﻿Mika.
3.
Poloi atsuvu yu uwwa, a̱ɗu azagbain o ugundo a Yakubu, a̱ɗu a̱za̱ o tsugono tsu u'wa wa Isra'ila! Ashe wuntsaa i reve uge'etosu wa amayun shi? 
A̱ɗu na i 'yuwain ili i na i ri ulobonu, reve i ciga iwuya. a̱ɗu na ya munusa ukwan u lipu wa ama a̱ va̱, a̱ɗu na ya tawusa inama i lipu i le diga etele e le. 
A̱ɗu na ya tamusa inama ya ama a̱ va̱, reve i ka̱ra̱ a munusa kwan lipu le, a kukuɗusa etele e le, ni paɗasai inama i lipu i le vadama a̱ ta̱ tsun le o upondo na a su'wan. 
A̱vu nda gogo i ciga i showen A̱sulazuva, i reve gba wa̱ usu ɗu shi. A mantsa'a, u to sokowo ɗu urewesu wa̱ a̱ yi adama a na i yuwain iwuya. 
Apa ili i na A̱sulazuva a dammai e ekere ama̱sula̱ a na a zuwai ama a̱ va̱ a̱ puwa̱yin, aza a na a̱ 'ya̱sa̱sa̱n ɗyo a dansa, <<<Nden ma asuvu> a mantsa ma na a ca nle ilyalya. Agba a dansa, <uvon> e ekere aza a na ca nle ili shi. 
Adama o ndolo, a̱ɗu ama̱sula̱, ili suru i to o'wo ɗu ayin, alavu alavu a̱ da̱na̱ lo shi, Irumbu i ɗa yo o'wo ɗu, i buwa a yuwan walu shi. Urana u ta̱ riya̱ ɗu a aci a̱ ɗu ama̱sula̱ a nda, ulivu u to o'wo ɗu irumbu picim. 
A̱ɗu a̱za̱ a̱ yindi, i ta uwwa wono, aza a walu a̱ ta̱ ra̱pula̱. Suru n ɗu i ta̱ ɓa̱ru na̱ ɗu, adama a na A̱sula̱ a uwwa ɗu shi. >> 
A̱mu gba shi, n ta̱ tapu nu ucira nu Ruhu va A̱sulazuva. N ta̱ tapu nu ugbamu wa asuvu u na ma yuwan uge'etosu wa amayun. Babu wovon n ta damma Yakubu ulinga wu ulambu wa̱ a̱ɓula̱ a̱ yi alanga eteshe. Isra'ila waru n damma yi unusu wa̱ yi. 
Uwwai ili i nda, azagbain o ugundo wa Yakubu, na̱ a̱za̱ o tsugono tsu u'wa wa Isra'ila, a̱ɗu na ya 'yuwusan uge'etosu wa amayun reve i vadala amayun suru. 
A̱ɗu na i suwai Sihiyona na̱ mpasa, Urishelima gba nu unusu. 
Azagbain o u'wa wa Yakubu a̱ ta̱ ushishi utowusu wu una̱ na paɗa ugana o uge'etosu. Nan ganu a ta yuwusan uritosu adama a̱ tsura̱ ili i na ya uwa le, waru ama̱sula̱ a̱ yi a ta yuwusan adanshi adama a̱ tsura̱ ikebe. Agba suru na̱ ne a ta majiyan A̱sulazuva a̱ ta̱ ɓolo na̱ e le a dansa, <<Ee, A̱sulazuva a̱ te e memere ma̱ tsu, upepu ucingi wu lo na wa faba tsu shi. 
Adama a̱ ɗu, aa ta cimba Sihiyona tsu uɗuma̱, Urishelima gba to o'wo oɓolo o okongo. Aagaɗi a na A̱a̱'isamapaɗa a̱ ri u to o'wo olopu.>> 
