﻿Eɓulu.
2.
Naa ɠa é ba, de maanɛɛʋɛ de ɠili kpaan kala gooiti ba, de ti mɛnigai, naa ɠa a kɛ, de mina ʋilɛ de undaaʋili pelei ʋa. 
Mazɔlɔɔ wooi geezuɠeelaiti ti daazeelini, ni naa ɓikpini, tɔ koloɠolo nui pɛ ta woomɛnitala nuiti pɛ ti zalai zɔlɔɔni nii soloogai ti-ɠɛɛwotiiti ma, 
naazu da zoo ɠale de ɠizo, ni da kizo faa wolai tɛi kɛɛna ga faalakoba vaa? Kizo fai nii Maliɠii ɓɔɠɔi boni mɔunpa, naa ʋoluma mɛni nuiti ti bo ti maaɓakpa ade ya, 
GALA ge ta-zeele wooiti maaɓakpa ga poogiti, ta maaɓɛlɛ vaiti, ta laavɔɔ vaiti, naa ʋɛɛ Zɛnvu Ɲadegai ná-vebɛaniiti ba, é ti ɠaaɠwɛɛni, eɠɛʋelei ziimai la. 
Tɔɔzei eteai é ʋaazu, nii gè ná-fai zuɠulazu, GALA ge la zobogi veeni geezuɠeelaiti zea ga ti zei eteai naa unda. 
Nui ta niima zeele wooi wogɛ adaʋɛ ta GALA Sɛʋɛi zu, é ɠɛ ma: «Nuɓusɛi ɠa ga leeni, è ʋa ɠigaiziɛ su? Nui ɠa ga leeni, è ʋa yiizoolɛ la? 
È dɔiʋɛ geezuɠeelaiti ba yeeɠɛɠala go laawu, è lɛbiyai ta unfemai veeʋɛ bɛ, ti ɠɛ unma ga masa bɔɔlɔgi, 
è aniiti pɛ puuʋɛ ná-zobogi wu.» Siɛgi zu GALA ge aniiti pɛ dɔai la nui ná-zobogi wu, é la tanɔpɛ zɛni ʋoluzu, nii é la ɠoloni bɛ. Tama anɛɛ naa ʋe, de la dɛ pɛtɛsu niizu ga aniiti pɛ ti ɠoloa nui ná-zobogi ʋɛ. 
Kɛlɛ nii de pɛtɛsu niizu, naa ɠa é ga, Yesu lɔini geezuɠeelaiti ba yeeɠɛɠala go laawu, naa ɠa a kɛ, GALA ná-zaalai maaʋele ma, é za nuɓusɛiti pɛ bɛ, da kaazu niina, lɛbiyai ta unfemai ti veai bɛ, ti unma ga masa bɔɔlɔgi, tɔɔzei saai ʋa é sɔlɔɔni. 
GALA ka é eteai ɓɛtɛa, ta eteai ɠa ná tɔun bɛ. Tama nɛɛʋɛ bɛ ga é ná-dointi ma mɔinmɔin pɔɔkpɔ ná-lɛbiyai ʋa. Tɛi tama Yesu ɠa é ti ɠizosu, kɛni naa a la daazeelii pɛ sɔlɔɔ GALA zea ga kpɔlɔi maaʋele. 
Yesu ɠa é nuiti ɲadesu ta-ɠotoiti ma, tama, tɛigi é nuiti ɲadesu, ta niiti é ti ɲadegai, ti pɛ ti-lɔkulugi ɠa ɠila kpe nɔ. Naa ɠa é ba, Yesu la unfega ga ti loli fai ga kɛɛɠɛlointi. 
Naa ɠa é kɛɛni é ɠɛni la GALA ma: «Nà zeze ga è-laaseigi kɛ̀ɛleaiti saama. Nà è maamusɛ wuyei loo maaɓɔgi zaama.» 
É ɠɛni ma mɔnɔ: «Nɔ̀un nà, nà-kitogi pɛ ka ɠɛ ga GALA nɔ.» Ta mɔnɔ: «Giya ɠaa, gá dointi GALA ge ti veai zèa.» 
Tama, ʋelei naama lointi ti la ga kpusɛi ta ɲamai nɔnɔiti, tɔ ɓɔɠɔi ɓalaa ɠɛni ga ti ɠɛʋele, naa ɠa a kɛ é naa ɠoloɠolo ga ná-saai maaʋele, zɔi saai ma zobogi zea, naa ɠa é ga Inɛgi, 
é naati unmɔɔ, niiti kpein ti ɠɛni eɠɛ duɔiti ta-luai maaʋele ma saai ʋa ti-zii ma voloi pɛ su. 
Mazɔlɔɔ koleʋɛ ga geezuɠeelaiti taade é ʋa ʋa ɓɔsu ti ʋa, kɛlɛ Abalaame mavofodaiti ka é ɓɔsu ti ʋa. 
Naa ɠa é ba, kɛni a la ɠula ga kɛɛɠɛleaiti fai pɛ su, naa ɠa a kɛ, é ɠɛ ga zalaɠa ɠula ɠundiɠi wolai, daavegai ga gaazumaawɔinɠai, é ga wooɠɛɠila nu GALA ná-botii zu, ga é nuɓusɛiti ta-ɠotoiti gba. 
Mazɔlɔɔ, tɛi tɔ ɓɔɠɔi é ɓɔlɔni, siɛgi zu tɛgai zeelini la ma, toɠa zoo é ɓɔ naati ba, niiti tɛgai zeelizu ti ma. 
