LEV 1:1 A̱sulazuva e ɗe ta̱ Musa reve u yuwan adanshi na̱ a̱yi diga o Oogodo o Uga'asusan. Reve u damma yi,
LEV 1:2 <<Yuwan adanshi na ama a Isra'ila vu damma le: Mantsa ma na za ro ɗu a̱a̱ ta̱wa̱a̱ A̱sulazuva na̱ kucci, u ta̱wa̱a̱ na̱ kucci vi iliyamunga ko vo oɓolo e inan ko vu mgbele ko vi ikyon.
LEV 1:3 <<Na̱ kucci'i za vu ukula̱tosu u ɗa wi inan, u ta ca ogono a nan na ri usa̱du shi. U ta̱wa̱ na̱ a̱yi o una̱ntsu wo Oogodo o Uga'asusa'an adama wo o'wo kucci na A̱sulazuva a̱a̱ usu.
LEV 1:4 U ta̱ kuru ukere wa̱ yi a aaci a̱ kucci vu ukula̱tosu'u, reve a̱ usuwa̱ yi a̱yi wo o'wo kucci matara mo ume mo unusu wa̱ yi.
LEV 1:5 Vuma'a u ta paɗa moggono'o a̱ ma̱ka̱ka̱n ma̱ A̱sulazuva. Reve olobo a Haruna nan ganu a̱ ta̱wa̱ na̱ mpasa'a, reve o kyo'onu yi e eɓele a masa'a'a suru ma na ma̱ ri o una̱ntsu wo Oogodo o Uga'asusan.
LEV 1:6 U ta muna kucci vu ukula̱tosu'u, reve wu paɗa yi mupaɗi mupaɗi.
LEV 1:7 Reve olobo a Haruna ganu a zuwa akina a masa'a reve e gere ɗanga a akina'a.
LEV 1:8 Reve e gere mupaɗi'i oɓolo na aaci na abaji a mani'in a ɗanga madala na ri a masa'a'a.
LEV 1:9 Amma wu za̱'wa̱ iliya̱tsuma̱ no okotsu a̱ yi na̱ mini. Reve ganu kula̱to yi suru a masa'a. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
LEV 1:10 <<Nna̱ kucci vu ukula̱tosu va̱ yi za vi ikyon i ɗa ko mgbele, reve u ca ogono a na a̱ ri usa̱du shi.
LEV 1:11 U ta paɗa yi upasu wu ugana u masa'a'a a̱ ma̱ka̱ka̱n ma̱ A̱sulazuva. Reve olobo a Haruna nan ganu o kyo'onu mpasa ma̱ yi e eɓele a masa'a'a suru a̱ ka̱nda̱ruwa̱.
LEV 1:12 Wu paɗa yi mupaɗi mupaɗi, reve ganu gere le, oɓolo na aaci na abaji a mani'in a ɗanga madala na ri a masa'a'a.
LEV 1:13 Wu za̱'wa̱ iliya̱tsuma̱ no okotsu na̱ mini, reve ganu ta̱wa̱ na̱ a̱yi suru, a̱vu u kula̱to yi a masa'a'a. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
LEV 1:14 <<Na̱ kucci vu ukula̱tosu a̱ tyo ya̱ A̱sulazuva'a za vu nnunu n ɗa, u ta ca muɗa ko ma̱ma̱rukuku.
LEV 1:15 Ganu ta̱ ta̱wa̱ na̱ a̱yi a masa'a reve u punda̱ra̱ yi yinlu u mula̱ aaci'i. Reve u kula̱to yi a masa'a'a. Reve a lyawa mpasa ma̱ yi mo ocusho a̱ nge'en m masa'a'a.
LEV 1:16 U to foɗo owofun ni ili i na i ri pe suru, reve u vari yi e eeɓele a asana a masa'a'a, uba̱ta̱ wo okomo.
LEV 1:17 U te reme evelu a̱ yi reve u ɗa̱ra̱la̱ niyi, amma waa karala niyi shi. Reve ganu'u u kula̱to yi a masa'a'a a ɗanga na ri a madala. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa̱ yi.
LEV 2:1 <<Na̱ vuma ta̱wa̱a̱ A̱sulazuva na̱ kucci vi ishina, u ta̱ ta̱wa̱ na̱ yira i lashi. U ta̱ tsun yi mani'in ni ili i ma̱guru i na a̱ tsu ɗe furenkisen.
LEV 2:2 Reve u ta̱wa̱ na̱ a̱yi uba̱ta̱ wo olobo a Haruna nan ganu. Ganu to shiton ukere na̱ yira i lashi'i na̱ mani'in oɓolo na̱ furenkisen suru. Reve u kula̱to yi ili yu ucuwusan zuva masa'a'a, kucci na a yuwain na akina, ili i ma̱guru ma na A̱sulazuva aa uwwusa uyo'o wa̱ yi.
LEV 2:3 Akapi a̱ kucci vi ishina na buwai, u to o'wo za va Haruna no olobo a̱ yi, a̱yi ɗa u la'ai akiza u kucci na a cayi A̱sulazuva va akina.
LEV 2:4 <<A mantsa ma na i ta̱wa̱i na̱ kucci vi ishina i na a zatsuyi a wuwan, wo o'wo za yira i lashi, opopofu a na a̱ ri na̱ wolilo shi na a̱ ja̱mba̱ra̱i na̱ mani'in, ko emeshen a na a yuwain babu wolilo na a putalai na̱ mani'in ma ɗa.
LEV 2:5 Na̱ kucci yira vi ishina va̱ wu yi za na a kangalai a ataɗa a ɗa, a yuwan yi na̱ yira i lashi i na a̱ ja̱mba̱ra̱i na̱ mani'in babu wolilo.
LEV 2:6 Vu busa yi mubushi mubushi, reve vu tsun yi mani'in, kucci vi ishina ɗa.
LEV 2:7 Nna̱ kucci yira vi ishina va̱ wu vi ili i na a raluyi a ataɗa a ɗa, a yuwan yi na̱ yira i lashi na̱ mani'in.
LEV 2:8 I ta̱wa̱a̱ A̱sulazuva kucci vi ishina vi ili i na a yuwain ni ili i nda. I ca ganu ele, a̱yi ɗa wa̱a̱ ta̱wa̱ ne ele a masa'a.
LEV 2:9 U te kene pe ili yu ucuwusan a̱tsuma̱ a̱ kucci vi ishina'a, reve u kula̱to yi a masa'a'a. Kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
LEV 2:10 Akapi a̱ kucci vi ishina na buwai u to o'wo za va Haruna no olobo a̱ yi, a̱yi ɗa u la'ai akiza u kucci na a cayi A̱sulazuva va akina.
LEV 2:11 <<Babu kucci vi ishina na a̱a̱ ta̱wa̱a̱ A̱sulazuva i na aa yuwan na̱ wolilo, adama a na ya̱a̱ kula̱to wolilo ko ishiki a̱tsuma̱ a̱ kucci na a cayi A̱sulazuva na akina shi.
LEV 2:12 I ta gura ta̱wa̱ ne ele tsa̱ kucci vu umatsun wu ufaru ya̱ A̱sulazuva, agba aa yuwan kucci ne ele a masa'a kucci ma̱guru mo uyo'o shi.
LEV 2:13 I ta̱ tsun kucci vi ishina i ɗu suru akpaɗi. She i kuɗa̱ a̱ tsun akpaɗi a akucunu a̱ A̱sula̱ a̱ ɗu a̱ kucci vi ishina ɗu wan. I tsun akpaɗi a̱ kucci ɗu suru.
LEV 2:14 <<Nni i ta̱wa̱a̱ A̱sulazuva na̱ kucci vi ishina vu umatsun wu ufaru, i ca a̱ga̱za̱ e ishina i sa'avu o uzuwun i na a kparai.
LEV 2:15 Reve i tsun yi mani'in na̱ furenkisen, kucci vi ishina ɗa.
LEV 2:16 Ganu ta̱ kula̱to ili yu ucuwusan diga pe e ishina i na a kparai'i na̱ mani'in oɓolo ni ili i furenkise'en suru, kucci na a cayi A̱sulazuva va akina.
LEV 3:1 <<Nna̱ kucci na vuma a̱a̱ ta̱wa̱a̱ za muwwulai ɗa, u ta ca diga a̱tsuma̱ o oɓolo e inan ogono ko a̱na̱wu. U ta ca za na ri usa̱du shi e ekere a̱ A̱sulazuva.
LEV 3:2 U ta̱ kuru ukere wa̱ yi a aaci e ili i na u cayi, reve u paɗa yi o u'uwata wo Oogodo o Uga'asusan. Reve olobo a Haruna nan ganu o kyo'onu mpasa'a e eɓele a masa'a'a suru a̱ ka̱nda̱ruwa̱.
LEV 3:3 Diga pe a̱ kucci muwwulai'i u ta̱ ta̱wa̱a̱ A̱sulazuva na̱ kucci vi ili i nda na a yuwain na akina: abaji a mani'in ma na ma palai iliya̱tsuma̱ suru na̱ za na ri uɓoluloi ni iliya̱tsuma̱'a̱,
LEV 3:4 oɓolo na a'ilu e re na abaji a mani'in ma na ma̱ ri uɓoluloi ne ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na woo foɗo oɓolo na a'ilu'u.
LEV 3:5 Reve olobo a Haruna a̱ kula̱to le a masa'a'a oɓolo na̱ kucci vu ukula̱tosu u na u ri a ɗanga madala, kucci na a yuwain na akina, ili i ma̱guru ma na A̱sulazuva aa uwwusa uyo'o wa̱ yi.
LEV 3:6 <<Nnu u ca diga e ikyon ko e mgbele kucci muwwulai e ekere a̱ A̱sulazuva, u ta ca ogono ko a̱na̱wu a na a̱ ri usa̱du shi.
LEV 3:7 Nnu u ca ma̱giri'i, u ta̱ ta̱wa̱ na̱ a̱yi a̱ ma̱ka̱ka̱n ma̱ A̱sulazuva.
LEV 3:8 U ta̱ kuru ukere wa̱ yi a aaci e ili i na u cayi, reve u paɗa yi elime o Oogodo o Uga'asusan. Reve olobo a Haruna o kyo'onu mpasa ma̱ yi e eɓele a masa'a'a suru a̱ ka̱nda̱ruwa̱.
LEV 3:9 Diga pe a̱ kucci muwwulai'i u ta ca kucci vi ili i nda na a yuwain na akina uba̱ta̱ wa̱ A̱sulazuva: mani'in ma̱ yi na̱ wizan u na u ri na̱ mani'in suru za na aa paɗa zuzu ne eetele e ikyun, oɓolo na̱ mani'in ma na ma palai iliya̱tsuma̱ suru ko za na ri uɓoluloi ni iliya̱tsuma̱'a̱,
LEV 3:10 na a'ilu e re na̱ mani'in ma na ma̱ ri uɓoluloi ne ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na woo foɗo oɓolo na a'ilu'u.
LEV 3:11 Ganu ta̱ kula̱to le a masa'a, tsi ilyalya kucci na a cayi A̱sulazuva na akina.
LEV 3:12 <<Na̱ kucci va̱ yi za megbele ma ɗa, u ta̱ ta̱wa̱ na̱ a̱yi a̱ ma̱ka̱ka̱n ma̱ A̱sulazuva.
LEV 3:13 U ta̱ kuru ukere wa̱ yi a aaci a̱ yi, reve u paɗa yi elime o una̱ntsu wo Oogodo o Uga'asusan. Reve olobo a Haruna o kyo'onu mpasa ma̱ yi e eɓele a masa'a'a suru a̱ ka̱nda̱ruwa̱.
LEV 3:14 Diga e ili i na u cayi'i u ta ca A̱sulazuva ili i nda kucci va akina: abaji a mani'in ma na ma palai iliya̱tsuma̱ suru na̱ za na ri uɓoluloi ne ele,
LEV 3:15 na a'ilu e re na̱ mani'in ma na ma̱ ri uɓoluloi ne ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na woo foɗo oɓolo na a'ilu'u.
LEV 3:16 Ganu ta̱ kula̱to le a masa'a tsi ilyalya, kucci na a yuwain va akina ili i ma̱guru mo uyo'o. Abaji a mani'in suru za va A̱sulazuva a ɗa.
LEV 3:17 <<A̱yi nda u to o'wo ili i mayan kuci hali a̱ tyo mantsa suru, uba̱ta̱ u na i da̱nuyi suru. She i tama abaji a mani'in ko mpasa wan.>>
LEV 4:1 Reve A̱sulazuva a damma Musa,
LEV 4:2 <<Damma aza a Isra'ila, na̱ vuma yuwan unusu o ucigu wa̱ yi shi a̱vu u yuwan ili i ta̱ e ili i na A̱sulazuva a zuwai she a yuwan wan,
LEV 4:3 nna̱ ganu na a̱ tsuwa̱yin mani'in yuwan unusu, reve u ta̱wa̱a̱ ama nu unusu, u ta̱ ta̱wa̱a̱ A̱sulazuva na̱ moggono ma nan ma na ma̱ ri usa̱du shi kucci adama o unusu u na u yuwain.
LEV 4:4 U ta̱ ta̱wa̱a̱ na̱ moggono'o o u'uwata wo Oogodo o Uga'asusan a̱ ma̱ka̱ka̱n ma̱ A̱sulazuva. U ta̱ kuru ukere wa̱ yi a aaci a̱ yi, reve u paɗa yi a̱ ma̱ka̱ka̱n ma̱ A̱sulazuva.
LEV 4:5 Reve ganu na a̱ tsuwa̱yin mani'i'in u kene mpasa m moggono'o reve u tara yi a uwa o Oogodo o Uga'asusan.
LEV 4:6 Waru u tsupu aakatsu a̱ yi a mpasa'a, reve wu kyo'onu yi toto ucindere a̱ ma̱ka̱ka̱n ma̱ A̱sulazuva elime o umuna wa̱ A̱a̱'isa̱.
LEV 4:7 Reve ganu putala mpasa n ro a avana a masa'a e ili i ma̱guru mo uyo'o ma na ma̱ ri a̱ ma̱ka̱ka̱n ma̱ A̱sulazuva o Oogodo o Uga'asusan. Reve u tsun akapi a mpasa m moggono'o e ikyun i masa'a ma̱ kucci vu ukula̱tosu o u'uwata wo Oogodo o Uga'asusan.
LEV 4:8 Reve u foɗo abaji a mani'in o moggono ma na a cayi kucci adama o unusu'u suru, na̱ mani'in ma na ma palai iliya̱tsuma̱ na̱ za na ri uɓoluloi ni iliya̱tsuma̱ suru,
LEV 4:9 na a'ilu e re na̱ mani'in ma na ma̱ ri uɓoluloi ne ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na woo foɗo oɓolo na a'ilu'u.
LEV 4:10 U to foɗo mani'i'in cine o tsu foɗo za vo ogono a na a cayi adama a muwwulai. Reve ganu kula̱to le a masa'a mo ukula̱tosu u kucci.
LEV 4:11 Amma ukwan u moggono'o ni inama ya̱ yi suru na aaci a̱ yi na ana a̱ yi ni iliya̱tsuma̱ ya̱ yi na̱ a̱ya̱n a̱ yi,
LEV 4:12 na akapi o moggono'o suru, u ta tara le o uta̱ o ucina̱ wu uva̱la̱ta̱ a̱ tyo uba̱ta̱ u na u ri cece, uba̱ta̱ u na oo ocosu okomo. Reve u kula̱to le ɗe na̱ ɗanga madala e edemu o okomo'o.
LEV 4:13 <<Nna ama a Isra'ila suru a yuwan unusu o ucigu u le shi a̱vu a yuwan ili i ta̱ e ili i na A̱sulazuva a zuwai she a yuwan wan, ko na̱ a̱ shi e reve ni ili'i shi, a̱ ta̱ nu unusu.
LEV 4:14 Nna̱ a̱ ta̱wa̱ e reve nu unusu u na a yuwain, a ta ca kucci moggono ma nan adama a̱ kucci vu unusu o una̱ntsu wo Oogodo o Uga'asusan.
LEV 4:15 Mbara ma ama a Isra'ila'a n ta̱ kuru ekere e le a aaci o moggono ma na'an a̱ ma̱ka̱ka̱n ma̱ A̱sulazuva, reve a paɗa yi lo.
LEV 4:16 Reve ganu na a̱ tsuwa̱yin mani'in u kene mpasa m moggono'o a uwa pe o Oogodo o Uga'asusa'an.
LEV 4:17 U ta̱ tsupu aakatsu a̱ yi a̱tsuma̱ a mpasa'a reve wu kyo'onu yi a̱ ma̱ka̱ka̱n ma̱ A̱sulazuva toto ucindere elime o umuna'a.
LEV 4:18 Reve ganu'u u putala mpasa n ro a avana a masa'a'a ma na ma̱ ri a̱ ma̱ka̱ka̱n ma̱ A̱sulazuva o Oogodo o Uga'asusan. Akapi a mpasa n na m buwai reve u tsun yi e ikyun i masa'a ma̱ kucci vu ukula̱tosu o u'uwata wo Oogodo o Uga'asusan.
LEV 4:19 U to foɗo abaji a mani'in ma̱ yi suru, reve u kula̱to yi a masa'a'a.
LEV 4:20 U ta yuwan na̱ moggono ma na'an cine u yuwain na̱ moggono ma na a cayi kucci adama o unusu. Ne tsunda tsa ɗa ganu a yuwaan le kucci matara mo ume mo unusu, reve gba a yuwaan le gafura.
LEV 4:21 Reve u tara na'an o uta̱ o ucina̱ wu uva̱la̱ta̱ a̱vu u kula̱to yi cine u kula̱toi nan vu ufaru. A̱yi nda a̱yi ɗa kucci vu unusu adama a ama a Isra'ila.
LEV 4:22 <<Nna̱ zagbain yuwan unusu o ucigu wa̱ yi shi, a̱vu u yuwan ili i ta̱ e ili i na A̱sulazuva A̱sula̱ a̱ yi a zuwai, u ta̱ nu unusu.
LEV 4:23 Nno o roco yi unusu u na u yuwain, u ta ca kucci ma̱ga̱ji ma na ma̱ ri usa̱du shi.
LEV 4:24 U ta̱ kuru ukere wa̱ yi a aaci a̱ ma̱ga̱ji'i, reve u paɗa yi uba̱ta̱ u na a tsu paɗasa kucci na a̱ kula̱tosu a̱ ma̱ka̱ka̱n ma̱ A̱sulazuva. Kucci adama o unusu u ɗa.
LEV 4:25 Reve ganu shepe mpasa n kucci adama o unusu'u na aakatsu a̱ yi, reve u putala a avana a masa'a ma̱ kucci vu ukula̱tosu, a̱vu u tsun akapi a mpasa'a e ikyun i masa'a'a.
LEV 4:26 U ta̱ kula̱to abaji a mani'i'in suru a masa'a cine u kula̱toi mani'in ma̱ kucci muwwulai. Ne ɗa ganu aa ca kucci adama a matara mo ume mo unusu adama a zagbai'in, reve a yuwaan yi gafura.
LEV 4:27 <<Na̱ vuma ro a̱tsuma̱ a ama yuwan unusu nu ucigu wa̱ yi shi, a̱vu u yuwan ili i ta̱ e ili i na A̱sulazuva a zuwai, u ta̱ nu unusu.
LEV 4:28 Nno o roco yi unusu u na u yuwain, u ta̱ ta̱wa̱a̱ na̱ a̱na̱wu e megbele a na a̱ ri usa̱du shi kucci o una̱ wu unusu u na u yuwain.
LEV 4:29 U ta̱ kuru ukere wa̱ yi a aaci a̱ kucci vu unusu'u reve u paɗa yi uba̱ta̱ u kucci vu ukula̱tosu.
LEV 4:30 Reve ganu shepe mpasa'a na aakatsu a̱ yi, reve u putala a avana a masa'a ma̱ kucci vu ukula̱tosu. Reve u tsun akapi a na a buwai e ikyun i masa'a'a.
LEV 4:31 U to foɗo abaji a mani'in suru cine o tsu foɗo mani'in ma̱ kucci muwwulai. Reve ganu kula̱to yi a masa'a ili i ma̱guru mo uyo'o e ekere a̱ A̱sulazuva. Ne ɗa ganu a yuwaan yi kucci matara mo ume mo unusu, a̱ ta̱ gba a yuwaan yi gafura.
LEV 4:32 <<Nna̱ mokyokyon ma ɗa wa̱a̱ ta̱wa̱a̱ kucci vu unusu va̱ yi, a̱na̱wu a ɗa wa̱a̱ ta̱wa̱a̱ za na ri usa̱du shi.
LEV 4:33 U ta̱ kuru ukere wa̱ yi a aaci a̱ yi, reve u paɗa yi adama a̱ kucci vu unusu uba̱ta̱ u na a tsu paɗasa kucci vu ukula̱tosu.
LEV 4:34 Ganu ta̱ shepe mpasa n kucci vu unusu'u na aakatsu a̱ yi reve u putala a avana a masa'a ma̱ kucci vu ukula̱tosu. Reve u tsun akapi a mpasa'a e ikyun i masa'a'a.
LEV 4:35 U to foɗo abaji a mani'in suru cine o tsu foɗo mani'in mo kyon kucci muwwulai. Reve ganu kula̱to yi a masa'a'a zuva kucci na a cayi A̱sulazuva va akina. Ne ɗa ganu aa yuwaan vuma'a kucci matara mo ume mo unusu u na u yuwain, a̱ ta̱ gba a yuwaan yi gafura.
LEV 5:1 <<Nna̱ vuma kuɗa̱ a yuwan adanshi a mantsa ma na e ɗe niyi adama u damma ili i na we enei ko u revei, u yuwan ta̱ unusu, waru ume wu unusu u ndolo u ta̱ a aci a̱ yi.
LEV 5:2 Ko gba na̱ vuma ju'wa̱n ili i na a tarai ili yi idaba i ɗa nu urevu wa̱ yi shi, ko a̱kwa̱kwa̱ a nama vu una ɗa, ko a̱kwa̱kwa̱ a nama vu u'wa ko a̱kwa̱kwa̱ e ili i na i ri e ika̱ta̱pu, wo o'wo ta̱ idaba. Waru u ta̱ nu unusu ko na wo o'woi u ri nu urevu shi.
LEV 5:3 Ko gba nu u ju'wa̱n cu'un vi ili yi idaba i na i tsu uta̱ uba̱ta̱ u vuma i na i tsu zuwa vuma o o'wo idaba biti, ko nu u ri nu urevu shi, nnu u ta̱wa̱ u reve wo o'wo ta̱ za vu unusu.
LEV 5:4 Ko gba na̱ vuma yuwan akucunu nu una̱ wa̱ yi iwa̱u a na waa yuwan ili i ro, ko ni iwuya i ɗa ko isa'ani, a̱tsuma̱ e ili i na suru vuma yuwain akucunu na̱ majiyan shi, ko nu u reve na̱ a̱yi shi, nnu u ta̱wa̱ u reve wo o'wo ta̱ za vu unusu.
LEV 5:5 Nna̱ vuma yuwan ta̱ unusu u ta̱ a̱tsuma̱ a̱ nusu nda, u damma unusu u na u yuwain.
LEV 5:6 U ta̱ ta̱wa̱a̱ na̱ mokyokyon ko megbele kucci vu unusu va̱ yi uba̱ta̱ wa̱ A̱sulazuva adama o unusu u na u yuwain. Reve ganu ca kucci matara mo ume mo unusu adama o unusu wa̱ yi.
LEV 5:7 <<Agba nna̱ wa̱a̱ tsura̱ mokyokyon shi, reve u ta̱wa̱a̱ A̱sulazuva na̱ muɗa n re ko murukuku n re adama a atsupu o unusu u na u yuwain, za ta̱ ta̱ adama a̱ kucci vu unusu za ta̱ ta̱ waru adama a̱ kucci vu ukula̱tosu.
LEV 5:8 U ta̱ ta̱wa̱ ne ele uba̱ta̱ wa ganu, za na aa fara ca za vu unusu. U ta̱ punda̱ra̱ yi yinlu amma wa̱a̱ mula̱ aaci'i shi.
LEV 5:9 U to kyo'onu mpasa n kucci vu unusu e eɓele a masa'a'a, reve u koso kpoko akapi a mpasa n na m buwai e ikyun i masa'a'a, kucci adama o unusu u ɗa.
LEV 5:10 Reve u ca za ire kucci vu ukula̱tosu cine a zuwai a yuwan. Ne ɗa ganu aa yuwan kucci matara mo ume mo unusu adama o unusu u na vuma'a u yuwain, reve gba a yuwaan yi gafura.
LEV 5:11 <<Agba na̱ waa gura tsura̱ muɗa n re ko murukuku n re shi, to u ta̱ ta̱wa̱a̱ nu ukunzuwu u ta̱ u efa u yira i lashi kucci adama o unusu wa̱ yi. She u tsun yi mani'in wan waru she u tsun yi ili i ma̱guru wan, adama a na kucci adama o unusu u ɗa.
LEV 5:12 Vuma'a u ta tara yira'a a̱ tyo ya ganu, reve ganu'u u kene ukere u ta̱ tapu ili yu ucuwusan. Reve u kula̱to yi a masa'a zuva vi ilyalya i na a cayi A̱sulazuva va akina. Kucci adama o unusu u ɗa.
LEV 5:13 Ne tsunda tsa ɗa ganu aa yuwan kucci matara mo ume mo unusu adama o unusu u na vuma'a u yuwain, reve gba a yuwaan yi gafura. Ili i na i buwai u to o'wo za va ganu, cine u ri a̱ kucci vi ishina.>>
LEV 5:14 Reve A̱sulazuva a damma Musa,
LEV 5:15 <<Nna̱ za ro a̱tsuma̱ a̱ ɗu yuwan ulambu wa̱ a̱ɓula̱, reve u yuwan unusu nu ucigu wa̱ yi shi e ekere e ili i na a tarai na akiza ya̱ A̱sulazuva, u ta̱ ta̱wa̱a̱ A̱sulazuva kucci vu unusu a̱a̱giri'i a̱tsuma̱ o oɓolo a̱ yi za na ri usa̱du shi. Ikebe ya̱ a̱a̱giri'i'i u te reme azurufa vi ili i na aa yuwusaan ulinga na̱ a̱yi a̱ a̱a̱'isa̱. Kucci makuɗa ma̱ wila̱ ma ɗa.
LEV 5:16 Vuma'a u ta tsupa adama e ili i na u yuwain unusu e ili ya akiza'a. Reve u da̱shi za ta̱ a̱tsuma̱ o ozo o ton, reve u ca ganu. Ganu ta yuwan kucci matara mo ume mo unusu adama a̱ yi oɓolo na̱ a̱a̱giri'i a̱ kucci makuɗa ma̱ wila̱, reve gba a yuwaan yi gafura.
LEV 5:17 <<Nna̱ vuma yuwan unusu a̱vu u yuwan ili i ta̱ a̱tsuma̱ e ili i na A̱sulazuva a zuwai she a yuwan wan, ko nu u shi u reve na̱ a̱yi shi, u kuɗa ta̱ wila̱ waru ume wu unusu u ndolo u ta̱ a aci a̱ yi.
LEV 5:18 U ta̱ ta̱wa̱a̱ ganu na̱ a̱a̱giri'i a na a̱ ri usa̱du shi kucci makuɗa ma̱ wila̱ diga o oɓolo e ikyon ya̱ yi, ikebe ya̱ yi i yuwan una̱ta̱ nu ukunzuwu u na a zuwai. Ne ɗa ganu aa yuwan kucci matara mo ume mo unusu u vuma'a adama o unusu u na u yuwain nu ucigu shi. Reve gba a yuwaan yi gafura.
LEV 5:19 Kucci vu unusu u ɗa, u yuwaan ta̱ A̱sulazuva unusu na amayun.>>
LEV 6:1 Reve A̱sulazuva a damma Musa,
LEV 6:2 <<Nna̱ vuma yuwan unusu wu ulambu wa̱ a̱ɓula̱ e ekere a̱ A̱sulazuva wu luma̱ moron ma̱ nden ma̱ yi, ni ili i na a ca niyi izuwa ko u yuwan yi wivu ko gba shi u paala moron ma̱ nden ma̱ yi,
LEV 6:3 ko gba u tsura̱ ili i na i puwa̱yin, reve u yuwan epen adama a̱ yi ko u kucina ne epen, ko u yuwan unusu u ro u na ama aa gura yuwan,
LEV 6:4 nu u nusan a̱vu u ta̱wa̱ u reve nu unusu wa̱ yi, u ta̱ ka̱mbuwa̱ ili i na wi iva̱i ko ili i na u tsura̱i na a'usa ko ni ili i na a ca niyi izuwa ko ili i na u tsura̱i i na i puwa̱yin,
LEV 6:5 ko e ili i na u yuwain akucunu e epen adama a̱ yi. U ta̱ ka̱mbuwa̱ yi suru hali u da̱shi za ta̱ a̱tsuma̱ o ozo o ton. Reve u ca za vi ili o urana u na waa ca kucci vu unusu va̱ yi.
LEV 6:6 Reve u ta̱wa̱a̱ ganu atsupu o unusu a̱a̱giri'i a na a̱ ri usa̱du shi diga o oɓolo e ikyon kucci makuɗa ma̱ wila̱ e ekere a̱ A̱sulazuva, ikebe ya̱ yi i yuwan una̱ta̱ nu ukunzuwu u na a zuwai.
LEV 6:7 Ne ɗa ganu aa yuwan kucci matara mo ume mo unusu u vuma'a a̱ ma̱ka̱ka̱n ma̱ A̱sulazuva. Reve a yuwaan yi gafura vu unusu u na u yuwain e ili i nda i na i zuwa niyi wo o'woi za vu unusu.>>
LEV 6:8 A̱sulazuva waru a damma ta̱ Musa,
LEV 6:9 <<Vu damma Haruna no olobo a̱ yi a na, apa nda wila̱ u kucci vu ukula̱tosu: Kucci vu ukula̱tosu u ta̱ asa a akinkina zuva masa'a hali usana, waru akina'a a̱ ta̱ da̱na̱ a madala.
LEV 6:10 Reve ganu oto a̱tugu o okoro na̱ mokoɗi ma aacaka ma̱ yi. Reve u pura̱ okomo a̱ kucci vu ukula̱tosu u tsun a̱ nge'en m masa'a.
LEV 6:11 Reve u foɗo itana i nda a̱vu wo oto ozo o ro. Reve u tanu okomo'o a̱ tyo o ucina̱ wu uva̱la̱ta̱ uba̱ta̱ u cece.
LEV 6:12 Akina a na a̱ ri a masa'a'a u ta̱ da̱na̱ a madala, she u kima̱ wan. Ganu ta̱ ri n da̱shishi ɗanga a akina'a usana suru. Reve u gere ɗe kucci vu ukula̱tosu a akina'a u kula̱to abaji a mani'in kucci muwwulai ɗe.
LEV 6:13 Akina'a u da̱na̱ a̱ madala a masa'a'a, she u kima̱ wan.
LEV 6:14 <<Apa nda cine a̱ ri n yuwusan kucci vi ishina: Olobo a Haruna a̱ ta̱ ta̱wa̱ na̱ a̱yi uba̱ta̱ wa̱ A̱sulazuva elime a masa'a'a.
LEV 6:15 Ganu te kene ukere u ta̱ tapu pe a yira i lashi'i na̱ mani'in oɓolo ni ili i ma̱guru suru, reve u kula̱to le ili yu ucuwusan a masa'a'a, ili i ma̱guru mo uyo'o e ekere a̱ A̱sulazuva.
LEV 6:16 Haruna no olobo a̱ yi a ta tama akapi a na a buwai. A ta tama yi babu wolilo uba̱ta̱ wa akiza o ukowo wo Oogodo o Uga'asusan.
LEV 6:17 A̱a̱ zun yi na̱ wolilo shi, n ca ta̱ nan ganu a̱yi wo o'wo akunda e le e ili i na a ca numu va akina. A̱yi ɗa ili i na i la'ai akiza, tsa̱ kucci vu unusu na̱ kucci makuɗa ma̱ wila̱.
LEV 6:18 Ulobo suru a̱tsuma̱ o olobo a Haruna u ta tama yi, cine a zuwai hali a̱ tyo a mantsa me elime, ili i na a cayi A̱sulazuva va akina. Ili i na suru i ju'wa̱in nle, u to o'wo na akiza.>>
LEV 6:19 A̱sulazuva a yuwan ta̱ adanshi na̱ Musa u damma,
LEV 6:20 <<Apa nda kucci na Haruna no olobo a̱ yi aa ca A̱sulazuva urana u na a̱ tsun niyi mani'in: ukunzuwu u ta̱ u efa u yira i lashi a̱tsuma̱ a kupa, cine a̱ tsu ta̱wa̱a̱ na̱ kucci vi ishina. A̱ ta̱ ta̱wa̱a̱ na akapi nu usana akapi waru nu ulivu.
LEV 6:21 A̱ ta̱ ja̱mba̱ra̱ yi na̱ mani'in a̱vu a kangala yi a ataɗa o ukangalu. A̱ ta̱ ta̱wa̱ na̱ a̱yi uja̱mba̱ru ulobonu, ukangalu mukutsu mukutsu tsa̱ kucci vi ishina, ili i ma̱guru mo uyo'o e ekere a̱ A̱sulazuva.
LEV 6:22 Ulobo u na waa tara e ekere a̱ yi tsa ganu na a̱ tsuyin mani'in, a̱yi ɗa woo foɓo yi. Akunda a̱ A̱sulazuva a ɗa kuci, a̱ ta̱ kula̱to yi suru.
LEV 6:23 Kucci vi ishina va ganu suru a̱ ta̱ kula̱to yi suru, aa lyuwa yi shi.>>
LEV 6:24 Reve A̱sulazuva a damma Musa,
LEV 6:25 <<Yuwan adanshi na̱ Haruna no olobo a̱ yi: Apa nda ure u mayan ma̱ kucci vu unusu: uba̱ta̱ u na a tsu paɗa kucci vu ukula̱tosu lo ɗa aa paɗa kucci vu unusu a̱ ma̱ka̱ka̱n ma̱ A̱sulazuva. A̱yi ɗa kucci na la'ai akiza.
LEV 6:26 Ganu na cayi kucci'i u ta tama inama'a. U ta tama yi uba̱ta̱ wa akiza, o ukowo wo Oogodo o Uga'asusan.
LEV 6:27 Ili i na biti i ju'wa̱in inama ya̱ yi u to o'wo na akiza, waru na̱ mpasa ma̱ yi n daɓa utugu, a̱ ta̱ za̱'wa̱ utugu'u uba̱ta̱ wa akiza.
LEV 6:28 Reve o ɓoso upondo u ci'in u na a su'wain inama'a. Amma na a su'wan yi ta̱ o upondo wu rumushili o to kongoro yi reve e lece yi na̱ mini.
LEV 6:29 Ulobo suru a̱tsuma̱ o umatsun wa ganu u ta gura tama inama'a, a̱yi ɗa u la'ai akiza.
LEV 6:30 Amma kucci vu unusu u na suru a̱ ta̱wa̱yi na̱ mpasa ma̱ yi o Oogodo o Uga'asusan adama a matara mo ume mo unusu Uba̱ta̱ wa Akiza, a̱ ta̱ kula̱to yi na akina.
LEV 7:1 <<Apa nda re mayan ma̱ kucci adama a makuɗa ma̱ wila̱. Kucci na la'ai akiza a ɗa.
LEV 7:2 A ta paɗa ili i na a̱ ta̱wa̱yi kucci adama o unusu'u uba̱ta̱ u na a tsu paɗa kucci vu ukula̱tosu. Reve o kyo'onu mpasa ma̱ yi e eɓele a masa'a'a suru a̱ ka̱nda̱ruwa̱.
LEV 7:3 A ta ca abaji a mani'in ma̱ yi suru, abaji a mani'in ma wizan na̱ mani'in ma na ma̱ ri uɓoluloi ni iliya̱tsuma̱,
LEV 7:4 oɓolo na a'ilu e re na abaji a mani'in me ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na oo foɗo oɓolo na a'ilu'u.
LEV 7:5 Ganu ta̱ kula̱to le a masa'a'a kucci na a cayi A̱sulazuva va akina, a̱yi ɗa kucci makuɗa ma̱ wila̱.
LEV 7:6 Ulobo suru o u'wa wa ganu u ta gura tama yi. A ta tama yi uba̱ta̱ wa akiza. Kucci na la'ai akiza a ɗa.
LEV 7:7 <<Ure u mayan ma̱ kucci makuɗa ma̱ wila̱ una̱ta̱ u ɗa u ri na̱ za kucci vu unusu. Ganu na yuwain kucci matara mo ume mo unusu u to o'wo ni ili i na i buwai.
LEV 7:8 Waru ganu na yuwain kucci vu ukula̱tosu o una̱ u vuma suru, u to o'wo nu ukwan u kucci vu ukula̱tosu u na u cayi'i.
LEV 7:9 Waru kucci vi ishina na a̱ zatsuyi suru a wuwan oɓolo ni ili i na o raluyi e ebelu o ukangalu ko a ataɗa o ukangalu, u to o'wo za va ganu na yuwan niyi.
LEV 7:10 Amma kucci vi ishina na a̱ ja̱mba̱ra̱i na̱ mani'in ko babu mani'in e te ne'esheen olobo a Haruna una̱ta̱.
LEV 7:11 <<Apa nda re mayan ma̱ kucci muwwulai na vuma aa gura ta̱wa̱a̱ A̱sulazuva:
LEV 7:12 Nnu u ca yi o una̱ wu ugodyusho, u ta ca emeshen a na a̱ ja̱mba̱ra̱i na̱ mani'in oɓolo no opopofu a na a̱ ri na̱ wolilo shi a na a̱ ja̱mba̱ra̱i na̱ mani'in, no opopofu a yira i lashi i na i ri na̱ wolilo shi i na a̱ ja̱mba̱ra̱i na̱ mani'in ulobonu.
LEV 7:13 Reve u ca akpatali o opopofu a na a̱ ri na̱ wolilo oɓolo na̱ kucci muwwulai.
LEV 7:14 A̱ kucci'i suru u ta ca aakpatali o opopofu a̱ ta̱ uneꞌe la̱nga̱ e ekere a̱ A̱sulazuva. Opopofu'u o to o'wo za va ganu na kyo'onuyi mpasa n kucci muwwulai'i.
LEV 7:15 Waru a ta tama inama i kucci muwwulai vu ugodyusho'o urana u na a yuwan niyi. Waa lyawa akapi a asa shi.
LEV 7:16 <<Amma nna̱ kucci na u cayi za vu ushitosun wa akucunu a ɗa ko gba kucci vu ucigu wo okolo a ɗa, a ta tama yi o urana u na a yuwan niyi. Agba akapi a na a buwai a ta gura tama yi nu usana u tawa.
LEV 7:17 Amma nnu u pasa hali o urana wa ta'atsu a̱ ta̱ kula̱to yi.
LEV 7:18 Nna a tama nama kucci muwwulai o urana wa ta'atsu, a̱a̱ ushi kucci va̱ yi shi. Waru aa tara kucci va̱ yi ili i ro shi, adama a na ili yi idaba i ɗa. Za na waru tamai inama'a ume wu unusu u ndolo u ta̱ a aci a̱ yi.
LEV 7:19 <<Nama na ju'wa̱in ili yi idaba suru aa tama yi shi. A̱ ta̱ kula̱to yi. Adama e inama gba, za na suru ri cece ta gura tama inama'a.
LEV 7:20 Amma za na suru tamai inama i kucci muwwulai ya̱ A̱sulazuva a̱yi gba u ta̱ idaba, a ta tawa yi a̱tsuma̱ a ama a̱ yi.
LEV 7:21 Nna̱ vuma ju'wa̱n ili yi idaba, ko za vuma ko za vu nama ko ili yi idaba i ro, reve waru u tama nama na a cayi A̱sulazuva kucci muwwulai, a ta tawa vuma ndolo a̱tsuma̱ a ama a̱ yi.>>
LEV 7:22 A̱sulazuva a damma ta̱ Musa,
LEV 7:23 <<Damma aza a Isra'ila, she i tama abaji a mani'in ma nan ko mo kyon ko me megbele wan.
LEV 7:24 Waru she i tama mani'in ma nama na kuwa̱i na aciya̱yi wan, ko gba nama na nama vu una vu unai wan. Amma i ta gura yuwan ili i ro na̱ a̱yi.
LEV 7:25 Za na suru tamai abaji a mani'in ma nama na a cayi A̱sulazuva kucci va akina, a ta tawa yi a̱tsuma̱ a ama a̱ yi.
LEV 7:26 Waru uba̱ta̱ u na i da̱nuyi suru she i tama mpasa wan, ko za manunu ko za vu nama.
LEV 7:27 Za na suru tamai mpasa, a ta tawa yi a̱tsuma̱ a ama a̱ yi.>>
LEV 7:28 Reve A̱sulazuva a damma Musa,
LEV 7:29 <<Yuwan adanshi na aza a Isra'ila a na, za na suru ta̱wa̱i na̱ kucci muwwulai e ekere a̱ A̱sulazuva, u ta ca A̱sulazuva upasu u ro u kucci va̱ yi.
LEV 7:30 Ne ekere a̱ yi a ɗa wa̱a̱ ta̱wa̱a̱ A̱sulazuva na̱ kucci na a yuwain na akina. U ta̱ ta̱wa̱a̱ na abaji a mani'in oɓolo na̱ ma̱ka̱ka̱n, reve u 'ya̱sa̱n ma̱ka̱ka̱'a̱n kucci vu u'ya̱susa̱n a̱ ma̱ka̱ka̱n ma̱ A̱sulazuva.
LEV 7:31 Ganu ta̱ kula̱to mani'i'in a masa'a, amma ma̱ka̱ka̱'a̱n u to o'wo akunda a Haruna no olobo a̱ yi.
LEV 7:32 A ta ca ganu uneꞌe wa aagutsu o usa'ani wa̱ kucci muwwulai'i.
LEV 7:33 A̱tsuma̱ o olobo a Haruna za na suru cayi mpasa na abaji a mani'in vu kucci muwwulai'i u ta tara aagutsu o usa'ani'i woo o'wo akunda a̱ yi.
LEV 7:34 Diga a̱ kucci muwwulai va aza a Isra'ila, ma̱ka̱ka̱n ma na suru a̱ 'ya̱sa̱in na aagutsu a na a cayi n tara le ta̱, reve n ca Haruna ganu no olobo a̱ yi wo o'wo akunda e le kuci.
LEV 7:35 A̱yi nda a̱yi ɗa akunda a̱ kucci va akina na a cayi A̱sulazuva a na a tawayi Haruna no olobo a̱ yi diga o urana u na a tawa nle a yuwan ulinga u tsuganu wa̱ A̱sulazuva.
LEV 7:36 Diga o urana u na a̱ tsun nle mani'in, A̱sulazuva a zuwa ta̱ a casu le akunda kuci hali a̱ tyo mantsa me elime.>>
LEV 7:37 Ele nda ele ɗa re mayan ma̱ kucci vu ukula̱tosu, na̱ kucci vi ishina na̱ za vu unusu na̱ za makuɗa ma̱ wila̱ na̱ za vu ukatalasa wa ganu, na̱ za muwwulai,
LEV 7:38 aza a na A̱sulazuva a dammai Musa a Masasan ma Sinai, o urana u na u zuwai aza a Isra'ila a̱ ta̱wa̱a̱ na̱ kucci le a̱ A̱tsumona a Sinai.
LEV 8:1 Reve A̱sulazuva a yuwan adanshi na̱ Musa u damma,
LEV 8:2 <<Tara Haruna oɓolo no olobo a̱ yi na̱ a̱tugu a tsuganu tse le, na̱ mani'in mo utsusun no oogono a nan a̱ kucci vu unusu na̱ a̱giri'i e re na aasaka o opopofu a na a̱ ri na̱ wolilo shi.
LEV 8:3 Reve vu ɓoloto ama suru o una̱ntsu wo Oogodo o Uga'asusan.>>
LEV 8:4 Reve Musa yuwan cine A̱sulazuva a zuwa niyi u yuwan. Reve ama o ɓoloto o una̱ntsu wo Oogodo o Uga'asusa'an.
LEV 8:5 Ɗaɗa Musa dammai ama'a, <<A̱yi nda a̱yi ɗa ili i na A̱sulazuva a zuwai a yuwan.>>
LEV 8:6 Reve wu uta̱a̱ Haruna no olobo a̱ yi elime, a̱vu u sumba̱ le na̱ mini.
LEV 8:7 Reve wo oto Haruna utugu wu uga'an, reve wu nla̱a̱ yi gbakala e ikyun. A̱vu wo oto yi utugu, na̱ ma̱tugu ma̱ epo. Reve wu nla̱a̱ yi gbakala vu uɗavu wu ukere ulinga wu ɗavi adama u guza̱ yi ulobonu.
LEV 8:8 Reve u sa̱ga̱da̱wa̱ yi oosonu a̱ ma̱ka̱ka̱n, reve u zuwa Urim na̱ Tumim pe.
LEV 8:9 Reve u katala yi ookokolo a tsuganu a aaci. Reve u zuwa ɗe ma̱pa̱ta̱ta̱ ma zinariya ma̱ cin o ookokolo'o, ookokolo a akiza, cine A̱sulazuva a zuwai.
LEV 8:10 Reve Musa tara mani'in mo utsusun reve u tsun a̱a̱'isa̱ ni ili i na i ri pe suru, a̱vu u tawa le oo o'wo na akiza.
LEV 8:11 Reve wu kyo'onu masa'a mani'in toto ucindere. A̱vu u tsuwa̱n masa'a ni itana i na i ri pe suru na aasa'atsu nu ukuruwa̱ta̱ wa̱ yi adama u tawa le oo o'wo na akiza.
LEV 8:12 Reve u tsuwa̱n Haruna mani'in a aaci adama a tawa yi na akiza.
LEV 8:13 Reve Musa ta̱wa̱ no olobo a Haruna a̱vu wo oto le a̱tugu, reve wu nla̱a̱ le igbakala a̱ nkyun n le. Reve wo oto le okokolo a tsuganu, cine A̱sulazuva a zuwai Musa.
LEV 8:14 Reve u ta̱wa̱ no oogono a nan a̱ kucci vu unusu. Reve Haruna no olobo a̱ yi a̱ kuru ekere e le a aaci a na'an.
LEV 8:15 A̱vu Musa paɗa yi, a̱vu kene mpasa, reve u daɓa mpasa'a na aakatsu a̱ yi u putala yi a avana a masa'a'a adama wo o'woto yi na akiza. Reve u tsun akapi a mpasa'a e ikyun i masa'a'a, a̱vu u tawa yi na akiza adama a matara mo ume mo unusu.
LEV 8:16 A̱vu Musa foɗo abaji a mani'in ma na ma palai iliya̱tsuma̱ suru nu upasu wa assuvu u na u la'ai ulobonu na a'ilu e re na̱ mani'in me ele, reve u kula̱to le a masa'a'a.
LEV 8:17 Amma a̱vu u kula̱to oogono a na'an nu ukwan wa̱ yi ni inama ya̱ yi na̱ a̱ya̱n a̱ yi o ucina̱ wu uva̱la̱ta̱'a̱, cine A̱sulazuva a zuwa niyi u yuwan.
LEV 8:18 Reve u ta̱wa̱a̱ na̱ a̱a̱giri'i a̱ kucci vu ukula̱tosu. A̱vu Haruna no olobo a̱ yi a̱ kuru ekere e le a aaci a̱ a̱a̱giri'i'i.
LEV 8:19 Ɗaɗa Musa paɗa niyi, reve u kyo'onu mpasa'a e eɓele a masa'a'a suru a̱ ka̱nda̱ruwa̱.
LEV 8:20 Reve wu paɗa a̱a̱giri'i'i mupaɗi mupaɗi, a̱vu u kula̱to aaci oɓolo na̱ mupaɗi'i na̱ mani'in.
LEV 8:21 Reve wu za̱'wa̱ iliya̱tsuma̱ na ana na̱ mini. Reve u kula̱to a̱a̱giri'i'i suru a masa'a'a, kucci vu ukula̱tosu, ili i ma̱guru mo uyo'o, kucci na a yuwayin A̱sulazuva va akina, cine A̱sulazuva a zuwai Musa.
LEV 8:22 Reve u ta̱wa̱ na̱ a̱a̱giri'i e ire, za vu ukatalasa u tsuganu. Reve Haruna no olobo a̱ yi a̱ kuru ekere e le a aaci a̱ a̱a̱giri'i'i.
LEV 8:23 Reve Musa paɗa yi. A̱vu u kene mpasa'a a̱vu u daɓa e lege vu utsuvu vu usa'ani wa Haruna na a aakatsu a gbain o ukere u sa'ani wa̱ yi na a aakatsu a gbain a anana o usa'ani wa̱ yi.
LEV 8:24 Reve u ta̱wa̱ no olobo a Haruna, reve u daɓa mpasa e nlege ma atsuvu o usa'ani e le na a akatsu a gbagbain e ekere a sa'ani e le na a akatsu a gbagbain a ana a sa'ani e le. A̱vu Musa kyo'onu mpasa n na m buwai e eɓele a masa'a'a suru a̱ ka̱nda̱ruwa̱.
LEV 8:25 Reve u tara mani'i'in na̱ wizan u mani'in na abaji a mani'in ma na ma palai iliya̱tsuma̱ suru, nu upasu wa assuvu u na u la'ai ulobonu, na a'ilu e re'e oɓolo na̱ mani'in me le, oɓolo na aagutsu o usa'ani.
LEV 8:26 Diga pe a aasaka o opopofu a na a̱ ri na̱ wolilo shi za na ri a̱ ma̱ka̱ka̱n ma̱ A̱sulazuva, u tara ta̱ oopopofu a̱ ta̱ na̱ za na a yuwain na̱ mani'in ne emeshen. Reve u kuru le a mani'i'in na a aagutsu o usa'ani'i.
LEV 8:27 Reve u zuwa le suru e ekere a Haruna no olobo a̱ yi. Reve a̱ 'ya̱sa̱n le a̱ ma̱ka̱ka̱n ma̱ A̱sulazuva kucci vu u'ya̱susa̱n.
LEV 8:28 Reve Musa tawa le e ekere e le, reve u kula̱to le a masa'a zuva kucci vu ukula̱tosu vu ukatalasa wa tsuganu, ili i ma̱guru mo uyo'o, kucci na a yuwayin A̱sulazuva va akina.
LEV 8:29 Reve Musa tara ma̱ka̱ka̱'a̱n reve u 'ya̱sa̱n yi kucci vu u'ya̱susa̱n e ekere a̱ A̱sulazuva. A̱yi ɗa akunda a Musa a̱ a̱a̱giri'i o ukatalasa wa ganu cine A̱sulazuva a zuwai Musa yuwan.
LEV 8:30 Reve Musa kene mani'in mo utsusun na̱ mpasa n na n ri a masa'a, reve wu kyo'onuwo Haruna na̱ a̱tugu a̱ yi, no olobo a̱ yi waru na̱ a̱ a̱tugu e le. Ne ɗa u tawai Haruna na̱ a̱tugu a̱ yi na akiza oɓolo no olobo a̱ yi na̱ a̱tugu e le.
LEV 8:31 Reve Musa damma Haruna no olobo a̱ yi, <<Su'wain inama'a o una̱ntsu wo Oogodo o Uga'asusan, reve i tama le lo oɓolo no opopofu a na a̱ ri a aasaka a̱ kucci vu ukatalasa cine a̱mu A̱sulazuva n zuwai, a na,<Haruna no olobo a̱ yi a ɗa aa tama le.>
LEV 8:32 Agba ili i na i pasai yi inama no opopofu'u, i kula̱to le.
LEV 8:33 Agba she yu uta̱ o una̱ntsu wo Oogodo o Uga'asusa'an wan rana cindere, hali she na̱ rana vu ukatalasa ɗu koto adama a na rana vu ukatalasa ɗu ta yuwan rana cindere.
LEV 8:34 Ili i na a yuwain ana'an, A̱sulazuva a zuwa yi ta̱ adama a matara mo ume mo unusu ma̱ ɗu.
LEV 8:35 I ta̱ da̱na̱ o una̱ntsu wo Oogodo o Uga'asusan ayin nu usana hali ayin e cindere, a yuwusan ili i na A̱sulazuva a zuwai, adama i kuwa̱ wan. A̱yi ɗa ili i na A̱sulazuva a zuwai.>>
LEV 8:36 Reve Haruna no olobo a̱ yi a yuwan ili i na A̱sulazuva a zuwa nle a yuwan suru cine a uwwai o una̱ wa Musa.
LEV 9:1 O urana wa̱ kunla̱ u na u kuruyi rana cindere va̱ a̱buki o ukatalasa u tsuganu, reve Musa ɗe Haruna no olobo a̱ yi, na̱ mbara ma aza a Isra'ila.
LEV 9:2 A̱vu u damma Haruna, <<Taraa aciya̱wu oogono a nan adama a̱ kucci vu unusu, na̱ a̱a̱giri'i adama a̱ kucci vu ukula̱tosu. Suru nle a̱ da̱na̱ usa̱du wan, a̱vu vu ta̱wa̱ ne ele a̱ ma̱ka̱ka̱n ma̱ A̱sulazuva.
LEV 9:3 Reve vu damma aza a Isra'ila, <Tarai ma̱ga̱ji adama a̱ kucci vu unusu, na̱ ma̱dindim na̱ kyon, suru nle aa'wan a̱ ta̱ ta̱ nu umatsun aza a na a̱ ri usa̱du shi adama a̱ kucci vu ukula̱tosu.
LEV 9:4 Reve waru a̱ ta̱wa̱a̱ no oogono a nan na̱ a̱a̱giri'i adama a̱ kucci muwwulai a̱ ma̱ka̱ka̱n ma̱ A̱sulazuva, na̱ kucci vi ishina i na a̱ ja̱mba̱ra̱i na̱ mani'in, adama a na A̱sulazuva a̱ ta̱ ta̱wa̱ ya̱'a̱ ɗu ana'an.> >>
LEV 9:5 Reve a̱ ta̱wa̱a̱ ni ili i na Musa zuwai elime o Oogodo o Uga'asusan. Reve ama suru a rawa zuzu e isawan a̱ ma̱ka̱ka̱n ma̱ A̱sulazuva.
LEV 9:6 Reve Musa damma, <<Apa nda ili i na A̱sulazuva a zuwa nɗu i yuwan, adama tsugbain tsa̱ A̱sulazuva tsa̱ ta̱wa̱ ya̱'a̱ ɗu.>>
LEV 9:7 Reve Musa damma Haruna, <<Ta̱wa̱ zuzu na̱ masa'a vu ca kucci vu unusu na̱ kucci vu ukula̱tosu va̱ wu. Vu yuwan kucci matara mo ume mo unusu va aciya̱wu na adama a ama. Reve vu ta̱wa̱a̱ na̱ kucci va ama, vu ca adama a matara mo ume mo unusu me le, cine A̱sulazuva a zuwai.>>
LEV 9:8 Ɗaɗa Haruna rawai zuzu na̱ masa'a'a a̱vu u paɗa ma̱dindim ma̱ kucci vu unusu adama a aciya̱yi.
LEV 9:9 Reve olobo a Haruna a ca yi mpasa'a. Reve u daɓa aakatsu a̱ yi a mpasa, a̱vu u putala yi a avana a masa'a'a. Reve u tsun akapi a mpasa'a e ikyun i masa'a.
LEV 9:10 Amma mani'in na a'ilu nu upasu wa assuvu u kucci vu unusu u kula̱to le ta̱ a masa'a, cine A̱sulazuva a zuwai Musa.
LEV 9:11 Reve u kula̱to inama nu ukwa'an o ucina̱ wu uva̱la̱ta̱.
LEV 9:12 Reve Haruna paɗa kucci vu ukula̱tosu'u. Reve olobo a̱ yi a ca yi mpasa'a, reve wu kyo'onu le e eɓele a masa'a'a suru a̱ ka̱nda̱ruwa̱.
LEV 9:13 Reve a ca yi kucci vu ukula̱tosu mupaɗi mupaɗi oɓolo na aaci, reve u kula̱to le a masa'a'a.
LEV 9:14 Reve wu za̱'wa̱ iliya̱tsuma̱ no okotsu a̱vu u kula̱to le oɓolo na̱ kucci vu ukula̱tosu zuva masa'a'a.
LEV 9:15 Reve Haruna ca kucci va ama, a̱vu u tara megbele adama a̱ kucci vu unusu adama a ama reve u paɗa yi. Reve u yuwan kucci vu unusu na̱ a̱yi tsu za vu ufaru.
LEV 9:16 Reve u ta̱wa̱a̱ na̱ kucci vu ukula̱tosu, reve u yuwan na̱ a̱yi o ure u na a zuwai.
LEV 9:17 Reve u ta̱wa̱a̱ na̱ kucci vi ishina, a̱vu u kene ukere u ta̱, reve u kula̱to yi a masa'a oɓolo na̱ kucci vu ukula̱tosu vu usana.
LEV 9:18 Reve waru Haruna paɗa oogono a nan na̱ a̱a̱giri'i adama a̱ kucci muwwulai adama a ama. Reve olobo a̱ yi a ca yi mpasa, reve wu kyo'onu le e eɓele a masa'a'a suru a̱ ka̱nda̱ruwa̱.
LEV 9:19 Agba mupaɗi ma abaji a mani'in mo oogono ma nan na̱ a̱a̱giri'i na̱ wizan u mani'in na̱ mani'in ma na ma palai iliya̱tsuma̱ na a'ilu nu upasu wa assuvu,
LEV 9:20 u kuru le ta̱ a̱ nka̱ka̱n mi inama'a, reve u kula̱to mupaɗi m mani'i'in a masa'a'a.
LEV 9:21 Amma reve Haruna ca kucci vu u'ya̱susa̱n vu nka̱ka̱n na agutsu o usa'ani'i a̱ ma̱ka̱ka̱n ma̱ A̱sulazuva, cine Musa zuwai a yuwan.
LEV 9:22 Reve Haruna 'ya̱sa̱n ekere a̱ yi a̱ tyo uba̱ta̱ wa ama, a̱vu u zuwaa le aba'un. Reve ana u kotoi ucasu u kucci vu unusu na̱ kucci vu ukula̱tosu, na̱ kucci muwwulai, reve u cipa̱ diga uba̱ta̱ u masa'a'a.
LEV 9:23 A̱vu Musa na̱ Haruna a uwa a̱tsuma̱ o Oogodo o Uga'asusan. Ana o uta̱i reve a zuwaa ama aba'un. Ɗaɗa tsugbain tsa̱ A̱sulazuva tsa̱ ta̱wa̱i uba̱ta̱ wa ama suru.
LEV 9:24 Reve akina o uta̱ uba̱ta̱ wa̱ A̱sulazuva, reve u tama kucci vu ukula̱tosu na abaji a mani'in a na a̱ ri a masa'a'a. Ana ama suru e ene niyi, reve o oruwo na̱ ma̱za̱nga̱. A̱vu a̱ riya̱ ma̱kpa̱ɓa̱.
LEV 10:1 Nadab na̱ Abihu olobo a Haruna, za suru tara ta̱ aayimba a akina a̱ yi, u tsun akina pe a̱vu u kula̱to a̱tsuka̱ pe. Reve a ca A̱sulazuva akina a na o lobonoi shi, cu'un na u zuwa nle a̱ ta̱wa̱a̱ shi.
LEV 10:2 Ɗaɗa akina o uta̱i uba̱ta̱ wa̱ A̱sulazuva, a̱vu u kula̱to le. A̱vu a̱ kuwa̱ a̱ ma̱ka̱ka̱n ma̱ A̱sulazuva.
LEV 10:3 Reve Musa damma Haruna, <<Apa nda ili i na A̱sulazuva a dammai, <Uba̱ta̱ wa aza a na a̱ ri zuzu na̱ a̱mu a ta tara mu na akiza, waru a ta ca mu tsugbain e esu a ama suru.> >> Haruna gba isawan ta̱ kuci kuci.
LEV 10:4 Reve Musa ɗe Mishe na̱ Elizafan olobo a Uziye dada ke'en va Haruna, a̱vu u damma le, <<Rawai zuzu i pura̱ a̱za̱ a̱ ɗu o uta̱ a alanga a̱ a̱a̱'isa̱ a̱ tyo o ucina̱ wu uva̱la̱ta̱.>>
LEV 10:5 Reve a rawa zuzu a tanu le a̱tsuma̱ a̱ a̱tugu e le o uta̱ a̱ tyo o ucina̱ o uva̱la̱ta̱, cine Musa zuwai.
LEV 10:6 Reve Musa damma Haruna no olobo a̱ yi Eliyaza na̱ Itama, <<She i lyawa a̱nji a̱ ɗu ukacaru wan, waru she yi kara a̱tugu a̱ ɗu wan ta̱wa̱ i kuwa̱ wan, reve i ronoo ama upan wa̱ A̱sula̱. Amma i lyawa a̱za̱ a̱ ɗu, u'wa wa Isra'ila suru e showen aza a na A̱sulazuva a̱ kula̱toi.
LEV 10:7 Waru she yu uta̱ o una̱ntsu wo Oogodo o Uga'asusan wan, ta̱wa̱ i kuwa̱ wan, adama a na mani'in mo utsusun ma̱ A̱sulazuva ma̱ ta aci a̱ ɗu.>> Reve gba a yuwan cine Musa dammai.
LEV 10:8 A̱vu A̱sulazuva a damma Haruna,
LEV 10:9 <<Na̱ a̱vu no olobo a̱ wu she i sowo masayan ma̱ ina̱bi ko ili yo oso i na i tsu tsura̱to wan, a mantsa ma na suru yaa uwa o Oogodo o Uga'asusan, adama i kuwa̱ wan. A̱yi nda u to o'wo ili i mayan kuci hali a̱ tyo mantsa suru.
LEV 10:10 Ni i ciga i 'yuwan yi kasa ili i na a tawai na akiza ni ili ya ndana, ni ili yi idaba ni ili i cece.
LEV 10:11 Waru ni i ciga i 'yuwan i rito ama a Isra'ila suru wila̱ u na A̱sulazuva a cayi e ekere a Musa.>>
LEV 10:12 Musa gba yuwan ta̱ adanshi na̱ Haruna na akapi o olobo a̱ yi, Eliyaza na̱ Itama u damma, <<Tarai kucci vi ishina i na i pasai a̱ kucci na a cayi A̱sulazuva va akina, reve i lyuwa yi a̱ nge'en m masa'a babu wolilo, adama a na u ta̱ na akiza lon.
LEV 10:13 I lyuwa yi uba̱ta̱ wa akiza, adama a na akunda a̱ wu a ɗa na̱ za vo olobo a̱ wu a̱ kucci na cayi A̱sulazuva va akina, adama a na ne ɗa a zuwa numu n yuwan.
LEV 10:14 Agba na̱ a̱vu no olobo a̱ wu oɓolo ne esheli a̱ wu i ta tama ma̱ka̱ka̱n ma̱ kucci ma na a̱ 'ya̱sa̱in na aagutsu a na a cayi, i tama le uba̱ta̱ u na u ri cece. A ca wu ele ta̱ akunda a̱ wu a ɗa na̱ a̱vu no olobo a̱ wu ne esheli a̱ wu diga a̱ kucci muwwulai va aza a Isra'ila.
LEV 10:15 Aagutsu a na a cayi na̱ ma̱ka̱ka̱n ma na a̱ 'ya̱sa̱i'in a̱ ta̱ ta̱wa̱ ne ele oɓolo na abaji a mani'in ma na a cayi va akina, a̱a̱ 'ya̱sa̱n yi a̱ ma̱ka̱ka̱n ma̱ A̱sulazuva tsa̱ kucci vu u'ya̱susa̱n. O to o'wo akunda a̱ wu na̱ a̱vu no olobo a̱ wu kuci, cine A̱sulazuva a zuwai.>>
LEV 10:16 Ana Musa ecei adama e megbele ma na a cayi adama a̱ kucci vu unusu, a̱vu u cina a̱ kula̱to yi ta̱ ɗe. Reve u yuwan upan na̱ Eliyaza na̱ Itama olobo a Haruna a na a buwai, a̱vu we ece,
LEV 10:17 <<Adama a̱ nye i tamai kucci vu unusu'u a̱ a̱a̱'isa̱ shi? Kucci va akiza lon ɗa, waru a ca ɗu ta̱ ele adama a tawa unusu wa ama a tara ume wu unusu u le a̱ ma̱ka̱ka̱n ma̱ A̱sulazuva.
LEV 10:18 Ana wo o'woi aa tara mpasa ma̱ yi a uwa Uba̱ta̱ wa Akiza shi, u shi to o lobono i tama inama'a a̱tsuma̱ a̱ a̱a̱'isa̱ cine n zuwai.>>
LEV 10:19 Reve Haruna usu Musa, <<Uwwa nda, ana'an ɗa a cayi kucci le adama o unusu na̱ kucci le vu ukula̱tosu a̱ ma̱ka̱ka̱n ma̱ A̱sulazuva, agba suru na̱ ne a̱vu ili i nda i fara na̱ a̱mu! Nna̱ n shi n tama kucci vu unusu ana'an, A̱sulazuva a̱ shi ta̱ a uwwa uyo'o va̱?>>
LEV 10:20 Ana Musa uwwai ili i nda, wu uwwa ta̱ uyo'o wi ili'i.
LEV 11:1 Reve A̱sulazuva a yuwan adanshi na̱ Musa na̱ Haruna u damma le,
LEV 11:2 <<Yuwain adanshi na ama a Isra'ila a na, a̱tsuma̱ e inama i na i ri o uvaɗi suru, apa nda aza a na yaa gura tama:
LEV 11:3 Nama na suru ookotsu a̱ yi a ɓatsalai, waru u tsu ka̱mbuwisa̱ ta̱ utamu, i ta gura tama yi.
LEV 11:4 Suru na̱ ne a̱tsuma̱ a aza a na a̱ tsu ka̱mbuwisa̱ utamu, ko a̱ ri no okotsu e le uɓatsulai ya tama ele nda shi: Yaa tama arakumi shi ko a na u tsu ka̱mbuwisa̱ utamu, okotsu a̱ yi a̱ ri uɓatsulai shi. Ili yi idaba i ɗa e ekere a̱ ɗu.
LEV 11:5 Magima, ko a na u tsu ka̱mbuwisa̱ utamu, okotsu a̱ yi a̱ ri uɓatsulai shi. Ili yi idaba i ɗa e ekere a̱ ɗu.
LEV 11:6 Mozomu waru, ko a na u tsu ka̱mbuwisa̱ utamu, okotsu a̱ yi a̱ ri uɓatsulai shi. Ili yi idaba i ɗa e ekere a̱ ɗu.
LEV 11:7 Ma̱gurusumu waru, ko a na u ri no okotsu uɓatsulai u tsu ka̱mbuwisa̱ utamu shi, ili yi idaba i ɗa e ekere a̱ ɗu.
LEV 11:8 She i tama inama i le wan, agba she i ju'wa̱in a̱kwa̱kwa̱ e le wan, ili yi idaba i ɗa e ekere a̱ ɗu.
LEV 11:9 <<A̱tsuma̱ e ili i na i ri a̱ mini suru ko a mala ko o ɗolu, i ta gura tama ili i na i ri na̱ a̱ka̱ɓa̱ na̱ a̱fa̱ɓa̱ a̱ lipu.
LEV 11:10 Amma ili i wuma i na i ri a mala ko o ɗolu suru, agba u ri na̱ a̱ka̱ɓa̱ ko a̱fa̱ɓa̱ a̱ lipu shi, ili yi idaba i ɗa e ekere a̱ ɗu.
LEV 11:11 I tara le ili yi idaba, she i tama inama i le wan. A̱kwa̱kwa̱ e le waru o o'wo ili yi idaba e ekere a̱ ɗu.
LEV 11:12 Ili i na suru i ri a̱ mini agba u ri na̱ a̱ka̱ɓa̱ ko a̱fa̱ɓa̱ shi, ili yi idaba i ɗa e ekere a̱ ɗu.
LEV 11:13 <<Apa nda icu'un yi nnunu n na yaa tara ili yi idaba, yaa tama le shi, ili yi idaba i ɗa: a̱a̱kuru na aasala na amikiya
LEV 11:14 na aajimba na̱ cu'un va aajimba suru,
LEV 11:15 na̱ cu'un va aakakan suru,
LEV 11:16 na azamina, na̱ vori na̱ papagula ni icu'un i le suru,
LEV 11:17 na̱ vori ke'en na̱ mecivecive na̱ a̱a̱pa̱mu,
LEV 11:18 na̱ mototon na̱ ma̱gba̱shimo na aasala e ke'en,
LEV 11:19 na aashamuwa na̱ cu'un va atakuba suru, na̱ a̱a̱burutu no oogyon.
LEV 11:20 <<Mubumbu n na ri ne evelu aza a na a tsu wala na ana a̱ na̱shi suru, ili yi idaba i ɗa e ekere a̱ ɗu.
LEV 11:21 Amma i ta gura tama mubumbu n na n ri ne evelu aza a na a tsu wala na ana a̱ na̱shi aza a na a̱ ri na agutsu a na a tsu zuwa le a gura 'yawan.
LEV 11:22 I ta gura tama cu'un va aapapari biti, na̱ cu'un vu jon suru na̱ cu'un va akyun suru.
LEV 11:23 Amma akapi a̱ mubumbu n na n ri ne evelu na ana a̱ na̱shi suru ili yi idaba i ɗa e ekere a̱ ɗu.
LEV 11:24 <<Ili i nda i ta zuwa ɗu yoo o'wo idaba. Za na suru ju'wa̱in a̱kwa̱kwa̱ e le u to o'wo idaba hali she ulivu.
LEV 11:25 Waru za na suru tarai a̱kwa̱kwa̱ a za ta̱ a̱tsuma̱ e le, u ta̱ za̱'wa̱ a̱tugu a̱ yi, agba u to o'wo idaba hali she ulivu.
LEV 11:26 <<Nama na suru ookotsu a̱ yi a ɓatsalai shi, waru u tsu ka̱mbuwisa̱ utamu shi ili yi idaba i ɗa e ekere a̱ ɗu. Za na suru ju'wa̱in a̱kwa̱kwa̱ a za ta̱ le u to o'wo idaba.
LEV 11:27 A̱tsuma̱ e inama i na i ri na ana a̱ na̱shi suru, aza a na a tsu wala na apata a ana, ili yi idaba i ɗa e ekere a̱ ɗu. Za na suru ju'wa̱in a̱kwa̱kwa̱ e le u to o'wo idaba hali ulivu.
LEV 11:28 Waru za na suru sheɗei a̱kwa̱kwa̱ e le u ta̱ za̱'wa̱ a̱tugu a̱ yi, agba u to o'wo idaba hali ulivu. Ili yi idaba i ɗa a̱ ri e ekere a̱ ɗu.
LEV 11:29 <<A̱tsuma̱ e inama i na i tsu ka̱ta̱pa̱ e iɗa, apa nda aza a na oo o'wo idaba e ekere a̱ ɗu: ashan na̱ a̱a̱ga̱ɗa̱ na̱ cu'un va aagada a gbain suru,
LEV 11:30 na̱ mopolyo'o na̱ kuna̱ na̱ ga̱ngu na̱ meruweruwen na aakanla.
LEV 11:31 Ele nda ili yi idaba i ɗa e ekere a̱ ɗu a̱tsuma̱ e ili i na i tsu ka̱ta̱pa̱ e iɗa. Za na suru ju'wa̱in a̱kwa̱kwa̱ e le u to o'wo idaba hali she ulivu.
LEV 11:32 Waru ili i na a̱kwa̱kwa̱ e le a̱ riya̱yi suru u to o'wo idaba, ko ni ili i na a yuwain na akpata a ɗa, ko umuna ko ukwan ko a̱buhu, cu'un vi ili i na aa yuwusan ulinga na̱ a̱yi, a̱ ta̱ tsupu yi a̱ mini. Waru u ta̱ da̱na̱ idaba hali she ulivu, reve wo o'wo cece.
