﻿Zan.
16.
«Gè niima vaiti bogɛ wo ma, nii a kɛ wo mina ʋa ɠɛlɛzu kidaaleʋei ʋa. 
Ta ʋaazu wo ɓɛɛzu GALA dɛbi ʋɛlɛiti bu. Yeeɠɛɠalai ta ɠa ʋaazu vɔlɔ, niiti ta ɠɛ wo ʋaazu, naati ta ɗa ɠisiɛ ga GALA ka ti dɛbizu ɠana. 
Ta naa pɛ kɛɛzu, tɔɔzei ti la Kɛ̀ɛ ɠwɛɛni, ti la nà ɓalaa kwɛ̀ɛ. 
Gè niima vaiti bogɛ wo ma, nii a kɛ siɛgi zu ma yeeɠɛɠalai zeelizu la, wo-ɠi ge loo su ga gè boni wo ma. Gè la kɛɛni gè ʋa bo wo ma kaite tɔɔzeizuʋɛ, mazɔlɔɔ gè ɠɛa dɛ wo ʋa.» 
«Niima ziɛgi zu, nà ga li naama nui ʋɔ bɛ, nii é tèʋegai, tama wo tanɔpɛ ge la gàazaɠasu ga ‹Mini ɠa è liizu ná?› 
Kɛlɛ tɛi gè niima wooiti boga wo ma, naa ɠɛa wo ʋɛ ga ziiɓɔlɔi. 
Tama gaamai ɠa gè bosu wo ma ɠani ga: Fizɔgɛ wo ma ga gè li, tɔɔzei ni gè la liini, Kpɔba Nui la ʋaa wo ʋɔ. Kɛlɛ ni nà liina, nà teʋe wo ma. 
Siɛgi zu é ʋaazu la, toɠa eteai zu nuɓusɛiti ta-ɠakagi lɛ ga tiye, é ʋilɛ kotoi ʋa, ta telebodai, naa ʋɛɛ GALA ná-tukpɔɠaaleʋe ʋelei ʋa, 
é ʋilɛ kotoi ʋa, tɔɔzei ti la ɠidaaleʋeni mà, 
é ʋilɛ telebodai ʋa, tɔɔzei nà ga li Kɛ̀ɛ ʋɔ bɛ, tama wo la mɔ pɛ̀tɛga, 
é ʋilɛ GALA ná-tukpɔɠaaleʋe ʋelei ʋa, tɔɔzei zɔi é zeini eteai nii unda, naa ná-tukpɔi ɠaa ɓega ga leʋe. 
«Faa mɔinmɔin kiligaa ta dɛ bɛ̀ ga gè bo wo ma, kɛlɛ naati buiʋɛ wo ma dɛ, ga wo ʋa ziɛ bu. 
Siɛgi zu Gaama Yɛnvui ʋaazu la, toɠa lo wo luɠɔ gaamai pɛ su. Wooi nii pɛ a ɠɛ bosu wo ma, é la naa woga nɔ ɓɔɠɔ ʋɛ, kɛlɛ nii pɛ é mɛnigai, naa ɠa a bo, toɠa ʋelela ʋele vaiti bo wo ma. 
Toɠa nà-lɛbiyai ɠula kɛlɛma, tɔɔzei nii é zèa, naa nɔ ɠa a ta zeɠe su, é bo wo ma. 
Nii nɔpɛgi é Kɛ̀ɛ ya, naa ɠa ga nɔ̀nɔ, naa ɠa é kɛa gè ɠɛɛzu la wo ma, nii é zèa, naa nɔ ɠa Zɛnvu Ɲadegai ta zeɠezu su, é bo wo ma.» 
«Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu.» 
Ná-kaladopoi tanigaa ti ɠɛni ɓɔɠɔ ɠaazaɠasu ga: «Lee ɠa é pɔ é bo ade ma ga niima wooiti: ‹Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu›? Ta gooi é ɠɛɛzu ma: ‹Nà ga li Kɛ̀ɛ ʋɔ bɛ›? 
Yeeɠɛɠala goi nii ɠani é vaazu ma, naa ʋoluʋɛ ɠa ga lee? Ade la ɠite kwɛɛ, nii ɓɔɠɔɓɔɠɔgi é ɠɛɛzu é bo.» 
