok heni Manetualain. Boe ma sikalatik kara raꞌa heni Herodes ao-mbaan losa ana mate ndua hadak.
ACT 12:24 No basa dedeꞌak fo mandadik kara raa, boe tao tamba natanggenggela Manetualain Hara Lii Malolen, ma hatahori fo mana tungga Lamatuak Yesus Eno-dala Masodan oo tamba ramanoꞌu boe.
ACT 12:25 Neu Barnabas no Saulus reni tutulu-fafalik numa hatahori Antiokiar mai feen neni Yerusalem neu naa basa ena, boe ma ara fali reni Antiokia reu. Ara roo hatahori taꞌe anak esa sama-sama no sara. Ndia naden Yohanis. Ara oo roken rae, Markus boe.
ACT 13:1 Numa kota Antiokia, hatahori noꞌuk ka ramahere neu Yesus ena. Hambu hatahori hida fo Manetualain pake sara dadi neu Ndia mana toꞌu dedeꞌan, ma hambu hida bali fo Ana pake sara fo ranori hatahorir. Sira raa, ndia: Barnabas, Simeon, fo hatahorir rasiꞌe roken rae ‘Tou Nggeok’, Lukius, numa kota Kerene mai, Menahem, fo ara rakaboin numa kadiꞌi anan mai sama-sama no manek Herodes, ma Saulus.
ACT 13:2 Faik esa, ara puasa ma rakabua fo rakaluku-rakatele neu Manetualain. Boe ma Manetualain Dula-dale Malalaon nafada sara nae, “Here mala Barnabas no Saulus. Te Au ue-osang noꞌuk ka. De ara muste tao ue-osa fo Au ae baꞌe fee sara.”
ACT 13:3 Neu ara puasa ma hule-haradoi basa, boe ma ara ndae liman nara reu Barnabas no Saulus fo tabis asa. Basa boe ma ara radenu dua sara reu rakalalaꞌok Lamatuak ue-osan.
ACT 13:4 Neu Manetualain Dula-dale Malalaon fee parenda neu Barnabas no Saulus fo dua sara laꞌo ndule basa mamanak kara, makasososan ara reni kota esa nai tasi tatain reu, nade Seleukia. Yohanis (hatahori naa ndia ara roken oo rae, Markus boe), ana oo tungga sama-sama no sara boe. Ara losa naa, ara saꞌe ofak fo reni pulu Siprus reu, de ara konda numa kota esa, nade Salamis. Numa naa, ara rasiꞌe maso reni hatahori Yahudir uma huhule-haradoin reu fo ara fee nenorik laꞌe-neu Manetualain Dedeꞌa-kokolan neu hatahorir.
ACT 13:6 Boe ma ara laꞌo tuli-tuli numa nggorok esa mai neni nggorok esa neu, de ara losa kota esa nai pulu naa suꞌun seri, nade Pafos. Nggubenor leo nai kota naa. Ndia naden Sergius Paulus. Ndia naa, hatahori malelak. Neu ana namanene nae, Barnabas asa mai nai ndia kotan naa ena, boe ma ana nadenu hatahorir fo reu roke sara, te dalen hii nalan seli nau nenene nenori-nefadak numa Lamatuak mai ena. Tehuu numa naa oo, hambu hatahori Yahudi esa boe, nade Bar Yesus (naden laen tungga dedeꞌa Yunani rae, ‘Elimas’). Hatahori ia, mana teka-dokik. Ana nasiꞌe pepeko-leleko hatahorir nae, ndia oo Manetualain mana toꞌu dedeꞌan boe. Ana natia-laik malole no nggubenor naa. Neu Barnabas asa mai, boe ma ana dudunggu nggubenor fo boso simbok kasa. Ana soba-soba nakabubusak nggubenor naa fo hae namahere neu Yesus.
ACT 13:9 Tehuu Manetualain Dula-dale Malalaon fee koasa neu Saulus (fo ara oo roken rae, Paulus boe), boe ma nakabubula matak fo mete nakateteek mana teka-dokik naa. Boe ma nae,
ACT 13:10 “Heeh! Elimas! Nitu anan o! Mana pepeko-lelekok! Losa faik hida bali fo o bei nau kedi-ira hatahori? O laban basa hata fo neulauk. No dalak naa, ai bubuluk o tungga nitur malangga ina-huun. O boso bei tao talo naa bali! O boso soba-soba kena Lamatuak dala ndoon bali!
ACT 13:11 Heeh! O nenene, ee! Neu ko Lamatuak huku-doki o. O matam neu ko poke fo o ta bisa mete-mita hata esa boe na losa faik hida dalen.” Paulus kokolak basa talo naa, boe ma hatahori naa matan poke tutik ka leo. De ana laꞌok nafaroroe, fo sangga hatahorir toꞌu ndia liman, mita fo rakalalaꞌok kana.
ACT 13:12 Neu nggubenor mete-nita no mata heli-helin talo naa, ma ana namanene Barnabas asa fee nenorik laꞌe-neu Yesus, ana heran bali-bali, basa boe ma ana namahere neu Yesus.
ACT 13:13 Paulus asa saꞌe ofak numa kota Pafos nai pulu Siprus mai, reni kota esa nai profensi Pamfilia, nade Perga reu. Ara konda ofak numa naa, boe ma Yohanis Markus laꞌo ela sara de ana fali neni Yerusalem neu.
ACT 13:14 Ara laꞌok tungga mada lai ruma Perga mai reni kota Antiokia nai profensi Pisidia reu. De ara laꞌok losa kota naa. Neu hatahori Yahudir fai hahae tao ue-osan, boe ma ara tungga reu hule-haradoi numa hatahori Yahudir uma huhule-haradoin.
ACT 13:15 Faik naa, ara lees numa baꞌi Musa susuran, ma numa Manetualain mana toꞌu dedeꞌan laen nara susuran mai. Boe ma uma huhule-haradoik naa malanggan nara roke Paulus asa rae, “Ama nggara ein. Mete ma ei mae helu hata neu ai, na, ai hule no hada-horomatak fo kokolak tao matea basa ai manai iar dalen.”
ACT 13:16 Boe ma Paulus nambariik neu mata. Ana botik liman fo noke sara nenee. De ana mulai kokolak nae, “Toranoo Israꞌel nggara ein. Ma basa ina-ama lalaꞌen fo mana maso anggama Yahudi, nahuu ei dalem mara oo hii ralan seli neu hatahori Israꞌel asa Manetualain boe. Au oke ei pasa ndiꞌi doom mara fo nenene au!
ACT 13:17 Manetualain here nala ita hatahori Israꞌel bei-baꞌin nara numa lele uluk mai ena. Neu ara reu leo numa dae Masir, fo ta sira nusa heli-helin, Manetualain fee sara leo no mole-damek, losa tititi-nonosin nara tamba ramanoꞌu. Basa boe ma Manetualain pake Ndia koasa moꞌon fo Ana noo sara kalua numa Masir mai.
ACT 13:18 Basa naa, ara leo lali-lali numa mamana nees, losa teuk haa hulu dalen. Leo mae ara langga batu rakandoo, tehuu Manetualain nakalalaꞌok kasa no kada dale narun fo ta namanasa sara.
ACT 13:19 Basa boe ma Manetualain nakalulutu hatahori nusak hitu nai dae Kanaꞌan. De Ana babaꞌe daen nara neu ita bei-baꞌin nara fo dadi neu sira dae pusakan.
ACT 13:20 Ara leo-laꞌo talo naa losa teuk natun haa lima hulu (450). Basa boe ma Manetualain soꞌuk fee sara mana maketu-maladi dedeꞌak kara, fo rakalalaꞌok kasa, losa Manetualain soꞌuk nala Ndia mana toꞌu dedeꞌan esa, nade Semuel.
ACT 13:21 Neu Semuel dadi neu Manetualain mana toꞌu dedeꞌan, ita bei-baꞌin nara hihiik ka hambu manek esa dei. De Manetualain soꞌuk nala Kis anan, nade Saul, numa leo Benyamin mai. Saul toꞌu parenda losa teuk haa hulu.
ACT 13:22 Basa boe ma Manetualain hai henin. De Manetualain soꞌuk nala Isai anan, nade Dauk dadi neu mane beuk nggatin. Manetualain bubuluk Dauk dalen nae, ‘Isai anan, Dauk ia, ndaa Au daleng. Neu ko ana tao natetu basa Au hihii-nanaung lalaꞌen.’
ACT 13:23 Lelek naa, Manetualain helu-bartaa nae nadenu Dauk tititi-nonosin esa, fo tao nasoi-nasoda hatahori Israꞌel asa numa sala-singgon nara mai. Au nau afada basa toranook kara ae, Dauk tititi-nonosin fo Manetualain helu-bartaak naa, ndia Yesus.”
ACT 13:24 Paulus tuti kokolan nae, “Neu Lamatuak Yesus bei ta mulai ue-osan, hambu hatahori esa, nade Yohanis, neu nafada hatahori Israꞌel asa nae, ara muste hahae numa sala-singgon nara mai, fo fali tungga Lamatuak. Basa naa, ara muste sarani fo dadi neu tanda nae, sira malole ro Lamatuak ena.
ACT 13:25 Tehuu neu Yohanis ue-osan sangga basan ena, ana nafada hatahorir nae, ‘Ei boso duꞌa mae, au ia, Hatahori fo Manetualain helu-bartaa numa lele uluk mai ena fo nae nadenun mai. Masaneda matalolole! Ei muste mahani Hatahori esa fo neu ko nae mai. Ndia ta neni babanggak lena heni au, losa au dadi uu kada ana neondan oo au ta andaa boe.’
ACT 13:26 Toranoo nggara ein! Ei fo memak baꞌi Abraham tititi-nonosin, ma ei laen nara fo dalem mara hii malan seli neu Manetualain. Nenene neu au dei! Manetualain nafada dedeꞌak ia neu ita ena, fo ita bisa bubuluk tala Ndia eno-dala masodan. Ana tao nasoi-nasoda ita numa ita sala-singgon nara mai.
ACT 13:27 Numa lele uluk mai, Manetualain pake Ndia mana toꞌu dedeꞌan nara fo ara surak rafada hatahorir laꞌe-neu Hatahori fo Manetualain helu-bartaa nae nadenun mai naa. Boe ma ita malangga anggaman nara, ma hatahori laen nara marai Yerusalem, ara lees laꞌi-laꞌik ka ena hata fo mana toꞌu dedeꞌak kara surak ena. Tungga fai hahae tao ue-osa, ara maso reni uma huhule-haradoik dale reu, fo ara lees laꞌe-neu Hatahori naa nai Manetualain Susura Malalaon dale. Tehuu ara ta ralela rae, Hatahori fo Manetualain helu-bartaa nae nadenun mai naa ena, ndia Yesus. Basa boe ma ara sangga dalak fo hukun mates neun. Naa te dalak ia oo ndaa no hata fo Manetualain mana toꞌu dedeꞌan nara surak ena boe.
ACT 13:28 Ara sangga-sangga dedeꞌak ro Yesus fo rae ike ratudan, tehuu ara ta hambu Ndia salan hata faa boe na. Leo mae talo naa, tehuu ara reu roke nggubenor Pilatus fo tao risan.
ACT 13:29 Nggubenor naa nakaheik, boe ma ara paku londa Yesus neu ai ngganggek lain, losa Ana mate. Tehuu basa iar oo ndaa no hata fo Manetualain mana toꞌu dedeꞌan nara surak ena boe. Basa boe ma ara rakonda ao-mbaa mamaten numa ai ngganggek lain mai, de ara koꞌo renin reu taon neu rates dale.
ACT 13:30 Tehuu Manetualain pake Ndia koasan, fo nasoda falik Yesus numa mamaten mai.
ACT 13:31 Neu Yesus nasoda fali numa mamaten mai ena, Ana natudu aon laꞌe noꞌuk ka neu hatahorir. Sira raa, ndia mana sama-sama ro Yesus ruma profensi Galilea mai fo reni Yerusalem reu. Ma sira raa ndia hatematak ia dadi reu sakasii fee hatahori Israꞌel asa.”
ACT 13:32 Paulus tuti kokolan nae, “Talo ia! Ai dua ngga, ndia au ua Barnabas ia, numa dae dook ka mai ena fo mafada ei, mita fo ei bubuluk mae, hata fo Lamatuak helu-bartaa neu ita bei-baꞌin nara ena, hatematak ia basa sara mori-dadi ena. Manetualain tao nasoda falik Yesus numa mamaten mai ena. Nai susura Sosoda Kokoa-kikiok kara nomer kaduan, Manetualain pake hatahori ena fo surak laꞌe-neu Yesus, Hatahori fo Ana helu-bartaa nae nadenun mai naa nae, ‘O ia, Au Anang. Faik ia, Au soꞌuk ala O fo toꞌu parenda.’
ACT 13:34 Numa lele uluk mai Manetualain helu-bartaa ena nae, neu ko Ana nae tao nasoda falik Hatahori fo Ana helu-bartaa nae nadenun mai naa ena, de Hatahori naa ta mate bali. Huu naa de Manetualain pake mana toꞌu dedeꞌan ena fo surak nae, ‘Numa lele uluk mai Au ndara fangga hehelu-bartaak ena ua mane Dauk fo ae feen babaꞌe-babatik. Dadi hatematak ia Au oo nau ndara fangga hehelu-bartaak naa bali ua o boe, nahuu o dadi muu mane Dauk tititi-nonosin.’
ACT 13:35 Hambu Sosoda Kokoa-kikiok kara laen rae, ‘Lamatuak ta ela O Hatahori Malalaon ao-mbaa mamaten, fo dadi noe nakalulutu nai Ndia raten dale.’
ACT 13:36 Ndondoon talo ia: Sosoda Kokoa-kikiok kara iar ta dudu neu kada Dauk mesa kana! Ita bubuluk talo naa, nahuu mane Dauk tao hata fo neulauk noꞌuk ka ena soa-neu ndia hatahori nusan, basa boe ma ana mate. De ratoin, boe ma ao-mbaa mamaten noe heni basan ena. Dadi ita bubuluk tae, Sosoda Kokoa-kikiok kara raa ta dudu neu Dauk, tehuu dudu neu Hatahori laen. Hatahori fo Ana dudu nalak naa, neu ko mete ma Hatahori naa maten ena, na, Manetualain tao nasoda falik kana numa mamaten mai. Huu naa de ao-mbaa mamaten ta noe nakalulutu faa boe na.
ACT 13:38 Dadi toranoo nggara ein, nenene matalolole! Hatahori naa, ndia Yesus! De mete ma ita tamahere neun, dei fo Ana nau lemba-nasaa sala-singgok kara, fo mete ma tungga ndoon, na, ita mesa ngga ndia muste lemba-tasaa. No dalak naa, Manetualain koka heni ita sala-singgon nara. Tehuu ita bubuluk ena tae, leo mae ita tao tungga basa baꞌi Musa hada hohoro-lalanen lalaꞌen oo, naa mesa kana bei ta bisa tao ita ndaa nai Manetualain matan.
ACT 13:40 Huu naa de ei muste duꞌa matalolole. Boso losak, hata fo Manetualain mana toꞌu dedeꞌan lele uluk kara rafada ena, tuda laꞌe ei. Ara surak ena rae, ‘Besa-besa ei hatahori mana makatitiik kara fo soa mete hatahori no kada pui a! Huu Au, Manetualain, tao sudi hata fo hatahorir heran bali-bali; tehuu neu ko ei simbo mala ei babaꞌem, fo ei mate ndua hadak. Au tao dalak esa neu ei bei masodak, tehuu ei ta nau simbok. Leo mae hatahorir rafada ena oo, ei ta nau malela boe. Malole lenak ei duꞌa matalolole dedeꞌak kara iar, mita fo ei oo heran boe.’ Dadi toranoo nggara ein. Duꞌa matalolole hata fo au afada bebeik kara ena. Boso nggari heni hata fo ei mamanene malan bebeik kara ia ena, sama leo hatahori mana makatitiik kara tatao-nonoꞌin. Au kokolang baꞌu kada naa. Makasi noꞌuk ka.”
ACT 13:42 Paulus no Barnabas kokolak basa, boe ma ara rambariik fo rae laꞌo ela uma huhule-haradoik naa. Tehuu hatahorir maruma naa roke fo ara fali mai seluk nai menggu mana maik, fo ara kokolak no lutun lenak bali, hata fo ara kokolak bebeik kara raa ena.
ACT 13:43 Neu ara kalua numa uma huhule-haradoik naa dale mai, hambu hatahori noꞌuk ka ruma naa mai, reu laꞌo tungga Paulus no Barnabas. Basa boe ma dua sara fee nenori-nefadak neu sara rae, “Ita bubuluk tae, Manetualain dalen malolen seli neu ita. Huu naa de ei oo muste toꞌu mahere tebe-tebe neu Ndia boe.”
ACT 13:44 Neu menggu mana maik, ndaa no hatahori Yahudir fai hahae tao ue-osan, ela kada baꞌuk ka fo basa hatahorir marai kota naa mai fo rae nenene Lamatuak Dedeꞌa-kokolan.
ACT 13:45 Tehuu neu hatahori Yahudi malanggan nara mete-rita hatahori noꞌuk ka nau mai fo nenene Paulus asa, boe ma dalen nara mana kikitok kara. Neu Paulus bei kola-kola, ara rasimbo bafak no huu-suꞌun taa roon, ma ara kokolak rakatutudak Paulus asa.
ACT 13:46 Tehuu Paulus asa ta rakadedeak, ma ara kokolak ta no bii-bambik bali. Ara rae, “Memak Manetualain soi dalak nakahuluk fee ita hatahori Yahudir, ma Ana fee Hara Lii Malolen neu ita ena. De naa memak nandaa! Tehuu ei ta nau simbok. Dadi no ei here talo naa, ei matudu mae, ei ta mandaa hambu masodak seku neu mia Manetualain. Dadi hatematak ia, ai mae meni Hara Lii Malole naa neni hatahori nusa-nusak laen nara reu, nahuu ei timba henin ena.
ACT 13:47 Huu Manetualain nadenu ai, sama leo Yesaya surak ena nae, ‘Au soꞌuk ala ei ena, fo dadi sama leo lantera fo neni manggaledok fee hatahori nusa-nusak laen nara, fo hatahori ta Yahudir, naa fo ei tao manggaledo dalak fo mana neni Au mai naa, ma naa fo Au akamboꞌik kasa numa sira sala-singgon nara mai. Ei oo muste matudu dalak naa nai dae-bafok ia numa suꞌun seri mai neni suꞌun seri neu boe.’ ”
ACT 13:48 Neu hatahori laen fo hatahori ta Yahudir ramanene talo naa, boe ma ara ramahoko ralan seli. De ara koa-kio neu Manetualain rae, “Koa-kio Lamatuak! Lamatuak Hara Lii Malolen naa neulaun seli!” Ma nai naa, hambu hatahorir fo Manetualain henggenee memak kasa numa lele uluk mai ena, fo bisa rasoda seku neu ro Ndia. Boe ma basa sara ramahere neu Lamatuak Yesus.
ACT 13:49 Manetualain Dedeꞌa-kokolan, ara tui-benggan numa bafak mai neni bafak neu, de natanggela ndule basa nusak naa.
ACT 13:50 Numa kota naa, hambu hatahori moꞌo-inahuuk kara, inak ma touk. Hambu ketuk fo dalen nara hii ralan seli neu Lamatuak. Tehuu hatahori Yahudi malanggan nara mai fo dudunggu hatahori moꞌo-inahuuk kara raa, losa ara husi kalua heni Paulus no Barnabas numa sira nusan mai.
ACT 13:51 Ara kalua numa kota naa mai, boe ma dua sara tao tungga hadak esa ndia nggafu heni afu numa ein nara mai, fo dadi tanda nae, hatahorir marai kota naa ta nau nenene neu dua sara. Basa boe ma ara laꞌo rasadea ela kota naa. De ara reni kota laen esa reu, nade Ikonium.
ACT 13:52 Tehuu hatahorir fo mana ramahere neu Lamatuak Yesus nai Antiokia ena, dalen nara ramahoko, nahuu Manetualain Dula-dale Malalaon tao natea dalen nara.
ACT 14:1 Paulus no Barnabas losa kota Ikonium, boe ma ara maso reni hatahori Yahudi uma huhule-haradoin reu. Numa naa, ara kokolak no loa-narun laꞌe-neu Manetualain Hara Lii Malolen, losa hatahori Yahudi noꞌuk ka ma hatahori nusa-nusak laen noꞌuk ka oo ramahere neu Lamatuak Yesus boe.
ACT 14:2 Tehuu numa naa, hambu hatahori Yahudi hida nemeheheren neu anggama Yahudi matea ndoos, de ara ta nau simbok Paulus asa kokolan. Boe ma ara dudunggu hatahori laen nara fo ara mburuk ralan seli neu hatahorir fo mana ramahere neu Yesus.
ACT 14:3 Tehuu Paulus asa ta ramataꞌu. Ara tui-bengga rakandoo Lamatuak Yesus Tutui Malolen neu see a mesan. Ara rafada rae, Lamatuak Yesus dalen neni soik soa-neu basa hatahorir. Ana oo fee koasa boe fo ara bisa tao tanda heran mata-matak kara, mita fo hatahori noꞌuk ka bubuluk rae, Lamatuak pake sara. Lelek naa, Paulus asa leo dook ka numa kota naa.
ACT 14:4 Boe ma hatahorir maruma kota naa rabaꞌe dadi reu bubuak dua. Bubuak esa tungga hatahori fo nemeheheren neu anggama Yahudi matea ndoos; ma esa bali na, ara tungga rahere rook Lamatuak nedenun nara. Hatahori bubuak kaduak kara raa rareresi rakandoo.
ACT 14:5 Boe ma hambu hatahori Yahudi hida fo nemeheheren neu anggama Yahudi matea ndoos rala harak ro hatahori laen nara ma sira malanggan nara boe, fo rakasususak Lamatuak nedenun nara. Ara oo rae toko Paulus asa renik batu boe.
ACT 14:6 Tehuu hambu hatahori nafada Paulus asa nae, hambu hatahori bubuak esa rae tao manggarauk neu sara. Boe ma ara ralai reu sangga sodak numa profensi Litonia, nai kota Listra, kota Derbe ma nggoro matia-taik kara marai naa.
ACT 14:7 Numa naa ara oo tui-bengga Lamatuak Yesus Tutui Malolen boe.
ACT 14:8 Paulus no Barnabas losa kota Listra, boe ma ratonggo ro touk esa. Ndia ein dua sara kekok mulai numa inan bonggi henin mai. De ana bei ta laꞌok nita.
ACT 14:9 Hatahori naa nanggatuuk fo nenene Paulus tutuin. Basa boe ma Paulus mete nakateteek kana, ma duꞌa nae, “Hatahori ia nemeheheren bisa tao nahai hedin!”
ACT 14:10 De Paulus nanggoun nae, “Kaꞌa! Mambariik leo!” Hatahori naa namanene nala naa, boe ma ana fotar nambadeik memak, de ana mulai laꞌo-laꞌo.
ACT 14:11 Neu hatahorir mete-rita Paulus tao talo naa, boe ma basa sara nado bafan nara bese mboo. De ara kokolak pake sira dedeꞌa Likonian rae, “Ei nenene dei! Hatahori dua iar, dewar ndia konda mai nai dae-inak pake hatahori dae-bafok ao-inan!”
ACT 14:12 Hatahorir raa kokolak talo naa, nahuu ara rae fama te Barnabas naa, sama leo sira dewan esa, nade Seus. Ma Paulus fo soa kokolak, ara rae fama te ndia naa, dewa Hermes.
ACT 14:13 Nai kota lelesun dea, hambu uma sosonggok esa soa-neu sira dewa Seus. Seus mana songgon mete-nita Paulus asa, boe ma neni bunggar ma leꞌa neni sapi mane moꞌok hida mai fo nae songgo-tanggu neu sara. Boe ma hatahori noꞌuk ka tungga mana songgo naa fo reu songgo-tanggu neu Lamatuak Yesus nedenun nara.
ACT 14:14 Tehuu neu ara bubuluk rae, hatahorir raa nau songgo-tanggu neu sara, boe ma Paulus no Barnabas ta rakaheik. De ara ralaik reni hatahori noꞌuk kara raa matan reu, boe ma ara sii sida sira mesa kasa badun nara, fo tao tanda rae sira ta rakaheik neu hata fo hatahorir raa sangga taok. Basa boe ma dua sara rakau rae,
ACT 14:15 “Awii! Tao hata de ei tao talo ia? Ei boso duꞌa mae air ia dewa. Air ia, hatahori dae-bafok biasa sama leo ei boe. Ai ia mai fo mafada ei tutui malole esa. Ei muste masadea laꞌo ela ei dewam mara fo ta raena sosoak hata-hata. Ei muste fali mai tungga Manetualain, fo mana masodak tebe-tebe. Ana ndia nakadadadik lalai no dae-inak ia, no basa oe-isin lalaꞌen.
ACT 14:16 Numa lele uluk mai, hatahori nusa-nusak kara leo-laꞌo tungga kada sira hihii-nanau heli-helin. Manetualain oo ela sara talo naa boe.
ACT 14:17 Tehuu Lamatuak ta lilii tao tanda mata-matak kara, mita fo basa hatahori nusa-nusak kara bubuluk rae, Lamatuak naa, malole. Ana ndia nakonda udan fee ita. Ana ndia fee ita osi-lutun nara rabuna-boa no neulauk. Ana ndia fee ita nanaꞌa-nininuk, ma tao namahoko ita dalen nara.”
ACT 14:18 Leo mae Paulus no Barnabas kaꞌi sara ena fo boso tao talo naa, tehuu hatahorir raa rasuu ralan seli fo nau reni sosonggok naa fee neu sara.
ACT 14:19 Faik naa, hambu hatahori Yahudi hida fo ruma kota Antiokia ma kota Ikonium mai reni kota Listra reu. Ara dudunggu hatahori noꞌuk kara raa fo tungga laban Lamatuak Yesus nedenun nara. Boe ma ara toko Paulus pake batu. Ara rae fama te maten ena, de leꞌa renin fo reu nggarin neni kota deak neu.
ACT 14:20 Tehuu Yesus hatahori kamaheren nara rambariik eko-feo Paulus, boe ma ana nambadeik. Basa boe ma ana maso fali neni kota dale neu. Neu beꞌe-main, boe ma ana no Barnabas laꞌok sama-sama reni kota laen reu, nade Derbe.
ACT 14:21 Numa Derbe, Paulus no Barnabas tui-bengga Lamatuak Yesus Tutui Malolen. De hatahori noꞌuk ka ramahere neu Yesus. Basa boe ma dua sara fali reni Listra reu. Numa naa mai, ara fali reni Ikonium reu. Numa Ikonium mai, ara laꞌo rakandoo reni Antiokia nai profensi Pisidia reu.
ACT 14:22 Numa naa, ara kokolak ro hatahori mana tungga Yesus fo ratetea dalen nara. Ara fee nesenedak rae, “Toranoo nggara ein! Mete ma ita maso dadi teu Manetualain hatahorin, na, boso duꞌa mae ita ta hambu susa-sonak bali. Leo mae talo bee oo, ita muste hambu susa-sonak boe. Tehuu ita muste takatataka, fo tungga takandoo neu Yesus.” Dua sara ranori talo naa neu Yesus hatahorin nara marai kota naa.
ACT 14:23 Basa boe ma Paulus no Barnabas mulai sangga hatahorir fo soꞌuk kasa dadi reu malangga nai saranik kara esa-esak. Ara hule-haradoi ma puasa fo sangga bubuluk Lamatuak hihii-nanaun. Basa boe ma ara ndae liman nara ma hule-haradoi, fo soꞌuk hatahori fo Lamatuak dudu nalak naa ena, fo dadi neu saranik kara malanggan.
ACT 14:24 Basa boe ma Paulus no Barnabas laꞌo ela profensi Pisidia fo laꞌo rakandoo reni profensi Pamfilia reu.
ACT 14:25 Ara losa kota esa, nade Perga. Ara tui-bengga Lamatuak Tutui Malolen numa naa. Basa boe ma ara laꞌo rakandoo, de ta dook ka bali, na, ara losa kota Atalia.
ACT 14:26 Numa naa, ara saꞌe ofak de fali reni kota Antiokia nai profensi Siria reu. Fai maneuk kara raa, Lamatuak Yesus hatahorin nara marai Antiokia naa ndia radenu ma loo lima sara reu Lamatuak fo Ana nanea natalolole sara. De hatematak ia Paulus asa rae fali fo tui saranik kara marai Antiokia rae, sira tao rabasa sira ue-osan ena.
ACT 14:27 Losa Antiokia, boe ma Paulus asa rakabubua rala Lamatuak hatahorin nara maruma naa. Boe ma ara tui no loa-narun basa hata fo Lamatuak tao neu sara ena. Rae, Lamatuak soi dalak ena fo hatahori ta Yahudir oo ramahere neu Yesus boe.
ACT 14:28 Basa boe ma Paulus no Barnabas leo dook ka ro Lamatuak Yesus hatahori kamaheren nara ruma naa.
ACT 15:1 Faik naa, hatahori Yahudi Karisten hida ruma dae dook ka nai profensi Yudea mai reni Antiokia reu. Losa naa, boe ma ranori Lamatuak Yesus hatahorin nara rae, “Ei mamahere neu Lamatuak Yesus ena. Naa oo malole boe. Tehuu naa bei ta dai. Mete ma ei nau tebe-tebe masoi-masoda, na, ei oo muste sunat boe, tungga ai dala-hadan, fo Lamatuak mesa kana feen nesik baꞌi Musa ena.”
ACT 15:2 Tehuu Paulus no Barnabas laban tingga-tingga neu hatahorir raa kokolan nara. Ara rareresi mate-mate. Boe ma Paulus asa rae, “Ei sala! Hatahori nusa-nusak laen ta Yahudi, fo mana ramahere neu Yesus, ta parluu tungga hatahori Yahudir dala-hadan sunat!” Huu ara rareresi talo naa, de ara rala harak fo radenu Paulus no Barnabas, ma nonoon laen hida ruma Antiokia mai, fo reni dedeꞌak sunat ia neni Lamatuak nedenun nara, ma lasi-lasi Karisten laen marai Yerusalem reu.
ACT 15:3 Huu naa de hatahori Karisten nara marai Antiokia radenu Paulus asa reni Yerusalem reu. Ara laꞌok tungga dala madak, resik profensi Fenisia ma profensi Samaria. Neu ara bei laꞌok numa dalak naa, ara tuli-tuli hatahori kamaherek kara uman. De ara tui no lutu-lelon rae, “Hatahori fo ta Yahudir oo fali mai fo ramahere neu Lamatuak ena boe!” Basa hatahorir ramanene rala naa, boe ma ramahoko.
ACT 15:4 Ara losa Yerusalem, basa Yesus hatahorin nara simbok kasa no malole. Lamatuak nadenun nara ma lasi-lasi Karisten nara oo simbok kasa boe. Basa boe ma Paulus asa tui basa hata fo Lamatuak tao neu sara ena, losa hatahori laen noꞌuk ka oo tungga Lamatuak Yesus ena boe. Ma ara oo tui sira nereresin laꞌe-neu sunat boe.
ACT 15:5 Hatahorir raa fo mana ramanene Paulus asa tutuin, hambu hatahori Karisten Yahudi hida numa partei Farisi mai. Ara rambariik, de kokolak rahere haran rae, “Nenene matalolole, ee! Mete ma hambu hatahori ta Yahudi see a mesan, fo nae tungga Yesus, na, ara muste tungga ita dala-hadan sunat, ma ita hadan hohoro-lalanen laen, fo Manetualain mesa kana nakonda nesik baꞌi Musa ena.”
ACT 15:6 Boe ma basa saranik kara rala harak fo Lamatuak nedenun nara, ma lasi-lasi Karisten nara rakabua fo timba-tai dedeꞌak naa.
ACT 15:7 De ara ratuka duduꞌak no loa-narun. Mateꞌen, boe ma Petrus nambariik de kokolak nae, “Toranoo nggara ein! Ei mesa ngga bubuluk mae, fai bakahulun Manetualain dudu nala au numa ei taladam mara mai ena, fo au uu tui-bengga Yesus Tutui Malolen neu hatahori ta Yahudir. Manetualain oo nau fo ara ramahere neu Yesus boe.
ACT 15:8 Manetualain nalela ita hatahori dae-bafok esa-esak dalen. Ma Ana ndia fee Ndia Dula-dale Malalaon neu sara, sama leo Ana fee neu ita ena. No dalak naa, ita bubuluk tae, Manetualain oo simbok kasa boe.
ACT 15:9 Manetualain ta memete matak sira ro ita. Ana ta bibingga sira numa ita mai. Ana tao nalalao dalen nara ena, nahuu ara oo ramahere neu Yesus ena boe, sama leo Ana oo tao nalalao ita dalen boe.
ACT 15:10 De, talo bee? Mete ma Lamatuak simbok kasa ena, na, tao hata de ita bei nau fua tamba bali, fo tao tamabera sara tenik dala-hadak sunat ia bali? Naa te, mete ma ita tae kokolak tungga ndoon, na, ita to ita bei-baꞌin nara, ta lemba tabeꞌi basa ita anggaman hohoro-lalanen! Dadi ita boso takasesetik kasa talo naa! Au ae atane talo ia: Lamatuak tao nasoi-nasoda ita, nahuu ita tungga anggama hohoro-lalanen, do? Taa, hetu! Ana tao nasoi-nasoda ita, nahuu Lamatuak Yesus sue-lai ma natudu dale susuen neu ita. De, boso lilii-ndondou! Manetualain oo sue-lai ma natudu dale susuen neu hatahori laen leo naak boe.”
ACT 15:12 Ara ramanene rala naa, boe ma ta hambu hatahori tamba seluk duduꞌak bali. Basa boe ma Paulus no Barnabas tui bali, tao hata de Lamatuak pake sira ena. Ara tui tanda heran nara, ma hata ta hohoꞌak, fo Manetualain taon numa hatahori ta Yahudir taladan nara ena.
ACT 15:13 Ara tui basa, boe ma hatahori esa, nade Yakobis, nambariik de kokolak nae, “Toranoo nggara ein! Ei nenene au dei!
ACT 15:14 Kaꞌa Peꞌu bei fo tui basa neu ita nae, Manetualain here nala hatahori ta Yahudir ena, fo fee sara maso dadi reu Lamatuak Yesus nufanelun nara.
ACT 15:15 Naa ndaa no Manetualain mana toꞌu dedeꞌan nara rafada memak kana numa lele uluk mai ena. Ara surak ena rae:
ACT 15:16 ‘Ndaa no fain, Au fali mai. Huu Au ae ambadedei falik mane Dauk parendan. Ndia tititi-nonosin mana nakalulutuk naa ena, Au ae ambededeik seluk kana, ma tao atean bali.
ACT 15:17 No tao talo naa, hatahori nusa-nusak laen nara oo mai sangga fo ratonggo ro Au boe. Au oo here ala sara ena, fo dadi neu Au hatahoring boe. Te Manetualain kokolak talo naa numa lele uluk mai ena na!’
ACT 15:19 De numa au, Yakobis mai, talo ia: mete ma numa hatahori nusa-nusak laen mai nae maso dadi Manetualain hatahorin, na, ita hatahori Yahudir boso tao takasususak kasa. Ita boso tao tamabera sara, ma boso tadenu sara fo tungga ita dala-hadan sunat. Dadi ita muste surak susurak esa, fo haitua fee sara tae, ara hae tungga basa ita hada Yahudi hohoro-lalanen lalaꞌen. Ita oo fee nesenedak neu sara tae, ara boso laꞌok sala ro hatahori fo ta sira sao toun do sira sao inan boe. Ara boso raꞌa mbaa sosonggok. Ara ta bole raꞌa banda daan. Ma ara ta bole raꞌa mbaa banda mana matek neni hese nisak fo daan ta kalua heni sana.
ACT 15:21 Mete ma ita fee hohoro-lalanek talo ia, na, ia ta mata beuk. Hatahori noꞌuk ka bubuluk ena, ita hatahori Yahudir dala-hadan memak talo naa ena. Huu hohoro-lalanek kara ruma baꞌi Musa mai naa, ita lees asa rai basa uma huhule-haradoik kara nai bee a mesan tungga-tungga fai hahae tao ue-osa. Dadi hatahori nusa-nusak laen noꞌuk ka bubuluk ena. Au kokolang baꞌu kada naa. Makasi!”
ACT 15:22 Basa boe ma Lamatuak nedenun ma lasi-lasik laen nara rala harak ro basa hatahori saranik marai Yerusalem fo rae redenu hatahori fo reu rafada sira nekeketun neu hatahori saranik nai bee a mesan. De ara sangga hatahori fo saranik kara fee hada-horomatak neun, fo mana nandaa no ues naa. Boe ma ara here rala hatahori dua. Esa nade Silas, ma esa bali nade Yudas (ara oo roken rae, Barsabas boe). Basa boe ma ara radenu dua sara reu sama-sama ro Paulus ma Barnabas.
ACT 15:23 Ara reni susurak fo fee hatahori nusa-nusak laen marai kota Antiokia, nai profensi Siria, losa dae dook manai profensi Kilikia. Susurak naa liin talo ia: “Hara haitua neulauk numa ai, Lamatuak Yesus nedenun nara ma lasi-lasi Karisten laen nara marai ia, nai kota Yerusalem mai. Ai surak susurak ia fee ei, fo ai sue sama leo ai toranoo heli-helin.
ACT 15:24 Ai surak susurak ia, nahuu ai mamanene mae, hambu hatahori hida ruma Yerusalem ia mai fo reu ratonggo ro ei numa naa ena. Ara fee nenorik sadi ndaa, losa rakasususak ma tao panggananaa ei. Sadi ei bubuluk leo, ai ta madenu mita hatahorir raa.
ACT 15:25 Neu ai mamanene ena mae, hambu hatahorir fo rakasususak ei talo naa, ai makabubua nai ia fo timba-tai dedeꞌak naa. Ai mala harak ena, ma maketu basa dedeꞌak naa ena. Dadi hatematak ia ai here mala hatahorir fo reti rafada ei, ai nekeketun. Ara reti sama-sama ro Barnabas ma Paulus, fo ai suek kara.
ACT 15:26 Ita hatahori kaduan nara ia, ara lemba-rasaa doidosok, losa ela baꞌuk ka mate sara. Ara hambu doidosok talo naa, nahuu ara tungga ita Lamatuan Yesus Karistus.
ACT 15:27 Dadi ai madenu Yudas no Silas, mita fo ara reti rafada ei susurak ia isin.
ACT 15:28 Manetualain Dula-dale Malalaon nafada ai ena, ma ai basa ngga makaheik talo naa mae, ei hae tungga basa ai dala-hada Yahudin nara, haꞌi netuduk leo dala-hada sunat. Dala-hadak kara raa tao ramabera hie-hie a mesan neu ei. Tehuu hambu dedeꞌak esa do dua, fo memak ei muste masanedak kasa:
ACT 15:29 Boso laꞌok sala mia hatahori fo ta o sao toum do ta o sao inam. Boso miꞌa mbaa sosonggok Boso miꞌa banda daan Ma boso miꞌa mbaa banda mates neni hese nisak, losa daan ta kalua heni sana. Mete ma ei manea mala ei aom numa basa dedeꞌak kara raa mai, na, ei ta tao nunute ei toranoo Karisten Yahudir. No dalak naa, ei bisa dadi bua-aok malole esa mia sara. Ai susuram ia, baꞌuk kada naa. Soda-molek.”
ACT 15:30 Ara simbo rala susurak naa, boe ma Paulus asa rateꞌa, de ara laꞌo reni kota Antiokia reu. Losa naa, ara rakabubua rala basa hatahori saranik kara, de ara fee susurak naa neu sara.
ACT 15:31 Neu ara lees basa susurak naa isin, boe ma basa sara ramahoko, nahuu susurak naa isin tao natea dalen nara ena.
ACT 15:32 Yudas no Silas oo dadi reu Lamatuak mana toꞌu dedeꞌan boe. Dua sara tui noꞌuk ka neu hatahori kamaherek kara maruma kota naa. Ara fee nenori-nefadak ma ratetea hatahorir raa dalen.
ACT 15:33 Neu dua sara leo doo-doo numa naa ena, boe ma hatahori saranik kara maruma Antiokia rakamboꞌik kasa fali reni hatahori mana madenu sara raa reu. Ara mboꞌi dua sara fali ro sodak.
ACT 15:34 [Tehuu Silas nau leo nakandoo nai kada Antiokia.]
ACT 15:35 Paulus no Barnabas leo doo-doo numa naa. Ara oo tulu-fali hatahori laen fo mana fee nenorik laꞌe-neu Lamatuak Yesus Eno-dala Masodan boe.
ACT 15:36 Neu Paulus no Barnabas leo doo-doo numa Antiokia, boe ma Paulus kokolak neu Barnabas nae, “Kaꞌa! Mai fo ita fali teni basa mamanak kara fo fai maneuk kara ita tuli tita sara naa teu. Ita teu tiro-dangga soba ita hatahori kamaheren nara masodan. Ara talo bee ena, ee? Te hatahori iar bei ta dook ka ramahere neu Lamatuak Yesus. Fai maneuk kara ita mulai tanori sara ena. Dadi mai fo ita teu tiro-dangga sara.”
ACT 15:37 Barnabas namanene Paulus noke talo naa, boe ma ana nakahuꞌu a. Barnabas nau fo Yohanis tungga no sara. (Ara oo roke Yohanis ia rae, Markus boe).
ACT 15:38 Tehuu Paulus ta nau. Huu fai maneuk kara Markus nalai laꞌo ela sara ruma profensi Pamfilia.
ACT 15:39 Paulus no Barnabas rasimbo bafak rala noꞌun seli talo naa, losa dua sara rabinggak. Boe ma Barnabas noke no Markus, fo dua sara saꞌe ofak losa pulu Siprus.
ACT 15:40 Tehuu Paulus noke no Silas. Neu ara rae laꞌo, hatahori kamaherek kara maruma Antiokia naa hule-haradoi neu Lamatuak fo nanea sara, ma Ana oo natudu dale susuen neu sara boe. Ara hule-haradoi basa, boe ma dua sara laꞌo.
ACT 15:41 Ara reu laꞌo ndule profensi Siria ma profensi Kilikia. Nai mamanak bee a mesan ara ratetea hatahori kamaherek kara dalen.
ACT 16:1 Basa boe ma Paulus asa laꞌo rakandoo fo rakahuluk reni kota Derbe reu. Numa naa mai, ara laꞌo rakandoo reni kota Listra reu. Numa kota naa, ara ratonggo ro hatahori taꞌe anak esa, nade Timotius. Aman hatahori Yunani. Tehuu inan hatahori Yahudi fo namahere neu Yesus ena. Timotius oo dadi neu Yesus hatahorin ena boe.
ACT 16:2 Basa hatahori kamaherek kara marai kota Listra ma kota Ikonium bubuluk rae, Timotius naa, hatahori neulauk.
ACT 16:3 Paulus nau fo Timotius tungga sara. Tehuu hambu hatahori Yahudir ruma naa, fo bubuluk rae, Timotius aman hatahori Yunani, de ana bei ta sunat tungga dala-hada Yahudi. Huu naa de Paulus ator fo ara sunat Timotius.
ACT 16:4 Basa boe ma ara laꞌo numa mamanak esa mai reni mamanak esa reu fo rafada nekeketuk naa, fo Lamatuak Yesus nedenun ma lasi-lasi Karisten nara raketu ralan numa Yerusalem ena.
ACT 16:5 No dalak naa, ara tao tamba ratea hatahori kamaherek kara dalen. Tungga faik hatahori beuk fo kamaherek kara tamba ramanoꞌu.
ACT 16:6 Basa boe ma Paulus asa laꞌo rakandoo reni profensi Frigia ma profensi Galatia reu, nahuu Manetualain Dula-dale Malalaon kaꞌi sara fo ara boso reu tui-bengga Lamatuak Tutui Malolen nai profensi Asia.
ACT 16:7 Neu ara losa nusak esa natoo no profensi Misia, boe ma ara rae soba maso reni profensi Bitinia reu. Tehuu Yesus Dula-dalen kaꞌi sara, fo boso naa reu.
ACT 16:8 Basa boe ma ara laꞌo resik profensi Misia, de ara konda losa kota Troas nai tasi tatain.
ACT 16:9 Leꞌodaen naa, Manetualain fee ninitak neu Paulus sama leo nai meꞌis dale. Ana mete-nita hatahori esa nambariik numa tasi serik, numa profensi esa, nade Makedonia. Hatahori naa bolu noke tutulu-fafalik nae, “Papa! Ia mai fo tulu-fali ai dei!”
ACT 16:10 Paulus mete-nita talo naa, boe ma ai maketu fo ai meni Makedonia miu. Ai duꞌa mae, memak naa Manetualain ndia nadenu fo ai miu mafada Ndia Eno-dala Masodan neu hatahorir marai tasi serik. Huu naa de Ana kaꞌi ai fo ta bole meni mamanak laen miu.
ACT 16:11 Basa boe ma numa kota Troas mai ai saꞌe ofak meni pulu kadiꞌik esa miu, nade Samotrake. Neu beꞌe-main, ai saꞌe ofak makandoo losa kota esa, nade Neapolis. Boe ma ai konda numa naa.
ACT 16:12 Numa naa mai, ai laꞌo tungga mada lai meni kota moꞌok esa miu, nade Felipi. (Felipi naa, kota kaneas nai profensi Makedonia; man-parenda Roma oo toꞌu koasa nai naa boe.) Ai leo faik hida numa naa.
ACT 16:13 Ndaa no hatahori Yahudi fai hahae tao ue-osan, ai miu sangga hatahori Yahudir mamana huhule-haradoin. Tungga ai nekendandaan, na, mamana huhule-haradoik naa nai lee tatain. Dadi ai laꞌo kalua mala faa numa kota mai, losa ai hambu lee esa. Numa naa, ai matonggo mia inak hida. De ai manggatuuk kola-kola mia sara.
ACT 16:14 Numa basa inak kara raa mai, hambu esa, nade Lidia. Ana numa kota esa dook ka nai profensi Asia mai, nade Tiatira. Inak ia naseꞌo tema mbila maranggeo mabelin seli neu hatahori moꞌo-inahuuk kara. Ana manggate hule-haradoi neu Manetualain. Dadi neu ana namanene Paulus kokolan, ana simbok memak kana.
ACT 16:15 Basa boe ma ai sarani memak mama Lidia no basa uma isin nara. Sarani basa, boe ma ana noke ai nae, “Ama nggara ein. Mete ma ei duꞌa mae, au ia amahere tebe-tebe neu Lamatuak Yesus ena, na, ei mai sunggu taak nai ai uman dei.” Ana kokoe nakandoo, de losa mateꞌen ai tungga.
ACT 16:16 Faik esa, neu ai bei laꞌo meni mamana huhule-haradoik miu, boe ma ai matonggo mia ana fetok esa numa dalak. Ndia naa, hatahori ata-daton. Ana pake nitu koasan, losa ana bisa nafada hatahori ua-nalen. Ana oo bisa bubuluk mandadik esa huu-suꞌun numa bee mai. De hatahori noꞌuk ka soa feen doik fo roke tulun tiro sira ua-nalen. Tehuu doik kara raa, ana fetok naa lamatuan nara ndia hambu basa sara, losa ara ramasuꞌi.
ACT 16:17 Faik naa, neu ai bei laꞌo numa dalak, ana fetok naa kada tungga nakandoo no ai. Boe ma ana eki nae, “Hatahori iar, Manetualain mana Demak Mateꞌen neondan nara. Ara mai fo nau ratudu dalak rae, tao talo bee fo hatahori bisa hambu masoi-masodak, ma rakamboꞌik numa sala-singgon nara mai!”
ACT 16:18 Ana fetok naa tao talo naa losa faik hida dalen. Leo-leo kada naa boe ma Paulus mbera namanene ana fetok naa eꞌekin. Boe ma ana hekor mbali ana fetok naa, de mete nakateteek kana, boe ma ana parenda nitu naa nae, “Heeh! O nitu manggarauk! No Lamatuak Yesus koasan, au parenda o, kalua numa ana fetok ia mai, hatematak ia boe!” Paulus kokolak basa talo naa, boe ma nitu naa kalua tutik ka.
ACT 16:19 Neu ana fetok naa lamatuan nara bubuluk rae, sira ata-daton mopo koasan ena, boe ma ramanasa, nahuu ara ta hambu doik bali. Boe ma ara toꞌu rala Paulus no Silas, de leꞌa ro sara reni pasar reu, nai mamanak fo ara rasiꞌe paken fo raole dedeꞌak.
ACT 16:20 Numa naa, ara eki rahere rae, “Hatahori iar mai fo rakalulutu ita kotan. Naa te sira ta hatahori ruma ia mai. Sira ia, hatahori Yahudir ruma dae dook mai fo soa kada tao mue-anggik nai ia!
ACT 16:21 Ara oo ranori hatahorir boe rae, ita boso tao matak neu man-parenda Roma hohoro-lalanen nara, fo tungga kada sira hohoro-lalanen.”
ACT 16:22 Hatahori noꞌuk ka ramanene rala naa, boe ma ara ramue-anggik, de ara reu popoko Paulus no Silas. Boe ma mana maketu-maladi dedeꞌak kara maruma naa radenu hatahorir reu sii heni dua sara bualoꞌa-papaken, basa boe ma ara filo sara.
ACT 16:23 Ara filo rakamiminak Paulus no Silas, basa boe ma ara tee sara reni bui dale reu. Ara radenu komedan mana manea numa naa, fo nanea natalolole hatahori kaduak kara raa. Boso losak ara ralai.
ACT 16:24 Komedan mana manea namanene nala naa, boe ma ana sese sara reni kama esa dale reu, nai bui naa taladan. Boe ma ana kabi ein nara pake langge ai.
ACT 16:25 Nai rarain neu leꞌodae fai baꞌe dua, boe ma Paulus no Silas hule-haradoi ma soda fo koa-kio neu Manetualain. Hatahori bui laen nara maruma naar ramanene sira sosodan naa.
ACT 16:26 Nggengger neu ma dae nanggenggo moꞌon seli, losa uma bui naa katematuan oo nanggenggo boe. Ma lelesun neni soik loak. Boe ma basa hatahori buir rante besin nara oo mboꞌi heni sara boe.
ACT 16:27 Faik naa, komedan mana manea bui oo nggengger de nambadeik, boe ma ana mete neu bui naa lelesun basa sara neni soik loak boe. Ana mete-nita naa, boe ma nae fama te basa hatahori buir ralai ena. De ana lesu nala felan, fo nae hala aon.
ACT 16:28 Tehuu Paulus eki nahere haran ma kaꞌin nae, “Papa, ee! Boso hala aom! Ai basa ngga bei ndia ia!”
ACT 16:29 Komedan mana manea bui namanene harak naa, boe ma ana namataꞌu nalan seli, ma namananauk kana. Basa boe ma ana nadenu fo ara reni feen aꞌi mbele, de ana nalaik maso neni bui naa dale neu, ma ao-inan dere bebe-bebe. Ana neu de sendek luu-langgan neu Paulus ma Silas ein nara.
ACT 16:30 Boe ma ana noo sara kalua numa bui dale mai, de natane nae, “Ama nggara ein. Au ia, susa alan seli. Au muste tao hata fo au bisa akamboꞌik numa susar ia mai?”
ACT 16:31 Paulus asa raselu rae, “Dalan talo ia: o mamahere neu Lamatuak Yesus, fo neu ko Ana tao nasoi-nasoda o. Leo naak oo basa o uma isim mara boe.”
ACT 16:32 Boe ma Paulus no Silas kokolak ro komedan bui naa, ma basa uma isin nara. Ara rafada Lamatuak Yesus Eno-dala Masodan neu sara.
ACT 16:33 Leꞌodae fai baꞌe dua lenak, boe ma komedan bui naa noke no Paulus ma Silas fo reu tao ralao dua sara hinan, huu ara hambu fifilok ndia afik ka naa. Basa boe ma Paulus asa sarani komedan naa no basa uma isin nara.
ACT 16:34 Basa de komedan naa noo sara reni ndia uman reu, fo fee sara raꞌa-rinu. Ana no basa nufanelun nara ramahoko ralan seli, nahuu ara ramahere neu Manetualain ena.
ACT 16:35 Neu bei huhua anan, boe ma mana maketu-maladi dedeꞌak kara haitua hara heheluk neni komedan bui naa neu, fo radenun nakamboꞌik Paulus asa numa bui dale mai.
ACT 16:36 Komedan bui namanene nala naa, boe ma ana nafada hara heheluk naa neu Paulus nae, “Papa nggara ein. Hatahori moꞌo-inahuuk kara raketu ena fo rakamboꞌik ei. Dadi papa sara fali no sodak leo.”
ACT 16:37 Paulus namanene nala naa, boe ma ana ta nau simbok no malole. De ana nafada nasafali neu mana manear fo mana reni hara heheluk bebeik kara naa nae, “Boso tao talo naa! Te air ia, hatahori Romar. De ai moke mahere ai haak! Man-parendar muste maole ai dedeꞌam ia, tungga hohoro-lalanek. Tungga ndoon, na, muste nenggetuuk parisa dei, basa dei fo hukun hatahori. Tehuu ara ta tao talo naa. Ara ta ranggatuuk parisa dei, do, sangga bubuluk ai salan hata, tehuu ara filo rakamiminak ai numa hatahori noꞌuk ka matan. Ta hambu huun hata esa boe na, tehuu ara tee ai meni bui dale miu. Ia manggaledo ndoos ena, ara lena-langga man-parenda Roma hohoro-lalanen. Basa boe ma hatematak ia, ara nau kalua heni ai no neneek numa bui dale mai, mita fo hatahorir ta bubuluk rae, ai salan hata? Ta bisa talo naa! Madenu malanggan nara raa mesa kasa mai fo rakamboꞌik ai. Talo naa dei, dei fo ai simbok.”
ACT 16:38 Neu mana manear raa reu tui falik Paulus kokolan naa, malanggan nara bubuluk rala rae, dua sara hatahori Romar, de raena haak. Boe ma ara ramataꞌu ralan seli.
ACT 16:39 De hatahori moꞌo-inahuuk kara reni bui mai, fo rataa sira salan nara, ma roke ambon neu Paulus no Silas. Basa boe ma ara kalua heni dua sara ruma bui dale mai, de ara roke fo ara laꞌo ela kota naa.
ACT 16:40 Ara kalua numa bui dale mai, boe ma Paulus asa reni mama Lidia uman reu. Numa naa, ara rakabua ro hatahori kamaherek kara. Ara ranori sara ma tao ratea dalen nara seluk laꞌe esa bali. Basa boe ma ara laꞌo ela kota naa.
ACT 17:1 Basa boe ma Paulus no Silas asa laꞌok rakandoo. Ara laꞌo resik kota esa, nade Amfipolis. Boe ma reni kota laen reu, nade Apolonia. Numa naa mai, ara laꞌo rakandoo losa kota Tesalonika. Nai kota naa, hambu uma huhule-haradoik Yahudi esa.
ACT 17:2 Mete ma ara losa mamanak esa fo hambu uma huhule-haradoik nai naa, ndaa no fai hahae tao ue-osa, na, Paulus nasiꞌe maso fo tungga hule-haradoi no hatahorir. Numa Tesalonika, ana oo maso neni sira uma huhule-haradoin neu boe. Boe ma ana natuka duduꞌak no sira marai naa, pake Manetualain Dedeꞌa-kokolan. Ana tungga hule-haradoi no sara talo naa, tungga fai hahae tao ue-osa losa menggu telu tungga-tungga.
ACT 17:3 Ana nafada sara nae, “Mete ma ita parisa tatalole nai Manetualain Susura Malalaon naa, na, ita bubuluk tae, ara rafada memak kana numa lele uluk mai ena rae, Hatahori fo Manetualain helu-bartaa nae nadenun mai naa ena, neu ko Ana hambu susa-sonak noꞌuk ka. Mateꞌen te Ana mate. Tehuu basa naa, Manetualain pake Ndia koasan fo tao nasoda falik kana numa mamaten mai. Hatematak ia ita bubuluk ena tae, Hatahori fo Manetualain helu-bartaak naa, ndia Yesus!”
ACT 17:4 Ara ramanene rala naa, boe ma hambu hatahori Yahudir fo mana simbok Paulus kokolan, reu rakabua ro Paulus asa. Numa hatahorir mana simbok kara raa, hambu hatahori Yunani noꞌuk ka oo hii ralan seli neu Lamatuak ena, ma hambu inak hida fo leleꞌa-nonoren moꞌok ka rai kota naa boe.
ACT 17:5 Tehuu hatahori Yahudi malanggan nara maruma naa rasakele ma dalen nara mbiri. De ara dudunggu mana loro-kook kara fo ara tao mue-anggik. Neu hatahorir rakabua noꞌuk ka ena, boe ma ara mulai tao mue-anggik numa kota naa. Ara sangga Paulus no Silas fo rae leꞌa ro sara reni hatahori noꞌuk mana tao mue-anggik kara raa reu. Basa boe ma reu nggafu fee Yason uman, nahuu Paulus no Silas leo taak numa naa.
ACT 17:6 Tehuu ara ta hambu Paulus asa ruma naa. Basa boe ma ara leꞌa ro Yason ma hatahori kamaherek laen nara hida reni mamana neole dedeꞌak reu. Ara rakasasaꞌek salak neu Yason asa rae, “Hatematak ia hambu hatahorir mai nai ita kotan ena. Hatahorir raa reni bee a reu, na, ara tao mue-anggik nai naa! Hatematak ia ara mai fo bonggar rakalulutu ita hohoro-lalanen nai ia, de ara nggatin no sira hohoro-lalanen nara! Yason ia, ana simbo nala hatahorir ia fo leo taak nai ndia uman! Basa sara laban ita hohoro-lalanen, nahuu ara ta nau manaku neu mane ina-huuk, keser. Ara kada nau manaku neu sira malangga ina-huun esa, nade Yesus.”
ACT 17:8 Hatahori moꞌo-inahuuk kara ma hatahorir maruma naa ramanene rala naa, boe ma duduꞌan nara mulai tasibu-ribu.
ACT 17:9 Boe ma hatahori moꞌo-inahuuk kara maruma kota naa radenu Yason no hatahori kamaherek kara fo bae doik dadi tanda nemeheherek rae, sira ta tao mue-anggik bali, ma ara tao hehelu-bartaak fo sira ta bole ralai. Ara bae basa doik, boe ma hatahorir raa mboꞌi Yason asa reu.
ACT 17:10 Leꞌodaen naa, hatahori kamaherek kara maruma kota Tesalonika duduꞌa rae, malole lenak sira radenu Paulus no Silas reni mamanak laen reu. Boe ma ara radenu dua sara reni kota esa reu, nade Berea. Losa naa, ara maso reni hatahori Yahudi uma huhule-haradoin dale reu.
ACT 17:11 Tehuu hatahori Yahudir maruma Berea naa, ta sama leo hatahorir marai Tesalonika. Hatahori iar, ara hii ralan seli nenene ma ara nau simbok Paulus asa kokolan. Sira maruma Berea naa, nenene ratalolole Paulus asa ma ara ranori tebe-tebe Manetualain Susura Malalaon. Ara nau sangga bubuluk Paulus asa kokolan naa tebe do taa. De hatu-leledon ara parisa no lutu-lelon Manetualain Susura Malalaon.
ACT 17:12 Huu naa de hatahori Yahudi noꞌuk ka maruma naa ramahere neu Yesus. Leo naak oo hatahori Yunanir boe. Sira mana ramahere neu Lamatuak Yesus naa, leleꞌa-nonoren nara moꞌok ka. Hambu inak ma touk boe.
ACT 17:13 Tehuu neu hatahori Yahudir maruma Tesalonika mai, ramanene rae, Paulus asa fee nenorik laꞌe-neu Manetualain Dedeꞌa-kokolan nai Berea, boe ma ara tungga reu, de dudunggu hatahorir fo tao mue-anggik numa naa bali.
ACT 17:14 Huu naa de hatahori kamaherek kara marai Berea roke lai-lai roo Paulus neni tasi tatain neu. Tehuu Timotius no Silas leo rakandoo numa Berea.
ACT 17:15 Hatahorir raa ro Paulus losa kota esa, nade Atena. Basa boe ma ara laꞌo elan numa naa, de fali reni Berea reu. Ara reni hara heheluk numa Paulus mai nae, Silas no Timotius reu lai-lai fo rakabua ro ndia.
ACT 17:16 Neu Paulus nahani neu Silas no Timotius fo reni Atena mai, dalen sona, nahuu ana mete-nita nai kota naa, hambu mamana sosonggok sudi nai bee.
ACT 17:17 Tehuu numa naa, hambu hatahori Yahudi hida ma hatahori ta Yahudi hida bali fo soa hule-haradoi neu Manetualain. Paulus maso neni sira uma huhule-haradoin neu, fo ana natuka duduꞌak no sara. Tungga faik, ana oo neni pasar neu boe, fo kola-kola no sudi see mana maik nai naa.
ACT 17:18 Boe ma ana nakaseseluk dedeꞌak no meser hida numa bua-aok dua mai nai kota naa, ndia Epikorus bua-aon ma Stoa bua-aon. Tehuu neu ana kokolak laꞌe-neu Yesus nae, Ndia naa, nasoda fali numa mamaten mai ena, boe ma hambu numa sira mai ketuk rasapura amben, ma rae, “Phueh! Memak hatahori mana ombo koson baꞌin!” Ketuk oo rakatitiik boe rae, “Hatahori ia nae nakasesetik ai fo songgo-tanggu neu sira dewa feꞌen nara!”
ACT 17:19 Hatahori Atena, ma hatahori deak mana leo numa kota naa, mete ma ara ramanene sadi ka hata fo beuk, haꞌi netuduk leo nenori beuk, do, duduꞌa beuk, na, sira hatahori malelan nara rasiꞌe ranggatuuk rakabua nai lete anak esa, nade Areopagus fo ratuka duduꞌak no loa-narun. Hambu numa sira mai roke roo Paulus neni naa neu, boe ma ara roken rae, “Soba mafada ai nenori beuk naa dei! Te o kokolak dedeꞌa beuk fo tao mala ai pangganaa faa. Dadi ai moke fo o kokolak tamba faa bali, mita fo ai bisa malela.”
ACT 17:22 Basa boe ma Paulus nambariik de kokolak nae, “Basa hatahori Atena rein! Au laꞌo ndule basa ei kotam ia ena, de au mete-ita ae, memak ei manggate makalalaꞌok anggama. Au mete-ita ei mamana sosonggom mara sudi rai bee. Tehuu au mete-ita batu sosonggok esa neni surak nae, ‘Sosonggok ia soa-neu dewa fo ita ta talela sana.’ Sosoa-ndandaan nae, ei songgo-tanggu neu Manetualain ena, tehuu ei bei ta malela Ndia. Ndia ia, ndia au tui-benggan neu ei.
ACT 17:24 Ndia ia, ndia nakadadadik lalai no dae-inak, no basa oe-isin lalaꞌen. Ndia oo naena haak fo parenda basa hata fo marai lalai ma dae-inak boe. Dadi Ana ta leo nai uma sosonggok fo hatahori dae-bafok taok.
ACT 17:25 Ana ndia fee ani hahaek, ma fee masodak neu ita hatahori dae-bafok. Kekeꞌun, Ana ndia fee basa hata fo ita toꞌak. Tehuu Ndia mesa kana ta toꞌa hata esa boe na. Dadi hatahori dae-bafok ta bisa tulun Ndia.
ACT 17:26 Numa kada hatahori esa mai, Ana nakadadadik basa hatahori nusa-nusak nai dae-inak katematuan. Ana baꞌe fee hatahori nusa-nusak kara esa-esak nonook dae oen. Ma Ana ndia koladu fo hatahori nusa-nusak kara mori-dadi, ma ara rakalulutu, esa-esak no ndia fai henggeneen.
ACT 17:27 Ana tao talo naa, nahuu Ana nau ita hatahori dae-bafok sanggan fo talela Ndia no neulauk. Hatahori dae-bafok memak sangga-sangga, fama ko ara bisa ratonggo roon. Naa te Ana ta nai dook ka numa ita mai.
ACT 17:28 Hambu hatahori kokolak rita rae, ‘Ita hahaen, huun memak numa Ndia mai. Ita masodan, okan memak numa Ndia mai.’ Hambu ei mana tao binim mara oo kokolak rita ena boe rae, ‘Ita tasoda, nahuu ndia. Huu naa de ita dadi teu ndia tititi-nonosin.’
ACT 17:29 Naa memak tebe. Ita basa ngga ia, Manetualain tititi-nonosin. De boso duꞌa mae, Manetualain sama leo patong sosonggok fo hatahori dae-bafok bisa dokin numa lilo mbilas, do lilo fulak, do batu mai tungga sira mesa kasa duduꞌan.
ACT 17:30 Lele uluk, memak hatahori dae-bafok bei ta nalela dedeꞌak ia. Huu naa de Manetualain ela sara leo-laꞌo tungga sira nggoa beben naa. Tehuu hatematak ia Ana ta nau ita leo-laꞌo talo naa bali. Huu naa de Ana parenda nae, ita muste mbia-sokolaa heni sosonggok kara raa, boe ma teu tungga Ndia leo.
ACT 17:31 Ndia oo henggenee faik esa ena, fo Ana huku-doki basa dae-bafok ia oe-isin lalaꞌen, nahuu sala-singgon nara. Ma Ana henggenee memak Hatahori esa dadi neu Ndia Mana Maketu-maladi Dedeꞌan. Neu ko Hatahori naa naketu huku-dokik tungga ndoon. Hatematak ia manggaledok ena, Mana Maketu-maladi Dedeak naa, ndia see. Hatahori naa, ndia Ana mate ena, tehuu Manetualain tao nasoda falik kana numa mamaten mai ena.”
ACT 17:32 Tehuu neu hatahorir fo mana rakabua ruma naa ramanene Paulus nae, “hambu Hatahori nasoda fali numa mamaten mai”, boe ma ara hika rakatitiik kana. Tehuu hambu hatahori hida oo tao matak neun boe. Ara rafada Paulus rae, “Ai bei hii nenene papa kokolak laꞌe-neu dedeꞌak naa bali. Tehuu laꞌe esa bali dei.”
ACT 17:33 Basa boe ma Paulus laꞌo ela mamanak naa.
ACT 17:34 Tehuu hambu ketuk reu rakabua roon, nahuu ara ramahere neu Lamatuak Yesus ena. Numa sira mai, hambu esa uen soa naole dedeꞌak nai Areopagus, nade Dionisius. Ma inak esa, nade Damaris. Ma hatahori laen hida bali fo tungga sama-sama ro sara.
ACT 18:1 Lelek naa, hambu mane ina-huuk man-parenda Roma, nade Klaudius. Ana namanasa hatahori Yahudir, de ana husi kalua heni sara ruma kota Roma mai, nai profensi Italia. Boe ma ara sasarak sudi bee reu. Hambu hatahori Yahudi esa, nade Akila, no saon nade Priskila. Dua sara tungga ralai kalua numa profensi Italia mai, reni kota esa reu, nade Korentus. Akila ia nusa huun ndia profensi Pontus. Ndia ue-osan, ndia soa tao sudi hata numa banda rouk mai. Faik naa, Paulus oo laꞌo ela kota Atena, de ana neni kota Korentus neu boe. Numa naa, Paulus nalela aok no Akila ma Priskila, te ndia oo soa tao sudi hata numa banda rouk mai boe. Ara leo sama-sama, ma ara raue-osa sama-sama.
ACT 18:4 Mete ma losa hatahori Yahudir fai hahae tao ue-osan ena, na, Paulus maso neni sira uma huhule-haradoin dale neu. Numa naa, ana soba fufudi hatahori Yahudir, ma hatahori laen nara fo ramahere neu Lamatuak Yesus.
ACT 18:5 Tehuu neu Silas no Timotius ruma profensi Makedonia mai, boe ma Paulus hahae tao ues banda rouk. Hatu-leledok ana ta nala neun nafada hatahori Yahudir nae, “Hatahori fo ita basa ngga tahanin numa lele uluk fo Manetualain helu-bartaa nae nadenun mai naa ena, Ana mai ena. Ndia Yesus!”
ACT 18:6 Tehuu hambu hatahori Yahudir fo laban rakandoo neu Paulus, ma ara kada kokolak rakatutudak kana. Boe ma Paulus nggafu heni afu numa bualoꞌa-papaken mai, fo dadi tanda nae, ndia ta nau tao matak neu sara ena bali, nahuu ara ta nau simbok Hara Lii Malole fo ndia tui-bengga neu sara. Boe ma ana kokolak nae, “Eir ia, sudi selik kana! Ei tao mambake ei ndiꞌi doom mara! Tehuu elan numa naa leo! Neu ko ei mesa ngga ndia lemba-masaa ei sala-singgom. Au ta aena neselu-netaak ua ei bali. Mulai hatematak ia, au ta koladu hata-hata bali ua ei hatahori Yahudir. Au nau uu anori hatahori nusa-nusak laen nara fo hatahori ta Yahudir.”
ACT 18:7 Hambu uma esa nai uma huhule-haradoik naa boboan. Tenu uma naa naden, Titius Yustus. Ndia hatahori ta Yahudi, tehuu ndia dalen hii nalan seli neu Manetualain. De neu Paulus nasadea laꞌo ela hatahori Yahudir, boe ma ana maso neni ama Titius uman dale neu.
ACT 18:8 Ta dook ka boe ma malangga uma huhule-haradoik naa namahere neu Lamatuak Yesus. Ndia naden Krispus. Basa ndia uma isin nara oo ramahere sama-sama ro hatahori Korentus laen nara, fo mana ramanene Paulus kokolan boe. Basa boe ma Paulus ator fo sarani basa sara.
ACT 18:9 Leꞌodaek esa, nok bali nai meꞌis dale, Paulus namanene Manetualain kokolak nae, “Paulus! O hae mamataꞌu, ma o dalem hae monda-maꞌa neu ue-osa ia, te o neselu-netaam bei ta basa sana. O muste fee nenorik makandoo neu hatahori iar muni Au Tutui Maloleng.
ACT 18:10 Masaneda, ee! Ta kada o mesa ngga maue-osa. Huu Au sama-sama ua o. Leo mae hatahorir rae rakasususak o, tehuu Au ambariik ahere ua o. Ma Au loti-mete o hatu-leledon. Boso lilii-ndondou, nai kota ia Au hatahoring noꞌuk ka.”
ACT 18:11 Paulus namanene nala naa, boe ma ana leo nala dook ka numa kota Korentus. Ana fee nenorik laꞌe-neu Lamatuak Eno-dala Masodan numa naa, losa teuk esa seserik.
ACT 18:12 Lelek naa, ara soꞌuk hatahori esa, fo dadi neu nggubenor numa profensi Akaya. Naden Galio. Hambu hatahori Yahudi hida oo rala harak fo leꞌa roo Paulus neni nggubenor neu numa mamana neole dedeꞌak.
ACT 18:13 De ara kalaak laꞌe-neu Paulus rae, “Hatahori ia fufudi nala hatahori noꞌuk ka ena, fo ara tungga anggama beuk. Naa te man-parenda Roma ta manaku anggama naa!”
ACT 18:14 Tehuu neu Paulus nae buka bafan fo nasalaꞌe aon, boe ma nggubenor nggero tutik ndia kokolan. Ana kaꞌi-ore memak hatahorir fo mana kalaak Paulus naa nae, “Heeh! Ei hatahori Yahudir, pasa ndiꞌi doom mara, ee! Mete ma ei mae meni dedeꞌak hatahori tao manggarauk, do, hatahori esa nakanisa esa, na, au muste nenene ei dedeꞌam.
ACT 18:15 Tehuu dedeꞌak fo ei menik ia, ei dedeꞌa uma dalem! Ei mareresi laꞌe-neu kada anggama Yahudi hohoro-lalanen, no ndia dedeꞌa-kokolan ma ndia naden nara. Dedeꞌak naa, man-parenda manai ia ta koladu naa!”
ACT 18:16 Basa boe ma nggubenor naa husi kalua heni sara ruma mamana neole dedeꞌak naa mai.
ACT 18:17 Boe ma hatahori Yunanir maruma naa humu rala hatahori esa, nade Sostenes. Hatahori naa, hatahori Yahudi uma huhule-haradoin malanggan. De ara leꞌa renin fo popokon numa nggubenor matan. Tehuu nggubenor ta mbali sara.
ACT 18:18 Basa boe ma Paulus leo nakandoo numa kota Korentus. Tehuu doo-doo boe ma ana nateꞌa laꞌo ela hatahori kamaherek kara maruma naa. Basa de ana no Priskila ma Akila reni kota esa neu, nade Kengkrea fo rahani ofak. Numa naa, Paulus keu namboli langgan fo dadi neu tanda nae, hata fo fai bakahulun ana helu-bartaa neu Lamatuak ena, hatematak ia ana tao nabasan ena. Basa boe ma ara saꞌe ofak reni kota Epesus reu. Ara losa naa, de ara konda numa ofak naa mai. Boe ma Paulus laꞌo ela nonoo kaduan nara raa, de ana maso neni hatahori Yahudi uma huhule-haradoin dale neu. Numa naa ana natuka duduꞌak no hatahori Yahudir.
ACT 18:20 Ara kola-kola talo naa, boe ma hatahori Yahudir roke fo Paulus leo nala dook ka faa no sara. Tehuu ana timba heni nonoken nara no naꞌu-naꞌun.
ACT 18:21 Boe ma ana nateꞌa nae, “Toranoo susue nggara ein! Ei boso haꞌi dalek, ee! Mete ma Lamatuak buka dalak, na, dei fo au fali mai tiro-dangga ei bali.” Ana kokolak basa talo naa, boe ma ana laꞌo ela Epesus.
ACT 18:22 Ana saꞌe ofak de nakandoo losa kota Kesarea. Ana konda numa naa. Boe ma ana ndaꞌe neni Yerusalem neu, fo fee hara masodak neu hatahori kamaherek kara maruma naa. Basa de ana fali neni kota Antiokia neu.
ACT 18:23 Ana leo doo-doo faa numa naa, boe ma ana laꞌo, de neu laꞌo ndule basa profensi Galatia ma profensi Frigia. Numa naa, ana tao natea hatahori kamaherek kara dalen.
ACT 18:24 Faik naa, hatahori Yahudi esa numa kota Aleksandria manai profensi Masir mai. Naden Apolos. Hatahori naa mana kokolak nalela dedeꞌak. Ana oo bubuluk losa lutu-lelon Manetulain Susuran isin boe. Ana dei fo losa nai kota Epesus.
ACT 18:25 Ana namanene nita tutuik laꞌe-neu Yesus, boe ma ana hii tui seluk kana neu hatahori laen. Ana tui no dere-dere hiek ma hata fo ana kokolak naa, memak tetebes. Tehuu ana bei ta nalela basa dedeꞌak kara. Ana bubuluk kada Yohanis sarani hatahorir, mete ma ara hahae numa sira sala-singgon mai ena.
ACT 18:26 Laꞌe esa, ana kokolak ta pake bii-bambik numa hatahori Yahudi uma huhule-haradoin dale. Priskila no Akila oo ramanene neun numa naa boe. Ara hule-haradoi basa, boe ma Priskila no Akila roke roon neni sira uman neu. Numa naa, ara rafadan laꞌe-neu basa Lamatuak Yesus Eno-dala Masodan lalaꞌen, losa dedeꞌa lutu-lutuk kara boe.
ACT 18:27 Basa boe ma Apolos naketu fo nae neni profensi Akaya neu. Hatahori kamaherek kara maruma Epesus basa sara dalek esa ro ndia hihiin. Basa de ara tao susurak esa fee sira toranoo hatahori kamaheren nara marai Akaya, roke fo ara simbok Apolos no malole. Ana toꞌu nala susurak naa, boe ma ana laꞌo leo. Losa Akaya, boe ma ana tulu-fali tebe-tebe hatahori kamaherek kara maruma naa.
ACT 18:28 Ana oo nakaseseluk dedeꞌak no hatahori Yahudir numa naa, nai hatahori noꞌuk matan, tehuu ara ta senggi sana boe. Ana soa pake Manetualain Susura Malalaon fo nanori sara nae, “Hatahori fo Manetualain helu-bartaa nae nadenun mai naa ena, fo ita tahanin do basa ia ena, ndia Yesus!”
ACT 19:1 Neu Apolos bei numa Korentus manai profensi Akaya, Paulus laꞌo ndule nggorok kara marai letek. Basa boe ma ana losa kota Epesus. Numa naa, ana natonggo no hatahori hida fo ramahere neu Lamatuak Yesus ena.
ACT 19:2 Boe ma ana natane sara nae, “Toranoo susue nggara ein. Fai maneuk kara, neu ei mamahere Lamatuak Yesus, ei oo simbo mala Manetualain Dula-dale Malalaon boe, do taa?” Ara raselu rae, “Taa. Ai bei ta mamanene mita mae, hambu Manetualain Dula-dalen fo leo naak.”
ACT 19:3 Boe ma Paulus natane seluk nae, “Mete ma leo naa, na, ara sarani ei pake saranik bee?” Ara raselu rae, “Ara sarani ai tungga Yohanis dalan.”
ACT 19:4 Boe ma Paulus nafada nae, “Nenene dei! Yohanis sarani hatahorir fo dadi neu tanda nae, ara hahae numa sala-singgon nara mai ena. Tehuu masaneda talo ia! Tungga faik, ndia mesa kana ndia nanori hatahori Israꞌel asa nae, ara muste ramahere neu Yesus, Hatahori fo Manetualain nae nadenun mai naa.”
ACT 19:5 Ara ramanene rala naa, boe ma ara roke fo ana sarani sara, fo ara maso dadi reu Lamatuak Yesus nufanelun nara.
ACT 19:6 Neu Paulus ndae liman neu sara ma ana hule-haradoi, boe ma Manetualain Dula-dale Malalaon konda neu sara. De ara mulai kokolak pake dedeꞌak mata-matak kara fo ara bei ta bubuluk rita sara. Ma Lamatuak pake sara fo ara bisa rafada hata fo neu ko ana mori-dadi.
ACT 19:7 Sira basa sara hatahori salahunu dua.
ACT 19:8 Neu Paulus leo numa kota Epesus, ana nasiꞌe maso neni hatahori Yahudir uma huhule-haradoin neu fo fee nenorik no lutu-lelon laꞌe-neu Manetulain parenda-koasan. Ana oo kokolak ta no bii-bambik boe. Ana tao talo naa, losa bulak telu.
ACT 19:9 Tehuu hambu hatahori fo ta nau simbok ndia nenorin, de ara laban ana. Ara oo dudunggu hatahorir marai naa boe, fo ara boso tungga Yesus Eno-dala Masodan. Huu naa de Paulus no hatahori kamaherek kara rakadedeak laꞌo ela uma huhule-haradoik naa. De ara reu rakabua ruma uma sakola esa. Tenu umak naa, hatahori esa, nade Tiranus.
ACT 19:10 Paulus nanori sara talo naa, losa teuk dua; losa hatahorir maruma profensi Asia katematuan ramanene rala Lamatuak Yesus Tutui Malolen ena. Mana mamanenek kara raa, hatahori Yahudi ma hatahori ta Yahudi boe.
ACT 19:11 Lelek naa, Lamatuak fee koasa neu Paulus fo ana tao tanda heran ta hohoꞌak mata-matak kara.
ACT 19:12 Haꞌi netuduk leo, mete ma hatahorir pindan rala Paulus tema paꞌa langgan, do, kalikeen, fo ara tao buas naa neu hatahori kamahedik, na, hatahorir raa hedin mopon tutik ka. Losa nitu manggarauk kara oo kalua laꞌo ela hatahorir boe.
ACT 19:13 Numa naa, hambu hatahori Yahudir malangga anggaman esa, no ana toun hitu. Malangga anggama naa, nade Sakewa. Anan nara rasiꞌe sudi bee reu fo husi kalua heni nitu numa hatahori mai. Ara oo soba-soba husi nitu pake Yesus naden boe rae, “O malela Yesus fo Paulus nafadak naa, do? Hatematak ia au parenda o, pake Yesus naden, fo kalua numa hatahori ia mai leo!” Ma hambu hatahori Yahudi malelak laen hida oo, soba tao talo naa boe.
ACT 19:15 Laꞌe esa, neu Sakewa anan nara parenda talo naa, boe ma hambu nitu manggarauk esa fo naselu nae, “Au alela Yesus. Au oo alela Paulus boe. Tehuu eir ia, see?”
ACT 19:16 Boe ma hatahori fo nitu saꞌek naa namanasa nalan seli. De ana fifiti, heheta-tatabu ma poko-femba sara. Ana tao nakahina sara, ma sii heni badun nara, losa ara ralai ralenggu-pikok no makahola ndoos ruma uma naa mai.
ACT 19:17 Basa boe ma dedeꞌak naa natanggela numa bafak mai neni bafak neu, losa basa hatahorir marai kota Epesus bubuluk; hatahori Yahudir, ma hatahori ta Yahudir oo bubuluk boe. Kekeꞌun, see a mesan fo namanene dedeꞌak naa, ara dadi ramataꞌu ma heran. Boe ma ara koa-kio Lamatuak Yesus, nahuu Ana fee koasa moꞌok neu Paulus ena.
ACT 19:18 Basa de, hatahori kamahere beuk kara raa reni sira toranoon fo kamaherek kara ena mai, fo buka dalen nara ma mboꞌa sira sala-singgon.
ACT 19:19 Numa sira iar mai, hambu ketuk fo rasiꞌe pake malela makiuk kara. Basa de ara raduduru rala sira buku malela makiun nara, fo ara hotu heni sara. Mete ma reke bukur raa belin nara, na, baꞌu leo doi fulak 50.000.
ACT 19:20 Basa boe ma hatahorir tui-bengga Manetualain Hara Lii Malolen tungga hatu-leledon neni sudi bee neu. De hatahori kamaherek kara tamba ramanoꞌu. Te Lamatuak Dedeꞌa-kokolan naa, maso losa nai hatahorir dale kuru-eron ma leleꞌa-nonoren moꞌon seli.
ACT 19:21 Basa boe ma, Paulus naketu fo fali neni Yerusalem neu. Tehuu ndia dalen hii nalan seli fo nakahuluk neni profensi Makedonia ma profensi Akaya neu, dei fo ana nau laꞌo nakandoo neni Yerusalem neu. Ana duꞌa memak ena nae, “Malole lenak, au uu tiro-dangga hatahori kamaherek kara marai mamanak kara ia dei. Leo mae talo bee oo au muste losa nai kota Roma boe.”
ACT 19:22 Basa boe ma ana nadenu nonoo laꞌo ein dua, ndia Timotius ma Erastus, fo rakahuluk reni Makedonia reu. Tehuu ndia mesa kana leo doo-doo bali numa profensi Asia.
ACT 19:23 Lelek naa, hambu dedeꞌa moꞌok esa mori-dadi numa kota Epesus laꞌe-neu Yesus Eno-dala Masodan.
ACT 19:24 Dedeꞌak naa oka-huun talo ia: Numa naa, hambu tou mana tutu lilo fulak esa, nade Demetrius. Ana nasiꞌe tao uma sosonggok kadiꞌi anak kara, fo seꞌo neu hatahori Epesus fo ara songgo dewi esa, nade Artemis. Huu ndia bua seseꞌon laku noꞌuk ka, de ana pake ana mana maue-osa noꞌuk ka. Huu naa de doik maso leo oe faa ia, neni touk ia neu.
ACT 19:25 Laꞌe esa, Demetrius nakabua nala ndia tukan nara ma tukan laen nara, de ana kokolak no sara nae, “Ama nggara ma basa toranoo nggara ein! Ei bubuluk ena mae, ita leleo-lalaꞌon dadi neulauk talo ia, nahuu doik noꞌuk ka faa leo oe numa ita bua seseꞌon ia mai.
ACT 19:26 Tehuu hatematak ia, ita mete-tita no ita mata deꞌe heli-helin nara, ma tamanene no ita ndiꞌi doo heli-helin nara ena, naa numa Paulus kokolan unda-poden mai. Huu ndia leꞌa-nore hatahori noꞌuk ka nae, buas sara fo ita taok kara ia, ta raena sosoak hata-hata. Ana nae, patong fo ita dokik ia, kada dewa-dewi kekedik ka mesan. Ta kada hatahorir marai kota Epesus ramanene neun, tehuu hatahorir marai profensi Asia katematuan oo ramanene ena boe.
ACT 19:27 De nenene matalolole, ee! Neu ko ita iar tae dadi teu hata bali, mete ma hatahori noꞌuk ka kada tungga rakandoo ro Paulus asa? Hatahori ta nau hasa hata fo ita tao talak kara iar ena. Masaneda, ee! Hatematak ia, hatahori noꞌuk ka rakaluku-rakatele neu ita dewin fo manaꞌa hiek, Artemis. Nai profensi Asia katematuan, losa dae-bafok buꞌun nara oo, hatahorir soa mai fo koa-kio neun nai ndia uma sosonggo ina-huun, fo nai ita kotan Epesus ia boe. Dadi boso losak hatahori ta nau tao matak neun ena, ma ara ta nau ia mai ena bali!”
ACT 19:28 Ara ramanene rala naa, boe ma ramanasa tutik ka. De ara eki rae, “Sodak Artemis! Artemis fo manaꞌa hiek! Ai hatahori Epesus asa koa-kio neu Artemis!”
ACT 19:29 Ara ramanene hatahorir kada eꞌekik talo naa, boe ma ara mulai ralai ruma bee a mesan mai, fo reu rakabubua numa naa, losa kota naa sofen seꞌe-seꞌe no hatahorir. Tehuu basa sara panggananaa. Boe ma hatahorir basa sara mulai tao mue-anggik, tungga-tungga dalak, losa nai kota dae moo loan. Ara humu rala hatahori dua, de leꞌa reni sara naa reu. Sira dua sara naden, Gayus ma Aristarkus. Hatahorir humu rala sara, nahuu dua sara iar, Paulus ana nunin nara ruma Makedonia mai.
ACT 19:30 Paulus namanene nala naa, boe ma ana nae maso neni hatahori mana mue-anggik kara talada heon neu, tehuu hatahori kamaherek kara maruma naa ta rakamboꞌik kana neu.
ACT 19:31 Hambu hatahori moꞌo-inahuuk hida ruma profensi Asia mai fo ralela Paulus no malole. Ara radenu hatahori fo neu nafadan nae, Paulus ta bole maso neni dae moo loak naa, nai hatahori noꞌuk fo mana mamue-anggik kara raa neu.
ACT 19:32 Boe ma numa dae moo loak naa, hatahori mulai sangga dedeꞌak naa huun. Hambu ketuk fo eki pepekok rae, “Talo ia!” Ketuk laen eki rae, “Talo naa!” Naa te sira noꞌuk ka oo ta bubuluk dedeꞌak naa nenggetuu-nemberiin talo bee boe. Sira raa, tungga kada makaseek.
ACT 19:33 Numa naa oo, hambu hatahori Yahudir fo ara mulai ramataꞌu boe, nahuu ara duꞌa rae, boso losak hatahori noꞌuk kara neu ko rakasasaꞌek salak neu hatahori Yahudir ndia dadi reu mana makabubusak numa dedeꞌak ia mai. Huu naa de ara fee sira hatahorin esa mata neu fo dadi neu sira mana toꞌu dedeꞌan. Hatahori naa, nade Aleksander. Ara roken fo ana nasalaꞌe sara nae, dedeꞌak naa ta sira hatahori Yahudir unda-poden. Basa boe ma Aleksander batak liman fo ara boso ramue. Boe ma ana mulai kokolak fo nasalaꞌe hatahori Yahudir.
ACT 19:34 Tehuu neu ara bubuluk rae, mete ma ndia naa, hatahori Yahudi, boe ma ara eki tamba rahere bali rae, “Sodak Artemis! Artemis fo manaꞌa hiek! Ita hatahori Epesus koa-kio neu Artemis!” Ara eki-eki talo naa, doon liꞌu dua.
ACT 19:35 Basa boe ma malangga man-parenda numa kota Epesus mai nambariik, de ana kokolak tao makasufu hatahorir raa dalen. Ana kokolak nae, “Kaꞌa-fadir marai kota Epesus! Basa hatahorir bubuluk ena rae, ita dewin Artemis mata-ao huun moꞌu numa lalai mai, fo neni ita ia mai. Dadi ita hatahori Epesus ia, ndia takaboi tatalololen. Ta hambu hatahori fo bisa haꞌi heni ita haak nenean, nahuu naa dadi tutuik numa mata mai ena, fo basa hatahorir bubuluk memak kana ena. Dadi tao hata de ei eki talo ia? Ela fo hatahori ombo koson tungga sira hihiin, tehuu ei hae mamue-anggik sadi ndaa talo ia!
ACT 19:37 Ei leꞌa meni hatahori kaduak kara ia reni ia mai, nok bali ara tao manggarauk. Naa te ara ta ramanaꞌo hata esa boe na numa Artemis uma sosonggo ina-huun mai. Ara oo ta kokolak rakatutudak ita dewin nade malolen boe. De ei mae ndae salak hata neu sara?
ACT 19:38 Masaneda matalolole, ee! Ita taena mamana neole dedeꞌak. Hatahori mana maole dedeꞌak oo nahani boe. De mete ma Demetrius asa nau tao dedeꞌak, na, ara muste tungga ndia hohoro-lalanen, fo reni dedeꞌak naa neni mamana neole dedeꞌak neu.
ACT 19:39 Mete ma hambu dedeꞌak laen fo rae rakalalaꞌok kana, naa fo ara reu raole ro lasi-lasi hadak kara.
ACT 19:40 Boso losak man-parenda Roma nau ndae salak neu ita, nahuu mue-anggik ia. Mete ma ara rae sangga bubuluk dedeꞌak ia nenggetuu-nemberiin, na, soba, ita taselu tae leo bee? Te dedeꞌak ia huu-suꞌun taa, na!”
ACT 19:41 Malanggan naa kokolak basa talo naa, boe ma nadenu fo basa hatahorir raa rasida. De ara rasida memak.
ACT 20:1 Neu hatahorir hahae tao mue-anggik ena bali, kota Epesus naa lende fali leo biasa. Basa de Paulus nakabua nala hatahori kamaherek kara maruma naa, fo natetea dalen nara. Basa naa, boe ma ana nateꞌa fo ana laꞌo neni profensi Makedonia neu.
ACT 20:2 Numa naa, ana laꞌo ndule basa nggorok kara, fo natetea hatahori kamaherek kara dalen. Ana tao talo naa, losa ana maso neni nusa Yunani neu.
ACT 20:3 Ana leo numa naa losa bulak telu. Basa boe ma, ana nahehere fo nae saꞌe ofak neni profensi Siria neu, tehuu ana namanene nae, hatahori Yahudir rala harak, fo rae tao risan. Ana namanene nala naa, boe ma ana ta nau saꞌe ofak nakandoo neni profensi Siria neu. Dadi ana laꞌo fali nesik kada profensi Makedonia.
ACT 20:4 Hambu hatahori bubua anak esa tungga Paulus. Ndia Timotius; papa Pirus anan Sopater numa kota Berea mai; hatahori dua ruma kota Tesalonika mai, nade Aristarkus ma Sekundus; hatahori esa numa kota Derbe mai, nade Gayus; ma hatahori dua ruma profensi Asia mai, ndia Tikikus ma Trofimus.
ACT 20:5 Basa boe ma au (ndia Lukas fo mana surak susurak ia), atonggo ua seluk Paulus numa kota Felipi nai profensi Makedonia. Boe ma Paulus ana nunin nara laꞌo rakahuluk, fo ara reu rahani ai nai kota Troas, nai tasi serik. Neu hatahori Yahudi fai ina-huun Paska nara seli ena, ai dua ngga saꞌe ofak meni kota Troas miu. Faik naa, ai faik lima numa ofa lai. Neu ai losa numa Troas, ai konda numa ofak mai. Boe ma ai matonggo seluk mia nonoo laen nara, de ai leo numa naa doon menggu esa.
ACT 20:7 Faik naa, laꞌe-ndaa fai Menggu. Paulus naketu ena nae, “Toranoo nggara ein. Beꞌe-mai au ae laꞌo akandoo.” De basa ai hatahori kamaherek lalaꞌen makabua fo mae miꞌa-minu sama-sama. Huu Paulus nae laꞌo ena, de ana kokolak no ai losa leꞌodae fai baꞌe dua.
ACT 20:8 Ai makabua numa uma esa tadak katelun lain. Leꞌodaen naa ara dede lambu noꞌun seli.
ACT 20:9 Faik naa, hambu taꞌe anak esa nade Yutikus, nanggatuuk numa dinela lain. Ana oo tungga nenene Paulus boe. Tehuu doo-doo boe ma matan namabera de ana sunggu seli. Nggengger neu ma ana tuda numa dinela naa mai. De maten tutik ka.
ACT 20:10 Basa boe ma Paulus konda, de holu nala taꞌe anak naa. Ana kokolak nae, “Boso mamataꞌu. Ana ta mate.”
ACT 20:11 Ai basa ngga mamahoko, nahuu taꞌe anak naa nasoda fali numa mamaten mai. Basa boe ma ara roo falik kana neni uman neu. De ai basa ngga hene fali meni uma tadak lain miu, boe ma manggatuuk miꞌa-minu sama-sama. Basa de Paulus tuti kokolan losa beꞌe-mai huhuan. Neu ledo tiik ka, boe ma ai mateꞌa fo mae laꞌo.
ACT 20:13 Basa boe ma ai mala harak fo ai mabaꞌe dalak losa ai matonggo seluk nai kota esa, nade Asos. Boe ma ai saꞌe ofak fo meni Asos miu. Tehuu Paulus kada laꞌo eik neni naa neu.
ACT 20:14 Neu ai matonggo mia Paulus numa Asos, boe ma ana hene ofak lain mai, de ai makandoo meni kota Metilene miu.
ACT 20:15 Numa Metilene mai, ai saꞌe ofak makandoo. Neu beꞌe-main, ai deka mia pulu esa, nade Kios. Neu bei-nesan, ai matalangga ofak neni pulu Samos neu. Neu esan, boe ma ai losa kota Miletus.
ACT 20:16 Tehuu Paulus hii nalan seli ena fo losa lai-lai nai Yerusalem, fo ana bisa tungga fai ina-huuk Pentakosta nai naa. Boe ma ana ta nau nggari heni ledo-fai fo ndaꞌe neni kota Epesus neu, nahuu ana ta naena fai lelak ena bali.
ACT 20:17 Dadi numa Miletus, Paulus helu harak neu lasi-lasi Karisten nara marai Epesus fo ara mai ratonggo roon.
ACT 20:18 Neu ara losa, boe ma Paulus nafada sara nae, “Basa toranoo nggara ein. Ei basa ngga bubuluk au leleo-lalaꞌon ena, mulai numa fai makasososan au tabu eing neu profensi Asia losa hatematak ia.
ACT 20:19 Ei oo bubuluk au tao ue-osa fafandek lima-eing nai ei taladam mara, tehuu au ta akadedemak ita au aong. Nai au ue-osang ia, au luu-oeng tuda noꞌuk ka, boe ma lemba-asaa ala susa-sonak ta baꞌu anak. Au oo hambu doidosok noꞌuk ka boe, numa hatahori Yahudir nanae manggaraun mai.
ACT 20:20 Neu au anori ei, au kalua heni basa hata fo au bubuluk neulauk, fo au fee sara reu ei. Au oo anori ei ta no bii-bambik boe. Au oo uni uma esa-esak uu fo fee nesenedak neu hatahorin nara laꞌe-neu Lamatuak hihii-nanaun boe.
ACT 20:21 Au oo afada neu hatahori Yahudir, ma hatahori ta Yahudir boe ae, ara muste hahae numa sira sala-singgon mai, fo fali tungga Manetualain. Ma ara oo muste ramahere neu Lamatuak Yesus, fo mana naena haak parenda ita boe.
ACT 20:22 Au ae afada talo ia: hatematak ia au ae uni Yerusalem uu, nahuu Manetualain Dula-dalen nuni neni au fo uni naa uu. Au tungga a mesan, leo mae au ta bubuluk hata dadi neu au nai naa.
ACT 20:23 Tehuu numa kota esa mai neni kota esa neu, Manetualain Dula-dale Malalaon nafada nakahuluk au ena nae, neu ko au maso bui ma lemba-asaa ala doidosok noꞌun seli nai naa.
ACT 20:24 Au bubuluk tebe talo naa ena, nahuu Lamatuak Yesus ndia fua-ndae ue-osa ia neu au arung lain, fo au uu tui-bengga Hara Lii Malole ae, Manetualain sue-lai ita, ma Ana oo natudu Ndia dale susuen naa neu ita boe. Mete ma au ta tungga Ndia hihii-nanaun fo tao abasa Ndia ue-osan ia, na, au ameda au masodang ia ta naena sosoak hata-hata.
ACT 20:25 Hatematak ia au bubuluk ae, ei ta mete-mita au ena bali. Eir ia ndia au fee nenorik doon seli ena laꞌe-neu dalan talo bee fo maso dadi miu Lamatuak nufanelun nara.
ACT 20:26 Huu naa de nenene matalolole. Au tao akababasak au ue-osang soa-neu ei ena. De hatematak ia ei mesa ngga ndia muste tao ue-osa ia nakandoo. Mete ma hambu hatahori numa ei mai, fo ta maso dadi neu Lamatuak nufanelun, na, ei ndia maselu-mataa! Au salang ta naa. Masaneda matalolole, ee! Au afada memak basa Lamatuak hihii-nanaun nara neu ei ena. Ta hambu hata esa boe na fo au afunin neu ei. Dadi ei muste manea matalolole ei mesa ngga leleo-lalaꞌom, ma lopo-linu matalolole basa hatahorir fo Manetualain Dula-dale Malalaon nadenu ei manea. Boso lilii-ndondou te Lamatuak Yesus maten ena fo bae ketu hatahorir raa nenik Ndia daa heli-helin. Ana oo henggenee nala ei boe, fo ei loti-mete sara sama leo mana lolo lopo-linu ndia bibi lombon nara.
ACT 20:29 Dadi hatematak ia au laꞌo ela ei. Tehuu masanedak, ee! Neu ko hambu hatahori mai fo ranori sadi ndaa nai ei taladam mara. Ara mai sama leo busa kakikik kara, fo maso reni bibi lombo lalaen neu.
ACT 20:30 Hambu hatahori mana masapepekok leo naak numa dea mai. Tehuu masanedak, te hambu ketuk oo toda numa ei taladam mara mai boe. Ara fee nenori pepeko-lelekok neu ei. Ara nau fo hatahori tungga kada sira. Huu naa de ara soba-soba leꞌa hatahorir fo boso tungga Yesus bali.
ACT 20:31 Dadi ei muste manea matalolole ei aom. Boso lilii-ndondou, te au leo sama-sama ua ei doon teuk telu ena. Au oo fee nenori-nefadak soa-neu ei hatu-leledon, ma ta ameda au mamanggung boe. Au luu-oeng tuda noꞌuk ka ena, nahuu ei.
ACT 20:32 Hatematak ia ita tae tabinggak ena. Dadi au loo lima ei basa ngga meni Manetualain neu, fo Ana lopo-linu ei. Ma ei muste toꞌu mahere tebe-tebe basa hata fo au afada neu ei ena numa makasososan mai laꞌe-neu Manetualain dale susuen. Manetualain naena koasa fo fee bebeꞌi-barakaik neu ei. Ndia oo helu-bartaa ena fo fee babaꞌe-babatik neu Ndia hatahorin nara boe. Dadi mete ma ei tungga makandoo neu Ndia no dale lolo-laok, na, ei oo hambu Ndia babaꞌe-babatin boe.
ACT 20:33 Neu au tao ue-osang numa ei taladam mara, au ta dale hedi haꞌi ei hata-hetom esa boe na. Au ta soba oke ei bua lilo mbilam, do lilo fulak, do bualoꞌa-papakek, do sudi hata a mesan.
ACT 20:34 Ei oo bubuluk boe, neu au leo ua ei, au tao ues fafandek lima-eing mita fo au bisa asoda. Ta soa-neu kada au mesa ngga, tehuu au oo tao ue-osa fo fee neu sira mana tungga au, soda-ladan nara boe.
ACT 20:35 Dadi no basa dalak kara iar, au atudu dalak ena fo ei oo tungga tulu-fali neu hatahori kasian fo ta mana hambu daik kara boe. Masaneda matalolole Lamatuak Yesus kokolan nae, ‘Malole lenak ita fee lena heni ita simbo.’ ”
ACT 20:36 Paulus kokolak basa talo naa, boe ma ana sendek luu-langgan, de hule-haradoi sama-sama no sara, ma noke-hule fo Lamatuak nanea sira basa sara.
ACT 20:37 Boe ma basa sara dalen nara sona, nahuu Paulus kokolak ena nae, neu ko ara ta ratonggo ro ndia ena bali. Dadi neu ara rae rabinggak ena, boe ma ara holu rala Paulus de ara idun, ma ara buꞌi rasakekedun. Basa boe ma ara rafuli ai meni ofak miu.
ACT 21:1 Ai mateꞌa basa mia lasi-lasi Karisten nara maruma Epesus mai no dale sonak, boe ma ai saꞌe ofak, de makandoo meni pulu Kos miu. Neu beꞌe-main, boe ma ai losa pulu Rodos. Numa naa mai, ai saꞌe ofak makandoo meni kota namo-seseek Patara miu.
ACT 21:2 Ai konda numa ofak mai numa naa. Basa boe ma ai saꞌe lali ofak laen, fo mana neni profensi Fenisia neu deka no Siria. Ai saꞌe ofak naa, boe ma leꞌa naka tutik ka.
ACT 21:3 Ta dook ka boe ma ai mete-mita pulu Siprus nai ai boboa kiin, tehuu ai laꞌo selin, de makandoo losa ai toko naka neu numa kota Tirus, nai profensi Siria. Numa naa, ara rae rakonda ofak fufuan numa ofak naa mai.
ACT 21:4 Huu ara bei rakonda ofak fufuan, boe ma ai konda fo miu sangga hatahori kamaherek kara. Ai matonggo mia sara, boe ma ai leo mia sara doon menggu esa. Hatahori maruma naa, ara hambu netuduk numa Manetualain Dula-dalen mai fo kaꞌi Paulus rae, ana hae neni Yerusalem neu bali.
ACT 21:5 Tehuu basa menggu esa boe ma ai fali meni ofak miu. Basa hatahori kamaherek kara, inak ma touk, moꞌo-kadiꞌik, lasi-murik, ara rafuli ai losa nembe. Numa naa ai basa ngga sendek ai luu-langgan fo hule-haradoi sama-sama.
ACT 21:6 Basa boe ma ai mateꞌa, de ai hene ofak lain miu ma ara fali reu sara.
ACT 21:7 Ai saꞌe ofak numa Tirus mai, de ai tuli mesik kota Ptolemais. Numa naa ai konda numa ofak mai, de ai miu sangga matonggo mia hatahori kamaherek kara. Ai matonggo mia sara, de ai leo mia sara faik esa.
ACT 21:8 Neu beꞌe-main, ai makandoo numa naa mai, de ai losa kota Kesarea. Numa naa, ai leo taak numa Felipus uman. Ndia naa, ndia makasososan neni Lamatuak Tutui Malolen numa naa. Ndia ia oo hatahori esa numa hatahori kahituk kara mai boe, fo ara tengga rala sara baꞌe nanaꞌak soa-neu ina falur maruma Yerusalem.
ACT 21:9 Felipus ana feton haa. Manetualain pake sara dadi neu mana toꞌu dedeꞌak fo rafada Ndia hara hehelun.
ACT 21:10 Neu ai leo mia sara fai hida dalen ena, boe ma hatahori esa, nade Agabus, numa profensi Yudea mai. Lamatuak paken dadi neu mana toꞌu dedeꞌak fo nafada Ndia hara hehelun.
ACT 21:11 Ana nakandoo neni ai mai. Boe ma ana haꞌi nala Paulus kalikeen, de ana futu ndia lima-ei heli-helin pake kalikeek naa. De ana kokolak nae, “Manetualain Dula-dale Malalaon nae leo ia: ‘Kalikeek ia tenu enan, neu ko hatahori Yahudir futu-paꞌa rarabin leo iak nai Yerusalem. Basa, na, ara loo liman neni hatahori ta Yahudir neu.’ ”
ACT 21:12 Ai mamanene hatahori naa kokolak talo naa, boe ma ai basa ngga moke Paulus no neketakak, fo ana boso neni Yerusalem neu bali. Ai fo ndia dadi miu ana nunin ma hatahori kamaherek kara maruma mamanak naa mai, moke talo naa.
ACT 21:13 Tehuu ana naselu nae, “Taa! Tao hata de ei buꞌi talo naa? Ei tao mala au daleng dadi namabera. Talo ia! Hambu hatahori fo memak ta hii au, nahuu au tungga Lamatuak Yesus. Tehuu leo mae ara futu-paꞌa rarabi au, do hala risa au, do tao talo bee oo, au ahani a simbok ena boe.”
ACT 21:14 Neu ai bubuluk mae, Paulus ta nau namanene neu ai, boe ma ai mboꞌin talo naa de mae, “Neu! Ela kada Lamatuak hihii-nanaun ndia dadi.”
ACT 21:15 Ai leo basa faik hida dalen numa Kesarea ena, boe ma ai mafafaꞌu ai bua-baꞌum mara, de ai meni Yerusalem miu.
ACT 21:16 Hambu hatahori kamaherek hida ruma Kesarea mai oo, tungga sama-sama ro ai boe. Ara ro ai losa uma esa, de ai sunggu taak numa naa. Tenu umak, nade Manason. Ana numa pulu Siprus mai. Ma ana oo tungga Lamatuak Yesus dook ka ena boe.
ACT 21:17 Neu ai losa Yerusalem, basa toranoo hatahori kamaherek kara soru ai no dale nemehokok.
ACT 21:18 Neu beꞌe-main, ai basa ngga miu matonggo mia Yakobis. Basa lasi-lasi Karisten nara oo rakabua ruma naa boe.
ACT 21:19 Ai mafee hada-horomatak esa no esa, boe ma Paulus tui loa-narun laꞌe-neu basa hata fo Lamatuak taon nai bee a mesan soa-neu hatahori ta Yahudir. Nae, Lamatuak Yesus soi dalak ena fo ara ramahere neu Ndia. Ana oo tui talo bee de Lamatuak pake ndia, ma basa ndia nonoon nai ue-osa ia dale ena boe.
ACT 21:20 Ara ramanene rala Paulus tutuin naa, boe ma basa sara koa-kio Manetualain. Basa boe ma ara rafada Paulus rae, “Kaꞌa Pau! Sadi kada kaꞌa bubuluk, hambu hatahori Yahudi rifu-rifuk kara oo ramahere neu Lamatuak Yesus ena boe. Ara oo bei toꞌu rahere hohoro-lalanek kara fo baꞌi Musa nakondan fee ita.
ACT 21:21 Tehuu hambu hatahori fo neni dedeꞌa anik nai ia nae, kaꞌa soa nanori hatahori Yahudir nai mamanak laen nara mae, ara ta parluu tungga baꞌi Musa anggaman hohoro-lalanen nara bali. Ara oo tui boe rae, kaꞌa kaꞌi sara ena, fo hae sunat ana toun nara tungga dala-hadak. Ma kaꞌa oo kaꞌi fo hatahori saranik kara hae tungga ita hatahori Yahudir dala-hadan laen nara bali boe.
ACT 21:22 Masaneda, ee! Hatahori Yahudir neu ko ramanene rala rae, kaꞌa Pau nai ia ena. Ma hatahori mana mamanene dedeꞌa anik kara raa ena, neu ko ramanasa. De ita tae sangga dala sasain talo bee dei?
ACT 21:23 Dadi ai fee hahambuk talo ia: Hambu hatahori haa numa ai mai, fo rahelu-bartaak ro Lamatuak ena. Hatematak ia, ara rae keu ramboli heni langgan nara, fo tao tanda rae, sira tao rakababasak sira hehelu-bartaan ena.
ACT 21:24 Mete ma bisa, na, kaꞌa Pau maso sama-sama mua sara meni Manetualain Uma Huhule-haradoi Ina-huun dale miu. Kaꞌa oo tungga mua sara fo tao tungga dala-hadak tao nelao aok naa boe. Kaꞌa oo muste tanggon sira doi babaen, tao tungga dala-hadak naa boe. Mete ma kaꞌa tao talo naa, na, neu ko hatahorir bubuluk rae, kaꞌa bei toꞌu nahere anggama Yahudi hohoro-lalanen, fo baꞌi Musa nakondan fee ita. Ma ara oo neu ko bubuluk tutuik naa boe fo rae, kaꞌa kaꞌi hatahorir fo ara boso tungga hatahori Yahudi dala-hadan naa, basa naar ombo koson!
ACT 21:25 Tehuu soa-neu hatahori ta Yahudi fo namahere neu Lamatuak Yesus ena, ita haitua susurak fee sara ena. Ita tafada ita nekeketun fai maneuk kara naa ena tae, sira ta parluu tungga basa ita hatahori Yahudi hohoro-lalanen lalaꞌen. Hata fo ara muste rasanedak fo tao tunggan, ndia: Boso laꞌok sala mia ta ei sao toum do ta sao inam. Boso mabali mia bua sosonggok, ma boso miꞌa hata fo tao nunute toranoo Yahudir. Ndia: boso miꞌa mbaa sosonggok; boso miꞌa mbaa daa; ma boso miꞌa mbaa banda neni hese nisak fo daan ta kalua heni sana.”
ACT 21:26 Basa boe ma Paulus simbok no malole sira hahambun. De neu beꞌe-main, ana no hatahori kahaak kara raa sama-sama reni Uma Huhule-haradoi Ina-huuk reu, de ara tao ralao aon nara tungga anggama Yahudi hohoro-lalanen. Basa naa, Paulus nafada malangga anggama manai naa nae, bei faik hida bali, dei fo ara tao ratetu sira hehelu-bartaan. Mete ma faik naa basan ena, na, sira esa-esak muste neni ndia fefeen neu Lamatuak.
ACT 21:27 Neu sangga basa fai kahituk kara fo ara rahelu-bartaak tao rakababasak dala-hadak naa, hambu hatahori Yahudi hida ruma profensi Asia mai, mete-rita Paulus neni kota Yerusalem neu sama-sama no nonoon esa, nade Trofimus. Trofimus ia, numa kota Epesus mai, ma ndia hatahori ta Yahudi. De neu ara mete-rita Paulus maso neni Uma Huhule-haradoi Ina-huuk dale neu, ara rae hetu ko, ana oo noo nonoon Trofimus neni naa neu boe. Naa te hatahori ta Yahudi ta bole maso neni naa neu. Boe ma ara haꞌi rala ia dadi neu huun, fo tao dedeꞌak. De ara dudunggu hatahori numa naa, fo humu Paulus. Ma ara eki rafada neu hatahorir maruma naa rae, “Wee! Hatahori Israꞌel asa ein, ee! Mai fo tulun ai dei. Ndia ia, hatahori fo soa fee nenorik sudi nai bee nae, nggari heni ita dala-hada Yahudin leo. Ana oo kokolak ta neulauk laꞌe-neu Manetualain Uma Huhule-haradoi Ina-huun ia boe. Hatematak ia bali, ana maso fo nae tao nanggenggeo Lamatuak mamana malalaon ia!”
ACT 21:30 Ara ramanene talo naa, boe ma kota Yerusalem esa isin nara ramanasa ralan seli. Boe ma hatahori noꞌuk ka ralai rakarumbu reni Uma Huhule-haradoi Ina-huuk reu. De ara humu rala Paulus, boe ma ara leꞌa rorosok kana kalua numa Uma Huhule-haradoik naa dale mai. Basa boe ma ara kena risa basa lelesur.
ACT 21:31 Neu ara ramue fo rae hala risan, boe ma soldadu Roma komedan numa naa, nenene nemue-anggik naa.
ACT 21:32 Boe ma ana nanggou memak ndia soldadun ma komedan nara fo ara maso reni hatahori noꞌuk ka fo mana ramue-anggik kara reu. Neu ara mete-rita soldadu no komedan ina-huuk mai, boe ma ara raloe popoko Paulus.
ACT 21:33 Basa boe ma komedan naa humu nala Paulus, ma nadenu sara fo futun pake rante besi dua. Ara futu basan, boe ma ana natane hatahorir raa nae, “Hatahori ia, see? Ana tao sala hata?”
ACT 21:34 Tehuu ara ta raselu tungga kada hara esak ka. Hambu ketuk rae, “Ana tao talo ia ena.” Tehuu ketuk rae, “Ana tao talo naa ena.” De komedan naa langgan nabako. Ana ta bubuluk dedeꞌak naa huu-suꞌun, nahuu hatahori noꞌuk kara eki rame-rame. Huu naa de ana nadenu fo ara roo Paulus neni kota batu dale neu.
ACT 21:35 Soldadur leꞌa reni Paulus, tehuu hatahorir raa tungga sama-sama, ma ara tamba ramanasa de ara tao lelik bali. Neu ara rae hene heda-huuk, hatahorir raa nggefu mata reu. Losa soldadur muste ndoro reni Paulus, mita fo hatahorir raa boso ruꞌi rakalulutun. Boe ma ara eki tingga-tingga rae, “Tao misan! Tao misan!”
ACT 21:37 Neu ara rae maso reni kota batu naa dale reu, boe ma Paulus noke komedan naa pake dedeꞌa Yunani nae, “Papa! Au bisa kokolak faa dei, do?” Komedan namanene Paulus kokolak talo naa, boe ma ana nggengger, de natane nae, “O mala dedeꞌa Yunani boe de? Talo bee de o bisa kokolak dedeꞌa Yunani?
ACT 21:38 Mete ma talo naa, na, au akandandaa sala ena. Au duꞌa ae, o ia, ndia hatahori Masir fo fai maneuk kara ana dudunggu hatahorir fo ara tao nehuuk naa. Boe ma ana noo hatahori rifun haa mana toꞌu tandek fo reni mamana nees reu. Tehuu o ia, ta ndia hatahori naa, hetu?”
ACT 21:39 Boe ma Paulus naselu nae, “Taa, Papa! Au ia, hatahori Yahudi. Au inang bonggi au numa kota Tarsus, nai profensi Kilikia. Au hule papa fee au lelak, fo au bisa kokolak ua hatahori noꞌuk kara iar.”
ACT 21:40 Komedan naa nakaheik. Boe ma Paulus nambariik neu heda-huuk lain, de ana batak liman, hule fo ara nenee, fo ana nae kokolak. Basa boe ma ana mulai kokolak pake sira dedeꞌa Aram. (Te numa naa, hatahori Ibranir kokolak pake dedeꞌa Aram).
ACT 22:1 Boe ma Paulus mulai kokolak nae, “Papa sara ma basa toranoo nggara ein! Au hule ei nenene au, te au ae asalaꞌe au aong.”
ACT 22:2 Faik naa, hatahori noꞌuk kara ramanene Paulus kokolak pake sira dedeꞌa heli-helin. Boe ma ara benggenee neuk ka, fo rae ramanene ratalolole Paulus kokolan naa. Boe ma ana tutin nae,
ACT 22:3 “Sadi ei basa ngga bubuluk mae, au ia hatahori Yahudi. Au inang bonggi au numa kota Tarsus, nai profensi Kilikia. Tehuu au amoꞌo numa Yerusalem ia. Mana manori au, ndia meser ina-huuk manai ia, nade Gamaliel. Ana nanori au basa baꞌi Musa hohoro-lalanen, losa lutu-lelon. Au oo manggate tungga Manetualain, sama leo ei basa ngga ia boe.
ACT 22:4 Fai maneuk kara au ta hahae uu husi fo humu ma akasususak hatahorir raa fo mana tungga Yesus Eno-dala Masodan. Au leꞌa uni sara, touk ma inak, reni Yerusalem ia mai, boe ma tee sara reni bui dale reu. Faik naa oo hambu ketuk mate sara boe.
ACT 22:5 Ita malangga anggama malangga ina-huun, no malangga laen mana maole dedeꞌa anggama basa sara bubuluk rae, hata fo au kokolak ia memak tebe talo naa! Au ta ombo koson. Te sira ndia fee au susura koasa, fo uu humu ala hatahorir fo mana tungga Yesus losa kota Damsik. Numa naa, au ae humu sara, de ae leꞌa uni sara reni Yerusalem mai. Au nanaeng, na, mita fo hatahori mana maketu-maladi dedeꞌa anggama, ndia neu ko fee huku-dokik neu sara.”
ACT 22:6 Basa boe ma Paulus tuti kokolan nae, “De au laꞌo uni Damsik uu, fo ae sangga sara rai naa. Fama te ledo namatetu, ai sangga mae losa kota ena. Medak neu ma, manggaledok esa nanggadilak numa lalai mai, saꞌan tetar au.
ACT 22:7 De au lenggu uu daer, boe ma au amanene harak esa kokolak nae, ‘Hee, Saulus! Tao hata de o tao doidoso Au talo ia, ee?’
ACT 22:8 Memak au amanene harak naa, tehuu au ta mete-ita hatahori. Boe ma au atane ae, ‘Papa fo mana kokolak ia, see?’ Basa boe ma harak naa naselu nae, ‘Au ia Yesus, hatahori Nasaret, fo o tao Au doidoso!’
ACT 22:9 Hatahorir fo mana laꞌo sama-sama ro au, mete-rita manggaledok naa, tehuu ta ramanene harak naa.
ACT 22:10 Boe ma au aselu ae, ‘Mete ma talo naa, na, hatematak ia au muste tao hata?’ Harak naa nafada nae, ‘Mambadeik leo, fo maso muni kota dale muu. Nai naa, dei fo Au afada basa hata fo o muste taok.’
ACT 22:11 Au amanene basa talo naa, boe ma ambadeik. Tehuu au ta mete-ita hata esa boe na ena, nahuu manggaledok naa saꞌan naꞌanda. De au nonoong nggara toꞌu rala au fo ara roo au maso uni kota Damsik uu.
ACT 22:12 Numa naa, hambu hatahori esa, nade Ananias. Hatahori ia dale ndoos, ma ana toꞌu nahere baꞌi Musa hohoro-lalanen nara. Basa hatahori Yahudir fo mana leo ruma kota naa hiin, ma ara oo fee hada-horomatak neun boe.
ACT 22:13 Ana mai sangga au, boe ma ana kokolak nae, ‘Kaꞌa Saulus! Malaak o matam fo mete-mita leo. Kaꞌa matan hai ena.’ Ana kokolak basa talo naa, boe ma au botik au matang, de au bisa mete-itan.
ACT 22:14 Basa boe ma ana nafada au nae, ‘Manetualain, fo ita bei-baꞌin nara hule-haradoi neuk naa, hatematak ia Ana here nala kaꞌa ena. Kaꞌa uen, ndia bubuluk no neulauk Ndia hihii-nanaun. Ma malela neu Yesus fo numa fai bakahulun mai, ita seseik kana tae, “Hatahori Malalaok”. Hatematak ia Lamatuak soi dalak ena fo kaꞌa mamanene aom numa Yesus mai.
ACT 22:15 Ndia mesa kana ndia here nala kaꞌa ena, fo laꞌo muu tui-bengga Ndia Tutui Malolen neu hatahorir sudi nai bee. Kaꞌa muste mafada basa hata fo kaꞌa mete-mita no mata heli-helim, ma basa hata fo kaꞌa mamanene numa Ndia mai.
ACT 22:16 Kaꞌa hae mahani doo-doo bali. Muu fo moke sara sarani kaꞌa leo! Fo dadi neu tanda nae, kaꞌa noke fo Lamatuak Yesus koka heni basa kaꞌa sala-singgom ena.’ ”
ACT 22:17 Basa de Paulus tuti kokolan nae, “Basa boe ma au fali uni Yerusalem uu. Faik esa, au uu hule-haradoi numa Uma Huhule-haradoi Ina-huuk. Neu au mulai hule-haradoi, Lamatuak fee ninitak neu au, nok bali meꞌis.
ACT 22:18 Au mete-ita Yesus. Boe ma Ana parenda au nae, ‘Hatematak ia o muste laꞌo ela kota Yerusalem ia leo! Hatahorir marai iar, ta nau simbok hata fo o fee nenorik laꞌe-neu Au.’
ACT 22:19 Tehuu au ta simbok parenda naa, nahuu fai bakahulun, malangga anggamar memak hii au. De au aselu ae, ‘Talo ia, Lamatuak! Sira basa sara bubuluk rae, fai maneuk kara, au ndia maso-kalua uma huhule-haradoik sudi nai bee, fo humu ma popoko basa hatahorir fo mana ramahere neu Lamatuak.
ACT 22:20 Ara oo bubuluk boe, neu ara toko risa Lamatuak nedenun, Stefanus, au numa naa, ma au oo akaheik boe. Neu ara raduduru batur fo toko neun, au ndia ator asa, ma anea sira badun.’
ACT 22:21 Leo mae au fee nesenedak talo naa, tehuu Yesus parenda seluk bali nae, ‘Boso bei maeok mata-matak kara bali! O laꞌo ela Yerusalem hatematak ia fo muu leo! Au ae adenu o muni dook ka muu, fo manori hatahori ta Yahudir.’ ”
ACT 22:22 Neu hatahori noꞌuk kara raa ramanene Paulus kokolak nae, Lamatuak nadenu ndia neni hatahori nusa-nusak laen neu ena, boe ma ara ta nau ramanene neu sana bali. Basa sara ramanasa, de ara eki rame-rame rae, “Boso mamanene hatahori ia bali! Hala misan leo! Ana ta nandaa nasoda ena.”
ACT 22:23 Ara eki talo naa, boe ma ara olu heni badun nara, ma ara raꞌu afu, de sonun lain neu, nahuu ramanasa ralan seli ena.
ACT 22:24 Neu komedan soldadu mete-nita nae, hatahorir raa tao nemuek talo naa ena bali, boe ma ana nadenu ndia soldadun nara fo leꞌa reni Paulus maso neni kota batu dale neu. Basa boe ma komedan nadenu sara filon, mita fo ana mboꞌa nae, ndia tao sala hata, de hatahori Yahudir rae hala risan.
ACT 22:25 Neu ara futu-paꞌa Paulus fo rae filon, boe ma ana natane nasafali soldadu naa nae, “Tungga man-parenda Roma hohoro-lalanen, bee ndia ndaa? Mete ma hatahori esa naena haak rau-inggu Roma, boe ma ana hambu dedeꞌak, na, ei muste taon talo bee? Ei popoko makahuluk kana, do, ei parisa makahuluk kana?”
ACT 22:26 Soldadu naa namanene nala naa, boe ma ana lai-laik neu sangga ndia komedan. De ana nafadan nae, “Papa! Hatahori ia, naena haak rau-inggu Roma. Dadi papa nae tao hata neun?”
ACT 22:27 Komedan namanene nala naa, boe ma mesa kana neu natane Paulus nae, “Rae, o maena haak rau-inggu Roma? Tebe, do?” Boe ma Paulus naselu nae, “Memak tebe! Au toꞌu haak naa.”
ACT 22:28 Basa boe ma komedan naa nae, “Au oo leo naak boe. Au bae ta baꞌu anak, dei de au hambu haak naa.” Tehuu Paulus naselu nae, “Soa-neu au, na, au ta bae hata-hata. Mulai numa inang bonggi au mai, au toꞌu haak naa ena. Au amang oo toꞌu haak naa boe.”
ACT 22:29 Neu ara ramanene rae, Paulus toꞌu haak rau-inggu Roma, boe ma soldadur raa rakadedeak, ma ara ta rambarani filon ma parisan ena. Komedan naa dadi namataꞌu, nahuu ana futu-paꞌa Paulus ena, ma ana bubuluk nae, ndia nggani seli hohoro-lalanek ena.
ACT 22:30 Neu beꞌe-main, komedan naa bei nau sangga bubuluk no tetuk dedeꞌak naa oka-huun talo bee. De ana nadenu ndia soldadun nara fo reu roke malangga anggama Yahudi malanggan nara ro basa hatahori moꞌo-inahuuk fo mana rasiꞌe raole dedeꞌa anggama Yahudi fo ara rakabua. Boe ma ana nadenu fo ara reu buka heni Paulus rante besin, fo roon neu nasare basa hatahorir raa.
ACT 23:1 Losa naa, de ara radenu Paulus fo nasalaꞌe aon. Boe ma ana mete namumula basa hatahorir raa, de mulai kokolak nae, “Toranoo nggara ein! Au ambariik nai ia no dale ndoos. Manetualain bubuluk nae, mulai numa au kadiꞌi anang mai losa faik ia, au daleng lolo-laok.”
ACT 23:2 Ananias fo malangga anggama Yahudir malangga ina-huun namanene Paulus kokolak talo naa, boe ma ana namanasa nalan seli. De ana fee parenda neu hatahorir fo mana rambariik deka Paulus nae, “Famba bafan!”
ACT 23:3 Boe ma Paulus bala Ananias nae, “Neu ko Manetualain famba balas o. Memak o hatahori dae-bafok rupak leo dii bei fo dama basa dean, tehuu ana dae edo nabolo dalen ena. O manggatuuk mai ia fo tao aom nok bali malalaok ia. Basa boe ma o mae huku-doki au tungga ita dala-hada hohoro-lalanen. Tehuu o mesa ngga ndia lena-langga hohoro-lalanek naa neu o madenu hatahorir raa famba au.”
ACT 23:4 Hatahori maruma naa ramanene Paulus kokolak talo naa, boe ma ara kaꞌi-oren rae, “Weeh! O ta mandaa kokolak talo naa, neu ita malangga anggaman nara malangga ina-huun ia!”
ACT 23:5 Boe ma Paulus naselu nae, “Tebe, do? Mete ma talo naa, na, au oke ambon, te au ta bubuluk ae, ndia naa, ita malangga anggaman nara malangga ina-huun. Memak Manetualain pake hatahori ena, fo surak nae, ‘Ei ta bole kokolak manggararauk neu ei malanggam mara.’ ”
ACT 23:6 Neu Paulus mete-nita hatahori mana maole dedeꞌa anggama naa, ana bubuluk nae, sira numa partei dua mai. Ketuk tungga partei Saduki, fo ara ramahere rae, hatahori mates ta bisa nasoda fali numa mamaten mai bali. Ara oo ramahere rae, ta hambu Manetualain atan nai nusa tetuk do inggu temak boe. Ma dula-dalek oo ta boe. Ketuk bali tungga partei Farisi, fo ramahere rae, neu ko Manetualain bisa tao nasoda falik hatahori mates sara. Ara oo ramahere boe rae, hambu dula-dalek ma hambu Manetualain atan nara nai nusa tetuk do inggu temak. Boe ma Paulus kokolak no nahere haran nae, “Toranoo nggara ein! Sadi ei basa ngga bubuluk mae, au ia, hatahori Farisi. Au amang ma au baꞌing nggara oo hatahori Farisir boe. Hatematak ia ei mae huku-doki au, nahuu au amahere ae, Manetualain bisa tao nasoda falik hatahori mates.” Neu Paulus kokolak talo naa, boe ma hatahori Farisir ro hatahori Sadukir raa mulai rareresi, losa dalen nara esa ta natoꞌu no esa ena. De hea baꞌe sara reu dua.
ACT 23:9 Hatahorir raa rareresi losa dadi mue-anggik. Basa boe ma meser hida ruma partei Farisi mai rambariik fo rasalaꞌe Paulus rae, “Hatahori ia ta sala! See bubuluk, fama te hambu dula-dalek, do, Manetualain atan esa numa nusa tetuk do inggu temak mai kokolak noon!”
ACT 23:10 Meser raa kokolak talo naa ena, tehuu sira nereresin tamba namoꞌo bali, losa komedan naa mulai namataꞌu. Ana duꞌa nae, boso losak ara poko-femba rame-rame rakamate Paulus. De ana nadenu soldadun nara konda fo leꞌa reni Paulus maso neni kota batu dale neu.
ACT 23:11 Neu leꞌodae, boe ma Lamatuak Yesus mai natudu aon neu Paulus. Ana tao natea Paulus dalen nae, “Pau! O boso mamataꞌu, ee! Hatematak ia o kokolak laꞌe-neu Au nai Yerusalem ia ena. Masaneda matalolole! O muste kokolak talo naa nai Roma boe.”
ACT 23:12 Neu beꞌe-mai huhuan, hambu hatahori Yahudi haa hulu lenak rala harak fo rae tao risa Paulus. Ara sumba-soo rae, “Ai ta nau miꞌa-minu, mete ma ai bei ta hala misa Paulus.”
ACT 23:14 Ara sumba-soo basa, boe ma ara reu rafada malangga anggama Yahudi malanggan nara ro lasi-lasi hadak Yahudir rae, “Papa nggara ein! Ai sumba-soo ena mae, ai ta nau miꞌa-minu, mete ma ai bei ta hala misa Paulus.
ACT 23:15 Ai hihiin talo ia: papa sara muste miu masare komedan, fo hulen ana no Paulus neni mamana neole dedeꞌa anggama neu. Tao nok bali papa sara rae parisa seluk ndia dedeꞌan. Dei fo ai tepa sara rai dalak, fo hala misa Paulus.”
ACT 23:16 Tehuu Paulus dadi toun esa namanene ara rala harak talo naa, boe ma ana nalaik neni kota batu dale neu fo nafada Paulus.
ACT 23:17 Paulus namanene basa dadin naa tutuin, boe ma ana noke nala soldadu pangga moꞌok esa, de nae, “Ia, au anang. O muan lai-laik neni o komedan neu. Fo ana nau nafada dedeꞌak esa.”
ACT 23:18 Boe ma soldadu pangga moꞌok naa no kanak naa neni ndia komedan neu. Ana tui nae, “Papa! Paulus fo ita okak naa, noke au fo au ua kanak ia neni papa mai. Ana nau nafada dedeꞌak esa fo nenenin seli.”
ACT 23:19 Basa boe ma komedan leꞌa neni kanak naa neni mamanak esa neu, de kada dua sara mesa kasa. De ana natane nae, “O nau mafada hata neu au?”
ACT 23:20 Boe ma kanak naa nafada nae, “Hambu hatahori hida rala harak ena fo rae hala risa toꞌo Pau. Ara rae mai roke papa, fo beꞌe-mai, na, papa no toꞌo Pau neni mamana neole dedeꞌa anggama neu. Ara tao nok bali ara nau parisa no lutu-lelon au toꞌong dedeꞌan.
ACT 23:21 Tehuu papa boso tungga sira hihiin. Te neu ko hambu hatahori haa hulu lenak rae tepa papa sara nai dalak, fo rae hala risa toꞌo Pau. Huu basa sara sumba-soo basa ena rae, ara ta nau raꞌa-rinu, mete ma ara bei ta hala risa toꞌo Pau. Hatematak ia basa sara maherek kara ena. Ara rahani kada papa nahara nae leo bee.”
ACT 23:22 Komedan naa namanene kanak naa tutuin, boe ma ana nafada neun nae, “O boso mafada esa boe na mae, o mai mafada au dedeꞌak ia.” Ana kokolak basa, boe ma nadenu kanak naa fali leo.
ACT 23:23 Basa boe ma komedan naa noke soldadu pangga moꞌok dua. Ana fee parenda neu sara nae, “Sadia mala soldadu anak natun dua; ma soldadu mana saꞌe ndara hitu hulu; ma soldadu mana toꞌu tee natun dua. Ei laꞌo memak liꞌu sio leꞌodaen ia, meni kota Kesarea miu.
ACT 23:24 Ei oo sadia ndara esa fee Paulus boe. Ei muste mian no matalolole losa nggubenor Feliks.”
ACT 23:25 Basa boe ma ana surak susurak fee nggubenor Feliks nae:
ACT 23:26 “Papa nggubenor Feliks, fo au fee hada-horomatak. Hara masodak numa au mai, Klaudius Lisias.
ACT 23:27 Hatahori fo au haituan neti hatematak ia, nade Paulus. Hatahori Yahudir toꞌu ralan, de ela baꞌuk ka ara hala risan ena. Faik naa, au soldadun nara leꞌa kalua henin numa hatahori Yahudir liman mai. Basa boe ma au bubuluk ae, ana toꞌu haak rau-inggu Roma.
ACT 23:28 Au nau bubuluk, tao hata de hatahori Yahudir rae hala risan. Huu naa de au uan neni hatahori Yahudir mamana neole dedeꞌa anggaman neu.
ACT 23:29 Tehuu ara ta hambu ana sala hata-hata. Memak ana ta tao manggarauk hata esa boe na. De hatahori ia ta bisa maso bui, ma ana oo ta nandaa hambu hukun mates boe. Naa te hatahorir maruma mamana neole dedeꞌa anggama naa rahuur, nahuu sira anggaman nenorin esa ta natoꞌu no esa. De au ua falik hatahori ia neni kota batu dale neu.
ACT 23:30 Tehuu neu beꞌe-main, au amanene ae, hambu hatahori Yahudir rala harak ena fo rae hala henin. Dadi au ndia fee parenda tutik ka fo roo hatahori ia neni papa neti. Au oo afada hatahori Yahudir fo mana radedeꞌa laban hatahori ia boe, fo ara mai rasare neu papa. Naa fo papa mesa kana ndia namanene ara nau rakasasaꞌek salak hata neun. Au susurang baꞌu kada naa. Makasi!”
ACT 23:31 Basa boe ma basa soldadur raa rahehere fo rakalalaꞌok sira komedan parendan leo. Leꞌodaen naa oo, ara roo Paulus losa kota esa, nade Antipatris boe.
ACT 23:32 Neu beꞌe-main, soldadu mana saꞌe ndarar roo Paulus losa kota Kesarea. Tehuu soldadu laen nara fali reni Yerusalem reu.
ACT 23:33 Neu ara losa Kesarea, boe ma ara reni susurak naa neni nggubenor neu. Ma ara loo lima Paulus neu nggubenor.
ACT 23:34 Nggubenor lees basa susurak naa, boe ma natane Paulus nae, “O ia, hatahori beek?” Boe ma Paulus naselu nae, “Au ia, hatahori numa profensi Kilikia mai, papa.”
ACT 23:35 Nggubenor namanene Paulus kokolak talo naa, boe ma ana bubuluk nae, Paulus memak toꞌu haak rau-inggu Roma. De ana kokolak nae, “Au ndia toꞌu parenda nai ia. Dadi au mesa ngga ndia neu ko aole o dedeꞌam. Tehuu ita muste tahani hatahorir fo mana rae radedeꞌa roo o naa, mai losa ia, dei fo au parisa o dedeꞌam.” Basa boe ma ana nadenu soldadur oka Paulus nai sira mamanan, nai uma bubua mana eko-feo nggubenor uma manen, fo bakahulun manek Herodes nambaririik kana.
ACT 24:1 Basa faik lima boe ma hatahori Yahudir fo mana rae radedeꞌa ro Paulus mai losa kota Kesarea. Nai hatahori mana mai kara raa hambu Ananias, ndia malangga anggama Yahudi malangga ina-huun. Malanggan laen nara oo tungga boe. Ara oo mai ro hatahori laen esa boe, nade Tertulus. Ndia naa, mana kokolak nalela dedeꞌak. Huu naa de ara paken fo ana dadi neu sira mana mambarii dedeꞌan, fo sara Paulus.
ACT 24:2 Neu basa hatahorir rakabua numa uma neole dedeꞌak ena, boe ma nggubenor nadenu roo Paulus maso neni dale neu. Boe ma Tertulus nambariik, fo nae kokolak nakatutudak Paulus. Ana fee hada-horomatak neu nggubenor, basa boe ma ana mulai kokolak nae, “Papa nggubenor fo au fee hada-horomatak! Doo basa ia, mulai numa papa toꞌu parenda nai ia, papa bubuluk nakahuluk ena hata fo neulauk fee ai. Ma papa oo tao neulauk matak noꞌuk ka ena, losa ai hatahori Yahudir bisa leo-laꞌo no mole-damek, nemehokok ma lino-lendek. Dadi ai nau pake fai lelak ia fo moke makasi noꞌun seli neu papa nggubenor. Te see bali ndia bisa tao neulauk basa naar sudi nai bee sama leo papa.
ACT 24:4 Au hae amanaru au kokolang, au kokolak tungga isi kekeꞌun leo. De au hule papa mamanene matalolole basa hata fo au nau afada laꞌe-neu Paulus ia.
ACT 24:5 Talo ia, papa. Soa-neu ai hatahori Yahudir, Paulus ia, nok bali hedis esa fo laꞌo ela mamanak esa lali neni mamanak esa neu. Ana hii laba ai anggaman, ma ana soa nakalulutu ai dala-hadan nai bee a mesan. Nai bee a mesan ana neu, na, ana tao hatahori Yahudir radedeꞌa esa no esa. Ndia ia, malanggan esa mana soa natanggela harak numa partei anggama fo mana tungga hatahori esa numa Nasaret mai, fo ai makaseseik kana mae, ‘partei Nasrani.’ Tehuu hata fo ara fee nenorik kara raa, nasala moꞌok no ai anggaman nenorin.
ACT 24:6 Hatahori ia soba nae tao nanggenggeo ai Uma Huhule-haradoi Ina-huu Malalaon ena, no dalak ana nuni hatahori dinitiur reni dale reu. Huu naa de ai humu malan. [Tungga ai hihiim, ai nau huku-dokin tungga ai hohoro-lalane heli-helin.
ACT 24:7 Tehuu komedan Lisias mai leꞌa nalan numa ai liman mai.
ACT 24:8 Basa boe ma ana parenda nae, mete ma see nae nadedeꞌa sara Paulus, na, ana muste mai nasare neu papa nai Kesarea. Ana kokolak talo naa, mita fo nggubenor ndia naole matan dedeꞌak ia]. Dadi hatematak ia ai meni ia mai, fo papa parisa dedeꞌak ia. Dei fo papa mesa kana bubuluk mae, basa hata fo ai kokolak ia, memak tebe. Baꞌu kada naa. Makasi, papa.”
ACT 24:9 Tertulus kokolak basa talo naa, boe ma hatahori Yahudi laen nara rakaheik tungga ndia kokolan rae, “Tebe, papa! Memak talo naa.”
ACT 24:10 Basa boe ma nggubenor dudu liman neu Paulus, de ana mulai kokolak nae, “Hatematak ia au fee lelak neu o fo masalaꞌe aom.” Boe ma Paulus nambariik, de ana mulai kokolak nae, “Papa nggubenor! Papa parenda nai ai profensin doo basa ia ena. Dadi papa bubuluk no tebe ai hatahori Yahudi nenggetuu-nemberiin nai ia ena. Huu naa de au ta amataꞌu asalaꞌe au aong nai papa matan.
ACT 24:11 Nai rarain fai salahunu dua maneuk kara ia, au uni Yerusalem uu fo hule-haradoi nai Uma Huhule-haradoi Ina-huuk. Papa bisa matane a leo neu hatahorir fo mana tungga hule-haradoi faik naa.
ACT 24:12 Numa Uma Huhule-haradoi Ina-huuk naa, au ta asimbo bafak ua hatahori esa boe na. Ma numa uma huhule-haradoik laen nara, au ta akabubua hatahorir fo fee sara tao mue-anggik. Leo naak oo numa Yerusalem boe, au ta tao nemuek hata esa boe na.
ACT 24:13 Tehuu hatematak ia hatahori iar rae rakatutudak au. Hata fo ara kokolak bebeik kara ia oo, ta naena bukti hata-hata boe.
ACT 24:14 Talo ia, papa nggubenor. Au muste manaku neu papa dedeꞌak esa. Au tungga partei beuk esa fo hatahorir seseik naden rae, ‘Lamatuak Yesus Eno-dala Masodan’. Au hule-haradoi neu Manetualain, sama leo au bei-baꞌing nggara hule-haradoi neun. Au oo tungga basa baꞌi Musa hohoro-lalanen nara boe, ma amahere tebe-tebe neu hata fo Manetualain mana toꞌu dedeꞌan lele uluk kara surak ela fee ai ena.
ACT 24:15 Au oo amahena neu Manetulain sama leo hatahori iar boe, fo hatematak ia rambariik rai ia fo ara sara au. Ai mamahere mae, neu ko Manetualain tao nasoda falik hatahori mates: leo mae hatahori neulauk, do hatahori manggarauk oo, sama a mesan boe.
ACT 24:16 Huu naa de au soa aote tebe-tebe, mita fo au bisa leo-laꞌo no dale ndoos nai Manetualain ma hatahori dae-bafok matan. No dalak naa, ta hambu hatahori fo bisa tao natuda au.
ACT 24:17 Au tao ue-osa teuk hida dalen numa dae Israꞌel dea, dei de au fali uni Yerusalem uu. Neu au mai, au uni doik fo hatahorir rakabubua rala, fo tulu-fali ai hatahori mana toꞌa taan nara. Basa boe ma au oo uni Uma Huhule-haradoi Ina-huuk uu boe, fo nau hule-haradoi, ma nau fee tunu-hotuk mata-matak kara neu Manetualain numa naa.
ACT 24:18 Neu au tao alao aong numa Uma Huhule-haradoi Ina-huuk tungga ai hadan hohoro-lalanen, boe ma ara mai fo rae humu au. Tehuu faik naa, ta hambu hatahori noꞌuk ruma naa, ma ta hambu mana tao mue-anggik hata esa boe na!
ACT 24:19 Maruma naa, kada hatahori Yahudi hida fo ruma profensi Asia mai, fo nau hule-haradoi numa naa boe. Dadi mete ma memak sira raena dedeꞌak ro au, na, muste sira ndia radedeꞌa ro au nai ia. Ta ndia papa sara iar!
ACT 24:20 Tehuu hatahorir raa ta mai. De papa matane sudik hatahori iar, au salang hata? Fai maneuk kara, neu ara parisa au numa mamana neole dedeꞌa anggama, ara ta hambu au salang esa boe na. Papa matane neu sara leo!
ACT 24:21 Fama te kada matak esak ka ndia tao sara ramue-anggik, ma ara mbera mete au matang. Neu au kokolak amabera au harang ae, ‘Ei nau huku-doki au, nahuu au amahere ae, Manetualain bisa tao nasoda falik hatahori mates!’ ”
ACT 24:22 Paulus kokolak talo naa, tehuu nggubenor Feliks oo bubuluk noꞌuk ka laꞌe-neu ‘Lamatuak Yesus Eno-dala Masodan’ ena boe, de ana nateꞌe nekebuak nae, “Talo ia! Au nau oke komedan Lisias, fo amanene ndia tutuin dei. Mete ma au kokolak basa uan ena, na, dei fo au bisa aketu-aladi dedeꞌak ia.”
ACT 24:23 Basa boe ma ana nadenu soldadu pangga moꞌok esa fo neu oka Paulus. Tehuu ana parenda fo mboꞌi fee lelak faa neu Paulus, ma boso kaꞌi nonoon nara fo mai raono-lalaun.
ACT 24:24 Nggubenor Feliks saon, hatahori Yahudi, nade Drusila. Seli faik hida, boe ma ana sangga fai lelak, fo ndia no saon rae kola-kola ro Paulus. De ana nadenu roo Paulus neu nasare sira dua sara. Boe ma Paulus nafada neu sara, dalan talo bee fo hatahorir bisa ramahere neu Yesus Karistus, ndia Hatahori fo Manetualain helu-bartaa memak kana numa lele uluk mai ena.
ACT 24:25 Ana oo nafada dalak talo bee fo hatahori bisa leo-laꞌo no ndoos, ma talo bee fo hatahori bisa nanea aon fo boso tao sala. Ana oo nafada boe nae, neu ko Manetualain nae huku-doki basa hatahorir. Neu Feliks namanene talo naa, boe ma ana namataꞌu nalan seli. De ana nafada neu Paulus, “Paulus. Dai ena. Losa kada ia leo! Ela hambu lelak, dei fo au anggou o bali.”
ACT 24:26 Faik naa, Feliks sangga dalak mita fo Paulus kosu doik neu ndia, fo ana nakamboꞌik kana. De ana kada noke Paulus nakandoo fo kola-kola noon.
ACT 24:27 Tehuu tungga dalak laen, nggubenor Feliks oo haꞌi hatahori Yahudi malanggan nara dalen boe. Huu naa de ana ta naketu-naladi lai-laik Paulus dedeꞌan. Ana ela dedeꞌak naa ende losa teuk dua dook. Basa boe ma hambu nggubenor beuk mai nggati Feliks. Ndia naden Parkius Festus. Tehuu ara oo bei oka raherek Paulus boe.
ACT 25:1 Lelek naa nggubenor beuk, Festus, lali neni Kesarea neu fo mulai nakalalaꞌok parenda. Ana leo kada faik telu numa naa, basa boe ma ana laꞌo nakandoo neni Yerusalem neu.
ACT 25:2 Numa naa, malangga anggama Yahudir malanggan nara ro ma malangga laen nara mai ratonggo fo ralela aok ro nggubenor beuk. Ara oo raseseik Paulus dedeꞌan numa sira kokolan dale boe.
ACT 25:3 Ara oo hule boe, mete ma bisa, na, nggubenor nadenu ndia hatahorin nara fo roo falik Paulus neni Yerusalem mai. Naa te ara rala harak ena fo rae hala risa Paulus nai dalak.
ACT 25:4 Tehuu nggubenor naselu nae, “Ama nggara ein. Talo ia. Elan numa naa fo ara okan nai Kesarea dei. Te au oo ae fali lai-laik naa uu boe.
ACT 25:5 Dadi mete ma hambu see numa ei mai ndia hambu koasa fo naole dedeak ia, na, ara bole laꞌok sama-sama ro au meni Kesarea miu. Mete ma memak hatahori ia tao salak hata-hata, na, ei bole madedeꞌa mian nai kada naa.”
ACT 25:6 Basa boe ma Festus leo doon fama te faik salahunu numa Yerusalem, dei de ana fali neni Kesarea neu. Faik naa, hambu hatahori Yahudi hida fo tungga roon losa naa. Neu beꞌe-main, boe ma nggubenor buka dedeꞌak naa. Ana nadenu sara roo Paulus maso mai nasare neun. Neu Paulus maso numa naa, boe ma hatahori Yahudir raa rambariik eko ralan, boe ma ara mulai ndae salak mata-matak kara neun. Tehuu ara ta bisa ratudu bukti esa boe na.
ACT 25:8 Basa boe ma Paulus nasalaꞌe aon nae, “Papa nggubenor. Au ta tao ita manggarauk hata esa boe na. Au oo ta tao dedeꞌak kara fo laban ai anggama Yahudin hohoro-lalanen boe. Au ta tao anggenggeo Manetulain Uma Huhule-haradoi Ina-huun nai Yerusalem. Ma au oo ta tao hata-hata fo laban man-parenda Roma hohoro-lalanen boe.”
ACT 25:9 Tehuu nggubenor nae sorodododo hatahori Yahudir fo haꞌi dalen. Huu naa de ana natane Paulus nae, “O duꞌa talo bee? O makaheik do taa, mete ma au aole o dedeꞌam ia nai Yerusalem?”
ACT 25:10 Paulus namanene nggubenor natane talo naa, boe ma ana naselu nae, “Papa nggubenor. Au ia rau-inggu Roma. De hatematak ia, au ambariik nai papa nggubenor numa man-parenda Roma mai matan fo mana naena haak naole au dedeꞌang tungga sira hohoro-lalanen. Dadi au ta nau uni Yerusalem uu, fo neketu au dedeꞌang nai naa. Papa bubuluk ena mae, au ta tao salak hata esa boe na, fo laban hatahori Yahudi iar.
ACT 25:11 Dadi mete ma memak au tao salak hata-hata, fo nandaa no hukun mates, na, au simbok. Tehuu mete ma hata fo ara kokolak naa, ta tetebes tungga Roma hohoro-lalanen, na, ta hambu esa fo bisa loo lima au uni hatahori iar uu. Ara kada sangga dalak, fo rae hala risa au no hie-hie a. De hatematak ia, tungga au haak, au oke akahehenek dedeꞌak ia neni mane ina-huuk keser nai mamanak mateꞌen neu, nai kota Roma. Naa fo mesa kana ndia naketu matan dedeꞌak ia!”
ACT 25:12 Nggubenor namanene Paulus noke talo naa, boe ma ana nakokola aok no ndia nonoon nara fo mana tungga raole dedeꞌak naa. Basa boe ma ana nafada Paulus nae, “Huu o moke makahehenek dedeꞌak ia neni keser neu, de o muste muni Roma muu.” Nggubenor kokolak basa talo naa, boe ma ana nateꞌe nekebuak naa.
ACT 25:13 Basa boe ma hatahori Yahudir manen, nade Agripa, no ndia fadi inan, nade Bernike reni Kesarea reu. Dua sara rae reu fee hada-horomatak neu nggubenor beuk.
ACT 25:14 Ara leo taak ro nggubenor Festus faik hida dalen. Laꞌe esa, Festus tui Paulus dedeꞌan neu dua sara. Ana nae, “Papa manek! Nai Kesarea ia, ai oka hatahori esa, nade Paulus. Fai bakahulun nggubenor raak ta hambu lelak naketu-naladi ndia dedeꞌan.
ACT 25:15 Bei lai-laik ia, neu au numa Yerusalem, malangga anggama Yahudir malanggan nara ma lasi-lasi hadak kara, mai tui Paulus salan. Basa boe ma ara roke au fo hukun ana.
ACT 25:16 Tehuu au afada sara ae, ‘Tungga man-parenda Roma hohoro-lalanen, au muste parisa akahuluk dedeꞌak naa, dei fo fee hukun nekeketun. Hatahori mana madedeꞌak kara muste rasasare matak dei. Au nau amanene sudik ei fee salak hata neun. Ma ana oo muste hambu lelak fo nasalaꞌe aon. Dei fo au bisa aketu-aladi dedeꞌak naa, ma fee huku-dokik hata neun.’
ACT 25:17 Basa boe ma neu au fali uni Kesarea mai, hambu hatahori Yahudi hida fo tungga ia mai. Neu beꞌe-main, boe ma au buka tutik dedeꞌak naa. Au adenu sara roo Paulus mai nasare au, mita fo au bisa amanene dedeꞌak ia nenggetuu-nemberiin.
ACT 25:18 Boe ma hatahori Yahudir rambariik, fo mulai hingga Paulus salan nara. Tehuu hata fo ara hinggak kara reu au naa, beran ta sama leo au duꞌak ena.
ACT 25:19 Sira hahambun ta sama laꞌe-neu kada sira anggama heli-helin. Ma ara rareresi laban neu Paulus laꞌe-neu Hatahori esa, nade Yesus. Tungga hatahori Yahudir raa, na, Yesus naa maten ena. Tehuu Paulus nahere tingga-tingga nae, Yesus naa, nasoda fali numa mamaten mai ena.
ACT 25:20 Ara rareresi talo naa, tehuu au hatahori beuk, de au ta bubuluk nau aketu-aladi dedeꞌa anggama ia talo bee. Huu naa de au atane Paulus ae, ‘Talo bee, leo au parisa o dedeꞌam ia nai kada Yerusalem a leo?’
ACT 25:21 Tehuu ana ta nakaheik. De ana noke nakahehenek dedeꞌan nakandoo neni keser neu, nai mamanak mateꞌen. Huu naa de au oka aheren, losa au hambu lelak fo haituan neni Roma neu.”
ACT 25:22 Mane Agripa namanene Festus tutuin talo naa, boe ma ana nae, “Mete ma bisa, na, au nau amanene matang numa hatahori naa mesa kana mai.” Boe ma Festus naselu nae, “Bisa! Dei fo au aole fo beꞌe-mai papa bisa mamanene matam numa hatahori naa mai.”
