﻿Kulakɛlɛmai.
7.
Naa ʋoluma, gè geezuɠeela naanigɔiti kaani loni eteai ma zoko naanigɔiti su. Ti eteai ma viilɛ zeizu naanigɔiti soni, nii a kɛ fiilɛ mina mɔ ʋu zooi ma, ɓaa kpoloɗɛi ɠa, ɓaa gului tanɔpɛ ma. 
Gè geezuɠeelai taɠili kaani, é ɗa ʋa, é zeɠe folo ɠulazu ʋelei, zɛnvu su ƓALAGI ná-poogi zoni zea. É wooɠulani gola geezuɠeela naanigɔiti ma, niiti zobogi veeni ti ya ga ti faa ɲɔi ɠɛ ga eteai ta kpoloɗɛi, é ɠɛni ti ma: 
«À mina faa ɲɔu nɔpɛ kɛ ga eteai, ta kpoloɗɛi, ta guluiti, eyɛsu gi poogi ʋɛɛ da-ƓALAGI ná-botiɠɛ nuiti toʋalaʋɛti.» 
Ti naati tiegɔi woni mà, niiti GALA ná-poogi ʋɛɛni ti-loʋalaʋɛti. Ti ɠɛni ga nu waaungila waaʋuunaani maazu naani (144.000), Izilayɛle nuɓusɛiti ta-wolodai kpein su. 
Zuda ná-bolodai zu waapuugɔ maazu felegɔ (12.000) ɠa poogi ʋɛɛni ba, Luɓɛn ná-bolodai zu waapuugɔ maazu felegɔ (12.000), Gade ná-bolodai zu waapuugɔ maazu felegɔ (12.000), 
Asɛɛl ná-bolodai zu waapuugɔ maazu felegɔ (12.000), Nɛfɛtali ná-bolodai zu waapuugɔ maazu felegɔ (12.000), Manasé ná-bolodai zu waapuugɔ maazu felegɔ (12.000), 
Simiyɔn ná-bolodai zu waapuugɔ maazu felegɔ (12.000), Levi ná-bolodai zu waapuugɔ maazu felegɔ (12.000), Isakaal ná-bolodai zu waapuugɔ maazu felegɔ (12.000), 
Zaɓulɔn ná-bolodai zu waapuugɔ maazu felegɔ (12.000), Zozɛfe ná-bolodai zu waapuugɔ maazu felegɔ (12.000), Ɓɛnzamɛn ná-bolodai zu waapuugɔ maazu felegɔ (12.000). 
Naa ʋoluma, gè wɛlɛni mɔnɔ, gè bɛbɛi ɠa, nii nu nɔpɛ ge la ɓena zoo é ʋa gaalu. Nuiti kana ti ɠulani ziiti pɛ su, ta bolodaiti pɛ, nuɓusɛiti pɛ nɔ, zii wooiti pɛ su. Ti ɠɛni loni masa kpɔkpɔgi ɠakalaʋɛ, Baala Ziʋoi ɠakalaʋɛ, ti maaɠiliai ga seɠe ɠolegiti, dɔɔ laaiti ti zoni ti ya. 
Ti ɠɛni wooɠulazu gola, ti ɗa ɠɛ ma: «Kizogi ɠa ga ada-ƓALAGI nɔnɔ, é zeini masa kpɔkpɔgi ɠa, ta Baala Ziʋoi nɔnɔ!» 
Geezuɠeelaiti pɛ ti ɠɛni loni masa kpɔkpɔgi maaɠoolii zu, ti kɛwola wɔlɔiti maaɠooli ta zɛnvu su ani naanigɔiti. Ti unpilɛni masa kpɔkpɔgi ɠakalaʋɛ, ti nɔkɔ GALA bu, 
ti ɗa ɠɛ ma: «Amina! Maamusɛi, lɛbiyai, ɠimalai, mamagiti, bɔɔlɔi, zɛbɛi, gaaɓaai, naati pɛ ta ga ada-ƓALAGI nɔnɔ, eyɛsu ɠɔ! Amina!» 
Kɛwola wɔlɔi gila ge ɓɔɛni pɔ̀, é ɠɛ mà: «Ɓɛɛni ka ga niiti seɠe ɠolegiti ti ti ɠɔba, mini ɠa ti zeɠeai ná?» 
Gè tɔun gooɠaaʋoteni, gè ɠɛ ma: «Màliɠii, ɗa ɠa è kwɛɛ.» É ɠɛni mà: «Tiya ɠa ti leʋegai wɔinzeɠema wolai zu, ti ʋa. Ti ta-zeɠeiti gbani, ti ti ɠole Baala Ziʋoi ɲamai zu. 
Naa ɠa é ba, ti loni GALA ná-masa kpɔkpɔgi ɠakalaʋɛ, ti ɗa dɛbi folo ʋɛɛ kpidi ʋa GALA sei ʋɛlɛi wu. Zɔi é zeini masa kpɔkpɔgi ɠa, naa ɠa ti makɛ ná-seɠe ʋɛlɛi wu. 
Pulu la mɔ ti zoga eyɛsu pɛ, kpɔɔle wɔin la mɔ ti zoga, folo la ɓɔiɗa ti la, die ge la ti ɓɔlɔa. 
Mazɔlɔɔ Baala Ziʋoi é masa kpɔkpɔgi zaamaʋɛ naa ɠa ti makɛ eɠɛ baala makɛ nui, é lo ti luɠɔ, é ɗa li ga tiye zɛnvu su ɗɛungiti pɔ bɛ. GALA ka ti-ɠaazuɗɛiti pɛ kpale.» 
