﻿1 Timɔte.
4.
Zɛnvu Ɲadegai ɠa dɛɛzu kpezekele ga tanigaa ta ɠɛlɛ kidaaleʋei ʋa yeeɠɛɠala ɠaaɓelagiti su, tɔɔzei ta ɠili kaka zɛnvuiti ba, ta inɛgiti ta-ɠalagiti. 
Ta ɓɔɠɔ yɛsu ná, ti ɠaka ga zɛɛ wo nuiti ta-wooveledai maaʋele, niiti ta-ɠisiɛi zaai na, eɠɛ kɔlu ɓɔii a ziɛ ma, é gala. 
Nui naati ta kalagi wosu ga é la ʋani ga nu anza zei, ta kɛni nu daamianigi tanigaa maaɲɛ. Kɛlɛ GALA ge naama laamianigiti kpɛtɛʋɛ ga kidaaleʋe nuiti ti gaamai ɠwɛɛ, ti mi faanɛɛ wuuɠwɛɛgai zu. 
Mazɔlɔɔ nii kpein GALA ge kpɛtɛai, ti pɛ pagɛ, tanɔpɛ ge la ná, nii nu a ɠɛlɛ ba, ni nɔ nu ɠa seɠezu ga faanɛɛ wuuɠwɛɛgai GALA bɛ, 
tɔɔzei GALA daawooi ta GALA falii ɠa é ti pɛ ɲadesu. 
Ni ɗa niima ɠalagi wona ga de-ɠɛɛleaiti, ɗa ɠɛ ga Yesu Kilista ná-botiɠɛ nu ʋagɔi, kɔnɔgi ga kidaaleʋei ma wooiti ta gaama ɠalagi, nii è ʋilɛgai polu ga pagɔ. 
Kɛlɛ ɠɛlɛ ɠimalala vaalaaliiti ba, niiti ti la zolooni kidaaleʋei ma. Ɠaaɓa GALA gaazuluabai zu, 
kpusɛi ná-maaɠoloi losu go ɠa ba. Kɛlɛ GALA gaazuluabai vizɔgɛ fai pɛ su, zɛnvui é wosu eteai nii zu, naama minazeɠegi ɠa su, ta zɛnvui é ʋaazu wosu etea niinɛi zu. 
Naama wooiti ta ga lada ɓɔɛi, maanɛai ɛsɛ pɛ ge yeezei bu. 
Naa ɠa é ba, gá botii ɠɛɛzu, gi ɗa ɲɛpii ɠɔ, tɔɔzei ba ga gi ɠitogɛ zɛnvu su ƓALAGI ʋa, é ga nuɓusɛi pɛ Kizo Nui, ma un ge daa ma ga kidaaleʋe nuiti. 
Niima vaiti ka ɗa ti-ma levei ve, è ma ɠalagiti bo. 
Mina va bu nu nɔpɛ ge ʋa sumɔ ɗa-loungo vai ma, é ʋa è ʋɛlɛʋɛlɛ, kɛlɛ ɠɛ kidaaleʋe nuiti bɛ ga poo pagɔ, è ɓɔɛ ʋelei zu, è-ziɛ ʋelei zu, ɗa-nɛɛbɛi zu, ɗa-ɠidaaleʋei zu, ta ɗa-ɲadedai zu. 
Eyɛsu gè ʋa, ɠaaɓa, è ɗa GALA Sɛʋɛi ɠala gaalɛbaiti su, è ɗa tɛnɛgi wo, è ɗa nuiti kala. 
Mina yeema zɛnvu zu vebɛanii ma, è sɔlɔɔni, GALA ná-kulakɛlɛma vai zu, siɛgi zu Egilisi lotuɠɔiti ti yeelaani la è ma. 
Ɠaaɓa, è niima wotii ɠɛ, è ɓɔɠɔ ve zea ɲɛgɛlɛin, naa ɠa a kɛ ɛsɛ pɛ ge è ɠa, è ɗa li luɠɔma. 
Dama ga ɓɔɠɔ, è dama ga ɗa-ɠalagi wo pelei, lo kpaan naa pɛ su. Mazɔlɔɔ ni ɗa naa ɠɛɛzu, ɗa ɓɔɠɔ ɠizosu, è naati ɓalaa kizo, niiti ti woilosu è-woo ma. 
