﻿Eɓulu.
7.
Mɛlekizedɛke ɠɛni ga Salɛme masagi, é ɠɛni ga GALA nii é Anii-Pɛ-Unda, naa ná-zalaɠa ɠula nui. Siɛgi zu Abalaame ɠɛni ʋaazu la, é zeɠe kɔɔmaʋɛ, ʋɛ é pilɛ sɔlɔɔni ná masagiti ma, Mɛlekizedɛke daaɠomini, é tuya loo bɛ. 
Tɔ ɠa Abalaame kɔɔzoganiiti pɛ ma ʋuusiɛi veeni zea. Mɛlekizedɛke laaseigi ʋoluʋɛ ɠa ga «telebo masagi», naa ʋolu ɓalaa Salɛme masagi, nii poluʋɛ ga «ziilɛi masagi». 
GALA Sɛʋɛi la kɛɛɠɛ ná-faa woni, ɓaa dee, ɓaa mɛmɛwolani mavofodai. É la sɔlɔɔ faa woni, ɓaa saa vaa. Ná-fai ʋokɔɠɔgɛ GALA Doun Zunui ná-fai ma, toɠa ga zalaɠa ɠula nui eyɛsu ɠɔ. 
Tama à naa wɔɔlɔ ʋelei ʋɛtɛ dɛɛ, nui nii mɛmɛwola Abalaame ɓɔɠɔi kɔɔzoganiiti pɛ ma ʋuusiɛi veeni zea. 
Levi mavofodaiti ti ga zalaɠa ɠula nuiti, devei veai ti ya, eɠɛʋelei tɔgi la, ga ti puusiɛi ɠula ti-ɠɛɛlointi zea, Izilayɛle nuɓusɛiti, tama ta naati ti pɛ ti ɠulaai Abalaame zu. 
Mɛlekizedɛke la ɠɛni ga Levi mavofodai ta, kɛlɛ é puusiɛi zɔlɔɔni Abalaame ya, é tuya loo naa ʋɛ, nii é GALA ná-minazeɠegiti sɔlɔɔni. 
Tama maaɠaali nɔpɛ ge la naa zu, zɔi bɔɔlɔai, naa ɠa a ɗa tuyai loo naa ʋɛ, nii zeemaalɔiɗai. 
Levi mavofodaiti ti aniiti ma ʋuusiɛiti feezu ti ya, ta ga nuiti ti zaazu, kɛlɛ Mɛlekizedɛke ɠa ga nui nii ná-faa wogai maaɓakpa ga toɠa vulua. 
Tama Levi nii puusiɛi veezu zea, toɠa veezu naa ya ga Abalaame maaʋele. 
Mazɔlɔɔ é ɠɛni dɛ kɛɛɠɛ ɓusɛi zu, siɛgi zu Mɛlekizedɛke liini la naa laaɠomisu. 
Tɔgi é veeni Izilayɛle nuɓusɛiti zea ɠani, naa un ge zeini Levi zalaɠa ɠula ʋelei ʋa. Ni tama faiti pɛ gaavɔnini ga Levi nuiti ta-zalaɠa ɠula wotii, leeni ɠa a la nuɓusɛiti kpɛdɛ ɠɛ ʋolu zalaɠa ɠula nu ɠili ba, ga Mɛlekizedɛke ɠɛʋele, nii é la ga Aalɔn ɠɛʋele? 
Mazɔlɔɔ siɛgi zu zalaɠa ɠula vai maavalibosu la, kɛni ɓalaa tɔgi maavalibo. 
Tama, zɔi niima vaiti ti wosu ná-faa zu, naa ɠa ga bolodai taɠili su nu, nii su nui tanɔpɛ ge la dɛ zalaɠa ɠulazuʋɛ ma wotii ta ɠɛɛni. 
Mazɔlɔɔ koleʋɛ gola ga de-Maliɠii zɔlɔɔni Zuda ná-bolodai zu. Moize la ɠɛni faa nɔpɛ boni bolodai naa ná-faa zu, é ʋa ʋilɛ zalaɠa ɠula nu vaa ʋa. 