LEV 11:33 Na̱ za ro a̱tsuma̱ e le riya̱ o upondo u ci'in, ili i na i ri pe suru u to o'wo idaba. I ta̱ gba o ɓoso upondo'o.
LEV 11:34 Ilyalya ya alya suru, i na mini mo upondo'o ma̱ ju'wa̱in, u to o'wo idaba. Ili yo oso suru yu upondo u ndolo u to o'wo idaba.
LEV 11:35 Ili i na suru a̱kwa̱kwa̱'a̱ a̱ riya̱yi u to o'wo idaba. Ko na̱ shi elele a ɗa ko uba̱ta̱ wu uzusun wo opopofu u ɗa i to ɓoso yi. Ili yi idaba i ɗa, waru o to o'wo ili yi idaba e ekere a̱ ɗu.
LEV 11:36 Agba suru na̱ ne, na̱ a̱kwa̱kwa̱ a̱ cu'un vu nama ndolo riya̱ a̱ lyusu mini ko o ooko'o, a̱ ta̱ da̱na̱ cece. Amma za na suru ju'wa̱in a̱kwa̱kwa̱'a̱ a̱tsuma̱ e le u to o'wo idaba.
LEV 11:37 Agba ko na̱ a̱kwa̱kwa̱'a̱ u riya̱a̱ icu'un, icu'u'un a ta buwa cece.
LEV 11:38 Agba n ne e re'weto ta̱ icuꞌuꞌun reve a̱kwa̱kwa̱'a̱ a̱ riya̱a̱ le, ili yi idaba i ɗa e ekere a̱ ɗu.
LEV 11:39 <<Nna̱ nama na a lyawa nɗu i tama kuwa̱, za na suru ju'wa̱in a̱kwa̱kwa̱'a̱ u to o'wo idaba hali she ulivu.
LEV 11:40 Za na suru tamai a̱kwa̱kwa̱'a̱ u ta̱ za̱'wa̱ a̱tugu a̱ yi, waru u to o'wo idaba hali she ulivu. Waru za na suru tanuyi a̱kwa̱kwa̱'a̱ u ta̱ za̱'wa̱ a̱tugu a̱ yi, reve waru wo o'wo idaba hali she ulivu.
LEV 11:41 <<Ili i wuma i kekeꞌen i na suru i ri e ika̱ta̱pu e iɗa biti ili yi idaba i ɗa, yaa tama le shi.
LEV 11:42 Ili i na biti i tsu sa̱ɓa̱ru a̱tsuma̱ ko ili i na i tsu wala na ana a̱ na̱shi, ko ili i na i ri na ana a̱ a̱bunda̱, ili i na i tsu sa̱ɓa̱ru e iɗa suru yaa tama yi shi adama a na ili yi idaba i ɗa.
LEV 11:43 She yoo o'woto aciya̱ɗu ili i tsugya ni ili i na ya̱a̱ sa̱ɓa̱rusu wan. Waru she i ka̱mba̱to aciya̱ɗu ili yi idaba adama e le wan, ko a zuwa ɗu yo o'wo idaba wan.
LEV 11:44 A̱mu ɗa A̱sulazuva A̱sula̱ a̱ ɗu. Adama o ndolo i tawa aciya̱ɗu yo o'wo na akiza, adama a na a̱mu za va akiza ɗa. She yo o'woto aciya̱ɗu idaba ni ili i na i tsu sa̱ɓa̱ra̱ e iɗa wan.
LEV 11:45 A̱mu ɗa A̱sulazuva za na uta̱a̱ nɗu diga e iɗa ya Masar adama mo o'wo A̱sula̱ a̱ ɗu. Adama o ndolo, yo o'wo na akiza, adama a na a̱mu za va akiza ɗa.
LEV 11:46 <<A̱yi nda wila̱ u ɗa adama e inama suru na̱ nnunu ni ili i wuma i na i ri a̱ mini suru na̱ cu'un vi ili i wuma i na i tsu sa̱ɓa̱ra̱ e iɗa.
LEV 11:47 Yi kasa ili yi idaba ni ili i na i ri cece, ni ili i wuma i na waru aa tama ni ili i wuma i na aa tama shi.>>
LEV 12:1 Reve A̱sulazuva a yuwan adanshi na̱ Musa u damma,
LEV 12:2 <<Yuwan adanshi na ama a Isra'ila a na: nna̱ ka yuwan a̱a̱tsuma̱ reve u matsan ulobo, u to o'wo idaba rana cindere, tsa mantsa ma̱ a̱shinda̱ ma̱ yi.
LEV 12:3 Reve o urana wa̱ kunla̱ a paɗa ulobo'o uryumbu.
LEV 12:4 U ta lyuwa elime a̱tsuma̱ a̱ a̱shinda̱ a limatan hali rana mata'atsu na aza a ta'atsu rana vu usumbu va̱ yi. A̱tsuma̱ a mantsa ma nda wa̱a̱ ju'wa̱n ili ya akiza shi, ko u ta̱wa̱ a̱ a̱a̱'isa̱ shi, she na̱ rana vu usumbu va̱ yi koto.
LEV 12:5 Agba nu u mantsa usheli, u to o'wo idaba hali ajuma e re, tsa mantsa ma̱ a̱shinda̱ ma̱ yi. U ta lyuwa elime a̱tsuma̱ a̱ a̱shinda̱'a̱ hali rana kupota̱li na̱ a̱za̱ a̱ ta̱li, she na̱ rana vu usumbu va̱ yi koto.
LEV 12:6 <<A mantsa ma na rana vu usumbu va̱ yi kotoi, ko vu umatsun wu ulobo ko usheli, reve u ta̱wa̱a̱ ganu na̱ ma̱giri'i ma aa'wan a̱ ta̱ o una̱ntsu wo Oogodo o Uga'asusan adama a̱ kucci vu ukula̱tosu, na̱ ma̱ma̱rukuku ko muɗa adama a̱ kucci vu unusu.
LEV 12:7 Reve ganu'u ca A̱sulazuva ele adama a̱ kucci matara mo ume mo unusu ma ka'a. Reve wo o'wo cece diga a mpasa n na mo oco niyi. A̱yi ɗa wila̱ wu ka na matsain mawun, ko ulobo ko usheli.
LEV 12:8 Agba na̱ wa̱a̱ tsura̱ ma̱giri'i shi, u ta̱wa̱ na̱ muɗa n re ko murukuku n re za ta̱ adama a̱ kucci vu ukula̱tosu za ta̱ waru adama a̱ kucci vu unusu. Ne ɗa ganu aa ca kucci matara mo ume mo unusu wa̱ yi, u ta̱ gba o'wo cece.>>
LEV 13:1 A̱sulazuva a yuwan ta̱ adanshi na̱ Musa na̱ Haruna u damma,
LEV 13:2 <<Na̱ vuma ri na atsutsu o ukwan u lipu va̱ yi, ko ikavuru ko mɓa̱la̱ ma abasa, reve u ka̱mba̱ mɓa̱la̱ n wuya mu ukwan u lipu, a̱ ta̱ ta̱wa̱ na̱ a̱yi uba̱ta̱ wa ganu Haruna ko uba̱ta̱ wu ulobo u ta̱ a̱tsuma̱ o olobo a Haruna ganu.
LEV 13:3 Ganu'u u ta̱ ka̱lyuwa̱ mɓa̱la̱ mu ukwan u lipu va̱ yi. Reve ne eleme a na a̱ ri uba̱ta̱ a̱ mɓa̱la̱'a̱ a̱ ka̱mba̱ u'uri, a̱vu mɓa̱la̱'a̱ n yuwan a̱ru'un u la'a a̱ru'un o ukwan u lipu va̱ yi, mɓa̱la̱ n vama n ɗa. Na̱ ganu ka̱lyuwa̱ yi u ta damma u ta̱ idaba.
LEV 13:4 Agba nna abasa a na a̱ ri a̱ lipu va̱ yi'i u ta̱ u'uri reve wo o'wo u ka̱ra̱ ukwan u lipu shi, waru eleme a na a̱ ri pe a̱ ka̱mba̱ u'uri shi, ganu ta̱ ɓa̱ru vuma vu mɓa̱la̱'a̱ ayin e cindere a̱yi a̱ nde'en.
LEV 13:5 O urana we cindere ganu ta̱ ka̱lyuwisa̱ yi, reve ne e yeni ya̱ yi mɓa̱la̱'a̱ koto u bala o ukwan u lipuꞌu shi, reve u da̱shi ɓa̱ru yi ayin e cindere o ro a̱yi a̱ nde'en.
LEV 13:6 O urana we cindere reve ganu ka̱lyuwisa̱ yi waru. Reve nnu upasu u na mɓa̱la̱'a̱ n ri u teme a̱ fa̱ɓusa̱ agba mɓa̱la̱'a̱ m bala o ukwa'an shi, reve ganu'u u damma u ta̱ cece, ikavuru i ɗa goon. Reve vuma'a wu za̱'wa̱ a̱tugu a̱ yi wo o'wo cece.
LEV 13:7 Agba nni ikavuru'u i bala o ukwan u lipu cina ɗe u roco aciya̱yi ya ganu adama ganu damma u ta̱ cece, u ta̱ ta̱wisa̱ ya ganu waru.
LEV 13:8 Ganu ta̱ ka̱lyuwa̱ yi, reve ni ikavuru'u i bala o ukwan, u ta damma u ta̱ idaba, mɓa̱la̱ mu ukutu n ɗa.
LEV 13:9 <<A mantsa ma na nanza ri na̱ mɓa̱la̱ n vama mu ukwan u lipu, a̱ ta̱ ta̱wa̱ na̱ a̱yi uba̱ta̱ wa ganu.
LEV 13:10 Ganu ta̱ ka̱lyuwa̱ yi. Nna̱ we ene utsutsu u u'uri o ukwan u na u ka̱mba̱toi eleme o uba̱ta̱'a̱ u'uri, waru nna̱ wuntsu wu lo o utsutsu'u,
LEV 13:11 mɓa̱la̱ mu ukutu n ɗa. Ganu ta damma u ta̱ idaba. Wa̱a̱ ɓa̱ru yi shi adama a na wo o'wo ta̱ ɗe idaba.
LEV 13:12 Agba nna̱ mɓa̱la̱'a̱ m ɓa̱ru lipu va̱ yi suru diga a aaci a̱ tyo a ana cine ganu aa gura ene,
LEV 13:13 ganu'u u ta̱ ka̱lyuwa̱ yi. Reve nna̱ mɓa̱la̱'a̱ n ta̱ɓa̱luwa̱ a̱ lipu hali u ɓa̱ru lipu va̱ yi suru, ganu'u u ta damma u ta̱ cece, a na wo o'woi u'uri suru, u ta̱ cece.
LEV 13:14 Amma a mantsa ma na wuntsu u sa'avu wu uta̱i a̱ lipu va̱ yi, u to o'wo idaba.
LEV 13:15 Ganu'u u ta̱ ka̱lyuwa̱ wuntsu'u, reve u damma u ta̱ idaba. Wuntsu ili yi idaba i ɗa, adama a na mɓa̱la̱ mu ukutu n ɗa.
LEV 13:16 Amma nna̱ wuntsu'u u ka̱mbisa̱ u'uri, za vu mɓa̱la̱'a̱ u ta̱ ka̱mba̱ ya ganu.
LEV 13:17 Reve ganu'u u ka̱lyuwa̱ yi. Reve nna̱ wuntsu'u u ka̱mba̱ u'uri, reve u damma za vu mɓa̱la̱'a̱ u ta̱ cece, reve wo o'wo cece.
LEV 13:18 <<Nna̱ vuma ri na aamicin a̱ lipu va̱ yi, reve wi ina,
LEV 13:19 nu uba̱ta̱ u na aamici'in u shi, utsutsu wa abasa a̱ u'uri o uta̱ lo ko abasa a sawun sawun, reve u roco ganu.
LEV 13:20 Ganu ta̱ ka̱lyuwa̱ uba̱ta̱'a̱ nnu u yuwan a̱ru'un za̱la̱ vu ukwan u lipu, reve waru eleme o uba̱ta̱'a̱ a̱ ka̱mba̱ u'uri, ganu'u u ta damma u ta̱ idaba. Mɓa̱la̱ mu ukutu n ɗa m ɓosoi aamicin.
LEV 13:21 Agba nna̱ ganu ka̱lyuwa̱ yi agba u ri ne eleme a̱ u'uri shi, waru u la'a ukwan u lipu a̱ru'un shi, waru u kporo ta̱, ganu ta̱ ɓa̱ru yi hali rana cindere.
LEV 13:22 Amma nnu u bala o ukwan, ganu ta damma u ta̱ idaba. Ukutu u ɗa.
LEV 13:23 Amma nna abasa'a e isawan uba̱ta̱ u ta̱ agba u baza shi, alana a amicin a ɗaɗa, ganu ta damma u ta̱ cece.
LEV 13:24 <<Ko gba nna̱ vuma ri na̱ wukulu a̱ lipu va̱ yi, reve inama i wukulu'u yo o'wo u'uri sawun sawun ko abasa a̱ u'uri,
LEV 13:25 ganu ta̱ ka̱lyuwa̱ yi. Reve nne eleme a abasa'a a̱ ka̱mba̱ u'uri a̱vu u la'a ukwan u lipu a̱ru'un, to, mɓa̱la̱ mu ukutu n ɗa n na m ɓosoi uba̱ta̱ u wukulu. Reve ganu damma u ta̱ idaba, adanshi a̱ mɓa̱la̱ mu ukutu n ɗa.
LEV 13:26 Amma nna̱ ganu ka̱lyuwa̱ yi agba eleme a̱ u'uri o lo a abasa'a shi waru u la'a ukwan u lipu a̱ru'un shi, amma u fa̱ɓa̱ ta̱, ganu ta̱ ɓa̱ru yi hali rana cindere.
LEV 13:27 Reve ganu ka̱lyuwisa̱ yi o urana we cindere. Na̱ waa balasa o ukwan, reve ganu damma u ta̱ idaba. Adanshi a̱ mɓa̱la̱ mu ukutu n ɗa.
LEV 13:28 Agba nna abasa'a e isawan uba̱ta̱ u ta̱ u bala o ukwan shi agba u fa̱ɓa̱ ta̱, utsutsu u ɗa a̱ wukulu. Ganu ta damma u ta̱ cece, aalana a̱ wukulu a ɗa goon.
LEV 13:29 <<Na̱ vali ko ka ri na̱ mɓa̱la̱ a aaci ko e ilegu,
LEV 13:30 ganu ta̱ ka̱lyuwa̱ mɓa̱la̱'a̱. Reve nnu u la'a ukwan u lipu a̱ru'un, eleme o uba̱ta̱'a̱ waru a̱ ta̱ mini ma tsusumba waru babu ugba̱mu, reve ganu damma u ta̱ idaba. Ikavuru i ɗa, mɓa̱la̱ n vama mu ukwan n ɗa va aaci ni ilegu.
LEV 13:31 Amma nna̱ ganu ka̱lyuwa̱ mɓa̱la̱ mi ikavuru'u agba u ka̱ra̱ a̱ru'un o ukwan shi, waru u ri ne eleme a̱ lima̱ shi, ganu ta̱ ɓa̱ru za vu mɓa̱la̱'a̱ hali ayin e cindere.
LEV 13:32 Reve o urana we cindere ganu ka̱lyuwisa̱ mɓa̱la̱'a̱. Nna̱ mɓa̱la̱'a̱ m bala shi, waru u ri ne eleme a̱ mini ma tsusumba shi, waru ikavuru'u u ka̱ra̱ a̱ru'un o ukwan shi,
LEV 13:33 to, u ta puna aaci'i, agba waa puna uba̱ta̱ e ikavuru'u shi. Reve ganu da̱shi ɓa̱ru yi ayin e cindere o ro.
LEV 13:34 Reve o urana we cindere ganu ka̱lyuwisa̱ ikavuru'u, reve nnu u bala o ukwan u lipu shi waru u ka̱ra̱ a̱ru'un o ukwan shi, ganu'u u ta damma u ta̱ cece. Reve wu za̱'wa̱ a̱tugu a̱ yi wo o'wo cece.
LEV 13:35 Agba ni ikavuru'u i bala o ukwan u lipuꞌu cina a damma u ta̱ cece,
LEV 13:36 reve ganu ka̱lyuwisa̱ yi, a̱vu ni ikavuru'u i bala o ukwan, ganu'u waa zami eleme a̱ mini ma tsusumba waru shi, u ta̱ idaba.
LEV 13:37 Agba nne e yeni ya̱ yi ikavuru'u i vadala shi, waru eleme a̱ lima̱ o uta̱ ta̱ pe, ikavuru'u i koto ta̱, waru wo o'wo ta̱ cece. Ganu ta damma u ta̱ cece.
LEV 13:38 <<Na̱ vali ko ka ri na abasa a̱ u'uri a̱ lipu va̱ yi,
LEV 13:39 ganu ta̱ ka̱lyuwa̱ yi. Reve na abasa'a a̱ ri uryoryo, muboto n ɗa mu uta̱i o ukwan, u ta̱ cece.
LEV 13:40 <<Na̱ a̱nji a aaci a vuma o oco, reve wo o'wo nu ukparu, u ta̱ cece.
LEV 13:41 Na̱ a̱nji a̱ cin vuma ɗa o ocoi reve wo o'wo nu ukparu wu cin, u ta̱ cece.
LEV 13:42 Agba nna̱ mɓa̱la̱ n shili uryoryo mu ɗe o ukparu wa aaci'i ko a̱ cin, mɓa̱la̱ n vama mu ukwan n ɗa mu uta̱i a aaci ko a̱ cin va̱ yi.
LEV 13:43 Reve ganu ka̱lyuwa̱ yi, nna̱ utsutsu wu mɓa̱la̱'a̱ u tu ushili uryoryo o ukparu wa aaci a̱ yi ko a̱ cin, tsu mɓa̱la̱ mu ukutu,
LEV 13:44 to, vuma'a u ta̱ nu ukutu, waru u ta̱ idaba. Na a ciga a 'yuwan ganu damma u ta̱ idaba, adama a na u ri nu ukutu a aaci.
LEV 13:45 <<Za vu cu'un vu mɓa̱la̱ n ndolo, to oto akari a̱ a̱tugu, reve u lyawa a̱nji a̱ yi za̱kpa̱kpa̱. Reve u ɓa̱ru urewesu wa̱ yi za̱la̱ vunu reve u saala, <N ta̱ idaba, N ta̱ idaba!>
LEV 13:46 Mantsa ma na u ri na̱ mɓa̱la̱'a̱ suru, u ta̱ da̱na̱ idaba. U ta̱ da̱nu a̱ nde'en. Uba̱ta̱ a̱ nden ma̱ yi u to o'wo o ucina̱ wu uba̱ta̱ o uva̱la̱ta̱.
LEV 13:47 <<Na̱ a̱ tsura̱ mɓa̱la̱ mu upa̱luwusa̱ o utugu, ko utugu wu uɗavu ko okoro,
LEV 13:48 ko ili yu uɗavu ko o okoro ko o ukwan ko a̱ cu'un vi ili i na biti a yuwain nu ukwan,
LEV 13:49 na̱ mɓa̱la̱'a̱ n ta̱ mini ma̱ a̱vu'un ko ushili o utugu'u, ko o ukwa'an ko o uɗavu ko o okoro, ko a̱ cu'un vi ili i na a yuwain nu ukwa'an biti, adanshi a̱ mɓa̱la̱ mu upa̱luwusa̱ u ɗa, o to roco ganu a̱yi.
LEV 13:50 Ganu ta̱ ka̱lyuwa̱ mɓa̱la̱'a̱, reve u ɓa̱ru ili i na i ri na̱ mɓa̱la̱'a̱ hali rana cindere.
LEV 13:51 Reve u ka̱lyuwisa̱ mɓa̱la̱'a̱ o urana we cindere. Na̱ mɓa̱la̱'a̱ n bala o utugu ko o uɗavu ko o ukwan ko a̱ cu'un vi ili i na a yuwain nu ukwan biti, mɓa̱la̱'a̱ mɓa̱la̱ m mona ma ɗa, ili'i wo o'wo ta̱ idaba.
LEV 13:52 U ta̱ kula̱to utugu'u, ko za vu uɗavu ko ukwan ko cu'un vi ili i na a yuwain nu ukwan biti, i na i la̱nga̱i na̱ a̱yi, adama a na mɓa̱la̱ m mona ma ɗa. A̱ ta̱ kula̱to le a akina.
LEV 13:53 <<Agba na̱ ganu ka̱lyuwa̱ a̱vu mɓa̱la̱'a̱ n bala o utugu'u shi, ko a za vu uɗavu ko o ukwan ko a̱ cu'un vi ili i na a yuwain nu ukwan biti,
LEV 13:54 reve u zuwa a̱ za̱'wa̱ ili i na mɓa̱la̱'a̱ n ri ɗe. Reve u ɓa̱ru ili'i hali rana cindere waru.
LEV 13:55 Na̱ a̱ za̱'wa̱ uba̱ta̱ u na ri na̱ mɓa̱la̱'a̱, reve ganu ka̱lyuwa̱ yi. No oroci a̱ mɓa̱la̱'a̱ a vadala shi, ko ana mɓa̱la̱'a̱ m balai shi, u ta̱ idaba. A̱ ta̱ kula̱to yi na akina, ko na̱ shi upa̱luwu'u u ta̱ pe a̱ a̱tsuma̱ ko na alanga.
LEV 13:56 <<Waru na̱ ganu'u u ka̱lyuwa̱, reve upa̱luwu'u u kporo cina a̱ za̱'wa̱ yi ɗe, u ta paɗa uba̱ta̱'a̱ o utugu'u, ko o uɗavu ko o ukwan ko e ili i na a yuwain nu ukwa'an.
LEV 13:57 Reve na̱ wu utisa̱ o utugu'u ko o uɗavu ko o ukwan ko a̱ cu'un vi ili i na a yuwain nu ukwan biti, u ta balasa. A̱ ta̱ kula̱to ili i na suru i ri na̱ mɓa̱la̱'a̱.
LEV 13:58 Agba utugu'u ko za vu uɗavu ko ukwan ko cu'un vi ili i na a yuwain nu ukwan biti, za na mɓa̱la̱'a̱ m puwa̱yin ana a̱ za̱'wa̱ niyi, a̱ ta̱ za̱'wisa̱ yi ire, reve u ka̱mba̱ cece.>>
LEV 13:59 A̱yi nda a̱yi ɗa wila̱ adama a̱ mɓa̱la̱ mu upa̱luwusa̱ n na n ri o utugu ko za vu uɗavu ko o okoro ko o ukwan ko a̱ cu'un vi ili i na a yuwain nu ukwan biti, adama u roco ko u ta̱ cece ko idaba.
LEV 14:1 A̱sulazuva a yuwan ta̱ adanshi na̱ Musa u damma,
LEV 14:2 <<Apa nda wila̱ adama a za na ri na̱ mɓa̱la̱ mu ukwan u lipu adama o urana u na wa̱a̱ ka̱mba̱ cece, na̱ a̱ ta̱wa̱ na̱ a̱yi uba̱ta̱ wa ganu:
LEV 14:3 ganu to uta̱ o ucina̱ wu uba̱ta̱ o uva̱la̱ta̱, reve u ka̱lyuwa̱ yi. Na̱ mɓa̱la̱'a̱ n koto ta̱ a vuma vu mɓa̱la̱ mu ukwa'an,
LEV 14:4 u ta zuwa a̱ ta̱wa̱a̱ na̱ nnunu n cece n re n wuma adama a za na a̱a̱ ka̱mba̱to cece'e, na̱ ɗanga seda na̱ a̱punda̱ a̱ shili o uɗavu no oroci o osondori.
LEV 14:5 Reve ganu zuwa le a paɗa manunu ma̱ ta̱ a̱ nnunu n re'e zuva vu upondo u ci'in u na u ri na̱ mini ma sa'ani.
LEV 14:6 Reve u tara manunu ma wuma ma na ma buwai oɓolo na̱ ɗanga seda na̱ a̱punda̱ a̱ shili o uɗavu no oroci o osondori. A̱vu u tsupu le a mpasa m manunu ma na a paɗai zuva mini ma sa'ani'i.
LEV 14:7 Reve wu kyo'onuwo za na a̱a̱ ka̱mba̱to cece diga a̱ mɓa̱la̱ mu ukwan toto ucindere. Reve u damma u ta̱ cece, a̱vu u lyawa manunu ma wuma'a u ka̱ra̱ a̱tsumona.
LEV 14:8 Reve a̱yi za na a̱a̱ ka̱mba̱to cece'e wu za̱'wa̱ a̱tugu a̱ yi, u puna a̱nji a̱ yi, a̱vu u sumba̱ na̱ mini. U ta̱ gba o o'wo cece. Reve no o koto za ndolo u ka̱mba̱ o uva̱la̱ta̱, amma wa̱a̱ da̱nu o oogodo a̱ yi shi hali rana cindere.
LEV 14:9 O urana we cindere, reve u puna a̱nji a aaci a̱ yi suru, na̱ ntsuka̱ ma̱ yi na̱ a̱ga̱pa̱na̱ a̱ yi. U ta puna eleme a̱ lipu va̱ yi suru. Reve wu za̱'wa̱ a̱tugu a̱ yi, a̱vu u sumba̱ na̱ mini, a̱vu wo o'wo cece.
LEV 14:10 <<Agba o urana wa̱ kunla̱ u ta tara mugiri'i n re n na n ri usa̱du shi na̱ mokyokyon ma̱ ta̱ ma aa'wan a̱ ta̱ nu umatsun za na ri usa̱du shi, na̱ makundatsu uta'atsu u yira i lashi a̱tsuma̱ a kupa u efa u na a̱ ja̱mba̱ra̱i nu uɓatsulai u ta̱ wu ta'atsu u mata'an ma mani'in.
LEV 14:11 Reve ganu na a̱a̱ ka̱mba̱to yi cece'e u ta̱ ta̱wa̱ na̱ za na a̱a̱ ka̱mba̱to cece'e oɓolo na̱ kucci va̱ yi a̱ ma̱ka̱ka̱n ma̱ A̱sulazuva o una̱ntsu wo Oogodo o Uga'asusan.
LEV 14:12 Reve ganu tara ma̱giri'i ma̱ ta̱, a̱vu u yuwaan kucci makuɗa ma̱ wila̱ oɓolo nu uɓatsulai u ta̱ wu ta'atsu u mata'an ma mani'in. A̱vu u 'ya̱sa̱n le kucci vu u'ya̱susa̱n e ekere a̱ A̱sulazuva.
LEV 14:13 Reve u paɗa a̱a̱giri'i'i uba̱ta̱ u na a tsu paɗa kucci vu unusu na̱ kucci vu ukula̱tosu Upasu wa Akiza. Tsa̱ kucci vu unusu, kucci makuɗa ma̱ wila̱ fo akunda a ganu a ɗa, a̱yi ɗa u la'ai akiza.
LEV 14:14 Ganu te kene mpasa n kucci vu unusu'u, reve u daɓa yi e lege vu utsuvu wu za na a̱a̱ ka̱mba̱to cece'e, na a aakatsu a gbain o ukere u sa'ani wa̱ yi na a aakatsu a gbain a anana o ukere u sa'ani wa̱ yi.
LEV 14:15 Reve ganu kene mani'in, reve u tsun yi a apata o ukere wu ugula̱ wa̱ yi.
LEV 14:16 Reve u tsupu aakatsu e ire o usa'ani wa̱ yi a mani'in ma na ma̱ ri a apata o ukere wu ugula̱ wa̱ yi'i, reve wu kyo'onu toto ucindere a̱ ma̱ka̱ka̱n ma̱ A̱sulazuva.
LEV 14:17 Reve akapi a na a buwai o ukere wa̱ yi'i, u daɓa e lege vu utsuvu vu ukere u sa'ani wu za na a̱a̱ ka̱mbuwa̱ cece'e na a aakatsu a gbain o ukere u sa'ani na a aakatsu a gbain a anana o usa'ani wa̱ yi zuva vu mpasa m makuɗa ma̱ wila̱.
LEV 14:18 Reve akapi a mani'in ma na ma buwai o ukere wa ganu'u u tsun le a aaci a za na a̱a̱ ka̱mba̱to cece'e u yuwaan yi kucci matara mo ume mo unusu a̱ ma̱ka̱ka̱n ma̱ A̱sulazuva.
LEV 14:19 <<Ganu ta ca kucci vu unusu u yuwaan za na a̱a̱ ka̱mba̱to cece'e kucci matara mo ume mo unusu diga e idaba ya̱ yi. Reve na̱ a̱yi ndolo koto u paɗa kucci vu ukula̱tosu'u.
LEV 14:20 Reve ganu'u u yuwan kucci'i a masa'a oɓolo na̱ kucci vi ishina, u yuwaan yi kucci matara mo ume mo unusu. Reve gba u ka̱mba̱ cece.
LEV 14:21 <<Amma na̱ za vu ulambu ɗa, agba waa gura tsura̱ ili i nda shi, reve u tara ma̱giri'i ma̱ ta̱ adama a̱ kucci makuɗa ma̱ wila̱ za na a̱a̱ 'ya̱sa̱n, adama a matara mo ume mo unusu wa̱ yi na̱ makundatsu ma̱ ta̱ ma yira i lashi a̱tsuma̱ a kupa u efa uja̱mba̱ru nu uɓatsulai u ta̱ wu ta'atsu u mata'an ma mani'in adama a̱ kucci vi ishina na̱ mani'in,
LEV 14:22 na̱ muɗa n re ko murukuku n re, za na suru waa gura tsura̱. Za ta̱ to o'wo kucci vu unusu za ta̱ waru adama kucci vu ukula̱tosu.
LEV 14:23 Reve o urana wa̱ kunla̱ u ta̱wa̱ ne ele ya ganu o una̱ntsu wo Oogodo o Uga'asusan a̱ ma̱ka̱ka̱n ma̱ A̱sulazuva adama o uka̱mba̱tosu wa̱ yi cece.
LEV 14:24 Reve ganu tara ma̱giri'i ma̱ kucci makuɗa ma̱ wila̱ oɓolo nu uɓatsulai u ta̱ wu ta'atsu u mata'an u mani'in. Reve ganu 'ya̱sa̱n le kucci vu u'ya̱susa̱n a̱ ma̱ka̱ka̱n ma̱ A̱sulazuva.
LEV 14:25 Reve u paɗa ma̱giri'i'i ma̱ kucci makuɗa ma̱ wila̱ꞌa̱. Reve u kene mpasa n kucci m makuɗa ma̱ wila̱ꞌa̱, reve u daɓa e lege vu utsuvu vu ukere wu usa'ani wu za na a̱a̱ ka̱mba̱to cece'e, na a aakatsu a gbain o ukere u sa'ani wa̱ yi na a aakatsu a gbain a anana o usa'ani wa̱ yi.
LEV 14:26 Reve ganu tsun akapi a mani'in a apata o ukere wu ugula̱ wa̱ yi.
LEV 14:27 Reve wu kyo'onu akapi a mani'in ma na ma̱ ri o ukere wu ugula̱ wa̱ yi'i na aakatsu e ire o usa'ani toto ucindere a̱ ma̱ka̱ka̱n ma̱ A̱sulazuva.
LEV 14:28 Reve akapi a mani'in ma na ma buwai o ukere wa̱ yi u daɓa yi e lege vu utsuvu wu usa'ani wu za na a̱a̱ ka̱mba̱to cece'e, na a aakatsu a gbain o ukere wu sa'ani na a aakatsu a gbain a anana o usa'ani, uba̱ta̱ u na a̱ tsuyin mpasa n kucci makuɗa ma̱ wila̱.
LEV 14:29 Reve akapi a mani'in ma na ma buwai o ukere wa ganu'u u tsun yi a aaci a za na a̱a̱ ka̱mba̱to cece'e, adama a yuwaan yi kucci matara mo ume mo unusu a̱ ma̱ka̱ka̱n ma̱ A̱sulazuva.
LEV 14:30 Reve u ca muɗa n re ko murukuku n re, ili i na waa gura tsura̱ suru.
LEV 14:31 Za ta̱ adama a kucci vu unusu za ve ire waru adama a̱ kucci vu ukula̱tosu, oɓolo na̱ kucci vi ishina. Reve ganu ca kucci matara mo ume mo unusu'u a̱ ma̱ka̱ka̱n ma̱ A̱sulazuva o una̱ wu za na a̱a̱ ka̱mba̱to cece'e.
LEV 14:32 <<A̱yi nda a̱yi ɗa wila̱ adama a za na ri na̱ mɓa̱la̱ mu ukwan u lipu n vama, za na aa gura ta̱wa̱a̱ na̱ kucci na a zuwai adama o uka̱mba̱tosu wa̱ yi cece shi.>>
LEV 14:33 A̱sulazuva a yuwan ta̱ adanshi na̱ Musa na̱ Haruna u damma,
LEV 14:34 <<Ni i uwa e iɗa ya Ka'ana za na maa ca ɗu wo o'wo za ɗu, na̱ n zuwa mɓa̱la̱ n vama n uwa o u'wa u ro e iɗa'a,
LEV 14:35 za vu u'wa'a u ta̱ ta̱wa̱ u damma ganu, <Me ene ta̱ gashi mɓa̱la̱ n uwa ta̱ o u'wa u va̱.>
LEV 14:36 Reve ganu zuwa a̱ pura̱ itana yu u'wa'a kafu ganu 'ya̱wa̱ u ka̱lyuwa̱ mɓa̱la̱'a̱, adama a damma ili i na i ri pe o u'wa'a suru a̱ ta̱ idaba wan. No o koto, reve ganu uwa u ka̱lyuwa̱ u'wa'a.
LEV 14:37 Reve u ka̱lyuwa̱ mɓa̱la̱'a̱. Na̱ mɓa̱la̱'a̱ u ri o uɓaɓu wu u'wa'a na abasa a̱ mini ma̱ a̱vu'un ko sawun, nu u uwa pe o uɓaɓu'u,
LEV 14:38 reve ganu uta̱ o u'wa'a a̱ tyo o una̱ntsu, reve u ɓa̱ru u'wa'a rana cindere.
LEV 14:39 Reve ganu ta̱wisa̱ o urana we cindere u ka̱lyuwa̱. Na̱ mɓa̱la̱'a̱ m bala o uɓaɓu wu u'wa'a,
LEV 14:40 reve ganu'u u zuwa a ta tawa atali a na a̱ ri na̱ mɓa̱la̱'a̱ reve a vari le uba̱ta̱ wi idaba o ugyuru u lyuci.
LEV 14:41 Reve a̱ ra̱ɓuwa̱ uɓaɓu wa̱ a̱tsuma̱ o u'wa'a suru. Reve o oco ili i na a̱ ra̱ɓuwa̱i'i uba̱ta̱ wi idaba o ugyuru u lyuci.
LEV 14:42 Reve a tara atali o ro a zuwa uba̱ta̱ u na o foɗoi ozo o ndolo. Reve a̱ zura̱ ci'in tso ro reve a sura u'wa'a.
LEV 14:43 <<Na̱ mɓa̱la̱'a̱ mu utisa̱ o u'wa'a, cina wu uta̱a̱ atali'i, reve vuma'a u ra̱ɓuwa̱ u'wa'a a̱vu u sura yi.
LEV 14:44 Reve ganu'u u 'ya̱wa̱ u ka̱lyuwa̱. Reve nna̱ mɓa̱la̱'a̱ m bala pe o u'wa'a, mɓa̱la̱ n vama mu upa̱luwusa̱ n ɗa o uwa'a'a. U'wa'a wo o'wo ta̱ idaba.
LEV 14:45 Reve o ɓoso u'wa'a, na atali a̱ yi na akpata nu usura wu u'wa'a suru. Reve a̱ pura̱ le a̱ tyo o uba̱ta̱ wi idaba o ugyuru u lyuci'i.
LEV 14:46 Za na suru uwai o u'wa'a a̱yi uɓa̱ruwu u to o'wo idaba hali she ulivu.
LEV 14:47 Waru za na asai pe o u'wa'a, ko u lyuwai pe o u'wa'a u ta̱ za̱'wa̱ a̱tugu a̱ yi.
LEV 14:48 <<Agba na̱ ganu ta̱wa̱ u ka̱lyuwa̱, na̱ mɓa̱la̱'a̱ koto m bala o u'wa'a shi cina a sura yi, u ta damma u'wa'a u ta̱ cece, adama a na mɓa̱la̱'a̱ n koto ta̱.
LEV 14:49 Adama a̱ ka̱mba̱to u'wa'a cece, vuma'a u ta tara nnunu n re na̱ ɗanga seda na̱ a̱punda̱ o uɗavu a̱ shili no oroci o osondori.
LEV 14:50 Reve u paɗa manunu ma̱ ta̱ o upondo u ci'in u na u ri na̱ mini ma sa'ani.
LEV 14:51 Reve u tara ɗanga seda no oroci o osondori na̱ a̱punda̱ a̱ shili o uɗavu oɓolo na̱ manunu ma wuma. Reve u tsupu le a mpasa m manunu ma na a paɗai na̱ mini'i, reve wu kyo'onu u'wa'a toto ucindere.
LEV 14:52 Ne ɗa wa̱a̱ ka̱mba̱to u'wa'a cece na̱ mpasa m manunu'u na̱ mini ma sa'ani na̱ manunu ma wuma na̱ ɗanga seda no oroci o osondori na̱ a̱punda̱ o uɗavu a̱ shili.
LEV 14:53 Reve u lyawa manunu ma wuma'a o ugyuru u lyuci wu 'yawan a̱ tyo o ogozo. Ne ɗa waa yuwan kucci matara mo ume mo unusu adama o u'wa'a, reve gba wo o'wo cece.>>
LEV 14:54 A̱yi nda a̱yi ɗa wila̱ adama a̱ mɓa̱la̱ mu ukwan u lipu: adama e ikavuru,
LEV 14:55 na adama a̱ mɓa̱la̱ mu upa̱luwusa̱ o utugu ko o u'wa,
LEV 14:56 na adama o utsutsu ko adama e ikavuru ko abasa o uryoryo,
LEV 14:57 adama u roco a mantsa ma na u ri idaba na̱ mantsa ma na u ri cece. A̱yi ɗa wila̱ adama a̱ mɓa̱la̱ mu ukwan n lipu.
LEV 15:1 A̱sulazuva a yuwan ta̱ adanshi na̱ Musa na̱ Haruna u damma,
LEV 15:2 <<Yuwain adanshi na aza a Isra'ila i damma le, na̱ vali ri a̱ ɗa̱wusa̱ a̱ lipu tsali tsa̱ yi, wuɗa̱wusa̱'a̱ ili yi idaba i ɗa.
LEV 15:3 Ko na̱ ma̱ɗa̱wa̱'a̱ u lyuwa elime ko u gulu, u ta zuwa yi wo o'wo idaba. Apa nda cine ma̱ɗa̱wa̱ ma̱ yi maa zuwa idaba:
LEV 15:4 Uba̱ta̱ wu nven n na vuma na a̱a̱ ɗa̱wusa̱ voyin suru u to o'wo idaba. Waru e ili i na u da̱nuyi suru u to o'wo idaba.
LEV 15:5 Za na suru ju'wa̱in uba̱ta̱ wu nven wa̱ yi u ta̱ za̱'wa̱ a̱tugu a̱ yi, reve u sumba̱ na̱ mini, a̱vu wo o'wo idaba hali ulivu.
LEV 15:6 Waru za na suru da̱nuyi e ili i na za na a̱a̱ ɗa̱wusa̱ da̱nuyi, u ta̱ za̱'wa̱ a̱tugu a̱ yi. Reve u sumba̱ na̱ mini, reve u buwa idaba hali she ulivu.
LEV 15:7 Za na suru ju'wa̱in lipu vu za na a̱ ɗa̱wusa̱, u ta̱ za̱'wa̱ a̱tugu a̱ yi, reve u sumba̱ na̱ mini, reve wo o'wo idaba she ulivu.
LEV 15:8 <<Na̱ za na a̱a̱ ɗa̱wusa̱ tsuwa̱a̱n za na ri cece ma̱tsa̱n, za na a̱ tsuwa̱yin ma̱tsa̱'a̱n u ta̱ za̱'wa̱ a̱tugu a̱ yi, reve u sumba̱ na̱ mini, reve wo o'wo idaba she ulivu.
LEV 15:9 Urutsu u na za ma̱ɗa̱wa̱'a̱ u da̱nuyi suru u to o'wo idaba.
LEV 15:10 Waru za na suru ju'wa̱in ili i na biti i ri za̱la̱ vu urutsu'u u to o'wo idaba hali ulivu. Waru za na suru tanuyi ili i ndolo u ta̱ za̱'wa̱ a̱tugu a̱ yi, reve u sumba̱ na̱ mini. Reve wo o'wo idaba she ulivu.
LEV 15:11 Za na suru za ma̱ɗa̱wa̱ ju'wa̱in agba u sa'a ekere a̱ yi na̱ mini shi, u ta̱ za̱'wa̱ a̱tugu a̱ yi reve u sumba̱ na̱ mini, a̱vu wo o'wo idaba she ulivu.
LEV 15:12 Upondo u ci'in u na za ma̱ɗa̱wa̱ ndolo ju'wa̱in suru o to ɓoso yi, agba ili i na suru u ju'wa̱in i na a yuwain nu uɗanga a̱ ta̱ za̱'wa̱ yi na̱ mini.
LEV 15:13 <<Na̱ a̱ ka̱mba̱to vuma cece diga a̱ ma̱ɗa̱wa̱ ma̱ yi, reve u kecee aciya̱yi rana cindere vu uka̱mba̱tosu cece va̱ yi, reve wu za̱'wa̱ a̱tugu a̱ yi. A̱vu u sumba̱ aciya̱yi na̱ mini ma sa'ani a̱vu wo o'wo cece.
LEV 15:14 Reve o urana wa̱ kunla̱ u tara muɗa n re ko murukuku n re, a̱vu u ta̱wa̱ a̱ ma̱ka̱ka̱n ma̱ A̱sulazuva o una̱ntsu wo Oogodo o Uga'asusan, a̱vu u ca ganu ele.
LEV 15:15 Reve ganu ca kucci le, za ta̱ kucci adama o unusu za ta̱ kucci vu ukula̱tosu. Ne ɗa ganu aa yuwan kucci matara mo ume mo unusu o una̱ wa̱ yi a̱ ma̱ka̱ka̱n ma̱ A̱sulazuva adama a̱ ma̱ɗa̱wa̱ ma̱ yi.
LEV 15:16 <<Na̱ tsali tsa vuma tso oco, u ta̱ sumba̱ lipu va̱ yi suru na̱ mini a̱vu wo o'wo idaba hali she ulivu.
LEV 15:17 Utugu ko ukwan u na tsali'i tsa̱ ju'wa̱in biti a̱ ta̱ za̱'wa̱ yi na̱ mini reve wo o'wo idaba hali she ulivu.
LEV 15:18 Na̱ vuma von na̱ ka hali tsali tso uta̱, ele ra a̱ ta̱ sumba̱ na̱ mini, reve o o'wo idaba hali she ulivu.
LEV 15:19 <<Na̱ ka e eneshe a̱shinda̱ o usumbu a̱ yi, u ta̱ da̱na̱ a̱tsuma̱ e idaba yu usumbu wa̱ yi hali rana cindere. Za na suru ju'wa̱n niyi u to o'wo idaba hali she ulivu.
LEV 15:20 E ili i na ka'a u voyin suru a mantsa mo usumbu ma̱ yi u to o'wo idaba. Waru e ili i na u da̱nuyi suru u to o'wo idaba.
LEV 15:21 Za na suru ju'wa̱in ili yi nven ya̱ yi u ta̱ za̱'wa̱ a̱tugu a̱ yi a̱vu u sumba̱ na̱ mini, reve wo o'wo idaba hali she ulivu.
LEV 15:22 Za na waru ju'wa̱in ili i na wa̱a̱ da̱nusu, u ta̱ za̱'wa̱ a̱tugu a̱ yi reve u sumba̱ na̱ mini, reve wo o'wo idaba hali she ulivu.
LEV 15:23 Ko ili yi nven i ɗa ko ili i na u shi nden, na̱ vuma ro ju'wa̱n yi u to o'wo idaba hali she ulivu.
LEV 15:24 Waru na̱ vuma von na̱ a̱yi reve mpasa mu usumbu ma̱ yi n ju'wa̱n yi, u to o'wo idaba rana cindere. Ili yi nven i na suru vali'i u voyin u to o'wo idaba.
LEV 15:25 <<Na̱ ka ri ocosu mpasa hali rana a̱bunda̱ agba mpasa mu usumbu ma̱ yi n ɗa shi, ko gba moco ma mpasa'a ma̱ ka̱ra̱ mantsa mo usumbu ma̱ yi, rana moco ma mpasa'a suru u ta̱ da̱na̱ a̱tsuma̱ e idaba. U ta̱ da̱na̱ a̱tsuma̱ e idaba tsa rana vu usumbu va̱ yi.
LEV 15:26 Ili yi nven i na u voyin suru a rana moco ma mpasa ma̱ yi u to o'wo idaba tsa mantsa mo usumbu wa̱ yi. Waru e ili i na suru u da̱nuyi u to o'wo idaba, tsa rana vu usumbu va̱ yi.
LEV 15:27 Za na suru ju'wa̱in ili i nda u to o'wo idaba. U ta̱ za̱'wa̱ a̱tugu a̱ yi reve u sumba̱, reve wo o'wo idaba hali she ulivu.
LEV 15:28 Amma na̱ wo o'wo cece diga o moco ma mpasa'a, u te kecee aciya̱yi rana cindere, na a yuwan ne, u to o'wo cece.
LEV 15:29 O urana wa̱ kunla̱ reve u tara muɗa n re ko murukuku n re. Reve u ta̱wa̱ ne ele ya ganu o una̱ntsu wo Oogodo o Uga'asusan.
LEV 15:30 Reve ganu ca za ta̱ kucci adama o unusu za ve ire waru kucci vu ukula̱tosu. Ne tsunda tsa ɗa ganu a yuwan kucci ma matara mo ume mo unusu o una̱ wa̱ yi a̱ ma̱ka̱ka̱n ma̱ A̱sulazuva adama e idaba i wocosu wa̱ yi.
LEV 15:31 <<Ne ɗa vaa kasa aza a Isra'ila ni ili i na yoo o'woto le idaba, adama a̱ kuwa̱ a̱tsuma̱ e idaba i le wan na̱ a̱ lungusa̱ uba̱ta̱ wu nden n va̱ n na n ri e memere me le.>>
LEV 15:32 A̱yi nda a̱yi ɗa ili i na aa yuwan adama a za na o o'woi idaba adama a̱ ma̱ɗa̱wa̱ ko za na tsali tsa̱ yi tsoo ocusho.
LEV 15:33 Na adama a ka na ri na̱ a̱shinda̱ o usumbu wa̱ yi, adama a vali ko ka na suru ri o ocosu, waru na adama a vali na voyin na̱ ka na ri idaba.
LEV 16:1 A̱sulazuva a yuwan ta̱ adanshi na̱ Musa cina olobo e re a Haruna a̱ kuwa̱ ɗe, ana a̱ ta̱wa̱i a̱ ma̱ka̱ka̱n ma̱ A̱sulazuva na akina a na a ntsayi shi, a̱vu gba a̱ kuwa̱.
LEV 16:2 Reve A̱sulazuva a damma Musa, <<Damma mawun ma̱ a̱na̱wu ma̱ wu Haruna, she u uwa Upasu wa Akiza o ucina̱ wu umuna elime e ikpa̱ta̱tsu ya Akpati mantsa ma na u cigai biti wan, ta̱wa̱ u kuwa̱ wan. Adama a na n ta̱ ta̱wa̱ e eleshe e ikpa̱ta̱tsu ya Akpati'i.
LEV 16:3 Apa nda cine Haruna aa uwa Upasu wa Akiza: u ta uwa na̱ moggono ma nan ma̱ kucci vu unusu na̱ a̱a̱giri'i a̱ kucci vu ukula̱tosu.
LEV 16:4 U to oto a̱tugu a akiza o okoro na̱ mokoɗi ma aacaka a̱ lipu va̱ yi. Reve wu nla̱ gbakala vu umuna e ikyun ya̱ yi, a̱vu wo oto ookokolo o okoro. A̱tugu a akiza a ɗa adama o ndolo u ta̱ sumba̱ kafu wo oto le.
LEV 16:5 U ta̱ ushi nga̱ji n re e ekere a ama a Isra'ila adama a̱ kucci vu unusu, na̱ a̱a̱giri'i a̱ ta̱ adama a̱ kucci vu ukula̱tosu.
LEV 16:6 <<Haruna ta ca nan kucci vu unusu adama a aciya̱yi, u yuwan kucci matara mo ume mo unusu wa̱ yi na adama o u'wa wa̱ yi.
LEV 16:7 Reve u tara nga̱ji n re'e, a̱vu u ta̱wa̱ ne ele a̱ ma̱ka̱ka̱n ma̱ A̱sulazuva o una̱ntsu wo Oogodo o Uga'asusan.
LEV 16:8 Reve u zuwa agita e mgbele n re'e, za ta̱ adama a̱ A̱sulazuva za ta̱ adama a Azaze.
LEV 16:9 Reve Haruna ta̱wa̱ na̱ za na agita a̱ riya̱yi adama a̱ A̱sulazuva u yuwan kucci vu unusu na̱ a̱yi.
LEV 16:10 Amma za na agita a̱ riya̱yi adama a Azaze a̱ ta̱ ta̱wa̱ na̱ a̱yi wuma a̱ ma̱ka̱ka̱n ma̱ A̱sulazuva a yuwan ili i na a tsu yuwan i matara mo ume mo unusu. A̱ gba̱ra̱ yi a̱ tyo a̱tsumona tsa̱ a̱gba̱ri a Azaze.
LEV 16:11 <<Haruna ta̱ ta̱wa̱a̱ no ogono a nan kucci vu unusu wa̱ yi. Reve u yuwan kucci matara mo ume mo unusu adama a aciya̱yi na adama o u'wa wa̱ yi. U ta paɗa na'an kucci vu unusu va aciya̱yi.
LEV 16:12 Reve u tara aayimba tapu na akinkina a na a̱ ri na akina diga a masa'a a̱ ma̱ka̱ka̱n ma̱ A̱sulazuva. Reve u shiton ukere u re ni ili i ma̱guru u uwa ne ele a̱tsuma̱ o umuna.
LEV 16:13 Reve u tsun ili i ma̱guru'u a akina'a a̱ ma̱ka̱ka̱n ma̱ A̱sulazuva adama mikyon ma a̱tsuka̱'a̱ m ɓa̱ru ikpa̱ta̱tsu ya akpati'i, uba̱ta̱ u matara mo ume mo unusu, ta̱wa̱ u kuwa̱ wan.
LEV 16:14 Reve u kene mpasa mo ogono a na'an reve wu kyo'onu yi na aakatsu a̱ yi elime e ikpa̱ta̱tsu ya akpati a matara mu ume mo unusu upasu wa asana. Reve waru wu kyo'onu akapi na aakatsu a̱ yi toto ucindere elime e ikpa̱ta̱tsu ya akpati'i.
LEV 16:15 <<Reve u paɗa megbele ma̱ kucci vu unusu'u adama a ama. Reve u ta̱wa̱ na̱ mpasa'a o ucina̱ wu umuna'a, a̱vu u yuwan na̱ a̱yi cine u yuwain na̱ mpasa mu na'an. Wu kyo'onu yi zuva vi ikpa̱ta̱tsu va akpati'i na̱ a̱ ma̱ka̱ka̱n ma̱ yi.
LEV 16:16 Ne ɗa waa yuwan kucci matara mo ume mo unusu adama o Upasu u na u La'ai Akiza, adama e idaba ya aza a Isra'ila na adama a aciyogbamu u le, ko cu'un vu unusu ne a yuwain. Ne ɗa waa yuwaan fo Oogodo o Uga'asusan a na a̱ ri uba̱ta̱ u le, e memere me idaba i le.
LEV 16:17 Ko za da̱na̱ pe o Oogodo o Uga'asusan wan a̱ mantsa ma na Haruna ganu aa uwa u yuwan kucci matara mo ume mo unusu Upasu u na u La'ai Akiza, hali she na̱ wu uta̱ nu u koto mayan ma̱ kucci matara mo ume mo unusu adama a aciya̱yi nu u'wa wa̱ yi na adama a ama a Isra'ila suru.
LEV 16:18 Reve wu uta̱ a̱ 'ya̱wa̱ uba̱ta̱ u masa'a ma na ma̱ ri a̱ ma̱ka̱ka̱n ma̱ A̱sulazuva u yuwan kucci matara mo ume mo unusu adama a̱ yi. Reve u kene mpasa mo ogono a na'an na̱ mpasa m megbele'e u putala yi a avana a masa'a'a.
LEV 16:19 U to kyo'onuwo yi mpasa'a na aakatsu a̱ yi toto ucindere, adama wo o'woto yi cece, waru u lapula yi e ekere e idaba ya aza a Isra'ila.
LEV 16:20 <<Nu u koto mayan ma̱ kucci matara mo ume mo unusu adama o Upasu u na u La'ai Akiza'a no Oogodo o Uga'asusan na̱ masa'a, reve u ta̱wa̱a̱ na̱ megbele ma wuma'a.
LEV 16:21 Reve Haruna kuru ekere a̱ yi ra a aaci a megbele ma wuma'a reve u damma iwuya na aciyogbamu nu unusu wa aza a Isra'ila suru. U zuwa le suru a aaci e megbele'e reve u gba̱ra̱ yi a̱ tyo a̱tsumona e ekere a vuma na a zuwai ulinga u ndolo.
LEV 16:22 Megbele'e ma ta tanu unusu wa ama'a suru a̱ tyo uba̱ta̱ u na za ri shi, reve vuma'a u lyawa yi a̱ a̱tsumona.
LEV 16:23 <<Reve Haruna uwa a̱tsuma̱ o Oogodo o Uga'asusa'an, reve u foɗo a̱tugu o okoro a na u shi wo otoi kafu u uwa Upasu u na u La'ai Akiza'a reve u lyawa le pe.
LEV 16:24 Reve u sumba̱ lipu va̱ yi na̱ mini uba̱ta̱ wa akiza, a̱vu wo oto a̱tugu a̱ yi. A̱vu wu uta̱ u ca kucci vu ukula̱tosu va̱ yi na̱ kucci vu ukula̱tosu va ama, u yuwan kucci matara mo ume mo unusu wa̱ yi na̱ za va ama'a.
LEV 16:25 Agba u ta̱ kula̱to abaji a mani'in ma̱ kucci vu unusu a masa'a.
LEV 16:26 Vuma na lyawai megbele Azaze ma̱ ka̱ra̱ a̱gba̱ri, u ta̱ za̱'wa̱ a̱tugu a̱ yi, reve u sumba̱ na̱ mini. Na a yuwan u ta gura uwa o uva̱la̱ta̱.
LEV 16:27 Agba nan na̱ megbele ma na a yuwayin kucci vu unusu'u aza a na a̱ ta̱wa̱i na̱ mpasa n le Upasu u na u La'ai Akiza adama a̱ kucci matara mo ume mo unusu a ta tara le a̱ tyo o ucina̱ wu uva̱la̱ta̱ a̱ kula̱to le. A̱vu a̱ kula̱to kwan le ni iliya̱tsuma̱ i le na̱ a̱ya̱n e le.
LEV 16:28 Vuma na kula̱to nle'e u ta̱ za̱'wa̱ a̱tugu a̱ yi, reve u sumba̱ na̱ mini. Na a yuwan ne u ta gura uwa o uva̱la̱ta̱.
LEV 16:29 <<A̱yi nda u to o'wo ili i na i ri n yuwusan kukuci: o urana wa kupa u woto we cindere, yaa lyuwa shi waru yaa yuwan ulinga shi, umatsun u lyuci ko omocin a na ri o limocin a̱tsuma̱ a̱ ɗu.
LEV 16:30 Adama a na o urana u nda u ɗa aa yuwan kucci matara mo ume mo unusu adama a̱ ɗu, adama a̱ ka̱mba̱to ɗu cece. I to o'wo cece a̱ ma̱ka̱ka̱n ma̱ A̱sulazuva diga a̱ nusu ɗu suru.
LEV 16:31 Ashibi a̱ wivuwun a ɗa la̱nga̱ e ekere a̱ ɗu, yaa lyuwa gba ili shi. A̱yi nda ili i na ya̱a̱ da̱na̱ a yuwusan ɗa kukuci.
LEV 16:32 Ganu na a̱ tsuyin mani'in a tawa niyi wo o'wo ganu o una̱ wa dada va̱ yi ɗa aa ca kucci matara mo ume mo unusu, wotowu na̱ a̱tugu a akiza o okoro.
LEV 16:33 Reve u yuwan kucci matara mo ume mo unusu adama o Upasu u na u La'ai Akiza. Reve u ca kucci matara mo ume mo unusu adama o Oogodo o Uga'asusa'an na adama a masa'a na adama a nan ganu na adama o oɓolo a ama'a suru.
LEV 16:34 <<A̱yi nda u to o'wo ili i na i ri n yuwusan kukuci. A̱ ta̱ a̱ ri n yuwusan kucci matara mo ume mo unusu adama o unusu wa ama a Isra'ila suru u ta̱ a aa'wan.>> Reve Musa yuwan cine A̱sulazuva a damma niyi.
LEV 17:1 A̱sulazuva a yuwan ta̱ adanshi na̱ Musa u damma,
LEV 17:2 <<Yuwan adanshi na̱ Haruna no olobo a̱ yi na ama a Isra'ila suru vu damma le, <Apa nda ili i na A̱sulazuva a zuwai:
LEV 17:3 na̱ vuma na a̱tsuma̱ a aza a Isra'ila paɗa ogono a nan ko mokyokyon ko megbele pe o uva̱la̱ta̱ ko ucina̱ wu uva̱la̱ta̱,
LEV 17:4 agba u ta̱wa̱ na̱ a̱yi o una̱ntsu wo Oogodo o Uga'asusan u ca kucci vu uneꞌe wa̱ yi e ekere a̱ A̱sulazuva elime a̱ a̱a̱'isa̱ a̱ A̱sulazuva shi, ume wu unusu wu mpasa u ta a aci a̱ yi. Wo oco ta̱ mpasa, a ta tawa vuma ndolo a̱tsuma̱ a ama a̱ yi.
LEV 17:5 A̱yi nda u ta dansa ama a Isra'ila a̱ ta̱ a̱ ri n ta̱wusa̱a̱ na̱ kucci na aa casu a atsusa uba̱ta̱ wa̱ A̱sulazuva e ekere a ganu o una̱ntsu wo Oogodo o Uga'asusan. Reve a ca kucci le vu muwwulai e ekere a̱ A̱sulazuva.
LEV 17:6 Reve ganu kyo'onu mpasa'a a masa'a ma̱ A̱sulazuva o una̱ntsu wo Oogodo o Uga'asusan. Reve u kula̱to abaji a mani'i'in ili i ma̱guru mo uyo'o a̱ tyo e ekere a̱ A̱sulazuva.
LEV 17:7 A̱a̱ da̱shi ca otoni a̱ lima̱ a na a̱ ri no oroci e mgbele kucci shi, aza a na aa yuwusan tsushakala ne ele. A̱yi nda u to o'wo ili i na a̱a̱ da̱na̱ a yuwusan kukuci hali a̱ tyo a mantsa me elime.>
LEV 17:8 <<Vu damma le, za va Isra'ila ko mocin na suru cayi kucci vu ukula̱tosu ko cu'un kucci ro,
LEV 17:9 agba u ta̱wa̱ na̱ a̱yi o una̱ntsu wo Oogodo o Uga'asusan u ca A̱sulazuva shi, a ta tawa vuma ndolo a̱tsuma̱ a ama a̱ yi.
LEV 17:10 <<Za va Isra'ila ko mocin na ri nden ne ele suru na tamai a̱kutsu a mpasa, n ta yuwan tsurala na̱ a̱yi, reve n tawa yi a̱tsuma̱ a ama a̱ yi.
LEV 17:11 Adama a na wuma wi ili i wuma i ta̱ a̱tsuma̱ a mpasa ma̱ yi. N ca ɗu ta̱ a̱yi adama i yuwan a̱ga̱nda̱ a matara mo ume mo unusu adama a aciya̱ɗu a masa'a, adama a na mpasa n ɗa n tsu tara ume wu unusu u vuma.
LEV 17:12 Adama o ndolo a ɗa n dammai aza a Isra'ila: ko za a̱tsuma̱ a̱ ɗu ko mocin na ri na̱ nden na̱ a̱ɗu aa tama mpasa shi.
LEV 17:13 <<Za va Isra'ila na suru, ko mocin na ri na̱ nden a̱tsuma̱ a̱ ɗu na vu unai nama o ugenge ko manunu ma na a tsu tama u to oco mpasa ma̱ yi reve u ciɗo yi na̱ ma̱bula̱.
LEV 17:14 Adama a na wuma wi ili i wuma i ta̱ a̱tsuma̱ a mpasa ma̱ yi. Adama o ndolo a ɗa n dammai aza a Isra'ila: she i tama mpasa mi ili i wuma wan, adama a na wuma wi ili i wuma suru i ta̱ a̱tsuma̱ a mpasa ma̱ yi. Za na suru tama niyi a ta tawa yi.
LEV 17:15 <<Za na suru tamai a̱kwa̱kwa̱ ko ili i na nama vu una kakarai, ko umatsun u lyuci ko mocin, u ta̱ za̱'wa̱ a̱tugu a̱ yi reve u sumba̱ na̱ mini. Reve u da̱na̱ idaba hali she ulivu, reve wo o'wo cece.
LEV 17:16 Agba na̱ vuma'a wu za̱'wa̱ a̱tugu ko u sumba̱ shi, ume wu unusu u ndolo u ta̱ a aci a̱ yi.>>
LEV 18:1 Reve A̱sulazuva a damma Musa,
LEV 18:2 <<Yuwan adanshi na aza a Isra'ila vu damma le: a̱mu ɗa A̱sulazuva A̱sula̱ a̱ ɗu.
LEV 18:3 She i yuwan cine aa yuwusan a̱tsuma̱ a Masar wan, uba̱ta̱ u na i da̱na̱i na̱ nden. Waru she i yuwan cine aa yuwusan a̱tsuma̱ e iɗa ya Ka'ana wan, uba̱ta̱ u na ma̱a̱ ta̱wa̱to ɗu. She i yuwan cine ele aa yuwusan wan.
LEV 18:4 I toni wila̱ u va̱ reve i kuru ili i na n dammai ulobonu. A̱mu ɗa A̱sulazuva A̱sula̱ a̱ ɗu.
LEV 18:5 I toni ili i na n dammai na̱ wila̱ u va̱, adama a na vuma na toniyi nle u ta̱ tsura̱ wuma e ekere e le. A̱mu ɗa A̱sulazuva.
LEV 18:6 <<She i yuwan zuzu ni imaci i na i ri zuzu na̱ a̱ɗu na yoo von ne ele wan. A̱mu ɗa A̱sulazuva.
LEV 18:7 She vu von na̱ mma va̱ wu vu zuwa dada va̱ wu o'wo ili yi izo'oshi wan. Mma va̱ wu ɗa. She vu von na̱ a̱yi wan.
LEV 18:8 She vu von na̱ ka va dada va̱ wu wan, ili i ndolo i ta zuwa dada va̱ wu o'wo ili yi izo'oshi.
LEV 18:9 She vu von na̱ mawun ma̱ a̱na̱wu ma̱ wu mo usheli wan, ko mawun ma̱ a̱sha̱wu ma̱ wu mo usheli wan, ko mawun mo usheli ma mma va̱ wu wan, ko o u'wa u ta̱ u ɗa a matsan nɗu ko a matsan yi ta̱ uba̱ta̱ u ro.
LEV 18:10 She vu von na̱ mawun ma tsukaya ma̱ wu usheli wu ulobo wa̱ wu wan, ko usheli wu usheli wa̱ wu wan, ili i ndolo i to o'wo wu ili yi izo'oshi.
LEV 18:11 She vu von nu usheli wu ka va dada va̱ wu za na a matsaan niyi wan, mawun ma̱ a̱sha̱wu ma̱ wu ma ɗa.
LEV 18:12 She vu von na̱ mawun ma̱ a̱na̱wu ma dada va̱ wu mo usheli wan, adama a na maci zuzu va dada va̱ wu ɗa.
LEV 18:13 She vu von na̱ mawun ma̱ a̱na̱wu ma mma va̱ wu mo usheli wan, adama a na maci zuzu va mma va̱ wu ɗa.
LEV 18:14 She vu von na̱ ka mawun ma̱ a̱na̱wu ma dada va̱ wu wan, adama a na a̱yi mma va̱ wu ɗa.
LEV 18:15 She vu von na̱ jene va̱ wu wan, ka mawun ma̱ wu ma ɗa. She vu von na̱ a̱yi wan.
LEV 18:16 She vu von na̱ ka mawun ma̱ a̱na̱wu ma̱ wu wan, adama a na ili i nda i to o'wo yi ili yi izo'oshi.
LEV 18:17 She vu von na̱ mma oɓolo nu usheli wa̱ yi wan. Waru she vu von na̱ mawun ma tsukaya ma̱ yi usheli wu ulobo wa̱ yi ko mo usheli wa̱ yi wan, adama a na imaci i zuzu ya̱ yi i ɗa. Iwuya i ɗa ndolo'o.
LEV 18:18 She vu zuwa zawa'a vu ka va̱ wu wo o'wo shewun va̱ yi ka va̱ wu gba ubuwu wuma, a̱vu vu von na̱ a̱yi wan.
LEV 18:19 <<She vu von na̱ ka a̱yi a mantsa mo usumbu ma̱ yi wan.
LEV 18:20 She vu von na̱ ka moron ma̱ nden ma̱ wu, a̱vu vu lungusa̱ aciya̱wu na̱ a̱yi wan.
LEV 18:21 She vu yuwan kucci na̱ ko mawun ma̱ ta̱ a̱tsuma̱ a̱ muwun ma̱ wu e ekere a̱ a̱a̱ma̱li Mole wan, adama vu ta̱wa̱a̱ na̱ wono e ekere a̱ A̱sulazuva wan. A̱mu ɗa A̱sulazuva.
LEV 18:22 She vu von na̱ vali na̱ vali cine a tsu yuwan na̱ ka wan. Ili yi idaba i ɗa e ekere a̱ A̱sulazuva.
LEV 18:23 She vu von na̱ nama wan a̱vu vu lungusa̱ aciya̱wu. She ka ca lipu va̱ yi nama von na̱ a̱yi wan, ili yi idaba i ɗa.
LEV 18:24 <<A̱tsuma̱ e re nda suru she i lungusa̱ aciya̱ɗu wan, adama a na tsundolo tsa ɗa ama a na moo lo a̱ ma̱ka̱ka̱n ma̱ ɗu o o'woi ili yi idaba.
LEV 18:25 Tsundolo tsa ɗa iɗa'a yo o'woi idaba. Reve n ca yi oforo adama o unusu wa̱ yi, adama o ndolo a ɗaɗa iɗa'a i shaamai aza a na a̱ ri pe nden.
LEV 18:26 Amma i to toni ili i na n dammai na̱ wila̱ u va̱ agba she i yuwan ili yi idaba i nda wan, ko umatsun wi iɗa i ɗa vu ri ko mocin na ri nden na̱ a̱ɗu,
LEV 18:27 adama a na ili i nda i ɗa suru ama'a a yuwain aza a na a̱ da̱na̱i elime a̱ ɗu, reve iɗa'a yo o'wo idaba.
LEV 18:28 Na̱ yo o'woto iɗa'a ili yi idaba, u ta shaama ɗu cine u shaamai ama a na a̱ shi elime a̱ ɗu.
LEV 18:29 Vuma na yuwain cu'un vi ili yi idaba i nda suru, cu'un vuma ndolo a tawa yi a̱tsuma̱ a ama yi.
LEV 18:30 I toni ili i na n dammai, she i yuwan ili yi idaba ya agadu ya ama a na a yuwusain kafu i ta̱wa̱ pa wan. Waru she i lungusa̱ aciya̱ɗu ne ele wan. A̱mu ɗa A̱sulazuva A̱sula̱ a̱ ɗu.>>
LEV 19:1 Reve A̱sulazuva a damma Musa,
LEV 19:2 <<Vu yuwan adanshi na aza a Isra'ila suru vu damma le, i da̱na̱ na akiza adama a na a̱mu A̱sulazuva A̱sula̱ a̱ ɗu za va akiza ɗa.
LEV 19:3 Vuma suru a̱tsuma̱ a̱ ɗu u ca dada na̱ mma ɗu tsugbain. Reve i yuwan tsutoni nu urana wa Ashibi a̱ va̱. A̱mu ɗa A̱sulazuva A̱sula̱ a̱ ɗu.
LEV 19:4 She i zuwa okolo a̱ ɗu a̱ musula̱ wan ko i zuɗa̱a̱ aciya̱ɗu ruma musula̱ mi irumu wan. A̱mu ɗa A̱sulazuva A̱sula̱ a̱ ɗu.
LEV 19:5 <<Ni i ca kucci muwwulai a̱ tyo uba̱ta̱ wa̱ A̱sulazuva, i ca yi cine wu ntsayi a̱ usu yi o una̱ u ɗu.
LEV 19:6 I ta tama kucci'i o urana u ndolo ko nu usana u tawa, ili i na gba i buwai hali urana wa ta'atsu i ta̱ kula̱to yi.
LEV 19:7 Na a tama akapi o urana wa ta'atsu wo o'wo ta̱ ili yi idaba, waru a̱ usu yi shi.
LEV 19:8 Vuma na tama niyi o urana wa ta'atsu biti, imini ya̱ yi i ɗa, adama a na u ka̱mba̱to ta̱ ili ya akiza ya̱ A̱sulazuva wo o'wo ili yi idaba, a ta tawa cu'un vuma ndolo a̱tsuma̱ a ama a̱ yi.
LEV 19:9 <<A mantsa ma na i gasai itana ya̱ a̱ɗuma̱ a̱ ɗu, she i gasa a̱ tyo a̱ nge'en ma̱ a̱ɗuma̱'a̱ wan ko i toni nu u'yanlu uba̱ta̱ u na i gasai wan.
LEV 19:10 She i ka̱mba̱ u'yanlu o uɗuma̱ wa ataci a̱ ina̱bi wan ko yi ta̱ɗa̱ aza a na o ocoi e iɗa wan. I lyawa le adama a alambi no omocin. A̱mu ɗa A̱sulazuva A̱sula̱ a̱ ɗu.
LEV 19:11 <<She i yuwan wivu wan. She i yuwan epen wan. She i luluma̱ nanza wan.
LEV 19:12 She i kucina na ala a̱ va̱ ne epen wan. Mayuwan ne u to rono ala a̱ A̱sula̱ a̱ wu e iɗa. A̱mu ɗa A̱sulazuva.
LEV 19:13 <<She i paala moron ma̱ nden ma̱ ɗu wan, waru she i usa itana ya̱ yi wan. She i lyawa ikebe ya aza a azamalinga ya asa o ukere u ɗu wan.
LEV 19:14 She yi isula agulani wan ko i zuwa ili i na irumba̱ ya̱a̱ ta̱ɗa̱tsa̱ wan, amma yu uwwa wovon wa̱ A̱sula̱ a̱ ɗu. A̱mu ɗa A̱sulazuva.
LEV 19:15 <<She i yuwan uge'etosu wu ulambu u mejege wan. She i roco aɗangulu e ekere a alambi wan ko icigi ba̱ta̱ wu zagbain wan, amma i yuwan uge'etosu wa amayun a̱tsuma̱ o nron mu nden n ɗu.
LEV 19:16 She i baza adanshi e epen a̱tsuma̱ a ama a̱ ɗu wan. She i yuwan ili i na yaa zuwa wuma wu nanza a̱tsuma̱ e meleshe wan. A̱mu ɗa A̱sulazuva.
