﻿Kulakɛlɛmai.
15.
Naa ʋoluma gè poogi taɠili kaani geeɠɔlɔgi zu, bɔɔlɔai, maayiki, geezuɠeela lɔfelaiti niiti nimiza vaa lɔfelaiti ti ɠɛni ti ya. Naati ka ti ga nimiza vaa lɔfela ɠaaɓelagiti, naati ka GALA ná-ziiɠulagi laazeelizu ga tiye. 
Gè anii ta ɠaani, kulaai ga kpoloɗɛi, suɠalagai eɠɛ sanu ʋɛɛlɛi, ta daavegai ga abui. Niiti ti pilɛ sɔlɔɔni filɛ zuai ma, ta baaɠulabai ma, ta daaseigi liegɔi ma, ti ɠɛni loni kpoloɗɛi ɠa, kɛai eɠɛ ʋɛɛlɛi, kɔnigiti GALA ge feeni ti ya, naati ti ɠɛni ti ya. 
Ti ɠɛni GALA ná-botiɠɛ nui Moize ná-guyei loozu, ta Baala Ziʋoi ná-guyei, ti ɗa ɠɛ ma: «Ɗa-ɠɛɛwotiiti bɔɔlɔʋɛ, ti maayikiʋɛ, Maliɠii GALA Zɛbɛi-Pɛ-Maliɠii! Ɗa-ʋeleiti sɔlegɛ, ti ga gaamai, ziiti ta-Masagi! 
Maliɠii, ɓɛ ɠa é la luaa è ʋa? Ɓɛ ɠa é la è-lɔɠɔi lɛbia? Mazɔlɔɔ ɗa ɠila kpe nɔ ɠa è ɲadegai. Ziiti pɛ ta ʋa, ti nɔkɔ è wu, mazɔlɔɔ ɗa-lelebo faiti ti ɠulaa kɛlɛma.» 
Naa ʋoluma, gè GALA sei ʋɛlɛi ɠaani geeɠɔlɔgi zu, daalao, ʋɛ zeele woo zeɠe ʋɛlɛi makɛsu ná. 
Geezuɠeela lɔfelaiti niiti nimiza vaa lɔfelaiti ti ɠɛni ti ya, naati ti ɠulani GALA sei ʋɛlɛi wu, ti maaɠilini ga geze ʋagɔ zeɠei, koleai, é ɗa volo, zanu saamaɠiligi ɠɛni ti-ɠaka wu. 
Zɛnvu su ani naanigɔiti taɠila ge zanu aniɲaka lɔfelai veeni geezuɠeela lɔfelaiti zea, ti laavegai ga GALA nii é vulua ɠɔoɠɔ, naa ná-ziiɠulagi. 
GALA sei ʋɛlɛi wuulaaveni ga duului, GALA ná-lɛbiyai ta ná-zɛbɛi maaʋele ma. Nu nɔpɛ ge la ɠɛni zooga é ʋa lɛ GALA sei ʋɛlɛi wu, eyɛsu geezuɠeela lɔfelaiti ta-nimiza vaa lɔfelaiti gaaɓela. 