ACT 25:23 Neu beꞌe-main, nggubenor Festus naole fo manek Agripa bisa namanene Paulus kokolan. Ana oo naole fo hatahori noꞌuk ka bisa ramanene Paulus boe. Sira: soldadur komedan nara, ma hatahori moꞌo-inahuuk kara ruma kota Kesarea mai. Basa boe ma manek Agripa no Bernike maso dale mai, ara rabua bua-loꞌa manek kara. Basa hatahorir maruma naa fee hada-horomatak neu dua sara. Neu basa sara rakabua ena, boe ma nggubenor nadenu roo Paulus maso neni dale neu.
ACT 25:24 Boe ma ara roo Paulus maso dale neu. De nggubenor mulai kokolak nae, “Manek Agripa, papa sara, ma basa fuik kara fo au fee hada-horomatak. Hatahori ia, naden Paulus. Hambu malangga hatahori Yahudi hida fo tao dedeꞌak roon. Basa boe ma ketuk reni au mai, mae numa Yerusalem, do mae nai ia, fo rakatakak au rae, hatahori ia ta nandaa nasoda ena.
ACT 25:25 Huu naa de au parisan, tehuu au ta hambu ndia salan fo nandaa no hukun mates. Tehuu mesa kana noke aon nakahehenek ndia dedeꞌan neni mamanak mateꞌen neu, huu naa de nau ta nau, au muste haituan neni Roma neu.
ACT 25:26 Mete ma au haituan neu, neu ko au muste fee susura nekelalaꞌok esa. Tehuu hatematak ia, au muste surak hata fee mane ina-huuk? Huu naa de au akabua basa papa sara, fo tamanene neun. Ita tamanene talan ena, na, au amahena papa manek Agripa bisa tia-tamba duduꞌak neu au, mita fo au bisa surak hata fo ndaa no duduꞌa-aꞌafi neulauk fee neu mane ina-huuk. Au ameda ta malole, mete ma haitua dedeꞌak ia neni keser neu, tehuu ta afada hatahori ia salan hata. Au kokolang baꞌu kada naa. Makasi.”
ACT 26:1 Basa boe ma manek Agripa nadenu Paulus nae, “Hatematak ia o bisa masalaꞌe o aom. Ai basa ngga mahani a ena fo mamanene neu o.” Paulus batak liman, de ana kokolak nae,
ACT 26:2 “Papa manek Agripa fo au fee hada-horomatak. Au ameda aua, nahuu papa fee lelak neu au, fo bole tui fee papa sara basa hata fo hatahori Yahudi nakasasaꞌek salak neu au.
ACT 26:3 Au bubuluk ae, papa nalela no neulauk, ita hatahori Yahudir dala-hadan, ma laꞌe-neu ita masodan do mamaten. Dadi au oke papa mamanene matalolole neu au.
ACT 26:4 Mulai numa kadiꞌi anang mai, ara ranori au ena fo leo-laꞌo tungga ita hatahori Yahudir dala-hadan. Makasososan au hambu nenorik numa au nggorong; basa boe ma au uu fo sakola tamba numa Yerusalem bali. Hatahori Yahudir marai Yerusalem mara bubuluk au leleo-lalaꞌong, ma ara ralela tebe-tebe au.
ACT 26:5 Mete ma malangga anggamar nau, na, ara bisa tui rae, sira ralela au numa fai bakahulun mai ena. Te au ia oo, maso partei anggama Farisi ena boe. Basa hatahorir bubuluk rae, ai hatahori Farisi iar ndia toꞌu mahere hatahori Yahudi anggaman hohoro-lalanen basa-basan.
ACT 26:6 Au, ma hatahori Israꞌel numa leo kasalahunu duak kara mai, rahani taa-taa fo Manetualain tao natetu Ndia hehelu-bartaan. Hehelu-bartaak naa, Ana nafadan neu ita bei-baꞌin numa lele uluk mai ena. Dadi losa hatematak ia, ita basa ngga hule-haradoi hatu-leledon, mita fo Manetualain hehelu-bartaan naa, dadi leo. Hehelu-bartaak naa isin nae, neu ko Ana tao nasoda falik hatahori fo mana matek kara ena. Papa manek Agripa, fo au fee hada-horomatak. Huu au amahere ae, neu ko Manetualain tao nasoda falik hatahori mates, huu naa de ara radedeꞌa ro au. Au nau atane: tao hata de hambu ketuk numa ei mai fo ta nau mamahere mae, Manetualain bisa tao nasoda falik hatahori mana matek ena? Ana bisa!
ACT 26:9 Bakahulun memak au tao hata a mesan, fo laban ahere neu basa hatahori fo mana tungga Yesus, hatahori Nasaret.
ACT 26:10 Faik naa, malangga anggama Yahudir malanggan nara fee koasa neu au, fo au uu tao akasususak Yesus hatahorin nara sudi rai bee. Au humu ala sara, basa naa au leꞌa uni sara reni Yerusalem mai, fo tee sara reni bui dale reu. Au oo tungga aketu-aladi fo fee hukun mates sira hida boe. Au oo maso uni uma huhule-haradoik kara dale uu, fo tao doidoso hatahorin nara boe. Boe ma au akasetik kasa fo laka ta ralela Yesus. Laꞌe noꞌuk ka, au uu husi fo humu sara no dale nasak. Sadi au amanene hatahorir fo mana ramahere neu Yesus naa rai bee a mesan, leo mae losa nai nusa deak oo, au uu husi fo humu sara boe!”
ACT 26:12 Paulus tuti kokolan nae, “Laꞌe esa, malangga anggama Yahudir malanggan nara fee susura koasa neu au fo au uu husi fo humu Yesus hatahorin nara marai kota Damsik. De au uu.
ACT 26:13 Papa manek Agripa! Neu ai bei laꞌo numa dalak, nai rarain ledo namatetu, nggengger neu ma, hambu manggaledok esa numa lalai mai, saꞌan naꞌanda nalan seli, laꞌe au ma au nonoong nggara.
ACT 26:14 Ai basa ngga lenggu miu daer, nahuu manggaledok naa saꞌan naꞌanda. Basa boe ma au amanene harak esa kokolak no au, pake dedeꞌa Aram nae, ‘Wee, Saulus! Tao hata de o soa tao doidoso Au taa-taa? Susa laꞌe esak kana mete ma o soa kada laban taa-taa Au hihii-nanaung.’
ACT 26:15 Au amanene harak naa, tehuu au ta mete-ita hatahorin. De au atane ae, ‘Papa mana kokolak ia, see, ee?’ Boe ma harak naa naselu mai au nae, ‘Au ia, Yesus, fo o soa tao doidoson taa-taa.
ACT 26:16 Saulus! Mambadeik leo! Au atudu aong neu o ia, fo o dadi muu Au hatahori nemehehereng. O muste muu mafada basa hatahorir, hata fo o mete-mitan numa au mai faik ia ena. Dei fo Au atudu seluk o bali dedeꞌa beuk kara, fo o bisa muu mafada neu basa hatahorir.
ACT 26:17 Neu ko o hambu susa-sonak mata-matak. Tehuu Au anea o numa hatahorir fo mana rae tao rakasususak o, leo mae hatahori Yahudir, do hatahori nusak laen nara. Tebe! Au adenu o muni hatahori ta Yahudir muu.
ACT 26:18 O muu tao malaak matan nara, mita fo ara bubuluk, ma ara leo-laꞌo rai manggaledok dale. Basa boe ma ara laꞌo ela sira leleo-lalaꞌo kilu-kain nara. Ma o muste matudu sara eno-dala masoda ndoos boe. O makamboꞌik kasa numa nitur malangga ina-huun koasan mai, basa naa mua sara reni Manetualain reu. No dalak naa, Manetualain koka heni basa sala-singgon nara lalaꞌen. Ara oo dadi reu Manetualain hatahorin boe, sama-sama ro hatahori laen fo Manetualain here nala sara ena, nahuu ara ramahere neu Au. Baꞌu kada naa fo Au afada neu o, Saulus!’ ”
ACT 26:19 Paulus tuti kokolan nae, “Dadi papa manek. Au akalalaꞌok au ue-osang fo au simbo matang numa nusa tetuk do inggu temak mai ena. Losa hatematek ia, au bei aue-osa akandoo, ta akadedeak faa boe na.
ACT 26:20 Makasososan au afada Yesus Eno-dala Masodan neu hatahori Yahudir marai Damsik. Basa boe ma au mai afada hatahori Yahudir marai Yerusalem, ma marai basa profensi Yudea. Basa boe ma au laꞌo ndule basa hatahori ta Yahudir nusan nara. Au kokolak no manggaledok neu basa sara, fo ara laꞌo ela sira leleo-lalaꞌo kasalan, ma ara loo lima aon nara reu Manetualain. Sira oo muste tao hata fo neulauk nai sira masodan dale soa-neu hatahori laen boe, fo dadi neu tanda nae, sira dadi reu hatahori beuk kara nai Lamatuak dale ena.
ACT 26:21 Huu au tao ue-osa talo naa, boe ma hatahori Yahudir humu rala au numa Uma Huhule-haradoi Ina-huuk, numa Yerusalem. Ara oo rae hala risa au boe.
ACT 26:22 Tehuu Manetulain tulu-fali au. Huu naa de au bei asoda losa hatematak ia. De au bisa ambariik nai ia, fo tui-bengga fee basa hatahorir, moꞌo-kadiꞌik, laꞌe-neu Yesus Eno-dala Masodan. Hata fo au afadak ia, basan nandaa no hata fo baꞌi Musa ma Manetualain mana toꞌu dedeꞌan lele uluk kara fee nenorik ena.
ACT 26:23 Ara fee nenorik laꞌe-neu Karistus, ndia Hatahori fo Manetualain helu-bartaa ena nae nadenun mai. Rae, ana muste lemba-nasaa doidosok, basa, na, Ana mate, tehuu basa boe ma Ana dadi neu hatahori makasososak fo Manetualain tao nasoda falik kana numa mamaten mai. Dei fo Ana ndia fee manggaledok neu hatahori Yahudir ma hatahori nusa-nusak laen marai dae-inak.”
ACT 26:24 Paulus bei kola-kola fo nafada ndia ue-osan, tehuu Festus nasambori kokolan no namabera haran nae, “Weeh, Paulus! Fama te o mamulu ia ena. O malela mala noꞌun seli, de tao mala o utem kokohii.”
ACT 26:25 Tehuu Paulus naselu nae, “Papa nggubenor fo au fee hada-horomatak. Au ta amulu. Basa hata fo au afadak kara ia memak tebe. Au ta ade bafa-maang.
ACT 26:26 Papa manek Agripa mesa kana bubuluk no tebe hata fo au kokolak ia. Huu naa de au ambarani kokolak no ledo-ledo. Au amahere ae, papa manek namanene basa dedeꞌak kara ia ena, nahuu hata fo mandadik kara raa ena, ta dadi numa mamana nees. Rae, Yesus fo mana matek nasoda fali numa mamaten mai ena. Basa hatahorir oo bubuluk dedeꞌak naa ena boe.
ACT 26:27 Numa lele uluk mai, Manetualain mana toꞌu dedeꞌan nara rafada memak dedeꞌak ia ena. Au ambarani ambedak ae, papa manek oo namahere mana toꞌu dedeꞌak kara raa kokolan boe, hetu?”
ACT 26:28 Manek Agripa nggado tutik Paulus kokolan nae, “Wee! Paulus! Doo-doo bali te o tao mala au dadi uu hatahori Karisten ena!”
ACT 26:29 Tehuu Paulus naselu neu manek nae, “Talo ia, papa. Au hule-haradoi neu Manetualain, mita fo lai-lai, do dook, ta kada papa manek mesa kana, tehuu basa hatahorir fo faik ia ramanene au kokolang ia, ara bisa dadi sama leo au, ndia Yesus hatahorin! Tehuu sadi papa sara boso dadi hatahori neni okak sama leo au ia.”
ACT 26:30 Paulus kokolak basa talo naa, boe ma manek Agripa no ndia fadin Bernike, nggubenor Festus, ma basa malangga ina-huun nara rambedeik fo fali reu sara.
ACT 26:31 Neu ara laꞌo dea reu, hatahorir raa rakokola aok rae, “Hatahori ia ta tao hata esa boe na, fo nandaa no hukun mates, do teen neni bui dale neu!”
ACT 26:32 Basa boe ma manek Agripa nafada nggubenor Festus nae, “Kasian, ee! Hatahori ia noke nakahehenek dedeꞌan neni mamana mateꞌen nai Roma neu ena. Mete ma taa, na, dedeꞌak ia bisa basan ena, ma bisa nekemboꞌik ndia leo.”
ACT 27:1 Basa boe ma nggubenor Festus naketu fo haitua Paulus neu nasare mane ina-huuk nai Roma, fo naketu Paulus dedeꞌan nai naa. Boe ma ana loo lima Paulus no hatahori bui laen hida bali reni komedan soldadu esa neu, nade Yulius, fo noo sara reni profensi Italia reu. Yulius naa, komedan esa numa soldadu mana manea keser mai.
ACT 27:2 Faik naa, au (ndia Lukas) tungga ua Paulus neu. Bei hambu seluk toranook esa bali, hatahori Makedonia numa kota Tesalonika mai, nade Aristarkus, ana oo tungga neu boe. Ai basa ngga saꞌe ofak esa numa kota Adramitium mai. Tungga nanaen, ofak naa neu ko tuli-tuli mamanak noꞌuk ka nai profensi Asia.
ACT 27:3 Ai saꞌe ofak laꞌo ela Kesarea, de neu beꞌe-main, ai losa kota Sidon. Komedan Yulius tao Paulus no malole, ma nafada Paulus fo ana bole neu tiro-dangga nonoon nara nai mada lai. Nai ndia duduꞌan, mita fo ara bisa fee Paulus sudi hata fo ana parluu nai tasi lai.
ACT 27:4 Basa boe ma ai basa ngga hene fali ofak lain miu fo mulai laꞌo. Tehuu ani soru nakarumbu nalan seli, losa ofak naa sangga nae ta laꞌo matak. Boe ma ara pale ofak fo laꞌo tungga pulu Siprus no Siria kabin, mita fo ai bambi numa ani soru mai.
ACT 27:5 Numa naa mai, ai fee ofak tepa nesik tasi mana nai profensi Kilikia ma profensi Pamfilia matan. De ai losa kota Mira, nai nusak Likia. Losa naa, ai basa ngga konda laꞌo ela ofak naa.
ACT 27:6 Numa Mira, komedan Yulius sangga ofak laen fo mana nae neni Italia neu. De ana hambu ofak esa, manuma kota Aleksandria mai, fo nae neni Italia neu. Boe ma ana nadenu ai basa ngga fo saꞌe meni ofak naa lain miu.
ACT 27:7 Ai saꞌe ofak faik hida dalen ena, tehuu ofak naa sangga nae ta laꞌo matak, nahuu ani soru nakarumbu nalan seli. De ai sota-mate dei de sangga deka kota Knidus. Tehuu anin bei nakarumbu nakandoo, de ai tepa meni pulu Kereta miu, mita fo ai bambi numa anin naa mai. Basa naa, dei de ai seli nggorosoon esa, nade Solmone.
ACT 27:8 Ai sota-bengge dei de seli heni nggorosoon naa, loro-loro pulu Kereta tasin tatain, de ai losa mamanak esa, nade Namo Malole. Mamanak naa deka no kota Lasea.
ACT 27:9 Numa naa, ofa isir hahae aon nara faa, nahuu ai numa ofa lai doon seli ena, tehuu ta bei losa Italia. Faik naa, hatahori Yahudir fai ina-huun Hambu Ambon neu Kilu-salak oo seli ena boe. Ndia sosoa-ndandaan nae, fai ani makarumbuk ma rii mambombonuk mulai ena. Basa boe ma ofa isir mulai ratatane aok rae, takandoo do bosok. Paulus namanene nala naa, boe ma ana mulai kokolak
ACT 27:10 nae, “Basa toranoo nggara ein. Au oke kokolak faa. Au duꞌa ae, mete ma ita takandoo, na, neu ko ita bisa hambu susa noꞌuk ka. Bisa-bisa ofak ia molo, de mopo bua-loꞌar, ma ita basa ngga oo bisa mate boe.”
ACT 27:11 Tehuu komedan soldadu naa ta nau nenene neu Paulus. Ana namahere lenak neu mana toꞌu uli, ma ofak tenu enan. Sira nanaen rae kalua laꞌo ela mamanak naa.
ACT 27:12 Huu Namo Malole naa ta linok, mete ma ofak muste see nai naa laꞌe fai tasi narii. Dadi sira noꞌuk ka nau ai makandoo fo meni kota Feniks miu. Ara ramahena mete ma bisa, na, ai basa ngga leo taak miu naa nai tasi bei namue ia. Kota Feniks naa, pulu Kereta namo-sesee malolen lenak, nahuu ana nai makabambik de ani muri-konas ma muri-kiis ta laꞌe sana, de ta hambu rii moꞌok.
ACT 27:13 Neu ani konas mulai fino-fino, ara beꞌek ka rae hambu anin naa ena fo ara bisa reni Feniks reu. Ara rae, “Ia anin malole. Mai fo ita saꞌe ofak leo!” De ara leꞌa naka ma ara leꞌa laa neu, boe ma ai saꞌe ofak loro-loro tasi tatain.
ACT 27:14 Ai bei ta mala dook ka, tehuu ani makarumbuk nggengger neuk ka ana mai. (Fo hatahori rae ‘ani dulu-kiis kadi’). Anin naa lemba neni ofak boꞌu-boꞌu ma laa-laa tasi taladan neu. Ofa isir ta bisa pale rala ofak no tetun, de ara mboꞌi ofak boꞌu-boꞌu ma laa-laa tungga kada anin hihiin.
ACT 27:16 Ai boꞌu-boꞌu ma laa-laa tungga kada rii talo naa, losa deka mia pulu anak esa, nade Kauda. Faik naa, ofak bei hela sakoci esa, talin neni paꞌak nai ofak ikon. De ai sota-mate leꞌa sakoci neni ofak lain neu.
ACT 27:17 Neu sakoci losa ofak lain ena, boe ma ara mulai fefeo tali ndule ofak naa aon fo ranea, boso losak ofak papan nara ratanggaa heni sara, boe ma molo. Ara oo ramataꞌu boe, boso losak rii tufa ofak fo ana hara neni meti sarakaek Sirtis nai Afrika naa neu. De ara rakonda naka mana laa-laak neni tasi dale neu, fo fee ofak nalaik koe-koe.
ACT 27:18 Ani makarumbuk naa rurua-mbembesi ai ofan kii-konak. De neu beꞌe-main, ofa isir mulai nggari heni ofak fufuan nara reni tasi dale reu.
ACT 27:19 Neu beꞌe-main bali, ani makarumbuk naa bei berak ka. De ara tamba ramataꞌu bali. Huu naa de ara boe nggari seluk ofak fufuan nara reni tasi dale reu, mita fo ofak nambadaku. Ofak buan nara oo, ofa isir nggari heni sara renik lima heli-helin nara boe.
ACT 27:20 Hatu-leledon, ani berak naa ta nakamate faa boe na losa faik hida dalen, sosoꞌa nggeok katen seli losa ai ta mete-mita ledo no nduuk kara. Ketu heni ai basa ngga nemehehenan ena, ma mameda mae, ai ta bisa masoda ena bali.
ACT 27:21 Basa faik hida ia dalen ena, ai ta miꞌa hata esa boe na. Boe ma Paulus noke nala basa sara, de ana kokolak nae, “Basa toranoo nggara ein! Soba leo ei tungga au kokolang fo ita ta laꞌo ela Namo Malole ena dei, na, hatematak ia ita ta hambu susa baꞌu basa ia, ma ta runggi hata-hata.
ACT 27:22 Tehuu hatematak ia, au oke neu ei basa ngga fo matetea ei dalem leo. Neu ko ita ofan ia nakalutu henin. Tehuu boso mamataꞌu, te ta hambu hatahori esa mate boe na.
ACT 27:23 Au nau fo ei basa ngga bubuluk mae, au ia Manetualain hatahorin, ma Ana fee au aue-osa soa-neu Ndia. Leꞌodaek ka, Ana nadenu Ndia atan esa numa nusa tetuk do inggu temak mai, de nambariik neu au boboang. Boe ma ata naa nafada au nae,
ACT 27:24 ‘Paulus! O hae mamataꞌu hata esa boe na. Neu ko o muste muu masare keser nai Roma fo naole o dedeꞌam. Huu Manetualain dale susuen neu o, de Ana oo tao nasoi-nasoda basa hatahorir marai ofak ia lain boe.’
ACT 27:25 De basa toranoo nggara ein. Ei dalem mara boso monda-maꞌa. Au amahere tebe-tebe neu Manetualain ae, hata fo Ana nafada neu au ndia leꞌodaek ka naa, neu ko ana dadi natetu talo naa.
ACT 27:26 Tehuu ofak ia neu ko ana hara nai pulu esa.”
ACT 27:27 Faik naa, rii-anin toko nakamiminak ai, de ai boꞌu-boꞌu ma laa-laa faik salahunu haa ena numa tasi Adria. Tehuu nai rarain fatilada, ofa isir rameda nok bali ai deka-deka mada lai ia ena.
ACT 27:28 Basa boe ma ara rakonda dodouk fo ara sangga bubuluk tasi oe deman. De ara uku hambu tasi oe deman reꞌa 20. Boe ma ofak mata neu faa bali, de ara rakonda seluk dodouk, de hambu tasi oe deman reꞌa 15.
ACT 27:29 Basa sara ramataꞌu boso losak ofak naa hara nala harik lain. De ara rakonda naka haa marai ofak ikon. Boe ma ai basa ngga mamahena fo fai manggaledo lai-lai.
ACT 27:30 Tehuu ofa isir rala harak fo rae ralai laꞌo ela ofak naa no neneek. De ara rakonda sakoci fo tao leo bali ara reu rakonda nakar marai ofak langgan.
ACT 27:31 Tehuu Paulus nafada ofa isir duduꞌa-aꞌafi manggaraun neu komedan no soldadur nae, “Mete ma ofa isir raa ta rahani kada ofak lain, na, neu ko ei basa ngga mate.”
ACT 27:32 Soldadur ramanene Paulus kokolak talo naa, boe ma ara tete ketu sakoci naa talin, fo elan ana boꞌu-boꞌu ma laa-laa. De ofa isir raa ta bisa ralai ena.
ACT 27:33 Neu fai sangga manggaledo, boe ma Paulus kokoe hatahorir raa fo basa sara raꞌa-rinu. Ana nae, “Menggu dua ia ena, ita kada nggua-nggua fo kada haradoi, ma ta isi ita poꞌon tenik hata esa boe na.
ACT 27:34 Dadi au hule mita fo ita taꞌa tala faa dei, fo ita bisa hambu falik ita barakain. Au amahere ae, neu ko ita esa ta hambu sosoek boe na. Au henggenee ae, ita basa ngga tasoda!”
ACT 27:35 Paulus kokolak basa talo naa, boe ma ana haꞌi roti. De ana hule-haradoi noke makasi neu Manetualain numa basa sara matan. Basa boe ma, ana haꞌi nala biak esa de naꞌa.
ACT 27:36 Ara mete-rita talo naa, boe ma dalen nara ratea rasafali. De ara oo raꞌa-rinu sama-sama boe. Basa ai manuma ofak naa lain, hatahori 276. Ai basa ngga miꞌa-minu.
ACT 27:38 Ai miꞌa-minu makabete mala, boe ma ara mulai nggari heni karo hade-nggandum mara reni tasi dale reu, fo soba tao ramadaku ofak naa.
ACT 27:39 Neu dulu silu ena, ofa isir mete-rita mada lai. Tehuu ara ta bubuluk pulu bee naa. Ara oo mete-rita tasi bafak esa fo tatain masarakaek. De ramahena, mete ma bisa, na, ara nau fee ofak naa nesik kada unuk kara huun fo neni tasi tataik naa neu.
ACT 27:40 Basa boe ma ara tete ketu nakar raa talin nara, de laꞌo ela sara reu tasi dale. Boe ma ara ratanggodo uli neni tasi dale neu, mita fo ara bisa rauli rala ofak naa. Basa de ara leꞌa laa anak manai mata neu, mita fo anin fuu ofak neni tasi tatain neu.
ACT 27:41 Tehuu ofak naa saꞌe nala unu sarakaek, dadi ana hara neu naa, de ana ta nakaundak nala ena. Boe ma rii mambombonuk tufa nakalutu ofak ikon.
ACT 27:42 Neu soldadur mete-rita mandadik naa, boe ma ara duꞌa rae hala risa basa hatahori buir raa. Te ara ramataꞌu, boso losak hatahori bui raa nane reni mada lai reu, fo ara nggefu laꞌo.
ACT 27:43 Tehuu komedan Yulius kaꞌi soldadun nara, nahuu ana nae tao Paulus hambu masodak. De ana fee parenda fo basa hatahori mana nane malelak kara boke reni tasi dale reu, fo nane reni mada lai reu.
ACT 27:44 Boe ma hatahori fo ta mana nane malelak kara, ana fee sara toꞌu papak do hata a mesan, fo rii tufa sara reni mada lai reu. Dadi ai basa ngga losa mada lai no sodak.
ACT 28:1 Neu ai basa ngga losa mada lai no sodak ena, dei de ai bubuluk mae, naa pulu Malta.
ACT 28:2 Nusak naa hatahorin nara simbok ai no malole. Faik naa udan mai ma anin makasufun seli, de ara ranaꞌa aꞌi mata moꞌok numa tasi tataik naa, boe ma roke ai miu dara aꞌi.
ACT 28:3 Paulus oo ana tungga neu hehere air fo nanaꞌa neu aꞌi boe. Tehuu neu ana ndae air raa reu aꞌi lain, nggengger neu ma mengge karasok esa kalua dea mai, nahuu ana ta nakataka aꞌi katobin. Boe ma mengge naa kiki nakadite neu Paulus liman.
ACT 28:4 Neu hatahori Maltar raa mete-rita mengge karasok naa doko-doko nakadite numa Paulus liman, boe ma esa kokolak no esa nae, “Hatahori ia, fama te hatahori kanisak. Leo mae ana hambu nekemboꞌik numa tasi manggaraun mai, tehuu naa memak ndia ua-nalen. Huu naa de ana ta bisa nasoda ena! See ndia tao manggarauk, na, ana muste lemba-nasaa nala ndia buna-boan.”
ACT 28:5 Hatahorir raa duꞌa rae, doo-doo faa te neu ko Paulus liman mbae, ma nggengger neu te maten. Tehuu Paulus birus heni mengge naa neni aꞌi dale neu. Ma ana ta nameda hedis faa boe na. De hatahorir raa rahani doo-doo faa, tehuu Paulus ta hata-hata. Boe ma ara duꞌa rae, “Fama te hatahori ia, dewa, ou!”
ACT 28:7 Ta dook ka numa mamanak naa mai, hambu nggubenor uman nara, ma dae loak. Nggubenor naa, nade Publius. Ana mai soru ai numa tasi tataik, de ana noke ai miu leo nai ndia uman. Numa naa, ana naono-lalau ai doon faik telu.
ACT 28:8 Faik naa, nggubenor ama bonggin hambu hedi sumaik, ma ana sali omba-lelan taa. Boe ma Paulus neu tiron numa kaman dale. Basa de Paulus ndae liman neu hatahori kamahedik naa, fo ana hule-haradoi feen. De ana hai neuk ka.
ACT 28:9 Neu ara mete-rita nggubenor aman hai, boe ma hatahori kamahedik laen reni Paulus reu. Ara hule Paulus fo tulu-fali sara, de ana tao nahai sara.
ACT 28:10 Basa boe ma hatahorir raa ratudu sira makasin no reni fee mudak ai buas noꞌun seli.
ACT 28:11 Ai leo numa Malta bulak telu, losa fai rii ma ani makarumbuk hahae. Faik naa, hambu ofak esa numa kota Aleksandria mai fo ana see ena neu bei fai rii numa pulu naa. Ofak naa nade, Ana Duak, nahuu hambu patong dewa ana duak nai ofak naa langgan. Basa boe ma ai saꞌe ofak naa fo makandoo meni Roma miu. De ai mae hene ofak lain miu, boe ma hatahori Maltar ara reni fee ai lepa-nggees ma hata fo ai parluu nai ofa lai.
ACT 28:12 Ai ofam laꞌok koe-koe, basa de losa kota Sirakusa, nai pulu Sisilia. Ai nafu numa naa, doon faik telu.
ACT 28:13 Numa naa mai, ai loro-loro Sisilia tasi tatain, de ai losa kota Regium. Neu beꞌe-main, ani konas nakarumbu, de ai ofam laꞌok lai-lai hiek. Neu bei-nesan, ai losa kota esa namo seseen, nade Putioli.
ACT 28:14 Ai konda laꞌo ela ofak naa, numa naa. Basa boe ma ai miu sangga Yesus hatahorin maruma naa. Neu ai matonggo mia sara, boe ma ara roke fo ai miu leo mia sara. De ai leo taak numa naa, menggu esa. Basa boe ma ai laꞌo eik makandoo meni Roma miu.
ACT 28:15 Neu Yesus hatahorin nara marai Roma ramanene rae, ai mae meni naa miu, boe ma ara mai soru ai numa dalak. Ketuk ratonggo ro ai numa Pasar Apius; ketuk bali ratonggo ro ai numa mamanak esa, nade Uma Hahae Teluk. Neu Paulus mete-nita sara, boe ma ana noke makasi noꞌun seli neu Manetualain, ma dalen dadi natea.
ACT 28:16 Losa Roma, [soldadur tao hatahori buir maso reni bui dale reu]. Tehuu Paulus taa. Ara ratanggodon, fo ana bole seba uma esa. Numa naa, ana leo no soldadu esa fo ana nanea naheren. Sira dua sara liman beke serik neni paꞌa nekebuak kara pake rante besi.
ACT 28:17 Basa faik telu, boe ma Paulus noke lasi-lasi Yahudir maruma naa, fo mai ratonggo roon. Neu ara rakabua ena, boe ma ana nafada sara nae, “Basa toranoo nggara ein! Au nai ia, nahuu hatahori Yahudi malanggan nara humu rala au numa Yerusalem. De ara loo lima au uni man-parenda Roma neu. Naa te au ta tao salak hata esa boe na! Au ta tao hata esa boe na, fo laban ita hatahori nusa heli-helin. Ma au oo ta laban ita hada hohoro-lalanen boe fo ita simbon numa ita bei-baꞌin nara mai ena.
ACT 28:18 Man-parenda parisa au dedeꞌang numa naa ena. Tehuu ara ta hambu au salang esa boe na, fo ndaa no hukun mates. Huu naa de ara rae rakamboꞌik au ena.
ACT 28:19 Tehuu hatahori Yahudi malanggan nara ta simbo man-parenda nekeketun, fo rae rakamboꞌik au, huu naa de nau ta nau, au muste akahehenek dedeꞌak neni mamanak mateꞌen mai. Au tao talo naa, tehuu au ta aena duduꞌak fo ae kalaak au hatahori nusa heli-heling.
ACT 28:20 Dedeꞌak naa ndia tao, de au akabubua toranook kara nai ia. Mita fo ita bisa kola-kola laꞌe-neu hata fo hatahori Yahudir rahani a neun: ndia, ita basa ngga tamahena neu Manek fo Manetualain nae nadenun mai, fo tao nasoi-nasoda ita hatahori Israꞌel naa. Dedeꞌak ia ndia tao, losa ara paꞌa au pake rante besi ia.”
ACT 28:21 Basa boe ma ara raselu rae, “Losa hatematak ia, ai bei ta simbo susurak esa boe na numa Yudea mai, fo rafada toranook dedeꞌan ia. Leo naak oo, toranook kara maruma naa mai ta kokolak hata esa boe na laꞌe-neu toranook Pau boe.
ACT 28:22 Tehuu ai hii mamanene hata fo toranook namahere, nahuu ai mamanene sudi nai bee rae, hatahorir ta simbok hata fo hatahori partei Karisten nara fee nenorik. Tehuu ndia ndondoon talo bee, ai bei ta bubuluk. De toranoo tulun kokolak kana fee ai dei.”
ACT 28:23 Basa boe ma ara rala harak sama-sama de here rala faik esa, fo rae ratonggo seluk bali. Losa ndia fain, boe ma hatahori noꞌun seli mai de rakabua numa Paulus uman. Boe ma ana mulai tui fee sara laꞌe-neu Manetualain parenda-koasan. Basa boe ma ana pake lalanek noꞌuk ka numa baꞌi Musa susuran nara mai, ma numa Manetualain mana toꞌu dedeꞌan laen nara susuran mai, fo nae leꞌa-nore sara ramahere neu Yesus. Ana kokolak numa huhua anan mai losa ledo bobok.
ACT 28:24 Neu ara ramanene basa Paulus kokolan, boe ma ketuk ramahere, tehuu laen ta ramahere.
ACT 28:25 Sira esa nareresi no esa losa ketuk rae fali reu sara. Tehuu Paulus kokolak nae, “Memak ei nereresim ia, ndaa no hata fo lele uluk Manetualain Dula-dale Malalaon nafada baꞌi Yesaya
ACT 28:26 nae, ‘O muu mafada hatahori nusak Yahudi ia mae, “Neu ko ei mamanene taa-taa Au kokolang, tehuu ta malela faa boe na! Ei mete-mita taa-taa hata fo Au taok, tehuu ei ta tao matak hata-hata.”
ACT 28:27 Huu hatahori nusak ia dalen nara ratea ralan seli ena. Ndiꞌi doon nara ta nau ramanene ena! Ma sira matan nara rapopoke risak kasa ena! Ela sara ruma naa fo hae ramanene bali; Ma ela sara ruma naa fo matan nara hae mete-rita bali. Ma ela sara ruma naa fo dalen nara makiuk seku neu. Losa ara ta bubuluk dalak fali neni Au mai bali. De talo bee fo Au bisa tao alole sara bali?’ ”
ACT 28:28 Basa boe ma Paulus nateꞌe kokolan nae, “Dadi talo ia, toranoo nggara ein! Ei muste bubuluk mae, hatematak ia Manetualain oo sadia tao nasoi-nasoda hatahori nusa-nusak ta Yahudir boe, nahuu ara oo nau nenene neun boe.”
ACT 28:29 [Paulus nafada basa talo naa, boe ma hatahorir raa fali reu sara. Tehuu sira duduꞌan nara ta ratoꞌu, nahuu esa nareresi no esa.]
ACT 28:30 Paulus leo numa ndia uma seseban, losa teuk dua. Ana simbok no nemehokok basa hatahorir fo mana mai sangga ratonggo roon.
ACT 28:31 No dalak naa, ana hambu ombak fo ana tui sara Manetualain parenda-koasan, ma nanori sara Lamatuak Yesus Eno-dala Masodan. Ana nambarani kokolak no ledo-ledo, ma ta hambu kai-baak hata esa boe na. Papa Teofilus fo dale malole. Au tutuing losa kada ia ena. Makasi. Numa au mai, Lukas.
ROM 1:1 Susurak ia numa au mai, Paulus. Manetualain here nala au ena, fo dadi uu Yesus Karistus nedenun. Boe ma Ana soꞌuk nala au dadi uu Karistus neondan, fo uu afada hatahorir rai bee a mesan laꞌe-neu Ndia Hara Lii Malolen.
ROM 1:2 Lele uluk Manetualain koladu memak ena fo Ndia mana toꞌu dedeꞌan nara surak laꞌe-neu Hara Lii Malole naa nai Ndia Susura Malalaon. Nai Susurak naa, Manetualain helu-bartaa nae nadenu Ndia Anan Yesus mai fo dadi neu hatahori dae-bafok. Hatematak ia Ndia hehelu-bartaan dadi ena, nahuu Yesus mai ena, dadi neu hatahori dae-bafok numa mane Dauk tititi-nonosin mai.
ROM 1:4 Tehuu nesik dedeꞌak laen, Manetualain natudu bukti nae, Yesus Karistus oo dadi neu Ndia Ana heli-helin boe. Yesus Dula-dalen naa, tebe-tebe malalao ndoos, sama leo Manetualain. Ma Manetualain oo pake Ndia koasan fo tao nasoda falik Yesus numa mamaten mai. Huu naa de ita bubuluk tae, Manetualain Anan naa, ndia Yesus, ita Lamatuan fo naena haak parenda ita.
ROM 1:5 Yesus natudu dale susuen neu au, losa Ana here nala au dadi uu Ndia nedenun fo afada Ndia hara hehelun nai bee a mesan. Huu Ana nau fo hatahori ta Yahudir oo ramahere neu Yesus, ma leo-laꞌo tungga Ndia hihii-nanaun boe. Au oo nau fo basa hatahori nusa-nusak kara ramahere neu Karistus, ma leo-laꞌo tungga Ndia hihii-nanaun boe.
ROM 1:6 Leo naak oo no ei marai kota Roma boe. Ei numa hatahori nusa-nusak noꞌuk ka rai mamanak noꞌuk ka mai. Yesus Karistus here nala ei ena nae, “Mai leo! Mai maso dadi miu Au hatahoring!”
ROM 1:7 Huu naa de au haitua susurak ia soa-neu ei marai Roma, ma fee nesenedak ae, Manetualain sue-lai ei. Ana oo noke fo ei dadi miu Ndia hatahorin fo mana leo-laꞌo no lolo-laok boe. Au hule-haradoi fo Manetualain, ita Aman, ma Yesus Karistus, ita Lamatuan, ratudu Sira dale susuen nara, ma fee ei leo-laꞌo no lino-lendek ma mole-damek.
ROM 1:8 Au buka au susurang ia, ma oke makasi noꞌuk ka neu Manetualain, nahuu Yesus Karistus naue-osa nai ei dalem mara. Au oo oke makasi boe, nahuu hatahorir fo mana leo rai man-parenda Roma nusan lalaꞌen, ara kola-kola laꞌe-neu ei nemeheheren neu Yesus.
ROM 1:9 Au hule-haradoi ta amaketu soa-neu ei. Tebe! Lamatuak mesa kana bubuluk nae, hata fo au kokolak ia, tebe. Ana oo bubuluk au aue-osa no dere-dere hiek, fo afada hatahorir laꞌe-neu Ndia Anan Tutui Malolen boe.
ROM 1:10 Tungga-tungga au hule-haradoi, au oke-hule talo ia: “Lamatuak, au mesa ngga ta bubuluk eno-dalan talo bee. Tehuu mete ma Lamatuak nau, na, soi dalak fo au bisa uu tiro-dangga au nonoong nggara marai Roma.”
ROM 1:11 Au hule-haradoi talo naa, huu au daleng hihiik ka mete-ita ei, fo au bisa baꞌe fee ei Manetualain Dula-dalen koasan, mita fo ei dadi miu Manetualain hatahorin fo mana nakatataka no barakaik lenak.
ROM 1:12 Talo ia: mete ma au dadi neti fo leo ua ei, au nau atetea ei dalem, fo ei nemeheherem bisa tamba natea. Ma au oo nau fo ei matetea au daleng boe.
ROM 1:13 Toranoo susue nggara ein! Au hii fo ei bubuluk mae, laꞌe noꞌuk ka ena, au ae uu tiro-dangga ei nai Roma naa. Tehuu losa hatematak ia oo bei ta dadi boe. Mete ma au dadi neti, na, au amahena hambu hatahori noꞌuk ka bei ramahere ratea neu Karistus, sama leo nai mamanak laen nara. No dalak naa, au ue-osang neni buna-boak neulauk.
ROM 1:14 Leo mae talo bee oo, ameda au muste tui-bengga Lamatuak Hara Lii Malolen neu basa hatahorir boe. Leo mae hatahori mana pake dedeꞌa Yunani do, hatahori dinitiu mana pake dedeꞌak laen do, hatahori moꞌo-inahuuk do, hatahori kadiꞌik do, hatahori mana sakolak do, hatahori ta mana sakolak. Huu naa de au ahani a ae uni Roma naa uu ena fo tiro-dangga ei.
ROM 1:16 Au ta mae faa boe na laꞌe-neu Lamatuak Yesus Hara Lii Malolen. Mete ma hatahori namahere neu Manetualain, Hara Liik naa naena koasa fo tao nasoi-nasoda hatahori naa numa sala-singgon mai. Hatahori Yahudir bubuluk dedeꞌak ia rakahuluk, basa dei de hatahori nusa-nusak laen nara.
ROM 1:17 Hara Liik naa oo natudu Manetualain eno-dalan fo tao hatahori kasala-singgok dadi neu ndoos boe. Basa naar bisa dadi, sadi hatahori namahere neun. Sama leo neni surak nai Manetualain Susura Malalaon dale nae, “Hatahorir muste ramahere neu Manetualain dei, dei fo ara bisa malole roon. Mete ma ara leo-laꞌo ramahere neun, dei fo ara hambu masodak tetebes.”
ROM 1:18 Tehuu Manetualain nafada talo ia ena: hambu hatahorir ta tao matak neu Ndia. Ara tao dedeꞌa manggarauk mata-matak. De Manetualain ta simbok sira tatao-nonoꞌin nara raa. Nai hatahori iar dalen dale, ara bubuluk hata ndia ndoos ena. Leo mae talo naa oo, tehuu ara kada tao rakandoo hata fo ta ndoos boe. Ara oo fufudi-hohodo hatahorir boe, losa hatahorir raa ta bubuluk hata fo ta ndoos bali. Huu naa de Manetualain nae nakonda hukun neu sara numa lalai mai.
ROM 1:19 Hatahori iar ta hambu dalak fo rasalaꞌe aon, huu dedeꞌak kara fo mana tao hatahorir bisa bubuluk laꞌe-neu Manetualain naa, manggaledok ena. Te Ndia mesa kana ndia natudu ena na! Talo ia: mulai numa Ana nakadadadik lalai no dae-inak mai losa hatematak ia, mete ma hatahori nae bubuluk laꞌe-neu Manetualain aon, ma koasan ta mana ketuk, bisa a mesan! Leo mae Manetualain mesa kana ta neni nitak, tehuu ita hatahori dae-bafok bei bisa talelan numa hata fo Ana taok mai. Huu naa de au ae, hatahori manggarauk kara raa ta hambu dalak fo bisa rasalaꞌe aon bali rae, “Au ta alela hata-hata laꞌe-neu Manetualain.”
ROM 1:21 Leo mae ara bubuluk laꞌe-neu Manetualain, tehuu ara ta manaku neu Ndia rae, “Lamatuak naa, ita Manetualain!” Ara oo ta nau roke makasi neun boe. Boe ma duduꞌan nara ramue-anggik, losa ara ta ralela hata fo ndoos bali. Ara panggananaa ma tui lelik mata-matak kara laꞌe-neu Manetualain aon. Ma dalen nara dadi makiuk.
ROM 1:22 Sira esa-esak soa rakadedemak aon nara rae, “Au ia, hatahori fo mana nalela dedeꞌak noꞌuk ka!” Leo mae ara duꞌa talo naa, tehuu ndondoon ndia, sira iar, nggoa bebek leo kamba.
ROM 1:23 Boe ma ara ta nau rakaluku-rakatele neu Manetualain fo ta neni babanggak, huu ara rae, “Ai ta parluu Manetualain matak leo naak!” De ara mulai rakaluku-rakatele neu patong mata-matak kara, fo mata-aon nara leo hatahori dae-bafok. Basa naa, ara oo rakaluku-rakatele neu patong fo mata-aon leo mbuik, banda laen, losa mata-aok leo mengge boe. No dalak naa, ara timba heni Manetualain ta mana matek, fo nggatin no hata fo mana matek!
ROM 1:24 Huu naa de Manetualain lokombesi sara ruma naa, mita fo ara tao tungga kada sira hihii-nanaun. Ana ela sara fo tao tungga dala manggarauk mata-matak kara fo mana raoka nai dalen nara. Losa-losak ara ta rameda mae ena. Boe ma ara tao manggenggeok mata-matak kara neu ao-ina heli-helin nara, ma ara oo tao leo naak neu hatahori laen ao-ina heli-helin nara boe.
ROM 1:25 Nai sira dalen dale, ara bubuluk nenorik bee fo ndoos laꞌe-neu Manetualain, tehuu ara ta nau hosek. Duduꞌan nara rakalulutu ena, de ara duꞌa rae, “Malole lenak naa fo ai tao mata-matak kara, losa rakararafu, te ta hambu babala manggarauk hata esa boe na!” Ara rakaluku-rakatele neu hata fo Manetualain aduk kara, tehuu ta nau rakaluku-rakatele neu Manetualain fo mana adu basa hatar raa! Ara tao aon nara leo hatahori mana matu-matuk, naa te rouk, isin taa! Ndondoon ndia, ita hatahori dae-bafok ia muste koa-kio ma fee hada-horomatak neu Manetualain takandoo! Naa, dei fo nandaa!
ROM 1:26 No sira manggaraun naa, huu naa de Manetualain lokombesi sara fo ara tao manggenggeok tungga kada sira hihii-nanaun. Ara kada hohongge-lelena mata-matak kara, ma ta rameda mamaek. Sao inan nara ta hii sunggu-soro ro sao toun nara bali, tehuu ara hii kada bee fo ta randaa no hadak. Inak sunggu-soro no inak!
ROM 1:27 Touk kara oo leo naak boe! Ara ta hii sunggu-soro ro sao inan nara bali, tehuu sunggu-soro ro kada touk kara! Ta rameda mae faa boe na! Huu naa de ara hambu huku-dokik no mandaak! Ara sio laꞌo dook ka numa eno-dala ndoos mai ena.
ROM 1:28 Ara duꞌa rae, “Malole lenak hae takaesa to Manetualain.” Huu naa de Manetualain lokombesi sara fo tao tungga kada sira hihii-nanaun! De ara bubuluk kada duꞌa bee fo makararafuk a mesan! Boe ma ara tao basa hata fo nanunute hatahori!
ROM 1:29 Leleo-lalaꞌon nara sofek no manggarauk mata-matak kara. Ara ta ralela tao hata fo neulauk, tehuu tao kada manggarauk a mesan. Ara bare-naꞌo. Ara rambeda dalek. Ara soa mbiri hatahori. Ara rakanisa hatahori. Ara soa rareresi. Ara pepeko-leleko. Ara kedi-ira. Ara soa tui leli-belak.
ROM 1:30 Ara soa kokolak raboboo hatahori laen naden. Ara mburuk ro Manetualain. Sesesu taak kara. Ara soa rakadadaek hatahori. Ara soa rakadedemak aon nara. Ara soa sangga dala manggarauk mata-matak kara. Ara soa laban ina-amar.
ROM 1:31 Ara ta nau hata fo ndoos. Ara lena-langga sira hehelu-bartaa heli-helin, losa hatahori ta namahere sara bali. Ara ta ralela sue hatahori. Ara ta raena dale kasian faa boe na neu hatahori.
ROM 1:32 Ara bubuluk Manetualain hohoro-lalanen ena nae, hatahori fo mana tao manggarauk leo naak naa, nandaa hambu hukun mates. Leo mae ara bubuluk hohoro-lalanek kara raa ena, tehuu ara bei tao manggarauk lena-lenak kara. Ta kada leo naak, tehuu ara soa kada dudunggu hatahori laen, fo ara oo tungga tao manggarauk leo naak boe. Naa sudi selik kana ena!
ROM 2:1 O mamanene laꞌe-neu manggarauk mata-matak kara bebeik kara ia, hetu? Boe ma mete te o duꞌa mae, “Awii! Hatahorir raa manggaraun sudi selik kana ena!” Mete ma o duꞌa talo naa ena, na, besa-besa, ee! O mesa ngga oo manggarauk leo naak boe. Huu naa de o ta hambu dalak fo masalaꞌe aom mae, o ia, see. Mete ma o kokolak mae, hatahori laen nara manggarauk, de randaa hambu hukun, boso lilii-ndondou mae, o ndae salak neu o ao heli-helim boe. Huu o tao manggarauk talo naa boe!
ROM 2:2 Ita bubuluk mete ma Manetualain fee hukun hatahori fo mana tao manggarauk kara, na, Ana naketu dedeꞌan nara no ta mbeu seserik.
ROM 2:3 Do, talo bee? Fama te o duꞌa mae, “Hatahori fo mana tao manggarauk kara, randaa hambu Manetualain huku-dokin.” Naa te o tao manggarauk sama leo sara. Tehuu nai o duduꞌam, o ta hambu Manetualain huku-dokin. Naa, ndia huun hata?
ROM 2:4 Manetualain natudu dale susuen neu o ena. Ma Ndia dalen loan seli laꞌe-neu o tatao-nonoꞌim. Tehuu tao hata de o ta hosek neu sana? Fama te o ta bubuluk mae, Ana natudu dale susuen neu o, mita fo o laꞌo ela o sala-singgom mara fo fali muni Ndia muu.
ROM 2:5 Tehuu o ia, langga batuk ma ta nau nenene! Ma o ta nau laꞌo ela o sala-singgom faa boe na! Dadi o tao mala o huku-dokim tamba nambera bali. Neu ko mete ma dae-bafok fai mateꞌen ena, na, Manetualain nae timba-tai basa hatahorir leleo-lalaꞌon nara. Neu ko basa hatahorir bubuluk rae, Manetualain naketu hatahorir dedeꞌan no ndoos. Faik naa, Ana hukun berak neu o, nahuu Ana ta simbok o tatao-nonoꞌin nara.
ROM 2:6 O leleo-lalaꞌom talo bee, na, neu ko Manetualain bala tungga hata fo o taok.
ROM 2:7 Hatahorir fo mana tao hata fo neulauk nakandoo, neu ko Ana fee sara masodak tetebes ta mana ketuk. Ara hambu hada-horomatak, nade malole, ma rasoda rakandoo ro Ndia.
ROM 2:8 Tehuu Manetualain ta simbok hatahori fo mana tao manggarauk. Ana namanasa sara tebe-tebe, huu ara ralela kada laban a mesan. Ara ta tao tungga hata fo ndoos, huu ara kada tao tungga hata fo manggarauk a mesan.
ROM 2:9 Basa hatahorir fo mana tao manggarauk kara, neu ko hambu susa-sonak ma sosoek. Leo mae hatahori Yahudi do, hatahori ta Yahudi, laꞌe basa sara.
ROM 2:10 Tehuu basa hatahorir fo mana tao hata fo neulauk, neu ko Manetualain nakadedemak kasa, ma fee sara hada-horomatak fo ara leo-laꞌo no lino-lendek ma mole-damek. Leo mae hatahori Yahudi do, hatahori ta Yahudi, basa sara hambu.
ROM 2:11 Te Manetualain ta memete matak na!
ROM 2:12 Manetualain Hohoro-lalanen naa, tuda laꞌe basa hatahorir. Mete ma hambu hatahori ta mana bubuluk Hohoro-lalanek naa, fo tao salak, neu ko ana lenggo feꞌe numa Manetualain mai. Mete ma hambu hatahorir bubuluk Hohoro-lalanek naa ena, tehuu ana tao salak, neu ko Manetualain pake Hohoro-lalanek naa bali, fo naketu-naladi ndia huku-dokin. Neu ko ara oo lenggo feꞌe numa Manetualain mai boe, nahuu ara lena-langga Ndia Hororo-lalanen ena.
ROM 2:13 Mete ma nau malole mia Manetualain, ta dai no kada nenene Ndia Hohoro-lalanen mesa kana. Hatahorir oo muste tao tungga Ndia Hohoro-lalanen boe, dei fo Ana nau simbok kasa. Boso kada mamanene a!
ROM 2:14 Leo mae hatahori ta Yahudir, ta bubuluk Manetualain Hohoro-lalanen isin, tehuu hambu ketuk numa sira mai tao tungga Hohoro-lalanek naa. Huu dalen nara ndia rafada sara, bee ndia ndaa, ma bee ndia sala.
ROM 2:15 No dalak naa, ara ratudu rae, Manetualain Hohoro-lalanen neni surak nai sira dalen dale, nok bali abas fo Manetualain tenu-lolon nai sira dalen. Sira dale heli-helin dale ndia timba-tai hata fo sira taok kara. Boe ma sira duduꞌan nara mesa kasa ndia rakasasaꞌek salak, mete ma sira tao salak, ma rafada mete ma sira tao ndoos.
ROM 2:16 De neu ko mete ma Manetualain soꞌuk nala Yesus Karistus dadi neu Mana Maketu-maladi Dedeꞌak ena, Ana nau parisa no lutu-lelon basa dedeꞌa nemeninok kara fo bei nefunik nai hatahorir dalen dale. Au fee nenorik talo naa, nandaa no manai Lamatuak Hara Lii Malolen.
ROM 2:17 Dadi ei hatahori Yahudir, talo bee? Ei hii soꞌuk aom mara mae, ei mesa ngga ndia toꞌu Manetualain Hohoro-lalanen fo Ana nakondan tungga baꞌi Musa, hetu? Ei oo soa mabafa loa laꞌe-neu ei nekeesam mia Manetualain boe.
ROM 2:18 Tebe! Ei bubuluk Manetualain hihii-nanaun ena. Ei bubuluk bee ndia neulaun lenak ena. Ei bubuluk basa dedeꞌak kara iar ena, nahuu meser asa ranori ei numa Manetualain Hohoro-lalanen mai ena.
ROM 2:19 Ei mamahere aom mara mae, ei bisa matudu dalak soa-neu hatahorir ta mana bubuluk rae bee reu. Ei tao aom mara nok bali manggaledok fo nasaꞌa soa-neu basa hatahorir fo mana leo-laꞌo nai makiuk dale.
ROM 2:20 Huu ei toꞌu Manetualain Hohoro-lalanen, ei duꞌa mae ei bubuluk basa-basan, ma toꞌu mala basa hata fo ndoos, hetu? Huu naa de ei duꞌa mae, ei bisa manori hatahori nggoa bebek ma kakana kadiꞌi anak kara fo ta mana ralela hata-hata.
ROM 2:21 Dadi au ae atane talo ia: ei hii manori hatahori laen nara, tehuu tao hata de ei mesa ngga ta nau manori hata-hata?! Ei hii hene mimbar fo parenda mae, “Boso mamanaꞌo.” Tehuu tao hata de ei mesa ngga mamanaꞌo?!
ROM 2:22 Ei fee nenorik mae, “Boso hohongge-lelena mia hatahori fo ta sao toum do ta sao inam.” Tehuu tao hata de ei mesa ngga hohongge-lelena?! Ei mburuk malan seli mia bua sosonggok kara, tehuu tao hata de ei mesa ngga panake mala buas ruma uma sosonggok mai?!
ROM 2:23 Ei kokolak maloloa bafam laꞌe-neu Manetualain Hohoro-lalanen, tehuu tao hata de ei mesa ngga lena-langga Hohoro-lalanek naa, ma makamamaek Manetualain talo naa?!
ROM 2:24 Boso tao sama leo fai bakahulun fo neni surak nai Manetualain Susura Malalaon nae, “No ei hatahori Yahudir manggaraum, huu naa de hatahori laen nara hii rakadadaek Manetualain nade malolen.”
ROM 2:25 Ei fo hatahori Yahudir muste sunat tungga Manetualain Hohoro-lalanen, hetu? Naa dadi tanda nae, ei maena haak simbo Manetualain hehelu-bartaan. Tehuu mete ma ei lena-langga Manetualain Hohoro-lalanen, na, Manetualain ta simbok ei. Ei dadi sama leo hatahori ta Yahudi fo ta mana sunat nitak.
ROM 2:26 Duꞌa matalolole! Mete ma hatahori fo ta mana sunat tao tungga Manetualain Hohoro-lalanen, na, neu ko Manetualain simbok nalan, leo bali ndia hatahori Yahudi fo mana sunat ena, hetu?
ROM 2:27 Tehuu besa-besa, ee! Mete ma hatahori ta Yahudir fo ta mana sunat, tao tungga Manetualain Hohoro-lalanen, na, neu ko ratudu hata? Ara ratudu ei salam mara rae, ei hatahori Yahudir fo mana sunat ena, lena-langga Manetualain Hohoro-lalanen, leo mae ei toꞌu Hohoro-lalanek naa numa lele uluk mai ena.
ROM 2:28 Boso duꞌa mae, hatahori fo mana dadi neu baꞌi Abraham tititi-nonosin, ma mana sunat nai rou deak ena, naa ndia tao ana dadi neu Manetualain hatahorin tebe-tebe. Taa!
ROM 2:29 Mana dadi neu Manetualain hatahorin tebe-tebe, ndia hatahori fo mana malole no Manetualain. Sunat tetebes fo tao nala hatahori dadi neu Manetualain anan naa, tandan ta nai rou deak, tehuu tandan nai dalen fo Manetualain Dula-dalen ndia taon. Manetualain ndia koa hatahori matak leo naak naa, ta hatahori dae-bafok ndia koan.
ROM 3:1 Mete ma talo naa, dadi miu hatahori Yahudi mana sunat naa, nanalan hata? Fama te ei duꞌa mae, hatahori Yahudi hambu noꞌun lenak ma neulaun lenak numa hatahori ta Yahudi mai, hetu?
ROM 3:2 Tebe! Dadi teu hatahori Yahudir, hambu nanalak nai matak noꞌuk ka. Kaesan, nahuu Manetualain fee hatahori Yahudir ues fo surak ma ranea ratalolole Ndia Dedeꞌa-kokolan.
ROM 3:3 De talo bee? Fama te ei duꞌa mae, Manetualain ta bisa tao tungga hata fo Ana kokolak, nahuu hatahori Yahudi ketuk ta ramahere neu Ndia, do?
ROM 3:4 Ta bisa dadi! Leo mae basa hatahorir marai dae-bafok ia mana pepeko-lelekok, tehuu Manetualain mesa kana ndia kokolak ndoos nakandoo! Masanedak, neni surak nai Susura Malalaok laꞌe-neu Manetualain aon nae, “Hambu hatahori fo ndae salak rae, Ana ta naketu dedeꞌak no ta mbeu seserik. Tehuu neu ko ara bubuluk rae, hata fo Ana kokolak naa, memak tetebes. Ana senggi, nahuu ta bisa dadi Ana kokolak sala.”
ROM 3:5 Mete ma ita tao salak, naa ndia natudu no manggaledon lenak neu basa hatahorir nae, hata fo Manetualain taok naa, memak tetebes. Mete ma talo naa, na, ita tae kokolak hata? Sangga tae, Manetualain mbeu seserik mete ma Ana hukun ita, do? (Te hambu hatahori ketuk kokolak talo naa na.)
ROM 3:6 Ta bisa dadi! Manetualain ta sala, mete ma Ana huku-doki ita. Huu Ana naena haak fo fee hukun neu hatahori fo mana tao salak nai dae-bafok ia.
ROM 3:7 Mete ma au ombo koson, naa natudu nae, Manetualain huku-dokin naa, tetebes. Mete ma au atudu Ndia ta neni babanggan talo naa ena, tao hata de Ana parisa au leleo-lalaꞌong, boe ma Ana naketu au dedeꞌang nae, hata fo au taok naa, sala?
ROM 3:8 Boso talo naa! Mete ma tungga duduꞌak talo naa, ei tungga hatahori fo mana nae, “Naa fo ita tao manggarauk noꞌun lenak, mita fo hata fo neulauk oo tamba namanoꞌu boe!” Hatahori fo mana kokolak talo naa, nandaa hambu huku-dokik. Hambu hatahori ketuk kokolak rakalulutu au nadeng rae, au anori hatahori talo naa.
ROM 3:9 Dadi talo bee? Ei duꞌa mae, ita hatahori Yahudir neulaun lenak numa hatahori ta Yahudir mai, do? Ta bisa dadi! Au atudu neu ei ena ae, basa hatahorir tuda salak, leo mae ndia hatahori Yahudi do, hatahori ta Yahudi.
ROM 3:10 Sama leo neni surak nai Manetualain Susura Malalaon nae, “Ta hambu hatahori fo leo-laꞌo ndoos seku neu. Ta hambu esa boe na!
ROM 3:11 Ta hambu hatahori mana bubuluk tebe-tebe laꞌe-neu Manetualain. Ta hambu esa boe na, fo sangga nalela Manetualain.
ROM 3:12 Basa sara sio laꞌo ela eno-dala masoda ndoos ena. Boe ma basa sara ta neni pakek kara ena. Ta hambu hatahori fo natudu dale susuek. Ta hambu esa boe na!
ROM 3:13 Kokolan nara raboo mburu, nok bali rates fo hatahori suu falik kana ena. Bafan nara ralela kada kokolak pepeko-lelekok. Dedeꞌa-kokolan fo mana kalua numa bafan nara mai, nok bali mengge rason.
ROM 3:14 Bafan nara ralela kada oꞌole-aꞌali hatahori, ma kokolak manggarauk fo kada rakahehedik hatahorir dalen nara, te naa ndia kalua numa dale kaboo mburun nara mai na.
ROM 3:15 Ara ta ramataꞌu rakanisa hatahori.
ROM 3:16 Ara bee reu, na, ara soa tao nemue-anggik nai naa, ma tao susa-sonak mata-matak kara neu hatahori.
ROM 3:17 Ara leo-laꞌo ta no mole-damek, ma ta nau leo-laꞌo no dale lino-lendek.
ROM 3:18 Ara ta rakatataka rala aon nara, nahuu ta rameda bibii-nemetaꞌuk faa boe na neu Manetualain.”
ROM 3:19 Ita bubuluk tae, Manetualain fee Ndia Hohoro-lalanen neu hatahori fo muste tao tungga Hohoro-lalanek kara raa. No dalak naa, ara ta bisa rasalaꞌe aon nara fo rae sira ta tao salak bali. Neu ko basa hatahorir marai dae-bafok ia muste rataa mbali Manetualain, fo Ana naketu-naladi sira dedeꞌan nae, sira sala, do taa.
ROM 3:20 Huu naa de ta hambu hatahori esa boe na bisa kokolak nae, “Manetualain henggenee nala au nae, hatahori dale ndoos, nahuu au tao tungga basa Ndia Hohoro-lalanen lalaꞌen.” Ta bisa! Huu Manetualain Hohoro-lalanen ndia natudu nae, ita basa ngga tao salak.
ROM 3:21 Boso panggananaa laꞌe-neu Manetualain nanaen fo natudu dalak soa-neu ita bisa malole fali to Ndia. Ndondoon ndia, ita bisa malole fali to Ndia, ta huu ita tungga Ndia Hohoro-lalanen. Ndia Hohoro-lalanen mesa kana ndia surak talo naa, ma Ndia mana toꞌu dedeꞌan lele uluk kara oo rafada talo naa nai Manetualain Susura Malalaon dale boe.
ROM 3:22 Manetualain henggenee nala ita dadi teu hatahori dale ndoos fo mana malole to Ndia, neu ita tamahere neu Yesus Karistus. Ana ta memete matak, te Ana tao talo naa soa-neu basa hatahorir fo mana ramahere neu Yesus.
ROM 3:23 Manetualain naa, malalaok. Ma Manetualain dudu-furan, ndia ita oo muste malalaok boe, dei fo Ana bisa simbo nala ita. Tehuu basa hatahorir tao salak. Huu naa de leo mae basa hatahorir soba-soba tao aon nara malole ro Manetualain, tehuu ita ta bisa nduku losa nai Manetualain dudu-furan fo demak mateꞌen naa.
ROM 3:24 Leo mae talo naa, tehuu Manetualain mesa kana ndia natudu Ndia dale susuen ma naketu-naladi nae, ita ta sala ena. Ana simbok nala ita talo naa, nahuu Yesus Karistus tefa-soi nala ita numa ita sala-singgon nara mai ena.
ROM 3:25 Manetualain henggenee nala Yesus ena fo dadi neu tunu-hotuk tatana mamaek, fo koka heni ita sala-singgon nara. Tehuu ita muste tamahere neun tae, Ana simbo nala ita huku-dokin. Dadi Ana fee daan titi, ma mate nggati ita. No dalak naa, Manetualain natudu nae, hata fo Ana naketu-naladi nalak naa, tetebes. Fai bakahulun, Ndia dalen loan seli, de Ana naketu fo lilii heni basa sala-singgok kara fo hatahorir taok ndia fai uluk. Tehuu mete ma Ana ta hukun hatahori kasalak, na, Ndia mbeu seserik. Dadi Ana soi dalak, mita fo Yesus Karistus bisa lemba-nasaa ita hatahori kasalak kara huku-dokin. Hatematak ia Ana natudu neu basa hatahorir nae, Ndia tao malole nakandoo. De basa hatahori kasalak kara, fo mana ramahere neu Yesus, Ana naketu fo henggenee nala sara sama leo hatahori dale ndoos.
ROM 3:27 Dadi talo bee? Fama te ei duꞌa mae, ei bisa kokolak maloloa bafam, nahuu Manetualain simbok nala ei ena, do? Ta bisa! Sangga matudu Hohoro-lalanek esa fo tao nala ei malole mia Manetualain, do? Ei duꞌa mae Manetualain simbok ei, nahuu ei tao hata fo neulauk, do? Ta bisa! Manetualain simbok ita, nahuu ita tamahere neu Yesus! Talo kada naa!
ROM 3:28 Huu naa de hatematak ia ita bubuluk ena talo ia: hatahorir bisa malole ro Manetualain, nahuu ramahere neun, ta huu ara tao tungga kada Ndia Hohoro-lalanen.
ROM 3:29 Dadi au ae atane talo ia: Manetualain simbok kada hatahori Yahudi do, Ana oo simbok hatahori laen boe? Tebe! Ana simbok basa sara!
ROM 3:30 Manetualain naa, kada esak ka. Ma hambu kada dalak esa ndia Ana simbon fo ita hatahori dae-bafok bisa malole toon. Ndia ita tamahere neu Karistus. Dalak naa soa-neu hatahori Yahudi ma hatahori ta Yahudi boe.
ROM 3:31 Dadi au ae atane talo ia: mete ma ita tamahere neu Manetualain, na, naa koka heni Ndia Hohoro-lalanen, do? Taa! Ndondoon ndia, naa tao natetu Ndia Hohoro-lalanen.
ROM 4:1 Dadi haꞌi netuduk numa ita hatahori Yahudir baꞌin, baꞌi Abraham mai. Ita bisa tanori hata numa ndia mai laꞌe-neu hatahorir dadi malole ro Manetualain, nahuu ramahere neu Karistus?
ROM 4:2 Ita bisa tanori talo ia: mete ma Abraham tao hata fo neulauk, de ana bisa malole no Manetualain, na, ana naena netehuuk fo kokolak naloloa bafan nai hatahori dae-bafok matan. Tehuu nai Manetualain matan, ana ta bisa kokolak hata-hata.
ROM 4:3 Sama leo neni surak nai Manetualain Susura Malalaon dale nae, “No Abraham namahere neu Manetualain, huu naa de Manetualain henggenee nalan dadi neu hatahori dale ndoos fo mana malole no Ndia.”
ROM 4:4 Hatahori mana maue-osa, simbo ndia nggadin. Nggadi naa ta doi fefee muda hiek, tehuu doik fo malanggan bae nggati hatahori naa sosota-mamanggun. Huu hatahori mana maue-osak haak naa.
ROM 4:5 Manetualain naena haak fo nae, hatahori fo mana namahere neu Yesus Karistus, bisa malole fali no Ndia, leo mae fai bakahulun hatahori naa, tao salak ma ta hosek neu Manetualain ena. Ta hambu dedeꞌak esa boe na fo hatahori bisa taon fo ana malole no Manetualain. Hatahori muste namahere neu Yesus Karistus, dei fo Manetualain henggenee nalan dadi neu hatahori dale ndoos ma simbok kana.
ROM 4:6 Mane Dauk oo nafada boe nae, hatahorir dalen mbena sau-sau neu Manetualain henggenee nala sara nae, sira iar, hatahori dale ndoos, leo mae ara ta tao hata-hata esa boe na. Dauk surak nae:
ROM 4:7 “Leo mae hatahori iar lena-langga Manetualain Hohoro-lalanen ena, tehuu Ana koka heni sala-singgon nara. Huu naa de ara raua ralan seli! Hatahori fo mana tao manggarauk kara, Manetualain lilii heni sala-singgon nara ena.
ROM 4:8 Mete ma Manetualain ta reke hatahori sala-singgon, na, hatahori naa naua tebe-tebe!”
ROM 4:9 Dadi fama te ei duꞌa mae, kada hatahori Yahudi fo mana sunat, ndia bisa naua fo ana malole no Manetualain, hetu? Ma hatahori nusa-nusak laen fo ta mana sunat, ta bisa, hetu? Taa! Duduꞌak leo naak naa, sala! Huu naa de ai fee nesenedak neu ei mae, nahuu Abraham namahere neu Manetualain, de Manetualain henggenee nalan dadi neu hatahori dale ndoos fo mana malole no Ndia.
ROM 4:10 Manetualain henggenee nala Abraham leo naak naa, ndia faik bee? Neu ana sunat basa ena, do neu ana bei ta sunat? Ndondoon ndia, ta neu ana sunat basa ena, tehuu neu ana bei ta sunat.
ROM 4:11 Tebe! Neu Abraham bei ta sunat, Manetualain henggenee nalan ena, dadi neu hatahori dale ndoos fo mana malole no Manetualain. Doo-doo dei de ana sunat fo dadi tanda nae, ndia dadi neu hatahori fo mana namahere neu Manetualain. No dalak naa, Abraham nasosoi dalak soa-neu basa hatahorir fo mana ramahere reu Manetualain. Manetualain simbok basa hatahorir fo mana ramahere reu Ndia fo ara malole roon, leo mae ara sunat, do taa.
ROM 4:12 Abraham oo nasosoi dalak fee ai hatahori Yahudir fo mana neni sunat boe. Ta huuai sunat, tehuu no ai mamahere Karistus, sama leo Abraham namahere Manetualain, neu ana bei ta sunat.
ROM 4:13 Manetualain ndara fangga hehelu-bartaak no Abraham ma tititi-nonosin nae, doo-doo te dae-bafok ia katematuan dadi neu sira pusakan. Manetualain helu-bartaa talo naa, nahuu Abraham namahere neun. De Manetualain henggenee nalan nae, hatahori dale ndoos fo mana malole no Ndia. Tehuu Manetualain ta helu-bartaa talo naa, nahuu Abraham tao tungga Ndia Hohoro-lalanen nara.
ROM 4:14 Mete ma hatahori fo mana tao tungga kada Manetualain Hohoro-lalanen bisa simbo nala pusaka fo Manetualain helu-bartaak naa, sosoa-ndandaan nae, nemeheherek neu Manetualain naa, hie-hie a mesan. Ma Manetualain hehelu-bartaan naa oo sosoan ta boe.
ROM 4:15 Nai bee fo hambu Manetualain Hohoro-lalanen, na, nai naa oo hatahorir lena-langga Hohoro-lalanek naa boe. Mete ma hatahori ralena-langga Ndia Hohoro-lalanen, na, Manetualain namanasa, de Ana huku-doki sara. Mete ma ta hambu Manetualain Hohoro-lalanen, na, ta hambu hatahori fo mana lena-langga Hohoro-lalanek naa.
ROM 4:16 Huu naa de ita muste tamahere neu Ndia. Naa, nenenin lena heni basa-basan. Manetualain hii natudu Ndia dale susuen no babalan taa soa-neu hatahori fo mana namahere neu Ndia. Mete ma ita tamahere neun sama leo Abraham, na, ita simbo tala hata fo Ana helu-bartaak, leo mae ita hatahori Yahudir fo mana ramahere ma bubuluk Ndia Hohoro-lalanen, do ta Yahudir. Dadi ita basa ngga mana mamaherek naa, sama leo Abraham tititi-nonosin.
ROM 4:17 Nai Manetualain Susura Malalaon dale, Ana helu-bartaa neu Abraham ena nae, “Au tao o dadi muu hatahori nusak noꞌuk ka bei-baꞌin.” Abraham namahere Manetualain. Doo-doo boe ma Manetualain tao natetu Ndia hehelu-bartaan naa. Ana ndia tao nasoda falik hatahori mates. No kada Ana kokolak, de hata fo ta hambu sana, ana dadi memak leo.
ROM 4:18 Abraham namahere neu Manetualain, ma ana nahanin taa-taa, leo mae ndia mesa kana bei ta naena anak. Huu naa de Manetualain taon dadi neu “hatahori nusak noꞌuk ka bei-baꞌin.” Naa, sama leo neni surak nai Susura Malalaok nae, “Tititi-nonosik noꞌuk ka neu ko dadi numa o mai.”
ROM 4:19 Abraham nemeheheren tean seli neu Manetualain, leo mae ana bubuluk ndia aon lasi nggoꞌo bauk ena, teun nara natun esa ena. Ma Sara ana manan nakatema ena, ma ndia oo lasi nggoꞌo-nggoꞌok ena boe.
ROM 4:20 Tehuu Abraham nemeheheren ta natanggenggo do, duꞌa nae, Manetualain ta bisa tao natetu Ndia hehelu-bartaan. Nemeheheren neu Manetualain boe natea neu ana nakadedemak Manetualain naden.
ROM 4:21 Abraham namahere tebe-tebe nae, hata fo Manetualain helu-bartaa nalan ena, Ana bisa tao natetun.
ROM 4:22 Huu naa de Manetualain henggenee nala Abraham dadi neu hatahori dale ndoos fo mana malole no Ndia.
ROM 4:23 Tehuu Manetualain Susura Malalaon nae, Manetualain ta reke leo naak soa-neu Abraham mesa kana,
ROM 4:24 tehuu soa-neu ita boe! Mete ma ita tamahere neun, na, Ana oo henggenee nala ita dadi teu hatahori dale ndoos fo mana malole to Ndia boe. Manetualain naa, ndia tao nasoda falik ita Lamatuan Yesus numa mamaten mai.
ROM 4:25 Yesus mate, nahuu ita ue-tao salak. Basa boe ma Ana nasoda fali numa mamaten mai fo nasosoi dalak, mita fo ita bisa malole fali to Manetualain.
ROM 5:1 Dadi no ita tamahere neu Manetualain, huu naa de Ana henggenee nala ita dadi teu hatahori dale ndoos. Boe ma ita dalen nara dadi lolo-laok ena soa-neu Manetualain, nahuu ita Lamatuan Yesus Karistus, ndia Manetualain nadenun mai ena, nasosoi dalak fo ita bisa mole-dame talo naa.
ROM 5:2 Karistus natudu Ndia dale susuen soa-neu ita talo naa, nahuu ita tamahere takahuluk neun. Huu naa de ita dalen nara bisa ratea. Ma ita dalen nara oo mbena sau-sau boe, nahuu ita bubuluk tae, neu ko Manetualain soꞌuk nala ita fo tameda tala Ndia ta neni babanggan.
ROM 5:3 Leo mae ita hambu tala susa-sonak mata-matak kara, tehuu ita dalen nara mbena sau-sau rakandoo. Ita bubuluk tae, ita tanori numa susa-sonak mai, fo ita bisa takatataka tala no bebeꞌi-barakaik lenak bali.
ROM 5:4 Mete ma ita takatataka tala nai susa-sonak dale, naa tao nala ita ta tuda, ma ita leleo-lalaꞌon tao namahoko Manetualain dalen. Mete ma ita leo-laꞌo no bebeꞌi-barakaik lenak talo naa, naa tao nala ita nemeheheren boe natea nae, neu ko Manetualain nau natudu Ndia dale susuen neu ita.
ROM 5:5 Mete ma ita nemeheheren boe natea talo naa, na, ita ta mae. Manetualain fee ita Ndia Dula-dale Malalaon ena, fo ita bisa bubuluk nai ita dalen dale tae, Ana sue nalan seli neu ita.
ROM 5:6 Ana natudu Ndia susuen talo ia: neu ita bei ta bisa tao ita aon malole to Manetualain, naa te Manetualain tengga nala fai fo mandaak esa, de Ana nadenu Karistus mai, fo mate soa-neu ita ta mana tao matak neu Manetualain.
ROM 5:7 Duꞌa matalolole dei! Hambu kada hatahori kikisek ndia mana sadia mate, nggati ndia nonoon fo madale ndoos. Fama te hambu hatahori ketuk sadia mate fo tulun hatahori fo madale susuek.
ROM 5:8 Tehuu Manetualain natudu Ndia susue-lalain sudi selik kana neu ita ena. Huu neu ita bei tao salak, Karistus mate soa-neu ita.
ROM 5:9 Manetualain henggenee nala ita dadi teu hatahori dale ndoos fo mana malole to Ndia, nahuu Karistus fee daan titi henin fo mate soa-neu ita. Naa te mete ma hatahori tao salak, na, Manetualain namanasa. Tehuu no kada Karistus tataon naa, ita fo mana tao salak ta hambu huku-dokik bali.
ROM 5:10 Fai bakahulun ita mana musuk kara to Manetualain. Tehuu Manetualain Ana heli-helin ndia mate fo tao nakasufu Manetualain dalen, mita fo ita bisa mole-dame to Manetualain. Dadi hatematak ia ita ta mana musuk kara ena, tehuu malole fali ena. Lena-lenak bali, nahuu Karistus nasoda fali numa mamaten mai ena, neu ko nai dae-bafok fai mateꞌen Ana oo tao nasoi-nasoda ita boe fo boso hambu Manetualain huku-dokin bali.
ROM 5:11 Ta leo kada naa! Ita dalen nara bisa mbena sau-sau tae, “Manetualain naa, ta neni babanggak sudi selik kana!” nahuu ita takaesa toon. Ita bisa dadi teu Ndia hatahorin, nahuu ita Lamatuan Yesus Karistus mate soa-neu ita ena, fo tao nala ita mole-dame to Manetualain.
ROM 5:12 Dadi numa lele uluk mai, hatahori dae-bafok makasososak, ndia baꞌi Adam, ndia mulai tao salak. Huu naa de Manetualain ta fee sana nasoda nakandoo. Basa de mulai numa faik naa mai, basa hatahorir marai dae-bafok ia oo tungga tao salak sama leo ndia boe. Huu ara tao salak sama leo ndia, de sira basa sara oo muste mate sama leo ndia boe.
ROM 5:13 Lele uluk neu Manetualain bei ta nakonda Ndia Hohoro-lalanen nara, hatahori tao salak nai ndule dae-bafok ia. Tehuu no bei ta hambu Hohoro-lalanek, ta hambu mana reke hatahori sala-singgon nara.
ROM 5:14 Numa baꞌi Adam mai, losa baꞌi Musa simbo Manetualain Hohoro-lalanen, basa hatahorir mate. Leo mae ara ta lena-langga Manetualain parendan, fo Ana feen neu Adam, tehuu ara bei tao salak mata-matak laen bali. Huu naa de ara muste mate sama leo Adam. Mete ma ita takasasamak baꞌi Adam no Lamatuak Yesus, hambu sama, ma hambu ta sama boe. Adam oo nok bali nggambar esa natudu Yesus mata-aon boe, fo neu ko ana sou mai.
ROM 5:15 Tehuu Adam ue-tatao salan, ta sama no Yesus ue-tatao neulaun soa-neu ita. Hatahori esa, ndia Adam, nalena-langga Manetualain parendan. Huu naa de basa hatahorir muste mate. Tehuu Hatahori esa bali, ndia Yesus Karistus, ue-tao neulauk mata-matak kara soa-neu ita, ma ta nahani hatahori bala Ndia neulaun. Hata fo Hatahori esa ue-tataon naa, dai ena soa-neu basa hatahorir, huu Manetualain hii tao kada neulauk soa-neu ita.
ROM 5:16 Hata fo Manetualain fee ita naa, ta sama leo salak fo hatahori esak naa, ndia Adam ue-tataon. Neu ana tao salak, Manetualain naketu nae, “O sala. Dadi o muste hambu huku-dokik!” Tehuu leo mae hatahorir tao rala salak noꞌun seli, Manetualain ndia parisa basa hatahorir leleo-lalaꞌon nara, bei nau natudu Ndia dale susuen, ma naketu nae, “Au henggenee o salam taa. Dadi hatematak ia o nekemboꞌik ena, ma huku-dokik ta laꞌe o ena bali. Mai fo malole fali mua Au!”
ROM 5:17 De hatahori esa, ndia Adam, tao salak, ma lena-langga Manetualain parendan. Huu naa de hatematak ia, basan muste mate. Tehuu Hatahori esa bali, ndia Yesus Karistus, ue-tao kada neulauk nakandoo. No Ndia ue-tatao neulaun naa, huu naa de ita bisa malole to Manetualain. Naa, nok bali buas esa, Ana feen no muda hiek kana neu ita. Ana nau fee ita masodak tetebes ta mana basak, sama leo ita dadi teu Manek nonoon nara.
ROM 5:18 Dadi no kada hatahori esa ue-tatao salan, nasosoi dalak fo basa hatahorir hambu husi-mbuuk numa Manetualain matan mai. Ma no kada Hatahori esa ue-tatao ndoon, na, nasosoi dalak fo basa hatahorir bisa malole fali ro Manetualain, fo rasoda tebe-tebe ro Ndia.
ROM 5:19 Talo ia: Adam naa, hatahori esa fo ta nau nenene Manetualain, boe ma nalena-langga Ndia parendan. Ma hatahori noꞌuk ka oo tungga tao salak sama leo ndia boe. Naa te Yesus naa, Hatahori esa fo nau nenene neu Manetualain, boe ma tao tungga hihii-nanaun. Yesus ndia nasosoi dalak fo hatahori noꞌuk ka bisa malole fali ro Manetualain.
ROM 5:20 Manetualain nakonda Ndia Hohoro-lalanen neu baꞌi Musa fo basa hatahorir bubuluk no tetuk, bee ndia sala. Tehuu nai bee a mesan hatahorir salan nara tamba ramanoꞌu, nai naa oo Manetualain natudu Ndia dale susuen lenak bali boe.
ROM 5:21 Fai bakahulun manggarauk manai hatahori dalen naena koasa fo koladu sara, losa ara tao salak mana neni hukun mates fo lenggo feꞌe numa Manetualain mai losa doon naa neu. Tehuu hatematak ia hata fo neulauk fo ita Lamatuan Yesus Karistus taok naa, Manetualain paken fo natudu Ndia dale susuen soa-neu ita. Ma hata fo neulauk naa, naena koasa fo koladu ita, de ita bisa malole to Manetualain, boe ma tasoda tebe-tebe to Ndia losa doon naa neu.
ROM 6:1 Dadi hatematak ia nau kokolak hata? Fama te ei duꞌa mae, “Manetualain lilii heni ita sala-singgon ena, nahuu Ndia dale susuen. Huu naa de malole lenak ita tao salak takandoo, mita fo Manetualain natudu Ndia dale susuen lena-lenak bali soa-neu ita.”
ROM 6:2 Ta bisa dadi! Ta nandaa mete ma ita tao salak takandoo, huu ita taketu tala ena tae, tasadea laꞌo ela ita sala-singgon nara ena. No ita ta neka-lili to manggarauk ena bali, naa sama leo ita mate ena! Hatahori fo mana matek ena, ta bisa tao salak bali, hetu? Mete ma ita mate talo naa ena, na, talo bee de ita bisa leo-laꞌo tao salak bali? Ta bisa, hetu?
ROM 6:3 Fama te ei ta bubuluk mae, neu ita sarani, naa dadi tanda nae, ita laꞌo ela leleo-lalaꞌo raak fo dadi teu hatahori beuk, ndia mana takaesak to Yesus Karistus. Naa, sama leo ita mate sama-sama toon.
ROM 6:4 Neu Karistus mate, ara ratoin. Boe ma neu faik ita hambu saranik, na, ita laꞌo ela leleo-lalaꞌo raak, sama leo ita oo mate, basa de ratoi ita boe. Amak Manetualain pake Ndia koasan ta neni babanggak fo nasoda falik Karistus numa mamaten mai. Ma Amak Manetualain oo nau ita simbo Ndia koasan naa fo tasoda fali numa mamates mai dadi hatahori beuk boe.
ROM 6:5 Naa sama leo ita mate sama-sama to Yesus. De ita mana takaesak to Ndia, neu ko ita oo tasoda fali numa ita mamaten mai boe, sama leo Ndia nasoda fali numa mamaten mai ena.
ROM 6:6 Fai bakahulun, ita dadi teu hatahori fo mana tao salak mata-matak. Tehuu ita leleo-lalaꞌo raan naa, nakalulutu basan ena, sama leo ara paku rakanisa ita nai ai ngganggek sama-sama to Karistus. Hatematak ia manggarauk manai ita dalen, ta naena koasa fo koladu ita bali. Hatematak ia ita ta neka-lili fo tao salak bali. Huu ita ta sama leo ata-dato fo ta naena haak here hata fo nae taon.
ROM 6:7 Mete ma hatahori mate ena, na, ana hambu nekemboꞌik ena, hetu? Ta hambu esa boe na, bisa nakasetik kana fo tao salak bali.
ROM 6:8 Huu naa sama leo ita mate sama-sama to Karistus, na, ita tamahere tae, ita oo neu ko tasoda takandoo to Ndia boe.
ROM 6:9 Ita bubuluk tae, nahuu Karistus nasoda fali numa mamaten mai, de Ana ta mate seluk bali. Ta hambu hata esa fo naena koasa fo tao nisan bali.
ROM 6:10 Fai bakahulun Ana mate laꞌe esak ka, fo feꞌa heni basa sala-singgok koasan. Tehuu hatematak ia Ana nasoda fo natudu hada-horomatak neu Manetualain.
ROM 6:11 Ei oo muste tao aom mara leo naak boe. Nok bali ei mate ena, huu naa de sala-singgok ta naena koasa soa-neu ei bali. De hatematak ia ei muste leo-laꞌo fo matudu hada-horomatak neu Manetualain, nahuu ei makaesa mia Yesus Karistus.
ROM 6:12 Boso fee lelak fo manggarauk manai o dalem naena koasa fo bisa koladu o, de tungga kada o ao-mbaam fo neu ko mana matek naa hihii-nanaun fo tao manggarauk kara.
ROM 6:13 Boso loo lima o aom fo tao kada hata fo ta ndoos sara, huu naa oo sala boe. Tehuu loo lima o aom neu kada Manetualain, fo Ana koladu o. Nok bali o mate ena, basa de o masoda fali numa mamatem mai. Dadi pake o ao katematuam fo tao hata fo ndoos sara soa-neu Manetualain.
ROM 6:14 Boso fee lelak fo sala-singgok bisa koladu ei, sama leo sala-singgok dadi neu ei malanggam. Hatematak ia ei hae leo-laꞌo tungga Musa hohoro-lalanen bali fo dadi malole falik mia Manetualain. Ei leo-laꞌo ndoos, nahuu Manetualain natudu Ndia dale susuen neu ei ena. De hatematak ia Ndia dale susuen naa, ndia koladu ei.
ROM 6:15 Dadi talo bee? Fama te ei duꞌa mae, “Nahuu ita hae leo-laꞌo tungga Musa hohoro-lalanen bali, fo dadi malole fali to Ndia, elan leo fo ita tao kada salak takandook kana. Te Manetualain bei nau natudu Ndia dale susuen soa-neu ita, na!” Ei duꞌa talo naa, do? Au afada, ee! Naa, sala!
ROM 6:16 Au haꞌi netuduk numa ata-dato no lamatuan mai. Mete ma ei loo lima aom mara fo maue-osa fee hatahori esa, na, ei muste nenene neun, ma maue-osa tungga ndia hihii-nanaun. Huu ndia naa, ei lamatuam fo mana naena haak parenda ei. Ma eir ia, ndia ata-daton. Leo naak oo ei bisa here nau tungga see boe. Ei bisa here fo tao salak, boe ma ei dadi miu sala-singgok ata-daton. Tehuu mete ma ei here talo naa, ei tao mala aom mara lenggo feꞌe numa Manetualain mai. Ei bisa here fo tao hata fo ndoos, ma dadi miu ata-dato fo mana tao tungga hata fo Manetualain nadenu neu ei. Mete ma ei here talo naa, na, ei bisa dadi malole mia Ndia!
ROM 6:17 Fai bakahulun ei fee lelak fo sala-singgok ndia koladu ei, tehuu hatematak ia ei nenene ei dale kuru-erom, de tao tungga hata fo hatahori saranik kara ranori ei. Huu naa de au oke makasi neu Manetualain.
ROM 6:18 Manetualain nakamboꞌik ei numa sala-singgok koasan mai, losa sala-singgok ta koladu ei bali. De hatematak ia hata fo ndoos ndia koladu ei.
ROM 6:19 Au kokolak ia, pake netuduk tungga faik numa ata-dato no lamatuan mai, fo malela au kokolang no muda hiek. Fai bakahulun ei loo lima aom mara dadi miu ata-dato fo tao salak, mana nuni neni ei dadi manggenggeok tungga Musa Hohoro-lalanen. Tehuu hatematak ia ei muste loo lima aom mara dadi miu ata-dato, fo mana leo-laꞌo tungga kada ndoon, mana nuni ei dadi lolo-laok nai Manetualain matan.
ROM 6:20 Fai bakahulun ei kada mamanene ma tao tungga salak hihii-nanaun, ei ta nenene ma tao tungga hata fo ndoos.
ROM 6:21 Au ae atane talo ia: Ei hambu buna-boa neulauk hata numa ei tatao-nonoim naa mai? Ta hambu, hetu? Naa te buna-boak fo ei hambuk naa, kada tao nakamamaek ei. No ei tatao salam talo naa, neu mateꞌen Manetualain nasadea laꞌo ela ei.
ROM 6:22 Tehuu hatematak ia Manetualain nakamboꞌik ei numa lamatua raak mai ena, de ei hae tao salak bali. Hatematak ia ei muste dadi miu Manetualain hatahori mana maue-osan. Mateꞌen neu ko ei dadi lolo-laok soa-neu Ndia, ma hambu masodak tetebes ta mana ketuk.
ROM 6:23 Neu ita tao salak, babalan ndia Manetualain nasadea laꞌo ela ita losa doon naa neu. Ita mate leo! Tehuu Manetualain sadia nala dala sasaik esa fee ita ena. Ana nau baꞌe fee ita masodak tetebes ta mana ketuk no muda hiek. Ma ita hambu tala masodak naa, mete ma ita dadi teu Lamatuak Yesus Karistus hatahorin.
ROM 7:1 Toranoo nggara ein! Hatematak ia au kokolak soa-neu ei fo mana malela hukun hohoro-lalanen nara. Talo ia: mete ma ei bei masodak, hukun hohoro-lalanen naena haak fo koladu ei. Tehuu mete ma ei mate ena, hukun hohoro-lalanen ta naena haak fo koladu ei bali.
ROM 7:2 Au haꞌi netuduk numa hohoro-lalanek sao holu ndaek mai. Mete ma inak esa sao nala saon ena, tungga hukun hohoro-lalanen, dua sara dadi reu sao holu-ndaek losa ara mate. Mete ma saon mate ena, na, ina falu naa ta nakaesa no hohoro-lalanek kara raa bali. Ana bole sao seluk.
ROM 7:3 Tehuu mete ma ana sao seluk no hatahori laen, neu sao toun bei masodak, na, tungga hohoro-lalanek, ana hohongge-lelena ena. Mete ma sao toun maten ena, na, hohoro-lalanek sao holu-ndaek ta laꞌe sana bali. Ndia hatahori nekemboꞌik ena. De mete ma ana sao seluk no hatahori laen, na, tungga hohoro-lalanek, ana ta hohongge-lelena.
ROM 7:4 Leo naak oo soa-neu ei kamaherek kara boe! Talo ia: Karistus maten ena. Naa, sama leo ei oo mate sama-sama mian boe, fo laꞌo ela ei leleo-lalaꞌo raam mara. De hukun hohoro-lalanen ta laꞌe ei bali. Hatematak ia ei nekemboꞌik numa hohoro-lalanek kara raa mai ena, ma ei makaesa mia Karistus ena, fo mana nasoda fali numa mamaten mai ena. Naa, sama leo ina falu mana sao beuk. Naa, dedeꞌan taa. De hatematak ia basa hata fo ei taok kara raa, soa-neu Manetualain.
ROM 7:5 Fai bakahulun ita tao tungga kada ita hihii-nanaun mesa kana. No ita bubuluk hohoro-lalanek, naa tao ita hii lena-langga hohoro-lalanek kara raa, fo tao basa hata fo ta ndoos. Dadi ita sala-singgon nara raa, ndia tao nala Manetualain nasadea ita.
ROM 7:6 Fai bakahulun ita muste tao tungga hohoro-lalanek. Tehuu hatematak ia hohoro-lalanek ta laꞌe ita bali, te ita mboꞌi heni ita leleo-lalaꞌo raan ena. Tungga eno-dala raak hihii-nanaun, na, Musa hohoro-lalanen neni surak nai Susura Malalaok futu-paꞌa ita. Tehuu tungga eno-dala beuk hihii-nanaun, na, ita takamboꞌik numa hohoro-lalanek naa mai ena. Te Manetualain Dula-dalen ndia koladu ita na! Huu naa de hatematak ia ita taue-osa soa-neu kada Manetualain leo.
ROM 7:7 Dadi ita nau kokolak hata? Fama te ei duꞌa mae, “Hohoro-lalanek fo Manetualain fee neu Musa naa, sala!” Taa! Mete ma au ta alela hohoro-lalanek kara raa, na, ta bisa dadi au alela basa hata fo ta ndoos nai au daleng. Haꞌi netuduk leo, hambu hohoro-lalanek nae, “Boso dale hedi mae haꞌi mala hatahori hata-heton.” Tehuu talo bee de au bisa bubuluk dale hedik naa, sala, mete ma au ta bubuluk, ana naena hohoro-lalanek? Ta bisa!
ROM 7:8 Tehuu no hambu hohoro-lalanek nae talo naa, naa nok bali hata fo manggarauk kara marai au daleng, tao nala au hii alan seli, fo haꞌi ala hatahori hata-heton mata-matak kara. Mete ma ta hambu hohoro-lalanek kaꞌi, na, sala-singgok oo ta naena koasa fo koladu hatahori boe.
ROM 7:9 Numa au leleo-lalaꞌong fai bakahulun, au ta alela tebe-tebe dudu-furak numa Manetualain Hohoro-lalanen mai. Doo-doo dei de au bisa alela tebe-tebe. Huu naa de au bei fo ameda ae, au lena-langga Hohoro-lalanek naa ma tao salak ena. Ma sala-singgok babalan naa, ndia au muste mate.
ROM 7:10 Boe ma au daleng nakalulutu, huu au bubuluk ae, au mesa ngga ta bisa malole ua Manetualain, nahuu kada tao tungga Ndia Hohoro-lalanen. Au andaa hambu ala Manetualain nasan, ndia hukun mates, nahuu au lena-langga Ndia Hohoro-lalanen ena. Naa te hambu Hohoro-lalanek fo tao hatahori bisa leo-laꞌo no ndoos. Tehuu tunga au, Hohoro-lalanek naa ndia nakalulutu au, de tao nala Manetualain nasadea au.
ROM 7:11 Hohoro-lalanek naa, memak natudu eno-dala masodak tetebes. Tehuu no hambu manggarauk leo nai au daleng dale, de au kedi-ira asafali au ao heli-heling, fo duꞌa ae, au bisa malole ua Manetualain, sadi tao tungga Ndia Hohoro-lalanen. Boe ma naa nok bali Hohoro-lalanek naa ndia taon losa Manetualain nunute au, ma ta nau nakaesa no au.
ROM 7:12 Dadi mete ma bebeik kara ia, hatahorir rae, “Hohoro-lalanek fo Manetualain fee neu Musa naa, sala,” na, au aselu ae, “Taa! Manetualain Hohoro-lalanen naa, malalaok!” Ma basa parendar marai Hohoro-lalanek naa oo malalaok, ndoos ma malole boe.
ROM 7:13 Fama te ei oo duꞌa boe mae, Hohoro-lalanek naa ndia tao nala Manetualain nasadea au, hetu? Taa! Leo mae au bubuluk Hohoro-lalanek naa, tehuu au bei nenene manggarauk manai au daleng, losa au tao salak. Dadi au ue-tatao salang naa, ndia tao nala Manetualain nasadea au. Hohoro-lalanek mesa kana memak malole, huu ana natudu basa hata fo manggarauk kara, fo mana tao nala ita lenggo feꞌe numa Manetualain mai. Dadi neu Manetualain natudu eno-dala masodak tetebes, Hohoro-lalanek naa natudu no manggaledon nae, hata fo ta neulauk nai ita dalen naa, ta malole.
ROM 7:14 Ita bubuluk tae, Hohoro-lalanek fo Manetualain feen neu baꞌi Musa konda numa Manetualain Dula-dalen mai. Tehuu au kada hatahori dae-bafok biasa fo daleng ta matea. De au amanene hata fo manggarauk manai au daleng fo kaboo mburuk, losa au tao salak. Naa, sama leo sala-singgok dadi neu au lamatuang, ma au dadi uu sala-singgok ata-daton.
ROM 7:15 Au panggananaa, huu au ta alela hata fo au taok. Au ta tao tungga hata fo au nau taok. Tehuu au tao tungga hata fo au ta nau taok.
ROM 7:16 Mete ma au tao tungga hata fo au ta nau taok, au manaku ae, Manetualain Hohoro-lalanen naa, tetebes.
ROM 7:17 De au ta ndia koladu au aong. Te manggarauk manai au daleng ndia koladu au aong na!
ROM 7:18 Au bubuluk ena ae, ta hambu hata fo neulauk leo nai au daleng. Au ia, hatahori dae-bafok fo au daleng kaboo mburuk. Nau ta nau, au ta bisa akasetik aong fo tao hata fo ndoos. Au nau, tehuu ana ta dadi nakandoo!
ROM 7:19 Au daleng hii fo tao hata fo neulauk, tehuu au ta tao sana. Ma au ta nau fo tao hata fo manggarauk, tehuu au kada tao!
ROM 7:20 Mete ma au tao tungga hata fo au ta nau taok, na, naa ta huu au mesa ngga hihiing, tehuu no manggarauk fo mana leo nai au daleng hihiin.
ROM 7:21 Dadi talo ia: leo mae au ae tao neulauk, tehuu hambu manggarauk manai au daleng dale ndia mana laban.
ROM 7:22 Naa te au daleng namahoko nalan seli, mete ma au duduꞌa laꞌe-neu Manetualain Hohoro-lalanen.
ROM 7:23 Tehuu maggarauk koasan manai au daleng dale, ndia nakalulutu au. Au daleng hii tao hata fo neulauk, tehuu ana ta dadi nakandoo. Naa, nok bali manggarauk manai au daleng dale naa humu nala au, fo nau nakasetik au fo tungga kada ndia.
ROM 7:24 Kasian laꞌe esak kana, ee! Au hatahori mana doidosok! See ndia bisa tao nasoi-nasoda au numa koasa manggarauk mana leo nai au daleng dale, fo mana tao nala Manetualain nunute au losa Ana nasadea au?
ROM 7:25 Awii! Manetualain mesa kana ndia nasosoi dalak fo nakamboꞌik au! Makasi noꞌun seli soa-neun, nahuu ita Lamatuan Yesus Karistus bisa tao nasoi-nasoda au! De mete ma au leo-laꞌo asarada neu kada au aong, au doidoso. Leo mae au hii alan seli tao tungga basa Manetualain Hohoro-lalanen lalaꞌen, tehuu manggarauk koasan manai au daleng dale ndia kokoe au fo tao sala-singgok akandoo.
ROM 8:1 Dadi Manetualain ta fee huku-dokik neu hatahori fo mana nakaesa no Yesus Karistus!
ROM 8:2 Talo ia! Hambu dalak dua: kaesan, mete ma ita takaesa to Yesus Karistus, Manetualain Dula-dalen fee koasa neu ita fo bisa leo-laꞌo no ndoos. Kaduan, hambu manggarauk nai ita dalen dale fo mana kokoe ita fo tao sala-singgok. Mete ma ita tao sala-singgok, Manetualain nunute ita, boe ma nasadea ita. Mete ma ita hambu tala Manetualain Dula-dalen, Ana nakamboꞌik ita numa sala-singgok koasan mai.
ROM 8:3 Leo mae ita tao tungga Musa Hohoro-lalanen, naa ta bisa tao nasoi-nasoda ita numa sala-singgok koasan mai, huu ita kada hatahori dae-bafok biasa a mesan fo mana tao sala-singgok nakandoo. Tehuu Manetualain ndia nasosoi dala sasaik. Ana nadenu Ana heli-helin fo dadi neu hatahori dae-bafok biasa sama leo ita. Leo mae hatahori dae-bafok biasa laen tao sala-singgok mata-matak kara, tehuu Yesus ta tao nita sala-singgok hata esa boe na. Lenak bali, Ana dadi neu tunu-hotuk fo koka heni hatahori sala-singgon.
ROM 8:4 Manetualain nadenu Karistus ena, fo Ana mate, mita fo ita tao tungga basa hata fo ndoos, tungga Manetualain Hohoro-lalanen nara. Dadi hatematak ia, ita tao hata fo ndoos sara, tungga Manetualain Dula-dalen hihii-nanaun, ma ta tao tungga ita mesa ngga hihii-nanaun bali.
ROM 8:5 Hatahori fo mana leo-laꞌo tungga kada sira mesa kasa hihii-nanaun naa, ara leo-laꞌo talo naa nahuu ara duduꞌa kada hata fo manggarauk kara a mesan rakandoo. Tehuu hatahori fo mana leo-laꞌo tungga kada Manetualain Dula-dalen hihii-nanaun, ara duduꞌa kada hata fo mana tao namahoko Manetualain Dula-dalen.
ROM 8:6 Hatahori fo mana fee lelak neu hata fo manggarauk kara fo koladu ndia duduꞌan, sama leo hatahori fo ta mana namanene Manetualain Dula-dalen, de ndia dale kuru-eron soa-neu Manetualain maten ena. Tehuu hatahori fo mana fee lelak fo Manetualain Dula-dalen koladu ndia duduꞌan naa, ana leo-laꞌo no ndoos, ma dalen lino-lendek.
ROM 8:7 Ita hatahori dae-bafok hihii-nanau heli-helin laban tebe-tebe Manetualain hihii-nanaun. De ita mesa ngga ta takaluku fo nenene neu Manetualain, nahuu ita mesa ngga ta bisa.
ROM 8:8 Hatahori fo mana fee lelak neu ndia mesa kana hihii-nanaun fo koladun, nau ta nau, ta bisa tao namahoko Manetualain dalen.
ROM 8:9 Tehuu eir ia, hatahori fo ta mana leo-laꞌo manggarauk tungga ei mesa ngga hihii-nanaum bali. Mete ma Manetualain Dula-dalen leo nai ei dalem dale, ei tao basa hata fo tao namahoko Ndia. (Tehuu mete ma hambu hatahori fo Karistus Dula-dalen ta leo nai dalen dale, ana oo ta dadi neu Manetualain enan boe.)
ROM 8:10 Ei ao-mbaam neu ko mate, nahuu ei tao sala-singgok ndia fai bakahulun. Tehuu hatematak ia no Karistus leo nai ei dalem dale, ei samanem neu ko nasoda nakandoo, nahuu Manetualain henggenee nala ei dadi miu hatahori dale ndoos, boe ma ei malole fali mia Ndia ena.
ROM 8:11 Manetualain ndia tao nasoda falik Yesus numa mamaten mai. Dadi leo mae ita mate, mete ma Manetualain Dula-dalen leo nai ita dalen dale, neu ko Ana oo tao nasoda falik ita numa mamates mai boe. Naa sosoa-ndandaan nae, Ana tao nasoda ita, sama leo Ana tao nasoda falik Karistus numa mamaten mai ena.
ROM 8:12 Dadi talo ia, toranoo nggara ein! Ita kahutak kara. Naa, ita ta tahuta fo leo-laꞌo tungga hatahori dae-bafok hihii-nanaun, tehuu ita tahuta fo leo-laꞌo tungga Manetualain hihii-nanaun.
ROM 8:13 Mete ma ita leo-laꞌo tungga kada manggarauk manai ita dalen dale, na, Manetualain nau nasadea ela ita, ma hukun nakamate ita! Tehuu mete ma ita fee lelak Manetualain Dula-dalen nakalulutu sala-singgok koasan manai ita dalen dale, na, dei fo ita bisa leo-laꞌo no ndoos ta mana ketuk.
ROM 8:14 Hatahori fo mana namanene neu Manetualain Dula-dalen fo koladu sara, na, sira iar Manetualain anan nara.
ROM 8:15 Mete ma ita fee lelak neu Manetualain Dula-dalen fo koladu ita, Ana ta tao ita dadi teu ata-dato fo mana leo-laꞌo no nemetaꞌuk. Fai bakahulun, ita leo naak. Tehuu no ita simbo tala Manetualain Dula-dalen fo koladu ita ena, de ita bubuluk ita dadi teu Manetualain anan nara ena. Huu naa de neu ko Ana nau namanene, mete ma ita tanggoun tae, “Ama Bonggik, ee!”
ROM 8:16 Ita mesa ngga dalen ndia nafada nae, ita dadi teu Manetualain anan nara. Ma Manetualain Dula-dalen oo nafada nae leo naa boe.
ROM 8:17 Mete ma ita dadi teu Manetualain anan nara, naa sosoa-ndandaan nae, neu ko ita simbo tala Ndia pusakan, nahuu Ana dadi neu ita Aman. Dadi mete ma Amak fee pusaka neu Ndia Anan Karistus, neu ko ita oo simbo sama-sama Ndia pusakan boe. Tehuu hambu dedeꞌak esa bali: ita muste hambu tala doidosok, sama leo Karistus oo hambu doidosok boe, mita fo Manetualain neu ko bisa nakadedemak ita, sama leo Ana nakadedemak Karistus ena.
ROM 8:18 Tehuu tungga au, doidosok fo ita hambuk hatematak ia sosoa-ndandaan taa, mete ma takasasamak kana no hata fo ta hohoꞌak kara fo neu ko Manetualain natudun neu ita.
ROM 8:19 Naa te basa hata fo Manetualain adu nalak kara marai lalai no dae-inak, ara rahani taa-taa ma hii ralan seli fo mete-rita Ana natudu Ndia anan teteben nara raa, sira seer. Ana nae natudu sara no dale mana mbena sau-sauk.
ROM 8:20 Manetualain nakadadadik lalai no dae-inak ma oe-isin lalaꞌen tungga Ndia nanaen. Tehuu ta dadi tungga Manetualain nanaen, huu Ndia huku-dokin. No huku-dokik naa, basa hata fo Manetualain aduk lalaꞌen rakalulutu, ta huu sira hihiin, tehuu tungga Manetualain hihii-nanaun. Leo mae talo naa oo, tehuu bei hambu nemehehenak boe.
ROM 8:21 Dadi hatematak ia, basa hata fo Manetualain adu nalak kara raa rakalulutu, ma ta raena dala sasaik. Tehuu neu faik Manetualain nakadedemak Ndia anan nara fo ara hambu nekemboꞌik numa mana makalulutuk kara mai, na, Ana oo nakamboꞌik basa hata fo Ana adu nalak kara ena boe, fo ta rakalulutu bali. De basa sara bisa dadi ta hohoꞌak tungga Ndia nanaen.
ROM 8:22 Ita bubuluk ena tae, hambu susa-sonak ma doidosok noꞌuk ka nai dae-bafok ia. Numa fai bakahulun losa hatematak ia, basa hata fo Manetualain adu nalak kara raa rahohoo huu rameda hedis, neu rahani taa-taa fo Manetualain adu basa-basan dadi beuk. Naa, sama leo inak nahohoo huu nameda hedis neu ana nahani nae bonggi anan.
ROM 8:23 Ta kada dae-bafok mesa kana ndia nahani taa-taa, tehuu ita oo tahani taa-taa talo naa boe. Leo mae Manetualain fee nakahuluk Ndia Dula-dalen neu ita ena, tehuu ita oo tahohoo nai ita dalen boe. Ita tanea taa-taa fo tahani Manetualain soꞌuk ita dadi teu Ndia ana teteben nara, ma nakamboꞌik ita ao-inan nara ruma basa hata fo mana makalulutuk mai.
ROM 8:24 Neu Manetualain tao nasoi-nasoda ita, Ana oo fee helu-bartaak noꞌuk ka fo neu ko ara dadi boe. Hatematak ia ita bei tahani taa-taa, nahuu bei ta dadi. Mete ma ita mete-tita matak esa dadi ena, ita ta parluu tahani bali, fo mete-tita seluk matak naa. Huu hatahori ta nahani taa-taa bali fo mete-nita matak esa fo mandadik ena, hetu?
ROM 8:25 Tehuu mete ma ita tahani taa-taa fo nau mete-tita matak esa bei ta dadi, na, ita bei bisa takatataka tala no dale naruk.
ROM 8:26 Leo naak oo neu ita tahani taa-taa boe, Manetualain Dula-dalen oo tulu-fali ita boe, nahuu ita barakain taa, ma ta hule-haradoi talela no ndoos. Tehuu Manetualain Dula-dalen ndia hule-haradoi nggati ita, leo mae ita kada tahohoo a, ma ta bisa hule-haradoi pake dedeꞌa deꞌek esa boe na.
ROM 8:27 Manetualain ndia bubuluk basa hata fo ita tae kokolak nai ita dalen. Ana oo bubuluk Ndia Dula-dalen duduꞌan boe. Huu naa de Ana bubuluk basa hata lalaꞌen fo Ndia Dula-dalen nae kokolak fo tulu-fali neu ita. Manetualain simbo hule-haradoik naa, nahuu Dula-dalek duduꞌan sama leo Manetualain mesa kana duduꞌan. Ndia Dula-dalen hule-haradoi fo Manetualain tulu-fali hatahori kamaherek kara. Dula-dalek naa, hule-haradoi tungga Manetualain hihii-nanaun.
ROM 8:28 Hatematak ia ita bubuluk ena talo ia: Manetualain tao nala basa hata dadi neulauk soa-neu hatahori fo mana sue-lai neun. Numa lele uluk mai Manetualain koladu memak ena, laꞌe-neu Ana nae tao talo bee soa-neu sara. De Ana nanggou sara ena nae, “Mai, leo! Mai dadi miu Au hatahoring!”
ROM 8:29 Lele uluk Ana nalela memak kasa, ma here nala sara, fo tao sara dadi neu mata-aok esa sama leo Ndia Anan, ndia Karistus. Karistus oo ndia uluk boe, ma laen nara dadi reu Ndia fadin.
ROM 8:30 Hatahorir fo Manetualain nalela sara numa lele uluk mai naa ena, Ana oo noke nala sara boe, fo dadi reu Ndia hatahorin. Ma hatahorir raa oo fo fai bakahulun hatahori mana kasala-singgok boe, Ana tao sara dadi reu hatahori dale ndoos fo mana malole fali ro Ndia. Ma Ana oo nakadedemak kasa boe.
ROM 8:31 Dadi ita tae kokolak hata bali laꞌe-neu dedeꞌak kara raa? Manetualain nasalaꞌe ita. Mete ma talo naa, na, see bisa laban ita bali? Ta hambu, hetu?
ROM 8:32 Manetualain ta kaꞌi-natabaa Ndia Ana heli-helin. Tehuu Ana loo lima Anan fo mate dadi neu tunu-hotuk, fo tulu-fali ita basa ngga lalaꞌen. Huu Manetualain ta kaꞌi-natabaa Ndia Anan faa boe na, ita bisa bubuluk tae, neu ko Ana oo fee no muda hiek neu ita, basa hata fo neulauk boe. Tebe, hetu?
ROM 8:33 Fama te ei duꞌa mae, bei hambu hatahori fo bisa ndae salak neu hatahori fo Manetualain here nala sara ena? Ta hambu, hetu? Manetualain mesa kana ndia henggenee nala ita nae, hatahori dale ndoos fo ta mana maena sala-singgok bali fo ita malole to Ndia.
ROM 8:34 Fama te ei duꞌa mae, bei hambu hatahori bisa nae, Manetualain muste fee hukun neu hatahori fo Ana here nalak kara ena. Ta bisa dadi! Yesus Karistus maten ena. Lena-lenak bali Manetualain tao nasoda falik kana numa mamaten mai ena. Basa de Manetualain soꞌuk nalan fo nanggatutuuk kana neu mamana hada-horomatak mateꞌen nai Ndia boboa konan. Nai naa Ana oo ndia hule-haradoi nakandoo soa-neu ita boe.
ROM 8:35 Fama te ei duꞌa mae, hambu hatahori do, dedeꞌak do, fo bisa nakasetik Karistus losa Ana ta sue-lai ita bali, do? Ta bisa dadi! Leo mae ita hambu dedeꞌak do, susa-sonak do, doidosok do, ndoe-laꞌas do, bua-loꞌas taa do, hambu sosoek do, hatahori nae nakanisa do, tehuu Karistus sue-lai nakandoo neu ita. Ta hambu hata esa boe na fo bisa tao nala Ana hahae sue-lai neu ita!
ROM 8:36 Sama leo neni surak nai Manetualain Susura Malalaon nae, “Hatu-leledon hatahorir rae rakanisa ita, nahuu ita dadi teu Lamatuak hatahorin. Ara tao rala ita, sama leo bibi lombo fo rae halan.”
ROM 8:37 Dadi leo mae ita hambu susa-sonak talo bee oo, tehuu ita senggi ena, nahuu Karistus sue-lai nalan seli neu ita boe.
ROM 8:38 Au bubuluk no tetuk talo ia: ta hambu hata esa boe na fo bisa tao nala Manetualain hahae sue-lai neu ita. Leo mae ita tasoda do, ita mate do, hambu ata numa nusa tetuk do inggu temak mai do, mana toꞌu parenda do, hambu koasa do, dedeꞌak hatematak ia do, dedeꞌak mana maik do,
ROM 8:39 koasa nai lalai do, koasa nai dae-inak do, hata laen fo Manetualain adu nalak kara ena do — ta hambu esa boe na bisa nabingga-baꞌek ita numa Manetualain mai fo tao nala Ana ta sue-lai ita bali! Huu ita takaesa to ita Lamatuan Yesus Karistus, fo Manetualain nadenun mai ena.
ROM 9:1 Ita fo mana takaesa to Karistus, kokolak hata fo ndoos. De au ta kokolak ombo koson neu ei. Au dale kuru-erong oo nafada au boe nae, Manetualain Dula-dalen koladu au daleng.
ROM 9:2 Au afada talo ia: au daleng sona. Au ameda berak leo naak, nahuu asaneda au hatahori heli-heling nggara. Huu au nau fo au hatahori Yahuding nggara oo rakaesa ro Karistus boe, tehuu noꞌuk ka ta ramahere neun. Mete ma au bisa soi dalak fee sara, au sadia oke fo Manetualain hukun au, nggati sara. Ma au oo sadia oke fo Manetualain nabinggak au numa Karistus mai boe, mita fo au hatahoring nggara bisa rakaesa ro Karistus.
ROM 9:4 Naa te sira iar, hatahori Israꞌel, ndia hatahori nusak esa fo naua nalan seli. Manetualain soꞌuk nala sara dadi reu Ndia anan nara numa lele uluk mai ena. Ana natudu Ndia koasan ta neni babanggak neu sara. Ana ndara fangga hehelu-bartaak mata-matak kara no sara. Ana fee Ndia Hohoro-lalanen neu sara. Sira ndia bubuluk talo bee fo rakaluku-rakatele ma raono-lalau neu Ndia. Ana helu-bartaa nae natudu Ndia dale susuen neu sara ena.
ROM 9:5 Ara dadi ruma ita bei-baꞌin nara mai, ndia: baꞌi Abraham, baꞌi Isak, ma baꞌi Yakob (hatahori roke nadek ‘Israꞌel’ numa ndia mai). Ma Karistus fo Manetualain helu-bartaa memak kana fo nae nadenun mai ndia lele uluk naa oo, dadi numa ita hatahori Yahudin bei-baꞌin nara mai boe. Karistus naa oo ndia Manetualain fo mana parenda basa-basan boe. Dadi nandaa mete ma hatahori soꞌuk kokoa-kikiok soa-neun losa doon naa neu. Tebe!
ROM 9:6 Leo mae hatahori Israꞌel noꞌuk ka bei ta simbok Karistus, tehuu hatahorir ta bisa kokolak rae, Manetualain hehelu-bartaan naa ta dadi. Boso duꞌa mae, basa hatahorir fo mana dadi numa Israꞌel bei-baꞌin nara mai naa, dadi reu hatahori Israꞌel fo Manetualain here nala sara, dadi reu Ndia hatahorin.
ROM 9:7 Haꞌi netuduk leo hatahori noꞌuk ka dadi ruma ita baꞌin, baꞌi Abraham mai. Tehuu sira basa sara ta Abraham tititi-nonosin fo Manetualain here nala sara. Sama leo Manetualain nafada Abraham ena nae, “O tititi-nonosim fo Au alelak, kada mana dadi numa o anam Isak mesa kana mai.”
ROM 9:8 Naa sosoa-ndandaan nae, numa lele uluk mai losa hatematak ia, ta basa tititi-nonosik kara maruma ai hatahori Yahudir baꞌin Abraham mai, dadi miu Manetualain anan nara. Kada tititi-nonosik manuma Manetualain hehelu-bartaan neu Abraham mesa kana mai, ndia Manetualain reke sara dadi reu Ndia ana teteben nara.
ROM 9:9 Manetualain ndara fangga hehelu-bartaak no Abraham nae, “Nai rarain, teuk esa bali, Au fali mai. Faik naa, o saom Sara bonggi nala ana tou anak esa ena.”
ROM 9:10 Ta talo kada naa. Te ita baꞌin Isak no saon Ribka bonggi rala ana duak.
ROM 9:11 Neu Ribka bei ta bonggi nala sara, ara bei ta tao hata fo neulauk do manggarauk. Leo mae talo naa oo, tehuu Manetualain nafada memak Ribka ena boe, laꞌe-neu ana duak kara fo mana kalua nakahuluk nae, “Neu ko kaꞌak naue-osa fee fadin.” Manetualain nafada talo naa, fo natudu nae, mete ma Ndia here nala hatahori esa ena, na, Ana bubuluk nae pake hatahori naa talo bee ena. De Manetualain here nala fadik naa, fo dadi neu Ndia hatahorin. Ana hae nahani fo mete sudik fadik naa tao talo bee, nahuu Manetualain bubuluk memak kana ena.
ROM 9:13 Sama leo Manetualain kokolak nai Ndia Susura Malalaon laꞌe-neu ana duak kara raa nae, “Au here ala Yakob, tehuu Au timba heni Esau.”
ROM 9:14 Dadi ita tae kokolak hata bali? Fama te ketuk kokolak rae, “Manetualain naketu-naladi dedeꞌak no mbeu seserik, do?” Ta bisa dadi!
ROM 9:15 Lele uluk Manetualain nafada baꞌi Musa nae, “Au atudu dale kasian neu hatahori fo Au mesa ngga here alak. Ma Au fee dale susueng neu hatahori fo Au mesa ngga dudu alak.”
ROM 9:16 Dadi hatahori naa ta nameda Manetualain dale kasian, ta huu ndia mesa kana hihii-nanaun, do, ta huu ndia mesa kana tataon. Tehuu no Manetualain mesa kana hihii-nanaun fo nau natudu Ndia dale kasian neu hatahori naa.
ROM 9:17 Ita bubuluk ia nai Susura Malalaok, Lamatuak kokolak no manek Masir nae, “Au soꞌuk ala o dadi muu manek, nahuu Au ae pake o fo matudu Au koasang neu hatahori noꞌuk kara. No dalak naa, hatahorir marai dae-bafok ia katematuan bisa soꞌu botik Au nadeng.”
ROM 9:18 Dadi mete ma Manetualain nae natudu Ndia dale kasian neu hatahori esa, na, kada Ana taon leo. Mete ma nae tao hatahori esa dalen natea, na, kada Ana taon leo.
ROM 9:19 Dadi boso losak hambu hatahorir rasabara au rae, “Mete ma Manetualain here nala hatahori esa, ta tungga hatahori naa tatao-nonoꞌin, tehuu tungga kada hata fo Manetualain naketu nalak, na, tao hata de Ana nau ndae salak neu ita, tungga ita tatao-nonoꞌin? Naa, mbeu seserik, hetu? Mete ma Manetualain memak naketu basa-basan, na, sosoa-ndandaan ita tatao-nonoꞌin sala oo Ndia naketu nalan ena boe!”
ROM 9:20 Mete ma hambu ketuk duꞌa talo naa, au aselu ae talo ia: “O duꞌa mae, o ia see?! O mae kokolak laban Manetualain, do?” Boso talo naa! Sama leo neni surak nai Manetualain Susura Malalaon dale nae, “Mete ma hatahori tao buas esa, hambu nai bee buas naa natane falik hatahori fo mana taon naa nae, ‘Tao hata de o tao au talo ia!?’ ”
ROM 9:21 Haꞌi netuduk leo mana tao ure dae. Numa dae manu taꞌik bubuak esa, ana naena haak fo tao nala nggusi manggadilak esa fo hatahori koan. Ana oo naena haak pake dae bubuak naa boe, fo tao nala mamana dafuk esa, tungga kada ndia hihiin.
ROM 9:22 Leo naak oo no Manetualain boe. Ana naena haak fo tao tungga Ndia hihii-nanaun. Ana nau natudu neu basa hatahorir nae, Ana namanasa, ma ta simbok hatahori tatao-nonoꞌi manggarauk hata esa boe na. Ana oo nau hatahori bubuluk boe nae, Ndia koasan ta neni babanggak. Fo hatahori bubuluk talo naa, Ana nakatataka aon no hatahori tatao-nonoꞌi manggaraun mata-matak kara. Tehuu hatahori fo mana tao manggarauk, kada rahani fain fo ara rakalulutu heni sara.
ROM 9:23 Ana nadale naruk talo naa, fo nae natudu neu hatahori noꞌuk kara nae, Ana nau natudu dale kasian neu hatahori ketuk. Sira iar, ndia Ana here memak kasa ena, fo nae nakadedemak kasa. No dalak naa, Ana nau hatahori bubuluk nae, Ndia mesa kana ta neni babanggak mateꞌen.
ROM 9:24 Sosoa-ndandaan nae, ita iar ndia Ana here memak kara ena fo dadi teu Ndia hatahorin nara. Ita iar, ketuk ruma hatahori Yahudir mai, ma ketuk ruma hatahori nusa-nusak laen nara mai.
ROM 9:25 Sama leo lele uluk, Manetualain pake Ndia mana toꞌu dedeꞌan Hosea fo surak laꞌe-neu hatahori ta Yahudir nae, “Hambu hatahori fo lele uluk ta Au hatahoring, tehuu neu ko Au oke ala sara ae, ‘Eir ia, Au hatahoring.’ Ma hambu hatahori nusa-nusak fo lele uluk Au ta sue sara, tehuu Au nau oke ala sara ae, ‘Eir ia, hatahori nusa-nusak fo Au suek.’ ”
ROM 9:26 Ana oo surak boe nae, “Numa naa, nai mamanak fo Manetualain nafada sara ena nae, ‘Eir ia, ta dadi neu Au hatahoring!’ Neu ko Manetualain fo Masodak nau nafada sara nae, ‘Hatematak ia ei dadi miu Au anang nggara ena!’ ” Ana kokolak talo naa, nahuu Ana kasian neu hatahori ta Yahudir.
ROM 9:27 Manetualain mana toꞌu dedeꞌan laen, ndia Yesaya, eki nita laꞌe-neu hatahori nusak Israꞌel nae, “Leo mae hatahori Israꞌel dadi ramanoꞌu ralan seli, nok bali sarakaek manai tasi tataik, tehuu neu ko Manetualain tao nasoi-nasoda kada hatahori baꞌu anak, numa sira sala-singgon nara mai.
ROM 9:28 Neu ko losa fain, fo Manetualain naketu-naladi basa hatahorir marai dae-bafok katematuan dedeꞌan, sama leo Ana nafada memak kana ena. Ana ta nahani a, tehuu Ana tao natetu basan no lai-laik!”
ROM 9:29 Lele uluk Yesaya oo nafada memak laꞌe-neu hatahori Yahudir boe nae, “Ita taua, nahuu Lamatuak mana Koasa Mateꞌen, fee luas fo ita tititi-nonosin ketuk hambu masodak. Mete ma ta talo naa, na, ita ketu-maꞌi ena, sama leo hatahori kota Sodom ma kota Gomorar.”
ROM 9:30 Dadi ita tae kokolak hata? Kokolak tae, hatahori ta Yahudir ruma sudi bee mai, fo lele uluk ara ta sangga-sangga fo nau malole ro Manetualain, hatematak ia ara malole roon ena, nahuu ara ramahere neu Yesus Karistus.
ROM 9:31 Naa te hatahori Israꞌel asa soba tao tungga Musa hohoro-lalanen ena fo ara bisa malole ro Manetualain, tehuu ta dadi nakandoo boe.
ROM 9:32 Tao hata de ara ta bisa malole ro Manetualain? No kada ara nau tao tungga hohoro-lalanek mita fo Ana simbok kasa sama leo hatahori dale ndoos, tehuu ara ta ramahere neu Yesus Karistus. De nok bali ara rakatunu laꞌe “batu neketunuk” esa. Sama leo Manetualain Susura Malalaon nae, “Mete ia dei! Au tao Hatahori esa, neu letek Sion, nai kota Yerusalem ena. Hatahori naa sama leo batu esa, fo mana tao hatahori nakatunu. Tehuu see namahere neu Ndia, na, hae mae.” Batu naa, ndia Yesus. Tehuu hatahori Israꞌel asa timba henin. Naa, sama leo ara rakatunu, boe ma ara tuda nahuu batu naa.
ROM 10:1 Toranoo nggara ein! Au nau fo hatahori Israꞌel asa dadi talo bee? Au hule-haradoi mita fo Manetualain tao nasoi-nasoda sara ruma sira sala-singgon nara mai. Mete ma dadi talo naa, dei fo au daleng namahoko!
ROM 10:2 Au bisa afada laꞌe-neu hatahori iar hihiru-heheon nara: ara manggate fo nau tungga Manetualain. Leo mae ara manggate talo naa, tehuu ara ta ralela eno-dala tetebes.
ROM 10:3 Ara ta ralela eno-dala masodak tetebes fo bisa tao hatahori malole no Manetualain, huu naa de ara soi sira mesa kasa dalan fo rae soba-soba malole ro Manetualain. No dalak naa, ara ta nau nenene neun.
ROM 10:4 Mete ma hatahorir tao tungga kada hohoro-lalanek, mita fo Manetualain simbok kasa, na, ta dai. Huu naa de Karistus tao natetu basa-basan, mita fo ita bisa malole to Manetualain. De hatematak ia basa hatahorir fo mana ramahere reu Karistus, bisa malole ro Manetualain.
ROM 10:5 Neu lele uluk baꞌi Musa natudu dalak nai Susura Malalaok dale ena, fo hatahorir bisa malole ro Manetualain, sadi ara tao tungga basa Manetualain Hohoro-lalanen nara lalaꞌen. Ana surak nae, “Hatahori mana tao tungga Hohoro-lalanek kara iar lalaꞌen, neu ko ara hambu masodak tetebes.”
ROM 10:6 Tehuu Manetualain Susura Malalaon oo natudu dalak laen boe nae, hatahorir bisa malole ro Manetualain, sadi ara ramahere neu Karistus. Hambu neni surak nae, “Hae matane mae, ‘See ndia bisa hene neni nusa tetuk do inggu temak neu?’ ” (Naa, nok bali hatahori nae hene neu nafada Karistus nae, ai hatahori dae-bafok hii malan seli fo Ana konda mai tao nasoi-nasoda ita.)
ROM 10:7 Susura Malalaok oo surak boe nae, “Hae matane mae, ‘See ndia nae konda neni Bolo Aꞌi Mbila Ta Kala Matek neu, nai hatahori mates sara mamanan?’ ” (Naa, nok bali hatahori nae konda fo no falik Karistus numa mamaten mai, fo Ana tao nasoi-nasoda ita.)
ROM 10:8 Hae talo naa! Sama leo nai Manetualain Susura Malalaon oo neni surak boe nae, “Lamatuak hara hehelun nai o matam ena! Hara heheluk naa nai o bafam ma o dalem.” Hara heheluk fo ita tafada hatahori naa tae, “Mete ma o mae sangga masoi-masodak, na, o muste mamahere neu Karistus!”
ROM 10:9 Mete ma o manaku pake o bafa heli-helim mae, “Yesus naa, au Lamatuang fo naena haak parenda au,” ma o mamahere nai o dalem mae, Manetualain tao nasoda falik Yesus Karistus numa mamaten mai ena, na, Manetualain tao nasoi-nasoda o numa o sala-singgom mara mai.
ROM 10:10 Mete ma o mamahere neu Karistus pake o dalem, na, Manetualain henggenee memak o nae, hatahori dale ndoos fo mana malole mua Ndia. Mete ma o manaku pake o bafam mae, Yesus dadi neu o Lamatuam fo naena haak parenda o, na, Manetualain nau tao nasoi-nasoda o numa o sala-singgom mara mai.
ROM 10:11 Sama leo nai Manetualain Susura Malalaon neni surak nae, “Hatahori fo mana namahere neu Manetualain, neu ko ta hambu nameda mamaek, huu Manetualain nau nakadadadik basa hata fo Ana kokolak nala sara ena.”
ROM 10:12 Hatahori Yahudi, ma hatahori ta Yahudi, sama a mesan. Ta hambu esa laen numa esa mai boe. Hambu kada Lamatuak esa, ma Ana dadi neu Lamatuak soa-neu basa hatahori nusa-nusak kara lalaꞌen. Ana nau natudu Ndia dale susuen sudi selik kana soa-neu basa hatahorir fo mana roke fo Ana tulu-fali sara.
ROM 10:13 Sama leo neni surak nai Susura Malalaok nae, “Basa hatahorir fo mana roke tutulu-fafalik numa Lamatuak mai, neu ko Ana tao nasoi-nasoda sara numa sira sala-singgon nara mai.”
ROM 10:14 Tehuu talo bee de hatahori bisa roke tutulu-fafalik mbali hatahori esa, mete ma ara bei ta ramahere sana? Ma talo bee de ara bisa ramahere neun, mete ma ara bei ta ramanene rita laꞌe-neun? Talo bee de ara bisa ramanene laꞌe-neun, mete ma ta hambu hatahori esa nafada sara boe?
ROM 10:15 Mete ma ta hambu esa nadenu sara, na, talo bee de ara bisa rafada hatahorir? Mete ma ara bisa mai rafada, naa sama leo nai Susura Malalaok neni surak nae, “Mete ma hatahorir mai reni hara lii malole, sira mamain naa, neulaun seli!”
ROM 10:16 Tehuu ei bubuluk ena mae, hambu hatahori Israꞌel ketuk ta nau nenene Lamatuak Hara Lii Malolen. Manetualain mana toꞌu dedeꞌan Yesaya surak nae, “Lamatuak, ee! Hatahorir ta nau ramahere hara heheluk fo ara ramanenek numa ai mai ena!”
ROM 10:17 Dadi mete ma nau tamahere neu Manetualain, na, muste nenene Ndia Dedeꞌa-kokolan dei. Mete ma ara nau nenene Ndia hara hehelun, na, muste nenene laꞌe-neu Karistus dei.
ROM 10:18 Au atane sudik, talo ia: fama te ei duꞌa mae, hatahori Israꞌel asa ta ramanene rita laꞌe-neu Karistus, do? Ara ramanene ena! Sama leo neni surak nai Manetualain Susura Malalaon numa lele uluk mai nae, “Manetualain mana toꞌu dedeꞌan hara hehelun laꞌe-neu Lamatuak natanggela ndule dae-bafok katematuan ena; Sira dedeꞌa-kokolan losa dae-bafok buꞌun nara ena.”
ROM 10:19 Au ae atane dedeꞌak esa bali ae, “Hatahori Israꞌel asa ta ralela Manetualain eno-dala masoda teteben, do?” Baꞌi Musa naa, hatahori makasososak fo mana surak laꞌe-neu dedeꞌak naa nae, Manetualain nafada hatahori Israꞌel asa talo ia: “Au nau tao dedeꞌak esa fee hatahori nusa-nusak laen nara. Dedeꞌak naa, neu ko tao nala ei dalem mara mbiri. Ma Au oo nau tao dedeꞌak esa boe, fee hatahori fo ei mae leo ute keak. Dedeꞌak naa, neu ko tao nala ei ale nisim.”
ROM 10:20 Mai fai bakahiton, baꞌi Yesaya surak no ledo-ledon laꞌe-neu hatahori ta Yahudi nae, “Hambu hatahorir fo fai uluk ta sangga Au, tehuu ara ratonggo ro Au ena. Hambu hatahorir fo fai uluk ta roke fo mete-rita Au, tehuu atudu Au aong neu sara ena.”
ROM 10:21 Tehuu laꞌe-neu hatahori Israꞌel, Manetualain nafada talo ia ena: “Hatu-leledon Au akambela aloa Au limang, fo ahani a hatahori Israꞌel reni Au mai. Tehuu ara ta nau nenene Au, ma ara oo hii laban Au boe.”
ROM 11:1 Dadi au ae atane talo ia: fama te ei duꞌa mae, “No hatahori Israꞌel ta nau nenene neu Manetualain, huu naa de Ana timba heni sara.” Talo naa, do? Taa! Au oo numa sira mai boe! Au ia, numa leo Benyamin mai. Benyamin aman, Yakob. Ndia baꞌin, Isak. Isak aman, Abraham, fo mana dadi neu basa hatahori Israꞌel asa baꞌin.
ROM 11:2 Manetualain ta timba nita heni Ndia hatahorin nara. Sira iar, ndia Ana nalela sara numa lele uluk mai. Ei bei masaneda do taa, neu hata fo neni surak nai Manetualain Susura Malalaon laꞌe-neu baꞌi Elia? Ana unggu-remu neu Manetualain laꞌe-neu hatahori Israꞌel, ma ana noke fo Manetualain huku-doki sara
ROM 11:3 nae, “Lamatuak! Hatahori iar rakanisa mana toꞌu dedeꞌak kara, fo Lamatuak nadenu sara mai. Ara oo ofe rakalulutu mei tunu-hotuk boe, numa mamana hatahorir rakaluku-rakatele neu Lamatuak. Numa basa Lamatuak mana toꞌu dedeꞌan nara lalaꞌen mai, ela kada au mesa ngga bei masodak. Tehuu ara oo sangga dalak bali, fo rae rakanisa au boe!”
ROM 11:4 Tehuu Lamatuak naselu nae, “O kokolam naa, sala! Au bei bingga ela hatahori 7.000 fo mana rakaluku-rakatele neu Au. Hatahori iar rakatataka rahere, ma ta songgo Baꞌal!”
ROM 11:5 Leo naak oo hatematak ia boe. Ta basa hatahori Yahudir rasadea neu Manetualain. Bei ela baꞌuk ka ruma ai mai fo Manetualain here nala sara ena fo nae tao nasoi-nasoda sara, nahuu Ana nae natudu dale susuen neu ai, ta huu ai tao hata fo neulauk! Mete ma Ana muste here nala ai, nahuu ai tao hata fo neulauk, naa sosoa-ndandaan nae, Ana ta bisa naketu fo natudu, do, ta natudu Ndia dale susuen neu ai. Mete ma talo naa, ndia naden ta ‘natudu Ndia dale susuen’ bali.
ROM 11:7 Dadi mateꞌen talo ia: hatahori Yahudi noꞌuk ka sangga-sangga fo Manetualain natudu Ndia dale susuen neu sara, mita fo ara oo bisa malole roon boe. Tehuu ta hambu sana, nahuu sira dalen nara ratea ma ta nau nenene neu Ndia. Tehuu hambu ketuk malole roon. Sira iar, ndia Manetualain here nala memak kasa ena.
ROM 11:8 Nai Manetualain Susura Malalaon neni surak laꞌe-neu hatahori langga batuk kara raa nae, “Manetualain fee sara, matak fo ta bisa mete-rita, ndiꞌi dook fo ta bisa namanene, ma ute keak fo ta bisa duduꞌa. De ara ta ralela hata fo ndoos, losa faik ia boe.”
ROM 11:9 Mane Dauk oo surak laꞌe-neu hatahori nusa Yahudi nai Susura Malalaok dale boe nae, “Ela sara feta-dote rai sira mesa kasa mein, naa fo ara duꞌa rae, basa naar neulauk ena. Tehuu sira fetan nara ndia ike rasafali sara. Ma sira mesa kasa suꞌin ndia tao rala sara rakatunu.
ROM 11:10 Elan numa naa fo matan nara dadi makiuk, fo ta mete-rita hata esa boe na! Elan numa naa fo ara lemba berak rakandoo, fo nggotin nara boe ruku!”
ROM 11:11 Dadi au ae atane talo ia: tao hata de hatahori Yahudir rakatunu? Ara tuda ena, do? Taa! Tehuu ara ta nau nenene neu Manetualain, ma ta ramahere neu Karistus, naa soi dalak soa-neu hatahori ta Yahudir fo bisa hambu masoi-masodak numa sala-singgon nara mai. Manetualain tao talo naa, huu Ana nau fo hatahori Yahudir mbiri, fo ara tungga falik Ndia bali.
ROM 11:12 Manggaledok ena nae, hatahori Yahudir lena-langga hata fo ndoos. Huu naa de hatahori laen nara maruma dae-bafok katematuan mai bisa rameda rala Manetualain dale susuen. Dadi hatahori Yahudir, hambu rurunggi moꞌok. Tehuu naa tao nala hatahori ta Yahudir hambu nanala moꞌok. Neu faik esa fo basa hatahori Yahudir malole fali ro Manetualain, naa lolen lenak bali!
ROM 11:13 Au nau afada neu ei hatahori ta Yahudir talo ia: Manetualain nadenu au ena fo laꞌok uu afada ei laꞌe-neu Ndia Hara Lii Malolen. Huu naa de au ambariik ahere fo akalalaꞌok ue-osa fo neulaun seli ia.
ROM 11:14 Mete ma au akalalaꞌok ue-osa ia no neulauk, boso losak tao ala au hatahori Yahudi heli-heling nggara mbiri, losa ketuk hambu masoi-masodak ruma sira sala-singgon nara mai.
ROM 11:15 Neu faik Manetualain timba heni Ndia hatahori Yahudi heli-helin, na, naa soi dalak fo hatahori laen nara hambu lelak fo bisa maso dadi reu Manetualain hatahorin. Tehuu neu ko leo ara mole-dame falik ro Manetualain, naa lolen seli. Naa sama leo ara rasoda fali ruma mamaten nara mai!
ROM 11:16 Haꞌi netuduk numa hatahori rae rumu roti mai. Mete ma ana haꞌi nala tarigu faa, fo loo liman neu Manetualain, neu ko basa rotir raa lalaꞌen oo dadi reu Ndia enan fo malalaok boe. Mete ma hatahori loo lima ai huuk okan esa dadi neu mbule uluk soa-neu Manetualain, neu ko ai huuk naa katematuan oo dadi neu Ndia enan fo malalaok boe.
ROM 11:17 Au ae akasasamak hatahori nusa Yahudi no ai huuk setun esa fo mana mori nai osi dale. Manetualain beta heni ai huuk naa ndanan ketuk ena. Tehuu ei hatahori ta Yahudir, sama leo ai setun fuir. Boe ma Manetualain beta nala ei ndanan ketuk ena fo nakadite sara reu ai huuk manai osi dale naa. No dalak naa, ndanak numa ai huuk manai osi deak mai bisa mori nasamusa, nahuu ndanak naa simbok basa-basan numa ai huuk manai osi dale mai. Naa, sama leo ei fo hatahori ta Yahudir oo simbok mala Manetualain dale susuen boe fo Ana nae feen soa-neu hatahori Yahudin nara.
ROM 11:18 Tehuu besa-besa, ee! Boso koa aom, duꞌa mae, ei numa deak mai naa, neulaun lena heni ndanak kara fo Manetualain beta heni sara raa ena! Mete ma o mae soꞌuk aom, boso lilii-ndondou, te o kada ndanak esa a! O ta ndia tao matea ai huuk naa. Te okan ndia tao nala ai huuk naa natea na!
ROM 11:19 Fama te o nau kokolak mae, “Manetualain beta heni ndanak esa numa ai huuk mana mori nai Ndia osin dale mai, fo Ana bisa nakadite falik au uu naa, fo nggati falik ndana raak naa.”
ROM 11:20 Naa, ndaa. Tehuu boso lilii-ndondou mae, Manetualain beta heni ndanak kara raa ena, nahuu ara ta ramahere neu Karistus. De o nggati sara, nahuu o mamahere neu Karistus. Dadi boso koa ao! Malole lenak o besa-besa, ma boso leli-belak kana!
ROM 11:21 Te hatahori Yahudir, sama leo ndana huun tetebes mana nasamusak nakahuluk na. Tehuu Manetualain ta ela sara rakatataka rala dook ka reu naa. Dadi mete ma o ta mamahere neu Ndia seku neu, boso mamahena mae, Ana ela o makatataka muu naa!
ROM 11:22 Dadi ei muste duduꞌa matalolole dei. Manetualain dalen mansuek. Tehuu Ana oo bubuluk fee huku-doki berak boe. Neu ko Ana fee hukun neu hatahori mana tudak ena, fo mana ta malole noon. Tehuu soa-neu ei hatahori ta Yahudir, Manetualain natudu Ndia dale susuen, sadi ei makaesa mian seku neu, ma elan fo Ana tao hata neulauk soa-neu ei. Tehuu mete ma ei ta ela sana tao talo naa, Ana oo nau beta heni ei numa Ndia ai huun mai boe.
ROM 11:23 Leo naak oo, no hatahori Yahudir boe. Mete ma ara sale dalen do tuke tein nara fo mulai ramahere neu Karistus, na, neu ko Manetualain nau nakadite falik kasa reu ai huuk tetebes naa. Te Ana naena koasa fo tao talo naa na!
ROM 11:24 Ei fo hatahori ta Yahudir, sama leo ndanak numa setun fuir mai, fo bakahulun mana mori mbembelak nai osi deak. Tehuu Manetualain here nala ei fo nakadite ei miu ai huu setun neulauk fo Ana selen nai Ndia osin dale, elan fo ai huu fuir mesa kasa laen, ma ai huu osir mesa kasa laen. Mete ma hatahori ta Yahudir mesa kasa bisa dadi talo naa, hata-bali hatahori Yahudir. Naa, bisa dadi lena-lenak bali, mete ma Manetualain nakadite falik kasa reu sira ai huu makasososan.
ROM 11:25 Toranoo nggara ein marai Roma! Ei muste malela dedeꞌak ia fo fai bakahulun bei nemeninok. Mete ma ei malelan ena, na, neu ko ei ta bisa koa ao fo duꞌa mae, ei malelak kara. Hata fo bakahulun nemeninok naa talo ia: hatematak ia hatahori Yahudir dalen nara ratea, ma ta nau ramahere neu Karistus. Tehuu ara ta leo naak rakandoo. Mete ma basa hatahori ta Yahudir fo Manetualain here nala sara ena, ramahere neu Karistus ena, na, neu ko hatahori Yahudir oo ramahere neun boe.
ROM 11:26 De mete ma faik naa losa ena, neu ko Manetualain tao nasoi-nasoda basa hatahori Yahudir ruma sira sala-singgon nara mai. Naa, sama leo neni surak nai Susura Malalaok ena nae, “Neu ko hambu Hatahori esa mai, fo tao nasoi-nasoda ita numa sosoek mai. Ana numa letek Sion, nai kota Yerusalem mai. Ana ndia tao nala Yakob tititi-nonosin nara sale dalen do tuke tein nara. Ara leo-laꞌo ta tao matak neu Au, ma ara rasadea laꞌo ela Au eno-dala masoda tetebeng ena.
ROM 11:27 Au nau koka heni sira sala-singgon. Huu Au ndara fangga hehelu-bartaak ua sara talo naa ena.”
ROM 11:28 Tungga-tungga hatahori Yahudir ramanene Karistus Hara Lii Malolen, ara tao aon nara nok bali musu mana laban neun. No dalak naa, ara fee lelak soa-neu ei hatahori ta Yahudir! Leo mae talo naa oo, tehuu Manetualain bei sue-lai sara boe, nahuu Ana sue-lai sira bei-baꞌin nara, ma here nala sara dadi reu Ndia hatahorin nara ena.
ROM 11:29 Mete ma Manetualain fee basa buas esa ena, na, Ana ta leꞌa nala falik kana. Mete ma Ana nanggou nala hatahori ena nae, “Woi! Mai, tungga Au! Mai maso dadi muu Au hatahoring leo!” Ana ta husi heni sana bali.
ROM 11:30 Fai uluk ei fo hatahori ta Yahudir, ta nau nenene neu Manetualain. Tehuu hatematak ia ei ndia simbo mala Manetualain dale kasian, nahuu hatahori Yahudir ta nau nenene neun.
ROM 11:31 De sira iar, ndia hatematak ia ta tao tungga Manetualain hihii-nanaun. Huu naa de Manetualain bei nau natudu Ndia dale kasian soa-neu ei. Ma neu ko Ana oo nau kasian neu sara bali boe.
ROM 11:32 Hatematak ia Manetualain mete hatahori Yahudi sama no Ana mete hatahori ta Yahudi. Huu basa sara ta tao tungga Ndia hihii-nanaun, nok bali neni ronggak kara, ma ta bubuluk dala sasaik. Ana ela sara talo naa, fo bisa natudu Ndia dale kasian soa-neu basa hatahorir.
ROM 11:33 Manetualain malelan seli! Ma Ana oo pake Ndia malelan fo tao hata neulauk boe. Ta hambu hatahori fo bisa nalelan no tebe-tebe. Ta hambu hatahori mana bubuluk no tebe-tebe, laꞌe-neu Ana naketu-naladi dedeꞌak. Ta hambu hatahori esa boe na ndia nalela, tao hata de Manetualain tao matak esa.
ROM 11:34 Ta hambu hatahori fo mana bubuluk no tetuk, ita Lamatuan duduꞌan. Ta hambu esa boe na bisa fee nenori-nefadak neu Ndia.
ROM 11:35 Ta hambu hatahori esa fo bisa fee mudak buas esa neu Manetualain, ta hambu hatahori fo bisa nakasetik Manetualain fo bala falik kana!
ROM 11:36 Huu basa-basan raoka numa Manetualain mai! Basan dadi, nahuu Ndia! Basa hata fo ita taok, ita taue-osa soa-neu Ndia. Ita soꞌuk kokoa-kikiok soa-neu Ndia, losa doon naa neu! Tebe talo naa!
ROM 12:1 Toranoo susue nggara ein! No Manetualain natudu Ndia dale kasian soa-neu ita ena, huu naa de au oke fo loo lima ei ao katematuan neun, nok bali tunu-hotuk fo bei malaok. Naa, ndia tao namahoko Manetualain dalen. Maote tebe-tebe fo tao tungga Ndia hihii-nanaun, ma leo-laꞌo no lolo-laok, te naa natudu ei susuem ma hada-horomatam neun. Memak ei mandaa makaluku-makatele neu Ndia talo naa.
ROM 12:2 Boso fee lelak fo hatahorir marai dae-bafok hatematak ia radenu ei muste tao talo bee, do, leo-laꞌo talo bee, tungga sira hihii-nanaun nara. Boso kada tungga no poke-mbakek a mesan sira duduꞌa-aꞌafin, leleo-lalaꞌon nara, do, sira dala-hadan. Tehuu malole lenak, ei fee lelak fo Manetualain adu ei duduꞌam dadi beuk, fo ei mete-mita basa-basan tungga eno-dala beuk. No dalak naa, ei bisa bubuluk Manetualain hihii-nanaun soa-neu ei. Huu Manetualain hihii-nanaun naa, malole, matetu-mandaik, ma tao namahoko Ndia dalen.
ROM 12:3 No Manetualain natudu dale susuen neu au ena, huu naa de Ana nadenu au. De au afada ei, talo ia: timba-tai ei aom mara pake dala tetebes! Boso soꞌuk ei aom mara lena heni hata fo tetebes. Boso pake timba-taik fo huu-suꞌun taak. Hatahori esa-esak muste soba fo nalela babanggi-babaꞌek fo Manetualain baꞌe soa-neun ena, nahuu ana namahere neu Karistus.
ROM 12:4 Haꞌi netuduk numa hatahori ao-inan mai. Ao-inak esa dadi numa babaꞌek noꞌuk ka mai. Babaꞌek esa-esak no ndia uen.
ROM 12:5 Leo naak oo, soa-neu ita mana makaesa to Karistus boe. Ita hatahori noꞌuk ka, tehuu ita takaesa sama leo ao-inak esa. Hatahori esa-esak no ndia uen, sama leo ita ao-inan babaꞌen nara. Esa toꞌa esa. Haꞌi netuduk leo, limak neni tete ketuk numa ao-inak mai, ta naena sosoak hata bali, hetu?
ROM 12:6 Talo ia: Manetualain fee koasa neu ita basa ngga fo takalalaꞌok ues mata-matak kara, nahuu Ana hii natudu Ndia dale susuen neu ita. Haꞌi netuduk leo, mete ma Manetualain fee koasa neu o fo mafada Ndia hara hehelun, na, o muste mafada hara heheluk naa no matetu-mandaik. Tehuu boso mafada lenak numa hara heheluk naa mai.
ROM 12:7 Mete ma Manetualain fee o babanggi-babaꞌek fo maono-lalau hatahori laen, o muste maono-lalau pake koasa naa. Mete ma Ana fee o babanggi-babaꞌek fo manori hatahorir laꞌe-neu Ndia, na, o muste fee nenorik pake koasa naa.
ROM 12:8 Mete ma Ana fee o babanggi-babaꞌek fo tao mambena hatahori dalen, na, o muste tao mambena pake koasa naa. Mete ma Ana fee o koasa fo bisa tulu-fali hatahorir munik hata-heto fo o hambuk, na, fee o hata-hetom fo tulu-fali neu sara. Mete ma Ana fee o babanggi-babaꞌek fo leꞌa-nore hatahorir fo rakalalaꞌok Ndia ue-osan dadi neulauk lenak, na, o muste manggate leꞌa-nore sara pake koasa naa. Mete ma Ana fee o dale kasian fo nau tulu-fali hatahori mana susa-sonak, na, o muste tulu-fali no dale mana mbena sau-sauk.
ROM 12:9 Mete ma ei matudu susue-lalaik neu hatahorir, na, matudu susue-lalaik tetebe ndoos; boso dea-matak. Masadea laꞌo ela basa hata fo manggarauk, ma toꞌu mahere basa hata fo neulauk.
ROM 12:10 Ei hatahori saranik muste sue-lai no malole esa mbali esa. Maote tebe-tebe fo matudu hada-horomatak esa mbali esa.
ROM 12:11 Mete ma ei maue-osa, na, maue-osa no dale mana dere-dere hiek, boso babati. Elan fo ei dalem mara mana mbena sau-sauk, neu ei maue-osa. Leo naak oo maue-osa soa-neu ita Lamatuan boe.
ROM 12:12 Ei dalem mara muste ramahoko hatu-leledon, huu ei bubuluk mala ena, hata fo Lamatuak helu-bartaa nae fee ei. Makatataka, mete ma hambu susa-sonak. Hule-haradoi hatu-leledon; boso manggu.
ROM 12:13 Pake ei hata-heton fo doi-sou hatahori saranik fo mana toꞌak. Mete ma hambu hatahori numa mamanak laen mai, makambela ei limam fo fee sara raꞌa-rinu, do, leo taak nai ei umam. No dalak naa, ei matudu ei susuem neu sara.
ROM 12:14 Mete ma hambu hatahori nakasususak ei makandoo, moke-hule Manetualain fo tao hata fo neulauk soa-neu sara. Tebe! Boso makatoo sara!
ROM 12:15 Mete ma hambu hatahori dalen namahoko, na, mamahoko sama-sama mian. Mete ma hambu hatahori buꞌi namatani nahuu dalen sona, na, buꞌi mamatani sama-sama mian.