LEV 19:17 <<She vu 'yuwan za va̱ wu o okolo a̱ wu wan. Vu ɓara moron ma̱ nden ma̱ wu a alanga e eteshe adama vu tsura̱ akunda o unusu wa̱ yi wan.
LEV 19:18 She i zami ure u na yaa tsupa ko i zuwa nanza o okolo a̱ ɗu wan, amma i ciga moron ma̱ nden ma̱ ɗu tsa aciya̱ɗu. A̱mu ɗa A̱sulazuva.
LEV 19:19 <<I toni ili i na n dammai. She i ɓolo cu'un vi iliyamunga i ro na̱ cu'un ro adama a yuwan tsukumbi wan. She i cu'wa̱n uɗuma̱ u ɗu ni icu'un, yi icu'un i re wan. She yo oto itana i na a ɗavai na̱ a̱punda̱ e re koko'o wan.
LEV 19:20 <<Na̱ vuma von na̱ ka na ri aagbashi, za na waru a yuwayin ɗe nanza nzuwulai n na waa zuwa, agba koto a tsupaa yi shi ko wo o'wo fa̱a̱n shi, a ca le oforo a na a ntsayi. O una le wan, adama a na koto wo o'wo fa̱a̱n shi.
LEV 19:21 Amma vuma'a u ta̱ ta̱wa̱ na̱ a̱a̱giri'i o una̱ntsu wo Oogodo o Uga'asusan adama a̱ kucci vu unusu uba̱ta̱ wa̱ A̱sulazuva.
LEV 19:22 Ganu ta yuwaan yi kucci matara mo ume mo unusu na̱ a̱a̱giri'i'i na̱ kucci makuɗa ma̱ wila̱ a̱ ma̱ka̱ka̱n ma̱ A̱sulazuva adama o unusu u na u yuwain, a̱vu a yuwaan yi gafura vu unusu wa̱ yi.
LEV 19:23 <<Mantsa ma na i uwai a̱tsuma̱ e iɗa'a reve i cu'wa̱n cu'un vu uɗanga na suru tsu matsan muwun ma alya, i tara muwu'un o o'wo ɗu ili yi idaba hali a'wan a ta'atsu, she i lyuwa le wan.
LEV 19:24 A aa'wan a̱ na̱shi umatsun wu ɗanga suru to o'wo ili ya akiza, kucci vi ica uba̱ta̱ wa̱ A̱sulazuva.
LEV 19:25 Amma gba a aa'wan a tawun i ta lyuwa umatsun wu ɗanga'a. Ne ɗa ugasa u ɗu wa̱a̱ da̱shi a̱bunda̱ a̱mu ɗa A̱sulazuva A̱sula̱ a̱ ɗu.
LEV 19:26 <<She i tama nama a̱yi ubuwu na̱ mpasa ma̱ yi wan. She i yuwan yindi ko tsuboci wan.
LEV 19:27 She i ye'we cin ɗu, ko i ye'we ntsuka̱ n ɗu wan.
LEV 19:28 She yi paɗa lipu ɗu adama a na i ri e mesun mo ukwa̱ wan, ko i yuwan iɗana a̱ lipu ɗu wan. A̱mu ɗa A̱sulazuva.
LEV 19:29 <<She vu lungusa̱ usheli wa̱ wu o ure u tsipere wan a̱vu ka̱mba̱to yi aashakala, na̱ ne ɗa shi iɗa'a i ta̱ ka̱mba̱ a tsushakala, a̱vu wo o'wo tapu ni iwuya.
LEV 19:30 I toni urana wa Ashibi u va̱, waru i ca a̱a̱'isa̱ a̱ va̱ tsugbain. A̱mu ɗa A̱sulazuva.
LEV 19:31 <<She i 'ya̱wa̱ uba̱ta̱ wa aza a na o ɓoloso aci na̱ ruhu va̱ a̱kwa̱kwa̱ ko yindi tsa̱ra̱ i zami a̱sa̱la̱ ko ikambishi ya̱'a̱ le wan. She i zami le wan ta̱wa̱ a̱ lungusa̱ ɗu wan. A̱mu ɗa A̱sulazuva A̱sula̱ a̱ ɗu.
LEV 19:32 <<I ca za na ri na̱ yono na abara tsugbain adama a na yaa uwwusa wovon wa̱ A̱sula̱ a̱ ɗu. A̱mu ɗa A̱sulazuva.
LEV 19:33 <<Na̱ mocin ri nden na̱ a̱ɗu e iɗa i ɗu, she i ɓongi yi wan.
LEV 19:34 I ta yuwaan mocin na ri oɓolo na̱ a̱ɗu cine yaa yuwaan umatsun wi iɗa i ɗu. I ciga yi cine i cigai aciya̱ɗu, adama a na a̱ɗu fo omocin a ɗa i da̱na̱i a̱tsuma̱ a Masar. A̱mu ɗa A̱sulazuva A̱sula̱ a̱ ɗu.
LEV 19:35 <<She i paala nanza ba̱ta̱ o uritosu wu uga'an e iɗa ko ume ko e ili ya̱ a̱bunda̱ wan.
LEV 19:36 I yuwan ulinga ni ili yu uritosu u mejege, ni ili yu ume i mejege. Makundatsu ma na yoo rito ili yu u'yewu u da̱na̱ mejege. A̱mu ɗa A̱sulazuva A̱sula̱ a̱ ɗu za na uta̱a̱ nɗu a̱tsuma̱ a Masar.
LEV 19:37 I reve i toni ta̱ ili i na n dammai suru oɓolo na̱ wila̱ u va̱ suru, i toni le. A̱mu ɗa A̱sulazuva.>>
LEV 20:1 A̱vu A̱sulazuva a yuwan adanshi na̱ Musa u damma,
LEV 20:2 <<Damma aza a Isra'ila, suru za va Isra'ila ko mocin na ri na̱ nden a̱tsuma̱ e le za na cayi ko mawun ma̱ ta̱ a̱tsuma̱ a̱ muwun ma̱ yi a̱ tyo ya̱ a̱a̱ma̱li Mole, a ciga a 'yuwan o una yi. Ama a̱ lyuci'i a ta vuvara yi na atali.
LEV 20:3 N ta yuwan tsurala na̱ vuma ndolo, waru n ta tawa yi a̱tsuma̱ ama a̱ yi. Adama a na u ca ta̱ mawun ma̱ ta̱ a̱tsuma̱ a̱ muwun ma̱ yi a̱ tyo ya̱ Mole. U ka̱mbuwa̱ ta̱ uba̱ta̱ wa akiza a̱ va̱ idaba, waru u tara ala a akiza a̱ va̱ ili ya̱ a̱ɓula̱ shi.
LEV 20:4 Na ama a̱ lyuci'i ene ta̱ ana u cayi mawun ma̱ ta̱ a̱tsuma̱ a̱ muwun ma̱ yi a̱ tyo ya̱ Mole reve a̱ rungwa̱, agba o una yi shi,
LEV 20:5 to n ta yuwan tsurala na̱ vuma'a nu u'wa wa̱ yi. Waru n ta tawa u'wa̱ wa̱ yi nu ugundo wa̱ yi a̱tsuma̱ a ama e le, na̱ suru aza a na a yuwusan tsushakala oɓolo na̱ a̱yi a̱ tyo ya̱ Mole.
LEV 20:6 <<N ta yuwan tsurala na̱ za na vadalai uba̱ta̱ u moɓolo ma aci no ozo o otoni, no oboci a yuwusan tsushakala uba̱ta̱ e itoni i le. Waru n ta tawa yi a̱tsuma̱ a ama a̱ yi.
LEV 20:7 I tawa aciya̱ɗu waru yo o'wo aza a akiza, adama a na a̱mu ɗa A̱sulazuva A̱sula̱ a̱ ɗu.
LEV 20:8 I guza̱ wila̱ u va̱ reve i kuru le. A̱mu ɗa A̱sulazuva, za na tawa nɗu na akiza.
LEV 20:9 <<Suru za na isulai dada va̱ yi ko mma va̱ yi a ciga a 'yuwan o una yi, adama a na wi isula ta̱ dada va̱ yi ko mma va̱ yi. Ume wu mpasa ma̱ yi n ta̱ da̱na̱ a aci a̱ yi.
LEV 20:10 <<Na̱ vuma yuwan tsipere na̱ ka moron ma̱ nden ma̱ yi, ele ra na a yuwain tsipere'e a ciga a 'yuwan o una le.
LEV 20:11 Na̱ vuma von na̱ ka va dada va̱ yi, u zuwa ta̱ dada va̱ yi o'wo ili i wono. Ele ra na a ciga a 'yuwan o una le, ume wu mpasa n le n ta̱ da̱na̱ a aci e le.
LEV 20:12 Na̱ vuma von na̱ jene va̱ yi, ele ra a ciga a 'yuwan o una le, adama a na a yuwan ta̱ ili yu uwuyanu, ume wu mpasa n le n ta̱ da̱na̱ a aci e le.
LEV 20:13 Na̱ vuma von na̱ za va̱ yi vali cine a̱ tsu von na̱ ka, ele ra a yuwan ta̱ ili yi idaba. Na a ciga a 'yuwan o una le, ume wu mpasa n le n ta̱ da̱na̱ a aci e le.
LEV 20:14 <<Na̱ vuma zuwa usheli na̱ mma va̱ yi, a̱yi ndolo iwuya i ɗa. A̱yi ne ele ra a ciga a 'yuwan a̱ kuloto le a̱tsuma̱ akina, ta̱wa̱ she iwuya i da̱na̱ a̱tsuma̱ a̱ ɗu wan.
LEV 20:15 <<Na̱ vuma yuwan tsipere na̱ nama a ciga a 'yuwan o una yi, reve fo o una nama'a.
LEV 20:16 Na̱ ka rawa zuzu na̱ nama adama u von na̱ a̱yi, a̱ to una ka'a oɓolo na̱ nama'a. A ciga a 'yuwan o una le, ume wu mpasa n le n ta̱ da̱na̱ a aci e le.
LEV 20:17 <<Na̱ vuma tara mawun ma̱ a̱na̱wu ma̱ yi, mawun mo usheli ma dada va̱ yi ko mawun mo usheli ma mma va̱ yi, reve a yuwan tsipere, wo o'wo ta̱ ili yi izo'oshi. Na a ciga a 'yuwan a tawa le a̱ ma̱ka̱ka̱n ma ama e le. Adama a na u ca ta̱ zawa'a wono, waru ume wu mpasa ma̱ yi n ta a aci a̱ yi.
LEV 20:18 <<Nna̱ vali von na̱ ka mantsa ma na we inda a̱shinda̱, u kpa̱tu'wa̱ ataɓu a̱ yi, waru a̱yi ka'a u kpa̱tu'wa̱ ta̱ ataɓu a mpasa ma̱ yi a alanga. Ele ra na a ciga a 'yuwan a tawa le a̱tsuma̱ a ama e le.
LEV 20:19 <<She vu yuwan tsipere na̱ mawun ma̱ a̱na̱wu ma mma ko za va dada va̱ wu wan, adama a na a̱yi ndolo u ta zuwa yi wo o'wo ili yi izo'oshi, ele ra ume wu mpasa n le n ta̱ da̱na̱ a aci e le.
LEV 20:20 Nna̱ vuma von na̱ ka va dada ke'en va̱ yi, u ta̱wa̱a̱ ta̱ dada ke'en va̱ yi na̱ wono. Ume wu mpasa n le n ta̱ da̱na̱ a aci e le, ele ra a̱ ta̱ kuwa̱ babu mawun.
LEV 20:21 Nna̱ vuma zuwa ka mawun ma̱ a̱na̱wu ma̱ yi, a̱yi ndolo ili yi idaba i ɗa, u ta̱wa̱a̱ ta̱ mawun ma̱ a̱na̱wu ma̱ yi na̱ wono. A̱ ta̱ da̱na̱ babu mawun.
LEV 20:22 <<I toni adanshi a̱ va̱ na̱ wila̱ u va̱ suru reve i kuru le, adama ta̱wa̱ iɗa i na ma̱a̱ tyowetyo ɗu i shaama ɗu wan.
LEV 20:23 She i yuwan mmalu cine agadu e iɗa i na ma̱a̱ gba̱ra̱ a̱ ma̱ka̱ka̱n ma̱ ɗu a̱ ri wan, adama a na a yuwan ta̱ suru ili i nda, a̱yi ɗa i zuwai me inda idaba i le.
LEV 20:24 Amma n damma ɗu ta̱, i to o'wo na agadu e iɗa i le. N ta ca ɗu a̱yi agadu, iɗa i na yee yeneshe na̱ maani ni ishiki. A̱mu ɗa A̱sulazuva A̱sula̱ a̱ ɗu za na tawa nɗu diga a akapi e elentsu.
LEV 20:25 <<I ta kakasa inama i na i ri idaba na aza na a̱ ri idaba shi, na̱ nnunu n na n ri idaba na aza a na a̱ ri idaba shi. She yo o'woto aciya̱ɗu idaba o una̱ wu nama ko manunu wan, ko ili i ro i na i ri e ika̱ta̱pu e iɗa, aza a na n tawai a̱ ri idaba uba̱ta̱ u ɗu wan.
LEV 20:26 I to o'wo aza a akiza ya̱'a̱ va̱, adama a na a̱mu A̱sulazuva, za va akiza ɗa. Waru n tawa ɗu ta̱ a̱tsuma̱ a akapi e elentsu adama yo o'wo a̱za̱ a̱ va̱.
LEV 20:27 <<Vali ko ka na ri o ɓoloso aci na̱ ruhu va̱ a̱kwa̱kwa̱ ko yindi na a ciga a 'yuwan o una yi. A ta vuvara yi na atali, waru ume wu mpasa ma̱ yi n ta̱ da̱na̱ a aci a̱ yi.>>
LEV 21:1 Reve A̱sulazuva a damma Musa, <<Yuwan adanshi na̱ nan ganu, olobo a Haruna, vu damma le: She za ta̱ a̱tsuma̱ e le u ju'wa̱n a̱kwa̱kwa̱ a̱tsuma̱ a ama a̱ yi wan u ka̱mba̱to aciya̱yi ili i idaba.
LEV 21:2 She maci va̱ yi i zuzu i ɗa goon wa̱a̱ ju'wa̱n, tsa mma va̱ yi, na̱ dada va̱ yi, nu ulobo wa̱ yi, ko usheli wa̱ yi na̱ mawun ma̱ a̱na̱wu ma̱ yi,
LEV 21:3 ko zakpara ko zawa'a va̱ yi vu ka za na koto revei vali shi, waru koto wo oloi shi za na ri e ekere a̱ yi, adama a̱ yi u ta gura ka̱mba̱to aciya̱yi ili yi idaba.
LEV 21:4 Waru she u ka̱mba̱to aciya̱yi ili yi idaba o una̱ u tsumaci tso lolo va̱ yi wan.
LEV 21:5 Nan ganu'u waru aa puna ogbondo shi, waru she e ye'we cin le, ko e ye'we ntsuka̱ n le wan, waru she a paɗa lipu le wan.
LEV 21:6 A̱ ta̱ da̱na̱ aza a akiza e ekere a̱ A̱sula̱ e le waru a̱ ka̱mba̱to ala A̱sula̱ e le ili ye pere shi, adama a na ele ɗa aa casu A̱sulazuva kucci va akina, ilyalya ya̱ A̱sula̱ e le, adama o ndolo a 'yuwan a ciga a̱ da̱na̱ na akiza.
LEV 21:7 She a zuwa ka na lungusa̱i aciya̱yi na̱ tsushakala wan. Ne ɗa waru a zuwa ka na kakasai na̱ vali va̱ yi wan, adama a nan ganu ama a akiza a ɗa e ekere a̱ A̱sula̱ e le.
LEV 21:8 I tara nan ganu na akiza adama a na ele ɗa a tsu tara kucci vi ilyalya ɗu a ca A̱sula̱ a̱ ɗu. A̱ ta̱ da̱na̱ na akiza e ekere a̱ ɗu, adama a na a̱mu A̱sulazuva a̱ ɗu za na tsu zuwa ɗu aza a akiza, a̱mu akiza a ɗa.
LEV 21:9 Waru usheli wa ganu u na suru u lungusa̱i aciya̱yi wo o'woi ashakala, u ca ta̱ dada va̱ yi wono, a̱ ta̱ kula̱to yi na akina.
LEV 21:10 <<Ganu gbain na ri zagbain a̱tsuma̱ a̱ a̱za̱ a̱ yi, za na a̱ tsuwa̱yin mani'in a aaci a̱ yi, waru za na a cayi ucira wo oto utugu u tsuganu waa lyawa a̱nji a̱ yi iwa̱u shi ko wu kara a̱tugu a̱ yi shi.
LEV 21:11 Waa rawa uba̱ta̱ u na a̱kwa̱kwa̱ a̱ ri shi tsa̱ra̱ u ka̱mba̱to aciya̱yi ili yi idaba wan, ko adama a mma va̱ yi ɗa ko dada va̱ yi.
LEV 21:12 Woo uta̱ u lyawa uba̱ta̱ wa akiza shi. Adama u ka̱mba̱to a̱a̱'isa̱ a̱ A̱sula̱ a̱ yi idaba wan, adama a na a tawa yi ta̱ o ure wu utsusun u mani'in wa̱ A̱sula̱ a̱ yi. A̱mu ɗa A̱sulazuva.
LEV 21:13 U zuwa ka na koto revei vali shi.
LEV 21:14 Waa zuwa ka na vali va̱ yi kuwa̱i ko ka na kakasai na̱ vali va̱ yi ko ka na lungusa̱i aciya̱yi a tsushakala shi. Agba u zuwa ka diga a̱tsuma̱ a ama a̱ yi za na koto revei vali shi,
LEV 21:15 tsa̱ra̱ u lungusa̱ muwun mu ugundo ma̱ yi a̱tsuma̱ a ama a̱ yi wan. A̱mu ɗa A̱sulazuva za na ka̱mbuwa̱ niyi za va akiza.>>
LEV 21:16 Reve A̱sulazuva a damma Musa,
LEV 21:17 <<Vu yuwan adanshi na̱ Haruna, vu damma yi, diga gogo hali a̱ tyo mantsa me elime ko za a̱tsuma̱ o ugundo wa̱ wu za na ri na̱ mɓa̱la̱ aa lyawa yi u rawa zuzu u ca kucci vi ilyalya ya̱ A̱sula̱ a̱ yi shi.
LEV 21:18 Adama a na vuma na ri na̱ mɓa̱la̱ suru wu ntsaa u rawa zuzu shi: irumba̱ ko a̱a̱kutsuma̱, ko za na utsuvu ko vunu ko urewesu wa̱ yi u ri dere shi ko za na ri danguɗu danguɗu,
LEV 21:19 ko vuma na ri nu ukuɗu a anana ko o ukere,
LEV 21:20 ko vuma na ri no oboto o ucina̱ ko mokoɗi ma vuma ko vuma na ri na̱ da'un a̱ lyusu ko za na ri na̱ mɓa̱la̱ mi ikavuru ko za na ri na ajakata ko za na o foɗoi arawa.
LEV 21:21 She za diga o ugundo wa Haruna ganu na ri na̱ mɓa̱la̱ u ta̱wa̱ zuzu na waa ca A̱sulazuva kucci va akina wan, adama a na u ri usa̱du. She u rawa zuzu na waa ca kucci vi ilyalya ya̱ A̱sula̱ a̱ yi wan.
LEV 21:22 U ta gura tama opopofu a̱ A̱sula̱ a̱ yi, a na a la'ai akiza ni ilyalya ya akiza waru.
LEV 21:23 Agba she u rawa zuzu nu umuna ko masa'a wan, adama a na u ri usa̱du, adama u lungusa̱ uba̱ta̱ wa akiza a̱ va̱ wan. Adama a na a̱mu ɗa A̱sulazuva a na a̱ ka̱mba̱to niyi za va akiza.>>
LEV 21:24 Ne ɗaɗa gba Musa yuwain adanshi na̱ Haruna no olobo a̱ yi, na ama a Isra'ila suru.
LEV 22:1 Reve A̱sulazuva a yuwan adanshi na̱ Musa,
LEV 22:2 <<Vu damma Haruna no olobo a̱ yi a̱ guza̱ ili ya akiza ya ama a Isra'ila i na a ca numu ulobonu tsa̱ra̱ a̱ lungusa̱ ala a̱ va̱ wan. A̱mu ɗa A̱sulazuva.
LEV 22:3 Vu damma le, <Nna̱ za ta̱ a̱tsuma̱ a̱ muwun mu ugundo n ɗu diga gogo hali a̱ tyo mantsa me elime u rawa zuzu ni ili ya akiza i na ama a Isra'ila a cayi A̱sulazuva a̱yi na̱ nshinda̱, a ta tawa vuma ndolo a̱ ma̱ka̱ka̱n ma̱ va̱. A̱mu ɗa A̱sulazuva.
LEV 22:4 Nna̱ a̱tsuma̱ o ugundo wa Haruna vuma ro ri na̱ mɓa̱la̱ mu ukwan u lipu ko u ri a̱ ma̱ɗa̱wa̱ waa lyuwa ili ya akiza shi, she na̱ wo o'wo cece. Ne ɗa fo nu u ju'wa̱n ili suru i na i ri idaba ya̱ a̱a̱kwa̱kwa̱ ko vuma na tsali tso ocoi u to o'wo idaba.
LEV 22:5 Waru ne ɗa, za na ju'wa̱in ili i na i ri e ika̱ta̱pu suru i na yaa zuwa yi wo o'wo ili yi idaba. Ko vuma na zuwa niyi wo o'woi idaba, a̱yi fo u to o'wo ili yi idaba.
LEV 22:6 Za na ju'wa̱in cu'un vi ili i ndolo suru u to o'wo idaba hali ulivu, waru waa lyuwa ilyalya ya akiza shi she nu u sumba̱.
LEV 22:7 Nu urana u riya̱ ɗaɗa woo o'wo cece, diga lo u ta gura lyuwa ilyalya ya akiza, adama a na ilyalya ya̱ yi i ɗa.
LEV 22:8 Waa tama ili i na i kuwa̱yi aciya̱yi shi, ko ili i na inama yu una yi karai shi. Ele nda a ta zuwa yi wo o'wo idaba. A̱mu ɗa A̱sulazuva.>
LEV 22:9 <<A yuwan tsutoni ni ili i na n damma nle adama o ronoo aciyele unusu ta̱wa̱ a̱ kuwa̱ o una̱ u na a 'yuwain a yuwan tsutoni wan. A̱mu ɗa A̱sulazuva za na o'woto nle na akiza.
LEV 22:10 <<Vuma na ri a̱tsuma̱ o ugundo wa ganu shi, waa lyuwa ilyalya ya akiza shi. Waru mocin va ganu ko za zamalinga waa lyuwa ilyalya ya akiza shi.
LEV 22:11 Amma nna̱ ganu tsula ta̱ aagbashi ni ikebe, aagbashi'i u ta gura lyuwa ilyalya'a. Waru za na a matsain a̱tsuma̱ o u'wa wa̱ yi u ta gura lyuwa ilyalya'a.
LEV 22:12 Nnu usheli wa ganu wo olo vuma na ri ganu shi, waa lyuwa a̱tsuma̱ e ili ya akiza i na a̱ tafai shi.
LEV 22:13 Amma nnu usheli wa ganu za na o'woi ma̱runa̱ ko wu uta̱i lolo waru u ri na̱ mawun shi, reve u ka̱mba̱ o u'wa wa dada va̱ yi, a̱yi ubuwu yawa, u ta gura lyuwa ilyalya ya dada va̱ yi. Vuma na ri ganu shi, ko cine a yuwain waa lyuwa ilyalya'a shi.
LEV 22:14 Waru na̱ za lyuwa ilyalya ya akiza a̱tsuma̱ o unusu, u ta̱ ka̱mbuwa̱a̱ ganu ili i na u lyuwai'i reve u da̱shi za ta̱ a̱tsuma̱ o ozo o ton wa̱ a̱bunda̱ e ili'i.
LEV 22:15 She nan ganu aa tara ilyalya ya akiza i na ama a Isra'ila a̱ ta̱wa̱yi A̱sulazuva ili yi idaba wan.
LEV 22:16 Na a lyawa vuma na ntsayi shi u lyuwa ilyalya ya akiza u ta̱ ta̱wa̱a̱ le nu unusu u na woo ronoo le uge'etosu, adama a na a̱mu ɗa A̱sulazuva za na ka̱mba̱to nle na akiza.>>
LEV 22:17 Reve A̱sulazuva a yuwan adanshi na̱ Musa,
LEV 22:18 <<Vu yuwan adanshi na̱ Haruna no olobo a̱ yi na ama a Isra'ila suru, vu damma le, na̱ za suru a̱tsuma̱ o u'wa wa ama a Isra'ila ko mocin na ri nden a̱tsuma̱ a ama a Isra'ila ta̱wa̱a̱ na̱ kucci vu ukula̱tosu e ekere a̱ A̱sulazuva, ko o shiton akucunu ko kucci vu ucigu wo okolo,
LEV 22:19 nnu u ciga a̱ ushi kucci va̱ yi, u ta̱wa̱a̱ na̱ no oogono a nan ko kyon ko megbele ma na ma̱ ri usa̱du shi.
LEV 22:20 She i ca kucci na ri na̱ usa̱du wan, adama a na a̱a̱ ushiya̱ ɗu a̱yi shi.
LEV 22:21 Na̱ vuma ta̱wa̱a̱ A̱sulazuva kucci muwwulai adama u shiton nzuwulai ko kucci vu ucigu wo okolo diga o oɓolo e inan ko oɓolo e ikyon ko o oɓolo e mgbele, na a 'yuwan a ciga u ca nama na ri gbaga, za na ri usa̱du shi.
LEV 22:22 She a ca A̱sulazuva kucci vu nama na ri ne esu shi wan, ko za na ri ukuɗu wan, ko za vu usa̱du wan, ko za na ri na̱ wuntsu a̱ lipu wan ko za na ri nu ukparu wan. She a yuwan kucci vu ukula̱tosu na̱ cu'un vi iliyamunga i ndolo a masa'a wan.
LEV 22:23 A ta gura ca oogono a nan ko kyon aza a na pasu lipu le a̱ ri usa̱du kucci vu ucigu wo okolo. Agba aa ca le adama a̱ kucci vu ushitosun wa akucunu shi.
LEV 22:24 Yaa ca A̱sulazuva nama na a̱ kula̱i ko o ɓosoi, ko a ɓatsai, ko o foɗoi arawa shi. Yaa yuwan ne e iɗa i ɗu shi.
LEV 22:25 Ne ɗa gba waru ya̱a̱ ushi icu'un yi iliyamunga i ndolo e ekere o mocin, reve i ca A̱sula̱ a̱ ɗu kucci vi ilyalya shi. A̱a̱ ushiya̱ ɗu ele shi adama a na a ntsaa a yuwan kucci ne ele shi, adama a na a̱ ri usa̱du waru a̱ ta̱ na̱ mɓa̱la̱ a̱ lipu le.>>
LEV 22:26 Reve A̱sulazuva a damma Musa a na,
LEV 22:27 <<Nna a matsan moggono ma nan ko mo kyon ko me megbele, u ta̱ da̱na̱ oɓolo na̱ mma va̱ yi hali rana cindere, o urana wa̱ kunla̱ a̱ tyo elime a̱ ta̱ ushi yi kucci na aa yuwaan A̱sulazuva va akina.
LEV 22:28 Agba yaa paɗa nan ko kyon urana u ta̱ na̱ mawun ma̱ yi shi.
LEV 22:29 Waru na̱ yaa casu kucci vu ugodyusho e ekere a̱ A̱sulazuva, i ca yi cine a̱ ushiya̱ ɗu.
LEV 22:30 A ta tama yi a̱ a̱tsuma̱ o urana u ta̱, yaa lyawa ili i pasa a̱ tyo usana u ro shi. A̱mu ɗa A̱sulazuva.
LEV 22:31 <<Adama o ndolo i guza̱ ili i na n damma nɗu waru i yuwan le. A̱mu ɗa A̱sulazuva.
LEV 22:32 Waru she i ka̱mba̱to ala a akiza a̱ va̱ ili ye pere wan, agba a̱ɗu ama a Isra'ila i zuwa ala a̱ va̱ a̱ da̱na̱ na akiza. A̱mu ɗa A̱sulazuva za na ka̱mba̱to nɗu aza a akiza.
LEV 22:33 A̱mu ɗa mu uta̱a̱ nɗu diga a̱tsuma̱ e iɗa ya Masar adama mo o'wo A̱sula̱ a̱ ɗu. A̱mu ɗa A̱sulazuva.>>
LEV 23:1 Reve A̱sulazuva a yuwan adanshi na̱ Musa,
LEV 23:2 <<Vu yuwan adanshi na ama a Isra'ila, vu damma le: Ele nda ele ɗa a̱buki a na n zuwai, a̱buki a na A̱sulazuva a zuwai a na a cuɗuwa a mantsa me iɓolo ya akiza ya aza a Isra'ila.
LEV 23:3 <<A ta yuwan ulinga a̱tsuma̱ a rana ta̱li, agba urana wa̱ cindere, urana u wivuwun la̱nga̱ ɗa. Urana u ɗa a na aa yuwan iɓolo ya akiza. Uba̱ta̱ u na i ri suru yaa yuwan ulinga a̱tsuma̱ o urana u ndolo shi ko ke'en, adama a na urana wa Ashibi u ɗa e ekere a̱ A̱sulazuva.
LEV 23:4 <<Ele nda ele ɗa a̱buki a na A̱sulazuva a zuwai iɓolo ya akiza. A ta saala ama a Isra'ila ele a mantsa ma na a zuwa nle:
LEV 23:5 O urana wa kupa na̱ a̱za̱ a̱ na̱shi a̱tsuma̱ o woto wu ufaru nu ulivu ɗaɗa ee teme mayan ma̱ A̱buki a Mapasa ma̱ A̱sulazuva.
LEV 23:6 Reve o urana u kupa no ozo ton o woto'o i yuwaan A̱sulazuva a̱buki o Opopofu a na a̱ ri na̱ Wolilo shi. I ta yuwan rana cindere a tamusa Opopofu a na a̱ ri na̱ Wolilo'o shi.
LEV 23:7 O urana wu ufaru wa̱ a̱buki'i i ta yuwan iɓolo ya̱ a̱ga̱nda̱ ya akiza. Yaa yuwan linga va ana'an na̱ nfa'an shi.
LEV 23:8 Agba i ca A̱sulazuva kucci vu ukula̱tosu hali rana cindere. O urana wa̱ cindere u ɗa yaa yuwan iɓolo ya akiza. A̱tsuma̱ o urana u nda yaa yuwan linga ɗu va ana'an na̱ nfa'an shi.>>
LEV 23:9 Reve A̱sulazuva a yuwan adanshi na̱ Musa,
LEV 23:10 <<Vu yuwan adanshi na ama a Isra'ila vu damma le: Nni i ta̱wa̱ a̱tsuma̱ e iɗa i na maa ca ɗu, waru ni i yuwan ugasa, i tara aakatalu a̱tsuma̱ e itana yu una i na i fara inai i 'ya̱wa̱a̱ ganu.
LEV 23:11 Ganu'u u ta ca A̱sulazuva aakatalu'u kucci vu u'ya̱susa̱n o una̱ u ɗu tsa̱ra̱ a̱ usu ɗu. Ganu'u u ta̱ 'ya̱sa̱n yi nu usana u tawa o urana u na u kuruyi urana wa Ashibi.
LEV 23:12 Waru o urana u na a cayi kucci vu u'ya̱susa̱'a̱n i ta ca ma̱giri'i ma na ma̱ ri na aa'wan a̱ ta̱, za na ri usa̱du shi adama a ca A̱sulazuva kucci vu ukula̱tosu.
LEV 23:13 Oɓolo na̱ ma̱giri'i'i, i ta ca kucci vi ishina makundatsu ure u efa u yira i lashi a̱tsuma̱ a kupa i na a̱ ja̱mba̱ra̱i na̱ mani'in ma̱ zetun, a ca A̱sulazuva kucci vi ilyalya i ma̱guru, agba kucci vi ili yo oso u da̱na̱ magasutsu ma̱ ta̱ ma masayan ma̱ ina̱bi.
LEV 23:14 Waru yaa tama opopofu ko ishina i na a̱ zuyin ko ishina i sa'avu shi. She urana u na i ta̱wa̱yi A̱sula̱ a̱ ɗu na̱ kucci nda. A̱yi nda wila̱ u ɗa u na ya̱a̱ guza̱ hali a̱ tyo a̱ muwun mu gundo ɗu uba̱ta̱ u na i da̱nuyi biti.
LEV 23:15 <<I kece ajuma e cindere cip cip cip diga o urana u na u kuruyi Ashibi, urana u na i ta̱wa̱i na aakatalu a̱ kucci vu u'ya̱susa̱n.
LEV 23:16 I kece rana kupoton a̱ca̱pa̱ a Ashibi a ajuma e cindere'e, reve i ca A̱sulazuva kucci vi ishina i sa'avu.
LEV 23:17 Uba̱ta̱ u na i ri nden suru i ta̱wa̱a̱ no opopofu e re a na aa ca A̱sulazuva kucci vu u'ya̱susa̱n. A yuwan opopofu suru na̱ makundatsu ure u efa ma yira i lashi a̱tsuma̱ a kupa na̱ wolilo, reve a ca A̱sulazuva kucci vu umatsun wu ufaru.
LEV 23:18 I ta ca mugiri'i n cindere oɓolo no opopofu'u, aza a na a̱ ri na aa'wan a̱ ta̱ ta̱ waru a̱ ri usa̱du shi oɓolo na̱ moggono ma nan na̱ a̱giri'i e re. A ta ca A̱sulazuva ele kucci vu ukula̱tosu oɓolo na̱ kucci vi ishina na̱ kucci vi ili yo oso, kucci na a yuwain na akina ili i ma̱guru mo uyo'o e ekere a̱ A̱sulazuva.
LEV 23:19 Waru i ta ca ma̱ga̱ji adama a̱ kucci vu unusu na̱ mugiri'i n re aza a na a̱ ri na aa'wan a̱ ta̱ ta̱ kucci muwwulai.
LEV 23:20 Ganu ta̱ 'ya̱sa̱n mugiri'i n re'e a̱ ma̱ka̱ka̱n ma̱ A̱sulazuva kucci vu u'ya̱susa̱n oɓolo no opopofu o umatsun wu ufaru. O to o'wo ili ya akiza e ekere a̱ A̱sulazuva, reve o o'wo aza a ganu.
LEV 23:21 O urana u ndolo a ta saala iɓolo ya akiza i ɗa. Yaa yuwan linga ɗu va na'an na̱ nfa'an shi. A̱yi nda u to o'wo ɗu wila̱ uba̱ta̱ u na i da̱nuyi suru hali a̱ tyo a̱ muwun mu gundo n ɗu.
LEV 23:22 <<Waru mantsa ma na i ri o ugasa, she i yuwan ugasa hali a̱ tyo a̱ nge'en ma̱ a̱ɗuma̱'a̱ wan. Waru yaa yuwan u'yanlu shi. I lyawa u'yanlu adama a alambi no omocin. A̱mu ɗa A̱sulazuva A̱sula̱ a̱ ɗu.>>
LEV 23:23 Reve A̱sulazuva a yuwan adanshi na̱ Musa,
LEV 23:24 <<Vu damma ama a Isra'ila: O urana wu ufaru u woto we cindere, i yuwan wivuwun wu urana la̱nga̱ adama a na urana u ɗa wu ucuwusan na̱ wivulu wa avana iɓolo ya akiza.
LEV 23:25 Yaa yuwan ulinga u ɗu wa ana'an na̱ nfa'an shi, agba i ca A̱sulazuva kucci na a yuwain na akina.>>
LEV 23:26 Reve A̱sulazuva a yuwan adanshi na̱ Musa,
LEV 23:27 <<Urana wa kupa u woto we cindere, Urana u Matara mo ume mo Unusu ma ɗa. U to o o'wo ɗu urana wi iɓolo wa akiza. She i lyuwa ilyalya o urana'a wan, reve i ca A̱sulazuva kucci na a yuwain na akina.
LEV 23:28 Waru yaa yuwan ulinga a̱tsuma̱ o urana u ndolo shi, adama a na Urana u ɗa u Matara mo ume mo Unusu, na aa ca kucci adama a matara mo ume mo unusu u ɗu a̱ ma̱ka̱ka̱n ma̱ A̱sulazuva A̱sula̱ a̱ ɗu.
LEV 23:29 Za na suru lyuwai ilyalya o urana u ndolo a ta tawa yi a̱tsuma̱ a ama a̱ yi.
LEV 23:30 Waru za na suru yuwain ulinga o urana u ndolo, n to kototo vuma ndolo a̱tsuma̱ a ama a̱ yi.
LEV 23:31 Yaa yuwan ulinga shi suru suru. Wila̱ u ɗa u na ya̱a̱ guza̱ hali a̱ tyo a̱ muwun mu gundo n ɗu uba̱ta̱ u na i da̱nu yi suru.
LEV 23:32 U to o o'wo ɗu Urana wa Ashibi u na yee ivuwan waru yaa lyuwa ilyalya shi. Diga o ulivu wu urana wa̱ kucci u woto'o hali a̱ tyo o ulivu wu urana wa kupa i cuwan a na Ashibi a ɗa.>>
LEV 23:33 Reve A̱sulazuva a yuwan adanshi na̱ Musa,
LEV 23:34 <<Vu yuwan adanshi na ama a Isra'ila vu damma, o urana u kupa no ozo o ton u woto we cindere u nda u ɗa A̱buki o Ogodo o Ucuwusan a̱ A̱sulazuva ee teme. Waru u ta tara rana cindere
LEV 23:35 Urana wu ufaru u to o o'wo iɓolo ya akiza. She i yuwan ulinga wa ana'an na̱ nfa'an wan.
LEV 23:36 I ta ca A̱sulazuva kucci na a yuwain na akina rana cindere. Reve o urana wa̱ kunla̱ i yuwan a̱buki a akiza waru i ca A̱sulazuva kucci na a yuwain na akina. A̱yi nda u to o o'wo ɗu iɓolo ya akiza, she i yuwan ulinga wa ana'an na̱ nfa'an wan.
LEV 23:37 <<Ele nda ele ɗa a̱buki a̱ A̱sulazuva aza a na a zuwaa nɗu ana ya̱a̱ da̱na̱ a yuwusan, aza a na ya̱a̱ da̱na̱ a yuwusan mantsa me iɓolo ya akiza na ya̱a̱ da̱na̱ a casu A̱sulazuva kucci va akina, kucci vu ukula̱tosu, na̱ kucci vi ishina na̱ nan kucci waru i ta ca kucci vo oso vu urana suru.
LEV 23:38 A̱buki a nda a̱ ta̱ a̱tsuma̱ o uda̱shiyi wa̱ a̱buki o urana wa Ashibi na̱ a̱buki a̱ ne'e na̱ a̱buki a̱ kucci va akucunu na̱ a̱buki a̱ kucci vu ucigu wo okolo na yaa ca A̱sulazuva.
LEV 23:39 <<Adama o ndolo urana wa kupa no ozo o ton u woto we cindere, a mantsa ma na i ɓolotoi itana ya̱ a̱ɗuma̱ a̱ ɗu, reve i yuwan a̱buki o urana we cindere wa̱ A̱sulazuva. Urana wu ufaru urana u wivuwun u ɗa, waru urana wa̱ kunla̱ fo urana u wivuwun u ɗa.
LEV 23:40 O urana wu ufaru u ɗa yaa lyuwa umatsun vu ɗanga sa'ani, reve i gasa ashiwashiwa oɓolo ne eten a ɗanga na ri na̱ a̱vu'un lon, reve i yuwan ma̱za̱nga̱ a̱ ma̱ka̱ka̱n ma A̱sulazuva A̱sula̱ a̱ ɗu hali rana cindere.
LEV 23:41 I ta yuwaan A̱sulazuva a̱buki a nda hali rana cindere a̱tsuma̱ a aa'wan suru. Wila̱ u ɗa u na ya̱a̱ guza̱ hali a̱ tyo a̱ muwun mu gundo ɗu. O woto wa̱ cindere u ɗa yaa yuwan a̱buki'i.
LEV 23:42 I da̱nu a̱tsuma̱ o ogodo a̱ ɗu hali rana cindere. Ne ɗa fo umatsun wa Isra'ila suru a̱a̱ da̱nu o ogodo e le.
LEV 23:43 Ne ɗa muwun mu ugundo n ɗu mee reve a na a̱mu ɗa n zuwai ama a Isra'ila a̱ da̱nu a̱tsuma̱ o ogodo e le a mantsa ma na mu uta̱a̱ nle a̱tsuma̱ e iɗa ya Masar. A̱mu ɗa A̱sulazuva A̱sula̱ a̱ ɗu.>>
LEV 23:44 Ne ɗa Musa cuɗuwai ama a Isra'ila a̱buki a nda a na A̱sulazuva a zuwayi ama a Isra'ila.
LEV 24:1 Reve A̱sulazuva a yuwan adanshi na̱ Musa,
LEV 24:2 <<Vu zuwa ama a Isra'ila a̱ ta̱wa̱a̱ wu na̱ mani'in ma̱ Zetun can adama a fitila tsa̱ra̱ a zuwa fitila'a u da̱na̱ a madala.
LEV 24:3 Haruna ta zuwa fitila'a elime o umuna u gbain u na u palai Oogodo o Uga'asusan. U ta̱ da̱na̱ a lapulusa ifitila'a diga ulivu a̱ tyo usana a̱ 'ya̱wa̱. Wila̱ u ɗa u na woo koto shi diga gogo hali a̱ tyo a̱ muwun mu ugundo n ɗu.
LEV 24:4 A̱yi ɗa wa̱a̱ da̱na̱ a̱ ka̱lyuwusa̱ ifitila'a a wisawatan u zinariya can a̱ ma̱ka̱ka̱n ma̱ A̱sulazuva kuci.
LEV 24:5 <<I kene yira i lashi reve i yuwaan opopofu kupa ne ejere na̱ a̱yi. Opopofu suru u lyuwa yira i na i ri ume u makundatsu u re u efa u yira i lashi a̱tsuma̱ a kupa.
LEV 24:6 Reve vu gere le udaru u re, o udaru suru vu zuwa a̱kutsu a̱ ta̱li zuva va apada a zinariya can na ri a̱ ma̱ka̱ka̱n ma̱ A̱sulazuva.
LEV 24:7 Reve vu tsun ili i ma̱guru o udaru suru adama wo o'wo kucci vu ucuwusan o una̱ wo opopofu'u, waru wo o'wo kucci na a cayi A̱sulazuva va akina.
LEV 24:8 O urana wa Ashibi suru Haruna gere le a̱ ma̱ka̱ka̱n ma̱ A̱sulazuva o una̱ wa aza a Isra'ila, akucunu a aza a Isra'ila a na a̱ ri n koto shi.
LEV 24:9 Opopofu'u o to o'wo aza a Haruna no olobo a̱ yi, waru a ta tama le pe uba̱ta̱ wa akiza adama a na akunda e le ɗa a na a la'ai akiza a̱tsuma̱ a̱ kucci va akina a na a cayi A̱sulazuva.>>
LEV 24:10 Urana u ro a̱vu ulobo wu ka va Isra'ila za na dada va̱ yi za vi iɗa va Masar ɗa, u ka̱ra̱ o uta̱ oɓolo na ama a Isra'ila. Reve ulobo'o na̱ vuma va Isra'ila'a a yuwan nla̱ngi o uva̱la̱ta̱ wa ama a Isra'ila.
LEV 24:11 A̱vu ulobo wu ka va Isra'ila'a u yuwan unusu u gbain na Ala a̱ A̱sulazuva. Reve a̱ ta̱wa̱to yi uba̱ta̱ wa Musa. (Aala a mma va̱ yi a ɗa Shelomi usheli wa Dibiri o ugundo wa Dan.)
LEV 24:12 Reve a̱ ɓa̱ru yi uba̱ta̱ u ro, hali she ne ee reve ili i na A̱sulazuva aa damma a alanga eteshe.
LEV 24:13 Reve A̱sulazuva a yuwan adanshi na̱ Musa u damma:
LEV 24:14 <<Vu uta̱a̱ na̱ vuma na yuwain unusu u gbai'in diga o uva̱la̱ta̱ u ɗu. Reve vu zuwa ama suru a na a uwwai ili i na u dammai a̱ kuruwa̱ yi ekere a aaci. Reve a zuwa ama'a suru a vara yi na atali.
LEV 24:15 Reve vu damma ama a Isra'ila a na: Vuma na suru yuwain adanshi isulai A̱sula̱ a̱ yi, u ta tara ume wu unusu wa̱ yi.
LEV 24:16 Vuma na yuwain unusu u gbain na ala A̱sulazuva suru amayun a̱ to una yi. Oɓolo a ama a ta vuvara yi na atali ko na̱ mocin ɗa ko umatsun wi iɗa nu u yuwaan Ala'a unusu u gbain na amayun a̱ to una yi.
LEV 24:17 <<Waru za na unai vuma suru, na amayun a̱yi fo a̱ to una yi.
LEV 24:18 Za na waru suru unai iliyamunga yi za ro, u ta̱ ka̱mbuwa̱ iliyamunga, wuma o una̱ u wuma.
LEV 24:19 Vuma na waru amaton yi moron ma̱ nden ma̱ yi suru, cine u yuwaan niyi ne ɗa fo a yuwaan yi.
LEV 24:20 Nu u kuɗa yi ta̱ eetele, a̱yi fo a ta kuɗa yi eetele. Nnu u foɗo yi lyusu, a̱yi fo o to foɗo yi lyusu. Nnu u mula̱ yi anga, a̱yi fo a̱ ta̱ mula̱ yi anga. Cine wa amaton niyi, ne ɗa fo aa amaton yi.
LEV 24:21 Za na unai iliyamunga suru, u ta̱ ka̱mbuwa̱ za ro. Waru za na unai vuma suru, a̱yi fo a̱ to una yi.
LEV 24:22 Wila̱ꞌa̱ u te reme mocin nu umatsun wi iɗa'a, a̱mu ɗa A̱sulazuva A̱sula̱ a̱ ɗu.>>
LEV 24:23 Reve Musa yuwan adanshi na ama a Isra'ila. A̱vu o uta̱a̱ vuma na yuwain adanshi o unusu u gbain o uva̱la̱ta̱'a̱, reve a vara yi na atali. Ama a Isra'ila a yuwan ta̱ cine A̱sulazuva a dammai Musa.
LEV 25:1 Reve A̱sulazuva a yuwan adanshi na̱ Musa a Masasan ma Sinai, u damma,
LEV 25:2 <<Vu yuwan adanshi na ama a Isra'ila, vu damma le, nni i uwa a̱tsuma̱ e iɗa i na maa ca ɗu, iɗa'a na aciya̱yi u toni wila̱ u wivuwun wa̱ A̱sulazuva.
LEV 25:3 I cu'wa̱n a̱ɗuma̱ a̱ ɗu a'wan a̱ ta̱li, waru i lapula a̱ɗuma̱ a̱ ina̱bi a̱ ɗu a'wan a̱ ta̱li'i, reve i ɓoloto matsun le.
LEV 25:4 Agba aa'wan e cindere u to o'wo aa'wan a̱ wivuwun e iɗa'a, wivuwun wa̱ A̱sulazuva. Ya̱a̱ cu'wa̱n a̱ɗuma̱ ɗu shi waru yaa lapula ɗanga ina̱bi ɗu shi.
LEV 25:5 Waru yaa gasa a̱ta̱pa̱shi shi, waru yaa ta'an umatsun wa̱ a̱ɗuma̱ a̱ ina̱bi a̱ ɗu a na i lapulai shi. Aa'wan o ndolo u to o'wo aa'wan a̱ wivuwun wi iɗa.
LEV 25:6 Ili i na iɗa'a yaa matsan a aa'wan a̱ wivuwun u to o'wo ɗu ilyalya, a̱ɗu na agbashi a̱ ɗu a̱ma̱ci na ali, hali fo na aza a zamalinga a̱ ɗu no omocin a na a̱ ri nden oɓolo na̱ a̱ɗu,
LEV 25:7 hali fo ni inan i ɗu hali na̱ inama yu una i na i ri a̱tsuma̱ e iɗa i ɗu. Ili i na i kungwai e iɗa'a suru o to o'wo ilyalya.
LEV 25:8 <<I kece a'wan e cindere a̱ wivuwun, a'wan e cindere udoɓonu toto ucindere'e, u to o'wo a'wan a̱ wivuwun amunga na̱ kucci.
LEV 25:9 Reve o urana wa kupa u woto we cindere yi ivula̱ aavana. O urana u kucci matara mo ume mo unusu yi ivula̱ aavana a̱tsuma̱ e iɗa i ɗu ma̱ɓula̱.
LEV 25:10 Reve i tawa aa'wan a kupoton na akiza, reve a lapa ulingi u na woo roco a na ama o o'woi fa̱a̱n a̱tsuma̱ e iɗa i ɗu nu uba̱ta̱ a̱ nden n ɗu suru. U to o'wo ɗu aa'wan a na ama o o'wo fa̱a̱n. Vuma suru ta̱ ka̱mba̱ e itana ya agadu yu umatsun wa̱ yi. Waru vuma suru ta̱ ka̱mba̱ a̱tsuma̱ o umatsun wa̱ yi.
LEV 25:11 Aa'wan a kupoto'on u to o'wo ɗu aa'wan a̱ a̱buki o uka̱mbusa̱ fa̱a̱n. A̱tsuma̱ a aa'wan o ndolo, ya̱a̱ cu'wa̱n shi waru yaa gasa a̱ta̱pa̱shi shi waru yoo ɓoloto umatsun wa̱ ina̱bi u na a̱ kuɗa̱i a lapula shi.
LEV 25:12 Adama a na aa'wan a̱ a̱buki o uka̱mbusa̱ fa̱a̱n ɗa waru i tara yi na akiza. A̱ta̱pa̱shi a ɗa goon yaa lyuwa.
LEV 25:13 <<A̱tsuma̱ a Aa'wan a̱ A̱buki a nda, za suru a̱tsuma̱ a̱ ɗu u ka̱mba̱ uba̱ta̱ e itana ya̱ yi.
LEV 25:14 Waru na̱ vu winaa za va̱ wu iɗa yi cimba, ko vu tsula e ekere a̱ yi, she i paalulai wan.
LEV 25:15 Na̱ vaa tsula iɗa e ekere a za va̱ wu, vu ta tsupa o una̱ wa̱ a̱bunda̱ a a'wan a na a̱ ri a̱ca̱pa̱ kafu a̱buki'i, waru u ta winaa wu o una̱ wa̱ a̱bunda̱ a a'wan a na a buwai a̱ tyo o ugasa.
LEV 25:16 Nna̱ a'wan a buwa a̱bunda̱, vu da̱shi a̱bunda̱ e ikebeꞌe. Agba nna̱ a'wan a buwa a̱bunda̱ shi, vu jebe ikebeꞌe. Adama a na ili i na waa winasa wu o una̱ wa̱ a̱bunda̱ e itana yu uɗuma̱ i ɗa.
LEV 25:17 She i paalulai wan, amma yu uwwa wovon wa A̱sula̱ a̱ ɗu, adama a na a̱mu ɗa A̱sulazuva A̱sula̱ a̱ ɗu.
LEV 25:18 <<Adama o ndolo i yuwan ili i na n damma nɗu waru i kuru wila̱ u na n zuwaa nɗu adama i yuwan nden n lafiya a̱tsuma̱ e iɗa'a.
LEV 25:19 Iɗa'a i ta matsan ulobonu, i ta lyuwa i cuwa̱n, waru i ta̱ da̱nu gbaga.
LEV 25:20 Agba nni i damma, <Nye tsaa lyuwa a̱tsuma̱ a aa'wan e cindere'e na̱ tsu cu'wa̱n shi waru tsaa gasa itana yu uɗuma̱ shi?>
LEV 25:21 I reve gba, n ta zuwaa ɗu aba'un a̱ va̱ a̱tsuma̱ a aa'wan a̱ ta̱li, adama iɗa'a i matsan ulobonu i na yaa lyuwa hali a'wan a ta'atsu.
LEV 25:22 Nni i yuwan ca̱'a̱n a aa'wan a̱ kunla̱, i ta̱ da̱na̱ a lyuwusa akuci e itana yu uɗuma̱, waru i ta lyuwa le hali a aa'wan a̱ kuci, a mantsa ma na ilyalya ya̱ yi i kutsai.
LEV 25:23 <<Yaa wina iɗa'a suru suru shi, adama a na iɗa'a za va̱ ɗa. Waru a̱ɗu omocin a ɗa tsa̱ a̱za̱ a̱ nden ma atsupu.
LEV 25:24 Waru iɗa i na yo o'woi za ɗu suru, nna̱ yaa wina yi, i ca ure u na aa gura tsupisa yi.
LEV 25:25 <<Nnu ulambu u reme za ta̱ a̱tsuma̱ a̱ ɗu, hali u kene pe a̱tsuma̱ e iɗa ya̱ yi u wina, vuma ta̱ a̱tsuma̱ e imaci i zuzu ya̱ yi u ka̱mba̱ u tsupisa iɗa'a.
LEV 25:26 Nna̱ gba za na winai uba̱ta̱'a̱ u ri ni imaci i na yaa gura tsupisa uba̱ta̱'a̱ shi, agba a̱ tyo ɗe elime a̱vu u tsura̱ ikebe i na waa gura tsupisa uba̱ta̱'a̱,
LEV 25:27 to, u kece a̱bunda̱ a a'wan a na u yuwain a na u winai uba̱ta̱'a̱. Reve u ka̱mbuwa̱ ili i na i buwai e ekere a vuma na u winayi, ne ɗa uɗuma̱'a̱ wa̱a̱ ka̱mbisa̱ za va̱ yi.
LEV 25:28 Agba nnu u ri ni ikebe i na waa gura tsupisa uba̱ta̱'a̱ shi, to, uba̱ta̱ u na a winai u ta̱ da̱na̱ e ekere a vuma na tsulai uba̱ta̱'a̱, hali a̱ tyo a Aa'wan a̱ A̱buki o uka̱mbusa̱ fa̱a̱n. A Aa'wan a̱ A̱buki'i a̱ ta̱ ka̱mbuwa̱a̱ yi, reve u ka̱mbisa̱ a̱ nden ma̱ yi.
LEV 25:29 <<Nna̱ vuma wina u'wa wu nden a̱tsuma̱ a̱ lyuci na ri nu ukari, u ta gura tsupisa u'wa'a a̱tsuma̱ a aa'wan a̱ ta̱. Aa'wan a̱ ta̱ ma̱ɓula̱ u ta̱ nu ucira u na waa gura tsupisa yi.
LEV 25:30 Agba nnu u gura tsupisa u'wa'a a̱tsuma̱ a aa'wan a̱ ta̱ o ndolo shi, to, u'wa'a wo o'wo ta̱ u'wa u vuma na tsula niyi, hali a̱ tyo a̱ muwun n tsukaya ma̱ yi. A̱a̱ ka̱mbuwa̱a̱ za vi ili shi a Aa'wan a̱ A̱buki'i.
LEV 25:31 Agba 'wa na ri a̱ mulyuci n na n ri uka̱nda̱ruwu nu ukari shi, a ta tara le tsi iɗa yi cimba, a ta gura tsupisa ikebe o una̱ u le. A ta gura waru ka̱mbuwa̱a̱ aza a 'wa na̱ 'wa le a̱tsuma̱ a Aa'wan a̱ A̱buki'i.
LEV 25:32 <<Agba aɗa a nan Levi na̱ 'wa le na ri a̱tsuma̱ e ilyuci i le, a̱ ta̱ na aa gura tsupisa ili i le a mantsa suru.
LEV 25:33 Agba na̱ vuma va̱ Levi wina u'wa a̱tsuma̱ e ilyuci ya ama a̱ Levi, agba u gura tsupisa u'wa'a shi, a̱ ta̱ ka̱mbuwa̱a̱ yi nu u'wa wa̱ yi a̱tsuma̱ a Aa'wan a̱ A̱buki'i, adama a na 'wa a̱tsuma̱ e ilyuci i nan Levi ili ya agadu i ɗa le a̱tsuma̱ aza a Isra'ila .
LEV 25:34 Agba aa wina atsusa a alyuna a na a̱ ri uka̱nda̱ruwu na̱ 'wa le shi adama a na ili ya agadu i ɗa le hali hali hali.
LEV 25:35 <<Nnu ulambu u reme za va̱ wu, agba waa gura kamba aciya̱yi shi, vu kamba yi cine vu revei vaa kamba mocin ko za vu mmalu a̱tsuma̱ a̱ ɗu. Adama u lyuwa elime na̱ nden oɓolo na̱ a̱ɗu.
LEV 25:36 Vu ca yi okopu agba vu ushi nu uda̱shiyi wan, amma vu uwwa wovon wa̱ A̱sula̱ a̱ wu. Vu lyawa yi u da̱nu oɓolo na̱ a̱vu.
LEV 25:37 Vu ca yi okopu agba vu ushi nu uda̱shiyi wan, ko vu winaa yi ilyalya nu uda̱shiyi wan.
LEV 25:38 A̱mu ɗa A̱sulazuva A̱sula̱ a̱ ɗu za na uta̱a̱ nɗu a̱tsuma̱ e iɗa ya Masar, adama n ca ɗu iɗa ya Ka'ana, tsa̱ra̱ mo o'wo A̱sula̱ a̱ ɗu.
LEV 25:39 <<Nna̱ za va̱ wu o'wo alambi hali u rawa a na u winai aciya̱yi uba̱ta̱ wa̱ wu, she vu zuwa yi ulinga tsa aagbashi wan.
LEV 25:40 U ta̱ da̱nu oɓolo na̱ a̱vu tsu za zamalinga ko za vu mmalu, waru u ta yuwaan wu ulinga hali she na Aa'wan a̱ A̱buki'i a rawa.
LEV 25:41 A mantsa mo ndolo ma ɗa a̱yi na̱ muwun ma̱ yi aa lyawa le, reve u ka̱mba̱ o ugundo nu uba̱ta̱ wu nkaya ma̱ yi.
LEV 25:42 Adama a na ama a Isra'ila agbashi a̱ va̱ a ɗa aza a na mu uta̱yi a̱tsuma̱ e iɗa ya Masar. Waru aa wina le tsa agbashi shi.
LEV 25:43 Waru vaa yuwan tsugono a aci e le ni iɓongi shi, amma vu uwwa wovon wa A̱sula̱ a̱ wu.
LEV 25:44 Agba agbashi e esheli no olobo a na vu cigai vu tsula o o'wo diga a nɗa n na n ri uka̱nda̱ruwu na̱ a̱vu, ele ɗa goon vaa gura tsula.
LEV 25:45 I ta gura tsula agbashi diga o omocin a na a̱ ri a̱ nden na̱ a̱ɗu na̱ muwun mu ugundo n le n na a matsain e iɗa i ɗu. Ele nda o to o'wo itana i ɗu.
LEV 25:46 I ta gura ca muwun n ɗu ele adama wo o'wo le agadu. O to o'wo ɗu agbashi hali hali. Agba a̱za̱ a̱ ɗu ama a Isra'ila, yaa yuwan tsugono a aci e le ni iɓongi shi.
LEV 25:47 <<Nna̱ mocin na ri nden a̱tsuma̱ a̱ ɗu za vu mmalu o o'wo za vu utsuru, reve za ta̱ a̱tsuma̱ a̱ ɗu wo o'wo alambi hali u wina aciya̱yi e ekere o moci'in, ko e ekere o umatsun wu mocin ro,
LEV 25:48 a ta gura tsupisa vuma va Isra'ila'a cina u wina ɗe aciya̱yi. Vuma ta̱ a̱tsuma̱ a mmaci ma̱ yi u ta gura tsupisa yi.
LEV 25:49 U ta gura o o'wo mawun ma̱ a̱na̱wu ma dada va̱ yi, ko mawun ma mawun ma̱ a̱na̱wu ma dada va̱ yi, ko imaci i lipu va̱ yi i ta gura tsupaa yi. Ko a̱yi a aciya̱yi u ta gura tsupisa aciya̱yi nnu u ri ni ikebe.
LEV 25:50 A̱yi na̱ za na tsula niyi, e te kece a̱bunda̱ e ikebe'e. A̱bunda̱ e ikebe i na aa tsupa adama a lyawa yi fa̱a̱n e te kece le o una̱ wa̱ a̱bunda̱ a a'wan a na a buwai kafu Aa'wan a̱ A̱buki'i a rawa. E te kece o una̱ wi ikebe i na a tsu tsupa za zamalinga.
LEV 25:51 Nna a'wan a na a buwai a̱ ri a̱bunda̱, u ta tsupa ili i na i la'ai a̱bunda̱ a̱tsuma̱ e ikebe i na u ushiyi a mantsa ma na u winai aciya̱yi.
LEV 25:52 Amma nna a'wa'an a buwa wa'a a rawa Aa'wan a̱ A̱buki'i, u te kece reve u tsupaa aciya̱yi cine wu ntsayi.
LEV 25:53 Moci'in u ta tara vuma va Isra'ila'a tsu za zamalinga va aa'wan suru. She i lyawa za na tsula niyi'i u yuwan tsugbain a aci a̱ yi ni iɓongi wan.
LEV 25:54 Nna̱ gba a gura tsupaa yi a̱tsuma̱ e re nda shi, a̱yi na̱ muwun ma̱ yi a ta lyawa le a̱tsuma̱ a Aa'wan a̱ A̱buki'i.
LEV 25:55 Adama a na ama a Isra'ila agbashi a̱ va̱ ɗa. Ele agbashi a̱ va̱ a ɗa aza a na mu uta̱yi a̱tsuma̱ e iɗa ya Masar. A̱mu ɗa A̱sulazuva A̱sula̱ a̱ ɗu.
LEV 26:1 <<I yuwaan aciya̱ɗu a̱ma̱li wan ko i shuwa̱ uruma ko ijigo wan waru she i she'en aatali e iɗa i ɗu a na ya̱a̱ ka̱ɗa̱ta̱wa̱ yi wan adama a na a̱mu ɗa A̱sulazuva A̱sula̱ a̱ ɗu.
LEV 26:2 I tara Ashibi a̱ va̱ na akiza waru i ca a̱a̱'isa̱ a̱ va̱ tsugbain. A̱mu ɗa A̱sulazuva.
LEV 26:3 <<Nni i kuru ili i na n zuwaa nɗu reve waru i toni wila̱ u va̱ ulobonu,
LEV 26:4 n ta̱ lyunguwa̱a̱ ɗu ni iro'i a̱tsuma̱ a mantsa, iɗa i ta ca limatan va̱ yi waru ɗanga ta ca limatan le.
LEV 26:5 Itana ya̱ a̱ɗuma̱ a̱ ɗu a ta yuwan a̱bunda̱ reve i da̱na̱ o ugasa hali a̱ tyo a mantsa mo uta'an wa̱ inabi, waru i ta̱ da̱na̱ a ta'asan umatsun wa̱ ina̱bi u ɗu hali mantsa ma̱ ca̱'a̱n mo ro ma̱ ka̱nda̱ruwisa̱. I ta lyuwa ilyalya i cuwa̱n waru i yuwan nden n ɗu a̱tsuma̱ a asuvu nden a̱tsuma̱ e iɗa i ɗu.
LEV 26:6 <<N ta ca ɗu asuvu nden e iɗa'a. I to von i lantsa babu wovon wu za. N to loso inama yu una i na i ri na̱ meleshe a̱tsuma̱ e iɗa'a, waru a̱a̱ da̱shi yuwan uvon a̱tsuma̱ e iɗa i ɗu shi.
LEV 26:7 I ta saɓa n'yuwatan n ɗu. Waru i to una le na̱ matsun me pe'eni.
LEV 26:8 Ama o ton a̱ ɗu, o to loso ama ukpaku (100,) ama ukpaku u ɗu gba o to loso ama ukpakukupa kupa (10,000.) I to una n'yuwatan n ɗu na̱ matsun mepe'eni reve a̱ riya̱ elime a̱ ɗu.
LEV 26:9 <<N ta̱ ka̱lyuwa̱ ɗu nu urewesu wi isa'ani, waru n ta zuwa ɗu i matsan lon i bala. Waru n to shiton akucunu a na n yuwain na̱ a̱ɗu.
LEV 26:10 I ta̱ da̱na̱ a lyuwusa itana ya̱ a̱ɗuma̱ a̱ ɗu ya aa'wan a na a̱ ka̱ra̱i hali a̱ tyo a mantsa ma na yoo uta̱a̱ le adama i ca aza a sa'avu ure.
LEV 26:11 N ta zuwa uba̱ta̱ wu nden n va̱ a̱tsuma̱ a̱ ɗu, waru mee ene ɗu ili yi idaba shi.
LEV 26:12 N ta̱ da̱na̱ oɓolo na̱ a̱ɗu, moo o'wo A̱sula̱ a̱ ɗu. A̱ɗu waru yo o'wo ama a̱ va̱.
LEV 26:13 A̱mu ɗa A̱sulazuva A̱sula̱ a̱ ɗu za na uta̱a̱ nɗu a̱tsuma̱ e iɗa ya Masar, adama i da̱na̱ agbashi e le wan. Reve mu kuɗa a̱a̱gba̱la̱ a na a tsugba nɗu, reve n zuwa ɗu i yuwan mmalu mejege.
LEV 26:14 <<Agba nni i 'yuwan a uwwa mu, waru i 'yuwan a yuwan ili i na n damma nɗu suru,
LEV 26:15 waru nni i kuɗa wila̱ u va̱, hali i tara le ili yi idaba, reve i kuɗa̱ o toni ili i na n dammai, reve waru i kuɗa akucunu a̱ va̱,
LEV 26:16 to, n ta gba a yuwaan ɗu ili i nda: N ta̱ lyunguwa̱ ɗu upepu u cingi wi iwuya lon, oɓolo na̱ mɓa̱la̱ icu'un icu'un, hali na̱ mɓa̱la̱ n na ma̱a̱ lungusa̱ ɗu esu. Reve i ka̱ra̱ a rumba̱na̱sa̱ a̱vu u zuwa mɓa̱la̱ mo okolo. I ta yuwan ca̱'a̱n ve pere, adama a na n'yuwatan n ɗu n ɗa maa lyuwa le.
LEV 26:17 N ta yuwan tsurala na̱ a̱ɗu adama n'yuwatan n ɗu n lyuwa ɗu nu uvon. Aza a na a 'yuwan nɗu ele ɗa aa yuwan tsugono tsa̱ ɗu, waru i ta̱ ka̱ra̱ e ilaɗi ko na̱ za lo a saɓusa ɗu shi.
LEV 26:18 <<Agba suru na̱ ne, ni i 'yuwan a zuwaa mu atsuvu, to n ta̱ gba o doɓonuwo ɗu a̱tsuma̱lima̱ a̱ ɗu toto ucindere.
LEV 26:19 N ta kuɗa ucira wu uvaɗu wa aciyogbamu u ɗu. N ta zuwa eleshe a na a̱ ri zuva ɗu o o'wo tsu rumu, iɗa i na i ri za̱la̱ ɗu waru tsu rumushili.
LEV 26:20 I to una ucira u ɗu pere adama a na iɗa i ɗu yaa matsan ili shi, waru ɗanga vi iɗa i ɗu aa matsan ili shi.
LEV 26:21 <<Agba hali n gogo ni i yuwaan mu aciyogbamu, waru ni i 'yuwan a zuwaa mu atsuvu, n ta̱ gba a̱ da̱shi ɗu a̱tsuma̱lima̱ udoɓonuwu toto ucindere adama o unusu u ɗu.
LEV 26:22 N ta̱ waru a̱ lyungu inama yu una a aci a̱ ɗu aza a na oo una muwun n ɗu ni iliyamunga i ɗu. Waru a ta jiba a̱bunda̱ a̱ ɗu hali re ɗu vo o'wo babu ama.
LEV 26:23 <<Agba suru ni ili i nda, ni i 'yuwan a̱ usu tsuɓari tsa̱ va̱, reve i lyuwa elime a yuwusaan mu aciyogbamu,
LEV 26:24 a̱mu fo, n to ronu na̱ a̱ɗu. A̱mu na aciya̱va̱ a ɗa maa yuwan nla̱ngi na̱ a̱ɗu. A̱vu n ca ɗu a̱tsuma̱lima̱ toto ucindere adama a̱ nusu ɗu.
LEV 26:25 N ta̱ ta̱wa̱a̱ ɗu nu uvon u na waa tsupaa mu adama a na i kuɗai akucunu a̱ va̱. Nni i rono a̱ ka̱mba̱ na̱ a̱ca̱pa̱ a̱ tyo a̱tsuma̱ e ilyuci i ɗu, n ta̱ lyunguwa̱ ɗu na̱ mɓa̱la̱, reve i riya̱ e ekere a n'yuwatan n ɗu.
LEV 26:26 N te geshe ure u ma̱tsura̱ me ilyalya i ɗu hali she na̱ a̱ma̱ci kupa a̱ zun opopofu e eelele a̱ ta̱, reve a ca ɗu uritowu. I ta lyuwa agba ya̱a̱ cuwa̱n shi.
LEV 26:27 <<Agba suru na̱ ne, nna̱ yu uwwa mu shi, reve i ka̱ra̱ a mmalu n ɗu a̱ 'ya̱susa̱a̱n mu aci,
LEV 26:28 a̱mu gba n ta̱ 'ya̱sa̱a̱n ɗu nu upan lon. Reve a̱mu na aciya̱va̱ n doɓonuwo ɗu a̱tsuma̱lima̱ toto ucindere adama a̱ nusu ɗu.
LEV 26:29 I ta tama inama i muwun n ɗu mo olobo ne esheli.
LEV 26:30 N ta̱ lungusa̱ a̱'isa̱ a̱ a̱ma̱li a̱ ɗu a agaɗi. Waru n ta̱ lungusa̱ musa'a ma̱ a̱tsuka̱ a̱ ma̱guru n ɗu. N ta̱ waru gba a̱ kunguru a̱kwa̱kwa̱ a̱ ɗu zuva va̱ a̱kwa̱kwa̱ va̱ a̱ma̱li a̱ ɗu. I to o'wo ili yi idaba e ekere a̱ va̱.
LEV 26:31 N ta̱ ka̱mba̱to ilyuci i ɗu asa'a. Waru n ta̱ lungusa̱ a̱'isa̱ a̱ ɗu. Ma̱a̱ da̱shi ciga ma̱guru ma̱ kucci ɗu shi.
LEV 26:32 N ta̱ lungusa̱ iɗa i ɗu hali wo o'wo cine n'yuwatan n na n ri na̱ nden pe aa lamba ili i na aa damma.
LEV 26:33 N te bete'we ɗu a̱ tyo a̱tsuma̱ a nɗa n ro, reve n tala matsun me pe'eni ma̱ va̱ n saɓa ɗu. A̱vu n zuwa iɗa i ɗu yo o'wo asa'a waru a̱ lungusa̱ ilyuci i ɗu.
LEV 26:34 Ɗaɗa iɗa i ɗu ya̱a̱ tsura̱ yu uwwa uyo'o wa Aa'wan a̱ wivuwun wa̱ yi a mantsa ma na u ri okongo. Ni i ri e iɗa yi n'yuwatan n ɗu, iɗa'a i ta̱ tsura̱ wivuwun wa̱ yi waru wu uwwa uyo'o u wivuwun.
LEV 26:35 Mantsa ma na u ri okongo suru, iɗa'a i ta̱ tsura̱ wivuwun u na u shi tsura̱i shi a mantsa ma̱ wivuwun wa Ashibi ma na na i da̱na̱i pe nden.
LEV 26:36 <<Amma o una̱ u ɗu gba aza a na a buwai, n ta zuwa wovon wa̱ a̱bunda̱ o okolo a̱ ɗu a̱tsuma̱ e iɗa yi n'yuwatan n ɗu. Hali ni ilama ya̱ a̱vu'un yaa saɓa ɗu. I ta suma she damma aza a na aa sumusa matsun mepe'eni, reve i riya̱, ko na wo o'woi za lo aa saɓusa ɗu shi.