Fai nii ɠa é niima vaiti pɛ kolezu mɔnɔ: Zalaɠa ɠula nu ɠili ge wuzeɠeni, nii é ɠɛni ga Mɛlekizedɛke ɠɛʋele. 
Zalaɠa ɠula nu ɠiligi, naa la ɠɛni zeini ga tɔgi maaʋele nii togai é ʋilɛ nuɓusɛi mavofodai ʋa, kɛlɛ kɛni zɛnvui é la ɠoloɠologa, naa ná-zɛbɛi. 
Mazɔlɔɔ niima zeele wooi woni ná-faa zu ga: «Ɗa ga zalaɠa ɠula nui eyɛsu ɠɔ, eɠɛʋelei Mɛlekizedɛke ɠɛni la.» 
Naa ɠa é kɛa, devei ma mɔungi zeɠea ga, tɔɔzei ná-zɛbɛsulalai ʋa, ta kulanuma la ba. 
Mazɔlɔɔ tɔgi la ani nɔpɛ daazeelini. Tama kitogi fizɔgai, nii de maaɓuɠazu GALA ba saɓu zu, naa ʋa potogi zu. 
Naama ge la ɠɛni ɠɛɛni GALA ná-kona wogai ʋolu. Zɔiti ti ɠɛni ɠɛɛzu ga zalaɠa ɠula nuiti, kona vaa la ba. 
Kɛlɛ Yesu ɠɛni ga zalaɠa ɠula nui ga konai maaʋele GALA ge boni, siɛgi zu é ɠɛni tɔun ma la: «Maliɠii ɠonani, tama é la zeɠea woo ʋolu, é ɠɛni ma: ‹Ɗa ga zalaɠa ɠula nui eyɛsu ɠɔ.› » 
Naa ma, Yesu ɠɛa ga minazeɠegi fizɔgai naa maazuɓaa nui. 
É ɓudɛ naa maazu, zalaɠa ɠula nu mɔinmɔingaa ti ʋaa ti leʋe, mazɔlɔɔ saai pele leʋeni ti luɠɔ, ga ti ʋa yɛ botii zu ɠɔ. 
Kɛlɛ Yesu ná-zalaɠa ɠula wotii la ɠulaa zea, é ʋa ve taɠili zea, mazɔlɔɔ toɠa vulua eyɛsu ɠɔ. 
Naa ɠa é ba, toɠa zoo é naati kizo ga pagɔ, zɔiti ti maaɓuɠazu GALA ba ga tɔun maaʋele, mazɔlɔɔ toɠa vulua ɠɔoɠɔ ga é ɗa soloogi wo ti ʋɛ. 
Yesu ɠa ga zalaɠa ɠula ɠundiɠi wolai, nii soloogai ade ma, ɲadegai, sɔ ge la ba, é la ɠɔzɔni, zɔɠɔzu ɠa ti ʋa ta kotoba nuiti, tɛɛʋɛ geeɠɔlɔgi ungaʋɛ. 
Maavaa la ba, eɠɛʋelei zalaɠa ɠula ɠundiɠi wolai zɔiti ti la, ga folo-o-folo é ɗa zalaɠaiti kula tɔ ɓɔɠɔi ná-kotoiti faa zu, naa ʋolu nuɓusɛiti ta-ɠotoiti faa zu. É zalaɠai ɠula laa ɠɛni ɠila kpe nɔ ná ɓe, siɛgi zu é ɓɔɠɔ ɠulani la ga zalaɠai nuɓusɛiti ta-ɠotoiti faa zu. 
Moize ná-tɔgi nuiti toni ga zalaɠa ɠula ɠundiɠi wolaiti, ti ga zɛbɛsulala nuiti. Kɛlɛ GALA ná-minazeɠe kona laawooi é woni tɔgi ʋoluma, naa ɠa é Doun Zunui zeiɗai ga zalaɠa ɠula ɠundiɠi wolai, nii ná-fai pɛ daazeeliai eyɛsu ɠɔ. 