ROM 12:16 Leo-laꞌo no masue-laik ma dalek esa. Boso madedema aom mara. Malole lenak, ei matia-laik mia hatahori ta naena fuli-nggamuk kara. Boso soꞌuk aom mara fo duꞌa mae, kada o mesa ngga ndia mana bubuluk.
ROM 12:17 Mete ma hatahori tao manggarauk neu o, na, boso balan no manggarauk. Tehuu o muste soba-soba fo sangga dalak neulaun lenak, ndia basa hatahorir bisa simbok kana.
ROM 12:18 Mete ma bisa, na, sangga dalak fo leo-laꞌo mole-dame mia basa hatahorir.
ROM 12:19 Toranoo susue nggara ein! Boso bala nembeda dalek. Elan numa naa fo kada Manetualain ndia koladun. Ana namanasa, mete ma hatahori tao manggarauk, sama leo neni surak nai Susura Malalaok nae, “Ita Lamatuan mesa kana ndia kokolak nae, Au aena haak fo bala nembeda dalek. Huu Au ndia fee hukun neu hatahori tatao manggaraun nara.”
ROM 12:20 Malole lenak, tao tungga hata fo Susura Malalaok nafada numa lele uluk mai nae, “Mete ma o musum ndoe-laꞌa, na, feen naꞌa. Mete ma o musum dale mada, na, feen ninu. Mete ma tao talo naa, neu ko dalen loe, de ana fee hada-horomatak mbali o.”
ROM 12:21 Boso fee lelak neu hata fo manggarauk kara koladu o. Malole lenak, kada hata fo neulauk ndia koladu o. No dalak naa, o bisa tao masenggi hata fo manggarauk kara.
ROM 13:1 Hatahori esa-esak muste nenene neu hatahori mana toꞌu parendar. Huu ara raena haak ma koasa fo parenda hatahori. Sira koasan fo toꞌu parenda naa, ara hambun numa Manetualain mai. Mana toꞌu koasar hatematak ia, ara toꞌu koasa talo naa nahuu Manetualain ndia soꞌuk kasa.
ROM 13:2 De mete ma hatahorir laban hatahori mana toꞌu parenda talo naa, naa sama leo ara laban hata fo Manetualain soꞌuk kana ena. Mete ma ara tao talo naa, neu ko hambu huku-dokik numa Manetualain mai.
ROM 13:3 Mete ma ei tao hata fo ndoos, na, hae mamataꞌu neu hatahori mana toꞌu parendar. Tehuu mete ma ei tao manggarauk, malole lenak ei mamataꞌu neu sara! De manea aom mara fo tao hata fo ndoos, fo hae mamataꞌu neu sara. Mete ma ei tao talo naa, na, neu ko ara koa ei.
ROM 13:4 Hatahori mana toꞌu parendar, sira iar ndia Manetualain here nala sara fo raono-lalau ei. Tehuu mete ma ei tao salak makandoo, malole lenak ei besa-besa leo! Huu ta hie-hie ara raena haak fo fee hukun neu ei. Sira iar, sama leo Manetualain hatahori neondan fo fee hukun neu hatahori fo mana tao manggarauk kara. Huu Manetualain ta simbok hata ndia manggarauk fo hatahorir taok; Ana namanasa sara.
ROM 13:5 Huu naa de ei muste nenene neu hatahori mana toꞌu parendar. Ei bubuluk nai ei dalem mara ena mae, naa ndia ndaa. Ma ei oo bubuluk boe mae, Manetualain namanasa, mete ma ita ta tao tungga hata fo ndoos.
ROM 13:6 Leo naak oo, ei muste bae bea fo neni neketu memak boe, nahuu hatahori mana toꞌu parendar rakalalaꞌok Manetualain ue-osan.
ROM 13:7 De ei muste bae basa hata tungga ndoon. Bae neu mana susu bear, basa bear fo ei muste bae. Fee hada-horomatak neu basa hatahorir fo mana muste simbok hada-horomatak. Mete ma hambu hatahori tao hata fo neulauk nakandoo, soꞌuk naden nara fo basa hatahorir bubuluk ara tao hata fo neulauk.
ROM 13:8 Bae makababasak o hutam mara fo boso leo-laꞌo no kada mahuta. Huu ita kada tahuta nai dedeꞌak esak ka, ndia susue-lalaik. Mete ma ei sue hatahori, na, ei tao tungga Manetualain Hohoro-lalanen nara ena.
ROM 13:9 Hohoro-lalanek kara raa rae, “Boso hohongge-lelena; boso makanisa hatahori; boso mamanaꞌo; boso dale hedi hatahori laen hata-heton,” ma laen bali. Mete ma nau tao tungga basa Hohoro-lalanek kara, na, muste tao tungga Hohoro-lalanek esa ia, ndia nae, “O muste sue hatahori laen nara, sama leo sue neu o ao heli-helim.”
ROM 13:10 Huu mete ma ita tatudu susue-lalaik neu hatahori laen, ita ta tao manggarauk neu sana, hetu? Dadi mete ma ita tatudu susue-lalaik takandoo, ita bisa tao tungga basa Hohoro-lalanek kara maruma Manetualain mai.
ROM 13:11 Manetualain nau nakamboꞌik ita numa hatahori manai dae-bafok ia manggaraun mai. Hatematak ia ndia fain fo tao nasoi-nasoda hatahori, ana deka nalan seli ena numa faik fo ita dei fo tamahere neu Yesus Karistus mai. De ita muste leo-laꞌo no tasue-laik, nahuu ita bubuluk fai masoi-masodak naa deka-deka ena. Fai uluk nok bali ita mana sungguk kara, tehuu hatematak ia ndia fain losa ena fo ita muste beꞌe leo!
ROM 13:12 Ta dook ka te leꞌodaek basa ena, boe ma manggaledok mai. De malole lenak ita hahae leo numa ita tatao manggaraun mai. Naa, sama leo hatahori fo mana leo-laꞌo nai makiuk dale ma tao hata fo manggarauk, huu ara duꞌa rae, ta hambu hatahori mete-rita sira. Tehuu hatematak ia ita muste dadi teu soldadu mana pake bua netatik, fo tambariik tahere tao hata fo neulauk kara, sama leo hatahori fo mana leo-laꞌo nai manggaledok dale.
ROM 13:13 Ita muste leo-laꞌo no ndoos, mita fo basa hatahorir mete-rita ita tao hata fo neulauk kara. Ta malole mete ma ita kada feta-dote rame-rame, ma tinu mafuk. Ta malole mete ma ita hohongge-lelena takandoo. Ta malole mete ma ita tareresi kii-konak. Ma ta malole mete ma ita mbiri, nahuu ta hii hatahori lena ita.
ROM 13:14 Tehuu malole lenak, masafali ei dalem fo dadi sama leo ita Lamatuan Yesus Karistus, fo Manetualain nadenun mai ena. Mete ma o dalem hii nalan seli tao hata fo ta ndoos, na, boso fee lelak fo o tao tungga o hihiim mana leli-belak talo naa. Makatataak aom!
ROM 14:1 Hambu hatahori fo namahere neu Lamatuak ena, tehuu ndia nemeheheren bei ta nahere, ma ana bei ta nalela dedeꞌak noꞌuk ka. Makambela limam fo simbok malan no malole. Boso mareresi laꞌe-neu ndia duduꞌan. Elan numa naa fo ana natia-laik no ei leo.
ROM 14:2 Hambu hatahori fo mana namahere neu Lamatuak, duduꞌa nae, hatahori saranik bisa raꞌa hata a mesan, leo mbaa do, hata a mesan. Tehuu hatahori saranik laen nara, fo nemeheheren nara bei ta ratea, nau raꞌa kada uta-ai doo. Ara raluli mbaa.
ROM 14:3 Tehuu nenene, ee! Hatahori saranik fo nameda ndia bole naꞌa hata a mesan, ta bole nakaloloek hatahori fo ta mana naꞌa mbaa. Leo naak oo, hatahori saranik fo ta mana nau naꞌa mbaa boe, boso mafada hatahori mana naꞌa mbaa mae, “Heeh! Muꞌa mbaa naa, sala!” Huu Manetualain simbok nala dua sara fo dadi reu Ndia hatahorin ena!
ROM 14:4 Mete ma o kada maselu kisubalik toranoom hatahori fo mana namahere talo naa, na, o duꞌa mae o ia, see? O maena haak hata fo ndae salak neu hatahori laen? Ndia ia, ta o hatahori mana maue-osam! Ma o ia, ta ndia malanggan. Huu kada ndia Lamatuan mesa kana, ndia naena haak fo nafada no ledo-ledon hata fo ana taok naa, ndaa, do sala. Tehuu boso lilii-ndondou. Ndia Lamatuan naa, ndia neu ko simbok no malole hatahori naa, nahuu Lamatuan ndia taon fo ana barakai, de bisa nakatataka.
ROM 14:5 Hambu hatahori ketuk raketu rae, faik esa malalaon lenak numa faik laen nara mai. Hambu hatahori laen duꞌa rae, basa faik kara sama a mesan, ta hambu esa feꞌe boe na. Hatahori esa-esak ndia muste naketu aon laꞌe-neu dedeꞌak kara raa.
ROM 14:6 Mete ma hatahori fo mana duꞌa nae, hambu faik fo malalaon lenak numa faik laen nara mai, ana tao talo naa fo natudu hada-horomatak neu ita Lamatuan. Hatahori fo mana naꞌa mbaa ma nanaꞌak laen nara, bisa naꞌa fo natudu hada-horomatak neu ita Lamatuan, huu ana noke makasi neu Manetualain. Leo naak oo soa-neu hatahori fo ta mana naꞌa mbaa boe. Ana oo nau natudu hada-horomatak neu ita Lamatuan boe, ma ana oo noke makasi neu Manetualain boe.
ROM 14:7 Mete ma ita tasoda, na, ita ta tasoda soa-neu kada ita aon mesa kana. Mete ma ita mate, na, ita ta mate soa-neu kada ita aon mesa kana.
ROM 14:8 Mete ma ita bei tasoda, na, ita takaesa to ita Lamatuan. Leo naak oo mete ma ita mate, na, ita bei takaesa to ita Lamatuan boe. De leo mae ita tasoda, do, ita mate, ita bei dadi teu Ndia enan.
ROM 14:9 Huu naa de Karistus mate, basa boe ma nasoda fali numa mamaten mai. Ana tao talo naa fo Ana oo bisa dadi neu Lamatuak soa-neu hatahori fo mana matek kara ena, ma soa-neu hatahori fo bei masodak kara boe.
ROM 14:10 Dadi tao hata fo o soꞌuk aom nok bali mana maketu-maladi dedeꞌak, fo maselu kisubalik o toranoo saranim? Tao hata de o makaloloek neun? Neu ko ita basa ngga muste tasare mbali Manetualain fo Ana parisa ita esa-esak leleo-lalaꞌon.
ROM 14:11 Sama leo neni surak nai Manetualain Susura Malalaon numa lele uluk mai nae, “Ita Lamatuan mesa kana ndia nafada nae, ‘Basa hatahorir neu ko sendek luu-langgan nara fo doꞌor neu Au, ma ratudu hada-horomatak neu Au. Hatahori esa-esak neu ko pake bafan nara fo manaku ma koa-kio Au rae, Au dadi uu sira Lamatuan fo naena haak parenda sara, nahuu Au ia, Manetualain.’ ”
ROM 14:12 Dadi ita basa ngga muste taselu-tataa talan fo tafada Lamatuak tae, ita tao talo bee, ma tao hata de ita tao talo naa.
ROM 14:13 Fai uluk ei marai Roma soa ndae salak makandoo neu ei toranoo saranim mara. Boso bei talo naa bali! Malole lenak ita taketu talo ia: ta bole tao ita toranoon nara rakatunu. Ita boso soba ike takatutudak kasa fo ara tao salak.
ROM 14:14 Huu au akaesa ua ita Lamatuan Yesus, au bubuluk no tetuk, talo ia: ta hambu nanaꞌa-nininuk hata esa boe na, fo bisa tao nanggenggeo hatahori, losa ana ta bisa hule-haradoi neu Lamatuak. Tehuu mete ma hatahori esa duꞌa nae, nanaꞌa-nininuk esa tao nanggenggeon losa ana nameda ta naena haak fo hule-haradoi bali, elan fo nanaꞌa-nininuk naa dadi neu nelulik soa-neun.
ROM 14:15 Haꞌi netuduk leo, mete ma o muꞌa mbaa, ma naa tao nala o toranoom dalen sona, na, o ta matudu o susuem neun ena, hetu? Makatataak aom dei! Boso makalulutu o toranoom nemeheheren, nahuu kada o mae muꞌa-minu matak esa! Huu Karistus oo mate soa-neu hatahori naa boe.
ROM 14:16 Ta malole mete ma o tao hata esa fo mameda mae neulauk, tehuu hatahori laen nara kokolak raboboo o nadem, nahuu ara duꞌa rae o taok naa, manggarauk.
ROM 14:17 Duꞌa matalolole! Manetualain naa, ita Manen. Tehuu ita ta dadi teu Manek hatahorin, nahuu kada ita taꞌa-tinu tungga hohoro-lalanek mesa kana. Taa! Mete ma ita nau dadi teu Manek hatahorin, ita muste tao hata fo ndoos, ita dalen lolo-laok, ita leo-laꞌo no ndoos ma mole-damek, ma ita dalen namahoko. Basa iar bisa dadi, mete ma ita takaesa takandoo to Manetualain Dula-dale Malalaon.
ROM 14:18 Hatahori fo mana naono-lalau Karistus talo naa, tao namahoko Manetualain dalen. Ma hatahori laen oo parisa natalolole hatahori naa leleo-lalaꞌon, de ana soꞌuk hatahori naa naden boe nae, “Ndia naa, malole!”
ROM 14:19 De ita muste taote tebe-tebe fo leo-laꞌo no mole-damek, ma esa natetea esa.
ROM 14:20 Boso takalulutu Manetualain ue-osan nai hatahori laen leleo-lalaꞌon, nahuu kada dedeꞌa nanaꞌa-nininuk. Lamatuak nafada ena, bole miꞌa hata a mesan, huu basa-basan malalaok. Tehuu mete ma o madedeꞌa mua o toranoom, nahuu kada dedeꞌa nanaꞌa-nininuk, o ia, sala. Boso talo naa!
ROM 14:21 Malole lenak, makatataak aom leo. Hae muꞌa mbaa, do, minu oe anggor, do, muꞌa-minu hata laen fo tao nala o toranoom nakatunu.
ROM 14:22 Talo ia: mete ma o mala harak mua Manetualain ena, basa de o maketu ena mae, o nau mamahere neu Ndia laꞌe-neu naꞌa-ninuk talo bee, na, o maua, huu basa-basan dadi matetuk ena. Hae duduꞌa fo sangga bubuluk o tao sala, do taa. Te o maketu mala talo naa ena na.
ROM 14:23 Tehuu mete ma o dalem napangge, basa fo o muꞌa-minu hata fo mameda tao nala o manggenggeo, Manetualain fee salak neu o, nahuu o ta tao tungga hata fo o mamahere nai o dalem neu o muꞌa-minu. Mete ma o mae tao hata a mesan, tehuu o mamahere mae, naa ta ndaa nai Manetualain matan, na, naa sala ena.
ROM 15:1 Dadi ita fo nemeheheren matea muste no dale loak fo tulu-fali hatahorir fo nemeheheren bei ta ratea rai sira lelemba beran dale. Ta malole mete ma ita tao tamahoko kada ita aon mesa kana.
ROM 15:2 Talo ia: ita esa-esak muste taote tebe-tebe fo tao hata fo neulauk soa-neu ita toranoo saranin nara, mita fo nemeheheren nara boe ratea. No dalak naa, ara dadi ramahoko ro ita.
ROM 15:3 Yesus Karistus mesa kana ta naue-osa fo tao namahoko kada Ndia dale heli-helin, tehuu Ana oo nau tao namahoko Manetualain dalen boe. Naa, sama leo neni surak memak nai Manetualain Susura Malalaon ena laꞌe-neu hata fo Yesus kokolak mbali Manetualain nae, “Sira nekedadaen soa-neu O, tuda laꞌe-ndaa Au boe.”
ROM 15:4 Basa hata fo hatahorir surak lele uluk nai Manetualain Susura Malalaon, neni surak fo ranori ita. Ana natudu eno-dalak fo tao ita dadi barakai lenak, takatataka lenak bali, ma Ndia Dedeꞌa-kokolan oo fee ita nembembena aok boe. No dalak naa, ita bisa tahani fo nau mete-tita Manetualain natudu Ndia dale susuen neu ita.
ROM 15:5 Manetualain ndia tao barakai hatahorir fo ara bisa rakatataka. Ma Ana ndia fee neteteak neu ita dalen. Au hule-haradoi fo oke Ana natudu eno-dalak fo ei leo-laꞌo no dalek esa, tungga Yesus Karistus hihii-nanaun.
ROM 15:6 Mete ma ei dalek esa talo naa, ei bisa sama-sama soꞌuk kokoa-kikiok soa-neu Manetualain. Ndia naa, ita Lamatuan Yesus Karistus Aman.
ROM 15:7 Dadi ei basa ngga muste esa simbok esa sama leo Karistus simbok ei. Mete ma ei leo-laꞌo talo naa, neu ko hatahorir rakadedemak Manetualain naden.
ROM 15:8 Au afada talo ia: Karistus tao aon nok bali hatahori neondak soa-neu hatahori Yahudir fo ara tao ratetu basa hata fo Manetualain helu-bartaa nae taon soa-neu sira bei-baꞌin nara ena. No dalak naa, Ana tulu-fali hatahori Yahudir fo bubuluk rae, Manetualain kokolak tetebes.
ROM 15:9 Huu naa de basa hatahori nusa-nusak laen fo hatahori ta Yahudir soꞌuk kokoa-kikiok soa-neu Manetualain. Huu ara bubuluk rae, Ana nameda kasian soa-neu ita basa ngga. Naa, sama leo lele uluk Dauk surak nai Susura Malalaok dale nae, “Huu naa de au nau akadedemak O nadem, nai hatahori nusa-nusak laen nara matan. Au nau soda sosoda kokoa-kikiok laꞌe-neu O nai hatahori nusa laen nara matan.”
ROM 15:10 Numa mamanak laen nai Susura Malalaok neni surak nae, “Woi! Ei hatahori deak numa mamanak laen nara mai. Tao ei dalem mara mbena sau-sau, sama-sama mia Lamatuak hatahori heli-helin nara.”
ROM 15:11 Dauk surak numa mamanak laen nai Susura Malalaok nae, “Ei manuma hatahori nusa-nusak laen nara mai, makadedemak Lamatuak, huu Ndia ta neni babanggak, de basa hatahorir tungga koa-kio neu ita Lamatuan.”
ROM 15:12 Baꞌi Yesaya surak numa mamanak laen nai Susura Malalaok nae, Numa Isai anan mane Dauk, neu ko ndia tititi-nonosin esa kalua mai. Neu ko Ana ndia toꞌu parenda soa-neu hatahori nusa-nusak laen nara. Ara bubuluk ena Ana nae mai. Boe ma ara rahani a neun, huu ara ramahena neun.”
ROM 15:13 Manetualain dadi okak numa basa hata fo ita tamahenak mai. Mete ma ei mamahere neun, na, Ana ndia tao nala ei dalem mara ramahoko ma lino-lendek. Elan fo Manetualain Dula-dale Malalaon koasan tao nala ei tamba mamahere tebe-tebe laꞌe-neu hata fo Ana nau taok.
ROM 15:14 Toranoo nggara ein! Au amahere tebe-tebe ena ae, ei dalem mara sofek no hata fo neulauk kara ena, ei bubuluk noꞌun seli ena, ma ei bisa esa nanori-nafada esa.
ROM 15:15 Au surak no ledo-ledon talo ia nai susurak ia fo fee nesenedak laꞌe esa bali soa-neu ei, laꞌe-neu dedeꞌak mata-matak kara. Au surak talo ia, nahuu Manetualain natudu Ndia dale susuen neu au,
ROM 15:16 neu Ana soꞌuk nala au fo dadi uu Yesus Karistus nedenun, fo muste uu tui-bengga Manetualain Hara Lii Malolen soa-neu hatahori nusak ta Yahudir. Au akalalaꞌok au ueng naa, sama leo malangga anggama fo nau tao sadia hatahori noꞌuk kara dadi leo tunu-hotuk esa fo tao namahoko Manetualain dalen. Manetualain Dula-dale Malalaon ndia tao nala sara dadi reu lolo-laok, fo Manetualain bisa simbok kasa.
ROM 15:17 No au akaesa ua Yesus Karistus, huu naa de au bisa soꞌuk au matang nai Manetualain matan.
ROM 15:18 Au kokolak afada kada Karistus tataon a mesan, ma talo bee de, Ana pake au. Au ta ambarani kokolak dedeꞌak laen. Hatematak ia hambu hatahori ta Yahudir ramanene neu Karistus, nahuu Manetualain pake au fo atudu eno-dalak pake au kokolang ma au leleo-lalaꞌong.
ROM 15:19 Karistus fee au koasa numa Manetualain Dula-dalen mai ena, mita fo au bisa tao tanda heran mata-matak kara. Ana fee koasa neu au fo atudu ae, Karistus naa, see. No dalak naa, au afada hatahorir rai bee a mesan ena, basa-basan laꞌe-neu Karistus Hara Lii Malolen. Huu naa de au afada numa kota Yerusalem mai, ndule basan losa dae Ilirikum deka no Italia.
ROM 15:20 Numa lele uluk mai, au duꞌa hambu ae, “Au daleng hii nalan seli nau afada laꞌe-neu Karistus soa-neu hatahorir, fo bei ta ramanene rita Ndia Hara Lii Malolen!” Te au ta hii fee nenorik nai mamanak fo hatahori laen nara fee nenorik ena na.
ROM 15:21 Nai Manetualain Susura Malalaon dale neni surak nae, “Hatahori nusa-nusak fo bei ta ramanene rita laꞌe-neu Lamatuak, sira naar, ndia neu ko mete-ritan. Hatahori fo bei ta ramanene hata esa boe na, sira naar, ndia neu ko bubuluk laꞌe-neu Ndia.”
ROM 15:22 No au ueng talo naa, huu naa de au bei ta dadi uu tiro-dangga ei.
ROM 15:23 Tehuu hatematak ia au ueng manai ia basan ena. Doon seli losa teu-teuk kara ena, au daleng hii nalan seli fo ae uu tiro-dangga ei.
ROM 15:24 Mete ma au uni nusa Sapanyol uu, dei fo au tuli uu tiro-dangga ei. Mete ma au tuli taak nai ei ena, na, ei oo bisa sou au mia doi dalak uni Sapanyol uu boe.
ROM 15:25 Tehuu hatematak ia au ae uni Yerusalem uu dei, fo aono-lalau Lamatuak hatahori kamaheren nara marai naa.
ROM 15:26 Huu ita toranoon nara marai profensi Makedonia ma profensi Akaya, fee doi kolete ena, fo tulu-fali hatahori kasian nara fo mana ramahere neu Karistus nai Yerusalem.
ROM 15:27 Ara nau tao talo naa, nahuu rameda rahuta soa-neu ita toranoon nara marai Yerusalem. Huu hatahorir maruma nusa-nusak laen marai bee a mesan oo simbok hata fo neulauk ena fo Manetualain Dula-dalen feen nakahuluk kana soa-neu hatahori Yahudir boe. Dadi nandaa mete ma hatahori saranik ta Yahudir nau pake sira hata-heton fo doi-sou sira toranoon hatahori Yahudir.
ROM 15:28 Dadi mete ma au tao akababasak ues ia ena, fo fee doi-souk ia neu ita toranoon nara marai Yerusalem, au ae tuli fo tiro-dangga ei, neu au laꞌo uni Sapanyol uu.
ROM 15:29 Mete ma au neti, neu ko au nau uni babaꞌe-babatik noꞌun seli numa Karistus mai.
ROM 15:30 Toranoo nggara ein! No Yesus Karistus dadi neu ei Lamatuam, ma Manetualain Dula-dalen tao nala ei esa sue esa, huu naa de au oke fo ei hule-haradoi tebe-tebe fo Manetualain tulu-fali au.
ROM 15:31 Moke-hule fo Manetualain nanea au nai profensi Yudea, fo hatahori fo ta mana nau namahere neu Manetualain, boso tao manggarauk neu au. Ma moke-hule fo mete ma au uu aono-lalau hatahori saranik kara marai Yerusalem, na, ara simbok au no malole.
ROM 15:32 Mete ma Manetualain nau, na, au bisa mai tiro-dangga ei no dale nemehokok. Au nau hahae aong faa nai ei naa.
ROM 15:33 Au hule-haradoi fo oke Manetualain sama-sama no ei. Ana ndia bisa tao nala hatahori leo-laꞌo no mole-damek. Tebe!
ROM 16:1 Nesik susurak ia, au ae akalelelak ita kaꞌa inan Febe neu ei, ma oke fo ei simbok malan dei. Ndia, ndia ara soꞌu ralan fo dadi neu mana malangga saranik nai kota Kengkrea.
ROM 16:2 Au oke fo ei makambela limam mara fo simbok malan no malole, sama leo hata fo nandaa soa-neu hatahori saranik kara, nahuu ana nakaesa no ita Lamatuan. Ana toꞌa hata, na, tulun doi-sou neun leo. Ana ndia tulu-fali au, ma hatahori noꞌuk ka numa fai bakahulun mai.
ROM 16:3 Haitua hara masodak malole numa au mai, fee kaꞌa inak Priskila no ndia saon, kaꞌa Akila. Ai sama-sama makalalaꞌok Yesus Karistus ue-osan noꞌun seli ena.
ROM 16:4 Ela kada faak ka dua sara mate fo ara tao rasoi-rasoda au. Tehuu ta kada au mesa ngga ndia oke makasi neu sara. Hatahori ta Yahudir fo mana dadi reu hatahori saranik ena, numa basa saranik kara marai bee a mesan oo roke makasi nahuu sira tutulu-fafali malolen boe.
ROM 16:5 Haitua au hara masodang fee basa hatahorir fo mana rakabubua fo nggarei nai Priskila no Akila uman. Haitua hara masodak fee au nonoong, kaꞌa Epenetus. Ndia naa, hatahori makasososak fo namahere neu Karistus nai profensi Asia.
ROM 16:6 Haitua hara masodak fee kaꞌa inak Mia. Ana naue-osa fafandek lima-ein numa ei taladam.
ROM 16:7 Haitua hara masodak fee kaꞌa Andronikus no kaꞌa inak Yunia. Sira naar, hatahori Yahudi sama leo au. Ara ramahere Karistus ena, neu au bei ta amahere. Fai bakahulun ara ruma bui dale sama-sama ro au. Sira oo dadi reu Lamatuak nedenun boe. Sira iar hatahori nelelak kara.
ROM 16:8 Haitua hara masodak fee kaꞌa Ampliatus. Au suen, nahuu ana nakaesa no ita Lamatuan.
ROM 16:9 Haitua hara masodak fee kaꞌa Urbanus. Ana oo nakalalaꞌok Karistus ue-osan sama-sama no ai boe. Haitua hara masodak fee kaꞌa Stakis fo au suen.
ROM 16:10 Haitua hara masodak fee kaꞌa Apeles. Ana hambu soba-douk, tehuu ana senggi. De manggaledok ena, ana namahere tebe-tebe neu Karistus. Haitua hara masodak fee kaꞌa Aristobulus nufanelun lalaꞌen.
ROM 16:11 Haitua hara masodak fee kaꞌa Herodion. Ndia ia, hatahori Yahudi sama leo au. Haitua hara masodak fee Narkisus nufanelun lalaꞌen fo mana ramahere neu Karistus ena.
ROM 16:12 Haitua hara masodak fee kaꞌa inak Trifena ma kaꞌa inak Trifosa. Sira oo rakalalaꞌok ita Lamatuan ue-osan boe. Haitua hara masodak fee au nonoong, kaꞌa inak Persis. Ndia oo naue-osa fafandek lima-ein soa-neu ita Lamatuan boe.
ROM 16:13 Haitua hara masodak fee kaꞌa Rufus. Ita Lamatuan ndia here nalan. Haitua hara masodak fee ndia inan boe. Ndia naa, nok bali au ina bongging.
ROM 16:14 Haitua hara masodak fee kaꞌa Asinkritus, kaꞌa Flegon, kaꞌa Hermes, kaꞌa Patrobas, kaꞌa Hermas, ma basa toranook kara fo mana leo ro sara.
ROM 16:15 Haitua hara masodak fee kaꞌa Filologus, kaꞌa inak Yulia, kaꞌa Olimpas, kaꞌa Nereus ma ndia fadi inan, ro basa hatahori saranik kara fo mana sama-sama ro sara.
ROM 16:16 Mete ma ei makabua, esa simbok esa pake iꞌidu susuek fo mana nandaak soa-neu hatahori kamaherek kara. Karistus hatahori saranin nara marai ia oo haitua hara masodak malole fee ei boe.
ROM 16:17 Toranoo nggara ein! Au oke fo ei besa-besa, ee! Manea matalolole, huu hambu hatahorir tao rabinggak ei fo rae ike rakatutudak ei. Hata fo ara rafada neu ei naa, ana laban neu hata fo ai manori ei ena. De boso matia-laik mia hatahori matak leo naak kara!
ROM 16:18 Ara ta raue-osa soa-neu ita Lamatuan Yesus Karistus. Ara raue-osa fo hambu buna-boak soa-neu kada sira ao heli-helin. Bafan nara mana laimina ndoos, mbali hatahori bei ta nalela bee ndia neulauk ma bee ndia manggarauk. Bafan nara leo bali fani oe fo kedi-ira hatahori.
ROM 16:19 Basa hatahorir ramanene ena rae, ei tungga makandoo Lamatuak hihii-nanaun. Huu naa de au daleng mbena sau-sau nahuu ei. Au nau fo ei dadi malela laꞌe-neu hata fo neulauk kara, ma boso babalik kasa ro hata fo manggarauk kara.
ROM 16:20 Manetualain naa, ndia fee ita bisa leo-laꞌo no mole-damek ma lino-lendek. Neu ko Ana ndia nakalulutu nitur malangga ina-huun koasan, ma natudu nae, ei ndia masenggin. Naa, ta dook ka ena. Au hule-haradoi fo ita Lamatuan Yesus Karistus natudu Ndia dale susuen soa-neu ei.
ROM 16:21 Fadi Timotius, fo mana maue-osa sama-sama no au, ana haitua hara masodak fee ei. Kaꞌa Lukius, kaꞌa Yason, ma kaꞌa Sosipater oo haitua hara masodak boe. Sira iar, hatahori Yahudi sama leo au.
ROM 16:22 (Au ia, Tertius, ndia mana surak susurak ia tungga hata fo kaꞌa Paulus nadenu au surak. Hara masodak malole numa au mai boe, huu au ia oo ita Lamatuan hatahorin boe.)
ROM 16:23 Au, Paulus, leo taak nai kaꞌa Gayus uman. Basa hatahori saranik kara marai ia rasiꞌe rakabua fo nggarei nai ndia uman. Ana oo haitua hara masodak boe. Kaꞌa Erastus fo mana dadi neu mana toꞌu doik nai kota, ma ita toranoon Kuartus oo haitua hara masodak boe.
ROM 16:24 [Au oke-hule fo ita Lamatuan Yesus Karistus natudu Ndia dale susuen soa-neu ei basa ngga. Baꞌu kada naa!]
ROM 16:25 Koa-kio Manetualain! Huu Ana ndia naena koasa fo tao ei dadi barakai. Ndia Hara Lii Malolen nae talo naa, ma au oo anori hatahorir talo naa boe, neu au afada sara laꞌe-neu Yesus Karistus. Manetualain ndia buka nafada ita basa hata laꞌe-neu Karistus ena fo hatahori lele uluk ta bubuluk, nahuu bei nemeninok.
ROM 16:26 Tehuu hatematak ia basa hata fo Manetualain mana toꞌu dedeꞌan lele uluk kara surak ralan nai Susura Malalaok dale, manggaledok ena. Manetualain ta mana matek, Ana ndia koladu fo basa hatahori nusa-nusak kara bisa bubuluk hata fo lele uluk nemeninok. No dalak naa, ara bisa ramahere neun, ma tungga Ndia hihii-nanaun.
ROM 16:27 Kada Ndia mesa kana, Manetualain. Kada Ndia mesa kana ndia nalela basa-basan. Au soꞌuk kokoa-kikiok neun, nahuu hata fo Yesus Karistus taok! Tebe naa! Au susurang losa kada ia, Soda-molek, Paulus
1CO 1:1 Susurak ia numa au mai, Paulus. Manetualain here nala au ena, fo dadi uu Yesus Karistus nedenun. Ma kaꞌa Sostenes oo haitua hara masodak soa-neu ei boe.
1CO 1:2 Au surak susurak ia fee ei, ndia Manetualain hatahori kamaheren marai kota Korentus. Ana here nala ei ena, fo dadi miu Ndia hatahori lolo-laon, nahuu ei mamahere neu Yesus Karistus ena. Ana oo tao ei dadi lolo-laok sama leo basa hatahori kamaherek laen nara rai bee a mesan boe. Ara oo roke tulun ita Lamatuan Yesus Karistus ena boe, fo Manetualain helu-bartaa memak kana numa lele uluk mai ena fo nae nadenun mai. De Ana oo dadi neu ita Lamatuan ma sira Lamatuan boe.
1CO 1:3 Au hule-haradoi neu Manetualain, ita Aman, ma Yesus Karistus, ita Lamatuan. Au oke-hule fo Ara ratudu Sira dale susuen neu ei, mita fo ei bisa leo-laꞌo no mole-damek ma lino-lendek.
1CO 1:4 Tungga-tungga au asaneda ei, au kokolak ua au Lamatuang ae, “Makasi noꞌun seli soa-neu hatahori Korentus asa nemeheheren!” Manetualain natudu Ndia dale susuen soa-neu ei ena, nahuu ei mamahere makandoo neu Yesus Karistus fo Ana nadenun mai ena.
1CO 1:5 De Ana fee ei mabeꞌi makalalaꞌok ues mata-matak kara ena, nahuu ei makaesa mia Ndia. Naa, tao nala ei mamasuꞌi nai ei dalem. Huu naa de ei malela no tebe-tebe basa hata fo nenenin lenak laꞌe-neu Ndia eno-dala masodan. Ei oo bubuluk dalak bee lolen lenak fo mafada hatahorir laꞌe-neu Karistus boe.
1CO 1:6 Basa dedeꞌak kara raa ratudu rae, basa hata fo ai mafada ei laꞌe-neu Karistus naa ena, raoka ratea nai ei dalem ena. Huu naa ei bei mamahere mae, basa dedeꞌak kara raa tetebes.
1CO 1:7 Dadi ei simbo mala basa hata fo neulauk ena, fo Manetualain Dula-dalen baꞌe fee Ndia hatahorin nara. Ta kuran hata esa boe na. De ei mahani a mia faik naa, fo neu ko Manetualain buka natudu ita Lamatuan Yesus Karistus soa-neu basa hatahorir.
1CO 1:8 Karistus naa, ndia nae tao barakai ei fo makatataka makandoo losa Ana fali mai nai dae-bafok ia. No dalak naa, ei ta tuda, ma ta hambu hatahori fo ndae salak neu ei.
1CO 1:9 Ita bisa tamahere neu Manetualain Dedeꞌa-kokolan, nahuu hata fo Ana kokolak, na, Ana taon dadi. De neu ko Ana nau tao basa dedeꞌak kara iar fee ei. Ana ndia nasosoi dalak fo ei bisa malela no malole Ndia Anan, ndia ita Lamatuan Yesus Karistus.
1CO 1:10 Toranoo susue nggara ein! Nai dedeꞌak ia, au kokolak unik ita Lamatuan Yesus Karistus naden. De au oke no tebe-tebe fo ei hahae mareresi leo. Tehuu maote tebe-tebe fo ei leo-laꞌo dalek esa, boso mabingga-baꞌek. Ei muste duduꞌa naruk, mita fo ei basa ngga bisa maena duduꞌak esak ka.
1CO 1:11 Au kokolak talo naa, huu hambu hatahori numa kaꞌa inak Kloe uma isin, mai tui au nae, ei ketuk bei mareresi makandoo.
1CO 1:12 Ei mareresi, de ketuk rae, “air ia, kaꞌa Paulus hatahorin!” Ma ketuk rae, “air ia, kaꞌa Apolos hatahorin!” Ma ketuk bali, rafafada aok rae, “air ia, tungga kaꞌa Peꞌu!” Laen bali rae, “air ia nenene kada Karistus mesa kana!”
1CO 1:13 Ei duduꞌam talo bee? Karistus nufanelun ta bisa rabingga-baꞌek. Do, ei duꞌa mae, naa au ndia mate nai ai ngganggek soa-neu ei? Taa! Do, neu sarani ei, ara pake au nadeng fo fee ei maso dadi miu au hatahoring, do? Ta bisa dadi, hetu?
1CO 1:14 Au oke makasi neu Manetualain, huu neu au ua ei numa naa, au ta sarani hatahori. Kada kaꞌa Krispus no kaꞌa Gayus ndia au sarani.
1CO 1:15 No dalak naa, ta hambu hatahori bisa nae, “Ara sarani au pake Paulus naden, de au dadi uu Paulus hatahorin.”
1CO 1:16 (Ee, au dei fo asaneda. Au oo sarani hatahori noꞌuk ka numa Stefanus uma isin boe. Tehuu au ta asaneda mete te hambu hatahori laen bali fo au saranin, do taa.)
1CO 1:17 Huu Karistus ta nadenu au fo uu sarani hatahori. Au ue huung naa, ndia afada hatahorir laꞌe-neu Ndia Hara Lii Malolen. Tehuu mete ma au afada hatahori talo naa, Ana ta nau au kokolak pake dedeꞌa binir fo atudu au malelang, do, atudu oka-huun fo ta hohoꞌak kara. Mete ma au kokolak talo naa, naa tao nakuran koasa numa tutuik laꞌe-neu Karistus mamaten numa ai ngganggek lain.
1CO 1:18 Hambu hatahori duꞌa nae, basa dedeꞌak fo ita tuik laꞌe-neu Karistus mamaten numa ai ngganggek lain naa, nggoa bebek sudi selik kana. Tehuu hatahori matak leo naak, neu ko ana lenggo feꞌe numa Manetualain mai. Naa te soa-neu ita, Karistus mamaten naa, natudu Manetualain koasan fo tao nasoi-nasoda ita numa ita sala-singgon mai.
1CO 1:19 Naa, sama leo Manetualain mana toꞌu dedeꞌan, nade Yesaya surak nita nae, “Manetualain nae, ‘Basa hata fo hatahori malelak kara bubuluk, neu ko Au amopo heni basa sara, fo dadi neu hata fo sosoa-ndandaan taak. Sira malelan matak talo bee oo neu ko Au nggari heni basa sara, fo dadi neu hata fo nenenin taak boe.’ ”
1CO 1:20 Fai bakahulun, memak Manetualain kokolak talo naa. De hatematak ia, ana dadi talo bee ena? Hatahori malelak kara dadi talo bee? Meser anggamar dadi talo bee? Ma hatahori mana parani madedeꞌak kara, dadi talo bee? Hena nenene, ee! Manetualain tao nala sara sama leo hatahori nggoa bebek ena! Ana feꞌa heni basa duduꞌa-aꞌafik mana naokak nai dae-bafok ia, ma tao sara sama leo ta raena sosoa-ndandaak hata esa boe na.
1CO 1:21 Manetualain malelan naa, ta neni babanggak sudi selik kana. Leo mae hatahori dae-bafok tao aon malelak, sira duduꞌa-aꞌafin mesa kasa ta manduku-mandaik fo ara bisa ralela tebe-tebe neu Manetualain. Leo mae talo naa, tehuu Manetualain pake Ndia malelan ena, fo sosoi dalak soa-neu hatahori dae-bafok. Fai bakahulun, Ana duꞌa ena nae, “Leo mae hatahori dae-bafok duꞌa nae, Au nedenung nggara kada hatahori nggoa bebek a mesan, tehuu leo mae talo bee oo, Au muste adenu hatahori fo reu rafada sara dedeꞌa ndoos laꞌe-neu Au boe.” Manetualain naketu basa nae pake hara heheluk fo Ndia nedenun nara rafadak naa ena, fo hatahorir bisa ramahere neu Ndia. Ana nau pake dalak naa, fo tao nasoi-nasoda hatahorir numa sala-singgon nara mai. Tehuu hatahori dae-bafok duꞌa rae Manetualain dalan naa, nggoa bebek. Huu naa de ara ta nau tao matak neu Ndia nedenun. Hatahori Yahudir nau roke kada tanda heran a mesan, fo ara bisa mete-rita Manetualain koasan. Ma hatahori Yunanir nau nenene kada dedeꞌa malelak kara fo mana maso duduꞌa-aꞌafik neulauk a mesan, tungga sira mesa kasa duduꞌan.
1CO 1:23 Leo mae talo naa, tehuu ai fo mana dadi Lamatuak nedenun nara, kada laꞌok miu mafada hatahorir mae, “Manetualain nadenu Karistus ena, ndia Hatahori fo Ana helu-bartaa memak kana numa lele uluk mai ena, fo nae nadenun mai. Basa de hatahori laen nara paku risan numa ai ngganggek lain.” Neu hatahori Yahudir ramanene tutuik naa, ara rae timba henin, huu tungga sira duduꞌan, Hatahori fo Manetualain nae nadenuk mai naa, ta bisa mate. Neu hatahori Yunanir ramanene tutuik naa, ara duꞌa, “Tutuik nggoa bebek mateꞌen, ee!”
1CO 1:24 Tehuu hambu hatahori fo Manetualain here memak kana, fo dadi neu Ndia enan. Ketuk ruma hatahori Yahudir mai, ma ketuk ruma hatahori ta Yahudir mai. Tungga sira raa, Karistus mamaten natudu sara ena nae, Manetualain koasan moꞌon sudi selik kana, ma Ndia malelan naa, ta neni babanggak sudi selik kana.
1CO 1:25 Leo mae hatahori dae-bafok kara duꞌa rae, Manetualain dalan naa nggoa bebek, tehuu Ndia malelan bei lena heni sara. Ma leo mae ara duꞌa rae, Manetualain ta naena koasa hata esa boe na, tehuu Ndia koasan moꞌon bei lena heni sara.
1CO 1:26 Toranoo susue nggara ein! Mita fo ei bisa malela au kokolang ia, masaneda ei nenggetuu-nemberiim, neu Manetualain here nala ei fo dadi miu Ndia enan. Tungga hatahori dae-bafok timba-tain, nai ei taladam mara ta hambu hatahori malelak noꞌuk ka, ta hambu hatahori ta hohoꞌak noꞌuk ka, ma ta hambu hatahori noꞌuk ka numa nufaneluk mai raena nade moꞌok.
1CO 1:27 Tehuu Manetualain here nae pake hatahori bee fo hatahori dae-bafok henggenee nae, nggoa bebek sudi selik kana, fo nakamamaek hatahori fo mana tao aon malelak. Ma Ana oo here nau pake hatahori bee fo hatahori dae-bafok henggenee nae, ta naena koasa hata esa boe na, fo nakamamaek hatahori fo mana tao aon naena koasa boe.
1CO 1:28 Ana here nala hatahori kadiꞌik ta resi fulinggamuk, ma hatahori dae-bafok hii rakaloloek kasa. Manetualain nau pake sara fo tao hatahori bee fo tao aon ta hohoꞌak, dadi sama leo sira ta raena sosoa-ndandaak hata-hata bali.
1CO 1:29 Dadi, neu hatahorir rasare mbali Manetualain, neu ko ta hambu esa boe na bisa femba tenden nae, ndia naa, ta hohoꞌak.
1CO 1:30 Manetualain mesa kana ndia nasosoi dalak fo ei bisa maso dadi miu Yesus Karistus hatahorin. Manetualain ndia tao fo Yesus dadi Hatahori fo fee Ndia malelan soa-neu ita. Yesus naa, ndia nasosoi dalak fo ita bisa mole-dame to Manetualain. Yesus naa, ndia tao ita bisa tasoda no ndoos ma lolo-laok. Ma Ana ndia nakamboꞌik ita numa sala-singgok koasan mai.
1CO 1:31 Dadi ita muste tao sama leo neni surak nai Manetualain Susura Malalaon nae, “See ndia hii soꞌuk kokoa-kikiok, malole lenak, ara soꞌuk kokoa-kikiok neu hata fo ita Lamatuan taok. Boso soꞌuk sira ao heli-helin.”
1CO 2:1 Toranoo susue nggara ein! Fai bakahulun, neu au uni ei neti, au buka afada ei Manetualain nanae nemeninon, fo fai bakahulun hatahori dae-bafok bei ta ralelan. Tehuu au ta uni dedeꞌa-kokolak naa fo kokolak koa ao. Ma au oo ta pake dedeꞌa binir fo atudu au malela heli-heling boe.
1CO 2:2 Neu au sama-sama ua ei, au duꞌa talo ia: au nau atudu kada dedeꞌak esa, ndia Yesus Karistus. Ndia naa, Hatahori fo Manetualain helu-bartaa memak kana numa lele uluk mai ena, fo nae nadenun mai. Tehuu neu Yesus mai, hatahorir paku rakanisan numa ai ngganggek lain. Kada dedeꞌak naa mesa kana, ndia au nau kokolak kana akandoo.
1CO 2:3 Fai maneuk kara, neu au bei sama-sama ua ei, au ameda ta abeꞌi, ma au oo amataꞌu ma dere bebe-bebe boe.
1CO 2:4 Au kokolang ma au hara hehelung naa, rofok a mesan, de hatahorir bisa ralelan no muda hiek. Au ta soba pake dedeꞌa-kokolak lena-lenak fo kokoe ei. Taa! Tehuu neu au kokolak naa, manggaledok ena ae, Manetualain Dula-dale Malalaon ndia koladu au, ma Ndia koasan nai au dale.
1CO 2:5 Au duꞌa, ta malole mete ma ei mamahere neu Manetualain, nahuu ei mamanene kada hatahori dae-bafok dedeꞌa-kokola malelan a mesan. Malole lenak ei mamahere neu Manetualain, nahuu Ana natudu Ndia koasan neu ei.
1CO 2:6 Naa te, neu ai makokola aok mia hatahori manggalalasik nai nemeheherem dale, ai manori pake dedeꞌa-kokolak mana maso duduꞌa-aꞌafi neulauk. Tehuu ta mana maso duduꞌa-aꞌafi neulauk tungga hatahori dae-bafok duduꞌan, do tungga hata fo hatahori mana toꞌu parendar hii ranori hatematak ia. Huu sira iar, neu ko ta toꞌu koasa rakandoo.
1CO 2:7 Tehuu ai manori kada nanae malelak mana konda numa Manetualain mai. Lele uluk neu dae-bafok bei ta dadi, Manetualain nafuni nanaen nara raa. Tehuu Ana naketu basa ena fo hatematak ia Ana nae buka nanae nemeninok naa soa-neu ita, mita fo nesik Ndia ta neni babanggan, ita hambu babaꞌe-babatik noꞌuk ka.
1CO 2:8 Tehuu hatahorir fo hatematak ia mana toꞌu parenda, ara ta ralela Manetualain malelan teteben. Mete ma ara ralela, ta bisa dadi ara paku rakanisa ita Lamatuan fo ta neni babanggak naa, nai ai ngganggek lain.
1CO 2:9 Nai Susura Malalaok neni surak laꞌe-neu Manetualain nanae nemeninon fo fai bakahulun bei nefunik nae, “Hambu hata fo hatahori dae-bafok matan bei ta mete-nitan, ma hambu hata fo hatahori dae-bafok ndiꞌi doon bei ta namanene nitan, fo hatahori dae-bafok ta bisa duꞌa nalan. Naa te Manetualain sadia memak basa dedeꞌak kara raa ena, fee hatahori fo mana sue-lai neu Ndia.”
1CO 2:10 Memak fai bakahulun, hatahorir ta ralela dedeꞌak kara raa, tehuu hatematak ia Manetualain pake Ndia Dula-dalen ena, fo tao dedeꞌak kara raa neni bukak soa-neu ita. Manetualain Dula-dalen naa, nalela basa dedeꞌak kara. Ana oo parisa no lutu-lelon Manetualain dale kuru-eron boe.
1CO 2:11 Ita esa-esak taena dula-dalek nai ita dale heli-helin dale. Huu naa de ita hatahori dae-bafok duduꞌan ma hihiru-heheon ta sama. Ma ta hambu hatahori laen fo bubuluk no tetuk ita dale kuru-eron, kada ita dula-dalen mesa kana. Leo naak oo no Manetualain boe. Ta hambu hatahori esa boe na, bubuluk Manetualain dale kuru-eron. Kada Ndia Dula-dalen mesa kana ndia bubuluk tebe-tebe.
1CO 2:12 Ita simbo tala Manetualain Dula-dalen ena, de Ana ndia koladu ita. Huu naa de ita ta tungga hatahori manai dae-bafok ia duduꞌan. De ita bisa talela basa dedeꞌa neulauk kara fo Ana adu nalan fee ita ena, nahuu Manetualain Dula-dalen nai ita dalen.
1CO 2:13 Dedeꞌak kara raa, ndia ita tasiꞌe kokolak kasa. Ai mafada basa dedeꞌak kara raa fo Manetualain Dula-dalen nanori neu ai. Ai ta fee nenorik pake dedeꞌa-kokolak fo maso duduꞌa-aꞌafi neulauk tungga hatahori dae-bafok duduꞌan. Tehuu ai fee nenorik pake dedeꞌa-kokolak numa Manetualain Dula-dalen mai, soa-neu hatahori mana nalela Lamatuak.
1CO 2:14 Tehuu mete ma hambu hatahori ta nalela Manetualain Dula-dalen, boe ma ana namanene ai kokolan, ana ta simbok no malole. Ana duꞌa nae, “Hata naa? Ta bisa maso nai duduꞌa-aꞌafik!” Naa te leo mae talo bee oo hatahori naa ta bisa nalela dedeꞌak kara raa, huu ana ta leo-laꞌo nakaesa no Manetualain Dula-dalen boe.
1CO 2:15 Hatahori fo mana leo-laꞌo nakaesa no Manetualain Dula-dalen, dei fo bisa nalela basa dedeꞌak kara raa, ma bisa bubuluk bee ndia tetebes sara. Tehuu hatahori laen nara ta uku-sudi rala hatahori naa.
1CO 2:16 Bisa talo bee? Sama leo neni surak nai Susura Malalaok dale nae, “See ndia bisa nalela Manetualain duduꞌan? Do, see ndia bisa koladu Lamatuak, fo Ana tao tungga ita nenori-nefadan? Ta hambu hatahori esa boe na!” Naa te ita bisa talela Manetualain nanaen nara raa, nahuu Karistus tulun fo ita bisa duduꞌa tungga Ndia duduꞌan.
1CO 3:1 Toranoo susue nggara ein! Fai maneuk kara, neu au numa naa, ei sama leo hatahori fo bei ta makaesa malole mia Manetualain Dula-dalen. Huu ei bubuluk kada tungga ei hihii-nanaum mesa kasa sama leo hatahori dae-bafok biasa. Huu naa de au ta bisa kokolak ua ei sama leo hatahori manggalalasik, huu ei sama leo kada kakana kadiꞌi anar.
1CO 3:2 Au muste anori ei laꞌe-neu dedeꞌa dakuk a mesan, huu ei bei ta sadia simbo dedeꞌak fo berak, sama leo kakana kadiꞌi anak fo bei ta bisa naꞌa mbaa. Naa te ei muste dadi barakaik sama leo hatahori moꞌok fo nasiꞌe naꞌa mbaa. Tehuu hatematak ia, ei bei leo bali kakana mbimbila anak fo nalela ninu kada susu.
1CO 3:3 Huu ei bei duduꞌa sama leo hatahori fo kada nau tungga sira mesa kasa hihii-nanaun. Mete ma hambu hatahori fo lenak numa ei mai, na, ei mbiri ma mareresi kii-konak! Huu naa de au ae ei bubuluk kada tungga ei mesa ngga hihii-nanaun. No dalak naa, ei sama leo kada hatahori dae-bafok biasa manai dae-bafok ia.
1CO 3:4 Huu ei ketuk mae, “Air ia, kaꞌa Paulus hatahorin!” Ma hambu ketuk rae, “Air ia, kaꞌa Apolos hatahorin!” Tungga-tungga ei kokolak talo naa, ei matudu mae, ei sama tetar mia hatahori dae-bafok biasa fo ta nalela Karistus.
1CO 3:5 Naa te Apolos naa, see? Ma au, Paulus ia, see? Ai dua ngga ia, kada dadi miu neondak a mesan. Ai ndia matudu dalak fo ei bisa mamahere neu Karistus. Apolos nakalalaꞌok ues tungga Lamatuak parendan. Ma au oo talo naa boe!
1CO 3:6 Au ndia makasososan afada ei laꞌe-neu Karistus. Naa, sama leo au sele-tande bini-nggees. Basa de Apolos mai nanori ei. Naa, sama leo ana totoli-tetee bini-nggees fo au sele-tandek naa ena. Tehuu Manetualain naa, ndia tao nala bini-nggees naa mori dadi namoꞌo.
1CO 3:7 Dadi hatahori fo mana sele-tande bini-nggees ta naena sosoa-ndandaak. Ma mana totoli-tetee bini-nggees naa oo ta naena sosoa-ndandaak boe. Kada hatahori esa ndia kasosoak, ndia Manetualain. Ana ndia tao nala bini-nggees naa mori.
1CO 3:8 Hatahori mana sele-tandek ma hatahori mana totoli-teteek, ara raue-osa sama-sama, leo ara rai bua-aok esa dale. Ma basa hatahorir fo mana rakalalaꞌok Manetualain ue-osan, neu ko Ana nae bala sira sosota-mamanggun.
1CO 3:9a Ai sama-sama dadi miu Manetualain hatahori mana maue-osan. Ma ei dadi sama leo Manetualain osin fo Ana nae nauen.
1CO 3:9b Leo naak oo ei sama leo uma esa fo Manetualain nae nambaririik kana boe.
1CO 3:10 Manetualain natudu Ndia dale susuen neu au ena. Huu naa de au sama leo ndolu langgak. Manetualain tulu-fali, de au anori dedeꞌa huuk neu ei numa makasososan mai, fo ambaririik ei leleo-lalaꞌom nai fanderen matea lain. Basa de hatahori laen oo ranori ei boe, fo rambaririik kana nai fanderen fo au tao alak naa lain ena. Tehuu tukan esa-esak muste naue-osa natalolole fo nambaririik kana ndaa tetebes.
1CO 3:11 Fanderen matea hambun ena. Ndia Yesus Karistus. Dadi ta hambu hatahori nambaririik fanderen laen nai ei dalem, huu Lamatuak nambaririik fanderen tetebes ena.
1CO 3:12 Neu ko hambu hatahori fo nau nambaririik neu fanderen naa lain pake buas mata-matak kara. Ketuk nau pake buas mabeli leo lilo mbilas, lilo fulak, do batu manggadilak. Ketuk nau pake buas biasa leo ai, naꞌu, do fii.
1CO 3:13 Tehuu tukan esa-esak ue-osan neu ko neni nitak, ma basa hatahorir bubuluk ndia ue-osan naa, neulauk do taa. Te losa dae-bafok mateꞌen, neu ko Manetualain nae foran, sama leo Ana pake aꞌi fo natudu hatahori esa-esak uen nakatataka do taa.
1CO 3:14 Mete ma fora basa hatahori esa ue-osan pake aꞌi ena, ma buas fo ana pakek bei nakatataka, neu ko Lamatuak feen seseba-babaek nai lalai.
1CO 3:15 Tehuu mete ma fora basa hatahori ue-osan pake aꞌi ena, ma buas fo ana pake nambaririik neu fanderen lain naa, aꞌi naꞌa henin, na, Lamatuak ta fee hatahori naa, seseba-babaek hata esa boe na. Tehuu tukan naa bei hambu masoi-masodak, leo mae sama leo hatahori fo mana nalai kalua numa uma fo aꞌi naꞌak mai, ma elak ka faa maten.
1CO 3:16 Ei muste malela mae, ei oo sama leo Manetualain uma huhule-haradoin esa boe, ma Ndia Dula-dalen oo leo nai dale boe.
1CO 3:17 Mete ma hambu hatahori fo nakalulutu Manetualain uma huhule-haradoin, fo Ndia mamana leleon naa, na, besa-besa, ee! Neu ko Manetualain oo fee hukun berak neun boe! Manetualain uma huhule-haradoin naa, malalaok. Huu naa de ei oo muste malalaok boe.
1CO 3:18 Boso kedi-ira ei aom! Mete ma o tao aom malelak, ma malela basa-basan tungga hatahori dae-bafok hatematak ia malelan, manggaledok ena, o ta malela hata esa boe na. Mete ma o mameda mae, o ta malela hata-hata, dei fo o bisa mulai manori fo malela.
1CO 3:19 Hatahori dae-bafok hatematak ia duduꞌan, Manetualain duꞌa nae kada nggoa bebek a mesan. Sama leo neni surak nai Susura Malalaok nae: “Hambu hatahori fo tao aon leo malelak, tehuu neu ko Lamatuak pake sira mesa kasa duduꞌa-aꞌafi kaboo mburun, de ike falik kasa fo nakalulutu duduꞌa-aꞌafin nara!”
1CO 3:20 Nai mamana laen neni surak nae, “Ita Lamatuan bubuluk ena, hata fo hatahori malelak kara duꞌak, ma nae taon talo bee, Ana bubuluk ena, sira duduꞌa kada dedeꞌak fo hie-hie a mesan.”
1CO 3:21 Dadi ei boso kada soꞌuk hatahori esa mae, ndia ta hohoꞌak. Lamatuak ndia soꞌuk hatahori fo nalangga ei. Basan dadi neu ei enam ena. Dadi ei malanggam mara, sama leo: au, kaꞌa Apolos, ma kaꞌa Peꞌu, ai basa ngga dadi miu ei enam. Ma basa hata manai dae-bafok ia oo dadi neu ei enam boe, leo mae ei bei masoda do mate, leo mae hatematak ia, do fai mana maik, basa-basan dadi neu ei enam.
1CO 3:23 Tehuu Ei dadi miu Karistus enan. Ma Karistus dadi neu Manetualain enan!
1CO 4:1 Dadi ei muste taon neu ai talo ia: boso soꞌu makadedemak ai, huu air ia, kada Karistus neondan a mesan. Ma Manetualain fee nemeheherek neu ai fo manori ma manea matalolole Ndia dedeꞌan nara fo fai bakahulun bei nefunik.
1CO 4:2 Hatahori mana manea ndia lamatuan hata-heton, ana muste dadi hatahori mana tao tungga hata fo ndoos.
1CO 4:3 Au talo bee? Au aue-osa tungga hata fo ndoos, do taa? Au ta hosek ei timba-tai au talo bee. Ma au oo ta tao matak neu hatahori laen nara timba-tai au talo bee boe. Au oo ta tao matak neu timba-tai au aong boe.
1CO 4:4 Huu leo mae au daleng nae au malole ena, mete te bei ta bubuluk sosoa-ndandaan nae au malole. Nenenin lenak ndia, Lamatuak timba-tai au talo bee.
1CO 4:5 Dadi ei boso tao aom mara leo mana maketu-maladi dedeꞌak fo timba-tai hatahori laen nara. Mahani Lamatuak fali main. Huu neu ko Ana ndia buka basa dedeꞌak kara. Ana ndia leꞌa kalua heni hata fo manggarauk kara fo hatahorir rafuni sara nai makiuk dale. Ana nau natudu basa hata fo hatahorir duduꞌa sara rai sira dalen dale. Ma Manetualain nau koa hatahori esa-esak mana tao hata fo neulauk kara ena.
1CO 4:6 Toranoo nggara ein! Au kokolak ena laꞌe-neu au ua kaꞌa Apolos, sama leo au fee netuduk fo ei bisa manori dedeꞌak esa numa ai mai, talo ia: Tao tungga basa dedeꞌak kara fo neni surak nai Manetualain Susura Malalaon a mesan. Boso tao tungga laen bali. Mete ma ei manori dedeꞌak naa, na, hae miak esa boe na ma kokolak maloloa bafam, nahuu tungga hatahori esa ma makaloloek laen.
1CO 4:7 Dadi talo bee? Ei tao aom laen numa laen mai, do? Bosok! Huu basa babanggi-babaꞌek fo ei simbok kara, ei hambun numa Manetualain mai. Dadi mete ma talo naa, tao hata de ei koa ao sama leo ei ndia mesa kana aꞌadun?
1CO 4:8 Nok bali basa hata fo ei toꞌak, ei hambun ena. Leo bali ei kamasuꞌik ena, na! Ei tao aom mara leo hatahori moꞌo-inahuuk sama leo manek, de ai ta miu tia-tamba hata-hata. Naa te Manetualain ndia fee basa hata fo ei toꞌak. Tehuu mete ma ei dadi manek tetebes, fama te ai bisa toꞌu parenda sama-sama mia ei, hetu?
1CO 4:9 Air ia, ndia Manetualain nadenu fo meni bee miu a mesan nai dae-bafok ia, fo mafada hatahori laꞌe-neu Karistus. Tehuu laꞌe-laꞌe esa, au duꞌa leo bali Manetualain nadenu ai mambariik miu dea mateꞌen, sama leo hatahori buir fo rahani sira hukun mates. Ma Ana fee basa hatahorir marai dae-bafok ia, no Ndia atan nara marai nusa tetuk do inggu temak, fo ara ranilu ai.
1CO 4:10 Ei ta hohoꞌak sudi selik kana ena! Hambu hatahorir duꞌa rae eir ia, malelak, nahuu ei makaesa mia Karistus. Tehuu ara duꞌa rae air ia, kada nggoa bebek sudi selik kana, nahuu ai dadi miu Karistus hatahorin. Fama te ara duꞌa rae, eir ia, ndia barakaik sudi selik kana ena. Tehuu air ia, kada mana male-kalek. Fama te ara rakadedemak ei. Tehuu ara ta fee hada-horomatak faa boe na neu ai. Sudi selik kana tebe-tebe!
1CO 4:11 Losa hatematak ia oo ai mameda ndoe ma dale mada boe. Ai bua-loꞌan nara kada sida-saik kara. Hatahori soa popoko-paparu ai. Ai dadi miu hatahori matofa-tarak ta mana maena uma.
1CO 4:12 Ai sota-bengge maue-osa mia ai lima heli-helin. Mete ma hatahori kokolak mata-matak kara laꞌe-neu ai, na, ai bala mae, “Ai moke-hule fo Manetualain tao hata fo neulauk soa-neu ei.” Mete ma hatahori tao rakasususak ai, na, ai here fo makatataka a leo.
1CO 4:13 Mete ma hatahori kokolak rakabobook ai nade malolen, ai here fo bala no kokolak neulauk a mesan. Leo mae talo naa oo, tehuu hatahori bei tao ai leo bali seek boe, do, dafu-dae manggenggeok fo nandaa kada nggari henin leo.
1CO 4:14 Au surak dedeꞌak kara iar, ta ae tao ei dadi mae. Tehuu au nau kaꞌi-ore ei, nahuu au sue ei sama leo au ana heli-heling. Huu naa de au afada ei, fo fali tungga eno-dala ndoos.
1CO 4:15 Leo mae hambu hatahori rifu-rifuk kara fo bisa ratudu dalak neu ei laꞌe-neu Karistus, tehuu kada au mesa ngga ndia dadi neu ei amam. Huu au ia, hatahori makasososak fo mana nafada ei laꞌe-neu Yesus Karistus Tutui Malolen. Huu naa de ei mamahere neun. Au tao talo naa, nahuu au akaesa malole ua Yesus Karistus.
1CO 4:16 Dadi au oke fo ei tungga matalolole au netudung.
1CO 4:17 Huu naa de au adenu Timotius fo tulun ei. Au sue neun, sama leo au ana heli-heling. Au amaheren, huu ana oo leo-laꞌo nakaesa no ita Lamatuan boe. Neu ko ana tulun ei fo fee nesenedak laꞌe-neu au leleo-lalaꞌong. Au leleo-lalaꞌong talo naa, nahuu au akaesa ua Yesus Karistus fo Lamatuak nadenun mai ena. Ma naa oo, sama leo hata fo au anorik fee hatahori saranik fo mana rakabubua nai bee a mesan boe.
1CO 4:18 Hambu ketuk ruma ei mai duꞌa rae, au ta dadi uni naa neti. Huu naa de ara koa ao ena.
1CO 4:19 Tehuu mete ma ita Lamatuan nau, ta dook ka bali te, au uni kota Korentus uu ena. No dalak naa, neu ko au bubuluk memak, mete te hatahori iar kada rabafa loa, do tebe-tebe raena koasa!
1CO 4:20 Huu Manetualain, Manek mana maena koasa. Ma Ndia hatahorin nara ta pake bafa mana laiminan nara fo fofoꞌa hatahori nemeheren, tehuu ara pake koasa fo tetebes.
1CO 4:21 Ei hihiim talo bee? Mete ma au mai, na, au kokolak barakaik ma fee hukun neu ei? Do, au mai atudu susue-lalaik ma dale neulauk?
1CO 5:1 Au amanene rae, hambu hatahori esa nai ei saranim dale, naeok no inak. Naa te hata fo ana taok naa, manggaraun lena heni hatahori ta mana nalela Manetualain. Huu ana soa sunggu-soro no ndia ina mbala heli-helin!
1CO 5:2 Tehuu ei koa aom mara bali, leo bali ei saranim neulauk a mesan! Ndondoon ndia, ei muste mae ma mameda susa. Hatahori matak naa, ei muste husi henin neni dook ka neu!
1CO 5:3 Leo mae ita takadodook esa no esa, tehuu au daleng leo nai ei. De au aketu hatahori manggarauk naa dedeꞌan ena, sama leo au nai naa memak.
1CO 5:4 Au aena haak aketu-aladi talo naa, nahuu Yesus dadi neu ita Lamatuan, ma au ia, Ndia nedenun. Ei muste manggatuuk makabua fo maketu-maladi dedeꞌak naa, menik Lamatuak naden. Au daleng oo sama-sama no ei boe.
1CO 5:5 De ei muste loo lima hatahori naa neni nitur malanggan neu, mita fo doo-doo boe ma hatahori naa nggari heni dedeꞌa manggarauk kara fo manai dalen dale. Mete ma ita Lamatuan fali mai, na, neu ko Ana bisa tao nasoi-nasoda hatahori naa numa ndia sala-singgon mai.
1CO 5:6 Ta malole, mete ma ei mabafa loa! Boso lilii-ndondou mae, ita babalik laru taꞌik baꞌu anak ka, fo tao kaifuu roti katematuan. Laru taꞌik naa, sama leo hatahori manggaraun. De mete ma elan fo ana tao manggarauk nai ei taladam, neu ko hatahori saranik laen nara oo tungga doꞌo-doꞌo tao manggarauk boe!
1CO 5:7 Husi heni hatahori manggarauk naa numa ei saranim mai, sama leo fai bakahulun hatahori Yahudir nggari heni basa laru taꞌik numa sira uman nara mai, fo sadia raꞌa feta Paska. No dalak naa, dei fo ei bisa dadi fali leo hatahori fo ta mana naena manggarauk nai ndia dalen dale bali. Ei muste dadi talo naa. Fai bakahulun, ara hala bibi lombo ana fo ta mana naena salak fo tao feta Paska tunu-hotun. Mai bakahiton, ara hala rakanisa Manetualain Hatahori Malalaon, fo dadi tunu-hotuk mana tao nalalao ita dalen.
1CO 5:8 Fai bakahulun, hatahori Yahudir raꞌa feta Paska pake roti lepa-nggees, ta mana pake laru taꞌik. Hatematak ia ita sama leo roti fo ta mana pake laru taꞌik naa. Huu naa de, muste tanea ita aon fo boso tao dedeꞌa manggarauk kara, ma boso tao makahehedik hatahori laen dalen. Ita muste kokolak tetebes takandoo. No dalak naa, hatahori mete-rita rae, ita tao basa-basan tungga ita dale susuen.
1CO 5:9 Fai bakahulun, au surak ita susurak ae, “Boso makabubua mia hatahori fo mana laꞌok sala no hatahori fo ta sira sao toun do sira sao inan.”
1CO 5:10 Au ta aena duduꞌak fo ei boso makabubua mia basa hatahorir marai dae-bafok ia, fo ta mana tao matak neu Manetualain, do hatahori bare-naꞌo, do hatahori pepeko-lelekok fo kedi-ira nala hatahori bua-baꞌun, do mana songgo-tangguk kara. Mete ma talo naa, na, ei muste tao aom mara lenggo feꞌe numa basa hatahorir marai dae-bafok ia mai.
1CO 5:11 Tehuu hatematak ia, dedeꞌak fo au kokolak naa, ndia: ei boso makabua mia hatahori fo mana nae ndia dadi hatahori saranik, naa te ana kada laꞌok sala do, mana bare-naꞌo do, mana songgo-tangguk do, mana kokolak nakalulutu hatahori naden do, mana mafu kamaberak do, mana pepeko-lelekok fo nau haꞌi nala hatahori bua-baꞌun. Ita boso takabua to hatahori matak leo naak kara. Boso manggatuuk miꞌa-minu mia sara bali!
1CO 5:12 Ei maena haak fo timba-tai hatahori saranik kara leleo-lalaꞌon. Tehuu au ta aena haak fo aketu-aladi dedeꞌak fee hatahori fo ta mana namahere neu Manetualain.
1CO 5:13 Huu Ndia mesa kana ndia neu ko naketu-naladi dedeꞌak fee hatahori fo ta mana namahere neu Ndia. Tehuu ei boso lilii-ndondou neu Manetualain Susura Malalaon mana surak nae, “Hatahori fo mana seseik aon dadi neu Manetualain hatahorin, tehuu ana soa tao dedeꞌa manggarauk kara husi nggari henin leo!”
1CO 6:1 Mete ma hatahori saranik esa nadedeꞌa no hatahori saranik laen, na, tao hata de ei meni mamana neketu-neladi dedeꞌak nai mana maketu-maladi dedeꞌak matan, fo ta mana nalela Manetualain? Talo bee de bisa talo naa? Malole lenak, mambariik miu hatahori kamaherek kara matan, fo ara parisa ei dedeꞌam!
1CO 6:2 Nok bali ei ta bubuluk mae, hatahori kamaherek kara, neu ko ara ndia raketu-raladi dedeꞌak soa-neu basa hatahorir marai dae-bafok ia. Dadi talo bee de losa ei mesa ngga ta mabeꞌi maole dedeꞌa kadiꞌi anak kara?
1CO 6:3 Ndondoon ndia, ita ndia taketu-taladi dedeꞌak fee Manetualain atan nara maruma nusa tetuk do inggu temak mai. De neu ko ei ndia muste maole dedeꞌak tungga faik kara.
1CO 6:4 Tamba bali, mete ma ei hatahori kamaherek kara madedeꞌa laꞌe-neu dedeꞌa kadiꞌi anak kara, tao hata de ei pake mana maketu-maladi dedeꞌak fo hatahori saranik ta fee hada-horomatak neu sara?
1CO 6:5 Au ae kokolak dedeꞌak esa fo muste tao nakamamaek ei. Talo bee? Sama leo nai ei taladam mara, ta hambu hatahori esa boe na fo malelan dai fo naole dedeꞌa kadiꞌi anak kara, netuduk leo dedeꞌak fo mana sou nai ita toranoon.
1CO 6:6 Tehuu hatahori kamaherek esa leꞌa noo ndia toranoo kamaheren, neni mana maketu-maladi dedeꞌak matan neu! Naa te mana maketu-maladi dedeꞌak naa, ta namahere neu Lamatuak!
1CO 6:7 Ta ndaa, hetu? Senggi ei ena, mete ma ei esa sara esa nai mamana neketu-neladi dedeꞌak. Malole lenak, mete ma o toranoom tao salak mbali o, na, elan numa naa leo. Mete ma o toranoom hatahori kamaherek namanaꞌo nala o bua-baꞌun, malole lenak elan numa naa fo ana haꞌi nala buas naa leo!
1CO 6:8 Tehuu ei hatahori kamaherek, esa tao salak mbali ndia toranoon, ma esa namanaꞌo mbali esa. Naa te ei sama-sama hatahori kamaherek!
1CO 6:9 Ei nok bali ta malela dedeꞌak kara iar! Naa te hatahori ta mana hii tao dedeꞌa tetebes, ta bisa dadi, ana maso dadi neu Manetualain nufanelun nara. Boso fee lelak neu aom mara hambu kedi-irak fo ei tao salak! Netuduk leo: mana laꞌok sala no hatahori fo ta ndia sao toun do ndia sao inan, mana songgo-tangguk, mana hohongge-lelena, touk fo mana sunggu-soro no touk,
1CO 6:10 hatahori naꞌok, mana bare-naꞌo, mana ninu mafuk, mana kokolak naboboo hatahori naden ma mana pepeko-lelekok fo haꞌi nala hatahori bua-baꞌun nara. Boso tao leo naak, huu basa hatahorir matak leo sira, ta bisa maso dadi reu Manetualain hatahorin!
1CO 6:11 Naa te fai bakahulun, ei ketuk oo leo naak boe! Tehuu Manetualain koka heni ei sala-singgom mara fo tao nalalao ei ena. Ma Ana oo nasosoi dalak fo ei bisa malole fali mia Ndia boe. Ana tao basa naar, nahuu ei makaesa mia ita Lamatuan Yesus Karistus, ma nahuu ei oo makaesa mia Manetualain Dula-dalen boe.
1CO 6:12 Au aena haak fo tao basa-basan. Tehuu basa hata fo au taok naa, bei ta bubuluk neulauk soa-neu au. Ma leo mae au aena haak fo tao basa-basan, tehuu au ta nau dedeꞌa ta malole ndia koasa au.
1CO 6:13 Haꞌi netuduk leo, hambu hatahori nae, “Nanaꞌak toꞌa poꞌok, ma poꞌok toꞌa nanaꞌak.” Tehuu masaneda, te neu ko Manetualain nakalulutu dua sara. Netuduk laen bali, ita boso pake ita ao-inan fo laꞌok sala to hatahori fo ta ita sao toun, do ita sao inan. Tehuu ita pake ita ao-inan fo bisa taue-osa fee ita Lamatuan. Ma ita Lamatuan oo ndia naena ita ao-inan boe.
1CO 6:14 Neu ita Lamatuan Yesus maten ena, Manetualain ndia tao nasoda falik kana numa mamaten mai. Dadi mete ma ita mate ena, neu ko Ana oo naena koasa fo tao nasoda falik ita numa mamates mai boe.
1CO 6:15 Ei ao-inam dadi neu Karistus enan, sama leo ei dadi miu babaꞌek esa numa Karistus ao-inan mai. Ei bubuluk dedeꞌak naa ena. Dadi mete ma ita pake babaꞌek numa Karistus ao-inan mai, basa de teu takabua to ina petak ao-inan, na, talo bee? Bosok! Te naa ta nandaa na!
1CO 6:16 Ei bubuluk ena, mete ma hatahori laꞌok sala fo sunggu-soro nakabua no ina petak talo naa, na, dua sara dadi reu esa ena. Sama leo neni surak nai Susura Malalaok nae, “Dua sara dadi reu esa ena.”
1CO 6:17 Tehuu hatahori fo mana leo-laꞌo dalek esa no ita Lamatuan, ana dadi esa no Lamatuak ena, sama leo dua sara rakaesa nai dula-dalek esa.
1CO 6:18 Mete ma o hambu lelak fo laꞌok sala mua ta o sao toum do sao inam, na, malai heok dook ka muu! Hatahori mana tao sala-singgok laen nara, rakalulutu sira mesa kasa, ma rakalulutu hatahori laen boe. Tehuu hatahori fo mana hii hohongge-lelenak naa, nakalulutu ndia ao-ina heli-helin.
1CO 6:19 O ao-inam naa, sama leo Manetualain Dula-dale Malalaon uma huhule-haradoin. Ndia Dula-dalen naa, ndia leo nai ei dalem mara, huu Manetualain mesa kana ndia fee Ndia Dula-dalen neu ei. Huu naa de ei mesa ngga ta maena haak bali, fo dadi malanggan soa-neu esa-esak ao-ina heli-helim. Tehuu hata de ei bei leo-laꞌo nok bali ei ta bubuluk dedeꞌak ia?
1CO 6:20 Karistus tefa-soi nala ei ena, no babaen belin seli. Dadi ei muste leo-laꞌo no hada-horomatak mbali ei ao-ina heli-helim, fo matudu mae, ei oo fee hada-horomatak neu Manetualain boe.
1CO 7:1 Hatematak ia, au ae surak laꞌe-neu basa hata fo ei matanek nai ei susuram naa mae, “Talo bee? Malole lenak, touk hae sao, do?”
1CO 7:2 Talo ia: nai hatahori leleo-lalaꞌon, hambu lelak noꞌuk ka fo hatahori bisa tuda neni nekebuak sao holu-ndaek kasalak neu, huu naa de malole lenak touk esa no sao heli-helin. Leo naak oo inak esa no ndia sao heli-helin boe.
1CO 7:3 Sao touk kara ein! Boso timba heni o saom haak fo sunggu-soro nakabua no o. Ma sao inak kara ein! Boso timba heni o saom haak fo sunggu-soro nakabua no o.
1CO 7:4 Huu sao inak fee ndia ao-inan ena, fo dadi neu ndia saon enan. Ma sao touk fee ndia ao-inan ena, fo dadi neu saon enan.
1CO 7:5 Dadi ei boso mandundu-helak kana, huu ei dua ngga maena haak! Tehuu mete ma ei nau hule-haradoi a mesan, ma ta nau duduꞌa dedeꞌak laen nara, na, bisa makatataka mala faa, fo boso sunggu-soro makabua nai ledo-fai kekeꞌuk. Sadi sao touk ma sao inak makokola aok no malole dei, ma mala harak talo naa. Mete ma ledo-fai huhule-haradoik naa basan ena, na, malole lenak dua sara rakabua fali lai-laik leo. Mete ma ta talo naa, na, manggataꞌak! Huu nitur malanggan no muda hiek soba-dou hatahori ta nabeꞌi nakatataka aon.
1CO 7:6 Dedeꞌak ia, kada au hahambung, ta Lamatuak hohoro-lalanen.
1CO 7:7 Tungga au duduꞌang, malole lenak hatahorir ta sao, sama leo au. Tehuu Manetualain fee hatahori esa-esak babanggi-babaꞌek ndaa noon. Boe ma hambu hatahorir fo Ana fee sara sao. Ma hambu hatahori laen fo Ana ta fee sara sao.
1CO 7:8 Au nau afada touk do inak fo bei ta sao, ma ina falur ae, malole lenak ei ta sao, sama leo au.
1CO 7:9 Tehuu mete ma ta bisa makatataka mala aom, malole lenak sao leo, te mete ma taa, na, hihii sasao holu-ndae heli-helin bisa naꞌa nasafalin.
1CO 7:10 Ia ta numa au mesa ngga mai. Au nau afada hata fo ita Lamatuan parendan ena, soa-neu hatahori mana saok kara ena ae, sao inak ta bole namaketu heni saon.
1CO 7:11 Tehuu mete ma ana ela heni ndia saon, na, ana boso sao seluk bali. Do malole lenak, ana fali fo mole-dame no ndia saon. Leo naak oo, sao touk ta bole namaketu heni ndia saon boe.
1CO 7:12 Ia numa au mesa ngga mai, ta numa ita Lamatuan mai. Neu hatahori laen nara, au nau kokolak talo ia: mete ma hambu hatahori saranik fo sao inan ta namahere neu Karistus, na, ana boso namaketu heni saon, mete ma saon bei sadia leo-laꞌo nakandoo no ndia.
1CO 7:13 Leo naak oo, mete ma hambu sao inak fo saon ta namahere neu Karistus boe, na, ana boso namaketu heni saon, mete ma saon hii fo sira leo-laꞌo sama-sama rakandoo.
1CO 7:14 Sao touk fo ta mana namahere neu Lamatuak oo dadi malalaok boe, nahuu ana nakaesa no saon. Ma sao inak fo ta mana namahere neu Lamatuak oo dadi malalaok boe, nahuu ana nakaesa no saon. Mete ma taa, na, sira anan nara ta malalaok. Tehuu no dalak ia, ara hambu dededek malalaok nai Lamatuak matan.
1CO 7:15 Tehuu mete ma hambu sao touk do sao inak fo ta mana namahere neu Lamatuak, ana laꞌo ela ndia saon hatahori kamaherek, na, elan numa naa leo. De sao touk do sao inak mana kamaherek, ara ta rakaesa talo naa bali. Huu Lamatuak noke nala ei fo dadi miu Ndia hatahorin, fo ei bisa leo-laꞌo mia lino-lendek ma mole-damek.
1CO 7:16 Sao ina kamaherek kara! Fama te ei bisa tao masoi-masoda ei saom. Fama ko ta bisa boe. Ma sao tou kamaherek kara! Fama te ei bisa tao masoi-masoda ei saom. Fama ko ta bisa boe. Ei ta bubuluk no tetuk.
1CO 7:17 Leo mae talo naa, tehuu hatahori esa-esak nenggetuu-nemberiin leo beek, neu Manetualain nanggou nala ei dadi miu Ndia hatahorin, na, leo-laꞌo makandoo talo naa leo. Hae nggatin bali, huu Lamatuak koladu nalan talo naa ena. Au anori hohoro-lalanek ia neu basa saranik kara.
1CO 7:18 Haꞌi netuduk, mete ma ei sunat mita fo matudu mae, ei hatahori Yahudir, dei fo bakadean ei mamanene Manetualain nanggou ei, na, haen no laka sunat naa. Ma hatahori fo ta sunat, neu ramanene Manetualain nanggou sara fo dadi reu Ndia enan, na, hae sunat fo dadi tanda rae, sira dadi reu Manetualain hatahorin ena.
1CO 7:19 Mete ma sunat mita, na, ta naena sosoa-ndandaak hata-hata. Mete ma ta sunat, naa oo ta naena sosoak hata-hata boe. Mana kasosoa-ndandaak ndia: ita tao tungga Manetualain parendan nara.
1CO 7:20 Neu Manetualain here nala ei dadi miu Ndia hatahorin, Ana ta nadenu ei sunat do ta sunat. Dadi elan fo ei talo kada naa leo. Hae nggatin.
1CO 7:21 Au fee lololek esa bali. Mete ma o dadi hatahori ata-daton, neu Manetualain nanggou o, na, elan fo o dadi talo kada naa, ta hata-hata. Tehuu mete ma o bisa dadi hatahori nekemboꞌik, na, dadi talo naa leo! Mete ma ta bisa dadi hatahori nekemboꞌik oo, ta hata-hata boe.
1CO 7:22 Neu Lamatuak nanggou nala ata-dato esa dadi neu Ndia hatahorin, ata-dato naa dadi neu hatahori nekemboꞌik ena, fo naue-osa fee ndia Lamatuan. Ma neu Lamatuak nanggou nala hatahori nekemboꞌik esa dadi neu Ndia hatahorin, hatahori naa hatematak ia, dadi neu Karistus neondan.
1CO 7:23 Karistus bae ketu ei ena, no babaen, belin sudi selik kana! Dadi ei boso dadi miu ata-dato soa-neu hatahori laen.
1CO 7:24 Toranoo susue nggara ein! Neu Manetualain nanggou nala ei dadi miu Ndia hatahorin, ei nenggetuu-nemberiim leo beek, na, elan talo kada naa leo. Hae nggatin bali. Elan numa naa leo, soa-neu Manetualain.
1CO 7:25 Ei matane au laꞌe-neu taꞌe anak ma feꞌo anak kara fo bei ta sunggu-soro rakabua rita. Lamatuak ta nafada au laꞌe-neu dedeꞌak naa. Tehuu ei bisa mamahere hata fo au kokolak, nahuu Lamatuak natudu Ndia dale kasian neu au. Au duduꞌang talo ia:
1CO 7:26 Hatematak ia, ita hambu doidosok mata-matak kara. Dadi mete ma hatahorir leo beek, na, elan talo naa leo. Au hahambung talo ia:
1CO 7:27 Mete ma o makaesa mua o sao inam, na, boso ela henin. Mete ma o ta makaesa mua o sao inam bali, na, hae sangga fo sao seluk ina beuk.
1CO 7:28 Tehuu leo o dadi sao, o ta tao salak hata-hata. Mete ma hambu inak bei ta sunggu-soro nakabua nita no touk dadi sao, ana oo ta tao salak hata-hata boe. Tehuu masaneda te hatahori mana saok, neu ko hambu susa-sonak mata-matak kara nai dae-bafok ia. Au dale hihiing fo ei boso susa-sona talo naa.
1CO 7:29 Toranoo susue nggara ein! Tungga au duduꞌang talo ia: ledo-fair tamba kekeꞌu ena, ma dae-bafok fai mateꞌen deka-deka ena. De hatahori kasao inak, boso tao matak neu kada sao inan mesa kana, tehuu ana oo muste tao matak neu Lamatuak boe.
1CO 7:30 Leo naak oo, mete ma hambu ketuk buꞌi, malole lenak ana natetea fo ana boso buꞌi boe, mita fo ana bisa tao matak neu Lamatuak. Mete ma ketuk dalen mbena sau-sau, malole lenak ana tao aon leo bali ta leo naak, mita fo ana bisa tao matak neu Lamatuak. Mete ma hambu ketuk nabeꞌi hahasa, malole lenak ana leo-laꞌo sama leo hatahori ta naena hata-hata, mita fo ana bisa tao matak neu Lamatuak.
1CO 7:31 Mete ma hambu ketuk pake bua-baꞌu numa dae-bafok ia mai, malole lenak ana tao aon sama leo ta tai-namahena neu dae-bafok ia bua-baꞌun, mita fo ana bisa tao matak neu Lamatuak. Huu dae-bafok ia lole-ladan, neu ko mopo henin.
1CO 7:32 Au nau fo ei boso kada duꞌa-duꞌa dedeꞌak kara iar. Huu hatahori ta mana saok naa, ndia ledo-fain lena noꞌuk ka fo ana tao matak laꞌe-neu Lamatuak hihii-nanaun. Huu naa de ana bisa sangga dalak fo naue-osa tao namahoko Lamatuak dalen.
1CO 7:33 Tehuu hatahori fo mana saok ena oo, muste tao matak neu dae-bafok ia hihii-nanaun boe. Ana nau tao matak laꞌe-neu Lamatuak hihii-nanaun, tehuu ana oo muste sangga dalak fo tao namahoko ndia sao inan boe. Naa, ndia tao nala duduꞌan nabingga-baꞌe kii-konak kana. Leo naak oo, inak fo ta naena sao touk bali ma inak fo bei ta sao nita boe. Ara tao matak laꞌe-neu Lamatuak hihii-nanaun fo ara bisa lolo-laok nai dalen nara ma ao-inan nara. Tehuu inak mana saok ena, dalen dadi nabingga-baꞌek kii-konak kana. Huu ana nae tao matak laꞌe-neu Lamatuak hihii-nanaun, tehuu ana oo, muste sangga dalak fo tao namahoko sao toun boe.
1CO 7:35 Au afada dedeꞌak ia neu ei, fo ei hambu neulaun. Au ta nau fo ikek nala ei. Au hihiing, ei tao hata fo tetebes, ma tao matak neu Lamatuak hihii-nanaun, fo ei duduꞌam mara ta rabingga-baꞌek.
1CO 7:36 Mete ma touk naena inak fo nae taon dadi neu saon, teun dai ena fo sao, na, ela sara sao leo. Hata-bali mete ma touk naa ta bisa nakatataka nala aon. No dalak naa, ara ta tao salak hata-hata. Boso losak ara kada ratalongga fair rakandoo, boe ma babasan, touk naa tao dedeꞌak ta ndoos sara.
1CO 7:37 Tehuu mete ma ana nabeꞌi nakatataka nala aon, ana hae nakasetik sao lai-laik. Huu ana bubuluk, ndia nae tao hata. Elan fo ana nakatataka nala dook ka oo malole boe.
1CO 7:38 Dadi touk mana sao nala inak fo nae taon dadi neu saon, naa malole. Ma ta mana saok naa, lolen lenak bali.
1CO 7:39 Sao inak nakaesa no saon losa mate. Tehuu mete ma saon maten ena, na, ana bole sao seluk, sadi sao beun naa oo, hatahori fo mana namahere neu Karistus boe.
1CO 7:40 Tungga au duduꞌang, ina falu naa maua-manalen lenak, mete ma ana ta sao bali. Au duꞌa, ia nenori-nefadak numa Manetualain Dula-dalen manai au dale.
1CO 8:1 Hatematak ia, au ae kokolak laꞌe-neu mbaa fo hatahorir paken neu sosonggok. Ita basa ngga bubuluk noꞌuk ka laꞌe-neu dedeꞌa kara iar ena. Mana dadi neu dedeꞌak ndia, mete ma hatahori bubuluk noꞌuk ka, ana bisa koa ao, huu ana duꞌa nae, ndia malelan lena heni hatahori laen nara. Malole lenak, ita tasue-laik neu hatahori laen leo. Huu, naa ndia tao nala basa hatahorir dadi barakai fo bisa rakatataka rala dook ka.
1CO 8:2 Mete ma hambu hatahori tao aon bubuluk ena, naa natudu nae, ndia malelan bei ta matetu-mandaik.
1CO 8:3 Tehuu mete ma hambu hatahori sue-lai neu Manetualain, na, Lamatuak nalelan ena. Naa, ndia nenenin lenak.
1CO 8:4 Dadi mete ma hatahori naꞌa mbaa fo pake ritan neu songgo-tangguk, ita basa ngga bubuluk tae, buas sosonggok manai dae-bafok ia, ta Manetualain. Huu ita bubuluk tae, “Hambu kada Manetualain esak ka ndia tetebes.” Ma “basa buas sosonggok fo hatahorir rakaluku-rakatele neun, ta raena sosoa-ndandaak hata-hata.”
1CO 8:5 Hambu buas noꞌuk ka nai lalai ma dae-inak fo hatahorir seseik rae, ‘lamatuak’.
1CO 8:6 Tehuu soa-neu ita, Manetualain kada esak ka. Ndia naa, ita Aman. Basa-basan raoka nai Ndia. Ita tao basa-basan soa-neu Ndia. Ma ita Lamatuan, kada esak ka. Ndia, Yesus Karistus. Manetualain pake Yesus, neu Ana adu basa-basan. Ma ita tasoda, nahuu Yesus ndia fee ita tasoda.
1CO 8:7 Tehuu hambu hatahori ta bubuluk dedeꞌak kara raa. Ara bei duduꞌa rakandoo laꞌe-neu buas sosonggok kara, sama leo ara duꞌa ritak fai bakahulun. Huu naa de tungga-tungga ara raꞌa mbaa fo hatahorir pake rita neu songgo-tangguk, ara duꞌa rae, “Nanaꞌak ia, dadi tunu-hotuk fo paken neu songgo-tangguk ena. Mete ma au uꞌa nanaꞌak ia, au bei neka-lili ua dedeꞌa manggarauk kara!” Dadi, naa nakalulutu duduꞌan nara losa ara ta bisa duduꞌa ndoos bali, nahuu dalen nara ta ratea.
1CO 8:8 Ndia dedeꞌa huun hata? Nanaꞌak ta bisa nuni no ita teu tasare Manetualain, hetu? Mete ma ta taꞌa, ita ta tamba manggarauk. Mete ma taꞌa, ta tao nala ita dadi teu hatahori malole, hetu?
1CO 8:9 Tehuu besa-besa, ee! Leo mae o maena haak fo tao dedeꞌak esa, bei ta bubuluk dedeꞌak naa dadi malole soa-neu o. Leo hambu toranook esa hatahori kamaherek dalen ta matea, mete ma ana mete-nita o tao matak naa, basa de ana nakatunu, na, ta malole!
1CO 8:10 O mesa ngga bubuluk ena, dedeꞌak naa ta dadi hata-hata. Tehuu mete ma toranoo hatahori kamaherek fo dalen ta matea, mete-nita o manggatuuk muꞌa nai uma sosonggok, neu ko ana duꞌa hata? Ana duꞌa, taꞌa nanaꞌa sosonggok fo ara paken neu songgo-tangguk oo, ta dadi dedeꞌak bali soa-neu ndia boe, de ana naꞌa leo.
1CO 8:11 O malela dedeꞌak noꞌuk ka ena. Tehuu mete ma o tao talo naa, o makalulutu hatahori dalen fo ta matea. Naa te hatahori naa, o toranoo kamaherem. Karistus oo mate soa-neun boe!
1CO 8:12 Talo ia: mete ma o toranoo dale ta mateam mara, mete-rita o tao dedeꞌak esa fo ara duꞌa rae sala, na, o tao salak fee sara ena. Ma o tao salak neu Karistus boe.
1CO 8:13 Dadi mete ma au uꞌa hata fo tao ala au toranoo kamahereng tuda neni salak neu, malole lenak au hae uꞌa mbaa matak leo naak. Leo mae losa doo naa neu oo haen leo boe. Huu au ta nau fo ara tuda reni salak dale reu.
1CO 9:1 Boso duꞌa mae, au ta aena haak fo surak talo ia fee ei. Huu Manetualain nadenu au fo uu afada ei laꞌe-neu Ndia. Au oo mete-ita Yesus, ita Lamatuan boe. Au akaesa uan akandoo, huu naa de ei basa ngga mamahere neu Yesus numa au ue-osang mai.
1CO 9:2 Leo mae hatahori laen ta simbok au dadi uu Lamatuak nedenun, tehuu ei bubuluk ena mae, Lamatuak nadenu au fo afada Ndia hara hehelun soa-neu ei. Mete ma ei nau sangga bukti bali, na, susuri-memete kada ei nenggetuu-nemberiim mara leo. Huu ei bei makaesa mia ita Lamatuan!
1CO 9:3 Au ae aselu asafali hatahori fo mana soa ndae salak neu au, talo ia:
1CO 9:4 Ei duꞌa mae, au ua Barnabas ta maena haak fo simbo nanaꞌa-nininuk numa hatahori fo ai fee nenorik mai, do?
1CO 9:5 Ei duꞌa mae, ai ta maena haak sao ina Karisten, fo bisa tungga sama-sama miu maono-malalau nai mamanak laen, do? Naa te Lamatuak nedenu laen nara, nuni roo sira sao inan nara boe. Lamatuak fadin nara oo leo naak boe. Petrus mesa kana oo tao talo naa boe!
1CO 9:6 Do, ei duꞌa mae, kada au ua Barnabas mesa ngga ndia muste tao ue-osa sangga doik, mita fo ai bisa masoda fo manori hatahorir?
1CO 9:7 Ei duduꞌam naa, oka-huun hata? Mete neu soldadur leo. Ara hae hasa sira nanaꞌan ma bua-loꞌan nara. Mete neu hatahori mana maue-osa nai osi anggor dale leo. Ta hambu esa kaꞌin nae, “O ta bole muꞌa anggor boan nara raa!” Mete neu kada mana lolor leo. Ana naena haak fo hee nala susu numa bibi lombo fo ana lolok mai.
1CO 9:8 Au ta kokolak talo naa kada tungga au, hatahori dae-bafok biasa mesa kana duduꞌan. Manetualain Hohoro-lalanen oo nafada dedeꞌak sama boe.
1CO 9:9 Nai baꞌi Musa Hohoro-lalanen neni surak nae, “Neu sapi bei roroo hade fo bingga feꞌe hade numa mbulen mai, boso rapa misa bafan fo ana ta bisa naꞌa.” Ei duꞌa mae, Lamatuak nau mboꞌi kada sapi mesa kana ndia bisa naꞌa, do?
1CO 9:10 Taa! Ana oo kokolak fo tao matak neu ai boe! Sama leo neni surak nae, “Hatahori mana dodoꞌi-dadaꞌu dae, ma hatahori mana bingga hade deꞌen numa mbulen mai, neu ara raue-osa, ara oo bubuluk rae, neu ko sira hambu sira babaꞌen boe.” Leo naak oo malole mete ma hatahori Karisten nedenun nara bisa simbo sira babaꞌen numa sira ue-osan buna-boan mai boe. Neu ai manori ei dedeꞌak kara ruma Manetualain Dula-dalen mai, naa sama leo hatahori mana ue daek esa sele-tande. Dadi, neu ai fee nenorik basa, na, naa ta hata-hata mete ma ai oo simbo nanaꞌa-nininuk do, hata-hata numa ei mai boe. Naa, memak nandaa!
1CO 9:12 Hatahori laen fo mana ranori ei, raena haak fo simbo nanaꞌak ma buas laen numa ei mai, hetu? De mete ma ai, na, talo bee? Ai maena haak lena heni sara! Tehuu ei bubuluk ena. Ai ta pake mita ai haak fo makasetik talo naa. Ai makatataka nai dedeꞌak mata-matak kara fo boso tao kai-baak soa-neu ei. Huu no dalak naa, ei hii mamanene Karistus Hara Lii Malolen fo ai tuik soa-neu ei.
1CO 9:13 Duduꞌa sudik kana! Malangga anggamar fo mana raono-lalau hatahorir rai Uma Huhule-haradoi Ina-huuk, soda-ladan nara ruma kolete fo hatahorir renik mai. Ma hatahorir fo mana raono-lalau nai mei tunu-hotuk, ara bisa raꞌa mbaa numa banda fo hatahorir renik mai.
1CO 9:14 Leo naak oo, Lamatuak helu ela boe nae, hatahorir fo uen nara ndia rafada Karistus Hara Lii Malolen, soda-ladan nara bisa ruma sira ue-osan buna-boan mai. Naa, ndia ndaa.
1CO 9:15 Leo mae au aena haak fo leo-laꞌo sama leo hatahori mana maue-osar, tehuu au ta hii tao talo naa. Au ta duꞌa ae, au surak susurak ia fo ei mulai fee au buas. Doon seli ena, au aono-lalau ei, ma ta oke hata-hata numa ei mai. Dadi malole lenak au mate, mita fo hatahorir boso duduꞌa rae au mulai hule-kai sudi hata.
1CO 9:16 Leo mae au afada hatahorir akandoo laꞌe-neu Lamatuak Hara Lii Malolen, tehuu naa ta dadi neu oka-huun fo au bisa kokolak aloloa bafang. Au muste afada hatahorir laꞌe-neu Lamatuak, huu Lamatuak ndia nadenu au talo naa. Mete ma au ta tao tungga au ueng talo naa, na, au soe naa! Huu neu ko huku-dokik tuda laꞌe au.
1CO 9:17 Mete ma au tao ue-osa ia nahuu no kada au hihii-nanau heli-heling, na, hata fo au hambuk naa, sama leo nggadi fo hatahori mana maue-osa simbo a leo. Tehuu mete ma au tao ue-osa ia nahuu Lamatuak ndia nadenu au, naa laen. Ana namahere au fo anea Ndia bua-baꞌu mabelin nara.
1CO 9:18 Dadi mete ma talo naa, au seseba-babaeng hata? Au ta parluu simbo nggadi! Au tui-bengga Lamatuak Hara Lii Malolen, ma ta oke hata-hata. Naa, ndia tao nala au ameda dai. Ma nemeda daik naa, sama leo au seseba-babaen. Dadi leo mae au aena haak mata-matak sama leo hatahori uen tui-bengga Hara Lii Malole naa, tehuu au mesa ngga ta nau pake basa au haak lalaꞌeng.
1CO 9:19 Au ia, hatahori nekemboꞌik fo mana naue-osa tungga au hihiing. Hatahorir ta raena haak fo raonda au tao ia, do tao naa. Leo mae talo naa, tehuu au tao aong sama leo ata-dato fo basa hatahorir raena haak raonda au. No dalak naa, au bisa tulun hatahori noꞌun lenak, fo ara rakatataka tungga Manetualain.
1CO 9:20 Dadi mete ma au akabua ua hatahori Yahudi, na, au tao aong leo hatahori Yahudi, fo tulu-fali hatahori Yahudir ralela Lamatuak. Mete ma au akabua ua hatahori mana toꞌu rahere Manetualain Hohoro-lalanen, na, au tao tungga Manetualain Hohoro-lalanen fo au oo bisa tulu-fali sara fo ralela Lamatuak boe, (leo mae au bubuluk ena ae, tao tungga Hohoro-lalanek naa, ta bisa tao nala au malole ua Lamatuak).
1CO 9:21 Mete ma au akabua ua hatahori fo ta mana bubuluk Manetualain Hohoro-lalanen, au dadi sama leo sara fo nuni ua sara reni Lamatuak reu. (Au ta akamboꞌik Manetualain Hohoro-lalanen fo Ana nakondan tungga baꞌi Musa, tehuu hatematak ia au leo-laꞌo tungga Karistus Hohoro-lalanen.)
1CO 9:22 Soa-neu hatahori fo dalen ta matea, au tao aong sama leo au daleng oo ta matea boe, fo au bisa kokoe sara reni Manetualain reu. Soa-neu basa hatahorir, au tao aong sama leo sara, mita fo talo bee oo au bisa tulun tao asoi-asoda hatahori ketuk boe.
1CO 9:23 Au tao basa dedeꞌak kara iar, mita fo basa hatahorir bisa ramahere Lamatuak Hara Lii Malolen. No dalak naa, ai bisa hambu babaꞌek nai basa hata fo neulauk fo Lamatuak hii feen neu ai.
1CO 9:24 Au fee lololek numa nekeseseꞌuk nelaik mai. Hatahori noꞌuk ka tungga nelaik, tehuu mana hambu joara kaesan, kada hatahori esak ka. Dadi o muste malaik tao tetebe fo dadi joara soa-neu Lamatuak.
1CO 9:25 Basa hatahorir fo mana tungga nekeseseꞌuk muste tao tebe-tebe nakandoo tungga kada hata fo ndia mesen nenorin, hetu? Ara raue-osa fafandek lima-ein nara talo naa, fo hambu kada solangga joara fo neu ko male-kale henin. Tehuu mete ma ita, na, ita taue-osa fo hambu seseba-babaek mana nakatataka losa doon naa neu.
1CO 9:26 Dadi au ta alaik sadi ndaa. Tehuu au aote tebe-tebe fo alaik ndoo fido-fidok losa too. Mete ma akasasamak au ua mana matutuk, na, au ta tutu anin, tehuu au tutu laꞌen.
1CO 9:27 Au tao tingga-tingga atetu basa nenori-nefadak ma anori no tebe-tebe fo au bisa akatataka. Huu ta malole, mete ma au afada hatahori laen laꞌe-neu Manetualain, naa te au mesa ngga lena-langga hohoro-lalanek, boe ma Lamatuak leꞌa heni au numa nekeseseꞌuk mai.
1CO 10:1 Toranoo susue nggara ein! Ei boso lilii-ndondou heni tutui lele uluk kara, neu ita bei-baꞌin nara ruma mamana nees. Manetualain natudu dalak neu basa sara, pake sosoꞌak mana laꞌok nakahuluk nesik matan nara. Ana tada baꞌe tasi oe, de noo sara resik naa, losa ara kalua reni tasi serik reu ro sodak.
1CO 10:2 Sosoꞌak naa ma tasi naa, dadi reu lololek esa. Ita bei-baꞌin nara ramahere baꞌi Musa fo nakalalaꞌok kasa, de ara tungga sosoꞌak naa, ma nok bali dudi reni tasi oe dale reu sama-sama roon. Naa, sama leo ita hambu sarani fo natudu nae, ita tamahere neu Karistus, de ita dadi teu Ndia hatahorin ma nenene neu Ndia.
1CO 10:3 Ita bei-baꞌin basa sara raꞌa nanaꞌak fo Manetualain Dula-dalen sadia fee sara.
1CO 10:4 Ma basa sara rinu oe fo Manetualain Dula-dalen sadia fee sara rinu. Oe fo ara rinuk naa, kalua numa batu moꞌok fo Manetualain Dula-dalen natudu neu sara. Ara bee reu a mesan, na, batu naa hambun memak kana ena. Batu naa, ndia Karistus.
1CO 10:5 Tehuu Manetualain ta hii hatahori noꞌuk kara tatao-nonoꞌin. Neu ara laꞌok ndule mamana nees mana loa naa, na, hambu noꞌuk ka mate numa naa. Dadi ara ratoi sira hatahorin nara rai mamanak noꞌuk ka.
1CO 10:6 Basa naar dadi fo fee netuduk, naa fo ita boso hihiik ka tao manggarauk sama leo sara.
1CO 10:7 Boso songgo-tanggu, sama leo sira ketuk. Nai Manetualain Susura Malalaon neni surak nae, “Hatahori Israꞌel iar ranggatuuk raꞌa-rinu rame-rame numa patong sapi ana matan. Basa boe ma ara mulai songgo-tanggu.”
1CO 10:8 Ita boso laꞌok sala to hatahori fo ta ita sao toun do ita sao inan. Huu fai maneuk kara, ara hohongge talo naa, de hambu hatahori 23.000 mate nai kada faik esa dalen.
1CO 10:9 Ita boso soba-soba tao manggarauk mata-matak kara dei, fo sangga bubuluk tae, Karistus nae hukun ita, do taa. Huu hatahori Israꞌel asa ketuk rae soba Manetualain talo naa, boe ma Ana haitua fee mengge karasok noꞌun seli mai kiki rakamate sara.
1CO 10:10 Ita oo boso unggu-remu boe. Sira ketuk kada unggu-remu rakandoo, basa boe ma Manetualain nadenu atan esa numa nusa tetuk do inggu temak mai, fo nakanisa sara.
1CO 10:11 Dedeꞌak naa laꞌe-ndaa hatahori Israꞌel asa, fo dadi netuduk soa-neu ita. Ara surak basa sara ena, fo ita bisa tanori ma boso tao tungga sira sala-singgon nara. Huu dae-bafok fai mateꞌen deka-deka mai ena.
1CO 10:12 Masanenedak, ee! Hatematak ia, o duꞌa mae, o bisa makatataka mahere ena. Tehuu o muste besa-besa, fo boso tuda.
1CO 10:13 Tungga-tungga o mameda hihiik ka tao manggarauk, masaneda te hatahori laen oo, rameda rita soba-douk leo naak ena boe. O bisa mamahere neu Manetualain, huu Ana tao natetu hata fo Ana kokolak. Ana ta fee lelak fo hambu mala soba-douk, lena heni hata fo o bisa makatataka malan. Tungga-tungga o hambu mala soba-douk talo naa, na, Ana fee dala sasaik neu o. Ana nau tao o mabeꞌi makatataka fo o boso tuda.
1CO 10:14 De toranoo susue nggara ein! Mete ma hatahorir rae soba rakasetik ei fo doꞌor neu sosonggok kara, na, malai heok numa naa mai leo! Boso bei maeok bali!
1CO 10:15 Au kokolak mbali ei fo bei maduduꞌa naruk. Ei mesa ngga muste timba-tai fo bubuluk hata fo au ae kokolak naa, tetebes.
1CO 10:16 Duꞌa sudik dedeꞌak ia: mete ma ita takabua fo taꞌa nai Lamatuak mein, boe ma haꞌi tala nggalas naa fo toke makasi neun, basa de ita tinu numa nggalas naa mai, naa sosoa-ndandaan nae, ita takaesa to Karistus. Neu Ana mboꞌa heni daan fo mate, naa nok bali ita oo, mate tungga boe. Mete ma ita fifiꞌi baꞌe roti naa, fo ita taꞌa, naa sosoa-ndandaan sama, ndia ita takaesa to Karistus. Dadi neu Ana mate, naa nok bali ita oo mate tungga boe.
1CO 10:17 Ita basa ngga haꞌi tala babaꞌek numa roti balok esa mai. Dadi basan mana haꞌi babaꞌek numa roti esa naa mai, sama leo ita takaesa dadi teu ao-inak esa, leo mae ita hatahori noꞌuk ka.
1CO 10:18 Duꞌa sudik hatahori Israꞌel lele uluk kara. Neu ara hala banda nai mei tunu-hotuk lain fo rakaluku-rakatele neu Manetualain, malangga anggama mana halak naa, ndia hambu naꞌa mbaan. Naa sosoa-ndandaan, ara rakaesa ro Manetualain, ma ara oo rakaesa ro hatahori mana neni banda naa, fo taon neu tunu-hotuk boe.
1CO 10:19 Neu faik hatahori ta mana malela Manetualain nae neni fefeen neu sira bua sosonggon, naa ta naena sosoak hata esa boe na. Huu bua sosonggok naa, kada patong mates a mesan. Tehuu neu hatahori hala banda dadi neu tunu-hotuk fee sira bua sosonggon nara, ara songgo-tanggu neu dula-dale manggarauk kara. Ara ta rakaluku-rakatele neu Manetualain. Dadi au ta nau ei makaesa mia dula-dale manggarauk leo naak.
1CO 10:21 Ei mana makaesa mia Lamatuak, nahuu minu numa nggalas manai Lamatuak mein mai, na, ei ta bole miu babalik mia dula-dale manggarauk kara, ma minu numa sira nggalan mai, neu hatahori songgo-tanggu sara. Naa sosoa-ndandaan nae, ei makaesa mia dula-dale manggarauk kara. Leo naak oo ei miꞌa nai Lamatuak mein, ei ta bole tungga miꞌa nai sira mein boe. Naa sosoa-ndandaan nae, ei makaesa mia dula-dale manggarauk kara! Nggoa bebek kara ein, ee!
1CO 10:22 Ei duꞌa talo bee? Nau tao ita Lamatuan horo mbala, do? Manggataꞌak, naa! Fama te ei duꞌa mae ei barakain lena heni Ndia, do?
1CO 10:23 Fama te ei mae, “Au ae tao hata a mesan, bole. Huu, naa au haak.” Tebe! Tehuu masaneda te, ta basa dedeꞌak kara raa, reni malole soa-neu o. Ma ta basa dedeꞌak kara bisa tulun tao ratea o dalem.
1CO 10:24 Boso kada sangga nanalak soa-neu o ao heli-helim. Malole lenak, sangga nanalak soa-neu hatahori laen boe.
1CO 10:25 Dadi talo ia: mete ma hasa mbaa nai pasar, na, muꞌa leo. Hae matane bali, “Ia mbaa sosonggok, do?” Do, duꞌa mae, “Au bole uꞌa mbaa ia, do taa?”
1CO 10:26 Huu nai Manetualain Susura Malalaon neni surak nae, “Dae-bafok no basa oe-isin lalaꞌen, ita Lamatuan enan.”
1CO 10:27 Mete ma hambu hatahori bei ta namahere neu Manetualain nae, “Mai muꞌa nai uma!” Mete ma ei mae miu, na, miu leo, ma miꞌa basa hata fo ara fee ei. Hae matane mae, “Au bole uꞌa ia, do taa?”
1CO 10:28 (Tehuu mete ma hambu hatahori mai nakukutuk nae, “Boso muꞌa ia, te ia mbaa sosonggok,” malole lenak o hae muꞌa. O muste tao matak neu hatahori fo mana mai nafada naa, huu ana duꞌa nae, o muꞌa, na, naa sala.
1CO 10:29 Duduꞌa matalolole tungga hatahori naa duduꞌan, fo ta bole muꞌa. Boso duꞌa kada malole soa-neu o ao heli-helim.) Naa te au bole tao tungga au hihiing. Tehuu mete ma hatahori laen tao dedeꞌak esa, ma ana duꞌa ta malole, na, hata de au oo ta hambu lelak fo tao tungga au hihiing boe, nahuu kada dedeꞌak naa ta malole soa-neu hatahori naa?
1CO 10:30 Mete ma au oke makasi neu Manetualain, de au uꞌa, na, hata de hatahorir kokolak rakatutudak au?
1CO 10:31 Dadi ei mae miꞌa do, minu do, tao hata a mesan, na, tao basa-basan fo ei matudu Manetualain nade malolen.
1CO 10:32 Boso makasususak hatahori Yahudir, do, hatahori ta Yahudir, do, Manetualain hatahori kamaheren nara.
1CO 10:33 Tao sama leo au ia. Huu au soba-soba tao amahoko basa sara, nai basa dedeꞌak kara. Au ta kada soba tao hata fo malole soa-neu au mesa ngga. Tehuu au soba tao hata fo malole soa-neu basa sara fo ara oo hambu masoi-masodak boe.
1CO 11:1 Ei haꞌi netuduk numa au mai, ma tao tungga au leleo-lalaꞌong. Huu au haꞌi netuduk numa Karistus mai, ma tao tunggan.
1CO 11:2 Au koa ei nahuu talo bee oo, ei masaneda neu au taa-taa boe. Ma basa dedeꞌak fo au anorik soa-neu ei, ei bei tao tunggan. Lolen sudi selik kana!
1CO 11:3 Tehuu hambu dedeꞌak esa fo au nau fee nesenedak neu ei talo ia: boso lilii-ndondou ei dadadin numa bee mai. Touk kamaherek esa-esak naoka nai Karistus fo dadi neu ndia malanggan. Inak dadadin numa touk mai. Ma Karistus numa Manetualain mai.
1CO 11:4 Touk boso mboti langgan neu ana hule-haradoi, do, neu ana nafada Lamatuak hara hehelun. Huu, naa sama leo ana nakamamaek Karistus, nahuu ana ta fee hada-horomatak tungga ita siꞌen.
1CO 11:5 Tehuu inak muste mboti langgan neu ana hule-haradoi, do, neu ana nafada Lamatuak hara hehelun. Huu mete ma taa, na, naa sama leo ana nakamamaek ndia saon, nahuu ana ta fee hada-horomatak sama leo ita siꞌen. Ma ana oo nakamamaek ndia ao heli-helin, sama leo mete ma inak nggeu namboli langgan boe.
1CO 11:6 Mete ma hambu inak ta nau mboti langgan fo dadi tanda nae, ana ta fee hada-horomatak neu saon, na, malole lenak ana nggute kekeꞌu ndia langga bulun. Tehuu mete ma nameda langga mbolin naa nakamamaek kana, malole lenak ana mboti langgan leo.
1CO 11:7 Soba duꞌa sudik kana talo ia: touk hae mboti langgan, huu Manetualain adu touk tungga Ndia mata-aon. Huu naa de touk dadi buna-boak fo natudu Manetualain ta neni babanggan. Ma inak oo dadi buna-boak fo natudu touk ta hohoꞌan boe.
1CO 11:8 Neu Manetualain adu dae-bafok ia, Ana ta adu touk numa inak mai. Tehuu Ana adu inak numa touk mai.
1CO 11:9 Ma Ana ta adu touk fee inak. Tehuu Ana adu inak fee touk.
1CO 11:10 Dadi malole lenak inak mboti langgan, fo hatahori bubuluk rae, ana pake ndia haak fo hule-haradoi ma nafada Lamatuak hara hehelun, tungga ndoon. Ata numa nusa tetuk do inggu temak mai oo bubuluk talo naa boe.
1CO 11:11 Tehuu mete ma ara rakaesa ro Lamatuak, inak ma touk ta rambariik mesa kasa.
1CO 11:12 Makasososan, Manetualain adu inak numa touk mai. Tehuu basa naa, inak bonggi nala touk. Ma Manetualain ndia adu fo basa-basan dadi.
1CO 11:13 Ei duꞌa sudik kana! Mete ma inak hule-haradoi neu Manetualain, ma ta mboti langgan, na, tungga ei, naa malole, do taa?
1CO 11:14 Tungga ei hadam nai kota Korentus, mete ma touk langga bulun manaru, naa nakamamaek kana, do?
1CO 11:15 Tehuu mete ma inak langga bulun manaru, naa lolen sudi selik kana, hetu? Lamatuak feen langga bulu naruk fo mboti nala langgan. Naa, ndia ndaa.
1CO 11:16 Tehuu mete ma hambu ketuk rareresi rakandoo laꞌe-neu dedeꞌak ia, masanenedak te ia ndia dadi neu ai siꞌem ena numa ai fo dadi malanggan ma numa saranik kara mai.
1CO 11:17 Hatematak ia, au ae kokolak dedeꞌak esa bali. Nai dedeꞌak ia, au ta bisa koa ei. Neu ei bei makabua, ei ta tao tungga hata fo ndoos, tehuu ei boe mamue-anggik bali.
1CO 11:18 Makasososan, au amanene rae, neu ei makabua tao ibadat, ei mabingga-baꞌek. Numa au amanene tutuik laꞌe-neu ei nebingga-baꞌem naa mai, neu ko hambu dedeꞌak ketuk tetebes.
1CO 11:19 (Memak, huu no ei tao esa-esak nekebubuan do nekebonggo-bonggon naa, neu ko neni nitak see ndia tebe-tebe namanene neu ita Lamatuan ma see ndia ta nau nenene neun.)
1CO 11:20 Neu ei hatahori saranik makabua fo miꞌa nai Lamatuak mein, ei muste masaneda neu Lamatuak Yesus. Naa, ndia ndaa. Tehuu ei ta tao talo naa.
1CO 11:21 Buktin, ndia neu ei manggatuuk miꞌa, hambu ketuk ta rahani hatahori laen, hambu ketuk raꞌa no bare-naꞌon ma hambu laen bali, rinu mafuk. Losa hatahori laen ta hambu babaꞌek, de ara ndoe.
1CO 11:22 Talo bee ia!? Ei ta maena uma heli-helik fo miꞌa-minu nai naa, do? Do, ei mae makalulutu Manetualain hatahori saranin nade malolen? Do, ei nau makamamaek hatahori mana toꞌa taak kara? Ei nau au kokolak talo bee? Ei nau au koa ei nai dedeꞌak ia, do? Boso mamahena!
1CO 11:23 Lamatuak Yesus mesa kana ndia nafada memak dedeꞌak ia neu au, ma au loo liman bali neu ei. Nae, neu hatahorir rahehere rala fo rae tao risa Ndia, leꞌodaen naa Ana haꞌi nala roti balok esa.
1CO 11:24 De Ana hule-haradoi noke makasi neu Manetualain. Boe ma nafada ana nunin nara nae, “Miꞌa roti ia. Ia Au ao-mbaang. Neu ko ara rakalulutu Au ao-mbaang fee ei. Dadi ei muste miꞌa roti ia fo masaneda neu Au.”
1CO 11:25 Neu ara raꞌa basa ena, Ana oo tao sama neu nggalas oe anggor boe nae, “Oe anggor ia, sosoa-ndandaan ndia: Manetualain nau ndara fangga hehelu-bartaa beuk no ei. Ma Au muste mboꞌa heni Au daang losa Au mate dei, dei fo hehelu-bartaak naa bisa dadi. De tungga-tungga ei minu oe anggor talo ia, na, ei muste masaneda neu Au mamateng.”
1CO 11:26 Tungga-tungga ei manggatuuk miꞌa roti talo ia, ma minu numa nggalas talo ia, losa Lamatuak fali mai, naa sama leo ei tui seluk laꞌe-neu Ndia mamaten.
1CO 11:27 Huu naa de, mete ma hambu hatahori naꞌa roti naa, ma ninu numa nggalas naa mai, fo nasaneda neu ita Lamatuan, tehuu dalen ta ndoos, neu ko Manetualain fee hukun neun. Roti ma oe anggor naa, ndia Lamatuak Yesus ao-mbaan ma daan. Dadi mete ma hatahori dalen ta ndoos, na, ta nandaa ana naꞌa-ninu nai naa, huu naa kada nakadadaek Lamatuak Yesus.
1CO 11:28 Malole lenak, hatahori esa-esak parisa ndia dale heli-helin dei. Basa, mete ma namahere tebe-tebe ndia dalen ndoos, dei fo ana bisa naꞌa roti naa, ma ninu oe anggor naa.
1CO 11:29 Tehuu hambu hatahorir raꞌa ma rinu ro dalen nara ta neulauk. Huu ara duꞌa rae, “Yesus mamaten naa, ta naena sosoa-ndandaak hata esa boe na. Yesus ao-mbaan ta naena sosoa-ndandaak soa-neu au.” Hatahori leo naak kara, mesa kasa lemba-rasaa sosoen, nahuu neu ko ara hambu huku-dokik.
1CO 11:30 Huu naa de, nai ei taladam mara naa, hambu ketuk mana sota-naꞌuk kara, hambu ketuk kamahedik kara, ma hambu ketuk fo mates sara ena.
1CO 11:31 Tehuu mete ma ita parisa tatalolole ita dalen dei, huku-dokik ta laꞌe nala ita talo naa.
1CO 11:32 Mete ma ita Lamatuan hukun ita, Ana tao talo naa, fo nanori ita tungga dalak fo ndoos. Ana ta nau huku-dokik laꞌe ita, ma neu ko takalulutu sama-sama to basa hatahorir marai dae-bafok ia.
1CO 11:33 Dadi toranoo susue nggara ein! Mete ma ei makabua fo miꞌa nai Lamatuak mein, na, esa muste nahani esa.
1CO 11:34 Mete ma hambu ketuk ndoe ralan seli, na, malole lenak raꞌa rala faa nai uma dei. Basa dei fo, mete ma ei makabua sama-sama, na, huku-dokik boso laꞌe nala ei. Laꞌe-neu dedeꞌak laen nara fo ei matanek naa, neu ko au uni naa neti, dei fo au koladun.
1CO 12:1 Toranoo susue nggara ein! Au nau fo ei malela laꞌe-neu koasa naa ma babanggi-babaꞌek fo Lamatuak Dula-dalen feen fo ita pake.
1CO 12:2 Ei bubuluk ena mae, neu ei bei ta dadi Lamatuak hatahorin nara, ei kada songgo-tanggu buas hara taak. Ei tungga no poke-mbakek neu sara.
1CO 12:3 Huu naa de au nau fo ei malela mae, ta bisa dadi hambu hatahori fo mana nakaesa no Manetualain Dula-dale Malalaon nae, “Neketook neu Yesus naa!” Ma ta bisa dadi hambu hatahori fo ta mana nakaesa no Manetualain Dula-dale Malalaon nae, “Yesus naa, au Lamatuang fo naena haak parenda au!”
1CO 12:4 Manetualain Dula-dalen fee hatahori esa-esak no ndia babanggi-babaꞌen fo ara rakalalaꞌok sira esa-esak uen. Tehuu basa babanggi-babaꞌek kara ruma Dula-dalek esa mai.
1CO 12:5 Hatahorir hambu babanggi-babaꞌe mata-matak kara fo raono-lalau hatahorir, tehuu basa sara ramanene numa kada Lamatuak esak ka mai.
1CO 12:6 Hatahori hambu ues mata-matak kara fo rakalalaꞌok Lamatuak ue-osan, tehuu kada Manetualain ndia tulun asa fo rakalalaꞌok basa ues sara raa lalaꞌen.
1CO 12:7 Manetualain natudu Ndia Dula-dalen neu hatahori esa-esak leleo-lalaꞌon no dalak mana feꞌek kara. De basa sara raua-ranale sama-sama fo esa bisa tulu-fali esa.
1CO 12:8 Ana fee babanggi-babaꞌek numa Ndia Dula-dalen koasan mai neu Ndia hatahorin nara. Ketuk simbo koasa duduꞌa naruk fo bisa ralela fee nenori-nefada mandaak tungga Lamatuak hihii-nanaun. Ketuk simbo koasa malelak no mandaik fo nafada laꞌe-neu Lamatuak fo ara ralela no ledo-ledo.
1CO 12:9 Ketuk bali simbo koasa nemeheherek matea neu Manetualain, nahuu ara rakaesa ratalolole ro Ndia Dula-dalen. Ketuk bali simbo koasa fo tao rahai hatahori kamahedik.
1CO 12:10 Ketuk bali simbo koasa tao tanda heran mata-matak kara fo ratudu Manetualain ta neni babanggan. Ketuk bali simbo koasa rambarani kokolak fo rafada Lamatuak hara hehelun no matetu-mandaik neu Ndia hatahorin nara. Ketuk bali simbo koasa duduꞌa-aꞌafi neulauk fo bubuluk dula-dalek bee ndia numa Manetualain mai ma bee ndia taa. Ketuk bali simbo koasa deꞌa-deꞌa kola-kola fo bisa kokolak pake dedeꞌak mata-matak kara tungga Dula-dalek hihiin. Ketuk bali simbo koasa fo bisa rafada dedeꞌak kara raa sosoa-ndandaan hata.
1CO 12:11 Tehuu kada Dula-dalek esa ndia taon fo basa sara bisa tao ues sara raa. Ana fee hatahori esa-esak fo ara rabeꞌi raue-osa tungga Dula-dalek hihii-nanaun.
1CO 12:12 Au nau akasasamak hatahori fo mana hambu babanggi-babaꞌek kara raa no hatahori ao-inak esa. Ao-inak naa, naena babaꞌen mata-matak kara. Tehuu babaꞌek mata-matak kara raa, rakaesa dadi neu ao-inak esak ka. Naa, sama leo Karistus hatahorin nara.
1CO 12:13 Kada Dula-dalek esa ndia nakaesa ita basa ngga. Huu naa de, neu ita hambu sarani, ita dadi sama leo hatahori nusak esa. Leo mae ita hatahori Yahudir, do hatahori ta Yahudir, ata-dato, do hatahori nekemboꞌik, Manetualain fee ita basa ngga Dula-dalek esak ka. Naa, sama leo ita basa ngga tinu oe mana neni masodak, numa oe matak esak ka mai.
1CO 12:14 Memak ao-inak ta numa kada babaꞌek esak ka mai. Ndia naa, dadi numa babaꞌek noꞌuk ka mai.
1CO 12:15 Leo o eim nae, “Au ia, ta limak. Dadi au ta dadi babaꞌek numa o ao-inam mai.” Leo mae ana kokolak talo naa, tehuu ndia bei babaꞌek numa o ao-inam mai. Tebe, hetu?
1CO 12:16 Mete ma o ndiꞌi doom nae, “Au ia, ta mata boak. Dadi au ta dadi babaꞌek numa o ao-inam mai.” Leo mae ana kokolak talo naa, tehuu ndia bei babaꞌek numa o ao-inam mai.
1CO 12:17 Duduꞌa dei! Mete ma o ao-inam dadi kada mata boak esak ka, talo bee de o bisa mamanene? Mete ma o ao-inam dadi kada ndiꞌi dook esak ka, talo bee de o bisa hae mala book?
1CO 12:18 Tehuu ei bubuluk ena, Manetualain tao nala ita sama leo ao-inak esa, ma Ana koladu babaꞌek mata-matak tungga Ndia hihiin.
1CO 12:19 Mete ma ita ao-inan dadi neu kada babaꞌek esa, na, naden ta ‘ao-inak’ ena bali, hetu?
1CO 12:20 Tehuu ndondoon ndia, ita ao-inan babaꞌen mata-matak. Naa, ndia taon dadi neu ao-ina katemak esa.
1CO 12:21 Hatahori mata boan ta bisa nakaloloek hatahori naa liman nae, “Au ta toꞌa o!” Ma hatahori langgan ta bisa nafada hatahori naa ein nae, “Au ta toꞌa o!”
1CO 12:22 Ndondoon ndia, hambu ao-inak babaꞌen fo ita duꞌa tae ta barakaik ma nenenin taa, tehuu ita bei toꞌa sara.
1CO 12:23 Hambu babaꞌek fo ita duꞌa tae sosoan kada baꞌu anak ka, tehuu ita bei takaboi tatalolole sara. Ma hambu babaꞌek fo ita mae tatudu sara, de ita tatana tatalolole sara.
1CO 12:24 Tehuu mete ma babaꞌek fo ta tao nakamamaek ita, ita ta tao hata-hata mbali sara. Manetualain nakabubua nala basa babaꞌek kara fo taon dadi ao-inak esa. De Ana heti fo babaꞌek bee ita duꞌa tae nenenin taa, ita oo takaboi tatalolole sara boe,
1CO 12:25 huu Ana ta hii ita ao-inan neni bingga-baꞌek. Ana nau fo basa babaꞌek, esa susuri-memete esa.
1CO 12:26 Mete ma babaꞌek esa hambu susa-sonak, na, basa sara oo rameda boe. Mete ma esa simbo hada-horomatak, na, basa sara oo ramahoko tungga boe.
1CO 12:27 Soa-neu ei oo leo naak boe. Huu ei sama leo Karistus ao-inan katematuan. Hatahori kamaherek esa-esak dadi sama leo babaꞌek esa numa Karistus ao-inan mai.
1CO 12:28 Nai hatahori kamaherek kara taladan, Manetualain fee koasa fo tao ues mata-matak kara. Kaesan, Ana nadenu hatahori ketuk reu rafada Ndia hara hehelun. Kaduan, Ana pake hatahori ketuk dadi reu Ndia mana toꞌu dedeꞌan. Katelun, Ana tao hatahori ketuk ralela ranori hatahorir laꞌe-neu Ndia. Ma Ana fee koasa neu hatahori ketuk fo bisa tao tanda heran mata-matak kara fo ratudu Ndia ta neni babanggan. Ketuk bali hambu koasa fo rahai hatahori kamahedik. Ketuk bali hambu babanggi-babaꞌek fo tulu-fali hatahorir. Ketuk bali hambu babanggi-babaꞌek fo bisa koladu hatahorir fo raue-osa sama-sama no malole. Ma Ana fee koasa neu hatahori ketuk bali fo ara bisa kokolak pake dedeꞌak mata-matak kara.
1CO 12:29 Ei duduꞌam talo bee? Manetualain nadenu basa hatahorir fo laꞌok reu tui-bengga Ndia hara hehelun, do? Taa. Ana tao basa hatahorir dadi reu Ndia mana toꞌu dedeꞌan, do? Taa. Ana tao basa hatahorir ralela ranori, do? Taa. Ana fee koasa neu basa hatahorir fo bisa tao tanda heran, do? Taa.
1CO 12:30 Ana fee koasa neu basa hatahorir fo rahai hatahori kamahedik, do? Taa. Ana tao basa hatahorir bisa kokolak pake dedeꞌak mata-matak kara, do? Taa. Ana tao basa hatahorir bisa rafada dedeꞌak kara raa sosoa-ndandaan, do? Taa.
1CO 12:31 Ei muste mahani a ma nau simbok fo pake babanggi-babaꞌek fo nanalan lenak soa-neu hatahori noꞌuk kara. Leo mae talo naa, tehuu au bei nau atudu soa-neu ei eno-dalak neulaun lenak.
1CO 13:1 Leo au bisa kokolak pake basa dedeꞌak mata-matak kara, hatahori dae-bafok dedeꞌan do, Manetualain atan numa nusa tetuk do inggu temak mai dedeꞌan do, tehuu au ta aena susue-lalaik faa boe na, ndia nanalan hata? Au kokolang naa, kada rouk, sama leo meko fo kada nalii dolo-dolo, do darom fo nalii nduka-nduka a mesan.
1CO 13:2 Leo au aena babanggi-babaꞌek ambarani kokolak fo afada Lamatuak hara hehelun no matetu-mandaik neu Ndia hatahorin, ma au bubuluk basa hata fo bei nemeninok, ma au alela basa hata fo hatahori malelak kara bubuluk, do mete ma au nemehereng neu Lamatuak matea, losa au bisa lali heni letek kara, tehuu au ta aena susue-lalaik faa boe na, ndia sosoan hata? Au tataong naa, ta naena sosoak hata-hata.
1CO 13:3 Mete ma au seꞌo heni basa au hata-hetong, boe ma baꞌe heni basa doin nara fo ahao hatahori mana toꞌa taak kara, do loo lima au ao-mbaang dadi neu tunu-hotuk, tehuu au ta aena susue-lalaik faa boe na, ndia sosoan hata? Au oo ta bisa akadedemak aong boe. Naa kada hie-hie a mesan! Nanalan taa.
1CO 13:4 Huu susue-lalaik naa, neulauk. Susue-lalaik naa, dale naruk ta mana namanasa lai-laik. Susue-lalaik naa, ta mana horo mbalak. Susue-lalaik naa, ta mana nakadedema aok. Susue-lalaik naa, ta mana koa aok.
1CO 13:5 Susue-lalaik naa, bangganaꞌuk taa-taa. Susue-lalaik naa, ta nau mesa kana senggi. Susue-lalaik naa, ta namanasa raꞌu-raꞌu. Susue-lalaik naa, ta nambeda dalek.
1CO 13:6 Susue-lalaik naa, namahoko no hata fo ndoos, ma ta hii hata fo mbeu seserik.
1CO 13:7 Susue-lalaik naa, nabeꞌi lenggu-barak. Susue-lalaik naa, namahere nakandoo. Susue-lalaik naa, namahena nakandoo. Susue-lalaik naa, nakatataka nakandoo.
1CO 13:8 Susue-lalaik naa, ta nalela hahaek. Tehuu hata fo Manetualain mana toꞌu dedeꞌan nara rafada naa, doo-doo te ta parluu ena bali. Mete ma hatahori kokolak pake dedeꞌak mata-matak kara, doo-doo boe te ta parluu ena bali. Mete ma hata fo hatahori malelak kara bubuluk, doo-doo te ta hambu sosoan bali.
1CO 13:9 Hatematak ia, ita talela kada baꞌu anak ka. Mete ma ita dadi teu Manetualain mana toꞌu dedeꞌan, ita tafada kada hata fo bei ta matetu-mandaik.
1CO 13:10 Tehuu losa fain, neu ko basa-basan dadi matetu-mandaik. Faik naa, basa hata fo ta matetu-mandaik oo, ta raena sosoan bali boe.
1CO 13:11 Haꞌi netuduk talo ia: neu au bei kadiꞌi ana, au kokolak sama leo kakana anar rasiꞌe kokolak. Au oo duduꞌa sama leo kakana ana rasiꞌe duduꞌak boe. Tehuu hatematak ia, au amoꞌo ena. Huu naa de au hihiru-heheong ta sama leo kakana ana bali.
1CO 13:12 Netuduk laen bali: hatematak ia, ita bisa mete-tita faa, tehuu bei ta manggaledok sama leo mete pake titiro makalulutuk. Tehuu doo-doo, neu ko basa-basan dadi manggaledok. Ita mete-tita sama leo hambun tetar nai ita idu-matan. Hatematak ia, au alela kada baꞌu anak. Tehuu doo-doo, neu ko au bisa alela basa-basan, sama leo Manetualain nalela basa-basan laꞌe-neu au aong.
1CO 13:13 Dadi hatematak ia, hambu dedeꞌak telu ndia ita muste tao tunggan takandoo. Ndia: ita muste tamahere takandoo neu Lamatuak; ita muste tamahena takandoo tae, neu ko Ana koladu basa-basan dadi malole; ma ita muste tasue-lai takandoo. Numa dedeꞌa kateluk kara iar mai, susue-lalaik, ndia nenenin lenak. Huu susue-lalaik ndia lolen lena heni basa-basan.
1CO 14:1 Maote tebe-tebe fo masue-laik nai basa dedeꞌak kara. Ta hambu dedeꞌak laen nenenin lenak bali. Ma sangga dalak fo Manetualain Dula-dalen fee ei koasa ma babanggi-babaꞌek fo ei bisa tao hata fo neulauk kara. Ma lolen ndia, mete ma ei hambu babanggi-babaꞌek fo mafada Manetualain hara hehelun.
1CO 14:2 Mete ma hatahori hambu babanggi-babaꞌek numa Manetualain Dula-dalen koasan mai fo bisa kokolak pake dedeꞌak laen, de nafada dedeꞌak bei ta manggaledok. Ana ta kokolak no hatahori laen, tehuu ana kokolak no kada Manetualain mesa kana. Ta hambu hatahorir fo mana rakabua rai naa, ndia ralela hatahori naa kokolan.
1CO 14:3 Tehuu mete ma hatahori naena babanggi-babaꞌek fo nafada Manetualain hara hehelun naa, na, ana fee hara heheluk neu basa hatahorir marai naar. Ana fofoꞌa hatahorir nemeheheren nara reu Manetualain, natetea dalen nara, ma kokoe-nanasi hatahori mana susa-sonak kara.
1CO 14:4 Hatahori fo mana kokolak pake dedeꞌak laen, ana natetea kada ndia ao heli-helin. Tehuu hatahori fo mana kokolak nafada Manetualain hara hehelun naa, ana natetea basa hatahorir fo mana rakabuak, fo saranik katematuan boe ratea lenak bali.
1CO 14:5 Au hihiing fo ei basa ngga bisa kokolak pake dedeꞌak laen. Tehuu au hihiing lenak fo ei bisa kokolak mafada Manetualain hara hehelun. Huu hatahori fo mana kokolak nafada Manetualain hara hehelun naa, sosoan lenak numa hatahori fo kada kokolak pake dedeꞌak laen mai. Mete ma kokolak pake dedeꞌak laen, naa oo malole boe, sadi hambu hatahori mana bisa nafada dedeꞌak naa sosoa-ndandaan. No dalak naa, hara heheluk naa bisa tao natetea lenak basa hatahorir marai saranik dale, fo ara bisa ralela.
1CO 14:6 Toranoo susue nggara ein! Duduꞌa sudik dedeꞌak ia. Leo au mai nai ei, boe ma au kokolak pake dedeꞌak fo ei ta malela sana, na, ei hambu nanalan hata? Ta hambu, hetu? Tehuu mete ma au kokolak soa-neu ei, malole lenak mete ma au afada Manetualain hihii-nanaun. Malole lenak au buka dedeꞌak fo fai bakahulun bei ta manggaledok. Malole lenak au tulun ei fo bubuluk dedeꞌak no neulaun lenak bali. Malole lenak au fee nesenedak laꞌe-neu Manetualain Dedeꞌa-kokolan. Malole lenak au anori ei. Naa, dei fo naena sosoak soa-neu ei, hetu?
1CO 14:7 Leo naak oo no bua kaliik kara boe. Sira ta horis, tehuu ara tao liik mata-matak kara. Pake suling do, sasandu do, nggitar do, mete ma ndia not ta nggatin, neu ko hatahori ta bisa bubuluk ana nakaminak sosodak bee, hetu?
1CO 14:8 Mete ma toꞌik liin ta nambaree, talo bee fo soldadur bisa bubuluk ana fee tanda fo rahehere reu ratati? Ta bisa, hetu?
1CO 14:9 Leo naak oo soa-neu ei boe. Mete ma ei kokolak pake dedeꞌak laen do pake dedeꞌak fo hatahori ta bisa ralela no manggaledok, naa sama leo kada ei kokolak mia anin. Kada hie-hie a mesan, huu hatahorir ta bisa humu rala o dedeꞌa-kokolam sosoa-ndandaan!
1CO 14:10 Hambu dedeꞌak mata-matak noꞌuk ka nai dae-bafok ia. Dedeꞌak esa-esak no ndia sosoa-ndandaa heli-helin.
1CO 14:11 Tehuu mete ma au ta bubuluk hatahori laen dedeꞌan, naa ta naena sosoa-ndandaak hata-hata soa-neu au. Au ta alela sira, ma sira oo ta ralela au boe. Ai esa no esa, dadi neu hatahori feꞌek.
1CO 14:12 Leo naak oo neu ei boe. Ei nau hambu koasa ma babanggi-babaꞌek numa Manetualain mai. Naa malole. Tehuu lolen lenak, ei maote tebe-tebe fo hambu koasa ma babanggi-babaꞌek fo ei bisa paken tulu-fali tao matetea hatahori kamaherek noꞌuk kara!
1CO 14:13 Dadi hatahori fo mana kokolak pake dedeꞌak laen, malole lenak ana hule-haradoi noke fo Manetualain oo feen babanggi-babaꞌek, mita fo bisa nafada dedeꞌak laen naa sosoa-ndandaan boe.
1CO 14:14 Mete ma au hule-haradoi pake dedeꞌak laen, au hule-haradoi pake au daleng, tehuu au ta alela au kokolak hata.
1CO 14:15 Dadi lolen ndia, au tao talo bee? Au pake dua sara, tehuu esa-esak no ndia fain. Au nau hule-haradoi pake dedeꞌak laen fo Manetualain Dula-dalen feen nai au daleng. Ma au oo nau hule-haradoi pake dedeꞌa deꞌek fo au alelan boe. Au nau soda sosodak kokoa-kikiok neu Manetualain pake dedeꞌak laen fo Manetualain Dula-dalen feen nai au daleng. Ma au oo bisa soda pake dedeꞌa deꞌek fo au alelan boe.
1CO 14:16 Mete ma o soꞌuk kokoa-kikiok no tebe-tebe neu Manetualain pake dedeꞌak laen, ma hambu hatahori numa naa, tehuu ta nalela dedeꞌak kara raa, talo bee fo ana bisa dalek esa no o? Neu o moke makasi neu Manetualain pake dedeꞌak laen, talo bee de ana bisa nakaheik neu o nae, “Tebe, naa!” Ta bisa, hetu? Huu ana ta nalela o dedeꞌa-kokolam naa sosoa-ndandaan.
1CO 14:17 O moke makasi neu Lamatuak talo naa oo bisa a mesan boe, tehuu naa ta tao natea hatahori laen dalen.
1CO 14:18 Au oke makasi neu Manetualain, nahuu Ana tao nala au bisa kokolak pake dedeꞌak laen lena heni numa ei basa ngga mai.
1CO 14:19 Tehuu mete ma hatahori kamaherek rakabua, malole lenak au kokolak do anori sara pake kada dedeꞌa deꞌe kekeꞌuk limak ka, fo ara bisa ralela, lena heni au kokolak do anori sara pake dedeꞌa deꞌek rifu-rifuk kara numa dedeꞌak laen mai, fo ara ta ralela sara.
1CO 14:20 Toranoo susue nggara ein! Mete ma ei nau soba malela dedeꞌak, na, ei muste manori duduꞌa sama leo hatahori manggalalasin. Boso duduꞌa sama leo kakana anar! Tehuu no dedeꞌa manggarauk, ei muste sama leo kakana anar, ta mana bubuluk tao dedeꞌa manggarauk kara, huu dalen nara lolo-laok.
1CO 14:21 Nai Manetualain Susura Malalaon neni surak nae: “Ita Lamatuan kokolak nae, ‘Au nau pake hatahori mana kokolak pake dedeꞌak laen nara, fo Au kokolak fee hatahori nusak Israꞌel iar. Tehuu leo mae Au kokolak talo bee oo, ara ta nau nenene Au boe.’ ”
1CO 14:22 Dadi ei mete-mita, mete ma hatahori kokolak pake dedeꞌak laen, naa dadi tanda soa-neu hatahorir bei ta ramahere neu Manetualain fo ara mete-rita Ndia koasan. Naa, ta tulun hatahorir fo mana ramahere neu Manetualain ena. Tehuu mete ma hatahori kokolak nafada Manetualain hara hehelun, naa tulun hatahori fo mana namahere neu Manetualain ena. Naa, ta tulun hatahori fo bei ta namahere neu Ndia.
1CO 14:23 Leo ei basa ngga makabubua, boe ma ei basa ngga kokolak pake esa-esak dedeꞌan, basa de hambu hatahorir ta ramahere do hatahori ta bubuluk dedeꞌak kara iar, maso rai ei taladam, neu ko ara duduꞌa rae leo bee? Neu ko ara rae, “Hatahorir marai iar, ramulu ia ena, ee!”
1CO 14:24 Ma leo ei basa ngga makokola aok mafada Manetualain hara hehelun, boe ma hambu hatahori ta kamaherek, do hatahori ta mana nalela dedeꞌak kara iar, maso nai ei taladam. Neu ko hatahori naa nau nenene hata fo ei kokolak. Dadi hata fo ei kokolak naa, natudu ndia sala-singgon nara, losa ana nau parisa no lutuk ndia leleo-lalaꞌo heli-helin.
1CO 14:25 Boe ma basa dedeꞌa manggarauk fo ana nafunin nai ndia dalen, neu ko neni bukak, fo basa hatahorir bubuluk. Basa boe ma hatahori naa neu ko sendek luu-langgan fo nakaluku-nakatele neu Manetualain nae, “Awii! Manggaledok ena, Manetualain nai ei taladam!”
1CO 14:26 Dadi toranoo susue nggara ein! Mete ma ei makabua, hatahori esa-esak no ndia babanggi-babaꞌen. Hambu mana soda sosoda kokoa-kikiok neu Manetualain. Hambu mana manori hatahori laꞌe-neu Manetualain. Hambu mana mafada dedeꞌak numa Manetualain mai, fo bakahulun bei nefunik. Hambu mana kokolak pake dedeꞌak laen. Ma hambu mana bisa nafada dedeꞌak laen naa sosoa-ndandaan. Basa dedeꞌak bebeik kara raa, ara muste tao sara fo ratetea hatahori laen nara nemeheheren.
1CO 14:27 Mete ma hambu mana hii kokolak pake dedeꞌak laen, naa malole. Tehuu elan fo kada hatahori dua do telu, dai ena. Hae noꞌu-noꞌu. Esa kokolak basa, dei fo esa kokolak bali. Ma muste hambu hatahori mana bisa nafada sira dedeꞌan sosoa-ndandaan.
1CO 14:28 Leo mete ma ta hambu hatahori fo mana bisa nafada dedeꞌak naa sosoa-ndandaan, na, hae kokolak pake dedeꞌak laen nai hatahori noꞌuk kara matan. Naa fo ara kokolak talo naa nai kada sira mesa kasa dalen. Ara oo bisa kokolak ro Manetualain talo naa boe.
1CO 14:29 Mete ma ei makabua, elan fo kada hatahori dua do telu, ndia rafada Manetualain hara hehelun. Laen nara muste timba-tai ratalolole sira kokolan naa.
1CO 14:30 Tehuu leo Manetualain buka fee nelelak neu dedeꞌak esa fo bakahulun bei ta manggaledok, soa-neu hatahori esa fo nanggatuuk nenene numa naa, na, hatahori naa muste nafada hara heheluk naa, neu basa hatahorir maruma naa. Ma hatahori mana kokolak manai mata muste hahae fo fee lelak neu hatahori mana bei fo nenene numa Manetualain mai naa, fo ana kokolak.
1CO 14:31 Ndondoon ndia, ei basa ngga bisa mafada Manetualain hara hehelun. Tehuu elan fo hatahori esak ka kokolak dei, basa dei fo ndia nonoon. No dalak naa, basa hatahorir bisa nenene, basa-basan bisa ranori, ma basa-basan bisa rameda sira dalen nara boe ratea.
1CO 14:32 Masaneda te, hatahori fo mana kokolak nafada Manetualain hara hehelun oo muste nalela koladu ndia ao heli-helin boe. Esa bisa nahani esa, ma laen nara bisa rakatataka rala aon nara dei.
1CO 14:33 Huu ta hambu nemue-anggik nai Manetualain. Basa-basan neni heti-totodok no kada lino-lendek. Nai bee a mesan, mete ma hatahori kamaherek rakabua siꞌen talo ia:
1CO 14:34 Inak kara muste ranggatuuk matu-matu. Boso ako bafan nara. Ara muste nenene neu malanggan nara. Huu Manetualain Hohoro-lalanen oo surak talo naa boe, hetu?
1CO 14:35 Mete ma hambu hatahori fo nau natane dedeꞌak esa, na, elan nahani ana fali uma mai dei, dei fo natane kada ndia sao toun. Huu mete ma inak kara ramue nai uma huhule-haradoik dale, na, naa tao kada nekemamaek!
1CO 14:36 Ei duduꞌam talo bee!? Manetualain Dedeꞌa-kokolan ta numa ei mai! Ma Ndia Dedeꞌa-kokolan ta fee kada ei mesa ngga marai kota Korentus! Duꞌa matalolole dei!
1CO 14:37 Mete ma hambu hatahori tao aon nae, ana bisa nafada Manetualain hara hehelun, do, duꞌa nae ndia simbo koasa numa Manetualain Dula-dalen mai, na, mesa kana ndia nakaheik nae, dedeꞌak naa, fo au surak fee ei naa, ta hohoro-lalanek numa au mai, tehuu parenda naa numa ita Lamatuan, Yesus mai.
1CO 14:38 Mete ma hambu hatahori ta nau simbok dedeꞌak bebeik kara iar, na, ei boso simbok kana.
1CO 14:39 Toranoo susue nggara ein! Maote tebe-tebe fo ei hambu koasa fo bisa kokolak mafada Manetualain hara hehelun. Ma boso kaꞌi hatahorir mae, ara ta bole kokolak pake dedeꞌak laen.
1CO 14:40 Dadi mete ma ei makabua, na, makalalaꞌok basa-basan no tetebes, tungga hata fo mandaak. Dedeꞌak esa basa dei, dei fo laen tungga. Makalalaꞌok basa-basan no malole. Boso mamue-anggik.
1CO 15:1 Toranoo susue nggara ein! Au nau fo ei masaneda Manetualain Hara Lii Malolen, fo au afada neu ei numa fai bakahulun mai ena. Ei simbo malan, boe ma ei makatataka tungga makandoo Hara Liik naa.
1CO 15:2 Hara Liik naa, ndia bisa neni masoi-masodak soa-neu ei, sadi ei toꞌu mahere makandoo neun. Tehuu mete ma ei ta mamahere makandoo neu Manetualain, na, ei nemeheherem naa, kada hie-hie a mesan.
1CO 15:3 Au oo anori ei dedeꞌak kara fo nenenin lenak ena boe, fo fai bakahulun hatahori ranori ritan neu au ena. Ndia: Karistus fo Manetualain nadenun mai naa ena, maten ena fo tao nasoi-nasoda ita numa ita sala-singgon nara mai, ndaa tetar no Manetualain Susura Malalaon surak numa lele uluk mai.
1CO 15:4 Boe ma ratoin. Basa de, bei-nesan Manetualain nasoda falik kana numa mamates mai, ndaa tetar no Manetualain Susura Malalaon surak memak kana numa lele uluk mai.
1CO 15:5 Basa boe ma Karistus natudu aon neu Petrus. Ana oo natudu aon neu Ndia ana nuni kasalahunu duan nara boe.
1CO 15:6 Basa de laꞌe esa, Ana oo natudu aon neu hatahori kamaherek natun lima lenak numa mamanak esa boe. Basa sara mete-ritan. Numa sira raa mai, noꞌuk ka bei ta mate. Kada baꞌu anak ka mate sara ena.
1CO 15:7 Boe ma Ana natudu aon neu kaꞌa Yakobis. Basa de Ana natudu aon neu basa Ndia nedenun nara lalaꞌen.
1CO 15:8 Au ndia bakahitok mateꞌen oo mete-itan boe. Au sama leo ana muri anak fo neni bonggik tungga dea mateꞌen.
1CO 15:9 Lamatuak nedenu laen nara, basa sara nenenin lenak numa au mai. Mete ma tungga ndoon, na, au ta andaa dadi neu Ndia nedenun. Fai bakahulun, au ndia tao doidoso ma hese-laka Lamatuak hatahorin nara rai bee a mesan.
1CO 15:10 Tehuu Manetualain natudu Ndia dale susuen neu au. De Ana ndia tao au dadi leo hatematak ia. Ana ta piru-nggari heni Ndia susuen no hie-hie, neu Ana tao dedeꞌa malole soa-neu au. Mateꞌen au ndia aote tebe-tebe lena heni basa sara! Naa te au ta ndia aue-osa, tehuu Manetualain dale susuen ndia naue-osa nai au leleo-lalaꞌong.
1CO 15:11 Dadi nenenin taa mete ma au ndia fee nenorik, do nedenuk laen ndia fee nenorik. Huu ai basa ngga fee nenorik laꞌe-neu dedeꞌak sama. Ai mafada hatahorir laꞌe-neu Manetualain Hara Lii Malolen nakandoo. Huu naa de ei dadi mamahere neu Hara Liik fo bei sama naa.
1CO 15:12 Ai masiꞌe manori hatahorir mae, Karistus fo Manetualain nadenun mai naa ena, nasoda fali numa Ndia mamaten mai ena. Dadi tao hata de ei ketuk mae, “Hatahori mana matek kara ta rasoda fali ruma mamaten nara mai”? Ndia oka-huun hata?