LEV 26:37 I ta̱ da̱na̱ a ngamulai va̱ni ɗu tsa ama a na a sumusaa una̱ u matsun me pe'eni ko na wo o'woi za lo aa saɓusa le shi. Adama o ndolo yaa gura isawan a̱ ma̱ka̱ka̱n ma n'yuwatan n ɗu shi.
LEV 26:38 I ta̱ kuwa̱ a̱tsuma̱ a nɗa n ro. Iɗa yi n'yuwatan n ɗu i ta lyuwa ɗu.
LEV 26:39 Amma o una̱ u ɗu gba aza a na a buwai, i ta̱ kuwa̱ a̱tsuma̱ e iɗa yi n'yuwatan n ɗu adama a̱ nusu ɗu na̱ wa aza a nkaya n ɗu.
LEV 26:40 <<Agba nna a pati gafura vu nusu le na̱ nusu vu nkaya n le nu ulambu wa amayun e le e ekere a̱ va̱ waru nna̱ a̱ usu a yuwaan mu ta̱ aciyogbamu,
LEV 26:41 ili i na i zuwai n 'yuwan nle hali n keɓe nle a̱ tyo e iɗa yi n'yuwatan nle, nna̱ a̱ ka̱ɗa̱to okolo a aciyogbamu e le reve a̱ usu unusu u le,
LEV 26:42 n ta cuwan na akucunu a na n yuwain na̱ Yakubu, na̱ Ishaku na̱ Ibrahim. N ta gba a cuwan ni iɗa'a.
LEV 26:43 Amma a ta lyawa iɗa'a i tsura̱ wivuwun a mantsa ma na u ri okongo. A ta̱ gba a tsupa o una̱ wu nusu le adama a na a 'yuwain wila̱ u va̱ waru e enei wila̱ u va̱ idaba.
LEV 26:44 Agba suru na̱ ne, a mantsa ma na a̱ ri e iɗa yi n'yuwatan n le, maa lyawa le shi, ko me ene le idaba shi hali na moo kototo le suru suru shi ko n kuɗa akucunu a na n yuwaan n le. A̱mu ɗa A̱sulazuva A̱sula̱ e le.
LEV 26:45 Amma adama a̱ ɗu n ta cuwan na̱ akucunu a na n yuwain na̱ nkaya n ɗu aza a na mu uta̱yi a̱tsuma̱ e iɗa ya Masar e esu a ama a nɗa n ro adama moo o'wo A̱sula̱ e le. A̱mu ɗa A̱sulazuva.>>
LEV 26:46 Ele nda e le ɗa ili i na a zuwai na̱ wila̱ nu uritosu u na A̱sulazuva a yuwain na ama a Isra'ila e ekere a Musa a Masasan ma Sinai.
LEV 27:1 Reve A̱sulazuva a yuwan adanshi na̱ Musa, u damma,
LEV 27:2 <<Vu yuwan adanshi na ama a Isra'ila vu damma le, nna̱ vuma yuwan akucunu la̱nga̱ a na waa ca A̱sulazuva vuma u ta gura tsupaa vuma'a ni ikebe o una̱ u vuma'a,
LEV 27:3 apa cine o rito ikebe i vuma'a o una̱ u makundatsu ma̱ a̱a̱'isa̱ a akiza. Vali na ri na a'wan ushin a̱ tyo kupota̱li, a ta tsupa azurufa kupoton.
LEV 27:4 Agba na̱ ka ɗa, a ta tsupa azurufa mata'atsu.
LEV 27:5 Ulobo u na u ri a'wan o ton a̱ tyo a'wan ushin, a ta tsupa azurufa ushin. Usheli u na u ri na a'wan o ndolo a ta tsupa azurufa kupa.
LEV 27:6 Mawun mo ulobo ma na ma̱ ri na̱ woto u ta̱ a̱ tyo a'wan o ton, a ta tsupa azurufa ton. Usheli gba na u ri na a'wa'an, a ta tsupa azurufa ta'atsu.
LEV 27:7 Vuma na gba ri na a'wan kupota̱li a gawan, a ta tsupa azurufa kupa no ozo o ton o una̱ u vali. O una̱ wu ka gba, a ta tsupa azurufa kupa.
LEV 27:8 Nna̱ vuma ciga yuwan cu'un va akucunu a nda agba alambi a ɗa na waa gura tsupa ili i na a paɗaa niyi shi, to, u 'ya̱wa̱ na̱ vuma'a uba̱ta̱ wa ganu, adama ganu paɗa ili i na i lobonoi na vuma'a waa gura tsupa.
LEV 27:9 <<Nna̱ akucunu'u e reme ta̱ a na waa ca iliyamunga i na yi ntsayi a ca A̱sulazuva a ɗa, to iliyamunga i ndolo wo o'wo ta̱ ili ya akiza.
LEV 27:10 Nu u 'yuwan u ciga u kita'wan iliyamunga'a wan, waru she u vadala za vu ulobonu na̱ za babu ulobonu wan, ko za babu ulobonu na̱ za vu ulobonu wan. Na̱ waa kita'wan iliyamunga ni iliyamunga, a̱yi na̱ za na a kita'wai'in ele ra o to o'wo ili ya akiza.
LEV 27:11 Agba nni ili i na a yuwain nzuwulai iliyamunga yi idaba i ɗa i na yi ntsayi a ca A̱sulazuva shi, to, vuma'a u 'ya̱wa̱a̱ ni iliyamunga'a ya ganu.
LEV 27:12 Ganu gba u ta̱ ka̱lyuwa̱ ulobonu wi iliyamunga'a ko u tu ulobonu ko u ri ulobonu shi, cine ganu paɗaa niyi ne ɗaɗa wa̱a̱ da̱na̱.
LEV 27:13 Amma nna̱ za vi ili'i u ciga ta̱ u ka̱mba̱ u tsupisa iliyamunga'a, to, u ta̱ da̱shi za ta̱ a̱tsuma̱ o ozo o ton a aci e ili i na a paɗai.
LEV 27:14 <<Nna̱ vuma ca u'wa wa̱ yi wo o'wo ili ya akiza e ekere a̱ A̱sulazuva, to ganu ka̱lyuwa̱ ulobonu wu u'wa'a. U ka̱lyuwa̱ ko u'wa'a u tu ulobonu ko u ri ulobonu shi. Ili i na ganu paɗai suru, ne ɗaɗa wa̱a̱ da̱na̱.
LEV 27:15 Nna̱ za na cayi u'wa'a u ciga u ka̱mba̱ u tsupisa u'wa'a, to u ta̱ da̱shi za ta̱ a̱tsuma̱ o ozo o ton a aci e ili i na a paɗayi u'wa'a, reve u'wa'a wo o'wiso za va̱ yi.
LEV 27:16 <<Na̱ vuma ca A̱sulazuva upasu u na wi iɗa wa agadu a̱ yi, to, a paɗaa iɗa'a ikebe a̱bunda̱ o una̱ wi icu'un i na a̱a̱ cu'wa̱n pe. Shekel azurufa kupoton o una̱ u makundatsu ushin vi icu'un.
LEV 27:17 Nu u ca ta̱ uɗuma̱ wa̱ yi a̱tsuma̱ a Aa'wan a̱ A̱buki o uka̱mbusa̱ fa̱a̱n, ikebe i na a paɗayi uɗuma̱'a̱ ya aa'wan i ɗaɗa wee reme.
LEV 27:18 Amma nnu u ca ta̱ uɗuma̱'a̱ cina Aa'wan a̱ A̱buki'i a̱ ka̱ra̱, to, ganu paɗaa uɗuma̱'a̱ ikebe o una̱ wa a'wan a na a buwai Aa'wan a̱ A̱buki'i a̱a̱ ka̱nda̱ruwisa̱. Waru a ta jiba a̱bunda̱ e ikebe i na a paɗai.
LEV 27:19 Agba na̱ vuma na cayi uɗuma̱'a̱ u ciga u ka̱mba̱ u tsupisa yi, to u ta̱ da̱shi za ta̱ a̱tsuma̱ o ozo o ton e ikebe yu uɗuma̱'a̱. Reve uɗuma̱'a̱ wo o'wiso za va̱ yi.
LEV 27:20 Agba nu u ciga u tsupisa uɗuma̱'a̱ shi, ko u shi ta̱ ɗe u winaa za ro uɗuma̱'a̱, to u ri n yuwan u ka̱mba̱ u tsupisa uɗuma̱'a̱ shi.
LEV 27:21 Na a ca uɗuma̱ a̱tsuma̱ a aa'wan a̱ A̱buki'i, uɗuma̱'a̱ u to o'wo ili ya akiza tsu uɗuma̱ u na a tawayi A̱sulazuva. U to o'wo uɗuma̱ u nan ganu.
LEV 27:22 <<Na̱ vuma ca uɗuma̱ u na u tsulai, uɗuma̱ u na u ri pe a̱tsuma̱ e iɗa ya agadu shi,
LEV 27:23 ganu ta paɗaa uɗuma̱'a̱ ikebe i na wu ntsayi hali a̱ tyo a a'wan a na a buwai a cina Aa'wan a̱ A̱buki'i. Vuma'a u ta tsupa ikebeꞌe o una̱ wi ikebe i na a paɗai o urana'a, ili ya akiza i ɗa e ekere a̱ A̱sulazuva.
LEV 27:24 A Aa'wan a̱ A̱buki'i uɗuma̱'a̱ u ta̱ ka̱mba̱ e ekere a za na tsula niyi, za na uɗuma̱'a̱ u shi za va̱ yi.
LEV 27:25 A ta paɗa ili i na yi ntsayi a tsupa suru o una̱ u makundatsu ma̱ a̱a̱'isa̱ a akiza.
LEV 27:26 <<Agba ko za aa ca umatsun wu ufaru wi iliyamunga shi, a na wo o'woi umatsun wu ufaru wi iliyamunga suru za va̱ A̱sulazuva ɗa, ko nan ko kyon, za va̱ A̱sulazuva ɗa.
LEV 27:27 Amma ni iliyamunga'a za vi idaba ɗa, a ta gura ka̱mba̱ a tsupisa yi o una̱ wi ikebe i na ganu paɗaa niyi oɓolo na̱ za ta̱ a̱tsuma̱ o ozo o ton. Nna̱ gba aa tsupisa yi shi, a wina yi o una̱ wi ikebe i na a paɗa niyi.
LEV 27:28 <<Agba ili yi lo a̱tsuma̱ e ili i na vuma ri na̱ a̱yi, na a cayi A̱sulazuva, ko vuma, ko iliyamunga, ko iɗa ya agadu, na aa gura wina ko a tsupa shi. Ili i na a tawai suru ili ya akiza i ɗa e ekere a̱ A̱sulazuva.
LEV 27:29 Babu vuma na a cayi adama o ukototosu na a tsupisa adama a̱ yi. Na a 'yuwan a ciga o una yi.
LEV 27:30 <<Za ta̱ a̱tsuma̱ a kupa suru vi ili yi iɗa'a, ko vi ishina, ko vu matsun vu ɗanga, a̱za̱ a̱ A̱sulazuva a ɗa. Ili ya akiza i ɗa e ekere a̱ A̱sulazuva.
LEV 27:31 Na̱ vuma ciga u tsupisa za ta̱ a̱tsuma̱ a kupa suru na u cayi, u da̱shi za ta̱ a̱tsuma̱ o ozo o ton a aci e ili'i.
LEV 27:32 Za ta̱ a̱tsuma̱ a kupa vi iliyamunga suru, ko vi inan, ko vi ikyon, ko vu mgbele, za va kupa suru na va̱a̱ ka̱ra̱ za̱la̱ va aaɗanga a za va aaguɓa, u to o'wo ili ya akiza e ekere a̱ A̱sulazuva.
LEV 27:33 Waa ɗangula iliyamunga i kupa o una̱ wu ulobonu wa̱ yi shi ko o ulambu wu ulobonu wa̱ yi shi. Agba waru waa kita'wa yi shi. Na a kita'wa yi, iliyamunga'a na̱ za na a kita'wai o to o'wo na akiza. A̱ ri na aa gura tsupisa le shi.>>
LEV 27:34 Ele nda, ele ɗa wila̱ u na A̱sulazuva a cayi Musa a Masasan ma Sinai adama a ama a Isra'ila.
1SA 1:1 A yuwan ta̱ vuma ro aala a̱ yi Elikana, vuma va Zuf za vu ugundo wa Ifiramu u ta̱ nden a̱ lyuci va Rama, e iɗa ya agaɗi ya Ifiramu. A̱yi ulobo wa Yeroham u ɗa ulobo wa Elihu ulobo wa Tohu ulobo wa Zuf vuma va Ifiramu.
1SA 1:2 U da̱na̱ ta̱ na̱ a̱ma̱ci e re, za ta̱ aala a̱ yi Hanatu za ve ire waru aala a̱ yi a ɗa Penina. Penina ta̱ na̱ muwun, agba Hanatu ri ni i ɗa shi.
1SA 1:3 Aa'wan suru Elikana tsu lyawa ta̱ lyuci va̱ yi Rama, reve u gawan a̱ 'ya̱wa̱ lyuci va̱ Shilo tsa̱ra̱ u yuwaan A̱sulazuva o oɓolo a̱ a̱soja a zuva a̱ga̱nda̱, waru u yuwaan yi kucci. Olobo e Eli e re Hofini na̱ Finiha ele ɗa a̱ da̱na̱i nan ganu va̱ A̱sulazuva ɗe.
1SA 1:4 A mantsa ma na suru Elikana cayi kucci va̱ yi, u tsu ca ta̱ ka va̱ yi Penina na̱ muwun mo olobo ma̱ yi suru ne esheli akunda e inama i le.
1SA 1:5 Amma u tsu ca ta̱ Hanatu akunda a gbain adama a na u ciga yi ta̱ lon, adama a na a̱ A̱sulazuva a̱ ɓa̱ru ta̱ umatsutsun wa̱ yi.
1SA 1:6 Shewun va̱ yi Penina tsu cukurusa̱ yi ta̱ adama u yuwaan yi ulamu waru u ca yi upan, adama a na A̱sulazuva a̱ ɓa̱ru ta̱ umatsutsun wa̱ yi.
1SA 1:7 Ucukurusa̱'a̱ u lyuwa ta̱ elime aa'wan suru. Mantsa ma na Hanatu 'ya̱wa̱i o u'wa wa̱ A̱sulazuva suru, shewun va̱ yi tsu cukurusa̱ yi ta̱ adama u ca yi upan, hali u shon reve u 'yuwan a lyuwa ilyalya.
1SA 1:8 Elikana vali va̱ yi tsu damma yi ta̱, <<Hanatu nye i zuwai vu ri e mesun? Nye i zuwa vu lyuwai ilyalya shi? Waru nye i zuwai vu ri ya̱ a̱tsuma̱la̱ngu? A̱mu n la'aa wu muwun mo olobo kupa shi?>>
1SA 1:9 Urana u ro ɗe Shilo ana a lyuwai ilyalya o sowoi, reve Hanatu 'yon u yuwan avasa. Eli ganu gba da̱na̱ ta̱ lo nden o ootogu o una̱ntsutsu wu u'wa wa̱ A̱sulazuva.
1SA 1:10 Hanatu da̱na̱ ta̱ na̱ a̱tsumola̱ngu lon, a̱vu u yuwan avasa a̱ tyo uba̱ta̱ wa̱ A̱sulazuva na̱ mesun lon.
1SA 1:11 Reve u yuwan akucunu u damma, <<A̱sulazuva o oɓolo a̱ a̱soja a zuva, na̱ vu ka̱lyuwa̱ a̱tsuma̱lima̱ a aagbashi a̱ wu reve vu cuwan na̱ a̱mu, agba vi icina na aa aagbashi a̱ wu shi, a̱vu vu ca yi ulobo, n ta̱ gba a ca A̱sulazuva a̱yi hali ukwa̱ wa̱ yi. Agba ko utanu wa̱a̱ ju'wa̱n aaci a̱ yi shi.>>
1SA 1:12 Ana u lyuwai elime na avasa a̱ tyo uba̱ta̱ wa̱ A̱sulazuva, Eli gba e idanasa una̱ wa̱ yi.
1SA 1:13 Hanatu yuwusan ta̱ avasa a̱tsuma̱ o okolo a̱ yi, una̱ wa̱ yi u ɗa goon u da̱na̱i a̱ ma̱zungwa̱, agba uɗyo wa̱ yi wu uta̱ shi. A̱vu Eli ene ngashi usowu u ɗa u ri.
1SA 1:14 Reve u damma yi, <<Hali a̱ tyo mantsa ma̱ ne va̱a̱ da̱na̱ usowu? Vu lyawa ne oso a masayan ma̱ inabi.>>
1SA 1:15 A̱vu Hanatu usu u damma, <<Ne ɗa shi zagbain va̱. A̱mu ka ɗa za na ri na̱ a̱tsumola̱ngu lon. N sowo masayan ma̱ ina̱bi ko ili i ro i na i tsu tsura̱to vuma shi. Amma n ta dansaa A̱sulazuva okolo a̱ va̱.
1SA 1:16 She vu tara aagbashi a̱ wu tsu ka ve pere wan. N ta avasa mantsa ma nda suru adama a̱ a̱bunda̱ o usa̱n na̱ a̱tsumola̱ngu a na n ri pe.>>
1SA 1:17 Reve Eli usu yi, <<Ka̱ra̱ na asuvu nden, lyawa A̱sula̱ a aza a Isra'ila a ca wu ili i na vu pati niyi.>>
1SA 1:18 Reve u damma, <<Lyawa aagbashi a̱ wu a̱ tsura̱ isa'ani e ekere a̱ wu.>> A̱vu ka'a u reme ure wa̱ yi u 'ya̱wa̱ u lyuwa ilyalya. Agba u da̱shi lukuta̱ urewesu wa̱ yi shi.
1SA 1:19 Ana usana u tawai, reve Elikana na̱ a̱ma̱ci a̱ yi na̱ muwun ma̱ yi a yuwaan A̱sulazuva a̱ga̱nda̱. A̱vu a̱ ka̱mba̱ o u'wa u le a Rama. Ana Elikana voyin na̱ ka va̱ yi Hanatu, reve gba A̱sulazuva a cuwain na̱ a̱yi.
1SA 1:20 Ana mantsa ma yuwain, reve Hanatu tsura̱ a̱a̱tsuma̱ reve u matsan mawun mo ulobo. Ɗaɗa u ca niyi aala Sama'ila, a dansa, <<M pati ta̱ A̱sulazuva a̱yi.>>
1SA 1:21 Ana Elikana nu u'wa wa̱ yi suru a̱a̱ 'ya̱wa̱ tsa̱ra̱ a ca A̱sulazuva kucci va aaꞌwan suru, reve waru u shiton akucunu a̱ yi,
1SA 1:22 Hanatu 'ya̱wa̱ shi. U damma ta̱ vali va̱ yi, <<Na̱ n kasa mawu'un maani, n ta tara yi a̱ ꞌya̱wa̱ n ca A̱sulazuva a̱yi, waru ɗe ɗa wa̱a̱ da̱na̱ kuci.>>
1SA 1:23 Reve Elikana usu ka va̱ yi u damma, <<Yuwan ili i na i lobono nuwu. Isawan pa hali she mantsa ma na vu kasa niyi maani. A̱yi de lyawa A̱sulazuva o shiton adanshi a̱ yi goon.>> Ɗaɗa Hanatu da̱nuyi o u'wa u co'o mawu'un hali mantsa ma na u kasa niyi maani.
1SA 1:24 Ana u kasa niyi maani, reve u tara yi a̱ 'ya̱wa̱ o u'wa wa̱ A̱sulazuva a̱ Shilo, oɓolo na̱ ogono a nan va aꞌwan a taꞌatsu, na̱ makundatsu ma yira kupa ne ejere, na̱ tsa̱n vu ukwan masayan ma̱ ina̱bi, ulobo'o gba a̱yi ubuwu mawun.
1SA 1:25 Ana a paɗai ogono a na'an, reve Hanatu na̱ Elikana a tara ulobo'o a̱ tyo ye Eli.
1SA 1:26 Reve Hanatu damma Eli, <<Wuma wa̱ wu ujima zagbain va̱! N kucina ta̱ na̱ a̱vu, a̱mu ɗa ka na da̱na̱i pa nda mishin zuzu na̱ a̱vu a yuwusan avasa a̱ tyo uba̱ta̱ wa̱ A̱sulazuva.
1SA 1:27 M pati ta̱ mawun ma nda, waru A̱sulazuva a ca mu ta̱ ili i na m pati niyi.
1SA 1:28 Adama o ndolo gogo n ca ta̱ A̱sulazuva a̱yi, waru u to o'wo e ekere a̱ yi a mantsa ma a wuma wa̱ yi suru.>> Reve a yuwaan A̱sulazuva a̱ga̱nda̱ ɗe.
1SA 2:1 Reve Hanatu yuwan avasa u damma, <<Okolo a̱ va̱ a shiwan ta̱ na̱ ma̱za̱nga̱ a̱ tyo e ekere a̱ A̱sulazuva! A̱sulazuva aa zuwa mu ta̱ mo o'wo nu ukadu lon. Reve m kpa̱tu'wa̱ una̱ u va̱ n zo'oso n'yuwatan n va̱, adama a na u wawa numu.
1SA 2:2 <<Babu za na ri na akiza tsa̱ A̱sulazuva, babu za na ri lo tsa̱ wu, babu lo aatali tsa̱ A̱sula̱ a̱ tsu.
1SA 2:3 <<She i lyuwa elime na adanshi o ugbawu wan, ko adanshi o uvaɗu o utusa̱ o una̱ u ɗu wan, adama a na A̱sulazuva a̱yi ɗa A̱sula̱ za na revei ili biti, a̱yi ɗa u tsu ge'eto linga vuma biti.
1SA 2:4 <<A kuɗa ta̱ tan va aza a na a gurai uvon, amma aza a na a̱ ri nu ucira shi a̱ tsura̱ ta̱ ugbamu wo ookolo.
1SA 2:5 Aza a na a̱ da̱na̱i nu ucuwun, gogo a ta yuwusan ulinga wi izami yi ilyalya. Amma aza a na a̱ da̱na̱i na ambulu, gogo a̱ ta̱ ucuwun. Ka na da̱na̱i na̱ muwun shi, gogo u ta̱ na̱ muwun n cindere. Amma a̱yi na u da̱na̱i na̱ muwun ma̱ a̱bunda̱, wo o'wo ta̱ a̱ nde'en.
1SA 2:6 A̱sulazuva a̱ tsu ta̱wa̱a̱ ta̱ nu ukwisa̱, waru u tsu ca ta̱ wuma. U tsu 'ya̱wa̱to ta̱ ama uba̱ta̱ wu nden wa̱ a̱kwa̱kwa̱, a̱vu waru u 'ya̱sa̱n le.
1SA 2:7 A̱sulazuva a tsu zuwa ta̱ ulambu, reve waru u ca utsuru. U tsu ka̱ɗa̱to ta̱ vuma, reve waru u 'ya̱sa̱n zuva.
1SA 2:8 U tsu 'ya̱sa̱n ta̱ alambi diga a̱ ma̱buta̱, aza a na a cigai ikambishi waru diga e edemu. U tsu da̱na̱to le ta̱ oɓolo na̱ azagbain, waru u tsu ca le ta̱ agadu o ootogu o tsugbain. Adama a na ikyun yu usa wu uvaɗi za va̱ A̱sulazuva a ɗa, a aci a̱yi a ɗa u yuwain uvaɗi.
1SA 2:9 <<U tsu wawa ta̱ ana a ama a̱ a̱ɓula̱ a̱yi, amma a̱za̱ e iwuya a̱ tsu puwa̱n ta̱ a̱tsuma̱ e irumbu. Adama a na nu ucira u ɗa vuma aa lyuwa aci shi.
1SA 2:10 A̱sulazuva a tsu kukuɗa ta̱ a̱za̱ a̱ nla̱ngi na̱ a̱yi, u tsu lapa ta̱ tsata a̱ tyo ya̱'a̱ le diga zuva. A̱sulazuva e ge'eto ta̱ uvaɗi ma̱ɓula̱. U ta ca mogono ma̱ yi ucira, u tsu zuwa ta̱ za na u tsuwa̱n yi mani'in u tsura̱ ukadu lon.>>
1SA 2:11 Reve Elikana na̱ Hanatu a̱ ka̱mba̱ o u'wa a Rama, agba ulobo Sama'ila wi isawan ta̱ ɗe, tsa̱ra̱ u kambusa Eli ganu a yuwusaan A̱sulazuva ulinga.
1SA 2:12 Muwun mo olobo ma̱ Eli gba ama a vama a ɗa. E reve A̱sulazuva shi.
1SA 2:13 Agadu a nan ganu a ɗa oɓolo na ama, na a mantsa ma na za ro cayi kucci, inama'a a̱ ma̱puna̱, aagbashi a ganu a̱ tsu ta̱wa̱ ta̱ na̱ kune gbain va akatsu a ta'atsu o ukere wa̱ yi.
1SA 2:14 Reve u sapa pe kune'e a̱tsuma̱ a̱ cu'un vu upondo'o suru, ili i na kune'e u gura sapai o uta̱ suru za va ganu ɗa. Ne ɗa a yuwusain na ama a Isra'ila aza a na a̱ ta̱wusa̱i a yuwan a̱ga̱nda̱ a Shilo.
1SA 2:15 Amma kafu a cina mantsa ma na a̱a̱ kula̱to mani'in, reve aagbashi a ganu a̱ ta̱wa̱ u damma za na aa casu kucci'i, <<Vu ca ganu inama yu uta̱nu adama u zun. Waa ciga aza a na a̱ suwa̱in shi, she de a̱za̱ o uta̱nu.>>
1SA 2:16 Na̱ vuma'a u damma yi, <<Lyawa a̱ kula̱to mani'i'in ne'e, reve vu tara cine vu cigai.>> Aagbashi'i u tsu usu ta̱, <<O'o, vu ca mu gogo! Na̱ vu 'yuwan n ta̱ tara nu ucira.>>
1SA 2:17 Unusu wo olobo a̱ Eli u wuyana ta̱ na̱ a̱bunda̱ lon a̱ ma̱ka̱ka̱n ma̱ A̱sulazuva, adama a na a tara kucci va̱ A̱sulazuva ili i ro shi.
1SA 2:18 Amma Sama'ila molobo ma lyuwa ta̱ elime a yuwusaan A̱sulazuva ulinga. U da̱na̱ ta̱ wotowu na̱ ma̱tugu ma̱ epo vo okoro.
1SA 2:19 Aa'wan suru, mma va̱ yi tsu zula̱a̱ yi ta̱ ma̱tugu, reve u 'ya̱wa̱a̱ yi a mantsa ma na vali va̱ yi na̱ a̱yi a̱a̱ 'ya̱wa̱ a ca kucci va aa'wan aa'wan.
1SA 2:20 Eli waru tsu zuwaa ta̱ Elikana na̱ ka va̱ yi Hanatu abaꞌun, a̱vu u damma, <<Lyawa A̱sulazuva a ca wu muwun n ro e ekere a Hanatu, tsa̱ra̱ wo o'wo o una̱ wu ulobo u na Hanatu patiyi, reve u ca A̱sulazuva a̱yi.>> Reve Elikana na̱ Hanatu ka va̱ yi a̱ ka̱mba̱ o u'wa.
1SA 2:21 Reve A̱sulazuva a cuwan na̱ Hanatu, reve u matsisan olobo a taꞌatsu ne esheli e re. A̱yi gba ulobo Sama'ila u kungwa ta̱ a yuwusaan A̱sulazuva ulinga.
1SA 2:22 Eli gba kutsa ta̱ lon. Waru u ta uwwusa suru ili i na olobo a̱ yi aa yuwusan na aza a Isra'ila suru na̱ cine o vosun na̱ a̱ma̱ci aza a na a yuwusan ulinga uba̱ta̱ o una̱ntsu wo Oogodo o Uga'asusan.
1SA 2:23 Ɗaɗa u damma nle, <<Nye i zuwai yaa yuwusan cu'un vi ili i nda? N ta uwwusa adanshi diga uba̱ta̱ wa ama suru adama o ulinga wu uwuyanu u na yaa yuwusan.
1SA 2:24 Lyawai, olobo a̱ va̱, adanshi a sa'ani a ɗa maa uwwusa diga e ekere a ama a̱ A̱sulazuva shi.
1SA 2:25 Na̱ vuma yuwaan vuma ro unusu, A̱sula̱ a ta gura isawaan yi, amma na̱ vuma yuwaan A̱sulazuva unusu, zane ɗa e isawaan yi?>> Agba olobo a̱ Eli a uwwa adanshi a dada le shi, adama a na A̱sulazuva o foɓo ta̱ ɗe a na woo una le.
1SA 2:26 Reve Sama'ila lyuwa elime na akungu nu utsuru wi isa'ani e ekere a̱ A̱sulazuva ne e ekere a ama.
1SA 2:27 Uranu u ro vuma va̱ A̱sula̱ ta̱wa̱ ta̱ uba̱ta̱ wa̱ Eli, a̱vu u damma yi, <<Nda ili i na A̱sulazuva a dammai: <N roco ta̱ aciya̱va̱ a alanga eteshe uba̱ta̱ wa a akaya a̱ ɗu Haruna nu u'wa wa̱ yi mantsa ma na a̱ da̱na̱i e iɗa ya Masar a yuwusaan mogono Firi'awuna tsugbashi.
1SA 2:28 Agba n ɗangula a̱ yi ta̱ diga a̱tsuma̱ o gundo va aza a Isra'ila suru o'wo nan ganu a̱ va̱, waru a yuwan a̱ga̱nda̱ a masa'a, a̱ kula̱to a̱tsuka̱ a̱ ma̱guru, a̱vu oto epo adama a zami majiyan ma̱ va̱. Waru n ca ta̱ akaya a̱ wu nu u'wa wa̱ yi akunda e le diga a̱ kucci na aa yuwain na akina wa aza a Isra'ila suru.
1SA 2:29 Nye i zuwai yaa tarasa kucci nu ucasu u na n dammai a̱ ta̱wa̱a̱ uba̱ta̱ wu nden n va̱ ili i ro shi? Nye i zuwai vaa casu muwun ma̱ wu tsugbain ula'awu na̱ a̱mu, na ya aa lyuwusa upasu u na u la'ai ulobonu u kucci va ama a̱ va̱ aza a Isra'ila?>
1SA 2:30 <<Adama o ndolo A̱sulazuva A̱sula̱ a aza a Isra'ila a ɗa a dammai, <N yuwan ta̱ nzuwulai na amayun ana, u'wa wa̱ wu nu u'wa wa dada va̱ wu ele ɗa a̱ ri n yuwusan a̱ga̱nda̱ a̱ ma̱ka̱ka̱n ma̱ va̱ babu ukotu.> Amma gogo A̱sulazuva a damma ta̱, <Ili i ndolo i ri n yuwan shi! Aza a na a ca numu tsugbain, ele ɗa maa ca tsugbain, amma aza a na o goro numu n ta tara le ili ye pere.
1SA 2:31 Mantsa ma̱ ta̱ lo a̱ ta̱wa̱ a na moo kototo wu na̱ olobo o u'wa wa dada va̱ wu, hali a̱a̱ tsura̱ za na aa kutsa a̱tsuma̱ o u'wa wa̱ wu shi.
1SA 2:32 Vu te e ene meleshe ma̱ a̱bunda̱ uba̱ta̱ wu nde n va̱. Amma n ta̱ roco wi isa'ani ekere a Isra'ila, amma za suru o u'wa wa̱ wu u ta̱ kuwa̱ babu u kutsa.
1SA 2:33 Na̱ n lyawa za a̱tsuma̱ o u'wa wa̱ wu suru a na wa yuwaan mu ulinga u tsuganu a masa'a ma̱ a̱ va̱ wee ene ure shi adama a̱bunda̱ a aɓara na̱ a̱tsuma̱la̱ngu, waru limatan vu u'wa wa̱ wu suru a̱ ta̱ kuwa̱ e ekere matsun me pe'eni.
1SA 2:34 << <Nda ili i na yoo o'wo wu iroci, Olobo e re a̱ wu Hofini na̱ Finiha a̱ ta̱ kuwa̱ urana u ta̱.
1SA 2:35 N ta̱ 'ya̱sa̱a̱n aciya̱va̱ ganu va̱ a̱ɓula̱ za na aa yuwaan mu a̱ga̱nda̱ reve u yuwan ili i na n cigai waru. N ta ca yi limatan va̱ a̱bunda̱ o u'wa wa̱ yi naa n ri koto shi, reve u yuwan a̱ga̱nda̱ elime mogono ma na a na n tsuwa̱n yi mani'in kuci.
1SA 2:36 Suru za na buwai a̱tsuma̱ a limatan va̱ wu u ta̱ ta̱wa̱ u kingyo wa̱ yi u pati azurufa na̱ ma̱kutsu mo opopofu u damma, <<Zuwa mu ulinga u tsuganu adama n tsa̱ra̱ ilyalya ya alya.>> > >>
1SA 3:1 Molobo Sama'ila u yuwusaan ta̱ A̱sulazuva ulinga e ekere a Eli. A mantsa mo ndolo A̱sulazuva aa yuwusan adanshi na ama kuci shi. Babu a̱bunda̱ a alavu alavu.
1SA 3:2 Urana u ro na ayin Eli za na esu a̱ yi o o'woi ga̱nda̱ ga̱nda̱ na u tse ene mejege shi, u da̱na̱ ta̱ nven asula a̱yi.
1SA 3:3 Babu fitila va̱ A̱sula̱ kima̱, Sama'ila pe nven o u'wa wa̱ a̱ A̱sulazuva, uba̱ta̱ u na Akpati a Nzuwulai a̱ A̱sula̱ a̱ da̱na̱i,
1SA 3:4 reve A̱sulazuva e ɗe Sama'ila, a̱vu Sama'ila usu, <<Mpa mu nda.>>
1SA 3:5 Reve u suma a̱ tyo uba̱ta̱ wa̱ Eli, a̱vu u damma, <<Mpa mu nda vu ɗe mu ta̱.>> A̱vu Eli usu yi, <<N ɗe wu shi, ka̱ra̱ a̱ ka̱mba̱ vu von.>> Reve u ka̱mba̱ u von.
1SA 3:6 A̱vu A̱sulazuva a̱ da̱shi ɗe Sama'ila. A̱vu Sama'ila 'yon u 'ya̱wa̱ ya̱ Eli reve u damma, <<Mpa mu nda vu ɗe mu ta̱.>> A̱vu Eli damma, <<Ulobo u va̱, n ɗe wu shi, ka̱ra̱ a̱ ka̱mba̱ vu von.>>
1SA 3:7 Sama'ila gba koto u shi u reve A̱sulazuva shi. Koto A̱sulazuva o roco aciya ya̱ yi uba̱ta̱ wa̱ yi a̱tsuma̱ a adanshi a̱ yi shi.
1SA 3:8 Reve A̱sulazuva e ɗewishe Sama'ila u ɗewu wa ta'atsu, a̱vu Sama'ila 'yon u 'ya̱wa̱ uba̱ta̱ wa̱ Eli a̱vu u damma, <<Mpa mu nda vu ɗe mu ta̱.>> Lo ɗa Eli revei a na A̱sulazuva a ɗa e ɗesu ulobo'o.
1SA 3:9 Ɗaɗa Eli dammai Sama'ila, <<Ka̱ra̱ vu 'ya̱wa̱ vu von, nu u da̱shi ɗe wu a̱vu vu damma, <Yuwan adanshi, A̱sulazuva, adama a na aagbashi a̱ wu a ta uwwusa.> >> Ɗaɗa Sama'ila 'ya̱wa̱ u voyin uba̱ta̱ wu nven ma̱ yi.
1SA 3:10 Reve A̱sulazuva a̱ ta̱wa̱ wi isawan uba̱ta̱'a̱, a̱vu u ɗewishe tsu ufaru, <<Sama'ila! Sama'ila!>> A̱vu Sama'ila usu, <<Yuwan adanshi, adama a na aagbashi a̱ wu a ta uwwusa.>>
1SA 3:11 A̱vu A̱sulazuva a damma yi, <<Gogo, n ciga ta̱ n yuwan ili i ro a̱tsuma̱ a Isra'ila i na vuma na suru uwwa niyi na atsuvu a̱ yi u ta da'wan.
1SA 3:12 O urana u ndolo n to shiton adanshi a na n yuwain ekere a̱ Eli nu u'wa wa̱ yi, diga o ufaru hali o ukosu suru.
1SA 3:13 Adama a na n damma yi ta̱ n ta paɗaa u'wa wa̱ yi ugana u babu ukotu, adama o unusu u na u revei na̱ a̱yi. Olobo a̱ yi a yuwan ta̱ adanshi a avama e ekere A̱sula̱, agba u ɓara le shi.
1SA 3:14 Adama o ndolo n kucinaa ta̱ u'wa wa̱ Eli, babu kucci ko ucasu u na waa gura tara ume wu unusu wu u'wa wa̱ Eli ko ke'en.>>
1SA 3:15 Reve Sama'ila von hali she usana. Ana u 'yoyin a̱vu u kpa̱tu'wa̱ na̱ntsutsu vu u'wa wa̱ A̱sulazuva. A̱vu wu uwwa wovon u na waa damma Eli alavu alavu'u.
1SA 3:16 Amma Eli ɗe yi ta̱ u damma, <<Sama'ila mawun ma̱ a̱ va̱.>> A̱vu Sama'ila usu, <<Mpa mu nda.>>
1SA 3:17 A̱vu Eli ece yi, <<Nye i ɗa u damma nuwu? She vu soko mu wan. Lyawa A̱sula̱ a ca wu a̱tsuma̱lima̱ lon na̱ vu damma mu suru ili i na u damma nuwu shi.>>
1SA 3:18 Ɗaɗa Sama'ila damma niyi ili suru, u soko yi ko ili i ta̱ shi. A̱vu Eli damma, <<A̱yi ɗa A̱sulazuva, lyawa u yuwan ili i na i lobono niyi.>>
1SA 3:19 Sama'ila kungwa ta̱, A̱sulazuva gba a̱ da̱na̱ ta̱ oɓolo na̱ a̱yi. Waru u zuwa ta̱ ili i na Sama'ila dammai suru u shiwan.
1SA 3:20 A̱tsuma̱ a Isra'ila suru diga upasu wu ugana u lyuci wa Dan a̱ tyo upasu wu uyagi u lyuci wa Biyasheba, vuma suru a̱tsuma̱ e iɗa'a u reve ta̱ a na Sama'ila vumava̱sula̱ va̱ A̱sulazuva amayun a ɗa.
1SA 3:21 Reve A̱sulazuva a̱ ka̱ra̱ o rocosu aciya̱yi a̱ Shilo. Ɗe ɗa u rocoi aciya̱yi ya Sama'ila a̱tsuma̱ a adanshi a̱ yi.
1SA 4:1 Reve adanshi a Sama'ila a̱ ta̱wa̱ e ekere a aza a Isra'ila suru. A mantsa mo ndolo, aza a Isra'ila o foɓo o uta̱ tsa̱ra̱ a̱ ꞌya̱wa̱a̱ aza a Filistiya nu uvon. Reve aza a Isra'ila a̱ va̱la̱ Ebeniza, reve aza a Filistiya a̱ va̱la̱ a Afe.
1SA 4:2 Reve aza a Filistiya e gere adama o uvon. Ana a yuwain uvon wu usuɗuwu, reve a lyuwa aza a Isra'ila nu uvon, reve o una ama ukpakukupa una̱shi (4,000) uba̱ta̱ wu uvon.
1SA 4:3 Ana a̱soja a Isra'ila a̱ ka̱mba̱i o uva̱la̱ta̱, reve mbara ma aza a Isra'ila e ece, <<Nye i zuwai A̱sulazuva a lyawai aza a Filistiya a lyuwa ntsu ana'an? Lyawai tsu ta̱wa̱ na Akpati a Nzuwulai a̱ A̱sulazuva pa nda za na ri Shilo, adama u 'ya̱wa̱ oɓolo na̱ a̱ tsu waru u wawa tsu e ekere a n'yuwatan n tsu.>>
1SA 4:4 Reve a̱ lyungu ama a̱ 'ya̱wa̱ Shilo, a̱vu a̱ ta̱wa̱ na̱ Akpati a Nzuwulai a̱ A̱sulazuva o oɓolo a̱ a̱soja a̱ zuva, za na ri nden a̱ memere me ikerobobi. Olobo e re a Eli, Hofini na̱ Finiha, a̱ shi ta̱ oɓolo na Akpati a Nzuwulai a̱ A̱sula̱'a̱.
1SA 4:5 Ana Akpati a Nzuwulai a̱ A̱sulazuva a̱ ta̱wa̱i a̱tsuma̱ o uva̱la̱ta̱, reve aza a Isra'ila suru o oruwo lon adama a̱ ma̱za̱nga̱ hali iɗa i jinga̱ɗa̱.
1SA 4:6 Ana aza a Filistiya a uwwai yorori a̱vu a damma, <<Nye i ɗa i ta̱wa̱i na̱ yorori i nda lon o uva̱la̱ta̱ wu mmaci ma Ibrahim?>> Ana a uwwai a na Akpati a̱ A̱sulazuva a ɗa a̱ ta̱wa̱i a̱tsuma̱ o uva̱la̱ta̱,
1SA 4:7 reve wovon u reme aza a Filistiya'a. Reve a damma, <<Musula̱ a̱ ta̱wa̱ ta̱ a̱tsuma̱ o uva̱la̱ta̱'a̱.>> A̱vu a damma, <<Addama a cina tsu ta̱, adama a na koto a yuwan cu'un vi ili tsunda shi.
1SA 4:8 A̱tsuma̱lima̱ a cina tsu ta̱, zane ɗa aa wawa tsu e ekere a̱ musula̱ mu ucira n nda? Ele ɗa musula̱ n na n lapai aza a Masar na̱ cu'un vu mɓa̱la̱ suru a̱tsumona.
1SA 4:9 A̱ɗu aza a Filistiya, gbamai okolo yo o ali adama yo o'wo agbashi a mmaci ma Ibrahim a nda cine a̱ shi agbashi a̱ ɗu wan. Yuwain ali, i yuwan uvon!>>
1SA 4:10 Reve gba aza a Filistiya a yuwan uvon lon, reve a lyuwa aza a Isra'ila. A̱vu vuma suru suma a̱ ka̱mba̱ o oogodo a̱ yi. O una ta̱ ama a̱bunda̱ lon. Aza a Isra'ila a lamba ta̱ a̱soja a ana a na a̱ da̱na̱i a ana ukpakukupa mataꞌatsu (30,000) o urana u ndolo.
1SA 4:11 A usa ta̱ Akpati a Nzuwulai a̱ A̱sula̱. Reve waru o una olobo e re a̱ Eli, Hofini na̱ Finiha.
1SA 4:12 A̱vu vuma ro o ugundo wa Banyami suma diga uba̱ta̱ wu uvon, a̱vu u ta̱wa̱ Shilo o urana u ndolo'o na̱ a̱tugu a̱ yi wu karu na̱ ma̱buta̱ aaci a̱ yi, adama u roco wo a̱tsuma̱la̱ngu.
1SA 4:13 Ana u rawai, Eli da̱na̱ ta̱ lo nden o ootogu a̱ yi a̱ nge'en mu ure a̱ ka̱lyuwusa̱, adama a na okolo a̱ yi a̱ da̱na̱ ta̱ e meje'en adama a gbaga va Akpati a Nzuwulai a̱ A̱sula̱. Ana vuma'a u uwai a̱ lyuci'i, a̱vu u ca aalabari'i. A̱vu lyuci'i suru gidu'wa̱ na̱ mesun.
1SA 4:14 Ana Eli uwwai uɗyo u mesun, a̱vu we ece, <<Nye i ɗa i zuwai mesun ma̱ 'yoyin ne tsunda?>> Reve vuma'a u jika̱ u 'ya̱wa̱ ya̱ Eli,
1SA 4:15 za na da̱na̱i na a'wan kupakucci na̱ kunla̱, waru esu a̱ yi o o'woi ga̱nda̱ ga̱nda̱ u tse ene shi.
1SA 4:16 A̱vu vuma'a u damma Eli, <<Gogo nda ɗa n ka̱mba̱i diga uba̱ta̱ wu uvon, waru ana'an n suma ta̱ diga ɗe.>> Reve Eli ece yi, <<Nye i ɗa i farai, ulobo u va̱?>>
1SA 4:17 Reve malingata'a ma̱ usu, <<Aza a Isra'ila a sumaa ta̱ aza a Filistiya, o una ta̱ a̱za̱ o uvon na̱ a̱bunda̱. Waru olobo e re a̱ wu Hofini na̱ Finiha a̱ kuwa̱ ta̱. Waru a usa ta̱ Akpati a Nzuwulai a̱ A̱sula̱.>>
1SA 4:18 Ana wu uwwai a̱ ɗeyi aala a Akpati a Nzuwulai a̱ A̱sula̱, a̱vu Eli riya̱ melene diga o ootogu a̱ yi uba̱ta̱ u na u da̱na̱i nden e nge'en mo una̱ntsutsu u lyuci. A̱vu yinlu ya̱ yi i kuɗa reve u kuwa̱, adama a na u kutsa ta̱ waru u ta̱ mgbain. U yuwan ta̱ tsugbain tsa aza a Isra'ila a'wan amunga.
1SA 4:19 Jene va̱ yi, ka va Finiha da̱na̱ ta̱ na̱ a̱tsuma̱ ukotu azama limatan. Ana wu uwwai alabari a na a usa ta̱ Akpati a Nzuwulai a̱ A̱sula̱ na alabari a̱ a̱sha̱wa̱le na̱ vali va̱ yi a̱ kuwa̱ ta̱, ɗaɗa mɓa̱la̱ m limatan n reme niyi, reve u da̱nu teri a̱vu u matsan.
1SA 4:20 A̱yi azama u kuwa̱, a̱vu a̱ma̱ci a na a̱ ri uɓa̱nu na̱ a̱yi a damma yi, <<She vu uwwa wovon wan, vu matsan ta̱ ulobo.>> Agba u usu ko u ka̱mbuwa̱ ugbozu shi.
1SA 4:21 Reve u ca ulobo'o aala Ikabo, a dansa, <<Tsugbain tsa kasa ta̱ na̱ Isra'ila.>> Adama a na a usa ta̱ Akpati a Nzuwulai a̱ A̱sula̱ a̱ tyo we e iɗa yo omocin nu ukwa̱ wa̱ a̱sha̱wa̱le na̱ vali va̱ yi.
1SA 4:22 A̱vu u damma, <<Tsugbain tsa kasa ta̱ na̱ Isra'ila, adama a na a usa ta̱ Akpati a Nzuwulai a̱ A̱sula̱ a̱ tyo we e iɗa yo omocin.>>
1SA 5:1 Ana aza a Filistiya a usai Akpati a Nzuwulai a̱ A̱sula̱'a̱, a̱vu a tara yi diga Ebeniza a̱ tyo Ashido.
1SA 5:2 A̱vu a uwa to Akpati a Nzuwulai a̱ A̱sula̱'a̱, o u'wa u ma̱sula̱ ma Dagon, a̱vu a zuwa yi zuzu na̱ Dagon.
1SA 5:3 Ana aza a Ashido a̱ 'yoyin na̱ wasasa usana a matawaa a̱vu a cina Dagon riya̱ ma̱kpa̱ɓa̱ e iɗa elime a Akpati a Nzuwulai a̱ A̱sulazuva. A̱vu a̱ 'ya̱sa̱n Dagon a̱ ka̱mbuwa̱ yi uba̱ta̱ u na u shi.
1SA 5:4 Amma ana usana u tawisai na̱ wasasa ana a̱ 'yoyin, reve a cina Dagon riya̱ ma̱kpa̱ɓa̱ e iɗa elime a Akpati a Nzuwulai a̱ A̱sulazuva. A̱vu aaci a̱ yi ne ekere a̱ yi suru o koɗuloi reve u da̱na̱ nven o una̱ wu una̱ntsutsu, lipu va̱ yi ɗa goon shi buwai.
1SA 5:5 A̱yi ɗa i zuwai hali na ana'an babu ganu va Dagon ko aza a na a uwusa o u'wa ma̱sula̱ ma Dagon a̱tsuma̱ a Ashido a na u tsu dasa una̱ wu una̱ntsutsu wa Dagon.
1SA 5:6 A̱vu ukere wu ume wa̱ A̱sulazuva u ga̱la̱ aza a Ashido, oɓolo na̱ mulyuci n na a̱ ri uka̱nda̱ruwu ne ele na̱ meleshe ma̱ a̱bunda̱ ma amicin.
1SA 5:7 Ana ama a Ashido enei ne, ɗaɗa a dammai, <<She tsu lyawai Akpati a Nzuwulai a̱ ma̱sula̱ a aza a Isra'ila ma̱ da̱na̱ pa oɓolo na̱ a̱tsu wan! Adama a na ukere wu ume wa̱ A̱sulazuva u ta̱ a̱ nla̱ngi na̱ tsu lon, oɓolo na̱ Dagon ma̱sula̱ ma̱ a̱ tsu.>>
1SA 5:8 A̱vu ama a Ashido a̱ lyunguwa̱ a azagbain a Filistiya suru na̱ nlingata o ɓoloto, reve e ece le, <<Nye i ɗa tsaa yuwain na Akpati a Nzuwulai a̱ ma̱sula̱ ma aza a Isra'ila?>> Reve a̱ usu, <<Tarai Akpati a Nzuwulai a̱ ma̱sula̱ ma a aza a Isra'ila a̱ tyo a̱ lyuci va Gat.>> Ɗaɗa a tarai Akpati a Nzuwulai a̱ ma̱sula̱ ma a aza a Isra'ila a̱ tyo Gat.
1SA 5:9 Agba ana a tara niyi a̱ tyo ɗe, a̱vu ukere wu ume wa̱ A̱sulazuva u ga̱la̱ lyuci'i, a̱vu wu da'waton le lon. A̱vu u lyunguwa̱ ama a̱ lyuci'i na̱ mɓa̱la̱ ma amici. Zagbain na̱ mawun suru e reme ta̱ amici'in.
1SA 5:10 Ɗaɗa a tarai Akpati a Nzuwulai a̱ A̱sula̱ a̱ tyo Ekuron. Ana Akpati a Nzuwulai a̱ A̱sula̱'a̱ a uwai pe, a̱vu a aza a Ekuron o ɓosho na̱ yisali, a damma, <<A̱ ta̱wa̱ ta̱ na Akpati a Nzuwulai a̱ ma̱sula̱ ma a aza a Isra'ila pa ya̱'a̱ tsu adama wu una tsu oɓolo na ama a̱ tsu.>>
1SA 5:11 A̱vu a̱ lyunguwa̱ azagbain a aza a Filistiya suru na̱ nlingata reve o ɓoloto le, reve a damma, <<Tarai Akpati a Nzuwulai a̱ ma̱sula̱ ma a aza Isra'ila a̱ ka̱mba̱ uba̱ta̱ u na wu uta̱i, ta̱wa̱ wu una tsu na ama a̱ tsu suru wan.>> Adama a na lyuci'i u shiwan ta̱ na̱ wovon wu ukwa̱ lon, adama a na ukere wu ume wa̱ A̱sulazuva u ga̱la̱ le ta̱ uga̱lu lon.
1SA 5:12 Ozo o ro a̱tsuma̱ lyuci'i a̱ kuwa̱ ta̱ ɗe, waru akapi a na a buwai a̱ ta̱ pe a̱tsuma̱lima̱ adama a amicin a na a̱ ri nle a̱ lipu. A̱vu suru nle e showen ma̱sula̱ ma̱ le adama u kamba le.
1SA 6:1 Akpati a Nzuwulai a̱ A̱sulazuva a yuwan ta̱ woto cindere e iɗa ya Filistiya.
1SA 6:2 Reve aza a Filistiya e ɗe nan ganu na̱ a̱za̱ a̱ yindi a̱vu a damma le, <<Nye i ɗa tsaa yuwan na Akpati a Nzuwulai a̱ A̱sulazuva? Damma ntsu cine tsa̱a̱ ka̱mbuwa̱ yi uba̱ta̱ u na wu uta̱i.>>
1SA 6:3 Reve a̱ usu, <<Na̱ ya̱a̱ ka̱mbuwa̱ Akpati a Nzuwulai a̱ ma̱sula̱ ma aza a Isra'ila, she i ka̱mbuwa̱ yi lya̱nga̱ wan, amma i ta lyungu yi oɓolo na̱ kucci makuɗa ma̱ wila̱. Ne ɗa ya̱a̱ ka̱mba̱ gbaga, waru i te reve ili i na i zuwai ukere wa̱ A̱sulazuva a̱a̱ ga̱ga̱la̱ nɗu.>>
1SA 6:4 A̱vu aza a Filistiya a yuwan yeci, <<Cu'un kucci makuɗa ma̱ wila̱ u ne ɗa tsa̱a̱ lyunguwa̱ yi?>> Reve a̱ usu, <<Yuwayin uma'an wa amicin a zinariya o ton na̱ a̱ga̱ɗa̱ o ton a zinariya, o una̱ wa̱ a̱bunda̱ azagbain wa aza a Filistiya, adama a na cu'un vu mɓa̱la̱ n ta̱ n ɗa n reme nɗu na̱ azagbain a̱ ɗu.
1SA 6:5 Yuwain amicin na̱ a̱ga̱ɗa̱ a na a̱ tsu lyungususa̱ iɗa i ɗu. Na̱ ne ɗa yaa ca ma̱sula̱ ma aza a Isra'ila tsugbain. U ta gura yuwan u tawa oforo a aci a̱ ɗu na̱ musula̱ n ɗu ni iɗa i ɗu.
1SA 6:6 Nye i zuwai yaa yuwusan aciyogbamu cine aza a Masar na̱ Firi'awuna yuwain? She na A̱sula̱ ma aza a Isra'ila mo o'wo to nle ili yu ulamu ɗaɗa u lyawa nle a̱ ka̱ra̱i shi?
1SA 6:7 <<Gogo she i yuwan keke vi inan sa'avu, na̱ a̱na̱wun e inan e re aza a na a matsain usa'avu, waru aza a na koto a̱ nla̱ le a̱gba̱la̱ e keke vi inan shi. Yi nla̱ ina'an e keke sa'avu'u, amma i takatsuwa na̱ muwu'un a̱vu i gutsu le o u'wa.
1SA 6:8 I tara Akpati a Nzuwulai a̱ A̱sulazuva a̱vu i zuwa yi e keke, na akpati o ro vu uma'a wa̱ a̱ga̱ɗa̱ na̱ aza a amicin a zinariya zuzu na̱ a̱ yi, za na ya̱a̱ lyungu wa̱ yi o una̱ u kucci makuɗa ma̱ wila̱. A̱vu i lyawa le a̱ ka̱ra̱.
1SA 6:9 Amma yi idana uba̱ta̱ u na a saɓa. Na̱ a̱ kuru agawan a̱ tyo o upasu wa̱ yi a̱ tyo Bet Shemesh, wo o'wo ta̱ A̱sula̱ a aza a Isra'ila a ɗa ma̱ lyunguwa̱a̱ ntsu a̱tsuma̱lima̱ a gbain a nda. Amma na a yuwan ne shi, tsu ta̱ reve a na ukere wa̱ yi u ɗa u lapa ntsu shi, mɓa̱la̱ n ɗa goon n ta̱wa̱ ntsu.>>
1SA 6:10 Reve ama'a a yuwan cine a damma nle. A̱vu a zami inan i re a̱vu a̱ nla̱a̱ le keke vi inan, reve e reme muwu'un a̱ gutsu le o u'wa.
1SA 6:11 Reve a zuwa Akpati a Nzuwulai a̱ A̱sulazuva e keke'e oɓolo na akpati o ro o uma'an u zinariya va̱ a̱ga̱ɗa̱ nu uma'an wa amicin oɓolo na̱ yi.
1SA 6:12 A̱vu ina'an i kuru ure mejege a̱ tyo ugawun wu upasu wu utyo wa Bet Shemesh, a̱vu e reme ure na a sali o ure, agba a vadaluwa usa'ani ko ugula̱ shi. A̱vu azagbain a aza a Filistiya a̱ kuru le hali a̱ tyo wu upasu wu utyo wa Bet Shemesh.
1SA 6:13 A mantsa'a ama a Bet Shemesh a̱ da̱na̱ ta̱ o ugasa wo oroci a yitabo o uka̱ri. Ana a̱ 'ya̱sa̱in aaci e le reve e ene Akpati'i, a̱vu a uwa ma̱za̱nga̱ ma na e ene niyi.
1SA 6:14 Ana keke'e u rawai o uɗuma̱ wa̱ Josuwa va Bet Shemesh a̱vu wi isawan lo zuzu na aatali a gbain o ro. A̱vu ama'a a ɓatsa a̱gba̱la̱ a̱ keke'e reve a paɗa ina'an, a̱vu a yuwaan A̱sulazuva kucci vu ukula̱tosu na̱ le.
1SA 6:15 Ama o ugundo wa̱ Levi a̱ shi ta̱ ɗe a̱ cipa̱to Akpati a Nzuwulai a̱ A̱sulazuva'a zuva keke'e, oɓolo na akpati a na a̱ ri nu uma'an u zinariya. A̱vu a zuwa le a aatali a gbai'in. O urana u ndolo ama a Bet Shemesh a ca ta̱ kucci vu ukula̱tosu na̱ kucci ro uba̱ta̱ wa̱ A̱sulazuva.
1SA 6:16 Ana azagbain o ton ma aza a Filistiya me enei ili i na suru i farai reve a gitsa o urana u ndolo'o a̱ ka̱mba̱ Ekuron.
1SA 6:17 Apa nda uma'an u zinariya wa amicin na aza a Filistiya a̱ lyunguyi adama wo o'wo kucci makuɗa ma̱ wila̱ uba̱ta̱ wa̱ A̱sulazuva. Za ta̱ adama e ilyuci ya Ashido, za ta̱ adama a Gaza, za ta̱ adama a Ashikelon, za ta̱ adama a Gat, za ta̱ waru adama a Ekuron.
1SA 6:18 A̱bunda̱ a̱ a̱ga̱ɗa̱ o uma'an u zinariya'a u da̱na̱ ta̱ una̱ta̱ na̱ a̱bunda̱ e ilyuci ya azagbain o ton ndolo ma Filistiya. Ilyuci'i o ɓolo ta̱ ni ilyuci i na a suwayi kari vu ucira oɓolo na̱ mulyuci ma̱ a̱bunda̱ n na n ri na̱ kari shi. Aatali a gbain a na a zuwai Akpati a Nzuwulai ma̱ A̱sulazuva ɗe, za na ri uba̱ta̱ o uɗuma̱ wa̱ Josuwa vuma va Bet Shemesh u ta̱ lo o una̱ wu urotsu hali na ana'an.
1SA 6:19 A̱vu A̱sula̱ o una ama kupocindere aza a Bet Shemesh adama a na a̱ ka̱lyuwa̱ ta̱ a̱tsuma̱ Akpati a Nzuwulai a̱ A̱sulazuva'a. Reve ama a yuwan nden n wiruta̱ lon adama a ama a̱ a̱bunda̱ a na A̱sulazuva a lapa nle i ɗa.
1SA 6:20 A̱vu aza a Bet Shemesh a damma, <<Zane ɗa a gura isawan elime a̱ A̱sulazuva, A̱sula̱ a akiza a nda? Uba̱ta̱ wa̱ zane u ɗa tsa̱a̱ lyunguwa̱ Akpati a Nzuwulai a̱ A̱sulazuva tsa̱ra̱ wu kasa na̱ a̱tsu?>>
1SA 6:21 A̱vu a̱ lyungu nlingata a̱ tyo uba̱ta̱ wa ama a Kiriyat Jeyarim ana, <<Aza a Filistiya a̱ ka̱mbuwa̱ ta̱ Akpati a Nzuwulai a̱ A̱sulazuva. Cipa̱i i tara yi a̱ tyo uba̱ta̱ u ɗu.>>
1SA 7:1 Reve ama a Kiriyat Jeyarim a̱ cipa̱ a tara a gawan Akpati a Nzuwulai a̱ A̱sulazuva a̱ tyo o u'wa wa Abinada za na ri a aagaɗi. A̱vu a tawa Eliyaza ulobo wa̱ yi u yuwan ipiri ya Akpati a Nzuwulai a̱ A̱sulazuva'a.
1SA 7:2 Akpati a Nzuwulai'i a jima ta̱ a̱ lyuci va Kiriyat Jeyarim hali a'wan ushin. A̱tsuma̱ a mantsa mo ndolo, reve aza a Isra'ila suru e showen A̱sulazuva adama u kamba le.
1SA 7:3 Reve Sama'ila damma suru u'wa wa Isra'ila, <<Na̱ ya̱a̱ ka̱mba̱ uba̱ta̱ wa̱ A̱sulazuva no okolo a̱ ɗu suru, to, yoo oco musula̱ mo omocin a na a̱ ri a̱tsuma̱ a̱ ɗu na̱ a̱ma̱li a Ashitore. Reve i ca aciya̱ɗu suru e ekere a̱ A̱sulazuva, reve waru i yuwaan yi a̱ga̱nda̱ goon. Ne ɗa waa wawa ɗu e ekere a aza a Filistiya.>>
1SA 7:4 Reve aza a Isra'ila o oco a̱ma̱li a Ba'al na̱ a Ashitore, reve a yuwaan A̱sulazuva goon a̱ga̱nda̱.
1SA 7:5 Reve Sama'ila damma, <<Ɓolotoi aza a Isra'ila suru ɗe Mizfa, n ta pati A̱sulazuva adama a̱ ɗu ɗe.>>
1SA 7:6 Ana o ɓolotoi ɗe Mizfa, reve e kene mini a̱vu o oco yi e iɗa a̱ ma̱ka̱ka̱n ma̱ A̱sulazuva. Reve a yuwan akuli o urana u ndolo ma̱ɓula̱ reve a damma, <<Tsu yuwaan ta̱ A̱sulazuva unusu.>> Reve Sama'ila yuwan tsugbain tsa a aza a Isra'ila a Mizfa.
1SA 7:7 Ana azagbain aza a Filistiya a uwwai a na aza a Isra'ila o ɓoloto ta̱ a Mizfa, reve azagbain aza a Filistiya o uta̱ a gawan tsa̱ra̱ a̱ riya̱a̱ le nu uvon. Reve ana aza a Isra'ila a uwwai a̱ ta̱ lo a̱ ta̱wa̱, a uwwa ta̱ wovon wa aza a Filistiya.
1SA 7:8 Reve aza a Isra'ila a damma Sama'ila, <<Lyuwa elime na̱ mesun a̱ tyo e ekere a̱ A̱sulazuva A̱sula̱ a̱ tsu, tsa̱ra̱ u wawa tsu e ekere aza a Filistiya.>>
1SA 7:9 Reve Sama'ila paɗa mokyokyon, reve u ca kucci vu ukula̱tosu suru a̱ tyo ekere a̱ A̱sulazuva. Reve u pati A̱sulazuva a kamba aza a Isra'ila, reve gba u usu avasa a̱ yi.
1SA 7:10 A̱yi a̱tsuma̱ o casu kucci vu ukula̱tosu'u, reve aza a Filistiya a rawa adama a yuwan uvon na aza a Isra'ila. Amma o urana u ndolo gba reve A̱sulazuva a yuwan tsata tsu ucira a aci aza a Filistiya, reve u zuwa le a̱ ra̱pula̱. Ɗaɗa u lyuwa nle nu uvon, elime aza a Isra'ila.
1SA 7:11 Reve aza a Isra'ila o uta̱ ni ilaɗi diga Mizfa, reve o lo le o unusa le o ure hali a rawa uba̱ta̱ u ro zuzu na̱ Bet Ka.
1SA 7:12 Reve Sama'ila shuwa̱ aatali a gbain e memere ma Mizfa na̱ Shen. Reve u ca aataliꞌi aala Ebeniza, adansa, <<A̱sulazuva a ɗa a kamba n tsu hali acina gogo.>>
1SA 7:13 Ne ɗa a lyuwai aci a aza a Filistiya, waru a̱ da̱shi uwa upasu wi iɗa wa aza a Isra'ila shi. Suru a mantsa ma wuma wa Sama'ila, ukere wa̱ A̱sulazuva u da̱na̱ ta̱ a̱ nla̱ngi na aza a Filistiya.
1SA 7:14 Reve a̱ ka̱mbuwa̱a̱ aza a Isra'ila ilyuci i le aza a na aza a Filistiya a usa nle i ɗa, diga Ekuron a̱ tyo Gat. Aza a Isra'ila gba a wawa ta̱ pasu vi ilyuci i le suru diga e ekere a aza a Filistiya. Waru a̱tsura̱ ta̱ asuvu nden ekere aza a Isra'ila na̱ aza a Amoriya.
1SA 7:15 Ne ɗa Sama'ila lyuwai elime na̱ tsugbain tsa aza a Isra'ila hali ukosu u wuma wa̱ yi.
1SA 7:16 A aa'wan suru, u tsu 'ya̱wa̱ ta̱ a̱ka̱nda̱riya̱ diga Betel a̱ tyo Gilga na̱ Mizfa ba̱ta̱ na u da̱na̱i za vu uge'etosu wa a aza a Isra'ila.
1SA 7:17 Amma u tsu ka̱mbisa̱ ta̱ Rama a̱ lyuci va̱ yi, uba̱ta̱ u na u tsu yuwusaan fo aza a Isra'ila uge'etosu. Waru u suwaa ta̱ A̱sulazuva masa'a ɗe a Rama.
1SA 8:1 Ana Sama'ila kutsai, reve wo o'woto olobo a̱ yi a̱za̱ o uge'etosu aciya a aza a Isra'ila.
1SA 8:2 Aala o ulobo wu ufaru wa̱ yi u ɗa Juwe, aala aza ire waru Abija. A̱da̱na̱ ta̱ o ulinga wu uge'etosu a̱ lyuci va Biyasheba.
1SA 8:3 Agba ele a̱ da̱na̱ cine dada le da̱na̱i shi, a̱ shi ta̱ a̱ ka̱mbuwa̱ ugbozu u le e icigi yi ikebe lon. A̱ ushishi ta̱ utowusu wu una̱, a yuwusan uge'etosu u sa'ani shi.
1SA 8:4 Reve mbara ma aza a Isra'ila o ɓoloto, a̱vu a̱ 'ya̱wa̱ uba̱ta̱ wa Sama'ila ɗe Rama.
1SA 8:5 Reve a damma yi, <<Gogo vu kutsa ta̱, waru olobo a̱ wu a̱ ri cine vu ri shi. Adama o ndolo vu ca tsu mogono za na e ge'eto tsu waru u rono tsu aɗanga cine akapi a nɗa a̱ ri.>>
1SA 8:6 Ana a damma niyi, <<Ca tsu mogono za na e ge'eto tsu waru u rono tsu aɗanga,>> Sama'ila uwwa uyoꞌo shi ko ke'en. Reve u yuwan avasa a̱ tyo uba̱ta̱ wa̱ A̱sulazuva.
1SA 8:7 Reve A̱sulazuva a damma Sama'ila, <<Zuwa atsuvu e ili i na aa dansa wu suru. Adama a na a̱vu ɗa a̱ 'yuwain shi amma a̱mu ɗa a 'yuwain mo o'wo mogono me ele.
1SA 8:8 Cine a yuwain diga urana u na mu uta̱a̱ nle diga Masar hali a̱ tyo ana'an a lyawa numu ta̱ reve a yuwaan musula̱ n ro a̱ga̱nda̱. Waru ne ɗa aa yuwusaan wu.
1SA 8:9 To, gogo vu zuwaa le atsuvu, amma gba vu rono le atsuvu lon e ili i na mogono ma na maa yuwan tsugbain a aci e le waa yuwan ne ele.>>
1SA 8:10 Reve Sama'ila ka̱mbuwa̱ ama a na a patishi niyi mogono ili i na A̱sulazuva a dammai suru.
1SA 8:11 A̱vu u damma le, <<Nda ili i na mogono ma na maa yuwan tsugbain a aci a̱ ɗu waa yuwan na̱ a̱ɗu. U ta tara o olobo a̱ ɗu u zuwa le o'wo a̱soja a̱ yi, o ozo o ro o to o'wo a̱za̱ o ulinga ni ikeke yi ido yu uvon ya̱ yi, ozo o ro waru a ta kumba ido ya̱ yi, ozo o ro waru o to o'wo aza a na aa suma elime e ikeke yi ido yu uvon.
1SA 8:12 Ozo o ro waru u ta zuwa le o'wo yali a̱ a̱soja ukpakukupa (1000) na̱ a̱soja kupoton, ozo o ro waru a ta yuwan iluma yu uɗuma̱ wa̱ yi, a̱vu a gasa ishina ya̱ yi, a̱vu a rumaa yi itana yu uvon oɓolo ni itana yu ulinga adama e ikeke yi ido ya̱ yi.
1SA 8:13 U ta tara esheli a̱ ɗu u zuwa le mayan ma mani'in ma̱ ma̱guru, na̱ mpondo, nu ukangalu.
1SA 8:14 U ta usa pasu va̱ a̱ɗuma̱ a̱ ɗu a na a la'ai ulobonu, na̱ a̱ɗuma̱ a̱ ina̱bi a̱ ɗu, na̱ za vu ɗanga zetun u ca azagbain a̱ yi.
1SA 8:15 U ta usa za ta̱ a̱tsuma̱ a kupa vi itana yu una i ɗu, na̱ a̱za̱ a̱ ina̱bi a̱ ɗu, reve u ca azagbain o ukobu wa̱ yi oɓolo na akapi azagbain a̱ yi.
1SA 8:16 U ta usa agbashi a̱ ɗu aza a ali na̱ a̱za̱ a̱ a̱ma̱ci, ni inan i ɗu aza a na a la'ai u ulobonu, na̱ nloli n nɗu, adama a yuwusaan yi ulinga.
1SA 8:17 U ta usa za ta̱ a̱tsuma̱ a kupa vo oɓolo e ikyon i ɗu. Waru a̱ɗu na aciya̱ɗu i to o'wo agbashi a̱ yi.
1SA 8:18 Nu uranu u ndolo u ta̱wa̱, i ta̱ shon adama o mogono ma na i ɗangulayi aciya̱ɗu, agba A̱sulazuva a̱ usu ɗu shi.>>
1SA 8:19 Agba ama'a a zuwaa Sama'ila atsuvu e ili i na u damma nle shi. Reve a damma, <<Ko na̱ ne, tsu ciga ta̱ mogono ma na moo rono tsu aɗanga.
1SA 8:20 Ne ɗa tsoo o'wo cine akapi a nɗa a̱ ri. A̱yi ɗa woo o'wo tsu zagbain zana e ge'eto tsu waru a̱yi ɗa woo rono a̱ tsu aɗanga a̱ tyo uba̱ta̱ o uvon.>>
1SA 8:21 Ana Sama'ila uwwai ili i na ama'a a dammai suru, reve u cuɗuwa A̱sulazuva.
1SA 8:22 A̱vu A̱sulazuva a damma, <<Vu zuwaa le atsuvu a̱vu vu ca le mogono.>> A̱vu Sama'ila damma aza a Isra'ila, <<Vuma suru ka̱mba̱ a̱ lyuci va̱ yi.>>
1SA 9:1 A yuwan ta̱ vuma gbain vu utsuru u ro diga o ugundo wa Banyami, za na da̱na̱i na aala Kish ulobo wa Abiyel ulobo wa Zero ulobo wa Bekora, ulobo wa Afiya za vu ugundo wa Banyami.
1SA 9:2 U ta̱ nu ulobo u na a̱ tsu ɗe Shawulu, babu za va Isra'ila na la'a niyi ulobonu. U la'a ta̱ ama a Isra'ila suru uga'an.
