﻿2 Kolɛnte.
11.
Ee, nà pɔ ga wo yeezei ɠimalala vai tago wu nɔ̀un bɛ! Ungo, à yeezei bù! 
Mazɔlɔɔ nà wo-ma loloi ɠulazu, ga toloi nii é zeɠezu GALA pɔ, mazɔlɔɔ gè wo maazogɛ zunu ɠila kpe bɛ, nii é ga Kilista. Tama nà pɔ gè wo lɛɛ la eɠɛ anzalopo ɓeai nii ɲadegai. 
Kɛlɛ nà luazu ga wa-ɠisiɛi mina ɠoloɠolo, wo ʋa ɠɛlɛ giliba ɲadegai ʋa, é wo yɔɠɔzu wa Kilista, eɠɛʋelei Ɛve ɓɔɠɔ yɛni na la, kaalii kaka ga ná-zɛɛ ɠeleɠele ɲɔi. 
Mazɔlɔɔ ni ta a ʋaana, é Yesu taɠili ná-faa laazeeli wo ma, é ɠula zɔi ʋolu gi ná-fai laazeelini wo ma, ɓaa ni wa yeezeina zɛnvui taɠili bu, é ɠula zɔi ʋolu wo yeezeini bu, ɓaa woo niinɛ ʋagɔi taɠili, é ɠula zɔi ʋolu wo yeezeini bu, wa yiilɔɔzu naa wu ga gola. 
Tama nà ɠisiɛzu ga gè la lɔini, gè ʋa leʋe naama ɠeelai tanɔpɛ ba, wo ti ʋɛtɛsu ga ti wɔɔlɔʋɛ gola! 
Ni tanisu gè la zooni kpɔɛzuɠula wolai la, kɛlɛ tama gè la ɠana faaɠwɛgi zu. Gi naa lɛɛni wo zaama, é ɠole ʋele-o-ʋele fai pɛ su. 
Siɛgi zu gè GALA ná-Woo Niinɛ Ʋagɔi laazeelini la wo ma, wo la sɔngɔ veeni. Gè ɓɔɠɔmaayeini, nii a kɛ wɔun wo wuzeɠe. Koto ɠa gè kɛai ga naa ɓaa? 
Fàaʋɛ bu zɔɔma Egilisiiti ti ɗa sàla, nii a kɛ nii gè sɔlɔɔsu ti ya, naa yɛ zèa, gè ɗa botii ɠɛ la wo ʋɛ. 
Siɛgi zu gè ɠɛni la wo ʋɔ bɛ, nà la ɠɛna kpalai zu, gè la ɠɛni ɠɛɛzu ga kasɔ nu nɔpɛ unma. Mazɔlɔɔ ɠɛɛɠɛlointi ti zeɠeni Masedoane, naati ti màavai pɛ kɛɛni. Gè ɓɔɠɔ zoni, gè la ɠɛɛni ga kasɔ wo unma fai tanɔpɛ su, tama nà yɛ nɔ ɓɔɠɔ zosu ɠana nɔ. 
Akayi yooi zu ná pɛ, nu nɔpɛ ge la zooga pele leʋesu tùɠɔ ga gè ʋa naama ɠoozunɛɛi ɠula. Kilista zaalai zu, nii é zìimaʋɛ, nà zoo ɠɛɛzu ma, gaamai ʋe. 
Leeni vaa zu gè nii wosu? Gè la wo nɛɛni ʋɛ ɓaa? GALA ge kwɛɛ! 
Nii gè kɛɛzu, nà yɛsu naa ɠɛɛzu nɔ, naa ɠa a kɛ, gè goozuɠulagi ɠula naati zea, niiti ti pɔ ga ti ada go nɔ ɠa, ti ʋa waso ga giye, eɠɛ ta ɠɛ botii ɠɛɛzu ga gi ɠɛʋele. 
Naama nuiti ta ga zɛɛ ɠeelaiti, yaava wotiɠɛ nuiti, ti ɓɔɠɔ ʋotesu ga Kilista ná-keelaiti. 
Naa tanɔpɛ ge la ga laavɔɔ vaa, tɔɔzei Setana ɓɔɠɔi ɠa ɗa zoo é ɓɔɠɔ ʋote ga wozakalagi ma ɠeezuɠeelai ta. 
Naa la ɠulaa nu ma ga wɛɛn, ni ná-botiɠɛ nuiti ta zoona ti ɠaazu ʋote ga telebodai ná-botiɠɛ nui ta. Kɛlɛ ti-ɠaaɓelagi ɠa ɠɛ eɠɛʋelei ta-ɠɛɛwotii la. 
Nà bosu mɔnɔ, nu nɔpɛ ge mina dève ga ɠimalala nu. Ni tama wa dèvena ga ɠimalala nu, à yeezei bù ga ɠimalala nui, naa ɠa a kɛ gè zoo gè ɓɔɠɔ lago maamusɛ. 