1CO 15:13 Leo hatahori mates ta nasoda fali numa mamaten mai, ndia sosoa-ndandaan nae, Karistus oo ta nasoda fali numa mamaten mai boe!
1CO 15:14 Mete ma Karistus ta nasoda fali numa mamaten mai, basa hata fo ai masiꞌe mafada hatahorir, sosoan taa. Ma ei nemeheherem neu Ndia, kada hie-hie a mesan!
1CO 15:15 Mete ma tetebes hatahori mates ta nasoda fali numa mamaten mai, ai oo dadi sakasii kokola bafa rouk laꞌe-neu Manetualain boe. Huu ai masiꞌe manori hatahorir mae, “Manetualain ndia tao nasoda falik Karistus numa mamaten mai!” Memak, ai mafada talo naa. Tehuu leo hatahori mates ta nasoda fali numa mamaten mai, ndia sosoa-ndandaan nae, Manetualain ta tao nasoda falik nita Karistus.
1CO 15:17 Duꞌa sudik dedeꞌak ia: Mete ma Karistus ta nasoda fali numa mamaten mai, na, ei nemeheherem neu Manetualain kada hie-hie a mesan! Huu ei bei lemba-masaa ei sala-singgom mara!
1CO 15:18 Ta kada naa mesa kana, huu basa hatahorir mana matek kara ena, fo bakahulun rakaesa ro Karistus, mete ma Karistus ta nasoda fali nita numa mamaten mai, na, sira oo mate ma lenggo feꞌe numa Manetualain mai boe.
1CO 15:19 Ita tasarai teu Karistus tae, neu ko Ana nau tao hata malole soa-neu ita. Tehuu mete ma ita nemehehenan talo naa, dadi nai kada dae-bafok ia, na, naa kada hie-hie a mesan! Ma ita dadi teu hatahori kasian sudi selik kana numa basa-basan mai!
1CO 15:20 Naa te ta talo naa, hetu? Ndondoon ndia: Karistus fo Manetualain nadenun mai naa ena, Ana nasoda fali numa mamaten mai ena! Ma ta kada Ndia mesa kana, te neu ko hatahori kamaherek mana matek kara ena oo, rasoda fali boe. Karistus sama leo mbule uluk makasososak fo natudu nae, hatahori mates neu ko nasoda fali numa mamaten mai tungga Ndia.
1CO 15:21 Lele uluk kada hatahori esak ka, ndia Adam, nalena-langga Manetualain parendan. Dadi ndia huku-dokin, ndia mamates. Huku-dokik naa oo tuda laꞌe-ndaa basa ita hatahori dae-bafok boe. Tehuu hatematak ia, hambu hatahori esa bali, ndia Karistus, fo mana nasoda tungga Lamatuak parendan. Dadi hatahori mates bisa nasoda fali numa mamaten mai, nahuu Ndia malolen!
1CO 15:22 Basa hatahorir fo mana lena-langga Lamatuak parendan oo, hambu hukun mates, sama leo Adam boe. Leo naak oo, basa hatahorir fo mana rakaesa ro Karistus, neu ko Manetualain tao nasoda falik kasa ruma mamates mai boe.
1CO 15:23 Tehuu esa-esak no ndia fain. Karistus dadi neu hatahori makasososak fo mana nasoda fali numa mamates mai, sama leo mbule uluk makasososak bebeik kara naa. Ma neu ko, mete ma Ana fali mai nai dae-bafok ia ena, dei fo Ndia hatahorin nara oo rasoda fali numa mamates mai boe.
1CO 15:24 Basa naa, dei fo dae-bafok fai mateꞌen losa. Faik naa, Karistus dadi Manek fo nakalulutu basa koasar, basa parendar, ma basa malelak fo mana musuk ro Lamatuak. Ana oo, dadi Manek fo mana loo lima falik Ndia haak parendan neu Manetualain boe, Ndia Aman.
1CO 15:25 Ana muste toꞌu parenda nakandoo, losa Manetualain nasenggi basa mana laban Karistus fo ara doꞌor mbalin.
1CO 15:26 Hambu dedeꞌak esa bali mana musu no ita hatahori dae-bafok. Ndia, ita muste mate. Tehuu mateꞌen, Manetualain oo nau nasenggi mamates koasan boe. Ana tao basa talo naa, boe ma ta hambu hatahori fo mate bali.
1CO 15:27 Nai Manetualain Susura Malalaon neni surak nae, “Manetualain tao basa neni senggik kara fo doꞌor neu Hatahori fo Ana helu-bartaa nae nadenun mai naa.” Neu ana surak nae, “Basa neni senggik kara fo doꞌor neu Ndia Hatahorin”, manggaledok ena nae, Manetualain ta maso nai naa. Huu Manetualain mesa kana ndia soꞌuk kana fo dadi Lamatuak soa-neu basa-basan.
1CO 15:28 Dei fo neu basa-basan namanene tebe-tebe neu Manetualain Anan, neu ko Anak naa ndia loo lima falik basa-basan neu Ndia Aman, mana soꞌuk Ndia dadi neu basa sara Lamatuan ena. Basa boe ma Manetualain toꞌu parenda nakandoo nai basa dedeꞌak kara, soa-neu basa hatahorir.
1CO 15:29 Hambu hatahori fo nau sarani, nggati hatahori mates fo bei ta sarani. Tehuu mete ma hatahori mates ta nasoda fali numa mamaten mai, tao hata de ara nau sarani soa-neu hatahori mates?
1CO 15:30 Mete ma hatahori mates ta nasoda fali numa mamaten mai, neu ko ai mamataꞌu mate. Naa te ta leo naak.
1CO 15:31 Tungga faik, au kada ae mate! Toranoo susue nggara ein! Au sumba-soo, au ameda ta hata-hata leo au mate. Au bisa botik au matang, nahuu ei makaesa makandoo mia ita Lamatuan Yesus Karistus, fo Manetualain nadenun mai ena.
1CO 15:32 Fai maneuk kara, neu au bei nai kota Epesus, au kada aruꞌi-raꞌuk ua hatahorir raa, mana sama leo banda fui manggarauk. Tehuu mete ma au kada ahuur fo bisa senggi soa-neu ao heli-heling, ta soa-neu Lamatuak, naa kada hie-hie a mesan. Nanalan taa! Mete ma tebe-tebe hatahori mates ta nasoda fali numa mamaten mai, malole lenak ita tungga-tungga kada hatahorir kokolan nara leo rae, “Mai fo ita feta rame-rame, ma taꞌa-tinu malada-malada leo, te beꞌe-mai ita mate ena!”
1CO 15:33 Ei boso hambu kedi-irak fo tungga duꞌa talo naa! Masanenedak! Hambu dedeꞌa-kokolak nae, “Mete ma o eik esa mua hatahori manggarauk, naa tao nala o sio laꞌo numa eno-dala ndoos mai.”
1CO 15:34 Boso tao manggarauk bali! Hahae leo! Koladu o ao heli-helim! Duꞌa matalolole fo tao kada ndoos leo! Ndondoon ndia, ei muste mameda mae, huu nai ei taladam mara, bei hambu hatahori fo bei ta nalela Manetualain.
1CO 15:35 Hambu ketuk ratane, “Dalan talo bee de hatahori mates bisa nasoda fali? Ma sira ao-inan dadi talo bee?”
1CO 15:36 Nggoa bebek, ee! Mete ma sele-tande bini-nggees, na, bini-nggees naa muste nakalulutu nai dae dale, dei fo ana bisa mori ma nanumbu.
1CO 15:37 Ma bini-nggees fo ita sele-tandek, mata-aon ta sama leo mana manumbuk ma nadoo. Ndia kada bini-nggees kamatuuk, matak leo nggandum do, hade do, bini-nggees laen.
1CO 15:38 Esa-esak tungga ndia mata-aon, tungga Manetualain hihii-nanaun. Huu Ana ndia naketu sele-tandek esa-esak mata-aon.
1CO 15:39 Banda-manur ma hatahori dae-bafok oo leo naak boe. Esa-esak no ndia mata-aon, tungga Manetualain hihii-nanaun. Hatahori dae-bafok ao-inan, tungga hatahori dae-bafok mata-aon. Banda-manur ao-inan nara, esa-esak no ndia mata-aon. Mbuik no ndia enan. Iꞌak no ndia enan. Laen bali no ndia enan.
1CO 15:40 Hambu buas nai lalai, ma hambu buas nai dae-inak. Manai lalai, hambu sira ta hohoꞌan. Tehuu ta hohoꞌan naa, laen numa marai dae-inak mai. Manai dae-inak oo, hambu sira ta hohoꞌan boe. Tehuu ta hohoꞌan naa, laen numa marai lalai mai.
1CO 15:41 Nai lalai, ledo ta hohoꞌan laen; bulan ta hohoꞌan laen; ma nduuk kara oo, ta hohoꞌan nara laen boe. Esa-esak no ndia mata-aon. Esa-esak no ndia ta hohoꞌan. Dadi basan ta hohoꞌak kara, hetu?
1CO 15:42 Mete ma hatahori mates nasoda fali, naa sama leo bini-nggees bebeik kara raa. Mete ma ratoi hatahori mates ena, na, ao-mbaa mamaten nakalulutu henin ena, hetu? Tehuu mete ma ana nasoda fali numa mamaten mai, ana ta sama leo bakahulun bali ena huu ana ta bisa mate bali.
1CO 15:43 Neu ita tatoi hatahori mates, ita tameda mamates naa manggenggeok. Tehuu mete ma hatahori naa nasoda fali ena, na, ana sudi selik kana! Huu ana dadi lolo-laok! Hatahori mates ta bisa tao hata-hata neu hatahorir ratoin. Tehuu neu lelek nasoda fali, ana dadi barakaik nalan seli!
1CO 15:44 Mete ma hatahori bei leo-laꞌo, ana kada bisa duduꞌa ma nameda a, hetu? Tehuu neu ana mate fo nasoda fali, Manetualain Dula-dalen feen masodak tetebes. Ma ana ta sama leo bakahulun ena bali.
1CO 15:45 Hatahori dae-bafok makasososak fo sama leo ita, ndia Adam. Tungga Manetualain Susura Malalaon, hambu neni surak nae, “ana dadi hatahori dae-bafok mana masodak, mana nalela kada duduꞌa ma nameda.” Tehuu hatahori dae-bafok fo mata-aon leo Adam manai lain mateꞌen naa, ndia Karistus. Ndia Dula-dalen ndia bisa fee hatahori nasoda tetebes.
1CO 15:46 Makasososak naa, ndia hatahori mana nalela kada duduꞌa ma nameda a, boe ma ana bisa mate. Tehuu mana masoda falik naa, ndia hatahori mana hambu masodak tetebes numa Manetualain Dula-dalen mai.
1CO 15:47 Hatahori dae-bafok makasososak nai dae-inak naa, neni aduk numa dae isik mai. Tehuu mata-aok kaduak naa, ndia Karistus, manuma lalai mai.
1CO 15:48 Ita fo mana leo-laꞌo nai dae-inak ia, mata-aok sama leo hatahori dae-bafok makasososak, fo Manetualain adun numa dae isik mai. Tehuu hatahori fo mana nakaesa no Manetualain nai lalai, mata-aon sama leo Karistus manuma lalai mai.
1CO 15:49 Ita hatematak ia, mata-aon sama leo Adam fo Manetualain adun numa dae isik mai. Tehuu doo-doo boe ma ita nggati mata-ao beuk, fo sama leo Karistus manuma lalai mai.
1CO 15:50 Toranoo susue nggara ein! Au ae afada neu ei, talo ia: ita fo mana dadi hatahori dae-bafok mata-ao makasososak, ita ao-inan numa daak ma duik mai. Dadi ita ta bisa simbo ita pusakan fo dadi teu Manetualain anan nai nusa tetuk do inggu temak. Ta bisa! Ita, hatahori dae-bafok mata-aok leo naak, neu ko ita ao-mbaan noe henin, de ita ta bisa simbo hata fo nakatataka nakandoo.
1CO 15:51 Dadi nenene matalolole! Au nau buka fee ei dedeꞌa nemeninok esa. Neu ko hambu hatahori kamaherek ketuk ta mate. Tehuu ita basa ngga neu ko nggati mata-ao beuk.
1CO 15:52 Neu toꞌik nalii bakahiton laꞌe esak kana, basa iar dadi no kada kaiboik. Nggafan lena heni o hate matam. Neu toꞌik nalii, faik naa oo hatahori mates sara rasoda fali ruma mamaten nara mai boe. Mete ma ara rasoda fali ena, ara ta mate seluk bali, ma ta rakalulutu seluk. Leo naak oo soa-neu ita boe. Ita basa ngga dadi mata-ao beuk.
1CO 15:53 Ita ao-mbaan hatematak ia bisa nakalulutu, nae nasafali dadi mata-ao beuk fo ta bisa nakalulutu bali! Ma ita fo hatematak ia bisa mate, nae nasafali dadi mata-aok fo ta bisa mate bali! Naa, tao tungga hata fo neni surak memak kana nai Susura Malalaok nae, “Lamatuak nakalulutu mamates koasan ena, ma nasenggin ena! Huu naa de ita ta mate ena bali.”
1CO 15:55 “Hee, Mamates! O nesenggim nai bee? Hee, Mamates! O koasa nekenisam nai bee bali?”
1CO 15:56 Tao hata de mamates neni nemeda hedis soa-neu ita hatahori dae-bafok? Naa dadi, nahuu ita tao salak. Ndian ena! Tao hata de ita sala-singgon nara raena koasa talo naa? Naa dadi, nahuu Manetualain Hohoro-lalanen natudu nae, ita sala-singgon nara ralena-langga Ndia Parendan. Ndian ena!
1CO 15:57 Tehuu hatematak ia basa-basan dadi laen ena! De ita basa ngga toke makasi noꞌun seli neu Manetualain. Huu Ana tao nala ita bisa tasenggi dedeꞌa manggarauk kara, tesik ita Lamatuan Yesus Karistus tataon. Ma Karistus ndia mana senggi tetebes!
1CO 15:58 Dadi toranoo susue nggara ein! Makatataka mahere! Boso matanggenggo! Ei ue-osam soa-neu Lamatuak muste tamba neulau ma tamba namanoꞌu. Huu ei bubuluk ena mae, ei maue-osa fafandek lima-eim soa-neu ita Lamatuan naa, ta hie-hie.
1CO 16:1 Hatematak ia au ae surak laꞌe-neu doik naa, fo ei maduduru malak ena, fo doi-sou neu Lamatuak hatahorin nara marai Yerusalem. Au afada hatahori kamaherek kara marai profensi Galatia ena fo ara muste raduduru doik naa. Hatematak ia ei oo muste tao tungga talo naa boe.
1CO 16:2 Tungga-tungga fai menggu, basa hatahorir muste mbeda sira doin baꞌu anak numa sira mbuse titin mai. Boso mahani au mamaing, dei fo ei mulai maote maduduru doik.
1CO 16:3 Mete ma au mai ena, na, matudu ei hatahorim mara fo ei mamaheren, fo reni doi doi-souk naa, fee Lamatuak hatahorin nara marai Yerusalem. Basa naa, dei fo au surak susurak fo akalelelak kasa reu malangga saranik manai naa.
1CO 16:4 Mete ma ei duꞌa mae, malole mete ma au oo tungga boe, na, ai bisa miu sama-sama.
1CO 16:5 Mete ma au laꞌok ndule profensi Makedonia lena, dei fo au uni ei neti. Tehuu au bei nau uni Makedonia uu dei.
1CO 16:6 Basa naa, dei fo au nau leo taak ua ei dook ka faa; fama te losa fai makasufuk katemak esa. Basa boe ma ei bisa mia au losa mamanak esa bali.
1CO 16:7 Au nanaeng uni ei neti, ta kada fai kekeꞌuk ka. Au nau leo ua ei dook ka faa, mete ma naa tungga Lamatuak hihii-nanaun.
1CO 16:8 Tehuu au bei nau leo nai kota Epesus ia losa fai malole Pentakosta, [fo ndia faik lima hulu numa basa fai malole Paska mai.]
1CO 16:9 Leo mae hambu hatahori noꞌuk ka laban Lamatuak ue-osan, tehuu au bei bisa aue-osa noꞌuk ka, nahuu nai ia bei hambu lelak neulaun seli.
1CO 16:10 Mete ma Timotius dadi neni ei neti, simbok malan no malole, fo ana hae duduꞌa hata-hata. Huu ndia ia, ita Lamatuan hatahori mana maue-osan, sama leo au.
1CO 16:11 Boso elan fo hatahori meten no kada puik kana. Tulun neun, losa ana fali no masodak, fo ana bisa fali neni au mai. Huu au ma toranook laen nara, mahanin.
1CO 16:12 Hambu dedeꞌak esa bali. Au kokoe ita toranoon Apolos ena fo ana neti tiro ei ma toranook laen nara. Tehuu ana bei ta nau neti hatematak ia. Kada mahani a leo, mete ma ana hambu fai lelak, dei fo ana neti.
1CO 16:13 Ei muste manea aom matalolole! Ei muste makatataka fo mamahere makandoo neu Lamatuak! Boso mamataꞌu! Tao matea aom!
1CO 16:14 Ei tao hata a mesan, na, natudu dedeꞌak esa ndia susue-lalaik.
1CO 16:15 Toranoo susue nggara ein! Ei basa ngga bubuluk mae, kaꞌa Stefanus no ndia uma isin dadi reu hatahori makasososak fo mana ramahere neu Karistus nai profensi Akaya naa. Ara raue-osa fafandek lima-ein nara fo raono-lalau basa hatahori kamaherek kara marai naa. Dadi au oke fo
1CO 16:16 ei mamanene neu sara ma neu hatahori matak leo naak kara. Ndia, hatahorir fo mana raue-osa no bebeꞌi barakaik fo sama-sama raono-lalau hatahori kamaherek kara.
1CO 16:17 Au hii alan seli nau mete-ita ei. Au daleng mbena sau-sau, huu kaꞌa Stefanus, kaꞌa Fortunatus, ma kaꞌa Akaikus, ara mai rai ia. No dalak naa, ara nggati ei.
1CO 16:18 Ara ratetea au daleng, sama leo ara oo ratetea ei dalem boe. Ei muste fee hada-horomatak neu hatahori matak leo naak kara.
1CO 16:19 Hatahori saranik kara marai profensi Asia haitua hara masodak soa-neu ei. Kaꞌa Akila no saon, kaꞌa inak Priskila, ma basa hatahori laen nara mana rasiꞌe rakabua nai sira uman oo haitua hara masodak boe, te sira oo rakaesa rakandoo ro ita Lamatuan boe.
1CO 16:20 Basa hatahori kamaherek kara marai ia oo haitua hara masodak boe. Mete ma ei makabua, na, esa simbok esa pake iꞌidu susue-lalaik mandaak soa-neu hatahori kamaherek kara.
1CO 16:21 Soba mete dei! Au, Paulus, pake au lima heli-heling fo surak dedeꞌa deꞌek talo ia: Soda-molek!
1CO 16:22 See ta naena susue-lalaik neu ita Lamatuan, neu ko Manetualain fee huku-dokik neun. Au ateme lole harang mbali hatahori, pake ai hatahori Yahudi dedeꞌa Aram ae, “Marana ta!” Sosoa-ndandaan nae, “Lamatuak, ee! Mai leo!”
1CO 16:23 Au oke-hule fo Yesus, ita Lamatuan natudu Ndia dale susuen neu ei.
1CO 16:24 Au sue-lai neu ei basa ngga, nahuu ita sama-sama takaesa to Karistus fo Manetualain nadenun mai ena. Losa kada ia leo. Soda-molek! Numa au mai, Paulus
2CO 1:1 Susurak ia numa au mai, Paulus. Manetualain nadenu au uni sudi bee uu ena, fo afada hatahorir laꞌe-neu Yesus Karistus, fo Manetualain dudu-fura memak kana numa lele uluk mai ena. Ita fadin Timotius oo nai ia boe. Ana haitua hara masodak. Au surak susurak ia fee basa hatahori kamaherek kara mana rasiꞌe rakabua nai kota Korentus ma profensi Akaya.
2CO 1:2 Au hule-haradoi neu Manetualain, ndia ita Aman, ma Yesus Karistus, ndia ita Lamatuan. Au oke-hule fo Ara ratudu Sira dale susuen neu ei, mita fo ei bisa leo-laꞌo no lino-lendek ma mole-damek.
2CO 1:3 Ai hihiin fo basa hatahorir rakadedemak Manetualain naden. Ndia naa, ita Lamatuan Yesus Karistus Aman. Basa nemedak kasian raoka numa Ndia mai, ma Ana ndia soa natetea ita dalen.
2CO 1:4 Ana oo ndia kokoe-nanasi ita, mete ma ita hambu susa-sonak boe. Huu naa de ita oo, bisa kokoe-nanasi hatahori laen fo mana hambu susa-sonak boe. Ita bisa tatetea sira dalen, sama leo Manetualain oo natetea ita dalen ena boe.
2CO 1:5 Karistus hambu nita susa-sonak noꞌun seli soa-neu ita ena. Dadi, neu ita hambu susa-sonak, Ndia Aman natetea ita dalen, nahuu ita takaesa to Karistus.
2CO 1:6 Mete ma ai hambu susa-sonak nai ia, Manetualain natetea ai dalen. Mete ma ai hambu susa-sonak, ai makatataka makandoo, na, ei oo muste malela boe mae, Lamatuak oo pake dalak leo naak fo natetea ei dalem ma nakamboꞌik ei numa dedeꞌa manggarauk mai boe. Mete ma ei hambu susa-sonak sama leo ai, Lamatuak natetea ei dalem, fo ei oo bisa makatataka makandoo boe.
2CO 1:7 Huu naa de ai mamahere tebe-tebe mae, ei bisa makatataka mahere ma ta manggenggo. Huu ai bubuluk mae, mete ma ei hambu susa-sonak sama leo ai, Manetualain oo natetea ei dalem boe, sama leo Ana oo natetea ai dalen boe.
2CO 1:8 Toranoo nggara ein! Ai hihiin fo ei malela tebe-tebe laꞌe-neu susa-sonak naa, fo ai hambu mita sara numa profensi Asia. Ai mameda berak, lena heni numa hata fo ai bisa lemban mai. Losa ai dale tean nae mopon, nahuu ai duꞌa mae, mate ia ena.
2CO 1:9 Ai mesa ngga mameda berak, sama leo hatahori esa bei fo namanene nala mana maketu-maladi dedeꞌak naketu hukun mates soa-neun. Tehuu basa naar dadi, mita fo ai mamahere neu Manetualain, ma ta mamahere neu ai ao heli-helin. Huu Manetualain naa, ndia naena koasa fo tao nasoda falik hatahori mates.
2CO 1:10 Ana ndia nakamboꞌik ai numa hata fo manggarauk mai ena, neu ela kada faa fo ai mate. Neu ko Ana oo nau nakamboꞌik ai numa manggarauk mai boe. Ai mamahena taa-taa mae, neu ko Ana nakamboꞌik ai numa hata fo manggarauk mai nakandoo seku neu.
2CO 1:11 Mete ma ei hule-haradoi makandoo soa-neu ai, naa oo tulun ai boe, huu Manetualain nau tao dedeꞌa neulauk noꞌuk ka soa-neu ai. Ana nau tao talo naa, nahuu hatahori noꞌuk ka hule-haradoi soa-neu ai. De neu hatahori noꞌuk ka rasaneda ai, neu ko ara oo roke makasi noꞌun seli neu Ndia boe.
2CO 1:12 Ai bisa kokolak maloloa bafan, nahuu ai bubuluk nai ai dalen dale mae, hata fo ai taok nai dae-bafok ia, tungga Manetualain hihii-nanaun soa-neu ai. Ai ta makaheok numa ues naa mai, mita fo basa hatahorir bisa mete-rita ai maue-osa no dale lolo-laok. Ai oo makalalaꞌok ai ue-osan boe, pake malelak fo mana konda numa Manetualain mai, ta pake malelak fo mana maokak nai dae-bafok ia. Manetualain natudu Ndia dale susuen neu ai. De ai bisa maue-osa no barakaik lenak bali, neu ai sama-sama mia ei.
2CO 1:13 Au kada surak fee ei laꞌe-neu basa hata fo ei bisa lees ma malela. Hatematak ia ei malela laꞌe-neu au kokolang ketuk ena. Tehuu au amahena, neu ko ei bisa malela no matetu-mandaik lenak bali.
2CO 1:14 Hatematak ia ei bei fo malela baꞌu anak ka laꞌe-neu ai. Tehuu neu ko mete ma ita Lamatuan Yesus Karistus fali mai ena, na, au amahere tebe-tebe ei malela noꞌuk ka ena. No dalak naa, ei bisa kokolak maloloa bafam laꞌe-neu ai, sama leo ai oo kokolak maloloa bafan laꞌe-neu ei boe.
2CO 1:15 Au amahere tebe-tebe ei malela dedeꞌak kara iar, huu naa de fai bakahulun, au aketu ita fo ae uu tiro-dangga seluk ei bali, mita fo ei bisa hambu babaꞌe-babatik laꞌe dua.
2CO 1:16 Faik naa au duduꞌa, mete ma au dadi uni profensi Makedonia uu, na, au bisa tuli tiro-dangga ei. Mete ma au fali numa Makedonia mai, au bisa tuli seluk nai ei bali. No dalak naa, ei bisa tulun doi-sou au, fo au bisa laꞌok akandoo uni profensi Yudea uu.
2CO 1:17 Tehuu talo bee? Tungga-tungga au afada ae, au daleng hii mai tiro-dangga ei, fama te ei duꞌa mae, au kada eso-eso akandoo, do? Do, ei duꞌa mae au kada aketu dedeꞌak tungga au hihii heli-heling, sama leo hatahori laen manai dae-bafok ia, do? Do, ei duꞌa mae au hatahori mana dea-matak, fo mana hii nae, “Hou.” Naa te nai au daleng, au duduꞌa ae, “Ta bisa dadi!” Fama te ei duꞌa mae au ia, mata-aon leo naak, hetu?
2CO 1:18 Ita bisa tamahere neu Manetualain, huu mete ma Ana kokolak dedeꞌak esa, na, neu ko Ana tao natetun. Huu naa de ai oo talo naa boe. Mete ma ai kokolak mae, “Hou,” na, ai ta duduꞌa mae, “Taa.”
2CO 1:19 Au, Silas, ma Timotius manori ei laꞌe-neu Yesus Karistus, Manetualain Anan ena. Ndia ta hatahori mana dea-matak fo mana kokolak “hou”, tehuu duduꞌan “taa”. Ndia oo ta nanggenggo, huu mete ma Ana kokolak “hou”, Ndia duduꞌan tebe-tebe “hou” boe.
2CO 1:20 Basa dedeꞌak kara fo Manetualain helu-bartaak ena, neu ko Ana taon dadi. Huu naa de, mete ma Yesus helu-bartaa dedeꞌak esa nae, “hou,” ita bisa taselu tae, “Tebe. Ndian ena! Amin!” Huu ai bubuluk memak hata fo Yesus nae taok ena. Ai mafada dedeꞌak ia fo matudu Manetualain ta neni babanggan.
2CO 1:21 Manetualain naa, ndia here nala ei ma ai ena. Ana ndia soꞌuk ita fo dadi teu Ndia hatahorin. Ana oo ndia tao nala ita takatataka takandoo boe.
2CO 1:22 Ana ndia fee Ndia Dula-dalen fo koladu ita, ma natudu Ndia nanaen soa-neu ita. Naa, sama leo hatahori esa tao ndia dededen neu buas esa fo nafada nae, naa ndia enan.
2CO 1:23 Au oke-hule fo Manetualain mesa kana dadi sakasii neu au kokolang ia. Huu Ana bubuluk au dale kuru-erong. Ana bubuluk tao hata de au bei ta dadi uni kota Korentus uu. Au ta nau tao akamamaek ei, huu naa de au bei ta uni naa uu.
2CO 1:24 Ai ta soꞌuk aon dadi malanggan fo madenu ei mae, ei muste mamahere neu see. Tehuu ai maue-osa sama-sama mia ei, mita fo ei dalem mara bisa mbena sau-sau. Ei bisa makatataka mahere, nahuu ei mamahere neu Manetualain.
2CO 2:1 Dadi au mesa ngga ndia aketu ae, au bei ta nau uu tiro-dangga ei, mita fo basa hatahorir dalen nara hae rameda berak.
2CO 2:2 Mete ma au tao ala ei dalem berak, na, see bali ndia neu ko tao au daleng namahoko? Kada ei mesa ngga. Tehuu mete ma au mai hatematak ia, au tao ei dalem sona.
2CO 2:3 Huu naa de au surak susurak bei lai-laik naa ae, au bei ta dadi uni ei neti. Au bei ahani taak, mita fo ei makandolu mala ei dedeꞌam dei. De mete ma au dadi mai, na, au hae ameda berak, nahuu ei dedeꞌam mara. Ndondoon ndia, eir ia, ndia tao au daleng namahoko. Au alela ei basa ngga. Dadi au amahere tebe-tebe, mete ma au daleng namahoko, na, ei dalem mara oo ramahoko talo naa boe.
2CO 2:4 Neu au surak susurak bei lai-laik naa fee ei, au ameda susa ma daleng berak. Au oo buꞌi amatani alan seli boe. Tehuu au surak talo naa, mita fo ei bisa malela au susueng neu ei. Au ta surak dedeꞌak naa, fo tao ala ei mameda susa.
2CO 2:5 Nai ei saranim manai naa, hambu hatahori esa tao nala hatahori noꞌuk ka dalen sona. Au oo sona boe, nahuu hatahori naa tatao-nonoꞌin. Naa te ndia tatao-nonoꞌin naa, memak ta talalu laꞌe-ndaa au, tehuu naa laꞌe-ndaa lenak soa-neu ei ketuk.
2CO 2:6 Au hae kokolak noꞌuk ka bali. Huu noꞌuk ka numa ei mai kaꞌi-oren, de ana hahae ena.
2CO 2:7 Dadi hatematak ia, ei muste lilii heni ndia salan, boe ma ei muste kokolak matalolole mian. Boso losak mopo ndia dale tean.
2CO 2:8 Huu naa de au oke fo ei makabua sama-sama, fo taon namahere tebe-tebe nae, ei sue ndia.
2CO 2:9 Au surak au susurang bei lai-laik naa, fo ae fora ei. Huu au nau bubuluk, mete ma ei tao tebe-tebe tungga basa hata fo au parenda neu ei.
2CO 2:10 Mete ma ei ta mambeda dalek bali, ma lilii heni hatahori salan, na, au oo tungga hata fo ei maketun ena boe. Mete ma hambu ndia salan fo parluu au lilii henin, na, au oo lilii heni hatahori naa salan boe. Au tao talo naa nai Karistus matan, fo dadi neu netuduk neulauk soa-neu ei.
2CO 2:11 Huu au ta hii nitur malanggan ike nala ita, do, nasenggi ita. Ita muste talela ndia nanae manggenggeon nara. Dadi boso mamanggonggoak kana, ee!
2CO 2:12 Fai bakahulun, neu au uni kota Troas uu, fo anori hatahorir laꞌe-neu Karistus Hara Lii Malolen naa, Lamatuak nasosoi dalak soa-neu au numa naa.
2CO 2:13 Tehuu au daleng ta namaneu, nahuu au ta atonggo ua au toranoong Titus numa naa. Basa boe ma au ateꞌa mbali hatahori kamaherek kara marai Troas, de au laꞌo uni profensi Makedonia uu.
2CO 2:14 Tehuu leo mae au nai bee a mesan, au oke makasi noꞌuk ka neu Manetualain. Huu Karistus natati laban dedeꞌa manggarauk kara, basa de Ana nasenggi sara ena, ma ita oo takaesa to Ndia boe. Huu naa de Manetualain natudu nakandoo nae, ita iar Ndia hatahorin nara. Dadi, neu ita tafada hatahorir laꞌe-neu Karistus, naa sama leo boo menik esa fo basa hatahorir bisa hae ralan.
2CO 2:15 Fai bakahulun, neu hatahori Yahudi tao tunu-hotuk, lumen hene neni Manetualain neu de tao namahoko dalen. Ita oo sama leo boo menik esa boe, fo fee nesenedak neu Manetualain laꞌe-neu Karistus. Tehuu soa-neu hatahori ketuk, ita sama leo boo mburuk esa. Mete ma hatahori mana leo-laꞌo dook ka numa Manetualain mai, mete-rita ita leleo-lalaꞌon, naa tao rala sara duꞌa-duꞌa rae, neu ko ara mate, ma ara lenggo feꞌe numa Manetualain mai. Tehuu soa-neu hatahori ketuk bali, ita sama leo boo menik esa. Mete ma hatahorir mana hambu masodak tetebes mete-rita ita leleo-lalaꞌon, naa tao rala sara rasaneda talo bee fo Karistus tao nasoi-nasoda sara, ma fee sara masodak tetebes ta mana ketuk. Hatahori dae-bafok see ndia nabeꞌi tao basa dedeꞌak kara iar? Ta hambu, hetu?
2CO 2:17 Masaneda, huu air ia, ta sama leo hatahori laen, mana kada fee nenorik laꞌe-neu Manetualain Dedeꞌa-kokolan mita fo ara sangga nanalak, sama leo ara danggan pake Manetualain Dedeꞌa-kokolan. Taa! Mete ma ai kokolak, basa hatahorir bisa mete-rita no ledo-ledo rae, ai fee nenorik no dale lolo-laok. Ai kokolan naoka numa Manetualain mai. Ma ai leleo-lalaꞌon nara rakaesa ro Karistus.
2CO 3:1 Boso duꞌa mae, ai mulai kokolak mabafa loa fo soꞌuk ai aom mara. Taa! Ndondoon naa ai sama leo hatahori laen fo parluu meni susura nekelalaꞌok fee ei, dei fo bisa makalalaꞌok ai ue-osan, do? Do, ai parluu moke susura nekelalaꞌok numa ei mai fo menin neni hatahori laen neu? Taa, hetu?
2CO 3:2 Huu ai susura nekelalaꞌon hambun ena. Susurak naa, ndia ei mesa ngga. Ai malela dedeꞌak noꞌuk ka laꞌe-neu ei leleo-lalaꞌom. Dedeꞌak kara raa neni mbedak nai ai dalen ena. Basa hatahorir bisa lees ei leleo-lalaꞌom; numa naa mai ara ralela ai ue-tataon buna-boan.
2CO 3:3 Huu manggaledok ena rae, ei sama leo susurak esa fo Karistus surak kana ena. Basa de Ana natotoꞌun neu ai. Karistus ta pake tinta fo surak susurak naa, tehuu Ana pake Manetualain mana Masodak Dula-dale Malalaon. Karistus oo ta doki Ndia Dedeꞌa-kokolan neu batu bebelak boe, fo rupan leo Manetualain taon fee Musa ena. Tehuu Ana surak kana neu ita dalen fo masodak.
2CO 3:4 Manetualain tao nala ai mamahere tebe-tebe mae, dedeꞌak kara iar basa sara memak tetebes, nahuu Karistus ndia natudu talo naa ena.
2CO 3:5 Mete ma numa kada ai mesa ngga aon mai, na, ai ta maena koasa fo bisa tao hata-hata. Koasa ma haak manai air ia, naoka nai Manetualain.
2CO 3:6 Manetualain naa, ndia soꞌuk nala ai dadi miu Ndia hatahori mana maue-osan ena, fo mafada hatahori laꞌe-neu Ndia Hehelu-bartaa Beun. Tehuu Ndia Hehelu-bartaa Beun naa, ta laꞌe-neu hatahori fo mana tao tungga hohoro-lalane mata-matak, tehuu laꞌe-neu hatahori fo mana nakaesa no Manetualain Dula-dale Malalaon. Mete ma hatahori kada tao tungga hohoro-lalanek no poke-mbakek a mesan, naa sama leo sira mate nai dalen nara ena, ma ta hambu masodak tetebes ta mana ketuk. Tehuu mete ma hatahori leo-laꞌo nakaesa no Manetualain Dula-dalen, ana hambu masodak tetebes naa.
2CO 3:7 Fai uluk, neu Manetualain doki Ndia Hohoro-lalanen neu batu bebelak kara, naa memak ta hohoꞌak. Tehuu leo mae hatahorir tao tungga basa Hohoro-lalanek kara raa lalaꞌen, neu ko ara bei lenggo feꞌe numa Manetualain mai. Basa de, neu Musa simbo nala Hohoro-lalanek kara raa, matan nasaꞌa ta hohoꞌa ndoos. Huu naa de hatahori Israꞌel asa ta bisa rakataka mete-rita ndia matan. Tehuu ta dook ka boe ma saꞌak naa mopon.
2CO 3:8 Dadi mete ma neni surak nai batu bisa dadi ta hohoꞌak talo naa, na, leo beek bali neu hata fo Manetualain Dula-dalen taon nai ita dalen dale naa ena? Neni henggeneek, ta hohoꞌan lenak bali, hetu?
2CO 3:9 Hohoro-lalanek naa natudu nae, ita muste hambu hukun mates fo lenggo feꞌe numa Manetualain mai, nahuu ita ta tao tungga basa Hohoro-lalanek kara raa lalaꞌen. Leo mae talo naa, tehuu Hohoro-lalanek naa oo ta hohoꞌan bei mahanik boe. Tehuu Manetualain Dula-dalen ta neni babanggak lenak bali, huu Ana natudu dalak fo ita bisa malole fali to Manetualain.
2CO 3:10 Dadi Hohoro-lalanek naa, fo fai uluk hatahorir duꞌa rae ta hohoꞌak, hatematak ia ndia ta hohoꞌan ta talo naa ena bali, huu hatematak ia hambu mana ta hohoꞌan lena henin ena.
2CO 3:11 Hohoro-lalanek kara raa ta hohoꞌan nara sama leo baꞌi Musa matan, fo fai uluk nasaꞌa, basa dei de saꞌan mopon. Musa no Hohoro-lalanek kara raa bei ta hohoꞌak, tehuu mana ta hohoꞌan lenan bali, ndia hata fo ta neni babanggak mana nakatataka nakandoo ta mana ketuk.
2CO 3:12 Ita basa ngga tamahere tebe-tebe tae, Lamatuak Hehelu-bartaa Beun nakatataka nakandoo ta mana ketuk. Huu naa de ita kokolak ledo-ledo, ta pake bii-bambik.
2CO 3:13 Ita hae sama leo baꞌi Musa. Ana muste mboti matan pake temak, mita fo hatahori Israꞌel asa ta bisa mete-rita, neu faik bee saꞌak naa mopon ena.
2CO 3:14 Tehuu Manetualain tao hatahori Israꞌel asa uten nara rouk. De losa hatematak ia oo, mete ma ara lees nai Manetualain Susura Malalaon laꞌe-neu Ndia Hehelu-bartaa Raan naa, naa sama leo hambu temak esa mboti nala langgan nara, de ara ta nau nenene, ma ta nau ralela boe. Ta hambu hatahori laen bali fo bisa buka dalen nara, fo ara bisa ralela. Kada Karistus mesa kana.
2CO 3:15 Losa hatematak ia oo, mete ma hatahori Yahudir lees baꞌi Musa susuran, ara ramanene boe, tehuu ta ralela tebe-tebe. Basa iar dadi, nahuu ara ta nenene pake dalen nara, leo bali hambu hata esa tatana nala dalen nara.
2CO 3:16 Tehuu mete ma hambu hatahori fo mulai namahere ita Lamatuan Yesus Karistus, na, Karistus buka hatahori naa dalen, mita fo ana bisa nalela tebe-tebe. Naa, sama leo neni surak nai Manetualain Susura Malalaon nae, “Ana buka heni temak fo mana mboti nala ndia matan naa ena.”
2CO 3:17 Nai Manetualain Susura Malalaon, neu baꞌi Musa kokolak nae, “Lamatuak”, ndia sosoan, Manetualain Dula-dalen. Mete ma ita hambu tala Dula-dalek naa, na, Ana tao nala ita dadi nekemboꞌik kara.
2CO 3:18 No dalak naa, Ana tao nala ita tamba faik boe tamba ta hohoꞌak, sama leo Ndia. Ita matan hae mbotin bali. Ma ita duduꞌa takandoo laꞌe-neu ita Lamatuan ta neni babanggan, huu Ndia Dula-dalen tulun ita talo naa.
2CO 4:1 Manetualain natudu dale kasian neu ai ena. Huu naa de Ana nadenu ai ena fo mafada hatahorir laꞌe-neu Ndia Hehelu-bartaa Beun. De ai makatataka makandoo, ma ta mopo ai dale tean.
2CO 4:2 Dadi numa fai bakahulun mai, ai maketu talo ia: ai mafada ledo-ledo ena mae, ai ta nau tao dedeꞌa manggarauk, sama leo hatahori laen nara. Ara soa tao no nefuni-nefunik, mita fo hatahorir ta bisa mete-rita. Ma ara oo ta mae ralela boe. Tehuu ai ta nau pepeko-leleko hatahorir. Ai oo ta kokolak bafa rouk laꞌe-neu Manetualain Dedeꞌa-kokolan boe, tehuu ai fee nenorik ledo-ledo laꞌe-neu hata fo tetebes. Ai tao talo naa, fo basa hatahorir bisa parisa aon ai kokolan nai Manetualain matan, boe ma timba-tai aon air ia, hatahori dae-bafok leo beek.
2CO 4:3 Hatahorir fo mana lenggo feꞌe numa Manetualain mai, ara ta nau ralela Lamatuak Hara Lii Malolen fo ai fee nenorik naa, de neu ko rakalulutu.
2CO 4:4 Nitur malanggan naa, nok bali lamatuak esa fo hatahorir rakaluku-rakatele neun hatematak ia. Ana tao nala hatahori ketuk uten nara rouk, nok bali dalen nara makatemak ena. Sira raa, hatahorir fo ta mana ramahere neu ita Manetualain. Dalen nara rakatema talo naa, nok bali ara poke, de ta bisa mete-rita Manetualain manggaledon. Huu naa de ara ta bisa ralela Hara Lii Malole laꞌe-neu Karistus. Ara oo ta ralela Karistus ta neni babanggan boe. Naa te Karistus naa, mata-aok esa no Manetualain.
2CO 4:5 Ai ta kokolak noꞌuk ka, laꞌe-neu ai ao heli-helin. Tehuu ai kokolak noꞌuk ka, laꞌe-neu Yesus Karistus, ita Lamatuan. Ai kokolak laꞌe-neu ai ao heli-helin kada ia mesa kana: ndia, ai tao aon sama leo hatahori neondak fo maono-lalau ei, nahuu ai dadi miu Yesus hatahorin.
2CO 4:6 Lele uluk Manetualain kokolak nita nae, “Muste hambu manggaledok nasaꞌa nai mamana makiuk.” De Ana tao Ndia manggaledon nasarangga nai ita dalen. Ana hii fee Ndia manggaledon neu ita. Naa, sosoa-ndandaan nae, neu ita duduꞌa laꞌe-neu Karistus, ita oo tasaneda Manetualain ta neni babanggan boe.
2CO 4:7 Leo mae ita iar, kada hatahori dae-bafok biasa a mesan, tehuu Manetualain mbeda buas mabeli ia nai ita dalen dale ena. Naa, sama leo hatahori esa mbeda ndia bua mabelin nai ure dae dale ena. Buas mabeli ia, ndia Manetualain manggaledon. Manggaledok ena nae, koasa ta hohoꞌak manai ita, ta naoka nai ita, tehuu naoka nai Manetualain.
2CO 4:8 Dadi leo mae hatahorir tuni-ndeni fo rakasususak ai nai bee a mesan, tehuu ai kada makatataka makandoo leo. Leo mae ai ta malela basa dedeꞌak kara raa sosoan, tehuu ai dale tean oo ta mopo sana boe.
2CO 4:9 Leo mae hatahorir rakasususak noꞌun seli neu ai, tehuu Manetualain ta laꞌo ela ai mesa ngga. Leo mae hatahorir nggafu fee ai, tehuu ara ta bisa rakalulutu ai.
2CO 4:10 No dalak naa, mete ma ai meni bee miu, na, ai bisa fee netuduk neu hatahorir mae, Yesus oo hambu nala tuni-ndenik makadotok neu Ana mate boe. Ai bisa matudu talo naa, nahuu ai hambu mala tuni-ndenik mata-matak ena. Leo mae hatahorir nggafu fee ai mata-matak kara, tehuu ai masoda makandoo. Naa oo fee netuduk nae, Yesus nasoda nakandoo nai ai aon dale boe.
2CO 4:11 Tebe! Laꞌe noꞌuk ka ena, ai mana masodak kara iar, elak kada faa mate, nahuu ai dadi miu Yesus hatahorin. No dalak naa, basa hatahorir bisa bubuluk rae, Yesus fee ai masodak tetebes, leo mae neu ko ai mate.
2CO 4:12 Dadi leo mae neu mateꞌen naa, ai mate, tehuu ai ta mamataꞌu kokolak laꞌe-neu Karistus. Ai sadia mate talo naa, mita fo ei bisa hambu masodak tetebes.
2CO 4:13 Nai Manetualain Susura Malalaon dale hambu neni surak nae, “Au amahere neu Manetualain, huu naa de au kokolak.” Ai oo duduꞌa sama leo naak boe. Ai mamahere neu Manetualain, huu naa de ai muste mafada hatahori laꞌe-neu Ndia.
2CO 4:14 Ai mambarani mafada talo naa, nahuu ai bubuluk mae, Manetualain ndia tao nasoda falik ita Lamatuan Yesus Karistus numa mamaten mai. Ana oo ndia neu ko tao nasoda falik ita boe, nahuu ita takaesa to Yesus. Neu ko Manetualain nambaririik ita basa ngga teu Ndia matan fo Ana simbok nala ita.
2CO 4:15 Manetualain tao basa dedeꞌak kara mana dadi neu ai naa, fo tulun ei. Ana oo nau natudu Ndia dale susuen boe, fo tamba faik hatahorir tamba ramanoꞌu rameda Ndia dale susuen. Neu ko ara oo roke makasi noꞌun seli neu Ndia boe. De ara oo manaku Ndia ta neni babanggan boe.
2CO 4:16 Huu naa de ita takatataka takandoo, ma ta mopo ita dale tean. Leo mae ita ao-mbaan boe loe, tehuu Manetualain tao ita dalen nara tamba ratea tungga faik.
2CO 4:17 Tungga ita duduꞌan, hatematak ia ita hambu tala susa-sonak mata-matak kara. Tehuu ita muste tasaneda tae, neu ko Lamatuak nau nakadedemak ita. Huu naa de ita taon neu hata mandadik hatematak ia, naa ta naena sosoa-ndandaak hata-hata!
2CO 4:18 Dadi ita muste mete neu dedeꞌak bee fo ta neni nitak kara. Boso kada mete bee fo neni nitak a mesan. Huu dedeꞌak fo neni nitak kara iar, ta rakatataka rala dook. Tehuu dedeꞌak bee fo ta neni nitak kara raa, neu ko ara ndia rakatataka rakandoo ma ta ramaketu.
2CO 5:1 Ita bubuluk, ita ao-mbaan hatematak ia, ita pake taak kana nai dae-bafok ia, nok bali laak esa fo ita tambaririi taak kana. Leo mae ita ao-mbaan nakalulutu henin, tehuu ita hae duduꞌa neu-mai, nahuu Manetualain sadia nala mamana neulauk esa soa-neu ita nai nusa tetuk do inggu temak ena. Hatahori dae-bafok ta tao mamanak naa. Tehuu Lamatuak ndia tao mamanak naa, de nakataka nakandoo.
2CO 5:2 Ita mangguk ka to ita ao-mbaan hatematak ia nai dae-bafok ia ena. Ma ita hii talan seli nau hambu ao-mbaa beuk fo neu ko ita paken nai nusa tetuk do inggu temak.
2CO 5:3 Mete ma neu ko ita losa nai naa ena, ita ta kada dadi teu samanek mesa kana, tehuu ita hambu ao-mbaa beuk nai naa. Naa, sama leo ita ta takaholak, tehuu pake bua-loꞌa beuk.
2CO 5:4 Ita ao-mbaan fo mana boe loe hatematak ia, tao nala ita leꞌa hahaek kara, nahuu tameda berak. Leo mae talo naa, tehuu ita ta nau mate, fo ta hambu ao-mbaak hata-hata bali. Taa! Ita nau hambu ita ao-mbaa beun, mita fo laꞌo ela ao-mbaa raak kara, nggatin no masoda beuk tetebes.
2CO 5:5 Manetualain ndia tao ita tahani a, fo simbok tala masoda beuk naa. Ana oo fee ita Ndia Dula-dalen boe, fo dadi neu tanda nemeheherek esa numa Ndia Hehelu-bartaan mai.
2CO 5:6 Dadi ita tamahere tebe-tebe takandoo. Ita talela tae, neu ita bei nai ita ao-mbaan hatematak ia, ita oo bei dook ka numa Lamatuak mai boe.
2CO 5:7 Huu naa de ita leo-laꞌo tesik nemeherek neu Lamatuak. Ita ta leo-laꞌo tesik kada neu hata fo ita bisa mete-titan nai dae-bafok ia mesa kana.
2CO 5:8 Tehuu ita oo tamahere tebe-tebe boe tae, mete ma ita mate laꞌo ela ita ao-mbaan hatematak ia fo teu leo sama-sama to Lamatuak nai nusa tetuk do inggu temak, na, henggenee ita tamahoko lenak bali.
2CO 5:9 Dadi leo mae ita tasoda takandoo nai dae-bafok ia do, ita mate nai ia do tasoda nai naa, ita hihiin ndia ita tao tamahoko Lamatuak dalen taa-taa.
2CO 5:10 Boso lilii-ndondou. Doo-doo te basa hatahorir muste rasare mbali Karistus. Ndia naa, Mana Maketu-maladi Dedeꞌak fo timba-tai basa hatahorir leleo-lalaꞌon nai dae-bafok ia. De neu ko Karistus bala no mandaak tungga hatahori tatao-nonoꞌin. Huu Karistus bubuluk, hatahori naa tao neulauk, do, ta neulauk.
2CO 5:11 No ai masaneda neu ko Karistus parisa ai leleo-lalaꞌon, huu naa de ai mamataꞌu ma fee hada-horomatak neu Ndia. Ma ai maue-osa fafandek lima-ein, fo fufudi-kokoe hatahorir fo ramahere neu Karistus. Manetualain bubuluk ai dalen lolo-laok ena. Au nau fo ei oo bubuluk ai dalen lolo-laok boe.
2CO 5:12 Ai ta makadedemak ai aon nai ei matam. Taa! Tehuu ai fee neseselun neu ei, mita fo ei bisa kokolak maloloa bafam laꞌe-neu ai, ma hae mae. No dalak naa, ei bisa maselu mbali hatahorir raa, fo mana rabafa loa. Ara rabafa loa laꞌe-neu sira ue-osan buna-boan fo hatahorir bisa mete-rita sara, naa te sira dalen ta lolo-laok.
2CO 5:13 Ei duꞌa mae ai kamuluk kara, naa te ai kokolak talo naa fo makalalaꞌok Manetualain ue-osan. Leo mae ei ta malela, tehuu Manetualain nalela. Neu ai kokolak pake duduꞌak ndoos, na, ai kokolak talo naa, fo tulun ei.
2CO 5:14 Karistus sue-lai nalan seli neu ita. Naa, ndia fee dale teas neu ai fo makalalaꞌok ai ue-osan. Huu ai mamahere mae, Hatahori esa, ndia Karistus, mate fo nggati basa hatahorir. Ndia sosoa-ndandaan nae, naa sama leo ita basa ngga mate ena fo laꞌo ela leleo-lalaꞌo raak, ma ta taena haak hata-hata nai dae-bafok ia.
2CO 5:15 Karistus mate soa-neu basa hatahorir, mita fo basa hatahorir fo mana leo-laꞌo nai dae-bafok ia, ta leo-laꞌo tungga sira hihii-nanau heli-helin nara bali. Tehuu hatematak ia, ara muste leo-laꞌo tungga Karistus hihii-nanaun, nahuu Ana ndia mate nggati sira ena, basa de Ana nasoda fali numa mamaten mai.
2CO 5:16 Dadi mulai hatematak ia, ita boso timba-tai hatahorir pake hatahori dae-bafok biasa uku-sudin. Leo mae fai bakahulun ita mesa kana timba-tai Karistus pake hatahori dae-bafok biasa duduꞌan. Tehuu hatematak ia, ai ta timba-tai Ndia talo naa bali.
2CO 5:17 De hatahori fo mana nakaesa no Karistus dadi neu hatahori dae-bafo beuk ena, fo naena leleo-lalaꞌo beuk. Ana ta sama leo fai bakahulun bali, huu ndia leleo-lalaꞌo raan mopo henin ena. Ta hambu sana ena bali! Huu hatematak ia, beuk hambun ena.
2CO 5:18 Basa iar, Manetualain ndia adun. Ana ndia tao mole-damek fo ita malole tasafali to Ndia, nahuu Karistus koka heni ita sala-singgon ena. Basa de Ana oo fee ues neu ita boe, fo ita oo tatudu dalak boe, mita fo hatahori laen nara oo bisa mole-dame fali ro Manetualain boe.
2CO 5:19 Masaneda te neu Karistus bei numa dae-bafok ia, Manetualain paken fo nuni no hatahorir reu mole-dame fali roon. Dadi Ana ta reke sira sala-singgon nara bali, de ara ta lemba-rasaa sala-singgok huku-dokin bali. Boe ma Ana fee ita ues fo teu tafada hatahorir tae, ara bisa malole fali ro Ndia.
2CO 5:20 Ita dadi teu Karistus lima konan. Dadi Manetualain pake ita fo nuni to hatahorir mai, mita fo ara mole-dame fali ro Ndia. No ai dadi miu Karistus lima konan, huu naa de ai oo moke neu ei boe mae, “Manetualain hii nalan seli fo ei malole masafali mia Ndia.”
2CO 5:21 Karistus mesa kana ta tao nita sala-singgok. Tehuu Manetualain tao nalan lemba-nasaa ita sala-singgon ena. Manetualain tao talo naa soa-neu ita, nahuu Karistus mamaten nasosoi dalak fo ita bisa leo-laꞌo to dale ndoos, sama leo Manetualain oo dale ndoos boe.
2CO 6:1 Huu ai maue-osa sama-sama mia Lamatuak, ai nau manori-mafada ei talo ia: Manetualain natudu Ndia dale susuen noꞌun seli neu ei ena. Dadi ei boso simbo mala Ndia dale susuen no kada hie-hie a mesan.
2CO 6:2 Boso lilii-ndondou Ndia Susura Malalaon surak nae, “Ndaa no fain, Au nenene o. Au oo tulun o boe, neu Au tao asoi-asoda hatahorir.” Nenene matalolole, ee! Hatematak ia, fain losa ena, ndia Manetualain fain fo tao nasoi-nasoda hatahorir.
2CO 6:3 De ai nau manea matalolole ai aon fo tao ai ue-osan no kada ndoos leo. Huu ai ta nau dadi miu kai-baak soa-neu hatahori fo mana nae neni Lamatuak eno-dala ndoon mai. Ma ai oo nau kokolak ndoos boe, mita fo hatahorir boso kokolak rakabobook ai nade malolen.
2CO 6:4 Basa-basan fo ai taok, ai maote tebe-tebe fo matudu mae, air ia, Manetualain hatahori mana maue-osa neulaun. Dadi leo mae ai hambu susa-sonak, doidosok do, leo-laꞌo nai mue-anggik taladan, na, ai makatataka makandoo leo.
2CO 6:5 Ai oo makatataka makandoo neu hambu popoko-fefembak boe, neu ara tee ai meni bui miu, neu hatahorir tao nemuek, neu maue-osa fafandek lima-ein, neu ta bisa sunggu, ma neu mameda ndoe.
2CO 6:6 Ai oo makatataka mia dale lolo-laok boe. Ai bubuluk noꞌuk ka laꞌe-neu Manetualain. Ai makatataka ma dale naruk. Ai tao hata fo neulauk neu hatahori. Ai fee lelak fo Manetualain Dula-dalen koladu ai. Ai oo sue-lai tebe-tebe neu hatahori ma ta dea-matak boe.
2CO 6:7 Neu ai kokolak, ai kokolak hata fo tetebes, ma ai ta malela kokolak bafa rouk. Ai oo simbo mala koasa numa Manetualain mai boe, fo tao dedeꞌa neulauk. Naa, sama leo ai dadi soldadu, mana toꞌu tee-tandek mandaik numa Manetualain mai, fo ai matati laban musu, ma ai ta neni senggik.
2CO 6:8 Ai oo makatataka boe, leo mae hatahorir ratudu hada-horomatak neu ai, do, ara kokolak rakabobook ai naden; leo mae ara kokolak rakatutudak ai, do, ara ranea ai nade malolen; leo mae hatahorir kokolak bafa rouk rae, ai kedi-ira mala hatahorir, do, ara kokolak rae, hambu ai kokolak tetebes.
2CO 6:9 Hambu ketuk ta ralela ai. Tehuu hambu noꞌuk ka ralela ai naden. Ela baꞌuk ka ai mate laꞌe noꞌuk ka ena, tehuu ai oo bei masoda makandoo boe. Ara hukun berak ai laꞌe noꞌuk ka, tehuu ai oo ta mate-mate boe.
2CO 6:10 Leo mae ai mameda berak, tehuu ai dalen oo mbena sau-sau nakandoo boe. Leo mae ai ta maena doik, tehuu ai tao mala hatahori noꞌuk ka ramasuꞌi nai dalen dale. Naa, sama leo ai ta maena hata esa boe na, tehuu ai oo hambu basa-basan boe.
2CO 6:11 Ai kokolak ledo-ledo neu ei marai kota Korentus. Ai oo sue-lai ei tebe-tebe boe.
2CO 6:12 Ai matudu ai susue-lalain neu ei ena, ma ta makatataak kana. Tehuu ei makatataak ei susue-lalaim neu ai.
2CO 6:13 Dadi au nau fee nenori-nefadak neu ei, sama leo ei dadi miu au anang nggara. Malole lenak ei sue ai ma boso makatataak kana.
2CO 6:14 Boso neka-lili mia hatahori fo ta mana namahere Karistus. Huu ei ta sama. Hatahori kamaherek fo mana leo-laꞌo ndoos, ta dalek esa no hatahori fo mana laban Lamatuak, de ta nandaa mete ma ara soba raote tebe-tebe fo raue-osa sama-sama. Hatahori dale malole no hatahori dale ta malole, ta randaa dadi nonook ei laꞌok esa. Naa, sama leo manggaledok ta bisa babalik no makiuk.
2CO 6:15 Karistus ta bisa nala harak no nitur malanggan, hetu? Ma hatahori fo ta mana namahere neu Manetualain ta hambu babaꞌe-babatik sama-sama no hatahori fo mana namahere neu Ndia.
2CO 6:16 Ei duꞌa talo bee, ee? Ndondoon naa, ei duꞌa mae, ei bisa maso meni Manetualain uma huhule-haradoin miu fo makaluku-makatele neu Ndia dei, dei fo maso meni uma sosonggok miu bali fo moke-hule mbali bua sosonggok kara, do? Ta nandaa, hetu! Huu Lamatuak naa, Manetualain mana masodak. Ana oo dadi neu ita Lamatuan boe. Ma ita dadi teu Ndia uma huhule-haradoin ena, nahuu Ana leo nai ita dalen dale. Manetualain surak nai Ndia Susura Malalaon ena nae, “Au umang nai Au hatahoring taladan nara. Au oo leo nai sira taladan nara boe. Au nau dadi neu sira Manetualain. Sira oo dadi reu Au hatahoring nggara boe.”
2CO 6:17 Dadi tao leo Lamatuak surak nae, “Ei muste kalua numa sira taladan nara mai, ma lenggo feꞌe numa sira mai, fo ei boso dadi sama leo sira. Ei dalem muste lolo-laok. Ei muste makadodook numa basa hata fo mana tao rala ei dalem mara ranggenggeo, tao talo naa, fo Au simbok ei no malole.
2CO 6:18 Au nau dadi uu ei Amam; ei oo dadi miu Au anang nggara boe. Naa ndia, ita Lamatuan nafada nae, Ndia, ndia mana Koasa Mateꞌen.”
2CO 7:1 Toranoo susue nggara ein! Manetualain helu-bartaa basa dedeꞌak bebeik kara iar fee ita ena, huu naa de ita muste tao talao ita dalen ma leleo-lalaꞌon. Boso ela manggenggeok faa boe na, nai ita ao-inan. Huu ita katematuan nau dadi lolo-laok soa-neu Manetualain fo tatudu tae, ita tamataꞌu ma fee hada-horomatak neu Ndia.
2CO 7:2 Toranoo nggara ein! Fee lelak neu ai. Buka dalem mara fo simbok ai no malole. Boso makatema dalem mara. Fai bakahulun, neu ai numa ei taladam, ai ta tao mita salak neu hatahori esa boe na. Ai ta fufudi-hohodo mita hatahori fo tao salak. Ai oo ta pepeko mita hatahori fo sangga nanalak numa sira mai boe.
2CO 7:3 Neu au kokolak talo naa, au ta ae ndae salak neu ei. Huu ai sue ei, sama leo au afada ena. De leo mae talo bee oo, ita mate do tasoda, ai makaesa mia ei boe.
2CO 7:4 Hatematak ia, au hae duduꞌa neu-mai bali, huu au amahere neu ei. Au oo kokolak aloloa bafang laꞌe-neu ei boe. Ei oo matetea au daleng boe. Dadi leo mae ita hambu susa-sonak mata-matak kara, tehuu au daleng mbena sau-sau nakandoo nahuu ei.
2CO 7:5 Fai bakahulun, ai meni profensi Makedonia miu, ai manggu malan seli. Ai hambu susa-sonak kii-konak. Ai mareresi mia hatahori deak. Ai oo mameda bii-mamataꞌu nai ai dalen boe.
2CO 7:6 Tehuu Manetualain naa, ndia natetea hatahori fo mopo dale tean, ma mana nameda berak ena. Ana oo natetea ai dalen boe, neu Ana nadenu Titus fo neni ai mai.
2CO 7:7 Titus mamain naa, neni netetea dalek soa-neu ai. Ana neni tutuik nae, neu ndia bei numa naa, ei matetea dalen. Tutuin naa oo tao natetea ai dalen boe, neu ai mamanenen. Ana oo tui nae, ei hii malan seli nau mete-mita au boe, ma ei fale dalem tebe-tebe neu dedeꞌak kara fo bakahulun mori-dadi nai ei taladam ena. Ana oo tui laꞌe-neu ei tao talo bee fo tulu-fali au boe. Huu naa de au daleng mbena sau-sau.
2CO 7:8 Au bubuluk ae, au susurang bakahulun fo kaꞌi-ore berak neu ei naa, memak tao nala ei mameda susa. Tehuu au ta fale daleng surak susurak naa. (Naa te faik naa, au fale daleng faa, neu au bubuluk ae, au susurang naa, tao nala ei susa, leo mae kada ta doo anak ka boe.)
2CO 7:9 Tehuu hatematak ia, au daleng mbena sau-sau. Au ta ameda nemehokok, nahuu faik naa ei mameda susa. Taa! Au ameda nemehokok, nahuu faik naa, au susurang fufudi-kokoe fo ei sale dalem do tuke teim. Ei manaku salam, ma laꞌo ela ei dedeꞌa ta neulaum fo fali tungga Manetualain eno-dala ndoon. Huu Manetualain ndia tao fo ei fale dalem talo naa. No dalak naa, ai susuran kada tao nala ei dadi neulauk.
2CO 7:10 Mete ma ita tameda fale dalek tungga Manetualain hihii-nanaun naa, ita hahae tao dedeꞌa manggarauk kara, tehuu tungga falik eno-dala ndoos. Naa, nakamboꞌik ita numa Manetualain huku-dokin mai, de ita hae leo-laꞌo to fale dalek takandoo. Tehuu mete ma ita kada fale dalek nai bifi dook a mesan, sama leo hatahorir marai dae-bafok ia siꞌen, neu ko ita takalulutu.
2CO 7:11 Ei duꞌa sudik kana! Neu ei lees au susurang naa, au bubuluk ei oo fale dalem mara boe. Naa, tungga Manetualain hihii-nanaun. Naa, tao nala ei maue-osa fafandek lima-eim mara fo koka heni dedeꞌa manggarauk numa ei leleo-lalaꞌom mai. Ei mangguk ka mia ei manggaraum ena. Ei oo mamataꞌu boe, mete te boso losak ei tao seluk manggarauk bali. Ei dalem mara hii ralan seli mete-mita au, ma mahani a makandoo fo tao dedeꞌa neulauk. Ei oo mahani a fo nau hukun hatahori mana tao salak boe. No ei tao tetebes talo naa, huu naa de ei dadi miu lolo-laok. No dalak naa, ta hambu mana bisa ndae salak neu ei.
2CO 7:12 Dadi au ta surak au susurang bakahulun naa, soa-neu hatahori mana tao manggarauk. Au oo ta surak fee hatahori fo mana hambu nala ndia manggaraun boe. Tehuu au surak susurak naa fee ei, mita fo au atudu ae, ei kokolam nai Manetualain matan naa, tetebes. Ma ei sue-lai tebe-tebe neu ai.
2CO 7:13 Basa iar lalaꞌen, ratetea au daleng. Ei oo matetea Titus dalen ena boe, mita fo dalen bisa lino-lendek. Naa oo tao tamba namahoko ai dalen boe.
2CO 7:14 Au akadedemak ita ei, numa Titus matan laꞌe-neu ei tatao neulaun. Au oo afadan ae, ei ta tao makamamaek mita au boe. Huu basa dedeꞌak kara fo ai tui mitak neu ei naa, tetebes. Ma basa dedeꞌak kara fo ai tui Titus laꞌe-neu ei naa oo tetebes boe.
2CO 7:15 Dadi tungga-tungga ana nasaneda ei tataom ma ei kokolam, ndia susue-lalain neu ei boe tamba. Ma ana oo nasaneda neu ana neni naa neti, ei simbok kana no hada-horomatak boe, tehuu ei kada duduꞌa neu-mai boso losak ei ta tao tungga au susurang.
2CO 7:16 Au daleng mbena sau-sau, nahuu au bisa amahere ei nai basa dedeꞌak kara. Dadi au ta duduꞌa neu-mai ua ei ena bali!
2CO 8:1 Toranoo susue nggara ein! Ai hihiin ei malela Manetualain dale susuen fo Ana natudun neu saranik kara marai profensi Makedonia ena.
2CO 8:2 Leo mae ara hambu susa-sonak ma tuni-ndenik manahetak, tehuu dalen nara mbena sau-sau rakandoo. Huu naa de, leo mae sira mesa kasa hata taak kara, tehuu ara bei fee sira doin noꞌun seli no dale lolo-laok, fo doi-sou hatahori kamaherek laen mana hambu susa-sonak kara.
2CO 8:3 Au mesa ngga bisa tui ae, ara fee basa-basan fo ara bisa fee. Boe ma ara fee tamba lena heni naa bali. Ta hambu esa nakasetik kasa.
2CO 8:4 Sira mesa kasa ndia roke no tebe-tebe, mita fo ai soi dalak fee sara. No dalak naa, ara bisa haꞌi rala babaꞌek, fo doi-sou hatahori kamaherek fo mana hambu susa-sonak marai Yerusalem.
2CO 8:5 Fai bakahulun, ai mamahena ara nau tao talo ia, tehuu hata fo ara taok naa, lena heni hata fo ai mamahenak! Kaesan, ara loo lima aon nara reu ita Lamatuan. Kaduan, ara kokolak bali rae, “Ai nau loo lima ai aon nara fo maono-lalau ei, nahuu ia tungga Manetualain hihii-nanaun.”
2CO 8:6 No saranik kara marai Makedonia fee netuduk talo naa, huu naa de ai moke fo Titus fali neni ei marai Korentus neu bali, mita fo ei oo bisa doi-sou Lamatuak hatahorin mana hambu susa-sonak marai Yerusalem boe. Huu fai bakahulun, ana ndia mulai naduduru doik fee sara. De hatematak ia, ai moke fo ana bisa tao natetu do nakadaik ei uem doi-sou hatahori.
2CO 8:7 Ei leleo-lalaꞌom soa-neu Lamatuak memak neulaun seli. Haꞌi netuduk leo: ei nemeheherem, matea; ei kokolam fo matetea hatahori dalen, neulauk; ei bubuluk noꞌuk ka laꞌe-neu Lamatuak; ei dale team mandema; ma ei sue-lai malan seli neu ai. Huu naa de au nau fo ei oo, doi-sou Lamatuak hatahorin mana hambu susa-sonak no fee doik noꞌun seli boe.
2CO 8:8 Au ta parenda ei marai Korentus fo fee doik noꞌun seli, tehuu au kada ae fora ei. Huu hatahori saranik kara marai Makedonia nau doi-sou sara ena. Dadi no dalak ia, ei oo bisa matudu, ei sue-lai tebe-tebe neu hatahori mana susa-sonak kara boe.
2CO 8:9 Ei bubuluk ena mae, ita Lamatuan Yesus Karistus, natudu Ndia dale susuen neu ei ena. Fai bakahulun Ana sama leo hatahori kamasuꞌik. Tehuu Ana here fo dadi neu hatahori hata taak fo tulun ei, mita fo ei bisa dadi mamasuꞌi nai dedeꞌak noꞌuk ka.
2CO 8:10 Teu maneuk kara, ei mulai maduduru doik fee sara ena. Ei ta fee kada doik ka mesan, tehuu ei oo doi-sou sara numa ei dalem mara mai boe. Dadi tungga au, ei muste tao talo ia:
2CO 8:11 Fai bakahulun, ei nau doi-sou Lamatuak hatahorin mana hambu susa-sonak marai Yerusalem naa ena. Dadi hatematak ia, fee mabasa hata fo ei maketu mala mae doi-sou ena. Ma ei mabeꞌi fee desi hata, na, feen leo. Tehuu nenenin lenak ndia, fee no dale dere-dere hiek.
2CO 8:12 Huu mete ma ita fee no dale dere-dere hiek tungga desi hata fo ita tabeꞌi fee, na, naa oo malole boe. Numa kada ita mai leo. Hatahori boso fee no nekesetik, hata fo neu ko tao nakasususak kana.
2CO 8:13 Au duduꞌang ta ae tao amabera ei, mita fo hatahori laen namadaꞌu. Tehuu au duduꞌang, ita basa ngga lemba-tasaa sama-sama sira susa-sonan.
2CO 8:14 Hatematak ia ei hambu lenak, ma sira ta mandaik. Doo-doo te ara oo bisa bala boe, mete ma ei ta hambu dai. No dalak naa, ita bisa lemba-tasaa sama-sama.
2CO 8:15 Naa, sama leo Manetualain Susura Malalaon surak nae, “Hatahori fo mana hambu noꞌuk, ta hambu lenak numa hata fo ara toꞌak mai. Ma hatahori fo mana hambu baꞌuk, ta hambu kuran numa hata fo ara toꞌak mai.”
2CO 8:16 Au oke makasi neu Manetualain, nahuu Ana ndia fufudi-kokoe Titus fo nau tulun ei, sama leo au nau tulun ei.
2CO 8:17 Memak ai moke fo ana neti tiro-dangga ei. Naa te, naa oo ndia hihii heli-helin boe. Huu naa de Titus mesa kana ndia nae neti tulun ei, ta huu au nonokeng.
2CO 8:18 Tehuu ana ta neti mesa kana. Ai oo madenu ai toranoon esa ena, fo neti sama-sama noon boe. Basa saranik kara marai iar ralela hatahori ia, nahuu ana naue-osa fafandek lima-ein ena, fo nafada hatahorir laꞌe-neu Lamatuak Hara Lii Malolen.
2CO 8:19 Saranik malanggan nara oo here ralan fo laꞌok sama-sama no ai boe, fo tulun ai nai ai ue-osa neulaun ia. Ai makalalaꞌok ue-osa ia, fo matudu ita Lamatuan ta neni babanggan, ma tao neulauk soa-neu hatahori mana susa-sonak marai Yerusalem.
2CO 8:20 Ai sangga dalak tao hata fo tetebes, mita fo ta hambu hatahori fo bisa nakasasaꞌek salak neu ai nae, ai ta maue-osa tebe-tebe neu ai toꞌu meni doik fee hatahori mana toꞌak kara.
2CO 8:21 Ai maote fo tao hata fo tetebes numa ai dale lolo-laon mai, nai Lamatuak matan ma nai hatahorir matan boe.
2CO 8:22 Hambu toranook esa bali, ai madenun neti sama-sama no Titus sara fo toꞌu reni doik naa. Ai parisa malan laꞌe noꞌuk ka ena. De ai bubuluk ena mae, ana nau naue-osa fafandek lima-ein soa-neu ei. Ana dere-dere hiek talo naa, nahuu ana bubuluk ena nae, ei tao hata fo tetebes.
2CO 8:23 Mete ma hambu hatahorir ratane laꞌe-neu Titus, na, mafada sara mae, Titus naa, au toranoong fo naue-osa no au nakandoo soa-neu ei. Mete ma hatahorir ratane laꞌe-neu hatahori laen mana nau tungga Titus laꞌok naa reti, na, mafada sara mae, hatahori kamaherek kara marai mamana laen oo here rala sara boe, fo ara tungga toꞌu doik ia, reni Yerusalem reti. Ara rahani a nai Korentus ena fo rae reti. Titus sama-sama no sara. Basa sara neu ko ratudu Karistus ta neni babanggan talo naa.
2CO 8:24 Dadi ei muste matudu susue-lalaim neu hatahorir fo mana toꞌu reni doik naa. Ma ei oo matudu sara, tao hata de ai hii kokolak maloloa bafan laꞌe-neu ei boe. No dalak naa, hatahori kamaherek maruma saranik marai bee a mesan mai, bubuluk tebe-tebe rae, ei sue sara.
2CO 9:1 Teteben ndia, au hae surak bali, fo oke ei doi-sou Lamatuak hatahori kamaheren nara.
2CO 9:2 Huu au bubuluk ena, ei maena dale dere-dere hiek doi-sou hatahorir talo naa. Au oo hii afada hatahori kamaherek marai Makedonia, laꞌe-neu ei dale susuen boe. Au tui ena ae, ei hatahori Korentus numa profensi Akaya mai, mahani memak numa teu maneuk kara mai ena, fo mae haitua doi doi-souk. Au oo tui laꞌe-neu ei dalem mana dere-dere hiem boe, fo mana tao nala hatahorir laen nara nau tungga doi-sou hatahori mana susak kara.
2CO 9:3 De au adenu ita toranoon nara reti ena fo ratudu rae, hata fo ai tuik kara laꞌe-neu ei ena, ta kokola bafa rouk. Au afada talo naa, mita fo ei mafafaꞌu memak.
2CO 9:4 Mete ma hambu hatahori Makedonia mai sama-sama ro au, boe ma ei bei ta mafafaꞌu mala, na, ita basa ngga mae. Boso losak au nemehehereng neu ei, oka-huun taa.
2CO 9:5 Huu naa de au duduꞌa ae, malole lenak ita toranoon nara laꞌo rakahuluk reni ei reti, fo ei basa ngga bisa koladu doi doi-souk naa tungga ei hehelum fai bakahulun. Ei muste fee numa ei dale susuem mai. Boso fee no dale datuak.
2CO 9:6 Masanenedak! Talo ia: “Hatahori fo mana sele-tande bini-nggees kada baꞌu anak ka, neu ko hambu buna-boak baꞌu anak ka boe. Hatahori fo mana sele-tande bini-nggees noꞌuk ma ta nakatataak kana, neu ko ana hambu falik buna-boan ma babaꞌe-babatik manahetak boe.”
2CO 9:7 Hatahori esa-esak muste naketu aon, ana nau fee desi hata. Boso fee no dale bibiak. Boso fee huu kada hatahori nekesetin. Huu Manetualain sue-lai hatahori fo mana fee no dale malenggan.
2CO 9:8 Manetualain nabeꞌi fee ei basa babaꞌe-babatik mata-matak. Ana oo nabeꞌi fee lena-lenak boe, mita fo ei ta toꞌa kuran hata esa boe na. Mete ma ei toꞌa, na, neu ko ei hambu dai lena. No dalak naa, ei bisa babaꞌe ei lenam fo tulun basa ue-osa neulauk.
2CO 9:9 Sama leo neni surak nai Manetualain Susura Malalaon nae, “Manetualain hii baꞌe fee hatahori mana matofa-tarak kara, numa Ndia dale susuen mai. Ana tao tetebes nakandoo, huu Ndia dale ndoon nakatataka nakandoo.”
2CO 9:10 Manetualain ndia fee bini-nggees, fo hatahori mana ue daer sele-tanden. Manetualain ndia fee nanaꞌak, fo ita bisa taꞌa. Manetualain ndia neu ko fee ei babaꞌe-babatik, mita fo ei bisa tao hata fo tetebes. Naa, sama leo ei dadi miu hatahori mana ue dae, boe ma Manetualain fee bini-nggees neu ei fo sele-tanden. De ei ue-tatao neulaun naa, Ana taon tungga faik, boe tamba namanoꞌu.
2CO 9:11 Manetualain nau fee ei lena heni hata fo ei mesa ngga toꞌak, mita fo ei bisa doi-sou hatahori laen nara numa ei dale susuen mai. Dadi mete ma ei doi-sou hatahori laen talo naa ena, neu ko ara roke makasi neu Manetualain.
2CO 9:12 Doi-souk naa fo ei feen neu Manetualain hatahorin marai naar, au henggenee tulu-fali sara. Ma naa oo tao nala ei soꞌuk makasi taa-taa neu Manetualain boe.
2CO 9:13 Huu neu ei doi-sou hatahori laen nara, naa natudu bukti nae, ei mamahere tebe-tebe. Naa oo tao nala hatahori laen nara soꞌuk kokoa-kikiok soa-neu Manetualain boe. Huu ara bisa mete-rita, ei nemeheherem neu Karistus Hara Lii Malolen naa, ta kokola bafa rouk. Naa natudu nae, ei tao tungga ei nemeheherem. Dadi neu ei fee doi-souk numa ei dale susuem mai neu sara, ma hatahori laen boe, na, naa ndia taon ara soꞌuk kokoa-kikiok soa-neu Manetualain.
2CO 9:14 Hatahori fo mana simbo nala doi-souk numa ei mai, neu ko hule-haradoi soa-neu ei. Ara oo hii ralan seli rae mete-rita ei boe, nahuu Manetualain natudu Ndia dale susuen noꞌun seli neu ei ena.
2CO 9:15 Tehuu Manetualain fee mudak ita Hadia esa lolen seli ena. Ndia, Yesus! Ndia belin naa, lena heni basa-basan! Huu naa de ita basa ngga sama-sama toke neu Manetualain tae, “Makasi!”
2CO 10:1 Au, Paulus mesa ngga, ndia surak nai ia. Neu ko hambu ketuk numa ei mai duduꞌa talo ia: mete ma au sama-sama ua ei, na, au mae kokolak ledo-ledo. Tehuu mete ma au dook ka numa ei mai, au ambarani kokolak no ta pake bii-bambik. Talo naa, hetu? Naa te au oke fo ei nenene au, nahuu Karistus dale lilon neu ei, ma Ana hii fee dale susuen neu ei.
2CO 10:2 Tehuu hambu ketuk ruma ei mai ta nau nenene au. Ara kokolak rae, ai tatao-nonoꞌin nara oo sama leo hatahori laen marai dae-bafok ia tatao-nonoꞌin nara boe. Dadi mete ma au uni naa uu, fama te au muste kokolak ta pake bii-bambik neu sara. Huu naa de au afada memak neu ei basa ngga, mita fo neu ko au uni naa uu, na, au hae kokolak barakaik ua sara.
2CO 10:3 Leo mae ita hatahori dae-bafok biasa oo, tehuu mete ma ita tareresi to hatahori laen, ita boso tambariik tahere fo tahuur boe, sama leo hatahorir marai dae-bafok ia fo ta ralela Manetualain.
2CO 10:4 Mete ma ita tahuur to hatahori, na, boso lilii-ndondou te ita tee-tanden nara ta sama ro hatahorir marai dae-bafok ia enan. De mete ma ita tahuur to hatahori langga batuk mana nareresi no ita, na, ita oo hambu Manetualain koasan mana bisa ofe nakalulutu hatahori oka-huun boe.
2CO 10:5 Manetualain koasan bisa ofe heni basa hatahori dae-bafok duduꞌan mana laban Manetualain, mana tao hatahorir ta nau ralela Ndia. Ndia koasan oo bisa natudu dalak boe, fo nggati hatahori dala duduꞌa raan naa, no dala duduꞌa beuk. No dalak naa, hatahori nanori fo duduꞌa tungga Karistus nenorin.
2CO 10:6 Noꞌuk ka numa ei mai mulai nenene Karistus, ma tao tungga basa Ndia hihii-nanaun lalaꞌen ena. Tehuu hambu ketuk numa ei mai bei ta nau nenene neu Ndia. Dadi ai mahani a ena, fo hukun sira ta mana nau nenene neu Ndia.
2CO 10:7 Ei hii mete-mita hata fo neni nitak numa kada dean mai. Tehuu ei muste mete hatahori dalen. Dadi mete ma hambu hatahori fo tao aon Karistus nedenun, na, masaneda matalolole. Huu ai oo Karistus nedenun, sama leo ndia boe.
2CO 10:8 Fama te ei duꞌa mae, au kokolak aloloa bafang lena-lenak laꞌe-neu koasa fo ita Lamatuan feen neu ai. Talo naa, hetu? Taa! Huu koasa naa hambun, fo natetea ei, ta nakalulutu ei dalem mara. Dadi au ta fee lelak neu hatahorir rakamamaek au, nahuu ara rae, au ta aena haak fo kokolak laꞌe-neu koasa fo Lamatuak feen neu au.
2CO 10:9 Au ta aena duduꞌak fo ae tao akatataꞌuk ei pake au susurang nggara.
2CO 10:10 Tehuu hatahorir raa kokolak rae, “Boso hosek mbali Paulus. Leo mae ndia susuran liin berak ma ta hohoꞌak, tehuu mete ma ana mai aon, ndia mana sota-naꞌuk ma kokolan ta naena koasa.”
2CO 10:11 Mita fo hatahori mana kokolak bafa rouk talo naa, duduꞌa dedeꞌak ia: hata fo ai surak nai susurak numa mamana dook mai, basa-basan sama no hata fo ai kokolak, mete ma ai mai nai ei taladam.
2CO 10:12 Hatahorir raa oo hii soꞌuk aon nara rae, sira raa, Karistus nedenu ta hohoꞌan boe. Ai ta mambarani makasasama aok leo sira. Bubuluk memak, hetu? Ta bisa dadi ai ta hohoꞌak leo sira! Hatahori matak leo naak, kada sangga hatahori mana sama leo sira mesa kasa. Basa de esa toba nasarada esa, nahuu sira mata-aok esa! Sira nggoa beben bali!
2CO 10:13 Naa te ai mesa ngga ta kokolak maloloa bafan, mete ma oka-huun taa. Ai kada kokolak talo naa, laꞌe-neu ues naa fo Manetualain feen neu ai ena. Hata fo ai taon fee ei ena, tungga kada hata fo Manetualain nadenu ai taon. Huu ai ta maue-osa nai naa dean.
2CO 10:14 Teteben ndia, ai ta kokolak lena-lenak neu ai kokolak maloloa bafan laꞌe-neu ei. Huu air ia, ndia mai tui ei laꞌe-neu Karistus Hara Lii Malolen. Ei oo simbo mala ai kokolan boe. Mete ma Manetualain ta nadenu nita ai, tehuu ai kokolak maloloa bafan laꞌe-neu ei, na, naa ndia ta tetebes.
2CO 10:15 Mete ma hatahori laen ndia raue-osa, na, ai ta kokolak maloloa bafan mae, naa dadi, nahuu ai ndia maue-osa. Nenenin lenak soa-neu air ia, ndia kada ei nemeheherem boe tamba ratea. No dalak naa, ai ue-osan buna-boan nai ei numa fai bakahulun naa mai, boe tamba nakandoo.
2CO 10:16 De ai bisa miu mafada Karistus Hara Lii Malolen nai mamanak kara marai ei boboam seri, fo bei ta hambu hatahori mana maue-osa nai naa. Huu ai ta nau kokolak mabafa loa menik hatahori laen ue-osan.
2CO 10:17 Nai Manetualain Susura Malalaon neni surak nae, “Mete ma hambu hatahori nau kokolak naloloa bafan, na, elan fo ana kokolak naloloa bafan laꞌe-neu kada ita Lamatuan leo.”
2CO 10:18 Mete ma hatahori esa kokolak naloloa bafan laꞌe-neu ndia aon, naa ta naena sosoak hata esa boe na. Tehuu mete ma ita Lamatuan ndia soꞌuk kokoak laꞌe-neu hatahori naa, na, naa dei fo ta hohoꞌak!
2CO 11:1 Au ae kokolak akadedemak aong baꞌu anak nok bali hatahori nggoa bebek. Dadi soba makatataak faa fo nenene au dei! Talo ia:
2CO 11:2 Au sama leo ei amam. Ei sama leo au ana feꞌong fo naena nefufudi aok ena. Mana sama leo ei manfufudi aom naa, ndia Karistus. De au nau anea atalolole ei, mita fo ei mauma-loo mia ei manfufudi aom naa, ei bei lolo-laok. Dadi au anea atalolole fo boso hambu mana edo-pode ei, fo nakalulutu ei nemeheherem.
2CO 11:3 Hatematak ia, ei tungga Karistus eno-dala ndoon no dale lolo-laok. Tehuu au amataꞌu, boso losak hambu hatahorir kedi-ira rala ei, fo ei sio laꞌo ela dalak naa, sama leo lele uluk mengge kedi-ira nala Hawa. Mengge naa bisa kedi-ira talo naa, nahuu ndia naa, mana puputa-papatak baꞌin!
2CO 11:4 Tungga-tungga hatahori matak leo naak kara reni ei mai, boe ma ranori ei laꞌe-neu Yesus mata-aok laen, ta sama leo Yesus fo ai manorin neu ei naa ena, na, hata de ei mamahere neu hatahori naa? Fai bakahulun, ei buka dalem fo simbo mala Manetualain Dula-dale Malalaon fo Ana koladu ei. Dadi tao hata de hatematak ia, ei nau simbo mala dula-dale mata-aok laen bali? Fai bakahulun, ei mamahere neu Karistus Hara Lii Malolen fo ai mafadan neu ei. Dadi tao hata de hatematak ia, ei nau mamahere neu nenorik rupak laen bali?
2CO 11:5 Ara soꞌuk aon nara rae, sira raa, Lamatuak nedenu fo ta hohoꞌan nara seli. Ndondoon naa sira haak lena heni au, do? Taa! Au ta tungga duduꞌak leo naak.
2CO 11:6 Leo mae rae, au ta alela kokolak pake dedeꞌa binir, tehuu au alela tebe-tebe hata fo au kokolak. Ei bubuluk dedeꞌak kara iar ena, nahuu au atudu laꞌi-laꞌik ka neu ei ena.
2CO 11:7 Neu au anori ei Manetualain Hara Lii Malolen, au ta oke ei tanggon au. Au tao kadiꞌi au aong, mita fo au bisa akadedemak ei. Ndondoon naa, ei nau fee salak neu au nahuu naa, do?
2CO 11:8 Hatahori kamaherek ruma saranik marai mamana laen nara ndia tanggon au, mita fo au bisa aono-lalau ei. Naa, sama leo au haꞌi numa sira mai, fo bisa tulun ei.
2CO 11:9 Neu au sama-sama ua ei, boe ma au hambu totoꞌak, au ta edo-pode ei, fo oke hata-hata numa ei mai. Ita toranoon nara maruma profensi Makedonia mai, ndia doi-sou au. Au ta tao amabera ita hata-hata neu ei, ma au oo ta nau tao talo naa nai mbila-beinesak boe.
2CO 11:10 Karistus Dedeꞌa-kokolan naa, tetebes. Au oo amahere tebe-tebe boe ae, au dedeꞌa-kokolang oo tetebes boe, nahuu au akaesa ua Karistus. Ta hambu hatahorir marai profensi Akaya naa ndia bisa kokoꞌo au bafang fo kaꞌi au, boso kokolak aloloa bafang ae, au ta tao amabera ei talo naa.
2CO 11:11 Tao hata de au kokolak talo ia? Ndondoon naa ia dadi, nahuu au ta sue ei, do? Leo mae ei duduꞌa talo naa, tehuu Manetualain mesa kana bubuluk au susue-lalaing neu ei.
2CO 11:12 Hata fo au taok naa, au nau tao akandoon. No dalak naa, hatahorir mana hii rakadedemak aon fo kokolak raloloa bafan rae, sira tataon sama leo ai, na, sira raa, oka-huun taak kara ena bali.
2CO 11:13 Ara rae, Lamatuak ndia nadenu sira. Sira raa, hatahori mana maue-osa fo mana kedi-ira hatahori! Ara soba-soba tao aon nara sama leo Karistus nedenun tetebes. Naa te basa naar kada kokolak bafa rouk a mesan!
2CO 11:14 Ei boso heran, ee! Huu nitur malanggan oo soba-soba tao aon sama leo Manetualain atan numa nusa tetuk do inggu temak mai boe, mana neni manggaledok no dale malole.
2CO 11:15 Huu naa de ei boso heran mete ma ndia hatahori mana maue-osan oo, soba-soba tao aon sama leo hatahori mana maue-osa no dale ndoos boe. Tehuu besa-besa, neu ko Manetualain bala sira manggaraun.
2CO 11:16 Mete ma ei nau, na, elan fo au kokolak akadedemak aong baꞌu anak bali nok bali hatahori nggoa bebek bali. Huu au nau soba-soba kokolak koa ao.
2CO 11:17 Mete ma au kokolak akadedemak aong leo iak, ta naoka nai ita Lamatuan. Tehuu naa, nok bali hatahori ute keak kokolan.
2CO 11:18 Hambu hatahori noꞌuk ka hii rakadedemak aon nara tungga hatahorir marai dae-bafok ia siꞌen. Dadi au oo nau kokolak aloloa bafang tungga sira boe.
2CO 11:19 Ei ndia mana tao aom hatahori duduꞌa ndoos, mete ma matonggo mia hatahori esa ute keak, na, ei matanggodon no dale loak, hetu?
2CO 11:20 Mete ma hatahori laen tao hata-hata neu ei, na, ei matanggodo sara ruma naa leo. Haꞌi netuduk leo: mete ma hambu hatahorir tao ei sama leo sira ata-daton, na, ei kada matanggodon leo. Mete ma hambu hatahorir ramanaꞌo rala ei bua-baꞌum, na, ei elan numa naa leo. Mete ma hambu hatahorir kedi-ira rala ei, na, ei elan numa naa leo. Mete ma hambu hatahorir soꞌuk aon leo hatahori moꞌo-inahuuk, ma nakaloloek ei sama leo hatahori kadiꞌi anak, na, ei elan numa naa leo. Leo naak oo, mete ma hambu hatahori famba ei, na, ei elan numa naa leo boe.
2CO 11:21 Tehuu boso mamanasa, ee! Au mae, nahuu ai kada noe-naꞌu a leo. Ai ta mabeꞌi tao talo naa, sama leo hatahorir raa tao fee ei ena. Tehuu mete ma ara nau kokolak raloloa bafan laꞌe-neu hata, na, au oo ambarani kokolak aloloa bafang talo naa boe. (Tehuu boso lilii-ndondou, te au kada kokolak akadedemak aong nok bali hatahori nggoa bebek na!)
2CO 11:22 Sira hatahori Ibrani isi-isik, do? Hou! Au boe. Sira hatahori Israꞌel, do? Hou! Au boe. Sira raa, baꞌi Abraham tititi-nonosin, do? Hou! Au boe.
2CO 11:23 Sira raa, Karistus hatahori mana maue-osan, do? Hou! Au oo leo naak boe. (Boso lilii-ndondou, huu au kokolak lena-lenak ia!) Memak au ae, au sama leo sira. Naa te au ia, lena heni sira. Au aue-osa barakain lenak. Hatahori sese au uni bui dale uu laꞌe noꞌun seli. Ara poko-femba au laꞌe noꞌun seli. Laꞌi-laꞌik ka ela kada faa, au oo mate boe.
2CO 11:24 Nai au hatahori Yahudi heli-heling nggara liman, au hambu tuni-ndenik laꞌe lima. Tungga-tungga au hambu fifilok, ara filo au laꞌe 39.
2CO 11:25 Hatahorir popoko au pake ai laꞌe telu. Ara toko au pake batu laꞌe esa fo rae tao risa au. Au ofang molo laꞌe telu. Au laa boꞌu-boꞌu numa tasi oe hatu-leledok esa.
2CO 11:26 Laꞌi-laꞌik ka au laꞌok losa dook ka sudi uni bee uu ena. Hambu sosoek noꞌun seli tao nala au, ela kada faa mate. Haꞌi netuduk leo: faa nai lee moꞌok ma naꞌo manu-meor. Hambu doidosok numa au hatahori Yahudi heli-heling nggara mai, hatahori ta Yahudir, ma hatahori mana tao aon nara sama leo toranoo hatahori kamaherek, naa te ara kedi. Au oo ela kada faa mate numa tasi taladan, numa kota, ma numa mamana nees boe.
2CO 11:27 Au aue-osa fafandek lima-eing, ma au hambu susa-sonak mata-matak kara. Hambu laꞌe noꞌuk ka au ta bisa sunggu. Au oo ndoe ma dale mada boe. Laꞌe noꞌuk ka au ta hambu uꞌa hata esa boe na. Laꞌe noꞌuk ka au oo ta aena bua-loꞌa nelusek boe, de au marini alan seli.
2CO 11:28 Mete ma ta nau reke basa dedeꞌak kara raa, na, reke kada talo ia leo: tungga-tungga faik au duduꞌang tarabangga, nahuu au duduꞌa laꞌe-neu basa ita toranoo kamaheren nara, fo mana rakabua nai bee a mesan.
2CO 11:29 Mete ma hambu hatahori nameda aon ta nabeꞌi, na, masaneda au. Huu au oo leo naak boe. Mete ma hambu hatahori fufudi-hohodo hatahori kamaherek fo tungga tao salak, au dadi mae ma asakele.
2CO 11:30 Mete ma au muste kokolak aloloa bafang, malole lenak au kokolak aloloa bafang laꞌe-neu dedeꞌak kara fo ratudu rae, au ia, kada noe-naꞌuk a mesan. Tebe!
2CO 11:31 Manetualain fo ita Lamatuan Yesus Aman, bubuluk au ta kokolak bafa rouk. Naa, nandaa mete ma hatahori soꞌuk kokoa-kikiok neu Ndia nakandoo.
2CO 11:32 Masaneda! Au ia, kada noe-naꞌuk a mesan. Mete ma au mesa ngga, na, ta bisa tao hata-hata. Haꞌi netuduk leo, fai bakahulun numa kota Damsik, manek Aretas nggubenor, nadenu hatahorir fo ramangge au numa kota lelesun, fo ara bisa humu rala au.
2CO 11:33 Tehuu au nonoong nggara tao au uu loꞌak esa dale, basa de rakonda au pake tali tungga kota tembok dean. Dadi mboꞌi heni au numa nggubenor liman mai.
2CO 12:1 Mete ma ei nau, na, elan fo au kokolak aloloa bafang faa bali. Naa te kokolak aloloa bafak, sosoan taa. Tehuu au nau afada ei dedeꞌak kara fo ita Lamatuan natudu neu au ena, nok bali nai meꞌis dale.
2CO 12:2 Au alela hatahori esa mana nakaesa no Karistus. Teuk salahunu haa maneuk kara, hambu esa noon neni lalai fo demak mateꞌen neu. Tehuu au ta bubuluk, mete ma ana hene, bei no ndia ao-inan, do, kada samanen ndia hene lain neu. Kada Manetualain ndia bubuluk. Au oo bubuluk boe ae, neu ana neni soꞌuk hene neni Lamatuak Mamana Malolen naa neu, ana namanene dedeꞌa-kokolak ta neni babanggak, losa hatahori dae-bafok ta bisa kokolak.
2CO 12:5 Dadi soa-neu hatahori matak leo naak, au nau kokolak aloloa bafang. Tehuu au ta nau kokolak aloloa bafang laꞌe-neu au ao heli-heling. Kada laꞌe-neu dedeꞌak fo au ta abeꞌi tao, dei fo au kokolak abafa loa talo naa.
2CO 12:6 Leo au nau kokolak aloloa bafang, au ta parluu kokolak bafa rouk, huu au aena dedeꞌak tetebes noꞌuk ka fo au bisa kokolak. Tehuu au kada akatataak aong leo, fo hatahorir boso duꞌa rae, au ta hohoꞌang lena heni numa hata fo ara ramanenen ma mete-ritan numa au mai.
2CO 12:7 Lena-lenak bali, Lamatuak natudu dedeꞌak ta neni babanggak noꞌuk ka neu au ena. Tehuu Manetualain oo fee lelak neu au fo hambu susa-sonak boe, mita fo au boso koa ao. Huu nitur malanggan nadenu ndia ana nunin esa fo kada dudunggu babalik au nakandoo, nok bali dila-nggauk esa nato nakamiminak au ao-inan. Awii! Au doidoso tebe-tebe!
2CO 12:8 Au oke laꞌe telu ena fo Lamatuak nggari heni dedeꞌak ia numa au mai.
2CO 12:9 Tehuu Ana naselu neu au nae, “Au atudu Au dale susueng neu o. Naa dai soa-neu o. Huu neu o mameda mae, tungga o barakai heli-helim ta dai, na, nai naa Au koasang boe tamba natea.” Huu naa de au nau kokolak aloloa bafang tamba, neu au ta abeꞌi tao dedeꞌak esa. No dalak naa, au bubuluk ae, Karistus koasan leo nai au dale.
2CO 12:10 Huu naa de, mete ma au ameda au mesa ngga ta abeꞌi tao ue-osa esa, au daleng kada lino-lendek a mesan. Dadi neu hatahorir kokolak rakadadaek au do, rakasususak au do, tao doidoso au do, tuni-ndeni au, nahuu au dadi uu Karistus hatahorin, na, au daleng kada lino-lendek leo. Huu mete ma au mesa ngga ta abeꞌi, na, au hambu koasa numa Karistus mai fo au abeꞌi tao dedeꞌak naa.
2CO 12:11 Ei leo-laꞌo nok bali Lamatuak ta nadenu nita au uni naa uu. Huu naa de nau ta nau, bebeik kara ia au kokolak akadedemak aong baꞌu anak nok bali hatahori nggoa bebek. Teteben ndia, ei ndia muste kokolak maloloa bafam laꞌe-neu au. Memak au ta aena sosoa-ndandaak hata-hata. Tehuu mete ma nekesasamak au ua “hatahori ta hohoꞌak sudi selik kana” naa, fo rae Lamatuak naonda sara, na, sira raa, ta hohoꞌan ta lena heni au.
2CO 12:12 Tungga-tungga Lamatuak nadenu hatahori esa neu nafada hatahorir laꞌe-neu Ndia, hatahori naa tao tanda heran mata-matak kara pake koasa, fo natudu bukti nae, Lamatuak ndia nadenu ndia. Boso lilii-ndondou, huu neu au bei nai ei taladam mara, au oo tao tanda heran leo naak kara boe. Au aue talo naa no au daleng nakatataka nakandoo.
2CO 12:13 Boso mamanasa, ee! Kada hambu dedeꞌak esak ka, ndia au ta tao sana nai ei, fo hatahori laen taon nai saranik laen. Ndia, au ta oke fo ei tanggon mala au.
2CO 12:14 Talo ia! Au ahani a ena uni ei neti laꞌe katelun. Au ta toꞌa ei tanggon au doi soda-ladang. Au oo ta toꞌa ei hata-hetom boe. Tungga ita dala-hadan, ta nandaa kakana anar rambeda hata-heto soa-neu sira ina-aman nara. Mana ndaak ndia, ina-amar mbeda hata-heto fee sira anan nara. Dadi au ta toꞌa ei mambeda hata-heto fee au, huu ei sama leo au anang nggara! Au toꞌak naa, ndia ei aom ma ei susue-lalaim.
2CO 12:15 Au amahoko fee hata a mesan fo au enang neu ei. Au oo hii aue-osa fafandek lima-eing boe, mita fo ei bisa leo-laꞌo tungga Lamatuak hihii-nanaun. Mete ma au sue alan seli neu ei, na, ei oo muste sue masafali au leo naak boe. Dadi tao hata de ei makatataak ei susue-lalaim? Ta nandaa, hetu?
2CO 12:16 Hambu ketuk numa ei mai manaku rae, au ta tao amabera ei. Tehuu hambu ketuk oo rae, au dadi hatahori fo malela pepeko-lelekon seli ma kedi ala ei boe, losa tao ala ei tungga au hihiing.
2CO 12:17 Dadi talo bee? Ndondoon naa hatahorir fo au adenu sara reni ei reti naa, kedi rala ei, do?
2CO 12:18 Au fufudi-kokoe Titus fo neni ei neti. Au oo adenu toranook laen esa fo neu noon boe. Ndondoon naa, Titus kedi nala ei, do? Taa, hetu? Titus no au ia, mata-aok esa. Ai dua ngga duduꞌan sama, ma ai oo maue-osa no dale ndoos boe.
2CO 12:19 Toranoo susue nggara ein! Ndondoon naa ei duduꞌa numa bebeik kara iar mae, ai masalaꞌe aon nai ei matam, do? Taa! Basa hata fo ai kokolak kara iar, Manetualain bubuluk ena. Dadi ai ta bisa mafuni hata-hata numa Ndia mai. Ai oo makaesa mia Karistus boe. No ai sue ei, huu naa de basa hata fo ai taok naa, bisa tao matetea ei.
2CO 12:20 Neu ko mete ma au dadi uni ei neti, au duꞌa-duꞌa, boso losak ei ta dadi miu hatahorir fo sama leo au hihiing. Boso losak hambu ketuk rareresi, dale mana mbirik, rambeda dalek, ketuk kada duduꞌa sira aon mesa kana, ketuk kokolak rakabobook hatahori nade malolen, hambu ketuk kokolak dedeꞌa lalok laꞌe-neu hatahori leleo-lalaꞌon, hambu mana koa aok, ma tao mue-anggik basa-basan. Fama te au oo dadi uu hatahori ta sama leo ei hiik boe.
2CO 12:21 Neu ko mete ma au uni ei neti, au duduꞌang ta namaneu nahuu ei tatao-nonoꞌim. Boso losak Manetualain nae nakamamaek au nai ei matam mara. Boso losak au tao ala hatahorir rameda berak, nahuu hambu noꞌuk ka ruma ei mai bei leo-laꞌo tao manggarauk, tehuu ta nau sale dalen do tuke tein, fo fali tungga Lamatuak eno-dala ndoon. Hambu ketuk laꞌok sala ro hatahorir ta sira saon nara. Ma ketuk tao ranggenggeo mata-matak kara. Ketuk bali tao tatao-nonoꞌi manggarau mata-matak kara mana neni mamaek, tehuu ta rameda mae, losa hatahorir nunute sara.
2CO 13:1 Dadi ia laꞌe katelun fo au nau neti tiro-dangga ei. Mete ma hambu ketuk fo nau rakasasaꞌek salak neu hatahori, na, boso lilii-ndondou ndia hohoro-lalanen. Sama leo neni surak nai Manetualain Susura Malalaon nae, “Mete ma hambu ketuk fo rakasasaꞌek salak neu hatahori esa, muste hambu sakasii dua do telu fo kokolan nara sama dei, dei fo simbok. Mete ma ta talo naa, na, boso simbok.”
2CO 13:2 Neu lelek fo au uni ei uu, laꞌe kaduan maneuk, au fee nesenedak neu hatahorir mana leo-laꞌo tao manggarauk kara raa ena. Hatematak ia, au fee nesenedak neu sara bali, sama-sama ro basa hatahorir fo mana leo-laꞌo tao manggarauk kara. Sama leo fai bakahulun, au fee nesenedak ae, neu ko mete ma au neti, au ta atanggodo sara.
2CO 13:3 No dalak naa, natudu bukti nae, Karistus kokolak nesik au. Mete ma Karistus nau koladu ei, Ana taon nenik koasa moꞌok nai ei taladam mara. Huu Ana ta tao ues no noe-naꞌuk.
2CO 13:4 Neu ara rakanisan numa ai ngganggek lain, memak Ana noe-naꞌu, huu Ana nakamboꞌik heni Ndia koasan ena. Tehuu Manetualain fee koasa neu Karistus de Ana nasoda hatematak ia. Leo mae ita mana dadi Ndia hatahorin tameda ta tabeꞌi, tehuu Manetualain fee ita masoda beuk ena. Huu naa de ai bisa maono-lalau ei pake Ndia koasan.
2CO 13:5 Parisa ei dale heli-helim mara fo sangga bubuluk mae, ei mamahere tebe-tebe neu Karistus, do taa. Ndia koasan neni nitak nai ei leleo-lalaꞌom, do taa? Fora ei aom talo naa. Huu mete ma Ana ta nakaesa no ei, na, ei ta dadi miu Ndia hatahorin.
2CO 13:6 Mete ma ei parisa ai, na, ei bisa mete-mita Ndia koasan neni nitak nai ai leleo-lalaꞌon. No dalak naa, ai mala dea.
2CO 13:7 Ai oo hule-haradoi moke neu Manetualain boe, mita fo ei boso tao salak hata esa boe na. Ai ta hosek mete ma hatahorir manaku do ta manaku air ia, Lamatuak nedenun. Tehuu ai hii ei tao hata fo tetebes, leo mae hatahori ketuk nau timba heni ai. Talo naa oo ta hata-hata boe.
2CO 13:8 Huu ita ta bisa tao hata esa boe na, fo laban hata fo tetebes. Kada ai malela tao hata fo tetebes a mesan.
2CO 13:9 Mete ma ei dadi barakaik, ma ai dadi noe-naꞌuk, ai mamahoko a mesan. Ai hule-haradoi moke fo Lamatuak tao nala ei boe dadi mandaik.
2CO 13:10 Huu naa de, leo mae au nai dook ka numa ei mai, au surak dedeꞌak kara iar hatematak ia, mita fo neu ko au mai, na, au hae kokolak hara berak neu ei bali. Au dadi uu ita Lamatuan nedenun. Tehuu Ana fee au haak ma koasa fo atetea ei, ta akalulutu ei.
2CO 13:11 Toranoo susue nggara ein! Au dedeꞌa deꞌen mateꞌen ia, kada hara masodak malole. Tao matetu-mandoo basa dedeꞌak kara. Mamanene matalolole au nenori-nefadang. Leo-laꞌo dalek esa. Ei muste malole esa no esa. Manetualain naa sue-lai ei. Au oke-hule fo Ana sama-sama no ei nakandoo, ma Ana tulu-fali ei fo leo-laꞌo mole-dame esa no esa.
2CO 13:12 Ei muste lole haram pake iꞌidu susuek, fo nandaa soa-neu Lamatuak hatahori lolo-laon. Manetualain hatahorin marai iar, basa sara haitua hara masodak malole soa-neu ei.
2CO 13:13 Au oke-hule fo ita Lamatuan Yesus Karistus natudu Ndia dale susuen neu ei. Au oke-hule fo Manetualain natudu Ndia susue-lalain neu ei. Au oo oke-hule fo Lamatuak Dula-dale Malalaon natudu Ndia dale lilon, mita fo ei basa ngga leo-laꞌo no dalek esa boe. Baꞌu kada naa leo, Paulus
GAL 1:1 Hara masodak numa au mai, Paulus. Au haitua susurak ia soa-neu toranoo hatahori kamaherek kara fo marai saranik kara rai profensi Galatia. Toranook kara fo mana sama-sama ro au rai ia oo haitua hara masodak fee ei boe. Au fee nesenedak neu ei ae, Amak Manetualain no Yesus Karistus ndia radenu au, ta hatahori dae-bafok ndia nadenu. Yesus Karistus naa, ndia Hatahori fo Manetualain nadenun mai ena. Karistus mate, tehuu Manetualain tao nasoda falik kana numa mamaten mai. Boe ma Sira raa, ndia radenu au fo uu tui-bengga neu hatahorir laꞌe-neu Hara Lii Malole.
GAL 1:3 Au hule-haradoi neu Manetualain, ndia ita Aman, ma Yesus Karistus, ita Lamatuan. Au oke-hule fo Sira ratudu dale susuen nara reu ei, mita fo ei bisa leo-laꞌo no mole-damek ma lino-lendek.
GAL 1:4 Karistus mate fo koka heni basa ita sala-singgon nara ma nakamboꞌik ita numa manggarauk manai dae-bafok hatematak ia. Basa naar tungga Amak Manetualain hihii-nanaun.
GAL 1:5 Huu naa de ita muste koa-kio takandoo neun! Tebe naa!
GAL 1:6 Toranoo nggara ein! Au ta duꞌa bubuluk eir ia bali! Manetualain here nala ei ena, nahuu Ana nau fo ei malela Ndia dale susuen. Tehuu tao hata de ei masadea neuk ka fo miu mamahere nenorik laen
GAL 1:7 fo ta ndoos? Fai bakahulun au fee nenorik hata fo ndoos laꞌe-neu Yesus Karistus Hara Lii Malolen ena. Tehuu hatematak ia mana kedi-irak kara mai ena fo puputa-papata Hara Lii Malole naa, losa tao rala ei panggananaa.
GAL 1:8 Besa-besa, ee! Neu ko Lamatuak nandoo hatahori mana maik fo fee nenorik laꞌe-neu Hara Lii Malole ta sama no fai bakahulun fo au fee nenorik naa. Leo mae hatahori naa numa ai mai, do, Manetualain atan esa numa nusa tetuk do inggu temak mai oo, nendook daka nalan boe.
GAL 1:9 Ai mafada memak dedeꞌak ia numa fai uluk mai ena. Tehuu hatematak ia au nau fee nesenedak seluk bali, talo ia: mete ma hambu hatahori mai fo fee nenorik laen numa Hara Lii Malole fo fai bakahulun ei simbo malak naa mai ena, naa fo Manetualain oo nandoon boe.
GAL 1:10 Au ambarani kokolak talo naa, nahuu au nau tao amahoko Manetualain dalen, ta hatahori dae-bafok dalen. Ei duꞌa mae au sorodododo nai hatahori dae-bafok matan, do? Taa! Mete ma au tao talo naa, na, au ta andaa dadi uu Karistus neondan.
GAL 1:11 Toranoo nggara ein! Au afada no ledo-ledo ae, Hara Lii Malole fo au anorik neu ei naa, hatahori dae-bafok ta ndia aꞌadun.
GAL 1:12 Au ta simbon numa hatahori dae-bafok mai, ma ta hambu hatahori dae-bafok nanori au. Yesus Karistus mesa kana ndia nafada sosoa-ndandaan neu au.
GAL 1:13 Ei mamanene mala tutuik ena laꞌe-neu au leleo-lalaꞌong fai bakahulun, neu au bei tungga anggama Yahudi, hetu? Lelek naa, au tuni-ndeni ala Lamatuak hatahorin sudi selik kana, fo ae akalulutu sara.
GAL 1:14 Faik naa oo, au daleng mbena nalan seli boe fo anori laꞌe-neu anggama Yahudi, lena heni hatahori Yahudi laen fo teun sama leo au. Ma au ia, manggaten lenak fo akalalaꞌok basa ai bei-baꞌin nara dala-hadan ma anggama hohoro-lalanen lalaꞌen.
GAL 1:15 Leo mae talo naa oo, tehuu Manetualain naketu nala ena, fo nalelelak au ua Ndia Anan boe. Au inang bei ta bonggi au, te Ana here nala au memak ena, nahuu Ana sangga natudu dale susuen neu au. Ana oo nadenu au boe, fo uu anori hatahori ta Yahudir. Neu Ana nadenu au talo naa, au ta uu oke hatahori laen nenori-nefadan.
GAL 1:17 Ma au oo ta uu atonggo ua lasi-lasi Karisten nara fo mana dadi reu Yesus nedenun numa Yerusalem boe. Tehuu au laꞌo memak uni dae Arab uu. Basa boe ma au fali uni kota Damsik uu bali.
GAL 1:18 Basa teuk telu boe ma au uu atonggo ua Petrus numa Yerusalem fo au nau bubuluk hata fo ana tuin fee au. Boe ma au leo taak numa naa, losa faik salahunu lima.
GAL 1:19 Faik naa, au oo atonggo ua Lamatuak Yesus fadi bonggin boe, nade Yakobis. Tehuu au ta atonggo ua Lamatuak nedenun laen nara. Kada sira dua sara.
GAL 1:20 Hata fo au surak ia, memak tetebes leo naak! Au ta pepeko-leleko! Te Manetualain bubuluk na!
GAL 1:21 Basa boe ma au laꞌo uni profensi Siria ma profensi Kilikia uu.
GAL 1:22 Faik naa, Karistus hatahorin nara marai Yudea bei ta ralela au.
GAL 1:23 Ara kada ramanene harak rae, “Hatahori fo fai bakahulun tao doidoso ita naa, hatematak ia ana fee nenorik laꞌe-neu Karistus Hara Lii Malolen. Naa te fai bakahulun ana ndia nae soba nakalulutu ita.”
GAL 1:24 Basa sara ramanene rala naa, boe ma ara rakadedemak Manetualain, nahuu au amahere neu Yesus Karistus ena.
GAL 2:1 Basa teuk salahunu haa, boe ma au fali uni kota Yerusalem uu, sama-sama ua Barnabas. Ma ai dua ngga oo, mia hatahori kamaherek ta Yahudi esa, nade Titus.
GAL 2:2 Au uni naa uu, nahuu Manetualain ndia nadenu. Basa boe ma au tui fee lasi-lasi Karisten nara Hara Lii Malole fo au anorik neu hatahori ta Yahudir naa ena. Faik naa, au kokolak aong ua sara, mita fo ara parisa ratalolole hata fo au fee nenorik naa, ndaa do taa. Mete ma ara raketu rae, ta ndaa, na, hatahori bisa nae, au ue-tataong kada hie-hie!
GAL 2:3 Ara ramanene rala au kokolang talo naa, boe ma ara simbo no malole. Ara oo simbo rala Titus no malole boe. Leo mae ndia hatahori ta Yahudi, tehuu ara ta rakasetik kana sunat.
GAL 2:4 Tehuu faik naa, hambu toranook ketuk ta rakaheik, nahuu ara fee nenorik laen. Sira raa, Karisten pepeko-lelekok. Boe ma ara mai rakasetik ro neneek Yesus Karistus hatahori ta Yahudin, fo tungga basa hatahori Yahudi anggaman hohoro-lalanen lalaꞌen. Naa te Yesus Karistus nakamboꞌik ita ena, huu naa de ita ta neka-lili to hohoro-lalanek kara raa, sama leo ata-dator.
GAL 2:5 Leo mae rakasetik talo naa, tehuu ai ta nau simbok faa boe na. No dalak naa, ei bisa mamahere makandoo neu Hara Lii Malole fo au fee nenorik naa ena. Naa memak tetebes.
GAL 2:6 Lasi-lasik kara raa simbok no malole au nenoring naa, ma ara ta tia-tamba hata-hata bali. Huu Manetualain ta memete matak. De leo mae sira hatahori moꞌo-inahuuk, do kadiꞌik, naa nenenin taa.
GAL 2:7 Nenenin lenak ndia: ara bubuluk rae, Manetualain here nala au ena, fo uni Hara Lii Malole fee hatahori ta Yahudi. Sama leo Ana oo nadenu Petrus fo neni Hara Lii Malole naa fee hatahori Yahudi boe.
GAL 2:8 Manetualain fee koasa neu Petrus ena, fo dadi neu nedenuk soa-neu hatahori Yahudi. Leo naak oo Ana fee koasa neu au fo dadi uu nedenuk soa-neu hatahori ta Yahudi boe.
GAL 2:9 Faik naa, hatahorir duꞌa ena rae, Yakobis, Petrus, ma Yohanis, malangga saranik. Neu telu sara bubuluk rae, Manetualain natudu dale susuen neu au ena fo akalalaꞌok Lamatuak ue-osan, boe ma ara rambariik mai ratoꞌu limak ro au ma Barnabas. Naa dadi neu tanda, ai basa ngga dalek esa. Ara rakaheik fo ai meni Hara Lii Malole fee hatahori ta Yahudi, ma sira ndia reni soa-neu hatahori Yahudi.
GAL 2:10 Ara ta roke hata-hata bali. Kada ara fee nesenedak neu ai fo boso lilii-ndondou tulu-fali hatahori hata taak kara. Memak naa ndia au nau taon ena.
GAL 2:11 Laꞌe esa Petrus neni kota Antiokia mai, boe ma au kaꞌi-oren no ledo-ledo, nahuu ana tao sala.
GAL 2:12 Neu ana bei fo mai, ana namahoko nanggatuuk naꞌa sama-sama no Karistus hatahori ta Yahudin nara. Tehuu neu Yakobis nonoon hatahori Yahudir mai, boe ma Petrus nakaheok numa toranoo ta Yahudi mai, ma ta nanggatuuk naꞌa no sara bali. Ana namataꞌu neu hatahori Yahudi fo mana fee nenorik naa nae, Karistus hatahorin nara muste toꞌu rahere basa hatahori Yahudi anggaman hohoro-lalanen lalaꞌen, ma muste leo-laꞌo rabinggak ruma hatahori ta Yahudir mai.
GAL 2:13 Hatahori Yahudi laen nara mete-rita Petrus tataon naa, ara oo tao tungga talo naa boe. Losa Barnabas oo tungga tasoso ro sira dea-matan nara raa boe.
GAL 2:14 Tehuu neu au mete-ita sira ta tungga tebe-tebe Hara Lii Malole hihii-nanaun ena, boe ma au kaꞌi-ore memak neu Petrus numa sira matan ae, “Kaꞌa Peꞌu! Kaꞌa ia, memak hatahori Yahudi. Tehuu Manetualain soi dalak ena fo hatahori mana namahere neu Yesus Karistus nakamboꞌik numa hatahori Yahudi anggaman hohoro-lalanen nara mai. Kaꞌa simbo nala dedeꞌak naa ena. Talo bee de hatematak ia kaꞌa bei nau nakasetik hatahori ta Yahudi, fo tao tungga anggama Yahudi hohoro-lalanen bali?”
GAL 2:15 Au kaꞌi-ore Petrus talo naa, nahuu ai dua ngga sama-sama hatahori Yahudi. Ai hatahori nusa Yahudin ta sama no hatahori nusa-nusak laen nara, nahuu ai hatahori nusa Yahudin malela Manetualain dook ka ena.
GAL 2:16 Tehuu hatematak ia ita oo bubuluk boe tae, Manetualain ta simbok hatahori esa boe na no malole, nahuu ana tao tungga anggama hohoro-lalanen. Manetualain simbok hatahori no malole, mete ma ana namahere neu Yesus Karistus, ta huu ana tao tungga anggama hohoro-lalanen. No kada hatahori namahere neu Karistus, dei fo Manetualain henggenee memak kana nae, ana ta naena salak ena.
GAL 2:17 Huu naa de ita fee nenorik tae, Manetualain simbok hatahori no malole, nahuu namahere neu Yesus Karistus. Tehuu hambu hatahori Yahudi ndia nakasasaꞌek salak neu ai nae, ai sala ena, nahuu ai mamahere neu Karistus, tehuu ta tungga anggama Yahudi hohoro-lalanen nara. Ei oo nau ndae salak talo naa boe, do?
GAL 2:18 Mete ma au toꞌu falik anggama hohoro-lalanen, fo au akamboꞌik henin ena naa, na, dei fo au sala!
GAL 2:19 Memak fai bakahulun au aote tebe-tebe tao tungga anggama Yahudi hohoro-lalanen nara, mita fo au malole ua Manetualain. Tehuu au oo ta bisa boe. Huu naa de hatematak ia au nggari heni hohoro-lalanek kara raa fo leo-laꞌo akaesa ua Karistus. No dalak naa, dei fo Manetualain simbok au no malole. Taon neu, au mate neni londak numa ai ngganggek lain sama-sama ua Karistus. Hatematak ia au ta ndia asoda bali, tehuu Karistus ndia nasoda nai au aon dale. Au hambu masoda beuk ia, nahuu au amahere neu Manetualain Anan. Ana sue nalan seli neu au, losa Ana mate nggati au.
GAL 2:21 Ma Manetualain simbok nala au nahuu Ndia dale susuen, ta huu au tungga anggama hohoro-lalanen nara. Mete ma hatahori bisa malole no Manetualain nahuu tungga anggama hohoro-lalanen, na, naa sosoa-ndandaan nae, Karistus mamaten naa hie-hie a mesan. Naa ndia au afada neu Petrus asa numa Antiokia.
GAL 3:1 Wee! Hatahori Galatiar ein, ee! Fai bakahulun au mesa ngga ndia afada numa ei matam ena, laꞌe-neu Yesus Karistus mamaten numa ai ngganggek lain. Tehuu hatematak ia hatahori kedi-ira ei no muda hiek ena! Ei nggoa bebem mara talo bee ia!
GAL 3:2 Au ae atane kada dedeꞌak esa. Ei simbo mala Manetualain Dula-dalen, nahuu ei tungga anggama hohoro-lalanen, do? Taa, hetu! Ndia Dula-dalen konda neu ei, nahuu ei mamahere Hara Lii Malole fo ei mamanenek naa ena.
GAL 3:3 Dadi tao hata de ei mamanggoa malan seli talo naa, ee? Fai bakahulun ei leo-laꞌo tungga Dula-dale Malalaok hihii-nanaun ena. Tehuu hatematak ia ei masafali ena bali fo leo-laꞌo tungga hatahori dae-bafok hihii-nanaun.
GAL 3:4 Neu ei bei fo mamahere neu Karistus, ei hambu tuni-ndenik noꞌun seli. Boso losak basa doidosok kara raa dadi hie-hie a mesan! (Naa te nemehere neu Karistus ta bisa dadi hie-hie.)
GAL 3:5 Neu Manetualain fee Ndia Dula-dalen, ma natudu tanda heran mata-matak kara numa ei matam, ei duꞌa mae, Ana tao talo naa nahuu ei tungga anggama hohoro-lalanen, do? Taa, hetu! Ana tao talo naa, nahuu ei mamahere Hara Lii Malole fo ei mamanenek ena.
GAL 3:6 Masaneda hatahori Yahudir baꞌin, ndia baꞌi Abraham. Sama leo Manetualain Susura Malalaon surak nae, “Huu ana namahere neu Manetualain, de Manetualain simbok kana no malole, ma henggenee nalan hatahori dale ndoos.”
GAL 3:7 Dadi ei muste malela no malole mae, hatahorir fo kamaherek sama leo Abraham, ara dadi reu Manetualain hatahorin fo ndoos.
GAL 3:8 Manetualain nafada memak nai Ndia Susura Malalaon nae, neu ko Ana oo simbok hatahori nusa-nusak laen nara nae, sira hatahori dale ndoos, mete ma ara ramahere reu Ndia boe. Te lele uluk Ana nafada memak Hara Lii Malole neu baꞌi Abraham ena nae, “Neu ko basa hatahori nusa-nusak kara marai dae-bafok hambu babaꞌe-babatik nahuu o.”
GAL 3:9 Huu Manetualain hehelu-bartaan naa, de Ana oo fee babaꞌe-babatik neu basa hatahorir fo mana ramahere reu Ndia, sama leo Ana fee Abraham ena boe.
GAL 3:10 Hatahori fo mana tungga anggama hohoro-lalanen, mita fo Manetualain simbok kana no malole, na, ana muste lemba-nasaa nala berak numa basa hohoro-lalanek kara raa lalaꞌen mai, sama leo ana hambu nala neketook ena. Hambu neni surak nai Manetualain Susura Malalaon dale nae, “Hatahori fo ta mana tungga nakandoo anggama hohoro-lalanen no tetuk, ana hambu neketook!”
GAL 3:11 Manggaledok ena, Manetualain ta simbok hatahori nahuu ana tungga anggama hohoro-lalanen. Sama leo neni surak nae, “Hatahori muste namahere neu Au, dei fo Au simbok kana no malole sama leo hatahori dale ndoos, fo ana hambu masodak tetebes.”
GAL 3:12 Mete ma hatahori nau leo-laꞌo tungga anggama hohoro-lalanen hihii-nanaun, na, ana muste tao tungga basa sara no tetuk! Manetualain nafada memak kana nai Ndia Susura Malalaon ena nae, “Hatahori fo mana nau leo-laꞌo tungga hohoro-lalanek, neu ko ana mbute-muek no kada hohoro-lalanek kara raa.”
GAL 3:13 Tehuu Karistus bae ketun ena, fo nakamboꞌik ai numa anggama hohoro-lalanen fo mana futu-paꞌa ai mai. Fai bakahulun ai leo-laꞌo sota-mate lemba-masaa mala berak numa anggama hohoro-lalanen nara raa mai, sama leo hatahori mana hambu neketook. Tehuu hatematak ia Lamatuak Yesus lui heni neketook naa numa ai mai ena. Sama leo neni surak nai Susura Malalaok dale nae, “Hatahori neni londa nisak nai ai huuk, ana hambu neketook.”
GAL 3:14 Neu Yesus Karistus mate fo tao nasoi-nasoda ita, babaꞌe-babatik fo Manetualain feen neu Abraham naa ena, naa oo konda neu hatahori nusa-nusak laen nara boe. No dalak naa, basa hatahorir fo mana ramahere reu Karistus bisa simbo Manetualain Dula-dalen fo Ana helu-bartaak naa ena.
GAL 3:15 Toranoo nggara ein! Hatematak ia au ae pake netuduk numa ita leleo-lalaꞌon tungga-tungga faik mai. Mete ma hambu hatahori surak rala susura babaꞌe pusaka, basa boe ma ana lima ree susurak naa, na, susurak naa neni henggenee nisak ena. Hatahori laen ta bisa koka heni hata fo neni surak nai susurak naa dale ena, ma ta bisa surak tamba hata-hata neun bali.
GAL 3:16 Leo naak oo, neu Manetualain ndara fangga hehelu-bartaak no Abraham ma tititi-nonosin boe. Manetualain ta nae, “Au ndara fangga hehelu-bartaak ia ua o tititi-nonosim mara”, nahuu Ana ta helu-bartaa no hatahori noꞌuk. Tehuu Ana helu-bartaa no kada Abraham tititi-nonosin esak ka, ndia Karistus.
GAL 3:17 Dadi talo ia: Manetualain ndara fangga hehelu-bartaak nakahuluk no baꞌi Abraham. Boe ma basa teuk natun haa telu hulu, dei de Ana nakonda anggama hohoro-lalanen neu hatahori Yahudir, nesik sira baꞌin Musa. Leo mae talo naa oo, tehuu Manetualain ta leꞌa falik Ndia hehelu-bartaan fo Ana taon nakahuluk naa boe.
GAL 3:18 Manetualain ta fee babaꞌe-babatik neu Abraham, nahuu ana tao tungga hohoro-lalanek. Tehuu Ana fee babaꞌe-babatik, nahuu Ana helu-bartaa memak fo nae fee mudak neu Abraham numa lele uluk mai. Naa, sama leo kanak esa simbo pusaka numa aman mai. Ana simbon, nahuu aman helu-bartaa memak ena, ta huu kanak naa tao tungga hohoro-lalanek.
GAL 3:19 Hatematak ia au ae atane talo ia: mete ma Manetualain simbok nala baꞌi Abraham no malole nahuu ndia nemeheheren, tao hata de Manetualain tamba seluk anggama hohoro-lalanen nesik baꞌi Musa bali? Ana tamba anggama hohoro-lalanen fo nanori hatahori dae-bafok laeꞌneu sira sala mata-matan. Ndia nanaen fo hatahori leo-laꞌo tungga hohoro-lalanek kara raa hihii-nanaun, losa Abraham tititi-nonosin esa mai. Mete ma tititi-nonosik naa mai ena, ndia Karistus, na, hohoro-lalanek kara raa ta parluu sara ena bali. Neu Manetualain fee hohoro-lalanek anggama Yahudir raa, Ana ta fee matan memak kana. Tehuu Ana pake Ndia atan numa nusa tetuk do inggu temak mai, fo ara renin de loon neu baꞌi Musa liman, dei de baꞌi Musa fee sara reu hatahori Yahudi. No dalak naa, baꞌi Musa dadi neu lelete soa-neu Manetualain no Ndia hatahorin nara.
GAL 3:20 Tehuu neu Manetualain ndara fangga hehelu-bartaak no Abraham, Ana ta pake lelete. Te Ndia mesa kana ndia ndara fangga hehelu-bartaak matak no matak na! No dalak naa, ita bubuluk tae, Manetualain hehelu-bartaan naa, ta neni babanggak lena heni basa hohoro-lalanek kara raa.
GAL 3:21 Neu Manetualain fee anggama hohoro-lalanen naa neu baꞌi Musa, naa laban nasafali no Ndia hehelu-bartaan, do? Taa! Mete ma hambu hohoro-lalanek, fo hatahori dae-bafok bisa tao tunggan de Manetualain simbok kana no malole mita fo ana bisa nasoda, na, hatahori Yahudi hohoro-lalanen bisa tao talo naa. Naa te ta hambu hohoro-lalanek esa boe na, fo hatahori dae-bafok bisa tao tunggan de tao makasufu Manetualain dalen mita fo Ana bisa simbok kana no malole.
GAL 3:22 Sama leo neni surak nai Manetualain Susura Malalaon dale nae, basa hatahorir neka-lili ralan seli ro sala mata-matak. Huu naa de kada hatahori fo mana namahere neu Yesus Karistus, ndia bisa simbo hata fo Manetualain helu-bartaak ena.
GAL 3:23 Neu Karistus bei ta mai, ai hatahori Yahudi neka-lili malan seli mia hohoro-lalanek kara raa, losa ta bisa makamboꞌik. Tehuu losa fain, Manetualain soi dalak fo ai makamboꞌik numa basa hohoro-lalanek kara raa mai, mete ma ai mamahere neu Karistus.
GAL 3:24 Dadi anggama hohoro-lalanen nara raa, sama leo mana manea fo fee nenorik natalolole ita, losa Karistus mai. Tehuu mete ma Ana mai ena, na, dei fo ita bisa tamahere neun, fo leo-laꞌo malole to Manetualain. Huu naa de hatematak ia ita ta parluu mana manea naa ena.
GAL 3:26 Hatematak ia ei dadi miu Manetualain anan nara ena, nahuu ei mamahere neu Yesus Karistus.
GAL 3:27 Ei basa ngga fo mana hambu sarani ena fo dadi miu Ndia hatahorin oo makaesa tebe-tebe mian boe.
GAL 3:28 Basa hatahorir fo mana ramahere neu Karistus, basan sama ta hambu esa laen no esa bali. Dadi leo mae ei hatahori Yahudi, do ta Yahudi, ata do ta ata, touk do inak, basan sama nahuu rakaesa ro Yesus Karistus.
GAL 3:29 Karistus naa, Abraham tititi-nonosin fo Manetualain helu-bartaa memak kana numa lele uluk mai ena. Huu ei makaesa mia Karistus ena, de ei oo dadi miu Abraham tititi-nonosin tebe-tebe ena boe. No dalak naa, ei oo bisa simbo babaꞌe-babatik fo Manetualain helu-bartaa memak fee Abraham naa ena boe.
GAL 4:1 Au fee netuduk esa bali. Kanak esa naena haak fo simbo pusaka numa aman mai, mete ma aman mate. Tehuu mete ma ndia teun bei ta dai, na, ana bei ta bisa simbo pusaka naa, leo mae basa naar neu ko dadi neu ndia enan. Mete ma teun bei ta dai, naa ndia bei sama leo ata-dato, ta mana maena haak fo haꞌi nala ndia malanggan hata-heton.
GAL 4:2 Huu naa de muste hambu hatahori fo mana faduli neun no ndia pusakan. Kanak naa muste tungga mana faduli hihiin, losa fain fo aman naketun ena, dei fo ana bisa simbo nala ndia pusakan.
GAL 4:3 Leo naak oo soa-neu ita boe. Neu Yesus Karistus bei ta mai, ita bei sama leo kakana kadiꞌik naa. Ita bei neka-lili tebe-tebe to dae-bafok duduꞌan ma hihiru-heheon, sama leo ata-dato esa.
GAL 4:4 Tehuu ndaa no fain, Manetualain nadenu Anan mai fo dadi neu hatahori dae-bafok, mita fo hatahori dae-bafok oo bisa neni soꞌuk dadi neu Manetualain anan nara boe. Manetualain Anan naa, leo-laꞌo tungga hatahori Yahudi anggaman hohoro-lalanen, mita fo Ana bisa nakamboꞌik basa hatahorir fo fai bakahulun neka-lili ro hohoro-lalanek kara raa.
GAL 4:6 Huu ei dadi miu Manetualain anan nara ena, de Ana nakonda Ndia Anan Dula-dalen mai, fo maso neni ei dalem mara neu. No dalak naa, ei maena haak moke Manetualain naa, “Ama Bonggik”.
GAL 4:7 De hatematak ia ei ta dadi ata-dato ena fo ta mana naena haak simbo mala pusaka bali. Tehuu ei dadi miu Manetualain anan nara fo mana raena haak simbo rala basa pusaka, fo Ana helu-bartaak ena.
GAL 4:8 Fai bakahulun, neu ei bei ta malela Manetualain, ei tao aom dadi miu ata-dato fo makadedemak basa hata fo ta ndoos ma tao tungga sara.
GAL 4:9 Tehuu hatematak ia ei malela Manetualain ena. Malole lenak au kokolak ae, Manetualain ndia nalela ei. Dadi talo bee losa ei nau fali deak bali. Ei nau makadedemak dae-bafok duduꞌan no hihiru-heheon fo sosoan taa, ma ta raena koasa hata-hata naa, ma tao tungga seluk kasa. Do, ei bei nau neka-lili mia dedeꞌak kara raa fo dadi miu ata-daton bali.
GAL 4:10 Au amanene ena ae, ei makalalaꞌok hohoro-lalanek laꞌe-neu anggama fai malolen nara tungga faik, bulak, ledo-faik lalalin ma teuk fo mae soba-soba tao mamahoko Manetualain dalen.
GAL 4:11 Ia, tao nala au duduꞌang ta namaneu! Boso losak au sosota-mamanggung anori ei losa doo basa ia, dadi hie-hie a mesan ena.
GAL 4:12 Toranoo susue nggara ein! Au oke fo ei leo-laꞌo makamboꞌik numa dedeꞌak kara raa mai, sama leo au ia. Au leo-laꞌo akamboꞌik numa anggama hohoro-lalanen mai ena, sama leo ei hatahori ta Yahudi. Fai bakahulun, neu ita bei sama-sama, au ta ameda ita susa-sonak numa ei mai.
GAL 4:13 Ei basa ngga bubuluk mae, fai maneuk kara, neu au bei fo mai makasososan fo tui-bengga Hara Lii Malole naa neu ei, au ao-mbaang male-maꞌa.
GAL 4:14 Leo mae talo naa oo, tehuu ei ta husi heni au nahuu ei simbok mala au boe, nok bali au ia Manetualain atan numa nusa tetuk do inggu temak mai. Lenak bali ei simbok mala au, nok bali au ia ndia Yesus Karistus.
GAL 4:15 Faik naa, ita basa ngga tamahoko talan seli. Tehuu tao hata de hatematak ia ta talo naa ena bali? Naa te faik naa ei sue malan seli neu au, losa-losak ei sadia doꞌi ei mata deꞌe heli-helim mara soa-neu au.
GAL 4:16 Huu au kokolak tetebes soa-neu ei, de hatematak ia ei duꞌa mae, au ia dadi uu ei musum, do?
GAL 4:17 Mana kedi-irak kara raa ta nau au anonoo ua ei, de ara manggate fufudi-hohodo ei, fo tungga basa hatahori Yahudi anggaman hohoro-lalanen lalaꞌen. Ara nau fo ei mbute-mue tungga kada sira hihii-nanaun.
GAL 4:18 Tehuu mete ma ei manggate tao hata fo neulauk kara, na, naa malole boe! Leo mae au sama-sama ua ei do, taa do, tao kada malole a mesan leo.
GAL 4:19 Ana susue nggara ein! Hatematak ia au aue-osa fafandek lima-eing seluk fee ei, losa au sama leo inak mana nameda hedis sangga bonggi. Au ta hahae aue-osa, losa ei dalem mara sama leo Karistus dalen ena.
GAL 4:20 Tehuu hatematak ia au ta bubuluk ae tao hata soa-neu ei bali! Au daleng hii nalan seli fo uu kokolak asare matak ua ei, mita fo au ta kokolak barakaik talo ia.
GAL 4:21 Mete ma ei nau leo-laꞌo tungga hatahori Yahudi anggaman hohoro-lalanen, na, malole lenak ei malela makahuluk hohoro-lalanek naa sosoan.
GAL 4:22 Sama leo nai Manetualain Susura Malalaon hambu tutuik laꞌe-neu sira baꞌin Abraham ana toun dua. Ana hambu anak esa numa ndia ata-dato inan mai, ma esa bali numa ndia sao huun fo ta ata-dato mai.
GAL 4:23 Ata-dato naa bonggi nala anan, nahuu tungga hatahori dae-bafok hihii-nanaun. Tehuu saon fo ta ata-dato naa bonggi nala anan, nahuu Manetualain helu-bartaa memak talo naa soa-neu Abraham.
GAL 4:24 Ina kaduak kara raa, dadi lololek fo natudu neu hehelu-bartaak dua fo Manetualain ndara fangga no hatahori dae-bafok. Hagar natudu hehelu-bartaak esa fo Manetualain ndara fanggan no baꞌi Musa numa letek Sinai, neu Ana nakonda hatahori Yahudi anggaman hohoro-lalanen nara. Hatahori fo mana neka-lili neu anggama hohoro-lalanen naa, sira oo ata-dato sama leo Hagar boe.
GAL 4:25 Mamanak naa nai letek Sinai nai dae Arab, ndia oo sama leo Hagar boe. Basa hatahori Yerusalem mara hatematak ia fo bei mana neka-lili ro anggama Yahudi hohoro-lalanen naa, sira oo ata-dato sama leo Hagar boe.
GAL 4:26 Tehuu Sara naa hehelu-bartaak bakahuluk fo Manetualain ndara fanggan no baꞌi Abraham, natudu kota Yerusalem laen esa nai nusa tetuk do inggu temak. Manetualain anan nara mana leo rai naa, ta ata-dato. Sira iar, hatahori nekemboꞌik fo ta mana neka-lilik ro anggama hohoro-lalanen nara. Huu naa de sira sama leo ai inam Sara, Abraham sao huun naa.
GAL 4:27 Sama leo neni surak nai Manetualain Susura Malalaon dale nae: “Wei! Inak kala tedis, ee! Tao mamahoko o dalem leo! Wei! Inak ta mana mameda hedi bobonggik! Soda no nemehokok leo! Inak fo dalen mana makalulutuk, nahuu saon ta tao matak neun ena bali, neu ko ana hambu anak noꞌun lena heni numa inak kasaok mai.”
GAL 4:28 Dadi toranoo nggara ein! Lele uluk Manetualain helu-bartaa fo fee Abraham anak. Tehuu dook ka dei de Manetualain tao natetu Ndia hehelu-bartaan, de fee Sara bonggi nala Isak fee Abraham. Ita oo sama leo Isak boe, nahuu Manetualain helu-bartaa fee tititi-nonosik laen soa-neu Abraham.
GAL 4:29 Lelek naa ata-dato anan fo bonggin tungga hatahori dae-bafok hihii-nanaun naa, namoꞌo mamais ena, ana tao doidoso Isak fo bonggin tungga Manetualain Dula-dalen hihii-nanaun. Naa oo sama leo hata fo mandadik hatematak ia boe.
GAL 4:30 Manetualain Susura Malalon surak nae, “Husi heni ata-dato naa no anan. Huu ata-dato naa anan, ta naena haak fo simbo pusaka. Kada sao huun fo ta ata-dato anan ndia naena haak.”
GAL 4:31 Dadi talo ia, toranoo nggara ein! Ita iar, ta sama leo ata-dato anan, nahuu ita ta neka-lili to hatahori Yahudi anggaman hohoro-lalanen bali. Ita iar, sama leo anak numa Abraham sao huun fo ta ata-dato mai, nahuu ita tamahere neu Yesus Karistus.
GAL 5:1 Lele uluk hatahori Yahudir lemba-rasaa rala berak numa sira anggaman hohoro-lalanen nara mai. Tehuu hatematak ia Karistus lui heni berak naa numa hatahori fo mana namahere neun mai ena. Huu naa de hatematak ia ita takamboꞌik ena. De ei boso hambu kedi-irak fo lemba-masaa seluk hohoro-lalanek kara raa, sama leo ata-dato!
GAL 5:2 Nenene, ee! Au ia, Paulus fo mana kokolak ia. Mete ma ei simbo sunat fo tungga hatahori Yahudir hohoro-lalanen, na, Karistus mamaten fo nakamboꞌik ei, ta hambu sosoan faa boe na bali.
GAL 5:3 Mete ma hatahori simbo sunat, na, ana oo muste lemba-nasaa seluk basa hohoro-lalanek kara raa bali boe. Ei masaneda, do taa? Fai bakahulun au afada memak ena.
GAL 5:4 Hatahori fo mana nau pake hohoro-lalanek fo tao Manetualain bisa simbok kana no malole, ana tao aon lenggo feꞌe numa Karistus mai. No dalak naa, ana siꞌu heni Manetualain dale susuen ena.
GAL 5:5 Tehuu Manetualain Dula-dale Malalaon soi dalak fo ita tamahere neu Yesus Karistus. Huu naa de ita tahani a tae, neu ko Manetualain henggenee nala ita nae, ita hatahori dale ndoos.
GAL 5:6 Leo mae hatahori sunat do, taa do, naa nenenin taa. Tehuu nenenin lenak ndia hatahori namahere neu Karistus, ma ana oo sue-lai neu hatahori laen boe.
GAL 5:7 Fai bakahulun ei leo-laꞌo tungga dala ndoos ena. Tehuu hatematak ia see ndia puta-pai nala ei ena, de losa ei ta tungga dalak naa bali?
GAL 5:8 Nenori puta-paik fo ei mamanenek naa, ta numa Manetualain mai. Naa te Ndia naa, ndia noke nala ei fo dadi miu Ndia hatahorin ena.
GAL 5:9 Hata fo ara fee nenorik, makasososan kada dedeꞌa deꞌek esa do duak ka. Tehuu doo-doo boe ma neu ko nenorik naa tao nala ei duduꞌam dadi nakalulutu. Sama leo laru taꞌik baꞌu anak fo hatahori babalik kana no tarigu, fo sangga tao roti. Doo-doo boe ma, laru taꞌik naa tao nala tarigu neni babalik naa kaifuu.
GAL 5:10 Huu ita takaesa to ita Lamatuan Yesus Karistus ena, de au amahena tebe-tebe ae, neu ko Ana tao ei mamahere falik hata fo au fee nenorik ena. Ma neu ko Manetualain mesa kana ndia hukun see a mesan fo mana nakalulutu ei nemeheherem ena.
GAL 5:11 Talo ia, toranoo nggara ein! Mete ma au fee nenorik ae, hatahori muste hambu sunat, na, neu ko au ta hambu tuni-ndenik bali, sama leo hatematak ia. Ma hatahori Yahudir ta siꞌu heni au nenoring bali laꞌe-neu Yesus mamaten numa ai ngganggek lain.
GAL 5:12 Tehuu hatahori fo mana tao panggananaa ei laꞌe-neu sunat naa, elan numa naa fo ara reu kedi heni sira ‘mamaen’ nara leo!
GAL 5:13 Toranoo nggara ein! Manetualain nakamboꞌik ei ena, fo ei hae neka-lili mia anggama hohoro-lalanen hihii-nanaun. Tehuu boso duꞌa mae, ei hambu nekemboꞌik ena fo leo-laꞌo tungga ei hihii-nanaum mara! Ndondoon ndia ei muste leo-laꞌo masue-laik, ma ei muste maono-lalau esa no esa leo bali ata-dato naono-lalau ndia lamatuan.
GAL 5:14 Sama leo neni surak nai Manetulain Susura Malalaon dale nae, “O muste sue hatahori laen nara, sama leo o sue o ao heli-helim.” Mete ma ei tao tungga kada hohoro-lalanek kisek ia, na, ei tao tungga basa hatahori Yahudi hohoro-lalanen sosoan lalaꞌen ena.
GAL 5:15 Tehuu mete ma ei esa raꞌu nala esa, do esa ruꞌi nala esa, na, mete leo! Ta dook ka te ei makalulutu ei ao heli-helim mara ena.
GAL 5:16 Au hahambun talo ia: mete ma ei tungga Manetualain Dula-dalen hihii-nanaun, ei ta tungga hatahori dae-bafok hihii-nanaun bali.
GAL 5:17 Hatahori dae-bafok hihii-nanaun, ta tungga Dula-dalek hihii-nanaun. Ma Dula-dalek hihii-nanaun ta tungga hatahori dae-bafok hihii-nanaun. Te dua sara esa laban esa na! Huu naa de ei ta bole tao tungga kada ei hihii-nanaum bali.
GAL 5:18 Tehuu mete ma Manetualain Dula-dalen nalangga ei, na, ei ta neka-lili mia hohoro-lalanek kara raa bali.
GAL 5:19 Hatahori fo mana leo-laꞌo tungga hatahori dae-bafok hihii-nanaun naa, haꞌi netuduk leo: hatahori mana laꞌok sala ro hatahori fo ta sira saon, hatahori duduꞌan fo manggenggeok, hohongge-lelenak ta rameda mamaek,
GAL 5:20 mana songgo-tanggu nitu do teka-dokik, mana ue musu, soa manggado bafak, dalen soa mbiri esa no esa, soa tao mue-anggik, mana duduꞌa kada ao heli-helin, soa dudunggu hatahori, soa kada nehuuk,
GAL 5:21 soa horo mbalak, soa ninu mafuk, feta setelelek, ma mana tao salak laen nara. Fai bakahulun au fee ita nesenedak ena ae, hatahori fo mana tao tungga dala leo naak, ara ta bisa dadi reu Manetualain hatahorin.
GAL 5:22 Tehuu hatahori fo mana leo-laꞌo tungga Manetualain Dula-dalen hihii-nanaun, neu ko Dula-dalek naa oꞌofe-fafaen fo taon dadi neu hatahori mana masue-laik, dalen mana mbenak, mana hii mole-dame, dale loak ta mana namanasa lai-laik, dalen malole no hatahorir, hii tulu-fali hatahorir, mana hii toꞌu nahere hehelu-bartaan,
GAL 5:23 dalen neulauk neu basa hatahorir, ma mana bisa nanea natalolole aon. Ta hambu hohoro-lalanek esa boe na, ndia kaꞌi tatao-nonoꞌi malole iar.
GAL 5:24 Hatahori fo mana maso dadi neu Yesus Karistus hatahorin ena, ana ta tungga hatahori dae-bafok hihii-nanaun ena bali. Hatahori dae-bafok hihii-nanaun fo tao manggarauk kara raa neni paku nisak sama-sama ro Yesus numa ai ngganggek lain.
GAL 5:25 Dadi mete ma Manetualain Dula-dalen fee masoda beuk neu ita ena, na, muste tao tungga taa-taa neu Ndia hihii-nanaun.
GAL 5:26 Huu naa de ita boso hihiik ka hambu hada-horomatak, boso hii esa laban esa, ma dalem mara boso mbiri esa no esa bali.
GAL 6:1 Toranoo nggara ein! Mete ma hatahori kamaherek esa tao salak, na, ei mana malela tebe-tebe Manetualain Dula-dalen hihii-nanaun, miu kokolak mian pake dale neulauk. Basa boe ma mia falik kana, fo ana tungga Manetualain eno-dala ndoon. Tehuu manea ei aom mara fo boso tuda tungga ndia salan.
GAL 6:2 Mete ma hatahori hambu susa, na, ei laen tulu-fali neun. No dalak naa, ei tao tungga Karistus hohoro-lalanen.
GAL 6:3 Mete ma hambu hatahori fo mana nakadedemak aon nae, ndia lena heni hatahori laen, naa te ta talo naa, na, ana kedi nala ndia ao heli-helin.
GAL 6:4 Dadi hatahori esa-esak muste parisa hata fo ndia taok. Mete ma hata fo ndia taok naa malole ena, neu ko ana nameda dai ena. Boso makasasamak kana mia hatahori laen.
GAL 6:5 Au kokolak talo naa, nahuu hatahori esa-esak muste naselu-nataa aon hata fo ndia taok.
GAL 6:6 Tehuu hatahori fo mana simbok Manetualain nenorin, ana muste baꞌe ndia ue-osan buna-boan, fo tulu-fali hatahori fo mana nanori ndia.
GAL 6:7 Masaneda, ee! Manetualain bubuluk basa-basan. De boso kedi-ira ei ao heli-helim, ma boso soba-soba kedi-ira neu Ndia. Hata fo hatahori sele-tanden nai osin, neu ko ana hambu falik ndia buna-boan.
GAL 6:8 Leo naak oo, mete ma hatahori tao manggarauk tungga ndia hihii-nanaun boe, na, neu ko ana hambu nala ndia leleo-lalaꞌo makalulutun. Tehuu mete ma hatahori tao hata fo neulauk tungga Dula-dale Malalaok hihii-nanaun, neu ko hatahori naa hambu nala masodak tetebes fo ta mana ketuk.
GAL 6:9 Huu naa de ei boso mbera tao basa hata fo neulauk. Te ndaa no fain, ita oo hambu tala buna-boa neulauk boe, sadi ita takatataka takandoo.
GAL 6:10 Dadi mete ma ita bei hambu lelak, na, ita tao memak hata fo neulauk soa-neu basa hatahorir, lenak bali soa-neu ita toranoo kamaheren nara.
GAL 6:11 Hatematak ia au surak aong susurak ia, pake huruf moꞌok kara.
GAL 6:12 Masaneda, ee! Mana puta-paik kara oo ramahere neu Yesus Karistus mana matek numa ai ngganggek lain boe. Tehuu ara rae rakasetik ei fo simbo mala sunat, nahuu ara ramataꞌu hatahori Yahudi laen tuni-ndeni sara. Mete ma ara fee nenorik rae, Manetualain oo simbok no malole hatahori fo ta mana tungga hohoro-lalane sunat boe. Huu naa de ara sorodododo mbali hatahori Yahudir.
GAL 6:13 Tehuu leo mae ara sunat ena oo ara ta tao tungga basa anggama hohoro-lalanen nara lalaꞌen boe. Ara nau ei simbo sunat, fo dadi miu sira hatahorin. No dalak naa, sira partein soꞌuk kasa.
GAL 6:14 Tehuu au ia nau kada akadedemak ita Lamatuan Yesus Karistus. Ana mate numa ai ngganggek lain, fo nakamate dedeꞌa manggarauk kara fo hatahori taok tungga dae-bafok hihii-nanaun. Huu naa de au ta tao matak neu dae-bafok hihii-nanaun.
GAL 6:15 Sunat do, ta sunat do, naa nenenin taa. Tehuu nenenin lenak ndia ita simbo masoda beuk numa Manetualain mai.
GAL 6:16 Au oke-hule fo Manetualain natudu susue-lalain neu basa hatahorir fo mana tungga au nenoring ia, mita fo ara bisa leo-laꞌo no mole-damek ma lino-lendek, boe ma ratudu dale kasian esa no esa. Te ara dadi reu Manetualain hatahori nusa beun ena na.