1SA 9:3 Urana u ro, reve a̱na̱wu o nloli ma̱ Kish dada va Shawulu m puwa̱n, reve u damma Shawulu, <<Tara aagbashi a̱ ta̱ oɓolo na̱ a̱vu, tsa̱ra̱ i 'ya̱wa̱ i zami i le.>>
1SA 9:4 Reve a̱ kuru a̱ tyo e iɗa ya agaɗi ya Ifiramu ni iɗa ya Shalisha, agba a̱ tsura̱ e ene nloli'i shi. Reve a̱ ka̱ra̱ a̱ 'ya̱wa̱ e iɗa ya Sha'alim, agba nloli'i mu ɗe shi. Reve fo a̱ ka̱ra̱ a̱ tyo e iɗa ya Banyami, agba suru a̱ tsura̱ e ene le shi.
1SA 9:5 Ana a rawai e iɗa ya Zuf reve Shawulu damma aagbashi a na a̱ ri oɓolo na̱ a̱yi, <<Tsu ka̱mba̱ o u'wa fa. Na̱ ne ɗa shi, dada va̱ ta lyawa udamu wa̱ a̱na̱wu o nloli reve u reme udamu adama a̱ tsu.>>
1SA 9:6 Amma a̱vu aagbashi'i a̱ usu yi u damma, <<Ka̱lyuwa̱ a̱ ta̱ pa na̱ vuma va̱ A̱sula̱ o ro a̱tsuma̱ a̱ lyuci nda za na a casu tsugbain lon, adama a na suru ili i na u dammai u tsu shiwan ta̱. Tsu ka̱ra̱ a̱ tyo uba̱ta̱ wa̱ yi gogo, u ta gura wo o'wo u damma tsu uba̱ta̱ u na tsoo toni.>>
1SA 9:7 Reve Shawulu ece aagbashi a̱ yi, <<To, na̱ tsu 'ya̱wa̱ uba̱ta̱ wa̱ yi nye i ɗa tsaa ca yi? Ilyalya i na tsu ri na̱ a̱yi a̱tsuma̱ e itsa̱n o koto ta̱, agba tsu ri ni ili i na tsaa ca yi shi. Ko tsu ta̱ na̱ i ili i ro i na tsa ca yi?>>
1SA 9:8 Reve aagbashi'i a̱ usuwisa̱ Shawulu u damma, <<Ka̱lyuwa̱, n ta̱ pa ni ikebe i azurufa ke'en. N ta ca vuma va̱ A̱sula̱'a̱ adama u damma tsu uba̱ta̱ u na tsoo toni.>>
1SA 9:9 Cine u shi a̱tsuma̱ a Isra'ila na̱ vuma ciga we ece A̱sula̱, u tsu damma ta̱, <<Ta̱wa̱ tsu 'ya̱wa̱ uba̱ta̱ wu za yindi,>> adama a na za na a̱ tsu ɗe vumava̱sula̱ ana'an, a̱ shi ta̱ a̱ tsu ɗe yi za yindi.
1SA 9:10 Reve Shawulu damma aagbashi a̱ yi, <<U lobono ta̱, ta̱wa̱ tsu ka̱ra̱.>> A̱vu e reme ure a̱ tyo a̱ lyuci na vuma va̱ A̱sula̱ da̱na̱i.
1SA 9:11 A mantsa ma na a̱ da̱na̱i a kumbusa aagaɗi a̱ tyo a̱ lyuci'i, reve a ga'an ne esheli a na a̱a̱ 'ya̱wa̱ o ooko'o adama e kene mini, reve e ece e le, <<Za yindi ta̱ pa nda'a?>>
1SA 9:12 Reve a̱ usu a damma, <<U ta̱ pa, u ta̱ ɗe elime a̱ ɗu. Jika̱i adama a na gogo ɗa u uwai a̱tsuma̱ a̱ lyuci'i, adama a na ana'an ama a̱ ta̱ na̱ kucci uba̱ta̱ wa̱ a̱ga̱nda̱.
1SA 9:13 A̱ɗu a ma'uwaa a̱ lyuci'i i ta cina yi babu u ka̱ra̱ a̱ tyo uba̱ta̱ wa̱ a̱ga̱nda̱ a na wa lyuwa ilyalya. Adama a na ama aa lyuwa ilyalya shi she nu u ta̱wa̱, adama a na she nu u zuwaa kucci'i aba'un. Na̱ a̱yi ndolo koto, a̱vu aza a na a banuyi a lyuwa ilyalya. Ka̱ra̱i a gawan gogo, adama a na gogo ɗa mantsa ma na ya̱ tsura̱ ye enei.>>
1SA 9:14 A̱vu a̱ ka̱ra̱ a̱ tyo a̱ lyuci. Ele a ma'uwaa ma̱ lyuci'i, reve e ene Sama'ila a̱ mota̱a̱ ana a ga'ansa na̱ a̱yi a̱ 'ya̱wa̱ a gawan uba̱ta̱ wa̱ a̱ga̱nda̱.
1SA 9:15 Urana u ta̱ kafu urana u na Shawulu a̱ 'ya̱wa̱, A̱sulazuva o roco ta̱ ɗe Sama'ila ili i nda u damma,
1SA 9:16 <<Nfa'an a mantsa ma nda n ta̱ lyungu wa̱ wu vuma diga o ugundo wa Banyami. Vu tsuwa̱n yi mani'in wo o'wo zagbain va ama a̱ va̱, aza a Isra'ila. U ta wawa ama a̱ va̱ e ekere a aza a Filistiya. Me ene ta̱ a̱tsuma̱lima̱ a na ama a̱ va̱ aa uwwusa, adama a na mu uwwa ta̱ mesun me le.>>
1SA 9:17 Ana Sama'ila enei Shawulu, ɗaɗa A̱sulazuva a damma niyi, <<Apa vuma na ma̱a̱ ka̱mbuwusa̱ a̱ wu'u. A̱yi ɗa waa yuwan tsugono tsa a ama a̱ va̱, aza a Isra'ila.>>
1SA 9:18 Reve Shawulu rawa ya Sama'ila o una̱ntsu u lyuci, a̱vu we ece, <<Vu ta̱ yuwan ankuri vu damma mu uba̱ta̱ u na u'wa wu za yindi u ri?>>
1SA 9:19 Reve Sama'ila usu Shawulu, <<A̱mu ɗaɗa za yindi'i! Walai elime a̱ va̱ a̱ tyo uba̱ta̱ wa̱ a̱ga̱nda̱. Ana'an i ta lyuwa oɓolo na̱ a̱mu. Nfa'an nu usana n ta̱ usu yeci ya̱ wu suru, a̱vu n lyawa ɗu i ka̱ra̱ a̱ ka̱mba̱.
1SA 9:20 She u ɓa̱la̱ wu adama a̱na̱wu o nloli n na puwa̱yin rana ta'atsu na ka̱ra̱i wan, adama a na a̱ tsura̱ le ta̱ ɗe. Suru ili i na okolo aza a Isra'ila a cigai a̱vu ɗa nu umatsun wa dada va̱ wu.>>
1SA 9:21 Reve Shawulu usu, <<Amma a̱mu za vu ugundo wa Banyami u ɗa, za na la'ai uka̱la̱mu suru suru a̱tsuma̱ o gundo wa aza a Isra'ila! Waru umatsun u tsu u ɗa u la'ai uka̱la̱mu a̱tsuma̱ o ugundo tsu! Cine vu yuwaan numu cu'un va adanshi a nda?>>
1SA 9:22 Reve Sama'ila uwa na̱ Shawulu na aagbashi a̱ yi a aasula a gbain, a̱vu u zuwa le a̱ da̱nu elime uba̱ta̱ u na aza a na a banuyi a̱ ri, a ta rawa ama mata'atsu.
1SA 9:23 Reve Sama'ila damma za na a yuwusan ilyalya, <<Ta̱wa̱a̱ mu na apaɗi a nama a na n ca nuwu, za na n damma nuwu, <Zuwa yi ko'o.> >>
1SA 9:24 Reve za na a yuwusan ilyalya'a ta̱wa̱a̱ na aagutsu a mani'in u zuwa yi a̱ ma̱ka̱ka̱n ma Shawulu. A̱vu Sama'ila damma yi, <<A̱yi nda a̱yi ɗa inama i na a zuwai adama a̱ wu. Vu tama, adama a na a tawa yi ta̱ la̱nga̱ adama a̱ wu a̱buki a nda, a mantsa ma na n dammai n ta̱ na̱ aza a na n banuyi.>> A̱tsuma̱ o uranu u ndolo Shawulu lyuwa ta̱ oɓolo na̱ Sama'ila.
1SA 9:25 A mantsa ma na a̱ cipa̱i diga uba̱ta̱ wa̱ a̱ga̱nda̱ a̱ tyo a̱ lyuci, a̱vu Sama'ila yuwan adanshi na̱ Shawulu ɗe zuva va aasula a̱ yi.
1SA 9:26 Reve a̱ 'yon na̱ wasasa, a̱vu Sama'ila ɗe Shawulu ɗe a aasula, <<Foɓo, n ta lyawa wu vu ka̱ra̱.>> Ana Shawulu foɓoi, ɗaɗa a̱yi na̱ Sama'ila a̱ ka̱ra̱i oɓolo.
1SA 9:27 A mantsa ma na a̱ da̱na̱i a cina ukosu u lyuci, a̱vu Sama'ila damma Shawulu, <<Vu damma aagbashi a̱ wu u ka̱ra̱ elime a̱ tsu.>> Ana a aagbashi'i u ka̱ra̱i elime'e, reve Sama'ila damma yi, <<Vu puro pa ne'e adama n ca wu ikaka diga uba̱ta̱ wa̱ A̱sula̱.>>
1SA 10:1 Reve Sama'ila tara meden ma mani'in, a̱vu u tsuwa̱n Shawulu a aaci. Reve u katala yi ɗaɗa u dammai, <<A̱sulazuva a̱ tsuwa̱a̱n wu ta̱ mani'in tsa̱ra̱ voo oꞌwo zagbain va a ama agadu a̱ yi.
1SA 10:2 Mantsa ma na vu kasai na̱ a̱mu ana'an, vu ta ga'asan na ali e re zuzu na ason a Rahila a Zeliza upasu wu utyo wa Banyami. A ta damma wu, <A̱ tsura̱ ta̱ a̱na̱wu o nloli'i na vu uta̱i izami'i. Gogo dada ɗu lyawa ta̱ udamu adama e le, u fara ta̱ udamu adama a̱ ɗu. U da̱na̱ ta̱ a̱ yeci, <<Cine maa yuwan adama n bunga̱ o ulobo u va̱?>> >
1SA 10:3 <<A̱vu vu lyuwa elime na̱ mmalu diga lo hali she na̱ vu rawa o uɗanga wo oku wa Tabo. Ama a ta'atsu a ta ga'asan na̱ a̱vu lo a gawan a̱ tyo uba̱ta̱ wa̱ a̱ga̱nda̱ wa̱ A̱sula̱ a̱tsuma̱ e Betel. Za ta̱ ta̱ da̱na̱ utanuwu na̱ mugbgbele n ta'atsu, za ta̱ waru ta̱ da̱na̱ na akpatali a ta'atsu o opopofu, za ta̱ waru na̱ itsa̱n vu kwan masayan ma̱ ina̱bi.
1SA 10:4 A̱ ta̱ ca̱sa̱ wu, a̱vu a cawu akpatali o opopofu ejere, a̱vu vu ushi le o ukere u le.
1SA 10:5 <<Reve vu ka̱ra̱ a̱ tyo aagaɗi a̱ A̱sula̱ a Gibiya uba̱ta̱ u na aza a Filistiya a̱ ri nu uva̱la̱ta̱ wo oɓolo a̱ a̱soja. A̱vu a marawaa a̱ lyuci'i, vu ta cina iɓolo ya ama̱sula̱ a̱ cipusa̱ diga uba̱ta̱ wa̱ a̱ga̱nda̱ a wa'asa igaraya na̱ muganga ni igbala ni ikumburu. Waru a̱ ta̱ da̱na̱ a yuwusan adanshi e ikaka ya̱ A̱sula̱.
1SA 10:6 Ruhu va̱ A̱sulazuva ta̱ cipa̱a̱ wu nu ucira, a̱vu vu yuwan adanshi e ikaka ya̱ A̱sula̱ oɓolo ne ele, vu ta vadala vo o'wo vuma ro ko'o.
1SA 10:7 Ni iroci i ndolo i shiwan, a̱vu vu yuwan ili i na ve enei i lobonoi. Adama a na A̱sula̱ a̱ ta̱ oɓolo na̱ a̱vu.
1SA 10:8 <<Reve vu zura̱ a̱ tyo Gilga elime a̱ va̱ vu puro mu. Na amayun n ta̱ ta̱wa̱ ya̱'a̱ wu n yuwan kucci vu ukula̱tosu na̱ kucci muwwulai, amma ko vu ciga ko vu 'yuwan vu ta̱ puro mu lo hali rana cindere hali n ta̱wa̱ n damma wu ili i na vaa yuwan.>>
1SA 10:9 Mantsa ma na Shawulu vadalai a na wa̱a̱ ka̱ra̱ u lyawa Sama'ila, a̱vu A̱sula̱ a vadala okolo a Shawulu, a̱vu iroci i na suru Sama'ila dammai a shiwan o urana u ndolo.
1SA 10:10 Ana Shawulu oɓolo na a aagbashi a̱ yi a rawai Gibiya, a̱vu iɓolo ya ama̱sula̱ a cina yi, a̱vu Ruhu va̱ A̱sula̱ cipa̱a̱ yi nu ucira, a̱vu u uwa a yuwusan adanshi e ikaka ya̱ A̱sula̱ oɓolo ne ele.
1SA 10:11 Ana suru aza a na e reve niyi nu ujumu a cina ana'an e ene niyi a yuwusan adanshi e ikaka ya̱ A̱sula̱ oɓolo na ama̱sula̱, reve e ecelei, <<Nye i ɗa i tsura̱i ulobo wa̱ Kish? Shawulu fo u ta̱ a̱tsuma̱ a ama̱sula̱?>>
1SA 10:12 A̱vu vuma na ri lo na̱ nden usu, <<Akapi i gba nan dada le fo ama̱sula̱ a ɗa?>> A̱yi nda wo o'wo ta̱ avandaru a adanshi, <<Shawulu fo u ta̱ pe a̱tsuma̱ a ama̱sula̱?>>
1SA 10:13 Ana Shawulu kotoi a yuwusan adanshi e ikaka ya̱ A̱sula̱'a̱, a̱vu u ka̱ra̱ a̱ tyo uba̱ta̱ wa̱ a̱ga̱nda̱.
1SA 10:14 A̱vu dada ke'en va̱ yi ece yi na̱ aagbashi a̱ yi, <<A̱ te ɗa i 'ya̱wa̱i?>> Reve u usu, <<Tsu 'ya̱wa̱ ta̱ izami ya̱ a̱na̱wun o nloli. Ana tse ene nle shi, ɗaɗa tsu 'ya̱wa̱i ya Sama'ila.>>
1SA 10:15 A̱vu dada ke'en va Shawulu damma, <<Damma numu ili i na Sama'ila damma nɗu.>>
1SA 10:16 Reve Shawulu usu yi, <<U damma tsu ta̱ na amayun a na a̱ tsura̱ ta̱ ɗe a̱na̱wun o nloli'i.>> Agba u damma dada ke'en va̱ yi ili i na Sama'ila damma niyi adama o tsugono shi.
1SA 10:17 Reve Sama'ila ɗe ama a Isra'ila suru, tsa̱ra̱ a ga'asan a̱ ma̱ka̱ka̱n ma̱ A̱sulazuva a Mizfa.
1SA 10:18 Ana a ta̱wa̱i a̱vu Sama'ila damma le, <<Apa ili i na A̱sulazuva, A̱sula̱ a aza a Isra'ila a dammai, <Mu uta̱a̱ ta̱ aza a Isra'ila diga e iɗa ya Masar, reve n wawa ɗu e ekere a aza a Masar na̱ tsugono tsa na tso ɓongishi nɗu suru.>
1SA 10:19 Amma gogo i 'yuwan ta̱ A̱sula̱ a̱ ɗu za na wawa nɗu a̱tsuma̱ e meleshe na addama suru. Reve i damma, <Ko na̱ ne, vu ca tsu mogono.> Gogo ta̱wa̱i, ɓolotoi aciya̱ɗu a̱ ma̱ka̱ka̱n ma̱ A̱sulazuva o una̱ wu gundo na̱ matsun ɗu.>>
1SA 10:20 Reve Sama'ila ta̱wa̱to aza a Isra'ila suru zuzu a̱ ma̱ka̱ka̱n ma̱ A̱sulazuva gundo gundo, reve a ɗangwa ugundo wa Banyami na̱ mazuwa ma agita.
1SA 10:21 Waru, a̱vu Sama'ila ta̱wa̱a̱ nu ugundo wa̱ Banyami, umatsun umatsun, a̱ ma̱ka̱ka̱n ma̱ A̱sulazuva, reve a ɗangwa umatsun wa Matiri. O ukosu reve a ɗangwa Shawulu ulobo wa̱ Kish. Agba ana a zami niyi a̱ tsura̱ ene yi shi.
1SA 10:22 Reve e ece A̱sulazuva, <<Koto vuma'a u rawa pa shi?>> Reve A̱sulazuva a damma, <<U ta̱ ɗe upa'awun e itana ya̱ a̱soja.>>
1SA 10:23 Reve ama a suma a̱ 'ya̱wa̱ a̱ ta̱wa̱ na̱ a̱yi, reve ana wi isawain e memere ma ama u la'a za suru uga'an.
1SA 10:24 Reve Sama'ila damma ama'a, <<Apa vuma na A̱sulazuva a ɗangwai. Babu tsa̱ yi a̱tsuma̱ a ama suru.>> Reve ama'a a saala, <<Wuma wa̱ wu u jima, mogono!>>
1SA 10:25 Reve Sama'ila cuɗuwa ama ili i na mogono ma na maa yuwan tsugbain a aci e le waa yuwan ne ele. Reve u ɗana le suru a̱tsuma̱ a aatagada o ukutsulusu, a̱vu u zuwa yi a̱ ma̱ka̱ka̱n ma̱ A̱sulazuva. Reve Sama'ila bete'we ama suru a̱ ka̱mba̱ a 'wa le.
1SA 10:26 Shawulu fo u ka̱mba̱ ta̱ o u'wa wa̱ yi a Gibiya, oɓolo na ali o ukadu aza a na A̱sula̱ a̱ ju'wa̱in okolo e le e shewun yi ta̱.
1SA 10:27 Amma ama a vama a damma ta̱, <<Cine tsa ɗa vuma nda aa gura wawa tsu?>> A̱vu o goro yi a 'yuwan a̱ ta̱wa̱a̱ yi nu une'e. Amma a̱yi gba u rungwa̱ ta̱ kpen.
1SA 11:1 Ana a jimanuyi, reve Nahash mogono ma aza a Amon ma̱ ka̱nda̱ruwa̱ lyuci va Jabe Giliyadu adama uriya̱ yi nu uvon. A̱vu suru ali a Jabe a damma yi, <<Yuwan nzuwulai na̱ a̱tsu, tsu ta yuwaan wu a̱ga̱nda̱.>>
1SA 11:2 Amma Nahash va Amon usu le ta̱, <<N ta yuwan nzuwulai na̱ a̱ɗu adama e ili i ta̱, a̱yi ɗa n kongoro esu o usa'ani a̱ ɗu suru adama yo o'wo ili yi izo'oshi uba̱ta̱ wa aza a Isra'ila suru.>>
1SA 11:3 A̱vu mbara ma Jabe n damma yi, <<Ca tsu rana cindere tsa̱ra̱ tsu lyungu nlingata a̱ tyo upasu wa aza a Isra'ila suru. Na̱ babu za na aa wawa tsu, reve tsu caa aciya̱tsu ya̱'a̱ wu.>>
1SA 11:4 Ana nlingata'a n rawai Gibiya lyuci na Shawulu ri, a̱vu a cuɗuwa ama adanshi a nda. Reve ama'a suru a shon na̱ yisali lon.
1SA 11:5 A mantsa'a a gba wuntsa ta̱ Shawulu a̱ ka̱mba̱ diga o uɗuma̱ ni inan yi iluma ya̱ yi elime. A̱vu we ece, <<Nye i ɗa i tsura̱i ama a na a̱ ri e mesun?>> A̱vu a̱ ka̱mbuwa̱ yi ili i na ama a Jabe a dammai.
1SA 11:6 Ana Shawulu uwwai adanshi e le, a̱vu Ruhu va̱ A̱sula̱ cipa̱a̱ yi nu ucira, a̱vu wu uwwa upan lon.
1SA 11:7 A̱vu wu paɗa inan i re apaɗi apaɗi, ɗaɗa u cayi nlingata a̱ 'ya̱wa̱ ne ele uba̱ta̱ suru a̱tsuma̱ a Isra'ila, a dansa, <<Suru za na uta̱i u kuruyi Shawulu na̱ Sama'ila shi, ne ɗa a yuwan ni inan ya̱ yi.>> Ɗaɗa wovon wa̱ A̱sulazuva u remei ama a Isra'ila lon. Reve ali o uta̱ nu uta̱.
1SA 11:8 Ana Shawulu ɓoloto nle ɗe Beze, ama ukpakukupa ukpakuta'atsu (300,000) diga Isra'ila, ama ukpakukupa mata'atsu (30,000) waru diga Yahuda.
1SA 11:9 Reve a damma nlingata n na n ta̱wa̱i'i, <<Dammayi ama a Jabe Giliyadu, <Kafu urana u suɗuwa nfa'an, i ta̱ tsura̱ iwawi.> >> Ana nlingata'a n 'ya̱wa̱i nu udammu uba̱ta̱ wa ama a Jabe a̱vu a yuwan ma̱za̱nga̱.
1SA 11:10 A̱vu a damma aza a Amon, <<Nfa'an tsu ta ca aciya̱tsu e ekere a̱ ɗu, reve i yuwan na̱ a̱tsu ili i na ye enei u lobono nɗu.>>
1SA 11:11 Na ayin o ndolo reve Shawulu ne'eshen ama a̱ yi oɓolo a ta'atsu. A̱vu a̱ 'ya̱wa̱ va̱la̱ta̱ va aza a Amon nu uvon diga ili ya ayin a̱ tyo wasasa. Reve a uwa mona me le hali urana u rawa a aci. A̱vu e bete'we aza a na a la'ai, babu aza a na e gerei ama e re re.
1SA 11:12 A̱vu ama a Isra'ila a damma Sama'ila, <<A̱ te ɗa aza a na a dammai, <Cine aa yuwan Shawulu yuwan tsugono tsa̱ tsu?> Ta̱wa̱a̱ ntsu na ama'a tsu una le.>>
1SA 11:13 Amma Shawulu damma ta̱, <<Babu ko vuma ta̱ na o una ana'an. Adama a na urana wa ana'an u ɗa A̱sulazuva a yuwayin aza Isra'ila iwawi.>>
1SA 11:14 A̱vu Sama'ila damma ama'a, <<Ta̱wa̱i tsu 'ya̱wa̱i Gilga adama tsu da̱shi usu Shawulu mogono ma̱ tsu ɗe.>>
1SA 11:15 Ɗaɗa ama'a suru a̱ 'ya̱wa̱i ɗe Gilga a̱vu a kucinato Shawulu mogono a̱ ma̱ka̱ka̱n ma̱ A̱sulazuva. Ɗe ɗa a cayi kucci muwwulai a̱ ma̱ka̱ka̱n ma̱ A̱sulazuva. Reve Shawulu na ama a Isra'ila suru a yuwan ma̱za̱nga̱ ma̱ a̱bunda̱.
1SA 12:1 A̱vu Sama'ila damma ama a Isra'ila suru, <<To, mu uwwa ta̱ suru ili i na i damma numu, a̱vu n ca ɗu mogono.
1SA 12:2 Gogo i ta̱ na̱ mogono zagbain ɗu. A̱mu gba, n kutsa ta̱ na̱ yono, waru olobo a̱ va̱ a̱ ta̱ lo oɓolo na̱ a̱ɗu. Mo o'wo ta̱ zagbain ɗu diga a̱mu o ulobo hali a cina ana'an.
1SA 12:3 A̱mu ɗa nda elime a̱ ɗu. Damma numu a̱ ma̱ka̱ka̱n ma̱ A̱sulazuva, oɓolo na̱ zana u tsuwa̱n yi mani'in. Zane ɗa n usai nan ko mololi? Zane ɗa n paalai ko n ɓongi yi? Zane ɗa n kuɗa̱i a yuwaan mejege? O ukere wa zane ɗa n ushiyi utowusu wu una̱ adama m ɓa̱ru esu a̱ va̱? Na̱ n yuwan ta̱ za ta̱ a̱tsuma̱ e le, i damma mu tsura̱ n ka̱mbuwa̱a̱ yi.>>
1SA 12:4 A̱vu a̱ usu, <<Vu paala tsu shi waru vu ɓongi tsu shi. Vu ushi ko ili i ta̱ o ukere u vuma shi.>>
1SA 12:5 Reve Sama'ila damma le, <<A̱sulazuva oɓolo na̱ mogono ma na u tsuwa̱yin mani'in ana'an, ele ɗa lyusu va̱ ekere a̱ ɗu, a na i tsura̱i ili i ro o ukere u va̱ shi.>> A̱vu a̱ usu, <<A̱sulazuva a ɗa lyusu tsu.>>
1SA 12:6 Reve Sama'ila yuwan adanshi na ama'a u damma, <<A̱sulazuva a ɗa a ɗangulai Musa na̱ Haruna, za a na o uta̱yi nkaya n ɗu e iɗa ya Masar.
1SA 12:7 Gogo she yi isawan pa a̱ ma̱ka̱ka̱n ma̱ A̱sulazuva, adama n cuwaan ɗu na̱ linga va̱ a̱ɓula̱ na A̱sula̱zuva a yuwaan nɗu na̱ nkaya n ɗu.
1SA 12:8 <<Mantsa ma na Yakubu ka̱ra̱i a̱ tyo Masar, nkaya n ɗu n showen ta̱ A̱sulazuva. A̱vu A̱sulazuva a̱ lyungu Musa na̱ Haruna aza a na o uta̱yi nkaya n ɗu diga e iɗa ya Masar a̱vu a̱ ta̱wa̱to le uba̱ta̱ u nda a̱ da̱nu.
1SA 12:9 <<Amma gba a̱vu e icina na̱ A̱sulazuva A̱sula̱ e le. Ɗaɗa u zuwa nle e ekere a Sisera, yali a̱ a̱soja ya Hazo, ne ekere a aza a Filistiya, na̱ mogono ma Mowa, aza a na a yuwain uvon ne ele.
1SA 12:10 Reve a̱ showen A̱sulazuva a̱vu a damma, <Tsu yuwan ta̱ unusu, tsu lyawa ta̱ A̱sulazuva, reve tsu ka̱ra̱ a yuwusaan a̱ma̱li a Ba'al na̱ Ashitore a̱ga̱nda̱. Amma gogo wawa tsu e ekere a n'yuwatan n tsu, tsu ta yuwaan wu a̱ga̱nda̱.>
1SA 12:11 Ɗaɗa A̱sulazuva a̱ lyungu Jeruba'al za na a̱yi ɗa Gidiyon, na̱ Barak na̱ Japuta na̱ a̱mu Sama'ila. A̱vu u wawa ɗu e ekere a n'yuwatan n ɗu upasu suru, adama i yuwan nden gbaga.
1SA 12:12 <<Amma a na ye enei Nahash mogono ma Amon ma̱ ta̱ ta̱wa̱a̱ ɗu nu uvon, reve i damma mu, <Ko na̱ ne, tsu ciga ta̱ mogono ma na ma yuwan tsugono tsa̱ tsu,> ko na wo o'woi A̱sulazuva A̱sula̱ a̱ ɗu a ɗa a̱ shi mogono ma̱ ɗu.
1SA 12:13 Gogo nda mogono ma na i ɗangulai, zana i pati ta̱ adama a̱ yi, gogo a̱yi ɗa nda A̱sulazuva a ca nɗu a̱ yi.
1SA 12:14 Na̱ yu uwwa wovon wa̱ A̱sulazuva, a̱vu i yuwaan yi a̱ga̱nda̱, na̱ tsutoni, agba i yuwan aciyogbamu e ekere a̱ wila̱ wa̱ yi shi, waru na̱ a̱ɗu na̱ mogono ma na maa yuwusan tsugono tsa̱ ɗu i kuru A̱sulazuva A̱sula̱ a̱ ɗu, u to lobono ɗu.
1SA 12:15 Amma ni i 'yuwan a na yaa yuwan tsutoni na̱ A̱sulazuva reve i yuwan aciyogbamu e ekere a̱ wila̱ wa̱ yi, ukere wa̱ A̱sulazuva a ta yuwan nla̱ngi na̱ a̱ɗu, cine u da̱na̱i ɗe na̱ nkaya nɗu.
1SA 12:16 <<Gogo isawain ye ene ili i gbain ya asalama i na A̱sulazuva a yuwan e esu a̱ ɗu.
1SA 12:17 Gogo mantsa me e ikani yo oroci a yitabo i ɗa shi? Waru mantsa me iro'i i ɗa shi. N ta pati A̱sulazuva u lyungu na̱ tsata ni iro'i. Waru i reve ili yu uwuyanu i gbain i na i yuwain e esu a̱ A̱sulazuva a na i pati niyi u ca ɗu mogono.>>
1SA 12:18 A̱vu Sama'ila pati A̱sulazuva, o urana u ndolo a̱vu A̱sulazuva a̱ lyungu na̱ tsata ni iro'i. Ɗaɗa ama suru a uwwai wovon wa̱ A̱sulazuva na̱ Sama'ila.
1SA 12:19 Reve ama suru a damma Sama'ila, <<Yuwan ipati adama a̱ tsu a agbashi a̱ wu uba̱ta̱ wa̱ A̱sulazuva A̱sula̱ a̱ wu, adama tsu kuwa̱ wan. Adama a na tsu da̱shi ta̱ unusu u tsu suru iwuya, uba̱ta̱ e ipati i na aa ca tsu mogono.>>
1SA 12:20 Reve Sama'ila damma, <<She yu uwwa wovon wan, ko na wo o'woi i yuwan ta̱ iwuya i nda suru. Suru na̱ ne she i vadala ucina̱ i lyawa itoni ya̱ A̱sulazuva wan, amma i yuwaan yi a̱ga̱nda̱ no okolo a̱ ta̱.
1SA 12:21 She i vadala a̱ tyo uba̱ta̱ u musula̱ me pere wan. Adama a na aa yuwaan ɗu isa'ani shi, ko a wawa ɗu shi, adama a na a̱ ri nu urana shi.
1SA 12:22 Adama a ala a gbain a̱ yi, A̱sulazuva aa vari ama a̱ yi shi. Adama a na u yo'ono ta̱ A̱sulazuva wo o'wo to ɗu ama a̱ yi.
1SA 12:23 A̱mu na aciya̱va̱ gba, A̱sulazuva aa para n yuwaan yi unusu uba̱ta̱ o ulambu u mayan ma avasa adama a̱ ɗu. Waru n to roco ɗu ure u na u ri mejege nu ulobonu.
1SA 12:24 Agba i reve yu uwwa ta̱ wovon wa̱ A̱sulazuva, a̱vu i yuwaan yi a̱ga̱nda̱ na amayun no okolo a̱ ta̱. I cuwan na̱ ili i gbain ya asalama i na u yuwaan nɗu.
1SA 12:25 Amma ni i lyuwa elime nu unusu, a̱ɗu na̱ mogono ma̱ ɗu a̱ ta̱ e iza̱ a̱ ɗu.>>
1SA 13:1 Shawulu na a'wan mata'atsu ɗaɗa wo o'woi mogono, waru u yuwan ta̱ tsugono tsa Isra'ila a'wan amunga ne ejere.
1SA 13:2 Reve Shawulu ɗangulaa aciya̱yi ama ukpakukupa uta'atsu (3,000) a̱tsuma̱ a ama a Isra'ila. Ama ukpakukupa ure (2,000) a̱ da̱nu ta̱ na̱ yi ɗe Mikimash, oɓolo na̱ iɗa ya agaɗi ya Betel. Waru ukpakukupa (1,000) u da̱na̱ ta̱ na̱ Jonata ɗe Gibiya upasu wa Banyami. Akapi a ama gba Shawulu lyawa le ta̱ a̱ ka̱mba̱ a 'wa le.
1SA 13:3 Jonata riya̱a̱ ta̱ va̱la̱ta̱ va aza a Filistiya nu uvon ɗe Geba, waru aza a Filistiya a uwwa ta̱ a ɗa e ili i na i farai. A̱vu Shawulu lyungu ee ivula̱ aavana e iɗa suru a̱vu a damma, <<Lyawa Mmaci ma Ibrahim mu uwwa!>>
1SA 13:4 A̱vu aza a Isra'ila suru a uwwa alabari a na Shawulu riya̱a̱ ta̱ va̱la̱ta̱ vo oɓolo a̱soja a Filistiya nu uvon, a̱vu gba aza a Isra'ila o o'wo ili yi idaba uba̱ta̱ wa aza a Filistiya. A̱vu e ɗe ama o uta̱, reve a ga'an na̱ Shawulu ɗe Gilga.
1SA 13:5 Reve aza a Filistiya o ɓoloto tsa̱ra̱ a yuwan uvon na aza a Isra'ila. A̱vu o uta̱ ni ikeke yi ido yu uvon ukpakukupa o uta'atsu (3,000) na akumbi e ido ukpakukupa uta̱li (6,000) na̱ oɓolo a̱ a̱soja a̱ a̱bunda̱ lon tsa̱ wuyun e ikyun i mala. A̱vu a gawan a̱ ya̱wa̱ a̱ va̱la̱ a Mikimash asana a Bet Aven.
1SA 13:6 Ana a̱soja a Isra'ila enei a̱ ta̱ pe a̱tsuma̱lima̱, waru a̱soja a Filistiya a̱ ga̱la̱ le ta̱ uga̱lu, reve a̱soja'a a pa'aton aciya̱le, ozo o ro a̱ da̱na̱ ta̱ pe a̱ba̱nu, ozo o ro awanda, ozo o ro a atali, waru ozo o ro a̱nci, ozo o ro o oko'o.
1SA 13:7 Reve Mmaci ma Ibrahim n ro n pasalai mavada ma̱ o Uɗolu wa̱ Urudu a̱ tyo upasu wi iɗa ya Gadu nu upasu wa Giliyadu. Shawulu gba u da̱na̱ ta̱ pe Gilga, waru suru aza a na a̱ ri oɓolo na̱ a̱yi e teme ta̱ meje'en ma̱ lipu adama o wovon.
1SA 13:8 Wi isawan ta̱ hali a cina rana cindere, mantsa ma na Sama'ila zuwaa niyi. Amma Sama'ila ta̱wa̱ Gilga shi. A̱vu ama a Shawulu a̱ ka̱ra̱ e bete'wishe.
1SA 13:9 Ɗaɗa Shawulu dammai, <<Ta̱wa̱a̱ numu na̱ kucci vu ukula̱tosu na̱ kucci muwwulai.>> A̱vu Shawulu yuwan kucci vu ukula̱tosu.
1SA 13:10 A̱yi u koto ucasu u kucci vu ukula̱tosu she gba Sama'ila a marawaa. Reve Shawulu 'ya̱wa̱ u cina yi u ca̱sa̱ yi.
1SA 13:11 A̱vu Sama'ila ece, <<Nye i ɗa vu yuwain?>> Reve Shawulu usu u damma, <<Ana me enei ama e bete'wishe agba vu ta̱wa̱ a mantsa'a shi, waru aza a Filistiya o to ɓolotosu ɗe Mikimash,
1SA 13:12 a̱vu n yuwan majiyan, <Gogo aza a Filistiya a̱ ta̱ ta̱wa̱a̱ mu nu uvon pa nda Gilga waru koto m pati isa'ani ya̱ A̱sulazuva shi.> Ɗaɗa n zuwai aciya̱va̱ nu ucira n yuwan kucci vu ukula̱tosu.>>
1SA 13:13 Reve Sama'ila damma Shawulu, <<Vu yuwan ta̱ tsulo lon. Vu kuru wila̱ wa̱ A̱sulazuva A̱sula̱ a̱ wu shi za na u damma nuwu vu yuwan shi. Na̱ vu shi vu kuru wila̱'a̱, u shi ta̱ a zuwa tsugono tsa̱ wu tsa lyuwa elime e ekere a aza a Isra'ila babu ukosu.
1SA 13:14 Amma gogo tsugono tsa̱ wu tsaa lyuwa elime shi. A̱sulazuva a̱ bunga̱ ta̱ vuma na okolo a̱ yi a cigai a̱vu u zuwa yi zagbain va ama a̱ yi, adama a na vu kuru wila̱ wa̱ A̱sulazuva shi.>>
1SA 13:15 Ɗaɗa Sama'ila lyawai Gilga a̱vu u ka̱ra̱ a̱ tyo Gibiya va Banyami. A̱vu Shawulu kece akapi a ama a na a buwai oɓolo na̱ a̱yi. A̱vu a̱ tsura̱ a̱bunda̱ a ama ukpakuta̱li (600).
1SA 13:16 Shawulu na̱ ulobo wa̱ yi Jonata na ama a na a̱ ri oɓolo ne ele a̱ da̱nu ta̱ Geba va Banyami. Reve aza a Filistiya a yuwan uva̱la̱ta̱ u le a Mikimash.
1SA 13:17 A̱vu oɓolo a ta'atsu a̱ a̱soja a Filistiya o uta̱ diga o uva̱la̱ta̱ u le adama o uvon. Reve oɓolo a̱ ta̱ a̱ 'ya̱wa̱ Ofura, a̱tsuma̱ o upasu wa Shuwal,
1SA 13:18 oɓolo o ro a̱ tyo ta̱ Bet Horon oɓolo o ro waru a̱ tyo o ta̱ ukosu wi iɗa i na ya̱a̱ ka̱lyuwusa̱ uka̱ri wa Zeboyim a̱ nka̱la̱la̱i zuzu na̱ a̱tsumona.
1SA 13:19 A mantsa ma nda babu maruma ma na a̱ tsura̱i a̱tsuma̱ e iɗa ya Isra'ila suru, adama a na aza a Filistiya a damma ta̱, <<Na̱ shi tsu lyawa le, Mmaci ma Ibrahim a̱ shi ta̱ aa yuwaan aciya̱le mutsun mu pe'eni ni ibata!>>
1SA 13:20 Ɗaɗa aza a Isra'ila suru a saɓai a̱cipa̱ a̱ tyo uba̱ta̱ wa aza a Filistiya adama e tewe elentsu a̱ a̱ba̱ri e le, na agalatsu e le, na aɓau na̱ ogonu le.
1SA 13:21 Waru atsupu'u ikebe i azurufa re ɗa a̱tsuma̱ a aza a ta'atsu vu utewishe wa̱ a̱ba̱ri e le na agalatsu e le. Atsupu o utewishe wa aɓau e le na̱ kune gbain va akatsu a ta'atsu e le na̱ aaɗanga a̱ ma̱gba̱ra̱ me inan i le, ikebe i azurufa ta̱ ɗa a̱tsuma̱ a aza a ta'atsu.
1SA 13:22 Ne ɗa o urana wu uvon u ndolo babu soja va Shawulu na̱ Jonata a na a̱ shi na̱ matsun me pe'eni ko ibata o ukere wa̱ yi, Shawulu na̱ Jonata ulobo wa̱ yi u ɗa goon a̱ shi ne ele.
1SA 13:23 Reve oɓolo a̱ a̱soja a aza a Filistiya o uta̱ a̱ tyo o upasata wa Mikimash.
1SA 14:1 Urana u ro reve Jonata ulobo wa Shawulu u damma ulobo u na wa̱a̱ guzusa̱a̱ yi itana yu uvon, <<Ta̱wa̱, tsu 'ya̱wa̱ upasalai wa̱ oɓolo a̱ a̱soja a Filistiya, upasu u ndeɗe.>> Agba u damma dada va̱ yi shi.
1SA 14:2 Shawulu da̱na̱ ta̱ nden o ukosu wa Gibiya za̱la̱ vu uɗanga muwun m peme a̱tsuma̱ a Migiron. Ama a na a̱ da̱na̱i oɓolo na̱ a̱yi a rawa ta̱ ama ukpaku uta̱li (600),
1SA 14:3 oɓolo na̱ Ahija ganu zana da̱na̱i wotowu na̱ epo. A̱yi ulobo wa Ahitub ɗa mawun ma a̱na̱wu ma Ikabo olobo a Finiha, ulobo wa̱ Eli, ganu va̱ A̱sulazuva a̱tsuma̱ a Shilo. Agba ko za reve a na Jonata ka̱ra̱i shi.
1SA 14:4 O upasata u masasan ma na Jonata cigai u kuruwa̱a̱ a̱ tyo o oɓolo a̱ a̱soja a Filistiya atali o uga'an a̱ shi ta̱ lo a̱ mɓa̱nga̱ suru. Aala a za ta̱ Boze, za va ire waru Sene.
1SA 14:5 Aatali a̱ ta̱ e isawan ta̱ ugana a̱ ka̱lyuwusa̱ eleme a Mikimash, za ta̱ waru uyagi elime a Geba.
1SA 14:6 Reve Jonata damma ulobo u na wa̱a̱ guzusa̱a̱ yi itana yu uvon, <<Ta̱wa̱ tsu 'ya̱wa̱ o uva̱la̱ta̱ wa̱ a̱ a̱soja a Filistiya a aza a na a paɗai uryumbu shi. U ta gura o'wo A̱sulazuva a yuwan ulinga adama a̱ tsu. Babu ili i na yaa putsa A̱sulazuva ni iwawi, u ta̱ tsura̱ u lyuwu wa aci ko na ali o uvon a̱bunda̱ ko na̱ ri uka̱la̱mu.>>
1SA 14:7 Reve za na a̱a̱ guzusa̱a̱ yi itana yu uvo'on u damma yi, <<Yuwan ili i na i ri o okolo a̱ wu suru. Yuwan cine vu cigai, o okolo a̱ va̱ o to oɓolo na̱ a̱vu.>>
1SA 14:8 Reve Jonata damma, <<Lyawa tsu pasa a̱ 'ya̱wa̱ uba̱ta̱ wa ama'a adama tsu roco aciya̱tsu uba̱ta̱ u le.
1SA 14:9 Na a damma tsu, <Puroyi hali she na̱ tsu ta̱wa̱ ya̱'a̱ ɗu,> tsu te isawan uba̱ta̱ u na tsu ri, tsa̱a̱ 'ya̱wa̱ gawan le shi.
1SA 14:10 Amma na a damma, <Ta̱wa̱i gawan tsu,> tsu ta kumba a gawan, adama a na a̱yi nda u to o'wo tsu iroci i na A̱sulazuva a ca le ta̱ e ekere a̱ tsu.>>
1SA 14:11 Ɗaɗa ele ra o rocoi aciyele uba̱ta̱ wa̱ o oɓolo a̱soja a Filistiya. Reve aza a Filistiya a damma, <<Ka̱lyuwa̱i! Mmaci ma Ibrahim n te e ika̱ta̱pu o uta̱sa̱ a̱ a̱nci uba̱ta̱ u na a pa'aton yi aciya̱le.>>
1SA 14:12 Reve o oɓolo a̱ a̱soja a aza a Filistiya a salaa Jonata na̱ ulobo u na wa̱a̱ guzusa̱a̱ yi itana yu uvo'on, <<Gawain a̱ ta̱wa̱ uba̱ta̱ u tsu, tsu ta yuwan a̱guma̱ a̱ ɗu.>> Ɗaɗa Jonata dammai ulobo u na wa̱a̱ guzusa̱a̱ yi itana yu uvo'on, <<Gawan o oɓolo na̱ a̱mu, A̱sulazuva a ca le ta̱ o ukere wa aza a Isra'ila.>>
1SA 14:13 Reve Jonata kumba ne ekere a̱ yi na ana, waru ulobo u na wa̱a̱ guzusa̱a̱ yi itana yu uvon a̱ca̱pa̱ a̱ yi. Jonata una ta̱ ozo o ro ne ekere a̱ yi, reve za na aa guzusa̱a̱ yi itana yu uvon una ozo ro e le a̱ca̱pa̱ a̱ yi.
1SA 14:14 O uvon wu ufaru reve Jonata na̱ ulobo u na wa̱a̱ guzusa̱a̱ yi itana yu uvon o una ama ushin a agalaci a washin a na a rawai uɓatsulai wu uɗuma̱ u na inan yi iluma yaa luma urana u ta̱.
1SA 14:15 Reve wovon u reme a̱ a̱soja a Filistiya a na a̱ ri o uva̱la̱ta̱ suru, na a aza a na a̱ ri ya aa alanga, hali fo na̱ o oɓolo a̱ a̱soja, na a aza a na a̱ tsu 'ya̱wa̱a̱ nu uvon. Reve suru n le a uwwa wovon lon. Reve iɗa i jinga̱ɗa̱. A̱sula̱ a ɗa a̱ lyunguyi na̱ wovon u ndolo.
1SA 14:16 Ana a̱za̱ e ipiri ya Shawulu a̱tsuma̱ a Gibiya va Banyami a̱ ka̱lyuwa̱i, reve e ene o oɓolo a̱soja a aza a Filistiya e bete'we za suru saɓa ure wa̱ yi.
1SA 14:17 Reve Shawulu damma ama a na a̱ ri oɓolo na̱ a̱yi, <<Kecei a̱soja tsura̱ i reve a aza a na a̱ ri pa oɓolo na̱ a̱tsu shi.>> Ana e kecei, Jonata na̱ ulobo u na wa̱a̱ guzusa̱a̱ yi itana yu uvon ɗa a̱ ri lo shi.
1SA 14:18 Ɗaɗa Shawulu dammai Ahija, <<Ta̱wa̱ na Akpati a Nzuwulai a̱ A̱sula̱ pa nda.>> Adama a na a mantsa mo ndolo u da̱na̱ ta̱ ekere a aza a Isra'ila.
1SA 14:19 Shawulu a yuwusaan adanshi na̱ ganu'u, reve utogbolyuwu a̱tsuma̱ o uva̱la̱ta̱ wa aza a Filistiya u ka̱ra̱ a̱ da̱shishi. Ɗaɗa Shawulu dammai ganu, <<She u damaton wu wan.>>
1SA 14:20 Ɗaɗa Shawulu na ama a̱ yi suru o ɓolotoi reve a̱ ka̱ra̱ a̱ tyo uba̱ta̱ o uvon. A cina ta̱ aza a Filistiya utogbolyuwu lon, a munulai can le na̱ mutsun mu pe'eni.
1SA 14:21 Mmaci ma Ibrahim n na n ri oɓolo na aza a Filistiya, waru a̱ ka̱ra̱i a gawan oɓolo ne ele o uva̱la̱ta̱, a̱ ka̱mba̱ ta̱ a̱ tyo uba̱ta̱ wa aza a Isra'ila aza a na a̱ ri oɓolo na̱ Shawulu na̱ Jonata.
1SA 14:22 Ana aza a Isra'ila suru a na a̱ shi a pa'ain a̱tsuma̱ e iɗa ya agaɗi ya Ifiramu a uwwai a na aza a Filistiya e te ilaɗi, ele fo a saɓa le ta̱ a̱ca̱pa̱ nu uvon.
1SA 14:23 Ne ɗa A̱sulazuva a wawai aza a Isra'ila o urana u ndolo, waru uvon u lyuwa ta̱ elime hali u ka̱ra̱ Bet Aven.
1SA 14:24 O urana u ndolo a̱ a̱soja a Isra'ila a uwa ta̱ a̱tsuma̱lima̱, adama a na Shawulu tara ta̱ akucunu na ama a dansa, <<Una̱ u ta̱ reme vuma na suru lyuwai ilyalya babu na ulivu u yuwain, babu na n tsupayi aciya̱va̱ e ekere a n'yuwatan n va̱!>> Ne ɗa gba babu vuma na peɗei ilyalya.
1SA 14:25 Ana a̱ a̱soja'a suru a uwai a̱ a̱a̱rumbu, a̱vu a cina ishiki e iɗa.
1SA 14:26 Waru ana a uwai a̱ a̱a̱rumbu'u, a̱vu a cina pe ishiki a̱ ɗa̱wusa̱, agba babu za na zuwai aakatsu u peɗei, adama a na ama a ta uwwusa wovon wa akucunu'u.
1SA 14:27 Agba Jonata reve a na dada va̱ yi yuwain akucunu na ama'a shi, ɗaɗa u sapiyi combo va a aaɗanga a na a̱ ri o ukere wa̱ yi reve u tsupu yi a abaji e ishiki'i. Reve u 'ya̱sa̱n ukere wa̱ yi a̱ tyo o una̱ wa yi, a̱vu esu a̱ yi a̱ kpa̱tu'wa̱.
1SA 14:28 Reve za ta̱ a̱tsuma̱ a ama'a u damma yi, <<Dada va̱ wu yuwaan ta̱ ama akucunu o usa̱n, u damma, <Una̱ u ta̱ reme vuma na suru lyuwai ilyalya ana'an!> A̱yi ɗa i zuwai ama a̱ ri uta̱ka̱lyuwu.>>
1SA 14:29 Ɗaɗa Jonata dammai, <<Dada va̱ ta̱wa̱a̱ ta̱ iɗa na addama. Ka̱lyuwa̱ cine esu a̱ va̱ a̱ kpa̱tu'wa̱i a na m peɗei ishiki i nda ke'en.
1SA 14:30 U shi a la'a na̱ a̱ shi a damma a lyawa ta̱ ama a lyuwa ilyalya fa̱a̱n ana'an diga a̱tsuma̱ e ilyalya i na a̱ pura̱i uba̱ta̱ wu n'yuwatan n le. Aza a Filistiya a na tsu shi o una a̱ shi a la'a nda shi?>>
1SA 14:31 O urana u ndolo o una ta̱ aza a Filistiya diga Mikimash a̱ tyo Ayalon, waru ama a̱ta̱ka̱lyuwu ta̱ lon.
1SA 14:32 Reve a ama a̱ ga̱da̱ra̱ azaza e itana yu uvon i na a̱ pura̱i. A̱vu a̱ pura̱ ikyon ni inan, na̱ mudindim a̱vu a paɗa le e iɗa, reve a tama le oɓolo na̱ mpasa n le.
1SA 14:33 Reve ama a damma Shawulu, <<Ka̱lyuwa̱i, a̱yi ɗa nda ama a yuwusan unusu e ekere a̱ A̱sulazuva a tamusa inama na̱ mpasa.>> Reve u damma, <<I kuɗa ta̱ wila̱. Bunda̱la̱i aatali a gbain a̱ ta̱wa̱ pa nda gogo.>>
1SA 14:34 Reve u dammisa, <<Ka̱ra̱i o uta̱ uba̱ta̱ wa ama a̱vu i damma le, <Lyawa vuma suru ta̱wa̱ na̱ nan va̱ yi ko kyon va̱ yi, a̱vu a paɗa le pa a tama le. She i yuwusan unusu uba̱ta̱ wa̱ A̱sulazuva i tama inama na̱ mpasa n le wan.> >> Ne ɗa za suru ta̱wa̱i na̱ nan va̱ yi ayin o ndolo reve a paɗa le ɗe aatali'i.
1SA 14:35 Ɗaɗa Shawulu suwayi A̱sulazuva masa'a, a̱yi ɗa masa'a mo ufaru ma na u suwayi A̱sulazuva.
1SA 14:36 Reve Shawulu damma, <<Lyawa tsu cipa̱i za̱la̱ tsu 'ya̱wa̱a̱ aza a Filistiya nu uvon na ayin a̱vu waru tsu pura̱ le itana hali she usana, waru tsaa lyawa za ro le wuma shi.>> Reve a̱ usu, <<Yuwan ili i na ve enei u lobono wu ta̱ suru.>> Amma ganu damma ta̱, <<Lyawa tse ecei A̱sula̱ pa nda.>>
1SA 14:37 A̱vu Shawulu ece A̱sula̱, <<N ka̱ra̱ a̱cipa̱ a na ma̱ 'ya̱wa̱a̱ aza a Filistiya nu uvon? Vu ta ca le e ekere a aza a Isra'ila?>> Agba A̱sula̱ a̱ usu yi o urana u ndolo shi.
1SA 14:38 Reve Shawulu damma, <<Ta̱wa̱yi pa nda, suru nɗu azagbain a̱ a̱soja, reve tsu zamiyi cu'un vu unusu u na a yuwain ana'an.
1SA 14:39 N kucuna ta̱ na̱ A̱sulazuva a na a̱ ri wuma za na wawai Isra'ila, ko na̱ u shi u bura ta̱ ulobo u va̱ Jonata, she nu u kuwa̱.>> Amma babu za na yuwain adanshi a̱tsuma̱ a ama a na a̱ da̱na̱i lo.
1SA 14:40 Reve Shawulu damma aza a Isra'ila suru, <<Yi isawan ndeɗe, waru a̱mu na̱ Jonata ulobo u va̱ tsu te isawan pa nda.>> A̱vu ama'a a̱ usu Shawulu, <<Yuwan ili i na ve enei u lobono nuwu.>>
1SA 14:41 Reve Shawulu yuwan avasa a̱ tyo uba̱ta̱ wa̱ A̱sulazuva A̱sula̱ a Isra'ila, <<Nye i zuwai vu usu yi aagbashi a̱ wu ana'an shi? Na̱ unusu u va̱ u ɗa, ko za vu ulobo u va̱ Jonata, vu usu na̱ Urim, amma nu unusu wa ama a Isra'ila ɗa, vu usu na̱ Tumim.>> Reve mazuwa ma agita mo roco Jonata na̱ Shawulu ɗa, reve ama'a o o'wo babu unusu.
1SA 14:42 Reve Shawulu damma, <<Zuwayi agita e ekere va̱ na̱ Jonata ulobo u va̱.>> A̱vu a tawa Jonata.
1SA 14:43 Ɗaɗa Shawulu dammai Jonata, <<Damma mu ili i na vu yuwain.>> Ɗaɗa Jonata damma niyi, <<M peɗe ta̱ ishiki wa'a nu combo va aaɗanga a na a̱ ri o ukere u va̱. Gogo n ta gura kuwa̱.>>
1SA 14:44 A̱vu Shawulu damma Jonata, <<Lyawa A̱sula̱ a ca a̱mu a̱tsuma̱lima̱ lon, na̱ o una wu shi.>>
1SA 14:45 Reve ama a damma Shawulu, <<Cine Jonata a̱a̱ kuwa̱, za na yuwain a̱ba̱jini o ulinga wi iwawi a̱tsuma̱ a Isra'ila? A̱sulazuva a para! Tsu kucuna ta̱ na̱ a̱ A̱sulazuva a na a̱ ri wuma, babu ko a̱nji a aaci a̱ yi za ta̱ na a̱ riya̱ e iɗa, adama a na u yuwan ta̱ ili i nda ana'an ni ikambi ya̱ A̱sula̱.>> Ne ɗa ama'a a papai Jonata, agba o una yi shi.
1SA 14:46 Ɗaɗa Shawulu lyawai magbagba ma aza a Filistiya, a̱vu aza a Filistiya a̱ ka̱mba̱ a̱ tyo e iɗa i le.
1SA 14:47 Ana Shawulu tarai tsugono ekere aza a Isra'ila u yuwan ta̱ uvon na̱ n'yuwatan n le uba̱ta̱ suru: A̱za̱ a̱ Mowa, na aza a Amon na̱ a̱za̱ a̱ Edom, na̱ ngono n Zoba na aza a Filistiya. Uba̱ta̱ u na u yuwain uvon suru u tsu lyuwa ta̱ aci.
1SA 14:48 U yuwan ta̱ uvon nu ukadu lon, reve u lyuwa aza a Amaleka nu uvon. Waru u wawa ta̱ aza a Isra'ila e ekere a aza a na a̱ pura̱ nle itana.
1SA 14:49 Olobo a Shawulu ele ɗa Jonata, na̱ Ishvi na̱ Malkishuwa. Waru e esheli e re a̱ yi ele ɗa, Mera zakpara, Mikal zawa'a.
1SA 14:50 Ala a ka va̱ yi ɗa Ahinowam usheli wa Ahima'az. Ala a yali ya̱ a̱soja a̱ yi a̱yi ɗa Abna ulobo wa Ner, waru Ner dada ke'en va Shawulu ɗa.
1SA 14:51 Kish ɗa dada va Shawulu, waru Ner dada va Abna, Kish na̱ Ner olobo a Abiyel a ɗa.
1SA 14:52 A̱tsuma̱ a wuma wa Shawulu suru, u yuwan ta̱ uvon wu usuɗuwu na aza a Filistiya. Na̱ we ene za vu ucira ko zana ri na̱ ukadu lon, reve wo o'woto yi soja va̱ yi.
1SA 15:1 Sama'ila damma ta̱ Shawulu, <<A̱mu ɗa A̱sulazuva a̱ lyungu yi a na ma̱ tsuwa̱n wu mani'in vo o mogono ekere ama a̱yi a aza a Isra'ila. Gogo vu polo atsuvu vu uwwa ikaka i na yu uta̱i uba̱ta̱ wa̱ A̱sulazuva.
1SA 15:2 Apa ili na A̱sulazuva o oɓolo a̱ a̱soja a zuva a dammai: <N ta tawa aza a Amaleka adama e ili i na a yuwayin aza a Isra'ila, ana a̱ riya̱a̱ n le nu uvon a mantsa ma na o uta̱i e iɗa ya Masar.
1SA 15:3 Gogo i ka̱ra̱ a̱ ꞌya̱wa̱ i riya̱a̱ aza a Amaleka, a̱vu i kototo ili i na a̱ ri na̱ a̱yi suru suru. Ko ili i ta̱ she i lyawa wuma wan. Yu una ali na̱ a̱ma̱ci na̱ muwun, na̱ nreɓu ni inan ni ikyon na arakumi, na̱ nloli.> >>
1SA 15:4 Avu Shawulu ɗe ama a na u ɓolotoi ɗe Telem, a̱soja a ana a na a̱ da̱na̱i a ana ukpakukupa ukpakure (200,000), nu ukpakukupa kupa (10,000) diga Yahuza.
1SA 15:5 Reve Shawulu 'ya̱wa̱ a̱ lyuci va Amaleka a̱vu u vawan a̱ a̱tsuma̱ o uka̱ri.
1SA 15:6 Reve u damma aza a Kena, <<Walai, i jika̱ yu uta̱ i lyawa aza a Amaleka ta̱wa̱ n kototo ɗu oɓolo ne ele wan, adama a na i roco ta̱ aza a Isra'ila suru isa'ani ya amayun a mantsa ma na a gawain o uta̱ diga Masar.>> Ɗaɗa aza a Kena o uta̱i diga a̱tsuma̱ a aza a Amaleka.
1SA 15:7 A̱vu Shawulu lyuwa aza a Amaleka nu uvon, diga Havila a̱ tyo Shur za na a̱ ri asana a Masar.
1SA 15:8 Reve u reme Aga mogono ma Amaleka wuma wa̱ yi, reve gba u kototo ama a̱ yi suru suru na̱ matsun me pe'eni.
1SA 15:9 Amma a̱yi na ama a̱ yi a lyawa ta̱ Aga wuma, na̱ mgbele ni inan na̱ mudindim na̱ mukyokyon, i na suru i la'ai ulobonu. Ele nda suru a ciga o kototo le suru suru shi. Amma ili i na suru a tarai ili ya̱ a̱ɓula̱ shi ko babu ucira ele ɗa o kototoi suru suru.
1SA 15:10 A̱vu A̱sulazuva a yuwan adanshi na̱ Sama'ila ana,
1SA 15:11 <<N yuwan ta̱ a̱tsumola̱ngu a na n ɗangwai Shawulu wo o'wo mogono, adama a na u vadalaa mu ta̱ ucina̱, waru u 'yuwan ta̱ a na wa yuwan tsutoni na̱ udammu u na n ca niyi.>> Sama'ila yuwan ta̱ upan, reve u showen A̱sulazuva ayin ma̱ɓula̱.
1SA 15:12 Na̱ wasasa, reve u 'ya̱wa̱ uba̱ta̱ wa Shawulu. Reve a damma yi, <<Shawulu 'ya̱wa̱ ta̱ a̱ lyuci va Kame, reve u shuwa̱ aciya̱yi aatsura a na a̱ ri n cuwusan na̱ a̱yi ɗe. Reve u vadala u ka̱ra̱ a̱ cipa̱ a̱ tyo Gilga.>>
1SA 15:13 Ana Sama'ila cina niyi, reve Shawulu damma, <<Lyawa A̱sulazuva a zuwaa wu abaꞌun! N yuwan ta̱ tsutoni nu udammu wa̱ A̱sulazuva!>>
1SA 15:14 A̱vu Sama'ila ece yi, <<N na amayun ɗa wu, ili i ne i ɗa maa uwwusa tsa mesun me mgbele oɓolo ni inan?>>
1SA 15:15 A̱vu u usu, <<Ama a̱ ta̱wa̱ ta̱ ne ele diga uba̱ta̱ wa aza a Amaleka, a lyawa ta̱ mgbele ni inan i na i la'ai ulobonu wuma adama a yuwaan A̱sulazuva A̱sula̱ a̱ wu kucci. Amma tsu kototo ta̱ suru suru akapi e ili i na i buwai.>>
1SA 15:16 A̱vu Sama'ila damma Shawulu, <<Isawan! N ta damma wu ili i na A̱sulazuva a dammai na ayin o yon.>> Reve Shawulu usu, <<Damma mu.>>
1SA 15:17 Reve Sama'ila usu yi, <<Ko na wo o'woi ɗe a̱ca̱pa̱ vu shi tara aciya̱wu ili i ro shi, a̱vu ɗa zagbain vu gundo va a aza a Isra'ila gogo shi? Waru A̱sulazuva a̱ tsuwa̱n wu ta̱ mani'in vo oꞌwo mogono ma aza a Israꞌila.
1SA 15:18 Waru u lyungu wu ta̱ adansa, <'Ya̱wa̱ vu kototo ama a avama o ndolo suru suru, aza a Amaleka. Vu yuwan uvon ne ele hali she na̱ vu kototo le.>
1SA 15:19 Adama a̱ nye i ꞌyuwain a na ya yuwan tsutoni na̱ A̱sulazuva? Adama a̱ nye i ga̱da̱ra̱i azaza e itana yu uvon i na i pura̱i? Nye i zuwai i yuwain ili i wuya a̱ ma̱ka̱ka̱n ma̱ A̱sulazuva?>>
1SA 15:20 A̱vu Shawulu usu u damma Sama'ila, <<Amma n yuwan ta̱ tsutoni na̱ A̱sulazuva. Adama a na n ka̱ra̱ ta̱ n 'ya̱wa̱ yuwan ulinga u na u lyungu numu n yuwan. N ta̱wa̱ ta̱ na̱ Aga mogono ma aza a Amaleka, reve waru n kototo akapi a aza a Amaleka suru suru.
1SA 15:21 Ama a tara ta̱ mgbele ni inan i na i la'ai ulobonu i na a̱ pura̱i uba̱ta̱ wu uvon na a tawai adama o ukototosu, adama a yuwaan A̱sulazuva A̱sula̱ a̱ wu kucci ne ele a̱tsuma̱ a Gilga.>>
1SA 15:22 Reve Sama'ila usu u damma, <<Nye i la'a yo'onotoi A̱sulazuva okolo, kucci vu ukula̱tosu na̱ kucci, ko tsutoni ni ili i na u dammai? A yuwaan yi tsutoni u la'a ta̱ kucci, waru o polo atsuvu u la'a ta̱ abaji a mani'in ma̱ a̱giri'i.
1SA 15:23 Aciyogbamu u ta̱ va damma unusu u yindi. Ulambu u ma uwwa ma adanshi u ta̱ va damma iwuya ya̱ a̱ga̱nda̱ a̱ tyo a̱ a̱ma̱li. Adama a na vu 'yuwain a yuwaan tsutoni na adanshi a̱ A̱sulazuva, u 'yuwan wu ta̱ a na vaa lyuwa elime na̱ tsugono.>>
1SA 15:24 Reve Shawulu damma Sama'ila, <<N yuwan ta̱ unusu n ka̱ra̱ ta̱ uɗuma̱ ni icu'un. N yuwan tsutoni ni ili i na A̱sulazuva a zuwai n yuwan nu udammu wa̱ yi oɓolo ni ili i na vu dammai shi. N da̱na̱ ta̱ a uwwusa wovon wa ama, ɗaɗa i zuwai n yuwain tsutoni ni ili i na a dammai.
1SA 15:25 Gogo gba n te ipati ya̱ wu, vu yuwaan mu gafura vu unusu u va̱. A̱vu vu ka̱mba̱ na̱ a̱mu, adama n yuwaan A̱sulazuva a̱ga̱nda̱.>>
1SA 15:26 A̱vu Sama'ila damma Shawulu, <<Ma̱a̱ ka̱mba̱ na̱ a̱vu shi. A̱vu ɗa vu ꞌyuwain adanshi a̱ A̱sulazuva, ɗaɗa gba u 'yuwan nuwu a na vaa lyuwa elime na̱ tsugono tsa a ama a Isra'ila!>>
1SA 15:27 Ana Sama'ila vadalai a na wa̱a̱ ka̱ra̱, reve Shawulu reme iwa̱sa̱ ye elentsu o utugu wa̱ yi a̱vu u kara yi.
1SA 15:28 A̱vu Sama'ila damma yi, <<A̱sulazuva a kara ta̱ tsugono tsa ama a Isra'ila ekere a̱ wu anaꞌan. A̱vu u ca moron ma̱ wu za na laꞌa nuwu.
1SA 15:29 A̱yi za na a̱yi ɗa Tsugbain tsa aza a Isra'ila u tsu yuwan epen shi, waru u tsu vadala okolo a̱ yi shi. Adama a na a̱yi vuma ɗa shi, na waa vadala okolo a̱yi.>>
1SA 15:30 Reve Shawulu damma, <<N yuwan ta̱ unusu. Amma yuwan ankuri ca mu tsugbain elime a mbara ma ama a̱ va̱ ne elime aza a Isra'ila. Vu ka̱mba̱ oɓolo na̱ a̱mu adama n yuwaan A̱sulazuva A̱sula̱ a̱ wu a̱ga̱nda̱.>>
1SA 15:31 Reve Sama'ila ka̱mba̱ oɓolo na̱ Shawulu, a̱vu Shawulu yuwaan A̱sulazuva a̱ga̱nda̱.
1SA 15:32 Reve Sama'ila damma, <<Ta̱wa̱a̱ numu na̱ Aga mogono ma aza a Amaleka pa nda.>> A̱vu Aga ta̱wa̱ ya̱'a̱ yi na asuvu nden a majiyan, <<Amayun ili i ro yi lo shi, meleshe mo ukwa̱ ma̱ ka̱ra̱ ta̱.>>
1SA 15:33 Amma a̱vu Sama'ila damma, <<Cine matsun me pe'eni ma̱ wu ma̱ ka̱mbuwa̱i a̱ma̱ci babu muwun, ne ɗa fo mma va̱ wu o'wo babu muwun a̱ a̱tsuma̱ a̱ a̱ma̱ci.>> A̱vu Sama'ila yuwan Aga mukoɗi mukoɗi a̱ ma̱ka̱ka̱n ma̱ A̱sulazuva a Gilga.
1SA 15:34 A̱vu Sama'ila ka̱ra̱ a̱ ka̱mba̱ a̱ wa̱ta̱ wa̱ yi lyuci va Rama, amma Shawulu ka̱ra̱ ta̱ a̱ ka̱mba̱ o u'wa wa̱ yi a̱ lyuci va Gibiya.
1SA 15:35 Sama'ila da̱shi ga'asan na̱ Shawulu waru shi a rana wuma wa̱ yi suru, amma Sama'ila yuwan ta̱ a̱tsumola̱ngu lon adama a Shawulu. Waru A̱sulazuva a yuwan ta̱ a̱tsumola̱ngu a na u zuwai Shawulu mogono ma aza a Isra'ila.
1SA 16:1 A̱vu A̱sulazuva a damma Sama'ila, <<Hali mantsa ma̱ ne va̱a̱ da̱na̱ a̱tsumola̱ngu adama a Shawulu? N 'yuwain ta̱ a na wa̱a̱ da̱na̱ mogono ma aza a Isra'ila. Gogo vu shito aavana a̱ wu na̱ mani'in, reve vu reme ure a̱ tyo Batalami. Vu zami ɗe vuma n na a̱ tsu ɗe Yese, n ɗangula ta̱ vuma ta̱ a̱tsuma̱ a̱ olobo a̱yi za na oo o'wo mogono.>>
1SA 16:2 Amma a̱vu Sama'ila damma, <<Adama a̱ nye maa yuwan ne? Shawulu ta uwwa alabari, reve wu una mu.>> Reve A̱sulazuva a̱ usu yi, <<Vu tara a̱na̱wu a manan a̱ 'ya̱wa̱, reve vu damma, <N ta̱wa̱ ta̱ tsa̱ra̱ n ca A̱sulazuva kucci.>
1SA 16:3 A̱vu vu banu Yese uba̱ta̱ u na vaa yuwan kucci. Waru n ta lyawa wu vu reve ili i na vaa yuwan. Vu ta̱ tsuwa̱a̱n mu ulobo u na waru n damma nu wu mani'in.>>
1SA 16:4 A̱vu Sama'ila yuwan cine A̱sulazuva a damma niyi u yuwan. Ana u rawai Batalami, a̱vu mbara n lyuci n ga'an toyi na̱ meje'en ma̱ lipu adama o wovon. Reve e ece yi a damma, <<Lafiya ɗa ta̱wa̱to nuwu pa ko?>>
1SA 16:5 Reve Sama'ila usu, <<Ee, lafiya ɗa uta̱wu u va̱. N ta̱wa̱ ta̱ tsa̱ra̱ n yuwaan A̱sulazuva kucci. I tawa aciya̱ɗu yo o'wo na akiza, reve i ta̱wa̱ uba̱ta̱ u kucci'i oɓolo na̱ a̱mu.>> A̱vu u zuwa Yese no olobo a̱ yi a tawa aciyele na akiza. A̱vu u banu le fo a̱ tyo uba̱ta̱ u na a yuwan kucci.
1SA 16:6 Ana a rawai, ana Sama'ila enei Eliyabu ulobo wa Yese, a̱vu u jiyan, <<Adanshi o ro o lo shi, vuma na ri nda mishin a̱ ma̱ka̱ka̱n ma̱ A̱sulazuva a̱yi ɗa u tsuwa̱a̱n yi mani'in.>>
1SA 16:7 Amma gba A̱sulazuva a damma yi ta̱, <<Sama'ila, she vi indana uruma wa̱ yi, ko uga'an wa̱ yi wan, adama a na n 'yuwan yi ta̱. Waru a̱mu A̱sulazuva n tsu indana ili i na vuma tsi indana shi. Vuma tsu ka̱lyuwa̱ ta̱ uruma u vuma goon, amma a̱mu n tsu ka̱lyuwa̱ ta̱ okolo.>>
1SA 16:8 Reve Yese ɗe Abinada ulobo wa̱ yi, a̱vu u zuwa yi u ka̱ra̱la̱i elime a Sama'ila. Amma a̱vu Sama'ila damma, <<A̱sulazuva a ɗangwa yi fo shi.>>
1SA 16:9 A̱vu Yese zuwa Shama ka̱ra̱la̱i. Reve Sama'ila damma, <<A̱sulazuva a ɗangula a̱yi nda fo shi.>>
1SA 16:10 Yese zuwa ta̱ olobo e cindere a̱tsuma̱ olobo a̱ yi a̱ ka̱ra̱la̱i a̱ ma̱ka̱ka̱n ma Sama'ila. Amma Sama'ila damma yi ta̱, <<A̱sulazuva a ɗangula aza a nda shi.>>
1SA 16:11 Reve Sama'ila ece yi, <<Vu buwa na̱ olobo o ro shi?>> A̱vu Yese usu, <<Mokosoto ma ɗa ma buwai, agba u ta̱ ɗe a aguɓa e mgbele.>> Ɗaɗa Sama'ila dammai, <<Lyungu e ɗe yi u ta̱wa̱, adama a na tse ene nden n na tsa̱ da̱nu tsu lyuwa shi she nu u ta̱wa̱.>>
1SA 16:12 A̱vu Yese lyungu a̱ 'ya̱wa̱ a̱ ta̱wa̱a̱ na̱ a̱yi. U da̱na̱ ta̱ nu uruma u sa'ani, na̱ gbaga lipu, waru muwun me e esu ma̱ yi n ta̱ ulobonu wa̱ a̱ka̱nla̱. Ɗaɗa A̱sulazuva a dammai, <<Vuma ɗaɗa nda'a! 'Yon vu tsuwa̱n yi mani'in a aaci.>>
1SA 16:13 Ɗaɗa Sama'ila tarai aavana a mani'in a̱vu u tsuwa̱n Da̱wuda a aaci e esu a azakpakpara a̱ yi. Diga o urana u ndolo a̱ 'ya̱wa̱, reve Ruhu va̱ A̱sulazuva a̱ cipa̱a̱ Da̱wuda nu ucira. Reve Sama'ila ka̱ra̱ a̱ ka̱mba̱ o u'wa a Rama.