Tama nii gè bosu niina, naa la ga nii Maliɠii pɔ, kɛʋelei niizuʋɛ gè liizu ga ɓɔɠɔ maamusɛa ná, nà ɓɔɛzu eɠɛ ɠimalala nu. 
Tɔɔzei ma mɔinmɔin ka ɓɔɠɔ maamusɛzu ga kpusɛ zu vai, nà ɓalaagi nà ɓɔɠɔ maamusɛzu. 
Wɔi wo ga ɠima nuiti, wa yiilɔɔzu ɠimalala nuiti bu! 
Wa yiilɔɔzu ti zei wo unda eɠɛ wa ɠɛ ga duɔiti, ti wo yea mi, ti wo yaava, ti waso wo ma, ti wo loɠa wo-ɠaazuʋɛti! 
Nii gè bosu, toɠa ga unfe faa, gi dɛɛʋɛ ga gá ga zɛbɛsulala nuiti naa letegi zu! Tama nà ɓɔɛzu ɠani eɠɛ ɠimalala nu, kɛlɛ ni nui ta ɠa zoo ɓɔɠɔ maamusɛzu fai ta zu, nà ɓalaa nà zoo ɓɔɠɔ maamusɛzu. 
Ta ga Eɓulu nuiti? Nà ɓalaa gè ga ta. Ta ga Izilayɛle nuiti? Nà ɓalaa gè ga ta. Ta ga Abalaame mavofodaiti? Nà ɓalaa gè ga ta. 
Ta ga Kilista ná-botiɠɛ nuiti ɓaa? Tama, nà ɓɔɛzu eɠɛ ɠi pa ge la mà, tèʋegɛ ti ʋa poun. Gè boti ɠɛɛʋɛ, é leʋe ti ʋa, gè kasoiti kɛɛni, gè doɠaiti sɔlɔɔ, gè ɠɛni saai ma vaaɓaagiti daawu ɠɔ. 
Zuifuiti ti dòɠaa laa ɠɛɛni lɔɔlu, naa ɠilagilagi pɛ kpakɔ ɲɛ ʋuusaʋagɔ maazu taaʋuu (39). 
Ti dòɠani ná zeizu ɠɛ saʋa ga kpakui. Ti sɔ̀ɔ laa ɠɛɛni ɠila, ti ʋa pàa ga kɔtui. Kein golai ɠoloɠoloni ga ze, ná ɠɛ saʋa, keingi ɗa ɠoloɠolo ga giye kpoloɗɛi wu. Gè folo ɠila ta kpidi ɠila kɛɛni kpoloɗɛi wu. 
Nà-siɛ mɔinmɔingiti su gè ɠɛni ti wosu, gè ziɛ wolaiti ta-vaaɓaagiti kwɛɛni, ta toosu nuiti ta-vaaɓaagiti, ta nà-nuɓusɛiti Zuifuiti ta-vaaɓaagiti, ta zii ɠiligiti ta-vaaɓaagiti, ta taa wolaiti su vaaɓaagiti, ta teʋebai zu vaaɓaagiti, ta kpoloɗɛi ɠaaʋɛ ma vaaɓaagiti, ta zɛɛ ɠɛɛɠɛlointi saama vaaɓaagiti. 
Gè boti ɓaagiti kɛɛni, ta ɲiigaazuɠai yeeɠɛɠala mɔinmɔin daawu. Gè pului ta kpɔɔle wɔin zuzoni, gè ɠɛni pului zu yeeɠɛɠala mɔinmɔin su. Gè ɓɔlɔni ga kɔɔlɛi ta vɛɛloi. 
Gè la zɔɔma vaa ɠiligiti ta woga, nii gè ɓalani la folo-o-folo, naa ɠɛni ga Egilisiiti ma yiizoolɛi! 
Ɓɛ ɠa zɛbɛi a ʋala zea, ni gè la ɠɛɛni ga zɛbɛsulala nu? Ɓɛ ɠa a loo, ni zìi la gàlani? 
Ni kɛɛɠeleɠele ge la ná, kɛni nu ɓɔɠɔ maamusɛ, nà ɓɔɠɔ maamusɛzu nà-zɛbɛsulala vaiti su! 
Mamagi ɠa de-Maliɠii Yesu Kɛɛɠɛ GALA bɛ eyɛsu ɠɔ. É kwɛɛ ga gè la zɛɛ wosu ɲɛgɛlɛin! 
Kɛ̀ai ma Damase taazuʋɛ, kundiɠii masagi Aletase seini, naa ɠɛni wɛlɛzu Damase nuiti ta-laazuʋɛ ma, ga ti ʋa sò. 
Kɛlɛ siɠigi ma venɛtɛlɛi ɠa ti zèini ná kpɔlɔgi zu, gè ɠula zea. 
