﻿Jonáa.
2.
A̱ꞌkhui̱nꞌ Jonáa niꞌthánkháñuu Ana̱ Mekhuíí, Anuu wi̱ na̱ꞌnimba̱a̱ ikhaa, a̱jndu̱ náa aúun e̱gi̱ꞌ. 
Kamí niꞌthén: «Náa ndíi xtáá ra̱mínúuꞌ ni̱tha̱nkháñaaꞌ, Anuꞌ Mekhuíí, kamí ikháán nithadxaunꞌ. A̱jndu̱ náa aúun iñáwajinꞌ ni̱ndxa̱ꞌwa̱, kamí ikháán nithadxawíín aꞌóꞌ. 
Nithaxúmúúꞌ náa tikhumboo iya-a̱pha̱ náa mi̱jnu̱ꞌ aúún, kamí nimbróꞌóón xu̱u̱ꞌ. Xógíꞌ iyaꞌ ndíi ni̱mbu̱xu̱u̱ nithani̱ ikháán, ninújŋgoo náa tsu̱du̱ꞌ ikhúún. 
A̱ꞌkhui̱nꞌ ni̱ndxa̱ꞌwa̱mínáꞌ ikhúún ndíi nithajmaxíñu̱u̱ mbá khayuuꞌ mitsíŋguánꞌ ndíi náa inaaꞌ. Múú maske máꞌ xuꞌkhuíin ma̱thaŋgu̱únꞌ máꞌ xóó mba̱yo̱o̱ guꞌwádxájkiaanꞌ. 
A̱jndu̱ náa ámiúꞌ nimbróꞌoo iyaꞌ, niruguaroꞌúún mujinkhámuu. Kamí mbáꞌwá nimbróꞌoo náa edxuꞌ. 
Nikhaoꞌ a̱jndu̱ náa juáꞌan rajkúu khúbá, kamí khu̱ba̱ꞌ niruguaroꞌúún mbá khámuu. Múú ikháán nithani̱khríya̱a̱ꞌ a̱jkiu̱nꞌ náa aúun iñáwajinꞌ, ¡ꞌálá Anuꞌ Mekhuíí! 
Ndíndu̱ ni̱jka̱rámbáa ámiúꞌ ni̱khu̱mu̱ꞌ ikhúún, nimáꞌáa̱nlaꞌ a̱jkiu̱nꞌ kha̱ya̱a̱ꞌ, Anuꞌ Mekhuíí. Kamí tsajkuun ndíi ni̱ni̱ ni̱jkha̱nú a̱jndu̱ náa inaaꞌ ikháán, a̱jndu̱ náa guꞌwádxájkiaanꞌ. 
Xa̱bu̱ wi̱ nuni̱mbe̱e̱n a̱jku̱u̱n wi̱ ra̱gíꞌdoo numúún ndi̱tháan, nu̱ni̱ña̱a̱ꞌ ndíi muni̱mbo̱o̱n khuyaaꞌ ikháán, wi̱ nagawíinꞌ a̱jkiu̱u̱n khaꞌñúún ikheen. 
I̱ndóó ikhúún rá, ma̱xna̱a̱ꞌlaꞌ núma̱a̱ꞌ ga̱jma̱a̱ ajmúú, kamí ma̱khu̱ꞌdaꞌ tsiŋgejñaꞌ náa inaaꞌ. Ma̱ni̱mbánuu ndíi ni̱khu̱ꞌdáminaꞌ ma̱ni̱. I̱ndóó ikháán, Ana̱ Mekhuíí, nathani̱kháwíin xa̱bu̱», niꞌthén Jonáa. 
Ikhú Anulúꞌ Mekhuíí niꞌthánñéjuunꞌ e̱gi̱ꞌ ndíi maxiriya̱a̱ꞌjleꞌ Jonáa náa khu̱ba̱mixooꞌ. 