GAL 6:17 Ndondoon ndia, au ta nau ena fo hatahori kada tao babalik au no dedeꞌak ia bali. Au ao-inang hambu foar ena, nahuu au aono-lalau Yesus Karistus.
GAL 6:18 Toranoo nggara ein! Au oke-hule fo ita Lamatuan Yesus Karistus natudu dale susuen neu ei basa ngga. Baꞌu kada naa! Hara masodak numa au mai, Paulus
EPH 1:1 Hara masodak numa au mai, Paulus. Au surak susurak ia soa-neu ei basa ngga, fo mana dadi neu Yesus Karistus hatahorin marai kota Epesus ena, ma mana makatataka leo-laꞌo no lolo-laok tungga Ndia hihii-nanaun. Ana ndia nadenu au tungga Manetualain hihii-nanaun.
EPH 1:2 Manetualain naa, ita Aman. Ma Yesus Karistus naa, ita Lamatuan. Au oke-hule fo Ara ratudu dale susuen nara fo ei leo-laꞌo no mole-damek ma lino-lendek.
EPH 1:3 Koa-kio neu Manetualain! Koa-kio neu ita Lamatuan Yesus Karistus Aman Manetualain. Lamatuak fee ita basa babaꞌe-babatik mata-matak kara numa nusa tetuk do inggu temak mai ena, nahuu ita dadi teu Yesus Karistus hatahorin ena.
EPH 1:4 Neu bei ta hambu dae-inak, Manetualain sue-lai ma here nala ita ena, fo dadi teu Karistus hatahorin. Ana nau fo ita leo-laꞌo no lolo-laok, fo hatahorir ta bisa rakasasaꞌek salak neu ita.
EPH 1:5 Ana naketu memak kana numa lele uluk mai ena, fo pake Yesus Karistus tao ita dadi teu Ndia anan. Ia, ndia tao nala Ndia dalen namahoko.
EPH 1:6 Huu naa de ita koa-kio neun. Huu Ana natudu dale susuen neu ita ena, fo ita bisa leo-laꞌo takaesa to Ndia Ana susuen.
EPH 1:7 Leo mae lele uluk ita ta leo-laꞌo no lolo-laok tungga Manetualain eno-dala masodan, tehuu Ana natudu dale susuen ma nadenu Anan naa, fo titi heni daan losa maten. No dalak naa, Ndia Anan tefa-soi nala ita numa ita sala-singgon nara mai.
EPH 1:8 Huu Ndia susuen sudi selik kana neu ita, de Ana oo tao manggaledo ita dalen nara fo ita bisa talela Ndia nanaen boe.
EPH 1:9 Lele uluk Manetualain bei ta nafada hatahori basa Ndia nanaen lalaꞌen. Tehuu hatematak ia, tungga Ndia hihiin, Ana tao nala ita talela ena tae, numa lele uluk mai Ana naketu nae pake Yesus Karistus ena fo tao hatahori dae-bafok mole-dame no Manetualain.
EPH 1:10 Ma neu ko losa fain, Yesus Karistus oo dadi neu Malanggan fo koladu basa hata marai dae-inak ma marai nusa tetuk do inggu temak boe.
EPH 1:11 No ita takaesa to Karistus, huu naa de ita oo simbo tala babaꞌe pusaka numa Manetualain mai boe. Numa makasososan mai, Ana here nala ai hatahori Yahudir, fo dadi miu Ndia hatahorin nara. Ndia nanaen nae pake ai fo soi dalak fee hatahori nusa-nusak laen nara, mita fo basa hatahorir bisa ramahere neu Karistus. Basa iar dadi, tungga hata fo Ana naketu memak kana ena. No dalak naa, ita basa ngga bisa takadedemak Manetualain naden fo ta neni babanggak.
EPH 1:13 No ai soi dalak ena, huu naa de ei numa hatahori nusa-nusak laen mai oo bisa maso dadi miu Karistus hatahorin boe, sadi ei mamahere Ndia Hara Lii Malolen fo tetebes. Hara Lii Malole naa tao nasoi-nasoda ei. Mete ma ei mamahere talo naa, na, ei oo simbo mala Manetualain Dula-dale Malalaon fo Ana helu-bartaa ena boe. Dula-dale Malalaok naa, sama leo dededek fo dadi neu tanda nae, ei dadi miu Ndia ena huun ena.
EPH 1:14 Ndia Dula-dale Malalaon oo dadi tanda nemeheherek boe nae, neu ko Manetualain fee basa hata fo Ana helu-bartaa ena, losa tefa-soi nala ita fo dadi teu Ndia hatahorin nara. Huu naa de ita koa-kio neun.
EPH 1:15 Au amanene noꞌuk ka laꞌe-neu ei nemeheheren neu ita Lamatuan Yesus Karistus, ma ei susue-lalaim soa-neu hatahori kamaherek kara ena. Huu naa de
EPH 1:16 au ta hahae oke makasi neu Manetualain.
EPH 1:17 Au hule-haradoi ae, “Ama Bonggik! Amak naa, au Lamatuang Yesus Karistus Manetualain. Ma Amak naa, ta neni babanggak. Au oke-hule fo Amak fee Amak Dula-dalen neu hatahori Epesus asa, mita fo ara ralela dedeꞌak bee ndia ndaa, ma bisa ralela dai lena no malole neu Amak.
EPH 1:18 Au oke-hule fo Amak Manetualain buka sira duduꞌan, ma tao manggaledo dalen nara, mita fo ara bisa ralela basa hata fo Amak helu-bartaa ena nae fee neu sara. Au oo nau fo ara bisa ralela pusaka fo Amak helu-bartaa nae fee sara naa boe. Te pusaka naa, ta hohoꞌa ndoos na!
EPH 1:19 Au oo oke-hule fo Amak tulun, fo ara bisa ralela dai lena no malole Amak koasan fo ta neni babanggak boe. Amak pake koasa naa, fo tulu-fali neu Amak hatahori kamaheren nara.
EPH 1:20 Manetualain koasan naa, ta neni babanggak! Ana pake koasa naa ena fo tao nasoda falik Karistus numa mamaten mai. Basa boe ma Manetualain soꞌuk Karistus neni nusa tetuk do inggu temak neu, ma nanggatutuuk kana neu Ndia boboa konan, neu mamana hada-horomatak mateꞌen.
EPH 1:21 Ana dema lena heni basa hata marai dae-inak, ma marai nusa tetuk do inggu temak mai ena. Ana oo dema lena heni basa koasar lalaꞌen, ma basa mana toꞌu parendar mai boe. Ana toꞌu Ndia koasan ta neni babanggak naa, ta kada neu hatematak ia. Tehuu Ana oo toꞌu nakandoo losa doon naa neu boe.
EPH 1:22 Manetualain mesa kana ndia tao nala basa-basan doꞌor neu Karistus. Ma Ana oo ndia soꞌuk Karistus dadi neu Langgak fo koladu basa hata fo mana makaesa ro hatahori kamaherek kara boe.
EPH 1:23 Dadi mete ma Ana dadi neu Langgak, na, ita hatahori kamaherek kara dadi sama leo Ndia ao-inan. Dei fo ita ndia takababasak basa ue-osar fo Ana nakalalaꞌok kana, neu Ana bei numa dae-inak ia. Ana ndia naena koasa fo tao basa-basan dadi, tungga Manetualain nanaen.” Au huhule-haradoing soa-neu ei talo naa.
EPH 2:1 Fai bakahulun ei lena-langga Manetualain parendan nara, ma tao salak mata-matak kara. Huu naa de Ana tao ei sama leo hatahori fo mana matek ena.
EPH 2:2 Fai bakahulun ei leo-laꞌo tungga dae-bafok ia hihii-nanaun, ma tungga nitur malanggan hihii-nanaun. Losa hatematak ia nitu naa bei fufudi-hohodo hatahori dae-bafok, fo ara laban Manetualain.
EPH 2:3 Fai bakahulun ita oo leo-laꞌo talo naa boe, losa hata a mesan fo ita meda titan do duꞌa hambun, na, ita tao tungga kada ita hihii-nanaun. Ita tao manggarauk sama leo hatahori laen nara, huu naa de Manetualain namanasa nalan seli neu ita,
EPH 2:4 ma Ana oo tao ita sama leo hatahori mates fo mana lenggo feꞌe numa Ndia mai boe. Leo mae talo naa oo, tehuu Ndia dalen tuda kasian neu ita, nahuu Ana sue nalan seli neu ita boe. Huu naa de Ana natudu dale susuen no dalak nadenu Yesus Karistus mai fo fee masoda beuk neu ita. Dadi Manetualain ndia tao nasoi-nasoda ita, nahuu Ndia dale susuen.
EPH 2:6 Yesus Karistus mate, tehuu Manetualain tao nasoda falik kana numa mamaten mai. Boe ma Manetualain soꞌuk kana fo toꞌu parenda nai nusa tetuk do inggu temak. Manetualain oo tao talo naa neu ita boe. Ana fee masoda beuk neu ita, basa boe ma Ana soꞌuk ita, ma ita toꞌu parenda sama-sama to Karistus nai nusa tetuk do inggu temak.
EPH 2:7 No dalak naa, mulai numa hatematak ia losa doon naa neu, Manetualain natudu susuen noꞌuk ka, ma Ndia dale susuen ta neni babanggak naa, nahuu ita tamahere neu Yesus Karistus.
EPH 2:8 Neu faik fo ei mamahere Karistus, Manetualain tao nasoi-nasoda ei nahuu Ndia dale susuen. Ana tao nasoi-nasoda talo naa, ta huu Ana nau bala hata fo ei taok. Huu masoi-masodak naa dadi neu hadia fo Ana fee mudak neu ei, de ei ta maena dalak fo mabafa loa no hata fo ei taok.
EPH 2:10 Ita nai dae-bafok ia, nahuu Manetualain ndia adu nala ita. Ma Yesus Karistus fee masoda beuk neu ita, mita fo nai ita leleo-lalaꞌon dale ita tao takandoo basa hata fo malole, fo Manetualain naketu memak kana numa lele uluk mai ena.
EPH 2:11 Toranoo nggara ein! Ei bubuluk ena mae, hatahori Yahudir toꞌu rahere sira hohoro-lalane sunat, ma ara rakadadaek ei hatahori ta Yahudir, nahuu ei ta tao tungga sira hohoro-lalanen naa! Naa te, naa kada hohoro-lalanek soa-neu kada hatahori dae-bafok ao-mbaan, tehuu ta soa-neu hatahori dae-bafok dale kuru-eron.
EPH 2:12 Neu ei bei ta mamahere neu Yesus Karistus, ei ta maena haak fo maso dadi miu Manetualain hatahorin. Fai bakahulun ei bei ta maso nai Manetualain hehelu-bartaan, fo Ana ndara fangga memak no Abraham ma tititi-nonosin nara ena. Lelek naa, ei leo numa dae-bafok ia ta no nemehenak neu Manetualain, nahuu ei bei dadi miu hatahori deak,
EPH 2:13 fo lenggo feꞌe numa Manetualain mai. Tehuu hatematak ia, Yesus Karistus soi dalak ena fo ei bisa makaesa mia Manetualain. Karistus mate fo tao makasufu Manetualain dalen, fo ei bisa mole-dame mian, ma bisa dadi miu Ndia hatahorin nara.
EPH 2:14 Fai bakahulun ai hatahori Yahudi ta bisa leo-laꞌo no mole-damek mia ei hatahori nusa-nusak laen. Nok bali hambu tembok fo tao ita esa no esa tabingga baꞌek. No Yesus Karistus mate numa ai ngganggek lain, boe ma Ana tao nandefa heni tembok naa, mita fo fai uluk ita mana musuk kara bisa mole-dame dadi sama leo hatahori nusak esa.
EPH 2:15 Fai bakahulun hatahori Yahudir sangga dalak fo leo-laꞌo malole ro Manetualain, pake sira anggaman hohoro-lalanen nara. Tehuu neu Yesus Karistus mate, Ana nggari heni dala raak naa ena, ma tao dala beuk, mita fo hatahori Yahudir ro hatahori nusa-nusak laen nara, dua sara bisa leo-laꞌo malole ro Manetualain. No dalak naa, basa sara rakaesa dadi reu hatahori nusa beuk esa fo leo-laꞌo ro mole-damek.
EPH 2:16 Dadi Karistus mate numa ai ngganggek, fo tao sira bubua kaduak mana musuk kara raa dadi reu esa, ma neni falik kasa reni Manetualain reu. Karistus koka heni basa hata fo fai bakahulun tao nala sara ramusuk.
EPH 2:17 Ana neni dae-bafok ia mai, fo neni Hara Lii Malole fee hatahori Yahudir sama-sama ro basa hatahori laen nara nae, “Fai bakahulun ei leo-laꞌo no mamusuk, tehuu hatematak ia hambu dalak ena fo ei bisa leo-laꞌo no mole-damek esa no esa.”
EPH 2:18 Dadi ai hatahori Yahudir mia ei fo ta Yahudir, sama-sama hambu dalak fo teni ita Aman Manetualain teu, nahuu Yesus soi dalak fee ita basa ngga ena. Ma Manetualain Dula-dale Malalaon oo natudu dalak naa neu ita basa ngga boe.
EPH 2:19 No Yesus Karistus ue-tataon, huu naa de ei hatahori ta Yahudi, fo ta mana maena haak hata esa boe na, ta dadi hatahori deak ena bali. Hatematak ia ei maena haak dadi miu rau-inggu nai nusa tetuk do inggu temak, nahuu ei maso dadi miu Manetualain nufanelun ena.
EPH 2:20 Naa, haꞌi netuduk leo Manetualain nae nambaririik uma esa. Ana tao batu netehuun, ndia Yesus Karistus. Boe ma Ana tao fanderen, sira Ndia mana toꞌu dedeꞌan ma nedenun nara. Basa boe ma Ana totodo batur reu basa naar lain. Batur raa, sira ita basa ngga fo mana maso dadi teu Ndia nufanelun ena.
EPH 2:21 Uma naa nambariik matea ndoos, nahuu batur raa neni tia-totodo neulauk kara nai batu netehuuk naa lain. Ma uma naa tamba faik tamba nambaloa, losa neu ko hatahori neni naa neu fo hule-haradoi neu Manetualain.
EPH 2:22 Dadi hatematak ia Manetualain tao ena fo ei hatahori ta Yahudir oo dadi sama leo batu, sama-sama mia ai hatahori Yahudir boe. Manetualain tia-totodo nala ita basa ngga, dadi mamana leleok soa-neu Ndia Dula-dalen.
EPH 3:1 No Manetualain ta bibingga hatahori Yahudi ma hatahori ta Yahudi, huu naa de Ana nadenu au, Paulus, fo afada laꞌe-neu Yesus Karistus Hara Lii Malolen neu ei hatahori ta Yahudir marai kota Epesus. Au akalalaꞌok au ue-osang ena, losa dadi uu hatahori bui ena.
EPH 3:2 Ei oo bubuluk no tetuk mae, Manetualain nadenu au, nahuu Ana nae natudu dale susuen neu ei boe.
EPH 3:3 Memak fai bakahulun Manetualain bei ta nafada hatahori dae-bafok laꞌe-neu hata fo Ana naketun fee hatahori ta Yahudi ena. Tehuu hatematak ia Ana nafada dedeꞌak ia neu au ena. Ia ndia au surak no keꞌu-keꞌun nai ia soa-neu ei.
EPH 3:4 Mete ma ei lees basa ena, na, ei oo bisa malela Manetualain nanaen laꞌe-neu Yesus Karistus fo Ana nafadan neu au ena boe.
EPH 3:5 Fai bakahulun hatahori dae-bafok bei ta nalela Manetualain nanaen. Tehuu hatematak ia Ana pake Ndia Dula-dalen fo nafada nanaen naa neu Ndia mana toꞌu dedeꞌan, ma nedenun nara.
EPH 3:6 Numa fai bakahulun mai, Manetualain naketu basa ena talo ia: mete ma hatahori ta Yahudir ramahere neu Yesus Karistus Hara Lii Malolen, na, ara oo bisa maso dadi reu Manetualain anan nara, sama leo hatahori Yahudir boe. Huu naa de hatematak ia, ita basa ngga dadi teu nufaneluk esa ena, ma ita sama-sama bisa simbo babaꞌe-babatik numa ita Aman Manetualain mai.
EPH 3:7 Manetualain natudu dale susuen ma here nala au dadi neu Ndia nedenun. Ana oo fee koasan neu au fo akalalaꞌok Ndia ue-osan boe.
EPH 3:8 Numa basa Manetualain hatahorin mai, au ia kadiꞌi anan lenak. Leo mae talo naa oo, tehuu Manetualain here nala au fo akalalaꞌok Ndia ue-osan ta neni babanggak boe. Ana nau fo au afada hatahori ta Yahudir laꞌe-neu Karistus dale susuen ta mana basak.
EPH 3:9 Mulai numa Manetualain adu dae-bafok ia mai, Ndia nanaen fo nae nadenu Karistus mai, lele uluk bei nemeninok. Tehuu hatematak ia Ana nau fo au fee hatahorir ralela laꞌe-neu Ndia nanaen naa.
EPH 3:10 Manetualain nanaen naa nae, Ndia malelan seli. Ma Ana nae pake Ndia hatahorin nara fo natudu Ndia malelan neu basa koasar ma basa mana parenda makiu-makahatuk marai lalai lalaꞌen.
EPH 3:11 Neu Ana bei ta adu dae-bafok ia, Ana naketu basa fo nae nasoi dalak fo tao nasoi-nasoda hatahori dae-bafok. De Ana pake ita Lamatuan Yesus Karistus, fo tao tungga talo naa.
EPH 3:12 Huu naa de ita mana mamahere neu Yesus Karistus ena, hae tamataꞌu mai kokolak to Manetualain bali. Ana nau simbok ita, sudi faik bee a mesan.
EPH 3:13 Masaneda, ee! Au doidoso nahuu au aono-lalau ei hatahori ta Yahudir. Leo mae talo naa oo, tehuu ei dalem mara boso babati boe. Huu au lemba-asaa ala doidosok ia, mita fo ei simbo mala neulaun.
EPH 3:14 Neu au duꞌa ala Amak Manetualain dale susuen ta neni babanggak naa, boe ma au sendek luu-langgang fo oke makasi neun.
EPH 3:15 Huu basa nufaneluk marai dae-bafok ma marai nusa tetuk do inggu temak, Aman Ndian ena.
EPH 3:16 Au hule-haradoi fo Ana fee babaꞌe-babatik noꞌun seli neu ei, tungga Ndia dale susuen fo mana sudi selik kana. Au oke-hule fo Ana nakonda Dula-dalen mai, ma fee koasa, mita fo ei dalem mara dadi ratea.
EPH 3:17 Au oke-hule fo Yesus Karistus nasoda nai ei dalem mara, nahuu ei mamahere makandoo neun. Ma au oo hule-haradoi fo ei leo-laꞌo makaesa mia Ndia susuen boe, sama leo ai huuk boe natea, nahuu okan nandoro seku dale neu.
EPH 3:18 Au oo hule-haradoi boe, fo ei mia basa Manetualain hatahorin, bisa sama-sama malela Karistus susue-lalain fo hatahori dae-bafok ta bisa dou ralan. Huu susue-lalaik naa, moꞌon seli, loan seli, deman seli ma noꞌun seli! Au oo hule-haradoi fo ei bisa mameda mita Ndia susuen boe, losa susuek naa tao nasofe ei dalem mara ma ei masodam mara.
EPH 3:20 Manetualain koasan ta neni babanggak, lena heni basa hata fo ita bisa tokek, ma basa hata fo ita bisa duꞌak. Ma Ana pake koasa ta neni babanggak naa, fo oꞌofe-fafae nai ita dalen dale.
EPH 3:21 Huu naa de mai fo ita mana makaesa to Yesus Karistus, takadedemak kana! Koa-kio takandoo neun, numa hatematak ia losa doon naa neu. Tebe talo naa!
EPH 4:1 Au akalalaꞌok au Lamatuang ue-osan ena, losa au dadi uu hatahori bui. Dadi hatematak ia, au nau kokoe ei fo leo-laꞌo ndaa no dala-hadak ma no ndoos tungga Manetualain hihii-nanaun, huu Ana noke nala ei dadi miu Ndia hatahorin ena.
EPH 4:2 Huu naa de ei muste leo-laꞌo no nekeloloe aok, ma leo-laꞌo no neulauk esa no esa. Ei muste madale naruk ma esa nalela esa hihii-nanaun, fo ei leo-laꞌo no esa sue esa. Mete ma numa ei mai, ketuk sangga kada salak no ndia nonoon, na, boso mambeda dalek.
EPH 4:3 Maote tebe-tebe fo leo-laꞌo no mole-damek esa no esa, nahuu Manetualain Dula-dalen tao nakaesa ei ena.
EPH 4:4 Yesus Karistus hatahorin nara dadi reu esa ena, sama leo Ndia ao-ina heli-helin. Ma basa sara oo simbok Manetualain Dula-dalen fo kada esak ka boe. Ma basa sara ramahena neu kada Manetualain, nahuu Ana ndia noke sara fo dadi reu Ndia hatahorin.
EPH 4:5 Ita Lamatuan fo mana naena haak parenda ita, kada esak ka; Ita tamahere kada dalak esak ka fo ita bisa mole-dame to Ndia. Ma ita basa ngga simbo sarani, fo dadi takaesa to Ndia.
EPH 4:6 Manetualain, kada esak ka, ma ita Aman, kada Ndia. Kada Ndia, parenda ita basa ngga. Kada Ndia, fo sama-sama no ita basa ngga. Ma kada Ndia, fo mana nasoda nakandoo nai ita basa ngga dalen.
EPH 4:7 Tehuu Yesus Karistus baꞌe fee ita Ndia koasan, mita fo ita esa-esak takalalaꞌok Ndia ue-osan.
EPH 4:8 Huu naa de Manetualain Susura Malalaon nae, “Ana hene neni mamana demak neu, fo Ana natati nai naa losa Ana senggi. Boe ma Ana neni falik hatahori neni humu nalak kara noꞌun seli, ma babaꞌe hadia fee hatahori dae-bafok.”
EPH 4:9 (Masaneda dedeꞌa deꞌek naa fo nae, “Ana hene”. Mete ma Ana hene, naa sosoa-ndandaan nae, lele uluk Ana konda nita neni dae-inak mai ena.
EPH 4:10 De Hatahori mana kondak naa, ndia Karistus. Ana ndia hene fali neni nusa tetuk do inggu temak neu, fo koladu basa hata marai lalai ma dae-inak.)
EPH 4:11 Karistus ndia fee koasa neu Ndia hatahorin fo rakalalaꞌok ues, fo Ana baꞌe fee sara. Ana fee ketuk koasa, fo dadi reu nedenun nara, ketuk dadi reu mana toꞌu dedeꞌan nara, ketuk dadi reu mana kiu-lolo soa-neu Ndia hatahorin nara, ketuk dadi malelak fo fee nenorik neu Ndia hatahorin nara, ma ketuk bali dadi mana reni Hara Lii Malole neni mamana beuk kara neu.
EPH 4:12 Esa-esak simbo ndia uen fo tao natetu do nakadaik Karistus hatahorin nara, fo basa sara bisa rakalalaꞌok Ndia ue-osan. No dalak naa, basa ita fo mana tamahere teu Yesus Karistus tamba tatea,
EPH 4:13 losa ita basa ngga tamahere no dalek esa, ma ita basa ngga oo talela tebe-tebe Manetualain Anan boe. Ita ta leo kakana ana bali, tehuu ita tungga tebe-tebe Ndia eno-dalan, ma dadi teu hatahori fo matetuk do makadaik, duduꞌa naruk, ma leo-laꞌo tungga basa Ndia hihii-nanaun. Mete ma ita leo-laꞌo talo naa ena, na, ita ta leo kamba neni nato iduk, fo leꞌan bee neu, na, ana kada tungga a mesan. Mete ma mana puta-paik kara mai fee nenorik laꞌe-neu dedeꞌa pepeko-lelekok, na, ara ta bisa tao ranggoa ita ena.
EPH 4:15 Tehuu ita kokolak neulauk tungga kada hata fo ndoos soa-neu ita toranoon nara, nahuu ita sue sara. Mete ma ita leo-laꞌo talo naa nai dedeꞌa hata a mesan dale, na, ita dadi teu mata-aok esa to Karistus. Ndia naa, ita Langgan fo mana koladu ita.
EPH 4:16 Ma ita iar, sama leo Ndia ao-inan. Mete ma hatahori lima-ein ma idu-bafan esa tulu-fali esa, tungga sira esa-esak uen, na, ndia ao-inan tamba natea. Leo naak oo soa-neu Karistus hatahorin nara boe. Mete ma ita sue ma tulun esa no esa, na, ita basa ngga oo tamba tatea boe.
EPH 4:17 Nenene matalolole, hata fo au nau kokolak hatematak ia, nahuu au Lamatuang mesa kana ndia nafada neu au. Ei boso leo-laꞌo sama leo hatahori ta mana malela Manetualain bali. Huu hata fo ara taok naa, tungga kada sira nggoa beben.
EPH 4:18 Ara laꞌok sala, nok bali hatahori laꞌok nai kiu-hatuk. Ara leo-laꞌo ratalenggo feꞌe numa Manetualain mai, nahuu ralangga batu, ma ta nau matak neun.
EPH 4:19 Ara ta mae ralela ena. Huu naa de ara tungga kada sira hihii-nanaun nara, ma leo-laꞌo no manggenggeok. Ara oo ta rameda dai boe.
EPH 4:20 Tehuu Karistus dala masodan fo ei manori malak naa, ta leo naak!
EPH 4:21 Hata fo ei manori malak laꞌe-neu Yesus Karistus naa ena, memak nenorik fo ndoos. Te ei mamanenen ena na!
EPH 4:22 De laꞌo ela ei dala masoda raan! Mete ma ei leo-laꞌo no manggenggeok tungga hatahori dae-bafok hihii-nanaun, na, ei hambu kedi-irak taa-taa naa ena. Ei ta maena haak nai dala masoda raak naa ena.
EPH 4:23 Tehuu naa fo Manetualain tao ei dalem ma duduꞌam dadi neu beuk,
EPH 4:24 fo ei dadi miu hatahori dae-bafo beuk tungga Ndia mata-aon. Huu naa de ei muste matudu dale beuk fo lolo-laok ma ndoos.
EPH 4:25 Dadi hatematak ia hahae maputa-paik leo! Kokolak no ndoos esa no esa, huu ita basa ngga takaesa ena, sama leo ao-inak esa kaei-limak ma kaidu-bafak.
EPH 4:26 Mete ma mamanasa, na, boso mamanasa losa ei tao salak. Malole lenak ei esa malole no esa leo! Boso mambeda nasak losa ledo tesa!
EPH 4:27 No dalak naa, nitur malanggan ta bisa soba-dou nala ei. Boso mboꞌin ana hambu lelak faa boe na!
EPH 4:28 Hatahori fo soa namanaꞌo, hahae leo! Malole lenak hatahori leo naak naue-osa natalolole pake ndia lima-ei heli-helin, mita fo ana bisa babaꞌe ndia ue nalan soa-neu hatahori kasian nara.
EPH 4:29 Mete ma kokolak, na, boso kokolak manggarauk, leo mae kada dedeꞌa deꞌek esak ka boe! Malole lenak kokolak kada malole. Fee nenori-nefadak neu hatahorir fo tulu-fali tebe-tebe neu sara, ma matetea dalen nara.
EPH 4:30 Boso makahehedik Manetualain Dula-dale Malalaon, huu Ana nai ei dalem. Ma Ana dedede nala ei ena nae, eir ia, Manetualain enan. Ndia Dula-dalen oo fee tanda nemeheherek boe nae, neu ko losa dae-bafok fai mateꞌen Manetualain tao nasoi-nasoda ei fo masoda mian seku neu.
EPH 4:31 Dadi boso mambeda dalek mia hatahori laen! Boso henggu nisim mara mia hatahori laen! Boso esa namanasa esa! Boso esa nahuur no esa! Boso kokolak maboboo hatahori naden! Ma boso tao dala manggarauk laen nara!
EPH 4:32 Tehuu malole lenak ei esa sue esa, ma tao basa hata fo neulauk esa no esa. Ei muste lilii heni hatahori sala-singgon, ma fee ambon neun, sama leo Manetualain koka heni ei sala-singgom ena, nahuu ei makaesa mia Karistus ena.
EPH 5:1 Eir ia, Manetualain ana susuen. Huu naa de ei muste leo-laꞌo tungga Ndia hihii-nanaun.
EPH 5:2 Ma ei muste esa sue esa, sama leo Yesus Karistus sue ei. Ana loo lima aon fo mate nggati ita. No dalak naa, Ana dadi tunu-hotu kaboo menik, fo tao namahoko Manetualain.
EPH 5:3 Eir ia oo Manetualain hatahori malalaon boe. Dadi boso leo-laꞌo no manggenggeok! Leo mae duꞌa kada dala manggarauk oo, bosok boe! Boso laꞌok sala mua hatahori ta o sao toum do o sao inam! Boso dale hedi!
EPH 5:4 Boso kokolak dedeꞌa manggenggeok! Boso kokolak sadi ndaa! Huu Manetualain hatahorin ta nandaa kokolak talo naa. Malole lenak ei kokolak kada dedeꞌa malole, ma moke makasi neu Manetualain.
EPH 5:5 Masaneda matalolole! Manetualain ta simbok hatahori fo mana leo-laꞌo no manggenggeok, ma hatahori fo mana laꞌok sala no hatahori fo ta ndia sao toun do ndia sao inan! Ara ta bisa maso dadi reu Karistus hatahorin, ma Manetualain ta dadi neu sira Manen. Manetualain oo ta simbok hatahori mana dale hedik boe, nahuu ara seti heni Ndia, ma rakadedemak matak laen nara.
EPH 5:6 Boso hambu nenggonggoak numa hatahori mana kokola ombo koson nae, “Hae leo-laꞌo no lolo-laok!” Neu ko Manetualain namanasa hatahori fo ta tungga Ndia hihii-nanaun.
EPH 5:7 Huu naa de ei boso makaesa aom mia hatahori matak leo naak kara.
EPH 5:8 Fai bakahulun ei nok bali hatahori fo mana leo-laꞌo nai makiuk dale, nahuu ei ta malela Manetualain. Tehuu hatematak ia Ana nakonda manggaledon ena, fo tao ei dadi miu Ndia anan nara. Huu naa de ei muste leo-laꞌo nai Ndia manggaledon naa dale.
EPH 5:9 Hatahori fo mana leo-laꞌo nakandoo nai manggaledok dale, ana tao hata fo neulauk, leo-laꞌo no ndoos, ma kokolak tungga ndoon.
EPH 5:10 Sangga dalak fo tao mamahoko Manetualain dalen, te Ana ndia naena haak parenda ita.
EPH 5:11 Boso makaesa aom mia hatahori fo mana leo-laꞌo nai makiuk dale. Sira tataon, nenenin ta faa boe na. Dadi ei muste kaꞌi-ore sara, ma matudu ledo-ledo sira salan nara.
EPH 5:12 Hata fo ara taok no nefufunik naa, manggenggeo ndoos losa ita tameda mae, mete ma ita tae kokolak kana.
EPH 5:13 Au fee netuduk talo ia: mete ma hatahori tao manggaledo basa hata fo manai makiuk dale, na, hatahori mete-ritan no manggaledok.
EPH 5:14 Leo naak oo, mete ma ita tao manggaledo hata manggarauk fo hatahori taon, ana bisa nalela nae, hata fo ana taok naa, manggarauk boe. Hambu sosodak esa nae, “Wee! Ei mana sungguk kara, mambadeik leo! Ei mana matek kara, masoda fali leo! Huu Karistus nau tao manggaledo ei.”
EPH 5:15 Huu naa de parisa matalolole ei leleo-lalaꞌom, fo ta sama leo hatahori nggoa bebek. Malole lenak pake duduꞌa-aꞌafi neulauk numa Lamatuak mai.
EPH 5:16 Hatematak ia hatahori noꞌuk ka tao basa hata fo manggarauk taa-taa. De mete ma hambu lelak tao basa hata fo neulauk, na, tao leo. Boso bei mahani bali!
EPH 5:17 Duduꞌa matalolole fo malela ita Lamatuan hihii-nanaun, fo ei boso sama leo hatahori nggoa bebek.
EPH 5:18 Boso mafu, te neu ko nininuk naa koladu ei, fo ei tao hata fo ta neulauk kara. Tehuu buka ei dalem, mita fo Manetualain Dula-dale Malalaon ndia koladu ei.
EPH 5:19 No dalak naa, neu ko ei esa kola-kola no esa pake dedeꞌa deꞌek numa Manetualain Susura Malalaon mai, numa sosodak fo koa-kio neu Ndia, ma numa sosodak fo ei hambun numa Ndia Dula-dale Malalaon mai. Mete ma soda, na, boso nai kada ei bifi doom. Tehuu koa-kio Manetualain numa ei dalem mai.
EPH 5:20 Yesus Karistus dadi neu ita Lamatuan, ma Amak Manetualain tao matak noꞌuk ka soa-neu ita ena. Huu naa de ita toke makasi takandoo neun.
EPH 5:21 Ei basa ngga muste esa tia-rada esa ma esa nenene esa. No dalak naa, ei matudu hada-horomatak ma bii-nemetaꞌuk neu Yesus Karistus.
EPH 5:22 Sao inak kara ein! Ei muste tia-rada ma nenene neu ei saom, sama leo tia-rada ma nenene neu ei Lamatuam Yesus Karistus.
EPH 5:23 Sao touk naa, sama leo sao inak malanggan. Ma Karistus oo Malanggan soa-neu Ndia hatahorin nara boe. Ana ndia soi dalak fo ara hambu masoi-masodak.
EPH 5:24 Huu naa de Karistus hatahorin nara muste tia-rada ma nenene neun. Leo naak oo, sao inak kara muste tia-rada ma nenene neu sira saon nara nai basa dedeꞌak kara dale boe.
EPH 5:25 Leo naak oo sao touk kara boe! Ei muste sue-lai neu ei saom, sama leo Karistus sue-lai Ndia hatahorin, losa Ana loo lima aon fo mate nggati sara.
EPH 5:26 Ana tao talo naa, fo ara dadi reu lolo-laok nai Manetualain matan, nahuu ara tungga Ndia Dedeꞌa-kokolan, ma ara hambu saranik ena.
EPH 5:27 Yesus Karistus hatahorin nara oo sama leo baroit inak boe fo nabua nala lolen seli, huu baroit touk nae mai nalan. Leo naak oo Karistus nae mai nala Ndia hatahorin nara boe. Huu naa de ara muste leo-laꞌo no neulauk ma lolo-laok, losa ta hambu salak faa boe na.
EPH 5:28 Leo naak oo sao touk kara boe! Ei muste sue-lai ei saom, sama leo sue-lai ei ao-ina heli-helim. Mete ma sao touk sue-lai ndia saon, sosoa-ndandaan nae, ana sue-lai ndia ao-ina heli-helin.
EPH 5:29 Ta hambu hatahori mburuk no ndia ao-ina heli-helin. Tehuu ana nafafaꞌu ma nakaboi-nasamao natalololen, sama leo Karistus nafafaꞌu natalolole Ndia hatahorin nara,
EPH 5:30 nahuu ita iar, sama leo Ndia ao-inan.
EPH 5:31 Sama leo neni surak nai Manetualain Susura Malalaon dale nae, “Huu naa de sao touk muste laꞌo ela ndia aman ma inan, fo neu leo-laꞌo dalek esa no ndia saon, te dua sara dadi reu esa ena.”
EPH 5:32 Manetualain Dedeꞌa-kokolan ta neni babanggak naa, natudu numa lele uluk mai laꞌe-neu sao holu-ndaek susue-lalain ena. Tehuu hatematak ia ita oo bubuluk boe tae, Dedeꞌa-kokolak kara raa oo natudu laꞌe-neu Karistus susue-lalain neu Ndia hatahorin nara boe.
EPH 5:33 Dadi sao touk muste sue-lai ndia saon sama leo ana sue-lai ndia ao-ina heli-helin. Ma sao inak muste fee hada-horomatak neu ndia saon.
EPH 6:1 Leo naak oo anak kara boe! Ei muste nenene neu ei ina-amam, te naa ndia ndaa, tungga ita Lamatuan hihii-nanaun.
EPH 6:2 Sama leo neni surak nai Manetualain Susura Malalaon dale nae, “O muste fee hada-horomatak neu o inam ma o amam.” Ia ndia Manetualain parenda makasososan, fo pake hehelu-bartaak.
EPH 6:3 Neu Manetualain fee parenda naa, Ana oo helu-bartaa boe nae, “Mete ma o tao tungga talo naa, neu ko o hambu babaꞌe-babatik noꞌun seli, ma o hambu teu naruk.”
EPH 6:4 Leo naak oo ina-amar boe! Ei boso boboto-barakai neu ei anam mara, te naa tao nemenasa sara. Malole lenak koladu matalolole sara, ma manori sara numa ana diꞌi-doen mai fo tungga Lamatuak eno-dalan. Mete ma ara tao salak, na, matudu sara dala ndoos tungga Lamatuak hihii-nanaun.
EPH 6:5 Leo naak oo hatahori mana maue-osar boe! Ei muste bii-mamataꞌu neu ei malanggam mana parenda ei nai dae-bafok ia, fo tia-rada ma nenene neun. Boso tao ue-osa mala kada seseri-seserik, tehuu tungga tebe-tebe malanggan hihii-nanaun, sama leo ei oo, tungga tebe-tebe Karistus hihii-nanaun boe.
EPH 6:6 Eir ia oo Karistus hatahori mana maue-osan boe. De nai dae-bafok ia, boso tao ue-osa baa-baa, nahuu malanggan mete ei. Tehuu tao ue-osa tebe-tebe feen, leo mae ta sana boe. Naa ndia tungga Manetualain hihii-nanaun.
EPH 6:7 Dadi makalalaꞌok ei ue-osan no dere-dere hiek, nok bali ei maue-osa fee ita Lamatuan, Manetualain, ta sama leo kada taue-osa fee malanggan hatahori dae-bafok.
EPH 6:8 Ita bubuluk tae, neu ko Manetualain fee babaꞌe-babatik neu hatahori fo mana tao hata fo neulauk. Leo mae sira raa, hatahori mana maue-osa do, malanggan do, ata-dato do, hatahori nekemboꞌik do, Ana fee babaꞌe-babatik neu basa sara.
EPH 6:9 Leo naak oo malanggan nara boe! Boso soa bondek makatataꞌuk mae poko-femba ei hatahori mana maue-osam mara. Te hambu sira Lamatuan nai nusa tetuk do inggu temak, fo sama leo ei enam boe. Ana ta memete matak, ma Ana nenene neu sudi see a mesan. Leo mae malanggan do, hatahori mana maue-osa do, Ana nenene basa sara.
EPH 6:10 Nenene matalolole au kokolang mateꞌen ia. Ei muste toꞌu mahere ei nemeheherem neu Manetualain, nahuu Ana ndia naena haak parenda ei ma Ndia koasan ta neni babanggak. Naa ndia bisa tao barakai ei!
EPH 6:11 Soldadur pake tee-tandek fo laban sira musun. Leo naak oo Manetualain nae pake ei sama leo soldadu boe. Ana nau fo ei laban basa duduꞌa-aꞌafi manggarauk lalaꞌen, fo nitur malanggan taok. Huu naa de ei muste mahehere pake no mantesak Manetualain tee-tanden.
EPH 6:12 Huu ita iar tatati! Ita ta tatati laban hatahori dae-bafok, tehuu ita tatati laban koasa manggarauk fo ita ta mete-tita sana, laban mana toꞌu parendar, laban basa koasa makiuk, ma laban basa hata fo manggarauk kara.
EPH 6:13 Dadi ei muste mahehere pake basa Manetualain tee-tafa musun lalaꞌen. Mete ma fai manggarauk kara raa losa ena, na, neu ko ei bisa laban makandoo losa mateꞌen. Mete ma ei ta tuda, na, ei makatataka losa masenggi musu naa.
EPH 6:14 Dadi ei muste maote tebe-tebe fo mambariik mahere! Mamahere leo neu kada Manetualain Dedeꞌa-kokolan fo ndoos, te naa sama leo ei pake soldadu kalikeen. Leo-laꞌo tungga ndoon, te naa sama leo ei pake badu besik mana babata tendek.
EPH 6:15 Mahehere miu tui-bengga Hara Lii Malole fo matudu dalak fo hatahori leo-laꞌo mole-dame no Manetualain, te naa sama leo ei pake sopatu soldadu.
EPH 6:16 Mamahere makandoo neu Manetualain, te naa sama leo tee-tandek nenea aok. No tee-tandek naa, ei bisa makamate basa nitu manggarauk kokou aꞌin fo ara koun neni ei neti.
EPH 6:17 Toꞌu mahere ei nemeherem mae, ei hambu masoi-masodak numa Manetualain mai ena, te naa sama leo soldadu pake solangga besi bai. Toꞌu mahere Manetualain Dedeꞌa-kokolan numa Ndia Dula-dale Malalaon mai, te naa sama leo soldadu pake tafa.
EPH 6:18 Mete ma ei nau mambariik mahere, na, muste hule-haradoi makandoo pake Manetualain Dula-dale Malalaon koasan. Manea makandoo, ma boso hahae hule-haradoi soa-neu basa Lamatuak hatahorin nai bee a mesan.
EPH 6:19 Ma boso lilii-ndondou hule-haradoi fee au boe. Moke fo Manetualain fee au Ndia hara hehelun, mita fo au bisa afada no ledo-ledo Ndia nanaen neu hatahori laen nara.
EPH 6:20 Leo mae au dadi uu hatahori bui ena, tehuu Lamatuak Yesus nadenu au, fo dadi uu Ndia lima konan. Dadi hule-haradoi fee au fo boso amataꞌu kokolak bee fo ndoos, te naa memak au uen na!
EPH 6:21 Au nau fo ei bubuluk au nenggetuu-nemberiing. Huu naa de au adenu Tikikus ia neni ei neti. Ndia ia, au toranoo susueng ma ana manggate nakalalaꞌok Lamatuak Yesus Karistus ue-osan.
EPH 6:22 Naa fo ana tui laꞌe-neu ai masodan nai ia. Ma au nau fo ana oo natetea ei dalem boe.
EPH 6:23 Au oke-hule neu Manetualain fo ita Aman, ma Yesus Karistus fo ita Lamatuan, fo Ara tao basa toranook kara esa mole-dame no esa, ma esa sue esa, nahuu ei mamahere neu Sara.
EPH 6:24 Au oo hule-haradoi fo ita Lamatuan Yesus Karistus natudu dale susuen neu basa hatahorir fo mana sue-lai rakandoo neun boe. Au susuran losa kada ia! Soda-molek, Paulus
PHI 1:1 Susurak ia numa au mai, Paulus. Au nonoong Timotius oo haitua hara masodak soa-neu ei boe. Ai dua ngga ia, Yesus Karistus neondan. Ai haitua susurak ia fee basa hatahorir fo mana ramahere neu Yesus Karistus marai kota Felipi. Ma ai nau fo basa malangga saranik kara, ma mana sou malangga saranik uen nara oo, bubuluk no malole susurak ia isin boe.
PHI 1:2 Manetualain naa, ita Aman. Ma Yesus Karistus naa, ita Lamatuan. De ai moke-hule fo Ara ratudu dale susuen nara reu ei, mita fo ei bisa leo-laꞌo no mole-damek ma lino-lendek.
PHI 1:3 Leo mae au ta mete-ita ei dook ka ena, tehuu au ta lilii ei! Tungga-tungga au asaneda ei, au oke makasi neu Manetualain, nahuu ei mamahere makandoo neun.
PHI 1:4 Tungga-tungga au hule-haradoi soa-neu ei, au daleng namahoko,
PHI 1:5 nahuu numa fai makasososan ei simbo Lamatuak Hara Lii Malolen, ei makalalaꞌok makandoo Ndia uen sama-sama mia au.
PHI 1:6 Naa, natudu nae, Manetualain mulai oꞌofe-fafae ei dalem mara ena. Ma au bubuluk tebe-tebe ae, Ana nakalalaꞌok nakandoo Ndia ue-osa malolen naa, losa dadi matetu-mandaik neu faik fo Yesus Karistus fali mai.
PHI 1:7 Memak, nandaa au sue ei, nahuu au daleng nakaesa no ei numa fai bakahulun mai ena. Fai maneuk kara ei maue-osa sama-sama mia au, neu au afada hatahorir laꞌe-neu Lamatuak Hara Lii Malolen, ma neu au bala hatahorir fo mana laban Hara Lii Malole naa. Leo mae au maso bui oo, tehuu ei ta malai makaheok ela au boe.
PHI 1:8 Manetualain ndia bubuluk nae, au daleng hii nalan seli neu ei. Au susueng neu ei naa, sama leo Yesus Karistus susuen.
PHI 1:9 Dadi au hule-haradoi fee ei talo ia: au oke-hule fo ei susuen esa no esa boe tamba nakandoo, losa ana sasi-sasi. Au oo oke-hule fo Manetualain fee ei malela tebe-tebe dedeꞌak bee ndia malole, mita fo ei masodam mara dadi lolo-laok boe. Boe ma neu ko, neu faik fo Karistus naketu-naladi dedeꞌak soa-neu basa hatahorir, na, Ana nafada nae, ei ta maena salak hata esa boe na,
PHI 1:11 nahuu Ana ndia tao nala ei dalem mara lolo-laok fo bisa leo-laꞌo no ndoos. Ma ei leo-laꞌo ndoos talo naa, na, hatahori laen nara rakadedemak Manetualain ma koa-kio neun.
PHI 1:12 Toranoo susue nggara ein! Au nau ei bubuluk mae, hambu hatahori rakasususak au, losa ara sese au uni bui uu. Tehuu Lamatuak Hara Lii Malolen natanggela nakandoo,
PHI 1:13 losa soldadu mana manea uma manek, ma basa hatahori laen nara oo bubuluk rae, au maso bui nahuu au tungga Yesus Karistus boe.
PHI 1:14 Boe ma Manetualain hatahorin nara marai ia mete-rita rae, Manetualain tao talo naa, neu au nai bui ia dale. Huu naa de ara boe rambarani, losa ara ta ramataꞌu bali ena. Basa boe ma ara kokolak no ledo-ledo Manetualain Dedeꞌa-kokolan nai bee a mesan.
PHI 1:15 Nai ia, hambu hatahori matak dua, mana manggate fee nenorik laꞌe-neu Karistus. Sira, mana maue-osa no dale ndoos, ma mana maue-osa no dale peko-pakik. Mana maue-osa no dale ndoos, dalen nara malole ro au. Ara bubuluk tebe-tebe rae, au lemba-asaa au susa-sonang ia, nahuu au akalalaꞌok au ue-osang, ma ta akaheok faa boe na. Tehuu mana maue-osa no dale peko-pakik, sira dalen nara mbiri esa no esa, ma sangga nadek. Ara tao rabingga-baꞌek hatahori kamaherek kara, sadi hambu ketuk fo tungga sara. Ara sangga dalak fo rakadedemak aon nara rae, sira ta hohoꞌak lena heni au. Ara duꞌa rae, mete ma hatahori tungga sara, na, neu ko naa tao tamba nambera au susa-sonang nai bui dale.
PHI 1:18 Tehuu ta hata-hata! Au ta tao matak, mitak mae hatahori fee nenorik no dale ndoos, do taa. Nenenin lenak, ara fee nenorik laꞌe-neu Karistus! Naa, ndia tao au daleng namahoko. Ma au amahoko tebe-tebe,
PHI 1:19 nahuu au bubuluk ae, ei hule-haradoi fee au, ma Yesus Karistus Dula-dalen tulu-fali au. Huu naa de au bubuluk mateꞌen te kada lino-lendek!
PHI 1:20 Leo mae au asoda do, mate oo ta hata-hata boe. Sadi Manetualain pake au fo akadedemak Lamatuak Yesus naden, ma fee nenorik no ledo-ledo laꞌe-neu Ndia, losa ta hambu hata esa boe na nakamamaek au. Basa iar lalaꞌen ndia au amahena akandoo numa fai uluk mai losa hatematak ia.
PHI 1:21 Au duduꞌa talo ia: Mete ma au asoda, na, elan fo au asoda akaesa ua Karistus, ma akalalaꞌok akandoo Ndia ue-osan. Naa, malole. Tehuu mete ma au mate, na, au hambu nanalak lenak bali. Huu au bisa laꞌo ela dae-bafok ia, ma au asoda fali numa mamates mai fo leo sama-sama ua Karistus nai nusa tetuk do inggu temak. Huu naa de au daleng napangge, ma au ta bubuluk bee ndia neulaun lenak!
PHI 1:24 Dadi talo ia leo! Huu ei bei toꞌa au nai ia, de malole lenak au leo sama-sama ua ei nai dae-bafok ia leo.
PHI 1:25 Au amahere au teu faing bei naruk fo bisa leo sama-sama ua ei. Lamatuak nau au atetea ei dalem mara, ma ei tamba mamahere neu Ndia no dale nemehokok.
PHI 1:26 De neu ko ei bisa makadedemak Yesus Karistus naden, nahuu Ana soi dalak ena fo au bisa fali uu tiro-dangga ei bali.
PHI 1:27 Leo mae talo bee oo, tehuu ei leleo-lalaꞌom muste ndoos, huu eir ia, Lamatuak hatahorin nara boe. Dadi ei muste leo-laꞌo ndaa no dala-hadak, ma tao tungga hata fo Karistus Hara Lii Malolen nafada neu ei. Neu ko mete ma au dadi fali uu tiro-dangga ei, do, kada amanene numa hatahorir mai rae, ei leo-laꞌo no malole, na, au bisa amahoko. Au bisa bubuluk ae, ei leo-laꞌo no dalek esa, nahuu ei makaesa mia Dula-dalek esak ka. Ma au bisa bubuluk ae, ei maote tebe-tebe fo makalalaꞌok Lamatuak Yesus Hara Lii Malolen sama-sama, mita fo hatahori laen nara oo ramahere tungga boe. Ma ei oo ta mamataꞌu, leo mae hambu hatahorir laban ei boe. Naa, dadi tanda soa-neu ei musum mara nae, Manetualain nau nggari heni sara reni aꞌi mbila ta kala matek reu. Tehuu Ana tao nasoi-nasoda ei, fo neu ko ei masoda mian seku neu.
PHI 1:29 No Manetualain dale mololen seli, huu naa de Ana nasosoi dalak ena, fo ei bisa mamahere neu Karistus, ma dadi miu Ndia hatahorin nara. Ta kada mamahere a leo, tehuu Ana oo fee luas fo ei hambu mala susa-sonak boe, nahuu ei tunggan.
PHI 1:30 Au amanene hatahori ketuk marai naa laban ei, nahuu ei makalalaꞌok Karistus Hara Lii Malolen. Masanenedak te fai maneuk kara oo, ara laban au leo naak boe. Ma hatematak ia oo, ara bei talo naa boe.
PHI 2:1 Toranoo susue nggara ein, fo mana dadi neu Yesus Karistus hatahorin! Ana fee ei hata fo neulauk noꞌuk ka ena. De ei bisa tao matetea esa no esa dalen. Ei bisa fee nenori-nefadak fo ana naoka numa ei dale susuem mai. Ei bisa leo-laꞌo no neulauk esa no esa, nahuu Manetualain Dula-dalen naue-osa nai ei taladam. Ma ei bisa matudu dale kasian ma dale neulaum esa no esa.
PHI 2:2 Mete ma ei tao talo naa, na, au daleng mbena sau-sau. Lenak bali, mete ma ei leo-laꞌo no masue aok ma dalek esa, leo-laꞌo no hihiik esa, ma mala harak esa fo maue-osa sama-sama.
PHI 2:3 Boso tao hata-hata fo sangga nanalak soa-neu kada o ao heli-helim. Ma boso tao aom lena heni hatahori laen nara. Naa te o koa aom naa, oka-huun taa. Ita muste takaloloe aok fo duꞌa tae hatahori laen nara lena heni ita.
PHI 2:4 Ma boso faduli kada ei esa-esak ka ena uma dalen. Tehuu ita oo muste tao matak neu hatahori laen totoꞌan nara boe.
PHI 2:5 Ita dalen, ita duduꞌan ma ita hihiru-heheon muste sama leo Yesus Karistus.
PHI 2:6 Leo mae Ndia mata-aon sama leo Manetualain, ma Ndia oo Lamatuak sama leo Manetualain boe, tehuu Ana lui heni Ndia haak, ma ta pake Ndia panggan.
PHI 2:7 De Ana konda neni dae-bafok ia mai, pake mata-aok sama leo hatahori dae-bafok biasa. Ana laꞌo ela Ndia haak basa-basan, fo tao Ndia aon dadi neu neondak.
PHI 2:8 Ta kada dadi neu hatahori kadiꞌi anak, tehuu Ana oo tao Ndia aon dadi neu hatahori neni nekedadaek, fo tao tungga Manetualain hihii-nanaun. Leo mae hatahorir rakanisan numa ai ngganggek lain oo, Ana simbo a mesan boe, ma maten, leo bali hatahori manggarauk.
PHI 2:9 No Ana nakaloloe aon talo naa, huu naa de Manetualain nakadedemak kana. Ma feen nadek fo ta neni babanggak. Ta hambu nadek esa boe na fo ta neni babanggak lena heni Ndia.
PHI 2:10 Manetualain nakadedemak naden talo naa, fo basa hatahorir fee hada-horomatak neun. Sira: hatahorir marai lalai, ma hatahorir marai dae-inak. Hatahori masodak ma hatahori mates. Neu ko basa hatahori sendek luu-langgan nara fo rakaluku-rakatele neun.
PHI 2:11 Ma neu ko basa hatahorir rae, “Yesus Karistus naa, tebe-tebe Lamatuak fo naena haak parenda au!” No dalak naa, ara oo koa-kio Amak Manetualain boe.
PHI 2:12 Toranoo susue nggara ein! Nenene besa-besa! Fai maneuk kara, neu au bei numa kota Felipi, ei nenene au, basa de ei tungga Manetualain eno-dala ndoon. Hatematak ia ita tabinggak nai mamanak laen, tehuu au oke fo ei maote tebe-tebe makandoo fo leo-laꞌo tungga ndoon. Masanenedak te mete ma ei ta nenene neu Ndia, na, neu ko ei mete a leo! Huu Ana ndia tao nasoi-nasoda ei numa sala-singgom mara mai. Boe ma ei muste leo-laꞌo ndaa no dala-hadak, huu ei dadi miu Ndia hatahorin ena.
PHI 2:13 Manetualain mesa kana ndia oꞌofe-fafae ei dalem mara. Ana ndia soi dalak fo ei nenene neun. Ma Ana ndia fee koasa fo ei bisa tao mamahoko Ndia dalen.
PHI 2:14 De mete ma ei tao hata a mesan, na, boso unggu-remu, ma boso mareresi.
PHI 2:15 Tao talo naa, fo ei bisa dadi miu hatahori dale lolo-laok, ma hatahori ta mana maena salak. Ei leo-laꞌo nai hatahori manggarauk taladan ma mana puta-paik kara. Tehuu ei boso tungga sara! Ei leleo-lalaꞌom muste lolo-laok, nahuu eir ia, Manetualain anan nara. De ei leleo-lalaꞌom mara muste randela-rasaꞌa fo matudu dalak soa-neu sara, sama leo nduuk nasaꞌa nai makiuk.
PHI 2:16 Boe ma ei leo-laꞌo tungga ndoon ma makalalaꞌok Manetualain Dedeꞌa-kokolan. No dalak naa, neu ko ei tao mala au daleng mbena sau-sau, neu faik fo Yesus Karistus fali mai. Ma au bebengge-mamanggung naa, hambu buna-boa neulauk, nahuu ta nggari heni sana no muda hiek.
PHI 2:17 Tehuu leo mae au fee basa au masodan, fo dadi neu tunu-hotuk, mita fo ei bisa mamahere matea lenak ma makalalaꞌok Manetualain ue-osan, na, au simbok no nemehokok. [Naa, sama leo malangga anggama mboꞌa oe anggor neu mei tunu-hotuk lain fo nakaluku-nakatele neu Manetualain.] No dalak naa, ita bisa tamahoko sama-sama, nahuu tunu-hotuk naa, ta hie-hie.
PHI 2:19 Au amahena ta dook ka bali te Lamatuak Yesus soi dalak fo au adenu Timotius, fo ana neti natetea ei dalem mara. Basa naa, ana fali neni ia mai bali, fo nafada au laꞌe-neu ei nenggetuu-nemberiim. No dalak naa, natetea au daleng.
PHI 2:20 Au ta adenu hatahori laen. Au adenu kada Timotius, nahuu ana dalek esa no au. Ma ana sue tebe-tebe neu ei.
PHI 2:21 Ndia naa, ta sama leo toranoo laen nara. Te sira raa, duduꞌa kada ena uma dalen nara, tehuu ta tao matak neu dedeꞌak fo nenenin lenak soa-neu Yesus Karistus.
PHI 2:22 Ei oo bubuluk boe mae, Timotius naue-osa fafandek lima-ein nara fo nakalalaꞌok Manetualain ue-osan ena. Ana naue-osa no au, nok bali kanak esa naue-osa fee aman. Ai dua ngga laꞌok miu tui-bengga Lamatuak Yesus Hara Lii Malolen nai bee a mesan.
PHI 2:23 Mete ma ara raketu-raladi basa au dedeꞌang nai ia ena, na, dei fo au adenu Timotius neti.
PHI 2:24 Tehuu hatematak ia, Lamatuak natetea au daleng nae, ta dook ka te, au oo bisa neti tiro-dangga ei boe.
PHI 2:25 Fai bakahulun au hambu susa-sonak, de ei madenu ita toranoon Epafroditus mai tiro au. Ana nakalalaꞌok Lamatuak ue-osan sama-sama no au, nok bali soldadu mana manggate tungga ndia komedan parendan. Tehuu hatematak ia, nai au duduꞌang au muste adenu falik kana neni ei neti.
PHI 2:26 Huu dalen hii nalan seli nau natonggo no ei ena. Ma ana oo duduꞌan ta namaneu soa-neu ei boe, nahuu ana bubuluk nae, ei mamanene ena, ndia kada hedi-hedik.
PHI 2:27 Memak tebe. Fai maneuk kara, ana namahedi berak losa sangga nae mate. Tehuu Manetualain suen, de tao nahain. Ma Manetualain oo sue au boe, de Ana tao nahai Epafroditus, mita fo au boso tamba susa bali.
PHI 2:28 Huu naa de au nau adenu falik kana neti, mita fo ei bisa matonggo mian no dale nemehokok. Mete ma talo naa, na, au daleng lende.
PHI 2:29 De ei muste simbok malan no malole, nahuu ndia naa, Lamatuak hatahorin. Ma ei muste fee hada-horomatak neun no basa hatahorir fo sama leo ndia ia. Ana nakalalaꞌok Karistus ue-osan losa ela baꞌuk ka maten. Ma ana ta nakaheok faa boe na, nahuu ana nau tulu-fali au nggati ei. Dadi ei muste simbok mala falik kana no dale neulauk.
PHI 3:1 Toranoo nggara ein! Nenene matalolole! Ei dalem mara muste ramahoko, nahuu ei makaesa mia Karistus. Leo mae au surak laꞌi-laꞌik ka talo ia, te au ta mbera fee nesenedak neu ei, fo boso hambu kedi-irak!
PHI 3:2 Besa-besa mia mana puta-paik kara fo nau rakasetik hatahorir rae, “Ei muste sunat fo dadi neu tanda rae, eir ia, Manetualain hatahorin.” Naa te Manetualain ta parenda talo naa! Ara sala naa ena! Leo mae talo naa oo, tehuu ara bei husi fo humu hatahorir nok bali busa kakikik boe.
PHI 3:3 Ara rae, Manetualain simbok hatahorir, nahuu ara sunat. Tehuu naa sala! Ita bubuluk ena tae, Manetualain simbok hatahorir nahuu ara ramahere neu Yesus. Manetualain hatahori teteben nara, sira ita fo mana tamahere neu Yesus! Ita ndia takaluku-takatele neun tungga Ndia Dula-dale Malalaon. Ita ndia takadedemak Yesus Karistus, nahuu Ana soi dalak ena fo ita bisa maso dadi teu Manetualain hatahorin. Ita ta bisa hambu masoi-masodak, nahuu tungga hatahori dae-bafok tatao-nonoꞌin.
PHI 3:4 Fai bakahulun au oo duꞌa sala, sama leo sira boe. Ae, hatahorir bisa maso dadi neu Manetualain hatahorin, sadi ara sunat. Naa te naa kada hatahori dae-bafok tatao-nonoꞌin. Mete ma au ae kokolak hatahori dae-bafok tatao-nonoꞌin, na, au kokolak koa ao lena heni basa-basan, nahuu fai bakahulun au tatao-nonoꞌing tungga no tetuk basa hatahori Yahudir anggama hohoro-lalanen lalaꞌen.
PHI 3:5 Tungga anggama hohoro-lalanen, au ina-amang nggara sunat au neu bonggi heni au faik falu. Au ia oo hatahori Yahudi isi-isik boe, huu au numa leo Benyamin mai, numa baꞌi Israꞌel tititi-nonosin mai. Au manggateng seli tao tungga no tetuk basa hohoro-lalanek kara lalaꞌen numa partei anggama Farisi mai, losa ta hambu hatahori esa fo bisa fee salak faa neu au boe na. Lena-lenak bali, au manggateng seli tao doidoso hatahorir fo mana tungga Karistus, nahuu au duꞌa ae hatahori iar, ara nggari heni ita anggaman hohoro-lalanen ena.
PHI 3:7 Tehuu neu au tungga Karistus, doo-doo boe ma au duduꞌang nasafali. Dadi hatematak ia, au ta koa ao neu au leleo-lalaong fai bakahulun nara raa ena, nahuu ara ta reni sosoa-ndandaak hata esa boe na soa-neu au bali. Hata fo au duꞌa ae, ta neni babanggak, ndia: Au bisa alela Yesus Karistus, au Lamatuang fo mana naena haak parenda au. Basa dedeꞌak laen nara, au taon leo kada dafuk.
PHI 3:9 Au nau asoda akaesa ua Yesus Karistus. Leo mae au tungga basa anggama hohoro-lalanen oo, Manetualain bei ta bisa simbok au boe. Ma leo mae au tao aong leo au ndaa ena oo, Ana bei ta bisa simbok au boe. Tehuu au muste amahere neu Karistus dei, dei fo Manetualain simbok au nae, “No Karistus koka heni o sala-singgom mara ena, huu naa de o dadi lolo-laok ena.”
PHI 3:10 De au hihiing talo ia: au nau alela Karistus no malole. Au oo nau ameda Manetualain koasan no malole, fo Ana paken nasoda falik Yesus Karistus numa mamaten mai boe. Mete ma hambu hatahori ketuk rae rakasususak au, nahuu au tungga Karistus, na, mboꞌin numa naa leo. Karistus oo hatahorir rakasususak kana boe. Mete ma ketuk rae rakanisa au, nahuu au aono-lalau hatahorir, na, au simbo a mesan. Karistus oo mate nggati au talo naa boe.
PHI 3:11 Mete ma au mate, na, neu ko Ana oo nasoda falik au numa mamates mai boe.
PHI 3:12 Toranoo nggara ein! Au daleng hii tungga Yesus Karistus eno-dala masodan ma hihii-nanaun lalaꞌen. Tehuu mete ma kokolak tungga ndoon, na, au bei ta tungga no tetuk talo naa. De au ambariik ahere, nahuu Yesus Karistus here nala au ena, fo tunggan talo naa. Au sama leo hatahori mana malaik tao tetebe fo ana bisa losa too. Dadi au alaik ndoo fido-fidok mata uu, ma ta koleu dea fo duduꞌa hata mandadik kara ndia fai bakahulun. Au lilii heni basa sara leo.
PHI 3:14 Tehuu au alaik tao tetebe losa too, fo hambu hadia. Au hadiang, ndia: Manetualain neu ko simbok au nai nusa tetuk do inggu temak, nahuu au amahere neu Yesus Karistus.
PHI 3:15 Au oke fo ei mana morik ma maoka teak nai Karistus dale ena, bisa dalek esa mia dedeꞌak kara iar. Tehuu mete ma ketuk duduꞌan ta sama ro dedeꞌak kara iar, na, naa fo Manetualain natudu dala sasaik neulauk, laꞌe-neu Ndia hihii-nanaun.
PHI 3:16 Tehuu leo mae talo naa, ita muste toꞌu tahere ma tao tungga basa hata fo ndoos, fo Lamatuak nanori ita ena.
PHI 3:17 Toranoo nggara ein! Ei muste tao tungga au leleo-lalaꞌong. Ei ketuk marai naar leleo-lalaꞌom mara oo, sama leo au ena boe. Tehuu see ndia beik, na, bisa nanori natalolole numa sira mai, fo tao tungga talo naa boe.
PHI 3:18 Besa-besa mia hatahori fo mana laban neu Karistus, ma ta simbok no malole Ndia mamaten numa ai ngganggek. Sira leleo-lalaꞌon mesa kasa ratudu sira laban neu Karistus. Au afada ita ei laꞌe-neu hatahori matak leo sira ena, tehuu hatematak ia no luu-oe mana faak au afada seluk bali.
PHI 3:19 Neu ko Lamatuak timba heni sara, basa fo nggari heni sara reni aꞌi mbila ta kala matek dale reu, nahuu dalen nara ta rakaesa roon. Ara tao kada manggarauk, ma sangga dalak fo tao ramahoko sira ao-ina heli-helin, losa ara koa ao ro sira manggaraun. Ara ta rameda mae. Ara kada duꞌa, leo bali hatahori fo ta mana nalela Lamatuak.
PHI 3:20 Ei boso tao tungga sara, tehuu tao tungga ai. Huu ita maso dadi teu Manetualain hatahorin ena, ma toꞌu haak dadi teu nusa tetuk do inggu temak rau-inggun. Hatematak ia ita tahani a ita Lamatuan Yesus Karistus. Neu ko Ana nae konda fali numa nusa tetuk do inggu temak mai, fo tao nasoi-nasoda ita numa Manetualain nasan mai.
PHI 3:21 Neu ko Karistus tao nasafali ita ao-mbaa mana noek fo mana bisa matek ia, fo dadi ao-mbaa beuk, fo ta mana matek sama leo Ndia ao-mbaan ta neni babanggak. Ana tao nasafali ita ao-mbaan nara, pake Ndia koasa moꞌon. Ma Ana oo pake koasa naa, fo tao basa hata nai sudi bee, rateꞌe langgan nara tungga Ndia parendan boe.
PHI 4:1 Toranoo susue nggara ein! Huu basa naar, de au oke fo ei leo-laꞌo tungga ndoon seku neu, boso peko-paki. Au hii alan seli mete-ita ei. Ei mesa ngga ndia dadi miu au ue-osang buna-boan. Ei tao mala au daleng namahoko. Ma au bisa botik au langgang, nahuu ei.
PHI 4:2 Au oke ina kaduak kara raa, sira Yodia ma Sinteke, fo boso rareresi bali. Ara muste dame, fo esa no esa leo-laꞌo no neulauk. No dua sara Lamatuan esak ka, huu naa de esa nakaesa no esa.
PHI 4:3 Nonoo tao ue-osang, ee! Au oke fo o koladu toranoo ina kaduak kara raa, losa ara ramandoo. Fai bakahulun, ara raue-osa tebe-tebe rita fo tulu-fali au rafada hatahori laꞌe-neu Lamatuak Hara Lii Malolen. Ara oo raue-osa rita talo naa, sama-sama ro Klemens, ma nonoo laen nara boe. Basa sara naden nara neni surak nai Lamatuak bukun soa-neu hatahorir naden, fo mateꞌen rasoda sama-sama ro Ndia nai nusa tetuk do inggu temak.
PHI 4:4 No ei dadi miu Lamatuak hatahorin ena, huu naa de ei dalem mara muste ramahoko hatu-leledon. Au afada seluk bali: tao ei dalem mara ramahoko taa-taa!
PHI 4:5 Ei dalem mara oo muste neulauk neu basa hatahorir boe. Boso lilii-ndondou mae, Lamatuak Yesus mamain sangga deka-deka ena.
PHI 4:6 Mete ma ei hambu susa-sonak, na, boso mamataꞌu hata esa boe na. Tehuu hule-haradoi fo moke Manetualain tulu-fali ei nai basa dedeꞌak kara. Ma basa hata fo ei mokek kara raa, boso lilii-ndondou soꞌuk dalem mara moke makasi neun.
PHI 4:7 Mete ma ei tao talo naa, neu ko Manetualain tao nala dalem mara dadi lino-lendek. Memak hatahori dae-bafok ta bisa ralela no tetuk dale lino-lendek fo ita hambun numa Manetualain mai. No ei mamahere neu Yesus Karistus, huu naa de Manetualain nau nanea fo ei dalem ma duduꞌam mara boso tarabangga. No dalak naa, Ana tao nalende ei dalem mara.
PHI 4:8 Toranoo nggara ein! Mateꞌen talo ia: boso duꞌa sadi ndaa. Tehuu manea ei duduꞌam fo duduꞌa hata fo ndaa no Lamatuak dalen, ma duduꞌa hata fo neulauk kara fo tao mamahoko hatahori dalen. Ei muste duduꞌa dala ndoos, ma lolo-laok. Duduꞌa hata fo ndaa, ma neulauk. Sangga dalak fo hatahori laen bisa hambu hada-horomatak. Sangga dalak fo soꞌu botik bee fo malole. Ma boso hahae duduꞌa neu basa hata fo malole iar.
PHI 4:9 Au anori ei tungga Lamatuak eno-dala masodan ena. Ei muste tungga au leleo-lalaꞌong, ma tao tungga basa hata fo au afada itan ma taon. Mete ma ei tungga talo naa, na, Manetualain natetea ei dalem mara, fo ei dalem mara lino-lendek, ma bisa leo-laꞌo no mole-damek.
PHI 4:10 Au oke makasi ma koa-kio Manetualain, nahuu ei ta lilii au. Memak au bubuluk ae, bakahulun ei masaneda au, tehuu bei ta hambu lelak fo tulu-fali au.
PHI 4:11 Au ta duꞌa ae, oke hata-hata. Au ta ameda ita toꞌa taa hata esa boe na, nahuu au anori ena, tao au aong nameda dai soa-neu hata fo nai mata.
PHI 4:12 Au asoda ita no lima rouk. Ma au oo asoda ita ua hambu dai lena-lenak boe. Au ameda ita poꞌo ndoes ma poꞌo betes ena. Sudi nai dalak bee, au anori ala nggoen ena, fo bisa akatataka ala au masodang.
PHI 4:13 Au bisa lemba abeꞌi ala sudi hata a mesan, nahuu Karistus ndia tao barakai au!
PHI 4:14 Leo mae talo bee oo au oke makasi boe, nahuu ei matudu au ei dale susuem mara ena, ma tulu-fali au nai susa-sonang dale.
PHI 4:15 Fai bakahulun, neu au laꞌo ela profensi Makedonia, fo uu tui-bengga Lamatuak Hara Lii Malolen numa mamanak laen nara, kada ei numa kota Felipi mai, ndia tulun bae au doi dalang. Tehuu Saranik laen nara, taa. Ei bubuluk tutuik naa ena.
PHI 4:16 Netuduk leo, neu au bei numa kota Tesalonika oo, ei haitua doik laꞌe esa do dua, fo tulu-fali au boe.
PHI 4:17 Hatematak ia au ta duꞌa ae oke hata-hata numa ei mai bali. Au nau Lamatuak bala fo fee babaꞌe-babatik neu ei, nahuu ei dalem mara malole neu au.
PHI 4:18 Basa tutulu-fafalik kara fo ei haituan fee au naa, au simbo ala sara numa Epafroditus mai ena. Naa, dadi neu babaꞌe-babatik soa-neu au, de hatematak ia, au ta toꞌa taa hata esa boe na. Naa oo dadi sama leo tunu-hotuk kaboo menik, fo hatahori hotun fo nakaluku-nakatele neu Manetualain boe. Ma Manetualain simbok no malole tunu-hotuk naa, nahuu naa tao namahoko Ndia dalen.
PHI 4:19 Manetualain fo au akaluku-akatele neuk naa, suꞌin mateꞌen. Ana bubuluk tebe-tebe ei totoꞌam. Boe ma neu ko Ana natudu dale susuen, ma fee Ndia babaꞌe-babatin ta neni babanggak neu ei, nahuu ei makaesa mia Yesus Karistus.
PHI 4:20 De naa fo ita takadedemak Amak Manetualain naden taa-taa, losa doon naa neu. Naa, ndaa naa ena!
PHI 4:21 Au haitua hara masodak neu basa hatahorir fo mana tungga Yesus Karistus marai kota Felipi. Au toranoong nggara marai iar oo, haitua hara masodak fee ei boe.
PHI 4:22 Basa hatahori kamaherek kara marai kota Roma ia oo, haitua hara masodak boe. Leo naak oo toranook kara fo mana tao ue-osa marai mane moꞌo-inahuuk uma manen boe. Ara haitua hara masodak neu ei.
PHI 4:23 Au oke-hule fo ita Lamatuan Yesus Karistus natudu dale susuen neu ei basa ngga. Au susurang losa kada ia, Paulus
COL 1:1 Hara masodak numa au mai, Paulus. Manetualain mesa kana ndia here nala au fo dadi uu Yesus Karistus nedenun. Nai ia oo hambu ita toranoon Timotius haitua hara masodak soa-neu ei boe.
COL 1:2 Au surak susurak ia fee ei, ndia Manetualain hatahorin nara marai kota Kolose, fo mana tao tungga Yesus Karistus eno-dala masodan taa-taa. Ai moke fo Manetualain, ita Aman, natudu Ndia dale susuen neu ei, mita fo ei leo-laꞌo no mole-damek ma lino-lendek.
COL 1:3 Tungga-tungga ai hule-haradoi nai ia soa-neu ei, ai moke makasi neu Manetualain, fo ita Lamatuan Yesus Karistus Aman.
COL 1:4 Ai mamanene dedeꞌak noꞌuk ka laꞌe-neu ei nemeheherem neu Yesus Karistus, ma laꞌe-neu ei susue-lalaim ma dale susuem soa-neu basa hatahori kamaherek kara ena.
COL 1:5 Ei tao talo naa, nahuu ei bubuluk hambu hata fo neulauk kara, fo neni mbedak soa-neu ei nai nusa tetuk do inggu temak. Hata fo neulauk kara iar, ei mamanene mita sara numa dedeꞌa-kokola ndoos mai ena, ndia Lamatuak Hara Lii Malolen,
COL 1:6 fo hatahorir reti tui-bengga neu ei numa lele uluk mai ena. Hara Lii Malole naa natanggela sudi bee neu nai dae-bafok ia, ma hambu buna-boa neulauk ena, nahuu ana tao nasafali hatahori masodan dadi malole. Ei masodam oo nasafali dadi malole talo naa, mulai numa fai makasososan ei mamanene Hara Lii Malole naa mai, ma ei malela tebe-tebe mala Manetualain dale susuen boe.
COL 1:7 Ei manori mala dedeꞌak kara iar ruma kaꞌa Epafras mai ena, ndia ai nonoo mana maue-osan fo ai suen. Ana manggate nakalalaꞌok nakandoo Karistus ue-osan nai ei taladam.
COL 1:8 Ana tui fee ai marai iar laꞌe-neu ei susue-lalaim, fo Manetualain Dula-dalen baꞌe feen neu ei ena.
COL 1:9 Huu naa de, mulai numa makasososan mai ai mamanene laꞌe-neu ei, ai hule-haradoi taa-taa fee ei. Ai moke Manetualain fo ei bisa malela Ndia hihii-nanaun no tebe-tebe, ma ei bisa malela dedeꞌak noꞌuk ka, tungga hata fo Manetualain Dula-dalen nanori ei.
COL 1:10 No dalak naa, ei bisa leo-laꞌo ndaa no dala-hadak ma meni Manetualain nade malolen. Ma ei oo bisa tao mamahoko Manetualain dalen nai basa dedeꞌak kara boe. Mete ma ei matudu dale malolem mara neu hatahorir, neu ko Manetualain tao nala ei boe tamba tao dedeꞌa maloler. No dalak naa, ei bisa tamba malela Manetualain.
COL 1:11 Ai oo hule-haradoi moke Manetualain fee Ndia koasan ta neni babanggak, fo ei bisa lemba-masaa basa manggataꞌak lalaꞌen no dale naruk boe. Ai moke fo ei dalem mara bisa sofek no nemehokok, fo ei moke makasi taa-taa neu Amak Manetualain. Ana soi dalak ena, fo ei bisa simbo mala babaꞌek numa ei pusakam nai nusa tetuk do inggu temak mai. Pusaka naa, Ana feen neu basa hatahorir fo mana ramahere neu Yesus Karistus. Ana nakamboꞌik ita numa koasa makiuk mai ena, basa de fee ita maso dadi teu Yesus Karistus hatahorin, fo leo nai manggaledok dale. Ana oo soꞌuk nala Yesus Karistus boe, fo dadi neu ita Manen. Yesus naa, Manetualain Ana susuen.
COL 1:14 Manetualain loo lima Ndia Anan naa ena, fo tefa-soi nala ita ma koka heni ita sala-singgon nara.
COL 1:15 Karistus naa, mata-aok esa no Manetualain, fo hatahori dae-bafok ta bisa mete-ritan. Ana nakahuluk numa basa-basan mai ena, ma Ana dadi neu Lamatuak numa basa hata fo Manetualain adu nalak kara mai ena.
COL 1:16 Manetualain pake Yesus Karistus, fo nakadadadik nala lalai no dae-inak ma basa isi-oen nara lalaꞌen. Ana adu basa hata fo hatahori dae-bafok bisa mete-rita sara. Ndia leo, sira mana toꞌu parenda, sira mana toꞌu koasa, mane-manek kara ma malanggan nara. Ma basa koasar do basa hata fo hatahori dae-bafok ta bisa mete-rita sara. Basa hata fo Manetualain taok kara raa, Ana tao soa-neu Yesus Karistus, ma Yesus oo ndia adu basa naar boe.
COL 1:17 Neu lelek fo basa hata laen bei ta nekedadadik kasa, tehuu Ndia hambu memak kana ena. Basa hata mandadik rakaesa roon, ma Ana ndia koladu sara.
COL 1:18 Ana dadi neu Langgak soa-neu basa hatahori kamaherek kara, ma hatahori kamaherek kara dadi sama leo Ndia ao-inan. Huu Ana ndia masodak huun. Numa basa mana matek kara mai, boe ma rasoda fali, Ana ndia lena heni basa-basan, mita fo Ana ndia demak mateꞌen lena heni basa-basan.
COL 1:19 Basa hata fo marai Manetualain aon dale oo, hambu sara rai Karistus aon dale boe, ma naa tao Manetualain namahoko.
COL 1:20 Manetualain pake Yesus Karistus, fo Ana dame no basa hata fo Ana adu nalak kara. Ana fee Ndia Anan, fo dadi neu tunu-hotuk de titi heni daan, ma maten numa ai ngganggek lain, mita fo basa hata marai lalai, ma basa hata marai dae-inak, bisa dame rasafali ro Manetualain.
COL 1:21 Bakahulun ei mesa ngga bei masoda nai dea, leo dook ka numa Manetualain mai. Ei musu mian ma leo lenggo feꞌe numa Ndia mai, nahuu ei dalem mara mburuk ma ei tatao-nonoꞌi manggaraum mara laban neun taa-taa.
COL 1:22 Leo mae talo naa oo, tehuu hatematak ia Ana soi dalak ena, fo ita bisa dame to Ndia boe. Ana ndia nadenu Ndia Anan fo dadi sama leo hatahori dae-bafok. Ma Ana fee Ndia Anan naa, fo dadi tunu-hotuk, ma maten numa ai ngganggek lain, fo ita bisa dame toon bali. Yesus Karistus tao talo naa, fo Ana bisa nuni noo ita teu tambariik nai Manetualain matan, fo ita dadi teu hatahori lolo-laok, dale ndoos, fo ta taena sala-singgok hata esa boe na.
COL 1:23 Sadi ei muste makatataka makandoo mia ei nemeheherem mara ma toꞌu mahere fo boso babati! Boso makaheok numa Hara Lii Malole naa mai, fo ei simbok kana neu ei mamanene ndia makasososan naa. Ei bisa masarada neu Hara Lii Malole naa. Hatahorir reu tui-bengga Hara Lii Malole naa nai bee a mesan nai dae-bafok ia ena. Ma Lamatuak nadenu au, Paulus, fo au oo uu tui-bengga Hara Lii Malole naa boe.
COL 1:24 Neu lelek Karistus leo numa dae-bafok ia, Ana hambu doidosok noꞌuk ka. Ma hatematak ia, au oo lemba-asaa ala doidosok mata-matak kara boe. Leo mae talo naa oo, au daleng namahoko taa-taa boe. Mete ma hambu hatahorir fo muste hambu doidosok, na, naa fo au ndia lemba-asaa ala doidosok naa soa-neu sara, sama leo Karistus lemba-nasaa doidosok soa-neu Ndia hatahorin nara. Ndia hatahorin nara dadi sama leo Ndia ao-inan.
COL 1:25 Manetualain baꞌe fee au ues ena fo aono-lalau Ndia hatahorin nara. Huu naa de au fee nenorik laꞌe-neu Ndia Dedeꞌa-kokolan no lutu-lelok fee ei.
COL 1:26 Numa makasososan mai, hatahorir ramanene Lamatuak Dedeꞌa-kokolan nara. Tehuu ara bei ta bubuluk Dedeꞌa-kokolak kara raa sosoan no manggaledok, huu sosoan naa bei nefunik. Tehuu hatematak ia, Lamatuak naketu nala ena fo buka sosoak naa soa-neu Ndia hatahorin nara. Ma Ndia nanaen fo tui-bengga tutui ta neni babanggak neu basa hatahori nusa-nusak kara marai dae-bafok ia, Yahudir do, ta Yahudir. Tutuik ta neni babanggak naa, ndia: Karistus leo nai ei dalem mara! Naa ndia, tao nala ei mamahere makandoo mae, neu ko Ana tao hata fo lolen mateꞌen soa-neu ei. Ia ndia, ita hatahori dae-bafok tahanik kana numa lele uluk mai.
COL 1:28 Dadi ai mafada neu basa hatahorir laꞌe-neu Karistus. Ai manori basa hatahorir, ma fee nesenedak neu sara, pake basa duduꞌa-aꞌafik fo Manetualain baꞌe fee ai. Ai tao talo naa, fo tao tamba matea basa hatahorir fo mana tungga Karistus, losa ara dadi matetu-mandaik fo neu ko ara bisa rambariik nai Ndia matan no ta mae, nahuu sira dalen ndoos taa-taa.
COL 1:29 Huu naa de au aote tebe-tebe ma aue-osa fafandek lima-eing nggara soa-neu ei. Au bisa akatataka aue-osa fafandek lima-eik talo naa, nahuu Karistus koasan ndia natetea au. Ndia koasan naa, ta neni babanggak!
COL 2:1 Ei mana leo nai kota Kolose, ma sira mana leo marai kota Laodikea, ma sira fo bei ta ratonggo rita ro au. Nenene matalolole! Au nau fo basan bubuluk aue-osa fafandek lima-eing soa-neu ei, ma soa-neu sara.
COL 2:2 Au nanaeng oo nau atetea sira dalen nara fo bisa rakaesa boe, nahuu ara leo-laꞌo no esa sue esa ena. Basa de ara dadi ramahere tebe-tebe, nahuu ara bubuluk tebe-tebe Manetualain nanaen ena, fo fai bakahulun bei nefunik. Hata fo neni nemeninok naa, ndia Karistus!
COL 2:3 Huu ei makaesa mia Karistus, dei fo Ana baꞌe fee basa duduꞌa-aꞌafik kara fo ei parluu, ma nanori ei pake duduꞌa-aꞌafik kara raa, fo tao hata fo neulauk kara. Duduꞌa-aꞌafik kara iar, sama leo pusaka mabeli.
COL 2:4 Au afada ei basa dedeꞌak kara laꞌe-neu Karistus, mita fo boso hambu hatahorir mai pepeko-leleko ei, ro bafa-maa mana laiminan nara.
COL 2:5 Memak au dook ka numa ei mai. Leo mae talo naa, tehuu au ta lilii ei, nahuu au daleng nakaesa no ei. Ma au amahoko, nahuu au bubuluk ei leleo-lalaꞌom ndaa no dala-hadak, ma ei bei toꞌu mahere ei nemeheherem mara neu Karistus.
COL 2:6 No fai bakahulun ei simbo mala Yesus Karistus dadi neu ei Lamatuam ena, huu naa de hatematak ia ei muste nenene makandoo neun. Huu Ndia bei dadi neu ei Lamatuam fo naena haak parenda ei.
COL 2:7 Mete ma ei leo-laꞌo makaesa mian talo naa, ei sama leo ai huuk fo tamba natea, nahuu okan saindoro seku neni dae dale neu. Ma ei sama leo uma matea, nahuu nambariik nai fanderen matea lain. Ei tao mahere makandoo nai ei nemeheherem dale, sama leo ei manori mitak kara ena. Ela leo bee na, ei dalem mara soꞌuk makasi taa-taa, nahuu basa hata fo Manetualain tao fee ei ena.
COL 2:8 Besa-besa fo ei boso tungga hatahori laen fo mana pake kada hatahori dae-bafok duduꞌa-aꞌafin, fo nuni reni ei sio laꞌo ela eno-dala ndoos. Ma boso tungga hatahori dae-bafok nenori malelan nara, fo huu-suꞌu taak. Sira nenorin nara raa, ruma kada hatahori dae-bafok duduꞌa-aꞌafin nara mai, ma ruma dae-bafok hohoro-lalanen nara mai. Tehuu nenorik kara raa, ta raoka nai Karistus dale.
COL 2:9 Basa hata fo marai Manetualain aon dale oo hambun nai Karistus aon dale boe. Ma Karistus oo dadi neu hatahori dae-bafok sama leo ita boe.
COL 2:10 No ei makaesa mia Karistus, ma dadi miu Ndia hatahorin, huu naa de Ana tao ei dadi matetu-mandaik. Huu Ndia dema lena heni basa koasar ma basa mana toꞌu parendar, leo mae malole do manggarauk, ndia koasa neni nitak do ta neni nitak.
COL 2:11 Neu faik fo sunat, hatahori Yahudir kedi heni sira ‘mamaen’ suꞌun roun fo dadi neu tanda nae, sira raa, Manetualain hatahorin. Neu ei maso dadi miu Karistus hatahorin, ei oo neni ‘sunat’ boe. Talo ia: Sunat ia, ta laꞌe-neu hatahori kedi heni roun nai ao-inan, tehuu laꞌe-neu Karistus kedi heni basa manggarauk numa ita dalen mai. Ndia, hata fo manggarauk kara fo ita hii tao, nahuu ita iar, hatahori dae-bafok.
COL 2:12 Neu ara sarani ei pake oe, naa sama leo ei neni netoik kara sama-sama mia Karistus. Basa de ei oo hambu masoda beuk boe, sama leo Ndia oo hambu masoda beuk boe. Ei hambu leo naak, nahuu ei mamahere mae, Manetualain pake Ndia koasan ta neni babanggak, fo tao nasoda falik Yesus Karistus numa mamaten mai. Ana oo pake koasa naa fo oꞌofe-fafae ei dalem mara boe.
COL 2:13 Fai bakahulun, nok bali ei mate ena, nahuu ei salam mata-matak kara, ma ei bei ta maso dadi miu Manetualain hatahorin. Leo mae talo naa, tehuu Ana koka heni basa ei sala-singgom mara, ma fee ei masoda beuk sama leo Ana tao nasoda falik Karistus numa mamaten mai.
COL 2:14 Ndondoon ndia naa, ita muste hambu huku-dokik, nahuu ita lena-langga Manetualain hohoro-lalanen nara ena. Tehuu Ana koka heni ita huku-dokin nara ena, neu faik fo ara paku Karistus numa ai ngganggek lain.
COL 2:15 Numa naa, Ana tao nasenggi basa koasa makiuk kara, ma basa mana makalalaꞌok parendar no manggarauk. Basa de Ana nakamamaek kasa numa hatahori noꞌuk matan. Naa, sama leo soldadu mana senggi netatik, fo fali tao nononggok ndule basa mamanak kara, ratudu sira musun nara fo ara tao senggik kara ena.
COL 2:16 Mete ma hatahori nae nakatutudak ei laꞌe-neu nanaꞌa-nininuk hohoro-lalanen nara, na, boso mbali sara. Mete ma hatahori nae tao dedeꞌak no ei laꞌe-neu fai maloler, do, feta bula beuk, do, hatahori Yahudir fai hahae tao ue-osan, na, boso nenene sara.
COL 2:17 Dedeꞌa leo naak kara, nenenin taa! Dedeꞌak kara raa sama leo kada lalaok, fo neu ko mopo henin. Tehuu Karistus naa ndia isi-isik. Ana ndia mahanik seku neu.
COL 2:18 Mete ma hatahorir rae rakatutudak ei, nahuu ei ta tungga hohoro-lalanek kara fo sira mesa kasa taok, na, boso mamanene sara. Mete ma ei mamanene sara, na, ei ta bisa simbo hata fo neulauk kara fo Manetualain nae fee ei. Tehuu besa-besa, ee! Memak hambu hatahorir hii sangga dalak fo rakatutudak ei. Ara nau ei muste makaloloek aom mara, ma songgo-tanggu neu Manetualain atan nara marai nusa tetuk do inggu temak, nahuu ara duꞌa rae, sira hambu meꞌis fo natudu sara talo naa. Ara tao aon nara neulaun lena heni hatahori laen nara. Naa te ta leo naak! Huu sira duduꞌan sama leo kada hatahori dae-bafok biasa.
COL 2:19 Ara ta rakaesa ro Karistus. Naa te Ana ndia Langgak. Ma Ndia hatahorin nara, sama leo Ndia ao-inan fo Ana koladun. Ana tao nala hatahorin nara tamba barakai, pake Manetualain koasan. No dalak naa, ara dadi sama leo uak no duik ratoꞌu rahere, fo esa sou esa losa ao-mbaak katematuan bisa naue-osa no neulauk!
COL 2:20 Ei mate sama-sama mia Karistus ena. De ei ta makaesa bali mia koasa makiuk kara nai dae-bafok ia. Dadi tao hata de ei bei tungga makandoo dae-bafok hohoro-lalane mata-matan nara? Ara rae leo ia:
COL 2:21 “Boso toꞌu ia; boso miꞌa naa; boso mafaroe ia.”
COL 2:22 Tehuu hohoro-lalanek kara raa, kada hatahori dae-bafok ndia taok, fo ara ranori hatahorir. Naa te hohoro-lalanek kara raa, kada koladu hata fo neu ko mopo heni sara!
COL 2:23 Mete ma hatahorir bisa tao tungga hohoro-lalanek kara raa, ara duꞌa rae, neu ko hatahorir fee hada-horomatak neu sira, huu nai hatahori memeten rae, sira malelan nara seli, hatahori mana matu-matuk tetebes, hatahori dale makaloloe aok kara, hatahori mana nakahehedik ao-ina heli-helin, ma mana songgo fo mangganten seli. Naa te taa! Hohoro-lalanek kara raa ta bisa tao ralole hatahori dae-bafok duduꞌan ma dalen fo hii tao manggarauk!
COL 3:1 Manetualain fee ei masoda beuk ena, sama leo Ana tao nasoda falik ei sama-sama mia Karistus. Hatematak ia Karistus nanggatuuk nai mamana hada-horomatak mateꞌen, nai Manetualain boboa konan. Huu naa de ei muste duduꞌa basa hata fo tao namahoko Manetualain dalen.
COL 3:2 Duduꞌa makandoo laꞌe-neu basa hata fo Manetualain hii. Boso tao matak mia hata fo kada tao namahoko hatahori dae-bafok dalen.
COL 3:3 Neu faik fo Karistus mate, ei oo mate tungga boe. Ei masoda beum naa, lino-lendek, nahuu ei makaesa mia Karistus ena, fo mana sama-sama no Manetualain nai nusa tetuk do inggu temak.
COL 3:4 Karistus nasoda nai ei dalem mara, ma Ana oo tao nala ei hambu masodak tetebes boe. Neu ko neu faik fo Ana fali mai, ei oo sou sama-sama mian boe. Basa naar, sudi selik kana!
COL 3:5 Huu naa de ei muste nggari heni ei hihiim fo mana hii tao kada manggarauk kara. Haꞌi netuduk leo: dale hii makaminak mia hatahori fo ta o saom; dale hii tao hata fo manggenggeok kara; dale hii tao tungga ao-mbaak hihii-nanaun; dale hii tao manggarauk mata-matak kara; ma dale hedik fo nau basan dadi neu kada o enam, (naa te, naa sama leo o songgo-tanggu, huu o makadedemak dedeꞌak laen, fo seti heni Manetualain).
COL 3:6 Dedeꞌak kara raa ndia tao rala Manetualain namanasa nalan seli, losa Ana nae huku-doki basa hatahorir fo ta mana nau nenene neun.
COL 3:7 Fai bakahulun ei oo leo-laꞌo talo naa boe, huu dalem mara rakaesa ro dedeꞌa manggarauk kara raa.
COL 3:8 Tehuu hatematak ia, ei muste nggari heni basa ei dalem mana hii tao manggarauk lalaꞌen. Haꞌi netuduk leo: hii mamanasa; dale katobik; mbeda dalek; kokolak makabobook hatahori nade malolen; ma bafa sesesu taak.
COL 3:9 Ma ei boso pepeko-leleko esa mbali esa. Huu ei nggari heni ei dalem fo mana hii tao manggarauk kara, ma laꞌo ela ei dala masoda raam ena. Ma hatematak ia ei nggatin, pake dale beuk ena. Naa, sama leo hatahori nggari heni ndia bua-loꞌa raan fo manggenggeok kara, de pake bua-loꞌa beuk fo laok. Manetualain ndia adu nala ei. Ma hatematak ia Ana oo ndia adun, de ei tamba malela neun, ma doo-doo bali te tao nala ei, dadi miu mata-aok esa sama leo Ndia boe.
COL 3:11 Nai masoda beuk ia dale, ita ta bisa henggenee hatahori numa kada rou dean mai tae, sira raa, hatahori Yahudir do, hatahori ta Yahudir; hatahori mana sunat do, hatahori ta mana sunat; hatahori feꞌek do, hatahori ta mana malela hadak do; ata-dato do, ta ata-dato. Naa, nenenin taa! Tehuu nenenin lenak ndia, mete ma ara rakaesa ro Karistus, ma mete ma Ana nasoda nai sira dalen.
COL 3:12 Manetualain tengga nala ei ena, nahuu Ana sue-lai ei. Ndia nanaen, na, ei dadi miu Ndia hatahori lolo-laon, fo laen numa hatahori dae-bafok biasa mai. Huu naa de ei muste dadi miu hatahori fo naena dale neulauk, dale malole, nekeloloe aok, dale bangganaꞌuk, ma dale naruk.
COL 3:13 Ei muste madale loak ma malela esa no esa. Mete ma hambu ei ketuk sangga nehuuk mbali ndia nonoon, na, boso mambeda dalek. Tehuu ei muste lilii heni salak kara raa, ma fee ambon neun, sama leo Manetualain lilii heni ei salam.
COL 3:14 Masanedak te susue-lalaik naa, nenenin lena heni basa-basan. De ei muste pake susue-lalaik naa nai ei dalem, sama leo hatahori pake bua-loꞌa nai ao-inan. Huu susue-lalaik naa tao nala ita dadi teu dalek esa, sama leo abas fo ita tenun dadi neu sidi neulauk mateꞌen.
COL 3:15 Ita bisa mole-dame to Manetualain, nahuu Karistus. Dadi ei muste fee lelak neu Karistus mole-damen oꞌofe-fafae ei dalem. Manetualain nau fo ei basa ngga leo-laꞌo no mole-damek esa no esa, nahuu ei basa ngga makaesa dadi miu ao-inak esa. Ma ei dalem mara muste moke makasi makandoo, nahuu Ana ndia here nala ei ena.
COL 3:16 Karistus Dedeꞌa-kokolan nara oo muste oꞌofe-fafae ei dalem ma ei masodam. Dedeꞌa-kokolak kara raa, sama leo pusaka mabeli, fo Ana baꞌe fee ei. Ara ratudu dalak fo ei bisa malela dedeꞌak noꞌuk ka tungga Manetualain duduꞌan. De ei bisa pake sara fo fee nenorik ma fee nesenedak neu ei esa no esa. Mete ma manori ei hatahorim mara, boso fee nenorik no barakaik, tehuu pake dale neulauk fo sofek no makasi. Pake sosoda kokoa-kikiok kara, sosoda anggamar, ma sosodak fo ei ndia taok kara, fo koa-kio neu Manetualain.
COL 3:17 Eir ia, dadi miu Yesus Karistus lima konan ena. Dadi masanedak te basa hata fo ei kokolak kara raa, pake Ndia naden. Ma basa hata fo ei taok kara oo pake Ndia naden boe. Boso lilii-ndondou tao basa-basan, pake Lamatuak Yesus Karistus “naden”. Ma moke makasi makandoo neu Ndia Aman, Manetualain.
COL 3:18 Sao inak kara ein! Ei muste nenene neu ei saom, nahuu naa ndia nandaa soa-neu hatahori fo mana tungga Yesus Karistus.
COL 3:19 Sao touk kara ein! Ei muste sue-lai neu ei saom, ma boso tuni-ndenin, fo tao mala dalen hedis.
COL 3:20 Kakanak kara ein! Ei muste tia-rada ma nenene ei ina-amam nai basa dedeꞌak kara dale, huu naa ndia tao namahoko Manetualain dalen.
COL 3:21 Ina-amar ein! Boso kada tuni-ndeni ma barakakai kakanak kara, mita fo dalen nara boso mami ma rambeda dalek neu ei.
COL 3:22 Hatahori mana maue-osar ein! Nai dae-bafok ia, ei muste tao tungga ei lamatuam nai basa dedeꞌak kara dale. Boso kada sorodododo neu ara memete ei. Tehuu maote tebe-tebe fo ei soa tao mamahoko sara. Maue-osa basa-basan no malole, nahuu ei bubuluk mae, Manetualain ndia memete ei.
COL 3:23 Ei tao hata a mesan, na, maue-osa no dere-dere hiek ta no mbera-maꞌak. Ei muste maue-osa sama leo ei maue-osa soa-neu ei Lamatuam Yesus Karistus, ta soa-neu hatahori dae-bafok. Ei maono-lalau neun. Ma neu ko Ana bala ei sosota-mamanggum, ma baꞌe pusaka fee ei.
COL 3:25 Tehuu mete ma ei maue-osa ta no malole, na, neu ko Ana hukun ei. Ana ta mbeu seserik, ma ta memete matak.
COL 4:1 Malanggan nara ein! Ei muste koladu ei neondam mara no ndoos ma ta mbeu seserik. Masanedak te ei oo maena Lamatuak nai nusa tetuk do inggu temak fo mana koladu ei boe.
COL 4:2 Ei muste manggate hule-haradoi makandoo. Ma basa hata fo ei kokolak mia Manetualain, naa tebe-tebe kalua numa ei dalem mara mai, boso duꞌa leli-belak, tehuu hule-haradoi no dalem mara sofek no makasi.
COL 4:3 Boso lilii-ndondou hule-haradoi fee ai, ma moke-hule fo Manetualain soi dalak fo ai bisa tui-bengga neu hatahorir hata fo fai bakahulun bei nefunik laꞌe-neu Karistus. Masanedak te au maso bui ia, nahuu au tui-bengga neu hatahorir laꞌe-neu Karistus.
COL 4:4 Hule-haradoi fo au bisa tui-bengga Hara Lii Malole naa no manggaledo ndoos, fo hatahorir bisa bubuluk no malole.
COL 4:5 Leo-laꞌo no ndoos nai hatahorir fo bei ta ramahere neu Karistus taladan. Pake matalolole tungga-tungga omba-lelak fo Lamatuak fee neu ei.
COL 4:6 Mete ma ei kokolak, na, kokolak no neulauk, ndaa no hatahorir dalen. Boso kokolak hata fo ara mbera nenenen. Pake dedeꞌa-kokola ndoos, fo ei bisa maselu masafali sara no malole, mete ma hambu hatahori ratane ei.
COL 4:7 Dei fo Tikikus mai tui ei laꞌe-neu au nenggetuu-nemberiing. Ndia ia, ai toranoo susuen fo mana maono-lalau Lamatuak hatahorin no dale mahanik. Fai bakahulun, ana oo nakalalaꞌok Lamatuak ue-osan sama-sama no au boe.
COL 4:8 Au adenun talo naa, fo ana bisa neti natetea ei dalem, ma bisa tui laꞌe-neu ai nai ia.
COL 4:9 Au oo adenu falik Onesimus fo tungga sama-sama noon boe. Onesimus naa, ita toranoo susuen fo dalen mahanik. Ndia ia, ei hatahori heli-helim. Sira dua sara, neu ko tui ei basa hata fo mandadik kara rai ia ena.
COL 4:10 Aristarkus haitua hara masodak neu ei. Ara kenan nai bui dale, sama-sama no au. Barnabas nufanelun, manade Markus oo haitua hara masodak boe. Fai bakahulun, au helu memak soa-neu ei ena ae, mete ma Markus mai tiro ei, na, simbon no malole.
COL 4:11 Yesus (fo ita token tae, “Yustus”) oo haitua hara masodak soa-neu ei boe. Numa basa nonook kara lalaꞌen fo mana sama-sama rakalalaꞌok Manetualain ue-osan, kada sira telu sara ndia dadi reu hatahori Karisten numa hatahori nusak Yahudi mai. Sira iar, ndia ratetea au daleng.
COL 4:12 Ei nonoom Epafras nai ia, ma ana oo haitua hara masodak soa-neu ei boe. Ana dadi neu Yesus Karistus neondan. Ana soa hule-haradoi no tebe-tebe soa-neu ei, ma noke-hule fo Manetualain natetea ei, tao natetu do nakadaik ei ma tao ei bubuluk tebe-tebe Ndia hihii-nanaun.
COL 4:13 Au afada memak ei ae, Epafras naa, naue-osa fafandek lima-ein nara soa-neu ei, ma fee hatahori Karisten nara marai kota Laodikea ma kota Herapolis.
COL 4:14 Hambu hara masodak numa Demas, ma numa doter Lukas mai, fo ita hatahori susuen.
COL 4:15 Au haitua hara masodak soa-neu toranoo kamaherek kara marai kota Laodikea. Boso lilii-ndondou haitua au hara masodang soa-neu Mama Nimfa no hatahori kamaherek kara fo mana rasiꞌe rakabua rai ndia uman.
COL 4:16 Mete ma ei basa ngga marai Kolose lees basa susurak ia ena, na, haitua makandoon neni hatahori kamaherek kara marai kota Laodikea neu, fo ara oo bisa lees boe. Ma ei oo muste lees susurak fo au haitua itan fee sara ena boe.
COL 4:17 Fee nesenedak neu Arkipus mae, “Boso lilii-ndondou makalalaꞌok makababasak ues fo o simbo malan numa Lamatuak mai naa ena.”
COL 4:18 Boso lilii-ndondou mae, ara bei kena au nai bui ia. Au oke-hule fo Manetualain natudu Ndia dale susuen neu ei. Mete neu te susurak ia, au lima reen pake au lima heli-heling. Hara masodak numa au mai, Paulus
1TH 1:1 Hara masodak numa au mai, Paulus, ma numa au nonoong nggara Silas ma Timotius mai. Ai haitua susurak ia fee basa ei saranik kara marai kota Tesalonika. Ei ndia here fo tungga Manetualain, ita Aman, ma tungga Yesus Karistus, ita Lamatuan. Ai hule neu Manetualain, fo natudu dale susuen neu ei, mita fo ei bisa leo-laꞌo no mole-damek.
1TH 1:2 Ai soa moke makasi neu Manetualain, nahuu ei nemeheherem. Hatu-leledon ai hule-haradoi fee ei basa ngga.
1TH 1:3 Ai masaneda taa-taa neu ue-osa fo ei taok naa, nahuu ei mamahere neu Lamatuak ma sue-lai neun. Ei makatataka makandoo mia ue-osar raa, nahuu ei mamahena Lamatuak Yesus. Ai soa meni basa naar reni ita Aman Manetualain matan neu.
1TH 1:4 Toranoo nggara ein! Ai bubuluk Manetualain sue-lai ei. Huu naa de Ana here nala ei dadi neu Ndia nufanelun.
1TH 1:5 Fai maneuk kara, neu ai meni Tesalonika neti, ai mafada ei Manetualain Hara Lii Malolen. Faik naa, ei pasa ndiꞌi doom mara de nenene matalolole ai kokolan. Ei ta kada mamanene a, tehuu ei oo mita no matam mara boe, Manetualain koasan numa Ndia Dula-dale Malalaon mai. Naa, ndia taon de losa ei simbok tebe-tebe Manetualain Hara Lii Malolen. Faik naa, ei mete-mita no matam mara, ai nenggetuu-nemberiin mae, ai tao talo bee, mita fo ei bubuluk tebe-tebe Manetualain eno-dala masodan.
1TH 1:6 No ei here tungga Manetualain hihii-nanaun, huu naa de ei leo-laꞌo tungga ai hihiru-heheon, ma ei oo leo-laꞌo tungga Lamatuak Yesus hihiru-heheon boe. Tehuu neu ei simbok Hara Lii Malole naa, hambu hatahori nakasususak ei. Leo mae talo naa, tehuu ei ta matanggenggo, nahuu Manetualain Dula-dale Malalaon tao namahoko ei dalem.
1TH 1:7 No dalak naa, ei matudu dalak neu basa hatahori kamaherek kara marai profensi Makedonia ma profensi Akaya.
1TH 1:8 Tehuu ta kada nai naa a mesan. Manetualain Hara Lii Malolen oo natanggela numa ei marai Tesalonika naa mai ena, losa sudi bee neu boe. De ai bei nau kokolak hata bali, huu basa hatahorir ramanene ei nemeheherem neu Manetualain ena.
1TH 1:9 Nai bee a mesan, hatahorir ratuik rae, fai maneuk kara ei makambela limam mara de simbok ai no malole. Basa boe ma ei piru heni ei sosonggo-tatanggum mara, de tungga falik neu Manetualain fo ndoos. Ei mae dadi Manetualain mana Masodak enan.
1TH 1:10 Ara oo tui-bengga boe rae, ei mahani a Manetualain Anan Yesus numa nusa tetuk do inggu temak mai. Fai maneuk kara, hatahorir rakanisan, tehuu Manetualain tao nasoda falik kana numa mamaten mai. Mateꞌen, Manetualain nae fee huku-dokik neu hatahorir ena, neu ko Lamatuak Yesus ndia nakamboꞌik ita numa Manetualain nasa-odadedein mai.
1TH 2:1 Toranoo nggara ein! Ei basa ngga bubuluk, neu ai neti makalalaꞌok Manetualain ue-osan numa Tesalonika, ai mbusen ta titi neu daer no hie-hie.
1TH 2:2 Ei oo masaneda boe, neu ai bei ta meni Tesalonika miu, hatahorir marai kota Felipi rakasususak ma tao doidoso ai ena. Tehuu Manetualain natetea ai dalem mara, de mambarani tui-bengga Manetualain Hara Lii Malolen neu ei, leo mae hatahori noꞌuk ka rareresi ta hohoꞌak ro ai.
1TH 2:3 Faik naa, ai meni Hara Lii Malole naa fee ei numa Tesalonika, ai ta meni nenori peko-pakik. Ai ta neti fo tao mamanggoa do pepeko-leleko ei.
1TH 2:4 Taa! Bakahulun ai neti no dale ndoos. Manetualain mesa kana ndia dudu ai ena, fo meni Hara Lii Malole naa neu ei. Ai ta nau tao mamahoko hatahori dalen, tehuu nau tao mamahoko Manetualain, huu Ana ndia dou do fora ai dalen nae, ndoos do peko-pakik.
1TH 2:5 Ei oo bubuluk boe mae, ai bafa-maan nara ta mana lai minak kara, lenak bali mae sangga nanalak seen esa numa ei mai. Manetualain bubuluk ai dalem.
1TH 2:6 Ai oo maue-osa, ta mae sangga kokoa-kikiok numa hatahori dae-bafok mai, do, numa ei mai, do, numa hatahori laen mai.
1TH 2:7 Air ia, Karistus nedenun. Ai oo maena haak, fo tao ai aom sama leo hatahori moꞌo-inahuuk kara, tehuu ai ta nau soꞌuk ai aom talo naa. Faik naa, ai tao ai aom sama leo kakana ana nai ei taladam. Ai oo matudu susuek neu ei, nok bali ina bonggik nasusu anan boe.
1TH 2:8 Ai ta kada neti fee Hara Lii Malole naa neu ei, te ai ao katematuan boe, nahuu air ia sue malan seli neu ei.
1TH 2:9 Toranoo nggara ein! Neu ko ei oo bei masaneda, ai maue-osa fafandek lima-ein nara hatu-leledon talo bee, mita fo bisa tanggon aom ai mesa ngga sodan. Neu ai meni Hara Lii Malole naa neu ei, ai ta mae makasosotak ei.
1TH 2:10 Ei basa ngga mita aom, leo naak oo Manetualain boe nae, neu ai sama-sama mia ei basa ngga mana kamaherek kara ruma naa ena, ai leo-laꞌo no dale lolo-laok, leo-laꞌo tungga kada ndoon, ma ta tao salak hata esa boe na.
1TH 2:11 Ei bubuluk mae, ai malalau ei basa ngga, sama leo ama bonggik nalalau ndia anan nara,
1TH 2:12 netuduk leo tao matetea ei basa ngga dalem, fee nesenedak neu ei ma kokoe ei, mita fo leo-laꞌo no mandaak, fo tao mamahoko Manetualain dalen. Ana ndia mana dadi Manek. Ana noke nala ei ena fo maso dadi miu Ndia nufanelun. Ana oo noke nala ei fo hambu hada-horomatak sama-sama mia Ndia boe.
1TH 2:13 Ai moke makasi neu Manetualain no ta mana ketuk, nahuu neu ei mamanene Hara Lii Malole naa numa ai mai, ei ta mamanene hatahori dae-bafok dedeꞌa-kokolan, tehuu mamanene Manetualain Dedea-kokolan. Ndia mesa kana ndia fofoꞌa nai ei hatahori kamaherek kara dalem.
1TH 2:14 Toranoo nggara ein! Ei bei fo tungga Manetualain eno-dalan, tehuu ei hatahori nusa isim mara rakasususak ei ena. No dalak naa, ei oo mameda sama-sama mia hatahori kamaherek kara marai profensi Yudea boe, fo mana hambu susa-sonak numa sira hatahori Yahudi heli-helin mai, nahuu ramahere neu Yesus Kristus.
1TH 2:15 Hambu hatahori Yahudi fo ta tao matak neu Manetualain hihii-nanaun. Huu naa de neu Manetualain nadenu Ndia mana toꞌu dedeꞌan nara reu sara, ara tao doidoso ma rakanisa mana toꞌu dedeꞌak kara raa. Leo naak oo, ara rakanisa Lamatuak Yesus boe. Hatematak ia ara sangga-sangga dalak, fo timba heni ai boe. Ara musu ro basa hatahorir. Manetualain oo ta hii sara boe.
1TH 2:16 Lenak bali, ara tao kai-baak mata-matak kara, mita fo ai ta bole meni seluk Manetualain Hara Lii Malolen fee hatahori nusa-nusak laen nara bali. Hatahori Yahudir raa ta nau fo Manetualain tao nasoi-nasoda hatahori laen nara. No dalak naa, ara tao sira salan nara tamba ramaheta. Huu naa de Manetualain namanasa, de huku-doki sara.
1TH 2:17 Toranoo nggara ein! Leo mae hatematak ia, nau ta nau ita basa ngga leo takadodook, tehuu naa, dook ka tungga kada mata memetek, te ta dook ka nai dalek. Ai sangga-sangga fai lelak, fo mete ma bisa, na, ai neti tiro-dangga seluk ei bali, huu ai dalen hii malan seli neu ei.
1TH 2:18 Au mesa ngga soba laꞌi-laꞌik ka nau neti tiro-dangga ei ena, tehuu nitur malanggan soa natabaa au lalaꞌong nakandoo.
1TH 2:19 Ei bubuluk, tao hata de ai nau neti tiro-dangga ei? Naa dadi, nahuu ai mamahena neu ei. Ei ndia tao ai dalen mbena sau-sau ma bisa botik ai langgan. See ndia toꞌu nahere Lamatuak Yesus naden bali, te kada ei ena! Neu faik fo Lamatuak fali mai, na, ai bisa botik ai matan, nahuu ei.
1TH 2:20 Memak tebe! Ei ndia tao ai dalen nara ratea ma mbena sau-sau.
1TH 3:1 Sadi kada ei bubuluk, fai maneuk kara fo ai laꞌo ela ei naa, ta tungga ai hihiin. Ai dalen hii nalan seli neti tiro-dangga ei, tehuu ta bisa. Ai ta makatataka mala dook ka ena, huu naa de ai maketu mala fo madenu Timotius neti. Tehuu au ma Silas mahani nai kada kota Atena. Timotius naa, ai toranoon. Ma ndia ai nonoon tao ue-osa fo sama-sama makalalaꞌok Yesus Karistus Hara Lii Malolen. Ai madenun neti fo ana nanori ei ma natetea ei dalem, mita fo ei nemeheherem tamba natea neu Manetualain.
1TH 3:3 No dalak naa, mete ma hambu susa-sonak, ei ta matanggenggo. Toꞌu mahere ei nemeheherem. Huu ei bubuluk mae, hatahorir fo mana ramahere neu Karistus, neu ko hambu susa-sonak talo naa.
1TH 3:4 Fai bakahulun, neu ai bei sama-sama mia ei, ai fee nesenedak ena mae, hatahori fo mana namahere neu Lamatuak Yesus, neu ko hambu susa-sonak mata-matak kara. Hatematak ia, basan dadi leo naak ena, hetu!
1TH 3:5 No au susa ae mate soa-neu ei nenggetuu-nemberiim mara, huu naa de au adenu Timotius neni Tesalonika neti, mita fo ai bisa bubuluk ei bei mamahere makandoo neu Lamatuak, do taa. Huu au atanggengge, boso losak nitur malangga ina-huun neti fo soba-dou ei ena, fo masadea laꞌo ela Lamatuak. Mete ma dadi talo naa, na, ai ue-osan fai bakahulun hie-hie a mesan!
1TH 3:6 Hatematak ia Timotius fali numa Tesalonika mai ena, ma neni hara liik fo tao nala ai mamahoko. Ana tui nae, ei mamahere taa-taa neu Karistus, ma esa sue esa nakandoo. Boe ma ana nafada nae, ei oo dalem hii nalan seli neu ai boe, sama leo ai oo dalen hii nalan seli neu ei boe.
1TH 3:7 Toranoo nggara ein! Leo mae ai nai ia mameda berak, nahuu hambu susa-sonak sudi numa bee mai ta baꞌu anak, tehuu Timotius tutuin tao nala ai mamahoko malan seli. Huu hatematak ia, ai bubuluk ena mae, ei nemeheherem matea makandoo neu Lamatuak.
1TH 3:9 De ai moke makasi noꞌun seli neu Manetualain no dale nemehokok, nahuu ei tungga maherek kana.
1TH 3:10 Hatu-leledon ai hule-haradoi taa-taa, fo mete ma bisa, na, ai bei bisa matonggo mia ei bali. Ai nau fee nenorik fo tao matetu do makadaik ei laꞌe-neu Manetualain eno-dala masodan.
1TH 3:11 Ai mamahena neu Manetualain, ita Aman, ma Yesus Karistus, ita Lamatuan, fo soi dalak losa ai bisa neti matonggo mia ei bali.
1TH 3:12 Ai moke-hule fo Lamatuak tao ei tamba masue-laik lena-lenak bali. Ma ei oo sue neu basa hatahorir, sama leo ai sue ei boe.
1TH 3:13 No dalak naa, Lamatuak natetea ei dalem, fo leo-laꞌo ndoos ma lolo-laok, losa faik fo Lamatuak Yesus fali mai no hatahorin nara, na, ei mambariik nai ita Aman Manetualain matan, ta lemba-masaa sala-singgok hata-hata.
1TH 4:1 Dadi talo ia, toranoo nggara ein! Ai kokoe ei, mita fo ei leleo-lalaꞌom tao ramahoko Manetualain dalen sama leo hata fo ai manori ei ena. Memak ei leo-laꞌo tungga basa naar ena. Tehuu no ita dadi teu Lamatuak Yesus nufanelun ena, de ai moke fo ei maote tebe-tebe lenak bali.
1TH 4:2 Ei basa ngga bubuluk ena, hata fo ai manori neu ei, pake Lamatuak Yesus koasan.
1TH 4:3 Manetualain hihii-nanaun talo ia: Leo-laꞌo no lolo-laok! Boso no manggenggeok. Ndia boso laꞌok sala mua hatahori fo ta o sao toum do o sao inam.
1TH 4:4 Ei muste malela koladu ei ao heli-helim, fo leo-laꞌo no lolo-laok mita fo hatahorir fee hada-horomatak neu ei.
1TH 4:5 Boso leo-laꞌo tungga ao-mbaak hihiim, sama leo hatahori fo ta mana nalela Manetualain.
1TH 4:6 Boso hambu hatahori fo nau haꞌi nanalak, do, nau laꞌok sala no hatahori fo sama-sama ramahere neu Manetualain. Huu Manetualain naa, Lamatuak fo neu ko bala basa-basa manggarauk leo naak. Basa iar, ai mafada ei laꞌi-laꞌik ka, ma fee nesenedak memak numa fai bakahulun mai ena.
1TH 4:7 Manetualain noke nala ai, fo dadi neu hatahorin. Ndia dale hihiin naa, ita muste leo-laꞌo no lolo-laok, ta no manggenggeok, sama leo mana hohonggek kara.
1TH 4:8 Huu naa de hatahori fo ta nau tungga nenorik ia, ana ta timba heni kada ai, tehuu ana oo timba heni Manetualain boe, fo mana fee Ndia Dula-dale Malalaon neu ei ena.
1TH 4:9 Au ameda au hae surak seluk bali fee ei laꞌe-neu masue-laik toranook no toranook, nahuu Manetualain mesa kana fee nenorik ena nae, ei muste masue-laik esa no esa.
1TH 4:10 Ai mamanene ena, ei sue basa toranook marai profensi Makedonia naa. Tehuu toranoo nggara ein! Hatematak ia ai moke fo ei sue hatahori laen lena-lenak bali.
1TH 4:11 Maote tebe-tebe fo ei bisa leo-laꞌo no lino-lendek. Boso miu masalaꞌe mala hatahori laen uma dalen ena, tehuu esa-esak koladu ndia ena uma dalen. Ei muste maue-osa, fo sangga nanaꞌa-nininuk no ei-lima heli-helim. Boso mamahena hatahori laen. Ai fee memak nesenedak ia neu ei numa fai bakahulun mai.
1TH 4:12 Mete ma ei leo-laꞌo talo naa, na, ei ta tao mambera hatahori laen. Mete ma hatahori laen nara fo ta mana ramahere neu Karistus mete-rita ei leleo-lalaꞌom talo naa, na, neu ko ara rae, “Awii! Memak hatahori fo mana tungga Lamatuak Yesus naa, ara leo-laꞌo tungga ndoon tebe!”
1TH 4:13 Toranoo nggara ein! Hatematak ia, au sangga ae afada dedeꞌak esa, mita fo ei bubuluk tebe-tebe laꞌe-neu hatahori mates. Ita bubuluk tae, hatahori mates sara neu ko ara rasoda fali numa mamaten nara mai. Dadi mete ma hambu numa Lamatuak Yesus hatahorin mai ana mate, na, ei boso susa-sona, sama leo hatahori laen nara fo ta mana ralela dedeꞌak naa.
1TH 4:14 Ita bubuluk ena tae, Yesus mate, basa de Manetualain tao nasoda falik kana numa mamaten mai. Mete ma talo naa, na, Manetualain oo tao nasoda falik basa hatahori mates fo kamaherek boe, ma nakabubua nala sara sama-sama ro Lamatuak Yesus.
1TH 4:15 Neu Lamatuak Yesus fali mai, Ana nau konda numa nusa tetuk do inggu temak neni dae-bafok mai, neu ko hambu harak nalii nahere fee parenda. Basa de Manetualain atan manai nusa tetuk do inggu temak malanggan, fee parenda fo fuu toꞌik. Boe ma Lamatuak hatahori mana maten nara ena rasoda fali. De ara ro ita bei masodak kara iar, neni soꞌuk hene teni sosoꞌak teu fo sama-sama simbok Lamatuak Yesus mamain. Basa boe ma ita basa ngga tasoda seku neu to Ndia. Ei nenene matalolole, te hata fo ai mafadak ia, Lamatuak mesa kana ndia nafada.
1TH 4:18 No dalak naa, ei muste pake nenorik ia, fo esa natetea esa dalen.
1TH 5:1 Toranoo nggara ein! Ai ta parluu surak mafada mae, Lamatuak mamain naa, laꞌe liꞌu hida do bulak fain hida.
1TH 5:2 Huu ei basa ngga bubuluk mae, Ndia mamain naa no kaiboik, sama leo naꞌo manu-meo mai nai fai hatun,
1TH 5:3 boe ma hatahori noꞌuk kara ranggatuuk pasi-pasi ta no huu-heek, te medak neu ma hambu sosoek. Ndia mamain oo sama leo ina kairuk boe, fo medak neu nameda hedis nae bonggi ena. Mete ma basa iar dadi, na, ita ta tae timba henin talo bee bali! Lamatuak mamain oo leo naak boe.
1TH 5:4 Toranoo nggara ein! Boso losak Ndia mamain naa, saꞌe laꞌe ei sama leo naꞌo manu-meo mai nai fati ladak, ndandaak ei sunggu seli. Ei boso leo naak! Ita ta leo-laꞌo nai makiuk-makahatuk dale, sama leo hatahori laen fo mana sunggu selik kara. Tehuu ita fo mana tamahere neu Yesus, leo-laꞌo nai manggaledok dale ena, tahehere fo simbok kana, ma tanea tatalolole ita aon. Ei bubuluk basa matak kara iar ena!
1TH 5:7 Huu hatahori mana sungguk, nasiꞌe sunggu nai leꞌodaen. Ma hatahori mana mafuk, nasiꞌe mafu nai leꞌodaen.
1TH 5:8 Tehuu ei boso talo naa, te ita iar leo-laꞌo nai manggaledok dale ena. Ei muste manea ei aom. Mete ma ei mamahere taa-taa neu Lamatuak ma esa sue esa, na, sama leo soldadu mana pake bua babata tendek. Mete ma ei mamahena taa-taa neu Lamatuak Yesus fo mana tao nasoi-nasoda ei numa Manetualain nasa-odadedein mai, sama leo soldadu mana suru langgan pake solangga besik.
1TH 5:9 Manetualain ta here nala ita fo laꞌe tala Ndia huku-dokin. Tehuu Ana here nala ita fo hambu masoi-masodak, nahuu ita tamahere neu Yesus Karistus, ita Lamatuan.
1TH 5:10 Ana mate ena fo nggati ita. Dadi neu faik fo Ana fali mai, ita tasoda takandoo toon, leo mae ita mate ena, do bei tasoda.
1TH 5:11 Huu naa de pake au dedeꞌa-kokolang ia, fo kokoe-nanasi ma esa natetea esa, sama leo ei taok numa bakahulun mai.
1TH 5:12 Toranoo nggara ein! Masaneda fo fee hada-horomatak neu ina-ama malangga saranik kara. Sira ndia raue-osa fafandek lima-ein nara ma fee nesenedak neu ei, mita fo ei boso tuda.
1TH 5:13 Tia-tamba sara no ei susue-lalaim, nahuu sira raa raue-osa rahere soa-neu ei. Esa no esa leo-laꞌo no ndolu ma dame.
1TH 5:14 Toranoo nggara ein! Bei ela dedeꞌak hida bali fo ai mae fee nesenedak neu ei talo ia: Mafada mbera-barek kara fo raue-osa tebe-tebe. Matetea dale mana monda-maꞌak kara. Masalaꞌe hatahori kadiꞌi anak kara. Ma makatataka mia basa hatahorir.
1TH 5:15 Masaneda fo boso bala manggarauk no manggarauk. Tehuu maote tebe-tebe fo soa tao kada tatao-nonoꞌi neulauk neu basa hatahorir. Boso tao neulauk neu kada ita hatahorin mesa kasa, tehuu hatahori deak kara boe.
1TH 5:16 Tao dalem namahoko taa-taa.
1TH 5:17 Hule-haradoi hatu-leledon.
1TH 5:18 Toke makasi neu Manetualain nai matak bee a mesan, leo mae susa, do nemehokok. Huu Manetualain hii basa hatahorir fo mana tungga Yesus Karistus tao leo naak.
1TH 5:19 Boso tao kai-baak neu Manetualain Dula-dalen ue-osan.
1TH 5:20 Mete ma hambu toranook esa nae, ndia simbo hara heheluk numa Manetualain mai, na, boso duꞌa mae, dedeꞌa-kokolan mudak ka!
1TH 5:21 Tehuu ei muste parisa matalole hara heheluk naa nae, tebe do taa, ana naoka numa Manetualain mai. Mete ma tebe, na, tungga leo.
1TH 5:22 Makaheok numa basa maggarauk ndendeen mai.
1TH 5:23 Au hule-haradoi oke Manetualain nalalao ei dalem mara ma basa ei leleo-lalaꞌom mara. Ana ndia tao ita tandolu-dalek esa no esa. No dalak naa, neu ita Lamatuan Yesus Karistus fafalin, ei bisa mambariik miu matan no ei ao-inam, dalem ma samanem, ta no sala-singgok hata esa boe na. Tebe! Huu Lamatuak Yesus naa, dalen mahanik. Ana ndia noke nala ei dadi miu Ndia hatahorin. Hata fo Ana kokolak kana, na, ana tao natetun. De ita bubuluk tae, neu ko Ana nuni ei no lolo-laok meni Manetualain matan miu.
1TH 5:25 Basa toranoo nggara ein! Boso lilii-ndondou hule-haradoi fee ai nai ia.
1TH 5:26 Au oke fo ei haitua hara masodak fee basa Lamatuak saranin nara marai naa.
1TH 5:27 Au oke no Lamatuak Yesus naden, fo ei lees au susurang ia, fee basa saranik kara lalaꞌen.
1TH 5:28 Au hule neu ita Lamatuan Yesus Karistus, fo natudu dale susuen neu ei basa ngga. Baꞌu kada naa. Sodak-molek, Paulus
2TH 1:1 Hara masodak numa ai mai, Paulus, ma numa au nonoong nggara Silasma Timotius mai. Susurak ia, ai haitua fee basa ei saranik kara marai kota Tesalonika. Ei ndia here fo tungga Manetualain, ita Aman, ma tungga Yesus Karistus ita Lamatuan.
2TH 1:2 Ai hule fo Ara ratudu dale susuen nara reu ei, mita fo bisa leo-laꞌo no mole-damek ma lino-lendek.
2TH 1:3 Basa toranoo nggara ein! Memak nandaa, ai soa moke makasi neu Manetualain, nahuu ei boe mamahere neun ma boe masue-laik esa no esa ena.
2TH 1:4 Huu naa de ai tui ei hihiru-heheon neu Manetualain hatahori saranin nara sudi rai bee. Ai tui mae, ei makatataka makandoo nai nemeheherem dale, leo mae hatahori laen nara tuni-ndeni rakasususak ei.
2TH 1:5 Basa iar ratudu rae, neu ko Manetualain naketu ei dedeꞌam no ta mbeu seserik. Susa-sonak fo ei lemba-masaak lelek ia, tao nala ei mandaa dadi miu Ndia hatahorin. Ndia naa, ei Manem.
2TH 1:6 Boso mamataꞌu, te Manetualain naa, ta mbeu seserik. Mete a leo! Neu ko Ana ndia bala hatahorir raa fo mana tao doidoso ei.
2TH 1:7 Ma Ana oo fee ei hahae taak numa susa-sonak fo ei lemba-masaak mai boe. Ana oo tao talo naa fee ai boe. Basa iar neu ko ara mori-dadi, neu lelek Lamatuak Yesus konda mai, sama-sama no atan nara fo ta neni babanggak kara ruma nusa tetuk do inggu temak mai.
2TH 1:8 Neu ko ara konda mai ro aꞌi mana mbila moꞌok. Boe ma Ana bala neu basa hatahorir fo ta mana nau ralela Manetualain ma ta nau tungga Lamatuak Yesus Hara Lii Malolen.
2TH 1:9 Ana fee huku-doki berak sudi selik kana neu basa sara, losa etoboꞌa tai nala sara seku neu. Ana husi heni sara numa matan mai, de ara ta rameda rala Ndia koasa ta neni babanggak bali.
2TH 1:10 Tehuu neu faik fo Ana mai naa, basa hatahori kamaherek kara rakadedemak naden, ma fee hada-horomatak neun. Neu ko ei oo nai hatahori kamaherek kara raa taladan boe, nahuu ei simbo mala Hara Lii Malole naa, fo fai maneuk kara ai tui-benggan neu ei ena.
2TH 1:11 Huu naa de ai hule-haradoi hatu-leledon fee ei, mita fo Manetualain duꞌa nae, memak ei mandaa dadi miu Ndia hatahorin. Ai oo moke-hule fo Ana fee koasan neu ei, mita fo bisa tao basa hata fo neulauk, tungga hata fo ei henggenee mae taon, ma hata fo ei mamahere.
2TH 1:12 Mete ma ei leo-laꞌo tungga dalak naa, neu ko hatahorir rakadedemak Lamatuak Yesus naden. Ma ei oo hambu kokoa-kikiok boe, huu ei tunggan. Basa iar neu ko mori-dadi, nahuu ita Aman Manetualain, ma ita Lamatuan Yesus Karistus dale susuen.
2TH 2:1 Toranoo nggara ein! Hatematak ia, ai mae mafada ei laꞌe-neu lelek bee fo ita Lamatuan Yesus Karistus nae fali mai, ma laꞌe-neu ita takabua toon.
2TH 2:2 Boso hambu kedi-irak no muda hiek, do, boso panggananaa mete ma ei mamanene hatahorir rae, Lamatuak fali mai ena. Leo mae ara kokolak rae, sira bubuluk numa Manetualain Dula-dalen mai, do, ramanene numa hatahorir mai, do, ara hambu susurak numa ai mai, boso mamahere sara. Basa naar, kokola bafa rouk!
2TH 2:3 Boso fee lelak hatahorir tao ranggoa ei. Huu neu ko muste hambu hatahori manggarauk esa toda nakahuluk, dei fo Lamatuak Yesus fali mai. Hatahori ia laban tebe-tebe neu Lamatuak, losa hatahori noꞌuk kara oo tungga laban boe. Hatahori ia, memak sudi selik kana! Huu naa de ana nandaa maso neni aꞌi mbila ta kala matek neu.
2TH 2:4 Ana tao aon dema lena heni basa dewar, ma laban basa hata fo hatahorir rakaluku-rakatele neun. Losa ana maso neni Manetualain Uma Huhule-haradoi Ina-huun neu, boe ma ana femba tenden nae, “Au ia, Manetualain!”
2TH 2:5 Ei masaneda, do taa? Fai maneuk kara au afada memak ei laꞌe-neu hatahori manggarauk naa ena, neu lelek au bei sama-sama ua ei, hetu?
2TH 2:6 Hatematak ia, ta hatahori manggarauk naa fain fo natudu aon, huu hambu hata esa ndia namanggenggeen. Ei oo bubuluk boe hata ndia namanggenggeen talo naa.
2TH 2:7 Hatematak ia, mana laban tao mue-anggik no neneek, nahuu bei hambu esa namanggenggeen. Tehuu neu ko mana mamanggenggeek naa nakamboꞌik liman.
2TH 2:8 Boe ma mana laban naa toda mai, de ana laban no ledo-ledo. Tehuu ndaa no Lamatuak Yesus mamain no manula-manapun, Ana nakalulutu hatahori manggarauk naa, pake kada dedeꞌa deꞌek esak ka.
2TH 2:9 Tehuu neu faik fo Lamatuak Yesus bei ta mai, nitur malangga ina-huun fee koasa ta hohoꞌak neu hatahori manggarauk naa, fo ana bisa tao tanda heran mata-matak, losa hatahorir duꞌa rae, ndia naa pake Manetualain koasan.
2TH 2:10 No dalak naa, hatahori noꞌuk ka hambu kedi-irak numa hatahori manggarauk naa pepeko-lelekon mai. Sira raa ndia neu ko lenggo feꞌe numa Manetualain mai. Leo mae Ana nasosoi dalak fo tao nasoi-nasoda sara, tehuu ara tola heni Ndia nanae neulaun ma ta nau ramahere neu hata fo ndoos.
2TH 2:11 Huu naa de Manetualain kena ketu dalen nara numa duduꞌa ndoos mai, mita fo ramahere neu basa pepeko-lelekok kara raa lalaꞌen.
2TH 2:12 No dalak naa, Manetualain naketu huku-doki berak neu sara, nahuu ara ta nau ramahere neu hata fo ndoos. Te sira hihiin lenak tao kada manggarauk.
2TH 2:13 Toranoo nggara ein! Ai moke makasi taa-taa neu Manetualain, nahuu Ana sue-lai ei. Neu Ana bei ta adu dae-bafok ia, Ana naketu memak ena fo tao nasoi-nasoda ei. Boe ma Ana fee Ndia Dula-dalen tao nalalao ei, nahuu ei mamahere hata fo ndoos.
2TH 2:14 Neu ai tui-bengga Hara Lii Malole neu ei, Manetualain pake Hara Lii Malole naa fo noke nala ei, mita fo tungga mameda ita Lamatuan Yesus Karistus hada-horomatan.
2TH 2:15 Toranoo nggara ein! Makatataka makandoo ma toꞌu matalolole basa hata fo ai mafada ei ena. Masaneda neu basa hata fo ai surak nai susurak dale boe.
2TH 2:16 Ai hule-haradoi taa-taa neu Manetualain, ita Aman, ma Yesus Karistus, ita Lamatuan. Ai moke-hule fo Ara ratetea ei dalem, mita fo ei tao basa hata fo neulauk. Ai moke-hule talo naa, nahuu ai bubuluk mae, Lamatuak naa, sue nalan seli neu ita basa ngga. No Ndia dale susuen, huu naa de Ana ta hahae natetea ita dalen. No dalak naa, ita bisa tamahena neun seku neu.
2TH 3:1 Basa toranoo nggara ein! Boso lilii-ndondou hule-haradoi fee ai. Hule-haradoi, mita fo Lamatuak Hara Lii Malolen bisa natanggela lai-lai, ma hatahorir sudi rai bee bisa fee hada-horomatak neu Hara Lii Malole naa, sama leo neu faik fo ei mesa ngga simbo Hara Lii Malole naa.
2TH 3:2 Hule-haradoi fo ela leo bee na ai oo hambu nekemboꞌik numa mana tao mue-anggik kara mai, ma numa hatahori manggarauk laen nara mai boe, huu ta basa hatahorir ramahere Hara Lii Malole naa.
2TH 3:3 Tehuu Lamatuak toꞌu Ndia dedeꞌa-kokolan. Ana bisa natetea ei dalem mara, ma nasusuru ei numa manggarauk mai.
2TH 3:4 Ma ai oo mamahere tebe-tebe boe mae, Lamatuak Yesus tao nala ei tungga hata fo ai mafada ei ena. Ma ei oo tao tungga talo naa seku neu boe.
2TH 3:5 Ai mamahena Lamatuak Yesus nakalalaꞌok ei, mita fo ei boe malela mae, Manetualain sue-lai ei. Ma ei oo malela boe mae, ei mabeꞌi makatataka nai doidosok dale, sama leo fai bakahulun Karistus nakatataka nai Ndia doidoson dale.
2TH 3:6 Basa toranoo nggara ein! Au fee nesenedak memak neu ei pake Lamatuak Yesus Karistus naden, ee! Boso makabua mia hatahori mbera-barek fo mana soa loro-kook kara raa. Huu ara ta tungga netuduk numa ai maue-osa maheren mai.
2TH 3:7 Ei basa ngga bubuluk mae, ei muste haꞌi netuduk numa ai leleo-lalaꞌon mai neu fai bakahulun ai leo mia ei. Ei mesa ngga mete-mita no ei matam mara ena. Ai ta nggari mita ledo-fai no hie-hie a mesan.
2TH 3:8 Ai maue-osa fafandek lima-eim mara hatu-leledon, mita fo ai boso tao mambera ei. Ai oo bei ta simbo hatahori naꞌa-ninun no kada mudak ka boe.
2TH 3:9 Air ia, Lamatuak hatahori mana maue-osan. De ai maena haak fo moke sudi hata numa ei mai. Tehuu ai ta nau pake haak naa. Air ia, nau dadi netuduk malole, mita fo ei tao tungga.
2TH 3:10 Fai maneuk kara, ai oo laꞌo ela fee ei hohoro-lalanek ena boe mae, “See ta naue-osa, na, ana hae naꞌa.”
2TH 3:11 Ai hambu harak mae, ketuk ruma ei mai kada loro-koo ta nau raue-osa. Ara kada ramue-osek ma reu sorodododo ro hatahori ena uma dalen.
2TH 3:12 Hatahori matak leo naak kara, ai fee nesenedak neu sara, pake Lamatuak Yesus Karistus naden, fo ara hahae loro-koo. Malole lenak ara mulai raue-osa, fo sangga nanaꞌak no sira mbuse titi heli-helin.
2TH 3:13 Basa toranoo nggara ein! Ei boso mbera tao hata fo neulauk, ee!
2TH 3:14 Ei tanda matalolole hatahori fo ta mana nau tungga hata fo ai surak nai susurak ia dale. Boso tao matak neu sara, mita fo ara mae rasafali aon nara.
2TH 3:15 Tehuu boso tao sara sama leo ei musum. Mahara mia sara no malole, sama leo ei toranoo heli-helim.
2TH 3:16 Lamatuak naa, Mane Mole-damek. Au oke-hule fo Ana baꞌe fee ei Ndia mole-damen nai hata a mesan. Au amahena Lamatuak sama-sama no ei taa-taa.
2TH 3:17 Dedeꞌa deꞌe neteꞌek nai susurak ia dale, au surak no au lima heli-heling, mita fo ei bubuluk mae, susurak ia tebe-tebe numa au mai. Basa susurak laen nara oo, au tao talo naa boe.
2TH 3:18 Au oke-hule fo ita Lamatuan Yesus Karistus natudu dale susuen neu ei basa ngga. Susurak ia losa kada ia, Paulus
1TI 1:1 Timotius fo malole! Hara masodak numa au mai, Paulus. Manetualain soꞌuk nala au dadi uu Yesus Karistus nedenun ena. Ma ita tamahena a neu Lamatuak Yesus fo mana fee ita leo-laꞌo takandoo toon, nahuu Manetualain tao nasoi-nasoda ita numa ita sala-singgon mai ena. Timotius! O sama leo au ana heli-heling, nahuu au oo ndia atudu dalak fo o mamahere neu Karistus boe. Au hule-haradoi oke fo Manetualain, ita Aman, ma Yesus Karistus, ita Lamatuan ratudu Sira dale susuen, dale kasian ma fee o leo-laꞌo no mole-damek ma lino-lendek.
1TI 1:3 Fai maneuk kara, ita dua ngga sama-sama numa kota Epesus. Neu au ae laꞌo uni profensi Makedonia uu, au fufuꞌa o fo mahani nai Epesus. Faik naa, hambu hatahorir tao pangganaa saranik kara ma fee nenori ta ndoos sara. De au oke o muu kaꞌi sara, fo ara boso fee nenorik rakandoo talo naa.
1TI 1:4 Ma hatahorir oo ngganggari heni ledo-fain nara boe, ma reu rasimbo bafak ro tutui lasik fo ta tetebes. Ara oo adu bafa-maan laꞌe-neu tititi-nonosik tututi-nanaton ta mana ketuk boe. Dedeꞌa matak leo naak kara kada tao hatahorir rahuur, ma tao sara ta leo-laꞌo no nemeherek neu Manetualain.
1TI 1:5 Au fee nenori-nefadak neu o ia, no dale hihiik mita fo manori hatahori kamaherek kara fo leo-laꞌo ro rasue-laik numa dale lolo-laok mai, numa duduꞌa ndoos mai, ma numa nemeherek no dale katematuan mai.
1TI 1:6 Tehuu hambu meser ketuk fo sio laꞌo dook ma laꞌo ela nenori-nefadak naa ena. Boe ma ara reu ngganggari heni ledo-fair ro rasimbo bafak ma kokolak sadi ndaa.
1TI 1:7 Ara ratudu aon nara rae, sira raa, meser mana fee nenorik laꞌe-neu baꞌi Musa Hohoro-lalanen nara. Ara tao aon nara dadi meser ina-huuk, tehuu ara ta bubuluk hata fo ara fee nenorik naa.
1TI 1:8 Ita basa ngga bubuluk tae, basa baꞌi Musa Hohoro-lalanen nara, malole. Sadi ita takalalaꞌok kasa tungga Manetualain hihii-nanaun.
1TI 1:9 Hohoro-lalanek kara raa, ta surak fee hatahorir fo leleo-lalaꞌon nara ndoos ena. Tehuu surak fee hatahori mana laban, hatahori ta mana nau nenene parenda, hatahori mana leo-laꞌo dook ka numa Manetualain mai, hatahori mana hii tao manggarauk, hatahori ta mana tao matak neu Manetualain, hatahori mana makadadaek hata fo lolo-laok, hatahori mana makanisa hatahori, hatahori mana makanisa inan no aman heli-helin.
1TI 1:10 Hohoro-lalanek kara raa oo surak hatahori mana sao leli-belak, touk mana sao no touk, hatahori mana leꞌa reni hatahori fo roke doik, hatahori mana pepeko-lelekok, hatahori mana sakasii pepekok, ma hatahori mana makasisikik hatahorir fo laban nenori ndoos boe.
1TI 1:11 Nenorik fo ndoos sara numa Manetualain Hara Lii Malolen mai, fo Ana loo liman neu au. Ma Lamatuak naa, Manetualain fo ta neni babanggak sudi selik kana. Hatahorir randaa rakadedemak kana.
1TI 1:12 Au oke makasi noꞌuk ka neu ita Lamatuan Yesus Karistus, nahuu Ana tengga nala au dadi uu hatahori nemeheheren, ma fee au bebeꞌi-barakaik, losa au bisa akalalaꞌok Ndia ue-osan.
1TI 1:13 Naa te fai bakahulun, au soa kokolak aboboo fo akatutudak Yesus naden, ma tao doidoso hatahorir fo mana tungga Ndia dala masodan. Au soa tuni-ndeni fo akalulutu sara. Au manggarauk talo naa, nahuu faik naa au ta alela hata fo au taok, ma bei ta amahere neu ita Lamatuan Yesus Karistus. Tehuu Ana ta lilii au ma natudu Ndia susuen neu au. Lenak bali, Ana natudu dale susuen neu au ta mana basak! Ana fee babaꞌe-babatik sasi kao-kao neu au, fo amahere ahere neun, ma bisa sue-lai hatahori sama leo Ana sue-lai au.
1TI 1:15 Ita tasiꞌe tamanene ena tae, “Yesus Karistus mai nai dae-bafok ia ena, fo tao nasoi-nasoda hatahorir fo mana tao sala-singgok kara.” Memak tetebes talo naa! Numa basa hatahorir mana tao salak mai, na, au ia ndia manggaraun lenak.
1TI 1:16 Leo mae au manggarauk talo naa, tehuu Manetualain naketu fo ta natuda huku-dokik neu au. Ana nau pake au dadi uu netuduk fo atudu Yesus Karistus dale loan neu hatahori manggarauk mateꞌen sama leo au ia. No dalak naa, hatahori laen fo mana tao sala-singgok kara oo bisa ramahere neun, mita fo ara hambu masodak rakandoo roon boe.
1TI 1:17 Koa-kio Manetualain! Kada Ndia mesa kana, Manetualain. Ta hambu laen ena bali! Manek mana toꞌu parenda ta mana basak. Ana ndia nasoda seku neu. Ana ndia ta mana matek. Ana ndia hatahori ta bisa mete-nitan no mata deꞌe heli-helin. Hatahorir fee basa hada-horomatak ma kokoa-kikiok neun losa doon naa neu! Amin.
1TI 1:18 Au anang Timotius fo dale malole! Au ae afada o, hata fo o muste makalalaꞌok kana nai uem mara. Basa iar tungga hata fo Manetualain mana toꞌu dedeꞌan nara kokolak memak laꞌe-neu o aom ena. Mete ma o tungga basa dedeꞌak kara raa no malole, o dadi sama leo soldadu esa, mana malela netatik, laban basa manggarauk kara.
1TI 1:19 Toꞌu mahere o nemeheherem neu Karistus. Ma manea o dalem fo lolo-laok seku neu. Huu hambu hatahori laen ta nau nenene sira dale kuru-eron nara ena bali, fo tao sira nemeheheren nakalulutu, sama leo ofak saꞌe nala harik.
1TI 1:20 Himenius no Aleksander asa, sama tetar talo naa ena! Huu naa de au loo lima sara reni nitu malanggan reu ena. Au tao talo naa, mita fo naa dadi neu nenorik esa, fo ara boso rakalulutu Manetualain naden bali.
1TI 2:1 Makasososan, au oke ei hule-haradoi fee basa hatahorir. Mete ma ei miu masare mbali Manetualain, na, moke fo Ana tulun basa hatahorir marai susa-sonak kara dale. Ma moke makasi, nahuu Ana tao malole neu sira basa sara.
1TI 2:2 Hule-haradoi talo naa, fee basa mane-manek kara ma basa hatahori mana toꞌu parenda boe. No dalak naa, ita basa ngga leo-laꞌo no lino-lendek ma mole-damek, tungga Manetualain hihii-nanaun. Leleo-lalaꞌok naa, nandaa no hatahori mana makaluku-makatele neun.
1TI 2:3 Huhule-haradoi matak leo naak naa, malole. Naa, tao namahoko Manetualain mana tao nasoi-nasoda ita.
1TI 2:4 Ana nau fo basa hatahorir hambu masoi-masodak, ma ralela hata fo ndoos. Ndia:
1TI 2:5 Manetualain naa, kada kisek. Ma hambu kada lelete kisek fo nakadadamek Manetualain no ita hatahori dae-bafok, ndia Yesus Karistus. Yesus naa, hatahori dae-bafo isi-isik.
1TI 2:6 Ana loo lima aon fo tefa-soi nala ita basa ngga numa ita sala-singgon nara mai. Ndaa no fain, boe ma Manetualain buka no ledo-ledo hara lii malole naa ena, fo nafada neu basa hatahorir.
1TI 2:7 Ma Ana here nala au dadi uu Ndia nedenun ena, fo laꞌok uu afada hatahori ta Yahudir nai bee a mesan ma anori sara, mita fo ara oo ramahere neu Lamatuak Yesus ma leo-laꞌo tungga eno-dala ndoos boe. Hata fo au afadak ia, tetebes. Au ta kokolak bafa rouk.
1TI 2:8 Au hihiing talo ia: Nai bee a mesan, mete ma ei makabua fo hule-haradoi, na, ei dalem mara muste neulauk esa no esa. Esa boso namanasa esa. Boso mareresi lelena. Mete ma ei soꞌuk limam mara fo hule-haradoi, na, dalem mara muste lolo-laok.
1TI 2:9 Leo naak oo, inak kara boe. Au nau fo ara rafafaꞌu ao-inan nara no mandaak, ma pake bua-loꞌa randaa no dala-hadak. Ara hae heti aon nara fo hatahorir pui-pui sara, ma feo langga bulun nara mata-matak kara, do ara pake bua-loꞌa mabeli ta randaa no dala-hadak, do ara ramasosoa lena-lenak, pake lilo mbilas, lilo fulak ma poematar. Hata fo tao nala inak kara dadi manaꞌa hiek kara, na, ndia dalen nara lolo-laok ma soa tao kada neulauk. Naa, ndaa no inak mana makaluku-makatele neu Manetualain.
1TI 2:11 Mete ma saranik kara rakabua fo nenene nenorik, na, inak kara oo tungga hohoro-lalanek fo pasa ndiꞌi doon nara no malole boe, fo nenene tebe-tebe nenorik naa. Boso kutu-nuꞌu ma mamue.
1TI 2:12 Tungga au naa, inak kara ta randaa soꞌuk aon nara fo parenda touk kara ma ranori sara. Malole lenak inak kara matu-matu a leo.
1TI 2:13 Huu Manetualain adu nakahuluk Adam. Basa naa, dei de Hawa.
1TI 2:14 Ma nitu malanggan ta kedi nala Adam nakahuluk, tehuu inak. Numa faik naa mai, hatahori dae-bafok lena-langga Manetualain hohoro-lalanen.
1TI 2:15 Tehuu leo mae talo naa oo, inak kara bisa hambu masoi-masodak boe, nahuu ara bonggi rala anak. Sadi ara ramahere tebe-tebe neu Karistus, leo-laꞌo rasue-laik esa no esa, leo-laꞌo no dale lolo-laok ma nandaa no dala-hadak.
1TI 3:1 Memak tebe, hata fo hatahori kokolak nae, “hatahori mana nau dadi malangga saranik, naa sosoa-ndandaan, ana here nala ue-osa esa neulaun seli ena.”
1TI 3:2 Malangga saranik kara leleo-lalaꞌon muste leo ia: Naden lolo-laok. Dalen mahanik neu kada saok esak ka. Nanea nala aon. Mana matu-matuk. Hatahorir fee hada-horomatak neun. Uma lelesun neni soik soa-neu fuik kara. Ma ana bisa didi-bui hatahori laen.
1TI 3:3 Boso hatahori mana ninu mafuk, ma liman boso dai-daik neu hatahori. Hatahori mana mandaak lenak ndia: hatahori dale lilok, mana toꞌu ndolu-dalek ma ta mana dale hedi doik.
1TI 3:4 Ana muste nafafaꞌu nala uma-loon no malole. Anan nara oo muste fee hada-horomatak ma ramanene neun boe.
1TI 3:5 Mete ma hatahori naa ta bisa nafafaꞌu nala uma-loo heli-helin, na, talo bee fo ana bisa nafafaꞌu nala Manetualain saranin nara?
1TI 3:6 Mete ma here malangga saranik, na, malole lenak here mala hatahori fo mana nai Karistus dale dook ka ena. Boso soꞌu malangga saranik numa hatahori bei fo namahere neu Lamatuak Yesus mai. Te hatahori leo naak, neu ko ana koa ao no muda hiek. Boso losak Manetualain delun, sama leo Ana delu nitur malanggan.
1TI 3:7 Mete ma soꞌuk hatahori dadi malangga saranik, na, sangga hatahori fo mana naena nade malole ena. Hatahori deak kara oo muste fee hada-horomatak neu malangga saranik naa boe. No dalak naa, ana ta mae hata esa boe na. Ma nitur malanggan ta bisa ike nalolin.
1TI 3:8 Leo naak oo no hatahori mana sou malangga saranik uen boe. Sira raa, muste hatahori mana naena nade malole, ta mana puputak bafa-maan, ta mana ninu mafuk, ma boso hatahori mana hii hambu nanalak lena-lenak.
1TI 3:9 Dalen nara muste lolo-laok ma ara muste toꞌu rahere nenorik fo Manetualain buka natudun neu ita hatahori kamaherek kara ena.
