﻿Pɔle Ná-Sɛʋɛi Velesiɛi É Teʋeni Tesalonike Nuiti Ma.
1.
Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti. 
Ɠɛɛɠɛ GALA ta Maliɠii Yesu Kilista ti zaalai la wo ma, ti ziilɛigi ve wo ʋɛ. 
Kɛ̀ɛleaiti, gi maanɛɛʋɛ gi mamagi ve GALA bɛ yeenɔpɛ wa-vaa zu, gaamazu naa zɔlegɛ, mazɔlɔɔ wa-ɠidaaleʋei ɠa liizu luɠɔma gola, nɛɛbɛi é wo yɔɠɔzu, naa ɠa liizu ga wɔɔlɔa. 
Gá unbuzeɠei lɛɛzu wa-vaa zu GALA ná-Egilisiiti su, tɔɔzei ʋelei wo loni la kpaan, ta ʋelei wa-ɠidaaleʋei la wɔinzeɠemaiti ta kpɔlɔiti pɛ saama wo sɔlɔɔsu. 
Kpɔlɔi nii ɠa é ga GALA ná-telebo tukpɔɠaaleʋei ma ʋoogi, naa ɠa é dɛɛzu ga wa zoloo GALA ná-masadai zɔlɔɔ fai ma, nii wo kpɔlɔi zɔlɔɔsu maaʋele ma. 
Soloogɛ ga GALA ge kpɔlɔi zei naati zea, niiti ti wo ɓɔlɔ vai laazu wo ya. 
Wɔiti wo kpɔlɔi zu, GALA ge dooɠogi ve wo ya, ta gá ɓɔɠɔi gi ya, siɛgi zu Maliɠii Yesu ɠulazu la kɛlɛma, é zeɠe geeɠɔlɔgi zu, ta ná-geezuɠeelaiti, zɛbɛ wolai ti ya. 
Toɠa ʋa abuzogi zaama, ga é naati sala, niiti ti la GALA kwɛɛ, ti la ɠolozu Woo Niinɛ Ʋagɔi ʋɛ, é ʋilɛ de-Maliɠii Yesu ʋa. 
Ta ti-zalai zɔlɔɔ ga ɠɔoɠɔ undaaʋiligi, ti maaɠooza, ti zeɠe Maliɠii ɠaazu, ti maaɠooza ná-zobogi ma lɛbiyai ʋa, 
siɛgi zu é ʋaazu la naama voloi, ga é lɛbiyai zɔlɔɔ ná-nuiti zea, niiti ta ɠidaaleʋe ma. Wa ɠɛ naati saama niiti ta maawui, tɔɔzei wo ɠidaaleʋeni gá-zeele wooi ma, gi boni wo ma. 
Naa ɠa é ba, gá GALA falizu wo ʋɛ yeenɔpɛ, nii a kɛ ada-ƓALAGI wo ɠɛʋele ɓɛtɛ, wo zoloo toligi ma, é bogai ga woye. Gá falizu ná-zɛbɛi zu, ga faa ʋagɔi nii pɛ wo wɔinɗai ga wo kɛ, é naa laazeeli wo ʋɛ ga pagɔ, é wa-ɠidaaleʋei ma ɠɛɛwotii ɠaavɔni, 
naa ɠa a kɛ Maliɠii Yesu laaseigi lɛbiyai zɔlɔɔ wo maaʋele ma, wa ɓalaa wo lɛbiyai zɔlɔɔ tɔun maaʋele ma, eɠɛʋelei da-ƓALAGI ná-zaalai la, ta de-Maliɠii Yesu Kilista. 
