﻿Galate.
4.
Tama, ni pogani zeɠe nui ɠa dɛ doungoyai zu, ta duɔi ta ga ɠɛʋele, anɛɛ ni tɔun ka é ga anii kpein maliɠii, 
tɔ ɓɔɠɔi ɠa yɛ dɛ gwɛlɛma nuiti ta naavolo unda nuiti zeezu, eyɛsu kɛɛɠɛ ná-yeeɠɛɠala leveai zeeli. 
Ada ɓalaagi, zenɔ ɠana é ɠɛni la, ade ɠɛai ma dɛ doungoyai zu, ade ɠɛni duɔlai zu zobogiti zeezu niiti ti zeini eteai nii unda. 
Kɛlɛ yeeɠɛɠalai é leveni, naa zeeliai ma, GALA ge ná-Doun Zunui leʋeni, é zɔlɔɔ anzanui ta ʋa tɔgi wu, 
naa ɠa a kɛ, zɔiti ti tɔgi wu, é naati unmɔɔ, ta é ade ɠɛ ga GALA dointi. 
Tɛi wo ga ná-dointi, GALA ge ná-Doun Zunui ná-Zɛnvui leʋegɛ, é zei ade-yiimaʋɛti, é ɗa wooɠula, é ɗa ɠɛ ma: «Aɓa!», naa ɠa ga «Kɛ̀ɛ!» 
Naa maaʋele ma, è la mɔ ga duɔ, kɛlɛ ɗa ga doin. Ni tama è ɠɛa ga doin, ɗa ɗɔnɔ zɔlɔɔ naa zu, nii GALA ge minazeɠeai la. 
Mɔungi, wo la ɠɛni GALA kwɛɛ, wo ɠɛni duɔlai zu naati zea, niiti ti la ga gala kitea. 
Kɛlɛ niizu niina wo GALA kwɛɛga, é ɓudɛ naa maazu, GALA ge wo ɠwɛɛga ga ná-nuiti, lee vaa zu wo ɠalesu ma ʋolu eteai zu yɛnvuiti ma, zɛbɛ ta tosu la ti ʋa. Wa pɔ ga wo lɔ ʋolu naati ta-luɔlai zu ɓaa? 
Wa fɛti voloiti sosu, ta alugi tanigaa, ta yeeɠɛɠalai tanigaa, naa ʋɛɛ konagi tanigaa ʋa! 
Ee! Nà luazu gola, ga botii kpein gè kɛa wa-vaa zu, naa mina ɠɛ zèa ga wafuun faa! 
Kɛ̀ɛleaiti, nà wo maanɛɛnɛzu, à ɠɛ ga kɛ̀ʋele, mazɔlɔɔ nà ɓalaagi nà ga wo ɠɛʋele. Wo la telebotala vaa nɔpɛ kɛɛni ga ze. 
Wo suɠwɛɛni ga, seeɓɛ vaa ɠa é kɛɛni, gè Woo Niinɛ Ʋagɔi laazeelini la wo ma, ma mɔungi zu. 
Seeɓɛi é ɠɛni bà, naa ɠɛni wo ʋɛ ga ʋoluɠula vaa, wo la ɠɛni ɠɛɛni bà kpɛɛluu, wɔ̀in la zeɠeni wo ma. Tɔun, wo yeezeini bù eɠɛ GALA ná-geezuɠeelai, eɠɛ Yesu Kilista ɓɔɠɔi. 
Wo wola ɠoozunɛɛni názu! Lee ɠa kɛai niina ga woye? Mazɔlɔɔ nà zeele wooi nii wosu wo ʋɛ, ga ni a la zoo ɠɛɛzu, wo ɓena wo-ɠaazuɠɛzɛiti kula su, wo ti ve bɛ̀. 
Gè ɠɛa niizu ga wo zili nui, tɛi gè gaamai wosu wo ma ɓaa? 