1TI 3:10 Parisa matalolole sira leleo-lalaꞌon ma ue-osan nara. Mete ma hatahorir ta hambu sira salan, na, dei fo soꞌuk kasa fo sou malangga saranik uen nara.
1TI 3:11 Leo naak oo, sira sao inan boe. Sira raa, muste inak fo mana leo-laꞌo ndaa no dala-hadak ma naena nade malole. Boso mana tao naboboo hatahori laen naden. Ara muste rakatataak rala aon nara, ma hatahori oo bisa namahere neu sara boe.
1TI 3:12 Mana sou malangga saranik uen nara oo muste touk fo dalen mahanik neu kada sao inak esak ka boe. Ana oo muste nafafaꞌu nala uma-loon no malole ma muste nafafaꞌu nala anan nara boe.
1TI 3:13 Sira mana raono-lalau saranik kara no malole, neu ko hatahorir boe fee hada-horomatak neu sara. Ma ara boe rambarani, ta ramataꞌu kokolak laꞌe-neu sira nemeheheren neu Yesus Karistus.
1TI 3:14 Timotius, ee! Au amahena ta dook ka bali, au bisa mai tiro-dangga o ena. Mete ma hambu kai-baak fo akai, na, susurak ia losa nakahuluk o limam ena. Au surak susurak ia fo nau afada o ae, Manetualain nufanelun nara muste leo-laꞌo talo bee. Boso lilii-ndondou mae, Lamatuak naa, Manetualain mana masodak. Ndia hatahorin nara sama leo uma esa fo naena batu kakalan ma dii inan matea. No dalak naa, ara muste toba rahere Manetualain nenorin fo ndoos.
1TI 3:16 Manetualain buka dedeꞌa nemeninok ta neni babanggak numa ita nemeheheren mai ena. Oka-huun talo ia: Karistus mai nai dae-bafok ena, pake hatahori dae-bafok mata-aon leo ita. Manetualain Dula-dalen oo natudu boe nae, Yesus naa, Hatahori dale ndoos. Ma Manetualain atan nara marai nusa tetuk do inggu temak oo mete-ritan boe. Manetualain soꞌuk kana neni nusa tetuk do inggu temak neu ena, basa de nakadedemak kana. Ndia tutuin natanggenggela ena, losa hatahori-nusa-nusak marai dae-bafok katematuan. Nai bee a mesan nai dae-bafok ia, hatahorir ramahere neun ena. Ita nemeheheren talo naa!
1TI 4:1 Tehuu Manetualain Dula-dalen nafada no ledo-ledon ena nae, neu ko saranik ketuk timba heni hata fo ita tamaherek. Boe ma ara tungga dula-dalek kara mana kedi-ira hatahori dae-bafok fo tungga nitur nenorin.
1TI 4:2 Hatahori mana mai fee nenorik sala leo naak, kokolak laen, tao laen. Sira iar, memak hatahori mana pepeko-lelekok! Hatahorir raa dale kuru-eron memak katemak kara ena.
1TI 4:3 Ara ranori hatahorir fo boso sao. Ara raluli nanaꞌa mata-matak. Naa te Manetualain, ndia adu nanaꞌak kara raa. Ana adu nanaꞌak kara raa fo neu hatahori kamaherek kara raꞌa, na, ara roke makasi neun. Te ara bubuluk hata fo ndoos na!
1TI 4:4 Basa hata fo Manetualain aduk kara raa, memak malole. De boso maluli hata-hata! Hatahori muste simbok basa naar no noke makasi neu Manetualain.
1TI 4:5 Huu Manetualain Dedeꞌa-kokolan, ma ita huhule-haradoin, tao basa nanaꞌak kara raa dadi malalaok.
1TI 4:6 Timotius, ee! Fee nesenedak basa dedeꞌak kara iar neu toranoo kamaherek kara. Mete ma o tao talo naa, o dadi muu Yesus Karistus hatahori mana maue-osa neulaun. Manetualain Dedeꞌa-kokolan tao o losa mamahere neun, ma fee o bubuluk mala nenorik bee, ndia ndaa. O toꞌu mahere Manetualain Dedeꞌa-kokolan nara ena. Naa, sama leo nanaꞌak mana tao barakai o ao-inam.
1TI 4:7 Boso ngganggari ledo-fai no tutui kokola bafa rouk fo ta natoꞌu no Manetualain. Boso tao matak neu bei lasik kara tutuin neluli mata-matak kara. Malole lenak mateme aom, mita fo o leo-laꞌo tungga basa Manetualain hihii-nanaun.
1TI 4:8 Lati aok fo ao-inak barakai naa, malole. Tehuu sosoan baꞌu anak ka. Tehuu lati aok fo leo-laꞌo tungga basa Lamatuak hihii-nanaun, sosoan noꞌuk ka. Ana naena sosoak, ta kada neu masodak nai dae-bafok hatematak ia, tehuu nai masodak mana maik boe.
1TI 4:9 Dedeꞌa-kokolak kara iar tetebes! De tahinda sara neu dalek dale fo boso lilii-ndondou.
1TI 4:10 Ita tamahena neu Manetualain mana masodak. Ana tao nasoi-nasoda basa hatahorir, lenak bali neu ita mana tamahere neun. Huu naa de ita taue-osa tahere ma taote tebe-tebe.
1TI 4:11 Fee basa nenorik kara iar. Ma madenu hatahorir fo tungga nenorik kara raa.
1TI 4:12 Boso mboꞌi hatahorir rakadadaek o, nahuu o bei muri-soruk. O muste dadi netuduk neu hatahori kamaherek kara, numa o kokolam, hihiru-heheom, dale susuem neu hatahori, nemeherem neu Yesus Karistus, ma o leleo-lalaꞌo lolo-laom mai.
1TI 4:13 Neu ei bei mahani au mamaing, na, boso lilii-ndondou lees Manetualain Dedeꞌa-kokolan neu hatahori kamaherek kara. Matetea dalen nara ma manori matalolole sara.
1TI 4:14 Makalalaꞌok matalolole babanggi-babaꞌek fo Manetualain feen neu o ena, fo o simbo malan neu faik fo malangga saranik kara hule-haradoi, ma ndae liman nara neu o. Faik naa, ara oo rafada Manetualain hara hehelun laꞌe-neu o masodam ma ue-osam boe. De boso makamboꞌik babanggi-babaꞌek fo o hambu malak naa ena.
1TI 4:15 Makalalaꞌok basa matak kara raa no manggatek! Mita fo basa hatahorir mete-rita rae, o masodam ma ue-osam nggani matak.
1TI 4:16 Ndia: manea fo o soa leo-laꞌo tungga ndoon. Ma manea fo o soa fee nenorik laꞌe-neu hata fo tetebes. Mete ma o toꞌu maherek basa naar, na, neu ko Manetualain nasosoi dalak fee o ma hatahorir mana ramanene neu o, mita fo ei makamboꞌik numa basa hata fo manggarauk kara mai.
1TI 5:1 Boso hara berak hatahori see fo lasin lenak. Tehuu pake dedeꞌa-kokola bangganaꞌuk, sama leo kokolak mua o ama bonggim. Ma hatahori bei muri-soruk, na, fofoꞌa dalen nara, tao sara leo o toranoo heli-helim.
1TI 5:2 Leo naak oo no inak see fo lasin lenak boe. Kokolak mua sara, sama leo o kokolak mua ina bonggim. Mete ma kokolak mua inak see fo murin lenak, na, tao sara leo o fadi ina heli-helim. O dalem muste lolo-laok mbali sara.
1TI 5:3 Saranik kara muste tulu-fali ina falur fo ta hambu nufaneluk rakaboi sara bali. Tehuu ina falu bee fo bei naena umbu-anak, ara ndia muste rakaboi. Manori umbu-anan nara fo ralelak bala ndia mbuse-titin neu sara. No dalak naa, ara raono-lalau Manetualain, ma tao ramahoko dalen. Tehuu ina falu bee fo tebe-tebe kada mesa kana, ana ta naena hatahori esa boe na, fo nakaboi sana. Ana namahena neu kada Manetualain mesa kana. Hatu-leledon ana hule-haradoi noke tutulu-fafalik neu Manetualain. De saranik kara muste rakaboi ina falu matak leo naak kara.
1TI 5:6 Tehuu ina falu bee fo hii leo-laꞌo no kada setelelek, leo mae ana bei nasoda, tehuu masodan ta naena sosoa-ndandaak, sama leo hatahori mana matek ena.
1TI 5:7 Fee nesenedak basa dedeꞌak kara raa neu saranik kara, mita fo hatahori deak kara ta bisa kokolak rakalulutu sira nade malolen.
1TI 5:8 Tehuu mete ma hambu hatahori ta nau rakaboi nufanelu heli-helin nara, lenak bali uma isi heli-helin nara, na, sama leo ana nggari heni nemeheheren neu Manetualain ena. Ndia manggaraun lena heni hatahori ta mana malela Manetualain.
1TI 5:9 Mete ma nau soꞌu ina falu fo sou malanggan nai saranik uen nara dale, ndia dudu-furan talo ia: teun nara tabole kuran numa nee hulu mai; fai bakahulun ana leo-laꞌo dalen mahanik neu kada sao touk esa;
1TI 5:10 hatahori ralelan, huu ana soa tao neulauk neu hatahori laen nara; ana nakaboi natalolole anan nara; liman makambelak fo naono-lalau hatahori laen nara; ana tulu-fali hatahori kamaherek kara no tao ue-osa dakuk kara; ana soa tulu-fali hatahori manai susa-sonak dale; ma ana soa nahani a fo tulu-fali nai hata fo neulauk dale.
1TI 5:11 Boso soꞌu ina falu bei muri-soruk kara fo tulu-fali nai saranik dale. Boso losak ao-mbaa hihiin nara raleꞌa, boe ma ara hii sao seluk bali. No dalak naa, ara ta raena fai ombak fo raono-lalau saranik no malole.
1TI 5:12 Mete ma sira fai omban fo raono-lalau saranik kuran, na, naa sama leo ara rakalulutu sira hehelu-bartaan nai Lamatuak matan. Neu ko hatahori fee salak neu sara.
1TI 5:13 Boso losak ara mulai mbera-maꞌa, boe ma reu ramue-osak maso-kalua hatahorir uman, ratuik kokola bafa rouk, rakalulutu hatahorir naden. Ma takalolen lenak bali, ara soa reu sorodododo hatahori laen dedeꞌan, ma kokolak hata fo ta ndaa no dala-hadak.
1TI 5:14 Malole lenak ina falu bei muri-soruk kara sao seluk bali, mita fo ara bonggi, ma rafafaꞌu uma-loo heli-helin nara. No dalak naa, hatahori mana musu ro ita, ta hambu dalak fo rakabobook ita naden.
1TI 5:15 Hambu ina falu muri-soruk ketuk laꞌok sala dalan ena, losa ara tungga nitu malanggan eno-dalan ena.
1TI 5:16 Mete ma ina kamaherek naena nufaneluk esa dadi ina falu ena, na, ina kamaherek naa muste tulu-fali ina falu naa. Boso ela saranik kara lemba-rasaa ralan, mita fo ara bisa tulu-fali ina falu laen nara, fo memak ta raena hatahori esa boe na bali.
1TI 5:17 Hatahori mana makalalaꞌok saranik no malole, ei muste fee hada-horomatak lenak neun ma bae nggadin no mandaak. Lenak bali neu sira mana raue-osa fafandek lima-ein nara, fo tao manggaledo Manetualain Dedeꞌa-kokolan, ma ranori ei eno-dala masodak tetebes.
1TI 5:18 Sama leo neni surak nai Manetualain Susura Malalaon nae, “Mete ma pake sapi fo tatabu hade deꞌen numa mbulen mai, na, boso pole nekehapi nggonggoron, mita fo ana bisa naꞌa boe.” Ma neni surak seluk bali nae, “See naue-osa, na, ndia nandaa hambu nggadi.”
1TI 5:19 Mete ma hambu ketuk fo rakasasaꞌek salak neu hatahori mana nakalalaꞌok saranik, na, boso simbon neuk ka! Muste hambu sakasii dua do telu tutuin sama, dei fo simbo malan fo parisan.
1TI 5:20 Mete ma kaꞌi-ore malan ena, tehuu ana bei leo-laꞌo nakandoo tungga salak naa, na, kaꞌi-oren nai saranik kara matan. No dalak naa, hatahori laen nara ta rambarani tao tungga salak talo naa.
1TI 5:21 Makalalaꞌok basa dudu-furak kara iar rai saranik dale. Boso mete matak, ma boso mbeu seserik. Au atotoꞌu ues ia neu o limam nai Manetualain ma Yesus Karistus matan. Atar marai nusa tetuk do inggu temak fo Manetualain tengga nalak kara raa oo, dadi sakasii boe!
1TI 5:22 Boso hailai soꞌu hatahori fo dadi malanggan. Parisa matalolole makahuluk kana dei. Mete ma ei soꞌu sadi ndaa hatahori, basa boe ma hatahori naa tao salak, ei oo tungga lemba-masaa mala neselu-netaak naa, nahuu ndia tatao-nonoꞌin boe. De manea matalolole o aom fo lolo-laok nakandoo.
1TI 5:23 Au amanene o hambu hedi taꞌi kambetak nakandoo. Malole lenak mulai hatematak ia, o babali oe no oe anggor faa, mita fo dadi neu modo-aidoo. Boso minu kada oe hiek.
1TI 5:24 Mete matalolole! Hambu hatahori ketuk salan nara neni nitak memak. Ara bei ta losa mana maketu-maladi dedeꞌak matan, tehuu basa hatahorir bubuluk sira salan ena. Hambu hatahori laen oo, doo-doo dei de salan nara neni nitak boe.
1TI 5:25 Leo naak oo, neu hatahorir mana tao neulauk kara boe. Ketuk neni nitak memak. Tehuu hambu laen nara tao hata fo neulauk no nefufunik. Leo mae talo naa oo, hata fo ara taok naa, ta dook ka te neni nitak boe. Ta bisa nefuni hata fo neulauk.
1TI 6:1 Hambu ata-dato fo namahere neu Lamatuak Yesus, na, ara muste fee hada-horomatak neu sira lamatuan nai dae-bafok ia, mita fo hatahori deak kara ta hambu dalak kokolak rakatutudak Manetualain naden, ma rakadadaek ita nenorin.
1TI 6:2a Hambu ata-dato lamatuan namahere neu Lamatuak Yesus. Ata-dator ta bole rakadadaek sira lamatuan, nahuu sira lamatuan naa namahere neu Lamatuak Yesus. Tao talo bee oo, ara muste ralalau lolen lenak bali neu sira lamatuan boe, nahuu dua sara sama-sama hatahori kamaherek, de esa muste sue esa.
1TI 6:2b Timotius, ee! Manori saranik kara laꞌe-neu basa iar, ma fufuꞌa sara fo ara tao tungga basa naar.
1TI 6:3 Ita nenorin ndoos naa, natudu dalak fo leo-laꞌo tungga Manetualain hihii-nanaun. Hatahori mana fee nenorik laen numa ia mai, ara timba heni Lamatuak Yesus Karistus nenori ndoon ena.
1TI 6:4 Hatahori matak leo naak, koa ao, tehuu uten rouk! Sira hedin nara, ndia kada soa sangga-sangga dedeꞌak ma rareresi laꞌe-neu kada dedeꞌa deꞌek. Basa iar tao hatahori dalen nara mbiri, rahuur, rakalulutu hatahori laen nade malolen, ma ranggaroti hoꞌa-hoꞌa reu hatahori laen.
1TI 6:5 Hatahori matak leo naak, soa tao mue-anggik ta basa-basa. Sira duduꞌan manggarauk. Ara ta bubuluk ena, bee ndia tetebes bali. Ara duꞌa rae, mete ma ara manggate rakalalaꞌok anggama, na, ara bisa ramasuꞌi.
1TI 6:6 Memak anggama bisa tao nala hatahori dae-bafok nameda hambu nanala moꞌok. Huu mete ma ita leo-laꞌo tungga Manetualain hihii-nanaun, ma tameda dai ena hata fo ita taenak, naa ndia tao namahoko Manetualain dalen. Naa dei fo anggama tetebes.
1TI 6:7 Masaneda matalolole! Neu faik fo bonggi ita, ita ta teni hata esa boe na neni dae-bafok ia mai. Ma neu ita mate oo, ta teni hata esa boe na kalua laꞌo ela dae-bafok ia boe.
1TI 6:8 De sadi hambu nanaꞌak ma bualoꞌa-papakek, na, nemeda dai leo!
1TI 6:9 Tehuu hatahori fo mana hihiik ka dadi namasuꞌi, ana hambu soba-dou mata-matak kara no muda hiek ma hambu ikek numa kii-konak mai, nahuu ara duduꞌa kada hata-heto a mesan. Basa naar neni sosoek ma nekelulutu masodan nara.
1TI 6:10 Dalek nai kada doik naa, dadi neu huuk numa hatahori tao manggarauk mata-matak mai. Hambu hatahori ketuk rasuu ralan seli sangga doik leo naak, losa ara laꞌok sala dook ka numa sira nemeheheren fo ndoos mai ena. No dalak naa, sira mesa kasa rakalulutu sira masodan.
1TI 6:11 Timotius, ee! O ia, Manetualain enan. De makadodook numa basa nanggarauk mai. Leo-laꞌo no lolo-laok. Leo-laꞌo fo tao mamahoko Manetualain dalen nai basa dedeꞌak kara. Mamahere makandoo neu Yesus Karistus. Sue-lai basa hatahorir. Makatataka nai susa-sonak dale. Leo-laꞌo no neulauk mua basa hatahorir.
1TI 6:12 Makatataka tebe-tebe fo makalalaꞌok basa nenorik fo ita tamaherek kara. Manetualain baꞌe fee o masodak ta mana basak ena. O mafada o nemeheherem neu Lamatuak Yesus talo naa nai hatahori noꞌuk kara matan ena. Dadi toꞌu mahere masodak naa, fo boso makamboꞌik kana.
1TI 6:13 Ma hatematak ia, au oke o ndara fangga hehelu-bartaak talo ia: Tao tungga basa Lamatuak Yesus parendan. Boso malena-langga parenda esa boe na, mita fo hatahori ta hambu o salam. Tao tungga basa naar no tebe-tebe, losa neu faik fo ita Lamatuan Yesus Karistus fali mai. Au oke fo o helu-bartaa talo naa nai Manetualain matan. Ana ndia baꞌe samanek neu basa kaani hahaek lalaꞌen. Au oo oke o helu-bartaa talo naa nai Yesus Karistus matan boe. Ana ndia nataa no ledo-ledo laꞌe-neu Ndia aon nai nggubenor Pontius Pilatus matan ena.
1TI 6:15 Lamatuak Yesus ta neni babanggak, Ana ndia toꞌu koasa. Ndia naa, Mane Ina-huuk numa basa manek kara mai. Ma Ndia naa, Malangga Ina-huuk numa basa malanggan nara mai. Ndaa no fain, Manetualain nau tao manggaledo dedeꞌak kara iar.
1TI 6:16 Kada Manetualain mesa kana ta mana matek. Ana leo nai manggaledok dale, fo hatahori dae-bafok ta bisa nakatataka mete-nita sana. Ta hambu hatahori esa boe na fo bisa mete-nita sana. Basa-basan fee hada-horomatak neun! Basa koasa lalaꞌen nai Ndia liman losa doon naa neu! Leo kada naa! Amin!
1TI 6:17 Mafada hatahori kamasuꞌik kara marai dae-bafok ia, fo ara boso koa ao, ma boso tai-ramahena neu sira hata-heton. Huu basa hata-hetor raa neu ko sambu do lalo. Malole lenak ara tai-ramahena neu Manetualain mana masodak. Huu Ana ndia mboꞌa basa hata fo ita toꞌak, mita fo ita bisa tameda tala masodak ia lole-ladan.
1TI 6:18 Mafada sara fo pake sira hata-heton fo tao hata fo neulauk. Ara muste manggate tao hata fo neulauk. Ara muste rakambela liman fo tulu-fali hatahori laen nara, ma hii nduu-pala babaꞌe-babatik, fo Lamatuak baꞌe fee sara.
1TI 6:19 No dalak naa, ara raduduru rala hata-heton nara fo dadi neu nemberii matea soa-neu sira masodan mana maik. De ara rambadedeik masodak fo kasosoa-ndandaak.
1TI 6:20 Timotius, ee! Manea matalolole basa hata fo Manetualain natotoꞌun neu o limam ena. Boso tungga sorodododo mua kokolak bafa rouk kara. Boso tamba suru tiꞌun ma dedeꞌa ta mana neni hada-horomatak neu Manetualain. Masaneda, ee! Hambu hatahori tao aon nara rae, sira malelak kara. Naa te sira ‘malelan’ naa, ta naena matea faa boe na. Hae muu adu o bafa-maam mua sara.
1TI 6:21 Hambu hatahori ketuk ramahere neu nenori mana puta-paik kara raa, losa ara sio laꞌo ela sira nemeheren fo ndoos neu Manetualain. Au oke fo Manetualain natudu dale susuen neu ei basa ngga. Soda-molek, Paulus
2TI 1:1 Timotius fo malole! Susurak ia numa au mai, Paulus, fo Manetualain mesa kana here nalan dadi neu Yesus Karistus nedenun ena. Ara radenu au fo uu afada masoda ndoos naa, fo Manetualain helu-bartaa elak fee neu basa hatahorir fo mana ramahere neu Yesus Karistus ena. Timotius, ee! O sama leo au ana heli-heling ena. De au hule-haradoi oke fo Manetualain, ita Aman, no Yesus Karistus, ita Lamatuan fo sue-lai o, ratudu dale susuen ma fee o leo-laꞌo no mole-damek ma lino-lendek.
2TI 1:3 Hatu-leledon au hule-haradoi fee o. Au soa oke makasi neu Manetualain, nahuu o tungga makandoo neun. Au aono-lalau Manetualain no dale lolo-laok, sama leo ita baꞌin nara raono-lalaun.
2TI 1:4 Au asaneda fai bakahulun fo ita tabaꞌek naa, o luu-oem tuda. Huu naa de au daleng hii nalan seli atonggo seluk ua o, mita fo au daleng namahoko.
2TI 1:5 Au oo asaneda fai bakahulun fo o mulai mamahere tebe-tebe neu Lamatuak Yesus. Nemeheherek matak leo naak naoka memak nai o beim Luisa, ma o inam Eunike dalen. Ma au oo amahere tebe-tebe boe ae, nemeheherek matak leo naak oo, ana mori nai o dalem boe.
2TI 1:6 Fai bakahulun neu au ndae au limang neu o langgam lain, ma hule-haradoi fee o, faik naa Manetualain tao nala o mabeꞌi tao ue-osa fee Ndia. De hatematak ia au oke fo o makarombe falik o babanggi-babaꞌem naa.
2TI 1:7 Manetualain Dula-dalen ta tao ita dadi teu hatahori taꞌu tekek. Tehuu Ana tao ita dadi teu hatahori mana nabeꞌik ma namahena aok, mana nalela nasue-laik, ma mana nalela nakatataak aon no malole.
2TI 1:8 Dadi boso mae kokolak laꞌe-neu ita Lamatuan fo mana naena haak parenda ita. Boso mae nahuu au ia hatahori bui. Au maso bui ia, nahuu au aono-lalau neu Ndia. Mete ma o muu tui-bengga Hara Lii Malolen naa, na, o muste mahehere fo lemba-masaa mala susa-sonak sama leo ai. Mete ma o hambu susa-sonak leo naak, na, neu ko Manetualain fee o bebeꞌi-barakaik.
2TI 1:9 Manetualain ndia tao nasoi-nasoda ita numa ita sala-singgon nara mai. Ma Ana here nala ita dadi teu Ndia hatahori lolo-laon ena. Ana natudu dale susuen neu ita, nahuu Ana sue-lai ita. Naa te ita ta tao hata esa boe na fo nandaa ita simbo Ndia dale susuen. Manetualain bei ta adu dae-bafok ia, tehuu Ana naketu memak ena fo nadenu Yesus Karistus mai, fo natudu Ndia dale susuen, ma tao nasoi-nasoda ita. Yesus Karistus mai ena, de Ana buka Manetualain nanaen naa isin ena. Ana nakalulutu mamates koasan ena. Ia dadi neu Hara Lii Malole! Dadi see ndia namahere neu Yesus Karistus, neu ko ana nasoda nakandoo no Manetualain.
2TI 1:11 Huu naa de Manetualain soꞌu nala au dadi uu Yesus Karistus nedenun, fo au tui-bengga Ndia Hara Lii Malolen, ma au anori hatahorir nai bee a mesan.
2TI 1:12 Basa naar tao au doidoso nai bui ia dale, huu au akalalaꞌok Yesus Karistus parendan naa. Leo mae talo naa oo, au ta mae, nahuu au bubuluk see ndia au amaheren, ndia Lamatuak Yesus. Ma au oo bubuluk tebe-tebe boe ae, Ana ndia natotoꞌu ues ia neu au limang. Ana ndia nabeꞌi nanea ues ia, ma Ana ndia tao au abeꞌi akalalaꞌok ue-osa ia losa Ana fali mai.
2TI 1:13 De manori tungga nenorik tetun fo au atudu basan neu o leo. Mete ma o mamahere makandoo ma sue-lai basa hatahorir talo naa, na, naa natudu nae, o dadi esa mua Yesus Karistus ena.
2TI 1:14 Manetualain fee o suꞌi mabeli esa nai o limam ena, ndia nenori matetuk. De lopo-linu matalolole suꞌi naa! Pake Manetualain Dula-dale Malalaon manai ita dalen, mita fo Ana tulu-fali o lopo-linu ma manea matalolole suꞌi naa.
2TI 1:15 Neu ko o mamanene ena rae, Figelus ma Hermogenes, ma hatahori laen nara maruma profensi Asia mai rasadea laꞌo ela au ena.
2TI 1:16 Tehuu Onesiforus laen bali. Ana ta nakaheok numa au mai. O mita no o matam, fai bakahulun neu au bei numa kota Epesus, ana tulu-fali au nakandoo. Hatematak ia ana mai nai kota Roma ia ena. Neu ana losa, ana sangga au ndule sudi nai bee. Mateꞌen, ana natonggo au numa bui dale. Tehuu ana ta mae. Ana mai tiro-dangga au taa-taa nai bui ia, fo natetea au daleng. De au hule-haradoi fo Manetualain natudu dale susuen neu Onesiforus no basa nufanelun nara. Neu ko ndaa no dae-bafok fai mateꞌen, mete ma Manetualain naketu-naladi hatahori dae-bafok kara dedeꞌan, na, au amahena fo Manetualain naketu-naladi no malole neu Onesiforus asa.
2TI 2:1 Timotius, au ana susueng! Yesus Karistus dalen malole. Ana nae fee seluk o bebeꞌi-barakaik. Dadi o muste simbo malan leo, huu hatematak ia o makaesa muan ena.
2TI 2:2 Fai bakahulun, au anori o laꞌe-neu Manetualain eno-dala ndoon numa hatahori noꞌuk kara matan ena. De hatematak ia au oke o, fo basa hata fo o mamanene malan numa au mai ena, na, o muu manori seluk kasa bali reu hatahori see fo o bisa mamaheren. Hatahorir raa muste bisa ranori seluk nenorik naa, fee hatahori laen bali.
2TI 2:3 Ita basa ngga ia, sama leo Yesus Karistus soldadun. De ita basa ngga sama-sama lemba-tasaa tala doidosok sama leo Ndia. Huu o ia soldadu neulauk, de o muste lemba-masaa mala o babaꞌem.
2TI 2:4 Soldadu mana makalalaꞌok ues, ana ta sorodododo no tataok laen bali. No dalak naa, ana bisa tao namahoko komedan.
2TI 2:5 Haꞌi netuduk laen numa nekeseseꞌuk mai. Mete ma ita tungga nekeseseꞌuk, na, muste tungga nekeseseꞌuk hohoro-lalanen. Mete ma taa, na, hahae leo! Ta bisa hambu joara. Leo naak boe, mete ma ita tae takalalaꞌok Lamatuak ue-osan, na, muste tungga Ndia hohoro-lalanen.
2TI 2:6 Mete neu hatahori mana ue daek boe. Ana naue-osa fafandek lima-ein nai ndia osin. Dadi ana ndia makasososan hambu osi naa buna-boan.
2TI 2:7 Duꞌa matalolole netuduk kara raa. Neu ko Manetualain fee o malela basa naar.
2TI 2:8 Duꞌa matalolole neu Yesus Karistus. Ndia naa, mane Dauk tititi-nonosin. Ana mate, tehuu Manetualain tao nasoda falik kana numa mamaten mai. Naa, dadi neu Hara Lii Malole fo au laꞌok uu tui-benggan sudi nai bee.
2TI 2:9 No au tui-bengga Hara Lii Malole naa, huu naa de au hambu doidosok talo ia. Lenak bali ara oka au ma bonggo budi au pake rante, nok bali au ia hatahori manggarauk. Leo mae talo naa oo, ara ta bisa kena-kaꞌi rala Manetualain Hara Lii Malolen boe.
2TI 2:10 De au sadia lemba-asaa doidosok mata-matak. Sadi Manetualain hatahorin fo Ana here nalak kara ena, bisa hambu masoi-masodak. Neu ko Manetualain nakadedemak kasa rakandoo, nahuu ara dadi reu Yesus Karistus hatahorin nara.
2TI 2:11 Dedeꞌa deꞌek kara iar memak tetebes: “Mete ma ita simbok tae, Karistus mate nggati ita, na, naa sama leo ita oo mate laꞌo ela ita leleo-lalaꞌo raan boe, basa boe ma ita oo neu ko leo-laꞌo sama-sama toon boe.
2TI 2:12 Mete ma ita takatataka tala doidosok sama leo Karistus, ita oo neu ko tanggatuuk toꞌu parenda sama-sama toon boe. Tehuu mete ma ita laka ta talela sana, Ana oo laka ta nalela nasafali ita boe.
2TI 2:13 Leo mae ita dalen ta mahanik toon, tehuu Ndia dalen mahanik no ita seku neu, nahuu Ana ta bisa pepeko. Hata fo Ana kokolak kana, neu ko Ana tao natetun.”
2TI 2:14 Fee nesenedak neu hatahori kamaherek kara, fo ara boso lilii-ndondou basa dedeꞌak kara iar. Madenu sara no Manetualain naden, fo ara hahae adu bafa-maak laꞌe-neu dedeꞌa deꞌek sosoa-ndandaan. Huu basa naar ta raena sosoa-ndandaak faa boe na. Kada rakalulutu hatahori mana mamanenek kara duduꞌan.
2TI 2:15 Maote tebe-tebe fo tao o aom sama leo hatahori maue-osak fo nandaa hambu kokoak numa Manetualain mai. Hatahori leo naak, hae mae, nahuu ana tao natetu uen no malole ena. O muste dadi hatahori mana fee nenorik laꞌe-neu Manetualain Dedeꞌa-kokolan no ndoos. Ndia Dedeꞌa-kokolan naa, tetebes!
2TI 2:16 Makadodook numa kokola huu-suꞌu taak mai, ma numa kokolak ta mana neni hada-horomatak neu Manetualain mai. Huu kokolak kara raa kada tao hatahori boe manggarau.
2TI 2:17 Sira kokola manggaraun nara ranamak sama leo hedi kangker. Himenius no Filetus kokolan nara, tetar leo naak!
2TI 2:18 Dua sara fee nenorik sala rae, basa hatahori mates sara rasoda fali ena. Tehuu naa ta ndaa! No dalak naa, ara sio laꞌo dook ka numa hata fo ndoos mai ena. Hata fo ara fee nenorik naa, rakalulutu hatahori ketuk nemeheheren.
2TI 2:19 Tehuu oka-huuk fo Manetualain nambaririik nalak ena, ta nanggenggo. Nai oka-huuk naa lain, hambu neni surak nae, “Lamatuak nalela Ndia hatahorin nara,” ma “Hatahori mana makaluku-makatele neu Manetualain, muste nakadodook numa manggarauk mai.” Oka-huuk naa, ndia Manetualain hatahorin nara.
2TI 2:20 Haꞌi netuduk numa hatahori kamasuꞌik kara uman mai. Hambu bua-baꞌu mata-matak. Ketuk neni dokik numa lilo mbilas ma lilo fulak mai. Tehuu ketuk oo ruma ai ma dae manu taꞌik mai boe. Bua-baꞌur maruma lilor mai, tenu uma namahoko nalan seli pake sara nai feta-dote moꞌok. Tehuu bua-baꞌu biasa, tenu uma mae pake sara nai hatahori matan. Leo naak oo no hatahori dae-bafok boe. Hatahori mana nakadodook aon numa manggarauk mai, ana sama leo bua-baꞌu neulauk kara. Tenu uma namahoko paken, nahuu ana naena sosoak fo tao ue-osa malole mata-matak.
2TI 2:22 Hatahori muri-soruk kara siik nala sara no muda hiek tungga ao-mbaak hihiin. Tehuu Timotius, o muste manea matalolole aom, fo boso tungga ao-mbaak hihiin talo naa. Maote tebe-tebe fo tao hata fo malole makandoo. Mamahere makandoo neu Lamatuak. Leo-laꞌo no susue-lalaik ma mole-damek neu basa hatahorir. Basa hatahorir fo mana ramahere neu Lamatuak, ma mana leo-laꞌo no dale lolo-laok, ara hii kada tao hata fo malole rakandoo. Dadi Timotius, o muste leo-laꞌo sama leo sara, ee!
2TI 2:23 Au afada seluk bali! Boso muu sorodododo, do, masimbo bafak neu dedeꞌa huu-suꞌu taak. Basa naar soa tao hatahorir rahuur.
2TI 2:24 Hatahorir fo mana raue-osa fee Lamatuak, ta randaa dadi reu hatahori mana unda-podek. Tehuu ara muste bangganaꞌu ro basa hatahorir, ralela ranori hatahori, ma raena dale naruk mbali hatahori mana sangga-sangga netofak kara.
2TI 2:25 Ara muste rakalalaꞌok no dale neulauk neu hatahori mana laban asa. No dalak naa, bisa dadi, Manetualain oꞌofe nasafali dalen nara fo ara sale dalen do tuke tein, de simbo rala hata fo ndoos.
2TI 2:26 No dalak naa, duduꞌan nara manggaledo bali, de ara bisa rakamboꞌik numa nitur malanggan mai, mana ike nala sara fo tungga hihiin ena.
2TI 3:1 Timotius! Deka-deka no dae-bafok fai mateꞌen, neu ko susa-sonan noꞌun seli. Au afada memak o talo naa.
2TI 3:2 Neu faik naa, hatahorir sue-lai neu kada sira ao heli-helin ma dale hedi kada doik. Ara koa ao, ma mete rakadadaek hatahori laen, soa rakamuu, ta nau nenene ina-ama, ta hii roke makasi, sesesu taak, ta hii matak bee fo laꞌe-neu Manetualain,
2TI 3:3 ta nau sue-lai hatahori, ta nau mole-dame ro hatahori, hii rakabobook hatahori nade malolen, ta rakatataka rala aon, manggarau ndoos, ta hii hata fo malole,
2TI 3:4 hii kada raseꞌo heni toranoon nara, ta raena duduꞌa naruk, tao aon leo hatahori malelak tehuu taa, soa tungga ao-mbaak hihiin lena heni numa tungga Manetualain hihiin mai.
2TI 3:5 Ara oo tao aon nara leo hatahori mana tungga Manetualain boe, tehuu rouk. Manetualain koasan ta nai sira dalen dale. Boso deka-deka mua hatahori matak leo naak kara.
2TI 3:6 Hatahori matak leo naak kara, ara maso reni hatahorir uman nara reu ro idu-mata malenggak, fo reu fufudi inak bee fo dalen nara ta matea, ma ara bisa laꞌe soba-douk no muda hiek. Inak matak leo naak kara leo-laꞌo lemba kilu-salak noꞌun seli, ma tungga ao-mbaak hihiin mata-matak.
2TI 3:7 Ara ramanene meser beuk mai fee nenorik laꞌe-neu nenori beuk, na, ara tungga-tungga a mesan. Tehuu ara ta ralela rita bee ndia ndaa ma bee ndia sala.
2TI 3:8 O masaneda tutuik Yanes no Yamres, hetu? Lelek naa, dua sara rareresi ro baꞌi Musa. Meser beuk mana maik hatematak ia oo hihiru-heheon nara sama leo naak boe. Ara laban nenori ndoos. Sira duduꞌan nara ta neulauk, ma nemeheheren nara ta tungga ndoon ena.
2TI 3:9 Meser mana pepekok matak leo naak kara, ta bisa rakataka rala dook ka. Doo-doo te basa hatahorir bubuluk sira nggoa beben nara! Sama leo fai bakahulun fo hatahorir bubuluk Yanes no Yamres pepeko-lelekon.
2TI 3:10 Timotius, ee! O bubuluk basa au masodang ena. O bubuluk basa hata fo au fee nenorik. O bubuluk au leleo-lalaꞌong. O bubuluk au duduꞌang. O bubuluk hata fo au amaherek. O mete-mita no o mata heli-helim ena, au dale narung neu hatahorir, ma au susueng neu sara. Ma o bubuluk au akatataka talo bee no dale naruk nai au doidosong dale.
2TI 3:11 O bubuluk mae, ara oo poko-femba rakamiminak au boe, losa au lemba-asaa ala doidosok mata-matak. Au hambu doidosok talo naa nai kota Antiokia, Ikonium, ma Listra. Tehuu Manetualain nakamboꞌik au numa basa naar mai.
2TI 3:12 Memak, basa hatahorir fo mana ramahere neu Yesus Karistus, ma nau leo-laꞌo no lolo-laok tungga Manetualain hihii-nanaun, neu ko hatahorir tao doidoso sara.
2TI 3:13 Lenak bali, hatahori manggarauk ma hatahori mana pepekok kara boe tamba manggarau rakandoo. Ara kedi-ira ratuda hatahori laen, naa te ara oo hambu kedi-irak boe.
2TI 3:14 Dadi o muste toꞌu maherek nenorik fo o simbo malak naa. Ma hata fo o mamaherek naa, tungga makandoon talo naa. Naa, ndia ndaa! O bubuluk tetebes, see ndia fee nenorik basa naar neu o, hetu? O bisa mamahere neu sara.
2TI 3:15 Mulai numa o bei kadiꞌin mai, o manori Manetualain Susura Malalaon isin ena. Susurak kara raa ratudu dala masoi-masodak, fo o bisa leo-laꞌo makaesa mua Manetualain nai nusa tetuk do inggu temak, nahuu o mamahere neu Yesus Karistus.
2TI 3:16 Basa hata fo neni surak nai Susura Malalaok naa, memak Manetualain ndia fee hatahori fo surak kasa. Susurak naa sosoan, sira: nanori hatahorir hata fo ndoos, natudu hatahori sala-singgon, leꞌa falik hatahori neni dala ndoos neu, ma didi-bui hatahori fo tungga faik leo-laꞌo tungga Lamatuak hihii-nanaun.
2TI 3:17 No dalak naa, Susura Malalaok naa bisa tao natetu do nakadaik Manetualain hatahorin nara mita fo ara rabeꞌi tao basa ue-osa neulauk.
2TI 4:1 Yesus Karistus fali neni dae-bafok ia mai, fo toꞌu parenda sama leo manek. Hatahori bei masodak, ma hatahori mates oo, ara sama-sama reu rataan fo Ana naketu-naladi sira dedeꞌan boe. De au oke tebe-tebe neu o nai Manetualain no Yesus Karistus matan, fo muu tui-bengga Manetualain Dedeꞌa-kokolan neu hatahorir. Mahani a memak! Hae duduꞌa ndia fain malole do taa. Matudu hatahorir salan. Tehuu kaꞌi-ore malole sara no dale naruk. Matetea hatahori dalen pake nenori ndoos.
2TI 4:3 Huu neu ko mbila-beinesak, hatahorir ta nau nenene nenori ndoos ena bali. Neu ko ara rakabubua rala meser mana bisa kokolak tungga sira hihiin, fo tao kada nemehoko dalen nara.
2TI 4:4 Ara sena ndiꞌi doon nara fo tola heni nenori ndoos. Tehuu ara pasa ndiꞌi doon nara fo nenene tutui lasik fo ta tetebes sara.
2TI 4:5 Leo mae talo bee oo, o muste kada matu-matu ma makatataka aon boe. Makatataka nai doidosok dale. Muu tui-bengga Hara Lii Malole fo hatahorir simbok Yesus Karistus. Maono-lalau hatahorir no dale nemehokok losa ue-osa naa basan. Boso no kada dale bibiak.
2TI 4:6 Hae faduli laꞌe-neu au aong, te au fai mamaten deka-deka ena. Au ia, sama leo nggalas, isin sangga basan ena.
2TI 4:7 Au akaseseꞌuk basa no malole ena. Au alaik losa too mateꞌen ena. Au tungga taa-taa ua Yesus Karistus, ma ta sio sudi uni bee uu.
2TI 4:8 Hatematak ia ela kada matak esa fo au ahanin. Ndia, beker joara fo ita Lamatuan mbeda memak kana ena fee basa hatahorir mana leo-laꞌo no ndoos. Ita Lamatuan naa, ndia mana maketu-maladi no matetuk. Ana ta mbeu seserik. Ndaa no fain, neu ko Ana loo lima fee au beker joara naa. Ma ta kada au mesa ngga. Basa hatahorir fo mana sue-lai neun, ma rahani a Ndia mamain, ara oo hambu beker talo naa boe!
2TI 4:9 Timotius, ee! Mai lai-lai fo tiro-dangga au dei!
2TI 4:10 Hatematak ia kada au mesa ngga. Kreskes laꞌo neni profensi Galatia neu ena. Ma Titus laꞌo neni nggoro Dalmatia neu ena. Tehuu Delmas sue lenak neu hata ta neulauk kara nai dae-bafok ia, de ana laꞌo ela au ena fo neni kota Tesalonika neu.
2TI 4:11 Kada Lukas mesa kana leo no au nai ia. Sangga mala Markus fo ei dua ngga mai sama-sama. Huu ana bisa tulun mata-matak neu au nai ia.
2TI 4:12 Au adenu Tikikus neni kota Epesus neu ena.
2TI 4:13 Mete ma o mai, na, boso lilii-ndondou haꞌi muni au badu hanang fo laꞌo elan nai Karpus uman nai kota Troas. Ma boso lilii-ndondou haꞌi muni au susurang nggara, lenak bali neni surak nai banda rouk kara.
2TI 4:14 Aleksander, mana tutu riti naa, ana tao manggarauk ta baꞌu anak neu au ena. Elan numa naa te neu ko Lamatuak balan, tungga tatao-nonoꞌi manggaraun naa.
2TI 4:15 O muste besa-besa mua hatahori naa, nahuu ana soa laban ita dedeꞌa-kokolan.
2TI 4:16 Neu makasososan au ambariik asalaꞌe au dedeꞌang numa mana maketu-maladi dedeꞌak matan, ta hambu hatahori esa boe na fo sama-sama no au. Basa sara laꞌo ela au. Mboꞌi sara ruma naa! Elan fo Manetualain lilii heni sira sala-singgon nara.
2TI 4:17 Leo mae talo naa oo, tehuu Manetualain ta laꞌo ela au boe. Ana fee bebeꞌi-barakaik neu au, mita fo au bisa tui-bengga Ndia Hara Lii Malolen no ta kuran hata esa boe na. Au tui-bengga talo naa, neu basa hatahori ta Yahudir, fo ara ramanene rala Hara Lii Malole naa. Ma au oo akamboꞌik numa sosoe moꞌok mai ena boe.
2TI 4:18 Neu ko Manetualain nakamboꞌik au numa basa manggarauk kara mai. Ma Ana nakalalaꞌok au no sodak, maso uni nusa tetuk do inggu temak uu. Nai naa, Ana ndia toꞌu parenda. Manetualain ta neni babanggak sudi selik kana! Au koa-kio akadedemak kana ta mana ketuk! Amin.
2TI 4:19 Boso lilii-ndondou fee hara masodak neu susi Priskila, no saon kaꞌa Akila. Leo naak oo no basa Onesiforus nufanelun lalaꞌen boe.
2TI 4:20 Erastus bei leo nai kota Korentus. Fai bakahulun au laꞌo ela Trofimus nai kota Miletus, huu faik naa ana namahedi berak.
2TI 4:21 Maote tebe-tebe fo ta bei losa fai makasufuk, na, o losa nai ia ena. Toranook kara marai iar, sira: Ebulus, Pudes, Linus ma susi Klaudia haitua hara masodak neu ei. Leo naak oo no toranoo Karisten laen nara boe.
2TI 4:22 Au amahena Manetualain sama-sama no o seku neu, ma Ana natudu dale susuen neu ei basa ngga. Baꞌu kada naa, Paulus
TIT 1:1 Ana Titus fo malole! Susurak ia numa au mai, Paulus, Manetualain hatahori neondan no Yesus Karistus nedenun. Ana nadenu au fo atetea hatahorir fo Ndia here nalak kara nemeheheren. Ana oo nadenu au atudu eno-dala ndoos, fo ara bubuluk leo-laꞌo tungga Manetualain hihii-nanaun boe. No dalak naa, Manetualain hatahorin nara ramahena rae, neu ko ara rasoda sama-sama rakandoo roon. Manetualain ta bei adu dae-bafok ia, tehuu Ana helu-bartaa memak ena nae, neu ko Ndia hatahorin nara leo-laꞌo rakandoo roon. Memak Ana ta mana kokola bafa rouk. Ndaa no fain, Manetualain natudu no manggaledon ena nae, Ana nau tao nasoi-nasoda hatahorir ruma sira sala-singgon nara mai, fo ara bisa leo-laꞌo rakandoo roon. De Ana parenda au fo laꞌok uu tui-bengga Hara Lii Malole naa neu basa hatahorir nai bee a mesan. Titus! O sama leo au ana heli-heling ena, nahuu o mua au sama-sama tamahere neu Karistus ena. Dadi au hule-haradoi neu Amak Manetualain, ma Yesus Karistus mana tao nasoi-nasoda ita, fo ratudu Sira dale susuen neu o, fo o leo-laꞌo no lino-lendek ma mole-damek.
TIT 1:5 Fai maneuk kara au aketu fo laꞌo ela o numa pulu Kereta, mita fo o koladu mala dedeꞌak hida fo bei parluu nai naa. Naa fo o soꞌuk mala hatahori bee fo randaa rakalalaꞌok saranik kara marai kota esa-esak. Boso lilii-ndondou hohoro-lalanek naa, fo au afada neu o laꞌe-neu hatahori fo mana nakalalaꞌok saranik kara ena. Nae:
TIT 1:6 mete ma sangga soꞌuk hatahori dadi malangga saranik, ndia leleo-lalaꞌon ta bole hambu salak hata-hata. Ana muste leo-laꞌo dalen mahanik no kada sao inak esak ka. Hatahori naa, anan nara oo muste ramahere neu Yesus Karistus boe. Boso losak hatahorir rae, anan nara raa soa tao mue-anggik, ma soa ralaka.
TIT 1:7 Huu malangga saranik kara rakalalaꞌok Manetualain ue-osan, de ara muste leo-laꞌo no ndoos ma raena nade malole. Boso soꞌu hatahori mana soa nakadedemak aon, hatahori nasa tuak, hatahori mana ninu mafuk, hatahori mana hii kada nahuur, ma hatahori mana dale hedi doik.
TIT 1:8 Hatahori mana makalalaꞌok saranik kara, ara muste nau simbok hatahorir nai uman nara no lima nekembelan. Ara muste hii kada neulauk; muste matu-matuk, fo ta mbeu seserik, fo dale lolo-laok, ma bisa nakatataka nala aon.
TIT 1:9 Ara muste toꞌu rahere Manetualain Dedeꞌa-kokolan, fo fai bakahulun ita tanori sara. No dalak naa, ara bisa ratudu Manetualain eno-dala ndoon neu hatahori laen, ma bisa tao ratetu nenori ta ndoos sara.
TIT 1:10 Hambu hatahori noꞌuk ka hii rareresi laꞌe-neu nenori ndoos. Dedeꞌa-kokolan nara huu-suꞌu taak kara, ma ara hii kada pepeko-leleko. Lena-lenak bali hatahori Yahudir mana rae basa hatahorir bee fo nau hambu masoi-masodak kara, muste sunat.
TIT 1:11 Ara pake sira nenori kasalan nara, fo leꞌa reni nufaneluk kara ketuk losa laꞌo ela Lamatuak nenori ndoon. Hatahori matak leo naak kara raa, sangga kada doik tungga dala pakanaꞌek a mesan! Kaꞌi-ore sara, mita fo ara boso fee nenori ta ndoos rakandoo.
TIT 1:12 Faik esa, sira mana helo binin esa numa pulu Kereta mai, tui la-e-neu ndia hatahori heli-helin nae, “Hatahori Keretar soa pepeko-lelekok. Ara bare-naꞌok ma mbera-baren nara seli! Tatao-nonoꞌin nara, sama leo busa-bafir.”
TIT 1:13 Memak hatahorir raa leo naak kara! Dadi o muste leꞌa-nore falik hatahori fo mana hambu kedi-irak kara raa, fo matetea falik sira nemeheheren neu Lamatuak.
TIT 1:14 Kokoe sara fo boso ramanene seluk hatahori Yahudir tutui lasik fo ta teteben nara. Ara oo muste hahae tungga parenda numa hatahori mana timba heni nenori ndoos mai boe.
TIT 1:15 Masaneda matalolole! Soa-neu hatahori dale lolo-laok, basa-basan lolo-laok. Tehuu soa-neu hatahori dale manggenggeok, ma ta namahere neu Lamatuak, ta hambu hata esa boe na lolo-laok. Huu sira dalen ma duduꞌan nara manggenggeok memak ena.
TIT 1:16 Ara manaku rae, sira ralela Manetualain. Tehuu sira leleo-lalaꞌon nara, sama leo ara ta ralela sana. Ara kokolak laen, tao laen. Memak oka-huun hatahori dae-bafo mburu manggarauk! Ara ta nau tungga Lamatuak hihii-nanaun. Boso mamahena mae hatahori matak leo naak kara, bisa tao hata fo neulauk bali!
TIT 2:1 Tehuu Titus, o boso sama leo sira, ee! O muste leꞌa-nore sara fo leo-laꞌo tungga Manetualain nenori ndoon.
TIT 2:2 Mafada ama lasik kara, fo leo-laꞌo tungga hohoro-lalanek, ranea nade malole, ma leo-laꞌo no matu-matuk. Ara muste toꞌu rakandoo ma rakatataka tungga Manetualain nenori ndoon. Ma ara muste sue hatahori laen.
TIT 2:3 Leo naak oo bei lasin nara boe. Mafada sara fo ranea ratalolole sira nenggetuu-nemberiin, ma leo-laꞌo taa-taa tungga Manetualain hihii-nanaun. Boso tao maboboo hatahori naden. Boso ike aon nara ro kada laru-ara. Tehuu ara muste ranori hatahorir fo leo-laꞌo no malole.
TIT 2:4 No dalak naa, ara ranori ma ratudu dala malole neu basa ina muri anak kara, fo sue-lai sao-anan nara.
TIT 2:5 Ara muste ranori sara fo leo-laꞌo no matu-matuk, leo-laꞌo no lolo-laok, fo rafafaꞌu uma-loon nara no malole, fee hada-horomatak neu saon nara, ma fee sira saon nara rakalalaꞌok uma-loo. Mete ma ara leo-laꞌo talo naa, neu ko ta hambu hatahori esa boe na bisa kokolak rakatutudak Manetualain Dedeꞌa-kokolan.
TIT 2:6 Leo naak oo, fee nenori-nefadak neu tou taꞌe anak kara, fo leo-laꞌo no matu-matuk boe.
TIT 2:7 Titus! O muste leo-laꞌo matalolole, fo dadi neu netuduk soa-neu hatahori laen nara. O tao hata a mesan, o muste taon no tetebes, sama leo hata fo o manorin neu hatahorir. Boso makamiminak mua o ue-osam mara.
TIT 2:8 Mete ma o manori hatahorir, na, o muste pake oka-huuk matea, mita fo hatahorir ta hambu dalak hata-hata fo bisa raselu kisubalik o. No dalak naa, hatahorir mana laban ita, mesa kasa mae, nahuu ara ta raena oka-huuk fo nggafu fee ita.
TIT 2:9 Manori hatahori neondak kara, fo ramanene neu sira lamatuan nai dedeꞌak hata a mesan, ma tao ramahoko lamatuan nara dalen. Ara oo boso rasimbo bafak ro lamatuan nara boe.
TIT 2:10 Ara ta bole ramanaꞌo rala sira lamatuan bua-baꞌun. Ara muste ratudu rae, sira lamatuan bisa namahere sira no katematuan. Sira raa muste dadi reu hatahori neulauk ma dale mahanik. Mete ma hatahori deak kara timba-tai neondak kara leleo-lalaꞌon talo naa, ro basa hata fo ita tanorik, na, neu ko ara manaku rae, nenorik naa ta neni babanggak. Huu ita tanori laꞌe-neu Manetualain mana tao nasoi-nasoda ita ena.
TIT 2:11 Manetualain natudu Ndia dale susuen neu basa hatahorir ena, ma soi dala masoi-masodak soa-neu hatahorir numa sala-singgon nara mai.
TIT 2:12 Huu naa de, ita muste timba heni leleo-lalaꞌo ta ndoos, ma basa ao-mbaak hihii manggaraun nara. Ita leo nai dae-bafok hatematak ia, ma muste takatataak aok, leo-laꞌo no lolo-laok, ma ita dalen nara muste mahanik no Manetualain.
TIT 2:13 Hatematak ia ita tamahena taa-taa neu Yesus Karistus mamain no ta neni babanggak sudi selik kana! Naa, dadi neu babaꞌe-babatik soa-neu ita basa ngga. Ndia naa, ita Lamatuan fo ta neni babanggak, fo mana tao nasoi-nasoda ita ena.
TIT 2:14 Ana loo lima aon dadi neu tunu-hotuk fo nakamboꞌik ita numa basa ita sala-singgon lalaꞌen mai, fo tao ita dadi teu Ndia hatahorin mana leo-laꞌo no dale lolo-laok, ma mana soa nau tao hata fo neulauk.
TIT 2:15 Dadi Titus, fee nenorik basa iar neu saranik kara. Tao mambena dalen nara, fo ara tungga basa nenorik kara raa lalaꞌen. See ndia tao salak, na, matudu dala malole neu sara. Hatahorir boso mete rakadadaek o, nahuu o maena haak fo tao dedeꞌak kara raa.
TIT 3:1 Fee nesenenedak neu saranik kara, fo ramanene neu man-parendar ma hatahori mana toꞌu koasar. Ara oo muste tao tungga basa hohoro-lalanek kara boe. Ma muste rahani a taa-taa fo tao hata fo neulauk.
TIT 3:2 Ara boso adu bafa-maan nara fo rakalulutu hatahori nade malolen. Boso hii rasimbo bafak boe. Malole lenak, leo-laꞌo neulauk no dale susuek neu basa hatahorir.
TIT 3:3 Fai bakahulun, neu lelek fo ita bei ta talela Lamatuak Yesus, ita oo bei ta bubuluk hata-hata, ma hambu kedi-irak no muda hiek boe. Ita ta hii nenene hatahori laen. Ita leo-laꞌo tungga kada ita ao-mbaan hihiin mata-matak. Ita dalen ta neulauk to hatahori laen. Ita leleo-lalaꞌon sofek no dale mana mbirik. Ita soa tambeda dalek, de hatahorir oo rambeda dalek neu ita boe.
TIT 3:4 Leo mae ita masodan nakalulutu talo naa oo, tehuu Manetualain natudu Ndia susue-lalain ma dale susuen neu ita ena boe, no dalak Ana tao nasoi-nasoda ita.
TIT 3:5 Ana tao nasoi-nasoda ita, ta huu ita tatao malolen, tehuu Ndia susue-lalain neu ita. Ana safe-sae nalalao ita sala-singgon nara, pake Dula-dale Malalaon fo nabeu ita masodan, sama leo bonggi seluk ita.
TIT 3:6 No Yesus Karistus maten ena fo tao nasoi-nasoda ita numa ita sala-singgon nara mai, huu naa de Manetualain haitua Ndia Dula-dale Malalaon mai fee ita, ma ta nakatataak kana.
TIT 3:7 Huu Yesus dale susuen, de Ana tao nalole ita nekeesan to Amak Manetualain, sama leo ita ia, Ndia anan. De ita bubuluk tae, neu ko ita tasoda no ta mana ketuk to Ndia. Masodak naa dadi neu ita pusakan!
TIT 3:8 Hata fo au kokolak ia, memak tetebes leo naak. Hata fo au fee nenorik ia, hambu sosoan soa-neu basa hatahorir. Huu naa de o muste fufuꞌa hatahorir fo tungga nenorik kara raa no tebe-tebe. Basa hatahorir fo mana ramahere neu Manetualain, muste sangga dalak taa-taa fo tao hata fo neulauk.
TIT 3:9 Boso muu sorodododo mua dedeꞌa kokola bafa rouk kara, ndia leo: masimbo bafak no dedeꞌa huu-suꞌu taak, mareresi sadi ndaa mua hatahori, mandundu-tofak laꞌe-neu see tititi-nonosin moꞌon lenak, ma mahuur laꞌe-neu Yahudir hada hohoro-lalanen nara. Tao hata? Basa naar, ta raena sosoak hata-hata. Ngganggari heni kada ledo-fair no hie-hie a mesan!
TIT 3:10 Muu fee nenori-nefadak neu hatahori mana tao nabingga-baꞌek hatahori saranik kara. Mete ma ana bei tao seluk talo naa, na, kaꞌi-oren no hara berak. Mete ma ana bei tao nakandoo bali, na, boso mbalin bali.
TIT 3:11 Hatahori matak leo naak, duduꞌan ta natetu ena. Ndia tatao-nonoꞌin mesa kana ndia natudu basa hatahorir nae, ndia sala.
TIT 3:12 Au aena nanaek ae adenu Artemas do Tikikus, fo neti natonggo no o nai pulu Kereta. Mete ma ana losa ena, na, o maote mai lai-laik fo matonggo mua au nai kota Nikopolis. Fai makasufuk ia, au hii alan seli uu leo nai naa.
TIT 3:13 O malela hatahori mana malela hukun, manade Senas naa, no nonoon Apolos, hetu? Ara sangga laꞌo reni dae dook reu. Dadi tulun doi-sou sara mita fo ara ta toꞌa-kuran hata-hata nai dalak.
TIT 3:14 Hatahori fo mana tungga Lamatuak Yesus, ara ta bole ranggatuuk kada ifa liman nara. Ara muste ranori tao hata fo neulauk kara, ma tulun hatahori mana toꞌa taak tetebes. No dalak naa, sira leleo-lalaꞌon naena sosoak.
TIT 3:15 Titus, ai basa ngga manai ia, haitua hara masodak neu o. Hara masodak oo neu ita nonoon nara fo sama-sama ramahere neu Lamatuak Yesus boe. Au hule-haradoi oke fo Manetualain natudu Ndia dale susuen neu ei basa ngga. Baꞌu kada naa, Paulus
PHM 1:1 Susurak ia numa au mai, Paulus. Au nonoong Timotius oo haitua hara masodak boe. Sadi kaꞌa bubuluk, ara oka au nai bui ia, nahuu au afada hatahorir laꞌe-neu Yesus Karistus. Au surak susurak ia fee o, Filmon, fo ai sue-lain ma dadi neu nonook mana naue-osa sama-sama no ai;
PHM 1:2 fee kaꞌa inak Apfia, fo ai taon leo ai toranoon; fee Arkipus, mana naote tingga-tingga sama-sama no ai nai ue-osa ia; ma soa-neu saranik kara fo mana rasiꞌe rakabua hule-haradoi nai o umam.
PHM 1:3 Au oke-hule Amak Manetualain ma ita Lamatuan Yesus Karistus ratudu dale susuen nara reu ei, mita fo bisa leo-laꞌo no mole-damek ma lino-lendek.
PHM 1:4 Filmon! Au oke makasi neu Lamatuak, tungga-tungga au hule-haradoi fee o, nahuu o leleo-lalaꞌom.
PHM 1:5 Huu au amanene noꞌuk ka ena, laꞌe-neu o nemeheherem neu Lamatuak Yesus, ma o susue-lalaim neu hatahori kamaherek kara.
PHM 1:6 Huu o nemeheherem naa, de o bisa leo-laꞌo dalek esa mua hatahori kamaherek laen nara. Au hule-haradoi fo mete ma ei matudu dale susuem mara esa no esa, na, ei bisa malela losa lutu-lelon, basa hata fo neulauk, fo ita bisa taon fee Lamatuak Yesus.
PHM 1:7 Kaꞌa! Huu o susuem naa, de o tao mala au amahoko, ma tao matetea au daleng ena. Ma o susuem naa oo natetea hatahori kamaherek noꞌuk ka dalen ena boe.
PHM 1:8 Kaꞌa, ee! Au parluu talo ia: au dadi uu Karistus nedenun. No dalak naa, au aena haak parenda o tao matak ia. Au ta nau parenda a mesan, tehuu kada ae oke tulun, sama leo hatahori lasik kara roke tulun. Au dadi uu hatahori bui, nahuu au tungga Yesus Karistus. De au ambarani oke tulun o, nahuu au bubuluk o susue-lalaim neu hatahori noꞌuk kara.
PHM 1:10 Au oke fo matudu o susue-lalaim neu au anang, Onesimus. Ndia naa, sama leo au ana heli-heling, huu ana dadi namahere neu Yesus numa au ue-osang mai, neu au numa bui ia dale.
PHM 1:11 Au bubuluk Onesimus naa, o ata-datom mana huꞌa nalai nita. Boe ma au bubuluk, fai bakahulun ana ta naena sosoak hata-hata fee o. Tehuu hatematak ia au amahere ana neni nanalak noꞌuk ka soa-neu ita dua ngga.
PHM 1:12 Au sue alan seli, tehuu elan numa naa leo, au adenu falik kana neni o neti.
PHM 1:13 Teteben ndia, au ae kaꞌin kada ia, fo ana bisa nggati o, fo naono-lalau au nai ia. Huu au ta akundak ala fo tao hata-hata nai ia. Au dadi hatahori bui, nahuu afada hatahorir laꞌe-neu Lamatuak Yesus Tutui Malolen.
PHM 1:14 Tehuu au ta nau o makahou a mesan, nahuu o mameda mae, hatahori rakasetik o. Au hihiing, o tao hata fo malole, nahuu naa tungga kada o mesa ngga hihiim. Dadi mete ma o bei ta simbok no malole, au ta nau tao hata-hata laꞌe-neu Onesimus ia, huu o haak naa.
PHM 1:15 Fama te o bisa duꞌa mae leo ia: Lamatuak nanaen fo Onesimus mopon numa o mai, nai fai kekeꞌuk, mita fo ana fali mai ngga fo leo nakandoo no o.
PHM 1:16 Neu nalai, ana bei dadi neu kada o ata-datom. Tehuu hatematak ia ana fali, de ana oo dadi neu o fadi susuem ena boe. Au oo sue alan seli boe! De hatematak ia, ndia sosoan fee o tamba ena. Ana ta dadi kada o ata-datom, tehuu ana oo dadi neu o fadim fo sama-sama mamahere neu Karistus boe.
PHM 1:17 Dadi talo ia kaꞌa. Mete ma o duꞌa mae au ia, o nonoom mana maue-osa sama-sama, na, au oke fo o simbok malan nok bali au ndia mai.
PHM 1:18 Tehuu mete ma Onesimus tao salak neu o do, ana bei nahuta o, elan fo au lemba-asaan.
PHM 1:19 Mete leo! Susura hutak ia, au surak kana pake au lima heli-heling: Au, Paulus, dei fo bae nggati Onesimus hutan nara neu Filmon. Dai ena, do? Fama te au ta parluu fee nesenedak laꞌe-neu o hutam moꞌon lenak neu au. Ndia, o dadi muu Lamatuak hatahorin nahuu au.
PHM 1:20 Tebe, kaꞌa! Elan fo kaꞌa tulun au nai dedeꞌak ia, nahuu ita tanufaneluk nai Lamatuak dale. Tao malende au daleng talo naa, nahuu ita sama-sama Karistus enan.
PHM 1:21 Kaꞌa! Au surak susurak ia fee o, nahuu au amahere o nau nenene matalolole neu au. Nai au nemedang, neu ko o tao lena heni hata fo au okek.
PHM 1:22 Hambu dedeꞌak esa bali. Tulun sadia fee au kama esa dei. Huu au amahere Lamatuak nenene ei huhule-haradoim, ma neu ko Ana soi dalak nakamboꞌik au numa bui ia mai, fo fali mai tiro-dangga ei nai naa bali.
PHM 1:23 Epafras nai ia. Ana oo dadi hatahori bui, nahuu nafada hatahorir laꞌe-neu Yesus Karistus, sama leo au boe. Ana oo haitua hara masodak soa-neu o boe.
PHM 1:24 Markus, Aristarkus, Demas, ma Lukas oo nai ia boe. Ara raue-osa sama-sama ro au. Ara oo haitua hara masodak boe.
PHM 1:25 Au oke-hule neu ita Lamatuan Yesus Karistus fo natudu Ndia dale susuen neu ei basa ngga. Baꞌu kada naa! Soda-molek Paulus
HEB 1:1 Lele uluk Manetualain pake Ndia mana toꞌu dedeꞌan nara fo kokolak ro ita bei-baꞌin hatahori Ibrani. Ana pake dalak mata-matak fo kokolak laꞌe noꞌuk ka no sara.
HEB 1:2 Tehuu hatematak ia, Ana fee Ndia Anan mai ena fo kokolak aon no ita. Numa makasososan mai, Manetualain here nala Ndia Anan ia ena, fo parenda sama-sama no Ndia. Neu Ana nakadadadik lalai no dae-inak, ma basa oe-isin lalaꞌen, Ndia Anan ia oo nakadadadik sama-sama noon boe.
HEB 1:3 Manetualain Anan ia, natudu Ndia Aman ta neni babanggak, sama leo ledo saꞌan nasararangga fali numa titiro mai. Huu Ana dadi mata-aok esa matetuk no Aman. Ma numa Ndia Dedeꞌa-kokolan fo ta neni babanggak mai, Ana nakalalaꞌok basa hata marai lalai no dae-inak. Ana oo nasosoi dalak boe, fo koka heni hatahori sala-singgon nara, mita fo ara dadi reu lolo-laok. Boe ma Ana fali neni nusa tetuk do inggu temak neu, fo nanggatuuk neu Manetualain boboa konan, neu mamana hada-horomatak mateꞌen.
HEB 1:4 Manetualain atan nara marai nusa tetuk do inggu temak, memak ta neni babanggak. Tehuu Ndia Anan ndia ta neni babanggak mateꞌen, lena heni basa sara. Manetualain panggan naa, demak mateꞌen. Ma Ana fee Ndia mesa kana panggan neu Anan ena. Huu naa de Ndia Anan lena heni numa basa Ndia atan nara marai nusa tetuk do inggu temak mai.
HEB 1:5 Manetualain kokolak nita no Anan nae, “Faik ia, Au soꞌuk O fo toꞌu parenda.” Manetualain oo kokolak boe nae, “Au ia, O Amam. Ma O ia, Au Anang.” Manetualain kokolak memak talo naa laꞌe-neu Ndia Anan, tehuu Ana ta kokolak nita talo naa laꞌe-neu Ndia atan nara marai nusa tetuk do inggu temak.
HEB 1:6 Neu Manetualain nadenu Ndia Anan ta neni babanggak mateꞌen mai, Ana oo parenda atan nara marai nusa tetuk do inggu temak boe nae, “Wee! Atar ein, ee! Ei muste fee hada-horomatak, ma makaluku-makatele neu Au Anang dei!”
HEB 1:7 Manetualain oo kokolak laꞌe-neu Ndia atan nara marai nusa tetuk do inggu temak boe nae, “Au tao Au atang nggara marai nusa tetuk do inggu temak, dadi rakarumbu sama leo anin. Au tao Au atang nggara, dadi sama leo aꞌi.” Manetualain kokolak talo naa, nahuu sira iar, kada Ndia hatahori neondan a mesan.
HEB 1:8 Tehuu Ana kokolak laen bali neu Ndia Ana heli-helin nae, “O ia, Manetualain. Neu ko O manggatuuk muu kadera man-parenda losa doon naa neu. Neu ko O toꞌu koasa fo parenda no dale ndoos.
HEB 1:9 O dalem namahoko mete-nita hatahorir leo-laꞌo no ndoos. Tehuu O dalem sona mete-nita hatahorir leo-laꞌo no kada puta-paik. Huu naa de O dalem namahoko, de Au mboꞌa mina neu O langgam, fo soꞌuk O dadi Manek lena heni basa laen nara.”
HEB 1:10 Manetualain oo kokolak laꞌe-neu Anan boe nae, “Anang, nggee! O ia, Lamatuak fo mana parenda memak numa lele uluk mai ena. O ia, ndia madenu fo lalai dadi memak. O ia, ndia parenda fo dae-inak dadi memak.
HEB 1:11 Neu ko lalai no dae-inak noe heni sara. Neu ko lalai no dae-inak mopo heni sara. Tehuu O mesa ngga masoda makandoo. Neu ko O piru heni lalai no dae-inak, sama leo hatahori piru heni bua-loꞌa sidak. Neu ko O nggati lalai no dae-inak, sama leo hatahori nggati bua-loꞌa beuk. Tehuu O mesa ngga ta leo naak. Huu O masoda losa doon naa neu.”
HEB 1:13 Manetualain oo kokolak neu Ndia Anan boe nae, “Anang, nggee! Mai manggatuuk muu ia, nai mamana hada-horomatak mateꞌen, nai Au boboa konang ia. Neu ko Au tao losa O musum mara, losa ara holu ei neu O.” Manetualain kokolak memak talo naa laꞌe-neu Ndia Anan, tehuu Ana ta kokolak nita talo naa laꞌe-neu Ndia atan nara marai nusa tetuk do inggu temak.
HEB 1:14 Ndia atan nara memak kanenenik kara, huu Ana nadenu sara fo reu faduli basa Ndia hatahorin nara lalaꞌen. Hatahori iar ndia neu ko Ana tao nasoi-nasoda sara ruma sira sala-singgon mai. Leo mae talo naa oo, tehuu Manetualain Anan bei lena heni basa Ndia atan nara lalaꞌen boe.
HEB 2:1 Huu naa de, ita muste toꞌu tahere hata fo ita tamanene talan, laꞌe-neu Manetualain Anan fo ita boso lilii henin.
HEB 2:2 Fai bakahulun, Lamatuak pake atan nara ruma nusa tetuk do inggu temak mai, fo rafada Ndia hara hehelun neu ita bei-baꞌin nara. Ndondoon ndia, ita bisa tamahere basa hara heheluk kara raa, huu naa tetebes nakandoo. Mete ma ara lena-langga Ndia parendan naa, neu ko ara hambu hukun no tetuk.
HEB 2:3 Memak, fai uluk talo naa. Tehuu hatematak ia, Manetualain Anan nasosoi dala beuk ena fo tao nasoi-nasoda hatahori dae-bafok. Ana nafada dala masoi-masodak ta neni babanggak ia, soa-neu Ndia hatahorin fo mana maono-lalau Ndia nai dae-inak ia. De ara rafada ita, fo ita tamahere. Tehuu mete ma ita ta tao matak, na, ita soe tetebes ia ena!
HEB 2:4 Manetualain oo fee koasa boe fo ara tao tanda heran mata-matak boe. Ana oo nakonda Ndia Dula-dalen neu sara boe, de ara tao matak laen noꞌuk ka tungga Ndia hihii-nanaun. Basa naar dadi, huu naa de ita bubuluk tae, dala masoi-masodak naa, memak tetebes.
HEB 2:5 Au kokolak laꞌe-neu dae-bafo beuk, fo neu ko ana mori-dadi. Tehuu Manetualain bei ta nafada nita Ndia atan nara marai nusa tetuk do inggu temak nae, neu ko ara ndia koladu dae-bafok naa. Neu ko hatahori dae-bafok ndia koladu.
HEB 2:6 Nai Manetualain Susura Malalaon, baꞌi Dauk natane nita laꞌe-neu hatahori dae-bafok belin nae, “Manetualain! Tao hata de Lamatuak tao matak neu hatahori dae-bafok? Tao hata de Lamatuak sue-lai sara? Huu sira kada hatahori dae-bafok biasa a mesan!
HEB 2:7 Tehuu Lamatuak fee koasa neu sara ena, fo ela kada baꞌuk ka ara dadi sama leo ata manai nusa tetuk do inggu temak. Lamatuak oo fee sara hada-horomatak ma soꞌuk kasa boe,
HEB 2:8 fo ara parenda basa hata fo Lamatuak adu nalak kara ena.” De tungga baꞌi Dauk susuran naa, Manetualain tao hatahori dae-bafok dadi neu malanggan, fo koladu basa hata fo Ana adu nalak kara ena. Naa te ita bei ta bubuluk hatahori dae-bafok esa boe na, parenda basa-basan talo naa.
HEB 2:9 Tehuu hambu Esa ndia parenda basa-basan. Ndia naa, ndia Yesus. Ana mai leo taak nai dae-inak ia fo dadi neu hatahori dae-bafok mana lemba-nasaa doidosok losa mate. Ana mate talo naa fo natudu Manetualain dale susuen neu hatahori dae-bafok. Basa boe ma Manetualain koan ma nakadedemak kana, de Ana parenda basa hata fo Manetualain adu nalak kara raa ena.
HEB 2:10 De nandaa Manetualain fee Yesus lemba-nasaa doidosok, mita fo Yesus bisa nasosoi dala masoi-masodak soa-neu hatahori dae-bafok. Huu Manetualain nau fo hatahori noꞌuk ka bisa leo-laꞌo sama-sama ro Ndia nai nusa tetuk do inggu temak. Manetualain ndia adu basa-basan. Ma basa mana masodak lalaꞌen, hambu sara nahuu Ndia.
HEB 2:11 Manetualain simbok no malole neu hatahori fo Yesus tao sara dadi malalaok, fo ara dadi reu Lamatuak anan nara. Manetualain oo Yesus Aman boe. No dalak naa, Yesus no sara Amak esa. Huu naa de Yesus ta mae noke sara nae, “Eir ia, Au toranoo heli-heling.”
HEB 2:12 Yesus nafada Aman ena nae, “Au nau afada Au toranoong nggara, laꞌe-neu Papa dale susuen! Au nau soda-helo nai sira taladan, laꞌe-neu Papa ta neni babanggan!”
HEB 2:13 Yesus oo kokolak taa-taa boe nae, “Au amahere akandoo neu Manetualain.” Boe ma Yesus oo kokolak seluk boe nae, “Mete dei! Au nai ia, sama-sama ua Manetualain anan nara, fo Ana loo lima sara neu Au ena, de Au koladu sara.”
HEB 2:14 Huu Lamatuak anan nara, hatahori dae-bafok biasa, de Yesus oo muste dadi neu hatahori dae-bafok leo sira boe. Huu Ana muste dadi hatahori dae-bafok, dei fo Ana bisa mate. Nesik Ndia mamaten naa, dei fo Ana bisa leꞌa nala falik koasa numa nitur malanggan mai. Huu malangga manggarauk naa, ndia toꞌu koasa fo koladu basa dedeꞌak mana nakakaik no mamates.
HEB 2:15 Ma ndia oo tao hatahori dae-bafok ramataꞌu mamates boe, losa ara tungga ndia hihii-nanaun, sama leo ata-dator. Tehuu hatematak ia, Yesus bisa nakamboꞌik hatahori dae-bafok numa sira nemetaꞌun naa mai ena.
HEB 2:16 Huu manggaledok ena, Yesus ta mai fo tulu-fali Manetualain atan nara marai nusa tetuk do inggu temak. Tehuu Ana mai fo tulu-fali ita, ndia baꞌi Abraham tititi-nonosin.
HEB 2:17 Huu naa de Yesus dadi sama tetar leo ita mana dadi teu Ndia toranoon ena. No dalak naa, Ana bisa dadi neu ita malangga anggaman demak mateꞌen, fo natudu dale kasian neu ita, ma tulu-fali ita tungga Manetualain hihii-nanaun. Ma Ana kokolak hata, na, Ana tao natetun. Fai bakahulun, ita bei-baꞌin nara roke malangga anggamar malangga ina-huun tao tunu-hotuk fo Lamatuak koka heni sira sala-singgon nara. Hatematak ia Yesus mesa kana dadi tunu-hotuk ena fo Lamatuak koka heni ita sala-singgon nara.
HEB 2:18 Neu Yesus leo-laꞌo numa dae-bafok ia, Ana hambu doidosok noꞌun seli. Hambu ketuk oo fufudi-hohodon fo Ana tao salak boe. Leo mae talo naa oo, Ana ta tuda boe. Huu naa de mete ma hambu ketuk fufudi-hohodo ita fo tao salak, na, Yesus bisa tulu-fali ena fo ita boso tuda.
HEB 3:1 De talo ia, toranoo nggara ein! Manetualain here nala ei ena, ma baraneꞌe ei hatahori dale lolo-laok, fo neu ko ei oo leo-laꞌo sama-sama mia Manetualain nai nusa tetuk do inggu temak boe. Ei muste duduꞌa no lutuk laꞌe-neu Yesus naa. Huu ita manaku ena tae, Ndia ia, Manetualain Nedenun, ma Ndia oo ita Malangga Anggaman Demak Mateꞌen boe.
HEB 3:2 Neu Manetualain nadenu Yesus, Yesus tao tungga basa Manetualain hihii-nanaun lalaꞌen. No dalak naa, Ana dadi sama leo baꞌi Musa. Huu baꞌi Musa oo tao tungga Manetualain hihii-nanaun boe, neu ana naono-lalau ita bei-baꞌin nara ndia lele uluk.
HEB 3:3 Leo mae talo naa oo, tehuu Yesus ta neni babanggak lena heni baꞌi Musa boe. Huu Yesus naa, sama leo malangga uma-loo. Ma manggaledok ena, malangga uma-loo ta neni babanggak lena heni hatahori neondak nai uma naa dale.
HEB 3:4 Hatahori esa-esak nambaririik ndia uma-loo heli-helin. Tehuu Manetualain ndia adu basa-basan.
HEB 3:5 Dadi baꞌi Musa tao tungga Manetualain hihii-nanaun, neu ana dadi hatahori neondak soa-neu Manetualain uma isin. Faik naa, ana nafada memak hata fo mateꞌen te Manetualain nae taon.
HEB 3:6 Yesus oo tao tungga Manetualain hihii-nanaun boe, tehuu Ndia ta hatahori neondak sama leo baꞌi Musa. Huu Ndia naa, Karistus, Manetualain Anan fo Ana here memak kana numa lele uluk mai, fo nae nadenun neni dae-bafok ia mai. Ma Karistus bubuluk koladu tebe-tebe Ndia Aman uma isin. Dadi mete ma ita toꞌu tahere ita nemeheheren, ma tamahena takandoo neu Karistus, ita oo bisa dadi teu Ndia uma isin boe.
HEB 3:7 Huu naa de, ei muste pasa ndiꞌi doom mara fo nenene matalolole hata fo Manetualain Dula-dale Malalaon kokolak ena nae, “Faik ia, mete ma ei mamanene Manetualain kokolan,
HEB 3:8 ei boso malangga batu, sama leo hatahorir raa, fo mana laꞌok reu-mai losa teuk haa hulu dalen numa mamana nees. Huu ara ta nau hosek neu Musa bali, losa Manetualain mesa kana sangga nae, ta bisa nadale naruk neu sara ena bali.
HEB 3:9 Duduꞌa sudik kana! Teuk haa hulu dalen, Au tao tanda heran mata-matak kara numa sira mata deꞌen nara! Tehuu ara kada soba rakandoo Au. Huu naa de Au oo amanasa sara boe ae, ‘Eir ia, sudi selik kana! Huu ei masadea laꞌo ela Au eno-dalang ena, fo tungga ei eno-dalam fo mana peko-pakik a mesan!’
HEB 3:11 Au ta akatataak mete-ita ei manggaraum mara talo naa ena bali. Huu naa de Au akatoo ei ae, ‘Ei ta bole maso miu fo hahae aom mara, sama-sama mia Au ena bali.’ ”
HEB 3:12 Dadi toranoo nggara ein! Besa-besa fo boso losak hambu ketuk numa ei mai raena dale manggarauk, losa ana ta namahere bali, boe ma nasadea laꞌo ela Manetualain mana masodak seku neu.
HEB 3:13 Malole lenak, tungga faik ei tao matetea esa no esa dalen. Boso bei mahani bali! Huu ei hambu kedi-irak no muda hiek fo tao salak, losa ei oo malangga batu boe, ma ta tao matak neu Manetualain.
HEB 3:14 Ita bisa dadi teu nonoo laꞌo eik esa to Yesus Karistus, sadi ita tamahena takandoo neun, sama leo neu faik fo ita bei fo mulai tamahere neun.
HEB 3:15 Manetualain Dula-dale Malalaon oo kokolak talo naa boe nae, “Faik ia, mete ma ei mamanene Manetuain kokolan, ei boso malangga batu, sama leo hatahorir raa, fo mana laꞌok reu-mai losa teuk haa hulu dalen numa mamana nees, huu ara laban Musa.”
HEB 3:16 Dadi hatematak ia, au ae atane talo ia: hatahorir raa fo mana ramanene rala Musa ena, boe ma rasadea elan naa, sira seer? See bali, mete ma ta ndia ita bei-baꞌin nara fo ndia Musa nuni sara kalua numa dae Masir mai.
HEB 3:17 Boe ma hatahorir raa ndia tao Manetualain dalen namanasa nalan seli, losa teuk haa hulu dalen naa, sira seer? See bali, mete ma ta ndia ita bei-baꞌin nara. Huu ara leo-laꞌo no peko-pakik numa mamana nees, losa mates sara, boe ma ratoi sara reu naa.
HEB 3:18 Basa de hatahorir raa, hambu neketook numa Manetualain mai, losa ta bole maso reni dae naa reu, fo hahae aon nara sama-sama ro Ndia naa, sira seer? See bali, mete ma ta ndia ita bei-baꞌin nara. Huu ara ta nau nenene neu Manetualain.
HEB 3:19 De manggaledok ena, hetu! Ita bei-baꞌin nara ta bisa maso reni dae naa reu, fo hahae aon nara sama-sama ro Manetualain, nahuu ara ta ramahere neun.
HEB 4:1 Dadi hatematak ia, ita muste duduꞌa naruk, nahuu Lamatuak bei helu-bartaa nae, Ndia hatahorin nara bisa hahae aon nara sama-sama ro Ndia. De boso losak hambu ketuk numa ei mai timba heni hata fo Manetualain helu-bartaak naa ena.
HEB 4:2 Ita tamanene tala hara lii malole naa ena, sama leo ita bei-baꞌin nara oo ramanene boe. Tehuu no ara ta ramahere hara liik naa, de ta hambu rala nanalak hata esa boe na.
HEB 4:3 Tehuu mete ma ita tamahere, ita bisa hahae aok kara sama-sama to Manetualain. Fai bakahulun, Ana helu-bartaa talo naa no ita bei-baꞌin nara ena, tehuu basa boe ma Ana namanasa de nafada sara nae, “Au ta akatataak mete-ita ei manggaraum mara talo naa ena bali. Huu naa de Au akatoo ei ae, ‘Ei ta bole maso ena bali, fo hahae aom mara sama-sama mia Au.’ ” Naa te ita bubuluk tae, neu Manetualain nakadadadik lalai no dae-inak, Ana koladu memak fo Ndia hatahorin nara bisa hahae aon nara, fo rasoda sama-sama ro Ndia.
HEB 4:4 Nai tutuik laꞌe-neu Manetualain nakadadadik lalai no dae-inak, neni surak laꞌe-neu Manetualain hahae aon nae, “Manetualain naue basa-basan, boe ma neu beꞌe-main, ndaa no fai kahitun, Ana hahae aon.”
HEB 4:5 Ma nai babaꞌek laen bali, Manetualain kokolak no ita bei-baꞌin nara nae, “Ei ta bole maso ena bali, fo hahae aom mara sama-sama mia Au.”
HEB 4:6 De Manetualain hihii-nanaun, na, Ndia hatahorin nara hahae aon nara fo rasoda sama-sama ro Ndia. Tehuu ita bei-baꞌin nara fo mana ramanene rakahuluk hara lii malole naa, ara ta bisa maso, nahuu ara ta tao tungga Manetualain hihii-nanaun.
HEB 4:7 Tehuu doo-doo boe ma Manetualain here fai laen, fo Ndia hatahorin bisa maso hahae aon nara sama-sama ro Ndia. Ana pake baꞌi Dauk fo kokolak nae, “Faik ia, mete ma ei mamanene Manetualain kokolan, boso matetea ei dalem mara sama leo batu, tehuu nenene matalolole leo.”
HEB 4:8 Neu baꞌi Dauk kokolak nae, “faik ia, ndia fai hahae aok”, ta ndia faik fo Yosua nuni no bei-baꞌir umbu-anan nara maso reni dae Kanaꞌan reu. Neu faik fo baꞌi Dauk kokolak talo naa, basa sara mate dook ka ena.
HEB 4:9 Huu naa de ita bubuluk tae, Lamatuak koladu nala fai laen ena, soa-neu Ndia hatahorin nara bisa hahae aon nara, fo rasoda sama-sama ro Ndia.
HEB 4:10 Ma hatahori fo mana maso hahae aon sama-sama no Manetualain, ana hahae numa ndia ue-osan mai ena, sama leo Manetualain oo hahae numa Ndia ue-osan mai, ndaa no fai kahitun boe, neu Ana adu basa dae-bafok ia.
HEB 4:11 De maote tebe-tebe fo ei bisa maso hahae aom fo masoda sama-sama mia Manetualain. Boso losak ketuk ta hambu maso, nahuu ana ta nau nenene Manetualain Dedeꞌa-kokolan, sama leo ita bei-baꞌin nara raa.
HEB 4:12 Huu Manetualain Dedeꞌa-kokolan nara ratudu eno-dala masodak tetebes. Dedeꞌa-kokolak kara raa raena koasa fo timba-tai ita duduꞌan ma hihii-nanaun lalaꞌen nai ita dalen nara. Huu Dedeꞌa-kokolak kara raa memak horis ma tanden nara lena heni fela mana maso neni mbaak dale neu fo tete ketu uak ma faꞌa duik, fo tao natanggaa basan.
HEB 4:13 Nai basa lalai no dae-inak lalaꞌen, ta hambu hata esa boe na, nefunik numa Manetualain mai, huu Ana bisa mete-nita basa-basan no manggaledok. Neu ko ita muste teu tasare mbalin, fo fee neseselum laꞌe-neu basa hata fo ita taok ena.
HEB 4:14 Ita muste toꞌu tahere ita nemeheheren, nahuu Manetualain Anan, Yesus dadi neu ita malangga anggama demak mateꞌen ena. Huu nai Manetualain matan nai nusa tetuk do inggu temak, Ana dadi neu lelete fo tulu-fali ita.
HEB 4:15 Ana bisa dadi lelete malole soa-neu ita, nahuu Ana nalela nae, ita iar, hatahori dae-bafok mana tuda no muda hiek, mete ma hambu ketuk fufudi-hohodon fo tao salak. Yesus oo hambu soba-douk sama tetar no ita boe, tehuu Ana ta tuda nita.
HEB 4:16 Huu naa de, mai fo ita tambarani teu deka-deka to Manetualain nai kadera man-parendan. Huu Ndia naa, dalen malole. De mete ma ita hule-haradoi neun, na, neu ko Ana natudu dale kasian fo tulu-fali ita ndaa no fain.
HEB 5:1 Hatahori fo ara soꞌuk kana dadi neu malangga anggama demak mateꞌen ena, ndia uen muste tulu-fali hatahorir fo koladu sira netututin no Manetualain. Ana muste simbo nala sira fefeen ma banda tunu-hotuk, fo loo lima sara reu Manetualain. Ana oo muste fee tunu-hotuk banda fo Manetualain koka heni hatahorir sala-singgon nara boe.
HEB 5:2 Mete ma hambu hatahori ketuk ta ralela eno-dala ndoos, do, hatahorir fo sio laꞌo numa dalak naa mai ena, na, malangga anggama naa ta nakasususak kasa. Dalen malole no sara, nahuu ndia oo hatahori dae-bafok mana tuda no muda hiek, leo sira boe.
HEB 5:3 Huu ndia oo hatahori dae-bafok fo tuda sama leo sira boe, de malangga anggama naa oo muste fee tunu-hotuk banda fo Manetualain koka heni ndia sala heli-helin, sama leo ana tao soa-neu hatahori laen nara boe.
HEB 5:4 Hatahori ta bole soꞌuk aon fo dadi neu malangga anggama demak mateꞌen. Huu kada Manetualain mesa kana ndia naena haak fo here hatahori leo naak, sama leo lele uluk, neu Ana soꞌu Musa kaꞌan, Harun.
HEB 5:5 Leo naak oo no Karistus boe. Ana ta soꞌuk aon fo dadi neu malangga anggama demak mateꞌen. Huu fai bakahulun, Manetualain ndia soꞌuk kana nae, “O ia, Au Anang, Faik ia, Au soꞌuk O fo toꞌu parenda.”
HEB 5:6 Nai babaꞌek laen nai Manetualain Susura Malalaon, Ana oo kokolak boe nae, “O dadi muu malangga anggama fo mata-aok esa mua Malkisedek lele uluk naa, tehuu O dadi muu malangga anggama losa doon naa neu.”
HEB 5:7 Neu Yesus fai masodan nai dae-bafok ia sangga basan ena, Ana soꞌuk hule-haradoi ta mana ketuk ma buꞌi nakarereu noke tulun fo Manetualain feen bebeꞌi-barakaik. Ana bubuluk nae, Manetualain koasan bisa tao nasoi-nasoda Ndia. De Manetualain namanene Yesus, nahuu Ana tungga tebe-tebe Manetualain hihii-nanaun.
HEB 5:8 Yesus naa, Manetualain Anan. Leo mae talo naa oo, tehuu Ana muste hambu doidosok boe fo Ana nanori nakandoo tungga Manetualain hihii-nanaun.
HEB 5:9 Boe ma memak Ana tao tungga tebe-tebe basa Manetualain hihii-nanaun lalaꞌen. Huu naa de, hatematak ia Ana dadi neu Ai Huu Masoi-masodak ena soa-neu basa hatahori fo mana ramahere neun, fo ara bisa rasoda rakandoo ro Manetualain.
HEB 5:10 Manetualain soꞌuk nala Yesus dadi neu malangga anggama, fo mata-aok esa no malangga anggama Malkisedek ndia lele uluk naa.
HEB 5:11 Bei hambu dedeꞌak noꞌuk ka, fo au sangga kokolak laꞌe-neu Karistus no Malkisedek, tehuu au hambu kai-baak fo tui no manggaledon dedeꞌak kara raa, nahuu ei bei sama leo kana kadiꞌi ana nggoa bebek fo bei ta nalela no neulauk.
HEB 5:12 Naa te eir ia mamahere dook ka ena. Tungga ndoon naa, ei muste dadi miu meser ena fo bisa manori hatahori laen. Tehuu nai memeten, ei bei sama leo kana mbimbila anak bei ta bisa naꞌa, bei fo bisa ninu kada susu. Ei bei parluu hatahori fo ranori ei, hata-hata mana dadi neu oka-huun numa Manetualain Susura Malalaon mai laꞌe-neu sale dale do tuke teik, hambu sarani, neketu-neladi nai dae-bafok fai mateꞌen ma laen bali.
HEB 5:13 Au bisa akasasamak ei mia kakana mbimbila anak talo naa, nahuu ei bei ta malela tebe-tebe nenorik mana dadi oka-huuk laꞌe-neu Karistus fo bisa leo-laꞌo no ndoos.
HEB 5:14 Tehuu mete ma kakana mbimbila anak naa, namoꞌo mamais ena, na, ana ta ninu susu bali, tehuu ana naꞌa nanaꞌa matea. Naa, sama leo hatahori mana nanori, losa ana nalela tebe-tebe Lamatuak nenorin ena, mita fo ana bubuluk bee ndia malole, ma bee ndia manggarauk kara.
HEB 6:1 Dadi ei muste manori nenori malelak lenak bali, nahuu ei manori mala nenorik oka-huun nara laꞌe-neu Karistus dook ka ena. Huu naa de hatematak ia, hae manori laꞌi-laꞌik ka nenorik oka-huun laꞌe-neu hatahori muste laꞌo ela sira sala-singgon nara; nenorik laꞌe-neu hatahorir ramahere neu Manetualain;
HEB 6:2 nenorik laꞌe-neu sarani; nenorik laꞌe-neu ndae limak fo simbok Manetualain Dula-dale Malalaon; nenorik laꞌe-neu Manetualain neu ko tao nasoda falik hatahori mates; ma nenorik laꞌe-neu hatahorir neu ko rasare mbali Manetualain fo simbok neketu-neladin nae, see ndia bole nasoda nakandoo no Ndia, ma see ndia taa.
HEB 6:3 Mete ma Manetualain fee luas, na, mai ita hene kalas manai lain leo. Huu au nau fee nenorik laꞌe-neu hata fo lenak bali.
HEB 6:4 Naa te hambu hatahori ketuk fo ralela Karistus nenorin ena, ma rameda Manetualain babaꞌe-babatin ena, losa Ana fee Ndia Dula-dale Malalaon neu sara. Ara bubuluk Manetualain Dedeꞌa-kokolan ena, ma ara rameda Ndia koasan ena. Koasa naa, neu ko Ana paken, mete ma dae-bafok fai mateꞌen losa ena. Leo mae talo naa oo, tehuu ara nggari heni sira nemeheheren ena, ma rasadea laꞌo ela Karistus ena boe. Huu naa de, ta bisa dadi ara hambu dalak fo bisa fali roke ambon, boe ma leo-laꞌo malole ro Manetualain bali. Mete ma hatahorir ta nau sale dalen do tuke tein nara talo naa, na, sama leo sira mesa kasa paku rakanisa seluk Manetualain Anan neu ai ngganggek lain, basa de ara rakamamae-rakatitiik kana nai hatahori noꞌuk kara matan.
HEB 6:7 Hatahori matak leo naak, sama leo dae fee buna-boak ta neulauk. Naa te mete ma udan mai ena, na, dae neulauk bisa fee buna-boak ma neni nanalak soa-neu hatahori mana ue daek. Boe ma Manetualain nakonda babaꞌe-babatik fo tao nala dae naa, buna-boan boe namanoꞌu.
HEB 6:8 Tehuu hatahori mana masadea Karistus naa, sama leo dae mana fee kada dila-nggauk. Ma dila-nggauk kara raa, ta reni nanalak hata esa boe na. Ta dook ka boe ma Manetualain mai fo fee hukun neu dae naa. Basa de Ana hotu heni buna-boak fo ta mana neni nanalak hata esa boe na.
HEB 6:9 Toranoo susue nggara ein! Leo mae au kokolak barakaik ka faa talo naa, tehuu au oo bubuluk boe ae, ei ta masadea Karistus. Huu ei mamahere neun ena, ma ei leo-laꞌom oo hambu buna-boan neulauk boe.
HEB 6:10 De masaneneda te Manetualain dalen ndoos. Ma Ana ta lilii ei mbuse titim. Ei maue-osa mahere ena fo tulu-fali Ndia hatahorin nara, ma sue-lai sara. Numa fai bakahulun mai, memak ei makalalaꞌok Ndia ue-osan ena. Ma ei bei tao talo naa.
HEB 6:11 Tehuu hatematak ia, au nau ei maue-osa mahere lenak bali fo tao tungga makandoo talo naa, losa basan. No dalak naa, neu ko ei simbo mala basa hata fo neulauk, fo ei mamahenan numa Manetualain mai.
HEB 6:12 Sadi ei boso dadi miu mbera-barek! Ei muste haꞌi netuduk numa hatahorir mai fo mana ramahere Manetualain dook ka ena. Huu ara ramahena rakandoo neun, losa ara simbo rala hata fo Ana helu-bartaan ena.
HEB 6:13 Haꞌi netuduk leo ita baꞌin Abraham. Lele uluk Manetualain ndara fangga hehelu-bartaak noon pake sumba-sook. Mete ma hatahori dae-bafok soꞌuk sumba-sook, ana nasiꞌe pake Manetualain naden fo Manetualain dadi neu ndia sakasiin, nahuu Manetualain naa lena heni ndia. Mete ma hambu dedeꞌak, basa hatahorir bubuluk rae, hatahori naa kokolan, tebe, nahuu ana sumba-soo pake Manetualain naden ena. Naa, memak hatahori dae-bafok dalan. Tehuu neu Manetualain sumba-soo no baꞌi Abraham, Ana pake Ndia nade heli-helin, nahuu ta hambu esa lena heni Ndia boe na. Ana helu-bartaa nae, “Neu ko Au fee babaꞌe-babatik mana hetak neu o ma o tititi-nonosim. Neu ko ara tamba ramanoꞌu, losa ta hambu hatahori bisa reke rala sara.” Manetualain helu-bartaa basa talo naa, boe ma baꞌi Abraham namahere ma namahena nakandoo neu Manetualain, leo mae dook ka, dei fo ana simbo hata fo Manetualain helu-bartaak ena.
HEB 6:17 No dalak naa, ita bubuluk ena, mete ma Manetualain tao hehelu-bartaak no Ndia hatahorin, Ana ndara fangga hehelu-bartaak naa pake sumba-sook fo dadi neu tanda nemeherek nae, hata fo Ana helu-bartaak naa, memak tetebes ma ta neni lali-lalik.
HEB 6:18 Hambu matak dua, ndia ta bisa lali-lali. Kaesan, ndia Manetualain hehelu-bartaan. Ma kaduan, ndia Ana pake sumba-sook dadi neu tanda nemeherek soa-neu hehelu-bartaak naa. Dadi mete ma Manetualain helu-bartaa nala matak esa, neu ko Ana tao natetun, nahuu Ana ta bisa kokolak pepekok. Huu naa de ita dalen hae babati no Ndia hehelu-bartaan. Ita talaik teu sangga masoi-masodak nai Ndia ena, de hatematak ia ita tahani a fo tamahena takandoo neu kada Ndia.
HEB 6:19 No dalak naa, ita dalen nara lino-lendek ena, sama leo ofak esa kalua numa rii mai ena, de see nai mamana seseek. Huu ita tamahena neu Yesus Karistus, fo mana dadi neu ita malangga anggaman demak mateꞌen ena. Fai bakahulun, ndaa no hatahori Yahudir fai malolen, malangga anggama demak mateꞌen maso nesik tema ririndik mana babata Kama Malalaok Mateꞌen, fo nasare mbali Manetualain numa naa.
HEB 6:20 Tehuu hatematak ia, Yesus maso nakahuluk ena fo nasosoi dalak fee ita. Huu Ndia oo malangga anggama demak mateꞌen fo mata-aok esa leo Malkisedek lele uluk naa boe. Tehuu Yesus ta neni babanggak lena heni malangga anggama mata-ao raak, nahuu Ana ta hahae nita nakalalaꞌok Ndia ue-osan.
HEB 7:1 Lele uluk, Malkisedek dadi manek kota Salem. Ana oo malangga anggama soa-neu hatahori mana makaluku-makatele neu Manetualain mana Demak Mateꞌen boe. Ndia naden naa sosoa-ndandaan, ndia “Manek Dale Ndoos”. Ma Manek Salem sosoa-ndandaan, “Manek Mole-damek.” Ta hambu esa boe na bubuluk Malkisedek momori-dadadin. Ta hambu esa boe na bubuluk aman, inan, ma bei-baꞌin nara. Ta hambu esa boe na bubuluk ndia fai bobonggin ma mamaten. Hatahori bubuluk kada ndia naa, manek kota Salem, ma malangga anggama soa-neu Manetualain. Tehuu ndia oo sama leo Manetualain Anan boe, nahuu ndia oo malangga anggama fo mana nakalalaꞌok nakandoo ndia ue-osan boe. Laꞌe esa, hambu manek hida mai ro sira soldadun nara, fo leꞌa rala bua-baꞌur ruma baꞌi Abraham nonoon nara mai. Basa boe ma baꞌi Abraham neu natati sama-sama no nonoon nara, losa ara rasenggi manek kara raa. Boe ma baꞌi Abraham leꞌa nala falik basa bua-baꞌur raa lalaꞌen. Neu baꞌi Abraham laꞌok fali neu ngga ena, boe ma Malkisedek kalua numa kota Salem mai, de neu sorun. Boe ma ana fee babaꞌe-babatik neu baꞌi Abraham nae, “Ela leo bee na Manetualain mana Demak Mateꞌen fee babaꞌe-babatik neu o.” Basa boe ma baꞌi Abraham fee Malkisedek babaꞌek esa numa babaꞌek salahunu mai, numa basa bua-baꞌur fo ana leꞌa nala falik kara raa mai. Ana fee talo naa, nahuu Malkisedek naa, malangga anggama numa Manetualain mana Demak Mateꞌen mai.
HEB 7:4 Dadi duduꞌa matalolole laꞌe-neu Malkisedek ia! Baꞌi Abraham feen babaꞌek esa numa babaꞌek salahunu mai, numa basa bua-baꞌur neulaun lenak fo ana leꞌa nala falik kara raa mai ena. De manggaledok ena, Malkisedek naa, hatahori moꞌo-inahuuk.
HEB 7:5 Naa te faik naa, Manetualain bei ta soꞌuk hatahorir fo dadi reu malangga anggama. Losa baꞌi Abraham usin Lewi, dei de Manetualain soꞌuk kana no tititi-nonosin nara fo dadi reu malangga anggama soa-neu basa baꞌi Abraham tititi-nonosin lalaꞌen. Basa boe ma Manetualain oo nakonda hohoro-lalanek boe nae, leo Lewi hatahorin nara raena haak simbo babaꞌek esa numa buna-boak babaꞌek salahunu mai, ruma sira toranoo leo laen nara marai Israꞌel mai.
HEB 7:6 Tehuu Malkisedek naa, ta Lewi tititi-nonosin. Leo mae talo naa oo, tehuu baꞌi Abraham feen babaꞌek esa numa babaꞌek salahunu mai boe, nahuu nai memeten, Malkisedek naa, hatahori ta hohoꞌak. Faik naa, baꞌi Abraham simbo hehelu-bartaak numa Manetualain mai ena, fo feen babaꞌe-babatik. Leo mae talo naa, tehuu Malkisedek oo kokolak boe nae, “Ela leo bee na Manetualain mana Demak Mateꞌen fee babaꞌe-babatik neu o.”
HEB 7:7 Ia oo ndia dadi bukti boe nae, Malkisedek naa, hatahori moꞌo-inahuuk. Huu hatahori mana kokolak fee babaꞌe-babatik, moꞌon lena hatahori mana simbo babaꞌe-babatik.
HEB 7:8 Malangga anggamar basa sara raena haak fo simbo rala babaꞌek esa numa babaꞌek salahunu mai. Tehuu sira kada hatahori dae-bafok biasar, de doo-doo te mate sara. Malangga anggama Malkisedek oo simbok babaꞌek esa numa babaꞌek salahunu mai boe. Tehuu ana nasoda nakandoo, nahuu Manetualain Susura Malalaon ta nafada nae, ana mate.
HEB 7:9 Huu baꞌi Abraham baꞌe fee Malkisedek bua-baꞌur raa, babaꞌek esa numa babaꞌek salahunu mai, na, hatahorir bisa duꞌa sudik kana rae, ana oo doi-sou nala ndia tititi-nonosin, bei ta neni bonggik kara boe. No dalak naa, ita bisa tae, ana bae memak usin Lewi babaꞌen esa numa babaꞌek salahunu mai ena.
HEB 7:11 Neu Lewi tititi-nonosin nara dadi malangga anggama, Lamatuak here nala baꞌi Musa kaꞌan, Harun fo dadi neu malangga anggama demak mateꞌen makasososak. Malangga anggamar uen, ndia ratudu dalak fo hatahori bisa leo-laꞌo no lolo-laok, ma malole no Manetualain. Leo mae ara tao tungga basa hohoro-lalanek kara oo, tehuu malangga anggama mata-aok leo Harun, ta bisa tao sara lolo-laok tebe-tebe boe. Huu naa de ara parluu malangga anggama laen, mana naena mata-aok sama leo Malkisedek.
HEB 7:12 Dadi mete ma malangga anggama mata-ao beuk nggati malangga anggama mata-ao raak, na, hohoro-lalane raak oo muste nggatin boe.
HEB 7:13 Manggaledok ena, hetu! Malangga anggama mata-ao beuk naa, ndia Yesus. Tehuu Ndia neni bonggik numa leo laen mai, ta numa leo Lewi mai. Tungga baꞌi Musa hohoro-lalanen, malangga anggama mata-aok leo Harun numa kada leo Lewi mai, ta bole numa leo laen mai.
HEB 7:14 Tehuu basa hatahorir bubuluk rae, ita Lamatuan Yesus Karistus bonggin numa leo Yahuda mai. Tungga baꞌi Musa hohoro-lalanen, ta hambu malangga anggama numa leo naa mai.
HEB 7:15 Tehuu Manetualain ta pake hohoro-lalane raak naa bali, nahuu hatematak ia hambu Yesus ena fo dadi malangga anggama mata-ao beuk, sama leo Malkisedek.
HEB 7:16 Tungga baꞌi Musa hohoro-lalanen, na, malangga anggama mata-ao raak kara, muste numa Lewi leon mai. Tehuu Yesus ta numa leo naa mai. Leo mae talo naa oo, tehuu Manetualain soꞌuk nalan fo dadi neu malangga anggama mata-ao beuk boe, nahuu Ana naena koasa fo nasoda nakandoo, ma ta hambu esa boe na bisa nakalulutu sana.
HEB 7:17 Manetualain Susuran surak nae, “O dadi muu malangga anggama mata-aok esa mua Malkisedek ndia lele uluk naa, tehuu O dadi malangga anggama losa doon naa neu.”
HEB 7:18 Sosoa-ndandaan nae, hohoro-lalane raak ta naena koasa fo tulu-fali hatahorir. Huu naa de Manetualain leꞌa falik hohoro-lalane raak naa ena, fo fai uluk Ana feen neu baꞌi Musa ena.
HEB 7:19 Leo mae hatahori leo-laꞌo ma tao tungga hohoro-lalane raak kara raa, tehuu ara bei raena sala-singgok. Huu naa de hatematak ia, Manetualain nasosoi dalak fo lolen lenak ena, mita fo ita bisa leo-laꞌo no mole-damek to Ndia.
HEB 7:20 Fai bakahulun, neu Manetualain soꞌu Lewi tititi-nonosin nara fo dadi malangga anggama, Ana ta helu-bartaa, ma ta soꞌuk sumba-sook hata esa boe na no sara. Tehuu neu Manetualain soꞌuk Yesus dadi malangga anggama, Ana helu-bartaa nae, “Au ia, Lamatuak fo naena haak parenda basa-basan! Au sumba-soo, Au ta lali-lali hata fo Au helu-bartaak ena. Au soꞌuk O dadi malangga anggama, fo O makalalaꞌok O uem makandoo.”
HEB 7:22 No Manetualain helu-bartaa talo naa, Ana pake Yesus fo dadi neu tanda nemeheherek fee ita nae, Ana nau ndara fangga hehelu-bartaak lolen lenak bali no ita.
HEB 7:23 Fai bakahulun malangga anggama mata-ao raak muste nggati rakandoo, huu ara mate. Huu naa de muste hambu malangga anggama noꞌuk ka.
HEB 7:24 Tehuu Yesus naa, malangga anggama mata-ao beuk esa fo mana masoda nakandoo, ma Ana oo nakalalaꞌok uen nakandoo boe. De ta parluu hambu hatahori nggati Ndia.
HEB 7:25 Huu naa de Yesus bisa tao nasoi-nasoda basa hatahorir mana nau reni Manetualain reu nesik Ndia. Ana bisa tao talo naa losa doon naa neu. Ma ana dadi neu sira hatahori uma dalen fo mana soa noke-hule neu Manetualain fo tulu-fali sara.
HEB 7:26 Yesus naa, malangga anggama demak mateꞌen fo mana nandaa besa-besa no ita. Huu Ndia naa, Hatahori Malalaok fo ta naena salak hata esa boe na. Ana ta sama no hatahori dae-bafok biasa, fo kada mana tao sala-singgok. Manetualain nakadedemak kana ena, nai nusa tetuk do inggu temak neu mamana hada-horomatak mateꞌen.
HEB 7:27 Huu naa de Yesus neulaun lenak numa basa malangga anggama mata-ao raak kara mai. Fai bakahulun ara muste tunu-hotu banda tungga faik, fo Manetualain koka heni sira mesa kasa sala-singgon nara. Basa naa, dei fo ara tao tunu-hotuk fee hatahorir. Tehuu Yesus ta parluu tao laꞌi-laꞌik kana talo naa, nahuu Ana loo lima Ndia ao heli-helin laꞌe esak ka ena fo dadi tunu-hotuk. Naa, dai ena fo Manetualain koka heni basa hatahorir sala-singgon nara.
HEB 7:28 Tungga baꞌi Musa hohoro-lalanen, ara soꞌuk hatahori dae-bafok biasa dadi reu malangga anggama. Tehuu ara bei raena sala-singgok. Huu naa de Manetualain ndara fangga hehelu-bartaa beuk nae, Ana nau soꞌuk Ndia Anan fo dadi neu malangga anggama demak mateꞌen. Huu Anan ia, tungga nakandoo Ndia hihii-nanaun.
HEB 8:1 De au kokolang nenenin lenak talo ia: hatematak ia ita taena malangga anggama demak mateꞌen ena fo ta neni babanggak lena heni bakahuluk kara raa. Hatahori naa, ndia Yesus. Ana nanggatuuk toꞌu parenda nai nusa tetuk do inggu temak, nai Manetualain mana Demak Mateꞌen boboa konan.
HEB 8:2 Ma Ana nakalalaꞌok Ndia uen nai mamana hule-haradoi huuk ta neni babanggak. Mamanak naa, Manetualain mesa kana ndia adun, ta hatahori dae-bafok ndia taon.
HEB 8:3 Malangga anggama demak mateꞌen nasiꞌe neni fefeek ma tunu-hotuk soa-neu Manetualain. Huu naa de Yesus oo muste neni tunu-hotuk boe.
HEB 8:4 Tehuu Yesus ta nakalalaꞌok Ndia uen nai dae-inak. Huu nai dae-inak, hambu malangga anggama mana neni fefeek ma tunu-hotuk soa-neu Manetualain ena, tungga baꞌi Musa hohoro-lalanen.
HEB 8:5 Ara rakalalaꞌok sira uen numa Laak Huhule-haradoik, rupan sama leo mamana huhule-haradoi huuk manai nusa tetuk do inggu temak. Neu baꞌi Musa nae tao Laak naa, Manetualain fee nesenedak neun nae, “Masaneda matalolole! O muste tao tebe-tebe tungga mata-aok sama leo mamana huhule-haradoi huuk fo neu faik Au atudun neu o numa letek naa lain ena!”
HEB 8:6 Tehuu Yesus uen ta neni babanggak lena heni malangga anggama raak kara. Huu hatematak ia, Manetualain ndara fangga hehelu-bartaak lolen lenak ena. Hehelu-bartaak fo lolen lenak naa, ndia Ana pake Yesus dadi lelete fo hatahori dae-bafok bisa mole-dame ro Manetualain.
HEB 8:7 Lele uluk Ana ndara fangga hehelu-bartaak no baꞌi Musa, neu Ana nakonda hohoro-lalanek kara raa. Leo mae talo naa oo, tehuu hatahori dae-bafok ta bisa leo-laꞌo lolo-laok tebe-tebe tungga hohoro-lalanek kara raa boe. Huu naa de ara ta bisa malole ro Manetualain. De hatematak ia parluu hambu hehelu-bartaak fo lolen lenak bali.
HEB 8:8 Fai bakahulun Manetualain kaꞌi-ore Ndia hatahorin nara, nahuu ara lena-langga laꞌi-laꞌik ka neu Ndia hohoro-lalane raan. Neu Ana ta nakataka nala ena bali, boe ma namanasa, de Ana nafada nae, “Nenene matalolole, Au ia, Lamatuak, fo naena haak parenda basa-basan! Neu ko Au ndara fangga hehelu-bartaa beuk ua hatahori nusa Israꞌel, ma leo Yahuda.
HEB 8:9 Neu ko hehelu-bartaak fo Au ae ndara fangga ua sara raa, ta sama no hehelu-bartaa raak fo fai bakahulun Au ndara fangga ua sira bei-baꞌin nara ena. Fai bakahulun Au toꞌu liman nara, fo nuni sara kalua numa dae Masir mai. Tehuu ara ta tao tungga hata fo ara helu-bartaa basak ro Au ena. Huu naa de Au ta nau tao matak neu sara ena bali.
HEB 8:10 Hehelu-bartaak fo Au ae ndara fangga ua hatahori nusa Israꞌel naa, isin talo ia: Neu ko Au tao Au hohoro-lalaneng neu sira duduꞌan dale. Neu ko Au surak Au parendang neu sira dalen dale. Boe ma Au dadi uu sira Lamatuan ma ara dadi reu Au hatahoring.
HEB 8:11 Neu ko ara ta parluu ranori sira nonoon nara bali, ma sira toranoon nara rae, ‘Ei muste malela Lamatuak!’ Huu basa sara ralela Au no malole, mulai numa kadiꞌi anan seli losa moꞌok mateꞌen mai.
HEB 8:12 No Au ae atudu Au dale kasian neu sara, huu naa de Au lilii heni basa sira sala-singgon lalaꞌen.”
HEB 8:13 Neu Manetualain kokolak nae, Ana nau ndara fangga hehelu-bartaa beuk no sara, sosoa-ndandaan nae, hehelu-bartaa raak, ta neni pakek ena. Ta dook ka bali te mopo henin ena.
HEB 9:1 Hatematak ia, au ae fee nesenedak talo ia: neu Manetualain ndara fangga hehelu-bartaa makasososak no ita bei-baꞌin nara, Ana oo nakonda hohoro-lalanek boe, fo ara rambaririik mamana huhule-haradoik fo ara bisa rakaluku-rakatele neun, tungga hohoro-lalanek naa hihiin.
HEB 9:2 Nai mamana huhule-haradoik naa, hambu bebelan ma laa moꞌok esa. Nai laak naa kama mukan, hambu mamana netetende lambu, ma mei esa fo malangga anggamar paken, ndae roti fee Manetualain. Kama muka naa, ara seseik kana rae, Manetualain Kama Malalaon.
HEB 9:3 Boe ma hambu tema ririndi moꞌok esa neni londak babata kama laen esa fo ara seseik kana rae, Manetualain Kama Malalaon Mateꞌen.
HEB 9:4 Nai tema ririndik naa matan, hambu mei lilo mbilas esa fo hotu rani kaboo menik fee Manetualain. Ma nai Kama Malalaok Mateꞌen hambu peti neni balu lilo mbilas esa fo ara seseik kana rae, Peti Hehelu-bartaak. Nai peti naa dale, ara mbeda bua-baꞌu lele uluk fo fee nesenedak neu hatahorir laꞌe-neu Manetualain hehelu-bartaan fo Ana ndara fanggak no sara ena. Nai naa, hambu tofles lilo mbilas esa, neni isik no roti manna. Roti naa, ndia roti lele uluk fo Manetualain nakondan numa lalai mai, fee ita bei-baꞌin nara, neu ara ndoe-laꞌa numa mamana nees. Nai peti naa oo, hambu baꞌi Harun teteꞌe ai kamatuun boe, fo bakahulun nasamusa nita. Ma hambu batu bebelak fo fai uluk Manetualain paken, doki Ndia hohoro-lalanen fo Ana feen neu baꞌi Musa.
HEB 9:5 Nai peti naa tatanan, hambu patong dua ratudu Manetualain ta neni babanggan. Patong raa, mata-aon sama leo Manetualain ata kalidan numa nusa tetuk do inggu temak mai, rambariik ro lidan nara nekembelak kara fo tatana rala peti naa, nahuu mamanak naa natudu Manetualain dale kasian neu hatahori dae-bafok. Tehuu hatematak ia, au faing ta dai fo kokolak no lutu-lelon laꞌe-neu bua-baꞌur raa.
HEB 9:6 Sira mbembeda-ngganggaon neu bua-baꞌur marai Manetualain Laa Huhule-haradoin naa, memak talo naa. Boe ma malangga anggamar maso-kalua tungga faik reni kama muka naa reu, fo rakalalaꞌok sira uen nai naa.
HEB 9:7 Tehuu kada malangga anggama Yahudir malangga ina-huun mesa kana ndia bole maso neni Manetualain Kama Malalaon Mateꞌen naa neu. Ma ana ta bole maso fai lelik, huu ana bole maso kada laꞌe esa ka nai teuk esa dalen. Mete ma ana maso, ana muste neni banda tunu-hotuk daan, fo bibirun neu Peti Hehelu-bartaak naa tatanan. Daak naa sosoan, mita fo Manetualain koka heni malangga anggama naa no basa hatahorir sala-singgon lalaꞌen, leo mae hata fo ara taok naa oo, ara ta bubuluk sala do taa boe.
HEB 9:8 Manetualain pake Ndia Dula-dale Malalaon ena fo fee ita bubuluk tae, mete ma tema ririndik naa, bei babata dalak maso neni Kama Malalaok Mateꞌen neu, naa sosoa-ndandaan nae, hatahori dae-bafok bei ta bisa maso neni Manetualain matan neu, losa faik bee fo hohoro-lalane raak kara bei neni pakek.
HEB 9:9 Huu basa naar dadi neu netuduk fo Manetualain Dula-dalen paken, fo nanori ita bei mana masodak hatematak ia. Fai bakahulun ita bei-baꞌin nara reni sira fefeen ma banda tunu-hotuk reu malangga anggama fo Manetualain koka heni sira sala-singgon nara. Tehuu leo mae ara reni tunu-hotuk noꞌun seli oo tunu-hotuk kara raa, ta bisa tao rala dalen nara dadi lolo-laok, ma ta bisa ramopo sira nemeda salan rai dalen nara boe.
HEB 9:10 Dadi hata fo ara taok naa, tungga kada anggama hohoro-lalanen. Hambu hohoro-lalanek parenda nae, ara ta bisa raꞌa ia, ma ta bisa rinu naa. Hambu hohoro-lalanek laen nae, ara muste safe aon nara ma bua-baꞌun nara tungga hohoro-lalanek hihiin. Naa te basa hohoro-lalanek kara raa, tao ralao kada hatahorir dean, tehuu ta tao ralao dalen nara. Leo mae talo naa oo, tehuu hohoro-lalanek kara raa muste laꞌok rakandoo boe, losa Manetualain nggatin no hohoro-lalane beuk.
HEB 9:11 Tehuu hatematak ia, Hatahori fo Manetualain helu-bartaa memak kana numa lele uluk mai naa nai ia ena. Hatahori naa, ndia Karistus. Ana mai ena fo dadi neu ita malangga anggama demak mateꞌen, ma Ana tao dedeꞌa malole fee ita ena. Ana nakalalaꞌok uen, sama leo malangga anggama mata-ao raak, tehuu Ana naue-osa nai mamana huhule-haradoi huuk ta neni babanggak. Ndia mamana huhule-haradoin naa, ta nai dae-inak, huu hatahori dae-bafok ta ndia tao mamanak naa.
HEB 9:12 Karistus maso neni Kama Malalaok Mateꞌen naa neu, fo nasare Manetualain sama leo malangga anggama demak mateꞌen mata-ao raak kara taok, teuk esa laꞌe esa. Ma neu Ana maso, Ana oo neni daak boe fo fee Manetualain. Tehuu ta sama. Huu Karistus ta neni banda tunu-hotuk daan. Ana nenik naa, ndia Ndia daa heli-helin, nahuu Ana mate ena fo dadi tunu-hotuk soa-neu ita. Tehuu Karistus neni daan dale neu laꞌe esak ka, fo nakamboꞌik ita numa ita sala-singgon mai, losa doon naa neu.
HEB 9:13 Dadi Karistus daan naa, memak ta neni babanggak lena heni banda daan. Huu tungga baꞌi Musa hohoro-lalanen, hatahori mana tao salak kara, manggenggeok ma ta randaa maso fo rakaluku-rakatele neu Manetualain. Muste reni malangga anggama reu fo tao tunu-hotuk, mita fo tunu-hotuk naa daan tao nambalao falik kasa. Tunu-hotuk noꞌuk ka roke bibi hiek daan ma sapi daan. Hambu hohoro-lalanek esa boe nae, mete ma hatahori koi laꞌe hatahori mates, ana dadi manggenggeok nai Manetualain matan ena. Mete ma hatahori naa nau nambalao fali, malangga anggama muste huru nala afu lenak numa sapi tenak neni hotu basak mai. Basa boe ma ana neni afu naa, fo sombun neu hatahori manggenggeok naa, mita fo nambalao fali.
HEB 9:14 Dadi mete ma banda daan bisa tao nalao hatahori ao-ina dean fo manggenggeok, lena-lenak bali no Karistus daan! Huu Karistus daan naa, nakamboꞌik ita numa sala-singgok kara mai ena, ma Ana oo tao nalao ita dalen dale boe. Ita sala-singgon tao nala ita lenggo feꞌe numa Manetualain mai. Neu Karistus mamaten talo naa, Manetualain Dula-dale mana masodak seku neu, tulu-falin fo Ana loo lima aon neu Manetualain, sama leo banda tunu-hotuk matetuk, ta naena mbiꞌe-toꞌik faa boe na. Dadi hatematak ia, ita bisa takaluku-takatele no tetebes ena neu Manetualain mana masodak seku neu.
HEB 9:15 No Karistus daan ta neni babanggak naa, huu naa de Manetualain paken dadi lelete neu hehelu-bartaa beuk soa-neu basa hatahorir fo Manetualain noke nala sara ena, fo dadi Ndia hatahorin. Neu Karistus mate fo tao nasoi-nasoda hatahori, Ana oo tefa-soi ita bei-baꞌin nara numa sala-singgok fo ara taok ndia lele uluk mai boe, neu Manetualain ndara fangga hehelu-bartaa raak no sara. Huu naa de ara oo bisa rasoda rakandoo ro Manetualain boe.
HEB 9:16 Au haꞌi netuduk, hatahori simbo pusaka, sama leo amak esa, tao susura pusaka fo mateꞌen fee pusaka neu ndia anan. Tehuu kanak naa dei fo bisa toꞌu nala pusaka naa, mete ma aman maten ena.
HEB 9:17 Mete ma amak naa bei masodak, anan bei ta bisa simbo pusaka, fo aman helu-bartaa memak kana ena nai susura pusaka naa.
HEB 9:18 Leo naak oo soa-neu Manetualain hehelu-bartaa raan boe fo Ana ndara fangga no ita bei-baꞌin. Mete ma hambu esa mate nakahuluk, dei fo ara bisa simbo hata fo Manetualain helu-bartaak naa. Huu naa de sira tunu-hotun pake banda daan fo dadi bukti nae, hambu mana matek ena.
HEB 9:19 Fai maneuk kara, baꞌi Musa nakabubua nala ita bei-baꞌin nara, de nafada basa parenda marai hohoro-lalanek fo Manetualain nakondak naa ena. Basa boe ma baꞌi Musa hala sapi ma bibi hiek fo haꞌi nala daan, de babalik kasa no oe. Ana oo pake tali mbilas fo futu ai doo lutuk ndanan boe. De ana boron neni daak naa dale neu, boe ma bibiru neu Manetualain Susuran, ma neu basa rau-inggur lalaꞌen.
HEB 9:20 Neu baꞌi Musa bibiru daak naa, ana oo kokolak boe nae, “Daak ia, dadi tanda nae, Manetualain ndara fangga hehelu-bartaak no ei. Mete ma ei tao tungga basa Ndia parendan lalaꞌen, neu ko Ana oo fee basa hata fo Ana helu-bartaak ena boe.”
HEB 9:21 Baꞌi Musa oo bibiru daak naa neu Laa Huhule-haradoik, ma basa bua-baꞌur marai naar fo ara pake rakaluku-rakatele neu Manetualain boe.
HEB 9:22 Huu tungga Manetualain hohoro-lalanen, numa basa bua-baꞌu manggenggeok kara mai noꞌun nara muste tao nelao sara pake daak. Huu naa de mete ma hatahori dae-bafok nau dadi lolo-laok numa sira sala-singgon mai, na, muste hambu tunu-hotuk daan.
HEB 9:23 Hata fo au tuik laꞌe-neu ita bei-baꞌin nara, ma sira Laa Huhule-haradoin naa, basa naar kada dadi neu netuduk, mita fo ita bisa talela Manetualain mamana huhule-haradoi huun ta neni babanggak nai nusa tetuk do inggu temak. Mete ma malangga anggama mata-ao raak nae maso neni Laak neu fo hule-haradoi neu Manetualain, ara muste tao ralao basa-basan dei, pake banda tunu-hotuk daan. Manetualain mamana huhule-haradoin manai nusa tetuk do inggu temak oo muste malalaok boe. Tehuu muste pake tunu-hotuk daan ta neni babanggak fo lena heni banda daan.
HEB 9:24 Kama Malalaok Mateꞌen fo Karistus masok naa, ta kama manai Laa Huhule-haradoik fo hatahori dae-bafok taok. Huu Laak manai dae-inak naa, kada dadi neu netuduk numa huun mai. Tehuu Karistus maso memak nai nusa tetuk do inggu temak dadi lelete fo tulu-fali ita nai Manetualain matan.
HEB 9:25 Fai bakahulun malangga anggama demak mateꞌen muste maso laꞌi-laꞌik kana teuk esa laꞌe esa neni Kama Malalaok Mateꞌen naa neu, ma neni banda daan fee Manetualain. Tehuu Karistus ta leo naak. Ana parluu maso kada laꞌe esak ka, ma neni Ndia daa heli-helin.
HEB 9:26 Huu mete ma Ana muste maso tungga teuk, sama leo malangga anggama mata-ao raak naa, sosoa-ndandaan nae, Ana muste mate laꞌi-laꞌik kana, mulai numa dae-bafok makasososan mai losa hatematak ia, mita fo Ana koka heni hatahori esa-esak sala-singgon. Tehuu Ana ta tao talo naa. Huu ndaa no faik Karistus mate, Ana dadi tunu-hotuk laꞌe kada esak ka fo siꞌu-sapu heni basa sala-singgok lalaꞌen fo hatahorir taok.
HEB 9:27 Manggaledok ena, hatahori dae-bafok mate laꞌe esak ka. Tehuu basa naa, ana muste neu nasare nai Manetualain matan fo Manetualain parisan.
HEB 9:28 Leo naak oo Karistus boe. Ana mate ma loo lima aon fo dadi neu tunu-hotuk laꞌe esak ka. Ma neu ko Ana oo fali mai boe. Tehuu Ana ta koladu hatahorir sala-singgon bali, nahuu Ana tao natetu ues naa ena. Tehuu hata fo Ana nae koladuk naa, ndia Ana nau tao nasoi-nasoda basa hatahorir fo mana ramahena neun.
HEB 10:1 Hohoro-lalanek kara fo Manetualain feen neu ita bei-baꞌin nara raa, bei kuran manggaledok. Huu, naa kada lalaok numa dedeꞌa malole mai, fo Manetualain nae feen neu ita. De leo mae hatahorir tungga hohoro-lalanek kara raa, ma reni banda tunu-hotuk taa-taa oo, naa ta bisa tao nalao tebe-tebe sira sala-singgon nara boe.
HEB 10:2 Mete ma hohoro-lalanek kara raa bisa tao ramopo tebe-tebe sira sala-singgon, na, ara ta reni banda tunu-hotuk bali, naa te ara bei rameda salak nai sira dalen nara.
HEB 10:3 Huu naa de tungga teuk bei reni banda tunu-hotuk laꞌi-laꞌik kana fee nesenedak neu Manetualain fo koka heni sira sala-singgon nara,
HEB 10:4 nahuu ta bisa dadi banda daan naena koasa fo siꞌu-sapu heni tebe-tebe hatahorir sala-singgon nara.
HEB 10:5 Huu naa de Karistus kokolak talo ia, neu Ana neni dae-bafok ia mai: “Manetualain! Manetualain ta namahoko no banda tunu-hotuk ma fefeek laen fo ara renik. Ara hala risa bandar noꞌun seli, fo dadi neu tunu-hotuk. Boe ma ara hotu bandar noꞌun seli, fo roke ambon. Leo mae talo naa oo, tehuu Manetualain dalen ta namahoko boe. Huu naa de Manetualain nadenu Au uni dae-bafok ia mai, fo dadi hatahori dae-bafok sama leo sira.”
HEB 10:7 Boe ma Karistus oo kokolak boe nae, “Manetualain! Au nai ia ena! Au mai fo tao tungga Manetualain hihii-nanaun, sama leo Manetualain mana toꞌu dedeꞌan surak memak laꞌe-neu Au.”
HEB 10:8 Dadi Karistus kokolan makasososan naa, ndia: “Manetualain ta namahoko no banda tunu-hotuk ma fefeek laen fo ara renik. Ara hala risa bandar noꞌun seli, fo dadi tunu-hotuk. Boe ma ara hotu bandar, fo roke ambon. Leo mae talo naa oo, tehuu Manetualain dalen ta namahoko boe.” Dadi leo mae ara tao tungga baꞌi Musa hohoro-lalanen nara no tetuk ena, tehuu Manetualain dalen ta namahoko.
HEB 10:9 Neu Karistus kokolak nae, “Au mai fo tao tungga Manetualain hihii-nanaun.” Ndia sosoa-ndandaan nae, Karistus mai fo koka heni dala raak, basa de nggatin no dala beuk.
HEB 10:10 Huu Manetualain hihii-nanaun, de Yesus Karistus dadi neu tunu-hotuk fo mate laꞌe esak ka soa-neu ita hatahori dae-bafok. No dalak naa, Ana tao nala ita dadi teu hatahori lolo-laok losa doon naa neu.
HEB 10:11 Tungga faik, malangga anggama mata-ao raak kara raa rakalalaꞌok sira uen, ma hala risa banda tunu-hotuk kara. Naa te tunu-hotuk kara raa, ta hambu rita koasa fo siꞌu-sapu heni tebe-tebe hatahori sala-singgon.
HEB 10:12 Tehuu ita Malangga Anggama Demak Mateꞌen, ndia Karistus, Ana loo lima aon fo mate dadi neu tunu-hotuk soa-neu ita. Ma Ana dadi neu tunu-hotuk laꞌe kada esak ka, Ana nasosoi dalak ena fo bisa siꞌu-sapu heni basa hatahori dae-bafok sala-singgon nara lalaꞌen. Basa naa, dei de Ana nanggatuuk neu Manetualain boboa konan nai mamana hada-horomatak mateꞌen.
HEB 10:13 Nai naa, Ana nahani losa Manetualain tao nala musun nara holu ei neun.
HEB 10:14 Ndia tunu-hotun fo laꞌe esak ka naa, tao naketu nakandoo sala-singgok koasan soa-neu hatahorir fo Karistus tao nalalao nakandoo sara.
HEB 10:15 Manetualain Dula-dale Malalaon oo nafada dedeꞌak sama leo naak soa-neu ita boe. Ana kokolak nita nae,
HEB 10:16 “Ei Lamatuam nafada nae talo ia: Au ndara fangga hehelu-bartaa beuk ua Au hatahoring nggara, Au tao Au hohoro-lalaneng neu duduꞌan nara, ma Au surak Au parendang nai dalen nara dale.”
HEB 10:17 Boe ma Ana nafada seluk nae, “Neu ko Au ta asaneda sira sala-singgon nara bali. Ma Au lilii heni sira tatao-nonoꞌin nara, neu ara lena-langga Au hohoro-lalaneng nggara.”
HEB 10:18 Ndia sosoa-ndandaan nae, mete ma Manetualain koka heni basa hatahorir sala-singgon nara ena, na, hatahorir hae reni tunu-hotuk bali, fo tao rakasufu Manetualain dalen.
HEB 10:19 Dadi talo ia toranoo nggara ein! Yesus daan titi henin ena, fo tao nakasufu Manetualain dalen. Huu naa de hatematak ia, ita hae tamataꞌu bali teu tasare mbalin nai Ndia Mamana Malalaon Mateꞌen nai nusa tetuk do inggu temak.
HEB 10:20 Masaneda neu Mamana Malalaok Mateꞌen raak naa! Numa naa, hambu tema ririndi loak mana babata fo hatahorir ta bole maso reu rasare matak ro Manetualain. Tehuu no Karistus mamaten naa, Ana nasosoi dala beuk, fo hatahorir bisa kokolak rasasare aok ro Manetualain.
HEB 10:21 Lena-lenak bali, Yesus oo dadi malangga anggama ta neni babanggak fo naono-lalau ma koladu Manetualain uma isin nara boe.
HEB 10:22 Huu, naa dadi neu ita haak, na, mai fo ita teu kokolak tasasare aok to Manetualain. Tehuu ita muste tamahere tebe-tebe neu Ndia no dale ndoos. Huu Yesus mamaten tao nalao ita dalen, losa ita ta duduꞌa hata fo manggarauk kara ena bali. Ma ita oo muste leo-laꞌo no lolo-laok boe, sama leo malangga anggama mata-ao raak kara muste radiu oe, dei fo maso reu raono-lalau Manetualain.
HEB 10:23 Mai fo ita oo toꞌu tahere basa hata fo ita manaku laꞌe-neu Manetualain boe. Ma ita oo muste tamahena neu Ndia boe, ma hae duduꞌa neu-mai, huu Ana tao natetu Ndia hehelu-bartaan.
HEB 10:24 Ma mai ita sangga dalak fo fufudi-kokoe ita toranoo kamaheren nara, mita fo ita basa ngga tatudu susue-lalaik noꞌun seli ma taue-osa neulauk mata-matak kara.
HEB 10:25 Huu Au amanene ena, hambu hatahori ketuk ta nau rakabua ro toranoo kamaheren nara bali. Tehuu boso talo naa! Ei muste makabubua fo esa natetea esa dalen. Lena-lenak bali, nahuu Lamatuak fai mamain deka-deka ena. Fee nesenedak neu sara talo naa!
HEB 10:26 Toranoo susue nggara ein! Ita bubuluk no lutu-lelon laꞌe-neu Yesus Karistus eno-dala ndoon ena. Tehuu mete ma ita tasadea laꞌo ela Yesus, ma leo-laꞌo tao salak takandoo, na, sosoa-ndandaan nae, ta hambu tunu-hotuk laen bali fo bisa koka heni ita sala-singgon nara.
HEB 10:27 Ita kada tahani no nemetaꞌuk, nahuu Manetualain mai fee huku-dokik neu ita. Huu aꞌi mana mbilak ta kala matek ta hohoꞌak naa, nahani a ena fo nae nakalulutu basa hatahorir mana laban neu Ndia.
HEB 10:28 Fai bakahulun mete ma hambu hatahori esa timba heni baꞌi Musa hohoro-lalanen, ma hambu hatahori dua do telu sakasii talo naa, na, hatahori mana tao salak naa, muste hambu hukun mates, ma ta hambu ambon bali.
HEB 10:29 Tehuu hatematak ia, mete ma hambu hatahori nakadadaek Manetualain Anan, naa sama leo ana mete nakadadaek Yesus daan, fo Ana mboꞌa henin ena fo tao nalalao hatahori naa. Ma hatahori naa, ta tao matak Manetualain hehelu-bartaan fo Ana ndara fangga noon pake daak naa. Hatahori naa oo tao namanasa Manetualain Dula-dalen boe, fo mana natudu dale susuen neun ena. Doo-doo sudik kana dei! Huu hatahori matak leo iak ia, neu ko ana lemba-nasaa nala huku-dokik beran lena bali numa hatahori mana timba heni baꞌi Musa hohoro-lalanen nara mai.
HEB 10:30 Manetualain kokolak nita nae, “Au aena haak fo bala hatahorir manggaraun. Ma neu ko Au tao talo naa.” Ma neni surak bali nae, “Manetualain naa, Mana Maketu-maladi Dedeꞌak. Neu ko Ana fee hukun neu Ndia hatahorin nara.”
HEB 10:31 Masanedak te Manetualain mana masodak seku neu! Neu ko hatahorir aon mumuru, mete ma Manetualain humu nala sara ena!
HEB 10:32 Ei muste masaneda, neu ei bei fo mulai bubuluk laꞌe-neu Karistus, basa dei de ei duduꞌam mara dadi manggaledo. Huu faik naa, leo mae ei hambu doidosok ma susa-sonak noꞌun seli, tehuu ei makatataka ma mamahere makandoo neu Karistus.
HEB 10:33 Hambu hatahorir rakadadaek ma rakamamaek ei nai hatahori noꞌuk kara matan. Hambu ketuk oo tao ei nonoo kamaherem mara talo naa boe.
HEB 10:34 Ei mameda dale kasian ma matudu dale malolem, neu hatahori neni teek nai bui dale. Neu hatahorir ramanaꞌo reni ei bua-baꞌum, ei simbo mala no kada nemehokok, nahuu ei bubuluk ena mae, neu ko eir ia simbo mala hata fo neulaun lenak, fo hatahori ta bisa ramanaꞌo reni sara.
HEB 10:35 Huu naa de ei muste toꞌu mahere ei nemeheherem. Neu ko Manetualain bala ei noꞌun seli.
HEB 10:36 Dadi kada makatataka! Huu mete ma, ei tao tungga makandoo Manetualain hihii-nanaun ena, neu ko ei simbo basa hata fo Ana helu-bartaa neu ei ena.
HEB 10:37 Manetualain mana toꞌu dedeꞌan nara surak ena laꞌe-neu Hatahori mana nae maik naa rae, “Ta dook ka te Hatahori mana nae maik naa, sou mai ena. Boso monda-maꞌa, huu Ana ta nahani nala dook ka.
HEB 10:38 Hatahori fo dale ndoos, neu ko hambu masoi-masodak, nahuu ana namahere Au. Mete ma hambu ketuk rakaheok aon numa Au mai, Au daleng ta namahoko.”
HEB 10:39 Tehuu ita iar, hatahori ta mana nakaheok aon laꞌo ela Manetualain. Huu hatahori matak leo naak, neu ko ana lenggo feꞌe numa Manetualain mai. Tehuu ita iar, hatahori fo mana namahere neu Manetualain. De ita hambu masoi-masodak fo tasoda takandoo to Manetualain.
HEB 11:1 Mete ma ita tamahere neu Manetualain, sosoa-ndandaan nae, ita tamahere tebe-tebe takandoo neun. Huu mete ma Ana helu-bartaa nae tao matak esa, na, ita bubuluk tae, neu ko Ana tao natetu hehelu-bartaak naa. Leo mae ita bei ta simbo hata esa boe na oo, ita kada tamahere takandoo boe.
HEB 11:2 Hambu ketuk numa ita bei-baꞌin nara mai, memak nemeheheren nara leo naak. Huu naa de Manetualain oo simbok kasa no malole boe.
HEB 11:3 Dae-inak no lalai fo ita mete-titak hatematak ia, ita tamahere tae, Manetualain ndia nakadadadik iar lalaꞌen. Tehuu Ana ta nakadadadin pake bua-baꞌu mana dadi memak ena, fo hatahori dae-bafok bisa mete-ritan. Iar lalaꞌen dadi, nahuu Ana kokolak pake kada Ndia Dedeꞌa-kokolan.
HEB 11:4 Habel namahere neu Manetualain. Huu naa de ana neni ndia fefeen neulaun lenak numa ndia kaꞌan Kaen fefeen mai. Manetualain simbok no malole Habel ma fefeen naa, nahuu dalen ndoos. Dadi leo mae ana mate dook ka ena, tehuu ita bei bisa tanori numa ndia mai, nahuu nemeheheren.
HEB 11:5 Henok oo namahere Manetualain boe. Huu naa de Manetualain soꞌuk kana neni nusa tetuk do inggu temak neu, mita fo ana hae mate. Hatahorir sanggan boe, tehuu ta ratonggo sana, nahuu Manetualain soꞌuk kana ena. Manetualain simbok kana no malole, huu Manetualain nae, “Henok ia, hatahori mana tao namahoko Au daleng.”
HEB 11:6 De talo ia, toranoo nggara ein! Manggaledok ena, Manetualain ta simbok hatahori fo ta mana namahere neu Ndia. Hatahori fo mana nae neni Manetualain neu, ana muste namahere nae, Manetualain naa memak masodak. Ma ana oo muste namahere boe nae, Manetualain nau tulu-fali hatahori fo mana mai sangga Ndia.
HEB 11:7 Noh oo namahere Manetualain boe. Huu naa de Noh namahere Manetualain neu Ana nafada memak kana nae, “Noh! Masaneda, ee! Neu ko Au akalulutu dae-bafok ia pake faa moꞌok fo hatahori dae-bafok bei ta mete-rita sana.” Leo mae Noh bei ta nita matak leo naak oo, ana nenene Manetualain boe, ma tao ofa moꞌok esa fo ndia uma isin nara bisa rasoi-rasoda. Ana namahere talo naa, huu naa de Manetualain henggenee nalan nae, hatahori dale ndoos. Tehuu basa hatahorir fo ta kamaherek kara, Manetualain hukun berak neu sara.
HEB 11:8 Baꞌi Abraham oo namahere Manetualain boe. Manetualain noke nalan, de nae, “Abraham, ee! Laꞌo ela o nggoro-tadum fo muni mamanak esa muu, neu ko Au atudun neu o. Huu neu ko dae naa dadi neu pusaka soa-neu o tititi-nonosim mara.” Ana namanene nala naa, boe ma ana tao tungga Manetualain hihii-nanaun, leo mae ana ta bubuluk nae bee neu.
HEB 11:9 Neu ana losa dae naa, boe ma nambaririik laak fo leo taak sama leo hatahori deak nai dae fo Manetualain helu-bartaa nae feen neun. Basa de anan Isak ma umbun Yakob oo leo reu naa boe, huu Manetualain helu-bartaa basa ena nae fee dae naa dadi neu sira pusakan.
HEB 11:10 Ana namahena fo neu ko ana leo nai kota ta hohoꞌak esa. Huu Manetualain mesa kana ndia nggambar fo nambaririik kota naa.
HEB 11:11 Baꞌi Abraham saon Sara oo namahere Manetualain boe. Leo mae ana bei ta bonggi nita, ma lasi nggonggok ena oo, tehuu Manetualain ndia taon de ana bisa dadi bei-baꞌik numa hatahori nusa moꞌok esa mai boe. Huu ana namahere nae, Manetualain neu ko tao natetu hata fo Ana helu-bartaa basak naa ena.
HEB 11:12 Huu naa de leo mae lasi nggonggook ena oo, ana bei bisa bonggi nala tititi-nonosik noꞌun seli boe, losa ta hambu hatahori esa boe na bisa reke nala sara. Huu sira dedesin nara nok bali nduuk kara rai lalai, ma sarakaek nai tasi tataik.
HEB 11:13 Ita baꞌin nara sira: baꞌi Abraham, baꞌi Isak, ma baꞌi Yakob oo ramahere rakandoo neu Manetualain boe, losa ara mate. Tehuu ara bei ta simbo dae pusaka fo Manetualain helu-bartaak ena. Leo mae talo naa oo, tehuu ara ramahena rakandoo no nemehokok boe, nahuu ara mete-rita dae naa numa dook ka mai ena. Ara manaku ena rae, sira kada hatahori feꞌek mana leo taak nai dae-bafok ia.
HEB 11:14 Naa te manggaledok ena, hatahori fo mana kokolak matak leo naak, dalen nara hii ralan seli hambu mamanak fo dadi neu sira dae pusakan.
HEB 11:15 Mete ma dae pusaka fo ita baꞌin nara hihiik ka reu naa, ndia baꞌi Abraham nggoro-tadun, na, neu ko ara hambu lelak noꞌuk ka fo fali naa reu.
HEB 11:16 Tehuu dae pusaka fo ara hihiik ka reu naa, ndia dae pusaka ta hohoꞌak nai nusa tetuk do inggu temak. Huu naa de Manetualain simbok kasa no malole fo dadi reu Ndia hatahorin. Huu Ana sadia memak kota esa fee sara nai nusa tetuk do inggu temak.
HEB 11:17 Baꞌi Abraham oo namahere tebe-tebe Manetualain boe, neu Manetualain fora ndia nemeheheren. Huu naa de ana tungga Manetualain parendan fo loo lima ndia anan Isak dadi tunu-hotuk. Naa te fai bakahulun Manetualain helu-bartaa basa laꞌe-neu kanak naa ena nae; “Numa o anam Isak ia mai; neu ko o hambu tititi-nonosik noꞌun seli; losa dadi neu hatahori nusak ta hohoꞌak esa.”
HEB 11:19 Tehuu baꞌi Abraham duꞌa ena nae, Manetualain naena koasa fo tao nasoda falik hatahori mates. Memak naa tetebes, huu faik naa sama leo ana hambu falik anan mana dadi tunu-hotuk ena.
HEB 11:20 Baꞌi Isak oo namahere Manetualain boe. Huu naa de ana noke-hule mita fo Manetualain fee babaꞌe-babatik neu ndia anan nara Yakob no Esau.
HEB 11:21 Baꞌi Yakob oo namahere Manetualain boe. Huu naa de neu ana sangga mate, ana nambariik ruku-ruku toꞌu teteꞌe ain, fo nakaluku-nakatele neu Manetualain. Basa de ana noke-hule Manetualain fee babaꞌe-babatik neu ndia umbun numa anan Yusuf mai.
HEB 11:22 Baꞌi Yusuf oo namahere Manetualain boe. Neu ana sangga mate, ana namahere nae, neu ko Manetualain nuni no falik Ndia hatahorin Israꞌel asa kalua numa dae Masir mai. Huu naa de ana helu sara, fo muste reni falik ndia dui-roun, mete ma ara laꞌo ela dae Masir.
HEB 11:23 Baꞌi Musa ina-aman oo ramahere Manetualain boe. Neu inan bonggi basan, boe ma ara rafunin losa bulak telu, nahuu ara mete-rita naao nombe-nombe. Ma ara ta ramataꞌu manek Masir, leo mae ana parenda hatahorin ena nae, “Makanisa basa kakana tou anak neni bonggik numa hatahori Ibrani mai!”
HEB 11:24 Neu baꞌi Musa namoꞌo mamais ena, ana oo namahere Manetualain boe. Fai bakahulun, manek Masir ana feton soꞌu nalan dadi neu ndia anan. Leo mae talo naa oo, tehuu Musa ta nau hatahorir duꞌa rae ndia ia, manek Masir nufanelun boe.
HEB 11:25 Ana duꞌa nae, malole lenak ndia leo-laꞌo no susa-sonak sama-sama no Manetualain hatahorin nara, lena heni numa ndia leo-laꞌo tao dedeꞌa manggarauk fo neni nemehokok kada ta dook ka.
HEB 11:26 Ana ta hosek neu hatahorir rakadadaek kana, nahuu ana namahena neu Karistus, Hatahori fo Manetualain helu-bartaa memak kana fo nae nadenun mai. Ana nakatataka talo naa, nahuu ana bubuluk neu ko Manetualain bala ndia, no seseba-babaek neulauk lena heni basa hata-heto marai dae Masir.
HEB 11:27 Baꞌi Musa oo namahere Manetualain boe, neu ana noke nakamboꞌik numa manek Masir mai, fo nuni no ita bei-baꞌin nara kalua numa dae naa mai. Leo mae manek namanasa nalan seli oo, tehuu baꞌi Musa ta namataꞌu sana boe. Baꞌi Musa namahere nakandoo neu Manetualain fo ta neni nitak, nok bali ana mete-nitan ena.
HEB 11:28 Baꞌi Musa oo namahere Manetualain boe, neu faik fo ara sadia rala rae kalua numa dae Masir mai ena. Huu ana tao tungga Manetualain parendan, de nadenu ita bei-baꞌin nara tao Paska makasososan, ma hala bibi lombo dadi neu banda tunu-hotuk. Boe ma ara haꞌi rala bibi lombo naa daan fo tao tanda neu sira uman nara. Leꞌodaen naa, Manetualain atan numa nusa tetuk do inggu temak mai, nakanisa basa ana uluk lalaꞌen marai dae Masir. Tehuu ana ta maso neu hala ana uluk nai ita bei-baꞌin uman nara, nahuu ana nita daak manai sira uma lelesun.
HEB 11:29 Neu ita bei-baꞌin nara kalua numa dae Masir mai, ara oo ramahere Manetualain boe. Huu sira nemeheheren nara raa, Manetualain tada baꞌe oe numa Tasi Mbilas, de ara ladi tasi naa no masodak resi dae madak. Tehuu soldadu Masir mana husi sara, rasamele mate, neu ara soba ladi tungga dalak naa.
HEB 11:30 Neu ita bei-baꞌin nara maso reni dae Kanaꞌan reu ena, ara oo ramahere Manetualain boe. Huu ara tungga Manetualain parendan, de laꞌok ndule kota Yeriko tembon losa faik hitu. Boe ma tembok naa ndefa henin tutik ka.
HEB 11:31 Numa naa oo hambu Rahab fo fai bakahulun, dadi ina petak numa kota naa boe. Ana simbok no malole hatahori Israꞌel mana mamaꞌun nara ma nafuni sara numa ndia uman, nahuu ana namahere Manetualain. Boe ma Manetualain nakalulutu basa hatahori Yerikor, nahuu ara ta nau nenene neun. Tehuu Manetualain tao nasoi-nasoda Rahab, nahuu ndia nemeheheren.
HEB 11:32 Au bei bisa kokolak naruk ka bali, laꞌe-neu hatahori laen nara fo mana ramahere Manetualain. Tehuu au fain taa, fo tui no lutu-lelon laꞌe-neu Gideon, Barak, Simson, Yefta, Dauk, Samuel, ma Manetualain mana toꞌu dedeꞌan laen nara.
HEB 11:33 Basa sara ramahere Manetualain. Huu naa de ketuk rasenggi mane-manek kara. Ketuk toꞌu parenda no dale ndoos, fo rasalaꞌe hatahori sala taak, ma fee hukun neu hatahori kasalak. Ketuk simbok rala hata fo Manetualain helu-bartaak ena. Ma ketuk rasenggi singa.
HEB 11:34 Hambu ketuk fo rakamate aꞌi mana mbila moꞌok. Hambu ketuk fo Manetualain tao nasoi-nasoda sara numa hatahori mana rae rakanisa sara renik tafa. Hambu ketuk fo mana sota naꞌuk kara, tehuu Manetualain tao barakai sara. Hambu ketuk fo Manetualain tao sara dadi reu mana matati musu ta hohoꞌak, losa ara timba rakadedeak musu soldadun nara ruma mamanak laen nara mai.
HEB 11:35 Hambu inak kara oo simbo falik sira nufanelun fo Manetualain tao nasoda falik kasa ruma mamates mai. Tehuu ketuk hambu tuni-ndenik, nahuu ramahere Manetualain. Ara hii mate, mita fo boso rasadea Manetualain. Dadi ta ketu sira netututin ro Manetualain. Huu ara ramahena rae, neu ko Manetualain soꞌuk kasa fo hambu masodak neulaun lenak bali nai nusa tetuk do inggu temak.
HEB 11:36 Ketuk hambu nekemuuk ma poko-fembak. Ketuk bali, ein nara neni langgek kara rai bui dale.
