﻿Eɓulu.
8.
Faiti gi ti wosu, nii ɠa é ga ma ɓii golai: Zalaɠa ɠula ɠundiɠi wolai ɠa ade yeema, toɠa zeini geeɠɔlɔgi zu, GALA Maayikiai ná-kpɔkpɔgi yeezazuʋɛ. 
Toɠa zalaɠa ɠula ɠundiɠi wola wotii ɠɛɛzu seizu ɲadegai, seɠe ʋɛlɛ ɲadega ɠitei wu, nii Maliɠii togai, nu laade é ʋa naa ɠɛ. 
Zalaɠa ɠula ɠundiɠi wolaiti pɛ sei ungi ɠa ga, ti ɗa vebɛaniiti teʋe GALA pɔ ta ti ɗa zalaɠaiti kula. Fizɔgɛ ada-zalaɠa ɠula ɠundiɠi wolai ɓalaagi ma ga ani ɠɛ zea, a teʋe. 
Ni é ɠɛni eteai zu, é la ɓena ɠɛ ga zalaɠa ɠula nu, tɔɔzei zalaɠa ɠula nuiti ta miná niina, niiti ti vebɛaniiti kulazu ga zalaɠai, eɠɛʋelei tɔgi bogai la. 
Naati ta botii ɠɛɛzu, é nɔ ga geeɠɔlɔgi zu aniiti baaɠulabai, ta ti-maaniinigi. Zekana Moize tɛnɛ gooi zɔlɔɔni da, siɛgi zu é ɠɛni seɠe ʋɛlɛ ɲadegai losu da. GALA ge ɠɛni ma: «Dama, è kɛ ga naama ɠazaʋigi nɔ, nii é lɛɛni ga ɗe gizei ma.» 
Kɛlɛ niizu, Yesu ná-botii wɔɔlɔʋɛ tɔnɔi ʋa gola, mazɔlɔɔ toɠa ga zɔɠɔzuɓɛtɛ nui minazeɠe niinɛi ná-faa zu nii fizɔgai gola, nii kpɛtɛai ga minazeɠegiti ti vizɔgai. 
Ni peelalazu la ɠɛni minazeɠe mɔungi ʋa, nu ɓɛdɛ la ɓena ɠɛ felesiɛ ʋa. 
Tama zeli ɠa GALA ge ɠɛni tosu ná-nuɓusɛiti ma, siɛgi zu é ɠɛni ti ma la: « ‹Naama voloiti ta ʋaazu, yeei gè ʋaazu minazeɠe niinɛi wosu da Izilayɛle nuɓusɛiti bɛ, ta Zuda nuɓusɛiti.› Maliɠii wooi ɠana. 
‹É la ɠɛa eɠɛ minazeɠegi gè kɛɛni ti-mɛmɛwolani bɛ, voloi gè ti zoni da ti-yee ʋa, ga gè ti ɠula Ezipete yooi ʋa. Ti la ɠɛɛni ga wooɠɛɠila nu nà-minazeɠegi ʋɛ, nà ɓalaagi, gè ʋoluaveni ti ʋa,› Maliɠii wooi ɠana. 
Maliɠii wooi ɠaa: ‹Kɛlɛ wɛlɛ minazeɠegi ʋa, gè bosu Izilayɛle nuɓusɛiti bɛ, naama voloiti poluma. Nà nà-tɔgiti dɔ ta-ɠisiɛiti su, gè ti zɛʋɛ ti-yiimaʋɛti. Nà ɠɛ ga ta-ƓALAGI, ti ɠɛ ga nà-nuɓusɛiti. 
Nu nɔpɛ kpɛdɛ la mɔ ɠɛa ba ga é seiɲɔɠɔ ɠala, ɓaa kɛɛɠɛloun, é ʋa ɠɛ ma: Maliɠii ɠwɛɛ! Mazɔlɔɔ ti pɛ ta kwɛ̀ɛ, é zo doungoiti ma ti zaama, é zeeli nu ɠiteiti pɛ ma. 
Mazɔlɔɔ nà ta-lelebotala vaiti suvaayɛ, gè la mɔ ta-ɠotoiti devea ti unma.› » 
GALA ga ɠɛna minazeɠe niinɛi ma vaa woga, é ma mɔungi ɠɛa ga ma wɔlɔma. Tama zɔi kɛai ga ma wɔlɔmai, é wɔlɔzaɠaga, toɠa na ʋa ɲɛɛlɛzu. 
