﻿2 Kolɛnte.
2.
Gè devea ga gè mina ɠale ma mɔnɔ, gè ʋa li wo ʋɔ bɛ, é ʋa ɠɛ ga ziiɓɔlɔ vaa. 
Mazɔlɔɔ ni nà wo yiiɓɔlɔ vaa ɠɛɛna, ɓɛ ɠa a zoo é nɔ̀un koozunɛ? Naati gila nɔ ʋe, niiti gè ti yiiɓɔlɔ vai ɠɛai. 
Gè sɛʋɛi ɠɛɛni, gè teʋe wo ma eɠɛʋelei gè kɛɛni la, naa ɠa a kɛ, nà ʋaana, gè mina ziiɓɔlɔ zɔlɔɔ naati zea, niiti ti maanɛai ti kòozunɛ. Dàaʋɛ wo pɛ wo la, nà-koozunɛɛi ɠa ga wo pɛ wɔnɔ. 
Gè sɛʋɛi ɠɛɛni, gè teʋe wo ma, gè ɠɛni kidaaʋiligi zu ta ziizoolɛi, gàazuɗɛi ɗa ʋu, wo yiiɓɔlɔ vaa la ɠɛni de, kɛlɛ wo ɠɛ kwɛɛ nɔ, ʋelei gè wo nɛai la ʋɛ. 
Ni nui ta ɠɛa ga wo yiiɓɔlɔ zaɓui, nà laade é ʋa zìiɓɔlɔ, kɛlɛ wo pɛ be, ɓaa wo tanigaani nɔ ʋe, ni de la pooʋazu ma. 
Zeli mɔinmɔingi wo toga ma, naa kula ɠɛa ga ma nui. 
Naa ɠa é ba, maanɛɛʋɛ ga wo suvaayɛ niina, wo iɲɔdɔ, naa ɠa a kɛ ziiɓɔlɔ wolai mina ada ʋɛɛ ba. 
Nà wo maanɛɛnɛzu, à wa-nɛɛbɛi lɛɛ la ga wo-ziɛ ʋelei tɔun pɔ. 
Mazɔlɔɔ nà-sɛʋɛi ɠɛ ungi ɠana: gè wo zuɠɔɠɔ, ni wa ga woo zo nu fai pɛ su. 
Mazɔlɔɔ zɔi wo suvaayɛsu, nà ɓalaa gè naa zuvaayɛga. Siɛgi zu gè suvaayɛgi wosu da, (ni fai ta ɠa ná, nii nà suvaayɛ), nà suvaayɛ wo maaʋele ma Kilista ɠaazu, 
naa ɠa a kɛ, de mina Setana yɛ ná, é ʋa zobo sɔlɔɔ ade ma, mazɔlɔɔ ná-faiti ti la ga de ɠwɛɛtala zu vaa. 
Siɛgi zu gè zeelini la Toloase, ga gè Woo Niinɛ Ʋagɔi laazeeli, é ʋilɛ Kilista ʋa, Maliɠii botii ɠɛ zobo pagɔi ma ʋɛlɛlaʋɛ laalaoni tùɠɔ. 
Anɛɛ naa ʋe, zìizoolɛni ga gola, tɔɔzei gè la ɠɛni ade-ɠɛɛloin Tite ɠaani. Naa ɠa é ba, gè valini Toloase nuiti ma, gè li ga Masedoane ʋele. 
Kɛlɛ mamagi ɠa GALA bɛ, mazɔlɔɔ toɠa losu gi luɠɔ Kilista ná-pilɛ sɔlɔɔgai zu yeenɔpɛ. Toɠa botii ɠɛɛzu ga giye, gi ɗa Kilista ɠwɛɛ fai vaza adaʋɛ pɛ, eɠɛ gulɔ maku nɛɛnɛgi é vazasu adaʋɛ pɛ. 
Gi ɠɛɛʋɛ eɠɛ gulɔ maku nɛɛnɛgi Kilista kulazu ga zalaɠai GALA bɛ, gá ga naa naati saama, niiti ti kizogi zɔlɔɔgai, ta naati ɓalaa bɛ niiti ti undaaʋilisu. 
Zɔiti ti undaaʋilisu, toɠa ga saai ma makugi, é ti lɔɔzu saai zu. Zɔiti ti ɠizogai, toɠa ga zɛnvui ma makugi, é zɛnvui veezu. Ɓɛ ɠa zobogi bɛ, a zoo é niima wotii ɠɛ? 
Mazɔlɔɔ gi la ga ma mɔinmɔin kɛʋele, gi ʋa ɠɛ GALA daawooi zu yaaɠozu, kɛlɛ tɔɔzei GALA ka é gi leʋega, gá gaamai wosu tɔun gaazu ga Kilista ná-botiɠɛ nuiti. 
