﻿Zake.
5.
À woilo gòoi ma, wa ʋe, wo ga naavolo nuiti! À wɔlɔ, wo ɓalakpala, tɔɔzei maanɔɠɔi maaʋele ma, é ʋaazu wo ʋɔ! 
Wa-naavoloiti ti luulaa, ɓaɠaɓaɠaiti ti wa-zeɠeiti kpotaɓotaga. 
Koikoigi wa-zanugiti ta wa-wali ɠaeiti koloɠologa, koikoigi naa ɠa é ga zeele wooi wo laalɔɠɔma, toɠa wo-ɓusɛi ɠoloɠolo eɠɛ abui. Wo naavoloi ɠaalɛa ba niima voloiti su, ti ga folo ɠaaɓelagiti. 
Pɛtɛ, wo la botiɠɛ nuiti salai veeni ti ya, niiti ti wa-ɓalagiti teʋeai. À woilo dɛɛ ti-zalai ɓain gooi ma! Molo leʋe nuiti kpain gooi zeelia Fai-Pɛ-Maliɠii GALA ma. 
Wo wa-eteai ziɛʋɛ gaanɛɛi zu ta ɓɔɠɔyiimai zu. Wo ɓɔɠɔ maalɔtɔʋɛ eɠɛ toganiiti wo ɠɔdaaleʋe voloi vaa zu. 
Wo telebo nui ʋeelalani, wo paa, é la wo zakpeni. 
Deɠɛmu, kɛ̀ɛleaiti, à yiilɔɔ eyɛsu Maliɠii ʋa. À wɛlɛ ʋelei tii ɠɛɛ nui a ɗa zooi ʋaalɔnɔ pagɔiti maaɓɔun da gola. Toɠa ɗa yiilɔɔ, eyɛsu é tona mɔungi zɔlɔɔ, ta ma ɠaaɓelagi é ʋuuzu. 
Wa ɓalaagi, à yiilɔɔ, wo zɛbɛzeɠe, mazɔlɔɔ Maliɠii ʋaa vai maaɓuɠaa. 
Kɛ̀ɛleaiti, à mina ɓaazaɠa ga ɓɔɠɔ lɔɠɔ wo ɠilagilagiti, naa ɠa a kɛ GALA ge mina wo lukpɔɠaaleʋe. Tukpɔɠaaleʋe Nui maaɓuɠaa, toɠa niina loni pɛlɛlaʋɛ. 
Kɛ̀ɛleaiti, GALA goo wo nuiti ti ɓɔɛni Maliɠii laaseigi zu, naati ta-ɓɔlɔi ta ta-yiilɔɔi ɠɛ wo ʋɛ ga poo pagɔi, wo ɠizɛ su. 
Pɛtɛ, niiti ti loni kpaan, da ɠɛɛzu naati ma, undaanɛɛ ɠa ti ʋɛ. Wo Zɔɓe ná-ziilɔɔ vai mɛnini, wo suɠwɛɛ nii Maliɠii kɛɛni bɛ gaaɓelagi zu. Mazɔlɔɔ Maliɠii laavegɛ ga nuɓɔɠɔlai ta maawɔinɠai. 
Kɛ̀ɛleaiti, faa nɔpɛ su, à mina ɠona, geeɠɔlɔgi ma, ɓaa zooi ma, ɓaa ga konai ma zii nɔpɛ. Kɛlɛ wa ɠɛna: «Ungo,» é ɠɛ ga: «Ungoi», wa ɠɛna: «Ɓa,» é ɠɛ ga: «Ɓagi», naa ɠa a kɛ wo mina loo GALA ná-tukpɔɠaaleʋei zu. 
Ta ɠa wo zaama, é kpɔlɔi zu ɓaa? Kɛni é GALA fali. Ta ɠa ná koozunɛai ɓaa? Naa maamusɛ wuyeiti too. 
Ta ɠa wo zaama, é zeeɓɛzu ɓaa? Naa Egilisi lotuɠɔiti toli, ti GALA fali ma, ti gulɔi ziɛ ma Maliɠii laaseigi zu. 
GALA falii é ɠɛɛzu ga kidaaleʋei, toɠa seeɓɛ nui ɠizo, Maliɠii ɠa kɛdɛyai ve bɛ. Ni é kotoa ɠɛɛʋɛ, naati suvaa ɠa yɛ bɛ. 
Deɠɛmu, à laa zɔ ga ɓɔɠɔ ɠaazu ga wa-ɠotoiti, wo GALA fali ɓɔɠɔ ʋɛ wo ɠilagilagi pɛ, naa ɠa a kɛ wo ɠɛdɛ. Zɛbɛi ɠa telebo nui ná-GALA falii ʋa, toɠa ɗa faa wola ʋaa. 
Eli ɠɛni ga nuɓusɛi ga de ɠɛʋele, é ɠilini GALA falii ʋa ga tona mina ʋu, tona la ɠɛni ʋuuni zooi ma, eyɛsu kona saʋagɔ alu dɔzita. 
Naa ʋolu, é GALA falini mɔnɔ, geeɠɔlɔgi yeeɓe tonai ʋa, zooi ná-kulanumaiti fe. 
Kɛ̀ɛleaiti, ni wo ta a ɠakana, é maaɠooza gaamai ʋa, taɠili ge gaaɠale ma ʋolu, é ʋaa la, 
à suɠwɛɛ ga zɔi é ʋaazu ga kotoba nui, é seɠe kaka pelei ma, naa ɠa ma nui yɛnvui ɠizosu saai ma, toɠa ɠɛ ga zaɓu kotoi ma mɔinmɔin suvaayɛ.
