﻿Eɓulu.
10.
Moize ná-tɔgi zu vai ɠɛni nɔ ga faa ʋagɔiti ti ɠɛni ʋaazu, naati maaniinigi. É la ɠɛni ga ti-ʋaaɠulaba ɠiteɠitegi ɓɔɠɔi. Naa ma, é la ɠɛni zooga é ʋa naati kɛ ga nui niiti ti laazeeliai, niiti ti ɠɛni maaɓuɠazu GALA ba, ga naama zalaɠa zii ɠilagiti nɔ, ti ɠɛni ɠulazu yeenɔpɛ kona-o-kona. 
Ni é ɠɛni ta-vaiti daazeelini mɛtu, niiti ti ɠɛni naama zalaɠaiti kulazu, ta la looɠo ti ɠula vai ʋa? Mazɔlɔɔ ná a la ɠɛ ɠila kpe nɔ ti ɲade, ta-ɠisiɛi la mɔ ɠɛni ɓɔlɔa ga ta-ɠotoiti faa. 
Kɛlɛ gaamazu, zalaɠai naati ta nu ɠitoozu kotoi ná-fai zu kona-o-kona. 
Mazɔlɔɔ nikɛ zinɛiti ta boliiti ma ɲamai la zooga é ʋa kotoiti kpe. 
Naa ɠa é ba, Kilista ʋaai ma eteai zu, é ɠɛni ma: «È la wɔinni ga zalaɠai ɓaa vebɛanii, kɛlɛ kpusɛ ɠa è kpɛtɛai bɛ̀. 
Gala zalaɠaiti ɓaa koto gba zalaɠaiti ti la è yiilɛini. 
Gè ɠɛni ma naazu: ‹Ee, GALA, wɛlɛ, pàaʋɛ ga gè è-yiimai ɠɛ, eɠɛʋelei bogai la nà-faa zu sɛʋɛi zu.› » 
É boni mɔunpa ga: «È la wɔinni ga zalaɠaiti ɓaa vebɛaniiti, anɛɛ gala zalaɠaiti ɓaa koto gba zalaɠaiti ti la è yiilɛini.» Tama niima zalaɠaiti ta ɠulazu eɠɛʋelei tɔgi bogai la. 
Naa ʋoluma é ɠɛ ma: «Ee, GALA, wɛlɛ, pàaʋɛ ga gè è-yiimai ɠɛ.» É faa mɔungi zeɠeni ga ɠana, ga é felesiɛi zei. 
Naama yiimai maaʋele ma, de ɲadega Yesu Kilista ɓusɛi vee vai zu de ʋɛ, é ɠula ga zalaɠai, ná ɠɛ ɠila kpe nɔ, é ɠwɛ naa ʋa. 
Zalaɠa ɠula nu kpein ka ɗa botii ɠɛ folo-o-folo, é ɗa zalaɠai ma zii ɠilagiti nɔ ɠula, niiti ti la zooga ti ʋa kotoiti kpe pɛ. 
Kɛlɛ Kilista mu, kpegai ma ga zalaɠa ɠila kpegi ɠula kotoi zuvaayɛ fai zu, é ga tɔnɔ eyɛsu ɠɔ, naa ʋolu é zeini GALA zeezazuʋɛ. 
Toɠa zeini miná niina, eyɛsu GALA ge sili nuiti kɛ ga ná-kɔɠɔloma anii. 
Mazɔlɔɔ zalaɠa ɠilagi maaʋele ma, é naati ta-vai laazeelia mɛtu, zɔiti é ti ɲadegai. 
Zɛnvu Ɲadegai ɠa naa wosu, é maaɓakpa ade ʋɛ. Mazɔlɔɔ kpegai ma ga ɠɛ ma dɛ: 
«Maliɠii wooi ɠaa: Wɛlɛ minazeɠegi ʋa gè bosu ti ʋɛ, naama voloiti poluma. Nà nà-tɔgiti dɔ ti-yiimaʋɛti, gè ti zɛʋɛ ta-ɠisiɛiti su.» 
É ɠɛni ma mɔnɔ: «Gè la mɔ ta-ɠotoiti ta ta-vaaɠaaza golaiti devea ti unma.» 
Tama, siɛgi zu kotoi zuvaayɛsu la, kotoi ma zuvaayɛ zalaɠa ɠula vaa la mɔ ba. 
Naa ɠa é ba, kɛ̀ɛleaiti, ladalai ɠa de ya, ga de viegɛ ga de lɔ ada ɲadega wolai, Yesu ɲamai zaalai zu. 
É pele niinɛ laalaoga ade ʋɛ, é vulua, kwɛpele seɠezuɠoozagi ʋoluʋɛ, pelei nii é ga tɔ ɓɔɠɔi ɓusɛi. 
