﻿Zafaniya.
3.
A̱tsuma̱lima̱ a ta cina lyuci va aciyogbamu, lyuci vi idaba ni iɓongishi! 
U tsu poloo za atsuvu shi, waru u tsu usu ulapulu shi. U tsu zuwaa A̱sulazuva okolo a̱ yi shi, waru u tsu rawa zuzu na̱ A̱sula̱ shi. 
Azagbain a̱ yi a̱ ta̱ tsi ikamu i ma̱gugwa̱, a̱za̱ o uge'etosu a̱ yi a̱ ta̱ tsa̱ nkerenkesu n na n liva̱i na ambulu, aza a na a tsu buwaa ili adama a nfa'an shi. 
Ama̱sula̱ a̱ yi ama a vama a ɗa, a̱za̱ e ikpa'a, nan ganu a̱ yi a tara ili ya akiza ili i ro shi. Waru a kuɗa ta̱ wila̱. 
A̱sulazuva a na a̱ ri a̱tsuma̱ a̱ lyuci'i za va̱ a̱ɓula̱ a ɗa, u tsu yuwan unusu shi. Usana biti u tsu roco ta̱ a̱ɓula̱ a̱ yi, usana wa̱ A̱sula̱ suru u tsu ka̱la̱ma̱ shi, suru na̱ ne za vu ulambu wa̱ a̱ɓula̱ ri na̱ wono shi. 
Reve A̱sulazuva a damma, <<N kototo ta̱ ɗe nɗa mu uvaɗi, ba̱ta̱ vu pa'atan vu ucira le la̱nga̱ ta̱. Waru n lungusa̱ ta̱ re le, babu za na a̱ kurusu le. O kototo ta̱ ilyuci i le suru suru ko za la'a shi waru ko za ri pe shi. 
Shi ta̱ n tara na amayun, a ama a̱ va̱ a ta uwwa wovon u va̱, waru a̱ usu tsuɓari, agba a̱a̱ da̱shi yuwan ulambu wu ugbozu shi, diga e ili i na n rono nle atsuvu. Amma suru na̱ ne reve a lyuwa elime nu ulambu wa̱ a̱ɓula̱ e ili i na aa yuwusan suru. 
Adama o ndolo a̱mu A̱sulazuva n damma ta̱, <Puroyi urana u na ma̱ 'yon n yuwan adanshi a aci a nɗa, adama a na n zuwa ta̱ okolo a na mo ɓoloto wu nɗa, no ozo o tsugono uba̱ta̱ u ta̱, reve n tsun wa̱ le upan u va̱, upan wu usuɗu u va̱ a aci e le. Uvaɗi ma̱ɓula̱ u ta̱ koto adama o upan wu usuɗuwu u va̱.> >> 
<<Na amayun, a mantsa ma ɗaɗa ma̱a̱ ka̱mba̱to nɗa a̱a̱ da̱na̱ a dansa amayun, suru nle a̱ ta̱ ɗe Aala A̱sulazuva, waru a yuwayin a̱ga̱nda̱ no okolo a̱ ta̱. 
Diga a alanga o upasu wu uɗolu wa̱ Kush aza a na aa yuwusaan mu a̱ga̱nda̱, ama a̱ va̱ a na a̱ ri ubete'u, a̱ ta̱ ta̱wa̱a̱ mu na̱ kucci.>> 
<<O urana u ndolo yaa uwwa wono shi adama a̱ nusu na i yuwaan numu shi. Adama a na n ta̱ o uta̱a̱ aza a aciyogbamu no ozo o uvaɗu a̱tsuma̱ a̱ ɗu. Waru ya̱a̱ da̱shi yuwan aciyogbamu a Masasan ma Akiza ma̱ va̱ shi. 
Agba n ta lyawa aza a na a tarai aciyele ili i ro shi, na aza a na a̱ ka̱ɗa̱toi aciyele a̱tsuma̱ a̱ ɗu, a ta zami upa'anta uba̱ta̱ wa̱ A̱sulazuva. 
Aza a Isra'ila a na a buwai a̱a̱ da̱shi yuwan unusu shi, waru a̱a̱ da̱shi yuwan epen shi, agba a̱a̱ da̱shi tsura̱ epen a̱ na̱ le shi. A ta yuwan aguɓa, reve o von, agba za lo na a da'waton le shi.>> 
Cana ishipa nu ucira, a̱vu Sihiyona! Vu 'ya̱sa̱n uɗyo, a̱vu Isra'ila! Vu yuwan ma̱za̱nga̱ waru vu yuwan mere no okolo a̱ wu suru, a̱vu Urishelima! 
A̱sulazuva a tawa ta̱ oforo a aci a̱ wu, waru u loso ta̱ n'yuwatan ma̱ wu. A̱sulazuva mogono ma Isra'ila ma̱ ta̱ oɓolo na̱ a̱vu, va̱a̱ da̱shi uwwa wovon u meleshe shi. 
O urana u ndolo a ta damma Urishelima, <<She vu uwwa wovon wan, a̱vu Sihiyona, she vu lyawa ekere a̱ wu a̱ ɗa̱mba̱ wan. 
A̱sulazuva A̱sula̱ a̱ wu a̱ ta̱ oɓolo na̱ a̱vu, za vu uvon ɗa, waru u tsu ulyuwu ta̱ aci. U ta yuwan ma̱za̱nga̱ a̱vu yuwan mere adama a̱ wu, u ta̱ ka̱mba̱to wu usa'avu adama e icigi ya̱ yi. U ta cana ishipa i ma̱za̱nga̱ nu ucira adama a̱ wu, 
ununa a tsu yuwan urana wa̱ a̱buki. N ta tawa ɗu a̱tsumola̱ngu waru ya̱a̱ da̱shi uwwa wono shi. 
Agba a mantsa'a n ta̱ ge'eto aza a na suru oo ɓongishi nɗu. N ta wawa a̱kutsuma̱ reve m ɓoloto aza a na e bete'wei. Oto o'wo ili yi ica waru a ca le tsugbain, a̱ ba̱ta̱ na suru a ca nle wono. 
A mantsa mo ndolo n to ɓoloto ɗu, n ka̱mba̱to ɗu o u'wa. N ta zuwa a ca ɗu tsugbain a̱vu i tsura̱ ica a̱tsuma̱ a ama o uvaɗi suru, a mantsa ma na n ka̱mbuwa̱a̱ nɗu nu utsuru u ɗu e esu a̱ ɗu. A̱mu A̱sulazuva a ɗa n dammai ne.>>
