﻿1 Kolɛnte.
2.
Kɛ̀ɛleaiti, siɛgi zu gè liini la wo ʋɔ bɛ, ga gè GALA ná-faazeikpasui ma lɔɔɠuzu vaiti daazeeli wo ma, gè la ɠɛni woo woni wo ma, nii gaaɠaazu ɓaai, ɓaa ɠima ɓɔɛ maayikiai. 
Mazɔlɔɔ gè deveni ga gè mina ani ɠili nɔpɛ kwɛɛ, yeeɠɛɠalai zu gè kɛɛzu wo zaama, kɛni Yesu Kilista, Yesu Kilista nii é ɓadɔni saa wului ma. 
Naa ɠa é ba, gè ɓɔɠɔ lɛɛni ga woye ga zɛbɛ la bà, gè ɠɛ duai ta sasuɓali wolai zu. 
Nà-kalagi ta nà-tɛnɛgiti ti la ɠɛni wosu ga nuɓusɛiti ta-ɠeleɠelegi ma ɠimalai, kɛni Zɛnvu Ɲadegai ná-zɛbɛi ma ɠulakɛlɛmai lɛɛ vai, 
naa ɠa a kɛ wa-ɠidaaleʋei mina zɛlɛ nuɓusɛiti ta-ɠimalai ʋa, kɛni GALA ná-zɛbɛi. 
Anɛɛ naa ʋe, ɠimala ɓɔɛi ɠa gi daazeelizu naati ma, niiti ti ga nu ɠiteiti kidaaleʋei zu. É la ga nii eteai devezu ga ɠimalai, ɓaa niima eteai zu ɠundiɠiiti ta-ɠimalai, niiti ti ʋaazu ɲɛɛlɛzu. 
Gá GALA ná-ɠimalai laazeelizu, nii é ɠɛni dɔɔɠui zu eyɛsu za. GALA ge kpɛtɛni ɠana kaite aisa wɔlɔwɔlɔi, é ʋa ɠɛ ga lɛbiyai ade ma vaa ma. 
Eteai niizu ɠundiɠiiti taɠila kpalaa ge la ɠɛni naama ɠimalai ɠwɛɛ. Mazɔlɔɔ ni ti ɠɛni kwɛɛ, ti la ɓena lɛbiya Maliɠii ɓadɔ saa wului ma. 
Kɛlɛ sɛʋɛʋɛ GALA Sɛʋɛi zu ga: «Nii nu nɔpɛ gaazu la dɛ kaani, nii nu woiyeɠe la dɛ mɛnini, nuɓusɛ la dɛ ɠigaiziɛni su, naa ɠa GALA ge kpɛtɛai naati bɛ, niiti ti nɛai ʋɛ.» 
Tama, ada ɠa GALA ge dɔɔɠuzu vai naa ɠulaai kɛlɛma ade ʋɛ ga ná-Zɛnvui maaʋele. Tɔɔzei Zɛnvui ɠa fai pɛ fɛɠɛlɛfɛɠɛlɛsu, anɛɛ GALA ná-faazeikpasui niiti ti lɔɔɠuai gola. 
Nu ɓɔɠɔ yɛnvui nɔ ɠa é ɠigi zu vai ɠwɛɛ. Zekana é la, GALA Zɛnvui nɔ ɠa é GALA kigi zu vai ɠwɛɛ. 
Gá ma, gi la eteai ná-zɛnvui zɔlɔɔni, kɛni Zɛnvui ɓɔɠɔi nii seɠeai GALA pɔ bɛ, naa ɠa a kɛ gi faanɛɛi kpein kwɛɛ, nii GALA ge kɛa gi ʋɛ. 
Gi la naama ɓɔɛiti bosu eɠɛʋelei nui ná-ɠimala ɓɔɛi ma ɠalagi la, kɛlɛ kɛni niiti GALA Zɛnvui kalagi wosu da. Zekana gi zɛnvu zu ɠaama vaiti zɔɠɔzuɠulazu la ga zɛnvu zu ɓɔɛiti. 
Kɛlɛ nui nii GALA Zɛnvui la ziimaʋɛ, é la zooga é ʋa yeezei Zɛnvui tɔna ná-gaama vaiti bu, mazɔlɔɔ naati ta tɔun gaazu ga ɠimalala vaa nɔ. É la zooga é ʋa ti ɠaaɠa, tɔɔzei GALA Zɛnvui nɔ ɠa é ma zobogi veezu pɛ, nu ʋa ti yɔɠɔzuɠwɛɛ. 
Nui GALA Zɛnvui ziimaʋɛ, naa ɠa zoo é fai pɛ ma lukpɔi ɠaaleʋe, kɛlɛ nu nɔpɛ ge la zooga é ʋa tɔun tukpɔɠaaleʋe. 
Mazɔlɔɔ GALA Sɛʋɛi bogɛ, é ɠɛ ma: «Ɓɛ ɠa é Maliɠii ná-kisiɛi ɠwɛɛ, ɓɛ ɠa a zoo é tɔun kala?» Tama adɔun, Kilista ná-kisiɛi ɠa é de ya. 