1SA 16:14 Gogo Ruhu va̱ A̱sulazuva lyawa ta̱ Shawulu, a̱vu ruhu vama diga uba̱ta̱ wa̱ A̱sulazuva u casu yi a̱tsuma̱lima̱ na̱ wovon lon.
1SA 16:15 Reve agbashi a Shawulu a damma yi, <<A̱yi ɗa nda ruhu vama diga uba̱ta̱ wa̱ A̱sula̱ u ta casu wu a̱tsuma̱lima̱ na̱ wovon lon.
1SA 16:16 Lyawa zagbain tsu zuwa agbashi a̱ yi a̱ 'ya̱wa̱ a zami vuma na gurai tsuwe'e tsa kumburu. U ta̱ wa'a a mantsa ma na ruhu vama diga uba̱ta̱ wa̱ A̱sula̱ cipa̱a̱ nuwu, reve gba u ugbozu wa̱ wu u von.>>
1SA 16:17 Reve Shawulu damma agbashi a̱ yi, <<'Ya̱wa̱i i zami za na gurai tsuwe'e i ta̱wa̱a̱ mu.>>
1SA 16:18 A̱vu za ta̱ a̱tsuma̱ a agbashi'i u damma, <<N reve ta̱ ulobo wa̱ Yese va Batalami za na revei cine a tsu waꞌa kumburu. Vuma ɗa na ri nu ukadu lon, za na gurai uvon, u tsu yuwan ta̱ adanshi nu ugbozu, waru u ta̱ ulobonu lon, A̱sulazuva o to oɓolo na̱ a̱yi.>>
1SA 16:19 Reve Shawulu lyungu nlingata a̱ 'ya̱wa̱ ya̱ Yese, a̱vu a damma, <<Vu lyunguwa̱ mu nu ulobo wa̱ wu Da̱wuda, za na aa guɓusaa wu mgbele.>>
1SA 16:20 Ɗaɗa Yese tarai mololi utanuwu no opopofu, na̱ tsa̱n vu ukwan masayan ma̱ ina̱bi na̱ megbgbele, a̱vu u lyungu le oɓolo nu ulobo wa̱ yi Da̱wuda a̱ tyo ya Shawulu.
1SA 16:21 Reve Da̱wuda ta̱wa̱ uba̱ta̱ wa Shawulu reve u teme a yuwusaan yi a̱ga̱nda̱. Shawulu ciga yi ta̱ lon, a̱vu u zuwai za na a̱a̱ da̱na̱ a̱ guzusa̱a̱ yi itana yu uvon.
1SA 16:22 Reve Shawulu lyunguwa̱ Yese na adanshi, adansa, <<Lyawa Da̱wuda da̱nu u lyuwa elime u yuwusan mu a̱ a̱ga̱nda̱, adama a na u tsura̱ ta̱ isa'ani e ekere a̱ va̱.>>
1SA 16:23 Ne ɗa na̱ ruhu vama diga uba̱ta̱ wa̱ A̱sula̱ cipa̱a̱ Shawulu biti, Da̱wuda tsu tara ta̱ kumburu va̱ yi reve u reme tsuwe'e. A̱vu ruhu vama'a u lyawai, reve ugbozu wa Shawulu u von.
1SA 17:1 A̱soja a Filistiya o foɓo ta̱ adama o uvon, a̱vu o ɓoloto a̱ lyuci va Soko a̱tsuma̱ e iɗa ya Yahuda. A̱ shuwa̱ ta̱ uva̱la̱ta̱ a Efes Damim, e memere mo Soko na̱ Azeka.
1SA 17:2 A̱vu Shawulu na̱ ali o uvon a Isra'ila oɓoloto a̱ va̱la̱ o uka̱ri wa Ela, reve e gere adama a na aa yuwan uvon na̱ a̱soja a aza a Filistiya.
1SA 17:3 Aza a Filistiya a̱ da̱na̱ ta̱ a masasan ma̱ ta̱ ugeru, aza a Isra'ila waru a za ire, nu uka̱ri e memere me ele.
1SA 17:4 A yuwan ta̱ vuma ro na la'a gurai uvon na a̱ tsu ɗe Goliya, diga a̱ lyuci va Gat, wu uta̱ ta̱ o uva̱la̱ta̱ wa aza a Filistiya. Uga'an wa̱ yi u la'a ta̱ ana kucci.
1SA 17:5 U da̱na̱ ta̱ na̱ melezu mo uvon ma̱ rumushili a aaci a̱ yi reve waru wo oto utugu wu uɗavu wu rumushili wu uvon a na ume wa̱ yi u dembe ta̱ ume u kilo kupoton na̱ a̱za̱ cindere.
1SA 17:6 Reve wo oto waru a̱a̱ra̱ga̱ a̱ rumushili a ana a̱ yi a na a tsu pala ana, reve u wo'o mabata ma̱ rumushili o ucina̱ wa̱ yi.
1SA 17:7 Ugba̱mu wi ibata ya̱ yi u ta̱ tsu ushin, waru ume wa aaci a̱ rumu wi ibata'a u rawa ta̱ uritowu kilo cindere wu rumu. Soja da̱na̱ ta̱ elime a̱ yi uguzu na̱ a̱a̱ra̱ga̱ a̱ yi.
1SA 17:8 A̱vu Goliya isawan mishin, reve wo oruwoo ali o uvon o ugeru a Isra'ila, <<Nye i ɗa i zuwai i ta̱wa̱i, reve i gere tsa̱ra̱ i yuwan uvon na̱ a̱tsu? A̱mu za va Filistiya ɗa shi, waru a̱ɗu agbashi a Shawulu a ɗa shi? Ɗangulai vuma ta̱ a̱tsuma̱ a̱ ɗu adama u cipa̱ u yuwan nla̱ngi na̱ mu!
1SA 17:9 Nu u gura yuwan nla̱ngi na̱ mu reve wu una mu, tsu to o'wo agbashi a̱ ɗu, agba na̱ n la'a yi ucira reve mu una yi, i to o'wo agbashi a̱ tsu a̱vu i yuwaan tsu tsugbashi.>>
1SA 17:10 Reve za va Filistiya'a u damma, <<Ana'an n ta yuwusan oɓolo ali o uvon a Isra'ila ulamu! Ɗangulaa numu vuma ta̱ tsu yuwan nla̱ngi.>>
1SA 17:11 Ana Shawulu na aza a Isra'ila suru a uwwai ili i na za va Filistiya dammai, reve a kuɗa okolo a uwwa wovon lon.
1SA 17:12 Da̱wuda gba ulobo wa̱ Yese ɗa, vuma va Efarata, diga a̱ lyuci va̱ Batalami a̱tsuma̱ a Yahuda. Yese da̱na̱ ta̱ no olobo kunla̱. Waru a mantsa ma na Shawulu da̱na̱i o tsugono, Yese kutsa ta̱ ɗe, waru u da̱na̱ ta̱ na a'wan lon.
1SA 17:13 Olobo a ta'atsu a kpakpara a̱ Yese, ele ɗa Eliyabu na̱ Abinada na̱ Shama, a̱ shi ta̱ oɓolo ukere na̱ ali o uvon a Shawulu adama a yuwan uvon na aza a Filistiya.
1SA 17:14 Da̱wuda ɗa le mokosoto. Azakpakpara a ta'atsu'u a̱da̱na̱ ta̱ oɓolo na ali o uvon a Shawulu.
1SA 17:15 Amma Da̱wuda 'ya̱wusa̱ ta̱ nu u ka̱mbi uba̱ta̱ wa Shawulu adama u guɓusa mgbele ma dada va̱ yi a Batalami.
1SA 17:16 A̱vu Goliya za va Filistiya ka̱ra̱ o uta̱ wi isawan o ronuso una̱ wa ali o uvon a Isra'ila usana nu ulivu suru hali rana amunga.
1SA 17:17 Urana u ro reve Yese damma ulobo wa̱ yi Da̱wuda, <<Taraa azakpakpara a̱ wu makundatsu kupa ne ejere vi ishina yu uzuwun i nda na akpatali kupa o opopofu, vu jika̱, vu 'ya̱wa̱a̱ le o uva̱la̱ta̱.
1SA 17:18 Waru vu taraa yali ya̱ a̱soja e le wara vi inan kupa. Vu reve cine a̱za̱ a̱ wu a̱ ri a̱vu vu ta̱wa̱a̱ mu ni ili i ro i na yoo roco cine a̱ ri ɗe.>>
1SA 17:19 Azakpakpara a̱ Da̱wuda a̱da̱na̱ ta̱ ɗe oɓolo na̱ Shawulu na ali o uvon a Isra'ila suru o uka̱ri wa Ela a yuwusan uvon na aza a Filistiya.
1SA 17:20 Na̱ wasasa a̱vu Da̱wuda lyawa oɓolo e mgbele ekere a za va aguɓa o ro, reve u tara itana u ka̱ra̱ cine dada va̱ yi Yese damma niyi. U rawa ta̱ o uva̱la̱ta̱'a̱ a mantsa ma na ali o uvon a Isra'ila a̱ ri a̱ mota̱a̱ a̱ 'ya̱wa̱ e gere, a yisali yu uvon.
1SA 17:21 Aza a Isra'ila na aza a Filistiya e isawan ta̱ ugeru adama o uvon, waru a̱da̱na̱ ta̱ a̱ nka̱la̱la̱i.
1SA 17:22 A̱vu Da̱wuda lyawa itana'a e ekere a soja na aa ka̱lyuwusa̱ itana, reve u suma a̱ tyo uba̱ta̱ u na e gerei adama o uvon tsa̱ra̱ u ca̱sa̱ azakpakpara a̱ yi.
1SA 17:23 A̱yi a̱tsuma̱ a adanshi ne ele, reve Goliya za na la'a gurai uvon va aza a Filistiya'a vuma va Gat, u ka̱ra̱ uta̱ diga o uva̱la̱ta̱ wa aza a Filistiya a̱vu u yuwan adanshi tsu ufaru. Da̱wuda gba a uwusai.
1SA 17:24 Ana ali o uvon a Isra'ila enei Goliya, a̱vu a sumaa yi adama o wovon lon.
1SA 17:25 Aza a Isra'ila a̱ shi ta̱ a dansa va̱ni le, <<Ye ene ta̱ cine vuma nda o utusa̱? Suru urana u ta̱ utusa̱ adama u yuwan aza a Isra'ila ulamu. Mogono ma damma ta̱ u ta ca vuma na suru unai vuma nda utsuru wa̱ a̱bunda̱. Waru u ta ca yi usheli wa̱ yi lolo, waru u'wa wa dada va̱ yi wa tsupa utafa a̱tsuma̱ a Isra'ila shi.>>
1SA 17:26 Ɗaɗa Da̱wuda ecei ali o uvon a na a̱ da̱na̱i mishin zuzu na̱ a̱yi, <<Nye i ɗa aa yuwaan vuma na unai vuma va Filistiya nda, nu u tawa wono u nda uba̱ta̱ wa aza a Isra'ila? Zane ɗa za babu upaɗu wu uryumbu va Filistiya nda, na waa yuwusaan ali o uvon A̱sula̱ a wuma ulamu?>>
1SA 17:27 Reve a̱ ka̱mbuwa̱ yi ili i na a̱ ri a dansa va̱ni le, a damma yi, <<Ne ɗa aa yuwaan vuma na una niyi.>>
1SA 17:28 Ana Eliyabu zakpara nan Da̱wuda suru suru uwwa niyi a adanshi na ama'a, reve u yuwan upan na̱ a̱yi lon, a̱vu we ece, <<Adama a̱ nye vu ta̱wa̱i pa? Waru zane vu lyawayi mgbele n wa'a i ndolo a̱tsumona? N reve ta̱ cine vu ri nu uvaɗu na akpaka, vu ta̱wa̱ ta̱ adama vu ka̱lyuwa̱ uvon.>>
1SA 17:29 A̱vu Da̱wuda damma, <<To, nye n yuwain? Yeci ɗa goon ma yuwusan!>>
1SA 17:30 Ɗaɗa u lyawa niyi reve u vadala ya nanza, a̱vu u yuwisan yi cu'un yeci'i, a̱vu u usu yi tsu ufaru. Suru ali o uvo'on za na we ecei biti, a̱vu usu yi tsu ufaru.
1SA 17:31 Ali o uvon o ro a uwwa ta̱ ili i na Da̱wuda dammai, reve a damma Shawulu, a̱vu u zuwa e ɗe yi.
1SA 17:32 A̱vu Da̱wuda damma Shawulu, <<She nanza dada'wan adama a vuma va Filistiya nda wan. Aagbashi a̱ wu a̱ ta̱ 'ya̱wa̱ u yuwan nla̱ngi na̱ a̱yi.>>
1SA 17:33 Reve Shawulu usu Da̱wuda, <<Vaa gura yuwan uvon na̱ za va Filistiya nda hali vu lyuwa aciya̱yi shi! A̱vu ulobo u ɗa vu buwai. Agba Goliya gura ta̱ uvon a̱yi o ulobo.>>
1SA 17:34 Amma Da̱wuda damma ta̱ Shawulu, <<N ta guɓusaa dada va̱ mgbele. A mantsa ma na kamu ko a̱ba̱jini a nama vu una na a̱ tsu ɗe biya remei kyon diga o oɓolo,
1SA 17:35 n tsu saɓa yi ta̱ n faba yi, reve n wawa kyon va̱ diga o una̱ wa̱ yi. Waru nna̱ kamu'u ko biya'a u piri, n tsu gbagbala ta̱ eleme a̱ yinlu yi, reve n faba yi e iɗa mu una yi.
1SA 17:36 Aagbashi a̱ wu o una ta̱ ikamu na̱ nan biya. Vuma babu upaɗu wu uryumbu nda fo u ta̱ o'wo tsa za ta̱ le, adama a na u yuwaan ta̱ ali o uvon A̱sula̱ a wuma ulamu.
1SA 17:37 A̱sulazuva a na wawa numu diga a̱ a̱kpa̱ta̱ e ikamu na̱ nan biya, a̱yi ɗa waru waa wawa mu e ekere a vuma va Filistiya nda.>> A̱vu Shawulu damma Da̱wuda, <<Wala, lyawa A̱sulazuva a̱ da̱na̱ oɓolo na̱ a̱vu.>>
1SA 17:38 Reve Shawulu oto yi itana yu uvon ya̱ yi. A̱vu wo oto yi melezu mo uvon ma̱ rumushili a aaci, reve wo oto yi utugu wu uɗavu wu rumushili.
1SA 17:39 A̱vu Da̱wuda nla̱ matsun me pe'eni o utugu'u, a̱vu u rito dasu adama a na koto u yuwan ulinga ne ele shi. A̱vu u damma Shawulu, <<Maa gura dasu na̱ nda shi, adama a na koto n yuwan ulinga ne ele shi.>> Reve wu foɗo itana yu uvo'on.
1SA 17:40 A̱vu u tara aaɗanga a aguɓa a̱ yi, reve wu ta̱ɗa̱ mugbodolu ma atali n ton a̱tsuma̱ o moɗolu, a̱vu u zuwa le a̱ tsa̱n va aguɓa va̱ yi oɓolo na̱ a̱bitsutsu a̱ yi ufoɓu o ukere, reve u ka̱ra̱ o uta̱ u ga'an na̱ Goliya.
1SA 17:41 A mantsa'a fo za va Filistiya'a u zurusa̱ ta̱ Da̱wuda. Vuma na ri uguzu na̱ a̱a̱ra̱ga̱ a̱ yi u da̱na̱ ta̱ elime a̱ yi.
1SA 17:42 Ana za va Filistiya ndolo petelyuwei Da̱wuda ulobonu, reve we ene ulobo u ɗa nu uruma u sa'ani, na̱ gbaga lipu, reve u goro yi.
1SA 17:43 A̱vu Goliya ece yi, <<Vu ta a majiyan a̱mu musa̱n ma ɗa? A̱yi ɗa i zuwai vu ta̱wa̱i ya̱'a̱ va̱ na aaɗanga?>> Reve wi isululai Da̱wuda na aala a̱ musula̱ ma a aza a Filistiya.
1SA 17:44 Ɗaɗa za va Filistiya'a wa saala Da̱wuda, <<Ta̱wa̱ pa nda, n ta ca asala ni inama yu una inama ya̱ wu!>>
1SA 17:45 A̱vu Da̱wuda damma yi, <<Vu ta̱wa̱ ta̱ tsa̱ra̱ vu yuwan nla̱ngi na̱ a̱mu na̱ matsun me pe'eni oɓolo ni ibata na̱ mabata. A̱mu gba shi, n ta̱wa̱ ta̱ n yuwan nla̱ngi na̱ a̱vu a̱tsuma̱ a ala a̱ A̱sulazuva o oɓolo a̱ a̱soja a zuva. A̱yi ɗa A̱sula̱ a̱ a̱soja a Isra'ila, za na vu yuwan yi ulamu.
1SA 17:46 Ana'an A̱sulazuva a ta ca mu a̱vu e ekere a̱ va̱. N ta o una wu, waru n to koɗo aaci a̱ wu. Ana'an n ta ca asala ni inama yu una a̱kwa̱kwa̱ ali o uvon a Filistiya, reve uvaɗi ma̱ɓula̱ u reve a na A̱sula̱ a̱ ta̱ a̱tsuma̱ a Isra'ila na amayun!
1SA 17:47 Aza a na a̱ ri uɓolotowu pa suru e te reve a na na̱ matsun me pe'eni ma ɗa ko ni ibata i ɗa A̱sulazuva a tsu wawa shi, adama a na uvon za va̱ A̱sulazuva a ɗa, waru u ta ca suru nɗu e ekere a̱ tsu.>>
1SA 17:48 Ana Goliya da̱shi zura̱ niyi zuzu, a̱vu Da̱wuda zarana a rawa uba̱ta̱ u na a̱soja a Filistiya a̱ ri yu ugeru adama u ga'asan na̱ yi.
1SA 17:49 A̱vu Da̱wuda tara aatali a̱ ta̱ a̱tsuma̱ a̱ tsa̱n va̱ yi, reve u zuwa yi a̱ a̱bitsutsu a̱ yi a̱vu u vuta̱la̱ yi. Reve aatali'i a vara Goliya a̱ cin, reve u ka̱ra̱ a uwa pe a̱ cin va̱ yi, a̱vu u riya̱ ma̱kpa̱ɓa̱.
1SA 17:50 Ne ɗa Da̱wuda lyuwai aci a za va Filistiya na̱ a̱bitsutsu na aatali a̱ ta̱, a na u vara niyi u riya̱i. Waru u da̱na̱ na̱ matsun me pe'eni o ukere wa̱ yi shi.
1SA 17:51 A̱vu Da̱wuda suma u rawa uba̱ta̱ wa̱ yi. Reve u tala matsun me pe'eni ma Goliya a̱tsuma̱ e ibici ya̱ yi, reve wu unai u koɗo aaci a̱ yi na̱ matsun me pe'eni'i. Ana aza a Filistiya e enei za vu uvon vu ucira le kuwa̱ ta̱, reve a vadala a suma.
1SA 17:52 Reve ali o uvon a Isra'ila na aza a Yahuda a̱ 'yon na̱ yorori reve a gbagba aza a Filistiya a̱ tyo o una̱ntsu wa Gat nu una̱ntsu wa Ekuron. Aza a Filistiya a na amatoyin na̱ a̱kwa̱kwa̱ e le ocusho ta̱ o ure diga Sha'arayim hali a̱ tyo Gat na̱ Ekuron.
1SA 17:53 Ana ali o uvon a Isra'ila a̱ ka̱mba̱i diga uba̱ta̱ u magbagba ma aza a Filistiya, a̱vu a̱ pura̱ uva̱la̱ta̱ u le.
1SA 17:54 Reve Da̱wuda tara aaci a Goliya a̱vu u tyewoto yi Urishelima, a̱vu u zuwa itana yu uvon ya Goliya o oogodo a̱ yi.
1SA 17:55 A mantsa ma na Shawulu enei Da̱wuda a̱ 'ya̱wa̱ uba̱ta̱ wa Goliya, reve we ece Abna, yali ya a̱soja, <<Abna, ulobo wa̱ zane u ɗa ulobo u nda'a?>> A̱vu Abna damma, <<N kucina ta̱ na̱ a̱vu, mogono, n reve shi.>>
1SA 17:56 Reve mogono ma damma, <<E ece ko ulobo wa̱ zane ɗa ulobo u nda'a.>>
1SA 17:57 Ana Da̱wuda ka̱mba̱i diga uba̱ta̱ u mona ma Goliya, a̱vu Abna tara yi, reve u tyewoto yi a̱ ma̱ka̱ka̱n ma Shawulu a̱yi uguzu na aaci a Goliya o ukere wa̱ yi.
1SA 17:58 Reve Shawulu ece yi, <<A̱vu ulobo wa̱ zane ɗa, ulobo?>> A̱vu Da̱wuda damma, <<A̱mu ulobo wa aagbashi a̱ wu Yese va Batalami ɗa.>>
1SA 18:1 Ana Da̱wuda kotoi adanshi na̱ Shawulu, a̱vu Jonata ulobo wa Shawulu uwwa ookolo a̱ yi e icigi ya̱ Da̱wuda lon. A̱vu u ciga yi tsa wuma wa̱ yi.
1SA 18:2 Diga o uranu u ndolo Shawulu ɓana ta̱ Da̱wuda, waru u lyawa yi u ka̱mba̱ o u'wa wa dada va̱ yi shi.
1SA 18:3 Reve Jonata yuwan nzuwulai na̱ Da̱wuda, adama a na u ciga yi ta̱ tsa wuma wa̱ yi.
1SA 18:4 Reve Jonata foɗo utugu u na u ri na̱ a̱yi wotowu, a̱vu u ca Da̱wuda, ni itana yu uvon ya̱ yi, na̱ matsun me pe'eni ma̱ yi, nu utan nu ujin wa̱ yi, na̱ gbakala va̱ yi.
1SA 18:5 Waru Da̱wuda tsu 'ya̱wa̱ ta̱ u lyuwa aci uba̱ta̱ u na Shawulu lyungu niyi uvon biti, reve Shawulu zuwa yi yali ya̱ a̱soja o uvon a̱ yi. Waru ili'i u yo'ono ta̱ ali o uvon suru, oɓolo na̱ nan yali yu uvon a Shawulu.
1SA 18:6 Ana ali o uvon a Isra'ila a̱ ri a̱ ma̱ ka̱mba̱ o u'wa, mantsa ma na Da̱wuda ka̱mba̱i diga uba̱ta̱ u na wu unai Goliya, a̱vu a̱ma̱ci o uta̱ e ilyuci ya Isra'ila suru, adama a ga'asan na̱ Shawulu mogono, na̱ muganga ni ikumburu a̱ ma̱za̱nga̱ e ishipa nu uje'en.
1SA 18:7 Ele o uje'en a̱vu a cana, <<Shawulu una ta̱ kpaku kupa va̱ yi, waru Da̱wuda una ta̱ ukpakukupa kupa va̱ yi va̱ a̱bunda̱.>>
1SA 18:8 Reve Shawulu yuwan upan lon, a̱vu udammu u ndolo u damaton yi. A̱vu u damma, <<A cuwa ta̱ Da̱wuda na̱ ukpakukupa kupa va̱ a̱bunda̱ a̱mu gba shi kpaku kupa goon. Nye i ɗa i buwa niyi a na wa̱a̱ tsura̱ she tsugono goon ko?>>
1SA 18:9 Waru diga a mantsa mo ndolo a̱ ka̱ra̱ a̱vu Shawulu reme tsushu'un na̱ Da̱wuda.
1SA 18:10 O urana we ire a̱vu ruhu vama diga uba̱ta̱ wa̱ A̱sula̱ cipa̱a̱ Shawulu nu ucira, a̱vu wo o'wo a yuwusan adanshi e ikaka ya̱ A̱sula̱ a̱tsuma̱ o u'wa wa̱ yi tsa vuma vu ujaru, a mantsa mo ndolo gba Da̱wuda wa'asaa yi ta̱ kumburu, cine u tsu yuwusan. Shawulu gba da̱na̱ ta̱ ni ibata o ukere wa̱ yi.
1SA 18:11 A̱vu u sari yi, a majiyan okolo a̱yi, <<N ta sapalai Da̱wuda nu uɓaɓu.>> Amma Da̱wuda kanzu'usa ta̱ toto ure.
1SA 18:12 Shawulu uwwa ta̱ wovon wa̱ Da̱wuda adama a na A̱sulazuva o to oɓolo na̱ yi, amma A̱sulazuva a vadalaa ta̱ Shawulu ucina̱.
1SA 18:13 Ɗaɗa Shawulu tawa niyi a̱ ma̱ka̱ka̱n ma̱ yi reve u zuwa yi yali ya̱ a̱soja ukpakukupa (1,000) adama u walaa le elime uba̱ta̱ o uvon.
1SA 18:14 A̱tsuma̱ e ili i na Da̱wuda yuwain suru u tsa̱ra̱ ta̱ ulyuwu wa aci, adama a na A̱sulazuva o to oɓolo na̱ a̱yi.
1SA 18:15 Waru ana Shawulu enei Da̱wuda ta̱ tsura̱sa̱ ulyuwu wa aci lon, a̱vu wu uwwa wovon wa̱ yi lon.
1SA 18:16 Amma aza a Isra'ila na aza a Yahuda suru a ciga ta̱ Da̱wuda, adama a na u ta̱ ronuso le aɗanga ulobonu uba̱ta̱ o uvon.
1SA 18:17 Ele lo reve Shawulu damma Da̱wuda, <<Apa usheli u kpara u va̱ Mera, n ta ca wu a̱yi lolo, vu yuwaan mu a̱ga̱nda̱ na̱ ukadu goon, waru vu yuwan uvon wa̱ A̱sulazuva.>> Adama a na Shawulu jiyan ta̱ a asuvu a̱ yi, <<Ma̱a̱ ya̱sa̱n ukere u va̱ ju'wa̱in shi, amma lyawa aza a Filistiya o una yi!>>
1SA 18:18 Da̱wuda damma ta̱ Shawulu, <<Zane ɗa n ri waru zane ɗa mmaci n va̱ ko umatsun wa dada va̱ a̱tsuma̱ a Isra'ila, hali a na mo o'wo toto mogono?>>
1SA 18:19 Amma a na mantsa ma rawai a na Shawulu a ca usheli wa̱ yi Mera lolo ekere Da̱wuda, reve u ca Adriye vuma va Mehola.
1SA 18:20 Mikal gba usheli wa Shawulu u ta̱ e icigi ya̱ Da̱wuda. Ana a dammai Shawulu aɗa a̱ yi, reve wu uwwa uyo'o lon.
1SA 18:21 Reve u jiyan o okolo a̱ yi, <<N ta ca yi a̱yi adama wo o'wo yi maza waru adama aza a Filistiya a̱tsura̱ o una yi.>> Ɗaɗa Shawulu dammai Da̱wuda we ire, <<Gogo vu to o'wo toto va̱.>>
1SA 18:22 A̱vu Shawulu damma agbashi a̱yi, <<Yuwain adanshi na̱ Da̱wuda usokowu i damma, <A̱yi ɗa nda mogono ma ta uwwusa na̱ a̱vu, waru suru agbashi a̱yi a ciga wu ta̱. Gogo nye yaa putsa a̱ wu a na va̱ usu a na voo o'wo toto va̱ yi?> >>
1SA 18:23 Reve agbashi a Shawulu a̱ ka̱mbuwa̱ Da̱wuda adanshi a nda usokowu. A̱vu Da̱wuda damma, <<I ta majiyan ili yu uro i ɗa a na moo o'wo toto mogono? A̱mu za vu ulambu ɗa waru ili i ro ɗa shi.>>
1SA 18:24 Ana agbashi a Shawulu a̱ ka̱mbuwa̱ niyi ili i na Da̱wuda dammai,
1SA 18:25 reve Shawulu damma, <<Dammai Da̱wuda, <Mogono ma ciga atsupu e ili i tsutoto i ro shi na a̱ ka̱ra̱i kwan vu ryumbu ukpaku (100) wa aza a Filistiya shi, adama u tsupa n'yuwatan ma̱ yi.> >> Majiyan ma Shawulu a̱yi ɗa adama Da̱wuda kuwa̱ e ekere aza a Filistiya.
1SA 18:26 Ana agbashi'i a dammai Da̱wuda adanshi a nda a̱vu Da̱wuda uwwa uyo'o lon a na wo o'wo toto mogono. Kafu mantsa ma atsupu e ikebe i lolo'o i rawa,
1SA 18:27 reve Da̱wuda 'yon oɓolo na̱ a̱soja a̱ yi, reve o una aza a Filistiya ukpakure (200). A̱vu Da̱wuda ta̱wa̱ na̱ kwan vu ryumbu le, a̱vu u ca mogono ele suru, adama wo o'wo toto mogono. Reve Shawulu ca yi usheli wa̱ yi Mikal lolo.
1SA 18:28 Ana Shawulu enei A̱sulazuva o to oɓolo na̱ Da̱wuda, waru usheli wa̱ yi Mikal ciga ta̱ Da̱wuda,
1SA 18:29 reve Shawulu da̱shi uwwa wovon wa̱ Da̱wuda, a̱vu wo o'wo ma'yuwatan ma̱ yi a akapi arana wuma wa̱ yi.
1SA 18:30 Mantsa ma na suru nan yali yu uvon a Filistiya o uta̱i adama a yuwan uvon na aza a Isra'ila, Da̱wuda tsu lyuwa ta̱ aci e le, u la'a akapi a yali yu uvon ya Shawulu, reve aala a̱ yi a̱ uta̱ lon.
1SA 19:1 Shawulu damma ta̱ Jonata ulobo wa̱ yi na agbashi a̱ yi suru o una Da̱wuda. Agba Jonata te icigi ya̱ Da̱wuda lon.
1SA 19:2 Reve Jonata damma Da̱wuda, <<Dada va̱ ta zamishi ure u na wa una wu. Vu yuwan ugbozu nfa'an nu usana, vu 'ya̱wa̱ o upa'atan vi isawan ɗe.
1SA 19:3 Waru n to uta̱ mi isawan zuzu na̱ dada va̱ a atsusa uba̱ta̱ u na vu ri upa'awun. N ta̱ a yuwan adanshi na̱ dada va̱ adama a̱ wu, a̱vu n damma wu suru ili i na u dammai.>>
1SA 19:4 A̱vu Jonata yuwan adanshi adama a ɗa Da̱wuda ulobonu uba̱ta̱ wa dada va̱ yi Shawulu, a̱vu u damma yi, <<She mogono ma yuwan unusu uba̱ta̱ aagbashi a̱ yi Da̱wuda wan, adama a na u yuwaan wu unusu shi, waru adama a na ili i na u yuwain u ta̱wa̱a̱ wu ta̱ ni i kambi shi na̱ a̱bunda̱.
1SA 19:5 Adama a na u ca ta̱ wuma wa̱ yi, reve wu una za va a Filistiya. Waru A̱sulazuva a ca ta̱ ulyuwu wa aci wa̱ a̱bunda̱ uba̱ta̱ wa̱ aza a Isra'ila suru, waru ve ene ta̱ reve vu yuwan ma̱za̱nga̱. Nye i zuwai vaa yuwan unusu uba̱ta̱ u vuma na ri nu unusu shi? She vu una Da̱wuda babu unusu u ro wan!>>
1SA 19:6 A̱vu Shawulu uwwa adanshi a Jonata a̱vu u yuwan akucunu, <<N kucuna ta̱ na̱ A̱sulazuva a na a̱ ri wuma, moo una yi shi.>>
1SA 19:7 A̱vu Jonata ɗe Da̱wuda reve u damma yi adanshi a nda suru. A̱vu Jonata ta̱wa̱ na̱ Da̱wuda uba̱ta̱ wa Shawulu, a̱vu u da̱nu oɓolo na̱ yi tsu ufaru.
1SA 19:8 A̱vu waru uvon u 'yowisa̱n, reve Da̱wuda uta̱ a na waa yuwan uvon na aza a Filistiya, waru u kototo le ta̱ wa'a shi, ɗaɗa a sumai a̱ ma̱ka̱ka̱n ma̱ yi.
1SA 19:9 Uranu u ro Shawulu da̱na̱ ta̱ nde o u'wa wa̱ yi, uguzu ni ibata o ukere wa̱ yi. A̱vu ruhu vama diga uba̱ta̱ wa̱ A̱sulazuva cipa̱ yi, Da̱wuda a wa'asa yi kumburu,
1SA 19:10 reve Shawulu zami ure u na̱ waa sapalai Da̱wuda ni ibata u ɓoloi nu uɓaɓu, amma a̱vu Da̱wuda kanzu'wa, ɗaɗa ibata i sapai uɓaɓu. A̱tsuma̱ a ayin o ndolo a̱vu Da̱wuda suma adama u la'a na̱ wuma wa̱ yi.
1SA 19:11 Shawulu lyungu ta̱ aza a matawa mo utyo adama a yuwan ipiri yu u'wa wa Da̱wuda, adama o una yi nu usana. Amma Mikal ka va̱ Da̱wuda, rono yi ta̱ atsuvu, <<Na̱ vu suma adama a wuma wa̱ wu na ayin a nda shi, nfa'an nda a̱ to una wu.>>
1SA 19:12 Ɗaɗa Mikal ta̱telyuwetyoi Da̱wuda nu usowoto wu upepu wa asula, a̱vu u suma ɗaɗa u la'ai.
1SA 19:13 Reve Mikal tara a̱a̱ma̱li reve u voton yi a̱ a̱a̱ga̱da̱, a̱vu wu pala yi nu umuna a̱vu wo oto yi eleme e megbele a aaci.
1SA 19:14 Ana Shawulu lyunguwisa̱i aza a matawa mo utyo e reme Da̱wuda, reve Mikal damma le, <<Wu uwwa uyo'o shi.>>
1SA 19:15 Reve Shawulu da̱shi lyunguwisa̱ aza a matawa mo utyo'o a̱ ka̱mba̱ e ene Da̱wuda ne esu le, reve u damma le, <<Ta̱wa̱a̱ numu na̱ a̱yi a̱ a̱a̱ga̱da̱'a̱ tsura̱ mu una yi.>>
1SA 19:16 Amma a na aza a matawa mo utyo'o a uwai o u'wa wa̱ Da̱wuda, reve a cina a̱a̱ma̱li a ɗa a̱a̱ga̱da̱'a̱, waru wo oto wu ne eleme e megbele a aaci.
1SA 19:17 Shawulu damma ta̱ Mikal, <<Nye i zuwai vu luluma̱ numu tsunda vu lyawai ma'yuwatan ma̱ va̱ ma̱ la'ai?>> A̱vu Mikal usu Shawulu, <<Da̱wuda damma mu ta̱ ana, na̱ n lyawai u ka̱ra̱ shi, u to una mu.>>
1SA 19:18 Ana Da̱wuda sumai u la'ai, reve u tyo ya Sama'ila ɗe Rama, reve u damma yi suru ili i na Shawulu yuwaan niyi. A̱vu a̱yi na̱ Sama'ila a̱ 'ya̱wa̱ a̱ da̱nu uba̱ta̱ u na a̱tsu ɗe Nayo.
1SA 19:19 Reve udammu u ta̱wa̱ Shawulu, <<Da̱wuda ta̱ Nayo a̱tsuma̱ a Rama.>>
1SA 19:20 Ɗaɗa u lyunguyi aza a matawa mo utyo a̱ 'ya̱wa̱ e reme Da̱wuda. Amma a na e enei oɓolo a ama̱sula̱ a yuwusan adanshi e ikaka ya̱ A̱sula̱, oɓolo na̱ Sama'ila ɗe mishin elime e le o una̱ wu zagbain, reve Ruhu va̱ A̱sula̱ cipa̱a̱ aza a matawa mo utyo a Shawulu. Reve fo e teme adanshi e ikaka ya̱ A̱sula̱.
1SA 19:21 Ana a dammai Shawulu, a̱vu u da̱shi lyunguwisa̱ aza a matawa mo utyo o ro, a̱vu a̱ le fo e teme adanshi e ikaka ya̱ A̱sula̱. Reve Shawulu lyunguwisa̱ aza a matawa mo utyo wa ta'atsu, a̱vu e le fo a uwa adanshi e ikaka ya̱ A̱sula̱.
1SA 19:22 Ɗaɗa a̱yi na aciya̱yi u lapai a̱ tyo Rama. Ana u rawai o ooko'o a gbain a na a̱ ri Seku, reve we ece, <<Te ɗa Sama'ila na̱ Da̱wuda ri?>> Reve a damma yi, <<A̱ ta̱ ɗe Nayo a̱tsuma̱ a Rama.>>
1SA 19:23 Ɗaɗa Shawulu ka̱ra̱i a̱ tyo Nayo a̱tsuma̱ a Rama. Amma a̱vu fo Ruhu va̱ A̱sula̱ cipa̱a̱ yi, reve u yuwan adanshi e ikaka ya̱ A̱sula̱ a̱tsuma̱ o ure hali u rawa Nayo.
1SA 19:24 A̱vu wu foɗo a̱tugu a̱ yi u uwa fo adanshi e ikaka ya̱ A̱sula̱ a̱ ma̱ka̱ka̱n ma Sama'ila. A̱vu u von ataɓu urana suru na ayin. A̱yi ɗa i zuwai ama a dammai, <<Shawulu fo ta̱ pe a̱tsuma̱ a ama̱sula̱?>>
1SA 20:1 Reve Da̱wuda suma diga Nayo a̱tsuma̱ a Rama a̱vu u 'ya̱wa̱ ya Jonata we ece yi, <<Nye i ɗa n yuwain? Iwuya i ne ɗa n yuwain? Unusu ne ɗa n yuwaan yi dada va̱ a̱ wu, a na waa zama wu una a̱ mu?>>
1SA 20:2 A̱vu Jonata usu yi, <<A̱sulazuva aa para, va̱a̱ kuwa̱ shi! Ka̱lyuwa̱! Dada va̱ tsu yuwan ili i gbain ko ili i ke'en na u tsu kuɗa̱ a damma mu shi. Nye i zuwai wo soko mu za nda? Ne ɗa u ri shi!>>
1SA 20:3 Amma a̱vu Da̱wuda yuwan akucunu, u damma, <<Dada va̱ wu reve ta̱ lon a na n tsura̱i isa'ani e ekere a̱ wu, reve u jiyan okolo a̱ yi, <Na̱ Jonata reve ili ya nda u ta yuwan a̱tsumola̱ngu lon.> Ko na̱ ne n kucuna ta̱ na̱ A̱sulazuva a na a̱ ri wuma na̱ wuma wa̱ wu, udasuwu u ta̱ ɗa goon u ri e memere ma̱ va̱ nu ukwa̱.>>
1SA 20:4 Ɗaɗa Jonata dammai Da̱wuda, <<Suru ili i na vu cigai n yuwaan a̱ wu, n ta yuwaan a̱ wu.>>
1SA 20:5 Reve Da̱wuda damma Jonata, <<A̱yi ɗa nda nfa'an urana wa̱ a̱buki o woto u sa'avu a ɗa, u lobono ta̱ n lyuwa oɓolo na̱ mogono, amma lyawa mu n 'ya̱wa̱ m pa'an a atsusa hali a cina santawa nu ulivu.
1SA 20:6 Na̱ dada va̱ wu lamba mu biti, reve vu damma, <Da̱wuda pati mu ta̱ lon n lyawa yi u jika̱ u 'ya̱wa̱ a̱ lyuci vu umatsun wa̱ yi Batalami, adama a na a fara ta̱ kucci va aa'wan vu umatsun wa̱ yi suru.>
1SA 20:7 Nu u damma, <U lobono ta̱,> aagbashi a̱ wu a ta la'a. Amma nu u la̱nga̱ a̱tsuma̱ lon, vu te reve a na u cigai wu una mu.
1SA 20:8 A̱vu gba shi, vu roco aagbashi a̱ wu icigi i na i tsu vadala shi, adama a na vu zuwa yi ta̱ u yuwain nzuwulai na̱ A̱sulazuva a̱ wu. Na̱ n yuwan ta̱ unusu, vu una mu na aciya̱wu! Nye i zuwai vaa ca mu ya dada va̱ wu adama wu una mu?>>
1SA 20:9 Reve Jonata usu, <<A̱sulazuva aa para! She vu yuwan adanshi ne wan, na̱ n reve ta̱ ko ke'en a na dada va̱ cigai wu una wu, maa damma wu shi?>>
1SA 20:10 Ɗaɗa Da̱wuda ecei Jonata, <<Zane ɗa a damma mu, na̱ dada va̱ wu usu wu nu upan?>>
1SA 20:11 Reve Jonata damma Da̱wuda, <<Ta̱wa̱, lyawa tsu lapa a̱ tyo a atsusa.>> Ɗaɗa ele ra a̱ ka̱ra̱i.
1SA 20:12 Reve Jonata damma Da̱wuda, <<N kucuna ta̱ na̱ A̱sulazuva A̱sula̱ a Isra'ila, na̱ mantsa ma nda nfa'an ko santawa n ta yuwan adanshi'i na̱ dada va̱. Nu u ta̱ ni ifoɓi i sa'ani a̱ tyo ya̱'a̱ wu, n ta̱ lyungu a damma wu.
1SA 20:13 Amma na̱ dada va̱ ciga ta̱ na woo una wu, n ta̱ lyungu wa̱ wu adama a na va a la'a. Amma lyawa A̱sulazuva a ca mu a̱tsuma̱lima̱ lon na̱ n yuwan ne shi. Lyawa A̱sulazuva a̱ da̱na̱ oɓolo na̱ a̱vu cine u da̱na̱i na̱ dada va̱.
1SA 20:14 Na̱ m buwa ta̱ wuma, vu roco mu icigi i na i tsu vadala shi tsa̱ A̱sulazuva. Amma mantsa ma na n kuwa̱i,
1SA 20:15 she vu koɗo icigi i na i tsu vadala shi nu u'wa u va̱ wan hali hali, ko n na̱ A̱sulazuva o kototo n'yuwatan ma̱ wu Da̱wuda diga o uvaɗi.>>
1SA 20:16 Reve Jonata yuwan nzuwulai nu u'wa wa̱ Da̱wuda, u damma, <<Lyawa A̱sulazuva a ca wu oforo n na̱ vu kuɗa̱ o shiton nzuwulai n na tsu yuwain.>>
1SA 20:17 Adama e icigi i na Jonata a yuwusan Da̱wuda reve u zuwa yi u kucunisa, adama a na u ciga ta̱ Da̱wuda cine u cigai wuma wa̱ yi.
1SA 20:18 Ɗaɗa Jonata damma niyi, <<A̱yi ɗa nda nfa'an urana wa̱ a̱buki o woto u sa'avu a ɗa, waru e ene a̱ wu lo shi adama a na ootogu a̱ wu a̱ ta̱ da̱na̱ lya̱nga̱.
1SA 20:19 Santawa a cina ulivu, a̱vu vu 'ya̱wa̱ uba̱ta̱ u na vu shi vu pa'ain a mantsa ma na addama a nda a farai, waru vi isawan pe zuzu nu uba̱ta̱ o oɓolo atali.
1SA 20:20 Waru n ta̱ tewin iliya i ta'atsu a̱ nge'en ma̱ yi, she damma n te tewishin ili i ro.
1SA 20:21 Waru n ta̱ lyungu ulobo u na tsa̱ ta̱wa̱i ra reve n damma yi, <'Ya̱wa̱ vu zami iliya i na n tewiyin.> Na̱ n damma yi, <Ka̱lyuwa̱, iliya i ta̱ lo a̱ nge'en nda ma̱ wu, ta̱wa̱ ne ele pa nda,> reve vu ta̱wa̱, vu la'a ta̱, adama a na n kucuna ta̱ na̱ A̱sulazuva a na a̱ ri wuma, babu addama o ro.
1SA 20:22 Amma na̱ n damma ulobo'o, <Ka̱lyuwa̱, iliya'a a̱ ta̱ ɗe elime a̱ wu ke'en,> reve vu ka̱ra̱, adama a na A̱sulazuva a ciga wu ta̱ vu ka̱ra̱.
1SA 20:23 Waru adama aɗa a na tsu yuwain a̱mu na̱ a̱vu, a̱yi ɗa nda A̱sulazuva a ɗa esu a̱ tsu a̱mu na̱ a̱ vu hali hali.>>
1SA 20:24 Ɗaɗa Da̱wuda pa'ain a atsusa. Ana urana wa̱ a̱buki o woto u sa'avu a rawai, reve Shawulu Mogono ma̱ da̱nu adama u lyuwa ilyalya.
1SA 20:25 Reve mogono ma̱ da̱nu uba̱ta̱ u na u tsu da̱nusu nu uɓaɓu, a̱ nka̱la̱la̱i na̱ Jonata, reve Abna da̱nu o tono Shawulu, amma uba̱ta̱ wa̱ Da̱wuda u da̱na̱ ta̱ lya̱nga̱.
1SA 20:26 Shawulu damma ili i ro shi o urana u ndolo, adama a na u ta̱ majiyan, <<Ili i ro i cina ta̱ Da̱wuda a na u ka̱mbuwa̱ niyi za vi idaba, amayun za vi idaba ɗa.>>
1SA 20:27 O urana we ire, wu urana u na u toni yi u urana wa̱ a̱buki o woto u sa'avu, uba̱ta̱ wa̱ Da̱wuda u da̱nisa̱ ta̱ lya̱nga̱. Reve Shawulu ece ulobo wa̱ yi Jonata, <<Nye i zuwai ulobo wa̱ Yese u ta̱wa̱i uba̱ta̱ wa alya e ilyalya yon na ana'an shi?>>
1SA 20:28 Reve Jonata usu Shawulu, <<Da̱wuda pati mu ta̱ lon n lyawa yi u 'ya̱wa̱ Batalami.
1SA 20:29 U damma ta̱, <Lyawa mu n ka̱ra̱, adama a na umatsun u tsu u ta casu kucci a̱ lyuci, waru zakpara va̱ damma mu ta̱ n da̱na̱ ɗe. Na̱ n tsura̱ isa'ani e ekere a̱ wu, vu lyawa mu n 'ya̱wa̱ me ene a̱za̱ va̱.> Adama a adanshi a nda ɗa u ta̱wa̱i a alya ilyalya oɓolo na̱ mogono shi.>>
1SA 20:30 Reve Shawulu yuwan upan na̱ Jonata lon, a̱vu u damma yi, <<A̱vu mawun me pere na aciyogbamu u ɗa tsa mma va̱ wu! N reve ta̱ vu ta a kambusa ulobo wa̱ Yese, adama vu ca aciya̱wu wono na̱ mma na matsan nu wu.
1SA 20:31 Nna̱ ulobo wa̱ Yese u ta̱ wuma o uvaɗi, wa lyawa tsugono tsa̱ wu tsa lyuwa elime a̱tsuma̱ e iɗa i nda shi. Gogo lyungu a̱ ta̱wa̱a̱ mu na̱ a̱yi, adama a na na a ciga a 'yuwan mu unai!>>
1SA 20:32 Reve Jonata usu dada va̱ yi Shawulu, <<Nye i zuwai oo una yi? Nye i ɗa u yuwain?>>
1SA 20:33 Reve Shawulu sari ibata ya̱ yi adama wu una yi. Ɗaɗa Jonata revei dada va̱ yi ciga ta̱ a na woo una Da̱wuda.
1SA 20:34 Reve Jonata 'yon nu upan lon diga a apada agba u lyuwa ilyalya o urana we ire, wu urana u na u toni u urana wa̱ a̱buki'i o woto u sa'avu shi, adama a na u ta̱ na̱ a̱tsumola̱ngu cine dada va̱ yi yuwain na̱ Da̱wuda a̱tsuma̱ o ulambu u wono.
1SA 20:35 Nu usana a̱vu Jonata 'ya̱wa̱ a atsusa uba̱ta̱ u na aa zuwai a na a ga'asan na̱ Da̱wuda. U da̱na̱ ta̱ na̱ molobo oɓolo na̱ a̱yi.
1SA 20:36 Reve u damma molobo'o, <<Suma vu zami iliya i na me tewin.>> Ana molobo'o u sumai, a̱vu u tewin liya elime a̱ yi ke'en.
1SA 20:37 Ana molobo'o u rawai uba̱ta̱ wu liya n na Jonata teweyin, a̱vu Jonata ɗe yi reve u damma, <<Liya'a wu ɗe elime a̱ wu ke'en shi?>>
1SA 20:38 Reve Jonata ɗe molobo'o, <<Jika̱! 'Ya̱wa̱ gogogo! She vi isawan wan!>> Ɗaɗa molobo'o u tarai liya'a a̱vu u ka̱mba̱ uba̱ta̱ wu zagbain va̱ yi.
1SA 20:39 Amma molobo'o u reve ko nye i ɗa suru ili i nda'a shi, Jonata na̱ Da̱wuda ɗa goon revei.
1SA 20:40 A̱vu Jonata ca molobo'o utan ni iliya ya̱ yi, a̱vu u damma yi, <<Wala, tara le a̱ tyo a̱ lyuci.>>
1SA 20:41 Mantsa ma na molobo'o u ka̱ra̱i, a̱vu Da̱wuda 'yon diga upasu wu uyagi uba̱ta̱ wo o oɓolo atali'i, reve u kingyo u ka̱ɗa̱to urewesu wa̱ yi e iɗa a̱ ma̱ka̱ka̱n ma Jonata toto uta'atsu. A̱vu a katalalai ra reve a̱ shon, amma Da̱wuda la'a ta̱ shon.
1SA 20:42 Reve Jonata damma Da̱wuda, <<Ka̱ra̱ na asuvu nden, adama a na tsu yuwan ta̱ akucunu a̱ n'utsa̱ na ala a̱ A̱sulazuva, tsu damma, <A̱sulazuva a ɗa esu a̱ va̱ na̱ a̱vu, waru esu a limatan va̱ wu na a limatan va̱ hali hali.> >> Reve Da̱wuda 'yon u ka̱ra̱, a̱vu Jonata ka̱ra̱ a̱ ka̱mba̱ a̱ lyuci.
1SA 21:1 Da̱wuda ka̱ra̱ ta̱ a̱ tyo Nob, uba̱ta̱ wa Ahimele ganu. A̱vu Ahimele ta̱wa̱ u ga'asan na̱ Da̱wuda e meje'en a̱vu we ece yi, <<Nye i zuwai vu ta̱wa̱i a̱ nde'en goon?>>
1SA 21:2 Reve Da̱wuda usu Ahimele ganu, <<Mogono ma ɗa ma̱ lyungu numu na aɗa o ro waru u damma mu ta̱, <She vu lyawa za reve ili i ro adama aɗa a na n lyungu nuwu wan, waru ni ili i na n damma nuwu wan.> Waru ali o uvon a̱ va̱, n damma le ta̱ uba̱ta̱ u na tsu zuwulai a na a ga'asan na̱ a̱mu.
1SA 21:3 Gogo, ilyalya i ne i ɗa vu ri na̱ a̱yi? Ca mu akpatali o opopofu ozo o ton, ko ili i ro i na vu ri na̱ a̱yi suru.>>
1SA 21:4 Reve ganu usu Da̱wuda, <<N ri pa no opopofu a ndana o ukere u va̱ shi, amma opopofu a akiza a ɗa a̱ ri pa, vu ta gura tama na ali o uvon a̱ wu a na asai na̱ a̱ma̱ci yon shi.>>
1SA 21:5 Reve Da̱wuda usu ganu, <<Amayun a kasa tsu ta̱ na̱ a̱ma̱ci cine a tsu yuwusan nu ufaru suru mantsa ma na n 'ya̱wa̱i mmalu na ali o uvon a̱ va̱. Lipu va ali a̱ va̱ a aza a akiza a ɗa ko na̱ shi gba n mmalu ma ndana n ɗa. Te gba ana'an a na tsu uta̱i mmalu ma akiza!>>
1SA 21:6 Ɗaɗa ganu ca niyi opopofu a akiza adama a na babu lo opopofu o ro ko'o, she za na a tawai na ri a̱ ma̱ka̱ka̱n ma̱ A̱sulazuva, a̱vu a kita'wan na̱ za vu usuɗuwu o urana u na a tawa niyi.
1SA 21:7 Waru o urana u ndolo aagbashi a Shawulu o ro da̱na̱ ta̱ lo, adama a na u ta̱ ni ili i na waa yuwan a̱ ma̱ka̱ka̱n ma̱ A̱sulazuva. Ala a̱ yi a ɗa Dowe vuma va Edom, zagbain va aza a aguɓa a Shawulu.
1SA 21:8 Reve Da̱wuda ece Ahimele, <<Vu ri ni ibata ko matsun me pe'eni mo ro pa shi? Adama a na n ta̱wa̱ na̱ matsun me pe'eni ma̱ va̱ ko itana yu uvon i ro shi, adama a na udammu u mogono u ta̱wa̱ mu ta̱ uragazu.>>
1SA 21:9 Reve ganu usu yi, <<Matsun me pe'eni ma Goliya vuma va Filistiya, na vu unai o uka̱ri wa Ela, u ta̱ pa u tu ukatalu na aakashi o cina̱ wa̱ epo. Na̱ vu ciga yi vu tara, matsun me pe'eni mo ro ma pa shi she a̱yi.>> A̱vu Da̱wuda damma, <<Babu za ro tsa̱ yi, ca mu a̱yi.>>
1SA 21:10 A̱vu Da̱wuda 'yon u sumaa Shawulu o urana u ndolo, a̱vu u ka̱ra̱ a̱ tyo ya Akish mogono ma Gat e iɗa ya Filistiya.
1SA 21:11 A̱vu agbashi a Akish a damma yi, <<A̱yi nda a̱yi ɗaɗa Da̱wuda'a mogono me iɗa'a? A̱yi nda a̱ yi ɗa vuma'a na amayun na a canaa yi ishipa nu uje'en, a̱vu a cana, <Shawulu una ta̱ kpaku kupa va̱ yi, waru Da̱wuda una ta̱ ukpakukupa kupa va̱ yi va̱ a̱bunda̱.> >>
1SA 21:12 A̱vu Da̱wuda zuwa adanshi'i o okolo a̱vu u ka̱ra̱ a uwwusa wovon wa Akish mogono ma Gat lon.
1SA 21:13 Reve u vadala ugbozu wa̱ yi a yuwusan ili iwa̱u a̱ ma̱ka̱ka̱n me le, waru suru mantsa ma na a̱ ri u uguzu na̱ yi, reve u yuwan she damma u ri nu ugbozu wa̱ yi shi, u reme yironishi a̱ na̱ntsu vu u'uwata u lyuci waru ma̱tsa̱n a̱ ma̱la̱la̱ a̱ ntsuka̱ ma̱ yi.
1SA 21:14 Ɗaɗa Akish dammai agbashi a̱ yi, <<Ka̱lyuwa̱i vuma'a aajarata a ɗa! Nye i zuwai i ta̱wa̱a̱ numu na̱ a̱yi?
1SA 21:15 N lamba ta̱ ajarata a na i ta̱wa̱a̱ numu na̱ cu'un vuma nda, u yuwusaan mu tsulo a̱ ma̱ka̱ka̱n ma̱ va̱? N cigai u ta̱wa̱ o u'wa u va̱ shi!>>
1SA 22:1 Da̱wuda lyawa ta̱ Gat a̱vu u suma a̱ tyo a̱ a̱a̱ba̱nu a Adulam. Ana a̱za̱ a̱ yi nu u'wa wa dada va̱ yi a uwwai ne suru, reve a lapa a̱ cipa̱ pe ya̱'a̱ yi.
1SA 22:2 Waru aza a na a̱ ri a̱tsuma̱lima̱ suru na aza a na o tono utan, na aza a na a̱ ri na adanshi o okolo, a̱vu oɓoloto uba̱ta̱ wa̱ yi, a̱vu wo o'wo zagbain le. Waru ama a na a̱ da̱na̱i oɓolo na̱ a̱yi a ta rawa ukpakuna̱shi (400).
1SA 22:3 Waru diga lo a̱vu Da̱wuda ka̱ra̱ a̱ tyo Mizfa a̱tsuma̱ a̱ Mowa a̱vu u damma mogono ma̱ Mowa, <<Vu ta yuwan ankuri vu lyawa dada va̱ na̱ mma va̱ a̱ ta̱wa̱ a̱ da̱nu oɓolo na̱ a̱vu hali she na̱ me ene ili i na A̱sula̱ aa yuwaan mu?>>
1SA 22:4 Ɗaɗa u lyawa nle oɓolo na̱ mogono ma̱ Mowa, reve a̱ da̱nu oɓolo na̱ a̱yi mantsa ma na suru Da̱wuda yuwain o upa'atan a masasan.
1SA 22:5 Amma Gadu vumava̱sula̱ damma ta̱ Da̱wuda, <<She vu da̱nu pe o upa'ata'an wan. Ka̱ra̱ a̱ tyo e iɗa ya Yahuda.>> Ɗaɗa Da̱wuda ka̱ra̱i a̱ tyo a̱ a̱a̱rumbu a Heret.
1SA 22:6 Shawulu uwwa ta̱ a na ene ta̱ Da̱wuda, oɓolo na ama a na a̱ ri oɓolo na̱ a̱yi. Shawulu da̱na̱ ta̱ nden ɗe Gibiya e ikyun yu uɗanga u na a̱ tsu ɗe tamari zuva va aagaɗi uɓa̱nu ni ibata ya̱ yi o ukere, waru azagbain a̱ yi suru a̱ da̱na̱ ta̱ mishin u ka̱nda̱ruwu na̱ a̱yi.
1SA 22:7 A̱vu Shawulu damma agbashi a̱ yi, <<Poloi atsuvu, ama a Banyami! Ulobo wa̱ Yese u ta ca ɗu atsusa oɓolo na̱ a̱ɗuma̱ a̱ ina̱bi suru? U ta zuwa ɗu yo o'wo yali vu ukpakukupa ko yali vu ukpaku ukpaku?
1SA 22:8 A̱yi ɗa i zuwai yoo foɓuso iwuya a aciya̱va̱ suru? Babu za na damma numu a na ulobo u va̱ u yuwan ta̱ nzuwulai nu ulobo wa̱ Yese. Ko za a̱tsuma̱ a̱ ɗu a yuwusan aɗa a̱ va̱ shi, ko u damma mu a na ulobo u va̱ u zuwai aagbashi a̱ va̱ adama u vawan mu, cine u yuwain ana'an shi.>>
1SA 22:9 Reve Dowe vuma va Edom, za na da̱na̱i lo mishin oɓolo na azagbain a Shawulu u usu, <<Me ene ta̱ ulobo wa̱ Yese a̱ ta̱wa̱ Nob, uba̱ta̱ wa Ahimele ulobo wa Ahitu.
1SA 22:10 Ahimele ece yi ta̱ A̱sulazuva waru u ca yi ta̱ ilyalya na̱ matsun me pe'eni ma Goliya vuma va Filistiya.>>
1SA 22:11 Ɗaɗa mogono ma̱ lyunguyi a̱ ta̱wa̱a̱ yi na̱ Ahimele ganu, ulobo wa Ahitu nu u'wa wa dada va̱ yi suru, aza a na da̱na̱i nan ganu a Nob, a̱vu suru a̱ ta̱wa̱ uba̱ta̱ u mogono.
1SA 22:12 A̱vu Shawulu damma, <<Polo atsuvu, ulobo wa Ahitu.>> A̱vu u usu, <<Mpa mu nda zagbain va̱.>>
1SA 22:13 Reve Shawulu damma yi, <<Nye i zuwai i foɓoi iwuya adama a̱ va̱? A̱vu nu ulobo wa̱ Yese, vu ca niyi opopofu na̱ matsun me pe'eni, waru vu patiya niyi A̱sula̱, adama u yuwan nla̱ngi na̱ a̱mu, waru u vawan mu, cine u yuwain ana'an!>>
1SA 22:14 Reve Ahimele usu mogono'o, <<Zane ɗa a̱tsuma̱ a agbashi a̱ wu ri na̱ a̱ɓula̱ tsa̱ Da̱wuda, toto mogono, yali ya̱ a̱za̱ e ipiri ya̱ a̱ wu suru, za na aa casu tsugbain o u'wa wa̱ wu suru?
1SA 22:15 Na amayun n patiya yi ta̱ A̱sula̱, agba a̱ yi nda a̱ yi ɗa mu ufaru shi. Amma n ta̱ e pati ya̱ wu she vu ca mu unusu ko vu tawaa za ro a̱tsuma̱ o u'wa wa dada va̱ wan. Adama a na n reve na aɗa a nda shi!>>
1SA 22:16 Reve mogono ma damma, <<Vu ciga vu 'yuwan o una wu, Ahimele, a̱vu nu u'wa wa dada va̱ wu suru.>>
1SA 22:17 A̱vu mogono ma damma a̱za̱ e ipiri ya̱ yi a na a̱ ri mishin u ka̱nda̱ruwu na̱ a̱yi, <<Vadalai yu una nan ganu va̱ A̱sulazuva, adama a na ele fo o ɓolo ta̱ aci na̱ Da̱wuda. E reve ta̱ ni ilaɗi ya̱ yi agba a damma mu shi.>> Amma a̱soja o mogono'o a ciga a̱ 'ya̱sa̱n ukere u le o una nan ganu va̱ A̱sulazuva'a shi.
1SA 22:18 Reve mogono ma damma Dowe, <<A̱vu vadaluwa vu una nan ganu.>> Ɗaɗa Dowe vuma va Edom vadaluwai wu una nle. O urana u ndolo wu una ta̱ ama kupakunla̱ no ozo o ton aza a na a̱ da̱na̱i wotowu na̱ mutugu ma̱ epo vo okoro.
1SA 22:19 Waru wu una ta̱ fo a̱za̱ a̱ lyuci va Nob na̱ matsun me pe'eni, lyuci nan ganu, na ali e le na̱ a̱ma̱ci na̱ muwun na̱ nreɓu, ni inan na̱ nloli ni ikyon.
1SA 22:20 Amma a̱tsuma̱ olobo a Ahimele ulobo wa Ahitu za na a̱ tsu ɗe Abiyata, u la'a ta̱, a̱vu u suma u kuru Da̱wuda.
1SA 22:21 A̱vu u damma Da̱wuda, Shawulu una ta̱ nan ganu a̱ A̱sulazuva.
1SA 22:22 Ɗaɗa Da̱wuda dammai Abiyata, <<Urana u ndolo a na Dowe vuma va Edom da̱na̱i lo, n reve ta̱ na amayun a na waa damma Shawulu. Adama a̱ va̱ a ɗa o unai u'wa wa dada va̱ wu suru.
1SA 22:23 Isawan oɓolo na̱ a̱mu, she vu uwwa wovon wan, adama a na za na a zamishi wuma wa̱ wu u ta zami shi fo za va̱. Vu ta̱ da̱na̱ gbaga oɓolo na̱ a̱mu.>>
1SA 23:1 Ana a dammai Da̱wuda, <<A̱yi ɗa nda aza a Filistiya a ta yuwusan uvon na aza a Kayila a̱tsuma̱ e iɗa ya Yahuda, waru a̱ ta̱ purusa̱ le ishina o osoroto,>>
1SA 23:2 a̱vu Da̱wuda pati ya̱ A̱sulazuva, u damma, <<N 'ya̱wa̱ n riya̱a̱ aza a Filistiya nu uvon?>> A̱vu A̱sulazuva a damma yi, <<'Ya̱wa̱ vu riya̱a̱ le tsura̱ vu wawa aza a Kayila.>>
1SA 23:3 Amma a̱vu ama a̱ Da̱wuda a damma yi, <<Ka̱lyuwa̱, a̱yi ɗa nda pa a̱tsuma̱ a Yahuda tsu ta uwwusa wovon. Cine tsa ɗa wo o'wo na̱ tsu 'ya̱wa̱ Kayila tsu riya̱a̱ aza a Filistiya nu uvon?>>
1SA 23:4 A̱vu Da̱wuda da̱shi pati ya̱ A̱sulazuva, a̱vu A̱sulazuva a̱ usu yi, <<Lapa a̱ cipa̱ Kayila, adama a na n ta ca aza a Filistiya e ekere a̱ wu.>>
1SA 23:5 Ɗaɗa Da̱wuda na̱ ama a̱ yi a̱ ka̱ra̱i a̱ tyo Kayila, a̱vu a yuwan uvon na aza a Filistiya, waru o una le ta̱ na̱ a̱bunda̱ wa'a shi. A̱vu a̱ pura̱ iliyamunga i le. Reve u wawa ama a Kayila.
1SA 23:6 Waru a mantsa ma na Abiyata ulobo wa Ahimele sumai a̱ tyo ya̱ Da̱wuda'a ɗe Kayila, u ta̱wa̱ ta̱ na̱ epo o ukere wa̱ yi.
1SA 23:7 A damma ta̱ Shawulu a na Da̱wuda ta̱ ɗe Kayila, a̱vu Shawulu damma, <<A̱sula̱ a ta ca yi e ekere a̱ va̱, adama a na u ɓa̱ru ta̱ aciya̱yi, a na wo'woi uwa ta̱ a̱ lyuci na ri na̱ na̱ntsu na a̱ɓa̱ru yi na̱ aɗanga e rumu.>>
1SA 23:8 A̱vu Shawulu ɗe a̱soja a̱ yi suru a lapa a̱ cipa̱ a̱ tyo Kayila, adama a̱ ka̱nda̱ruwa̱ Da̱wuda na̱ ama a̱ yi nu uvon.
1SA 23:9 Ana Da̱wuda uwwai Shawulu ta yuwusan ifoɓi i na wa̱ ta̱wa̱ yi nu uvon, a̱vu u damma Abiyata ganu, <<Ta̱wa̱ na̱ epo.>>
1SA 23:10 Reve Da̱wuda yuwan avasa u damma, <<A̱sulazuva A̱sula̱ a Isra'ila, aagbashi a̱ wu a uwwa ta̱ a na na amayun Shawulu ta zama u ta̱wa̱ Kayila, tsa̱ra̱ u kototo lyuci adama a̱ va̱.
1SA 23:11 Amma Shawulu ta̱ zura̱ a̱ tyo Kayila cine aagbashi a̱ wu uwwai? Waru azagbain a Kayila a ta reme mu reve a ca mu ekere a̱yi? A̱sulazuva A̱sula̱ a Isra'ila, n te e ipati ya̱ wu vu damma aagbashi a̱ wu.>> Reve A̱sulazuva a damma, <<U ta̱ ta̱wa̱.>>
1SA 23:12 Reve Da̱wuda yuwisan yeci, <<Azagbain a Kayila a ta ca mu na̱ ama a̱ va̱ a̱ tyo e ekere a Shawulu?>> A̱vu A̱sulazuva a̱ usu, <<A ta ca ɗu.>>
1SA 23:13 Ɗaɗa Da̱wuda na̱ ama a̱ yi ele ama ukpakuta̱li (600), a̱ 'yon yi a lyawai Kayila, a̱vu a̱ ka̱ra̱ a̱ tyo uba̱ta̱ u na aa gura 'ya̱wa̱ suru adama e reme le wan. Ana a dammai Shawulu Da̱wuda suma ta̱ diga Kayila, a̱vu u bula̱ mmalu a̱ 'ya̱wa̱ ɗe.
1SA 23:14 A̱vu Da̱wuda isawan pe uba̱ta̱ o upa'atan a̱tsumona, ne e iɗa ya agaɗi wa̱ A̱tsumona a Zif. Waru Shawulu zamishi yi ta̱ urana suru, amma A̱sula̱ a ca Da̱wuda e ekere a̱ yi shi.
1SA 23:15 Ana Da̱wuda da̱na̱i Horesh a̱tsuma̱ A̱tsumona a Zif, reve wu uwwa Shawulu ta̱wa̱ ta̱ uba̱ta̱'a̱ izami ya̱ yi adama wu una yi.
1SA 23:16 Reve Jonata ulobo wa Shawulu u 'ya̱wa̱ uba̱ta̱ wa̱ Da̱wuda ɗe Horesh, a̱vu u ca yi adanshi wi isawan no okolo a̱ yi uba̱ta̱ wa̱ a̱ A̱sula̱ ulobonu.
1SA 23:17 A̱vu u damma yi, <<She vu uwwa wovon wan, ukere wa dada va̱ Shawulu wa̱a̱ ju'wa̱n wu shi. Vu to o'wo mogono a aci a aza a Isra'ila suru a̱mu gba n to o'wo dodu va̱ wu. Ko Shawulu dada va̱ reve ta̱ ne.>>
1SA 23:18 A̱vu ele ra a yuwan nzuwulai a̱ ma̱ka̱ka̱n ma̱ A̱sulazuva. Reve Jonata ka̱mba̱ o u'wa, a̱vu Da̱wuda isawan pe Horesh.
1SA 23:19 Ɗaɗa aza a Zif a̱ 'ya̱wa̱i uba̱ta̱ wa Shawulu ɗe Gibiya a̱vu a damma, <<Da̱wuda ta̱ pe a̱tsuma̱ a̱ tsu uba̱ta̱ o upa'atan ɗe Horesh zuva va aagaɗi a Hakila upasu wu uyagi wa Jeshimon.
1SA 23:20 Gogo, mogono, she vu ta̱wa̱ mantsa ma na u lobono nuwu vu yuwan ne, waru tsu ta tara ume adama tsu ca yi e ekere a̱ wu.>>
1SA 23:21 Reve Shawulu damma, <<A̱sulazuva a zuwaa ɗu aba'un, adama a na i roco mu ta̱ isa'ani.
1SA 23:22 'Ya̱wa̱yi i yuwisan ifoɓi i ro. I gura reve uba̱ta̱ u na Da̱wuda tsu 'ya̱wusa̱ na za na ene niyi ɗe. Adama a na a damma mu ta̱ u tu nu ugbozu lon.
1SA 23:23 I gura reve ba̱ta̱ na waa pa'asan suru reve i ka̱mba̱ i damma mu urevu wa amayun. Reve tsu gereyi. Na̱ u ta̱ lo upasu'u, n ta̱ bunga̱ yi ko te ɗa u ri, a̱tsuma̱ o umatsun wa a aza a Yahuda suru.>>
1SA 23:24 A̱vu a̱ 'yon a̱ ka̱ra̱ a̱ tyo Zif babu Shawulu rawa. Da̱wuda gba na̱ ama a̱ yi a̱ da̱na̱ ta̱ A̱tsumona a̱ Mawon, upasu wu uyagi wa̱ Jeshimon a̱tsuma̱ o Uka̱ri wa Araba.
1SA 23:25 A̱vu Shawulu na ali o uvon a̱ yi a̱ 'ya̱wa̱ izami ya̱ yi, reve a damma Da̱wuda, ɗaɗa u ka̱ra̱i a̱ cipa̱ tyo a aatali a gbain o ro a̱vu wi isawan A̱tsumona a̱ Mawon. Ana Shawulu uwwai ne, a̱vu u lapa a̱ tyo a̱tsumona a̱ Mawon izami ya̱ yi.
