﻿Kulakɛlɛmai.
4.
Naa ʋoluma gè wɛlɛni. Gè kpogi ɠaani geeɠɔlɔgi zu, nii daalaogai. Woo mɔungi gè mɛnini eɠɛ puʋu fɛɛ wooi, é ɗa ɓɔɛ pɔ̀, naa ɠɛni mà: «Lɛ ʋɛ. Nii é ʋaazu ɠɛɛzu naa ʋolu, nà naa lɛɛzu ga ɗe.» 
Gaamago nɔ, GALA Zɛnvui yeini mà. Wɛlɛ, masa kpɔkpɔgi ɠɛni geeɠɔlɔgi zu, nui ta ɠɛni zeini ma masa kpɔkpɔgi ɠa. 
Zɔi é ɠɛni zeini ná, é ɠɛni volozu eɠɛ kɔtu zɔngɔ ɓaagiti, ti-laa ga zasepe ta saaledowane. Masa kpɔkpɔgi maalatiga ɠɛni de ga kpazamanamanagi, é ɗa volo eɠɛ kɔtu zɔngɔ ɓaagi, daa ga emelɔde. 
Masa kpɔkpɔ ʋuufelegɔ maazu naanigɔ (24) ɠɛni masa kpɔkpɔgi naa maaɠoolii zu. Kɛwola wɔlɔ ʋuufelegɔ maazu naanigɔ (24) ɠɛni zeini naama masa kpɔkpɔgiti ga, ti maaɠiliai ga seɠe ɠolegiti, masa bɔɔlɔgi ti unba ga zanugi. 
Mainmain ɠɛni ɠulazu masa kpɔkpɔgi zu, ta wooiti, ta tona kpunɛ tugiti. Sɔmɔ dɔfela ɠɛni sosu gola masa kpɔkpɔgi ɠakalaʋɛ, naati ka ti ga GALA ná-zɛnvu lɔfelaiti. 
Masa kpɔkpɔgi ɠakalaʋɛ, anii ta ɠɛni ná eɠɛ kpoloɗɛi, suɠalagai eɠɛ ʋɛɛlɛi. Zɛnvu su ani naanigɔiti ti ɠɛni masa kpɔkpɔgi zaamaʋɛ, ta ti ɠoolini ma. Ti-ɠaazuɠɛzɛi ɠɛni ti maaʋɛ ná pɛ, ti-ɠakalaʋɛti ta ti-ʋoluʋɛti pɛ. 
Zɛnvu su anii ma mɔungi ɠulani ga zalai, felesiɛi ɠula ga nikɛ ɓokpagi, saʋasiɛi ɠaazuʋɛ ɠula ga nui ɠaazuʋɛ, naanisiɛi ɠula ga koɠɛi a ɠɛna ɠoʋega. 
Koʋegi ɠɛni zɛnvu su ani naanigɔi, naati gilagilagi pɛ ba ga dɔzitadɔzita, ti-ɠaazuɠɛzɛi ɠɛni ti maaʋɛ pɛ, ta ti-ɠoozuʋɛ pɛ. Folo ʋɛɛ kpidi ʋa, ti la ɠɛni ɓɔlɔzu ti ɗa ɠɛ ma: «Ɲadegai, ɲadegai, ɲadegai, naa ɠa é ga Maliɠii GALA, Zɛbɛi-Pɛ-Maliɠii, é ɠɛni ná, tɔ ɠa é ná, tɔ ɠa é ʋaazu!» 
Siɛgi zu zɛnvu su ani naanigɔiti ta ɠɛna lɛbiyai ta maamusɛi ta mamagi vea la naa ʋɛ, nii é zeini masa kpɔkpɔgi ɠa, ta é vulua ɠɔoɠɔ, 
kɛwola wɔlɔ ʋuufelegɔ maazu naanigɔiti (24) ta ɗa ʋilɛ ɲiibiɠa, ti nɔkɔ naa wu, nii é zeini masa kpɔkpɔgi ɠa, é vulua ɠɔoɠɔ. Ta ɗa ta-masa bɔɔlɔgiti pili masa kpɔkpɔgi ɠakalaʋɛ, ti ɠɛ ma: 
«Ee, gi-Maliɠii, gá-ƓALAGI, è zoloogɛ ga è lɛbiyai zɔlɔɔ, ta bɔɔlɔi, ta zɛbɛi, mazɔlɔɔ ɗa ɠa è aniiti pɛ kpɛtɛa, ti pɛ ta ná è-yiimai zu, ti pɛ ta zɛnvui wosu è-zaalai zu.» 