HEB 11:37 Ketuk mate, nahuu ara pesi sara pake batur. Ketuk mate, nahuu hatahorir horo baꞌe ao-inan nara pake hohorok. Ketuk mate, huu rakanisa sara pake tafa. Ketuk, hata taak kara de pake kada bua-loꞌa numa banda rouk mai, nahuu hatahorir tuni-ndeni ma rakasususak kasa, losa husi heni sara,
HEB 11:38 de ralai reu leo nai mamana nees, nai letek kara, nai luak kara, ma nai bolok kara marai dae dale. Hatahorir rakaloloek hatahorir ia, ma husi heni sara de reu leo nai mamana ta neulauk. Naa te sira nemeheheren nara ta hohoꞌak, losa hatahorir marai dae-bafok ia, ta randaa ro sara.
HEB 11:39 Manetualain koa basa sara, nahuu ara ramahere neu Ndia. Tehuu losa mate oo, ara bei ta simbo hata fo Manetualain helu-bartaa elak ena boe.
HEB 11:40 Ana nau tao tungga Ndia hehelu-bartaan, pake dalak neulaun lenak, ndia nesik Karistus fo ita basa ngga hatematak ia mana talela Karistus ena ma sira mana matek kara lele uluk ena leo-laꞌo takandoo to Ndia.
HEB 12:1 Dadi ita bei mana leo-laꞌo hatematak ia, talo bee? Ita sama leo hatahori fo mana tungga nekeseseꞌuk nalaik. Ita bei-baꞌin lele uluk kara fo mana ramahere Manetualain, ara sama leo mana manilur fo rambariik eko-feo, fo fee nembembena aok soa-neu ita. Tehuu mete ma ita bei neka-lili to sala-singgok kara, naa tao nala ita nelain beran seli. Huu naa de ita muste nggari heni basa sala-singgok kara lalaꞌen, mita fo ita bisa talaik tao tetebe. Huu Manetualain mesa kana ndia here nala ita fo tungga nekeseseꞌuk ia, de ita muste takatataka fo talaik takandoo losa too mateꞌen.
HEB 12:2 Ma ita talaik, boso mete kii-konak, tehuu muste mete neu kada Yesus. Huu Ana nasosoi dalak fo ita bisa tamahere neu Manetualain. Ma neu ko Ana tulu-fali fo ita tamahere takandoo losa babasan. Masaneda, do taa? Neu Yesus doidoso numa ai ngganggek lain, hatahorir rakamamae-rakatitiik kana, tehuu Ana nakatataka nakandoo. Ana bubuluk mete ma doidoson basan ena, neu ko Ndia dalen namahoko. Naa, tebe. Huu Ana mate basa, boe ma Manetualain soꞌuk kana fo nanggatuuk neu Manetualain boboa konan, de Dua sara parenda sama-sama.
HEB 12:3 Leo mae hatahorir tao manggarauk mbalin, tehuu Ana nakatataka nakandoo. De ei boso lilii-ndondou neu Yesus doidoson ia, mita fo ei oo bisa makatataka makandoo, ma ta bengge-manggu boe.
HEB 12:4 Ei laban dedeꞌa manggarauk kara ena, tehuu bei ta laban mahere losa titi heni ei daam mboꞌa henin. Tebe, hetu?
HEB 12:5 Fama te ei lilii-ndondou Manetualain Dedeꞌa-kokolan fo nafada neu ei ena, sama leo amak esa kokolak no anan nae, “Anang, nggee! Mete ma ita Lamatuan fee hukun fo nanori o, mita fo o leo-laꞌo tungga eno-dala ndoos, na, o boso duꞌa mae nenorik naa nenenin taa! Mete ma Ana kaꞌi-ore fo nanori o, na, dalem boso sona.
HEB 12:6 Huu ita Lamatuan kaꞌi-ore fo nanori hatahori bee ndia Ana sue-lain. Memak, basa hatahorir fo Ana simbok kasa dadi neu Ndia anan nara, neu ko Ana kaꞌi-ore fo nanori sara.”
HEB 12:7 De mete ma Manetualain kaꞌi-ore fo nanori ei, fo leo-laꞌo tungga eno-dala ndoos, na, kada makatataka. Ana tao talo naa, nahuu ei dadi miu Ndia anan ena. Huu amak esa-esak muste kaꞌi-ore fo nanori anan, losa kanak naa bubuluk leo-laꞌo tungga eno-dala ndoos.
HEB 12:8 Huu mete ma Manetualain ta kaꞌi-ore fo nanori ei, sama leo Ndia anan laen nara, sosoa-ndandaan nae, eir ia, ta Ndia anan.
HEB 12:9 Ita tasiꞌe fee hada-horomatak neu ita ama bonggin nai dae-bafok ia, nahuu ana kaꞌi-ore fo nanori ita, neu faik ita bei kadiꞌi anan. Naa, tebe naa ena. Lena-lenak bali, ita muste nenene Manetualain, nahuu Ndia ia, ita Aman manai nusa tetuk do inggu temak. Ana nau kaꞌi-ore fo nanori ita, de leo-laꞌo tungga Ndia eno-dala ndoon.
HEB 12:10 Ita ama bonggin kaꞌi-ore fo nanori ita, fain runggak ka, tungga kada hata fo ana duꞌa nae neulauk. Tehuu Manetualain bubuluk dai lena, hata fo ita parluu tanorik. Huu naa de Ana kaꞌi-ore fo nanori ita leo-laꞌo no lolo-laok sama leo Ndia.
HEB 12:11 Memak ita tameda sona, neu faik fo ita hambu kaꞌi-orek. Tehuu doo-doo boe ma ita dalen lino-lendek, nahuu ita bubuluk tala, leo-laꞌo tungga Manetualain hihii-nanaun ena.
HEB 12:12 Toranoo nggara ein! Matetea ei limam mana bengge-mangguk ena, ma tao madaku ei eim mana berak kara ena. Boso malaik peko-paki, tehuu malaik ndoo fido-fidok, fo sira mana sota-naꞌuk kara oo hambu nembembena aok fo ara bisa ralaik rakandoo boe. Ei muste matetea ei dalem mara fo makatataka makandoo ma mamahere neu Karistus.
HEB 12:14 Toranoo kamaherek neu Karistus! Ei muste maote tebe-tebe fo leo-laꞌo no mole-damek esa no esa. Ma maote tebe-tebe fo leo-laꞌo no lolo-laok. Huu hatahori ta lolo-laok, ta bisa mete-nita Manetualain.
HEB 12:15 Esa fofoꞌa esa mita fo ta hambu ketuk numa ei mai nakadedeak, losa ta nameda Manetualain dale susuen. Manea matalolole fo boso fee dale hedis sou nai ei taladam. Huu, naa nok bali raso malik, tao nala hatahori noꞌuk ka tuda reni salak reu.
HEB 12:16 Besa-besa ma manea fo boso hambu ketuk hohongge-lelena, ma boso leo-laꞌo ta tao matak neu Manetualain, sama leo Esau. Esau naa, baꞌi Isak ana ulun. Faik esa, Esau fali no poꞌo ndoes. Ana noke nanaꞌak pinggak esa numa fadin Yakob mai, ma bae nenik ndia haak ana uluk.
HEB 12:17 Tehuu ta dook ka boe ma ita bubuluk Esau fale dalen. Huu neu papa Isak nae noke-hule Manetualain fee babaꞌe-babatik ana uluk soa-neun, Isak ta bisa noke ena, nahuu Esau fee heni ndia haak naa no hie-hie ena. Huu naa de leo mae ana buꞌi nakarereu oo, ana ta bisa hambu falik hata fo fai bakahulun ana nggari henik naa boe.
HEB 12:18 Talo ia, toranoo nggara ein! Ita bisa teni Manetualain matan teu ena, tungga dala beuk fo Ana nasosoi nalan fee ita ena. Tehuu lele uluk ita bei-baꞌin nara bei ta bisa talo naa. Neu faik fo Manetualain ndara fangga hehelu-bartaak no sara, ara deka ro letek esa, nade Sinai. Numa letek naa lain, hambu aꞌi mana mbilak. Hambu kutus boe. Ma letek naa oo makiu-makahatuk tatana nalan boe, losa tao rala sara ramataꞌu ralan seli.
HEB 12:19 Ara oo ramanene toꞌik nalii boe, basa de Manetualain haran ta neni babanggak, kalua numa letek naa mai. Ara ramanene Manetualain kokolan, boe ma ara tamba ramataꞌu, losa roke baꞌi Musa rae, “Awii! Ai ta bisa makatataka mamanene harak ia bali!”
HEB 12:20 Ara ta bisa rakatataka, nahuu Manetualain perendan naa, beran seli. Huu Ana nafada nae, “Ta bole hambu esa heta ein neu letek ia! Leo mae hatahori do, banda! Te see heta ein neu letek ia, muste hambu pepesik nenik batu losa maten.”
HEB 12:21 Hata fo ara mete-ritak numa letek naa, memak tao nala aok kara mumuru. Losa baꞌi Musa oo dere bebe-bebe boe.
HEB 12:22 Tehuu hatematak ia, dalak neni Manetualain neu, neni soik ena, ma ita bisa kokolak tasasare aok toon. Hatematak ia, ita mai nai letek esa, nade Sion. Ma nai naa hambu kota Yerusalem. Kota Yerusalem ia, ta nai dae-bafok, tehuu kota Yerusalem beuk nai nusa tetuk do inggu temak, ndia Manetualain mamana leleon. Nai naa, hambu Manetualain atan nara noꞌun seli, losa rifu-rifuk, mana tao feta rame-rame.
HEB 12:23 Kota naa oo dadi neu mamana nekebubuak soa-neu basa hatahorir mana ramahere Karistus boe. Manetualain tao nala susurak fo surak esa-esak naden nai nusa tetuk do inggu temak. Manetualain oo nai naa boe, fo neu ko Ana parisa ma timba-tai basa hatahorir leleo-lalaꞌon. Ma nai naa oo hambu basa hatahorir fo lele uluk Manetualain simbok kasa no malole rakabua boe, nahuu ramahere neu Ndia. Nai naa, basa sara dadi lolo-laok.
HEB 12:24 Ma Yesus oo nai naa boe, fo mana dadi lelete soa-neu Manetualain no hatahori dae-bafok. Yesus mate titi heni daan, mita fo Manetualain bisa ndara fangga hehelu-bartaa beuk no ita. Huu naa de Yesus daan naa, tao nakasufu Manetualain dalen. Tehuu ia laen numa Habel daan mai, nai Tutui Makasososak naa. Huu neu Kaen nakanisa Habel, Habel daan mana titik naa, tao natobi Manetualain dalen, losa Ana fee huku-dokik neu Kaen.
HEB 12:25 Pasa ndiꞌi doom mara no malole, nenene hata fo Manetualain nae kokolak no ei. Boso tao sama leo ita bei-baꞌin nara, fo timba heni baꞌi Musa kokolan, neu lelek ana dadi neu Manetualain mana toꞌu dedeꞌan, nai dae-bafok ia. De Manetualain fee hukun neu sara. Hata-bali neu ita! Mete ma ita ta nau nenene Ndia kokolan numa nusa tetuk do inggu temak mai, neu ko Ana fee hukun beran lenak neu ita!
HEB 12:26 Neu ita bei-baꞌin nara rambariik numa letek Sinai, Manetualain haran ta neni babanggak naa, tao nala dae nanggenggo. Hatematak ia Ana helu-bartaa nae, “Neu ko Au tao dae nanggenggo laꞌe esa bali, tehuu ta kada dae mesa kana nanggenggo, huu lalai oo nanggenggo tungga boe.”
HEB 12:27 Neu Manetualain kokolak nae, Ana nae tao basa-basan nanggenggo “laꞌe esa bali”, sosoa-ndandaan nae, Manetualain nae fafae-nggonggongga basa hata fo Ana nakadadadik nala sara marai lalai no dae-inak, losa bee ta bisa rakatataka, na, mopo heni sara. Tehuu basa hata fo bisa nakatataka nala, neu ko mahanik seku neu.
HEB 12:28 Manetualain toꞌu parenda-koasa nai nusa tetuk do inggu temak. Naa, ta bisa nakalulutu. Kada lino-lendek! Huu Ana nau simbok ei maso dadi miu Ndia hatahorin nai naa, de mai fo ita toke makasi neun, takaluku-takatele neun, ma takadedemak kana, huu Ndia ta neni babanggak!
HEB 12:29 Tehuu ita oo muste besa-besa boe, nahuu Manetualain nasa-odedein, sama leo aꞌi mana hotu basa hata lalaꞌen losa basan.
HEB 13:1 Toranoo susue nggara ein! Hambu dedeꞌak hida fo au ae fee nesenedak neu ei. Boso lilii-ndondou masue-lai makandoo neu ei toranoo kamaherem mara.
HEB 13:2 Boso lilii-ndondou buka dalem mara fo simbok hatahori bee fo ei ta malelan nai ei umam. Huu hambu toranook ketuk simbo rita hatahori leo naak, naa te hatahorir raa, Manetualain atan nara ruma nusa tetuk do inggu temak mai.
HEB 13:3 Boso lilii-ndondou tao matak neu hatahorir marai bui, te humu rala sara, nahuu ara ramahere neu Karistus. Huu naa de ei muste tulu-fali sara, nok bali ei ndia neni humuk. Ma boso lilii-ndondou tulu-fali hatahori neni tuni-ndenik. Faduli sara no malole, nok bali ei ndia hambu doidosok.
HEB 13:4 Sasaok naa, lolo-laok. Tehuu boso losak sasaok lolo-laok naa, dadi manggenggeok. Huu neu ko Manetualain fee hukun neu basa hatahorir mana hohongge ro hatahori fo ta sira sao toun do sira sao inan.
HEB 13:5 Boso dale hedi doik. Tehuu ei muste leo-laꞌo no mameda dai ena, no hata fo ei enam. Huu Manetualain kokolak ena nae, “Au ta lilii ei. Au ta laꞌo ela ei.”
HEB 13:6 De matetea ei dalem, sama leo hatahorir surak rita rae, “Au Lamatuang nau tulu-fali au, huu naa de au ta amataꞌu. Ta hambu hatahori esa boe na, fo bisa tao babati neu au.”
HEB 13:7 Boso lilii-ndondou ei malanggam mara, mana fee nenorik rita laꞌe-neu Manetualain Dedeꞌa-kokolan neu ei. Duduꞌa matalolole sira eno-dala masodan, ma suri-memete sira nemeheheren. Te hata fo ramaherek naa, ndia:
HEB 13:8 Yesus Karistus naa, ta nasafali nita. Numa makasososan mai, losa hatematak ia, ma losa doon naa neu. Ndia sama a mesan.
HEB 13:9 Huu naa de ei boso tungga doꞌo-doꞌo mia nenorik mana salak leleꞌa-nonoren. Manetualain natetea ei dalem, nahuu Ana natudu dale susuen neu ei ena. Ta huu ei tungga hohoro-lalanek laꞌe-neu nanaꞌa-nininuk. Huu hohoro-lalanek leo naak kara, ta raena sosoak.
HEB 13:10 Lele uluk numa Manetualain Laa Huhule-haradoin bebelan, hambu mei tunu-hotuk esa, soa-neu banda tunu-hotuk kara. Malangga anggama mana malalau nai naa, naena haak fo naꞌa mbaa sisan nara numa mei naa mai. Tehuu hatematak ia ita taena mei laen. Ma malangga anggama mata-ao raak, ta naena haak fo naꞌa nai naa.
HEB 13:11 Fai bakahulun tungga teuk, malangga anggama demak mateꞌen, neni banda tunu-hotuk daan fo neu taon nai Manetualain Kama Malalaon Mateꞌen. No dalak naa, Manetualain lilii heni sira sala-singgon nara. Basa de ara reni banda naa, fo reu hotun nai nggorok dea.
HEB 13:12 Leo naak oo no Yesus boe. Ana oo dadi tunu-hotuk boe, fo Manetualain koka heni hatahori dae-bafok sala-singgon nara. Ma neu Ana doidoso naa, ara oo leꞌa roon, de reu rakanisan numa kota Yerusalem dean boe.
HEB 13:13 Huu naa de mai ita teni Yesus teu, fo tamahere takandoo neun. Leo mae hatahorir rakadadaek ita oo, tehuu ita simbo a mesan, sama leo Ndia boe.
HEB 13:14 Huu ita kada leo taak nai dae-bafok ia. Tehuu ita tamahena fo leo nai kota beuk esa, nai nusa tetuk do inggu temak losa doon naa neu.
HEB 13:15 Huu Yesus dadi neu tunu-hotuk soa-neu ita ena, de ita hae teni banda tunu-hotuk soa-neun bali. Tehuu hambu fefeek laen fo ita muste tenin takandoo soa-neu Manetualain, ndia fefeek kokoa-kikiok mana nakadedemak Ndia naden.
HEB 13:16 Ma boso lilii-ndondou tao hata neulauk soa-neu hatahori laen. Mete ma ara toꞌa hata, na, tulu-fali neu sara. Huu basa naar oo dadi sama leo fefeek mana tao namahoko Manetualain dalen boe.
HEB 13:17 Ei muste mamanene neu basa hatahorir mana koladu ei. Huu ara ranea ei samanem hatu-leledon. Neu ko ara muste raselu-rataa sira ue-osan nara rai Manetualain matan. Dadi nenene matalolole neu sara, mita fo ara bisa rataa no dale nemehokok. Boso losak ei laꞌo ela Yesus Karistus eno-dala masodan, boe ma ara rataa no dale makalulutuk. No dalak naa, ei ta maua ena.
HEB 13:18 Tulun hule-haradoi makandoo soa-neu ai. Huu memak ai dalen nara ndoos, ma ai nau tao hata neulauk makandoo.
HEB 13:19 Lena-lenak bali, tulun hule-haradoi fo au bisa fali uni ei neti no lai-laik.
HEB 13:20 Manetualain naa, ndia nalende ita dalen. Au oke-hule Ana tulu-fali ei, mita fo bisa tao tungga basa Ndia hihii-nanaun lalaꞌen. Au oo oke-hule fo Ana tulu-fali ita basa ngga boe, fo dadi teu hatahori mana tao namahoko Ndia dalen. Huu Manetualain pake Yesus Karistus daan mana titik fo ndara fangga hehelu-bartaa beuk no ita. Hehelu-bartaak naa, laꞌok nakandoo seku neu. Boe ma Manetualain tao nasoda falik ita Lamatuan Yesus Karistus naa. Hatematak ia, Yesus nakaboi ita, nok bali mana lolo ta neni babanggak. Huu naa de ita takadedemak naden, ma koa-kio takandoo neun! Tebe, naa.
HEB 13:22 Toranoo susue nggara ein! Au oke fo ei simbok no malole, au nenori-nefadang ia no dale loak. Huu basa hata fo au surak nai susurak ia, kada kekeꞌuk ka.
HEB 13:23 Hambu harak, fo au nau ei basa ngga bubuluk. Ndia: ita toranoon Timotius kalua numa bui mai ena. Mete ma ana mai no lai-laik neni au mai, dei fo ai dua ngga meni ei neti.
HEB 13:24 Au haitua hara masodang neu ei malanggam mara, ma hara masodang soa-neu ei basa ngga mana mamahere Yesus Karistus. Toranook kara maruma profensi Italia oo haitua hara masodak boe.
HEB 13:25 Au oke-hule fo Manetualain natudu Ndia dale susuen neu ei basa ngga. Talo kada naa!
JAM 1:1 Hara masodak numa au mai, Yakobis. Au ia, Manetualain no Lamatuak Yesus Karistus hatahori neondan. Au surak susurak ia fee ei hatahori Yahudi mana tungga Lamatuak Yesus ena, fo mana sembo nusak nai bee a mesan.
JAM 1:2 Toranoo nggara ein! Au nau afada talo ia: mete ma ei hambu mala susa-sonak mata-matak, na, dalem mara boso monda-maꞌa. Kada simbok no dale nemehokok, te neu ko buna-boan malole.
JAM 1:3 Ita bubuluk tae, mete ma ei makatataka nai susa-sonak talo naa, losa makamboꞌik numa soba-douk mai ena, ma ei bei mamahere makandoo neu Lamatuak, na, naa tao nala ei tamba lino-lendek neu faik fo hambu soba-douk laen.
JAM 1:4 Ei hae masadea ela susa-sonak. Tehuu elan fo ei bisa manori makatataka susa-sonak losa dadi matetu-mandaik. No dalak naa, ei nemeheherem dadi tetu-temak, losa ta toꞌa kuran hata esa boe na.
JAM 1:5 Mete ma hambu ketuk numa ei mai, mameda mae ta hambu dala sasaik numa susa-sonak mai, na, ei bisa matane neu Manetualain fo mana bubuluk basa-basan. Ana ndia bisa natudu dala sasaik soa-neu ei. Ana soi dalak no nemehokok, ma Ana ta namanasa ei neu faik fo ei moke-hule neun.
JAM 1:6 Tehuu neu faik fo ei moke-hule neun, boso moke no dale mapanggek. Ei muste mamahere tebe-tebe mae, Ana bisa fee hata fo ei mokek. Mete ma hatahori mana noke no dale mapanggek, ana sama leo rii fo anin fuu nakamiminak kana konda-hene ta no bolo-dalan.
JAM 1:7 Hatahori bee fo dalen babati talo naa, ana ta natahuu no basa dedeꞌak kara. Boso mamahena mae, ana hambu hata-hata numa Manetualain mai.
JAM 1:9 Hatahori hata taak kara fo mana ramahere neu Lamatuak Yesus ena, ara muste tao dalen nara mbena sau-sau, nahuu Manetualain soꞌu nala sara dadi neu Ndia nufanelun.
JAM 1:10 Ma hatahori kamasuꞌik kara fo mana ramahere neu Lamatuak Yesus ena, ara oo muste tao dalen nara mbena sau-sau boe, nahuu Lamatuak nanori sara fo boso koa ao. Hatematak ia ara bubuluk rae, sira hata-heton nara neu ko sambu do lalo heni sara sama leo bungga fuir rabuna lolen seli, tehuu ta dook ka boe ma ledo haan, de male-kale heni sara. Leo naak oo no hatahori kamasuꞌik kara boe. Leo mae ara rasambute ro ue-osan, tehuu sira oo sambu do lalo heni sara boe.
JAM 1:12 Lamatuak fee babaꞌe-babatik neu hatahori fo mana nakatataka soba-douk losa nala loan. Boe ma ana simbo nala babaꞌe masoi-masodan fo Manetualain helu-bartaa fee neu hatahori fo mana sue-lai neun ena. Ana simbo seseba-babaen, sama leo hatahori mana joara simbo beker.
JAM 1:13 Masaneda matalolole! Mete ma ketuk numa ei mai hambu soba-douk ma dalen hii nalan seli nau tao salak, na, boso makasasaꞌek salak mae, “Naa, Manetualain ndia soba au!” Boso leo naak, huu Manetualain ta tao salak. Ma Ana oo ta soba-dou nita hatahori fo tao salak boe.
JAM 1:14 Huu salak memak kalua numa hatahori dale heli-helin mai. Makasososan, ndia dalen hii tao manggarauk, basa de ana duꞌa neu-mai fo tao nanae manggenggeok.
JAM 1:15 Boe ma ana tao tungga ndia nanae manggenggeon naa. Mateꞌen te Manetualain naketu-naladi hukun mates neu hatahori fo mana tao manggarauk.
JAM 1:16 Toranoo susue nggara ein! Boso hambu kedi-irak laꞌe-neu basa iar.
JAM 1:17 Dedeꞌa manggarauk kara ta kalua numa Manetualain mai. Tehuu Ana ndia fee basa babaꞌe-babatik malole ma basa hata fo lolo-laok. Ana ndia nakadadadik ledo, bulan ma nduuk kara. Basa sara lali-lali mamanak rai lalai, ma tao saꞌo-mafon nara rasafali rakandoo. Kada Manetualain mesa kana ndia ta nalela nasafali.
JAM 1:18 Manetualain nanaen soa-neu ita, talo ia: Ana fee Ndia Dedeꞌa-kokolan fo ndoos neu ita. Ana oo pake Ndia Dedeꞌa-kokolan naa, fo tao masoi-masodak neu ita boe. Numa basa hata fo Ana adu nalak nai dae-bafok ia, Ana tengga nala ita ena, dadi teu Ndia mbule ulun.
JAM 1:19 Toranoo susue nggara ein! Masanedak, ee! Lolen talo ia: Boso kokolak sadi ndaa. Malole lenak, pasa ndiꞌi doom mara fo nenene matalolole hatahori laen dedeꞌa-kokolan dei! Ma boso mamanasa lai-laik.
JAM 1:20 Mete ma namanasa, na, hatahori ta bisa tao hata fo neulauk, tungga Manetualain hihii-nanaun.
JAM 1:21 Dadi ei muste hotu-dedede heni basa ei sala-singgom mara lalaꞌen, sama leo hatahori tofa nalalalao osin, boe ma hotu heni dafun nara. Ma ei oo muste simbok no makaloloe aok Manetualain Dedeꞌa-kokolan boe. Dedeꞌa-kokolak kara raa sama leo bini-nggees neni sele-tandek nai ei dalem dale. Mete ma ei tao talo naa, na, neu ko Manetualain nakamboꞌik ei numa sala-singgom mara mai, ma Ana simbok nala ei fo masoda makandoo mian.
JAM 1:22 Mete ma ei bubuluk Manetualain Dedeꞌa-kokolan ena, na, ei muste tao tunggan. Boso kada mamanene a! Mete ma ei kada mamanene a, tehuu ta tao tunggan, na, ei pepeko-leleko masafali ei ao heli-helim.
JAM 1:23 Mete ma hatahori namanene nala Dedeꞌa-kokolak naa ena, tehuu ta tao tunggan, naa nok bali hatahori mana loti matan nai titiro. Bei fo ana laꞌo nasadea ela titiro naa, boe ma ana lilii heni memak ndia heheon.
JAM 1:25 Tehuu ei boso hahae parisa matalolole Manetualain Dedeꞌa-kokolan mana matetu-mandaik, fo bisa nakamboꞌik hatahori numa sala-singgon nara mai. Manetualain neu ko baꞌe fee babaꞌe-babatik nai basa hata fo ei taok, sadi ei nenene ma tao tungga Dedeꞌa-kokolak naa. Boso losak Dedeꞌa-kokolak naa maso ndiꞌi doo kiik, ma kalua nesik ndiꞌi doo konak!
JAM 1:26 Mete ma hatahori tao aon leo hatahori mana matu-matuk, tehuu ana ta nanea nala bafa-maan, hatahori naa kedi-ira nasafali ao heli-helin. Ndia anggaman hie-hie a mesan.
JAM 1:27 Anggama fo malalaok naa, ndia hatahori nakaluku-nakatele neu Amak Manetualain tungga ndoon no dale lolo-laok, losa ta hambu manggenggeon faa boe na. Naa ndia tao namahoko Amak Manetualain dalen. Anggama fo ndoos talo naa, tao hatahori hii doi-sou ina falur ma ana maak kara. Hatahori fo anggaman talo naa, ta mboꞌi hatahori manai dae-bafok ia, leꞌa-nore nala sara no dedeꞌa manggarauk.
JAM 2:1 Toranoo nggara ein! Talo bee de ei bisa mae ei mamahere neu Yesus Karistus, ita Lamatuan fo ta neni babanggak, mete ma ei soa memete matak? Boso talo naa!
JAM 2:2 Taon neu, hambu hatahori dua maso reni ei uma huhule-haradoim dale reu. Esa pake bua-loꞌa manggadilak, ma ndeli lilo mbilas sofe liman. Ma laen bali pake badu manggenggeok.
JAM 2:3 Basa de ei mamue-anggik huu kada simbok mala hatahori fo mana pake bua-loꞌa manggadilak naa, fo feen mamanak neulaun seli nesik mata. Tehuu mana pake badu manggenggeok naa, ei madenun mae, “Mambariik muu dea naa! Mete ma taa, na, manggatuuk muu daer!”
JAM 2:4 No ei kada memete matak talo naa, ei sama leo mana maketu-maladi dedeꞌak fo mbeu seserik. Hambu duduꞌa manggarauk mana nauli ei talo naa!
JAM 2:5 Toranoo susue nggara ein! Manetualain tengga nala hatahori hata taak nai dae-bafok ia ena, mita fo ara ramahere tebe-tebe neu Ndia, sama leo ara ramasuꞌi nai sira dalen dale. Ma Ana oo tengga nala sara boe, fo ara oo hambu babaꞌek nai Manetualain parenda-koasan fo Ana helu-bartaa elan ena, fo feen neu hatahori fo mana sue-lai neun boe.
JAM 2:6 Tehuu no kada ei memete matak talo naa, ei makadadaek hatahori hata taak kara. Naa te ara ta tao manggarauk hata esa boe na neu ei. Ei lilii hatahori bee momolo-tatabu ei, do? Ta hatahori hata taak kara. Te hatahori kamasuꞌik kara raa, ndia momolo-tatabu ei. Sira ndia sangga nemuek, fo hela rorosok ei meni mamana neketu-neladi dedeꞌak miu. Sira hambu rala makeen, de ei hambu kada seen.
JAM 2:7 Eir ia, Lamatuak Yesus hatahorin nara. Tehuu hatahori kamasuꞌik kara, ara kada kokolak rakalulutu Lamatuak Yesus nade malolen! Tao hata de ei nau sorodododo mbali sara?
JAM 2:8 Malole lenak, tao tungga Lamatuak hohoro-lalanen esa fo neulaun lenak, nae: “O muste sue hatahori laen nara, sama leo o sue o ao heli-helim.” Hohoro-lalanek naa neni surak nai Susura Malalaok dale.
JAM 2:9 Tehuu mete ma ei kada memete matak, ma haꞌi dalek mbali kada hatahori kamasuꞌik, na, ei tao sala ma malena-langga Lamatuak hohoro-lalanen ena.
JAM 2:10 Hatahori fo mana tao tungga Manetualain Hohoro-lalanen no tetuk, tehuu ana lena-langga kada hohoro-lalanek esak ka, na, naa sama leo ana lena-langga basa Hohoro-lalanek kara lalaꞌen ena.
JAM 2:11 Lamatuak fee hohoro-lalanek nae, “Boso hohongge-lelena.” Ana oo fee hohoro-lalanek laen boe nae, “Boso makanisa hatahori.” De mete ma ei ta makaminak mia inak do touk, te makanisa hatahori, na, naa sama leo ei lena-langga basa Manetualain Hohoro-lalanen lalaꞌen ena.
JAM 2:12 De mete ma ei sangga kokolak, do sangga tao matak esa, muste masaneda talo ia: Neu ko Manetualain ndia naketu, mete ma ita tao tungga Hohoro-lalanen fo sue-lai hatahori, do taa. Te hohoro-lalanek naa bisa nakamboꞌik ita numa Lamatuak huku-dokin mai.
JAM 2:13 Lamatuak ta fee dale susuen neu hatahori bee fo ta nameda dale kasian neu hatahori laen nara. Tehuu mete ma ei maena dale kasian neu hatahori laen, neu ko Lamatuak oo naena dale kasian neu ei boe. De hae bii-mamataꞌu simbo mala Lamatuak huku-dokin, nahuu Ana reke memak basa naar ena.
JAM 2:14 Toranoo nggara ein! Mete ma hambu hatahori nae, ndia namahere neu Lamatuak, tehuu ana ta tao hata-hata fo natudu ndia nemeheheren, naa ta naena sosoak hata-hata. Nemeheherek matak leo naak ta bisa tao nasoi-nasoda sana.
JAM 2:15 Taon neu hambu kaꞌa toꞌuk do kaꞌa inak mana toꞌak tebe-tebe, nok bali ta naena bualoꞌa-papakek, do ta hambu nanaꞌak tungga-tungga faik.
JAM 2:16 Mete ma kada ei kokolak mae, “Laꞌo matalolole, ee! Naa fo Lamatuak fee babaꞌe-babatik neu o! Taꞌim boso natafuu, ee! Boso ndoe mate, ee!” Sosoan hata kokolak talo naa, mete ma ei ta tao hata-hata neni nitak fo doi-sou neu sara?
JAM 2:17 Dadi ta dai no kada o mae, o mamahere a, hetu?! No kada nemehere a mesan, tehuu ta tao tungga nemeheherek naa, naa naden, ta ‘nemeheherek’ ena bali. Huu naa, sama leo nemeheherek fo maten ena, fo ta naena sosoak hata-hata.
JAM 2:18 Hambu hatahori bisa tao dedeꞌak nae, “Hatahori bisa kada namahere neu Manetualain, ma ta tao hata fo neulauk. Hatahori laen nara kada bisa tao hata fo neulauk ma ta rakaseseik Manetualain naden.” Tehuu ndia dedeꞌan talo ia: o tatao-nonoꞌi neulaum ndia dadi bukti numa o nemeheherem naa mai. Tehuu mete ma o ta tao dedeꞌa neulauk, au ta bisa mete-ita bukti numa o nemeherem mai. Au bisa atudu au nemehehereng no dalak au tao dedeꞌa neulauk kara.
JAM 2:19 O tungga nenorik mana nae, “Manetualain naa, kada Kisek. Ta hambu laen bali.” Malole boe! Tehuu nitur lolen lena heni o, nahuu ara oo ramahere talo naa boe, losa ara ramataꞌu ma dere faku-faku. Dadi boso duꞌa mae, “No malela kada pake utek, naa dai ena.” Taa! Nggoa bebek, ee! Manggaledok ena nae, nemeheherek fo ta naena buna-boak hata-hata, ana oo ta naena sosoak hata-hata boe.
JAM 2:21 Haꞌi netuduk numa ita baꞌi Abraham mai. Fai maneuk kara, ana tao tungga hata fo Manetualain parenda neun, ma ana neni anan Isak fo taon neu mei tunu-hotuk lain. Huu naa de Manetualain nae, “Abraham tao ndaan ena.”
JAM 2:22 Abraham namahere neu Manetualain, losa ana simbok de tao tungga Manetualain parendan naa. Naa dadi bukti nae, Abraham namahere neu Manetualain no dale katematuan.
JAM 2:23 De basa iar dadi sama leo neni surak nai Susura Malalaok dale nae, “Abraham namahere neu Manetualain, de Manetualain henggenee nalan dadi neu hatahori dale ndoos.” Ma sama leo neni surak nae, “Abraham naa, Manetualain nonoon.”
JAM 2:24 Manggaledok ena, hetu? Ita bubuluk tae, Manetualain simbok hatahori mete ma ndia nemeheheren neu Manetualain ndia tao nalan soa tao hata fo neulauk kara boe. Kada nemeheherek a mesan, ta dai.
JAM 2:25 Haꞌi netuduk laen numa ina Rahab mai bali. Ndia ina petak numa lele uluk mai. Neu hatahori Yerikor sangga fo rae rakanisa hatahori Israꞌel mana mamaꞌun nara, Rahab neu nafuni sara. Ma ana nadenu sara ralai kalua tungga dalak laen, fo hatahorir boso humu rala sara. Basa de Manetualain henggenee nalan dadi neu ina dale ndoos, nahuu tatao-nonoꞌi neulaun naa.
JAM 2:26 Mete ma hatahori kokolak nae, ana namahere neu Manetualain, tehuu ta tao hata fo neulauk, ana kada kokola bafa rouk naa. Nemeheherek leo naak, ta naena buna-boak, sama leo ao-inak ta naena ani hahaek ena, ndia mates. Naa, ta nemeheherek fo masodak.
JAM 3:1 Toranoo nggara ein! Hambu hatahori noꞌuk ka sangga ranori hatahori kamaherek kara. Naa, malole a mesan! Tehuu masaneda! Neu ko Manetualain parisa no lutu-lelon hatahori mana manori hatahori kamaherek kara. Dadi ta bole sadi ndaa hatahori fee nenorik.
JAM 3:2 Ita basa ngga kokolak sala mata-matak. Tehuu hatahori bee fo bisa rakatataka rala bafa-maan, ta tui leli-belak kana, de ana bisa koladu ndia leleo-lalaꞌo katematuan.
JAM 3:3 Haꞌi netuduk numa ndara mai. Ita bisa koladu ndara moꞌok fo tungga ita hihiin, no kada leꞌa tali rapan a mesan.
JAM 3:4 Haꞌi netuduk laen bali numa ofak mai. Ani berak fuu nakamiminak ofa moꞌok tungga ndia hihiin. Tehuu uli kadiꞌik ka te mana toꞌu uli bisa nakalalaꞌok ofak tungga ndia hihiin.
JAM 3:5 Leo naak oo no ita bafa-maan boe. Bafa-maak naa, kadiꞌik. Tehuu ue-tataon, moꞌon sudi selik kana! Ita bafa-maan naa sama leo aꞌi bunan kadiꞌik fo bisa naꞌa heni lasi katemak esa.
JAM 3:6 Bafa-maak naa oo sama leo aꞌi mbilak boe. Ita bisa pake ita bafa-maan fo takalulutu dedeꞌak noꞌuk ka. Ita bafa-maan bisa nakalulutu ita masoda katematuan. Dedeꞌa manggarauk noꞌuk ka nai dae-bafok ia, kalua numa hatahori bafa-maan mai. Ma nitu malanggan oo pake hatahori bafa-maan fo nakalalaꞌok ndia ue-tataon boe.
JAM 3:7 Hatahorir rakalililik rita banda fui mata-matak kara ena, banda manodo-manamak, mbuik, ma iꞌak nai tasi dale.
JAM 3:8 Tehuu bei ta hambu hatahori esa boe na fo nakalililik nita bafa-maan. Bafa-maak naa, hata manggarauk esa fo susa koladu talan. Ana sama leo raso fo sususuk ndule basa hatahorir ao-inan katematuan, losa nakamaten.
JAM 3:9 No kada bafa-maak esa, hatahori koa-kio ma oꞌole-aꞌali. Naa, ta nandaa! Ita pake bafa-maak fo koa-kio neu Amak Manetualain. No bafa-maak naa oo, ita oꞌole-aꞌali hatahori, fo Lamatuak adun tungga Ndia mata-aon ena. Talo bee de bisa dadi talo naa?
JAM 3:11 Netuduk leo, ta hambu oe mamis ma oe masik bubu rasapupura kalua sama-sama numa oe matak esa mai.
JAM 3:12 Netuduk laen bali: ta hambu ndaꞌedoo naboa titimu dafa. Ta hambu mbelak nambule anggor, hetu? Huu ai huuk naboa tungga ndia mata-aon. Sama leo ita ta bisa ndui tala oe mamis numa lifu oe masik mai.
JAM 3:13 Hatahori kaduduꞌa neulauk ma mana malela dedeꞌak kara, hae nakadedemak aon, huu ana bubuluk ndia malelan naa numa Manetualain mai. Mita fo ana natudu malelan naa, no dalak leo-laꞌo tungga ndoon.
JAM 3:14 Boso mabafa loa mae, o hatahori maduduꞌa neulauk, mete ma o dalem mbiri, do, o soa ruꞌi makatutudak hatahori laen. Naa sama leo o naa, masapepeko. Huu leleo-lalaꞌok talo naa, naa naden ta ‘duduꞌa neulauk’ ena bali. Hihiru-heheok nok bali dale mana mbirik do, soa maruꞌik, na, ta konda numa Manetualain mai. Naa, dae-bafok hihiru-heheon nara. Naa, nandaa soa-neu hatahori ta mana fee sira masodan neu Manetualain. Hihiru-heheok kara raa tungga nitur dalan.
JAM 3:16 Mete ma hambu dale mana mbirik ma soa maruꞌik, na, neu ko hambu nemue-anggik, ma hatahori tao manggarauk mata-matak.
JAM 3:17 Tehuu duduꞌa neulauk mana konda numa Manetualain mai, talo ia: makasososan, tao nala ita leo-laꞌo no lolo-laok. Basa de ana tao nala ita ta hii netofak, hii nekeloloe aok, soa dale loak, ma matu-matuk. Nenenin oo tao nala ita dalen malole, tulu-fali hatahorir, ita ta mbeu seserik, ma ta dea-matak to hatahori laen nara boe.
JAM 3:18 Ma hatahori fo mana natudu dala mole-damek neu ko hambu buna-boa neulauk. Naa, sama leo hatahori sele-tande bini-nggees, fo mateꞌen te ana hambu nala falik buna-boa neulaun.
JAM 4:1 Ei mareresi ma mahuur, esa no esa. Masalan hata? Naa dadi, nahuu nai ei taladam hambu hatahorir mana raote tebe-tebe fo nau sangga nemehokok soa-neu kada sira ao heli-helin.
JAM 4:2 Ei dalem mara rasuu nau hambu hata esa, tehuu limam mara ta rambakai dai sana. Basa de ei dalem mara mbiri, soa mareresi, ma mahuur, losa ei ta bii ma nau makanisa hatahori. No ei ta hule-haradoi ma ta moke numa Manetualain mai, huu naa de ei ta hambu hata fo ei mokek.
JAM 4:3 Tehuu leo mae ei hule-haradoi ketu basa batu air oo, ei ta hambu hata fo ei mokek boe, nahuu ei moke tungga kada ei dale kasuum mesa kana.
JAM 4:4 Eir ia, hatahori dale ta mahanik neu Manetualain! Ei sama leo sao inak ma sao touk, dalen nara ta mahanik esa no esa losa ara hohongge-lelena. Mete ma ei neka-lili mia dae-bafok ia hihii-nanaun, ei tao aom mara ramusuk ro Manetualain. Ndian ena!
JAM 4:5 Huu naa de sama leo neni surak nai Susura Malalaok dale nae, “Manetualain fee Ndia Dula-dalen leo nai ita dalen ena. Ma Dula-dalek naa hihiin fo ita dalen mahanik to kada Ndia seku neu. Huu Ndia naa mana horo-mbalak.”
JAM 4:6 Tamba bali, Manetualain oo bei nau fee tamba Ndia dale susuen boe. Huu naa de Susura Malalaok surak nae: “Manetualain laban hatahorir mana rakadedemak aon nara, tehuu Ana natudu dale susuen, neu hatahorir mana rakaloloek aon nara.”
JAM 4:7 Manetualain naa, ndia ita Lamatuan fo naena haak parenda ita. Dadi loo lima ei aom mara neu Ndia, fo tungga hihii-nanaun. Ei boso tungga nitur malanggan hihiin. Laban maheren! No dalak naa, ana nalai laꞌo ela ei.
JAM 4:8 Maote tebe-tebe fo ei leo-laꞌo dalek esa mia Manetualain. No dalak naa, Ana oo deka-deka no ei boe. Heeh, ei mana leo-laꞌo no manggenggeok kara! Ei muste tao matetu ei dala masodam. Ma ei fo dale mapanggek kara! Ei muste laꞌok ndoos fo tungga Manetualain, boso sio kii-konak kana bali. Doo basa ia, ei leo-laꞌo no kada nemehokok ma setelelek. Dadi hatematak ia ei hahae leo! Ei bubuluk ei dale mapanggem ma ei sala-singgom mara ena. Malole lenak ei fale dalem ma buꞌi makarereu leo.
JAM 4:10 Mete ma ei malela tebe-tebe mae, ei memak ta mandaa nai Manetualain matan, na, neu ko Ana soꞌuk ei dadi neu hatahori mana nandaa nai Ndia matan.
JAM 4:11 Toranoo nggara ein! Boso kokolak makabobook ei esa no esa nade malolem. Mete ma ei kokolak talo naa ena, ma soa ndae salak makandoo neu hatahori, na, ei lena-langga Manetualain hohoro-lalanen ena fo nae, “O muste sue neu o toranoom, sama leo sue o ao heli-helim.” Mete ma ei ta tao tungga hohoro-lalanek naa, na, ei soꞌuk aom mara dema lena heni numa Manetualain Hohoro-lalanen mai ena.
JAM 4:12 Manetualain ndia tao Hohoro-lalanek kara raa. Kada Ndia mesa kana naena haak fo naketu-naladi ita dedeꞌan nara. Ma kada Ndia mesa kana naena haak tao nasoi-nasoda ita, do, fee hukun mates neu ita. Ei ta maena haak fo maketu-maladi hatahorir dedeꞌan, do, kokolak makabobook hatahorir nade malolen.
JAM 4:13 Talo ia! Ei muste bubuluk ena fo boso kokolak mae, “Bekin ia do beꞌe-mai, ai nau meni kota naa miu, ee! Ai mae leo nai naa, doon teuk esa. Ai mae sembo-dangga fo hambu nanalak faa dei!”
JAM 4:14 O bubuluk hata laꞌe-neu mbila-beinesak. Ta hambu hatahori esa boe na bubuluk masodak hihii-nanaun. Hatahori dae-bafok masodan sama leo koꞌa-masuk fo titan kada hatematak, basa boe ma mopon tutik kana.
JAM 4:15 Malole lenak ei kokolak mae, “Mete ma Lamatuak sue, na, mita fo ita tasoda. Mete ma Lamatuak nau, na, mita fo ita bisa tao talo ia.”
JAM 4:16 Mete ma ta kokolak talo naa, ei kada mabafa loa a mesan. Naa sama leo ei lilii heni Lamatuak nai ei nanaem mara. Naa, sala moꞌok ena!
JAM 4:17 Masaneda matalolole! Hatahori bee fo bubuluk hata fo ndaa ena, tehuu ta tao tungga sana, na, naa sama no ana tao salak ena.
JAM 5:1 Hatahori kamasuꞌik kara ein! Pasa ndiꞌi doom mara fo nenene matalolole! Ei makakaik mala hatahori nggadin fo mana naue-osa fafandek lima-ein nara soa-neu ei. Hatematak ia sira mbuse titin buna-boan nara, ara kii-bolu rafada ei pepeko-lelekom. Manetualain Ta Neni Babanggak Mateꞌen pasa ndiꞌi doon neu hatahori mana maue-osar raa susa-sonan nara ena. Ei ue-osam nai dae-bafok ia, ndia kada tao neulauk neu ei ao heli-helim ma leo-laꞌo no kada setelelek. Hatematak ia ei sama leo sapi maao fo nahani a rae halan ena. Ei huku-doki ma makanisa hatahori neulauk kara ena, fo ta bisa rasalaꞌe rala aon nara rai ei matam. Hatahori kamasuꞌik kara ein! Mulai buꞌi makarereu leo! Neu ko susa-sonak mata-matak kara daka rala ei. Ei hata-hetom mara mulai rakalulutu heni sara ena. Ma ei bua-loꞌa neulaum mara, ana dae naꞌa heni sara. Ei lilo mbilam ma lilo fulam mara beli taak kara ena bali. Ma neu ko lilo mbilas ma lilo fulak kara raa raꞌa rasafali ei, sama leo aꞌi naꞌa heni ai tuuk. Talo bee de dae-bafok fai mateꞌen nae mai ena, tehuu ei bei mamue maduduru hata-heto mana sambu do lalok kara bali? Ei hata-hetom mara neu ko dadi bukti rae, ei ta malela hata ndia kabelik nai Manetualain matan!
JAM 5:7 Toranoo nggara ein! Ei muste makatataka mahani Lamatuak mamain. Mete kada hatahori mana ue daek. Ana nakatataka nahani daen buna-boan. Udan makasososak mai, boe ma ana sele-tande. Basa naa, ana nahani udan seluk bali, fo sele-tanden nara mori no neulauk. Mateꞌen te rabuna-boa. Ndaa no fain, hatahori naa neu ketu-koru sesele-tatanden buna-boan nara.
JAM 5:8 Ei oo muste mahani leo naak boe. Tao matetea aom mara, huu ta dook ka te Lamatuak mai ena!
JAM 5:9 Toranoo nggara ein! Boso unggu-remu esa no esa. Mete ma kada unggu-remu makandoo, na, neu ko Manetualain naketu huku-dokik neu o! Mete leo, te Amak Mana Maketu-Maladi Dedeꞌak nai lain, nambariik nai ei idu-matam ena.
JAM 5:10 Toranoo nggara ein! Tungga netuduk numa Manetualain mana toꞌu dedeꞌan nara mai. Leo mae ara hambu susa-sonak mata-matak, tehuu ara rakatataka rakandoo.
JAM 5:11 Mete ma hambu hatahori nakatataka nala susa-sonak, ita takadedemak hatahori naa naden. Haꞌi netuduk leo baꞌi Ayub. Ana hambu susa-sonak mata-matak, tehuu nakatataka nalan. Basa de Manetualain dalen tuda kasian neun, boe ma Ana koladu basa-basan dadi malole soa-neu Ayub. Manetualain tao talo naa, nahuu Ndia dale susuen ma sofek no susue-lalaik.
JAM 5:12 Toranoo nggara ein! Nenenin lenak, ei boso soꞌuk sumba-sook. Mete ma nau mae, “hou”, na, mataa “hou” leo. Mete ma “taa”, na, kada mataa “taa” leo. Talo naa, dai ena! Boso tao lena-lenak ma soꞌuk sumba-sook fo maseseik hatahori mates nai dae-inak naden. Hata-bali sumba-soo “no Manetualain” mana masodak nai lalai naden. Soꞌuk sumba-sook mata-matak, sosoan taa. Mete ma talo naa, na, simbo mala tema-tema o huku-dokim, nahuu o sumba-soom mara.
JAM 5:13 Mete ma ketuk numa ei mai hambu susa-sonak, na, malole lenak ana hule-haradoi. Mete ma ketuk numa ei mai, ramahoko, na, malole lenak ana soda-helo koa-kio neu Lamatuak.
JAM 5:14 Mete ma ketuk numa ei mai, ramahedi, na, malole lenak moke lasi-lasi saranik kara, fo ara rarai mina neu hatahori kamahedik naa, ma hule-haradoi pake Lamatuak naden, mita fo Lamatuak tao nahain.
JAM 5:15 Mete ma ei hule-haradoi fee hatahori hedis, ma mamahere tebe-tebe neu Lamatuak, neu ko Lamatuak tao nahai hatahori naa. Mete ma hatahori naa tao salak ena, neu ko Lamatuak koka heni ndia sala-singgon nara.
JAM 5:16 Mete ma ketuk numa ei mai, tao salak, na, muste manaku ei sala-singgom mara esa no esa. No dalak naa, ei basa ngga, esa hule-haradoi fee esa, mita fo ei dadi malole. Hatahori fo dalen lolo-laok, ndia huhule-haradoin sofek no koasa, de bisa neni nanalak malole.
JAM 5:17 Haꞌi netuduk numa baꞌi Elia mai. Ndia naa oo, hatahori biasa sama leo ita boe. Tehuu neu ana hule-haradoi noke fo udan boso mai bali, boe ma udan hahae neuk ka, ma udan ta konda losa doon teuk telu seserik.
JAM 5:18 Basa de ana hule-haradoi noke fo udan mai, boe ma udan mai neuk ka. Naꞌu ai anar momodo, ma osi-lutur rabuna-boa rasafali.
JAM 5:19 Toranoo nggara ein! Mete ma ketuk numa ei mai, mulai tao salak fo laꞌo ela hata fo ndoos, boe ma hambu esa tulu-falin, fo ara tungga falik Manetualain eno-dala ndoon, naa malole.
JAM 5:20 Masaneda matalolole ia! Mete ma ei tulu-fali hatahori fo mana tao salak, losa ana fali neni Lamatuak neu, ma ana ta tao salak bali, na, ei tao masoi-masoda hatahori naa, mita fo ana leo-laꞌo nakandoo no Manetualain. No dalak naa, Manetualain koka heni sala noꞌun nara ena. Baꞌu kada naa! Numa au mai, Yakobis
1PE 1:1 Susurak ia numa au mai, Petrus, ndia Yesus Karistus nedenun. Au surak susurak ia fee ei basa ngga fo Manetualain here nalak kara dadi neu Ndia hatahorin ena. Ei dadi miu hatahori feꞌek fo mana leo natanggela nai mamanak noꞌuk ka nai profensi Pontus, profensi Galatia, profensi Kapadokia, profensi Asia ma profensi Bitinia. Toranoo susue nggara ein! Numa makasososan mai, Amak Manetualain here memak nala ei ena, fo dadi neu Ndia hatahorin. Ndia Dula-dalen oo tao nala ei dadi malalaok soa-neu Ndia boe, mita fo ei bisa tao tungga basa parendar fo Yesus Karistus feen neu ei. Mete ma ei tao tungga basa Ndia parendan nara raa, naa sama leo Manetualain bibiru Yesus daan neu ei fo dadi tanda nae, ei dadi malalaok soa-neu Ndia ena. Au hule-haradoi fo Manetualain natudu Ndia dale susuen neu ei, mita fo ei bisa leo-laꞌo tamba faik, tamba lino-lendek ma mole-damek.
1PE 1:3 Basa kokoa-kikiok soa-neu Manetualain! Ndia naa, ita Lamatuan Yesus Karistus Aman. Manetualain madale lilok, huu naa de Ana kasian nalan seli neu ita. Yesus Karistus maten, basa de Ana tao nasoda falik kana numa mamaten mai. Dadi mete ma Karistus tao nala ita tasoda, Ana fee ita masoda beuk fo malole fali to Manetualain, sama leo ita neni bonggi seluk. Huu naa de ita tamahere neu Karistus takandoo, de ita tamahena ma tamahere tebe-tebe tae, neu ko Ana nakaboi-nasamao natalolole ita.
1PE 1:4 Nai dae-bafok ia, mete ma amak esa mate, na, ana laꞌo ela ndia hata-heton soa-neu ndia anan nara. Leo naak oo Yesus mbeda ela pusaka soa-neu ita nai lalai ena boe. Pusaka naa ta bisa nakararafu, ta bisa nakalulutu ma ta bisa mopo henin.
1PE 1:5 Ei mamahere mae, Manetualain naena koasa fo tulu-fali nala ei. Ana nakaboi-nasamao ei ma nanea ei fo boso hambu mana nakalulutu ei. Mete ma neu dae-bafok fai mateꞌen, Ana nau natudu dalak talo bee fo Ana tao nasoi-nasoda ei.
1PE 1:6 Huu naa de ei dalem mara ramahoko, leo mae hatematak ia ei mameda berak, nahuu ei muste hambu mala susa-sonak mata-matak.
1PE 1:7 Manetualain fee lelak neu ita mana hambu tala soba-douk fo sangga fora ita nemeheheren neu Ndia. Mete ma ita takamboꞌik numa soba-douk mai, naa natudu nae, ita nemeheheren naa, matea ma tetebes. Ita bisa takasasamak kana no lilo mbilas. Ita muste hotun neu aꞌi, mita fo nggeon kalua henin, dei fo ita hambu lilo mbilas isi-isik. Naa te tungga Manetualain duduꞌan, ita nemeheheren belin lena heni lilo mbilas. Dadi mete ma ita nemeheheren nakamboꞌik numa soba-douk talo naa mai, neu ko neu Yesus Karistus fali mai, Manetualain koa ita, boe ma Ana natudu ita ta hohoꞌan ma fee ita hada-horomatak.
1PE 1:8 Leo mae ei bei ta mete-mita Yesus no ei matam mara, tehuu ei sue-lai neun. Leo mae ei bei ta mete-mitan hatematak ia, tehuu ei mamahere neun. Ei dalem mara oo mbena sau-sau lenak boe, leo mae ta hambu dedeꞌa deꞌek mandaak fo mafada hatahorir laꞌe-neu ei dale nemehokom mara.
1PE 1:9 Manetualain tao nasoi-nasoda ei numa ei sala-singgom mara mai, dadi neu ei seseba-babaem, nahuu ei mamahere neun.
1PE 1:10 Manetualain mana toꞌu dedeꞌa lele ulun nara sangga bubuluk fo nau ralela no neulaun lenak, talo bee fo Manetualain tao nasoi-nasoda hatahorir numa sala-singgon nara mai. Mana toꞌu dedeꞌak kara raa rafada memak laꞌe-neu Manetualain natudu Ndia dale susuen neu ei, nahuu Ana nahani memak kana ena fo tao nasoi-nasoda ei.
1PE 1:11 Karistus Dula-dalen naote nai sira dalen nara fo nafada memak kana nae, neu ko Karistus muste hambu susa-sonak ma Ana muste hambu doidosok talo bee. Basa naar lalaꞌen dadi, dei fo Manetualain nakadedemak kana. Huu naa de mana toꞌu dedeꞌak kara raa nau sangga bubuluk faik bee dedeꞌak kara iar mori-dadi.
1PE 1:12 Boe ma Karistus Dula-dalen naa oo nafada mana toꞌu dedeꞌak kara raa boe nae, ta sira ndia mete-rita, tehuu ei ndia mete-mita dedeꞌak kara iar. Hatematak ia ei oo mamanene laꞌe-neu dedeꞌak kara iar boe, nahuu Manetualain Dula-dale Malalaon numa nusa tetuk do inggu temak mai nadenu hatahori laen, fo neu tui-bengga Lamatuak Hara Lii Malolen neu ei. Naa te Manetualain atan nara ruma nusa tetuk do inggu temak mai oo hii ralan seli mete-rita dedeꞌak kara iar boe.
1PE 1:13 Huu naa de ei muste sadia mahani a fo malela matalolole basa dedeꞌak kara iar. Manea matalolole fo ei duduꞌa no ndoos. Sadia tahani a fo tamahere takandoo neu Yesus Karistus losa Ana fali mai, nahuu neu faik naa, Manetualain nae natudu Ndia dale susuen neu ei.
1PE 1:14 Ei muste nenene neu Manetualain, sama leo kakanak kara nenene neu sira ina-aman. Fai uluk ei bei ta malela Manetualain eno-dala masoda teteben. Tehuu hatematak ia, ei malela ena. De boso leo-laꞌo tungga ei hihii-nanaum fo tao manggarauk bali. Naa, ei leleo-lalaꞌo raam.
1PE 1:15 Huu naa de hatematak ia ei muste leo-laꞌo malalaok. Huu Manetualain naa, malalaok. Ana ndia noke nala ei fo dadi miu Ndia anan. Huu naa de ei muste malalaok nai basa ei leleo-lalaꞌom katematuan.
1PE 1:16 Sama leo neni surak nai Manetualain Susura Malalaon dale nae, “Ei muste malalaok, nahuu Au malalaok.”
1PE 1:17 Ei hii kokolak mia Manetualain sama leo Ndia naa, ei Amam. Ana oo dadi Mana Maketu-maladi Dedeꞌak fo neu ko parisa hatahori esa-esak leleo-lalaꞌon. Tehuu Ndia laen numa mana maketu-maladi dedeꞌak laen nara mai. Huu Ana naketu-naladi hatahorir dedeꞌan nara no matetuk ma ta mbeu serik. Huu naa de ei muste leo-laꞌo no besa-besa. Te ei sama leo hatahori feꞌek mana leo taak a mesan nai dae-bafok ia.
1PE 1:18 Ei bubuluk ena mae, Karistus bae ketu ena fo tefa-soi nala ei numa ei leleo-lalaꞌom fo sosoa-ndandaa taak mai. Leleo-lalaꞌo rupak leo naak naa, ei simbo malan numa ei bei-baꞌim mara mai, nok bali pusaka esa. Tehuu masaneda, te Karistus bae ketu soa-neu ei, ta pake lilo mbilas do lilo fulak fo neu ko mopo heni sara.
1PE 1:19 Tehuu Ana bae nala ei nenik Ndia daa heli-helin. Naa, belin sudi selik kana. Ana mate nok bali ara hala bibi lombo ana maro ta kambiꞌe-toꞌik esa, fo ara halan dadi neu tunu-hotuk.
1PE 1:20 Neu lelek Manetualain bei ta adu dae-bafok ia, Ana bubuluk memak ena basa-basan fo neu ko Karistus taok. Tehuu lele uluk Manetualain bei ta natudu Karistus neu hatahori manai dae-bafok ia. Hatematak ia dei de Ana natudu Karistus fo dadi neu babaꞌe-babatik soa-neu ei.
1PE 1:21 No hata fo Karistus taok, huu naa de ei bisa mamahere neu Manetualain. Ana tao nasoda falik Karistus numa mamaten mai ena ma nakadedemak kana. Manetualain tao talo naa, mita fo ei mamahere neu Ndia ma mamahena fo Ana tao natetu hata fo Ana helu memak kana ena.
1PE 1:22 Ei tao tungga hata fo tetebes. Dadi hatematak ia, ei bisa maue-osa no basa ei bebeꞌi-barakaim soa-neu Lamatuak. Naa, tao nala ei sue-lai tebe-tebe neu ei toranoo kamaherem mara. Ei susue-lalaim naa muste boe natea, nahuu ei dalem mara lolo-laok.
1PE 1:23 Hatematak ia ei hambu masoda beuk ena. Tehuu masoda beuk ia, ei ta hambu sana numa ei ina-amam fo neu ko ara mate nai dae-bafok ia mai, tehuu ei hambun numa ita Aman manai nusa tetuk do inggu temak fo ta mana matek mai. Ei masoda beum naa, ei hambun nesik Manetualain Dedeꞌa-kokolan. Ndia Dedeꞌa-kokolan ia, neni masodak tetebes ma natea nakandoo.
1PE 1:24 Sama leo Manetualain Susura Malalaon surak nae, “Hatahori dae-bafok naa, nok bali naꞌu esa do, bungga esa. Huu sira lolen naa, ta rakatataka rakandoo. Naꞌu, male-kale henin. Bungga bunan oo moꞌu henin boe. Doo-doo te ara mate, boe ma mopo heni sara.
1PE 1:25 Tehuu ita Lamatuan Dedeꞌa-kokolan, naoka nahere nakandoo ma ta mana ketuk.” Lamatuak Dedeꞌa-kokolan naa, ndia Hara Lii Malole fo ai mafada neu ei ena.
1PE 2:1 Dadi ei boso tao manggarauk hata esa boe na. Boso kada puta-paik mia hatahori. Boso dea-matak. Dalem mara boso mbiri. Boso kokolak makabobook hatahori nade malolen. Nggari heni basa naar leo!
1PE 2:2 Kakana mbimbila anak kara dokodoe rae rinu susu numa sira inan mai. Leo naak oo ei dalem mara muste hii ralan seli fo nau bubuluk Manetualain Dedeꞌa-kokolan boe. Naa ndia tao nala ei nemeheherem mara boe ratea tungga-tungga faik. No dalak naa, ei bisa mamoꞌo dadi miu hatahori lasik, fo mana leo-laꞌo tungga Manetualain hihii-nanaun.
1PE 2:3 Ma ei mameda mala ita Manetualain dale susuen ena.
1PE 2:4 Makaesa aom mara mia Karistus. Te Ana sama leo batu esa, tehuu Ndia naena masodak. Tukan nara nggari heni batu naa ena, nahuu ara duꞌa rae, batu naa nanalan taa. Tehuu Manetualain henggenee Ndia belin sudi selik kana, de here nalan ena fo dadi batu netehuuk fo nenenin lenak.
1PE 2:5 Ei oo muste makaesa mia Karistus boe, mita fo Manetualain oo pake ei boe. No dalak naa, ei sama leo batu fo Manetualain here nalan fo nambaririik uma soa-neu Ndia Dula-dalen. Ei oo sama leo batu mana maena masodak, sama leo Karistus boe. Ei sama leo malangga anggamar, mana leo-laꞌo no malalaok soa-neu Manetualain. Naa, sama leo ei meni tunu-hotuk soa-neun. Ei tunu-hotum tao namahoko Manetualain dalen, nahuu Yesus Karistus maten ena soa-neu ei basa ngga.
1PE 2:6 Sama leo neni surak nai Manetualain Susura Malalaon dale nae, “Mete dei! Te Au tao batu makasososan, nai kota Yerusalem ia, fo ara seseik kana rae, ‘kota Sion’. Au ndia here ala batu naa ena. Ndia belin seli soa-neu Au. Dadi hatahori mana ramahere neu Ndia, neu ko ara ta hambu mamaek hata esa boe na.”
1PE 2:7 Yesus naa, sama leo batu naa. De soa-neu hatahori fo mana namahere neun, Yesus belin sudi selik kana. Tehuu soa-neu hatahori fo ta mana namahere neun, Manetualain Susura Malalaon surak nae, “Batu naa, fo tukan nara nggari henin ena, hatematak ia dadi neu batu makasososak ena, fo nenenin lenak.”
1PE 2:8 Neni surak boe nae, “Hambu batu fo tao nala hatahorir rakatunu. Hambu batu fo tao nala sara tuda.” Ara tuda, nahuu ta tao tungga Manetualain Dedeꞌa-kokolan. Huu Manetualain henggenee memak kana ena fo ara tuda talo naa.
1PE 2:9 Tehuu ei ta leo naak. Huu ei dadi miu hatahori fo Manetualain mesa kana here nalan ena. Ei dadi miu Ndia enan. Ei sama leo malangga anggama mana maono-lalau manek. Ei oo sama leo hatahori nusak esa mana leo-laꞌo no malalaok soa-neu Manetualain boe. Ei dadi talo naa, mita fo ei bisa tui-bengga neu basa hatahorir laꞌe-neu Manetualain dale susuen, fo Ana taon soa-neu ei. Huu Ana nadenu ei ena fo laꞌo ela hata fo manggarauk ma leo-laꞌo tao malole. Naa, nok bali ei kalua numa makiuk mai, fo leo-laꞌo nai Ndia manggaledon fo neulaun seli.
1PE 2:10 Fai bakahulun ei dadi sama leo nufaneluk esa ta naena sosoa-ndandaak faa boe na. Tehuu hatematak ia ei maso dadi miu Manetualain nufanelun ena. Fai bakahulun ei ta nau simbok Manetualain dale kasian neu ei. Tehuu hatematak ia ei simbo malan ena.
1PE 2:11 Toranoo susue nggara ein! Eir ia, kada dadi fuik nai dae-bafok ia. Huu ei nok bali hatahori nusa deak mana nggoro naꞌu nai hatahori nusan. Huu naa de au oke taa-taa fo ei boso sama leo hatahori dae-bafok laen nai dae-bafok ia, mana tao manggarauk tungga sira hihii-nanaun nara. Huu nai ei dalem mara hambu netatik esa. Ndia, hihiik fo tao manggarauk natati laban hihiik fo tao malole. Dadi boso makamboꞌik hihiik fo tao manggarauk naa, nasenggi ei. Mete ma talo naa, na, ei makalulutu!
1PE 2:12 Manea matalolole fo ei leo-laꞌo no ndoos nai hatahori fo ta mana nalela Manetualain naa matan. No dalak naa, leo ara nau rakasasaꞌek salak neu ei sadi ndaa, na, ara mete-rita kada ei neulaum a mesan. De mete ma Karistus fali mai, neu ko sira mesa kasa ndia rakadedemak Manetualain, nahuu ei tatao neulaum naa.
1PE 2:13 Ita Lamatuan hihii-nanaun fo ei nenene neu basa hatahorir mana toꞌu koasa. Haꞌi netuduk leo: nenene neu manek, huu ana dadi malangga mandema.
1PE 2:14 Nenene neu nggubenor, huu manek nadenun ena, fo ana naketu-naladi huku-dokik soa-neu hatahori mana tao manggarauk kara ma ana soꞌuk kokoak soa-neu hatahori mana tao ndoos sara.
1PE 2:15 Huu naa de Manetualain nau fo ei tao hata fo ndoos sara, mita fo hatahori nggoa bebek ta mana bubuluk hata-hata, ta naena dalak fo nakasasaꞌek salak neu ei.
1PE 2:16 Leo mae ei dadi hatahori nekemboꞌik mana maena haak fo tao tungga ei hihiim, tehuu boso pake sadi ndaa ei haak naa, fo tao manggarauk. Pake haak naa, fo maue-osa fee Manetualain huu ei dadi miu Ndia pusakan.
1PE 2:17 Ei muste fee hada-horomatak neu basa hatahorir. Ei muste sue-lai basa hatahorir fo mana ramahere neu Karistus. Ei muste leo-laꞌo no mandaak nai Manetualain matan, te neu ko Ana ndia naketu-naladi huku-dokik soa-neu ei. Ma ei muste fee hada-horomatak neu basa hatahorir mana toꞌu parenda.
1PE 2:18 Hatahori neonda nggara ein! Mamanene neu ei malanggam mara, ma fee hada-horomatak neu sara. Boso mamanene neu kada malanggan fo naena dale malole ma neulauk a mesan. Tehuu leo ei malanggam manggaraun seli oo ei muste nenene neun boe.
1PE 2:19 Mete ma ei hambu huku-dokik sadi ndaa numa ei malanggam mai leo mae ei ta tao salak hata-hata, ma mete ma ei makatataka mala nai susa-sonak naa, nahuu ei masaneda mala Manetualain hihii-nanaun soa-neu ei, na, neu ko Manetualain natudu Ndia dale susuen neu ei.
1PE 2:20 Leo ei tao salak, de hambu fefembak, na, nanalan hata, mete ma ei makatataka nai susa-sonak naa? Ta hambu, hetu? Tehuu mete ma ei hambu susa-sonak nahuu ei tao hata fo malole, boe ma ei makatataka, na, Manetualain loti-mete neu ei.
1PE 2:21 Karistus oo hii nalan seli boe fo ei leo-laꞌo tao hata fo ndoos, leo mae ei hambu susa-sonak. Huu Ana oo lemba-nasaa susa-sonak soa-neu ita boe. No dalak naa, Ana dadi netuduk fo ita tungga Ndia, sama leo ita laꞌok tungga Ndia ei tatabun.
1PE 2:22 Sama leo Manetualain Susura Malalaon surak nae, “Ana ta tao nita salak. Ta hambu pepeko-lelekok kalua numa Ndia bafan mai.”
1PE 2:23 Neu ara kokolak rakadadaek kana, Ana ta bala. Neu Ana hambu susa-sonak ma doidosok, Ana ta ndindia nae bala. Tehuu Ana loo lima aon neu Manetualain liman. Huu Ana namahere nae, Manetualain naa, Mana Maketu-maladi Dedeꞌak fo ta mbeu seserik.
1PE 2:24 Karistus naa, ndia lemba-nasaa ita sala-singgon neu faik fo Ana mate numa ai ngganggek lain. Ana tao talo naa, mita fo ita hae leo-laꞌo tao salak bali. De hatematak ia, ita ta leo-laꞌo no tao salak, tehuu ita leo-laꞌo no kada tao hata fo ndoos a mesan. Huu Ana nggati ita ena fo simbo nala ita huku-dokin. Huku-dokik naa, tao nala Ana nakahina losa maten. Huu hinak fo tao nala Ana mate naa, tao nahai ei ena.
1PE 2:25 Ei sama leo bibi lombo fo fai bakahulun sio laꞌo ela dalak ena. Tehuu hatematak ia ei fali meni Lamatuak eno-dala ndoon mai ena. Huu Ana ndia nanea ma nakaboi-nasamao natalolole ei, sama leo mana lolo esa nanea ma nakaboi-nasamao ndia bibi lombon nara.
1PE 3:1 Sao inak kara ein! Bebeik kara au ae, ita muste nenene neu hatahori mana toꞌu koasa. Dadi ei muste nenene neu ei saom. Masaneda te hambu sao touk ketuk fo ta nau tao tungga Manetualain Dedeꞌa-kokolan. Leo mae ara ta nau nenene ei dedeꞌa-kokolam, tehuu neu ko ara nau ramahere Karistus, nahuu ei leleo-lalaꞌom.
1PE 3:2 Huu ara mete-rita basa ei hihiru-heheom ma ei dale lolo-laom natudu hada-horomatak neu Manetualain.
1PE 3:3 Inak manaꞌa hien naa, ta numa hata fo neni nitak numa dea mai. Haꞌi netuduk leo: heti aon tao langga bulu fefeon mata-matak do, ramasosoa lena-lenak pake lilo mbilas ma lilo fulak do, pake bua-loꞌa mabelir ta nandaa no dala-hadak.
1PE 3:4 Tehuu mana tao inak dadi manaꞌa hiek tebe-tebe ndia: sira dalen nara fo ta neni nitak numa dea mai. Haꞌi netuduk leo: dale neulauk ma mana matu-matuk. Manaꞌa hiek matak leo naak naa ta mopo henin, leo mae inak nambalasi ena. Tungga Manetualain timba-tain, manaꞌa hiek matak leo naak naa belin seli.
1PE 3:5 Huu lele uluk ina dale malalaok kara fo mana ramahere Manetualain, manaꞌa hien nara oo leo naak boe. Ara oo nenene neu sira saon boe.
1PE 3:6 Haꞌi netuduk numa bei Sara mai. Ana nenene neu saon Abraham. Ana oo fee lelak saon koladun boe. Ei inak kara oo muste tungga ndia netudun boe, nahuu mete ma ei tao hata fo ndoos, na, ei hae mamataꞌu hata esa boe na.
1PE 3:7 Sao touk kara ein! Leo-laꞌo dalek esa mia ei saom. Timba-tai matalolole hata fo neulauk soa-neun ma tao tunggan. Matudu hada-horomatak soa-neun nai basa dedeꞌak kara, nahuu inak barakain ta sama leo touk barakain. Huu ei sama-sama simbo mala pusaka fo Manetualain nae fee ei. Ndia, ei sama-sama simbo mala masoda beuk fo Manetualain fee ei numa Ndia dale susuen mai. Tehuu ei sao touk kara muste leo-laꞌo dalek esa mia ei saom leo naak, mita fo neu faik fo ei dua ngga soꞌuk dalem fo hule-haradoi moke hata esa numa Manetualain mai, na, Ana nau namanene ei.
1PE 3:8 Toranoo susue nggara ein! Neu mateꞌen te, au ae kokolak dedeꞌak esa. Ei basa ngga oo muste leo-laꞌo dalek esa boe. Mete ma hatahori esa nameda susa do namahoko, na, ei laen nara oo muste mameda leo naak boe. Ei muste sue-lai neu hatahorir fo mana ramahere Karistus, ma matudu dale neulaum mara esa mbali esa. Boso makadedemak aom mara, tehuu ei muste makaloloek aom mara.
1PE 3:9 Boso bala manggarauk no manggarauk. Mete ma hatahori kada raselu kisubalik ei, boso maselu kisubalik hatahori naa bali. Tehuu moke-hule fo Manetualain fee babaꞌe-babatik neun. Manetualain noke nala ei ena dadi miu Ndia hatahorin, mita fo ei bisa simbo mala babaꞌe-babatik numa Ndia mai.
1PE 3:10 Sama leo neni surak nai Manetualain Susura Malalaon nae, “Hatahori mana sangga nasoda no neulauk, ma mana sangga nasoda nala dook ka nai dae-bafok ia, hatahori naa muste nanea ndia bafan fo boso bafa lafok, ma boso kokolak pepeko-lelekok.
1PE 3:11 Ana muste sale dalen do tuke tein, fo boso tao manggarauk bali, tehuu fali fo tao kada ndoos leo. Ana muste nanori fo leo-laꞌo mole-dame no basa hatahorir, boe ma sangga dalak fo malole fali no sara.
1PE 3:12 Huu ita Lamatuan tao matak neu hatahori mana leo-laꞌo no ndoos. Ma Ana oo nau namanene sira hule-haradoin boe. Tehuu ita Lamatuan laban nakandoo neu hatahori mana leo-laꞌo tao manggarauk.”
1PE 3:13 Mete ma ei tao hata fo ndoos no dere-dere hiek, see nau tao manggarauk mbali ei bali? Taa, hetu?
1PE 3:14 Tehuu leo mae ei tao hata fo ndoos ma hambu ketuk tao nakasususak ei, ei hambu nanalak. Mete ma hambu hatahori ta nalela Karistus dadi namataꞌu nahuu hata esa, na, ei boso tungga mamataꞌu talo naa. Ei duduꞌam boso namue-anggik ma dalem mara sona sama leo sara.
1PE 3:15 Tao ei dalem mara kada lino-lendek, nahuu ei soꞌuk mala Karistus nai ei dalem mara ena fo dadi neu ei Lamatuam fo malalaok. Leo hatahorir roke ei fo mafada ei nemeherem, ma tao hata de ei mamahena mae, neu ko Karistus tao basa-basan dadi malole, na, ei muste sadia mahani a fo maselu neu sara.
1PE 3:16 Tehuu ei muste maselu numa ei dale neulaum mai ma matudu hada-horomatak neu sara, mita fo ara bubuluk ei tao hata fo ndoos numa dale lolo-laom mai. Leo mae ei tao hata fo neulauk talo naa, tehuu neu ko hambu ketuk nau kokolak rakatutudak ei, nahuu ei makaesa mia Karistus. Dadi mete ma ei tao hata fo neulauk makandoo, na, sira mana makatitiik ei neu ko ara mae.
1PE 3:17 Mete ma naa tungga Manetualain hihii-nanaun, na, boso lilii-ndondou te malole lenak ei hambu susa-sonak nahuu tao hata fo ndoos; boso huu ei tao salak.
1PE 3:18 Karistus mate laꞌe esak ka, nahuu ita hatahori dae-bafok tao salak. Ndia mana leo-laꞌo ndoos, maten soa-neu ita ena fo mana leo-laꞌo manggenggeok. Ana mate, mita fo ita bisa malole fali to Manetualain. Karistus naa oo hatahori dae-bafok sama leo ita boe. Hatahorir rakanisan, tehuu basa de Manetualain Dula-dalen tao nasoda falik kana numa mamaten mai.
1PE 3:19 Dula-dalek naa oo nuni no Ndia neu nanori hatahori mana matek dula-dalen nara boe, fo neni ronggak nai mamanak esa, nok bali bui.
1PE 3:20 Sira raa, ndia hatahori lele uluk ta mana nau nenene neu Manetualain. Lelek naa, baꞌi Noh tao ofa moꞌok. Manetualain nahani memak kana fo nae nita hatahorir tao tungga Ndia hihii-nanaun, tehuu ara ta nau tao tungga. Huu naa de kada hatahori falu ndia hambu masoi-masodak numa faa moꞌok naa mai.
1PE 3:21 Faa naa dadi neu netuduk esa, sama leo faik fo ei sarani. Sarani naa natudu nae, Manetualain nakamboꞌik ei numa ei sala-singgom mai, nahuu Yesus Karistus nasoda fali numa mamaten mai ena. Neu ara sarani ei naa, ara ta radiu ei fo tao ralalao ei ao-inam mara. Ndondoon ndia, ei ndara fangga hehelu-bartaak mia Manetualain, fo nau tao nalalao ei dalem mara. No dalak naa, ei bisa leo-laꞌo ma tao hata fo ndoos.
1PE 3:22 Hatematak ia Yesus hene fali neni nusa tetuk do inggu temak neu ena. Nai naa, Ana nanggatuuk nai mamana hada-horomatak mateꞌen lain, nai Manetualain boboa konan. De atar marai nusa tetuk do inggu temak, basa koasar ma mana toꞌu koasar muste nenene neu Karistus rakandoo.
1PE 4:1 Karistus naa, hatahori dae-bafok sama leo ita. Ana hambu doidosok noꞌun seli ena, de ei oo muste sadia fo hambu doidosok sama leo Ndia boe. Tehuu masaneda te hatahori mana sadia fo hambu susa-sonak nahuu nakaesa no Karistus, ana naketu ena fo ta nau tao salak bali.
1PE 4:2 Leo mae ana bei leo-laꞌo nai dae-bafok ia, tehuu ana ta leo-laꞌo tao salak bali sama leo hatahori dae-bafok laen nara. Huu ana leo-laꞌo tungga Manetualain hihii-nanaun.
1PE 4:3 Fai bakahulun ei maena faik dai mete ma ei mae tao manggarauk hata a mesan, nok bali hatahori ta mana malela Manetualain. Haꞌi netuduk leo: ara tao sadi ndaa. Ara laꞌok sala ro hatahori ta sira saon. Ara tungga sira hihiin tao manggarauk. Ara rinu mafuk. Ara tao feta setelelek. Ara tao feta sao holu-ndaek sadi ndaa. Ara kada songgo-tanggu fo bisa tao rala ita aon mumuru.
1PE 4:4 Ara kokolak raboboo ei nade malolem, huu ei ta tungga mabali mia sira manggaraun nara fo mana seli susudik, nahuu ara ta ralela ei leleo-lalaꞌom leo beek.
1PE 4:5 Tehuu masaneda te neu ko ara muste rasare Manetualain, fo mana dadi neu Mana Maketu-maladi Dedeꞌak. Ara muste rafadan, tao hata de sira leo-laꞌo manggarauk talo naa. Boso lilii-ndondou, huu basa hatahorir muste rasare reu Ndia, hatahori bei masodak, ma hatahori mates.
1PE 4:6 Tebe! Manetualain nae parisa hatahori mana matek kara, sama leo Ana parisa hatahori dae-bafok laen nara. Huu Ana nae mete-nita sira leleo-lalaꞌon fai uluk. Huu naa de Yesus neu tui-bengga Manetualain Hara Lii Malolen neu sara, mita fo sira oo bisa hambu masodak tetebes, fo tao tungga Manetualain hihii-nanaun boe.
1PE 4:7 Dae-bafok fai mateꞌen deka-deka mai ena. Huu naa de ei muste duduꞌa naruk ma matu-matu fo ei bisa hule-haradoi no malole.
1PE 4:8 Nenenin lenak ndia, ei muste leo-laꞌo masue-laik esa no esa makandoo. Leo mae hatahori laen tao salak makadoto ndoos, tehuu ei bei bisa manonoo mian mete ma ei sue-lai neun.
1PE 4:9 Makambela limam fo simbok mala hatahori numa mamanak laen mai leo taak nai ei umam. Tehuu masaneda fo boso simbok no unggu-remuk.
1PE 4:10 Hatahori esa-esak fo mana simbo babanggi-babaꞌek numa Manetualain mai ena muste pake babanggi-babaꞌek naa, fo naono-lalau ndia toranoo kamaheren nara. Makaboi-masamao ma pake matalolole babanggi-babaꞌek naa, fo neni nanalak soa-neu Manetualain.
1PE 4:11 Haꞌi netuduk leo: mete ma hambu babanggi-babaꞌek manori hatahorir, na, masaneda te ei muste manori hatahorir pake Manetualain Dedeꞌa-kokola heli-helin. Mete ma hambu babanggi-babaꞌek maono-lalau hatahorir, na, maono-lalau pake bebeꞌi-barakaik fo Manetualain feek. No dalak naa, basa hatahorir mete-rita eir ia, Yesus Karistus hatahorin. Huu naa de ara rakadedemak Manetualain. Ndia naa, ta neni babanggak! Ma Ana naena koasa fo toꞌu parenda ta mana ketuk! Tebe leo naak!
1PE 4:12 Toranoo susue nggara ein! Boso heran mete ma hambu soba-douk beran seli. Naa ndia fora ei nemeheherem mara. Boso duduꞌa mae, kada o mesa ngga ndia hambu soba-douk talo naa.
1PE 4:13 Tehuu ei dalem bisa mbena sau-sau, huu ei hambu mala doidosok sama leo Karistus oo hambu doidosok boe. No dalak naa, neu ko ei dalem mara mbena sau-sau tebe-tebe, neu faik fo basa hatahorir mete-rita Karistus ta neni babanggan.
1PE 4:14 Neu hatahorir kokolak rakadadaek ei nahuu ei makaesa mia Karistus, ei maua nahuu Manetualain Dula-dalen ta neni babanggan nai ei dale.
1PE 4:15 Tehuu mete ma ei muste hambu doidosok, na, boso huu ei dadi miu mana makanisa hatahori do, naꞌok do, hatahori manggarauk do, mana sorodododo rala hatahori laen ena uma dalen.
1PE 4:16 Tehuu mete ma hatahori hambu nala susa-sonak, nahuu dadi neu Karistus hatahorin, ana hae mae faa boe na. Malole lenak, ara soꞌuk kokoa-kikiok neu Manetualain, nahuu ara dadi reu hatahori Karisten.
1PE 4:17 Fain losa ena fo hatahori reu rasare mbali Manetualain. Ana mulai parisa numa Ndia hatahori heli-helin nara leleo-lalaꞌon mai. Dadi duduꞌa leo! Mete ma Ana mulai ena no ita hatahori Karisten, na, talo bee soa-neu hatahori fo ta mana nau simbok Ndia Hara Lii Malolen? Neu ko sira huku-dokin beran lena, ee!
1PE 4:18 Sama leo neni surak nai Manetualain Susura Malalaon nae, “Mete ma hatahori fo mana leo-laꞌo no ndoos a mesan, ela baꞌuk ka ta hambu masoi-masodak, na, talo bee bali neu hatahori fo ta mana tao matak mbali Manetualain? Ma talo bee boe no hatahori fo mana leo-laꞌo tao salak?”
1PE 4:19 Dadi mete ma Manetualain nakamboꞌik Ndia hatahorin nara hambu rala susa-sonak tungga Manetualain hihii-nanaun, na, ara bisa ramahere rae, neu ko Ana oo nanea sara boe. Huu Ana ndia adu sara ma Ana oo tao tungga hata fo Ndia kokolak ena boe. De ara bei bisa tao hata fo ndoos rakandoo, nahuu Ana nanea sara talo naa.
1PE 5:1 Au mesa ngga dadi uu malanggan esa. Fai bakahulun neu Karistus lemba-nasaa Ndia doidoson, au mete-ita no au mata heli-heling. Neu faik fo basa hatahorir mete-rita Manetualain ta neni babanggan, au oo ae tungga mete-itan no au mata heli-heling boe. Dadi au ae fee nenori-nefadak neu malanggan laen nara, talo ia:
1PE 5:2 Ei sama leo mana lolo fo mana nakaboi-nasamao sira bibi lombon nara. Dadi ei muste makaboi-masamao matalolole hatahorir fo Manetualain fee sara neu ei ena. Koladu sara no malole. Boso huu ei uem naa, tehuu ei hii tao talo naa. Koladu sara no malole tungga Manetualain hihii-nanaun. Boso sangga nanala lenak soa-neu ao heli-helim, tehuu maue-osa no dere-dere hiek fo tulu-fali Manetualain hatahorin nara.
1PE 5:3 Boso kada parenda sadi ndaa fo tao mamabera hatahorir fo Manetualain fee ei koladuk ena. Tehuu ei muste dadi netuduk malole, fo mana matudu dalak neu sara.
1PE 5:4 Yesus naa, sama leo Malangga Mana Lolo. Mete ma Ana fali mai ena, neu ko Manetualain fee ei seseba-babaek, nahuu ei koladu hatahorim mara no malole. Seseba-babaek naa, ta bisa nakalulutu henin, te ana nakatataka nakandoo.
1PE 5:5 Hatahori muri ana nggara ein! Ei oo muste nenene neu saranik malanggan nara boe. Ei basa ngga boso soꞌuk aom mara. Sama leo Manetualain Susura Malalaon surak nae, “Manetualain laban neu hatahori fo mana nakadedemak aon nara, tehuu Ana hii natudu Ndia dale susuen neu hatahori dale nekeloloek aon.”
1PE 5:6 Huu naa de ei basa ngga muste masaneda Manetualain koasan, mita fo ei boso koa ao. Doo-doo te ndaa no fain, boe ma Manetualain nae soꞌuk kokoak neu ei.
1PE 5:7 Soꞌuk dalem mara, mita fo Manetualain ndia koladu basa hata fo mana tao ei duduꞌam ta namaneu. Huu Ana natudu dale susuen neu ei.
1PE 5:8 Besa-besa, ee! Duduꞌa naruk! Manea matalolole huu ita musun, ndia nitur malanggan nae nakalulutu ei. Ana nae kodo katemak ei, nok bali singa esa mana lakamarak, nae sangga banda fo naꞌan.
1PE 5:9 Tehuu boso mamataꞌu. Ei muste laban nitur malanggan naa. Ei oo muste makatataka fo mamahere neu Manetualain makandoo boe. Te ei bubuluk ena mae, ei toranoo kamaherem mara rai bee a mesan nai dae-bafok ia oo muste hambu rala susa-sonak sama leo ei boe.
1PE 5:10 Tehuu masaneda te Manetualain hii natudu Ndia dale susuen neu ita. Ana ndia noke nala ei fo dadi miu Ndia hatahorin, nahuu ei simbo mala Karistus ena. Huu naa de Ana nau nakadedemak ei fo bisa leo-laꞌo mia Ndia makandoo. Tehuu mete ma ei hambu mala susa-sonak nai dae-bafok ia kada ta dook ka, na, Manetualain nae tao nalole falik ei. Ana nae natetea ei ma tao nala ei makatataka. Ana oo nambaririik ei miu fanderen matea boe.
1PE 5:11 Ita toke fo basa koasar rai Manetualain liman dale, losa doon naa neu. Tebe!
1PE 5:12 Silas ndia tulun au fo surak susura kekeꞌuk ia. Ndia ia, ita toranoo kamaheren ma au hatahori lima konang. Au fee nenori-nefadak neu ei fo makatataka mahere, huu Manetualain hii natudu Ndia dale susuen neu ita nakandoo. Dadi ei muste mambariik mahere fo boso makaheok.
1PE 5:13 Hatahori kamaherek mana makabua rai kota Babel oo haitua hara masodak fee ei boe. Manetualain here nala sara ena, sama leo Ana here nala ei boe. Au anang Markus oo haitua hara masodak boe.
1PE 5:14 Mete ma ei matonggo, na, esa lole haran mbali esa menik iꞌidu susuek fo natudu ei susue-lalaim. Au nau fo ei basa ngga fo mana mamahere neu Karistus bisa leo-laꞌo no lino-lendek ma mole-damek. Soda-molek, Petrus
2PE 1:1 Susurak ia numa au mai, Simon Petrus. Au dadi uu Yesus Karistus hatahori neondan. Au oo dadi uu Ndia nedenun boe, fo Ana nadenun neni bee a mesan neu fo tui-bengga hatahorir laꞌe-neu Ndia. Au surak susurak ia fee ei mana mamahere neu Yesus Karistus ena. Manetualain nasosoi dalak mita fo ei oo bisa mamahere neu Karistus sama leo ai boe, nahuu Ndia dalen ndoos. Nemeheherek naa, kabelik soa-neu ita basa ngga. Karistus oo dadi neu ita Manetualain boe, ma Ndia oo dadi Hatahori fo mana tao nasoi-nasoda ita numa ita sala-singgon nara mai boe.
2PE 1:2 Au oke-hule fo ei bisa malela no malole neu Manetualain, ma neu ita Lamatuan Yesus, mita fo Ara ratudu Sira dale susuen neu ei, fo ei bisa leo-laꞌo no mole-damek ma lino-lendek.
2PE 1:3 Yesus naena koasa sama leo Manetualain koasan. Huu naa de Yesus baꞌe fee ita ena basa hata fo ita toꞌak, fo leo-laꞌo no ndoos tungga Manetualain hihii-nanaun. Ana tao talo naa, nahuu ita talela Ndia no malole. Ma Ana ndia noke nala ita dadi teu Ndia hatahorin, nahuu Ndia malole ma ta neni babanggak sudi selik kana.
2PE 1:4 Yesus fee basa hata fo nenenin lenak neu ita ena. Huu fai bakahulun Ana helu-bartaa ena fo nae fee basa dedeꞌak kara raa. Ndia hehelu-bartaan nara neulaun sudi selik kana. Ana fee basa naar reu ita, mita fo ita dalen bisa dadi sama leo Lamatuak dalen. Ma ita oo bisa takamboꞌik numa basa dedeꞌa kaboo mburuk mai boe, fo hatahori marai dae-bafok ia hii taok, nahuu ara leo-laꞌo tao tungga kada sira hihii heli-helin ma ta rakatataak rala aon nara.
2PE 1:5 Huu naa de au nau ei maote tebe-tebe fo tao hata fo neulauk. Huu ei mamahere neu Yesus ena, tehuu naa bei ta dai. Maue-osa hata fo neulauk nakandoo. Malela Lamatuak lena-lenak bali.
2PE 1:6 Tehuu boso losa kada naa leo. Manori fo ei leo-laꞌo makatataak mala aom mara. Tehuu naa oo bei ta dai boe. Tungga-tungga ei hambu susa-sonak, na, ei muste makatataka mahere, boso makaheok. Tehuu tao lena heni naa bali. Tao basa-basan tungga Manetualain hihii-nanaun.
2PE 1:7 Tehuu boso losa kada naa leo. Matudu susue-lalaim neu ita toranoo kamaheren. Tehuu naa bei ta dai. Huu ei muste leo-laꞌo masue-laik makandoo.
2PE 1:8 Mete ma ei leo-laꞌo talo naa, ma nenori-nefada neulauk kara iar boe tamba rakandoo, na, naa tao nala ei boe malela no malole neu ita Lamatuan Yesus Karistus. Nenori-nefada neulauk kara iar ta mopo sara hie-hie ma ta ngganggari ledo-fair. Nenori-nefada neulauk kara iar, tao rala ei boe malela no malole neu Ndia.
2PE 1:9 Mete ma hambu hatahori ta nau tao talo naa, na, ana duduꞌa kekeꞌuk a mesan. Ana ta mete-nita hata manai ndia idu-matan, nok bali ndia naa, pokek. Lamatuak koka heni hatahori naa sala-singgon ena, fo dalen bisa lolo-laok. Tehuu hatahori naa lilii henin ena!
2PE 1:10 Toranoo susue nggara ein! Hatematak ia ei muste maote tebe-tebe lenak bali. Lamatuak here nala ei ena fo dadi miu Ndia hatahorin, boe ma ei meni Ndia miu. Hatematak ia ei muste matudu mae, ei maso dadi miu Ndia nufanelun ena. Mete ma nenori-nefadak kara iar fo au soꞌuk kasa bebeik kara raa tamba rakandoo nai ei leleo-lalaꞌom, na, ei ta bisa tuda.
2PE 1:11 No dalak naa, Manetualain nae fee ei dedeꞌak esa ta hohoꞌa ndoos. Ndia, Ana nasosoi dalak ma fee ei haak fo simbo mala Yesus Karistus dadi neu ei Manem fo masoda mian seku neu. Huu Ndia naa, ita Lamatuan. Ma Ndia oo Hatahori fo mana tao nasoi-nasoda ita numa ita sala-singgon mai ena boe.
2PE 1:12 Ei bubuluk nenori-nefadak kara raa ena fo au soꞌuk kasa bebeik kara raa, ma ei makatataka mahere, nahuu ei mamahere neu hata fo tetebes. Leo mae talo naa, tehuu au nau fee nesenedak laꞌi-laꞌik nenori-nefadak ia neu ei, mita fo ei boso lilii-ndondou.
2PE 1:13 Au ta nau fee lelak fo ei lilii. Au nau fee nesenedak neu ei fo duduꞌa makandoo nenori-nefadak kara iar. Huu neu au bei leo-laꞌo nai dae-bafok ia, memak nandaa mete ma au fee nesenedak nenori-nefadak kara iar neu ei.
2PE 1:14 Ta dook ka te au mate ena. Ita Lamatuan Yesus Karistus nafada memak au talo naa ena. Huu naa de au bubuluk memak kana ena.
2PE 1:15 Leo mae neu ko au mate ena, tehuu au aote tebe-tebe hatematak ia fo ei masaneda makandoo mia nenori-nefadak kara iar.
2PE 1:16 Fai bakahulun au ua au nonoo nggara tui-bengga neu ei laꞌe-neu ita Lamatuan Yesus Karistus ena. Ai oo tui boe mae, mete ma Ana fali mai, neu ko Ana mai no koasa ta neni babanggak. Tebe, hetu? Tehuu naa ta tutui lasik fo ta tetebes. Ai kada tui ei laꞌe-neu hata fo ai mete-mitan no ai mata heli-helin ena. Huu naa de ai bubuluk Yesus ta neni babanggan naa, sama leo mane ina-huuk esa.
2PE 1:17 Laꞌe esa, ai sama-sama mia Yesus numa Manetualain lete malalaon. Boe ma Amak Manetualain mesa kana ndia nafada laꞌe-neu Yesus ta neni babanggan. Huu faik naa, ai mamanene harak esa lolen sudi selik kana kalua numa lalai mai nae, “Ndia ia, Au Ana susueng. Ana tao namahoko Au daleng.”
2PE 1:19 Numa naa mai ita boe tamahere tebe-tebe laꞌe-neu basa hata fo ita simbo tala sara ena ruma Manetualain mana toꞌu dedeꞌan lele uluk kara mai. Dadi malole lenak ei tao tungga sira hara hehelun nara! Huu sira hara hehelun nara raa, sama leo lambu esa nasaꞌa nai mamana makiuk. Dadi ei muste mamanene sira hara hehelun nara, losa Yesus fali mai. No dalak naa ei bisa tamba malela makandoo. Naa, sama leo ei mete-mita makahuluk nduu mansai, dei fo ledo toda tao manggaledo basa-basan.
2PE 1:20 Masaneda te Manetualain mana toꞌu dedeꞌan nara rafada memak laꞌe-neu dedeꞌak noꞌuk ka ena. Tehuu sira hara hehelun nara raa, ta tungga sira hihii-nanau heli-helin nara.
2PE 1:21 Hata fo ara surak naa ena, ta naoka numa hata fo ara hii kokolak neu a leo. Tehuu naa naoka nai Manetualain, tungga hata fo Ndia Dula-dale Malalaon natudu neu sara.
2PE 2:1 Fai bakahulun hambu hatahori Israꞌel ketuk soꞌuk aon nara rae, sira dadi Manetualain mana toꞌu dedeꞌan. Naa te ara pepeko-leleko. Neu ko ei oo matonggo mia hatahori leo naak boe nai ei taladam. Hambu hatahori ketuk rae, sira fee nenorik laꞌe-neu Manetualain, tehuu ara kada pepeko-leleko a mesan. Ara fee nenorik ma rafuni sira duduꞌa-aꞌafi kaboo mburun. Huu naa de ara bisa tao sira nenori mana peko-pakin nara dale reu. Mete ma ei nenene sira nenorin nara, neu ko ei makalulutu. Ara laka rae, Lamatuak Yesus naa, ta sira lamatuan. Naa te Ana ndia tefa-soi nala sira ena no babaen belin seli. Ara tao talo naa, de neu ko mesa kasa rakalulutu lai-laik.
2PE 2:2 Leo mae talo naa, tehuu neu ko hatahori noꞌuk ka tungga sara, ma tao sadi ndaa ta rameda mamaek. Neu ko hatahori kokolak ta neulauk laꞌe-neu nenori tetebes, huu sira tatao-nonoꞌin edo-poden naa.
2PE 2:3 Meser masapepekok kara raa, mana bare-naꞌok kara. Ara tui leli-belak kana, fo ara bisa kedi rala ei doim. Tehuu boso lilii-ndondou, te Manetualain dadi neu Mana Maketu-maladi Dedeꞌak fo ta mana sunggu nitak. Numa fai bakahulun mai, Ana nahani memak fo huku-doki sara. Neu ko ara rakalulutu rafu-rafu.
2PE 2:4 Haꞌi netuduk leo, lele uluk Manetualain atan ketuk marai nusa tetuk do inggu temak tao salak. Tehuu Manetualain mana dadi neu Mana Maketu-maladi Dedeꞌak ta nakamboꞌi sara. Ana piru sara reni aꞌi mbila ta kala matek reu, ma oka sara rai bolo makiuk mandema dale. Ara rahani rai mamanak naa, losa fain fo ara rasare mbali Ndia.
2PE 2:5 Leo naak oo no hatahori tembo lele uluk kara boe. Lelek naa, ara leo-laꞌo tao manggarauk, ma ta tao matak neu Manetualain. Tehuu Manetualain koladu ena fo Ndia hatahorin dale ndoos esa, nade Noh, natudu dalak fo hatahorir bisa leo-laꞌo ro ndoos. Tehuu ara oo ta nau nenene neun boe. Huu naa de Manetualain haitua faa moꞌok fo tao nakalutu hatahori fo ta mana nau tao matak neu Ndia. Tehuu Ana tao nasoi-nasoda Noh no ndia nufanelun. Basa sara hatahori falu.
2PE 2:6 Laꞌe esa bali, hatahori lele uluk rai kota Sodom ma Gomora leleo-lelaꞌon nara manggarauk sudi selik kana. Boe ma Manetualain hukun asa. Ana hotu heni basa-basan marai naa, losa dadi afu. De basa hatahorir marai naa mate heni basa sara. Naa, dadi netuduk soa-neu hatahori laen mana nau leo-laꞌo manggarauk, ma ta tao matak neu Manetualain. Ara bisa bubuluk memak sira ua-nalen nara, mete ma ara ta nau sale dalen do tuke tein.
2PE 2:7 Tehuu faik naa, hambu hatahori esa nade Lot. Ana leo-laꞌo ndoos. Ana mangguk ka ena no hatahori manggarauk kara tatao-nonoꞌin nara mana lena-lenak, ta mana nau nenene neu Manetualain. De Manetualain tao nasoi-nasoda Lot numa mamanak naa mai.
2PE 2:8 Lot mesa kana hii tao hata fo ndoos, tehuu ana leo nai hatahori Sodom mara taladan. Ma tungga faik ana oo mete-nita ma namanene ara lena-langga Manetualain Hohoro-lalanen nara boe. Naa, tao nala dalen sona.
2PE 2:9 Basa netuduk kara raa ratudu rae, Manetualain bubuluk dalak tao nasoi-nasoda hatahori fo mana hii nenene Ndia numa soba-douk mata-matak kara mai. Ana oo bubuluk naketu huku-doki berak boe soa-neu hatahori mana leo-laꞌo peko-pakik kara. Ma Ana tao talo naa nakandoo losa fain fo Ana naketu basa hatahorir dedeꞌan nara.
2PE 2:10 Huku-doki berak naa, tuda lena-lenak soa-neu hatahori fo mana hii kada leo-laꞌo no manggenggeok tungga sira hihii-nanau heli-helin nara. Ara ta nau nenene hatahori esa boe na, ma rakatitii-rakadadauk basa mana toꞌu koasar. Neu ko Lamatuak huku-doki sara. Meser masapepekok bebeik kara raa rambarani ralan seli ma koa ao. Ara oo ta nau ratudu hada-horomatak, ma ta ramataꞌu kokolak tao raboboo Manetualain ma Ndia atan nara rai lalai boe.
2PE 2:11 Naa te Ndia atan nara marai nusa tetuk do inggu temak barakain nara lena heni meser masapepekok kara raa. Leo mae talo naa, tehuu atar raa ta kokolak tao raboboo meser raa rai sira Lamatuan matan. Ma ara oo ta soa ndae salak neu meser raa boe.
2PE 2:12 Tehuu meser masapepekok kara raa hii kokolak tao raboboo laꞌe-neu dedeꞌak bee fo sira mesa kasa ta ralela. Te ara sama leo banda ta duduꞌa ralela na! Malole lenak, humu mala sara fo makalulutu heni sara leo! Naa, sira ua-nalen. Neu ko rakalulutu heni sara, nahuu sira tatao-nonoꞌi manggaraun.
2PE 2:13 Ara rakasususak noꞌuk ka neu hatahorir. Basa naa, neu ko Lamatuak oo nakasususak kasa boe, nahuu sira tataon ta ndoos. Ara hii kada tao feta setelelek rame-rame. Ara oo hii tao sadi ndaa nai fai leledon boe, mita fo basa hatahorir mete-rita sira manggaraun nara. Ara ta rameda mae, ma ara kokolak raboboo ei nade malolem. Mete ma ara raꞌa feta sama-sama ro ei, ara nau tao tungga kada sira hihii manggaraun nara.
2PE 2:14 Mata deꞌen nara rambaloa sangga inak mana hii raeok ro sara. Ara kada leo-laꞌo tao manggarauk rakandoo. Ara rasiꞌe sangga hatahori fo nemeheheren ta matea neu Lamatuak, boe ma ara ike sara fo tungga tao manggarauk. Ara sangga dalak fo raꞌa mata lenak rakandoo. Neu ko Lamatuak huku-doki sara!
2PE 2:15 Fai bakahulun meser masapepekok kara raa oo hatahori mana tungga eno-dala ndoos boe, tehuu doo-doo boe ma ara sio laꞌo. No dalak naa, ara sama leo Balaam lele uluk, ndia Bosor anan. Ndia naa, Manetualain mana toꞌu dedeꞌan esa. Tehuu ana hii nala doik sudi selik kana, huu naa de ana tao hata fo ta ndoos asa. Laꞌe esa, Balaam saꞌe banda keledei. Keledeir, ta bisa kokolak. Tehuu faik naa, Manetualain tao nala keledei naa, bisa kokolak sama leo hatahori dae-bafok! Boe ma keledei naa nahara berak neu Balaam, nahuu ndia tatao-nonoꞌi manggaraun. Keledei naa nau fo Balaam hahae, mita fo ana boso tao peko-pakik bali, sama leo hatahori kamuluk.
2PE 2:17 Meser masapepekok kara raa sama leo oe matak esa sosoan taa, nahuu mada heni oen ena. Ara oo sama leo koꞌa-masuk sosoan taa boe, nahuu anin fuu henin. Manetualain sadia memak mamana makiu-makahatuk esa fo kena sara.
2PE 2:18 Huu ara kokolak raloloa bafan, tehuu isin taa. Ara nau ike rala hatahorir fo tao tungga hata fo ta kambareek. Ara hii fufudi-hohodo hatahori bei fo fali reni eno-dala ndoos reu, mita fo ara tao salak seluk bali.
2PE 2:19 Hatahori mana masapepekok kara raa helu-bartaa rae, “Mete ma ei nenene neu ai, na, ei hambu nekemboꞌik fo tao tungga kada ei hihiim a mesan!” Tehuu hatahori mana kokolak talo naa, sama leo ata-dato ta mana bisa nakamboꞌik aon numa sira manggaraun nara mai. Huu hatahori mana fee lelak neu hata esa koladu ndia aon, na, naa sama leo ana dadi neu ata-dato numa hata naa mai.
2PE 2:20 Mete ma nau takamboꞌik numa manggarauk manai dae-bafok ia fo mana tao nanggenggeo ita, na, ita muste talela ita Lamatuan Yesus Karistus. Tehuu mete ma hambu ketuk rakaheok numa Ndia mai, boe ma rakaesa seluk ro hata fo manggarauk sama leo fai uluk, na, naa sama leo hata fo manggarauk naa koladu sara. Hatematak ia ara boe soe lenak bali!
2PE 2:21 Ta malole mete ma ara bubuluk eno-dala masodak tetebes ena, basa de rakaheok, boe ma ta tao tungga hata fo neulauk ma lolo-laok naa bali, fo Lamatuak parenda neu ita ena. Malole lenak, ara hae bubuluk rita eno-dala ndoos.
2PE 2:22 Hambu dedeꞌa lasik laꞌe-ndaa meser masapepekok kara raa rae, “Mete ma busa muta, ana neu naꞌa nasafali ndia muta heli-helin.” Hambu laen bali nae, “Leo mae radiu bafi esa ena, tehuu ana fali neu lololi seluk tane-mbuuk bali.”
2PE 3:1 Toranoo susue nggara ein! Ia, ndia au susura kaduang soa-neu ei. Nai susura kaduak kara iar, au fee nesenedak neu ei, fo ei bisa duduꞌa laꞌe-neu basa hata fo ndoos.
2PE 3:2 Masaneda neu Manetualain mana toꞌu dedeꞌa lolo-laon kokolan lele uluk. Masaneda neu Yesus nedenun nara boe. Duduꞌa matalolole laꞌe-neu hata fo ita Lamatuan parenda sara fo rafada neu ei. Huu Ana ndia tao nasoi-nasoda ei numa sala-singgom mara mai.
2PE 3:3 Masaneda talo ia dei: leo mae dae-bafok bei ta losa fai mateꞌen, tehuu hambu mana makatitiik tao sadi ndaa tungga kada sira hihii-nanaun a mesan. Ara kokolak rakalulutu basa dedeꞌak fo tetebes sara.
2PE 3:4 Ara kokolak rae, “Ciih! Yesus helu-bartaa nae, Ana nae fali mai, do? Mete ma talo naa, na, Ana nai bee? Mulai numa ita bei-baꞌin nara mate losa hatematak ia oo ta hambu esa nasafali boe. Basa-basan laꞌok rakandoo, mulai numa Manetualain nakadadadik lalai no dae-inak.”
2PE 3:5 Tehuu hambu dedeꞌak esa fo hatahori mana masapepekok kara ta nau rasaneda ralan. Ndia, numa makasososan mai Manetualain kada kokolak a mesan, de lalai hambu memak kana. Boe ma Manetualain nakadadadik oe. Basa de Ana bingga feꞌe oe numa mada lai mai, boe ma nakadadadik mada lai sou numa oe mai. Manetualain kokolak nae leo bee ena, na, naa hambun neuk ka leo. Doo-doo boe ma Manetualain pake faa moꞌok fo nakalulutu heni basa hatahorir marai dae-bafok ia; mana rasoda rai Noh lelen. Tehuu hatematak ia, Manetualain nafada memak hata fo Ana nae taon neu lalai no dae-inak. Hatematak ia Ana bei nakatataak kana, tehuu neu ko ndaa no fain, Ana nae hotu heni sara. Neu ko Manetualain natuda huku-dokik fo nakalulutu heni basa hatahorir fo ta mana nau tao matak neu Ndia. Leo mae talo naa, tehuu hatahori masapepekok kara raa ta nau rasaneda rae, neu ko Manetualain tao tungga hata fo Ana kokolak ena.
2PE 3:8 Toranoo susue nggara ein! Boso lilii-ndondou dedeꞌak ia. Ita Lamatuan ta reke ledo-fair sama leo ita rereken. Tungga Ndia, faik esa bisa dadi teuk rifun esa. Ma teuk rifun esa oo bisa dadi faik esak ka boe.
2PE 3:9 Mete ma ita Lamatuan helu-bartaa nae tao dedeꞌak esa, na, Ana tao natetun laꞌe-ndaa ndia fain, ma ta nahani. Hambu hatahori ketuk duduꞌa rae, Lamatuak naue no kada maꞌa-maꞌa. Naa te taa! Ana bei nakatataak kana fo nahani ndia fain. Ita Lamatuan nau fo basa hatahorir sale dalen ma tuke tein nara dei, fo laꞌo ela basa sira sala-singgon nara, de tungga falik Ndia. Huu Ana ta nau fo hatahorir lenggo feꞌe numa Ndia mai.
2PE 3:10 Tehuu neu ita Lamatuan fali mai naa, ta hambu hatahori mana bubuluk memak kana. Huu Ndia mamain naa no kada kaiboik a mesan, nok bali naꞌo manu-meo esa maso neni uma dale neu. Faik naa, basa hata marai lalai neni hotu henik kara, ndia leo ledo, bulan ma nduuk kara. Basa-basan, basa sara! Leo naak oo dae-bafok no basa oe-isin nara boe. Kade heni sara!
2PE 3:11 Dadi mete ma basa-basan neu ko neni hotu henik kara talo naa, na, ei muste dadi miu hatahori mata leo beek? Ei muste maote tebe-tebe fo leo-laꞌo tungga Lamatuak hihii-nanaun. Ei muste leo-laꞌo no malalaok!
2PE 3:12 Ei oo muste mahani a neu Lamatuak mamain boe. Dadi ei muste maote tebe-tebe fo tao faik naa mai lai-lai. Faik naa, lalai oo neni hotu henik boe. Ma basa hata marai lalai oo neni hotuk kara, de noe heni sara boe.
2PE 3:13 Tehuu neu ko hambu lalai beuk ma dae-bafo beuk. Manetualain helu-bartaa talo naa ena, de naa ndia ita tahani a neun. Nai naa, hambu kada hatahori mana leo-laꞌo no ndoos a mesan.
2PE 3:14 Dadi toranoo susue nggara ein! Neu ei mahani a neu dedeꞌak kara iar, ei muste maote tebe-tebe fo dadi hatahori neulauk, tungga Lamatuak timba-tain. No dalak naa, ta hambu hatahori fo bisa ndae salak neu ei. Maote tebe-tebe fo leo-laꞌo no mole-damek boe.
2PE 3:15a Ita Lamatuan naa nahani a mesan fo fee lelak, mita fo Ana bisa tao nasoi-nasoda ei numa ei sala-singgom mara mai.
2PE 3:15b Ita toranoon Paulus surak fee ei ena laꞌe-neu dedeꞌak noꞌuk ka fo sama, hetu? Manetualain ndia feen malelak talo naa, huu naa de ana oo surak talo naa boe.
2PE 3:16 Tungga-tungga Paulus surak susurak, ana oo kokolak dedeꞌak kara iar boe. Nai ndia susuran nara raa memak hambu dedeꞌak fo ita ta bisa talela tala sosoan no malole. Hambu hatahorir oo tao rafeo-falik dedeꞌak kara raa sosoan boe. Ara oo tao rafeo-falik dedeꞌak laen nai Manetualain Susura Malalaon dale boe. Sira raa, ndia hatahori mbera-barek, ma hatahori fo nemeheheren nara bei ta matea. Hatahori matak leo naak kara, neu ko rakalulutu heni sara.
2PE 3:17 Toranoo susue nggara ein! Ei bubuluk mala meser masapepekok kara raa leleo-lalaꞌon nara ena. Dadi besa-besa, ee! Ara ta nau nenene hohoro-lalanek hata esa boe na. Ara soba-soba fo pepeko-leleko ei, mita fo ei sio laꞌo ela eno-dala ndoos. Tehuu boso fee lelak neu sara fo rasenggi ei talo naa. Huu naa de ei muste makatataka mahere.
2PE 3:18 Malole lenak ei nemeheherem mara mori rakandoo. Ei bubuluk ita Lamatuan Yesus Karistus ena, ndia tao nasoi-nasoda ita numa ita sala-singgon nara mai. Ana nau natudu Ndia dale susuen neu ei. Ma Ana oo nau fo ei malela neu Ndia no malole bali boe. Au nau fo basa hatahorir rakadedemak Ndia numa hatematak ia losa doon naa neu! Soda-molek Petrus
1JO 1:1 Au surak susurak ia laꞌe-neu Manetualain Dedeꞌa-kokolan mana Neni Masoi-Masodak. Dedeꞌa-kokolak mana Neni Masoi-Masodak ia, hambu memak kana numa dae-bafok makasososan mai. Hatematak ia au ma au nonoong nggara mete-mitan no ai mata heli-helin ena. Ai mamanenen menik ai ndiꞌi doo heli-helin ena. Ma ai mafaroen menik ai lima heli-helin ena. Ai mete-mitan talo naa,
1JO 1:2 nahuu Ana toda mai nai ai taladan. Fai bakahulun Ana leo no Ndia Aman, tehuu hatematak ia Ana natudu ao heli-helin neu ai ena. Huu naa de ai mambarani mafada ei, talo bee fo hatahori dae-bafok bisa hambu masodak tetebes ta mana ketuk. Huu Ndia ia, Dedeꞌa-kokolak mana Neni Masoi-Masodak.
1JO 1:3 Ai nau mafada ei basa hata fo ai mitak ena, ma basa hata fo ai mamanenek ena fo ei bisa dalek esa mia ai. Huu ita basa ngga takaesa ena to Manetualain ma Ndia Anan fo nadenun mai, ndia Yesus Karistus.
1JO 1:4 Dadi ai surak susurak ia fo tao mamahoko ei dalem mara. No dalak naa, ai dalen nara oo tamba ramahoko boe.
1JO 1:5 Nenorik fo Yesus nafada ai ndia hatematak ia, ai mae mafada neu ei, talo ia: Manetualain naa, malolen seli. Ana ta naena manggarauk faa boe na. Huu Ana sama leo manggaledok mana nasaꞌa, fo ta hambu makiuk faa boe na.
1JO 1:6 Mete ma ita kokolak tae, “Ita leo-laꞌo dalek esa to Lamatuak,” tehuu ita bei leo-laꞌo tao hata fo manggarauk, na, naa sama leo ita leo-laꞌo nai makiuk dale. Huu ita kokolak pepeko-leleko, ma ta leo-laꞌo tungga eno-dala ndoos.
1JO 1:7 Tehuu mete ma ita leo-laꞌo tungga eno-dala ndoos, ita sama leo hatahori fo mana leo-laꞌo nai Manetualain manggaledon. No dalak naa, ita bisa leo-laꞌo dalek esa, esa no esa. Ma ita dalen dadi lolo-laok, nahuu Manetualain Anan Yesus mate, ma Ndia daan koka heni basa ita sala-singgon nara ena.
1JO 1:8 Mete ma ita kokolak tae, “Ita ta tao sala-singgok,” na, naa dadi tanda nae, ita kedi-ira ita ao heli-helin ena, ma ta bubuluk hata fo ndoos.
1JO 1:9 Tehuu mete ma ita manaku ita sala-singgon, neu ko Manetualain mana naena dale ndoos, tao tungga Ndia hehelu-bartaan, de koka heni ita sala-singgon ma tao nambalao ita dalen nara.
1JO 1:10 Mete ma ita kokolak tae, “Ita ta tao tita sala-singgok,” na, ita tao Manetualain dadi neu mana pepeko-lelekok naa ena! Huu Ana kokolak ena nae, basa hatahori tao sala-singgok. Mete ma ita kokolak talo naa, manggaledok ena nae, Ndia Dedeꞌa-kokolan ta nai ita dalen nara.
1JO 2:1 Ana susue nggara ein! Au surak afada basa iar, mita fo ei leo-laꞌo ta tao sala-singgok bali. Tehuu mete ma hambu ketuk tao sala-singgok, neu ko hambu mana masalaꞌe ita nai Amak Manetualain matan. Naa, ndia Yesus Karistus, Hatahori Malalaok fo Manetualain nadenun neni dae-bafok ia mai ena.
1JO 2:2 Ana mate dadi tunu-hotuk soa-neu ita, fo Manetualain koka heni ita sala-singgon nara. Ta fee kada ita mesa ngga, tehuu soa-neu basa hatahorir marai dae-bafok ia boe.
1JO 2:3 Ita bubuluk tae, ita talela Manetualain no malole, mete ma ita tungga Ndia parendan nara.
1JO 2:4 Hatahori bisa kada kokolak nae, “Au alela Manetualain.” Tehuu mete ma ana ta tao tungga Manetualain parendan, na, ndia ia mana soa pepeko-lelekok fo kokolak laen, tao laen.
1JO 2:5 Tehuu hatahori fo mana tao tungga Manetualain parendan, naa dadi bukti nae, ndia susuen neu Manetualain tetebes ena. No dalak naa, ita bubuluk tae, ita iar, Manetualain hatahorin.
1JO 2:6 Dadi mete ma hatahori kokolak nae, “Au leo-laꞌo akaesa ua Manetualain,” na, ana muste leo-laꞌo sama leo Yesus Karistus.
1JO 2:7 Ana susue nggara ein! Parenda fo au surak ia, ta dedeꞌa beuk soa-neu ei. Parenda ia hambu memak kana ena nai Manetualain Dedeꞌa-kokolan, fo ei mamanenen numa fai bakahulun mai ena.
1JO 2:8 Leo mae talo naa oo, tehuu hambu dedeꞌa beuk boe, fo au ae surak laꞌe-neu Manetualain parendan ia. Parenda ia, laꞌok tebe-tebe nai Yesus leleo-lalaꞌon ena. Ma parenda ia mulai laꞌok nai ei ena, nahuu makiuk manai ei dalem mara mulai mopo ena, ma manggaledok tetebes mulai nasaꞌa nai ei leleo-lalaꞌom mara ena.
1JO 2:9 Hatahori bisa a kokolak nae, “Au leo-laꞌo nai manggaledok dale.” Tehuu mete ma ana mburuk no toranoon, na, naa dadi tanda nae, ana bei leo-laꞌo nai makiuk dale.
1JO 2:10 Hatahori fo mana leo-laꞌo nai manggaledok dale, ana muste sue ndia toranoon, ma ta hambu manggarauk hata esa boe na nai ndia dalen fo nakatutudak aon.
1JO 2:11 Huu naa de mete ma hambu hatahori mburuk no ndia toranoon, naa dadi tanda nae, ana bei leo-laꞌo nai makiuk dale. Ana laꞌok nafaroroe a, nahuu makiuk tao nala matan pokek ena.
1JO 2:12 Ana nggara ein! Au surak susurak ia fee ei, nahuu Karistus mate soa-neu ei ena, de Manetualain koka heni ei sala-singgom mara ena.
1JO 2:13 Lasi-lasi nggara ein! Au surak susurak ia fee ei, nahuu ei malela Yesus Karistus, fo hambu memak kana numa lele uluk mai ena. Muri ana nggara ein! Au surak susurak ia fee ei, nahuu ei matati laban manggarauk baꞌin ena, losa ei senggi.
1JO 2:14 Ana nggara ein! Au surak susurak ia fee ei, nahuu ei malela Amak Manetualain. Lasi-lasi nggara ein! Au surak susurak ia fee ei, nahuu ei malela Yesus Karistus, fo hambu memak kana numa lele uluk mai ena. Muri ana nggara ein! Au surak susurak ia fee ei, nahuu ei mahinda Manetualain Dedeꞌa-kokolan nai ei dalem mara, losa ei dadi barakaik, ma ei matati laban manggarauk baꞌin ena, losa ei senggi.
1JO 2:15 Ei boso sue neu dae-bafok hihii-nanaun, ma dae-bafok hata-heton. Huu hatahori fo mana sue neu dae-bafok, ta bisa sue neu Amak Manetualain.
1JO 2:16 Hata fo manai dae-bafok ia, ta natoꞌu no Manetualain. Haꞌi netuduk leo: hatahori fo mana leo-laꞌo tao namahoko ndia ao heli-helin; hatahori fo mana bare-naꞌo sudi hata; ma hatahori fo mana koa aon nahuu kamasuꞌik. Dedeꞌa leo naak kara ta raoka nai Amak Manetualain. Ara raoka nai kada dae-bafok ia.
1JO 2:17 Naa te dae-bafok ia neu ko sambu do lalo henin, sama-sama no basa hata fo hatahori hii sanggak kara. Tehuu hatahori fo mana hii tao tungga Manetualain hihii-nanaun, ana ta sambu do lalo henin, te neu ko nasoda nakandoo.
1JO 2:18 Ana nggara ein! Fair fo dae-bafok fai mateꞌen deka-deka mai ena. Ei mamanene ena mae, hatahori fo mana laban Karistus neu ko ana sou mai. Naa te hambu memak kasa ena. Huu hambu mana laban Karistus nai bee a mesan ena. Naa dadi tanda nae, fair fo dae-bafok fai mateꞌen deka-deka mai ena.
1JO 2:19 Mana tukan laban nara kalua numa ita taladan nara mai. Naa te sira iar, ta ita hatahorin nara. Mete ma sira tebe-tebe ita hatahorin nara, na, neu ko ara ta laꞌo ela ita ena, tehuu ara rakatataka rakandoo sama-sama ro ita. Tehuu ara fiti ein reu, de kou ralai ena. Dadi manggaledok ena, sira raa ta ita hatahorin nara, hetu?
1JO 2:20 Tehuu ei ta sama leo sira. Huu ei simbo mala Dula-dale Malalaok numa Karistus mai ena. Ma Dula-dalek naa tulu-fali ei ena fo ei basa ngga malela hata fo ndoos.
1JO 2:21 Ei duꞌa mae, au surak susurak ia, nahuu au duꞌa ae ei ta bubuluk hata fo ndoos? Taa! Ei bubuluk ena! Ei malela ena, bee ndia ndoos ma bee ndia pepeko-lelekok.
1JO 2:22 Naa te hambu mana kedi-irak kara laꞌok nai dae-bafok ia. Talo bee fo ita bisa talela sara? Sira raa ndia hatahori fo mana kokolak rae, Yesus naa ta Karistus. Tungga sira, Yesus ta Hatahori Malalaok fo Manetualain helu-bartaa memak kana ena fo nadenun mai. Hatahori fo mana kokolak leo naak, laban nakandoo Karistus, huu ara timba heni Amak Manetualain ma Ndia Anan.
1JO 2:23 Hatahori mana timba heni Manetualain Anan, na, ara oo timba heni Ndia Aman boe. Tehuu mete ma hatahori manaku Manetualain Anan, na, ara oo dadi reu Manetualain anan nara ena boe.
1JO 2:24 Dadi ei muste toꞌu makandoo hata fo ei mamanene malan numa fai bakahulun mai ena. No dalak naa, ei makaesa makandoo mia Amak Manetualain ma Ndia Anan.
1JO 2:25 Ma Ndia mesa kana ndia helu-bartaa neu ita nae, neu ko ita tasoda takandoo to Ndia.
1JO 2:26 Au surak susurak ia, fo ei malela laꞌe-neu hatahori fo mana nae kedi-ira ei.
1JO 2:27 Ei simbo mala Manetualain Dula-dale Malalaon ena, ma ei oo leo-laꞌo makaesa mian ena boe. Dadi ei ta parluu hatahori laen fo ranori ei bali. Manetualain Dula-dalen dai ena, nahuu Ana bisa fee nenorik laꞌe-neu basa hata fo ndoos. Ana ta pepeko-leleko, sama leo mana kedi-irak kara raa. Dadi toꞌu maherek hata fo Ana fee nenorik ena, mita fo ei leo-laꞌo dalek esa makandoo mia Karistus.
1JO 2:28 Talo ia ana nggara ein! Ei muste leo-laꞌo makaesa makandoo mia Karistus. Neu ko mete ma Ana fali mai, na, ei hae mamataꞌu ma hae mameda mae mambariik nai Ndia matan.
1JO 2:29 Ei bubuluk ena mae, Ana soa tao hata fo ndoos, huu naa de ei oo bisa bubuluk boe mae, basa hatahorir fo mana tao tungga hata fo ndoos, sira oo dadi reu Manetualain anan nara boe.
1JO 3:1 Soba ei duduꞌa sudik Amak manai nusa tetuk do inggu temak susue-lalain neu ita! Ndia susue-lalain naa, ta neni babanggak, losa Ana soꞌuk nala ita dadi teu Ndia anan nara. Tebe naa! Tehuu hatahori leo-laꞌo tungga dae-bafok ia hihii-nanaun, ta bubuluk ita iar see, nahuu ara ta ralela Manetualain.
1JO 3:2 Ana susue nggara ein! Ita dadi teu Manetualain anan nara ena, tehuu bei ta neni henggeneek, ita tae dadi talo bee bali. Ita bubuluk talo ia: Neu Karistus fali mai, ita oo dadi sama leo Ndia boe, nahuu ita mete-titan no ledo-ledo.
1JO 3:3 Basa hatahorir fo mana rahani a neu Karistus mamain naa, neu ko ara tao ralalao leleo-lalaꞌon, mita fo leo-laꞌo malalaok sama leo Karistus.
1JO 3:4 Basa sala-singgok ralena-langga Manetualain parendan. Huu naa de basa hatahorir fo mana tao sala-singgok, lena-langga Manetualain parendan ena, ma laban neun ena.
1JO 3:5 Ei bubuluk ena mae, Karistus dadi neu hatahori dae-bafok fo koka heni basa ita sala-singgon lalaꞌen. Ana bisa tao talo naa, nahuu Ndia mesa kana ta tao nita salak.
1JO 3:6 Dadi hatahori fo mana leo-laꞌo nakaesa nakandoo noon, ta leo-laꞌo tao salak nakandoo bali. Tehuu mete ma hatahori leo-laꞌo tao salak nakandoo, sosoa-ndandaan nae, ana ta nalela ma ta nakaesa no Karistus.
1JO 3:7 Ana susue nggara ein! Boso hambu kedi-irak. Hatahori fo mana leo-laꞌo tungga hata fo ndoos, ndia naa, hatahori dale ndoos sama leo Karistus.
1JO 3:8 Tehuu hatahori fo mana leo-laꞌo tao salak, ana naoka nai nitu manggarauk kara malanggan. Ana ndia soa tao manggarauk numa makasososan mai. Huu naa de Manetualain Anan mai fo nakalulutu heni nitu tatao-nonoꞌi manggaraun naa.
1JO 3:9 Hatahori fo mana dadi neu Manetualain anan ena, ta leo-laꞌo tao salak nakandoo bali, nahuu Manetualain leo nai aon dale. Ana ta bisa tao salak nakandoo, nahuu ana naoka nai Manetualain dale.
1JO 3:10 No dalak naa, ita bisa bubuluk see ndia naoka nai Manetualain dale, ma see ndia naoka nai nitur malanggan dale. Hatahori fo ta mana tao tungga hata fo ndoos, ma hatahori fo ta mana nalela sue ndia toranoon, naa dadi tanda nae, ana ta naoka nai Manetualain.
1JO 3:11 Numa lele uluk mai, ei mamanene memak hara heheluk ia ena nae, “Esa sue esa!”
1JO 3:12 Bei masaneda tutuik Kaen no Habel, hetu? Boso tao tungga Kaen, huu ana naoka nai manggarauk baꞌin dale, losa nakanisa fadin Habel. Tao hata de ana tao talo naa? Ana tao talo naa, nahuu ana tao hata fo manggarauk, tehuu fadin tao hata fo ndoos.
1JO 3:13 Toranoo nggara ein! Boso heran mete ma hatahori fo mana tungga dae-bafok hihii-nanaun mburuk ro ei.
1JO 3:14 Ita bubuluk ena tae, mete ma hatahori kasalak ana mate, na, neu ko ana lenggo feꞌe numa Manetualain mai. Tehuu mete ma ita tasue-laik to ita toranoon, naa dadi bukti nae, ita mate, na, neu ko ita tasoda takandoo to Manetualain. Mete ma basa hatahorir fo ta mana raena susue-lalaik kara neu ko mate, na, ara lenggo feꞌe numa Manetualain mai.
1JO 3:15 Hatahori fo mana mburuk no ndia toranoon, ndia oo sama leo hatahori mana nakanisa hatahori boe. Dadi ei bubuluk ena, hatahori matak leo naak, ta hambu masodak nakandoo no Manetualain.
1JO 3:16 Ita bisa talela susue-lalaik tetebes numa Karistus netudun mai. Ana sue-lai ita, losa Ana loo lima aon ma mate fo nggati ita. Huu naa de ita oo muste loo lima ita aon soa-neu ita toranoon nara boe.
1JO 3:17 Mete ma hambu hatahori soda-ladan mandaik, boe ma ana mete-nita toranoon esa soda-ladan ta mandaik, tehuu dalen ta tuda kasian fo tulu-fali neun, talo bee de hatahori naa bisa kokolak nae, “Au sue-lai neu Manetualain!” Ta bisa!
1JO 3:18 Ana susue nggara ein! Boso sue-lai tungga kada kokolak leo fani oe pake dedeꞌa deꞌek a mesan, tehuu tao hata fo malole boe fo matudu susue-lalai tetebes.
1JO 3:19 Mete ma ita tatudu susue-lalaik no tao hata malole talo naa, ita bisa bubuluk tae, ita leo-laꞌo tungga hata fo ndoos. No dalak naa, ita hae tamataꞌu ma bisa soꞌuk ita matan neu faik fo tasare mbali Manetualain.
1JO 3:20 Leo mae ita dalen bei soa nakasasaꞌek salak neu ita laꞌe-neu hata ta malole fo ita tao titan, tehuu hae tamataꞌu. Huu Manetualain dale kasian sudi selik kana lena heni ita enan. Ma Ana oo bubuluk basa-basan boe.
1JO 3:21 Ana susue nggara ein! Mete ma ita dalen ta nakasasaꞌek salak neu ita, na, ita bisa tamahere aok kara ma hae mae, neu faik fo ita teu tasare mbali Manetualain.
1JO 3:22 Ita bisa simbo basa hata fo ita token numa Ndia mai, nahuu ita tao tungga Ndia parendan nara, ma tao tamahoko Ndia dalen.
1JO 3:23 Ndia parendan nae leo ia: mamahere makandoo neu Ndia Anan Yesus Karistus, fo Ana nadenun mai ena. Ma esa sue esa makandoo, sama leo Yesus parenda naa ena.
1JO 3:24 Hatahori fo mana tao tungga Manetualain parendan nara, ana leo-laꞌo nakaesa no Manetualain. Ma Manetualain oo nakaesa noon boe. Ita bubuluk Ana nai ita dalen, nahuu Ndia Dula-dalen leo nai naa.
1JO 4:1 Ana susue nggara ein! Boso simbo no kada nggoa kamangganggam, mete ma hambu hatahori nae, ndia neni hara heheluk numa Manetualain mai. Tehuu ei muste parisa matalolole fo bubuluk mete te ndia kokolan naa, tetebes numa Manetualain mai, do taa. Huu hatematak ia mana pepeko-lelekok noꞌun seli, laꞌok ndule dae-bafok ia ena. Ara kedi-ira hatahorir rae, sira iar, Manetualain mana toꞌu dedeꞌan nara.
1JO 4:2 Ita bisa talela hara heheluk bee fo tebe-tebe numa Manetualain Dula-dalen mai, talo ia: Manetualain helu-bartaa memak kana numa fai bakahulun mai ena, fo nae nadenu Ndia Anan neni dae-bafok ia mai. Mete ma hatahori fo mana neni hara heheluk naa manaku nae, Yesus Karistus naa, tebe-tebe Manetualain Anan mana dadi hatahori dae-bafok sama leo ita, na, ndia hara hehelun naa, memak numa Manetualain mai.
1JO 4:3 Tehuu hatahori fo ta mana manaku neu Yesus talo naa, ana ta naoka nai Manetualain dale. Huu, naa numa mana laban Karistus mai. Ei mamanene mita ena mae, mana laban Karistus naa, neu ko ana sou mai. Naa te leo naak naa, hambu memak kana nai dae-bafok ia ena.
1JO 4:4 Ana susue nggara ein! Eir ia, memak maoka nai Manetualain dale, ma Ndia koasan nai ei dalem mara. Huu naa de ei tao masenggi mana laban Manetualain ena. Huu Ndia Dula-dalen manai ei dalem naa, barakain lena heni koasa manai dae-bafok ia.
1JO 4:5 Sira raa, raoka nai dae-bafok ia hihii-nanaun. Huu naa de sira dedeꞌa-kokolan nara oo raoka nai dae-bafok ia hihii-nanaun boe. De hatahorir marai dae-bafok ia, hii nenene sara.
1JO 4:6 Tehuu ita taoka nai Manetualain. Huu naa de hatahori fo mana nalela Manetualain, nau nenene ita. Tehuu hatahorir fo ta mana maokak nai Manetualain, ara ta nau nenene ita. No dalak naa, mete ma hambu hatahori nae, ndia toꞌu neni hara heheluk numa Manetualain mai, ita bisa bubuluk bee ndia tetebes, fo mana maokak nai Manetualain Dula-dalen, ma bee ndia pepeko-lelekok.
1JO 4:7 Ana susue nggara ein! Ita muste esa sue esa, nahuu susue-lalaik naa, naoka nai Manetualain. Basa hatahorir mana sue-laik, sira oo raoka nai Manetualain boe, ma ralelan no malole.
1JO 4:8 Tehuu hatahori fo ta naena susue-lalaik, ana ta nalela Manetualain, nahuu Manetualain naa, ndia susue-lalaik.
1JO 4:9 Manetualain natudu Ndia susue-lalain neu ita talo ia: Ana nadenu Ndia Ana kise-muꞌen neni dae-bafok ia mai, fo nasosoi dalak fee ita. No dalak naa, ita bisa tasoda takandoo to Manetualain.
1JO 4:10 Mete ma ita nau mete-tita susue-lalaik tetebes, boso mete ita susue-lalain neu Manetualain. Tehuu mete Manetualain susue-lalain neu ita, nahuu Ana nadenu Ndia Anan fo mate dadi tunu-hotuk nggati ita. No dalak naa, Ana koka heni ita sala-singgon nara, fo ita bisa malole tasafali to Ndia.
1JO 4:11 Ana susue nggara ein! Manetualain sue-lai nalan seli neu ita talo naa ena, na, ita oo muste esa sue-lai esa boe.
1JO 4:12 Ta hambu hatahori esa boe na fo mete-nita Manetualain no ledo-ledo. Leo mae talo naa oo, tehuu mete ma ita tasue-laik esa no esa, sosoa-ndandaan nae, Manetualain sama-sama no ita boe. Ma Ndia susue-lalain boe tamba nai ita masodan, losa ana dadi susue-lalaik tetebes.
1JO 4:13 Manetualain fee Ndia Dula-dalen nai ita dalen ena. Huu naa de ita bubuluk tae, ita leo-laꞌo dalek esa to Ndia, ma Ana oo dalek esa no ita boe.
1JO 4:14 Au ua au nonoong nggara mete-mita Manetualain Anan no ai mata heli-helin ena. Basa de ai mafada basa hatahorir mae, Amak Manetualain nadenu Ndia Anan mai ena fo tao nasoi-nasoda hatahorir marai dae-bafok ia ruma sira sala-singgon nara mai.
1JO 4:15 Hatahori esa-esak fo mana manaku nae, Yesus naa, Manetualain Anan, ana leo-laꞌo malole no Manetualain, ma Manetualain oo malole noon boe.
1JO 4:16 Ita bubuluk ena tae, Manetualain sue-lai nalan seli neu ita. Huu naa de ita tamahere tae, neu ko Ana oo sue-lai nakandoo neu ita boe. Manetualain sue-lai nalan seli neu hatahori. Dadi hatahori fo mana leo-laꞌo no susue-lalaik, ana oo leo-laꞌo dalek esa no Manetualain boe, ma Manetualain oo dalek esa noon boe.
1JO 4:17 Mete ma ita dalek esa to Manetualain, na, ita susue-lalain dadi tetebes. Ma neu dae-bafok fai mateꞌen, neu ko Manetualain nae parisa basa hatahorir masodan, na, ita hae tamataꞌu tambariik nai Ndia matan, nahuu ita dadi sama leo Karistus ena, neu Ana leo numa dae-bafok ia.
1JO 4:18 Mete ma ita leo-laꞌo no susue-lalaik, na, ita ta tameda nemetaꞌuk faa boe na. Huu mete ma ita sue-lai tebe-tebe, na, naa sama leo ita nggari heni basa nemetaꞌuk lalaꞌen fo ita tamedak nai ita dalen. Mete ma hatahori namataꞌu, na, dalen susa-sona, nahuu ana namataꞌu hambu nala huku-dokik. Ana sama leo kakana ana fo bei ta bubuluk sue-lai tebe-tebe neu hatahori.
1JO 4:19 Ita sue-lai, nahuu Manetualain sue-lai nakahuluk neu ita.
1JO 4:20 Mete ma hatahori kokolak nae, “Au sue-lai neu Manetualain,” naa te ana mburuk no toranoon, ndia ia kada kokola bafa rouk naa. Mete ma hatahori ta sue-lai ndia toranoon manai ndia idu-matan, na, talo bee de ana bisa sue-lai neu Manetualain fo ana bei ta mete-nitan? Ta bisa dadi, hetu?
1JO 4:21 Huu Manetualain mesa kana ndia nakonda parenda nae, ita boso sue-lai neu kada Ndia mesa kana, tehuu ita oo muste sue-lai neu ita toranoo kamaheren nara boe.
1JO 5:1 Basa hatahori kamaherek kara rae, Yesus naa, memak Karistus, fo Manetualain nadenun mai ena, ma sira raa, dadi reu Manetualain anan nara ena. Huu hatahori fo mana sue-lai hatahori esa dadi neu amak, ana oo sue-lai amak naa anan boe.
1JO 5:2 Mete ma ita sue-lai neu Manetualain, ma tao tungga Ndia parendan, naa natudu nae, ita oo sue-lai neu Ndia anan nara boe.
1JO 5:3 Dadi mete ma ita sue-lai neu Manetualain, na, ita tao tungga Ndia parendan nara. Ma Ndia parendan, ta berak.
1JO 5:4 Ita mana dadi teu Manetualain anan nara ena, bisa tasenggi laban dae-bafok hihii-nanaun, nahuu ita tamahere neu Ndia.
1JO 5:5 Huu hatahori fo mana nasenggi dae-bafok hihii-nanaun, ndia hatahori fo mana namahere nae, Yesus naa, Manetualain Anan.
1JO 5:6 Sadi kada ei bubuluk. Yesus naa, ta kada hatahori dae-bafok biasa a mesan. Huu Ndia oo Karistus boe fo Manetualain nadenun neni dae-bafok ia mai ena. Neu Ana nae nakalalaꞌok Ndia ue-osan ena, Yohanis saranin pake oe. Basa naa Ana oo mate boe, ma titi heni daan. Dadi nenenin lenak, ta kada oe fo Yohanis sarani nenik neun, tehuu Ndia daan fo titi henik naa oo kanenenik boe. Huu Manetualain Dula-dale heli-helin ndia nafada talo naa, ma Dula-dalek naa, ta nalela pepeko-leleko.
1JO 5:7 Huu hambu dedeꞌak telu ndia dadi sakasii:
1JO 5:8 sira, Manetualain Dula-dalen, oe fo Yohanis sarani nenik neu Yesus, ma Yesus daa heli-helin. Sira telu sara raa, ratudu dedeꞌak esa sama fo laꞌe-neu Yesus.
1JO 5:9 Mete ma hatahori dae-bafok ndia dadi sakasii, na, ita tasiꞌe tamahere neun. Lena-lenak bali, mete ma Manetualain mesa kana ndia dadi sakasii laꞌe-neu Ndia Ana heli-helin. Naa te dedeꞌak kateluk kara iar, ndia Manetualain pake sara ena fo ratudu bukti rae, Yesus naa, ta kada hatahori dae-bafok biasa, tehuu Ndia oo Karistus boe.
1JO 5:10 Hatahori fo mana namahere neu Manetualain Anan naa, sosoa-ndandaan nae, hatahori naa simbo nala Manetualain Dedeꞌa-kokolan laꞌe-neu Kanak naa ena. Tehuu hatahori fo ta mana namahere neu Manetualain, ana sama leo hatahori fo mana kokolak nae, “Manetualain naa, mana pepeko-lelekok!” No dalak naa, ana ta simbok Manetualain Dedeꞌa-kokolan laꞌe-neu Manetualain Ana heli-helin.
1JO 5:11 Manetualain Dedeꞌa-kokolan isi-liin talo ia: Ana fee ita masoi-masodak tetebes ta mana ketuk ena. Ma ita hambu masoi-masodak naa, nahuu ita tamahere neu Ndia Anan.
1JO 5:12 Dadi hatahori fo mana makaesak no Manetualain Anan, hambu masoi-masodak nakandoo no Ndia. Tehuu hatahori fo ta mana makaesak no Manetualain Anan, ta hambu masoi-masodak leo naak.
1JO 5:13 Au surak basa dedeꞌak kara iar fee ei fo mana mamahere neu Manetualain Anan, mita fo ei bubuluk tebe-tebe mae, ei hambu masoi-masodak nakandoo.
1JO 5:14 Mete ma ita hule-haradoi neu Manetualain ma toke hata a mesan tungga Ndia hihii-nanaun, na, ita bisa tamahere Ana namanene hata fo ita tokek naa.
1JO 5:15 Mete ma ita tamahere tebe-tebe talo naa ena, na, ita oo tamahere tebe-tebe boe tae, ita simbo hata fo ita token numa Ndia mai.
1JO 5:16 Mete ma o mete-mita o toranoom tao salak fo ta tao nala sana mate, malole lenak o hule-haradoi moke fo Manetualain tulu-fali toranoom naa, fo ana nasoda. Nai dedeꞌak ia tungga au duduꞌang talo ia: hambu salak fo ta tao hatahori mate, ma hambu salak fo bisa tao hatahori mate. Tehuu au ta adenu hule-haradoi, mete ma hambu salak fo bisa tao hatahori mate.
1JO 5:17 Nai Manetualain matan, basa hata ta kalolek fo ita taok kara raa, sala a mesan. Tehuu ta basa salak kara reni mamates.
1JO 5:18 Hatahori fo mana maokak nai Manetualain dale ena, ta leo-laꞌo tao salak nakandoo ena bali, huu Manetualain Anan nanean. Ma manggarauk baꞌin ta bisa nasenggi sana ena bali.
1JO 5:19 Ita bubuluk tae, ita iar, taoka nai Manetualain dale. Tehuu ita oo bubuluk boe tae, manggarauk baꞌin naena koasa fo koladu basa hatahorir marai dae-bafok ia.
1JO 5:20 Ita bubuluk tae, Manetualain Anan mai ena fo fee ita talela basa dedeꞌak kara iar, mita fo ita bisa talela Manetualain fo tetebes. Hatematak ia ita bisa leo-laꞌo malole to Ndia ena, nahuu ita leo-laꞌo dalek esa to Anan, Yesus Karistus. Huu Ndia naa oo Manetualain tetebes boe. Ma Ana ndia fee hatahori nasoi-nasoda nakandoo.
1JO 5:21 Ana nggara ein, ee! Manea matalolole ei leleo-lalaꞌom. Boso losak hambu mana seti henik fo nggati Manetualain nai ei dalem. Baꞌu kada naa, Yohanis
2JO 1:1 Mama boꞌi sue! Susurak ia numa au mai, Yohanis, fo mana dadi malangga saranik. Au surak susurak ia fee mama fo Manetualain here nalan ena dadi neu Ndia hatahorin. Ma susurak ia oo fee mama anan nara boe. Au sue-lai ei basa ngga, fo dalem mara rakaesa ro basa hata fo ndoos. Basa hatahori laen nara fo mana bubuluk hata fo ndoos, ara oo sue-lai ei boe.
2JO 1:2 Ai sue-lai ei, nahuu hata fo ndoos neni selek kara rai ita dalen, ma neu ko rasoda rakandoo nai ita dale.
2JO 1:3 Au hule-haradoi oke fo Manetualain, ma Ndia Anan, Yesus Karistus, ratudu Sira dale susuen, ma dale kasian neu ita, fo ita bisa leo-laꞌo no lino-lendek ma mole-damek, leo-laꞌo tasue-laik, ma takaesa takandoo to hata fo ndoos sara.
2JO 1:4 Au amahoko alan seli, neu au atonggo ua mama anan nara ketuk, ma mete-ita sara leo-laꞌo no malole, tungga eno-dala masoda ndoos, sama leo Amak Manetualain parenda neu ita ena.
2JO 1:5 Mama boꞌi sue! Hatematak ia au oke fo ita basa ngga leo-laꞌo tasue-laik. Hata fo au okek naa, ta parenda beuk, tehuu au kada fee nesenedak neu parenda fo ita toꞌu memak kana numa makasososan mai ena.
2JO 1:6 Ita bisa tatudu ita susue-lalain, mete ma ita tao tungga Manetualain parendan nara. Numa fai bakahulun mai, Ana parenda ita ena, fo leo-laꞌo tasue-laik esa no esa. Ia ta dedeꞌa beuk, huu ei mamanene mala parenda ia numa fai bakahulun mai ena.
2JO 1:7 Mana pepeko-lelekok noꞌuk ka laꞌok ndule dae-bafok ia ena. Ara fee nenorik rae, Yesus Karistus neni dae-bafok ia mai, tehuu Ndia ta hatahori dae-bafok tetebes. Sira oo mana soa kokola bafa rouk fo laban Karistus boe, ma ta nau simbok rae, Yesus naa, ndia Karistus, fo Manetualain here memak kana numa fai bakahulun mai ena.
2JO 1:8 Manea matalolole fo ita sosota-mamanggun boso mopo henin. Dadi ei muste manggate maue-osa makandoo fo ei bisa hambu basa babaꞌe-babatik, fo Lamatuak helu-bartaa nae feen neu ei nai nusa tetuk do inggu temak.
2JO 1:9 Hatahori fo mana sio laꞌo ela Karistus nenorin, ana ta nakaesa no Manetualain. Tehuu hatahori fo mana toꞌu nahere nenorik naa, ana nakaesa no Manetualain, ma Anan, Yesus Karistus.
2JO 1:10 Mete ma hambu hatahorir mai fee nenorik hata fo ta ndoos laꞌe-neu Karistus, na, boso simbok kana nai ei umam, ma boso tao matak neun.
2JO 1:11 Huu mete ma ei tao matak neun, na, ei haꞌi mala babaꞌek nai ndia ue-osa manggaraun naa ena.
2JO 1:12 Bei hambu dedeꞌak noꞌuk ka fo au hii alan seli afada ei, tehuu malole lenak au hae surak kasa nesik susurak. Huu ta dook ka bali au ae mai kokolak memak ua ei fo ita tebe-tebe bisa tamahoko sama-sama.
2JO 1:13 Manetualain oo here nala mama kaꞌa inan boe. Ndia anan nara haitua hara masoda neulauk soa-neu mama sara rai naa. Baꞌu kada naa. Hara masodak numa au mai, Yohanis
3JO 1:1 Toranoo Gayus fo au suen tebe-tebe. Hara masodak numa au mai, Yohanis, mana dadi malangga saranik.
3JO 1:2 Au oke-hule fo Lamatuak nanea o, mita fo o ao-inam sodak, ma o dalem sofek no mole-damek.
3JO 1:3 Hambu toranook ketuk mai tui au rae, o tungga makandoo Manetualain eno-dala masoda ndoon. Au amanene ala naa, boe ma au daleng namahoko sudi selik kana.
3JO 1:4 Au amahoko lenak bali neu amanene rae, au anang nggara leo-laꞌo tungga eno-dala ndoos.
3JO 1:5 Toranoo susuek! O makalalaꞌok Manetualain ue-osan no neulauk ena, neu o simbok no neulauk toranook kara fo mana rakalalaꞌok Karistus ue-osan ndule basan. Leo mae o bei ta malela sara oo, tehuu o simbok kasa no neulauk boe.
3JO 1:6 Hatahori mana fali maik kara ena, tui hatahori saranik marai iar rae, o simbok kasa no neulauk ma sue sara. Hatematak ia au oke fo o tulun makandoo hatahori matak leo naak kara, huu naa ndia tao namahoko Manetualain dalen.
3JO 1:7 Ara soa laꞌok ndule basa mamanak fo ranori hatahorir laꞌe-neu Yesus Karistus. Tehuu ara ta simbo doi-souk hata-hata numa hatahori ta kamaherek kara mai.
3JO 1:8 Dadi memak nandaa, mete ma ita ndia muste doi-sou sara. No dalak naa, ita takalalaꞌok Lamatuak ue-osan sama-sama to sara.
3JO 1:9 Fai bakahulun au haitua susurak ena fee saranik manai o mamanam, tehuu Diotrefes soꞌuk aon sama leo malanggan. Ma ana ta nau nenene au.
3JO 1:10 Dadi mete ma au uni naa neti, neu ko au buka no ledo-ledo laꞌe-neu hata fo ana taok. Huu ana kokolak pepeko-leleko, fo nae nakatutudak ita. Lena-lenak bali, ana timba heni Lamatuak hatahorin nara mana reni naa reu. Basa boe ma ana dunggu-mbau toranook kara marai naar, fo boso simbok hatahorir raa. Mete ma hambu ketuk rae simbok kasa, ana kaꞌi sara. Ma ana bingga kalua heni hatahori mana simbo toranook kara raa ruma saranik kara mai.
3JO 1:11 Toranoo susuek! O muste haꞌi netuduk numa hatahori mana tao hata fo neulauk mai. Boso haꞌi netuduk numa hatahori mana tao hata fo manggarauk mai. Huu Manetualain hatahorin nara ndia hatahori mana tao hata fo neulauk. Tehuu hatahori mana tao hata fo manggarauk, ta nalela Manetualain.
3JO 1:12 Haꞌi netuduk leo Demetrius. Basa hatahorir koan, nahuu ana tungga Manetualain eno-dala masoda ndoon. Au oo koan boe, ma o bubuluk au ta kokola bafa rouk.
3JO 1:13 Bei hambu dedeꞌak laen noꞌun seli bali, fo au ae kokolak ua o, tehuu au ta nau surak kasa nesik susurak.
3JO 1:14 Huu au amahena ta dook ka bali te ita tatonggo, fo ita dua ngga bisa kokolak tasare matak.
3JO 1:15 Baꞌu kada naa dei. Toranook kara marai iar haitua hara masodak. Tulun haitua au hara masodang fee toranoo esa-esak marai naa, esa-esak no naden. Soda-molek, Yohanis
JUD 1:1 Hara masodak numa au mai, Yudas. Au ia, ita Lamatuan Yesus Karistus hatahori neondan. Au oo Yakobis fadin boe. Au surak susurak ia fee basa hatahorir fo Manetualain here nala sara ena. Ana sue sara, ma Yesus Karistus nanea sara nakandoo losa Ana fali mai.