1SA 23:26 Shawulu kuru ta̱ upasu u ta̱ wa a aatali a gbai'in Da̱wuda waru na ali o uvon a̱ yi o upasu we ire, a̱vu nan Da̱wuda a̱ jika̱ adama a la'a ya Shawulu. Ana Shawulu na ali o uvon a̱ yi a̱ da̱na̱i a rawusa zuzu na̱ le adama e reme le,
1SA 23:27 a̱vu malingata ma̱ ta̱wa̱ ya Shawulu u damma, <<Jika̱ vu ta̱wa̱, adama a na aza a Filistiya a̱ riya̱a̱ ta̱ iɗa i tsu nu uvon!>>
1SA 23:28 Ɗaɗa Shawulu lyawai izami ya̱ Da̱wuda a̱vu u 'ya̱wa̱ u riya̱a̱ aza a Filistiya nu uvon. Adama a ndolo a ɗa e ɗeyi uba̱ta̱'a̱ Aatali a Mala'a.
1SA 23:29 A̱vu Da̱wuda lapa a gawan diga lo, a̱vu u da̱nu uba̱ta̱ o upa'atan A̱tsumona a En Gedi.
1SA 24:1 Ana Shawulu ka̱mba̱i diga uba̱ta̱ e itoni ya aza a Filistiya, a̱vu a damma yi, <<Da̱wuda ta̱ ɗe A̱tsumona a En Gedi.>>
1SA 24:2 Ɗaɗa Shawulu ɗangulai ama ukpakukupa uta'atsu (3,000) a̱tsuma̱ a Isra'ila suru, a̱vu o uta̱ izami ya̱ Da̱wuda na ama a̱ yi zuzu na̱ Aatali a̱ Mgbele n Masasan mu Una.
1SA 24:3 Ana u rawai uba̱ta̱ u na a̱ gutsu su mgbele a̱ nge'en mu ure, uba̱ta̱ u na a̱a̱ba̱nu a̱ ri, a̱vu Shawulu ɓatsa adama u yuwan rulu. Da̱wuda na ali a̱ yi, a̱ shi ta̱ pe alanga pe a̱ba̱nu'u.
1SA 24:4 A̱vu ama a̱ yi a damma, <<A̱yi nda a̱yi ɗa urana u na A̱sulazuva a damma nuwu, <Ka̱lyuwa̱, n ta ca ma'yuwatan ma̱ wu e ekere a̱ wu, adama vu yuwan na̱ a̱yi cine vu cigai.> >> Reve Da̱wuda 'yon u puta̱ yi, a̱vu u koɗo iwa̱sa̱ ye elentsu yu utugu wa Shawulu babu a̱yi urevu.
1SA 24:5 Na̱ a̱ca̱pa̱ a̱vu Da̱wuda dama na̱ cine u koɗo niyi iwa̱sa̱ ye elentsu yu utugu'u.
1SA 24:6 A̱vu u damma ama a̱ yi, <<A̱sulazuva a para mu n yuwan na̱ zagbain va̱ ili ya nda, za na A̱sulazuva a tawai, ko n 'ya̱sa̱n ukere u va̱ n ju'wa̱in yi, adama a na a̱yi ɗa A̱sulazuva a̱ tsuwa̱n yi mani'in.>>
1SA 24:7 Na adanshi a nda a ɗa Da̱wuda ɓarai ama a̱ yi, waru u lyawa le o una Shawulu shi. A̱vu Shawulu lyawa a̱a̱ba̱nu'u u reme mmalu ma̱ yi.
1SA 24:8 Na̱ a̱ca̱pa̱ a̱vu Da̱wuda uta̱ diga a̱ a̱a̱ba̱nu'u, reve u ɗe Shawulu, <<Zagbain va̱ mogono!>> Ana Shawulu vadalai, a̱vu Da̱wuda kingyo u ka̱ɗa̱to urewesu wa̱ yi e iɗa.
1SA 24:9 A̱vu Da̱wuda damma yi, <<Nye i zuwai va uwwusa adanshi a na ama a dammai, <A̱yi ɗa nda Da̱wuda ciga ta̱ waa amaton wu>?
1SA 24:10 Ka̱lyuwa̱, ana'an nda ve ene ta̱ ne esu a̱ wu, cine A̱sulazuva a ca nuwu e ekere a̱ va̱ a̱tsuma̱ a̱ a̱a̱ba̱nu. A damma mu ta̱ mu una wu, amma n lyawa wu ta̱ wuma, n damma ta̱, <Ma̱a̱ 'ya̱sa̱n ukere u va̱ n ju'wa̱n zagbain va̱ shi, adama a na a̱ yi ɗa za na A̱sulazuva a̱ tsuwa̱yin mani'in.>
1SA 24:11 Ka̱lyuwa̱, dada va̱, nda iwa̱sa̱ ya̱ elentsu o utugu wa̱ wu o ukere u va̱! Ko na wo o'woi n koɗoi iwa̱sa̱ ya̱ elentsu o utugu wa̱ wu agba mu una wu shi. Gogo vu jiyan waru vu reve a na n ri ni ifoɓi yu uwuyanu ko aciyogbamu a̱ tyo e ekere a̱ wu shi, n yuwaan wu unusu shi, amma vu ta zamishi mu adama vu una mu.
1SA 24:12 Lyawa A̱sulazuva e ge'eto tsu ra. Waru lyawa A̱sulazuva a tsupaa mu iwuya i na vu yuwain a̱ tyo ya̱'a̱ va̱, amma ukere u va̱ wa̱a̱ ju'wa̱n wu shi.
1SA 24:13 Cine udammu wu nkaya mu ufaru n dammai, <Iwuya i tsu uta̱ ta̱ uba̱ta̱ wa̱ a̱za̱ e iwuya.> Ne ɗa ukere u va̱ wa̱a̱ ju'wa̱n wu shi.
1SA 24:14 <<A̱vu na vu ri mogono ma Isra'ila zane ɗa vu uta̱i uvon na̱ a̱yi? Zane ɗa vaa gbagbusa? A̱kwa̱kwa̱ a̱ musa̱n? Ko aakupa?
1SA 24:15 Lyawa A̱sulazuva o o'wo za vu uge'etosu u tsu waru u kurato tsu. Lyawa wi idana mu, waru wi isawaan mu u roco a na n ri nu unusu shi, a̱vu u wawa mu e ekere a̱ wu.>>
1SA 24:16 Ana Da̱wuda kotoi adansa ne, a̱vu Shawulu ece, <<Uɗyo wa̱ wu u ɗa nda'a, ulobo u va̱ Da̱wuda?>> Reve u shon na̱ yisali lon.
1SA 24:17 Reve u damma, <<Vu la'a mu ta̱ a̱ɓula̱ adama a na vu ɓana mu ta̱ ulobonu, amma a̱mu n yuwaan wu ta̱ iwuya.
1SA 24:18 Vu damma mu ta̱ gogo isa'ani i na vu yuwaan numu, A̱sulazuva a ca mu ta̱ e ekere a̱ wu, agba vu una mu shi.
1SA 24:19 Na̱ vuma ene ma'yuwatan ma̱ yi u ta lyawa yi u ka̱ra̱ fa̱a̱n? Adama o ndolo lyawa A̱sulazuva a tsupaa wu ni isa'ani, adama e ili i na vu roco numu ana'an.
1SA 24:20 N reve ta̱ na amayun vu to o'wo mogono, waru tsugono tsa Isra'ila tsa ta lyuwa elime o ukere wa̱ wu.
1SA 24:21 Gogo kucinaa mu na̱ A̱sulazuva voo kototo limatan ta̱ va̱ a̱ca̱pa̱ va̱ shi, ko vu kimusa̱ ala a̱ va̱ diga o u'wa wa dada va̱ shi.>>
1SA 24:22 A̱vu Da̱wuda kucinaa ne Shawulu. Reve Shawulu ka̱mba̱ o u'wa, amma Da̱wuda na̱ ama a̱ yi a̱ ka̱ra̱ ta̱ a̱ ka̱mba̱ o upa'ata'an.
1SA 25:1 Ana a yuwain ne Sama'ila kuwa̱ ta̱, a̱vu aza a Isra'ila suru o ɓoloto a yuwan nde n wiruta̱ adama a̱ yi, reve a̱ ciɗo yi a̱tsuma̱ a̱ lyuci va̱ yi a Rama. Reve Da̱wuda ka̱ra̱ a̱cipa̱ a̱ tyo A̱tsumona a Faran.
1SA 25:2 A yuwan ta̱ vuma ro diga a̱tsuma̱ a limatan va Keleb za na a̱ tsu ɗe Nabal, diga a̱ a̱tsuma̱ a̱ lyuci va Mawon, za na ri nu uba̱ta̱ zuzu na̱ lyuci va Kame. Za vu utsuru ɗa da̱na̱i lon, u ta̱ na̱ ni ikyon ukpakukupa uta'atsu (3,000) na̱ mgbele ukpakukupa (1,000). Ka va̱ yi Abigel da̱na̱ ta̱ ulobonu nu urevu, amma vuma ɗa na da̱na̱i na asuvu usuɗuwu ni iwuya. Waru Nabal da̱na̱ ta̱ apunusa ikyon ya̱ yi a̱tsuma̱ a Kame.
1SA 25:4 Mantsa ma na Da̱wuda da̱na̱i a̱tsumona, wu uwwa ta̱ a na Nabal ta apunusa ikyon ya̱ a̱ yi,
1SA 25:5 ɗaɗa u lyunguyi ali o uvon kupa a̱vu u damma le, <<'Ya̱wa̱i uba̱ta̱ wa Nabal ɗe Kame reve i ca̱sa̱ yi na aala a̱ va̱.
1SA 25:6 I damma yi, <Wuma wa̱ wu ujima! Asuvu nden a̱ da̱na̱ oɓolo na̱ a̱vu, waru ɓolo nu u'wa wa̱ wu, waru asuvu nden a̱ da̱na̱ oɓolo ni ili i na vu ri na̱ yi suru!
1SA 25:7 << <Mu uwwa ta̱ mantsa me ipuna me ikyon ma ɗa. Mantsa ma na azaguɓa a̱ wu a̱ da̱na̱i oɓolo na̱ a̱tsu, tsu yuwaan le iwuya shi, waru suru mantsa ma na a̱ da̱na̱i ɗe Kame babu ili i le i na i puwa̱yin.
1SA 25:8 Ece agbashi a̱ wu waru a ta damma wu. Adama o ndolo lyawa olobo a̱ va̱ a̱ tsura̱ isa'ani e esu a̱ wu, adama a na tsu rawa ta̱ urana wa̱ a̱buki. Vu yuwan ankuri vu ca a̱ tsu agbashi a̱ wu, nu ulobo wa̱ wu Da̱wuda, ilyalya i na va̱a̱ tsura̱a̱ a̱ tsu suru.> >>
1SA 25:9 Ana olobo a̱ Da̱wuda a rawai, a̱vu a damma Nabal ili i nda suru na ala a̱ Da̱wuda, reve o puro u usuwu wa̱ a̱ yi.
1SA 25:10 A̱vu Nabal usu le, <<Zane ɗa Da̱wuda nda'a? Zane ɗa ulobo wa̱ Yese nda? Agbashi na̱ a̱bunda̱ a suma ta̱ diga uba̱ta̱ wa azagbain e le a rana nda.
1SA 25:11 Nye i zuwai maa tara opopofu a̱ va̱ na̱ mini, ni inama i na m paɗai adama a̱za̱ e ipuna i va̱, reve n ca ama a na o uta̱i diga uba̱ta̱ u na n revei shi?>>
1SA 25:12 Ɗaɗa olobo a̱ Da̱wuda'a a vadalai a̱ ka̱mba̱. Ana a rawai a̱vu a damma yi ili ya nda suru.
1SA 25:13 A̱vu Da̱wuda damma ama a̱ yi, <<Za suru wu nla̱ matsun me pe'eni ma̱ yi!>> Ɗaɗa a̱ nla̱i mutsun mu pe'eni n le, a̱vu Da̱wuda fo nla̱ matsun me pe'eni ma̱ yi. A̱vu ali ukpakuna̱shi (400) a̱ ka̱ra̱ oɓolo na̱ Da̱wuda, reve ali ukpakure (200) e isawan ipiri yi itana i le.
1SA 25:14 A̱vu aagbashi a̱ ta̱ a Nabal a damma Abigel ka va Nabal, <<Da̱wuda lyungu ta̱ nlingata diga a̱tsumona a̱ ta̱wa̱ adama a na a̱ ca̱sa̱ zagbain tsu, amma a̱vu u gbarana le.
1SA 25:15 A̱yi ɗa nda ama a nda a̱ da̱na̱ ta̱ na̱ a̱ɓula̱ e ekere a̱ tsu lon. A yuwaan tsu iwuya shi, mantsa ma na tsu da̱na̱i alyuna a atsusa zuzu ne ele, ko ili ta̱ i tsu i puwa̱n shi.
1SA 25:16 Ayin nu urana o o'wo ta̱ ukari u na u gesheshe n tsu, mantsa ma na tsu uta̱i alyuna e mgbele i tsu zuzu ne ele.
1SA 25:17 Gogo she vu yuwan majiyan ve ene ili i na va yuwan, adama a na addama a̱ shiton ta̱ zagbain tsu nu u'wa wa̱ yi suru. A̱yi vuma vama ɗa, na ko za aa gura yuwaan yi adanshi shi.>>
1SA 25:18 Agba Abigel jika̱ ta̱, a̱vu u tara akpatali o opopofu ukpakure (200) na̱ tsa̱n vu kwan masayan ma̱ ina̱bi ejere, ni ikyon i ton i na a lapulai ɗe, na̱ ishina yu uzuwun u makundatsu ushin, na̱ ogbodolu o u'yewu ukpaku (100) u muwun n ina̱bi, na akala o u'yewu u muwun mu ubiri ukpakure (200), a̱vu u zuwa le o nloli.
1SA 25:19 Reve u damma agbashi a̱ yi, <<Walai elime n ta̱ kuru ɗu.>> Agba u damma vali va̱ yi Nabal shi.
1SA 25:20 A̱yi a mmalu zuva mololi, a na u rawai e ikyun i masasan, a̱vu we ne Da̱wuda na ama a̱ yi a̱ za̱luwusa̱ a̱ tyo ya̱'a̱ yi, reve u ga'an ne ele.
1SA 25:21 Da̱wuda damma ta̱ ɗe, <<Ulinga we pere u ɗa n yuwain a na n pirishi yi itana i vuma nda Nabal a̱tsumona suru, adama she ili i ta̱ ya̱ yi i puwa̱n wan. A̱vu u tsupa mu ni iwuya o una̱ wi isa'ani.
1SA 25:22 Lyawa A̱sulazuva a ca mu a̱tsuma̱lima̱ lon a̱mu Da̱wuda, na̱ lyawa vali ta̱ wuma kafu usana u tawa!>>
1SA 25:23 Ana Abigel enei Da̱wuda a̱vu u jika̱ u cipa̱ o mololi a̱vu u kingyo u ka̱ɗa̱to urewesu wa̱ yi e iɗa a̱ ma̱ka̱ka̱n ma̱ a̱ yi.
1SA 25:24 A̱vu u riya̱ a ana a̱ yi reve u damma, <<Zagbain va̱ lyawa unusu'u wo o'wo za va̱ goon, yuwan ankuri vu lyawa aagbashi a̱ wu a yuwan adanshi na̱ a̱vu, uwwa ili i na maa damma wu.
1SA 25:25 Yuwan ankuri zagbain va̱ she poloo adanshi a vuma vama nda Nabal atsuvu wan. U ta̱ tsa aala a̱yi. Aala a̱ yi ulo u ɗa, waru tsulo tsa̱ ta̱ oɓolo na̱ a̱ yi. Amma adama a̱ va̱, aagbashi a̱ wu, me ene o olobo a na zagbain va̱ lyungu yi shi.
1SA 25:26 <<Gogo zagbain va̱, n kucuna ta̱ na̱ A̱sulazuva a na a̱ ri wuma na̱ wuma wa̱ wu, a na wo o'woi A̱sulazuva a putsa nuwu na voo oco mpasa, ko vu tsupaa aciya̱wu ne ekere a̱ wu, lyawa n'yuwatan ma̱ wu na aza a na a zama a amaton wu zagbain va̱ o o'wo tsa Nabal.
1SA 25:27 Waru lyawa une'e u nda, za na aagbashi a̱ wu a̱ ta̱wa̱yi zagbain va̱, a ca ama a na a̱ kuru nuwu.
1SA 25:28 M pati wu ta̱ vu yuwaan aagbashi a̱ wu gafura n na̱ n yuwaan ta̱ unusu biti, adama a na A̱sulazuva a ta zuwa u'wa wa̱ wu u shuwa̱ na amayun hali hali, adama a na zagbain va̱ ta yuwusan nla̱ngi mu uvon wa̱ A̱sulazuva, waru a̱a̱ tsura̱ iwuya ya̱'a̱ wu shi, suru a mantsa ma wuma ma̱ wu.
1SA 25:29 Ko na wo o'woi za ro ta gbagbusa wu e izami i wuma wa̱ wu adama wu una wu, wuma wu zagbain va̱ ta̱ da̱na̱ gbaga ukatalu a̱tsuma̱ o oɓolo a aza a wuma a̱ A̱sulazuva A̱sula̱ a̱ wu. Amma wuma wu n'yuwatan ma̱ wu a̱ ta̱ vuta̱la̱ le cine a̱ tsu vuta̱la̱ aatali a̱ a̱bitsutsu.
1SA 25:30 Mantsa ma na A̱sulazuva a shitowoyi zagbain va̱ nzuwulai mi ili isa'ani i na u yuwain suru adama a̱ yi waru a̱vu u zuwa yi zagbain a aci ya aza a Isra'ila,
1SA 25:31 zagbain va̱ a̱ da̱na̱ na̱ a̱tsuma̱la̱ngu ko udamotowu o okolo adama o wocosu wu mpasa shi, she vu tsupaa aciya̱wu wan. Waru na̱ A̱sulazuva o roco zagbain va̱ isa'ani, vu cuwan na̱ a̱mu aagbashi a̱ wu.>>
1SA 25:32 A̱vu Da̱wuda damma Abigel, <<Za va aba'un ɗa A̱sulazuva A̱sula̱ a Isra'ila, za na lyungu nuwu ana'an vu ga'asan na̱ a̱mu.
1SA 25:33 Lyawa vu da̱na̱ na aba'un adama o uge'etosu u sa'ani wa̱ wu, waru a na vu 'yasan numu na̱ wocosu wu mpasa, waru she n tsupaa aciya̱va̱ ne ekere a̱ va̱ wan.
1SA 25:34 Na̱ ne shi, n kucuna ta̱ na̱ A̱sulazuva A̱sula̱ a Isra'ila a na a̱ ri wuma, za na putsa numu na ma amaton wu, na̱ shi a damma vu jika̱ vu ta̱wa̱ vu ga'asan na̱ a̱mu shi, babu ko vali ta̱ o u'wa wa Nabal na asa wuma kafu usana.>>
1SA 25:35 A̱vu Da̱wuda ushi ili i na u ta̱wa̱a̱ niyi, a̱vu u damma, <<Ka̱mba̱ o u'wa na̱ nden ma asuvu. Mu uwwa ta̱ adanshi a̱ wu waru n usu ta̱ ipati ya̱ wu.>>
1SA 25:36 Ana Abigel ka̱mba̱i ya Nabal, a̱yi pe a̱tsuma̱ o u'wa a yuwusan a̱buki, tsa̱ a̱buki o tsugono, u da̱na̱ ta̱ a uwwusa uyo'o, waru usowu lon. Agba u damma yi adama shi hali she nu usana.
1SA 25:37 Nu usana, ana usowu'u wu uta̱i Nabal, a̱vu ka va̱ yi damma yi ili ya nda suru, reve okolo a̱ yi a kuɗa nu uta̱, a̱vu u von kpa̱ka̱ tsa aatali.
1SA 25:38 Ana a yuwain rana kupa a̱vu A̱sulazuva a faba Nabal, a̱vu u kuwa̱.
1SA 25:39 Ana Da̱wuda uwwai a na Nabal kuwa̱ ta̱, a̱vu u damma, <<Za va aba'un ɗa A̱sulazuva a na a tsupaa numu wisulusa u na n tsura̱i o ukere wa Nabal waru u putsa ta̱ aagbashi a̱ yi a yuwan iwuya. A̱sulazuva a̱ ka̱mbuwa̱a̱ ta̱ Nabal ni iwuya ya̱ yi a aci a̱ yi.>> A̱vu Da̱wuda lyungu adanshi a̱ tyo ya Abigel, a damma yi u ciga ta̱ wo o'wo ka va̱ yi.
1SA 25:40 Ana agbashi a̱ Da̱wuda a̱ 'ya̱wa̱i uba̱ta̱ wa Abigel ɗe Kame reve a damma yi, <<Da̱wuda ɗa lyungu ntsu tsu tara wu vo o'wo ka va̱ yi.>>
1SA 25:41 A̱vu u ka̱ɗa̱to urewesu wa̱ yi a̱ tyo e iɗa reve u damma, <<Apa a̱mu aagbashi a̱ wu ufoɓu u na maa yuwaan wu a̱ga̱nda̱, reve n sa'a ana a agbashi a zagbain va̱.>>
1SA 25:42 A̱vu Abigel jika̱ u 'yon u kumba mololi na agbashi e esheli o ton aza a na a yuwusaan yi ulinga a mmalu ana. A̱vu u toni nlingata ma̱ Da̱wuda reve wo o'wo ka va̱ yi.
1SA 25:43 A̱vu Da̱wuda zuwisa ka na a̱ tsu ɗe Ahinowam diga Yezireyel, a̱vu ele ra o o'wo a̱ma̱ci a̱ yi.
1SA 25:44 Amma Shawulu ca ta̱ usheli wa̱ yi Mikal, ka va̱ Da̱wuda ya Palti ulobo wa Layish vuma va Galim, wo'o ka va̱ yi.
1SA 26:1 A̱vu a ama a Zif a̱ 'ya̱wa̱ uba̱ta̱ wa Shawulu ɗe Gibiya a̱vu a damma yi, <<Da̱wuda ta̱ ɗe uva̱pu agaɗi a Hakila, za na a̱ ka̱lyuwusa̱ Jeshimon.>>
1SA 26:2 Ɗaɗa Shawulu ka̱ra̱i a̱cipa̱ a̱ tyo A̱tsumona a Zif oɓolo na ali o uvon ukpakukupa uta'atsu (3,000) aza a Isra'ila a na u ɗangulai, adama a zami ɗe Da̱wuda.
1SA 26:3 A̱vu Shawulu yuwan uva̱la̱ta̱ wa̱ yi zuzu nu ure zuva va aagaɗi a Hakila a̱ ka̱lyuwusa̱ Jeshimon, amma Da̱wuda da̱na̱ ta̱ nden a̱tsumona'a. Ana wu uwwai ana Shawulu ta̱wa̱ ta̱ izami ya̱ yi,
1SA 26:4 a̱vu u lyungu aza a na aa tawa utyo, a̱vu gba e ene amayun a ɗa Shawulu ta̱ lo oɓolo na ali o uvon yi.
1SA 26:5 Reve Da̱wuda 'yon u 'ya̱wa̱ uba̱ta̱ u na Shawulu va̱la̱i, a̱vu we ene uba̱ta̱ u na Shawulu na̱ Abna ulobo wa Ner, yali ya̱ a̱soja a̱ yi, o voyin. Shawulu da̱na̱ ta̱ pe nven e memere mo uva̱la̱ta̱, reve ali o uvo'on o von uka̱nda̱ruwu na̱ a̱yi a nlavu.
1SA 26:6 Reve Da̱wuda damma Ahimele za va Hitiya, na̱ Abishai mawun ma̱ a̱na̱wu ma Yowab za na mma le ɗa Zeruya, <<Zane ɗa a̱ kuru mu a̱ 'ya̱wa̱ o uva̱la̱ta̱ uba̱ta̱ wa Shawulu?>> A̱vu Abishai usu, <<N ta̱ 'ya̱wa̱ oɓolo na̱ a̱vu.>>
1SA 26:7 Ɗaɗa Da̱wuda na̱ Abishai a̱ 'ya̱wa̱i o uva̱la̱ta̱ wa Shawulu na ayin, a̱vu a cina yi a nlavu, ni ibata ya̱ yi usapu e iɗa zuzu na aaci a̱ yi. Abna gba oɓolo na akapi ali o uvo'on a̱ da̱na̱ ta̱ nven uka̱nda̱ruwa̱ na̱ a̱ yi.
1SA 26:8 Reve Abishai damma Da̱wuda, <<Ana'an A̱sula̱ a ca ta̱ ma'yuwatan ma̱ wu o ukere wa̱ wu. Gogo lyawa mu n ya̱wa̱ n sapa yi usapu u ta̱ ni ibata ya̱ yi n ɓolo yi ni iɗa, n ciga n sapa yi ure shi.>>
1SA 26:9 Amma a̱vu Da̱wuda damma Abishai, <<She vu una yi wan! Zane ɗa a̱a̱ 'ya̱sa̱n ukere u ju'wa̱n vuma na A̱sulazuva a tawai a̱vu u da̱na̱ babu unusu?>>
1SA 26:10 A̱vu Da̱wuda damma, <<N kucuna ta̱ na̱ A̱sulazuva a na a̱ ri wuma, A̱sulazuva na aciya̱yi a̱yi ɗa woo kototo yi, ko urana wa̱ yi u ta̱wa̱ a na wa̱a̱ kuwa̱, ko u 'ya̱wa̱ uba̱ta̱ o uvon a̱vu u kuwa̱ ɗe.
1SA 26:11 Amma A̱sulazuva a paraa mu n 'ya̱sa̱n ukere u va̱ n ju'wa̱n za na A̱sulazuva a̱ tsuwa̱yin mani'in. Gogo vu tara ibata i na i ri uba̱ta̱ a aaci a̱ yi na̱ medele ma̱ mini a̱vu vu ta̱wa̱ tsu wala.>>
1SA 26:12 Ɗaɗa Da̱wuda tarai ibata na̱ medele ma̱ mini ma na ma̱ ri zuzu na aaci a Shawulu, reve a̱ ka̱ra̱. Babu za na ene nle ko revei ili i na i farai, ko za ro juwan, adama a na suru nle nlavu ma̱ a̱ru'un diga uba̱ta̱ wa̱ A̱sulazuva ma̱pura̱ le ta̱.
1SA 26:13 Reve Da̱wuda ka̱ra̱ a̱ tyo mavada mo uka̱ri ma̱ ndeɗe, a̱vu u kumba aagaɗi o ro za na ri akasu nu uba̱ta̱ u na Shawulu no oɓolo ali o uvon a̱ yi ri. A̱ba̱jini agalaci a̱ da̱na̱ ta̱ e memere me ele.
1SA 26:14 A̱vu Da̱wuda salaa ali o uvon na̱ Abna ulobo wa Ner, a̱vu u damma, <<Vu ta uwusa mu Abna?>> Reve Abna usu, <<Zane ɗa a̱vu za na e ɗesu a damatosun mogono tsun nda?>>
1SA 26:15 Reve Da̱wuda damma Abna, <<A̱vu vali ɗa, ko ne ɗa shi? Zane ɗa ri tsa̱ wu a̱tsuma̱ ali o uvon a Isra'ila? Nye i zuwai vu piriyi zagbain va̱ wu mogono ulobonu shi? Adama a na za ro ta̱wa̱ ta̱ adama wu una mogono zagbain va̱ wu.
1SA 26:16 Ili i na vu yuwain u lobono shi. N kucuna ta̱ na̱ A̱sulazuva a na a̱ ri wuma, a̱vu na ali o uvon a̱ wu i 'yuwan i kuwa̱, adama a na i piriyi zagbain ɗu ulobonu shi, za na A̱sulazuva a̱ tsuwa̱yin mani'in. Ka̱lyuwa̱i a̱ te ɗa ibata i mogono na̱ medele ma̱ mini ma na ma̱ ri zuzu na aaci a̱ yi?>>
1SA 26:17 Shawulu reve ta̱ uɗyo wa̱ Da̱wuda a̱vu u damma, <<Uɗyo wa̱ wu u ɗa nda'a ulobo u va̱ Da̱wuda?>> A̱vu Da̱wuda usu, <<Ee a̱mu ɗa zagbain va̱ mogono.>>
1SA 26:18 A̱vu Da̱wuda lyuwa elime na adanshi u damma, <<Nye i zuwai zagbain va̱ a gbagbusa aagbashi a̱ yi? Nye i ɗa n yuwain, waru iwuya i ne ɗa i ri e ekere a̱ va̱?
1SA 26:19 Gogo lyawa zagbain va̱ mogono ma uwwa adanshi a aagbashi a̱ yi. Ko na̱ shi A̱sulazuva a ɗa a zuwa nuwu vu yuwan upan adama a̱ va̱, to lyawa u ushi kucci. Amma na ama ɗa a zuwai, lyawa a yuwaan le una̱ a̱ ma̱ka̱ka̱n ma̱ a̱ A̱sulazuva! Adama a na a̱ gba̱ra̱ mu ta̱ ana'an adama a na ma̱ tsura̱ akunda a̱tsuma̱ agadu A̱sulazuva, a dansaa, <Ya̱wa̱ vu yuwaan musula̱ n ro a̱ga̱nda̱.>
1SA 26:20 Gogo she vu lyawa mpasa n va̱ mo oco e iɗa alanga na̱ ma̱ka̱ka̱n ma̱ A̱sulazuva wan. Nye i zuwai mogono ma Isra'ila ma̱ ri ya̱ izami i na wo una aakupa tsa a̱ va̱? Cine tsu ɗa va yuwan ugenge u va̱ tsa matsulu a nsasan?>>
1SA 26:21 Ɗaɗa Shawulu dammai, <<N yuwan ta̱ unusu, ka̱mba̱ Da̱wuda ulobo u va̱, ma yuwan wu iwiya waru shi, adama a na vu tara ta̱ wuma u va̱ na̱ a̱ɓula̱ ana'an. Amayun n yuwan ta̱ tsulo, waru ni ili yu uwuyanu lon!>>
1SA 26:22 A̱vu Da̱wuda usu, <<Apa nda ibata i mogono, lyawa za ta̱ a̱tsuma̱ ali o uvon a̱ wu u ta̱wa̱ u ushi yi.
1SA 26:23 A̱sulazuva a tsu zuwaa ta̱ koyan aba'un o una̱ wa̱ a̱ɓula̱ a̱ yi na amayun a̱ yi. A̱sulazuva a ca wu ta̱ e ekere a̱ va̱ ana'an, amma ma̱a̱ 'ya̱sa̱n ukere n ju'wa̱n za na A̱sulazuva a̱ tsuwa̱yin mani'in shi.
1SA 26:24 A̱yi ɗa nda, cine wuma wa̱ wu u ri ulobonu ana'an e esu a̱ va̱, ne ɗa lyawa wuma u va̱ u da̱na̱ ulobonu o urewesu wa̱ A̱sulazuva, waru lyawa u wawa mu a̱tsuma̱ a addama suru!>>
1SA 26:25 Ɗaɗa Shawulu dammai Da̱wuda, <<Lyawa vu da̱na̱ na aba'un ulobo u va̱ Da̱wuda, vu ta yuwan ili na̱ a̱bunda̱ waru na amayun vu ta lyuwa aci e le.>> Ɗaɗa Da̱wuda remei ure wa̱ yi, a̱vu Shawulu ka̱mba̱ o u'wa.
1SA 27:1 Reve Da̱wuda yuwan majiyan o okolo a̱ yi, <<Urana u ro n ta̱ kuwa̱ o ukere wa Shawulu. Ili i na i la'aa numu a na ma yuwan a̱yi ɗa n suma a̱ tyo e iɗa ya aza a Filistiya. Shawulu ta lyawa izami i va̱ uba̱ta̱ suru a̱tsuma̱ a pasu vi iɗa ya Isra'ila, waru n ta la'a o ukere wa̱ yi.>>
1SA 27:2 Ɗaɗa Da̱wuda na ali o uvon a̱ yi ukpakuta̱li (600) a na a̱ ri oɓolo na̱ a̱yi a̱ ka̱ra̱i, a̱vu a̱ tyo mavada uba̱ta̱ wa Akish ulobo wa Mawok, mogono ma Gat.
1SA 27:3 A̱vu Da̱wuda na ali o uvon a̱ yi a̱ da̱nu a̱tsuma̱ a Gat oɓolo na̱ Akish. Za suru da̱na̱ ta̱ oɓolo nu u'wa wa̱ yi, waru Da̱wuda da̱na̱ ta̱ oɓolo na̱ a̱ma̱ci e re a̱ yi Ahinowam za va Yezireyel na̱ Abigel za va Kame, ma̱runa̱ ma Nabal.
1SA 27:4 Agba ana a dammai Shawulu Da̱wuda suma ta̱ a̱ tyo Gat, u da̱shi zami yi shi.
1SA 27:5 Uranu u ro reve Da̱wuda damma Akish, <<Na̱ n tsura̱ isa'ani e esu a̱ wu, lyawa vu ca mu uba̱ta̱ u ro a̱tsuma̱ a̱ mulyuci vi iɗa'a, adama n da̱nu ɗe. Adama a̱ nye a ɗa aagbashi a̱ wu a̱ da̱nu a̱ lyuci tsugono oɓolo na̱ vu?>>
1SA 27:6 Ne ɗa o urana u ndolo Akish ca niyi Ziklag, a̱yi ɗa i zuwai Ziklag wo o'woi za vu ngono ma Yahuda hali na ana'an.
1SA 27:7 Da̱wuda da̱nu ta̱ e iɗa ya Filistiya aa'wan a̱ ta̱ na̱ woto na̱shi.
1SA 27:8 A̱tsuma̱ a rana vu nde ma̱ a̱ yi a̱tsuma̱ a Ziklag, Da̱wuda tsu u ta̱ ta̱ na ali o uvon a̱ yi adama a̱ riya̱a̱ aza a Geshura nu uvon, na aza a Girzi na aza a Amaleka. Ɗe nu ufaru ama a nda a ɗa a fara da̱nuyi e iɗa'a, diga upasu wa̱ Shur, hali a cina Masar.
1SA 27:9 Mantsa ma na suru Da̱wuda riya̱a̱ nle nu uvon, u tsu lyawa vali ko ka wuma shi, amma u tsu pura̱ ta̱ mgbele ni inan, na̱ nloli, na arakumi, ni itana yu otosu. Reve u ka̱mba̱ ya Akish.
1SA 27:10 Na̱ Akish ece yi, <<Te ɗa vu 'ya̱wa̱i uvon ana'an?>> Da̱wuda tsu damma yi ta̱, <<Uba̱ta̱ wa Nege wu upasu wa Yahuda,>> ko, <<Uba̱ta̱ wa Nege wu upasu wa aza a Yerameyel,>> ko, <<Uba̱ta̱ wa Nege wu upasu wa̱ a̱za̱ a̱ Keni.>>
1SA 27:11 Da̱wuda tsu lyawa vali ko ka wuma shi, adama a na she ta̱wa̱ a̱ 'ya̱wa̱ nu dammu a̱tsuma̱ a Gat a damma, <<Apa ili i na Da̱wuda yuwain>> wan. A̱yi ɗa ili i na u yuwusain mantsa ma na u da̱na̱i nden e iɗa ya aza a Filistiya suru.
1SA 27:12 A̱vu Akish lyawaa Da̱wuda okolo, a̱vu u damma aciya̱yi, <<Wo o'wo ta̱ ili yi idaba lon uba̱ta̱ wa ama a̱ yi, aza a Isra'ila, adama wo o'wo aagbashi a̱ va̱ hali hali.>>
1SA 28:1 A rana ndolo aza a Filistiya o ɓoloto ta̱ ali o uvon e le adama o uvon, adama a yuwan uvon na aza a Isra'ila. A̱vu mogono Akish damma Da̱wuda, <<Vu reve a na a̱vu na ali o uvon a̱ wu i to uta̱ oɓolo na̱ a̱mu, na ali o uvon a̱ va̱ adama o uvon.>>
1SA 28:2 Reve Da̱wuda damma, <<U lobono ta̱, vu te ene ili i na aagbashi a̱ wu aa gura.>> Reve Akish damma Da̱wuda, <<U lobono ta̱, n ta̱ ka̱mbuwa̱ wu za vi ipiri va̱ a mantsa ma wuma u va̱.>>
1SA 28:3 Gogo Sama'ila kuwa̱ ta̱ ɗe, a̱vu aza a Isra'ila suru a yuwan nden n wiruta̱ adama a̱ yi, a̱vu a̱ ciɗo yi a̱ lyuci va̱ yi ɗe Rama. Shawulu gba̱ra̱ ta̱ ɗe aza a na o ɓoloso aci na̱ ruhu va̱ a̱kwa̱kwa̱ na̱ a̱za̱ a̱ yindi e iɗa'a.
1SA 28:4 Reve aza a Filistiya o ɓoloto aciya̱le reve a yuwan uva̱la̱ta̱ zuzu na̱ lyuci va Shunem, Shawulu gba shi u ɓoloto ta̱ suru ali o uvon a Isra'ila, a̱vu a yuwan uva̱la̱ta̱ u le a Masasan ma Gilbowa.
1SA 28:5 Ana Shawulu enei ali o uvon a Filistiya, reve okolo a̱ yi e je'en na̱ wovon lon.
1SA 28:6 Waru a na Shawulu patiyi A̱sulazuva, A̱sulazuva a̱ usu yi shi, ko uba̱ta̱ wa alavu, ko na̱ Urim, ko uba̱ta̱ wa ama̱sula̱.
1SA 28:7 Reve Shawulu damma agbashi a̱ yi, <<Zamiya numu ka na o ɓoloso aci na̱ ruhu va̱ a̱kwa̱kwa̱, adama n 'ya̱wa̱ ya̱'a̱ yi me ece yi ili i na maa yuwan.>> A̱vu agbashi a̱ yi a damma yi, <<Za ro ta̱ ɗe En Do.>>
1SA 28:8 Ɗaɗa Shawulu pusa̱n yi iroci ya̱ yi a̱vu wo oto itana i ro, reve na ayin a̱yi na ama e re a̱ ka̱ra̱ a̱ 'ya̱wa̱ uba̱ta̱ a ka'a a̱vu u damma yi, <<Ece we mu ruhu vu za na kuwa̱i vu ta̱wa̱a̱ mu na̱ za na suru mee ɗe aala a̱ yi.>>
1SA 28:9 Amma ka'a u damma yi ta̱, <<Amayun vu reve ta̱ ili i na Shawulu yuwain. U gba̱ra̱ ta̱ aza a na o ɓoloso aci na̱ ruhu va̱ a̱kwa̱kwa̱ na̱ a̱za̱ a̱ yindi a̱tsuma̱ e iɗa'a. Adama a̱ nye vaa azuwayi wuma u va̱ maza, adama vu zuwa o una mu?>>
1SA 28:10 Shawulu kucinaa yi ta̱ na̱ A̱sulazuva, <<N kucina ta̱ na̱ A̱sulazuva a na a̱ ri wuma, aa ca wu a̱tsuma̱lima̱ adama a nda shi.>>
1SA 28:11 Reve ka'a u damma, <<Zane ɗa ma̱a̱ ta̱wa̱a̱ wu?>> A̱vu u damma, <<Ta̱wa̱a̱ mu na̱ Sama'ila.>>
1SA 28:12 Ana ka'a we enei Sama'ila a̱vu wo oruwo lon a̱vu u damma Shawulu, <<Nye i zuwai vu luluma̱ numu? Ashe a̱vu ɗa mogono Shawulu!>>
1SA 28:13 Reve mogono'o u damma yi, <<She vu uwwa wovon wan. Nye i ɗa ve enei?>> A̱vu ka'a u damma, <<Me ene ta̱ za ro tsa ma̱sula̱ o uta̱sa̱ diga e iɗa.>>
1SA 28:14 A̱vu we ece yi, <<Nye i ɗa oroci a̱ yi?>> Reve u usu, <<Abara a ɗa me enei a̱ ta̱wa̱ woto wu nu utugu.>> Ɗaɗa Shawulu revei a na Sama'ila ɗa, a̱vu u kingyo u ka̱ɗa̱to urewesu wa̱ yi a̱ tyo we iɗa.
1SA 28:15 Reve Sama'ila damma Shawulu, <<Nye i zuwai vu damaton numu a na vu ta̱wa̱to numu?>> A̱vu Shawulu usu, <<N ta̱ pe a̱tsuma̱ a̱tsuma̱lima̱ lon, aza a Filistiya a ta yuwusan uvon na̱ a̱mu waru A̱sula̱ a vadalaa mu ta̱ ucina̱. U da̱shi usu mu shi, ko uba̱ta̱ wa ama̱sula̱ ko uba̱ta̱ wa alavu shi. Adama o ndolo n ɗe wu ta̱ vu damma mu ili i na maa yuwan.>>
1SA 28:16 Reve Sama'ila damma, <<Nye i zuwai ve ece numu, a na wo o'woi A̱sulazuva a vadalaa nuwu ucina̱, a̱vu wo o'wo ma'yuwatan ma̱ wu?
1SA 28:17 A̱sulazuva a yuwan ta̱ na̱ a̱vu cine u dammai o una̱ u va̱. A̱sulazuva a kara ta̱ tsugono diga e ekere a̱ wu a̱vu u ca moron ma̱ wu Da̱wuda.
1SA 28:18 Adama a na vu yuwan tsutoni nu uɗyo wa̱ A̱sulazuva shi, a na vu kuɗa̱i o kototo aza a Amaleka aza a na u da̱na̱i a uwwusa upan u le lon, a̱yi ɗa i zuwai A̱sulazuva a yuwaan nuwu ili ya nda ana'an.
1SA 28:19 Babu na̱ ne, A̱sulazuva a ta ca ali o uvon a Isra'ila oɓolo na̱ a̱vu e ekere a aza a Filistiya, waru nfa'an a̱vu no olobo a̱ wu i ta̱ da̱na̱ oɓolo na̱ a̱mu. A̱sulazuva a ta ca ali o uvon a Isra'ila suru e ekere a aza a Filistiya.>>
1SA 28:20 Ɗaɗa Shawulu rishiyi nu uta̱ wudaruwu e iɗa, tapu nu wovon adama a adanshi a Sama'ila. Waru u da̱na̱ nu ucira shi, adama a na u lyuwai ili i ro shi urana na ayin o ndolo suru.
1SA 28:21 Ana ka'a ta̱wa̱i ya Shawulu, waru ana we enei u ta̱ e meje'en lon, reve u damma yi, <<A̱yi ɗa nda aagbashi a̱ wu a yuwaan wu ta̱ tsutoni. N ca ta̱ wuma u va̱ adama n yuwan ili i na vu damma numu.
1SA 28:22 Gogo yuwan ankuri vu uwwa aagbashi a̱ wu. Waru vu lyawa n ca wu ilyalya tsura̱ vu lyuwa adama vu tsura̱ ucira u na va̱a̱ ka̱mba̱.>>
1SA 28:23 A̱vu u 'yuwan u damma, <<Maa lyuwa ili i ro shi.>> Amma agbashi a̱ yi a kamba ta̱ ka'a a patishi yi, reve wu uwwa adanshi e le. Ɗaɗa u yoyin diga e iɗa a̱vu u da̱nu a̱ a̱ga̱da̱.
1SA 28:24 Ka'a u shi ta̱ na̱ ma̱dindim ma̱ lipu o u'wa, ɗaɗa u jika̱ tara u paɗa yi, a̱vu u tara yira u lapa, reve u yuwaan yi opopofu a na a̱ ri na̱ wolilo shi.
1SA 28:25 Ɗaɗa u delyo wa̱ yi Shawulu na̱ agbashi a̱ yi, a̱vu a tama. Ɗaɗa a̱ 'yoyin a̱ ka̱ra̱i na ayin o ndolo.
1SA 29:1 Aza a Filistiya o ɓoloto ta̱ ali o uvon e le suru ɗe Afe, a̱vu aza a Isra'ila a̱ va̱la̱ a̱ lyusu mini a̱tsuma̱ a Yezireyel.
1SA 29:2 Mantsa ma na azagbain a aza a Filistiya a̱ ri a mmalu no oɓolo ali o uvon ukpaku na̱ ukpakukupa, Da̱wuda na ali o uvon a̱ yi a̱ da̱na̱ ta̱ o tono ele a mmalu a̱ca̱pa̱ oɓolo na̱ mogono Akish.
1SA 29:3 Nan yali o uvon a Filistiya a yuwan ta̱ yeci, <<Nye i ɗa Mmaci ma Ibrahim nda maa yuwusan pa?>> Reve Akish usu, <<Da̱wuda ɗa zana da̱na̱i aagbashi a Shawulu mogono ma Isra'ila. U ta̱ pa oɓolo na̱ a̱mu aa'wan aa'wan, waru diga urana u na wu kasai na̱ Shawulu a cina ana'an n tsura̱ yi nu unusu shi.>>
1SA 29:4 Amma nan yali o uvon a Filistiya a yuwan ta̱ upan na̱ a̱yi a̱vu a damma yi, <<Ka̱mba̱to ɗe vuma nda, adama u ka̱mba̱ ɗe uba̱ta̱ u na vu ca niyi nda̱na̱ta̱. Wa̱a̱ 'ya̱wa̱ oɓolo na̱ a̱tsu uba̱ta̱ o uvon shi, ta̱wa̱ u ta̱wa̱ u vadalaa tsu mantsa mo uvon wan. U ta gura yuwan ulinga na̱ mantsa ma nda wu koɗo aci a̱tsu adama u yo'onoto Shawulu zagbain va̱ yi okolo.
1SA 29:5 Ashe Da̱wuda ɗa na a canaa yi ishipa nu uje'en a̱vu a cana, <Shawulu una ta̱ ukpakukupa va̱ yi, waru Da̱wuda una ta̱ ukpakukupa kupa va̱ yi.> >>
1SA 29:6 Ɗaɗa Akish ɗeyi Da̱wuda reve u damma yi, <<N kucina ta̱ na̱ A̱sulazuva a na a̱ ri wuma, a̱vu za va̱ a̱ɓula̱ ɗa, waru shi ta̱ n ciga vu 'ya̱wa̱ uvon oɓolo na ali o uvon a̱ va̱. Adama a na diga urana u na vu ta̱wa̱i ya̱'a̱ va̱ a cina ana'an, n tsura̱ wu nu unusu shi, amma akapi azagbain a Filistiya a̱ usu wu shi.
1SA 29:7 To, gogo she vu vadala vu ka̱mba̱ na asuvu nden, she vu yuwan ili i na ya̱a̱ lungusa̱ okolo akapi azagbain a Filistiya wan.>>
1SA 29:8 A̱vu Da̱wuda ece yi, <<Amma nye i ɗa n yuwain? Unusu u ne u ɗa vu tsura̱i uba̱ta̱ wa aagbashi a̱ wu diga o urana u na n ta̱wa̱i ya̱'a̱ wu hali a cina ana'an? Nye i zuwai ma̱a̱ 'ya̱wa̱ n yuwan uvon na̱ n'yuwatan mu zagbain va̱ mogono shi?>>
1SA 29:9 A̱vu Akish usu yi reve u damma, <<N reve ta̱ vu ta̱ babu unusu na amayun a̱ wenu u va̱ tsa malingata ma̱ A̱sula̱, suru na̱ ne nan yali o uvon a Filistiya a damma ta̱, <Wa̱a̱ 'ya̱wa̱ oɓolo na̱ a̱tsu uba̱ta̱ o uvon shi.>
1SA 29:10 Gogo she vu 'yon nu usana, oɓolo na̱ agbashi a zagbain va̱ wu Shawulu aza a na a̱ ta̱wa̱i oɓolo na̱ a̱vu, a̱vu i ka̱ra̱ nu usana urana a̱ ma̱ɓa̱tsa̱a̱.>>
1SA 29:11 Ɗaɗa Da̱wuda na ali o uvon a̱ yi o uta̱i nu usana adama a̱ ka̱mba̱ e iɗa ya aza a Filistiya, reve aza a Filistiya a̱ ka̱ra̱ a̱ tyo Yezireyel.
1SA 30:1 Ana a yuwain rana ta'atsu, a mantsa ma na Da̱wuda oɓolo na ali o uvon a̱ yi a rawai a 'wa le a̱ lyuci va Ziklag, reve a cina oɓolo ali o uvon a Amaleka cina a̱ ta̱wa̱a̱ ozo o upasu we Nege na̱ Ziklag nu uvon hali a̱ kula̱to yi.
1SA 30:2 A̱vu e reme a̱ma̱ci na aza a na a̱ ri pe suru, mawun na̱ zagbain suru. Agba o una ko za shi, amma a̱ pura̱ le ta̱ a̱ ka̱ra̱.
1SA 30:3 Ana Da̱wuda na ali o uvon a̱ yi a rawai Ziklag, a̱vu a cina a̱ kula̱to yi ta̱ na akina waru a̱ma̱ci e le no olobo ne esheli e le a̱ pura̱ le ta̱.
1SA 30:4 Ɗaɗa Da̱wuda na ali o uvon a na a̱ ri oɓolo na̱ a̱yi a̱ shosuyin na̱ yisali lon hali a lamba ucira u na a̱a̱ shon.
1SA 30:5 A̱ pura̱ ta̱ fo a̱ma̱ci e re a̱ Da̱wuda, Ahinowam za va Yezireyel na̱ Abigel ma̱runa̱ ma Nabal va Kame.
1SA 30:6 Waru Da̱wuda da̱na̱ ta̱ pe e meleshe lon, adama a na ali o uvon a̱ yi a yuwan ta̱ adanshi a na a vuvara yi na atali hali u kuwa̱, adama a na koyan da̱na̱ ta̱ o upan lon u na waa lamba o olobo ne esheli a̱ yi. Amma Da̱wuda ca ta̱ aciya̱yi adanshi adama a na u zuwa ta̱ ucira wa̱ yi e ekere a̱ A̱sulazuva A̱sula̱ a̱ yi.
1SA 30:7 Reve Da̱wuda damma Abiyata ganu, ulobo wa Ahimele, <<Ta̱wa̱a̱ mu na̱ epo.>> Ɗaɗa Abiyata ta̱wa̱yi Da̱wuda na̱ epo.
1SA 30:8 Reve Da̱wuda ece A̱sulazuva, <<N saɓa oɓolo ali o uvon a na a̱ ta̱wa̱a̱ ntsu nu uvon u nda? N ta cina le?>> A̱vu u usu yi, <<Saɓa le adama a na na amayun vu ta cina le, reve vu usa suru ili i na a̱ pura̱ nuwu wi i ɗa.>>
1SA 30:9 Ɗaɗa Da̱wuda uta̱i, na ali o uvon ukpakuta̱li (600) a na a̱ ri oɓolo na̱ a̱yi. Ana a rawai o Uka̱ri wa Beso, reve ozo o ro e le e isawan lo.
1SA 30:10 Amma Da̱wuda na ali o uvon ukpakuna̱shi (400) a lyuwa ta̱ elime na̱ masaɓa me le goon, adama a na ali o uvon ukpakure (200) a̱ kuna̱ ta̱ hali a gura pasa uka̱ri'i shi.
1SA 30:11 Ali a na a̱ da̱na̱i oɓolo na̱ Da̱wuda a̱ tsura̱ ta̱ vuma va Masar a atsusa reve a tara yi a̱ tyo ya̱ Da̱wuda. A̱vu a ca yi ilyalya u lyuwa, na̱ mini reve u sowo.
1SA 30:12 A̱vu a cayi abishi akala a̱ muwun mu ubiri o u'yewu, na̱ ogbodolu a̱ muwun n ina̱bi o u'yewu ejere. Waru a na u tamai reve ugbozu u ka̱mba̱ yi, adama a na u shi u lyuwa ilyalya ko u sowo mini shi a̱tsuma̱ arana ta'atsu na ayin a ta'atsu.
1SA 30:13 Reve Da̱wuda damma yi, <<Zane ɗa zagbain va̱ wu waru te ɗa vu uta̱i?>> Reve u usu, <<A̱mu vuma va Masar ɗa aagbashi a za va Amaleka. Zagbain va̱ lyawa mu ta̱ rana ta'atsu na ka̱ra̱i a na m banakain.
1SA 30:14 Tsu 'ya̱wa̱ ta̱ nu uvon upasu wa̱ Nege va aza a Keretiya na̱ upasu wa aza a Yahuda na̱ upasu wa̱ Nege va Keleb, a̱vu waru tsu kula̱to Ziklag.>>
1SA 30:15 A̱vu Da̱wuda damma yi, <<Vu ta gura tara mu a̱ cipa̱ uba̱ta̱ o oɓolo ali o uvon o ndolo?>> Reve u usu, <<Kucinaa mu na̱ A̱sula̱ a na voo una mu ko vu cawisan mu waru e ekere a zagbain va̱ shi, n ta tara wu a̱ tyo uba̱ta̱ u le.>>
1SA 30:16 A̱vu u tara yi a̱ 'ya̱wa̱, a̱vu a cina le ɗe ubetu'wu o upasu wi iɗa'a suru, a lyuwusa no osowi a uwusa uyo'o, adama a̱ a̱bunda̱ e itana i na a̱ pura̱i diga e iɗa ya aza a Filistiya na̱ diga e iɗa ya Yahuda.
1SA 30:17 Reve Da̱wuda riya̱a̱ le nu uvon diga urana a̱ ma̱riya̱ hali a cina nfa'an nu ulivu, waru babu vuma a̱tsuma̱ e le za na la'ai, she olobo ukpakuna̱shi (400) a na a kumbai arakumi a̱vu a suma.
1SA 30:18 Da̱wuda usa ta̱ ili i na suru aza a Amaleka a̱ shi a̱ pura̱i, oɓolo na̱ a̱ma̱ci e re a̱ yi.
1SA 30:19 Babu ili i na i puwa̱yin, ko mawun ko zagbain ko ulobo ko usheli, ko itana ko ili i ro i na a̱ shi a̱ pura̱i. Da̱wuda ka̱mbuwa̱ ta̱ ili'i suru.
1SA 30:20 U pura̱ ta̱ geru vu mgbele ni inan suru, a̱vu ali o uvon a̱ yi a guɓa le elime iliyamunga i le, a dansa, <<Ele ɗa ili i na Da̱wuda pura̱i uba̱ta̱ wu uvon.>>
1SA 30:21 Reve Da̱wuda ka̱mba̱ o Uka̱ri wa Beso a̱vu u cina ali o uvon ukpakure (200) a na a gura kuru niyi shi adama o ukunu, a̱vu a̱ ta̱wa̱ a ga'asan na̱ Da̱wuda oɓolo na ali o uvon a na a̱ ri oɓolo na̱ a̱yi. A mantsa ma na Da̱wuda na ali o uvon a rawai zuzu na̱ le a̱vu u ca̱sa̱ le.
1SA 30:22 Amma a̱vu suru a̱za̱ e iwuya na̱ ama a vama a̱tsuma̱ aza a na a̱ kuruyi Da̱wuda a damma, <<Adama a na a̱ 'ya̱wa̱i oɓolo na̱ a̱tsu shi, tsaa ca le ili i na tsu tsura̱i uba̱ta̱ wu uvon shi. She de a tara a̱ma̱ci e le na̱ muwun n le a̱ ka̱ra̱.>>
1SA 30:23 Amma Da̱wuda damma ta̱, <<Waa yuwan ne shi, a̱za̱ a̱ va̱! She i ciga aciya a̱ ɗu ekere e ili i na A̱sulazuva a ca n tsu wan. U geshe tsu ta̱, a̱vu u ca tsu oɓolo ali o uvon a na a̱ ta̱wa̱i a yuwain uvon na̱ a̱tsu.
1SA 30:24 Babu za na a̱ usu ili i na i dammai! Akunda a za na isawain ni itana u ta̱ da̱na̱ una̱ta̱ na̱ za na 'ya̱wa̱i uba̱ta̱ o uvon. Suru tsu ta̱ ne'eshen le una̱ta̱.>>
1SA 30:25 Da̱wuda zuwa yi ta̱ wo o'wo wila̱ ni ili i na a̱ kuru uba̱ta̱ wa aza a Isra'ila diga urana u ndolo hali a cina ana'an.
1SA 30:26 Ana Da̱wuda rawai Ziklag, u lyungu ta̱ akapi a̱tsuma̱ e ili i na a̱ pura̱i a̱ tyo uba̱ta̱ a̱ n'utsa̱ ma̱ yi, mbara ma Yahuda, u damma, <<Nda une'e u ɗu diga e itana i na tsu pura̱i uba̱ta̱ wu uvon uba̱ta̱ wu n'yuwatan ma̱ A̱sulazuva.>>
1SA 30:27 Nda ala e ilyuci i na Da̱wuda lyunguwa̱ yi une'e, Betel na̱ Ramot a̱tsuma̱ e Nege na̱ Yati
1SA 30:28 na̱ Arowa na̱ Sifamo na̱ Eshitemowa
1SA 30:29 na̱ Rakal ni ilyuci ya aza a Yerameyel ni ilyuci ya̱ a̱za̱ a̱ Keni
1SA 30:30 na̱ Homa na̱ Bor Ashan na̱ Atak
1SA 30:31 na̱ Heburon na̱ suru uba̱ta̱ u na Da̱wuda na ali o uvon a̱ yi a garusai.
1SA 31:1 Ele lo reve aza a Filistiya a yuwisan uvon na aza a Isra'ila, hali she na aza a Isra'ila a sumai. Amma o una ta̱ ali o uvon a Isra'ila na̱ a̱bunda̱ a Masasan ma Gilbowa.
1SA 31:2 A̱vu aza a Filistiya a saɓusa Shawulu na̱ olobo yi, reve o una olobo a ta'atsu yi Jonata na̱ Abinada na̱ Malkishuwa.
1SA 31:3 Uvo'on u suɗuwa ta̱ Shawulu. Ali o uvon a na a̱ da̱na̱i na̱ tan na aya a̱ tsura̱ ta̱ a tawan yi waru a amaton yi ta̱ lon.
1SA 31:4 A̱vu Shawulu damma vuma na a̱a̱ guzusa̱a̱ yi itana yu uvon, <<Vu tala matsun me pe'eni ma̱ wu reve vu una mu, ta̱wa̱ a̱za̱ o ulambu wu upaɗu wu uryumbu a nda a yuwan mu ulamu o una mu wan.>> Vuma na gba guzusa̱a̱ niyi itana yu uvoꞌon u 'yuwan ta̱ adama a na wu uwwa ta̱ wovon lon. Ɗaɗa gba Shawulu tala yi matsun me pe'eni ma̱ yi, reve u riya̱a̱ yi wu una aciya ya̱ yi.
1SA 31:5 Ana za na a̱ guzusa̱a̱ yi itana yu uvon enei Shawulu kuwa̱ ta̱, a̱vu a̱yi fo u riya̱a̱ matsun me pe'eni ma̱ yi a̱vu u kuwa̱ oɓolo na̱ a̱yi.
1SA 31:6 Ne ɗa Shawulu kuwa̱i, no olobo a ta'atsu a̱ yi, na̱ za na tsu guzusa̱a̱ yi itana yu uvon, na̱ ali o uvon a̱ yi suru a̱ kuwa̱ ta̱ urana u ta̱ oɓolo.
1SA 31:7 Mantsa ma na aza a Isra'ila aza a na a̱ ri mavada mo o upasu wu Uka̱ri wa Yezireyel na̱ mavada mo Uɗolu wa̱ Urudu a uwwai, na a ɗa a na Shawulu no olobo a ta'atsu a̱ yi a̱ kuwa̱ ta̱, waru a uwwai a na a̱soja a Isra'ila a sumai, reve e le fo a suma a lyawa ilyuci i le. A̱vu aza Filistiya a̱ ta̱wa̱ a̱ da̱nu pe.
1SA 31:8 Ana usana u tawai, a na aza a Filistiya a̱ ta̱wa̱i a̱ pura̱ itana ya̱ a̱kwa̱kwa̱'a̱, a̱vu a cina Shawulu no olobo a ta'atsu a̱ yi nven ukwa̱ zuva Masasan ma Gilbowa.
1SA 31:9 Ɗaɗa o koɗoi aci a Shawulu a̱vu a̱ pura̱ itana yu uvon ya̱ yi, reve a̱ lyungu nlingata e iɗa ya Filistiya ma̱ɓula̱ a damma alabari a̱tsuma̱ o u'wa wa̱ a̱ma̱li e le nu uba̱ta̱ wa ama e le suru.
1SA 31:10 A̱vu a zuwa itana yu uvon ya̱ yi a̱tsuma̱ o u'wa wa̱ a̱ma̱li a Ashitore, reve a̱ sa̱ga̱do lipu va̱ yi o uɓaɓu u lyuci wa Bet Shan.
1SA 31:11 Ana aza a na a̱ ri na̱ nden Jabe Giliyadu a uwwai ili i na aza a Filistiya a yuwain na̱ Shawulu,
1SA 31:12 suru ali o uvon o ukadu le a̱ 'yon ta̱ a̱vu a̱ 'ya̱wa̱ na ayin a tara lipu va Shawulu na̱ lipu vo olobo a̱ yi diga o uɓaɓu wa Bet Shan, a̱vu a̱ tyowetyo le Jabe a̱vu a̱ kula̱to le ɗe.
1SA 31:13 Reve a̱ pura̱ etele e le reve a̱ ciɗo le e ikyun yu uɗanga u na a̱ tsu ɗe tamari ɗe Jabe, avu a yuwan akuli rana cindere adama o a̱tsuma̱la̱ngu.
MIC 1:1 A̱sulazuva a ca ta̱ Mika vuma va Moreshete adanshi e ikaka i nda a̱tsuma̱ alavu alavu adama a Samariya na̱ Urishelima a mantsa ma̱ tsugono ma Yotam na̱ Ahaz na̱ Hezekiya ngono ma Yahuda.
MIC 1:2 Uwwai, a̱ɗu ama o uvaɗi suru, polo atsuvu vu uwwa, a̱vu uvaɗi ni ili i na i ri pe a̱tsuma̱ wu suru. Lyawa A̱sulazuva Zagbain A̱sula̱ diga A̱a̱'isamapaɗa a akiza a̱yi wo o'wo, iroci a aci a̱ ɗu.
MIC 1:3 I reve, A̱sulazuva a̱ ta̱ ta̱wa̱ diga o uba̱ta̱ a̱ nden ma akiza a̱ yi. U ta̱ cipa̱ reve u dadasa ba̱ta̱ va̱ a̱ga̱nda̱ o uvaɗi.
MIC 1:4 Nsasan n ta̱ jeruwe za̱la̱ va apata ana a̱ yi waru ka̱ri ta ɓatsa cine abaji e ishiki a tsu jejeruwe o una̱ wa akina, reve u ka̱ra̱ e ilaɗi a̱ cipa̱ cine o tsu oco mini diga a agaɗi.
MIC 1:5 Ili i nda suru adama o unusu wa Yakubu u ɗa na̱ nusu va Isra'ila. Nyen ɗa unusu wu ugundo wa Yakubu? Ashe mayan ma̱ a̱ga̱nda̱ ma̱ a̱ma̱li a Samariya ɗa shi? A te ɗa gba ba̱ta̱ va̱ a̱ga̱nda̱ va Yahuda ri? Ashe a̱tsuma̱ a Urishelima ɗa a̱ ri shi?
MIC 1:6 <<Adama o ndolo n ta̱ ka̱mba̱to Samariya oɓolo e edemu a̱ rulu, wo'o tsu uba̱ta̱ u na a̱ tsu cu'wa̱n a̱ɗuma̱ a̱ ina̱bi. Waru n ta gandalato atali a̱ yi a̱ tyo o uka̱ri reve waru n za̱ɓa̱luwa̱ atali e ikyun a̱ yi.
MIC 1:7 N to ɓoɓoso a̱ma̱li a̱ yi a na a̱ zuɗa̱i, a̱ ta̱ kula̱to utsuru wa̱ yi na akina, n ta̱ kototo a̱ma̱li a̱ yi suru, adama a na a̱ tsura̱ le ta̱ diga o ure u tsushakala, waru a̱ ta̱ a̱ ka̱mba̱ o ure u tsu tsushakala'a.>>
MIC 1:8 A̱vu Mika damma, <<Adama e ili i nda, n ta yuwan a̱tsumola̱ngu reve n shon, n foɗo itana n wala ataɓu. N ta̱ shon tsa̱ musa̱n mu una, waru n yuwan a̱tsumola̱ngu tsa azamina,
MIC 1:9 Adama a na antsu a Samariya aza a na e ina ɗa shi, hali fo u ju'wa̱n Yahuda, waru u rawa ta̱ a̱ na̱ntsu va ama a̱ va̱, hali a uwa Urishelima.>>
MIC 1:10 She a yuwan adanshi a̱ yi a̱tsuma̱ a Gat wan, ko ke'en she a̱ shon wan. Amma a̱ɗu a̱za̱ Bet Leyafara i gandala a̱ ma̱buta̱ goon.
MIC 1:11 A̱ɗu ama a Shafiri, i yuwan n manlu ataɓu na̱ a̱tsuma̱ o wono. Ama a Za'anan gba she yu uta̱ wan. Bet Eze na ama a̱ yi a̱ te e mesun ya̱ tsura̱ ikambi e ekere a̱ yi shi.
MIC 1:12 Adama a na ama a Maroto a ta pura isa'ani na̱ meje'en. Agba iwuya diga uba̱ta̱ wa̱ A̱sulazuva a̱ cipa̱ ta̱ o una̱ntsu wa Urishelima.
MIC 1:13 A̱ɗu ama a Lakish, i foɓo ikeke yi ido i ɗu, adama a na a̱ a̱tsura̱ ta̱ unusu wa Isra'ila a̱tsuma̱ a̱ ɗu. Hali na u zuwai Sihiyona mayan mo unusu gayin.
MIC 1:14 Adama o ndolo, i ca ama Moreshete Gat ne'en vu ukosu. Waru lyuci va Akizibi ta̱ pura̱ ugbozu wu ngono ma Isra'ila.
MIC 1:15 Reve A̱sulazuva a damma, n ta̱ ta̱wisa̱ na̱ za na a lyuwa ɗu nu uvon, aza a na a̱ ri na̱ nden a̱tsuma̱ a Maresha. Tsugbain tsa Isra'ila tsa̱ ta̱ ka̱mba̱ e ekere a Adulam.
MIC 1:16 A̱vu Yahuda, vu puna aciya̱wu ogbondo adama a̱tsuma̱la̱ngu a̱ muwun ma̱ wu n na vu cigai. Vu puna aciya̱wu ogbondo vo o'wo tsa̱ a̱a̱kuru, adama a na muwun ma̱ wu n ta̱ 'ya̱wa̱ tsugbashi e iɗa i ro.
MIC 2:1 A̱tsuma̱lima̱ a ta cina aza a na o foɓuso iwuya, e le na o foɓuso iwuya na ayin! Nu usana u tawa, a̱ tsu uta̱ ta̱ a yuwan iwuya'a, adama a na ucira u mayan me iwuya'a u ta̱ e ekere e le.
MIC 2:2 A tsu yuwan ta̱ tsushu'un vu ɗuma̱ reve a usa le, na̱ tsushu'un vu 'wa reve fo a usa le. A tsu tsugba ta̱ vuma, reve a usa u'wa wa̱ yi ni ili ya agadu a̱ yi.
MIC 2:3 Adama o ndolo ɗa A̱sulazuva a dammai, <<Gogo n to foɓuso addama a aci a̱ cu'un va ama a nda, za na aa gura uta̱a̱ aciyele a̱tsuma̱ a̱ yi shi. Waru aa gura yuwan mmalu na afalu shi, adama a na mantsa mo uyo'o u ɗa shi.
MIC 2:4 O urana u ndolo a ta cana ishipa ya avandaru a aci a̱ ɗu, reve a yuwan mesun ma̱ a̱tsumola̱ngu lon adansa, <Za tsu koto ta̱! U kita'wa ta̱ akunda a ama a̱ va̱, u tawa le ta̱ e ekere a̱ va̱. A̱sulazuva e ne'eshen ta̱ ɗuma̱ tsu, e ekere a ama a na a lyuwa n tsu nu uvon.> >>
MIC 2:5 Adama o ndolo ya̱ tsura̱ za, diga a̱tsuma̱ oɓolo a ama A̱sulazuva na eneshe iɗa'a o ure u mazuwa ma agita shi.
MIC 2:6 Reve ama̱sula̱ e le a damma, <<She vu yuwan adanshi e ikaka i nda wan.>> <<She vu yuwan adanshi e ikaka i nda wan, Ili i wono yi lo na ya cina tsu shi!>>
MIC 2:7 <<U ta̱ ulobono ama a Yakubu a damma, <Ruhu va̱ A̱sulazuva lamba ta̱ ankuri? Linga va̱ yi ɗa nda'a?> >> <<Ashe adanshi a̱ va̱ a tsu yuwan urana e ekere aza na o toni niyi mejege shi?>>
MIC 2:8 Reve A̱sulazuva a̱ usu le u damma, <<Babu usa̱n ama a̱ va̱ a̱ tsu 'yon ta̱ tsa n'yuwatan, tsa aza a na a̱ ri a̱ ma̱ka̱mba̱a̱ diga uba̱ta̱ wu uvon, o foɗoso a̱tugu aza na ili i burai shi.
MIC 2:9 I loso ta̱ a̱ma̱ci a ama a̱ va̱ diga a 'wa sa'ani le. Reve i tara tsugbain tsa̱ va̱, diga a̱ muwun n le suru hali hali.
MIC 2:10 Gogo a̱ɗu a̱za̱ a̱ɓula̱, 'yoyin, i ka̱ra̱, adama a na uba̱ta̱ u nda uba̱ta̱ u wivuwun u ɗa shi. Adama a na iɗa'a wo o'wo ta̱ idaba.
MIC 2:11 Na̱ vuma 'yon reve u reme epen a dansa, <N ta yuwan ɗu alajiya adama a masayan ma̱ ina̱bi ni ili i na i tsu tsura̱to.> To, a̱ yi ɗa wo o'wo za va alajiya a ama a nda'a.>>
MIC 2:12 <<Adanshi o ro o lo shi, n to ɓoloto ɗu a̱za̱ o ugundo wa Yakubu, waru n to ɓoloto akapi ama a Isra'ila a na a buwai. N to ɓolo ɗu tso oɓolo e ikyon uba̱ta̱ wa aguta, tso oɓolo e ikyon uba̱ta̱ wa alyuna. I to o'wo a̱ba̱jini oɓolo a ama a na a uwwa elemu e le.>>
MIC 2:13 A̱yi za na a̱ ba̱ma̱ ukari, u to rono le a aaɗanga reve a̱ uta̱la̱i nu uba̱ta̱'a̱. U to o'wo le una̱ntsu u mo uta̱. Mogono me le ma̱ ta̱ ka̱ra̱ elime e le. A̱sulazuva na aciya̱yi a ɗa wo rono le a aaɗanga.
MIC 3:1 Poloi atsuvu yu uwwa, a̱ɗu azagbain o ugundo a Yakubu, a̱ɗu a̱za̱ o tsugono tsu u'wa wa Isra'ila! Ashe wuntsaa i reve uge'etosu wa amayun shi?
MIC 3:2 A̱ɗu na i 'yuwain ili i na i ri ulobonu, reve i ciga iwuya. a̱ɗu na ya munusa ukwan u lipu wa ama a̱ va̱, a̱ɗu na ya tawusa inama i lipu i le diga etele e le.
MIC 3:3 A̱ɗu na ya tamusa inama ya ama a̱ va̱, reve i ka̱ra̱ a munusa kwan lipu le, a kukuɗusa etele e le, ni paɗasai inama i lipu i le vadama a̱ ta̱ tsun le o upondo na a su'wan.