Yesu gaaɠaani ga ta pɔ ti gaazaɠa, é ɠɛni ti ma: «Wa ɓɔɠɔ ɠaazaɠasu naama wooi ʋoluʋɛ ma, nii gè bogai wo ma ga: ‹Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu›? 
Gè bo wo ma ga gaamai, wa wɔlɔ, wo ɗa ɓɔɠɔ maawɔin, naama ziɛ su, eteai ɗa ɠoozunɛ. Wa ɠɛ ziiɓɔlɔi zu, kɛlɛ wa-yiiɓɔlɔi ɠa valibo ga koozunɛɛi. 
Doun zɔlɔɔ koozuwanai ɠaana anzanui ʋa, toɠa ɗa ɠɛ bɛ ga ziiɓɔlɔi, tɔɔzei ná-yeeɠɛɠalai zeelia, kɛlɛ siɛgi zu é doin zɔlɔɔsu da, toɠa ɗa yeema ná-soolɛi ma, tɔɔzei koozunɛɛʋɛ ga nui ta ʋa eteai zu. 
Wa ɓalaagi, ziiɓɔlɔi ɠa wo su niima ziɛgi zu, kɛlɛ nà ʋaazu wo ʋɛtɛsu ʋolu, naazu wo-yiimaʋɛ laa ɠa ve ga koozunɛɛi, tama nu nɔpɛ ge la zooga wa-ɠoozunɛɛi ɠulazu wo ya. 
Naama volo ná, wo la mɔ gàazaɠaga faa nɔpɛ ma. Gè bo wo ma ga gaamai, nii nɔpɛ wa fali Kɛ̀ɛ ma ga dàaseigi, toɠa fe wo ya. 
Zaaɠaza, wo la dɛ faa nɔpɛ falini ga dàaseigi. Tama à fali, wa sɔlɔɔ, naa ɠa a kɛ wa-ɠoozunɛɛi laazeeli.» 
«Gè niima vaiti bogɛ wo ma ɠani faalaaliiti su, kɛlɛ yeeɠɛɠalai ta ɠa ʋaazu, gè la mɔ ɓɔɛa wo ʋɔ ɠana, nà ɓɔɛ wo ʋɔ kpezekele, é ʋilɛ Kɛ̀ɛ ʋa. 
Naama volo ná, wa wo ɓɛdɛma vaiti fali Kɛ̀ɛ ma ga dàaseigi. Gè la vɔlɔ ɠɛɛzu wo ma, nà Kɛ̀ɛ vali wo ʋɛ. 
Tɔɔzei Kɛ̀ɛ ɓɔɠɔgoi wo nɛɛʋɛ ʋɛ, mazɔlɔɔ wo nɔ̀un nɛa ʋɛ, wo ɠidaaleʋe ga sèɠeʋɛ pɔ bɛ, gè ʋa. 
Sèɠeʋɛ Kɛ̀ɛ ʋɔ bɛ, gè ʋa eteai zu, nà ma, nà ga zeɠe eteai zu, gè li Kɛ̀ɛ ʋɔ bɛ.» 
Ná-kaladopoiti ti ɠɛni ma: «Tɔun è tɔɔzeiɗa ga è ɗa ɓɔɛ kpezekele-o, è la mɔ faalaali wosu. 
Gi kwɛni niina ga è fai pɛ kwɛɛ, naa ʋoluma è ɓɛdɛ la ba ga nu nɔpɛ ge è ɠaazaɠa, naa ɠa é kɛɛzu gi laai da ga è zeɠeʋɛ GALA pɔ bɛ, è ʋa.» 
Yesu ti wooɠaaʋoteni, é ɠɛ ma: «Wo laa da niina kɛlɛ? 
Tama yeeɠɛɠalai ɠa ʋaazu, tɔun vɔlɔ é ɓega ga zeeli, siɛgi zu wo zuvazasu da, ɛsɛ ge ɗa li ga ɓoto ʋele, màaɠelesa ge leʋe nà ɠila. Kɛlɛ nà ɠila ge la ɠɛɛzu de, tɔɔzei Kɛ̀ɛ ɠa bà. 
Kɛni nà la naa wo wo ma, nii a kɛ ziilɛigi ɠɛ wo ya ada-ɠilibalai zu. Wa ʋaazu kpɔlɔ mɔinmɔin sɔlɔɔsu eteai zu, kɛlɛ à zɛbɛzeɠe, tɔɔzei gè zobo sɔlɔɔga eteai ma.» 
