﻿Efɛze.
4.
Nɛ̀i gè ga kasoɠa nui, botii maaʋele ma gè kɛa Maliɠii ʋɛ, nà wo maanɛɛnɛzu deɠɛmu, wo-ziɛ ʋelei zoloo naama loligi ma bogai ga woye: 
À ɓɔɠɔmaayei, wo ɠɛ ga nu zɛsɛbo nu, wo ziilɔɔi ʋɛɛ naa ʋa. À yeezei ɓɔɠɔ wu wo ɠilagilagi pɛ nɛɛbɛi zu. 
À ɠaaɓa, wo gilibalai makɛ, nii Zɛnvu Ɲadegai feezu wo ya, ziilɛigi zu nii é wo ɠilizu ʋa. 
Ada ga kpusɛ ɠila kpe nɔ, ta Zɛnvu Ɲadega ɠila kpe nɔ ɠa é ná, eɠɛʋelei nɔ kito gila kpegi la, nii GALA ge wo loligai ma. 
Maliɠi ɠila kpe nɔ ɠa é ná, ta kidaaleʋe ɠila kpe, naa ʋɛɛ ɓatize ɠila kpe ba, 
GALA gila kpe ka é ná, nii é ga ɛsɛ pɛ Kɛɛɠɛ, é nuiti pɛ unda, é kɛɛwotii ɠɛɛzu ga nuiti pɛ maaʋele, é yɛ nuiti pɛ ba. 
Kɛlɛ de ɠilagilagi pɛ de losu zɔlɔɔgɛ yɛ, é zoloo kɔɠɔgi ma Kilista feeni ga vebɛanii. 
Naa ɠa é ba, GALA Sɛʋɛi ɠɛni: «É lɛɛni maazuʋɛ, é liini ga kɔɔ luɔiti, é vebɛaniiti fe nuɓusɛiti bɛ.» 
Naa ʋoluʋɛ ɠa ga leeni ga: «É lɛɛni»? Naa ɠa bosu ga, é yeini dɛ zooi wuʋɛ ma adaʋɛti. 
Zɔi zeiɗai, tɔ ɠila nɔ ɠa é lɛɛni geeɠɔlɔgi maazu ʋelei poun, naa ɠa a kɛ é fai pɛ daazeeli. 
Tɔ ɠa é nuɓusɛiti tosuʋɛti feai, tanigaa ti ɠɛ ga keelaiti, tanigaa GALA goo wo nuiti, tanigaa Woo Niinɛ Ʋagɔ laazeeli nuiti, tanigaa GALA ná-baala kpulugiti makɛ nuiti ta nuiti kala nuiti, 
naa ɠa a kɛ GALA ná-nuiti suzeeli, nii a kɛ ti zoo ti ta-wotii laazeeli, ta Kilista ɓusɛi lii vai zu luɠɔma, 
eyɛsu ade pɛ de ɠɛ ga ani ɠila kidaaleʋei ma ɠilibai zu, ta GALA Doun Zunui ɠwɛɛgai zu, de ɠɛ ga nu ɠiteiti, de zuzeeli, é zoloo Kilista ná-suzeelii ma. 
Naazu, de la mɔ ɠɛa ga doungoa, kala kiligiti ma viilɛi ʋa ɗa de li tingotanga, nuɓusɛiti ta-yaavaiti zea, ti nuiti pilɛsu kaka pelei ʋa ga ta-ɠeleɠele ɲɔiti. 
Tama, kɛni gaamai wo fai maaʋele ma nɛɛbɛi zu, de ɓaɠo fai pɛ su Kilista letemazu, nii é ga ma ungi. 
Tɔun saɓu zu ɠa é kɛɛzu kpusɛi ʋaalobazuʋɛ ɠilagilagi pɛ togai la ɓɔɠɔ ʋa kpaan, kpusɛi pɛ ge ɠili ɓɔɠɔ ʋa ga todazuʋɛti pɛ, ti veai zea. Naazu ti ɠilagilagiti pɛ ta ɠɛna losuʋɛ ɠɛa, ʋelei maanɛai é ɠɛ la, kpusɛi pɛ ka wɔɔlɔzu, é lii luɠɔ nɛɛbɛi zu. 