MIC 3:4 A̱vu nda gogo i ciga i showen A̱sulazuva, i reve gba wa̱ usu ɗu shi. A mantsa'a, u to sokowo ɗu urewesu wa̱ a̱ yi adama a na i yuwain iwuya.
MIC 3:5 Apa ili i na A̱sulazuva a dammai e ekere ama̱sula̱ a na a zuwai ama a̱ va̱ a̱ puwa̱yin, aza a na a̱ 'ya̱sa̱sa̱n ɗyo a dansa, <<<Nden ma asuvu> a mantsa ma na a ca nle ilyalya. Agba a dansa, <uvon> e ekere aza a na ca nle ili shi.
MIC 3:6 Adama o ndolo, a̱ɗu ama̱sula̱, ili suru i to o'wo ɗu ayin, alavu alavu a̱ da̱na̱ lo shi, Irumbu i ɗa yo o'wo ɗu, i buwa a yuwan walu shi. Urana u ta̱ riya̱ ɗu a aci a̱ ɗu ama̱sula̱ a nda, ulivu u to o'wo ɗu irumbu picim.
MIC 3:7 A̱ɗu a̱za̱ a̱ yindi, i ta uwwa wono, aza a walu a̱ ta̱ ra̱pula̱. Suru n ɗu i ta̱ ɓa̱ru na̱ ɗu, adama a na A̱sula̱ a uwwa ɗu shi. >>
MIC 3:8 A̱mu gba shi, n ta̱ tapu nu ucira nu Ruhu va A̱sulazuva. N ta̱ tapu nu ugbamu wa asuvu u na ma yuwan uge'etosu wa amayun. Babu wovon n ta damma Yakubu ulinga wu ulambu wa̱ a̱ɓula̱ a̱ yi alanga eteshe. Isra'ila waru n damma yi unusu wa̱ yi.
MIC 3:9 Uwwai ili i nda, azagbain o ugundo wa Yakubu, na̱ a̱za̱ o tsugono tsu u'wa wa Isra'ila, a̱ɗu na ya 'yuwusan uge'etosu wa amayun reve i vadala amayun suru.
MIC 3:10 A̱ɗu na i suwai Sihiyona na̱ mpasa, Urishelima gba nu unusu.
MIC 3:11 Azagbain o u'wa wa Yakubu a̱ ta̱ ushishi utowusu wu una̱ na paɗa ugana o uge'etosu. Nan ganu a ta yuwusan uritosu adama a̱ tsura̱ ili i na ya uwa le, waru ama̱sula̱ a̱ yi a ta yuwusan adanshi adama a̱ tsura̱ ikebe. Agba suru na̱ ne a ta majiyan A̱sulazuva a̱ ta̱ ɓolo na̱ e le a dansa, <<Ee, A̱sulazuva a̱ te e memere ma̱ tsu, upepu ucingi wu lo na wa faba tsu shi.
MIC 3:12 Adama a̱ ɗu, aa ta cimba Sihiyona tsu uɗuma̱, Urishelima gba to o'wo oɓolo o okongo. Aagaɗi a na A̱a̱'isamapaɗa a̱ ri u to o'wo olopu.>>
MIC 4:1 A mantsa mo ukosu, masasan ma na u'wa wa̱ A̱sulazuva a̱ ri u to o'wo masasan ma na ma la'ai a̱ɓula̱ suru suru. A ta cuwa yi ulawu na̱ nsasan na agaɗi suru. Nɗa n ta̱ da̱na̱ a sumusa a̱ 'ya̱wusa̱ ɗe.
MIC 4:2 Nɗa na̱ a̱bunda̱ a̱ ta̱ ta̱wa̱ a damma, <<Ta̱wa̱ yi, tsu kumbai masasan ma A̱sulazuva, a̱ 'ya̱wa̱ o u'wa wa̱ A̱sula̱ a Yakubu, adama u roco tsu re va̱ yi, tsura̱ a̱tsu fo tsu yuwan mmalu o ure wa̱ yi. >> Adama a na uritosu wa̱ A̱sulazuva u ta̱ o uta̱ diga Sihiyona, waru adanshi A̱sula̱ a̱ ta̱ ta̱wa̱ diga Urishelima.
MIC 4:3 A̱sulazuva a̱ ta̱ ge'eto ama o uvaɗi a̱bunda̱. Waru u ta̱ ge'eto nɗa m gbain gbain. A ta ruma mutsun mu pe'eni n le a̱ ka̱mba̱to le a̱ba̱ri e iluma, ibata i le waru a ta ruma le a̱ ka̱mba̱to le mutsun n wukoɗu wu ɗanga. Nɗa n buwa o uta̱ a̱ 'ya̱wa̱ uvon shi, waru a̱ da̱shi rito uvon shi.
MIC 4:4 Vuma suru ta̱ da̱nu e ikyun ya ataci a ina̱bi a̱ yi, na̱ e ikyun yu uɗanga vu biri va̱ yi na asuvu nden. Za lo na da'waton yi shi, adama a na A̱sulazuva oɓolo a̱ a̱soja a zuva a ɗa a dammai ne.
MIC 4:5 Ko na wo o'woi nɗa suru n ta̱ kurusu musula̱ n le, amma a̱tsu tsu ta̱ toni A̱sulazuva A̱sula̱ a̱ tsu.
MIC 4:6 Reve A̱sulazuva a damma, <<O urana u ndolo, n to oɓoloto aza a na a̱ pura̱i a̱ tyo tsugbashi waru n to ɓoloto aza a na o losoi, na aza a na n cayi a̱tsuma̱lima̱.
MIC 4:7 N ta̱ ka̱mba̱to aza a na a̱ pura̱i a̱ tyo tsugbashi na la'ai ama a̱ va̱, aza a na o losoi o'wo iɗa yu ucira. A̱mu A̱sulazuva n ta yuwan tsugono a aci e le a masasan ma Sihiyona diga gogo hali hali.
MIC 4:8 A̱vu usa wu uga'an wu uba̱ta̱ e ipiri yi ikyon, uba̱ta̱ wu upa'anta wu ucira wa Sihiyona a aci a̱ wu a ɗa tsugono tsu ufaru tsa̱ a̱ ka̱mba̱, tsugono'o u ta̱ ka̱mba̱ Urishelima.>>
MIC 4:9 Gogo nye i zuwai vu ri a yisali nu ucira? Mogono me pe a̱tsuma̱ a̱ wu gogo shi? Za na a casu wu a̱sa̱la̱ a̱ kuwa̱ ta̱ ɗa? A̱yi ɗa ili i na i zuwai a̱tsuma̱lima̱ a̱ riya̱ nuwu tsa ka na ri a uwwusa mɓa̱la̱ n limatan?
MIC 4:10 Vu yuwan ma̱nga̱ vu sala a̱vu Sihiyona, tsa ka na ri a̱ a̱tsuma̱lima̱ a̱ mɓa̱la̱ n limatan. Adama a na gogo vu ta̱ o uta̱ pe a̱tsuma̱ a̱ lyuci'i reve vu da̱nu oogodo aagalaci o ugyuru. Vu ta̱ ka̱ra̱ a̱ tyo Babila. Diga ɗe ɗa A̱sulazuva a wawa wu diga e ekere a n'yuwatan ma̱ wu.
MIC 4:11 Gogo, nɗa na̱ a̱bunda̱ o ɓoloto ta̱ e reme tsushu'un na̱ a̱ vu a dansa, <<Lyawa a̱ lungusa̱ yi, lyawa tsu zuwa esu a aci a Sihiyona.>>
MIC 4:12 Agba a̱ reve majiyan ma A̱sulazuva shi, waru e reve ifoɓi ya̱ yi shi, na wo ɓoloto le tsa aakatalu e ishina shi, tsi ishina i na o ɓolotoi o osoroto a na a faba.
MIC 4:13 Reve A̱sulazuva a damma, <<A̱vu Sihiyona aaɗanga o usuɗa 'yon vu yuwan usuɗa. Adama a na n ta ca wu ucira tsa̱ rumu no ookotsu e irumushili. Vu ta̱ lungusa̱ nɗa na̱ a̱bunda̱, a̱vu vu ca utsuru u le uba̱ta̱ wa̱ A̱sulazuva o uvaɗi suru.>>
MIC 5:1 Gogo, vu ɓoloto a̱ a̱soja a̱ wu adama a na a̱ ka̱nda̱ruwa̱ tsu ta̱ nu uvon. Waru a ta faba mogono ma Isra'ila na aaɗanga o ugbaguzu.
MIC 5:2 A̱vu A̱sulazuva a damma, <<A̱vu lyuci va Batalami va Efarata, a̱tsuma̱ o ugundo wa Yahuda wa'a ɗa vu ri, agba a̱tsuma̱ a̱ wu n ta̱ o uta̱a̱ vuma na a yuwan tsugono tsa Isra'ila, za na ri nu ugundo ɗe ɗe, za na ri ɗe ɗe a̱ ta̱wa̱.>>
MIC 5:3 Adama o ndolo A̱sulazuva a̱ ta̱ uta̱ aɗa a ama a̱ yi, hali she na a matsan za tsugono'o, waru she na ama a 'wa va̱ yi a̱ ka̱mba̱ a̱tsuma̱ a Isra'ila.
MIC 5:4 Tsa za va aguɓa, u ta̱ e idana ama a̱ yi, nu ucira u na wu uta̱i diga uba̱ta̱ wa̱ A̱sulazuva, a̱tsuma̱ a tsugbain tsa̱ aala A̱sulazuva A̱sula̱ a̱ yi. Ama a̱ yi a̱ ta̱ da̱nu gbaga, adama a na a̱ ta̱ reve nu ucira wa aala a̱ yi a̱tsuma̱ o uvaɗi suru.
MIC 5:5 Waru u to o'wo asuvu nden n tsu, a mantsa ma na ama a Asuriya a̱ riya̱a̱ iɗa i tsu nu uvon, hali a̱ ba̱ma̱ kari tsu, tsu ta zuwa a̱za̱ o uka̱lyusa̱ e cindere, oɓolo na azagbain kunla̱ a yuwan uvon ne le,
MIC 5:6 na a yuwan tsugono tsa Asuriya na̱ matsun me pe'eni. Nimro waru na̱ matsun mepe'eni ma na a talai. Waru u ta wawa tsu diga e ekere aza a Asuriya, a mantsa ma na a̱ ta̱wa̱yi iɗa i tsu nu uvon, ko na̱ shi a uwa o tyo wi iɗa i tsu.
MIC 5:7 Akapi o ugundo wa Yakubu na la'ai o to o'wo a̱tsuma̱ a ama na̱ a̱bunda̱, tsa a'iza na a̱ ta̱wusa̱ diga uba̱ta̱ wa̱ A̱sulazuva, tsa̱ yiji'in a anlya, za na tsu puro za shi ko u zuwa ucira uba̱ta̱ wu vaɗilima̱ shi.
MIC 5:8 Akapi o ugundo wa Yakubu na la'ai o to o'wo a̱tsuma̱ a ama na̱ a̱bunda̱, tsa a kamu e memere me inama yu una yo ogozo, tsa kamu vu ucira e memere mo oɓolo e ikyon, za na nu wu 'yawan a̱vu u riya̱a̱ le, waru za lo na wawa le shi.
MIC 5:9 Ukere wa̱ wu u ta la'a ucira wu n'yuwatan ma̱ wu, waru a̱ ta̱ kototo n'yuwatan ma̱ wu!
MIC 5:10 Reve A̱sulazuva a damma, <<O urana u ndolo u ɗa mo una ido i ɗu waru n kototo ikeke yi ido i ɗu.
MIC 5:11 N ta̱ kototo ilyuci yi iɗa i ɗu waru mu ɓoso pa'atan vu ucira ɗu.
MIC 5:12 N ta̱ gba o kototo a̱za̱ a̱ nkunu a̱ ɗu, waru ya̱ da̱shi tsura̱ boci shi.
MIC 5:13 N ta̱ fo o kototo a̱ma̱li a̱ ɗu na atali a̱ga̱nda̱ a na a̱ ri a̱tsuma̱ a̱ ɗu. Ya̱ da̱shi ka̱ɗa̱towa̱a̱ ili i na i yuwain ne e ekere a̱ ɗu shi.
MIC 5:14 N ta̱ mumula̱ a̱ma̱li a ka Ashera na a̱ ri a̱tsuma̱ a̱ ɗu a mantsa ma na n kototoi ilyuci i ɗu.
MIC 5:15 Na asuvu usuɗu u ɗa ma tsupa nɗa n na n 'yuwain a yuwan tsutoni na̱ a̱mu.>>
MIC 6:1 Uwwai ili i na A̱sulazuva a dammai Isra'ila: << 'Yon vu 'ya̱wa̱ na adanshi a̱ va̱ eleme a nsasan, lyawa agaɗi a uwwa ili i na vaa damma.>>
MIC 6:2 Uwwai a̱ ɗu nsasan ili i na A̱sulazuva a yuwusan adanshi a aci a̱ ɗu, poloi atsuvu a̱ ɗu nkyun mu uvaɗi. Adama a na A̱sulazuva a̱ ta̱ na adanshi a aci a ama a̱ yi, u ta karishi Isra'ila ana.
MIC 6:3 <<Ama a̱ va̱, nye i ɗa n yuwaan nɗu? Cine tsa ɗa n damaton nɗu? Usu numu!
MIC 6:4 A̱mu ɗa mu uta̱a̱ nɗu a̱tsuma̱ e iɗa ya Masar reve n wawa ɗu diga e iɗa i tsugbashi. A̱mu ɗa n lyunguyi Musa na̱ Haruna na̱ Maryamu o rono ɗu aaɗanga.
MIC 6:5 Ama a̱ va̱, cuwain ili i na Mogono Balak ma Mowa mo foɓoi ni ili i na Balam mawun ma Beyo ma̱ usu niyi. Cuwain na̱ mmalu n ɗu diga Shitim a̱ tyo Gilga, adama i reve nu ulinga wa̱ a̱ɓula̱ wa̱ A̱sulazuva.>>
MIC 6:6 Na̱ nye ma̱ ta̱wa̱ a̱ ma̱ka̱ka̱n ma A̱sulazuva n yuwan a̱ga̱nda̱ a̱ ma̱ka̱ka̱n ma̱ A̱sula̱ a gbain? N ta̱ ta̱wa̱ a̱ ma̱ka̱ka̱n ma̱ yi na̱ kucci vu ukula̱tosu u ma̱dindim ma aa'wan a̱ ta̱?
MIC 6:7 Ko A̱sulazuva a ta uwwa uyo'o wa̱ a̱giri'i ukpakukupa kupa va̱ a̱bunda̱, na̱ ɗolu mani'in ma̱ zetun ɗa? Ko n ta ca mawun mo ufaru ma̱ va̱ kucci vu unusu u va̱, ko mpasa n va̱ adama o unusu u wuma u va̱?
MIC 6:8 O'o vaɗilima̱, A̱sulazuva o roco wu ta̱ ɗe ili i na i ri ulobonu. Gogo ili i na A̱sulazuva a cigai ya̱'a̱ wu, a̱yi ɗa vu yuwan mejege, a̱vu vu ciga mayan me iliyali, vu ka̱ɗa̱to vu yuwan mmalu na̱ A̱sula̱ a̱ wu.
MIC 6:9 Poloi atsuvu! A̱sulazuva a̱ ta̱ ɗewu va ama a̱ Urishelima. Ugbozu ɗa lon a uwwa wovon wa̱ A̱sulazuva! Uwwai a̱ ɗu ugundo oɓolo ni iɓolo ilyuci'i!
MIC 6:10 Ko n ta̱ e icina nu utsuru u na a̱ tsura̱i o ure wi iwuya o u'wa u vuma vi iwuya? Ko n ta̱ e icina na̱ makundatsu ma na a da̱da̱'wain?
MIC 6:11 Ko me ge'eto vuma na ri na̱ makundatsu me epen, na̱ buhu yipalishi shi?
MIC 6:12 A̱za̱ o utsuru a̱ lyuci ɗu, aza a na e le'eshe alambi a ɗa. Aza a na a̱ ri pe na̱ nden a̱ lyuci'i a̱za̱ epen a ɗa suru.
MIC 6:13 Adama o ndolo, n ta amaton ɗu, n ta̱ ka̱mba̱to ɗu okongo adama a̱ nusu ɗu.
MIC 6:14 I ta lyuwa, agba ya̱ cuwa̱n shi, a̱a̱tsuma̱ a̱ ɗu a̱ ta̱ da̱na̱ o upunda̱ra̱sa̱ adama a ambulu. I to ɓoloto wi ili, agba ya gura zuwa ili shi, ili i ke'en i na i zuwai waru, n ta̱ lungusa̱ le a̱tsuma̱ o uvon.
MIC 6:15 I ta̱ cu'wa̱n, agba ya yuwan ugasa shi. I ta pisha mani'in ma̱ zetun, agba ya yuwan ulinga na̱ mani'in ma̱ yi shi. I ta pisha matsun ina̱bi, agba yo sowo masayan ma̱ yi shi.
MIC 6:16 Adama a na i toni ta̱ re vama va Omri, na̱ linga vu u'wa wa Ahabu suru, reve i yuwan ulinga na̱ a̱sa̱la̱ e iwuya i le. Adama o ndolo, n ta̱ ka̱mba̱to ɗu okongo, waru a ama a̱ wu o'wo ili macuru. Ne ɗa, a̱ ɗu ama a̱ va̱, a 'yuwan na a cuwa ɗu uba̱ta̱ suru.>>
MIC 7:1 U yo'ono mu shi! Adama a na mo o'wo ta̱ tsa za vu u'yanlu, a mantsa ma na o kotoi ugasa, u muwun ma̱ ina̱bi. Maani ma̱ ina̱bi ma lo na a ta'an a lyuwa shi. Waru umatsun wu ufaru wu biri lo na okolo a̱ va̱ a cigai shi.
MIC 7:2 Ama a̱ a̱ɓula̱ o koto ta̱ a̱tsuma̱ o uvaɗi, za lo na buwai na ri no okolo asa'ani shi, za suru ta zama ure u na wo una za ro, za suru ta azusu moron ma̱ nden ma̱ yi ni igolo.
MIC 7:3 E veɗece ta̱ a yuwan iwuya ne ekere e le. Ngono n ta zama ne'en, a̱za̱ o uge'etosu a̱ ta̱ ushishi utowusu wu una̱, azagbain a tsu zuwa ta̱ a yuwan ili i na a cigai. Ne ɗa o ɓoloi una̱ suru.
MIC 7:4 Vuma va̱ a̱ɓula̱ le tsa awanda ɗa u ri, za va amayun a̱tsuma̱ e le u ta̱ tsu ubara u na a yuwain na awanda. Urana u na A̱sula̱ e ge'eto le yuwan ta̱, u rana u na a damma n le o una̱ wa ama̱sula̱ aza a na a yuwusan ipiri i le, gogo za suru wo o'wo ta̱ utogbolyuwu.
MIC 7:5 She vu zuwaa moron me nden ma̱ wu okolo wan waru vu soɗuwo i'utsa̱ ya̱ wu ma̱tsa̱n wan, vu goloɓo una̱ wa̱ wu a̱ tyo a ka va̱ wu na vu ri e icigi za na ri nven na̱ a̱vu.
MIC 7:6 Ama o u'wa u vuma, ele ɗa n'yuwatan ma̱ yi, adama a na ulobo u ta yuwaan dada va̱ yi ulamu, mawun mo usheli waru u ta̱ 'ya̱sa̱a̱n mma va̱ yi aci, jene ta yuwan tsushu'un na̱ a̱na̱wa̱ le fo.
MIC 7:7 A̱mu gba n ta zuwaa A̱sulazuva esu, n puro A̱sula̱ e iwawi i va̱, A̱sula̱ a̱ va̱ u ta uwwa mu.
MIC 7:8 A̱vu ma'yuwatan ma̱ va̱, she vu yuwan ma̱za̱nga̱ a aci a̱ va̱ wan, ko na wo o'woi n riya̱i n ta̱ 'yowisa̱n. A mantsa ma na n da̱nuyi a̱tsuma̱ e irumbu, A̱sulazuva oto o'wo ekan a̱ va̱.
MIC 7:9 N yuwaan ta̱ A̱sulazuva unusu, n ta kaɓa asuvu a̱tsuma̱ o upan wa̱ yi. Hali she nu u ge'eto iwuya i na a yuwaan numu a̱vu u zuwa mu mo o'wo fa̱a̱n. U ta̱ ta̱wa̱to mu uba̱ta̱ e ekan, waru n ta̱ ene a̱ɓula̱ a̱ yi.
MIC 7:10 A mantsa'a n'yuwatan n va̱ n te ene, waru wono u ta̱ kpoto le ele na a damma numu, <<A̱ te ɗa A̱sulazuva A̱sula̱ a̱ wu?>> Esu a̱ va̱ e te ene uriyu u le, gogo a ta dadasa le tso yilyo'o a̱ re.
MIC 7:11 Urana u na a suwisa kari ɗu ta̱ lo a̱ ta̱wa̱, o urana u ndolo a̱ ta̱ da̱shi washin wu utyo wi iɗa i ɗu.
MIC 7:12 O urana u ndolo ama a̱ ɗu a̱ ta̱ ka̱mba̱ uba̱ta̱ u ɗu, diga Asuriya oɓolo ni ilyuci ya Masar, hali diga Masar a̱ tyo Yufiriti, na̱ diga a mala a̱ tyo a mala, na̱ diga a masasan a̱ tyo a masasan.
MIC 7:13 Uvaɗi gba u to o'wo okongo, adama a ama a na a̱ ri pe nden, adama e iwuya ya ama a na a̱ ri pe.
MIC 7:14 Vu guɓa ama a̱ wu na aaɗanga aguɓa a̱ wu, oɓolo e ikyon ya̱ wu ya agadu, za na a yuwusan nden ma aciyele a̱tsumona, a̱tsuma̱ o uba̱ta̱ wa alyuna u sa'ani. Lyawa a yuwan aguɓa a̱tsuma̱ Bashan na̱ Giliyadu, cine a yuwain ɗe nu ujimu.
MIC 7:15 Reve A̱sulazuva a damma, <<Tsu rana na yu uta̱i a̱tsuma̱ e iɗa ya Masar, n ta̱ roco le ili ya asalama a̱ va̱.>>
MIC 7:16 Nɗa n ta̱ e ene reve o sowo wono o una̱ wu ucira u le suru. A̱ ta̱ ɓa̱ru na̱ le ne ekere waru atsuvu e le a ta ula.
MIC 7:17 E te peɗe ma̱buta̱ tsi iyo, tsi inama i na yo ronoso a̱a̱tsuma̱ e iɗa. A̱ ta̱ o uta̱ na̱ meje'en diga a pa'atan n le, a ta vadala na̱ wovon uba̱ta̱ wa̱ A̱sulazuva A̱sula̱ a̱ tsu. waru a uwwa wovon wa̱ wu.>>
MIC 7:18 Zane ɗa A̱sula̱ tsa̱ wu, na tsu yuwan gafura vu unusu na̱ matawa mo unusu va akapi a ama agadu a̱ yi? Vu tsu guza̱ upan wa̱ wu hali hali shi, adama a na vu ta uwwusa uyo'o vu roco icigi i na i tsu vadala shi.
MIC 7:19 Vu ta da̱shi ene iliyali i tsu, vu ta dadasa nusu tsu za̱la̱ va apata ana a̱ wu. Vu ta vari nusu tsu suru a̱tsuma̱ a mala ma̱ a̱ru'un.
MIC 7:20 Vu to roco Yakubu amayun a̱ wu, Ibrahim waru icigi i na i tsu vadala shi. Cine vu kucinayi nkaya ntsu ɗe nu ujimu.
NAH 1:1 Adanshi e ikaka ya̱ A̱sula̱ a̱ tyo Niniva. Aatagada a alavu alavu a na Nahum vuma va Elikoshi enei.
NAH 1:2 A̱sulazuva A̱sula̱ a̱ tsushu'un a ɗa, waru za va atsupu a ɗa. A̱sulazuva za va atsupu a ɗa, waru za vu upan wu usuɗuwu. U tsu tsupa ta̱ e ekere a n'yuwatan ma̱ yi. A̱ ta̱wusa̱a̱ n'yuwatan ma̱ yi nu upan.
NAH 1:3 A̱sulazuva a tsu yuwan upan go'o shi, waru za vu ucira u ɗa lon, u tsu lyawa za vu unusu ka̱ra̱ fa̱a̱n shi. Ure wa̱ yi u ta̱ pe a̱tsuma̱ a̱ lipa̱ na̱ wunla̱, eleshe waru ma̱buta̱ ma apata ana a̱ yi.
NAH 1:4 U tsu ɓara ta̱ mala hali u 'yewe, waru u tsu 'yeweto ta̱ ɗolu suru. Bashan na̱ Kame a̱ tsu 'yewe ta̱, yipa̱lu ya Lebanon fo a tsu kpanla ta̱.
NAH 1:5 Nsasan n tsu jinga̱ɗa̱ ta̱ elime a̱ yi, agaɗi waru e jeruwe. Uvaɗi u jinga̱ɗa̱ ta̱ elime a̱ yi na aza a na a̱ ri pe a̱tsuma̱ a̱ yi.
NAH 1:6 Zane ɗa aa gura isawan a̱ ma̱ka̱ka̱n ma̱ yi nu u yuwan upan? Zane ɗa aa gura isawaan usuɗuwu wu upan wa̱ yi? Upan wa̱ yi u to ocusho tsa a akina, atali a̱ ta̱ ɓosuso a̱ ma̱ka̱ka̱n ma̱ yi.
NAH 1:7 A̱sulazuva za vi isa'ani i ɗa, uba̱ta̱ wu upa'atan wu ucira a mantsa ma addama. Waru u ta aɗa aza a na a zuwai ucira u le ya̱'a̱ yi.
NAH 1:8 Agba na̱ mini ma gbain ma ɗa A̱sulazuva o kototo Niniva, u ta̱ lo n'yuwatan ma̱ yi a̱ tyo e irumbu.
NAH 1:9 Ili i na o foɓoi aci A̱sulazuva biti u ta rawa utyo. Addama a̱ da̱shi ta̱wa̱ wa̱ ire shi.
NAH 1:10 O to o'wo tsi ili i na awanda a̱ guza̱i reve o'wo gashi aza a na ma̱ra̱ ma̱ tsura̱to yi, a̱ ta̱ kuloto le tsa anlya o u'yewu.
NAH 1:11 A̱tsuma̱ Niniva a ɗa vuma ro uta̱i, za na foɓoyi A̱sulazuva iwuya, reve u ca a̱sa̱la̱ e pere.
NAH 1:12 Apa ili i na A̱sulazuva a dammai, <<Ko na wo o'woi a̱ ta̱ na aza a na o ɓoloi aci na̱ a̱bunda̱, o to koɗo ɗu reve a̱ tsun ɗu a̱ nge'en. A̱ɗu aza a Yahuda ko na wo o'woi n ca ɗu ta̱ a̱tsuma̱lima̱, ma̱a̱ da̱shi yuwan ne shi.
NAH 1:13 Gogo n ta kuɗa a̱a̱gba̱la̱ e inan yi iluma i na u zuwaa nɗu a̱ yinlu, reve n kakasa akani a na a̱ nla̱ ɗu na̱ yi.>>
NAH 1:14 A̱sulazuva a yuwan ta̱ adanshi a aci a̱ wu Nineva a na, <<Vu buwa a̱ tsura̱ muwun mu ugundo n na e ɗe na aala a̱ wu shi. Waru n ta̱ kototo musula̱ n na i she'ein na̱ a̱ma̱li a na a̱ zuɗa̱i, aza musa'a n ɗu. N ta̱ foɓoo ɗu aason, adama a na i ri nu urana shi.>>
NAH 1:15 Ka̱lyuwa̱! Zuva vu nsasan m gbagbain ana aza a na a̱ ta̱wusa̱a̱ na alabari asa'ani, za na a cuɗuwusa asuvu nden! A̱vu Yahuda vu yuwan a̱buki a̱ wu, vu shiton akucunu a̱ wu. Adama a na n'yuwatan n buwa a̱ ka̱nda̱ruwa̱ wu shi o to kototo le suru suru.
NAH 2:1 Za vu ulungusu ta̱wa̱ ta̱ aci a̱ wu Niniva, vu geshe ba̱ta̱ vu upa'atan vi idana re vi isawan nu ucira, vu ɓoloto a̱za̱ e ipiri ya̱ wu suru!
NAH 2:2 Ko na̱ shi a damma a̱za̱ o ulungusu wu utsuru a̱ shi a̱ ta̱ a̱ lungusa̱ utsuru wi iɗa i le, ko shi gba a damma a̱ lungusa̱ ta̱ eten a ataci a ina̱bi i le, A̱sulazuva gba ta̱ ka̱mbuwa̱a̱ Isra'ila na̱ tsugbain tsa a̱ yi suru.
NAH 2:3 A̱ra̱ga̱ ali o uvon a Niniva a̱za̱ a̱ shili a ɗa, a̱soja a̱ yi a̱ ta̱ wotowu na̱ a̱tugu a̱ shili a̱ ma̱ɗiya̱. Irumu yi ikeke yi ido i le i da̱na̱ ta̱ e ikanasa urana u na o foɓo n le a fabusa ibata nu ucasu u wovon.
NAH 2:4 Ikeke yi ido'o a̱ da̱na̱ ta̱ e ilaɗi ujaru a̱tsuma̱ e re, reve a sumusa na̱ a̱ 'ya̱wi na̱ a̱ ka̱mbi a̱tsuma̱ agalaci a̱ lyuci'i. a̱ ta̱ tsi fitila, a̱ ka̱ra̱sa̱ tsi imaɗatsu.
NAH 2:5 Reve mogono ma Niniva mo ɓoloto ali o uvon a̱ yi, a̱vu a̱ ka̱ra̱ a̱ ta̱ɗa̱tsa̱sa̱ a̱ 'ya̱wa̱, a̱ jika̱ a̱ tyo o ukari u lyuci, a̱ shuwa̱ ili i na a yuwaan aciyele mapari.
NAH 2:6 A̱ kpa̱tu'wa̱ ta̱ agula o ɗolu, reve ukobu u mogono wo oco.
NAH 2:7 Adanshi ma̱ 'ya̱wa̱a̱ ma tsugbashi me e iɗa ya Niniva ma̱ ta̱ lo. Agbashi e esheli a̱ ta̱ da̱na̱ e mesun tsa muɗa no o korosoyi ekere aci.
NAH 2:8 Niniva ta̱ tsa aagula a na o ɓosoi, Waru a ta yisali a dansa, <<Isawain! Isawain!>> Agba babu za na vadalai.
NAH 2:9 I pura̱ azurufa! I pura̱ zinariya! Utsuru wa̱ yi u ri na̱ utyo shi, na̱ cu'un vu utsuru va̱ yi biti diga uba̱ta̱ wi izuwa ya̱ yi!
NAH 2:10 Niniva la̱nga̱ ta̱, waru u kuwa̱ ta̱, reve wo o'wo okongo! Okolo ama a̱ yi a kuɗa ta̱, a̱lu e le a̱ ka̱ra̱ ta̱ e meje'en, waru rewesu le rakpatsa ta̱.
NAH 2:11 Nye ɗa i shi i cinai lyuci ndolo Niniva za na shi vadama a̱ba̱nu e ikamu? A̱ba̱nu a na a tsu lyuwato muwun mi ikamu, uba̱ta̱ u na kamu na̱ ka vu kamu tsu yuwusan alyuna, oɓolo na̱ muwun mi ikamu babu wovon?
NAH 2:12 Kamu kakara ta̱ ili na̱ a̱bunda̱ adama a̱ muwun ma̱ yi, waru wu una ta̱ fo ka vu kamu va̱ yi nama. A̱vu u shiton a̱ba̱nu a̱ yi ni ili i na wu unai, a̱ba̱nu a̱ yi fo ni inama'a.
NAH 2:13 Reve A̱sulazuva oɓolo a̱ a̱soja a zuva damma, <<A̱yi ɗa nda, n ta̱ riya̱a̱ Niniva! A̱vu n kuloto ikeke yi ido ya̱ yi na akina. Matsun me pe'eni ma ta lyuwa a̱ a̱soja a̱ yi. Aza a na a̱ ri tsi ikamu yu ucira. N ta putsa yi na woo kototo nɗa mu uvaɗi, reve n putsaa nlingata ma̱ yi na 'ya̱wa̱a̱ ni ikaka i wovon.>>
NAH 3:1 Woo yo'ono wu shi! A̱vu lyuci na ocosu mpasa, zana ri tapu ne epen za na ri tapu ni itana i na a̱ pura̱i, u lamba itana i na a usai shi!
NAH 3:2 Uwwa! Mesun ma asuɗu na̱ mesun ma̱ a̱ga̱nda̱mu e ikeke, na̱ mesun me ilaɗi yi ido kirib kirib na̱ cine ikeke'e a̱ jinga̱ɗa̱sa̱ iɗa!
NAH 3:3 Ka̱lyuwa̱! Aza a na a kumbusa ido a̱ ta̱ a̱tsuma̱ o uvon, mutsun m pe'eni n ta a madala ɓolo ni ibata, waru apa a̱bunda̱ ama a na o unai. Apa oɓolo a̱kwa̱kwa̱, a na a̱ ri n kece shi, ama a̱ ka̱ra̱ ta̱ a̱ ta̱ɗa̱tsa̱sa̱ zuva va̱ a̱kwa̱kwa̱.
NAH 3:4 Ili i nda i fara ta̱ suru adama a̱bunda̱ a tsushakala a Niniva, aashakala o una̱ wu uyo'o u ndolo, mma va̱ a̱za̱ nkunu, za na pusa̱yin nɗa a̱tsuma̱ o ure u tsu shakala tsa̱ a̱ yi, ne elentsu a̱tsuma̱ o ure u tsuboci tsa̱ a̱ yi.
NAH 3:5 A̱sulazuva o oɓolo a̱ a̱soja a damma ta̱, <<A̱yi ɗa nda, n ri tsushu'un na̱ Niniva, n ta̱ 'ya̱sa̱n ma̱kuru ma̱ wu n roco nɗa ataɓu a̱ wu, reve vo o'wo ili i wono e ekere o tsugono tsu uvaɗi suru.
NAH 3:6 N ta kusha'wa wu ili yi idaba, a̱vu n ca wu wono mo o'woto wu ili i na o goro.
NAH 3:7 Aza a na a̱ ka̱lyuwa̱ nuwu suru o to rono na̱ a̱ca̱pa̱ a damma, <Ili ya asalama! Niniva wo o'wo ta̱ okongo, zane ɗa a̱ shon adama a̱ yi? A te ɗa ma̱a̱ tsura̱a̱ wu aza a na a ca wu adanshi?> >>
NAH 3:8 Niniva, vu la'a ta̱ lyuci va̱ Tebe, zana ri o una̱ wu Uɗolu wa̱ Nilu ɗa? A̱yi fo mini ma ɗa ma̱ ka̱nda̱ruwa̱ niyi, mala ma ɗa uba̱ta̱ wu upa'atan wa̱ a̱ yi, mini ma ɗa ukari wa̱ yi.
NAH 3:9 Kush na̱ Masar ɗa ucira wa̱ yi, waru ucira wa̱ yi u ri nu utyo shi. Put na̱ Libiya e le ɗa aza a na o ɓoloso una̱ na̱ yi.
NAH 3:10 Nu ucira wa̱ yi suru a̱ pura̱i ta̱ a̱ 'ya̱wa̱ e iɗa i tsugbashi, a̱ ka̱ra̱ ta̱ na̱ yi a̱ tyo e iɗa i ro. O ɓuɓosuso ta̱ aci a̱ nreɓu ma̱ yi, oboguzu e re suru. E ne'eshen ta̱ mbara ma̱ yi a̱tsuma̱ o ure u matawa ma agita, a̱ nla̱ ta̱ azagbain a̱ yi na akani suru.
NAH 3:11 Niniva vu to o'wo usowu tim, waru vu to sowo a̱tsuma̱lima̱ lon. Vu ta zami uba̱ta̱ wu upa'atan, diga e ekere a n'yuwatan ma̱ wu.
NAH 3:12 Ba̱ta̱ vu ɓaɓu va̱ wu ri nu ucira shi, a ta lyuwa le tsu umatsun wu ubiri na e inai. A mantsa ma na a̱ jinga̱ɗa̱i ɗanga'a, a̱vu muwu'un a̱ riya̱ o una̱ wu za va alya.
NAH 3:13 Ka̱lyuwa̱ a̱soja o uvon a̱ wu, a̱ ta̱ tsa̱ a̱ma̱ci. Na̱ntsu lyuci va̱ wu ukpa̱tu'u ɗa a̱ ri e ekere a n'yuwatan ma̱ wu. Akina a lyuwa ta̱ ɗanga vu ukatsusu vu na̱ntsu va̱ wu.
NAH 3:14 Rono mini adama a na a̱ ta̱ ka̱nda̱ruwa̱ wu, vu tsura̱ mini ma̱ a̱bunda̱ kafu uvo'on u teme. Vu da̱shi ugbamu wu uɓaɓu wa̱ wu! Vu ka̱ra̱ a̱ 'ya̱wa̱ o uɓaa vu dadasa ci'in, reve vu tara ili i ma̱zuɗa̱ me ikunku!
NAH 3:15 Ni ifoɓi i nda suru, akina a ta lyuwa wu, matsun mepe'eni ma̱ ta̱ kototo wu, waru u ta tama wu tsa apapari. Vu da̱shi ta̱ a̱bunda̱ tsa apapari, reve vu da̱shi a̱bunda̱ tso oɓolo akyun!
NAH 3:16 Vu da̱shi ta̱ a̱bunda̱ aza atsulu na wina a̱ wu hali a la'a oɓolo a̱ yitele'o ya zuva. A̱ ta̱ tsa akyun a na a tsu yuwan ulungusu reve a̱ kpa̱tu'wa̱ evelu e le a 'yawan.
NAH 3:17 Aza e ipiri ya̱ wu a̱ ta̱ a̱bunda̱ va damma akyun a na a̱ ri a̱ ma̱ka̱ra̱ azagbain a̱ wu a̱ ta̱ tso o oɓolo apapari, nden zuva va alya a mantsa mo uta̱nu. Mantsa ma na urana u suɗuwai, a̱vu a 'yawan, waru babu za na tsu reve uba̱ta̱ u na a̱ tyo yi.
NAH 3:18 <<A̱vu mogono ma Asuriya aza a na e idanasa ama a̱ wu a̱ ta̱ nlavu, mbara ma̱ wu fo n ta nlavu. Akapi a ama a̱ wu a̱ ta̱ ubetu'wu tsi ikyon zuva vu nsasan, a̱ ri na̱ za va aguɓa a na oɓoloto le shi.
NAH 3:19 Babu ili i na ya inato wuntsu a̱ wu, adama a na wuntsu wa̱ wu za a na a̱ tsu ta̱wa̱ nu ukwisa̱ u ɗa. Zana uwwai adama a ɗa wu u ta ɓasa ekere a̱ yi u damma, <Ulobono ta̱!> Adama a na za lo na kuɗa̱i o sowo a̱tsuma̱lima̱ diga e ekere a̱ wu shi?>>
HAB 1:1 Apa ikaka i na Haba̱ku vumava̱sula̱ e enei a̱tsuma̱ alavu alavu.
HAB 1:2 A̱sulazuva, hali mantsa ma̱ ne ma ɗa, mee showen wu adama e ikambishi, agba vaa zuwaa mu atsuvu shi? N yuwusan ta̱ mesun kuci adama o u'ya̱susa̱n wu ugbozu, agba vu wawa shi?
HAB 1:3 Nye i zuwai vu lyawa numu eneshe ulambu wa̱ a̱ɓula̱? Nye i zuwai vu ri a̱ a̱ka̱nla̱ e iwuya? Ukototosu nu u'ya̱susa̱n wu ugbozu n ta̱ elime a̱ va̱. Mawasan na̱ nronuloi n 'yon ta̱.
HAB 1:4 Adama o ndolo wila̱ u ri nu ucira shi, waru amayun a buwa o ulinga shi. A̱za̱ e iwuya a̱ ka̱nda̱ruwa̱ ta̱ a̱za̱ a̱ a̱ɓula̱, adama a vadala amayun.
HAB 1:5 Reve A̱sulazuva a damma,<<Ka̱lyuwa̱ nɗa vee e ene, vu ta yuwan asalama lon, adama a na n ta yuwan ili i ro a rana wuma wa̱ wu, zana ko na̱ shi a damma wu va̱a̱ usu shi.
HAB 1:6 N ta̱ 'ya̱susa̱n aza a Babila, iɗa yu usuɗuwu nu ujaru fo, aza a na a̱ ri a mmalu uba̱ta̱ suru a̱tsuma̱ o uvaɗi a ususa ba̱ta̱ vu nden n na ri a̱za̱ e le shi.
HAB 1:7 Ele ili i wovon i ɗa ni ili yi ilaɗi, a ta yuwusaan aciyele uge'etosu cine a cigai.
HAB 1:8 Ido i le i la'a ta̱ ta̱su ilaɗi, asuvu usuɗuwu u le u la'a ta̱ nkerenkesu n na n ri na ambulu, akumbi e ido e le a̱ tsu ta̱wa̱ ta̱ na afalu. Akumbi e ido e le a̱ tsu ta̱wa̱ ta̱ diga uba̱ta̱ wa alanga, a̱ tsu zura̱ ta̱ tsa̱ a̱a̱kuru a na a cigai a̱ ka̱ɗa̱.
HAB 1:9 Suru nle a̱ tsu ta̱wa̱ ta̱ adama o u'ya̱susa̱n wu ugbozu. A ta uwwusa wovon u le babu na a rawai. O tsu ɓoloto ta̱ agbashi cine vu revei wuyun.
HAB 1:10 A tsu lamaa ta̱ ngono, reve o zo'oso azagbain. O tsu zo'oso ta̱ fo ilyuci i na i ri nu ukari wu ucira suru, a tsu ɓoloto ta̱ ma̱bula̱ reve a kumba a lyuwa yi.
HAB 1:11 A̱ tsu ka̱ra̱ ta̱ tsu upepu, a lyuwa elime, ozo o unusu a ɗa, aza a na ma̱sula̱ ma̱ le a̱yi ɗa ucira u le.>>
HAB 1:12 A̱sulazuva, a̱vu ɗaɗa vu ri hali hali! A̱sula̱ a̱ va̱, za va akiza, tsa̱ kuwa̱ shi. A̱sulazuva, a̱vu ɗa vu zuwa nle e ge'etosu. A̱vu Aatali, a̱vu ɗa vu zuwa nle a ca tsu a̱tsuma̱lima̱.
HAB 1:13 Esu a̱ wu a̱ ta̱ na akiza lon vaa gura ka̱lyuwa̱ iwuya shi, vu tsu ciga vu ka̱lyuwa̱ unusu shi. Cine tsa ɗa va̱a̱ ka̱lyuwusa̱ aza a na aa yuwusan iwuya? Cine tsa ɗa vu rungwa̱i a̱za̱ e iwuya kpaku o soɗusu aza a na a la'a nle a̱ɓula̱?
HAB 1:14 Vu yuwan ta̱ ama tsa mugula a̱tsuma̱ a mala, tsi ili i wuma i mala i na i ri na̱ zagbain shi.
HAB 1:15 N'yuwatan n tsu reme le ta̱ na̱ gon, reve o uta̱a̱ le alanga ni igolo, o tsu ɓoloto le ta̱ a̱ agaso e le, a̱vu a yuwan mere na̱ ma̱za̱nga̱.
HAB 1:16 Adama o ndolo a tsu yuwaan ta̱ igolo i le kucci, reve a yuwaan agaso e le a̱tsuka̱ a̱ ma̱guru. Adama a na e le ɗa a̱ ta̱wa̱a̱ nle nu utsuru ni ilyalya ya̱ a̱bunda̱.
HAB 1:17 A ta lyuwa elime a̱ za̱la̱sa̱ igolo i le? O kototosu nɗa babu ene iliyali hali hali?
HAB 2:1 N ta kumba atsura a̱ va̱ mi isawan tsa za vi ipiri, n puro mu uwwa ili i na waa damma mu, nu usuwu u na wa ca adama e mesun ma̱ va̱.
HAB 2:2 Reve A̱sulazuva a damma mu, <<Vu ɗana alavu alavu'u vu ɗana yi a alanga e eteshe aɓaci a atali, tsa̱ra̱ za vu ɗesununa̱ u ɗe yi babu usa̱n.
HAB 2:3 Adama a na alavu alavu'u u ta pura mantsa ma na a zuwai, u ta yuwusan adanshi o ukosu waru wo o'wo epen shi. vu puro yi, ko nu jima, na amayun u ta̱ ta̱wa̱, waa tara mantsa shi.
HAB 2:4 Uwwai, za na okolo a̱ yi a̱ ri mejege shi u ta̱ riya̱, amma za va̱ a̱ɓula̱ ta yuwan wuma, adama o ucawu wo okolo a̱yi.>>
HAB 2:5 Na̱ ne suru, masayan ma̱ ina̱bi ma̱ tsu pusa̱n ta̱ za vu uvaɗu ugbozu, adama o ndolo u tsu da̱nu o u'wa shi. Utsa̱n wa̱ yi u ta̱ a̱bunda̱ tso ason, waru u ta̱ tsu ukwa̱, u tsu cuwa̱n shi. U tsu ɓolotowo ta̱ aciya̱yi nɗa suru, a̱vu u pura̱a̱ aciya̱yi ama suru.
HAB 2:6 Ama'a suru a ta yuwan tsushu'un na̱ a̱yi, o zo'osuso yi a yuwusan yi ulamu a dansa, <<A̱tsuma̱lima̱ a ta cina za na o ɓolotosoo aciya̱yi itana i wivu! Hali a̱ tyo a mantsa ma̱ ne voo ɓolotowo aciya̱wu utsuru a̱tsuma̱ o ure wu ule'e?>>
HAB 2:7 Babu usa̱n, aza a na o tono wu utan a ta zuwa wu elime, a̱ ta̱ ta̱wa̱ a zuwa wu meje'en ma̱ lipu. Vu to o'wo le itana i na a̱ pura̱i uba̱ta̱ o uvon.
HAB 2:8 Ana wo o'woi vu usa ta̱ nɗa na̱ a̱bunda̱, akapi a ama a nɗa nna n buwai a ta usa a̱za̱ a̱ wu. Adama a na vo oco ta̱ mpasa ma ama, vu lungusa̱ nɗa ni ilyuci, na ama a na a̱ ri a̱tsuma̱ e le suru.
HAB 2:9 <<A̱tsuma̱lima̱ a ta cina za na a lyuwusa melen ma̱ yi shi adama o u'wa wa̱ yi! A̱vu na vu suwai u'wa zuva va aagaɗi adama vu la'a a addama!
HAB 2:10 Vu ronoo ta̱ u'wa wa̱ wu wono. Adama a na vu una ta̱ ama na̱ a̱bunda̱, vu kototo ta̱ aciya̱wu.
HAB 2:11 Atali o ukari a̱ ta̱ shon, atsura akpata a̱ ta̱ usu.
HAB 2:12 A̱tsuma̱lima̱ a ta cina, za na suwai lyuci na̱ mpasa, za na suwai lyuci gbain ni iwuya!
HAB 2:13 Ashe A̱sulazuva o oɓolo a̱ a̱soja a zuva ɗa zuwai ama o uvaɗi a yuwan a̱tsuma̱lima̱ reve akina o soɗu le shi? Waru a yuwan ulinga we pere shi?
HAB 2:14 Adama a na uvaɗi u ta̱ da̱na̱ tapu nu urevu u tsugbain tsa̱ A̱sulazuva, cine vu revei mini mo tsu shiton mala.
HAB 2:15 A̱tsuma̱lima̱ a ta cina za na tsura̱to yi nron mu nden ma̱ yi, a̱ zuɗa̱sa̱ yi diga a̱ tsa̱n vu ukwan hali she no o'wo usowu, tsa̱ra̱ we ene e le aataɓu!
HAB 2:16 Wono u ta̱ kpa̱to wu o una̱ u tsugbain. Gogo mantsa ma̱ wu ma ɗa! Vu to sowo vo o'wo ataɓu! Mokkoto ma na ma̱ ri o ukere u sa'ani wa̱ A̱sulazuva ma̱ ta̱ riya̱ wu, ili i wono i kpa̱to tsugbain tsa̱ wu.
HAB 2:17 Ulungusu u na vu yuwain a aci a Lebanon u ta̱ ka̱mba̱ a aci ya̱ wu, mona me inama ya̱ yi i na vu yuwain u ta ca wu wovon. Adama a na vo oco ta̱ mpasa ma ama, a̱vu vu lungusa̱ nɗa ni ilyuci, na ama a na a̱ ri suru a̱tsuma̱ e le na̱ nden.
HAB 2:18 Ucira u ne u ɗa a̱a̱ma̱li a̱ ri na̱ a̱yi ana wo o'woi vuma ɗa she'en niyi? Uruma u ɗa u na woo ritosu epen. Adama a na vuma na yuwan niyi u ta zuwusa ucira e ili i na u yuwain, u yuwan ta̱ a̱ma̱li a na a tsu yuwan adanshi shi.
HAB 2:19 A̱tsuma̱lima̱ a ta cina za na dammai akpata, <Ka̱mba̱ wuma> Ko aatali a na a̱ ri ukwa̱, <'Yon!> U ta gura yuwan uritosu? Agba a̱yi ɗa nda a pala yi ta̱ na̱ zinariya oɓolo na̱ azurufa, agba u ri wuma shi.
HAB 2:20 Amma A̱sulazuva a̱ ta̱ pe a̱tsuma̱ a̱ A̱a̱'isa̱ a Akiza a̱ yi, lyawa uvaɗi ma̱ɓula̱ u rungwa̱ kpen a̱ ma̱ka̱ka̱n ma̱ yi.>>
HAB 3:1 Avasa a Haba̱ku vumava̱sula̱, aci a Shigiyonotu.
HAB 3:2 A̱sulazuva, mu uwwa ta̱ aɗa o ulinga wa̱ wu, reve wovon u guza̱ mu. Vu yuwisan a̱ba̱jini a linga va̱ wu a mantsa ma̱ tsu, vu lyawa e reve le. A̱tsuma̱ o upan wa̱ wu vee ene iliyali i tsu.
HAB 3:3 A̱sula̱ a̱ ta̱wa̱ ta̱ diga Teman, Za va Akiza ta̱ ta̱wa̱ diga a Masasan ma Faran. Zuva va zuva ta shiwan na̱ tsugbain tsa̱ yi, uvaɗi ma̱ɓula̱ u ta shiwan ni ica ya̱ yi.
HAB 3:4 Imaɗatsu ya̱ yi i ta̱ tse ekan yu urana, eka'an u ta̱ e ikanasa diga o ukere wa̱ yi, uba̱ta̱ u na ucira wa̱ yi u ri usokowu.
HAB 3:5 U lyungu ta̱ mɓa̱la̱ elime a̱ yi, waru u zuwa ta̱ ukwa̱ wu usuɗuwu u kuru a̱ca̱pa̱ a̱ yi.
HAB 3:6 Wi isawan ta̱, reve u jinga̱ɗa̱ uvaɗi. A̱vu u ka̱lyuwa̱, reve u zuwa nɗa n je'en. Akuci a nsasan a̱ ra̱mo ta̱, a̱vu akuci a agaɗi o oco. Re va̱ yi a̱ ta̱ lo hali hali.
HAB 3:7 Me ene ta̱ ogodo a̱ Kushan a̱tsuma̱lima̱, ama e iɗa ya Midiya e meje'en ma̱ lipu.
HAB 3:8 A̱sulazuva, vu yuwan ta̱ upan na̱ ɗolu? A̱tsumola̱ngu a̱ wu a̱ ta̱ aci o ɗolu? Upan wu usuɗuwu wa̱ wu u ta aci a mala? A mantsa ma na vu kumbai ido ya̱ wu, ni ikeke yi ido yu ulyuwu wa aci ya̱ wu?
HAB 3:9 Vu uta̱ ta̱ utan wa̱ wu alanga e eteshe, vu zuwa ta̱ aya a̱ wu a'yin. Wivuwun A̱vu vu ne'eshen uvaɗi na̱ mini.
HAB 3:10 Nsasan me ene wu ta̱, a̱vu o oɓoro. A jara ta̱ mini ma̱ a̱bunda̱, hali mala ma̱ a̱ru'un ma̱gugwa̱, hali ikeɗu i mala'a i 'yon zuva.
HAB 3:11 A̱vu urana na̱ woto e isawan kpen uba̱ta̱ u na a̱ ri na̱ nde, adama e ekan ya aya a̱ wu na a̱ ka̱ra̱i, oɓolo ne ekan e ibata ya̱ wu.
HAB 3:12 A̱tsuma̱ asuvu usuɗuwu a̱ wu a ɗa vu dasai uvaɗi, a̱tsuma̱ o upan u ɗa vu dasai nɗa.
HAB 3:13 Vu uta̱ ta̱ tsa̱ra̱ vu wawa ama a̱ wu, adama vu wawa aza a na vu tawai. Vu kototo ta̱ za vi iwuya, reve vu voton yi ataɓu.
HAB 3:14 Vu sapa yi ta̱ aaci ni ibata ya̱ yi, ana a̱soja a̱yi na a gurai uvon a̱ ta̱wa̱i tsa̱ lipa̱ tsa̱ra̱ e bete'we tsu, ma̱za̱nga̱ ma̱ le a̱ yi ɗa o soɗu alambi a na a̱ ri usokowu.
HAB 3:15 Vu dasa ta̱ mala ni ido ya̱ wu, vu ta̱ lukuta̱sa̱ mini mo ucira.
HAB 3:16 Na mu uwwai ne, a̱vu okolo a̱ va̱ a̱ riya̱, a̱vu una̱ u va̱ u je'en adama e ilama, etele a̱ va̱ a̱ kuwa̱ ta̱, a̱mu a mmalu ana a̱ va̱ e meje'en. Suru na̱ ne n ta kaɓa asuvu, n puro urana wa̱ a̱tsuma̱lima̱ u ta̱wa̱ a aci e iɗa i na ya̱a̱ ta̱wusa̱a̱ tsu nu uvon.
HAB 3:17 Ko na̱ shi uɗanga wu ubiri u ɓoso yipa̱lu shi, ko na̱ shi a̱ tsura̱ muwun n ina̱bi a ataci shi, ko na̱ shi ɗanga zetun matsan shi, ko iɗa i kuɗa̱ a̱ ta̱wa̱a̱ ni ilyalya, ko na̱ shi babu ikyon o uva̱la̱ta̱ ko na̱ shi babu inan uba̱ta̱ u na a̱a̱ gutsusu le,
HAB 3:18 suru na̱ ne n ta yuwan ma̱za̱nga̱ a̱ ma̱ka̱ka̱n ma̱ A̱sulazuva. N ta yuwan mere e ekere a̱ A̱sula̱ za vi iwawi i va̱.
HAB 3:19 A̱sulazuva zagbain ɗa ucira u va̱, u zuwa ta̱ ana a̱ va̱ e reme iɗa tsa mere'on, n yuwan mmalu zuva va atali. Udammu a̱ tyo a̱ ma̱dobiya. Za vi itana i tsuwe'e i na i ri na a'yin.
ZEP 1:1 A mantsa ma na Josiya ulobo wa Amon da̱na̱i o tsugono tsa Yahuda, vumava̱sula̱ Zafaniya ulobo wa Kush, ulobo wa Gedaliya, mawun ma tsukaya ma Amariya wu u'wa wa Hezekiya, damma ta̱ ili i na A̱sulazuva a damma niyi.
ZEP 1:2 Reve A̱sulazuva a damma, <<N ta̱ kototo ili biti a̱tsuma̱ o uvaɗi.>>
ZEP 1:3 <<N ta̱ kototo vaɗilima̱ ni inama yu uvaɗi suru, n ta̱ kototo nnunu na̱ mugula m mala, n ta̱ kototo a̱za̱ e iwuya, a̱vu n tawa vaɗilima̱ diga o uvaɗi.>>
ZEP 1:4 <<N ta̱ ba̱ruwa̱ ukere u va̱ n yuwan nla̱ngi na̱ Yahuda na aza a na a̱ ri nden a̱tsuma̱ a̱ Urishelima suru. Waru n to kototo akapi ama a na a yuwusaan Ba'al a̱ga̱nda̱ na ala a nan ganu a na a yuwusan yi ulinga.
ZEP 1:5 N ta̱ kototo aza a na a tsu kumba ukwa̱'a̱ a yuwaan urana na̱ woto na̱ italyo'o a̱ga̱nda̱. N ta̱ kototo aza a na a̱ ka̱ɗa̱tosu a kucinasa na̱ A̱sulazuva, waru a yuwusan akucunu na̱ ma̱sula̱ Mole.
ZEP 1:6 N ta̱ kototo aza a na a vadalai ucina a lyawai itoni ya̱ A̱sulazuva, na aza a na a zamiyi A̱sulazuva ko a pati niyi ikambishi shi.>>
ZEP 1:7 Vu rungwa̱ kpen a̱ ma̱ka̱nka̱ ma̱ A̱sulazuva! Adama a na urana wa̱ yi u yuwan ta̱ zuzu. A̱sulazuva o foɓo ta̱ na wa ca a ama a̱ yi kucci, waru u ɗangula ta̱ aza a yuwan ili i na u foɓoi.
ZEP 1:8 <<Urana u na a̱mu A̱sulazuva maa ca ama a̱ va̱ kucci, n ta̱ ge'eto azagbain o mogono na̱ muwun n mogono, na aza a na oo otosu a̱tugu a̱ga̱nda̱ a̱ musula̱ mi iɗa i ro.
ZEP 1:9 O urana u ndolo n ta̱ ge'eto za na suru a yuwusan a̱ga̱nda̱ tsa za na revei A̱sula̱ shi, na aza a na o shitoyin u'wa wu zagbain le ni ili ya usa na̱ yipalishi.>>
ZEP 1:10 A̱vu A̱sulazuva a damma, <<O urana u ndolo, a ta uwwa mesun diga o Una̱ntsu u Magula, yorori diga o Upasu u ire, ni ilama yu ucira i ma̱riya̱ ma agaɗi.
ZEP 1:11 Oruwoi, a̱ɗu aza a na i ri nden upasu we eden! Adama a na o kototo ta̱ suru aza a atsulu na awina, aza a na a tsulusa azurufa suru o una le ta̱.
ZEP 1:12 A mantsa mo ndolo n ta gbangaɗa Urishelima ni ifitila, a̱vu n ca a̱za̱ nden n vama oforo, aza a na aa yuwusan majiyan, <A̱sulazuva a yuwan tsu isa'ani ko iwuya shi.>
ZEP 1:13 A̱ ta̱ pura̱ utsuru u le, 'wa le waru o kototo le, a ta suwa 'wa agba a̱ da̱nu pe shi. A̱ ta̱ cu'wa̱n a̱ɗuma̱ a̱ ina̱bi agba oo sowo masayan me le shi.>>
ZEP 1:14 Urana u gbain wa̱ A̱sulazuva a yuwan ta̱ zuzu a̱ zura̱sa̱ ni ilaɗi. Uwwai! Uɗyo u mesun ma̱ A̱sulazuva ma̱ ta̱ da̱na̱ okono, o urana'a za a na gurai uvon u ta yuwan yisali lon.
ZEP 1:15 Urana u ndolo u to o'wo urana wu upan, urana u ɗa wa̱ a̱tsumola̱ngu na̱ a̱tsuma̱lima̱, urana u ɗa wa̱ a̱tsuma̱lima̱ nu ukototosu, urana u ɗa wi irumbu picim, urana u ɗa we eleshe ni irumbu da̱n.
ZEP 1:16 Urana u ɗa u mesun ma avana na̱ yorori yu uvon a aci e ilyuci i na i ri na̱ kari vu ucira na atsura o uga'an.
ZEP 1:17 <<N ta̱ ta̱wa̱a̱ ama na̱ a̱tsuma̱lima̱ hali e reme mmalu tsa̱ nrumba̱, adama a na a yuwaan ta̱ A̱sulazuva unusu. O to oco mpasa n le tsa̱ mini, inama i le waru tse everi.>>
ZEP 1:18 O urana wu upan wa̱ A̱sulazuva azurufa na̱ zinariya le aa gura wawa le shi. A̱tsuma̱ o upan wu usuɗu wa̱ yi, u to kototo uvaɗi ma̱ɓula̱. Na amayun u ta̱ kototo aza a na a̱ ri nden o uvaɗi suru.
ZEP 2:1 Ɓolotoi, ɓolotoi, a̱ɗu iɗa yu ulambu u wono,
ZEP 2:2 kafu e bete'we ɗu tso owopo, kafu upan wu usuɗuwu wa̱ A̱sulazuva u cipa̱a̱ ɗu, kafu urana wu upan wa̱ A̱sulazuva u ta̱wa̱ aci a̱ ɗu.
ZEP 2:3 I zami A̱sulazuva suru nɗu, a̱ɗu na i tarai aciya̱ɗu ili i ro shi e iɗa'a, a̱ɗu na yaa yuwusan ili i na u dammai. I zami ya̱ a̱ɓula̱, i tara aciya̱ɗu ili i ro wan. U ta gura o'wo a pa'aton ɗu o urana wu upan wa̱ A̱sulazuva.
ZEP 2:4 O to kototo Gaza Ashikelon to o'wo okongo. A̱ ta̱ gba̱ra̱ Ashido nu urana a aci, reve fo a̱ gba̱ra̱ Ekuron.
ZEP 2:5 A̱tsuma̱lima̱ a ta cina a̱ɗu, a̱ɗu na i ri e ikyun i mala, a̱ɗu aza a Keretiya, adanshi a̱ A̱sulazuva a̱ ta̱ a̱ nla̱ngi na̱ ɗu, a̱vu Ka'ana iɗa ya aza a Filistiya, <<N ta̱ kototo wu, hali na za a la'a shi.>>
ZEP 2:6 Iɗa i na i ri e ikyun i mala, uba̱ta̱ u na aza a Keretiya a̱ ri na̱ nden, u to o'wo uba̱ta̱ wa alyuna, nu uva̱la̱ta̱ wa aza a aguɓa nu uba̱ta̱ wa aguta e ikyon.
ZEP 2:7 Uba̱ta̱'a̱ u to o'wo, uba̱ta̱ wa aza a na a buwai wuma o u'wa wa Yahuda, lo ɗa a yuwan alyuna. Nu ulivu a̱vu o von a 'wa va aza a Ashikelon. Adama a na A̱sulazuva A̱sula̱ e le a̱ ta̱ da̱na̱ a ɗa e le, waru u ta̱ ka̱mbuwa̱a̱ le na aba'un e le.
ZEP 2:8 <<Mu uwwa ta̱ ulamu u na aza Mowa a yuwusan, na̱ wisulusa u na aza a Amon a yuwusan, aza a na ee isulusa ama a̱ va̱ a lapusa ma̱ka̱nka̱ a dansa, a ta lyuwa iɗa ya ama a̱ va̱.
ZEP 2:9 A̱vu A̱sulazuva o oɓolo a̱ a̱soja a zuva A̱sula̱ a Isra'ila a damma, n kucina ta̱ na̱ wuma u va̱, Mowa to o'wo tso Sodom, aza a Amon waru tsa Gomora iɗa'a u ta shiwan na awanda na̱ a̱nci a akpaɗi, iɗa i na i kuwa̱i hali hali. Ama a̱ va̱ a na a la'ai a̱ ta̱ pura̱ itana i le, wo o'wo agadu le.>>
ZEP 2:10 A̱yi nda a̱yi ɗa ili i iliyinkapa ya aciyogbamu u le, adama a na a tarai ama'a ili i ro shi, reve a yuwan tsushu'un na ama a̱ A̱sulazuva o oɓolo a̱ a̱soja a zuva.
ZEP 2:11 A̱sulazuva o to o'wo ili i wovon e ekere e le, na amayun u kototo musula̱ mu uvaɗi suru. Reve nɗa n na n ri e ikyun i mala a̱ ka̱ɗa̱to wa̱ yi, za suru diga e iɗa ya̱ yi.
ZEP 2:12 <<Hali na̱ a̱ɗu fo a̱za̱ a̱ Kush, o to o una ɗu na̱ matsun me pe'eni ma̱ va̱.>>
ZEP 2:13 A̱sulazuva a̱ ta̱ ba̱ruwa̱ ukere wa̱ yi a̱ tyo wu ugana u kototo Asuriya, u ta̱ ka̱mba̱to Niniva okongo, u'yewu tsa̱ a̱tsumona.
ZEP 2:14 Iliyamunga o to von e memere ma̱ yi, na̱ cu'un vu nama biti. Vori na̱ papagula a̱ ta̱ da̱na̱ zuva va atsura a̱ lyuci'i, yisali i le i ta̱ da̱na̱ o uta̱sa̱ a angu a asula na̱ na̱ntsu, n'yuwatan n ta palu'wa ɗanga seda vu kwa̱'a̱ va̱ yi.
ZEP 2:15 A̱yi nda a̱yi ɗa lyuci va afalu na shi nden gbaga, za na dammai aciya̱yi, <<A̱mu ɗa goon, waru za ro lo shi!>> A̱yi ɗa nda wo o'woi okongo, uba̱ta̱ wu nven wi inama yu una! Za na ka̱ra̱i lo suru, u ta cira a̱vu u gbaɗatsa aaci.
ZEP 3:1 A̱tsuma̱lima̱ a ta cina lyuci va aciyogbamu, lyuci vi idaba ni iɓongishi!
ZEP 3:2 U tsu poloo za atsuvu shi, waru u tsu usu ulapulu shi. U tsu zuwaa A̱sulazuva okolo a̱ yi shi, waru u tsu rawa zuzu na̱ A̱sula̱ shi.
ZEP 3:3 Azagbain a̱ yi a̱ ta̱ tsi ikamu i ma̱gugwa̱, a̱za̱ o uge'etosu a̱ yi a̱ ta̱ tsa̱ nkerenkesu n na n liva̱i na ambulu, aza a na a tsu buwaa ili adama a nfa'an shi.
ZEP 3:4 Ama̱sula̱ a̱ yi ama a vama a ɗa, a̱za̱ e ikpa'a, nan ganu a̱ yi a tara ili ya akiza ili i ro shi. Waru a kuɗa ta̱ wila̱.
ZEP 3:5 A̱sulazuva a na a̱ ri a̱tsuma̱ a̱ lyuci'i za va̱ a̱ɓula̱ a ɗa, u tsu yuwan unusu shi. Usana biti u tsu roco ta̱ a̱ɓula̱ a̱ yi, usana wa̱ A̱sula̱ suru u tsu ka̱la̱ma̱ shi, suru na̱ ne za vu ulambu wa̱ a̱ɓula̱ ri na̱ wono shi.
ZEP 3:6 Reve A̱sulazuva a damma, <<N kototo ta̱ ɗe nɗa mu uvaɗi, ba̱ta̱ vu pa'atan vu ucira le la̱nga̱ ta̱. Waru n lungusa̱ ta̱ re le, babu za na a̱ kurusu le. O kototo ta̱ ilyuci i le suru suru ko za la'a shi waru ko za ri pe shi.
ZEP 3:7 Shi ta̱ n tara na amayun, a ama a̱ va̱ a ta uwwa wovon u va̱, waru a̱ usu tsuɓari, agba a̱a̱ da̱shi yuwan ulambu wu ugbozu shi, diga e ili i na n rono nle atsuvu. Amma suru na̱ ne reve a lyuwa elime nu ulambu wa̱ a̱ɓula̱ e ili i na aa yuwusan suru.
ZEP 3:8 Adama o ndolo a̱mu A̱sulazuva n damma ta̱, <Puroyi urana u na ma̱ 'yon n yuwan adanshi a aci a nɗa, adama a na n zuwa ta̱ okolo a na mo ɓoloto wu nɗa, no ozo o tsugono uba̱ta̱ u ta̱, reve n tsun wa̱ le upan u va̱, upan wu usuɗu u va̱ a aci e le. Uvaɗi ma̱ɓula̱ u ta̱ koto adama o upan wu usuɗuwu u va̱.> >>
ZEP 3:9 <<Na amayun, a mantsa ma ɗaɗa ma̱a̱ ka̱mba̱to nɗa a̱a̱ da̱na̱ a dansa amayun, suru nle a̱ ta̱ ɗe Aala A̱sulazuva, waru a yuwayin a̱ga̱nda̱ no okolo a̱ ta̱.
ZEP 3:10 Diga a alanga o upasu wu uɗolu wa̱ Kush aza a na aa yuwusaan mu a̱ga̱nda̱, ama a̱ va̱ a na a̱ ri ubete'u, a̱ ta̱ ta̱wa̱a̱ mu na̱ kucci.>>
ZEP 3:11 <<O urana u ndolo yaa uwwa wono shi adama a̱ nusu na i yuwaan numu shi. Adama a na n ta̱ o uta̱a̱ aza a aciyogbamu no ozo o uvaɗu a̱tsuma̱ a̱ ɗu. Waru ya̱a̱ da̱shi yuwan aciyogbamu a Masasan ma Akiza ma̱ va̱ shi.
ZEP 3:12 Agba n ta lyawa aza a na a tarai aciyele ili i ro shi, na aza a na a̱ ka̱ɗa̱toi aciyele a̱tsuma̱ a̱ ɗu, a ta zami upa'anta uba̱ta̱ wa̱ A̱sulazuva.
ZEP 3:13 Aza a Isra'ila a na a buwai a̱a̱ da̱shi yuwan unusu shi, waru a̱a̱ da̱shi yuwan epen shi, agba a̱a̱ da̱shi tsura̱ epen a̱ na̱ le shi. A ta yuwan aguɓa, reve o von, agba za lo na a da'waton le shi.>>
ZEP 3:14 Cana ishipa nu ucira, a̱vu Sihiyona! Vu 'ya̱sa̱n uɗyo, a̱vu Isra'ila! Vu yuwan ma̱za̱nga̱ waru vu yuwan mere no okolo a̱ wu suru, a̱vu Urishelima!
ZEP 3:15 A̱sulazuva a tawa ta̱ oforo a aci a̱ wu, waru u loso ta̱ n'yuwatan ma̱ wu. A̱sulazuva mogono ma Isra'ila ma̱ ta̱ oɓolo na̱ a̱vu, va̱a̱ da̱shi uwwa wovon u meleshe shi.
ZEP 3:16 O urana u ndolo a ta damma Urishelima, <<She vu uwwa wovon wan, a̱vu Sihiyona, she vu lyawa ekere a̱ wu a̱ ɗa̱mba̱ wan.
ZEP 3:17 A̱sulazuva A̱sula̱ a̱ wu a̱ ta̱ oɓolo na̱ a̱vu, za vu uvon ɗa, waru u tsu ulyuwu ta̱ aci. U ta yuwan ma̱za̱nga̱ a̱vu yuwan mere adama a̱ wu, u ta̱ ka̱mba̱to wu usa'avu adama e icigi ya̱ yi. U ta cana ishipa i ma̱za̱nga̱ nu ucira adama a̱ wu,
ZEP 3:18 ununa a tsu yuwan urana wa̱ a̱buki. N ta tawa ɗu a̱tsumola̱ngu waru ya̱a̱ da̱shi uwwa wono shi.
ZEP 3:19 Agba a mantsa'a n ta̱ ge'eto aza a na suru oo ɓongishi nɗu. N ta wawa a̱kutsuma̱ reve m ɓoloto aza a na e bete'wei. Oto o'wo ili yi ica waru a ca le tsugbain, a̱ ba̱ta̱ na suru a ca nle wono.
ZEP 3:20 A mantsa mo ndolo n to ɓoloto ɗu, n ka̱mba̱to ɗu o u'wa. N ta zuwa a ca ɗu tsugbain a̱vu i tsura̱ ica a̱tsuma̱ a ama o uvaɗi suru, a mantsa ma na n ka̱mbuwa̱a̱ nɗu nu utsuru u ɗu e esu a̱ ɗu. A̱mu A̱sulazuva a ɗa n dammai ne.>>
