﻿1 Tesalonike.
2.
Kɛ̀ɛleaiti, wa ɓɔɠɔi wo suɠwɛɛ ga gi ʋaa vai wo ʋɔ bɛ, gi la ɠɛni ʋaani ná wafuun. 
Gi kpɔlɔi zɔlɔɔga ʋoluma Filipe, ta ɓaaɠulama vaiti, eɠɛʋelei wo kwɛɛ da, GALA ge ziiɓaai veeni gi ʋɛ, gi GALA ná-Woo Niinɛ Ʋagɔi laazeeli wo ma, sakpegiti saama. 
Tama toligi gi bosu ga nuiti, é la ɠulazu kaka faa zu, ɓaa kigaiziɛ ɲɔu zu, gi la ba ga gi nu nɔpɛ yaava. 
Tama gá ɓɔɛzu yeenɔpɛ eɠɛʋelei GALA ge pɔ la, mazɔlɔɔ tɔ ɠa é vaani bu, é Woo Niinɛ Ʋagɔi ɠaliva gi ma. Gi la ɠɛɛzu kɛni gi nɛɛ nuɓusɛa ʋɛ, kɛlɛ kɛni GALA nɔ, nii é nu yiimaʋɛ vaiti fɛɠɛlɛfɛɠɛlɛsu. 
Eɠɛʋelei wa ɓɔɠɔi wo kwɛɛ la, gi la nu lɛsu ɓɔɛ woni. Gi la woo nɛɛnɛgaa woni, wɔin ʋa ɠɛ gi ma ga gi nu ná-wali ɠula zea, GALA ka ga gá-zeelei. 
Gi la lɛbiya nɔpɛ gaiziɛni nuiti zea, anɛɛ wo ʋɔ bɛ, ɓaa zɔiti pɔ bɛ, 
tama ʋelei gi la ga Kilista ná-keelaiti, gá la zoo gi da wo ma ga maaɓaai. Kɛlɛ gi ɠɛni ga nu ʋagɔiti wo zaama, eɠɛ doun deei é ná-dointi sɛsɛbosu. 
Wo nɛɛ ʋelei ma gi ʋɛ, gi ɠɛʋele ɓɛtɛni, é la nɔ ga gi GALA ná-Woo Niinɛ Ʋagɔi ve wo ya, kɛlɛ gi ɓɔɠɔ yɛnvuiti ɓalaa, mazɔlɔɔ wo loni gi-yii ʋa gola. 
Kɛ̀ɛleaiti, wo-ɠi ka su, ʋelei gi botii ɠɛɛni la, gi kpɔlɔi zuzo, gi botii ɠɛ folo ʋɛɛ kpidi ʋa, ga gi mina ɠɛ ga kasɔ wo tanɔpɛ unma, siɛgi zu gi ɠɛni GALA ná-Woo Niinɛ Ʋagɔi laazeelizu la. 
Wa ga naa ma zeeleiti gi ʋɛ, ta GALA ɓalaa, gi ziɛ ʋelei wo zaama, wɔiti wo ɠidaaleʋeai, naa ɠɛɛni ɲadedai zu, ta telebodai, peelalazu nɔpɛ ge la ɠɛni gi ʋa wo letema. 
Wo suɠwɛɛ ɓalaa ga gi naa ɠɛɛni wo ɠilagilagi ʋɛ, nii doun kɛɛɠɛ a kɛ ná-dointi bɛ, 
gi wo lɛnɛ, gi wo iɲɔdɔ, gi ɠili wo ma, ga wo-ziɛ ʋelei zoloo GALA ziimai ma, tɛigi é wo loligai ga wo wɔnɔ zɔlɔɔ ná-masadai zu ta ná-lɛbiyai. 
Gá mamagi veezu ɓalaa GALA bɛ yeenɔpɛ, tɔɔzei siɛgi zu gi GALA daawooi laazeelini la wo ma, wo yeezeini bu, wo la soni ga nuɓusɛ laawoo ʋe, kɛlɛ wo soni ga GALA daawooi. Tama toɠa ga naa ɠiteɠite. Tɔ ɠa é botii ɠɛɛzu wo-yiimaʋɛ, wɔiti wo ɠidaaleʋeai. 
Kɛ̀ɛleaiti, wo ʋokɔɠɔgɛ Zudé Egilisiiti ma, ti ga GALA ná-nuiti, ti ɠidaaleʋeai Yesu Kilista ma. Wo kpɔlɔi zɔlɔɔni wa-you zu nuiti zea, ga naama wɔinzeɠemai ma ziiti nɔ, nii ti sɔlɔɔni, tiya ɓɔɠɔi, ta-nuiti zea, ti ga Zuifuiti. 
Tiya ɠa ti Maliɠii Yesu ʋaani ta GALA goo wo nuiti. Ti gi wɔinzeɠeni. Ti la GALA ɛnɛkɛni, ta ga nuɓusɛiti pɛ sili nuiti. 
Ti ɠaaɓaani, ti pele leʋe gi luɠɔ, ga gi mina ɓɔɛ zii ɠiligiti pɔ, ti ʋa kizogi zɔlɔɔ. Ta ta-ɠotoi laazeelizu, nii ti kɛa yeeɠɛɠalai pɛ daawu. Kɛlɛ GALA ná-ziiɠaawanai ɓega ga zeeli ti ma. 
Kɛ̀ɛleaiti, gɔun gi letemazu, ade balini ma kpusɛi zu yeeɠɛɠala go laawu. Kɛlɛ ada-ɠisiɛiti ti la balini ma. Wɔin wola ɠa gi ma, ga gi wo ʋɛtɛ ʋolu, gi ɠaaɓaani ga gi naa ɠɛ. 
Wɔin ɠɛni gi ma ga gi ɠale ma, gi ʋa wo ʋɔ bɛ. Nà Pɔle, gè ɠaaɓaani ná zeizu ɠɛ mɔinmɔin, kɛlɛ Setana pele leʋeni gi luɠɔ. 
Tama wa laade ɓaa, wo ʋa ɠɛ ga gá-ɠitogi, ta gá-ɠoozunɛɛi, ta gá-vɔnifaamai ma zalai, gá ɠɛ ɲaɠai ɠulazu la ade-Maliɠii Yesu ɠaazu, siɛgi zu é ʋaazu la? 
Ungo, wa ɠa wo ga gá-lɛbiyai ta gá-ɠoozunɛɛi! 