Gilimai ti bosu ga woye, faa ʋagɔ laade. Ti wɔinni ti wo zeɠe bà, nii a kɛ wo ɠili ti ʋa. 
Pagɛ ga wo ɠili faa ʋagɔi ɠɛɛ vai ʋa siɛnɔpɛ su, é la nɔ ga siɛgi zu gè ɠɛɛzu la wo zaama. 
Dòinti, nà doun zɔlɔɔ koozuwanai zu ga niinɛ wa-vaa zu, eyɛsu wo ɠɛ ga nu ɠiteiti Kilista ná-faa zu. 
Wɔin ɠa mà niizu, ga gè ɠɛ wo zaama, gè kpɔ̀ɛ wooi maavalibo, mazɔlɔɔ zìi ɠa zoolɛzu gola ga wa-vaa! 
À bo dɛɛ mà, wɔi wo wɔinni wo wa-eteai ziɛ tɔgi wu, wo la tɔgi wooi mɛnisu ɓaa? 
Mazɔlɔɔ sɛʋɛʋɛ GALA Sɛʋɛi zu ga Abalaame doun zunu felegɔ zɔlɔɔni, gilagi ɠɛni ga duɔ anzanui nɔnɔi, gilagi ɠɛ ga anzanui é ga wɔɔlɔi, naa nɔnɔi. 
Kɛlɛ duɔ anzanui ná-doun zunui zɔlɔɔni ga kpusɛi ná-faa ɓɛtɛai maaʋele, tama anzanui é ɠɛni ga wɔɔlɔi, naa ná-doun zunui zɔlɔɔni ga GALA ná-minazeɠegi ɓabii. 
Niima vaiti ta ga faalaalii: Anzanu felegɔi niiti ta ga minazeɠe felegɔiti. Minazeɠegi gilagi, naa ɠa é ga Agaal, é ga Sinayi gizei nɔnɔi, é dointi sɔlɔɔsu, ti ga duɔiti. 
Agaal ɠa ga Sinayi gizei, é Alaɓe yooi zu, naati ka ti ma ta Zeluzalɛme nii é ná niizu, tɔɔzei toɠa ga duɔi ta ná-dointi pɛ. 
Kɛlɛ Zeluzalɛme é geezuʋɛ, toɠa ga wɔɔlɔi, tɔ ɠa é ga ade-lee. 
Mazɔlɔɔ sɛʋɛʋɛ GALA Sɛʋɛi zu ga: «Ɠoozunɛ, ɗɛi è ga doun zɔlɔɔtala anzanui, è la doun zɔlɔɔsu! Ɠoozunɛ, è wooɠula la, ɗɛi è la doun ɠoozuwana wosu! Mazɔlɔɔ anzanui kɛlɛi wogai ba, ná-dointi ta mɔin gola, é leʋe anzanui nɔnɔi ʋa, nii é zini bɛ.» 
Wɔun, kɛ̀ɛleaiti, wo zɔlɔɔgɛ eɠɛʋelei Izaake zɔlɔɔni da, ga GALA ná-minazeɠegi ɓabii. 
Kɛlɛ ʋelei nɔ zɔi é zɔlɔɔni ga kpusɛi ná-faa ɓɛtɛai maaʋele, é ɠɛni zɔi wɔinzeɠezu la, nii é zɔlɔɔni ga GALA Zɛnvui ná-faa ɓɛtɛai maaʋele, zenɔ ɠana é ɠɛɛzu la niizu. 
Kɛlɛ lee ɠa GALA Sɛʋɛi bosu? «Duɔ anzanui ɓɛ ta ná-doun zunui, mazɔlɔɔ duɔ anzanui ná-doun zunuiti ti la ɓɔga poganii ma, ta wɔɔlɔ anzanui ná-doun zunui.» 
Naa ɠa é ba, kɛ̀ɛleaiti, ade la ga duɔ anzanui ná-dointi, da ga wɔɔlɔ anzanui ná-dointi. 
