﻿1 Piyɛlɛ.
5.
Nà totuɠɔiti tɛnɛsu, ti wo zaama. Nà ga totuɠɔ ga ti ɠɛʋele. Kpɔlɔiti ti zeini Kilista ma, nà ga naama zeelei ta. Nà nɔ̀nɔ zɔlɔɔ naama lɛbiyai zu, é ʋaazu ɠulazu kɛlɛma. Wɛlɛ nii ɠa gè bosu ti ma: 
À GALA ná-baala kpulugi zɛsɛbo, nii kalivaai wo ma, wo ɠaaɓa ma ga pagɔ. À mina kɛ ga ɓala ʋele, kɛlɛ à kɛ ga ɠoozunɛ ʋele, eɠɛʋelei GALA ge pɔ la. À mina kɛ naavolo zɔlɔɔ faa ma, kɛlɛ à kɛ ɠi pagɔlai zu. 
Niiti ti ɠalivaai wo ma, à mina zei ti unda ga maaɓa, kɛlɛ à ɠɛ ga poo pagɔ baala kpulugi ʋɛ. 
Siɛgi zu baala makɛ ɠundiɠi wolai ɠulazu la kɛlɛma, wa masa bɔɔlɔgi zɔlɔɔ, é ga lɛbiya gelei, ná-foloi la ɠulaa ba pɛ. 
Zekana nɔ é la, nu niinɛiti, à ɓɔɠɔmaayei wo-yeemaazuiti bɛ. Wo pɛ, wa-ɓɔfaamaiti su, à ɓɔɠɔmaayeii loo ɠɔba eɠɛ seɠei, mazɔlɔɔ sɛʋɛʋɛ ga: «GALA ka waso nuiti sakpe, kɛlɛ toɠa ná-zaalai la ɓɔɠɔmaayei nuiti ma.» 
À ɓɔɠɔmaayei deɠɛmu, GALA zeei ná-zobogi wu, naa ɠa a kɛ é wo wuzeɠe, yeeɠɛɠalai zu é deveai. 
À wa-yiizoolɛ vaiti pɛ da tɔun unma, mazɔlɔɔ tɔ ɓɔɠɔi ɠa é ɠaaɓaazu wo ma. 
À ɠɛ ga sɔɓelama nuiti. À dama. Wo zili nui é ga Inɛgi, toɠa leʋesu eɠɛ zalai nii é zikɔzu, é ɗa nu ɠaiziɛ, é ʋa mi. 
À lo kpaan kidaaleʋei zu, wo sakpe, mazɔlɔɔ wo-ɠɛɛleaiti ti eteai zu ná pɛ, ta naa ɠɛɠala ɓɔlɔi zɔlɔɔsu. 
Wo kpɔlɔi zɔlɔɔga ʋoluma yeeɠɛɠala go laawu, GALA é ga zaalai pɛ Maliɠii, é wo loligai ga wo wɔnɔ zɔlɔɔ ná-ɠɔoɠɔ lɛbiyai zu, wa-ɠilibalai zu wa Yesu Kilista, tɔ ɓɔɠɔi ɠa wo ɠɛʋele ɓɛtɛ, é wo zapelɔ, é wo zɛbɛlɔ, é wo ɠɔɠɔlo kpaan ɲiikpitalai zu. 
Toɠa nɔnɔ ga zobogi, eyɛsu ɠɔ! Amina! 
Ade-ɠɛɛloin Silase, gè devezu ga wooɠɛɠila nui, naa ɠa kpɔgai bà, gè woo zuɓuɠa koi nii zɛʋɛ wo ma, gè wo lɛnɛ, gè maaɓakpa, ga pele ɠana GALA ná-zaala ɠitei la, nii wo ɠiliai ba. 
Egilisii é Ɓaɓilɔne, GALA ge yiimazeɠeai la ga wo ɠɛʋele, naa ɠa wo luʋɔsu, dòun zunui Maleke ɓalaagi ɠa wo luʋɔsu. 
À ɓɔɠɔ luʋɔ ga nɛɛnɛi. Ziilɛigi ɠɛ wo pɛ wo ya, wɔiti wo ga Kilista nɔnɔiti.