Wɛlɛ deɠɛmu nii ɠa gè bosu wo ma Maliɠii laaseigi zu, gè maaɓakpa, toɠa ga: Wo maa la mɔ nɛɛni, wo ʋa ziɛ eɠɛʋelei nui niiti ti la, ti la GALA kwɛɛ, ti ziɛzu la, ta-ɠeleɠelegi la faa nɔpɛ paazu ti ma. 
Ta-ɠisiɛi zuɓidiʋɛ, ta ga wɛɛin zɛnvui vaa ma, nii GALA ge feezu, tɔɔzei ta-vaaɠaaɠalala wolai ʋa, ta ta-ɠikpaa ɲɔiti. 
Ti ti ɠɛʋele ʋagɔi pɛ toa ya, ti ɓɔɠɔ lɔa ɓaaɠulama vai zu, ti ɗa kɔzɔba vai ma zii pɛ kɛ ga ɓɔɠɔzotalai. 
Kɛlɛ wɔun, zetaale wo ʋa Kilista ná-fai ɠala da! 
Dàaʋɛ da ga wo ná-fai mɛnigɛ, ti wo ɠala da, é zoloo gaamai ma, é Yesu ya. 
Wo maanɛɛʋɛ deɠɛmu wo nu wɔlɔmalai ta ma ziɛ ʋelei ɠula ɠɔba, nii é ɠoloɠolosu gaazuɠulapɔi ma yaavai zu. 
Kɛni wo niinɛ mɛtu wo-yɛnvui ta wa-ɠisiɛi zu, 
wo ɓɔɠɔ maaɠili ga nu niinɛlai, kpɛtɛai é zoloo GALA kɛʋelei ma, naa ɠa a kɛ wo eteai ziɛ telebodai ta ɲadedai zu, niiti ti zɔlɔɔsu gaamai zu. 
Naa ɠa é ba, à ɓe zɛɛi ʋa! Wo ɠilagilagi ɗa gaamai wo seiɲɔɠɔi ma, mazɔlɔɔ ada ga kpusɛ ɠilagi ʋaalobaiti. 
Wa yiiɠaawanana, à mina koto ɠɛ. Ziiɠaawanai mina yɛ wo ɠɔbu, foloi a ʋa da. 
À mina pele tanɔpɛ fe Inɛgi ya. 
Zɔi é ɠɛa unmai wosu, é mina mɔ unma wo, kɛlɛ é botii ɠɛ, é boti ʋagɔi ɠɛ ga ɓɔɠɔ yeei, naa ɠa a kɛ, ani ɠɛ zea, é ɓɔ tanigaani ba, ti ɠula ti ɓɛdɛma vaiti su. 
À mina kpɔɛ ɲɔu nɔpɛ bo, kɛni nɔ kpɔɛ zɔɓelamai, nii a ɓɔ zɔiti ba, ti li luɠɔma kidaaleʋei zu, é ɓɔ nu ʋa maavai zu, é faa ʋaa mɛni nuiti ma. 
À mina GALA Zɛnvu Ɲadegai yiiɓɔlɔ. Tɔ ɠa GALA ge kɛai wo ma ga poogi, unmɔɔ folo ɠaaɓelagi vaa ma. 
Faawanama vai, ziiɠula fai, ziiɠaawana vai, zɔngɔma vai, tɔɠɔ ɠoloɠologi, ta keleɠele ɲɔi ma zii pɛ, naa pɛ ge ɠula wo zaama. 
À nuɓɔɠɔlai ta maawɔinɠai ɠɛ wo ɠilagilagiti pɛ. À ɓɔɠɔ zuvaayɛ wo ɠilagilagiti, eɠɛʋelei GALA ge wo zuvaayɛga da, ga Kilista maaʋele. 