Naa ma, zalaɠa ɠula ɠundiɠi wolai ɠa é ade ya, é zeini GALA ná-pɛlɛi unda. 
Deɠɛmu ade maaɓuɠa GALA ba, ga de-yii ɲadegai, ta kidaaleʋe laazeeliai, de-yiiti ɲadegai kisiɛ ɲɔi pɛ ma, de-ɓusɛi gbaai ga ziɛ ɲadegai. 
Ade da-ɠitogi zo kpaan, nii ade ma vaa wosu, mazɔlɔɔ zɔi é minazeɠegi wogai, toɠa ga wooɠɛɠila nu. 
Ɛsɛ ge wɛlɛ bɔɔla ma, ade ɠilagilagi pɛ, ga de ɓɔɠɔ iɲɔdɔ nɛɛbɛi ziɛ vai zu, ta kɛɛwoti ʋagɔiti kɛɛ vai. 
Ade mina ɠɛ ga tanigaani kɛʋele, de ʋa ɠɛlɛ da-maaɓɔgi ʋa, kɛlɛ ade ɓɔɠɔ iɲɔdɔ, eɠɛʋelei vɔlɔ wo ɠaazu Maliɠii ná-tukpɔɠaaleʋe voloi ʋa la, maa ɗa ɓuɠa. 
Mazɔlɔɔ de gaamai ɠwɛɛga ʋoluma, ni da ɠɛna kotoi ɠɛa kenein ga gaaɠilimai, zalaɠa nɔpɛ ge la mɔ ná ade ʋɛ, nii a kotoiti kpe, 
kɛni nɔ niina tukpɔi maaɓɔun fai ma luai, ta abuzo golai kɛʋele ɓɛtɛai ga é kpaka nuiti gala! 
Nui ta a la Moize ná-tɔgi ɠoloɠolona, ti la ɠɛni maawɔinɠaa, ti ɓena paa, ga zeele felegɔ ɓaa saʋagɔ ná-zeele wooi maaʋele. 
Nimizai ma zii ɓɛgele ɠa maanɛai é zei naama nui ma, zɔi é ɓaaɠulazu GALA Doun Zunui ma, ta minazeɠegi GALA ge bogai, naama ɲamai é naa leve ga wafuun faa, nii é tɔun ɲadeni, é Zɛnvu Ɲadegai ʋoomu, nii zaalai zɔlɔɔsu ga maaʋele? 
Mazɔlɔɔ de naa ɠwɛɛ, zɔi é ɠɛni ma: «Nà ɠa gè ga potokula nui, nà ɠa gè ɛsɛ gilagilagi zalazu!» É ɠɛ ma mɔnɔ: «Maliɠii ɠa ná-nuɓusɛiti tukpɔɠaaleʋe.» 
Naa maayikiʋɛ, ga nu loo zɛnvu su ƓALAGI yeezaama! 
À ɠizɛ naama volo mɔungiti su, wo ɓegai ma ga GALA ná-wozakalagi zɔlɔɔ, wo ɓɔlɔni gola, kɛlɛ wo loni kpaan, wo kɔɔ ɲɔi naa ɠɔ. 
Wo tanigaa ti ɠɛni ʋoomusu, ti zopele ɗa ɲɔu kɛlɛi zu, zɔiti ma ti ɠɛʋele ɓɛtɛai wo zaama ga ti ɓɔ naati ba, niiti ti ɠɛni ti zopele ɲɔuzu ɠana. 
Wo wɔnɔ zɔlɔɔni kasoɠa nuiti ta-ɓɔlɔi zu, wo va bu ga koozunɛ wo-yeaɠɔligiti ti ɗa ɠula wo ya, mazɔlɔɔ wo ɠɛni kwɛɛ ga ania zɔlɔɔga niiti ti vizɔgai, ti yɛsu ná ɠɔ. 
À mina ɠɛlɛ wa-ladalai ʋa, kulanuma wolai ɠa ba. 
Wo ɓɛdɛi ɠa ziilɔɔi ʋa, naa ɠa a kɛ wo naa ɠɛ, nii é ga GALA ziimai, wo ʋa naa zɔlɔɔ, nii é ma minazeɠe bogai. 
Sɛʋɛʋɛ GALA Sɛʋɛi zu ga: «Ná tago nɔ ʋe niina, su la mɔ ɠoozani, zɔi maanɛai é ʋa, toɠa ʋa niina, é la mɔ lɛbisu. 
Zɔi telebogai gàazu, naa ɠa zɛnvui wo ga kidaaleʋei maaʋele, kɛlɛ ni a ɠalena ma ga ʋoluʋelei, ná-fai la zoga zìi ma.» 
Adɔun, de la ga naama nuiti, niiti ti ɠalesu ma ga ʋoluʋelei, ti undaaʋili, kɛlɛ ada ga nuiti kidaaleʋei ti ya, ada ɠizosu. 