JUD 1:2 Au oke-hule fo Manetualain natudu Ndia dale kasian, ma fee Ndia susue-lalain noꞌun seli neu ei, mita fo ei leo-laꞌo no mole-damek ma lino-lendek.
JUD 1:3 Toranoo susue nggara ein! Fai bakahulun au hii alan seli surak fee ei, basa-basan laꞌe-neu Manetualain tao nasoi-nasoda ita. Tehuu hatematak ia hambu dedeꞌak sou, huu naa de au ameda no nekesetik, nau ta nau au muste surak laen. Manetualain fee ita eno-dala masoda ndoos ena. Ana fee eno-dala masodak naa laꞌe esak ka, ma Ana ta nggati-nggati sana. Ana fee eno-dala masodak naa neu Ndia hatahori kamaheren nara. Dadi hatematak ia au oke fo ei maote tebe-tebe ma mambariik mahere, mita fo hatahori boso soba-soba nggati eno-dala masodak manuma Manetualain mai naa.
JUD 1:4 Huu hambu hatahori hida fee nenorik ro neneek rai ei taladam ena. Sira raa, ta tungga Manetualain eno-dala masoda ndoon, tehuu ara tungga-tungga kada sira ao-mbaa hihiin mesa kasa. Ara rae Lamatuak dale susuen ndia soi dalak fo ara bole tao sadi ndaa talo naa. Naa kokola bafa rouk ena! Sira raa, kokolak laen, tao laen! Ara nau fo ita hae tamanene bali neu ita Manen ma ita Lamatuan Yesus Karistus. Tehuu ei masaneda, sama leo neni surak nai Susura Malalaok nae, Manetualain mesa kana henggenee memak sira huku-dokin numa lele uluk mai ena.
JUD 1:5 Ei bubuluk dedeꞌak noꞌuk ka ena, tehuu au fee nesenedak seluk neu ei fo muste besa-besa. Masaneda tutuik tembo uluk, neu Israꞌel asa kalua numa Masir mai. Leo mae Lamatuak tao nasoi-nasoda hatahori nusak katemak esa, tehuu fai bakahiton Ana oo nakalulutu basa sara, fo ta mana nau ramahere neun boe.
JUD 1:6 Haꞌi netuduk laen laꞌe-neu Manetualain atan manai nusa tetuk do inggu temak. Manetualain fee sara koasa, tehuu neni ukuk. Tehuu ketuk rameda naa bei ta dai, boe ma ara ralai seli sira koasan. Tehuu Manetualain futu-paꞌa sara pake rante fo ta bisa rakamboꞌik, ma oka sara reu mamana makiuk, rahani Faik naa fo Manetualain nae naketu-naladi basa hatahorir dedeꞌan.
JUD 1:7 Ma boso lilii-ndondou kota Sodom no kota Gomora, ma nggorok laen nara mana matia-taik rai naa. Hatahorin nara hii tao manggarauk mata-matak ro hatahori fo ta sira sao toun do sira sao inan. Ara oo hii tao tatao-nonoꞌik bee fo ta no dala-hadak boe, sama leo touk sunggu-soro no touk ma inak sunggu-soro no inak. Tehuu Manetualain nakalulutu basa sara pake aꞌi ena. Tutuik ia, fee nesenedak neu ita, neu ko Manetualain pake aꞌi mbila ta kala matek, fo huku-doki basa manggarauk lalaꞌen.
JUD 1:8 Leo mae talo naa oo, tehuu hatahori mana maso nai ei taladam naa, ara leo-laꞌo ro peko-pakik rakandoo boe. Ma ara pake sira meꞌi-afen dadi neu netehuuk fo tao ranggenggeo aon nara, ma laban sadi ndaa neu hatahori mana toꞌu koasa, ma rakadadaek koasa maloler rai nusa tetuk do inggu temak.
JUD 1:9 Tehuu Mikael ta tao sama leo sira. Ndia naa, mandor soa-neu Manetualain atan nara marai nusa tetuk do inggu temak. Neu Musa bei fo mate, Mikael nareresi no nitur malangga ina-huun, laꞌe-neu Musa ao-mbaa mamaten. Tehuu Mikael ta fee salak neu sana, do nakadadaek kana. Ana kada nafadan nae, “Neu ko Manetualain ndia koladu o, dei fo mameda mitan!”
JUD 1:10 Tehuu hatahori iar ta leo naak. Ara rakadadaek ma rakatitiik basa hata fo ara ta ralela sara. Ara tao hata a mesan tungga kada sira ao-mbaan hihiin, sama leo banda-manur duduꞌa-aꞌafi taak. Huu naa de ara rakalulutu sira ao heli-helin.
JUD 1:11 Besa-besa! Neu ko ara hambu rala sira babaꞌen. Ara tao tungga sama leo Kaen, fo mana nakanisa ndia fadi bonggin. Ara tao tungga sama leo Balaam, fo nae tao hata a mesan, sadi hambu doik. Ara oo tao tungga sama leo Kora boe. Ana nakalulutu, nahuu ana laban Manetualain. No sira manggaraun naa, de neu ko hatahori iar oo lenggo feꞌe numa Manetualain mai boe.
JUD 1:12 Mete ma hatahori iar rakabua ro ei fo masaneda Manetualain susue-lalain, neu ei miꞌa-minu sama-sama, na, ara ta rameda mae ro sira bare-naꞌon. De ei muste besa-besa, ee! Sira iar nok bali batu unuk nai tasi dale fo nakalulutu ofak. Ara oo sama leo sosoꞌa nggeok nai dae madak lain boe, te ta natuda soba udan faa boe na. Ara kada kokolak raloloa bafan, tehuu ta tao hata-hata fo neulauk. Ara nok bali ai huuk fo ta naena sosoak faa boe na. Neu fai neboak, ara ta fee boak esa boe na; naa te neni feꞌa henik losa okan nara ena.
JUD 1:13 Sira ue-osan nara kada rakamamaek ita. Sira iar, sama leo rii moꞌok tufa laꞌo ela hanuk manggenggeok tungga-tungga tasi tatain. Ara oo sama leo nduuk mana lali-lali neu-mai nai lalai boe, mana hambu hukun fo Manetualain tao sara reu mamana makiu-makahatuk esa, de ara ta toda losa doon naa neu.
JUD 1:14 Henok naa, tititi-nonosik kahitun, reken numa Adam mai. Ana nafada memak mandadik hata soa-neu hatahori matak ia. Ana nae, “Ei mete sudik kana. Ita Lamatuan mai no Ndia ata malalaon nara numa nusa tetuk do inggu temak mai. Sira raa noꞌun seli, losa ta bisa reke tala sara bali.
JUD 1:15 Ana mai fo nae naketu-naladi basa hatahorir dedeꞌan. Neu ko Ana natudu basa hatahori esa-esak salan nara lalaꞌen, ma buka nakaholak basa hata fo ta ndaak kara. Ana fee huku-dokik neu hatahori manggarauk kara, nahuu ara kokolak ta malole soa-neun.”
JUD 1:16 Hatahori dae-bafok iar oo ralela kada unggu-remuk ta basa-basa boe. Ara soa rakasasaꞌek salak neu hatahori taa-taa. Ara ta tao matak neu Manetualain hihii-nanaun, ma tungga kada sira ao-mbaan hihiin mesa kasa. Kokolan nara kada rakadedema aok a mesan. Ara soa sangga matak ma haꞌi hatahori dalen, mita fo hambu nanalak tungga kada sira hihiin.
JUD 1:17 Toranoo susue nggara ein! Boso lilii-ndondou ita Lamatuan Yesus Karistus hara hehelun neu nedenun nara fo rafada memak reu ei ena rae, mete ma sangga losa dae-bafok fai mateꞌen, na, mana makatitiik kara sou mai. Ara hii rakadadaek Lamatuak hihii-nanaun, fo tungga kada sira mesa kasa hihiin mana peko-pakik.
JUD 1:19 Hatematak ia, hatahori raa rai ia ena. Ara ndia tusu-hai reu-mai fo tao ei mabingga-baꞌek. Ara bubuluk kada leo-laꞌo tungga hatahori dae-bafok hihiin a mesan, huu Manetualain Dula-dale Malalaon ta nai sira dalen dale.
JUD 1:20 Tehuu toranoo susue nggara ein! Ei muste mambaririik ei masodam neu ei nemehehere malalaom fanderen lain. Fee Dula-dale Malalaok koasa ei aom mara, neu faik fo ei hule-haradoi.
JUD 1:21 Masanenedak, Manetualain sue nalan seli neu ei. De boso lilii-ndondou Ndia susue-lalain naa, no dalak manea ei aom. Ei muste makatataka mahani ita Lamatuan Yesus Karistus natudu dale kasian fo fee ei masoda makandoo mia Manetualain.
JUD 1:22 Ei muste matudu dale kasian neu hatahori fo dale mapanggek.
JUD 1:23 Ei muste tulun neu basa hatahorir mana parluu hambu masoi-masodak, sama leo ei leꞌa falik hatahori numa aꞌi dale mai. Hambu hatahori laen bali, fo ei muste matudu dale susuem neu sara. Besa-besa, ee! Leo mae ei mameda kasian neu sara, tehuu ei oo muste nunute neu manggenggeon nara boe, sama leo hatahori nunute badu manggenggeo kabook.
JUD 1:24 Hatematak ia ita soꞌuk kokoa-kikiok neu Manetualain! Huu Ana bisa nanea ei, fo ei boso tuda. Ma Ana ndia bisa nuni noo ei, fo mambariik nai Lamatuak matan, huu Ana ndia tao ei dadi lolo-laok, ma ta manggenggeok bali. Ei mai mia dalem mbena sau-sau, huu Ndia ta neni babanggak sudi selik kana!
JUD 1:25 Kada Manetualain mesa kana, ndia dadi Lamatuak tetebes. Kada Ndia mesa kana ndia tao nasoi-nasoda ita! Boe ma nesik ita Lamatuan Yesus Karistus, Manetualain tao nasoi-nasoda ita. De basa hada-horomatak lalaꞌen feen neun. Basa ta neni babanggak lalaꞌen, Ndia enan. Ndia koasan, moꞌon seli. Ma Ndia haak parendan, hambun numa lele uluk mai, ma hatematak ia, losa doon naa neu. Tebe! Ndian ena! Numa au mai, Yudas
REV 1:1 Hara masodak numa au mai, Yohanis, fo Yesus Karistus hatahori neondan. Nai susurak ia dale, au surak laꞌe-neu hata fo neu ko ana mori-dadi. Au bubuluk dedeꞌak kara iar, talo ia: Manetualain mesa kana ndia buka nafada memak neu Yesus Karistus. Boe ma Manetualain nadenu Yesus fo nafada neu Manetualain hatahori neondan nara. Basa de Yesus nadenu atan esa numa nusa tetuk do inggu temak mai, fo neu buka natudu basa dedeꞌak kara iar, mita fo au surak memak kasa. Ta dook ka te basa dedeꞌak kara iar neu ko ara dadi. De ei muste nenene matalolole Manetualain Dedeꞌa-kokolan fo Yesus nafadak kara iar ena.
REV 1:3 Basa hatahorir fo mana lees susurak ia losa hatahorir bisa ramanenen, na, ara raua ralan seli. Ma hatahori fo mana ramanene susurak isin, ma tao tungga hara hehelun nara, ara oo raua boe. Te fain deka-deka nae mai ena na!
REV 1:4 Hara masodak numa au mai soa-neu Lamatuak sarani bubuak kahitun nara marai profensi Asia. Au oke-hule fo Manetualain natudu dale susuen fo ei bisa leo-laꞌo no mole-damek ma lino-lendek. Huu Manetualain naa hambu memak kana numa lele uluk mai. Ana nasoda hatematak ia, ma neu ko Ana nasoda losa doon naa neu. Au oo oke-hule fo Ndia Dula-dalen natudu dale susuen boe, fo ei bisa leo-laꞌo no mole-damek ma lino-lendek. Au mete-ita Ndia Dula-dalen naa, sama leo hambu dula-dalek hitu fo rasare Manetualain kadera man-parendan.
REV 1:5 Au oo oke-hule boe fo Yesus Karistus natudu Ndia dale susuen, mita fo ei bisa leo-laꞌo no mole-damek ma lino-lendek. Ana soa kokolak no ledo-ledo laꞌe-neu hata fo Manetualain nafada neun. Fai bakahulun Ana mate tebe-tebe, tehuu Manetualain tao nasoda falik kana, mita fo Ana dadi neu hatahori makasososak mana nasoda fali numa mamates mai. Ana oo dadi Malanggan fo mana koladu basa manek kara marai dae-bafok boe. No Yesus sue-lai ita, huu naa de Ana fee daan titi henin soa-neu ita, losa Ana mate. No mamaten naa, Ana soi dalak fo nakamboꞌik ita numa ita sala-singgon koasan mai.
REV 1:6 De Ana soꞌuk nala ita dadi teu Ndia rau-inggun, mita fo ita taue-osa soa-neu Ndia Aman, Manetualain. Yesus Karistus memak ta neni babanggak, ma Ndia koasan ta mana basak. Tebe naa!
REV 1:7 Dadi buka matam mara fo mete matalolole! Hatematak ia Yesus ma Ndia Aman nai nusa tetuk do inggu temak. Tehuu ta dook ka bali Ana konda fali nai sosoꞌak dale. Basa hatahorir marai dae-bafok neu ko mete-ritan. Leo naak oo no hatahorir raa fo fai bakahulun ara mbaun boe. Neu ko basa hatahori nusa-nusak marai dae-bafok ia fale dalen nara ma buꞌi rakarereu, nahuu ara ralelan. Basa iar memak neni henggeneek, ara mori-dadi. Tebe talo naa.
REV 1:8 Manetualain nae, “Au ia, numa Alfa mai losa Omega. Au ia, numa A mai losa Z. Basa-basan mori-dadi numa Au mai, numa makasososan mai losa babasan. Au ia, asoda memak numa lele uluk mai ena. Au asoda hatematak ia. Ma Au neu ko asoda losa doon naa neu. Huu kada Au mesa ngga ndia mana koasa mateꞌen!”
REV 1:9 Ita basa ngga sama-sama tamahere tae, Yesus naa, ita Manen, huu naa de au dadi uu ei toranoom. Hambu hatahori laen nara ramanasa, nahuu ita tungga Yesus. Boe ma ara tao doidoso ita basa ngga. Tehuu Yesus natetea nala ita dalen nara ena, mita fo ita bisa takatataka seku neu. No Au afada hatahorir laꞌe-neu Manetualain Dedeꞌa-kokolan ma fee nenorik laꞌe-neu Yesus ena, huu naa de hambu hatahori ketuk fo ta rakaheik. De hatematak ia ara humu rala au, ma nggari au uni pulu ia mai ena fo naden, Patmos.
REV 1:10 Laꞌe esa, ndaa no fai huhule-haradoik, Manetualain Dula-dalen maso nai au dale. Medak neuk ka, boe ma au amanene harak esa kii-bolu nahere numa au deang. Liin, sama leo toꞌis.
REV 1:11 Harak naa nadenu au nae, “Yohanis! Au ae atudu dedeꞌak esa neu o. Basa hata fo o mete-mitak kara ia, muste surak kasa. Basa naa, o muste haitua sara reni saranik bubua kahituk kara reu, sira: saranik kara marai kota Epesus, kota Smirna, kota Pergamus, kota Tiatira, kota Sardis, kota Filadelfia, ma kota Laodikea.”
REV 1:12 Au amanene ala naa, boe ma au leuk dea fo nau mete see ndia kokolak naa. Tehuu au mete-ita kada lambu tiꞌoek hitu neni netetendek kara rai mamana netutuu lambu fo neni taok numa lilo mbilas mai.
REV 1:13 Ma hambu Hatahori esa nambariik nai lambur raa taladan. Rupan sama leo Hatahori Dae-bafo Isi-isik. Ana pake badu esa, naruk losa ein, ma Ana ndae lafa lilo mbilas esa nai karan.
REV 1:14 Langga bulun, muti ndoos sama leo abas. Matan deꞌen, mbila leo aꞌi.
REV 1:15 Ein, mbila kara-karak, sama leo riti neni hotuk nai aꞌi dale. Haran moꞌok, sama leo tasi nakaruu.
REV 1:16 Ana toꞌu nduuk hitu nai lima konan. Tafa mata duak matande esa, kalua numa bafan mai. Matan nasaꞌa, sama leo ledo nasaꞌa nai fai leledon.
REV 1:17 Neu au mete-ita Hatahori naa, boe ma bara heni au tutik ka leo bali hatahori mana mate ndiꞌak uu ein nara. Tehuu Ana koi au nenik lima konan, de Ana kokolak nae, “Ana nggee! Boso mamataꞌu! Basa-basan mori-dadi numa Au mai, numa makasososan mai losa babasan.
REV 1:18 Fai bakahulun Au mate. Tehuu hatematak ia o mete dei! Au asoda fali ena, ma neu ko Au asoda akandoo losa doon naa neu. Ma Au ndia toꞌu nggoek fo bisa buka mamana hatahori mates, fo tao asoda falik kasa.
REV 1:19 O muste surak basa hata fo o mete-mitak hatematak ia, ma surak basa hata fo neu ko ara mori-dadi.
REV 1:20 Au afada akahuluk sosoa-ndandaan talo ia: lambu lilo kahituk kara raa sosoa-ndandaan, ndia sarani bubua kahituk kara. Ma nduu kahituk kara fo o mete-mita sara rai Au lima konang ia, ndia ata hitu ruma nusa tetuk do inggu temak mai mana reni hara liik numa Manetualain mai soa-neu sarani bubua kahituk kara raa.”
REV 2:1 Basa naa, Hatahori Dae-bafo Isi-isik parenda au nae, “Yohanis. O muste surak susurak esa. Liin talo ia: ‘Soa-neu saranik kara marai kota Epesus: Susurak ia, numa Au mai, ndia Yesus. Au ndia toꞌu nduu kahituk kara nai Au lima konang. Au oo laꞌo ndule lambu lilo mbilas kahituk kara raa boe fo mete esa-esak. Nenene Au kokolang ia.
REV 2:2 Au mete-ita ei leleo-lalaꞌom nai kota Epesus ena nae, ei soa maue-osa fafandek lima-eim mara soa-neu Lamatuak. Mete ma hambu hatahori manggarauk nai ei taladam mara, ei ta mboꞌi lelak soa-neun. Mete ma hambu hatahori mai kedi-ira nae, ndia naa, Lamatuak nedenun, ei soa parisa matalolole ndia leleo-lalaꞌon, fo bubuluk mae, hatahori matak leo naak naa, hatahori dae-bafok mana pepeko-lelekok, do taa. Basa boe ma ei ndundu henin, fo boso mamanene neun.
REV 2:3 Leo mae hatahorir rakasususak ei, nahuu ei mamahere Au, tehuu ei makatataka makandoo, ta makadedeak.
REV 2:4 Tehuu Au mete-ita, ei tuda nai dedeꞌak esa. Fai bakahulun neu ei bei fo mamahere neu Au, ei esa sue esa. Tehuu hatematak ia ei ta tao leo naak ena bali.
REV 2:5 Dadi ei muste masaneda falik fai bakahulun naa dei! Hatematak ia ei doon seli numa tatao-nonoꞌik bakahulun naa mai ena. Huu naa de ei muste hahae leo numa ei salam ia mai, fo masue-laik fali sama leo fai bakahulun. Mete ma taa, na, neu ko Au mai fo haꞌi ala falik lambu lilo mbilas naa numa ei mai.
REV 2:6 Tehuu Au daleng namahoko baꞌu anak, nahuu ei timba heni Nikolai nenorin ena fo ndia ana nunin nara tao tunggan. Au oo timba heni sira edo-poden nara boe.
REV 2:7 Nenene matalolole hata fo Manetualain Dula-dalen nafada neu Ndia saranin nara. Hatahori fo mana nakatataka tungga Au losa ana mate, neu ko Au feen luas, fo ana bole naꞌa ai boak numa ai huuk mana nai Manetualain osin mai. Hatahori fo mana naꞌa ai huuk naa boan, ana hambu masodak tetebes ta mana ketuk.’ ”
REV 2:8 Basa boe ma Hatahori Dae-bafo Isi-isik naa tuti Ndia kokolan nae, “Yohanis, hatematak ia o muste surak susurak laen. Liin talo ia: ‘Soa-neu saranik kara marai kota Smirna: Susurak ia, numa Au mai, ndia Yesus. Basa-basan mori-dadi numa Au mai, numa makasososan mai losa babasan. Fai bakahulun Au mate, tehuu hatematak ia Au asoda fali ena. Dadi nenene Au kokolang ia.
REV 2:9 Au mete-ita ei leleo-lalaꞌo doidosom nai kota Smirna ena. Tungga hatahori memeten, na, eir ia, hatahori mana manggananarok. Naa te tungga Manetualain memeten, na, ei kamasuꞌik kara. Hambu hatahori ketuk manaku aon rae, sira Manetualain hatahorin nara, fo kokolak rakabobook ei nade malolem. Naa te sira raa ta Manetualain hatahorin. Ara sama leo saranik bubuak esa mana kada tungga doꞌo-doꞌo nitur malanggan.
REV 2:10 Dadi nenene matalolole. Neu ko ei bei hambu susa-sonak, tehuu hae mamataꞌu. Sadi ei bubuluk, nitur malanggan sangga humu ei ketuk fo sese ei meni bui dale miu, losa faik salahunu. Ndia dale hihiin fo ei masadea laꞌo ela Au. Leo mae ara rae rakanisa ei, tehuu ei boso lilii Au. Huu hatahori fo mana nakatataka tungga Au losa ana mate, neu ko Au bala ndia seseba-babaen, fo ana nasoda nakandoo sama-sama no Au.
REV 2:11 Nenene matalolole hata fo Manetualain Dula-dalen nafada neu Ndia saranin nara. Hatahori fo mana nakatataka tungga Au losa ana mate, neu ko ana ta doidoso nai tasi aꞌi fo mbilan ta kala matek. No dalak naa, ana ta mate laꞌe kaduan.’ ”
REV 2:12 Boe ma Hatahori Dae-bafo Isi-isik tuti seluk Ndia kokolan bali nae, “Yohanis, hatematak ia o muste surak susurak laen bali. Liin talo ia: ‘Soa-neu saranik kara marai kota Pergamus: Susurak ia, numa Au mai, ndia Yesus. Au ndia toꞌu tafa matandek kamata duak. Nenene Au kokolang ia.
REV 2:13 Au alela ei kotan Pergamus naa ena. Mana toꞌu parenda nai naa, ndia nitur malanggan. Leo mae talo naa oo, ei toꞌu mahere Au nadeng, ma mamahere makandoo neu Au boe. Fai bakahulun Au hatahoring esa numa naa, nade Antipas. Ana soa fee nenorik no tetebes laꞌe-neu Au eno-dala masodang, tehuu ara tao risan. Leo mae talo naa oo, tehuu ei ta laka mae, ta malela Au boe.
REV 2:14 Tehuu Au mete-ita, ei tuda huu matak esa do dua. Hambu hatahori hida numa ei mai, soa tungga Balaam nenorin. Fai bakahulun Balaam nakabubusak Balak fo fufudi-hohodo hatahori Israel asa, losa ara lena-langga Manetualain hihii-nanaun. Ana fufudi-hohodo sara fo tungga reu songgo-tanggu, ma raꞌa nanaꞌa sosonggok, ma tao sala ro hatahori fo ta sira sao toun do sira sao inan.
REV 2:15 Hambu hatahori hida numa ei mai oo, tungga Nikolai nenorin boe.
REV 2:16 Dadi ei muste hahae numa ei salam mara mai. Mete ma taa, na, ta dook ka te Au mai nggafu fee ei pake dedeꞌa-kokola matandek, fo nok bali tati pake tafa.
REV 2:17 Nenene matalolole hata fo Manetualain Dula-dalen nafada neu Ndia saranin nara. Hatahori fo mana nakatataka tungga Au losa ana mate, neu ko Au feen naꞌa roti manna fo neni nembedak no malole nai nusa tetuk do inggu temak. Neu ko Au oo feen batu mutik esa fo neni surak ndia nade beun nai lain boe. Kada ndia mesa kana bubuluk nadek naa, tehuu hatahori laen ta bubuluk.’ ”
REV 2:18 Basa de Hatahori Dae-bafo Isi-isik tuti seluk Ndia kokolan bali nae, “Yohanis, hatematak ia o muste surak susurak laen bali. Liin talo ia: ‘Soa-neu saranik kara marai kota Tiatira: Susurak ia, numa Au mai, Yesus, fo Manetualain Anan! Au mata deꞌeng mbila leo aꞌi, ma Au eing oo mbila kara-karak sama leo riti neni hotuk nai aꞌi dale boe. Nenene Au kokolang ia.
REV 2:19 Au mete-ita ei leleo-lalaꞌom mara ena. Ei sue-lai tebe-tebe neu Au ma nemeherem mara maherek neu Au. Ei tungga makandoo Au parendang fo maono-lalau hatahori. Leo mae hatahori tao doidoso ei oo, ei makatataka makandoo boe. Au oo bubuluk boe ae, hatematak ia ei maue-osa mahere lenak bali soa-neu Au.
REV 2:20 Tehuu ei tuda huu matak esa: ei simbo no malole inak Isabeel naa, fo mana nakadedemak aon nae, ndia naa, Manetualain mana toꞌu dedeꞌan. De ei soi lelak feen fo ana fee nenorik sala Au hatahoring nggara. Huu ndia nenorin mana puta-patak naa, losa Au hatahoring nggara tungga laꞌok sala ro hatahori fo ta sira sao toun do sira sao inan, ma raꞌa nanaꞌa sosonggok ena.
REV 2:21 Au kaꞌi-ore inak naa laꞌi-laꞌik ka ena, mita fo ana laꞌo ela salak naa. Tehuu ana ta nau.
REV 2:22 Dadi mete matalolole. Hatematak ia, Au aketu-aladi ena fo hukun ana no hedis esa, losa ana ta bisa laꞌo ela mamana susunggun. Leo naak oo no basa hatahorir mana hohongge roon. Mete ma ara ta laꞌo ela ina manggarauk naa, ta dook ka te Au oo hukun asa boe.
REV 2:23 Neu ko Au hala isa ina manggarauk naa anan nara. No dalak naa, basa ei mana kamaherek kara malela mae, Au bubuluk hatahori dae-bafok dale ikon nara. Ma neu ko Au bala ei tungga ei tatao-nonoꞌim mara.
REV 2:24 Tehuu ei laen nara marai Tiatira naa, ta tungga inak naa nenori manggaraun naa. Ei timba heni nenori nemeninok fo ara rae, ‘nitu malela makiun’. Huu naa de Au ta parluu kaꞌi-ore ei bali,
REV 2:25 sadi ei toꞌu mahere ei nemeheherem losa Au fali mai.
REV 2:26 Hatahari fo mana nakatataka tungga Au losa ana mate, neu ko Au feen koasa. Koasa naa, koasa moꞌok sama leo Au hambuk numa Au Amang mai fo parenda basa hatahori nusa-nusak kara marai dae-bafok ia no lima besik. Mete ma hambu ketuk laban ndia, neu ko ana nakalulutu sara, sama leo hatahori nafanggi ure dae. Neu ko Au oo fee ei nduu mansai boe.
REV 2:29 Nenene matalolole hata fo Manetualain Dula-dalen nafada neu saranin nara.’ ”
REV 3:1 Boe ma Hatahori Dae-bafo Isi-isik tuti seluk Ndia kokolan bali no au nae, “Yohanis, hatematak ia o muste surak susurak laen bali. Liin talo ia: ‘Soa-neu saranik kara marai kota Sardis: Susurak ia, numa Au mai, ndia Yesus. Manetualain Dula-dalen nai Au dale. Ma Dula-dalek naa naena boboak hitu. Au oo ndia toꞌu nduuk hitu nai Au limang boe. Nenene Au kokolang ia. Au mete-ita ei ue-osam mara nai Sardis ena. Hambu hatahorir rae, ei leo-laꞌo tungga Au hihii-nanaung tebe-tebe. Naa te ei sama leo, ta maena masodak.
REV 3:2 De mambadeik leo! Tao tamba matea ei nemeheherem fo mana sangga mopok naa ena. Au parisa basa hata fo ei tao malak naa ena, tehuu ta hambu esa ndaa boe na nai Manetualain matan.
REV 3:3 Boso lilii-ndondou basa nenori ndoos fo ei mamanenen ena, ma simbok malan numa fai bakahulun mai. Tungga tebe-tebe Manetualain hihii-nanaun, ma laꞌo ela ei salam mara fo tungga falik kana. Mete ma ei ta mambadeik lai-lai fo tao talo naa, medak neu te Au mai sama leo naꞌo manu-meo, fo ei ta meda mala sana.
REV 3:4 Tehuu bei hambu ketuk numa ei marai Sardis mai, leo-laꞌo no ndoos, sama leo hatahori ta tao nanggenggeo bua-loꞌan. Huu sira leleo-lalaꞌon nara ndoos, de neu ko ara randaa laꞌok sama-sama ro Au pake bua-loꞌa mutik.
REV 3:5 Hatahori fo mana nakatataka tungga Au losa ana mate, neu ko ana oo pake bua-loꞌa mutik boe. Au ta koka heni ndia naden numa susurak fo mana surak basa hatahori naden nara, fo neu ko hambu masodak seku neu ro Manetualain. Neu ko Au oo manaku ndia nai Au Amang matan ma atan nara marai nusa tetuk do inggu temak boe ae, ndia naa, Au hatahoring.
REV 3:6 Nenene matalolole hata fo Manetualain Dula-dalen nafada neu saranin nara.’ ”
REV 3:7 Basa boe ma Hatahori Dae-bafo Isi-isik kokolak nakandoo bali nae, “Yohanis, hatematak ia o muste surak susurak laen bali. Liin talo ia: ‘Soa-neu saranik kara marai kota Filadelfia: Susurak ia, numa Au mai, ndia Yesus. Au ia, Malalaok ma Ndoos. Au ndia toꞌu mane Dauk nggoen. Mete ma Au soi lelesu, na, ta hambu esa boe na bisa kenan. Mete ma Au kenan, na, ta hambu esa boe na bisa soin.
REV 3:8 Au bubuluk basa hata fo ei tao malak kara raa ena. Au oo bubuluk, ei leleꞌa-nonorem mara kada baꞌu anak. Leo mae talo naa oo, tehuu ei ta laka mae ta malela Au, ma ei tungga makandoo Au nenoring boe. Masaneda matalolole, te Au soi lelesu fee ei ena, de ta hambu esa boe na bisa kenan.
REV 3:9 Nenene matalolole! Huu hambu hatahori ketuk kokolak bafa rouk rae sira iar, tetebes Manetualain hatahorin. Naa te sira raa, mana pepeko-lelekok fo tungga doꞌo-doꞌo nitur malanggan. Tehuu neu ko ei mete a leo! Au tao sara losa mai sendek luu-langgan nara rai ei matam, ma manaku rae, memak Au sue-lai ei.
REV 3:10 Huu ei tungga Au parendang ena fo makatataka tungga makandoo neu Au, de neu ko Au anea atalolole ei numa doidosok fo Manetualain nae haituan mai fo fora basa hatahorir marai dae-bafok ia.
REV 3:11 Ta dook ka te Au mai ena. De toꞌu maherek Au nenoring fo ei simbo malan numa fai bakahulun mai ena. Boso losak hambu ketuk fonda rala ei seseba-babaen fo Manetualain nae feen neu ei.
REV 3:12 Hatahori fo mana nakatataka tungga Au losa ana mate, neu ko ana leo taa-taa no Manetualain, sama leo dii inak neni sele nisak nai Manetualain Uman. Neu ko Au surak Au Lamatuang naden, ma Lamatuak kotan naden neu hatahori naa aon. Kota naa raseseik kana rae, ‘Yerusalem Beuk’, fo neu ko Manetualain nakondan numa nusa tetuk do inggu temak mai. Ma Au oo surak Au nade beung neu hatahori naa aon boe.
REV 3:13 Nenene matalolole hata fo Manetualain Dula-dalen nafada neu Ndia saranin nara.’ ”
REV 3:14 Boe ma Hatahori Dae-bafo Isi-isik tuti Ndia kokolan bali nae, “Yohanis, hatematak ia o muste surak susurak mateꞌen. Liin talo ia: ‘Soa-neu saranik kara marai kota Laodikea: Susurak ia, numa Au mai, Yesus, fo hatahori roken rae, ‘Mana Tetebes’. Au ia, soa kokolak tebe-tebe Manetualain Dedeꞌa-kokolan. Ma basa-basan fo Manetualain aduk kara ena, mori-dadi numa Au mai.
REV 3:15 Au mete-ita ei tao hata nai Laodikea naa ena. Tehuu eir ia, talo bee? Katobik, taa; makasufuk oo taa boe. Mete ma katobik, na, katobi ndoos! Mete ma makasufuk, na, makasufu ndoos!
REV 3:16 Huu ei dalem mara batik kara, Au ae asapura heni ei numa Au bafang mai ena, sama leo hatahori rasapura heni amben.
REV 3:17 Ei kokolak koa ao mae, ‘Air ia, hatahori kamasuꞌik. Ai leo-laꞌo malole, ta parluu hata-hata bali!’ Naa te ei dalem makatemak ena, losa ei ta bubuluk bee ndia malole. Huu naa de ei dadi sama leo hatahori manggananarok ma makaholak kara ena.
REV 3:18 De malole lenak, ei mai hasa mala lilo mbila isi-isik numa Au mai, mita fo ei dadi miu hatahori kamasuꞌik tetebes. Ma hasa mala bua-loꞌa mutik fo mbambalu neu ei makaholam. Ma hasa mala modo matak fo rose neu ei matam, mita fo ei mete-mita masafali no manggaledok.
REV 3:19 Mete ma hatahori fo Au suen tao salak, na, Au kaꞌi-ore ma hukun asa, mita fo ara dadi neulauk. De ei muste tao matetu ei dalem mara, fo ei tungga Au no dale mbenak tebe-tebe.
REV 3:20 Nenene matalolole, huu Au ambariik nai lelesu bafan ena, ma Au anggou laꞌi-laꞌik ka ena fo ae maso dale uu. Mete ma hambu hatahori namanene Au harang, boe ma ana mai soi lelesu, na, neu ko Au maso dale uu, fo ai manggatuuk miꞌa sama-sama.
REV 3:21 Hatahori fo mana nakatataka tungga Au losa ana mate, neu ko Au feen haak fo nanggatuuk parenda sama-sama no Au. Au oo akatataka tungga Au Amang, huu naa de hatematak ia Au anggatuuk parenda sama-sama uan boe.
REV 3:22 Nenene matalolole hata fo Manetualain Dula-dalen nafada neu Ndia saranin nara.’ ”
REV 4:1 Hatahori Dae-bafo Isi-isik kokolak nateꞌe Ndia hara hehelun fee sarani bubua kahituk kara, boe ma Manetualain natudu fee au matak laen bali. Medak neu ma, au mete-ita lelesu esa neni soik nai nusa tetuk do inggu temak. Boe ma au amanene seluk hatahori fo hara maheren nok bali toꞌis nae, “Mai! Hene ia lain mai leo, fo Au ae atudu o basa hata fo neu ko mori-dadi.”
REV 4:2 Faik naa oo, Manetualain Dula-dalen soꞌuk neni au uni nusa tetuk do inggu temak uu boe. Medak neu ma, au mete-ita kadera man-parenda esa, ma hambu esa nanggatuuk nai lain.
REV 4:3 Saꞌan momodok ma mbilas sama leo batu manggadilak mabelir fo ara seseik kana rae, yaspis ma sardius. Hambu elus esa oo eko-feo kadera man-parenda naa boe. Saꞌan momodok sama leo batu manggadilak samrud.
REV 4:4 Nai mamanak naa oo, hambu kadera man-parenda anak dua hulu haa boe. Ara eko-feo kadera man-parenda manai talada heon naa. Hambu mane leo dua hulu haa ranggatuuk rai kaderar raa. Basa sara pake bua-loꞌa mutik, ma pake solangga man-parenda numa lilo mbilas mai.
REV 4:5 Hambu ndelas sara ranggahadok ratuti-ranatok ruma kadera man-parenda mana nai talada heon naa mai, ma lalai nasapaparak ruun nara moꞌon seli ratuti-ranatok. Hambu aꞌi mbele hitu oo, mbila nai kadera man-parenda naa matan boe. Sira raa, sama leo Manetualain Dula-dalen fo mana naena boboak hitu.
REV 4:6 Nai kadera man-parenda naa matan, au mete-ita nok bali hambu tasi fo oen neu ndoos sama leo titiro. Boe ma au mete-ita horis ta hohoꞌak haa eko-feo kadera naa. Ao-inan nara dea no mata sofek no mata deꞌek. Horis sara raa, sira raono-lalau Manetualain.
REV 4:7 Horis kaesan naa, matan sama leo singa. Nomer kaduan, matan sama leo sapi mane. Nomer katelun, matan sama leo hatahori dae-bafok. Ma nomer kahaan, matan sama leo mbui marambua moꞌok lambu.
REV 4:8 Horis kahaak kara raa, esa-esak naena lidak nee. Nai lidak kara raa dean ma dalen oo sofek no mata deꞌek boe. Hatu-leledon ara soda-helo ta ramaketu rae, “Ai koa-kio Manetualain! Ai makadedemak ai Lamatuan naden! Manetualain naa, malalao ndoos! Manetualain naa, mana naena koasa ta neni babanggak. Manetualain mana nasoda numa lele uluk mai. Manetualain mana nasoda hatematak ia. Ma Manetualain mana nasoda losa doon naa neu!”
REV 4:9 No soda-helo talo naa, ara koa-kio ma fee hada-horomatak neu Manetualain, ma roke makasi neun, nahuu Ana ndia mana nanggatuuk nai kadera man-parenda naa lain, ma Ndia mana masodak losa doon naa neu. Neu ara soda-helo,
REV 4:10 mane leo kadua hulu haak kara raa oo, sendek luu-langgan nara reu Manetualain matan fo mana manggatuuk nai kadera man-parenda naa lain boe. Ara buka heni sira solangga man-parendan, de tao sara reu kadera man-parenda matan fo rakaluku-rakatele neu Ndia mana masodak losa doon naa neu. Boe ma ara koa-kio neun rae,
REV 4:11 “Oo, Manetualain! Ai koa-kio Manetualain! Ai makadedemak Manetualain naden. Manetualain ia, ndia naena haak parenda ai. Lamatuak ia, ai Manetualain! Manetualain ndia nandaa simbok ai kokoa-kikion. Manetualain ndia memak muste simbok ai hada-horomatan. Huu Manetualain mana maena koasa mateꞌen. Ma Manetualain ta neni babanggak mateꞌen. Manetualain ndia adu basa-basan. Manetualain ndia fee masodak neu basa-basan. Basa mana dadik kara, ara dadi, nahuu Manetualain ndia adu sara ena. Basa horis sara lalaꞌen, hambu ani hahaek, nahuu Manetualain ndia baꞌe fee sara ena.”
REV 5:1 Boe ma au mete-ita seluk Ndia, mana nanggatuuk nai kadera man-parenda naa. Ana toꞌu lululuk esa nai lima konan. Lululuk naa, dea ma mata sofek no susura deꞌek. Ma ara segel risan ena nai mamanak hitu.
REV 5:2 De au mete-ita ata ta hohoꞌak ndoos esa numa nusa tetuk do inggu temak mai. Ana natane no haran nahere nae, “See ndia naena haak fo bisa buka segel ma lees susurak naa?”
REV 5:3 Ana natane talo naa, tehuu ara ta hambu hatahori esa boe na ndia naena haak fo bisa buka susura neni luluk naa ma lees isin. Nai nusa tetuk do inggu temak, ma nai dae-inak, ta hambu esa boe na ndia naena haak. Nai hatahori mates mamanan oo, ta hambu boe.
REV 5:4 Mete-ita talo naa, boe ma au buꞌi akarereu, nahuu ta hambu hatahori esa boe na naena haak fo bisa buka susura neni luluk naa ma lees isin.
REV 5:5 Basa boe ma esa numa mane leo kadua hulu haak kara raa mai, kokolak no au nae, “Weeh, kaꞌa! Boso buꞌi. Huu hambu mane Dauk tititi-nonosin esa ta neni babanggak, fo ara roken rae, ‘Singa numa leo Yahuda mai’. Ana rua-mbembesi nakalulutu basa manggarauk lalaꞌen ena. De Ana ndia naena haak fo bisa buka segel ma lees susurak naa isin.”
REV 5:6 Amanene talo naa, boe ma au mete-ita Bibi Lombo Ana esa nambariik numa horis ta hohoꞌak kahaak kara raa talada heon, ma mane leo kadua hulu haak kara raa fo ranggatuuk eko-feo kadera man-parenda naa. Bibi Lombo Ana naa, nok bali neni hala nitak ena. Ndia susuran hitu, ma matan oo hitu boe. Ndia mata deꞌe hitun nara raa, sama leo Ndia Dula-dalen mana naena boboak hitu, Ana fee sara ndule basa dae-bafok ia ena.
REV 5:7 Basa de au mete-ita Bibi Lombo Ana naa, laꞌok neni Ndia mana manggatuuk nai kadera man-parenda naa neu, de ana haꞌi nala susura neni luluk naa numa lima konan mai.
REV 5:8 Neu Bibi Lombo Ana naa haꞌi nalan, boe ma horis ta hohoꞌak kahaak kara raa, ma mane leo kadua hulu haak kara raa, sendek luu-langgan nara fo rakaluku-rakatele reu matan. Sira esa-esak toꞌu bua kaliik, nok bali sasando, ma manggo lilo mbilas esa. Manggo naa neni isik no rani neni hotuk fo tao masuk kaboo menik. Ai daa kaboo menik naa, ndia Manetualain hatahorin nara huhule-haradoin.
REV 5:9 Boe ma basa sara soda-helo sosoda beuk esa rae: “Bibi Lombo Ana ia, ndia nandaa simbo susurak ia. Bibi Lombo Ana ia, ndia naena haak fo bisa buka ndia segel. Te ara hala risan ena. Basa de Manetualain pake Bibi Lombo Ana daan, fo tefa-soi nala hatahori dae-bafok numa basa leor ma hatahori nusak kara mai, mita fo sira ketuk bisa dadi Manetualain hatahorin. No dalak naa, hatahori dae-bafok numa basa dedeꞌak ma nusak mai, bisa dadi reu Manetualain nufanelun.
REV 5:10 Bibi Lombo Ana ia, nakabubua nala basa sara ena, dadi reu mamana parenda-koasa esa. Bibi Lombo Ana ia, here nala sara ena, dadi reu Manetualain hatahori mana maue-osan nara. Neu ko ara toꞌu parenda nai dae-bafok. Neu ko ara raue-osa fee Manetualain nai dae-inak.”
REV 5:11 Basa naa, au botik matang, de au amanene hara moꞌok esa. Ma au mete-ita horis ta hohoꞌak kahaak kara raa ma mane leo kadua hulu haak kara raa, tamba ro Manetualain atan nara ruma nusa tetuk do inggu temak mai. Atar raa noꞌun nara, losa kefi-kefik kara.
REV 5:12 Basa sara soda-helo ro haran rahere rae, “Ai makadedemak Bibi Lombo Ana fo neni hala nisak naa, nahuu Ana ndia nandaa simbok ita kokoa-kikion! Ndia koasan naa, moꞌon seli. Ndia hata-heton nara raa, noꞌun seli. Ndia duduꞌa-aꞌafin naa, tetar laꞌe esak kana. Ndia barakain naa, ta neni babanggak ndoos. Ai makadedemak naden. Ai fee hada-horomatak neun. Ai koa-kio neun.”
REV 5:13 Basa naa, au amanene sosodak laen esa bali. Numa basa horis lalaꞌen, nai nusa tetuk do inggu temak, nai lalai, nai dae-inak, ma nai tasi dale, basa sara soꞌuk haran nara fo soda-helo. Numa hatahori mates mamanan mai oo, ara soda-helo tungga boe. Basa sara soda-helo rame-rame rae, “Ai koa-kio neu Manetualain fo mana nanggatuuk nai kadera man-parenda ia. Ai oo makadedemak Bibi Lombo Ana ia boe. Ai fee hada-horomatak neu Sara. Ai makaluku-makatele neu Sara. Huu Ara toꞌu parenda taa-taa seku neu! Ma Sira koasan ta mana basak!”
REV 5:14 Basa boe ma horis ta hohoꞌak kahaak kara raa, raselu taa-taa rae, “Tebe naa! Tebe naa ena!” Boe ma mane leo kadua hulu haak kara raa sendek luu-langgan nara bali fo rakaluku-rakatele neu Manetualain ma Bibi Lombo Ana naa.
REV 6:1 Basa boe ma au mete-ita Bibi Lombo Ana buka segel kaesan numa susura neni luluk naa mai. De au amanene esa numa horis ta hohoꞌak kahaak kara raa mai kii-bolu no haran nahere sama leo lalai nasaparak. Ana parenda nae, “Muu leo!”
REV 6:2 Medak neu ma, au mete-ita ndara mutik esa. Hambu hatahori esa nanggatuuk nai lain. Hatahori naa pake solangga parani musu, nahuu ana nasenggi nakandoo nai netatik dale. Hatematak ia Ana toꞌu kokouk ena, ma kalua fo neu tao nasenggi seluk ndia musun nara bali nai dae-inak.
REV 6:3 Basa boe ma Bibi Lombo Ana naa buka segel nomer kaduan. De au amanene horis ta hohoꞌak nomer kaduan parenda nae, “Muu leo!”
REV 6:4 Basa boe ma ndara mbila kara-karak esa kalua mai. Hatahori fo mana nanggatuuk nai lain, simbo tafa moꞌok esa. Ara fee koasa neun fo neu tao netofak nai dae-inak, mita fo hatahori dae-bafok esa nakanisa esa.
REV 6:5 Basa boe ma Bibi Lombo Ana naa buka segel nomer katelun. De au amanene horis ta hohoꞌak katelun parenda nae, “Muu leo!” Medak neu ma, au mete ita ndara nggeok esa. Hatahori fo mana nanggatuuk nai ndara naa lain, toꞌu tatais esa nai liman fo nae tai nanaꞌak mana sangga basak ena.
REV 6:6 Basa boe ma au amanene nok bali harak esa numa horis ta hohoꞌak kahaak kara raa talada heon mai. Harak naa nafada nae, “Neu ko hambu fai ndoe-laꞌas ta hohoꞌak nai dae-inak. Hatahori nggadin faik esa, dai kada hasa isik mok telu; isi neulauk, na, hambu kada mok esak ka. Tehuu neu fai ndoe-laꞌas naa losa ena, ta bole tao risa ai setun ma ai anggor rai osir dale.”
REV 6:7 Basa boe ma Bibi Lombo Ana naa buka segel nomer kahaan. De au amanene horis ta hohoꞌak kahaan parenda nae, “Muu leo!”
REV 6:8 Medak neu ma, au mete-ita ndara bulu unik mana bandu afuk esa. Hatahori fo mana nanggatuuk nai ndara naa lain, nade ‘Mamates’. Hambu esa oo tungga ndia dean boe, naden, ‘Mamana Hatahori Mates Sara’. De dua sara hambu koasa fo reu rakanisa hatahorir marai dae-inak pake tafa, fai ndoe-laꞌas, hedi-raus, ma banda kakiki-kakaak. Mete ma reke basa hatahori mana matek kara raa, dedesin nara sama leo basa babaꞌek esa numa babaꞌek haa mai numa basa hatahorir marai dae-inak mai.
REV 6:9 Basa boe ma Bibi Lombo Ana naa buka segel nomer kaliman. De au mete-ita hatahorir fo fai bakahulun neni nekenisak kara ena. Samanen nara rai mei tunu-hotuk ndandaan dae. Hatahorir rakanisa sara, nahuu ramahere neu Manetualain, ma tui-bengga Ndia Dedeꞌa-kokolan sudi bee neu.
REV 6:10 Ara kii-bolu rae, “Oo, Manetualain! Ai Lamatuan ta neni babanggak mateꞌen! Ai Lamatuan fo malalaok! Hata fo Manetualain kokolak, na, ai mamahere. Tehuu ai muste mahani losa faik bee bali, dei fo Manetualain naketu-naladi dedeꞌak fo huku-doki hatahorir mana makanisa ai nai dae-inak?”
REV 6:11 Ara ratane basa talo naa, boe ma esa-esak simbo badu muti naruk. Hambu esa nafada sara nae, “Mahani baꞌu anak bali, losa ei dedesim mara dai ena. Huu bei hambu ei toranoom mara fo neu ko hatahorir oo rae rakanisa sara sama leo ei boe.”
REV 6:12 Basa boe ma Bibi Lombo Ana naa buka segel nomer kaneen. Medak neu ma, au mete-ita dae-bafok nanggenggo moꞌon seli. De ledo dadi makiuk sama leo tema nggeok, ma bulan dadi mbila sama leo daak.
REV 6:13 Nduuk kara marai lalai tuda reni dae-inak reu, sama leo ai boa nurak moꞌu henin numa huun mai, huu ani berak.
REV 6:14 Boe ma au mete-ita lalai ndara baꞌen neu dua, fo neni luluk sama leo neneꞌik, losa mopon. Ma basa letek kara ro basa pulur ranggenggo losa mopo heni sara ruma mamanan nara mai.
REV 6:15 Au mete-ita talo naa, boe ma basa hatahorir marai dae-inak, mulai numa mane-manek kara, malangga man-parenda, komedan soldadu, hatahori kamasuꞌik, losa ata-dator mai, basa sara ramataꞌu. Basa de ara ralai reu keke rai luak kara dale, ma batu mbiak kara marai letek kabin.
REV 6:16 Ara radenu letek kara ma batu moꞌo kahuuk kara rae, “Ndefa mai fo tatana mala ai leo! Mafuni mala ai fo Ndia mana manggatuuk nai kadera man-parenda moꞌok naa lain, ta bisa mete-nita ai bali. Ma Bibi Lombo Ana naa ta bisa huku-doki ai bali.
REV 6:17 Awii! Etoboꞌa nala ai ia ena, huu fai sosoek mai ena! Manetualain ma Bibi Lombo Ana naa nau mboꞌa nasan nara neu ai ia ena. Tehuu ta hambu esa boe na bisa sili nalan!”
REV 7:1 Basa naa, au mete-ita Manetualain atan haa ruma nusa tetuk do inggu temak mai. Ara rambariik reu dae-inak buꞌun kahaan nara fo babata anin. De anin ta bisa fuu nai tasi dale, ta bisa fuu nai mada lai, ma ta bisa fuu ai huuk kara.
REV 7:2 Manetualain fee sara koasa ena fo rakalulutu mada lai ma tasi. Basa de au mete-ita ata laen esa bali numa nusa tetuk do inggu temak mai. Ata naa numa mamana ledo totodan mai. Ana neni dededek numa Manetualain mana masodak seku neu mai. Boe ma ana nanggou nahere nafada ata kahaak kara raa nae,
REV 7:3 “Mahani dei! Boso makalulutu mada lai do, tasi do, ai huuk kara. Mahani losa ai dedede basa Manetualain hatahori neondan nara odamatan dei.”
REV 7:4 De ara rafada au rae, ata naa dedede nala Manetualain hatahorin nara ena. Sira dedesin nara, hambu hatahori 144.000 fo maruma basa leo Israꞌel mai. Sira:
REV 7:5 Numa leo Yahuda mai, hambu hatahori 12.000; leo Ruben, hatahori 12.000; leo Gad, hatahori 12.000;
REV 7:6 leo Aser, hatahori 12.000; leo Naftali, hatahori 12.000; leo Manase, hatahori 12.000;
REV 7:7 leo Simeon, hatahori 12.000; leo Lewi, hatahori 12.000; leo Isaskar, hatahori 12.000;
REV 7:8 leo Sebulon, hatahori 12.000; leo Yusuf, hatahori 12.000; ma numa leo Benyamin mai, hatahori 12.000.
REV 7:9 Basa boe ma au mete-ita hatahori dae-bafok noꞌun seli, losa ta bisa reke ala basa sara. Ara ruma basa leor, basa hatahori nusak kara, basa dedeꞌak kara ma basa nusak kara marai dae-inak ia mai. Basa sara rakabubua rasare mbali kadera man-parenda naa, ma Bibi Lombo Ana naa. Ara pake badu mutik ma toꞌu mbua sina doon rai liman nara.
REV 7:10 Boe ma ara soꞌuk kokoa-kikiok rame-rame rae, “Ai koa-kio neu ai Manetualain, fo mana nanggatuuk nai kadera man-parenda ia. Ai oo makadedemak Bibi Lombo Ana ia boe. Sira iar, ndia tao rasoi-rasoda ai. Sira iar, ndia soi eno-dala masodak soa-neu ai.”
REV 7:11 Ara kokolak basa talo naa, boe ma Manetualain atan nara ruma nusa tetuk do inggu temak mai, fo mana rambariik eko-feo kadera man-parendar raa, sendek luu-langgan nara losa idu-matan nara laꞌe daer rasare mbali kadera man-parenda moꞌok naa. Mane leor ma horis kahaak kara raa oo tao talo naa boe. Basa sara rakaluku-rakatele neu Manetualain,
REV 7:12 ma soda-helo rae, “Tebe! Tebe naa! Ai oo koa-kio neu Manetualain boe! Ai oo makadedemak Manetualain naden boe! Manetualain duduꞌa-aꞌafin naa, tetar laꞌe esak kana. Manetualain koasan naa, moꞌon seli. Manetualain barakain naa, ta neni babanggak sudi selik kana. Ai moke makasi neu Manetualain taa-taa. Ai fee hada-horomatak neu Manetualain ta mana ketuk. Tebe! Ndian ena!”
REV 7:13 Ara koa-kio basa talo naa, boe ma esa numa mane leo kadua hulu haak kara raa mai natane au nae, “Hatahori noꞌuk kara fo mana pake badu mutik kara iar, o malela sara, do? Ara ruma bee mai?”
REV 7:14 Tehuu au aselu ae, “Taa, Papa. Au ta alela sara, seer. Papa ndia bubuluk dai lena.” Boe ma ana nafada au nae, “Sira iar, hatahorir fo mana kalua ruma doidoso moꞌok mai ena. Sira iar, ndia pake Bibi Lombo Ana naa daan ena, fo safe ralao sira bua-loꞌan nara, ma tao ramuti ralao sira badun nara.
REV 7:15 Huu naa de ara rambariik reu Manetualain kadera man-parendan matan. Ara raono-lalau Manetualain hatu-leledon nai Uma Huhule-haradoin. Manetualain sama-sama no sara seku neu. Manetualain nanea sara seku neu.
REV 7:16 Neu ko ara ta rameda ndoe-laꞌa bali. Neu ko ara ta rameda dale mada bali. Neu ko ara ta rameda ledo hotu sara bali. Neu ko roun nara ta lofa laꞌe katobik bali.
REV 7:17 Bibi Lombo Ana mana matia-aok no kadera man-parenda naa, neu ko Ana dadi neu sira mana lolon. Neu ko Ana foo neni sara, reu rinu nai oe matak fo mana neni masodak. Neu ko Manetualain oo koka heni sira susa-sonan nara boe, fo ara ta buꞌi ramatani bali.”
REV 8:1 Basa boe ma Bibi Lombo Ana naa buka segel nomer kahitun. Medak neu ma, basa nusa tetuk do inggu temak isin nara, benggenee. Ta hambu esa boe na nahara do nanggariti, fama te losa liꞌu seserik esa.
REV 8:2 Boe ma au mete-ita ata hitu ruma nusa tetuk do inggu temak mai. Ara rambariik rakandoo nai Manetualain matan, rahani a fo raono-lalaun. Sira esa-esak simbo rala toꞌin.
REV 8:3 Basa boe ma au mete-ita ata laen esa bali numa nusa tetuk do inggu temak mai. Ata naa nambariik neu mei naa matan fo ara pake hotu ai daa kaboo menik. Ana toꞌu manggo lilo mbilas esa, ndia ara rasiꞌe paken fo tao ai daa kaboo menik neun. De ara feen ai daa kaboo menik noꞌun seli, fo ana babalik kana no Manetualain hatahorin nara huhule-haradoin. Basa boe ma ana neni manggo lilo mbilas naa sama leo tunu-hotu kaboo menik, fo taon neu mei lilo mbilas naa lain manai kadera man-parenda naa matan.
REV 8:4 Boe ma ana hotu ai daa kaboo menik naa. De boo menin lume losa Manetualain matan sama-sama no basa huhule-haradoik ruma Manetualain hatahorin nara mai.
REV 8:5 Basa naa, ata naa haꞌi nala aꞌi numa mei naa mai, fo tao nasofe manggo lilo mbilas naa. Basa boe ma ana mbia heni manggo naa neni dae-inak mai. Medak neu ma, au mete-ita ndelas nanggahadok ratuti-ranatok kii-konak kana nai dae-inak. Ma lalai nasapaparak ratuti-ranatok, ma dae nanggenggo moꞌon seli.
REV 8:6 De ata kahituk kara raa ruma nusa tetuk do inggu temak mai rahani a fo nau fuu sira toꞌin.
REV 8:7 Neu ata nomer kaesan fuu ndia toꞌin, boe ma uda eis ma aꞌi mana babalik no daak, mboꞌa neni dae-inak mai. Basa naꞌu momodok rai bee a mesan aꞌi naꞌa heni sara. Mete ma ita baꞌe dae-inak neu babaꞌek telu, na, kada babaꞌek esa ndia aꞌi naꞌa henin. Mete ma ita baꞌe basa ai huuk kara marai dae-inak ia neu babaꞌek telu, na, kada babaꞌek esa ndia aꞌi naꞌa henin.
REV 8:8 Neu ata nomer kaduan fuu ndia toꞌin, boe ma hambu buas esa nok bali lete moꞌok mana mbilak, mbesi neni tasi dale neu, losa tasi babaꞌek esa numa babaꞌen telu mai dadi neu daak.
REV 8:9 Boe ma babaꞌek esa numa babaꞌek telu mai numa basa bandar marai tasi dale mai, mate basa sara. Ma babaꞌek esa numa babaꞌek telu mai numa basa ofak kara marai tasi dale oo rakalutu boe.
REV 8:10 Neu ata nomer katelun fuu ndia toꞌin, hambu nduu moꞌok esa tuda numa lalai mai, sama leo aꞌi mbele moꞌo mana mbilak esa. Nduuk naa naden, ‘Malik’. Neu ana tuda, boe ma oe mana nai leer ma oe matak kara, dadi malik. De hatahori mana rinu oe naa, noꞌuk ka mate. Mete ma ita baꞌe basa leer ma oe matak kara rai dae-inak ia neu babaꞌek telu, na, kada babaꞌek esa ndia malik.
REV 8:12 Basa boe ma ata nomer kahaan naa fuu ndia toꞌin. Medak neu ma ledo, bulan, ma nduuk kara dadi neu makiuk, huu hambu fefembak. Dadi ndaa fai leledon, babaꞌek esa numa babaꞌek telu neu fai leledok mai, dadi neu makiuk, nahuu ledo ta nasaꞌa neulauk ena bali. Ma ndaa fai leꞌodaen, babaꞌek esa numa babaꞌek telu neu fai leꞌodaek mai, dadi neu makiu-makahatuk, nahuu bulan ma nduuk kara ta rasaꞌa neulauk ena bali.
REV 8:13 Boe ma au botik matang, de mete-ita mbui marambua moꞌok esa lambu seku nai lalai. Ana kii nae, “Besa-besa, ee! Neu ko sosoe moꞌok daka nala basa hatahorir fo mana leo-laꞌo nai dae-inak. Huu bei ela ata laen telu ruma nusa tetuk do inggu temak mai, bei ta fuu sira toꞌin.”
REV 9:1 Basa boe ma ata nomer kaliman naa fuu ndia toꞌin. De au mete-ita nduuk esa tuda neni dae-inak mai ena. Ara fee nggoek esa neu nduuk naa fo ana soi lelesu bolo doidosok fo ikon taak.
REV 9:2 Ana soi bolok naa lelesun, boe ma aꞌi masu nggeo katek kalua sama leo aꞌi masuk numa aꞌi naꞌa lasi mai. Aꞌi masuk naa kalua mboka-mboka lain neu, losa lalai ma ledo dadi makiuk.
REV 9:3 Boe ma hambu lamak noꞌun seli lambu kalua numa aꞌi masuk naa mai, fo konda reni dae-inak mai. Manetualain fee sara koasa ena sama leo kurak.
REV 9:4 Tehuu Ana fee parenda neu sara fo ta bole rakalulutu dae-inak naꞌun, ai huuk, ma sele-tandek laen nara. Tehuu ara muste tao doidoso basa hatahorir fo ta mana raena Manetualain dededen nai odamatan nara.
REV 9:5 Manetualain fee lelak neu lamak kara raa fo tao doidoso hatahorir raa losa bulak lima, tehuu ta bole rakanisa sara. Kada tao nehedi sara, sama leo kurak kikin.
REV 9:6 Nai bulak lima naa dalen, neu ko hatahorir doidoso ralan seli, losa ara roke mate a leo. Leo mae talo naa oo, tehuu ara ta mate boe.
REV 9:7 Au mete-ita lamak kara raa mata-aon nara sama leo ndara musu. Ara pake solangga parani musu neni taok numa lilo mbilas mai. Mata-aon nara sama leo hatahori dae-bafok.
REV 9:8 Langga bulun nara naruk sama leo inak langga bulun. Ma nisin nara tandek sama leo singa nisin.
REV 9:9 Nok bali ara pake babata tendek numa besi mai, leo bali iꞌak unen. Lidan nara rakamuu moꞌon seli, sama leo soldadu batalion esa ndaran nara ralaik leꞌa kareta musu.
REV 9:10 Ikon nara ta hohoꞌak ma karasok, sama leo kurak rason. Ara hambu koasa fo tao doidoso hatahori pake sira rason, losa bulak lima.
REV 9:11 Lamak kara raa manen, ndia malanggan numa basa ata neni husik nai bolo doidosok fo ikon taan naa mai. Naden nai dedeꞌa Ibrani, Abadon, ma nai dedeꞌa Yunani, Apolion. Sosoa-ndandaan nae, “Mana Makalulutuk”.
REV 9:12 No dalak naa, sosoek makasososak naa, laꞌo seli ena. Tehuu besa-besa, ee! Huu bei hambu sosoek dua bali neu ko ara mai.
REV 9:13 Basa boe ma ata nomer kaneen fuu ndia toꞌin. De au mete-ita mei lilo mbilas mana nasare mbali Manetualain fo ara paken hotu ai daa kaboo menik. Hambu harak esa kalua numa mei naa susuran haa sara mai.
REV 9:14 Harak naa nafada ata naa fo ana bei fo fuu basak ka toꞌin naa nae, “Hambu ata haa neni futuk kara dook ka rai lee moꞌok esa ena, nade lee Efrat. Muu makamboꞌik kasa leo!”
REV 9:15 Boe ma ana neu nakamboꞌik kasa fo ara reu rakanisa hatahori dae-bafok, ndaa no ndia teun, ndia bulan, ndia fain ma ndia liꞌun fo Manetualain naketu memak kana ena. Mete ma ita baꞌe basa hatahori dae-bafok nai dae-inak ia neu babaꞌek telu, na, kada babaꞌek esa ndia mana matek kara.
REV 9:16 Ara rafada au rae, atar raa soldadun fo mana saꞌe ndara musur raa, dedesin nara kefin natun dua.
REV 9:17 De au mete-ita soldadur raa ro sira ndaran nara. Soldadur raa pake babata tendek dulak telu, ndia mbila kara-karak, momodo manggadilak, ma uni balerang. Ndarar raa langgan sama leo singa langgan. Hambu aꞌi, aꞌi masuk ma balerang oo rasapura ruma ndarar raa bafan nara mai,
REV 9:18 fo fee doidosok matak telu nai dae-inak. Doidosok mana kalua numa ndarar raa bafan nara mai rakamate babaꞌek esa numa babaꞌek telu mai numa basa hatahorir marai dae-inak mai.
REV 9:19 Boe ma ndarar raa reu tao doidoso hatahori dae-bafok pake sira bafan ma ikon nara. Nai ndara ikon nara raa, hambu langgak sama leo mengge langgan.
REV 9:20 Tehuu bei hambu hatahori dae-bafok laen nara rai dae-inak, fo ta hambu nekenisak ruma sosoek kara raa mai. Leo mae talo naa oo, tehuu ara ta nau laꞌo ela sira manggaraun nara boe. Ara songgo-tanggu neu nitu nakandoo, ma songgo-tanggu buas sosonggok fo ara taon numa lilo mbilas, lilo fulak, riti, batu ma ai mai. Leo mae buas sara raa, ta mete-rita, ta bisa ramanene ma ta bisa laꞌok, tehuu ara songgo-tanggu sara ta pake hahaek!
REV 9:21 Ara oo ta nau hahae numa sira sala laen nara mai boe, sama leo rakanisa hatahori, pake malela makiuk, laꞌok sala ro hatahori fo ta ndia sao toun do ndia sao inan, ma ramanaꞌo.
REV 10:1 Basa boe ma au mete-ita Manetualain atan ta hohoꞌak esa konda numa nusa tetuk do inggu temak mai. Ndia ao-inan sosoꞌak mboti nalan. Hambu elus oo eko-feo langgan boe. Matan nasaꞌa sama leo ledo, ma ein mbila sama leo aꞌi.
REV 10:2 Ana toꞌu susura kadiꞌi ana neni luluk esa, neni nakambelak ena. Ana nambariik no ei konan nai tasi dale ma ei kiin nai mada lai.
REV 10:3 De ana kii-bolu no haran nahere, sama leo singa aro. Ana kii-bolu basa, boe ma lalai nakaruu bala haran natuti-nanatok laꞌe hitu.
REV 10:4 Neu lalai nakaruu bala basa, boe ma au nau surak sira kokolan ena. Tehuu au amanene harak esa numa nusa tetuk do inggu temak mai nae, “Weeh! O boso mafada hatahorir laꞌe-neu nekeruu kahituk kara raa kokolan, ee! Ta bole surak hata-hata.”
REV 10:5 Boe ma ata mana mambariik no ein esa nai tasi ma ein esa nai mada lai naa, soꞌu botik lima konan neni lalai neu,
REV 10:6 de sumba-soo nae, “Au kokolang ia, memak tetebes! Au sumba-soo pake Manetualain naden, nahuu Ndia mana masodak losa doon naa neu! Ana ndia nakadadadik lalai no dae-inak, ma basa oe-isin lalaꞌen ena. Dadi nenene matalolole! Faik fo ita tahanik naa, sangga losa ena.
REV 10:7 Mete ma Manetualain ata nomer kahitun nau fuu toꞌin ena, na, neu ko Manetualain tao tungga Ndia nanaen, fo lele uluk hatahori bei ta bubuluk kana. Tehuu nanaek naa, Ana nafada neu Ndia mana toꞌu dedeꞌan nara ena fo raono-lalau Ndia. Dadi nenene matalolole, huu au dedeꞌa-kokolang ia, tetebes.”
REV 10:8 Boe ma harak fo au amanenek numa lalai mai naa, kokolak seluk bali no au nae, “Yohanis, o muu leo muni ata mana nambariik eik esa nai tasi dale ma eik esa nai mada lai naa muu. Haꞌi mala susura kadiꞌi ana neni luluk naa, fo neni nekembelak nai ndia liman naa.”
REV 10:9 Basa boe ma au uni ata naa uu, fo oke susura kadiꞌi ana neni luluk naa. De ana nafada au nae, “Haꞌi malan fo muꞌa leo! Nai o bafam mameda makeek sama leo fani oe, tehuu neu ko ana tao nala o taꞌim mameda malik.”
REV 10:10 Ana kokolak basa talo naa, boe ma au simbo ala susura kadiꞌi ana neni luluk naa numa liman mai. De au uꞌan. Nai au bafang dale ameda makeek sama leo fani oe. Tehuu neu au kodo henin, au ameda malik nai au taꞌing dale.
REV 10:11 Boe ma hambu esa nadenu au nae, “O muste muu seluk bali fo mafada memak hata fo Manetualain nae taon nai dae-inak. Mafada laꞌe-neu hata fo neu ko ana dadi neu basa manek kara marai dae-inak ma neu hatahorir ruma basa leor, basa hatahori nusak kara, ma basa dedeꞌak kara mai.”
REV 11:1 Basa boe ma ara soro fee au ai uꞌukuk esa, narun sama leo teteꞌe ai. Boe ma Manetualain parenda au nae, “Yohanis, mambadeik leo fo muu uku Au Uma Huhule-haradoi Ina-huung no mei tunu-hotung nai kota Yerusalem. Ma reke basa hatahorir mana hule-haradoik marai naa.
REV 11:2 Tehuu hae uku Uma Huhule-haradoik naa bebelan, huu mamanak naa neni loo limak soa-neu hatahori nusa-nusak laen nara ena fo ta mana ralela Au. Neu ko ara mai momolo-tatabu tao ranggenggeo Au kotang naa, losa bulak 42 (ndia faik 1.260).
REV 11:3 Neu ko Au adenu Au hatahoring dua rai naa, fo ara dadi reu au mana toꞌu dedeꞌang. Neu ko ara pake bua-loꞌa sususak ma rafada Au hara hehelung, losa faik 1.260 naa basa sara ena.”
REV 11:4 Manetualain mana toꞌu dedeꞌan Sakaria surak memak kana numa lele uluk mai ena, laꞌe-neu mana toꞌu dedeꞌa kaduak kara iar. Ana lole sara pake nggambar ai setun huuk dua ma mamana netetende lambu dua fo mana rambariik rasare Manetualain, fo naena haak parenda basa hatahorir marai dae-bafok.
REV 11:5 Mete ma hambu hatahorir nau rakasosoek Manetualain mana toꞌu dedeꞌa kaduan nara ia, na, neu ko aꞌi kalua numa sira bafan nara mai fo tao nakade basa sira musun nara. No dalak naa, basa hatahorir fo mana nau rakasususak kasa, neu ko mate sara.
REV 11:6 Neu faik fo dua sara dadi reu Manetualain mana toꞌu dedeꞌan nai dae-inak, Ana fee sara koasa fo kena udan. Ana oo fee koasa fo tao oe matak dadi neu daak, ma koasa fo neni sosoek mata-matak nai dae-inak ia, tungga kada sira hihiin nara boe.
REV 11:7 Mete ma sira fain fo rafada Manetualain hara hehelun nara basa ena, na, neu ko banda kakiki-kakaak esa kalua numa bolo doidosok fo ikon taak naa mai. Ana natati laban dua sara, losa nasenggi ma nakanisa sara.
REV 11:8 No dalak naa, dua sara mate numa kota moꞌok fo fai bakahulun hatahorir rakanisa sira Lamatuan numa ai ngganggek. Kota naa, dadi kota manggarauk ena sama leo Sodom ma Masir tembo uluk. Neu ko hatahori nggari heni mana toꞌu dedeꞌak kara raa ao-mbaa mamaten nara reu dalak, losa faik telu seserik. Boe ma hatahorir ruma basa leor, basa hatahori nusak kara, basa dedeꞌak kara, ma basa nusak kara mai ranilu ao-mbaa mamates kaduak kara raa. Ara oo ta fee luas fo ratoi sara boe,
REV 11:10 nahuu ara ramahoko mete-rita hatahori kaduak kara raa mate sara ena. Huu dua sara ndia soa tao babalik basa hatahorir marai dae-inak duduꞌa manggaraun. De ara tao feta rame-rame, ma esa haitua fee esa hadia.
REV 11:11 Tehuu basa faik telu seserik, neu ko Manetualain fee sara ani hahaek, fo ara rasoda fali. Boe ma basa hatahorir fo mana mete-rita sara, dere faku-faku.
REV 11:12 De mana toꞌu dedeꞌa kaduak kara raa neu ko ramanene hara maherek esa numa lalai mai, fo nadenu sara nae, “Wee! Ei dua ngga hene lain ia mai leo!” Boe ma dua sara neni soꞌuk lalai reu no sosoꞌak mboti nala sara. Ara mete-rita talo naa, boe ma musun nara bafa bese mboo.
REV 11:13 Medak neu ma, dae nanggenggo nalan seli. Mete ma ita reke basa umar marai kota, numa uma salahunu mai hambu esa ndia ndefa henin. Ma hambu hatahori rifun hitu mates sara. Hatahori laen ta mana matek kara ramataꞌu ralan seli. Tehuu neu ko ara oo fee hada-horomatak neu Manetualain boe, nahuu Ana ndia toꞌu parenda nai nusa tetuk do inggu temak.
REV 11:14 No dalak naa, sosoek nomer kaduan laꞌo seli ena. Tehuu besa-besa, ee! Sosoek nomer katelun sangga mai ena.
REV 11:15 Basa naa, Manetualain ata nomer kahitun numa nusa tetuk do inggu temak mai fuu ndia toꞌin. Medak neu ma, au amanene harak noꞌun seli ruma nusa tetuk do inggu temak mai rae, “Hatematak ia mana toꞌu parenda nai dae-inak, kada Manetualain no Karistus, ndia Manetualain Hatahorin fo Ana here nalan numa lele uluk mai ena. Neu ko Manetualain toꞌu parenda-koasa nakandoo sama leo Manek, losa doon naa neu.”
REV 11:16 Mane leo kadua hulu haak kara raa fo mana ranggatuuk rai kadera man-parendar marai Manetualain matan naa, ara oo ramanene harak kara raa boe. Boe ma ara sendek luu-langgan nara losa idu-matan nara laꞌe daer, fo koa-kio neu Manetualain,
REV 11:17 ma soda-helo rae, “Oo, Manetualain! Ai Lamatuan! Manetualain ndia parenda basa-basan. Manetualain ndia toꞌu koasa basa-basan. Manetualain ndia nasoda numa lele uluk mai. Manetualain ndia nasoda hatematak ia. Ai moke makasi neu Manetualain, nahuu Manetualain pake koasa moꞌon ena, fo toꞌu parenda nai dae-inak.
REV 11:18 Tehuu hatahori nusa-nusak kara ramanasa, huu ara ta nau tungga Manetualain. Tehuu hatematak ia Manetualain oo namanasa boe, nahuu ara ta nau ralela sana. Hatematak ia fain losa ena, fo Manetualain huku-doki hatahorir fo ta mana tao matak neu Ndia. Hatematak ia fain losa ena, fo Manetualain nakalulutu hatahori fo mana nakalulutu hatahori laen. Hatematak ia fain losa ena, fo Manetualain parisa hatahori mates sara dedeꞌan. Hatematak ia fain losa ena, fo Manetualain bala hatahori neondan nara mbuse titin. Ndia, Manetualain mana toꞌu dedeꞌan nara, ma Manetualain hatahorin nara, moꞌo-kadiꞌik, lasi-murik. Manetualain bala basa hatahorir, fo mana fee hada-horomatak neu naden.”
REV 11:19 Basa naa, au mete-ita nai nusa tetuk do inggu temak, Manetualain Uma Huhule-haradoin lelesun neni soik. Boe ma au mete-ita peti fo fai bakahulun ara paken mbeda Manetualain parendan neni surak nai batu lain. Boe ma ndelas sara tee reu-mai, lalai nasapaparak natuti-nanatok, dae-inak nanggenggo, ma uda eis batu mambera tuda numa lalai mai.
REV 12:1 Basa naa, medak neu ma au mete-ita tanda ta hohoꞌak esa toda numa lalai mai, fo hatahori dae-bafok bei ta mete-nitan: hambu inak esa, ao-inan neni mbotik no ledo. Ana tabu ein neu bulan lain. Ana pake solangga manek neni heti nduuk salahunu dua.
REV 12:2 Inak naa kairuk, ma ana kada buꞌi, huu taꞌin nambeta nae bonggi.
REV 12:3 Medak neu ma, au mete-ita seluk tanda ta hohoꞌak laen esa toda numa lalai mai. Hambu mengge buta mbilas moꞌok esa. Langgan hitu, ma susuran salahunu. Ana pake solangga manek hitu nai langga kahitun nara.
REV 12:4 Ana pake ikon fo sasaa namopo heni babaꞌek esa numa basa nduuk kara marai lalai mai. Elak kara kada babaꞌek dua. Basa de ana toko heni nduuk kara raa reni dae-bafok mai. Boe ma ana neu nambariik nasare inak naa, fo nahani losa ana bonggi. Huu ana nae kodo heni memak kakanak naa.
REV 12:5 De inak bonggi nala Ana touk esa. Tehuu Manetualain atan esa numa nusa tetuk do inggu temak mai fonda nala Kakanak naa. Boe ma noo Kakanak naa neni Manetualain neu fo Ana parenda sama-sama no Manetualain nai nusa tetuk do inggu temak. Huu Kakanak naa, neu ko parenda basa hatahori nusa-nusak kara marai dae-inak no koasa ta neni babanggak meteꞌen.
REV 12:6 Tehuu inak naa nalai neni mamana nees esa neu fo Manetualain sadia memak feen ena. Neu ko ara fadulin nai naa losa teuk telu seserik (ndia faik 1.260).
REV 12:7 Basa boe ma netati moꞌok dadi numa nusa tetuk do inggu temak. Manetualain atan nara ro sira malanggan manade Mikael, ratati laban mengge buta naa no ana nunin nara.
REV 12:8 Boe ma Mikael asa rasenggi mengge buta naa no ana nunin nara. Basa de ara kaꞌi mengge buta naa no ana nunin nara, fo ta bole leo nai nusa tetuk do inggu temak bali.
REV 12:9 Huu naa de ara husi heni sara ruma nusa tetuk do inggu temak mai, de piru heni sara reni dae-inak mai. Mengge buta naa, ndia nitur malanggan fo raseseik kana rae, ‘Nitu-mula’. Numa makasososan mai ana kada pepeko-leleko hatahori dae-bafok fo ara tao salak.
REV 12:10 Basa boe ma au amanene seluk hara maherek esa numa lalai mai nae, “Fai bakahulun mengge buta naa nambariik nakandoo numa Manetualain matan. Ndia naa, mana bafa lafok fo soa ndae salak neu ita toranoo kamaheren nara. Ana soa nakasasaꞌek salak neu sara hatu-leledon. Tehuu hatematak ia ana neni piru henik numa nusa tetuk do inggu temak mai ena. Dadi hatematak ia basan matetu-mandaik. Hatematak ia fain losa ena, fo Manetualain tao nasoi-nasoda hatahori dae-bafok. Hatematak ia Manetualain toꞌu parenda no Ndia koasan ta neni babanggak. Ma Ana soꞌuk nala Karistus ena, ndia Hatahori fo Ana here nalak ena fo dadi Manek soa-neu basa hatahori nusa-nusak kara.
REV 12:11 Ita toranoo kamaheren nara rasenggi mengge buta naa fo fai bakahulun ndae salak neu sara, nahuu Bibi Lombo Ana daan titi henin ena fo koka heni sira sala-singgon nara. Ara oo rasenggi mengge buta naa boe, nahuu ara rambarani tui-bengga neu hatahorir laꞌe-neu Bibi Lombo Ana dale susuen neu sara. Leo mae hatahorir ramanasa losa rae rakanisa sara oo, tehuu ara ta rakaheok boe.
REV 12:12 Dadi basa mana masodak lalaꞌen marai nusa tetuk do inggu temak, muste ramahoko! Tehuu basa mana masodak lalaꞌen marai dae-inak muste ranea, nahuu sosoek nae daka nala ei ena. Nitur malanggan konda nai ei ena. Ana namanasa nalan seli ena, nahuu ana bubuluk nae, ndia fain fo tao manggarauk naa, nae basan ena!”
REV 12:13 Neu faik fo mengge buta naa bubuluk nae, ndia neni nggari henik nai dae-inak ena, boe ma ana neu sangga fo nau nakasususak inak naa fo mana bonggi nala Kakanak naa.
REV 12:14 Tehuu ara fee inak naa lidak dua sama leo mbui marambua moꞌok lidan, mita fo ana lambu neu keke nai mamana nees fo dook ka numa mengge buta naa mai. Numa naa ara fadulin losa teuk telu seserik.
REV 12:15 Mengge buta naa mete-nita talo naa, boe ma ana nasapura kalua heni oe sama leo faa, fo nae mbamba neni inak naa.
REV 12:16 Tehuu dae-inak fali nala inak naa, no dalak dae natangga fo musi nabasa oe mana faa kalua numa mengge buta naa bafan mai, mita fo oe naa boso losa inak naa.
REV 12:17 Basa boe ma mengge buta naa namanasa nalan seli neu inak naa. De ana kalua fo neu natati laban inak naa anan laen nara, sira hatahorir fo mana leo-laꞌo tungga Manetualain parendan, ma manaku rae, sira raa Yesus hatahorin.
REV 12:18 Basa boe ma mengge buta naa neu nambariik neu tasi tatain. Ana henggu nisin.
REV 13:1 Basa boe ma au mete-ita banda kakiki-kakaak esa kalua numa tasi dale mai. Langgan hitu ma susuran salahunu. Ana pake solangga manek esa-esak nai ndia susuran nara. Nai langgan nara raa neni surak dedeꞌa deꞌek nekedadaek neu Manetualain.
REV 13:2 Ndia ao-inan, sama leo meo-asu. Ndia ein, sama leo baruang ein. Ma bafan, sama leo singa bafan. Mengge buta naa fee haak neu banda kakiki-kakaak naa fo nanggatuuk neu kadera man-parenda, ma pake basa ndia koasan lalaꞌen.
REV 13:3 Nai banda kakiki-kakaak naa langgan esa, hambu foa moꞌok, nok bali ana neni tati nitak losa ela baꞌuk ka ana mate, tehuu ta dadi mate. Basa hatahorir marai dae-inak heran mete-rita banda kakiki-kakaak naa ta hohoꞌan, de ara tunggan.
REV 13:4 Basa boe ma ara oo fee hada-horomatak neu mengge buta naa, ma rakadedemak kana sama leo Manetualain boe, nahuu mengge naa fee koasa neu banda kakiki-kakaak naa ena. Hatahorir raa oo koa-kio banda kakiki-kakaak naa boe rae, “Banda naa, ta hohoꞌak sudi selik kana! Ta hambu esa boe na bisa nasenggin!”
REV 13:5 Manetualain fee lelak neu banda kakiki-kakaak naa fo ana kokolak koa ao, ma kokolak nakadadaek Manetualain. Banda naa hambu luas fo toꞌu parenda, losa teuk telu seserik (ndia bulak 42).
REV 13:6 Huu naa de ana kokolak nakatutudak Manetualain naden. Ma ana oo kokolak nakadadaek basa Manetualain hatahorin nara fo mana leo rai nusa tetuk do inggu temak boe.
REV 13:7 Manetualain oo fee luas neun fo natati laban Manetualain hatahorin nara, losa nasenggi sara boe. Ana oo hambu koasa fo parenda hatahorir numa basa leor, basa hatahori nusak kara, basa dedeꞌak kara, ma basa nusak kara marai dae-inak mai boe.
REV 13:8 Huu naa de basa hatahorir marai dae-inak songgo-tanggu banda kakiki-kakaak naa. Sira raa, ndia basa hatahorir fo naden nara ta neni surak nai Bibi Lombo Ana Susuran dale. Fai bakahulun hatahorir rakanisa Bibi Lombo Ana naa ena, tehuu Manetualain tao nasoda falik kana numa mamaten mai. Neu Manetualain bei ta adu dae-bafok ia, Ana surak memak basa hatahori kamaherek kara naden nai susurak naa dale nae, sira raa, ndia neu ko hambu masodak tetebes ta mana ketuk.
REV 13:9 “Nenene matalolole!
REV 13:10 Mete ma Manetualain naketu-naladi ena nae, hatahori esa, muste humu ralan, na, neu ko humu ralan. Mete ma Manetualain naketu-naladi ena nae, hatahori esa muste hambu nekenisak renik tafa, na, neu ko rakanisan renik tafa.” De Manetualain hatahorin nara boso rakadedeak, te naa dadi neu omba-lelak fo ara rakatataka tungga ma ramahere rakandoo neun na!
REV 13:11 Basa naa, au mete-ita banda kakiki-kakaak laen, kalua numa dae-inak mai. Susuran dua, sama leo bibi lombo susuran. Ma haran, sama leo mengge buta haran.
REV 13:12 Ana dadi neu mana toꞌu dedeꞌak soa-neu ndia malanggan, ndia banda kakiki-kakaak kaesan naa, fo fai bakahulun neni tati nitak, de ela baꞌuk ka maten. Ana hambu koasa numa ndia malanggan mai, fo nakasetik basa hatahorir marai dae-inak songgo-tanggu neu ndia malanggan.
REV 13:13 Ana oo tao tanda heran nara ta hohoꞌak boe, losa-losak ana bisa nakonda aꞌi numa lalai mai, neu hatahori noꞌuk kara matan.
REV 13:14 No dalak naa, banda kakiki-kakaak nomer kaduan naa, pake ndia malanggan koasan fo pepeko-leleko hatahorir marai dae-inak. Ana oo parenda hatahorir fo doki rala patong esa, sama leo ndia malanggan mata-aon boe, fo ara fee hada-horomatak neu ndia malanggan, fo fai bakahulun neni tatik losa ela baꞌuk ka maten.
REV 13:15 Manetualain oo fee lelak neu banda mana pepeko-lelekok naa boe, fo fee ani hahaek tao nahori patong naa. No dalak naa, patong naa bisa kokolak, ma fee parenda fo rakanisa hatahori ta mana nau songgo-tanggu neun.
REV 13:16 Banda mana pepeko-lelekok naa oo nakasetik basa hatahorir fo simbok rala dededek nai sira lima konan, do nai sira odamatan boe. Basa hatahorir, moꞌo-kadiꞌik, kamasuꞌik ma hata taak, mana nekemboꞌik do, ata-dato, basa sara muste simbok dededek naa.
REV 13:17 Mete ma taa, na, ara ta bisa raseꞌo do rahasak hata esa boe na. Nai dededek naa, neni surak banda kakiki-kakaak nomer kaesan naa naden, ma ndia nomer.
REV 13:18 Nai ia muste pake utek, ou! Hatahori malelak bisa nalela nomer naa, ndia sosoa-ndandaan. Nomer naa ndia natudu nala hatahori dae-bafok esa, ndia “666”.
REV 14:1 Basa boe ma au botik matang, medak neu te au mete-ita Bibi Lombo Ana naa nambariik nai lete anak esa lain, nade letek Sion. Ana nambariik sama-sama no hatahori 144.000. Nai basa sara odamatan, neni surak Bibi Lombo Ana naa no Aman naden.
REV 14:2 De au amanene harak esa numa lalai mai. Harak naa, lii moꞌon sama leo oe totolik ma nandoro sama leo lalai nasaparak. Tehuu harak naa lolen seli, leo bali hatahori noꞌuk ka rakaminak sasandu.
REV 14:3 Boe ma au mete-ita hatahori ka-144.000 kara raa rambariik rasare mbali Manetualain, ma horis ta hohoꞌak kahaak kara fo mana eko-feo Manetualain kadera man-parendan naa, ma mane leo kadua hulu haak kara raa. Hatahori noꞌuk kara raa soda-helo sosoda beuk esa. Kada sira mesa kasa ndia bubuluk sosodak naa, tehuu hatahori laen taa. Sira iar ndia mana malole ro Manetualain, nahuu Manetualain pake Anan daan, de tefa-soi nala sara ena.
REV 14:4 Sira masodan malalaok, sama leo taꞌe anak fo bei ta sunggu-soro nakabua nita no inak. Ara tungga raherek Bibi Lombo Ana naa reni bee reu a mesan, nahuu Manetualain tefa-soi nala sara pake Anan daan ena, mita fo ara dadi reu Ndia enan. Huu naa de sira iar sama leo mbule uluk fo hatahorir reni sara ruma osin nara mai, fo loo lima sara reu Manetualain no Bibi Lombo Ana naa.
REV 14:5 Ara oo ta mana pepeko-lelekok, nahuu dalen nara lolo-laok boe.
REV 14:6 Basa boe ma au mete-ita Manetualain atan esa bali numa nusa tetuk do inggu temak mai. Ana lambu seku nai lalai, fo tao natanggela Manetualain Hara Lii Malolen ta mana ketuk. Ana lambu ndule fo nafada basa hatahorir marai dae-inak, ruma basa leor, basa hatahori nusak kara, basa dedeꞌak kara, ma basa nusak kara mai.
REV 14:7 Ana kokolak nahere haran tingga-tingga nae, “Ei muste fee hada-horomatak neu Manetualain! Ei muste makadedemak Ndia naden fo ta neni babanggak! Huu fain losa ena, fo Manetualain parisa basa hatahorir tatao-nonoꞌin. Koa-kio neu Ndia! Makadedemak Ndia naden! Huu Ana ndia nakadadadik nala lalai no dae-inak. Ma Ana ndia parenda fo tasi ma oe matak kara basa sara dadi.”
REV 14:8 Au kokolak basa talo naa, boe ma au mete-ita ata laen esa bali numa nusa tetuk do inggu temak mai, fo mai tungga ndia. Ana nafada nae, “Makalulutuk ena! Makalulutuk ena! Kota Babel ta hohoꞌak naa, nakalulutu ena! Kota manggarauk naa, ndefa henin natetu no daer ena. Fai bakahulun kota naa sama leo ina petak fo mana soa nakasetik basa hatahori nusak kara marai dae-inak rinu mafuk tungga kada ndia sunda-pandain. Tehuu hatematak ia kota naa nameda nala Manetualain nasa-odadedein ena!”
REV 14:9 Basa naa au mete-ita ata laen bali numa nusa tetuk do inggu temak mai, fo mai tungga ata nomer kaduan naa. Ana kokolak nahere haran tingga-tingga nae, “Besa-besa, ee! Basa hatahorir fo mana songgo-tanggu banda kakiki-kakaak naa no ndia patong, do, simbo ndia dededen nai odamatan, do, nai liman, neu ko ara oo rameda Manetualain nasa-odadedein boe!
REV 14:10 Neu ko Manetualain mesa kana mboꞌa nasan neu sara, sama leo Ana fee sara rinu anggor oe ulu malik. Neu ko Ana nggari heni sara reni aꞌi mbila balerang ta mana matek reu. Ndia atan nara maruma nusa tetuk do inggu temak mai, ma Bibi Lombo Ana naa oo, mete-rita matak naa boe.
REV 14:11 Kekeꞌun, basa hatahorir fo mana songgo-tanggu banda naa no ndia patong, do, simbo rala ndia dededen, neu ko ara hambu rala tuni-ndenik talo naa no ta mana basak. Aꞌi masuk numa sira doidoson mai, lume kalua lain neu ta mana ketuk hatu-leledon.”
REV 14:12 Dadi basa naar sosoan nae, Manetualain hatahorin nara muste nenene ratalolole Ndia parendan, ramahere rakandoo neu Yesus, ma boso rakadedeak. Basa boe ma au amanene harak esa numa lalai mai, nafada au nae, “Yohanis! O muste surak talo ia: Mulai hatematak ia, mete ma hatahorir fo mana ramahere neu Lamatuak Yesus losa ara mate, na, ara raua ralan seli.” De Manetualain Dula-dale Malalaon naselu nae, “Tebe! Neu ko ara raua ralan seli! Ara hambu doidosok nai dae-bafok ena, tehuu ara rakatataka fo tungga Manetualain rakandoo. De neu ko Manetualain bala sira sosota-mamanggun, ma ara ta doidoso nai nusa tetuk do inggu temak ena bali.”
REV 14:14 Basa naa, au botik matang. Medak neu ma, au mete-ita sosoꞌa mutik manggahadok esa, ma hambu hatahori esa nanggatuuk numa sosoꞌak naa lain. Hatahori naa, nok bali Hatahori Dae-bafo Isi-isik. Ana pake solangga joara numa lilo mbilas mai, ma ana toꞌu dombe kakaik matande esa.
REV 14:15 De au mete-ita ata laen esa numa nusa tetuk do inggu temak mai bali. Ana kalua numa Manetualain Uma Huhule-haradoin mai. Ana nanggou nafada Hatahori manai sosoꞌak naa nae, “Pake o dombe kakain naa, fo ketu-koru leo! Huu faik fo nekebubua nala dae-inak buna-boan nara, losa ena.”
REV 14:16 Boe ma Hatahori fo mana nanggatuuk numa sosoꞌak naa, lombe Ndia dombe kakain, de ketu-koru ma naduduru nala dae-inak buna-boan nara.
REV 14:17 Boe ma ata laen esa bali, kalua numa Uma Huhule-haradoik manai nusa tetuk do inggu temak dale mai. Ana oo toꞌu dombe kakaik matande esa boe fo nae kedi ai boak.
REV 14:18 Basa de ata laen esa bali, kalua numa mamana hotu ai daa kaboo menik numa Uma Huhule-haradoik manai nusa tetuk do inggu temak naa mai. Ata ia uen, ndia nanea aꞌi manai mamana hotu ai daa kaboo menik naa. Ana bolu nadenu ata mana toꞌu dombe kakaik naa nae, “Pake o dombe kakain naa, fo muu kedi ai boak nai dae-inak leo! Huu nai naa, ai anggor boan nara latuk kara ena.”
REV 14:19 De ata naa lombe ndia dombe kakain neni dae-inak neu, fo kedi nala anggor nggiin nara. Boe ma ana mboꞌa anggor boak kara raa reni bak rumu-keꞌek dale reu. Basa de ara heheta sara fo sangga haꞌi anggor oen. Heheta anggor boan nai bak rumu-keꞌek naa, sosoan ndia Manetualain nasan.
REV 14:20 Bak rumu-keꞌek naa, hambun nai kota deak. Neu ara heheta anggor boan nara raa, boe ma daak faa kalua noꞌun seli. Daak naa fafaan sama leo lee esa, narun kilo meter 300, ma deman meter esa seserik.
REV 15:1 Basa naa, au mete-ita matak ta hohoꞌak esa numa lalai, losa au heran alan seli. Hambu ata hitu ruma nusa tetuk do inggu temak mai, esa-esak toꞌu koasa fo haitua sosoe moꞌok neni dae-inak mai. Sosoe kahituk kara iar, sosoe mateꞌen nara siran ena. Mete ma basa sara dadi ena, na, sosoa-ndandaan nae, Manetualain dalen makasufu ena, de Ana ta namanasa seluk hatahori dae-bafok bali.
REV 15:2 Basa boe ma au mete-ita tasi mana mbilak sama leo titiro babalik no aꞌi. Au oo mete-ita hatahori noꞌuk ka rambariik rai tasi naa tatain boe. Sira raa, hatahori fo ta mana tungga banda kakiki-kakaak naa, ta songgo ndia patong, ma ta simbok ndia dededen. Basa sara toꞌu bua kaliik sama leo sasandu, fo ara simbon numa Manetualain mai.
REV 15:3 De ara soda-helo sosodak esa numa baꞌi Musa mai, fo ndia Manetualain hatahori neondan lele uluk. Hatahori raa oo soda-helo fo koa-kio neu Yesus boe. Fai bakahulun hatahorir rakanisan, sama leo hatahorir hala bibi lombo ana nai Manetualain Uma Huhule-haradoin, fo tao rakasufu Ndia dalen. Ara soda-helo rae, “Ai koa-kio Manetualain! Ai makadedemak Manetualain naden! Huu Manetualain koasan sudi selik kana. Ma Manetualain ta neni babanggan heran sudi selik kana. Manetualain toꞌu parenda-koasa neu basa hatahori nusak kara marai dae-inak ena. Manetualain dadi Manek soa-neu basa leor marai dae-bafok ena. Basa hata fo Manetualain aduk, sudi selik kana! Manetualain ue-osan, lolen seli! Manetualain eno-dalan, ndoos sudi selik kana. Manetualain masodan, tetebes mateꞌen!
REV 15:4 Basa hatahorir rakadedemak Manetualain naden, basa hatahorir koa-kio Manetualain malolen. Huu kada Manetualain mesa kana malalaok. Ma kada Manetualain mesa kana ta naena salak. Neu ko basa hatahori nusak kara mai rakaluku-rakatele neu Manetualain. Neu ko basa leor mai roke makasi neu Manetualain. Huu basa hatahorir mete-rita Manetualain ue-osa neulaun ena. Ma basa hatahorir bubuluk Manetualain dale ndoon ena.”
REV 15:5 Neu hatahorir raa soda-helo basa, boe ma au mete-ita Kama Malalaok Mateꞌen naa nai Manetualain Uma Huhule-haradoin manai nusa tetuk do inggu temak, ma ndia tema ririndin neni soi loak.
REV 15:6 Boe ma au mete-ita ata kahituk kara raa ruma nusa tetuk do inggu temak mai fo mana reni sosoe kahituk kara raa. Ara kalua ruma Uma Huhule-haradoik mai. Ara pake bua-loꞌa muti manggadilak lao ndoos, ma ara pake ndae aruk fo taon numa lilo mbila isik mai.
REV 15:7 Basa de au mete-ita esa numa horis ta hohoꞌak kahaak kara raa mai, fo marai Manetualain kadera man-parenda boboan, baꞌe bokor lilo mbilas hitu fee ata kahituk kara raa. Bokor kahituk kara raa, esa-esak neni isik no huku-dokik numa Manetualain mai. Ndia mana masodak seku neu. Ana nahani a fo fee nasa-ododedein neni dae-inak mai.
REV 15:8 Ta dook ka boe ma Uma Huhule-haradoik naa sofek no aꞌi masuk fo kalua numa Manetualain ta neni babanggan ma koasan mai. Ta hambu hatahori esa boe na bisa maso neni naa neu. Ata kahituk kara raa muste mboꞌa rakababasak sosoe kahituk kara raa reni dae-inak mai, dei fo hatahori bisa maso reni naa reu.
REV 16:1 Basa boe ma au amanene hara maherek esa kalua numa Uma Huhule-haradoik dale mai, fo parenda ata kahituk kara raa nae, “Miu leo! Haꞌi meni bokor raa fo mboꞌa heni Manetualain nasa-odadedein neni dae-inak neu leo.”
REV 16:2 Ara ramanene rala naa, boe ma ata kaesan mboꞌa heni ndia bokor isin neni dae-inak mai. Medak neu ma, sosoek daka nala basa hatahorir fo mana simbo rita banda kakiki-kakaak naa dededen, ma hatahori fo mana songgo-tanggu neu ndia patong. Ara hambu bisu mburuk, mbetan sudi selik kana.
REV 16:3 Basa boe ma ata kaduan mboꞌa heni ndia bokor isin neni tasi dale neu. Medak neu ma, oe mana nai tasi dadi neu daa kaboo mburuk, sama leo hatahori mates daan. Boe ma basa horis marai tasi dale, mate basa sara.
REV 16:4 Basa de ata nomer katelun mboꞌa heni ndia bokor isin neni leer ma oe matak kara dale reu. Boe ma basa oer raa dadi daak.
REV 16:5 De au amanene ata esa numa nusa tetuk do inggu temak mai, ndia koladu basa oer marai dae-inak. Ana koa-kio Manetualain nae, “Oo, Manetualain! Manetualain ndia malalaok! Manetualain ndia ta tao nita salak! Manetualain ndia nasoda numa makasososan mai ena, Ma neu ko Manetualain nasoda losa doon naa neu. Manetualain naketu-naladi dedeꞌak no matetuk ena. Manetualain fee huku-dokik no mandaak.
REV 16:6 Hatahorir tao ramboꞌa heni Manetualain hatahorin daan ena. Hatahorir rakanisa Manetualain mana toꞌu dedeꞌan nara ena. Huu naa de Manetualain nakasetik kasa ena fo ara rinu daak boe. Huu naa de Manetualain bala sara ma fee huku-dokik no mandaak ena.”
REV 16:7 Basa boe ma au amanene harak esa, kalua numa mei tunu-hotuk mai, naselu nae, “Tebe! Manetualain mana koasa mateꞌen. Tebe! Manetualain ndia ta neni babanggak mateꞌen. Manetualain ndia naketu-naladi dedeꞌak no matetuk. Manetualain ndia fee huku-dokik no mandaak.”
REV 16:8 Boe ma ata nomer kahaan mboꞌa heni ndia bokor isin neni ledo neu. Medak neu ma, ledo dadi neu katobi roo-rook, losa hatahori dae-bafok kade roun nara.
REV 16:9 Basa hatahori dae-bafok fo rou kadek kara raa, lalanggu Manetualain naden, nahuu Ana ndia haitua sosoek naa neu sara. Leo mae talo naa, tehuu ta hambu hatahori esa boe na sale dalen do tuke tein fo fali neni Manetualain neu, ma koa-kio neun.
REV 16:10 Basa de ata nomer kaliman naa, mboꞌa heni ndia bokor isin neni banda kakiki-kakaak naa kadera man-parendan neu. Medak neu ma, makiu-makahatuk tatana nala basa hatahorir fo mana songgo-tanggu ndia, losa ara henggu nisin nara, mita fo ara bisa rakatataka rala manggataꞌak.
REV 16:11 Ara oo lalanggu Manetualain nai nusa tetuk do inggu temak boe, nahuu sira hinan nara rambeta ralan seli. Leo mae talo naa, tehuu ta esa boe na hahae tao manggarauk, fo tungga falik Manetualain.
REV 16:12 Basa boe ma ata nomer kaneen mboꞌa heni ndia bokor isin neni lee moꞌok manade Efrat naa neu. Boe ma lee naa oen mada tutik ka. De ara tao dalak numa naa fee mane-manek kara ma soldadur fo neu ko maruma dulu mai.
REV 16:13 Boe ma au mete-ita nitu manggarauk telu. Mata-aon nara leo nggenggede. Esa kalua numa mengge buta naa bafan mai. Esa kalua numa banda kakiki-kakaak naa bafan mai. Ma esa bali kalua numa mengge buta mana toꞌu dedeꞌan fo mana pepeko-lelekok naa bafan mai.
REV 16:14 Nitu kateluk kara raa raena koasa fo tao tanda heran mata-matak. Ara kalua fo reu ratonggo ro basa manek kara rai dae-bafok. Boe ma raheluk fo faik esa reu ratati laban Manetualain mana koasa mateꞌen. Tehuu faik fo ara raheluk ralan naa ena, laꞌe faik fo Manetualain henggenee elan fo tao nasenggi basa Ndia musun nara.
REV 16:15 Mamanak fo neu ko ara rakabua fo rae ratati naa, dedeꞌa Ibrani nae, Armagedon. Yesus Karistus oo kokolak boe nae, “Masaneda matalolole! Medak neuk ka, Au mai no kaiboik nok bali naꞌo manu-meo fo hatahori ta meda rala sana. Hatahori fo mana mauak, ndia hatahori mana mahanik no nabua bua-loꞌa mana daik kara. No dalak naa, neu faik fo Au mai, neu ko ana ta hambu mamaek, nahuu hatahorir ta mete-rita ndia makaholan.”
REV 16:17 Basa de ata nomer kahitun mboꞌa heni ndia bokor isin neni anin neu. Boe ma Manetualain kokolak nahere haran numa Ndia kadera man-parendan manai Uma Huhule-haradoik mai nae, “Basa ena! Au nasa-odadedeing lua heni basan ena!”
REV 16:18 Boe ma hambu ndelas tee neu-mai, ma lalai nasapaparak matuti-manatok moꞌon seli. Ma dae nanggenggo moꞌon seli fo bei ta dadi nita nai dae-inak oo mai boe.
REV 16:19 Faik naa, Manetualain ta lilii kota Babel manggaraun. Ana pake dae nenggenggon sudi selik kana naa, mita fo kota ta hohoꞌak naa ndara baꞌen neu telu. Ana tao talo naa, mita fo hatahori Babel asa rameda rita Ndia nasa-odadedein. Kota-kota laen nara marai dae-bafok oo ndefa heni basa sara boe.
REV 16:20 Faik naa, basa pulur tendak heni sara talo kada naa leo, ma letek kara oo mopo heni basa sara boe.
REV 16:21 Hambu uda eis batu mana moꞌor oo mbesi ruma lalai mai, de tuni nala hatahori dae-bafok boe. Eis batur raa, ketuk beran nara losa kilo nggeram haa hulu. Uda eis naa tao nala hatahori dae-bafok kara doidoso, huu naa de ara lalanggu Manetualain.
REV 17:1 Basa boe ma esa numa ata kahituk kara raa ruma nusa tetuk do inggu temak mai fo mana toꞌu bokor rouk kara raa, mai kokolak no au nae, “Mai ia dei! Au nau atudu o, talo bee fo Manetualain huku-doki ina petak manggarauk mateꞌen naa. Ina petak naa, ndia kota moꞌok fo ara rambaririik kana deka oe noꞌuk.
REV 17:2 Fai bakahulun mane-manek kara sudi ruma bee mai, ara hohongge-lelena ro kota naa hatahorin nara. Hatahori laen nara oo mai rinu mafuk, ma tungga-tungga ro kota naa hohongge-lelenan boe.”
REV 17:3 Basa naa, Manetualain Dula-dalen maso nai au dale, de ata manuma nusa tetuk do inggu temak mai naa nuni no au uni mamana nees esa uu. Numa naa, au mete-ita inak esa nanggatuuk numa banda kakiki-kakaak mbila kara-karak esa lain. Banda naa langgan hitu, susuran salahunu. Nai basa ao-ina kateman neni surak dedeꞌa deꞌek fo mana nakadadaek Manetualain.
REV 17:4 Inak naa pake bua-loꞌa bangganaꞌuk mbilas ma mbila maranggeok. Ana heti aon no lilo mbilas, batu manggadilak mabeli, ma poemata. Nai lima konan ana toꞌu manggo tee lilo mbilas esa, sofek no anggor. Anggor naa, fo ndia hohongge-lelenan, no basa hata manggarauk ma manggenggeok laen fo ana taok.
REV 17:5 Nai odamatan neni surak nadek esa, fo sosoa-ndandaan bei nemeninok. Dedeꞌa neni surak naa, liin talo ia:
REV 17:6 Boe ma au mete neu, te inak naa mafu nalan seli, nahuu ana ninu Manetualain hatahorin nara daan ena. Sosoa-ndandaan nae, ana nakanisa basa Manetualain hatahorin nara ena, nahuu ara ta hahae rafada hatahorir laꞌe-neu Yesus. Au mete-ita talo naa, boe ma au amanggonggoak ka, ma au heran alan seli.
REV 17:7 Tehuu ata naa natane au nae, “Tao hata de o mamanggonggoak ka talo naa? Mai fo au afada inak manggarauk naa sosoa-ndandaan. Leo naak oo no banda kakiki-kakaak fo kalangga hituk ma susurak salahunu fo ana saꞌek naa boe.
REV 17:8 Fai bakahulun banda kakiki-kakaak naa leo-laꞌo numa dae-inak, tehuu hatematak ia ta sana ena. Ta dook ka bali te ana fali numa bolo doidoso ikon taak naa mai. Faik naa, hambu hatahorir fo leo-laꞌo numa dae-bafok, naden nara ta neni surak rai Bibi Lombo Ana Susuran dale, fo Manetualain surak memak kana neu faik fo Ana bei ta adu dae-bafok ia. Neu ko hatahorir raa ramanggonggoak kana mete-rita banda kakiki-kakaak naa, nahuu ana fali ena. Tehuu mete ma ana fali mai ena, na, neu ko Manetualain piru henin neni tasi aꞌi balerang fo mbilan ta kala matek neu.
REV 17:9 Hatahori mana malelak tetebes bisa nalela dedeꞌak ia sosoa-ndandaan. Banda kakiki-kakaak kalangga hituk naa sosoa-ndandaan nae, letek hitu. Ina petak naa nanggatuuk nai letek kara raa poin. Ma langga kahituk kara raa oo sosoa-ndandaan nae, manek hitu boe.
REV 17:10 Numa manek kahituk kara raa mai, lima mate sara ena. Esa nanggatuuk toꞌu parenda hatematak ia. Esa bali bei ta mai. Tehuu mete ma ana mai ena, na, ana toꞌu parenda kada ta doo anak ka.
REV 17:11 Hatematak ia au afada laꞌe-neu banda kakiki-kakaak naa fo fai bakahulun leo-laꞌo, tehuu hatematak ia maten ena. Fai bakahulun ana oo maso nai mane kahituk kara raa dale boe, tehuu neu ana fali mai fo toꞌu parenda dadi neu manek kafalun. Neu ko ana oo nakalulutu boe.
REV 17:12 Susura kasalahunuk kara raa sosoa-ndandaan, ndia manek salahunu. Ara bei ta toꞌu parenda. Dei fo ara simbo koasa fo toꞌu parenda sama-sama ro banda kakiki-kakaak naa, tehuu kada ta doo anak ka.
REV 17:13 Basa sara rala harak fo loo lima sira koasan neni banda kakiki-kakaak naa neu.
REV 17:14 Manek kara raa neu ko reu ramusuk laban Bibi Lombo Ana naa. Tehuu Bibi Lombo Ana naa no hatahorin nara, neu ko rasenggi basa sara. Hatahorir fo mana tungga Bibi Lombo Ana naa, ndia hatahori fo Ana here nalak kara, ma noke nala sara fo tungga raherek Ndia. Neu ko ara senggi, nahuu Bibi Lombo Ana naa ta neni babanggak sudi selik kana. Kada Ndia mesa kana dadi Manek soa-neu basa manek kara, ma Malanggan soa-neu basa malanggan nara.
REV 17:15 Ma oe noꞌuk mana deka ina petak naa, ndia hatahorir ruma basa leor, basa hatahori nusak kara, basa dedeꞌak kara, ma basa nusak kara marai dae-inak mai.
REV 17:16 Mane kasalahunuk kara raa ma banda kakiki-kakaak naa, neu ko ara mburuk ro inak fo ta mana mae nalelak naa. Neu ko ara leꞌa rala basa bua-loꞌan ma basa bua-baꞌun, de ara laꞌo elan hola-hola neu naa. Boe ma ara oo raꞌa ao-mbaan boe. Basa boe ma ara piru nenetun neni aꞌi dale neu.
REV 17:17 Manetualain mesa kana ndia tao losa basa mane kasalahunuk kara raa rala harak, fo loo lima sira koasan neni banda kakiki-kakaak naa neu, losa ana nakalulutu inak naa. No dalak naa, Manetualain nanaen lalaꞌen, neu ko mori-dadi.
REV 17:18 Ina petak fo o mitak naa, ndia kota ta hohoꞌak fo ana parenda basa manek kara rai dae-inak.”
REV 18:1 Basa naa, au mete-ita Manetualain atan laen esa konda numa nusa tetuk do inggu temak mai. Ana naena koasa ma saꞌak ta hohoꞌak, losa tao manggaledo basa dae-inak.
REV 18:2 Ana pake hara moꞌok fo nafada nae, “Ndefa henin ena! Ndefa henin ena! Kota Babel ndefa henin ena! Rua henin ena! Rua henin ena! Kota ta hohoꞌak naa, rua henin ena! Ana dadi neu nitur mamana leleon ena. Ana dadi neu basa dula-dale manggarauk kara dae huun ena. Ana dadi neu basa mbui kaar mana raꞌa nenetuk mamana nekebuan ena. Ana dadi neu basa banda manggarauk kara lalaen ena.
REV 18:3 Ndefa henin ena, nahuu basa hatahori nusa-nusak kara marai dae-inak, soa mai rinu mafuk numa ndia anggor mai. Rua henin ena, nahuu basa leor marai dae-bafok, soa mai sunda-pandai ro kota naa hatahorin. Mane-manek kara ruma basa nusak kara mai, mai hohongge-helena ruma naa. Hatahori mana danggan ruma basa kotar mai, mai raseseꞌo losa ara ramasuꞌi ena. Huu kota naa sama leo inak fo mana soa hasa basa hata fo neulaun lenak. Huu kota naa sama leo ina petak fo mana soa sangga basa hata fo malada-malada.”
REV 18:4 Basa de au amanene harak laen esa bali nanggou numa lalai mai nae, “Wei! Basa Au hatahoring nggara ein! Kalua malai laꞌo ela naa leo! Laꞌo ela kota naa leo! Boso tao tungga kota naa hatahorin manggaraun, fo boso hambu mala sira huku-dokin boe.
REV 18:5 Huu manggaraun nara noꞌun seli ena. Ma salan nara ratuni-ratana suu losa lalai ena. Hatematak ia Manetualain ta lilii sira leleo-lalaꞌo manggaraun ena bali. Hatematak ia Manetualain nahani a ena fo nau huku-doki sara.
REV 18:6 De ei muste bala manggaraun nara, sama leo ana tao manggarauk neu hatahori laen ena. Tehuu ei muste bala sara, losa lipa laꞌe dua. Fai bakahulun ara kedi-ira hatahori, losa rinu numa sira manggo tee lilo mbilan mana sofek no anggor doidosok mai. Tehuu hatematak ia sira mesa kasa ndia muste rinu anggor doidosok naa, losa lipa laꞌe dua.
REV 18:7 Ara tao rala aon nara sama leo hatahori ta hohoꞌak. Ma ara rakadedemak aon nara ena. Ara nau kada soda-lada neulauk. Ara hii kada malada-malada a mesan. Huu naa de ara muste hambu susa-sona berak. De ara muste leo-laꞌo no doidosok Huu fai bakahulun ara kokolak koa ao sama leo ina petak nae, ‘Au ia, ina manek! Neu ko au ta dadi uu ina falu! Neu ko au ta buꞌi akarereu. Neu ko au ta pake bua-loꞌa nggeok.’
REV 18:8 Ara kokolak talo naa losa Manetualain namanasa sara ena. Losa Manetualain nau hukun asa ena. Neu ko nai kada faik esa dalen, ara rameda ndoe ralan seli, ara buꞌi rakarereu, ma ara oo mate nduahadak boe. Losa hatahori piru heni sara reni aꞌi dale reu. Losa aꞌi naꞌa nabasa ao-mbaa mamaten nara. Huu Manetualain mana koasa mateꞌen, ndia fee huku-dokik ia. Ma Manetualain ta neni babanggak mateꞌen, ndia naketu-naladi dedeꞌak ia.
REV 18:9 Fai bakahulun mane-manek kara mai hohongge-lelena ro kota naa hatahorin nara, ma soda-ladan nara neulauk nai naa. Neu ko ara mete-rita masuk hene numa aꞌi naa mai, neu ko ara bubuluk rae aꞌi naꞌa heni basa kota naa ena. Basa de ara buꞌi rakarereun.
REV 18:10 Boe ma aon nara mumuru mete-rita hatahorir raa doidoson. Tehuu ara rambarani rambariik ruma kada dook ka mai. Ma ara rambarani mete ruma kada naa mai. Boe ma ara kokolak rae, ‘Awii! Kasian Babel, ee! Awii! Kasian kota ta hohoꞌak! Nai kada liꞌu esak ka dalen, o hambu hukun ena. Nai kada ta doo anak ka te lulutuk nala o ena.’
REV 18:11 Ramanene talo naa, boe ma hatahorir fo fai bakahulun ruma basa mamanak kara mai fo danggan numa naa, ara oo tungga buꞌi rakarereu boe. Huu ta hambu hatahori esa boe na, nau neu hasa sira bua neseseꞌon nara bali.
REV 18:12 Ta hambu hatahori esa boe na, nau neu hasa sira bua heti aon numa lilo mbilas, lilo fulak, batu manggadilak, do, poemata mai bali. Ta hambu hatahori esa boe na, nau neu hasa sira tema lenan, tema sutra, do, tema bangganaꞌuk laen nara fo mbilas, do, mbila maranggeok. Ta hambu hatahori esa boe na, nau neu hasa sira buan numa ai kaboo menik, nggadi noli neni dokik, do, ai neni dokik laen nara mai. Ta hambu hatahori esa boe na, nau neu hasa sira buan numa riti, besi, do, batu marmar mai.
REV 18:13 Ta hambu hatahori esa boe na, nau neu hasa sira ai makeen, do, ai rou makeek mata-matak. Ta hambu hatahori esa boe na, nau neu hasa sira ai daa kaboo menin, do, mina kaboo menik mata-matak. Ta hambu hatahori esa boe na, nau neu hasa sira oe anggor, mina setun, tarigu, do, hade-nggandum. Ta hambu hatahori esa boe na, nau neu hasa sira sapin, bibi lombon, do, ndaran. Ta hambu hatahori esa boe na, nau neu hasa sira karetan, do, sira ata-daton nara.
REV 18:14 Neu ko hatahori mana danggan nara raa fale dalen nara rae, ‘Awii, Babel, ee! Awii, kota ta hohoꞌak! O bua-baꞌu neulaum mara fo o hatahorim mara hii rala sara seli naa, ta sara ena. Basa-basan mopo sara ena, losa sira dadi reu hata taak kara ena, losa ranggananaro.’
REV 18:15 Fai bakahulun hatahori danggan nara raa ramasuꞌi nahuu kota naa fo sama leo ina petak. Tehuu hatematak ia ara fale dalen nara ta ramaketu ena. Ara ramataꞌu ralan seli, mete-rita kota naa hatahorin doidoson. Sira aon nara mumuru ralan seli, mete-rita sira huku-dokin. Tehuu ara rambarani mete ruma kada dook ka mai. Ara rambarani rambariik ruma kada naa mai.
REV 18:16 Boe ma ara kokolak rae, ‘Awii! Kasian Babel, ee! Awii! Kasian kota ta hohoꞌak! Fai bakahulun o hatahorim pake bua-loꞌa bangganaꞌuk mbilas, do, mbila maranggeok numa tema mabeli mateꞌen mai. Fai bakahulun o hatahorim heti aon nara ro lilo mbilas, poemata, ma batu manggadilak mabeli mateꞌen.
REV 18:17 Tehuu nai kada liꞌu esak ka dalen, o bua-baꞌum mara ta sara ena. Nai kada ta doo anak ka, o suꞌim mara mopo basa sara ena!’ Fai bakahulun oo ofak kapatein nara ma ofak isin nara saꞌe ofak reu-mai ruma kota naa mai. Tehuu hatematak ia ara rambarani see ruma kada dook ka mai. Ma hatematak ia ara rambarani mete ruma kada naa mai.
REV 18:18 Ara ranilu masuk mana kalua numa aꞌi dale mai. Boe ma ara bubuluk rae, aꞌi naꞌa nabasan ena. Boe ma ara fale dalen, de kokolak rae, ‘Awii kasian! Neu ko ta hambu kota laen fo ta hohoꞌak sama leo Babel bali. Awii kasian! Neu ko ta hambu kota laen, fo neulaun sama leo ndia bali.’
REV 18:19 Ara raꞌu afu fo sombun neu langgan nara, nahuu dalen nara sona. Ara buꞌi rakarereu, nahuu dalen nara rakalulutu. Boe ma ara kokolak rae, ‘Awii! Kasian Babel, ee! Awii! Kasian kota ta hohoꞌak! Ai saꞌe ofak miu-mai meni bua-baꞌu fee o ena, losa ai oo mamasuꞌi boe. Ai lemba-baꞌu meni o fufuam mara ena, losa ai oo tungga soda-lada neulaun boe. Tehuu nai kada liꞌu esak ka dalen, basa naar, mopo heni sara ena. Nai kada ta doo anak ka, basa naar, rakalulutu heni sara ena.’
REV 18:20 Boe ma harak naa kokolak seluk bali nae, ‘Wee, ei mana leo-laꞌo nai nusa tetuk do inggu temak! Ei dalem mara ta parluu ranoso bali. Wee, Manetualain hatahorin nara! Ei dalem mara ta parluu rameda susa bali. Wee, Lamatuak nedenun nara ein! Naa fo ei dalem mara mbena sau-sau. Wee, Manetualain mana toꞌu dedeꞌan nara ein! Naa fo ei dalem mara ramahoko. Fai bakahulun Babel nakasususak ei. Fai bakahulun kota naa tuni-ndeni ei. Tehuu hatematak ia Manetualain bala ei doidosom ena. Hatematak ia Ana bala kota naa manggaraun ena.’ ”
REV 18:21 Basa boe ma au mete-ita ata esa numa nusa tetuk do inggu temak mai, barakain seli. Ana mai koꞌo nala batu esa, baꞌu sama leo hatahori esa. Boe ma ana mbesi batu naa neni tasi dale neu. Ana oo nafada boe nae, “Neu ko ara oo rakalulutu Babel talo naa boe. Neu ko ara oo tao ramopo kota ta hohoꞌak naa talo naa boe.
REV 18:22 Ta hambu hatahori esa boe na, fo rakaminak bua kaliik nai kota naa. Ta hambu hatahori esa boe na, fo namanene sasandu, nggitar, sulik, ma toꞌik liin nai kota naa bali. Ta hambu tukan esa boe na, fo naue-osa tungga ndia ue-tataon bali. Ta hambu hatahori esa boe na, fo mbau hader nai kota naa bali.
REV 18:23 Ta hambu hatahori esa boe na, fo ana dede lambu nai kota naa bali. Ta hambu hatahori esa boe na, fo tao feta kabin nai naa bali. Fai bakahulun kota naa mana maseꞌo-hahasa bua-baꞌur, ramasuꞌi ralan seli ena. Fai bakahulun Babel hatahori mana danggan nara, soda-ladan nara neulauk ralan seli ena. Tehuu ara pake malela makiuk, fo kedi-ira hatahori rai dae-inak. Ara pake modo balu mata, fo pepeko-leleko hatahori nai dae-bafok.
REV 18:24 Babel hambu hukun berak ia ena, nahuu ana soa nakanisa Manetualain mana toꞌu dedeꞌan nara. Kota ta hohoꞌak naa nakalulutu ena, nahuu ana soa tuni-ndeni Manetualain hatahorin nara losa mate. Hambu Manetualain hatahorin ketuk oo hambu nekenisak nai mamana laen nara boe. Tehuu Babel ndia muste lemba-nasaa basa salak kara raa. Kota ta hohoꞌak naa ndia muste lemba-nasaa neselu-netaan.”
REV 19:1 Manetualain atan naa kokolak basa talo naa, boe ma au amanene hara moꞌok nok bali mana soda bubua moꞌok esa soda-helo numa nusa tetuk do inggu temak dale. Ara soda-helo rae, “Haleluya! Haleluya! Ita koa-kio ita Manetualain, nahuu Ndia ta neni babanggak meteꞌen. Haleluya! Haleluya! Ita koa-kio ita Manetualain, nahuu Ndia mana koasa mateꞌen. Manetualain ndia tao nasoi-nasoda ita, numa ita sala-singgon nara mai. Manetualain ndia tao natetu-nandoo ita, numa ita peko-pakin mai.
REV 19:2 Ita koa-kio Manetualain, nahuu Ana naketu-naladi dedeꞌak no matetuk. Ita koa-kio Manetualain, nahuu Ana ndia natuda huku-dokik fo ta mbeu seserik. Manetualain natuda huku-dokik neu ina petak naa ena, nahuu ana soa fufudi-hohodo hatahorir rai dae-bafok, fo tungga hohongge-lelena sama-sama roon, ma tungga ndia tatao-nonoꞌi manggaraun. Manetualain bala ina manggarauk naa ena, nahuu ana soa nakanisa Manetualain hatahori neondan nara.”
REV 19:3 Basa naa, ara soda-helo sosodak laen bali nai nusa tetuk do inggu temak rae, “Haleluya! Koa-kio Manetualain! Haleluya! Makadedemak Ndia naden! Huu aꞌi masuk numa aꞌi fo mana naꞌa inak naa ao-mbaa mamaten naa, masun hene nakandoo ta nateꞌe-nateꞌe. Ma aꞌi masuk numa aꞌi fo mana naꞌa kota ta hohoꞌak naa, masun hene nakandoo ta basa-basa.”
REV 19:4 Basa boe ma mane leo kadua hulu haak kara raa ro horis ta hohoꞌak kahaak kara raa, sendek luu-langgan nara fo rakaluku-rakatele rasare Manetualain kadera man-parendan. Ara fee hada-horomatak neun rae, “Tebe! Mai fo ita koa-kio Manetualain! Haleluya! Mai fo ita takadedemak Ndia naden!”
REV 19:5 Boe ma au amanene harak esa bali numa kadera man-parenda naa mai nae, “Wee, Manetualain hatahori neondan nara ein! Wee, Manetualain anan nara ein! Mai fo ita takadedemak Manetualain naden. Mai fo basa moꞌo-kadiꞌik koa-kio neu Ndia.”
REV 19:6 Basa de au amanene nok bali hambu hatahori noꞌuk ka kola-kola. Haran nara lii moꞌon seli nok bali oe totolik, ma nahere sama leo lalai nasapaparak natuti-nanatok. Ara kokolak rae, “Haleluya! Ai koa-kio Manetualain. Haleluya! Ai makadedemak Ndia naden. Huu Ndia mana koasa mateꞌen. Ma Ana ndia parenda basa-basan.
REV 19:7 Hatematak ia ita dalen nara ramahoko ena. Hatematak ia ita dalen nara mbena sau-sau ena. Ita koa-kio neu Ndia, nahuu Bibi Lombo Ana fai kabin losa ena. Ita takadedemak Ndia naden, nahuu baroit inak fo nae dadi neu Bibi Lombo Ana saon naole nala ena.
REV 19:8 Manetualain feen bua-loꞌa baroit numa tema bangganaꞌuk mai ena. Manetualain feen bua-loꞌa muti manggadilak ena.” (Bua-loꞌa muti manggadilak naa, ndia Manetualain hatahorin nara tatao-nonoꞌi neulaun nara.)
REV 19:9 Boe ma ata numa nusa tetuk do inggu temak mai naa nafada au nae, “Yohanis! O muste surak talo ia: ‘Basa hatahorir lalaꞌen fo mana hambu nonokek reni Bibi Lombo Ana feta kabin reu naa, neu ko raua ralan seli!’ ” Basa de ata naa tuti kokolan bali nae, “Manetualain Dedeꞌa-kokolan ia, memak tebe!”
REV 19:10 De au sendek luu-langgang fo akaluku-akatele neu Manetualain atan naa. Tehuu ana kaꞌi au nae, “O boso makaluku-makatele au talo naa! Huu au oo Manetualain hatahori neondan, sama leo o, ma o toranoom mara fo mana tui-bengga laꞌe-neu Yesus boe. Mana toꞌu dedeꞌak fo nafada Manetualain hara hehelun nara, basa sara oo ratudu neu Yesus boe, mita fo hatahorir rakaluku-rakatele neun. Huu Manetualain Dula-dalen hihii-nanaun talo naa. Dadi boso makaluku-makatele au, tehuu makaluku-makatele neu kada Manetualain!”
REV 19:11 Boe ma au botik matang, de mete-ita nusa tetuk do inggu temak natahuka. Medak neu ma, au mete-ita ndara mutik esa kalua mai. Hatahori fo mana nanggatuuk nai ndara naa lain, naden, “Hatahori mana Toꞌu Hehelu-bartaak” ma “Hatahori Ndoos”. Neu Ana naketu-naladi dedeꞌak, Ana naketu no matetuk. Neu Ana neni musu dale neu, Ana neu no dale ndoos.
REV 19:12 Ndia mata deꞌen mbila sama leo aꞌi. Ana pake solangga manek noꞌuk ka nai Ndia langgan. Naden neni surak nai Ndia ao-inan, tehuu kada Ndia mesa kana ndia bubuluk nadek naa sosoa-ndandaan.
REV 19:13 Bua-loꞌan neni borok neu daak ena. Hatahori roken rae, “Manetualain Dedeꞌa-kokolan”.
REV 19:14 Au oo mete-ita soldadur ruma nusa tetuk do inggu temak mai boe. Ara saꞌe ndara mutik kara tungga Ndia. Basa sara oo pake bua-loꞌa bangganaꞌuk fo muti ndoos.
REV 19:15 Hambu tafa tandek esa kalua numa Ndia bafan mai. Ana pake tafa naa, fo neni musu dale neu laban basa hatahori nusa-nusak kara marai dae-inak. De Ana nasenggi sara. Boe ma Ana dadi neu sira Manen. Ana parenda sara no lima besik, losa ara oo rameda rala Manetualain mana koasa mateꞌen nasa-odadedein boe. Naa, sama leo hatahori heheta-tatabu rakalulutu anggor boan fo rumu-keꞌe heni oen.
REV 19:16 Nai Hatahori naa bua-loꞌan, ma manai mbuun, neni surak talo ia:
REV 19:17 Basa naa, au mete-ita ata esa numa nusa tetuk do inggu temak mai, nambariik numa ledo lain. Boe ma ana nanggou neu basa mbui kaar mana raꞌa nenetuk fo lambu seku rai lalai nae, “Mai fo ei basa ngga makabubua nai ia leo, fo tungga mai miꞌa Manetualain feta moꞌon!
REV 19:18 Ei bole miꞌa basa hatahori mates sara nenetun: ndia mane-manek kara, malangga musur ma soldadur. Ei bole miꞌa ndarar ma soldadur mana saꞌe ndarar raa nenetun. Ei bole miꞌa ata-dator do hatahori nekemboꞌik do hatahori kadiꞌi anak do hatahori moꞌo-inahuuk nenetun. Kekeꞌun, ei bole miꞌa basa-basan nenetun.”
REV 19:19 Basa boe ma au mete-ita banda kakiki-kakaak naa fo fai bakahulun kalua numa tasi dale mai. Ana neu nala harak no basa manek kara marai dae-inak ro sira soldadun nara. Boe ma ara reu ratati laban Hatahori fo mana nanggatuuk nai ndara mutik naa lain, sama-sama no Ndia soldadun nara maruma nusa tetuk do inggu temak mai.
REV 19:20 Tehuu Hatahori fo mana nanggatuuk nai ndara mutik naa lain, humu nala banda kakiki-kakaak naa, no ndia mana toꞌu dedeꞌan, fo mana pepeko-lelekok. Mana toꞌu dedeꞌak naa, ndia fai bakahulun tao tanda heran mata-matak, fo pepeko-leleko hatahorir fo mana simbo rala banda kakiki-kakaak naa dededen ena, ma songgo-tanggu ndia patong ena. Tehuu hatematak ia, Hatahori fo mana nanggatuuk nai ndara mutik naa lain, neu piru heni banda kakiki-kakaak naa no ndia mana toꞌu dedeꞌan reni tasi aꞌi balerang mana mbila ta kala matek neu.
REV 19:21 Basa de Hatahori fo mana nanggatuuk nai ndara mutik naa lain, neu nakanisa soldadu laen nara raa, pake Ndia tafan mana kalua numa bafan mai. Basa boe ma mbui kaar mana raꞌa nenetuk kara mai raꞌa heni basa ao-mbaa mamates sara raa.
REV 20:1 Basa boe ma au mete-ita ata esa numa nusa tetuk do inggu temak mai konda numa lalai mai. Ana toꞌu rante moꞌok esa, ma toꞌu nggoek lelesu bolo doidoso ikon taak naa.
REV 20:2 De ana neu humu mengge buta naa, ndia nitur malanggan, fo ara seseik kana rae, “Nitu-mula”. Ana ndia kedi-ira hatahori dae-bafok numa lele uluk mai. Boe ma ata naa futu-paꞌa mengge buta naa pake rante, fo okan neu bolok naa dale, doon losa teuk rifun esa.
REV 20:3 Boe ma ata naa timba mengge buta naa neni bolo doidosok naa dale neu. De ana kena ketu bolok lelesun, ma segel nisan, mita fo oka mengge buta neu naa, losa teuk rifun esa. No dalak naa, mengge buta naa ta bisa pepeko-leleko hatahori nusa-nusak kara marai dae-inak, losa teuk rifun esa. Basa naa, dei fo nakamboꞌik kana, tehuu kada ta doo anak ka.
REV 20:4 Boe ma au mete-ita kadera man-parenda noꞌun seli, ma hambu hatahorir ranggatuuk rai lain. Manetualain soꞌuk kasa ena fo ara raketu-raladi dedeꞌak. Sira raa, hatahori fo fai bakahulun reu tui-bengga laꞌe-neu Yesus Hara Lii Malolen, ma Manetualain Dedeꞌa-kokolan, losa hatahorir rakanisa sara. Sira raa, ndia ta songgo-tanggu banda kakiki-kakaak naa, ma ndia patong. Ara oo ndia ta nau simbok banda kakiki-kakaak naa dededen fo taon neu sira odamatan do liman nara boe. Ara hambu nekenisak, tehuu Manetualain tao nasoda falik kasa ruma mamates mai ena, mita fo ara toꞌu parenda sama-sama ro Karistus losa teuk rifun esa.
REV 20:5 No dalak naa, ara dadi reu hatahori makasososak fo Manetualain tao nasoda falik kasa ruma mamates mai. De sira iar raua ralan seli, huu ara dadi reu Manetualain hatahorin nara ena. Ara ta neni piruk kara reni mamana doidosok naa reu, de ta rameda rita mamates laꞌe kaduan. Huu sira ndia dadi sama leo malangga anggama fo raono-lalau Manetualain ma Karistus. Ma ara oo toꞌu parenda sama-sama ro Karistus losa teuk rifun esa boe. Tehuu hatahori mana matek laen nara, muste rahani losa teuk rifun esa, dei fo Manetualain tao nasoda falik kasa ruma mamates mai.
REV 20:7 Neu teuk rifun kaesan naa basan ena, neu ko Manetualain nadenu rakamboꞌik mengge buta naa numa bolo doidosok naa mai.
REV 20:8 Boe ma ana neu pepeko-leleko hatahori nusa-nusak kara fo ara seseik rae, Gog ma Magog, fo mana ruma bee a mai nai dae-bafok. Neu ko ana nakabubua sira hatahorin nara fo reu ratati. Sira dedesin nara, sama leo sarakaek nai tasi tataik.
REV 20:9 Basa boe ma Gog ma Magog soldadun nara nonggo nuni-nuni laꞌo matak losa dook ka, losa dae-inak buꞌun nara. Boe ma ara eko-feo ndule Lamatuak kotan fo Ana suen, ma Ndia hatahorin nara. Tehuu Lamatuak nakonda aꞌi numa lalai mai fo naꞌa heni basa soldadur raa.
REV 20:10 Boe ma Manetualain hatahorin nara humu rala nitur malanggan, fo mana kedi-ira hatahori noꞌuk ka ena naa, ndia Nitu-mula. De ara pirun neni tasi aꞌi balerang fo mbilan ta kala matek dale neu. Neu ko ana neni okak nai naa sama-sama no banda kakiki-kakaak naa, ma ndia mana toꞌu dedeꞌan fo mana pepeko-lelekok. Nai naa, ara hambu tuni-ndenik ma doidosok taa-taa hatu-leledon, losa doon naa neu.
REV 20:11 Basa boe ma au mete-ita kadera man-parenda muti moꞌok esa. Ma Manetualain nanggatuuk nai kadera man-parenda naa lain. Medak neu ma, dae-inak no lalai kosu reu, losa mopo sara ma ta mete-ita sara bali.
REV 20:12 Basa naa, au mete-ita hatahori mana matek kara ena. Sira basa sara moꞌo-kadiꞌik rambariik rasare reni kadera man-parenda naa reu. Boe ma atar maruma nusa tetuk do inggu temak mai, mai buka bukur fo mana surak basa hatahori dae-bafok tatao-nonoꞌin nara lalaꞌen. Basa de ara buka susurak laen esa bali, ndia susurak fo neni surak hatahori naden nara fo mateꞌen te ara rasoda ro Manetualain losa doon naa neu. Boe ma Ana naketu-naladi hatahori mates sara raa dedeꞌan, tungga hata fo sira esa-esak taok ena, sama leo neni surak nai susurak kara raa dale.
REV 20:13 Boe ma basa hatahori mates sara mai fo rambariik rasare reni kadera man-parenda naa reu. Sira raa, basa hatahorir mana mate nitak, nai mada lai, do, nai tasi dale. De Manetualain naketu-naladi dedeꞌan nara esa-esak, tungga sira tatao-nonoꞌin.
REV 20:14 Basa boe ma Manetualain piru heni Mamates neni tasi aꞌi mbila ta kala matek naa dale neu. Ana oo piru heni Mamana Hatahori Mates neni tasi aꞌi naa dale neu boe. Huu tasi aꞌi naa, ndia mamana mamates laꞌe kaduan.
REV 20:15 Hatahori bee fo naden nara ta neni surak nai susurak naa dale oo, neni piruk neni tasi aꞌi naa dale neu boe. Huu susurak naa, ndia surak hatahori naden fo nasoda nakandoo no Manetualain.
REV 21:1 Basa boe ma au mete-ita lalai beuk ma dae-ina beuk, te lalai raak ma dae-ina raak, mopo sara ena. Tasi oo ta sana ena boe.
REV 21:2 Boe ma au mete-ita Manetualain kota malalaon, ndia Yerusalem Beuk, konda numa nusa tetuk do inggu temak mai. Kota naa naole nala ena, nok bali baroit inak, nau neu soru ndia saon.
REV 21:3 Basa de au amanene hara moꞌok esa numa kadera man-parenda naa mai nae, “Mete matalolole! Mulai numa hatematak ia mai, Manetualain Uman nai hatahori dae-bafok talada heon. Mulai numa faik ia mai, Manetualain leo-laꞌo sama-sama no Ndia hatahorin nara. Ana dadi neu sira Manetualain ena. Ma ara dadi reu Ndia anan nara ena. Neu ko Ana no sara taa-taa. Ma Ana sama-sama no sara losa doon naa neu.
REV 21:4 Neu ko Ana hari namada basa luu-oen nara, fo ara ta buꞌi rakarereu bali. Huu nai naa ta hambu kamahedik bali. Ma nai naa ta hambu mana matek bali. Basa mana tao susa-sonak numa lele uluk mai, ta hambu sara ena bali. Basa mana tao doidosok numa lele uluk mai, mopo sara ena.”
REV 21:5 Boe ma Ndia fo mana nanggatuuk nai kadera man-parenda naa kokolak nae, “Mete matalolole, te Au tao ala basan dadi beuk ena.” Basa de Ana kokolak seluk no au bali nae, “Surak leo! Basa hatahorir bisa ramahere Au Dedeꞌa-kokolang ia, huu basa iar, memak tebe ena!”
REV 21:6 Boe ma Ana nafada au bali nae, “Basa-basan fo Au helu-bartaak numa lele uluk mai naa, dadi ena. Huu Au ia, numa Alfa mai losa Omega. Ma Au ia, numa A mai losa Z. Basa-basan numa Au mai, mulai numa makasososan mai losa babasan. Basa hatahorir fo mana dale madak kara, neu ko Au fee sara rinu no mudak numa oe matak mana neni masodak naa mai, mita fo hatahori nasoda no ndoos.
REV 21:7 Basa hatahorir fo mana rakatataka tungga Manetualain eno-dala ndoon, neu ko ara simbo rala basa babaꞌe-babatik kara iar. Huu neu ko Au dadi uu sira Manetualain, ma sira dadi reu Au anang nggara.
REV 21:8 Tehuu hambu hatahori ketuk oo, neu ko neni piru henik, reni tasi aꞌi balerang fo mana mbila ta kala matek naa dale reu boe. Ndia leo hatahori kamataꞌuk, hatahori mana masadea Yesus, hatahori manggenggeok, hatahori fo mana laꞌok sala no hatahori ta sira soa toun do sira sao inan, mana makanisa hatahori mana songgo-tangguk, mana teka-dokik, ma mana pepeko-lelekok. Neu ko basa sara neni piru henik kara reni tasi aꞌi dale reu, fo hatahorir rae, ‘mamana mamates kaduan.’ ”
REV 21:9 Basa boe ma au mete-ita esa numa ata kahituk kara raa maruma nusa tetuk do inggu temak mai, fo fai bakahulun ana toꞌu bokor neni isik no Manetualain nasa-odadedein. Ana mai natonggo no au, de kokolak nae, “Mai ia dei! Au ae atudu o baroit inak, fo mana nae sao nala Bibi Lombo Ana.”
REV 21:10 Boe ma Manetualain Dula-dalen maso nai au dale, de ata esa numa nusa tetuk do inggu temak mai, nuni neni au uni lete mandema esa uu. Numa naa, ana natudu au kota Yerusalem, ndia Manetualain kota malalaon. Kota naa konda numa nusa tetuk do inggu temak mai.
REV 21:11 Kota naa, lolen seli! Hambu saꞌa manggahadok kalua neu-mai numa Manetualain manula-manapun mai, sama leo batu intan manggahadok. Losa basa kota naa dadi manggaledok.
REV 21:12 Hambu tembo moꞌo demak eko-feo kota naa, no lelesu moꞌok salahunu dua. Hambu ata salahunu dua ruma nusa tetuk do inggu temak mai oo, ranea lelesur raa boe. Nai lelesu kasalahunu duak kara raa neni surak leo Israꞌel kasalahunu duan nara naden.
REV 21:13 Lelesu moꞌok telu rasare dulu. Telu rasare muri. Telu rasare kii. Ma telu bali rasare kona.
REV 21:14 Tembok naa nambariik nai batu netehuu moꞌok salahunu dua. Nai batu esa-esak neni surak Bibi Lombo Ana nedenu kasalahunu duan nara naden. Sira ndia raono-lalau neu Ndia nai dae-bafok.
REV 21:15 Boe ma ata fo mana kokolak no au naa, ana toꞌu nala ai uꞌukuk esa numa lilo mbilas mai, fo nau uku kota naa no lelesu moꞌon ma tembon.
REV 21:16 Ana uku nakahuluk kota naa tembon boboan haa sara. Narun, loan, ma deman, basa sara sama, ndia kilo meter 2.220.
REV 21:17 Basa de ana uku tembok naa katen, hambu meter 65, tungga hatahori dae-bafok uꞌukun.
REV 21:18 Tembok naa, neni taok numa batu manggadilak mabelir mai, naden yaspis. Ma basa hata nai kota naa dale, neni taok numa lilo isik mai, fo saꞌan naꞌanda sama leo titiro.
REV 21:19 Batu netehuuk kasalahunu duak kara raa, neni hetik no batu manggadilak mabelir mata-matak. Batu kaesan pake batu yaspis, saꞌan momodok. Nomer kaduan, pake batu nilam, saꞌan modo-afuk. Nomer katelun, pake batu mirah, saꞌan mbilas. Nomer kahaan, pake batu samrud, saꞌan momodok.
REV 21:20 Nomer kaliman, pake batu unam, neni tadak no soklat mutik. Nomer kaneen, pake batu sardius, saꞌan mbilas. Nomer kahitun, pake batu ratna cempaka, saꞌan uni lilok. Nomer kafalun, pake batu beril, saꞌan momodo afu-afuk. Nomer kasion, pake batu krisolit, saꞌan sangga unik ka. Nomer kasalahunun, pake batu krisopras, saꞌan sangga momodok. Nomer kasalahunu esan, pake batu lasuardi, saꞌan momodo tasi oek. Nomer kasalahunu duan, pake batu kecubung, saꞌan mbila maranggeok.
REV 21:21 Ma lelesu moꞌo kasalahunu duak kara raa, tao sara ruma poemata deꞌek salahunu dua mai. Lelesu esa taon numa poemata deꞌek esa mai. Ma kota naa okofoon, taon numa lilo mbilas isik manggadilak mai, sama leo titiro.
REV 21:22 Ma au leleuk, tehuu ta hambu Uma Huhule-haradoik nai kota naa. Huu Manetualain mana koasa mateꞌen ma Bibi Lombo Ana naa rai naa taa-taa. Huu naa de hatahorir reu rakaluku-rakatele memak neu Sara.
REV 21:23 Kota naa oo ta parluu ledo no bulan fo tao manggaledon boe, nahuu Manetualain mandela-masaꞌan ndia tao manggaledok nai naa. Ma Bibi Lombo Ana naa, dadi sama leo lambu mana mbilak ena.
REV 21:24 Hatahorir ruma basa hatahori nusa-nusak kara marai dae-bafok, neu ko mai laꞌo-laꞌo nai manggaledok naa dale. Mane-manek kara marai dae-inak oo reni hata-heto ta hohoꞌan nara reni naa reu boe.
REV 21:25 Nai naa, ta hambu leꞌodaek ena. Huu naa de ara ta parluu kena lelesu mana maso kota neu.
REV 21:26 Neu ko ara oo maso kota naa dale, reni basa hata fo neulauk ma basa hada-horomatak numa basa nusak kara marai dae-inak mai reu boe.
REV 21:27 Tehuu mana ta bole maso neni naa neu, ndia basa hata fo manggarauk, nok bali: basa mana songgo-tanggur, mana hohongge-lelena, ma mana pepeko-lelekok kara. Mana bole masok kara, ndia kada hatahorir fo naden nara neni surak kara rai Bibi Lombo Ana susuran fo neni surak nadek numa hatahori mana nasoda taa-taa no Manetualain.
REV 22:1 Basa boe ma ata numa nusa tetuk do inggu temak mai naa natudu au lee esa, oen neni masodak. Oe naa, neu ndoos sama leo titiro. Oe naa bubu numa Manetualain ma Bibi Lombo Ana kadera man-parendan mai.
REV 22:2 Boe ma ana faa neni okofoo moꞌok taladan manai kota naa neu. Nai lee naa tatain beke serik, hambu ai huuk esa neni masodak. Ai huuk naa, teuk esa naboa laꞌe salahunu dua; bulak esa, laꞌe esa. Doon bisa dadi neu modo-aidoo, fo tao nahai hatahori nusa-nusak kara marai dae-inak.
REV 22:3 Tehuu basa hata fo Manetualain timba nitan ma nakatoos sara, ta hambu sara rai kota naa. Manai naar, ndia Manetualain ma Bibi Lombo Ana fo mana ranggatuuk toꞌu parenda rai Sira kadera man-parendan, ro Sira hatahori neondan fo mana nakaluku-nakatele neu Sara.
REV 22:4 Basa sara bisa mete-rita Manetualain matan. Ma Manetualain naden neni surak nai sira odamatan nara.
REV 22:5 Nai naa, ta hambu leꞌodaek. De Manetualain hatahorin nara ta parluu ledo do lambu, nahuu Manetualain ndia tao manggaledo kota naa. Neu ko ara oo toꞌu parenda sama-sama nai naa boe, losa doon naa neu.
REV 22:6 Basa de Manetualain atan naa nafada au nae, “Basa hata fo au afada o ia ena, memak tebe. Basa hatahorir bisa ramahere au kokolang ia. Fai bakahulun Manetualain pake Ndia Dula-dalen fo nafada Ndia Dedeꞌa-kokolan neu Ndia mana toꞌu dedeꞌan nara. Tehuu hatematak ia Ana pake Ndia atan numa nusa tetuk do inggu temak mai, fo nafada anan nara laꞌe-neu basa dedeꞌak kara iar fo ta dook ka te muste mori-dadi.”
REV 22:7 Basa naa, Yesus kokolak nae, “Masanedak, ee! Ta dook ka te Au mai ena. Nai susurak ia, basan neni surak ena laꞌe-neu hata fo neu ko mori-dadi. Basa hatahorir fo mana tungga susurak ia isi-liin nara, neu ko ara ndia raua ralan seli.”
REV 22:8 Mana surak susurak ia, ndia au Yohanis. Au ia, ndia amanene ma ita basa dedeꞌak kara iar. Au amanene basa, boe ma au sendek luu-langgang fo akaluku-akatele neu ata manuma nusa tetuk do inggu temak mai naa ein. Huu Ana ndia natudu basa dedeꞌak kara iar neu au.
REV 22:9 Tehuu ana kaꞌi au nae, “Wee! Boso tao talo naa! O muste makaluku-makatele neu kada Manetualain. Boso makaluku-makatele neu au. Huu au oo Manetualain hatahori neondan sama leo o, ma o toranoom mara, fo mana dadi reu Ndia mana toꞌu dedeꞌan, ma basa hatahorir laen nara, fo mana tao tungga hata fo neni surak nai susurak ia dale boe.
REV 22:10 O boso mafuni susurak ia isi-liin neu hatahori laen nara. Ta dook ka te basa hata fo neni surak nai susurak ia dale, neu ko mori-dadi.
REV 22:11 Basa hatahorir fo mana tao manggenggeok, na, ela sara ruma naa fo ara tao kada manggenggeok rakandoo. Tehuu basa mana leo-laꞌo no lolo-laok, ara muste leo-laꞌo no lolo-laok rakandoo. Basa hatahorir fo mana tao manggarauk, ela sara ruma naa fo ara tao kada manggarauk rakandoo. Tehuu basa mana tao neulauk, ara muste tao neulauk rakandoo.”
REV 22:12 Basa boe ma Yesus kokolak seluk bali nae, “Masaneda matalolole! Ta dook ka te Au mai ena. Neu ko Au bala neu basa hatahorir, tungga hata fo ara taok ena.
REV 22:13 Au ia, Numa Alfa mai losa Omega. Au ia, Numa A mai losa Z. Basa-basan mori-dadi numa Au mai, mulai numa makasososan mai losa babasan.
REV 22:14 Hatahorir fo mana safe ralao bua-loꞌan nara ena, ara ndia raua. Huu neu ko ara hambu haak fo maso tungga lelesu ina reni kota naa dale reu. Hatahorir fo mana leo-laꞌo ro lolo-laok ena, ara ndia raua. Huu neu ko ara hambu luas, fo raꞌa ai boak mana tao hatahorir rasoda rakandoo.
REV 22:15 Tehuu hatahori laen, ta bole maso naa neu. See fo ta mana dadi neu Manetualain hatahorin, ta bole leo nai naa. Ndia, hatahori ta mana mamahere neu Manetulain, hatahori mana hohongge-lelenak, mana songgo-tangguk, mana makanisak, mana teka-dokik, ma mana pepeko-lelekok. Basa naar, ta bole maso. Basa naar, ela sara reu kada dea.
REV 22:16 Au ia, Yesus. Au ndia adenu Au atang numa nusa tetuk do inggu temak mai, fo atudu basa dedeꞌak kara iar, fo neu ko ei miu mafada Au hara hehelung neu saranik bubua kahituk kara raa. Au ia, mane Dauk tititi-nonosin. Au ia, Manek mana toꞌu parenda. Au saꞌang manggaledo ndoos, sama leo nduu mansai. Au saꞌang tanden seli, sama leo nduu dulu siluk.”
REV 22:17 Manetualain Dula-dalen noke nae, “Ia mai leo!” Baroit inak naa oo nanggou boe nae, “Mai leo!” Naa fo basa mana mamanenek kara oo, tungga ranggou boe rae, “Mai leo!” Naa fo basa mana dale madak kara, mai fo rinu leo! Naa fo basa mana nau ninu oe fo mana neni masodak naa, na, mai haꞌi leo! Hatahori bole haꞌi oe naa, no mudak. Hatahori bole ninu oe naa, no ta pake babaek.
REV 22:18 Au ia, Yohanis, fee nesenedak neu basa hatahorir fo neu ko ramanene hata fo Manetualain natudu memak kana fee au nai susurak ia, talo ia: mete ma hambu hatahori tamba seluk hata-hata nai susurak ia, na, neu ko Manetualain fee tamba huku-dokik neun, nenik sosoek kahituk kara fo Ana mboꞌan neni dae-inak mai naa.
REV 22:19 Mete ma hambu hatahorir tao rakuran hata-hata bali numa susurak ia mai, na, neu ko Manetualain haꞌi heni ndia haak fo ana ta maso neni kota malalaok neu, ma ana boso naꞌa ai boak fo tao hatahori nasoda nakandoo.
REV 22:20 Yesus mesa kana ndia natudu basa dedeꞌak kara iar. Ana helu-bartaa ena nae, “Tebe naa! Ta dook ka te Au mai ena.” Lamatuak Yesus, mai leo!
REV 22:21 Au oke-hule fo Lamatuak Yesus natudu Ndia dale susuen neu basa Ndia hatahorin nara lalaꞌen. Amin. Numa au mai, Yohanis
