﻿2 Kolɛnte.
9.
Toɠa ɠɛ ga wafuun faa ga gè GALA ná-nuiti ti Zeluzalɛme ta-ɓɔba vai zɛʋɛ, gè teʋe wo ma. 
Tama gè wo yiima vaa ʋagɔi ɠwɛɛ. Gè ɓɔɠɔ maamusɛni la wa-vaa zu Masedoane nuiti gaazu, gè ɠɛ ti ma: «Ade-ɠɛɛlointi ti Akayi yooi zu, ti ɠɛʋele ɓɛtɛni ga ti fe kaite konagi teʋegai.» Wa-zɛbɛzeɠei naa ma mɔinmɔin ɲiikpiga ti zaama ga ti ta ɠɛ. 
Naa ma, nà ɠɛɛɠɛloin tɛiti teʋesu wo ma, naa ɠa a kɛ ɓɔɠɔ maamusɛi gi boga wa-vaa zu ti ɠaazu, naa mina ɠɛ ga zɛɛ vaa naazu ta wo ɠɛʋele ɓɛtɛ ɠɛzɛɠɛzɛ, eɠɛʋelei gè boni la. 
Ni naa laade, ni Masedoane nuiti ta ʋaana màazaasu, gi ka ga wo ɠɛʋele la ɓɛtɛni, gá-ɠitogi naa ɠa valibo ga gá-unfegi, tɔɔzei gi la ɠɛa ma wa-unfegi. 
Naa ɠa é ba, gè pɛtɛgɛ ga fizɔgɛ gè ɠɛɛɠɛloin tɛiti maanɛɛnɛ, ti ʋa wo ʋɔ bɛ nɔ̀un tuɠɔ, nii a kɛ vebɛanii nii wo ma minazeɠegi wogai na, ti naama vai zeikpasu, naa ɠa a kɛ wa-vebɛanii naa ɠɛʋele ɓɛtɛai ɠɛ wo ɠoba, wo-ɠi ge la polu, wo feai ga ɠoozunɛɛ ʋele, gaazuɠili la su. 
À kwɛɛ wo ɠɛ: Zɔi é tago nɔ vazasu, naa ɠa tago nɔ leʋe, zɔi é fazasu ga gola, naa ɠa teʋe ga gola. 
Ɛsɛ pɛ ge fe, eɠɛʋelei é deveai la yiimaʋɛ, é mina ɠɛ ga gaazuɠili vaa, ɓaa kpala vaa, mazɔlɔɔ nui é feezu ga ɠoozunɛ ʋele, naama nui ɠa nɛai GALA bɛ. 
Zobogi ɠa GALA bɛ, é ani ʋagɔi ma zii pɛ fe wo ya, é ʋooʋa, naa ɠa a kɛ, anii pɛ ge ɠɛ wo ya yeenɔpɛ, é kula ɠɛ wo-maavaiti pɛ su, mɔtai yɛ ná ga pagɔ kɛɛwoti ʋagɔiti ma vaa ma. 
Sɛʋɛʋɛ GALA Sɛʋɛi zu ga: «É gaaɠwɛa ga bɔɔlɔa bala nuiti ba, ná-nuɓɔɠɔlai ɠa yɛsu ná ɠɔ.» 
GALA é ani zuwui veezu faza nui ya, é daamianigi ve ga ɠɔnɔgi, naa ɠa ani zuwui ve wo ya, nii wo ɓɛdɛi ba, é gaawɔɔlɔ, nii a kɛ wa-nuɓɔɠɔlai gwaai wo gola. 
Naazu wa ɓɛtɛ ani ʋagɔi kpein su, wa zoo wo faanɛɛi ɠɛ ga gola, naa ma, ma mɔinmɔin ka ɗa GALA mama niina, wa-vebɛaniiti faa zu gi gaaɠwɛɛzu ti ʋa. 
Mazɔlɔɔ niima ɓɔba wotii wo kɛɛzu, é la ɠɛɛzu ga GALA ná-nuiti nɔ ti-maavaa ɠɛɛ vai, kɛlɛ toɠa ɠɛɛzu ga GALA mama ungi ma mɔinmɔin bɛ GALA falii zu. 
Botii naa losuʋɛ ma, ta lɛbiyai ve GALA bɛ wa-woozogi ma vaa zu, nii wo Woo Niinɛ Ʋagɔi ɠulazu la kɛlɛma é ʋilɛ Kilista ʋa. Ta lɛbiyai ve ɓalaa, tɔɔzei wa-vaaɓɔɠɔ aniiti faa zu, wo gaaɠwɛɛzu ʋa wa tiyani ta zɔiti pɛ. 
Ta GALA falii ɠɛ wo ʋɛ, ti wo nɛ ʋɛ gola, tɔɔzei zaala wolai naa ʋa, nii GALA ge daai wo ma. 
Mamagi ɠa GALA bɛ ná-vebɛanii vaa zu, nu la pokɔɠɔga ani nɔpɛ ma! 
