﻿Sɛʋɛi Nii Teʋegai Eɓulu Nuiti Ma.
1.
Mɔungi zu, GALA ge ɓɔɛni ade-mɛmɛwolani pɔ, ná zeizu mɔin, ta kɛʋele mɔinmɔin su, ga GALA goo wo nuiti maaʋele. 
Kɛlɛ niima voloiti su, ti ga yeeɠɛɠala ɠaaɓelagiti, é woo ʋua ná-Doun Zunui la, naa ɓɔɛ la ade ʋɔ. Tɔ ɠa é yiimazeɠea la ga é anii pɛ pu zeezu. Tɔ ɠa é eteai ɓɛtɛni ga tɔun maaʋele. 
Doun Zunui tɔna ka é ga GALA ná-lɛbiyai ma voloi, é ga GALA ɓɔɠɔi ʋaaɠulabai. Tɔ ɠa é kpɛtɛanii pɛ suzosu ga daawooi ná-zɛbɛi. Kpegai ma ga kotoiti gba vai ɠɛ, é zeini geeɠɔlɔgi zu maazuʋɛ poun, GALA Maayikiai yeezazuʋɛ. 
Doun Zunui wɔɔlɔʋɛ gola, é leʋe geezuɠeelaiti ba, ʋele nɔ ɠana é la ɓalaa, é daasei sɔlɔɔgɛ, nii bɔɔlɔai naati tɔnɔi ʋa. 
Mazɔlɔɔ geezuɠeelai ɓɛgele ɠa GALA ge ɠɛni ma: «Ɗa ga dòun zunui, za, gè è ɠɛa ga dòin.» Ɓaa mu mɔnɔ: «Nà ɠɛ bɛ ga ɠɛɛɠɛi, tɔun ge ɠɛ bɛ̀ ga doun zunu»? 
Siɛgi zu GALA ge Doun Zunu mɔungi leʋeni da eteai zu, é ɠɛni ma: «GALA ná-geezuɠeelaiti pɛ ti nɔkɔ bu!» 
Niima wooi ɠa é boni geezuɠeelaiti ta-vaa zu: «Tɛigi a ɗa ná-geezuɠeelaiti kɛ ga fiilɛi, é ná-botiɠɛ nuiti kɛ ga abuzogi.» 
Kɛlɛ GALA ge ɠɛni Doun Zunui ma: «Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ, ɗa-masa tukpɔi ɠa ga telebo tukpɔi. 
Telebodai nɛɛʋɛ è ʋɛ, è tɔ koloɠolo fai wɔinzeɠe. Naa ɠa é ba, GALA, ɗa-ƓALAGI gulɔi ziɛni è ma, koozunɛ wulɔi, é yiimazeɠe ga ɗe è ɠɛɠalaiti saama.» 
É ɠɛni ma mɔnɔ: «Ɗa ɠa, Maliɠii, è eteai lɔɔɓadɔni tɔɔzeizu mɔunpa, geeɠɔlɔgi ɠa ga è-yeei ná-kpɛtɛanii. 
Ta ɲɛɛlɛ, kɛlɛ ɗɔun ɗa ná eyɛsu ɠɔ. Ti pɛ ta wɔlɔzaɠa eɠɛ seɠei, 
è ti ʋɛɛ su, è ti ɓili eɠɛ tookɔba wolai, ti maa ɠa valibo eɠɛ seɠei. Kɛlɛ ɗɔun, ɗa yɛsu ɠɛʋele ma, ɗa-ɠonagiti ti la ɓega ɠɔ!» 
Geezuɠeelaiti su, ɓɛgele ɠa é ɠɛni ma: «Zei zèezazuʋɛ, eyɛsu gè è zili nuiti kɛ ga ɗa-ɠɔɠɔloma anii»? 
Geezuɠeelaiti ti pɛ tɛi ti ʋa ɠɛ ga zɛnvuiti ti GALA ná-botii ɠɛɛzu ɓaa? É ti leʋesu ga ti kpɔba ve naati bɛ ti maanɛai ti kizogi zɔlɔɔ. 
