﻿Zan Ná-Sɛʋɛi Zaʋasiɛi.
1.
Nɛ̀i gè ga Egilisi lotuɠɔi, nà ɠa gè sɛʋɛi nii leʋesu nɛ̀ɛɲɔɠɔi Gaiyuse ma, gè nɛai ʋɛ ga gaamai. 
Nɛ̀ɛɲɔɠɔi, nà pɔ ga è-yeavaiti pɛ ti zoloo ga pagɔ, è ɠɛ kɛdɛyai zu è-ɓusɛi zu, eɠɛʋelei è la zɛnvu zu vaiti su. 
Kòozunɛɛni gola, de-ɠɛɛleaiti paai ma, ti zeɠe è ʋɔ bɛ, ti ɗa-wooɠɛɠiladai wo gaamai zu, eɠɛʋelei è ziɛzu la gaamai zu. 
Koozunɛ nɔpɛ ge la wɔɔlɔa zèa, é ʋa leʋe nii ʋa, ga gè mɛni ga dòinti ta ziɛzu gaamai zu. 
Nɛ̀ɛɲɔɠɔi, ɗa ziɛzu ga wooɠɛɠiladai fai pɛ su è kɛɛzu ɠɛɛɠɛlointi bɛ, anɛɛ naati bɛ niiti ti ga wɛɛinti. 
Ti naama zeele wooi woni Egilisi nuiti gaazu, nii pilɛgai ɗa-nɛɛbɛi ʋa. Nà è maanɛɛnɛzu ga è ɓɔ ti ʋa ta-ziɛi zu, eɠɛʋelei soloogai la GALA gaazu. 
Tɔɔzei Kilista ná-botii ma ziɛi ɠa ti bosu, ti la yeezeini kidaaleʋelala nuiti ta-ɓɔba nɔpɛ bu. 
Naa ma, de maanɛɛʋɛ de yeezei nii ɠɛɠala nuiti bu, naa ɠa a kɛ de losu ɠɛ botii naa ʋa, nii ti kɛɛzu gaamai ʋɛ. 
Gè sɛʋɛ go leʋeni Egilisii ma, kɛlɛ Diyotelɛfe, nii wɔinɗai ga é ɠɛ ga ta-ɠundiɠii, é la gi levezu ga tago ɓalaa. 
Naa ɠa é ba, siɛgi zu gè ʋaazu la, nà siɛ ʋele ɲɔiti bo, woo ɲɔiti ta zɛɛiti é ti wosu gi ma. Kɛlɛ é la ɓelani naa ʋa, é la kɛɛzu é ʋa yeezei de-ɠɛɛleaiti bu, ti ʋaazu, zɔiti ta ɠɛɛna ti yeezei ti wu, é pele ɓesa naati tuɠɔ, é ti ɓɛ Egilisii zu. 
Nɛ̀ɛɲɔɠɔi, mina ʋokɔɠɔ faa ɲɔi ma, kɛni faa ʋagɔi. Zɔi é faa ʋagɔi ɠɛɛzu, naa ɠa ga GALA nu, kɛlɛ zɔi é faa ɲɔi ɠɛɛzu, naa la GALA kwɛɛ pa. 
Ɛsɛ pɛ ka zeele woo ʋagɔi wosu Demetiliyuse ʋɛ, gaamai ɓɔɠɔi ɠa ɓɔɛzu ná-faa zu. Gá ɓalaagi gá zeele wooi wosu bɛ, tama è kwɛɛ ga nii gi bosu, gaamai ɠana. 
Faa mɔinmɔin ka kìsu ga gè bo è ma, kɛlɛ gè la wɔinni gè ʋa naa ɠɛ ga sɛʋɛ ɓakui ta sɛʋɛ ɗɛi. 
Toɠa kìsu ga su la ɠoozazu de ɓɔɠɔ ɠa, da ɓɔɛ ʋɔ názu, laani ta la. 
Ziilɛigi ɠɛ è ʋɛ. De-wɔɔlaiti ta è luʋɔsu. De-wɔɔlaiti tuʋɔ, ti ɠilagilagi pɛ.
