﻿Kɛɛwotiiti.
20.
Siɛgi zu zɔngɔi ɓeni la, Pɔle kaladopoiti tolini, é ti lɛnɛ. Naa ʋoluma é valini ti ma, é pele zo, é ɗa li ga Masedoane ʋele. 
É naama yooi zu ziɛni, é ɗa tɛnɛ mɔinmɔin bo ga kidaaleʋe nuiti. Naa ʋoluma é liini Gɛlɛki yooi zu, 
é yɛni miná alu saʋagɔ laawu. É ɠɛʋele ɓɛtɛni niina ga é lɛ ɓatoi zu, é li Siili, eyɛsu é faa ɠwɛɛsu ga Zuifuiti ti yaavai ɠiliʋɛ ma. Naa maaʋele ma, é deveni ga é ɠale ma Masedoane ʋele. 
Siɛɲɔɠɔiti daaseigiti kaa: Ɓelé nui Piiluse ná-doun zunui Sopatɛɛl, Tesalonike nu felegɔi Alisitaake ta Sekɔnduse, naa ʋɛɛ Dɛɛleɓé nui Gaiyuse ʋa, ta Timɔte, naa ʋoluma Azi nuiti Tisike ta Tolofime. 
Naati ti toni da gi luɠɔ, ti li ti ɗa gi ɓɔun Toloase. 
Gɔnɔi, siɛgi zu ɓului nii lɛʋɛ la su naama vɛti voloiti ti ɓeni la, gi lɛɛni ɓatoi zu Filipe taazuʋɛ, gi kɛ ga folo lɔɔlugɔ ziɛi ɠa, gi li gi ti ɠa Toloase, gi kɛ miná ga dɔɔɠɔ ɠila. 
Dɔɔɠɔi ma volo mɔungi, gi ɠaalɛa ɠɛni de ba ga gi ɓului ɠaaɠwɛ ɓɔɠɔ ʋa. Tɛi Pɔle maanɛɛni ga é li poluma zobui, é ɠɛni ɓɔɛzu gaalɛbai zu nuiti pɔ, é ná-kpɔɛi zuɠoozani, eyɛsu kua zaamai zeeli. 
Lanboi wola mɔinni geezu ʋɛlɛi wu, ʋɛ gi ɠɛni ná gaalɛbai zu. 
Zunu loungoi ta ɠɛni zeini fenɛtɛlɛi laaʋɛ, daaseigi ga Etikuse, tɛi Pɔle ɠɛni ná-kpɔɛi wola zuɠoozazu, ɲiimɛnii leʋeni la ga gola, é ɠula geezu ʋɛlɛi zaʋasiɛi zu, é loo zooi ma. Ti buzeɠeni, kɛlɛ é zaani niina. 
Kɛlɛ siɛgi zu Pɔle ʋilɛni da, é maaʋɛɛni zunu loungoi ma, é seɠe é da yeezu, é ɠɛ ti ma: «À mina yiizoolɛ, toɠa vulua!» 
Pɔle lɛai ma ʋolu geezu ʋɛlɛi wu, é ɓului ɠaleɠaleni, é daamii wo. Naa ʋoluma, é yɛni kpɔɛzuɠulai ɠa eyɛsu wozai seɠe ma, é zɛba é ɗa li. 
Ti ʋaani ga zunu loungoi, é vulua, naa ɠɛni ga ɛsɛ pɛ iɲɔdɔɔ va. 
Gɔun, gi toni da Pɔle luɠɔ ɓatoi zu, gi li Asɔse, miná ɠa maanɛɛni ga gi Pɔle zeɠe ná, eɠɛʋelei tɔ ɓɔɠɔi é deveni la, mazɔlɔɔ kɛni a la leʋe ga siɛ kɔɠɔa ʋelei. 
Seeliai ma gi ma Asɔse, gi seɠeni ɓatoi zu, gi li Mitilɛne. 
Gi zeɠe miná, gi yɛ kpoloɗɛi ɠa poluma zobui, gi zeeli Siyo. Naa ʋolu voloi, gi zeeli Samɔse, naa ʋoluma voloi gi leɠa zeeli Milɛ. 
Pɔle deveni ga é leʋe Efɛze ɠoba, naa ɠa a kɛ é mina ɓɔɠɔ ma volo li Azi yooi zu, tɔɔzei é ɠɛni zuvilɛzu ga é li Zeluzalɛme, ni a la zoo ɠɛɛzu ná Pantekote voloi. 
Kɛlɛ Pɔle yɛni Milɛ, é keela leʋe Egilisi lotuɠɔiti tuɠɔ Efɛze ga ti ʋa. 
Siɛgi zu naati ti ʋaani la pɔ bɛ, é ɠɛni ti ma: «Yeeɠɛɠalai kpein ge kɛa wo ʋa, wa ɓɔɠɔi wo kwɛni ʋelei gè ɠɛa ziɛzu la, é lɔɔzei folo mɔungi ma, yee gè ʋilɛni la Azi yooi ma. 
