﻿Pɔle Ná-Sɛʋɛ Mɔungi É Teʋeni Tesalonike Nuiti Ma.
1.
Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti. Zaalai la wo ma, ta ziilɛigi ve wo ʋɛ! 
Gá GALA mamasu yeenɔpɛ wo pɛ wa-vaa zu, gi ɗa wa-vaa wo yeenɔpɛ gá-ƓALA faliiti su. 
Wa-ɠidaaleʋei ma luʋa ʋele ʋagɔi ta wa-nɛɛbɛi ma wotii, naa ʋɛɛ wa-ɠitogi wɔɔlɔ ʋelei ʋa de-Maliɠii Yesu Kilista letegi, gá ɠizɛsu naati su GALA gaazu nii é ga ade-Ɠɛɛ. 
Kɛ̀ɛleaiti, gi suɠwɛɛ ga GALA ge wo nɛa ʋɛ, é yiimazeɠe ga woye, ga wo ɠɛ ga ná-nuiti. 
Mazɔlɔɔ gi la Woo Niinɛ Ʋagɔi laazeelini wo ma ga kpɔɛzuɠulai letelegi nɔ, kɛlɛ gi kɛɛni ɓalaa ga zɛbɛi, ta Zɛnvu Ɲadegai ná-kpɔbai. Naa ʋoluma, gi wola laani naa la, nii gi ɠɛni bosu. Wo suɠwɛɛ ʋelei gi ziɛni la wo zaama, é ɠɛ wo ʋɛ ga faa ʋagɔ. 
Wo ʋilɛni gi-ɠɔɠɔ ʋogi ʋa, ta Maliɠii nɔnɔi. Wo kpɔlɔ mɔinmɔin sɔlɔɔni, kɛlɛ tama wo GALA daawooi zɔlɔɔni ga Zɛnvu Ɲadegai ná-koozunɛɛi. 
Naa ma wo ɠɛa ga poogi kidaaleʋe nuiti pɛ bɛ Masedoane yooi zu ta Akayi yooi. 
Mazɔlɔɔ Maliɠii laawooi zeɠeni wo ʋɔ bɛ, daazeeli Masedoane ta Akayi yooi pɛ su, kɛlɛ é la ɠwɛni miná, wo ɠidaaleʋe vai GALA ma, naama wooi vazaga mini-o-mini, gi ɓɛdɛ la mɔ ba ga gi ʋa naa ta wo. 
Mazɔlɔɔ ti pɛ ta bosu, ʋelei wo yeezeini la gi wu, gi ʋaai ma wo ʋɔ bɛ, ta ʋelei wo ɠɛlɛni la kɔɔɠɔ ganigiti ba, wo lati GALA ma, ga wo ɗa botii ɠɛ zɛnvu su ƓALAGI ʋɛ, é ga GALA kitei, 
wa ná-Doun Zunui Yesu maaɓɔunsu, é ʋa, é zeɠe geeɠɔlɔgi zu. Tɔ ɠa GALA ge buzeɠeni, é kula saai ya, tɔ ɠa é de ɠulazu GALA ná-ziiɠaawanai wu, nii é ʋaazu. 