Gè botii ɠɛɛʋɛ Maliɠii ʋɛ ɓɔɠɔmaayeii zu naa ʋɛɛ gɔlɔi ʋa, ta kpɔlɔiti, niiti ti ɠɛni zeizu mà Zuifuiti ta-yaavaiti maaʋele ma. 
Wo kwɛni ɓalaa ga gè la faa nɔpɛ dɔɔɠuni wo ʋa, kɛlɛ gè naa pɛ daazeelini wo ma, ta gè wo ɠala kɛlɛi zu, ta wa-ʋɛlɛiti bu ga nii kpein soloogai wo ma. 
Gè ɠɛni Zuifuiti ta zii ɠiligiti tolisu yeenɔpɛ ga ti ti-ziɛ ʋelei maavalibo, é ʋilɛ GALA ba, ta ti ɠidaaleʋe ade-Maliɠii Yesu Kilista ma. 
«Niima ziɛgi zu nà ɠa gè liizu Zeluzalɛme, Zɛnvu Ɲadegai ɠa é ɠɛ, kɛni gè li. Nɔ̀un, gè la kwɛni nii é kpɔ̀unsu ná. 
Kɛlɛ taai kpein gè leʋesu su, Zɛnvu Ɲadegai ɠa dɛɛzu ga ze, é bo mà ga kasoi ta maanɔɠɔiti ta kpɔ̀unsu. 
Kɛlɛ nɔ̀un zɛnvui la gàazu ga ani nɔpɛ, gè la pɛtɛsu ga sɔɓelama ani nɔpɛ, nii mà yiizoolɛi ma, naa ɠa ga gè kpizɛi ɠaaɓela ta botii, nii gè sɔlɔɔgai Maliɠii Yesu ya, nii é ga gè GALA ná-zaalai ma Woo Niinɛ Ʋagɔi laazeeli. 
«Gè kwɛni niina ga wɔi kpein gè ɠɛa leʋesu wo zaama, ga GALA ná-masadai ma wooi laazeelia wo ma, wo tanɔpɛ ge la mɔ nɔ̀un pɛtɛga. 
Naa ɠa é ba, nà bosu wo ma za ga: Wo tanɔpɛ ma ɲamai ma ɠoto la bà. 
Tɔɔzei gè la GALA ziima vai tanɔpɛ dɔɔɠuni wo ʋa, gè ti pɛ dɛɛʋɛ ga woye. 
Naa ɠa é ba, à makɛ ɓɔɠɔ ma, ta GALA ná-baala kpulugi pɛ ma, nii Zɛnvu Ɲadegai wo zeiɗai unda ga wo makɛ. À ɠaaɓa GALA ná-Egilisii ma, nii é geyaai ga tɔ ɓɔɠɔi ná-Doun zunui ma ɲamai. 
Gè kwɛni ga siɛgi zu gè liizu la, zuluɓu vilɛiti ta lɔ wo zaama, ti la GALA ná-baala kpulugi maawɔinɠaa. 
Wa ɓɔɠɔi wo zaama, nui tanigaa ta wuzeɠezu, ti ɗa zɛɛ ɓɔɛiti bo, nii a kɛ ti kaladopoiti tati ga ti ʋɔ pelei. 
À wɛlɛ ɓɔɠɔ ma mu, wo ɠizɛ su ga kona saʋagɔ laawu, gè la ɓɔlɔni folo ʋɛɛ kpidi ʋa ga wo ɠilagilagi pɛ tɛnɛga yeeta vɔlɔ ga gɔlɔi. 
«Niizu, nà wo veezu GALA ta ná-zaalai ma wooi ya. Zobogi ɠa GALA bɛ ga é wo wɔɔlɔ kidaaleʋei zu, ta é tuyai loo wo ʋɛ, nii é makɛgai nu ɲadegaiti pɛ bɛ. 
Gàazu la ɠulani nu nɔpɛ ná-wali ɓaa zanu, ɓaa nu ná-seɠea ʋa. 
À wɛlɛ zèeiti ba, wa ɓɔɠɔi wo kwɛni ga niiti ka ti màavaiti gaaɠulaai ba, ta zɔiti ɓalaa ti ɠɛa pòlu. 
Gè dɛɛʋɛ ga woye kɛʋelei pɛ su ga ʋele ɠana wo maanɛai wo botii ɠɛ la, nii wo ɓɔsu da zɛbɛsulala nuiti ba, wo ɠizɛ ɓalaa Maliɠii Yesu ɓɔɠɔi wooi zu, nii é boni ga: ‹Undaanɛɛ ɠa faanɛɛ ɠɛ nui ʋɛ, é leʋe naa ʋa, nii é sɔlɔɔsu.› » 
Siɛgi zu é ɓeni la ga naama wooiti bo, é ʋilɛni ɲiibiɠa ga ti GALA fali ʋɔɔma. 
Ti pɛ ti veleveleni Pɔle ɠɔbu, ti ɗa wola wɔlɔ, ti ɗa nɛɛnɛ. 
Pɔle wooi é boni ti ma ga: «Wo la mɔ gàazuʋɛ ʋɛtɛga,» naa ɠa é ti wola yiizoolɛni. Ti liini ti pu ga pele ɓatoi ʋɔ bɛ. 
